Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

ྱེན་པ་ལ། །གོས་པ་མེད་པར་གཞོལ་བར་བྱེད། །བྱང་ཆུབ་སེམས་
དཔའ་བློ་ཆེན་དག །ལམ་ཆེན་རབ་ཏུ་བརྒྱན་པས་ན། །བསམ་གྱིས་མི་ཁྱབ་མཆོག་དག་ལ། །རྣམ་པར་དག་པས་གཞོལ་བར་བྱེད།། །།བམ་པོ་བཞི་པ། གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱིས་གོ་ཆའི་སྤྱོད་ཡུལ་དཔག་ཏུ་མེད་པ་དང་། ཐེག་པ་ཆེན་པོའི་སྤྱོད་ཡུལ་དཔག་ཏུ་མེད་པ་དང་། ལམ་ཆེན་པོའི་སྤྱོད་ཡུལ་དཔག་ཏུ་མེད་པ་དག་ལ་རབ་ཏུ་གཞོལ་བར་བྱའོ། །དེ་ཅིའི་ཕྱིར་ཞེ་ན། ཐམས་ཅད་དུ་རྗེས་སུ་འཇུག་པར་འགྱུར་བའི་ཕྱིར་རོ། །བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱེད་དོ། །ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ཐེག་པ་ཆེན་པོ་ལ་བཞོན་པར་བྱེད་དོ། །ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ལམ་ཆེན་པོ་ལ་
རབ་ཏུ་གནས་པར་བྱེད་དོ། །ཆོས་ཐམས་ཅད་ལ་མཉམ་པ་ཉིད་རབ་ཏུ་ཐོབ་པར་བྱ་བའི་ཕྱིར་རབ་ཏུ་གཞོལ་བར་བྱེད་དོ། །འོན་ཀྱང་གོ་ཆ་དེས་ཆོས་ཅུང་ཟད་ཙམ་ཡང་ནང་ངམ། ཕྱི་རོལ་ལམ། རགས་པ་འམ། ཕྲ་བ་འམ། ཐག་རིང་བ་འམ། ཐག་ཉེ་བ་འམ། འདས་པ་འམ། ད་ལྟར་
བྱུང་བ་འམ། མ་འོངས་པ་འམ། འདུས་བྱས་སམ། འདུས་མ་བྱས་སམ། གནས་པ་འམ། མི་གནས་པ་ཞེས་བྱ་བ་ཡང་དག་པར་རྗེས་སུ་མི་དམིགས་སོ། །གལ་ཏེ་གོ་ཆ་འདིས་ཆོས་ཐམས་ཅད་རབ་ཏུ་རྣམ་པར་འབྱེད་མི་ནུས་སམ། གཏན་ལ་འབེབས་པར་མི་ནུས་སམ། ཡོངས་
སུ་མི་ཤེས་སམ། རྗེས་སུ་འཇུག་པར་མི་ནུས་སམ། མངོན་སུམ་དུ་བྱེད་མི་ནུས་སམ། ཡང་དག་པར་འདའ་བར་མི་ནུས་ན། གོ་ཆ་ཆེན་པོ་བགོས་པ་ཞེས་མི་བྱའོ། །ཆོས་ཐམས་ཅད་རབ་ཏུ་རྣམ་པར་འབྱེད་པར་བྱེད་དམ། གཏན་ལ་འབེབས་སམ། ཡོངས་སུ་ཤེས་པར་གྱུར་

ཏམ། རྗེས་སུ་འཇུག་པར་བྱེད་དམ། མངོན་སུམ་དུ་བྱེད་དམ། ཡང་དག་པར་འདའ་བར་བྱེད་ན་གོ་ཆ་ཆེན་པོ་བགོས་པ་ཞེས་བྱའོ། །ཐེག་པ་ཆེན་པོ་དེས་ཀྱང་ཆོས་འགའ་ཙམ་ཡང་ནང་ངམ་ཕྱི་རོལ་ཞེས་བྱ་བ་ནས་ཐམས་ཅད་མཁྱེན་པའི་ཡེ་ཤེས་སུ་བསྔོ་བ་ཞེས་བྱ་བའི་བར་དུ་ཡང་
དག་པར་མི་དམིགས་ཤིང་ཡོངས་སུ་ཤེས་པ་དང་། རྗེས་སུ་འཇུག་པ་དང་། མངོན་སུམ་དུ་བྱེད་པ་དང་། ཡང་དག་པར་འདའ་བར་བྱེད་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་དང་། ཆོས་ལ་རབ་ཏུ་མཁས་པའི་ཐེག་པ་དང་། མྱ་ངན་ལས་འདས་བར་ཕྱིན་པར་བྱེད་པའི་ཐེག་པ་དང་།
གོང་ན་མེད་པའི་ཐེག་པ་དང་། མཚུངས་པ་མེད་པའི་ཐེག་པ་ཞེས་བྱའོ། །ལམ་ཆེན་པོ་དེས་ཀྱང་ཅུང་ཟད་ཙམ་ནང་ངམ་ཕྱི་རོལ་ཞེས་བྱ་བ་ནས་ཆོས་ཐམས་ཅད་མཉམ་པ་ཉིད་ཀྱི་ལམ་ཆེན་པོར་གྱུར་ནས་གཞོལ་བར་བྱེད་པ་ཞེས་བྱ་བའི་བར་དུ་ཡང་དག་པར་མི་དམིགས་ཤིང་མཉམ་པ་ཉིད་
ཀྱི་ལམ་འདིས་ཆོས་འགའ་ཙམ་ཡང་ཡོངས་སུ་མི་ཤེས་པ་མེད་པས་དེའི་ཕྱིར་ལམ་འདི་ནི་བླ་ན་མེད་པའི་ལམ་དང་། གྲངས་དང་། ཚད་མེད་པའི་ལམ་དང་། མཚུངས་པ་མེད་པའི་ལམ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་
པ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་སྤྱོད་པ་ཀུན་གྱི་རྗེས་སུ་ཡང་དག་པར་འཇུག་པར་བྱེད་དོ། །སེམས་ཅན་ཐམས་ཅད་ཀྱི་ཉོན་མོངས་པའི་ཀུན་ནས་ཉོན་མོངས་པ་སྤོང་ཞིང་ཡོངས་སུ་དག་པར་བྱེད་དོ། །ཐེག་པ་ཆེན་པོ་ལ་ཞོན་ནས་སེམས་ཅན་རྣམས་ཀྱི་དགེ་
བའི་རྩ་བ་ཐམས་ཅད་ཡང་དག་པར་འཕེལ་བར་བྱེད་དོ། །ལམ་ཆེན་པོ་འདི་ལ་གནས་ནས་སེམས་ཅན་རྣམས་དགེ་བའི་རྩ་བ་ཐམས་ཅད་སྒྲུབ་པར་ཡང་དག་པར་སྐུལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་རེ་རེའི་ཕྱིར་
སེམས་ཀྱི་སྤྱོད་པ་རེ་རེའི་ཕྱིར་ཡང་འཁོར་བའི་མཐའ་ཇི་སྲིད་པ་དེ་སྲིད་དུ་ཡུན་རིང་པོར་འཁོར་བ་ན་འཁོར་ཞིང་། ཤེས་རབ་ཀྱི་སྨན་ཡོངས་སུ་ཚོལ་བ་དང་། གོ་ཆ་མི་སྤོང་བར་ཤིན་ཏུ་བརྟན་པར་བྱས་ནས་གོ་ཆ་ཆེན་པོ་དང་། ཚད་མེད་པའི་གོ་ཆ་དང་། བསམ་པར་དཀའ་བའི་གོ་ཆ་དང་། རྣམ་

པར་དག་པའི་གོ་ཆ་དང་། དཔག་ཏུ་མེད་པའི་གོ་ཆ་དང་། བླང་བ་མེད་པའི་གོ་ཆ་དང་། སེམས་ཅན་གྱི་འདུ་ཤེས་རིག་པའི་གོ་ཆ་དང་། སེམས་ཅན་མེད་པར་ཤེས་པའི་གོ་ཆ་དང་། བདག་མེད་པར་ཤེས་པའི་གོ་ཆ་དང་། སེམས་ཅན་གྱི་རང་བཞིན་ཤེས་པའི་གོ་ཆ་དང་།
སེམས་ཅན་གྱི་རང་བཞིན་རྗེས་སུ་རྟོགས་པའི་གོ་ཆ་དང་། བདག་གི་རང་བཞིན་ཤེས་པའི་གོ་ཆ་དང་། ནང་གི་རང་བཞིན་ཤེས་པའི་གོ་ཆ་དང་། ནང་གི་རང་བཞིན་རྗེས་སུ་རྟོགས་པའི་གོ་ཆ་དང་། ཕྱི་རོལ་གྱི་རང་བཞིན་ཤེས་པའི་གོ་ཆ་དང་། ཕྱི་རོལ་གྱི་རང་བཞིན་རྗེས་སུ་རྟོགས་པའི་གོ་ཆ་དང་།
ནང་དང་ཕྱི་རོལ་གཉི་གའི་རང་བཞིན་ཤེས་པའི་གོ་ཆ་དང་། ནང་དང་ཕྱི་རོལ་གཉི་གའི་རང་བཞིན་རྗེས་སུ་རྟོགས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་ཤེས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་རྗེས་སུ་རྟོགས་པའི་གོ་ཆ་དང་། ཆོས་ཐམས་ཅད་དམིགས་སུ་མེད་པར་
ཤེས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་དམིགས་སུ་མེད་པར་ཤེས་པའི་གོ་ཆ་དང་། ཆོས་ཐམས་ཅད་རྟོགས་པར་ཁོང་དུ་ཆུད་པའི་གོ་ཆ་དང་མཐའ་མེད་པའི་གོ་ཆ་དང་། དབུས་མེད་པའི་གོ་ཆ་དང་། དབུས་དང་། མཐའ་མེད་པའི་གོ་ཆ་དང་། འདས་པ་མ་ཡིན་པའི་གོ་ཆ་དང་།
མ་འོངས་པ་མ་ཡིན་པའི་གོ་ཆ་དང་། ད་ལྟར་བྱུང་བ་མ་ཡིན་པའི་གོ་ཆ་དང་། བྱ་བ་མེད་པའི་གོ་ཆ་དང་། བྱེད་པ་མེད་པའི་གོ་ཆ་ཡང་དག་པར་བགོ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་འདི་ལ་བགོ་བར་ཡང་མི་བྱེད། རྗེས་སུ་
རྟོགས་པར་ཡང་མི་བྱེད། གཏན་ལ་འབེབས་པར་ཡང་མི་བྱེད། ངེས་པར་འབྱུང་བར་ཡང་མི་བྱེད། མངོན་སུམ་དུ་ཡང་མི་བྱེད་དེ། གོ་ཆ་ཉིད་ཡོད་པ་མ་ཡིན་པའི་ཕྱིར་རོ། །གོ་ཆ་བགོས་པ་གང་ཡིན་པ་དེ་དག་ནི་རྗེས་སུ་རྟོགས་པར་མི་བྱེད་པའི་ཕྱིར་རྗེས་སུ་རྟོགས་པར་བྱེད་དོ། །
གཏན་ལ་འབེབས་པར་མི་བྱེད་པའི་ཕྱིར་གཏན་ལ་འབེབས་པར་བྱེད་དོ། །ངེས་པར་འབྱུང་བར་མི་བྱེད་པའི་ཕྱིར་ངེས་པར་འབྱུང་བར་བྱེད་དོ། །མངོན་སུམ་དུ་མི་བྱེད་པའི་ཕྱིར་མངོན་སུམ་དུ་བྱེད་དོ། །གདེག་པར་བྱ་བ་མེད་པའི་ཕྱིར་ཐེག་པ་ཆེན་པོ་ལ་ཞོན་པར་བྱེད་དོ། །ཐེག་པ་ཆེན་པོ་

ལ་གདགས་པར་མི་བྱེད་དེ། གདགས་པ་མེད་པའི་གདགས་པས་གདགས་པར་བྱེད་ཀྱང་ཐེག་པ་ཆེན་པོ་ལ་ནི་གདགས་པར་བྱ་བ་ཅི་ཡང་མེད་དོ། །གལ་ཏེ་གདགས་པ་དང་བཅས་པར་གྱུར་ན་དེ་ཉིད་གདགས་པ་མ་ཡིན་ཏེ། གདགས་པ་དེ་དག་དམིགས་སུ་མེད་པའི་ཕྱིར་དང་། བལྟར་
མེད་པའི་ཕྱིར་རོ། །ཐེག་པ་ཡང་ཡོད་པ་མ་ཡིན་པ་སྟེ། ཐེག་པ་ལ་གནས་པ་དག་ནི་དམིགས་སུ་མེད་པས་ཐེག་པ་ཆེན་པོ་ལ་གནས་པར་བྱས་པས་གཞོལ་བར་བྱས་པ་སྤོང་ཞིང་མཐར་ཕྱིན་པར་ཡང་མི་བྱེད་ལ། མྱ་ངན་ལས་འདས་པར་ཕྱིན་པར་ཡང་མི་བྱེད་དེ། དམིགས་སུ་མེད་པའི་
ཕྱིར་རོ། །ལམ་མ་ཡིན་པས་ལམ་མེད་དེ། ལམ་ལ་གཞོལ་བར་བྱེད་པ་ཉིད་ཡང་དག་པར་མཉམ་པའི་ཕྱིར་རོ། །ཡང་དག་པའི་ལམ་འདི་ནི་གདགས་སུ་མེད་པས་སུ་ཞིག་གང་དུ་གང་ལས་གདགས་པར་བྱེད་དེ། བྱ་བ་ཡང་མེད། བྱེད་པ་ཡང་མེད། འདུས་པ་ཡང་མ་ཡིན།
འདུས་པ་མེད་པ་ཡང་མ་ཡིན། ཐམས་ཅད་ལ་སྐྱོ་ཞིང་ཐམས་ཅད་ཡོངས་སུ་མི་འཚལ་བ་ཡིན་ནོ། །དེ་ཅིའི་ཕྱིར་ཞེ་ན། ཡང་དག་པར་མཉམ་པའི་ལམ་འདི་ནི་ཆོས་ཐམས་ཅད་དང་གཅིག་པ་ཡང་མ་ཡིན། ཐ་དད་པ་ཡང་མ་ཡིན་ཞིང་མཚུངས་པར་མི་ལྡན་པའི་ཕྱིར་རོ། །ཆོས་ཀྱི་འདུ་
ཤེས་མི་སྐྱེད་ཅིང་ཆོས་ཐམས་ཅད་སྤོང་བར་བྱེད་པས་གཙང་བ་ཡང་མེད་མི་གཙང་བ་ཡང་མེད་དོ། །ཆོས་ཉིད་ཀྱང་དེ་བཞིན་ཏེ། གཙང་བ་མེད། མི་གཙང་བ་མེད་པས་དེའི་ཕྱིར་ལམ་འདི་ནི་ཀུན་ནས་ཉོན་མོངས་པ་མེད་པའི་ལམ་ཞེས་བྱ་སྟེ། བགྲོད་པ་མེད་པས་བགྲོད་པར་བྱེད་དོ། །
ཡོངས་སུ་བཟུང་བ་མེད་པས་ཡོངས་སུ་གཟུང་བར་བྱེད་དོ། །ལམ་འདི་ནི་ཤིན་ཏུ་ཟབ་པས་སྐྱེ་བ་མེད་པ། འབྱུང་བ་མེད་པ། བྱེད་པ་མེད་པ། ཐོབ་པ་མེད་པ། མངོན་པར་འདུ་བྱེད་པ་མེད་པ། གནས་མེད་པ། སྒྲིབ་པ་མེད་པ། དངོས་པོ་མེད་པ་དངོས་པོ་ཐམས་ཅད་རབ་ཏུ་སྟོན་པ།
དངོས་པོ་ཐམས་ཅད་དབྱེར་མེད་པ། དངོས་པོའི་རྗེས་སུ་མི་འཇུག་པ་ཡིན་ཏེ། དངོས་པོ་མེད་པའི་ཕྱིར་བླ་ན་མེད་པའི་གནས་སུ་ཕྱིན་པར་བྱེད་པ་ཡིན་ནོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གོ་ཆ་འདི་དང་། ཐེག་པ་འདི་དང་། ལམ་འདི་

དེ་ལྟར་རིག་པར་བྱའོ། །འོན་ཀྱང་གོ་ཆ་འདི་དང་། ཐེག་པ་འདི་དང་། ལམ་འདི་ནི་བལྟར་མེད་ཅིང་ཤེས་པར་བྱར་མེད་པ་དང་། དམིགས་སུ་མེད་པའི་ཕྱིར་སུ་ཞིག་གོ་ཆ་བགོ་བར་བྱེད། སུ་ཞིག་ཐེག་པ་འདི་ལ་ཞོན་པར་བྱེད། སུ་ཞིག་ལམ་འདི་ལ་སྤྱོད་པར་བྱེད་དེ།
བལྟར་མེད་ཅིང་ཤེས་པར་བྱར་མེད་པ། དམིགས་སུ་མེད་པས་སོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་ཆོས་འདི་ཐོས་ནས་མི་སྐྲག་མི་དངང་བར་ཀློག་པ་དང་། ཁ་ཏོན་དུ་འདོན་པ་དང་། ཡང་དག་པར་རབ་ཏུ་སྟོན་པ་དང་། ཆོས་ཀྱི་ཚུལ་དང་
འགལ་བ་མེད་ཅིང་རྗེས་སུ་འཐུན་པར་བསྒྲུབས་པ་དང་། རབ་ཏུ་དགའ་བར་མོས་པར་བྱེད་པ་དང་། ཆོས་འདིའི་ཕྱིར་རབ་ཏུ་བརྩོན་པར་བྱེད་པ་དང་། ཆོས་ཀྱི་ཚུལ་ངེས་པ་འདི་ལ་ཐབས་མཁས་པའི་ནུས་པ་དང་ལྡན་པར་གྱུར་པ་གང་ཡིན་པ་དེ་དག་ནི་གོ་ཆ་འདི་བགོས་ཏེ། ཐེག་པ་འདི་
ལ་ཞོན་ནས་ལམ་འདིར་ཞུགས་ཏེ། ཆོས་ཟབ་མོ་དམིགས་སུ་མེད་པ་འདི་ལ་གཞོལ་བར་བྱེད་པས་འཁོར་བའི་མཐའ་གཏུགས་ནས་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་ཡོན་ཏན་དཔག་ཏུ་མེད་པས་རབ་ཏུ་བརྒྱན་ནས་འཇིག་རྟེན་དུ་འབྱུང་བར་འགྱུར་རོ། །
བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཆོས་འདི་ལ་རབ་ཏུ་དགའ་བས་བརྩོན་འགྲུས་བསྐྱེད་ནས་བག་ཡོད་པར་བསྒྲུབ་པར་བྱའོ། །སེམས་ཅན་གང་ལ་ལ་ཞིག་ཆོས་ཟབ་མོ་འདི་ཐོས་མ་ཐག་ཏུ་དགའ་བ་བསྐྱེད་པ་གང་ཡིན་པ་དེ་དག་ཀྱང་ངས་ཕན་
པ་ཆེན་པོ་ཐོབ་པར་རབ་ཏུ་བསྟན་ན་གང་ཞིག་ནན་ཏན་བརྩོན་འགྲུས་ཀྱིས་བག་ཡོད་པ་དང་བཅས་པ་དང་། ཚུལ་ཁྲིམས་ཀྱི་སྤྱོད་པ་རྣམ་པར་དག་པས་གཞོལ་བར་བྱེད་པ་ལྟ་སྨོས་ཀྱང་ཅི་དགོས། །བློ་གྲོས་མཐའ་ཡས་ཁྱོད་ཀྱིས་ཆོས་འདི་ཤིན་ཏུ་ཡངས་ཤིང་རྒྱ་ཆེ་བ་རྣམ་པ་དུ་མ་དང་། ཁྱད་
པར་དུ་འཕགས་པ་རྣམ་པ་དུ་མ་དང་། རྣམ་པར་དག་པ་དུ་མ་དང་ལྡན་པ་ལ་ལྟོས། ངས་ཆོས་འདི་ལ་ནན་ཏན་གྱིས་བསྔགས་པ་རབ་ཏུ་བརྗོད་པ་ནི་སེམས་ཅན་རྣམས་རབ་ཏུ་དགའ་བ་བསྐྱེད་པས་ཡུན་རིང་པོའི་ཕན་པ་དང་། བདེ་བ་ཐོབ་ནས་ཡོངས་སུ་སྐྱོ་བར་བྱ་བའི་ཕྱིར་དང་། རབ་ཏུ་ཞི་བར་བྱ་

བའི་ཕྱིར་དང་། ཡོངས་སུ་ཤེས་པར་བྱ་བའི་ཕྱིར་རོ། །བློ་གྲོས་མཐའ་ཡས་ཡང་ཁྱོད་ཀྱིས་ཆོས་འདི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པའི་བདེ་བ་སྦྱིན་པ་བྱེད་པ་ཡིན་ཡང་སྲིད་པ་རྣམས་སུ་དབུལ་ཕོངས་པ་སྣ་ཚོགས་སྣང་བར་གྱུར་པ་ནི་སེམས་ཅན་རྣམས་ཆོས་
ཟབ་མོ་འདི་ལས་རབ་ཏུ་ཉམས་པར་གྱུར་པའི་ཕྱིར་འཇིག་རྟེན་པ་དང་འཇིག་རྟེན་ལས་འདས་པའི་ཕུན་སུམ་ཚོགས་པ་དང་། འབྱོར་པ་དང་། བདེ་བ་རྣམས་སྤངས་བ་ཡིན་པར་བལྟ་བར་བྱའོ། །བློ་གྲོས་མཐའ་ཡས་ཡང་ཁྱོད་ཀྱིས་དེ་བཞིན་གཤེགས་པ་མངོན་སུམ་དུ་བཞུགས་པས། ཆོས་རིན་པོ་
ཆེ་ཟབ་མོ་འདི་འབྱོར་པ་དུ་མ་རྙེད་སླ་བར་གྱུར་ཏོ་སྙམ་དུ་བལྟ་བར་བྱ་ཞིང་། ཁྱོད་ཀྱིས་ཆོས་ཟབ་མོ་འདི་ལ་ནན་ཏན་གྱིས་རབ་ཏུ་བསྒྲུབ་པར་བྱའོ། །བྱིས་པ་སོ་སོའི་སྐྱེ་བོ་རྣམས་ནི་ངས་ཆོས་རིན་པོ་ཆེ་འདི་ཡང་དག་པར་བསྟན་པ་ན་ཐོས་པར་ཡང་མི་འདོད་ན། ལེན་པ་དང་འཛིན་པ་ལྟ་སྨོས་ཀྱང་ཅི་
དགོས། དེ་བཞིན་གཤེགས་པ་མངོན་སུམ་དུ་བཞུགས་ཤིང་ཆོས་རིན་པོ་ཆེ་འབྱོར་བའི་དུས་སུ་ཡང་མཉན་པར་མོས་པ་དང་། འདྲི་བར་ཡང་འདུན་པར་མི་འགྱུར་ན་མ་འོངས་པའི་དུས་ལྔ་བརྒྱ་ཐ་མ་ལ་ཡང་དག་པའི་ཆོས་རབ་ཏུ་རྣམ་པར་འཇིག་པའི་ཚེ་སངས་རྒྱས་དང་། ཆོས་དཀོན་མཆོག་དང་།
ཆོས་འཛིན་པར་བྱེད་པ་རྣམ་པ་གསུམ་མངོན་དུ་མི་འགྱུར་བའི་དུས་སུ་མཉན་པ་དང་། འདྲི་བར་མོས་པར་ལྟ་ག་ལ་འགྱུར། བློ་གྲོས་མཐའ་ཡས་འོན་ཀྱང་མ་འོངས་པའི་དུས་ན་གལ་ཏེ་དེ་བཞིན་གཤེགས་པས་ལེགས་པར་བྱིན་གྱིས་བརླབས་པར་གྱུར་ན་ཆོས་རིན་པོ་ཆེ་ཟབ་མོ་འདི་རྙེད་པར་
འགྱུར་རོ། །བློ་གྲོས་མཐའ་ཡས་ཤིན་ཏུ་འཇིགས་པའི་དུས་དེའི་ཚེ་ཆོས་རིན་པོ་ཆེ་ཟབ་མོ་འདི་ཡང་དག་པར་ཉམས་ཤིང་འགྲིབ་པ་འམ་ཟད་པར་གྱུར་བ་མེད་མོད་ཀྱི། འོན་ཀྱང་ཆོས་འདི་ལ་ཉན་པ་དང་འཛིན་པར་བྱེད་པ་མེད་དེ། ངའི་སྤྱན་སྔར་སེམས་རྩེ་གཅིག་ཏུ་མཉན་པར་
མོས་པ་དང་། གོ་ཆ་བགོས་པ་ནི་མ་གཏོགས་ཏེ། དེ་དག་དེའི་ཚེ་ཆོས་འདི་ལ་རབ་ཏུ་དགའ་བས་ཉན་པ་དང་། ལེན་པར་འགྱུར་བས་སོ། །དེའི་ཚེ་སེམས་ཅན་གང་དག་ཆོས་འདི་ཐོས་ནས་རབ་ཏུ་དད་པ་ཙམ་སྐྱེད་པར་བྱེད་ན་ཡང་། ངས་དེ་དག་ཆོས་རྒྱ་ཆེན་པོ་འདི་

མངོན་པར་བསྒྲུབ་པར་འགྱུར་བར་བསྟན་པ་ཡིན་ན་ད་ལྟར་ཆོས་འདི་ལ་ཡོངས་སུ་དད་པ་བསྐྱེད་ནས་ནན་ཏན་གྱིས་སྒྲུབ་པར་བྱེད་པ་ལྟ་སྨོས་ཀྱང་ཅི་དགོས། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བླ་ན་མེད་པའི་གོ་ཆ་དང་། །གོ་ཆ་ཆེན་
པོ་ཚད་མེད་པ་རྣམས་ཡང་དག་པར་བགོས་པ་ན། འདི་སྙམ་དུ་སེམས་ཏེ། བདག་ནི་སེམས་ཅན་དབུལ་ཕོངས་པར་གྱུར་པ་འདི་ལྟ་སྟེ། ཚུལ་ཁྲིམས་ཀྱིས་རྒུད་པ་དང་། ཐོས་པས་རྒུད་པ་དང་། ཤེས་རབ་ཀྱིས་རྒུད་པ་དང་། རྣམ་པར་གྲོལ་བས་རྒུད་པ་དང་། རྣམ་པར་གྲོལ་བའི་
ཡེ་ཤེས་མཐོང་བས་རྒུད་པ་དེ་དག་ཐམས་ཅད་ལ་ཆོས་ཆེན་པོ་འདིས་ཕོངས་པ་མེད་པར་བྱའོ། །ཆོས་ཆེན་པོ་འདིས་ཕོངས་པ་མེད་པར་བྱ་བའི་ཕྱིར་རྒུད་པ་ཐམས་ཅད་སྤངས་ནས། ཚུལ་ཁྲིམས་ཀྱི་ནོར་དང་། ཐོས་པའི་ནོར་དང་། ཤེས་རབ་ཀྱི་ནོར་དང་། རྣམ་པར་གྲོལ་བའི་ནོར་དང་།
རྣམ་པར་གྲོལ་བའི་ཡེ་ཤེས་མཐོང་བའི་ནོར་གྱིས་ཕྱུག་པར་བྱའོ། །འདོད་ཆགས་དང་། ཞེ་སྡང་དང་། གཏི་མུག་གི་མེ་རྣམས་རབ་ཏུ་ཞི་བར་བྱའོ། །ནད་ཐམས་ཅད་ལས་སོས་པར་བྱའོ། །བླ་ན་མེད་པའི་སྨན་གྱ་ནོམ་པ་གཏང་བར་བྱའོ། །སྨན་འདིའི་དབང་གིས་ནད་རྣམ་པ་སྣ་ཚོགས་
བསལ་ནས་བདེ་བ་ཆེན་པོ་ཐོབ་པར་བྱའོ། །ལྷག་མ་དང་བཅས་པ་གཏན་དུ་སྤངས་ཏེ། ཤིན་ཏུ་བསིལ་བའི་ངོ་བོ་ཉིད་བླ་ན་མེད་པའི་མྱ་ངན་ལས་འདས་པ་མངོན་དུ་བྱས་ནས་ཡིད་ལ་སེམས་པ་དང་། སོ་སོར་རྟོག་པའི་ལྷག་མ་ཅི་ཡང་ལུས་པ་མེད་པ་དང་། འདུས་བྱས་དང་། འདུས་མ་
བྱས་ཐམས་ཅད་ཡོངས་སུ་ཚོལ་བ་མེད་པ་ལ་དགོད་པར་བྱའོ་སྙམ་མོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་འདི་ནི་མཆོག་ཏུ་བདེ་ཞིང་ཡོངས་སུ་ཚོལ་བ་ཐམས་ཅད་ལུས་པ་མེད་པའི་ཕྱིར་དང་། ཡོངས་སུ་ཚོལ་བ་གཏན་དུ་ཞི་ཞིང་ཡོངས་སུ་ཟད་པའི་ཕྱིར་རོ། །བློ་གྲོས་མཐའ་ཡས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་དེ་ལྟ་བུ་བགོས་ནས་གཞན་ཡང་སེམས་ཅན་ཐམས་ཅད་ལ་སྙིང་བརྩེ་བས་ཡོངས་སུ་བསྡུ་བའི་ཕྱིར། ཐེག་པ་ཆེན་པོ་ལ་ཞོན་ནས་འདི་སྙམ་དུ་ཐེག་པ་ཆེན་པོ་འདི་ལ་ནི་འདས་པའི་སངས་རྒྱས་རྣམས་ཀྱིས་ཀྱང་

བཅིབས་ནས་ངེས་པར་བྱུང་བར་གྱུར་ཏོ། །མ་བྱོན་པའི་སངས་རྒྱས་རྣམས་ཀྱང་འདི་ལ་བཅིབས་ནས་ངེས་པར་འབྱུང་བར་འགྱུར་རོ། །ད་ལྟར་བཞུགས་པའི་སངས་རྒྱས་རྣམས་ཀྱིས་ཀྱང་འདི་ལ་བཅིབས་ནས་ངེས་པར་བྱུང་བར་གྱུར་ཀྱང་གཤེགས་པར་གྱུར་པ་ཡང་མེད་ལ། བཅིབས་
པ་དང་། ངེས་པར་འབྱུང་བ་ཡང་མེད་དོ་སྙམ་མོ། །དེ་ཅིའི་ཕྱིར་ཞེ་ན། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། བྱེད་པ་མེད་པའི་ཕྱིར་ངེས་པར་བྱུང་བར་གྱུར་བ་ཡང་མ་ཡིན། ངེས་པར་འབྱུང་བ་ཡང་མ་ཡིན། ངེས་པར་འབྱུང་བར་
འགྱུར་བ་ཡང་མ་ཡིན་ནོ། །ཐེག་པ་འདི་ལ་ཞོན་ནས་དེ་ལྟར་ངེས་པར་འབྱུང་བ་གང་ཡིན་པ་དེ་དག་ནི་ལེགས་པར་བྱུང་བ་ཡིན་ཏེ། མངོན་པར་ཞེན་པ་མེད་པས་ཆོས་ཐམས་ཅད་འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན་པས་འོང་བ་མེད་པ་འགྲོ་བ་མེད་པ་ཡིན་ནོ། །ཐེག་
པ་འདི་ལམ་གང་གིས་ངེས་པར་འབྱུང་བའི་ཚེ་ཡང་འདུས་པ་མ་ཡིན་པས་འོང་བ་མེད་པ་འགྲོ་བ་མེད་པ་ཡིན་ནོ། །ཐེག་པ་འདི་དང་། ལམ་འདིས་གོ་ཆ་ཆེན་པོ་བྱས་ནས་ངེས་པར་འབྱུང་བའི་ཚེ་ཡང་འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན་པས་འོང་བ་མེད་པ་འགྲོ་བ་མེད་པ་
ཡིན་ཏེ། དམིགས་སུ་མེད་པའི་ཕྱིར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་འདི་དང་། ཐེག་པ་འདི་དང་ལམ་འདིས་དེ་ལྟར་གཞོལ་བར་བྱེད་དོ། །གཞན་ཡང་གོ་ཆ་འདི་དང་། ཐེག་པ་འདི་དང་ལམ་འདིས་གཞོལ་བར་བྱེད་པའི་ཚེ་
འདི་སྙམ་དུ་སོ་སོའི་སྐྱེ་བོའི་ཆོས་གང་ཡིན་པ་དང་། ཉན་ཐོས་ཀྱི་ཆོས་གང་ཡིན་པ་དང་། རང་སངས་རྒྱས་ཀྱི་ཆོས་གང་ཡིན་པ་དང་། སངས་རྒྱས་ཀྱི་ཆོས་གང་ཡིན་པའི་ཆོས་དེ་དག་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། །
སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། མངོན་པར་འདུ་བྱ་བ་མེད་པའི་ཆོས་གང་ཡིན་པ་དེ་དག་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། །ཡོངས་སུ་སྐྱེ་བ་དང་བྲལ་བ་དང་འགག་པར་འགྱུར་

བ་ནས། མྱ་ངན་ལས་འདས་པ་ཆེན་པོའི་བར་གྱི་གོ་ཆ་དེ་དག་ལ་ཡང་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། །བློ་གྲོས་མཐའ་ཡས་གོ་ཆ་ཆེན་པོ་འདི་དང་། ཐེག་པ་འདི་དང་། ལམ་འདི་དག་ལ་ནི་བྱང་ཆུབ་སེམས་དཔའ་
ཐམས་ཅད་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་གང་གིས་ཀྱང་བསྒུལ་བར་མི་ནུས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་སངས་རྒྱས་བཅོམ་ལྡན་འདས་རྣམས་ནི་
གོ་ཆ་འདི་དང་། ཐེག་པ་འདི་དང་། ལམ་འདི་ལ་གཡོ་བ་མི་མངའ་བ་བརྙེས་པས་ཡོངས་སུ་མྱ་ངན་ལས་འདས་པ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་གཡོ་བ་མེད་པའི་ཕྱིར་དང་། ཆོས་ཐམས་ཅད་ཀྱི་ངོ་བོ་ཉིད་དང་། ཆོས་ཉིད་ཀྱི་མཚན་ཉིད་མི་འཐུན་པ་དང་བྲལ་བའི་
ཕྱིར་དང་། མཚན་མ་རྣམ་པར་དག་པའི་ཕྱིར་དང་། ཡོངས་སུ་རྣམ་པར་དག་པའི་ཕྱིར་དང་། མཚན་མ་དག་གིས་སོ་སོར་བརྟག་པ་དང་། མཆོག་ཏུ་སོ་སོར་བརྟག་པ་དང་། ཀུན་ཏུ་སོ་སོར་བརྟག་པར་བྱ་བ་མ་ཡིན་ནོ། །ཆོས་ཐམས་ཅད་ཀྱི་ཆོས་ཀྱི་མཚན་ཉིད་ཀྱི་ངོ་བོ་ཉིད་ཀྱང་ངོ་བོ་ཉིད་
ཀྱིས་སོ་སོར་བརྟག་པ་དང་། མཆོག་ཏུ་སོ་སོར་བརྟག་པ་དང་། ཀུན་ཏུ་སོ་སོར་བརྟག་པར་བྱ་བ་མ་ཡིན་ནོ། །ཆོས་ཐམས་ཅད་ཀྱི་ངོ་བོ་ཉིད་མེད་པ་དང་། མཚན་མ་མེད་པ་དང་། བསྟན་དུ་མེད་པ་དང་། བརྗོད་དུ་མེད་པ་གང་ཡིན་པ་འདི་ནི་ཆོས་རྣམས་ཀྱི་དེ་ཁོ་ན་ཉིད་ཀྱི་མཚན་ཉིད་ཅེས་བྱའོ། །བློ་གྲོས་
མཐའ་ཡས་གོ་ཆ་འདི་དང་། ཐེག་པ་འདི་དང་། ལམ་འདི་ལྟ་བུ་འདི་དག་གིས་དེ་ཁོ་ན་ཉིད་ཀྱི་མཚན་ཉིད་ཀྱང་དེ་བཞིན་དུ་བསྟན་དུ་མེད་ཅིང་བརྗོད་དུ་མེད་པ་ཡིན་ཡང་སེམས་ཅན་རྣམས་ཁོང་དུ་ཆུད་པར་བྱ་བའི་ཕྱིར་དང་། ཆོས་ཐམས་ཅད་ཀྱི་སྣང་བ་འཕེལ་བར་བྱ་བའི་ཕྱིར་གོ་ཆ་འདི་དང་། ཐེག་པ་
འདི་དང་། ལམ་འདི་དག་བཏགས་པ་ཙམ་དུ་མདོར་བསྟན་པ་ཡིན་ནོ། །དེང་ཁྱོད་ཀྱིས་གལ་ཏེ་གོ་ཆ་འདི་དང་། ཐེག་པ་འདི་དང་། ལམ་འདིའི་དོན་གྱི་རྗེས་སུ་འཇུག་ཅིང་སྤྱོད་པར་འདོད་ན་གདགས་པ་མེད་པ་དང་། བསྟན་པ་མེད་པ་དང་། བརྗོད་པ་མེད་པར་དོན་གྱི་རྗེས་སུ་འབྲང་བར་བྱའོ། །

དོན་གྱི་རྗེས་སུ་འབྲང་བ་གང་ཡིན་པ་དེ་དག་ལ་ནི་འདི་ནི་སྤྱད་པར་བྱའོ། །ཞེས་བྱ་བ་ཡང་ཅུང་ཟད་ཀྱང་མེད་ལ། འདི་ནི་རྗེས་སུ་འབྲང་བར་བྱའོ་ཞེས་བྱ་བ་ཡང་ཅུང་ཟད་ཀྱང་མེད་པས་དོན་མ་ཡིན་པ་དེ་དག་གི་རྗེས་སུ་ནི་འབྲང་བར་མི་བྱེད་ལ་དོན་གང་ཡིན་པ་དེ་དག་གི་རྗེས་སུ་འབྲང་བར་བྱེད་དོ། །དོན་གྱི་རྗེས་
སུ་འབྲང་བའི་ཚེ་སྒྲའི་རྗེས་སུ་འབྲང་བར་མི་བྱེད་དོ། །ཡི་གེའི་རྗེས་སུ་འབྲང་བར་མི་བྱེད་དོ། །ངག་གི་རྗེས་སུ་འབྲང་བར་མི་བྱེད་དེ། རྗེས་སུ་མི་འབྲང་བ་དེའི་རྗེས་སུ་མི་འཇུག་པ་གང་ཡིན་པའོ། །དེ་ལ་དོན་གང་ཡིན་ཞེ་ན། འདི་ལྟ་སྟེ། གསང་སྟེ་བསྟན་པ་གང་ཡིན་པ་དག་ཡིན་པས་གསང་སྟེ།
བསྟན་པ་རྣམས་རྗེས་སུ་རྟོགས་པར་བྱས་ནས་མངོན་པར་ཡིད་ཆེས་པས་སྤྱོད་པར་བྱའོ། །མངོན་པར་ཡིད་ཆེས་པས་སྤྱོད་པ་གང་ཡིན་པ་དེ་དག་ནི་དོན་དེ་དག་ལ་རྣམ་པར་རྟོག་པར་མི་བྱེད་པས་རྣམ་པར་མི་རྟོག་པའི་རྗེས་སུ་འབྲང་བར་བྱེད་དེ། རྗེས་སུ་འབྲང་བར་བྱེད་པ་གང་ཡིན་པ་དེ་ནི་སྤྱོད་པ། མེད་
པ་དང་། རྗེས་སུ་འབྲང་བ་མེད་པ་ཞེས་བྱའོ། །དེ་ཅིའི་ཕྱིར་ཞེ་ན། དོན་དེ་དག་ལ་སྤྱོད་པ་ཞེས་བྱ་བ་ཡང་ཅུང་ཟད་ཀྱང་མེད་ལ། རྗེས་སུ་འབྲང་བ་དང་། ཀུན་ཏུ་འགྲོ་བ་ཞེས་བྱ་བ་ཡང་ཅུང་ཟད་ཀྱང་མེད་དེ། སྤྱོད་པ་ཡོངས་སུ་སྤངས་པའི་ཕྱིར་རྗེས་སུ་འབྲང་བར་མི་བྱེད་དོ། །བྱང་ཆུབ་ཀྱི་རྗེས་སུ་
འཐུན་པར་ཡང་མི་སྤྱོད་ལ་འཁོར་བའི་རྗེས་སུ་འཐུན་པར་ཡང་མི་སྤྱོད་དེ། རྗེས་སུ་འཐུན་པ་དང་། རྗེས་སུ་མི་འཐུན་པ་དེ་དག་ནི་ཡིད་ལ་བྱེད་པ་ཡང་མ་ཡིན། ཡང་དག་པའི་དྲན་པ་ཡང་མ་ཡིན་ཏེ། བསམ་པ་ཡོངས་སུ་དག་པར་གྱུར་པའི་ཕྱིར་ཏེ། རྗེས་སུ་འབྲང་བར་མི་བྱེད་དོ། །
བློ་གྲོས་མཐའ་ཡས་ཁྱོད་ཀྱིས་དོན་འདིའི་རྗེས་སུ་འབྲང་བར་བྱའི་ཐ་དད་པའི་སྤྱོད་པ་དང་ལྡན་པར་མི་བྱའོ། །གལ་ཏེ་ཐ་དད་པའི་རྗེས་སུ་འབྲང་བར་བྱེད་ན་དེ་ནི་བརྗེད་ངས་པ་ཡིན་པས་སྒྲའི་རྗེས་སུ་འབྲང་བ་དང་། ཚིག་འབྲུ་དང་། ཡི་གེའི་རྗེས་སུ་འབྲང་བ་དང་། ངག་གི་རྗེས་སུ་འབྲང་བར་འགྱུར་ཏེ།
ཚིག་གི་བརྗོད་པ་དེ་དག་ཀྱང་ཡོངས་སུ་སྤོང་བར་མི་འགྱུར་རོ། །སྒྲ་ཡོངས་སུ་ཤེས་པ་དང་། ཚིག་འབྲུ་དང་། ཡི་གེ་ལས་ཡང་དག་པར་འདས་པ་དང་། ཚིག་གི་བརྗོད་པ་རྗེས་སུ་རྟོགས་པ་གང་ཡིན་པ་དེ་དག་ནི་དེ་ལྟར་རྗེས་སུ་འབྲང་བར་མི་བྱེད་པས། འཁོར་བར་འཇུག་པར་མི་འགྱུར་རོ། །དོན་

འདི་ལ་དེ་ལྟར་རྗེས་སུ་འབྲང་བ་དང་། དེ་ལྟར་རྗེས་སུ་འཇུག་པ་གང་ཡིན་པ་དེ་དག་ལ་ནི་སྤྱོད་པ་ཅུང་ཟད་ཀྱང་མེད་དེ། སྤྱོད་པ་ཉེ་བར་ཞི་བར་གྱུར་པའི་ཕྱིར་རོ། །བློ་གྲོས་མཐའ་ཡས་དོན་གྱི་རྗེས་སུ་འཇུག་པའི་ཚེ་མངོན་པར་འདུས་བྱས་པ་དང་བཅས་པས་དོན་གྱི་
རྗེས་སུ་འབྲང་བར་མི་བྱའོ། །གལ་ཏེ་མངོན་པར་འདུ་བྱེད་པ་མེད་པར་དོན་གྱི་རྗེས་སུ་འབྲང་བར་བྱེད་ན་དེ་ནི་འོང་བ་མེད་པ་དང་། ཕྱིར་མི་ལྡོག་པར་མི་འགྱུར་བ་ཞེས་བྱ་སྟེ། འོང་བ་མེད་པ་དང་། ཕྱིར་ལྡོག་པར་མི་འགྱུར་བ་གང་ཡིན་པ་དེ་དག་ནི་གོ་ཆ་འདི་དང་ཐེག་པ་འདི་དང་། ལམ་འདི་
དང་། རྗེས་སུ་འཐུན་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་བྱེད་པ་ཡིན་པས་སེམས་ཅན་རྣམས་ལ་ཕན་པ་ཆེན་པོ་བྱེད་པར་འགྱུར་རོ། །བློ་གྲོས་མཐའ་ཡས་གང་གིས་ཆོས་འདི་དེ་ལྟར་སྟོན་པ་དང་། དོན་གྱི་རྗེས་སུ་འབྲང་བར་བྱེད་པ་དང་། རྗེས་སུ་
འཇུག་པར་བྱེད་པ་གང་ཡིན་པ་དེ་དག་ནི་སེམས་ཕྱིན་ཅི་ལོག་མེད་པ་དང་། ཐེ་ཚོམ་མེད་པའི་མོས་པ་ཡོངས་སུ་བསྒྲུབ་པ་ཡིན་པས་གོ་ཆ་འདི་དང་། ཐེག་པ་འདི་དང་། ལམ་འདི་ཡོངས་སུ་མ་བསྡུས་པ་གང་ཡིན་པ་དེ་དག་ནི་ཡོངས་སུ་བསྡུས་ནས་མྱུར་དུ་གཞོལ་བར་བྱེད་པས་གོ་ཆ་འདི་མ་
བགོས་པར་ཡང་མྱུར་དུ་བགོ་བར་བྱེད་དོ། །ཐེག་པ་འདི་ལ་ད་དུང་ཞོན་པར་མ་གྱུར་པ་ཡང་མྱུར་དུ་ཞོན་པར་བྱེད་དོ། །ལམ་འདི་ལ་གནས་པར་མ་གྱུར་པ་ཡང་མྱུར་དུ་གནས་པར་བྱེད་དོ། །བློ་གྲོས་མཐའ་ཡས་སེམས་ཅན་དེ་དག་ནི་བསོད་ནམས་ཀྱི་ཚོགས་རྒྱ་ཆེན་པོ་ཡོངས་སུ་སྡུད་
པ་དང་། སངས་རྒྱས་བཅོམ་ལྡན་འདས་རྣམས་ཀྱིས་རྗེས་སུ་བསྲུང་ཞིང་དགོངས་པར་འགྱུར་བས་ཆོས་དང་འགལ་བ་མེད་པ་དང་། དགེ་འདུན་དང་འཐུན་པར་སྤྱོད་པར་འགྱུར་རོ། །བློ་གྲོས་མཐའ་ཡས་ཁྱོད་ནི་དགེ་བའི་རྩ་བ་ཚད་མེད་པ་རྣམས་ཡོངས་སུ་བསྡུས་པ་ཡིན་པས་མ་འོངས་པའི་
དུས་སུ་ཆོས་འདིས་སེམས་ཅན་རྣམས་ཡོངས་སུ་བསྡུས་ནས་སེམས་ཅན་རྣམས་ཀྱི་ཆེད་དུ་ཁུར་ལྕི་བ་བསྐུར་བར་བྱའོ། །དེས་ན་བསོད་ནམས་ཀྱི་ཚད་ཤིན་ཏུ་བརྗོད་པར་དཀའ་བ་དག་རབ་ཏུ་འཐོབ་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་

པ། བྱང་ཆུབ་སེམས་དཔའ་འཇིགས་མེད་པས། །དེ་ལྟར་གོ་ཆ་བགོས་པའི་ཚེ། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་དཔག་མེད་བགོ་བར་བྱེད། །སེམས་ཅན་གལ་ཏེ་ཕོངས་གྱུར་ཏམ། །སྡུག་བསྔལ་ཆོས་ནི་མེད་པའི་ཚེ། །ཚུལ་ཁྲིམས་དང་ནི་མང་དུ་ཐོས། །ཤེས་རབ་
རྣམ་གྲོལ་ཚད་མེད་པ། །གོ་ཆ་དཔག་མེད་རབ་བགོས་ནས། །ཆོས་ཀྱིས་རབ་ཏུ་ཕྱུག་པོར་བྱེད། །ཆོས་ཀྱིས་ཕྱུག་པོར་གྱུར་པའི་ཕྱིར། །ཐམས་ཅད་བདེ་བ་ཐོབ་པར་བྱེད། །དབུལ་བའི་སྡུག་བསྔལ་སྤངས་པའི་ཕྱིར། །བླ་མེད་ཆོས་ནི་སྟོན་བྱེད་པས། །ཐོས་པ་དག་ནི་རྡུལ་སྤངས་ནས། །
བདེ་ལམ་འདི་ལ་བཀོད་པར་བྱེད། །ཚུལ་ཁྲིམས་ཕུང་པོ་རབ་རྒྱས་ཤིང་། །མང་དུ་ཐོས་པ་རྒྱ་མཚོ་འདྲ། །ཤེས་རབ་མཆོག་ནི་ཐོབ་པས་ན། །དེས་ན་འཆིང་བ་གཅོད་པར་བྱེད། །རྣམ་གྲོལ་ཀུན་ཏུ་གསལ་བྱེད་དང་། །རྣམ་གྲོལ་ཡང་དག་ཤེས་མཐོང་བ། །གང་གིས་མངོན་སུམ་
བྱེད་པ་ནི། །ཐམས་ཅད་བདེ་བ་འཐོབ་པར་འགྱུར། །འདོད་ཆགས་ཞེ་སྡང་གཏི་མུག་མེས། །རྟག་ཏུ་སྲེག་ཅིང་ཀུན་གདུངས་པས། །དེས་ན་སེམས་ཅན་སྡུག་བསྔལ་འགྱུར། །མེ་དེ་བདག་གིས་གསད་པར་བྱ། །སེམས་ཅན་རྣམས་ལ་སྨན་བཏང་ནས། །ནད་རྣམས་ཐམས་ཅད་
བསལ་བར་བྱ། །གལ་ཏེ་ནད་ནི་ཞི་གྱུར་ན། །མྱ་ངན་འདས་དབྱིངས་ཕྱིན་པར་འགྱུར། །ལྷག་མ་ཐམས་ཅད་གཏན་སྤངས་ནས། །བདེ་གནས་ལ་ནི་གཞོལ་བར་བྱེད། །བདེ་བའི་གནས་སུ་བཞག་པས་ན། །ལྡོག་པར་གྱུར་པ་གང་ཡང་མེད། །འདུས་བྱས་བདེ་བ་ཐམས་ཅད་ལ། །
ཡོངས་སུ་འཚོལ་བར་མི་བྱེད་ཅིང་། །བླ་ན་མེད་པའི་བདེ་ཆེན་དག །ཐམས་ཅད་མངོན་སུམ་བྱེད་པར་འགྱུར། །སྤྲོས་པ་མེད་པའི་ཆོས་དག་གིས། །སེམས་ཅན་ཡོངས་སུ་སྨིན་བྱེད་པས། །མཐར་ཕྱིན་པ་ཡི་བདེ་བ་དག །ཐམས་ཅད་རབ་ཏུ་འཐོབ་པར་བྱེད། །དེ་ལྟ་བུར་ནི་གང་
གཞོལ་བ། །ལན་ཅིག་སོང་ནས་ཕྱིར་མི་ལྡོག །གཞོལ་བ་ལས་ནི་ཡང་དག་འདས། །མཆོག་ཏུ་བདེ་བ་རྟག་ཏུ་ཐོབ། །བདེ་བ་ཆེན་པོ་དག་གིས་ནི། །མོས་པ་དང་ནི་མི་མོས་པ། །གཞོལ་བ་དང་ནི་གཞོལ་མེད་པ། །ཐམས་ཅད་རབ་ཏུ་སྤོང་བར་བྱེད། །དེ་ལྟར་གོ་ཆ་བགོས་ནས་ཀྱང་། །

ཐེག་པ་འདི་ལ་ཞོན་ནས་ནི། །སེམས་ཅན་རྣམས་ལ་སྙིང་བརྩེའི་ཕྱིར། །ཐམས་ཅད་ཡོངས་སུ་གཟུང་བར་བྱ། །འདས་པའི་ཐམས་ཅད་མཁྱེན་པ་རྣམས། །ཐེག་པ་འདི་ཡིས་ངེས་བྱུང་གྱུར། །མ་བྱོན་ཐམས་ཅད་མཁྱེན་རྣམས་ཀྱང་། །ཐེག་པ་འདི་དབང་ངེས་
འབྱུང་འགྱུར། །ད་ལྟར་སངས་རྒྱས་བཅོམ་ལྡན་འདས། །ཐེག་པ་འདི་དབང་ངེས་འབྱུང་བརྙེས། །དེ་ཕྱིར་ཐེག་པ་འདི་ལ་ནི། །མ་བཅིབས་པ་ནི་གང་ཡང་མེད། །འཇིག་རྟེན་དག་ལ་མགོན་མཛད་པས། །རྒྱལ་བ་དག་ནི་ཐམས་ཅད་ཀུན། །ཐེག་པ་འདི་ཡིས་ངེས་འབྱུང་ཡང་། །
ཐེག་པའི་འདུ་ཤེས་སྐྱེད་མི་མཛད། །ཐེག་པ་མེད་པས་ཐེག་པ་མཛད། །ལམ་མེད་པ་ལ་ལམ་དུ་མཛད། །ངེས་འབྱུང་མེད་པར་ངེས་པར་བྱུང་། །དེ་ཕྱིར་ངེས་འབྱུང་བླ་ན་མེད། །ཐེག་པ་འདི་ནི་ངེས་འབྱུང་ཚེ། །ངེས་འབྱུང་ཅུང་ཟད་ཡོད་མ་ཡིན། །སྟོང་པ་མཚན་མ་མེད་པ་དང་། །སྨོན་
མེད་བྱེད་པ་མེད་ཕྱིར་རོ། །ཐེག་མིན་ངེས་བྱུང་མ་ཡིན་པ། །དེ་ནི་ཐེག་ཆེན་ཞེས་བྱའོ། །ཐམས་ཅད་རབ་ཏུ་མཉམ་པས་ན། །དེས་ན་ཡང་དག་གཞོལ་བར་བྱེད། །ཐེག་པ་འདི་ལ་འདུས་པ་མེད། །མ་འདུས་པ་ཡང་ཡོད་མ་ཡིན། །བླ་མེད་ལམ་ལ་གཞོལ་བྱེད་པས། །བདེ་བ་ཆེན་པོ་
མངོན་དུ་བྱེད། །ཐེག་པ་འདི་ལ་མཚུངས་ལྡན་མེད། །མཚུངས་མི་ལྡན་པ་ཡོང་མ་ཡིན། །གནས་པ་མེད་ཅིང་རྟེན་པ་མེད། །དེས་ན་རབ་ཏུ་གཞོལ་བར་བྱེད། །ལམ་འདི་ལ་ནི་འོང་བ་མེད། །ལམ་འདི་ལ་ནི་བགྲོད་པ་མེད། །ཡང་དག་ལམ་འདི་གང་སྤྱོད་པ། །རབ་དབེན་ཡང་དག་གཞོལ་བར་
འགྱུར། །ངས་ནི་ལམ་འདི་ཐེག་འདི་དང་། །གོ་ཆ་ཆེན་པོ་འདི་དག་ནི། །ཆོས་ལ་རྟེན་པར་མི་བྱེད་པས། །རབ་དབེན་བླ་མེད་མཆོག་ཏུ་བསྟན། །སོ་སོའི་སྐྱེ་བོའི་ཆོས་རྣམས་དང་། །ཉན་ཐོས་ཆོས་ནི་ཐམས་ཅད་དང་། །རང་རྒྱལ་ཆོས་རྣམས་ཐམས་ཅད་ཀྱང་། །ཐམས་ཅད་
དམིགས་སུ་མེད་པ་ཡིན། །སངས་རྒྱས་ཆོས་ནི་ཐམས་ཅད་དང་། །དྲི་མེད་བླ་ན་མེད་པའི་ཆོས། །རིང་བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །སྟོད་དང་མཚན་མ་མེད་པའི་ཆོས། །སྨོན་དང་བྱེད་པ་མེད་ཆོས་ཀྱང་། །རིང་བ་མ་ཡིན་ཉེ་མིན་པས། །ཐམས་ཅད་

དམིགས་སུ་མེད་པ་ཡིན། །སྐྱོན་བྲལ་དང་ནི་འགགས་པའི་ཆོས། །རབ་དབེན་མྱ་ངན་འདས་པའི་ཆོས། །རིང་བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །ཐེག་པ་འདི་དང་གོ་ཆ་འདི། །ལམ་འདི་ལ་ནི་འཛིན་མེད་ཅིང་། །བླ་མེད་གཡོ་བ་མེད་པས་ན། །མཐར་ནི་
གང་ཡང་དམིགས་སུ་མེད། །ཆོས་ཀྱི་རང་བཞིན་ཐམས་ཅད་དང་། །དེ་ཁོ་ན་ཡི་མཚན་ཉིད་ནི། །གདགས་སུ་རུང་བ་མ་ཡིན་ཏེ། །ཆོས་ཉིད་རྣམས་ནི་སྟོང་ཕྱིར་རོ། །ཐེག་པ་འདི་དང་གོ་ཆ་འདི། །ལམ་འདི་བསྟན་དུ་མེད་པ་ཡིན། །ཆོས་རྣམས་རང་བཞིན་ཇི་ལྟ་བ། །དེ་ཡི་རང་བཞིན་དེ་
བཞིན་ནོ། །ཆོས་རྣམས་དག་ནི་ཐམས་ཅད་ལ། །མཚན་ཉིད་རང་བཞིན་མེད་པའི་ཆོས། །ང་ཡིས་མདོར་ནི་བསྟན་པ་ཡིན། །ཆོས་རྣམས་ཐམས་ཅད་དག་ལ་ནི། །རང་བཞིན་མཚན་ཉིད་ཐམས་ཅད་ཀུན། །ཇི་ལྟར་ངས་ནི་བཤད་པ་བཞིན། །མཐར་ནི་ཡོད་པར་མི་འགྱུར་རོ། །ཐེག་པ་
འདི་དང་ལམ་འདི་དང་། །གོ་ཆའི་རང་བཞིན་མཚན་ཉིད་ལ། །ཚིག་གིས་བརྗོད་པ་རབ་བསལ་ནས། །མཐར་ནི་དམིགས་པར་འགྱུར་མ་ཡིན། །ཚིག་ནི་ཡོད་པ་མ་ཡིན་ཕྱིར། །ངོ་མཚར་རབ་ཏུ་གྱུར་པ་ཡིན། །ཚིག་གི་བརྗོད་པ་དེ་དག་ལ། །ངག་གི་མཚན་ཉིད་ཡོད་མ་ཡིན། །ཆོས་
རྣམས་དག་ནི་གཞལ་དུ་མེད། །མཆོག་དང་ཀུན་ཏུ་གཞལ་དུ་མེད། །ཐམས་ཅད་དཔག་ཏུ་མེད་པས་ན། །དེ་ཕྱིར་ཆོས་ནི་བླ་ན་མེད། །ཐེག་པ་འདི་དང་གོ་ཆ་འདི། །ལམ་འདི་ཡང་ནི་དེ་བཞིན་དུ། །མཚན་མ་མེད་པ་དེ་དག་ལ། །དེ་ལྟར་རྗེས་སུ་འཇུག་པར་བྱ། །སེམས་ཅན་རྣམས་
ནི་ཀུན་གྱིས་ཀྱང་། །ཡོངས་ཤེས་ནན་ཏན་བསྒྲུབ་པ་དང་། །མྱུར་དུ་ཆོས་སྣང་ཐོབ་བྱའི་ཕྱིར། །དེ་ཕྱིར་ངས་ནི་དེ་སྐད་བསྟན། །ཆོས་རྣམས་ལ་ནི་ཚིག་མེད་པས། །ཐམས་ཅད་བརྗོད་དུ་མེད་པ་ཡིན། །ཆོས་རྣམས་དེ་དག་ཀུན་ལ་ནི། །ཐམས་ཅད་རྗེས་སུ་འཇུག་པར་བྱ། །ཆོས་
ལ་ཚིག་ནི་མེད་པའི་ཕྱིར། །དེ་ཡི་རྗེས་སུ་འབྲང་བར་བྱ། །སྤྱོད་ཀྱང་སྤྱད་པ་ཅུང་ཟད་མེད། །ཐམས་ཅད་ཆོས་ནི་སྤྱོད་པ་མེད། །ཚོལ་བ་མེད་ཅིང་མོས་ཚོལ་མེད། །འགྲོ་བ་མེད་པས་རྗེས་སུ་འབྲང་། །དེ་ལྟར་རྗེས་སུ་གང་འབྲང་བ། །དོན་ལ་སོ་སོར་རྟོག་མི་བྱེད། །ཁྱོད་

ཀྱིས་ཡང་དག་བདེན་པའི་དོན། །ཐམས་ཅད་རྗེས་སུ་འབྲང་བར་བྱ། །སྒྲ་རྣམས་དང་ནི་ཚིག་གི་ནི། །རྗེས་སུ་འཇུག་པར་མི་བྱའོ། །སྒྲ་རྣམས་དང་ནི་ཚིག་དག་གི །རྗེས་སུ་གལ་ཏེ་མི་འཇུག་ན། །དོན་གྱི་རྗེས་སུ་འབྲང་བྱེད་པས། །འདི་ནི་དོན་
ཚོལ་ཞེས་ཀྱང་བྱ། །དོན་ཅེས་བྱ་བ་གང་ཞེ་ན། །གསང་སྟེ་གསུངས་པར་རིག་པར་བྱ། །རྣམ་རྟོག་མེད་ལ་ཡིད་ཆེས་པས། །དོན་དེའི་རྗེས་སུ་འབྲང་བར་བྱ། །དོན་དེ་གསལ་བར་རབ་རྟོགས་ན། །གསང་སྟེ་གསུངས་པ་དེ་དག་ལ། །འཛིན་མེད་ཞེན་པ་མེད་པ་དང་། །
འབྲང་དང་རྗེས་སུ་འཇུག་མི་འགྱུར། །གལ་ཏེ་རྗེས་སུ་འབྲང་བྱེད་ན། །མངོན་ཤེས་རྗེས་སུ་འབྲང་བར་བྱེད། །གལ་ཏེ་རྗེས་སུ་མི་འབྲང་ན། །ཐམས་ཅད་རྗེས་སུ་འཇུག་མི་འགྱུར། །ཡང་དག་དྲན་པ་དེ་དབང་གིས། །རྗེས་སུ་འཇུག་པ་སྤོང་བར་བྱེད། །བྱང་ཆུབ་
དང་ནི་འཁོར་བ་དང་། །གཉི་ག་ཡང་ནི་མཚུངས་མི་ལྡན། །དེ་ལ་བསམ་པར་མི་བྱེད་པས། །བསམ་མེད་ཡང་དག་དྲན་པ་ཡིན། །བསམ་པ་ཡོངས་སུ་དག་པའི་ཕྱིར། །རྣམ་པར་དག་པ་ཞེས་བྱའོ། །འདི་དང་ཐ་དད་སྒྲུབ་བྱེད་ན། །བླ་མེད་ཆོས་ནི་སྤོང་བར་
འགྱུར། །ཁྱོད་ཀྱིས་དོན་དེ་དག་ལ་ནི། །ཇི་སྐད་བསྟན་བཞིན་བསྒྲུབ་པར་བྱ། །གལ་ཏེ་ཚིག་གི་རྗེས་འབྲང་ན། །དེ་ནི་སྒྲ་ཡི་རྗེས་འབྲང་བས། །དེ་ལས་ཡང་དག་མི་འདའ་ཞིང་། །འཇིག་རྟེན་ཆོས་དང་མཚུངས་པར་འགྱུར། །སྒྲ་དང་ཚིག་འབྲུ་ཡི་གེ་རྣམས། །
དེ་དག་རྗེས་སུ་འཇུག་མི་བྱ། །ཡང་དག་དོན་ནི་རྟོགས་བྱས་ཏེ། །བགྲོད་པ་མེད་པས་རྗེས་འབྲང་བྱ། །ཡང་དག་དོན་ལ་སྒྲ་ཡང་མེད། །ཚིག་འབྲུ་ཡི་གེ་ཡོད་མ་ཡིན། །ཚིག་ལས་ཡང་དག་འདས་པའི་ཕྱིར། །ཡང་དག་དོན་ཅེས་བྱ་བ་ཡིན། །དོན་དེའི་རྗེས་སུ་འབྲང་
བྱེད་ཀྱང་། །རྗེས་སུ་འབྲང་བ་ཅི་ཡང་མེད། །འབྲང་བར་བྱ་བ་ཞི་བའི་ཕྱིར། །ཡང་དག་དོན་ཅེས་བྱ་བ་ཡིན། །ཡང་དག་དོན་ནི་དེ་དག་ལ། །འབྲང་བ་མེད་པ་འབྲང་མེད་པས། །དེ་ནི་ཕྱིར་ལྡོག་མི་འགྱུར་ཞིང་། །གོ་ཆ་སྤོང་བར་མི་བྱེད་དོ། །གོ་ཆ་ཆེན་པོ་ཐེག་ཆེན་དང་། །

ལམ་ཆེན་རྗེས་སུ་གང་འབྲང་བ། །བདེ་བའི་གནས་སུ་བགྲོད་བྱས་ནས། །སེམས་ཅན་རྣམས་ལ་ཕན་བྱེད་འགྱུར། །རབ་ཏུ་བདེ་བའི་ཆོས་འདི་དག །ངས་ནི་ཁྱོད་ལ་རབ་ཏུ་བཤད། །ཁྱོད་དོན་རྗེས་སུ་འབྲང་བྱེད་ན། །ཁྱོད་ཀྱི་ཐེ་ཚོམ་ཆད་པར་འགྱུར། །ཐེག་པ་འདི་ལ་གང་
ཞོན་པ། །ཞོན་ནས་རབ་ཏུ་བགྲོད་བྱེད་ན། །བྱང་ཆུབ་ཆེན་པོར་མྱུར་ཕྱིན་ནས། །བླ་མེད་སངས་རྒྱས་མངོན་སུམ་བྱེད། །ཐེག་པ་མཆོག་ཏུ་གྱུར་པ་འདི། །བཞོན་བྱེད་གང་ཡིན་མྱུར་ཞོན་བྱེད། །ལམ་དང་གོ་ཆ་ཆེན་པོ་ཡི། །དོན་དག་ཀྱང་ནི་དེ་བཞིན་ནོ། །བླ་ན་མེད་པའི་
ཆོས་འདི་ལ། །ནན་ཏན་གྱིས་ནི་གང་སྒྲུབ་པ། །སེམས་ཅན་དེ་དག་ཐམས་ཅད་ལ། །སངས་རྒྱས་རྣམས་ཀྱིས་དགོངས་པར་འགྱུར། །མ་འོངས་འཇིག་པའི་དུས་ཀྱི་ཚེ། །ཁྱོད་ཀྱིས་ཆོས་འདི་རབ་ཕྱེ་ནས། །སེམས་ཅན་རྣམས་ལ་རྒྱ་ཆེར་ནི། །ཕན་པ་དག་ནི་རབ་ཏུ་བྱོས། །
མ་འོངས་འཇིག་པའི་དུས་ཀྱི་ཚེ། །གལ་ཏེ་ཆོས་འདི་རབ་ཕྱེ་ནས། །བླ་མེད་བསོད་ནམས་སྐྱེ་འགྱུར་བས། །དེ་ཡི་གྲངས་ནི་གཞལ་མི་ནུས། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བགོས་པའི་གོ་ཆ་གང་ཡིན་པ་དེ་ནི་རྒྱལ་པོ་ཆེན་པོ་ཞེས་
བྱའོ། །དཔག་ཏུ་མེད་པའི་རྒྱལ་པོ་ཞེས་ཀྱང་བྱའོ། །བཀོད་པ་ཆེན་པོ་དང་ལྡན་པས་བཞོན་པའི་ཐེག་པ་ཞེས་ཀྱང་བྱའོ། །དེད་དཔོན་ཆེན་པོ་ཞེས་ཀྱང་བྱའོ། །དཔག་ཏུ་མེད་པའི་འོད་ཅེས་ཀྱང་བྱའོ། །བཀོད་པ་དམ་པ་དང་ལྡན་པ་བགྲོད་པར་བྱ་བའི་ལམ་ཞེས་ཀྱང་བྱའོ། །
བཀོད་པ་ཚད་མེད་པའི་ཚོགས་ཞེས་ཀྱང་བྱའོ། །ཐབས་ཚད་མེད་པའི་ཚོགས་ཞེས་ཀྱང་བྱ་སྟེ། ལམ་འདིའི་དབང་གིས་སྐྱེས་བུ་དམ་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །གཞན་ཡང་བློ་གྲོས་མཐའ་ཡས་སྔོན་འདས་
པའི་དུས་ཀྱི་བསྐལ་པ་ཚད་མེད་ཅིང་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བ་ཁ་

ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཙན་དན་སྤོས་ཀྱི་འོད་ཟེར་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་གློག་གི་འོད་ཅེས་བྱའོ། །འཇིག་རྟེན་གྱི་ཁམས་ནི་རབ་ཏུ་སྣང་བ་ཞེས་བྱ་སྟེ། དེའི་ཚེ་
ཞིང་དེས་གཞི་ལག་མཐིལ་ལྟར་མཉམ་ཞིང་མི་གཙང་བ་རྣམ་པ་སྣ་ཚོགས་དང་། གྱོ་མོ་དང་། གསེག་མ་དང་། ཚེར་མ་དང་། སྡོང་དུམ་ལ་སོགས་པ་མེད་དེ་གསེར་དང་། དངུལ་གྱི་བྱེ་མ་གཅལ་དུ་བཀྲམ་པས་འཇིག་རྟེན་གྱི་ཁམས་དེ་གང་གིས་མཐོང་བ་རབ་ཏུ་དགའ་བར་
གྱུར་ཏོ། །དེའི་ཚེ་གླིང་བཞི་པོ་རྣམས་ཡངས་ཤིང་རྒྱ་ཆེ་བས་ཐམས་ཅད་ཀྱང་དཔག་ཚད་འབུམ་ཕྲག་གཉིས་གཉིས་ཀྱིས་འཁོར་བར་གྱུར་ཏེ། གླིང་རེ་རེ་ན་ཡང་གྲོང་ཁྱེར་ཆེན་པོ་བཞི་ཁྲི་བརྒྱད་སྟོང་ཡོད་དེ། །གྲོང་ཁྱེར་རེ་རེའི་ཚད་ཀྱང་ཞེང་དུ་དཔག་ཚད་བཅུ་དང་། སྲིད་དུ་
དཔག་ཚད་བཅུ་གཉིས་ཡོད་དེ། ཐ་མའི་ར་བ་ཡང་ཤིན་ཏུ་མཐོ་ཞིང་བཀོད་པ་དང་ལྡན་པར་གྱུར་ཏོ། །གྲོང་ཁྱེར་རེ་རེ་ན་ཡང་མི་བྱེ་བ་ཕྲག་བརྒྱད་བརྒྱད་གནས་ཏེ། དེ་ཡང་གྲོང་རྡལ་ཁྲི་དང་། སྐྱེད་མོས་ཚལ་སྟོང་གིས་བསྐོར་ནས་རབ་ཏུ་བརྒྱན་པར་གྱུར་ཏོ། །གཞན་ཡང་ཞིང་
ཁམས་དེ་ན་མེ་ཏོག་གི་ལྗོན་ཤིང་དང་། འབྲས་བུའི་ལྗོན་ཤིང་དང་། སྤོས་ཀྱི་ལྗོན་ཤིང་དང་། གོས་ཀྱི་ལྗོན་ཤིང་དང་། རོ་མཆོག་ཏུ་གྱུར་པའི་ལྗོན་ཤིང་དང་། རྡོ་རྗེའི་ལྗོན་ཤིང་རྣམ་པ་སྣ་ཚོགས་ཀྱི་བཀོད་པ་དང་། རྫིང་དང་། རྫིང་བུ་དང་། ཆུ་མིག་དང་། འབབ་ཆུ་རྣམས་
ཀྱང་གཡས་གཡོན་གྱི་འགྲམ་དྲང་ཞིང་མཛེས་པ་དང་། ཡོན་ཏན་བརྒྱད་དང་ལྡན་པའི་ཆུས་རབ་ཏུ་གང་བ་དང་། དེ་ན་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་ཁ་དོག་སྣ་ཚོགས་ཀྱི་འོད་དང་ལྡན་པས་ཀུན་ཏུ་ཁྱབ་པར་གྱུར་ཏོ། །དེ་བཞིན་གཤེགས་
པ་ཙན་དན་སྤོས་ཀྱི་འོད་ཟེར་དེའི་སྐུའི་ཚེའི་ཚད་ནི་ལོ་བྱེ་བ་ཁྲག་ཁྲིག་ཕྲག་དྲུག་ཅུ་རྩ་བརྒྱད་ཐུབ་པར་གྱུར་ཏོ། །ཉན་ཐོས་ཀྱི་འཁོར་ནི་བྱེ་བ་ཁྲག་ཁྲིག་ཕྲག་དྲུག་ཅུ་མངའ་བར་གྱུར་ཏོ། །དེའི་ཚེ་མི་རྣམས་བྱད་བཞིན་སྡུག་ཅིང་མཛེས་པ་དང་། རབ་ཏུ་བདེ་བ་དང་ལྡན་པ་དང་། འདོད་

ཆགས་དང་། ཞེ་སྡང་དང་། གཏི་མུག་བསྲབས་པས་གདུལ་སླ་བ་དང་། ཅུང་ཟད་ཙམ་ཞིག་བཤད་ཅིང་བསྟན་པས་ཀྱང་ཆོས་རྣམས་ཀྱི་རང་བཞིན་གྱི་མཚན་ཉིད་ཡོངས་སུ་ཤེས་པར་གྱུར་ཏོ། །བློ་གྲོས་མཐའ་ཡས་གཞན་ཡང་དེའི་ཚེ་འཁོར་ལོས་སྒྱུར་བའི་རྒྱལ་པོ་དོན་
ཐམས་ཅད་གྲུབ་པ་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ། གླིང་བཞི་པ་རྣམས་སྐྱབས་སུ་དོང་བ་ཞིག་བྱུང་སྟེ། འཛམ་བུའི་གླིང་དེ་ན་གྲོང་ཁྱེར་ཆེན་པོ་ཆུ་ཞེང་དུ་དཔག་ཚད་བཞི་བཅུས་འཁོར་བ་ཞིག་ཡོད་དེ། མིས་རབ་ཏུ་གང་བ། བདེ་ཞིང་འབྱོར་པ་དང་ལྡན་པ། གྲོང་
ཁྱེར་གྱི་ནང་དུ་དཔག་ཚད་ལྔ་ཚུན་ཆད་རིན་པོ་ཆེ་སྣ་བདུན་གྱིས་གཅལ་དུ་བཀྲམ་པ། ཤིང་ཏ་ལ་མཆོག་རྣམས་ཀྱང་དྲིལ་བུ་གཡེར་ཀ་སྤྱངས་ཤིང་གསེར་ཡང་དག་པའི་དྲ་བས་གཡོགས་པ་དག་གིས་ཀུན་ཏུ་གང་བར་གྱུར་ཏོ། །རྒྱལ་པོ་དེའི་ཕོ་བྲང་ནི་བཻཌཱུ་རྱ་འབའ་ཞིག་ལས་
བྱས་ཤིང་ཞེང་དུ་དཔག་ཚད་གཅིག་ཡོད་དེ། ངོས་བཞི་ན་ཀ་བ་སྟོང་སྟོང་ཡོད་དོ། །ཕོ་བྲང་གཞལ་མེད་ཁང་དེའི་སྟེང་ན་ཡང་ཁང་པ་བརྩེག་མ་ཤིན་ཏུ་མཐོ་ཞིང་རིན་པོ་ཆེ་སྣ་ཚོགས་ཀྱིས་རབ་ཏུ་བརྒྱན་པ་སྟོང་ཡོད་དོ། །ཕོ་བྲང་གཞལ་མེད་ཁང་དེའི་མདུན་ན་སྤོས་ཀྱི་རྫིང་
ཆེན་པོ་ཤིན་ཏུ་དང་བ་ཞིག་ཡོད་དེ། དེའི་ཉེ་འཁོར་ན་གཞན་ཡང་སྤོས་ཀྱི་འོད་དང་ལྡན་པའི་རྫིང་བུ་ཕྲ་མོ་རིན་པོ་ཆེ་སྣ་བདུན་ལས་མངོན་པར་གྲུབ་པ་བཅུ་དྲུག་ཡོད་དེ། དེ་དག་གིས་མཐའ་མ་འཁོར་བར་བསྐོར་ཏོ། །རྫིང་བུ་རེ་རེ་ལས་ཀྱང་འབབ་ཆུ་དག་རབ་ཏུ་འབབ་པས་དེ་
ལས་དཔེར་ན་རོལ་མོ་མང་པོ་བྱས་པ་ལྟ་བུའི་སྒྲ་སྙན་པ་དག་བྱུང་བར་གྱུར་ཏོ། །རྫིང་བུ་ཕྲ་མོ་རེ་རེ་ལ་ཡང་ལམ་སྟེགས་བརྒྱད་བརྒྱད་ཡོད་དོ། །སྤོས་ཀྱི་འོད་ཀྱི་རྫིང་ཆེན་པོ་ལ་ནི་ལམ་སྟེགས་སུམ་ཅུ་རྩ་གཉིས་ཡོད་དེ། ལམ་སྟེགས་ཐམས་ཅད་ཀྱང་གསེར་འབའ་ཞིག་ལས་
མངོན་པར་གྲུབ་པ། རིན་པོ་ཆེའི་ཤིང་ལྗོན་པ་ཕྲེང་དུ་དཀྲིགས་པ། རིན་པོ་ཆེའི་དྲ་བས་གཡོགས་པ། སྤོས་མཆོག་དམ་པའི་དྲིས་གྲོང་ཁྱེར་ཀུན་ཏུ་གང་བར་བྱེད་པའི་ཕྱིར་རྫིང་དེ་དག་སྤོས་ཀྱི་འོད་ལྡན་ཞེས་བྱའོ། །བློ་གྲོས་མཐའ་ཡས་འཁོར་ལོས་སྒྱུར་བའི་རྒྱལ་པོ་དེ་

ལ་བཙུན་མོ་བཞི་ཡོད་དེ། དཔག་མེད་སྤོས་དང་། ལེགས་པའི་དབྱངས་དང་། དམ་པ་སྣ་ཚོགས་ཀྱི་དབྱངས་དང་། ངང་པའི་རྒྱལ་པོ་ལྟ་བུའི་དབྱངས་ཞེས་བྱ་བ་དག་ཡིན་ནོ། །བཙུན་མོ་རེ་རེ་ལ་ཡང་བུ་གཉིས་གཉིས་ཡོད་དེ། གདོན་མི་ཟ་བའི་མཆོག་
དང་། བཟང་པོའི་མཆོག་དང་། ཀླུའི་མཆོག་དང་། མཆོག་གི་དབྱངས་དང་། དམ་པའི་དབྱངས་དང་། ཚངས་པའི་དབྱངས་དང་། མཆོག་གི་སྤྲིན་དང་། སྤྲིན་གྱི་དབྱངས་ཞེས་བྱ་བ་དག་ཡིན་ནོ། །དེ་ལ་སླས་ནི་འབུམ་ཕྲག་དྲུག་ཡོད་དེ། བུ་ནི་སྟོང་ཕྲག་བཅུ་ཡོད་དོ། །དེའི་ཚེ་
རྒྱལ་པོའི་ཕོ་བྲང་གི་ནང་དུ་འཁོར་རྣམས་དང་ལྷན་ཅིག་ཏུ་དགའ་བ་མྱོང་ཞིང་རྩེ་བ་ལས་ནམ་མཁའ་ལས་དེ་བཞིན་གཤེགས་པའི་སྐུ་ཤིན་ཏུ་མཛེས་པ་ཞིག་མཐོང་ངོ་། །དེ་ནས་དེ་བཞིན་གཤེགས་པ་དེས་རྒྱལ་པོ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་པོ་ཆེན་པོ་བླ་ན་མེད་པའི་གོ་
ཆ་བགོས་ཏེ། བླ་ན་མེད་པའི་ཐེག་པ་ལ་ཞོན་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་ཞིང་སེམས་ཅན་རྣམས་ལ་ཤེས་རབ་ཀྱི་སྨན་གཏང་བར་བྱའི། ལྷ་དང་མིའི་འདོད་པའི་ཡོན་ཏན་ལྔ་པོ་དག་ལ་མངོན་པར་ཞེན་པར་མི་བྱའོ། །གོ་ཆ་ཆེན་པོ་འདིས་ནི་
བླ་ན་མེད་པའི་བདེ་བ་ཡོངས་སུ་སྡུད་པར་བྱེད་དོ། །བླ་ན་མེད་པའི་ཐེག་པ་འདིས་ཀྱང་སྐྱེ་དགུ་རྣམས་བླ་ན་མེད་པའི་སྐྱེད་མོས་ཚལ་དུ་རབ་ཏུ་འདྲེན་པར་བྱེད་དེ། གང་གིས་དེར་ཞུགས་པས་དེ་དག་ནི་ཕྱིར་ལྡོག་པར་མི་འགྱུར་རོ། །ལྷ་དང་མི་ཐམས་ཅད་ཀྱི་འདོད་པ་རྣམ་པ་སྣ་
ཚོགས་ནི་མི་རྟག་པ། རྣམ་པར་འཇིག་ཅིང་ཡོངས་སུ་འགྱུར་བའི་ཆོས་ཅན། མཐུ་ཡུན་རིང་དུ་མི་གནས་པ། དེ་མ་ཐག་ཏུ་འགག་པའི་ཆོས་ཅན་ཡིན་ནོ་ཞེས་གསུངས་སོ། །བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པས་དེ་སྐད་ཅེས་བཀའ་
སྩལ་པ་ཐོས་པ་དང་། དེ་བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། །སུ་ཞིག་གོ་ཆ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། གོ་ཆ་དེ་ཇི་ལྟ་བ་བཞིན་དུ་རབ་ཏུ་བགོ་བར་བགྱིའོ། །སུ་ཞིག་ཐེག་པ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། ཐེག་པ་ཆེན་པོ་དེ་ཇི་ལྟ་

བ་བཞིན་དུ་དེ་ལ་འཚལ་བར་བགྱིའོ། །སུ་ཞིག་ལམ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། ལམ་ཆེན་པོ་དེ་ཇི་ལྟ་བ་བཞིན་དུ་རབ་ཏུ་གཞོལ་བར་བགྱིའོ། །དེ་སྐད་ཅེས་གསོལ་པ་དང་། དེའི་ཚེ་དེ་བཞིན་གཤེགས་པ་དེས་རྒྱལ་པོ་ཆེན་པོ་དེ་ལ་འདི་སྐད་ཅེས་བཀའ་
སྩལ་ཏོ། །ཀྱེ་རྒྱལ་པོ་ཆེན་པོ་འདི་ལྟར་ཤེས་པར་གྱིས་ཤིག །དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ཞེས་བྱ་བ་ཡོད་ཀྱིས། རྒྱལ་པོ་དེའི་ཐད་དུ་སོང་ཤིག་དང་། རྒྱལ་པོ་ཆེན་པོ་ལ་ཇི་ལྟར་གོ་ཆ་ཆེན་པོ་བགོ་བ་དང་། ཐེག་པ་ཆེན་པོ་ལ་ཞོན་པ་དང་།
ལམ་ཆེན་པོ་ལ་གཞོལ་བར་བྱ་བའི་ཆོས་དེ་ཡང་དག་པར་སྟོན་པར་འགྱུར་རོ། །དེ་ནས་དེ་བཞིན་གཤེགས་པ་དེས་དེ་སྐད་ཅེས་བཀའ་སྩལ་ནས་མི་སྣང་བར་གྱུར་ཏོ། །བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པ་དངོས་པོ་དེ་ལྟ་བུ་མཐོང་བ་དང་།
བ་སྤུ་ཟིང་ཞེས་བྱེད་པར་གྱུར་ནས་ངོ་མཚར་གྱི་བསམ་པ་དང་། འཇིགས་པའི་སེམས་སྐྱེས་པས་ལྷ་དང་། མིའི་འདོད་པའི་བདེ་བ་སྣ་ཚོགས་ལ་མ་མོས་ཤིང་འདུས་བྱས་ཐམས་ཅད་ལ་ཡོངས་སུ་སྐྱོ་བར་གྱུར་ནས། གོ་ཆ་ཆེན་པོ་དང་། ཐེག་པ་ཆེན་པོ་དང་། ལམ་ཆེན་པོ་
ཡོངས་སུ་གཉེར་བའི་ཕྱིར་རྒྱལ་བུ་བརྒྱད་དང་། བཙུན་མོ་བཞི་དང་། བུ་གཞན་རྣམས་དང་། སླས་དང་། གཡོག་འཁོར་རྣམས་དང་ལྷན་ཅིག་ཏུ་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ག་ལ་བ་དེ་ལོགས་སུ་དོང་ངོ་། །དེར་ཕྱིན་པ་དང་། འཁོར་དང་བཅས་ཏེ་
གུས་པས་བཅོམ་ལྡན་འདས་དེའི་ཞབས་ལ་མགོ་བོས་གཏུགས་ཏེ་ཕྱག་བྱས་ནས་རིན་པོ་ཆེ་སྣ་བདུན་གྱི་མེ་ཏོག་རྣམ་པ་སྣ་ཚོགས་བརྒྱ་སྟོང་དུ་མས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མངོན་པར་གཏོར་ཏོ། །གཞན་ཡང་ན་བཟའ་
ཚད་མེད་པ་སྙེད་དེ། དེ་བཞིན་གཤེགས་པ་དང་། ཉན་ཐོས་ཀྱི་དགེ་འདུན་རྣམས་ལ་ཕུལ་ལོ། །གཞན་ཡང་བདེ་བའི་ཡོ་བྱད་ཐམས་ཅད་ཀྱིས་ལོ་སྟོང་ཕྲག་བཅུའི་བར་དུ་བསྙེན་བཀུར་བ་དང་། རིམ་གྲོ་དང་། མཆོད་པ་བྱས་སོ། །དེའི་འོག་ཏུ་རྒྱལ་

ཐབས་སྤངས་ནས་འཁོར་དང་བཅས་དེ། དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་གྱི་གསུང་རབ་ལས་རབ་ཏུ་བྱུང་ངོ་། །བློ་གྲོས་མཐའ་ཡས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་དེས་དགེ་སློང་དོན་ཐམས་ཅད་གྲུབ་པ་དང་།
འཁོར་རྣམས་ཀྱི་མོས་པའི་བསམ་པ་ཐུགས་སུ་ཆུད་ནས་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་གང་ཡིན་པ་རྣམ་པར་ཕྱེ་སྟེ། དེ་དག་ལ་ཡང་དག་པར་བསྟན་ཏོ། །དེ་དག་གིས་ཐོས་པར་གྱུར་པ་དང་། ཤིན་ཏུ་བརྟན་པའི་སེམས་བསྐྱེད་
ནས་ཆོས་ཟབ་མོའི་ཕྱིར་ཇི་སྲིད་འཚོའི་བར་དུ་ལུས་དྲང་པོར་བསྲང་སྟེ། ནན་ཏན་གྱིས་ནུར་བ་མེད་པར་བསྒོམས་པ་དང་། རྟག་ཏུ་དེ་བཞིན་གཤེགས་པ་ལ་བརྟེན་པས་འཇིག་རྟེན་པའི་འདོད་པ་ཐམས་ཅད་ཀྱིས་མི་གཡོས་པའི་ཡིད་ལ་བྱེད་པ་ཐོབ་པར་
གྱུར་ཏོ། །བློ་གྲོས་མཐའ་ཡས་དེའི་ཚེ་དེ་བཞིན་གཤེགས་པ་དེས་དགེ་སློང་དོན་ཐམས་ཅད་གྲུབ་པ་ལ་བཀའ་སྩལ་པ། རིགས་ཀྱི་བུ་དེང་ཁྱོད་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ལ་ཡང་དག་པར་གཞོལ་བར་བྱེད་ན་ལམ་འདིའི་དབང་
གིས་ཐམས་ཅད་མཁྱེན་པའི་ཡེ་ཤེས་དང་མཚུངས་པ་མེད་པའི་ཡེ་ཤེས་མངོན་པར་འགྲུབ་པར་འགྱུར་གྱིས། ཁྱོད་ཀྱིས་ཚུལ་བཞིན་དུ་ནན་ཏན་བརྩོན་འགྲུས་ཀྱིས་བསྒོམ་པར་བྱའོ། །དེ་སྐད་ཅེས་བཀའ་སྩལ་པ་དང་། དགེ་སློང་དོན་ཐམས་ཅད་གྲུབ་པ་དེས་དེ་
བཞིན་གཤེགས་པ་ཙན་དན་སྤོས་ཀྱི་འོད་ཟེར་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ནི་ད་ལྟར་གོ་ཆ་ཞེས་བགྱི་བའི་ཆོས་ཡང་དག་པར་རྗེས་སུ་མ་མཐོང་། གོ་ཆ་བགོས་པར་བགྱིད་པ་ཡང་ཡང་དག་པར་རྗེས་སུ་མ་མཐོང་། གོ་ཆ་བགོས་
ནས་བགྲོད་པར་བགྱིད་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང་ངོ་། །གོ་ཆ་བགོས་པའི་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་བདག་གིས་ནི་ཐེག་པ་ཞེས་བགྱི་བའི་ཆོས་ཀྱང་ཡང་དག་པར་རྗེས་སུ་མ་མཐོང་། ཐེག་པ་

ཆེན་པོ་ལ་བཞོན་པར་བགྱིད་པ་ཡང་ཡང་དག་པར་རྗེས་སུ་མ་མཐོང་། ཐེག་པས་བགྲོད་པར་བགྱིད་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང་། ཐེག་པ་ཆེན་པོ་ལ་འཚལ་བའི་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་
བདག་གིས་ནི་ལམ་ཞེས་བགྱི་བའི་ཆོས་ཀྱང་ཡང་དག་པར་རྗེས་སུ་མ་མཐོང་། ལམ་འདིའི་དབང་གིས་གཞོལ་བར་གྱུར་པ་དང་། གཞོལ་བར་འགྱུར་བ་དང་། གཞོལ་བར་བགྱི་བ་ཡང་དག་པར་རྗེས་སུ་མ་མཐོང་། ལམ་གྱིས་བགྲོད་པར་བགྱི་
བའི་ཕྱོགས་ཀྱང་ཡང་དག་པར་རྗེས་སུ་མ་མཐོང་། ལམ་གྱིས་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་བདག་གིས་ནི་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལ་ཐག་རིང་བ་ཞེས་བགྱི་བ་འམ། ཐག་ཉེ་བ་ཞེས་བགྱི་
བ་འམ། འདས་པ་དང་། མ་འོངས་པ་དང་། ད་ལྟར་བྱུང་བ་ཞེས་བགྱི་བ་ཡང་དག་པར་མི་དམིགས་ཤིང་ཡང་དག་པར་རྗེས་སུ་མ་མཐོང་ལགས་སོ། །བདག་དེ་ལྟར་རྣམ་པར་ལྟ་བ་ན་ཆོས་ཅུང་ཟད་ཙམ་ཡང་རྙེད་པར་བགྱི་བའམ་མངོན་དུ་བགྱི་བ་ཡང་དག་པར་
མ་མཐོང་ལགས་སོ། །བདག་ལ་ནི་མངོན་དུ་བགྱི་བ་ཅི་ཡང་མ་མཆིས་ན། བཅོམ་ལྡན་འདས་ཅིའི་སླད་དུ་བདག་ལ་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ་ལམ་ལ་ཡང་དག་པར་གཞོལ་བར་བྱེད་དམ་ཞེས་བཀའ་སྩལ་ལགས། བཅོམ་ལྡན་འདས་
ནི་ཐམས་ཅད་མཁྱེན་པ། ཐམས་ཅད་གཟིགས་པ་ལགས་པས་ཇི་ལྟར་བདག་ཅག་ལ་སོགས་པས་ཆོས་ལ་མངོན་པར་བསྒྲུབ་པར་བགྱིད་པ་ནི་དེ་བཞིན་གཤེགས་པ་ཉག་གཅིག་གིས་ཐུགས་སུ་ཆུད་ཀྱི། ཉན་ཐོས་དང་། རང་སངས་རྒྱས་རྣམས་ཀྱི་སྤྱོད་ཡུལ་ནི་མ་
ལགས་སོ་ཞེས་གསོལ་ཏོ། །བློ་གྲོས་མཐའ་ཡས་དགེ་སློང་དོན་ཐམས་ཅད་གྲུབ་པས་དེ་བཞིན་གཤེགས་པ་དེའི་སྤྱན་སྔར་དེ་སྐད་སྨྲས་པའི་ཚེ་འཁོར་དང་བཅས་པ་ཐམས་ཅད་ཀྱིས་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཆོས་ཀྱི་བཟོད་པ་

ཐོབ་པའི་ཕྱིར་ཐམས་ཅད་ཕྱིར་མི་ལྡོག་པ་ཐོབ་པར་གྱུར་ཏོ། །དེ་ནས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་གྱིས་ཀྱང་ཁྱོད་བསྐལ་བ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །དེ་དག་གིས་ལུང་བསྟན་པ་ཐོས་པས་རབ་ཏུ་དགའ་བར་གྱུར་ནས་ནམ་མཁའ་ལ་ཏ་ལ་བདུན་ཙམ་དུ་འཕགས་ཏེ། དེ་བཞིན་གཤེགས་པ་ལ་ཚིགས་སུ་བཅད་དེ་མངོན་པར་བསྟོད་པ། གྲགས་པ་ཆེན་པོ་ཚད་མེད་པས། །
རི་རྒྱལ་བཞིན་དུ་མངོན་པར་འཕགས། །བཅོམ་ལྡན་ཐམས་ཅད་མཁྱེན་པ་ཡིས། །ཡོན་ཏན་རྣམས་ནི་སྟོན་པར་མཛད། །སངས་རྒྱས་སྤྱན་ནི་གསལ་གཟིགས་པས། །ཉི་མ་བཞིན་དུ་སྣང་བར་མཛད། །གཙོ་བོ་འཁོར་འདུས་བཞུགས་པ་ཡི། །ཞབས་
ལ་བདག་ནི་ཕྱག་འཚལ་ལོ། །ཡོན་ཏན་ཚོགས་ནི་ཚད་མེད་ཅིང་། །སངས་རྒྱས་མཁྱེན་པ་ཡོངས་རྫོགས་པས། །བདག་ལ་སོགས་པས་སངས་རྒྱས་ཀྱི། །བླ་མེད་ཡེ་ཤེས་ཐོབ་པར་འགྱུར། །བླ་མེད་སྣང་བ་ཆེན་པོ་ཡིས། །ལྷ་མི་མ་ལུས་གསལ་མཛད་པས། །
ཆོས་ཀྱི་གཏེར་ནི་རབ་ཕྱེ་ནས། །ཡོན་ཏན་རྒྱ་མཚོ་དཔག་མེད་སྟོན། །མཁྱེན་པ་རྟག་ཏུ་མི་ཉམས་ཤིང་། །ཡང་དག་སངས་རྒྱས་ཉོན་མོངས་སྤངས། །ཤེས་རབ་འོད་ལྡན་བརྩོན་འགྲུས་ཆེ། །ཡོན་ཏན་ཟབ་ལ་བདག་ཕྱག་འཚལ། །ཀླུ་ཆེན་བཀོད་པ་ཆེན་པོ་སྟེ། །
མཚན་མང་དག་གིས་སྐུ་རབ་བརྒྱན། །བཞུགས་པ་དག་ནི་རི་རབ་འདྲ། །འཁོར་བཞུགས་དཔེ་ཟླ་ཡོང་མ་མཆིས། །འཇིག་རྟེན་འདྲེན་པ་རབ་མཛད་པས། །ལྷ་མི་འཁོར་ནི་ཟིལ་གྱིས་གནོན། །ཆོས་སྟོན་པ་ལ་བསྙེངས་མི་མངའ། །སྐྱེས་མཆོག་ལ་ནི་བདག་
ཕྱག་འཚལ། །བཅོམ་ལྡན་ཐུབ་པ་ཆེན་པོ་ནི། །ཡོན་ཏན་དཔག་མེད་མཚོ་ལགས་པས། །བདག་ཅག་ཆོས་མིག་རྣམ་པར་ཕྱེ། །བདག་ཅག་གོ་ཆ་རབ་ཏུ་བཀོན། །བདག་ཅག་དུས་ནི་ཐམས་ཅད་དུ། །ཐེག་པ་ཆེ་ལ་རབ་འཚལ་ནས། །རྟག་ཏུ་ལམ་མཆོག་འདི་དག་

ལ། །གཞོལ་བགྱིད་གཞན་དུ་མི་མཆིའོ། །ཐུབ་པ་ཆེན་པོ་དཔའ་བོའི་གཙོ། །ཆོས་རྣམས་ཐམས་ཅད་ཐུགས་སུ་ཆུད། །འཇིག་རྟེན་དག་ན་ལྷག་མ་མཆིས། །བདག་ཅག་སྲོག་ཕྱོགས་སྐྱབས་སུ་མཆི། །བློ་གྲོས་མཐའ་ཡས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཙན་དན་སྤོས་ཀྱི་འོད་ཟེར་དེས་ཆོས་འདི་བསྟན་པས། སེམས་ཅན་ཚད་མེད་གྲངས་མེད་པ་རྣམས་ཡོངས་སུ་སྨིན་པར་མཛད་དོ། །དགེ་སློང་དོན་ཐམས་ཅད་གྲུབ་པ་དེ་ཕྱིན་ཅད་འཁོར་དང་བཅས་ཏེ། སངས་རྒྱས་
བཅོམ་ལྡན་འདས་ཚད་མེད་གྲངས་མེད་པ་སྙེད་ལ་རིམ་གྲོ་དང་། མཆོད་པ་བྱས་པས་བསྐལ་པ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏེ། མཚན་ཡང་དེ་བཞིན་གཤེགས་པ་སྤྱོད་
ཡུལ་དཔག་ཏུ་མེད་པ་ལས་ཡང་དག་པར་འདས་པའི་རྒྱལ་པོ་ཞེས་བྱ་བར་གྱུར་ཏོ། །སངས་རྒྱས་ངའི་ཞིང་གི་ཡོན་ཏན་དང་། ཆུ་ཞིང་གི་མཚན་ཉིད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙན་དན་སྤོས་ཀྱི་འོད་ཟེར་གྱི་ཞིང་ཁམས་
རབ་ཏུ་སྣང་བ་དང་ཐ་དད་པ་མེད་པར་གྱུར་ཏོ། །ཉན་ཐོས་རྣམས་ཀྱི་གྲངས་ཀྱང་ཚད་མེད་པར་གྱུར་ཏོ། །རྒྱལ་པོའི་བཙུན་མོ་དང་། རྒྱལ་བུ་དང་འཁོར་རྣམས་ཀྱང་བསྐལ་པ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་སངས་རྒྱས་པར་གྱུར་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་པས་ཐེག་པ་ཆེན་པོ་ལ་ཞོན་ཏེ། ལམ་འདིས་ཆོས་ཀྱི་སྒྲོན་མ་ཆེན་པོ་བཟུང་ནས་ཆོས་ཀྱི་སྣང་བ་ཆེན་པོ་བྱེད་པ་དང་། ཆོས་ཀྱི་འོད་ཟེར་ཆེན་པོ་འགྱེད་པ་
དང་། ཆོས་ཀྱི་རྒྱལ་མཚན་ཆེན་པོ་བསྒྲེང་བ་དང་། ཆོས་ཀྱི་རྔ་ཆེན་པོ་རྡུང་བ་དང་། ཆོས་ཀྱི་གྲུ་ཆེན་པོར་ཞུགས་ནས་ཆོས་ཆེན་པོ་ཡོངས་སུ་བསྡུས་ཏེ། རབ་ཏུ་གཞོལ་བར་བྱེད་པ་དང་། སྐྱེས་བུ་དམ་པའི་རྣམ་པར་རྩེན་པས་རྣམ་པར་རྩེ་བ་དང་། ཆོས་ཀྱི་ཆར་

གྱིས་སེམས་ཅན་རྣམས་ཚིམ་པར་བྱས་ནས་རབ་ཏུ་དགའ་བར་བྱེད་པ་དང་། ནན་ཏན་བརྩོན་འགྲུས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ལམ་འདི་ལ་གནས་པའི་ཚེ་ཆོས་ཀྱི་སྣང་བ་ཆེན་པོ་འཐོབ་པར་འགྱུར་ཏེ། སྣང་བ་འཐོབ་པར་འགྱུར་བའི་ཕྱིར་རྟེན་ཅིང་འབྲེལ་པར་འབྱུང་བའི་ཆོས་ཐམས་ཅད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་།
རང་བཞིན་གྱིས་འབྱུང་བ་མེད་པར་མཐོང་བས་གཟུགས་ལ་གཟུགས་ཉིད་དུ་མི་མཐོང་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་ཡང་དེ་བཞིན་ནོ། །རྣམ་པར་ཤེས་པ་ལ་ཡང་རྣམ་པར་ཤེས་པ་ཉིད་དུ་མི་མཐོང་བས་རྣམ་པར་ཤེས་
པ་ཐ་དད་པའི་རྐྱེན་ལས་འབྱུང་བ་དང་། རྣམ་པར་ཤེས་པའི་མཚན་ཉིད་རང་བཞིན་གྱིས་གཟོད་མ་ཉིད་ནས་སྟོང་བ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་དེ་རྒྱུ་རྐྱེན་མང་པོར་གཏོགས་པ་ཙམ་ཡིན་པར་རབ་ཏུ་རྟོགས་སོ། །རྒྱུ་
རྐྱེན་འདུས་པར་མཐོང་བ་ན་རྒྱུ་རྐྱེན་ཉིད་ཀྱང་སྟོང་པ་དང་། མཚན་མ་མེད་པ་དང་། འབྱུང་བ་མེད་པར་རབ་ཏུ་ཤེས་སོ། །དེ་ལྟར་མཐོང་བའི་ཚེ་མིག་ལ་མིག་ཉིད་དུ་མི་ལྟ་སྟེ། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་ཡང་དེ་བཞིན་ནོ། །ཡིད་ལ་
ཡང་ཡིད་ཉིད་དུ་མི་མཐོང་བས་ཡིད་ཐ་དད་པའི་རྐྱེན་ལས་བྱུང་བ་དག་ཡིད་ཀྱི་མཚན་ཉིད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་པར་རབ་ཏུ་རྟོགས་སོ། །སའི་ཁམས་དང་། ཆའི་ཁམས་
དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱི་བར་ལ་ཡང་བྱེད་པ་མེད་པ་དང་། མྱོང་བ་མེད་པར་རབ་ཏུ་ཤེས་སོ། །ཆོས་ཅུང་ཟད་ཙམ་ལ་ཡང་

ཆོས་ཅུང་ཟད་ཙམ་དུ་མི་མཐོང་སྟེ། ཐ་དད་པའི་རྐྱེན་ལས་བྱུང་ཞིང་རྒྱུ་དང་རྐྱེན་མང་པོར་གཏོགས་པས་རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་པ་ཞེས་བྱའོ། །རྟེན་ཅིང་འབྲེལ་བར་འབྱུང་བ་ཉིད་ཀྱང་སྟོང་པ་དང་། མཚན་མ་མེད་པ་དང་།
འབྱུང་བ་མེད་པར་རབ་ཏུ་ཤེས་སོ། །བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་དེ་ལ་གནས་པའི་ཚེ། རྟེན་ཅིང་འབྲེལ་བར་འབྱུང་བ་ལ་སོ་སོར་རྟོག་པར་བྱེད་པ་ཡིན་ཏེ། དེ་ལྟར་བརྟགས་པས་ཤེས་རབ་ཀྱིས་རྟེན་ཅིང་འབྲེལ་
བར་འབྱུང་བའི་དེ་ཁོ་ན་ཉིད་ཀྱི་མཐའ་མངོན་སུམ་དུ་རྟོགས་པར་འགྱུར་ཏེ། ཆོས་ཀྱི་སྣང་བ་དེ་དག་ཐམས་ཅད་ཀྱི་དབང་གིས་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། བྱམས་
པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ནས་སངས་རྒྱས་ཀྱི་ཆོས་ཇི་སྙེད་པ་ཐམས་ཅད་ཀྱི་བར་རྣམས་ཀྱང་མྱུར་དུ་ཡོངས་སུ་རྫོགས་པར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་
ཆུབ་སེམས་དཔའ་འཇིགས་མེད་པས། །དེ་ལྟར་གནས་པ་མེད་པས་ན། །ཆོས་ཀྱི་སྣང་ཆེན་རབ་བྱས་ནས། །ཤེས་པ་དམ་པས་གཞོལ་བར་བྱེད། །ཆོས་ཆེན་རྒྱལ་མཚན་འཛུགས་བྱེད་པས། །རྒྱལ་མཚན་འདི་ནི་བླ་ན་མེད། །སངས་རྒྱས་ཆོས་ནི་ཐམས་
ཅད་ལ། །ཡང་དག་དྲན་པས་གཞོལ་བར་བྱེད། །ཤེས་རབ་ལེགས་པས་རྣམ་པར་རྩེན། །ཆོས་ཀྱིས་སེམས་ཅན་སྦྱིན་པ་གཏོང་། །ཆོས་ཆེན་ཆར་ནི་རབ་འབེབས་ཤིང་། །འཇིགས་པ་མེད་པས་གཞོལ་བར་བྱེད། །དེ་ལྟར་བྱང་ཆུབ་སེམས་དཔའ་རྣམས། །
ཆོས་ཀྱི་སྣང་ཆེན་ཐོབ་པས་ན། །ཡང་དག་པ་ཡི་ཆོས་དག་ལ། །དཔའ་བོས་ལེགས་པར་གནས་པར་བྱེད། །ཆོས་ཀྱི་སྣང་བ་དེ་དབང་གིས། །ཆོས་རྣམས་ཐམས་ཅད་རྟོགས་པར་བྱེད། །རྐྱེན་ནི་མང་ལས་བྱུང་བའི་ཕྱིར། །ཐམས་ཅད་བརྟན་བདེན་གང་

ཡང་མེད། །ཆོས་རྣམས་རང་བཞིན་ཉིད་ཀྱིས་སྟོང་། །རང་བཞིན་ཉིད་ཀྱིས་མཚན་མ་མེད། །རང་བཞིན་ཉིད་ཀྱིས་སྐྱེ་བ་མེད། །རང་བཞིན་ཉིད་ཀྱིས་ངོ་བོ་མེད། །ཆོས་རྣམས་རྐྱེན་ནི་མང་པོ་དག །ལྷན་ཅིག་འདུས་ལས་བྱུང་བ་ཡིན། །
རྐྱེན་ནི་མང་པོ་འདུས་པའི་ཕྱིར། །རང་བཞིན་གྱིས་ནི་མེད་པ་ཡིན། །བྱང་ཆུབ་སེམས་དཔའི་རྐྱེན་རྣམས་ལ། །སོ་སོར་རྟོག་པས་སྟོང་པར་རིག །རྐྱེན་རྣམས་རང་བཞིན་གྱིས་སྟོང་བས། །རང་བཞིན་གྱིས་ནི་མཚན་མ་མེད། །སྐྱེ་བ་དག་ནི་ཡོད་མ་ཡིན། །བྱ་
བ་དག་ཀྱང་ཡོད་པ་མིན། །དེ་ལྟར་སོ་སོར་གང་རྟོགས་པ། །ཆོས་ལ་ནན་ཏན་སྒྲུབ་པར་བྱེད། །རྟེན་འབྲེལ་ངོ་བོ་ཉིད་མེད་ཕྱིར། །རྐྱེན་རྣམས་ཀྱང་ནི་རྐྱེན་མ་ཡིན། །དེ་ལྟར་ཚུལ་བཞིན་གང་རྟོག་པ། །ཆོས་རྣམས་ཐམས་ཅད་ཤེས་པར་འགྱུར། །གཟུགས་དང་
ཚོར་བ་འདུ་ཤེས་དང་། །འདུ་བྱེད་རྣམ་ཤེས་དེ་བཞིན་རྟོག །རྒྱུ་དང་རྐྱེན་ནི་མང་པོ་ལས། །ཕུང་པོ་རྣམས་ནི་བྱུང་བ་ཡིན། །ཕུང་པོ་ཡང་དག་མེད་པས་ན། །རང་བཞིན་ངོ་བོ་ཉིད་ཀྱིས་སྟོང་། །ངོ་བོ་སྟོང་ཕྱིར་མཚན་མ་མེད། །ཐམས་ཅད་སྐྱེ་བ་གང་ཡང་མེད། །
ཕུང་པོ་རྣམས་ནི་མཚན་མ་སྤངས། །མཚན་མ་སྤངས་པས་སྐྱེ་བ་མེད། །སྐྱེ་བ་མེད་པས་འགག་པ་མེད། །ཕུང་པོ་མཚན་ཉིད་དེ་འདྲའོ། །མཚན་མེད་མི་བདེན་མཚན་མར་མཐོང་། །མཚན་མ་དེ་ནི་གང་ལས་ཡོད། །ཆོས་རྣམས་ངོ་བོ་ཉིད་མེད་ཕྱིར། །ཕུང་
པོ་འདི་ཡང་རང་བཞིན་མེད། །དེ་བཞིན་ཁམས་དང་སྐྱེ་མཆེད་ཀྱང་། །ཐམས་ཅད་རྐྱེན་ལས་བྱུང་བས་ན། །རང་བཞིན་ངོ་བོ་ཉིད་ཀྱིས་སྟོང་། །མཚན་མ་མེད་ཅིང་ངོ་བོ་མེད། །ཆོས་རྣམས་དག་ནི་ཐམས་ཅད་ལ། །ཆོས་ཀྱི་ངོ་བོ་མི་དམིགས་པར། །ཆོས་
རྣམས་ཐམས་ཅད་གང་ཤེས་པ། །དེ་ནི་དོན་སེམས་པ་ཞེས་བྱ། །འདོད་དང་གཟུགས་དང་གཟུགས་མེད་ཁམས། །ཐམས་ཅད་རྐྱེན་ལས་བྱུང་བས་ན། །རང་བཞིན་ངོ་བོ་ཉིད་ཀྱིས་སྟོང་། །མཚན་མ་མེད་ཅིང་ངོ་བོ་མེད། །འདི་ལ་རྟོག་པའི་ཡེ་ཤེས་དེ། །ཇི་

ལྟར་ཡུལ་དེ་ཤེས་པར་འགྱུར། །ཡེ་ཤེས་འདི་དང་ཡུལ་དེ་དག །རང་བཞིན་རྟག་ཏུ་སྤངས་པས་ན། །སྐྱེ་བ་དང་ནི་རྐྱེན་མང་པོ། །འདི་གཉིས་ལ་ཡང་བྱེད་པ་མེད། །བྱེད་མེད་དེ་ལྟར་གང་ཤེས་པ། །དེ་ནི་ཡང་དག་མཚན་ཉིད་ཡིན། །མཚན་ཉིད་མེད་ཀྱང་མཚན་ཉིད་བཤད། །བྱང་
ཆུབ་སེམས་དཔའ་དེར་ཞུགས་ཀྱང་། །མཚན་ཉིད་མཚན་ཉིད་མེད་པར་ཡང་། །རྣམ་པར་རྟོག་པར་མི་བྱེད་དོ། །དེ་ལྟར་རབ་ཏུ་གང་ཤེས་པ། །ཡང་དག་མཚན་ཉིད་མཐོང་བས་ན། །ཆོས་རྣམས་ཀྱི་ནི་དབྱིངས་དག་ལ། །ཆོས་ཀྱི་འདུ་ཤེས་ཅུང་ཟད་མེད། །ཆོས་རྣམས་དང་ནི་ཆོས་ཀྱི་
དབྱིངས། །འདི་གཉིས་ལ་ཡང་མཚན་མ་མེད། །ཆོས་རྣམས་མཚན་མ་སྤངས་པས་ན། །ཆོས་ཀྱི་དབྱིངས་ཞེས་བཤད་པ་ཡིན། །ཆོས་ཀྱི་དབྱིངས་ཞེས་གང་བཤད་པ། །དབྱིངས་མེད་དབྱིངས་མེད་པ་ཡང་མིན། །ཆོས་ཀྱི་དབྱིངས་ཞེས་རབ་བསྟན་ཀྱང་། །ཡང་དག་པར་ནི་དམིགས་སུ་
མེད། །དོན་འདི་རབ་ཏུ་སེམས་པའི་ཚེ། །དམིགས་སུ་མེད་པར་མི་སེམས་ཤིང་། །རྣམ་རྟོག་རྣམས་ནི་སྤངས་བའི་ཕྱིར། །ཆོས་ཀྱི་སྣང་ཆེན་ཐོབ་པར་འགྱུར། །ཆོས་རྣམས་རང་བཞིན་མེད་པའི་ཕྱིར། །སྣང་བ་ལ་ཡང་རང་བཞིན་མེད། །དེ་ལྟར་སོ་སོར་རྟོག་པའི་ཕྱིར། །ཆོས་ཀྱི་སྣང་བ་ཐོབ་པ་ཡིན། །
རྟོག་མེད་ཡེ་ཤེས་མི་མཐོང་ཞིང་། །ལྟ་བ་འདི་ཡང་མི་མཐོང་བ། །ཆོས་རྣམས་མི་བདེན་མཐོང་བའི་ཕྱིར། །འདི་ལ་རྟོག་པར་བྱེད་ཅེས་བསྟན། །ཆོས་ཀྱི་སྣང་བ་བསམ་མི་ཁྱབ། །མཐའ་མེད་ཅིང་ནི་ཚད་ཀྱང་མེད། །ཆོས་རྣམས་སྟོང་པར་མཐོང་བས་ན། །རྣམ་པར་མི་རྟོག་པ་ཞེས་བཤད། །ཆོས་རྣམས་
དང་ནི་མཚན་ཉིད་རྣམས། །རྟག་ཏུ་ཐོབ་དང་འཇུག་མེད་པའི། །རྣམ་དག་ཆོས་སྒྲ་འདི་ཐོས་ན། །དགའ་བ་ཆེན་པོ་རབ་ཏུ་བསྐྱེད། །གལ་ཏེ་ཆོས་ནི་སྐྱེ་མེད་དང་། །རྟག་ཏུ་རྣམ་རྟོག་མེད་པ་ཡི། །རྣམ་དག་ཆོས་སྒྲ་འདི་ཐོས་ནས། །རབ་དབེན་བདེ་བ་ཐོབ་པར་འགྱུར། །གལ་ཏེ་མ་འོངས་དུས་ཀྱི་ཚེ། །བླ་མེད་
ཆོས་ནི་ཐོས་གྱུར་ན། །སེམས་ཅན་དེ་དག་ཡུན་རིང་ནས། །ཡོན་ཏན་བསགས་པ་བཤད་པར་བྱ། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་འདི་ཐོས་གྱུར་ན། །དེ་ནི་ཡང་དག་ཆོས་འདི་ལ། །མྱུར་བ་ཁོ་ནར་གཞོལ་བར་འགྱུར།། །།བམ་པོ་ལྔ་པ།

གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དེ་ལྟར་ཆོས་ཐམས་ཅད་ལ་སོ་སོར་རབ་ཏུ་རྟོག་པར་བྱེད་པའི་ཚེ་ཆོས་རྣམས་ལ་ཆོས་ཀྱི་སྣང་བ་ཐོབ་པས་སྟོང་པ་ཉིད་ལ་སྟོང་པ་ཉིད་དུ་མི་བལྟའོ། །སྟོང་པ་ཉིད་ལས་ལོགས་ཤིག་ན་ཡང་སྟོང་པ་ཉིད་དུ་མི་
བལྟའོ། །ཆོས་འགའ་ཙམ་ཡང་སྟོང་པ་ཉིད་དང་མཚུངས་པར་ལྡན་པ་འམ། མཚུངས་པར་མི་ལྡན་པར་ཡང་དག་པར་རྗེས་སུ་མི་བལྟའོ། །སྟོང་པ་ཉིད་ཀྱིས་སྟོང་པ་ཉིད་སྟོང་པ་འམ་མི་སྟོང་པར་ཡང་ཡང་དག་པར་རྗེས་སུ་མི་བལྟའོ། །ལྟ་བ་ཉིད་ཀྱིས་ཆོས་ཐམས་ཅད་ལ་ལྟ་བར་ཡང་མི་བྱེད་དོ། །དེ་
ལྟར་ལྟ་བའི་ཚེ་མཚན་མ་མེད་པ་ལ་མཚན་མ་མེད་པར་ཡང་དག་པར་རྗེས་སུ་མི་བལྟའོ། །མཚན་མ་མེད་པ་ལས་ལོགས་ཤིག་ན་ཡང་མཚན་མ་མེད་པར་ཡང་དག་པར་རྗེས་སུ་མི་བལྟའོ། །ཆོས་འགའ་ཙམ་ཡང་མཚན་མ་མེད་པ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་དག་པར་རྗེས་སུ་
མི་བལྟའོ། །མཚན་མ་མེད་པས་མཚན་མ་མེད་པར་ཡང་དག་པར་རྗེས་སུ་མི་བལྟའོ། །མཚན་མ་དང་བཅས་པས་མཚན་མ་དང་བཅས་པའི་ལྟ་བ་དང་། མཚན་མ་མེད་པའི་ལྟ་བ་དང་། མཚན་མ་མེད་པ་མ་ཡིན་པ་ཡང་མ་ཡིན་པའི་ལྟ་བར་ཡང་དག་པར་རྗེས་སུ་ལྟ་བར་མི་བྱེད་དེ། སྐྱེ་བ་མེད་པ་དང་། བྱེད་པ་
མེད་པ་ལ་ཡང་དེ་བཞིན་ནོ། །ཟད་པ་ལ་ཡང་ཟད་པར་ཡང་དག་པར་རྗེས་སུ་མི་བལྟའོ། །ཟད་པ་ལས་ལོགས་ཤིག་ན་ཡང་ཟད་པར་ཡང་དག་པར་རྗེས་སུ་མི་བལྟའོ། །ཆོས་འགའ་ཙམ་ཡང་ཟད་པ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་ཡང་དག་པར་རྗེས་སུ་མི་བལྟའོ། །ཟད་པས་
ཟད་པར་ཡང་དག་པར་རྗེས་སུ་མི་བལྟའོ། །ཟད་པ་ལ་ཟད་པ་མེད་པར་ཡང་ཡང་དག་པར་རྗེས་སུ་མི་བལྟའོ། །ཟད་པ་ཡང་མ་ཡིན། ཟད་པ་མེད་པ་ཡང་མ་ཡིན་པར་ཡང་དག་པར་རྗེས་སུ་མི་བལྟའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་ལྟ་བའི་ཚེ་ཆོས་ཅུང་ཟད་ཙམ་ཡང་བལྟར་ཡོད་
པ་འམ། བལྟར་མེད་པ་འམ། བསྟན་དུ་ཡོད་པ་འམ། བསྟན་དུ་མེད་པ་འམ། འཇུག་ཏུ་རུང་བ་འམ། འཇུག་ཏུ་མི་རུང་བ་འམ། རྟོགས་པར་བྱར་རུང་བ་འམ། རྟོགས་པར་བྱར་མི་རུང་བ་ཞེས་བྱ་བ་གང་ཡང་མི་དམིགས་ཏེ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་

རྣམས་ཀྱི་ལམ་འདི་ལ་གནས་པའི་ཆོས་ཀྱི་སྣང་བ་ཆེན་པོ་ཞེས་བྱའོ། །ཆོས་ཀྱི་སྣང་བ་ཐོབ་པའི་ཕྱིར་ཆོས་ཐམས་ཅད་ལ་མཐའ་ཅི་ཡང་མེད་པར་མཐོང་ཞིང་མཐའ་དང་དབུས་ལ་ཡང་མངོན་པར་ཞེན་པར་མི་བྱེད་དོ། །མངོན་པར་ཞེན་པ་མེད་པའི་ཕྱིར་སངས་རྒྱས་ཀྱི་ཆོས་ལ་ཡང་རབ་ཏུ་གཞོལ་བར་འགྱུར་
རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། སྟོང་པ་ཉིད་ལ་སྟོང་མི་ལྟ། །སྟོང་ལས་གུད་ན་སྟོང་མི་ལྟ། །དེ་ལྟ་བུར་ནི་གང་ལྟ་བ། །སྟོང་པ་མཐོང་བ་ཞེས་བྱའོ། །ཆོས་འགའ་ལ་ཡང་མི་གནས་ཤིང་། །ཆོས་འགའ་ཙམ་ཡང་སྟོང་དེ་དང་། །མཚུངས་པར་ལྡན་དང་
མཚུངས་མི་ལྡན། །གང་ཡང་དམིགས་པར་མི་བྱེད་དོ། །སྟོང་པ་ཉིད་ནི་རང་བཞིན་སྟོང་། །སྟོང་པ་ཉིད་ལ་འཛིན་མི་བྱེད། །ཡོངས་སུ་འཛིན་པ་མེད་པའི་ཕྱིར། །ཆོས་རྣམས་ཐམས་ཅད་ཤེས་པར་འགྱུར། །ལྟ་བ་དག་ལ་ལེན་མེད་ཅིང་། །སོ་སོར་རྟོག་ལ་འཛིན་མི་བྱེད། །ལྟ་དང་རྟོག་པ་རབ་ཤེས་པས། །
དེ་གཉིས་ལེན་པར་མི་བྱེད་དོ། །ལྟ་བ་དག་ནི་རྣམ་དག་ཅིང་། །རྟོག་པ་དག་ནི་མི་དམིགས་པར། །དེ་ལྟར་ཆོས་རྣམས་གང་རྟོག་པ། །མཐར་ནི་གང་ཡང་འཛིན་མི་བྱེད། །མཚན་མ་མེད་པར་མི་ལྟ་ཞིང་། །མཚན་མ་མེད་པར་རྟོག་མི་བྱེད། །མཚན་མ་མེད་པ་དག་ལ་ཡང་། །མཚན་མ་མེད་པར་སྒོམ་
མི་བྱེད། །མཚན་མ་མེད་ཅིང་བསྟན་དུ་མེད། །སྨོན་པ་མེད་ཅིང་མི་དམིགས་པས། །ཆོས་ཀྱི་ངོ་བོ་འགའ་ཙམ་ཡང་། །བསྒོམ་པར་བྱ་བ་ཅི་ཡང་མེད། །མཚན་མ་མེད་པ་མི་སེམས་ཤིང་། །སྨོན་པ་མེད་པའང་སེམས་མི་བྱེད། །དེ་ལྟར་རྣམ་པར་མི་རྟོག་པས། །མཚན་དང་མཚན་མེད་རབ་རྟོགས་
འགྱུར། །མཚན་མ་མེད་ལ་མི་གཞོལ་ཞིང་། །མཚན་མ་མེད་ལ་འཇུག་མི་བྱེད། །གཞོལ་དང་འཇུག་པ་མེད་པས་ན། །རབ་རྟོགས་མཉམ་ཉིད་གནས་པར་འགྱུར། །བློ་ལྡན་མཚན་མ་མི་མཐོང་ཞིང་། །མཚན་མ་མེད་པའང་མཐོང་མི་འགྱུར། །གང་ཞིག་མི་མཐོང་མི་སེམས་པ། །ཐམས་ཅད་མེད་པར་རབ་ཏུ་
རྟོགས། །གང་ཞིག་རྟག་ཏུ་འདི་སྙམ་དུ། །བསམ་མེད་བརྟན་མེད་གང་སེམས་པ། །བསམ་དང་བརྟན་པ་དག་ལ་ནི། །མཉམ་དང་མཉམ་པར་རབ་ཏུ་གནས། །མཚན་མ་མེད་པ་ཇི་ལྟ་བ། །བྱས་པ་མེད་པའང་དེ་བཞིན་ཏེ། །རབ་ཏུ་བསྟན་ཀྱང་བསྟན་དུ་མེད། །བསམས་ནས་རབ་ཏུ་རྟོགས་ཕྱིར་རོ། །སྐྱེ་བ་མེད་

པའང་དེ་བཞིན་དུ། །ཆོས་འགའ་ཙམ་ཡང་སྐྱེ་བ་མེད། །རང་བཞིན་ཅི་ཡང་མེད་པས་ན། །ངོ་བོ་མེད་པར་རབ་ཏུ་རྟོགས། །སྐྱེ་བ་དང་ནི་སྐྱེ་བ་མེད། །བྱེད་བཅས་བྱེད་པ་མེད་པ་ཡང་། །གཟུང་བར་བྱ་བ་ཅུང་ཟད་མེད། །བློ་ལྡན་རྣམ་པར་རྟོག་མི་བྱེད། །དྲན་དང་ཤེས་རབ་གཡོ་བ་མེད། །
རྣམ་འབྱེད་མེད་པར་རབ་རྟོགས་པས། །ངོ་བོ་ཡོད་དང་ངོ་བོ་མེད། །མཉམ་པ་ངོ་བོ་རྣམས་དང་བྲལ། །ཟད་པ་ལ་ཡང་ཟད་མི་ལྟ། །ཟད་པ་མེད་པར་ཡང་མི་ལྟ། །ལྟ་བ་མེད་པར་རབ་རྟོགས་པས། །ཟད་པའི་ཡེ་ཤེས་གོང་ན་མེད། །ཟད་པ་དང་ནི་མི་ཟད་པ། །གཉི་ག་ལ་ཡང་རྟོག་མི་བྱེད། །རྣམ་པར་རྟོག་པ་མེད་
པའི་ཕྱིར། །བསམ་མེད་མཉམ་པར་རབ་ཏུ་གནས། །ཟད་པ་ལ་ཡང་ཟད་ལྟ་མེད། །ཟད་མེད་ལྟ་བའང་ཡོད་མ་ཡིན། །དེ་ལྟར་ལྟ་བ་ཟད་པའི་ཕྱིར། །ཟད་དང་མ་ཟད་འཛིན་མི་བྱེད། །གལ་ཏེ་ཟད་དང་མ་ཟད་ལ། །ཐམས་ཅད་འཛིན་པར་མི་བྱེད་ན། །ཡོངས་སུ་འཛིན་པ་མེད་པའི་ཕྱིར། །ཟད་པའི་ཡེ་ཤེས་
གསལ་རྟོགས་འགྱུར། །ཟད་པའི་ཡེ་ཤེས་སྤྱོད་ཡུལ་ནི། །འཇིགས་པ་མེད་པས་འཐོབ་པར་འགྱུར། །ཆོས་འདི་རབ་ཏུ་རྟོགས་པའི་ཕྱིར། །བྱང་ཆུབ་སེམས་དཔའ་བདེ་བར་གནས། །དེ་ནས་འཁོར་འདུས་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ཞེས་བྱ་བ་འདུས་པར་གྱུར་པ་
དེ་འདུག་པའི་སྟན་ལས་ལངས་ནས། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ནི་ཆོས་རྣམས་ཀྱི་ཡེ་ཤེས་ཡོངས་སུ་བསྡུ་བར་འཚལ་བའི་སླད་དུ་བསྒྲུབ་པ་བསྐྱེད་པས་ཆོས་ཀྱི་སྣང་བ་ཆེན་པོ་དེ་ཐོབ་པར་འགྱུར་བ་ལགས་ཀྱིས་ཀྱང་ཆོས་ཀྱི་སྣང་བ་དེ་ལ་ལྟ་བ་ཅུང་ཟད་ཙམ་ཡང་མ་མཆིས་ཏེ། ཆོས་ཀྱི་སྣང་བའི་དབང་གིས་འདུས་བྱས་དང་འདུས་མ་བྱས་དང་། འཇིག་རྟེན་པ་དང་། འཇིག་རྟེན་
ལས་འདས་པ་དང་། རྗེས་སུ་འཐུན་པ་དང་། རྗེས་སུ་མི་འཐུན་པ་དང་། སྤྲོས་པ་དང་བཅས་པ་དང་། སྤྲོས་པ་མ་མཆིས་པའི་ཆོས་ཐམས་ཅད་རྟོགས་པར་གྱུར་པ་ལགས་ན་བཅོམ་ལྡན་འདས་ཆོས་ཀྱི་སྣང་བ་དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྒྲུབ་པ་མ་མཆིས་པར་མཐོང་བར་འགྱུར་བ་ལྟ་མཆིས་

ལགས་སམ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བསྒྲུབ་པ་ཅུང་ཟད་ཀྱང་མེད། ཁྱད་པར་དུ་བསྒྲུབ་པ་ཡང་མེད། བསྒྲུབ་
པའི་རྗེས་སུ་འབྲང་བ་ཡང་མེད། ཀུན་ཏུ་ཁྱབ་པར་བསྒྲུབ་པ་ཡང་མེད་པར་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་ཐོབ་པར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཉིད་ཀྱང་དམིགས་སུ་མེད་ཅིང་མཐོང་བར་མི་འགྱུར་ན་བྱང་ཆུབ་སེམས་དཔའི་སྤྱོད་པ་མི་དམིགས་ཤིང་མཐོང་བར་མི་འགྱུར་བ་
ལྟ་སྨོས་ཀྱང་ཅི་དགོས་ཏེ། དེའི་ཕྱིར་བསྐལ་པ་དུ་མར་མངོན་པར་བསྒྲུབས་པས་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་འཐོབ་པར་འགྱུར་བར་ལྟ་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་ཐམས་ཅད་ཉེ་བར་ཞི་ཞིང་སྤྱོད་པ་རྣམ་པར་དག་པར་གྱུར་པས་ན་ཆོས་ཀྱི་སྣང་བ་འཐོབ་པ་
ཡིན་ནོ། །ཆོས་ཀྱི་སྣང་བའི་སྤྱོད་པ་ནི་གྲངས་ཀྱི་ཚད་དང་ལྡན་པའི་སྤྱོད་པ་ཡང་མ་ཡིན། མཚན་མའི་རྗེས་སུ་འབྲང་བའི་སྤྱོད་པ་ཡང་མ་ཡིན་ན་གང་ལས་སྤྱོད་པ་ཐམས་ཅད་ཅེས་ཉེ་བར་འདོགས། མངོན་པར་བསྒྲུབ་པ་ཞེས་བྱ་བ་ནི་ཉེ་བར་འདོད་པའི་སྤྱོད་པ་ཡང་མ་ཡིན་ལ། དེ་དང་བྲལ་བ་ཡང་མ་
ཡིན་ནོ། །བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་འདི་ལ་གནས་པའི་ཚེ་སྤྱོད་པ་ཐམས་ཅད་སྤོང་བར་བྱེད་པས་ཡོངས་སུ་འཛིན་པར་མི་བྱེད་དོ། །སྤྱོད་པ་འདི་དང་ལྡན་པ་ནི་གྲངས་ཀྱི་ཚད་དང་ལྡན་པའི་སྤྱོད་པ་ཡང་མ་ཡིན། མཚན་མའི་རྗེས་སུ་འབྲང་
བའི་སྤྱོད་པ་ཡང་མ་ཡིན་པས་མཚན་མ་མེད་པ་དང་སྤྱོད་པ་མེད་པས་ཆོས་ཀྱི་སྣང་བ་ཆེན་པོ་འདི་ཐོབ་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་སྤྱོད་མེད་ལ། །སྤྱོད་པ་དག་ནི་ཅི་ཡང་མེད། །སྤྱོད་པ་མེད་པ་གང་ཐོབ་པ། །
འཇིགས་པ་མེད་པས་གཞོལ་བར་བྱེད། །ཁྱད་པར་བསྒྲུབ་པ་ཡོད་མ་ཡིན། །ཀུན་ཏུ་བསྒྲུབ་པ་ཅི་ཡང་མེད། །སྤྱོད་མེད་ཁྱད་པར་བསྒྲུབ་མེད་པས། །མཉམ་པ་ཉིད་དུ་གཞོལ་བར་བྱེད། །སྤྱོད་པ་འདི་ནི་བསྟན་དུ་མེད། །མཚན་མ་རྣམས་ཀྱང་ཡོད་མ་ཡིན། །སྤྱོད་དང་མཚན་མ་མེད་གྱུར་པ། །འདི་

ནི་སྤྱོད་པའི་མཚན་ཉིད་ཡིན། །བྱང་ཆུབ་སེམས་དཔའི་མཚན་མེད་སྤྱོད། །དངོས་པོ་རྣམས་ལ་ཡོངས་མི་གནས། །སྤྱོད་མེད་གནས་པ་མེད་པས་ན། །བློ་ལྡན་མངོན་པར་སྒྲུབ་པར་བྱེད། །སྤྱོད་པ་མེད་པས་གཡོ་བ་མེད། །སྤྱོད་པ་འདི་ནི་བླ་ན་མེད། །གཡོ་མེད་སྤྱོད་ལ་གང་སྤྱོད་
པ། །འབད་པས་རབ་ཏུ་གཞོལ་བར་བྱེད། །བྱང་ཆུབ་སེམས་དཔའ་དམིགས་སུ་མེད། །སྤྱོད་པ་དག་ནི་བལྟར་མི་མཐོང་། །གཟུགས་ཀྱི་ལུས་ཀྱང་མི་མཐོང་བ། །འདི་ནི་ལེགས་པར་རྗེས་འབྲང་ཡིན། །གཟུགས་མེད་ཁ་དོག་མཚན་མ་མེད། །དེ་ཕྱིར་སྤྱོད་པ་ཐམས་ཅད་མེད། །ལྟ་བ་
དག་ལ་འཛིན་པ་མེད། །འདི་ནི་སྤྱོད་པ་དཔེ་མེད་ཡིན། །བྱང་ཆུབ་སེམས་དཔའི་བླ་མེད་སྤྱོད། །གདགས་པ་དག་ཏུ་མི་ལྟུང་ཞིང་། །རྣམ་པར་འགྱུར་བའང་མེད་པས་ན། །དེ་ན་འཛིན་པ་ཅི་ཡང་མེད། །སྤྱོད་ལ་གདགས་པ་མེད་པའི་ཕྱིར། །བླ་མེད་སྤྱོད་པ་ཞེས་བྱའོ། །གལ་ཏེ་སྤྱོད་པ་
འདི་ཐོབ་ན། །ཆོས་ཀྱི་སྣང་ཆེན་འཐོབ་པར་འགྱུར། །བྱང་ཆུབ་སེམས་དཔའ་སྤྱོད་གྲུབ་པ། །ཚིག་མེད་བསྐལ་པའི་ཚད་ཀྱང་མེད། །བསྐལ་པ་ཚད་མེད་སྙེད་དུ་ཡང་། །སྤྱོད་པ་རྣམས་ནི་སྟོན་པར་བྱེད། །བྱང་ཆུབ་སེམས་དཔའི་སྤྱོད་གཙང་བས། །རྣམ་པར་དག་ལ་རབ་ཏུ་གནས། །སྤྱོད་པ་
ཐམས་ཅད་སྤངས་པས་ན། །གཟུང་བར་བྱ་བ་ཅི་ཡང་མེད། །བྱང་ཆུབ་སེམས་དཔའ་བཏང་སྙོམས་གནས། །སྤྱོད་པ་རྣམས་ནི་སྲུང་བར་བྱེད། །སྤྱོད་པ་ཐམས་ཅད་སྤངས་པས་ན། །བཏང་སྙོམས་ལ་ནི་རབ་ཏུ་གནས། །བྱང་ཆུབ་སེམས་དཔའི་སྤྱོད་དཔག་མེད། །མཐའ་དང་མཐའ་མེད་