Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

པར་འདོད་པ། བདེ་བར་འདོད་པ། དོན་དུ་འདོད་པ། གྲུབ་པ་དང་བདེ་བར་འདོད་པ་ཡིན་ནོ་སྙམ་དུ་སེམས་བསྐྱེད་པར་བྱའོ། །ཤ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཀྱི་སྔོན་གྱི་སྨོན་ལམ་གྱི་དབང་གིས་ངས་བཤད་དེ། རིགས་ཀྱི་བུ་འམ་རིགས་ཀྱི་བུ་
མོ་གང་དག་གིས་ཐོས་པ་དང་། གང་དག་ཐོས་པར་འགྱུར་བ་དེ་ཡང་སངས་རྒྱས་ཀྱི་མཐུ་དང་། རང་རང་གི་དགེ་བའི་རྩ་བའི་རྣམ་པར་སྨིན་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་
ཏོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་འདས་པའི་འོག་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་སུའི་མཐུས་ཐོས་པར་འགྱུར། བཅོམ་
ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་ང་འདས་པའི་འོག་ཏུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་བཅོམ་ལྡན་འདས་དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཀྱི་མཐུས་ཐོས་པར་འགྱུར་ཞིང་། ཇི་ལྟར་དམ་པའི་ཆོས་སྨྲ་བ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་
ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་སྨྲ་བར་འགྱུར་བ་དེ་ལྟར་རྒྱལ་པོ་ཆེན་པོ་བཞི་པོ་དག་དང་། ལྷའི་དབང་པོ་བརྒྱ་བྱིན་ཡང་སྤྲོ་བ་སྐྱེ་བར་འགྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཉན་པར་འགྱུར་བ་དེ་དག་གི་ལས་ཀྱི་རྣམ་པར་སྨིན་པས་ཀྱང་
རྒྱལ་པོ་ཆེན་པོ་བཞི་པོ་དག་དང་། ལྷའི་དབང་པོ་བརྒྱ་བྱིན་སྤྲོ་བ་སྐྱེ་བར་འགྱུར་རོ། །དེ་སྐད་ཅེས་བཀའ་སྩལ་བ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་ཡོན་ཏན་གྱི་ཆོས་ཆེན་པོ་དང་ལྡན་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་
ཅེས་བཀའ་སྩལ་ཏོ། །ཤ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་
ཡོན་ཏན་གྱི་ཆོས་ཆེན་པོ་དང་ལྡན་པ་ཡིན་ཏེ། ཤ་ར་དྭ་ཏིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་དག་འཇིགས་པ་འམ་སྐྲག་པར་གྱུར་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་མཚན་
ནས་བརྗོད་ན་རིགས་ཀྱི་བུ་འམ་རིགས་ཀྱི་བུ་མོ་དེ་དག་གི་འཇིགས་པ་དང་། སྐྲག་པ་དག་མེད་པར་འགྱུར་རོ། །ཤ་ར་དྭ་ཏིའི་བུ་གལ་ཏེ་ཕྱོགས་ལ་ལ་ཞིག་ཏུ་འཁོར་ལོ་དྲག་པོ་ལྟ་བུའི་སེར་བ་བབ་པར་གྱུར་ན་དེ་འབབ་པ་ན་རིགས་ཀྱི་བུ་འམ་རིགས་ཀྱི་བུ་མོ་དག་གིས་བཅོམ་ལྡན་འདས་དེ་བཞིན་

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་མཚན་ནས་བརྗོད་ཅིང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདེན་པ་དང་།
བདེན་པའི་ཚིག་གང་གིས་ཀླུ་བརྒྱ་ཕྲག་མང་པོ་དང་། ཀླུ་སྟོང་ཕྲག་མང་པོ་དང་། ཀླུ་བརྒྱ་སྟོང་ཕྲག་མང་པོ་དང་། ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྡུག་བསྔལ་བར་གྱུར་པ་དག་ཐར་བར་མཛད་ཅིང་ཐར་བར་མཛད་ནས་ཀྱང་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོས་ཏེ།
དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་གང་གི་ཚེ་འཇིག་རྟེན་གྱི་ཁམས་གཞན་དང་། གཞན་དག་ཏུ་ཀླུ་ཁྲོ་བོ་དག་གིས་འཁོར་ལོ་དྲག་པོ་ལྟ་བུའི་སེར་བ་འབེབས་པར་བྱེད་པས། དེ་ན་སེམས་ཅན་གང་
དག་འཇིགས་ཤིང་སྐྲག་པར་གྱུར་པ་དེ་དག་བདག་གི་མཚན་ནས་བརྗོད་པར་འགྱུར་ཞིང་དེར་བདག་གི་མཐུས་འཁོར་ལོ་དྲག་པོ་ལྟ་བུའི་སེར་བ་དེ་དག་ཉེ་བར་ཞི་བར་གྱུར་ཅིག་ཅེས་ཡོངས་སུ་བསྔོས་པའི་བདེན་པ་དང་། བདེན་པའི་ཚིག་དེས་བདག་ཅག་ལ་འཁོར་ལོ་དྲག་པོ་ལྟ་བུའི་སེར་བ་
འབབ་པ་འདི་དག་ཉེ་བར་ཞི་བར་གྱུར་ཅིག་ཅེས་བརྗོད་པ་ཙམ་གྱིས་ན་ཀླུ་རྣམས་ཀྱི་འཁོར་ལོ་དྲག་པོ་ལྟ་བུའི་སེར་བ་དེ་དག་ཉེ་བར་ཞི་བར་འགྱུར་ཏེ། ཤ་ར་དྭ་ཏིའི་བུ་སེམས་ཅན་དེ་དག་གི་སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །ཤ་ར་དྭ་ཏིའི་བུ་གཞན་ཡང་རིགས་ཀྱི་
བུ་འམ་རིགས་ཀྱི་བུ་མོ་དག་འཇིགས་པ་འམ། སྐྲག་པ་འམ། ཡམས་ཀྱི་ནད་དམ། གནོད་པ་བྱུང་བར་གྱུར་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་རྗེས་སུ་དྲན་པར་བྱ་ཞིང་། བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདེན་པ་དང་། བདེན་པའི་ཚིག་གང་གིས་དམ་བཅས་པ་དང་། ཚིག་བརྗོད་པ་གང་ཡིན་པའི་དམ་བཅས་པ་དང་། ཚིག་བརྗོད་པ་དེ་དག་ཐམས་ཅད་

ཡོངས་སུ་རྫོགས་པར་གྱུར་ཅིང་དམ་བཅས་པ་དང་། ཚིག་བརྗོད་པ་དེ་དག་ཐམས་ཅད་ཀྱི་ཕ་རོལ་ཏུ་སོན་པའི་བདེན་པ་དང་བདེན་པའི་ཚིག་དེས་འཇིགས་པ་དང་། སྐྲག་པ་དང་། ཡམས་ཀྱི་ནད་དང་། གནོད་པ་འདི་དག་ནུབ་པར་གྱུར་ཅིག་ཅེས་བརྗོད་པ་ཙམ་གྱིས་འཇིགས་
པ་དེ་དག་དང་། སྐྲག་པ་དེ་དག་དང་། ཡམས་ཀྱི་ནད་དེ་དག་དང་། གནོད་པ་དེ་དག་ནུབ་པར་འགྱུར་ཏེ། ཤ་ར་དྭ་ཏིའི་བུ་སེམས་ཅན་དེ་དག་གི་སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་
ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་གྱི། གཉིས་ནི་མ་ལགས་པས་བཙུན་པ་བཅོམ་ལྡན་འདས་དེ་ལྟ་
ལགས་པས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་
ཅེས་བཀའ་སྩལ་ཏོ། །ཤ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཇི་ལྟར་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཤ་

ར་དྭ་ཏིའི་བུ་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པས་སངས་རྒྱས་ཀྱི་ཞིང་ཡོངས་སུ་སྦྱངས་པ་དང་། སངས་རྒྱས་ཀྱི་ཞིང་ཡོངས་སུ་བཟུང་བ་དེ་ལྟར་གང་གིས་སངས་རྒྱས་ཀྱི་ཞིང་ཡོངས་སུ་སྦྱོང་བ་དང་།
དེ་ལྟར་སངས་རྒྱས་ཀྱི་ཞིང་ཡོངས་སུ་འཛིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཉུང་སྟེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་སངས་རྒྱས་
བཅོམ་ལྡན་འདས་དེ་དག་གི་སངས་རྒྱས་པ་ཉིད་ཀྱང་མཚུངས། ཐམས་ཅད་མཁྱེན་པ་ཉིད་ཀྱང་མཚུངས། ཁ་དོག་ཀྱང་མཚུངས། རྟགས་ཀྱང་མཚུངས། རིགས་ཀྱང་མཚུངས། སངས་རྒྱས་ཀྱི་ཞིང་ཡོངས་སུ་འཛིན་པར་ཡང་མཚུངས། ཉན་ཐོས་ཀྱི་དགེ་འདུན་གྱི་
འདུས་པ་ཡང་མཚུངས། དེ་དག་གི་རྣམ་པར་གྲོལ་བ་ཡང་མཚུངས་མོད་ཀྱི། གཞན་དུ་ན་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཐ་དད་པར་འགྱུར་བ་དང་། སེང་གེའི་ཁྲི་ཐ་དད་པ་དང་། པད་མའི་དཀྱིལ་འཁོར་ཐ་དད་པར་འགྱུར་བ་
འབའ་ཤིག་ཏུ་ཟད་དོ། །དེ་ནས་འདོད་པ་ན་སྤྱོད་པའི་ལྷ་རྣམས་དང་། ཚངས་རིས་ཀྱི་ལྷ་རྣམས་ཤར་ཕྱོགས་སུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཕྱག་
འཚལ་ནས་འདི་སྐད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གང་འཇིག་རྟེན་གྱི་ཁམས་གཞན་ན་བཞུགས་པའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་འདིར་བཤད་པའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་

པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཕྱག་འཚལ་ལོ། །ཕྱག་འཚལ་ལོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་འདོད་པ་ན་སྤྱོད་པའི་ལྷ་རྣམས་དང་། ཚངས་རིས་ཀྱི་ལྷ་དེ་དག་གིས་ལྷའི་མེ་ཏོག་མན་དཱ་ར་
བ་དང་། མན་དཱ་ར་བ་ཆེན་པོ་དང་། ལྷའི་སྤོས་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །མངོན་པར་གཏོར་མ་
ཐག་ཏུ་སངས་རྒྱས་ཀྱི་མཐུས་མེ་ཏོག་དེ་དག་དང་། སྤོས་དེ་དག་བཅོམ་ལྡན་འདས་ཀྱི་སྟེང་གི་ནམ་མཁའ་ལ་མེ་ཏོག་གི་གདུགས་ཆེན་པོ་གནས་པར་གྱུར་ཏོ། །གཞན་ཡང་འདོད་པ་ན་སྤྱོད་པའི་ལྷ་རྣམས་དང་། ཚངས་རིས་ཀྱི་ལྷ་དེ་དག་གིས་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་མཆོད་པ་བྱ་བའི་ཕྱིར། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེ་ལོགས་སུ་མེ་ཏོག་དག་གིས་གཏོར་
བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བདག་གིས་སངས་རྒྱས་ཀྱི་མཐུས་འཁོར་བཞི་པོ་དེ་དག་དང་། འདོད་པ་ན་སྤྱོད་པའི་ལྷ་འདི་དག་དང་། ཚངས་རིས་ཀྱི་ལྷ་འདི་དག་གིས། བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་མཐོང་བར་འགྱུར་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་གསོལ་བ་གདབ་པར་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་གྱི་
སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས། རྫུ་འཕྲུལ་གྱིས་ནམ་མཁའ་ལ་མངོན་པར་འཕགས་ཏེ། བར་སྣང་ལ་སྐྱིལ་མོ་ཀྲུང་བཅས་ནས་བཞུགས་པར་གྱུར་ཏོ། །སངས་རྒྱས་ཀྱི་མཐུས་འཁོར་བཞི་པོ་དེ་དག་ཀྱང་སྟེང་གི་ནམ་མཁའ་ལ་མངོན་

པར་འཕགས་ནས་བར་སྣང་ལ་འཁོད་པར་གྱུར་ཏོ། །སངས་རྒྱས་ཀྱི་མཐུས་འདོད་པ་ན་སྤྱོད་པའི་ལྷ་དེ་དག་དང་། ཚངས་རིས་ཀྱི་ལྷ་དེ་དག་ཀྱང་སྟེང་གི་ནམ་མཁའ་ལ་མངོན་པར་འཕགས་ནས་བར་སྣང་ལ་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ། འདི་ལྟ་
བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དེ། །དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས། འཁོར་བཞི་པོ་དེ་དག་དང་། འདོད་པ་ན་སྤྱོད་པའི་ལྷ་དེ་དག་དང་། ལྷའི་དབང་པོ་བརྒྱ་བྱིན་དང་། ཚངས་རིས་ཀྱི་ལྷ་དེ་དག་གིས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཉན་ཐོས་ཀྱི་དགེ་འདུན་དང་བཅས་པ་དང་། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང་བཅས་པ་དེ་དང་། སངས་རྒྱས་ཀྱི་ཞིང་དེ་ཡང་མཐོང་བར་
གྱུར་ཏོ། །མཐོང་ནས་ཀྱང་དེ་དག་ཐམས་ཅད་པུས་མོ་གཡས་པའི་ལྷ་ང་སྟེང་གི་བར་སྣང་ལ་བཙུགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཕྱག་འཚལ་བར་གྱུར་ཏོ། །དེ་ནས་འཁོར་བཞི་པོ་དེ་དག་གིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་གི་མི་རྣམས་མཐོང་བ་དང་། འདི་སྙམ་དུ་སེམས་ཏེ། འདི་ལྟར་ལྷའི་ཁ་དོག་དང་། མཚན་མ་དང་། དབྱིབས་དང་ལྡན་པ་འདི་དག་ཅི་སུམ་ཅུ་རྩ་གསུམ་གྱི་ལྷའི་རིས་ནས་སུམ་ཅུ་རྩ་གསུམ་པའི་ལྷ་རྣམས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་ལྷགས་པའི་ལྷ་རྣམས་ཡིན་ནམ། འོན་ཏེ་འདི་དག་མ་ཡིན་སྙམ་མོ། །

དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། འདི་དག་ནི་ལྷ་ཡིན་ཏེ། དམ་པའི་ཆོས་མཉན་པའི་ཕྱིར་མིའི་ཆ་ལུགས་དང་རྟགས་འཛིན་ཅིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་མི་འཁྲུགས་པའི་སྤྱན་སྔ་ན་འདུག་གོ །དེ་ཅིའི་ཕྱིར་ཞེ་ན། བདག་གིས་སྔོན་ཆད་མི་རྣམས་ལ་འདི་ལྟ་བུའི་མཛེས་པ་དང་། དཔལ་དང་། སྐལ་བ་བཟང་པོ་ཕུན་སུམ་ཚོགས་པ་དག་ལན་འགའ་ཡང་མ་མཐོང་མ་ཐོས་པའི་ཕྱིར་རོ་སྙམ་མོ། །དེ་ནས་
བཅོམ་ལྡན་འདས་ཀྱིས་རྫུ་འཕྲུལ་གྱི་ཆོ་འཕྲུལ་དེ་དག་སླར་བསྡུས་སོ། །དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་དེ་དག་ཐེ་ཚོམ་དང་བཅས། ཡིད་གཉིས་དང་བཅས་པར་ཐུགས་སུ་
ཆུད་ནས། ལྷའི་དབང་པོ་བརྒྱ་བྱིན་ལ་བཀའ་སྩལ་པ། ཀཽ་ཤི་ཀ་གང་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེས་པའི་མི་དེ་དག་ནི་ལྷའི་ཉེ་བར་སྤྱོད་པ་དང་།
ཡོངས་སུ་སྤྱོད་པ་དག་དང་ལྡན་པ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། མི་གང་དག་གིས་སངས་རྒྱས་ཀྱང་མཐོང་ལ་ལྷའི་ལོངས་སྤྱོད་དང་། ཉེ་བར་སྤྱོད་པ་དང་ལྡན་པའི་མི་དེ་དག་ནི་ལྷའི་ཕུན་སུམ་ཚོགས་པ་དང་ལྡན་པ་སྟེ། འདོད་
པར་བྱ་བ་ཡིན་ནོ། །གང་དག་འཇིག་རྟེན་གྱི་ཁམས་གཞན་དག་དང་། སངས་རྒྱས་ཀྱི་ཞིང་གཞན་དག་ནས་ཤི་འཕོས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེ་བར་
འགྱུར་བའི་མི་དེ་དག་ཀྱང་འདོད་པར་བྱ་བ་ཡིན་ནོ་སྙམ་མོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་གང་ཁྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་

ཤཱཀྱ་ཐུབ་པ་མཐོང་ཞིང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཡང་མཐོང་བས་ན། ཀཽ་ཤི་ཀ་གལ་ཏེ་དེ་ཙམ་གྱིས་ཀྱང་ཁྱོད་ཀྱི་ལུས་ཀྱིས་རྙེད་པ་ལེགས་པར་རྙེད་པ་ཡིན་ན་ཀཽ་ཤི་ཀ་གང་ཁྱོད་སངས་རྒྱས་ཀྱི་ཞིང་དེར་
སྐྱེ་བར་འགྱུར་བའི་རྙེད་པ་དེ་ལྟ་སྨོས་ཀྱང་ཅི་དགོས། དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། གང་དག་གི་རྣ་ལམ་དུ་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གྲག་པ་དེ་དག་ཀྱང་རྙེད་པ་ལེགས་པར་རྙེད་པ་ཡིན་ན་གང་དག་སངས་རྒྱས་ཀྱི་ཞིང་དེར་སྐྱེ་བར་
འགྱུར་བ་ལྟ་སྨོས་ཀྱང་ཅི་དགོས་སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ་བྱང་ཆུབ་སེམས་དཔའི་ཐེག་པ་པའི་གང་ཟག་གང་དག་སངས་རྒྱས་ཀྱི་ཞིང་དེར་སྐྱེ་བར་འགྱུར་བ་དེ་དག་ནི་རྙེད་པ་ལེགས་པར་རྙེད་པ་ཡིན་ནོ། །
དེ་ཅིའི་ཕྱིར་ཞེ་ན། ཀཽ་ཤི་ཀ་དེ་ནི་འདི་ལྟར་ཕྱིར་མི་ལྡོག་པ་ཉིད་ལ་གནས་པར་འགྱུར་བའི་ཕྱིར་རོ། །ཀཽ་ཤི་ཀ་སྲོག་ཆགས་གང་དག་གིས་ཇི་ལྟར་སངས་རྒྱས་ཀྱི་ཞིང་དེར་སྐྱེ་བར་སེམས་བསྐྱེད་ན། དེ་དག་ནི་དེ་ལྟར་སེམས་བསྐྱེད་མ་ཐག་ཏུ་བྱང་ཆུབ་སེམས་དཔའ་སེམས་
དཔའ་ཆེན་པོ་ཕྱིར་མི་ལྡོག་པ་ཇི་ལྟ་བ་དེ་ལྟར་གཟུང་བར་བྱའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་དགེ་སློང་ལྔ་སྟོང་ཙམ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའི་ཐེག་པ་པའི་དགེ་སློང་བརྒྱད་སྟོང་
གིས་ནི་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །བྱང་ཆུབ་སེམས་དཔའི་ཐེག་པ་པའི་དགེ་སློང་མ་ལྔ་སྟོང་གིས་ཀྱང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །བྱང་ཆུབ་སེམས་དཔའི་ཐེག་པ་པའི་དགེ་བསྙེན་བརྒྱ་སྟོང་གིས་ཀྱང་སངས་རྒྱས་ཀྱི་ཞིང་
དེར་སྐྱེ་བར་སྨོན་ལམ་བཏབ་བོ། །བྱང་ཆུབ་སེམས་དཔའི་ཐེག་པ་པའི་དགེ་བསྙེན་མ་ཁྲིས་ཀྱང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །འདོད་པ་ན་སྤྱོད་པའི་ལྷའི་བུ་སྟོང་ཕྲག་རབ་ཏུ་མང་པོ་དག་གིས་ཀྱང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་

སྟེ། དེ་དག་ཐམས་ཅད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སངས་རྒྱས་ཀྱི་ཞིང་དེར་སྐྱེ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ལུང་བསྟན་ཏོ། །གང་དག་དེ་ལས་
གཞན་པའི་སེམས་ཅན་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་འདེབས་པར་འགྱུར་བ་དེ་དག་ཀྱང་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ལུང་སྟོན་པར་འགྱུར་ཏེ། ལུང་བསྟན་ནས་ཀྱང་དེ་དག་སངས་རྒྱས་ཀྱི་ཞིང་དེ་ཉིད་དུ་སྐྱེ་བར་འགྱུར་
རོ། །གཞན་ཡང་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་ཆོས་ཀྱི་རྣམ་གྲངས་འདིའི་མཐུ་དང་། བྱིན་གྱི་རླབས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་རྣམ་པ་དྲུག་ཏུ་གཡོས་ཏེ། གཡོས་རབ་ཏུ་གཡོས། ཀུན་ཏུ་རབ་ཏུ་གཡོས།
འགུལ་རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་ཞིང་འཇིག་རྟེན་དུ་སྣང་
བ་ཆེན་པོས་ཀྱང་ཁྱབ་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཤ་ར་དྭ་ཏིའི་བུ་དང་། ཚེ་དང་ལྡན་པ་ཀུན་དགའ་བོ་དང་། རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། དགེ་སློང་དེ་དག་དང་།
ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོ་ཆོས་ཀྱི་རྣམ་གྲངས་
ལེའུ་སྟོང་ཕྲག་བརྒྱ་པ་ལས་མི་འཁྲུགས་པའི་བཀོད་པའི་ལེའུ་ཞེས་བྱ་སྟེ་དྲུག་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་བ་ལས་ལེའུ་བདུན་པ་སྟེ་གོ་ཆའི་བཀོད་པ་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་ཝརྨ་བྱཱུ་ཧ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གོ་ཆའི་བཀོད་པ་བསྟན་པ་ཞེས་བྱ་བ་
ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་ཀ་ལན་ད་ཀའི་གནས་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་ཤ་སྟག་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལ་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་བསྐོར་ཅིང་གུས་པས་རིམ་གྲོ་དང་། བཀུར་སྟི་བྱས་པར་གྱུར་ཏོ། །དེའི་ཚེ་འཁོར་འདུས་པ་དེར་བྱང་ཆུབ་སེམས་དཔའ་སེམས་
དཔའ་ཆེན་པོ་བློ་གྲོས་མཐའ་ཡས་ཞེས་བྱ་བ་འདུས་པར་གྱུར་བ་དེ་འདུག་པའི་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་སྤྱི་བོ་བཏུད་དེ་ཕྱག་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ། བཅོམ་ལྡན་འདས་བདག་ལ་ཐེ་
ཚོམ་ཅུང་ཟད་ཅིག་མཆིས་ཏེ། དེ་བཞིན་གཤེགས་པ་ལ་ཞུ་བར་འཚལ་ན་ཐུགས་རྗེས་གནང་བར་མཛད་ཅིང་བདག་ལ་བཤད་དུ་གསོལ། དེ་སྐད་ཅེས་གསོལ་པ་དང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། དཔའ་ཆེན་སྐྱེས་བུ་
ཆེན་པོ་སྟེ། །འཇིག་རྟེན་དག་ན་མཚུངས་མ་མཆིས། །བདག་ནི་སེམས་ཅན་དག་གི་སླད། །ཐེ་ཚོམ་ཅུང་ཟད་ཞུ་བ་ལགས། །སེང་གེའི་གདན་ལས་མ་བཞེངས་པར། །སྐུ་ནི་ཕྱོགས་བཅུ་ཀུན་ཏུ་ཁྱབ། །ཐ་དད་སྨྲ་བ་ཐམས་ཅད་ཀྱིས། །གང་ཡང་བསྒུལ་བར་མི་འགྱུར་བར། །མཁྱེན་པའི་གཏེར་ནི་
མཐའ་མི་མངའ། །སྟོབས་རྣམས་ཀྱང་ནི་ཚད་མ་མཆིས། །བཅོམ་ལྡན་སྟོབས་ནི་རེ་རེས་ཀྱང་། །འཇིག་རྟེན་མ་ལུས་སྒྲོལ་བར་མཛད། །ཐམས་ཅད་མཁྱེན་ལ་རབ་གནས་ཤིང་། །སྟོབས་བཅུ་ལ་ནི་གང་གནས་པ། །མི་འཇིགས་སེང་གེ་ཆེན་པོ་སྟེ། །རྒྱལ་བ་བླ་ན་མེད་པའི་གཙོ། །མ་འདྲེས་ཆོས་ནི་

བཅྭ་བརྒྱད་དག །དེ་བཞིན་གཤེགས་ལ་མངའ་བས་ན། །འཇིག་རྟེན་རྣམས་ནི་གསལ་མཛད་ཅིང་། །མུ་སྟེགས་རྣམས་ནི་ཕམ་པར་མཛད། །ཆོས་རྣམས་ཐམས་ཅད་རབ་མཁྱེན་པས། །དེ་སླད་མཐའ་མེད་མཆོག་ཅེས་བགྱི། །ཉམས་པ་མི་མངའི་འདྲེན་པ་ལ། །བདག་ནི་ཐེ་
ཚོམ་ཞུ་བ་ལགས། །དྲི་མེད་མཁྱེན་པ་མཐའ་མེད་པ། །མཁྱེན་པ་མི་གཡོ་རྒྱ་མཚོ་བཞིན། །མཁྱེན་པ་ཡུལ་ལ་ཐོགས་མི་མངའ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་ལེགས་པར་བསྒོམས་པས་ན། །ལམ་ལ་ཐེ་ཚོམ་ཡོང་མི་མངའ། །བདེར་གནས་འདྲེན་པ་ཆེན་པོ་ལ། །བདག་ནི་ཐེ་ཚོམ་
ཞུ་བ་ལགས། །ཆུ་བོ་དག་ནི་རབ་རྒལ་ཅིང་། །མཚམས་སྦྱོར་འཆིང་བ་ཡོངས་བཅད་པ། །གདུག་པའི་ཟུག་རྔུ་འབྱིན་པ་ལ། །བདག་ནི་ཐེ་ཚོམ་ཞུ་བ་ལགས། །མ་རིག་སྒོ་ངའི་སྦུབས་བཅོམ་ཞིང་། །ཉོན་མོངས་གདུང་བ་ཉེར་ཞི་བ། །ཤིན་ཏུ་བསིལ་ལ་རབ་གནས་ལ། །བདག་ནི་ཐེ་ཚོམ་ཞུ་བ་ལགས། །
འཇིགས་མེད་ཡེ་ཤེས་བླ་མེད་དང་། །ཡེ་ཤེས་ཆགས་དང་ཐོགས་མེད་པ། །ཆོས་ཀྱི་རྒྱ་མཚོའི་མཁྱེན་པ་རྣམས། །དེ་བཞིན་གཤེགས་པས་མངོན་སུམ་བརྙེས། །སངས་རྒྱས་ཡོན་ཏན་ཚད་མེད་པས། །མངོན་སུམ་མཁྱེན་པ་ཡོངས་སུ་རྫོགས། །ཟག་པ་ཐམས་ཅད་ཟད་གྱུར་ཅིང་། །ཉོན་མོངས་ལྟ་བ་རབ་
བཅོམ་པ། །བཅོམ་ལྡན་ཡོན་ཏན་ཚད་མེད་པ། །མང་པོ་དག་ནི་རབ་ཏུ་བསགས། །བསམ་གྱིས་མི་ཁྱབ་ཆོས་རྗེ་ལ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཆོག་གི་མཁྱེན་པ་ཡིས། །འཇིག་རྟེན་ཀུན་ནི་གསལ་བར་མཛད། །ཆོས་ཀྱི་སྣང་བ་སྟོན་མཛད་པས། །ཡོན་ཏན་རྒྱ་མཚོ་མཐའ་
མི་མངའ། །འདྲེན་པའི་ཆོས་ཀྱི་འོད་ཟེར་གྱིས། །འཇིག་རྟེན་ཀུན་ཏུ་གསལ་བར་མཛད། །དེ་སླད་འཇིག་རྟེན་སངས་རྒྱས་ཀྱི། །ཆོས་ཀྱི་འོད་ཟེར་སྣང་བ་ལགས། །ཆོས་ཀྱི་རྒྱ་མཚོ་ཐམས་ཅད་མཁྱེན། །སྤོབས་པ་དག་ནི་བླ་ན་མེད། །བརྩོན་འགྲུས་བསམ་གྱིས་མི་ཁྱབ་ཅིང་། །རྣམ་དག་ལྟ་བ་རབ་སྤངས་པ། །
སངས་རྒྱས་སྤྱན་ནི་མཐའ་མེད་པས། །མཁྱེན་པའི་ཡུལ་ལ་མཐའ་མི་མངའ། །འཇིག་རྟེན་མཚུངས་མེད་གཙོ་བོ་ལ། །བདག་ནི་ཐེ་ཚོམ་ཞུ་བ་ལགས། །ཆོས་རྒྱལ་ཐུབ་པ་ཆེན་པོ་ཡིས། །སེམས་ཅན་ཐེ་ཚོམ་གཅོད་པར་མཛད། །འདྲེན་པ་ལ་ནི་བདག་ཞུ་ན། །མོས་པ་ཇི་བཞིན་བཀས་བཤད་

གསོལ། །ལྷ་དང་མི་ཡི་འཇིག་རྟེན་ཀུན། །ཐམས་ཅད་བདག་གིས་རབ་བརྟགས་ན། །དེ་བཞིན་གཤེགས་དང་མཚུངས་མེད་པས། །ཐམས་ཅད་མ་ལུས་གསལ་བར་མཛད། །ཡོན་ཏན་རྣམས་ལ་རབ་གནས་ཤིང་། །རྒྱན་དང་ལྡན་པའི་སྐྱེས་ཆེན་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །དྲང་
སྲོང་ནང་ན་གསལ་བ་པོ། །དཔེར་ན་གངས་རི་ཆེན་པོ་ནི། །རིན་ཆེན་ཀུན་གྱིས་བཀོད་པའི་གནས། །བཅོམ་ལྡན་ཆོས་གདན་བཞུགས་པ་ཡི། །བཀོད་པ་དག་ཀྱང་དེ་བཞིན་ནོ། །རབ་ཡངས་བརྩོན་འགྲུས་ཆེན་པོ་ཡིས། །ཡིད་འོང་སྒྲ་ནི་སྟོན་མཛད་པས། །སེམས་ཅན་གང་དག་ཐོས་གྱུར་ན། །དགེ་
བའི་རྩ་བ་རྣམ་དག་འགྱུར། །བཅོམ་ལྡན་མི་གཡོ་མཆོག་ལགས་པས། །ཆོས་ཀྱི་སྣང་བ་སྟོན་པར་མཛད། །དེས་ནི་སེམས་ཅན་ཐམས་ཅད་ཀྱི། །ཡིད་བཞིན་བློ་ནི་བདེ་བར་འགྱུར། །དུས་དང་འཁོར་ནི་རབ་མཁྱེན་ཅིང་། །གང་ཟག་མཁྱེན་པ་འདྲེན་པ་ཡིས། །ཆོས་ཀྱི་སྣང་བ་སྟོན་མཛད་པས། །
དུས་མཁྱེན་པ་ཡི་བློ་ལྡན་ལགས། །ཚངས་སྐད་བརྩོན་འགྲུས་ཆེན་པོ་ཡིས། །རྣམ་དག་གསུང་ནི་བཀས་བཤད་གསོལ། །ཆར་ཆེན་ས་ལ་བབས་པ་ལྟར། །ཆོས་ཀྱི་རླན་གྱིས་ཁྱབ་པར་མཛོད། །བཅོམ་ལྡན་འཁོར་འདུས་ནང་བཞུགས་ཏེ། །ཀུན་ཏུ་ཆོས་ཀྱི་ཆར་ཕབ་ནས། །ཆོས་འདི་
ལ་ནི་གང་རེ་བ། །སེམས་ཅན་རྣམས་ནི་ཚིམ་པར་མཛོད། །མཆོག་ཏུ་བདེ་ལ་རབ་གནས་པས། །རྒྱལ་པོ་རི་རབ་ཇི་ལྟ་བཞིན། །སེམས་ཅན་རྣམས་ལ་སྦྱིན་མཛད་ཅིང་། །མང་པོ་རྣམས་ནི་དགའ་བར་མཛོད། །དཔའ་ཆེན་རྐང་གཉིས་གཙོ་དག་ནི། །སྤྱོད་ཡུལ་བསམ་གྱིས་མི་ཁྱབ་པས། །
སེམས་ཅན་དག་ནི་ཐམས་ཅད་ཀྱིས། །གང་ཡང་འཚལ་བར་མི་འགྱུར་རོ། །སྐྱེས་བུ་ཆེན་པོ་ཚད་མ་མཆིས། །འཁོར་འདུས་འཐུན་པར་གྱུར་བ་དག །ཐུབ་པ་ཆེ་ལ་བརྟེན་ནས་ནི། །སངས་རྒྱས་སྤྱོད་ཡུལ་ཚོལ་བ་ལགས། །བདག་ནི་སངས་རྒྱས་སྤྱོད་ཡུལ་ལ། །གཞོལ་བའི་སླད་དུ་འདིར་མཆིས་
ན། །འདྲེན་པ་མཁྱེན་པ་ཐོགས་མི་མངའ། །ཇི་ལྟར་མྱུར་དུ་དབྱེ་མི་མཛད། །བདག་ནི་དེ་ཡི་མོས་པ་བཞིན། །ཞལ་དུ་བལྟས་ནས་ཞུ་ལགས་ན། །བཅོམ་ལྡན་ཐུགས་རྗེས་རབ་ཕྱེ་ནས། །ཐེ་ཚོམ་རྣམས་ནི་བཅད་དུ་གསོལ། །བླ་མེད་ཆོས་ནི་ཐོས་གྱུར་ན། །སེམས་ནི་རབ་ཏུ་དགའ་བར་འགྱུར། །ལུས་

ནི་དགའ་བས་ཁྱབ་གྱུར་ནས། །ཐེ་ཚོམ་དྲ་བ་ཆད་པར་འགྱུར། །ཆོས་ཀྱི་རྒྱལ་པོ་བླ་མེད་གཙོ། །ཐམས་ཅད་མཁྱེན་པ་འཇིགས་མི་མངའ། །ཐམས་ཅད་མཁྱེན་ཅིང་གཟིགས་པ་ལ། །བདག་ནི་ཐེ་ཚོམ་ཞུ་བ་ལགས། །སངས་རྒྱས་ཆོས་ནི་ཐམས་ཅད་ལ། །ཐེ་ཚོམ་ཅུང་ཟད་ཡོང་མི་
མངའ། །རབ་བརྩོན་འདྲེན་པ་ཆེན་པོ་ལ། །བདག་ནི་ཐེ་ཚོམ་ཞུ་བ་ལགས། །བླ་མེད་ཐེ་ཚོམ་ཆད་པ་པོ། །ཆོས་ལ་ཐེ་ཚོམ་མི་མངའ་བ། །ཡོན་ཏན་རྒྱ་མཚོ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །སྣང་བ་ཆེན་པོ་དཔག་མེད་དང་། །ཡོན་ཏན་ཆེན་པོ་དཔག་མེད་དང་། །རྣམ་དག་མཁྱེན་
པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བརྩོན་འགྲུས་མཁྱེན་པ་དཔག་མེད་དང་། །སྤྱོད་ཡུལ་མཁྱེན་པ་དཔག་མེད་དང་། །ཕན་འདོགས་མཁྱེན་པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཁྱེན་པ་མཐའ་མེད་ཀྱང་། །མཐའ་དང་མཐའ་མེད་རབ་ཏུ་སྤངས། །
ཐེ་ཚོམ་ཐམས་ཅད་གཅོད་པ་ལ། །བདག་ནི་ཐེ་ཚོམ་ཞུ་བ་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །ཐུགས་རྗེས་ཞུ་བ་གསན་དུ་གསོལ། །གནང་བར་མཛད་ན་བདག་ཞུ་ན། །ཐུབ་པ་ཆེན་པོས་བཤད་དུ་གསོལ། །ཐམས་ཅད་མཁྱེན་པ་ཤཱཀྱའི་གཙོ། །གྲགས་ཆེན་ལ་ནི་ཞུ་བ་ལགས། །
གལ་ཏེ་ཐུགས་རྗེས་གནང་གྱུར་ན། །ཐེ་ཚོམ་དྲ་བ་གཅད་དུ་གསོལ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེང་ཁྱོད་ཀྱིས་ངའི་ཞལ་དུ་བལྟས་ནས་སེམས་རྩེ་གཅིག་ཏུ་གསོལ་བ་འདེབས་པ་འདིས་དེ་
བཞིན་གཤེགས་པ་ལ་ཞུ་བ་དུ་ཞིག་ཞུ་བར་སེམས། །གལ་ཏེ་ཞུ་བ་ཡོད་ན་ངས་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བློ་གྲོས་མཐའ་ཡས་ཁྱོད་ཀྱིས་ནི། །ང་ལ་ཅི་ཞིག་འདྲི་བར་སེམས། །དེ་བཞིན་
དུ་ནི་ཞུས་ཤིག་དང་། །ངས་ནི་རབ་ཏུ་བཤད་པར་བྱ། །ཁྱོད་ཀྱིས་ཇི་སྐད་དྲིས་པ་བཞིན། །རེ་རེ་ནས་ནི་གསལ་ཕྱེ་ནས། །ཇི་ལྟར་མོས་དང་འདུན་པ་བཞིན་དུ། །མྱུར་དུ་ཕྱེ་སྟེ་རབ་བཤད་དོ། །ངས་ནི་ཁྱོད་ལ་རབ་བཤད་ཀྱིས། །ཐམས་ཅད་ཐེ་ཚོམ་མེད་པར་བྱོས། །ཇི་ལྟར་ཁྱོད་ཀྱི་འདོད་པ་བཞིན། །

ཁྱོད་ཀྱིས་ཞུས་དང་འཚམ་པར་བཤད། །དེང་ཁྱོད་དུས་བཞིན་ཞུ་བར་གྱིས། །དུས་དང་དོན་ནི་ཇི་ལྟ་བཞིན། །དུས་བཞིན་དུ་ནི་ཞུས་པའི་ཕྱིར། །ངས་ནི་ངེས་པར་རབ་བཤད་དོ། །ཇི་ལྟར་ཁྱོད་ཀྱི་མོས་པ་བཞིན། །ཞུ་བ་དག་ནི་ཞུས་ཤིག་དང་། །ངས་ནི་ཐམས་ཅད་རྗེས་འཐུན་པར། །ཁྱོད་ལ་རབ་
ཏུ་བཤད་པར་བྱ། །དེང་ཁྱོད་དུས་སུ་ཞུས་ཤིག་དང་། །ངས་ཀྱང་དུས་བཞིན་བཤད་པར་བྱ། །ཐེ་ཚོམ་དྲ་བ་བཅད་པས་ན། །ཐེ་ཚོམ་མེད་པ་འཐོབ་པར་འགྱུར། །ང་ནི་ཆོས་ཀྱི་རྗེར་གྱུར་པས། །དོན་ནི་མཐར་ཕྱིན་ཐུགས་སུ་ཆུད། །ཆོས་རྣམས་ཐམས་ཅད་དག་ལ་ཡང་། །ཐེ་ཚོམ་མེད་པ་
བརྙེས་པ་ཡིན། །ང་ནི་ཆོས་རྣམས་ཐམས་ཅད་ལས། །མངོན་སངས་རྒྱས་པས་བསམ་དཀའ་ཡིན། །སེམས་ཅན་མོས་པ་ཇི་བཞིན་དུ། །ཞུས་པ་དག་ནི་སྟོང་པར་མཛད། །ང་ནི་ཆོས་རྣམས་ཐམས་ཅད་ལ། །ཐོགས་པ་དག་ནི་མི་མངའ་བས། །དུས་བཞིན་དུ་ནི་ཞུས་པ་ལ། །མྱུར་དུ་
བཤད་པ་མཛད་པ་ཡིན། །ངས་ནི་དུས་བཞིན་རབ་བཤད་ཅིང་། །ཐེ་ཚོམ་དག་ནི་མི་མངའ་བས། །དེ་ཡི་མོས་པ་ཇི་ལྟ་བར། །དེ་ཡི་ཐེ་ཚོམ་གཅོད་པར་མཛད། །ང་ནི་རྟག་ཏུ་དུས་རྣམས་དང་། །འཁོར་འདུས་པ་ཡི་བསམ་པ་དང་། །སེམས་ཅན་དག་ནི་ཐམས་ཅད་ཀྱི། །བསམ་པ་ཐ་དད་
མཁྱེན་པ་ཡིན། །རྟག་ཏུ་སེམས་ཅན་ཐམས་ཅད་ཀྱི། །འདོད་པ་དང་ནི་འདོད་མེད་པ། །སོ་སོར་རབ་ཏུ་བརྟགས་ནས་ནི། །དེ་དག་གསལ་བར་གཟིགས་པ་ཡིན། །གལ་ཏེ་བློ་དང་ལྡན་པ་རྣམས། །ལེགས་པ་ཉིད་དུ་སྒྲུབ་བྱེད་ན། །ང་ཡི་དུས་དང་སྦྱར་ནས་ནི། །ཡང་དག་ཆོས་སྟོན་གོ་བར་མཛད། །
བློ་དང་མི་ལྡན་དེ་དག་ནི། །གཏི་མུག་དག་གིས་རྨོངས་དཀྲུགས་ཤིང་། །དེ་དག་ཤེས་རབ་སྣང་མེད་པས། །ཡང་དག་ཆོས་ལ་གུས་མི་འགྱུར། །གལ་ཏེ་གུས་པ་མེད་གྱུར་ན། །ཡང་དག་ཆོས་ནི་ཚོལ་མི་བྱེད། །ཆོས་འདི་ཐོས་པར་གྱུར་ཀྱང་ནི། །སྣང་བ་ཆེན་པོའི་ཤེས་མི་སྐྱེ། །གང་ཞིག་
ཆོས་ལ་མཁས་གྱུར་པ། །ཆོས་ལ་མོས་ཤིང་ཚོལ་བར་བྱེད། །གལ་ཏེ་ཆོས་འདི་ཐོས་གྱུར་ན། །རབ་སྣང་ཡེ་ཤེས་ཐོབ་པར་འགྱུར། །ཐེག་ཆེན་དག་ལ་མོས་པ་ནི། །མི་ཡི་གཙོ་བོ་ཚོལ་བྱེད་པས། །རབ་སྣང་ཡེ་ཤེས་ཐོབ་པར་འགྱུར། །བསམ་གྱིས་མི་ཁྱབ་གཉེར་བ་དག །བསམ་གྱིས་མི་

ཁྱབ་ཡེ་ཤེས་ལ། །གཞོལ་བ་གང་ཡིན་དེ་དག་ནི། །ཐོས་པས་ཡོངས་སུ་རྫོགས་པར་འགྱུར། །དཔག་མེད་ཡེ་ཤེས་ལ་མོས་དང་། །བསམ་གྱིས་མི་ཁྱབ་གཉེར་བ་དག །དེས་ནི་ཆོས་འདི་ཐོས་གྱུར་ན། །བླ་མེད་ཡེ་ཤེས་ཐོབ་པར་འགྱུར། །སེམས་ཅན་དག་ནི་ལ་ལ་
ཞིག །བྱང་ཆུབ་སྙིང་པོ་ཚོལ་བ་དང་། །བླ་མེད་འཁོར་ལོ་བསྐོར་འདོད་པས། །ཆོས་འདི་ཐོས་ནས་དགའ་བར་འགྱུར། །མོས་ཤིང་རབ་ཏུ་བརྩོན་པ་དང་། །ཆོས་ལ་གཙོ་བོར་གང་འཛིན་པ། །དྲི་མེད་ཆོས་ནི་ཐོས་གྱུར་ན། །མོས་ཤིང་རབ་ཏུ་དགའ་བར་འགྱུར། །གལ་ཏེ་སེམས་ཅན་ལ་ལ་དག །
ལེགས་པར་བསྒྲུབ་པར་མོས་གྱུར་པ། །ཆོས་ཀྱི་འོད་ཟེར་སྣང་བ་ཡི། །བླ་མེད་ཆོས་འདི་བསྟན་པར་བྱ། །ཁུར་ལྕི་རྣམས་ནི་ཁྱེར་བ་དང་། །ནན་ཏན་བསྒྲུབ་པ་ལ་མོས་པ། །དེས་ནི་ཆོས་འདི་ཐོས་གྱུར་ན། །དགའ་བས་ཀུན་ཏུ་ཁྱབ་པར་འགྱུར། །གང་ཞིག་རབ་ཏུ་མོས་པ་ཡིས། །དགེ་བའི་ཆོས་ནི་
སེམས་བྱེད་ན། །དེ་ལ་སྙིང་བརྩེ་བསམ་བཞག་ནས། །རབ་ཏུ་ཕྱེ་ནས་བསྟན་པར་བྱ། །ཁྱོད་ལ་སོགས་ལ་ཐུགས་བརྩེའི་ཕྱིར། །ཁྱོད་ཀྱིས་ཇི་སྐད་ཞུས་པ་བཞིན། །ངས་ཀྱང་ཡང་དག་ངེས་པར་ནི། །ཁྱོད་ཀྱི་ཐེ་ཚོམ་གཅད་པར་བྱ། །ངས་ནི་ལོ་མང་སྟོང་ཕྲག་ཏུ། །ཐབས་མཁས་དག་ནི་རབ་
བསྒོམས་ཤིང་། །ཐེ་ཚོམ་དག་ནི་བསལ་བས་ན། །ཁྱོད་ཀྱི་མོས་པ་རབ་ཏུ་མཁྱེན། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ཁྱོད་ལ་རབ་ཏུ་བསྟན་པས་ན། །ཐེ་ཚོམ་རྣམས་ནི་གཅད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །
ཇི་ལྟར་མོས་པ་བཞིན་དུ་ནི། །ངས་ནི་རབ་ཏུ་བཤད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ང་ནི་ཆོས་ལ་རབ་གནས་པས། །གཡོ་བ་མེད་པ་བརྙེས་པ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་
ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་བྱང་ཆུབ་སེམས་དཔའི་ཐེག་པ་ལ་ཐེ་ཚོམ་ཅུང་ཟད་ཅིག་མཆིས་པ་དེང་ཞུ་བ་ལགས་ན། ཇི་ལྟར་ན་སྐྱེས་བུ་དམ་པ་འཇིགས་པ་སྤངས་ནས་ཡང་དག་པར་

སེམས་རྩེ་གཅིག་ཏུ་སེམས་ཅན་རྣམས་ཀྱི་སླད་དུ་གོ་ཆ་ཆེན་པོ་བགོས་ནས་གོ་ཆ་ཆེན་པོས་རབ་ཏུ་བརྒྱན་པ་དང་། མོས་པ་ཆེན་པོ་བསྐྱེད་ནས་གུས་པར་བགྱིད་པ་དང་། བག་ཡོད་པ་དང་བཅས་པས་ཐེག་པ་ཆེན་པོ་འདི་ལ་འཚལ་ནས་ཤིན་ཏུ་རྣམ་པར་དག་པ་ཆེན་པོ་མཉམ་པ་ཉིད་ཀྱི་ཤུལ་མཐོ་
དམན་དང་། གྱོ་མོ་དང་། གསེག་མ་དང་། ཚེར་མ་དང་། མི་གཙང་བ་རྣམ་པ་སྣ་ཚོགས་ཀྱི་ལྟ་བའི་ཐིབས་པོ་རྣམས་མ་མཆིས་པ། ཟུག་རྔུ་གདུག་པའི་སྡུག་བསྔལ་དང་། ཉོན་མོངས་པའི་གཡང་ས་མ་མཆིས་པ། འཆི་བ་དང་། འཇིགས་ཤིང་སྐྲག་པ་དང་། བར་ཆད་མ་མཆིས་པ། དྲང་ཞིང་
གྱ་གྱུ་མ་མཆིས་པ་དང་། དེ་ཁོ་ན་ཉིད་ཀྱི་མཉམ་པ་ཉིད་ཀྱི་ཤུལ་དང་། ཐོགས་པ་མ་མཆིས་པའི་ཤུལ་དུ་ཞུགས་ནས་ལྟ་བའི་ཐིབས་པོ་རྣམས་བཅད་པ་དང་། དྲ་བ་ཐམས་ཅད་དྲལ་བ་དང་། མུན་ནག་རྣམས་བསལ་བ་དང་། སྲིད་པའི་མངོན་པར་ཞེན་པ་རྣམས་སྤང་བ་དང་། འདུ་འཕྲོ་བ་རྣམས་
སྤང་བའི་སླད་དུ་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བ་ལགས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདིའི་སླད་དུ་ཞུ་བ་གསོལ་བ་ལགས་སོ། །སྐྱེས་བུ་དམ་པ་ཇི་ལྟ་བུས་གོ་ཆ་ཆེན་པོ་ཇི་ལྟ་བུ་
བགོས་ན་གོ་ཆ་ཆེན་པོ་བགོས་པ་དེས་ཐེག་པ་ཆེན་པོ་ལ་འཚལ་ནས་ལམ་ཆེན་པོ་འདིས་གཞོལ་ཞིང་ཡང་དག་པར་འཇུག་པར་འགྱུར་བ་ལགས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གོ་ཆའི་བཀོད་པ་གང་ལགས་པ་དང་། ལམ་གང་ལ་གནས་པ་
དང་། ཆོས་རྣམས་ཀྱི་ཚུལ་ལ་མཁས་པ་ལ་གནས་པ་གང་ལགས་པ་བཀས་བཤད་དུ་གསོལ། ཆོས་ཀྱི་ཚུལ་ལ་མཁས་པ་ལ་རབ་ཏུ་གནས་པས་ནི་ཆོས་རྣམས་ཀྱི་ཚུལ་ལ་མཁས་པའི་སྣང་བ་སྐྱེད་པར་འགྱུར་ལ། ཆོས་ཀྱི་སྣང་བའི་དབང་གིས་ནི་གོ་ཆ་མི་སྤོང་བར་ཐེག་པ་ཆེན་པོ་ལ་འཚལ་
ནས་ནུར་བ་མ་མཆིས་པའི་བརྩོན་འགྲུས་ཀྱི་སྟོབས་དང་། བརྗེད་ངས་པ་མ་མཆིས་པའི་དབང་པོ་དང་། རྒྱུན་ཆགས་པ་མ་མཆིས་པའི་ཤེས་རབ་ཀྱི་སྟོབས་ཀྱིས་མྱུར་དུ་ཆོས་ཀྱི་དབྱིངས་ཀྱི་ཚུལ་ལ་གསལ་བར་མཁས་པ་མངོན་པར་བསྒྲུབས་ནས། བྱང་ཆུབ་ཀྱི་སྙིང་པོར་བགྲོད་པ་དང་།

ཆོས་ཀྱི་འཁོར་ལོ་བསྐོར་ནས་སེམས་ཅན་རྣམས་ལ་ཡང་དག་པར་ཆོས་སྟོན་པའི་སླད་དུ་སེམས་ཅན་ཐམས་ཅད་ཇི་ལྟར་མོས་པ་དང་། ཇི་ལྟར་གཞོལ་བ་བཞིན་དུ་མ་གྲོལ་བ་ལས་རྣམ་པར་གྲོལ་བར་འགྱུར་ལགས་སོ། །བཅོམ་ལྡན་འདས་ཐེག་པ་ཆེན་པོ་འདིས་སེམས་
ཅན་རྣམས་ལ་སྨན་པ་དང་། བདེ་བར་བགྱི་བའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདི་ཞུ་ལགས་སོ། །བཅོམ་ལྡན་འདས་དེ་བཞིན་གཤེགས་པ་ནི་ཐམས་ཅད་མཁྱེན་པ་ཐམས་ཅད་གཟིགས་པ་ལགས་ན་ཆོས་གང་གིས་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་མངོན་པར་བསྒྲུབས་པ་དང་། ཏིང་ངེ་འཛིན་ཐོབ་པའི་དབང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་མངོན་
པར་རྫོགས་པར་སངས་མ་རྒྱས་ཀྱི་བར་དུ་ཕྱིར་ལྡོག་པར་མི་འགྱུར་བ་གང་ལགས་པ་བཀས་བཤད་དུ་གསོལ། བཅོམ་ལྡན་འདས་དེ་བཞིན་གཤེགས་པའི་མཁྱེན་པ་དང་། གཟིགས་པ་ནི་ངོ་མཚར་རྨད་དུ་བྱུང་བའི་ཆོས་ཡོངས་སུ་རྫོགས་ཤིང་སེམས་ཅན་རྣམས་ཀྱི་ཤེས་རབ་ཀྱི་སྨན་
རབ་ཏུ་མཁྱེན་པ་ལགས་པས་དེའི་སླད་དུ་བདག་ཞུ་བ་གསོལ་ལགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། བྱང་ཆུབ་སེམས་དཔའ་རྣམས་ཀྱི་སླད། །སངས་རྒྱས་ཆོས་དོན་ཟབ་མོ་དག །ཐམས་ཅད་
མཁྱེན་ཅིང་གཟིགས་པ་པོ། །རྐང་གཉིས་གཙོ་ལ་བདག་ཞུ་ལགས། །ཐེག་པ་ཆེན་པོའི་རྣལ་འབྱོར་པ། །ཏིང་འཛིན་གང་གིས་གཞོལ་གྱུར་པ། །སེམས་ཅན་རྣམས་ལ་སྨན་སླད་དུ། །དེ་དག་ཞུ་བ་གསོལ་བ་ལགས། །ཇི་ལྟར་སྐྱེས་བུ་དམ་པ་ཡིས། །གོ་ཆ་དཔག་མེད་བགོ་
བར་འགྱུར། །དེ་ལྟར་གོ་ཆ་བགོས་ནས་ཀྱང་། །ཇི་ལྟར་རབ་ཏུ་གཞོལ་བར་འགྱུར། །ཇི་ལྟར་འདུན་པ་སློང་བར་འགྱུར། །ཇི་ལྟར་དེ་ལ་སྲེད་པར་འགྱུར། །ཇི་ལྟར་བརྩོན་འགྲུས་ཆེན་པོར་འགྱུར། །ཇི་ལྟར་བག་ཡོད་ལྡན་པར་འགྱུར། །ཇི་ལྟར་བྱང་ཆུབ་སེམས་དཔའ་རྣམས། །

ཐེག་ཆེན་འདི་ལ་གཞོལ་བར་བགྱི། །དེ་ལ་འཚལ་ནས་ཅི་བགྱིད་པ། །དངོས་པོ་འདི་ཡང་བཀས་བཤད་གསོལ། །ཇི་ལྟར་ཐེག་ཆེན་བཏེག་ནས་ནི། །བྱང་ཆུབ་སེམས་ལ་གཞོལ་གྱུར་པ། །འཇིག་རྟེན་འདྲེན་པའི་ཐུགས་རྗེ་ཡིས། །མྱུར་དུ་བདག་ལ་བཀས་བཤད་གསོལ། །
ཇི་ལྟར་ཡང་དག་མཉམ་ལམ་གྱིས། །མཉམ་པ་ཉིད་དུ་གཞོལ་བར་འགྱུར། །ལྟ་བ་རྣམས་ཀྱི་ཐིབས་པོ་དག །གཅོད་པར་བགྱིད་ལ་སྐྱོན་མེད་འགྱུར། །སྤྱོད་ཡུལ་དག་ནི་ཐམས་ཅད་ལས། །ཇི་ལྟར་བགྱིས་ན་འདའ་བར་འགྱུར། །ཇི་ལྟར་མཉམ་པ་ཉིད་དག་གིས། །འདོད་
ཆགས་དྲ་བ་དྲལ་བར་འགྱུར། །ཇི་ལྟར་མུན་ནག་རབ་བསལ་ནས། །ཡེ་ཤེས་སྣང་ཆེན་ཐོབ་པར་འགྱུར། །བྱང་ཆུབ་སེམས་དཔའ་དེ་དག་གིས། །ཇི་ལྟར་བགྱིས་ན་གཞོལ་བར་འགྱུར། །ཇི་ལྟར་སོ་སོར་རབ་བརྟགས་པས། །འཆིང་བ་མང་པོ་སྤོང་བར་འགྱུར། །ཇི་ལྟར་
བྱང་ཆུབ་སེམས་དཔའ་རྣམས། །འཆིང་བ་སྤངས་ནས་བདེ་བར་གནས། །ཇི་ལྟར་བྱང་ཆུབ་སེམས་དཔའ་རྣམས། །འཇིགས་པ་ཆེ་ལས་འདའ་བར་འགྱུར། །ཆོས་ཀྱི་དོན་ལ་མཁས་གྱུར་ནས། །བླ་མེད་ལ་ནི་གཞོལ་བར་འགྱུར། །བྱང་ཆུབ་སེམས་དཔའ་ཇི་ལྟ་བུའི། །
དཔག་མེད་གོ་ཆ་བགོ་བར་བགྱིད། །གོ་ཆ་དེ་དག་བགོས་ནས་ཀྱང་། །ཐེག་ཆེན་ལ་ནི་འཚལ་བར་བགྱིད། །ཇི་ལྟར་བྱང་ཆུབ་སེམས་དཔའ་རྣམས། །མཉམ་ཉིད་ལམ་ལ་གཞོལ་བར་བགྱིད། །བདག་གིས་དེང་འདིར་ཞུས་པ་འདི། །བཅོམ་ལྡན་འདས་ཀྱིས་བཀས་
བཤད་གསོལ། །བྱང་ཆུབ་སེམས་དཔའ་ཇི་ལྟ་བུར། །གོ་ཆ་བཀོད་པ་ཐོབ་འགྱུར་དང་། །བླ་མེད་ཐེག་པ་རབ་བརྒྱན་པ། །བཅོམ་ལྡན་འདས་ཀྱིས་བཀས་བཤད་གསོལ། །ལམ་འདི་ལ་ནི་གནས་པ་དང་། །ལམ་དེའི་བཀོད་པ་གང་ལགས་དང་། །ཆོས་རྣམས་ལ་ནི་མཁས་
གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཆོས་ཀྱི་དབྱིངས་ཀྱི་ཚུལ་རྣམས་དང་། །ཆོས་ལ་མཁས་པའི་སྣང་བ་དག །ཇི་ལྟ་བུར་ནི་རྟོག་གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་དེ་ཐོས་

ནས། །ཆོས་རྣམས་ཐམས་ཅད་མཐར་ཕྱིན་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་ཐོབ་གྱུར་ནས། །གོ་ཆ་ཆེན་པོ་མི་སྤོང་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་
སེམས་དཔའ་རྣམས། །ཐེག་ཆེན་འདི་ལ་འཚལ་ནས་ནི། །བརྩོན་འགྲུས་ལྡོག་པར་མི་འགྱུར་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་སེམས་དཔའ་རྣམས། །བསམ་པ་དག་ནི་རབ་བརྟན་ཞིང་། །འདི་ལྟར་ཤེས་རབ་སྟོབས་དག་གིས། །ཤིན་ཏུ་
འདུལ་བ་ཐོབ་འགྱུར་ལགས། །ཇི་ལྟར་ཆོས་ཀྱི་དབྱིངས་རྣམས་ཀྱི། །ཚུལ་ལ་མཁས་པས་ཐོབ་པར་འགྱུར། །ཆོས་ཀྱི་རྒྱལ་པོ་བསམ་མི་ཁྱབ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་མྱུར་བ་ཁོ་ནར་ནི། །བྱང་ཆུབ་སྙིང་པོར་བགྲོད་གྱུར་ནས། །སུ་ཡང་སྐོར་བར་མི་འགྱུར་
བ། །ཚངས་པའི་འཁོར་ལོ་སྐོར་འགྱུར་ལགས། །ཇི་ལྟར་གཡོ་བ་མ་མཆིས་པར། །སྔོན་གྱི་སྨོན་ལམ་ཇི་ལྟ་བཞིན། །སེམས་ཅན་ཐམས་ཅད་ཀུན་ལ་ནི། །ཆོས་རྣམས་ཡང་དག་སྟོན་འགྱུར་ལགས། །ཆོས་རྣམས་ཡང་དག་བསྟན་པས་ན། །འཁོར་བ་ལས་ནི་གྲོལ་འགྱུར་ལགས། །ཇི་ལྟར་བགྱིས་ན་སེམས་ཅན་
རྣམས། །གཏན་དུ་བདེ་བ་འཐོབ་འགྱུར་ལགས། །སེམས་ཅན་རྣམས་ལ་སྨན་སླད་དུ། །འཇིག་རྟེན་འདྲེན་ལ་བདག་ཞུ་ན། །ཐམས་ཅད་མཁྱེན་ཅིང་གཟིགས་པ་པོའི། །ཐུགས་རྗེས་བདག་ལ་བཀས་བཤད་གསོལ། །ཆོས་ནི་གང་དང་གང་དག་གིས། །བྱང་ཆུབ་སེམས་དཔའ་སྨིན་བགྱིད་པ། །
ཆོས་ཀྱི་རྒྱ་མཚོ་ཐམས་ཅད་ཀྱིས། །ཏིང་འཛིན་ཕྱག་རྒྱ་མཛད་དུ་གསོལ། །སངས་རྒྱས་ཆོས་ལ་རབ་མོས་ཤིང་། །བྱང་ཆུབ་ཆེ་ལ་གང་ལྟ་བ། །ཆོས་ཀྱི་སྒྲ་འདི་ཐོས་གྱུར་ན། །ལུས་ཀུན་ཁྱབ་པར་དགའ་བར་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་
བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་ཁྱོད་ཀྱིས་སྔོན་སངས་རྒྱས་ཚད་མེད་པ་རྣམས་ལ་མཆོད་ཅིང་རིམ་གྲོ་བྱས་པ་དང་། དགེ་བའི་རྩ་བ་རྣམས་བསྐྱེད་ཅིང་ཡོན་ཏན་གཞལ་དུ་མེད་པ་བསགས་པས་ན་ཆོས་ཟབ་མོ་འདི་ལ་རབ་ཏུ་གདུང་བས་མོས་པར་གྱུར་པ་དང་། བསམ་པ་རྒྱ་ཆེན་པོས་

སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་བསྐྱེད་ནས་དེ་བཞིན་གཤེགས་པ་ལ་ཞུ་བ་ཞུས་པ་ལེགས་སོ་ལེགས་སོ། །ཁྱོད་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། ངས་ཁྱོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་མངོན་པར་བསྒྲུབ་པ་དང་། ཇི་ལྟར་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་བ་ཡང་དག་པར་བཤད་པར་བྱའོ། །བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་
སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་གོ་ཆ་ཆེན་པོ་བགོས་པ་དེས་སེམས་ཅན་རྣམས་ཡོངས་སུ་བསྡུ་བའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་སྦྱིན་པ་རྣམ་པར་དག་པ་ལ་དགོད་པའི་ཕྱིར་གོ་ཆ་
ཆེན་པོ་བགོ་བར་བྱའོ། །སེམས་ཅན་རྣམས་ཚུལ་ཁྲིམས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བཟོད་པ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བརྩོན་འགྲུས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་
བགོ་བར་བྱའོ། །སེམས་ཅན་རྣམས་བསམ་གཏན་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ཤེས་རབ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །
སེམས་ཅན་རྣམས་ལ་ཕན་གདགས་པའི་དངོས་པོ་དང་མཚུངས་པར་ལྡན་པའི་སེམས་བསྐྱེད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ནད་ཀྱི་གཉེན་པོར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །ཡོན་ཏན་ཆེན་པོ་མངོན་པར་བསྒྲུབ་
པ་ལ་མཁས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །བླ་ན་མེད་པའི་ཡེ་ཤེས་ལེགས་པར་ཡོངས་སུ་རྫོགས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་འཁོར་བའི་འཇིགས་པ་ལས་ཡོངས་སུ་བསྐྱབ་པའི་ཕྱིར་གོ་ཆ་ཆེན་པོ་བགོ་བར་བྱའོ། །མཚུངས་པ་མེད་པའི་ཡེ་

ཤེས་ལེགས་པར་ཡོངས་སུ་རྫོགས་པར་རབ་ཏུ་བསྟན་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདུད་དང་། བདུད་ཀྱི་འཁོར་དང་། བདུད་ཀྱི་ཕོ་ཉ་དང་། བདུད་ཀྱི་ལས་ལ་གནས་པ་དང་། ལྟ་བ་རྣམས་ཀྱི་ཐིབས་པོ་
དང་། ལམ་ཡ་ང་བར་ཞུགས་པའི་མུ་སྟེགས་ཅན་གྱི་བསྟན་པ་ལས་རབ་ཏུ་བྱུང་བ་ཐམས་ཅད་དང་། འཇིག་རྟེན་རྒྱང་པན་དང་། མུ་སྟེགས་ཅན་དང་འཐུན་པ་ཇི་སྙེད་པ་དག་དང་འཐབ་པའི་ཕྱིར་གོ་ཆ་ཆེན་པོ་བགོ་བར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་གོ་ཆ་ཆེན་
པོ་བགོ་ཞིང་། གོ་ཆ་མི་སྤོང་བར་བརྩོན་འགྲུས་ཆེན་པོ་བསྐྱེད་ནས་སེམས་ཅན་གྱི་ཁམས་ཐམས་ཅད་དུ་ཞུགས་ཏེ། བཟོད་པ་ལ་གནས་ནས་འཇིགས་པ་རྣམས་སྤངས་ཏེ། མི་སྐྲག་མི་དངང་། མི་གཡོ་མི་འཁྲུག་པར་བྱས་ནས་གོ་ཆ་དཔག་ཏུ་མེད་པ་དག་བགོ་བར་བྱའོ། །དེ་འདི་ལྟ་སྟེ།
སེམས་ཅན་ཐམས་ཅད་ཡོངས་སུ་སྐྱོབ་པའི་གོ་ཆ་དང་། ལྟ་བའི་ཐིབས་པོ་ཐམས་ཅད་གཅོད་པའི་གོ་ཆ་དང་། བདུད་ཀྱི་དཔུང་རྣམས་རྣམ་པར་འཇིག་པར་བྱེད་པའི་གོ་ཆ་དང་། ཤེས་རབ་ཡང་དག་པར་ལེན་པའི་གོ་ཆ་དང་། ཚོགས་དཔག་ཏུ་མེད་པ་སོགས་པའི་གོ་ཆ་དང་། ཁུར་ལྕི་བ་རྣམས་སྒྲོལ་བའི་
གོ་ཆ་དང་། མངོན་པར་ཡིད་ཆེས་པ་འཕེལ་བར་བྱེད་པའི་གོ་ཆ་དང་། ཚུལ་ཁྲིམས་ལ་གནས་པའི་གོ་ཆ་དང་། ལས་ཀྱི་ཀུན་གཞི་ཡོངས་སུ་སྦྱོང་བའི་གོ་ཆ་དང་། ཐམས་ཅད་རྣམ་པར་དག་པར་བྱེད་པའི་སྟོབས་ཀྱི་གཏེར་གྱི་གོ་ཆ་དང་། ཐབས་མཁས་པའི་གཏེར་གྱི་གོ་ཆ་དང་། མངོན་པར་ཞེན་པ་ཐམས་
ཅད་ཡོངས་སུ་སྤོང་བའི་གོ་ཆ་དང་། ལྡོག་པ་དང་། འགྱེད་པ་མེད་པའི་ཤེས་རབ་ཀྱི་གོ་ཆ་གང་ཡིན་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཆེན་པོ་དེ་ལྟ་བུ་བགོས་ནས་འཁོར་བའི་མཐའ་ཇི་སྲིད་པ་དེའི་བར་དུ་ཤིན་ཏུ་བརྟན་པའི་བརྩོན་འགྲུས་ཀྱི་སྟོབས་གཡོ་བ་མེད་པ་མི་སྤོང་བར་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་བྱའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་སེམས་ཅན་རྣམས། །བསྡུ་ཕྱིར་གོ་ཆ་བགོ་བར་བྱ། །སེམས་ཅན་རྣམས་ནི་ཚད་མེད་ཕྱིར། །གོ་ཆ་བགོས་པ་ཚད་མེད་དོ། །སྦྱིན་

པ་རྣམ་པར་དག་པའི་ཕྱིར། །ཐམས་ཅད་རབ་ཏུ་དགའ་བར་བྱེད། །སེམས་ཅན་ལ་ནི་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །ཚུལ་ཁྲིམས་རྣམ་པར་དག་པའི་ཕྱིར། །གོ་ཆ་འདི་ནི་བགོ་བར་བྱ། །འཇིག་རྟེན་ལ་ནི་ཕན་འདོགས་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་
འདི་ནི་བགོ་བར་བྱ། །བཟོད་པ་རྣམ་པར་དག་པའི་ཕྱིར། །དར་ཞིང་བདེ་བར་གནས་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བརྩོན་འགྲུས་རྣམ་པར་དག་པའི་ཕྱིར། །ཕྱིར་མི་ལྡོག་པར་འགྲུབ་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །
གོ་ཆ་འདི་ནི་བགོ་བར་བྱ། །བསམ་གཏན་རྣམ་པར་དག་པའི་ཕྱིར། །སྤྱོད་ཡུལ་དག་ཀྱང་དེ་བཞིན་ནོ། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །ཤེས་རབ་རྣམ་པར་དག་པའི་ཕྱིར། །ཟག་མེད་བླ་ན་མེད་པ་ཡིན། །སེམས་ཅན་རྣམས་ལ་ཕན་གདགས་ཕྱིར། །
གོ་ཆ་འདི་ནི་བགོ་བར་བྱ། །སེམས་ཅན་དག་ནི་ཐམས་ཅད་ལ། །བདེ་བའི་ཡོ་བྱད་སྦྱིན་དགོས་པས། །དོན་དེ་ལེགས་པར་ཤེས་པའི་ཕྱིར། །གོ་ཆ་འདི་ནི་བགོ་བར་བྱ། །བྱང་ཆུབ་སེམས་དཔའ་སེམས་ཅན་རྣམས། །ཕན་པའི་དངོས་པོ་བྱ་དགོས་པས། །བསྡུ་བ་རྣམ་དག་བཞི་པོ་ཡིས། །སྲིད་པ་ཀུན་
ཏུ་འཇུག་པར་བྱེད། །འདོད་ཆགས་ཞེ་སྡང་གཏི་མུག་ནད། །གཉེན་པོ་དག་ནི་བསྟེན་པའི་ཕྱིར། །སེམས་ཅན་ལ་ནི་སྨན་གཏོང་བས། །ནད་རྣམས་རབ་ཏུ་སེལ་བར་བྱེད། །དེས་ན་བྱང་ཆུབ་སེམས་དཔའ་རྣམས། །གོ་ཆ་ལེགས་པར་བགོས་ནས་ནི། །ཡོན་ཏན་རྣམས་ཀྱི་ཚོགས་དག་ན། །མཁས་
བ་དཔག་མེད་ཐོབ་པ་ཡིན། །སེམས་ཅན་འཁོར་བའི་སྡུག་བསྔལ་གྱི། །ཉམས་ཐག་ཤིན་ཏུ་མི་བདེ་བས། །བདག་གིས་ཡོངས་སུ་བསྐྱབ་སྙམ་ནས། །གོ་ཆ་དཔག་མེད་བགོ་བར་བྱ། །འཁོར་བའི་སྡུག་བསྔལ་ཚད་མེད་རྣམས། །བདག་གིས་རྣམ་པར་དགྲོལ་སྙམ་ནས། །སྲིད་ལྟའི་དྲ་བས་ཀླགས་
པ་དག །ཐམས་ཅད་ཡོངས་སུ་གཅད་པར་བྱ། །གང་གིས་ཉོན་མོངས་དྲ་བ་འདི། །ཐམས་ཅད་གཅོད་པར་གང་ནུས་པ། །བརྟན་པའི་བརྩོན་འགྲུས་སྟོབས་དག་གིས། །དཔའ་བོའི་གོ་ཆ་བགོ་བ་ཡིན། །སེམས་ཅན་དག་ནི་ཐམས་ཅད་ཀུན། །བདེ་བའི་ལམ་ལ་རབ་བཀོད་ཅིང་། །མྱ་ངན་འདས་

ལ་གཞོལ་བ་དང་། །བླ་མེད་བདེ་ལ་དགོད་པར་བྱ། །གང་ཞིག་བརྩོན་འགྲུས་ཆེན་པོའི་སྟོབས། །གོ་ཆ་འདི་ནི་བགོ་བར་བྱེད་པ། །བདུད་རྣམས་ཐམས་ཅད་དག་དང་ནི། །རྟག་ཏུ་འཐབ་ཀྱང་ངལ་མི་འགྱུར། །གང་ཞིག་ལྟ་ལ་རབ་གནས་ནས། །ཐིབས་པོ་དག་ཏུ་གང་ཞུགས་དང་། །
འཇིག་རྟེན་རྒྱང་པན་བ་དག་ལ། །གོ་ཆ་བགོས་ནས་ཕན་གདགས་བྱ། །གཞན་ཡང་འཁོར་ནི་ཚད་མེད་པ། །ལམ་གོལ་དག་ཏུ་ཞུགས་པ་རྣམས། །དེ་དག་ལ་ནི་ཕན་གདགས་ཕྱིར། །གོ་ཆ་དཔག་མེད་བགོ་བར་བྱ། །དེ་ལྟར་གོ་ཆ་བགོས་ནས་ནི། །གོ་ཆ་ཆེན་པོ་མི་སྤོང་བར། །བརྩོན་འགྲུས་ཆེན་
པོའི་སྟོབས་བསྐྱེད་ན། །གོ་བགོས་རབ་བརྟགས་ཁྱད་པར་འཕགས། །སེམས་ཅན་ཁམས་ལ་རབ་ཞུགས་ཏེ། །བཟོད་པ་ལ་ནི་གནས་གྱུར་ནས། །བརྟན་པའི་བཟོད་པ་སྒྲུབ་བྱེད་པ། །གོ་བགོས་གོང་ན་མེད་པ་ཡིན། །འཇིགས་པ་དག་ནི་རབ་སྤངས་ཤིང་། །སྐྲག་པ་དག་ནི་མེད་པར་ཡང་། །
གོ་ཆ་དཔག་མེད་བགོས་ནས་ནི། །ཐམས་ཅད་རབ་བརྩོན་འགྲུས་པར་བྱ། །གང་ཞིག་གོ་ཆ་རབ་གནས་པ། །རྟག་ཏུ་ཡང་དག་རྟོགས་གྱུར་ཅིང་། །རབ་དབེན་གཡོ་བ་མེད་པས་ན། །མི་འཁྲུགས་ལྡོག་པར་མི་འགྱུར་རོ། །དེ་ལྟའི་གོ་ཆ་རབ་བགོས་ནས། །བློ་དང་ལྡན་པས་གཞན་ཡང་ནི། །
སེམས་ཅན་སྐྱོབ་པའི་གོ་བགོས་ཏེ། །བདུད་ཀྱི་གོ་ཆ་གཞོམ་པར་བྱ། །ཡོན་ཏན་དཔག་མེད་གོ་ཆ་དག །ཐམས་ཅད་རབ་ཏུ་བགོ་བར་བྱ། །དབང་པོ་ཤེས་མཆོག་གང་ཟག་གིས། །བགོས་ནས་བདེ་བ་ཐོབ་པར་འགྱུར། །ཁུར་ལྕི་རབ་ཏུ་སྤང་བའི་ཕྱིར། །བླ་མེད་གོ་ཆ་བགོས་ནས་སུ། །སེམས་
ཅན་ཐམས་ཅད་ཡོངས་བཟླས་ནས། །སྡུག་བསྔལ་ཁུར་ལས་ཐར་བར་བྱ། །རྣམ་དག་དད་པ་འཕེལ་བྱེད་ཅིང་། །དབང་པོ་དྲུག་ནི་རབ་སྡོམ་པ། །ཚུལ་ཁྲིམས་གང་དག་ལྡན་པ་ནི། །གོ་བགོས་གོང་ན་མེད་པ་ཡིན། །དཔའ་བོ་ཡེ་ཤེས་བསྒྲུབ་པ་ལ། །བྱང་ཆུབ་སེམས་དཔའ་རབ་
གནས་པས། །སྤྱོད་ལ་ཚུལ་ཁྲིམས་ལྡན་པས་ན། །གོ་བགོས་གཡོ་བ་མེད་པ་ཡིན། །སྔོན་གྱི་རྒྱལ་བ་མང་པོ་ལས། །རྣམ་དག་ལས་ནི་བསྒྲུབས་པས་ན། །དེ་ཕྱིར་གོ་ཆ་རབ་བགོས་ནས། །རྟག་ཏུ་འཇིགས་པ་མེད་པ་ཡིན། །སེམས་ཅན་ལ་ནི་སྲེད་པའི་བློས། །འཇིག་རྟེན་ལ་ནི་ཕན་

འདོགས་པས། །ཐབས་ནི་རབ་ཏུ་རྟོགས་པས་ན། །གོ་བགོས་ལེགས་པར་གནས་པ་ཡིན། །ཐབས་མཁས་ཡེ་ཤེས་གང་ཡིན་པ། །བྱང་ཆུབ་སེམས་དཔས་རབ་རྟོགས་པས། །དེ་ལྟར་གོ་ཆ་བགོས་ནས་ནི། །འཆིང་བ་མཐའ་དག་གཅོད་པར་བྱེད། །མངོན་ཞེན་ཐམས་ཅད་རབ་སྤོང་ཞིང་། །
ཡིད་ཆེས་རྒྱབ་ཀྱིས་མི་ཕྱོགས་པ། །གོ་བགོས་བློ་དང་ལྡན་པ་ནི། །བླ་མེད་བྱང་ཆུབ་བགྲོད་པར་འགྱུར། །བྱང་ཆུབ་སེམས་དཔའ་ངེས་པར་ནི། །བདག་དང་གཞན་ལ་ཕན་འདོགས་གང་། །བརྩོན་འགྲུས་སྟོབས་ལ་རབ་གནས་པ། །བརྟན་ཞིང་ཕྱིར་ལྡོག་མི་འགྱུར་རོ།། །།བམ་པོ་གཉིས་པ།
གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྐལ་པ་ཚད་མེད་པ་ནས་ཁུར་ཆེན་པོ་ཁྱེར་ཞིང་གོ་ཆ་ཆེན་པོ་བགོས་པའི་གོ་ཆ་དེ་ལྟ་བུ་དེ་ནི་བདུད་དམ། །བདུད་ཀྱི་འཁོར་རམ། བདུད་ཀྱི་ཕོ་ཉ་འམ། ལོག་པར་ལྟ་བའི་ཐིབས་པོ་དགོན་དུང་མ་རུངས་པར་ཞུགས་པའི་
སེམས་ཅན་རྣམས་ཀྱིས་མཐོང་བར་མི་འགྱུར་རོ། །དེ་ཅིའི་ཕྱིར་ཞེ་ན། གཟུགས་མེད་ཅིང་བསྟན་དུ་མེད་པ་དང་། ལྟོས་པ་མེད་ཅིང་མཚན་མ་མེད་པ་དང་། མཚན་མ་སྤངས་པས་མཚན་མ་དང་བྲལ་བ་དང་། མིང་དང་ཡི་གེ་མེད་པའི་ཕྱིར་རོ། །བློ་གྲོས་མཐའ་ཡས་གལ་ཏེ་ལ་ལ་ཞིག་མདའི་
ཚད་རི་རབ་ཙམ་ཤ་སྟག་འཕངས་ན་ཡང་ཕོག་པར་མི་འགྱུར་ལ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་ཐམས་ཅད་བདུད་ཀྱི་རྒྱལ་པོར་གྱུར་ལ། རེ་རེ་ལ་ཡང་བདུད་ཀྱི་དམག་རྣམ་པ་སྣ་ཚོགས་འཁོར་དང་བཅས་པར་གྱུར་པ་དེ་དག་དུས་གཅིག་ཏུ་མདའ་རྣོན་
པོ་ཚད་རི་རབ་ཙམ་ཤ་སྟག་འཕངས་ན་ཡང་ནམ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུའི་གོ་ཆ་བགོས་པ་ལ་རྣམ་པར་གཞིགས་པ་འམ། ཐ་ན་སྤུ་ཉག་མ་གཅིག་ཙམ་ཡང་ཉམས་པར་བྱེད་པར་མི་ནུས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སེམས་ཀྱིས་
ཀྱང་ཐ་དད་པའི་འདུ་ཤེས་སྐྱེད་པར་མི་ནུས་ན་ལུས་ཀྱིས་གནོད་པ་བྱ་བ་ལྟ་སྨོས་ཀྱང་ཅི་དགོས། བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་རྩེ་གཅིག་ཏུ་དེ་དག་འདུལ་བར་བྱེད་པ་གང་ཡིན་པ་དེ་དག་ནི་བདུད་མང་པོ་ཕམ་པར་བྱེད་ཅིང་ཉེ་བར་ཞི་བར་ཡང་བྱེད་ལ། གོ་ཆ་དེ་ལྟ་བུ་ལ་གནས་

ཤིང་གཡོ་བ་མེད་པས་སེམས་ཅན་ཐམས་ཅད་ཀྱིས་ཀྱང་རྣམ་པར་འཇིག་པར་བྱེད་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་མཚན་མ་མེད་པའི་ཕྱིར་དང་། སེམས་ཅན་རྣམས་ཀྱིས་བལྟ་བར་བྱ་བའི་སྤྱོད་ཡུལ་མ་ཡིན་པའི་ཕྱིར་སེམས་ཅན་ཐམས་ཅད་ཀྱིས་མཐོང་ཞིང་ཤེས་པར་
མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་རྟོགས་པའི་ཕྱིར་ཡང་དག་པ་ཇི་ལྟ་བ་བཞིན་དུ་གོ་ཆ་ཆེན་པོ་བགོས་པ་དེ་དག་ཤེས་ཤིང་མཐོང་ངོ་། །སེམས་ཅན་རྣམས་ཡོངས་སུ་བསྐྱབ་པའི་ཕྱིར་ཆོས་ཐམས་ཅད་ལ་ཡང་མངོན་པར་ཞེན་པར་མི་བྱེད་དོ། །
སེམས་ཅན་རྣམས་ལ་ཕན་གདགས་པའི་ཕྱིར་ཆོས་ཐམས་ཅད་ལ་ཡང་དམིགས་པར་མི་བྱེད་དེ། དེ་ལྟ་བས་ན་སེམས་ཅན་རྣམས་ཀྱིས་མཐོང་ཞིང་ཤེས་པར་མི་ནུས་སོ། །གོ་ཆ་དེ་ལྟ་བུ་བགོས་པ་དེ་དག་ལ་ནི་ཁ་དོག་གི་མཚན་མ་མེད་ཅིང་བསྟན་དུ་མེད་པ་དང་། ཚིག་གི་བརྗོད་པ་མེད་པའི་
ཕྱིར་གཟུགས་དང་ཡང་མཚུངས་པར་ལྡན་པར་མི་འགྱུར་ལ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་ཡང་མཚུངས་པར་ལྡན་པར་མི་འགྱུར་རོ། །ནང་དང་མཚུངས་པར་ལྡན་པར་མི་འགྱུར། ཕྱི་རོལ་དང་ཡང་མཚུངས་པར་ལྡན་པར་མི་འགྱུར། ནང་
དང་ཕྱི་རོལ་གཉིས་ཀ་དང་མཚུངས་པར་ལྡན་པར་མི་འགྱུར། ནང་ཡང་མ་ཡིན་ཕྱི་རོལ་ཡང་མ་ཡིན་པ་དང་མཚུངས་པར་ལྡན་པར་མི་འགྱུར། ཁམས་དང་ཡང་མཚུངས་པར་ལྡན་པར་མི་འགྱུར། སྐྱེ་མཆེད་དང་ཡང་མཚུངས་པར་ལྡན་པར་མི་འགྱུར། སའི་ཁམས་དང་ཡང་མཚུངས་
པར་ལྡན་པར་མི་འགྱུར། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་དང་ཡང་མཚུངས་པར་ལྡན་པར་མི་འགྱུར། འདོད་པའི་ཁམས་དང་ཡང་མཚུངས་པར་ལྡན་པར་མི་འགྱུར། གཟུགས་དང་གཟུགས་མེད་པའི་ཁམས་དང་ཡང་མཚུངས་པར་
ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་མེད་པ་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པ་དང་ཡང་མཚུངས་པར་ལྡན་པར་

མི་འགྱུར། མངོན་པར་འདུ་བྱེད་པ་དང་བཅས་པ་ཡང་མ་ཡིན། མངོན་པར་འདུ་བྱེད་པ་མེད་པ་ཡང་མ་ཡིན་པ་དང་ཡང་མཚུངས་པར་ལྡན་པར་མི་འགྱུར། ཉན་ཐོས་ཀྱི་ས་དང་ཡང་མཚུངས་པར་ལྡན་པར་མི་འགྱུར། རང་སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར།
སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར། ཚིག་གི་ལམ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་རྒྱུ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་
བྱེད་དང་། རྣམ་པར་ཤེས་པའི་རྒྱུ་དང་ཡང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། མཚན་ཉིད་དང་། མཚན་ཉིད་མ་ཡིན་པ་དང་ཡང་མཚུངས་བར་ལྡན་པར་མི་འགྱུར། ཆོས་
ཐམས་ཅད་དང་མཚུངས་བར་ལྡན་པར་ཡང་མི་འགྱུར། མཚུངས་པར་ལྡན་པར་མི་འགྱུར་བ་ཡང་མ་ཡིན་ཏེ། འཆིང་བ་མེད་པ། གྲོལ་བ་མེད་པ་བགྲང་བ་དང་། དཔེ་དག་གིས་ཤེས་པར་བྱ་བ་མ་ཡིན་པ་སྟེ། འདི་ལྟར་ཆོས་ཐམས་ཅད་ནི་བགྲང་བ་ལས་ཡང་དག་པར་འདས་པའི་ཕྱིར་རོ། །དེ་ལྟ་བུའི་གོ་
ཆ་དང་ལྡན་པ་དེ་དག་ནི་ཆོས་ཐམས་ཅད་དུ་ལྟ་བ་ཡང་དག་པར་མི་དམིགས་ཏེ། གཟུགས་སུ་ལྟ་བ་ཡང་དག་པར་མི་དམིགས་སོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་ལྟ་བར་ཡང་དག་པར་མི་དམིགས་སོ། །ཐ་ན་ཆོས་ཅུང་ཟད་ཙམ་དུ་ལྟ་བ་ཡང་དག་པར་མི་དམིགས་
སོ། །དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ནི་ཆོས་ཐམས་ཅད་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ནོ། །གཟུགས་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་དང་།
རྣམ་པར་ཤེས་པ་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ཏེ། ཆོས་ཐམས་ཅད་ཀྱི་མཚུངས་པར་ལྡན་པ་དང་། མཚུངས་པར་མི་ལྡན་པ་དེ་དག་ཐག་བསྲིངས་པ་ཡིན་ནོ། །དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ལ་ནི་མངོན་པར་འདུ་བྱ་བ་མེད་དེ། བྱེད་པ་མེད་

པའི་ཕྱིར་རོ། །མཚན་མ་ཡང་མེད་དེ། མཚན་མ་ཉིད་ཡོད་པ་མ་ཡིན་པའི་ཕྱིར་རོ། །གནས་ཀྱི་མཚན་མ་མེད་པ། འདུས་པའི་མཚན་མ་མེད་པ། རྣམ་པར་རྟོག་པ་མེད་པ། གཡོ་བ་མེད་པ། དམིགས་པ་མེད་པ། ངོ་བོ་ཉིད་དུ་བལྟ་བ་མེད་པ་སྟེ། གོ་ཆ་བགོས་བ་ཉིད་ཀྱང་
དམིགས་སུ་མེད་པའོ། །དེ་བཞིན་དུ་གོ་ཆ་བགོས་པ་ཉིད་ཀྱང་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཡང་དག་པར་བགོས་པ་ན་གང་གིས་གོ་ཆ་བགོས་པ་དང་། གང་དུ་གོ་ཆ་བགོས་པ་དང་། གང་ལས་གོ་ཆ་བགོས་པ་
ཡང་དག་པར་རྗེས་སུ་མི་མཐོང་བ་དང་། བདག་གིས་གོ་ཆ་བགོས་པ་དང་། བདག་གིས་གོ་ཆ་བགོས་པར་ཡང་ཡང་དག་པར་རྗེས་སུ་མི་མཐོང་བ་དང་། འདིར་གོ་ཆ་བགོས་པ་དང་། གཞན་དུ་གོ་ཆ་བགོས་པ་ཡང་ཡང་དག་པར་རྗེས་སུ་མི་མཐོང་བ་དང་། གོ་ཆ་དེ་ལྟ་བུ་བགོས་པའི་སེམས་ཅན་
ཡང་ཡང་དག་པར་རྗེས་སུ་མི་མཐོང་སྟེ། ཆོས་ཐམས་ཅད་མངོན་པར་འདུ་བྱ་བ་མེད་པའི་ཕྱིར་དང་ཡོད་པ་མ་ཡིན་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་དེ་ལྟ་བུ་བགོས་པ་དེ་དག་ནི་དེ་བཞིན་གཤེགས་པའི་གོ་ཆ་བགོས་པ་ཡིན་པས་ལུས་ཀྱང་མི་དམིགས། ངག་ཀྱང་
མི་དམིགས། ཡིད་ཀྱང་མི་དམིགས་ཏེ་དམིགས་སུ་མེད་པའི་ཕྱིར་རྣམ་པར་རྟོག་པ་རབ་ཏུ་སྤངས་པ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གལ་ཏེ་ཆོས་ཅུང་ཟད་ཙམ་ལ་གནས་པར་གྱུར་ཏམ། གལ་ཏེ་ཆོས་ཅུང་ཟད་ཙམ་ལ་དམིགས་ནས་གོ་ཆ་བགོས་སམ། གོ་ཆ་བགོ་
འམ། གོ་ཆ་བགོ་བར་འགྱུར་བ་དེ་དག་ནི་གོ་ཆ་ཆེན་པོ་བགོས་པ་ཞེས་མི་བྱ་སྟེ། གལ་ཏེ་སེམས་དེ་དག་ལས་ཡང་དག་པར་འདས་པར་གྱུར་པ་ན་གདོད་བསམ་གྱིས་མི་ཁྱབ་པའི་གོ་ཆ་ཆེན་པོ་བགོས་པ་ཞེས་བརྗོད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་འགའ་
ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན། བསྐལ་པ་གཅིག་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན། བསྐལ་པ་བརྒྱ་སྟོང་དང་བསྐལ་པ་བྱེ་བ་བརྒྱ་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན་གྱི།

བསྐལ་པ་ཚད་མེད་པ་གྲངས་མེད་པའི་སེམས་ཅན་གྱི་ཕྱིར་གོ་ཆ་ཆེན་པོ་བགོས་པ་ཡིན་པས་དེའི་ཕྱིར་གོ་ཆ་ཆེན་པོ་ཚད་མེད་པ་བགོས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཡང་དག་པར་བགོས་པ་ན་སེམས་ཅན་གྱི་འདུ་ཤེས་ལ་མི་གནས་པའི་གོ་ཆ་གྱོན་
པར་བྱེད་དོ། །སེམས་ཅན་གྱི་འདུ་ཤེས་མི་སྐྱེད་པའི་གོ་ཆ་དང་། སེམས་ཅན་གྱི་འདུ་ཤེས་སྤོང་བའི་གོ་ཆ་དང་། བདག་གི་འདུ་ཤེས་ཟློག་པའི་གོ་ཆ་དང་། སེམས་ཅན་གྱི་ངོ་བོ་ཉིད་ཤེས་པའི་གོ་ཆ་དང་། བདག་གི་ངོ་བོ་ཉིད་ཤེས་པའི་གོ་ཆ་དང་། འདུ་ཤེས་དང་། ཚོར་བ་ལས་ཡང་དག་པར་
འདས་པའི་གོ་ཆ་དང་། ཆོས་ཐམས་ཅད་ལ་བྱེད་པའི་འདུ་ཤེས་མེད་པར་ཤེས་པའི་གོ་ཆ་དང་། མཚན་མའི་གོ་ཆ་དང་། མཚན་མ་མེད་པའི་མཚན་ཉིད་ཀྱི་གོ་ཆ་དང་། སྨོན་པ་མེད་པའི་མཚན་ཉིད་ཀྱི་གོ་ཆ་དང་། ཆོས་ཐམས་ཅད་སྐྱེ་བ་མེད་པའི་མཚན་ཉིད་ཤེས་པའི་གོ་ཆ་དང་། འགག་པ་
མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་བྱེ་བྲག་གི་ངོ་བོ་ཉིད་ཀྱི་མཚན་ཉིད་ཤེས་པའི་གོ་ཆ་དང་བྱེ་བྲག་གི་ངོ་བོ་ཉིད་མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་དངོས་པོའི་མཚན་ཉིད་ཤེས་པའི་གོ་ཆ་དང་། དངོས་པོ་མེད་པའི་མཚན་ཉིད་ཀྱི་གོ་ཆ་གྱོན་པར་བྱེད་དོ། །
བློ་གྲོས་མཐའ་ཡས་གལ་ཏེ་དངོས་པོ་མེད་པ་ལ་གནས་ནས་གོ་ཆ་གྱོན་པར་བྱེད་ལ་གོ་ཆ་ཆེན་པོ་བགོས་པ་ཞེས་མི་བྱ་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དངོས་པོ་ལ་མི་གནས་པར་ཡེ་ཤེས་ཆེན་པོ་ཡོངས་སུ་ཚོལ་བ་ཡིན་པས་དེའི་ཕྱིར་གོ་ཆ་ཆེན་པོ་བགོས་པ་ཞེས་བརྗོད་པ་
ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བསྐལ་པ་སྟོང་ཕྲག་ཚད་མེད་དུ། གོ་ཆ་དཔག་མེད་བགོས་ནས་ནི། །སེམས་ཅན་དག་ནི་ཐམས་ཅད་ཀུན། །སྡུག་བསྔལ་རྣམས་ལས་གྲོལ་བར་བྱེད། །དེ་ལྟའི་གོ་ཆ་ཆེ་བགོས་པ། །བདུད་དམ་བདུད་ཀྱི་
མངགས་པ་དང་། །བདུད་ཀྱི་ལས་རྣམས་བྱེད་པ་དག །མིག་གིས་མཐོང་བར་མི་འགྱུར་རོ། །དེ་ལས་གཞན་པའི་སེམས་ཅན་གང་། །ལྟ་བའི་ཐིབས་པོར་ཞུགས་པ་དག །བསམ་གྱིས་མི་ཁྱབ་གོ་ཆ་འདི། །དེས་ཀྱང་ཐོབ་པར་འགྱུར་མ་ཡིན། །གཟུགས་མེད་ཅིང་ནི་ཁ་དོག་མེད། །བསྟན་

དུ་མེད་ཅིང་ལྟོས་མེད་པ། །གོ་ཆ་བསམ་གྱིས་མི་ཁྱབ་པ། །དེ་ཕྱིར་མིག་གིས་བལྟ་བྱ་མིན། །མིང་མེད་མཚན་མ་མེད་པ་དང་། །མཚན་མ་ཐམས་ཅད་སྤངས་པས་ན། །གོ་ཆ་བགོས་པ་དཔག་ཏུ་མེད། །དེ་ཕྱིར་ཕན་ཚུན་མཐོང་བ་མེད། །གལ་ཏེ་མདའ་ནི་རི་རབ་ཚད། །ཤིན་ཏུ་
རྣོན་པོ་འཕངས་ན་ཡང་། །བསམ་གྱིས་མི་ཁྱབ་གོ་བགོས་པས། །མདའ་ནི་རང་ཉིད་ཆག་པར་འགྱུར། །འཇིག་རྟེན་བདུད་ནི་ཇི་སྙེད་པས། །རི་རབ་ཚད་ནི་མདའ་རྣམས་ཀྱིས། །གོ་ཆ་ཆེན་པོ་བགོས་པ་ལ། །དུས་གཅིག་འོངས་ཏེ་འཕངས་ན་ཡང་། །གོ་ཆ་ཆེན་པོ་བགོས་པ་ཡི། །སྤུ་ཉག་
གཅིག་ནི་ཉམས་མི་འགྱུར། །བསམ་གྱིས་མི་ཁྱབ་གོ་བགོས་པས། །གང་ཡང་ཕམ་བྱེད་གཞིག་མི་ནུས། །དེས་ན་བྱང་ཆུབ་སེམས་དཔའ་རྣམས། །ལུས་དང་སེམས་ནི་འགྱུར་བ་མེད། །བསམ་གྱིས་མི་ཁྱབ་གོ་བགོས་ལ། །སུ་ཞིག་བསྒུལ་ཞིང་གཡོ་བར་ནུས། །སེམས་བསྐྱེད་ཐང་ཅིག་ཙམ་
གྱིས་ཀྱང་། །བདུད་ནི་མང་པོ་ཕམ་བྱེད་པས། །བྱང་ཆུབ་སེམས་དཔའ་བསམ་མི་ཁྱབ། །བདུད་དཔུང་དག་ནི་འཇིལ་བར་བྱེད། །དེ་ལྟའི་གོ་ཆ་ཆེ་བགོས་པ། །ནམས་ཀྱང་གཡོ་བར་མི་འགྱུར་བས། །སེམས་ཅན་དག་ནི་ཐམས་ཅད་ཀྱིས། །མཐོང་བར་ནུས་པ་གང་ཡང་མེད། །སེམས་ཅན་
དག་ནི་ཐམས་ཅད་ཀྱིས། །གོ་ཆ་མཚན་ཉིད་མི་ཤེས་པས། །དེ་ཕྱིར་སེམས་ཅན་ཐམས་ཅད་ཀྱིས། །མིག་གིས་མཐོང་བར་མི་ནུས་སོ། །བྱང་ཆུབ་སེམས་དཔའ་སྐྱབས་བྱེད་ཅིང་། །ཆོས་རྣམས་ཐམས་ཅད་ཤེས་པས་ནི། །རྡོ་རྗེ་མཆོག་དང་འདྲ་བས་ན། །དེ་ནི་ལེགས་པར་གོ་བགོས་ཡིན། །
ཆོས་རྣམས་ཐམས་ཅད་མི་ལེན་ཅིང་། །སེམས་ཅན་རྣམས་ནི་སྐྱོབ་བྱེད་པས། །སངས་རྒྱས་ཆོས་ཀྱི་རྗེས་འབྲང་ཕྱིར། །དེ་ནི་ལེགས་པར་གོ་བགོས་ཡིན། །གོ་ཆར་འཛིན་པ་མེད་པ་ནི། །ཆོས་རྣམས་ཀུན་གྱི་རྗེས་འབྲང་བ། །བསམ་གྱིས་མི་ཁྱབ་གོ་བགོས་པས། །དེ་ནི་ལེགས་པར་
གོ་བགོས་ཡིན། །གོ་ཆ་བསྟན་པ་མེད་པར་ཡང་། །ཆོས་ནི་ཐམས་ཅད་གང་སྦྱོང་བ། །ཆོས་རྣམས་ཚིག་དང་བྲལ་བས་ན། །སྟོན་པར་ནུས་པ་གང་ཡང་མེད། །གཟུགས་དང་མཚུངས་པར་མི་ལྡན་ཞིང་། །ཚོར་བ་དང་ཡང་མཚུངས་མི་ལྡན། །འདུ་ཤེས་འདུ་བྱེད་རྣམ་ཤེས་དང་། །

མཚུངས་ལྡན་འདུས་པ་ཡང་མ་ཡིན། །ནང་དུ་མཚུངས་པར་མི་ལྡན་ཞིང་། །ཕྱི་རོལ་དུ་ཡང་མཚུངས་ལྡན་མིན། །ནང་དང་ཕྱི་རོལ་གཉི་གར་ཡང་། །མཚུངས་ལྡན་འདུས་པ་ཡང་མ་ཡིན། །ཁམས་དང་མཚུངས་པར་མི་ལྡན་ཞིང་། །སྐྱེ་མཆེད་དང་ཡང་མཚུངས་ལྡན་མིན། །ཁམས་
དང་སྐྱེ་མཆེད་དག་དང་ཡང་། །འདུས་པར་གྱུར་པར་ཡོད་མ་ཡིན། །ས་དང་མཚུངས་པར་མི་ལྡན་ཞིང་། །ཆུ་དང་མཚུངས་པར་ལྡན་པ་མིན། །མེ་རླུང་ནམ་མཁའ་རྣམ་ཤེས་དང་། །མཚུངས་ལྡན་འདུས་པ་ཡང་མ་ཡིན། །འདོད་དང་མཚུངས་པར་མི་ལྡན་ཞིང་། །གཟུགས་དང་
མཚུངས་པར་ལྡན་པའང་མིན། །གཟུགས་མེད་པ་ཡི་ཁམས་རྣམས་དང་། །མཚུངས་ལྡན་འདུས་པ་ཡང་མ་ཡིན། །ཐམས་ཅད་དམིགས་སུ་མེད་པས་ན། །མངོན་པར་འདུས་བྱས་རྣམས་དང་ནི། །མངོན་པར་འདུས་བྱས་མེད་པ་དང་། །མཚུངས་ལྡན་འདུས་པ་ཡང་མ་ཡིན། །བསམ་
གྱིས་མི་ཁྱབ་གོ་བགོས་པས། །གནས་པ་མེད་ཅིང་འདུས་པ་མེད། །འཆིང་བ་མེད་ཅིང་གྲོལ་བ་མེད། །མཚུངས་པར་མི་ལྡན་ཡོད་མ་ཡིན། །གོ་ཆ་མཐའ་ནི་དཔག་མེད་པས། །ཉན་ཐོས་དག་གི་ས་དག་དང་། །རང་སངས་རྒྱས་ཀྱི་ས་དང་ཡང་། །མཚུངས་ལྡན་འདུས་པ་ཡང་མ་ཡིན། །
སངས་རྒྱས་ཀྱི་ནི་ས་རྣམས་དང་། །ཆོས་རྣམས་ཐམས་ཅད་ཀུན་དང་ནི། །ཐམས་ཅད་མཚུངས་པར་མི་ལྡན་ཞིང་། །ཐམས་ཅད་འདུས་པར་གྱུར་མ་ཡིན། །ཚིག་གི་ལམ་ནི་སྣ་ཚོགས་ཀྱིས། །གང་ཡང་རེག་པར་མི་འགྱུར་བས། །དཔག་ཏུ་མེད་པའི་གོ་ཆ་འདི། །ངོ་བོ་མེད་ཅིང་བསམ་དཀའ་
ཡིན། །ཆོས་རྣམས་ཐམས་ཅད་བདག་དང་ནི། །མཚུངས་ལྡན་མཚུངས་མིན་ལྡན་མིན་པས། །བསམ་གྱིས་མི་ཁྱབ་གོ་ཆ་ནི། །བགྲང་བ་ཀུན་ལས་འདས་པ་ཡིན། །གོ་ཆ་བླ་ན་མེད་པས་ན། །འཆིང་བ་མེད་ཅིང་གྲོལ་བ་མེད། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་ཤེས་
མཚན་ཉིད་མེད། །དེ་དག་གི་ནི་མཚན་ཉིད་དང་། །མཚུངས་ལྡན་འདུས་པ་ཡང་མ་ཡིན། །ཆོས་རྣམས་ཀུན་གྱི་མཚན་ཉིད་དང་། །མཚུངས་ལྡན་མཚུངས་མིན་ལྡན་པའང་མིན། །མཚན་མ་མེད་པ་དག་དང་ཡང་། །མཚུངས་ལྡན་འདུས་པ་ཡང་མ་ཡིན། །གོ་ཆ་བླ་ན་མེད་པས་ནི། །འཆིང་བ་

མེད་ཅིང་གྲོལ་བ་མེད། །ཆོས་རྣམས་དག་ནི་ཐམས་ཅད་ལས། །ཆོས་གཅིག་གྲངས་སུའང་བགྲང་བ་མེད། །ཆོས་རྣམས་ཐམས་ཅད་དག་ལས་ནི། །གོ་ཆ་དམིགས་པར་མི་འགྱུར་བས། །དེ་ཕྱིར་བླ་ན་མེད་འགྱུར་ཞིང་། །བསམ་གྱིས་མི་ཁྱབ་པ་ཞེས་བརྗོད། །གོ་
ཆ་ལ་ནི་གཟུགས་མེད་ཅིང་། །ཚོར་བ་འདུ་ཤེས་ཡོད་མ་ཡིན། །འདུ་བྱེད་མེད་ཅིང་རྣམ་ཤེས་མེད། །ཕུང་པོ་རྣམས་ཀྱིས་བསྡུས་པའང་མིན། །དེ་ལྟའི་དཔའ་བོ་གང་དག་གིས། །གོ་ཆ་ཆེན་པོ་འདི་བགོས་པས། །ལུས་དང་སེམས་ནི་མི་དམིགས་པས། །ཆོས་ནི་ཅུང་ཟད་མཐོང་མི་འགྱུར། །
བསམ་པ་རྣམས་ལས་འདས་པའི་ཕྱིར། །རྣམ་དག་སེམས་ལ་རབ་གནས་ཤིང་། །རྟག་ཏུ་ཞུམ་པ་མེད་པས་ན། །བསམ་གྱིས་མི་ཁྱབ་པ་ཞེས་བརྗོད། །ཤིན་ཏུ་བརྟན་པས་གོ་བགོས་པ། །དེ་ཡི་སེམས་ནི་མི་སྒུལ་ཞིང་། །བསྐལ་པའི་ཚད་ནི་མི་འཛིན་པས། །བསམ་གྱིས་མི་ཁྱབ་པ་ཞེས་
བརྗོད། །གོ་ཆ་ལ་ནི་ཚད་མེད་ཅིང་། །ཆོས་དང་ཆོས་མིན་མི་ལེན་པས། །དུས་ཀྱི་ཚད་ནི་མེད་པའི་ཕྱིར། །གཞལ་དུ་མེད་པ་ཞེས་བྱའོ། །སེམས་ཅན་འདུ་ཤེས་མི་སྐྱེད་ཅིང་། །བདག་གི་འདུ་ཤེས་ཡོད་མ་ཡིན། །འདུ་ཤེས་འདི་ནི་ཤེས་པའི་ཕྱིར། །འདུ་ཤེས་ཐམས་ཅད་སྐྱེ་མི་འགྱུར། །
ཆོས་རྣམས་ཐམས་ཅད་ཤེས་ཀྱང་ནི། །ཆོས་དེའི་འདུ་ཤེས་སྐྱེ་མི་འགྱུར། །དེ་ལྟར་གོ་ཆ་གང་བགོས་པས། །བསམ་གྱིས་མི་ཁྱབ་པ་ཞེས་བརྗོད། །གཞན་ཡང་བློ་གྲོས་མཐའ་ཡས་གོ་ཆ་ཆེན་པོ་འདི་ནི་ཆོས་གྱ་ནོམ་པའི་བཀོད་པའི་ཡོ་བྱད་ཅེས་ཀྱང་བྱ། །མཆོག་ཏུ་གྱུར་པ་ཞེས་ཀྱང་བྱ་
སྟེ། རྣམ་པར་གཞིག་པར་མི་ནུས་པའི་ཕྱིར་རོ། །ཆོས་ཐམས་ཅད་དབྱེར་མེད་པ་ཞེས་བྱ་སྟེ། ཆོས་ཅུང་ཟད་ཙམ་ལ་ཡང་བྱེ་བྲག་ཏུ་འབྱེད་པ་མེད་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གོ་ཆ་འདི་ལྟ་བུ་བགོས་པ་དེ་ནི་ཤེས་རབ་ཆེན་པོའི་སྟོབས་འཛིན་ཅིང་
ཐེག་པ་ཆེན་པོ་དང་ཐེག་པ་མཆོག་དང་མཚུངས་པ་མེད་པའི་ཐེག་པ་དང་། ཡོངས་སུ་སྡུད་པ་ཆེན་པོའི་ཐེག་པ་དང་དཔག་ཏུ་མེད་པ་སྡུད་པའི་ཐེག་པ་ལ་ཞོན་ནས་སེམས་ཅན་ཐམས་ཅད་ཐེག་པ་འདིས་འདེགས་པར་བྱེད་ཀྱང་ཐེག་པ་འདི་ལ་མི་ཤོང་བ་གང་ཡང་མེད་ལ། ཐེག་པ་དེ་ཡང་

འཕེལ་བ་མེད་ཅིང་འགྲིབ་པ་མེད་པར་སེམས་ཅན་རྣམས་བདེ་བ་ལ་དགོད་པར་བྱེད་ཅིང་སེམས་ཅན་རྣམས་བདེ་བར་ངེས་པར་བྱུང་བར་བྱེད་དོ། །སེམས་ཅན་གང་ངེས་པར་བདེ་བར་བྱེད་པའི་ཐེག་པ་འདི་ལ་ཞོན་པ་གང་ཡིན་པ་དེ་དག་ལ་ནི་ལུས་དང་སེམས་ངལ་ཞིང་ཉོན་མོངས་པར་གྱུར་པ་ཡོད་པར་མི་འགྱུར་
རོ། །བློ་གྲོས་མཐའ་ཡས་ཐེག་པ་འདི་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་དང་། ཉན་ཐོས་དང་། རང་སངས་རྒྱས་དང་། ཐེག་པ་གཞན་གྱིས་ངེས་པར་འབྱུང་བར་བྱེད་པ་ཐམས་ཅད་ཟིལ་གྱིས་གནོན་པར་བྱེད་དོ། །ཐེག་པ་འདི་ནི་འགྲོ་བ་མེད་པ་འོང་བ་མེད་པ་
གནས་པ་མེད་པ་བལྟར་མེད་པ་ཤེས་པ་མེད་པ་སྔོན་གྱི་མཐའ་མི་དམིགས་པ་ཕྱི་མའི་མཐའ་མི་དམིགས་པ་དབུས་ཀྱི་མཐའ་མི་དམིགས་པ། དུས་གསུམ་མཉམ་པ་ཉིད་དུ་གྱུར་ཅིང་། ནམ་མཁའ་དང་མཚུངས་པ། ཀུན་ནས་ཉོན་མོངས་པའི་རྡུལ་མི་གོས་པ། བལྟས་པ་མེད་པ། ཐོགས་པ་མེད་པ་མངོན་པར་ཞེན་པ་མེད་པ་
ཡིན་པས། ཐེག་པ་འདིས་ངེས་པར་འབྱུང་བར་བྱའོ། །ཐེག་པ་འདི་ནི་ཚད་མེད་པ་ཡིན་ཏེ་གཞལ་དུ་མེད་པའི་ཕྱིར་རོ། །རང་བཞིན་གྱིས་ཐོགས་པའི་མཚན་མ་མེད་པ་ཡང་ཡིན་ཏེ། མཚན་མ་ལ་མི་གནས་པའི་ཕྱིར་རོ། །ཐེག་པ་མཆོག་འདི་ལ་ཞོན་པ་གང་ཡིན་པ་དེ་དག་ནི་སེམས་ལ་ཞུམ་པ་མེད་
པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་ཞིང་འཇུག་པར་འགྱུར་རོ། །བློ་གྲོས་མཐའ་ཡས་འདི་ལྟ་སྟེ། དཔེར་ན་མར་མེ་དང་ཉི་མ་དང་ཟླ་བའི་དཀྱིལ་འཁོར་ནི་སེམས་ཅན་རྣམས་ཀྱི་སྣང་བ་ཆེན་པོར་བྱེད་དོ། །དེ་བཞིན་དུ་ཐེག་པ་ཆེན་པོ་