Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

ིག་ཅན་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་། དགའ་བ་དང་། ཡིད་བདེ་བ་སྐྱེས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་
པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ལས་དགོངས་ཏེ་དེ་སྐད་དུ་ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ་ཞེས་བདུད་སྡིག་ཅན་ལ་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་བྱིན་གྱི་རླབས་མེད་པས་བྱིན་

གྱིས་བརླབས་པ་ཡིན་ཏེ། ཆོས་ཀྱི་རྣམ་གྲངས་འདི་ཡང་བྱིན་གྱི་རླབས་མེད་པས་བྱིན་གྱིས་བརླབས་པ་ཡིན་པས། འཇམ་དཔལ་དེའི་ཕྱིར་ངས་བདུད་སྡིག་ཅན་ལ་འདི་སྐད་དུ་ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ་ཞེས་སྨྲས་སོ། །འཇམ་དཔལ་བདེན་པ་དང་བདེན་པའི་ཚིག་
གང་གིས་ཆོས་ཐམས་ཅད་བྱིན་གྱི་རླབས་མེད་པས་བྱིན་གྱིས་བརླབས་པ་དང་། ཐ་དད་དུ་དབྱེར་མེད་པ་དང་། བརྗོད་དུ་མེད་པ་དང་། མཚན་ཉིད་མེད་པ་དང་། བསྙད་དུ་མེད་པ་དང་། སྨྲར་མེད་པ་དང་། གཉིས་སུ་མེད་པ་དང་། གཉིས་དང་བྲལ་བ་དང་། ཡང་དག་པའི་མཐའ་དང་མཉམ་པ་དང་། དེ་བཞིན་ཉིད་དུ་ཞུགས་
པ་དང་། ཆོས་ཀྱི་དབྱིངས་ཀྱི་མཚན་ཉིད་ཡིན་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་འཛམ་བུའི་གླིང་ན་རབ་ཏུ་སྤྱོད་པར་གྱུར་ཅིག །དེ་ནས་བཅོམ་ལྡན་འདས་ཀྱིས་བདེན་པའི་བྱིན་གྱིས་བརླབས་དེ་མཛད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གང་ཡིན་
པ་དང་། ཆོས་ཀྱི་རྣམ་གྲངས་འདི་གང་ཡིན་པ་དེ་དག་ནི་མཉམ་པའི་ཕྱིར་ཁྱོད་ཀྱིས་ཀུན་ནས་སྒོའི་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པ་ནི་ཀུན་ནས་སྒོའི་ཆོས་
ཀྱི་དབྱིངས་འདི་ལེགས་པར་ཐུགས་སུ་ཆུད་ནས་སེམས་ཅན་རྣམས་ལ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པར་མཛད་པའི་ཕྱིར་རོ། །ཀུན་དགའ་བོ་དེ་ལྟ་བས་ན་ཆོས་ཀྱི་རྣམ་གྲངས་འདི་ལེགས་པར་བསྲུང་བ་དང་། ལེགས་པར་གཟུང་བ་དང་། ལེགས་པར་ཀུན་ཆུབ་པར་གྱིས་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་
སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་དང་། འཇམ་དཔལ་གཞོན་ནུར་གྱུར་པ་དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་
བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཀུན་ནས་སྒོའི་ལེའུ་ཞེས་བྱ་བ་སྟེ་ལེའུ་བཅུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་གཅིག་པ་སྟེ། འོད་ཟེར་ཀུན་དུ་བཀྱེ་བ་བསྟན་པ། བམ་པོ་དང་པོ། རྒྱ་གར་སྐད་དུ། ཨཱརྱ་རཤྨི་སམནྟ་མུཀྟོ་ནི་ར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འོད་ཟེར་ཀུན་དུ་
བཀྱེ་བ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ། དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་རང་
དབང་ཆེན་པོ་ཐོབ་པ་ལྔ་བརྒྱ་དང་། གཞན་ཡང་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་ཁྲག་ཁྲིག་ཕྲག་བརྒྱད་ཅུ་དང་། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་སོགས་པ་
ཁྲག་ཁྲིག་ཕྲག་བཞི་བཅུ་དང་ཐབས་ཅིག་ཏུ་བཞུགས་ཏེ། དེའི་ཚེ་འཁོར་འདུས་པ་དེ་ཉིད་དུ་ཟླ་འོད་གཞོན་ནུར་གྱུར་པ་ཞེས་བྱ་བ་ཞིག་འདུས་པར་གྱུར་པ་དེ་འདུག་པའི་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་
ཀྱི་ཞབས་ལ་མགོ་བོས་ཕྱག་བྱས་ཏེ། གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་སྔོན་ཕྲིན་ལས་ཅི་ཞིག་མཛད་ན་འདི་ལྟར་རྣམ་པར་ངེས་པའི་འོད་ཟེར་དང་། ཡོངས་སུ་སྡུད་པའི་འོད་ཟེར་དང་། ཀུན་ནས་
སློང་བའི་འོད་ཟེར་དང་། རབ་ཏུ་སྟོན་པའི་འོད་ཟེར་དང་། ཁ་དོག་སྣ་ཚོགས་ཀྱི་འོད་ཟེར་དང་། ཁ་དོག་འདྲེས་པ་མ་མཆིས་པའི་འོད་ཟེར་དང་། རྒྱ་ཆུང་ངུའི་འོད་ཟེར་དང་། རྒྱ་ཆེན་པོའི་འོད་ཟེར་དང་། རྣམ་པར་དག་པའི་འོད་ཟེར་དང་། ཤིན་ཏུ་རྣམ་པར་དག་པའི་འོད་ཟེར་དང་། དྲི་མ་
མ་མཆིས་པའི་འོད་ཟེར་དང་། ཤིན་ཏུ་དྲི་མ་མ་མཆིས་པའི་འོད་ཟེར་དང་། དྲི་མ་དང་བྲལ་བའི་འོད་ཟེར་དང་། རིམ་གྱིས་འཕེལ་བའི་འོད་ཟེར་དང་། གསལ་བའི་འོད་ཟེར་དང་། ཤིན་ཏུ་གསལ་བའི་འོད་ཟེར་དང་། མཐའ་མ་མཆིས་པའི་འོད་ཟེར་དང་། ཤིན་ཏུ་མཐའ་མ་མཆིས་

པའི་འོད་ཟེར་དང་། ཚད་མ་མཆིས་པའི་འོད་ཟེར་དང་། ཤིན་ཏུ་ཚད་མ་མཆིས་པའི་འོད་ཟེར་དང་། གྲངས་ཀྱི་ཚད་མ་མཆིས་པའི་འོད་ཟེར་དང་། ཤིན་ཏུ་གྲངས་ཀྱི་ཚད་མ་མཆིས་པའི་འོད་ཟེར་དང་། མྱུར་བའི་འོད་ཟེར་དང་། ཤིན་ཏུ་མྱུར་བའི་འོད་ཟེར་དང་། གནས་པ་
མ་མཆིས་པའི་འོད་ཟེར་དང་། གནས་མ་མཆིས་པའི་འོད་ཟེར་དང་། རབ་ཏུ་འབར་བའི་འོད་ཟེར་དང་། སྣང་བར་བགྱིད་པའི་འོད་ཟེར་དང་། མོས་པར་བགྱིད་པའི་འོད་ཟེར་དང་། ཕ་རོལ་དུ་ཕྱིན་པར་བགྱིད་པའི་འོད་ཟེར་དང་། ཐོགས་པ་མ་མཆིས་པའི་འོད་ཟེར་དང་། གཡོ་བ་མ་མཆིས་
པའི་འོད་ཟེར་དང་། དྲང་པོའི་འོད་ཟེར་དང་། དཔག་ཏུ་མ་མཆིས་པ་ལ་གནས་པའི་འོད་ཟེར་དང་། གཟུགས་ཀྱི་མཚན་གྱི་འོད་ཟེར་དང་། གཟུགས་ཀྱི་མཚན་སྣ་ཚོགས་ཀྱི་འོད་ཟེར་དང་། གཟུགས་ཀྱི་མཚན་ཚད་མ་མཆིས་པའི་འོད་ཟེར་དང་། ཁ་དོག་སྔོན་པོ་དང་། སེར་པོ་དང་།
དམར་པོ་དང་། དཀར་པོའི་མཚན་ཉིད་ཀྱི་འོད་ཟེར་དང་། ཁ་དོག་ལེ་བརྒན་གྱི་མཚན་ཉིད་ཀྱི་འོད་ཟེར་དང་། ཆུ་ཤེལ་གྱི་ཁ་དོག་གི་མཚན་ཉིད་ཀྱི་འོད་ཟེར་དང་། ནམ་མཁའི་ཁ་དོག་གི་མཚན་ཉིད་ཀྱི་འོད་ཟེར་དང་། འདི་ལྟ་བུ་ལ་སོགས་པ་རྣམ་པ་སྣ་ཚོགས་ཀྱི་འོད་ཟེར་རེ་རེ་ཀུན་ཀྱང་ཁ་
དོག་རྣམ་པ་ལྔའི་འོད་ཟེར་འདྲེས་པར་གྱུར་པ་སྟོན་པར་མཛད་པ་ནས་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོའི་དངོས་པོ་རེ་རེ་ཀུན་ཀྱང་འོད་ཟེར་ཁ་དོག་རྣམ་པ་སྣ་ཚོགས་ཚད་མ་མཆིས་པ་དཔག་ཏུ་མ་མཆིས་པ་དག་དང་འདྲེས་པར་གྱུར་པ་རབ་ཏུ་སྟོན་པར་མཛད་པའི་བར་
དུ་བརྙེས་པར་གྱུར་ལགས། དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་ཚིགས་སུ་བཅད་དེ་བཀའ་སྩལ་པ། ད་ནི་བསམ་གྱིས་མི་ཁྱབ་པའི། །དགེ་བའི་ལས་ཀྱི་རྒྱུ་རྐྱེན་གྱིས། །རྨོངས་པ་རྣམས་ནི་རབ་སྤངས་པས། །འོད་ཟེར་སྣ་ཚོགས་གྲུབ་པ་ཡིན། །གཞན་
ཡང་སྤྱོད་པ་སྣ་ཚོགས་ཀྱིས། །སངས་རྒྱས་ལམ་ལ་རབ་གནས་ཤིང་། །སྟོང་བ་བྱེད་མེད་ཤེས་རབ་ཀྱིས། །འདྲེས་པའི་འོད་ཟེར་བསྟན་པ་ཡིན། །ཇི་ལྟར་ཕྱི་རོལ་ཆོས་དག་ལ། །མཚན་ཉིད་བྱེ་བྲག་སྣ་ཚོགས་སྣང་། །དེ་ནི་སྟོང་ཞིང་བདག་ཀྱང་མེད། །བྱེད་པ་མེད་ཅིང་སེམས་ཡིད་

མེད། །གཞན་ཡང་ཇི་ལྟར་ནང་གི་ལུས། །སྟོང་ཞིང་བདག་མེད་བྱེད་མེད་ཀྱང་། །དེ་ལས་རྣམ་པ་སྣ་ཚོགས་ཀྱི། །སྒྲ་སྐད་དག་ནི་རབ་ཏུ་སྟོན། །དེ་ལྟར་བྱེད་མེད་དབང་གིས་ན། །ཁ་དོག་དཔག་མེད་འོད་བསྟན་ནས། །མོས་པ་དག་ནི་ཇི་བཞིན་དུ། །རེ་བ་དག་ནི་སྐོང་བར་མཛད། །
རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་གཉིས་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པ་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་གསུམ་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པ་རབ་
ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བཞི་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པ་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་ལྔ་འབྱུང་བ། །སོ་སོར་རབ་འབྲིང་ཐ་མ་ཡང་། །ལས་གཙང་ལས་
ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་དྲུག་འབྱུང་བ། །སོ་སོར་རབ་འབྲིང་ཐ་མ་ཡང་། །ཐབས་མཁས་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བདུན་འབྱུང་བ། །སོ་སོར་རབ་འབྲིང་ཐ་མ་ཡང་། །ལས་
དགེ་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བརྒྱད་འབྱུང་བ། །སོ་སོར་རབ་འབྲིང་ཐ་མ་ཡང་། །དགེ་བའི་ཆོས་ལས་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་དགུ་འབྱུང་བ། །སོ་སོར་རབ་འབྲིང་ཐ་མ་ཡང་། །
ཚོགས་དག་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བཅུ་འབྱུང་བ། །སོ་སོར་རབ་འབྲིང་ཐ་མ་ཡང་། །སྦྱིན་པ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ཉི་ཤུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །
ཚུལ་ཁྲིམས་བསྲུངས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་སུམ་ཅུ་གང་བྱུང་བ། །སོ་སོར་རབ་འབྲིང་ཐ་མ་ཡང་། །བཟོད་པ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བཞི་བཅུ་གང་བྱུང་བ། །སོ་སོར་རབ་འབྲིང་ཐ་མ་ཡང་། །

བརྩོན་འགྲུས་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ལྔ་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བསམ་གཏན་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་དྲུག་བཅུ་གང་འབྱུང་བ། །
སོ་སོར་རབ་འབྲིང་ཐ་མ་ཡང་། །ཤེས་རབ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བདུན་ཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བྱམས་སེམས་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བརྒྱད་ཅུ་གང་
འབྱུང་བ། །སོ་སོར་རབ་འབྲིང་ཐ་མ་ཡང་། །སྙིང་རྗེའི་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་དགུ་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །དགའ་བའི་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་
ནི། །ཁ་དོག་རྣམ་བརྒྱ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བཏང་སྙོམས་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་སྟོང་ནི་གང་འབྱུང་བ། །སོ་སོར་རབ་འབྲིང་ཐ་མ་ཡང་། །ཡོན་ཏན་སྟོན་ལས་སྐྱེས་པ་ཡིན། །རེས་འགའ་
དངོས་པོ་གཅིག་ལས་ནི། །ཁ་དོག་ཁྲི་ནི་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བསོད་ནམས་ཚོགས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གང་སྟོན་པ། །སོ་སོར་རབ་འབྲིང་ཐ་མ་ཡང་། །ཡིད་ཆེས་པ་ལས་སྐྱེས་པ་ཡིན། །རེས་འགའ་
དངོས་པོ་གཅིག་ལས་ནི། །ཁ་དོག་བྱེ་བ་གཉིས་སྟོན་པ། །སོ་སོར་རབ་འབྲིང་ཐ་མ་ཡང་། །རྗེས་སུ་ཡི་རང་ལས་སྐྱེས་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གསུམ་སྟོན་པ། །སོ་སོར་རབ་འབྲིང་ཐ་མ་ཡང་། །ཤིན་ཏུ་སྦྱངས་ལས་སྐྱེས་པ་ཡིན། །རེས་འགའ་
དངོས་པོ་གཅིག་ལས་ནི། །ཁ་དོག་བྱེ་བ་བཞི་སྟོན་པ། །སོ་སོར་རབ་འབྲིང་ཐ་མ་ཡང་། །སངས་རྒྱས་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་ལྔ་སྟོན་པ། །སོ་སོར་རབ་འབྲིང་ཐ་མ་ཡང་། །ཆོས་ལ་གུས་ལས་སྐྱེས་པ་ཡིན། །རེས་འགའ་དངོས་

པོ་གཅིག་ལས་ནི། །ཁ་དོག་བྱེ་བ་དྲུག་སྟོན་པ། །སོ་སོར་རབ་འབྲིང་ཐ་མ་ཡང་། །དགེ་འདུན་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བདུན་སྟོན་པ། །སོ་སོར་རབ་འབྲིང་ཐ་མ་ཡང་། །ཚུལ་ཁྲིམས་གུས་ལས་སྐྱེས་པ་ཡིན། །རེས་འགའ་
དངོས་པོ་གཅིག་ལས་ནི། །ཁ་དོག་བྱེ་བ་བརྒྱད་སྟོན་པ། །སོ་སོར་རབ་འབྲིང་ཐ་མ་ཡང་། །ཏིང་འཛིན་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་དགུ་སྟོན་པ། །སོ་སོར་རབ་འབྲིང་ཐ་མ་ཡང་། །ཀུན་བརྩེ་ལས་ནི་སྐྱེས་པ་ཡིན། །རེས་
འགའ་དངོས་པོ་གཅིག་ལས་ནི། །ཁ་དོག་བྱེ་བ་བཅུ་སྟོན་པ། །སོ་སོར་རབ་འབྲིང་ཐ་མ་ཡང་། །བག་ཡོད་ལས་ནི་སྐྱེས་པ་ཡིན། །གཞན་ཡང་སྤུ་ཁུང་གཅིག་ལས་ནི། །འོད་ཟེར་མང་པོ་གང་སྟོན་པ། །འོད་ཟེར་སྣ་ཚོགས་མིང་དེ་དག །དེང་འདིར་ཁྱོད་ལ་བཤད་པར་བྱ། །ང་ལ་འོད་
ཟེར་གཅིག་ཡོད་དེ། །དེ་མིང་སྤྲིན་གཙང་སྣང་ཞེས་བྱ། །འོད་ཟེར་དེ་ནི་དགེ་བའི་རྩ། །དཔག་མེད་བསགས་ལས་སྐྱེས་པ་ཡིན། །འདི་ལྟར་འདས་པའི་དུས་ཀྱི་ཚེ། །སེམས་ཅན་རྣམ་པ་ཇི་སྙེད་པ། །ནད་རྣམས་སྣ་ཚོགས་བཏབ་པ་ལས། །སྙིང་བརྩེའི་སེམས་ནི་རབ་བསྐྱེད་
ནས། །སྨན་ནི་མང་པོ་རབ་བཏང་ཞིང་། །དེ་དག་སོས་པར་བྱས་པ་ཡི། །རྒྱུ་དང་རྐྱེན་ནི་འདི་ཡི་ཕྱིར། །དེ་འདྲའི་འོད་ཟེར་ཐོབ་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་མིག་ཅེས་བྱ། །མར་མེས་སངས་རྒྱས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་
ཟེར་ཡང་ཡོད་དེ། །དེ་མིང་རྣམ་དག་རྣ་ཞེས་བྱ། །སྒྲ་དབྱངས་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྣ་ཞེས་བྱ། །སྤོས་ཆུ་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་
ཡོད་དེ། །དེ་མིང་རྣམ་དག་ལྕེ་ཞེས་བྱ། །རོ་མཆོག་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ལུས་ཤེས་བྱ། །འདི་ལྟར་གོས་ཀྱིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་

དེ། །དེ་མིང་རྣམ་དག་སེམས་ཞེས་བྱ། །རྟག་ཏུ་སངས་རྒྱས་ཡིད་ཆེས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་གཟུགས་ཞེས་བྱ། །སངས་རྒྱས་གཟུགས་ནི་བྲིས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་
ཡང་ཡོད་དེ། །དེ་མིང་རྣམ་དག་སྒྲ་ཞེས་བྱ། །རྟག་ཏུ་ཆོས་ལ་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་དྲི་ཞེས་བྱ། །རྟག་ཏུ་དགེ་འདུན་གུས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་
རོ་ཞེས་བྱ། །ཡིད་བཞིན་དུ་ནི་སྦྱིན་བཏང་བས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རེག་ཅེས་བྱ། །བྱུག་སྤོས་དག་གིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཆོས་ཞེས་བྱ། །ཆོས་རྣམས་
ཡོངས་སུ་བཟུང་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ས་ཞེས་བྱ། །སངས་རྒྱས་དགེ་འདུན་ས་ཕྱགས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཆུ་ཞེས་བྱ། །ཆུ་མིག་ཁྲོན་པས་མཆོད་པས་
ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་མེ་ཞེས་བྱ། །མི་འཛིན་མཆོད་ཅིང་སྦྱིན་བཏང་བས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རླུང་ཞེས་བྱ། །རླུང་ཡབ་ཐོགས་ནས་མཆོད་པས་ན། །དེ་ཕྱིར་དེ་ལས་
སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཕུང་ཞེས་བྱ། །ལུས་ཀྱིས་སངས་རྒྱས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཁམས་ཞེས་བྱ། །རྟག་ཏུ་བྱམས་པའི་སེམས་བསྒོམས་པས། །དེ་ཕྱིར་དེ་ལས་སྐྱེས་པ་ཡིན། །
ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་བདེན་ཞེས་བྱ། །རྟག་ཏུ་བརྫུན་ནི་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཞི་ཞེས་བྱ། །རྟག་ཏུ་སྦྱིན་པ་བཏང་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་

རྣམ་དག་སྒྲ་ཞེས་བྱ། །སངས་རྒྱས་རྣམས་ཀྱི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་དྲན་ཞེས་བྱ། །ཏིང་འཛིན་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྤོབས་
ཞེས་བྱ། །ཀུན་འཛིན་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འཐུན་ཞེས་བྱ་བ་ཡིན། །རྩོད་པ་དག་ནི་བསྡུམས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་དོན་རབ་བསྟན་ཅེས་བྱ། །སྟོང་ཉིད་
རབ་ཏུ་རྟོགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་སྔོ་ཞེས་བྱ། །པད་མ་སྔོན་པོས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་སེར་ཞེས་བྱ། །ཙམ་པ་ཀས་ནི་མཆོད་པས་ན། །དེ་ཕྱིར་དེ་
ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་དམར་ཞེས་བྱ། །མུ་ཏིག་དག་གིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་དཀར་ཞེས་བྱ། །གསེར་གྱི་གདུགས་ཀྱིས་མཆོད་པས་ན། །དེ་ཕྱིར་དེ་ལས་སྐྱེས་པ་
ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཡོན་ཏན་མཆོག་ཅེས་བྱ། །ཚོན་སྣ་མང་པོས་བརྒྱན་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཀླུའི་གཟི་ཞེས་བྱ། །ཀླུ་ཡི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་
ཡང་ཡོད་དེ། །དེ་མིང་གླང་པོའི་གཟི་ཞེས་བྱ། །གླང་པོའི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སེང་གེ་རྒྱལ་ཞེས་བྱ། །སེང་གེའི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །
དེ་མིང་ཁྱུ་མཆོག་རྒྱལ་ཞེས་བྱ། །ཁྱུ་མཆོག་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཟླ་བ་ཡིན། །སངས་རྒྱས་མཆོད་རྟེན་ཕྱགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་

ཀླུ་གདུལ་ཞེས་བྱའོ། །དར་གྱི་ལྡ་ལྡི་ཕུལ་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གནོད་སྦྱིན་འདུལ་ཞེས་བྱ། །སོ་སོར་ལེགས་པར་བརྟགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་
བུད་མེད་རྟོགས་ཞེས་བྱ། །བུད་མེད་མཚན་མ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྐྱེས་པ་རྟོགས་ཞེས་བྱ། །སྐྱེས་པའི་མཚན་མ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྡོ་རྗེ་སྟོབས་ཞེས་
བྱ། །ལས་ཀྱི་ཤེས་པ་དག་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྟོང་པ་སྟོན་ཞེས་བྱ། །འཇིག་རྟེན་རྣམ་སྨིན་སྟོན་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཡང་དག་རྟོགས་ཞེས་བྱ། །ཕྱིན་ཅི་ལོག་
ནི་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སངས་རྒྱས་གསུང་ནི་སྟོན་ཞེས་བྱ། །ཆོས་དབྱིངས་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སྐྱོན་རྣམས་སྤངས་པ་ཞེས་བྱའོ། །མོས་པའི་
བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །བཀོད་པ་ཀུན་ཏུ་སྣང་ཞེས་བྱ། །མར་མེ་ཕུལ་བའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྲེད་པ་སྤངས་ཞེས་བྱ། །ཏིང་འཛིན་ཤེས་
རབ་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་བག་ཆགས་སྤངས་ཞེས་བྱ། །སྔོན་མཐའི་ཤེས་པ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཆགས་པ་སྤངས་ཞེས་བྱ། །མི་སྐྱེ་ཡེ་ཤེས་
བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །འགྲོ་བ་རྣམས་ནི་སྤངས་ཞེས་བྱ། །ཟག་ཟད་ཡེ་ཤེས་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གནས་སྤངས་ཞེས་བྱ་སྟེ། །སྡུག་བསྔལ་ཤེས་པ་

བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སངས་རྒྱས་ཆོ་འཕྲུལ་ཞེས་བྱའོ། །རྫུ་འཕྲུལ་མཐུ་ཡི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གཟུགས་མེད་སྟོན་ཅེས་བྱ། །རྫུ་འཕྲུལ་རྐང་གི་
བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དགེ་བའི་གྲོགས་ལ་མོས་ཞེས་བྱ། །རྟོགས་པའི་རང་བཞིན་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །མིག་གི་སྔོན་མཐའ་ཞེས་བྱའོ། །མིག་
གི་སྔོན་མཐའ་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །མིག་གི་མཐའ་ཟད་ཅེས་བྱའོ། །མིག་ཟད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྲིད་པའི་མཐའ་ཞེས་བྱ། །སྲིད་
མེད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འཇིག་པ་མེད་ཅེས་བྱ། །འགོག་པ་མེད་ཀྱི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་མཐའ་མེད་ཅེས་བྱའོ། །མཐའ་མེད་བསྔགས་
པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་མཚན་མ་མེད་ཅེས་བྱ། །འདུས་མ་བྱས་ཀྱི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འགྱུར་བ་མེད་ཅེས་བྱ། །ཁྱད་པར་མེད་པའི་
བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འགྱུར་བ་མེད་ཅེས་བྱ། །ཞེན་པ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འབྱུང་བ་མེད་ཅེས་བྱ། །སྐྱེ་བ་མེད་པའི་བསྔགས་
བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྐྱེ་བ་མེད་ཅེས་བྱ། །འབྱུང་བ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་བསྟན་མེད་ཅེས་བྱ་ཡོད། །སྐྱེ་དགུ་རྣམས་ནི་ཡོངས་སུ་སྨིན་པར་བྱེད། །ང་ལ་འོད་

ཟེར་ཆོས་ཉིད་ཅེས་བྱ་ཡོད། །སངས་རྒྱས་ཞིང་ནི་བྱེ་བ་གཡོ་བར་བྱེད། །ང་ལ་འོད་ཟེར་བདུད་འདུལ་ཞེས་བྱ་ཡོད། །འོད་ཟེར་དེ་ཡི་གཟིས་ནི་བདུད་སྐྲག་བྱེད། །ང་ལ་འོད་ཟེར་བསོད་ནམས་རྒྱལ་མཚན་ཡོད། །དེ་ཡི་མིང་འཛིན་དག་ནི་གནོད་པ་སྤོང་། །ང་ལ་འོད་
ཟེར་སྟོབས་ལྡན་རྒྱལ་མཚན་ཡོད། །དེ་ཡི་མིང་འཛིན་དག་ནི་དགྲ་རབ་སྤོང་། །ང་ལ་འོད་ཟེར་རབ་ཞི་རྒྱལ་མཚན་ཡོད། །དེ་ཡི་མིང་འཛིན་དག་ནི་འདོད་ཆགས་སྤོང་། །ང་ལ་འོད་ཟེར་བསམ་གཏན་རྒྱལ་མཚན་ཡོད། །དེ་ཡི་མིང་འཛིན་དག་ནི་ལོག་སྤྱོད་སྤོང་། །ང་ལ་འོད་ཟེར་གྲགས་
པའི་རྒྱལ་མཚན་ཡོད། །དེ་ཡི་མིང་འཛིན་དག་ནི་གྲགས་པ་འཐོབ། །ང་ལ་འོད་ཟེར་ཡིད་དགའ་རྒྱལ་མཚན་ཡོད། །དེ་ཡི་མིང་འཛིན་དག་ནི་མྱ་ངན་མེད། །ང་ལ་འོད་ཟེར་སྡོམ་གཙང་རྒྱལ་མཚན་ཡོད། །དེ་ཡི་མིང་འཛིན་ཚུལ་ཁྲིམས་འཆལ་པ་སྤོང་། །ང་ལ་འོད་ཟེར་སྤོས་མཆོག་རྒྱལ་
མཚན་ཡོད། །དེ་ཡི་མིང་འཛིན་མི་གཙང་མེད་པར་འགྱུར། །ང་ལ་འོད་ཟེར་ཆོས་ཟབ་ཅེས་བྱ་ཡོད། །དེ་ཡི་མིང་འཛིན་ཐེ་ཚོམ་མེད་པར་འགྱུར། །ང་ལ་འོད་ཟེར་གནས་པ་མེད་པ་ཡོད། །དེ་ཡི་མིང་འཛིན་སྲེད་པ་སྤོང་བར་འགྱུར། །ང་ལ་འོད་ཟེར་རྟོག་བྲལ་ཞེས་བྱ་ཡོད། །དེ་ཡི་མིང་
འཛིན་འཛིན་པ་མེད་པར་འགྱུར། །ང་ལ་འོད་ཟེར་རི་རབ་ཅེས་བྱ་ཡོད། །དེ་ཡི་མིང་འཛིན་གཡོ་བ་མེད་པར་འགྱུར། །ང་ལ་འོད་ཟེར་གསང་བའི་སྤྱོད་པ་ཡོད། །དེ་ཡི་མིང་འཛིན་མངོན་པར་ཞེན་པ་མེད། །ང་ལ་འོད་ཟེར་རྣམ་གྲོལ་སྤྱོད་པ་ཡོད། །དེ་ཡི་མིང་འཛིན་འཆིང་བ་མེད་པར་འགྱུར། །
ང་ལ་འོད་ཟེར་ལེགས་འདུལ་ཞེས་བྱ་ཡོད། །དེ་ཡི་མིང་འཛིན་མཉེན་དེས་ཐོབ་པར་འགྱུར། །ང་ལ་འོད་ཟེར་མི་གཡོ་ཞེས་བྱ་ཡོད། །དེ་ཡི་མིང་འཛིན་འདོད་ཆགས་ཞེན་སྤོང་འགྱུར། །ང་ལ་འོད་ཟེར་རབ་འདུལ་ཞེས་བྱ་ཡོད། །དེ་ཡི་མིང་འཛིན་ཚུལ་ཁྲིམས་རྫོགས་པར་འགྱུར། །ང་
ལ་འོད་ཟེར་དགེ་མང་སྤྱོད་པ་ཡོད། །དེ་ཡི་མིང་འཛིན་གོས་པ་མེད་པར་འགྱུར། །ང་ལ་འོད་ཟེར་ཕན་མང་བྱེད་པ་ཡོད། །གང་གིས་མིང་ཐོས་ཉེས་པ་རྣམ་སྤོང་འགྱུར། །ང་ལ་འོད་ཟེར་མཆོག་ཤེས་མཐོང་བ་ཡོད། །གང་གིས་མིང་ཐོས་རྨོངས་པ་མེད་པར་འགྱུར། །ང་ལ་འོད་ཟེར་ཕན་

ཚོལ་ཞེས་བྱ་ཡོད། །གང་གིས་མིང་ཐོས་ཞེ་སྡང་མེད་པར་འགྱུར། །ང་ལ་འོད་ཟེར་སེམས་དགའ་བྱེད་པ་ཡོད། །གང་གིས་མིང་ཐོས་བདེ་བ་ཐོབ་པར་འགྱུར། །ང་ལ་འོད་ཟེར་གདུང་བ་མེད་པ་ཡོད། །གང་གིས་མིང་འཛིན་སྟོང་ཉིད་རྟོགས་པར་འགྱུར། །ང་ལ་འོད་ཟེར་ངོ་བོ་ཉིད་མེད་
ཡོད། །གང་གིས་མིང་འཛིན་སྤྲོས་ལས་འདའ་བར་འགྱུར། །ང་ལ་འོད་ཟེར་རྟེན་པ་མེད་པ་ཡོད། །གང་གིས་མིང་འཛིན་གཡོ་བ་མེད་པར་འགྱུར། །ང་ལ་འོད་ཟེར་རྨོངས་དང་བྲལ་བ་ཡོད། །གང་གིས་མིང་འཛིན་སོམ་ཉི་མེད་པར་འགྱུར། །ང་ལ་འོད་ཟེར་གནས་མེད་ཅེས་བྱ་ཡོད། །
གང་གིས་མིང་འཛིན་གཏི་མུག་མུན་པ་སྤོང་། །ང་ལ་འོད་ཟེར་ནང་ལུས་སྐྱོ་བ་ཡོད། །གང་གིས་མིང་འཛིན་དེ་ནི་ལེན་མི་འགྱུར། །ང་ལ་འོད་ཟེར་འཛིན་མེད་ཅེས་བྱ་ཡོད། །གང་གིས་མིང་འཛིན་ཡི་གེ་ཚིག་འབྲུ་སྤོང་། །ང་ལ་འོད་ཟེར་རྨོངས་པ་མེད་པ་ཡོད། །གང་གིས་མིང་འཛིན་
བརྗོད་དང་བྲལ་བར་འགྱུར། །ང་ལ་འོད་ཟེར་འགྲོ་མེད་ཅེས་བྱ་ཡོད། །གང་གིས་མིང་འཛིན་མ་འོངས་ཤེས་པར་འགྱུར། །ང་ལ་འོད་ཟེར་ཀུན་མཐའ་ཞེས་བྱ་ཡོད། །གང་གིས་མིང་འཛིན་འདས་པ་ཤེས་པར་འགྱུར། །ང་ལ་འོད་ཟེར་མཚུངས་མེད་ཅེས་བྱ་ཡོད། །གང་གིས་མིང་འཛིན་ཟག་
མེད་རྟོགས་པར་འགྱུར། །ང་ལ་འོད་ཟེར་འཕགས་ཐོབ་ཅེས་བྱ་ཡོད། །གང་གིས་མིང་འཛིན་མཆོག་གྱུར་ཤེས་པར་འགྱུར། །ང་ལ་འོད་ཟེར་དྲི་མ་མེད་པ་ཡོད། །གང་གིས་མིང་འཛིན་མངོན་པར་ཞེན་པ་སྤོང་། །ང་ལ་འོད་ཟེར་རྡུལ་སྤོང་ཞེས་བྱ་ཡོད། །གང་གིས་མིང་འཛིན་མུན་པ་མེད་
པར་འགྱུར། །ང་ལ་འོད་ཟེར་སྲེད་པ་མེད་པ་ཡོད། །གང་གིས་མིང་འཛིན་རྟེན་དག་སྤོང་བར་འགྱུར། །ང་ལ་འོད་ཟེར་མཆོག་རྒྱལ་ཞེས་བྱ་ཡོད། །གང་གིས་མིང་འཛིན་ཕ་རོལ་སྨྲ་བ་ནོན། །ང་ལ་འོད་ཟེར་དར་ལ་བབ་པ་ཡོད། །གང་གིས་མིང་འཛིན་སྤྱོད་པ་དྲུག་འགྲུབ་འགྱུར། །ང་ལ་འོད་
ཟེར་མཆོག་བཙུན་ཞེས་བྱ་ཡོད། །གང་གིས་མིང་འཛིན་ཤེས་པ་ཐོགས་མེད་འགྱུར། །ང་ལ་འོད་ཟེར་མྱུར་བ་ཞེས་བྱ་ཡོད། །གང་གིས་མིང་འཛིན་དགེ་སློང་མཆོག་འགྲུབ་འགྱུར། །ང་ལ་འོད་ཟེར་མཚན་ལྡན་ཞེས་བྱ་ཡོད། །གང་གིས་མིང་འཛིན་ཆོས་ཟབ་རྟོགས་པར་འགྱུར། །ང་ལ་

འོད་ཟེར་མཚན་མ་མེད་པ་ཡོད། །གང་གིས་མིང་འཛིན་ང་རྒྱལ་སྤོང་བར་འགྱུར། །ང་ལ་འོད་ཟེར་སྐྱེ་མེད་ཅེས་བྱ་ཡོད། །གང་གིས་མིང་འཛིན་འཐོབ་མེད་རྙེད་པར་འགྱུར། །ང་ལ་འོད་ཟེར་སངས་རྒྱས་དྲན་པ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་
བསྔགས། །སངས་རྒྱས་མང་ལ་སྤྱོད་པ་རྣམས་བསྒྲུབས་པས། །འདི་ལྟ་བུ་ཡི་འོད་ཟེར་གྲུབ་པ་ཡིན། །སངས་རྒྱས་སྐུ་ལས་བྱུང་བའི་འོད་ཟེར་རྣམས། །རྡུལ་ཕྲན་གྲངས་ནི་བརྒྱ་སྟོང་བྱེ་སྙེད་མངའ། །དེ་བཞིན་ཞིང་ནི་ཚད་མེད་བྱེ་སྙེད་མངའ། །དེ་ཡི་གྲངས་ནི་རྒྱ་མཚོའི་བྱེ་མ་སྙེད། །རྡུལ་
དེ་སྙེད་ཀྱི་འོད་ཟེར་རྣམས་ཀྱང་ནི། །སོ་སོ་ལ་ཡང་འཁོར་ནི་མང་པོ་ཡོད། །འོད་ཟེར་དེས་ནི་སངས་རྒྱས་མེད་ཞིང་དུ། །དེ་བཞིན་གཤེགས་པའི་རྣམ་དག་སྐུར་སྤྲུལ་ནས། །ཤིན་ཏུ་ཟབ་མོའི་ཆོས་ནི་སྟོན་མཛད་པས། །སེམས་ཅན་བཟོད་ལ་རབ་ཏུ་འགོད་པར་མཛད། །ང་ལ་འོད་ཟེར་སངས་རྒྱས་
ཞེས་བྱ་ཡོད། །སེམས་ཅན་སངས་རྒྱས་ལམ་ལ་གནས་པར་མཛད། །ང་ལ་འོད་ཟེར་ཆོས་ཤེས་བྱ་བ་ཡོད། །ཤིན་ཏུ་རྣམ་དག་གསལ་བྱེད་དྲི་མ་མེད། །ང་ལ་འོད་ཟེར་དགེ་འདུན་ཞེས་བྱ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །ང་ལ་འོད་ཟེར་རྣམ་དག་ཅེས་བྱ་
ཡོད། །འོད་ཟེར་དེ་ནི་ཁྱད་འཕགས་རྙེད་པར་དཀའ། །ང་ལ་འོད་ཟེར་པད་མ་ཞེས་བྱ་ཡོད། །སེམས་ཅན་ཕན་འདོགས་ཡོངས་སུ་སྨིན་པར་བྱེད། །ང་ལ་འོད་ཟེར་ཚངས་པ་ཞེས་བྱ་ཡོད། །ཁ་ཅིག་བརྒྱ་བྱིན་ཡང་ན་ལྷ་ཞེས་བྱ། །ཟླ་བ་ཀླུ་དང་གནོད་སྦྱིན་ཞེས་ཀྱང་བྱ། །ལྷ་མ་ཡིན་དང་ནམ་
མཁའ་ལྡིང་ཞེས་བྱ། །ཁ་ཅིག་རྒྱལ་པོ་བུད་མེད་ཞེས་ཀྱང་བྱ། །ཁ་ཅིག་བུ་མོ་ཁ་ཅིག་ཁྱེའུ་ཞེས་བྱའོ། །དེ་ལྟར་འོད་ཟེར་སྣ་ཚོགས་མང་པོ་རྣམས། །སོ་སོར་དགེ་ཆོས་དག་གིས་སྐལ་མཚུངས་འདུལ། །འཁོར་ནི་ཚད་མེད་བྱེ་བ་སྙེད་དག་ཀྱང་། །ཐམས་ཅད་བྱང་ཆུབ་ཡོངས་སུ་སྨིན་པར་
བྱེད། །ང་ལ་འོད་ཟེར་ཤེས་རབ་ཅེས་བྱ་ཡོད། །ཁ་ཅིག་ཚུལ་ཁྲིམས་ཁ་ཅིག་མིང་བྱམས་པ། །ཁ་ཅིག་སྙིང་རྗེ་དགའ་དང་སྒྲོན་ཞེས་བྱ། །ཁ་ཅིག་བྱུག་སྤོས་ཁ་ཅིག་རོལ་མོ་སྒྲ། །འདི་ལྟ་བུ་ལ་སོགས་པའི་འོད་ཟེར་རྣམས། །སྔོན་གྱི་སྤྱོད་པའི་རྗེས་སུ་འཐུན་པར་ནི། །སྐྱེ་དགུའི་རྣམ་པ་ཚད་

མེད་ཡོངས་བསྡུས་པས། །དེས་ན་འོད་ཟེར་འདི་དག་རྫོགས་པ་ཡིན། །ང་ལ་འོད་ཟེར་གཙོ་བོ་ཞེས་བྱ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །སངས་རྒྱས་བསྟན་པ་རྣམས་ལ་རྟག་གུས་པས། །དེས་ན་འོད་ཟེར་འདི་ནི་རྫོགས་པ་ཡིན། །སངས་རྒྱས་སྤྱན་གྱིས་སེམས་ཅན་
གྲངས་གཟིགས་ནས། །སྤུ་ཁུང་ཀུན་ནས་འོད་ཟེར་སྣ་ཚོགས་གཏོང་། །འོད་ཟེར་མང་པོ་དེ་དག་རེ་རེ་ཡང་། །སོ་སོར་འཁོར་མང་དག་གིས་རབ་ཏུ་བསྐོར། །སེམས་ཅན་རྣམས་ཀྱི་མོས་པ་ཇི་བཞིན་དུ། །སངས་རྒྱས་འོད་ཟེར་གཏོང་ཞིང་སྨིན་པར་མཛད། །གང་གིས་འོད་ཟེར་བསྟན་པ་
འདི་ཐོས་ནས། །རབ་ཏུ་དགའ་ཞིང་མོས་པར་གང་བྱེད་པ། །དེ་སྔོན་སངས་རྒྱས་མང་པོ་དག་ལས་ནི། །མདོ་སྡེ་འདི་ནི་ཐོས་པར་གྱུར་པ་ཡིན། །ང་ལ་འོད་ཟེར་ཁྱད་པར་འཕགས་པ་ཡོད། །འཁོར་ནི་བྱེ་བ་བརྒྱད་ཅུ་གྲངས་སྙེད་ཡོད། །སྔོན་གྱི་སངས་རྒྱས་དག་ལ་ཚིགས་བཅད་གཅིག །བསྔགས་
པས་དེ་ཕྱིར་འོད་ཟེར་འདི་གྲུབ་པོ། །ང་ལ་འོད་ཟེར་མྱ་ངན་མེད་པ་ཡོད། །འཁོར་ནི་ཁྲག་ཁྲིག་བརྒྱད་ཅུ་སྙེད་ཡོད་དེ། །དེ་བཞིན་གཤེགས་པའི་བསྟན་པ་གཅིག་བཟུང་བས། །དེ་ཕྱིར་འོད་ཟེར་འདི་ནི་གྲུབ་པ་ཡིན། །ང་ལ་འོད་ཟེར་རྣམ་དག་མཆོག་ཡོད་དེ། །འཁོར་ནི་བྱེ་བ་བརྒྱད་ཅུ་གྲངས་
སྙེད་ཡོད། །ཏིང་འཛིན་གཅིག་ནི་ཡོངས་སུ་བཟུང་བས་ན། །དེ་ཕྱིར་འོད་ཟེར་འདི་ནི་གྲུབ་པ་ཡིན། །འདས་པའི་དུས་ཀྱི་སངས་རྒྱས་མཚན། །ཁྱད་པར་འཕགས་པ་ཞེས་བྱ་བྱུང་། །སངས་རྒྱས་དེས་ནི་འཇིག་རྟེན་ན། །སྐུ་ཚེའི་ཚད་ནི་མེད་པར་བཞུགས། །དང་པོ་མངོན་པར་སངས་རྒྱས་ཚེ། །
ཆོས་བསྟན་འཁོར་དུ་འདུས་པ་ཡི། །གྲངས་ནི་ཁྲག་ཁྲིག་བརྒྱད་ཅུ་སྙེད། །དེ་ཉིད་དུ་ནི་འདུས་པར་གྱུར། །དེ་ཡི་ཚེ་ན་འཛམ་བུ་ཡི། །གླིང་ཆེན་དག་ནི་འདི་དག་ཏུ། །ཡུལ་གྱི་རྒྱལ་པོ་དེ་ཡི་མིང་། །སྒྲ་ལ་མོས་ཞེས་བྱ་བ་བྱུང་། །རྒྱལ་པོ་ཆེན་པོ་དེ་ལ་ནི། །བུ་ཕོ་དག་ནི་ལྔ་བརྒྱ་ཡོད། །
བྱད་བཞིན་དག་ནི་སྡུག་མཛེས་པས། །མཐོང་བ་དག་ནི་དགའ་བར་འགྱུར། །དེ་ཡི་ཚེ་ན་རྒྱལ་པོའི་ཡབ། །གཟི་བྱིན་རང་དབང་རབ་ལྡན་ཞིང་། །དཀོན་མཆོག་དག་ནི་གསུམ་པོ་ལ། །ཤིན་ཏུ་དང་བ་སྐྱེས་པར་གྱུར། །རྒྱལ་པོ་དེ་ལ་སྐྱེད་མོས་ཚལ། །མཆོག་ཏུ་གྱུར་པ་ཇི་སྙེད་པ། །

དེ་དག་ཐམས་ཅད་གུས་པས་ནི། །བཅོམ་ལྡན་དེ་ལ་རབ་ཏུ་ཕུལ། །སྐྱེད་མོས་ཚལ་ནི་དེ་དག་ཏུ། །འཆག་ས་དག་ནི་ཇི་སྙེད་པ། །དེ་དག་ཐམས་ཅད་ཀུན་དུ་ནི། །ལྗོན་ཤིང་ཙམ་པ་ཀ་དག་དང་། །ལྗོན་ཤིང་ནྱ་གྲོ་དྷ་དག་དང་། །ལྗོན་ཤིང་ཀིང་ཤུ་ཀ་དང་ནི། །ལྗོན་ཤིང་
ཨུ་དུམ་བ་ར་དང་། །ལྗོན་ཤིང་པ་ལ་པ་ཏྲ་དང་། །ལྗོན་ཤིང་ཤི་རི་ཤ་དག་དང་། །ལྗོན་ཤིང་མྱ་ངན་འཚད་ལ་སོགས། །དེ་དག་གྲངས་ནི་སོ་སོར་ཡང་། །བྱེ་བ་ཕྲག་ནི་བརྒྱད་ཅུ་ཡོད། །ལྗོན་ཤིང་མང་པོ་དེ་དག་ཀྱང་། །དབྱར་དང་དགུན་ནི་འདྲ་བར་ཡང་། །མེ་ཏོག་འབྲས་བུ་ཡལ་ག་དག །ཁ་
དོག་དག་ནི་གསལ་ཞིང་རྒྱས། །དྲི་མཆོག་དམ་པ་རབ་འབྱུང་ཞིང་། །དེ་བཞིན་གཤེགས་པའི་སྐུ་ལ་འཐུལ། །དགེ་སློང་དག་ནི་ཇི་སྙེད་པ། །ལུས་ཀྱི་ཁ་དོག་གསེར་དང་འདྲ། །དེ་དག་ཐམས་ཅད་ཀུན་ཀྱང་ནི། །ལྗོན་ཤིང་དག་ནི་དེ་དྲུང་དུ། །འདུག་ནས་རབ་ཏུ་བརྩོན་པས་ན། །གཟུངས་
ནི་རབ་ཏུ་ཐོབ་པར་གྱུར། །དེ་ཚེ་དེ་བཞིན་གཤེགས་པ་དེ། །རྒྱལ་པོ་ཡབ་དང་སྲས་རྣམས་དང་། །གཞན་ཡང་འཁོར་ནི་མང་པོ་ལ། །ཤིན་ཏུ་ཐུགས་ནི་བརྩེ་བའི་ཕྱིར། །རྣམ་པར་ངེས་པའི་འོད་ཟེར་མདོ། །དེ་དག་ལ་ནི་རབ་ཏུ་བསྟན། །རྒྱལ་པོ་དེས་ནི་ཐོས་གྱུར་ནས། །སེམས་ནི་རབ་ཏུ་
དགའ་བར་གྱུར། །ཚིགས་སུ་བཅད་པ་ཚད་མེད་པས། །དེ་བཞིན་གཤེགས་པའི་བསྔགས་པ་བརྗོད། །གཞན་ཡང་རྒྱལ་པོ་ཆེན་པོ་དེས། །རིན་པོ་ཆེ་ཡི་གདུགས་དམ་པ། །བྱེ་བ་ཕྲག་ནི་བརྒྱད་ཅུ་སྙེད། །བཅོམ་ལྡན་དེ་ལ་རབ་ཏུ་ཕུལ། །རིན་ཆེན་གདུགས་ནི་རེ་རེ་ལ། །ཡིད་བཞིན་
ནོར་བུའི་དྲ་བ་དག །མཐའ་མ་འཁོར་བར་རབ་ཏུ་བརྒྱན། །ཡིད་བཞིན་ནོར་བུ་རིན་པོ་ཆེ། །དེ་དག་རེ་རེའི་རིན་ཐང་ཡང་། །འཛམ་བུའི་གསེར་ནི་བཙོ་མ་དག །སྲང་ནི་བྱེ་བ་བརྒྱད་ཅུ་རི། །རིན་ཆེན་གདུགས་ནི་རེ་རེ་ཡང་། །ཡིད་བཞིན་ནོར་བུ་རིན་པོ་ཆེ། །བྱེ་བ་ཕྲག་ནི་བརྒྱད་ཅུ་
སྙེད། །ཕྲེང་བ་དག་ཏུ་བྱས་པར་གྱུར། །ཡིད་བཞིན་རིན་ཆེན་དེ་དག་ཀྱང་། །ཁ་དོག་དག་ནི་རབ་གསལ་བས། །ཉིན་མཚན་དག་ནི་མེད་པར་ཡང་། །རྟག་ཏུ་འོད་ཟེར་རབ་ཏུ་གཏོང་། །འོད་ཟེར་དེ་དག་རེ་རེས་ཀྱང་། །དཔག་ཚད་བརྒྱ་ནི་སྣང་བར་བྱེད། །འོད་ཟེར་དེ་དག་རབ་གསལ་བས། །

ཉི་ཟླ་དག་ནི་ཟིལ་གྱིས་གནོན། །གཞན་ཡང་རིན་ཆེན་གདུགས་དེ་དག །སེང་གེ་རིན་ཆེན་ཆུན་འཕྱང་ནི། །བྱེ་བ་ཕྲག་ནི་བརྒྱད་ཅུ་དང་། །གསེར་སྐུད་རིན་ཆེན་ཕྲེང་བ་ཡང་། །བྱེ་བ་ཕྲག་ནི་བརྒྱད་ཅུ་དག །ངོས་བཞི་དག་ནི་རབ་ཏུ་བརྒྱན། །གཞན་ཡང་རིན་ཆེན་དམ་པ་ནི། །འདི་ལྟར་
རྣམ་པ་སྣ་ཚོགས་ཀྱིས། །མུ་ཏིག་རིན་ཆེན་དྲ་བ་དག །སྤེལ་མ་དག་ཏུ་རྣམ་པར་བརྒྱན། །འདི་ལྟ་བུ་ཡི་གདུགས་དག་གིས། །སྐྱེད་མོས་ཚལ་ནི་ཀུན་ཏུ་གཡོགས། །དེ་ཡི་སྟེང་དུ་གཞན་ཡང་ནི། །པད་མ་སུ་མ་ན་དང་ནི། །པད་མ་ཨ་ཏི་མུག་ཏ་ཀ། །བཏང་བཟུང་ཞེས་ནི་བྱ་བ་དང་། །
པད་མ་ཨུ་དུམ་བ་ར་དང་། །པད་མ་སྔོན་པོ་ལ་སོགས་དང་། །དེ་བཞིན་རྣམ་པ་སྣ་ཚོགས་ཀྱི། །པད་མའི་གདུགས་ནི་ཚད་མེད་པ། །རེ་རེ་ཐམས་ཅད་ཀུན་ཀྱང་ནི། །རིན་ཆེན་དྲ་བ་འཚམ་པར་བྱས། །གཞན་ཡང་གསེར་གྱི་སྐུད་པ་ལས། །བྱས་པའི་གོས་དག་གིས་ཀྱང་ནི། །བླ་རེ་
དག་ཏུ་རབ་བྱས་ནས། །དེ་ཡི་སྟེང་དུ་ཁྱབ་པར་གཡོགས། །གཞན་ཡང་ཙན་དན་རིན་ཆེན་ཁྲི། །གསེར་དག་ལས་ནི་རྐང་བྱས་པ། །དེ་ཡི་གྲངས་ཀྱང་བྱེ་བ་ཕྲག །བརྒྱད་ཅུ་སྙེད་ནི་རབ་ཏུ་བཤམས། །རིན་ཆེན་ཁྲི་ནི་དེ་དག་ལ། །ཟབ་དར་དག་ལས་བྱས་པ་ཡི། །སྟན་ནི་བྱེ་བ་
ཕྲག་བརྒྱད་ཅུ། །དེ་ཡི་སྟེང་དུ་རབ་བརྒྱན་ཏོ། །དེ་ཡི་ཚེ་ན་སེམས་ཅན་གྱི། །རྣམ་པ་དག་ནི་ཇི་སྙེད་པ། །སྲིད་པའི་རྩེ་མོ་མན་ཆད་ཀྱང་། །ཐམས་ཅད་དེར་ནི་འདུས་གྱུར་ནས། །དེ་བཞིན་གཤེགས་པ་དེ་ལས་ནི། །མདོ་སྡེ་འདི་ནི་རབ་ཏུ་མཉན། །ལྷ་དང་ཀླུ་དང་གནོད་སྦྱིན་དང་། །
དྲི་ཟ་ཡི་ནི་རྒྱལ་པོ་དང་། །ལྟོ་འཕྱེ་ཆེན་པོ་ལྷ་མ་ཡིན། །དེ་དག་མདོ་སྡེ་འདི་ཐོས་ནས། །རབ་ཏུ་དགའ་བའི་སེམས་སྐྱེས་པས། །ཚིགས་སུ་བཅད་པ་བརྒྱད་སྟོང་གིས། །དེ་བཞིན་གཤེགས་པའི་བསྔགས་བརྗོད་ནས། །དེ་དག་ཐམས་ཅད་ཀུན་གྱིས་ཀྱང་། །བྱང་ཆུབ་ཆེན་པོར་སྨོན་
ལམ་བཏབ། །ལྷ་དང་ཀླུ་དང་ལྷ་མ་ཡིན། །དེ་ལ་སོགས་པ་ཐམས་ཅད་ཀྱང་། །ཡོངས་སུ་དང་བའི་སེམས་ཀྱིས་ནི། །མེ་ཏོག་མན་དཱ་ར་བ་དང་། །མུ་ཏིག་རིན་ཆེན་ལ་སོགས་པའི། །ཆར་ཕབ་མཆོད་པ་རབ་ཏུ་བྱས། །དེ་ཡི་ཚེ་ན་གཞན་ཡང་ནི། །ལྷ་ཆེན་མཐུ་དང་གཟི་ལྡན་པ། །

བྱེ་བ་ཕྲག་ནི་བརྒྱད་ཅུ་སྙེད། །མདོ་སྡེ་འདི་ནི་ཐོས་པས་ན། །རབ་ཏུ་དགའ་བའི་སེམས་བསྐྱེད་ནས། །བྱང་ཆུབ་ཆེན་པོར་སྨོན་ལམ་བཏབ། །མ་འོངས་པ་ཡི་དུས་ཀྱི་ཚེ། །འོད་ཟེར་འདི་འདྲ་ཐོབ་པར་ཤོག །དེ་བཞིན་གཤེགས་པས་དེ་ཡི་ཚེ། །དེ་ཡི་བསམ་པ་ཐུགས་
ཆུད་པས། །མ་འོངས་སངས་རྒྱས་འགྲུབ་འགྱུར་ཞེས། །བྱང་ཆུབ་ཏུ་ནི་ལུང་ཡང་བསྟན། །དེ་ཡི་ཚེ་ན་གཞན་ཡང་ནི། །བརྒྱ་བྱིན་ལྷ་ཡི་དབང་པོ་དང་། །ཚངས་པ་འཁོར་དང་བཅས་པ་ཡང་། །བྱེ་བ་ཕྲག་ནི་བརྒྱད་ཅུ་སྙེད། །འོད་ཟེར་རབ་ཏུ་སྟོན་པ་ཡི། །མདོ་སྡེ་འདི་ནི་ཐོས་པས་ན། །
རབ་ཏུ་དགའ་བའི་སེམས་བསྐྱེད་ནས། །བྱང་ཆུབ་ཏུ་ནི་སེམས་ཀྱང་བསྐྱེད། །མ་འོངས་སངས་རྒྱས་འགྲུབ་འགྱུར་ཞེས། །བྱང་ཆུབ་ཏུ་ནི་ལུང་ཡང་བསྟན། །དེ་ཡི་ཚེ་ན་གཞན་ཡང་ནི། །ཀླུ་ནི་བྱེ་བ་ཁྲག་ཁྲིག་ཕྲག །བརྒྱད་ཅུ་སྙེད་ནི་འདུས་པ་དག །མདོ་སྡེ་འདི་ནི་ཐོས་པས་ན། །བྱང་
ཆུབ་ཏུ་ནི་སེམས་བསྐྱེད་པས། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། །གསེར་འདབ་རྒྱལ་པོ་བྱེ་བ་ཕྲག །བརྒྱད་ཅུ་སྙེད་ནི་འདུས་པ་དག །མདོ་སྡེ་འདི་ནི་ཐོས་པས་ན། །སྡོམ་པ་ལྔ་ནི་རབ་བསྲུངས་ཏེ། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་
གཞན་ཡང་ནི། །དྲི་ཟའི་རྒྱལ་པོ་བྱེ་བ་ཕྲག །བརྒྱད་ཅུ་སྙེད་ནི་འདུས་པ་དག །མདོ་སྡེ་འདི་ནི་ཐོས་པས་ན། །རོལ་མོ་བརྒྱ་སྟོང་རྣམས་བྱས་ཏེ། །སྒྲ་སྙན་དག་ནི་རབ་ཕྱུང་ནས། །བཅོམ་ལྡན་དེ་ལ་མཆོད་བྱས་པས། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། །
གནོད་སྦྱིན་རྒྱལ་པོ་ཁྲག་ཁྲིག་སྙེད། །མདོ་སྡེ་འདི་ནི་ཐོས་པས་ན། །སངས་རྒྱས་ཡེ་ཤེས་དག་ལས་ནི། །ཤིན་ཏུ་དད་པ་སྐྱེས་པར་གྱུར། །དེ་དག་ཐམས་ཅད་ཀུན་གྱིས་ཀྱང་། །བྱང་ཆུབ་ལུང་བསྟན་ཐོབ་པར་གྱུར། །ཟླ་འོད་འདི་ལྟར་ཤེས་པར་གྱིས། །དེ་ཚེ་རྒྱལ་པོ་སྒྲ་མོས་པས། །མཆོད་
པ་རྣམ་པ་སྣ་ཚོགས་ཀྱིས། །བཅོམ་ལྡན་དེ་ལ་མཆོད་བྱས་པ། །གཞན་ཡིན་སྙམ་དུ་མི་བལྟ་སྟེ། །དེ་ནི་ཁྱོད་དག་ཉིད་ཡིན་ནོ། །ཁྱོད་ནི་སྔོན་འདས་དུས་ཀྱི་ཚེ། །མདོ་སྡེ་འདི་ནི་ཐོས་པའི་རྒྱུས། །དེ་ལྟ་བས་ན་དེང་འདིར་ཡང་། །འདི་ཉིད་སླར་ཡང་ཞུས་པ་ཡིན། །ང་ནི་མྱ་ངན་འདས་

པའི་འོག །གང་ཡང་རུང་བ་སུ་ཞིག་གིས། །དམ་པའི་ཆོས་ཀྱི་འཁོར་ལོ་དག །རྣམ་པར་འཇིག་པའི་དུས་ཀྱི་ཚེ། །ཆོས་ཀྱི་བསྟན་པ་འདི་དག་ནི། །དང་བའི་སེམས་ནི་གང་བསྐྱེད་པ། །འདི་ལྟ་བུ་ཡི་མདོ་སྡེ་དག །རྒྱ་ཆེར་ཡང་དག་སྟོན་པར་ནུས། །མ་འོངས་མདོ་སྡེ་འདི་ནི་གང་སྟོན་པ། །
དེས་ནི་ང་ཡི་ཆོས་འཛིན་སྲུང་བར་བྱེད། །དེ་ནི་འདྲོན་མང་དེད་པའི་དེད་དཔོན་འདྲ། །རིན་ཆེན་གཏེར་འཛིན་སྲུང་བ་ཞེས་ཀྱང་བྱ། །མ་འོངས་དུས་ཚེ་མདོ་འདི་གང་ཐོས་ནས། །སྐད་ཅིག་ཙམ་དུ་མོས་པ་སྐྱེད་བྱེད་པ། །དེ་ནི་སངས་རྒྱས་བྱིན་གྱིས་བརླབས་པ་ཡིན། །འཇམ་དཔལ་བྱིན་གྱིས་
བརླབས་པར་རིག་པར་བྱ། །དེས་ནི་སངས་རྒྱས་མང་པོ་མཐོང་འགྱུར་བས། །གསང་བའི་ཆོས་གཏད་ཤེས་རབ་རྣོ་བར་འགྱུར། །སེམས་ཅན་གང་དག་སེམས་དྲང་མཉེན་དེས་ཤིང་། །རྟག་ཏུ་སངས་རྒྱས་རིམ་གྲོ་བྱེད་ལ་བརྩོན། །བདག་མེད་སྒོམ་ཞིང་བྱམས་དང་བཟོད་སྐྱེད་པ། །དེས་
ནི་མདོ་སྡེ་འདི་ལ་མོས་པར་འགྱུར། །གང་ཞིག་རྟག་ཏུ་མི་དགེའི་སེམས་འཆང་ཞིང་། །རྙེད་ལ་གདུ་ཞིང་ཆོག་མི་ཤེས་པ་དང་། །རབ་དབེན་རྣམས་ལ་མོས་པར་མི་འགྱུར་བ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་དེ་བཞིན་གཤེགས་པ་རྣམས་མཆོད་དང་། །དམ་ཆོས་ཟབ་མོ་
ལེགས་པར་རྟོགས་པ་དང་། །སངས་རྒྱས་ཡང་དག་ཡེ་ཤེས་ཡིད་ཆེས་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་སེམས་གཡེང་དད་པའི་སེམས་མེད་ཅིང་། །རྟག་ཏུ་སྲོག་གཅོད་གདུལ་བར་རབ་དཀའ་དང་། །འདོད་པའི་ཡུལ་རྣམས་ཀུན་གྱི་བྲན་བྱེད་པ། །དེས་ནི་མདོ་སྡེ་
འདི་ལ་མོས་མི་འགྱུར། །གང་ཞིག་རྟག་ཏུ་དགོན་གནས་རབ་མོས་ཤིང་། །གཅིག་པུ་དབེན་པར་འདུག་ཅིང་སེམས་ཞི་དང་། །རྙེད་དང་གཉེན་ལ་མངོན་པར་ཞེན་མེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་གྲོགས་ངན་དག་གི་རྗེས་འབྲང་ཞིང་། །བདག་དང་གཞན་
གྱི་དགེ་བ་འཇིག་བྱེད་དང་། །ཚུལ་ཁྲིམས་ཏིང་འཛིན་དག་ནི་ཆེར་ཉམས་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་ཡིད་མོས་ཤིན་ཏུ་རྣམ་དག་ཅིང་། །རྟག་ཏུ་ཤེས་རབ་ཆོས་རྣམས་རབ་འབྱེད་དང་། །དགེ་བའི་བཤེས་གཉེན་དག་གིས་རབ་བསྲུངས་པ། །དེས་ནི་མདོ་སྡེ་འདི་ལ་མོས་པར་

འགྱུར། །གང་ཞིག་གཉེན་གྱི་ཁྱིམ་ལ་རབ་ཆགས་ཤིང་། །མེ་ཏོག་འབྲས་བུ་བྱིན་ནས་དགའ་བྱེད་དང་། །སེམས་ལ་དྲང་པོ་མེད་ཅིང་སྒྱུ་འཆང་བ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་རྟག་ཏུ་སངས་རྒྱས་དྲིན་དྲན་ཞིང་། །དགེ་བའི་རྩ་བ་མཆོག་ལ་མོས་
པ་དང་། །བྱང་ཆུབ་བསྔོ་ཞིང་གཡོ་སྒྱུ་མེད་གྱུར་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་ཆུང་མ་བུ་མོ་སྲེད་ཆགས་ཤིང་། །གོས་མཆོག་སྣ་ཚོགས་དག་གིས་རབ་བརྒྱན་ནས། །རྟག་ཏུ་དེ་དང་ལྷན་ཅིག་རྩེ་སྨོན་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་སེམས་ཟབ་
གནས་པ་མེད་གྱུར་ཅིང་། །འདོད་པའི་ཡུལ་གྱིས་གོས་པ་མེད་པ་དང་། །ཟས་སྐོམ་དག་གིས་གཡོ་སྒྱུ་མི་སྐྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་སྐྱེ་དགུ་རྣམས་ལ་འདི་སྐད་དུ། །འདོད་ཆགས་སྤྱད་ཀྱང་ཉེས་མེད་གང་ཟེར་བ། །དུས་གསུམ་སངས་རྒྱས་རྣམས་ལ་སྐུར་
བ་ཡིན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་ཡིད་ཆེས་རྟག་ཏུ་རབ་བརྟན་ཞིང་། །ནན་ཏན་བསྐྱེད་ནས་ཆོས་རྣམས་ཚོལ་བ་ལ། །སྐྱོ་བ་མེད་ཅིང་བརྙས་པར་མི་བྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་ཆུང་མ་བུ་མོ་མངོན་ཞེན་ཅིང་། །རྟག་ཏུ་འདོད་
པའི་ཡུལ་ནི་རྗེས་དྲན་དང་། །ཤེས་རབ་མི་སྒོམ་རྒྱ་ཆེར་ཕན་མི་འདོགས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་རི་དང་ནགས་ཁྲོད་རབ་གནས་ཤིང་། །ཤེས་རབ་བསྒོམས་ནས་ཤིན་ཏུ་དགའ་གྱུར་དང་། །འཚོ་བའི་ཡོ་བྱད་དག་ལ་འདོད་མེད་པ། །དེས་ནི་མདོ་སྡེ་འདི་ལ་མོས་
པར་འགྱུར། །གང་ཞིག་མིག་གི་སྔོན་དང་ཕྱི་མའི་མཐའ། །རྟག་ཏུ་རྨོངས་དང་མི་རྟོགས་གང་ཡིན་པ། །དེ་ནི་གཏི་མུག་བདུད་ཀྱིས་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་སྔོན་དང་ཕྱི་མའི་མཐའ། །རྟག་ཏུ་རྟོགས་ཤིང་རྨོངས་པ་མེད་གྱུར་པ། །དེ་ནི་
བདུད་ཀྱིས་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་མཐའ་ཡོད་དང་མེད་པ་ལ། །རྟག་ཏུ་རྨོངས་ནས་ཁོང་དུ་མ་ཆུད་པ། །དེ་ནི་གཏི་མུག་བདུད་ཀྱིས་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་མཐའ་ཡོད་དང་

མེད་པ་དག །རྟག་ཏུ་རྟོགས་ཤིང་རྨོངས་པ་མེད་གྱུར་པ། །དེ་ནི་བདུད་ཀྱིས་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མི་གནས་འཇིག་པའི་མཚན་ཉིད་ལ། །རྟག་ཏུ་རྨོངས་ཤིང་ཁོང་དུ་མི་ཆུད་པ། །དེ་ནི་གཏི་མུག་བདུད་ཀྱིས་བཅིངས་པས་
ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མི་གནས་འཇིག་པའི་མཚན་ཉིད་དག །རྟག་ཏུ་ཁོང་དུ་ཆུད་ཅིང་རྨོངས་མེད་པ། །དེ་ནི་བདུད་ཀྱིས་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །རྣ་བ་སྣ་དང་ལྕེ་ལུས་ཡིད་དག་དང་། །གཟུགས་
སྒྲ་དྲི་རོ་རེག་བྱ་ཆོས་རྣམས་དང་། །ས་ཆུ་མེ་རླུང་ངོ་བོ་ཉིད་དག་དང་། །དངོས་པོ་སེམས་ཅན་སྡུག་བསྔལ་ཕུང་པོ་དང་། །ཁམས་དང་འཇིག་རྟེན་སྐྱེ་སྒྲ་མི་བདེན་དང་། །འདོད་ཆགས་ཞེ་སྡང་གཏི་མུག་ང་རྒྱལ་སྲེད། །འཆབ་རྒྱགས་སེར་སྣ་ཕྲག་དོག་གཡོ་སྒྱུ་དང་། །ཁྲོ་སོགས་པར་ཡང་དེ་
བཞིན་རིག་པར་གྱིས། །གང་ཞིག་མིག་ཟད་མཐའ་ནི་དེ་དག་ལ། །རྟག་ཏུ་རྨོངས་ཤིང་ཁོང་དུ་མི་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་མཐའ་ནི་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་
བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་འཇིག་པ་དེ་དག་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་འཇིག་པ་དེ་དག་ལ། །རྟག་
པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་རབ་དབེན་དེ་དག་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་
མིག་གི་རབ་དབེན་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་འགྲོ་འོང་མེད་པ་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་

མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་འགྲོ་འོང་མེད་པ་དག །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ལ་བདག་མེད་མ་རྟོགས་ནས། །མིག་ཟད་ངོ་བོ་ཉིད་ལ་རྟག་
རྨོངས་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ལ་བདག་མེད་རབ་རྟོགས་ནས། །མིག་ཟད་ངོ་བོ་རྟག་ཏུ་རྟོགས་གྱུར་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ལ་བདག་མེད་
མ་རྟོགས་ནས། །བཟོད་པའི་གནས་ལ་རྟག་ཏུ་རྨོངས་གྱུར་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ལ་བདག་མེད་རབ་རྟོགས་ནས། །བཟོད་པའི་གནས་ནི་རྟག་ཏུ་རྟོགས་གྱུར་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་
ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེ་ནི་མི་གནས་ཚུལ་ཁྲིམས་བསྒྲུབ་མི་ནུས། །མི་གནས་ཚུལ་ཁྲིམས་མངོན་པར་མི་སྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་མི་གནས་ཚུལ་
ཁྲིམས་བསྒྲུབ་པར་ནུས། །མི་གནས་ཚུལ་ཁྲིམས་མངོན་པར་བསྒྲུབ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེས་ནི་ཟག་མེད་ཚུལ་ཁྲིམས་བསྒྲུབ་མི་ནུས། །ཟག་མེད་ཚུལ་ཁྲིམས་མངོན་པར་མི་བསྒྲུབ་པས། །དེས་ནི་མདོ་སྡེ་འདི་
ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཟག་མེད་ཚུལ་ཁྲིམས་བསྒྲུབ་པར་ནུས། །ཟག་མེད་ཚུལ་ཁྲིམས་མངོན་པར་བསྒྲུབ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེས་ནི་ཟག་མེད་ཤེས་རབ་
བསྒྲུབ་མི་ནུས། །ཟག་མེད་ཤེས་རབ་མངོན་པར་མི་སྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཟག་མེད་ཤེས་རབ་བསྒྲུབ་པར་ནུས། །ཟག་མེད་ཤེས་རབ་མངོན་པར་བསྒྲུབ་པས་ན། །དེས་ནི་མདོ་སྡེ་འདི་ལ་མོས་པར་

འགྱུར། །གང་ཞིག་མིག་ཟད་ངོ་བོ་མ་རྟོགས་པ། །མིག་སྟོང་ཉིད་ལ་རྟག་ཏུ་རྨོངས་པར་འགྱུར། །དེས་ནི་ཀུན་འཛིན་ཡེ་ཤེས་མི་སྐྱེད་པས། །མདོ་སྡེ་འདི་ལ་རབ་ཏུ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །མིག་སྟོང་ཉིད་ནི་རྟག་པར་རྟོགས་པར་འགྱུར། །དེས་ནི་ཀུན་
འཛིན་ཡེ་ཤེས་རབ་བསྐྱེད་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མིག་ཟད་ངོ་བོ་ཉིད་རྟོགས་པ། །དེས་ནི་ཀུན་འཛིན་ཡེ་ཤེས་བསྒྲུབ་པ་ན། །བླ་མེད་མ་ཆགས་ཡེ་ཤེས་རབ་བསྒྲུབས་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མདོ་སྡེ་འདི་ལ་མ་
མོས་པ། །མིག་ཟད་ངོ་བོ་ཉིད་ལ་རྟག་ཏུ་རྨོངས། །དེས་ནི་ཏིང་འཛིན་རྣམས་ལས་ཉམས་པས་ན། །བླ་མེད་ཡེ་ཤེས་ཐོབ་པར་ཤིན་ཏུ་དཀའ། །གང་ཞིག་མདོ་སྡེ་འདི་ལ་རབ་མོས་ཤིང་། །མིག་ཟད་ངོ་བོ་ཉིད་ནི་མངོན་རྟོགས་པ། །དེས་ནི་ཏིང་འཛིན་མངོན་པར་བསྒྲུབས་པས་ན། །བླ་མེད་
ཡེ་ཤེས་མངོན་བྱེད་དཀའ་བ་མེད། །གང་ཞིག་མིག་ཟད་ངོ་བོ་ཉིད་རྟོགས་ཤིང་། །བདག་མེད་པ་ཡི་མཚན་ཉིད་རབ་ཤེས་པ། །དེས་ནི་རྟག་ཏུ་ཆོས་འདི་ཐོས་པས་ན། །མངོན་པར་ཡིད་ཆེས་ཐེ་ཙོམ་མེད་པ་འཐོབ། །གང་ཞིག་མིག་ཟད་ངོ་བོ་ཉིད་སེམས་ཤིང་། །ཉིན་མཚན་རབ་བརྩོན་ལེ་ལོ་
མེད་གྱུར་པ། །དེས་ནི་ཀུན་འཛིན་སྤོབས་པ་མངོན་བསྒྲུབས་ནས། །མདོ་སྡེ་འདི་ནི་རྟག་ཏུ་སྟོན་པར་འགྱུར། །གང་ཞིག་མདོ་སྡེ་འདི་ནི་སེམས་བྱེད་པ། །འོད་ཟེར་འབྱིན་པའི་ཡེ་ཤེས་རྫོགས་པར་འགྱུར། །དེས་ནི་དེ་བཞིན་གཤེགས་པ་རབ་སྟོན་ཅིང་། །མིག་སྟོང་ཉིད་ནི་རབ་ཏུ་རྟོགས་པར་
འགྱུར། །གང་ཞིག་མཆོད་རྟེན་བརྒྱ་སྟོང་རབ་བྱས་ཤིང་། །སངས་རྒྱས་ཐམས་ཅད་མཆོད་པ་བྱས་པ་བས། །གང་ཞིག་མདོ་སྡེ་འདི་ནི་སེམས་བྱེད་ན། །འདི་ཡི་ཡོན་ཏན་དེ་བས་ཁྱད་པར་འཕགས། །གང་གིས་རོལ་མོ་བརྒྱ་སྟོང་རབ་བྱས་ནས། །དེ་བཞིན་གཤེགས་པའི་རིང་བསྲེལ་
མཆོད་པ་བྱས། །གང་ཞིག་མདོ་སྡེ་འདི་ནི་ཐོས་གྱུར་ན། །འདི་ཡི་ཡོན་ཏན་དེ་བས་ཁྱད་པར་འཕགས། །སངས་རྒྱས་སྤྱན་གྱིས་གཟིགས་པའི་སེམས་ཅན་རྣམས། །བསྐལ་པ་དག་ནི་བྱེ་བ་ཚད་མེད་པར། །དེ་བཞིན་གཤེགས་དང་མཚུངས་པར་མཆོད་པ་བས། །མདོ་སྡེ་འདི་བཟུང་

བསོད་ནམས་ཁྱད་པར་འཕགས། །གང་ཞིག་མདོ་སྡེ་འདི་ལ་ཚིག་བཞི་པའི། །ཚིགས་བཅད་གཅིག་ཙམ་འཛིན་ཅིང་སྟོན་བྱེད་ན། །དེ་ལ་རྒྱལ་བ་ཐུགས་རྗེ་ཆེན་པོ་ཡི། །གཙོ་ལྟར་གུས་པ་རབ་ཏུ་བསྐྱེད་པར་བྱ། །ང་ནི་འདས་པའི་བསྐལ་པ་བརྒྱ་སྟོང་དུ། །
སྲིད་པ་གསུམ་དུ་འཁོར་བར་གྱུར་པའི་ཚེ། །སངས་རྒྱས་དག་ནི་ཚད་མེད་པ་རྣམས་ལ། །མདོ་སྡེ་འདི་ཡི་ཕྱིར་ནི་རིམ་གྲོ་བྱས། །རེས་འགའ་མར་མེ་བརྒྱ་སྟོང་ཚད་མེད་པ། །སྙིང་པོ་རེ་རེའི་ཚད་ཀྱང་དཔག་ཚད་ཙམ། །སྦར་ནས་མདོ་སྡེ་འདི་ལ་རང་དབང་དག །འཐོབ་པར་བྱ་ཕྱིར་
འདྲེན་པ་རྣམས་ལ་མཆོད། །རེས་འགའ་མེ་ཏོག་ཙམ་པ་ཀ་དང་ནི། །སུ་མ་ན་དང་མྱ་ངན་མེད་པ་ཡི། །ཕྲེང་བ་རྒྱལ་མཚན་གདུགས་ནི་སྣ་ཚོགས་ཀྱིས། །དེ་བཞིན་གཤེགས་པའི་མཆོད་རྟེན་མཆོད་པ་བྱས། །ང་སྔོན་འཁོར་བའི་འཁོར་བར་གྱུར་པའི་ཚེ། །སློང་དུ་འོངས་པ་
དག་ལ་སྦྱིན་བཏང་སྟེ། །རེས་འགའ་མེ་ཏོག་འབྲས་བུ་དག་ཀྱང་བཏང་། །རེས་འགའ་ཟམ་པ་ཁྲོན་པ་ཆུ་མིག་བཏང་། །རེས་འགའ་གླང་པོ་ཆེ་དང་བཞོན་པ་བཏང་། །རེས་འགའ་རིན་ཆེན་རྟ་དང་ཆུང་མ་བཏང་། །རེས་འགའ་གསེར་གྱི་ཁྲི་དང་རིན་ཆེན་གུར། །རེས་འགའ་སེ་
མོ་དོ་དང་ཕྲེང་བ་བཏང་། །དེ་བཞིན་བསྐལ་པ་བརྒྱ་སྟོང་རྫོགས་པར་ནི། །མདོ་སྡེ་འདི་ཕྱིར་སེམས་ལ་སེར་སྣ་མེད།། །།བམ་པོ་གཉིས་པ། ང་སྔོན་མདོ་སྡེ་འདི་ཡི་ཕྱིར། །ཚུལ་ཁྲིམས་ཡོངས་སུ་དག་པར་བསྲུངས། །ཏིང་འཛིན་ཤེས་རབ་རྟག་ཏུ་
བསྒོམས། །སེམས་ཅན་རྣམས་ལ་སྦྱིན་པ་བཏང་། །ང་སྔོན་མདོ་སྡེ་འདི་ཡི་ཕྱིར། །གཏུམ་པོ་དག་གིས་བརྒྱད་བཀག་ཀྱང་། །དེ་ཚེ་ང་ནི་སྙིང་བརྩེ་བས། །དེ་ལ་གནོད་པ་ཡོད་མ་བྱས། །ང་སྔོན་མདོ་སྡེ་འདི་ཡི་ཕྱིར། །སློང་དུ་འོངས་པ་དག་ལ་ནི། །ཇི་ལྟར་མོས་བཞིན་རབ་
བཏང་བས། །ཐམས་ཅད་རབ་ཏུ་དགའ་བར་བྱས། །ང་སྔོན་མདོ་སྡེ་འདི་ཡི་ཕྱིར། །གཞལ་མེད་ཁང་ཆེན་རྣམས་ལ་ནི། །རིན་ཆེན་དྲ་བས་རབ་བརྒྱན་ནས། །སངས་རྒྱས་རྣམས་ལ་ཡོངས་སུ་ཕུལ། །ང་སྔོན་མདོ་སྡེ་འདི་ཡི་ཕྱིར། །རིན་ཆེན་རྣམ་པ་སྣ་ཚོགས་དང་། །

ཡིད་བཞིན་ནོར་བུ་རིན་པོ་ཆེས། །སངས་རྒྱས་རྣམས་ལ་མཆོད་པ་བྱས། །ང་སྔོན་མདོ་སྡེ་འདི་ཡི་ཕྱིར། །དྲིན་ཡོད་རྣམས་ལ་རྟག་དྲན་པས། །ཐ་ན་ཚིགས་བཅད་གཅིག་མཉན་པ། །དེ་ལ་ཡང་ནི་བཀུར་སྟི་བྱས། །ང་སྔོན་མདོ་སྡེ་འདི་ཡི་ཕྱིར། །ཚུལ་ཁྲིམས་ལྡན་ལ་རབ་བཀུར་
བས། །ཐ་ན་འཆག་པའི་ཚེ་ན་ཡང་། །དེ་ལ་རྟག་ཏུ་གུས་པ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །འཁོར་བ་དག་ན་འཁོར་བའི་ཚེ། །དྲིན་ནི་ཅུང་ཟད་ཡོད་པ་ལའང་། །དེ་ལ་རྟག་ཏུ་དྲིན་དུ་གཟོས། །ང་སྔོན་མདོ་སྡེ་འདི་ཡི་ཕྱིར། །རྙེད་པ་མ་བཙལ་ཆོས་མ་སྐུར། །ཉེ་བཤེས་
སེམས་ཅན་རྣམས་ལ་ནི། །སྙིང་བརྩེ་དག་ནི་རབ་ཏུ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །མང་ཐོས་ལེགས་བཤད་ལྡན་པས་ན། །ཆོས་ལ་མངོན་པར་ཞེན་བྱེད་ཅིང་། །བཤེས་པའི་ཁྱིམ་ལ་སེར་སྣ་མེད། །ང་སྔོན་མདོ་སྡེ་འདི་ཡི་ཕྱིར། །མི་དགེའི་སེམས་ནི་སྐྱེས་གྱུར་ན། །མྱུར་
བ་ཉིད་དུ་རབ་བཤགས་པས། །འཕེལ་བར་ཡང་ནི་ཡོད་མ་བྱས། །ང་སྔོན་མདོ་སྡེ་འདི་ཡི་ཕྱིར། །རྒྱལ་པོའི་བུར་ནི་གྱུར་བ་ན། །རིན་པོ་ཆེ་དང་བྱུག་སྤོས་དང་། །སྤོས་ཀྱི་ཕྱེ་མ་ཇི་སྙེད་པ། །དད་པའི་སེམས་ནི་ངས་བསྐྱེད་ནས། །སངས་རྒྱས་རྣམས་ལ་བསྔོས་ཤིང་ཕུལ། །ང་སྔོན་མདོ་
སྡེ་འདི་ཡི་ཕྱིར། །ཁྲི་མོན་བཙོན་ལ་སྙིང་བརྩེ་བས། །སྡུག་བསྔལ་སྣ་ཚོགས་གང་མྱོང་བ། །ལུས་ཀྱི་སྐྱིན་པར་དང་དུ་བླངས། །ང་སྔོན་མདོ་སྡེ་འདི་ཡི་ཕྱིར། །འདོད་པའི་ཡོན་ཏན་ལྔ་སྤངས་ནས། །རྟག་ཏུ་དུས་དྲུག་དག་གི་ཚེ། །སྡོམ་པ་དག་ནི་རབ་ཏུ་བླངས། །ང་སྔོན་མདོ་སྡེ་འདི་ཡི་ཕྱིར། །
རྟག་ཏུ་བཟོད་པ་རབ་བསྒོམས་པས། །ཐ་ན་ཆུང་མ་དག་ལ་ཡང་། །འདོད་པའི་སེར་སྣ་ཡོང་མ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །དབུལ་ཕོངས་དག་ནི་ཐམས་ཅད་ཀུན། །བདེ་བ་དག་ནི་ཐོབ་བྱའི་ཕྱིར། །ནོར་དག་གིས་ནི་ཕྱུག་པོར་བྱས། །ང་སྔོན་མདོ་སྡེ་འདི་ཡི་ཕྱིར། །དགེ་
སྦྱོང་དང་ནི་བྲམ་ཟེ་དང་། །སྐྱེ་དགུ་རྣམ་པ་སྣ་ཚོགས་ཀུན། །ཐམས་ཅད་དག་ནི་རབ་ཏུ་བསྡུས། །ང་སྔོན་མདོ་སྡེ་འདི་ཡི་ཕྱིར། །ཐམས་ཅད་ཀུན་ལ་ཕན་གདགས་ཕྱིར། །རྟག་ཏུ་སྦྱིན་བདག་ཆེར་བྱས་ནས། །སློང་བ་དག་ལ་ཡོངས་སུ་བཏང་། །རེས་འགའ་མེ་ཏོག་འབྲས་བུ་དག །

གཞན་དག་གཅོད་དུ་མི་གཞུག་པར། །སེམས་ཅན་རྣམས་ལ་ཡོངས་བཏང་ཞིང་། །ཡིད་བཞིན་དུ་ནི་ཚིམ་པར་བྱས། །ང་སྔོན་སྦྱིན་པ་གཏོང་བའི་ཚེ། །སེམས་ནི་རྟག་ཏུ་སྙོམས་པས་ན། །ཚུལ་ཁྲིམས་ཡོན་ཏན་ལྡན་པ་དང་། །ཚུལ་ཁྲིམས་འཆལ་དང་ངོ་ཚ་
མེད། །རྫུ་འཕྲུལ་ཆེན་པོ་ཐོབ་པ་ནས། །སོ་སོའི་སྐྱེ་བོའི་བར་དག་ལ། །ངོ་མཚར་སྙམ་པའི་སེམས་བསྐྱེད་ནས། །གུས་པས་ཀུན་ལ་སྦྱིན་པ་བཏང་། །ང་སྔོན་སྦྱིན་པ་གཏོང་བའི་ཚེ། །སེམས་ལ་མཐོ་དམའ་མེད་པས་ན། །སྡུག་བསྔལ་འགྲོ་བ་མི་ཚོལ་ཞིང་། །མདོ་སྡེ་འདི་
ལ་རྩེ་གཅིག་མོས། །རེས་འགའ་ཡུལ་ཁམས་དག་ཏུ་ནི། །ཕྱིར་རྒོལ་ཐམས་ཅད་མེད་བྱས་ཤིང་། །ཀླུ་རྣམས་ཀུན་ནི་རབ་བཏུལ་ནས། །དུས་བཞིན་ཆར་ནི་རབ་ཏུ་ཕབ། །ཟླ་འོད་ཁྱོད་ཀྱིས་ཤེས་པར་གྱིས། །ངས་ནི་ཚེ་རབས་དཔག་མེད་ནས། །མདོ་སྡེ་འདི་ནི་གཉེར་བའི་
ཕྱིར། །དཀའ་བ་རྣམས་ནི་རབ་ཏུ་སྤྱད། །བསྐལ་པ་བརྒྱ་སྟོང་སྙེད་དུ་ནི། །བརྗོད་ཀྱང་མཐར་ཐུག་མི་འགྱུར་རོ། །ཡིད་ཆེས་པ་ལ་ཁྱོད་གནས་ནས། །མ་འོངས་ཐ་མ་དུས་ཀྱི་ཚེ། །ཡང་དག་དྲན་པའི་སེམས་སྐྱེད་ལ། །མདོ་སྡེ་འདི་ནི་བཤད་པར་གྱིས། །ངས་ནི་སངས་རྒྱས་
སྤྱན་དག་གིས། །མ་འོངས་དུས་ནི་གསལ་གཟིགས་པས། །སྤྱོད་པ་སྣ་ཚོགས་ཇི་ལྟ་བ། །ཐམས་ཅད་རབ་ཏུ་མཁྱེན་པ་ཡིན། །དགེ་སློང་དག་ནི་གང་ཞིག་གིས། །བླ་མེད་ཡེ་ཤེས་བཙལ་བའི་ཕྱིར། །ཤིན་ཏུ་དང་བའི་སེམས་ཀྱིས་ནི། །མདོ་སྡེ་འདི་ནི་གང་སྟོན་པ། །གང་
ཟག་དེ་དང་ཕྱོགས་རྣམས་ཀྱང་། །ཐམས་ཅད་མ་ལུས་ཐུགས་སུ་ཆུད། །མ་འོངས་ཐ་མ་དུས་ཀྱི་ཚེ། །མདོ་འདི་ཐོས་ནས་གང་མོས་པ། །བསམ་པ་དང་ནི་ཐབས་རྣམས་ཀྱང་། །ཐམས་ཅད་མ་ལུས་ཐུགས་སུ་ཆུད། །དམན་པ་དག་ནི་གང་ཞིག་གིས། །མདོ་སྡེ་འདི་
ནི་མ་ཐོས་པས། །ཆོས་བསྟན་པ་ལ་སྐུར་འདེབས་པ། །ཐམས་ཅད་མ་ལུས་ཐུགས་སུ་ཆུད། །དགེ་སློང་རྣམས་ནི་གང་ཞིག་དང་། །དགེ་སློང་མ་ནི་གང་ཞིག་གིས། །མདོ་སྡེ་འདི་ནི་ཐོས་གྱུར་ནས། །ཤིན་ཏུ་གདུང་བས་ངུ་བྱེད་པ། །དེ་ཀུན་ངས་ནི་ལུང་བསྟན་ནས། །རྒྱལ་བ་

གཙོ་བོ་མཐོང་བར་འགྱུར། །ཟླ་འོད་ཁྱོད་ཀྱིས་ཤེས་པར་གྱིས། །སངས་རྒྱས་རྫུ་འཕྲུལ་སྟོབས་ཀྱིས་ནི། །གང་དག་ཡིད་ནི་དག་པ་དང་། །གང་དག་གི་ནི་མ་དག་དང་། །ཐ་ན་མོས་པ་གང་ཡིན་པ། །ཐམས་ཅད་མ་ལུས་ཐུགས་སུ་ཆུད། །སེམས་ཅན་དག་ནི་གང་ཞིག་
གིས། །རབ་ཞི་དབེན་ལ་རྟག་མོས་ཤིང་། །ཏིང་འཛིན་རྣམས་ལ་རབ་གནས་ནས། །འཁོར་བ་དག་ལ་མ་ཆགས་པས། །ཐ་ན་བག་ཆགས་རྣམས་ཀྱང་ནི། །གཏན་ནས་རབ་ཏུ་གང་སྤངས་དང་། །དེ་ལ་སོགས་པའི་ཡོན་ཏན་རྣམས། །ཐམས་ཅད་མ་ལུས་ཐུགས་སུ་
ཆུད། །སེམས་ཅན་དག་ནི་གང་ཞིག་གིས། །མི་བདེན་ཆོས་ལ་ཞེན་པ་དང་། །སེམས་ཅན་དག་ནི་གང་ཞིག་གིས། །སངས་རྒྱས་ལ་ནི་རབ་མོས་པ། །མ་འོངས་དངོས་པོ་འདི་ལྟ་བུ། །ཐམས་ཅད་མ་ལུས་ཐུགས་སུ་ཆུད། །སེམས་ཅན་དག་ནི་གང་ཞིག་གིས། །འཇིག་རྟེན་
བདེ་ལ་རབ་ཆགས་པས། །སངས་རྒྱས་བྱང་ཆུབ་ས་བོན་དག །ལེགས་པ་ཉིད་དུ་མི་སྐྱེད་པ། །རྒྱུ་དང་རྐྱེན་ནི་དེ་ཡི་ཕྱིར། །སྦྱོར་བ་རྣམས་ནི་ཉམས་པར་འགྱུར། །སུ་ཡང་རུང་བ་གང་ཞིག་གིས། །བྱང་ཆུབ་ས་བོན་རྟོགས་གྱུར་ན། །གང་ཟག་དེ་ཡིས་ངེས་པར་ནི། །རྣམ་དག་
འོད་ཟེར་དཔག་མེད་ཐོབ། །ཟླ་འོད་ཁྱོད་ཀྱིས་འདི་ལྟ་བུར། །འོད་ཟེར་འདི་ལ་སོགས་པ་ཡི། །རྒྱུ་དང་རྐྱེན་ནི་རེ་རེ་ཀུན། །སོ་སོ་ཐ་དད་ཉིད་དུ་ལྟོས། །ཁྱོད་ཀྱིས་ཤེས་རབ་སྟོབས་ཀྱིས་ནི། །ཐམས་ཅད་དེ་ལྟར་རིག་པར་གྱིས། །གང་ཞིག་མི་དགེ་གྲོགས་སྤངས་ཏེ། །དགེ་
བའི་བཤེས་གཉེན་ལ་བསྟེན་བྱས། །ཚུལ་ཁྲིམས་རྣམ་དག་གང་སྲུང་བ། །སངས་རྒྱས་འོད་ཟེར་སྒྲུབ་པར་འགྱུར། །ཁྱོད་ཀྱིས་དབང་པོ་རབ་སྲུངས་ལ། །ངོ་ཚ་ཁྲེལ་མེད་རབ་ཏུ་སྤོངས། །དགེ་བའི་ཆོས་ནི་རབ་བསྒོམས་ལ། །སེམས་ཅན་རྣམས་ནི་བསྲུང་བར་གྱིས། །ཁྱོད་ཀྱིས་
རྩོད་པ་རབ་སྤོངས་ལ། །སྟོང་ཉིད་དག་ནི་རྟོགས་པར་གྱིས། །རྙེད་པ་དག་ལ་མ་གདུ་བར། །མང་ཐོས་ལེགས་བཤད་ལྡན་པར་གྱིས། །ཁྱོད་ཀྱིས་རྙེད་པ་དག་ལ་ནི། །མི་གཙང་ལྟ་བུར་བལྟ་བར་གྱིས། །རྙེད་པའི་དྲི་མ་དག་གིས་ནི། །རྣམ་དག་སེམས་ནི་སྦགས་མ་བྱེད། །རྣམ་པར་

གྲོལ་བ་བཙལ་བར་བྱོས། །བླ་མེད་རྙེད་པ་ཐོབ་པར་འགྱུར། །ཁྱོད་ཀྱིས་སངས་རྒྱས་ལམ་བསྒྲུབས་ལ། །སངས་རྒྱས་ཆོས་ཉིད་འདྲ་བར་ལྟོས། །ཆོས་ཀྱི་སྒྲོན་ཆེན་རྟག་སྦོར་ལ། །འཇིག་རྟེན་ཀུན་ནི་སྣང་བར་གྱིས། །ཁྱོད་ཀྱི་སེམས་ནི་རི་རྒྱལ་ལྟར། །མི་གཡོ་ཉིད་
དུ་རབ་ཏུ་བྱོས། །ཁ་ངན་དང་ནི་བརྡེགས་པ་ཡང་། །ཐམས་ཅད་བཟོད་པ་དང་དུ་ལོང་། །ཁྱོད་ནི་སེམས་ཅན་རྣམས་ཀྱི་ཕྱིར། །དགེ་བཤེས་ཡང་དག་རབ་ཏུ་བྱོས། །དམན་པའི་སེམས་ནི་ཡོངས་སྤོངས་ལ། །རྣམ་དག་ལས་ནི་རྟག་ཏུ་སྒྲུབས། །ཁྱོད་ཀྱི་སེམས་ནི་བརྟན་བྱོས་ལ། །
བླ་མེད་ཆོས་ནི་རབ་ཏུ་སྟོན། །མདོ་སྡེ་དམ་པ་འདི་ལྟ་བུ། །བརྩེ་བ་ཅན་ལ་སྦྱིན་པར་གྱིས། །བླ་མེད་ཡེ་ཤེས་གང་ཚོལ་བ། །འཁོར་བ་དག་ལ་འཇིགས་མ་བྱེད། །དེས་ནི་སྡིག་པ་རྣམ་སྤངས་ནས། །ཕན་ཡོན་མཆོག་ནི་ཐོབ་པར་འགྱུར། །དཔེར་ན་བློ་དང་ལྡན་པ་དག །མེ་ལ་
སྤྱོད་པར་མཁས་པ་གང་། །རོ་རྣམས་སྣ་ཚོགས་སྦྱིན་བྱེད་ཀྱང་། །མེས་ནི་སྲེག་པར་ཡོང་མི་འགྱུར། །གང་ཞིག་བློ་དང་མི་ལྡན་པ། །ཐབས་དག་ལ་ནི་མི་མཁས་པས། །མེ་ཁྱེར་ལག་མཐིལ་གང་བཞག་པ། །མེས་ནི་རབ་ཏུ་སྲེག་པར་འགྱུར། །ཇི་ལྟར་མི་ཞིག་དུག་དག་གིས། །
སེམས་ནི་འཁྲུགས་ནས་མྱོས་པ་གང་། །མེ་ལ་རབ་ཏུ་བསྲོས་ན་ནི། །དེ་ཡི་རྒྱུ་ཡིས་སོས་པར་འགྱུར། །ཟླ་འོད་ཁྱོད་ཀྱིས་ཤེས་པར་གྱིས། །བློ་དང་ལྡན་པའང་དེ་བཞིན་དུ། །ཡིད་བརྟེན་ཡིད་ནི་སྟོང་པར་རིག །དེ་ཕྱིར་འཁོར་བར་གནས་ཀྱང་ནི། །མིག་བརྟེན་མིག་ནི་སྟོང་
རིག་པས། །མིག་ལ་མངོན་པར་ཞེན་པ་མེད། །གལ་ཏེ་དེ་ལྟར་རབ་ཤེས་ན། །མིག་ལ་གནས་ཀྱང་ཉོན་མོངས་མེད། །གལ་ཏེ་མིག་ཉིད་སྟོང་རིག་ན། །ཡང་དག་ཡེ་ཤེས་སྒྲུབ་པར་འགྱུར། །ཡང་དག་ཡེ་ཤེས་ཐོབ་པའི་ཕྱིར། །འོད་ཟེར་དག་ནི་འབྱུང་བར་འགྱུར། །གལ་
ཏེ་མིག་ཉིད་སྟོང་རིག་ན། །འདོད་ཆགས་དག་ནི་གཏན་ནས་སྤོང་། །འདོད་ཆགས་དག་ནི་མེད་པའི་ཕྱིར། །འོད་ཟེར་དག་ནི་འབྱུང་བར་འགྱུར། །དེ་བཞིན་ཞེ་སྡང་གཏི་མུག་དང་། །ངར་འཛིན་འཆབ་དང་ཁྲོ་བ་དང་། །སེར་སྣ་ཕྲག་དོག་ངོ་ཚ་མེད། །མི་བཟོད་སེམས་ནི་མཐོ་བ་དང་། །

རྒྱགས་དང་མངོན་པའི་ང་རྒྱལ་དང་། །གཡོ་སྒྱུ་དང་ནི་བག་མེད་དང་། །གྱ་གྱུ་ལ་སོགས་བར་དུ་ཡང་། །ཐམས་ཅད་འདོད་ཆགས་བཞིན་དུ་བཤད། །ཡང་དག་ཡེ་ཤེས་ཐོབ་གྱུར་ན། །མིག་ནི་ཞི་བ་ཉིད་དུ་རྟོགས། །ཞི་བ་ཉིད་དུ་རྟོགས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་
དག་ཡེ་ཤེས་ཐོབ་གྱུར་ན། །སངས་རྒྱས་ཚུལ་ལ་རབ་ཏུ་གནས། །ཚུལ་ལ་རབ་ཏུ་གནས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་ཐོབ་གྱུར་ན། །སངས་རྒྱས་ཐབས་ལ་གནས་པར་འགྱུར། །ཐབས་ལ་རབ་ཏུ་གནས་པའི་ཕྱིར། །འོད་ཟེར་དག་ནི་འབྱུང་བར་
འགྱུར། །ཡང་དག་ཡེ་ཤེས་མ་བསྒྲུབས་པར། །སྒྲིབ་པ་དག་ནི་གཏན་སྤོང་ཞིང་། །འོད་ཟེར་འབྱུང་བ་སྒྲུབ་པར་ནི། །ངས་སྔོན་མ་ཐོས་མ་མཐོང་ངོ་། །ཡང་དག་ཡེ་ཤེས་རབ་བསྒྲུབས་ནས། །སྒྲིབ་པའི་གནོད་པ་གཏན་སྤོང་ཞིང་། །སྤྱོད་པ་འདི་རྗེས་གང་འབྲང་བ། །འོད་ཟེར་འགྱེད་པ་ཐོབ་
པར་འགྱུར། །རྒྱལ་བའི་སྤྱོད་པ་ཡོངས་ཚོལ་ཞིང་། །མདོ་སྡེ་འདི་ལ་བསླབས་བྱས་ནས། །དེ་བཞིན་གཤེགས་ལ་གང་མཆོད་པ། །ཡང་དག་ཡེ་ཤེས་ཐབས་ཐོབ་འགྱུར། །ཡང་དག་ཡེ་ཤེས་གང་བསྒྲུབས་པ། །སངས་རྒྱས་རྣམས་ལ་མཆོད་པར་གྱིས། །འོད་ཟེར་འགྱེད་པ་རྫོགས་
པར་འགྱུར། །ལག་མཐིལ་འབྲས་བུ་ཇི་བཞིན་ནོ། །མིག་ལ་བདག་མེད་གང་རྨོངས་པ། །དགེ་སྦྱོང་ཆོས་ནི་ཉམས་པར་འགྱུར། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །མིག་ལ་བདག་མེད་གང་རྟོགས་པ། །དགེ་སློང་ཆོས་ནི་སྒྲུབ་པར་འགྱུར། །གང་ཟག་
དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །མིག་གི་མཐའ་ཟད་གང་རྟོགས་པ། །རྣ་བ་སྐྱེ་བའི་མཐའ་ཡང་རྟོགས། །རྣ་བ་སྐྱེ་བའི་མཐའ་རྟོགས་པས། །དགེ་སྦྱོང་ཆེན་པོའི་ཆོས་ཤེས་བྱ། །གལ་ཏེ་མིག་གི་ངོ་བོ་ཉིད། །མཐའ་ནི་ཡོངས་སུ་མ་ཤེས་ན། །མིག་ནི་
སྐྱེ་བའི་མཐའ་དག་ཀྱང་། །ཡོངས་སུ་ཤེས་པར་མི་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ཡོངས་སུ་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང་། །ཡོངས་སུ་ཤེས་པ་ཉིད་དུ་འགྱུར། །

གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་མ་ཤེས་ན། །མིག་གི་སྐྱེ་བའི་མཐའ་དག་ཀྱང་། །ལེགས་པ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་
མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང་། །ལེགས་པ་ཉིད་དུ་ཤེས་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་མངོན་སུམ་མ་ཤེས་
ན། །མིག་ནི་སྐྱེ་བའི་མཐའ་དག་ཀྱང་། །མངོན་སུམ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་མངོན་སུམ་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང་། །མངོན་སུམ་ཉིད་དུ་རབ་ཤེས་པས། །
གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་མ་ཤེས་ན། །མིག་ནི་སྐྱེ་བའི་མཐའ་དག་ཀྱང་། །ཡོངས་སུ་ཤེས་པར་མི་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །
གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང་། །མངོན་སུམ་ཉིད་དུ་ཤེས་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །རྣམ་དག་ལེགས་པར་མ་ཤེས་ན། །
རྣ་བའི་ངོ་བོ་རྣམ་དག་པ། །ལེགས་པ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །རྣམ་དག་ལེགས་པར་ཤེས་གྱུར་ན། །རྣ་བའི་ངོ་བོ་རྣམ་དག་པ། །ལེགས་པ་ཉིད་དུ་རྟོགས་འགྱུར་བས། །གང་ཟག་དེ་
ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །དེ་བཞིན་སྣ་དང་ལྕེ་དང་ལུས། །ཡིད་དང་གཟུགས་སྒྲ་དྲི་རོ་དང་། །རེག་བྱ་ཆོས་དང་ས་ཆུ་དང་། །མེ་རླུང་དག་གི་དངོས་པོ་དང་། །འཇིག་རྟེན་སྡུག་བསྔལ་ཕུང་པོ་དང་། །ཁམས་དང་འཇིག་རྟེན་སྐྱེ་མཆེད་དང་། །སྒྲ་དང་མིང་ལ་སོགས་

པ་ཡང་། །ཐམས་ཅད་དེ་བཞིན་རིག་པར་གྱིས། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སེམས་ཅན་གང་ཐེག་པ་ཆེན་པོ་ལ་ཡང་དག་པར་གཞོལ་ཞིང་འོད་ཟེར་འགྱེད་པ་དེ་ལྟ་བུ་ཡོངས་སུ་རྫོགས་པར་བྱ་བར་འདོད་པ་དེས་དགེ་
བའི་རྩ་བའི་ཚོགས་རྣམ་པ་བརྒྱད་ཅུ་པོ་འདི་དག་མངོན་པར་བསྒྲུབ་པར་བྱའོ། །རྣམ་པ་བརྒྱད་ཅུ་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྲུང་ཞིང་རྗེས་སུ་དྲན་པ་དང་། གནོད་སེམས་མེད་པ་དང་། ཚུལ་ཁྲིམས་ཡོངས་སུ་དག་པ་སྲུང་ཞིང་ཉམས་པར་མི་བྱེད་པ་དང་། སེམས་
ཤིན་ཏུ་མཉམ་པ་དང་། གཡོ་སྒྱུ་མེད་པ་དང་། སེར་སྣ་མེད་པ་དང་། ཕྲག་དོག་མེད་པ་དང་། འདོད་ཆགས་ཀྱི་བསམ་པ་མེད་པ་དང་། བསླུ་བའི་བསམ་པ་མེད་པ་དང་། ཐེག་པ་ཆེན་པོའི་མདོ་སྡེ་དམ་པ་དག་ལ་མངོན་པར་ཡིད་ཆེས་པ་དང་། དབང་ཕྱུག་དང་། རྒྱགས་པ་ལ་ཞེན་ཅིང་
སྲེད་པ་མེད་པ་དང་། བཟོད་པའི་སྟོབས་ཕུན་སུམ་ཚོགས་པ་དང་། སྨོན་ལམ་ལས་ཕྱིར་མི་ལྡོག་པ་དང་། བསམ་པ་ཤིན་ཏུ་རྣམ་པར་དག་པར་གྱུར་པ་དང་། དགོན་པ་ན་གནས་པ་དང་། འཁོར་རྣམས་ལ་མི་རྟེན་པ་དང་། རྙེད་པ་ལ་མི་རྟེན་པ་དང་། གྲགས་པ་ལ་མི་རྟེན་པ་དང་། བསམ་གཏན་
རྣམས་ལ་རབ་ཏུ་གནས་པ་དང་། འོད་ཟེར་གྱི་ཏིང་ངེ་འཛིན་རབ་ཏུ་སྟོན་པ་དང་། ཚུལ་ཁྲིམས་དང་ལྡན་པ་དག་ལ་སྒྱུ་མེད་པར་རིམ་གྲོ་བྱེད་པ་དང་། ཚངས་པ་མཚུངས་པར་སྤྱོད་པ་དག་ལ་མཆོག་གི་བསམ་པ་སྐྱེད་པ་དང་། ཆོས་ལ་གུས་པའི་ཕྱིར་མཁན་པོ་དང་སློབ་དཔོན་དག་ལ་ཤིན་ཏུ་བཀུར་བ་དང་།
མདོ་སྡེའི་དོན་རབ་ཏུ་རྟོགས་པ་དང་། ཡང་དག་པར་བསྟན་པ་ལ་རབ་ཏུ་མཁས་པ་དང་། ཚིག་སྨྲས་པ་དག་ལ་མི་བདེན་པ་མེད་པ་དང་། ཡང་དག་པའི་བསམ་པ་ལ་གནས་པ་དང་། དགེ་བའི་རྩ་བ་བསྐྱེད་པ་ལ་བརྩོན་པ་དང་། རྟག་ཏུ་སྦྱིན་པ་གཏོང་བ་དང་། བདུད་ཀྱི་ལས་རབ་ཏུ་རྟོགས་པ་དང་།
དབང་པོ་རྣམས་དམ་དུ་སྲུང་བ་དང་། ཚིག་རབ་ཏུ་བརྟགས་པ་དང་། དོན་དམ་པའི་བདེན་པ་ལ་མཁས་པ་དང་། ས་རྣམས་ཀྱི་རང་གི་མཚན་ཉིད་རབ་ཏུ་རྟོགས་པ་དང་། གཟུངས་ཟད་མི་ཤེས་པ་ཡོངས་སུ་ཚོལ་བ་དང་། ལུས་དང་སྲོག་ལ་ཕོངས་པ་མེད་པ་དང་། འཁོར་བཞི་པོ་དག་ལ་རྗེས་སུ་

སྟོན་པར་བྱེད་པ་དང་། འཇིག་རྟེན་པའི་བསམ་པ་ཡོངས་སུ་བཅད་པ་དང་། འཇིག་རྟེན་ཕྱི་མའི་ཆོས་མེད་དོ་ཞེས་ཟེར་བའི་ལོག་པར་ལྟ་བ་རྣམས་སྤངས་པ་དང་། ད་དུང་མ་བསླབས་པ་དག་ལ་གྱ་གྱུའི་མཚན་མ་མི་སྟོན་པ་དང་། གང་བསླབ་པར་འདོད་པ་དག་ལ་ཅི་ནུས་ཀྱིས་
རྣམ་པར་ཕྱེ་ནས་རབ་ཏུ་སྟོན་པ་དང་། གླུ་དང་རོལ་མོའི་སྒྲ་དག་གི་བསྔགས་པ་མི་བརྗོད་པ་དང་། རྒྱན་དང་ཡོ་བྱད་ཀྱི་བསྔགས་པ་མི་བརྗོད་པ་དང་། བདེན་པ་རྣམས་ལ་ཡང་དག་པར་ཞུགས་པ་དང་། མང་དུ་ཐོས་པ་ཕུན་སུམ་ཚོགས་པ་དང་། གཉིད་རབ་ཏུ་སྤངས་པ་དང་། ཡང་དག་པའི་
ཆོས་ཡོངས་སུ་ཚོལ་བ་ལ་རབ་ཏུ་བརྩོན་པ་དང་། སངས་རྒྱས་ལ་གུས་པ་དང་། བྱང་ཆུབ་ཏུ་སེམས་བསྐྱེད་པ་དང་། འཇིག་རྟེན་པའི་ལས་ཡོངས་སུ་སྤངས་པ་དང་། བསླབ་པའི་གནས་རྣམས་ལ་ཡང་དག་པར་བརྩོན་པ་དང་། ཆོས་ལ་སྲེད་པའི་ཕྱིར་གྲོགས་ཁྱད་པར་ཅན་ལ་རྟེན་པར་བྱེད་པ་
དང་། དགེ་བའི་རྩ་བ་རྣམས་ཡོངས་སུ་ཚོལ་བ་ལ་སྐྱོ་བ་མེད་པ་དང་། རབ་ཏུ་འབྱུང་བ་ལ་ཤིན་ཏུ་མོས་པ་དང་། སངས་རྒྱས་ཀྱི་ཆོས་སྲུང་ཞིང་ཡོངས་སུ་འཛིན་པར་བྱེད་པ་དང་། སྡིག་པའི་ལས་མི་སློང་བ་དང་། བསྟན་པ་རྣམས་ལ་ཐེ་ཚོམ་མེད་པ་དང་། དཔེས་སྟོན་པ་ལ་རབ་ཏུ་མཁས་
པ་དང་། གསང་བ་རྣམས་རྣམ་པར་ཕྱེ་ནས་སྟོན་པར་བྱེད་པ་དང་། བྱང་ཆུབ་ཆེན་པོ་ཡོངས་སུ་ཚོལ་བ་ལ་ངལ་བ་མེད་པ་དང་། མདོ་སྡེ་ཡང་དག་པར་བཟུང་བ་རྣམས་བརྗེད་པར་མི་བྱེད་པ་དང་། རང་གི་བསླབ་པ་མི་སྤོང་བ་དང་། ཕ་རོལ་གྱི་སྨྲ་བ་རྣམས་ཚར་གཅོད་པ་དང་། ངེས་པར་འབྱུང་
བའི་ལམ་ཡོངས་སུ་ཚོལ་བ་དང་། སྤྱོད་པ་ཚད་མེད་པ་རྣམས་མངོན་པར་སྒྲུབ་པ་དང་། ཆོས་ཀྱི་ཡེ་ཤེས་དེ་དག་ལ་སེམས་ངེས་པར་གྱུར་པ་དང་། རྒྱུ་དང་འབྲས་བུ་གསལ་བར་མཐོང་ཞིང་འཁོར་བའི་རྒྱུན་མི་གཅོད་པ་དང་། སྲིད་པ་གསུམ་པོ་དག་ལ་ཆགས་པ་མེད་པ་དང་། མངོན་པའི་ང་རྒྱལ་
སྤངས་པ་དང་། མངོན་པར་ཡིད་ཆེས་པ་དག་ལ་གཉེན་པོ་རྣམ་པར་གཞག་པ་དག་སྟོན་པར་བྱེད་པ་དང་། མ་འོངས་པའི་འབྲས་བུ་རྣམ་པར་སྨིན་པའི་བྱེ་བྲག་རྟོགས་པར་ཁོང་དུ་ཆུད་པ་དང་། སྔོན་གྱི་མཐའ་ཡོངས་སུ་ལེགས་པར་ཤེས་པ་དང་། གཞན་གྱི་དྲིང་ལ་མི་ལྟོས་བ་དང་། ཡོངས་སུ་

སྤོང་བའི་སྤྱོད་པ་དག་ལ་བརྩོན་འགྲུས་ཀྱིས་གྲུབ་པར་བྱེད་པ་དང་། སངས་རྒྱས་ཀྱི་མཚན་དང་དཔེ་བྱད་ཀྱི་བཀོད་པ་དག་ཕུན་སུམ་ཚོགས་པར་བྱེད་པ་གང་ཡིན་པ་འདི་ནི་རྣམ་པ་བརྒྱད་ཅུ་ཞེས་བྱའོ། །གཞན་ཡང་ཟླ་འོད་གཞོན་ནུ་ཆོས་བརྒྱད་ཅུ་པོ་འདི་དག་ནི་ཆོས་ལྔའི་ནང་དུ་འཇུག་པར་འགྱུར་རོ། །
ཆོས་ལྔ་གང་ཞེ་ན། འདི་ལྟ་སྟེ། འཁོར་བ་ཤེས་པ་དང་། མྱ་ངན་ལས་འདས་པ་ཤེས་པ་དང་། ཉོན་མོངས་པ་ཟད་པ་ཤེས་པ་དང་། མཆོག་ཏུ་གྱུར་པ་ཤེས་པ་དང་། བསོད་ནམས་ཀྱི་འབྲས་བུ་ཤེས་པ་གང་ཡིན་པའོ། །གཞན་ཡང་ཟླ་འོད་གཞོན་ནུ་ཆོས་ལྔ་པོ་དེ་དག་ནི་ཆོས་གཉིས་
ཀྱི་ནང་