Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

དུ་འཇུག་པར་འགྱུར་རོ། །གཉིས་གང་ཞེ་ན། འདི་ལྟ་སྟེ། སེམས་ཡོངས་སུ་དག་པས་རབ་ཏུ་བརྒྱན་པ་དང་། གཟུགས་ཡོངས་སུ་དག་པས་རབ་ཏུ་བརྒྱན་པ་གང་ཡིན་པའོ། །གཞན་ཡང་ཟླ་འོད་གཞོན་ནུ་ཆོས་གཉིས་པོ་དེ་དག་ནི་ཆོས་གཅིག་གི་ནང་དུ་འཇུག་པར་འགྱུར་རོ། །
གཅིག་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་རྣམ་པར་གྲོལ་བ་མངོན་པར་གྲུབ་པ་གང་ཡིན་པའོ། །གཞན་ཡང་ཟླ་འོད་གཞོན་ནུ་ཡང་ཆོས་རྣམ་པ་བརྒྱད་ཅུ་ཡོད་དེ། དེ་དག་གིས་དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་
རྣམ་པར་གྲོལ་བ་ལེགས་པར་ཡོངས་སུ་རྫོགས་པར་བྱེད་པའོ། །རྣམ་པ་བརྒྱད་ཅུ་གང་ཞེ་ན། འདི་ལྟ་སྟེ། སྦྱིན་པའི་ཚོགས་དང་། ཤེས་རབ་རྒྱ་ཆེན་པོར་གྱུར་པ་དང་། ཚུལ་ཁྲིམས་རྣམ་པར་དག་པ་ཡོངས་སུ་སྒྲུབ་པ་དང་། ཉོན་མོངས་པའི་གདུང་བ་དང་བྲལ་བ་དང་། ང་རྒྱལ་
རབ་ཏུ་བཅོམ་པ་དང་། ཚིག་མཉེན་པ་དང་། དངོས་པོ་སྣ་ཚོགས་རབ་ཏུ་ཤེས་པ་དང་། དགེ་བའི་གྲོགས་པོ་ཡོངས་སུ་ཤེས་པ་དང་། ཐེག་པ་ཆེན་པོ་ལ་ཡང་དག་པར་གཞོལ་བ་དང་། བརྩོན་འགྲུས་ཀྱི་གོ་ཆ་བགོས་པ་དང་། སྤྱོད་ལམ་གྱིས་སེམས་ཅན་འདུལ་བ་དང་། ཉོན་མོངས་
པར་ལྟུང་བ་རྣམས་ཀྱི་ཐེ་ཚོམ་རབ་ཏུ་གཅོད་པ་དང་། མི་དགེ་བ་རྣམས་ལ་སྨོད་ཅིང་ཆོས་དཀར་པོ་རྣམས་མངོན་པར་བསྒྲུབ་པ་དང་། མི་དགེ་བའི་གྲོགས་པོ་དང་མི་འགྲོགས་པ་དང་། དགེ་བའི་རྩ་བ་རྣམས་བསྐྱེད་པ་ལ་ཡོངས་སུ་སྐྱོབ་མེད་པ་དང་། བྱང་ཆུབ་ཏུ་སེམས་བསྐྱེད་པ་དང་། བརྩོན་

འགྲུས་རབ་ཏུ་རྩོམ་པ་དང་། བདུད་ཀྱི་དངོས་པོ་རབ་ཏུ་རྟོགས་པ་དང་། བདེན་པ་རྣམས་མངོན་དུ་གྱུར་པ་དང་། ཡང་དག་པ་ཁོ་ནར་མཆོད་པ་བྱེད་པ་དང་། ཐེ་ཚོམ་ཡོངས་སུ་གཅོད་པ་དང་། སེམས་ཀྱིས་རྟག་ཏུ་སེམས་ཅན་ཡོངས་སུ་བཟླ་བར་སེམས་པ་དང་།
སྲིད་པ་རྣམས་ལ་མངོན་པར་ཞེན་པ་མེད་པ་དང་། སེམས་རྒྱ་ཆེན་པོ་ཡོངས་སུ་བསྐྱེད་པ་དང་། སེམས་ཅན་མི་དགེ་བ་རྣམས་ལ་ཉེས་དམིགས་ཡང་དག་པར་སྟོན་པ་དང་། འདོད་ཆགས་དང་། ཞེ་སྡང་དང་། གཏི་མུག་རབ་ཏུ་སྤོང་བ་དང་། འདོད་པའི་ཕན་པ་ཡོངས་སུ་མི་ཚོལ་བ་དང་།
སེམས་ཅན་ཡོངས་སུ་སྨིན་པར་བྱེད་པ་དང་། དེ་བཞིན་གཤེགས་པའི་མཆོད་རྟེན་འཆོས་པ་དང་། འཕགས་པ་རྣམས་ལ་གུས་པ་སྐྱེད་པ་དང་། ཐེག་པ་ཆེན་པོ་ལ་གནས་པ་དག་ལ་རྟེན་ཅིང་རིམ་གྲོ་བྱེད་པ་དང་། ཐེག་པ་དམན་པ་དག་གི་བསྔགས་པ་མི་བརྗོད་པ་དང་། ཉན་ཐོས་ཀྱི་
ཐེག་པ་པ་དག་ཐག་རིང་དུ་སྤོང་བ་དང་། ཕྱིར་རྒོལ་བ་རྣམས་ཚར་གཅོད་པ་དང་། སངས་རྒྱས་བཅོམ་ལྡན་འདས་རྣམས་ལ་མཆོད་པ་རྒྱ་ཆེན་པོ་བཤམས་ནས་ཁྱད་པར་དུ་འཕགས་པའི་སེམས་ཀྱིས་དབུལ་བར་བྱེད་པ་དང་། ཐོགས་པ་མེད་པའི་ཡེ་ཤེས་ཐོབ་པ་དང་། སྤོབས་པ་ཕུན་
སུམ་ཚོགས་པ་དང་། དཔེ་སྣ་ཚོགས་ཀྱིས་ཡང་དག་པའི་ཆོས་རབ་ཏུ་སྟོན་པར་བྱེད་པ་དང་། སྟོང་པའི་ངོ་བོ་ཉིད་དང་འགལ་བར་མི་བྱེད་པ་དང་། ཆོས་ཡོངས་སུ་ཚོལ་བ་ལ་ལེ་ལོ་མེད་པ་དང་། དོན་ཟབ་མོ་ཡང་དག་པར་སྟོན་པ་དང་། གཟུངས་ཆེན་པོ་དང་ལྡན་པ་དང་། ཆོས་
ཡང་དག་པར་སྟོན་པར་བྱེད་ཀྱང་མངོན་པར་ཞེན་པ་མེད་པ་དང་། ཆོས་རྒྱ་ཆེར་སྤེལ་བར་བྱེད་པ་དང་། ཡོངས་སུ་འདྲེན་པ་ལ་ཆོག་ཤེས་པ་མེད་པ་དང་། སྤྱོད་པ་རྣམས་ཡོངས་སུ་རྫོགས་པ་དང་། གཟི་བྱིན་ཆེན་པོ་དང་ལྡན་པ་དང་། སྤོབས་པ་ཐོགས་པ་མེད་པ་དང་། མང་དུ་ཐོས་
པ་ཕུན་སུམ་ཚོགས་པ་དང་། མི་དགེ་བ་རྣམས་ཀྱི་བསྔགས་པ་མི་རྗོད་པ་དང་། དགེ་བའི་ལས་ཡང་དག་པར་སྒྲུབ་པ་དང་། ཕུང་པོ་རྣམས་ཁོང་དུ་ཆུད་པ་དང་། ལྟ་བ་རྣམས་རབ་ཏུ་སྤངས་པ་དང་། རྒྱུའི་ངོ་བོ་ཉིད་རབ་ཏུ་རྟོགས་པ་དང་། སྤྱོད་ཡུལ་ལས་ཡང་དག་པར་འདས་པ་དང་།

སྤྱོད་ཡུལ་མ་ཡིན་པ་ཡོངས་སུ་སྤངས་པ་དང་། ཡོངས་སུ་དང་བསྐྱེད་པ་དང་། ཡང་དག་པའི་ལམ་ལ་གནས་པ་དང་། ཐེག་པ་ཆེན་པོ་ལ་རབ་ཏུ་དགའ་བ་དང་། མཉམ་པ་ཉིད་དུ་ཡོངས་སུ་སྡུད་པར་བྱེད་པ་དང་། བདག་མེད་པ་ལ་མངོན་པར་མ་ཆགས་པ་དང་། འཁོར་བ་ལ་ཡོངས་སུ་སྐྱོ་
བ་མེད་པ་དང་། མྱ་ངན་ལས་འདས་པ་ཡོངས་སུ་ཚོལ་བ་ལ་མོས་པ་དང་། འདོད་པ་ཆུང་བའི་ཕྱིར་དགོན་པ་ལ་གནས་པ་དང་། རྟག་ཏུ་བསོད་སྙོམས་སློང་ཞིང་ལེ་ལོ་མེད་པར་གྱུར་པ་དང་། ཇི་ཙམ་རྙེད་པ་དེ་ཉིད་ཀྱིས་ཆོག་པར་འཛིན་པ་དང་། ངོ་ཚ་མེད་པ་དང་། ཁྲེལ་མེད་པ་སྤངས་
པ་དང་། སངས་རྒྱས་རྣམས་ལ་བསྙེན་པར་བྱེད་པ་དང་། དགེ་བའི་གྲོགས་པོ་དང་ལྷན་ཅིག་གནས་པ་དང་། བདག་གི་ཟླ་མ་ཡིན་པ་རྣམས་རབ་ཏུ་སྤོང་བ་དང་། སོ་སོའི་སྐྱེ་བོ་རྣམས་ལ་སྙིང་བརྩེ་བ་དང་། སེམས་ཅན་གྱི་སྤྱོད་པ་དང་འཐུན་པར་བྱེད་པ་དང་། སངས་རྒྱས་ལ་ཤིན་ཏུ་དང་
བ་དང་། སྣོད་མ་ཡིན་པ་ཡོངས་སུ་སྤོང་བ་དང་། མི་འཐུན་པ་རྣམས་ལ་ཚིག་སྦྱིན་པར་མི་བྱེད་པ་དང་། གསོལ་བ་མི་འདེབས་པ་དག་ལ་ཡང་དག་པར་སྟོན་པར་མི་བྱེད་པ་དང་། གསོལ་བ་འདེབས་པ་ཞིག་འོངས་ན་ཅི་རིགས་པར་སྟོན་པར་བྱེད་པ་དང་། ཟས་ལ་སྙོམས་པར་གྱུར་པ་དང་།
རྟག་ཏུ་གཏོང་ཞིང་མཉམ་པ་ཉིད་དུ་གཏོང་བ་དང་། སྒོ་ཆེན་པོ་ཕྱེ་ནས་གཏོང་བར་བྱེད་པ་གང་ཡིན་པ་དེ་དག་ནི་གཞོན་ནུ་ཆོས་རྣམ་པ་བརྒྱད་ཅུ་ཅེས་བྱ་སྟེ། འདི་དག་གིས་དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་རྣམ་པར་གྲོལ་བ་ཐོབ་པར་བྱེད་དོ། །དེའི་ཚེ་ཟླ་འོད་གཞོན་
ནུར་གྱུར་པས་ཆོས་དེ་ལྟ་བུ་ཐོས་པས་རབ་ཏུ་དགའ་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་མངོན་པར་བསྟོད་པ། དེ་བཞིན་གཤེགས་པ་མིག་ཟད་མཐའ་མཁྱེན་པས། །དེ་སླད་རྣམ་དག་ཡེ་ཤེས་སྟོན་མཛད་ལགས། །རྣམ་དག་ཡེ་ཤེས་སྟོན་པར་མཛད་
པས་ན། །རྣམ་དག་འོད་ཟེར་ཕུན་སུམ་ཚོགས་པ་ལགས། །དེ་བཞིན་གཤེགས་པས་མིག་བདག་མེད་མཁྱེན་པས། །དེ་སླད་རྣམ་དག་དབྱངས་ནི་སྟོན་མཛད་ལགས། །རྣམ་དག་དབྱངས་ནི་སྟོན་པར་མཛད་པས་ན། །ཚངས་དབྱངས་མཚན་ཉིད་ཕུན་སུམ་ཚོགས་པ་ལགས། །

བཅོམ་ལྡན་སྔོན་ནི་སེམས་ཅན་ཕན་བཏགས་པས། །དེ་སླད་རྣམ་དག་གསུང་ནི་རྫོགས་པ་ལགས། །རྣམ་དག་གསུང་ནི་ཡོངས་སུ་རྫོགས་པས་ན། །འཇིག་རྟེན་ཚད་མེད་རྣམས་ལ་ཕན་འདོགས་མཛད། །དེ་བཞིན་གཤེགས་པས་མིག་ཉིད་སྟོང་མཁྱེན་པས། །
དེ་སླད་ཀུན་འཛིན་མཁྱེན་པ་རྫོགས་པ་ལགས། །ཀུན་འཛིན་མཁྱེན་པ་ཡོངས་སུ་རྫོགས་པས་ན། །དེ་བཞིན་གཤེགས་པའི་འོད་ཟེར་དཔག་མེད་སྟོན། །དེ་བཞིན་གཤེགས་པས་མིག་གི་ཁྱད་པར་མཁྱེན། །མིག་གི་ཁྱད་པར་དག་ཀྱང་མཐའ་མ་མཆིས། །མཁྱེན་པའི་མིང་ནི་
དཔག་ཏུ་མ་མཆིས་པས། །དེ་བཞིན་གཤེགས་པའི་འོད་ཟེར་དཔག་མེད་སྟོན། །སངས་རྒྱས་ཡི་གེ་ཁྱད་པར་སྒོ་མཁྱེན་པས། །མིག་སྟོང་ཡི་གེ་བྲལ་བར་རབ་ཏུ་མཁྱེན། །མིག་སྟོང་ཡི་གེ་བྲལ་བར་མཁྱེན་པས་ན། །དེ་བཞིན་གཤེགས་པའི་འོད་ཟེར་དཔག་མེད་སྟོན། །གང་
ཞིག་མིག་ལ་བདག་མེད་རབ་སེམས་པ། །སངས་རྒྱས་གསུང་ནི་བདེན་པ་ཉིད་དུ་རྟོགས། །སངས་རྒྱས་གསུང་ནི་བདེན་པར་རྟོགས་པས་ན། །དེ་བཞིན་གཤེགས་པའི་འོད་ཟེར་ངེས་པ་སྟོན། །བཅོམ་ལྡན་རྫུ་འཕྲུལ་མཆོག་ནི་ཡོངས་རྫོགས་པས། །མིག་གི་འཇིག་པ་དཔག་
མེད་ཐུགས་སུ་ཆུད། །མིག་གི་འཇིག་པ་རབ་ཏུ་མཁྱེན་པས་ན། །འཇིག་རྟེན་ཐམས་ཅད་ལ་ནི་ཕན་འདོགས་མཛད། །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །མིག་གི་སྐྱེ་བ་དཔག་མེད་རབ་ཏུ་མཁྱེན། །ཇི་ལྟར་བཅོམ་ལྡན་མིག་གི་སྐྱེ་མཁྱེན་པ། །བདག་ཀྱང་རིང་པོར་མི་
ཐོགས་དེ་བཞིན་ཤོག །དེ་བཞིན་རྣ་བ་སྣ་དང་ལྕེ་ལུས་ཡིད། །གཟུགས་སྒྲ་དྲི་རོ་རེག་བྱ་དག་དང་ཆོས། །འཇིག་རྟེན་སྐྱེ་དང་སྒྲ་དང་མིང་ལ་སོགས། །ཐམས་ཅད་ལ་ཡང་དེ་བཞིན་རབ་ཏུ་མཁྱེན། །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །སྦྱིན་པའི་ཕ་རོལ་བྱོན་པ་ཕུན་སུམ་ཚོགས། །
ཇི་ལྟར་བཅོམ་ལྡན་སྦྱིན་པའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཚུལ་ཁྲིམས་རྣམ་དག་ཕ་རོལ་བྱོན་དང་ལྡན། །ཇི་ལྟར་བཅོམ་ལྡན་ཚུལ་ཁྲིམས་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །

ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བཟོད་པའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བཟོད་པའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བརྩོན་འགྲུས་ཕ་རོལ་བྱོན་པ་ཕུན་སུམ་
ཚོགས། །ཇི་ལྟར་བཅོམ་ལྡན་བརྩོན་འགྲུས་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བསམ་གཏན་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བསམ་གཏན་ཕ་རོལ་བྱོན། །བདག་ཀྱང་རིང་པོར་
མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཤེས་རབ་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་ཤེས་རབ་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཆོས་སྐུའི་ཕ་
རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་ཆོས་སྐུའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་གཟུགས་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་གཟུགས་ལྡན་
པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་ཡིད་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་ཡིད་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་
གྱུར་པ། །ཡོན་ཏན་མཆོག་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་ཡོན་ཏན་མཆོག་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །གཟུགས་ཀྱི་མཚན་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་གཟུགས་
ཀྱི་མཚན་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་སྒྲ་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་སྒྲ་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་

གྱུར་པ། །རྫུ་འཕྲུལ་ཆེན་པོ་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྫུ་འཕྲུལ་ཆེར་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །སེམས་ཅན་གདུལ་སླད་སྲིད་པ་གསུམ་ན་བཞུགས། །ཇི་ལྟར་
བཅོམ་ལྡན་སེམས་ཅན་གདུལ་མཛད་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འཁོར་བའི་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་འཁོར་བའི་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་
ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་འདོད་ཆགས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཞེ་སྡང་སྤྱོད་པ་དཔག་
མེད་དག་ལས་འདས། །ཇི་ལྟར་བཅོམ་ལྡན་ཞེ་སྡང་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །གཏི་མུག་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་གཏི་མུག་སྤྱོད་འདས་པ། །བདག་ཀྱང་རིང་པོར་
མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་ཞེ་སྡང་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་འདོད་སྡང་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཞེ་སྡང་གཏི་
མུག་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་སྡང་རྨོངས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་གཏི་མུག་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་འདོད་རྨོངས་སྤྱོད་འདས་པ། །བདག་
ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཆ་མཉམ་སྤྱོད་པ་དཔག་མེད་ཡང་དག་འདས། །ཇི་ལྟར་བཅོམ་ལྡན་ཆ་མཉམ་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །འདྲེན་པ་འདོད་ཆགས་དག་ལས་ཡོངས་འདས་པས། །

འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་ཞེ་སྡང་དག་ལས་ཡོངས་འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་
པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་གཏི་མུག་སྤྱོད་ལས་ཡོངས་འདས་པས། །འཇིག་རྟེན་ཀུན་ལ་ཤིན་དུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་འདོད་ཆགས་ཞེ་སྡང་སྤྱོད་
འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་ཞེ་སྡང་གཏི་མུག་སྤྱོད་འདས་པས། །འཇིག་རྟེན་ཀུན་ལས་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་
རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་འདོད་ཆགས་གཏི་མུག་སྤྱོད་འདས་པས། །འཇིག་རྟེན་ཀུན་ལས་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་ཆགས་
སྡང་གཏི་མུག་སྤྱོད་འདས་པས། །འཇིག་རྟེན་ཀུན་ལས་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ལྷ་ཚོགས་མང་པོ་ཐམས་ཅད་འདུལ་བར་མཛད། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཀླུ་ཚོགས་མང་པོ་ཐམས་ཅད་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་
བཞིན་གཤེགས་པ་མཁྱེན་པ་མཆོག་ལྡན་པས། །གནོད་སྦྱིན་མང་པོ་ཐམས་ཅད་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །དྲི་ཟ་ཐམས་ཅད་རབ་ཏུ་འདུལ་མཛད་ཅིང་། །

དེ་བཞིན་གྲུལ་བུམ་དཔག་ཏུ་མ་མཆིས་པ། །འཁོར་བཅས་ཇི་སྙེད་རབ་ཏུ་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཆོས་རྣམས་ཡང་དག་དོན་ནི་རབ་
ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཡང་དག་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་སྡུག་བསྔལ་ཟད་མཐའ་མཁྱེན། །སྐྱེ་དགུ་ཐམས་ཅད་ལ་ནི་ཕན་འདོགས་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྡུག་བསྔལ་ཟད་ལ་ཐེ་ཚོམ་མ་
མཆིས་ཤོག །དེ་བཞིན་གཤེགས་པས་རྒྱུ་ཟད་མཐའ་མཁྱེན་པས། །སྐྱེ་དགུ་ཐམས་ཅད་ལ་ནི་ཕན་འདོགས་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །རྒྱུ་ཟད་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་སྤྱོད་པ་དག་
ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་སྤྱོད་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་གནས་དང་གནས་མེད་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་
རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་ལས་དང་འབྲས་བུ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་
པས། །འཇིག་རྟེན་རང་བཞིན་སྣ་ཚོགས་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཐམས་ཅད་ཀུན་དུ་འགྲོ་བའི་སྤྱོད་པ་མཁྱེན། །བདག་ཀྱང་དེ་འདྲའི་ཡེ་ཤེས་
གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་མོས་པ་སྣ་ཚོགས་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་

གཤེགས་པ་མཁྱེན་པ་མཆོག་ལྡན་པས། །དབང་པོ་རྣམས་ཀྱི་རང་བཞིན་ཐམས་ཅད་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །བསམ་གཏན་སྤྱོད་པ་དག་ནི་རབ་ཏུ་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །རྣམ་པར་ཐར་པའི་སྤྱོད་པ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །
དེ་བཞིན་གཤེགས་པ་མཁྱེན་པ་མཆོག་ལྡན་པས། །ཆ་མཉམ་སྤྱོད་པ་དག་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །སྙོམས་འཇུག་སྤྱོད་པ་དག་ནི་རབ་ཏུ་
མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་འཁོར་བ་རབ་མཁྱེན་པས། །འཁོར་བ་ཉོན་མོངས་རྒྱུ་ལས་སྐྱེས་པར་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་
ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་ཐམས་ཅད་རབ་མཁྱེན་པས། །འཇིག་རྟེན་ཕན་འདོགས་དཔེ་ཟླ་ཡོང་མ་མཆིས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་ཏིང་
འཛིན་རབ་གནས་པས། །ཁྱད་པར་ཐབས་ཀྱི་ཡེ་ཤེས་སྐྱེད་པར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །སྔོན་གྱི་གནས་ཀྱི་སྤྱོད་པ་དཔག་མེད་མཁྱེན། །བདག་
ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཆི་འཕོ་སྐྱེ་བ་དཔག་མེད་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །

དེ་བཞིན་གཤེགས་པ་མཁྱེན་པ་མཆོག་ལྡན་པས། །ཉོན་མོངས་ཟད་པ་ཐམས་ཅད་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །བླ་མེད་བྱང་ཆུབ་
ཡང་དག་མངོན་སངས་རྒྱས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཉོན་མོངས་བག་ཆགས་དག་ནི་རབ་ཏུ་སྤངས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་
རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཁོར་བ་ངེས་འབྱུང་ཆོས་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་ཆོས་དོན་རབ་མཁྱེན་པས། །
སེམས་ཅན་དཔག་མེད་རྣམས་ནི་གོ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་ཆོས་ཉིད་སྒྱུ་མ་དང་། །རྨི་ལམ་སྨིག་རྒྱུ་ལྟ་བུར་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་
རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་འཇིག་རྟེན་ཐམས་ཅད་ཀྱི། །ཡི་གེ་དག་དང་བརྗོད་པ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་སྤོབས་པ་མཆོག་ལྡན་པས། །
དམ་ཆོས་ཟབ་མོ་དག་ནི་སྟོན་པར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་སྐུ་གསུང་ཐུགས་དུལ་པས། །ཐམས་ཅད་ཡེ་ཤེས་རྗེས་སུ་འབྲང་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་
ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་དུས་གསུམ་རབ་མཁྱེན་པས། །འཛིན་དང་ཆགས་པ་མི་མངའ་ཐོགས་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་

པས་ཚུལ་ཁྲིམས་ཏིང་འཛིན་དང་། །ཤེས་རབ་བསྒྲུབས་པས་དེ་ལས་ལྡོག་མི་འགྱུར། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག །དེ་བཞིན་གཤེགས་པས་རྣམ་གྲོལ་རབ་བསྒྲུབས་པས། །རྣམ་གྲོལ་མཁྱེན་དང་གཟིགས་པ་
ལྡོག་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག །དེ་བཞིན་གཤེགས་པས་ཞི་གནས་ལྷག་མཐོང་བསྒྲུབས། །ལྷ་མི་འཇིག་རྟེན་དག་ན་མཚུངས་མ་མཆིས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་
གསུམ་ཐུགས་རྗེ་ཆེན་པོའི་གཙོར་གྱུར་ཅིག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་ཆོས་རྣམས་ལ་ནི་ཞེན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་ཅིག །དེ་བཞིན་གཤེགས་པས་འཇིག་
རྟེན་མཁྱེན་ལྡན་པས། །འགྲོ་བ་སྣ་ཚོགས་དག་ནི་གསལ་བར་གཟིགས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འགྲོ་བ་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་སྐྱེ་ཟད་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་
འདྲའི་ཡེ་ཤེས་གྲུབ་གྱུར་ནས། །སྐྱེ་ཟད་ཉིད་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་རབ་ཞི་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །རབ་ཞི་དེ་ལ་ཐེ་ཚོམ་མ་མཆིས་ཤོག །དེ་བཞིན་
གཤེགས་པ་འཁོར་བའི་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཁོར་བ་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་སྔོན་དང་ཕྱི་མཐའ་མཁྱེན། །དེ་སླད་སློབ་དཔོན་མ་མཆིས་མཁྱེན་དང་
ལྡན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྔ་ཕྱིའི་མཐའ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་སྐྱོན་ཟློག་མཐའ་རབ་མཁྱེན། །དེ་སླད་སློབ་དཔོན་མ་མཆིས་མཁྱེན་དང་ལྡན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱོན་ཟློག་དེ་ལ་ཐེ་ཚོམ་མ་མཆིས་

ཤོག །དེ་བཞིན་གཤེགས་པས་སྔོན་དང་ཕྱི་མཐའ་མཁྱེན། །མིག་གི་རྟག་ཆད་དག་ལ་འཛིན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྔ་ཕྱི་མཐའ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་སྐྱེ་ཟད་མཐའ་མཁྱེན་པས། །མིག་
གི་རྟག་ཆད་དག་ལ་འཛིན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱེ་ཟད་ཉིད་ལ་ཐེ་ཚོམ་མ་མཆིས་ཤོག །གང་ཞིག་སྔོན་དང་ཕྱི་མཐའ་མ་རྟོགས་པས། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་
པ་དག་ལ་ཞེན་མི་མངའ། །གང་ཞིག་ཡོད་མེད་མཐའ་ནི་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །གང་ཞིག་ཟད་དང་མི་ཟད་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་
བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །གང་ཞིག་འཇུག་དང་མི་འཇུག་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །ཞེ་སྡང་གཏི་མུག་
ཁོང་ཁྲོ་འཆབ་པ་དང་། །གཡོ་སྒྱུ་ཕྲག་དོག་ང་རྒྱལ་ཁེངས་པ་དང་། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་དག་ཀྱང་དེ་བཞིན་ནོ། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་འཛུམ་པ་མཛད་དེ།
འོད་ཟེར་གསེར་གྱི་ཁ་དོག་ལྟ་བུ་རབ་ཏུ་བཀྱེའོ། །འོད་ཟེར་དེས་ཀྱང་སངས་རྒྱས་ཀྱི་ཞིང་ཚད་མེད་དཔག་ཏུ་མེད་པ་རྣམས་སྣང་བར་བྱས་ཏེ། འཇིག་རྟེན་གྱི་ཁམས་དེ་དག་ཏུ་ཕན་པ་དག་བྱས་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། དེ་བཞིན་གཤེགས་པའི་གཙུག་ཏོར་ཉིད་དུ་
ཐིམ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་བྱམས་པ་འདུག་པའི་སྟན་ལས་ལངས་ནས། །བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། གུས་པས་ཐལ་མོ་སྦྱར་ནས།

ཚིགས་སུ་བཅད་པ་འདི་དག་གིས་མངོན་པར་བསྟོད་དེ། བཅོམ་ལྡན་འདས་ལ་ཞུ་བ་ཞུས་པ། འབྲུག་དང་སེང་གེའི་སྒྲ་སྒྲོགས་ཤིང་། །ཀ་ལ་པིང་ཀའི་སྒྲ་ཕྱུང་བས། །ཆོས་རྔ་ཆེན་པོའི་སྒྲ་འབྱིན་པ། །ཅི་ཡི་སླད་དུ་འཛུམ་པ་མཛད། །ཉི་མ་སྟོང་བས་ཁྱད་པར་འཕགས། །རྣམ་པར་སྒྲ་རབ་དག་
དང་ལྡན། །ཡོན་ཏན་ངོ་མཚར་རབ་མངའ་བ། །ཅི་སླད་འོད་ཟེར་བཀྱེ་བ་མཛད། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་རབ་བརྒྱན་པས། །ཐམས་ཅད་དག་ནི་ཡོངས་རྫོགས་པས། །ཅི་སླད་འོད་ཟེར་བཀྱེ་བ་མཛད། །དེ་བཞིན་གཤེགས་པ་དབྱངས་
མཉེན་པས། །ངག་རྩུབ་རྣམས་ནི་རྟག་ཏུ་སྤངས། །སེམས་ཅན་ནད་ནི་ལེགས་གསོ་བ། །ཅི་སླད་འོད་ཟེར་བཀྱེ་བ་མཛད། །ཐུགས་རྗེ་ཆེན་པོ་རྐང་གཉིས་གཙོ། །མིག་ནི་རྟག་ཏུ་སྟོང་དབེན་མཁྱེན། །རྣམ་དག་ཚངས་པའི་དབྱངས་མངའ་བས། །སེམས་ཅན་རྣམས་ལ་ཆོས་སྟོན་མཛད། །
རྣ་བ་སྣ་ལྕེ་ལུས་དང་ཡིད། །སྒྲ་དང་མིང་ལ་སོགས་པ་ནས། །ཀུན་འབྱུང་འགོག་པ་ལམ་དག་དང་། །ཡེ་ཤེས་བཟོད་པའི་བར་དེ་བཞིན། །ཐུགས་རྗེ་ཆེན་པོ་རྐང་གཉིས་གཙོ། །མིག་ཟད་སྐྱེ་བའི་མཐའ་དག་དང་། །རབ་ཞི་དག་ནི་འཁོར་བ་དག །ཐམས་ཅད་སྟོང་དབེན་ཉིད་དུ་
མཁྱེན། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། །གཞན་ཡང་རྟེན་ཅིང་འབྲེལ་འབྱུང་ཆོས། །ཆད་དང་རྟག་པ་ཡོངས་བྲལ་ནས། །བདག་དང་གཞན་གྱིས་བྱས་མིན་པས། །རྐྱེན་
བབ་ལས་བྱུང་ཉིད་དུ་གསུང་། །རེས་འགའ་རྣམ་གྲངས་སྣ་ཚོགས་ཀྱིས། །སྡུག་བསྔལ་གཞི་ནི་སྟོན་པར་མཛད། །རེས་འགའ་དོན་ནི་སྣ་ཚོགས་ཀྱིས། །སངས་རྒྱས་འོད་ཟེར་བསྔགས་པར་མཛད། །རེས་འགའ་ཚིག་ནི་ཚད་མེད་ཀྱིས། །རབ་དབེན་ཆོས་ནི་སྟོན་མཛད་ཅིང་། །
གང་ཟག་སྲོག་དང་བདག་མེད་དང་། །སེམས་ཅན་མེད་པ་ཉིད་དུ་སྟོན། །འདས་པའི་སངས་རྒྱས་ཚད་མེད་ཀྱང་། །བསམ་གྱིས་མི་ཁྱབ་པ་དག་གི། །ཚིགས་སུ་བཅད་པ་བརྒྱ་སྟོང་གིས། །དེ་འདྲའི་ཆོས་ནི་སྟོན་པར་མཛད། །དེ་བཞིན་གཤེགས་པས་ཡོན་ཏན་ཆོས། །ཡང་

དག་ཉིད་ནི་སྟོན་མཛད་ཀྱང་། །རྗོད་དང་བརྗོད་བྱ་མི་མངའ་བས། །བརྗོད་མཛད་ཆོས་ཀྱང་ཡོང་མི་མངའ། །བཅོམ་ལྡན་ཡང་དག་ཆོས་གསུང་ཞིང་། །སྐྱེ་དགུ་རྣམས་ནི་གོ་མཛད་པས། །ལྷ་རྣམས་དང་ནི་གནོད་སྦྱིན་དག །གང་ཐོས་དེ་དག་རྟོགས་པར་འགྱུར། །ལྷ་མ་
ཡིན་ནི་ཐམས་ཅད་ཀྱང་། །མོས་པ་དག་ནི་རྣམ་པར་དག །མི་ནི་མང་པོ་ཚད་མེད་ཀྱང་། །ཐེ་ཚོམ་དྲ་བ་ཆད་པར་གྱུར། །འདོད་ཆགས་རང་བཞིན་རབ་ཏུ་རྟོགས། །ཞེ་སྡང་གཏི་མུག་རྣམ་པར་བཤིག །སྲེད་དང་ང་རྒྱལ་མ་རིག་དང་། །གཡོ་སྒྱུ་ཕྲག་དོག་སྤྲོས་པ་ནས། །སྡུག་བསྔལ་
ཕུང་པོ་ལ་སོགས་པར། །ཐམས་ཅད་ཀྱང་ནི་ཡོངས་སུ་སྤངས། །འདི་ལ་སོགས་པའི་ཚིག་གི་དོན། །མཐར་ནི་ཀུན་ཀྱང་རྣམ་པར་དག །དེ་བཞིན་གཤེགས་པས་ཆོས་གཅིག་ལ། །སྣ་ཚོགས་མིང་ནི་རབ་མཁྱེན་པས། །གྲངས་ནི་བརྒྱ་སྟོང་མང་པོ་རྣམས། །བསམ་གྱིས་མི་ཁྱབ་རབ་ཏུ་
སྟོན། །སངས་རྒྱས་ཚད་མེད་མང་པོ་ལས། །དེ་འདྲའི་ཆོས་ནི་ལེགས་བསླབས་པས། །ཆོས་ཀྱི་དངོས་པོ་གཅིག་ལ་ཡང་། །བརྗོད་པ་ཐུག་པ་མེད་པ་སྟོན། །དེ་བཞིན་གཤེགས་པས་ཆོས་རྣམས་ཀྱི། །རྣམ་གྲངས་སྣ་ཚོགས་རབ་མཁྱེན་པས། །མིང་ཚིག་དང་པོ་བར་མ་དང་། །ཐ་
མ་རྣམ་འབྱེད་རབ་ཏུ་མཁྱེན། །ཐ་དད་ཚིག་ནི་སྣ་ཚོགས་དག །ཐམས་ཅད་རབ་ཏུ་བསླབས་པས་ན། །དོན་མཆོག་དག་ནི་གྱ་ནོམ་པ། །སྟོན་པ་དག་ནི་རབ་ཏུ་མཁྱེན། །དེ་འདྲའི་དབྱངས་ནི་རྣམ་དག་པ། །རྒྱུ་རྐྱེན་ཚོགས་པ་ལས་བྱུང་བས། །ལྕེ་འབའ་ཞིག་ལ་རྟེན་པ་ནས། །ལུས་སེམས་
བར་ལ་རྟེན་པའང་མིན། །ས་ནི་རྣམ་པ་དྲུག་ཏུ་གཡོས། །ཕྱོགས་བཅུའི་འཁོར་ནི་ཡོངས་འདུས་ནས། །ཐལ་སྦྱར་བཅོམ་ལྡན་ཞལ་ལྟ་ན། །ཐེ་ཚོམ་དག་ནི་བསལ་དུ་གསོལ། །དེ་བཞིན་གཤེགས་པས་མིག་ཟད་དང་། །སྐྱེ་མཐའ་དག་ནི་རང་བཞིན་གྱིས། །རྟག་ཏུ་སྟོང་ཞིང་དབེན་པ་དང་། །
འགྲོ་འོང་མེད་པར་རབ་ཏུ་མཁྱེན། །བཞུགས་དང་གནས་ནི་མི་མངའ་བས། །ཡང་དག་མཐའ་ལ་རབ་ཏུ་བཞུགས། །བཅོམ་ལྡན་སྤྱན་ནི་ཐོགས་མི་མངའ། །དེ་སླད་དེང་བདག་ཞུ་བ་ལགས། །དེ་བཞིན་གཤེགས་པས་མིག་ཉིད་ཀྱི། །སྔོན་དང་ཕྱི་མའི་མཐའ་དག་དང་། །ཟད་དང་མ་ཟད་

འཁོར་བ་ནི། །རང་བཞིན་སྟོང་དབེན་རབ་མཁྱེན་པས། །ཆོས་ཀྱི་དོན་རྣམས་རབ་ཕྱེ་ནས། །འཇིག་རྟེན་རྣམས་ནི་དགའ་བར་མཛད། །ཐུབ་པ་དབྱངས་སྙན་རབ་མངའ་བས། །ཅི་སླད་འཛུམ་པ་སྟོན་པར་མཛད། །བཅོམ་ལྡན་སྔོན་དང་ཕྱི་མཐའ་དང་། །མིག་ཉིད་སྟོང་དབེན་རབ་མཁྱེན་
ཅིང་། །རྣམ་རྟོག་ཚིག་དང་བྲལ་ལགས་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་མིག་ནི་དཔག་མེད་དང་། །བརྗོད་པ་སྣ་ཚོགས་རང་བཞིན་གྱིས། །རྟག་ཏུ་སྟོང་དབེན་མཁྱེན་ལགས་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཟད་དང་སྐྱེ་མཐའ་དང་། །མིག་
ཉིད་སྟོང་དབེན་རབ་མཁྱེན་ཅིང་། །ཉོན་མོངས་རྣམས་ནི་ཡོངས་སྤངས་པས། །སངས་རྒྱས་བྱང་ཆུབ་མཁྱེན་པ་བརྙེས། །གྲགས་པ་མཆོག་ནི་ཕུན་སུམ་ཚོགས། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཡུན་རིང་བསྒོམ་བསླབས་པས། །བསམ་གྱིས་མི་ཁྱབ་སྟོན་པར་མཛད། །
མིག་ཉིད་སྟོང་པ་ཉིད་དུ་མཁྱེན། །དྲི་བྲལ་རྟག་ཏུ་རྣམ་པར་དག །སེམས་ཀྱི་སྤྱོད་པ་ཚད་མེད་རྣམས། །དགོངས་པ་གཅིག་གིས་ཐམས་ཅད་མཁྱེན། །འོད་ཟེར་འཇིག་རྟེན་སྣང་མཛད་པ། །འདི་ནི་གང་གི་སྔ་རྟགས་ལགས། །དྲང་སྲོང་ཆེན་པོ་མངོན་སངས་རྒྱས། །རྐང་གཉིས་གཙོ་བོ་
ཁྱད་པར་འཕགས། །ཉོན་མོངས་དག་ནི་རབ་བསལ་བས། །ཐུགས་ནི་རྟག་ཏུ་ཞི་ཞིང་དབེན། །དེ་བཞིན་གཤེགས་པ་མཁྱེན་མཆོག་གིས། །མིག་ཟད་མཐའ་ནི་རབ་ཏུ་རྟོགས། །རྒྱུ་དང་རྐྱེན་ནི་གང་གི་སླད། །དེང་འདིར་འཛུམ་པ་སྟོན་པར་མཛད། །རྣ་བ་སྣ་ལྕེ་ལུས་དང་ཡིད། །
ཡུལ་དྲུག་དང་ནི་འབྱུང་ཆེན་བཞི། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། །བཅོམ་ལྡན་མིག་ལ་བདག་མེད་མཁྱེན། །རྣ་བ་མི་རྟག་ཉིད་དུ་རྟོགས། །སྣ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ལྕེ་ལ་བདག་མེད་
མཁྱེན། །ལུས་ཀྱང་མི་རྟག་ཉིད་དུ་རྟོགས། །སེམས་ཡིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་གཟུགས་ལ་བདག་མེད་མཁྱེན། །སྒྲ་ཡང་མི་རྟག་ཉིད་དུ་རྟོག །དྲི་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་

ལྡན་རོ་ལ་བདག་མེད་མཁྱེན། །རེག་བྱ་མི་རྟག་ཉིད་དུ་རྟོགས། །ཆོས་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ས་ལ་བདག་མེད་མཁྱེན། །ཆུ་ཡང་མི་རྟག་ཉིད་དུ་རྟོགས། །མེ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་
པར་མཛད། །བཅོམ་ལྡན་རླུང་ལ་བདག་མེད་མཁྱེན། །ངོ་བོ་མི་རྟག་ཉིད་དུ་རྟོགས། །དངོས་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་འཇིག་རྟེན་བདག་མེད་མཁྱེན། །སྡུག་བསྔལ་མི་རྟག་ཉིད་དུ་རྟོགས། །ཕུང་པོ་སྟོང་པར་རབ་མཁྱེན་ན། །ཅི་
སླད་འཛུམ་པ་སྟོན་པར་མཛད། །བཅོམ་ལྡན་ཁམས་ལ་བདག་མེད་མཁྱེན། །འཇིག་རྟེན་མི་རྟག་ཉིད་དུ་རྟོགས། །སྐྱེ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་སྒྲ་ལ་བདག་མེད་མཁྱེན། །མིང་ཡང་མི་རྟག་ཉིད་དུ་རྟོགས། །ལམ་ཉིད་སྟོང་པར་རབ་
མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཡེ་ཤེས་བདག་མེད་མཁྱེན། །རབ་དབེན་མི་རྟག་ཉིད་དུ་རྟོགས། །སེམས་ཅན་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་རང་བཞིན་རང་བཞིན་མེད། །བདག་དང་བདག་མེད་པ་ཡང་མཁྱེན། །
མོས་པ་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །འཁོར་བ་བདག་མེད་ཉིད་དུ་གཟིགས། །རྟག་དང་མི་རྟག་པ་ཡང་མཁྱེན། །མྱ་ངན་འདས་པ་སྟོང་མཁྱེན་ན། །ཅི་སླད་འཛུམ་པ་སྟོན་པར་མཛད། །དེ་བཞིན་གཤེགས་པ་ཐུགས་རྣམ་གྲོལ། །གྲགས་པ་
ཁམས་གསུམ་ཀུན་དུ་གང་། །བརྒྱ་བྱིན་མི་ཡི་དབང་པོ་དང་། །ཀླུ་རྣམས་ལ་སོགས་ཀུན་གྱིས་མཆོད། །དེ་བཞིན་གཤེགས་པས་མིག་ཟད་དང་། །སྐྱེ་མཐའ་རབ་དབེན་མཁྱེན་ལགས་ན། །ཅི་སླད་འཛུམ་པ་སྟོན་པར་མཛད། །སངས་རྒྱས་སྲས་ནི་ཚད་མེད་པ། །འཁོར་འདིར་ཐམས་
ཅད་རབ་ཏུ་འདུས། །སངས་རྒྱས་གསུང་ལས་སྐྱེས་པ་དང་། །ཆོས་ལས་སྤྲུལ་ཏེ་གང་བྱུང་བ། །ཐམས་ཅད་བཅོམ་ལྡན་སྤྱན་སྔར་མཆིས། །གུས་པས་ཐལ་མོ་རབ་སྦྱར་ལགས། །འཁོར་འདུས་དེ་དག་སླད་དུ་ནི། །འོད་ཟེར་རྒྱུ་རྐྱེན་འདི་ཞུ་ལགས། །དེ་བཞིན་གཤེགས་པས་མིག་ཉིད་ནི། །

སྟོང་ཞིང་བདག་མེད་མཁྱེན་པས་ན། །ཁྱིམ་ན་གནས་པའི་རྣལ་འབྱོར་པ། །ཐམས་ཅད་ལས་ནི་ཡང་དག་འདས། །དེ་བཞིན་གཤེགས་པས་ཆོས་རྣམས་ནི། །བྱེ་བྲག་མེད་ཅིང་མཉམ་མཁྱེན་པས། །བཅོམ་ལྡན་དགོངས་པ་རབ་མཁྱེན་གྱི། །རྫུ་འཕྲུལ་དག་གིས་གཟིགས་མ་ལགས། །
བཅོམ་ལྡན་མིག་ལ་བདག་མེད་མཁྱེན། །ངོ་བོ་ཉིད་སྟོང་འགྲོ་འོང་མེད། །རྣམ་དག་མཁྱེན་པ་ཚད་མ་མཆིས། །ཅི་སླད་འཛུམ་པ་སྟོན་པར་མཛད།། །།བམ་པོ་གསུམ་པ། དེ་བཞིན་གཤེགས་པ་སྐྱེ་མཐའ་རབ་ཟད་པ། །ཐུགས་རྗེ་ཆེན་པོས་འཇིག་རྟེན་ཀུན་སྐྱོབ་མཛད། །
ཆོས་རྗེ་མཆོག་གྱུར་མི་ཡི་གཙོར་གྱུར་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བྱང་ཆུབ་སེམས་དཔའ་ཆེན་པོ་ཚད་མ་མཆིས། །གཞན་ཡང་ལྷ་ཚོགས་གཟི་བྱིན་ཆེ་བ་རྣམས། །མཁའ་ལ་གདུགས་ནི་དམ་པ་དག་ཀྱང་ཐོགས། །ས་ཆེན་འདི་ནི་རབ་ཏུ་གཡོས་པར་གྱུར། །
གང་ཞིག་སྔོན་ནི་དེ་བཞིན་གཤེགས་པ་ལས། །ཡུན་རིང་དགེ་བའི་ཆོས་ནི་གང་བསྒྲུབས་པ། །མཉམ་པར་དགའ་མཛད་ཐུགས་རྗེ་ཆེན་པོའི་གཙོ། །ཅི་སླད་འཛུམ་པ་བསྟན་མཛད་བཤད་དུ་གསོལ། །གང་ཞིག་སྔོན་ནི་སངས་རྒྱས་རབ་མཆོད་ནས། །ཆོས་འདི་ཐོས་ནས་དགའ་བ་རབ་
སྐྱེས་པས། །འདྲེན་པ་རབ་མཆོག་མི་ཡི་གཙོར་གྱུར་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་གསུང་ནི་མང་པོ་དགའ་མཛད་པས། །བྱ་རྒྱལ་ངང་པ་བཞིན་དུ་དབྱངས་རབ་སྙན། །སྒྲ་སྙན་ཚད་མེད་རང་གི་ངང་གིས་འབྱུང་། །ཅི་སླད་འོད་ཟེར་འདི་བཀྱེ་བཤད་དུ་
གསོལ། །ཚིགས་བཅད་བྱེ་བ་ཚད་མ་མཆིས་པ་ཡིས། །རྗེས་འཐུན་གསུང་གི་བསྔགས་པ་བརྗོད་གྱུར་ཅིང་། །ཀུ་ཙི་ར་ཡི་སྒྲ་སྐད་མཆོག་ལྡན་པ། །ཅི་སླད་འོད་ཟེར་བཀྱེ་བ་བཤད་དུ་གསོལ། །འབྲུག་སྒྲ་ཟབ་མོས་ཆོས་ནི་བསྟན་པའི་སྒྲ། །འཇིག་རྟེན་བརྒྱ་སྟོང་དཔག་མེད་གྲགས་གྱུར་པ། །
ཐུགས་རྗེས་ཚིག་རྩུབ་ཡང་ན་འཇམ་སྟོན་པ། །ཅི་སླད་འོད་ཟེར་གསེར་གྱི་ཁ་དོག་བཀྱི། །སྐྱེ་དང་མི་སྐྱེ་ཟད་དང་མི་ཟད་མཁྱེན། །མིག་ཉིད་བྲལ་ཞིང་འགྲོ་འོང་མེད་པར་རྟོགས། །འཇིག་རྟེན་སྣང་མཛད་བདུད་རྩིའི་མཆོག་གྱུར་པ། །ཅི་སླད་འོད་ཟེར་གསེར་གྱི་ཁ་དོག་བཀྱེ། །མིག་གི་བྱུང་བ་རྟག་

ཏུ་སྟོང་དབེན་དང་། །འགྲོ་འོང་མ་མཆིས་གནས་པ་མ་མཆིས་དང་། །སྨིག་རྒྱུ་ཆུ་བུར་ལྟ་བུར་རབ་མཁྱེན་པ། །རྒྱུ་རྐྱེན་གང་གི་སླད་དུ་འཛུམ་བསྟན་ལགས། །དེ་བཞིན་རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ཆོས་རྣམས་ནས། །སྒྲ་དང་མིང་ལ་སོགས་པའི་
བར་དུ་ཡང་། །ཐམས་ཅད་དེ་བཞིན་དུ་ནི་རིག་པར་བགྱི། །རྡོ་རྗེ་རྟག་པའི་སྐུ་དང་མི་འཇིག་སྐུ། །མཚན་མཆོག་བརྒྱ་སྟོང་དག་ནི་ཕུན་སུམ་ཚོགས། །སྐུ་ལ་འཁྲུལ་འཁོར་མི་མངའ་གཡོ་མཛད་པ། །རྒྱུ་རྐྱེན་གང་སླད་འཛུམ་པ་བཤད་དུ་གསོལ། །བྱིན་པ་ཟླུམ་ཞིང་ཞབས་ཀྱི་རྟིང་པ་རིང་། །
ཕྱལ་གྱི་མཚན་མ་མི་གདའ་སེང་གེ་འདྲ། །ལྟེ་བ་ཤིན་ཏུ་ཟབ་ཅིང་རྐེད་རྒྱས་པ། །རྒྱུ་རྐྱེན་གང་སླད་འཛུམ་མཛད་བཤད་དུ་གསོལ། །གསེར་སྐུ་རྣམ་དག་རྡུལ་དང་དྲི་མ་སྤངས། །བ་སྤུ་རེ་རེ་ཁ་དོག་མཐོན་མཐིང་ལྡན། །གཡས་སུ་འཁྱིལ་ཅིང་སྤོས་ཀྱི་ངད་ལྡང་བ། །རྒྱུ་རྐྱེན་གང་སླད་
འཛུམ་མཛད་བཤད་དུ་གསོལ། །སྐུ་མཆོག་དམ་པ་ཡོངས་རྫོགས་རྟག་གནས་པ། །དཔེར་ན་ནྱ་གྲོ་དྷ་ཡི་ཤིང་རྒྱལ་བཞིན། །ཡོན་ཏན་ཐམས་ཅད་ཀྱིས་ནི་རབ་ཏུ་བརྒྱན། །གསུང་དབྱངས་དག་གིས་འཁོར་ནི་དགའ་བར་མཛད། །དཔུང་པ་ཟླུམ་ཞིང་ཕྲག་པ་སྟུག་ལ་མཛེས། །གཙུག་
ཏོར་ཡོངས་རྫོགས་གཡས་སུ་འཁྱིལ་བར་གདའ། །ཞིང་ནི་བརྒྱ་སྟོང་དཔག་མེད་རྒྱུ་བར་མཛད། །སེམས་ཅན་ལོག་དང་ཡང་དག་ལམ་སྟོན་མཛད། །ཚེམས་དཀར་དྲི་མི་མངའ་བས་དུང་དང་འདྲ། །ལྗགས་མཚན་སྲིད་རིང་ཞལ་ནི་ཀུན་དུ་ཁེབས། །འགྲམ་པ་སེང་གེ་འདྲ་ཞིང་ཤངས་ནི་
མཐོ། །ཐམས་ཅད་ཐབས་དང་རྣམ་དག་ཐུགས་ལས་སྐྱེས། །ཨུད་པ་ལ་ཡི་བསུང་ནི་ཞལ་ནས་འབྱུང་། །ཙན་དན་དྲི་དག་སྐུ་ནི་ཀུན་དུ་ཁྱབ། །སྔོན་ནི་བྱམས་པ་རྒྱ་ཆེར་བསྒོམས་པས་ན། །རྣམ་དག་མོས་པ་རྟག་ཏུ་རྒྱུན་མི་འཆད། །དེ་བཞིན་གཤེགས་པའི་ཞབས་མཐིལ་ཤིན་ཏུ་མཉམ། །
ས་ལ་རེག་ཀྱང་རྡུལ་ནི་གོས་མི་འགྱུར། །གོམ་པ་སེང་གེ་གླང་པོ་ཆེ་འདྲ་བས། །འཇིག་རྟེན་ཐམས་ཅད་ལས་ནི་ཡང་དག་འདས། །འཁོར་ལོ་རྩིབས་སྟོང་མཚན་གྱིས་མཛེས་པར་བརྒྱན། །ཁྱད་འཕགས་འོད་ཟེར་དག་ནི་རབ་ཏུ་གསལ། །དགེ་བ་དག་གིས་སྐྱེ་དགུ་ཕན་འདོགས་པས། །གང་

གིས་མཐོང་བ་དང་བ་རབ་ཏུ་སྐྱེ། །སོར་གཅིག་འོད་ཟེར་བརྒྱ་སྟོང་རབ་བཀྱེ་ནས། །སངས་རྒྱས་ཞིང་ནི་དཔག་མེད་སྣང་བར་མཛད། །སྔོན་ནི་དགེ་སྦྱོང་མང་པོ་རབ་བསྒྲུབས་པས། །མཚན་གྱི་བཀོད་པ་སྣ་ཚོགས་འདི་བརྙེས་ལགས། །གཟུགས་སྐུ་ཡོངས་རྫོགས་དཔེ་ཟླ་ཡོང་མ་མཆིས། །ཞལ་
མཚན་རབ་མཛེས་ཤིན་ཏུ་ཁྱད་པར་འཕགས། །རྫུ་འཕྲུལ་དག་གིས་འཇིག་རྟེན་ཕན་འདོགས་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བྱིན་པ་རི་དགས་ཨེ་ན་ཡ་དང་འདྲ། །སྐུ་དབྱིབས་མི་རྒུ་སེང་གེ་ཇི་ལྟ་བཞིན། །འཇིག་རྟེན་བྱུང་ནས་འཇིག་རྟེན་སྣང་མཛད་པ། །ཅི་སླད་
འཛུམ་པ་བསྟན་མཛད་བཤད་དུ་གསོལ། །ཅང་ཤེས་བཞིན་དུ་མཚན་སྦས་རྡུལ་མི་མངའ། །ཕྱག་མཐིལ་མཉམ་རྒྱས་ཕྱག་ནི་པུས་མོ་འདས། །མི་ཡི་སེང་གེ་ངོ་མཚར་ཁྱད་པར་འཕགས། །ཅི་སླད་འཛུམ་པ་བསྟན་མཛད་བཤད་དུ་གསོལ། །སྐུ་ལས་འོད་ཟེར་དཔག་མེད་རབ་འགྱེད་
ཅིང་། ཁ་དོག་གྱ་ནོམ་རབ་ཞི་རྟག་གསལ་བ། །རྣམ་དག་ཐུགས་ནི་རྟག་ཏུ་རྒྱུན་མི་འཆད། །མདོ་སྡེ་ཚད་མེད་པ་དག་སྟོན་པར་མཛད། །རྟག་དང་ཆད་པ་དག་ལ་གནས་པ་ཡིས། །དེ་འདྲའི་ཆོས་ནི་བསྒྲུབ་པར་འགྱུར་མ་ལགས། །གང་གིས་མཐར་ལྟ་རྣམས་ནི་རབ་སྤངས་ན། །བཅོམ་
ལྡན་རྣམ་དག་སྐུ་ནི་མྱུར་ཐོབ་འགྱུར། །ལྷ་རྔ་འབྲུག་སྒྲ་གསུང་ནི་ཀུན་གྲགས་ཤིང་། །ཀ་ལན་དཀའི་དབྱངས་སྙན་རབ་ཏུ་གསལ། །ལྷ་ཡི་གླུ་སྒྲ་བརྒྱ་སྟོང་མང་ལྡན་པ། །ཅི་སླད་འོད་ཟེར་བཀྱེ་བ་བཤད་དུ་གསོལ། །འདྲེན་པས་གསུང་གཅིག་ཏུ་ནི་ཆོས་བསྟན་པས། །འཆལ་པའི་ཚུལ་
ཁྲིམས་ཅན་དག་རྒྱུན་ཡང་བཅད། །དེ་བཞིན་གཤེགས་པས་དབྱངས་རབ་གང་གསུངས་པ། །དེ་ཀུན་ཟབ་ཅིང་ངོ་མཚར་ཆོས་ལགས་སོ། །ཁྱུ་མཆོག་སྨིན་མཚམས་འོད་ཟེར་རབ་བཀྱེ་བས། །སངས་རྒྱས་ཞིང་ནི་བརྒྱ་སྟོང་གསལ་བར་མཛད། །སྤྱན་མཆོག་དག་ནི་ཁ་དོག་མཐོན་མཐིང་
འདྲ། །གཙུག་ཏོར་མཚན་ནི་མཁའ་ཡི་ལྷས་མི་མཐོང་། །ཚེམས་དཀར་གཏམས་པ་བཞི་བཅུ་དག་དང་ལྡན། །དཔེར་ན་རིན་ཆེན་ཆུ་ཤེལ་དག་དང་མཚུངས། །དགེ་བའི་ཕྲིན་ལས་ཚད་མེད་དག་ལས་སྐྱེས། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་བཞིན་གཤེགས་པ་ཡོན་ཏན་

རྫོགས་པའི་སྐུ། །ཁ་དོག་དམ་པ་དཔག་མེད་ཕུན་ཚོགས་ཤིང་། །འོད་ཟེར་རྣམ་དག་ངོ་མཚར་རབ་བཀྱེ་བ། །ཅི་སླད་འཛུམ་པ་བསྟན་མཛད་བཤད་དུ་གསོལ། །ཐུགས་རྗེ་ཆེན་པོ་མཆོག་རྒྱལ་རྐང་གཉིས་གཙོ། །སེམས་ཅན་ཡང་དག་བསམ་པ་ཐུགས་སུ་ཆུད། །ཐོགས་པ་མ་མཆིས་སྤོབས་
པ་མཆོག་བརྙེས་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་བཞིན་གཤེགས་པས་ཕ་རོལ་རབ་བྱོན་པས། །རིག་པ་གསུམ་དང་མངོན་ཤེས་དྲུག་ཕུན་ཚོགས། །རྣམ་དག་འོད་ཟེར་དཔག་མེད་སྟོན་མཛད་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་སྔོན་ནི་བསྐལ་པ་
དཔག་མེད་སྙེད། །བཅོམ་ལྡན་བརྒྱ་སྟོང་སྙེད་ལ་མཆོད་པ་མཛད། །དེ་འདྲའི་རྒྱུ་འབྲས་ཆབ་ནི་མི་འཚལ་བ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་སྔོན་ནི་བསྐལ་པ་དཔག་མེད་སྙེད། །ཏིང་འཛིན་མཆོག་རྣམས་ལ་ནི་རབ་བཞུགས་པས། །མིག་གི་སྐྱེ་མཐའ་ཟད་པའི་མཐའ་མཁྱེན་
ན། །ཅི་སླད་འཛུམ་པ་བསྟན་མཛད་བཤད་དུ་གསོལ། །འདས་པ་དང་ནི་མ་འོངས་ད་ལྟར་དུས། །འདྲེན་པས་དེ་དག་ཀུན་ནི་རབ་ཏུ་མཁྱེན། །རྣམ་དག་མཁྱེན་པ་ཐོགས་མེད་བསམ་མི་ཁྱབ། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་འཁོར་མང་པོའི་མདུན་དུ་
ཕྱག་གསེར་གྱི་ཁ་དོག་ལྟ་བུ་བརྐྱང་སྟེ། ཟླ་འོད་གཞོན་ནུར་གྱུར་པའི་སྤྱི་བོ་ལ་བཞག་ནས་ཚིགས་སུ་བཅད་དེ་བཀའ་སྩལ་པ། །གཞོན་ནུ་ཤིན་ཏུ་ལེགས་པར་ཉོན། །ངས་ནི་དེང་འདིར་བྱང་ཆུབ་ཆོས། །འོད་ཟེར་རབ་ཏུ་སྟོན་པའི་མདོ། །ཁྱོད་ལ་ཤིན་ཏུ་ཡོངས་གཏད་ཀྱིས། །མ་འོངས་ཐ་མ་དུས་ངན་ཚེ། །
ཆོས་ནི་རྣམ་པར་འཇིག་པ་ན། །ཁྱོད་ཀྱིས་སེམས་ཅན་རྣམས་ལ་ནི། །རབ་ཏུ་ཕྱེ་ནས་བཤད་པར་གྱིས། །ངས་ནི་སངས་རྒྱས་སྤྱན་དག་གིས། །མ་འོངས་ཐ་མ་དུས་ཀྱི་ཚེ། །ཤིན་ཏུ་ཟབ་ཅིང་གྱ་ནོམ་པའི། །མདོ་སྡེ་དམ་པ་འདི་དག་ལ། །གང་མོས་གང་ནི་མི་མོས་པ། །ཐམས་ཅད་ཀུན་ཀྱང་གཟིགས་ཤིང་
མཁྱེན། །སེམས་ཅན་དག་ནི་གང་ཞིག་གིས། །བྱང་ཆུབ་ལམ་ནི་རབ་ཚོལ་བ། །རྟག་ཏུ་སངས་རྒྱས་རྗེས་དྲན་ཞིང་། །མདོ་སྡེ་འདི་ནི་གཟུང་བར་གྱིས། །གང་ཞིག་དད་པ་རབ་འཇིག་ཅིང་། །འདུ་འཛི་ལ་ནི་མོས་འགྱུར་དང་། །ཉིན་མཚན་གཉིད་ལ་གང་དགའ་བ། །མདོ་སྡེ་འདི་ལ་མོས་མི་འགྱུར། །ང་ཡི་བསྟན་

པ་དག་ལས་ནི། །རབ་ཏུ་བྱུང་བར་གྱུར་ནས་ཀྱང་། །མྱ་ངན་འདས་པའི་ཆོས་དག་ལ། །མོས་པ་དག་ནི་མི་སྐྱེ་བ། །སྐྱེས་བུ་བླུན་པོ་དེ་དག་ནི། །དད་པས་བྱིན་པ་ཆུད་གཟོན་འགྱུར། །འདུས་བྱས་རྣམས་ཀྱི་ཆོས་དག་ལ། །ཉེས་དམིགས་མང་བར་ཐོས་ཀྱང་ནི། །འཇིག་རྟེན་དག་ལ་མངོན་ཞེན་ནས། །འཇིགས་པ་དག་
ནི་མི་སྐྱེ་བ། །སྐྱེས་བུ་བླུན་པོ་དེ་དག་ནི། །མཁས་པ་རྣམས་ཀྱིས་སྨོད་པར་འགྱུར། །ཆོས་གོས་དག་ནི་བགོས་གྱུར་ཀྱང་། །དེ་ལ་ཤེས་རབ་ཅི་ཡང་མེད། །ཐུབ་པས་ལེགས་པར་གསུངས་པ་ཡི། །ཡང་དག་བཀའ་ནི་གང་ཡིན་པ། །ཤེས་པ་མེད་པས་ཐོས་གྱུར་ན། །ཡིད་ཆེས་ལེན་པར་མི་འགྱུར་ཏེ། །
སྐྱེས་བུ་བླུན་པོ་དེ་དག་དང་། །ལྷན་ཅིག་གནས་པར་མི་བྱའོ། །ཁྱད་པར་འཕགས་པའི་ཆོས་འདི་དག །གལ་ཏེ་ཐོས་པར་གྱུར་ནས་ཀྱང་། །རབ་ཏུ་དགའ་ཞིང་མོས་པ་ཡི། །སེམས་ཀྱང་སྐྱེ་བར་མི་འགྱུར་བ། །དེ་འདྲའི་གང་ཟག་དག་ལ་ནི། །ངས་ནི་རབ་ཏུ་སྨོད་པར་བྱེད། །མི་ལུས་ཐོབ་པར་གྱུར་མོད་
ཀྱང་། །དེ་ནི་དོན་མེད་ཆུད་ཟོས་ཡིན། །གལ་ཏེ་ཤིན་ཏུ་ཟབ་པའི་ཆོས། །འདི་དག་ཐོས་པར་གྱུར་ནས་ནི། །རབ་ཏུ་དགའ་ཞིང་མོས་པ་ཡི། །སེམས་ནི་རབ་ཏུ་སྐྱེ་འགྱུར་བ། །དེ་འདྲའི་གང་ཟག་དེ་དག་ནི། །སྔོན་ཆད་སངས་རྒྱས་ཕྲད་པས་ན། །གདོན་མི་ཟ་བ་ཁོ་ནར་ནི། །བླ་མེད་བྱང་ཆུབ་ཐོབ་པར་འགྱུར། །
སྐྱེས་བུ་བླུན་པོ་གང་དག་ཅིག །ལྟ་བ་ངན་པས་རབ་སྨས་ནས། །ཤེས་རབ་སྲོག་ནི་གཅོད་བྱེད་པ། །བྱང་ཆུབ་ཡོངས་སུ་སྤོང་བར་འགྱུར། །དེ་ལྟ་བས་ན་མི་དགེ་བའི། །བཤེས་གཉེན་དག་ནི་རབ་སྤངས་ནས། །བློ་ལྡན་མཁས་པ་དག་ལ་ནི། །བསྟེན་ཅིང་གུས་པ་བསྐྱེད་པར་བྱ། །འཇིག་རྟེན་དག་ནི་ཐམས་
ཅད་ན། །ཉེས་དམིགས་ཚད་མེད་གང་ཡོད་དང་། །སེམས་ཅན་ངན་སོང་གསུམ་པོར་ནི། །རྟག་ཏུ་བྱིང་བར་གང་བྱེད་པ། །ཐམས་ཅད་གཏི་མུག་རྨོངས་པ་ཡི། །རྒྱུ་དང་རྐྱེན་ལས་བྱུང་བས་ན། །ཉོན་མོངས་རྗེས་སུ་འཇུག་བྱེད་ཅིང་། །རང་དབང་དག་ནི་འཐོབ་མི་འགྱུར། །ཡང་དག་ཆོས་ནི་སྤོང་བྱེད་ཅིང་། །ཆོས་མ་
ཡིན་པ་སྤྱོད་པར་བྱེད། །དེ་ལྟ་བས་ན་རྨོངས་པ་ཡི། །སྐྱེས་བུ་དམན་པ་སྤང་བར་བྱ། །ཇི་ལྟར་ཁ་ལོ་སྒྱུར་བ་ཡིས། །རང་གི་སྲོག་ཤིང་བཅག་པ་བཞིན། །མི་དགེ་ལས་ནི་བྱས་པས་ན། །སེམས་ཅན་དམྱལ་བར་སྐྱེ་བར་འགྱུར། །ཁ་ནས་ཚིག་ངན་ཕྱུང་ནས་ནི། །རྟག་ཏུ་བདག་ལ་གནོད་བྱེད་པ། །ཇི་ལྟར་སྟ་རེ་རྣོ་

ཐོགས་ནས། །རང་གི་ལུས་ནི་གཅོད་བྱེད་འདྲ། །ཆོས་རྣམས་རྒྱུ་དང་རྐྱེན་དག་གིས། །བྱས་པའི་ལས་ཀྱི་རྗེས་སུ་ནི། །རྣམ་སྨིན་མྱོང་བ་སྐྱབས་མེད་པར། །དེ་ལྟར་ཁོང་དུ་མ་ཆུད་པས། །འཇིག་རྟེན་དྲང་སྲོང་ལ་བསྟེན་ནས། །དགེ་བའི་གྲོགས་པོ་ཡིན་སྙམ་སེམས། །དེ་ནས་རང་ཉིད་འདི་
སྙམ་དུ། །སྟོང་པ་ཉིད་ནི་གང་བསྒོམ་པ། །འདུས་མ་བྱས་ནི་རྟོགས་སྙམ་ནས། །ཆད་པར་ལྟ་བ་སྐྱེད་པར་བྱེད། །ལུས་ནི་སྣོད་ཆག་པ་དང་འདྲ། །སེམས་ཀྱང་རྗེས་སུ་འགག་གྱུར་ཞེས། །ཕལ་ཆེར་ཀྱལ་བའི་ཚིག་དག་ལ། །མོས་པ་ཉིད་དུ་རབ་འགྱུར་ཞིང་། །འདི་ལ་མངོན་པར་ཞེན་པས་ན། །ཕན་པའི་
དོན་ནི་ཅི་ཡང་མེད། །གལ་ཏེ་སྦྲུལ་ནི་གདུག་པ་ཡིས། །གནོད་པ་དག་ནི་རབ་བྱས་ཀྱང་། །ནམ་ཡང་སྐྱེ་དགུ་མང་པོ་རྣམས། །ངན་འགྲོ་དག་ཏུ་ལྟུང་མི་བྱེད། །བླུན་པོ་གང་ཞིག་ཆོས་སྟོན་པ། །དགེ་བའི་རྩ་བ་འཇིག་བྱེད་པས། །སྐྱེ་དགུ་མང་པོ་ཚད་མེད་སྙེད། །སེམས་ཅན་དམྱལ་བར་ལྟུང་བར་བྱེད། །
ཁྱེད་ལ་སོགས་པ་འཁོར་འདུས་པ། །འདི་ལྟ་བུར་ནི་ལྟ་བར་གྱིས། །དེང་འདིར་ང་ཡི་སྤྱན་སྔར་ནི། །ཟླ་འོད་གཞོན་ནུ་གང་འདུག་པ། །འདིས་ནི་སྔོན་ཆད་འདས་པ་ཡི། །སངས་རྒྱས་དག་ནི་བཅོམ་ལྡན་འདས། །ཚད་མེད་གང་གཱའི་ཀླུང་བྱེ་སྙེད། །མཆོད་པ་རིམ་གྲོ་རབ་བྱས་ཤིང་། །ཤིན་ཏུ་བརྟན་པར་
ཡོངས་བསྒོམས་ནས། །བླ་མེད་ཡེ་ཤེས་བཙལ་བས་ན། །སྲིད་པ་དག་ནི་ཐམས་ཅད་ལ། །སེམས་ཀྱིས་གནས་པ་ཅི་ཡང་མེད། །མིག་གི་སྐྱེ་མཐའ་གཏན་དུ་ནི། །རྣམ་པར་དག་པར་ཤེས་པས་ན། །སྤྲོས་པ་དག་ནི་ཡོངས་སྤངས་ནས། །མངོན་པར་ཞེན་པ་ཅི་ཡང་མེད། །སེམས་ཅན་དག་ནི་ཚད་མེད་
ལ། །ཕན་པ་དག་ནི་བྱ་བའི་ཕྱིར། །བླ་མེད་འོད་ཟེར་སྟོན་པ་ཡི། །མདོ་སྡེ་དག་ནི་སྟོན་པར་བྱེད། །སྐྱེས་བུ་བླུན་པོ་གང་ཡིན་པ། །ཆོས་འདི་སློབ་པར་མི་ནུས་པས། །རྣལ་འབྱོར་བསྒོམ་པ་དག་ལ་ནི། །སྐྱོན་ཉིད་དུ་ཡང་ལྟ་བར་བྱེད། །དེ་ལྟ་བས་ན་བླུན་པོ་དག །ཐག་རིང་པོར་ནི་ཡོངས་སྤངས་ནས། །དེ་དག་ལ་ནི་
བསྟན་མི་བྱ། །དེ་ཡི་ཆོས་ཀྱང་མི་བསླབ་བོ། །སྐྱེས་བུ་བླུན་པོ་གང་ཡིན་པ། །རྩོད་པའི་སྨྲ་ལ་མོས་པས་ན། །རྩོད་སྨྲ་མེད་པའི་སྤྱོད་པ་ལ། །ནན་ཏན་བསྒྲུབ་པར་མི་ནུས་པས། །སྐྱེས་བུ་དེ་དག་རྣམས་ལ་ནི། །ཚུལ་བཞིན་སེམས་ནི་ཅི་ཡང་མེད། །དེ་ལྟ་བས་ན་དེ་དག་ལ། །བསྙེན་བཀུར་མི་བྱ་བསྔགས་མི་བརྗོད། །སྐྱེས་

བུ་བླུན་པོ་གང་ཡིན་པ། །ལེ་ལོ་སྙོམ་ལས་ལ་གནས་པས། །རྟག་ཏུ་ལུས་དང་ངག་ཡིད་ཀྱི། །མི་དགེ་ལས་ནི་སྤྱོད་པས་ན། །དེ་ལ་ཚུལ་ཁྲིམས་དག་པ་དང་། །ཤེས་རབ་མང་ཐོས་ཅི་ཡང་མེད། །རྟག་ཏུ་འདོད་པའི་ཡུལ་སེམས་ཤིང་། །འདུ་འཛི་དག་ལ་མོས་པར་བྱེད། །ཁྱེད་ཀྱིས་འདི་ལྟར་བླུན་པོ་དེ། །རིགས་
དང་རུས་དང་ལུས་ཀྱང་ནི། །དམན་པ་ཡིན་པར་རབ་ཏུ་ལྟོས། །ཁོང་ཁྲོ་བཀའ་བློ་མི་བདེ་ཞིང་། །བྱད་བཞིན་དག་ནི་མི་སྡུག་ལ། །གལ་ཏེ་དགེ་བའི་གནས་སྐྱེས་ཀྱང་། །ལུས་ནི་རྟག་ཏུ་མ་རབས་འགྱུར། །བདག་ཏུ་འདུ་ཤེས་ལ་ཞེན་པས། །ཡང་དག་དོན་ལ་རྨོངས་པར་འགྱུར། །བློ་གྲོས་དག་དང་མི་ལྡན་
པས། །ཚིག་གི་བྱེ་བྲག་འབྱེད་མི་ནུས། །རང་བཞིན་སྟོང་པའི་ཆོས་ཐོས་ཀྱང་། །དེ་ལ་མོས་པ་སྐྱེད་མི་འགྱུར། །དེ་བཞིན་གཤེགས་པ་བཅོམ་ལྡན་འདས། །ཡུན་རིང་པོ་ནས་འཇིག་རྟེན་པའི། །ཚིག་གི་སྤྲོས་པ་གང་ཡིན་པ། །ཐམས་ཅད་རབ་ཏུ་སྤངས་པ་ཡིན། །སོ་སོའི་སྐྱེ་བོས་འདི་དག་ལ། །ཤིན་
ཏུ་ཞེན་ཅིང་ཆགས་པས་ན། །ཇི་སྲིད་འཚོ་བའི་བར་དུ་ཡང་། །རྟོགས་ཤིང་ཁོང་དུ་ཆུད་མི་འགྱུར། །ཚུལ་ཁྲིམས་བསྔགས་པ་རྗོད་བྱེད་ཀྱང་། །ཚངས་པར་སྤྱོད་པ་སྒྲུབ་མི་བྱེད། །ཁ་ནས་ཆོས་ནི་སྟོན་བྱེད་ཀྱང་། །ལུས་ཀྱིས་ཆོས་མིན་སྤྱོད་པར་བྱེད། །རང་གིས་འདུལ་བ་སྟོན་བྱེད་ཀྱང་། །རྟག་ཏུ་འདུལ་
མིན་སྤྱོད་པར་བྱེད། །སངས་རྒྱས་སློབ་མ་དག་ལ་ནི། །ཁ་དོག་བསྒྱུར་བའི་གོས་གྱོན་གསུངས། །འཆལ་བའི་ཚུལ་ཁྲིམས་ཅན་དག་གིས། །གོས་འདི་རབ་ཏུ་བགོས་གྱུར་ཀྱང་། །ང་རྒྱལ་དང་ནི་བག་མེད་པའི། །སེམས་ནི་རབ་ཏུ་འཕེལ་བར་བྱེད། །དད་པས་བྱིན་པ་ཅི་ཟོས་པ། །ཐུ་ལུམ་འབར་བ་
མིད་པ་འདྲ། །དེ་ལྟར་ཁྱིམ་གྱི་གནས་སྤངས་ནས། །འདོད་པ་ལྔ་ཡི་བདེ་བའང་མེད། །གཞན་ཡང་སངས་རྒྱས་ཆོས་དག་ལ། །མཆོག་གི་བདེ་བ་མ་ཐོབ་ནས། །སྤྱོད་པ་འདྲེན་མ་མོས་བྱེད་པས། །མཐའ་གཉིས་དག་ནི་སྤོང་མི་འགྱུར། །ཡིད་ཀྱི་མོས་པ་ཇི་སྙེད་པ། །ཐམས་ཅད་ཀྱང་ནི་དག་མི་འགྱུར། །
དེ་འདྲའི་གང་ཟག་བླུན་པོ་ནི། །འཁོར་མང་ནང་དུ་གནས་གྱུར་ཀྱང་། །དཔེར་ན་ཇི་ལྟར་ཝ་སྐྱེས་དག །སེང་གེའི་ཁྱུར་ནི་ཞུགས་པ་བཞིན། །དེ་ལྟར་རབ་ཏུ་ཞི་བ་ཡི། །ཆོས་ནི་ཡང་དག་བསྟན་བྱས་ཀྱང་། །དེ་བཞིན་ཉིད་དང་སྟོང་པའི་དོན། །རྟོགས་ཤིང་ཁོང་དུ་མ་ཆུད་པས། །འཁོར་མང་དག་ལ་བསྟན་བསྔགས་

ཀྱང་། །ཁེངས་པའི་སེམས་ནི་སྐྱེད་པར་བྱེད། །སྟོན་པ་ཆེན་པོ་མི་དྲན་པས། །ངོ་ཚ་དམན་པའི་སེམས་ཀྱང་མེད། །མི་གཙང་དངོས་པོ་ལེན་བྱེད་ཀྱང་། །ཡིད་བཞིན་ནོར་བུ་ཐོབ་པ་བཞིན། །ཤིན་ཏུ་དགའ་བས་འཛིན་བྱེད་པས། །སེམས་ཀྱིས་ཆུང་ཟད་གཏོང་མི་བྱེད། །འདི་ལྟ་
བུ་ཡི་མ་རབས་དག །ཁྱིམ་ནས་རབ་ཏུ་བྱུང་ནས་ནི། །སྤྱོད་ལམ་དག་ཀྱང་སྲུང་བ་དང་། །ཆོས་གོས་ལྷུང་བཟེད་འཛིན་བྱེད་ཀྱང་། །ཆ་བྱད་ཙམ་དང་ལྡན་པས་ན། །ཡང་དག་ཤེས་རབ་ཅི་ཡང་མེད། །ཁ་སྤུ་དག་ནི་བྲེགས་གྱུར་ཀྱང་། །སྡིག་པའི་སེམས་ནི་མི་སྤོང་ཞིང་། །དགེ་སྦྱོང་མ་ཡིན་པ་ཡི་ཆོས། །ལོག་
ལྟ་དག་ཏུ་ལྷུང་གྱུར་ན། །རབ་དབེན་མྱ་ངན་འདས་པའི་ལམ། །དེ་དག་རབ་ཏུ་ཉམས་པར་འགྱུར། །དགེ་སྦྱོང་མངོན་དུ་བྱ་བ་ཡི། །འབྲས་བུ་དག་ཀྱང་འཐོབ་མི་འགྱུར། །མ་རིག་ཉོན་མོངས་རྣམས་ཀྱང་ནི། །རྡུལ་ཙམ་ཉམས་པར་མི་འགྱུར་རོ། །གྲོང་ཁྱེར་དག་ཏུ་རྣམ་རྒྱུ་ཞིང་། །རང་ཉིད་དབེན་པའི་བསྔགས་
བརྗོད་ཀྱང་། །སྐྱེས་བུ་བླུན་པོ་བློ་མེད་པས། །ཡང་དག་བགྲོད་པ་ཤེས་མི་འགྱུར། །སེམས་ཀྱི་འདུན་པ་ཅི་ཡོད་པ། །དེ་དག་ཐམས་ཅད་མི་དགེ་ཡིན། །རྙེད་པ་འདོད་པའི་རྒྱུ་ཡི་ཕྱིར། །དགོན་པ་དག་ན་གནས་བྱེད་ཀྱི། །མྱ་ངན་འདས་པའི་ཡང་དག་རྒྱུ། །བསྒྲུབ་པའི་ཕྱིར་ནི་མ་ཡིན་ནོ། །རྨུགས་དང་གཉིད་
ལ་རབ་ཏུ་དགའ། །ལུས་ནི་ཇི་ལྟར་བདེ་སྙམ་ནས། །རྟག་ཏུ་དེ་ལྟའི་དངོས་པོ་དག །སྒྲུབ་པ་ལ་ནི་མོས་པར་བྱེད། །དགོན་པའི་གནས་ནི་དེ་དག་ཏུ། །ལོ་ནི་མང་པོར་གནས་བྱེད་ཀྱང་། །ཕྱིན་ལོག་ལྟ་བར་གྱུར་པའི་ཕྱིར། །མྱ་ངན་འདས་ལམ་སྟོར་བས་ན། །ནམས་ཀྱང་དགེ་སྦྱོང་ལམ་དག་གི །འབྲས་བུ་
དག་ནི་ཐོབ་མི་འགྱུར། །ཡང་དག་ལྟ་བ་རབ་ཉམས་ཤིང་། །ཚུལ་ཁྲིམས་དག་དང་འགལ་བྱས་པས། །གོས་བཟང་དག་གིས་ལུས་བརྒྱན་པ། །དེ་ལ་ཤིན་ཏུ་སྲེད་པར་འགྱུར། །འདོད་པའི་བདེ་བ་རྣམས་ལ་ནི། །རྟག་ཏུ་སྲེད་པ་སྐྱེད་པར་བྱེད། །གལ་ཏེ་གྲོང་ཁྱེར་ཞུགས་ན་ཡང་། །ང་རྒྱལ་མཚན་མ་
སྟོན་བྱེད་ཅིང་། །ལུས་ཀྱི་ལས་ནི་མི་སྲུང་བས། །སྤྱོད་ལམ་དག་ལ་གནས་མི་བྱེད། །རེས་འགའ་གྲོང་ཁྱེར་ཞུགས་ནས་ནི། །རྒྱུ་ཚེ་རང་ཉིད་འདི་སྐད་དུ། །དགོན་པའི་གནས་ནི་དེ་དག་ན། །རི་ཕུག་དག་ནི་གང་ཡོད་པ། །ཁྱེད་རྣམས་འདི་ལྟར་ཤེས་པར་གྱིས། །དེ་ནི་བདག་གི་གནས་ཡིན་ཏེ། །མཐོ་

དམའ་རན་པར་ལྟ་བ་དང་། །འགྲོ་གོམ་ཚུལ་ལ་གནས་སོ་ཞེས། །ཐ་དད་མཚན་མའི་ཚིག་བརྗོད་དེ། །དགྲ་བཅོམ་པ་ཡི་རྟགས་བསྟན་པས། །ཁྱིམ་པ་དག་ནི་ཇི་སྙེད་པ། །ཕན་ཚུན་དུ་ནི་འདི་སྐད་དུ། །དགོན་པའི་དགེ་སློང་གང་ཡིན་པ། །ཡང་དག་འཕགས་པ་ཡིན་ཞེས་ཟེར། །རེས་འགའ་དགོན་
པ་དེ་དག་ན། །གནས་པར་གྱུར་པ་དེ་ཡི་ཚེ། །གལ་ཏེ་གཞན་དག་འོངས་གྱུར་ན། །འདི་ལྟ་བུར་ནི་སྟོན་པར་བྱེད། །བདག་ནི་དགོན་གནས་འདི་དག་ཏུ། །ཉིན་མཚན་འཆག་པར་བྱེད་ཅེའམ། །ཡང་ན་རྩྭ་འཇམ་བཏིང་ནས་ནི། །འདིར་ནི་འདུག་པར་བྱེད་ཅེས་ཟེར། །རེས་འགའ་གྲོང་ཁྱེར་ཞུགས་
གྱུར་ནས། །ཁྱིམ་པའི་དེར་ནི་ཕྱིན་པའི་ཚེ། །གཡོ་སྒྱུས་ནན་ཏན་འདི་སྐད་དུ། །བདེ་འམ་ཞེས་ནི་འདྲི་བར་བྱེད། །འཇིག་རྟེན་པ་ཡི་འདུ་འཛིའི་གཏམ། །རྒྱལ་པོ་ཆོམ་རྐུན་ལ་སོགས་པའི། །སྣ་ཚོགས་དག་ནི་རྗོད་པར་བྱེད། །རེས་འགའ་ཆགས་པའི་སེམས་དག་གིས། །བུད་མེད་རྣམས་ཀྱི་མདུན་
དག་ཏུ། །ཐབས་ནི་རྣམ་པ་སྣ་ཚོགས་ཀྱིས། །རང་གི་ཡོན་ཏན་རྗོད་པར་བྱེད། །བདག་ནི་འཇིག་རྟེན་ཐམས་ཅད་ཀྱི། །བསོད་ནམས་ཞིང་ནི་ཆེན་པོ་བྱེད། །བདག་ནི་རྒྱལ་ཐབས་རབ་སྤངས་ནས། །རབ་ཏུ་བྱུང་ནས་ལམ་སྒོམ་ཡིན། །བཙུན་མོ་དང་ནི་སྲས་རྣམས་ཀྱང་། །མཐོ་རིས་སྐྱེས་པར་གྱུར་
ཅེས་ཟེར། །དེ་དག་དེ་སྐད་ཐོས་ནས་ནི། །ཤིན་ཏུ་གུས་པ་རབ་བསྐྱེད་དེ། །གོས་ཟས་དང་ནི་བཏུང་བ་དག །སྣ་ཚོགས་སྦྱར་ནས་མཆོད་པར་བྱེད། །བཙུན་པས་ཐུགས་རྗེར་རབ་དགོངས་ཤིང་། །བདག་ཅག་ཐད་དུ་ཡང་གཤེགས་ཟེར། །རོ་ཞིམ་དག་ལ་ཞེན་ཆགས་ཤིང་། །ཉེས་དམིགས་རྣམས་
ནི་མི་ཤེས་པས། །བདུད་ཀྱིས་གླགས་ཀྱང་རྙེད་འགྱུར་ཏེ། །རུ་སྦལ་རྒྱ་མོས་ཟིན་པ་འདྲ། །དགོན་པར་གནས་པ་དག་ལ་ཡང་། །རྙེད་པ་དག་གིས་སྙེམས་པར་བྱེད། །དགེ་སློང་བརྩོན་འགྲུས་ཅན་དག་ལ། །བརྙས་ཤིང་སྐུར་པ་འདེབས་པར་བྱེད། །རྙེད་དང་གྲགས་པས་སེམས་རྨོངས་པས། །ཡང་ནས་
ཡང་དུ་ཞེན་པ་སྐྱེད། །ལུས་ནི་ཡོངས་སུ་གསོ་བའི་ཕྱིར། །རྟག་ཏུ་གཡོ་སྒྱུ་སྤྱོད་པས་ན། །ལུས་དང་ངག་གི་མི་དགེ་ལས། །ཡང་ནས་ཡང་དུ་འཕེལ་བར་བྱེད། །གལ་ཏེ་སྦྱིན་བདག་དད་པ་ཡིས། །དད་པའི་སེམས་ཀྱིས་མཆོད་ན་ཡང་། །ལེ་ལོ་སྙོམ་ལས་དབང་གིས་ནི། །དེ་ཡི་བསོད་ནམས་འབྲི་བར་བྱེད། །

སྐྱེས་བུ་བླུན་པོ་དེ་དག་ནི། །རྟག་ཏུ་མི་དགེ་འདོད་བསྐྱེད་པས། །སྟོང་པ་ཉིད་ཀྱི་ཆོས་འདི་ལ། །རྗེས་འཐུན་བཟོད་སེམས་འཐོབ་མི་འགྱུར། །གང་དག་ང་ཡི་བསྟན་པ་ལས། །ཉེས་དམིགས་དེ་དག་རབ་སྤངས་ནས། །ནན་ཏན་བག་ཡོད་སྒྲུབ་བྱེད་ན། །ཆོས་འདི་ཐོས་པར་དཀའ་མི་
འགྱུར། །རྙེད་པ་དང་ནི་མི་རྙེད་དང་། །བསྟོད་སྨད་སྡུག་བསྔལ་བདེ་ལ་སོགས། །འཇིག་རྟེན་ཆོས་ཀྱིས་མི་གཡོས་པ། །ཆོས་འདི་ཐོབ་པར་དཀའ་མི་འགྱུར། །ལུས་ལ་མི་གཙང་འདུ་ཤེས་དང་། །ཕུང་པོ་རྨ་ཡི་འདུ་ཤེས་དང་། །ཟས་ནི་རྨ་བསྐུས་འདུ་ཤེས་པ། །ཆོས་འདི་ཐོབ་པར་དཀའ་མི་འགྱུར། །
གོས་བཟང་དག་ནི་ཐོབ་གྱུར་ཀྱང་། །དྲེགས་པ་དག་ནི་མི་སྐྱེད་ཅིང་། །ངོ་ཚ་དགབ་པའི་ཕྱིར་གྱོན་པ། །ཆོས་འདི་ཐོབ་པར་དཀའ་མི་འགྱུར། །གཟུགས་དང་སྟོབས་ནི་མི་སྙེམས་ཤིང་། །ཟས་ལ་ཆགས་པ་མེད་པ་དང་། །སྲོག་གནས་ཕྱིར་ནི་གང་ཟ་བ། །ཆོས་འདི་ཐོབ་པར་དཀའ་མི་འགྱུར། །སྲེད་པ་
རྣམས་ནི་སྟོང་ཤེས་ནས། །འདོད་པ་དག་ལ་བླང་དོར་མེད། །རྟག་ཏུ་སྟོང་དབེན་གང་སྤྱོད་པ། །ཆོས་འདི་ཐོབ་པར་དཀའ་མི་འགྱུར། །དཔག་ཚད་གཅིག་འདས་རི་ཁྲོད་དུ། །གཅིག་པུ་འདུག་ནས་མཉམ་བཞག་ཅིང་། །འདུས་བྱས་བདག་མེད་གང་རྟོགས་པ། །ཆོས་འདི་ཐོབ་པར་དཀའ་མི་འགྱུར། །
མི་ཟད་སྐྱེ་བའི་མཐའ་དག་དང་། མིག་འཇུག་མཚན་ཉིད་རྟོགས་བྱེད་ཅིང་། །མིག་གཙང་ལམ་ནི་རབ་སྒྲུབ་པ། །ཆོས་འདི་ཐོབ་པར་དཀའ་མི་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་ཀུན་ཀྱང་དེ་བཞིན་ནོ། །དེ་བཞིན་མ་
འོངས་དུས་ཀྱི་ཚེ། །དགེ་སློང་དག་ནི་ཚད་མེད་སྙེད། །བརྩོན་པ་དང་ནི་ལེ་ལོ་ཅན། །ཐམས་ཅད་དེ་བཞིན་ཤེས་པར་གྱིས། །དགེ་དང་མི་དགེའི་གྲོགས་པོ་དག །སྒྲུབ་པ་དང་ནི་མི་སྒྲུབ་པ། །ཡིད་ཆེས་པ་དང་ཡིད་མི་ཆེས། །ཐམས་ཅད་དེ་བཞིན་ཤེས་པར་གྱིས། །དགེ་དང་མི་དགེའི་གྲོགས་པོ་དག །
མིག་ཟད་ལམ་ནི་གང་ཡིན་པ། །སྒྲུབ་པ་དང་ནི་མི་སྒྲུབ་པ། །ཐམས་ཅད་དེ་བཞིན་ཤེས་པར་གྱིས། །གང་ཞིག་བྱང་ཆུབ་རབ་མོས་ཤིང་། །ཟླ་གཅིག་གཉིས་གསུམ་འདས་ནས་ནི། །དུས་གཞན་ཕྱིར་ནི་གང་ལྡོག་པ། །ཐམས་ཅད་དེ་བཞིན་ཤེས་པར་གྱིས། །གང་ཞིག་ཆོས་འདི་ཐོས་གྱུར་ནས། །མོས་

པའི་སེམས་ནི་གང་བསྐྱེད་པ། །གལ་ཏེ་ཉམས་པར་གྱུར་ན་ཡང་། །སླར་ནི་དད་པ་ཐོབ་པར་འགྱུར། །གང་ཞིག་ཆོས་འདི་ཐོས་གྱུར་ནས། །བག་མེད་སྤོང་བར་མི་བྱེད་པ། །མདོ་འདི་སངས་རྒྱས་དཀའ་མ་ཡིན། །དེ་སྙམ་དུ་ནི་སེམས་པར་འགྱུར། །གང་ཞིག་ཆོས་འདི་ཐོས་གྱུར་ནས། །བདུད་ཀྱིས་ཡོངས་སུ་གང་བཟུང་བ། །དང་
པོ་དད་པ་སྐྱེས་གྱུར་ཀྱང་། །ཕྱིས་ནི་རབ་ཏུ་སྤོང་བར་འགྱུར། །གང་ཞིག་ཆོས་ལ་མ་མོས་པ། །མི་བདེན་གྲགས་དང་རྙེད་པ་ཚོལ། །གྲོང་ཁྱེར་གྲོང་རྡལ་རབ་རྒྱུ་ཞིང་། །གཟུངས་རྣམས་དང་ནི་ཏིང་འཛིན་དང་། །ཀུན་འཛིན་འོད་ཟེར་བསྔགས་བརྗོད་ཀྱང་། །དེ་ཡིས་ཡང་དག་རྟོགས་མི་འགྱུར། །འདོད་པ་ལྔ་པོས་བཅིངས་པ་དང་། །
འཇིག་རྟེན་ལས་ནི་འདོད་ཚོལ་བ། །བརྗོད་པ་དག་ནི་རྟོགས་བྱེད་པས། །སྟོང་ཉིད་སྒོམ་ལ་སྐུར་པ་འདེབས། །དྲན་དང་ཤེས་རབ་སེམས་མེད་པས། །ཚེ་ཚད་རབ་ཏུ་དོན་མེད་འདས། །བླུན་པོ་སྟོང་པའི་ཆོས་སྤོང་བ། །དེ་ནི་ཚུལ་ཁྲིམས་བགེགས་བྱས་པས། །མནར་མེད་དག་ཏུ་ལྟུང་བར་འགྱུར། །ནམ་ཡང་མཐོ་རིས་ཡོང་མི་སྐྱེ། །གང་
གིས་སྐད་ཅིག་གཅིག་ལ་ནི། །མཆོད་རྟེན་སྟོང་ནི་བྱས་པ་བས། །གང་གིས་མདོ་སྡེ་འདི་ཐོས་ནས། །ཚིག་བཞི་ཚིགས་བཅད་གཅིག་འཛིན་འཕགས། །མེ་ཏོག་ཕྲེང་བ་བརྒྱ་སྟོང་དག །སངས་རྒྱས་མཆོད་རྟེན་མཆོད་པ་བས། །གང་གིས་མདོ་སྡེ་འདི་ཐོས་ནས། །ཚིག་བཞི་ཚིགས་བཅད་སེམས་པ་འཕགས། །གང་གིས་
རིན་ཆེན་མཆོད་རྟེན་དག །གང་གཱའི་བྱེ་སྙེད་བྱས་པ་བས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །སངས་རྒྱས་ཞིང་ནི་འབུམ་ཕྲག་བརྒྱ། །མེ་ཏོག་གཏོར་ནས་མཆོད་པ་བས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །ཆོས་གོས་འབུམ་ཕྲག་བརྒྱ་
མང་པོ། །སངས་རྒྱས་རྣམས་ལ་ཕུལ་བ་བས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །སངས་རྒྱས་སྤྱན་ནི་རྣམ་དག་འཕགས། །མི་མཁྱེན་མི་གཟིགས་གང་ཡང་མེད། །གང་གིས་མདོ་སྡེ་འདི་མོས་ན། །སངས་རྒྱས་སྤྱན་ནི་ཐོབ་པར་འགྱུར། །འདས་པའི་བསྐལ་པ་གྲངས་མེད་ཚེ། །
སངས་རྒྱས་མར་མེ་མཛད་པ་བྱུང་། །ང་ནི་བྲམ་ཟེའི་ཁྱེ་འུར་གྱུར། །མེ་ཏོག་ཐོགས་ནས་མཆོད་པ་བྱས། །ཤཱཀྱ་ཐུབ་པ་ཞེས་བྱ་བ། །བྱང་ཆུབ་སྙིང་པོ་ལ་འདུག་ནས། །མདོ་སྡེ་འདི་ནི་སྟོན་འགྱུར་ཞེས། །ང་ལ་བྱང་ཆུབ་ལུང་ཡང་བསྟན། །ཁྱོད་ནི་དེ་ཚེ་གཞོན་ནུར་གྱུར། །ད་ལུང་བསྟན་པ་ཐོས་གྱུར་ནས། །དགའ་ཞིང་དད་པའི་

སེམས་བསྐྱེད་དེ། །ཐལ་མོ་སྦྱར་ནས་འདི་སྐད་དུ། །གལ་ཏེ་བྲམ་ཟེའི་ཁྱེའུ་འདི་ནི། །མངོན་པར་རྫོགས་པར་སངས་རྒྱས་ཚེ། །བདག་ནི་དེ་ཡི་གྲོགས་གྱུར་ནས། །མྱ་ངན་འདས་པའི་འོག་ཏུ་ཡང་། །ཆོས་ཀྱི་སྡེ་སྣོད་རབ་འཛིན་ཅིང་། །སྲུང་བར་ཤོག་ཅེས་སྨོན་ལམ་བཏབ། །སངས་རྒྱས་མར་མེ་མཛད་དེ་ཡིས། །འོད་ཟེར་
སྟོན་པའི་མདོ་འདི་ནི། །ཇི་སྐད་གསུངས་བཞིན་དེ་ཡི་ཚེ། །བྲམ་ཟེའི་ཁྱེའུ་དང་གཞོན་ནུ་གཉིས། །ལེགས་པར་མཉན་ཅིང་ཡོངས་སུ་བཟུང་། །ང་སྔོན་འདས་པའི་དུས་ཀྱི་ཚེ། །མེ་ཏོག་ཨུད་པ་ལ་དག་གིས། །སངས་རྒྱས་དེ་ལ་མཆོད་པ་བྱས། །དེ་ཚེ་ཁྱོད་ཀྱང་དེར་འདུག་སྟེ། །འདི་སྐད་དུ་ནི་སྨོན་ལམ་བཏབ། །ང་ཡི་བསྟན་
པ་ཐ་མ་ལ། །མདོ་སྡེ་འདི་ནི་རབ་བཟུང་ནས། །རྒྱ་ཆེར་སྟོན་པར་ཤོག་ཅེས་སྨྲས། །གང་གིས་ཆོས་འདི་ཐོས་གྱུར་ནས། །ཞེ་སྡང་སེམས་ནི་མི་སྐྱེད་པར། །གཟུང་འཛིན་ཀློག་ཅིང་གང་འདོན་པ། །དེ་ནི་སྐྱེས་བུ་དམ་པ་ཡིན། །ཁྱོད་ཀྱིས་མ་འོངས་དུས་ཀྱི་ཚེ། །ཐོས་དཀའི་ཆོས་འདི་རབ་བཟུང་ནས། །སེམས་ཅན་དག་ལ་དོན་གྱི་ཚུལ། །
རྒྱ་ཆེར་དབྱེ་ཞིང་བསྟན་པར་བྱ། །ངས་ཀྱང་འདས་པའི་དུས་ཀྱི་ཚེ། །ཡང་དག་ཆོས་ནི་ནུབ་པ་ན། །འོད་ཟེར་སྟོན་པའི་མདོ་འདི་ནི། །སེམས་ཅན་དག་ལ་རྒྱ་ཆེར་བསྟན། །བླུན་པོས་ནན་ཏན་མི་སྒྲུབ་པས། །འདི་ལ་སྐུར་བ་འདེབས་པར་བྱེད། །ངས་ནི་དེ་སྐད་ཐོས་གྱུར་ཀྱང་། །ཞེ་སྡང་དག་ནི་སྐྱེད་མི་བྱེད། །ངས་ནི་རྟག་ཏུ་
བཟོད་བསྒོམས་ནས། །འཇིག་རྟེན་རྣམས་ལ་ཕན་འདོགས་བྱེད། །བཟོད་པའི་སྟོབས་ནི་རྫོགས་པས་ན། །མཚན་དང་དཔེ་བྱད་དག་གིས་བརྒྱན། །གཞོན་ནུ་ཁྱོད་ཀྱིས་སངས་རྒྱས་སྐུ། །གྱ་ནོམ་ཡོངས་སུ་རྫོགས་གྱུར་ཅིང་། །གསེར་གྱི་ཁ་དོག་རྣམ་དག་འཕགས། །བཟོད་པའི་སྟོབས་ལས་བྱུང་བར་ལྟོས། །ང་ཡི་ཞབས་ནི་
ས་རེག་ནས། །ཞིང་ནི་ཚད་མེད་གཡོ་བྱེད་ཀྱང་། །སེམས་ཅན་རྣམས་ནི་མི་ལྟུང་བ། །ཐམས་ཅད་བཟོད་པའི་སྟོབས་ལས་སྐྱེས། །ང་ཡི་སྤུ་ཁུང་གཅིག་ནས་ནི། །འོད་ཟེར་བརྒྱ་སྟོང་རབ་བཀྱེ་ནས། །ཐམས་ཅད་གསལ་བར་གང་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང་། །སྲིན་པོ་བཞིན་དུ་འཇིགས་པའི་གཟུགས། །
སྲོག་ཆགས་གཟི་བྱིན་འཕྲོག་བྱེད་པ། །ང་ལ་རྟག་ཏུ་གུས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །ང་ཡི་འཁོར་ནི་ཇི་སྙེད་པ། །སེམས་ནི་རབ་ཏུ་དུལ་གྱུར་ནས། །དེ་བཞིན་གཤེགས་ལ་གུས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །རོལ་མོའི་སྒྲ་ནི་བརྒྱ་སྟོང་དག །འཁོར་འདུས་ཆེན་པོའི་ནང་དག་ཏུ། །

སངས་རྒྱས་ཡོན་ཏན་བསྔགས་བརྗོད་པ། །ཐམས་ཅད་བཟོད་མཆོག་སྟོབས་ལས་བྱུང་། །ཀླུ་ཡི་རྒྱལ་པོ་བརྒྱ་སྟོང་དག །རབ་ཏུ་གདུག་ཅིང་འཇིགས་རུང་བ། །སངས་རྒྱས་མཐོང་ན་དགའ་བ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །སྲིན་པོ་གནོད་སྦྱིན་ལ་སོགས་པས། །མེ་ཏོག་ཕྲེང་བ་བརྒྱ་སྟོང་ཐོགས། །འོངས་ནས་ང་ལ་
མཆོད་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང་། །ཞིང་ནི་བརྒྱ་སྟོང་ཚད་མེད་པར། །བཞུགས་པའི་དེ་བཞིན་གཤེགས་པ་རྣམས། །ང་ཡི་ཡོན་ཏན་བསྔགས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །ལྟོ་འཕྱེ་དང་ནི་ལུས་སྲུལ་པོ། །བརྒྱ་སྟོང་དག་ནི་འདུས་གྱུར་ནས། །མེ་ཏོག་གཏོར་ནས་
ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །གནོད་སྦྱིན་རྒྱལ་པོ་ལ་སོགས་པ། །བྱེ་བ་བརྒྱ་ཕྲག་དྲུག་ཅུ་རྣམས། །འོངས་ནས་ང་ལ་གང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །གཞན་ཡང་ཀླུ་ཡི་རྒྱལ་པོ་ནི། །མ་ན་བ་ག་ལ་སོགས་པས། །མུ་ཏིག་དམར་པོས་ང་མཆོད་པ། །ཐམས་ཅད་བཟོད་
མཆོག་སྟོབས་ལས་བྱུང་། །དུ་མུ་རུ་དང་ཤི་ཁྱི་བའི། །བརྒྱ་སྟོང་སྙེད་ནི་འདུས་གྱུར་ནས། །རོལ་མོ་དག་གིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །ལྟོ་འཕྱེ་དང་ནི་ལུས་སྲུལ་པོ། །བརྒྱ་སྟོང་སྙེད་ནི་འདུས་གྱུར་ནས། །མེ་ཏོག་སྤོས་ཀྱིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །ས་ཆེན་འཛིན་པ་ཀླུ་ཡི་
རྒྱལ། །ལུས་ཕྱེད་དག་ནི་རབ་བསྟན་ནས། །ཐལ་སྦྱར་ང་ལ་གུས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །ལུས་མེད་སྒྲ་གཅན་ཟིན་ལ་སོགས། །བྱེ་བ་ཕྲག་ནི་བརྒྱ་སྟོང་རྣམས། །དང་བའི་སེམས་ཀྱིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །གཞོན་ནུ་ཁྱོད་ཀྱིས་འདི་ལྟར་ལྟོས། །སངས་རྒྱས་འོད་ཟེར་གང་
རེག་པ། །སྡུག་བསྔལ་བྲལ་ནས་བདེ་ཐོབ་པ། །ཐམས་ཅད་བཟོད་མཆོག་སྟོབས་ལས་བྱུང་། །ས་མུ་ཏ་དང་རླུང་གི་ལྷ། །བརྒྱ་སྟོང་ནམ་མཁའ་གང་བར་ནི། །སྤོས་ཀྱི་ཆར་ཕབ་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །ལྷ་ཡི་འཁོར་ནི་བརྒྱ་སྟོང་དག །ལྷ་ཡི་མེ་ཏོག་གཏོར་མཆོད་དེ། །སྲེད་སྤངས་སངས་རྒྱས་སྟེན་བྱེད་པ། །ཐམས་ཅད་
བཟོད་མཆོག་སྟོབས་ལས་བྱུང་། །ཁྱེད་ཀྱིས་སངས་རྒྱས་རྫུ་འཕྲུལ་དང་། །སྦྱིན་དང་ཚུལ་ཁྲིམས་སྒྲ་བསྒྲགས་ནས། །ཐམས་ཅད་ཀུན་དུ་ཐོས་མཛད་པ། །བཟོད་མཆོག་སྟོབས་ལས་བྱུང་བར་ལྟོས། །ཕུང་པོ་ཁམས་ཀྱི་སྒྲ་དག་དང་། །བདེན་པ་བཞི་ཡི་སྒྲ་དག་གིས། །ཐམས་ཅད་ཀུན་ནི་གོ་མཛད་པ། །ཐམས་ཅད་བཟོད་མཆོག་སྟོབས་ལས་བྱུང་། །ང་ཡི་རྫུ་

འཕྲུལ་སྟོབས་ཀྱིས་ནི། །མཁའ་ལས་མིག་ཟད་མཐའ་དག་དང་། །རབ་ཞིའི་སྒྲ་ནི་ཐོས་གྱུར་ཏེ། །སྐྱེ་བའི་མཐའ་ཡང་དེ་བཞིན་ནོ། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ནི་རྒྱུ་དང་རྐྱེན། །དེ་ལས་སྐྱེ་ཡང་འགྲོ་འོང་མེད། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ཞི་རྟོགས་བྱེད་ན། །
སངས་རྒྱས་རྣམས་ཀྱང་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ཟད་མཐའ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་མཐའ་རབ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་
སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་སྐྱེ་མཐའ་ཞི་པས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་འཇུག་རབ་ཞི་ན། །སངས་རྒྱས་རྣམས་ནི་དེ་ལས་སྐྱེས། །
དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ནི་སྐྱེ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་དབེན་རབ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་
དུ་ནི་ཐོས་པར་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་ལ་སོགས་པའི་བར། །ཐམས་ཅད་ཀུན་ཀྱང་དེ་བཞིན་ནོ། །འདོད་སྡང་གཏི་མུག་ཁོང་ཁྲོ་དང་། །འཆབ་དང་ཕྲག་དོག་གཡོ་སྒྱུ་དང་། །ཁེངས་དང་ང་རྒྱལ་ལ་སོགས་པ། །རྒྱ་ཆེར་བཤད་
པའང་དེ་བཞིན་ནོ། །དེ་ནས་ཟླ་འོད་གཞོན་ནུར་གྱུར་པས་དེ་ལྟ་བུའི་ཆོས་ཁྱད་པར་དུ་འཕགས་པ་ཐོས་པས་རབ་ཏུ་དགའ་བར་གྱུར་ནས་ཐལ་མོ་སྦྱར་ཏེ། །བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་གི་གདུགས་ལ་བདག་དེ་བཞིན་གཤེགས་པ་དང་། འཁོར་
མང་པོ་དང་བཅས་པར་གདུགས་ཚོད་ལ་སྤྱན་འདྲེན་ན། ཐུགས་བརྩེ་བར་དགོངས་ཏེ་བདག་གིས་སྦྱར་བའི་གདུགས་ཚོད་གསོལ་བར་ཅི་གནང་། དེ་སྐད་ཅེས་གསོལ་པ་དང་། དེ་ནས་བཅོམ་ལྡན་འདས་ཀྱིས་གཞོན་ནུ་དེའི་བསམ་པ་རྣམ་པར་དག་པ་དང་། སེམས་ཅན་ཚད་མེད་པ་རྣམས་

ལ་ཡང་ཕན་པ་མཛད་པར་འགྱུར་བར་ཐུགས་ཀྱིས་མཁྱེན་ནས་ཐུགས་བརྩེ་བར་དགོངས་ཏེ་ཅང་མི་གསུང་བས་གནང་ངོ་། །དེ་ནས་ཟླ་འོད་གཞོན་ནུར་གྱུར་པ་སྟན་ལས་ལངས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། ལན་གསུམ་བསྐོར་བ་བྱས་ནས། རབ་ཏུ་དགའ་
བས་རང་གི་ཁྱིམ་དུ་སོང་སྟེ། རང་གི་འཁོར་དང་བཅས་པ་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྟོ་འཕྱེ་ཆེན་པོ་ལ་སོགས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་བཞི་མདོར་དར་གྱི་ལྡིང་ཁང་བྲེས་ཏེ་ལྡིང་ཁང་དེ་ཡང་ཤིན་ཏུ་མཐོ་ཞིང་རྒྱ་ཆེ་ལ་ཐམས་ཅད་ཀུན་དུ་ཁྱབ་པ།
གསེར་གྱི་ཙོང་ཙོང་དྲ་བར་བྲེས་པ། ནོར་བུ་རིན་པོ་ཆེའི་ཕྲེང་བ་སྦྱངས་པ། སེང་གེའི་བ་དན་དང་། གསེར་གྱི་ཕྲེང་བ་ལུ་གུ་རྒྱུད་ཅན་འབུམ་ཕྲག་བརྒྱ་སྟོང་སྣ་ཚོགས་ཀྱིས་བརྒྱན་པ། གཞན་ཡང་རིན་པོ་ཆེའི་མེ་ཏོག་ཁ་དོག་ཁྱད་པར་དུ་འཕགས་པའི་ཕྲེང་བའི་ཕུང་པོ་དག་གཅལ་དུ་བཀྲམ་མོ། །
མེ་ཏོག་ཙམ་པ་ཀ་དང་ཨ་ཏི་མུག་ཏ་ལ་སོགས་པ་རྣམ་པ་སྣ་ཚོགས་ཀྱི་ཕྲེང་བ་ཚད་མེད་གྲངས་མེད་པ་ཡང་རིན་པོ་ཆེའི་ལྡིང་ཁང་གི་ནང་ཐམས་ཅད་དང་། འཁོར་འདུས་པ་ཐམས་ཅད་ཀུན་ཏུ་ཁྱབ་པར་སྦྱངས་ཤིང་རྒྱན་དུ་བྲེས་སོ། །གཞན་ཡང་དེའི་ནང་དུ་ཁྲི་སྟན་རྣམས་བཤམས་ནས།
རིན་པོ་ཆེའི་སྤོས་ཕྱི་ལི་ཀ་དང་། དུ་མ་ཙ་དང་། ཙན་དན་དང་། གུར་གུམ་རྣམ་པར་དག་ཅིང་ཡིད་དགའ་བར་བྱེད་པ་སྣ་ཚོགས་བསྲེགས་སོ། །དེ་བཞིན་དུ་སྦྱར་སྤོས་མཆོག་དམ་པ་སྣ་ཚོགས་ཀྱང་མཆོད་པའི་ཡོ་བྱད་དུ་སྦྱར་ཏོ། །གཞན་ཡང་སྤོས་ཀྱི་ཆུས་ལམ་སྲང་རྣམས་ཀུན་ཏུ་ཁྱབ་
པར་ཆག་ཆག་བཏབ་བོ། །ས་གཞི་ཀུན་དུ་མེ་ཏོག་སྣ་ཚོགས་གཅལ་དུ་བཀྲམ་མོ། །དེའི་ཚེ་ལྷའི་བུ་མོ་དང་། ལྷ་མ་ཡིན་གྱི་བུ་མོ་དང་། སྒྲ་གཅན་ཟིན་གྱི་བུ་མོ་གྲངས་མེད་ཚད་མེད་པ་ཡང་རབ་ཏུ་དགའ་བའི་སེམས་བསྐྱེད་ནས། བྱང་ཆུབ་ཀྱི་རྒྱུ་མངོན་པར་བསྒྲུབ་པར་འདོད་པའི་ཕྱིར་དེར་
འོངས་ནས་གྲོང་ཁྱེར་ཆེན་པོ་ཁྱད་པར་དུ་འཕགས་པ་དེ་རབ་ཏུ་བརྒྱན་ཏོ། །དེ་ནས་ཟླ་འོད་གཞོན་ནུར་གྱུར་པ་གྲོང་ཁྱེར་དེ་ཀུན་དུ་ཁྱབ་པར་བརྒྱན་ཅིང་ཡོངས་སུ་དག་པ་དང་གདུགས་ཚོད་ལ་བབ་པར་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་

རྣམས་ལ་སྨན་པར་མཛད་པའི་སླད་དུ་གྲོང་ཁྱེར་ཆེན་པོར་གཤེགས་སུ་གསོལ། དེ་ནས་བཅོམ་ལྡན་འདས་འཁོར་མང་པོ་དང་ཐབས་ཅིག་ཏུ་གྲོང་ཁྱེར་དུ་གཤེགས་ནས་སྒོའི་ཐེམ་པ་ལ་ཞབས་བཞག་མ་ཐག་ཏུ་གྲོང་ཁྱེར་ཆེན་པོ་དེའི་ས་ཆེན་པོ་ཡང་རབ་ཏུ་གཡོས་པར་གྱུར།
ཕྱོགས་བཅུའི་འཇིག་རྟེན་གྱི་ཁམས་འབུམ་ཕྲག་བརྒྱ་སྟོང་ཚད་མེད་པ་ཡང་རབ་ཏུ་གཡོས་པར་གྱུར་ཏེ། དེའི་ཚེ་ལོང་བ་དག་ནི་གཟུགས་མཐོང་བར་གྱུར། སྡུག་བསྔལ་བ་རྣམས་ནི་བདེ་བ་ཐོབ་པར་གྱུར། འོན་པ་རྣམས་ནི་སྒྲ་ཐོས་པར་གྱུར། བྱད་བཞིན་མི་སྡུག་པ་རྣམས་ནི་བྱད་བཞིན་བཟང་པོ་
ཐོབ་པར་གྱུར། ནོར་མེད་པ་རྣམས་ནི་ནོར་དང་ལྡན་པར་གྱུར། བུ་མེད་པ་རྣམས་ནི་བུ་ཡོད་པར་གྱུར། གོས་མེད་པ་རྣམས་ནི་གོས་ཐོབ་པར་གྱུར། རིན་པོ་ཆེ་མེད་པ་རྣམས་ནི་རིན་པོ་ཆེ་ཐོབ་པར་གྱུར། ཉེ་བཤེས་མེད་པ་རྣམས་ནི་ཉེ་བཤེས་དང་ལྡན་པར་གྱུར། ལུས་ཀྱི་རྒྱན་ཐམས་ཅད་ཀྱིས་ཕོངས་
པ་རྣམས་ནི་ལུས་ཀྱི་རྒྱན་ཐམས་ཅད་དང་ལྡན་པར་གྱུར་ཏོ། །གཞན་ཡང་ངང་པ་དང་