Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

རབ་ཏུ་
སྤངས། །སྤྱོད་པ་དེ་ལ་གཡོ་མེད་པས། །སྤྱོད་པ་བླ་ན་མེད་ཅེས་བྱ། །བྱང་ཆུབ་སེམས་དཔའི་མཚན་མེད་སྤྱོད། །སྤྱོད་པ་འདི་ནི་བླ་ན་མེད། །སྤྱོད་པ་འདི་ནི་སྤྱོད་པ་ན། །བདུད་ཀྱི་སྤྱོད་ཡུལ་ཡང་དག་འདས། །བྱང་ཆུབ་སེམས་དཔའི་མཚན་མེད་སྤྱོད། །མཚན་མ་མེད་པ་གསལ་རྟོགས་པས། །
མཚན་མ་དང་ནི་མཚན་མ་མེད། །ཐམས་ཅད་ལ་ནི་རྟེན་མི་བྱེད། །བྱང་ཆུབ་སེམས་དཔའ་ཤེས་འདི་གནས། །སྤྱོད་པ་འདི་ནི་ལེགས་པར་གྲུབ། །སྤྱོད་པ་ཅུང་ཟད་མེད་པས་ན། །སྤྱོད་པ་མེད་པ་ཞེས་བརྗོད་དོ། །བྱང་ཆུབ་སེམས་དཔའ་རྣམ་དག་པ། །སྤྱོད་པ་དག་ལ་འཇིགས་པ་མེད། །ཡང་དག་

དྲན་པས་གཞོལ་བྱེད་པས། །འདི་ནི་ལེགས་པར་གནས་པ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེས་བུ་དམ་པ་རྣམས་སྤྱོད་པ་རྣམ་པ་དུ་མ་མངོན་པར་བསྒྲུབ་པར་བགྱིད་པ་གང་ལགས་
པ་འདི་ཤིན་ཏུ་ཟབ་པས་བྱིས་པ་སོ་སོའི་སྐྱེ་བོ་མཚན་མ་དང་བཅས་ཤིང་མངོན་པར་འདུ་བགྱི་བ་དང་བཅས་པའི་མངོན་པར་བསྒྲུབ་པ་དག་གིས་ཅུང་ཟད་ཙམ་ཡང་སྤྱོད་པར་མི་འགྱུར་བ་ནི་ངོ་མཚར་ཆེ་ལགས་སོ། །བཅོམ་ལྡན་འདས་ཆོས་འགའ་ཙམ་ཡང་སྤྱོད་པ་འདིའི་ནང་དུ་འཇུག་པར་འགྱུར་བ་གང་
ཡང་མ་མཆིས་པས་དེའི་སླད་དུ་སྤྱོད་པ་འདི་ནི་སྐྱེས་བུ་དམ་པ་རྣམས་ཀྱི་མཉམ་པ་ཉིད་ཀྱི་སྤྱོད་པར་གྱུར་པ་ལགས་སོ། །བཅོམ་ལྡན་འདས་སྐྱེས་བུ་དམ་པ་རྣམས་ཀྱི་སྤྱོད་པ་གང་ལགས་པ་དེ་ནི་ཚད་མ་རྣམས་ཀྱིས་མཐའ་དཔག་པར་བགྱི་བ་མ་ལགས་སོ། །དེ་ནས་དེའི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོ་བློ་གྲོས་འཕགས་པས་ཚིགས་སུ་བཅད་པ་འདི་དག་གིས་དེ་བཞིན་གཤེགས་པ་ལ་མངོན་པར་བསྟོད་པ། །དཔའ་ཆེན་ཡང་དག་སངས་རྒྱས་ཏེ། །བླ་མེད་རྐང་གཉིས་ཀུན་གྱི་གཙོ། །སྤྱོད་པ་ཟབ་མོ་རབ་བསྟན་ནས། །བྱང་ཆུབ་སེམས་དཔའ་ཕན་འདོགས་མཛད། །
བཅོམ་ལྡན་སྤོབས་པ་གྱ་ནོམ་པ། །དེ་ཡི་ཚད་ནི་དཔག་པར་དཀའ། །སྤོབས་པ་དག་ནི་མཐའ་མེད་པས། །སྐྱེས་བུ་ཆེན་པོ་མཆོག་ལགས་སོ། །ཆོས་རྗེ་གཏམ་གྱི་ཚུལ་མཁྱེན་པས། །དེས་ན་ཡང་དག་མ་ལུས་མཁྱེན། །བྱང་ཆུབ་སེམས་དཔའ་རྣམས་ལ་ནི། །བླ་མེད་སྤྱོད་པ་འདི་རབ་
བཤད། །བཅོམ་ལྡན་མགོན་པོར་འགྱུར་བ་ཡི། །སྤྱོད་པའི་ཐབས་ནི་སྟོན་མཛད་ཅིང་། །སྤྱོད་པ་དག་ལས་འདས་པས་ན། །བློ་ལྡན་གང་ཟག་གཞོལ་བར་བགྱིད། །ཀླུ་ཆེན་བསམ་གྱིས་མི་ཁྱབ་པ། །མཁྱེན་པའི་སྤྱོད་ཡུལ་མཐའ་མ་མཆིས། །ཐམས་ཅད་མཁྱེན་པ་རྐང་གཉིས་
གཙོ། །སྤྱོད་པ་དམ་པ་འདི་རབ་ཕྱེ། །བཅོམ་ལྡན་ཐུབ་པ་མི་གཡོ་བའི། །སྤྱོད་པ་དག་ནི་གང་ཕྱེ་བ། །སྤྱོད་པ་འདི་ནི་མི་སྒུལ་བས། །དེ་སླད་དཔེ་མེད་སྤྱོད་ཅེས་བགྱི། །དཔའ་ཆེན་ཐུབ་པ་ཆེན་པོ་སྟེ། །སྔོན་ཆད་བསྐལ་པ་མང་པོར་ནི། །སྤྱོད་པ་དག་ནི་གང་བསྒྲུབས་པས། །སུ་ཡང་དེར་

ནི་ཕྱིན་མི་འགྱུར། །བྱང་ཆུབ་སེམས་དཔའ་ཆོས་སྟོན་པས། །འཇིག་རྟེན་དག་ན་གནས་བགྱིད་ཀྱང་། །རྣམ་པ་ཐམས་ཅད་མཁྱེན་པ་དག །རིང་པོར་མི་ཐོགས་འཐོབ་པར་འགྱུར། །བདག་ཅག་སེམས་ཅན་སྙིང་བརྩེའི་སླད། །མ་འོངས་ཐ་མ་དུས་ཀྱི་ཚེ། །བླ་ན་མ་
མཆིས་ཆོས་འདི་ནི། །སྲུང་ཞིང་རབ་ཏུ་འཛིན་པར་བགྱིད། །བདག་ཅག་ཆོས་འདི་ཐོས་གྱུར་ནས། །མ་འོངས་ཐ་མ་དུས་ཀྱི་ཚེ། །སེམས་ཅན་རྣམས་ནི་ཀུན་གྱི་སླད། །སྤྱོད་ཅིང་རབ་ཏུ་སྟོན་པར་བགྱིད། །བདག་ཅག་ཆོས་ཀྱི་སྣང་བ་ཡིས། །མ་འོངས་ཐ་མ་དུས་ཀྱི་ཚེ། །ཆོས་
རྣམས་ཡོངས་སུ་ཚོལ་བ་ལ། །ཕན་འདོགས་ཆེན་པོ་རབ་ཏུ་བགྱིད། །བདག་ཅག་ཡི་དམ་རབ་བསྐྱེད་ནས། །མ་འོངས་ཐ་མ་དུས་ཀྱི་ཚེ། །སེམས་ཅན་རྣམས་ནི་ཀུན་གྱི་སླད། །བསྲུང་བ་འཛིན་དང་འཇོག་པར་བགྱིད། །བདག་ཅག་རྟག་ཏུ་འདི་སྙམ་དུ། །མ་འོངས་ཐ་མ་དུས་ཀྱི་ཚེ། །
སངས་རྒྱས་ཆོས་མཚོ་མཆོད་བགྱིས་ནས། །བླ་མེད་ཆོས་ནི་འཛིན་པར་སྨོན། །བདག་ཅག་ཆོས་ཀྱི་སྡེ་སྣོད་ཀྱི། །སྐྱེས་བུ་མཆོག་ནི་བགྱིས་འགྱུར་ནས། །ཆོས་ཀྱི་སྒོ་འདི་རབ་བཟུང་སྟེ། །བསྲུངས་ནས་ཡུན་རིང་གནས་པར་སྨོན། །བདག་ཅག་ཆོས་ཀྱི་ཆུ་དག་ལ། །ཡི་དམ་བླངས་
ཏེ་རབ་འཐུངས་ནས། །ཆོས་ཀྱི་སྒོ་མོ་འདི་དག་ལ། །བསྲུང་བ་དག་ནི་བགྱིད་འགྱུར་ཞིང་། །བདག་ཅག་ཆོས་འདི་ཐོས་གྱུར་ནས། །མ་འོངས་ཐ་མ་དུས་ཀྱི་ཚེ། །སྐྱེས་བུ་ཆེན་པོ་རབ་བགྱིས་ནས། །ཡང་དག་ཆོས་ནི་འཛིན་པར་ཤོག །བདག་ཅག་སྲོག་ནི་ཉམས་གྱུར་ཀྱང་། །བླ་མེད་ཆོས་
ནི་མི་སྤོང་ཞིང་། །ཡང་དག་ཆོས་ནི་འདི་དག་གི །ཆོས་འཛིན་པ་ནི་བགྱིད་པར་ཤོག །བདག་ཅག་ཆོས་འཛིན་པ་ལ་ཡང་། །ཆོས་སེམས་དག་ནི་མི་སྐྱེད་པར། །རབ་གདུང་ཟབ་མོས་འདི་ཐོས་ནས། །ངེས་པར་འདོད་དང་འཐུན་པར་ཤོག །བདག་ཅག་མ་འོངས་དུས་ཀྱི་ཚེ། །ཆོས་
རྣམས་ཡོངས་སུ་ཚོལ་བ་ལ། །ཡང་དག་ཆོས་འདི་རབ་བསྟན་ནས། །དེ་དག་ཀུན་ཀྱང་དགའ་བར་བགྱིད། །ཆོས་ཀྱི་མངའ་བདག་བསམ་མི་ཁྱབ། །སྐྱབས་ཆེན་དག་ནི་མཛད་པས་ན། །ཐུགས་རྗེས་བདག་ལ་བྱིན་བརླབས་ཏེ། །བདག་ཆོས་འཛིན་ལ་དགོངས་པར་སྨོན། །དེ་ནས་བཅོམ་

ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་ཁྱོད་ཀྱིས་མ་འོངས་པའི་དུས་ཐ་མ་ལ་ཡང་དག་པའི་ཆོས་བསྲུང་ཞིང་ཡོངས་སུ་གཟུང་བའི་ཕྱིར་གོ་ཆ་ཆེན་པོ་བགོས་པ་ནི་ཇི་ལྟར་སྔོན་གྱི་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱིས་རྒྱལ་བ་རྣམས་ལ་མཆོད་པ་དང་། རིམ་གྲོ་བྱས་ནས་དགེ་བའི་རྩ་བ་རྣམས་བསྐྱེད་དེ། ཡུན་རིང་པོར་ཚངས་པར་སྤྱོད་པ་ཡང་དག་པར་སྤྱད་ནས་གོ་ཆ་ཆེན་པོ་བགོས་ཏེ། སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྲུང་ཞིང་ཡོངས་སུ་གཟུང་བར་
འགྱུར་བ་དག་དང་བྱེ་བྲག་ཏུ་གྱུར་པ་ཅི་ཡང་མེད་པས་ལེགས་སོ་ལེགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །མ་འོངས་འཇིག་པའི་དུས་ཀྱི་ཚེ། །ཁྱེད་ཀྱིས་ཆོས་འདི་རབ་བཟུང་སྟེ། །སེམས་ཅན་རྣམས་ལ་ཕན་གདགས་ཕྱིར། །ཆོས་འདི་
རྣམ་པར་དབྱེ་བར་བྱ། །མ་འོངས་ཐ་མ་དུས་ཀྱི་ཚེ། །ཁྱེད་ཀྱིས་རྒྱལ་བའི་ཆོས་ཟུང་ཤིག །གལ་ཏེ་ཆོས་འདི་ཐོས་གྱུར་ན། །རབ་ཏུ་དགའ་བ་སྐྱེད་པར་འགྱུར། །མ་འོངས་ཐ་མ་དུས་ཀྱི་ཚེ། །ཁྱོད་ནི་ཆོས་འཛིན་པར་འགྱུར་བས། །ངས་ནི་ཆོས་ཟབ་བཤད་པར་བྱ། །ཁྱེད་ཀྱིས་དེ་བཞིན་
གཟུང་བར་གྱིས། །གསང་སྟེ་གསུངས་པའི་མདོ་སྡེ་དག །ཁྱོད་ཐོས་གྱུར་ན་ཡིད་ལ་ཟུང་། །དོན་གྱི་ཚུལ་ནི་འདི་དག་ལ། །ཐེ་ཚོམ་དག་ནི་མེད་པར་གྱིས། །རྣམ་པར་ངེས་པའི་དོན་ཟབ་དག །ཁྱོད་ཐོས་གྱུར་ན་ཡིད་ལ་ཟུང་། །སེམས་ཅན་རྣམས་ལ་ཕན་གདགས་ཕྱིར། །ཆོས་ཀྱི་གཏེར་ནི་
རབ་ཟུང་ཤིག །ཆོས་ཀྱི་སྦྱིན་པ་ཡོངས་བཏང་ནས། །སེམས་ཅན་རྣམས་ནི་ཚིམ་པར་གྱིས། །ཐོས་པར་གྱུར་ན་ལུས་དང་སེམས། །ཀུན་དུ་ཁྱབ་པར་དགའ་བར་འགྱུར། །བྱང་ཆུབ་སེམས་དཔའི་ལམ་རྣམས་དང་། །སྤྱོད་པ་རྣམས་ཀྱི་ཚུལ་དག་དང་། །དེ་དག་གི་ནི་མདོ་སྡེ་རྣམས། །
མཐར་ཕྱིན་ཡོངས་སུ་འཛིན་པའི་ཕྱིར། །ཁྱེད་ཀྱིས་སེམས་ཅན་ཚད་མེད་རྣམས། །རྒྱ་ཆེར་རབ་ཏུ་སྒྲོལ་བར་འགྱུར། །འཇིག་རྟེན་དག་ནི་ཐམས་ཅད་དུ། །ཡོངས་སུ་མི་ཟློགས་གང་ཡང་མེད། །ཁྱེད་ཀྱིས་ཆོས་འདི་གཟུང་བའི་ཕྱིར། །འཇིག་རྟེན་རྣམས་ལ་ཕན་འདོགས་པས། །བསོད་

ནམས་ཕུང་པོ་མཆོག་ཐོབ་འགྱུར། །དེ་ཕྱིར་རབ་ཏུ་གཞོལ་བར་བྱ། །ངས་འདིར་ཆོས་ནི་གང་བསྟན་པ། །ཁྱེད་ཀྱིས་ཐམས་ཅད་རབ་བཟུང་སྟེ། །མ་འོངས་ཐ་མ་དུས་ཀྱི་ཚེ། །བློ་ལྡན་རྣམས་ལ་བཤད་པར་བྱ། །ད་ལྟར་མ་འོངས་དུས་ཀྱི་ཚེ། །ཆོས་འདི་གང་ཞིག་འཛིན་བྱེད་
པ། །དེས་ནི་སངས་རྒྱས་སྟོང་རྣམས་ཀྱི། །ཡང་དག་ཆོས་ནི་འཛིན་པར་འགྱུར། །སེམས་ཅན་རྣམས་ལ་ཕན་གདགས་ཕྱིར། །ཆོས་ཀྱི་སྒོ་འདི་བསྲུང་བར་བྱ། །མ་འོངས་ཐ་མ་དུས་ཀྱི་ཚེ། །ཕན་པ་ཆེན་པོ་བྱེད་པར་འགྱུར། །གལ་ཏེ་མ་འོངས་དུས་ཀྱི་ཚེ། །གང་ཞིག་ཆོས་འདི་འཛིན་བྱེད་
པ། །དེ་ནི་སངས་རྒྱས་གཅིག་འགའ་ལས། །བསྙེན་ཅིང་རིམ་གྲོ་བྱས་པ་མིན། །གལ་ཏེ་མ་འོངས་དུས་ཀྱི་ཚེ། །གང་ཞིག་ཆོས་འདི་སྲུང་བྱེད་པས། །དེས་ནི་ཆོས་འདི་ལེགས་སྟོན་པས། །མང་པོ་རིམ་གྲོ་བྱས་པ་ཡིན། །གང་ཞིག་ཆོས་ནི་འདི་དག་ལ། །ཐེ་ཚོམ་ཅུང་ཟད་མི་སྐྱེད་ཅིང་། །
མ་འོངས་ཆོས་ནི་སྲུང་བྱེད་པ། །དེ་ནི་བློ་དང་ལྡན་པ་ཡིན། །གོ་ཆ་དཔག་མེད་བགོས་ནས་ནི། །རྒོལ་བའི་དགྲ་ལས་གང་རྒྱལ་བ། །མ་འོངས་ཐ་མ་དུས་ཀྱི་ཚེ། །ཡང་དག་ཆོས་འདི་འཛིན་པར་འགྱུར། །སངས་རྒྱས་ཡང་དག་ཆོས་འདི་ལ། །ཐེ་ཚོམ་དྲ་བ་རབ་བསལ་ཏེ། །ཆོས་ཐོས་གང་ཞིག་
འཇིགས་མེད་པ། །ཡང་དག་ཆོས་འདི་འཛིན་པར་འགྱུར། །དེ་ལྟ་བས་ན་བློ་གྲོས་འཕགས་པ་རིགས་ཀྱི་བུ་འམ་རིགས་ཀྱི་བུ་མོ་གང་དག་ནན་ཏན་གྱིས་ཡོན་ཏན་ཁྱད་པར་དུ་འཕགས་པ་ཆེན་པོ་ཡོངས་སུ་ཚོལ་བ་རྣམས་ཀྱིས་མ་འོངས་པའི་དུས་ཐ་མའི་ཚེ་ཆོས་ཟབ་མོའི་ཕྱིར་གོ་ཆ་བགོས་ནས་
ཡོངས་སུ་གཟུང་བར་བྱ། །བཀླག་པར་བྱ། ཁ་ཏོན་དུ་གདོན་པར་བྱ། གཞན་དག་ལ་ཡང་དེའི་དོན་ཡང་དག་པར་རབ་ཏུ་བསྟན་པར་བྱའོ། །གཞན་ཡང་བློ་གྲོས་འཕགས་པ་ངས་མངོན་པར་དྲན་ཏེ། སྔོན་འདས་པའི་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཀུན་དུ་སྣང་མཛད་ཅེས་བྱ་བ་ཞིག་

འཇིག་རྟེན་དུ་བྱུང་སྟེ། བསྐལ་པའི་མིང་ནི་ཡང་དག་པར་རྒྱལ་བ་ཞེས་བྱའོ། །འཇིག་རྟེན་གྱི་ཁམས་ནི་དྲི་མ་མེད་པ་ཞེས་བྱ་སྟེ། ས་གཞི་ཡངས་ལ་ཤིན་ཏུ་མཛེས་པ་རིན་པོ་ཆེ་སྣ་བདུན་ལས་མངོན་པར་གྲུབ་པའོ། །དེའི་ཚེ་གླིང་ཆེན་པོ་དེ་ཆུ་ཞེང་འདྲ་སྟེ། དཔག་ཚད་བདུན་ཁྲི་བདུན་ཁྲི་
ཡོད་དོ། །དེ་ན་ཡང་གྲོང་ཁྱེར་ཆེན་པོ་དྲུག་ཁྲི་དྲུག་ཁྲི་ཡོད་དེ། གྲོང་ཁྱེར་རེ་རེའི་ཚད་ཀྱང་ཆུ་ཞེང་འདྲ་སྟེ། དཔག་ཚད་བཅུ་དྲུག་བཅུ་དྲུག་ཡོད་དོ། །དེ་དག་ཀྱང་མཐའ་མ་ར་བས་འཁོར་བར་བསྐོར་ཅིང་། བ་གམ་གྱིས་བརྒྱན་པ། སྒོ་རབ་ཏུ་མཛེས་ཤིང་མཐོང་ན་དགའ་བ་དང་། ཤིང་
ཏ་ལ་མཆོག་རྣམས་ཕྲེང་དུ་དཀྲིགས་པས་བསྐོར་བ། སྐྱེད་མོས་ཚལ་བརྒྱ་སྟོང་དུ་མས་རབ་ཏུ་བརྒྱན་པ། སྐྱེད་མོས་ཚལ་ཀུན་དུ་ཁྲི་དང་སྟན་ལེགས་པར་བཤམས་པ། རྫིང་དང་། རྫིང་བུ་དང་། འབབ་ཆུ་རྣམས་རབ་ཏུ་གང་ཞིང་འགྲམ་གྱི་སྟེགས་དང་། ལམ་རྣམས་རིན་པོ་ཆེ་སྣ་ཚོགས་
གཅལ་དུ་བཀྲམ་པ། མཐའ་མའི་ས་གཞི་མཉམ་པ་འབྱུང་ཞིང་འཇུག་པའི་ཚེ་ཉམ་ང་བ་མེད་པ། །འགྲམ་གྱི་འོབས་རྣམས་སུ་ཙན་དན་དང་། ཏ་མ་ལ་ལ་སོགས་པ་སྤོས་སྣ་ཚོགས་ཀྱི་ལྗོན་ཤིང་རྣམས་ཕྲེང་དུ་དཀྲིགས་པར་གྱུར་ཏོ། །གྲོང་ཁྱེར་རེ་རེ་ན་ཡང་མི་བྱེ་བ་སྟོང་ཕྲག་བཅུ་བཅུ་
གནས་ཏེ། སེམས་ཅན་དེ་དག་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་པར་གྱུར་བའི་ཕྱིར། དེ་ལྟ་བུའི་བདེ་བ་རབ་ཏུ་མྱོང་པར་གྱུར་ཏོ། །དེའི་ཚེ་དེ་བཞིན་གཤེགས་པ་དེ་བསྐལ་པ་དང་པོ་ནས་བསྐལ་པ་ཉིས་བརྒྱ་འདས་ནས་དེར་བྱུང་བས་དེའི་ཕྱིར་བསྐལ་པ་
དེའི་མིང་ཡང་ཡང་དག་པར་རྒྱལ་བ་ཞེས་བྱའོ། །བསྐལ་པ་དེ་ལ་དེ་བཞིན་གཤེགས་པ་ལྔ་བརྒྱ་རིམ་བཞིན་དུ་བྱུང་སྟེ། དེ་རེ་རེའི་ཞིང་ཡང་རིན་པོ་ཆེ་སྣ་བདུན་ལས་མངོན་པར་གྲུབ་པ་ཤ་སྟག་གོ །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་པའི་འོག་ཏུ་ཀུན་ཀྱང་འདྲ་
སྟེ། ཡང་དག་པའི་ཆོས་ནི་ལོ་ཁྲིའི་བར་དུ་གནས་པར་གྱུར་ཏོ། །དེ་ལྟར་དེ་བཞིན་གཤེགས་པ་ལྔ་བརྒྱ་པོ་དག་འཇིག་རྟེན་དུ་བྱུང་བ་དེ་དག་ལ་ཡང་ཉན་ཐོས་དང་། བྱང་ཆུབ་སེམས་དཔའི་འཁོར་འདུས་པ་རབ་ཏུ་མང་སྟེ། འདུས་པ་རེ་རེའི་ཚེ་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་

ཚད་མེད་པ་སྙེད་ཐེག་པ་གཅིག་གི་ལམ་དུ་ཞུགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་བསྐལ་པ་དེ་ལ་འཁོར་ལོས་སྒྱུར་བའི་རྒྱལ་པོ་དཔའ་བོའི་སྡེ་ཞེས་བྱ་བ་རིན་པོ་ཆེ་བདུན་དང་ལྡན་པ། གླིང་བཞི་ལ་དབང་བྱེད་པ་ཞིག་བྱུང་ངོ་། དེའི་ཚེ་འཛམ་
བུའི་གླིང་ན་གྲོང་ཁྱེར་ཆེན་པོ་དཔག་ཚད་བཅུ་དྲུག་གིས་འཁོར་བ་ཞིག་ཡོད་དེ། མི་བྱེ་བ་ཕྲག་བརྒྱད་ཁྲི་གནས་པ། རབ་ཏུ་བདེ་ཞིང་དགའ་བ། འབྱོར་པ་རྒྱས་པ། འོབས་རིམ་པ་བདུན་དང་། ལྗོན་ཤིང་དཀྲིགས་པ་རིམ་པ་བདུན་དང་། ལམ་སྲང་རིམ་པ་བདུན་དང་། དྲིལ་བུའི་དྲ་བ་རིམ་པ་བདུན་
དང་། སྐྱེད་མོས་ཚལ་སྟོང་གིས་གྲོང་ཁྱེར་དེ་ཡོངས་སུ་བསྐོར་ཅིང་རབ་ཏུ་བརྒྱན་པར་གྱུར་ཏོ། །སྐྱེད་མོས་ཚལ་རེ་རེའི་ཚད་ཀྱང་ཆུ་ཞེང་འདྲ་སྟེ། དཔག་ཚད་ཉི་ཤུ་ཉི་ཤུ་ཡོད་དོ། །དེ་རེ་རེ་ཡང་ར་བ་རིམ་བདུན་དང་། དྲ་བ་རིམ་བདུན་དང་། བཀོད་པ་རྣམ་པ་སྣ་ཚོགས་དང་། རིན་པོ་ཆེ་
སྣ་ཚོགས་ཤིན་ཏུ་གྱ་ནོམ་པ་དག་གིས་རབ་ཏུ་མཛེས་པར་བྱས་པས་དཔེར་ན་ལྷ་རྣམས་ཀྱི་སྐྱེད་མོས་ཚལ་ཇི་ལྟ་བ་བཞིན་ནོ། །དེ་དག་རེ་རེ་ལ་ཡང་རྫིང་དང་རྫིང་བུ་རིན་པོ་ཆེ་བཻ་དཱུརྱས་འོག་གཞི་དང་འགྲམ་བྱས་པ། རྡོའི་སྙིང་པོ་དང་རིན་པོ་ཆེ་སྣ་ཚོགས་ཀྱིས་ལམ་སྟེགས་བྱས་ཤིང་གཅལ་དུ་
བཀྲམ་པ། རིན་པོ་ཆེའི་ལྗོན་ཤིང་མེ་ཏོག་སྣ་ཚོགས་རབ་ཏུ་རྒྱས་པ་ཕྲེང་དུ་དཀྲིགས་པ་བརྒྱ་བརྒྱ་ཡོད་དོ། །གྲོང་ཁྱེར་ཆེན་པོ་དེའི་ནང་ན་རྒྱལ་པོ་དེའི་ཕོ་བྲང་དཔག་ཚད་བདུན་གྱིས་འཁོར་བ་ཡོད་དེ་གསེར་དང་རིན་པོ་ཆེ་སྣ་ཚོགས་ལས་མངོན་པར་གྲུབ་པ། མཐའ་མ་རིན་པོ་ཆེས་
རབ་ཏུ་བརྒྱན་པ། བཻ་དཱུརྱ་དང་། ཡིད་བཞིན་གྱི་ནོར་བུ་རིན་པོ་ཆེའི་དྲ་བས་གཡོགས་པ། ཤིང་ཏ་ལ་རྣམས་ཀྱིས་རབ་ཏུ་མཛེས་པར་བརྒྱན་པ། རྫིང་བུ་བཅུ་གཉིས་ཀྱིས་རབ་ཏུ་བསྐོར་བ། འོག་གཞི་གསེར་ཡང་དག་པས་གཅལ་དུ་བཀྲམ་པ། བཻ་དཱུརྱ་དང་རིན་པོ་ཆེ་སྣ་ཚོགས་ཀྱི་ཟམ་
པ་བཏགས་པ། གསེར་ཤིན་ཏུ་གྱ་ནོམ་པ་འབའ་ཞིག་གིས་ལམ་སྟེགས་དང་ལམ་བྱས་པར་གྱུར་ཏེ། རྫིང་བུ་དེ་དག་གི་ནང་ན་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དཀར་པོ་རབ་ཏུ་རྒྱས་པ་དག་གིས་གང་བར་གྱུར་ཏོ། །འཁོར་ལོས་སྒྱུར་བའི་རྒྱལ་པོ་དེ་ལ་བཙུན་མོ་ནི་ཉིས་

སྟོང་ཡོད་དོ། །བུ་ནི་དྲུག་ཁྲི་ཡོད་དེ། འཁོར་རྣམས་དང་སྐྱེད་མོས་ཚལ་དེ་དག་ཏུ་འདོད་པ་ལྔའི་བདེ་བ་མྱོང་ཞིང་རབ་ཏུ་རྩེ་བ་ལས་རྒྱལ་པོ་དེ་འདི་སྙམ་དུ་འདོད་པ་རྣམས་ནི་མི་རྟག་ཅིང་རིང་པོར་མི་ཐོགས་པར་རྣམ་པར་འགྱུར་བ་ཡིན་པས་བདག་གིས་གདོན་མི་ཟ་བར་སེམས་རྩེ་གཅིག་ཏུ་སངས་རྒྱས་
ཀྱི་ཆོས་ཡོངས་སུ་བཙལ་བར་བྱའོ། །གལ་ཏེ་ཆོས་ཐོས་ནས་བསྟན་པ་ཇི་ལྟ་བ་བཞིན་དུ་བསྒྲུབ་པར་གྱུར་ན་བདག་ལ་ཡུན་རིང་པོའི་ཕན་པ་དང་། བདེ་བ་བྱེད་པར་འགྱུར་རོ། །སྙམ་དུ་བསམས་མ་ཐག་ཏུ་ནམ་མཁའ་ལས་ལྷ་ཞིག་གིས་རྒྱལ་པོ་དེ་ལ་སྨྲས་པ། ཀྱེ་སྐྱེས་བུ་ཆེན་པོ་
ལེགས་སོ་ལེགས་སོ། །ད་ལྟར་དེ་བཞིན་གཤེགས་པ་ཀུན་དུ་སྣང་མཛད་ཅེས་བྱ་བ་འཇིག་རྟེན་དུ་བྱུང་སྟེ། ཐོག་མར་དགེ་བ། བར་དུ་དགེ་བ། ཐ་མར་དགེ་བའི་ཆོས་ཡང་དག་པར་རབ་ཏུ་སྟོན་པར་མཛད་ཀྱིས། རྒྱལ་པོ་མྱུར་དུ་དེ་བཞིན་གཤེགས་པ་དེའི་སྤྱན་སྔར་སོང་ལ་ཡང་དག་པའི་ཆོས་
ཞུས་ཤིག་དང་རྒྱལ་པོས་ཡུན་རིང་པོའི་ཕན་པ་དང་། བདེ་བ་ཡང་འཐོབ་པར་འགྱུར་ལ། སངས་རྒྱས་ཀྱི་ཆོས་མངོན་པར་སྒྲུབ་ཅིང་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པར་ཡང་འགྱུར་རོ། །རྒྱལ་པོ་དེ་ལྷས་དེ་སྐད་སྨྲས་པ་ཐོས་པ་དང་། རབ་ཏུ་དགའ་བར་གྱུར་ནས་གཡོག་
འཁོར་རྣམས་ཀྱིས་བསྐོར་ཏེ། དེ་བཞིན་གཤེགས་པ་ཀུན་ཏུ་སྣང་མཛད་ག་ལ་བ་དེ་ལོགས་སུ་དོང་ནས་ཞབས་ལ་མགོ་བོས་གཏུགས་ཏེ་ཕྱག་བྱས་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཇི་ལྟ་བུ་ཞིག་གིས་ཆོས་རྣམས་ཀྱི་ཐབས་མཁས་པ་ཡོངས་
སུ་སྡུད་པ་དང་། ཚངས་པར་སྤྱོད་པ་མྱུར་དུ་ཡོངས་སུ་རྫོགས་པར་བགྱིས་པར་འགྱུར། བདག་དེ་བཞིན་དུ་བསྒྲུབ་པར་འཚལ་ལོ། །དེ་སྐད་ཅེས་གསོལ་པ་དང་། དེའི་ཚེ་དེ་བཞིན་གཤེགས་པ་དེས་ཀྱང་རྒྱ་ཆེར་རྣམ་པར་ཕྱེ་སྟེ་རབ་ཏུ་བསྟན་ཏོ། །རྒྱལ་པོ་དེས་ཆོས་ཐོས་པས་འཁོར་དང་བཅས་ཏེ།
བདེ་བའི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་ཀུན་དུ་སྣང་མཛད་དང་། ཉན་ཐོས་ཀྱི་དགེ་འདུན་རྣམས་ལ་ལོ་ཉི་ཁྲིའི་བར་དུ་གུས་པས་རིམ་གྲོ་དང་། མཆོད་པ་བྱས་སོ། །དེ་བཞིན་གཤེགས་པ་ཀུན་དུ་སྣང་མཛད་ཀྱི་གསུང་རབ་ལས་རབ་ཏུ་བྱུང་ནས་ཡང་དག་པའི་ཆོས་ཐོས་ཏེ།

མངོན་པར་བསྒྲུབ་པའི་ཕྱིར་དེའི་ཚེ་ཆོས་ཡང་དག་པར་བླངས་པའི་དགེ་བའི་རྩ་བ་དང་། ཆོས་ཡང་དག་པར་བཟུང་བའི་དགེ་བའི་རྩ་བ་དང་། ཆོས་ཡང་དག་པར་བསྟན་པའི་དགེ་བའི་རྩ་བ་ཐོབ་པར་གྱུར་པས་ཆོས་ཇི་སྙེད་ཐོས་པ་རྣམས་རབ་ཏུ་སེམས་ཤིང་མི་བརྗེད་པ་དང་།
ཡོན་ཏན་ཚད་མེད་པ་རྣམས་ནན་ཏན་བརྩོན་འགྲུས་ཀྱིས་མངོན་པར་བསྒྲུབས་པར་གྱུར་ཏེ། དེ་བཞིན་གཤེགས་པས་དུས་གསུམ་དུ་གསུངས་པའི་ཡང་དག་པའི་ཆོས་རྣམས་སེམས་ཅན་རྣམས་ལ་རྣམ་པ་སྣ་ཚོགས་སུ་རབ་ཏུ་ཕྱེ་སྟེ། སྟོན་པར་གྱུར་ཅིག་ཅེས་ཀྱང་སྨོན་ལམ་བཏབ་བོ། །
དེ་ལྟར་སྨོན་ལམ་བཏབ་ནས་ཀྱང་བསྐལ་པ་ཡང་དག་པར་རྒྱལ་བ་ལས་བྱུང་བའི་དེ་བཞིན་གཤེགས་པ་ཇི་སྙེད་པ་དེ་དག་རེ་རེ་ལ་ཡང་རིམ་གྲོ་དང་། མཆོད་པ་བྱས་ནས་དེ་བཞིན་གཤེགས་པ་དེ་དག་གིས་དུས་དང་པོར་གསུངས་པའི་ཆོས་ཡང་དག་པར་མངོན་སུམ་དུ་གསུངས་པ་དང་། དུས་
བར་མར་གསུངས་པའི་ཆོས་ཡང་དག་པ་དང་། དུས་ཐ་མར་གསུངས་པའི་ཆོས་ཡང་དག་པ་རྣམས་ཀྱང་མ་ལུས་པར་ཡང་དག་པར་བཟུང་ནས་སེམས་ཅན་བྱེ་བ་ཁྲག་ཁྲིག་ཕྲག་བཞི་ཁྲི་བརྒྱ་སྟོང་སྙེད་ཡོངས་སུ་སྨིན་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་
རབ་ཏུ་གཞོལ་བར་བྱས་སོ། །སེམས་ཅན་ཚད་མེད་པ་སྙེད་ཐབས་མཁས་པས་བཏུལ་ཏེ། ཉན་ཐོས་དང་རང་སངས་རྒྱས་ཀྱི་ཐེག་པ་ལ་རབ་ཏུ་བཀོད་དོ། །བསྐལ་པ་དེ་ལས་ནང་གི་ཐ་མར་དེ་བཞིན་གཤེགས་པ་གློག་གི་འོད་ཅེས་བྱ་བ་བྱུང་སྟེ། དགེ་སློང་དཔའ་བོའི་སྡེས་དེ་བཞིན་
གཤེགས་པ་གློག་གི་འོད་ལས་ཆོས་ཡང་དག་པར་གསུངས་པ་ཐོས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་བཞིན་གཤེགས་པ་གློག་གི་འོད་ཀྱིས་ཀྱང་དཔའ་བོའི་སྡེ་ཁྱོད་མ་འོངས་པའི་དུས་ན་སངས་རྒྱས་བཅོམ་ལྡན་འདས་བརྒྱ་སྟོང་ཚད་མེད་པ་སྙེད་ལ་རིམ་གྲོ་དང་། མཆོད་
པ་བྱས་ནས་དེ་བཞིན་གཤེགས་པས་དུས་གསུམ་དུ་གསུངས་པའི་ཆོས་ཡང་དག་པ་རྣམས་ཡོངས་སུ་བཟུང་སྟེ། སེམས་ཅན་ཚད་མེད་གྲངས་མེད་པ་སྙེད་ལ་ཕན་གདགས་པ་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་

བཀོད་པ་དང་། སེམས་ཅན་ཚད་མེད་པ་རྣམས་ཉན་ཐོས་ཀྱི་ཐེག་པ་ལ་རབ་ཏུ་བཀོད་དེ། དེའི་འོག་ཏུ་བསྐལ་པ་གྲངས་མེད་པ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་བརྩོན་འགྲུས་དཔག་ཏུ་མེད་པའི་
འོད་ཟེར་ཡོན་ཏན་རྣམ་པར་རྒྱལ་བའི་རྒྱལ་པོ་ཞེས་བྱ་བར་འགྱུར་རོ། །ཞེས་ལུང་བསྟན་ཏེ། སངས་རྒྱས་དེའི་ཞིང་ནི་རྣམ་པར་དག་པའི་ཡོན་ཏན་ཚད་མེད་པ་བསགས་པ་ལས་མངོན་པར་གྲུབ་པས་མི་རྣམས་ཀྱིས་རབ་ཏུ་གང་ཞིང་བདེ་བ་དང་འབྱོར་བ་རབ་ཏུ་ལྡན་པ་ཉན་ཐོས་དང་བྱང་ཆུབ་སེམས་
དཔའི་ཚོགས་རབ་ཏུ་མང་པོར་གྱུར་ཏོ། །དེ་བཞིན་གཤེགས་པ་དེའི་སྐུ་ཚེའི་ཚད་ནི་བསྐལ་པ་ཆུང་ངུ་ལྔ་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་བསྐལ་པ་ཆུང་ངུ་ལྔའི་བར་དུ་གནས་པར་གྱུར་ཏེ། བསྟན་པ་གནས་པའི་ཆོས་ཀྱང་ལྷ་དང་། མི་རྣམས་
ཀྱིས་ཡོངས་སུ་བཟུང་བར་གྱུར་ཏོ། །རིང་བསྲེལ་གྱི་མཆོད་རྟེན་ཡང་ཞིང་ཁམས་ཀུན་དུ་གང་བར་གྱུར་ཏོ། །དེ་ལྟ་བས་ན་བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤིན་ཏུ་རྣམ་པར་དག་པའི་ཆོས་ཟབ་མོ་འདི་ལ་གུས་པས་ཡང་དག་པར་བཟུང་ཞིང་བསྒོམས་ནས་
ཆོས་ཀྱི་རྒྱན་གྱི་ཡོ་བྱད་ཀྱིས་ལུས་རབ་ཏུ་བརྒྱན་པར་བྱའོ་ཆོས་ཀྱི་རབ་ཏུ་བརྒྱན་པར་གྱུར་ན་དེ་བཞིན་གཤེགས་པའི་སྐུ་རྡོ་རྗེ་ལས་མངོན་པར་གྲུབ་པ་མཐུ་བོ་ཆེ་ཤིན་ཏུ་བརྟན་པ་འཐོབ་པར་འགྱུར་ཏེ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་
ཐམས་ཅད་ལུས་ཀྱི་མཐུ་སྟོབས་གཏུགས་ཏེ། ཤིན་ཏུ་བརྟན་པའི་སྐུ་དེ་རྣམ་པར་གཞིག་པར་འདོད་ན་ཡང་གང་གིས་ཀྱང་རྣམ་པར་གཞིག་པར་མི་ནུས་སོ། །ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་འཁོར་གྱི་ནང་དུ་ཆོས་ཀྱི་སྣང་བ་རབ་ཏུ་བསྟན་ན་ཡང་གང་གིས་ཀྱང་བརྒལ་
དུ་མེད་པར་འགྱུར་རོ། །སེམས་ཅན་གང་གིས་ཆོས་ཟབ་མོ་འདི་ལེན་ཏམ། ཀློག་གམ་ཁ་ཏོན་དུ་འདོན་ཏམ། ནན་ཏན་བརྩོན་འགྲུས་ཀྱིས་སྒྲུབ་པར་བྱེད་ན་ཇི་ལྟར་མོས་པ་བཞིན་དུ་རིགས་ཤིན་ཏུ་མཐོ་བའི་རིགས་སུ་སྐྱེ་བར་འགྱུར་བ་ནས་བྱང་ཆུབ་ཀྱི་ཤིང་དྲུང་དུ་མངོན་པར་རྫོགས་པར་

སངས་རྒྱས་པའི་བར་དུ་ཡང་ཐོབ་ནས་གྲགས་པ་ཕུན་སུམ་ཚོགས་པ་དང་། འཇིག་རྟེན་གྱི་ཁམས་ཁྱད་པར་དུ་འཕགས་ཤིང་ལམ་ཐ་དད་པ་དང་། འདྲེས་པ་མེད་པ་དང་། བྲམ་ཟེ་དང་མུ་སྟེགས་ཅན་གྱི་མིང་ཡང་མེད་ན་ལྟ་བ་ངན་པས་ལོག་པར་ཡོངས་སུ་ཚོལ་བ་ལྟ་སྨོས་ཀྱང་ཅི་
དགོས་པ་དང་། མི་དགེ་བའི་ཆོས་རྣམས་ཀྱི་མིང་ཡང་མི་ཐོས་ན་མི་དགེ་བའི་རྩ་བ་མངོན་པར་བསྒྲུབ་པ་ལྟ་ཡོད་པར་ག་ལ་འགྱུར་བ་དང་། ལག་པ་དང་། རྐང་པའི་སོར་མོ་ལས་འོད་ཟེར་བཀྱེ་ནས་འཇིག་རྟེན་གྱི་ཁམས་ཚད་མེད་པ་རྣམས་སྣང་བར་བྱེད་དེ། སེམས་ཅན་གང་གི་ལུས་ལ་རེག་
པ་དེ་དག་ཐམས་ཅད་བདེ་བ་ཐོབ་པར་བྱེད་པ་དང་། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་སུམ་དུ་བྱེད་པར་འགྱུར་རོ། །བློ་གྲོས་འཕགས་པ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ངའི་བསྟན་པ་ལ་ནན་ཏན་གྱིས་སྒྲུབ་པར་བྱེད་པ་དེ་དག་ནི་ཡོན་ཏན་
ཁྱད་པར་དུ་འཕགས་པ་དེ་ལྟ་བུ་དག་འཐོབ་པར་འགྱུར་ཏེ། གལ་ཏེ་ངས་ཡོངས་སུ་རྫོགས་པར་བརྗོད་པར་གྱུར་ན་ནམས་ཀྱང་མཐར་ཐུག་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །
བློ་གྲོས་འཕགས་པ་གང་དག་བྱང་ཆུབ་སེམས་དཔའི་ལམ་འདི་ལ་གནས་པ་དེ་དག་གིས་ནི་རྣམ་པར་དག་པའི་ཆོས་ཟབ་མོ་འདི་ནན་ཏན་གྱིས་མངོན་པར་བསྒྲུབས་ནས་སྟོང་པ་ཉིད་དང་རྗེས་སུ་འཐུན་པ་དང་། རབ་ཏུ་དབེན་པ་དང་རྗེས་སུ་འཐུན་པར་གྱུར་ན་ཆོས་ཀྱི་སྣང་བ་རབ་ཏུ་འཐོབ་པར་འགྱུར་
རོ། །ཆོས་ཀྱི་སྣང་བའི་དབང་གིས་ནི་ཆོས་ཐམས་ཅད་ཀྱི་ངོ་བོ་ཉིད་ཐ་དད་པ་མེད་པ་མཐོང་བར་འགྱུར་རོ། །ངོ་བོ་ཉིད་ཐ་དད་པ་མེད་པ་མཐོང་བའི་ཕྱིར་ནི་ལྟ་བ་རྣམ་པར་དག་པར་འགྱུར་རོ། །ལྟ་བ་རྣམ་པར་དག་པའི་ཕྱིར་ནི་ཆོས་སུ་ལྟ་བ་ཡང་མེད་ལ། ཆོས་གང་ཡང་རང་བཞིན་དང་བྲལ་བར་ལྟ་བ་
ཡང་མེད་དོ། །ཆོས་སུ་ལྟ་བ་རྣམ་པར་དག་པས་རྣམ་པར་དག་པ་ཡང་མེད་དོ། །རྣམ་པར་དག་པ་ཡང་མེད་པ་གང་ཡིན་པ་དེ་ལ་ནི་རྣམ་པར་དག་པའི་ལུས་ཀྱང་མེད་པས་རྣམ་པར་དག་པའི་ཡེ་ཤེས་ཀྱི་སྤྱོད་ཡུལ་ཐོབ་ནས་ཆོས་ཀྱི་དབྱིངས་རྣམས་དབྱིངས་ཀྱང་མ་ཡིན། དབྱིངས་

མ་ཡིན་པ་ཡང་མ་ཡིན་པར་ཡང་ཡང་དག་པར་འཐོབ་པར་འགྱུར་རོ། །དབྱིངས་སུ་ལྟ་བ་རྣམ་པར་དག་པར་གྱུར་པས་དབྱིངས་རྣམ་པ་སྣ་ཚོགས་ཀྱི་ངོ་བོ་ཉིད་དུ་འདུ་ཤེས་པ་ཡོངས་སུ་སྤོང་བར་འགྱུར་རོ། །ངོ་བོ་ཉིད་དུ་འདུ་ཤེས་པ་ཡོངས་སུ་སྤངས་པའི་ཕྱིར་དབྱིངས་ཀྱི་ཚུལ་གྱི་གསང་ཚིག་གང་ཡིན་
པ་རྟོགས་པར་གྱུར་ནས་ཆོས་རྣམས་དབྱིངས་མ་ཡིན་པར་ཡོངས་སུ་ཤེས་པར་གྱུར་ཏེ། འདི་ལྟར་ཆོས་ཀྱི་དབྱིངས་ལ་ཐ་དད་པ་མེད་པར་མཐོང་བའི་ཕྱིར་དང་། རྣམ་པར་འཇིག་པ་མེད་པར་མཐོང་བའི་ཕྱིར་དང་། འགྱུར་བ་མེད་པར་མཐོང་བའི་ཕྱིར་ཆོས་ཀྱི་དབྱིངས་ཀྱི་ཚུལ་ཐམས་ཅད་
ལ་ཐབས་མཁས་པ་རབ་ཏུ་འཐོབ་པར་འགྱུར་རོ། །ཐབས་མཁས་པའི་དབང་གིས་ནི། ཆོས་ཀྱི་དབྱིངས་ཀྱི་ཚུལ་ཡོངས་སུ་ཤེས་ཤིང་ཏིང་ངེ་འཛིན་གྱི་སྟོབས་ཀྱིས་ཆོས་ཀྱི་དབྱིངས་རྣམས་ཀྱི་བྱེ་བྲག་གི་ཚུལ་གང་ཡིན་པ་དེ་དག་ལ་ཡང་རྗེས་སུ་འཇུག་པར་འགྱུར་རོ། །སྤྱོད་པ་འདི་ལ་གནས་པའི་ཚེ་
ཆོས་ཐམས་ཅད་ལ་ཐབས་མཁས་པས་ཆོས་ཐམས་ཅད་ལ་གནས་པ་མེད་པ་དང་། མངོན་པར་ཞེན་པ་མེད་པར་འགྱུར་རོ། །མངོན་པར་ཞེན་པ་མེད་པའི་ཕྱིར་ཆོས་ཀྱི་དབྱིངས་ཀྱི་ཚུལ་ཐམས་ཅད་ཅི་རིགས་པར་རྣམ་པ་སྣ་ཚོགས་སུ་རབ་ཏུ་ཕྱེ་ནས་སྟོན་པར་འགྱུར་རོ། །ཏིང་ངེ་འཛིན་གྱི་
མཐུའི་དབང་གིས་གཞན་ཡང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ལ་རྣམ་པར་རྩེན་པའི་རྫུ་འཕྲུལ་གྱིས་གཅིག་ལས་མང་པོར་སྒྱུར་བ་དང་། མང་པོ་ལས་གཅིག་ཏུ་སྒྱུར་བ་དང་། རི་དང་བྲག་དང་། རྩིག་པ་དག་ལ་ཐོགས་པ་མེད་པར་འགྲོ་
བ་དང་། འཕུར་བ་ལ་དབང་འཐོབ་པར་འགྱུར་རོ། །ཁམས་བཞི་པོ་དག་འདུས་པ་ལ་རབ་ཏུ་མཁས་པར་འགྱུར་རོ། །ཁམས་ལ་མི་གནས་པར་ཁམས་ཐམས་ཅད་རབ་ཏུ་ཤེས་པར་འགྱུར་རོ། །ནམ་མཁའི་ཁམས་དང་གཅིག་ཏུ་གྱུར་ཀྱང་ནམ་མཁའི་ཁམས་ལ་མངོན་པར་
ཞེན་པ་དང་། ཐོགས་པ་ཅི་ཡང་མེད་དོ། །ཁམས་འདུས་པ་ལ་རབ་ཏུ་མཁས་པར་གྱུར་པའི་ཕྱིར་ཁམས་ཐམས་ཅད་ཐབས་མཁས་པས་མངོན་པར་སྒྲུབ་པར་བྱེད་དོ། །མངོན་པར་བསྒྲུབས་པའི་ཕྱིར་ཆུའི་ཁམས་རབ་ཏུ་རྟོགས་པར་གྱུར་ནས་ཆུའི་ཁམས་ལས་དུད་པ་འཐུལ་བ་

དང་། མེ་རབ་ཏུ་འབར་བ་དང་། དུད་པ་འཐུལ་བ་དང་། མེ་རབ་ཏུ་འབར་བ་གཉིས་ཀ་སྟོན་པར་བྱེད་པས་རྣམ་པ་སྣ་ཚོགས་སུ་སྟོན་པའི་བར་དུ་བྱས་ནས་སེམས་ཅན་རྣམས་ལ་ཕན་གདགས་པ་ཆེན་པོ་བྱེད་དོ། །ཆོས་ཀྱི་དབྱིངས་ཀྱི་ཚུལ་གྱི་ཐབས་མཁས་པ་ལ་རབ་
ཏུ་གནས་ནས་གཡོ་བ་མེད་པར་ཇི་ལྟར་མོས་པ་བཞིན་དུ་སངས་རྒྱས་ཀྱི་ཞིང་གང་དུ་མོས་པ་དེ་བཞིན་དུ་སྐྱེ་བར་འགྱུར་བས་སྲིད་པ་རྣམས་སུ་མངལ་དུ་སྐྱེ་བའི་ལུས་བཟློག་སྟེ། སྤྲུལ་པས་སྐྱེ་བའི་ལུས་བླངས་ནས་རྟག་ཏུ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་
བཞིན་གཤེགས་པ་རྣམས་མཐོང་ཞིང་དེ་བཞིན་གཤེགས་པ་དེ་དག་ཀྱང་མཚན་ནི་འདི་ལྟ་བུའོ། །རིགས་ནི་འདི་ལྟ་བུའོ། །འཁོར་འདུས་པ་ནི་འདི་ལྟ་བུའོ། །ཆོས་སྟོན་པ་ནི་འདི་ལྟ་བུའོ། །ཞེས་མ་འདྲེས་པར་རབ་ཏུ་ཤེས་སོ། །དེ་ནས་འཁོར་དེ་ཉིད་དུ་གཞན་ཡང་བྱང་ཆུབ་
སེམས་དཔའ་སེམས་དཔའ་ཆེན་པོ་དཔག་ཏུ་མེད་པའི་རྒྱལ་བ་ཞེས་བྱ་བ་འདུས་པར་གྱུར་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཇི་ལྟ་བུ་ཞིག་ལ་གནས་པར་གྱུར་ན་བཅོམ་ལྡན་འདས་
ཀྱིས་ཇི་སྐད་གསུངས་པའི་ཡོན་ཏན་མཆོག་དེ་དག་འཐོབ་པར་འགྱུར་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པའི་རྒྱལ་བ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་
ཅད་ལ་གནས་པ་མེད་པ་གང་ཡིན་པ་དེས་ངས་ཇི་སྐད་བསྟན་པའི་ཡོན་ཏན་མཆོག་ཏུ་གྱུར་པ་དེ་དག་འཐོབ་པར་འགྱུར་རོ། །དཔག་ཏུ་མེད་པའི་རྒྱལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གལ་ཏེ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་
པར་ཤེས་པ་ལ་གནས་པར་གྱུར་ཏམ། གལ་ཏེ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་ལ་གནས་པར་གྱུར་ཏམ། གལ་ཏེ་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ལ་

གནས་པར་གྱུར་ན་ངས་མདོ་སྡེ་འདི་ལས་བསྟན་པའི་ཡོན་ཏན་དེ་དག་དང་ལྡན་པར་མི་སྟོན་ཏོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ལ་གནས་པ་མེད་ཅིང་འབྱུང་བ་དང་། འཇུག་པ་མེད་པར་གྱུར་ན་ངས་དེ་དག་གི་ཡོན་ཏན་གྱིས་རྒྱ་མཚོ་ཆེན་པོ་
དཔག་ཏུ་མེད་པ་ཐོབ་པར་འགྱུར་བར་རབ་ཏུ་བསྟན་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་ཆོས་ཅུང་ཟད་ཙམ་ཡང་དམིགས་པར་བྱ་བ་དང་། གནས་པར་བྱ་བ་ཡང་མེད་ལ་ཆོས་ཅུང་ཟད་ཙམ་ཡང་འཇུག་པར་བྱ་བ་འམ། འབྱུང་བར་བྱ་བ་
ཡང་མེད་པར་ཆོས་རྣམས་ཀྱི་ཚུལ་ལ་ལེགས་པར་གནས་ཤིང་གཡོ་བ་མེད་པས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་གནས་པ་དང་། གཡོ་བ་མེད་དེ་གཡོ་བ་མེད་པའི་ཕྱིར་མཐོ་བ་ཡང་མེད། དམའ་བ་ཡང་མེད་དོ། །མཐོ་བ་དང་དམའ་
བ་མེད་པའི་ཕྱིར་མཐོ་བ་དང་། དམའ་བ་ལ་གནས་པ་ཡོངས་སུ་སྤོང་བར་བྱེད་དོ། །མཐོ་དམའ་ལ་མི་གནས་པའི་ཕྱིར་དགེ་བའི་གནས་སུ་གནས་པ་ཞེས་བྱའོ། །དགེ་བའི་གནས་སུ་གནས་པ་གང་ཡིན་པ་དེ་ནི་གནས་པ་མེད་པ་ལ་གནས་པ་ཡིན་ནོ། །གནས་པ་མེད་པ་ལ་གནས་པ་
གང་ཡིན་པ་དེ་ནི་ཅི་ལ་ཡང་གནས་པ་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་ཡང་རྣམ་པར་གཞག་པ་འམ། རྫོགས་པར་བྱེད་པ་མེད་པས་གནས་མེད་པ། གནས་པ་མེད་པ། འབྱུང་བ་མེད་པ། བྱེད་པ་མེད་པར་གྱུར་བ་ཡིན་ནོ། །དེ་ཅིའི་
ཕྱིར་ཞེ་ན། གནས་མི་དམིགས་པས་སོ། །གནས་མེད་པའི་ཕྱིར་རྣམ་པར་རྟོག་པ་ཡང་མེད་དོ། །རྣམ་པར་རྟོག་པ་མེད་པའི་ཕྱིར་མི་གཡོ་བའི་གནས་སུ་གནས་པར་བྱེད་དོ། །ཆོས་ཀྱི་དབྱིངས་ཇི་ལྟ་བ་བཞིན་དུ་གནས་པར་བྱེད་དོ། །གནས་མེད་པ་ལ་གནས་པར་བྱེད་པས་གནས་
པ་ཅི་ཡང་མེད་དེ། གནས་དང་། གནས་མེད་པ་ལ་མངོན་པར་ཞེན་པ་མེད་པས་ལེགས་པར་གནས་པ་ཞེས་བྱའོ། །དཔག་ཏུ་མེད་པའི་རྒྱལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་ཚུལ་ལ་རབ་ཏུ་གནས་པ་ནི་དེ་ལྟར་གནས་པ་མེད་པ་རྣམ་པར་གཞག་ནས་

གནས་མེད་པ་ལ་གནས་པར་བྱེད་པས་ཆོས་ཐམས་ཅད་ལ་རྣམ་པར་རྟོག་པ་མེད་པར་མཐོང་ཞིང་རྣམ་པར་མི་རྟོག་པའི་སྤྱོད་པ་དེ་ལྟ་བུ་ལ་གནས་པར་བྱེད་དེ། སྤྱོད་པ་དེས་ཆོས་ཐམས་ཅད་གཡོ་བ་མེད་པར་མཐོང་བས་ཚུལ་བཞིན་དུ་གནས་པའི་རྗེས་སུ་འཐུན་པ་དང་།
ཚུལ་བཞིན་དུ་མི་གཡོ་བའི་རྗེས་སུ་འཐུན་པ་དང་། ཚུལ་བཞིན་དུ་མི་ལེན་པའི་རྗེས་སུ་འཐུན་པར་གྱུར་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་ཡང་དག་དྲན། །དོན་ལ་ལེགས་པར་སེམས་བྱེད་ཅིང་། །ཆོས་
རྣམས་ལ་ནི་མི་གནས་པས། །བློ་དང་ལྡན་པ་ཞེས་བྱའོ། །ཆོས་ནི་ཅུང་ཟད་འགའ་ཙམ་ཡང་། །རྣམ་པར་གཞག་པར་བྱ་བ་མེད། །རྣམ་པར་གཞག་པ་མེད་པའི་ཕྱིར། །འཇིགས་པ་མེད་པར་གཞོལ་བར་བྱེད། །གཟུགས་ནི་རྣམ་པར་མི་གཞག་ཅིང་། །ཚོར་བ་རྣམས་ཀྱང་
གཞག་པ་མེད། །འདུ་ཤེས་དང་ནི་འདུ་བྱེད་དང་། །རྣམ་པར་ཤེས་པ་འང་དེ་བཞིན་ནོ། །ཕུང་པོ་རྣམས་ལ་མི་གནས་ཤིང་། །ཁམས་རྣམས་དང་ནི་སྐྱེ་མཆེད་དང་། །གནས་དང་གནས་མ་ཡིན་ལ་ཡང་། །རྟག་ཏུ་གནས་པ་མེད་པ་ཡིན། །ས་ཡི་ཁམས་ལ་མི་གནས་ཤིང་། །ཆུ་
ཡི་ཁམས་ལའང་གནས་པ་མིན། །མེ་དང་རླུང་གི་ཁམས་ལ་ཡང་། །རྟག་ཏུ་གནས་པ་མེད་པ་ཡིན། །འདོད་པའི་ཁམས་དང་གཟུགས་ཀྱི་ཁམས། །གཟུགས་མེད་ཁམས་ལ་མི་གནས་ཏེ། །རྣམ་གཞག་མེད་པ་ཐོབ་པའི་ཕྱིར། །ཁམས་གསུམ་དག་ལ་གནས་མི་བྱེད། །ནམ་
མཁའི་ཁམས་ནི་དེ་དག་ལ། །གནས་པར་ཡང་ནི་མི་བྱེད་དེ། །གནས་པར་བྱེད་པ་མེད་པས་ན། །མཉམ་པ་ཉིད་དུ་གཞོལ་བར་བྱེད། །དེ་ཕྱིར་ཆོས་ནི་ཅུང་ཟད་ཙམ། །གནས་པར་བྱ་བ་ཅི་ཡང་མེད། །གནས་པ་མེད་པ་གང་ཐོབ་པ། །དེ་ནི་ཡེ་ཤེས་དམ་པ་ཡིན། །ཡེ་ཤེས་དམ་པ་
གནས་པ་མེད། །གནས་པ་མེད་པས་ལེགས་གནས་ཡིན། །དེ་ལྟའི་གནས་པ་གང་ཐོབ་པ། །ཆོས་ཀྱི་དབྱིངས་ལ་གནས་པ་ཡིན། །གནས་པ་མེད་དང་མཚུངས་ལྡན་ཕྱིར། །དེ་ནི་རྟག་ཏུ་ལེགས་གནས་འགྱུར། །གནས་པ་མེད་ཅིང་རྟེན་པ་མེད། །ཆོས་ལ་གནས་པ་འཐོབ་པར་

འགྱུར། །གལ་ཏེ་རྟེན་མེད་ཐོབ་གྱུར་ན། །རྟག་ཏུ་གཡོ་བ་མེད་པར་འགྱུར། །འཇུག་པ་མེད་ཅིང་འབྱུང་བ་མེད། །མཉམ་པ་ཉིད་དུ་རབ་ཏུ་གནས། །ཆོས་ལ་དེ་ལྟར་གང་གནས་པ། །དེ་ནི་དཔའ་བོ་ཞེས་བྱའོ། །ཆོས་རྣམས་ཀུན་ལ་མཐོ་བ་མེད། །ཆོས་རྣམས་ཀུན་ལ་དམའ་བ་
མེད། །དེ་ལྟར་གཡོ་བ་མེད་གྱུར་པས། །ཆོས་ཀྱི་དབྱིངས་ལ་རབ་ཏུ་གནས། །གཡོ་བ་མེད་ལ་གནས་པའི་ཕྱིར། །བླ་མེད་གནས་པ་འཐོབ་པར་འགྱུར། །མི་གནས་གནས་དང་རྗེས་འཐུན་པ། །དེ་ནི་དཔའ་བོ་ཞེས་བྱའོ། །གནས་པ་ལ་ནི་མི་གནས་ཤིང་། །གནས་ལ་གཡོ་བ་མེད་གྱུར་
པ། །གནས་པ་མེད་པས་གྲུབ་པས་ན། །ལེགས་པར་གནས་པ་འཐོབ་པར་འགྱུར། །གནས་དང་གནས་མ་ཡིན་ལ་ཡང་། །ཐམས་ཅད་དུ་ནི་གཡོ་བ་མེད། །གཡོ་བ་མེད་ལ་གནས་པས་ན། །གཡོ་བ་མེད་པ་ཞེས་བྱའོ། །གལ་ཏེ་མི་གཡོ་གནས་འགྱུར་ན། །ཐམས་ཅད་ལ་ཡང་
གནས་མི་འགྱུར། །གནས་དང་གནས་མིན་མི་སེམས་པས། །རྣམ་རྟོག་མེད་ལ་རྟག་ཏུ་གནས། །གནས་ལ་གནས་པར་མི་བྱེད་ཕྱིར། །གཡོ་བར་གྱུར་པ་ཅི་ཡང་མེད། །གནས་ཀྱིས་གཡོ་བ་མེད་པས་ན། །ཐམས་ཅད་ལ་ཡང་གནས་མི་འགྱུར། །གལ་ཏེ་མི་གནས་ཐོབ་འགྱུར་ན། །
གནས་དང་གནས་མིན་གྱིས་མི་གཡོས། །གནས་ཀྱིས་མི་གཡོས་གང་ཡིན་པ། །གནས་ལ་རབ་གནས་ཞེས་བྱའོ། །གནས་ལ་རབ་ཏུ་གང་གནས་པ། །གནས་པ་མེད་ལ་གནས་པས་ན། །ཆོས་རྣམས་ཐམས་ཅད་མཐོང་འགྱུར་ཞིང་། །ཆོས་ཀྱི་རྗེས་སུ་འཐུན་ལ་གནས། །དེ་ལྟར་ཆོས་
རྣམས་མཐོང་བས་ན། །སྣ་ཚོགས་དག་ལ་མི་གནས་ཤིང་། །གནས་མེད་རབ་ཏུ་གནས་པ་མེད། །ཆོས་གནས་པ་ལ་མཁས་པར་འགྱུར། །རྟག་ཏུ་ཆོས་ལ་རབ་གནས་པས། །རྣམ་པར་རྟོག་པ་ཅི་ཡང་མེད། །རྣམ་པར་རྟོག་པ་སྤངས་པའི་ཕྱིར། །འདི་ནི་མི་གཡོས་པ་ཞེས་བྱ། །གལ་
ཏེ་མི་གཡོས་གནས་གྱུར་ན། །སྤྱོད་པ་དག་ལ་རྣམ་མི་རྟོག །གནས་དང་གནས་མིན་ཡོངས་སུ་སྤོང་། །འདི་ནི་སོ་སོར་རྟོག་བྱེད་ཡིན། །གལ་ཏེ་མིག་ཡོར་རབ་རྟོག་ན། །ཐམས་ཅད་གཡོ་བ་མེད་པར་འགྱུར། །ཆོས་རྣམས་རྟག་ཏུ་མཉམ་པ་ལ། །དེ་བཞིན་རབ་ཏུ་གཞོལ་བར་འགྱུར། །ཚུལ་

བཞིན་རྗེས་འཐུན་གནས་པ་དང་། །ཚུལ་བཞིན་རྣམ་པར་མི་གཡོ་དང་། །མི་གཡོ་གནས་ནི་གང་ཐོབ་པ། །གནས་མེད་ལ་ནི་རྟག་ཏུ་གནས། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཡང་འདི་སྐད་ཅེས་གསོལ་
ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་ཚུལ་འཆིང་བ་མ་མཆིས་པ་དང་། གྲོལ་བ་མ་མཆིས་པ་ལ་རབ་ཏུ་འགོད་པར་མཛད་པ་ཤིན་ཏུ་ངོ་མཚར་ཆེ་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་
ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ནི་ཆོས་ཅུང་ཟད་ཙམ་ཡང་མཚུངས་པར་ལྡན་པའམ། མཚུངས་པར་མི་ལྡན་པ་འམ། འཐུན་པར་གྱུར་པ་འམ། ཡོངས་སུ་བསྡུས་པ་འམ། ཡོངས་སུ་མ་བསྡུས་པ་འམ། སྐྱབས་སུ་འགྲོ་བ་དང་མི་ལྡན་པ་འམ། འདོད་ཆགས་དང་
བཅས་པ་འམ་འདོད་ཆགས་དང་བྲལ་བ་འམ། ཞེ་སྡང་དང་བཅས་པ་འམ། ཞེ་སྡང་དང་བྲལ་བ་ཞེས་བགྱི་བ་ཡང་དག་པར་རྗེས་སུ་མི་དམིགས་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་ཚུལ་ཐམས་ཅད་རྣམ་པར་གཞག་པ་ལ་རབ་ཏུ་མཁས་
པ་ནི་གལ་ཏེ་སེམས་ཅན་རྣམས་ཀྱིས་གུས་པས་མཆོད་པ་བགྱིས་པ་ན་ཡང་འདོད་ཆགས་ཀྱི་སྲེད་པ་སྐྱེ་བར་མི་འགྱུར་ལ། །སྨོད་ཅིང་གནོད་པར་བགྱིད་ན་ཡང་ཞེ་སྡང་སྐྱེ་བར་མི་འགྱུར་ཏེ། འདུ་ཤེས་སྣ་ཚོགས་མ་མཆིས་ཤིང་ཆོས་སུ་ལྟ་བ་ཐམས་ཅད་ཡོངས་སུ་སྤངས་པས་ཆོས་འགའ་
ཙམ་ཡང་ཆོས་འགའ་ཙམ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་དག་པར་རྗེས་སུ་མི་དམིགས་ལགས་སོ། །མཚུངས་པར་ལྡན་པ་དང་། མཚུངས་པར་མི་ལྡན་པ་ལས་ཀྱང་ཡང་དག་པར་འདས་པའི་སླད་དུ་མཚུངས་པར་ལྡན་པ་དང་། མཚུངས་པར་མི་
ལྡན་པའི་འདུ་ཤེས་སྤོང་ཞིང་མཚུངས་པར་ལྡན་པ་དང་། མཚུངས་པར་མི་ལྡན་པའི་འདུ་ཤེས་ཀྱང་ཡང་དག་པར་ཁོང་དུ་ཆུད་པར་འགྱུར་ལགས་སོ། །ཁོང་དུ་ཆུད་པ་ལས་ཡང་དག་པར་འདས་ནས་ཀྱང་ཆོས་འགའ་ཙམ་ལ་ཡང་རྩོལ་བ་འམ། ལྡོག་པ་འམ། བགྲོད་པར་བགྱི་བ་དང་

བཅས་པའམ། བགྲོད་པར་བགྱི་བ་མ་མཆིས་པ་ཞེས་མཚུངས་པར་ལྡན་པར་བགྱིད་ལགས་སོ། །ཆོས་ཐམས་ཅད་ཀྱི་ཚུལ་ཡང་ཡང་དག་པ་མ་ལགས་པའི་བསམ་པ་མ་མཆིས་ཤིང་ཡོངས་སུ་འཛིན་པ་མ་མཆིས་པས་ཐབས་མཁས་པས་ཆོས་ཀྱི་ངོ་བོ་ཉིད་རྣམ་པར་འཇིག་པར་མི་
བགྱིད་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ལ་དེ་ལྟར་གནས་པའི་ཚེ་ཐབས་མཁས་པས་ཆོས་ཐམས་ཅད་ཀྱི་དབྱིངས་ཀྱི་ཚུལ་ཡང་དག་པར་སྟོན་པར་བགྱིད་ལགས་པས་སངས་རྒྱས་ཀྱི་ཆོས་ཐམས་ཅད་མྱུར་དུ་ཡོངས་
སུ་རྫོགས་པར་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་བ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཆོས་ལ་རྣམ་པར་གཞག་པར་བྱ་
བ་མེད་ཅིང་གནས་པར་བྱ་བ་མེད་པར་མཐོང་བར་གྱུར་ན། སངས་རྒྱས་ཀྱི་ཆོས་ལ་རྣམ་པར་གཞག་པར་བྱ་བ་མེད་པ་དང་། གནས་པར་བྱ་བ་མེད་པ་དང་། ཁྱད་པར་དུ་གནས་པ་མེད་པར་ཡང་དག་པར་མཐོང་བར་གྱུར་ཏེ། སངས་རྒྱས་ཀྱི་ཆོས་གནས་པ་མི་གཡོ་བར་མཐོང་བའི་ཕྱིར་
དང་། འཁོར་བར་མི་འཇུག་པའི་ཕྱིར་དང་། ཡོངས་སུ་མི་འགྱུར་བའི་ཕྱིར་ཆོས་ཐམས་ཅད་ཀྱི་དབྱིངས་དང་རྗེས་སུ་འཐུན་པར་གནས་པར་གྱུར་བས་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་
སེམས་དཔའ་ཆེན་པོ་གང་སངས་རྒྱས་ཀྱི་ཆོས་ལ་གནས་པ་མེད་པ་དང་། མི་གནས་པ་མེད་པ་དང་། ཁྱད་པར་དུ་གནས་པ་མེད་པ་དང་། ཁྱད་པར་མེད་པར་གནས་པ་མེད་པ་དང་། གནས་པའི་གནས་པ་མེད་པ་དང་། གནས་པ་མ་ཡིན་པར་གནས་པ་མེད་པ་དང་།
གཡོ་བ་མེད་པ་དང་། རྣམ་པར་རྟོག་པ་མེད་པ་དང་། ཁྱད་པར་དུ་རྣམ་པར་རྟོག་པ་མེད་པ་དང་། ཀུན་དུ་རྟོག་པ་མེད་པར་གྱུར་ན། གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་

དཔའ་ཆེན་པོ་གང་ཆོས་འགའ་ཙམ་ཡང་རྣམ་པར་གཞག་པ་མི་མཐོང་ལ། ཆོས་ཐམས་ཅད་ཀྱི་གནས་མཆོག་ཏུ་རྣམ་པར་གཞག་ཏུ་ཡོད་པར་ཡང་མི་མཐོང་ཞིང་རྣམ་པར་རྟོག་པ་མེད་པ་དང་། མཆོག་ཏུ་རྣམ་པར་རྟོག་པ་མེད་པ་དང་། ཀུན་ཏུ་རྣམ་པར་རྟོག་པ་མེད་
པར་གྱུར་ན། གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་ཡང་འདུག་པ་འམ། འགྲོ་བ་ཞེས་བྱ་བ་ཡང་དག་པར་མི་མཐོང་ལ་རྣམ་པར་རྟོག་
པ་ཡང་མེད། ཁྱད་པར་དུ་རྣམ་པར་རྟོག་པ་ཡང་མེད། ཀུན་དུ་རྣམ་པར་རྟོག་པ་ཡང་མེད་དེ། ཆོས་ཐམས་ཅད་ནམ་མཁའ་ཡོངས་སུ་དག་པ་ལྟར་མཐོང་ཞིང་འོད་ཀྱིས་རབ་ཏུ་གསལ་བར་གྱུར་བས་ཉོན་མོངས་པ་ཡོངས་སུ་སྤོང་བ་དང་། ཆོས་ཐམས་ཅད་འོད་ཀྱིས་རབ་ཏུ་སྣང་བར་
བྱེད་པའི་ཕྱིར་གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་ལ་ཐབས་མཁས་པ་ཐོབ་པ་ཞེས་བྱ་སྟེ། རྣམ་པར་གཞག་པས་ཆོས་ཀྱི་དབྱིངས་ལ་སོ་སོར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ལ་རྣམ་པར་གཞག་པ་ཅུང་ཟད་ཙམ་ཡང་མེད་པའི་ཕྱིར་རོ། །འདི་ལྟ་སྟེ།
དཔེར་ན་ནམ་མཁའ་དང་། རླུང་གི་ཁམས་ལ་ནི་གནས་ཀྱང་མེད། བལྟར་ཡང་མི་མཐོང་རྣམ་པར་གཞག་པའི་གནས་ཀྱང་མེད། རྟེན་པའི་གནས་ཀྱང་མེད། བསྟན་དུ་ཡང་མེད་དོ། །དེ་བཞིན་དུ་ཆོས་ཀྱི་དབྱིངས་ཀྱང་འཇུག་པར་བྱ་བའི་གནས་ཀྱང་མེད། བལྟ་བར་བྱ་བའི་གནས་
ཀྱང་མེད། རྣམ་པར་གཞག་པའི་གནས་ཀྱང་མེད། རྟེན་པའི་གནས་ཀྱང་མེད། ཁོང་དུ་ཆུད་པར་བྱ་བ་ཡང་མེད། བསྟན་དུ་ཡང་མེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བསྟན་པར་བྱ་བ་མེད་པའི་ཕྱིར། དེ་བཞིན་ཉིད་ཀྱི་དབྱིངས་དང་མཚུངས་པར་ལྡན་
པར་གནས་སོ། །བློ་གྲོས་མཐའ་ཡས་ཆོས་ཐམས་ཅད་ཀྱི་དབྱིངས་ནི་སྐྱེ་བ་མེད་པ། སྲོག་མེད་པ། རྒ་བ་མེད་པ། འཆི་བ་མེད་པ། རྒོད་པ་མེད་པ། བྱིང་བ་མེད་པ། བསྟན་དུ་མེད་པའི་དབྱིངས་ཡིན་པས་ཆོས་ཀྱི་དབྱིངས་ཤེས་བྱའོ། །རྣམ་པར་འགྱུར་བ་མེད་པའི་དབྱིངས་

ཡིན་པས་ཆོས་ཀྱི་དབྱིངས་ཤེས་བྱ་སྟེ། ཆོས་ཀྱི་དབྱིངས་ནི་གནས་ཐམས་ཅད་དུ་ཁྱབ་པ་ཡིན་ནོ། །བློ་གྲོས་མཐའ་ཡས་ཆོས་ཀྱི་དབྱིངས་ནི་འགྲོ་བ་མེད་ཅིང་འགྲོ་བའི་གནས་མེད་དེ། འགྲོ་བ་དང་། གནས་པ་མེད་པའི་ཕྱིར་ཆོས་ཀྱི་དབྱིངས་དང་མཚུངས་པར་ལྡན་པར་གནས་པ་ཞེས་
བྱའོ། །དེ་བཞིན་ཉིད་ཀྱི་ཆོས་ཀྱི་དབྱིངས་ལ་ནི་གནས་ཀྱང་མེད། གནས་མ་ཡིན་པ་ཡང་མེད་དོ། །དེ་ཅིའི་ཕྱིར་ཞེ་ན། དེ་བཞིན་ཉིད་ཀྱི་ཆོས་ཀྱི་དབྱིངས་དང་། དེ་བཞིན་ཉིད་ཀྱི་རང་བཞིན་ནི་ཡོད་པ་མ་ཡིན་པའི་ཕྱིར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ཀྱིས་ངས་བསྟན་པ་འདི་ཐོས་པར་གྱུར་ན་ཆོས་ཐམས་ཅད་ཀྱི་དབྱིངས་ཀྱི་ཚུལ་གྱི་ཆོས་ཀྱི་སྣང་བ་ཆེན་པོ་འཐོབ་པར་འགྱུར་ལ། ཆོས་ཀྱི་སྣང་བ་ཐོབ་པའི་དབང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་ནས་མྱུར་དུ་དེ་བཞིན་གཤེགས་པའི་སྟོབས་བཅུ་དང་།
མ་འདྲེས་པ་བཅྭ་བརྒྱད་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་ཀྱི་དགེ་བའི་རྩ་བ་རྒྱ་ཆེན་པོ་དང་། ཚོགས་ཁྱད་པར་དུ་འཕགས་པ་ཡོངས་སུ་སྨིན་པར་བྱ་བའི་ཕྱིར་དང་། དེ་བཞིན་གཤེགས་པའི་གདུང་རྒྱུན་མི་འཆད་པར་བྱ་
བའི་ཕྱིར་མྱུར་དུ་བྱང་ཆུབ་ཀྱི་སྙིང་པོར་སོང་ནས་ཆོས་ཀྱི་འཁོར་ལོ་བསྐོར་བ་དང་། བདུད་ཀྱི་གནས་རྣམས་ཟིལ་གྱིས་གནོན་པ་དང་། ཐ་དད་པར་སྨྲ་བ་རྣམས་ཚར་གཅོད་པ་དང་། སྐྱེས་བུ་དམ་པའི་སེང་གེའི་སྒྲ་ཆེན་པོ་སྒྲོགས་ཤིང་སེམས་ཅན་རྣམས་ཀྱི་མོས་པ་ཇི་ལྟ་བ་དང་།
སྨོན་ལམ་ཇི་ལྟ་བ་དང་། སེམས་བསྐྱེད་པ་ཇི་ལྟ་བ་བཞིན་དུ་ཡང་དག་པར་རྣམ་པར་གྲོལ་བར་བྱ་བའི་ཕྱིར་དམ་པའི་ཆོས་བསྟན་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འགོད་པར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་
དེ་བཀའ་སྩལ་པ། བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་ལ་མི་གནས་པས། །སངས་རྒྱས་ཀྱི་ནི་ཆོས་དག་ལ། །རྣམ་པར་གཞག་པ་ཅི་ཡང་མེད། །བྱང་ཆུབ་སེམས་དཔའ་ཐམས་ཅད་ནི། །རྣམ་པར་གཞག་པ་མེད་པའི་ཕྱིར། །སངས་རྒྱས་ཀྱི་ནི་

ཆོས་དག་ལ། །འཇིགས་པ་མེད་པར་གཞོལ་བར་བྱེད། །བྱང་ཆུབ་སེམས་དཔའ་ཐམས་ཅད་ནི། །སངས་རྒྱས་ཆོས་ལ་གནས་པ་དང་། །གནས་ཀྱང་མེད་པར་མཐོང་བས་ན། །ཤིན་ཏུ་ལེགས་པར་གནས་པར་བྱེད། །བྱང་ཆུབ་སེམས་དཔའ་ཐམས་ཅད་
ནི། །གནས་དག་ལ་ནི་མི་གནས་པར། །ཆོས་རྣམས་རབ་ཏུ་མཐོང་བས་ན། །གནས་པ་མེད་ཅིང་ལྡོག་པ་མེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ལ་གནས་པ་མེད་མཐོང་བས། །སངས་རྒྱས་ཆོས་ལ་མི་གཡོས་ཤིང་། །སངས་རྒྱས་ཆོས་ཀྱང་ཚོལ་མི་བྱེད། །
བྱང་ཆུབ་སེམས་དཔའ་ཐམས་ཅད་ནི། །ཆོས་ནི་ཐ་དད་མི་མཐོང་བས། །སངས་རྒྱས་ཆོས་ལས་མ་གཡོས་ཤིང་། །ཡོངས་སུ་འཚོལ་བར་མི་བྱེད་དོ། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་དེ་ལྟར་མཐོང་བས་ན། །ཆོས་རྣམས་མཁས་པར་བྱ་བ་ལ། །
ཐབས་མཁས་པས་ནི་གནས་པར་བྱེད། །བྱང་ཆུབ་སེམས་དཔའ་ཐམས་ཅད་ནི། །རྟག་ཏུ་མཉམ་པར་མཐོང་བས་ན། །སངས་རྒྱས་ཆོས་ལ་མི་གནས་ཤིང་། །མི་གནས་པ་ཡང་མ་ཡིན་ནོ། །རྟག་ཏུ་གནས་མེད་པ་ལ་གནས། །གནས་མེད་པ་ཡང་མ་ཡིན་ནོ། །
རྟག་ཏུ་རྣམ་པར་རྟོག་མི་བྱེད། །རྣམ་པར་མི་རྟོག་པ་ཡང་མིན། །རྣམ་པར་རྟོག་པ་སྣ་ཚོགས་དག །རྟག་ཏུ་མེད་པར་གྱུར་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །གནས་པ་མེད་དང་མཚུངས་ལྡན་པས། །དུས་དང་གནས་རྣམས་ཀུན་དུ་ཡང་། །གཡོ་བ་མེད་
པར་གྱུར་པ་ཡིན། །བྱང་ཆུབ་སེམས་དཔའ་ཐམས་ཅད་ཀྱིས། །ནམ་ཞིག་ཆོས་ཀྱི་ཚུལ་དག་ལ། །མཉམ་པ་ཉིད་དུ་གནས་པའི་ཚེ། །ལེགས་པར་གནས་པ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་ཀྱིས། །ནམ་ཞིག་ཆོས་ཀྱི་ཚུལ་དག་ལ། །ཆོས་འགའ་
ཙམ་ཡང་མི་མཐོང་ན། །མཉམ་པ་ཉིད་ལ་གནས་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་ལ་གནས་མེད་པར། །རབ་ཏུ་མཐོང་བར་གྱུར་ཀྱང་ནི། །གནས་ནི་ཡོངས་སུ་སྤོང་མི་བྱེད། །གཡོ་བ་མེད་པ་ཐོབ་པས་ན། །བསྟན་པར་བྱ་བ་ཅི་ཡང་

མེད། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་གྱི་ཚུལ་དག་ལ། །རབ་ཏུ་མཁས་པར་གྱུར་པས་ན། །ཐབས་མཁས་པས་ནི་གནས་པར་བྱེད། །གནས་པ་མེད་ལ་གནས་པས་ན། །བྱང་ཆུབ་སེམས་དཔའ་ཞེས་བྱའོ། །བྱང་ཆུབ་སེམས་དཔའ་
ཐམས་ཅད་ནི། །ཆོས་ནི་ཅུང་ཟད་ཙམ་ལ་ཡང་། །འགྲོ་འམ་འོང་ཞེས་བྱ་བ་ཡི། །རྣམ་རྟོག་དག་ལ་མི་གནས་པ། །དེ་ཚེ་ཆོས་རྣམས་ཐམས་ཅད་ཀྱི། །ཚུལ་ལ་རབ་ཏུ་གནས་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་ཚུལ་ནི་ཀུན་ལ་ཡང་། །
རྣམ་པ་སྣ་ཚོགས་གནས་བྱེད་པས། །ཆོས་ཀྱི་སྣང་བ་ཆེན་པོ་ནི། །དཔག་ཏུ་མེད་པ་སྐྱེད་པར་བྱེད། །ཆོས་ཀྱི་སྣང་བའི་དབང་གིས་ནི། །མཉམ་པའི་ལྟ་བ་རབ་གནས་པས། །ཆོས་རྣམས་ཐམས་ཅད་ཀུན་ལ་ནི། །ཆོས་རྣམས་ཀུན་གྱི་ཚུལ་རྣམས་ཀྱང་། །ནམ་མཁའ་དག་པ་
ལྟ་བུ་དང་། །གྲིབ་མ་དང་ནི་གཟུགས་བརྙན་དང་། །མཉམ་ཞིང་དྲི་མ་མེད་པར་མཐོང་། །བྱང་ཆུབ་སེམས་དཔའ་ཐམས་ཅད་ནི། །ལྟ་བ་དག་ནི་རྟོགས་གྱུར་ཀྱང་། །རྟོགས་པ་དག་ནི་མེད་པས་ན། །རང་བཞིན་ཡོངས་སུ་སྤོང་བར་བྱེད། །བྱང་ཆུབ་སེམས་དཔའ་ཐམས་ཅད་
ནི། །ཇི་ལྟར་མཐོང་ཞིང་རྟོགས་བྱེད་པས། །ཆོས་ཀྱི་ཚུལ་ནི་ཐམས་ཅད་ལ། །རབ་ཏུ་གནས་པར་གྱུར་པ་ཡིན། །ཆོས་རྣམས་ཀུན་གྱི་དབྱིངས་དག་ལ། །བརྟན་པས་ནན་ཏན་བསྒྲུབས་པས་ན། །ཆོས་ཀྱི་དབྱིངས་ཀྱི་ཚུལ་དག་ལ། །ཐབས་མཁས་པ་ཞེས་བརྗོད་པ་ཡིན། །
བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་དབྱིངས་ལ་མི་གནས་པས། །ཆོས་ཀྱི་དབྱིངས་རྣམས་ཐམས་ཅད་ཀུན། །གཏན་དུ་ཡོད་མིན་ལྟ་བར་བྱེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་དབྱིངས་རྣམས་རྟོགས་པས་ན། །ཆོས་རྣམས་ནམ་མཁའ་རླུང་
ཁམས་ལ། །རྣམ་གཞག་མེད་ཅིང་ཐམས་ཅད་དུ། །ཁྱབ་པར་གྱུར་པ་བཞིན་དུ་མཐོང་། །ཆོས་ཀྱི་དབྱིངས་ཀྱང་དེ་བཞིན་ཏེ། །ཐམས་ཅད་དུ་ནི་ཁྱབ་པ་ཡིན། །ཆོས་ཀྱི་དབྱིངས་ནི་བསམ་དཀའ་བས། །བསྟན་པར་བྱ་བར་རུང་མ་ཡིན། །བློ་ལྡན་དག་ནི་ཐམས་ཅད་

ཀུན། །རྟེན་པར་ཡང་ནི་མི་བྱེད་དོ། །བསྟན་མེད་དབྱིངས་ནི་གང་ཡིན་པ། །དེ་ནི་ཆོས་ཀྱི་དབྱིངས་ཤེས་བྱ། །གནས་པའི་གནས་ནི་མེད་པས་ན། །དེ་ནི་གནས་པ་ཞེས་བྱའོ། །ཆོས་ཀྱི་དབྱིངས་ལ་སྐྱེ་བ་མེད། །སྲོག་ཀྱང་མེད་ལ་རྒ་བའང་མེད། །འཆི་བ་མེད་ཅིང་
བྱིང་བ་མེད། །ངེས་པར་འབྱུང་བའང་ཡོད་མ་ཡིན། །ཆོས་ཀྱི་དབྱིངས་ནི་བསམ་དཀའ་བས། །འོང་བ་མེད་ཅིང་འགྲོ་བ་མེད། །ཆོས་ཀྱི་དབྱིངས་ནི་ཕུང་པོ་མིན། །ཁམས་དང་སྐྱེ་མཆེད་ཀྱང་མ་ཡིན། །གནས་ཀྱང་སྤོང་བར་མི་བྱེད་པས། །གཡོ་བ་མེད་པར་གྱུར་པ་ཡིན། །ཆོས་
ཀྱི་དབྱིངས་ཀྱི་དེ་བཞིན་ཉིད། །རང་བཞིན་དག་ནི་ཡོད་མ་ཡིན། །བྱང་ཆུབ་སེམས་དཔའ་ཐམས་ཅད་ཀྱིས། །ཆོས་ཀྱི་དབྱིངས་ནི་བསམ་དཀའ་བས། །དེ་ལྟར་ཁོང་དུ་ཆུད་གྱུར་ན། །ཆོས་ཀྱི་སྣང་བ་འཐོབ་པར་འགྱུར། །དེ་ཡི་དབང་གིས་བྱང་ཆུབ་ཀྱི། །སྙིང་པོར་ཡང་ནི་བགྲོད་པར་
འགྱུར། །སངས་རྒྱས་རྣམས་ཀྱི་ཆོས་ལ་ཡང་། །ཐེ་ཚོམ་དག་ནི་མེད་པར་འགྱུར། །གཡོ་བ་དག་ནི་མེད་པར་ཡང་། །ཆོས་ཀྱི་སྣང་བ་དག་གིས་ཀྱང་། །སེམས་ཅན་དག་ནི་ཐམས་ཅད་ཀུན། །བདེ་བ་ཆེན་པོ་འཐོབ་པར་བྱེད། །བློ་གྲོས་མཐའ་ཡས་བྱང་ཆུབ་སེམས་
དཔའ་སེམས་དཔའ་ཆེན་པོ་གང་ཆོས་ཟབ་མོ་འདི་ལྟ་བུ་དག་ལ་ནན་ཏན་གྱིས་མངོན་པར་སྒྲུབ་པར་བྱེད་ན། །ཆོས་ཀྱི་སྣང་བ་དེ་ལྟ་བུ་འཐོབ་པར་འགྱུར་ཏེ། །ཤེས་རབ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ།། །།བམ་
པོ་དྲུག་པ་སྟེ་ཐ་མ། །གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་བསྐལ་པ་གྲངས་མེད་པ་གཉིས་འདས་པ་ན་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་
རྟེན་མཁྱེན་པ་བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཟླ་བའི་སྒྲོན་མའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་བདུད་རྩི་ཞེས་བྱའོ། །འཇིག་རྟེན་གྱི་ཁམས་ནི་ཡོངས་སུ་དག་པར་བྱེད་པ་

ཞེས་བྱ་སྟེ། །སངས་རྒྱས་དེའི་ཞིང་ཆུ་ཤེལ་ལས་མངོན་པར་གྲུབ་པས་རྟག་ཏུ་འོད་ཟེར་གྱིས་ཞིང་དེ་ཀུན་དུ་གསལ་བར་བྱེད་དེ། །སེམས་ཅན་གང་དག་འོད་ཟེར་དེས་རེག་པར་གྱུར་པ་དེ་དག་ཤིན་ཏུ་མཛེས་ཤིང་བྱད་བཞིན་བཟང་པོར་གྱུར་པས་དེའི་ཕྱིར་འཇིག་རྟེན་གྱི་ཁམས་དེ་ཡོངས་སུ་དག་
པར་བྱེད་པ་ཞེས་བྱའོ། །དེ་ན་ལོགས་ཤིག་ན་གྲོང་ཁྱེར་དང་། གྲོང་རྡལ་ཞེས་བྱ་བའི་མིང་ཡང་མེད་དེ། །ལམ་རྣམས་གྱ་ནོམ་ཞིང་གསེར་གྱི་ཐིག་བཀྱེ་བ་ལམ་རྣམས་ཀྱི་བར་རེ་རེའི་ཚད་རྒྱང་གྲགས་ཕྱེད་ཕྱེད་ཡོད་དོ། །ལམ་རེ་རེའི་བར་དུ་ཡང་རིན་པོ་ཆེའི་ཀ་བ་དང་། ཏ་ལ་སྣ་ཚོགས་ཀྱི་ལྗོན་
ཤིང་འོད་དང་ལྡན་པ་བརྒྱད་ཅུ་རྩ་བཞི་བརྒྱད་ཅུ་རྩ་བཞི་ཕྲེང་དུ་དཀྲིགས་སོ། །གཞན་ཡང་རྫིང་བུ་བཞི་ལམ་སྟེགས་ཀྱིས་བསྐོར་བ་ཡོད་དོ། །མི་རྣམས་ནི་རིན་པོ་ཆེ་སྣ་བདུན་གྱི་གཞལ་མེད་ཁང་དྲ་བས་གཡོགས་ཤིང་དར་གྱི་ལྡ་ལྡི་སྤྱངས་པ། །མེ་ཏོག་གིས་རབ་ཏུ་མཛེས་པར་བྱས་པ་དག་
ན་གནས་པས་དཔེར་ན་ལྷ་རྣམས་ཇི་ལྟ་བ་བཞིན་ནོ། །འཇིག་རྟེན་གྱི་ཁམས་དེའི་སེམས་ཅན་རྣམས་ནི་རབ་ཏུ་བདེ་ཞིང་བདེ་བ་དང་ལྡན་པས་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་ཤིང་བྱད་བཞིན་ཤིན་ཏུ་སྡུག་པ། ཚེ་ཤིན་ཏུ་རིང་བ། འདོད་ཆགས་དང་། ཞེ་སྡང་དང་། གཏི་
མུག་སྲབ་པ། གདུལ་སླ་བ། སྦྱོར་བ་ཆུང་ངུས་ཆོས་རྣམས་རྒྱ་ཆེར་རྟོགས་པ་ཤ་སྟག་གོ །དེ་བཞིན་གཤེགས་པ་དེའི་སྐུ་ཚེའི་ཚད་ནི་ལོ་བྱེ་བ་ཕྲག་སྟོང་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་འཇིག་རྟེན་ན་ལོ་བྱེ་བ་སྙེད་གནས་པར་གྱུར་ཏོ། །འདུས་
པ་ལན་བཅུར་ཆོས་བཤད་དེ། འདུས་པ་རེ་རེ་ལ་ཡང་ཉན་ཐོས་ཀྱི་འཁོར་སློབ་པའི་ས་ལ་གནས་པ་ནི་བྱེ་བ་ཁྲག་ཁྲིག་ཕྲག་ཉི་ཤུ་ཡོད་པར་གྱུར་ཏོ། །བྱང་ཆུབ་སེམས་དཔའི་འཁོར་ཐེག་པ་གཅིག་གི་ལམ་ལ་བགྲོད་པར་གྱུར་པ། དེའི་གྲངས་ནི་ཚད་ཀྱང་མེད་དོ། །བློ་གྲོས་མཐའ་
ཡས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེའི་བྱང་ཆུབ་ཀྱི་ཤིང་རིན་པོ་ཆེའི་ཚད་ཀྱང་རྒྱར་ནི་དཔག་ཚད་ལྔ་བཅུ་ཡོད་དོ། །སྲིད་དུ་ནི་དཔག་ཚད་བརྒྱ་ཡོད་དེ། རྩ་བ་ནི་བྱི་རུ་ལས་བྱས་པ། སྡོང་པོ་ནི་བཻ་དཱུརྱ་ལས་བྱས་པ། །ཡལ་ག་ནི་གསེར་ལས་བྱས་པ། །ལོ་མ་ནི་རྡོའི་སྙིང་པོ་

ལས་བྱས་པའོ། །བྱང་ཆུབ་ཀྱི་གདན་གྱི་ཚད་ཀྱང་ཆུ་ཞིང་འདྲ་སྟེ། དཔག་ཚད་བརྒྱ་བརྒྱ་ཡོད་དོ། །གདན་དེའི་མཐའ་མ་ནི་ལན་ཀན་གྱིས་འཁོར་བར་བསྐོར་ཏོ། །ཏ་ལའི་ལྗོན་ཤིང་མཆོག་རྣམས་ཀྱིས་ནི་ཕྲེང་དུ་དཀྲིགས་ཏེ། །གསེར་གྱི་དྲིལ་བུ་དང་། རིན་པོ་ཆེའི་དྲ་བས་
གཡོགས་ཤིང་རབ་ཏུ་བརྒྱན་པར་གྱུར་ཏོ། །བྱང་ཆུབ་ཆེན་པོའི་གདན་དེ་འཕང་དུ་ནི་དཔག་ཚད་གསུམ་ཡོད་དེ། གདན་ཤིན་ཏུ་ཕྲ་ཞིང་འཇམ་པ་དག་དེའི་སྟེང་དུ་བཏིང་ངོ་། །གོས་མཆོག་དམ་པ་བརྒྱ་སྟོང་སྙེད་ཀྱིས་བརྒྱན་ཅིང་སྦྱངས་པར་གྱུར་ཏེ། གདུགས་དང་། རྒྱལ་མཚན་དང་། བ་དན་ཉི་ཤུ་ནི་
གཡས་གཡོན་དུ་དཀྲིགས་སོ། །དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་གདན་དེ་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེའི་ཚེ་འཇིག་རྟེན་གྱི་ཁམས་དེ་ན་ངན་སོང་གསུམ་ཡང་མེད། ངན་སོང་གསུམ་གྱི་མིང་ཡང་མེད། །
མི་ཁོམ་པ་རྣམས་ཀྱང་མེད། མི་ཁོམ་པ་རྣམས་ཀྱི་མིང་ཡང་མེད་དོ། །དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེ་ནི་རྟག་པར་འཇིག་རྟེན་གྱི་ཁམས་ཐམས་ཅད་དུ་སྤྲུལ་པའི་སྐུ་བསྟན་ནས་ཆོས་ཀྱི་འཁོར་ལོ་བསྐོར་བར་མཛད་དོ། །བློ་གྲོས་མཐའ་ཡས་དེ་བཞིན་གཤེགས་པ་ཟླ་བའི་སྒྲོན་
མའི་རྒྱལ་པོ་དེ་ལ་བྱང་ཆུབ་སེམས་དཔའ་གཉིས་ཡོད་དེ། གཅིག་གི་མིང་ནི་སྤྲིན་གྱི་དབྱངས་ཞེས་བྱའོ། །གཅིག་གི་མིང་ནི་དཔག་མེད་དབྱངས་ཞེས་བྱའོ། །བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་འཐོབ་པར་འགྱུར་ལགས། དེ་སྐད་ཅེས་གསོལ་པ་དང་། དེའི་ཚེ་དེ་བཞིན་གཤེགས་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཚུལ་
རྣམ་པར་གཞག་པའི་ཐབས་མཁས་པ་འཐོབ་པར་བྱ་བའི་ཕྱིར་བྱང་ཆུབ་སེམས་དཔའ་དེ་གཉིས་ལ་ཆོས་དེ་རྒྱ་ཆེར་ཡང་དག་པར་རབ་ཏུ་བསྟན་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་དེ་ཐོས་པས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་

མཁས་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེའི་འོག་ཏུ་ལོ་ཉི་ཁྲིའི་བར་དུ་གཉིད་ཀྱང་མེད། འདོད་པ་དང་། ཁོང་ཁྲོ་བ་དང་། རྣམ་པར་འཚེ་བའི་བསམ་པ་ཡང་མེད། ཟས་ཀྱི་འདུ་ཤེས་ཀྱང་མེད། ཉལ་བའི་འདུ་ཤེས་ཀྱང་མེད། ན་བའི་རྐྱེན་ཡང་མེད། སྨན་ལ་
སོགས་པ་ཡོངས་སུ་ཚོལ་བའི་འདུ་ཤེས་ཀྱང་མེད། འཇིག་རྟེན་པའི་ལྟད་མོ་དང་། གཏམ་དང་། རྩེད་མོ་ལ་ཡང་དགའ་བ་མེད་པར་དེ་བཞིན་གཤེགས་པ་དེས་ཆོས་བསྟན་པ་རྩེ་གཅིག་ཏུ་མཉན་པས་སྟན་ལས་མ་ལངས་པར་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་དེ་བཞིན་
གཤེགས་པ་དེས་བཀའ་སྩལ་པ། རིགས་ཀྱི་བུ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་ལ་འདི་ལྟར་ཐབས་མཁས་པར་གྱུར་པ་དེ་དེང་ཁྱེད་ཡོངས་སུ་ཚོལ་བར་བྱེད་དམ། བྱང་ཆུབ་སེམས་དཔའ་དེ་གཉིས་ཀྱིས་གསོལ་པ། བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱི་
ཚུལ་རྣམ་པར་གཞག་པའི་ཐབས་ལ་མཁས་པའི་མིང་ཡང་ཡང་དག་པར་རྗེས་སུ་མི་མཐོང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པའི་ཆོས་མཆིས་པར་ཡང་ཡང་དག་པར་རྗེས་སུ་མི་མཐོང་ན་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་
མཁས་པ་ལྟ་སྨོས་ཀྱང་ཅི་འཚལ་ལགས། བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱང་ཡང་དག་པར་མི་དམིགས། །ཆོས་རྣམས་ཀྱི་རྣམ་པར་གཞག་པ་ཡང་ཡང་དག་པར་མི་དམིགས་པས་ཆོས་ཐམས་ཅད་ལ་གནས་པ་ཡང་མ་ལགས། མི་གནས་པ་ཡང་མ་ལགས་
སོ། །བཅོམ་ལྡན་འདས་བདག་ཅག་དེ་ལྟར་མཐོང་བ་ལ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་འདི་ལྟར་ཐབས་མཁས་པ་དེ་ཡོངས་སུ་ཚོལ་བར་བགྱིད་པ་འམ། ཡོངས་སུ་ཚོལ་བར་མི་བགྱིད་པ་ལྟ་མཆིས་པར་ག་ལ་འགྱུར། །བཅོམ་ལྡན་འདས་བདག་ཅག་ནི་ཆོས་ཐམས་ཅད་
ཀྱི་ཚུལ་རྣམ་པར་གཞག་པ་ལ་དེ་ལྟར་ཐབས་མཁས་པ་ཡོངས་སུ་ཚོལ་བར་བགྱིད་པ་ཡང་ཡང་དག་པར་རྗེས་སུ་མི་མཐོང་། ནང་ངམ། ཕྱི་རོལ་ལམ། དེ་གཉིས་ཀྱི་བར་རམ། ཆོས་ཐམས་ཅད་ཅེས་བགྱི་བ་འམ། ཆོས་ཀྱི་ཚུལ་ལ་དེ་ལྟར་ཐབས་མཁས་པ་རྣམ་པར་གཞག་པ་

ཞེས་བགྱི་བ་ཡང་དག་པར་རྗེས་སུ་མི་མཐོང་། ཆོས་འགའ་ཡང་ནང་ངམ། སླད་རོལ་ལམ། དེ་གཉིས་ཀྱི་བར་རམ། ཆོས་ཐམས་ཅད་ཅེས་བགྱི་བའམ། ཆོས་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་བགྱི་བ་ཡང་ཡང་དག་པར་རྗེས་སུ་མི་མཐོང་ལགས་
སོ། །བཅོམ་ལྡན་འདས་བདག་ཅག་ནི་ཐ་ན་ཆོས་ཅུང་ཟད་ཙམ་ཡང་ནང་ངམ། སླད་རོལ་ལམ། དེ་གཉིས་ཀྱི་བར་རམ། ཆོས་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་བགྱི་བ་བགྲོད་པར་བགྱིར་རུང་བ་འམ་བསྟེན་པར་བགྱིར་རུང་བ་ཡང་ཡང་དག་པར་རྗེས་སུ་མ་མཐོང་ལགས་
སོ། །བཅོམ་ལྡན་འདས་དེ་ལྟར་ཆོས་འགའ་ཙམ་ཡང་གཞོལ་བར་བགྱིད་པ་འམ་བསྟེན་པར་བགྱིར་རུང་བ་མ་མཆིས་ན་བདག་ཅག་གིས་ཇི་ལྟར་དེ་རྣམ་པར་གཞག་པར་བགྱི་ལགས། བཅོམ་ལྡན་འདས་བདག་ཅག་གིས་ནི་འདས་པ་འམ། ད་ལྟར་བྱུང་བ་འམ། མ་འོངས་པ་གང་ཡང་
རྣམ་པར་གཞག་པའི་གནས་སུ་གྱུར་པར་ཡང་ཡང་དག་པར་རྗེས་སུ་མ་མཐོང་བ་ལགས་སོ། །གལ་ཏེ་རྣམ་པར་གཞག་པའི་གནས་ཡང་དག་པར་མཆིས་པ་མ་ལགས་ན་བདག་ཅག་གིས་གང་དུ་ཅི་ཞིག་རྣམ་པར་གཞག་པར་བགྱི་ལགས། བཅོམ་ལྡན་འདས་རྣམ་པར་གཞག་པ་མ་
མཆིས་པའི་སླད་དུ་རྗེས་སུ་འཐུན་པ་ལ་གནས་པ་ཡང་མ་ལགས། རྗེས་སུ་མི་འཐུན་པ་ལ་མི་གནས་པ་ཡང་མ་ལགས་པས་བསམ་པ་མ་མཆིས་པ་དང་མཚུངས་པར་ལྡན་པ་དང་། སྐྱེ་བ་མ་མཆིས་པ་དང་མཚུངས་པར་ལྡན་པར་གྱུར་པ་ལགས་སོ། །བཅོམ་ལྡན་འདས་བདག་ཅག་ནི་
གང་ལས་གང་གིས་གང་དུ་གང་གི་ཚེ་བདག་ཅག་གི་སེམས་དང་། ཡིད་དང་། རྣམ་པར་ཤེས་པ་སྐྱེ་བ་འམ། འགག་པ་ཞེས་བགྱི་བ་ཡང་དག་པར་རྗེས་སུ་མ་མཐོང་ན་སེམས་དང་ཡིད་དང་། རྣམ་པར་ཤེས་པས་ཆོས་ཐམས་ཅད་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་ཇི་
སྐད་དུ་བརྗོད་པར་བགྱི་ལགས། བློ་གྲོས་མཐའ་ཡས་བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་དེའི་སྤྱན་སྔར་དེ་སྐད་སྨྲས་པའི་ཚེ་བྱང་ཆུབ་སེམས་དཔའ་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་བྱེ་བ་ཕྲག་སྟོང་གིས་ནི་བླ་ན་

མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོས་ཡང་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཇི་ལྟར་ཁྱེད་གནས་པ་མེད་པས་གནས་མེད་པ་ལ་གནས་ནས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་
ཐབས་མཁས་པ་ལ་གནས་པ་དེ་བཞིན་དུ་རིགས་ཀྱི་བུ་ཆོས་ཐམས་ཅད་ཀྱང་དེ་བཞིན་ཏེ། དེ་བཞིན་གཤེགས་པ་འཇིག་རྟེན་པའི་རྗེས་སུ་འཐུན་པར་མཛད་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་བརྙེས་པར་སྟོན་པར་མཛད་དོ། །
གལ་ཏེ་དེ་བཞིན་གཤེགས་པ་འཇིག་རྟེན་པའི་རྗེས་སུ་འཐུན་པར་མི་མཛད་ན་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་མངོན་དུ་མཛད་པ་ཡང་མི་སྟོན་ཏོ། །རིགས་ཀྱི་བུ་ཆོས་རྣམས་ལ་ནི་གནས་མེད་དོ། །གནས་མེད་པ་
ཡང་མ་ཡིན་ནོ། །གནས་དང་གནས་མེད་པ་ཞེས་བྱ་བ་གང་ཡིན་པ་དེ་དག་ཐམས་ཅད་ནི་འཇིག་རྟེན་པའི་རྗེས་སུ་འབྲང་བའོ། །འཇིག་རྟེན་པའི་རྗེས་སུ་འབྲང་བ་གང་ཡིན་པ་དེ་ལ་ནི་ཆོས་འགའ་ཙམ་ཡང་སྐྱེ་བར་བྱ་བ་འམ། ཁོང་དུ་ཆུད་པར་བྱ་བ་མེད་པས་དེའི་ཕྱིར་རིགས་ཀྱི་བུ་
ནན་ཏན་བརྩོན་འགྲུས་བསྐྱེད་ནས་མྱུར་དུ་ཆོས་རྣམས་ལས་རྣམ་པར་གྲོལ་བ་འཐོབ་པར་བྱའོ། །བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་ལས་ཆོས་དེ་ལྟ་བུ་ཐོས་པ་དང་། ནམ་མཁའ་ལ་འཕགས་ནས་ཚིགས་སུ་བཅད་དེ་དེ་བཞིན་གཤེགས་པ་ལ་མངོན་པར་
བསྟོད་པ། །ཆོས་ཀྱི་རྒྱལ་པོ་བསམ་མི་ཁྱབ། །ངོ་མཚར་ཆོས་ནི་རབ་ཏུ་བརྙེས། །ཐམས་ཅད་མཁྱེན་པ་རྐང་གཉིས་གཙོ། །སངས་རྒྱས་ཆོས་ནི་བླ་ན་མེད། །ཆོས་ཉིད་བླ་ན་མ་མཆིས་སླད། །དེ་བཞིན་གཤེགས་དང་མཚུངས་མ་མཆིས། །ཆོས་རྣམས་སྐྱེ་བ་མ་མཆིས་པས། །
དེང་བདག་བཟོད་པ་འདི་ཐོབ་ལགས། །བདག་ནི་རྟག་ཏུ་སྐྱེ་བ་དང་། །སྐྱེ་བ་མ་མཆིས་རྟོག་མི་བགྱིད། །དེ་བཞིན་རྣམ་མི་རྟོག་ལ་ཡང་། །ཐམས་ཅད་བསམ་པར་མི་བགྱིད་དོ། །ཆོས་རྒྱལ་ཐུབ་པ་ཆེན་པོ་སྟེ། །ཡོན་ཏན་ཚིག་དང་རྟོག་སྤངས་པ། །རྣམ་པར་དག་པའི་ཆོས་

བསྟན་ནས། །འཁོར་རྣམས་དགའ་བར་མཛད་དུ་གསོལ། །སངས་རྒྱས་ཡོན་ཏན་མཆོག་དག་གི། །མཐའ་ནི་གང་ཞིག་རྟོགས་འཚལ་བས། །བསྐལ་པ་ཚད་མེད་རབ་བརྟགས་ཀྱང་། །དམིགས་པར་ཡང་ནི་མི་འགྱུར་རོ། །ཡོན་ཏན་དཔག་ཏུ་མ་མཆིས་
སླད། །ཁྱད་པར་འཕགས་ཤིང་བླ་ན་མེད། །ཆོས་རྣམས་སྐྱེ་བ་མ་མཆིས་ལ། །བདག་ནི་རྟོག་པར་མི་བགྱིད་དོ། །བདག་ནི་སངས་རྒྱས་ཆོས་དག་ལ། །རྣམ་པར་འཛིན་པར་མི་བགྱིད་པས། །དགེ་བའི་རྩ་བ་མང་པོ་དག །ཇི་ལྟར་འཐོབ་སྙམ་སེམས་མི་བགྱིད། །ཆོས་རྣམས་
བསྟན་དུ་མ་མཆིས་ཤིང་། །སྐྱེ་དང་མཚན་མ་མ་མཆིས་པས། །འདི་ལྟར་མཚན་མ་མ་མཆིས་བཟོད། །འདིར་ནི་ཐམས་ཅད་མངོན་དུ་གྱུར། །དེང་བདག་ཐོབ་པའི་བཟོད་པ་འདི། །ནམས་ཀྱང་ལྡོག་པར་མི་འགྱུར་བས། །དེ་སླད་ཐམས་ཅད་མཁྱེན་པ་ལ། །དེས་ན་དགའ་བ་སྐྱེས་པ་
ལགས། །དེ་བཞིན་གཤེགས་པའི་ཆོས་ལ་བདག །ངེས་པར་སོམ་ཉི་མ་མཆིས་པས། །ཆོས་རྣམས་ཐམས་ཅད་དག་ལ་ཡང་། །ཐེ་ཚོམ་མང་པོ་རབ་ཏུ་སྤངས། །བླ་མེད་སངས་རྒྱས་ཆོས་དག་ལས། །དེང་བདག་བཟོད་པ་འདི་ཐོབ་ཀྱང་། །བདག་ནི་རྟོག་པར་ཡོང་མི་བགྱིད། །རྟོག་པ་
མ་མཆིས་པ་ཡང་མིན། །བློ་གྲོས་མཐའ་ཡས་བྱང་ཆུབ་སེམས་དཔའ་དེ་གཉིས་ཀྱིས་ཚིགས་སུ་བཅད་པ་འདི་དག་སྨྲས་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་ལ་ལན་གསུམ་བསྐོར་བ་བྱས་ཏེ། ལྷའི་མེ་ཏོག་དང་། ཙན་དན་གྱི་ཕྱེ་མས་དེ་བཞིན་གཤེགས་པ་ལ་མངོན་པར་
གཏོར་ཏོ། །དེ་ནས་དེ་བཞིན་གཤེགས་པ་དེས་ཀྱང་འདི་སྐད་དུ་ཁྱེད་བསྐལ་པ་ཉི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེ་བཞིན་གཤེགས་པས་ལུང་
བསྟན་པ་ཐོབ་པས་རབ་ཏུ་དགའ་བར་གྱུར་ཏེ། དེ་བཞིན་གཤེགས་པ་ལ་སེམས་རྩེ་གཅིག་ཏུ་བརྟགས་ནས་བསམ་གཏན་རྣམས་ལ་ཞུགས་པས་རྫུ་འཕྲུལ་གྱིས་རྣམ་པར་རྩེན་པ་དང་། དུད་པ་འཐུལ་བ་དང་། འོད་འབྱིན་པ་དག་ལ་རང་དབང་ཐོབ་པར་གྱུར་ཏོ། །གཞན་ཡང་སེམས་ཅན་

རྣམས་ལ་ཆོས་ཡང་དག་པར་རྣམ་པར་ཕྱེ་སྟེ་བསྟན་པས་ལྷ་དང་། མི་བྱེ་བ་ཕྲག་ཉི་ཤུ་རྩ་བཞི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །བྱང་ཆུབ་སེམས་དཔའ་དེ་གཉིས་ཇི་སྲིད་འཚོའི་བར་དུ་ནན་ཏན་གྱིས་ཚངས་པར་སྤྱོད་པ་ཡང་དག་པར་སྤྱད་ནས་
དེ་བཞིན་གཤེགས་པ་དེས་དུས་བར་མར་གསུངས་པའི་ཡང་དག་པའི་ཆོས་དང་། དུས་ཐ་མར་གསུངས་པའི་ཡང་དག་པའི་ཆོས་རྣམས་རབ་ཏུ་བསྲུངས་ཤིང་ཡོངས་སུ་བཟུང་ངོ་། །གཞན་ཡང་དེའི་ཚེ་དེ་དག་གིས་སེམས་ཅན་བྱེ་བ་ཕྲག་བཞིའི་བར་དུ་བཏུལ་ནས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱས་སོ། །བྱང་ཆུབ་སེམས་དཔའ་དེ་གཉིས་རིམ་གྱིས་སངས་རྒྱས་བརྒྱ་སྟོང་མང་པོ་ལ་རིམ་གྲོ་དང་། མཆོད་པ་བྱས་ནས་དེ་བཞིན་གཤེགས་པ་རྣམས་ཀྱི་ཏིང་ངེ་འཛིན་དང་། ཡང་དག་པའི་ཆོས་རྣམས་མ་ལུས་པར་ཡོངས་སུ་བཟུང་
བས་བསྐལ་པ་ཉི་ཁྲི་འདས་ནས་དེ་བཞིན་གཤེགས་པ་རིན་པོ་ཆེའི་ཏོག་ཅེས་བྱ་བ་ཆོས་ཀྱི་འཁོར་ལོ་རྗེས་སུ་བསྐོར་བ་དང་ཕྲད་པར་གྱུར་པས་སེམས་ཅན་ཚད་མེད་པ་སྙེད་བཏུལ་ཏེ། །ཡོངས་སུ་སྨིན་པར་བྱས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་
གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་དེའི་ཞིང་ནི་ཤིན་ཏུ་རྣམ་པར་དག་ཅིང་ཉན་ཐོས་ཀྱི་མིང་ཡང་མེད་པས་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་འབའ་ཞིག་གིས་གང་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་ཡོངས་སུ་མྱ་ངན་ལས་འདས་པའི་ཚེ་འདི་སྐད་
དུ་ང་ཡོངས་སུ་མྱ་ངན་ལས་འདས་པའི་འོག་ཏུ་བྱང་ཆུབ་སེམས་དཔའ་སྤྲིན་གྱི་དབྱངས་ཞེས་བྱ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མཚན་ཡང་དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཞེས་བྱ་བར་འགྱུར་རོ། །
སངས་རྒྱས་དེའི་ཞིང་ནི་བཀོད་པ་ཕུན་སུམ་ཚོགས་པ། ཡོན་ཏན་དཔག་ཏུ་མེད་པ་ལས་མངོན་པར་གྲུབ་པ། བྱང་ཆུབ་སེམས་དཔའ་དང་། ཉན་ཐོས་ཀྱི་འཁོར་ཕུན་སུམ་ཚོགས་པར་མ་གྱུར་པ་མེད་དོ། །དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཡོངས་སུ་མྱ་ངན་ལས་

འདས་པའི་འོག་ཏུ་བྱང་ཆུབ་སེམས་དཔའ་དཔག་ཏུ་མེད་པའི་དབྱངས་ཞེས་བྱ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་ལུང་བསྟན་ཏོ། །བློ་གྲོས་མཐའ་ཡས་ཆོས་ཀྱི་རྣམ་གྲངས་འདི་ནི་དམིགས་སུ་མེད་པའི་
ཕྱིར་དང་། ཚིག་མེད་པའི་ཕྱིར་བསྟན་དུ་མེད་པ། སྐྱེ་བ་མེད་པ། འགག་པ་མེད་པ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ནན་ཏན་བརྩོན་འགྲུས་ཀྱིས་ཚུལ་བཞིན་དུ་བསྒྲུབ་པར་བྱའོ། །བྱང་ཆུབ་སེམས་དཔའ་གང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་
ཐབས་མཁས་པ་ལ་གནས་ཤིང་དམིགས་སུ་མེད་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ན་སངས་རྒྱས་ཀྱི་ཆོས་ཡོངས་སུ་རྫོགས་པ་དང་། ཡོན་ཏན་ཚད་མེད་པས་རབ་ཏུ་བརྒྱན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །བློ་གྲོས་མཐའ་ཡས་ང་
ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་འདི་མ་གཏོགས་པར་གུད་ན་ཆོས་ཅུང་ཟད་ཙམ་ཡང་ཐམས་ཅད་མཁྱེན་པའི་ཡེ་ཤེས་མངོན་པར་བསྒྲུབ་པར་འགྱུར་བ་ཡོད་པར་ཡང་དག་པར་མི་སྨྲའོ། །གང་ལ་ལ་ཞིག་སྐྱེ་བ་མེད་པ། འགག་པ་མེད་པ། ཤིན་ཏུ་ཟབ་པ། སྟོང་པ་
ཉིད་ཀྱི་ཆོས་འདི་ནན་ཏན་བརྩོན་འགྲུས་ཀྱིས་ཡང་དག་པར་སྒྲུབ་པར་བྱེད་པ་ན་མྱུར་དུ་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་ཚུལ་ལ་ཐབས་མཁས་པ་དང་། གཟུངས་དང་། སྤོབས་པ་ཕུན་སུམ་ཚོགས་པ་དང་། བླ་ན་མེད་པའི་ཡོངས་སུ་སྡུད་པ་འཐོབ་པར་འགྱུར་ཞིང་སངས་རྒྱས་བཅོམ་ལྡན་
འདས་རྣམས་ཀྱིས་ཀྱང་བསྔགས་པ་བརྗོད་པ་དང་། ཆོས་ཀྱི་བཀོད་པའི་ཡོ་བྱད་ཀྱིས་རབ་ཏུ་བརྒྱན་པ་དང་། སྦྱིན་པ་ཡོངས་སུ་རྫོགས་པ་དང་། ཚུལ་ཁྲིམས་རྣམ་པར་དག་པ་ལ་གནས་པ་དང་། བཟོད་པ་རྣམ་པར་དག་པ་དང་། བླ་ན་མེད་པའི་བརྩོན་འགྲུས་དང་། དམིགས་པ་མེད་པའི་བསམ་
གཏན་དང་། ཤེས་རབ་ཆེན་པོ་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་བས་མཆོག་ཏུ་གྱུར་པའི་ནང་ན་རབ་མཆོག་ཏུ་གྱུར་པ་དང་། མྱུར་དུ་ཐམས་ཅད་མཁྱེན་པ་ཞེས་བྱ་བའི་མིང་ཐོབ་ནས་བྱང་ཆུབ་ཀྱི་སྙིང་པོ་ལ་འདུག་པར་འགྱུར་བས་རྒྱལ་པོ་

ཆེན་པོ་བཞི་གདུགས་ཐོགས་ནས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པས་ལྷ་དང་མི་རྣམས་ལ་སྣང་བ་ཆེན་པོ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འགོད་པར་འགྱུར་རོ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་
ཆེན་པོ་གང་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་བརྩོན་འགྲུས་ཀྱིས་སྒྲུབ་པར་བྱེད་ན་ཆོས་ཐམས་ཅད་ཆོས་ཀྱི་དབྱིངས་དང་མཚུངས་པ་ཉིད་དུ་མཐོང་བར་འགྱུར་ཏེ། དེ་ལྟར་མཐོང་བའི་ཚེ་ཆོས་ཀྱི་དབྱིངས་ལ་ཡང་ཆོས་ཐམས་ཅད་དུ་མི་མཐོང་ལ། ཆོས་རྣམས་ལ་ཡང་ཆོས་ཀྱི་དབྱིངས་སུ་
མི་མཐོང་བས་བརྩོན་འགྲུས་ཀྱིས་མངོན་པར་སྒྲུབ་པར་བྱེད་དོ། །ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་པས་ཆོས་ཐམས་ཅད་ཀྱི་ཁམས་ལ་ཡང་མངོན་པར་ཞེན་པ་ཡང་མེད་གཡོ་བ་ཡང་མེད་དོ། །ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་ཤིང་མངོན་པར་ཞེན་
པ་ཡང་མེད། རྣམ་པར་རྟོག་པ་ཡང་མེད་པས་ཆོས་གཅིག་ཏུ་འདུས་པའི་ནང་དུ་ཆོས་ཐམས་ཅད་འདུས་པར་མཐོང་ལ། །ཆོས་ཐམས་ཅད་འདུས་པའི་ནང་དུ་ཆོས་གཅིག་འདུས་པར་མཐོང་ཡང་ཆོས་ཐམས་ཅད་འདུས་པས་ཆོས་གཅིག་འདུས་པ་ལ་སྟེན་པར་ཡང་མི་བྱེད་ལ། ཆོས་གཅིག་
གི་འདུས་པས་ཀྱང་ཆོས་ཐམས་ཅད་ཀྱི་འདུས་པ་ལ་སྟེན་པར་ཡང་མི་བྱེད་དོ། །ཆོས་འདི་གཅིག་རབ་ཏུ་རྟོགས་པའི་ཕྱིར་ཡང་ཆོས་ཐམས་ཅད་རབ་ཏུ་རྟོགས་པར་འགྱུར་ལ། ཆོས་ཐམས་ཅད་རབ་ཏུ་རྟོགས་པའི་ཕྱིར་ཡང་ཆོས་འདི་གཅིག་ཤེས་པར་བྱ་བའི་གནས་རྣམས་རབ་
ཏུ་རྟོགས་པར་འགྱུར་ཡང་ཆོས་རྣམས་ཀྱིས་ཆོས་ཐམས་ཅད་ལ་སྟེན་པར་མི་བྱེད་དོ། །ཉེ་བར་ལེན་པའི་ཕུང་པོ་རྣམས་འདུས་པ་རྟོགས་པར་ཁོང་དུ་ཆུད་པས་ཉེ་བར་ལེན་པའི་ཕུང་པོ་སྣ་ཚོགས་ཀྱི་ངོ་བོ་ཉིད་ཀྱི་མཚན་ཉིད་ལ་ཡང་འདུས་པ་ཡོད་པ་འམ། འདུས་པ་མེད་པར་
མངོན་པར་ཞེན་པ་སྐྱེད་པར་མི་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་སྤྱོད་པའི་ཚེ་ཆོས་གང་རྒྱུ་དང་། རྐྱེན་མང་པོ་འདུས་པ་ལས་སྐྱེ་བ་དང་། ཆོས་གང་རྒྱུ་དང་། རྐྱེན་མང་པོ་འདུས་པ་ལས་མངོན་པར་སྒྲུབ་པར་འགྱུར་བའི་ཆོས་དེ་དག་ཀྱང་རྟོགས་པར་

ཁོང་དུ་ཆུད་དོ། །ཆོས་གང་རྒྱུ་དང་། རྐྱེན་འདུས་པ་ལས་རྣམ་པ་སྣ་ཚོགས་ཀྱི་ངོ་བོ་ཉིད་མཚུངས་པར་ལྡན་པར་འབྱུང་བར་འགྱུར་བའི་ཆོས་གང་ཡིན་པ་དེ་དག་རྟོགས་པར་ཁོང་དུ་ཆུད་ཀྱང་མངོན་པར་ཞེན་པ་ཡང་མེད་ལ། ཆོས་ཐམས་ཅད་ཅེས་གདགས་པའི་མཚན་ཉིད་ཀྱང་རྗེས་སུ་
རྟོགས་པར་བྱེད་དོ། །མཚན་མ་དང་བཅས་པ་དང་མཚན་མ་མེད་པ་ཡང་རབ་ཏུ་རྟོགས་པར་བྱེད་དོ། །ཁམས་རྣམས་ཀྱི་བྱེ་བྲག་དང་། ཁམས་སྣ་ཚོགས་ཀྱི་ངོ་བོ་ཉིད་ཀྱི་མཚན་ཉིད་ཀྱི་བྱེ་བྲག་ཀྱང་རབ་ཏུ་རྟོགས་པར་འགྱུར་རོ། །གང་གིས་རྒྱུ་བྱས་ནས་ཉོན་མོངས་པས་རྟེན་ཅིང་འབྲེལ་བར་འབྱུང་
བའི་ཆོས་རྣམས་ལ་བསྟེན་པ་དང་། གཞོལ་བར་མི་འགྱུར་བ་ཡང་ཁོང་དུ་ཆུད་པར་འགྱུར་རོ། །འཇིག་རྟེན་དང་། འཇིག་རྟེན་ལས་འདས་པའི་ཆོས་རྣམས་ཕན་ཚུན་མི་འགལ་བར་ཡང་རྗེས་སུ་རྟོགས་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་དང་། འཇིག་རྟེན་
པའི་མཚན་ཉིད་ཀྱི་ཕྱག་རྒྱ་ཡང་ཡོངས་སུ་རྟོགས་པར་འགྱུར་རོ། །ཆོས་ཀྱི་རྣམ་གྲངས་གཅིག་གིས་ཀྱང་ཆོས་ཐམས་ཅད་ཀྱི་རྣམ་གྲངས་ཁོང་དུ་ཆུད་པར་བྱེད་ལ། ཆོས་ཀྱི་རྣམ་གྲངས་མང་པོས་ཀྱང་ཆོས་གཅིག་གིས་རྣམ་གྲངས་ཁོང་དུ་ཆུད་པར་བྱེད་དོ། །ཆོས་ཐམས་ཅད་ཀྱི་རྣམ་གྲངས་ཀྱིས་ཀྱང་
ཆོས་གཅིག་གི་རྣམ་གྲངས་ལ་སྟེན་པར་མི་བྱེད་ལ། ཆོས་གཅིག་གི་རྣམ་གྲངས་ཀྱིས་ཀྱང་ཆོས་རྣམས་ཀྱི་རྣམ་གྲངས་ལ་སྟེན་པར་མི་བྱེད་དོ། །ཆོས་ཀྱི་རྣམ་གྲངས་དེ་ལྟ་བུ་དག་མ་ལུས་པར་ཡོངས་སུ་སྦྱོང་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་
ཆེན་པོ་གང་ཆོས་འདི་ནན་ཏན་གྱིས་སྒྲུབ་པར་བྱེད་པ་དེ་དག་ནི་ཚུལ་གཅིག་པའི་ཚིག་གིས་བསྟན་པའི་རྣམ་གྲངས་གཅིག་གིས་ཆོས་ཐམས་ཅད་ཀྱི་ངོ་བོ་ཉིད་རོ་གཅིག་པ་ཁོང་དུ་ཆུད་པར་འགྱུར་བས་ཆོས་ཐམས་ཅད་ལ་རྩོད་པ་མེད་པ་ཚུལ་བཞིན་གྱིས་རབ་ཏུ་དབེན་པའི་མཆོག་འཐོབ་པར་
འགྱུར་ཏེ། ཕན་ཚུན་འགལ་བ་མེད་པར་འཁོར་མང་པོའི་ནང་དུ་ཆོས་འདིའི་བསྔགས་པ་བརྗོད་ནས་ཡང་དག་པར་བསྟན་པ་དང་། ནན་ཏན་གྱིས་བསྒྲུབས་པས་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཡང་རབ་ཏུ་འཐོབ་པར་འགྱུར་རོ། །དེ་ལྟར་མངོན་པར་བསྒྲུབས་པས་རྩོད་པ་

དང་བཅས་པ་འམ། རྩོད་པ་མེད་པར་ཡང་རུང་སྟེ། དེ་དག་ཐམས་ཅད་ཉེ་བར་ཞི་བར་གྱུར་བས་ཚུལ་བཞིན་དུ་གནས་པར་འགྱུར་རོ། །ང་རྒྱལ་དང་། བག་མེད་པ་དག་ཀྱང་རྗེས་སུ་འཐུན་པས་ཡོངས་སུ་སྤོང་བར་བྱེད་དོ། །ངེས་པར་བཤད་པ་དག་ཀྱང་ལེགས་པར་ཡོངས་སུ་འཛིན་པར་བྱེད་
དོ། །མིང་དང་ཚིག་ཐ་དད་པ་དག་ཀྱང་ཡོངས་སུ་རྟོགས་པར་འགྱུར་རོ། །ཆོས་ཀྱི་དབྱིངས་ཀྱི་ཚུལ་དག་ལ་ཡང་ཐབས་མཁས་པས་ནན་ཏན་གྱིས་སྒྲུབ་པར་བྱེད་དོ། །ཆོས་ཀྱི་སྒོ་རྣམས་ཀྱང་ལེགས་པར་ཡིད་ལ་བྱེད་དོ། །ཆོས་གང་དང་མཚུངས་པར་ལྡན་པ་འམ། མཚུངས་པར་མི་ལྡན་
པ་ཡང་རུང་སྟེ། ཐབས་མཁས་པས་ངེས་པའི་དོན་ལ་བསམ་པ་རྣམ་པར་དག་པས་