Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

ཟུང་བའི་ཕྱིར་ཡང་རྒྱུ་ཞིང་ཐམས་ཅད་མཁྱེན་པ་ཉིད་
ཀྱི་སེམས་དེ་ཡང་སེམས་ཅན་གཞན་རྣམས་དང་། གང་ཟག་གཞན་དག་ལ་རྗོད་པར་བྱེད་ལ་སེམས་དེ་ཡང་ཡང་དག་པའི་མཐའ་ངོ་བོ་ཉིད་དུ་རྟོགས་པར་གྱུར་ཏེ། དྲིས་ན་སེམས་ཀྱི་ངོ་བོ་ཉིད་ཀྱིས་སེམས་ཅན་ཐམས་ཅད་ཀྱི་ངོ་བོ་ཉིད་རྟོགས་ཤིང་སེམས་ཅན་ཐམས་ཅད་ཀྱི་ངོ་བོ་ཉིད་ཀྱིས་

ཆོས་ཐམས་ཅད་ཀྱི་ངོ་བོ་ཉིད་རྟོགས་ལ་ཆོས་ཐམས་ཅད་ཀྱི་ངོ་བོ་ཉིད་ཀྱིས་དགེ་བའི་རྩ་བ་ཐམས་ཅད་ཀྱི་ངོ་བོ་ཉིད་རྟོགས་ཤིང་དགེ་བའི་རྩ་བ་ཐམས་ཅད་ཀྱི་ངོ་བོ་ཉིད་ཀྱིས་བྱང་ཆུབ་སེམས་དཔའི་ངོ་བོ་ཉིད་བརྡ་སྤྲོད་པར་བྱེད་པ་དེ་ནི་ལྷའི་བུ་བྱང་ཆུབ་སེམས་དཔའི་ཡང་དག་
པའི་ཤེས་པ་བརྡ་སྤྲོད་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་སྦྱིན་པ་སྦྱིན་པ་ན་གང་གཏོང་བར་བྱེད་པ་དང་། གང་གིས་གཏོང་བར་བྱེད་པ་དང་། གང་ལ་གཏོང་བར་བྱེད་པ་དང་། གང་དུ་གཏོང་བར་བྱེད་པ་དང་། གང་དུ་ཡོངས་སུ་སྔོ་བར་བྱེད་པ་དེ་དག་
ཤིན་ཏུ་གཏོང་བས་གཏོང་བར་བྱེད་ཅིང་། རྟེན་པར་མི་བྱེད། གནས་པར་མི་བྱེད། མངོན་པར་ཞེན་པར་མི་བྱེད། རེ་བར་མི་བྱེད། དམིགས་པར་མི་བྱེད་ལ། ཡང་དག་པར་རྗེས་སུ་མི་མཐོང་བས་དྲིས་ན་ཤིན་ཏུ་གཏོང་བ་ཉིད་དང་། ཤིན་ཏུ་མི་དམིགས་པ་ཉིད་དང་། ཤིན་ཏུ་སྟོང་པ་
ཉིད་གང་ཡིན་པ་དེ་དག་ཉིད་གཏོང་བའི་ངོ་བོ་ཉིད་དུ་རྟོགས་ཤིང་། གཏོང་བའི་ངོ་བོ་ཉིད་ཀྱིས་ཡང་དག་པའི་མཐའི་ངོ་བོ་ཉིད་རྟོགས་ལ། ཡང་དག་པའི་མཐའི་ངོ་བོ་ཉིད་ཀྱིས་ཆོས་ཐམས་ཅད་ཀྱི་ངོ་བོ་ཉིད་རྟོགས་ཏེ། ཆོས་ཐམས་ཅད་ཀྱི་ངོ་བོ་ཉིད་ཀྱིས་སེམས་ཅན་ཐམས་ཅད་ཀྱི་ངོ་བོ་
ཉིད་རྟོགས་ཤིང་། སེམས་ཅན་ཐམས་ཅད་ཀྱི་ངོ་བོ་ཉིད་ཀྱིས་བྱང་ཆུབ་སེམས་དཔའི་ངོ་བོ་ཉིད་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་སྦྱིན་པས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་
ལུས་ཉེ་བར་ཞི་བས་ཚུལ་ཁྲིམས་ཉེ་བར་ཞི་བར་རྟོགས་ཏེ། ངག་ཉེ་བར་ཞི་བ་དང་། སེམས་ཉེ་བར་ཞི་བས་ཚུལ་ཁྲིམས་ཉེ་བར་ཞི་བར་རྟོགས་ཤིང་། ལུས་དང་། ངག་དང་། སེམས་ཉེ་བར་ཞི་བས་བྱང་ཆུབ་ཉེ་བར་ཞི་བར་རྟོགས་ལ། བྱང་ཆུབ་ཉེ་བར་ཞི་བས་སེམས་ཅན་ཉེ་བར་ཞི་
བར་རྟོགས་ཏེ། སེམས་ཅན་ཉེ་བར་ཞི་བས་ཆོས་ཐམས་ཅད་ཉེ་བར་ཞི་བར་རྟོགས་ཤིང་། ཆོས་ཐམས་ཅད་ཉེ་བར་ཞི་བས་ཡང་དག་པའི་མཐའ་ཉེ་བར་ཞི་བ་ཞེས་བྱ་བར་རྟོགས་ལ། དེ་ཡང་དག་པའི་མཐའ་ཉེ་བར་ཞི་བས་ཞི་བ་དང་། རབ་ཏུ་ཞི་བ་དང་། ཉེ་བར་ཞི་བར་གྱུར་བས་

དྲིས་ན་ཆོས་ཐམས་ཅད་ཉེ་བར་ཞི་བ་ཉིད་དུ་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་ཚུལ་ཁྲིམས་ཀྱིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཤིན་ཏུ་ཟད་པའི་ཆོས་ཉིད་དང་། ཤིན་དུ་སྐད་ཅིག་
པའི་ཆོས་ཉིད་དང་། ཤིན་ཏུ་ཡ་མ་བརླའི་ཆོས་ཉིད་དུ་རིག་ནས་སེམས་ཅན་ཐམས་ཅད་ཀྱི་ཉེས་པར་བྱས་པ་ཡང་བཟོད་ཅིང་། གང་གི་ཚེ་ཕྱི་ནང་གི་སེམས་ཀུན་ནས་མི་སློང་བར་བཟོད་པ་དང་། གང་གིས་ཁོང་ཁྲོ་བར་འགྱུར་བའི་ཡིད་ལ་བྱེད་པའི་ཕྱི་རོལ་དུ་མི་གཏོང་ཞིང་སེམས་ཅན་
ཐམས་ཅད་ཀྱི་ཉེས་པར་སྤྱད་པ་བཟོད་པ་དང་། སེམས་ཅན་དེ་དག་གི་ངོ་བོ་ཉིད་གང་ཡིན་པ་དེ་ནི་བཟོད་པའི་ངོ་བོ་ཉིད་ཡིན་པ་དང་། བཟོད་པའི་ངོ་བོ་ཉིད་གང་ཡིན་པ་དེ་ནི་བྱང་ཆུབ་ཀྱི་ངོ་བོ་ཉིད་ཡིན་པ་དང་། བྱང་ཆུབ་ཀྱི་ངོ་བོ་ཉིད་གང་ཡིན་པ་དེ་ནི་ཆོས་ཐམས་ཅད་ཀྱི་ངོ་བོ་ཉིད་ཡིན་
པར་རྟོགས་ཤིང་། ཆོས་ཐམས་ཅད་ཀྱང་ཡང་དག་པའི་མཐའི་ངོ་བོ་ཉིད་དུ་རྟོགས་ཏེ། དྲིས་ན་ཤིན་ཏུ་ཟད་པའི་ཆོས་ཉིད་དང་། ཤིན་ཏུ་སྐད་ཅིག་པའི་ཆོས་ཉིད་དང་། ཤིན་ཏུ་ཡ་མ་བརླའི་ཆོས་ཉིད་དུ་རྟོགས་པས་རྒྱུ་བ་མེད་པ་ཉིད་ཀྱིས་བཟོད་པ་བརྡ་སྤྲོད་པར་བྱེད་དེ། ལྷའི་བུ་
དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་བཟོད་པས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཡིད་ལ་བྱེད་པ་ཐམས་ཅད་ཀྱིས་དབེན་པའི་ཆོས་རྟོགས་ཤིང་སྒྲོ་འདོགས་པ་མེད་ལ་བཏང་སྙོམས་དང་ལྡན་པའི་བརྩོན་འགྲུས་དང་
ལྡན་པས་བརྩམ་པ་གང་རྩོམ་པ་དེ་དབེན་པ་ཉིད་དུ་ཡང་དག་པར་རྗེས་སུ་མཐོང་བ་དང་། དེ་ནང་དབེན་པས་ཕྱི་རོལ་དུ་རྒྱུ་བ་མེད་པར་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་རྒྱུ་ཞིང་། བརྩོན་འགྲུས་དབེན་པས་སེམས་ཅན་དབེན་པར་རྟོགས་ལ། སེམས་ཅན་དབེན་པས་
བྱང་ཆུབ་དབེན་པར་རྟོགས་པ་དང་། བྱང་ཆུབ་དབེན་པས་ཆོས་ཐམས་ཅད་དབེན་པར་རྟོགས་པ་དང་། ཆོས་ཐམས་ཅད་དབེན་པས་ཡང་དག་པའི་མཐའ་དབེན་པར་རྟོགས་པས་དྲིས་ན་བརྩོན་འགྲུས་དེ་དག་ཉིད་ཀྱི་རང་བཞིན་དབེན་པ་ཇི་ལྟ་བ་བཞིན་དུ་དབེན་པར་བརྡ་སྤྲོད་པར་བྱེད་དེ།

ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་བརྩོན་འགྲུས་ཀྱིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་མཉམ་ཞིང་བྱེ་བྲག་མེད་པར་གྱུར་པར་བསམ་གཏན་བྱེད་དེ། བསམ་
གཏན་དེ་ལ་སེམས་གནས་པར་འཇོག་ཅིང་གནས་དེ་ལ་ཡང་རྣམ་པར་ཤེས་པ་གནས་པར་མི་བྱེད་པ་དང་། དེས་རྣམ་པར་ཤེས་པ་མི་གནས་ཤིང་སེམས་མཉམ་པ་ཉིད་ཀྱིས་བསམ་གཏན་མཉམ་པ་ཉིད་དུ་རྟོགས་པ་དང་། བསམ་གཏན་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དུ་རྟོགས་པ་
དང་། བྱང་ཆུབ་མཉམ་པ་ཉིད་ཀྱིས་སེམས་ཅན་ཐམས་ཅད་མཉམ་པ་ཉིད་དུ་རྟོགས་པ་དང་། སེམས་ཅན་ཐམས་ཅད་མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་རྗེས་སུ་རྟོགས་པས་དེ་ལྟར་ཆོས་ཐམས་ཅད་མཉམ་པ་ཞེས་བྱ་བར་རིག་ལ་དྲིས་ན་རང་བཞིན་ཇི་ལྟ་བ་བཞིན་དུ་
མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་བརྡ་སྤྲོད་པར་བྱེད་དོ། །ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་བསམ་གཏན་གྱིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཤེས་རབ་ཀྱི་མིག་གིས་རྣམ་པར་
སྦྱངས་པའི་ཡེ་ཤེས་ཀྱིས་ཆོས་ཐམས་ཅད་མཐོང་སྟེ། ཇི་ལྟར་ཆོས་གང་ཡང་ཡང་དག་པར་རྗེས་སུ་མི་མཐོང་བ་དེ་ལྟར་མཐོང་ཞིང་གང་གི་ཚེ་ཆོས་གང་ཡང་ཡང་དག་པར་རྗེས་སུ་མི་མཐོང་བ་དེའི་ཚེ་ཅི་ཡང་མ་ཡིན་པར་འགྱུར་རོ། །དེ་ཅི་ཡང་མ་ཡིན་པའི་ཤེས་པ་ཐོབ་པས་མི་
རྒྱུ། རབ་ཏུ་མི་རྒྱུ། རྣམ་པར་མི་རྒྱུའོ། །དེས་རྒྱུ་བ་དང་། རབ་ཏུ་རྒྱུ་བ་དང་། རྣམ་པར་རྒྱུ་བ་ཐམས་ཅད་ཡང་དག་པར་རྒྱུན་བཅད་པས་མི་འཁོར་རོ། །རྣམ་པར་མི་འཁོར་རོ། །དེ་ཅིའི་ཕྱིར་ཞེ་ན། དེས་གང་གིས་འཁོར་བར་འགྱུར་བའི་རབ་ཏུ་རྒྱུ་བ་དེ་འདི་ལྟ་སྟེ། འདོད་པ་དང་།
ཆགས་པ་དང་། སྨོན་པའི་རྒྱུན་བཅད་པའི་ཕྱིར་ཏེ། དེ་འདོད་པའི་དོན་དུ་གཉེར་བ་ཐམས་ཅད་མེད་པར་སེམས་ཅན་ཡོངས་སུ་སྨིན་པར་བྱ་བ་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྡུ་བ་དང་། དམ་པའི་ཆོས་ཡོངས་སུ་གཟུང་བ་དང་། དཀོན་མཆོག་གསུམ་

གྱི་གདུང་རྒྱུད་མི་གཅད་པའི་ཕྱིར་བསམས་བཞིན་དུ་སྐྱེ་བ་རྣམས་སུ་རྒྱུ་བར་བྱེད་དེ། དེ་ནི་རྒྱུ་བ་མེད་པ་ཉིད་ཀྱིས་རྒྱུ་བར་བྱེད་ཅིང་ཆོས་རྣམས་ཀྱི་རང་བཞིན་རྣམ་པར་དག་པའི་མཚན་ཉིད་ཀྱང་རྣམ་པར་འཁྲུག་པར་མི་བྱེད་དེ། དེ་ནི་དེའི་ཤེས་རབ་ཡིན་པས་དེ་ཤེས་རབ་ཀྱི་རང་བཞིན་གྱིས་
བྱང་ཆུབ་རབ་ཏུ་ཤེས་པ་དང་། བྱང་ཆུབ་ཀྱི་རང་བཞིན་གྱིས་སེམས་ཅན་གྱི་རང་བཞིན་དང་། སེམས་ཅན་གྱི་རང་བཞིན་གྱིས་ཆོས་ཐམས་ཅད་ཀྱི་རང་བཞིན་རྟོགས་ཤིང་། ཆོས་ཐམས་ཅད་ཀྱང་ཡང་དག་པའི་མཐའི་རང་བཞིན་དུ་རབ་ཏུ་ཤེས་ཏེ། དྲིས་ན་ཆོས་ཀྱི་དབྱིངས་ཀྱི་རང་བཞིན་
དབྱེར་མེད་པ་དེ་ཉིད་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་ཤེས་རབ་ཀྱི་མིག་གིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའི་ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་གཞག་པས་
གནས་པ་ན་དེས་སྔོན་གྱི་མཐའི་ལུས་ནི་མ་སྐྱེས་པར་རབ་ཏུ་ཤེས་སོ། །ཕྱི་མའི་མཐའི་ལུས་ནི་འཕོ་བ་མེད་པར་རབ་ཏུ་ཤེས་སོ། །ད་ལྟར་བྱུང་བའི་ལུས་ལ་ནི་རྩྭ་དང་། ཤིང་དང་། རྩིག་པ་དང་། བོང་བ་དང་། མིག་ཡོར་གྱི་ངོ་བོ་ཉིད་ལྟ་བུར་སོ་སོར་རྟོག་པར་བྱེད་དེ། དེ་དེ་
ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་པས་ལུས་ཀྱི་རང་བཞིན་སྐྱེ་བ་མེད་པར་རིག་ནས་ལུས་ཀྱི་རྣམ་པར་རིག་པ་དང་ལྡན་པའི་ཡིད་ལ་བྱེད་པ་ཀུན་ནས་སློང་བར་མི་བྱེད་དོ། །ཡིད་ལ་བྱེད་པ་ཀུན་ནས་སློང་བར་མི་བྱེད་པ་གང་ཡིན་པ་དེ་ནི་ལྷག་པར་བྱེད་པ་ལ་མི་གནས་པ་ཡིན་ཏེ།
དེ་ལྷག་པར་བྱེད་པ་དང་བྲལ་ཞིང་རྣམ་པར་ཤེས་པ་མི་གནས་པས་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་ཡང་ཆོས་གང་ལ་ཡང་སྒོམ་པར་མི་བྱེད། རྣམ་པར་འཇིག་པར་མི་བྱེད་དོ། །དེས་ཆོས་ཐམས་ཅད་དངོས་པོ་མེད་པར་རིག་ནས་ལུས་ལ་ལུས་ཀྱི་རྗེས་སུ་ལྟ་
ཞིང་གནས་པ་ན། སེམས་གང་གིས་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་པའི་སེམས་དེ་ཡང་སྒྱུ་མའི་ཆོས་ཉིད་དང་། བྲག་ཅའི་ཆོས་ཉིད་ལྟ་བུར་རབ་ཏུ་ཤེས་སོ། །དེ་ལྟར་རབ་ཏུ་ཤེས་པས་བདེ་བའི་ཚོར་བ་ལ་ཡང་རྗེས་སུ་ཆགས་པ་མེད་ལ་སྡུག་བསྔལ་གྱི་ཚོར་བ་ལ་ཡང་ཁོང་ཁྲོ་བ་མེད་

ཅིང་། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལ་ཡང་རྨོངས་པ་མེད་པས་མ་རིག་པ་བག་ལ་ཉལ་བར་མི་འགྱུར་ཏེ། གང་གི་ཚེ་ཚོར་བ་རྣམས་ཀྱིས་མི་འཕྲོགས་པ་དེ་ནི་དེའི་ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་
ཡིན་ནོ། །དེ་དེ་ལྟར་ཚོར་བའི་རྗེས་སུ་ལྟ་ཞིང་གནས་པ་ན་ཆོས་ཐམས་ཅད་ལ་ཚོར་བའི་རྒྱུ་བ་དག་གི་སེམས་མི་རྒྱུ་བས་དེ་ཆོས་ཐམས་ཅད་ལ་སེམས་མི་གནས་པའི་ཕྱིར་བྱང་ཆུབ་ཀྱི་སེམས་སྤོང་བར་མི་བྱེད། འདོར་བར་མི་བྱེད། ཡོངས་སུ་གཏོང་བར་མི་བྱེད་དེ། དེ་ནི་དེའི་སེམས་ལ་
སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཡིན་ནོ། །དེ་ཆོས་ཤེས་པ་མངོན་སུམ་དུ་གྱུར་པས་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་གནས་པ་ན་དྲན་པ་མེད་ཅིང་ཡིད་ལ་བྱེད་པ་མེད་པས་ཆོས་ཉིད་ལ་འཇུག་པར་བྱེད་ཅིང་། ལུས་དང་། ཚོར་བ་དང་། སེམས་དང་། ཆོས་རྣམས་
ལ་འདུ་ཤེས་དང་། ཡིད་ལ་བྱེད་པ་དང་། ལྟ་བ་དང་། ཀུན་ནས་དཀྲིས་པ་དག་གིས་གནས་པར་མི་བྱེད་དེ། དེ་ནི་དེའི་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཡིན་ནོ། །དེས་ཆོས་ཐམས་ཅད་རང་བཞིན་གྱིས་མ་བྱུང་ཞིང་དངོས་པོ་མེད་པ་དང་། ནམ་མཁའི་ངོ་བོ་
ཉིད་ལྟ་བུར་རྟོགས་པས་དྲིས་ན་དྲན་པ་མེད་པ་དང་། མངོན་པར་འདུ་བྱ་བ་མེད་པས་དྲན་པ་ཉེ་བར་གཞག་པ་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་དྲན་པ་ཉེ་བར་གཞག་པས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་བྱང་ཆུབ་
སེམས་དཔའི་ཡང་དག་པའི་ཤེས་པ་ནི་གང་ཐམས་ཅད་མཁྱེན་པ་ཉིད་ཀྱི་སེམས་དེ་ལ་ཀུན་ཤེས་པར་བྱེད། །རྣམ་པར་རིག་པར་བྱེད། གནས་པར་བྱེད། མི་སྤོང་བར་བྱེད། རྣམ་པར་མི་གཡེང་བར་བྱེད། མི་རྗེད་པར་བྱེད་པ་དང་། དང་པོར་དགེ་བའི་རྩ་བ་རྣམས་ཀྱི་ཐོག་མར་འགྲོ་བ་དང་།
སེར་སྣའི་སེམས་ལ་མི་འཇུག་པ་དང་། བདོག་པ་ཐམས་ཅད་ཡོངས་སུ་གཏོང་བའི་རྗེས་སུ་འཇུག་པ་དང་འཆལ་པའི་ཚུལ་ཁྲིམས་ཀྱི་སེམས་སྤོང་བ་དང་། ཚུལ་ཁྲིམས་ཀྱི་ཕུང་པོ་ལ་གནས་པ་མེད་པ་དང་། སེམས་ཅན་ཐམས་ཅད་ལ་གནོད་སེམས་མེད་ཅིང་རྩོད་པ་མེད་པ་དང་། ལུས་

དང་། ངག་དང་། སེམས་ཀྱིས་རྨ་མི་འབྱིན་པ་དང་། ཉན་ཐོས་དང་། རང་སངས་རྒྱས་ཀྱི་བརྩོན་འགྲུས་མི་རྩོམ་པ་དང་། ཐེག་པ་ཆེན་པོའི་བརྩོན་འགྲུས་རྩོམ་པ་དང་། མི་དགེ་བའི་ཆོས་རྣམས་ཡིད་ལ་མི་བྱེད་ཅིང་མི་དྲན་པ་དང་། བསམ་གཏན་དང་། སྙོམས་པར་འཇུག་
པ་ཐམས་ཅད་ལ་མི་གནས་པར་སྒོམ་པ་དང་། ལྟ་བའི་རྣམ་པ་ཐམས་ཅད་ལ་མི་རྒྱུ་བ་དང་། ཆོས་ཐམས་ཅད་འཕྲོ་བར་མི་བྱེད་པ་དང་། ཆོས་ཐམས་ཅད་ལ་རྣམ་པ་མེད་པར་འཇུག་པ་དང་། སེམས་ཅན་རྣམས་ཀྱི་བསམ་པའི་རྣམ་པ་ལ་འཇུག་པ་དང་། ཡུལ་རྣམས་ལ་མི་
རྒྱུ་བ་དང་། འཕགས་པའི་སྐྱེ་བོ་རྣམས་ཀྱི་རྗེས་སུ་འཇུག་པ་དང་། འཕགས་པ་མ་ཡིན་པའི་སྐྱེ་བོ་རྣམས་དང་མ་འདྲེས་པ་དང་། ལུས་དང་། ངག་དང་། ཡིད་ཀྱི་ལས་མ་སྨད་པ་དང་། བག་ཡོད་པ་ལྷུར་ལེན་ཅིང་སངས་རྒྱས་ཀྱི་ཆོས་ཡོངས་སུ་ཚོལ་བ་དང་། བསྟང་མི་དགོས་
པར་དགོས་པ་ཐམས་ཅད་ཉམས་འོག་ཏུ་ཆུད་པར་བྱེད་པ་དང་། འདོད་ཆགས་དང་། ཞེ་སྡང་དང་། གཏི་མུག་སྤངས་པས་རྣམ་པར་དག་པ་དང་། ཚུལ་ཁྲིམས་ལ་སྐྱོན་མེད་པའི་ཕྱིར། ཡོངས་སུ་གདུང་བ་མེད་པ་དང་། ལོག་པར་ཞུགས་པ་རྣམས་དང་མ་འབྲེལ་པ་དང་། ནང་ཤིན་ཏུ་
དག་པས་ཚུལ་འཆོས་པ་མེད་པ་དང་། ངག་གི་ལས་ཡོངས་སུ་དག་པས་ཁ་གསག་མེད་པ་དང་། རང་གི་རྙེད་པས་ཆོག་ཤེས་པས་ཚོལ་བ་མེད་པ་དང་། འཚོ་བ་ངན་པ་རྣམ་པར་སྤངས་པས་ཐོབ་ཀྱིས་འཇལ་བ་མེད་པ་དང་། ངན་ངོན་ཙམ་གྱིས་ཆོག་ཤེས་པས་རྣམ་པར་གཡོ་
བ་མེད་པ་དང་། ཁམས་གསུམ་ལ་འདུན་པ་དང་བྲལ་བས་འདོད་པ་ཆུང་བ་དང་། སྡིག་པ་འདོད་པ་དང་བྲལ་བས་ཆོག་ཤེས་པ་དང་། ཆོས་ཐམས་ཅད་དབེན་པར་མོས་པས་དབེན་པ་དང་། འཇིག་རྟེན་པའི་སྤྱོད་པ་སྤངས་པས་དོན་ཉུང་བ་དང་། སྤྲོས་པ་ཐམས་ཅད་ཡང་དག་པར་བཅད་
པས་སྤྲོས་པ་མེད་པ་དང་། འདུན་པ་དང་། ཞེ་སྡང་དང་། འཇིགས་པ་དང་། གཏི་མུག་དང་བྲལ་བས་འགྲོ་བ་མེད་པ་དང་། ང་རྒྱལ་ངེས་པར་བཅོམ་པས་ཆོས་ལ་དགའ་བ་དང་། སེམས་ཤིན་ཏུ་དུལ་བས་ཅང་ཤེས་པ་དང་། ཚུལ་ཁྲིམས་ཀྱི་ཕུང་པོས་ཀུན་ཏུ་སྲུང་བ་དང་། ཏིང་

ངེ་འཛིན་གྱི་ཕུང་པོས་སེམས་གནས་པ་མེད་པ་དང་། ཤེས་རབ་ཀྱི་ཕུང་པོས་སེམས་རྣམ་པར་གྲོལ་བ་དང་། འཕགས་པའི་རིགས་མི་འདོར་བ་དང་། བྱང་ཆུབ་ཀྱི་སེམས་ལ་དམ་བཅས་པ་མ་ཉམས་པ་དང་། རྙེད་པ་དང་། བཀུར་སྟི་ཐམས་ཅད་དོན་དུ་མི་གཉེར་
བ་དང་། སེམས་ཅན་ཕ་རོལ་དག་གི་ངོར་བྱེད་པ་མེད་པ་དང་། གཞན་ཀུན་དུ་བསྲུང་བའི་ཕྱིར་བདག་རྗེས་སུ་སྲུང་བ་དང་། རང་གི་སེམས་ལ་ངེས་པར་སེམས་པས་གཞན་གྱི་འཁྲུལ་པ་རྣམས་མི་ཚོལ་བ་དང་། ཚུལ་ཁྲིམས་ལེགས་པར་བསྡམས་པས་འཇིགས་པ་ཐམས་ཅད་དང་
བྲལ་བ་དང་སློབ་དཔོན་གྱི་དཔེ་མཁྱུད་མེད་པས་ཆོས་ཀྱི་བགོ་བཤའ་བྱེད་པ་དང་། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རྣམས་རྗེས་སུ་སྲུང་བ་དང་། དང་པོར་དགེ་བའི་ཆོས་ཐམས་ཅད་ལ་ཐོག་མར་འགྲོ་བ་དང་། ཆོས་ཐམས་ཅད་རོ་གཅིག་པས་སྤྱོད་པ་ཐ་དད་པ་མེད་པ་དང་།
རློམ་སེམས་ཐམས་ཅད་ཡང་དག་པར་བཅོམ་པས་རློམ་སེམས་མེད་པ་དང་། སྐྱེ་བ་མེད་པར་སོ་སོར་རྟོག་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམས་བཞིན་དུ་སྐྱེ་བ་ཡང་ཡོངས་སུ་འཛིན་པ་དང་། ཆོས་ཐམས་ཅད་ལ་གཟོད་མ་ནས་སྟོང་པ་ཉིད་དུ་ཡང་སོ་སོར་རྟོག་ལ་ལྟ་བ་
ཐམས་ཅད་གདུལ་བའི་ཕྱིར་སེམས་ཅན་ཡོངས་སུ་སྨིན་པར་ཡང་བྱེད་པ་དང་། མཚན་མ་མེད་པ་ཡོངས་སུ་འདྲིས་པར་ཡང་བྱེད་ལ་མཚན་མ་ལ་སྤྱོད་པའི་སེམས་ཅན་རྣམས་ལ་ཡང་ལྟ་བ་དང་། སྨོན་པའི་ཤེས་པ་ཡང་མེད་ལ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་ཕྱིར་སྨོན་ལམ་ཐམས་
ཅད་ཀྱང་ཡོངས་སུ་རྫོགས་པར་བྱེད་པ་དང་། མངོན་པར་འདུ་བྱེད་པ་མེད་པར་ཡང་སོ་སོར་རྟོག་ལ་དགེ་བའི་རྩ་བ་མངོན་པར་འདུ་བྱ་བས་ཀྱང་ངོམས་མི་མྱོང་བ་དང་། དངོས་པོ་ནི་དངོས་པོ་མེད་པར་སྣང་བས་དངོས་པོ་དང་དངོས་པོ་མེད་པ་ལ་རྟོག་པ་དང་། ལྷག་པར་བྱེད་པ་དང་དབྲལ་བའི་
ཕྱིར་ཡིད་ལ་བྱེད་པ་མེད་པ་དང་། སེམས་ཅན་བདག་མེད་པ་ལ་སྦྱོར་བས་བདག་ལ་བདག་མེད་པ་དང་། ཉོན་མོངས་པ་ཡོངས་སུ་བཏང་བ་དང་། སེམས་ཅན་ཡོངས་སུ་མ་བཏང་བས་བཏང་བ་དང་མ་བཏང་བ་དང་། ཐབས་དང་ཤེས་རབ་བསྒོམས་པས་མ་ཞི་ཞིང་ཞི་ལ་ཉེ་བར་ཞི་བ་དང་།

ཉན་ཐོས་དང་། རང་སངས་རྒྱས་ཐམས་ཅད་དང་མ་འདྲེས་པས་འགྲོ་བ་མ་ཡིན་པར་འགྲོ་བ་དང་། བདུད་ཀྱི་ལམ་ལས་ཡང་དག་པར་འདས་པས་ལམ་མ་ཡིན་པའི་ལམ་དང་། བྱིས་པ་སོ་སོའི་སྐྱེ་བོ་ཐམས་ཅད་དང་མ་འདྲེས་པས་སྤྱོད་པ་མ་ཡིན་པ་སྤྱོད་པ་དང་། ཆོས་ཐམས་ཅད་
ལ་རྟོག་པས་འདེག་པ་མེད་ཅིང་གཞག་པ་མེད་པ་མཉམ་པ་ཉིད་དང་། གཞན་ལ་ལྷག་པར་རློམ་སེམས་སུ་མི་བྱེད་པས་བདག་མི་སྒྲོགས་པ་དང་། སངས་རྒྱས་ཀྱི་ཆོས་རྣམས་ཡོངས་སུ་རྫོགས་པས་ཤེས་པ་མི་མཉམ་པ་དང་མཉམ་པ་དང་། ཆོས་ཐམས་ཅད་མ་སྐྱེས་པ་དང་མ་འགགས་
པར་བཟོད་པས་མི་སྐྱེ་བའི་ཆོས་ལ་བཟོད་པ་སྟེ། ལྷའི་བུ་དེ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ལྷའི་བུ་མི་སྐྱེ་བ་དང་མི་འབྱུང་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སྐྱེ་བའི་འཁོར་བ་ཡོངས་སུ་འཛིན་པ་ནི་བྱང་ཆུབ་སེམས་དཔའི་ཤེས་པ་ཡིན་ཏེ། སངས་རྒྱས་ཀྱི་
ཆོས་ཡོངས་སུ་རྫོགས་པར་འགྱུར་རོ། །སྐྱོ་ཞིང་འདོད་ཆགས་དང་བྲལ་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སངས་རྒྱས་ཀྱི་ཆོས་ཐམས་ཅད་ཡང་དག་པར་རིག་པར་བྱ་བ་ལ་དགའ་ཞིང་མཆོག་ཏུ་དགའ་བ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །མཚམས་སྦྱོར་བ་མེད་
པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སྐྱེ་བར་མཚམས་སྦྱོར་བའི་ཤེས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཡོངས་སུ་གཅོད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། དགེ་བའི་རྩ་བ་རྒྱུན་ཆགས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །
དགེ་བའི་རྩ་བ་དང་ཞེ་འགྲས་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། དགེ་བའི་རྩ་བས་ངོམས་མི་མྱོང་བ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཁམས་གསུམ་དུ་མཚམས་སྦྱོར་བར་མི་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སེམས་ཅན་རྣམས་ཡོངས་སུ་
སྨིན་པར་བྱ་བའི་ཕྱིར་བསམས་བཞིན་དུ་སྐྱེ་བ་ཡོངས་སུ་འཛིན་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །རང་གི་ཉོན་མོངས་པ་སྤོང་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་བརྩོན་པ་ནི་བྱང་ཆུབ་སེམས་དཔའི་ཤེས་

པ་ཡིན་ནོ། །བདག་གི་ཕྱིར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། །སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བའི་ཕྱིར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཡལ་བར་འདོར་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི།
སེམས་ཅན་ཡོངས་སུ་སྨིན་པར་བྱ་བར་སྦྱོར་བ་ནི། བྱང་ཆུབ་སེམས་དཔའི་ཤེས་པ་ཡིན་ནོ། །འདོད་ཆགས་དང་། ཞེ་སྡང་དང་། གཏི་མུག་དང་། ཉོན་མོངས་པ་ཟད་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། འདོད་ཆགས་དང་། ཞེ་སྡང་དང་། གཏི་མུག་དང་།
ཉོན་མོངས་པ་ཡོངས་སུ་ཤེས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །འགོག་པའི་ཆོས་མངོན་སུམ་དུ་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། འགོག་པ་ཡོངས་སུ་འདྲིས་པར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཟག་པ་ཟད་པར་བྱེད་པ་ནི་
བྱང་ཆུབ་སེམས་དཔའི་ཤེས་པ་མ་ཡིན་གྱི། དགེ་བའི་རྩ་བས་ཟག་པ་དབྲི་བར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །རྣམ་པར་ཐར་པ་གསུམ་མངོན་སུམ་དུ་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། རྣམ་པར་ཐར་པ་གསུམ་ལ་ཡོངས་སུ་འདྲིས་པར་
བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཕུང་པོ་ལྔའི་ཁུར་འདོར་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སེམས་ཅན་ཐམས་ཅད་ཀྱི་ཁུར་འདོར་བར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །དབང་པོ་དྲུག་འགོག་པར་བྱེད་པ་ནི་བྱང་ཆུབ་སེམས་
དཔའི་ཤེས་པ་མ་ཡིན་གྱི། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །སྐྱེ་བ་ཟད་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སྐྱེ་བའི་མཚམས་སྦྱོར་བར་བྱེད་པ་ནི་བྱང་ཆུབ་སེམས་
དཔའི་ཤེས་པ་ཡིན་ནོ། །ཉན་ཐོས་དང་། རང་སངས་རྒྱས་ཀྱི་རྣམ་པར་གྲོལ་བའི་འབྲས་བུ་ཐོབ་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། བྱང་ཆུབ་ཀྱི་སྙིང་པོར་རྣམ་པར་གྲོལ་བའི་འབྲས་བུས་སེམས་ཅན་ཐམས་ཅད་ཉེ་བར་འཚོ་བར་བྱེད་པ་ནི་བྱང་ཆུབ་སེམས་

དཔའི་ཤེས་པ་ཡིན་ནོ། །ཡང་དག་པའི་ཤེས་པ་བརྡ་སྤྲོད་པའི་ལེའུ་བསྟན་པ་འདི་བཤད་པ་ན་འཁོར་དེ་ལས་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་
ཏེ། འཇམ་དཔལ་ལེགས་སོ་ལེགས་སོ། །ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཤེས་པ་བརྡ་སྤྲོད་པ་དེ་ལེགས་པར་སྨྲས་སོ། །འཇམ་དཔལ་བྱང་ཆུབ་སེམས་དཔའ་གང་དག་ཤེས་པ་བརྡ་སྤྲོད་པ་བསྟན་པ་འདི་ཐོས་ན་མོས་པར་འགྱུར་ཞིང་མི་སྐྲག །མི་དངང་ལ་དངང་བར་མི་འགྱུར་
བ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་རྣམས་ཀྱིས་ཡང་དག་པའི་ཤེས་པ་བརྡ་སྤྲོད་པར་འགྱུར་རོ།། །།བམ་པོ་གཉིས་པ་སྟེ་ཐ་མའོ། དེ་ནས་ལྷའི་བུ་རིན་ཆེན་མཆོག་གིས་འཇམ་དཔལ་
གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཅི་ཁྱོད་ཤེས་པ་བརྡ་སྤྲོད་པར་བྱེད་དམ། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་ཁོ་བོས་ཆོས་འགའ་ཞིག་ཐོབ་བམ་སྤངས་པར་གྱུར་ན་ནི་ཁོ་བོས་ཤེས་པ་བརྡ་སྤྲོད་པར་ཡང་འགྱུར་བ་ཞིག་ན། ལྷའི་བུ་ཁོ་བོས་ནི་ཆོས་འགའ་ཡང་
ཐོབ་པ་མེད་ཅིང་སྤངས་པ་མེད་པས་ན་ཁོ་བོས་ཅི་ཞིག་ཤེས་པ་བརྡ་སྤྲོད་པར་བྱ། །ལྷའི་བུས་སྨྲས་པ། འཇམ་དཔལ་ཁྱོད་ཀྱིས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་པོ་དེ་དག་ལས་ཐོབ་པ་དང་། མངོན་པར་རྟོགས་པ་མེད་དམ། འཇམ་དཔལ་གྱིས་སྨྲས་པ།
ལྷའི་བུ་སངས་རྒྱས་བཅོམ་ལྡན་འདས་རྣམས་ནི་འཐོབ་པ་འམ་མངོན་པར་རྟོགས་པའི་ཕྱིར་ཆོས་སྟོན་པར་མི་མཛད་དོ། །སྨྲས་པ། འཇམ་དཔལ་འོ་ན། སངས་རྒྱས་བཅོམ་ལྡན་འདས་རྣམས་ཇི་ལྟར་ཆོས་སྟོན་པར་མཛད། འཇམ་དཔལ་གྱིས་སྨྲས་པ། ལྷའི་བུ་སངས་རྒྱས་བཅོམ་
ལྡན་འདས་རྣམས་ནི་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་ཉིད་ཀྱིས་ཆོས་སྟོན་པར་མཛད་ཀྱིས། སྐྱེ་བ་མེད་པ་དང་། འགག་པ་མེད་པ་དང་། གདེག་པ་མེད་པ་དང་། གཞག་པ་མེད་པ་དང་། འོང་བ་མེད་པ་དང་། འགྲོ་བ་མེད་པ་དང་། སེམས་ཅན་མེད་པ་དང་། སེམས་

ཅན་དང་བྲལ་བ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། འཁོར་བ་དང་། ཡོངས་སུ་མྱ་ངན་ལས་འདའ་བའི་ཕྱིར་ཆོས་སྟོན་པར་མི་མཛད་དེ། ལྷའི་བུ་སངས་རྒྱས་བཅོམ་ལྡན་འདས་རྣམས་ནི་དེ་ལྟར་ཆོས་སྟོན་པར་མཛད་དོ། །ལྷའི་བུས་སྨྲས་
པ། འཇམ་དཔལ་གལ་ཏེ་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདའ་བའི་ཕྱིར་ཆོས་སྟོན་པར་མི་མཛད་ན། འོ་ན་གང་གི་དོན་དུ་སངས་རྒྱས་འབྱུང་བར་འགྱུར། འཇམ་དཔལ་གྱིས་སྨྲས་པ། །ལྷའི་བུ་སངས་རྒྱས་ནི་འཇིག་ཚོགས་ལ་ལྟ་བའི་རང་བཞིན་གྱི་ངོ་བོ་
ཉིད་རྟོགས་པར་བྱ་བའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་མ་རིག་པ་དང་། སྲིད་པའི་སྲེད་པའི་རང་བཞིན་གྱི་ངོ་བོ་ཉིད་ཡང་དག་པར་བསྟན་པའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་འདོད་ཆགས་དང་། ཞེ་སྡང་དང་། གཏི་མུག་གི་རང་བཞིན་གྱི་ངོ་བོ་ཉིད་རྟོགས་པར་བྱ་བའི་
དོན་དུ་འབྱུང་ངོ་། །ལྷའི་བུ་སངས་རྒྱས་ནི་ཕྱིན་ཅི་ལོག་གི་རང་བཞིན་མཉམ་པ་ཉིད་དུ་བསྟན་པའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་ལྟ་བའི་རྣམ་པ་ཐམས་ཅད་རྟོགས་པར་བྱ་བའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་ཕུང་པོ་དང་། ཁམས་དང་། སྐྱེ་མཆེད་དང་། ཆོས་ཀྱི་
དབྱིངས་ཀྱི་རང་བཞིན་གྱི་ངོ་བོ་ཉིད་ཡང་དག་པར་བསྟན་པའི་དོན་དུ་འབྱུང་ངོ་། །ལྷའི་བུ་སངས་རྒྱས་འབྱུང་བ་ཞེས་བྱ་བ་དེ་ནི་ཆོས་ཐམས་ཅད་སྐྱེ་བ་མེད་པའི་ཚིག་བླ་དགས་ཡིན་ཏེ། གང་ལ་ཆོས་གང་ཡང་སྐྱེ་བ་མེད་པ་དེ་ལ་ནི་འཁོར་བ་ཡང་མེད་ལ་ཡོངས་སུ་མྱ་ངན་ལས་འདའ་བ་ཡང་མེད་
དོ། །ལྷའི་བུས་སྨྲས་པ། འཇམ་དཔལ་དེ་ལྟ་ན་སེམས་ཅན་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་གོ་ཆ་བགོས་པ་དེ་དག་གི་གོ་ཆ་ནི་བགོས་པ་མེད་པ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་འབྱུང་བ་ནི་ཕན་པ་མེད་པའི་ཕྱིར་རོ། །འཇམ་དཔལ་
གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། ཕན་པ་གང་གིས་རབ་ཏུ་ཕྱེ་བ་ཡིན་སྙམ་འམ། སྨྲས་པ། འཇམ་དཔལ་ཕན་པ་ནི་མངོན་པར་འདུ་བྱེད་པས་རབ་ཏུ་ཕྱེ་བ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་ཁྱོད་དེ་བཞིན་གཤེགས་པ་ལ་མངོན་པར་འདུ་མཛད་པ་ཡོད་

པར་འདོད་དམ། སྨྲས་པ། འཇམ་དཔལ་དེ་ནི་མ་ཡིན་ཏེ། དེ་བཞིན་གཤེགས་པ་ནི་མངོན་པར་འདུ་མཛད་པ་མི་མངའ་བ་ཡིན་པས་དེ་ནི་འདུས་མ་བྱས་པ་བརྙེས་པ་དང་། འདུས་མ་བྱས་ཤིང་མངོན་པར་འདུ་མཛད་པ་ནི་མི་མངའ་བ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་
ཁྱོད་ཀྱིས་དམ་བཅས་པ་དེ་ཉིད་ཀྱིས་ན། མངོན་པར་འདུས་མ་བྱས་པ་ལ་ནི་ཕན་པ་དང་། གནོད་པ་དམིགས་སུ་མེད་དོ། །ལྷའི་བུས་སྨྲས་པ། འཇམ་དཔལ་ཆོས་བསྟན་པ་འདི་ནི་ལས་དང་པོ་པ་རྣམས་ཀྱི་མདུན་དུ་བཤད་པར་མི་བྱའོ། །དེ་ཅིའི་ཕྱིར་ཞེ་ན། ཐོས་ནས་སྐྲག་པར་འགྱུར་
བ་དང་། སྐྲག་ནས་ཀྱང་ཕྱིར་ལྡོག་པར་འགྱུར་དུ་འོང་བའི་ཕྱིར་རོ། །འཇམ་དཔལ་གྱིས་སྨྲས་པ། ལྷའི་བུ་ལས་དང་པོ་པའི་བྱང་ཆུབ་སེམས་དཔའ་སྐྲག་པ་དང་། ཕྱིར་ལྡོག་པ་གང་ཡིན་པ་དེ་ནི་ཕྱིར་མི་ལྡོག་པ་ཉིད་ལ་ཡང་དག་པར་གནས་པ་ཡིན་ནོ། །ལྷའི་བུས་སྨྲས་པ། འཇམ་
དཔལ་ཁྱོད་ཅི་ལས་བསམས་ཏེ། དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ་ལས་དང་པོ་པའི་བྱང་ཆུབ་སེམས་དཔའ་གང་ཉན་ཐོས་དང་། རང་སངས་རྒྱས་ཀྱི་སས་སྐྲག་ཅིང་སེར་སྣ་དང་། འཆལ་པའི་ཚུལ་ཁྲིམས་དང་། གནོད་སེམས་དང་། ལེ་ལོ་དང་། རྣམ་
པར་གཡེང་བ་དང་། འཆལ་པའི་ཤེས་རབ་དག་ལས་ཕྱིར་ལྡོག་པ་དེ་ནི་ཕྱིར་མི་ལྡོག་པ་ཉིད་ལ་ཡང་དག་པར་གནས་པ་ཡིན་ནོ། །སྨྲས་པ། འཇམ་དཔལ་ཇི་ལྟར་གནས་ན་ཡང་དག་པར་གནས་པ་ཡིན། སྨྲས་པ། ལྷའི་བུ་མཉམ་པར་གནས་ཤིང་མི་མཉམ་པར་གནས་པ་མ་ཡིན་
ན་དེའི་ཕྱིར་ཡང་དག་པར་གནས་པ་ཞེས་བྱའོ། །སྨྲས་པ། འཇམ་དཔལ་ལས་དང་པོ་པའི་བྱང་ཆུབ་སེམས་དཔའ་ཇི་ལྟར་གནས་པ་ཡིན། སྨྲས་པ། ལྷའི་བུ་གང་གི་ཚེ་ལས་དང་པོ་པའི་བྱང་ཆུབ་སེམས་དཔའ་ཆོས་ཀྱི་དབྱིངས་མཉམ་པ་ཉིད་ལ་མི་གནས་པའི་ཚུལ་གྱིས་མཉམ་པ་ཉིད་
དུ་གནས་པ་དེ་ལྟ་བུ་ནི་ལས་དང་པོ་པའི་བྱང་ཆུབ་སེམས་དཔའི་གནས་པ་ཡིན་ནོ། །སྨྲས་པ། འཇམ་དཔལ་ཇི་ཙམ་གྱིས་ན། བྱང་ཆུབ་སེམས་དཔའ་ལས་དང་པོ་པ་ཡིན། སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་དང་པོ་ཉིད་ནས་སྟོང་པ་ཉིད་དང་། མཚན་མ་

མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། འབྱུང་བ་མེད་པའི་ཆོས་ལ་མོས་པ་དེའི་ཕྱིར་ལས་དང་པོ་པ་ཞེས་བྱའོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཡུན་རིང་པོ་ནས་སྤྱད་པ་ཡིན། སྨྲས་པ། ལྷའི་བུ་བྱིས་པ་སོ་སོ་སྐྱེ་བོ་
ཐམས་ཅད་ནི་ཡུན་རིང་པོ་ནས་སྤྱད་པ་ཡིན་ཏེ། དེ་དག་གི་འཁོར་བའི་སྔོན་གྱི་མཐའ་མི་མངོན་པའི་ཕྱིར་རོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་སྤྱད་པ་སྲུང་བ་ཡིན། སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་འདོད་ཆགས་ལ་སྤྱོད་པ་ཡོངས་སུ་སྨིན་
པར་བྱ་བའི་ཕྱིར་འདོད་ཆགས་ཀྱི་སྤྱད་པ་ལ་སྤྱོད་ཀྱང་འདོད་ཆགས་ཀྱི་སྤྱོད་པ་དང་ལྷན་ཅིག་མི་གནས་པ་དེ་ལྟ་བུ་ནི་བྱང་ཆུབ་སེམས་དཔའ་སྤྱད་པ་སྲུང་བ་ཡིན་ནོ། །ཞེ་སྡང་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་ཞེ་སྡང་གི་སྤྱད་པ་ལ་སྤྱོད་ཀྱང་ཞེ་སྡང་གི་སྤྱོད་པ་དང་། ལྷན་ཅིག་མི་གནས་པ་དང་།
གཏི་མུག་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་གཏི་མུག་གི་སྤྱད་པ་ལ་སྤྱོད་ཀྱང་གཏི་མུག་གི་སྤྱོད་པ་དང་ལྷན་ཅིག་མི་གནས་པ་དང་། ཆ་མཉམ་པ་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་ཆ་མཉམ་པའི་སྤྱད་པ་ལ་སྤྱོད་ཀྱང་། ཉོན་མོངས་པ་ཐམས་ཅད་དང་ལྷན་ཅིག་མི་གནས་
པ་དེ་ལྟ་བུ་ནི་བྱང་ཆུབ་སེམས་དཔའ་སྤྱད་པ་སྲུང་བ་ཡིན་ནོ། །ལྷའི་བུ་བྱང་ཆུབ་སེམས་དཔའ་གང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་ཀྱི་རྗེས་སུ་འཇུག་ཀྱང་ཆོས་ཀྱི་དབྱིངས་ཀྱི་རང་བཞིན་གྱི་མཚན་ཉིད་ཀྱང་རྣམ་པར་འཁྲུག་པར་
མི་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་སྤྱད་པ་སྲུང་བ་ཡིན་ནོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཆོས་གང་ཡང་འཇིག་པར་མི་བྱེད། །ཆགས་
པར་ཡང་མི་བྱེད་ལ་ཆོས་ཀྱི་དབྱིངས་ནི་རང་བཞིན་གྱིས་འཇིག་པ་མེད་ཅིང་ཆགས་པ་མེད་པར་རྟོགས་པ་དེ་ལྟ་བུ་ནི་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ལྡོག་པ་དང་། འཇུག་པར་བྱེད་པ་དེའི་ཚེ་བྱང་ཆུབ་སེམས་དཔའ་

ཕྱིར་མི་ལྡོག་པ་ཡིན་ནོ། །དེ་ཅིའི་ཕྱིར་ཞེ་ན། འདོད་པའི་ཁམས་སུ་ཡང་ལྡོག་ལ་བསམ་གཏན་རྣམས་ལ་ཡང་འཇུག་པར་བྱེད་པའི་ཕྱིར་རོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་མ་རྟོགས་པ་རྟོགས་ཤིང་མི་རྩོད་པ་ལྷུར་ལེན་པ་དེའི་ཚེ་བྱང་ཆུབ་སེམས་དཔའ་ཕྱིར་མི་
ལྡོག་པ་ཡིན་ནོ། །དེ་ཅིའི་ཕྱིར་ཞེ་ན། དེས་སེམས་ཅན་གྱི་ཁམས་དང་། ཆོས་ཀྱི་ཁམས་དང་། བདག་གི་ཁམས་མ་རྟོགས་པ་དེ་མངོན་སུམ་དུ་གྱུར་པས་ཆོས་ཐམས་ཅད་ལ་ཡང་ཕྱིར་ལྡོག་པ་མེད་པའི་ཕྱིར་ཏེ། དེའི་ཕྱིར་ཕྱིར་མི་ལྡོག་པ་ཞེས་བྱ་སྟེ། དེ་ནི་སངས་རྒྱས་ཀྱི་ཆོས་རྣམས་
ལ་གཞན་གྱི་དྲིང་མི་འཇོག་ཅིང་ནེམ་ནུར་མེད་ལ་ཐེ་ཚོམ་མེད་ཅིང་སོམ་ཉི་དང་བྲལ་བའི་ཕྱིར་གཟོད་མ་ནས་དག་ཅིང་དྲི་མ་མེད་ལ་ཉོན་མོངས་པ་མེད་ཅིང་ཤེས་རབ་ཀྱི་སྣང་བ་གསལ་བར་གྱུར་པས་ཆོས་ཐམས་ཅད་ལ་དབང་སྒྱུར་ཞིང་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་གྱུར་པ་དེའི་ཕྱིར་ཕྱིར་མི་
ལྡོག་པ་ཞེས་བྱའོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་གཅིག་གིས་ཐོགས་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སྐྱེ་བ་ཐམས་ཅད་སྐྱེ་བ་མེད་པར་ཤེས་ཤིང་། སེམས་ཅན་
ཐམས་ཅད་ཀྱི་འཆི་འཕོ་དང་། སྐྱེ་བ་ཡང་རབ་ཏུ་ཤེས་ལ། སེམས་ཅན་ཡོངས་སུ་སྨིན་པར་བྱ་བའི་ཕྱིར། སྐྱེ་བ་ཐམས་ཅད་དུ་སྐྱེ་བ་སྟོན་ཅིང་ལེན་པ་མེད་པར་སྐྱེ་བ་ཡོངས་སུ་འཛིན་པར་བྱེད་པ་དང་། སྐྱེ་བ་དང་། ཚེ་རབས་ཐམས་ཅད་དུ་ལེན་པ་དང་བྲལ་བས། འཆི་བ་
དང་། སྐྱེ་བ་ལས་ཡང་དག་པར་འདས་པ་དང་། ཆོས་ཐམས་ཅད་ཀྱི་མཉམ་པ་ཉིད་ལས་ཀྱང་མི་འདའ་ཞིང་ཡང་དག་པར་མི་འདའ་བ་དང་། རྒྱུ་དང་རྐྱེན་ཚོགས་པའི་དོན་རྟོགས་པ་དང་། སེམས་ཅན་ཐམས་ཅད་དང་ལུས་མཉམ་པ་དང་། སེམས་ཅན་ཐམས་ཅད་དང་། སེམས་
མཉམ་པ་དང་། སེམས་ཅན་ཐམས་ཅད་དང་ངག་མཉམ་པ་དང་། སེམས་ཅན་ཐམས་ཅད་དང་ཡུལ་མཉམ་པ་དང་། སངས་རྒྱས་ཀྱི་ཡུལ་ལ་རབ་ཏུ་གནས་པ་དང་། ཆོས་ཀྱི་དབྱིངས་ཀྱི་ཡུལ་རྟོགས་པ་དང་། ཆོས་ཀྱི་དབྱིངས་མཉམ་པ་ཉིད་ཀྱིས་མཉམ་པ་དང་། སེམས་

ཅན་གྱི་བསམ་པའི་བྱ་བ་ཤེས་པ་དང་། དུས་ལ་ལྟ་བ་དང་། བྱང་ཆུབ་ཀྱི་སྙིང་པོའི་མཐར་ཐུག་པ་དེ་ནི་སྐྱེ་བ་གཅིག་གིས་ཐོགས་པ་ཞེས་བྱ་སྟེ། ལྷའི་བུ་དེ་ལྟར་ན་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཡིན་ནོ། །དེ་ནས་ལྷའི་བུ་རིན་ཆེན་མཆོག་གིས་
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཁ་ན་མ་ཐོ་བ་མེད་ཅིང་ཐམས་ཅད་དུ་དཔྱས་མེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཡེ་ཤེས་ཀྱིས་བྱས་པའི་ལས་རྣམས་
བྱེད་པ་དང་། ང་རྒྱལ་གྱིས་བྱས་པ་དག་མི་བྱེད་པ་དེའི་ཚེ་བྱང་ཆུབ་སེམས་དཔའ་ཁ་ན་མ་ཐོ་བ་མེད་ཅིང་ཐམས་ཅད་དུ་དཔྱས་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ཀྱི་ལྷག་པའི་བསམ་པས་བདོག་པ་ཐམས་ཅད་ཡོངས་སུ་
གཏོང་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་སེར་སྣ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་སྦྱངས་པའི་ཡོན་ཏན་དང་། བསླབ་པ་དང་། ཚུལ་ཁྲིམས་དང་། ཡི་དམ་ཐམས་ཅད་དང་ལྡན་པ་དེ་ལྟ་བུ་ནི་ཁ་ན་མ་ཐོ་བ་མེད་
པ་ཡིན་ནོ། །གང་ཡང་འཆལ་པའི་ཚུལ་ཁྲིམས་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་སེམས་ཅན་ཐམས་ཅད་ལ་ཁོང་ཁྲོ་བའི་སེམས་མེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བརྣབ་སེམས་དང་། གནོད་སེམས་
ཀྱི་བག་ལ་ཉལ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་དགེ་བའི་རྩ་བ་ཐམས་ཅད་རྩོམ་པའི་བརྩོན་འགྲུས་ལ་ཡང་དག་པར་སྣང་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ལེ་ལོ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་
ནོ། །གང་གི་ཚེ་བསམ་གཏན་དང་། སྙོམས་པར་འཇུག་པ་ལ་སྙོམས་པར་འཇུག་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བསམ་གཏན་གྱི་བདེ་བའི་རོ་མྱོང་བར་མི་བྱེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཤེས་རབ་ཀྱི་རྩ་བའི་ཐོས་པ་ཡོངས་སུ་ཚོལ་

བ་ལ་བརྩོན་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འཆལ་པའི་ཤེས་རབ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་རྨ་ཕྱུང་ཡང་རྨ་མི་འབྱིན་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་རྨ་ཕྱུང་ཡང་རྨ་མི་ཕྱིན་པ་དེ་ལྟ་བུ་
ནི་དཔྱས་མེད་པ་ཡིན་ནོ། །གང་གི་ཚེ་ཇི་ལྟ་བ་བཞིན་དུ་སྨྲ་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་དེ་བཞིན་དུ་བྱེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ནང་ཉེ་བར་ཞི་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཕྱི་རོལ་གྱི་ཡུལ་རྣམས་ཀྱིས་མི་གོས་པ་
དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཐམས་ཅད་མཁྱེན་པ་ཉིད་ཀྱི་སེམས་ལ་བསམ་པ་ཐ་དད་པ་མེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཐེག་པ་དམན་པ་ལ་འདོད་པ་མེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་བདུད་ཀྱི་ལས་རྣམས་རྟོགས་པ་
དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བདུད་ཀྱི་ལས་རྣམས་ཟློག་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་འཇིག་རྟེན་ན་སྣང་བ་ཐོབ་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འཇིག་རྟེན་གྱི་ཆོས་རྣམས་ཀྱིས་མི་གོས་པ་དེ་ལྟ་བུ་ནི་དཔྱས་མེད་
པ་ཡིན་ནོ། །གང་གི་ཚེ་བྱ་བ་དང་འགལ་བར་མི་བྱེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བྱ་བ་མ་ཡིན་པར་མི་ལྟུང་བ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ང་རྒྱལ་དང་རྒྱགས་པ་དང་། སྙེམས་པ་ཐམས་ཅད་དང་བྲལ་བ་དེ་ལྟ་བུ་ནི་ཁ་ན་མ་ཐོ་བ་མེད་པ་
ཡིན་ནོ། །གང་ཡང་ཡེ་ཤེས་དང་། རྣམ་པར་ཤེས་པ་ཕུན་སུམ་ཚོགས་ཤིང་འཕགས་པའི་བདེན་པ་དང་ལྡན་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་དམ་བཅས་པ་བརྟན་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་དམ་བཅས་པ་ཉམས་འོག་ཏུ་ཆུད་པར་བྱེད་
པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་རྟེན་ཅིང་འབྲེལ་པར་འབྱུང་བ་ལུགས་དང་འཐུན་པར་བྱེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་རྟེན་ཅིང་འབྲེལ་པར་འབྱུང་བའི་ཆོས་རྣམས་ལ་མངོན་པར་ཞེན་པ་མེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་

ཤེས་རབ་དང་ཡེ་ཤེས་ཀྱིས་ཆོས་ཐམས་ཅད་རང་བཞིན་གྱིས་སྟོང་བར་རབ་ཏུ་ཤེས་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཐབས་ཤེས་པས་དགེ་བའི་རྩ་བ་ཐམས་ཅད་ཡང་དག་པར་སྡུད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་ཡང་རྩོམ་པ་ཐམས་
ཅད་ལ་སྙིང་རྗེ་ཆེན་པོས་འཇུག་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཆོས་ཐམས་ཅད་ལ་རྣམ་པར་ཐར་པར་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་ཡང་ཆོས་ཐམས་ཅད་མི་དམིགས་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་དམིགས་པའི་ལྟ་
བ་སྤང་བའི་ཕྱིར་ཆོས་སྟོན་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་ཡང་ཚུལ་བཞིན་ལ་རབ་ཏུ་སྦྱོར་ཞིང་ཆོས་གང་ཡང་ཡང་དག་པར་རྗེས་སུ་མི་མཐོང་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འབྲས་བུ་ཐོབ་པ་མངོན་སུམ་དུ་བྱེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །
གང་གི་ཚེ་ཆོས་ཀྱི་དབྱིངས་སྟོང་པ་ཞེས་བྱ་བར་སོ་སོར་རྟོག་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་སེམས་ཅན་ཐམས་ཅད་ཡོངས་སུ་མི་གཏོང་བ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཁམས་གསུམ་དང་ལྷན་ཅིག་མི་གནས་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །
གང་ཡང་སེམས་ཅན་ཐམས་ཅད་ལ་ལྟ་བའི་ཕྱིར་ཡོངས་སུ་མྱ་ངན་ལས་མི་འདའ་བ་དེ་ལྟ་བུ་ནི་དཔྱས་མེད་པ་ཡིན་ནོ། །ལྷའི་བུ་གཞན་ཡང་ཇི་ཙམ་དུ་ཚིག་འཇུག་པ་དང་། ཚིག་གིས་རློམ་སེམས་སུ་བྱེད་པ་དང་། ཚིག་གིས་རྟོགས་པར་བྱེད་པ་དང་། ཚིག་ལ་མངོན་པར་ཞེན་པར་བྱེད་
པ་དེ་ཙམ་དུ་སྐྱོན་ཡིན་ནོ། །ལྷའི་བུ་ཇི་ཙམ་དུ་ཆོས་ཐམས་ཅད་ལ་བསྙད་དུ་མེད་པ་ཉིད་དང་། འཇུག་པ་མེད་པ་ཉིད་དང་། རློམ་སེམས་མེད་པ་ཉིད་དང་། རྟོག་པ་མེད་པ་ཉིད་དང་། འཕྲོ་བ་མེད་པ་ཉིད་དང་། བརྗོད་དུ་མེད་པ་ཉིད་དང་། སེམས་ཅན་ཡོངས་སུ་མི་གཏོང་བའི་ཕྱིར་གཏན་
དུ་ཡོངས་སུ་མྱ་ངན་ལས་མི་འདའ་བ་ཉིད་ཡིན་པ་དེ་ཙམ་དུ་ཁ་ན་མ་ཐོ་བ་མེད་ཅིང་དཔྱས་མེད་པ་ཡིན་ནོ། །ལྷའི་བུ་གང་ལ་ཁ་ན་མ་ཐོ་བ་མེད་ཅིང་དཔྱས་མེད་པ་དེ་ནི་ཡི་གེ་མེད་པ་ཡིན་ནོ། །གང་ལ་ཡི་གེ་མེད་པ་དེ་ནི་བརྗོད་དུ་མེད་པ་ཡིན་ཏེ། བརྗོད་དུ་མེད་པའི་དོན་ལ་ནི་ཁ་ན་མ་ཐོ་བ་མེད་ཅིང་

དཔྱས་མེད་དོ། །ལྷའི་བུ་དེ་ལྟ་བས་ན་བརྗོད་དུ་མེད་པའི་དོན་ལ་རྟོན་པའི་བྱང་ཆུབ་སེམས་དཔའ་ནི་རང་གི་སེམས་གཙོ་བོར་བྱེད་པས་ཁ་ན་མ་ཐོ་བ་མེད་ཅིང་འཕགས་པ་རྣམས་ཀྱིས་དཔྱས་བྱར་མེད་པ་ཡིན་ནོ། །བསྟན་པ་འདི་བཤད་པ་ན་བཅོམ་ལྡན་འདས་ཀྱིས་འཇམ་དཔལ་གཞོན་
ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཁ་ན་མ་ཐོ་བ་མེད་པ་དང་། དཔྱས་མེད་པ་དེ་ལེགས་པར་སྨྲས་སོ། །འཇམ་དཔལ་གང་གི་ཚེ་བྱང་ཆུབ་སེམས་དཔའ་དེ་ལྟར་ཁ་ན་མ་ཐོ་
བ་མེད་ཅིང་དཔྱས་མེད་པར་གྱུར་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བསྟན་པ་འདི་ཐོས་ནས་འཁོར་དེ་ལས་བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ནས་དེ་དག་
ཐམས་ཅད་ཀྱང་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གཞན་དང་། གཞན་དག་ཏུ་མིང་ཐ་དད་པའི་དེ་བཞིན་གཤེགས་པ་དག་ཏུ་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་འཁོར་དེ་ལས་ལྷའི་བུ་ཁ་ཅིག་འདི་སྙམ་དུ་སེམས་
ཏེ། ལྷའི་བུ་རིན་ཆེན་མཆོག་འདི་ཡུན་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདིའི་སངས་རྒྱས་ཀྱི་ཞིང་ནི་ཅི་འདྲ་བ་ཞིག་ཏུ་འགྱུར། བྱང་ཆུབ་ཐོབ་པའི་མིང་ནི་ཇི་སྐད་ཅེས་བྱ་བར་འགྱུར་སྙམ་མོ། །དེ་
ནས་སངས་རྒྱས་ཀྱི་མཐུས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའི་བུ་རིན་ཆེན་མཆོག་འདི་ཡུན་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདིའི་
སངས་རྒྱས་ཀྱི་ཞིང་ནི་ཅི་འདྲ་བ་ཞིག་ཏུ་འགྱུར། བྱང་ཆུབ་ཐོབ་པའི་མིང་ནི་ཇི་སྐད་ཅེས་བགྱི་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ལྷའི་བུ་རིན་ཆེན་མཆོག་འདི་ནི་

བསྐལ་པ་འབུམ་འདས་པའི་འོག་ཏུ་བསྐལ་པ་རིན་ཆེན་འབྱུང་གནས་ཞེས་བྱ་བ་ལ་ཤར་ཕྱོགས་སུ་འཇིག་རྟེན་གྱི་ཁམས་དགའ་བ་བཀོད་པ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་བཀོད་པ་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་དགའ་བ་བཀོད་པ་དེ་ཡང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། ལྷ་དང་། མི་རྣམས་ཀྱིས་ཀུན་
དུ་གང་བ་དང་། མི་ཁོམ་པ་དང་། ངན་སོང་ཐམས་ཅད་དང་བྲལ་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་དེ་ནི་རྡོ་བ་དང་། གསེག་མ་དང་། གྱོ་མོ་མེད་ཅིང་ལག་མཐིལ་ལྟར་མཉམ་ལ་རིན་པོ་ཆེ་སྣ་གསུམ་འདི་ལྟ་སྟེ། བཻ་དཱུརྱ་དང་། ཤེལ་དང་། འཛམ་
བུ་ཆུ་བོའི་གསེར་གྱིས་སྤྲས་ཤིང་བལྟ་ན་སྡུག་ལ་གསེར་གྱི་དྲ་བས་ཀུན་ནས་བཀབ་པར་འགྱུར་རོ། །ཀུན་དགའ་བོ་འདི་ལྟ་སྟེ། དཔེར་ན་འཕྲུལ་དགའི་ལྷ་རྣམས་ཀྱི་ལོངས་སྤྱོད་དང་། ཉེ་བར་སྤྱོད་པ་ཅི་འདྲ་བ་དེ་བཞིན་དུ་མི་དེ་དག་གི་ལོངས་སྤྱོད་དང་། ཉེ་བར་སྤྱོད་པ་ཡང་དེ་དང་
འདྲ་བར་འགྱུར་ཏེ། འཇིག་རྟེན་གྱི་ཁམས་དེར་ནི་བཟའ་བ་དང་། བཏུང་བ་དག་ཀྱང་ཡིད་ལ་བསམས་པ་ཙམ་གྱིས་འབྱོར་པར་འགྱུར་རོ། །འཇིག་རྟེན་གྱི་ཁམས་དེར་ནི་ཉན་ཐོས་དང་། རང་སངས་རྒྱས་དག་གི་མིང་ཡང་འབྱུང་བར་མི་འགྱུར་རོ། །བྱང་ཆུབ་སེམས་དཔའ་དེ་དག་
ཀྱང་ཆོས་ཀྱི་དགའ་བ་སྣ་ཚོགས་དང་། ཆོས་ཀྱི་རྣམ་པར་གྲོལ་བ་སྣ་ཚོགས་དང་། བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་སྣ་ཚོགས་དང་། རྫུ་འཕྲུལ་གྱི་རྣམ་པར་འཕྲུལ་བའི་བཀོད་པ་སྣ་ཚོགས་དག་གིས་དགའ་མགུར་སྤྱོད་པར་འགྱུར་ཏེ། ཆོས་
ཀྱི་རབ་ཏུ་དགའ་བ་དང་། མཆོག་ཏུ་དགའ་བ་དང་། དགའ་བ་དག་གིས་དགའ་བར་འགྱུར་བ་མ་གཏོགས་པར་ཚོར་བ་གཞན་དག་མྱོང་བར་མི་འགྱུར་བས་དེའི་ཕྱིར་འཇིག་རྟེན་གྱི་ཁམས་དེ་དགའ་བ་བཀོད་པ་ཞེས་བྱ་བར་འགྱུར་རོ། །དེ་བཞིན་གཤེགས་པ་དེའི་ཚེའི་ཚད་ནི་ལོ་བྱེ་བ་

ཕྲག་དྲུག་ཅུར་འགྱུར་རོ། །དེའི་བྱང་ཆུབ་སེམས་དཔའི་དགེ་འདུན་བྱང་ཆུབ་སེམས་དཔའ་རབ་ཏུ་བྱུང་བ་ནི་བྱང་ཆུབ་སེམས་དཔའ་བྱེ་བ་ཕྲག་དྲུག་ཅུར་འགྱུར་རོ། །དེའི་བྱང་ཆུབ་སེམས་དཔའ་ཁྱིམ་ན་གནས་པ་ནི་དཔག་ཏུ་མེད་པར་འགྱུར་རོ། །དེ་བཞིན་གཤེགས་པ་རིན་ཆེན་
བཀོད་པ་དེ་གང་གི་ཚེ་བྱང་ཆུབ་སེམས་དཔའ་དེ་དག་ལ་ཆོས་སྟོན་པར་འགྱུར་བ་དེའི་ཚེ་སྟེང་གི་བར་སྣང་ལ་ཏ་ལ་བྱེ་བ་ཕྲག་བརྒྱད་ཅུ་ཙམ་དུ་ནམ་མཁའ་ལ་མངོན་པར་འཕགས་ཏེ། སྟེང་གི་འཇིག་རྟེན་གྱི་ཁམས་སྐྱིལ་མོ་ཀྲུང་གཅིག་གིས་ཁྱབ་པར་བྱས་ནས་འོད་ཟེར་བརྒྱ་སྟོང་
དག་གིས་སངས་རྒྱས་ཀྱི་ཞིང་དེར་སྣང་བས་ཁྱབ་པར་བྱས་ཤིང་ལྷའི་མེ་ཏོག་དང་། སྤོས་དང་། ཕྱེ་མའི་ཆར་དག་མངོན་པར་རབ་ཏུ་ཕབ་ནས་ལྷའི་སིལ་སྙན་དང་། ཕེག་རྡོབ་པ་དང་། གླུ་དབྱངས་བརྒྱ་སྟོང་དག་གི་སྒྲ་ཕྱུང་སྟེ། ཐམས་ཅད་དང་ལྡན་པའི་སངས་རྒྱས་ཀྱི་ཞིང་དེ་སྒྲས་
གོ་བར་བྱས་ནས་བྱང་ཆུབ་སེམས་དཔའ་དེ་དག་ལ་འདི་ལྟ་སྟེ། མི་ཟད་པའི་སྒོ་ཞེས་བྱ་བའི་གཟུངས་ཀྱི་སྒོའི་ཆོས་སྟོན་པར་འགྱུར་རོ། །དེ་ལ་མི་ཟད་པའི་སྒོའི་གཟུངས་ཀྱི་སྒོ་གང་ཞེ་ན། འདི་ལྟ་སྟེ། ལུས་དང་། སེམས་དབེན་པ་ཉིད་དུ་སྟོན་པར་བྱེད་པ་ཆོས་ཐམས་ཅད་ཀྱི་
དབེན་པའི་སྒོ་དང་། ཆོས་རྣམས་ཀྱི་ངེས་པར་རྟོགས་པ་ཉིད་སྟོན་པར་བྱེད་པ་ཆོས་ཐམས་ཅད་ལ་སོ་སོར་རྟོག་པའི་སྒོ་དང་། །ཆོས་རྣམས་ཀྱི་ཉེ་བར་ཞི་བར་སྟོན་པར་བྱེད་པ་ཆོས་ཐམས་ཅད་ཀྱི་ཚུལ་བཞིན་ལ་རབ་ཏུ་སྦྱོར་བའི་སྒོ་དང་། ཆོས་རྣམས་ཀྱི་ཁ་ན་མ་ཐོ་བ་མེད་པ་སྟོན་
པར་བྱེད་པ་ཆོས་ཐམས་ཅད་ཀྱི་ཡང་དག་པའི་ནན་ཏན་གྱི་སྒོ་དང་། ཆོས་རྣམས་ཀྱི་ཤེས་པའི་སྣང་བ་སྟོན་པར་བྱེད་པ་ཆོས་ཐམས་ཅད་ཀྱི་སྣང་བའི་སྒོ་དང་། ཆོས་རྣམས་ཀྱི་བྱེ་བྲག་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་མཉམ་པ་ཉིད་ཀྱི་སྒོ་དང་། ཆོས་རྣམས་ཀྱི་རྣམ་པར་གཡེང་
བ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཞི་གནས་ཀྱི་སྒོ་དང་། ཆོས་རྣམས་ཀྱི་འགལ་བ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ལྷག་མཐོང་གི་སྒོ་དང་། ཆོས་རྣམས་ཀྱི་འཁྲུག་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ངེས་པར་སེམས་པའི་སྒོ་དང་།

ཆོས་རྣམས་ཀྱི་མི་བརྗེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་དྲན་པའི་སྒོ་དང་། ཆོས་རྣམས་ཀྱི་དོན་རྟོགས་པ་སྟོན་པར་བྱེད་པ་ཆོས་ཐམས་ཅད་ཀྱི་རྟོགས་པའི་སྒོ་དང་། ཆོས་རྣམས་ཀྱི་ཡིད་རྣམ་པར་དག་པ་སྟོན་པར་བྱེད་པ་ཆོས་ཐམས་ཅད་ཀྱི་བློ་གྲོས་ཀྱི་
སྒོ་དང་། ཆོས་རྣམས་ཀྱི་ལྟ་བའི་རྣམ་པ་ཐམས་ཅད་ཡང་དག་པར་འཇོམས་པ་སྟོན་པར་བྱེད་པ་ཆོས་ཐམས་ཅད་ཀྱི་སྟོང་པ་ཉིད་ཀྱི་སྒོ་དང་། ཆོས་རྣམས་ཀྱི་ཞི་བ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་མཚན་མ་མེད་པའི་སྒོ་དང་། ཆོས་རྣམས་ཀྱི་འགྲོ་བ་ཐམས་ཅད་ཡང་དག་
པར་གཅོད་པ་སྟོན་པར་བྱེད་པ་ཆོས་ཐམས་ཅད་ཀྱི་སྨོན་པ་མེད་པའི་སྒོ་དང་། ཆོས་རྣམས་ཀྱི་མངོན་པར་འདུ་བྱེད་པ་དང་བྲལ་བ་སྟོན་པར་བྱེད་པ་ཆོས་ཐམས་ཅད་ཀྱི་མངོན་པར་འདུ་བྱེད་པ་མེད་པའི་སྒོ་དང་། ཆོས་རྣམས་ཀྱི་མངོན་པར་འགྲུབ་པ་མེད་པར་སྟོན་པར་བྱེད་པ་ཆོས་
ཐམས་ཅད་ཀྱི་སྐྱེ་བ་མེད་པའི་སྒོ་དང་། ཆོས་རྣམས་ཀྱི་གཉིས་སུ་མེད་པའི་ཆོས་ཉིད་སྟོན་པར་བྱེད་པ་ཆོས་ཐམས་ཅད་ཀྱི་འབྱུང་བ་མེད་པའི་སྒོ་དང་། ཆོས་རྣམས་ཀྱི་རྟོག་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་འདོད་ཆགས་དང་བྲལ་བའི་སྒོ་དང་། ཆོས་རྣམས་ཀྱི་མངོན་སུམ་
གྱི་ཤེས་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་སྤྲོས་པ་མེད་པའི་སྒོ་དང་། ཆོས་རྣམས་ཀྱི་གཉིས་དང་བྲལ་བ་སྟོན་པར་བྱེད་པ་ཆོས་ཐམས་ཅད་ཀྱི་གཉིས་སུ་མེད་པ་ཉིད་ཀྱི་སྒོ་དང་། ཆོས་རྣམས་ཀྱི་གཡོ་བ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་རྟེན་པ་མེད་པའི་སྒོ་དང་།
ཆོས་རྣམས་ཀྱི་སེམས་ཅན་མཉམ་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་སེམས་ཅན་མེད་པ་ཉིད་ཀྱི་སྒོ་དང་། ཆོས་རྣམས་ཀྱི་འགྱུར་བ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་བྱེད་པ་མེད་པའི་སྒོ་དང་། ཆོས་རྣམས་ཀྱི་སྤྱོད་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་
གཟུང་བ་མེད་པའི་སྒོ་དང་། ཆོས་རྣམས་ཀྱི་གཞི་ཡང་དག་པར་འཇོམས་པ་སྟོན་པར་བྱེད་པ་ཆོས་ཐམས་ཅད་ཀྱི་གཞི་མེད་པའི་སྒོ་དང་། ཆོས་རྣམས་ཀྱི་ལྷག་པར་བྱེད་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ངེས་པའི་སྒོ་དང་། ཆོས་རྣམས་ཀྱི་འབྲས་བུ་

འགྲུབ་པར་སྟོན་པར་བྱེད་པ་ཆོས་ཐམས་ཅད་ཀྱི་རྒྱུའི་སྒོ་དང་། ཆོས་རྣམས་ཀྱི་མི་བརྗེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་མངོན་པར་བརྩོན་པའི་སྒོ་དང་། ཆོས་རྣམས་ཀྱི་ཀུན་ནས་ལྡང་བ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ངེས་པར་འབྱུང་བའི་སྒོ་དང་།
ཆོས་རྣམས་ཀྱི་མ་ནོར་བ་དེ་བཞིན་ཉིད་སྟོན་པར་བྱེད་པ་ཆོས་ཐམས་ཅད་ཀྱི་དེ་བཞིན་ཉིད་ཀྱི་སྒོ་དང་། ཆོས་རྣམས་ཀྱི་དབྱེར་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཡང་དག་པའི་མཐའི་སྒོ་དང་། ཆོས་རྣམས་ཀྱི་རོ་གཅིག་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཆོས་ཀྱི་དབྱིངས་
ཀྱི་སྒོ་དང་། ཆོས་རྣམས་ཀྱི་དུས་གསུམ་མཉམ་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཡང་དག་པ་ཇི་ལྟ་བ་བཞིན་གྱི་སྒོ་དང་། ཆོས་རྣམས་ཀྱི་སྒྲ་དབྱངས་དང་། ཚིག་གི་ལམ་གྱིས་བརྗོད་པ་ཐམས་ཅད་ལ་མངོན་པར་ཞེན་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་
ཀྱི་བརྗོད་དུ་མེད་པའི་དོན་གྱི་སྒོ་དང་། ཆོས་རྣམས་ཀྱི་ཉེ་བར་ཞི་བ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་བསམ་གཏན་གྱི་སྒོ་དང་། ཆོས་རྣམས་ཀྱི་གང་ཟག་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཆོས་ཉིད་ཀྱི་སྒོ་དང་། ཆོས་རྣམས་ཀྱི་ཆོས་མཉམ་པ་ཉིད་རྟོགས་པ་སྟོན་
པར་བྱེད་པ་ཆོས་ཐམས་ཅད་ཀྱི་བྱང་ཆུབ་ཀྱི་སྒོ་སྟེ། ཀུན་དགའ་བོ་དེ་ལྟར་དེ་བཞིན་གཤེགས་པ་རིན་ཆེན་བཀོད་པ་དེ་ནམ་མཁའི་དཀྱིལ་དེ་ཉིད་ལས་མ་བཞེངས་པར་བྱང་ཆུབ་སེམས་དཔའ་དེ་དག་ལ་མི་ཟད་པའི་སྒོའི་གཟུངས་ཀྱི་སྒོ་དེ་དག་རྒྱ་ཆེར་ཡང་དག་པར་རབ་ཏུ་སྟོན་པར་གྱུར་
ཏེ། དེ་ཡང་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་གིས་བཟོད་པ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་དེ་བཞིན་གཤེགས་པ་རྣམས་ལྷུན་གྱིས་གྲུབ་ཅིང་མངོན་
པར་འདུ་མཛད་པ་མི་མངའ་བས་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་རྣམས་ལ་ཐོགས་པ་མི་མངའ་བའི་ཡེ་ཤེས་གཟིགས་པ་འཇུག་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་གང་དེ་བཞིན་གཤེགས་པ་

རྣམས་ལྷུན་གྱིས་གྲུབ་ཅིང་མངོན་པར་འདུ་མཛད་པ་མི་མངའ་བས་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་རྣམས་ལ་ཐོགས་པ་མི་མངའ་བའི་ཡེ་ཤེས་གཟིགས་པ་འཇུག་པ་དེ་ནི་མ་འདྲེས་པ་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་
བོས་ལྷའི་བུ་རིན་ཆེན་མཆོག་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །ལྷའི་བུས་སྨྲས་པ། བཙུན་པ་ཀུན་དགའ་བོ་འདི་ལ་ནི་གང་ལུང་
བསྟན་པའི་ཆོས་གང་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། གཟུགས་བྱང་ཆུབ་སེམས་དཔའ་མ་ཡིན་པས་གཟུགས་ཀྱང་ལུང་བསྟན་དུ་མེད་ལ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བྱང་ཆུབ་སེམས་དཔའ་མ་ཡིན་པས་རྣམ་པར་
ཤེས་པ་ཡང་ལུང་བསྟན་དུ་མེད་པ་དང་། སའི་ཁམས་བྱང་ཆུབ་སེམས་དཔའ་མ་ཡིན་པས་སའི་ཁམས་ཀྱང་ལུང་བསྟན་དུ་མེད་པ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་བྱང་ཆུབ་སེམས་དཔའ་མ་ཡིན་པས་རླུང་གི་ཁམས་ཀྱང་ལུང་བསྟན་དུ་
མེད་པ་དང་། མིག་བྱང་ཆུབ་སེམས་དཔའ་མ་ཡིན་པས་མིག་ཀྱང་ལུང་བསྟན་དུ་མེད་པ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་བྱང་ཆུབ་སེམས་དཔའ་མ་ཡིན་པས་ཡིད་ཀྱང་ལུང་བསྟན་དུ་མེད་པ་དང་། མིང་དང་གཟུགས་བྱང་ཆུབ་
སེམས་དཔའ་མ་ཡིན་པས་མིང་དང་གཟུགས་ཀྱང་ལུང་བསྟན་དུ་མེད་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་བྱང་ཆུབ་སེམས་དཔའ་མ་ཡིན་པས་དུས་གསུམ་ཡང་ལུང་བསྟན་དུ་མེད་པ་དང་། རྒྱུ་དང་ལྟ་བ་བྱང་ཆུབ་སེམས་དཔའ་མ་ཡིན་པས་རྒྱུ་དང་ལྟ་བ་ཡང་
ལུང་བསྟན་དུ་མེད་པ་དང་། འབྱུང་བ་དང་། འཇིག་པ་བྱང་ཆུབ་སེམས་དཔའ་མ་ཡིན་པས་འབྱུང་བ་དང་། འཇིག་པ་ཡང་ལུང་བསྟན་དུ་མེད་པའི་ཕྱིར་རོ། །བཙུན་པ་ཀུན་དགའ་བོ་བྱང་ཆུབ་སེམས་དཔའ་ཞེས་བྱ་བ་དེ་ནི་བརྡའི་གཞིའི་ཚིག་བླ་དགས་ཡིན་ནོ། །དེ་ནི་ཉེ་བར་ཞི་བའི་

གཞི་ཡིན་ཏེ། ཆོས་གང་ཤིན་ཏུ་ཉེ་བར་ཞི་བ་དེ་ལ་ནི་ལུང་བསྟན་པ་གང་ཡང་མེད་དོ། །བཙུན་པ་ཀུན་དགའ་བོ་ལུང་བསྟན་པ་ཞེས་བྱ་བ་དེ་ནི་ཆོས་ཐམས་ཅད་གཟུང་དུ་མེད་པའི་ཚིག་བླ་དགས་ཡིན་ཏེ། བཙུན་པ་ཀུན་དགའ་བོ་གང་གི་ཚེ་བྱང་ཆུབ་སེམས་དཔའ་ནང་ངམ། ཕྱི་རོལ་
ལམ། དགེ་བ་འམ། མི་དགེ་བ་འམ། འདུས་བྱས་སམ། འདུས་མ་བྱས་ཀྱི་ཆོས་གང་ཡང་ཡོངས་སུ་འཛིན་པར་མི་བྱེད་ན་དེའི་འོག་ཏུ་ལུང་བསྟན་པར་འགྱུར་ཏེ། བཙུན་པ་ཀུན་དགའ་བོ་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་ཞེས་བྱ་བ་ནི་ཆོས་ཐམས་ཅད་ཡོངས་སུ་གཟུང་
དུ་མེད་པར་ལུང་བསྟན་པ་ཡིན་ནོ། །ལུང་བསྟན་པ་ནི་ཆོས་ཐམས་ཅད་རྗེས་སུ་གཟུང་དུ་མེད་པར་ལུང་བསྟན་པ་ཡིན་ནོ། །ལུང་བསྟན་པ་ནི་ཆོས་ཐམས་ཅད་གནས་མེད་པར་ལུང་བསྟན་པ་ཡིན་ནོ། །ལུང་བསྟན་པ་ནི་ཆོས་ཐམས་ཅད་སྐྱེ་བ་མེད་པར་ལུང་བསྟན་པ་ཡིན་ནོ། །
ལུང་བསྟན་པ་ནི་ཆོས་ཐམས་ཅད་རྟོག་པ་མེད་པ་དང་། རྣམ་པར་རྟོག་པ་མེད་པར་ལུང་བསྟན་པ་ཡིན་ཏེ། བཙུན་པ་ཀུན་དགའ་བོ་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་ནི་དེ་ལྟ་བུ་ཡིན་ནོ། །དེ་ནས་བཅོམ་ལྡན་འདས་ཀྱིས་ལྷའི་བུ་རིན་ཆེན་མཆོག་ལ་ལེགས་སོ་ཞེས་བྱ་བ་
བྱིན་ཏེ། ལྷའི་བུ་ལེགས་སོ་ལེགས་སོ། །དེ་ལྟ་བུའི་ཆོས་རྟོགས་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །གཏམ་འདི་བརྗོད་པར་གྱུར་པ་ན་བདུད་སྡིག་ཅན་དཔུང་དང་བཅས། བཞོན་
པ་དང་བཅས། འཁོར་དང་བཅས་པར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བདུད་སྡིག་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་ལུང་སྟོན་པར་
མཛད་ཅིང་། ཉན་ཐོས་ལུང་སྟོན་པར་མི་མཛད་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་བྱང་ཆུབ་སེམས་དཔའ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷ་དང་། མི་

རྣམས་ཀྱིས་ལེགས་པར་རྟོགས་ཤིང་རིག་པ་ཡིན་པས་ན་དེའི་ཕྱིར་བྱང་ཆུབ་སེམས་དཔའ་ལུང་སྟོན་པར་མཛད་ཀྱི། ཉན་ཐོས་ནི་ལྷ་དང་། མི་རྣམས་ཀྱིས་རིག་པ་མ་ཡིན་པས་དེའི་ཕྱིར་ཉན་ཐོས་ལུང་སྟོན་པར་མི་མཛད་དོ། །བདུད་སྡིག་ཅན་བྱང་ཆུབ་སེམས་དཔའ་
ལུང་བསྟན་ནི་སེམས་ཅན་མང་པོ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ཀྱི། ཉན་ཐོས་ལུང་བསྟན་པས་ནི་དེ་ལྟ་མ་ཡིན་ལ། ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་རྣམས་ཀྱང་། ཕྱིར་མི་ལྡོག་པར་འགྱུར་བས་ན་དེའི་ཕྱིར་
བྱང་ཆུབ་སེམས་དཔའ་ལུང་སྟོན་པར་མཛད་ཀྱི། ཉན་ཐོས་ལུང་སྟོན་པར་མི་མཛད་དོ། །དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་ཅིའི་ཕྱིར་འཁོར་འདིར་འོངས། དེ་སྐད་ཅེས་སྨྲས་པ་དང་། བདུད་སྡིག་ཅན་གྱིས་འཇམ་
དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གང་གི་ཚེ་བཅོམ་ལྡན་འདས་ཀྱིས་ལྷའི་བུ་རིན་ཆེན་མཆོག་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་བཀོད་པ་ཞེས་བྱ་བར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ལུང་བསྟན་པའི་ཚེ་དེ་ལྟར་ལུང་བསྟན་པའི་སྒྲས་བདག་གི་གནས་དང་གཞལ་མེད་ཁང་ཐམས་ཅད་དང་། སྐར་ཁུང་དང་། རྟ་བབས་ཐམས་ཅད་དང་། རིན་པོ་ཆེའི་ཤིང་ལྗོན་པ་དང་། དགའ་ཞིང་རྩེ་བའི་ལོངས་སྤྱོད་ཀྱི་གནས་ཐམས་ཅད་ལས་འདི་སྐད་དུ་བཅོམ་ལྡན་འདས་དེ་བཞིན་
གཤེགས་པ་ཤཱཀྱ་ཐུབ་པས་ལྷའི་བུ་རིན་ཆེན་མཆོག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཟིན་ཏོ། །བྱང་ཆུབ་སེམས་དཔའ་གཞན་དག་ཀྱང་ལུང་བསྟན་དུ་འོང་གིས་སྡིག་ཅན་ཁྱོད་སོང་ཤིག་ཅེས་སྒྲ་ཕྱུང་ངོ་། །འཇམ་དཔལ་གྱིས་སྨྲས་པ། སྡིག་ཅན་ཁྱོད་
བྱང་ཆུབ་སེམས་དཔའ་རྣམས་ལུང་བསྟན་པས་ཡི་མ་རངས་པར་གྱུར་ཏམ། བདུད་སྡིག་ཅན་གྱིས་སྨྲས་པ། འཇམ་དཔལ་གལ་ཏེ་འཛམ་བུའི་གླིང་ན་སེམས་ཅན་ཇི་སྙེད་པ་རྣམས་དགྲ་བཅོམ་པ་ཉིད་དུ་ལུང་བསྟན་ན་ནི་བདག་ཀྱང་ཡི་རངས་པར་འགྱུར་གྱི། བྱང་ཆུབ་སེམས་དཔའ་ནི་

གཅིག་ཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཀྱང་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་གང་གི་ཚེ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེའི་ཚེ་བདག་གི་གནས་ཐམས་ཅད་སྤ་བཀོང་བའི་ཕྱིར་
ཏེ། འདི་ལྟར་བྱང་ཆུབ་སེམས་དཔའ་དེས་ནི་སེམས་ཅན་ཚད་མེད་གྲངས་མེད་དཔག་ཏུ་མེད་པ་དག་ཐེག་པ་གསུམ་པོ་དག་གིས་ཁམས་གསུམ་ནས་ངེས་པར་འབྱིན་པར་འགྱུར་བས་འཇམ་དཔལ་དེ་ལྟར་ན་བདག་གི་ཡིད་ལ་གཅགས་པ་ཆེན་པོར་གྱུར་ཏོ། །འཇམ་དཔལ་གྱིས་
སྨྲས་པ། སྡིག་ཅན་ཁྱོད་འོངས་ཀྱང་རུང་། མ་འོངས་ཀྱང་རུང་སྟེ། སྡིག་ཅན་ཁྱོད་ཀྱིས་ནི་ལྷག་པའི་བསམ་པས་ཡང་དག་པར་ཞུགས་ཤིང་ཐབས་ལ་མཁས་པ་དང་ལྡན་ལ་ཤེས་རབ་ཀྱི་ཕ་རོལ་ཏུ་ཕྱིན་པས་ངེས་པར་བྱུང་བའི་བྱང་ཆུབ་སེམས་དཔའ་ལ་བར་ཆད་བྱ་བར་མི་ནུས་
སོ། །དེ་ཅིའི་ཕྱིར་ཞེ་ན། ལྷག་པའི་བསམ་པས་ཡང་དག་པར་ཞུགས་པ་དང་། ཐབས་ལ་མཁས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པས་ངེས་པར་བྱུང་བའི་བྱང་ཆུབ་སེམས་དཔའ་ནི་བདུད་ཀྱི་ལམ་ལས་ཡང་དག་པར་འདས་པའི་ཕྱིར་རོ། །དེ་ནས་སངས་རྒྱས་ཀྱི་མཐུས་བདུད་
སྡིག་ཅན་གྱིས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལྷག་པའི་བསམ་པས་ཡང་དག་པར་ཞུགས་པ་དང་། ཐབས་ལ་མཁས་པ་དང་། ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་འབྱུང་བ་ཡིན། འཇམ་
དཔལ་གྱིས་སྨྲས་པ། སྡིག་ཅན་གང་གི་ཚེ་བྱང་ཆུབ་སེམས་དཔའ་ཉི་ཚེ་བའི་སྤྱོད་པ་ཐམས་ཅད་ལ་ལྷག་པར་མི་སྤྱོད་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་ཉོན་མོངས་པ་ཐམས་ཅད་དང་། བདུད་ཀྱི་ལས་ཐམས་ཅད་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་ཕན་པར་གྱུར་པར་མཐོང་བ་དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་ཉོན་མོངས་པ་ཐམས་ཅད་དང་ལྷན་ཅིག་མི་གནས་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་གི་ཚེ་བྱང་ཆུབ་སེམས་དཔའ་ལྷག་

པའི་བསམ་པས་སེམས་ཅན་ཐམས་ཅད་བསྒྲལ་བའི་ཕྱིར་གོ་ཆ་ཆེན་པོ་བགོས་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་བསྡུ་བའི་དངོས་པོ་བཞིས་སེམས་ཅན་རྣམས་སྡུད་པ་དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་
སེམས་ཅན་ཐམས་ཅད་ལ་ཤིན་ཏུ་ཡོངས་སུ་མྱ་ངན་ལས་འདས་པའི་ངོ་བོ་ཉིད་དུ་སོ་སོར་རྟོག་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་གི་ཚེ་བྱང་ཆུབ་སེམས་དཔའ་ནང་དང་ཕྱིའི་དངོས་པོ་རྣམས་ལ་མི་ལྟ་བར་གྱུར་ཅིང་བྱང་ཆུབ་ཀྱི་སེམས་ཀྱི་
ལྷག་པའི་བསམ་པས་བདོག་པ་ཐམས་ཅད་ཡོངས་སུ་གཏོང་བ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་སེམས་ཅན་ཐམས་ཅད་ལ་སྦྱིན་གནས་སུ་འདུ་ཤེས་སྐྱེད་པར་བྱེད་པ་དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་སྦྱིན་པ་པོ་དང་།
ལེན་པ་པོ་ཡང་དག་པའི་མཐའ་དང་མཉམ་པ་ཉིད་དུ་མོས་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་གི་ཚེ་བྱང་ཆུབ་སེམས་དཔའ་དགེ་བའི་རྩ་བ་བརྩམས་པ་དག་ལས་ཕྱིར་མི་ལྡོག་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་
པ་ཡིན་ནོ། །གང་གི་ཚེ་གཞན་གྱི་དོན་གྱིས་ཟིན་ཅིང་རང་གི་དོན་ལས་ལྡོག་པར་བྱེད་པ་དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་དོན་ལ་རྟོན་པ་ཡིན་གྱི། ཚིག་འབྲུ་ལ་རྟོན་པ་མ་ཡིན་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་
གི་ཚེ་བྱང་ཆུབ་སེམས་དཔའ་སློང་བ་པོ་མཐོང་ན་ཁོང་ཁྲོ་བ་མེད་ཅིང་ཡི་རངས་པར་བྱེད་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་དགེ་བའི་རྩ་བ་ཡང་དག་པར་སྡུད་ཅིང་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པ་དེ་ལྟ་བུ་ནི་ཐབས་ལ་མཁས་པ་ཡིན་
ནོ། །གང་གི་ཚེ་ཆོས་ཐམས་ཅད་བྱང་ཆུབ་ཀྱི་རང་བཞིན་དུ་རབ་ཏུ་ཤེས་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །དེ་ནས་ལྷའི་བུ་རིན་ཆེན་མཆོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་བདུད་སྡིག་ཅན་དཔུང་དང་

བཅས། བཞོན་པ་དང་བཅས་འཁོར་དང་བཅས། གནས་དང་བཅས་པ་འདི་ལྟོ་བའི་ནང་དུ་བཅུག་ན་ནི་འདི་ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་དག་ལ་བར་ཆད་བྱེད་པར་མི་འགྱུར་རོ། །འཇམ་དཔལ་གྱིས་སྨྲས་པ། རིགས་ཀྱི་བུ་བདུད་སྡིག་ཅན་
ལྟོ་བའི་ནང་དུ་གཞུག་པ་ནི་བྱང་ཆུབ་སེམས་དཔའི་ཆ་མ་ཡིན་པས་རིགས་ཀྱི་བུ་ཁོ་བོས་ཅི་ནས་ཀྱང་བདུད་སྡིག་ཅན་འདི་སངས་རྒྱས་ཀྱི་གཟུགས་ཀྱི་མཚན་གྱིས་ལེགས་པར་བརྒྱན་ཅིང་བདེ་བ་མཆོག་དང་ལྡན་པས་སེང་གེའི་ཁྲི་ལ་འདུག་སྟེ། སངས་རྒྱས་ཀྱི་སྤོབས་པས་ཆོས་སྟོན་པར་འགྱུར་བ་དེ་
ལྟར་བྱིན་གྱིས་བརླབ་པར་བྱའོ། །དེ་ནས་བདུད་སྡིག་ཅན་གྱིས་ཚིག་དེ་ཐོས་ནས་མི་སྣང་བར་བྱ་བར་འདོད་ཅིང་འབྲོས་པར་འདོད་པ་ན་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་འཁོར་དེ་ནས་མི་སྣང་བར་བྱ་བ་དང་། འབྲོས་པར་ཡང་མ་ནུས་སོ། །དེ་ནས་དེའི་ཚེ་འཇམ་དཔལ་གཞོན་ནུར་
གྱུར་པས་བསམ་པ་འདི་སྙམ་དུ་བསམས་ཏེ། བདུད་སྡིག་ཅན་སངས་རྒྱས་ཀྱི་གཟུགས་ཀྱི་མཚན་དང་ལྡན་ཞིང་སེང་གེའི་ཁྲི་ལ་འདུག་པར་ཐམས་ཅད་དང་ལྡན་པའི་འཁོར་གྱིས་མཐོང་བར་བསམས་ནས། དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་འདི་སྐད་ཅེས་སྨྲས་སོ། །
སྡིག་ཅན་ཁྱོད་ཀྱིས་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་ཐོབ་སྟེ། ཁྱོད་ནི་སངས་རྒྱས་ཀྱི་གཟུགས་ཀྱི་མཚན་དང་ལྡན་ཞིང་སེང་གེའི་ཁྲི་ལ་འདུག་གོ །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་བདུད་སྡིག་ཅན་གྱིས་འདི་སྐད་ཅེས་སྨྲས་སོ། །འཇམ་དཔལ་བཅོམ་
ལྡན་འདས་ཉིད་ཀྱིས་ཀྱང་བྱང་ཆུབ་མ་བརྙེས་ན་ཁོ་བོས་ལྟ་འཐོབ་པར་འགྱུར་རེ་སྐན། དེ་ཅིའི་ཕྱིར་ཞེ་ན། བྱང་ཆུབ་ནི་འཐོབ་པའི་འདོད་ཆགས་དང་བྲལ་བའི་མཚན་ཉིད་ཡིན་པས་ན་འདོད་ཆགས་དང་བྲལ་བ་ལ་ནི་འཐོབ་པ་ཡང་མེད། མངོན་པར་རྟོགས་པ་ཡང་མེད་དེ། བྱང་ཆུབ་ནི་འདུས་མ་
བྱས་པ་ཐོབ་པ་ཡིན་ལ་དེ་ཡང་འཐོབ་པ་མེད་པ་ཉིད་ཀྱི་མཚན་ཉིད་ཡིན་པ་དང་། བྱང་ཆུབ་ནི་སྟོང་པ་ཉིད་རྟོགས་པའི་མཚན་ཉིད་ཡིན་པས་ན་སྟོང་པ་ཉིད་ཀྱིས་སྟོང་པ་ཉིད་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་མཚན་མ་མེད་པའི་མཚན་ཉིད་ཡིན་པས་ན་མཚན་མ་མེད་པས་

མཚན་མ་མེད་པ་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་སྨོན་པ་མེད་པའི་མཚན་ཉིད་ཡིན་པས་ན་སྨོན་པ་མེད་པས་སྨོན་པ་མེད་པ་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་ཆོས་ཀྱི་དབྱིངས་ཀྱི་རང་བཞིན་ཡིན་པས་ན་རང་བཞིན་གྱིས་རང་བཞིན་
མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་དེ་བཞིན་ཉིད་དབྱེར་མེད་པའི་མཚན་ཉིད་ཡིན་པས་ན་དེ་བཞིན་ཉིད་ཀྱིས་དེ་བཞིན་ཉིད་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་ཡང་དག་པའི་མཐའ་ལ་གནས་པ་ཡིན་པས་ན་ཡང་དག་པའི་མཐས་ཡང་དག་པའི་མཐའ་མངོན་
པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། སྐྱེས་བུ་མེད་པ་དང་། གང་ཟག་མེད་པའི་ངོ་བོ་ཉིད་ཡིན་པས་ན་དེ་ལ་ནི་མངོན་པར་རྫོགས་པར་འཚང་རྒྱ་བ་གང་ཡང་མེད་པའི་ཕྱིར་རོ། །
འཇམ་དཔལ་གཞན་ཡང་བྱང་ཆུབ་སེམས་དཔའ་གང་གིས་བྱང་ཆུབ་ཀྱི་མཚན་ཉིད་བསྟན་པ་འདི་ཐོས་ནས་ཆོས་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་རྣམ་པར་འཁྲུགས་པར་མི་བྱེད་པ་དེ་ནི་སངས་རྒྱས་ཉིད་ཡིན་པར་བརྗོད་པར་བྱའོ། །བདུད་ཀྱིས་བསྟན་པ་འདི་བཤད་པ་ན་བྱང་ཆུབ་སེམས་
དཔའ་ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱི་བྱིན་གྱི་རླབས་ཀྱིས་བདུད་སྡིག་ཅན་དེ་བཞིན་གཤེགས་པའི་ཁ་དོག་དང་། གཟུགས་ཀྱི་
མཚན་དང་ལྡན་ཞིང་སེང་གེའི་ཁྲི་ལ་འདུག་ནས་ཟབ་མོའི་གནས་འདི་ལྟ་བུ་འདི་དག་སྟོན་པ་ནི་ངོ་མཚར་ཏོ། །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་ཁོ་བོས་ནི་སེམས་མེད་པའི་དངོས་པོ་ཤིང་དང་། རྩྭ་དང་། ནགས་ཚལ་འདི་དག་ལ་དེ་ལྟ་དེ་ལྟར་བྱིན་གྱིས་བརླབས་
ན་ཡང་འདི་དག་ཀྱང་དེ་ལྟ་བུའི་མཚན་དང་ལྡན་ཞིང་སངས་རྒྱས་ཀྱི་སྤོབས་པས་ཆོས་སྟོན་པར་འགྱུར་རོ། །ཁོ་བོས་གནས་བརྟན་ཤ་ར་དྭ་ཏིའི་བུ་ཉིད་ལ་དེ་ལྟ་དེ་ལྟར་བྱིན་གྱིས་བརླབས་ན་ཡང་གནས་བརྟན་ཤ་ར་དྭ་ཏིའི་བུ་ཡང་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་ཞིང་

སངས་རྒྱས་ཀྱི་སྤོབས་པས་ཆོས་སྟོན་པར་འགྱུར་རོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུ་འདི་སྙམ་དུ་སེམས་ཏེ། བདག་ཀྱང་འཇམ་དཔལ་གཞོན་ནུར་གྱུར་པས་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་པར་བྱིན་གྱིས་བརླབས་ན་ཉན་ཐོས་སྟོན་པའི་གཟུགས་སུ་
གནས་པ་ནི་མི་འཐུན་པ་ཡིན་པས་བདག་འཁོར་འདི་ནས་མི་སྣང་བར་བྱའོ། །སྙམ་དུ་བསམས་པ་དང་། འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་དེས་མི་སྣང་བར་བྱེད་མ་ནུས་སོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤ་ར་དྭ་ཏིའི་བུའི་སེམས་ཀྱི་
ཡོངས་སུ་རྟོག་པ་སེམས་ཀྱིས་ཤེས་ནས་ཚེ་དང་ལྡན་པ་ཤ་ར་དྭ་ཏིའི་བུ་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་ཞིང་སེང་གེའི་ཁྲི་ལ་འདུག་པར་ཐམས་ཅད་དང་ལྡན་པའི་འཁོར་རྣམས་ཀྱིས་མཐོང་བར་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པས་
ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་ཇི་ལྟར་དེ་བཞིན་གཤེགས་པ་ཆོས་སྟོན་པར་མཛད་པ་དེ་བཞིན་དུ་བདུད་སྡིག་ཅན་དང་ལྷན་ཅིག་ཏུ་སྟོན་ཅིག །དེ་ནས་ཚེ་དང་ལྡན་པ་ཤ་ར་དྭ་ཏིའི་བུ་སངས་རྒྱས་ཀྱི་གཟུགས་དང་། སྐུའི་མཚན་དང་
ལྡན་པས་བདུད་སྡིག་ཅན་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་པ་ལ་འདི་སྐད་ཅེས་སྨྲས་སོ། །སྡིག་ཅན་དེ་བཞིན་གཤེགས་པ་རྣམས་ཀྱི་བྱང་ཆུབ་ཅི་ཞིག་གིས་རབ་ཏུ་ཕྱེ་བ་ཡིན་སྨྲས་པ། བཙུན་པ་ཤ་ར་དྭ་ཏིའི་བུ་སངས་རྒྱས་བཅོམ་ལྡན་འདས་རྣམས་ཀྱི་བྱང་
ཆུབ་ནི་ཆོས་ཐམས་ཅད་མཉམ་པ་ཉིད་དུ་རྟོགས་པས་རབ་ཏུ་ཕྱེ་བ་ཡིན་ནོ། །ཆོས་དང་ཆོས་མ་ཡིན་པ་གཉིས་སུ་མེད་པར་རྟོགས་པས་རབ་ཏུ་ཕྱེ་བ་ཡིན་ནོ། །ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་དབང་བསྐུར་བས་རབ་ཏུ་ཕྱེ་བ་ཡིན་ནོ། །སེམས་ཅན་ཐམས་ཅད་ཀྱི་སེམས་ཀྱི་
སྤྱོད་པ་རྟོགས་པས་རབ་ཏུ་ཕྱེ་བ་ཡིན་ནོ། །དངོས་པོ་དང་དངོས་པོ་མེད་པ་ཐམས་ཅད་རྟོགས་པས་རབ་ཏུ་ཕྱེ་བ་ཡིན་གྱི། དངོས་པོ་རྣམ་པར་འཇིག་པས་རབ་ཏུ་ཕྱེ་བ་མ་ཡིན་ནོ། །བསྒོམ་པ་དངོས་པོ་མེད་པས་རབ་ཏུ་ཕྱེ་བ་མ་ཡིན་ཏེ། རབ་ཏུ་ཕྱེ་བ་ཡང་མ་ཡིན། རབ་ཏུ་མ་ཕྱེ་

བ་ཡང་མ་ཡིན། །རྒྱུ་བ་མེད་པ་རྒྱུ་བ་དང་བྲལ་བ་རྒྱུ་བ་ཐམས་ཅད་ཡང་དག་པར་ཆད་པ་སྟེ། འོང་བ་མེད་ཅིང་འགྲོ་བ་མེད་པ་ཡིན་ནོ། །དེ་ནས་བདུད་སྡིག་ཅན་གྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་དེ་བཞིན་གཤེགས་པ་
ཅི་ཞིག་ལ་གནས་པ་ཡིན། ཚེ་དང་ལྡན་པ་ཤ་ར་དྭ་ཏིའི་བུས་སྨྲས་པ། སྡིག་ཅན་དེ་བཞིན་གཤེགས་པ་ནི་འཁོར་བ་མཉམ་པ་ཉིད་ལ་གནས་པ་ཡིན་ནོ། །མྱ་ངན་ལས་འདས་པས་རློམ་སེམས་མེད་པ་ལ་གནས་པ་ཡིན་ནོ། །ལྟ་བའི་རྣམ་པ་ཐམས་ཅད་ཀྱི་ངོ་བོ་ཉིད་ཀྱི་མཚན་
ཉིད་ལ་གནས་པ་ཡིན་ནོ། །ཉོན་མོངས་པ་ཐམས་ཅད་ཀྱི་གནས་ལ་གནས་པ་ཡིན་ནོ། །ཆོས་ཐམས་ཅད་ཀྱི་ཡང་དག་པ་ཇི་ལྟ་བའི་རྩ་བའི་གནས་ལ་གནས་པ་ཡིན་ནོ། །འདུས་བྱས་དང་། འདུས་མ་བྱས་གཉིས་སུ་མེད་པའི་གནས་ལ་གནས་པ་ཡིན་ནོ། །གནས་ཐམས་
ཅད་ལ་མི་གནས་པ་ལ་གནས་པ་ཡིན་ཏེ། སྡིག་ཅན་དེ་བཞིན་གཤེགས་པ་ནི་དེ་ལྟ་བུ་ལ་གནས་པ་ཡིན་ནོ། །ཚེ་དང་ལྡན་པ་ཤ་ར་དྭ་ཏིའི་བུས་ཡང་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་བྱང་ཆུབ་ག་ལས་བཙལ་བར་བྱ། བདུད་སྡིག་ཅན་གྱིས་སྨྲས་པ། བཙུན་
པ་ཤ་ར་དྭ་ཏིའི་བུ་བྱང་ཆུབ་ནི་འཇིག་ཚོགས་ལ་ལྟ་བའི་རྩ་བ་ལ་གནས་པ་དང་། མ་རིག་པ་དང་། སྲིད་པའི་སྲེད་པའི་ཀུན་དུ་སྦྱོར་བ་དང་། ཕྱིན་ཅི་ལོག་གིས་ཀུན་ནས་དཀྲིས་པ་དང་། སྒྲིབ་པ་དང་། ཆོད་པ་དག་ལས་བཙལ་བར་བྱའོ། །སྨྲས་པ། སྡིག་ཅན་ཁྱོད་ཅི་ལས་
བསམས་ཏེ་དེ་སྐད་སྟོན། སྨྲས་པ། བཙུན་པ་ཤ་ར་དྭ་ཏིའི་བུ་ཆོས་དེ་དག་ཡང་དག་པ་ཇི་ལྟ་བ་བཞིན་དུ་རྟོགས་པ་གང་ཡིན་པ་དེ་ཉིད་བྱང་ཆུབ་ཡིན་པའི་ཕྱིར་རོ། །བསྟན་པ་འདི་བཤད་པ་ན་དགེ་སློང་བརྒྱད་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཤ་ར་
དྭ་ཏིའི་བུ་ལ་དད་པའི་ལྷའི་བུ་རྣམས་དང་། བདུད་ཀྱི་རིས་ལ་དད་པའི་ལྷའི་བུ་རྣམས་ལས་སྲོག་ཆགས་སུམ་ཁྲི་ཉིས་སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷའི་བུ་དེ་དག་གདུལ་བའི་དབང་གི་ཕྱིར་འཇམ་དཔལ་གཞོན་ནུར་གྱུར་པས་བདུད་

སྡིག་ཅན་དང་། གནས་བརྟན་ཤ་ར་དྭ་ཏིའི་བུ་གཉིས་སངས་རྒྱས་ཀྱི་གཟུགས་དང་། སྐུའི་མཚན་གྱིས་བརྒྱན་པར་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པས་བྱིན་གྱིས་བརླབས་དེ་ཕྱིར་བསྡུས་སོ། །དེ་ནས་གནས་བརྟན་ཤ་ར་དྭ་ཏིའི་བུ་དང་། བདུད་
སྡིག་ཅན་ཡང་རང་རང་གི་གཟུགས་ཀྱི་མཚན་དང་ལྡན་པར་གྱུར་ཏོ། །དེ་ནས་དེའི་ཚེ་ཕྱོགས་བཞིའི་སངས་རྒྱས་ཀྱི་ཞིང་ཐ་དད་པ་དག་ནས་བྱང་ཆུབ་སེམས་དཔའ་སྟོང་ཕྲག་མང་པོ་དག་ལྷགས་ཤིང་འདུས་ཏེ་དེ་དག་ནམ་མཁའ་ལས་བབས་ནས་བཅོམ་ལྡན་འདས་ག་ལ་བར་དོང་སྟེ་ཕྱིན་
པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་པར་གྱུར་ཏོ། །ཕྱོགས་གཅིག་ཏུ་འཁོད་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་
ཏོ། །བཅོམ་ལྡན་འདས་བདག་ཅག་ནི་ཆོས་ཀྱི་དབྱིངས་ཀྱི་རང་བཞིན་དབྱེར་མ་མཆིས་པར་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་དམ་པའི་ཆོས་ཡོངས་སུ་གཟུང་བའི་སླད་དུ་འདིར་མཆིས་ལགས་ཏེ། བཅོམ་ལྡན་འདས་བདག་ཅག་གིས་ཆོས་ཀྱི་རྣམ་གྲངས་འདི་གཟུང་བར་
བགྱི། བཅང་བར་བགྱི། བཀླག་པར་བགྱི། ཀུན་ཆུབ་པར་བགྱི་ཞིང་དམ་པའི་ཆོས་ཡོངས་སུ་གཟུང་བའི་སླད་དུ་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བགྱིའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །
བཅོམ་ལྡན་འདས་བྱང་ཆུབ་སེམས་དཔའ་འདི་དག་གང་ནས་འདིར་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་འདི་དག་ནི་སངས་རྒྱས་ཀྱི་ཞིང་ཐ་དད་པ་དག་ནས་འདུས་པ་སྟེ། འཇམ་དཔལ་གཞོན་ནུར་གྱུར་པས་ཡོངས་
སུ་སྨིན་པར་བྱས་ཤིང་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པར་བསྟན་པའི་ཆོས་ཀྱི་རྣམ་ག