Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

རབ་ཏུ་གནས་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་སྒོ་འདི་ལ་དེ་ལྟར་གནས་པ་དེ་དག་ནི་སྤྱོད་པ་ཆུང་ངུས་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་
ཏིང་ངེ་འཛིན་ཐོབ་ནས་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཚད་མེད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཁྱེད་ཀྱིས་ཆོས་རྣམས་ཐམས་ཅད་ནི། །ཆོས་ཀྱི་དབྱིངས་སུ་འཇུག་
པར་ལྟོས། །ཆོས་རྣམས་ཆོས་དབྱིངས་མཚུངས་པས་ན། །ཚུལ་ནི་ཀུན་ཀྱང་མཉམ་པ་ཡིན། །གཞན་ཡང་ཆོས་ཀྱི་དབྱིངས་རྣམས་ནི། །ཆོས་རྣམས་ཀུན་དུ་འཇུག་པར་ལྟོས། །ཆོས་དབྱིངས་ཆོས་དང་མཚུངས་པས་ན། །ཚུལ་ནི་ཀུན་དུ་མཉམ་པ་ཡིན། །ཆོས་ཀྱི་དབྱིངས་རྣམས་ལ་ཡང་
ནི། །ཐམས་ཅད་ཆོས་སུ་ལྟ་མི་བྱེད། །ཆོས་ཀྱི་དབྱིངས་ལས་མ་གཏོགས་པར། །ཆོས་རྣམས་སུ་ཡང་ལྟ་མི་བྱེད། །ཆོས་རྣམས་ཐམས་ཅད་ཀུན་ལ་ཡང་། །ཆོས་ཀྱི་དབྱིངས་སུ་ལྟ་མི་བྱེད། །ཆོས་རྣམས་མ་གཏོགས་གུད་ན་ཡང་། །ཆོས་ཀྱི་དབྱིངས་སུ་ལྟ་མི་བྱེད། །ཁམས་ནི་རྣམ་
པ་སྣ་ཚོགས་དང་། །ཆོས་ཀྱི་དབྱིངས་ནི་སྣ་ཚོགས་ཉིད། །ཆོས་འདུས་རྣམས་ནི་རྟོགས་པས་ན། །ཐབས་མཁས་གནས་པ་ཅི་ཡང་མེད། །དུས་དང་གནས་ནི་ཐམས་ཅད་དུ། །སྣ་ཚོགས་ངོ་བོ་འདུས་པ་ཡང་། །གནས་པ་མེད་ཅིང་རྟེན་པ་མེད། །བླང་བར་བྱ་བ་ཅི་ཡང་མེད། །འདུས་པ་ཐ་

དད་ངོ་བོ་ཉིད། །རྣམ་པར་རྟོག་དང་མི་རྟོག་པ། །དེ་ལ་གཉི་ག་ཡོད་མ་ཡིན། །བློ་དང་ལྡན་པས་མཉམ་པར་མཐོང་། །འདུས་པ་གཅིག་ནི་ཤེས་པའི་ཕྱིར། །འདུས་པ་མང་པོ་ཤེས་པར་འགྱུར། །འདུས་པ་མང་པོ་ཤེས་པའི་
ཕྱིར། །འདུས་པ་གཅིག་ཀྱང་ཤེས་པར་འགྱུར། །འདུས་པ་དང་ནི་མ་འདུས་དང་། །རང་བཞིན་གཅིག་དང་ཐ་དད་ལ། །སྟེན་པར་མི་བྱེད་རྟོག་མི་བྱེད། །འཛིན་པ་མེད་ཅིང་ཞེན་པ་མེད། །ཆོས་རྣམས་ཐམས་ཅད་དེ་དག་ལ། །འདུས་པ་མེད་པར་རྟོག་
པས་ན། །འདུས་པ་ཉིད་དུ་མི་སེམས་ཤིང་། །འཛིན་པ་མེད་ཅིང་ཞེན་པ་མེད། །ཆོས་ཀྱི་རྣམ་པ་ཐམས་ཅད་ཀྱི། །གདགས་པའི་མཚན་ཉིད་དེ་ཤེས་པས། །སེམས་པ་མེད་ཅིང་སྟེན་པ་མེད། །འཇིགས་པ་མེད་ཅིང་ཞེན་པ་མེད། །ལས་དང་ལས་ཀྱི་རྣམ་སྨིན་
དག །ཐམས་ཅད་མ་ལུས་རྟོགས་ཤེས་ཤིང་། །དེ་དང་འགལ་བར་མི་བྱེད་པས། །འདི་ནི་བརྩོན་འགྲུས་ལྡན་པ་ཡིན། །ལས་དང་ལས་ནི་གང་བྱས་པ། །འདི་གཉིས་འདུས་པའི་མཚན་ཉིད་ཡིན། །མཚན་དེ་མཚན་མེད་གང་ཤེས་པ། །འདི་ནི་བརྩོན་འགྲུས་
ལྡན་པ་ཡིན། །ཁམས་རྣམས་འདུས་པ་དག་དང་ནི། །ཁམས་ཀྱི་བྱེ་བྲག་ངོ་བོ་ལ། །དེ་དག་རྟག་ཏུ་མཉམ་ཤེས་པ། །འདི་ནི་བརྩོན་འགྲུས་ལྡན་པ་ཡིན། །རྒྱུ་འབྲས་ཕན་ཚུན་འབྲེལ་པ་ནི། །ཐམས་ཅད་ཁོང་དུ་ཆུད་པས་ན། །རྒྱུ་རྐྱེན་ཆོས་ནི་དེ་དག་ལ། །
གོ་བགོས་ཚུལ་བཞིན་གནས་པར་བྱེད། །འཇིག་རྟེན་འདས་པའི་ཆོས་རྣམས་དང་། །འཇིག་རྟེན་པ་ཡི་ཆོས་རྣམས་ནི། །འགལ་བ་ཅུང་ཟད་མེད་རྟོགས་པས། །དེ་བཞིན་མཉམ་པར་གནས་པར་བྱེད། །འཇིག་རྟེན་ཇི་ཙམ་གནས་པ་ཡི། །མཚན་ཉིད་ཕྱག་
རྒྱ་ཐམས་ཅད་ཀྱང་། །རྗེས་འཐུན་སོ་སོར་རྟོག་བྱེད་པས། །ཡོངས་ཤེས་མཉམ་པར་གནས་པར་བྱེད། །ཆོས་ཀྱི་རྣམ་གྲངས་གཅིག་གིས་ནི། །ཆོས་རྣམས་རྣམ་གྲངས་རབ་ཤེས་ཀྱང་། །ཆོས་ཀྱི་རྣམ་གྲངས་མང་པོ་ཡིས། །རྣམ་གྲངས་གཅིག་ནི་ཤེས་མི་

བྱེད། །ཆོས་ཀྱི་རྣམ་གྲངས་གཅིག་གིས་ནི། །རྣམ་གྲངས་མང་པོ་སྟེན་མི་བྱེད། །ཆོས་ཀྱི་རྣམ་གྲངས་མང་པོས་ཀྱང་། །རྣམ་གྲངས་གཅིག་ལ་སྟེན་མི་བྱེད། །ཆོས་ཀྱི་རྣམ་གྲངས་ཐམས་ཅད་ལ། །མཉམ་དང་ཡོངས་སུ་དག་པ་དང་། །ཐ་དད་འདུ་ཤེས་
མེད་གྱུར་པ། །འདི་ནི་སོ་སོར་རྟོག་པ་ཡིན། །ཚིག་གིས་བསྟན་པའི་ཆོས་རྣམས་ལ། །མཉམ་པ་ཉིད་དུ་སྟོན་བྱེད་ཅིང་། །མཉམ་པ་ཉིད་ལ་གང་གནས་པ། །འདི་ནི་སོ་སོར་རྟོག་པ་ཡིན། །ཚིག་གིས་བསྟན་པའི་ཆོས་རྣམས་ལ། །ཚུལ་བཞིན་དུ་ནི་ཤེས་
མཐོང་བ། །རྗེས་འཐུན་རབ་ཏུ་ཐོབ་པས་ན། །འདི་ནི་ཐབས་དང་ལྡན་ཞེས་བྱ། །རྩོད་པའི་སྨྲ་བ་མི་སྐྱེད་ཅིང་། །རྩོད་པའི་རྒྱུ་རྐྱེན་མི་བྱེད་པ། །ཐམས་ཅད་འགལ་བར་མི་བྱེད་པས། །འདི་ནི་རྗེས་འཐུན་ཞེས་བྱའོ། །རྟག་ཏུ་རྩོད་པ་མེད་སྐྱེད་ཅིང་། །
རྩོད་པ་མེད་དང་མཚུངས་ལྡན་པ། །མཉམ་ཞིང་འགལ་བར་མི་བྱེད་པས། །འདི་ནི་བློ་ལྡན་ཞེས་བྱའོ། །ཆོས་རྣམས་ཀུན་གྱི་ཚུལ་དག་ལ། །རྩོད་པར་སྨྲ་བ་ཉེར་ཞི་ཞིང་། །གོ་བགོས་ཚུལ་བཞིན་གང་སྒྲུབ་པ། །འདི་ནི་དཔའ་བོ་ཞེས་བྱའོ། །དེ་ལྟར་སོ་སོར་
རབ་བརྟགས་ནས། །གཅིག་ཏུ་རྩོད་པ་མེད་གྱུར་པ། །འཁོར་འདུས་མང་པོ་རྣམས་སུ་ནི། །བླ་མེད་ཆོས་ནི་བསྔགས་པར་འགྱུར། །འདི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་རྒྱ་མཚོ་ཐམས་ཅད་ཀྱི། །ཕྱག་རྒྱའི་ཏིང་འཛིན་མངོན་སྒྲུབ་པ། །
འདི་ནི་ཡང་དག་དྲན་ལྡན་ཡིན། །འདི་ལྟར་གཅིག་ཏུ་རྩོད་པ་མེད། །ནན་ཏན་གྱིས་ནི་སྒྲུབ་བྱེད་ཅིང་། །རྩོད་སྨྲ་ཉེར་ཞི་མཚུངས་ལྡན་པ། །ཏིང་འཛིན་འདི་ནི་རྫོགས་པར་བྱེད། །ཚུལ་བཞིན་དུ་ནི་རབ་གནས་ཤིང་། །གསང་སྟེ་གསུངས་པ་གང་ཤེས་པ། །
བདག་དང་ང་རྒྱལ་ཤེས་པས་ན། །ང་རྒྱལ་སེམས་མཐོ་སྤོང་བར་བྱེད། །ངེས་པར་གསུངས་པའི་གསུང་རབ་ལས། །ཐབས་མཁས་ཡོངས་སུ་རྫོགས་བྱེད་ཅིང་། །བྱེ་བྲག་མིང་ནི་གང་ཤེས་པ། །འདི་ནི་བློ་ལྡན་ཞེས་བྱའོ། །ཆོས་རྣམས་ཀུན་གྱི་ཚུལ་

ལ་ནི། །ཚུལ་བཞིན་ནན་ཏན་གང་སྒྲུབ་པ། །ཆོས་རྣམས་ཀུན་གྱི་སྒོ་མཐོང་བས། །འདི་ནི་ཆོས་མཐོང་ཞེས་བྱའོ། །དེ་ལྟར་ནན་ཏན་གང་སྒྲུབ་པ། །ཆོས་གང་མཚུངས་པར་ལྡན་པ་དང་། །ཆོས་གང་མཚུངས་པར་མི་ལྡན་པ། །ཆོས་དེ་
ཐམས་ཅད་ཤེས་པར་འགྱུར། །ཆོས་རྣམས་ཐམས་ཅད་ཀུན་ལས་ནི། །ལས་ནི་དག་པར་གང་དྲན་པ། །ངེས་པར་གསུངས་པའི་དོན་དག་ལ། །ཐབས་མཁས་པ་ནི་འཐོབ་པར་འགྱུར། །ཆོས་རྣམས་ཐམས་ཅད་ཀུན་ལ་ནི། །བརྩོན་འགྲུས་བསྐྱེད་
ནས་གང་སེམས་པ། །ཆོས་རྣམས་ཐམས་ཅད་རྟོགས་པས་ན། །ཏིང་འཛིན་འདི་ནི་འཐོབ་པར་འགྱུར། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་འདི་ལ་ནན་ཏན་གྱིས་སྒྲུབ་པར་བྱེད་ན་གཞན་ཡང་ཏིང་
ངེ་འཛིན་གྱི་ཆོས་ཡོངས་སུ་སྡུད་པར་འགྱུར་གྱིས་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཡང་དག་པར་བཤད་པར་བྱའོ། །བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་
སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་ཀྱི་སྣང་བའི་སྒོ་ཡོད་དེ། ཆོས་ཀྱི་ཚུལ་ལ་ཐབས་མཁས་པ་འབྱུང་བར་བྱེད་དོ། །
ཆོས་ཐམས་ཅད་ཀྱི་ཕྱག་རྒྱ་རབ་ཏུ་འབྱུང་བར་བྱེད་དོ། །ཆོས་ཀྱི་ཕྱག་རྒྱའི་སྒོ་ཐམས་ཅད་དུ་འཇུག་པར་འགྱུར་རོ། །ཆོས་ཐམས་ཅད་ཀྱི་བྱ་བ་རྣམས་ཁོང་དུ་ཆུད་ཅིང་རབ་ཏུ་འཇིག་པར་འགྱུར་རོ། །ཆོས་ཀྱི་སྣང་བ་འཐོབ་པར་ནུས་ཤིང་ཡང་དག་པར་
རབ་ཏུ་སྟོན་པར་བྱེད་དོ། །ཆོས་ཀྱི་སྣང་བའི་དབང་གིས་ཆོས་ཀྱི་ཚིག་གི་སྒོ་རྣམས་ལ་རྗེས་སུ་གཞོལ་བར་བྱེད་དོ། །ཐབས་མཁས་པའི་སྣང་བ་ཡང་དག་པར་འབྱུང་བར་བྱེད་པའི་ཆོས་ཀྱི་སྣང་བའི་སྒོ་དེ་ཡང་གང་ཞེ་ན། འདི་ལྟ་སྟེ། མིང་ཐ་དད་པ་

བསྟན་པའི་སྒོ་དང་། གསང་བ་བསྡམས་པའི་སྒོ་དང་། མིང་ཐ་དད་པའི་དངོས་པོའི་སྒོ་དང་། དངོས་པོ་ཡོངས་སུ་བསྡུ་བའི་སྒོ་དང་། བྱེ་བྲག་རྣམས་ཀྱི་སྒོ་རབ་ཏུ་རྟོགས་པ་གང་ཡིན་པའོ། །ཇི་ལྟར་དེ་དག་ཁོང་དུ་ཆུད་ནས་ཏིང་ངེ་འཛིན་གྱི་སྒོ་ཡང་
དག་པར་སྐྱེ་བར་འགྱུར་ཞེ་ན། ཆོས་ཀྱི་དབྱིངས་ཀྱི་ཚུལ་གྱི་སྒོ་ཐམས་ཅད་ནི་དོན་གཅིག་ཏུ་འཇུག་པར་འགྱུར་བས་ཆོས་ཀྱི་སྣང་བ་རྣམས་རྗེས་སུ་རྟོགས་པར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་
གང་ཆོས་ཟབ་མོའི་ཚུལ་ལ་ཐབས་མཁས་པ་འདི་སྒྲུབ་པར་བྱེད་པ་དང་། སྒྲུབ་པར་འགྱུར་བ་དང་། ཡོངས་སུ་ཚོལ་བ་དང་། ཡོངས་སུ་ཚོལ་བར་འགྱུར་བ་དེ་དག་ཆོས་ཀྱི་རྣམ་གྲངས་འདི་ཐོབ་པར་གྱུར་ན་སྦྱོར་བ་ཆུང་ངུས་སྣང་བ་ཆེན་པོ་ཐོབ་ནས་ཆོས་
ཀྱི་སྒོ་རབ་ཏུ་འཇུག་པར་འགྱུར་རོ། །ཆོས་ཀྱི་སྒོ་འདི་ལས་ཀྱང་ཡང་སྣང་བ་བྱུང་ནས་སྣང་བ་དེས་ཀྱང་ཆོས་ཀྱི་སྒོ་ཇི་ལྟ་བུ་དང་། སྤྱོད་པ་ཇི་ལྟ་བ་བཞིན་དུ་རྗེས་སུ་འཇུག་ཅིང་རྗེས་སུ་སྤྱོད་པར་འགྱུར་བས་ཚུལ་ཇི་ལྟ་བ་བཞིན་དུ་ཏིང་ངེ་འཛིན་གྱི་སྟོབས་ཀྱིས་ཆོས་
ཀྱི་སྒོ་རྣམས་ལ་སོ་སོར་རབ་ཏུ་རྟོགས་པར་བྱེད་དོ། །ཏིང་ངེ་འཛིན་གྱི་སྒོ་ནས་ཤེས་རབ་སྐྱེས་པས་ཀྱང་དེ་ཁོ་ན་ཉིད་ཀྱི་ཚུལ་གང་ཡིན་པ་དག་རབ་ཏུ་རྟོགས་པར་འགྱུར་ཏེ། ཏིང་ངེ་འཛིན་གྱི་མཐུའི་ཕྱིར་དང་། ཆོས་ཀྱི་སྒོ་ལ་སོ་སོར་རབ་ཏུ་རྟོགས་པར་བྱེད་
པའི་ཕྱིར་དང་། ཤེས་རབ་སྐྱེད་པར་བྱེད་པའི་ཕྱིར་ཏིང་ངེ་འཛིན་གྱི་སྒོ་ནས་ཆོས་ཀྱི་དབྱིངས་རྟོགས་ཤིང་ཐབས་མཁས་པ་ལ་གནས་པར་འགྱུར་བས་ཆོས་ཀྱི་སྒོའི་སྣང་བ་ཐམས་ཅད་རབ་ཏུ་སྐྱེད་པ་དང་། ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་
ཅད་ཀྱང་རབ་ཏུ་འཐོབ་པར་འགྱུར་རོ། །བློ་གྲོས་མཐའ་ཡས་ཆོས་ཀྱི་སྒོ་ཞེས་བྱ་བ་གང་ཞེ་ན། འདི་ལྟ་སྟེ་ཡི་གེ་ཨ་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་མ་རིག་པས་མངོན་པར་འདུས་བྱས་པས་འདུ་བྱེད་ཡོངས་སུ་རྫོགས་པར་འགྱུར་

བ་གང་ཡིན་པ་ཡི་གེ་ཨ་ཞེས་བྱ་བ་སྔོན་དུ་འགྲོ་བས་མ་རིག་པ་ཉེ་བར་ཞི་བར་བྱེད་དོ། །གནས་པར་བྱ་བ་ཅི་ཡང་མེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མཚན་མ་མེད་པའི་ཕྱག་རྒྱའི་སྒོར་འཇུག་པར་བྱའོ། །
ཡི་གེ་ཨི་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལས་ཀྱི་རྣམ་པར་སྨིན་པའི་འབྲས་བུ་དང་། ལས་ཀྱི་བྱ་བ་དང་། ལས་དང་། འབྲས་བུ་དང་། ཚོགས་པ་རྣམས་འགྲུབ་པར་བྱེད་པ་དང་། ལས་དང་འབྲས་བུ་དང་། ཚོགས་པ་དང་།
རྐྱེན་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་མེད་པ་དང་། འབྲས་བུ་མེད་པ་དང་། ཚོགས་པ་མེད་པ་དང་། རྐྱེན་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་འདུ་བྱེད་རྣམས་ཀྱི་ཕྱག་རྒྱས་ཆོས་
ཐམས་ཅད་ཕྱག་རྒྱས་བཏབ་ནས་ལས་རྣམ་པ་སྣ་ཚོགས་དང་། ལས་ཀྱི་བྱ་བ་སྣ་ཚོགས་དག་ལས་ཆོས་ཀྱི་ཡེ་ཤེས་ཀྱི་སྣང་བ་ཐམས་ཅད་རབ་ཏུ་སྐྱེད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུ་བྱེད་ཐམས་ཅད་ལ་ཐབས་མཁས་པའི་ཕྱག་རྒྱའི་
སྒོར་འཇུག་པར་བྱའོ། །འདི་ལྟར་ཡི་གེ་དྷ་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ཡི་གེ་མཱ་ཞེས་བྱ་བས་མིང་དང་ཚིག་ཏུ་གདགས་པའི་གྲོགས་བྱས་པས་ཆོས་སྣ་ཚོགས་དང་མཚུངས་པར་ལྡན་པར་འགྱུར་བ་དང་། ཡི་གེ་དྷ་དང་མས་
གྲོགས་བྱས་པར་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པ་མེད་པ་དང་། གྲོགས་མེད་པ་དང་། མིང་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་ཕྱག་རྒྱ་དཔག་ཏུ་མེད་པས་ཆོས་ཐམས་ཅད་ཕྱག་
རྒྱས་བཏབ་པས་རྣམ་པར་རྟོག་པ་ཐམས་ཅད་མི་དམིགས་ཤིང་རྣམ་པར་རྟོག་པ་ཡོངས་སུ་སྤོང་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྣམ་པར་མི་རྟོག་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་མཐའ་མེད་པའི་ཕྱག་རྒྱས་

ཆོས་ཐམས་ཅད་ཕྱག་རྒྱས་བཏབ་ནས་མཐའ་འདུས་པ་མེད་ཅིང་མཐའ་ཡོངས་སུ་ཟད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྟོག་པ་མེད་པ་དང་། དཔྱོད་པ་མེད་པ་དང་། ཚིག་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་
རང་བཞིན་སྣ་ཚོགས་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་རང་བཞིན་གཅིག་གིས་མངོན་པར་འདུས་བྱས་པའི་མཚན་མ་དང་། རང་བཞིན་སྣ་ཚོགས་ཀྱི་འདུ་ཤེས་རབ་ཏུ་སེལ་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་རང་བཞིན་སྣ་ཚོགས་ཀྱི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་འདུན་པ་དང་། མཚུངས་པར་ལྡན་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་འདུས་བྱས་ཀྱི་སྤྱོད་པ་མངོན་དུ་བྱུང་བ་རྣམས་ཡོངས་སུ་རྫོགས་པར་བྱེད་པ་དང་། འདོད་པ་
སྤངས་ནས་རབ་ཏུ་དབེན་པར་གྱུར་པ་དང་། ཚོགས་པ་ཉིད་ཡོད་པ་མ་ཡིན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདོད་པ་ཟད་པར་བྱེད་པའི་ཤེས་པ་དང་། མཐོང་བ་དང་། ཚོགས་པ་མེད་པའི་ཕྱག་རྒྱའི་སྒོར་འཇུག་པར་བྱ་སྟེ། བློ་གྲོས་
མཐའ་ཡས་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱག་རྒྱའི་སྒོས་ཆོས་ཐམས་ཅད་ཕྱག་རྒྱས་བཏབ་པ་ཡིན་ཏེ། ཕྱག་རྒྱའི་སྒོ་འདིས་ཆོས་ཐམས་ཅད་ལ་རབ་ཏུ་འཇུག་པར་བྱེད་དོ། །བློ་གྲོས་མཐའ་ཡས་གཞན་ཡང་ཐོགས་པ་མེད་
པའི་སྒོ་དང་། རྗེས་སུ་འཐུན་པ་མེད་པའི་སྒོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཁོང་དུ་ཆུད་པར་བྱས་ནས་རྗེས་སུ་འཇུག་པར་བྱའོ། །དེ་ལ་ཐོགས་པ་མེད་པའི་སྒོ་དང་། ཚོགས་པ་མེད་པའི་སྒོ་ཞེས་བྱ་བ་གང་ཡིན་ཞེ་ན། འདི་
ལྟ་སྟེ་ནམ་མཁའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མངོན་པར་ཞེན་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རབ་ཏུ་དབེན་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་

བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཉིས་སུ་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རབ་ཏུ་ཞི་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་ཕྱག་རྒྱའི་
སྒོར་འཇུག་པར་བྱའོ། །འདི་ལྟར་རྣམ་པར་ཕྱེ་བ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཡོ་བ་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་གནས་མེད་པའི་ཕྱག་རྒྱས་ཆོས་ཐམས་ཅད་ཕྱག་
རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀུན་ནས་ཉོན་མོངས་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །ངོ་བོ་ཉིད་ཀྱིས་སྟོང་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ཐོབ་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །མཚན་མ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐབས་མཁས་པས་སྒོམ་པའི་ཕྱག་རྒྱའི་སྒོར་འཇུག་པར་བྱའོ། །སྨོན་པ་མེད་པའི་ཕྱག་རྒྱས་
ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་སྨོན་ལམ་གྱི་སྣང་བའི་ཕྱག་རྒྱའི་སྒོར་འཇུག་པར་བྱའོ། །འདོད་ཆགས་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་
པོ་རྣམས་རྣམ་པར་རྟོག་པ་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པའི་ཕྱག་རྒྱའི་སྒོར་འཇུག་པར་བྱའོ། །སྐྱེ་བ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ཤེས་པ་དང་། མཐོང་བ་སྐྱེ་བ་དང་།
སྐྱེ་བ་མེད་པའི་ཕྱག་རྒྱའི་སྒོར་འཇུག་པར་བྱའོ། །ཉེ་བར་ཞི་བར་འགྱུར་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕུང་པོ་ཡོངས་སུ་སྤོང་བའི་ཕྱག་རྒྱའི་སྒོར་འཇུག་པར་བྱའོ། །མཚན་མ་ཟད་པར་བྱེད་པའི་

ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྐྱེ་བ་ཟད་པར་བྱེད་པའི་ཕྱག་རྒྱའི་སྒོར་འཇུག་པར་བྱའོ། །ཆོས་ཀྱི་དབྱིངས་ཀྱི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཆོས་ཀྱི་དབྱིངས་རབ་ཏུ་རྟོགས་པ་ལ་མཁས་པའི་ཕྱག་རྒྱའི་སྒོར་འཇུག་པར་བྱའོ། །རྗེས་སུ་དྲན་པ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པར་རྣམ་པར་རྟོག་པ་མེད་ཅིང་
མཉམ་པ་ཉིད་དུ་གྱུར་པའི་ཕྱག་རྒྱའི་སྒོར་འཇུག་པར་བྱའོ། །ངོ་བོ་ཉིད་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རང་བཞིན་ཐམས་ཅད་ཡོངས་སུ་ཤེས་པའི་ཕྱག་རྒྱའི་སྒོར་འཇུག་པར་བྱའོ། །
ཡོངས་སུ་མྱ་ངན་ལས་འདས་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཞི་བ་དང་། འགོག་པའི་རྗེས་སུ་འབྲང་བའི་ཕྱག་རྒྱའི་སྒོར་འཇུག་པར་བྱ་སྟེ། བློ་གྲོས་མཐའ་ཡས་འདི་
དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ལ་ཐོགས་པ་མེད་པའི་སྒོ་དང་། རྗེས་སུ་འཐུན་པའི་སྒོ་དང་། རྟག་པ་དང་། ཆད་པར་ལྟ་བ་ཐམས་ཅད་ལས་ཡང་དག་པར་འདས་པའི་སྒོ་དང་། མཐའ་མེད་པའི་སྒོ་དང་། སྔོན་དང་ཕྱི་མའི་མཐའ་མེད་པའི་སྒོ་ཡིན་
ཏེ། འདི་ལྟར་ཡོངས་སུ་སྐྱོ་བར་གྱུར་པའི་ཕྱིར་དང་། འགོག་པར་བྱེད་པའི་ཕྱིར་དང་། ཞི་བར་བྱེད་པའི་ཕྱིར་དང་། བསིལ་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཕྱག་རྒྱའི་སྒོ་འདིའི་རྗེས་སུ་བསླབ་པར་བྱ་སྟེ། རྗེས་སུ་འཇུག་པར་བྱ། ལེགས་པར་
བསྒོམ་པར་བྱའོ། །ཆོས་ཀྱི་སྒོ་འདི་རྣམས་ཀྱིས་ནི་ཆོས་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་རབ་ཏུ་ཐོབ་པར་བྱེད་དོ། །ཏིང་ངེ་འཛིན་འདི་དང་ཡང་དག་པ་ཇི་ལྟ་བ་བཞིན་དུ་རྗེས་སུ་འཐུན་པར་གྱུར་ན། ཆོས་རྣམས་ལ་ཐབས་མཁས་པའི་ཤེས་པ་ཡོངས་སུ་སྡུད་པར་བྱེད་དོ། །དེ་ལྟ་བས་ན་

བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཕྱག་རྒྱའི་སྒོ་འདི་ལེགས་པར་བསྒོམས་ནས་ཆོས་ཀྱི་རྒྱ་མཚོའི་ཏིང་ངེ་འཛིན་ཐམས་ཅད་ལ་གནས་ཏེ། ཆོས་ཐམས་ཅད་ལ་སོ་སོར་རབ་ཏུ་རྟོག་པར་བྱེད་ན། ཆོས་ཀྱི་སྣང་བ་ཆེན་པོ་ཚད་མེད་དཔག་ཏུ་མེད་པ་སྐྱེ་ཞིང་རབ་ཏུ་འབྱུང་བར་
འགྱུར་རོ། །བློ་གྲོས་མཐའ་ཡས་འདི་ལྟ་སྟེ། དཔེར་ན་རྒྱ་མཚོ་ཆེན་པོའི་ཆུ་ནི་ཚད་མེད་པས་དེའི་ཚད་གང་གིས་ཀྱང་དཔག་པར་མི་ནུས་སོ། །དེ་བཞིན་དུ་ཆོས་ཐམས་ཅད་ཀྱང་ཚད་མེད་པས་གང་གིས་ཀྱང་དེའི་ཚད་དཔག་པར་མི་ནུས་སོ། །གཞན་ཡང་འདི་ལྟ་སྟེ། དཔེར་ན་ཆུ་ཀླུང་ཐམས་ཅད་ནི་རྒྱ་མཚོ་ཆེན་
པོར་འབབ་ཅིང་འཇུག་པར་འགྱུར་རོ། །དེ་བཞིན་དུ་ཆོས་ཐམས་ཅད་ཀྱང་ཆོས་ཀྱི་ཕྱག་རྒྱར་འཇུག་པར་འགྱུར་བས་དེའི་ཕྱིར་རྒྱ་མཚོའི་ཕྱག་རྒྱ་ཞེས་བྱ་སྟེ། ཆོས་ཐམས་ཅད་ཕྱག་རྒྱས་བཏབ་ནས་ཆོས་རྣམས་ཀྱི་རྒྱ་མཚོའི་ཕྱག་རྒྱར་ཞུགས་པར་གྱུར་ན་ཕྱག་རྒྱ་འདིས་ཆོས་ཐམས་ཅད་ཆོས་ཀྱི་ཕྱག་རྒྱ་དང་མཚུངས་པར་
མཐོང་བས་སོ། །གཞན་ཡང་འདི་ལྟ་སྟེ། དཔེར་ན་ཀླུ་ཆེན་པོ་དང་། ཀླུའི་འཁོར་ལུས་ཆེན་པོ་དང་ལྡན་པ་རྣམས་ནི་རྒྱ་མཚོ་དང་ལྡན་ཞིང་རྒྱ་མཚོར་འཇུག་པར་ནུས་པས། རྒྱ་མཚོ་ཆེན་པོ་དེ་དག་ལ་གནས་སུ་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ་བསྐལ་པ་བརྒྱ་སྟོང་ཚད་མེད་པ་
སྙེད་དུ་ཐེག་པ་རྣམས་ལེགས་པར་བསྒོམས་པས་ཏིང་ངེ་འཛིན་གྱི་ཕྱག་རྒྱའི་སྒོ་འདིར་འཇུག་པར་ནུས་ཤིང་ཕྱག་རྒྱའི་སྒོ་འདི་ཉིད་ལ་གནས་པར་བྱེད་དེ། སངས་རྒྱས་ཀྱི་ཆོས་རྣམས་མངོན་དུ་བྱ་བའི་ཕྱིར་དང་། ཐམས་ཅད་མཁྱེན་པ་ལེགས་པར་ཡོངས་སུ་རྫོགས་པར་བྱ་བའི་ཕྱིར་ཆོས་རྣམས་ཀྱི་ཕྱག་རྒྱའི་སྒོ་དེ་ལྟ་
བུ་དག་མངོན་པར་སྒྲུབ་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་སྒོ་འདི་ནན་ཏན་གྱིས་སྒྲུབ་པར་བྱེད་ན་ཆོས་ཐམས་ཅད་ཀྱི་སྒོ་ལ་ཡང་དག་པར་སློབ་པར་འགྱུར་རོ། །ཆོས་ཀྱི་སྒོ་རྣམས་ཆོས་ཀྱི་སྒོ་འདིར་འདུ་བར་མཐོང་བའི་ཕྱིར་ཆོས་ཀྱི་སྣང་བ་རྣམས་བསྐྱེད་ནས་ཆོས་ཀྱི་རྒྱ་མཚོ་
ཐམས་ཅད་དུ་འཇུག་པར་འགྱུར་བས་དེའི་ཕྱིར་ཆོས་ཀྱི་རྣམ་གྲངས་འདི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཅེས་བྱའོ། །གཞན་ཡང་འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་རིན་པོ་ཆེ་ཆེན་པོ་རྣམས་འདུ་བའི་གནས་སུ་གྱུར་པ་ཡིན་ནོ། །ཏིང་ངེ་འཛིན་འདི་ཡང་དེ་བཞིན་དུ་ཆོས་ཐམས་ཅད་

དང་། ཆོས་ལ་ཐབས་མཁས་པ་རྣམས་འདུ་བའི་གནས་སུ་གྱུར་པ་ཡིན་ནོ། །བློ་གྲོས་མཐའ་ཡས་སེམས་ཅན་གང་ལ་ལ་ཞིག་སངས་རྒྱས་ཀྱི་མཁྱེན་པ་དང་། གཟིགས་པ་བླ་ན་མེད་པ་འཐོབ་པར་བྱ་བའི་ཕྱིར་ཏིང་ངེ་འཛིན་འདི་ཡོངས་སུ་ཚོལ་བར་གྱུར་པ་དང་། ཡོངས་སུ་ཚོལ་
བར་འགྱུར་བ་དང་། ཡོངས་སུ་ཚོལ་བར་བྱེད་པ་དེ་དག་ནི་ཆོས་ཀྱི་རྒྱ་མཚོ་ཡོངས་སུ་རྫོགས་པའི་ཤེས་རབ་ཐམས་ཅད་ཡོངས་སུ་ཚོལ་བར་བྱེད་པ་ཡིན་པས་དོན་དེའི་ཕྱིར་ངས་ཆོས་ཀྱི་ཕྱག་རྒྱ་འདི་ཁྱོད་ལ་གཏད་པ་ཡིན་གྱིས་ཁྱོད་ཀྱིས་ཀྱང་མ་འོངས་པའི་དུས་ལྔ་བརྒྱ་ཐ་མ་ལ་ཡང་དག་
པའི་ཆོས་འཇིག་པར་འགྱུར་བའི་ཚེ་ཆོས་ཀྱི་ཕྱག་རྒྱ་འདིས་སེམས་ཅན་རྣམས་ལ་ཡོངས་སུ་གདབ་པར་བྱའོ། །ཆོས་ཀྱི་ཕྱག་རྒྱ་འདིས་གང་ལ་བཏབ་པར་གྱུར་ན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་ཞིང་སངས་རྒྱས་ཀྱི་
ཆོས་ཡོངས་སུ་རྫོགས་པར་བྱེད་པས་མྱུར་དུ་བྱང་ཆུབ་ཀྱི་སྙིང་པོར་འགྲོ་བ་དང་། བླ་ན་མེད་པའི་ཆོས་ཀྱི་འཁོར་ལོ་སྐོར་བ་དང་། སངས་རྒྱས་ཀྱི་གདུང་བསབ་པ་དང་། ཐམས་ཅད་མཁྱེན་པའི་ས་ལ་རྗེས་སུ་འཐུན་པར་གནས་པ་དང་། བླ་ན་མེད་པའི་ཡོངས་སུ་མྱ་ངན་ལས་འདས་
པ་ཆེན་པོས་ཡོངས་སུ་མྱ་ངན་ལས་འདས་པ་དང་། ལྷ་དང་མི་རྣམས་ཀྱང་ཡང་དག་པའི་ཆོས་ཡོངས་སུ་འཛིན་པ་ལ་གཟུང་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡོན་ཏན་ཁྱད་པར་དུ་འཕགས་པ་དེ་ལྟ་བུ་ཡོངས་སུ་སྡུད་པར་འདོད་པ་
དེས་ཆོས་ཟབ་མོ་འདི་ལ་ནན་ཏན་གྱིས་བསླབ་པར་བྱ་ཞིང་བག་ཡོད་པ་དང་ལྡན་པར་བྱའོ། །གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རི་རབ་ཀྱི་འོད་ལས་ཡང་དག་པར་འདས་པའི་རྒྱལ་

པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་དགེ་བ་ལ་གནས་པ་ཞེས་བྱའོ། །འཇིག་རྟེན་གྱི་ཁམས་ནི་ཡིད་དགའ་བར་བྱེད་པ་ཞེས་བྱའོ། །བསྐལ་པ་དེའི་སེམས་ཅན་རྣམས་ཚེ་རིང་ཞིང་ཚེའི་ཚད་མེད་པ་དང་། རབ་ཏུ་བདེ་ཞིང་འབྱོར་བ་དང་ལྡན་
པ་དང་། དགེ་བའི་ཆོས་ལ་རབ་ཏུ་གནས་པས་དེའི་ཕྱིར་བསྐལ་པ་དེའི་མིང་དགེ་བ་ལ་གནས་པ་ཞེས་བྱའོ། །སངས་རྒྱས་ཀྱི་ཞིང་དེ་ཡངས་ཤིང་རྒྱ་ཆེ་བ་དང་། ཤིན་ཏུ་མཛེས་པས་མཐོང་བ་རྣམས་ཡིད་བདེ་ཞིང་དགའ་བར་བྱེད་པ་དང་། སྤོས་ཀྱི་ངད་དང་ལྡན་
པས་ཀུན་དུ་ཁྱབ་པར་བྱེད་པས་དེའི་ཕྱིར་འཇིག་རྟེན་གྱི་ཁམས་དེ་ཡིད་དགའ་བར་བྱེད་པ་ཞེས་བྱའོ། །དེའི་ཚེ་གླིང་བཞི་ལས་གླིང་གསུམ་གྱི་ཚད་མཉམ་སྟེ། དཔག་ཚད་བརྒྱད་ཁྲི་བརྒྱད་ཁྲི་ཡོད་དོ། །གླིང་རེ་རེ་ན་ཡང་གྲོང་ཁྱེར་ཉི་ཁྲི་ཉི་ཁྲི་ཡོད་དེ། གྲོང་ཁྱེར་
རེ་རེའི་ཚད་ཀྱང་དཔག་ཚད་བཅུ་བཅུ་ཡོད་དོ། །འཛམ་བུའི་གླིང་གི་ཚད་ནི་དཔག་ཚད་བྱེ་བ་ཡོད་དོ། །དེ་ན་གྲོང་ཁྱེར་བརྒྱད་ཁྲི་ཡོད་དོ། །གྲོང་ཁྱེར་རེ་རེའི་ཚད་ཀྱང་དཔག་ཚད་ཉི་ཤུ་ཉི་ཤུ་ཡོད་དོ། །དེ་དག་ཀྱང་གཞལ་མེད་ཁང་བརྩེག་མ་དང་། ར་བས་འཁོར་བར་བསྐོར་
བ། གོས་སྣ་ཚོགས་འབྱུང་བའི་ཤིང་ལྗོན་པ་དང་། རོ་སྣ་ཚོགས་འབྱུང་བའི་ཤིང་ལྗོན་པ་དང་། མེ་ཏོག་སྣ་ཚོགས་ཀྱི་ཤིང་ལྗོན་པ་དང་། རིན་པོ་ཆེའི་ཤིང་ཏ་ལ་དག་གིས་རབ་ཏུ་བརྒྱན་པ། །ཡུལ་བདེ་ཞིང་མིས་རབ་ཏུ་གང་བར་གྱུར་ཏོ། །དེ་ན་གྲོང་ཁྱེར་མཆོག་
ཏུ་ཆེར་དཔག་ཚད་བརྒྱས་འཁོར་བ་ཡོད་དེ། དེ་ཡང་སྐྱེད་མོས་ཚལ་ཉི་ཁྲིས་འཁོར་བར་བསྐོར་བ། སྐྱེད་མོས་ཚལ་དེ་ཀུན་དུ་ཡང་འབབ་ཆུ་དག་རབ་ཏུ་འབབ་ཅིང་མེ་ཏོག་དང་། འབྲས་བུ་དག་རབ་ཏུ་རྒྱས་པ། སྤོས་མཆོག་དམ་པའི་ངད་ལྡང་བས་ཡིད་དགའ་བར་
བྱེད་པ། བྱ་དང་རི་དགས་རྣམས་སྒྲ་སྙན་པ་འབྱིན་པས་རབ་ཏུ་གང་བར་གྱུར་ཏོ། །དེའི་ཚེ་དེ་བཞིན་གཤེགས་པ་དེ་སྐྱེད་མོས་ཚལ་དེ་གཅིག་ཏུ་བཞུགས་ནས་འཁོར་རྣམས་ལ་ཆོས་བསྟན་པར་གྱུར་ཏོ། །བློ་གྲོས་མཐའ་ཡས་དེ་བཞིན་གཤེགས་པ་རི་རབ་ཀྱི་

འོད་ལས་ཡང་དག་པར་འདས་པའི་རྒྱལ་པོའི་སྐུ་ཚེའི་ཚད་ནི་བསྐལ་པ་ཆུང་ངུ་བཅུ་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་བསྐལ་པ་ཆུང་ངུ་གཅིག་གི་བར་དུ་འཇིག་རྟེན་དུ་གནས་པར་གྱུར་ཏོ། །དེ་བཞིན་གཤེགས་པ་དེས་
འཁོར་འདུས་པ་ལ་ལན་བཞིར་ཆོས་བསྟན་ཏེ། འཁོར་འདུས་པ་རེ་རེ་ལ་ཡང་ཉན་ཐོས་སློབ་པའི་ས་ལ་གནས་པ་བྱེ་བ་ཁྲག་ཁྲིག་ཕྲག་ལྔ་ལྔ་ཡོད་དོ། །དགྲ་བཅོམ་པ་དང་། བྱང་ཆུབ་སེམས་དཔའི་འཁོར་ནི་བྱེ་བ་ཁྲག་ཁྲིག་ཕྲག་ལྔ་བཅུ་ལྔ་བཅུ་ཡོད་དོ། །དེའི་ཚེ་དེ་
བཞིན་གཤེགས་པ་དེ་ལ་བྱང་ཆུབ་སེམས་དཔའ་གཉིས་ཡོད་དེ། གཅིག་གི་མིང་ནི་དཔའ་བོའི་སྡེ་ཞེས་བྱའོ། །གཅིག་གི་མིང་ནི་དཔའ་བོའི་སྟོབས་ཤེས་བྱ་སྟེ། བྱང་ཆུབ་སེམས་དཔའ་དེ་གཉིས་ཀྱང་རྫུ་འཕྲུལ་དང་ལྡན་ཞིང་མི་སྐྱེ་བའི་ཆོས་ལ་བཟོད་པ་ཐོབ་པ་ཡིན་
པས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཇི་ལྟ་བུ་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཡོངས་སུ་རྫོགས་པར་བགྱིད་པར་འགྱུར་ལགས།
དེ་ནས་དེ་བཞིན་གཤེགས་པ་དེས་ཚིག་གི་རྣམ་གྲངས་འདི་རྒྱ་ཆེར་ཡང་དག་པར་རབ་ཏུ་བསྟན་ཏོ། །འདི་ཡང་དག་པར་རབ་ཏུ་བསྟན་པ་ན་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་གཉིས་
ཀྱིས་ནི་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ཐོབ་པར་གྱུར་ཏོ། །ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་དང་། བྱང་ཆུབ་སེམས་དཔའི་ཏིང་ངེ་འཛིན་རྣམས་མངོན་དུ་གྱུར་པའི་ཕྱིར་
སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་ཆེན་པོ་བསྟན་པ་དང་། འོད་ཟེར་ཆེན་པོ་བཀྱེ་བ་དང་། ཚངས་པའི་སྒྲ་ཤིན་དུ་གྱ་ནོམ་པ་བསྒྲགས་ནས་སེམས་ཅན་རྣམས་ལ་ཡང་དག་པའི་ཆོས་བསྟན་ཅིང་ཡོངས་སུ་སྨིན་པར་བྱས་པས་སྲོག་ཆགས་བྱེ་བ་ཕྲག་

བརྒྱད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །དེ་ནས་དེ་བཞིན་གཤེགས་པ་དེས་འདི་སྐད་དུ་ཁྱེད་བསྐལ་པ་བརྒྱ་འདས་པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་
ཏེ། བསྐལ་པ་དེ་རེ་རེ་ལ་ཡང་དེ་བཞིན་གཤེགས་པ་ལྔ་བརྒྱ་ལྔ་བརྒྱ་ལ་མཆོད་པ་དང་། རིམ་གྲོ་བྱེད་པ་དང་། དེ་བཞིན་གཤེགས་པ་དེ་དག་གིས་དུས་བར་མར་གསུངས་པའི་ཆོས་ཡང་དག་པ་གང་ཡིན་པ་དང་། དུས་ཐ་མར་གསུངས་པའི་ཆོས་ཡང་དག་པ་གང་ཡིན་པ་
དེ་དག་ཀྱང་མ་ལུས་པར་ཡོངས་སུ་བཟུང་ནས་སེམས་ཅན་རྣམས་ལ་ཕན་པ་ཆེན་པོ་བྱེད་པར་འགྱུར་རོ། །བསྐལ་པ་རེ་རེ་ལ་ཡང་སེམས་རྩེ་གཅིག་ཏུ་གྱུར་ཅིང་རྣམ་པར་གཡེང་བ་མེད་པས་སྐྱེ་བ་ཐམས་ཅད་དུ་ཡང་རྫུས་ཏེ་སྐྱེ་བར་འགྱུར་རོ། །སྐྱེ་བ་ཐམས་ཅད་དུ་ཡང་ཏིང་ངེ་འཛིན་ལས་
ལྡོག་པར་མི་འགྱུར་ཞིང་རྫུ་འཕྲུལ་གྱིས་ཆོས་སྟོན་པས་སེམས་ཅན་མང་པོ་རྣམས་ཡོངས་སུ་མྱ་ངན་ལས་ཟློས་པར་འགྱུར་རོ། །བསྐལ་པ་བརྒྱ་འདས་ནས་གཞན་ཡང་དེ་བཞིན་གཤེགས་པ་ཡོན་ཏན་དཔག་ཏུ་མེད་པ་ཞེས་བྱ་བ་ལ་མཆོད་པ་དང་། རིམ་གྲོ་བྱས་པས་ཏིང་ངེ་འཛིན་དང་། རྫུ་
འཕྲུལ་དང་། རྣམ་པར་ཐར་པ་ཚད་མེད་པ། རྣམས་ལ་རྣམ་པར་རྩེན་པར་འགྱུར་རོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་དང་ཕྲད་པར་གྱུར་པའི་ཚེ་གཅིག་གི་མིང་ནི་མྱ་ངན་མེད་པ་ཞེས་བྱའོ། །གཅིག་གི་མིང་ནི་རབ་ཏུ་གནས་
པ་ཞེས་བྱ་སྟེ། དེ་བཞིན་གཤེགས་པའི་རྗེས་སུ་ཆོས་ཀྱི་འཁོར་ལོ་བསྐོར་ནས་སེམས་ཅན་ཚད་མེད་གྲངས་མེད་པ་རྣམས་བཏུལ་ཏེ། ཐེག་པ་གསུམ་པོ་དག་ལ་རབ་ཏུ་བཀོད་པས་དེའི་ཚེ་དེ་བཞིན་གཤེགས་པ་དེས་ཀྱང་འདི་སྐད་དུ་ང་ཡོངས་སུ་མྱ་ངན་ལས་འདས་པའི་འོག་ཏུ་མྱ་ངན་མེད་པ་
འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་སྤོབས་པ་དཔག་ཏུ་མེད་པ་ཞེས་བྱ་བར་འགྱུར་རོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་རབ་ཏུ་གནས་པ་འདི་བླ་ན་མེད་པ་

ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། །དེ་བཞིན་གཤེགས་པ་འོད་ཟེར་ཁྱད་པར་དུ་འཕགས་པ་ཞེས་བྱ་བར་འགྱུར་རོ། །དེ་བཞིན་གཤེགས་པ་དེ་དག་གི་སྐུ་ཚེའི་ཚད་ཀྱང་བསྐལ་པ་རེ་རེ་ཐུབ་པར་འགྱུར་ཏེ། སངས་རྒྱས་ཀྱི་ཞིང་དེ་དག་ཀྱང་ཡོན་ཏན་ཚད་མེད་པ་
བསགས་པ་ལས་མངོན་པར་གྲུབ་པ་ཡིན་ནོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེ་བཞིན་གཤེགས་པའི་སྤྱན་སྔར་ལུང་བསྟན་པ་ཐོབ་པས་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏོ། །བློ་གྲོས་མཐའ་ཡས་
བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་འཐོབ་པར་འདོད་པས་རབ་ཏུ་དགའ་བ་དང་། བརྩོན་འགྲུས་ཆེན་པོ་བསྐྱེད་ནས་ལུས་དང་སྲོག་ལ་ཕོངས་པ་མེད་པ་དང་། བག་ཡོད་པས་མངོན་པར་བསྒྲུབ་པར་བྱའོ། །དེ་ནས་དེའི་ཚེ་
འཁོར་འདུས་པ་དེ་ཉིད་དུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྱི་བློ་གྲོས་ཤེས་བྱ་བ་འདུས་པར་གྱུར་པ་དེ་འདུག་པ་སྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཆོས་ཐམས་ཅད་ཀྱི་ཡེ་ཤེས་ལ་ཐབས་མཁས་པ་འཐོབ་པར་བགྱི་བ་དང་། དེ་བཞིན་གཤེགས་པའི་ཐམས་ཅད་མཁྱེན་པ་ཐོབ་པར་བགྱི་བའི་སླད་དུ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཡང་དག་པར་གསུངས་པ་ནི་ངོ་མཚར་ཆེ་ལགས་སོ། །བཅོམ་ལྡན་འདས་གལ་
ཏེ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ཐོབ་པར་གྱུར་ན་གདོན་མི་འཚལ་བར་ཆོས་རྣམས་ཀྱི་ཚུལ་ལ་ཐབས་མཁས་པ་ཐོབ་ནས་མྱུར་དུ་བྱང་ཆུབ་ཀྱི་སྙིང་པོར་མཆི་བར་འགྱུར་བས་ཡོན་ཏན་གྱི་རྒྱ་མཚོ་དཔག་ཏུ་མ་མཆིས་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལ་རབ་ཏུ་གཞོལ་བར་བགྱིད་པ་དང་། རྟག་ཏུ་སངས་རྒྱས་རྣམས་མཐོང་ཞིང་ནན་ཏན་གྱིས་ཆོས་ཡང་དག་པར་མངོན་པར་སྒྲུབ་པ་དང་། དགེ་འདུན་དང་སྤྱོད་པ་མཚུངས་པས་དེ་བཞིན་གཤེགས་པའི་མཆོད་པ་ཆེན་པོ་ཡོངས་སུ་སྦྱོང་བར་འགྱུར་བ་དང་། ཉན་ཐོས་དང་། རང་སངས་

རྒྱས་ཀྱི་ས་ལས་ཡང་དག་པར་འདའ་བར་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྱི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་དེ་
བཞིན་དུ་དོན་གྱི་བློ་གྲོས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཐོབ་པར་གྱུར་ན་ཡོན་ཏན་ཁྱད་པར་དུ་འཕགས་པ་ཚད་མེད་པ་རྣམས་རབ་ཏུ་འཐོབ་པར་འགྱུར་རོ། །གལ་ཏེ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་
རྣམས་ལ་གནས་པར་གྱུར་ན་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ལ་ཐབས་མཁས་པས་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །དོན་གྱི་བློ་གྲོས་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ནི་རིན་པོ་ཆེ་སྣ་ཚོགས་
ལས་མངོན་པར་གྲུབ་པ་རྒྱ་མཚོ་ཆེན་པོ་ལས་དཔག་ཚད་བརྒྱད་ཁྲི་བཞི་སྟོང་གིས་གྱེན་དུ་འཕགས་ཤིང་མཆོག་ཏུ་གསལ་བར་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ་ཏིང་ངེ་འཛིན་འདིས་ལེགས་པར་གཞོལ་བར་བྱེད་པའི་ཕྱིར་ཆོས་ཀྱི་གཏེར་གྱི་
རྒྱ་མཚོ་ཆེན་པོ་ཐམས་ཅད་ལས་མངོན་པར་འཕགས་ནས་ལྷ་དང་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་གནོན་ཅིང་བླ་ན་མེད་པའི་གནས་པས་མཆོག་ཏུ་གསལ་བར་གནས་སོ། །གཞན་ཡང་འདི་ལྟ་སྟེ། དཔེར་ན་ཟླ་བའི་དཀྱིལ་འཁོར་ནི་སྐར་མའི་ཚོགས་མང་པོས་ཡོངས་
སུ་བསྐོར་བ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ། ལྷ་དང་མིར་བཅས་པའི་འཇིག་རྟེན་གྱི་འཁོར་འདུས་པ་ཆེན་པོ་ཐམས་ཅད་དུ་རབ་ཏུ་གསལ་བར་གནས་སོ། །དོན་གྱི་བློ་གྲོས་ཁྱོད་ཀྱིས་ཆོས་འདི་ཐོས་པར་གྱུར་ན་འདི་ལས་སུ་ཡང་མི་དགའ་
ཞིང་མོས་པ་མི་སྐྱེ་བ་འམ། བརྩོན་འགྲུས་མི་སྐྱེད་པ་འམ། བག་ཡོད་པ་དང་བཅས་པར་མི་འགྱུར་བ་གང་ཡང་མེད་པར་བལྟ་བར་བྱ་སྟེ། སེམས་ཅན་བསོད་ནམས་ཆུང་ཞིང་དམན་པ་ལ། མོས་པ་ནི་མ་གཏོགས་སོ། །སེམས་ཅན་གང་ཤེས་རབ་ཆེན་པོ་དང་ལྡན་པ་

དག་གིས་ནི་ཆོས་རྒྱ་ཆེན་པོ་འདི་མངོན་པར་སྒྲུབ་པར་བྱེད་ལ། ཆོས་རྒྱ་ཆེན་པོ་མངོན་པར་སྒྲུབ་པ་གང་ཡིན་པ་དེ་དག་ནི་ཡོན་ཏན་ཕུན་སུམ་ཚོགས་པའི་སྐྱེས་བུ་དམ་པ་རྣམས་ཀྱིས་ཡོངས་སུ་གཟུང་བར་འགྱུར་ཏེ། ངས་ཇི་སྐད་དུ་གང་གིས་ཆོས་ཀྱི་ནོར་རྒྱ་ཆེན་པོ་འདི་ཡོངས་སུ་འཛིན་པར་
བྱེད་པ་དེ་དག་ནི་ལྷ་དང་མི་རྣམས་ཀྱིས་ཡོངས་སུ་བསྲུང་ཞིང་རིམ་གྲོ་བྱེད་པ་དང་། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་རྗེས་སུ་དགོངས་པར་འགྱུར་རོ་ཞེས་བསྟན་པ་ལྟ་བུའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྣམ་གྲངས་འདི་ལ་ནན་ཏན་གྱིས་སྒྲུབ་ཅིང་སློབ་པར་བྱེད་པ་དེ་དག་ནི་སེམས་ཅན་རྣམས་ལ་ཕན་པ་ཆེན་པོ་བྱེད་ཅིང་ཐེ་ཚོམ་
ཐམས་ཅད་རབ་ཏུ་སེལ་བ་དང་། མདུད་པ་ཐམས་ཅད་རབ་ཏུ་དགྲོལ་བ་དང་། བག་ཆགས་རྣམས་སྤོང་བ་དང་། བག་ལ་ཉལ་བ་རྣམས་གཅོད་པ་དང་། སྲེད་པའི་དགའ་བ་རྣམས་ལས་ཡང་དག་པར་འདས་པ་དང་། སྲིད་པའི་རྒྱ་མཚོ་ལས་ཡང་དག་པར་རྒལ་བ་དང་།
མུན་ནག་རྣམས་གཏན་ཏུ་བསལ་བ་དང་། སྐྲག་ཅིང་འཇིགས་པ་རྣམས་རབ་ཏུ་སྤོང་བ་དང་། ཐབས་མཁས་པས་སེམས་ཅན་ཐམས་ཅད་ཀྱི་སེམས་རབ་ཏུ་ཤེས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འོད་ཟེར་ཆེན་པོ་བཀྱེ་བས་
འོད་ཟེར་དེས་འཇིག་རྟེན་གྱི་ཁམས་གྲངས་མེད་པ་གསལ་བར་མཛད་ཅིང་ཉི་མ་དང་ཟླ་བའི་འོད་ཟེར་ཐམས་ཅད་ཀྱང་ཟིལ་གྱིས་མནན་ཏོ། །འོད་ཟེར་བཀྱེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་
ཆུབ་སེམས་དཔའ་སེམས་དཔའ་ཆེན་པོ་གང་རྒྱ་མཚོའི་ཕྱག་རྒྱའི་ཏིང་ངེ་འཛིན་འདི་ལ་ནན་ཏན་གྱིས་སྒྲུབ་པར་བྱེད་པ་དེ་དག་ཀྱང་དེ་བཞིན་དུ་རྫུ་འཕྲུལ་ཆེན་པོ་རབ་ཏུ་སྟོན་ཅིང་འོད་ཟེར་ཆེན་པོ་འགྱེད་པ་དང་། སེང་གེའི་སྒྲ་ཆེན་པོ་བསྒྲགས་ནས་ཆོས་འདི་ཡང་དག་པར་སྟོན་པར་བྱེད་པས་ཁམས་གསུམ་ལས

ཡང་དག་པར་འདས་ཤིང་སྣང་བ་ཆེན་པོ་བྱེད་པར་འགྱུར་ཏེ། དེང་ང་ཇི་ལྟ་བ་བཞིན་པས་བྱེ་བྲག་ཏུ་གྱུར་པ་ཅི་ཡང་མེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་
ལྡན་འདས་དེ་བཞིན་གཤེགས་པས་ཆོས་ཀྱི་རྣམ་གྲངས་འདི་བྱིན་གྱིས་བརླབས་ནས་སླད་མའི་དུས་ཀྱི་ཚེ་སེམས་ཅན་གང་དག་ཆོས་ཀྱི་རྣམ་གྲངས་འདིའི་མིང་ཐོས་པ་ཙམ་གྱིས་ཀྱང་ཡོན་ཏན་དཔག་ཏུ་མ་མཆིས་པ་ཐོབ་པར་འགྱུར་བར་མཛད་དུ་གསོལ། དེ་ནས་བཅོམ་ལྡན་འདས་
ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་ཡང་འོད་ཟེར་ཆེན་པོ་རབ་ཏུ་བཀྱེའོ། །གཞན་ཡང་ཕྱག་སོར་གཅིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་རབ་ཏུ་གཡོ་བར་མཛད་པས་སེམས་ཅན་རྣམས་བདེ་བ་ཆེན་པོ་ཐོབ་པར་གྱུར་ཏོ། །དེའི་ཚེ་
འཁོར་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་ལ་སོགས་པའི་འཁོར་རྣམས་ཀྱིས་ལྷའི་མེ་ཏོག་དམ་པ་དང་། ལྷའི་གོས་དམ་པ་དག་གིས་མངོན་པར་གཏོར་ནས་དུས་གཅིག་ཏུ་ལྷའི་རོལ་མོ་
རྣམས་བྱས་སོ། །ལྷ་ཚད་མེད་པ་རྣམས་ཀྱིས་ཀྱང་ལྷའི་གོས་རྒྱང་ནས་མངོན་པར་གཏོར་བས་ནམ་མཁའ་ཀུན་ཏུ་གང་བར་གྱུར་ཏེ། སྐད་འཐུན་པར་འདི་སྐད་དུ་ཀྱེ་མ་སངས་རྒྱས་རྣམས་ཀྱི་སྤྱོད་ཡུལ་ནི་བསམ་གྱིས་མི་ཁྱབ་བོ། །གང་གིས་ཆོས་ཟབ་མོ་འདི་ཡོངས་སུ་
འཛིན་པར་བྱེད་པ་དེ་དག་ནི་སེམས་ཅན་ཐམས་ཅད་ཀྱིས་གུས་པར་མཆོད་ཅིང་ཕྱག་བྱ་བའི་འོས་སུ་གྱུར་པར་རིག་པར་བྱའོ། །ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་
སྩལ་ཏོ། །བློ་གྲོས་མཐའ་ཡས་མ་འོངས་པའི་དུས་ན་གང་བསོད་ནམས་ཆུང་བའི་སེམས་ཅན་དེ་དག་གིས་ནི་གོ་ཆའི་བཀོད་པ་དང་། ཏིང་ངེ་འཛིན་གྱི་བཀོད་པ་འདི་ཐོས་པར་མི་འགྱུར་གྱི། སེམས་ཅན་གང་ཐབས་མཁས་པ་དང་ལྡན་པ་དང་། ཚོགས་ཆེན་པོ་ཡོངས་སུ་སྡུད་པ་

གང་ཡིན་པ་དེ་དག་གིས་མ་འོངས་པའི་དུས་ན་ཆོས་འདི་ཐོས་པར་འགྱུར་རོ། །ཆོས་འདི་ལ་གང་གིས་ནན་ཏན་དུ་སྒྲུབ་པར་བྱེད་པ་དེ་དག་ནི་དུས་གསུམ་གྱི་སངས་རྒྱས་བཅོམ་ལྡན་འདས་ཀྱིས་ཡོངས་སུ་གཟུང་བར་འགྱུར་རོ། །བློ་གྲོས་མཐའ་ཡས་མ་འོངས་པའི་དུས་ན་འཇིགས་པ་ཆེན་པོ་འབྱུང་བའི་ཚེ་
ངའི་ཆོས་ཀྱི་རྣམ་གྲངས་འདི་ཁྱོད་ལ་སོགས་པ་ལ་ཡོངས་སུ་གཏད་དོ། །ངས་བསྐལ་པ་བྱེ་བ་ཁྲག་ཁྲིག་གྲངས་མེད་པ་ནས་བླ་ན་མེད་པའི་ཆོས་ཀྱི་གཏེར་རབ་ཏུ་བསགས་པས་ཡོན་ཏན་ཕུན་སུམ་ཚོགས་པ་དང་། དཔག་ཏུ་མེད་པའི་བདེ་བ་ཐོབ་པ་གང་ཡིན་པ་དེ་དག་ཁྱོད་ཀྱིས་ཀྱང་འཐོབ་པར་འགྱུར་གྱིས་
སྡུག་བསྔལ་གྱི་ཕུང་པོ་ཐམས་ཅད་ཁྱོད་ཀྱིས་རབ་ཏུ་སྤངས་ཏེ་ཡོན་ཏན་གྱི་རྒྱ་མཚོ་དཔག་ཏུ་མེད་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་
དཔའ་ཆེན་པོ་ལྔ་བརྒྱ་དང་བཅས་པ་དང་། ཁྱིམ་བདག་མ་སྨད་པ་དང་། ཚོང་དཔོན་བཟང་སྐྱོང་ལ་སོགས་པ་གཙོ་བོར་གྱུར་པ་རྣམས་ཀྱིས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་མཐུ་ཅི་མཆིས་པས་དེ་བཞིན་གཤེགས་པའི་བྱང་ཆུབ་
ཆེན་པོའི་ཆོས་ཡོངས་སུ་བཟུང་ནས་སླད་མའི་དུས་ཀྱི་ཚེ་སེམས་ཅན་རྣམས་ལ་ཕན་གདགས་པར་བགྱིའོ་ཞེས་གསོལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུག་པའི་སྟན་ལས་ལངས་ཏེ། མེ་ཏོག་རྣམ་པ་སྣ་ཚོགས་ཀྱིས་དེ་བཞིན་གཤེགས་པ་ལ་མངོན་པར་གཏོར་ནས་ལུས་ཀྱི་གོས་
མཆོག་དམ་པ་ཕུད་དེ། མཆོད་པ་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དགེ་བའི་རྩ་བ་འདིས་སེམས་ཅན་ཐམས་ཅད་ལ་ཡོངས་སུ་བསྔོ་སྟེ། སེམས་ཅན་རྣམས་བྱང་ཆུབ་ཀྱི་ཕྱོགས་ཀྱི་ཆོས་ཕུན་སུམ་ཚོགས་པ་འཐོབ་པར་འགྱུར་བ་དང་། དེ་བཞིན་གཤེགས་པའི་ཐམས་ཅད་
མཁྱེན་པའི་ཡེ་ཤེས་མངོན་པར་བསྒྲུབ་པར་འགྱུར་བ་དང་། སླད་མའི་དུས་ཀྱི་ཚེ་སེམས་ཅན་ཐམས་ཅད་ཀྱི་དགེ་བའི་རྩ་བ་ཇི་སྙེད་པ་དེ་དག་ཡོངས་སུ་རྫོགས་པར་འགྱུར་བར་སྨོན་ལམ་འདེབས་ལགས་སོ། །དེ་སྐད་ཅེས་གསོལ་བ་དང་། དེ་ནས་དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་

སེམས་དཔའ་ཆེན་པོ་རྣམས་རབ་ཏུ་དགའ་བ་བསྐྱེད་པའི་ཕྱིར་ཚིགས་སུ་བཅད་དེ་བཀའ་སྩལ་པ། །སེམས་ཅན་ཐམས་ཅད་ཀུན་ལ་ནི། །ཕན་པ་ཆེན་པོ་བྱ་བའི་ཕྱིར། །ང་ཡི་བྱང་ཆུབ་ཆོས་བཟུང་ནས། །ཆོས་རྒྱལ་སེང་གེའི་སྒྲ་སྒྲོགས་ཤིག །མ་འོངས་ཐ་མའི་དུས་ཀྱི་ཚེ། །གང་ཞིག་ཆོས་ནི་ཡོངས་ཚོལ་
བ། །རྒྱ་ཆེན་ཆོས་འདི་ཐོས་གྱུར་ན། །ཐམས་ཅད་བདེ་བ་ཐོབ་པར་འགྱུར། །ངས་ནི་ཇི་སྐད་བསྟན་པ་བཞིན། །གང་གིས་ཐེག་པ་འདི་མཐོང་ཞིང་། །མདོ་སྡེའི་ཆོས་འདི་ཐོས་གྱུར་ན། །ཇི་ལྟར་མོས་པའི་བདེ་བ་འཐོབ། །བློ་དང་ལྡན་པ་གང་ཞིག་གིས། །ཐབས་མཁས་དག་ནི་རབ་བསྒོམས་ཏེ། །ཆོས་མཆོག་འདི་ནི་
ཐོས་གྱུར་ན། །ལུས་དང་སེམས་ནི་རབ་བདེར་འགྱུར། །གང་ཞིག་འཁོར་འདིར་འདུས་གྱུར་པ། །ང་ཡིས་མངོན་སུམ་བཤད་མཐོང་དང་། །ཆོས་འདི་ཐོས་པར་གྱུར་ནས་ནི། །རབ་ཏུ་དགའ་བ་གང་སྐྱེད་པ། །མ་འོངས་ཐ་མའི་དུས་ཀྱི་ཚེ། །ཁྱོད་ཀྱིས་བསོད་ནམས་ཚད་མེད་པའི། །ཕུང་པོ་
དག་ནི་རབ་བསྐྱེད་ཅིང་། །འཁོར་བ་མཐའ་མེད་སྒྲོལ་བར་འགྱུར། །མ་འོངས་ཐ་མའི་དུས་ཀྱི་ཚེ། །ཆོས་རྗེས་རབ་ཏུ་གསུངས་པ་ཡི། །ཆོས་འདི་གང་ཞིག་འཛིན་བྱེད་པ། །སངས་རྒྱས་རྣམས་ཀྱིས་གཟུང་བར་འགྱུར། །མ་འོངས་ཐ་མའི་དུས་ཀྱི་ཚེ། །ང་ཡི་བྱང་ཆུབ་ཆོས་འཛིན་པ། །དེ་ནི་སངས་
རྒྱས་ཚད་མེད་པའི། །ཐ་མའི་དུས་ཀྱི་ཆོས་འཛིན་འགྱུར། །བཅོམ་ལྡན་འདས་ཀྱིས་ཆོས་འདི་བསྟན་པ་ན། །བྱང་ཆུབ་སེམས་དཔའ་ཚད་མེད་པ་སྙེད་མི་སྐྱེ་བའི་ཆོས་ཀྱི་བཟོད་པ་ཐོབ་པར་གྱུར་ཏོ། །སེམས་ཅན་ཚད་མེད་པ་སྙེད་ནི་དགེ་བའི་རྩ་བ་ཡོངས་སུ་སྨིན་
པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་
འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། གོ་ཆའི་བཀོད་པ་བསྟན་པ་ཞེས་བྱ་བའི་ལེའུ་སྟེ་བདུན་པ་རྫོགས་སོ།། །།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བརྒྱད་པ་སྟེ། ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ། །བམ་པོ་དང་པོ། །རྒྱ་གར་སྐད་དུ། ཨཱརྱ་དྷརྨ་དྷཱ་ཏུ་པྲ་ཀྲྀ་ཏི་ཨ་སམ་བྷེ་ད་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་
སྐད་དུ། འཕགས་པ་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་
མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་བརྒྱད་སྟོང་གི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སངས་རྒྱས་ཀྱི་ཞིང་སྣ་ཚོགས་ཐ་དད་པ་ནས་འདུས་པ་ཁྲི་ཉིས་སྟོང་དང་། ལྷའི་བུ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་
པ་སུམ་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །དེའི་ཚེ་ན་འཇམ་དཔལ་གཞོན་ནུར་གྱུར་པ་དང་། ལྷའི་བུ་རིན་ཆེན་མཆོག་ཅེས་བྱ་བ་ཡང་འཁོར་དེ་ཉིད་དུ་འདུས་ཏེ་འདུག་པར་གྱུར་ཏོ། །དེ་ནས་ལྷའི་བུ་རིན་ཆེན་མཆོག་འདི་སྙམ་དུ་སེམས་ཏེ། འདི་ལྟར་བཅོམ་ལྡན་འདས་ཀྱིས་འཇམ་དཔལ་
གཞོན་ནུར་གྱུར་པ་ལ་ཆོས་སྟོན་པར་བསྐུལ་བ་མཛད་དེ། བསྐུལ་ནས་ཀྱང་བཤད་ལ་ཅི་ནས་ཀྱང་བདུད་ཀྱི་གནས་ཐམས་ཅད་སྤ་བཀོང་བར་འགྱུར་བ་དང་། བདུད་སྡིག་ཅན་ཡི་ཆད་པར་འགྱུར་བ་དང་། ཕས་ཀྱི་རྒོལ་བ་ཐམས་ཅད་ཤིན་ཏུ་ཚར་གཅད་པར་འགྱུར་བ་དང་། མངོན་པའི་ང་རྒྱལ་
ཅན་ཐམས་ཅད་ང་རྒྱལ་མེད་ཅིང་ཤེས་པ་བརྡ་སྤྲོད་པར་འགྱུར་བ་དང་། རྣལ་འབྱོར་སྤྱོད་པ་དག་འབྲས་བུ་ཐོབ་པར་འགྱུར་བ་དང་། འབྲས་བུ་འཐོབ་པ་དག་ཀྱང་ཁྱད་པར་དུ་འགྲོ་བར་འགྱུར་བ་དང་། སངས་རྒྱས་དང་། ཆོས་དང་། དགེ་འདུན་གྱི་གདུང་རྒྱུན་མི་གཅད་པའི་ཕྱིར་སྐྱེ་བོ་མང་པོ་དག་ཀྱང་བྱང་
ཆུབ་ཏུ་སེམས་བསྐྱེད་པར་འགྱུར་བ་དང་། དེ་བཞིན་གཤེགས་པས་བསྐལ་པ་གྲངས་མེད་པར་ཡང་དག་པར་བསྒྲུབས་པའི་བྱང་ཆུབ་འདི་ཡང་ཡུན་རིང་དུ་གནས་པ་དང་། རྒྱས་པར་འགྱུར་བ་དང་། དེ་བཞིན་གཤེགས་པ་བཞུགས་སམ་ཡོངས་སུ་མྱ་ངན་ལས་འདས་ཀྱང་རུང་སྟེ། ཆོས་བསྟན་

པ་དེ་གང་དག་གིས་ཐོས་པར་གྱུར་པ་དེ་དག་ཐེག་པ་གང་ལ་མོས་པས་མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་དེ་ལྟ་བུའི་ཆོས་སྟོན་ན་ཅི་མ་རུང་སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་བུ་རིན་ཆེན་མཆོག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་
འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་འཁོར་འདི་ཁྱོད་ལས་ཆོས་མཉན་པ་ཐོས་པར་འདོད་ཀྱིས་འཁོར་འདི་དག་ལ་གཏམ་གྱི་རྒྱུད་འགའ་ཞིག་ལ་ཁྱོད་སྤོབས་པར་གྱིས་ཤིག །འཇམ་དཔལ་གཞོན་ནུར་གྱུར་པས་གསོལ་པ། བཅོམ་ལྡན་འདས་ཅི་ལས་བརྩམས་ཏེ་
སྤོབས་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། །འཇམ་དཔལ་ཆོས་ཀྱི་དབྱིངས་ཀྱི་རང་བཞིན་ལས་རྩོམས་ལ་ཁྱོད་སྤོབས་པར་གྱིས་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་ཐམས་ཅད་ཀྱང་ཆོས་ཀྱི་དབྱིངས་ཀྱི་རང་བཞིན་ལགས་པས་བཅོམ་
ལྡན་འདས་ཆོས་ཀྱི་དབྱིངས་ཀྱི་རང་བཞིན་ནི་བརྗོད་པའམ་མཉན་པར་ཅུང་ཟད་ཀྱང་རྔོ་མི་ཐོགས་ལགས་ན། བཅོམ་ལྡན་འདས་ཇི་ལྟར་ཆོས་ཀྱི་དབྱིངས་ཀྱི་རང་བཞིན་ལས་བརྩམས་ཏེ་བསྟན་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་བསྟན་པ་འདི་ཐོས་ན་
གང་ཟག་མངོན་པའི་ང་རྒྱལ་ཅན་དག་ནི་སྐྲག་པར་འགྱུར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་གང་དག་སྐྲག་པར་འགྱུར་བ་དེ་དག་ཀྱང་ཆོས་ཀྱི་དབྱིངས་ཀྱི་རང་བཞིན་ཅན་ལགས་པས་ཆོས་ཀྱི་དབྱིངས་ཀྱི་རང་བཞིན་ནི་སྐྲག་པར་མི་འགྱུར་ལགས་སོ། །དེ་ནས་ཚེ་དང་ལྡན་པ་ཤ་ར་དྭ་
ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་ཆོས་ཐམས་ཅད་ཆོས་ཀྱི་དབྱིངས་ཀྱི་རང་བཞིན་ཡིན་ན་ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་ནས་ཉོན་མོངས་པར་འགྱུར་བ་ཡང་མེད་ལ། རྣམ་པར་བྱང་བར་འགྱུར་བ་ཡང་མེད་ན་སེམས་ཅན་རྣམས་
ཀྱི་ཀུན་ནས་ཉོན་མོངས་པ་འམ་རྣམ་པར་བྱང་བ་ཅི་ལས་འབྱུང་བར་འགྱུར། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་བྱིས་པ་སོ་སོའི་སྐྱེ་བོ་འཇིག་ཚོགས་ལ་ལྟ་བའི་ཕྱིན་ཅི་ལོག་གིས་བསླད་ཅིང་ངར་འཛིན་པ་དང་། ང་ཡིར་འཛིན་པ་ལ་གནས་པ་རྣམས་ལ་ནི་བདག་དང་གཞན་

གྱི་འདུ་ཤེས་འབྱུང་ངོ་། །བདག་དང་གཞན་གྱི་འདུ་ཤེས་པ་ལ་གནས་པ་དེ་དག་ལ་ནི་དགེ་བ་དང་མི་དགེ་བའི་སེམས་དང་སེམས་ལས་བྱུང་བ་དག་འབྱུང་སྟེ་སེམས་དང་སེམས་ལས་བྱུང་བའི་ཆོས་དེ་དག་གིས་དགེ་བ་དང་མི་དགེ་བའི་ལས་མངོན་པར་འདུ་བྱ་བ་དག་མངོན་པར་འདུ་བྱེད་ཅིང་དེ་དག་ལ་
རྒྱུ་དེ་དང་རྐྱེན་དེ་དང་ངོ་བོ་ཉིད་དེའི་རྣམ་པར་སྨིན་པ་ཉིད་མངོན་པར་འགྲུབ་པར་འགྱུར་རོ། །བཙུན་པ་ཤ་ར་དྭ་ཏིའི་བུ་དེ་དག་གིས་ཇི་ཙམ་དུ་སྲིད་པའི་འགྲོ་བར་སྐྱེ་བ་ཡོངས་སུ་བཟུང་བ་དེ་ཙམ་དུ་ཀུན་ནས་ཉོན་མོངས་པ་ཞེས་བྱའོ། །བཙུན་པ་ཤ་ར་དྭ་ཏིའི་བུ་ཀུན་ནས་ཉོན་མོངས་པ་དེ་ཡང་ཆོས་ཀྱི་
དབྱིངས་ཀྱི་རང་བཞིན་ཉིད་ཡིན་པས་ཀུན་ནས་ཉོན་མོངས་པ་ཉིད་ཆོས་ཀྱི་དབྱིངས་ཀྱི་རང་བཞིན་དུ་ཡོངས་སུ་ཤེས་པ་གང་ཡིན་པ་དེ་ཉིད་རྣམ་པར་བྱང་བ་ཞེས་བྱ་སྟེ། དོན་དམ་པར་ནི་དེ་ལ་ཀུན་ནས་ཉོན་མོངས་པ་འམ། རྣམ་པར་བྱང་བ་འམ། གང་ཀུན་ནས་ཉོན་མོངས་པར་འགྱུར་བ་འམ།
རྣམ་པར་བྱང་བར་འགྱུར་བ་ཅི་ཡང་མེད་དོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་དགེ་སློང་ལྷག་པའི་ང་རྒྱལ་ཅན་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་
ཅེས་སྨྲས་སོ། །འཇམ་དཔལ་ཁྱོད་ཀྱིས་བསྟན་པ་འདི་བཤད་པ་ན་དགེ་སློང་ལྷག་པའི་ང་རྒྱལ་ཅན་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ཏེ། འཇམ་དཔལ་ཆོས་ཀྱི་དབྱིངས་ནི་ཁྱོད་ལས་ཕྱད་པར་འབྱུང་ངོ་། །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་ཅི་ཆོས་
ཀྱི་དབྱིངས་ཀྱི་རང་བཞིན་སྔོན་བཅིངས་པར་གྱུར་ལ་དགྲོལ་བ་ཞིག་ཡིན་སྙམ་འམ། །སྨྲས་པ་འཇམ་དཔལ་ཆོས་ཀྱི་དབྱིངས་ཀྱི་རང་བཞིན་ནི་སྔོན་བཅིངས་པར་གྱུར་པ་ཡང་མ་ཡིན་ལ། དགྲོལ་བ་ཡང་མ་ཡིན་ནོ། །སྨྲས་པ། བཙུན་པ་ཤ་ར་དྭ་ཏིའི་བུ་འོ་ན་དགེ་སློང་དེ་དག་གིས་སེམས་ཅི་ཞིག་ལས་
རྣམ་པར་གྲོལ། སྨྲས་པ། འཇམ་དཔལ་དེ་བཞིན་གཤེགས་པས་ཉན་ཐོས་མང་པོ་བཏུལ་ཏེ། དེ་དག་གིས་སེམས་ནི་ལེན་པ་མེད་པར་ཟག་པ་རྣམས་ལས་རྣམ་པར་གྲོལ་ཏོ། །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་ཅི་ཁྱོད་བཅོམ་ལྡན་འདས་ཀྱི་ཉན་ཐོས་ཡིན་ནམ། སྨྲས་པ།

འཇམ་དཔལ་དེ་དེ་བཞིན་ཏེ། ཁོ་བོ་ནི་བཅོམ་ལྡན་འདས་ཀྱི་ཉན་ཐོས་ཡིན་ནོ། །སྨྲས་པ། བཙུན་པ་ཤ་ར་དྭ་ཏིའི་བུ་ཅི་ཁྱོད་ཀྱིས་སེམས་ལེན་པ་མེད་པར་ཟག་པ་རྣམས་ལས་རྣམ་པར་གྲོལ་ལམ། སྨྲས་པ། འཇམ་དཔལ་རྣམ་པར་གྲོལ་ལོ། །སྨྲས་པ། བཙུན་པ་
ཤ་ར་དྭ་ཏིའི་བུ་ཅི་ཁྱོད་ཀྱི་སེམས་འདས་པ་རྣམ་པར་གྲོལ་ལམ། འོན་ཏེ་མ་འོངས་པ་དང་ད་ལྟར་བྱུང་བ་རྣམ་པར་གྲོལ། བཙུན་པ་ཤ་ར་དྭ་ཏིའི་བུ་སེམས་འདས་པ་ནི་ཟད་པའི་མཚན་ཉིད་ཡིན་ལ། སེམས་མ་འོངས་པ་ནི་མ་ཐོབ་པའི་མཚན་ཉིད་ཡིན། སེམས་ད་ལྟར་བྱུང་བ་ནི་མི་གནས་པའི་
མཚན་ཉིད་ཡིན་ན། བཙུན་པ་ཤ་ར་དྭ་ཏིའི་བུ་ཁྱོད་ཀྱི་སེམས་རྣམ་པར་གྲོལ་བ་དེ་གང་ཡིན། ཚེ་དང་ལྡན་པ་ཤ་ར་དྭ་ཏིའི་བུས་སྨྲས་པ། འཇམ་དཔལ་སེམས་འདས་པ་ཡང་རྣམ་པར་གྲོལ་བ་མ་ཡིན་ལ། མ་འོངས་པ་དང་། ད་ལྟར་བྱུང་བ་ཡང་མ་ཡིན་ནོ། །འཇམ་དཔལ་གྱིས་སྨྲས་པ།
བཙུན་པ་ཤ་ར་དྭ་ཏིའི་བུ་འོ་ན་ཁྱོད་ཀྱི་སེམས་རྣམ་པར་གྲོལ་བ་དེ་གང་ཡིན། སྨྲས་པ། འཇམ་དཔལ་ཀུན་རྫོབ་རྣམ་པར་གཞག་པས་སེམས་རྣམ་པར་གྲོལ་བར་བསྟན་པར་ཟད་ཀྱི། དོན་དམ་པར་ནི་འདི་ལ་གང་བཅིང་བ་འམ། དགྲོལ་བའི་སེམས་དམིགས་སུ་མེད་དོ། །འཇམ་དཔལ་
གྱིས་སྨྲས་པ། བཙུན་པ་ཤ་ར་དྭ་ཏིའི་བུ་ཁྱོད་ཆོས་ཀྱི་དབྱིངས་ཀྱི་རང་བཞིན་ལ་ཀུན་རྫོབ་དང་། དོན་དམ་པ་ཡོད་པར་འདོད་དམ། སྨྲས་པ། འཇམ་དཔལ་ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་རྫོབ་དང་། དོན་དམ་པ་དམིགས་སུ་མེད་དོ། །འཇམ་དཔལ་གྱིས་སྨྲས་པ།
བཙུན་པ་ཤ་ར་དྭ་ཏིའི་བུ་འོ་ན་ཇི་ལྟར་ཀུན་རྫོབ་རྣམ་པར་གཞག་པས་སེམས་རྣམ་པར་གྲོལ་བར་སྟོན། སྨྲས་པ། འཇམ་དཔལ་ནམ་ཡང་སེམས་རྣམ་པར་གྲོལ་བ་ཅི་ཡང་མེད་དམ། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་གལ་ཏེ་སེམས་ཤིག་ནང་ངམ། ཕྱི་རོལ་ལམ།
གཉི་གའི་བར་ན་དམིགས་སུ་ཡོད་ན་ནི་སེམས་རྣམ་པར་གྲོལ་བར་ཡང་འགྱུར་བ་ཞིག་ན། བཙུན་པ་ཤ་ར་དྭ་ཏིའི་བུ་སེམས་ནི་ནང་ངམ། ཕྱི་རོལ་ལམ། གཉི་ག་མེད་པར་ཡང་དམིགས་སུ་མེད་པས། དེ་ལ་བཅིངས་པ་འམ། རྣམ་པར་གྲོལ་བ་ཅི་ཡང་མེད་དོ། །དེ་ནས་

འཁོར་དེ་ལས་དགེ་སློང་ཉིས་བརྒྱས་འཇམ་དཔལ་གཞོན་ནུར་གྱུར་པས་བསྟན་པ་འདི་ཐོས་པ་དང་། སྟན་ལས་ལངས་ཏེ་དོང་ནས་ཚིག་འདི་སྐད་ཅེས་ཀྱང་སྨྲས་ཏེ། གལ་ཏེ་འདི་ལ་སུ་ལ་ཡང་རྣམ་པར་གྲོལ་བ་མེད་ཅིང་སུ་ཡང་རྣམ་པར་མི་གྲོལ་ན། འོ་བུ་ཅག་གི་རབ་ཏུ་འབྱུང་
ཞིང་བསྙེན་པར་རྫོགས་པ་དགེ་སློང་གི་དངོས་པོ་ལ་དོན་ཅི་ཞིག་ཡོད། གལ་ཏེ་ངེས་པར་འབྱུང་བ་ཅི་ཡང་མེད་ན་ལམ་སྒོམ་པ་ལ་དོན་ཅི་ཡོད་ཅེས་དེ་ལྟར་དགེ་སློང་དེ་དག་སྨོད་ཅིང་ཡི་ཆད་ནས་འཁོར་དེ་ནས་དོང་ངོ་། །དེ་ནས་འཇམ་དཔལ་གཞོན་ནུར་གྱུར་པས་དགེ་སློང་དེ་དག་འདུལ་
བའི་དབང་དུ་རིག་ནས་ལམ་གང་ནས་དགེ་སློང་དེ་དག་དོང་བའི་ལམ་དེའི་མདུན་དུ་སྤྲུལ་པའི་དགེ་སློང་ཞིག་སྤྲུལ་ཏོ། །དེ་ནས་དགེ་སློང་དེ་དག་སྤྲུལ་པའི་དགེ་སློང་དེ་དག་ག་ལ་བ་དེར་དོང་སྟེ་ལྷགས་ནས་སྤྲུལ་པའི་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཁྱོད་ག་ལས་འོངས།
དེ་ནས་སྤྲུལ་པའི་དགེ་སློང་དེས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁོ་བོ་ནི་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ལ་མ་ཞུགས། མ་ཤེས། མ་མོས། ཡིད་མ་ཆེས་ནས་ཁོ་བོ་འཁོར་དེ་ནས་དོང་ངོ་། །དེ་ནས་དགེ་སློང་ཉིས་བརྒྱ་པོ་
དེ་དག་གིས་ཀྱང་འདི་སྐད་ཅེས་སྨྲས་སོ། །ཁོ་བོ་ཅག་ཀྱང་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ལ་མ་ཞུགས། མ་ཤེས། མ་མོས། ཡིད་མ་ཆེས་ནས་ཁོ་བོ་ཅག་འཁོར་དེ་ནས་དོང་ངོ་། །དེ་ནས་སྤྲུལ་པའི་དགེ་སློང་དེས་དགེ་སློང་ཉིས་བརྒྱ་པོ་དེ་དག་ལ་འདི་སྐད་ཅེས་སྨྲས་
སོ། །ཚེ་དང་ལྡན་པ་དག་གིས་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ལ་མི་འཐུན་པ་ཅི་ཞིག་ཐོས་ན་ཁྱེད་ཅག་འཁོར་དེ་ནས་དོང་། དེ་དག་གིས་སྨྲས་པ། ཚེ་དང་ལྡན་པ་འཇམ་དཔལ་གཞོན་ནུར་གྱུར་པ་ནི་འདི་ལ་སུ་ལ་ཡང་ཐོབ་པ་མེད། མངོན་པར་རྟོགས་པ་མེད།
རྣམ་པར་གྲོལ་བ་མེད་པར་སྟོན་པས་ཁོ་བོ་ཅག་འདི་སྙམ་དུ་སེམས་ཏེ། གལ་ཏེ་འདི་ལ་སུ་ལ་ཡང་ཐོབ་པ་མེད། མངོན་པར་རྟོགས་པ་མེད། རྣམ་པར་གྲོལ་བ་མེད་ན་འོ་བུ་ཅག་གི་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་ལ་དོན་ཅི་ཡོད། འོ་བུ་ཅག་གི་ཚངས་པར་

སྤྱོད་པ་ལ་གནས་པ་ལ་དོན་ཅི་ཡོད། གལ་ཏེ་འདི་ལ་ངེས་པར་འབྱུང་བ་ཅི་ཡང་མེད་ན་ལམ་སྒོམ་པ་ལ་དོན་ཅི་ཡོད་སྙམ་དུ་བསམས་ནས་ཁོ་བོ་ཅག་འཁོར་དེ་ནས་དོང་ངོ་། །དེ་ནས་སྤྲུལ་བའི་དགེ་སློང་དེས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཅི་
ཁྱེད་ཅག་མ་མོས་ནས་དོང་བར་ཟད་དམ། འོན་ཏེ་སྤངས་ཤིང་མི་སྙན་པར་བརྗོད་ནས་དོང་། དེ་དག་གིས་སྨྲས་པ། ཁོ་བོ་ཅག་ནི་མ་མོས་ནས་དོང་བར་ཟད་ཀྱི། ཁོ་བོ་ཅག་གིས་སྤངས་པ་ཡང་མེད་ལ་མི་སྙན་པར་བརྗོད་པ་ཡང་མེད་དོ། །དེ་ནས་སྤྲུལ་བའི་དགེ་སློང་དེས་དགེ་སློང་དེ་དག་ལ་
ལེགས་སོ་ཞེས་བྱ་བ་བྱིན་ནས་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་རྩོད་པ་མེད་པ་ནི་དགེ་སྦྱོང་གི་ཆོས་ཀྱི་མཆོག་ཡིན་པས་མི་སྙན་པར་བརྗོད་པར་མི་བྱ། བརྩད་པར་མི་བྱའི་རེ་ཤིག་ཇེ་བགྲོ་བར་བྱའོ། །ཚེ་དང་ལྡན་པ་དག་ཅི་སེམས་འདི་སྔོན་པོ་ཞེས་བྱ་བ་ཞིག་གམ། སེར་པོ་ཞེས་
བྱ་བ་ཞིག་གམ། དམར་པོ་ཞེས་བྱ་བ་ཞིག་གམ། དཀར་པོ་ཞེས་བྱ་བ་ཞིག་གམ། །བཙོད་ཀ་ཞེས་བྱ་བ་ཞིག་གམ། ཤེལ་གྱི་ཁ་དོག་ལྟ་བུ་ཞེས་བྱ་བ་ཞིག་གམ། ཡང་དག་པ་ཞེས་བྱ་བ་ཞིག་གམ། ཡང་དག་པ་མ་ཡིན་པ་ཞེས་བྱ་བ་ཞིག་གམ། རྟག་པ་ཞེས་བྱ་བ་ཞིག་གམ། མི་
རྟག་པ་ཞེས་བྱ་བ་ཞིག་གམ། གཟུགས་ཅན་ཞེས་བྱ་བ་ཞིག་གམ། གཟུགས་ཅན་མ་ཡིན་པ་ཞེས་བྱ་བ་ཞིག་གམ། ཞེས་རྟོགས་ཤིག་དེ་དག་གིས་སྨྲས་པ། ཚེ་དང་ལྡན་པ་སེམས་ནི་གཟུགས་ཅན་མ་ཡིན་པ། བསྟན་དུ་མེད་པ། སྣང་བ་མེད་པ། ཐོགས་པ་མེད་པ། གནས་མེད་
པ། རྣམ་པར་རིག་བྱེད་མ་ཡིན་པའོ། །དེ་ནས་སྤྲུལ་བའི་དགེ་སློང་དེས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཅི་གཟུགས་ཅན་མ་ཡིན་པ། བསྟན་དུ་མེད་པ། སྣང་བ་མེད་པ། ཐོགས་པ་མེད་པ། གནས་མེད་པ། རྣམ་པར་རིག་བྱེད་མ་ཡིན་པའི་སེམས་དེ་ནང་
ན་གནས་སོ། །ཞེས་བྱ་བའམ། ཕྱི་རོལ་ན་གནས་སོ་ཞེས་བྱ་བ་འམ། གཉི་གའི་བར་ན་གནས་སོ་ཞེས་བྱ་བར་དམིགས་སུ་ཡོད་སྙམ་འམ། སྨྲས་པ་དེ་ནི་མ་ཡིན་ནོ། །སྨྲས་པ། ཚེ་དང་ལྡན་པ་དག་གལ་ཏེ་སེམས་ཏེ་གཟུགས་ཅན་མ་ཡིན། བསྟན་དུ་མེད། སྣང་བ་མེད། ཐོགས་

པ་མེད། །གནས་མེད། རྣམ་པར་རིག་བྱེད་མ་ཡིན། ནང་ན་ཡང་མེད། ཕྱི་རོལ་ན་ཡང་མེད། གཉི་ག་མེད་པར་ཡང་དམིགས་སུ་མེད་ན་ཅི་དེ་ལ་ཡང་དག་པར་ཡོངས་སུ་གྲུབ་པ་ཡོད་སྙམ་འམ། དེ་དག་གིས་སྨྲས་པ། དེ་ནི་མ་ཡིན་ནོ། །སྨྲས་པ། ཚེ་དང་ལྡན་པ་དག་གང་ཡང་
དག་པ་མ་ཡིན་ཞིང་ཡོངས་སུ་གྲུབ་པ་མ་ཡིན་པ་དེ་ལ་ཅི་རྣམ་པར་གྲོལ་བ་ཡོད་སྙམ་འམ། དེ་དག་གིས་སྨྲས་པ། དེ་ནི་མ་ཡིན་ནོ། །སྨྲས་པ། ཚེ་དང་ལྡན་པ་དག་དེ་ལས་བསམས་ནས། འཇམ་དཔལ་གཞོན་ནུར་གྱུར་པས་འདི་སྐད་དུ་ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་ནས་
ཉོན་མོངས་པར་འགྱུར་བ་ཡང་མེད་ལ་རྣམ་པར་བྱང་བར་འགྱུར་བ་ཡང་མེད་དོ། །ཞེས་བསྟན་ཏོ། །ཚེ་དང་ལྡན་པ་དག་ཡང་བྱིས་པ་སོ་སོའི་སྐྱེ་བོ་ཕྱིན་ཅི་ལོག་གིས་བསླད་པ་རྣམས་ལ་ནི་ངར་འཛིན་པ་དང་། ང་ཡིར་འཛིན་པ་ཡོངས་སུ་འཛིན་པ་འབྱུང་ངོ་། ངར་འཛིན་པ་དང་། ང་ཡིར་
འཛིན་པ་ལ་གནས་ཏེ། རྟག་ཏུ་ཡུལ་རྣམས་ལ་སྤྱོད་ཅིང་གནས་པ་དེ་དག་ལ་ནི་དམིགས་པ་ལས་བྱུང་བའི་སེམས་འབྱུང་སྟེ། དམིགས་པ་ཟད་ན་ཟད་པར་འགྱུར་ལ་བྱུང་ནས་ཞིག་ཅིང་ཞུ་སྟེ་གནས་པ་མེད་དོ། །སེམས་ཀྱི་དམིགས་པ་གང་གིས་རབ་ཏུ་འབྱུང་ཞིང་བསྙེན་པར་རྫོགས་པ་
དགེ་སློང་གི་དངོས་པོར་འགྱུར་བ་དང་། ལམ་སྒོམ་པར་བྱེད་པའི་སེམས་དེ་ནི་རང་བཞིན་གྱིས་མེད་པ་དང་། ཡང་དག་པ་མ་ཡིན་པ་དང་། བྱུང་བ་མ་ཡིན་པའོ། །མེད་པ་དང་། ཡང་དག་པ་མ་ཡིན་པ་དང་། བྱུང་བ་མ་ཡིན་པ་གང་ཡིན་པ་དེ་ལ་ནི་སྐྱེ་བ་ཡང་མེད། འཇིག་པ་
ཡང་མེད། གནས་པ་ཡང་མེད་དོ། །གང་ལ་སྐྱེ་བ་མེད་པ་དང་། འཇིག་པ་མེད་པ་དང་། གནས་པ་མེད་པ་དེ་ལ་ནི་བཅིངས་བ་ཡང་མེད། རྣམ་པར་གྲོལ་བ་ཡང་མེད་དོ། །དེ་ལ་ནི་ཐོབ་པ་ཡང་མེད། མངོན་པར་རྟོགས་པ་ཡང་མེད་དེ། ཚེ་དང་ལྡན་པ་དག་དེ་ལས་བསམས་ནས་འཇམ་དཔལ་གཞོན་ནུར་གྱུར་པས་འདི་སྐད་དུ་
ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་ནས་ཉོན་མོངས་པར་འགྱུར་བ་ཡང་མེད། རྣམ་པར་བྱང་བར་འགྱུར་བ་ཡང་མེད་དེ། འདི་ལ་ནི་སུ་ལ་ཡང་ཐོབ་པ་མེད། མངོན་པར་རྟོགས་པ་མེད། རྣམ་པར་གྲོལ་བ་མེད་དོ་ཞེས་སྨྲས་སོ། །དེ་ནས་སྤྲུལ་པའི་དགེ་སློང་དེས་བསྟན་པ་འདི་བཤད་པ་ན་

དགེ་སློང་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་སྟེ་ཕྱིན་པ་དང་། རང་རང་གི་བླ་གོས་འཇམ་དཔལ་གཞོན་ནུར་གྱུར་པ་ལ་མངོན་པར་བཀབ་
ནས་ཚིག་འདི་སྐད་ཅེས་ཀྱང་སྨྲས་སོ། །འཇམ་དཔལ་ཁྱོད་ཀྱིས་ནི་ཁོ་བོ་ཅག་ཡོངས་སུ་བསྐྱབས་སོ། །འདི་ལྟར་ཁོ་བོ་ཅག་ཀྱང་དམ་པའི་ཆོས་སྤོང་བར་མ་ཞུགས་པས་ད་ཕྱིན་ཅད་ཆོས་འདུལ་བ་ཟབ་མོ་ལ་འཇུག་པ་ལས་ཕྱི་རོལ་དུ་གྱུར་པ་མ་ཡིན་ནོ། །དེ་ནས་ཚེ་དང་ལྡན་པ་རབ་འབྱོར་གྱིས་
དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གིས་ཅི་ཞིག་ཐོབ་ཅིང་ཅི་ཞིག་མངོན་པར་རྟོགས་ན་རང་རང་གི་བླ་གོས་འཇམ་དཔལ་གཞོན་ནུར་གྱུར་པ་ལ་མངོན་པར་བཀབ། དེ་དག་གིས་སྨྲས་པ། བཙུན་པ་རབ་འབྱོར་ཁོ་བོ་ཅག་གིས་ནི་ཅི་ཡང་ཐོབ་པ་མེད་ཅིང་མངོན་པར་
རྟོགས་པ་མེད་པས་དེའི་ཕྱིར་ཁོ་བོ་ཅག་གིས་རང་རང་གི་བླ་གོས་འཇམ་དཔལ་གཞོན་ནུར་གྱུར་པ་ལ་མངོན་པར་བཀབ་བོ། །བཙུན་པ་རབ་འབྱོར་གང་གི་ཚེ་ཁོ་བོ་ཅག་ཐོབ་པའི་འདུ་ཤེས་ཡོད་པར་གྱུར་པ་དེའི་ཚེ་ནི་ཁོ་བོ་ཅག་སྟན་ལས་ལངས་ཏེ་འཁོར་དེ་ནས་དོང་ངོ་། །གང་གི་ཚེ་ཁོ་བོ་ཅག་
ཐོབ་པའི་འདུ་ཤེས་དེ་དང་བྲལ་བར་གྱུར་པ་དེའི་ཚེ་སླར་ལྷགས་སོ། །རབ་འབྱོར་གྱིས་སྨྲས་པ། ཚེ་དང་ལྡན་པ་དག་ཁྱེད་ཅི་ལས་བསམས་ཏེ་དེ་སྐད་སྨྲ། དེ་དག་གིས་སྨྲས་པ། བཙུན་པ་རབ་འབྱོར་ཐོབ་པ་ཞེས་བྱ་བ་དེ་ནི་གཡོ་བ་ཡིན་ནོ། །དེ་ནི་རློམ་སེམས་ཡིན་ཏེ། གང་ལ་གཡོ་བ་
ཡོད་པ་དང་། རློམ་སེམས་ཡོད་པ་དེ་ལ་ནི་ཐོབ་པ་ཡང་མེད་ཅིང་མངོན་པར་རྟོགས་པ་མེད་དོ། །བཙུན་པ་རབ་འབྱོར་གང་ལ་ཐོབ་པ་མེད་ཅིང་མངོན་པར་རྟོགས་པ་མེད་པ་དེ་ནི་རློམ་སེམས་ཐམས་ཅད་ཡང་དག་པར་བཅོམ་པ་ཡིན་ནོ། །ཚེ་དང་ལྡན་པ་རབ་འབྱོར་གྱིས་སྨྲས་པ། ཚེ་དང་ལྡན་པ་
དག་ཁྱེད་ཅག་སུས་བཏུལ། དེ་དག་གིས་སྨྲས་པ། བཙུན་པ་རབ་འབྱོར་གང་ཐོབ་པ་མེད་པ་དང་། མངོན་པར་རྟོགས་པ་མེད་པ་དང་། གང་སྐྱེ་བ་མེད་པ་དང་། ཡོངས་སུ་མྱ་ངན་ལས་འདའ་བ་མེད་པ་དང་། གང་མཉམ་པར་གཞག་པ་མེད་པ་དང་། སེམས་རྣམ་པར་གཡེངས་པ་མེད་པ་དེས་རབ་

ཏུ་བཏུལ་ཏོ། །སྨྲས་པ། ཚེ་དང་ལྡན་པ་དག་ཅི་ཁྱེད་ཅག་བཏུལ་བ་ཡིན་ནམ། དེ་དག་གིས་སྨྲས་པ། འཇམ་དཔལ་གཞོན་ནུར་གྱུར་པ་ལ་དྲིས་ཤིག །དེ་ནས་ཚེ་དང་ལྡན་པ་ཀུན་དགའ་བོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དགེ་སློང་དེ་དག་སུས་
བཏུལ། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་གང་ལ་ཕུང་པོ་རྣམས་མེད་པ་དང་། ཁམས་རྣམས་མེད་པ་དང་། སྐྱེ་མཆེད་རྣམས་མེད་པ་དང་། གང་སོ་སོའི་སྐྱེ་བོ་མ་ཡིན་པ་དང་། །སློབ་པ་མ་ཡིན་པ་དང་། མི་སློབ་པ་མ་ཡིན་པ་དང་། ཉན་ཐོས་མ་ཡིན་པ་དང་། བྱང་
ཆུབ་སེམས་དཔའ་མ་ཡིན་པ་དང་། དེ་བཞིན་གཤེགས་པ་མ་ཡིན་པ་དང་། གང་ལུས་དང་ལྡན་པ་མ་ཡིན་པ་དང་། ངག་དང་ལྡན་པ་མ་ཡིན་པ་དང་། སེམས་དང་ལྡན་པ་མ་ཡིན་པ་དང་། མཚུངས་པར་ལྡན་པ་མ་ཡིན་པ་དང་། བྲལ་བ་མ་ཡིན་པ་དེས་བཏུལ་ཏོ། །སྨྲས་པ། འཇམ་དཔལ་
དེ་སྟོན་པ་སུ་ཞིག །འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་འདི་ཇི་སྙམ་དུ་སེམས། དེ་བཞིན་གཤེགས་པས་སྤྲུལ་པ་ཞིག་སྤྲུལ་ན་དེ་མཚུངས་པར་ལྡན་པ་ཡིན་སྙམ་འམ། སྨྲས་པ། འཇམ་དཔལ་དེ་ནི་ཆོས་གང་དང་ཡང་མཚུངས་པར་ལྡན་པ་ཡང་མ་ཡིན། བྲལ་བ་
ཡང་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་ཅི་ཆོས་ཐམས་ཅད་སྤྲུལ་པའི་ངོ་བོ་ཉིད་ཡིན་ནམ། སྨྲས་པ། འཇམ་དཔལ་དེ་དེ་བཞིན་ནོ། །འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་དགེ་སློང་འདི་དག་ནི་སྤྲུལ་པས་བཏུལ་བ་ཡིན་ཏེ། སྤྲུལ་
པའི་འདུལ་བ་ཅི་འདྲ་བར་ཉན་ཐོས་ཐམས་ཅད་ཀྱི་འདུལ་བ་ཡང་དེ་འདྲའོ། །བཙུན་པ་ཀུན་དགའ་བོ་གང་དག་དེ་ལྟར་བཏུལ་བ་དེ་དག་ནི་ཡང་དག་པར་བཏུལ་བ་ཡིན་ནོ། །གང་དག་ཆོས་འདུལ་བ་འདི་ལ་མོས་པར་མི་བྱེད་པ་དེ་དག་ནི་ལྷག་པའི་ང་རྒྱལ་ཅན་དུ་རིག་པར་བྱའོ། །དེ་ནས་ཚེ་དང་ལྡན་པ་
ཀུན་དགའ་བོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་དགེ་སློང་ལྷག་པའི་ང་རྒྱལ་ཅན་དུ་རིག་པར་བྱ། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་འདི་ལ་དགེ་སློང་ཚུལ་ཁྲིམས་ཀྱི་ཕུང་པོ་ཡོངས་སུ་དག་པས་ཡོངས་སུ་དག་པར་རློམ་

སེམས་སུ་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཡོངས་སུ་དག་པས་ཡོངས་སུ་དག་པར་རློམ་སེམས་སུ་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་
པར་བྱའོ། །བདག་གིས་ཐོབ་བོ། །བདག་གིས་མངོན་སུམ་དུ་བྱས་སོ་སྙམ་དུ་སེམས་ཤིང་རློམ་སེམས་སུ་བྱེད་པ་དང་། ཡོངས་སུ་རྟོག་པར་བྱེད་པ་དེ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །འཇིག་ཚོགས་ལ་ལྟ་བས་སྐྲག་ཅིང་བགྲོད་པ་གཅིག་པའི་ལམ་གྱི་རོ་མྱོང་བར་བྱེད་པ་ནི་ལྷག་
པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། སྟོང་པ་ཉིད་གང་གིས་འཇིག་ཚོགས་ལ་ལྟ་བ་སྟོང་པའི་སྟོང་པ་ཉིད་དེས་བགྲོད་པ་གཅིག་པའི་ལམ་ཡང་སྟོང་པའི་ཕྱིར་ཏེ། སྟོང་པ་དེ་ལྟ་བུ་ལ་སྟོང་པ་ཉིད་ཀྱིས་ཡང་དག་པར་མི་འཇུག་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །
བཙུན་པ་ཀུན་དགའ་བོ་གཞན་ཡང་དགེ་སློང་གང་འཇིག་ཚོགས་ལ་ལྟ་བའི་སྟོང་པ་ཉིད་གང་ཡིན་པ་དང་། བགྲོད་པ་གཅིག་པའི་ལམ་གྱི་སྟོང་པ་ཉིད་གང་ཡིན་པའི་སྟོང་པ་ཉིད་དེ་ལ་སྟོང་པ་ཉིད་ཀྱིས་མཉམ་པར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། བཙུན་པ་
ཀུན་དགའ་བོ་སྟོང་པ་ཉིད་ཀྱང་གཞན་མ་ཡིན་ལ་འཇིག་ཚོགས་ལ་ལྟ་བ་ཡང་གཞན་མ་ཡིན་ཏེ། འཇིག་ཚོགས་ལ་ལྟ་བ་ཉིད་སྟོང་པ་ཉིད་ཡིན་པ་དང་། སྟོང་པ་ཉིད་ཀྱང་གཞན་མ་ཡིན་ལ་ལམ་ཡང་གཞན་མ་ཡིན་ཏེ། ལམ་ཉིད་སྟོང་པ་ཉིད་ཡིན་པའི་ཕྱིར་རོ། །བཙུན་པ་ཀུན་དགའ་བོ་གཞན་ཡང་དགེ་སློང་གང་
མ་རིག་པ་དང་། སྲིད་པའི་སྲེད་པས་འཇིགས་ཤིང་མ་རིག་པ་ལས་རྣམ་པར་གྲོལ་བའི་རོ་མྱོང་བར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། གང་ལ་གཉིས་སུ་འདུ་ཤེས་འཇུག་པ་དེ་ནི་རྣམ་པར་གྲོལ་བ་མ་ཡིན་པའི་ཕྱིར་རོ། །བཙུན་པ་ཀུན་དགའ་བོ་གཞན་
ཡང་དགེ་སློང་གང་འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱིས་སྐྲག་ཅིང་རྣམ་པར་ཐར་པའི་སྒོ་གསུམ་པོ་དག་གི་རོ་མྱོང་བར་བྱེད་པ་དང་། ཕྱིན་ཅི་ལོག་བཞིས་སྐྲག་ཅིང་འདུ་ཤེས་བཞིའི་རོ་མྱོང་བར་བྱེད་པ་དང་། སྒྲིབ་པ་ལྔས་སྐྲག་ཅིང་དབང་པོ་ལྔའི་རོ་མྱོང་བར་བྱེད་པ་དང་། སྐྱེ་

མཆེད་དྲུག་གིས་སྐྲག་ཅིང་མངོན་པར་ཤེས་པ་དྲུག་གི་རོ་མྱོང་བར་བྱེད་པ་དང་། རྣམ་པར་ཤེས་པའི་གནས་བདུན་གྱིས་སྐྲག་ཅིང་བྱང་ཆུབ་ཀྱི་ཡན་ལག་བདུན་གྱི་རོ་མྱོང་བར་བྱེད་པ་དང་། ལོག་པ་ཉིད་བརྒྱད་ཀྱིས་སྐྲག་ཅིང་འཕགས་པའི་ལམ་ཡན་ལག་བརྒྱད་པའི་རོ་མྱོང་བར་བྱེད་པ་དང་། འདུས་
བྱས་ཀྱི་དངོས་པོ་དགུས་སྐྲག་ཅིང་མཐར་གྱིས་གནས་པའི་སྙོམས་པར་འཇུག་པ་དགུའི་རོ་མྱོང་བར་བྱེད་པ་དང་། མི་དགེ་བ་བཅུའི་ལས་ཀྱི་ལམ་གྱིས་སྐྲག་ཅིང་མི་སློབ་པའི་ཆོས་བཅུའི་རོ་མྱོང་བར་བྱེད་པ་དང་། འདུས་བྱས་ཀྱི་ཁམས་ཀྱིས་སྐྲག་ཅིང་འདུས་མ་བྱས་ཀྱི་ཁམས་དག་གི་རོ་
མྱོང་བར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། བཙུན་པ་ཀུན་དགའ་བོ་དེ་དག་ཐམས་ཅད་ནི་གཡོ་བ་དང་། རློམ་སེམས་དང་། སྤྲོས་པ་ཡིན་ཏེ། བཙུན་པ་ཀུན་དགའ་བོ་ཇི་ཙམ་དུ་གཡོ་བ་དང་། རློམ་སེམས་དང་། སྤྲོས་པ་དང་། སེམས་མཐོ་
བ་དང་། དམའ་བ་དང་། འཛིན་པ་དང་། སྤོང་བ་དང་། ཡོངས་སུ་རྟོག་པ་དང་། རྟེན་པ་དང་། ལྷག་པར་ཞེན་པ་དང་། སྒྲོ་འདོགས་པ་ཡོད་པ་དེ་ཙམ་དུ་ལྷག་པར་བྱེད་པ་དང་ལྡན་པའི་ལྷག་པའི་ང་རྒྱལ་ཡིན་པའི་ཕྱིར་ཏེ། བཙུན་པ་ཀུན་དགའ་བོ་དེ་ལྟ་བུའི་དགེ་སློང་ནི་ལྷག་པའི་ང་རྒྱལ་ཅན་
དུ་ཤེས་པར་བྱའོ། །དེ་ཅིའི་ཕྱིར་ཞེ་ན། བཙུན་པ་ཀུན་དགའ་བོ་འདུས་བྱས་ཀྱི་ཁམས་ཀྱི་སྟོང་པ་ཉིད་གང་ཡིན་པའི་སྟོང་པ་དང་། འདུས་མ་བྱས་ཀྱི་ཁམས་ཀྱི་སྟོང་པ་ཉིད་གང་ཡིན་པའི་སྟོང་པ་དང་། སྟོང་པ་ཉིད་ལ་མཉམ་པ་ཉིད་དུ་མི་འཇུག་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱ་བ་ཡིན་
པའི་ཕྱིར་རོ། །དེ་ནས་ཚེ་དང་ལྡན་པ་ཀུན་དགའ་བོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་དགེ་སློང་ལྷག་པའི་ང་རྒྱལ་མེད་པ་ཡིན། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་གང་གི་ཚེ་དགེ་སློང་ནང་ཉེ་བར་ཞི་བས་ཡུལ་
ཐམས་ཅད་ཀྱང་ཉེ་བར་ཞི་བར་མཐོང་ཞིང་མཉམ་པ་ཞེས་བྱ་བ་འམ། མི་མཉམ་པ་ཞེས་བྱ་བ་འམ། རིག་པ་ཞེས་བྱ་བ་འམ། མ་རིག་པ་ཞེས་བྱ་བ་འམ། དམིགས་པ་ཞེས་བྱ་བ་འམ། མི་དམིགས་པ་ཞེས་བྱ་བ་འམ། འདུས་བྱས་ཞེས་བྱ་བ་འམ། འདུས་མ་བྱས་ཞེས་བྱ་

བར་རློམ་སེམས་སུ་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། གཉིས་སུ་འབྱེད་པར་མི་བྱེད། གཅིག་ཏུ་སྡུད་པར་མི་བྱེད། ལེན་པར་མི་བྱེད། འདོར་བར་མི་བྱེད། འཕྲོ་བར་མི་བྱེད། མངོན་པར་ཞེན་པར་མི་བྱེད་ཅིང་ཆོས་ཐམས་ཅད་ཡང་
དག་པའི་མཐའ་དང་མཉམ་པར་ཡང་དག་པར་རྗེས་སུ་མཐོང་ལ་མཉམ་པ་མེད་པ་དང་། མི་མཉམ་པ་མེད་པར་མཉམ་པ་ཉིད་ཀྱིས་མཉམ་པས་མཉམ་པར་བྱ་བ་འམ། མི་མཉམ་པར་བྱ་བའི་ཆོས་གང་ཡང་མེད་དེ། མཉམ་པ་ཉིད་གང་ཡིན་པ་དེ་ཡང་ཡང་དག་པར་རྗེས་སུ་
མི་མཐོང་ཞིང་རློམ་སེམས་སུ་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། མངོན་པར་ཞེན་པར་ཡང་མི་བྱེད་ན། ཐོབ་པ་འམ། མངོན་པར་རྟོགས་པ་འམ། མངོན་སུམ་དུ་བྱ་བས་རློམ་སེམས་སུ་བྱེད་པ་ལྟ་ཅི་སྨོས་ཏེ་དེ་ནི་གནས་མེད་དོ། །བཙུན་པ་ཀུན་དགའ་
བོ་དེ་ལྟར་ན་དགེ་སློང་ལྷག་པའི་ང་རྒྱལ་མེད་ཅིང་གཉེན་པོ་མེད་པ་དང་། ཕྱོགས་མེད་པ་དང་། རང་གི་ཕྱོགས་དང་། གཞན་གྱི་ཕྱོགས་དང་བྲལ་བ་དང་། ཚོར་བ་ཐམས་ཅད་རྒྱུན་བཅད་པ་དང་། ཚོར་བ་དང་། ཚོར་བ་མེད་པ་ཐམས་ཅད་དང་། དམིགས་པ་དང་། རྣམ་པར་རྟོག་
པ་དང་། ཡིད་ལ་བྱེད་པ་ཐམས་ཅད་དང་བྲལ་བ་དང་། འཆིང་བ་མེད་པ་དང་། ཉེ་བར་ལེན་པ་མེད་པ་དང་། ཞི་བ་དང་། རབ་ཏུ་ཞི་བ་དང་། ཉེ་བར་ཞི་བ་ཡིན་ཏེ། དེ་ནི་ངར་འཛིན་པ་དང་། ང་ཡིར་འཛིན་པ་དང་བྲལ་བས་ཆོས་གང་ལ་ཡང་སྤང་བ་འམ། མངོན་པར་རྟོགས་
པ་འམ། མངོན་སུམ་དུ་བྱ་བ་ཡོད་པའི་ཆོས་དེ་ཡང་ཡང་དག་པར་རྗེས་སུ་མི་མཐོང་སྟེ། དེ་ལྟར་ཞུགས་པའི་དགེ་སློང་ནི་ལྷག་པའི་ང་རྒྱལ་མེད་པ་ཡིན་ནོ། །དེས་ནི་ནམ་མཁའི་ཁམས་མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་རྟོགས་པས་ན་ཆོས་གང་ལ་ཡང་དགེ་
བ་ཞེས་བྱ་བ་འམ། མི་དགེ་བ་ཞེས་བྱ་བ་འམ། ཁ་ན་མ་ཐོ་བ་དང་བཅས་པ་ཞེས་བྱ་བ་འམ། ཁ་ན་མ་ཐོ་བ་མེད་པ་ཞེས་བྱ་བ་འམ། ཟག་པ་དང་བཅས་པ་ཞེས་བྱ་བ་འམ། ཟག་པ་མེད་པ་ཞེས་བྱ་བའམ། འཇིག་རྟེན་པ་ཞེས་བྱ་བ་འམ། །འཇིག་རྟེན་ལས་འདས་པ་

ཞེས་བྱ་བ་འམ། འདུས་བྱས་ཞེས་བྱ་བ་འམ། འདུས་མ་བྱས་ཞེས་བྱ་བར་སྒྲོ་འདོགས་པར་མི་བྱེད་དོ། །དེ་ནི་སྒྲོ་འདོགས་པར་མི་བྱེད་པ་ཉིད་ཀྱིས་ཀྱང་རློམ་སེམས་སུ་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད་དེ། ཡང་དག་པར་རྗེས་སུ་མི་མཐོང་ངོ་། །དེས་ནི་
ཆོས་ཐམས་ཅད་སྒྲོ་བཏགས་པ་མེད་པར་མཉམ་པ་ཉིད་ཀྱིས་མཉམ་ཞིང་ནམ་མཁའ་ལྟར་མཉམ་པ་ཉིད་དུ་རྟོག་པ་ཡིན་ནོ། །བཙུན་པ་ཀུན་དགའ་བོ་གང་དེ་ལྟར་མོས་པའི་དགེ་སློང་ནི་ཡང་དག་པར་ཤིན་ཏུ་རྣམ་པར་གྲོལ་བ་ཞེས་བྱ་སྟེ། དེ་ལྟར་ན་ལྷག་པའི་ང་རྒྱལ་མེད་པ་ཡིན་ནོ། །
དེ་ལས་དགོངས་ནས་བཅོམ་ལྡན་འདས་ཀྱིས་འདི་སྐད་དུ་ཇི་ལྟར་ནམ་མཁའ་ལག་མཐིལ་ལ་མི་ཆགས་པ་ལྟར་དགེ་སློང་གི་ཆོས་ཀྱང་དེ་བཞིན་ནོ་ཞེས་གསུངས་སོ། །བསྟན་པ་འདི་བཤད་པ་ན་དགེ་སློང་ཉིས་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་
ནས་ལྷའི་བུ་རིན་ཆེན་མཆོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལྷག་པའི་ང་རྒྱལ་མེད་པ་ཡང་དག་པའི་ཤེས་པ་བརྡ་སྤྲོད་པར་བྱེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་
སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་མི་མཉམ་པ་དང་མཉམ་པའི་སེམས་འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སེམས་ཉན་ཐོས་དང་རང་སངས་རྒྱས་ཐམས་ཅད་ལས་ཡང་དག་པར་འདས་པའི་སེམས་དེ་ནང་ན་གནས་པར་ཡང་མི་མཐོང་། ཕྱི་
རོལ་ན་ཡང་མ་ཡིན། གཉི་ག་མེད་པར་ཡང་མ་ཡིན། ཕྱི་རོལ་གྱི་ཡུལ་ལ་རྒྱུ་ཞིང་གནས་པར་ཡང་མི་མཐོང་ལ་དགེ་བའི་རྩ་བ་བསགས་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་བ་དང་། དམ་པའི་ཆོས་ཡོངས་སུ་ག