Kinh tạng Tây Tạng (Kangyur Đại Học) — 039_དཀོན་བརྩེགས།_ཀ

ཁ་ཅིག་ནི་ཉན་
ཐོས་ཀྱི་ས་ལ་འཇུག་པར་འགྱུར་རོ། །ངན་པའི་ས་ལ་མོས་པའི་སེམས་ཅན་ཁ་ཅིག་ནི་རང་སངས་རྒྱས་ཀྱི་ས་ལ་འཇུག་པར་འགྱུར་རོ། །སྨོན་ལམ་ཆེན་པོ་ཕུན་སུམ་ཚོགས་པའི་སེམས་ཅན་རྒྱ་ཆེན་པོ་ལ་མོས་པ་རྣམས་ནི་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པ་ལ་འཇུག་པར་
འགྱུར་རོ། །དམན་པའི་ཆོས་དང་ངན་པའི་ཆོས་རྣམས་ཡོངས་སུ་སྤངས་པ་ངེད་ནི་རྒྱ་ཆེན་པོའི་ཆོས་ལ་མོས་པ་འདི་དག་ལ་གནས་ཤིང་ངེད་ཀྱིས་དེ་བཞིན་གཤེགས་པ་རྣམས་ཀྱི་དགོངས་པ་བསྟན་པའི་གསང་ཚིག་གི་མཚམས་དེ་དག་མཁྱེན་ནས། སེམས་ཅན་རྣམས་ཀྱི་དབང་པོ་ཇི་
ལྟ་བ་བཞིན་དུ་ཡོངས་སུ་སྨིན་པར་བྱ་བ་དང་། མོས་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པ་རྣམས་ཀྱི་ཆོས་བསྟན་པ་ཚིག་འབྲུ་དཔེ་མེད་པ་དང་། རྒྱ་ཆེ་བ་དང་། གྱ་ནོམ་པ་རྣམས་ཀྱིས་ཆོས་ཐམས་ཅད་ཡང་དག་པར་བླངས་པ་དག་འབྱུང་སྟེ།
ཆོས་དེ་དག་ཐམས་ཅད་ནི་མཉམ་པ་སྟེ། ལྷག་པ་མེད་པ། ཆད་པ་མེད་པ། གཟུགས་མེད་པ་མ་ཡིན་པ། གཟུགས་མཉམ་པ་ཡིན་པ། འགྲིབ་པ་མེད་པ། ཡོངས་སུ་རྫོགས་པ་མེད་པ། མཐའ་ཡས་པ། འཆི་བ་མེད་པ། རང་བཞིན་གྱིས་རྣམ་པར་དག་པའོ། །
སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པའི་ངོ་བོ་ཉིད་ཀྱི་རང་བཞིན་ཡང་དག་པ་ཇི་ལྟ་བ་བཞིན་དུ་མཐོང་ཞིང་རྟོགས་པར་འགྱུར་ཡང་ཆོས་གང་ཡང་རབ་ཏུ་རྟོགས་པ་ཡང་མེད། ཡང་དག་པར་རྟོགས་པ་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཅེས་བྱ་བ་

ནི་དེ་བཞིན་གཤེགས་པས་རྣམ་གྲངས་སུ་བསྟན་ཏེ་གསུངས་པས་ན་གང་རྣམ་གྲངས་སུ་བསྟན་ཏེ་གསུངས་པའི་ཆོས་དེ་ལ་ནི་ཆོས་དང་ཆོས་མ་ཡིན་པའི་གནས་སྐབས་སུ་གདགས་པ་མེད་པའི་ཕྱིར་རོ། །རྗེས་སུ་བཏགས་པའི་ཆོས་ཐམས་ཅད་ནི་དོན་དམ་པར་ཡང་དག་པ་ཉིད་དུ་ན་
གདགས་སུ་མེད་དེ། ཆོས་རྣམས་ཀྱི་ཡང་དག་པ་ཇི་ལྟ་བ་བཞིན་དུ་གཞོལ་བར་དེ་བཞིན་གཤེགས་པས་གསུངས་སོ། །ཆོས་དང་ཆོས་མ་ཡིན་པ་རྣམས་ནི་རྣམ་པར་རྟོག་པས་ཉེ་བར་གནས་པར་བྱས་པ་མ་ཡིན། རྣམ་པར་མི་རྟོག་པས་ཀྱང་མ་ཡིན་ནོ། །ཆོས་ཐམས་ཅད་ནི་རྟོག་
པ་ཇི་ལྟ་བ་བཞིན་དུ་མཉམ་པ་ཉིད་ཡིན་པས་རྣམ་པར་མ་བརྟགས་པའོ། །ཆོས་ཐམས་ཅད་ནི་ཁྱད་པར་ཁོང་དུ་ཆུད་པས་ཁྱད་པར་མེད་པའོ། །ཆོས་ཐམས་ཅད་ནི་བྱུང་བ་མེད་པས་མ་བྱུང་བའོ། །ཆོས་ཐམས་ཅད་ནི་ཡང་དག་པ་མ་ཡིན་པའི་རྣམ་པར་རྟོག་པས་ཡོངས་སུ་བརྟགས་
ཤིང་ཀུན་ནས་བསླང་བས་དངོས་པོ་མེད་པའོ། །ཆོས་ཐམས་ཅད་ནི་ཀུན་ནས་སློང་བ་ལ་རག་ལས་པས་ཀུན་ནས་ལྡང་བ་མེད་པའོ། །ཆོས་ཐམས་ཅད་ནི་ཕན་ཚུན་རྡོབ་པ་མེད་པས་འཇུག་པ་མེད་པའོ། །ཆོས་ཐམས་ཅད་ནི་བཏང་སྙོམས་ཡོངས་སུ་རྫོགས་པས་ལྟོས་པ་མེད་པའོ། །
ཆོས་ཐམས་ཅད་ནི་བླང་བ་དང་དོར་བ་མེད་པས་རྗེས་སུ་སྦྱོར་བ་མེད་པ་སྟེ་འདིར་ནི་སྨོན་ལམ་གྱི་ཁྱད་པར་གྱི་ལས་བྱེད་དོ། །ཆོས་འདི་དག་ཐམས་ཅད་ནི་ངོ་བོ་ཉིད་མེད་པ་དང་། ཆོས་ཀྱི་ངོ་བོ་ཉིད་ལས་ཤིན་ཏུ་འདས་པས་བདག་གི་བ་མེད་པའོ། །ཆོས་འདི་དག་ཐམས་ཅད་ནི་སྤྲོས་
པ་མེད་པས་ཁྱད་པར་མེད་ཅིང་མཉམ་པའོ། །ཆོས་འདི་དག་ནི་ཇི་ལྟར་སྨོན་པ་དེ་ལྟར་ཡང་དག་པར་འགྲུབ་ཀྱང་དེ་ལ་སྨོན་པར་བྱེད་པ་གང་ཡང་མེད་པའོ། །ཆོས་འདི་དག་ཐམས་ཅད་ནི་རག་ལས་པ་ལས་གཞོལ་བས་ཅི་ཡང་མ་ཡིན་པའོ།། །དེའི་ཕྱིར་དེ་བཞིན་གཤེགས་པས་
ཆོས་འདི་དག་ཐམས་ཅད་ནི་རྨི་ལམ་དང་སྒྱུ་མའི་རང་བཞིན་ལྟ་བུར་བསྟན་ཏེ་ཆོས་རྣམས་ཀྱི་རང་བཞིན་གང་ཡིན་པ་དེ་ལ་ནི་རབ་དང་འབྲིང་དང་ཐ་མར་དབྱེ་བ་ཆུང་ཟད་ཀྱང་མེད་དོ། །དེ་ལྟ་བས་ན་ངེད་ནི་སྨོན་ལམ་རྣམ་པར་དག་པས་སེམས་ཅན་རྣམས་ལ་ཕན་གདགས་པའི་ཕྱིར་

སྨོན་ལམ་རྒྱ་ཆེན་པོ་དག་ལ་རབ་ཏུ་བཀོད་ནས་ཆོས་གང་ལ་ཡང་མངོན་པར་ཞེན་པ་མེད་པ་ལ་རབ་ཏུ་དགོད་པ་མཛད་དོ། །བཀོད་པ་མཐའ་ཡས་འདི་ནི་ཉི་མའི་རིགས་ཀྱི་འོད་ཟེར་སྣང་བར་བྱེད་པ་དང་། ཆོས་ཀྱི་སྣང་བ་གང་གིས་བྱང་ཆུབ་སེམས་དཔའ་རྣམས་ཀྱི་སྨོན་ལམ་
གྱི་ཁྱད་པར་ཕུན་སུམ་ཚོགས་པ་དག་རྣམ་པར་འཕེལ་ཞིང་མངོན་པར་འཕགས་པར་འགྱུར་བའི་ཆོས་ཀྱི་སྣང་བ་ཡིན་ནོ། །དེ་ལྟ་བས་ན་ཆོས་ཀྱི་ཚུལ་བསྟན་པ་འདི་ལ་མོས་པའི་རིགས་ཀྱི་བུ་དག་ནི་སེམས་ཅན་རྣམས་ལ་ཆོས་ཀྱིས་སྣང་བར་བྱེད་དོ། །བཀོད་པ་མཐའ་ཡས་དེ་ལ་བྱང་ཆུབ་
སེམས་དཔའ་ནང་དུ་ཚུལ་བཞིན་དུ་སེམས་པ་དང་། ཕྱི་རོལ་ཏུ་དྲན་པ་མི་གཡེང་བ་དང་། སྒྲིབ་པ་སྤང་བ་ལ་གནས་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཀུན་ཏུ་སྣང་བ་རྗེས་སུ་དྲན་པ་དང་། ཆོས་ཟབ་མོ་ལ་མོས་པ་དག་གིས་ཆོས་འདི་ལ་ཉེ་བར་བརྟག་པར་བྱའོ། །ཆོས་འདི་
དག་ཐམས་ཅད་ནི་རྐྱེན་གྱི་དོན་ལ་མཁས་པ་སོ་སོར་རྟོག་པར་བྱ་བའི་ཕྱིར་དེ་བཞིན་གཤེགས་པས་བསྟན་པ་སྟེ། རྐྱེན་གྱི་དོན་གྱི་ངོ་བོ་ཉིད་དེ་ཡང་རང་བཞིན་གྱིས་གསོག་གསོབ་ཡ་མ་བརླ་སྙིང་པོ་མེད་པ་སྟེ། བརྫུན་པ་སླུ་བའི་ཆོས་སུ་བསྟན་ཏོ། །རྒྱུ་དང་རྐྱེན་གང་དག་གིས་སེམས་
ཅན་རྣམས་ཀུན་ནས་ཉོན་མོངས་པར་གྱུར་པ་དེ་དག་ཀྱང་གསོག་གསོ་བ་ཡ་མ་བརླ་སྙིང་པོ་མེད་པ་སྟེ། བརྫུན་པ་སླུ་བའི་ཆོས་ཡིན་ནོ། །རྒྱུ་དང་རྐྱེན་གང་དག་གིས་སེམས་ཅན་རྣམས་རྣམ་པར་དག་པར་འགྱུར་བ་དེ་དག་ཀྱང་ཕྱོགས་བཅུའི་འཇིག་རྟེན་གྱི་ཁམས་རྣམས་སུ་བཙལ་ཀྱང་སྣང་བར་མི་
འགྱུར། དམིགས་པར་མི་འགྱུར་ཏེ་ཆོས་འདི་དག་ཐམས་ཅད་ནི་གཟུང་བ་དང་འཛིན་པ་མེད་ཅིང་ཡོད་པ་མ་ཡིན་པའི་ཕྱིར་དམིགས་སུ་མེད་པའོ། །དེ་བཞིན་གཤེགས་པས་གང་ཆོས་རྣམས་ཀྱང་སྤང་བར་བརྟགས་ན་ཆོས་རྣམས་མ་ཡིན་པ་རྣམས་སྤངས་པ་ལྟ་སྨོས་ཀྱང་ཅི་དགོས་ཏེ། གང་སྤང་བ་དེ་
ཡང་བླང་བ་མེད་པ་དང་། ལྷུན་གྱིས་གྲུབ་པ་དང་། རང་བཞིན་གྱིས་རྣམ་པར་དག་པའི་ཕྱིར་ཅུང་ཟད་ཀྱང་ཡོད་པ་མ་ཡིན་ནོ། །ཆོས་ཐམས་ཅད་ནི་རང་བཞིན་ཇི་ལྟ་བ་བཞིན་དུ་རྟོགས་པ་ཡིན་པས་རྣམ་པར་རྟོག་པ་དང་ཡོངས་སུ་རྟོག་པ་མེད་པའོ། །ཆོས་ཐམས་ཅད་ནི་གཞན་མ་ཡིན་པ་

ཉིད་ཀྱི་ཕྱིར་གནས་བསྟན་དུ་མེད་པའོ། །དེ་ལྟ་བས་ན་ཆོས་འདི་དག་ཐམས་ཅད་ནི་གནས་མེད་པ། གནས་པ་མེད་པ། བརྗོད་པས་མིང་དུ་བཏགས་པ་སྟེ་གང་བརྗོད་པས་མིང་དུ་བཏགས་པ་དེ་ནི་ཡ་མ་བརླ་སྟེ། རང་གི་ངོ་བོ་ཉིད་མེད་པར་ཉེ་བར་གནས་པ། ཉེ་བར་གནས་པ་མ་ཡིན་པ།
གནས་པ་མེད་པ་སྟེ། དེ་ལྟར་དེ་དག་ནི་གནས་མེད་པའི་ཕྱིར་མི་གནས་པའོ། །ཟད་པ་དང་། རྣམ་པར་འགྱུར་བ་དང་། འགོག་པ་དག་ནི་དེ་བཞིན་གཤེགས་པས་རྣམ་གྲངས་ཀྱི་ཚིག་གིས་བསྟན་པ་སྟེ། དེ་བཞིན་གཤེགས་པ་རྣམས་ཀྱི་དགོངས་པའི་རྣམ་གྲངས་འདི་ལ་འཇུག་པར་
བྱའོ། །དགེ་བ་འམ་མི་དགེ་བའི་ཆོས་རྣམས་ལ་མངོན་པར་ཞེན་པར་མི་བྱ་སྟེ། མི་དགེ་བའི་ཆོས་རྣམས་ལ་མངོན་པར་ཞེན་པས། མི་དགེ་བའི་ཆོས་རྣམས་ལ་མངོན་པར་ཞེན་པར་འགྱུར་རོ། །མི་དགེ་བའི་ཆོས་རྣམས་ལ་མངོན་པར་ཞེན་པས་སྡུག་བསྔལ་དང་། ཡིད་མི་
བདེ་བའི་ཆོས་རྣམས་མངོན་པར་འབྱུང་བར་འགྱུར་བ་འདི་དག་ནི་སྡུག་བསྔལ་འཕགས་པའི་བདེན་པར་བཏགས་པས་དེ་བཞིན་གཤེགས་པས་མི་དགེ་བའི་ཆོས་ཀྱི་རྣམ་གྲངས་སུ་བསྟན་ཏོ། །དགེ་བ་དང་མི་དགེ་བ་ལ་མངོན་པར་ཞེན་པ་མེད་པ་དང་། སྲེད་པ་འགོག་པ་འདི་དག་ནི་ཀུན་
འབྱུང་བ་སྤང་ཞིང་འཕགས་པའི་བདེན་པ་གཉིས་པོ་རྟོགས་པར་བྱ་བའི་ཕྱིར་དེ་བཞིན་གཤེགས་པས་དགེ་བའི་ཆོས་ཀྱི་རྣམ་གྲངས་སུ་བསྟན་ཏོ། །འགོག་པའི་ཕྱིར་དང་། རློམ་སེམས་མེད་པའི་ཕྱིར་དང་། ཟད་པ་དང་། འདོད་ཆགས་དང་བྲལ་བ་ལ་ཉེ་བར་བརྟག་པ་དང་།
ཉེ་བར་མི་ལེན་པ་དང་། མངོན་པར་དགའ་བ་དང་། འདུ་ཤེས་དང་། ཚོར་བ་མེད་པ་དང་། རློམ་སེམས་དང་བྲལ་བ་འདི་དག་ནི་སྡུག་བསྔལ་འགོག་པ་འཕགས་པའི་བདེན་པ་རྟོགས་པར་བྱ་བའི་ཕྱིར་དེ་བཞིན་གཤེགས་པས་འཕགས་པའི་བདེན་པ་གསུམ་པའི་རྣམ་གྲངས་
སུ་བསྟན་ཏོ། །ཆོས་ཇི་ལྟ་བ་བཞིན་དུ་རྟོགས་པའི་ས་དང་། རློམ་སེམས་དང་། གཡོ་བ་དང་། སྤྲོས་པ་ཐམས་ཅད་ལས་ཡང་དག་པར་འདས་པའི་སའི་ལམ་གང་ཡིན་པ་དེ་དག་ཡོངས་སུ་བཙལ་ཞིང་ཡང་དག་པའི་ལྟ་བ་བསྒོམ་པ་ནས། ཡང་དག་པའི་ཏིང་ངེ་འཛིན་

གྱི་བར་དུ་ཡན་ལག་བརྒྱད་དང་ལྡན་པའི་ལམ་རྣམས་བསྟན་པ་འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་རྟོགས་པར་བྱ་བའི་ཕྱིར་དེ་བཞིན་གཤེགས་པས་འཕགས་པའི་བདེན་པ་བཞི་པའི་རྣམ་གྲངས་སུ་བསྟན་ཏེ་འདི་ནི་
སངས་རྒྱས་བཅོམ་ལྡན་འདས་རྣམས་ཀྱི་སྡུག་བསྔལ་ཡོངས་སུ་ཤེས་པར་བྱ་བ་དང་། ཀུན་འབྱུང་བ་སྤང་བ་དང་། འགོག་པ་མངོན་སུམ་དུ་བྱ་བ་དང་། ལམ་བསྒོམ་པར་བྱ་བ་དག་ལས་སྡུག་བསྔལ་ཀུན་འབྱུང་བ་དང་། སྡུག་བསྔལ་འགོག་པ་དང་། སྡུག་བསྔལ་
འགོག་པར་འགྱུར་བའི་ལམ་གྱི་རྣམ་གྲངས་སུ་བཞག་པ་ཡིན་ཏེ། སྡུག་བསྔལ་འདི་ནི་ཡང་དག་པར་ཡོད་པ་མ་ཡིན་པ་ལས་བཏགས་པར་ཟད་དོ། །མ་རིག་པ་ལ་སོགས་པ་ཤེས་པའི་གཞི་རྣམས་ནི་འདི་གཉིས་ཏེ། དེ་ཅིའི་ཕྱིར་ཞེ་ན། ཤེས་པ་མེད་པ་ལ་ནི་གཞི་ཅུང་ཟད་ཀྱང་མེད་
པས་དེ་ནི་མངོན་པར་རྟོགས་པ་མེད་པ། སྣང་བ་མེད་པ། ཤེས་པ་མེད་པ། ཁོངས་སུ་གཏོགས་པ་མེད་པས་ན་དེ་ལ་གང་གི་གཞིར་འགྱུར་ཏེ། མེད་པ། གསོག །བརྫུན་པ་སླུ་བའི་ཆོས་ཡིན་ནོ། །དེ་ལ་གཞི་དེ་ཡང་ཡོད་པ་མ་ཡིན་པ་ལས་བཏགས་པ་སྟེ། འདི་ལ་
ཐེར་ཟུག་ཏུ་མངོན་པར་ཞེན་པ་དང་། ཆད་པར་མངོན་པར་ཞེན་པའི་གཞི་མེད་པས་ན་རློམ་སེམས་སུ་མངོན་པར་ཞེན་པ་མེད་པར་སྡུག་བསྔལ་གྱི་གཞི་ལ་བརྟག་པར་བྱའོ། །དེ་ལྟར་གཞི་མེད་པ་ལ་མངོན་དུ་ཤེས་པ་ཡང་མེད་པར་ཡོངས་སུ་ཤེས་པར་བྱའོ། །མ་རིག་པའི་སྦྱོར་བ་ལས་
བྱུང་བས་སྡུག་བསྔལ་ནི་མི་ཤེས་པའི་རང་བཞིན་ཅན་ཏེ་མ་རིག་པ་ནི་གང་དང་ཡང་མཚུངས་པར་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་པས་དེ་ནི་ཡོད་པ་མ་ཡིན་ཏེ། དེའི་ཕྱིར་དེ་ནི་མཚུངས་པར་ལྡན་པ་མ་ཡིན་ནོ། །དེ་ལྟ་བས་ན་མ་རིག་པ་ལ་ནི་བྱེད་པ་པོ་གདགས་སུ་མེད་ཅིང་
བྱེད་པ་པོ་མི་དམིགས་པས་མི་རྟོག་རྣམ་པར་མི་རྟོག །མི་བྱེད་རྣམ་པར་མི་བྱེད་དོ། །བཀོད་པ་མཐའ་ཡས་འདི་ནི་བྱང་ཆུབ་སེམས་དཔའ་རྣམས་ཀྱི་རིག་པ་དང་རྗེས་སུ་འཐུན་པ། མ་རིག་པའི་རང་གི་ངོ་བོ་ཡོངས་སུ་ཤེས་པའི་སྒོ་སྟེ། གང་གིས་མ་རིག་པའི་མུན་པ་བསལ་ཅིང་རིག་པ་དང་

རྗེས་སུ་འཐུན་པའི་ཆོས་ཀྱི་སྒོ་མངོན་དུ་གྱུར་ནས་བྱང་ཆུབ་སེམས་དཔའ་རྣམས་ཀྱི་འཕགས་པའི་བདེན་པ་ལ་མཁས་པ་རྟོགས་པར་བྱ་བའི་ཕྱིར་སྒོ་འདི་དག་ཡོངས་སུ་སྦྱོང་ཞིང་མངོན་པར་སྒྲུབ་པ་དང་། སྡུག་བསྔལ་ལ་ལྷག་པར་དམིགས་པ་ན་ཀུན་འབྱུང་བ་ནུབ་པ་དང་། ཟད་པ་དང་། འགག་པར་
འགྱུར་ཏེ་དེ་ལྟར་མཉམ་པ་ཉིད་ཀྱི་ལམ་སྒྲུབ་ཅིང་སྒོམ་པ་དང་། དེ་ལྟར་སྤྱོད་པས་དེ་ལྟར་མཉམ་པ་ཉིད་ཀྱི་ལམ་གྱི་རྣམ་གྲངས་ཀྱིས་ཆོས་དེ་དག་ཐམས་ཅད་མངོན་དུ་ཤེས་ཤིང་ཡོངས་སུ་ཤེས་སོ། །མངོན་དུ་ཤེས་པས་སྤང་བར་བྱའོ། །མངོན་དུ་ཤེས་པས་མངོན་སུམ་དུ་བྱའོ། །མངོན་དུ་
ཤེས་པས་བསྒོམ་པར་བྱ་སྟེ། དེའི་ཕྱིར་གང་མངོན་དུ་ཤེས་པ་དེ་ནི་ཡོངས་སུ་ཤེས་པའོ། །གང་ཡོངས་སུ་ཤེས་པ་དེ་ནི་སྤང་བའོ། །གང་སྤང་བ་དེ་ནི་མངོན་སུམ་དུ་བྱ་བའོ། །གང་མངོན་སུམ་དུ་བྱ་བ་དེ་ནི་བསྒོམ་པར་བསྟན་ཏེ། དེ་ལྟར་འཕགས་པའི་ཆོས་ཤེས་ནས་རྣམ་པར་རྟོག་
པ་མེད་པའི་ཚུལ་གྱིས་བརྩོན་འགྲུས་དང་མ་བྲལ་བར་བདེན་པ་མངོན་པར་བསྒྲུབ་བོ་ཞེས་བླང་བ་མེད་པ་དང་དོར་བ་མེད་པར་གནས་པར་འགྱུར་རོ། །བཀོད་པ་མཐའ་ཡས་འཕགས་པ་རྣམས་ཀྱིས་ནི་ཆོས་ཐམས་ཅད་བརྟགས་པ། རྣམ་པར་བསྒྲུབས་པ། གཅེས་པའོ་ཞེས་བྱ་བར་ཤེས་པས་
རློམ་སེམས་སུ་མི་བྱེད། སྤྲོས་པར་མི་བྱེད་པར་ཡང་དག་པ་ཇི་ལྟ་བ་བཞིན་དུ་མཐོང་བ་སྲུང་ཞིང་ཞེན་པར་མི་བྱེད། རྣམ་པར་མི་བྱེད་དོ། །དེ་ལྟ་བས་ན་ལམ་དང་། སྤང་བར་བྱ་བ་དང་། དགེ་བའི་ཆོས་རྣམས་ལ་ཡང་རློམ་སེམས་སུ་མི་བྱེད། སྤྲོས་པར་མི་བྱེད་ན་མི་དགེ་བའི་
ཆོས་རྣམས་ལྟ་ཅི་སྨོས། དེ་དག་སྤང་བའི་ཕྱིར་ཡང་མི་གནས་ན་རྣམ་པར་མི་རྟོག་པའི་ཚུལ་གྱིས་ཆོས་མ་ཡིན་པ་དག་སྤང་བའི་ཕྱིར་ལྟ་སྨོས་ཀྱང་ཅི་དགོས། ཀུན་ཏུ་སྦྱོར་བ་སྤང་བའི་མཁས་པ་དག་ནི་ཆོས་རྣམས་དང་ཀུན་ཏུ་སྦྱོར་བར་ཡང་མི་བྱེད། ཆོས་མ་ཡིན་པ་རྣམས་དང་ཀུན་ཏུ་
སྦྱོར་བར་ཡང་མི་བྱེད་དེ་དེས་ཆོས་ཐམས་ཅད། བརྫུན་པ། སླུ་བ། ཡ་མ་རླ། གསོག་གསོབ་ལྟ་བུར་ཤེས་པས་ན་འདི་ནི་དེའི་བདེན་པ་མངོན་པར་སྒྲུབ་པ་ཡིན་ནོ། །གང་གི་ཕྱིར་དེ་ནི་བཏང་སྙོམས་ཡོངས་སུ་རྫོགས་པ་དང་། ཀུན་ཏུ་སྦྱོར་བ་སྤངས་པ་དང་། ལམ་ལ་གནས་

པ་དང་། འགྲོ་བ་རྣམས་ཀྱི་དུས་ལས་འདས་པར་བྱ་བའི་ཕྱིར་རྗེས་སུ་ཆགས་པ་མེད་ཅིང་ཁོང་ཁྲོ་བ་མེད་པས་ཆོས་ཉིད་ཀྱི་རང་གི་ངོ་བོ་བླང་བ་མེད་པ་དང་དོར་བ་མེད་པར་རྟོགས་སོ། །བཀོད་པ་མཐའ་ཡས་གང་ཡང་ཆོས་རྣམས་ཀྱི་ངོ་བོ་ཉིད་ནི་རང་བཞིན་གྱིས་སྟོང་པའི་
ངོ་བོ་ཉིད་ཡིན་པའི་ཕྱིར་ཆོས་ཐམས་ཅད་ནི་ངོ་བོ་ཉིད་ཀྱིས་དབེན་པས་ན་ཆོས་རྣམས་ལ་བྱེད་པ་པོ་ནི་འགའ་ཡང་དམིགས་སུ་མེད་དོ། །ཆོས་ཐམས་ཅད་ནི་ཀུན་ཏུ་སྦྱོར་བ་མེད་པ་དང་ལྡན་པས་ན་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་ཏེ། དེ་དག་གིས་དངོས་པོ་མེད་པ་ལ་ཡང་མངོན་
པར་ཞེན་པར་མི་བྱ། དངོས་པོ་དང་དངོས་པོ་མེད་པ་རྣམ་པར་སྤང་བ་ཡང་རློམ་སེམས་སུ་མི་བྱ། སྤྲོས་པར་མི་བྱའོ། །རྐྱེན་རྣམས་རྣམ་པར་དག་པར་ཡོངས་སུ་ཤེས་པ་དེས་ཆོས་གང་དག་རྐྱེན་གྱིས་སྐྱེད་དེ་བྱུང་བའི་རྐྱེན་དེ་དག་ནི་གཅིག་གིས་གཅིག་སྟོང་པ་དང་། སེམས་ཅན་
གྱི་ངོ་བོ་ཉིད་མེད་པའི་ཕྱིར་ཤིན་ཏུ་དག་པ་དང་། ཤིན་ཏུ་དབེན་པས་ན་རྐྱེན་རྣམས་ཀྱང་རྒྱུ་དང་ལྡན་པ་མ་ཡིན། རྒྱུ་ཡང་རྐྱེན་རྣམས་དང་ལྡན་པ་མ་ཡིན་ཏེ། ཆོས་ཐམས་ཅད་ནི་ཕན་ཚུན་གཡོ་བ་མེད་ཅིང་སྤྱོད་པ་མེད་པས་འཇུག་པ་མེད་པའི་ཆོས་རྣམས་ལ་སེམས་པར་བྱེད་དེ། བཀོད་
པ་མཐའ་ཡས་གཞི་མེད་པའི་ཆོས་ཀྱི་སྒོ་འདི་ལ་འཇུག་པར་བྱའོ། །སྒོ་རྣམ་པར་དག་ཅིང་ཆོས་སྣང་བའི་གཞིར་གྱུར་པ་ནི་ཉམས་པར་མི་འགྱུར་ཞིང་། སྐྱེ་བར་འགྱུར་ལ་རྗེས་སུ་བཟུང་བ་ཉིད་ཀྱང་རྣམ་པར་དག་པར་འགྱུར་རོ། །སྤྲོས་པ་དང་བྲལ་བའི་སྣང་བ་ཡང་བྱེད་པར་འགྱུར་རོ། །སྣང་
བས་སྙེམས་པ་མེད་ཅིང་འཇུག་པར་ཡང་འགྱུར་རོ། །གཞུང་ལས་ཡང་དག་པར་འདས་ཏེ། ཆགས་པ་མེད་པས་ངེས་པར་འབྱུང་བར་ཡང་འགྱུར་རོ། །བཀོད་པ་མཐའ་ཡས་ཆོས་ཐམས་ཅད་ནི་མིང་དང་མཚན་མའི་ཐ་སྙད་ཀྱིས་བརྗོད་པ་སྟེ། དེ་ལ་མཚན་མ་གང་ཡིན་པ་
དེ་ནི་འབྱུང་བ་ཆེན་པོ་བཞི་ལ་གཟུགས་སུ་བཏགས་པའོ། །མིང་གང་ཡིན་པ་དེ་ནི་ཕུང་པོ་བཞི་ལ་གཟུགས་མེད་པར་བཏགས་པ་སྟེ་དེ་ལ་མིང་ནི་ཡང་དག་པ་མ་ཡིན་པར་ཡོངས་སུ་བཏགས་པའོ། །མཚན་མ་ཡང་དག་པ་ཇི་ལྟ་བ་མ་ཡིན་པའི་ཕྱིན་ཅི་ལོག་གིས་བདག་ནི་གཟུགས་

ཡིན་ནོ། །གཟུགས་ནི་བདག་གི་ཡིན་ནོ་ཞེས་འཛིན་ཅིང་མཚན་མའི་རྣམ་པར་རྟོག་པས་མིང་དུ་བཏགས་པའོ། །དེ་ལ་གང་ཡང་མིང་དང་གཟུགས་ཞེས་བྱ་བ་གཉིས་ཀ་ཡང་ཡང་དག་པ་ཇི་ལྟ་བ་མ་ཡིན་པས། གསོག་དང་བརྫུན་པ་སླུ་བའི་ཆོས་ཏེ་སྒྱུ་མར་གྱུར་པ་དང་། རྨི་ལམ་
གྱི་གཟུགས་ལྟ་བུའོ། །རྨི་ལམ་གྱི་གཟུགས་ཀྱི་ལུས་ཇི་ལྟ་བ་དེ་བཞིན་དུ་གཟུགས་རྣམས་བསྟན་ཏེ། སྙིང་པོ་མེད་པའི་གཟུགས་རྣམས་དང་། མིང་གི་ཕུང་པོ་བཞི་པོ་གཉིས་ཀ་ཡང་ཐ་སྙད་ཙམ་དུ་རྗེས་སུ་རྟོགས་པར་བྱའོ། །དེ་ལྟར་རྗེས་སུ་རྟོགས་ན། སྡུག་བསྔལ་གྱིས་གནོད་
པ་མེད་ཅིང་བདེན་པ་ལ་ལྷག་པར་དམིགས་པ་ཡང་མེད་པས་དེའི་སེམས་ལ་ཅི་ཡང་མེད་ཅིང་མི་དམིགས་ཏེ། དེ་ཆུང་ངུ་ན་མྱ་ངན་ལས་འདའ་བ་དང་ལྡན་པ་ཡང་མེད་དེ། དེ་ནི་འདི་ལྟར་འདུ་ཤེས་ལས་ཡང་དག་པར་འདས་པས་ན། ཚོར་བ་འགགས་པར་འགྱུར་རོ། །བཀོད་པ་མཐའ་ཡས་ཁམས་
གསུམ་པ་རྣམས་ནི་འདུ་ཤེས་ཀྱི་ཡིད་ལ་བྱེད་པ་ལས་བྱུང་ལ། འདུ་ཤེས་ཀྱི་ཡིད་ལ་བྱེད་པ་ནི་ཡོད་པ་མ་ཡིན་པས་དེའི་ཕྱིར་ཁམས་གསུམ་པ་རྣམས་ཀྱང་ཡོད་པ་མ་ཡིན་པར་བསྟན་ཏོ། །གང་ཡང་ཀུན་ཏུ་ཤེས་པར་བྱེད་པ་དེ་ནི་གཟུགས་ལ་མངོན་པར་ཞེན་པའོ། །གང་ཡིད་ལ་བྱེད་པ་དེ་ནི་ཚོར་བ་
དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དག་དང་ལྡན་པར་བསྟན་ཏེ། ཆོས་རྣམས་ཀྱི་རང་བཞིན་ནི་མཚུངས་པར་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་པས་འདུ་ཤེས་ཀྱི་ཡིད་ལ་བྱེད་པ་དེ་ནི་ཡོད་པ་མ་ཡིན་ནོ། །འདུ་ཤེས་ཀྱི་ཡིད་ལ་བྱེད་པ་དེ་ཡང་རང་བཞིན་
གྱིས་ཡོད་པ་མ་ཡིན་པས་དེའི་ཕྱིར་ཡོད་པ་མ་ཡིན་པ་ལས་ཚིག་གིས་བཏགས་པ་ནི་རང་བཞིན་གྱིས་ཉེ་བར་ཞི་བའི་རྣམ་གྲངས་སུ་བསྟན་ཏོ། །བཀོད་པ་མཐའ་ཡས་ཆོས་རྣམས་ཀྱི་རང་བཞིན་ལས་ཆོས་བཤད་པའི་རྣམ་གྲངས་དག་འབྱུང་སྟེ། བཤད་པ་དང་པ་དང་བརྗོད་པ་མཉམ་པ་ཉིད་ཀྱིས་
བདེན་པ་བསྒྲུབ་པ་འདི་བྱང་ཆུབ་སེམས་དཔའ་རྣམས་ཀྱིས་རྗེས་སུ་རྟོགས་པར་བྱའོ། །བཀོད་པ་མཐའ་ཡས་ཀུན་ཏུ་སྦྱོར་བ་ཐམས་ཅད་སྤང་བའི་ཕྱིར་དེ་བཞིན་གཤེགས་པ་རྣམས་ཀྱི་ཆོས་བཤད་པ་འབྱུང་བ་ནི་འབྲས་བུ་མེད་པ་མ་ཡིན་ཏེ། དེ་ལ་ཁྱོད་ཀྱིས་རླབས་པོ་ཆེའི་སེམས་བསྐྱེད་

ནས་ཆོས་ཐམས་ཅད་ལ་མངོན་པར་ཞེན་པ་མེད་པ་དང་། རློམ་སེམས་མེད་པ་དང་། སྤྲོས་པ་མེད་པ་དང་། སེམས་ཅན་མེད་པས་ཆོས་རྣམས་ལ་འཇུག་ཅིང་སེམས་ཅན་རྣམས་ལ་བྱམས་པ་ཆེན་པོ་དང་། སྙིང་རྗེ་ཆེན་པོ་བསྐྱེད་ནས་ཆོས་ཀྱི་སྒོ་འདི་དག་ལ་འཇུག་པར་བྱ།
ཡང་དག་པར་འགྲོ་བར་བྱ། ངེས་པར་བརྟག་པར་བྱའོ། །ཆོས་ཀྱི་སྒོ་རྣམས་ཀྱང་གང་ཞེ་ན། མི་ཤེས་པ་ལས་འདུས་བྱས་ཀྱི་ཆོས་ཐམས་ཅད་འབྱུང་བར་རྟོགས་པ་དང་། ཡེ་ཤེས་མཐོང་བ་ལས་འདུས་མ་བྱས་པའི་ཆོས་ཐམས་ཅད་འབྱུང་བར་རྟོགས་ནས་སྤྲོས་པ་མེད་པའི་ཡེ་ཤེས་ཀྱིས་
འདུས་བྱས་དང་། འདུས་མ་བྱས་པའི་ཆོས་རྣམས་ལ་ཡང་ཡང་དག་པར་འཇུག་པར་བྱ་ཞིང་ཡོངས་སུ་སྦྱང་བར་བྱ་བ་དང་། བགྲང་བ་མེད་པའི་ཆོས་ཀྱི་རྗེས་སུ་འཇུག་པས་གྲངས་རྣམས་ཀྱང་གྲངས་དང་ལྡན་པ་མེད་ཅིང་། གྲངས་རྣམས་ཀྱང་གྲངས་ལ་གནས་པ་མེད་པ་སྟེ། འདུས་མ་
བྱས་པའི་སྒོ་ནི་ཆོས་ཀྱི་སྒོ་ཡིན་པས་ཆོས་ཀྱི་སྒོ་ནི་ཡོངས་སུ་དག་ཅིང་། ཆོས་སྣང་བའི་རྣམ་པ་ཀུན་འཛིན་པར་བྱེད་པ་སྟེ། རྗེས་སུ་གཟུང་བ་དང་། ཀུན་བཟུང་བའི་ཆོས་རྣམས་ཀྱང་ཆུད་ཟ་བར་མི་འགྱུར་བར་ཐབས་ལ་མཁས་པ་མངོན་པར་བསྒྲུབས་པའི་བློས་བརྗོད་ཅིང་སྟོན་པར་བྱེད་དོ། །
བཀོད་པ་མཐའ་ཡས་འདི་ནི་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་སྒོར་འཇུག་པ་དང་། གང་དག་གིས་བློའི་རབ་ཏུ་དབྱེ་བ་རྒྱ་ཆེར་མངོན་པར་འཕགས་པར་འགྱུར་བ་དང་། ཡེ་ཤེས་ཀྱི་ངེས་པའི་ཚིག་གི་དོན་ཐམས་ཅད་བསྟན་པའོ། །བཀོད་པ་མཐའ་ཡས་དེ་ལ་གང་གིས་
བྱང་ཆུབ་སེམས་དཔའ་ཆོས་རྣམས་ཀུན་འཛིན་པ་ལ་མཁས་པར་འགྱུར་བའི་གཟུངས་ཀྱི་སྒོའི་ཆོས་རིམ་པར་ཕྱེ་བ་གང་ཞེ་ན། བཀོད་པ་མཐའ་ཡས་འདི་ལ་བྱང་ཆུབ་སེམས་དཔའ་ཡོངས་སུ་དག་པའི་ཡེ་ཤེས་ལ་མཁས་པ་ལ་གནས་པ་དང་། སྤོབས་པའི་ཡེ་ཤེས་ལ་གནས་
ནས་དོན་གྱི་རྗེས་སུ་སོང་བའི་བློས་ཆོས་རྣམས་ཀྱི་རང་བཞིན་གྱི་ངོ་བོ་ཉིད་ལ་རྣམ་པར་ལྟ་ཞིང་ཆོས་འདི་དག་ཐམས་ཅད་ནི་ངོ་བོ་ཉིད་ཀྱིས་རྣམ་པར་གནས་པ་མེད་པ། མིང་མེད་པ། མཚན་མ་མེད་པ། མཉམ་པ་མེད་པ། འཐུན་པ་མེད་པ། གཟུགས་མེད་པ་མ་ཡིན་པ་སྟེ་

དེ་དག་ནི་བརྗོད་དུ་མེད་པ་ལས་ཡང་དག་པར་བགྲོ་བ་བཀྲི་བའི་ཚིག་གིས་བསྟན་ཏེ། ཆོས་རྣམས་ཀྱི་རང་བཞིན་གང་ཡིན་པ་དེ་ནི་བསྟན་དུ་མེད་པ། འོང་བ་མེད་པ། འགྲོ་བ་མེད་པ། ཡི་གེ་མེད་པ། ཡི་གེ་རྣམ་པར་དག་པ་སྟེ་ལྷུན་གྱིས་གྲུབ་པའོ། །དེ་ཅིའི་ཕྱིར་ཞེ་ན། ཆོས་རྣམས་
ཀྱི་རང་བཞིན་ནི་ནམ་མཁའ་དང་མཚུངས་ཤིང་འདྲ་བའི་ཕྱིར་ཏེ། དེའི་ཕྱིར་ཆོས་དེ་དག་ཐམས་ཅད་ནི་བརྫུན་པ། མངོན་པར་མ་གྲུབ་པ་སྟེ་ནམ་མཁའ་ལྟར་ཡོངས་སུ་བརྟག་ཅིང་བརྗོད་པ་རྣམ་པ་མེད་ཅིང་རྣམ་པར་དག་པའོ། །ཆོས་འདི་དག་ཐམས་ཅད་ནི་སྒོ་མེད་པའི་སྒོ་ཡིན་པས་ཆོས་འདི་
དག་ཐམས་ཅད་ཀྱི་སྒོ་ནི་རྣམ་པར་དག་པ་སྟེ། ཤིན་ཏུ་ཉོན་མོངས་པ་མེད་ཅིང་ཉེ་བར་ཉོན་མ་མོངས་པའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་བཞིན་ནི་ཤིན་ཏུ་སྐྱེ་བ་མེད་ཅིང་མངོན་པར་གྲུབ་པ་མེད་དེ། ཆོས་རྣམས་ཀྱི་ངོ་བོ་ཉིད་གང་ཡིན་པ་དེ་ལ་ནི་སྐྱེ་བའམ་མངོན་པར་
གྲུབ་པ་མེད་པའི་ཕྱིར་རོ། །དེའི་ཕྱིར་ཆོས་དེ་དག་ཐམས་ཅད་ནི་དངོས་པོ་མེད་པའི་ངོ་བོ་ཉིད་དུ་བསྟན་ཅིང་བཤད་དེ། ཆོས་རྣམས་ཀྱི་རང་བཞིན་ནི་དངོས་པོ་མེད་པའི་ངོ་བོ་ཉིད་ཡིན་ནོ། །དེ་ལྟར་འདི་དག་ལ་མངོན་པར་ཞེན་པ་མེད་ན་བྱང་ཆུབ་སེམས་དཔའ་རྣམས་ཀྱི་མངོན་པར་ཞེན་པ་
མེད་པའི་ཆོས་ཀྱི་སྒོ་དང་། གཟུངས་ཀྱི་སྒོ་དང་། ཆོས་རིམ་པར་ཕྱེ་བའི་སྒོ་རྣམས་རྣམ་པར་དག་པར་འགྱུར་རོ། །ཆོས་ཐམས་ཅད་ཀྱི་རྣམ་པ་ཞེས་བྱ་བ་ནི་ཐ་སྙད་ཀྱིས་འདི་ལྟར་རྣམ་པའོ་ཞེས་བརྗོད་པ་སྟེ། རྣམ་པ་གང་ཡིན་པ་དེ་ནི་རྣམ་པ་མེད་པས་ན། རྣམ་པ་ནི་བྱེད་པ་མེད་པ།
རྣམ་པར་བྱེད་པ་མེད་པ། རྗེས་སུ་ཆགས་པ་མེད་པ། ཁོང་ཁྲོ་བ་མེད་པའོ། །དེའི་ཕྱིར་རྣམ་པར་དག་པའི་སྒོ་ནི་སྒོ་མེད་པར་བསྟན་པ་སྟེ། སྒོ་རྣམ་པར་དག་པ་དེ་ནི་རྣམ་པ་མེད་པར་འཇུག་པའི་སྒོ་ཡོངས་སུ་དག་པ་ཡིན་པས་ན་དེ་ལྟར་རྣམ་པ་ཞེས་བྱ་བ་ནི་ཡང་དག་པར་ཡོད་པ་མ་
ཡིན་པའི་དོན་དུ་བསྟན་ཏོ། །དེ་ལྟར་ནམ་རིག་པ་རྗེས་སུ་རྟོགས་པར་བྱ་བའི་དོན་དང་། མངོན་པར་འདུ་བྱེད་པ་མེད་པ་དང་། རྣམ་པ་མེད་པ་ལ་འཇུག་པའི་ཚུལ་དུ་བསྟན་པ་ཡིན་ཏེ། བཀོད་པ་མཐའ་ཡས་སྒོ་འདི་ནི་གཟུངས་རྣམ་པར་དག་པར་འགྱུར་བའོ། །བཀོད་པ་མཐའ་ཡས་

སྒོ་སྒོ་ཞེས་བྱ་བ་ནི་ཆོས་ཐམས་ཅད་ནམ་མཁའི་སྒོ་ལྟ་བུར་རྟོགས་ཤིང་ནམ་མཁའི་སྒོ་ལྟར་སྣང་བ་མེད་པར་གྱུར་པའོ། །དེ་ལ་གང་སྐྱེ་བ་དང་། གང་འཇིག་པ་དེ་དག་མཉམ་པ་ཉིད་དུ་རྗེས་སུ་རྟོགས་པས་ན་རྟོགས་པ་ཡང་མེད། ནུབ་པ་ཡང་མེད། ཀུན་བཟུང་བ་ཡང་མེད་
པར་ཆོས་དེ་དག་ཐམས་ཅད་ཀུན་གཟུང་བར་བྱའོ། །གཟུང་བ་མེད་པ་དང་། སྤང་བ་མེད་པ་དང་། མཉམ་པ་མེད་པ་དང་། མི་མཉམ་པ་མེད་པ་དང་། རྡུལ་ཕྲ་མོ་ཙམ་གྱི་ཆོས་ཀྱང་དམིགས་སུ་མེད་པའི་རྣམ་པའི་སྒོར་འཇུག་པ་འདི་ནི་རྣམ་པ་མེད་པ་རྣམ་པར་དག་པ་ཡིན་ནོ། །བཀོད་
པ་མཐའ་ཡས་རྣམ་པ་མེད་པ་རྣམ་པ་མེད་པ་ཞེས་བྱ་བ་ནི་གང་ལ་ལུས་མེད་པ་དང་། ལུས་སུ་བཏགས་པ་མེད་པ་སྟེ། རྣམ་པ་མེད་པ་ནི་གང་ལ་མིང་གི་ཚོགས་མེད་པ་དང་། ཚིག་གི་ཚོགས་ཀྱིས་བཏགས་པ་མེད་པའོ། །རྣམ་པ་མེད་པ་ནི་ནམ་མཁའ་ལྟར་རྣམ་པར་བསྒོམ་པ་སྟེ་དེ་ལྟར་དོན་གྱི་
ཚུལ་རྗེས་སུ་རྟོགས་པར་བྱའོ། །ནམ་མཁའ་ནམ་མཁའ་ཞེས་བྱ་བ་ནི་ནམ་མཁའ་མེད་པས་ན་ནམ་མཁའ་ཞེས་ཚིག་གི་ཚོགས་ཀྱིས་བཏགས་པའོ། །འདི་ནི་གང་གིས་བྱང་ཆུབ་སེམས་དཔའ་གཟུངས་ཀྱི་ཚུལ་ལ་མཁས་པ་རྟོགས་པར་འགྱུར་བ་སྟེ། མ་རིག་པ་དང་རྗེས་སུ་འཐུན་པ།
རིག་པའི་ཡེ་ཤེས་ཀྱི་སྟོབས་བསྐྱེད་པའི་སྒོའི་ཆོས་རིམ་པར་ཕྱེ་བ་ཡིན་ཏེ། རྗེས་སུ་གཟུང་བ་དང་། རྩོད་པ་མེད་པ་དང་། རྨོངས་པ་མེད་པར་བྱ་བའི་ཕྱིར་ཀླུའི་རྒྱལ་པོ་མ་དྲོས་པས་ཆར་གྱི་རྒྱུན་ཆེན་པོ་དང་། ཆུ་ཆེན་པོ་གཏོང་བ་བཞིན་དུ་རྒྱུན་ཆད་པ་མེད་པའི་གཟུངས་ཀྱི་གསང་ཚིག་
གི་དགོངས་པ་ལ་འཇུག་པར་བྱའོ། །བཀོད་པ་མཐའ་ཡས་གཟུངས་གཟུངས་ཞེས་བྱ་བའི་གསང་ཚིག་འདི་དག་ཇི་ལྟ་བུར་བསྟན་པ་ཡིན། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བཀོད་པ་མཐའ་ཡས་ཀྱིས་འདི་སྐད་ཅེས་གསོལ་ཏོ། །
བཅོམ་ལྡན་འདས་གཟུངས་ཞེས་བགྱི་བ་ནི། ཆོས་རྣམས་དང་མཚམས་སྦྱོར་བ་ལ་མཁས་པའི་ཚིག་བླ་དགས་ལགས་སོ། །བཅོམ་ལྡན་འདས་གཟུངས་ཞེས་བགྱི་བ་ནི་རྗེས་སུ་དྲན་པའི་ལས་ཀུན་འཛིན་པར་བགྱི་པ་ལགས་སོ། །ཤེས་རབ་ཀྱི་གཏེར་གྱི་སྟོབས་ཀྱིས་ཀུན་

འཛིན་པའི་གསང་ཚིག་གི་གཞི་འདི་དག་བསྟན་པ་དེའི་སླད་དུ་གཟུངས་ཞེས་བགྱི་བའི་གྲངས་སུ་མཆིའོ། །ཡེ་ཤེས་ལ་མཁས་པ་ལ་འཇུག་པའི་བློས་དེ་ལྟར་བྱང་ཆུབ་ཀྱི་སྟོབས་མཐའ་ཡས་པ་དག་ཀུན་ཏུ་གཟུང་བར་བགྱི་སྟེ། བཅོམ་ལྡན་འདས་བདག་ནི་ཇི་ལྟར་སེམས་ཅན་ཐམས་ཅད་ལ་
ཕན་གདགས་པའི་སླད་དུ་ཡེ་ཤེས་མཐའ་ཡས་པ་སྟོན་པ་ལ་མཁས་པའི་སྟོབས་རྒྱུན་མི་འཆད་པ་དང་། ཆོས་ཀྱི་རྒྱུན་རྣམ་པར་འབྱེད་པར་བགྱིད་པ་ལགས་སོ། །བཅོམ་ལྡན་འདས་གཟུངས་ཀྱི་སྒོ་འདི་ནི་ནམ་མཁའ་ལྟར་ཡངས་ཤིང་མཉམ་པ་མ་མཆིས་པའི་སྒོ་ཆེན་པོ་ལགས་ཏེ། དེའི་
སླད་དུ་དེ་ནི་ཚད་མ་མཆིས་པ་དང་མཐའ་མ་མཆིས་པར་ཚིག་གིས་བརྗོད་དོ། །བརྗོད་པ་མཉམ་པ་ཉིད་དང་། རྗེས་སུ་གཟུང་བ་དང་། རྗེས་སུ་བསྟན་པ་ཞེས་བགྱི་བ་ནི་སྟོན་མཁས་པ་དང་། མཉམ་པ་མ་མཆིས་པ་ཞེས་བགྱི་བའི་གྲངས་སུ་མཆིའོ། །ཡི་གེའི་རྣམ་པར་དབྱེ་བ་ཡོངས་
སུ་རྫོགས་པས་ངེས་པའི་ཚིག་སོ་སོ་ཡང་དག་པར་རིག་པ་ཡོངས་སུ་རྫོགས་པར་འགྱུར་རོ། །དོན་ལ་ཉེ་བར་རྟོག་ཅིང་སྟོན་པ་ལ་མཁས་པས་དོན་སོ་སོ་ཡང་དག་པར་རིག་པ་ཡོངས་སུ་རྫོགས་པར་འགྱུར་རོ། །ཆོས་རྣམས་ཀྱི་རྣམ་པར་ངེས་པ་རབ་ཏུ་སྟོན་པ་ལ་མཁས་པས་ཆོས་སོ་སོ་
ཡང་དག་པར་རིག་པ་ཡོངས་སུ་རྫོགས་པར་འགྱུར་རོ། །ཆོས་རྣམས་ཀྱི་སྒོ་ལ་སྤོབས་པ་ཡོངས་སུ་དག་པས་སྤོབས་པ་སོ་སོ་ཡང་དག་པར་རིག་པ་ཡོངས་སུ་རྫོགས་པར་འགྱུར་རོ། །སེམས་ཅན་རྣམས་ལ་ཕན་གདགས་པའི་སླད་དུ་བྱམས་པ་ཆེན་པོ་དང་། སྙིང་
རྗེ་ཆེན་པོ་ཡོངས་སུ་བཟུང་སྟེ། རྗེས་སུ་བཟུང་ནས་ཀྱང་གཞན་ཤེས་ལ་གཞན་སྟོན་པར་མི་བགྱིད་པར་སྤྲོས་པ་མ་མཆིས་པའི་བཏང་སྙོམས་སྟོན་པར་བགྱིད་དོ། །བཅོམ་ལྡན་འདས་དོན་མཐའ་ཡས་པ་ལ་མཁས་པ་དང་། གཟུངས་ཀྱི་སྒོའི་ཚུལ་ལ་མཁས་པའི་ཆོས་རིམ་པར་ཕྱེ་བ་
འདི་དག་ནི་དེ་བཞིན་གཤེགས་པའི་ཞལ་གྱི་སྒོ་ནས་ཕྱུང་བའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བཀོད་པ་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བཀོད་པ་མཐའ་ཡས་སྒོ་སྒོ་ཞེས་བྱ་བ་འདི་ནི་དེ་བཞིན་གཤེགས་པའི་ཐམས་

ཅད་མཁྱེན་པའི་ཡེ་ཤེས་ཀྱི་ཚིག་བླ་དགས་ཡིན་ནོ། །བཀོད་པ་མཐའ་ཡས་གང་ལས་ཆོས་འདི་དག་སྟོན་ཅིང་རྗོད་པར་འགྱུར་བ་དེ་ནི་དེ་བཞིན་གཤེགས་པའི་རང་བྱུང་གི་ཡེ་ཤེས་གཟིགས་པའི་སྒོ་ཤིན་ཏུ་རྣམ་པར་དག་པ། སྒོ་མཐའ་ཡས་པ་རྣམ་པར་དག་པ་ལ་
གནས་པ། གནས་པ་མེད་པ། མི་གནས་པའི་ཚུལ་གྱིས་ཆོས་མང་པོ་འཛིན་པར་སྣང་བ་ཡིན་ནོ། །བཀོད་པ་མཐའ་ཡས་ངས་ཆོས་ཐམས་ཅད་སངས་རྒྱས་ཀྱི་ཆོས་ཡིན་ནོ་ཞེས་བཤད་པ་ནི་གང་ཆོས་ཐམས་ཅད་རྗེས་སུ་རྟོགས་པ་དེ་སངས་རྒྱས་ཀྱི་ཆོས་ཞེས་བྱ་སྟེ། སངས་
རྒྱས་ཀྱི་ཡེ་ཤེས་ཀྱིས་ཆོས་ཐམས་ཅད་ཀྱི་རང་བཞིན་མཉམ་པར་ཐུགས་སུ་ཆུད་པ་དེའི་ཕྱིར་ཆོས་འདི་དག་ནི་སངས་རྒྱས་ཀྱི་ཆོས་ཡིན་ནོ། །ཆོས་སོ་ཅོག་རྗེས་སུ་རྟོགས་པར་བྱ་བའི་ཕྱིར་ཆོས་ཐམས་ཅད་ཁོང་དུ་ཆུད་པ་ཞེས་བསྟན་པ་ཡང་ཆོས་རྣམས་རྗེས་སུ་རྟོགས་པ་གང་ཡིན་
པ་འདི་ནི་གཟུངས་ཀྱི་སྒོ་རྗེས་སུ་རྟོགས་པ་ཡིན་ཏེ། ཆོས་ཐམས་ཅད་ཀྱི་ཁོངས་སུ་གཏོགས་པའི་ཕྱིར་རོ། །བཀོད་པ་མཐའ་ཡས་གཟུངས་འདི་ལྟ་བུ་ནི་བཤད་པ་དང་། བསྔགས་པ་དང་། བརྗོད་པ་དང་། རབ་ཏུ་བརྗོད་པ་དང་། དཔེར་བསྟན་པ་ཐམས་ཅད་ཀྱི་ཁོངས་
སུ་གཏོགས་པ་ཡིན། ནང་དུ་འདུས་པ་དང་། གཙོ་བོར་གྱུར་པ་དང་། སྙིང་པོར་གྱུར་པ་ཡིན་ཏེ། བསྔགས་པ་དང་། བཤད་པ་དང་། དཔེར་བསྟན་པ་ཐམས་ཅད་ནི་ཡི་གེའི་རྣམ་པར་རིག་པས་རྗོད་པར་བྱེད། སྟོན་པར་བྱེད། རབ་ཏུ་གསལ་བར་བྱེད་དོ། །
བཀོད་པ་མཐའ་ཡས་དེ་ལ་ཡི་གེའི་རྣམ་པར་རིག་པ་ནི་ཨ་ཞེས་བྱ་བ་སྔོན་དུ་འགྲོ་བ་ཡིན་ལ། ཡི་གེ་བསྟན་པ་ནི་ཧ་ཞེས་བྱ་བས་མཐར་གཏུགས་པ་ཡིན་ནོ། །བཀོད་པ་མཐའ་ཡས་དཔེར་ན་མངལ་དུ་བུ་འཆགས་ཤིང་འཛིན་པའི་སྔོན་དུ་འགྲོ་བ་ནི་མ་ཡིན་ལ། ས་བོན་ཉེ་བར་
འཇོག་པའི་སྔོན་དུ་འགྲོ་བ་ནི་ཕ་ཡིན། ཕུང་པོའི་ན་ཚོད་འགྱུར་བའི་སྔོན་དུ་འགྲོ་བ་ནི་སྐྱེ་བ་ཡིན། དེའི་འོག་ཏུ་ནི་ཡན་ལག་མཐའ་དག་གི་དབྱིབས་རྣམ་པར་ཕྱེ་བ་དང་། སྐྱེ་མཆེད་རྣམ་པར་ཕྱེ་བ་དང་། དབང་པོ་རྣམ་པར་ཕྱེ་བ་དང་། དབང་པོ་ཡོངས་སུ་སྨིན་པའི་དབྱིབས་

རྣམ་པར་ཕྱེ་བ་ཕུན་སུམ་ཚོགས་པ་ཐམས་ཅད་མངོན་པར་འགྲུབ་པ་ལྟར་རྣམ་པར་དབྱེ་བ་དང་ལྡན་པ་ཐམས་ཅད་ཀྱི་སྔོན་དུ་ཡི་གེའི་ཕྱི་མོ་འགྲོ་བ་ཡང་དེ་དང་འདྲའོ། །དེ་ལ་ཡི་གེའི་ཕྱི་མོ་ཨ་ཞེས་བྱ་བ་གསལ་བ་ཉེ་བར་གནས་པ་ནི་སྔོན་དུ་འགྲོ་བ་ཡིན། ཧ་ཞེས་བྱ་བ་ནི་མཐར་
ཐུག་པ་ཡིན་ལ་ཡི་གེ་གཞན་དག་ནི་དེའི་ཁོངས་སུ་གཏོགས་ཤིང་རྗེས་སུ་འབྲང་བ་དང་། རྗེས་སུ་འབྲེལ་བ་ཡིན་ཏེ། འདི་ནི་གཟུངས་ཀྱི་སྒོར་འཇུག་པ་བསྟན་ཅིང་བརྗོད་པ་ཡིན་ནོ། །འདུས་བྱས་སུ་གཏོགས་པ་ཐམས་ཅད་ཀྱི་འཇིག་པ་གང་ཡིན་པ་དེ་ཡང་ཉེ་བར་བརྟག་
པར་བྱ་སྟེ། །དཔེར་ན་ཡི་གེ་ཁ་ཞེས་བྱ་བ་དང་། ཡང་ཞེས་བྱ་བ་དེ་དག་ཉེ་བར་སྦྱར་ནས་ཡིག་འབྲུ་བསླབ་པའི་མཐར་ཕྱིན་ནས་དོར་བ་ལྟར་སྲིད་པའི་ཡན་ལག་ཏུ་ཉེ་བར་གནས་པའི་འདུ་བྱེད་དུ་གཏོགས་པ་ཐམས་ཅད་འཇིག་པའི་སྒོ་ནས་ཟད་པ་ཉིད་དུ་སྟོན་པ་ཡང་དེ་དང་འདྲའོ། །དཔེར་ན་
ལྡན་པ་ནི་འགོག་པ་དང་། རྣམ་པར་སྟེན་པ་ལྟར་སྲིད་པའི་ཀུན་ཏུ་སྦྱོར་བ་དང་མཚུངས་པར་ལྡན་ཞིང་སྲིད་པར་གཏོགས་པ་དང་ལྡན་པ་གཉིས་ཉེ་བར་གནས་པ་ཐམས་ཅད་ཀྱང་དེ་དང་འདྲའོ། །དེ་ལ་དངོས་པོ་དང་དངོས་པོ་མེད་པའི་ལྡན་པ་གཉིས་ཉེ་བར་གནས་པའི་ཆོས་ཐམས་ཅད་ཀུན་ཏུ་
བརྟགས་ནས་མཐར་གྱིས་མངོན་པར་འདུ་བྱེད་པ་མེད་པའི་སྒོ་ཡོངས་སུ་སྦྱང་བར་བྱ་སྟེ། འདི་ནི་སྐྱེ་བ་དང་། འཇིག་པ་སྟོན་པའི་ཆོས་ཀྱི་སྒོར་འཇུག་ཅིང་གཟུངས་ཀྱི་སྒོར་རིམ་པར་ཕྱེ་བ་སྟོན་པ། བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་ཡོངས་སུ་རྫོགས་པར་འགྱུར་བ་ཡིན་ནོ། །
འདི་ལྟར་ཡི་གེའི་ཕྱི་མོ་རྣམས་ལས་ཡི་གེ་དང་པོ་སྨོས་ནས་རིམ་གྱིས་ཌྷ་ཞེས་བྱ་བ་དང་། ཧ་ཞེས་བྱ་བའི་མཐར་ཐུག་པ་ཆུབ་པར་སྨོས་ཏེ་བཤད་པ་དང་། སྒྲས་ཡང་དག་པར་བསྟན་པའི་སྒོ་ནས་གསང་སྔགས་ཀྱི་དགོངས་པ་ལ་འཇུག་པར་བྱ་ཞིང་ཐོགས་པ་མེད་པར་ཆོས་དང་འཐུན་པར་འཇུག་
པའི་ཡང་དག་པར་འགྲོ་བ་ཡང་བསམ་པར་བྱའོ། །བཀོད་པ་མཐའ་ཡས་དེ་ལ་དཔེར་ན་ཡི་གེའི་ཕྱི་མོ་རྣམས་རྣམ་པར་བརྟགས་ན་ཡི་གེ་ཨ་ཞེས་བྱ་བ་དང་པོར་སྨོས་ལ། དེ་ལས་གཞན་པའི་ཡི་གེ་རྣམས་ཀྱང་རྣམ་པར་བརྟགས་ཏེ་ཡིད་ལ་བྱེད་པ་དང་རྗེས་སུ་འཐུན་པའི་རིམ་པར་ཌྷ་ཞེས་བྱ་བ་དང་།

ཧ་ཞེས་བྱ་བའི་མཐར་ཐུག་པའི་བར་དུ་སྨོས་ཤིང་འདྲིས་པར་བྱེད་ན་དེ་ལས་ལྷག་པར་གདགས་པའི་ཡི་གེ་ཅི་ཡང་མེད་པ་ལྟར། འདུ་བྱེད་དུ་གཏོགས་པ་ཐམས་ཅད་ལ་གཉིས་སུ་མེད་པའི་ཡིད་ལ་བྱེད་པ་མངོན་པར་འགྲུབ་པ་ཡང་དེ་དང་འདྲའོ། །བཀོད་པ་མཐའ་ཡས་གང་
གཉིས་སུ་རྣམ་པར་རྟོག་པ་དང་བྲལ་བ་དེ་ལ་ནི་ཡང་དག་པར་ན་ཡི་གེར་གདགས་པ་ཅུང་ཟད་ཀྱང་མེད་ཅིང་རང་བཞིན་གྱི་ངོ་བོ་ཉིད་དུ་རྣམ་པར་རྟོག་པ་ཡང་ཅུང་ཟད་ཀྱང་མེད་དོ། །གང་ལ་རྣམ་པར་རྟོག་པ་མེད་པ་དེ་ལ་ནི་འདུ་བྱེད་དུ་གདགས་པ་ཅུང་ཟད་ཀྱང་མེད་དོ། །བཀོད་པ་མཐའ་ཡས་ཆོས་ཐམས་ཅད་
ཤེས་པ་གང་ཡིན་པ་དེ་ལ་ཡི་གེའི་རྣམ་པར་རིག་པ་ཉེ་བར་གནས་པ་དེ་ནི་ཡི་གེ་མངོན་པར་མ་གྲུབ་པའི་ཕྱིར་རྣམ་པ་མེད་པ་ཡིན་ནོ། །དེ་ཅིའི་ཕྱིར་ཞེ་ན། ཨ་ཞེས་བྱ་བ་ཡང་དག་པས་ཀུན་ནས་བསླང་བ་ནི་ཅི་ཡང་མེད་དེ། དེ་ལྟར་འདུས་བྱས་སུ་གཏོགས་པ་ཐམས་ཅད་རྣམ་པ་མེད་པར་འཇུག་པར་བལྟ་
བར་བྱ་ཞིང་། མངོན་པར་འདུ་བྱེད་པ་མེད་པར་བྱ་བའི་ཕྱིར་ཕུང་པོ་ཐམས་ཅད་སྤང་བར་ཡང་བྱའོ། །བཀོད་པ་མཐའ་ཡས་འདི་ནི་གཟུངས་རྣམ་པར་དག་པ་ལ་མཁས་པའི་སྒོ་ཡིན། ཀུན་ནས་འཛིན་པའི་སྒོ་ཡིན། ཆོས་རིམ་པར་ཕྱེ་བའི་སྒོ་ཡིན་ཏེ། དེ་ལ་བསླབ་ན་བྱང་ཆུབ་སེམས་དཔའ་
རྣམས་ཀུན་ནས་རྨོངས་པ་མེད་པའི་བྱ་བ་ལ་མངོན་པར་འཕགས་པར་ཡང་འགྱུར། སེམས་ཅན་རྣམས་ཆོས་ཀྱིས་ཕོངས་པ་མེད་པར་བྱེད་པར་ཡང་འགྱུར་ཞིང་དེ་དག་འདུ་ཤེས་སུ་གྱུར་བའི་སེམས་ཉེ་བར་བླངས་ནས་གནས་པར་ཡང་མི་འགྱུར། འདུ་ཤེས་ཡིད་ལ་བྱེད་པ་རྣམ་པར་སྤངས་ནས་
སེམས་ཅན་རྣམས་ལ་སྙིང་བརྩེ་བའི་ཕྱིར་སྐྱེ་བར་ཡང་འགྱུར། ཆོས་བླ་ན་མེད་པ་ཤེས་པ་རྣམ་པར་གཏན་ལ་དབབ་པ་ལ་མཁས་པར་བྱ་བའི་ཕྱིར་བློས་ཆོས་ཀྱི་སྣང་བ་ཀུན་ཏུ་གཏོང་བར་ཡང་འགྱུར། དེ་བཞིན་གཤེགས་པའི་ཆོས་ཀྱི་མཛོད་རྗེས་སུ་དྲན་པར་ཡང་འགྱུར། ཆོས་རྗེས་སུ་
རྟོགས་པར་བྱ་བའི་ཕྱིར་བློས་རྟོགས་པའི་ཚུལ་མཐའ་ཡས་པ་ལ་མཁས་པ་ཁོང་དུ་ཆུད་པར་ཡང་འགྱུར་རོ། །བཀོད་པ་མཐའ་ཡས་དེ་ལ་བྱང་ཆུབ་སེམས་དཔའ་རྣམས་ཀྱིས་འཛིན་པ་མེད་པར་བྱ་བའི་ཕྱིར་ཆོས་ཐམས་ཅད་མིང་ཙམ་དུ་ཤེས་པར་བྱས་ནས། སྒྲ་དང་ཡང་དག་པར་འགྲོ་བ་

དང་། བརྗོད་པ་སྣ་ཚོགས་ཀྱང་ཁོང་དུ་ཆུད་པར་བྱ་སྟེ་གཟུངས་ཀྱི་ཚུལ་ལ་མཁས་པའི་རྗེས་སུ་འཇུག་པར་བྱའོ། །ཇི་ལྟར་གཟུངས་ཀྱི་ཚུལ་ལ་མཁས་པའི་རྗེས་སུ་འཇུག་པར་བྱ་ཞེ་ན། གང་ཡུལ་ན་མི་གནས་ཤིང་ཕྱོགས་ན་མི་གནས་ལ། ཆོས་གང་གི་ཁོངས་སུ་ཡང་མ་གཏོགས།
ནང་དུ་ཡང་མ་འདུས་ཤིང་བརྗོད་པ་དང་ཡང་དག་པར་བརྗོད་པ་མཉམ་པར་གནས་པ་འདི་ནི་མིང་དུ་བཏགས་པ་ཙམ་དུ་ཟད་པར་རྗེས་སུ་རྟོགས་ནས་ཆོས་རྣམས་ཀྱི་ཡང་དག་པའི་ཚིག་ཇི་ལྟ་བ་བཞིན་དུ་ཁོང་དུ་ཆུད་པར་བྱའོ། །བཀོད་པ་མཐའ་ཡས་དེ་བཞིན་གཤེགས་པ་རྣམས་ཀྱི་ཆོས་ནི་
ཐམས་ཅད་ཀྱང་རྣམ་པ་མེད་པ་བརྗོད་པ་མེད་པ་ཡིན་ནོ། །འདི་ནི་སྟོབས་དང་། མི་འཇིགས་པའི་ས་ཡིན་ཏེ། ཆོས་གང་ཅི་ཡང་རུང་བ་དེ་ཐམས་ཅད་སྒོ་འདི་ནས་བསྟན་པར་བྱའོ། །དེ་བཞིན་གཤེགས་པས་ནི་ཆོས་རྣམས་རྣམ་པ་དུ་མ་ཉིད་དུ་བསྟན་མོད་ཀྱི། ཆོས་རྣམས་ལ་ནི་
གཅིག་པ་ཉིད་དམ་ཐ་དད་པ་ཉིད་ཡོད་པ་མ་ཡིན་གྱི་ཆོས་འདི་དག་ཐམས་ཅད་ནི་མ་སྐྱེས་པ་དང་མེད་པ་ཡིན་ནོ། །འདི་ལྟར་ཆོས་ཐམས་ཅད་ནི་སྟོང་པ་ཉིད་དུ་བསྟན་ཏེ། གང་དག་སྟོང་པ་ཡིན་པ་དེ་དག་ནི་མཚན་མ་དང་བྲལ་བ་ཡིན་ནོ། །གང་དག་མཚན་མ་དང་བྲལ་བ་དེ་དག་ནི་སྨོན་
པ་མེད་པ་དང་། རབ་ཏུ་ཤེས་པ་མེད་པ་ཡིན་ནོ། །ཆོས་གང་དག་སྟོང་པ་དང་། མཚན་མ་དང་བྲལ་བ་དང་། སྨོན་ལམ་གྱིས་དབང་མ་བསྒྱུར་བ་དང་། ཤེས་པ་མེད་པ་དང་། བྱེ་བྲག་ཏུ་ཤེས་པ་མེད་པ་དེ་དག་ནི་ཡོད་ཅེས་བྱ་བའམ། མེད་ཅེས་བྱ་བར་བརྗོད་པར་བྱ་བ་ཡང་མ་ཡིན་
ལ་མེད་དོ་ཞེས་ཐ་སྙད་གདགས་པར་བྱ་བ་ཡང་མ་ཡིན། དེ་ལ་མེད་དོ་སྙམ་དུ་མངོན་པར་ཞེན་པར་བྱ་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ཆོས་ཐམས་ཅད་དོན་དམ་པར་མངོན་པར་ཞེན་པ་མེད་པར་གསུངས་ཏེ། འདི་ལྟར་མངོན་པར་ཞེན་པ་གང་
ཡིན་པ་དང་། གང་གིས་མངོན་པར་ཞེན་པ་དང་། ཇི་ལྟར་གང་དུ་མངོན་པར་ཞེན་པ་དེ་དག་ཐམས་ཅད་ནི་གསོག་གསོབ་སླུ་བའི་ཆོས་ཅན། གཡོ་བ་རློམ་པ་སྟེ་སྤྲོས་པ་ཡིན་ནོ། །བཀོད་པ་མཐའ་ཡས་ཆོས་འདི་དག་སྟོན་པ་ལ་ལྟོས། གང་ཞིག་གིས་ཅི་ཡང་མ་བསྟན་ཏམ་ཡོངས་

སུ་དག་པར་བསྟན་ཀྱང་རུང་། འོན་ཀྱང་དེ་ལ་སྟོན་པ་པོ་ཡིན་པར་བརྗོད་དགོས་ཏེ། བཀོད་པ་མཐའ་ཡས་འདི་ལྟ་བུ་ནི་དེ་བཞིན་གཤེགས་པའི་ཆོས་སྟོན་པ་འབྱུང་བ་ཡིན་ནོ། །བཀོད་པ་མཐའ་ཡས་འདི་ན་ཚུལ་འདི་ཀུན་ཤེས་པ་ཡང་དཀོན་ཏེ། ད་ལྟར་ཁྱོད་ལ་
སོགས་པ་ངའི་མངོན་སུམ་དུ་གྱུར་ཅིང་ཀུན་ཤེས་པར་བྱེད་པའི་སྒྲུབ་པ་ལ་གནས་པ་རྣམས་ཆོས་འདི་ལ་མོས་པ་མང་བར་ཟད་དོ། །བཀོད་པ་མཐའ་ཡས་མ་འོངས་པའི་དུས་ཕྱི་མའི་ཚེ་ན་སེམས་ཅན་ཆོས་འདི་ལྟ་བུ་དག་ཀུན་ཤེས་པར་འགྱུར་བ་ནི་ཉུང་སྟེ། གང་དག་ད་ལྟར་འདི་ན་ངའི་མངོན་
སུམ་དུ་གྱུར་ཅིང་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བར་བྱ་བའི་ཕྱིར་བདག་ཅག་གིས་ཕྱི་མའི་དུས་ན་དེ་བཞིན་གཤེགས་པའི་ཆོས་ཀྱི་ཚུལ་གཟུང་བར་བྱའོ་ཞེས་གོ་བགོས་པ་དེ་དག་ནི་མ་གཏོགས་སོ། །བཀོད་པ་མཐའ་ཡས་བྱང་ཆུབ་སེམས་དཔའ་གང་དག་སྔོན་གྱི་
རྒྱལ་བ་ལ་ལྷག་པར་བྱ་བ་བྱས་ཤིང་ཟབ་མོ་ལ་མོས་པ་ཆོས་ཟབ་མོའི་ཚུལ་ལ་མཁས་པ་མཉན་པ་དོན་དུ་གཉེར་ཞིང་མོས་པ་དེ་དག་ནི་ཆོས་འདི་འཛིན་པ་རྙེད་པར་འགྱུར་རོ། །བཀོད་པ་མཐའ་ཡས་དེ་བཞིན་གཤེགས་པ་ནི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། སངས་རྒྱས་མང་
པོ་ལ་བསྙེན་བཀུར་བྱས་པ། ཟབ་མོའི་ཚུལ་གྱིས་གཞི་བླངས་པ། དད་པ་ཅན། དགེ་བ་ཚོལ་བ། མོས་པ་མང་བ། རྒྱ་ཆེན་པོ་ལ་ཡང་དག་པར་གནས་པ། ཐེག་པ་ཆེན་པོ་དོན་དུ་གཉེར་བ་ལ་བརྩོན་པ། ཉན་ཐོས་ཀྱི་ཐེག་པ་དང་། ཁམས་གསུམ་པ་ཐམས་ཅད་
དོན་དུ་མི་གཉེར་བ། ཆོས་ཟབ་མོ་སྤྱོད་པ་རྣམས་ལ་སྔོན་མ་ཐོས་པའི་ཆོས་ཀྱི་ཚུལ་ཟབ་མོ་ཡངས་པ། ཚད་མེད་པ། བལྟ་དཀའ་བ། རྟོགས་པར་དཀའ་བ། བྱིས་པ་ཐོས་པ་ལ་སོགས་པ་དང་མི་ལྡན་པ། མངོན་པར་ཞེན་པ་རྣམས་ཀྱིས་གཏིང་དཔག་དཀའ་བ་འདི་
སེམས་ཅན་ཐམས་ཅད་ལ་ཕན་པར་བྱ་བ་དང་། བདེ་བར་བྱ་བའི་ཕྱིར་ཡང་དང་ཡང་དུ་སྟོན་པར་མཛད་ཀྱི། འདི་དོན་དུ་མི་གཉེར་བ་རྣམས་ཀྱིས་ནི་མ་ཡིན་ནོ། །བཀོད་པ་མཐའ་ཡས་དེ་བཞིན་གཤེགས་པ་ནི་ཁྱོད་ལ་སོགས་པ་ལྷར་བཅས་པའི་འཇིག་རྟེན་ཆོ་ག་དང་།

སྤྱོད་ཡུལ་ཕུན་སུམ་ཚོགས་པ། ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ། འཇིགས་པ་ཐམས་ཅད་ལས་ཡོངས་སུ་གྲོལ་བར་འདོད་ཅིང་སྙོམ་ལས་མེད་པ་རྣམས་ལ་ཆོས་སྟོན་པར་མཛད་དེ། དེའི་ཆེད་དུ་དེ་བཞིན་གཤེགས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་
པ་ན་ཆོས་ཟབ་མོ་འདི་ལ་བསྐལ་པ་བྱེ་བ་ཕྲག་དུ་མར་བསླབས་ནས་ངེས་པར་བྱུང་བ་ཡིན་ནོ། །བཀོད་པ་མཐའ་ཡས་དེ་བཞིན་གཤེགས་པ་ནི་ཅི་ནས་ཀྱང་སེམས་ཅན་ཐམས་ཅད་ཀྱིས་ཆོས་ཀྱི་འཁོར་ལོ་བླ་ན་མེད་པ་ཡང་དག་པར་སྐོར་བར་འགྱུར་བ་དང་། སེམས་ཅན་ཐམས་ཅད་ཀྱིས་ཡེ་
ཤེས་ཆེན་པོ་བླ་ན་མེད་པ་མཐོང་བར་འགྱུར་བ་དང་། ཐམས་ཅད་མཁྱེན་པའི་ཡེ་ཤེས་ཀྱི་རིགས་རྒྱུན་མི་གཅད་པར་བྱ་བའི་ཕྱིར་ཆོས་ཀྱི་ཚུལ་འདི་སྟོན་པར་མཛད། བྱིན་གྱིས་རློབ་པར་མཛད་ཅིང་ཅི་ནས་ཀྱང་སེམས་ཅན་རྣམས་སངས་རྒྱས་ཀྱི་ཆོས་ཀྱིས་ངེས་པར་འབྱུང་བར་འགྱུར་བ་དང་།
གཟུངས་ཀྱི་ཚིག་གི་ཆོས་འདི་རྒྱས་པར་བྱ་བ་དང་། ཆོས་ཀྱི་ཚུལ་འདི་ལ་རྗེས་སུ་ཡི་རང་བར་འགྱུར་བ་དེ་ལྟར་སྟོན་པར་མཛད་རྗོད་པར་མཛད་དོ། །བཀོད་པ་མཐའ་ཡས་དེ་ལ་ཁྱོད་ལ་སོགས་པ་དེ་བཞིན་གཤེགས་པའི་རྗེས་སུ་སློབ་པའི་ཚུལ་ཅན་དག་གིས་སེམས་ཅན་དད་པ་ཅན་རྣམས་ལ་
ཆོས་བསྟན་པ་དང་། ཆོས་རབ་ཏུ་གསལ་བར་བྱ་བའི་ཕྱིར་ཇི་ལྟ་ཇི་ལྟར་བྱང་ཆུབ་སེམས་དཔའ་རྣམས་ཀྱིས་ཇི་ལྟར་ཐོས་པའི་ཆོས་རྒྱས་པར་འཁོར་རྣམས་ལ་སྟོན་པར་བྱེད། རབ་ཏུ་གསལ་བར་བྱེད་པ་དེ་ལྟ་དེ་ལྟར་ཆོས་ལ་གནས་པ་ཉིད་དུ་སྒྲུབ་པ་དང་། སངས་རྒྱས་ཀྱི་ཡེ་ཤེས་ལ་ཉེ་བར་
འགྱུར་བ་དང་། མྱུར་དུ་གཟུངས་ཐོབ་པ་རྙེད་པར་འགྱུར་ཞིང་གཟུངས་ཐོབ་པ་དེས་ཀྱང་ཚེགས་ཆུང་ངུས་ཆོས་ཀྱི་སྒོ་ཡོངས་སུ་དག་པ། གསལ་བ། དཀར་པོ་རྣམས་ཀུན་ཏུ་འཛིན་པར་འགྱུར་བར་ནན་ཏན་གྱིས་ཤིག །བཀོད་པ་མཐའ་ཡས་ཆོས་ཐམས་ཅད་ནི་རང་བཞིན་གྱིས་ཡོངས་སུ་
དག་པ་སྟེ། ཆོས་རྣམས་ཀྱི་རང་བཞིན་གང་ཡིན་པ་དེ་ནི་ཀུན་ཏུ་སྦྱོར་བ་ཡང་མ་ཡིན། རྣམ་པར་འབྲལ་བ་ཡང་མ་ཡིན་ཏེ། ལྡན་པ་དང་མི་ལྡན་པར་ཉེ་བར་གནས་པ་མ་ཡིན་ནོ། །བཀོད་པ་མཐའ་ཡས་ཆོས་རྣམས་ལ་ཆོས་ཡོད་པ་མ་ཡིན་ནོ། །ཡོད་པ་མ་ཡིན་པ་ནི་གང་དུ་ཡང་ཡང་

དག་པར་གདགས་སུ་མེད་དེ། སེམས་ཅན་རྣམས་ཀྱིས་ཀུན་ཤེས་པར་བྱ་བའི་ཕྱིར་རྒྱུ་ངེས་པར་སྟོན་པ་དང་། རྒྱུ་ཟད་པ་དང་། འདོད་ཆགས་དང་བྲལ་བ་དང་། འགོག་པར་འདོགས་པ་ནི་མ་གཏོགས་སོ། །བཀོད་པ་མཐའ་ཡས་ཆོས་རྣམས་ཀྱི་རང་བཞིན་གྱི་མཚན་
ཉིད་གང་ཡིན་པ་དེ་ལ་ནི་རྒྱུ་ཡང་མེད། རྒྱུ་ཟད་པ་ཡང་མེད། འདོད་ཆགས་དང་བྲལ་བ་ཡང་མེད། འགོག་པ་ཡང་མེད་ན་དེ་བཞིན་གཤེགས་པའི་ཆོས་སྟོན་པ་ཡོངས་སུ་དག་པ་དེ་ལྟ་བུ་འབྱུང་བ་ལ་ལྟོས།། །།བམ་པོ་གཉིས་པ། བཀོད་པ་མཐའ་ཡས་གང་དག་
དེ་བཞིན་གཤེགས་པ་ལ་ཆོས་ཉིད་དུ་རྟོག་ན་ཡང་དེ་དག་གིས་དེ་བཞིན་གཤེགས་པ་མཐོང་བ་རྣམ་པར་དག་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་ཆོས་ཀྱང་མ་ཡིན། ཆོས་མ་ཡིན་པ་ཡང་མ་ཡིན་ནོ། །དེ་བཞིན་གཤེགས་པ་ནི་ཆོས་གང་གིས་ཀྱང་རྣམ་པར་གནས་
པར་མི་འགྱུར་ན་ཆོས་མ་ཡིན་པས་རྣམ་པར་གནས་པར་འགྱུར་བ་ལྟ་སྨོས་ཀྱང་ཅི་དགོས་ཏེ་འདི་ལྟ་བུ་ནི་ཡོད་པ་མ་ཡིན་ནོ། །དེ་བཞིན་གཤེགས་པ་ནི་ཆོས་སུ་གདགས་པ་ལས་ཡང་དག་པར་འདས་པས་དེ་ནི་ཅིར་ཡང་བརྗོད་པར་བྱ་བ་མ་ཡིན་ནོ། །དེ་བཞིན་གཤེགས་པ་ནི་བརྗོད་པ་རྣམ་པར་
དག་པ་སྟེ། དེའི་ཕྱིར་དེ་བཞིན་གཤེགས་པ་ནི་ཟབ་པ། རྒྱ་ཆེ་བ། ཚད་མེད་པ་ཡིན་ནོ། །བཀོད་པ་མཐའ་ཡས་དེ་བཞིན་གཤེགས་པ་ལ་ནི་གཟུགས་ཀྱི་རྣམ་པར་རིག་པ་ཡང་མེད། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རྣམ་པར་རིག་པ་ཡང་
མེད་ན། གང་དག་གིས་ནི་དེ་བཞིན་གཤེགས་པར་འདོགས་པར་འགྱུར་གང་དག་གིས་ནི་དེ་འདོགས་པར་ཤེས། དེ་བཞིན་གཤེགས་པ་ནི་གཟུགས་ཟད་པའི་རྣམ་པར་གྲོལ་བ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཟད་པའི་རྣམ་པར་གྲོལ་
བ་དང་ཡང་དག་པར་ལྡན་པ་ཡིན་ནོ། །དེ་བཞིན་གཤེགས་པ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་མཚུངས་པར་མི་ལྡན་རབ་ཏུ་མི་ལྡན་པ་ཡིན་ནོ། །དེ་བཞིན་གཤེགས་པས་ནི་འདུས་བྱས་དང་། འདུས་མ་

བྱས་སུ་རློམ་པར་མི་མཛད། སྤྲོས་པར་མི་མཛད་དེ། ཉེ་བར་ལེན་པ་གཉིས་དང་མི་ལྡན་པ་ཡིན་ནོ། །དེ་བཞིན་གཤེགས་པ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཉེ་བར་ལེན་པ་དང་མཚུངས་པར་མི་ལྡན། རབ་ཏུ་མི་
ལྡན་པ་ཡིན་ནོ། །དེ་བཞིན་གཤེགས་པ་ནི་རྩ་བ་ཆད་པ་སྟེ། ཆོས་ཐམས་ཅད་ཀྱང་རྩ་བ་དང་བྲལ་བ། སྤྲོས་པ་མེད་པ། གཡོ་བ་མེད་པ། མི་གཡོ་བ། ཆུ་བོ་ལས་རྒལ་བ། བླ་ན་མེད་པ། སངས་རྒྱས་ཀྱི་ཡུལ་ཁོ་ན་ལ་གནས་པ་ཡིན་གྱི་མི་གནས་པའོ་ཞེས་
བརྗོད་པར་ནི་མི་བྱའོ། །དེ་བཞིན་གཤེགས་པ་ནི་ཆོས་གང་ལ་ཡང་ཐུགས་སུ་མི་ཆུད། ལེན་པར་མི་མཛད། ཉེ་བར་རྟོག་པར་མི་མཛད་དོ། །དེ་བཞིན་གཤེགས་པ་ཇི་ལྟར་བར་ཆོས་སྟོན་པ་ཡང་དེ་དང་འདྲ་སྟེ། དེ་བཞིན་གཤེགས་པ་མཚུངས་པར་ལྡན་པ་མི་མངའ་
བ་ནི་འབྲལ་བར་བྱ་བའི་ཕྱིར་ཆོས་སྟོན་པར་མཛད་དོ། །དེ་བཞིན་གཤེགས་པའི་ཆོས་ཉིད་ཇི་ལྟ་བར་ཆོས་ཐམས་ཅད་ཀྱང་དེ་དང་འདྲ་ལ། ཆོས་ཐམས་ཅད་ཀྱི་དེ་བཞིན་ཉིད་ཀྱི་ཚུལ་ཡང་ཡང་དག་པ་ཇི་ལྟ་བ་བཞིན་དུ་ངེས་པར་སྟོན་ཏེ། དེའི་ཕྱིར་དེ་བཞིན་གཤེགས་པ་དང་། ཆོས་ཐམས་
ཅད་ནི་དེ་བཞིན་ཉིད་དུ་འདོགས་པ་ཡིན་ནོ། །དེ་བཞིན་ཉིད་ཇི་ལྟ་བར་ཆོས་ཐམས་ཅད་དང་། དེ་བཞིན་གཤེགས་པའི་ཆོས་ཉིད་དང་། ཆོས་ཐམས་ཅད་ཀྱི་ཆོས་ཉིད་ཀྱང་དེ་དང་འདྲ་སྟེ། དེ་ནི་གཉིས་སུ་མེད། གཉིས་སུ་བྱར་མེད་ལ། གཅིག་པ་ཉིད་ཀྱང་མ་ཡིན། ཐ་དད་པ་
ཉིད་ཀྱང་མ་ཡིན་ནོ། །བཀོད་པ་མཐའ་ཡས་དེ་བཞིན་གཤེགས་པ་ནི་རྣམ་པར་རྟོག་པ་དང་ཀུན་ཏུ་རྟོག་པས་ཉེ་བར་གནས་པ་མ་ཡིན་གྱི། ཆོས་ཐམས་ཅད་ལས་མི་འདའ་བར་བྱ་བའི་ཕྱིར་ཆོས་སྟོན་པར་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་གང་ཡང་དག་པར་འདའ་བར་བྱ་
བའི་ཆོས་དེ་འགའ་ཡང་མ་དམིགས་པའི་ཕྱིར་རོ། །བཀོད་པ་མཐའ་ཡས་གང་གི་ཚེ་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེའི་ཚེ་ཆོས་འགའ་ཡང་མངོན་པར་རྫོགས་པར་ཐུགས་སུ་མ་ཆུད། མ་མཁྱེན། རྣམ་པར་

མ་མཁྱེན་ཏོ། །ཆོས་དང་རྗེས་སུ་འཐུན་པའི་ཆོས་ཐམས་ཅད་ཀྱང་མ་དམིགས་ཏེ། གང་མི་དམིགས་པ་དེ་ལ་རྗེས་སུ་འཐུན་པའི་ཆོས་མི་དམིགས་སོ་སྙམ་དུ་རྣམ་པར་རྟོག་པ་ཡང་མི་མཛད་དོ། །དེའི་ཚེ་དེ་བཞིན་གཤེགས་པ་ལ་ཆོས་ཀྱི་འདུ་ཤེས་སམ། ཆོས་མ་ཡིན་
པའི་འདུ་ཤེས་ཀྱང་མི་འཇུག་ཅིང་ཀུན་ཏུ་མི་སྤྱོད་ལ་འདུ་ཤེས་ཡིད་ལ་བྱེད་པ་ཡང་མི་འབྱུང་ངོ་། །དེའི་ཚེ་དེ་བཞིན་གཤེགས་པ་ཆོས་ཉིད་རང་བཞིན་གྱིས་རྣམ་པར་དག་པ་ལ་གནས་ཤིང་མི་གནས་པ་ཇི་ལྟ་བ་དེ་བཞིན་དུ་ཆོས་ཐམས་ཅད་མཁྱེན་ཅིང་རྣམ་པར་ཕྱེ་མོད་ཀྱི། སུས་ཀྱང་མཁྱེན་པ་ཡང་མེད།
རྣམ་པར་ཕྱེ་བ་ཡང་མེད་དོ། །བཀོད་པ་མཐའ་ཡས། དོན་དམ་པ་སྟོན་པའི་ཚིག་འདི་དག་ནི་དེ་བཞིན་གཤེགས་པའི་ཚིག །མེད་པའི་ཚིག །རྣམ་པར་དག་པའི་ཚིག་ཡིན་ཏེ། །འདི་དག་ཐམས་ཅད་ནི་བྱང་ཆུབ་སེམས་དཔའ་རྣམས་ཚིག་རྣམ་པར་དག་པ་ཤེས་པའི་ཚུལ་ཡིན་ནོ། །གང་གིས་
སྒོ་མཐའ་ཡས་པའི་ཚུལ་དང་། གཟུངས་ཀྱི་སྒོ་རྗེས་སུ་རྟོགས་པ་ནི་ཆོས་ཅུང་ཟད་ཀྱང་རྟོགས་པ་ཡང་མ་ཡིན། མ་རྟོགས་པ་ཡང་མ་ཡིན་ནོ། །བཀོད་པ་མཐའ་ཡས་ཚིག་ཚིག་ཅེས་བྱ་བ་ནི་ཚིག་ཏུ་གྱུར་པ་མེད་དེ། ཚིག་མེད་པ་ལ་འཇུག་པས་ཚིག་ཐམས་ཅད་རྗེས་སུ་རྟོགས་པར་བྱའོ། །
ཚིག་ཐམས་ཅད་ནི་འདོད་ཆགས་དང་བྲལ་བའི་ཚིག་ཡིན་ཏེ། འདི་ལྟར་ཚིག་དེ་ནི་ནོར་བའི་ཚིག་ཡིན་ནོ། །གང་ནོར་བའི་ཚིག་ཡིན་པ་དེ་ནི་འདོད་ཆགས་དང་བྲལ་བའི་ཚིག་ཡིན་ནོ། །ཚིག་དེ་དག་ཐམས་ཅད་ནི་སླུ་བའི་ཚིག་ཡིན་ནོ། །གང་སླུ་བའི་ཚིག་ཡིན་པ་དེ་ནི་དེ་བཞིན་ཉིད་ཀྱི་ཚིག་གོ །
གང་དེ་བཞིན་ཉིད་ཀྱི་ཚིག་གང་ཡིན་པ་དེ་ནི་མཐར་ཐུག་པའི་ཚིག་གོ །གང་མཐར་ཐུག་པའི་ཚིག་ཡིན་པ་དེ་ནི་ཟད་པ་དང་། འདོད་ཆགས་དང་བྲལ་བ་དང་འགོག་པའི་ཚིག་གོ །གང་ཟད་པ་དང་། འདོད་ཆགས་དང་བྲལ་བ་དང་། འགོག་པའི་ཚིག་ཡིན་པ་དེ་ནི་མྱ་ངན་ལས་འདས་
པའི་ཚིག་སྟེ། ཚིག་མེད་པའི་ཚིག །ཀུན་ཏུ་སྦྱོར་བ་མེད་པའི་ཚིག །གདགས་པ་མེད་པའི་ཚིག་ཡིན་ནོ། །བཀོད་པ་མཐའ་ཡས་ཚིག་གཅིག་ཅེས་བྱ་བ་ནི་ཆོས་ཐམས་ཅད་དགེ་བ་དང་། མི་དགེ་བའི་ནང་དུ་ཡང་དག་པར་མི་འདུ་བ་ཡིན་ནོ། །ཚིག་གཅིག་པོ་གང་ཞེ་ན། འདོད་

ཆགས་དང་བྲལ་བའི་ཚིག་སྟེ་འདོད་ཆགས་དང་བྲལ་བ་ལ་ནི་ཚིག་འགའ་ཡང་མེད་དོ། །འདོད་ཆགས་དང་བྲལ་བ་ཇི་ལྟ་བར་ཚིག་ཐམས་ཅད་ཀྱང་དེ་དང་འདྲ་སྟེ་འདི་ལྟར་ཚིག་རྣམ་པར་དག་པའི་ཕྱིར་ཚིག་ཐམས་ཅད་ནི་ཚིག་མེད་པ་ཡིན་ནོ། །ཚིག་རྣམ་པར་དག་པ་གང་ཡིན་པ་དེ་ཡང་མྱ་ངན་ལས་
འདས་པ་རྣམ་པར་དག་པ་ཡིན་ལ། མྱ་ངན་ལས་འདས་པ་རྣམ་པར་དག་པ་གང་ཡིན་པ་དེ་ཡང་ཚིག་རྣམ་པར་དག་པ་ཡིན་ཏེ། འདི་ལྟར་ཚིག་ཐམས་ཅད་ནི་བརྗོད་དུ་མེད་པ་ཡིན་ནོ། །ངག་གང་གིས་ཚིག་རྗོད་པར་བྱེད་པ་དེ་ཡང་ཕྱོགས་བཅུར་མི་དམིགས་ཏེ་གང་གིས་བརྗོད་པ་དང་།
གང་ལ་བརྗོད་པ་དང་། གང་བརྗོད་པ་དང་། ཅིས་བརྗོད་པ་དང་། ཇི་ལྟར་བརྗོད་པ་དེ་དག་ཐམས་ཅད་ཡོད་པ་མ་ཡིན་ནོ། །གང་ཡོད་པ་མ་ཡིན་པ་དེ་ལ་ནི་མེད་པའི་དོན་དུ་རློམ་པར་ཡང་མི་བྱ། སྤྲོས་པར་ཡང་མི་བྱ་སྟེ། ཚིག་ཐམས་ཅད་ནི་རློམ་སེམས་མེད་པའི་ཚིག །སྤྲོས་
པ་མེད་པའི་ཚིག་ཡིན་ནོ། །དེའི་ཕྱིར་རྣལ་འབྱོར་པ་ཚིག་དེ་དག་ཐམས་ཅད་ཡོངས་སུ་ཚོལ་ཞིང་རྣམ་པར་རྟོག་ན་འདོད་ཆགས་དང་བྲལ་བ་དང་། འགོག་པ་དང་མྱ་ངན་ལས་འདས་པར་འགྱུར་ཏེ། མྱ་ངན་ལས་འདས་པ་ནི་ཚིག་དེ་དང་ཐ་དད་པ་མ་ཡིན་ནོ། །ཚིག་དེ་ཉིད་ཀྱང་བརྗོད་དུ་
མེད་པ་ཡིན་ཏེ། འདི་ལྟར་ཚིག་ཀྱང་གཞན། ངག་ཀྱང་གཞན་ལ། ངག་གང་གིས་ཚིག་སྟོན་པའི་ངག་དེ་ནི་དབང་མེད་པ། གསོབ་འདྲིད་པ་སྟེ། སླུ་བའི་ཆོས་ཅན་ཡིན་ནོ། །ཚིག་རྣམ་པར་དག་པ་བསྟན་པ་ལ་མཁས་པར་བྱ་བའི་ཕྱིར་གདགས་པ་མེད་པས་ཚིག་རྣམ་པར་
རིག་པར་བྱེད་དེ། གང་འདོགས་པ་མེད་པ་དེ་ནི་འདོགས་པ་ཡིན་ནོ། །གང་འདོགས་པ་དེ་ནི་ཚིག་ཐ་དད་པ་ཡིན་ནོ། །གང་ཚིག་ཐ་དད་པ་དེ་ནི་རྣམ་པར་མི་རྟོག་པའོ། །གང་རྣམ་པར་མི་རྟོག་པ་དེ་ནི་རྟོག་པ་སྤངས་ཤིང་ཆོས་ཉིད་འདིའི་ནང་དུ་ཡང་དག་པར་འདུ་བ་ཡིན་ནོ། །དེ་
ནི་རྣམ་པར་དཔྱོད་པ་མེད་པར་བྱ་བའི་ཕྱིར་གང་ལ་ཡང་ཐ་སྙད་ཀྱི་སྤྱོད་པ་ཀུན་ཏུ་མི་སྤྱོད་དེ། འདི་ལྟར་དེ་མི་སྤྱོད་རྣམ་པར་མི་སྤྱོད། ཡང་དག་པར་མི་སྤྱོད། ཉེ་བར་མི་སྤྱོད་དོ། །གང་དག་དེ་ལྟར་གནས་པ་དེ་དག་ནི་དེ་བཞིན་གཤེགས་པས་དེ་བཞིན་གཤེགས་པའི་ཐེག་པ་

པའོ་ཞེས་གསུངས་ཏེ། ཆོས་ཅུང་ཟད་ཀྱང་མི་སྤྱོད་པར་བྱང་ཆུབ་སེམས་དཔའི་ས་ལ་ཀུན་ཏུ་སྤྱོད་པ་ཡིན་ནོ། །གང་དག་དེ་ལྟ་བུར་ཞུགས་པ་དེ་དག་ནི་གཟུངས་མཐའ་ཡས་པ་རྣམ་པར་སྦྱོང་བ་ལ་མཁས་པ་ཡིན་ནོ། །བཀོད་པ་མཐའ་ཡས་དེ་ལ་གཟུངས་ཀྱི་སྒོའི་
ཚིག་གང་གིས་བྱང་ཆུབ་སེམས་དཔའ་རྣམས་གཟུངས་སོ་སོར་ཐོབ་ནས་ཆོས་ཀྱི་གཏེར་མཐའ་ཡས་པ་རབ་ཏུ་སྟོན་པར་འགྱུར་བ་དང་། རྒོལ་བ་ཐམས་ཅད་ཚར་བཅད་ནས་རྩོད་པ་མེད་པའི་ས་ལ་གནས་པར་འགྱུར་བ་དང་། ཉེ་བར་ཞི་བའི་ཆོས་རྒྱས་པར་བྱ་བ་ལ་འཇུག་པར་འགྱུར་
བའི་གཟུངས་ཀྱི་སྒོའི་ཚིག་བསྟན་པར་བྱའོ། །གཟུངས་ཀྱི་སྒོའི་ཚིག་དེ་དག་ཀྱང་གང་ཞེ་ན། །སྱཱད་ཡ་ཐེ་དན། ཛ་ཡེ། བི་ཛ་ཡེ། ཨུ་ཀེ། ཨུ་ཀ་བ་ཏི། ཨཱ་ལོ་ཀེ། ཨ་ལོ་ཀ་བ་ཏི། པྲ་བྷེ། པྲ་བྷ་བ་ཏི། ནིར་དར་ཤ་ནེ། ནིར་དར་ཤ་ན་བ་ཏི། ཨརྠེ། ཨརྠ་
བ་ཏི། ཤོ་དྷ་ནི། ཤོ་དྷ་ན་བ་ཏི། པ་རི་ཤོ་དྷ་ནེ། ཀྲི་ཡེ། བི་ཀྲི་ཡ་བ་ཏི། ཨུད་ཏ་ར་ཎི། ས་ར་ཎི། མ་ཧཱ་བི་ཛ་ཡེ། མ་ཧཱ་བི་ཛ་ཡབ་ཏི། ཨ་ནུ་སན་དྷི། ཨ་པྲ་ཏི་སན་དྷི། ཡུ་ག་པ་ཏི་ནད་དྷ། སིད་དྷི། སིད་དྷཱར་ཐ་བ་ཏི། མ་ཏི། མ་ཏེ་པྲ་བྷེ། ཨུད་ཏ་རེ་
ཨུད་ཏ་ར་བ་ཏི། བི་ཙ་རེ། བི་ཙ་ར། ཨ་ནུ་སན་དྷི། ས་རེ། སར་བ་ཏི། སར་ཨ་ནུ་ག་ཏེ། ས་མེ་སམཱ་ར་བྷ་བི་ག་ཏེ། ག་ཏེ། ཨ་ནི་ག་ཏེ། ཨ་པྲ་ཏི་ནི་བར་ཏེ། བི་ཤེ་ཥེ། བི་ཤེ་ཥ་བ་ཏི། ཨ་བ་ཧི་ནི། ནི་བཧི་ནི། པྲ་བ་ཧི་ནི། ཨུ་ཧ་ཨུད་ཏ་ར་ཎེ། མཱ་
ལ་བ་ན་ཡེ། ཨ་ཤེ་ཥྭེ། ཨ་ནུ་པ་ཤེ་ཥེ། ཨ་ནུ་ག་མེ། ཨ་པྲ་ཏི་ག་མེ། ཨ་ག་ཏེ། ཨ་ན་ག་ཏེ། ག་ཏི་བི་ཤོ་དྷ་ནི། པ་རི་ཤོ་དྷ་ནི། ཀཾ་ཀྵ་ཙྪེ་ད་ནི། ཡ་ཏེ་མ་ཏི་བྲ་ཏི་ཏེ། མ་ཏི་པི་ཤོ་དྷ་ནི། ས་མན་ཏ་ཨ་ནུ་ག་ཏེ། ས་མན་ཏ་པ་རི་བཱ་རེ། ས་མན་ཏ་བི་ཤོ་དྷ་ནི། ཨ་
ནུ་པྲ་གྲི་ཧི། ཨ་ནུ་པྲ་གྲི་ཧི་ཏེ། ཧི་ནཱར་ཐེ། ཨརྠ་པིཤུད་དྷི། པ་ར་མེ། ཧེ་ཏུ་ནི་དྭི་སན་ནེ། པྲ་ཏཱི་ཏེ། པྲ་ཏྲཱི་ཏ་བ་ཏི། བི་ནིཤྩ་ཡེ། བི་ནིཤྩ་ཡ་ཨ་ནུ་ག་ཏེ། ཨ་ནན་ཏཱར་ཐེ། ཨ་ནན་ཏ་བི་གྲ་ཧི། མ་ད་བི་ཤུད་དྷི། ཨ་ནུ་གྲ་ཧེ། ཨ་གྲ་ཧ་བི་ཤོ་དྷ་ནི། ཨ་དྷྱད་མ་བི་ག་ཏེ།

བ་ཧ་བ་བི་ཤོ་དྷ་ནི། བི་དྱཱ་ཨ་ནུ་ག་ཏི། བི་དྱཱ་ཨ་ནུ་སན་དྷི། པ་རི་ཤོ་དྷ་ནི། བཀོད་པ་མཐའ་ཡས་གསང་སྔགས་ཀྱི་ཚིག་བསྟན་པ་འདི་དག་ནི་གཟུངས་ཡོངས་སུ་ཤེས་པར་འགྱུར་བ་སྟེ། དེ་དག་གིས་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཆོས་ཀྱི་
གཏེར་མཐའ་ཡས་པ་རྗེས་སུ་དྲན་པར་འགྱུར། སེམས་ཅན་རྣམས་ལ་ཡང་རབ་ཏུ་སྟོན་པར་འགྱུར། མི་སླུ་བའི་ས་ལ་གནས་ཤིང་དོན་དང་ཚིག་གི་ཚུལ་ཐམས་ཅད་ཀྱང་རྗེས་སུ་རྟོག་པར་འགྱུར། སངས་རྒྱས་ཀྱི་ཆོས་རབ་ཏུ་དབྱེ་བ་རྒྱ་ཆེན་པོ་ཚད་མེད་པ་ཡང་རྟོགས་པར་འགྱུར།
ཇི་ལྟར་སྨོན་པ་ཡང་ཡོངས་སུ་རྫོགས་པར་འགྱུར་རོ། །བཀོད་པ་མཐའ་ཡས་དེ་ལ་ཇི་ལྟར་ན་བྱང་ཆུབ་སེམས་དཔའ་རྣམས་གཟུངས་ཀྱི་ཚུལ་ཐབས་མཁས་པ་ལྷག་པར་རྟོགས་པར་འགྱུར་བ་དང་། རྗེས་སུ་རྟོགས་ནས་ཀྱང་ཚུལ་དང་འཐུན་པའི་དགོངས་པ་ལ་མཁས་པའི་ཚུལ་ཀུན་ཤེས་
པར་འགྱུར་བ་གཟུངས་ཀྱི་ཚུལ་རབ་ཏུ་དབྱེ་བ་ཀུན་ཤེས་པ་ལ་མཁས་པ་བསྟན་པར་བྱའོ། །ཇི་ལྟར་ཀུན་ཤེས་པར་འགྱུར་ཞེ་ན། བཀོད་པ་མཐའ་ཡས་མིག་ནི་གཟུགས་ཀུན་ཏུ་འཛིན་པ་ཡིན་ལ། རྣ་བ་ནི་སྒྲ་ཀུན་ཏུ་འཛིན་པ་ཡིན། སྣ་ནི་དྲི་ཀུན་ཏུ་འཛིན་པ་ཡིན། ལྕེ་ནི་རོ་ཀུན་
ཏུ་འཛིན་པ་ཡིན། ལུས་ནི་རེག་བྱ་ཀུན་ཏུ་འཛིན་པ་ཡིན། ཡིད་ནི་ཆོས་ཀུན་ཏུ་འཛིན་པ་ཡིན་ནོ། །བཀོད་པ་མཐའ་ཡས་དེ་ལ་ཇི་ལྟར་ན་ནང་གི་ཆོས་དྲུག་པོ་དག་ཕྱིའི་ཆོས་རྣམས་སུ་འཛིན་པ་ཡིན་ཞེ་ན། བཀོད་པ་མཐའ་ཡས་གང་གི་ཚེ་བྱང་ཆུབ་སེམས་དཔའ་མིག་གིས་
གཟུགས་མཐོང་བ་ན་དེ་ལ་མི་རྟག་པ་ཉིད་དུ་ཀུན་ཏུ་འཛིན་པར་བྱེད། སྐྱེ་བ་དང་འཇིག་པའི་ཆོས་ཅན་དུ་རབ་ཏུ་རྟོགས་པར་བྱེད། དེ་ལ་ཟད་པ་དང་། འདོད་ཆགས་དང་བྲལ་བ་དང་། འགོག་པར་ཀུན་ཏུ་འཛིན་པར་བྱེད་དོ། །དེ་ཤེས་རབ་ཀྱི་སྟོབས་ཆགས་པ་མེད་པ། །དྲན་པ་ལ་མཁས་པ།
རྫབ་རྫུབ་མ་ཡིན་པས་ནང་གི་མིག་གི་ཁམས་ཀུན་ཏུ་འཛིན་པར་བྱེད་དེ། མིག་ལ་བདག་གམ། བདག་མེད་པར་ཉེ་བར་རྟོགས་པར་ནི་མི་བྱེད་དོ། །དེ་མིག་གི་སྐྱེ་མཆེད་རྣམ་པར་དག་པ་ལ་མཁས་པ་ལ་གནས་ཏེ། གཟུགས་ལ་དམིགས་པ་རྗེས་སུ་གཟུང་བའི་ཕྱིར་གཟུངས་ཀྱི་སྒོ་

རྣམ་པར་སྦྱོང་བར་བྱེད་ཅིང་ཕྱི་དང་ནང་གི་ཆོས་དེ་ལས་གཞན་པ་ཀུན་ཏུ་སྦྱོར་བར་འགྱུར་བ་དག་དང་བྲལ་བའི་སྒོ་ནས་ལྡོག་པར་རྗེས་སུ་ལྟ། འདོད་ཆགས་དང་བྲལ་བར་རྗེས་སུ་ལྟ། འགོག་པར་རྗེས་སུ་ལྟ་ཞིང་གནས་ལ་ཅུང་ཟད་ཀྱང་སྤྲོས་པར་མི་བྱེད་དོ། །དེ་སྤྲོས་པ་
མེད་པ་ཀུན་ཏུ་འཛིན་པ་ལ་མཁས་པས་རློམ་སེམས་མི་འབྱུང་བའི་གནས་ལ་གནས་ཤིང་། མིག་གི་རྣམ་པར་ཤེས་པ་དང་། མིག་གི་རྣམ་པར་ཤེས་པས་ཤེས་པར་བྱ་བའི་ཆོས་རྣམས་བཏང་སྙོམས་སུ་འཇོག་ཅིང་རློམ་པར་མི་བྱེད་དོ། །ཇི་ལྟར་མཐོང་བ་རྣམ་པར་དག་པ་བཞིན་ཆོས་
རྣམས་སྒྱུ་མ་དང་འདྲ་བ་ཉིད་དུ་རྗེས་སུ་དྲན་པར་ཡང་བྱེད་དོ། །དེ་རྣམ་པར་ལྟ་བ་ཐུན་མོང་མ་ཡིན་པས་ཤེས་པ་དང་། ཤེས་བྱ་རྣམ་པར་དག་པ་ལ་མཁས་པ་ཀུན་ཏུ་འཛིན་པ་ན་བསོད་ནམས་དང་ཡེ་ཤེས་ཀྱི་ཕུང་པོ་རྒྱ་ཆེན་པོ་ཡོངས་སུ་འཛིན་པར་ཡང་འགྱུར་རོ། །དེ་བཞིན་དུ་རྣ་བ་
དང་། སྣ་དང་། ལྕེ་དང་། ལུས་དང་། ཡིད་ཆོས་འཛིན་པའི་བར་དུ་ཡང་འཐུན་པར་སྦྱར་ཏེ། དེ་ལ་བྱང་ཆུབ་སེམས་དཔའ་ཡིད་ཀྱིས་ཆོས་རྣམ་པར་ཤེས་པ་ན། ཆོས་ལ་མི་རྟག་པར་ཀུན་ཏུ་འཛིན་པར་བྱེད། ཆོས་རྣམས་སྐྱེ་བ་དང་། འཇིག་པའི་ཆོས་ཅན་དུ་ཡང་དག་
པར་རྗེས་སུ་ལྟ་ཞིང་ཟད་པ་དང་། འདོད་ཆགས་དང་བྲལ་བ་དང་། འགོག་པར་ཀུན་ཏུ་འཛིན་པར་ཡང་བྱེད་དོ། །དེ་ཤེས་རབ་ཀྱི་སྟོབས་ཆགས་པ་མེད་པ། དྲན་པ་ལ་མཁས་པ་རྫབ་རྫུབ་མ་ཡིན་པས་ནང་གི་ཡིད་ཀྱི་སྐྱེ་མཆེད་ཀུན་ཏུ་འཛིན་པར་བྱེད་དེ། བདག་གམ་བདག་མེད་
པར་སྤྲོས་པ་ཡང་མི་བྱེད་ལ་སྣ་ཚོགས་སུ་ཀུན་ཏུ་འཛིན་པ་ལ་མཁས་པས་ཡིད་ཀྱི་རྣམ་པར་ཤེས་པའི་ས་ལ་རབ་ཏུ་རྣམ་པར་འབྱེད་པར་བྱེད་དོ། །དེའི་འོག་ཏུ་ཡིད་ཀྱི་སྐྱེ་མཆེད་རྣམ་པར་དག་པ་ལ་མཁས་པ་ལ་གནས་ཏེ། ཆོས་ལ་དམིགས་པ་རྗེས་སུ་གཟུང་བའི་ཕྱིར། གཟུངས་ཀྱི་
སྒོ་རྣམ་པར་སྦྱོང་བར་བྱེད་ཅིང་ཕྱི་དང་ནང་གི་ཆོས་དེ་ལས་གཞན་པ་ཀུན་ཏུ་སྦྱོར་བར་འགྱུར་བ་དག་དང་བྲལ་བའི་སྒོ་ནས་ལྡོག་པར་རྗེས་སུ་ལྟ། འདོད་ཆགས་དང་བྲལ་བར་རྗེས་སུ་ལྟ། འགོག་པར་རྗེས་སུ་ལྟ་ཞིང་གནས་ལ། ཅུང་ཟད་ཀྱང་སྐུར་པ་འདེབས་པའམ་སྤྲོས་པར་

ནི་མི་བྱེད་དོ། །དེ་སྤྲོས་པ་མེད་པ་ཀུན་ཏུ་འཛིན་པ་ལ་མཁས་པས་རློམ་སེམས་མི་འབྱུང་བའི་གནས་ལ་གནས་ཤིང་ཡིད་ཀྱི་རྣམ་པར་ཤེས་པ་དང་། རྣམ་པར་ཤེས་པར་བྱ་བའི་ཆོས་རྣམས་བཏང་སྙོམས་སུ་འཇོག་ཅིང་སྤྲོས་པར་ཡང་མི་བྱེད། རློམ་པར་ཡང་མི་བྱེད་དོ། །ཇི་ལྟར་
མཐོང་བ་རྣམ་པར་དག་པ་བཞིན་ཆོས་རྣམས་མཉམ་པ་ཉིད་དུ་རྗེས་སུ་དྲན་པར་ཡང་བྱེད། རྣམ་པར་ཤེས་པ་དང་། ཤེས་བྱ་རྣམ་པར་སྦྱོང་བ་ལ་མཁས་པ་ཀུན་འཛིན་པར་ཡང་བྱེད་ཅིང་རྣམ་པར་ལྟ་བ་ཐུན་མོང་མ་ཡིན་པས་བསོད་ནམས་དང་ཡེ་ཤེས་ཀྱི་ཕུང་པོ་རྒྱ་ཆེན་པོ་ཡོངས་
སུ་འཛིན་པར་ཡང་འགྱུར་རོ། །དེ་དེ་ལྟར་ཕྱི་དང་ནང་གི་ཆོས་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ལ་ཤེས་རབ་ཀྱི་སྟོབས་དོན་གྱི་རྗེས་སུ་སོང་བའི་བློ་ཐབས་མཁས་པས་ཡོངས་སུ་ཟིན་པས་ཆོས་འགའ་ཡང་རྒྱུ་མེད་པར་ཡང་དག་པར་རྗེས་སུ་མི་ལྟ་ལ།
རྒྱུ་དང་རྐྱེན་ལས་འབྱུང་བར་ཡང་དག་པར་རྗེས་སུ་མི་ལྟ་སྟེ། ཆོས་ཐམས་ཅད་ཕན་ཚུན་མི་ལྡན་པར་ཤེས་པར་བྱས་ནས་ཆོས་རྣམས་ཀྱི་རང་བཞིན་ཇི་ལྟ་བ་བཞིན་དུ་ཡང་དག་པར་རྗེས་སུ་འབྲང་ངོ་། །ཆོས་འདི་དག་ཐམས་ཅད་ནི་རང་བཞིན་གྱིས་འོད་གསལ་བ་སྟེ། ཕན་ཚུན་ཀུན་འཛིན་པ་
དང་། རྗེས་སུ་འཐུན་པར་འཛིན་པས་ཆོས་རྣམས་ཀྱི་རྟེན་གྱི་ཚུལ་དུ་ཉེ་བར་གནས་པ་ཡིན་གྱི་ཆོས་ཐམས་ཅད་བསྡུས་ནས་ཐུན་མོང་གི་ཚུལ་དུ་གནས་པ་ནི་མ་ཡིན་ནོ། །ཆོས་གང་དག་སྐྱེ་བ་མེད་ཅིང་ལྡོག་པ་མེད་པ་དེ་དག་ནི་བརྗོད་པར་བྱ་བ་མ་ཡིན་ནོ། །ཆོས་གང་དག་དོན་དང་
ལྡན་ཞིང་ཕན་ཚུན་སྐལ་བ་མཉམ་པ་དང་བྲལ་བ་དེ་དག་ཐམས་ཅད་ནི་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་ནོ། །ཆོས་རྣམས་ནི་བྱེད་པ་པོ་མེད་པ། བྱེད་དུ་འཇུག་པ་པོ་མེད་པའོ། །ཆོས་རྣམས་ནི་སྲོག་མེད་པ། སེམས་ཅན་མེད་པ། གང་ཟག་མེད་པའོ། །
ཆོས་ཐམས་ཅད་ནི་ཚིག་མངོན་པར་སྒྲུབ་པ་ཇི་ལྟ་བ་བཞིན་རྗེས་སུ་འཛིན་པས་མྱ་ངན་ལས་འདས་པ་དང་མཉམ་པའོ། །ཆོས་ཐམས་ཅད་ནི་ཆགས་པ་མེད་པ། ཆགས་པ་དང་མི་ལྡན་པ། ཆགས་པ་དང་བྲལ་བ་སྟེ། བཀོད་པ་མཐའ་ཡས་གཟུངས་རབ་ཏུ་དབྱེ་བ་ལ་མཁས་

པ་བསྟན་པ་འདི་ནི་བྱང་ཆུབ་སེམས་དཔའ་རྣམས་ཀྱི་ཕྱི་དང་ནང་གི་ཆོས་དག་གིས་ཆོས་ཐམས་ཅད་ཉེ་བར་བརྟག་པར་བྱ་བ་ཡིན་ནོ། །དེ་ལྟར་བཤད་ན་བྱང་ཆུབ་སེམས་དཔའ་དེ་ནང་གི་གཞི་ཐམས་ཅད་ཀྱང་རབ་ཏུ་སྤོང་ལ་ཕྱི་རོལ་གྱི་ཡང་ལེན་པར་མི་བྱེད་དོ། །དེ་འདི་
ལྟར་རྣམ་པར་རྟོག་པར་ཡང་བྱེད་དེ། ཀྱེ་མ་འཇིག་རྟེན་གནས་པ་འདི་ནི། འཁོར་བའི་འཁོར་ལོ་ཐོག་མ་དང་ཐ་མ་མེད་པར་ཞུགས་པ། མ་རིག་པས་ཟིན་པའི་རྗེས་སུ་སོང་བ། མ་རིག་པའི་སྒོ་ངའི་སྦུབས་སུ་ཆུད་ཅིང་འཁྱམ་རབ་ཏུ་འཁྱམ། ཀུན་ཏུ་རབ་ཏུ་འཁྱམ་པའོ། །འཁོར་
བའི་འཁོར་ལོ་དེ་ཉིད་ཏུ་ཀུན་ཏུ་འགྱུར། རབ་ཏུ་འགྱུར་ཡང་འདི་ལ་འཁོར་བར་དམིགས་པ་ཡང་མེད། མངོན་པ་ཡང་མེད་དེ། འཁོར་བའི་འཁོར་ལོ་ཡོངས་སུ་འགྱུར་བའི་རྗེས་སུ་འགྲོ་བ་ཡང་དག་པ་ཡང་ཡོད་པ་མ་ཡིན་ནོ། །འཇིག་རྟེན་གནས་པ་དེ་ལྟ་བུ་ཡིན་ཡང་འདི་ལ་འཇིག་རྟེན་
དུ་དམིགས་པ་ཡང་མེད། འཇིག་རྟེན་དུ་མངོན་པ་ཡང་མེད་དོ། །སེམས་ཅན་འདི་རྣམས་ནི་ཆོས་འདི་ལྟ་བུ་དག་རབ་ཏུ་མི་ཤེས་པས་འདི་ཉིད་དུ་རྒྱུ། །ཀུན་ཏུ་རྒྱུ། རྒྱུག །ཡོངས་སུ་རྒྱུག །རྗེས་སུ་རྒྱུག་གོ །ཀྱེ་མ་སེམས་ཅན་འདི་དག་ནི་དེ་ཉིད་མི་ཤེས་ཤིང་། ཡང་དག་པ་
མ་ཡིན་པས་ཕྱིན་ཅི་ལོག་ཏུ་གྱུར་པ་སེམས་ཅན་མེད་པར་སེམས་ཅན་དུ་འདུ་ཤེས་པ་ལ་ཆགས་པ་སྟེ། སེམས་ཅན་དུ་འདུ་ཤེས་པའི་འཆིང་བས་བཅིངས་པ་ཡིན་ནོ། །ཀྱེ་མ་སེམས་ཅན་འདི་དག་ནི་ཆོས་རྣམས་རབ་ཏུ་མི་ཤེས་པས་འཇིག་པ་དང་། རྣམ་པར་འཇིག་པ་དང་། རབ་ཏུ་འཇིག་
པའི་རྗེས་སུ་སོང་བ་སྟེ། ཡང་དག་པ་མ་ཡིན་པའི་ཕྱིར་རྒོལ་བ་དང་། གཡུལ་འགྱེད་པ། མུན་པའི་རྗེས་སུ་སོང་བ་ཡིན་ཡང་གང་དུ་ཡང་སོང་བ་མེད། གང་ནས་ཀྱང་འོང་བ་མེད་དོ། །ཀྱེ་མ་སེམས་ཅན་འདི་དག་ནི་ཀུན་ཏུ་ཆགས་པ་ལ་ཞེན་པ། ཀུན་ཏུ་ཆགས་པའི་འཆིང་བས་
བཅིངས་པ་སྟེ། ཐར་པ་རབ་ཏུ་མི་ཤེས་པ་ཡིན་པས་བདག་གིས་སེམས་ཅན་རྣམས་ལ་ཕན་གདགས་པ་དང་། རྗེས་སུ་གཟུང་བའི་ཕྱིར་ཆོས་ཀྱི་ཚུལ་འདི་བསྟན་པར་བྱ་གོར་མ་ཆག་སྙམ་མོ། །བཀོད་པ་མཐའ་ཡས་བྱང་ཆུབ་སེམས་དཔའ་ཆོས་རྣམས་དེ་ལྟར་རབ་ཏུ་རྣམ་པར་

འབྱེད་ན་མྱུར་དུ་ཆོས་རྣམས་ལ་སྣང་བ་ཆེན་པོ་ཡང་འཐོབ་པར་འགྱུར། སྒོ་ཡོངས་སུ་དག་པ་ཡང་རྗེས་སུ་འཐོབ་པར་འགྱུར། སོ་སོ་ཡང་དག་པར་རིག་པ་ཡང་ཀུན་ཏུ་འཛིན་པར་འགྱུར། བཟོད་པ་ཆེན་པོ་སྣང་བར་བྱ་བ་ལ་ཡང་བརྩོན་པར་འགྱུར། བྱམས་པ་ཆེན་པོ་དང་། སྙིང་རྗེ་ཆེན་
པོ་ཡང་འཛིན་པར་འགྱུར། དགོངས་པ་བསྟན་པ་ལ་ཡང་མཁས་པར་འགྱུར། ཚིག་གི་རྣམ་གྲངས་ཀྱང་ཀུན་ཤེས་པར་འགྱུར། ཚིག་ཚད་མེད་པ་ཡང་ཤེས་པར་འགྱུར། སྔོན་གྱི་གནས་ཀྱང་རྗེས་སུ་དྲན་པར་འགྱུར། ཕན་ཡོན་ཡང་ཀུན་ཏུ་སྟོན་པར་འགྱུར་ཡང་ཆོས་འགའ་དང་ཡང་འགལ་
བར་མི་བྱེད་ལ་སེམས་ཅན་རྣམས་རྩོད་པ་མེད་པའི་ལས་ལ་ཡང་འཛུད་པར་འགྱུར། ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ཚར་གཅོད་པར་ཡང་འགྱུར། སེམས་ཅན་རྣམས་མུན་པ་ལས་རབ་ཏུ་ཐར་པར་བྱ་བའི་ཕྱིར་ཆོས་སྟོན་པར་ཡང་འགྱུར། ཕྱོགས་བཅུ་དག་ཏུ་
དེ་བཞིན་གཤེགས་པ་རྣམས་ཀྱིས་ཆེད་དུ་རྗོད་པར་ཡང་འགྱུར། ཆོས་ཀྱི་སྣང་བ་ཆེན་པོ་གཏོང་བར་ཡང་འགྱུར། ཆོས་བསམ་གྱིས་མི་ཁྱབ་པའི་སྦྱིན་བདག་ཏུ་ཡང་འགྱུར། དེ་བཞིན་གཤེགས་པ་རྣམས་ཀྱི་ཆོས་ཀྱི་གཏེར་ལ་རྣམ་པར་སྤྱོད་ཅིང་ཀུན་ཏུ་རྨོངས་པར་ཡང་མི་
འགྱུར་རོ། །སྨོན་ལམ་གྱི་བྱེ་བྲག་ཀུན་ཏུ་འཛིན་ཅིང་ཇི་ལྟར་སྨོན་པ་ཡང་ཡོངས་སུ་རྫོགས་པར་འགྱུར་རོ། །ཐབས་ལ་མཁས་པ་བསམ་གྱིས་མི་ཁྱབ་པ་ཡང་ལྷག་པར་རྟོགས་ཤིང་སེམས་ཅན་རྣམས་ཀྱི་བསམ་པ་སྒྲུབ་པ་ཡང་ཡང་དག་པར་སྐུལ་བར་འགྱུར་རོ། །སྔོན་
གྱི་མཐའ་དང་ཕྱི་མའི་མཐའི་རྒྱུ་ཀུན་ཏུ་སྟོན་ཅིང་འདས་པ་དང་། མ་འོངས་པ་ལ་མཁས་པ་ངེས་པར་སྟོན་པར་ཡང་འགྱུར་རོ། །བཀོད་པ་མཐའ་ཡས་དེ་ལ་བྱང་ཆུབ་སེམས་དཔས་ཏིང་ངེ་འཛིན་གྱི་སྒོ་བསྒྲུབ་པ་ལ་མངོན་པར་བརྩོན་པར་བྱ་སྟེ། བྱང་ཆུབ་སེམས་དཔའ་
ཏིང་ངེ་འཛིན་གྱི་སྒོ་བསྒྲུབ་པ་ལ་མཁས་པས་གཟུངས་ཀྱི་སྒོ་བསྒྲུབ་པ་ལ་མཁས་པས་རྟོགས་པར་འགྱུར་རོ། །བྱང་ཆུབ་སེམས་དཔའ་གཟུངས་ཀྱི་སྒོ་བསྒྲུབ་པ་ལ་མཁས་པ་རྗེས་སུ་རྟོགས་པ་ནི་དགོངས་པའི་རྣམ་གྲངས་སྟོན་པ་ལ་ཡང་མཁས་པར་འགྱུར། ཡེ་ཤེས་ཀྱི་

རྣམ་གྲངས་ལ་ཡང་འཇུག་པར་འགྱུར། ཆོས་ཟབ་མོའི་ཚུལ་ལ་ཡང་རྗེས་སུ་རྟོགས་པར་འགྱུར། བསྟན་པར་དགོད་པ་ཡང་ཤེས་པར་འགྱུར་ཞིང་གང་ལ་ཡང་ཡིད་གཉིས་སུ་མི་འགྱུར། གཞན་ལ་རག་མ་ལས་པའི་བཟོད་པ་ལ་གནས་ཤིང་བརྩོན་འགྲུས་
ཆེན་པོ་རྩོམ་མཁས་པ་ལ་འཇུག་པར་ཡང་འགྱུར་རོ། །བཀོད་པ་མཐའ་ཡས་བྱང་ཆུབ་སེམས་དཔའ་སེམས་ཅན་ལ་སྙིང་བརྩེ་བས་ཆོས་ཐམས་ཅད་ཤེས་པ་ཡང་དག་པར་སྡུད་པ་ལ་མཁས་པ་ཀུན་ཏུ་ཚོལ་བ་ནི་ཐེག་པ་གང་ཡང་ཡང་དག་པར་མི་ཤེས་པ་མེད་དེ། སངས་རྒྱས་ཀྱི་ཡེ་
ཤེས་ཀྱང་ཐོབ་སླ་བར་འགྱུར། འཇིག་རྟེན་ཐམས་ཅད་ལས་མངོན་པར་འཕགས་པའི་ཤེས་པ་ཡེ་ཤེས་ཆེན་པོ་ཐམས་ཅད་མཁྱེན་པའི་ཡེ་ཤེས་ཀྱང་ཤིན་ཏུ་ལེགས་པར་སྦྱོང་བར་འགྱུར་རོ། །བཀོད་པ་མཐའ་ཡས་གཟུངས་ཀྱི་ཚུལ་ལ་མཁས་པའི་ཆོས་རིམ་པར་ཕྱེ་བ་བསྟན་པ་འདིར་
ཆོས་གང་དག་གིས་བྱང་ཆུབ་སེམས་དཔའ་རྣམས་ཡང་དག་པར་སྡུད་པར་འགྱུར་ཞིང་ཅི་ནས་ཀྱང་བྱང་ཆུབ་སེམས་དཔའ་རྣམས་ལས་རྒྱ་ཆེན་པོས་ཡང་དག་པར་ཟིན་ཅིང་གསང་སྔགས་དང་། དགོངས་པ་དང་། བརྗོད་པའི་སྒྲ་དང་། ཡང་དག་པར་བརྗོད་པ་ཐམས་ཅད་ཀྱང་རྗེས་སུ་
རྟོགས་པར་ཡང་འགྱུར། བློའི་རབ་ཏུ་དབྱེ་བ་ཤེས་པ་ལ་མཁས་པས་ཡང་ཁོང་དུ་ཆུད་པར་འགྱུར་བའི་ཆོས་དེ་དག་ཐམས་ཅད་བསྟན་པར་བྱའོ། །ཆོས་དེ་དག་ཀྱང་གང་ཞེ་ན། བཀོད་པ་མཐའ་ཡས་འདི་ལ་བྱང་ཆུབ་སེམས་དཔའ་ཚུལ་ཁྲིམས་ཀྱི་གཞི་ལ་མཁས་པ་ཡོངས་སུ་དག་
པ་ལ་གནས་ཤིང་བདེན་པའི་བྱིན་གྱིས་བརླབས་ལ་མཁས་པ་ལ་གནས་པ་དང་། གཏོང་བ་ལ་མཁས་པ་ལ་གནས་པ་ཡང་འཕེལ་བར་བྱེད་དོ། །ངའི་མེད་པ་དང་། ཡོངས་སུ་འཛིན་པ་མེད་པའི་ཆོས་ཡོངས་སུ་ཚོལ་བ་ལ་མངོན་པར་བརྩོན་ཞིང་ཐབས་ཀྱི་གནས་སྒོམ་པར་བྱེད་པ་ན་
ཆོས་ཐམས་ཅད་ཀྱི་ཚུལ་ལ་མཁས་པའི་གནས་རྟོགས་པར་ཡང་འགྱུར་ལ་ཡོངས་སུ་ཉམས་པའི་ཆོས་ཅན་དུ་ཡང་མི་འགྱུར་རོ། །དེ་ཕྱིར་མི་ལྡོག་པའི་ས་ལ་གནས་ཤིང་མྱུར་དུ་སྤོབས་པ་ཕུན་སུམ་ཚོགས་པས་མངོན་པར་འཕགས་པར་ཡང་འགྱུར། ཤེས་རབ་རྒྱ་མཚོ་ལྟ་བུས་རྣམ་པར་འཕེལ་བར་

ཡང་འགྱུར་རོ། །བཀོད་པ་མཐའ་ཡས་ཕྱི་མའི་དུས་ན་བྱང་ཆུབ་སེམས་དཔའ་གང་དག་ཆོས་ཟབ་མོའི་ཚུལ་བསྟན་ན་དོན་དུ་གཉེར་ཞིང་དེ་བཞིན་གཤེགས་པའི་ཆོས་ཀྱི་མཛོད་རྣམ་པར་དབྱེ་བར་འདོད་ཅིང་མོས་ལ། ལྷག་པའི་བསམ་པ་ཕུན་སུམ་ཚོགས་པ། བསམ་པ་དགེ་བ། སེམས་
བཟང་བ་དེ་དག་མ་གཏོགས་པར་གཞན་འགའ་ཡང་ཆོས་འདི་དག་ལེན་པར་འགྱུར་བ་མེད་དེ། ཆོས་ཀྱི་ཚུལ་འདི་ལ་བརྩོན་ཞིང་སློབ་པར་འཇུག་པ་དེ་དག་ནི་རྣམ་གྲངས་བསྟན་པ་ཡང་རྗེས་སུ་རྟོགས་པར་འགྱུར། ཆོས་རྣམས་ཀྱི་ངོ་བོ་ཉིད་ཀྱི་རང་བཞིན་ཡང་རྗེས་སུ་རྟོགས་པར་འགྱུར་རོ། །
བཀོད་པ་མཐའ་ཡས་དེ་བཞིན་གཤེགས་པ་ནི་རྣམ་གྲངས་ཀྱིས་ཆོས་སྟོན་པར་ཡང་མཛད་ལ་དེ་བཞིན་གཤེགས་པ་ཆོས་ཀྱི་རང་བཞིན་དང་འགལ་བར་ཡང་མི་མཛད་ཅིང་། ཆོས་ཀྱི་རང་བཞིན་དང་མི་འགལ་བར་རྗོད་པ་ཡང་མཛད་དོ། །ཆོས་ཐམས་ཅད་བྱས་པ་མེད་པར་ཡང་རྗོད་ལ། ཆོས་
རྣམས་ལ་བརྗོད་པའམ། རྗོད་པར་བྱེད་པ་ཡང་མི་སྟོན་ཏོ། །བཀོད་པ་མཐའ་ཡས་དེ་བཞིན་གཤེགས་པ་ནི་སྟོན་པ་ལ་མཁས་པའི་ཕ་རོལ་ཏུ་ཕྱིན་པ་ཡང་རྟོགས་ལ་དེ་བཞིན་གཤེགས་པས་ཆོས་འགའ་ཡང་རྟོགས་པ་ཡང་མེད། རྗེས་སུ་རྟོགས་པ་ཡང་མེད། ཡང་དག་པར་རྟོགས་པ་
ཡང་མེད་དོ། །དེ་བཞིན་གཤེགས་པ་ནི་ཆོས་འགའ་ཡང་དོར་བར་བྱ་བའི་ཕྱིར་ཆོས་སྟོན་པར་མི་མཛད་དེ། ཆོས་གང་ཡང་སོ་སོར་སྤང་བར་བྱ་བའི་ཕྱིར་ཡང་མ་ཡིན། བསྐྱེད་པར་བྱ་བའི་ཕྱིར་ཡང་མ་ཡིན། ཐོབ་པར་བྱ་བའི་ཕྱིར་ཡང་མ་ཡིན། མི་ཐོབ་པར་བྱ་བའི་ཕྱིར་ཡང་མ་ཡིན་
ནོ། །དེ་བཞིན་གཤེགས་པ་ནི་མི་དམིགས་པ་ལ་གནས་པ་ཡིན་ཡང་། དེ་བཞིན་གཤེགས་པ་གནས་པ་ཡང་མ་ཡིན། མི་གནས་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། །དེ་བཞིན་གཤེགས་པ་ནི། གང་གིས་ཀྱང་རྣམ་པར་གཞག་པར་བྱ་བ་མ་ཡིན་ནོ། །དེ་བཞིན་གཤེགས་པས་དེ་བཞིན་
གཤེགས་པ་དེ་འདི་ལྟར་གནས་སོ། །དེ་ལྟར་གནས་སོ་ཞེས་མིང་དུ་བརྗོད་པ་གང་ཡིན་པ་དེ་ཡང་གཅིག་པ་ཉིད་ཀྱང་མ་ཡིན། ཐ་དད་པ་ཉིད་ཀྱང་མ་ཡིན་ཏེ། དེ་བཞིན་གཤེགས་པ་ནི་འགྲོ་བ་དང་འོང་བར་གདགས་པར་བྱ་བ་མ་ཡིན་ནོ། །དེ་བཞིན་གཤེགས་

པ་ནི་སྤྲོས་པ་མེད་པ་སྟེ། སྤྲོས་པ་ལས་ཡང་དག་པར་འདས་པ་ཡིན་ཡང་གང་ལས་ཀྱང་འདའ་བ་མེད་དོ། །དེ་བཞིན་གཤེགས་པ་ལ་ལྷག་པར་འདས་པ་མེད་དེ། འདི་ལྟར་དེ་བཞིན་གཤེགས་པས་དེ་བཞིན་གཤེགས་པ་ལ་ལྷག་པར་འདས་པ་མེད་པར་ཡང་མཁྱེན་ཏོ། །
དེ་བཞིན་གཤེགས་པས་དེ་བཞིན་གཤེགས་པ་མཁྱེན་པ་ཡང་མེད་དེ། དེ་བཞིན་གཤེགས་པ་ནི་ཕྱིན་ཅི་མ་ལོག་པ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དུ་ཡང་མཁྱེན་པ་མེད་དོ། །དེ་བཞིན་གཤེགས་པ་ནི་ཇི་ལྟར་ཆོས་ཅུང་ཟད་ཀྱང་ཀུན་ཏུ་མི་སྟོན་པ་དེ་ལྟར་དེ་བཞིན་
གཤེགས་པ་ཉིད་དུ་སྟོན་པར་མཛད་ཅིང་། ངེས་པར་སྟོན་པར་ཡང་མི་མཛད། ཡང་དག་པར་སྟོན་པར་ཡང་མི་མཛད་དོ། །དེ་བཞིན་གཤེགས་པ་ནི་ཆོས་ཐམས་ཅད་ཀྱི་རང་བཞིན་ཇི་ལྟ་བ་བཞིན་དུ་གནས་པར་གྱུར་པ་ཡིན་ཡང་ཆོས་རྣམས་ཀྱི་རང་བཞིན་གང་ཡིན་པ་དེ་ནི་གདགས་
པར་བྱ་བ་མ་ཡིན་ནོ། །ཆོས་རྣམས་ལ་ནི་རང་བཞིན་མེད་དེ། འདི་ལྟར་དེ་བཞིན་གཤེགས་པས་ཆོས་ཐམས་ཅད་ནི་མ་བྱས་པ། འགྱུར་བ་མེད་པ། ཡང་དག་པར་མ་སྐྱེས་པ། མ་འགགས་པ། མ་བྲལ་བའོ། །ཆོས་ཐམས་ཅད་ནི་ཤིན་ཏུ་རྣམ་པར་དག་པ་སྟེ། ཐོབ་
པ་ཡང་མེད། ཡང་དག་པར་ཐོབ་པ་ཡང་མེད་དོ། །ཆོས་ཐམས་ཅད་ནི་དམིགས་སུ་མེད་པའོ་ཞེས་གསུངས་སོ། །ཆོས་ཐམས་ཅད་ནི་མངོན་པར་རྟོགས་པ་མེད་པ་སྟེ་འདི་ལྟར་ཆོས་འགའ་ཡང་ཐོབ་པ་མེད་དོ། །ཆོས་དེ་ནི་ཅུང་ཟད་ཀྱང་ཐོབ་པར་བྱ་བ་མ་ཡིན་ཏེ་ཉེ་བར་རྟོགས་པའི་
ཆོས་ནི་ཆོས་ཀྱང་མ་ཡིན། གང་གིས་ཀྱང་ཉེ་བར་རྟོགས་པ་ཡང་མེད། ཐོབ་པ་ཡང་མེད། སོ་སོར་ཐོབ་པ་ཡང་མེད་དོ། །དེ་ལྟ་བས་ན་ཆོས་ཐམས་ཅད་ནི་སྐྱེ་བ་མེད་པས་ཉེ་བར་རྟོགས་པ་ཡང་མེད་པ་ཡིན་ནོ། །དེ་བཞིན་གཤེགས་པ་རྣམས་ཀྱི་བསྟན་པ་མངོན་པར་སྒྲུབ་པ་རྣམ་
པར་སྦྱང་བའི་ཕྱིར་འཕགས་པའི་ཆོས་སུ་གདགས་པར་བརྗོད་པ་འབྱུང་བར་བསྟན་པ་གང་ཡིན་པ་དེ་ཡང་འཕགས་པའི་ཆོས་ཅུང་ཟད་ཀྱང་ཐོབ་པ་མེད་དོ། །འཕགས་པ་རྣམས་ལ་ནི་ཆོས་སམ། ཆོས་མ་ཡིན་པ་ཅུང་ཟད་ཀྱང་མེད་དེ། ཆོས་ལ་ཡང་འཕགས་པའམ། འཕགས་

པ་མ་ཡིན་པ་ཅུང་ཟད་ཀྱང་མེད་དོ། །འདི་ལ་དེ་བཞིན་གཤེགས་པ་རྣམས་ཀྱི་བསྟན་པ་མངོན་པར་སྒྲུབ་པ་ནི་ཆོས་འགའ་ཡང་སྦྱོར་བ་ཡང་མེད། མི་སྦྱོར་བ་ཡང་མེད་པ་སྟོན་པ་ཡིན་པར་ཁོང་དུ་ཆུད་པར་བྱའི་ཐ་སྙད་ཀྱི་རྗེས་སུ་འབྲང་བར་བྱ་བ་ནི་མ་ཡིན་ནོ། །དེ་བཞིན་གཤེགས་
པ་ནི་ཆོས་སུ་འདོགས་པར་ཡང་མཛད་ལ། ཆོས་རྣམ་པར་གནས་པ་འདོགས་པར་ཡང་མི་མཛད་དོ། །དེ་བཞིན་གཤེགས་པ་ནི་ཆོས་མ་ཡིན་པ་སྟོན་པར་ཡང་མཛད་ལ། ཆོས་མ་ཡིན་པ་རྣམ་པར་གནས་པ་འདོགས་པར་ཡང་མི་མཛད་དོ། །དེ་བཞིན་གཤེགས་པ་ནི་དགེ་བ་
དང་། མི་དགེ་བར་སྟོན་པར་ཡང་མཛད་ལ། དགེ་བ་དང་མི་དགེ་བ་རྣམ་པར་གནས་པ་འདོགས་པར་ཡང་མི་མཛད་དོ། །དེ་བཞིན་གཤེགས་པ་ནི་ཆོས་ཐམས་ཅད་སྟོན་པར་ཡང་མཛད་ལ། ཆོས་ཐམས་ཅད་རྣམ་པར་གནས་པ་འདོགས་པར་ཡང་མི་མཛད་དོ། །དེ་བཞིན་
གཤེགས་པ་ནི་ཆོས་ཐམས་ཅད་གདགས་པ་མེད་པར་སྟོན་པར་ཡང་མཛད་ལ། གདགས་པ་མེད་པ་རྣམ་པར་གནས་པ་འདོགས་པར་ཡང་མི་མཛད་དོ། །བཀོད་པ་མཐའ་ཡས་དེ་བཞིན་གཤེགས་པའི་ཆོས་བསྟན་པ་འདི་ནི་ཤིན་ཏུ་ཟབ་སྟེ་ཆོས་ཟབ་མོ་ལ་ཡོངས་སུ་སྦྱང་བ་མ་བྱས་
པས་ཀུན་ཤེས་པར་ནུས་པ་མ་ཡིན་ནོ། །བཀོད་པ་མཐའ་ཡས་བྱང་ཆུབ་སེམས་དཔའ་མངོན་པར་རྫོགས་པར་བྱང་ཆུབ་པར་འདོད་པ་འཁོར་བ་ལས་ཡོངས་སུ་འགྲོལ་བར་འདོད་པས་དེ་བཞིན་གཤེགས་པ་རྣམས་ཀྱི་བསྟན་པ་མངོན་པར་བསྒྲུབ་པ་བཤད་པ་རྗེས་སུ་རྟོགས་པར་བྱའོ། །
བཀོད་པ་མཐའ་ཡས་བྱང་ཆུབ་སེམས་དཔའ་གང་གི་ཚེ་ཆོས་འདི་དག་ལ་ནེམ་ནུར་མེད་ཅིང་ཐེ་ཙོམ་མེད་པར་རབ་ཏུ་རྣམ་པར་འབྱེད་པ་ན་ཆོས་འགའ་ཡང་ལེན་པར་ཡང་མི་བྱེད། འདོར་བར་ཡང་མི་བྱེད། ཆོས་འགའ་ཡང་སྐྱེད་པར་ཡང་མི་བྱེད། འགག་པར་ཡང་མི་བྱེད། ཆོས་འགའ་
ཡང་སྤྲོས་པར་ཡང་མི་བྱེད་དོ། །བདེན་པ་མངོན་པར་བསྒྲུབ་པ་ལ་ཡང་ཉེ་བར་སྦྱོར་ལ། བདེན་པ་མངོན་པར་བསྒྲུབ་པ་བསྟན་པ་ལ་མངོན་པར་ཞེན་པར་ཡང་མི་བྱེད་དེ། དེ་ལྟར་ཆོས་ཀྱི་སྒོ་ཡོངས་སུ་དག་པ་ཀུན་ཤེས་པར་འགྱུར་ཞིང་ཏིང་ངེ་འཛིན་གྱི་སྒོ་མངོན་པར་བསྒྲུབ་པས་ཡོངས་སུ་

སྦྱང་བ་བྱས་པ་ཡིན་ནོ། །བཀོད་པ་མཐའ་ཡས་འདི་ལྟ་སྟེ་དཔེར་ན། རིའི་རྒྱལ་པོ་རི་རབ་ནི་སེམས་ཅན་བསོད་ནམས་བྱས་པ། དགེ་བའི་རྩ་བ་བསྐྱེད་པ། གཞལ་མེད་ཁང་ལ་ཡོངས་སུ་ལོངས་སྤྱོད་པ་རྣམས་ཀྱི་གནས་སུ་འགྱུར་ཞིང་སེམས་ཅན་དེར་སྐྱེས་པ་རྣམས་ཀྱང་རབ་ཏུ་
དགའ་བར་འགྱུར་རོ། །དེ་བཞིན་དུ་ཆོས་རིན་པོ་ཆེ་ཀུན་ནས་བསྡུས་པ་འདི་ཡང་བྱང་ཆུབ་སེམས་དཔའ་དགེ་བའི་རྩ་བ་བསྐྱེད་པ་རྣམས་ལ་སྟོན་པར་འགྱུར་ཏེ། རིན་པོ་ཆེ་དེས་ཀྱང་བྱང་ཆུབ་སེམས་དཔའ་ཐམས་ཅད་མཁྱེན་པའི་ཡེ་ཤེས་རིན་པོ་ཆེ་འཐོབ་ཅིང་ཆོས་བླ་ན་མེད་པ་ཤེས་པ་རིན་པོ་ཆེའི་རྗེས་སུ་
འགྲོ་བར་ཡང་འགྱུར་རོ། །བཀོད་པ་མཐའ་ཡས་ཆོས་ཐམས་ཅད་ཡང་དག་པར་བསྡུས་པའི་མདོ་སྡེ་འདི་ནི་ཆོས་ཀྱི་གཏེར་གྱི་གཟུངས་ཡང་དག་པར་རབ་ཏུ་བསྟན་པར་བྱ་བའི་ཕྱིར་དེ་བཞིན་གཤེགས་པ་རྣམས་ལས་འབྱུང་སྟེ། ཆོས་ཀྱི་གཟུངས་རྒྱ་ཆེན་པོ་འདི་རབ་ཏུ་འབྱུང་ཡང་ཉེ་བར་
གནས་པ་ནི་མ་ཡིན་ནོ། །དེ་བཞིན་གཤེགས་པ་རྣམས་ཀྱི་བསྟན་པ་གང་ཡིན་པ་དེ་ཐམས་ཅད་ནི་སྒོ་མཐའ་ཡས་པའི་གཟུངས་ལས་འབྱུང་སྟེ། དེ་བཞིན་གཤེགས་པ་ནི་སྒོ་རྣམ་པར་སྦྱང་བ་དང་། མདོ་སྡེ་ཐམས་ཅད་ཡང་དག་པར་བསྡུ་བའི་ཕྱིར་ཆོས་རྣམས་ཀྱི་གཟུངས་ཀྱི་ཚུལ་འདི་
སྟོན་པར་མཛད་དོ། །མདོ་སྡེ་ཐམས་ཅད་ཡང་དག་པར་སྡུད་པར་བྱེད་པའི་གཟུངས་འདི་ནི་བྱེད་པ་མེད་པ། མི་འགྱུར་བ། མཐའ་མེད་པ། དབུས་མེད་པ། མཐར་ཐུག་པ་མེད་པ་སྟེ། གཟུངས་འདི་ནི་རྩོམ་པ་ཚད་མེད་པ་ཡིན་ནོ། །གཟུངས་ཀྱི་སྒོ་འདི་ནི་ཕྱོགས་བཅུའི་
འཇིག་རྟེན་གྱི་ཁམས་ཀུན་ཏུ་དེ་བཞིན་གཤེགས་པའི་བྱིན་གྱི་རླབས་ཀྱིས་སྤྱོད་དེ། བཀོད་པ་མཐའ་ཡས་དེ་ནི་ཆོས་བསྟན་པ་འདི་ལ་གཟུངས་ཀྱི་སྒོ་རིམ་པར་ཕྱེ་བའི་ཆོས་ཀྱི་ཚུལ་བརྗོད་པ་དང་པོ་ཡིན་ནོ། །བཀོད་པ་མཐའ་ཡས་གང་དུ་ཆོས་ཐམས་ཅད་ཡང་དག་པར་འདུ་བར་འགྱུར་
བ་དེ་ལ་ནི་བྱང་ཆུབ་སེམས་དཔའ་ཆོས་ཀྱི་ཚུལ་འདི་རྗེས་སུ་རྟོགས་པ། ཆོས་ཀྱི་རྒྱུན་རབ་ཏུ་མ་ཆད་པ་ལ་འཇུག་པར་འདོད་པ། ཆོས་ཐམས་ཅད་གནས་པ་མེད་པའི་ཕྱག་རྒྱའི་རྗེས་སུ་འབྲང་བར་འདོད་པ། གསང་སྔགས་དང་དགོངས་པ་ཁོང་དུ་ཆུད་པ་ཉམས་པ་མེད་པ།