Kinh tạng Tây Tạng (Kangyur Đại Học) — 039_དཀོན་བརྩེགས།_ཀ

སློང་ཁྱོད་ཅི་ཆོས་ཐམས་ཅད་སྟོང་པར་འདོད་དམ་ཞེས་དྲི་བར་བྱའོ། །དེ་གལ་ཏེ་འདི་སྐད་དུ་ཁོ་བོ་ནི་སྟོང་པ་ཉིད་མི་འདོད་དོ་ཞེས་ཟེར་ན་དེ་ལ་འདི་སྐད་དུ་ཚེ་དང་ལྡན་པ་ཁྱོད་ནི་དགེ་སྦྱོང་ཤཱཀྱའི་སྲས་ལས་ཉམས་ནས་ཡུན་རིང་ངོ་། །དེ་ཅིའི་ཕྱིར་ཞེ་ན། བཅོམ་ལྡན་འདས་དེ་ནི་སྟོང་པ་ཉིད་
གསུང་བ་སྟེ། བདག་ཏུ་གསུང་བ་མ་ཡིན། སེམས་ཅན་དུ་གསུང་བ་མ་ཡིན། སྲོག་ཏུ་གསུང་བ་མ་ཡིན། གང་ཟག་ཏུ་གསུང་བ་མ་ཡིན་པའི་ཕྱིར་རོ་ཞེས་བརྗོད་པར་བྱའོ། །དེ་གལ་ཏེ་འདི་སྐད་དུ་ཆོས་ཐམས་ཅད་ནི་སྟོང་པ་སྟེ། ཁོ་བོ་སྟོང་པ་ཉིད་འདོད་དོ་ཞེས་ཟེར་ན་དེ་ལ་འདི་
སྐད་དུ་ཚེ་དང་ལྡན་པ་ཆོས་ཐམས་ཅད་ཀྱང་སྟོང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟ་ཅི་སྨོས། ཚེ་དང་ལྡན་པ་ཅི་མིག་དེ་བཞིན་གཤེགས་པ་ཡིན་ནམ། ཅི་རྣ་བ་དང་། སྣ་དང་། ལྕེ་དང་། ལུས་དང་། ཡིད་དེ་བཞིན་གཤེགས་
པ་ཡིན་ཞེས་བརྗོད་པར་བྱའོ། །དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་ཡིན། རྣ་བ་དང་། སྣ་དང་། ལྕེ་དང་། ལུས་དང་། ཡིད་དེ་བཞིན་གཤེགས་པ་ཡིན་ནོ་ཞེས་ཟེར་ན་དེ་ལ་འདི་སྐད་དུ་འོ་ན་ནི་ཚེ་དང་ལྡན་པ་ཡང་དེ་བཞིན་གཤེགས་པ་ཡིན་ནོ་ཞེས་བརྗོད་པར་བྱའོ། །དེ་
གལ་ཏེ་འདི་སྐད་དུ་མིག་དེ་བཞིན་གཤེགས་པ་མ་ཡིན་ཏེ། ཡིད་ཀྱི་བར་དུ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེ་ལྟར་ན་མིག་ནི་བཏགས་པ་སྟེ། དེ་དེ་བཞིན་གཤེགས་པ་མ་ཡིན། ཡིད་ཀྱི་བར་དུ་བཏགས་པ་སྟེ། དེ་དེ་བཞིན་གཤེགས་པ་མ་ཡིན་ནོ། །
ཚེ་དང་ལྡན་པ་དེ་ལྟར་ན་ཁྱོད་འདི་སྐད་དུ་དེ་བཞིན་གཤེགས་པ་བཏགས་པ་མ་ཡིན་ནོ་ཞེས་ཟེར་ན་གནས་དེར་བདག་ཅག་གིས་ཅི་ཞིག་མ་ཐོབ་པར་གྱུར་ཅེས་བརྗོད་པར་བྱའོ། །དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་མ་ཡིན། དེ་བཞིན་གཤེགས་པ་མིག་ལས་གཞན་པ་ཡང་མ་

ཡིན། ཡིད་ཀྱི་བར་དུ་དེ་བཞིན་གཤེགས་པ་མ་ཡིན། དེ་བཞིན་གཤེགས་པ་ཡིད་ལས་གཞན་པ་ཡང་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེ་བཞིན་གཤེགས་པས་སྐྱེ་མཆེད་བཅུ་གཉིས་གསུངས་པ་ནི་འདི་ལྟ་སྟེ། མིག་གི་སྐྱེ་མཆེད་དང་། གཟུགས་ཀྱི་སྐྱེ་མཆེད་ནས་ཡིད་
ཀྱི་སྐྱེ་མཆེད་དང་། ཆོས་ཀྱི་སྐྱེ་མཆེད་དེ། ཚེ་དང་ལྡན་པ་དེ་དག་ནི་སེམས་ཅན་ནམ་སེམས་ཅན་དུ་བཏགས་པར་ཟད་ན། ཚེ་དང་ལྡན་པ་ཅི་མིག་དེ་བཞིན་གཤེགས་པ་ཡིན་ནམ། ཡིད་ཀྱི་བར་དུ་དེ་བཞིན་གཤེགས་པ་ཡིན་ནམ་ཞེས་བརྗོད་པར་བྱའོ། །དེ་གལ་ཏེ་འདི་སྐད་དུ་
མིག་དེ་བཞིན་གཤེགས་པ་ཡིན་ཏེ། ཡིད་ཀྱི་བར་དུ་དེ་བཞིན་གཤེགས་པ་ཡིན་ནོ་ཞེས་ཟེར་ན་དེ་ལ་འདི་སྐད་དུ་འོ་ན་སེམས་ཅན་ཐམས་ཅད་ཀྱང་སངས་རྒྱས་སུ་འགྱུར་ཏེ། ས་ཐམས་ཅད་དང་། རི་ཐམས་ཅད་དང་། ཤིང་ཐམས་ཅད་དང་། སྲིད་པར་གཏོགས་པ་རྣམས་སངས་
རྒྱས་སུ་འགྱུར་རོ་ཞེས་བརྗོད་པར་བྱའོ། །དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་མ་ཡིན་ཏེ། ཡིད་ཀྱི་བར་དུ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེ་བཞིན་གཤེགས་པས་ཆོས་དང་ཆོས་མ་ཡིན་པ་བསྟན་པ་ནི་འདི་དག་གོ་ཞེས་བརྗོད་པར་བྱའོ། །
དེ་གལ་ཏེ་འདི་སྐད་དུ་གཟུགས་དེ་བཞིན་གཤེགས་པ་མ་ཡིན་ཏེ། ཆོས་ཀྱི་བར་དུ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་ཚེ་དང་ལྡན་པ་ཅི་ཆོས་མ་ཡིན་པ་དེ་བཞིན་གཤེགས་པ་ཡིན་ནམ་ཞེས་བརྗོད་པར་བྱའོ། །དེ་གལ་ཏེ་འདི་སྐད་དུ་ཆོས་མ་ཡིན་པ་དེ་བཞིན་གཤེགས་པའོ་
ཞེས་ཟེར་ན་དེ་ལ་འདི་སྐད་དུ་འོ་ན་སེམས་ཅན་གང་དག་ཕར་མི་འཛིན་པ་དང་། མར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། རིགས་ཀྱི་གཙོ་བོ་མི་སྐྱོང་བ་དང་། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་
གཡེམ་པ་དང་། བརྫུན་དུ་སྨྲ་བ་དང་། ཕྲ་མ་སྨྲ་བ་དང་། ངག་རྩུབ་པོ་སྨྲ་བ་དང་། ཚིག་ཀྱལ་པ་སྨྲ་བ་དང་། བརྣབ་སེམས་ཅན་དང་། གནོད་སེམས་ཀྱི་སེམས་དང་ལྡན་པ་དང་། ལོག་པར་ལྟ་བ་དག་དང་། སྲིད་པར་བསྡུས་པ་དེ་དག་ཐམས་ཅད་ཀྱང་དེ་བཞིན་གཤེགས་པར་འགྱུར་

རོ་ཞེས་བརྗོད་པར་བྱའོ། །དེ་གལ་ཏེ་འདི་སྐད་དུ་ཆོས་མ་ཡིན་པ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེའི་ཕྱིར་དེ་བཞིན་གཤེགས་པ་ནི་ཆོས་ཀྱང་མ་ཡིན་ཆོས་མ་ཡིན་པ་ཡང་མ་ཡིན་ནོ། །གང་ཆོས་ཀྱང་མ་ཡིན་ཆོས་མ་ཡིན་པ་ཡང་མ་
ཡིན་པ་དེ་ལ་བཏགས་པ་མེད་དོ། །ཚེ་དང་ལྡན་པ་དེ་ལྟར་ན་འདི་སྐད་དུ་དེ་བཞིན་གཤེགས་པ་བཏགས་པ་མ་ཡིན་ནོ་ཞེས་ཟེར་རམ་ཞེས་བརྗོད་པར་བྱའོ། །འོད་སྲུང་དེ་ལྟར་ན་མི་བླུན་པོ་དེ་དག་ནི་དུས་དུས་སུ་ཆོས་དང་འཐུན་པས་ཚར་གཅད་པར་བྱའོ། །འོད་སྲུང་གང་ཆོས་དང་
འཐུན་པ་ངེས་པར་བྱུང་བ་འདི་ལ་ཆོས་དང་འཐུན་པས་ཕྱིར་སྨྲ་ནུས་པ་དེ་ནི་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པའི་འཇིག་རྟེན་ན་ངས་མ་མཐོང་སྟེ། གཞན་དུ་ན་ཁྲོ་བ་དང་། ཞེ་སྡང་དང་། གཏི་མུག་དང་། མི་བཟོད་པ་དང་། རྐྱེན་
མེད་པ་སྨྲས་ནས་ཆོས་སྟོང་པ་ལ་སྨོད་ཅིང་འགྲོ་བར་འགྱུར་བ་ནི་མ་གཏོགས་སོ། །འོད་སྲུང་དེ་ལྟར་ཁྱོད་ཀྱིས་མདོ་སྡེ་འདི་ལྟ་བུ་འདི་དག་གཟུང་བར་བྱའོ། །འོད་སྲུང་དགེ་སློང་གང་དག་མདོ་སྡེ་འདི་ལྟ་བུ་འདི་དག་འཛིན་པར་མི་འགྱུར་བའི་དུས་དེ་ཡོད་དེ། དེ་དག་ལ་མིང་གསུམ་
འདོགས་པར་འགྱུར་རོ། །གསུམ་གང་ཞེ་ན། འདི་ལྟ་སྟེ། ཆད་པར་སྨྲ་ཞིང་དངོས་པོ་མེད་པ་དང་། ཕུང་པོ་མེད་པ་དང་། རིམ་གྲོ་མེད་པའོ། །འོད་སྲུང་དེ་ལྟར་ན་དེའི་ཚེ་མདོ་སྡེ་འདི་ལྟ་བུ་འདི་དག་སྤང་བར་འགྱུར་རོ། །འོད་སྲུང་དེའི་དུས་ན་འདི་ལྟར་དེ་བཞིན་
གཤེགས་པ་ལ་བསྟི་སྟང་མི་བྱེད་པ་དང་། ཆོས་ལ་བསྟི་སྟང་མི་བྱེད་པར་འགྱུར་ཏེ། དེ་བཞིན་གཤེགས་པ་དང་ཆོས་ལ་བསྟི་སྟང་མེད་པར་བྱས་ནས་དགེ་འདུན་གྱི་མིང་གི་ཚོགས་ལྷག་མར་འགྱུར་བ་ལ་ལྟོས། དེ་དག་ནི་བཏགས་པ་ལ་རྟེན་པར་འགྱུར། མིང་ལ་རྟེན་པར་
འགྱུར་ཏེ། དེ་དག་སངས་རྒྱས་དང་ཆོས་ཀྱི་མིང་བརྗོད་ཅིང་གཞན་དག་ལ་སྟོན་ཀྱང་སངས་རྒྱས་ཇི་ལྟར་བལྟ་བར་བྱ་བ་ནི་ཤེས་པར་མི་འགྱུར་རོ། །དེ་དག་སངས་རྒྱས་དང་ཆོས་ཞེས་ཚིག་ཏུ་བརྗོད་ཀྱང་དེ་བཞིན་གཤེགས་པས་ཆོས་བཤད་པ་གང་ཡིན་པ་དེ་ནི་ཤེས་པར་མི་

འགྱུར་རོ། །དེ་དག་སྐྱེས་བུ་ཟུང་བཞི་དང་། སྐྱེས་བུ་གང་ཟག་ཡ་བརྒྱད་བརྗོད་པར་འགྱུར་ཞིང་། བཅོམ་ལྡན་འདས་ཀྱི་ཉན་ཐོས་ཀྱི་མིང་ཙམ་ཤེས་པར་འགྱུར་ཏེ། ཡོན་ཏན་གང་དག་གིས་དེའི་མིང་དང་། དེའི་དོན་ནི་རིག་པར་མི་འགྱུར། དེའི་དོན་ནི་ཤེས་པར་མི་འགྱུར་རོ། །
དེ་དག་གོས་དང་ཟས་ཀྱི་ཆེད་དང་། མལ་སྟན་དང་། ན་བའི་གསོ་སྨན་དང་། ཡོ་བྱད་ཀྱི་ཕྱིར་ཆོས་སྤོང་བར་འགྱུར་རོ། །དེ་ལ་བྱང་ཆུབ་སེམས་དཔས་མདོ་སྡེ་འདི་ལྟ་བུ་འདི་དག་ཁོང་དུ་ཆུད་པར་བྱ་བའི་ཕྱིར་བརྩོན་འགྲུས་བརྩམ་པར་བྱ། བདག་འཇུག་པར་བྱས་ལ་གཟུང་བར་
བྱའོ། །དེ་ཅིའི་ཕྱིར་ཞེ་ན། དེ་དག་ཕྱི་མའི་དུས་ན་ཆོས་ཀྱི་གྲོང་ཁྱེར་སྐྱོང་བར་འགྱུར་བའི་ཕྱིར་རོ། །ཆོས་བསྟན་པ་འདི་ལྟ་བུས་བསྐལ་པ་དགུ་བཅུ་རྩ་གཅིག་སྟོངས་པར་གྱུར་ཏོ། །འོད་སྲུང་ངས་མངོན་པར་ཤེས་ཏེ་འདས་པའི་དུས་ན་བསྐལ་པ་སྟོང་ལ་དེ་བཞིན་གཤེགས་པ་གཅིག་
འཇིག་རྟེན་དུ་བྱུང་ངོ་། །འོད་སྲུང་ངས་མངོན་པར་ཤེས་ཏེ་འདས་པའི་དུས་ན་དེ་བཞིན་གཤེགས་པ་ཞི་བ་དང་ལྡན་པ་ཞེས་བྱ་བ་བྱང་ཆུབ་སེམས་དཔའ་རྣམས་ཡོངས་སུ་སྨིན་པར་མཛད་པ་དང་། འཇིག་རྟེན་གྱི་དོན་གྱི་ཕྱིར་བསྐལ་པ་བརྒྱད་ཁྲི་བཞི་སྟོང་དུ་བཞུགས་པར་གྱུར་ཏོ། །
འོད་སྲུང་ངས་མངོན་པར་ཤེས་ཏེ་འདས་པའི་དུས་ན་དེ་བཞིན་གཤེགས་པ་དྲི་མ་མེད་པ་ཞེས་བྱ་བ་བསྐལ་པ་བྱེ་བ་ཕྲག་ཉི་ཤུར་བཞུགས་ཏེ། བསྐལ་པ་བྱེ་བ་ཕྲག་ཉི་ཤུར་བྱང་ཆུབ་སེམས་དཔའི་སྤྱོད་པ་སྤྱད་ནས་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས་སོ། །འོད་སྲུང་དེ་བཞིན་གཤེགས་པས་སེམས་ཅན་རྣམས་ལ་ཕན་གདགས་པའི་ཕྱིར་ཅི་ཙམ་དུ་དཀའ་བ་མཛད་པ་ལ་ལྟོས། འོད་སྲུང་བསྐལ་པའི་སྙིགས་མ་འདི་ལྟ་བུ་ཟད་པའི་དུས་ན་ངས་སྨད་པར་མི་བྱའོ། །འོད་སྲུང་ཐ་ན་སེམས་ཅན་
གཅིག་གིས་ངའི་ཆོས་ཤེས་པ་དང་ཐམས་ཅད་ལག་ན་དབྱིག་པ་ཐོགས་ཤིང་ལག་ན་མཚོན་ཐོགས་ཏེ་ངའི་གན་དུ་རྒྱུག་ཅིང་འོང་བར་མི་སེམས་པ་དེ་ཡང་ངོ་མཚར་ཤིན་ཏུ་ཆེའོ། །དེ་ཅིའི་ཕྱིར་ཞེ་ན། འོད་སྲུང་སྐྱེས་བུ་དམ་པའི་ཆོས་ནི་འདི་དག་ཡིན་ཏེ། འདི་ལྟ་སྟེ། འདུས་བྱས་

ཐམས་ཅད་ལ་མངོན་པར་འདུ་མི་བྱེད་པ་ཤེས་པར་དཀའ་བའི་ཕྱིར་རོ། །བདག་ཏུ་ལྟ་བ་འམ། སེམས་ཅན་དུ་ལྟ་བ་འམ། སྲོག་ཏུ་ལྟ་བ་འམ། གང་ཟག་ཏུ་ལྟ་བ་འམ། འབྱུང་བར་ལྟ་བ་འམ། ཕུང་པོ་ལ་མངོན་པར་རྟེན་པ་འམ། ཚུལ་ཁྲིམས་སུ་
ལྟ་བ་འམ། སངས་རྒྱས་སུ་ལྟ་བ་འམ། ཆོས་སུ་ལྟ་བ་འམ། དགེ་འདུན་དུ་ལྟ་བ་འམ། མྱ་ངན་ལས་འདས་པར་ལྟ་བ་འམ། གང་ལ་ལ་མྱ་ངན་ལས་འདས་པར་ལྟ་བ་དེ་དག་ཐམས་ཅད་ནི་དེ་བཞིན་གཤེགས་པས་ལོག་པར་ལྟ་བར་མཁྱེན་ཏོ། །དེ་ཅིའི་ཕྱིར་ཞེ་ན། འོད་
སྲུང་དེ་བཞིན་གཤེགས་པ་ནི་མྱ་ངན་ལས་འདས་པ་ལ་མི་དགོངས་ཤིང་མྱ་ངན་ལས་འདས་པ་མི་དམིགས་པའི་ཕྱིར་རོ། །འོད་སྲུང་གང་དག་མྱ་ངན་ལས་འདས་པ་ལ་སེམས་ཤིང་དམིགས་པ་དེ་དག་ཐམས་ཅད་ནི་དེ་བཞིན་གཤེགས་པས་ལོག་པར་ལྟ་བར་མཁྱེན་ཏོ། །གང་
དག་ལོག་པར་ལྟ་བ་དེ་དག་ནི་མི་ཤེས་པ་ཞེས་བྱའོ། །གང་དག་མི་ཤེས་པ་དེ་དག་ནི་སྨས་པའོ། །གང་དག་སྨས་པ་དེ་དག་ནི་བྱིས་པའོ། །བྱིས་པ་གང་ཡིན་པ་དེ་དག་ལ་སངས་རྒྱས་ཀྱི་བྱང་ཆུབ་ཀྱིས་ཅི་ཞིག་བྱ་སྟེ། དེ་དག་ནི་ཐ་ན་མཐོ་རིས་སུ་སྐྱེ་བ་དང་ཡང་རིང་ངོ་། །
འོད་སྲུང་མ་འོངས་པའི་དུས་ན་དགེ་སློང་ལོ་ཉི་ཤུ་འམ། ལོ་བཞི་བཅུ་འམ། ལོ་ལྔ་བཅུ་འམ། དྲུག་ཅུ་འམ། བདུན་ཅུ་འམ། བརྒྱད་ཅུ་འམ། དགུ་བཅུ་འམ། ལོ་བརྒྱ་ཐུབ་སྟེ། རྒ་བས་ཟིལ་གྱིས་ནོན་པ། ཆོས་གོས་ཀྱིས་བརྒྱན་པ། མགོ་བྲེགས་པ། ལུས་བསླུས་
པ། རྒས་པ། གནས་བརྟན་དུ་ཆུད་པ། གཏི་མུག་པ། འཁོགས་པ། གཟི་བརྗིད་ཉམས་པ། ལོག་པར་ཞུགས་པ་དག་འབྱུང་སྟེ། དེ་དག་འཆི་བའི་དུས་ཀྱི་ཚེ་སྡིག་པ་འདོད་པས་ཟིལ་གྱིས་ནོན་ནས་བསམ་བཞིན་དུ་ལྷོད་པའི་ཆོས་རྣམས་ཀྱིས་གནས་ཏེ། དེ་དག་གནས་གསུམ་
གྱིས་རྟོགས་པ་བརྗོད་པར་འགྱུར་རོ། །གསུམ་གང་ཞེ་ན། འདི་ལྟ་སྟེ། ཡང་ན་སྤྱོད་ལམ་ཀུན་ཏུ་སྟོན་པས་སམ། ཡང་ན་སྤྱོད་པ་འཛིན་པས་སམ། ཡང་ན་མཛུབ་མོ་བསྒྲེང་བ་སྟེ། གནས་གསུམ་པོ་འདི་དག་གིས་རྟོགས་པ་བརྗོད་པར་འགྱུར་རོ། །དེ་དག་ལྷག་པའི་ང་

རྒྱལ་དུ་ལྟུང་བས་འཆི་བའི་དུས་ཀྱི་ཚེ་འགྱོད་པའི་སེམས་ཀྱིས་འཆི་བའི་དུས་བྱེད་པར་འགྱུར་ཏེ། དེ་དག་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །འོད་སྲུང་དེ་ལྟ་བས་ན་ཁྱོད་མོས་པར་བྱ། ཁྱོད་
ཀྱིས་ཁོང་དུ་ཆུད་པར་བྱ་སྟེ། ཅི་ནས་ཀྱང་དགེ་བའི་བཤེས་གཉེན་དང་། དོན་འདོད་པ་དང་། སྙིང་བརྩེ་བ་ཅན་དུ་བྱ་ཞིང་འདི་ལྟ་སྟེ། དཔེར་ན་ཀུན་ཏུ་རྒྱུ་རྩ་བ་ཅན་དང་། འཆིང་བ་པ་བཞིན་དུ་ཕྱིས་འགྱོད་པར་མི་བྱའོ། །འོད་སྲུང་བདག་ཏུ་ལྟ་བ་ལ་རབ་ཏུ་འབྱུང་བར་ང་
སྐབས་མི་འབྱེད་དེ། སེམས་ཅན་དུ་ལྟ་བ་ལ་མ་ཡིན། སྲོག་ཏུ་ལྟ་བ་ལ་མ་ཡིན་ཞིང་། གང་ཟག་ཏུ་ལྟ་བ་ལ་རབ་ཏུ་འབྱུང་བའི་སྐབས་མི་འབྱེད་དོ། །གང་དག་ལ་སྐབས་མ་ཕྱེ་བ་དེ་དག་བསྟན་པ་འདི་ལ་རབ་ཏུ་བྱུང་ཞིང་རྐུན་མ་དེ་དག་དད་པས་བྱིན་པ་ཡོངས་སུ་སྤྱོད་དེ། ཡང་
དག་པའི་དགེ་སློང་ཚུལ་ཁྲིམས་དང་ལྡན་པ་ནི་མ་ཡིན་ནོ། །འོད་སྲུང་མིས་ཞག་དྲུག་གི་བར་དུ་ཟན་མ་ཟོས་པ་ནི་སླའི། བསྟན་པ་འདི་ལ་རབ་ཏུ་བྱུང་ནས་འདི་ལྟ་སྟེ། བདག་ཏུ་ལྟ་བའམ། སེམས་ཅན་དང་སྲོག་ཏུ་ལྟ་བའམ། གང་ཟག་ཏུ་ལྟ་བའམ། མྱ་ངན་ལས་འདས་
པའི་བར་དུ་ལྟ་བས་དད་པས་བྱིན་པ་ཡོངས་སུ་སྤྱད་པ་ནི་དེ་ལྟ་མ་ཡིན་ནོ། །དེ་ལ་བྱང་ཆུབ་སེམས་དཔས་བདག་ཏུ་ལྟ་བར་མི་འགྱུར་བ་དང་། སེམས་ཅན་དུ་ལྟ་བར་མི་འགྱུར་བ་དང་། སྲོག་ཏུ་ལྟ་བར་མི་འགྱུར་བ་དང་། གང་ཟག་ཏུ་ལྟ་བར་མི་འགྱུར་བ་དང་། འབྱུང་བར་ལྟ་བར་
མི་འགྱུར་བ་དང་། མྱ་ངན་ལས་འདས་པར་ལྟ་བར་མི་འགྱུར་བར་བྱ་ཞིང་ལྟ་བ་ཐམས་ཅད་སྤང་བའི་ཕྱིར་ཆོས་བསྟན་པར་བརྩོན་འགྲུས་བརྩམ་པར་བྱའོ། །འོད་སྲུང་སྐྱེས་བུ་དམ་པ་དེ་ལྟ་བུ་དེ་དག་ལ་ངས་མདོ་སྡེ་འདི་ལྟ་བུ་འདི་དག་རྗེས་སུ་གཏད་དོ། །དེ་ཅིའི་ཕྱིར་ཞེ་ན། འདི་ལྟར་
དེ་དག་ནི་ང་ཅི་འདྲ་བ་དེ་འདྲ་བར་འགྱུར་བར་འདོད་པའི་ཕྱིར་རོ། །གང་དག་དེ་འདྲ་བར་འགྱུར་བར་འདོད་པ་དེ་དག་ནི་ང་འདྲ་བ་རྣམས་ཀྱིས་བརྡར་བྱས་པའོ། །གང་དག་ངེད་ཀྱིས་བརྡར་བྱ་བ་དེ་དག་གིས་ངེད་ལ་བསྐུལ་བར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་

བཅད་པ་འདི་དག་བཀའ་སྩལ་ཏོ། །གང་དག་སྤྲོས་པ་མི་མངའ་བ། །འཇིག་རྟེན་མགོན་རྣམས་མ་གཏོགས་པར། །སེམས་ཅན་གནོད་པས་ཉེན་གྱུར་པ། །དེ་དག་རྣམས་ཀྱི་སྐྱབས་མེད་དོ། །དམན་ཞིང་གོལ་བའི་ལམ་ཞུགས་པ། །སེམས་ཅན་
གནོད་པར་གྱུར་རྣམས་ལ། །གང་གིས་ངན་འགྲོར་འགྲོ་བ་ཡི། །འདོད་ཆགས་ཕྱིར་ཞིང་རབ་ཏུ་འཕེལ། །འདྲེན་པ་མེད་ཅིང་མགོན་མེད་པའི། །དགོན་པ་ལ་ནི་རབ་ཏུ་གནས། །གང་ན་བདེ་བ་མེད་པ་ཡི། །ལམ་དེ་ལ་ནི་རབ་ཏུ་ཞུགས། །དཔེར་ན་མདའ་གཞུ་མ་ཐོགས་
པའི། །ཚོང་པ་ལམ་དུ་ཞུགས་གྱུར་པ། །དེ་ནི་ཆོམ་པོས་བཅོམ་ནས་སུ། །དེ་ལས་ནོར་རྣམས་ཀུན་ཕྲོགས་ཏེ། །སྡུག་བསྔལ་ལས་བྱུང་གང་གི་ནོར། །རྣམ་པར་ཆུད་གཟན་བྱས་འོངས་ཏེ། །དངོས་པོ་གང་དང་གང་བཟུང་བ། །དེ་ལས་ཕྱིར་ཡང་གནོད་པ་འབྱུང་། །
དེ་བཞིན་འདི་ན་ཁ་ཅིག་ཀྱང་། །ཆོས་ཀྱི་བྱ་བ་འོངས་པ་ཡང་། །སྔོན་གྱི་དགེ་བ་དམ་པ་མཆོག །ནོར་དེ་སྤྱད་ནས་འོངས་པ་ཡིན། །དེ་དག་འདི་ན་མགོ་བྲེགས་སྟོན། །བྱིས་པའི་ལྟ་བའི་དབང་དུ་སོང་། །བདག་དང་སྲོག་དང་དེ་བཞིན་དུ། །གང་ཟག་འདུ་ཤེས་འཛིན་པར་
འགྱུར། །དགེ་སློང་གང་དག་སྟོང་ཉིད་སྨྲ། །གང་ཟག་ལ་ནི་མི་སྟེན་པ། །དེ་ལ་སྡང་བའི་སེམས་བསྐྱེད་ནས། །མྱུར་དུ་ངན་འགྲོར་འགྲོ་བར་འགྱུར། །གནོད་པའི་སེམས་ནི་བྱེད་པར་འགྱུར། །གཅིག་ལ་གཅིག་ནི་གནོད་པར་བྱེད། །ཡོད་པ་མ་ཡིན་སྐུར་པ་འདེབས། །
དེ་ལ་དེས་ནི་ཁྲེལ་བར་འགྱུར། །ལུས་ཀྱིས་གནོད་ཅིང་ངག་གིས་གནོད། །ཡིད་ནི་ཤིན་ཏུ་གཡོ་དང་ལྡན། །གང་དག་ཕྱིན་ཅི་ལོག་ལྟ་བ། །དེ་དག་འགྲོ་བ་ཤིན་ཏུ་སྡིག །སྡིག་པའི་ལས་རྣམས་བྱས་ནས་སུ། །མྱུར་དུ་ངན་འགྲོར་འགྲོ་བར་འགྱུར། །སྡུག་བསྔལ་རྣམས་
ཀྱིས་གནོད་གྱུར་ལ། །དཔུང་གཉེན་མེད་ཅིང་སྐྱབས་ཀྱང་མེད། །མ་འོངས་དུས་ན་དགེ་སློང་དག །གནོད་སེམས་དཔའ་བ་འབྱུང་འགྱུར་ཏེ། །གང་དག་བྱང་ཆུབ་རྗེས་ཞུགས་པའི། །དགེ་སློང་རྣམས་ལ་གནོད་བྱེད་འགྱུར། །ཤིན་ཏུ་མི་བཟད་འགྱུར་བ་དག །མདོ་སྡེ་

འདི་འདྲ་འདི་དག་སྤོང་། །ཤཱཀྱ་སེང་གེའི་བསྟན་པ་ལ། །ཕྱིར་ཞིང་དད་པར་མི་འགྱུར་རོ། །གཅིག་ལ་གཅིག་ནི་གནོད་པའི་སེམས། །ཤིན་ཏུ་ཆེན་པོ་བྱེད་པར་འགྱུར། །གཅིག་ལ་གཅིག་ནི་མི་སྙན་པ། །ཕྱོགས་ཕྱོགས་དག་ཏུ་སྒྲོགས་པར་འགྱུར། །ཡོད་པ་མ་ཡིན་སྐུར་
འདེབས་ཤིང་། །དེ་ལ་དེ་དག་ཁྲེལ་བར་འགྱུར། །སྡིག་པའི་བཤེས་གཉེན་དཔུང་སྐྱེ་ཞིང་། །དེ་ན་དེས་པ་མཐུ་ཆུང་འགྱུར། །དམ་ཆོས་མཐུ་ཆུང་བྱས་ནས་སུ། །སྡིག་པ་ཅན་དག་དཔུང་སྐྱེས་ནས། །ང་སྲས་ཐུགས་ལས་སྐྱེས་པ་ཡི། །དགེ་སློང་དེ་དག་འདོང་བར་
འགྱུར། །ཕྱོགས་གང་དུ་ནི་འདོང་སྙམ་ཞིང་། །གང་དུ་དགེ་བར་འགྱུར་བ་དང་། །སྡིག་པ་རྣམས་ལས་གྲོལ་འགྱུར་ཞེས། །དེ་ལ་སྙིང་རྗེ་སྐྱེ་བར་འགྱུར། །དེ་ཕྱིར་དེ་དག་མདོ་སྡེ་འདི། །དེ་ཡི་ཚེ་ན་ཡིད་ལ་འཛིན། །མཐའ་འཁོབ་ཏུ་ནི་དགའ་གྱིས་ཤེས། །འཇིག་
རྟེན་མགོན་གྱིས་བཀའ་སྩལ་གྱིས། །ཚུར་ཤོག་སངས་རྒྱས་བསྔགས་པ་ཡི། །མཐའ་འཁོབ་དེར་ནི་འདོང་བར་བྱ། །རྣམ་པར་འཇིག་པའི་དུས་བབ་པ། །ད་ལྟར་དེས་པ་ཤིན་ཏུ་དཀོན། །དེ་ན་ཁ་ཅིག་འདི་སྐད་འཛེར། །གང་དུ་དྲང་སྲོང་ཆེན་པོ་དེས། །བླ་མེད་བྱང་
ཆུབ་བརྙེས་གྱུར་པ། །དེར་ནི་མྱུར་འདོང་ཚུར་ཤོག་ཤིག །དེ་ན་ཁ་ཅིག་འདི་སྐད་འཛེར། །དེས་པ་འདི་ནི་ལེགས་པར་སྨྲས། །ཡུལ་རྒྱུ་འབྲས་བུ་ཡོད་དོ་ཞེས། །འཇིག་རྟེན་མགོན་གྱིས་བཀའ་སྩལ་ཏོ། །བྱང་ཆུབ་ས་ནི་ཡིད་འོང་བ། །དེར་འདོང་བ་ནི་ཆེས་སླ་ཡི། །
གནོད་པའི་སེམས་ཀྱིས་འདིར་གཙེས་ནས། །འཆི་འགྱུར་དེ་ལྟ་མ་ཡིན་ཞེས། །ང་ཡི་ཕྱིར་ནི་ཡུལ་རྒྱུ་ཞིང་། །དགེ་སློང་དེ་དག་འདོང་བར་འགྱུར། །སངས་རྒྱས་བཞུགས་བཞུགས་རབ་བཟང་བ། །གནས་ནི་དེར་ཡང་འདོང་བར་འགྱུར། །འཆག་ས་དང་ནི་བཞུགས་ས་དང་། །
རྡོ་ལེབ་ཤིང་དྲུང་སྟོངས་གྱུར་པ། །དེར་ནི་དེ་དག་འདུས་ནས་སུ། །ཡང་དང་ཡང་དུ་ངུ་བར་འགྱུར། །འདིར་ནི་དྲང་སྲོང་ཆེ་དེ་ཡི། །འཆག་ས་ཡོངས་སུ་སྤྱད་པ་སྟེ། །དེ་ཡི་ཚེ་ན་དེར་བྱུང་བ། །སངས་རྒྱས་དེ་ནི་མ་མཐོང་ངོ་། །འདིར་ནི་དྲང་སྲོང་ཆེན་པོ་དེས། །འདུས་བྱས་

ཐམས་ཅད་མི་རྟག་ཅེས། །ཆོས་ཀྱི་དམ་པ་བསྟན་པ་མཛད། །དེ་ཡང་བདག་ཅག་དེང་མ་མཐོང་། །མི་དང་མི་མ་ཡིན་རྣམས་དང་། །ལྷ་དང་ཀླུ་རྣམས་ལྷགས་གྱུར་ནས། །ལེགས་པར་གསུངས་པས་ཚིམ་མཛད་པ། །དེ་ཡང་བདག་ཅག་སྟོངས་པར་
མཐོང་། །བྱང་ཆུབ་སྙིང་པོ་དམ་པ་མཆོག །སངས་རྒྱས་ས་དང་ཉེར་དོང་སྟེ། །དེ་དག་དེར་ནི་ཚོགས་གྱུར་ནས། །ཚུལ་བཞིན་དུ་ནི་སེམས་པར་འགྱུར། །འདིར་ནི་འཇིག་རྟེན་མགོན་པོ་དེས། །བྱང་ཆུབ་བླ་ན་མེད་པ་བརྙེས། །འདིར་ནི་སྡིག་ཅན་དཔུང་བཅས་པ། །ཝ་བཞིན་
ཤིན་ཏུ་སྐྲག་པར་མཛད། །གང་ན་སངས་རྒྱས་གདན་ཡོད་པ། །འདི་ནི་ས་ཡི་སྙིང་པོ་སྟེ། །འདས་དང་གང་དག་འབྱུང་འགྱུར་བ། །ཀུན་གྱི་གདན་ཡང་འདི་ཡིན་ནོ། །འདི་ཉིད་དུ་ནི་དཔའ་ཆེན་ལ། །ལྷ་མང་བྱེ་བས་བསྟི་སྟང་བྱས། །ཞག་བདུན་སྐྱིལ་མོ་ཀྲུང་གཅིག་གིས། །ཤིང་
འདི་ལ་ནི་གཟིགས་པ་མཛད། །དེར་ཡང་བསྟི་སྟང་བྱས་ནས་སུ། །གང་དུ་འཁོར་ལོ་རབ་བསྐོར་ཅིང་། །ཚངས་པའི་འཇིག་རྟེན་གོ་གྱུར་པ། །ཆོས་བསྟན་པར་ནི་འདོང་པར་འགྱུར། །དགེ་སློང་དེ་དག་དེར་དོང་ནས། །ཡང་དང་ཡང་དུ་ངུ་བར་འགྱུར། །དཔའ་བོ་འདིར་ནི་
གཤེགས་ནས་སུ། །དེ་ཚེ་ལྔ་སྡེ་བཏུལ་བ་མཛད། །ལྔ་སྡེས་སངས་རྒྱས་མཐོང་ནས་སུ། །ཡིད་མི་བདེ་བ་སྐྱེས་གྱུར་ཏེ། །གང་ཡང་ལྡང་བར་མི་བྱེད་ཅེས། །འོག་ཁྲིམས་དེ་ནི་བཅས་པར་འགྱུར། སྟོན་པ་ཐུགས་རྗེ་ལྡན་པ་དེས། །སྲོག་ཆགས་རྣམས་ལ་ཐུགས་རྗེ་མཛད། །
འཆི་མེད་འབྲས་བུ་ཐོབ་འགྱུར་བ། །དགེ་སློང་ལྔ་སྡེ་རྣམས་ལ་གདམས། །ཆོས་ཀྱི་འཁོར་ལོར་ཕྱག་འཚལ་ཅིང་། །ཡང་དང་ཡང་དུ་དུས་བྱས་ནས། །གང་དུ་མྱ་ངན་འདས་གྱུར་ཏེ། །ཐ་མར་སངས་རྒྱས་མཐོང་བར་འདོད། །སྲོག་ཆགས་ཀུན་ལ་ཕན་པའི་ཕྱིར། །འདིར་
ནི་འཇིག་རྟེན་མགོན་པོ་དེས། །སྐུ་ཡི་ཚིགས་ནི་དབྱེ་བ་མཛད། །འདིར་ནི་སངས་རྒྱས་མྱ་ངན་འདས། །ཤཱཀྱ་སེང་གེ་ཐུབ་པ་ཆེ། །ཀྱེ་མ་སངས་རྒྱས་ཞེས་ཀྱང་འཛེར། །ཁྱོད་ཀྱི་སྒྲ་ནི་ཐོས་གྱུར་གྱི། །ཁྱོད་ནི་དེ་རིང་མ་མཐོང་ངོ་། །འདིར་ནི་དྲང་སྲོང་ཆེན་པོ་དེས། །དགེ་སློང་

རབ་བཟང་ཐ་མ་པ། །འདི་ནི་ཐ་མ་པར་གྱུར་ཞེས། །ཡེ་ཤེས་ཀྱིས་ནི་སྔ་ནས་མཁྱེན། །ཁ་ཅིག་རྣམ་པར་རྒྱུ་ཞིང་འཆི། །ཁ་ཅིག་ལེགས་པར་གནས་ཤིང་འཆི། །ཁ་ཅིག་རྒྱུ་བ་བྱས་ནས་འཆི། །དེ་དག་ཀུན་ཀྱང་བདེ་འགྲོར་འགྲོ། །དེ་ནས་ཕྱི་མའི་དུས་ཀྱི་ཚེ། །གང་དག་ཚུལ་
ཁྲིམས་རབ་གནས་པ། །དེ་དག་གི་ནི་བསྟན་པ་འདི། །ཤིན་ཏུ་རྒྱ་ཆེན་འགག་པར་འགྱུར། །དགེ་སློང་གང་དག་ཁྲིམས་འཆལ་པ། །དེ་དག་ཐམས་ཅད་མཆོད་པར་འགྱུར། །དད་པས་བྱིན་པ་དེ་སྤྱད་ནས། །མྱུར་དུ་ངན་འགྲོར་འགྲོ་བར་འགྱུར། །ཕྱི་མའི་དུས་
ནའང་ཤེས་རབ་ཅན། །མྱུར་དུ་བདེ་འགྲོར་འགྲོ་འགྱུར་བ། །ཅི་འདྲ་དེ་ཚེ་འབྱུང་འགྱུར་བ། །དགེ་སློང་རྣམས་ཀྱི་བྱེ་བྲག་ལྟོས། །དེ་ན་འཇིག་རྟེན་སྣང་བྱེད་པ། །འཇིག་རྟེན་ལ་ནི་སྙིང་བརྩེ་བ། །བྱང་ཆུབ་སེམས་དཔའ་ཤེས་རབ་ཆེ། །བྱམས་པའི་སེམས་ཀྱིས་ཕན་བྱེད་
རྣམས། །དགའ་ཞིང་མགུ་བའི་སེམས་ཀྱིས་ནི། །དེ་དག་ཞལ་ཏ་བྱེད་པར་འགྱུར། །བདག་ཅག་སངས་རྒྱས་འགྱུར་བར་བྱ། །བདག་ཅག་བྱམས་པ་མཉེས་པར་བྱ། །སྲོག་ཆགས་ཀུན་གྱི་མདུན་དུ་ནི། །བདག་ཅག་སྟོན་ལ་བསྟི་སྟང་བྱ། །ཇི་ལྟར་བདག་ཅག་བསམས་
པ་བཞིན། །ཐམས་ཅད་མཁྱེན་པ་ལུང་སྟོན་འགྱུར། །མཐུ་བོ་ཆེ་ནི་དེ་དག་གི །དོན་ཕྱིར་ངས་ནི་བཤད་པར་བྱ། །དེ་དག་གིས་ནི་མངོན་མཐོང་བཞིན། །སངས་རྒྱས་དེས་ནི་དེ་དག་གཟིགས། །ངས་ནི་འདི་དག་དབུགས་དབྱུང་ངོ་། །ང་ཡང་འདི་འདྲར་འགྱུར་བྱ་ཞེས། །
བྱང་ཆུབ་ཡན་ལག་ཡོངས་ཚོལ་ཞིང་། །སངས་རྒྱས་ཀུན་ལ་ཕྱག་འཚལ་ལོ། །དེ་ན་བུད་མེད་གང་དག་ཀྱང་། །བྱང་ཆུབ་མཆོག་ལ་ཞུགས་གྱུར་པ། །དེ་དག་ཀུན་ཀྱང་དབུགས་དབྱུང་ངོ་། །དེ་བཞིན་གཤེགས་པ་དཔག་ཏུ་མེད། །བུད་མེད་མཚན་རྣམས་སྤངས་གྱུར་ནས། །མྱུར་
དུ་སྐྱེས་པར་རེད་པར་འགྱུར། །སངས་རྒྱས་བྱམས་པ་དེ་མཐོང་ནས། །དེ་དག་བསྟི་སྟང་བྱེད་པར་འགྱུར། །འདུན་པ་དྲག་པོ་བསྐྱེད་བྱས་ལ། །ཤེས་ཉེན་རྣམས་ནི་བསླབ་བྱས་ན། །ཡོངས་སུ་ཚོལ་བ་དེ་དག་ཀུན། །དཀའ་བ་མེད་པར་རྙེད་པར་འགྱུར། །འདུན་པ་དྲག་ཅིང་ཁྲིམས་

ལྡན་དང་། །མང་དུ་ཐོས་པར་གྱུར་ནས་སུ། །དེ་ཚེ་སངས་རྒྱས་ས་སྟོན་པ་པོ། །བྱམས་པས་དེ་དག་ལུང་སྟོན་འགྱུར། །དེ་བས་དོན་འདི་ཐོས་གྱུར་ནས། །དད་པ་བཟང་པོ་སྐྱེད་པར་འགྱུར། །སེམས་ཅན་ཀུན་ལ་ཕན་གདགས་ཕྱིར། །སེམས་ནི་
བརྟན་པོར་བྱེད་པར་འགྱུར། །འདི་ནི་མི་གང་ཡོངས་ཚོལ་བ། །གནས་དེ་ཅི་ཕྱིར་རྙེད་མི་འགྱུར། །གང་ལ་ཤེས་རབ་བརྩོན་འགྲུས་ཡོད། །དེ་ལ་བྱང་ཆུབ་དཀོན་པ་མེད། །དགའ་ཞིང་མགུ་བའི་སེམས་ཀྱིས་ནི། །གཡོ་དང་ལྡན་པར་ཡོང་མི་བྱ། །བྱམས་པའི་
སེམས་ནི་བསྒོམ་པར་བྱ། །བས་མཐའ་དགོན་པར་གནས་པར་བྱ། །འདི་ནི་བྱང་ཆུབ་སྤྱོད་པ་ཡིན། །གང་དག་འདི་ལ་གསོག་ཆོས་ཀྱིས། །གནས་འདིར་རབ་ཏུ་རྗོད་བྱེད་པ། །དེ་དག་ཆོམ་རྐུན་དྲག་པོ་ཆེ། །སེམས་ཅན་ཀུན་གྱིས་ཕྱག་བྱས་སོ། །གང་དག་བཟའ་
དང་བཏུང་བ་དང་། །རྙེད་དང་བཀུར་སྟིའི་དོན་གྱི་ཕྱིར། །ཆོས་རྣམས་འཐུན་པར་བཟུང་བྱས་ནས། །ཕན་ཚུན་དུ་ནི་འཆད་པར་འགྱུར། །དེ་དག་སྲོག་ནི་མཆོག་མིན་ཏེ། །དེ་དག་སྲོག་ནི་དོན་མེད་དོ། །དེ་ནི་འཆི་ཞིང་ཕོངས་པར་འགྱུར། །དེས་ནི་ངན་སོང་མྱུར་དུ་འགྱུར། །ཆོས་
ཀྱི་སྒོ་ནས་ཁ་ཅིག་ནི། །དགེ་སློང་མིན་ལ་དགེ་སློང་མིང་། །སོ་སོར་ཐར་པ་ལེགས་གསུང་དང་། །མདོ་སྡེ་བསྔགས་མིན་བརྗོད་པར་འགྱུར། །གང་དུ་རང་ཁྲིམས་ཕུན་སུམ་ཚོགས། །འདི་འདྲ་བ་དག་ངས་བཤད་པ། །དགེ་སློང་གཟུགས་ཀྱིས་སྤོང་འགྱུར་ཏེ། །དེ་དག་ལ་ནི་བཟང་འགྲོ་
མེད། །གང་ཞིག་ལྷར་བཅས་འཇིག་རྟེན་ལ། །དེ་སྙེད་སྐུར་པ་བཏབ་པ་བས། །གང་གིས་ཀུན་མཁྱེན་སྟོན་པ་ལ། །སྐུར་བཏབ་དེ་ནི་དེ་བས་མང་། །ལུས་ཀྱིས་ཀུན་ཏུ་བསྡམ་པར་བྱ། །ངག་གིས་ཡང་དག་བསྡམ་པར་བྱ། །ཡིད་ཀྱིས་སྡང་བར་མི་བསམ་སྟེ། །དེ་ཚེ་མྱ་ངན་འདས་པར་
གྱིས། །འོད་སྲུང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཤིང་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པའི་དགེ་སློང་རྣམས་ཀྱང་ཡོངས་སུ་མྱ་ངན་ལས་འདས་ལ། ལྷག་པའི་བསམ་པ་ཕུན་སུམ་ཚོགས་པའི་སེམས་ཅན་རྣམས་ཀྱང་འཆི་བའི་དུས་བྱས་ཏེ་ཟད་པར་གྱུར་པ་འབྱུང་

བའི་དུས་དེ་ཡོད་དེ། དམ་པའི་ཆོས་ཕྱི་མ་ལོ་ལྔ་བརྒྱ་པ་ཐ་མར་གྱུར་པ་ན་དགེ་སློང་བརྐམ་པ། ཆགས་པས་ཟིལ་གྱིས་ནོན་པ། ཆགས་པ་ཡ་ང་བས་ཟིལ་གྱིས་ནོན་པ། ཕྲ་མ་ཅན། གཏུམ་པ། །བརླང་བ། རྩུབ་པ། ཁྲོ་གཉེར་མང་བ། །ཆོས་གསུམ་ལ་གནས་པ་དག་འབྱུང་སྟེ། གསུམ་
གང་ཞེ་ན། དམན་པའི་ཐ་སྙད་ལ་གནས་པ་དང་། ཉོ་ཚོང་གི་སྤྱོད་པ་ལ་གནས་པ་དང་། བུད་མེད་དང་འདྲེ་ཞིང་གནས་པ་སྟེ། ཆོས་གསུམ་པོ་དེ་དག་ལ་གནས་པར་འགྱུར་རོ། །ཆོས་བཞི་ལས་ཡོངས་སུ་ཉམས་པར་འགྱུར་ཏེ། བཞི་གང་ཞེ་ན། ཚུལ་ཁྲིམས་ཀྱི་ཕུང་པོ་ལས་ཡོངས་སུ་ཉམས་པར་
འགྱུར་བ་དང་། བཟང་འགྲོར་འགྲོ་བ་ལས་ཡོངས་སུ་ཉམས་པར་འགྱུར་བ་དང་། འབྲས་བུ་ཐོབ་པ་ལས་ཡོངས་སུ་ཉམས་པར་འགྱུར་བ་དང་། སངས་རྒྱས་ལ་ཡང་དག་པ་ཇི་ལྟ་བ་བཞིན་དུ་བལྟ་བ་ལས་ཡོངས་སུ་ཉམས་པར་འགྱུར་བའོ། །ཆོས་བཞི་པོ་དེ་དག་དང་ལྡན་པ་དེ་རྣམས་ལ་སྐྱོ་བར་
བྱེད་པའི་ཆོས་བཞི་ཤིན་ཏུ་ཤས་ཆེ་བར་འགྱུར་ཏེ། བཞི་གང་ཞེ་ན། དེ་དག་ལ་ཕྲག་དོག་ཤིན་ཏུ་ཤས་ཆེ་བར་འགྱུར་བ་དང་། དེ་དག་ལ་ཁྲོ་བ་ཤིན་ཏུ་ཤས་ཆེ་བར་འགྱུར་བ་དང་། དེ་དག་ལ་ཁྱིམ་ལ་ལྷག་པར་ཆགས་པ་ཤིན་ཏུ་ཤས་ཆེ་བར་འགྱུར་བ་དང་། བདག་ཀྱང་ཡོངས་སུ་སྤངས་ཏེ་བརྐམ་
པས་ཟས་སོགས་པའི་གནས་ཀྱི་བུམ་པར་འཇོག་པར་འགྱུར་ཏེ། དེ་དག་ཆོས་གོས་ལ་ཞེན་ནས་ཆགས་པས་ཟིལ་གྱིས་ནོན་ནས་ཟ་མ་ཏོག་ལྟ་བུའི་ཆོས་མང་དུ་ཀུན་ཏུ་སྤྱོད་པར་འགྱུར། ཟ་མ་ཏོག་ལྟ་བུའི་ཆོས་ཡང་དག་པར་བླངས་ནས་གནས་པར་འགྱུར། གསོག་དང་ཡ་མ་བརླར་
འགྱུར་ཏེ། དེ་དག་ལ་དགེ་སྦྱོང་གི་ཆོས་གནས་པར་མི་འགྱུར་རོ། །ཆོས་འདི་ལྟ་བུ་འདི་དག་ཐོས་ནས་གནས་བཞི་ལྷག་པར་ཡོངས་སུ་ཚོལ་བར་འགྱུར་ཏེ། བཞི་གང་ཞེ་ན། ཆོས་སྤོང་བ་ལྷག་པར་ཡོངས་སུ་ཚོལ་བར་འགྱུར་བ་དང་། མ་གནང་བ་སྨྲ་བར་འགྱུར་བ་དང་།
བུད་མེད་འབའ་ཞིག་འཁོད་པ་ལ་ཆོས་འཆད་པར་འགྱུར་བ་དང་། དེ་དག་དེ་ལྟ་བུ་བྱེད་ཅིང་སོ་སོར་ཐར་པ་སྤོང་བ་ལྷག་པར་ཡོངས་སུ་ཚོལ་བར་འགྱུར་བ་སྟེ། དེ་དག་མདོ་སྡེ་འདི་ལྟ་བུ་འདི་དག་ཐོས་ནས། དེ་བས་ཀྱང་ཆེར་ཆོས་ཀྱིས་ཕོངས་པར་འགྱུར་བའི་ལས་བྱེད་པར་

འགྱུར་རོ། །འོད་སྲུང་འདི་ལྟ་སྟེ། དཔེར་ན་ཁྱི་ཁྲོ་བའི་སྣར་མཁྲིས་པས་བསྐུས་ན་འོད་སྲུང་འདི་ཇི་སྙམ་དུ་སེམས། ཁྱི་དེ་དེ་བས་ཀྱང་ཆེར་ཤིན་ཏུ་ཁྲོ་བར་འགྱུར་རམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ། འོད་སྲུང་དེ་བཞིན་དུ་སྐྱེས་བུ་དམ་པ་མ་ཡིན་པ་ཁྱི་དང་འདྲ་བ་འདྲེ་དང་འདྲ་བ་དེ་དག་འབྱུང་བར་འགྱུར་ཏེ། དགེ་སློང་མདོ་སྡེ་པ་བསམ་པའི་གཞི་ལ་གནས་པ། ཆོས་འདི་ལྟ་བུ་འཛིན་པ། ཆོས་འདི་ལྟ་བུ་སྟོན་པ་དག་གིས་དེ་དག་ཡང་དག་པར་འདོད་པ་ཆུང་བ་ལ་བཀོད་ཅིང་
འདོད་པ་ཆུང་བའི་བསྔགས་པ་སྨྲར་བཅུག་ན་དེ་དག་གིས་ཐོས་ནས་མི་དགའ་བར་འགྱུར། སྒྱིད་ལུག་པར་ཡང་འགྱུར། ཞུམ་པར་འགྱུར། ཡོངས་སུ་གདུང་བར་འགྱུར། ཁྲོ་བས་ཟིལ་གྱིས་ནོན་པར་འགྱུར་ཏེ། བདག་ཅག་དུས་མ་ཡིན་པ་དང་། ཕྱོགས་མ་ཡིན་པར་བཀོད་
དོ། །བདག་ཅག་དུས་མ་ཡིན་པར་བཀོད་པར་གྱུར་པ་ལས་སོ་སོར་རྗེས་སུ་སྦྱོར་བ་བྱས་ཏེ་ཅི་བྱེད་པ་བྱེད་པར་འགྱུར་ཞེས་སྨྲ་བར་འགྱུར། མདོ་སྡེ་འདི་ལྟ་བུ་འདི་དག་ཐོས་ནས་སྤོང་བར་འགྱུར། རལ་གྲིའི་སོ་དང་། མདུང་ཐུང་ལྟ་བུའི་ཁྲོ་བ་རིག་པར་འགྱུར། དེ་དག་འདོད་པ་
ཆུང་བའི་བསྔགས་པ་མི་སྨྲ་བས་འདི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་ཚིག་ཏུ་སྨྲ་བར་འགྱུར་ཏེ། དེ་དག་འདོད་པ་ཆུང་བ་མ་ཡིན་ཞིང་འདོད་པ་ཆེ་བ་ཡོངས་སུ་འཛིན་ཏོ། །འོད་སྲུང་ངས་ནི་རྣམ་གྲངས་དུ་མས་འདོད་པ་ཆུང་བའི་བསྔགས་པ་གསུངས་ཏེ། འཚོ་བ་
ཡོངས་སུ་དག་པས་ཆོག་ཤེས་པ་དང་། གསོ་སླ་བ་དང་། དགང་སླ་བ་དང་། ཡོ་བྱད་བསྙུངས་པ་དང་། སྦྱངས་པའི་ཡོན་ཏན་དང་། མཛེས་པ་དང་། དགོན་པ་ལ་གནས་པ་དང་། བརྩོན་འགྲུས་བརྩམས་པའི་བསྔགས་པ་གསུངས་སོ། །ཁྱེད་ཟ་མ་ཏོག་ལྟ་བུའི་ཆོས་ལ་ཀུན་
ཏུ་སྤྱོད་པ་མང་བར་མ་བྱེད་ཅིག །དེ་ཅིའི་ཕྱིར་ཞེ་ན། ཆོས་འདི་དག་ནི་སྙིང་སྟོབས་སྐྱེད་པ་ཡིན་པའི་ཕྱིར་ཏ་ཁྱོད་གཡོ་མ་བྱེད་ཅིག །ཆོས་འདི་དག་ནི་སྙིང་སྟོབས་སྐྱེད་པ་ཡིན་གྱིས་ཁྱེད་ཁྲོ་བ་ལ་གདུ་བར་མ་བྱེད་ཅིག །ཁྱེད་དངོས་པོ་ལེན་པར་མ་བྱེད་ཅིག །ཁྱེད་དངོས་པོ་མེད་པར་

གྱིས་ཤིག །ཁྱེད་མཚན་མའི་འདུ་ཤེས་མ་བྱེད་ཅིག །ཁྱེད་གནས་མེད་པ་དང་འདྲིས་པ་མེད་པར་གྱིས་ཤིག །ཁྱེད་བ་ལང་དང་བོང་བུ་སྡུད་པར་མ་བྱེད་ཅིག །ཁྱེད་ལེ་ལོའི་གནས་རྣམས་དང་ལྡན་པར་མ་བྱེད་ཅིག །ཁྱེད་མི་དགེ་བའི་ཆོས་སྤང་བ་དང་། དགེ་བའི་ཆོས་བསྒྲུབ་
པའི་ཕྱིར་བརྩོན་འགྲུས་རྩོམས་ཤིག །འོད་སྲུང་ངས་ནི་རྣམ་གྲངས་དུ་མས་དབེན་པ་བསྔགས་ཏེ། དགོན་པ་ལ་གནས་པ་དང་། འདུ་འཛི་མེད་པ་བསྔགས་སོ། །དེ་ལ་ཡོ་བྱད་མ་བསྙུངས་པ་ལ་གནས་པ། འདོད་པ་ཆེ་བ། སྡིག་པ་འདོད་པ། ཡོ་བྱད་མ་བསྙུངས་པའི་ཚུལ་ལ་
གནས་པ་དག་གིས་ཡོ་བྱད་བསྙུངས་པ་ལ་གནས་པ་འདི་ལྟ་བུ་འདི་དག་སྤོང་བར་འགྱུར་རོ། །འོད་སྲུང་འདི་ལྟ་སྟེ། དཔེར་ན་དབྱར་ཟླ་འབྲིང་པོ་ལ་མི་ཞིག་མར་འཐུངས་ལ་དེ་ཡང་ཤེས་རབ་འཆལ་པའི་རང་བཞིན་ཅན་ཞིག་པས་སྐོམ་ནས་ཆུ་ཚོལ་ཏེ། དེས་མི་ཞིག་ལ་ཆུ་བསླངས་པ་དང་།
དེས་འདི་སྐད་དུ་ཀྱེ་མི་ཁྱོད་མར་འཐུངས་ཀྱིས་ཆུ་འདོད་པར་མ་བྱེད་ཅིག །ཤི་བར་གྱུར་ཏ་རེ་ཞེས་སྨྲས་པ་དང་། དེ་ཁྲོ་བས་ཟིལ་གྱིས་ནོན་ནས་མི་དེ་ལ་མི་སྙན་པ་བརྗོད་ཅིང་གཤེ་ལ་དེའི་ཚིག་མ་མཉན་ཏེ། དེས་ཆུ་འཐུངས་ནས་འཆི་བའི་དུས་བྱེད་པ་དེ་བཞིན་དུ་འོད་སྲུང་གང་དག་དམིགས་
པ་ཅན་གྱི་རང་བཞིན་ཅན་བརྐམ་པ་ཡོན་ཏན་མ་ཡིན་པ་ལ་གནས་པའི་དགེ་སློང་དག་འབྱུང་བར་འགྱུར་ཏེ། དེ་དག་ལ་ཆོས་འདི་ལྟ་བུ་འཛིན་པའི་དགེ་སློང་དག་གིས་འདི་ནི་བྱ་བའོ། །འདི་ནི་བྱ་བ་མ་ཡིན་པའོ་ཞེས་བསྐུལ་ན་དེ་དེ་དག་ཁྲོ་བས་ཟིལ་གྱིས་ནོན་ནས་མི་སྙན་པ་བརྗོད་པར་འགྱུར།
གཤེ་བར་འགྱུར་ཏེ། མདོ་སྡེ་འདི་ལྟ་བུ་འདི་དག་དང་། དེ་བཞིན་གཤེགས་པའི་གདམས་པ་དང་། རྗེས་སུ་བསྟན་པ་སྤོང་བར་འགྱུར་རོ། །འོད་སྲུང་དེ་ལྟ་བས་ན་ད་ལྟར་ཕལ་ཆེར་དེ་བཞིན་གཤེགས་པ་དང་རྩོད་དོ། །འོད་སྲུང་དེ་བཞིན་གཤེགས་པ་དགེ་སློང་གི་དགེ་འདུན་ལ་བསླབ་
པའི་གཞི་འཆའ་ཞིང་སྟན་གཅིག་པར་ཟ་བར་བསྔགས་པ་ན་དགེ་སློང་བཟང་སྐྱོང་ཁྲོ་བས་ཟིལ་གྱིས་ནོན་ནས་ཟླ་བ་གསུམ་ན་ངའི་གན་དུ་འོངས་པ་ལ་ལྟོས། འོད་སྲུང་ཚངས་པར་སྤྱོད་པའི་སྙིང་པོ་མཆོག་འདི་ཉིད་ལ་གནས་སྐབས་འདི་ལྟ་བུ་འདི་བྱུང་ན་དེ་བཞིན་གཤེགས་པ་ཡོངས་སུ་མྱ་ངན་

ལས་འདས་ནས་ལྟ་ཅི་སྨོས། དགེ་སློང་ཟང་ཟིང་ལ་ཆགས་པ། ལྷུང་བཟེད་ལ་ཆགས་པ། ཆོས་གོས་ལ་ཆགས་པ། ན་བའི་གསོས་སྨན་དང་ཡོ་བྱད་ལ་ཆགས་པ། རྨུགས་པ་དང་གཉིད་ཀྱི་དབང་དུ་སོང་བ་དང་། །གནོད་སེམས་ལ་དཔའ་བའི་དགེ་སློང་རྣམས་མདོ་སྡེ་འདི་
ལྟ་བུ་འདི་དག་ཐོས་ན་དེ་བཞིན་གཤེགས་པ་ལ་ཡང་བསྟི་སྟང་མེད་པར་གྱུར་ན། དགེ་སློང་གང་དག་བྱ་བ་ལ་གནས་པ་རྣམས་ལ་ལྟ་ཅི་སྨོས། འོད་སྲུང་གང་ཆོས་རིན་པོ་ཆེ་འདི་ལྟ་བུ་འདི་ནུབ་པར་འགྱུར་བ་ནི་མ་ལེགས་པའོ། །ཤིན་ཏུ་མ་ལེགས་པའོ། །དེ་ལ་རིགས་ཀྱི་བུ་འམ།
རིགས་ཀྱི་བུ་མོ་དོན་འདོད་པ་དད་པས་ཕྱི་མའི་དུས། སྙིགས་མའི་དུས། ཤིན་ཏུ་འཆབ་པའི་དུས། རིགས་ཀྱི་བུ་མུ་གེ་བྱུང་བའི་དུས་དེ་ན་ངའི་བསྟན་པ་ལ་མདོ་སྡེ་ཟབ་མོ་འདི་ལྟ་བུ་འདི་དག་ཐོས་ནས་རིགས་པ་དང་ལྡན་པ་རྣམས་ལ་བརྗོད་པར་བྱའི་རིགས་པ་དང་མི་ལྡན་པ་རྣམས་ལ་ནི་
མ་ཡིན་ནོ། །དད་པ་རྣམས་ལ་བརྗོད་པར་བྱའི་མ་དད་པ་རྣམས་ལ་ནི་མ་ཡིན་ནོ། །འོད་སྲུང་ང་ཡང་ད་ལྟར་རིགས་པ་དང་ལྡན་པ་རྣམས་ལ་སྨྲའི་རིགས་པ་དང་མི་ལྡན་པ་རྣམས་ལ་ནི་མ་ཡིན་ནོ། །དད་པ་རྣམས་ལ་སྨྲའི་མ་དད་པ་རྣམས་ལ་ནི་མ་ཡིན་ནོ། །འོད་སྲུང་རྟ་དམུ་རྒོད་ནི་རྟ་ཅང་
ཤེས་ཀྱི་གོ་ཆ་མི་ལེན་ཏོ། །ལེན་ན་ཡང་དེ་ལ་དེ་ཡིད་མི་དགའ་བར་འགྱུར་ན་དུང་དང་། འཁར་རྔ་དང་། རྔ་བོ་ཆེ་དང་། རྫ་རྔའི་སྒྲ་བཟོད་པ་ལྟ་ཅི་སྨོས་ཏེ་དེ་ནི་གནས་མེད་དོ། །འོད་སྲུང་དེ་བཞིན་དུ་དགེ་སློང་ཚུལ་ཁྲིམས་འཆལ་པ་ཡང་སྐྱེས་བུ་དམ་པའི་ཆོས་ལ་ནམ་ཡང་བཟོད་པར་མི་
འགྱུར་རོ། །འོད་སྲུང་འདི་ལྟ་སྟེ། དཔེར་ན་རྟ་དམུ་རྒོད་དེ་ནི་འདྲོག་པར་འགྱུར་རོ། །འོད་སྲུང་དེ་བཞིན་དུ་དགེ་སློང་ཚུལ་ཁྲིམས་འཆལ་པ་ཡང་ཐ་ན་ཆོས་ཐམས་ཅད་ནི་བདག་མེད་པའོ་ཞེས་ཚིག་གཅིག་སྨྲས་ན། དེ་ལ་བདག་གི་འདུ་ཤེས་ཅན་འཇིགས་པར་འགྱུར། སྐྲག་པར་འགྱུར།
རྩོད་པར་འགྱུར་ན་ཉེ་བར་བསྟན་པ་ན་ལྟ་ཅི་སྨོས། གོ་ཆ་བགོས་ནས་བདུད་ཀྱི་སྡེ་བྱེ་བ་ཕྲག་བརྒྱ་ཕམ་པར་བྱ། ཇི་ལྟར་ཤིན་ཏུ་རྩོད་པར་མི་འགྱུར་བ་དེ་ལྟར་ཕ་རོལ་ཕམ་པར་བྱའོ། །དེ་དག་གི་གོ་ཆ་དེ་ནི་མི་ཤིགས་པའི་རྩ་བ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པའི་རྩ་བ་དང་།

མ་ཆགས་པའི་རྩ་བ་དང་། ཞེ་སྡང་མེད་པའི་རྩ་བ་དང་། གཏི་མུག་མེད་པའི་རྩ་བ་དང་། ཕྲག་དོག་མེད་པའི་རྩ་བ་དང་། འདོད་པ་སྤོང་བའི་རྩ་བ་དང་། གཅིག་པུར་གནས་པའི་རྩ་བ་དང་། མི་ཉལ་བའི་རྩ་བའོ། །ཐམས་ཅད་ཀྱི་ཐམས་ཅད་དུ་གནོད་སེམས་ཀྱི་སེམས་བསྐྱེད་པར་
མི་བྱ། ཐམས་ཅད་ཀྱི་ཐམས་ཅད་དུ་འདོད་ཆགས་ཀྱི་སེམས་བསྐྱེད་པར་མི་བྱ། གང་དུ་ཡང་རེ་བར་མི་བྱའོ། །གོ་ཆ་དེ་ནི་རེ་བ་མེད་པའི་རྩ་བ་ཞེས་བྱ་སྟེ། གོ་ཆ་དེ་ལྟ་བུ་བགོས་ནས་བྱང་ཆུབ་ཏུ་སེམས་བསྐྱེད་པར་བྱ། གང་ལ་ཡང་མངོན་པར་ཞེན་པ་མེད་པར་བྱའོ། །བདག་
ཏུ་འདུ་ཤེས་བསྐྱེད་པར་མི་བྱ་སྟེ། སེམས་ཅན་དུ་འདུ་ཤེས་མི་བསྐྱེད། སྲོག་ཏུ་འདུ་ཤེས་མི་བསྐྱེད། གང་ཟག་ཏུ་འདུ་ཤེས་མི་བསྐྱེད། བུད་མེད་དུ་འདུ་ཤེས་མི་བསྐྱེད། སྐྱེས་པར་འདུ་ཤེས་མི་བསྐྱེད། སའི་ཁམས་སུ་འདུ་ཤེས་མི་བསྐྱེད། ཆུའི་ཁམས་སུ་འདུ་ཤེས་མི་
བསྐྱེད། མེའི་ཁམས་སུ་འདུ་ཤེས་མི་བསྐྱེད། རླུང་གི་ཁམས་སུ་འདུ་ཤེས་མི་བསྐྱེད། འདོད་པའི་ཁམས་སུ་འདུ་ཤེས་མི་བསྐྱེད། གཟུགས་ཀྱི་ཁམས་སུ་འདུ་ཤེས་མི་བསྐྱེད། གཟུགས་མེད་པའི་ཁམས་སུ་འདུ་ཤེས་མི་བསྐྱེད། ཚུལ་ཁྲིམས་སུ་འདུ་ཤེས་མི་བསྐྱེད།
འཆལ་པའི་ཚུལ་ཁྲིམས་སུ་འདུ་ཤེས་མི་བསྐྱེད་ཅིང་སྟོང་པ་ཉིད་དུ་འདུ་ཤེས་བསྐྱེད་པར་མི་བྱ། ཐམས་ཅད་ལ་འདུ་ཤེས་བསྐྱེད་པར་མི་བྱ་སྟེ། ཐ་ན་མྱ་ངན་ལས་འདས་པའི་འདུ་ཤེས་ཀྱང་བསྐྱེད་པར་མི་བྱ་ན་བདག་ཏུ་འདུ་ཤེས་བསྐྱེད་པ་ལྟ་ཅི་སྨོས། ཅིའི་ཕྱིར་འདུ་ཤེས་བསྐྱེད་པར་མི་
བྱ་ཞེ་ན། འདི་ལ་འདུ་ཤེས་དེ་གང་ཡང་མི་དམིགས་པའི་ཕྱིར་རོ། །འོད་སྲུང་གལ་ཏེ་འདོད་ཆགས་ཡང་དག་པ་ཡིན་དུ་ཟིན་ན་དེའི་འཕོ་བ་དང་། འགོག་པ་ཀུན་ཏུ་ཤེས་པར་མི་འགྱུར་རོ། །འོད་སྲུང་འདི་ལྟར་འདོད་ཆགས་ནི་ཡུལ་ལ་གནས་པ་དང་། ཕྱོགས་ན་གནས་པར་མི་དམིགས་ཏེ།
བརྫུན་དུ་སྨྲ་བ་ནི་མ་གཏོགས་སོ། །དེ་ལྟ་བས་ན་དེ་བཞིན་གཤེགས་པ་ནི་ཡང་དག་པ་གསུང་བ་སྟེ། ཡང་དག་པ་ཇི་ལྟ་བ་བཞིན་དུ་གསུང་ངོ་། །འདོད་ཆགས་གང་ཡིན་པ་དེ་ནི་བདག་མ་ཡིན་ཏེ། དེ་ལྟ་བུའི་ཆོས་དེ་དག་ནི་དགེ་སྦྱོང་གི་ཆོས་རྣམས་སོ། །དེ་ལ་གང་ན་མི་དམིགས་པ་དེ་

དག་ནི་དགེ་སྦྱོང་གི་ཆོས་ཡིན་ནོ། །གང་དག་གིས་འདུ་ཤེས་དེ་བཟུང་ན་དེ་དག་གིས་རི་རབ་དང་མཉམ་པའི་གང་ཟག་ཏུ་འདུ་ཤེས་བཟུང་བར་འགྱུར་ཏེ། དེ་དག་ནི་བསྟན་པ་འཕགས་པ་འདི་ལས་ཉམས་པ་སྟེ། དེ་དག་གིས་དགེ་སྦྱོང་གི་ཆོས་དེ་དག་ཅི་ཡང་མ་བསྐྱེད་
ཅིང་དེ་དག་དགེ་སྦྱོང་གི་ཆོས་ལ་གནས་པ་མ་ཡིན་ཏེ་རགས་པ་ལྷུར་ལེན་པའོ། །དེས་ན་སྐྱེས་བུ་གཏི་མུག་པ་གཏི་མུག་གིས་རྒས་པ་དེ་དག་ལ་སུས་ཀྱང་ཅི་ཡང་བརྗོད་པར་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་གིས་ཅི་ཡང་བཟུང་སྟེ། དེས་ན་སེམས་ཅན་དམྱལ་བ་ཆེན་པོ་
མི་བཟད་པར་བསྐལ་པར་གནས་པར་འགྱུར་བའི་སྐབས་ཡོངས་སུ་གཟུང་བའི་ཕྱིར་རོ། །འོད་སྲུང་དགེ་སློང་ཀོ་ཀ་ལི་ཀ་དང་། དགེ་སློང་ལྷས་བྱིན་དང་། དགེ་སློང་ཁ་ན་ཌ་དྲ་བ་བྱ་དང་། དགེ་སློང་ཀ་ཏ་མོ་ར་ཀཏི་ཤྱ་དང་། དགེ་སློང་རྒྱ་མཚོས་བྱིན་ལ་ལྟོས། འོད་སྲུང་དགེ་སློང་རྟ་ཐུལ་དང་།
ནབ་སོ་ལ་ལྟོས། འོད་སྲུང་དགེ་སློང་སྐར་བཟངས་ངའི་གཡོག་བྱེད་དེ་ངའི་མདུན་ན་སྨྲ་ཞིང་འཆག་པ་དང་འདུག་པ་ལ་ཡང་ལྟ། རྫུ་འཕྲུལ་གྱི་སྟོབས་ཀྱིས་སྟེང་གི་བར་སྣང་ལ་འཆག་པ་ལ་ཡང་ལྟ། ཆོས་དང་འཐུན་པས་མུ་སྟེགས་ཅན་སྟོང་ཚར་གཅོད་པ་ལ་ཡང་ལྟ་ལ། དེ་ང་ལ་དད་པར་
མི་བྱེད་ཅིང་ཚིག་རེ་རེ་ལ་ཡང་འཐུན་པར་མི་བྱེད་པ་ལ་ལྟོས། གང་ཚིག་རེ་རེ་ལ་ཡང་འཐུན་པར་མི་བྱེད་པ་དེ་ནི་ངན་པར་འགྲོ་བར་འགྱུར་རོ། །ཀྱེ་ཡང་སངས་རྒྱས་ཡང་དག་པའོ་ཞེས་ཚིག་ཏུ་སྨྲ་བར་འགྱུར་བ་དེ་ལ་ནི་ཙན་དན་གྱི་ཕུར་མ་རི་རབ་ཙམ་གྱིས་གཏོར་བར་བྱ་མངོན་པར་གཏོར་བར་བྱའོ། །
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་གྱི་གདུགས་བྱས་ཏེ་སྟེང་གི་བར་སྣང་ལ་གཟུང་བར་བྱའོ། །དེ་ཅིའི་ཕྱིར་ཞེ་ན། འོད་སྲུང་འདི་ལྟར་སངས་རྒྱས་ཀྱི་སྒྲ་ཡང་དག་པ་ལ་ཡང་ཡིད་ཆེས་པར་དཀའ་ན་གང་དད་པར་གྱུར་ནས་དད་པས་རབ་ཏུ་འབྱུང་བ་དང་། འདོད་
པའི་ཡོན་ཏན་སྤངས་ནས་ཅི་ལ་ཡང་མི་གནས་པར་བསམ་གཏན་བྱེད་པར་འགྱུར་བ་ལྟ་ཅི་སྨོས། འོད་སྲུང་སེམས་ཅན་གང་དག་འདི་ལ་བཟོད་ཅིང་ཇི་ལྟར་བཅས་པའི་བསླབ་པ་ལ་སློབ་པ་དང་། ཆོས་བདུད་རྩི་དེ་ཡང་རྟོགས་པ་དེ་དག་ནི་མཆོག་ཏུ་ངོ་མཚར་ཆེའོ། །འོད་སྲུང་འདི་ལྟ་སྟེ།

དཔེར་ན་འདུས་པ་ཆེན་པོར་གྱུར་པའི་ནང་ན་ལྤགས་པའི་རྔ་སྒྲ་བྱུང་རྒྱལ་དུ་འབྱུང་བ། ལེགས་པར་བྱས་པ། བརྗོད་པ་བཞིན་དུ་བྱེད་པ། སྦྱིན་པ་སྦྱིན་པ། རྣམ་པར་བཀྲ་བ་དག་ཅིག་ཡོད་ལ་མི་ཞིག་གིས་དེ་མགོ་ལ་མི་ལྷུང་བར་བྱས་ཏེ་ཆེར་སྒྲུབ་པའོ་ཞེས་སྨྲ་ཞིང་གོས་དག་གིས་དཀྲིས་ཏེ་ཁྱེར་
བ་ལས། འོད་སྲུང་བལྟས་ན་སྦྱིན་པ་ཅི་ཡང་སྦྱིན་པར་མ་གྱུར་ནས་ཀྱེ་ཡང་ཡོད་པ་མ་ཡིན་པར་མཐོང་སྟེ། འདོར་བར་བྱེད་པ་དེ་བཞིན་དུ་འོད་སྲུང་དེ་བཞིན་གཤེགས་པའི་དཔལ་གྱིས་སྦྱིན་པ་ཅི་ཡང་སྦྱིན་པར་མ་མཐོང་ལ། ཀྱེ་ཡང་ཡོད་པ་མ་ཡིན་པར་མཐོང་ནས་འདོར་བར་འགྱུར་རོ། །
འོད་སྲུང་བདག་ཏུ་འདུ་ཤེས་པ་ལས་འདོད་ཆགས་འབྱུང་ངོ་། །གཞན་དུ་འདུ་ཤེས་པ་ལས་འདོད་ཆགས་འབྱུང་ངོ་། །འོད་སྲུང་སུ་བདག་གི་འདུ་ཤེས་ཡོངས་སུ་ཤེས་པ་དེ་ནི་འོད་སྲུང་མདོ་སྡེ་འདི་ལྟ་བུ་འདི་དག་ཐོས་ནས་མི་འཁྲུག་གོ །དེ་ཅིའི་ཕྱིར་ཞེ་ན། མི་འཐུན་པ་ལས་གཤེ་
བར་འགྱུར་བའི་ཕྱིར་རོ། །དེ་ལྟ་བས་ན་ཆོས་འདི་ལྟ་བུ་འདི་དག་ཐོས་ནས་དེ་བས་ཀྱང་ཤས་ཆེར་ཡིད་འབྱུང་བའི་སེམས་འཐོབ་བོ། །གང་དག་གིས་ཤིན་ཏུ་བཟུང་བ་དེ་དག་ནི་ལོག་པར་ལྟ་བའོ། །གང་དག་ལོག་པར་ལྟ་བ་དེ་དག་ནི་ཡང་དག་པ་འདི་ལྟ་བུས་བསྐུལ་ན་འཁྲུག་གོ །དེ་ཅིའི་
ཕྱིར་ཞེ་ན། འོད་སྲུང་བདག་ཏུ་འདུ་ཤེས་པ་ནི་འཁྲུག་པར་འགྱུར་བའི་ཕྱིར་རོ། །འོད་སྲུང་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ཞིག་ཆོས་འདི་ལྟ་བུ་འདི་དག་ཐོས་ནས་འཁྲུག་གམ། གནོད་སེམས་སྐྱེད་དམ། སྤོང་བར་བྱེད་ན་དེ་དག་ནི་དགེ་
སྦྱོང་ཞེས་བྱ་ཡང་དགེ་སྦྱོང་གི་ཐ་སྙད་བོར་བ་སྟེ། དེ་དག་ནི་ངའི་ཉན་ཐོས་མ་ཡིན་ལ་ང་ཡང་དེ་དག་གི་སྟོན་པ་མ་ཡིན་ནོ། །དེ་ཅིའི་ཕྱིར་ཞེ་ན། འོད་སྲུང་བརྫུན་དུ་སྨྲ་བ་དག་ནི་ངའི་ཉན་ཐོས་མ་ཡིན་ལ་ང་ཡང་བརྫུན་དུ་སྨྲ་བ་དག་གི་སྟོན་པ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། དེ་
བཞིན་གཤེགས་པ་ནི་ཡང་དག་པར་གསུང་བ། དེ་བཞིན་གཤེགས་པ་ནི་ཆོས་ཐམས་ཅད་སྟོང་པའོ་ཞེས་དེ་སྐད་གསུང་བའི་ཕྱིར་རོ། །འོད་སྲུང་དེ་བཞིན་གཤེགས་པ་ནི་བདག་གི་སྟོབས་འཇིག་པར་མཛད་པ་སྟེ། དེ་དང་རྩོད་དོ། །གང་དེ་བཞིན་གཤེགས་པ་དང་རྩོད་པ་དེ་ནི་བདུད་

ཅེས་བྱའོ། །དེ་བཞིན་གཤེགས་པས་ནི་བདུད་ཀྱི་རིས་རབ་ཏུ་དབྱུང་བ་དང་། བསྙེན་པར་རྫོགས་པར་མ་གནང་ངོ་། །འོད་སྲུང་འདི་ལྟ་སྟེ། དཔེར་ན་གང་ཞིག་འདི་སྐད་དུ་བྱ་ཀ་ལ་ཀུ་ཊི་ཀ་ལས་བལ་གླང་གླང་པོ་ཆེ་སྐྱེས་སོ་ཞེས་ཟེར་ན་འོད་སྲུང་འདི་ཇི་སྙམ་དུ་སེམས།
མི་དེའི་ཚིག་དེ་ཡིད་ཆེས་པར་བྱ་བ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། འོད་སྲུང་འདི་ཇི་སྙམ་དུ་སེམས། དེ་འཐུན་པ་ཡིན་ནམ་འོན་ཏེ་མི་འཐུན་པ་ཡིན། གསོལ་པ། བཅོམ་ལྡན་འདས་དེ་ནི་མི་འཐུན་པ་ལགས་སོ། །བཀའ་སྩལ་པ།
དེ་བས་ཀྱང་སྐྱེས་བུ་དམ་པ་མ་ཡིན་པ་གང་དག་བདག་ཏུ་འདུ་ཤེས་དང་། སེམས་ཅན་དུ་འདུ་ཤེས་དང་། སྲོག་ཏུ་འདུ་ཤེས་དང་། གང་ཟག་ཏུ་འདུ་ཤེས་དང་། མྱ་ངན་ལས་འདས་པའི་འདུ་ཤེས་ལ་གནས་ཏེ། ང་ལ་སྟོན་པ་ཞེས་བརྗོད་པ་དེ་དག་ནི་ཆེས་མི་འཐུན་ནོ། །འོད་སྲུང་
འདི་ལྟ་སྟེ། དཔེར་ན་མི་ལ་ལ་ཞིག་འོངས་ནས་འདི་སྐད་དུ་བྱ་འདབ་བཟངས་ལས་བྱ་རོག་སྐྱེས་སོ་ཞེས་ཟེར་ན། འོད་སྲུང་འདི་ཇི་སྙམ་དུ་སེམས། མི་དེའི་ཚིག་དེ་ཡིད་ཆེས་པར་བྱ་བ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། འོད་
སྲུང་འདི་ཇི་སྙམ་དུ་སེམས། དེ་འཐུན་པ་ཡིན་ནམ། འོན་ཏེ་མི་འཐུན་པ་ཡིན། གསོལ་པ། བཅོམ་ལྡན་འདས་མི་འཐུན་པ་ལགས་སོ། །བཀའ་སྩལ་པ། དེ་བས་ཀྱང་སྐྱེས་བུ་དམ་པ་མ་ཡིན་པ་གང་དག་བདག་ཏུ་འདུ་ཤེས་ལ་གནས་པ་ནས་མྱ་ངན་ལས་འདས་པའི་འདུ་
ཤེས་ཀྱི་བར་ལ་གནས་ནས་ང་ལ་སྟོན་པའོ་ཞེས་བརྗོད་པ་དེ་དག་ནི་ཆེས་མི་འཐུན་ནོ། །འོད་སྲུང་འདི་ལྟ་སྟེ། དཔེར་ན་མི་ལ་ལ་ཞིག་འདི་སྐད་དུ་སྲིན་བུ་མེ་ཁྱེར་གྱིས་རི་རབ་བླངས་ཏེ་འགྲོའོ་ཞེས་ཟེར་ན་འོད་སྲུང་འདི་ཇི་སྙམ་དུ་སེམས། མི་དེའི་ཚིག་དེ་ཡིད་ཆེས་པར་བྱ་བ་ཡིན་ནམ།
གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། འོད་སྲུང་འདི་ཇི་སྙམ་དུ་སེམས། མི་དེའི་ཚིག་དེ་འཐུན་པ་ཡིན་ནམ་འོན་ཏེ་མི་འཐུན་པ་ཡིན། གསོལ་པ། བཅོམ་ལྡན་འདས་མི་འཐུན་པ་ལགས་སོ། །བཀའ་སྩལ་པ། དེ་བས་ཀྱང་སྐྱེས་བུ་དམ་པ་མ་

ཡིན་པ་གང་དག་བདག་ཏུ་འདུ་ཤེས་ལ་གནས་པ་ནས་མྱ་ངན་ལས་འདས་པའི་བར་གྱི་འདུ་ཤེས་ལ་གནས་ནས་ང་ལ་སྟོན་པའོ། །ཞེས་བརྗོད་པ་དེ་དག་ནི་ཆེས་མི་འཐུན་ནོ། །འོད་སྲུང་འདི་ལྟ་སྟེ། དཔེར་ན་རྒྱལ་པོའི་རིམ་གྲོ་པའི་མི་ལ་ལ་ཞིག་ཡོད་ལ། སྔོན་མ་མཐོང་བའི་
མི་ལ་ལ་ཞིག་གིས་དེ་ལས་བསླབས་ནས་དེ་དབང་ཕྱུག་གི་གནས་ཞིག་ཏུ་སོང་སྟེ། རྒྱལ་པོའི་ཞབས་འབྲིང་བ་དེ་དག་གི་ནང་དུ་སོང་ནས། མ་གླེངས་པར་འདི་སྐད་ཅེས་ཟེར་ཏེ། རྒྱལ་པོ་འདི་སྐད་གསུང་ངོ་། །རྒྱལ་པོས་འདི་ལྟ་བུ་དག་བཀའ་སྩལ་གྱིས་དེ་བཞིན་དུ་གྱིས་ཤིག །ཁོ་བོ་ནི་རྒྱལ་པོ་འམ་
རྒྱལ་པོའི་བློན་པོ་ཆེན་པོ་དེ་དག་མ་མཐོང་བའི་མི་ཡིན་ཏེ། དབང་ཕྱུག་གི་གནས་ཀྱིས་འོངས་སོ་ཞེས་དེ་དེ་སྐད་ཟེར། དེ་དེ་ལྟ་བུ་དག་ཟེར་ཞིང་དེ་ལྟར་བྱའོ། །ཁོ་བོ་ནི་སྲོག་གི་ཆེད་དུ་རྒྱལ་པོ་འམ། རྒྱལ་པོའི་བློན་པོ་ཆེན་པོ་དེ་དག་གི་གན་དུ་འགྲོའོ་ཞེས་ཟེར་བ་དེ་བཞིན་དུ་འོད་སྲུང་དེ་
བཞིན་གཤེགས་པ་ཡང་སྟོབས་རྫོགས་པ། རང་གི་བྱ་བ་རྫོགས་པ་དང་ལྡན་པ་སྟེ། དཔེར་ན་རྒྱལ་པོས་སའི་དཀྱིལ་འཁོར་ཆེན་པོ་མཐའ་ཐུག་པ་མེད་པར་བདེ་བར་ཆམ་དུ་འབེབས་ཤིང་དེ་ལ་ཟས་སྦྱར་བ་དག་ཀྱང་འབྱུང་བ་དེ་བཞིན་དུ་དེ་བཞིན་གཤེགས་པ་ཡང་དགེ་འདུན་མཐའ་
ཐུག་པ་མེད་པ་དང་། སངས་རྒྱས་ཀྱི་ཞིང་མང་པོ་ཆམ་དུ་འབེབས་ཏེ། དེ་ལ་ཞལ་ཟས་སྦྱར་བ་དག་ཀྱང་འབྱུང་ངོ་། །དེ་ལ་སྔོན་མ་མཐོང་བའི་མི་བདག་ཏུ་སྨྲ་བ་དང་། སེམས་ཅན་དུ་སྨྲ་བ་ནས་མྱ་ངན་ལས་འདས་པའི་བར་དུ་སྨྲ་བ་དག་འོང་ཞིང་དེ་དག་མ་བཅོལ་བར་འོངས་ནས་འདི་སྐད་
ཅེས་ཟེར་ཏེ། དེ་བཞིན་གཤེགས་པས་འདི་སྐད་བཀའ་སྩལ་ཏོ། །དེ་བཞིན་གཤེགས་པས་འདི་ལྟ་བུ་བཀའ་སྩལ་ཏེ། འདི་ནི་བྱ་བའོ། །འདི་ནི་བྱ་བ་མ་ཡིན་ནོ་ཞེས་ཟེར་རོ། །དེ་ལ་གང་དག་གདམས་ངག་དང་། རྗེས་སུ་བསྟན་པའི་བཀའ་དང་འཐུན་པར་བྱེད་པ་དེ་དག་ནི་དེ་བཞིན་
གཤེགས་པའི་བཀའ་ལ་མངོན་པར་དད་དེ་འགལ་བར་མི་བྱེད་ཅིང་དེ་དག་གིས་ཐོས་ནས་བདག་དང་ཡང་སྔོ། བུ་དང་ཆུང་མ་དང་ཡང་སྔོ་ཞིང་སྦྱིན་པར་བྱེད། ཤིན་ཏུ་མཆོག་དང་། ཤིན་ཏུ་གྱ་ནོམ་པར་སྦྱིན་པར་བྱེད། ཤིན་ཏུ་བསྟི་སྟང་བྱས་ཏེ་སྦྱིན་པར་བྱེད། དད་པས་སྦྱིན་པར་བྱེད་ཅིང་ཇི་

སྲིད་དུ་ཁོང་དུ་མ་ཆུད་པ་དེ་སྲིད་དུ་དད་པས་སྦྱིན་པར་བྱེད་དེ། དེ་ལྟར་ན་ཡོན་ཏན་དེ་ལྟ་བུ་དང་། སྤྱོད་པ་དེ་ལྟ་བུ་དང་ལྡན་པ་དེ་དག་ནི་སྔོན་མ་མཐོང་བའི་མི་དང་འདྲའོ། །དེ་དག་གིས་ཡོངས་སུ་སྤྱད་ནས་འདུ་འཛིས་ཉིན་མཚན་འདས་པར་བྱེད་དོ། །རྒྱལ་པོའི་གཏམ་
བརྗོད་པ་དང་། ཆོམ་རྐུན་གྱི་གཏམ་བརྗོད་པ་དང་། བཟའ་བའི་གཏམ་དང་། བཏུང་བའི་གཏམ་དང་། སྨད་འཚོང་མའི་གཏམ་དང་། བུད་མེད་ཀྱི་གཏམ་དང་། སྨད་པའི་གཏམ་བརྗོད་པར་འགྱུར། ཟླ་བ་སྤྱང་ཀིས་ཟིན་པ་དང་། ཉི་མ་སྤྱང་ཀིས་ཟིན་པ་དང་། རྒྱལ་པོ་འོང་ངོ་། །རྒྱལ་
པོ་འགྲོའོ། །རྒྱལ་པོ་བཙུན་མོའི་འཁོར་གྱི་ནང་ན་འདུག་གོ་ཞེས་བྱ་བ་དང་། ཁྱིམ་གྱི་གཏམ་བརྗོད་པར་འགྱུར། སྡུག་པར་འགྲོ་བར་བྱ། གང་ན་ཟས་སྟེར་བ་དེར་འགྲོ་བར་བྱ་ཞེས་དེ་ལྟ་བུའི་གཏམ་བརྗོད་པར་འགྱུར་རོ། །ཞག་གཅིག་གནས་པས་ཉི་མ་འདས་པར་བྱས་ནས་གཙུག་ལག་
ཁང་དུ་འགྲོ་བར་འགྱུར། ཞག་གཉིས་གནས་པ་དང་། ཞག་གསུམ་གནས་པ་དང་། ཞག་བཞི་གནས་པ་དང་། ཞག་ལྔ་གནས་པ་དང་། ཞག་དྲུག་གནས་པ་དེ་དག་དེར་གནས་པ་ལྟ་བུའི་གཏམ་བརྗོད་པར་འགྱུར་ཞིང་དེ་ལྟ་བུའི་གཏམ་དག་བརྗོད་པར་འགྱུར། སྨན་ཆང་སྣ་ཚོགས་ཀྱི་གཏམ་གྱི་རྒྱུད་ཀྱིས་ཤེས་
བཞིན་མེད་པར་གྱུར་པའི་ལུས་དང་། ཁ་ནས་ཁ་ཆུ་ཟག་ཅིང་མྱོས་ནས་ཉལ་བར་འགྱུར་རོ། །དེ་དག་གིས་དེར་ཅི་བྱས་པ་དེ་རྨི་ལམ་དུ་རྨི་བར་འགྱུར། བདག་འགྲོ་བ་རྨི་བར་འགྱུར། བདག་ཡོན་ཏན་མ་ཐོབ་པ་སྒྲུབ་པར་རྨི་བར་འགྱུར་རོ། །དེ་དག་སད་ནས་ཕན་ཚུན་གཏམ་ཟེར་ཏེ། འདི་ལྟར་
ཁྱོད་ནི་མཚན་མོ་སོང་ངོ་། །འདི་ལྟར་ཁྱོད་ནི་འདུག་གོ །འདི་ལྟར་ཁྱོད་ཀྱིས་དེ་ལ་ཐོབ་བོ། །གང་དག་གིས་མ་ཐོབ་པ་དེ་དག་ཀྱང་མྱུར་དུ་སྐྱེན་པར་མྱུར་དུ་སོང་དང་ལེགས་སོ་ཞེས་ཕན་ཚུན་སྨྲ་བར་འགྱུར་ཏེ། ཤིས་པའི་རྨི་ལམ་དེ་དག་རྨིས་ནས་དེ་དག་གྲོང་དང་། གྲོང་ཁྱེར་དང་། གྲོང་
རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་འཇུག་པར་འགྱུར། གཅིག་ལ་གཅིག་ངོ་འཛུམ་གནག་པ་དང་། སྡུག་བསྔལ་བ་དང་། ཉེ་བར་གནས་པ་མ་ཡིན་པའི་རྒྱུ་དང་། མཉམ་པར་མ་གཞག་པའི་སེམས་ཀྱིས་རྒོད་ཅིང་དབང་པོ་ཕལ་པར་གྱུར་ལ། མ་བསྒྲིམས་ཤིང་

སེམས་གཡེང་བའི་སྤྱོད་པས་དེ་དག་ཁྱིམ་དུ་དོང་ནས་སོ་སོར་ཐར་པ་བོར་ཏེ་བུད་མེད་ཉི་ཚེ་འཁོད་པ་ལ་ཆོས་སྟོན་པར་འགྱུར། དེ་དག་བདག་ཅག་གང་ལས་ཤིན་ཏུ་རྙེད་པར་འགྱུར་སྙམ་ནས་ཆོས་སྒྲུབ་ཅིང་དེ་དག་དེ་ལས་རྙེད་པར་འགྱུར་ཏེ། དེ་དག་ཆགས་ཤིང་ཞེན་ལ་མདུད་པ་བོར་ཏེ། བརྒྱལ་
ཞིང་ལྷག་པར་ཆགས་ལ། ལྷག་པར་ཆགས་པར་གྱུར་ནས་དེ་དག་མི་འགྱོད་པས་ངུ་ཞིང་འདོང་བར་འགྱུར་རོ། །གནས་གཉིས་རབ་ཏུ་སྟོན་ཏེ། གཉིས་གང་ཞེ་ན། ཤིན་ཏུ་བཟང་ཞིང་ཤིན་ཏུ་རབ་ཏུ་ཞི་བ་ལ་བསྔགས་པར་མཐོང་བ་དང་། ཁ་ཅིག་ཤིན་ཏུ་བཟང་པོ་མ་ཡིན་པ་ལ་མི་སྙན་
པ་བརྗོད་པར་འགྱུར་བ་སྟེ། སྦྱིན་པ་པོ་རྣམས་ལ་ལྟ་ཅི་སྨོས། དེ་དག་ཡང་དེ་ལྟར་འདུས་ནས་གཅིག་ལ་གཅིག་ལྟ་ཞིང་ཅི་ཞིག་བྱིན། སུས་བྱིན། ཇི་སྙེད་ཅིག་བྱིན། ཇི་སྙེད་ཅིག་སྤྱད་ཅེས་སྨྲ་བར་འགྱུར་རོ། །འོད་སྲུང་འཆི་བའི་དུས་མ་བྱས་ཀྱི་བར་དུ་རྣལ་འབྱོར་ལ་མི་བརྩོན་པ་དག་
གི་རྣམ་གྲངས་ནི་འདི་དག་གོ །རྣལ་འབྱོར་དང་མི་ལྡན་པ་དེ་དག་ལ་གཞན་ཡང་ཤེས་པར་བྱ་སྟེ། འདི་ལྟ་སྟེ། ཆོས་ཐམས་ཅད་སྤོང་བའོ། །འོད་སྲུང་དགེ་སློང་དེ་ལྟ་བུ་དེ་དག་ལ་སྙིང་རྗེ་བར་བྱའོ། །དེ་ཅིའི་ཕྱིར་ཞེ་ན། དེ་དག་གི་རྣམ་པར་སྨིན་པ་སྡུག་བསྔལ་བར་འགྱུར་བའི་ཕྱིར་རོ། །
དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །འཚོ་བ་དག་གི་དོན་གྱི་ཕྱིར། །བྱིས་པ་རྒྱལ་པོས་བཀྲབས་པར་འགྱུར། །ཁྱིམ་དང་ཁྱིམ་དུ་རྒྱུ་བྱེད་ཅིང་། །རྒྱལ་པོ་འདི་སྐད་གསུང་ཞེས་ས་སྨྲ། །དེ་དག་དོང་ནས་ཕྲ་མ་ཟེར། །ཁྲོས་ནས་ཆད་
པས་བཅད་ད་རེ། །བྱིས་པའི་མཐུ་ནི་དེ་ལྟ་བུས། །རྟག་ཏུ་འཚོ་བ་བྱེད་པར་འགྱུར། །གང་གིས་བསྐལ་པ་བརྒྱ་མང་དུ། །ལག་པ་རྐང་པ་ཡོངས་བཏང་ཞིང་། །བྱ་བར་དཀའ་བ་མང་མཛད་པ། །སངས་རྒྱས་ལ་ལྟ་སྨོས་ཅི་དགོས། །ང་ནི་ཆོས་ཀྱི་རྒྱལ་པོའི་མི། །ཆད་པ་
དྲག་པོ་གཅོད་ལ་དབང་། །ཇི་ལྟར་བྱ་ཞིང་ཅི་བྱ་ཞེས། །སུ་ཡང་འདྲི་བར་ཡོད་མི་བྱེད། །དགེ་སློང་རྣམས་ལ་གནས་བྱིན་ཞིང་། །ཟས་དང་སྐོམ་གྱི་དམ་པ་དང་། །ཆོས་གོས་མཆོག་ཏུ་གང་གྱུར་པ། །ཐམས་ཅད་གུས་དང་བཅས་པས་བྱིན། །འདི་ལྟར་བདག་ཀྱང་མི་

སྤྱོད་ཅིང་། །བུ་ལའང་སྦྱིན་པར་མི་བྱེད་ལ། །སྡུག་བསྔལ་ཤ་ཐང་བཙལ་བྱས་ནས། །གང་དག་ཚུལ་ཁྲིམས་ལྡན་ལ་བྱིན། །དེ་ལ་གང་དག་མི་རིགས་པ། །སྤྱད་ནས་མྱུར་དུ་འགྲོ་བྱེད་དེ། །ཕྱོགས་གཅིག་ཏུ་ནི་འདུས་ནས་སུ། །བདེ་བར་གྱུར་ཏམ་ཞེས་ཀྱང་འཛེར། །
རྒྱལ་པོའི་གཏམ་དང་ཆོམ་རྐུན་གཏམ། །གེལ་བའི་གནས་ཀྱི་གཏམ་དག་དང་། །བཟའ་བ་དང་ནི་བཏུང་བའི་གཏམ། །དེ་དག་འདུས་ནས་སྨྲ་བར་བྱེད། །ཉི་ཟླ་སྤྱང་ཀིས་ཟིན་པ་དང་། །རྒྱལ་པོ་འོང་དང་འགྲོ་བ་དང་། །དེར་ནི་རྒྱལ་བར་འགྱུར་བ་དང་། །དེར་ནི་ཕམ་པར་འགྱུར་བ་དག །
མི་རིགས་པ་རྣམས་བརྗོད་པ་འདི། །ཡང་དང་ཡང་དུ་བརྗོད་པར་འགྱུར། །མལ་ཆ་བཟང་པོའི་མལ་བཅས་ཏེ། །མཚན་མོ་ཐོག་ཐག་ཉལ་བྱས་ནས། །དེ་དག་ན་ནི་ངན་པ་སྟེ། །སྦྱིན་པ་དེ་ནི་མཆོག་མ་ཡིན། །ཡང་དང་ཡང་དུ་མི་རྙེད་ཀྱིས། །གང་ན་བཟང་བའི་ཁྱིམ་དེར་འདེང་། །
ཇི་སྲིད་དུ་ནི་དོན་བརྟགས་ཏེ། །ཉལ་བ་བྱས་ནས་དེ་ཡི་ཚེ། །མི་རིགས་རྨོངས་པ་བློ་ངན་པ། །དཔེར་ན་བོང་བུ་ཁལ་ཁྱེར་བཞིན། །དེ་ནི་དེ་དག་ཅི་བསམས་བཞིན། །དེ་ཚེ་རྨི་ལམ་རྨིས་གྱུར་པ། །སད་ནས་ཀུན་ཏུ་རྗོད་བྱེད་དེ། །དེ་དག་ཕན་ཚུན་སྨྲ་བར་བྱེད། །ཁྱོད་ལ་
ཀྱལ་ཀ་མི་བྱེད་དེ། །ཁྱོད་ལ་རྨི་ལམ་བཟང་རྨིས་ཀྱིས། །ཡིད་མི་བདེ་བ་མ་སྐྱེད་པར། །མྱུར་དུ་སོང་ལ་དེ་སྒྲུབས་ཤིག །ཤིན་ཏུ་སྡོམ་པ་ཅི་འདྲ་བར། །དེ་དག་གྲོང་དང་ཡུལ་འཁོར་འགྲོ། །ཐམས་ཅད་ངོ་འཛུམ་གནག་གྱུར་ཅིང་། །སྤྲེའུ་དང་འདྲ་བར་རྣམ་པར་འཁྱམ། །དེ་དག་
ཁྱིམ་དུ་ཞུགས་ནས་སུ། །སོ་སོར་ཐར་པ་ལེགས་བཤད་པ། །སངས་རྒྱས་ཀྱི་ནི་མདོ་བོར་ནས། །བུད་མེད་རྣམས་ལ་ཆོས་འཆད་དོ། །དེ་དག་ཁྱིམ་ནས་འགྲོ་བྱེད་ཅིང་། །གང་གིས་རབ་ཏུ་ངན་བྱིན་པ། །དེར་ནི་སྦྱིན་པ་པོ་དང་དེའི། །གཉེན་བཤེས་གྱུར་པ་རྣམས་ལ་སྨོད། དེ་དག་
ཡང་འདུས་གྱུར་ནས་སུ། །གཅིག་ལ་གཅིག་ནི་འདྲི་བྱེད་དེ། །ཅི་རྙེད་ཁྱོད་ཀྱིས་ཅི་ཞིག་ཟོས། །ཅི་ཞེས་དྲིས་ནས་དེ་དག་སྨྲ། །དེ་ལྟར་སྔ་མ་བཞིན་སྦྱར་ཏེ། །ལོ་གཅིག་བཞིན་དུ་ལོ་བརྒྱར་ཡང་། །དེ་དག་འདྲ་བའི་རྟོག་པ་ཡིས། །དེ་དག་འཚོ་བ་བྱེད་པར་འགྱུར། །དེར་ནི་རྩོད་པ་

བྱས་ནས་སུ། །འདི་ནི་སྨན་དུ་འགྱུར་བ་སྟེ། །ནད་ཉུང་འགྱུར་བ་ཡིན་ནོ་ཞེས། །མེ་ཏོག་གི་ནི་སྦྲང་རྩི་སྡུད། །དེར་ནི་བསྒོམ་པ་བོར་ནས་སུ། །ཁྱིམ་པ་རྣམས་དང་འདུ་བྱེད་པ། །དེ་དག་ལ་ནི་སངས་རྒྱས་དང་། །སངས་རྒྱས་བརྒྱས་ཀྱང་ཅི་ཞིག་མཛད། །བདག་ལ་ཕོངས་
པར་འཛིན་པ་དང་། །བདག་ཏུ་འདུ་ཤེས་རྟག་སྤངས་ལ། །གང་དག་ངན་འགྲོར་མི་འགྲོ་བའི། །རྣལ་འབྱོར་དེ་དག་སྐྱེད་འགྱུར་བ། །དེ་དག་ལ་ནི་དེ་རབ་དཀའ། །འདི་ལྟར་བྱིས་པ་བློ་ངན་པ། །ཁྱིམ་པ་དང་ནི་འདུ་བ་རྣམས། །དམ་པའི་ཆོས་ནི་སྤོང་བར་བྱེད། །གང་དག་ཤཱཀྱ་
སེང་གེ་ཡི། །ཉན་ཐོས་ཡང་དག་སྤྱོད་ཡུལ་བ། །སྲོག་གི་དོན་གྱི་ཆེད་དུ་ཡང་། །སུ་ཡང་བསླབ་པ་འདའ་མི་ནུས། །ཁུར་གྱི་འདུ་ཤེས་སྐྱེད་བྱེད་པ། །མཁས་པ་ཟས་ལ་བརྐམ་པ་མེད། །དེ་ལ་མི་སྡུག་སྒོམ་པར་བྱེད། །དེ་ལ་འདུག་ཅིང་རྣམ་པར་སྦྱོང་། །འདོད་པའི་ཟག་པ་
སྤང་བའི་ཕྱིར། །འདུ་ཤེས་ཐམས་ཅད་རྣམ་པར་འཇིག །དེ་དག་བསྟན་པ་འདི་ལ་ནི། །རབ་ཏུ་འབྱུང་བར་སྐབས་འབྱེད་དོ། །ཡང་དང་ཡང་དུ་ཡོངས་བཙལ་ན། །གང་ལ་སྙིང་པོ་མི་དམིགས་པ། །སྟོང་པ་ཉིད་ནི་གང་བརྗོད་པ། །ཆོས་ལ་མཁས་པ་མི་སྨོད་དོ། །གང་དག་སྟོང་
ཉིད་ཚུལ་མཁས་པ། །དེ་དག་དཔའ་ཞིང་ཤེས་རབ་ཆེ། །བདུད་དཔུང་བཅས་པར་སྐྲག་པར་བྱེད། །དེ་དང་དེ་དག་སྦྱིན་པ་སྦྱོང་། །དེ་དག་ལ་ནི་དགའ་བ་མེད། །སྟོང་པ་ཉིད་དང་འགལ་མི་བྱེད། །དཔའ་བོ་དེ་དག་སངས་རྒྱས་སྲས། །རྐང་གཉིས་ནང་ན་སྦྱིན་པའི་གནས། །
བློ་གྲོས་ངན་པ་མང་བྱུང་ཚེ། །དམ་པའི་ཆོས་ཉུང་གནས་པར་འགྱུར། །བག་ཡོད་པས་ནི་ཚོལ་བ་ཡིས། །དགེ་སློང་དེས་པ་ཉུང་བར་འགྱུར། །འཆི་བ་མྱུར་དུ་འབྱུང་འགྱུར་ལ། །བདག་གི་ཡང་དག་ཉིད་ཀྱི་གཏམ། །ཉིན་དང་མཚན་དུ་བརྗོད་འགྱུར་ཞེས། །མཁས་པས་
སྐྱོ་བ་བསྐྱེད་པར་བྱ། །རྐང་གཉིས་དམ་པ་མ་གཏོགས་པར། །འཇིག་རྟེན་ན་ནི་སྐྱབས་གཞན་མེད། །བསླབ་པ་རྣམས་ལ་བདག་བསླབས་ལ། །འཆི་བའི་དུས་བྱེད་འགྱུར་བར་བྱ། །དགོངས་ཏེ་བཤད་པ་འདི་ལྟ་བུ། །གང་དག་མི་ཤེས་དེ་དག་ནི། །བླ་ན་མེད་པའི་

སངས་རྒྱས་དང་། །ཆོས་ལའང་བསྟི་སྟང་མི་བྱེད་དོ། །ཀྱེ་མ་དམ་ཆོས་ཟད་འགྱུར་ཏེ། །འདི་དག་ཡུན་རིང་མི་ཐོགས་ཤིང་། །རྒྱུན་ཐུང་རིང་པོར་མི་ཐོགས་ཀྱིས། །བརྩོན་འགྲུས་བརྟན་པོ་བརྩམ་པར་བྱ། །དེ་སྐད་མེད་ཅེས་བཀའ་སྩལ་ནས་བཅོམ་ལྡན་འདས་
ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་མདོ་སྡེ་འདི་ལྟ་བུ་འདི་དག་ཐོས་ནས་ཡང་དག་པར་སྐྱོ་བ་འདི་ལྟ་བུ་མི་སྐྱེད་པ་དེ་དག་ནི་ངོ་མཚར་ཏོ། །དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་
ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཆོས་བཞི་དང་ལྡན་པའི་སེམས་ཅན་རྣམས་སྐྱོ་བ་མི་སྐྱེ་སྟེ། བཞི་གང་ཞེ་ན། བག་མེད་པ་མང་བ་དང་། ལས་ཀྱི་རྣམ་པར་སྨིན་པ་ལ་ཡིད་མི་ཆེས་པ་དང་། སེམས་ཅན་དམྱལ་བ་ཆེན་པོ་ལ་ཡིད་མི་ཆེས་པ་དང་། འདི་ལྟར་བདག་
འཆི་བར་འགྱུར་བར་ཡིད་མི་ཆེས་པ་སྟེ། འོད་སྲུང་ཆོས་བཞི་པོ་དེ་དག་དང་ལྡན་པའི་སེམས་ཅན་རྣམས་སྐྱོ་བ་མི་སྐྱེའོ། །འོད་སྲུང་གཞན་ཡང་ཆོས་བཞི་དང་ལྡན་པའི་སེམས་ཅན་རྣམས་སྐྱོ་བ་མི་སྐྱེ་སྟེ། བཞི་གང་ཞེ་ན། འབྱུང་བ་ཆེན་པོ་གཞོན་ཏེ་བར་ཆད་མེད་པར་འདུག་པར་གྱུར་པ་
དང་། མཐུ་སྟོབས་དང་ལྡན་པར་གྱུར་པ་དང་། འདོད་པའི་ཡོན་ཏན་རྣམས་ལ་རབ་ཏུ་ཆགས་པར་གྱུར་པ་དང་། གཟི་བརྗིད་ལ་སེམས་པས་རྣལ་འབྱོར་མ་མྱོང་ཞིང་གདུང་བའི་སྟོབས་ཅན་དུ་གྱུར་པ་སྟེ། འོད་སྲུང་ཆོས་བཞི་པོ་དེ་དག་དང་ལྡན་པའི་སེམས་ཅན་རྣམས་སྐྱོ་བ་མི་སྐྱེའོ། །
འོད་སྲུང་ཆོས་བཞི་དང་ལྡན་པའི་དགེ་སློང་ནི་སངས་རྒྱས་ཀྱི་བྱང་ཆུབ་སྤོང་སྟེ། བཞི་གང་ཞེ་ན། དེས་སྔོན་སྡིག་པའི་ལས་བྱས་པར་གྱུར་པ་དང་། དེ་ཆོས་ཀྱིས་ཕོངས་པར་འགྱུར་བ་དང་། དེའི་མི་དགེ་བའི་རྣམ་པར་སྨིན་པ་སྟོན་པ་དང་། །མཁན་པོ་དང་སློབ་དཔོན་ནི་སྐྱེ་བོ་མང་པོས་བསྔགས་
པ་ཡིན་ན། དེ་ནི་སངས་རྒྱས་ཀྱི་བྱང་ཆུབ་སྤོང་ཞིང་དེ་དག་གི་རྗེས་སུ་བསླབས་ནས་སྤོང་ལ་ཐོས་པ་ཉུང་བར་གྱུར་པ་ཡིན་ཏེ། སྐྱོན་གཞན་གྱིས་ཕ་རོལ་ལ་ཕྲག་དོག་ཏུ་གྱུར་པས་སངས་རྒྱས་ཀྱི་བྱང་ཆུབ་སྤོང་བ་སྟེ། འོད་སྲུང་ཆོས་བཞི་པོ་དེ་དག་དང་ལྡན་པའི་དགེ་སློང་ནི་སངས་རྒྱས་ཀྱི་བྱང་

ཆུབ་སྤོང་ངོ་།། །།སྡོམ་པ་གསུམ་བསྟན་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ། །བམ་པོ་གསུམ་པ་སྟེ་ཐ་མ། འོད་སྲུང་དགེ་སྦྱོང་དུ་བྱེད་པ་དང་། བྲམ་ཟེར་བྱེད་པའི་ཆོས་གཅིག་སྟེ། གཅིག་གང་ཞེ་ན། ཆོས་ཐམས་ཅད་ལ་སེམས་མི་གནས་པ་
སྟེ། འདི་ནི་དགེ་སྦྱོང་དུ་བྱེད་པ་དང་། བྲམ་ཟེར་བྱེད་པའི་ཆོས་གཅིག་གོ །འོད་སྲུང་འདི་ལྟ་སྟེ། དཔེར་ན་མི་ལ་ལ་ཞིག་རི་ཀ་ནས་རྦབ་ཏུ་ལྷུང་ནས་སྟོང་པའི་གནས་དང་། ཤིང་སྟོང་པའི་གནས་དང་། ནམ་མཁའ་སྟོང་པའི་འདུ་ཤེས་ཀྱིས་ས་སྟོང་པར་ཤེས་ཏེ། དེ་དབུགས་ཕྱི་ནང་
དུ་རྒྱུ་བར་མི་འགྱུར་རོ། །འོད་སྲུང་དེ་བཞིན་དུ་ཆོས་ཐམས་ཅད་ལ་འཛིན་ཏེ། མིག་གིས་རྟགས་སུ་འཛིན་ཅིང་མིག་གིས་མཚན་མར་འཛིན་པ་ནི་དགེ་སྦྱོང་དུ་བྱེད་པའི་ཆོས་མ་ཡིན། བྲམ་ཟེར་བྱེད་པའི་ཆོས་མ་ཡིན་ནོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་།
ཡིད་ཀྱིས་རྟགས་སུ་འཛིན་ཅིང་མཚན་མར་འཛིན་པ་ནི་དགེ་སྦྱོང་དུ་བྱེད་པའི་ཆོས་མ་ཡིན། བྲམ་ཟེར་བྱེད་པའི་ཆོས་མ་ཡིན་ནོ། །གཟུགས་ལ་མཚན་མར་འཛིན་པ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་མཚན་
མར་འཛིན་པ་ནི་དགེ་སྦྱོང་དུ་བྱེད་པའི་ཆོས་མ་ཡིན། བྲམ་ཟེར་བྱེད་པའི་ཆོས་མ་ཡིན་ནོ། །ཚུལ་ཁྲིམས་ཀྱིས་བྱང་ཆུབ་འདོགས་ཤིང་ཚུལ་ཁྲིམས་ཀྱིས་བྱང་ཆུབ་རློམ་སེམས་སུ་བྱེད་པ་དང་། །ཐོས་པ་ཡོངས་སུ་ཚོལ་བས་བྱང་ཆུབ་རློམ་སེམས་སུ་བྱེད་པ་དང་། ངོ་ཚ་ཤེས་
པ་དང་། ཁྲེལ་ཡོད་པས་བྱང་ཆུབ་འདོགས་པ་དང་། འོང་བ་དང་འགྲོ་བས་བྱང་ཆུབ་རློམ་སེམས་སུ་བྱེད་པའི་ཆོས་འདི་ནི་དགེ་སྦྱོང་དུ་བྱེད་པའི་ཆོས་མ་ཡིན། བྲམ་ཟེར་བྱེད་པའི་ཆོས་མ་ཡིན་ནོ། །གང་རློམ་སེམས་སུ་བྱེད་པའི་ཆོས་དེ་ནི་གནོད་པར་འགྱུར་རོ། །ཅིས་གནོད་པར་འགྱུར་ཞེ་
ན། འདོད་ཆགས་ཀྱིས་གནོད་པར་འགྱུར་རོ། །ཞེ་སྡང་གིས་གནོད་པར་འགྱུར་རོ། །གཏི་མུག་གིས་གནོད་པར་འགྱུར་རོ། །དེ་ལ་གང་མིག་གིས་མཚན་མར་འཛིན་པ་དེ་ནི་མཚན་མར་འཛིན་པས་ཡིད་དུ་འོང་བ་དང་། ཡིད་དུ་མི་འོང་བའི་གཟུགས་རྣམས་ཀྱིས་མིག་ལ་གནོད་པར་

འགྱུར་རོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་དེ་བཞིན་ཏེ། ཡིད་ཀྱིས་མཚན་མར་འཛིན་ན་དེ་མཚན་མར་འཛིན་པས་ཡིད་དུ་འོང་བ་དང་། ཡིད་དུ་མི་འོང་བའི་ཆོས་རྣམས་ཀྱིས་ཡིད་ལ་གནོད་པར་འགྱུར་རོ། །གང་ལ་གནོད་པར་འགྱུར་བ་དེ་ནི་སེམས་ཅན་
དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དང་། ལྷ་དང་མིའི་ནང་དུ་ཕོངས་པར་འགྱུར་རོ། །གང་ཕོངས་པ་དེ་ནི་རློམ་སེམས་ཀྱིས་ཕོངས་པར་འགྱུར་རོ། །དེ་ལ་རློམ་སེམས་གང་ཞེ་ན། ངའོ་སྙམ་པ་ནི་རློམ་སེམས་སོ། །ངའི་འོ་སྙམ་པ་ནི་རློམ་སེམས་སོ། །
བུད་མེད་དོ་སྙམ་པ་ནི་རློམ་སེམས་སོ། །སྐྱེས་པའོ་སྙམ་པ་ནི་རློམ་སེམས་སོ། །སའོ་སྙམ་པ་ནི་རློམ་སེམས་སོ། །ཆུའོ་སྙམ་པ་ནི་རློམ་སེམས་སོ། །མེའོ་སྙམ་པ་ནི་རློམ་སེམས་སོ། །རླུང་ངོ་སྙམ་པ་ནི་རློམ་སེམས་སོ། །ཀེང་རུས་སུ་འདུ་ཤེས་པ་ནི་རློམ་སེམས་སོ། །རྣམ་པར་
ཟོས་པར་འདུ་ཤེས་པ་ནི་རློམ་སེམས་སོ། །རྣམ་པར་སྔོས་པར་འདུ་ཤེས་པ་ནི་རློམ་སེམས་སོ། །རྣམ་པར་དམར་བར་འདུ་ཤེས་པ་ནི་རློམ་སེམས་སོ། །རྣམ་པར་འབུ་ཞུགས་པར་འདུ་ཤེས་པ་ནི་རློམ་སེམས་སོ། །རྣམ་པར་གྲོལ་བར་འདུ་ཤེས་པ་ནི་རློམ་སེམས་སོ། །རྣམ་
པར་གྲོལ་བ་གང་ཅི་ཡང་རུང་བ་ཞིག་ཡོད་དོ་སྙམ་དུ་རློམ་སེམས་སུ་བྱེད་ཅིང་དེས་རྣམ་པར་གྲོལ་བར་འགྱུར་རོ་སྙམ་པ་ནི་རློམ་སེམས་སོ། །སྔོན་གྱི་གནས་རྗེས་སུ་དྲན་པ་རྣམ་པ་དུ་མ་སྔོན་དུ་བྱའོ་སྙམ་པ་ནི་རློམ་སེམས་སོ། །བདག་རྗེས་སུ་དྲན་པར་བྱའོ་སྙམ་པ་ནི་རློམ་སེམས་སོ། །
ཤིན་ཏུ་འདས་སོ། །ཤིན་ཏུ་ད་ལྟར་བྱུང་ངོ་། །ང་བདག་གང་ཡིན་པ་དེ་འདས་པའོ། །ང་བདག་གང་ཡིན་པ་དེ་ད་ལྟར་བྱུང་བའོ་སྙམ་པ་ནི་རློམ་སེམས་སོ། །གང་དང་གང་དུ་འདུ་ཤེས་པ་ནི་རློམ་སེམས་ཏེ། མྱ་ངན་ལས་འདས་པའི་བར་དུ་འདུ་ཤེས་པ་ནི་རློམ་སེམས་སོ། །མྱ་ངན་ལས་
འདས་པ་ཐོབ་པར་བྱའོ་སྙམ་པ་ནི་རློམ་སེམས་སོ། །འོད་སྲུང་མདོར་ན་དམིགས་པ་ནི་རློམ་སེམས་སོ། །གང་དང་གང་དུ་འདུ་ཤེས་འཇུག་ན་ཐ་ན་སྟོང་པ་ཉིད་དོ་སྙམ་པ་དེ་ཐམས་ཅད་ཀྱང་རློམ་སེམས་ཏེ། དགེ་སྦྱོང་དུ་བྱེད་པའི་ཆོས་མ་ཡིན་པ་དང་། བྲམ་ཟེར་བྱེད་པའི་ཆོས་མ་ཡིན་པ་

ཐམས་ཅད་ནི་རློམ་སེམས་ཐམས་ཅད་དོ། །འདི་ལྟར་འདི་དག་ནི་དགེ་སྦྱོང་གི་སྤྱོད་པ་མ་ཡིན། བྲམ་ཟེའི་སྤྱོད་པ་མ་ཡིན་ནོ། །དགེ་སྦྱོང་དང་བྲམ་ཟེའི་ཆོས་རྣམས་ནི་དེ་བཞིན་གཤེགས་པས་གསུངས་པ་སྟེ། འོད་སྲུང་འདི་ལྟ་སྟེ། དཔེར་ན་ནམ་མཁའ་འམ་ས་ལྟ་བུའོ། །དེ་ཅིའི་
ཕྱིར་ཞེ་ན། བར་སྣང་ནི་འདི་སྙམ་དུ་ང་བར་སྣང་ངོ་སྙམ་དུ་མི་སེམས་པའི་ཕྱིར་རོ། །འོད་སྲུང་དེ་བཞིན་དུ་དགེ་སྦྱོང་དང་། བྲམ་ཟེ་ཡང་འདི་སྙམ་དུ་ང་ནི་དགེ་སྦྱོང་ངོ་། །ང་ནི་བྲམ་ཟེའོ་སྙམ་དུ་མི་སེམས་སོ། །འོད་སྲུང་དེ་ལྟ་བས་ན་གང་ཆོས་འདི་དག་ལ་རློམ་སེམས་སུ་མི་བྱེད་པ་དེ་ནི་དགེ་
སྦྱོང་དུ་བྱེད་པའི་ཆོས་སོ། །བྲམ་ཟེར་བྱེད་པའི་ཆོས་སོ། །ཅིའི་ཕྱིར་དགེ་སྦྱོང་དུ་བྱེད་པའི་ཆོས་དང་། བྲམ་ཟེར་བྱེད་པའི་ཆོས་ཞེས་བྱ་ཞེ་ན། དགེ་སྦྱོང་ནི་དེ་ལྟར་བྱེད་པ་ཡང་མེད། མི་བྱེད་པ་ཡང་མེད་དེ། དེའི་ཕྱིར་དགེ་སྦྱོང་དུ་བྱེད་པ་དང་། བྲམ་ཟེར་བྱེད་པའི་ཆོས་ཞེས་བྱའོ། །འོད་
སྲུང་འདི་ལྟ་སྟེ། དཔེར་ན་མི་ལ་ལ་ཞིག་མཚན་མོ་མུན་པ་མུན་ནག་གི་མུན་པར་ཞུགས་ནས་ལག་པ་གཡོབ་ཅིང་ཁ་གདངས་ཏེ་ཚིག་འདི་སྐད་ཅེས་འཇིག་རྟེན་ལ་ཅོ་དྲིའོ། །འཇིག་རྟེན་ལ་ཅོ་དྲིའོ་ཞེས་སྨྲ་ན། འོད་སྲུང་འདི་ཇི་སྙམ་དུ་སེམས། མི་དེས་གང་ཞིག་ལ་ཅོ་དྲིས་པར་གྱུར།
གསོལ་པ། བཅོམ་ལྡན་འདས་བདག་ཉིད་ལ་ཅོ་དྲིས་ལགས་སོ། །དེ་ཅིའི་སླད་དུ་ཞེ་ན། དེ་ན་ཅོ་དྲི་བ་གང་ཡང་མ་མཆིས་པའི་སླད་དུའོ། །བཀའ་སྩལ་པ། འོད་སྲུང་དེ་བཞིན་དུ་དགེ་སློང་ཡང་དགོན་པ་ན་འདུག་གམ། ཤིང་དྲུང་ན་འདུག་གམ། ཁང་སྟོང་ན་འདུག་གམ།
བླ་གབ་མེད་པ་ན་འདུག་ཀྱང་རུང་སྟེ། མིག་མི་རྟག་གོ་ཞེས་ཡིད་ལ་བྱེད། རྣ་བ་དང་། སྣ་དང་། ལྕེ་དང་། ལུས་དང་། ཡིད་མི་རྟག་གོ་ཞེས་ཡིད་ལ་བྱེད། གཟུགས་མི་རྟག་གོ་ཞེས་ཡིད་ལ་བྱེད། སྒྲ་དང་། དྲི་དང་། རོ་དང་། རེག་དང་། ཆོས་རྣམས་མི་རྟག་གོ་ཞེས་ཡིད་ལ་བྱེད།
མྱ་ངན་ལས་འདས་པ་ཐོབ་པར་བྱའོ་ཞེས་ཡིད་ལ་བྱེད་ཅིང་བདག་རྣམ་པར་ཞི་བར་བྱའོ་སྙམ་པ་འདི་ལྟ་བུ་འདི་ནི་དགེ་སྦྱོང་གི་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། གང་མིག་དམིགས་ནས་མིག་དགག་པའི་ཕྱིར་མངོན་པར་བརྩོན་ཞིང་མངོན་པར་འདུ་བྱེད་བ་དེ་ནི་སྡིག་པ་འཛིན་པར་

རྟོག་པའོ། །གང་རྣ་བ་དང་། སྣ་དང་། ལྕེ་དང་། ལུས་དང་། ཡིད་དམིགས་ནས་ཡིད་དགག་པའི་ཕྱིར་མངོན་པར་བརྩོན་ཞིང་མངོན་པར་འདུ་བྱེད་པ་དེ་ནི་གནས་གསུམ་དམིགས་ཏེ། བསྒྲུབ་པ་ཡིད་ལ་བྱེད་པ་དེ་དག་གིས་གནས་གསུམ་ལ་རྟོག་གོ །གང་ལ་
མཐོང་བས་རྟོག་པ་ཡོད་པ་དེ་ལ་སེམས་རྩེ་གཅིག་པ་ག་ལ་ཡོད། འོད་སྲུང་སངས་རྒྱས་ཀྱི་བྱང་ཆུབ་འདི་ནི་ཟབ་སྟེ། རྟོགས་པར་དཀའ་བའོ། །ཚོགས་ནི་ཉམས་སུ་ལེན་པར་དཀའ་བའོ། །འོད་སྲུང་སེམས་རྩེ་གཅིག་པ་ཞེས་བྱ་བ་ཇི་ཙམ་གྱིས་ན་སེམས་རྩེ་གཅིག་པ་ཞེས་བྱ་ཞེ་ན།
ཡོངས་སུ་བཙལ་ན་ཆོས་གཅིག་ཀྱང་མི་དམིགས་པ་སྟེ། མིག་ལ་སྙིང་པོ་མི་དམིགས་སོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་སྙིང་པོ་མི་དམིགས་སོ། །ཆོས་ཐམས་ཅད་ལ་སྙིང་པོ་མེད་པར་ཡང་མི་དམིགས་སོ། །དེ་ཅིའི་ཕྱིར་ཞེ་ན། སེམས་ཀྱི་རང་བཞིན་སྐྱེ་བ་མེད་
པ་གང་ཡིན་པ་འདི་ནི་དེའི་རང་བཞིན་ཡིན་པའི་ཕྱིར་རོ། །ཆོས་ཐམས་ཅད་ནི་སྙིང་པོ་མེད་པ། དམིགས་པ་མེད་པ་སྟེ། དེ་དག་ནི་འདས་པ་ཡང་རུང་། མ་འོངས་པ་ཡང་རུང་། ད་ལྟར་བྱུང་བ་ཡང་རུང་། སེམས་ལ་མི་དམིགས་སོ། །མི་དམིགས་པ་དང་མངོན་པར་འདུ་མི་བྱེད་པས་
དེའི་ཕྱིར་མངོན་པར་འདུ་མི་བྱེད་པ་ཞེས་བྱའོ། །ཅིའི་ཕྱིར་མངོན་པར་འདུ་མི་བྱེད་པ་ཞེས་བྱ་ཞེ་ན། རྙིང་པ་དང་། གསར་པ་མངོན་པར་འདུ་མི་བྱེད་དེ། དེའི་ཕྱིར་མངོན་པར་འདུ་མི་བྱེད་པ་ཞེས་བྱའོ། །དེ་ལ་འདས་པའི་སེམས་ཀྱང་རྣམ་པར་མི་འགྲོལ། མ་འོངས་པའི་སེམས་ཀྱང་རྣམ་
པར་མི་འགྲོལ། ད་ལྟར་བྱུང་བའི་སེམས་ཀྱང་རྣམ་པར་མི་འགྲོལ་ལོ། །གང་སེམས་མི་དམིགས་པ་དེའི་ཕྱིར་སེམས་རྩེ་གཅིག་པ་ཞེས་བྱ་སྟེ། འདི་ནི་སེམས་ཀྱི་བགྲང་བར་བྱས་པའོ། །འོད་སྲུང་མ་འོངས་པའི་དུས་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་
མར་ལུས་ཁས་འཆེ་ཞིང་དངོས་པོ་དེ་དང་དེ་རྣམ་པར་འཇིག་པར་འདོགས་པ་དག་བྱུང་སྟེ། དེ་དག་ཕུང་པོ་ལྔར་འདུ་ཤེས་པར་འགྱུར་ཏེ། དེ་བཞིན་གཤེགས་པས་ཕུང་པོ་ལྔ་ནི་རྨི་ལམ་ལྟ་བུར་གསུངས་ན། དེ་དག་དེའི་ཚེ་འདི་ལྟར་རྨི་ལམ་ཞེས་བྱ་བའི་ཐ་སྙད་ཡོད་པས་རྨི་ལམ་འདི་ནི་ཡོད་དོ། །རྨི་

ལམ་འདི་ནི་ཡོད་དོ་ཞེས་རྨི་ལམ་ཡང་དག་པ་ཉིད་དུ་སྟོན་པར་འགྱུར་རོ། །གལ་ཏེ་རྨི་ལམ་མེད་དུ་ཟིན་ན། །བདག་ཅག་དེ་ལ་རྨི་ལམ་གྱི་འདུ་ཤེས་མི་འབྱུང་ངོ་། །དེ་ལྟ་བས་ན་རྣམ་པར་རིག་པ་དེ་ཡོད་དེ། །དེ་བས་ན་བདག་ཅག་རྨི་ལམ་དེ་ལ་རྨི་ལམ་དུ་འདུ་ཤེས་བྱུང་ངོ་། །དེ་བཞིན་དུ་གང་དག་ཉེ་བར་
བཟུང་སྟེ་རྨི་ལམ་ལྟ་བུའོ་ཞེས་གསུངས་པའི་ཕུང་པོ་ལྔ་པོ་དེ་དག་ཀྱང་ཡོད་དོ། །ཀྱེ་ཕུང་པོ་དེ་དག་མེད་དུ་ཟིན་ན་ཕུང་པོ་ལྔ་ཉེ་བར་བཟུང་སྟེ་རྨི་ལམ་ལྟ་བུའོ་ཞེས་མཛད་པར་མི་འགྱུར་རོ་ཞེས་ཟེར་རོ། །ཀྱེ་མི་བླུན་པོ་དེ་དག་ནི་རྨི་ལམ་ལ་ཡང་དག་པའི་འདུ་ཤེས་བསྐྱེད་པར་འགྱུར་ཏེ། དེ་དག་འདི་ལྟ་
བུའི་མདོ་སྡེ་འདི་དག་ཐོས་ནས་སྤོང་བར་འགྱུར་རོ། །དེ་ལ་དགེ་སློང་མ་གང་དག་འབྱུང་བ་དེ་དག་ནི་བསླང་བའི་ཁྱིམ་མང་པོ་དག་ཏུ་དགྲ་བཅོམ་མ་ཡིན་ནོ་ཞེས་སྒྲོགས་ཤིང་དགེ་སློང་མའི་གླེང་གཞི་ནི་ཤེས་རབ་སོར་གཉིས་པ་ཡིན་ན་ཐོབ་པར་རྗོད་ཅིང་ལེན་པར་འགྱུར་རོ། །དེ་ལ་དགེ་བསྙེན་དང་། དགེ་
བསྙེན་མ་དེ་དག་ནི་ཚིགས་སུ་བཅད་པ་ཙམ་འམ། ཚིགས་སུ་བཅད་པའི་ཆ་ཙམ་ཐོས་ནས་ཐོབ་པར་སྒྲོགས་པར་འགྱུར་རོ། །འོད་སྲུང་དེ་ལྟར་ན་དེའི་ཚེ་དགེ་སློང་གང་ལོ་ཉི་ཤུ་འམ། སུམ་ཅུར་དགོན་པའི་གནས་ན་མངོན་པར་བརྩོན་པར་འགྱུར་བ་དེ་སངས་རྒྱས་ཀྱི་གསུང་རབ་ཀྱི་ཆེད་
དུ་དགེ་བསྙེན་ཞག་གཅིག་ལོན་པ་དང་འགྲོགས་པར་འགྱུར་ཏེ། འོད་སྲུང་སྟོང་པ་སྒྲོགས་པར་འགྱུར་རོ། །དེ་ལ་ཕན་ཚུན་སྟོང་པ་སྟོང་པ་ཞེས་ཚིག་ཏུ་བརྗོད་པས་ཡོངས་སུ་རྟོགས་སོ། །ཡོངས་སུ་རྟོགས་སོ་ཞེས་ཚིག་ཏུ་སྨྲ་བར་འགྱུར་རོ། །དེ་ལ་དགེ་སློང་གང་ཆོས་འདི་ལྟ་བུ་འདི་དག་ཐོས་
ནས་འདི་ལྟ་བུ་དག་ཕན་ཚུན་བརྗོད་པར་འགྱུར་རོ། །དེ་དག་གིས་དེ་དག་ཐོས་ནས་སྐྲག་པར་འགྱུར་ཏེ། ཁྱིམ་པའམ་རབ་ཏུ་བྱུང་བ་ཡང་རུང་། ཚིག་འདི་སྐད་ཅེས་ཁྱིམ་པ་རྣམས་དང་འགྲོགས་པར་མི་བྱ་སྟེ། མི་འགྲོགས་ཀྱིས་ཕ་ཟད་ཅིག །འདི་ནི་སྟོན་པའི་བཀའ་མ་ཡིན་ནོ་ཞེས་སྨྲ་བར་
འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཤེས་པ་དང་། ཇི་ལྟར་རབ་ཏུ་ཤེས་པ་དེས་ཕན་ཚུན་འདུ་བར་འགྱུར་ཞིང་དེ་དག་ལ་གང་གིས་ཤིན་ཏུ་ཟབ་མོ་བརྗོད་པ་དེ་སྤོང་བར་འགྱུར་ཏེ། ཁྱིམ་པ་དང་རབ་ཏུ་བྱུང་བ་དེ་དག་གིས་དེ་བརྙས་པར་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། འོད་སྲུང་ཚངས་

པར་སྤྱོད་པའི་སྙིང་པོ་མཆོག་བསྟན་པ་ན་ཤེས་པར་འགྱུར་བ་ཡང་ཉུང་ན། དེའི་ཚེ་ཉུང་ངུ་དེ་དག་ཀྱང་ཡོངས་སུ་མྱ་ངན་ལས་འདས་ཤིང་ཤིན་ཏུ་ཉུང་ལ་མཆོག་ཏུ་ཤིན་ཏུ་ཉུང་བ་རྣམས་ལུང་འབོགས་པ་ལྟ་སྨོས་ཀྱང་ཅི་དགོས། འོད་སྲུང་དེ་ལྟར་ན་དེའི་ཚེ་གང་ཡང་དག་པ་ཇི་ལྟ་བ་
བཞིན་དུ་རྟོགས་ཤིང་མི་འགལ་བར་ཤེས་པའི་དགེ་སློང་ནི་དགེ་སློང་སྟོང་གི་དགེ་འདུན་གྱི་ནང་ན་ཡང་གཅིག་ཀྱང་དེ་ན་དཀོན་པར་འགྱུར་རོ། །དེ་ན་གཞན་གང་དག་འབྱུང་བ་དེ་དག་ནི་སྐྱེ་བོ་དེ་ལས་མི་སློབ་སྟེ་གང་ཡང་དག་པ་ཇི་ལྟ་བ་བཞིན་དུ་རྟོགས་ཤིང་མི་འགལ་བར་སྦྱོར་བ་དང་ལྡན་པར་འགྱུར་བའི་དགེ་སློང་ནི་
དགེ་སློང་ཉིས་སྟོང་གི་དགེ་འདུན་གྱི་ནང་ན་ཡང་གཅིག་ཀྱང་དེ་ན་དཀོན་པར་འགྱུར་རོ། །འོད་སྲུང་དེ་ལྟར་ན་དེའི་ཚེ་ཁྱིམ་པ་དང་། རབ་ཏུ་བྱུང་བ་དག་བསྟན་པ་འདི་ལ་བརྙས་པར་འགྱུར་རོ། །འོད་སྲུང་དེའི་ཚེ་དེའི་དུས་ན་དགེ་སློང་གང་མི་དགེ་བའི་ཆོས་སྤང་བ་དང་། དགེ་བའི་ཆོས་བསྐྱེད་པའི་
ཕྱིར་བརྩོན་འགྲུས་བརྩམས་པ་དང་། ནམ་གྱི་ཆ་སྟོད་དང་། ནམ་གྱི་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་འབྱུང་བར་འགྱུར་ཏེ། དེ་ནི་དེའི་ཚེ་སྲོག་ལ་འབབ་པར་འགྱུར། སྨད་པར་འགྱུར། ཡོངས་སུ་སྤོང་བར་འགྱུར་རོ། །འོད་སྲུང་དེ་ལྟར་ན་དེའི་ཚེ་ཆོས་འདི་ལྟ་བུ་རྣམ་
པར་འཇིག་པར་འགྱུར། དགེ་སློང་རྣམ་པར་འཇིག་པར་འགྱུར་རོ། །དེ་ན་མཁས་པ་ཟབ་མོ་ལ་མོས་པ་གོས་པ་མེད་པ་ལ་མོས་པ་དག་གིས་དེའི་ཚེ་གུས་པ་དང་བཅས་པར་བྱ། ཞེས་དང་བཅས་པར་བྱ་ཞིང་གཅིག་ཏུ་འདུས་ནས་དགོན་པ་ལ་གནས་པར་བྱའོ། །དེ་ནས་བཅོམ་ལྡན་
འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡིས་ཆོས་གང་ལེགས་བཤད་པ། །དམ་པའི་དོན་དང་ལྡན་པ་སྟེ། །ཕུང་པོ་སྙིང་པོ་མེད་བསྟན་པ། །དེ་དག་རྨི་ལམ་འདྲ་བར་ལྟོས། དེ་ཚེ་དགེ་སློང་དེ་དག་ནི། །རྩོད་པར་བྱེད་དེ་གཡོ་ཞིང་འགུལ། །ཕན་
ཚུན་བྱེ་བྲག་ཡོད་མེད་དེ། །དེ་དག་འདུ་ཤེས་རྙེད་པར་འགྱུར། །དགེ་སློང་གང་གིས་ཅི་བརྗོད་པ། །དེ་དག་རྣམས་ཀྱང་དེ་ཙམ་བརྗོད། །ཆོས་ཀྱི་ཚུལ་ནི་དེ་ཙམ་སྟེ། །བྱེ་བྲག་ཡོད་པར་མི་འགྱུར་རོ། །ཁྱིམ་པས་དགེ་སློང་སྨྲ་བ་ནི། །སངས་རྒྱས་རྣམས་ཀྱི་བྱང་ཆུབ་འདི། །

གལ་ཏེ་ཤེས་ན་ངོ་མཚར་ཏེ། །ཁྱོད་ཀྱིས་འབྲས་བུ་དང་པོ་ཐོབ། །ཁྱིམ་པ་དགེ་སློང་སྟེན་དེ་དག །ཆོས་མཐོང་ཡིན་པ་སྙམ་དུ་སེམས། །དེ་ཡི་མདུན་དུ་སྦྱིན་པ་རྣམས། །དེ་དག་ཡང་ཡང་སྦྱིན་པར་འགྱུར། །དགེ་སློང་ཇི་ལྟར་བཤད་པ་དག །དེ་ནི་དེ་བཞིན་གཞན་དུ་མིན། །
བདེན་པ་མཐོང་དེས་བདག་ཅག་ལ། །བཤད་པ་རྣམས་ནི་འཐུན་སྙམ་བྱེད། །སྦྱིན་པ་ཡོད་དེ་དགེ་སློང་རྣམས། །དམ་པའི་ཆོས་ལ་མི་གནས་ཏེ། །དེ་ཡི་ཚེ་ན་བྱུང་བ་རྣམས། །སངས་རྒྱས་བྱང་ཆུབ་འཇིག་པར་བྱེད། །དེ་ལ་མ་སྟེན་ང་ལ་སྟེན། །ང་ནི་ཁྱོད་ཀྱི་སྟོན་པ་ཡིན། །
ང་ནི་ཇི་ལྟར་གྱུར་པ་བཞིན། །ཁྱོད་ཀྱིས་མྱུར་དུ་ཐོབ་པར་འགྱུར། །འདི་ནི་གནས་ཀྱི་དམ་པ་སྟེ། །ཞི་བ་ཡིན་ཞེས་ཕན་ཚུན་སྨྲ། །ཐམས་ཅད་གཅིག་ཏུ་འདུས་གྱུར་ནས། །ང་ཡི་བསྟན་པ་འཇིག་བྱེད་འགྱུར། །དཔེར་ན་གྲོང་འཇོམས་བྱེད་པ་ཡི། །ཆོམ་རྐུན་ཤིན་ཏུ་
མི་བཟད་རྣམས། །གྲོང་ཁྱེར་རྣམས་དང་ཡུལ་འཁོར་དང་། །གྲོང་འདབ་དག་ནི་རྣམ་པར་འཇིག །དེ་བཞིན་དགེ་སློང་རྣམས་འབྱུང་བ། །བློ་ངན་དམན་ཞིང་ཤིན་ཏུ་རྨོངས། །ཤེས་རབ་ཆུང་ཞིང་སྡོམ་པ་འཆལ། །སྲོག་དང་གང་ཟག་ཤིན་ཏུ་རྟེན། །ང་ཡིས་གཡོ་
བ་གང་བཤད་པ། །དེར་བརྟེན་འདི་ལ་ཉམས་པ་སྟེ། །དེ་དང་དེ་དག་དགྲ་བཅོམ་སྨྲ། །དེ་ཀུན་ལྷག་པའི་ང་རྒྱལ་ཅན། །དགེ་སློང་དགེ་འདུན་མདུན་དག་ཏུ། །དེ་དག་འདུས་པར་གྱུར་ཀྱང་ནི། །དེ་ནི་མིང་དུ་སྣང་བར་ཟད། །གཅིག་ཀྱང་དེ་ནི་ཤིན་ཏུ་དཀོན། །དེ་ཚེ་ཆོས་ཀྱི་རྒྱལ་
པོ་ཡི། །བྱང་ཆུབ་རབ་ཏུ་སྤོང་བར་འགྱུར། །ལྷ་རྣམས་སྡུག་བསྔལ་ཡི་མུག་ཅིང་། །ཡང་དང་ཡང་དུ་ངུ་བར་འགྱུར། །ཆོས་མཆོག་ཤཱཀྱ་སེང་གེ་ཡི། །བསྟན་པ་འདི་ནི་རབ་འཇིག་ཅེས། །དེ་ན་ལྷ་གང་དད་པ་རྣམས། །ས་ལ་རབ་ཏུ་འགྱེལ་བར་འགྱུར། །ཀྱེ་མ་སངས་
རྒྱས་ཞེས་སྨྲ་ཞིང་། །ཀྱེ་མ་ལེགས་པར་བཤད་པའི་ཆོས། །ཀྱེ་མ་དགེ་འདུན་སྦྱིན་པའི་གནས། །སངས་རྒྱས་ཐུགས་སྐྱེས་སྲས་ཞེས་སྨྲ། །ཆོས་ཀྱི་རྒྱལ་པོས་བསྟན་པ་ཡི། །ཆོས་ནི་ཕྱིན་ཅད་མི་ཐོས་སོ། །ཀུན་ཏུ་རྨོངས་ཤིང་མུན་པར་གྱུར། །ཐུབ་པ་འདི་ནི་མྱ་ངན་འདའ། །

ས་བླའི་ལྷ་རྣམས་དེ་མ་ཐག །སྒྲ་ཆེན་འདི་སྐད་སྒྲོགས་པར་འགྱུར། །སྒྲོན་མ་འདི་ནི་མེད་འགྱུར་ཞེས། །ལྷ་རྣམས་གོ་བར་བྱེད་པར་འགྱུར། །དེ་ལས་འཇིག་རྟེན་ལྷག་མེད་པའི། །སངས་རྒྱས་ཁྱ