Kinh tạng Tây Tạng (Kangyur Đại Học) — 039_དཀོན་བརྩེགས།_ཀ

ེད་ཀྱིས་ཐོས་ཟིན་གྱིས། །ཕྱིན་ཅད་ལྷ་དང་ཀླུ་རྣམས་ཀྱང་། །
ཡིད་ལ་གཅགས་པར་གྱུར་ཏ་རེ། །སངས་རྒྱས་ཇི་ལྟར་ང་འགྱུར་ཞེས། །བསྐལ་པ་གྲངས་མེད་གསུམ་དུ་དེས། །བདག་གི་དང་ནི་གཞན་དག་གི །སྡུག་བསྔལ་ཐམས་ཅད་བཟོད་པར་བྱས། །གང་གིས་སྲོག་ཆགས་ཐམས་ཅད་ལ། །ཤིན་ཏུ་ལེགས་པར་ཆོས་བསྟན་པ། །
འཇིག་རྟེན་མགོན་པོ་དེ་ཡི་ཆོས། །འདི་ནི་ཤིན་ཏུ་ནུབ་པར་འགྱུར། །འཁྲུག་པ་བྱེད་པ་བྱུང་གྱུར་ཏེ། །ཤིན་ཏུ་མི་བཟད་སྡིག་བྱེད་པ། །བདུད་ཀྱི་ཕོ་ཉ་དྲག་པོའི་བདུད། །འཇིག་འདོད་བཀའ་བློ་རབ་མི་བདེ། །གཡོ་བྱེད་གཡོན་ཅན་བློ་གྲོས་ངན། །སྒྱུ་དང་ལྡན་ཞིང་
བྱིས་པ་དམན། །ཁྲོས་ཤིང་ཁྲོས་ནས་བླ་མ་དང་། །རྒྱལ་བའི་བསྟན་པ་འཇིག་པར་བྱེད། །ས་བླ་པ་ལས་སྒྲ་ཐོས་ནས། །བླ་མའི་ལྷ་རྣམས་མི་དགར་འགྱུར། །རྒྱལ་པོ་ཆེན་པོ་བཞི་པོ་ཡང་། །དེ་ཚེ་ཡིད་མི་བདེ་བར་འགྱུར། །ལྕང་ལོ་ཅན་གྱི་ཕོ་བྲང་དུ། །གནོད་སྦྱིན་
ཚོགས་རྣམས་འདུས་གྱུར་ནས། །ཐམས་ཅད་གདོང་ལ་མཆི་འཛག་ཅིང་། །འཇིགས་སུ་རུང་བའི་སྒྲ་ཡང་འབྱིན། །ལྷ་རྣམས་ཐམས་ཅད་འདུས་གྱུར་ནས། །ཉམ་ཐག་པར་ནི་ཆོ་དེ་འདོན། །ཕན་ཚུན་སློབ་པར་མི་བྱེད་ཅིང་། །ཡིད་ནི་ཤིན་ཏུ་དམན་པར་འགྱུར། །གྲོང་ཁྱེར་གང་
དག་རབ་བརྒྱན་ཅིང་། །རིན་ཆེན་རང་བཞིན་གནས་པ་རྣམས། །ཐམས་ཅད་མི་སྡུག་མདོག་གྱུར་ཅིང་། །ཕྱག་དར་ཕུང་པོ་འདྲ་བར་འགྱུར། །གྲོང་ཁྱེར་དམ་པ་དེ་དག་ཏུ། །སྐད་ཅིག་དེ་ལ་དགའ་མི་འགྱུར། །གྲོང་ཁྱེར་དམ་པ་དེ་དག་ཏུ། །སྔོན་ཆད་བཞིན་དུ་དགའ་མི་འགྱུར། །
གང་དུ་ང་ནི་བཙས་གྱུར་པ། །དེར་ནི་ལྷ་རྣམས་འདང་བྱེད་ཅིང་། །མཐོང་ནས་རབ་ཏུ་འགྱེལ་འགྱུར་ཏེ། །དེ་ལྟར་ཤིན་ཏུ་མི་བཟད་འགྱུར། །ས་ལ་འབབ་པར་བྱེད་འགྱུར་ཞིང་། །དེར་འདོང་དེར་ནི་འདུག་པར་བྱ། །ཡང་དག་ཉིད་ཀྱི་ཆོས་རྣམས་ནི། །མྱུར་དུ་འཇིག་འགྱུར་ཡོད་

ཅེས་འཛེར། །འཛམ་བུའི་གླིང་དུ་བབས་གྱུར་ནས། །རྣམ་པར་འཇིག་པ་མཐོང་བར་འགྱུར། །སངས་རྒྱས་སྲས་རྣམས་བྲེལ་ཕོངས་ཏེ། །ཤིན་ཏུ་རྣམ་པར་འཇིག་པར་འགྱུར། །གྲོང་ཁྱེར་མཆོག་རྣམས་ཞག་བདུན་དུ། །ཁ་དོག་གཟི་བྱིན་མེད་པར་འགྱུར། །ཞག་བདུན་
བར་དུ་ལྷ་རྣམས་ཀྱང་། །ཡང་དང་ཡང་དུ་ངུ་བར་འགྱུར། །ཀྱེ་མ་སངས་རྒྱས་དཔའ་ཆེན་པོ། །མངོན་སུམ་མཐོང་བར་གང་གྱུར་པ། །མགོན་པོ་དེ་ཡང་སྣང་མ་གྱུར། །བདག་མགོན་དེ་ཡང་མྱ་ངན་འདས། །མཉན་ཡོད་གནས་པར་གྱུར་པ་ན། གང་དག་ལྷགས་ནས་
བསྙེན་བཀུར་བ། །དེ་དག་ས་དེར་གནས་ནས་སུ། །ཡང་དང་ཡང་དུ་ངུ་བར་འགྱུར། །འདི་ནི་སངས་རྒྱས་གདན་ཡིན་ཏེ། །འཕགས་པའི་བདེན་པ་བཞི་པོ་དག །མི་མཆོག་གིས་ནི་དེར་བཤད་པ། །བདག་ཅག་དེ་ཚེ་མངོན་སུམ་མོ། །འཇིག་རྟེན་དག་ཀྱང་ཡང་ལྡོངས་ཤིང་། །
ཕན་ཚུན་གུས་པར་བྱེད་མི་འགྱུར། །སྡིག་པའི་ལས་རྣམས་བྱས་ནས་སུ། །དེས་ནི་ངན་འགྲོར་འགྲོ་བར་འགྱུར། །ལྷ་ཡི་གཞལ་མེད་ཁང་མང་རྣམས། །དེ་ཡི་ཚེ་ན་སྟོངས་པར་འགྱུར། །འཛམ་བུའི་གླིང་གི་སེམས་ཅན་རྣམས། །མགོན་མེད་སྐྱབས་ཀྱང་མེད་པར་
འགྱུར། །འཆག་སར་གྱུར་པའི་གནས་འདི་དག །རྣམ་པར་ཞིགས་ཤིང་སྟོངས་པར་འགྱུར། །ཆོས་རྒྱལ་མྱ་ངན་འདས་གྱུར་པས། །འཇིག་རྟེན་འདི་དག་དགའ་བ་མེད། །སུམ་ཅུ་རྩ་གསུམ་གནས་ཀྱི་བདག །ལྷ་དབང་བརྒྱ་བྱིན་དེ་ཡི་ཚེ། །སྡུག་བསྔལ་གྱུར་ཅིང་
ཡི་མུག་ནས། །སྒྲ་ཆེན་རབ་ཏུ་འབྱིན་པར་འགྱུར། །སུམ་ཅུ་རྩ་གསུམ་ལྷ་ཀུན་ཀྱང་། །ལག་པ་བསྒྲེང་ཞིང་རབ་ཏུ་ངུ་། །སྐྱེད་མོས་ཚལ་དུ་ཐོས་གྱུར་ནས། །དེ་མ་ཐག་ཏུ་རྒྱུག་པར་འགྱུར། །ཆོས་རྣམས་སྟོན་པ་གང་ཡིན་པ། །འཇིག་རྟེན་མགོན་དང་བྲལ་ལོ་ཞེས། །
ལྷ་རྣམས་རྟག་པར་རྒྱུན་དུ་ཡང་། །ང་ནི་རྗོད་པར་བྱེད་པར་འགྱུར། །ལྷ་རྣམས་བདུད་རྩི་མི་ཟ་ཞིང་། །གླུ་ཡི་སྒྲ་ཡང་ལེན་མི་འགྱུར། །སུམ་ཅུ་རྩ་གསུམ་ལྷ་རྣམས་ནི། །ཟླ་བ་དྲུག་ཏུ་ཡིད་མི་བདེ། །བསྟན་པའི་བདག་པོ་མེད་གྱུར་ཅེས། །ལྷ་མ་ཡིན་གྱིས་དེར་ཐོས་ནས་

སུམ་ཅུ་གསུམ་གྱི་ལྷ་རྣམས་དང་། །འཐབ་མོ་བྱེད་དུ་འདོང་ཞེས་འཛེར། །འཛམ་བུའི་གླིང་གི་རྒྱལ་པོ་རྣམས། །སངས་རྒྱས་མཆོད་རྟེན་བྱེད་པར་འགྱུར། །དེ་ཡི་ཚེ་ན་ལྷ་མིན་དང་། །ལྷ་རྣམས་འཐབ་མོ་བྱེད་པར་འགྱུར། །དེ་ཚེ་དགེ་སློང་ཕལ་ཆེར་ཡང་། །
ངན་འགྲོ་དག་ཏུ་འགྲོ་བར་འགྱུར། །དགེ་སློང་མ་ནི་ཕལ་ཆེར་ཡང་། །ངན་འགྲོ་དག་ཏུ་འགྲོ་བར་འགྱུར། །དེ་ཚེ་ཁྱིམ་པ་ཁྲིམས་འཆལ་པ། །དགེ་བསྙེན་པ་འམ་ཁྱིམ་གནས་པ། །དེ་དག་གིས་ཀྱང་སྒྲ་བརྗོད་ནས། །དེས་ན་ངན་འགྲོར་འགྲོ་བར་འགྱུར། །དེ་ཚེ་བུད་མེད་
སྡིག་པ་ཅན། །དེ་དག་འགྲོ་བའང་སྡིག་ཅན་ཏེ། །དེ་ཚེ་འཇིག་རྟེན་ཐམས་ཅད་ཀྱང་། །གཡོ་ཞིང་ཤིན་ཏུ་འགུལ་བར་འགྱུར། །ལ་ལ་དག་ནི་གྲོང་འདབ་རྒྱུག །ལ་ལ་དག་ནི་རི་ལ་རྒྱུག །རྣམ་པར་རྒྱུག་པའི་སེམས་ཅན་རྣམས། །སྲོག་ནི་རིང་པོར་མི་ཐུབ་འགྱུར། །ཆོམ་
རྐུན་དག་ཀྱང་མང་དུ་འབྱུང་། །དགོན་པ་ཡང་ནི་འབྱུང་འགྱུར་ཞིང་། །འབྲུ་རྣམས་བཏབ་ཀྱང་མི་གནས་ཏེ། །བྱི་བ་དག་གིས་གནོད་པར་འགྱུར། །མུ་གེ་བྱུང་བར་གྱུར་པ་ན། མི་གང་འཆི་བའི་དུས་བྱེད་པ། །ཤི་ནས་ཡི་དགས་ནང་འགྲོ་སྟེ། །དེ་ནི་སྡུག་བསྔལ་མྱོང་
བར་འགྱུར། །དེ་ཚེ་ཕྱོགས་བཞིའི་དགེ་འདུན་དང་། །མཆོད་རྟེན་ལ་ནི་གང་ཕུལ་བ། །དེ་ཚེ་དགེ་སློང་དེ་དག་གིས། །ཕན་ཚུན་བགེད་པ་བྱེད་པར་འགྱུར། །ང་འདས་གྱུར་པའི་ཕྱི་ན་ནི། །སྡུག་བསྔལ་འདི་འདྲ་འདི་འབྱུང་གིས། །མྱུར་དུ་རབ་ཏུ་བརྩོན་གྱིས་ཤིག །དེ་ནི་མངོན་
སུམ་གྱུར་ཏ་རེ། །བྱིས་པ་ཐམས་ཅད་མི་ཤེས་ཤིང་། །བྱིས་པ་ཐམས་ཅད་མཁས་མ་ཡིན། །བྱིས་པ་དེ་དག་ལས་བྱས་ནས། །ངན་འགྲོར་མྱུར་དུ་འགྲོ་བར་འགྱུར། །གང་ལས་ཤེས་རབ་འབྱུང་འགྱུར་བ། །ལུང་ནོད་པ་དང་ཁ་ཏོན་དགའ། །ཤེས་རབ་བསླབས་པའི་སེམས་
ཅན་རྣམས། །མྱུར་དུ་བདེ་འགྲོར་འགྲོ་བར་འགྱུར། །ཤེས་རབ་རྣམ་པར་བརྟགས་ན་མཛེས། །ང་ནི་ཅི་འདྲ་དེ་ལྟར་སློབས། །ཐམས་ཅད་འདུ་བ་སྤངས་ནས་སུ། །མྱུར་དུ་མྱ་ངན་འདས་པར་འགྱུར། །དམ་པའི་ཆོས་ནི་ཅུང་ཞིག་གནས། །བརྩོན་འགྲུས་བརྟན་པ་བརྩམ་པར་གྱིས། །

དེ་ཙམ་ཞིག་ནི་སྨྲ་བར་ནུས། །ཚུལ་བཞིན་བསམ་པ་མྱུར་དུ་གྱིས། །བསྐལ་པ་འདི་ནི་འདས་འོག་ཏུ། །བསྐལ་པ་དྲུག་ཅུ་ཐམ་པར་ནི། །སངས་རྒྱས་སྒྲ་གྲག་མི་འགྱུར་ན། །དགའ་བ་འདི་ནི་ག་ལ་འབྱུང་། །བཀྲེས་པས་ཤིན་ཏུ་ཉེན་གྱུར་པས། །ཕན་ཚུན་དག་ནས་འདུས་གྱུར་
ནས། །མ་ཡི་ཤ་དང་བུ་ཡི་ཤ །དེ་དག་ཟ་བར་བྱེད་པར་འགྱུར། །དེ་ན་བུ་ཕོ་སྐྱེས་པ་ཡང་། །བག་ཕེབས་ཁྱིམ་དུ་འགྲོ་མི་བྱེད། །རང་གི་ཁྱིམ་ན་འདུག་ཀྱང་ནི། །ཤིན་ཏུ་འཇིགས་པས་སྐྲག་པར་འགྱུར། །འཁོར་བར་ཤིན་ཏུ་གནོད་གྱུར་པ། །དེ་དག་མཐོང་ཞིང་ཐོས་གྱུར་
ནས། །འདོད་ལ་སུ་ཞིག་སྲེད་པ་སྐྱེ། །འདོད་པའི་རྩ་བ་བུད་མེད་ཡིན། །སྐྱེ་བའི་རྩ་བ་མི་ཤེས་པ། །སྡུག་བསྔལ་རྩ་བ་ཕུང་པོ་སྟེ། །དེ་བས་སྡུག་བསྔལ་ཡོངས་སུ་སྤོངས། །སེམས་ཅན་གང་དག་རྨོངས་གྱུར་པ། །དེ་དག་བུད་མེད་སྟེན་པར་བྱེད། །སེམས་ཅན་གང་
དག་མ་རྨོངས་པ། །མྱུར་དུ་མྱ་ངན་འདས་རེག་འགྱུར། །ལུང་འབོགས་བྱེད་ནི་རྣམ་སྨིན་དང་། །ཕྲད་པར་འགྱུར་བ་ཡོད་མ་ཡིན། །གང་གིས་ངན་འགྲོར་འགྲོ་འགྱུར་བ། །ཟག་བཅས་འབྲས་བུར་བཅས་པ་འདི། །གང་དག་ཟག་པ་མེད་པའི་ཆོས། །གསོབ་དང་གསོག་དང་སྟོང་
པ་དང་། །སྙིང་པོ་མེད་དང་དབེན་པ་སྟེ། །དེ་དག་མྱུར་དུ་རྟོགས་པར་གྱིས། །འོད་སྲུང་ཆོས་དང་པོ་འདི་དང་ལྡན་པའི་བྱང་ཆུབ་སེམས་དཔའ་ཟག་པ་མེད་པའི་ཆོས་འདོད་ན་ཆོས་ཐམས་ཅད་ལ་སེམས་མི་གནས་པར་བསྟན་པར་བྱའོ། །འོད་སྲུང་གཞན་ཡང་བྱང་ཆུབ་སེམས་
དཔའ་ནི་ཡོངས་སུ་སྦྱང་བར་བྱ་བ་བརྟན་པ་ཡིན་ཏེ། དེ་ལ་བརྟན་པ་ནི་གང་ཡོངས་སུ་སྦྱང་བར་བྱ་བ་ནི་གང་ཞེ་ན། སེམས་བརྟན་པ་ཡིན། བརྩོན་འགྲུས་བརྟན་པ་ཡིན་ནོ། །དེ་ལ་སེམས་བརྟན་པ་གང་ཞེ་ན། འོད་སྲུང་འདི་ལ་བྱང་ཆུབ་སེམས་དཔས་འདི་སྙམ་དུ་གང་གཱའི་ཀླུང་གི་
བྱེ་མ་ཇི་སྙེད་པ་དེ་སྙེད་ཀྱི་སངས་རྒྱས་ལ་བསྙེན་བཀུར་བྱས་ནས་ཕྱིས་བྱང་ཆུབ་ཏུ་སེམས་གཅིག་བསྐྱེད་ལ་དེ་ནས་ཡང་བསྐལ་པ་གང་གཱའི་ཀླུང་གི་བྱེ་མ་སྙེད་ན་སངས་རྒྱས་གཅིག་འབྱུང་ཞིང་སེམས་བསྐྱེད་པ་གང་གཱའི་ཀླུང་གི་བྱེ་མ་སྙེད་ཀྱིས་མི་ལུས་གཅིག་ཐོབ་ལ། མིར་སྐྱེ་བ་ཐོབ་པ་

གང་གཱའི་ཀླུང་གི་བྱེ་མ་སྙེད་ཀྱི་ཆོས་ཀྱི་ཚིག་གཅིག་ཐོས་ཤིང་དེས་ཤེས་རབ་གསལ་བར་གྱུར་ཀྱང་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཕན་པར་གྱུར་པ་སྙམ་དུ་སེམས་བསྐྱེད་པར་བྱའོ། །དེ་ལ་བྱང་ཆུབ་སེམས་དཔས་སེམས་བརྟན་པ་འདི་ལྟ་བུ་བསྐྱེད་
པར་བྱ་སྟེ། སངས་རྒྱས་ཀྱི་ཡེ་ཤེས་ཅི་འདྲ་བ་དེ་མནོད་པར་བྱ། བདག་གིས་བྱ་དཀའ་བ་འདི་ལྟ་བུས་དེ་བཙལ་བར་བྱ། བདག་གིས་བྱ་དཀའ་བ་འདི་ལྟ་བུས་སངས་རྒྱས་ཀྱི་ཡེ་ཤེས་དེ་ཡང་དག་པར་བསྒྲུབ་པར་བྱའོ་སྙམ་དུ་སེམས་བསྐྱེད་པར་བྱ་སྟེ། འོད་སྲུང་བྱང་ཆུབ་སེམས་དཔའ་
རྣམས་ནི་སེམས་བརྟན་པ་འདི་ལྟ་བུ་ཡིན་ནོ། །ཀྱེ་འོད་སྲུང་འདི་ལ་མི་མཛངས་པ་ཁ་ཅིག་ནི་དཔེས་བཤད་པའི་དོན་རྟོགས་པར་འགྱུར་བས་ཁྱོད་ལ་དཔེ་བརྗོད་པར་བྱའོ། །འོད་སྲུང་གལ་ཏེ་བྱ་དཀའ་བའི་གནས་འདི་ལྟ་བུས་བྱང་ཆུབ་འཐོབ་སྟེ། གང་ཞིག་བསྐལ་པ་གང་གཱའི་ཀླུང་
གི་བྱེ་མ་སྙེད་དུ་དབུགས་དབྱུང་བར་མི་བྱ། དབུགས་རྔུབ་པར་མི་བྱ་བར་སློབ་ཅིང་དབུགས་དབྱུང་བར་མི་བྱེད། དབུགས་རྔུབ་པར་མི་བྱེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་བྱེད་ཅིང་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གནས་ན་
ཡང་དེ་ལ་བྱང་ཆུབ་སེམས་དཔས་མཐུ་བསྐྱེད་པར་བྱ། སྤྲོ་བ་བསྐྱེད་པར་བྱའི་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཏང་བར་མི་བྱའོ། །སྙམ་དུ་སེམས་བརྟན་པ་འདི་ལྟ་བུ་བསྐྱེད་པར་བྱ་སྟེ། ཀྱེ་འོད་སྲུང་བྱང་ཆུབ་སེམས་དཔའ་ནི་སེམས་བརྟན་པ་འདི་ལྟ་བུ་དང་ལྡན་པ་
ཡིན་ནོ། །འོད་སྲུང་བྱང་ཆུབ་སེམས་དཔའ་གང་ལ་ལ་ཞིག་འདི་ལྟ་བུའི་སེམས་བསྐྱེད་ན་ཅི་ཞིག་འཛིན་ཅེ་ན། གནས་ཀྱང་མི་འཛིན་གནས་མ་ཡིན་པ་ཡང་མི་འཛིན་ཏོ། །ཇི་ལྟར་གནས་ཀྱང་མི་འཛིན་གནས་མ་ཡིན་པ་ཡང་མི་འཛིན་ཅེ་ན། གང་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་འགྱུར་བའི་གནས་ཀྱང་མེད་ལ། དེ་མྱུར་དུ་ཡང་འཐོབ་པའོ། །འོད་སྲུང་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས། གང་གིས་དེ་བཞིན་གཤེགས་པས་གསུངས་པའི་མདོ་སྡེ་བྱང་ཆུབ་ལ་ཡང་དག་

པར་གཞོལ་བ་འདི་ལྟ་བུ་འདི་དག་གི་ཚུལ་གྱིས་གནས་ལེན་ཅིང་ནན་ཏན་གྱིས་སྒྲུབ་ན། དེ་ནི་དེ་བས་ཆེས་བསོད་ནམས་ཀྱི་ཕུང་པོ་མང་དུ་སྐྱེད་པར་འགྱུར་རོ། །འོད་སྲུང་བྱང་ཆུབ་སེམས་དཔའ་ནི་སེམས་བརྟན་པ་ཡིན་ཏེ། སེམས་བརྟན་པ་ནི་སེམས་ཀྱང་མི་དམིགས་ཏེ། དེས་ན་དེ་ཞུམ་པར་མི་
འགྱུར་རོ། །དེ་ལ་ཡོངས་སུ་སྦྱང་བར་བྱ་བ་གང་ཞེ་ན། ཡོངས་སུ་སྦྱང་བར་བྱ་བ་ནི་མང་སྟེ། ཡོངས་སུ་སྦྱང་བར་བྱ་བ་མང་བ་གང་ཞེ་ན། ཡོངས་སུ་སྦྱང་བར་བྱ་བ་མང་བ་ནི་གང་སེམས་བསྐྱེད་པ་གཅིག་ཀྱང་རྟོགས་པར་མི་ནུས་པའོ། །དེ་ཅིའི་ཕྱིར་ཞེ་ན། ཆོས་དེ་དག་ནི་གདགས་
པར་བྱ་བ་མ་ཡིན་པའི་ཕྱིར་རོ། །དེ་ལ་འདི་ནི་ཡོངས་སུ་སྦྱང་བར་བྱ་བའི་དམ་པ་ཡིན་ཏེ། འདི་ལྟ་སྟེ་སེམས་བརྟན་པ་ཉིད་དོ། །དེ་ལ་འདི་སྐད་ཅེས་བྱ་སྟེ། འབྱུང་ངམ་མི་འབྱུང་འགྱུར་ཞིག་གུ། །བདག་ནི་ཅི་འདྲར་འགྱུར་ཞིག་ཅེས། །སེམས་མེད་སེམས་ཀྱི་འདུ་ཤེས་པ། །
སྐྲག་པ་ཆེན་པོ་འབྱུང་བར་འགྱུར། །དེ་དག་རྟག་ཏུ་རྣམ་པར་རྟོག །ཇི་ལྟར་བྱང་ཆུབ་འཐོབ་སྙམ་ཞིང་། །ལས་མཐའ་མིན་ལ་གནས་གྱུར་ནས། །རྣལ་འབྱོར་གདམས་ངག་བྱེད་པར་འགྱུར། །འདི་དག་ལེ་ལོའི་མཚན་ཉིད་དེ། །འདི་དག་བྱང་ཆུབ་མཚན་ཉིད་མིན། འདིར་
ནི་ཐེ་ཚོམ་ཐམས་ཅད་འབྱུང་། །སངས་རྒྱས་སམ་ནི་ཉན་ཐོས་ཀྱང་། །སངས་རྒྱས་ཆོས་རྣམས་རབ་བཟང་བ། །སྤྱོད་པར་མི་བྱེད་མི་ཚོལ་ན། །སྒྲ་ཙམ་གྱིས་ནི་བདེ་བ་འདི། །ཐོབ་པར་ནུས་པ་མ་ཡིན་ནོ། །རྒྱལ་ཆེན་སྒྲུབ་པར་བྱེད་པ་ཡི། །འདུན་དང་དད་པ་འདིར་ཡོད་
ཀྱང་། །སེམས་ཙམ་གྱིས་ནི་ངལ་བ་འདི། །ཐོབ་པར་ནུས་པ་མ་ཡིན་ནོ། །འདིར་ནི་བྱ་བ་ཐམས་ཅད་ཀྱང་། །ཆོས་གཅིག་གིས་ནི་བྱེད་དོ་ཞེས། །བྱེ་བྲག་འདི་ནི་རྟོགས་གྱུར་ནས། །བྱང་ཆུབ་བྱེད་རྒྱུ་སྤྱད་པར་བྱ། །འོད་སྲུང་དེ་ལ་ཆོས་ཀྱི་རྣམ་གྲངས་འདི་བཤད་པ་ན་
རྣམ་གྲངས་དེ་དང་ལྡན་ན་བྱང་ཆུབ་སེམས་དཔའ་སངས་རྒྱས་རྣམས་མཉེས་པར་ཡང་མི་བྱེད་ལ་བདག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་བདག་ཉིད་ཀྱིས་བདག་ལ་ལུང་སྟོན་པར་བྱེད་དོ། །འོད་སྲུང་འདི་ལ་བྱང་ཆུབ་སེམས་དཔའ་

ཁྱིམ་པའི་ཡོངས་སུ་སྦྱང་བ་བྱ་བ་གང་དག་བྱང་ཆུབ་ལ་ཕན་པར་འགྱུར་བ་གང་ཡིན་ཞེ་ན། འོད་སྲུང་བྱང་ཆུབ་སེམས་དཔའ་ཁྱིམ་པའི་ཡོངས་སུ་སྦྱང་བ་བྱ་བ་གང་དག་བྱང་ཆུབ་ལ་ཕན་པར་འགྱུར་བ་ནི་གསུམ་སྟེ། གསུམ་གང་ཞེ་ན། ཐམས་ཅད་མཁྱེན་པ་ཉིད་ལ་ཤིན་ཏུ་འདུན་
པར་བྱ་བ་དང་། སྔོན་གྱི་བྱེད་པར་མི་ལྟུང་བར་བྱ་བ་དང་། དེས་བསླབ་པའི་གཞི་ལྔ་དང་ལྡན་པར་བྱ་བ་སྟེ། ཡན་ལག་གསུམ་པོ་དེ་དག་དང་ལྡན་ན་ཆོས་དྲུག་སྒྲུབ་པར་བྱེད་དོ། །དྲུག་གང་ཞེ་ན། འཕགས་པའི་གནས་འཐོབ་པ་དང་། མི་བླུན་ཞིང་ལུག་ལྟར་ལྐུགས་པ་མ་ཡིན་པ་དང་།
འོན་པ་མ་ཡིན་ཞིང་དིག་པ་མ་ཡིན་པ་དང་། དེའི་ལུས་རྣམ་པར་གསལ་བར་མངོན་པར་འགྲུབ་པ་དང་། དད་པ་མྱུར་དུ་འཐོབ་ཅིང་ཆོས་ཟབ་མོ་དག་གིས་སྐྲག་པར་མི་འགྱུར་བ་དང་། བསྒྲིམ་མི་དགོས་པར་ཐོས་པས་འཕགས་ཤིང་མྱུར་དུ་ཕྱིར་མི་ལྡོག་པ་འཐོབ་པར་འགྱུར་བའོ། །ཆོས་
དྲུག་པོ་འདི་དག་གི་བར་དུ་གཅོད་པར་འགྱུར་བའི་ཆོས་ལྔ་སྟེ། དེ་ལ་མཁས་པར་བྱའོ། །ལྔ་གང་ཞེ་ན། ཕྲ་མ་མི་བྱ་བར་དམ་བཅས་ཏེ་མི་གནས་པ་དང་། རྣམ་པ་ཐམས་ཅད་དུ་བསླུ་བར་མི་བྱ་བ་དང་། བྱང་ཆུབ་སེམས་དཔས་བསམ་པ་ཕུན་སུམ་ཚོགས་པར་བྱ་བ་དང་། སེར་སྣ་
ནི་དེའི་བར་དུ་གཅོད་པར་འགྱུར་བ་དང་། འདོད་པ་ལ་མངོན་པར་ཆགས་པ་ནི་དེའི་བར་དུ་གཅོད་པར་འགྱུར་བ་སྟེ། ཆོས་ལྔ་པོ་དེ་དག་ནི་དེའི་བར་དུ་གཅོད་པར་འགྱུར་བའོ། །གཞན་ཡང་ཉམས་སུ་བླང་བའི་ཆོས་གསུམ་སྟེ། གསུམ་གང་ཞེ་ན། རྒྱུན་མི་འཆད་པར་རབ་ཏུ་
འབྱུང་བའི་སེམས་བསྐྱེད་པར་བྱ་བ་དང་། ཚུལ་ཁྲིམས་དང་ལྡན་པའི་དགེ་སྦྱོང་དང་བྲམ་ཟེ་རྣམས་ལ་གུས་པ་དང་བཅས་ཤིང་ཞེས་དང་བཅས་པར་བྱ་བ་དང་། གང་དག་བཅོས་ཤིང་ཆོས་སྟོན་པ་དེ་དག་ཡོངས་སུ་སྤང་བར་བྱ་བའོ། །དེ་ཅིའི་ཕྱིར་ཞེ་ན། དེ་ལ་བྱང་ཆུབ་སེམས་དཔས་བསླབ་པར་མི་
བྱ་བའི་ཕྱིར་རོ། །བྱང་ཆུབ་སེམས་དཔས་རྩྭའི་ཁུར་བསྐུར་བར་མི་བྱའོ། །དེ་ཅིའི་ཕྱིར་ཞེ་ན། གང་གསོག་པ་དེ་བྱང་ཆུབ་ཀྱི་ལམ་མ་ཡིན་པའི་ཕྱིར་ཏེ། དེ་ནི་མི་ཤེས་པས་སྦགས་ནས་ཆོས་དེ་དག་ཡང་དག་པར་བླངས་ཏེ་མི་སློབ་བོ། །འོད་སྲུང་གཞན་ཡང་བྱང་ཆུབ་སེམས་དཔས་

ཆོས་གསུམ་ཡང་དག་པར་བླངས་ནས་བསླབ་པར་བྱ་སྟེ། གསུམ་གང་ཞེ་ན། དེས་རྒྱུན་མི་འཆད་པར་སངས་རྒྱས་ལ་གཞོལ་བར་བྱ་བ་དང་། ལུང་མནོས་ཏེ་ཁ་ཏོན་བྱ་བ་ལ་མངོན་པར་བརྩོན་པར་བྱ་བ་དང་། དེས་སེམས་ཅན་རྣམས་ལ་བྱམས་པའི་སེམས་བསྐྱེད་པར་བྱ་ཞིང་
བསྒོམ་པར་བྱ་བ་སྟེ། ཆོས་གསུམ་པོ་དེ་དག་ཡང་དག་པར་བླངས་ནས་བསླབ་པར་བྱའོ། །གཞན་ཡང་ཆོས་གསུམ་ཀུན་ཏུ་བསྟེན་པར་བྱ་སྟེ། གསུམ་གང་ཞེ་ན། དེས་ཁུ་ཚུར་དང་ཐལ་ལྕག་གིས་བརྡེག་པ་སྤང་བར་བྱ་བ་དང་། དེས་གཞན་ལ་དམན་པར་གྱུར་པས་སྨྲ་
བར་མི་བྱ་བ་དང་། སེམས་ཅན་འཇིགས་པ་རྣམས་ལ་མི་འཇིགས་པ་སྦྱིན་པར་བྱ་བ་སྟེ། ཆོས་གསུམ་པོ་དེ་དག་ནི་ཀུན་ཏུ་བསྟེན་པར་བྱའོ། །དེ་ལ་འདི་སྐད་ཅེས་བྱ་སྟེ། སེམས་ཅན་དམན་པ་རྣམས་མི་བསྟེན། །གང་དག་ལྟ་བ་མི་དྲང་བ། །མཐོང་ནས་རིང་དུ་
སྤང་བྱ་སྟེ། །སྦྲུལ་གདུག་གཏུམ་པ་ཇི་བཞིན་ནོ། །གང་དག་དེ་དག་ཕྱག་འཚལ་བ། །དེ་དག་རྗེས་སུ་བསླབ་མི་བྱ། །ཁྱི་ཟ་མཐོང་བ་ཇི་ལྟ་བར། །དེ་དག་རིང་དུ་སྤང་བར་བྱ། །གང་དག་དམིགས་པ་ཅན་གྱུར་པ། །སེམས་ཅན་དེ་དག་ངན་འགྲོར་འགྲོ། །གང་དག་
དེ་དག་རྗེས་སློབ་པ། །དེ་དག་འགྲོ་བའང་དེ་འདྲའོ། །རྒྱལ་བའི་བསྟན་པ་ཐོས་གྱུར་ནས། །སྟོང་པའི་ཆོས་ལ་དོགས་མེད་ཅིང་། །དགེ་སློང་གང་དག་སྟོང་དགའ་བ། །དེ་དག་ལ་ནི་གུས་པར་བྱེད། །དེ་དག་ལས་ནི་ཐོས་པ་འཕེལ། །དེ་དག་ཤེས་རབ་རྣོ་བར་འགྱུར། །
བྱང་ཆུབ་ལ་ནི་ཉེ་འགྱུར་ཏེ། །སེམས་ཅན་ཀུན་གྱིས་ཕྱག་བྱས་སོ། །མྱུར་དུ་གསོ་སྦྱོང་བྱེད་པར་འགྱུར། །ལུང་ནོད་པལ་མྱུར་དུ་སྤྱོད། །དེ་ཡི་ཤེས་རབ་ཤིན་ཏུ་འཕེལ། །ཆུ་ལས་ཨུད་པལ་ཇི་བཞིན་ནོ། །མྱུར་དུ་གསོ་སྦྱོང་བྱེད་པར་འགྱུར། །ཆོས་ཀྱང་མྱུར་
དུ་ཉན་པར་བྱེད། །དེ་ཡི་ཤེས་རབ་རབ་ཏུ་འཕེལ། །དེས་ནི་ཟག་པ་ཆད་པར་བྱེད། །ཤེས་རབ་ཆེ་ཞིང་བརྩོན་འགྲུས་ཆེ། །གཟི་བརྗིད་ཆེ་ཞིང་འཇིགས་པ་མེད། །གང་དག་ལ་ནི་བྱེད་འདོད་དང་། །བདག་གི་དོན་ཀྱང་རབ་ཏུ་བྱེད། །འདི་ལ་ཁྱིམ་པ་ཁུ་ཚུར་དང་།།

ཐལ་ལྕག་རྡེག་པ་སྤོང་བར་བྱེད། །བྱང་ཆུབ་ཡན་ལག་ཡོངས་སུ་ཚོལ། །དེ་ནི་ཆོས་ལས་ཉམས་མི་འགྱུར། །དེ་ནི་ནད་ཀྱང་ཉུང་བར་འགྱུར། །གཟུགས་ཀྱི་མཆོག་དང་ལྡན་པར་འགྱུར། །སེམས་ཅན་རྣམས་ནི་དགའ་བར་འགྱུར། །ནོར་ལ་དགའ་བ་
མེད་པར་འགྱུར། །ཁྱིམ་གྱི་ས་ལ་གནས་བྱེད་ཅིང་། །བྱམས་པའི་སེམས་ནི་སྒོམ་པར་བྱེད། །ངན་འགྲོ་ཐམས་ཅད་ཡོངས་སྤངས་ནས། །སུམ་ཅུ་རྩ་གསུམ་གནས་སུ་འགྲོ། །ལྷ་ཞེས་བྱ་བའི་མིང་ཐོབ་ཅིང་། །འདོད་པ་ཅན་གྱིས་འདོད་མོས་ནས། །ལྷ་ཡི་ནང་ནས་ཤི་
འཕོས་ཀྱང་། །དེ་ནི་ངན་འགྲོར་འགྲོ་མི་འགྱུར། །གང་དག་རིགས་བཙུན་གྲགས་པ་ཡི། །མི་ཡི་འཇིག་རྟེན་འདིར་སྐྱེའོ། །དེ་ནི་གཟུགས་དང་ལྡན་པར་འགྱུར། །དེ་ལ་རྣམ་པར་གཙེ་མི་ནུས། །མི་འདི་ཆོས་སྤྱོད་ཡིན་ཞེས་ཏེ། །ལྷ་དང་ཀླུ་རྣམས་སྲུང་བར་བྱེད། །
གནས་ཀྱི་དམ་པ་མཐོང་འགྱུར་ཞིང་། །སྲོག་ཆགས་ཀུན་ཀྱང་དགའ་བར་འགྱུར། །དེ་ནི་བདེ་བར་ཉལ་བྱེད་ཅིང་། །བདེ་བར་ཕྱིར་ཡང་སད་པར་འགྱུར། །ལྷ་རྣམས་ཀྱིས་ནི་བསྲུངས་པ་བཞིན། །དེ་ལ་འཇིགས་པ་མི་འབྱུང་ངོ་། །རྒྱ་ཆེན་ཆོས་དང་ལྡན་རྣམས་ཀྱིས། །
མཚན་ཉིད་འདི་འདྲ་འདི་དག་སྟེ། །ཁྱིམ་གྱི་གནས་ན་གནས་རྣམས་ཀྱི། །གཞན་ཡང་རྒྱ་ཆེར་རབ་ཏུ་མང་། །ཁྱིམ་པ་བྱང་ཆུབ་ཞུགས་པ་གང་། །སྐྱེ་བོ་མང་ལ་དགེ་བ་དག །སྐུལ་བར་བྱེད་ཅིང་དྲན་པར་བྱེད། །སྐྲག་རྣམས་མི་འཇིགས་སྦྱིན་བྱེད་པ། །ཐམས་
ཅད་གཟིགས་པ་མ་གཏོགས་པར། །ལྷ་གཞན་རྣམས་ཀྱིས་ཤེས་མ་ཡིན། །དེ་དག་ལམ་ནི་དྲང་པོར་འགྱུར། །ཀུན་ཀྱང་ཤེས་རབ་ལྡན་པར་འགྱུར། །དེ་ནི་དགེ་བའི་རྩ་བ་དེས། །ངན་འགྲོ་ཐམས་ཅད་ཡོངས་སྤངས་ནས། །རིག་པ་གསུམ་པོ་ཀུན་དང་ལྡན། །བསླབ་
པ་གསུམ་ལ་བསླབས་པ་ཡིན། །བསོད་ནམས་ཅི་འདྲ་བྱས་པ་དང་། །ཕྱག་ཀྱང་ཅི་འདྲ་བྱས་པ་བཞིན། །དེ་ནི་སེམས་ཅན་ཐམས་ཅད་ཀྱིས། །གཅིག་པུ་ཕྱག་བྱས་གྱུར་པ་ཡིན། །གང་ཞིག་སྟོན་ལ་ཕྱག་བྱས་པ། །བསོད་ནམས་ཅི་འདྲ་བྱས་པ་དང་། །ཕྱག་

ཀྱང་ཅི་འདྲ་བྱས་པ་བཞིན། །སེམས་ཅན་རྣམས་ཀྱི་མཆོག་ཏུ་འགྱུར། །ཁྱིམ་གྱི་ས་ལ་གནས་ནས་སུ། །གང་ཞིག་བྱང་ཆུབ་སེམས་བསྐྱེད་པ། །དེ་ཡི་གྲགས་ཆོས་འདི་རྣམས་ཏེ། །གཞན་རྣམས་དག་ཀྱང་ཡང་ཉོན་ཅིག །འོད་སྲུང་བྱང་ཆུབ་སེམས་དཔའ་ཁྱིམ་
པས་ཆོས་གསུམ་དང་ལྡན་པར་བྱ་སྟེ། གསུམ་གང་ཞེ་ན། དགེ་མཚན་དང་ལྟས་སྤང་བར་བྱ་བ་དང་། ཁྱིམ་པ་དེས་བསྲེལ་བ་མང་པོ་སྤང་བའི་ཕྱིར་གཙང་སྦྲར་བྱ་བ་དང་། དེས་མང་དུ་ཐོས་པ་ལ་མངོན་པར་བརྩོན་པར་བྱ་བ་སྟེ། ཆོས་གསུམ་པོ་དེ་དག་དང་ལྡན་པར་བྱའོ། །གཞན་
ཡང་དེས་ཆོས་གསུམ་ཡང་དག་པར་བླངས་ནས་གནས་པར་བྱ་སྟེ། གསུམ་གང་ཞེ་ན། ཆོས་འཆད་པ་ལ་རྒྱུན་གཅད་པར་མི་བྱ་བ་དང་། ཆོས་བརྗོད་པ་ལ་གསོལ་བ་གདབ་པར་བྱ་བ་དང་། དེས་འབྲུ་མར་གྱི་མར་མེ་རྒྱུན་མི་གཅད་པར་བྱ་བ་སྟེ། དེས་ཆོས་གསུམ་པོ་དེ་དག་རྒྱུན་
མི་གཅད་པར་བྱའོ། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པས་གང་དག་བུད་མེད་ཀྱི་དངོས་པོར་འགྱུར་བའི་ཆོས་གསུམ་ཐམས་ཅད་ཀྱི་ཐམས་ཅད་དུ་མི་བྱ་སྟེ། གསུམ་གང་ཞེ་ན། མ་ཆོས་ཉན་པ་ལས་བཟློག་པར་མི་བྱ་བ་དང་། དགེ་སློང་ལ་ལྟ་བ་ལས་བཟློག་
པར་མི་བྱ་བ་དང་། ཆུང་མ་དགེ་སློང་ལ་ལྟ་བ་ལས་བཟློག་པར་མི་བྱ། ཐ་ན་རང་གི་ཆུང་མ་ལ་ཡང་ཆོས་ཉན་པའི་བར་ཆད་མི་བྱ། ཡན་ལག་མ་ཡིན་པར་གཞུག་པར་མི་བྱ་བ་སྟེ། གང་སྐྱེས་པའི་དངོས་པོ་སྤངས་ནས་བུད་མེད་དུ་འགྱུར་བའི་ཆོས་གསུམ་པོ་འདི་དག་
ཐམས་ཅད་ཀྱིས་ཐམས་ཅད་དུ་མི་བྱའོ། །དེ་ལ་འདི་སྐད་ཅེས་བྱ་སྟེ། རབ་ཏུ་དད་པས་ཡང་དང་ཡང་། །འབྲུ་མར་མར་མེ་བུད་པར་བྱ། །དེ་ལས་དེ་ནི་རྡུལ་མེད་སྤྱན། །སངས་རྒྱས་སྤྱན་ནི་ཐོབ་པར་འགྱུར། །མིག་དེ་ཡིས་ནི་མགོན་པོ་དེ། །ཤེས་བྱ་ཐམས་ཅད་ཤེས་པར་འགྱུར། །ཤེས་བྱ་གང་
ཞིག་ཤེས་མིན་པ། །ཤེས་བྱ་ཤེས་ནས་ཤེས་པར་འགྱུར། །འདས་པའི་ཤེས་བྱའི་ཆོས་རྣམས་དང་། །ད་ལྟར་བྱུང་བའང་དེ་བཞིན་ཏེ། །མ་འོངས་པ་ལ་བརྟག་མི་བྱ། །མཚན་ཉིད་གསུམ་དུ་གྱུར་ཏ་རེ། །མཚན་ཉིད་གཉིས་པོ་དེ་དག་ཡོད། །གསུམ་པོ་རྣམ་

པར་སྤང་བྱས་ན། །དེ་དག་ཐམས་ཅད་དོན་གཅིག་འགྱུར། །མཚན་ཉིད་ཀྱིས་ནི་མཚན་ཉིད་མེད། །དབང་པོ་སངས་རྒྱས་ཀྱིས་བཤད་པ། །ཆོས་དེ་དབང་པོ་མ་ཡིན་ནོ། །གང་གིས་དེ་དག་རྣམ་བརྟགས་པ། །དེ་ནི་བྱང་ཆུབ་མཆོག་མི་འགྱུར། །སངས་རྒྱས་སྤྱན་ནི་རྣམ་སྦྱངས་ན། །
ཐམས་ཅད་མངོན་སུམ་ཤེས་པར་འགྱུར། །གང་ཞིག་ཡང་དག་རབ་བཤད་པའི། །ལམ་འདི་ཉིད་ལ་བྱང་ཆུབ་ཡོད། །ཆོས་རྣམས་དེ་དག་བསྟན་པ་མེད། །དེ་དག་རྣམ་པར་བཤིག་པའང་མེད། །ཆོས་རྣམས་ཐམས་ཅད་མ་བཤད་དེ། །དེས་ན་རབ་ཏུ་བཤད་ཅེས་བྱ། །དེ་ཡི་ཕྱིར་ན་སྟོན་པ་ནི། །
ཁྱིམ་པ་རྣམས་ལ་ཆོས་སྟོན་ཏེ། །འབྲུ་མར་རྣམས་ཀྱི་མར་མེ་བུས། །དེ་ཚེ་མིག་གིས་ཤེས་པར་འགྱུར། །ཤཱཀྱ་སེང་གེའི་བསྟན་པ་ནི། །འཆད་པའི་ཚེ་ན་རྒྱུན་མི་གཅད། །མྱུར་དུ་ངན་འགྲོར་སོང་ང་རེ། །དམུས་ལོང་དུ་ཡང་མྱུར་དུ་འགྱུར། །རྒྱལ་བའི་བསྟན་པ་ཤོད་ཅིག་ཅེས། །ཡང་དང་ཡང་དུ་
གསོལ་བ་གདབ། །དེ་ནི་དགེ་བའི་རྩ་བ་དེས། །འཁོར་ལོ་དམ་པ་བསྐོར་བར་འགྱུར། །བར་ཆད་བྱེད་པར་མི་བྱ་སྟེ། །ཆོས་ཀྱི་བར་ཆད་བྱས་པས་ན། །བུད་མེད་མི་བཟད་ཆེན་མོ་དང་། །ལོང་སྒུར་རབ་སྡིག་གྱུར་ཏ་རེ། །དེ་ནི་གཟུགས་རྣམས་མི་མཐོང་ཞིང་། །དེ་ནི་ཅུང་ཟད་མི་ཐོས་ཏེ། །སྐྱེ་བ་པོ་
ཞིག་མུན་ཁུང་དུ། །བཅུག་ནས་འདུག་པ་ཇི་བཞིན་ནོ། །ཆུང་མའི་ཕྱིར་ནི་ཕྲག་དོག་ཅན། །བར་ཆད་དག་ནི་བྱས་པས་ན། །མྱུར་དུ་འཆི་བའི་དུས་བྱས་ནས། །ཤིན་ཏུ་སྡིག་ཅན་བུད་མེད་འགྱུར། །སྐྲ་ནི་སེར་ཞིང་ཁམ་པ་དང་། །གནག་ཅིང་བལྟ་ན་མི་སྡུག་དང་། །ཤིན་ཏུ་མི་བཟད་རྐང་གྱོལ་དང་། །
འོན་པར་འགྱུར་ཞིང་ལྕེ་མེད་འགྱུར། །ཕྲག་དོག་ཅན་གྱི་སྐྱེས་པ་ནི། །འདོད་པའི་ཆེད་དུ་འདི་འདྲའི་གནས། །ཤིན་ཏུ་མི་བཟད་འདི་དག་ནི། །ཡང་དང་ཡང་དུ་མྱུར་དུ་འགྱུར། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པས་ཆོས་གསུམ་མི་བྱ་སྟེ། གསུམ་གང་ཞེ་ན། གཞན་གྱི་སྦྱིན་པ་ལ་མ་
བོས་སམ། ཐབས་མེད་པར་མར་གྱི་སྙིང་ཁུ་ཡང་སྦྱིན་པར་མི་བྱ་ཞིང་གཞན་ཅི་ཡང་རུང་སྟེ། སྦྱིན་པར་དཀའ་བའི་ཡོངས་སུ་གཏང་བ་སྦྱིན་པར་མི་བྱ་བ་དང་། དེས་རབ་ཏུ་འབྱུང་བའི་བར་ཆད་མི་བྱ་ཞིང་རབ་ཏུ་མ་བྱུང་བ་ཡང་རབ་ཏུ་འབྱུང་བ་ཡང་དག་པར་འཛིན་དུ་གཞུག་པ་དང་། དེ་བཞིན་གཤེགས་པའི་རིང་

བསྲེལ་གྱི་མཆོད་རྟེན་གྱི་ཞལ་ཏ་བྱ་ཞིང་ལག་དཔོན་དུ་བསྐོ་བའི་གནས་སུ་བསྐོས་ན་ཡང་དེ་ལ་བརྟེན་ཏེ་ཡོ་བྱད་དུ་སྤྱད་པར་མི་བྱ་བ་སྟེ། བྱང་ཆུབ་སེམས་དཔའ་ཁྱིམ་པས་ཆོས་གསུམ་པོ་དེ་དག་མི་བྱའོ། །དེ་ལ་འདི་སྐད་ཅེས་བྱ་སྟེ། ཕ་རོལ་སྦྱིན་པ་སྦྱིན་པའི་ཚེ། །རིགས་པ་མིན་ལ་སྦྱིན་མི་བྱ། །སྦྱིན་པ་
སྐྱོན་ཆགས་ཐམས་ཅད་ནི། །སྐྱེ་བོ་དཀོན་ལ་སྦྱིན་མི་བྱ། །དད་པས་དེར་ནི་སོང་ནས་སུ། །ཐལ་མོ་སྦྱར་ཏེ་འདུག་པར་བྱ། །སྦྱིན་དང་སྦྱིན་པར་ཡང་དང་ཡང་། །ཡིད་ནི་རབ་ཏུ་དགའ་བར་བྱ། །དེ་ཉིད་དགེ་འདུན་གནས་པ་དེར། །སྤྲོ་བ་ཤིན་ཏུ་ཆུང་གྱུར་ན། །གང་ལས་སྐྱེ་བོ་སྤྲོ་ཆུང་བ། །གསོལ་བ་
བཏབ་སྟེ་ལེན་དུ་གཞུག །བཏུང་འོས་གསལ་བའི་བཏུང་བ་དང་། །དེ་ན་གང་དག་དེ་འདྲ་བ། །དེ་ལ་མི་འཐུན་ཡིད་ཀྱིས་སུ། །སེམས་ནི་གནོད་པར་མི་བསམ་མོ། བུ་འམ་འོན་ཏེ་གཉེན་གྱི་རྣམས། །རབ་ཏུ་འབྱུང་བར་བྱེད་པ་ན། དེ་ལ་བྱང་ཆུབ་སེམས་དཔའ་ཡིས། །བར་དུ་གཅོད་པར་མི་བྱའོ། །
སེམས་ཅན་ཐམས་ཅད་བདེར་གྱུར་ཅིག །ཐམས་ཅད་མྱ་ངན་འདས་རེག་ཤོག །བདག་གི་ལྷག་བསམ་འདི་འདྲ་ལ། །ཆོས་ཀྱི་དམ་པ་བཤད་དུ་གསོལ། །ཉེས་དམིགས་འདི་དག་ཤེས་ནས་སུ། །བདག་ནི་དྲི་མ་མེད་པར་བྱ། །ཉོན་མོངས་དྲི་ཅན་བྱས་པས་ན། །ཡུན་རིང་མྱ་ངན་བྱེད་ད་རེ། །འོད་སྲུང་
གཞན་ཡང་བྱང་ཆུབ་སེམས་དཔའ་ཁྱིམ་པས་ཆོས་གསུམ་ལ་བརྩོན་པར་མི་བྱ་སྟེ། གསུམ་གང་ཞེ་ན། སྐྱེས་པ་བཙོང་བར་མི་བྱ་བ་དང་། བུད་མེད་བཙོང་བར་མི་བྱ་བ་དང་། གཞན་དག་ལ་སྨན་མ་ཡིན་པ་སྦྱིན་པར་མི་བྱ་ཞིང་གང་དག་དེ་ལྟ་བུ་བྱེད་པ་དེ་དག་ལ་ཡང་བསྟེན་པར་མི་བྱའོ། །དེ་ལ་འདི་སྐད་ཅེས་བྱ་
སྟེ། །སྐྱེས་པ་བཙོང་བ་སྤང་བར་བྱ། །བུད་མེད་བཙོང་བའང་རྣམ་པར་སྤང་། །སྨན་མིན་སྦྱིན་པར་མི་བྱ་སྟེ། །སྦྱིན་པར་བྱེད་པ་དེ་དག་སྤང་། །ལྷ་རྣམས་དེ་ལ་འཕྱ་བར་བྱེད། །སེམས་ཅན་སྡུག་བསྔལ་མྱོང་བར་འགྱུར། །ཕྱོགས་དང་ཕྱོགས་མཚམས་འགྲོ་བྱེད་ཅིང་། །མྱ་ངན་ཟུག་རྔུས་གནོད་པར་འགྱུར། །མྱ་
ངན་རྣམ་པ་མང་པོ་ཡིས། །དེ་ནི་ཡུན་རིང་གནོད་པར་འགྱུར། །མྱ་ངན་གྱུར་ནས་འཆི་དུས་བྱེད། །དེ་ལྟ་བས་ན་དེ་མི་བྱ། །དེ་ཕྱིར་ཉེས་པ་འདི་དག་དང་། །གཞན་རྣམས་དག་ཀྱང་ངས་ཤེས་པས། །བྱང་ཆུབ་སེམས་དཔའ་རྣམས་ཀྱི་ཕྱིར། །ཕྱོགས་ཙམ་ཞིག་ནི་བརྗོད་པ་ཡིན། །འོད་སྲུང་གཞན་ཡང་བྱང་

ཆུབ་སེམས་དཔའ་ཁྱིམ་པས་ཆོས་གསུམ་མི་བྱ་སྟེ། གསུམ་གང་ཞེ་ན། བུད་མེད་སྨད་འཚོང་མའི་གན་དུ་འགྲོ་བར་མི་བྱ་བ་དང་། སྨྲ་སེམས་ཐ་དད་པར་སྤྱོད་པའི་སྐྱེས་པའམ། བུད་མེད་བསྟེན་པར་མི་བྱ་བ་དང་། བ་ལང་གསོད་པའི་གནས་སུ་གནས་པར་མི་བྱ་བ་སྟེ། བྱང་ཆུབ་
སེམས་དཔའ་ཁྱིམ་པས་ཆོས་གསུམ་པོ་དེ་དག་མི་བྱའོ། །དེ་ལ་འདི་སྐད་ཅེས་བྱ་སྟེ། འདོད་པ་སྤྱོད་པ་སྨད་པའི་འོས། །སྨད་འཚོང་གན་དུ་འགྲོ་མི་བྱ། །འདོད་པ་ངན་པ་སྟེན་བྱེད་པ། །མྱུར་དུ་རིམ་གྲོ་མི་བྱེད་འགྱུར། །གཟུགས་བཟང་གན་དུ་འགྲོ་བྱེད་པ། །དེ་དག་ལ་ནི་སྨོད་པར་འགྱུར། །
མྱུར་དུ་ནད་ཀྱིས་ཐེབས་པར་འགྱུར། །དེས་ན་དེ་ཡང་འཆི་དུས་བྱེད། །སྨྲ་སེམས་ཐ་དད་སྤྱོད་པ་ཡི། །སྐྱེས་པའམ་བུད་མེད་དེས་མི་བསྟེན། །གཞན་གྱི་བུད་མེད་འཕྲོག་བྱེད་ན། །དེ་ལ་ནུས་ཀྱི་རབ་ཏུ་སྦྱོར། །བ་ལང་གསོད་པར་བྱེད་པ་ན། རྣམ་པ་ཀུན་ཏུ་དེར་མི་འགྲོ། །བྱང་ཆུབ་སེམས་དཔའ་
རྣམ་དག་ལ། །སྐྱོབ་པ་ངས་ནི་འདི་མ་བསྔགས། །ཉེས་པ་འདི་དག་མཁྱེན་པས་ན། །སངས་རྒྱས་ཀྱིས་ནི་དེ་ཕྱིར་བརྗོད། །རིགས་པ་མིན་ལ་སྦྱོར་བ་རྣམས། །དེ་དག་ཆེད་དུ་བརྗོད་པ་མཛད། །སངས་རྒྱས་ང་ཡི་ཉན་ཐོས་རྣམས། །ཤེས་སོ་ཞེས་ནི་ཁ་ཅིག་སྨྲ། །དེ་དག་སངས་རྒྱས་སྤྱན་སྔ་ནས། །
སྤྱོད་ཡུལ་གང་ན་ཡོད་པར་འདོང་། །སེམས་ཅན་གང་དག་འཕགས་གནས་ཤིང་། །མྱུར་དུ་མྱ་ངན་འདས་འདོད་པ། །དེ་དག་དོན་དུ་བཤད་པ་སྟེ། །བཀའ་བློ་མི་བདེ་ཕྱིར་མ་བཤད། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པས་ཆོས་གསུམ་དང་ལྡན་པར་བྱ་སྟེ། གསུམ་གང་ཞེ་ན།
ཁྱིམ་ན་གནས་པ་དེས་སྲོག་ནི་ཕོ་ཉའི་དགོངས་གནས་དང་འདྲ་བར་བདག་ལ་རྣམ་པར་བརྟག་པར་བྱ་བ་དང་། བྱིན་ཞིང་ཡོངས་སུ་བཏང་བའི་ནོར་བསགས་པར་བསྒྲུབ་པར་བྱ་ཞིང་། གང་མ་བྱིན་པ་དང་ཡོངས་སུ་མ་བཏང་བ་དེ་ལ་དཔག་ཚད་བརྒྱ་ན་ཡོད་པ་ལ་ཡང་འདུ་ཤེས་བསྐྱེད་པར་མི་བྱ་བ་དང་།
དེས་བུ་དང་ཆུང་མའི་ཆེད་དུ་གཞག་པའི་བློ་བསྐྱེད་པར་མི་བྱ་སྟེ། འོད་སྲུང་བྱང་ཆུབ་སེམས་དཔའ་ཁྱིམ་པས་ཆོས་གསུམ་པོ་དེ་དག་དང་ལྡན་པར་བྱའོ། །དེ་ལ་འདི་སྐད་ཅེས་བྱ་སྟེ། བདག་ནི་མྱུར་དུ་འཆིའོ་ཞེས། །འཆི་བའི་འདུ་ཤེས་བསྒོམ་པར་བྱ། །དེ་བས་ལོངས་སྤྱོད་བསགས་པ་ལ། །ལོངས་སྤྱོད་

ལས་ནི་སྙིང་པོ་བླང་། །བུ་དང་ཆུང་མའི་དོན་གྱི་ཕྱིར། །དེས་ནི་ནོར་རྣམས་བསགས་མི་བྱ། །ལུས་དང་ལོངས་སྤྱོད་སྲོག་རྣམས་ལས། །སྙིང་པོ་མྱུར་དུ་ལེན་པར་བྱེད། །བྱང་ཆུབ་དོན་དུ་འདུན་དྲག་བསྐྱེད། །རྒོད་ཅིང་གཡེང་བར་མི་བྱེད་དོ། །ནོར་དང་ཆོས་ནི་སྤངས་ནས་སུ། །ལུས་ཀུན་ལ་ནི་གནོད་
པར་འགྱུར། །འདི་ནི་བྱིས་པའི་རྩེད་མོ་སྟེ། །སྣང་བ་མཐོང་ཞིང་མི་སྣང་མཐོང་། །རོ་མྱང་བ་ནི་དགོས་པ་མེད། །ཆོས་ཀྱི་ཤུགས་ནི་སྐྱོབ་པ་ཡིན། །རྒྱུན་མི་འཆད་པར་བཤད་པར་བྱ། །ཆོས་འདི་རྟག་ཏུ་གནས་པ་ཡིན། །མཚུངས་པར་ལྡན་རྣམས་ཕན་ཚུན་དུ། །འཕྱ་བར་བྱེད་པ་སྡུག་བསྔལ་ཡིན། །
འདི་འདྲ་བ་ཡི་ཆོས་འདི་དག །འོད་སྲུང་ངས་ནི་རབ་ཏུ་བརྗོད། །གང་དག་མཁས་པར་འགྱུར་བ་དག །མི་དེ་ཀུན་ནི་ངས་ཤེས་ཏེ། །དེ་དག་ཤེས་པར་རིག་གྱུར་ཅིང་། །བདག་ལ་ཡིད་བྱུང་གྱུར་ནས་ནི། །དེ་ཡི་ཚེ་ན་ཡང་དང་ཡང་། །ང་ནི་མངོན་དུ་གྱུར་པར་བྱ། །འོད་སྲུང་གཞན་ཡང་བྱང་ཆུབ་སེམས་
དཔའ་ཁྱིམ་པ་ཆོས་གསུམ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་འཐོབ་སྟེ། གསུམ་གང་ཞེ་ན། ཕ་མ་མ་དད་པ་དད་པ་ལ་འཇོག་པར་བྱེད། ཕ་མ་ཚུལ་ཁྲིམས་འཆལ་པ་ཚུལ་ཁྲིམས་ལ་འཇོག་པར་བྱེད། ཕ་མ་སེར་སྣ་ཅན་གཏོང་བ་ལ་འཇོག་པར་བྱེད། བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བསྔགས་པ་བརྗོད་ཅིང་གཞན་དག་ལ་ཡང་ཆོས་སྟོན་པར་བྱེད་པ་འདི་ནི་གང་གིས་བྱང་ཆུབ་སེམས་དཔའ་ཁྱིམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་འཐོབ་པའི་ཆོས་དང་པོའོ། །འོད་སྲུང་གཞན་ཡང་བྱང་ཆུབ་སེམས་དཔའ་
ཁྱིམ་པས་བཀུར་སྟི་བྱ་བར་འོས་པ་ཡང་ཤེས། བཀུར་སྟི་བྱ་བའི་འོས་མ་ཡིན་པ་ཡང་ཤེས་ཏེ། བཀུར་སྟི་བྱ་བའི་འོས་དང་། བཀུར་སྟི་བྱ་བའི་འོས་མ་ཡིན་པ་ཤེས་ནས་ཀྱང་གང་དག་བཀུར་སྟིར་བྱ་བ་དེ་དག་ལ་ནི་བཀུར་སྟིར་བྱེད། གང་དག་བཀུར་སྟི་བྱ་བའི་འོས་མ་ཡིན་པ་དེ་དག་ལ་ནི་བཀུར་སྟི་མི་བྱེད་ཀྱི། དེ་དག་
ལ་བྱམས་པ་སྒོམ་པར་བྱེད་དེ། འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གཉིས་པོ་འདི་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་འཐོབ་བོ། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པ་དེའི་ལོངས་སྤྱོད་གང་དག་སྡུག་བསྔལ་ཞིང་སྡུག་བསྔལ་བར་བསྒྲུབས་པ་དེ་དག་

དེས་ཆུད་མི་གཟོན་ཅིང་ཆུད་མི་ཟ་བར་བྱེད་དེ། དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་རྣམས་དང་ཐུན་མོང་དུ་སྤྱོད་པ་མ་གཏོགས་པར་སུ་ལ་ཡང་སྦྱིན་པར་མི་བྱེད་དེ། ཚངས་པ་མཚུངས་པར་སྤྱོད་པ་རྣམས་དང་སྲི་བ་མེད་པར་སྤྱོད་དོ། །འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་
གསུམ་པོ་འདི་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་འཐོབ་བོ། །དེ་ལ་འདི་སྐད་ཅེས་བྱ་སྟེ། བྱང་ཆུབ་སེམས་དཔའ་ཁྱིམ་པ་ནི། །བྱང་ཆུབ་དམ་པ་ཚོལ་བ་ན། །གང་གིས་དམ་པ་རྟོགས་གྱུར་པའི། །ཤེས་རབ་རྩ་བ་གསུམ་གྱིས་སྐྱེ། །ཕ་དང་མ་ནི་གང་ཡིན་པ། །
བློ་གྲོས་ངན་ཅིང་མ་དད་པ། །དད་ལ་འདུན་པ་སྐྱེད་བྱེད་ཅིང་། །ཆོས་ཀྱི་མཆོག་ལ་སྦྱོར་བར་བྱེད། །འཇུངས་པ་གཏོང་དང་ཚུལ་ཁྲིམས་ལ། །ཤེས་རབ་འཆལ་པ་ཤེས་རབ་སྦྱོར། །བྱང་ཆུབ་དམ་པ་གང་ཡིན་པ། །དེ་ལ་དེ་དག་ཡང་དག་འཛུད། །ཕྱོགས་བཞི་དག་ཏུ་སོང་ནས་སུ། །ལེགས་པར་
བཤད་པ་ཡོངས་བཙལ་ཏེ། །གང་གིས་ཤེས་རབ་འཕེལ་འགྱུར་བ། །ཆོས་ཀྱི་སྦྱིན་པ་སྦྱིན་པར་བྱ། །ཁྲིམས་འཆལ་ཁྲིམས་ལ་གཞག་བྱས་ཤིང་། །མ་དད་དད་པ་འཛིན་བཅུག་སྟེ། །ཤེས་འཆལ་ཤེས་རབ་འཛིན་བཅུག་ནས། །དེ་ནི་ལྡོག་པར་མི་འགྱུར་རོ། །ཤེས་རབ་ཅན་དེས་དགེ་སློང་
མཐོང་། །ཚུལ་ཁྲིམས་ལྡན་དང་མང་ཐོས་ལ། །བཀུར་སྟི་བྱེད་ཅིང་སྟེན་པར་བྱེད། །སོང་ནས་ཡང་ནས་ཡང་དུ་འདྲི། །གང་གི་དོན་དུ་སྟེན་པ་ཡིས། །དགེ་སློང་དེ་ལ་ཡང་ཡང་འདྲི། །ཁྱིམ་པ་རྣམས་ཀྱི་ཆོས་དེ་དག །དེས་ནི་མྱུར་དུ་དེ་མི་ལྡོག །མཁས་པ་དེ་ནི་དེ་དག་གི །ཐོབ་པའི་གནས་
ཀྱི་ཁྱད་པར་ཤེས། །མཁས་པ་རྣམས་ཀྱི་ཁྱད་ཤེས་ནས། །དེ་ལ་བདག་གི་ཤ་ཡང་སྦྱིན། །ང་ཡིས་གང་དག་བརྗོད་བྱས་པ། །དེ་དག་དད་པའི་མཚན་ཉིད་དེ། །མ་དད་པས་ནི་དེ་དག་གིས། །བྱང་ཆུབ་སེམས་འདུད་མི་ནུས་སོ། །ཁྱད་པར་ཤེས་ཤིང་ཡིད་གཞུངས་པ། །ཁྱད་པར་མྱུར་དུ་ཐོབ་པར་
འགྱུར། །ཆོས་རྣམས་ཀུན་གྱི་ཁྱད་པར་ནི། །དེ་ལ་དཀོན་པར་མི་འགྱུར་རོ། །བདག་དང་ཕ་རོལ་གཞན་རྣམས་ཀྱི། །ཁྱད་པར་དེ་ལྟར་ཤེས་གྱུར་ནས། །སེམས་དགའ་མངོན་དུ་སྒྲུབ་པར་བྱེད། །དེས་ན་དེ་ཡི་ཤེས་རབ་འཕེལ། །དེ་ཡི་ལོངས་སྤྱོད་གང་ཡིན་པ། །གང་དག་དེས་ནི་ཀུན་བསྒྲུབས་པ།

དེ་དག་ཚུལ་ཁྲིམས་ལྡན་རྣམས་དང་། །གཅིག་ཏུ་སྤྱད་པར་སྔ་ནས་བྱས། །དེ་ནི་གཞན་དུ་མི་སྨྲ་སྟེ། །དེ་ནི་ལོག་པར་སྨྲ་མ་ཡིན། །གཏོང་དང་ལྡན་ཞིང་མཐུ་བརྟན་པ། །དེ་དེ་དེ་བཞིན་གཤེགས་པར་འགྱུར། །ཚུལ་ཁྲིམས་བཟང་ཞིང་འགྲོགས་ན་བདེ། །དཔའ་བོ་བྱམས་པ་ཐོབ་གྱུར་པ། །
སྦྱིན་པ་བྱིན་ནས་སྔ་ལོགས་སམ། །ཡང་ན་ཕྱི་ནས་དགའ་བར་འགྱུར། སྦྱིན་བདག་དམ་པ་དཔའ་བོ་སྟེ། །སྦྱིན་བདག་ལས་ནི་ཚོལ་བ་མེད། །ཐམས་ཅད་སྦྱིན་བདག་བརྟན་པ་པོ། །དེ་ལ་མ་བྱིན་ཡོང་མེད་དེ། །གསེར་རམ་ཡང་ན་དབྱིག་ཀྱང་རུང་། །སྔོན་གྱི་ཚེ་རབས་རྣམས་ན་བྱིན། །ཆོས་
མཆོག་རྣམས་དང་ཟབ་མོ་མཆོག །གོ་འཕང་ཡོངས་སུ་ཚོལ་བར་བྱེད། །གང་ཞིག་ལྷར་བཅས་འཇིག་རྟེན་ལ། །བསྟི་སྟང་བྱེད་པ་རིགས་མ་ཡིན། །གང་ཟག་གཅིག་པོ་གང་ཡིན་ལ། །ཆོས་ཀྱི་དོན་ཕྱིར་བཀུར་སྟི་བྱ། །ཆོས་ལས་སྐྱེས་པ་དཔའ་བོས་ནི། །ཆོས་ཀྱི་ཆོས་ཀྱང་ཡོངས་སུ་ཚོལ། །
ཆོས་གཅེས་ཆོས་དང་ཡིད་གཞུངས་པ། །འཇིག་རྟེན་ན་ནི་འདྲེན་པར་འགྱུར། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པ་ཆོས་གསུམ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལས་ཉན་ཐོས་ཀྱི་ཐེག་པར་ཡོངས་སུ་མྱ་ངན་ལས་འདའ་བར་བྱེད་དེ།
གསུམ་གང་ཞེ་ན། འོད་སྲུང་འདི་ལ་ཁ་ཅིག་བྱང་ཆུབ་ཏུ་སེམས་བསྐྱེད་ནས། སེམས་ཅན་དམྱལ་བ་རྣམས་ཀྱིས་འཇིགས་ཤིང་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱིས་འཇིགས་ཏེ། བྱང་ཆུབ་ལ་ཁུར་དུ་འདུ་ཤེས་པར་འགྱུར་ཞིང་དེ་གལ་ཏེ་དགེ་བའི་རྩ་བ་ཡང་དག་པར་བསྒྲུབས་པ་རྣམས་རྒྱུན་མི་
འཆད་པར་ཡིད་ལ་མི་བྱེད། ལེན་པར་མི་བྱེད་ལ་དེ་ཡིད་ཀྱིས་ཞེ་འགྲས་པར་བྱེད། དེ་སེམས་ཀྱིས་ཞེ་འགྲས་པར་བྱེད་ཅིང་སྡུག་བསྔལ་གྱི་འདུ་ཤེས་སུ་འགྱུར་ན། འོད་སྲུང་ཆོས་དང་པོ་དེ་དང་ལྡན་པའི་བྱང་ཆུབ་སེམས་དཔའ་བྱང་ཆུབ་ལས་ལྡོག་ཅིང་ཉན་ཐོས་ཀྱི་ཐེག་པར་ཡོངས་སུ་མྱ་ངན་ལས་འདའ་བར་བྱེད་དོ། །
འོད་སྲུང་གཞན་ཡང་འདི་ལ་ཁ་ཅིག་བྱང་ཆུབ་ཏུ་སེམས་བསྐྱེད་ནས་གང་སྦྱིན་པ་སྦྱིན་ཞིང་ཡོངས་སུ་དགའ་བ་མ་ཡིན་པའི་སྦྱིན་པ་བྱིན་ཏེ། བྱིན་ཞིང་བྱིན་ནས་ཀྱང་འགྱོད་པར་འགྱུར་ཞིང་སངས་རྒྱས་ཀྱི་ཡེ་ཤེས་ལ་མི་གཏོད་ན། འོད་སྲུང་ཆོས་གཉིས་པ་དེ་དང་ལྡན་པའི་བྱང་ཆུབ་སེམས་དཔའ་ཁྱིམ་པ་ནི་བྱང་ཆུབ་ལས་

ལྡོག་ཅིང་མྱུར་དུ་ཉན་ཐོས་ཀྱི་ཐེག་པར་ཡོངས་སུ་མྱ་ངན་ལས་འདའ་བར་བྱེད་དོ། །འོད་སྲུང་གཞན་ཡང་འདི་ལ་ཁ་ཅིག་བྱང་ཆུབ་ཏུ་སེམས་བསྐྱེད་ནས་མང་དུ་ཐོས་པ་ཡོངས་སུ་བཙལ་བའི་ཕྱིར་བརྩོན་འགྲུས་མི་རྩོམ་གྱི། དེ་དགེ་བའི་རྩ་བ་ངན་ངོན་ཙམ་དེས་མྱུར་དུ་ཡོངས་སུ་མྱ་ངན་ལས་
འདའ་བར་བྱེད་ན། འོད་སྲུང་ཆོས་གསུམ་པ་དེ་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བྱང་ཆུབ་ལས་ལྡོག་ཅིང་མྱུར་དུ་ཉན་ཐོས་ཀྱི་ཐེག་པར་ཡོངས་སུ་མྱ་ངན་ལས་འདའ་བར་བྱེད་དོ། །དེ་ལ་འདི་སྐད་ཅེས་བྱ་སྟེ། །བྱང་ཆུབ་ཆེད་དུ་འདུན་བསྐྱེད་ལ། །འཐུན་པར་རྗེས་སུ་མི་སྒྲུབ་ན། །སངས་
རྒྱས་ཐེག་ལས་ལྡོག་འགྱུར་ཏེ། །ཉན་ཐོས་ཐེག་པར་འགྲོ་བར་འགྱུར། །མ་དད་པ་དང་ལེ་ལོ་ཅན། །སེར་སྣ་ཅན་དང་ཤེས་རབ་འཆལ། །དེ་དག་ལ་ནི་བྱང་ཆུབ་མེད། །དེ་དག་བར་དུ་གཅོད་པ་ཡིན། །བྱས་པ་གཟོ་ཞིང་ཁྲིམས་དང་ལྡན། །སྦྱིན་ལ་ཡིད་ནི་དགའ་བ་དང་། །བྱིན་ནས་
སེམས་ནི་ཚིམ་གྱུར་པ། །དེ་དག་བྱང་ཆུབ་དཀོན་མ་ཡིན། །སྡིག་པ་དག་ནི་སེམས་ཀྱིས་བྱེད། །སེམས་ཀྱིས་སྦྱིན་པ་སྦྱིན་པར་བྱེད། །སེམས་ཅན་སེམས་མཆོག་ལྡན་དེ་དག །འཇིག་རྟེན་མཆོད་རྟེན་འདྲ་བར་འགྱུར། །གང་དག་ཆོས་འདི་རྣམ་སྤངས་ནས། །བྱང་ཆུབ་ཏུ་ནི་སེམས་
བཏུད་པ། །དེ་དག་འཇིག་རྟེན་རྣམས་ན་ནི། །སྦྱིན་གནས་བླ་མེད་སངས་རྒྱས་འགྱུར། །འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གསུམ་དང་ལྡན་ན་བྱང་ཆུབ་ལས་ལྡོག་ཅིང་རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བྱེད་དེ། གསུམ་གང་ཞེ་ན།
འོད་སྲུང་འདི་ལ་ཁ་ཅིག་བྱང་ཆུབ་ཏུ་སེམས་བསྐྱེད་ནས་ཆོས་ལ་སེར་སྣ་བྱེད་དེ། འོད་སྲུང་ཆོས་དང་པོ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བྱང་ཆུབ་ལས་ལྡོག་ཅིང་རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བྱེད་དོ། །འོད་སྲུང་གཞན་
ཡང་འདི་ལ་ཁ་ཅིག་བྱང་ཆུབ་ཏུ་སེམས་བསྐྱེད་ནས་དགེ་མཚན་དང་ལྟས་ལ་ཆགས་ཏེ། འོད་སྲུང་ཆོས་གཉིས་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བྱང་ཆུབ་ལས་ལྡོག་ཅིང་རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བྱེད་དོ། །འོད་

སྲུང་གཞན་ཡང་འདི་ལ་ཁ་ཅིག་བྱང་ཆུབ་ཏུ་སེམས་བསྐྱེད་ནས་བྱང་ཆུབ་ཀྱི་ཡན་ལག་རྣམས་ཡོངས་སུ་མི་ཚོལ་ཞིང་ལེ་ལོ་ཅན་དུ་འགྱུར་ཏེ། འོད་སྲུང་ཆོས་གསུམ་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བྱང་ཆུབ་ལས་ལྡོག་ཅིང་རང་སངས་རྒྱས་ཀྱི་ཡོངས་
སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བྱེད་དོ། །དེ་ལ་འདི་སྐད་ཅེས་བྱ་སྟེ། ཆོས་ལ་སེར་སྣ་བྱེད་གྱུར་ཅིང་། །གཞན་དག་ལ་ནི་མི་སྟོན་པ། །རྐྱེན་གྱིས་བྱང་ཆུབ་འཐོབ་འགྱུར་ཏེ། །འདི་ནི་བྱང་ཆུབ་ལྡོག་པར་འགྱུར། །དེ་ལྟར་འདི་གཉིས་གནོད་འགྱུར་ཏེ། །གནོད་པ་ལས་ནི་སྡུག་བསྔལ་འོངས། །འགྲོ་
འམ་ཉེ་བར་བསྟེན་ནམ་ཞེས། །དེ་ནི་བྱང་ཆུབ་ཐེ་ཚོམ་ཟ། །ཐེག་པ་ཆེ་ལ་བསམ་བྱས་ནས། །མྱུར་དུ་ལྟས་ནི་ལྟ་བར་བྱེད། །གང་འདིར་སྟོན་པ་མི་སྟེན་པ། །དེ་དག་དད་པའི་མཚན་ཉིད་མིན། །གང་དག་འདུན་པ་དྲག་ལྡན་ཞིང་། །བྱང་ཆུབ་བརྟན་པ་དོན་གཉེར་བ། །དེ་དག་གཞན་ལ་ཕྱག་
མི་འཚལ། །འཇིག་རྟེན་མཆོད་རྟེན་མ་གཏོགས་སོ། །གང་དག་དད་པ་འདི་འདྲ་བ། །ལྷ་གཞན་རྙེད་པར་མི་འགྱུར་ཏེ། །དེས་དེ་མཆོག་ནི་ཕུན་སུམ་ཚོགས། །ལྷ་ཡི་ལྷ་ཞེས་བྱ་བ་ཡིན། །བྱང་ཆུབ་ཏུ་ནི་འདུན་བསྐྱེད་ནས། །གང་ཞིག་གཞན་ལ་ཕྱག་མི་འཚལ། །དེ་ནི་དེ་དང་དེ་
དག་ཏུ། །སྟོབས་དང་གཟུགས་དང་ལྡན་པར་འགྱུར། །འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གསུམ་དང་ལྡན་ན་ལུས་གནག་པར་འགྱུར་ཞིང་ལུས་ནག་པོར་འགྱུར་ཏེ། གསུམ་གང་ཞེ་ན། དེ་བཞིན་གཤེགས་པའི་མཆོད་རྟེན་ལ་མར་མེ་བུས་པ་དེ་ནས་མར་མེ་རྐུ་བ་དང་། ཕ་
རོལ་དང་འགྱེད་པ་ན་ཁྲོ་བ་ཉེ་བར་སྟོན་པ་དང་། མ་དྲིས་པར་སྨྲ་ཞིང་མི་ནག་པོའི་མཚང་བྲུས་པ་ཡིན་ཏེ། འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གསུམ་པོ་དེ་དག་དང་ལྡན་ན་ལུས་ནག་པོར་འགྱུར་རོ། །དེ་ལ་འདི་སྐད་ཅེས་བྱ་སྟེ། མཆོད་རྟེན་མར་མེ་བུས་པ་ལ། །དེ་ཡི་འོད་ནི་འཕྲོག་བྱེད་ན། །
དེ་ཡིས་ལུས་ནི་གནག་འགྱུར་ཏེ། །དཔེར་ན་ལ་བ་ནག་པོ་བཞིན། །མི་མཐོང་ནས་ནི་མཚང་འབྲུ་སྟེ། །ང་ནི་དཀར་གྱི་ཁྱོད་གནག་ཅེས། །དེས་ནི་གཞན་ལ་བརྙས་བྱས་ན། །ནག་པོར་འགྱུར་ཏེ་མུན་པ་བཞིན། །ངག་ནི་ཤིན་ཏུ་བསྡམ་པར་གྱིས། །ཆུད་ཟར་འགྱུར་བའི་ལས་མེད་དེ། །ལས་དེ་ཇི་

ལྟར་བྱས་པ་བཞིན། །དེ་ལྟར་དེ་ལ་སྤྱོད་པར་འགྱུར། །འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གསུམ་དང་ལྡན་ན་མགར་བའི་ཁྱིམ་དུ་སྐྱེ་བར་འགྱུར་ཏེ། གསུམ་གང་ཞེ་ན། འོད་སྲུང་འདི་ལ་བྱང་ཆུབ་སེམས་དཔའ་ཁྱིམ་པ་བདག་ཉིད་བསླབ་པའི་གཞི་ལྔ་དང་ལྡན་པ་ཡིན་ལ།
ཉེ་དུ་ལམ་རིང་པོ་ནས་ལྷགས་པ་དེ་དག་ལ་ཆང་ལྡུད་པ་དང་། སེམས་ཅན་གཞན་དག་ཀྱང་ཆང་ལ་འགྲོན་དུ་འབོད་ན་འོད་སྲུང་ཆོས་དང་པོ་འདི་དག་དང་ལྡན་པའི་བྱང་ཆུབ་སེམས་དཔའ་ཁྱིམ་པ་ནི། མགར་བའི་ཁྱིམ་དུ་སྐྱེ་བར་འགྱུར་རོ། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པ་བདག་
ཉིད་ཚངས་པར་སྤྱོད་པ་ཡིན་ལ་གཞན་དག་འཁྲིག་པའི་ཆོས་ལ་སྦྱོར་ན། དེ་ལས་བྱས་ཤིང་བསགས་པ་དེས་མགར་བའི་ཁྱིམ་དུ་སྐྱེ་བར་འགྱུར་ཏེ། འོད་སྲུང་ཆོས་གཉིས་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་མགར་བའི་ཁྱིམ་དུ་སྐྱེ་བར་འགྱུར་རོ། །འོད་སྲུང་གཞན་ཡང་བྱང་ཆུབ་
སེམས་དཔའ་ཁྱིམ་པ་དེ་ཁྱིམ་ན་བྱ་བ་ཅི་ཡང་རུང་བ་ཞིག་བརྩམས་པ་ཡོད་ལ་དེ་མི་ཆོས་ཀྱིས་འབྲེལ་པ་ཞིག་འདུག་པའི་གན་དུ་སོང་སྟེ། བོས་ནས་ཚུར་ཤོག །རེ་ཞིག་ཁ་ཏོན་བྱེད་པ་ཐོང་ལ་ལས་རིངས་པར་གྱིས་ཞེས་བསྒོ་ན་དེ་ལས་བྱས་ཤིང་བསགས་པ་དེས་མགར་བའི་ཁྱིམ་དུ་སྐྱེ་བར་འགྱུར་ཏེ།
འོད་སྲུང་ཆོས་གསུམ་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་ནི་མགར་བའི་ཁྱིམ་དུ་སྐྱེ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ཉེ་དུ་ལྷགས་པ་མཐོང་ནས་སུ། །ཆང་ལ་འགྲོན་དུ་འབོད་བྱེད་ཅིང་། །མྱོས་པའི་བཏུང་བ་བྱིན་པས་ན། །མགར་བ་མུ་ཅོར་སྨྲ་བར་འགྱུར། །དེ་ནི་
ཁབ་དང་མཚོན་ཆ་དང་། །བཟོ་ཡི་གནས་ནི་མི་བྱེད་ཀྱི། །ས་ལ་འདུག་པ་བྱས་ནས་སུ། །ལག་པས་སྦུད་པ་བླངས་ནས་འབུད། །བུད་མེད་དང་ནི་འདུ་སྤངས་ལ། །གཞན་དག་ལ་ནི་འདོད་བསྔགས་ན། །ལས་ཀྱི་རྣམ་པར་སྨིན་པ་དེས། །མགར་བ་མུ་ཅོར་སྨྲ་བར་འགྱུར། །དེ་ནི་ཁབ་དང་
མཚོན་ཆ་དང་། །སྦུད་པ་བུད་ཀྱང་མི་ཤེས་ལ། །ལག་པས་ཐོ་བ་བཟུང་ནས་སུ། །དེ་ནི་ལྕགས་ཀྱི་གར་བུ་རྡུང་། །ཆོས་ནི་རྣམ་པར་སྤངས་བྱས་པས། །དེ་ནས་མི་དེ་ཤི་འཕོས་ནས། །མི་དེ་རབ་ཏུ་མྱུར་བར་ནི། །མགར་བའི་ཁྱིམ་དེར་སྐྱེ་བར་འགྱུར། །དེ་ནི་སྦུད་པ་མི་མཐོང་ཞིང་། །

དེ་ནི་ཐོ་བ་མི་མཐོང་སྟེ། །སྣོད་རྣམས་ཐམས་ཅད་འཇོམས་པར་བྱེད། །རྣམ་པར་སྨིན་དེ་འདི་འདྲའོ། །འོད་སྲུང་ངག་ནི་བསྲུང་བར་བྱ། །ཡིད་ཀྱང་ཤིན་ཏུ་བསྡམ་པར་བྱ། །མི་དགེ་བ་ཡི་ཆོས་རྣམས་ཀུན། །གཞན་ལ་བརྗོད་པར་མི་བྱའོ། །སྐྱེ་བའི་འཁོར་བ་སྡུག་བསྔལ་ཏེ། །སྲེད་པས་
སྐྱེ་བ་འཕེལ་བར་འགྱུར། །དེ་བས་བརྟན་པ་ཆོས་སྤྱོད་ཅིག །ཆོས་མ་ཡིན་པ་རྣམ་པར་སྤོངས། །འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གསུམ་དང་ལྡན་ན་རྒྱལ་རིགས་ཤིང་སཱ་ལ་ཆེན་པོ་ལྟ་བུ་རྣམས་དང་སྐལ་བ་མཉམ་པར་སྐྱེ་བར་འགྱུར་ཞིང་། གཟུགས་བཟང་བ་དང་། མཛེས་པ་
དང་། བལྟ་ན་སྡུག་པ་དང་། ཁ་དོག་བཟང་པོ་རྒྱས་པ་མཆོག་དང་ལྡན་པ་དང་། ལེ་ལོ་མེད་པ་དང་། གསལ་བ་དང་། ཤིན་ཏུ་རྣམ་པར་ངེས་པར་འགྱུར་ཏེ། གསུམ་གང་ཞེ་ན། འོད་སྲུང་འདི་ལ་བྱང་ཆུབ་སེམས་དཔའ་ཁྱིམ་པས་སྔོན་མ་མཐོང་བའི་དགེ་སྦྱོང་དང་། བྲམ་ཟེ་དག་མཐོང་ན་
འདི་དག་ནི་སྦྱིན་གནས་སོ། །འདི་དག་ནི་མཆོད་པར་འོས་པའོ། །འདི་དག་ནི་ཕྱག་བྱ་བར་འོས་པའོ། །འདི་དག་ནི་བསོད་ནམས་ཀྱི་ཞིང་ངོ་ཞེས་དགའ་བ་བསྐྱེད་དེ། དེ་དག་དགའ་བར་གྱུར་པའི་སེམས་ཀྱིས་གོས་དང་། ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་
ཀྱིས་འགྲོན་དུ་གཉེར་ཏེ། འོད་སྲུང་ཆོས་དང་པོ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་རྒྱལ་རིགས་ཤིང་ས་ལ་ཆེན་པོ་ལྟ་བུ་དང་། སྐལ་བ་མཉམ་པར་སྐྱེ་བར་འགྱུར་རོ། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པ་ཡི་དམ་སྙིང་པོ་ཅན་ལ་གནས་པ་ཡིན་ཏེ། དེ་ཡི་དམ་
སྙིང་པོ་ཅན་ལ་གནས་པས་ཇི་སྐད་སྨྲས་པ་བཞིན་བྱེད་ཅིང་། བརྫུན་དུ་སྨྲ་བ་མ་ཡིན་ཏེ། འོད་སྲུང་ཆོས་གཉིས་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་རྒྱལ་རིགས་ཤིང་སཱ་ལ་ཆེན་པོ་ལྟ་བུ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །འོད་སྲུང་གཞན་ཡང་བྱང་ཆུབ་སེམས་
དཔའ་ཁྱིམ་པ་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དེ་དག་ལ་བསྙེན་བཀུར་བྱས་ནས་སྙིང་པོ་ལེན་ཏེ། འོད་སྲུང་ཆོས་གསུམ་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་རྒྱལ་རིགས་ཤིང་སཱ་ལ་ཆེན་པོ་ལྟ་བུ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ལ་འདི་སྐད་ཅེས་

བྱ་སྟེ། དེས་ནི་ཤེས་རབ་རང་བཞིན་ཅན། །ཁྲིམས་ལྡན་མང་དུ་ཐོས་མཐོང་ནས། །ཡིད་བདེ་བ་ནི་བསྐྱེད་བྱས་ཏེ། །སོང་ནས་དེ་དག་འགྲོན་དུ་གཉེར། །དེ་དག་འགྲོན་དུ་གཉེར་བྱས་ནས། །དེ་ནི་ཡང་དག་ཇི་བཞིན་བྱེད། །དེ་ནི་གཏོང་རྒྱུན་མི་གཅོད་ཅིང་། །དེ་ལ་འགྲས་པར་འགྱུར་
བ་མེད། །གང་གི་དོན་དུ་བསྙེན་བཀུར་བ། །སྙིང་པོ་དེ་ནི་ལེན་པར་བྱེད། །སྣ་ཚོགས་ཤེས་པའི་ཁྱད་པར་གྱིས། །རིན་ཆེན་ཤིན་ཏུ་དཀོན་ལ་ཡང་། །གང་དག་དད་པ་འདི་འདྲ་ཞིང་། །བྱང་ཆུབ་ལ་ཡང་མངོན་ཞུགས་པ། །དེ་དག་ཡེ་ཤེས་སྤྱོད་ཡུལ་བ། །བྱང་ཆུབ་རྙེད་པར་དཀའ་བ་
མེད། །འཚོ་བ་མཆོག་གིས་འཚོ་བྱས་ནས། །ལོངས་སྤྱོད་མཆོག་རྣམས་སྡུད་པར་བྱེད། །ཆོས་ཀྱི་དམ་པ་ཡོངས་སུ་ཚོལ། །མྱ་ངན་འདས་པ་མཆོག་ལ་རེག །རིགས་མཆོག་རྣམས་སུ་སྐྱེ་བར་འགྱུར། །གཟུགས་ཀྱི་དམ་པ་མངོན་པར་འགྲུབ། །ཆོས་གོས་དམ་པ་འཆང་བར་བྱེད། །དེ་ནི་མྱ་ངན་
འདས་མཆོག་འཐོབ། །མཁས་པའི་མི་ནི་འདི་འདྲའི་ཆོས། །དེ་དག་ཤེས་པར་གྱུར་ནས་ནི། །ཀུན་ཏུ་སྤྱོད་དེ་ཐུབ་པ་ཡིས། །ཉེ་བར་བསྟན་ལ་གུས་པར་བྱེད། །མི་དེ་སངས་རྒྱས་ཐེག་པ་ཡི། །ཐེག་པ་མཆོག་གིས་འགྲོ་བར་བྱེད། །མྱ་ངན་འདས་པ་བསིལ་བའི་དངོས། །འདི་ནི་དེ་ཡི་འབྲས་བུ་
མཆོག །ཅི་འདྲ་བ་ཡི་ལས་བྱས་པ། །རྣམ་པར་སྨིན་པ་དེ་འདྲར་འགྱུར། །བསྐལ་པ་བྱེ་བ་ཕྲག་བརྒྱར་ཡང་། །དེ་ནི་ཆུད་ཟར་འགྱུར་བ་མེད། །འོད་སྲུང་བྱང་ཆུབ་སེམས་དཔའ་ཁྱིམ་པ་ཆོས་གསུམ་དང་ལྡན་ན་ཁྱིམ་གྱི་ས་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་སངས་རྒྱས་ཀྱི་བར་དུ་ཇི་ལྟར་ནམ་དུ་ཡང་འདོད་པའི་ཡོན་ཏན་ལྔ་པོ་དག་ལ་ཡོངས་སུ་སྤྱོད་པར་མི་འགྱུར་བ་དེ་ལྟ་བུའི་དགེ་བའི་རྩ་བ་སྐྱེད་དེ། གསུམ་གང་ཞེ་ན། འོད་སྲུང་འདི་ལ་བྱང་ཆུབ་སེམས་དཔའ་ཁྱིམ་པ་བསླབ་པའི་གཞི་ལྔ་དང་ལྡན་པ་ཡིན་ཏེ། དེ་གཞན་ལ་ཡང་འདོད་པ་བསྔགས་པར་མི་
བྱེད་ཅིང་། བུད་མེད་དང་རྒྱུ་བ་མ་ཡིན་གྱི་རང་གི་དོན་ལ་མངོན་པར་བརྩོན་པ་ཡིན་ཏེ། བདག་ནི་བུད་མེད་དང་བསྟེན་པས་ཆོག་གིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་འདོད་པའི་ཡོན་ཏན་ལྔ་པོ་དག་དང་ཕྲད་པར་མ་གྱུར་ཅིག་ཅེས་སེམས་ཀྱང་སྐྱེད་དེ།

འོད་སྲུང་ཆོས་དང་པོ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་ནམ་ཡང་འདོད་པའི་ཡོན་ཏན་ལྔ་པོ་དག་ལ་ཡོངས་སུ་མི་སྤྱོད་དོ། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པ་འདི་ལྟ་བུའི་མདོ་
སྡེ་འདི་དག་ཐོས་ནས་དད་པ་སྐྱེད་ཅིང་དད་ནས་ཀྱང་ཡོངས་སུ་ཚོལ་ལོ། །འོད་སྲུང་གཞན་ཡང་མདོ་སྡེ་འདི་ལྟ་བུ་འདི་དག་གཟུང་དཀའ་བས་ཡོངས་སུ་ཟིན་པར་འགྱུར་ཏེ། འོན་ཀྱང་ལུང་འབོགས་པར་བྱེད། རྩོམ་པར་བྱེད་དོ། །འོད་སྲུང་གཞན་ཡང་གང་ཞིག་ཆོས་འདི་ལྟ་བུ་འདི་དག་ཐོས་ནས་འགྱོད་
པའི་གནས་མཐའ་དག་སེལ་བར་འགྱུར་ཏེ། དེ་དགེ་བའི་རྩ་བ་དེས་ཆགས་པ་མེད་པའི་སྤོབས་པ་དང་། གྲོལ་བའི་སྤོབས་པ་དང་ལྡན་པར་འགྱུར། ཤི་འཕོས་ཀྱང་རུང་། ཤི་འཕོས་པར་མ་གྱུར་ཀྱང་རུང་སྟེ། དེ་བཞིན་གཤེགས་པ་རྣམས་མྱུར་དུ་མཐོང་བར་འགྱུར། ཤི་འཕོས་ནས་ཀྱང་མཐོ་རིས་ཀྱི་
འཇིག་རྟེན་དུ་འགྲོ་བར་འགྱུར་ཏེ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་རིང་ངོ་སྙམ་དུ་ཤེས་པར་མི་བྱ་སྟེ། འོད་སྲུང་ཆོས་གཉིས་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་
དུ་འདོད་པའི་ཡོན་ཏན་ལྔ་པོ་དག་ལ་མི་སྤྱོད་དོ། །འོད་སྲུང་གཞན་ཡང་བྱང་ཆུབ་སེམས་དཔའ་ཁྱིམ་པ་དགེ་བའི་རྩ་བ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། དེ་གཟུགས་ལ་དགའ་བ་མ་ཡིན། སྒྲ་ལ་དགའ་བ་མ་ཡིན། དྲི་ལ་དགའ་བ་མ་ཡིན། རོ་ལ་
དགའ་བ་མ་ཡིན། རེག་ལ་དགའ་བ་མ་ཡིན། ལོངས་སྤྱོད་ལ་དགའ་བ་མ་ཡིན། དབང་ཕྱུག་ལ་དགའ་བ་མ་ཡིན། གཡོག་འཁོར་ལ་དགའ་བ་མ་ཡིན་ཏེ། དེས་འདུས་མ་བྱས་ཀྱི་སེམས་དང་། འདུས་མ་བྱས་ཀྱི་རྣམ་པར་སྨིན་པར་གྱུར་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་འདོད་པའི་ཡོན་ཏན་ལྔ་པོ་དག་ལ་ཡོངས་སུ་མི་སྤྱོད་དེ། འོད་སྲུང་ཆོས་གསུམ་པ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་བླ་ན་མེད་པ་ཡང་དག་པར་རྫོགས་

པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་འདོད་པའི་ཡོན་ཏན་ལྔ་པོ་དག་ལ་མི་སྤྱོད་དོ། །དེ་ལ་འདི་སྐད་ཅེས་བྱ་སྟེ། ཁྱིམ་པ་བསླབ་པའི་གཞི་ལྔ་པོ། །བསྲུང་བ་དག་ནི་ལེགས་བསྲུངས་ཏེ། །བུད་མེད་དང་ནི་འདུ་བ་སྤོང་། །དེ་ལ་སྨོད་ཅིང་བཤུང་བར་བྱེད། །འདི་འདྲ་བ་ཡི་
ཆོས་འདི་དག །ཡོངས་སུ་ཚོལ་བས་ངོམས་པ་མེད། །འགྱོད་པའི་གནས་ནི་གང་ཡིན་པ། །དེ་དག་དེས་ནི་མྱུར་དུ་སེལ། །དགེ་བའི་ཆོས་རྣམས་ཐམས་ཅད་ཀྱང་། །བྱང་ཆུབ་དོན་དུ་སྔོ་བར་བྱེད། །དེ་ནི་དགེ་བའི་རྩ་བ་དེས། །འདོད་པའི་ཡོན་ཏན་མྱུར་དུ་སྤོང་། །རྟག་ཏུ་མང་དུ་ཐོས་པར་འགྱུར། །
སྙིང་རྗེ་ཡང་དག་བསྐྱེད་ནས་སུ། །སྲོག་ཆགས་རྣམས་ལ་ཆོས་སྟོན་ཅིང་། །བྱང་ཆུབ་ལམ་ནི་ཡོངས་སུ་ཚོལ། །དེ་བས་འདི་འདྲ་རྣམས་ཐོས་ནས། །འདུན་པ་བཟང་པོ་བསྐྱེད་བྱ་ཞིང་། །འདོད་པས་བསྟེན་པར་མི་བྱ་སྟེ། །འཁོར་ལོ་མྱུར་དུ་བསྐོར་བར་བྱ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་
ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་སྡོམ་པ་གསུམ་བསྟན་པ་ཞེས་བྱ་བར་ཟུང་ཤིག །བྱང་ཆུབ་
སེམས་དཔའི་བསླབ་པ་ཡོངས་སུ་བརྗོད་པ་ཞེས་བྱ་བར་ཡང་ཟུང་ཤིག །ཆོས་ཐམས་ཅད་ཡང་དག་པར་འདུ་བ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་འོད་སྲུང་ཆེན་པོ་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། དྲི་ཟ་དང་།
མི་དང་། ལྷ་མ་ཡིན་དུ་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། སྡོམ་པ་
གསུམ་བསྟན་པ་ཞེས་བྱ་བ་ལེའུ་དང་པོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ།། །།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་གཉིས་པ་སྟེ་སྒོ་མཐའ་ཡས་པར་སྦྱོང་བ་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་ཨ་ནན་ཏ་མུ་ཁ་པ་རི་ཤོ་དྷ་ན་ནིར་དེ་ཤ་པ་རི་བརྟ་ནཱ་མ་མ་ཧཱ་ཡཱ་ན་སཱུ་ཏྲ།
བོད་སྐད་དུ། འཕགས་པ་སྒོ་མཐའ་ཡས་པ་རྣམ་པར་སྦྱོང་བ་བསྟན་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་
འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་རྣམས་དང་ཐབས་ཅིག་ཏུ་བཞུགས་སོ། །ཡང་
དེའི་ཚེ་ན་བཅོམ་ལྡན་འདས་འཁོར་བརྒྱ་སྟོང་དུ་མས་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་བཀོད་པ་མཐའ་ཡས་ཞེས་བྱ་བ་འཁོར་དེ་ཉིད་དུ་འདུས་ཏེ་འདུག་པར་གྱུར་པ་དེ་སྟན་ལས་ལངས་ཏེ། ཆོས་གོས་ཕྲག་པ་གཅིག་ལ་གཟར་ནས་པུས་མོ་གཡས་
པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་དེ་བཞིན་གཤེགས་པས་བདག་ལ་སྐབས་ཕྱེ་ན་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བཀོད་པ་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བཀོད་པ་མཐའ་
ཡས་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་བ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་

བཀོད་པ་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཚད་མ་མཆིས་པ་དང་། དཔག་ཏུ་མ་མཆིས་པ་དག་ལ་ཡང་དག་པར་རབ་ཏུ་ཞུགས་པ་རྣམས་དང་། གོ་ཆ་ཆེན་པོ་བགོས་པ་རྣམས་ཀྱི་སླད་དུ་
དེ་བཞིན་གཤེགས་པ་ལ་བདག་ཕྱོགས་འགའ་ཞིག་ཡོངས་སུ་ཞུའོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཆེན་པོའི་ས་ལ་ཡང་དག་པར་རབ་ཏུ་ཞུགས་པ་རྣམས་དང་། དོན་མཐའ་ཡས་པ་ཤེས་པའི་ཐབས་ལ་མཁས་པ་ལ་ཡང་དག་པར་རབ་ཏུ་ཞུགས་པ་རྣམས་དང་།
རྣམ་པར་ངེས་པའི་ཡེ་ཤེས་ཆེན་པོ་ཡང་དག་པར་བརྩམས་པ་ལ་ཡང་དག་པར་རབ་ཏུ་ཞུགས་པ་རྣམས་དང་། བྱང་ཆུབ་ཀྱི་ལམ་ལ་ཡང་དག་པར་ཞུགས་པ་དེ་ལྟ་བུ་དེ་དག་གི་སླད་དུ། དེ་བཞིན་གཤེགས་པ་ལ་བདག་ཡོངས་སུ་ཞུའོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་
ཆེན་པོ་སེམས་ཅན་ཐམས་ཅད་ལ་ཕན་པ་ཉེ་བར་བསྒྲུབ་པ་ལ་ཡང་དག་པར་རབ་ཏུ་ཞུགས་པ་རྣམས་དང་། སེམས་དཔེ་མ་མཆིས་པ་རྣམས་དང་། ཆོས་ཐམས་ཅད་རྣམ་པར་དག་པར་ཤེས་པའི་དོན་ལ་སེམས་པ་རྣམས་དང་། ཐབས་ལ་མཁས་པའི་ཤེས་པ་ཆེན་པོས་རབ་ཏུ་རྣམ་པར་འབྱེད་
པ་རྣམས་དང་། དོན་ཚད་མ་མཆིས་པ་རྣམ་པར་ངེས་པའི་ཐབས་ལ་མཁས་པ་རྗེས་སུ་ཐོབ་པར་འཚལ་བ་རྣམས་དང་། སེང་གེའི་ཁྲི་ཆེན་པོ་མངོན་པར་འཚལ་བ་རྣམས་དང་། ཐམས་ཅད་མཁྱེན་པའི་སེང་གེའི་ཁྲི་གདན་ལ་མངོན་པར་མཆིས་པ་རྣམས་དང་། རྣམ་པར་གནོན་པ་ཆེན་པོ་
ངེས་པར་བརྩམས་པ་ལ་ཡང་དག་པར་རབ་ཏུ་ཞུགས་པ་རྣམས་དང་། ཕྱིར་མི་ལྡོག་པའི་ངེས་པའི་ཚིག་སྣ་ཚོགས་ལ་མཁས་པ་རྣམས་དང་། རྣམ་པར་འབྱེད་པའི་བརྩོན་འགྲུས་ཆེན་པོ་ཀུན་ཏུ་བརྩམས་པའི་གོ་ཆ་ཆེན་པོ་ཤིན་ཏུ་བགོས་པ་དེ་དག་གི་སླད་དུ་དེ་བཞིན་གཤེགས་པ་ལ་བདག་
ཡོངས་སུ་ཞུ་བར་འཚལ་ལོ། །བཅོམ་ལྡན་འདས་སེམས་ཅན་གང་དག་སེམས་ཅན་ཐམས་ཅད་ཀྱི་མཆོག་བགྱིད་པར་འཚལ་བ་རྣམས་དང་། སེམས་ཅན་ཐམས་ཅད་ལ་དབང་ཕྱུག་གིས་དབང་སྒྱུར་བའི་ཕ་རོལ་ཏུ་ཕྱིན་པར་འཚལ་བ་རྣམས་དང་། བཅོམ་ལྡན་འདས་གང་དག་

ཐོགས་པ་མ་མཆིས་པའི་མི་འཇིགས་པའི་ཤེས་པ་རྗེས་སུ་ཐོབ་པར་འཚལ་བ་རྣམས་དང་། མི་འཇིགས་པ་གང་ལ་གནས་ནས་སེམས་ཅན་རྣམས་ལ་འཕེལ་བ་མ་མཆིས་པ་དང་འགྲིབ་པ་མ་མཆིས་པའི་ཐབས་དང་རྐྱེན་གྱིས་ཆོས་སྟོན་པར་འགྱུར་བ་རྣམས་དང་། ཐབས་ལ་མཁས་པས་
སེམས་ཅན་རྣམས་ལ་ཆོས་ཐམས་ཅད་ཀྱི་དོན་རྒྱ་ཆེར་སྟོན་པར་འགྱུར་བ་རྣམས་དང་། ཆོས་རྣམས་ཀྱི་ངོ་བོ་ཉིད་ཀྱི་རང་བཞིན་ལ་ཇི་ལྟ་བ་བཞིན་དུ་འཇུག་པར་སྟོན་པར་འགྱུར་བ་རྣམས་དང་། བཅོམ་ལྡན་འདས་གང་དག་དཔེ་མ་མཆིས་པའི་སེམས་དང་། བླ་ན་མ་མཆིས་པའི་སེམས་
དང་། མཆོག་གི་སེམས་དང་ལྡན་པ་རྣམས་དང་། སེམས་ཀྱི་དབང་ཕྱུག་རྗེས་སུ་ཐོབ་པར་འཚལ་བ་དེ་དག་གི་སླད་དུ་དེ་བཞིན་གཤེགས་པ་ལ་བདག་ཡོངས་སུ་ཞུ་བར་འཚལ་ལོ། །བཅོམ་ལྡན་འདས་གང་དག་འཇིག་རྟེན་ཐམས་ཅད་ལ་སྨན་པ་དང་བདེ་བའི་སླད་དུ་མ་རིག་པའི་སྒོ་ངའི་
སྦུབས་བརྟོལ་ནས་སློབ་དཔོན་ལ་མི་ལྟོས་པར་རང་བྱུང་གི་ཡེ་ཤེས་ཀྱི་མཛོད་དང་། ལྷ་དང་བཅས་པའི་འཇིག་རྟེན་གྱི་མཆོག་དང་། གཙོ་བོ་དང་། ཁྱད་པར་དུ་འཕགས་པ་དང་། རབ་དང་རབ་ཀྱི་མཆོག་ཏུ་འགྱུར་བར་འཚལ་བ་དེ་དག་གི་སླད་དུ་དེ་བཞིན་གཤེགས་པ་ལ་བདག་ཡོངས་སུ་ཞུ་
བར་བགྱིད་དོ། །བཅོམ་ལྡན་འདས་སེམས་ཅན་གང་དག་འཇིག་རྟེན་ཐམས་ཅད་ལ་སྨན་པ་དང་བདེ་བའི་སླད་དུ་ཉེ་བར་གནས་པ་རྣམས་དང་། མི་འཇིགས་པ་ཆེན་པོའི་ཡེ་ཤེས་རྗེས་སུ་ཐོབ་པར་འཚལ་བ་རྣམས་དང་། རང་བྱུང་གི་ཡེ་ཤེས་ཀྱི་སྟོབས་ལ་གནས་ནས་ཡེ་ཤེས་མཐའ་ཡས་
པ་སྟོན་པའི་ཐབས་ལ་མཁས་པ་རྣམ་པར་འབྱེད་པར་འཚལ་བ་རྣམས་དང་། རྣམ་པར་ངེས་པའི་ཆོས་མཐའ་ཡས་མུ་མེད་པ་དག་རབ་ཏུ་སྟོན་པར་འཚལ་བ་རྣམས་དང་། བཅོམ་ལྡན་འདས་གང་དག་ལྷ་དང་བཅས་པའི་འཇིག་རྟེན་དག་འོད་ཀྱིས་སྣང་བར་བགྱི་བར་འཚལ་བ་དེ་དག་གི་
སླད་དུ། དེ་བཞིན་གཤེགས་པ་ལ་བདག་ཡོངས་སུ་ཞུ་བར་བགྱིད་དོ། །བཅོམ་ལྡན་འདས་གང་དག་ཐབས་ལ་མཁས་པས་སེམས་ཅན་རྣམས་ལ་བླ་ན་མེད་པའི་ཡེ་ཤེས་རྒྱ་ཆེན་པོ་ཐོགས་པ་མ་མཆིས་པ་དག་ཡང་དག་པར་རབ་ཏུ་སྟོན་པར་འཚལ་བ་རྣམས་དང་ཤིན་ཏུ་རྣམ་པར་

དག་པའི་ཡེ་ཤེས་སྟོན་པའི་ཐབས་ལ་མཁས་པ་རྣམ་པར་འབྱེད་པར་འཚལ་བ་དེ་དག་གི་སླད་དུ་དེ་བཞིན་གཤེགས་པ་ལ་བདག་ཡོངས་སུ་ཞུ་བར་འཚལ་ལོ། །བཅོམ་ལྡན་འདས་གང་དག་ཐམས་ཅད་མཁྱེན་པའི་ཡེ་ཤེས་ཀྱི་ཐབས་ལ་མཁས་པའི་ས་རྗེས་སུ་
ཐོབ་པར་འཚལ་བ་དེ་དག་གི་སླད་དུ་དེ་བཞིན་གཤེགས་པ་ལ་བདག་ཡོངས་སུ་ཞུ་བར་འཚལ་ལོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ས་གང་ལ་གནས་ནས་མྱུར་དུ་སངས་རྒྱས་ཀྱིས་ཡོངས་སུ་རྫོགས་པར་བགྱིད་པ་རྣམས་དང་། ཐབས་ལ་མཁས་པའི་
ཕ་རོལ་ཏུ་ཕྱིན་པ་བསམ་གྱིས་མི་ཁྱབ་པ་དག་རྟོགས་པར་བགྱིད་པ་རྣམས་དང་། ཚེགས་ཆུང་ངུས་སེམས་ཅན་ཡོངས་སུ་སྨིན་པར་བགྱི་བའི་ཐབས་ལ་མཁས་པ་བསམ་གྱིས་མི་ཁྱབ་པ་དག་རྟོགས་པར་བགྱིད་པ་རྣམས་དང་། ཡེ་ཤེས་གང་གིས་སེམས་ཅན་རྣམས་ཀྱི་
མི་དགེ་བའི་ཆོས་རྣམས་སྤང་བ་དང་། དགེ་བའི་ཆོས་རྣམས་སྤེལ་བ་དང་། བྱང་ཆུབ་ཀྱི་ལམ་དང་། ཐམས་ཅད་མཁྱེན་པའི་གདུང་རིགས་ཀུན་ཏུ་བསྟེན་པར་བགྱི་བ་དང་། སེམས་ཅན་སྟོང་ཕྲག་མང་པོ་དཔག་ཏུ་མ་མཆིས་པ་རྣམས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་མི་ལྡོག་པ་ལ་སོ་སོར་འགོད་པར་བགྱིད་པའི་ཡེ་ཤེས་དེ་ལྟ་བུ་དག་མངོན་སུམ་དུ་བགྱི་བའི་སླད་དུ་སྒྲུབ་པར་བགྱིད་པ་རྣམས་དང་། བཅོམ་ལྡན་འདས་སེམས་ཅན་རྣམས་དང་། བྱང་ཆུབ་སེམས་དཔའ་རྣམས་ལ་བྱང་ཆུབ་ཀྱི་ལམ་ཡང་དག་པར་རབ་ཏུ་སྟོན་
པ་རྣམས་དང་། སངས་རྒྱས་ཀྱི་ཆོས་རྣམས་ལ་ཡང་དག་པར་དགའ་བ་དེ་དག་གི་སླད་དུ་དེ་བཞིན་གཤེགས་པ་ལ་བདག་ཡོངས་སུ་ཞུ་བར་བགྱིད་དོ། །བཅོམ་ལྡན་འདས་འཁོར་མང་པོ་འདུས་པར་གྱུར་པ་འདི་དག་ལ་གང་དེ་བཞིན་གཤེགས་པས་དེ་ལྟ་བུའི་ཆོས་ཀྱི་སྒོ་དག་
བསྟན་པའི་དུས་ནི་འདི་ལགས། ཚོད་ནི་འདི་ལགས་ཀྱིས་དེ་ལྟ་བུའི་ཆོས་ཀྱི་སྒོ་དག་བཤད་ཅིང་དེ་ལྟ་བུའི་ཆོས་བསྟན་པ་དེ་དག་ཉེ་བར་བསྒྲུབ་ཏུ་གསོལ། བྱང་ཆུབ་སེམས་དཔའ་འདི་དག་ཀྱང་ཇི་ལྟར་བསམ་གྱིས་མི་ཁྱབ་པའི་སྨོན་ལམ་ཡོངས་སུ་རྫོགས་ཤིང་ཐམས་ཅད་ཀྱང་སྐྱེ་

བ་གཅིག་གིས་ཐོགས་པ་དགེ་བའི་རྩ་བ་ཡོངས་སུ་སྨིན་པ་ཤ་སྟག་ལགས་ན། བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་འདི་དག་ཆོས་ཀྱི་ཚུལ་ཚད་མ་མཆིས་པ་རྣམ་པར་འབྱེད་པ་ལ་མཁས་པའི་གཞིར་འགྱུར་བ་དང་། ངེས་པའི་ཚིག་གི་དོན་ཐམས་ཅད་རྟོགས་ཤིང་སྟོན་པར་
འགྱུར་བ་དང་། འཚལ་ན་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། འཚལ་ན་རྫུ་འཕྲུལ་གྱི་སྟོབས་མཐའ་ཡས་པ་དག་ལ་གནས་ནས་སེམས་ཅན་ཚད་མ་མཆིས་པ་རྣམས་ཡོངས་སུ་སྨིན་པར་བགྱིད་པར་འགྱུར་བ་དང་། སངས་རྒྱས་ཀྱི་ཆོས་རྣམས་དང་།
སངས་རྒྱས་ཀྱི་ཡེ་ཤེས་ཀུན་ཏུ་གཟུང་བ་ལ་མཁས་པར་བགྱི་བའི་སླད་དུ་དེ་བཞིན་གཤེགས་པས་དེ་དག་ལ་གཟུངས་ཀྱི་སྒོ་ལ་མཁས་པ་དེ་ལྟ་བུ་དག་ཉེ་བར་བསྒྲུབ་ཏུ་གསོལ། བཅོམ་ལྡན་འདས་ཇི་ལྟར་དེ་བཞིན་གཤེགས་པས་དེ་ལྟ་བུའི་ཆོས་ཀྱི་སྒོ་དག་ཡང་དག་པར་རབ་ཏུ་བཤད་
ན་སེམས་ཅན་དཔག་ཏུ་མ་མཆིས་པ་དག་ཀྱང་བྱང་ཆུབ་ཀྱི་ལམ་ལ་མཁས་ཤིང་ཡོངས་སུ་སྨིན་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པས་སྔོན་ཡུན་རིང་པོ་ནས་སེམས་ཅན་ཚད་མ་མཆིས་དཔག་ཏུ་མ་མཆིས་པ་དག་སངས་རྒྱས་ཀྱི་མཁྱེན་པ་དང་། རང་བྱུང་གི་
ཡེ་ཤེས་ལ་སོ་སོར་དགོད་པར་སྨོན་ལམ་མཛད་པ་དེའི་དུས་ནི་འདི་ལགས་ཀྱིས། བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་འདི་དག་རང་རང་གི་དགེ་བའི་རྩ་བ་ཡོངས་སུ་སྨིན་པར་འགྱུར་བ་དང་། སླར་ཞིང་རྒྱ་ཆེར་གོང་ནས་གོང་དུ་སྨོན་ལམ་བསམ་གྱིས་མི་ཁྱབ་པ་ལ་
མཁས་པས་གནས་པར་འགྱུར་བ་དང་། དེ་བཞིན་གཤེགས་པའི་མཐུས་ཐབས་ལ་མཁས་པ་བསམ་གྱིས་མི་ཁྱབ་པ་དང་། ཚད་མ་མཆིས་པ་དག་འཐོབ་པར་འགྱུར་བ་དེ་ལྟར་དེ་དག་ལ་གཟུངས་ཀྱི་སྒོ་དེ་ལྟ་བུ་དག་བཤད་ཅིང་རབ་ཏུ་བསྟན་དུ་གསོལ། བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐབས་ལ་མཁས་པ་མཐའ་ཡས་པ་དག་ནི་ཐུགས་སུ་ཆུད། མི་འཇིགས་པ་ཆེན་པོའི་ས་ལ་ནི་ཤིན་ཏུ་རབ་ཏུ་ཞུགས། བསྐལ་པ་བྱེ་བ་དཔག་ཏུ་མ་མཆིས་པ་ནས་ཡང་དག་པར་བསྒྲུབས་པའི་དགོངས་པས་

ནི་སེམས་ཅན་ཐམས་ཅད་ཀྱི་བསམ་པ་བསྒྲུབ་པ་ལ་མཁས་ན། བཅོམ་ལྡན་འདས་འཁོར་འདི་དག་ཐམས་ཅད་ནི་དེ་བཞིན་གཤེགས་པའི་ཞལ་དུ་ལྟ་ཞིང་འཁོར་འདི་དག་ནི་དེ་བཞིན་གཤེགས་པ་ལ་ལྟ་བས་ངོམས་མ་འཚལ། ཐམས་ཅད་མཁྱེན་པའི་
ཡེ་ཤེས་ཡོངས་སུ་ཚོལ་བས་ངོམས་མ་འཚལ་ཆོས་ཡོངས་སུ་ཚོལ་བས་ངོམས་མ་འཚལ། དོན་རྣམ་པར་ངེས་པའི་ཆོས་ཀྱི་མཛོད་ཉན་པས་ངོམས་མ་འཚལ་བ་ལགས་ཀྱིས། བཅོམ་ལྡན་འདས་དེ་བཞིན་གཤེགས་པ་ནི་འཁོར་འདི་རྣམས་ཀྱི་བསམ་པ་བསྒྲུབ་པ་ལ་མཁས་
ཤིང་དེ་བཞིན་གཤེགས་པས་ནི་བྱང་ཆུབ་སེམས་དཔའ་འདི་དག་ཐམས་ཅད་ཀྱི་སྨོན་ལམ་ལ་མཁས་པ་ཡང་རབ་ཏུ་མཁྱེན། འཇུག་པ་ལ་མཁས་པ་ཡང་རབ་ཏུ་མཁྱེན། ཡོངས་སུ་སྨིན་པར་བགྱི་བ་ལ་མཁས་པ་ཡང་རབ་ཏུ་མཁྱེན་པས་ན། བཅོམ་ལྡན་འདས་སངས་
རྒྱས་ཀྱི་ཡུལ་དང་། དེ་བཞིན་གཤེགས་པའི་ཡུལ་བླ་ན་མེད་པ་ལ་ཞུགས་ནས་དེ་དག་ལ་ཆོས་ཀྱི་སྒོ་གང་དག་དང་། གཟུངས་ཀྱི་སྒོའི་ཚིག་གང་དག་གིས་ཆོས་ཐམས་ཅད་རྣམ་པར་ངེས་པ་ལ་མཁས་པ་ཡོངས་སུ་རྫོགས་པར་འགྱུར་བ་དེ་ལྟ་བུ་དག་དེ་བཞིན་གཤེགས་པས་
བཀའ་སྩལ་ཅིང་བཤད་དུ་གསོལ། བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་ཡོངས་སུ་མ་སྨིན་པ་རྣམས་ཡོངས་སུ་སྨིན་པར་བགྱི་བ་དང་། ཡོངས་སུ་སྨིན་པ་རྣམས་མངོན་པར་ཤེས་པ་མྱུར་བ་དང་། རྣམ་པར་གྲོལ་བའི་ཡེ་ཤེས་གཟིགས་པའི་ཐམས་ཅད་མཁྱེན་
པའི་སེམས་སོ་སོར་ཐོབ་པར་བགྱི་བ་དང་། བཅོམ་ལྡན་འདས་གང་དག་མ་ངེས་པའི་ས་ལ་གནས་པའི་སེམས་ཅན་དེ་དག་གིས་ཆོས་བསྟན་པ་འདི་ཐོས་ནས་ཐམས་ཅད་མཁྱེན་པའི་ཡུལ་ལ་ཡོངས་སུ་སྨིན་པར་འགྱུར་བ་དེ་ལྟ་བུའི་སླད་དུ། དེ་བཞིན་གཤེགས་པ་ལ་བདག་
ཤིན་ཏུ་རྣམ་པར་ངེས་པ་དག་ཡོངས་སུ་ཞུའོ། །བཅོམ་ལྡན་འདས་བྱམས་པ་ཆེན་པོས་སེམས་ཅན་རྣམས་ཡོངས་སུ་གཟུང་བའི་སླད་དུ་ཆོས་བཤད་པ་འདི་ལ་བཞུགས་སུ་གསོལ། བཅོམ་ལྡན་འདས་ཇི་ལྟར་སླད་མའི་དུས་སླད་མའི་ཚེ་ན་གནོད་སེམས་ཆེ་བའི་དུས་དང་།

འདོད་ཆགས་དང་། ཞེ་སྡང་དང་། གཏི་མུག་དང་ཉོན་མོངས་པ་མང་པོ་འབྱུང་བའི་དུས་དང་། མ་རིག་པས་ཟིན་པར་གྱུར་པའི་སེམས་ཅན་རྣམས་ཆོས་འཁྲུག་པ་འཆབ་པར་བགྱིད་པའི་དུས་དང་། ཆོས་ལ་རྩོད་ཅིང་འཐབ་པའི་དུས་ན་བྱང་ཆུབ་སེམས་དཔའ་རྣམས་བྱམས་པ་ཆེན་
པོས་ཡང་དག་པར་ཟིན་པའི་སེམས་ཀྱིས་འཁྲུག་པ་དེ་ལ་བཟོད་ཅིང་ཇི་མི་སྙམ་པར་བགྱིད་པ་དང་། རྩོད་པ་མ་མཆིས་པར་ཆོས་ཀྱི་ཚུལ་འདི་ལ་ངེས་པར་འབྱུང་བར་འགྱུར་བ་དང་། སྙིང་རྗེ་ཆེན་པོས་ཡོངས་སུ་ཟིན་པས་རྩོད་པ་མ་མཆིས་ཤིང་། རྗེས་སུ་འཐུན་པར་འགྱུར་བ་དང་།
དགེ་བའི་རྩ་བའི་སྟོབས་བསྐྱེད་པ་དག་རྗེས་སུ་ཐོབ་པར་བགྱི་བའི་སླད་དུ་བཅོམ་ལྡན་འདས་དེ་བཞིན་གཤེགས་པ་ལ་བདག་དོན་རྣམ་པར་ངེས་པ་འདི་དག་ཡོངས་སུ་ཞུའོ། །བཅོམ་ལྡན་འདས་དེ་བཞིན་གཤེགས་པ་བྱང་ཆུབ་སེམས་དཔའ་རྣམས་ལ་ཐོགས་པ་མ་མཆིས་པའི་ཆོས་
ཀྱི་ཚུལ་འདི་རྣམ་པར་དབྱེ་བར་བཞེད་ན། བཅོམ་ལྡན་འདས་གང་དག་ཆོས་ཐམས་ཅད་ཀུན་ཏུ་བསྡུ་བ་ལ་མཁས་པར་འགྱུར་བའི་ཆོས་བསྟན་པའི་སྒོ་དང་། ཆོས་སྣང་བའི་སྒོ་དེ་དག་གང་ལགས། དེ་བཞིན་གཤེགས་པས་ཆོས་ཐམས་ཅད་བསྡུ་བ་ལ་མཁས་པ་གང་དག་གིས་ཆོས་
ཀྱི་ཚུལ་འདི་ནི་བསླུ་བ་མེད་ཅིང་ཉེ་བར་ཞི་བའོ། །ཞེས་བསྟན་ཅིང་། ཆོས་ཀྱི་གཏེར་དཔག་ཏུ་མ་མཆིས་པ་དག་རྣམ་པར་དབྱེ་བར་གསོལ། ཆོས་ཀྱི་མཛོད་རྣམས་རྣམ་པར་དགྲོལ་དུ་གསོལ། དེ་བཞིན་གཤེགས་པ་ནི་ཟིལ་གྱིས་མི་ནོན་ཅིང་ཉམས་པ་མི་མངའ་ལ་རྒྱུན་མི་
འཆད་པའི་དགོངས་པ་ཕུན་སུམ་ཚོགས་པ་དང་ལྡན་པས་ཕ་རོལ་རྒོལ་བ་ཐམས་ཅད་ནི་ཆོས་དང་འཐུན་པས་ཚར་བཅད་ཅིང་རབ་ཏུ་བཏུལ། བདུད་ཐམས་ཅད་ནི་ཕམ་པར་མཛད། སངས་རྒྱས་ཀྱི་ཆོས་རྣམས་ཀྱིས་སེམས་ཅན་རྣམས་ལ་དགེ་བའི་རྩ་བ་ནི་ཡང་དག་པར་སྒྲུབ།
སེམས་ཅན་རྣམས་ལ་སྨོན་ལམ་ལ་མཁས་པ་མཐའ་ཡས་པ་མངོན་པར་འཕགས་པ་དག་ནི་ཡང་དག་པར་སྒྲུབ་ཅིང་ཀུན་ཏུ་སྟོན། ཐམས་ཅད་མཁྱེན་པའི་ཡེ་ཤེས་འདི་ལ་ནི་མངོན་པར་འཕགས། ཆོས་ཀུན་བསྡུ་བ་ཚད་མ་མཆིས་པ་རྣམས་ནི་རྗེས་སུ་དགོངས། སྤོབས་པ་

ཕུན་སུམ་ཚོགས་པ་མཐའ་ཡས་པ་དག་དང་ནི་ལྡན་ན་རྣམ་པར་གསལ་བའི་ཚིག་འབྲུ་དཔེ་མ་མཆིས་པ་རྣམས་དང་། ཤིན་ཏུ་རྣམ་པར་སྦྱངས་པའི་སོ་སོ་ཡང་དག་པར་རིག་པ་རྒྱུན་མི་འཆད་པ་རྣམས་ཀྱིས་གཟུངས་ཀྱི་ཚུལ་ལ་མཁས་པ་མཐའ་ཡས་པ་ཁོང་དུ་
ཆུད་པར་འགྱུར་བ་དང་། ཆོས་ཐམས་ཅད་ཤིན་ཏུ་རྣམ་པར་ངེས་པའི་ཚུལ་ལ་མཁས་པར་འགྱུར་བ་དང་། སེམས་ཅན་རྣམས་ལ་བསམ་པ་སྒྲུབ་པར་བསྐུལ་བ་དང་། སེམས་ཅན་རྣམས་ལ་སྔོན་གྱི་མཐའ་དང་། ཕྱི་མའི་མཐའི་སྦྱོར་བ་བསྟན་པ་དང་། འདས་པ་དང་། མ་
འོངས་པ་དང་། ད་ལྟར་བྱུང་བའི་ཆོས་རྣམས་ཡང་དག་པར་བསྟན་པ་དང་། རྒྱུ་ལ་རག་ལས་པ་རྣམས་ཡང་དག་པར་བསྟན་པ་དང་། ཆོས་གང་ལ་ཡང་མངོན་པར་ཞེན་པ་མ་མཆིས་པར་སེམས་ཅན་རྣམས་ལ་ཆོས་བསྟན་པ་དང་། ཕྱོགས་བཅུའི་འཇིག་རྟེན་གྱི་ཁམས་དག་ན་
སངས་རྒྱས་བཅོམ་ལྡན་འདས་རྣམས་དེ་དག་ལ་ཡང་དག་པའི་ཆེད་དུ་བརྗོད་པ་གསུང་བར་འགྱུར་བ་དང་། ཕྱོགས་བཅུའི་འཇིག་རྟེན་གྱི་ཁམས་ཀུན་ཏུ་རྫུ་འཕྲུལ་གྱི་སྟོབས་དང་། མི་འཇིགས་པས་སེམས་ཅན་རྣམས་ཀྱི་ཆོས་ལ་ལྟ་བ་སྤང་བར་བགྱི་བ་དང་། སེམས་ཅན་
རྣམས་ལ་རྣམ་པར་ངེས་པའི་ཆོས་བསམ་གྱིས་མི་ཁྱབ་པ་དག་བསྟན་པ་དང་། སངས་རྒྱས་ཀྱི་ཡེ་ཤེས་ཡོངས་སུ་སྨིན་པར་བགྱི་བ་ལ་མཁས་པ་དེ་ལྟ་བུའི་ཆོས་ཀྱི་གཏམ་འབེལ་བ་དག་བཀའ་སྩལ་དུ་གསོལ། བཅོམ་ལྡན་འདས་དེ་ལྟར་ཐབས་ལ་མཁས་པ་ཆེན་པོའི་
ས་ཡོངས་སུ་བརྟག་པའི་ཆེད་དང་། དོན་ཐམས་ཅད་ཤེས་པའི་ཐབས་ལ་མཁས་པ་བསམ་གྱིས་མི་ཁྱབ་པ་དག་ཡང་དག་པར་བསྡུ་བའི་སླད་དུ་དེ་བཞིན་གཤེགས་པ་ལ་བདག་ཡོངས་སུ་ཞུའོ། །བཅོམ་ལྡན་འདས་གཞན་ཡང་ཆོས་གང་གིས་བྱང་ཆུབ་སེམས་དཔའ་
རྣམས་ཀྱི་སྨོན་ལམ་ལ་མཁས་པ་དང་། ཡོངས་སུ་སྨིན་པར་བགྱི་བ་ལ་མཁས་པ་དང་། ཐབས་ལ་མཁས་པ་ཡོངས་སུ་རྫོགས་པར་འགྱུར་བ་དང་། ཇི་ལྟར་བྱང་ཆུབ་སེམས་དཔའ་རྣམས་ཀྱིས་ཆོས་བསྟན་པ་འདི་ཐོས་ན་ཆོས་ཀྱི་སྣང་བ་ཆེན་པོ་སོ་སོར་འཐོབ་པར་

འགྱུར་བ་དང་། བྱང་ཆུབ་ཀྱི་ལམ་ཡོངས་སུ་སྨིན་པར་འགྱུར་བ་དང་། སྨོན་ལམ་གྱི་ཁྱད་པར་ལ་མཁས་པ་ཡོངས་སུ་སྨིན་པར་འགྱུར་བ་དེ་ལྟ་བུའི་ཆོས་དག་དེ་བཞིན་གཤེགས་པས་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་
སེམས་དཔའ་བཀོད་པ་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བཀོད་པ་མཐའ་ཡས་གང་ཁྱོད་དེ་ལྟར་ཤིན་ཏུ་དུལ་བའི་བློས་དེ་བཞིན་གཤེགས་པ་ལ་ཡོངས་སུ་ཞུ་བ་ནི་ལེགས་སོ་ལེགས་སོ། །བཀོད་པ་མཐའ་ཡས་ཇི་ལྟར་ཡང་ཁྱོད་བྱང་ཆུབ་སེམས་དཔའ་རྣམས་
ཀྱི་ཐབས་ལ་མཁས་པ་ཡོངས་སུ་རྫོགས་པར་བྱ་བའི་ཕྱིར་ཞུགས་པ་དང་། ཇི་ལྟར་ཡང་ཁྱོད་བྱང་ཆུབ་སེམས་དཔའ་རྣམས་ཀྱི་སྨོན་ལམ་རྣམ་པར་དག་པར་བྱ་བའི་ཕྱིར་ཞུགས་ཤིང་བྱང་ཆུབ་སེམས་དཔའ་ཐམས་ཅད་ཀྱི་ཆེད་དང་། སེམས་ཅན་ཐམས་ཅད་ལ་སྙིང་རྗེ་བའི་ཕྱིར་
དེ་ལྟར་དེ་བཞིན་གཤེགས་པ་ལ་ཤིན་ཏུ་རྣམ་པར་ངེས་པ་དག་ཡོངས་སུ་ཞུ་བ་ནི་ཁྱོད་ཀྱིས་ཡོན་ཏན་མཐར་ཐུག་པར་སླ་བ་མ་ཡིན་ནོ། །བཀོད་པ་མཐའ་ཡས་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་། ཇི་ལྟར་བྱང་ཆུབ་སེམས་དཔའ་རྣམས་ཐམས་
ཅད་མཁྱེན་པའི་ཡེ་ཤེས་ཀྱི་ཡུལ་ལ་དེ་དག་དང་། །གཞན་ཡང་ཡོན་ཏན་ཚད་མེད་པ་དག་གིས་མངོན་པར་འཕགས་པར་འགྱུར་བ་དེ་ལྟ་བུའི་ཆོས་བསྟན་པ་དག་བཤད་པར་བྱའོ། །བཅོམ་ལྡན་འདས་ལེགས་སོ་ཞེས་བྱང་ཆུབ་སེམས་དཔའ་བཀོད་པ་མཐའ་ཡས་བཅོམ་ལྡན་འདས་ཀྱི་
ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བཀོད་པ་མཐའ་ཡས་འདི་ལ་བྱང་ཆུབ་སེམས་དཔའ་སྨོན་ལམ་ལ་མཁས་པ་མཐའ་ཡས་པ་མངོན་པར་འདོད་པ་རྣམས་ཀྱིས་དེ་བཞིན་གཤེགས་པ་རྣམས་ཀྱི་དགོངས་པའི་གསང་བའི་ཚིག་ལ་འཇུག་
པར་བྱ། ཀུན་ཏུ་གཟུང་བར་བྱ། ངེས་པར་བརྟག་པར་བྱ། ཚུལ་བཞིན་དུ་ཡིད་ལ་ཉེ་བར་བརྟག་པར་བྱའོ། །ཇི་ལྟར་ཚུལ་བཞིན་དུ་ཉེ་བར་བརྟག་པར་བྱ་ཞེ་ན། བཀོད་པ་མཐའ་ཡས་དེ་བཞིན་གཤེགས་པའི་བསྟན་པ་འདི་ནི་ཇི་ཙམ་དུ་ཡང་དག་པར་བསྡུ་བ་ལ་མཁས་

པའི་སངས་རྒྱས་ཀྱི་ཡེ་ཤེས་ལས་འབྱུང་བས་ཡོངས་སུ་མ་དག་པ་ལས་འབྱུང་བ་མེད་དོ། །བཀོད་པ་མཐའ་ཡས་དེ་ལ་བྱང་ཆུབ་སེམས་དཔའ་རྣམས་ཀྱིས་འདི་ལ་ཡང་དག་པར་རབ་ཏུ་བསླབ་པར་བྱ་སྟེ། འདི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་ཆོས་
བསྟན་པ་རྣམས་ནི་དེ་དག་གིས་ཆོས་འདི་དག་ཉིད་ལ་ངེས་པར་བསྟེན་ཅིང་ཐུགས་རྗེ་ཆེན་པོ་ལ་གནས་ནས། སེམས་ཅན་རྣམས་ལ་བྱམས་པ་ཆེན་པོས་ཁྱབ་པར་མཛད་པ་ལས་འདི་ལྟར་རྣམ་པར་ངེས་པའི་ཆོས་རྣམས་མཚུངས་པར་འབྱུང་སྟེ། སེམས་ཅན་དམན་པ་ལ་མོས་པ་