Kinh tạng Tây Tạng (Kangyur Đại Học) — 039_དཀོན་བརྩེགས།_ཀ

་པར་རོ། །རྒྱལ་མཚན་དང་། གདུགས་ཐོགས་པ་མཐོང་ན་ས་ལྔ་པར་རོ། །སྒྲ་འབྱིན་པར་མཐོང་ན་ས་དྲུག་པར་རོ།། །།བམ་པོ་གསུམ་པ་སྟེ་ཐ་མ།
རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་གླང་པོ་ཆེའི་གཙོ་བོ་ལ་ཞོན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་བདུན་པོ་དག་ཏུ་བལྟ་སྟེ། བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དང་། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་དགོངས་ཤིང་དེ་ལ་ཡེ་ཤེས་འཇུག་པ་དང་། དབང་ཕྱུག་ཆེན་པོ་ཡང་ཡོད་པ་ཡིན་པས་དེས་ན་གུས་པ་དང་བཅས་པ་དང་། བྱང་ཆུབ་སེམས་དཔའ་ཡང་དག་པར་འཛིན་དུ་གཞུག་པ་དང་། རྒྱུ་མེད་པ་དང་།
ངན་ངོན་ཙམ་གྱིས་ཆོག་ཤེས་པ་དང་། ཡིད་དུ་འཐད་པ་སྦྱིན་པར་བྱའོ། །དེས་ན་དེའི་ལས་ཀྱི་སྒྲིབ་པ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་བདག་གླང་པོ་ཆེའི་གཙོ་བོ་ཐ་མལ་པ་ལ་ཞོན་པར་ཀུན་ཏུ་ཤེས་ན་དེ་ནི་ས་

དང་པོ་པར་བལྟའོ། །གང་གིས་གོས་དཀར་པོ་བགོས་ཏེ་ཞོན་པར་ཀུན་ཏུ་ཤེས་ན་དེ་ནི་ས་གཉིས་པར་བལྟའོ། །གང་གིས་ཚོན་དམར་པོ་ཅན་བགོས་ཏེ་ན་དེ་ནི་ས་གསུམ་པར་བལྟའོ། །གང་གིས་ཚོན་སྣ་ཚོགས་ཅན་བགོས་ཏེ་ན་དེ་ནི་ས་བཞི་པར་བལྟའོ། །
གང་གིས་དྲི་ཞིམ་པོས་ཁ་བསྒྱུར་བའི་གོས་དག་བགོས་ཤིང་རྒྱན་གྱིས་བརྒྱན་ཏེ་ན་དེ་ནི་ས་ལྔ་པར་བལྟའོ། །གང་གིས་ཅོད་པན་ཐོགས་ཏེ་ན་དེ་ནི་ས་དྲུག་པར་བལྟའོ། །གང་གིས་རྒྱན་གྱིས་བརྒྱན་པའི་གདུགས་ཐོགས་ཏེ་ན་དེ་ནི་ས་བདུན་པར་བལྟའོ། །ས་གོང་མ་
པ་དག་གིས་ནི་ཐམས་ཅད་ཕུན་སུམ་ཚོགས་པར་མཐོང་སྟེ། ལས་ཀྱི་སྒྲིབ་པ་དང་། མངོན་པར་མི་བརྩོན་པ་ནི་མ་གཏོགས་སོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་རྟ་ལ་ཞོན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་
དང་པོ་བཞི་པོ་དག་ཏུ་བལྟ་སྟེ། དེས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྟེན་པར་བྱའོ། །དེ་ལ་ནི་བདུད་ཀྱི་ལས་ཤས་ཆེ་ལ་ལས་ཀྱི་སྒྲིབ་པ་ཆུང་བ་ཡིན་པས་དེས་སྟོང་པ་ཉིད་གཙོ་བོར་བྱ་བ་དང་། ལྷག་མཐོང་མང་དུ་བྱ་བ་དང་། ནན་ཏན་གྱིས་བསྒྲུབ་པར་བྱའོ། །དེས་ན་དེའི་ལས་
ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །དེ་ལ་བདག་རྟ་འགྲེང་བ་ལ་ཞོན་པར་ཀུན་ཏུ་ཤེས་ན་ས་དང་པོ་པར་བལྟའོ། །འགྲོ་བ་ལ་ཞོན་པར་ཀུན་ཏུ་ཤེས་ན་ས་གཉིས་པར་བལྟའོ། །རྒྱུག་པ་ལ་ཞོན་པར་ཀུན་ཏུ་ཤེས་ན་ས་གསུམ་
པར་བལྟའོ། །བརྒྱན་པ་ལ་ཞོན་པར་ཀུན་ཏུ་ཤེས་ན་ས་བཞི་པར་བལྟ་སྟེ། བདུད་ཀྱི་ལས་ནི་མ་གཏོགས་སོ། །ས་གོང་མ་དག་ལ་ནི་ཐམས་ཅད་ཕུན་སུམ་ཚོགས་པར་མཐོང་སྟེ། བྱང་ཆུབ་སེམས་དཔའི་ལྷག་པའི་ང་རྒྱལ་ཅན་རྣམས་དང་། བདུད་ཀྱི་ལས་ནི་མ་གཏོགས་
སོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་བདེན་པའི་བྱིན་གྱིས་བརླབས་བྱེད་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་བཅུ་པོ་ཐམས་ཅད་ལས་ས་གང་ཡང་རུང་བར་བལྟ་སྟེ། དེ་ལ་ནི་བདུད་ཀྱི་ལས་ཆུང་ལ། ལས་ཀྱི་སྒྲིབ་པ་ཤས་

ཆེ་བ་ཡིན་པས། དེས་ནི་ཡུལ་མང་པོ་ལ་ངེས་པར་བརྟག་པར་བྱ་ཞིང་། ཏིང་ངེ་འཛིན་བསྒྲུབ་པ་ལ་མཁས་པར་ཡང་བྱ། སྤྱོད་ལམ་དྲང་པོ་དང་། སོགས་པ་དང་བྲལ་བར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་
ཡང་འགྱུར་རོ། །གང་སྦྱིན་པ་དང་ལྡན་པའི་བྱིན་གྱིས་བརླབས་བྱེད་ན་བྱང་ཆུབ་སེམས་དཔའ་དེ་ནི་ས་དང་པོ་པར་བལྟའོ། །བཅིངས་པ་ལས་ཐར་བར་བྱ་བའི་ཕྱིར་ན་ས་གཉིས་པར་བལྟའོ། །ནད་པ་ཐར་བར་བྱ་བའི་ཕྱིར་ན་ས་གསུམ་པར་བལྟའོ། །གྲོང་ཁྱེར་གྱི་ཕྱིར་ན་ས་བཞི་པར་
བལྟའོ། །རྒྱལ་པོའི་ཕྱིར་ན་ས་ལྔ་པར་རོ། །གླིང་བཞི་པའི་ཕྱིར་ན་ས་དྲུག་པར་རོ། །སྟོང་གི་ཕྱིར་ན་ས་བདུན་པར་རོ། །སྟོང་གཉིས་པའི་ཕྱིར་ན་ས་བརྒྱད་པར་རོ། །སྟོང་གསུམ་པའི་ཕྱིར་ན་ས་དགུ་པར་རོ། །འོད་འབྱུང་བ་དང་། ས་གཡོ་བ་དང་། ལྷ་རྣམས་ཀྱིས་མེ་
ཏོག་གི་ཆར་དབབ་པའི་ཕྱིར་ན་ས་བཅུ་པར་ཏེ། ས་དྲུག་པོ་དག་ལ་ནི་བདུད་ཀྱི་ལས་མ་གཏོགས་སོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་འབྲས་བུའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་དང་པོ་བདུན་པོ་དག་ཏུ་བལྟ་སྟེ། ལུང་
བསྟན་པ་ཡོངས་སུ་རྫོགས་པའི་ཆོས་དང་ལྡན་པ་ཡིན་ནོ། །དེས་ནི་རྙེད་པ་དང་བཀུར་སྟི་ལ་མ་ཆགས་པ་དང་། དྲང་པོ་དང་ཉེས་པ་མི་འཛིན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་འབྲས་
བུ་ཉུང་ངུའི་ཤིང་ལྗོན་པ་མཐོང་ན་དེ་ནི་ས་དང་པོ་པར་བལྟའོ། །གང་གིས་འབྲས་བུ་མང་པོའི་ཤིང་ལྗོན་པ་མཐོང་ན་དེ་ནི་ས་གཉིས་པར་བལྟའོ། །གང་གིས་འབྲས་བུ་རོ་ཞིམ་པོའི་ཤིང་ལྗོན་པ་མཐོང་ན་དེ་ནི་ས་གསུམ་པར་བལྟའོ། །གང་གིས་འབྲས་བུ་དྲི་ཞིམ་པོའི་ཤིང་ལྗོན་པ་
མཐོང་ན་བྱང་ཆུབ་སེམས་དཔའ་དེ་ནི་ས་བཞི་པར་བལྟའོ། །གང་གིས་འབྲས་བུ་སྨན་དུ་རུང་བའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་ལྔ་པར་བལྟའོ། །གང་གིས་ལྷ་ཡུལ་པ་ལྟ་བུའི་འབྲས་བུའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་དྲུག་པར་བལྟའོ། །གང་གིས་

བདུད་རྩིའི་རོ་དང་ལྡན་པའི་འབྲས་བུའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་བདུན་པར་བལྟའོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་མེ་ཏོག་གི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་དང་པོ་བདུན་པོ་དག་
ལས་ས་གང་ཡང་རུང་བར་བལྟ་སྟེ། དེས་ནི་དགེ་བའི་རྩ་བ་སྣ་ཚོགས་བྱ་བ་ལ་བརྩོན་པར་བྱ་ཞིང་དགེ་བའི་རྩ་བའི་ཆོས་དེ་ལ་ཀུན་ཏུ་སྤྱོད་པ་ན་དེས་འཁོར་བཞི་པོ་དག་དང་མ་འདྲེས་པར་རི་ཁྲོད་དུ་འགྲོ་བ་ལ་བརྩོན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་
ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་མེ་ཏོག་མང་ལ་དྲི་མི་ཞིམ་པའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་དང་པོ་པར་བལྟའོ། །གང་གིས་མེ་ཏོག་དྲི་ཞིམ་པོའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་གཉིས་པར་
བལྟའོ། །གང་གིས་མེ་ཏོག་མང་ཞིང་དྲི་ཞིམ་པའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་གསུམ་པར་བལྟའོ། །གང་གིས་མེ་ཏོག་དང་འབྲས་བུར་བཅས་པའི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་བཞི་པར་བལྟའོ། །གང་གིས་ལོ་མ་ཉུང་
བའི་མེ་ཏོག་གི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་ལྔ་པར་བལྟའོ། །གང་གིས་ལྷའི་མེ་ཏོག་གི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་དྲུག་པར་བལྟའོ། །གང་གིས་བྱང་ཆུབ་ཀྱི་ཤིང་ལྗོན་པ་མཐོང་ན་བྱང་ཆུབ་སེམས་དཔའ་དེ་ནི་ས་བདུན་པར་བལྟ་
སྟེ། བདུད་ཀྱི་ལས་ནི་མ་གཏོགས་སོ། །ས་གོང་མ་དག་ལ་ནི་མཚན་མ་ལྡོག་པ་མེད་དོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་སྔོན་མ་མཐོང་བའི་གྲོང་ཁྱེར་མཐོང་ན་དེ་ནི་ས་དང་པོ་དྲུག་པོ་དེ་དག་ཏུ་བལྟ་སྟེ། བྱང་ཆུབ་སེམས་དཔའ་དེ་ལ་ནི་
ཆོས་ཀྱི་སྒྲིབ་པ་མེད་དོ། །བྱང་ཆུབ་སེམས་དཔའ་དེ་ནི་མི་སྐྱེ་བའི་ཆོས་ལ་བཟོད་པ་དང་ཉེ་བར་རིག་པར་བྱ་སྟེ། དེས་ནི་སྟོང་པ་ཉིད་བསྒོམ་པའི་ཕྱིར་ཡི་དམ་ལ་བརྟན་པ་དང་། བདེ་བ་དང་སྡུག་བསྔལ་དག་གིས་ཞེ་འགྲས་པ་མེད་པའི་སེམས་སུ་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་

པར་དག་པར་འགྱུར་ཞིང་། །བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གྲོང་ཁྱེར་དང་པོ་བརྩིགས་མ་ཐག་པ་མཐོང་ན་ས་དང་པོ་པར་བལྟའོ། །གྲོང་ཁྱེར་ཕྱིས་བྱི་དོར་བྱས་པ་མཐོང་ན་ས་གཉིས་པར་རོ། །ར་བ་ཕུན་སུམ་ཚོགས་པས་ནི་ས་གསུམ་པར་རོ། །སྐྱེད་མོས་ཚལ་ཕུན་སུམ་
ཚོགས་པས་ནི་ས་བཞི་པར་རོ། །འབབ་ཆུ་ཕུན་སུམ་ཚོགས་པས་ནི་ས་ལྔ་པར་རོ། །རྫིང་བུ་ཕུན་སུམ་ཚོགས་པས་ནི་ས་དྲུག་པར་ཏེ། སྡིག་པའི་གྲོགས་པོའི་ལག་ཏུ་སོང་བ་དང་། དམིགས་པ་ཅན་དང་། མངོན་པར་མི་བརྩོན་པ་དང་། བདུད་ཀྱི་ལས་ནི་མ་གཏོགས་སོ། །ས་གོང་
མ་དག་ལ་ནི་ཐམས་ཅད་ཕུན་སུམ་ཚོགས་པར་མཐོང་ངོ་། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་མཚོ་མ་དྲོས་པ་མཐོང་ན་དེ་ནི་ས་དང་པོ་བརྒྱད་པོ་དག་ཏུ་བལྟ་སྟེ། དེ་ལ་ཉོན་མོངས་པ་ནི་ཆུང་ངོ་། །གལ་ཏེ་ལྷག་པའི་བསམ་པས་བརྩོན་པར་བྱེད་ཅིང་ལུས་དང་།
སྲོག་དང་། ཡོ་བྱད་དག་ལ་ལྷག་པར་ཆགས་པར་མི་བྱེད་ན་དེ་ལ་མྱུར་དུ་སྣང་བ་སྐྱེ་བར་འགྱུར་རོ། །དེས་གཞན་གྱི་བསམ་པ་ཡོངས་སུ་རྫོགས་པར་བྱ་བ་ལ་མངོན་པར་བརྩོན་པར་བྱ་སྟེ། དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་
འགྱུར་རོ། །གང་གིས་མཚོ་མ་དྲོས་པའི་འགྲམ་མཐོང་ན་དེ་ནི་ས་དང་པོ་པར་བལྟའོ། །གང་གིས་དབུས་མཐོང་ན་དེ་ནི་ས་གཉིས་པར་རོ། །གང་གིས་ཐམས་ཅད་མཐོང་ན་དེ་ནི་ས་གསུམ་པར་རོ། །གང་གིས་ལག་པས་རེག་ན་དེ་ནི་ས་བཞི་པར་རོ། །གང་གིས་ཁྲུས་བྱས་
ན་དེ་ནི་ས་ལྔ་པར་རོ། །གང་འགྲམ་ན་འདུག་ན་དེ་ནི་ས་དྲུག་པར་རོ། །གང་གིས་མཚོ་མ་དྲོས་པའི་ཀླུ་མཐོང་ན་དེ་ནི་ས་བདུན་པར་རོ། །གང་གིས་གནས་དང་གཟི་བྱིན་སྦྱིན་པར་མཐོང་ན་དེ་ནི་ས་བརྒྱད་པར་རོ། །ས་དྲུག་པོ་དག་ལ་ནི་བདུད་ཀྱི་ལས་མ་གཏོགས་སོ། །རྡོ་རྗེས་རབ་འཇོམས་
གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་ལྷའི་བུ་མཐོང་ན་བྱང་ཆུབ་སེམས་དཔའ་དེ་ནི་ས་དང་པོ་ལྔ་པོ་དག་ལས་ས་གང་ཡང་རུང་བར་བལྟའོ། །དེ་ལ་ལས་ཀྱི་སྒྲིབ་པ་དང་བདུད་ཀྱི་ལས་ནི་ཆུང་ལ་འདོད་པ་ཙམ་ནི་ཡོད་དེ། དེས་ཟླ་བ་གསུམ་དུ་བརྩོན་པར་བྱས་ན་ལས་ཀྱི་

སྒྲིབ་པ་རྣམ་པར་དག་པར་འགྱུར་ཞིང་། རྣམ་པར་མ་དག་པ་ཡང་ཆུང་ངུར་འགྱུར་ལ་སྣང་བ་ཐོབ་པར་ཡང་འགྱུར་རོ། །བྱང་ཆུབ་སེམས་དཔའ་དེ་ནི་ཕྱོགས་བཅུའི་བྱང་ཆུབ་སེམས་དཔའ་རྣམས་ཀྱིས་བསམས་པ་ཡིན་ཏེ། དེ་གལ་ཏེ་སྐྱོ་བར་མི་འགྱུར་ཞིང་མངོན་པར་བརྩོན་
པར་འགྱུར་ན་དེས་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །དེ་ལ་རྒྱལ་ཆེན་བཞི་པའི་རིས་ཀྱི་ལྷའི་བུ་མཐོང་ན་ས་དྲུག་པོ་དག་ཏུའོ། །སུམ་ཅུ་རྩ་གསུམ་པས་ནི་ས་བདུན་པར་རོ། །དགའ་ལྡན་པས་ནི་ས་བརྒྱད་པར་རོ། །
ཚངས་རིས་པས་ནི་ས་དགུ་པར་རོ། །གནས་གཙང་མ་བས་ནི་ས་བཅུ་པར་རོ། །ས་དང་པོ་ལ་མངོན་པར་བརྩོན་པས་ནི་ས་ཐམས་ཅད་ཀྱང་མཐོང་སྟེ། བདུད་ཀྱི་ལས་ཀྱང་ཡོད་དོ། །ས་བཅུ་པོ་དག་ལྷག་པའི་བསམ་པ་ཕུན་སུམ་ཚོགས་པས་ནི་ཐམས་ཅད་མཐོང་ངོ་། །རྡོ་རྗེས་
རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་ཀླུ་མཐོང་ན་དེ་ནི་ས་བརྒྱད་པོ་དག་ལས་ས་གང་ཡང་རུང་བར་བལྟ་སྟེ། དེ་ནི་ཆོས་ལ་རྗེས་སུ་འཐུན་པའི་བཟོད་པ་དང་ལྡན་པ་ཡིན་ནོ། །དེ་ནི་བརྩམས་ནས་ཡང་ཕྱིར་རྣམ་པར་རྩེ་བར་འགྱུར་བ་དང་། སྦྱོར་བ་བཟུང་
ནས་ཀྱང་ཡང་ཕྱིར་སྤོང་བར་འགྱུར་ཏེ། དེས་ནི་ལོངས་སྤྱོད་ཀྱི་གཞི་ལས་ཆོས་སྨྲ་བ་ལ་སྐུར་པ་བཏབ་པ་ཡིན་པས་དེས་སྡུག་པའི་དངོས་པོ་ཡོངས་སུ་བཏང་བ་ལ་མངོན་པར་བརྩོན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་
རོ། །གང་གིས་རི་ལ་གནས་པའི་ཀླུ་མཐོང་ན་དེ་ནི་ས་དང་པོ་པར་བལྟའོ། །གང་གིས་ནགས་ཁུང་ན་གནས་པ་མཐོང་ན་དེ་ནི་ས་གཉིས་པར་བལྟའོ། །གང་གིས་ཆུ་ཀླུང་གི་ཕ་རོལ་ཏུ་མཐོང་ན་དེ་ནི་ས་གསུམ་པར་བལྟའོ། །གང་གིས་ནགས་ཁྲོད་ཏུ་མཐོང་ན་དེ་ནི་ས་བཞི་པར་
བལྟའོ། །གང་གིས་སྐྱེ་བོའི་ནང་དུ་མཐོང་ན་དེ་ནི་ས་ལྔ་པར་བལྟའོ། །གང་གིས་རྒྱལ་པོའི་ཕོ་བྲང་གི་ནང་དུ་མཐོང་ན་དེ་ནི་ས་དྲུག་པར་བལྟའོ། །གང་གིས་སྐྱེ་བོ་མང་པོས་ཡོངས་སུ་བསྐོར་བ་མཐོང་ན་དེ་ནི་ས་བདུན་པར་བལྟའོ། །གང་གིས་ནམ་མཁའ་ལ་མཐོང་ན་དེ་ནི་ས་བརྒྱད་པར་

བལྟའོ། །ས་དང་པོ་དྲུག་པོ་དག་ལ་ནི་བདུད་ཀྱི་ལས་མ་གཏོགས་པར་བལྟའོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན། བདག་འཛམ་བུའི་གླིང་གཞན་དུ་སོན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་དྲུག་པོ་དག་ཏུ་བལྟ་སྟེ། བཟོད་
པ་ཐོབ་པ་ཡིན་ནོ། །དེ་ལ་སྒྲིབ་པ་ནི་ཆུང་ན་དེ་མངོན་པར་མི་བརྩོན་པ་དང་། ལེ་ལོ་དང་གཡོ་ལ་སྟེན་པ་དང་། ངའོ་སྙམ་པའི་ང་རྒྱལ་གྱི་ཚུལ་གྱིས་སྣང་བ་ཐོབ་པར་མི་འགྱུར་བས་དེས་ཚུལ་དེ་དག་ཇི་ལྟ་བ་དེ་བཞིན་དུ་རབ་ཏུ་བརྩོན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་
དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་འཛམ་བུའི་གླིང་ཉམས་མི་དགའ་བ་མཐོང་ན་དེ་ནི་ས་དང་པོ་པར་རོ། །གང་གིས་ཉམས་དགའ་བ་མཐོང་ན་དེ་ནི་ས་གཉིས་པར་རོ། །གང་གིས་གྲོང་དང་། གྲོང་ཁྱེར་དང་། གྲོང་རྡལ་མཛེས་པར་མཐོང་
ན་དེ་ནི་ས་གསུམ་པར་རོ། །གང་གིས་སྐྱེད་མོས་ཚལ་མེ་ཏོག་ཀུན་ཏུ་རྒྱས་པར་མཐོང་ན་དེ་ནི་ས་བཞི་པར་རོ། །གང་གིས་ལྗོངས་ཀྱི་མི་འདུས་པར་མཐོང་ན་དེ་ནི་ས་ལྔ་པར་རོ། །གང་གིས་ཀུན་དགའི་ར་བ་དང་། ཚལ་ཕུན་སུམ་ཚོགས་པ་མཐོང་ན་དེ་ནི་ས་དྲུག་པར་ཏེ། །བདུད་ཀྱི་
ལས་ནི་མ་གཏོགས་སོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་གོས་དཀར་པོ་གྱོན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་བརྒྱད་པོ་དག་ཏུ་བལྟ་སྟེ། དེ་ནི་ལས་ཀྱི་སྒྲིབ་པ་རྣམ་པར་དག་པ་ལ་བདུད་ཀྱི་ལས་ཤས་ཆེ་བ་ཡིན་པས་དེ་
ཆོས་ལ་འདུན་པ་སྐྱེས་ཀྱང་། ཡང་ཕྱིར་ནུར་བར་འགྱུར་ཞིང་དེའི་ཡོན་ཏན་དག་ལ་བར་ཆད་མང་བར་འགྱུར་བས་དངོས་པོ་ཐམས་ཅད་མི་སྦ་བར་བྱ་ཞིང་ཡེ་ཤེས་ལ་བརྩོན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་
རོ། །ཡོ་བྱད་ཐམས་ཅད་དང་། གདིང་བ་ཐམས་ཅད་དང་། མང་དུ་ཐོས་པར་བྱ་བ་དང་། སྐྱོན་དང་། ལུས་དང་། སྲོག་དང་། དགེ་བའི་རྩ་བ་དག་ལ་ཡང་མངོན་པར་བརྟག་པར་བྱའོ། །གང་གིས་གོས་དཀར་པོ་གཙང་མ་རྙིང་པ་གྱོན་པར་མཐོང་ན་དེ་ནི་ས་དང་པོ་པར་རོ། །གང་གིས་སར་པ་ཁ་

ཚར་མེད་པ་གྱོན་པར་མཐོང་ན་དེ་ནི་ས་གཉིས་པར་རོ། །གང་གིས་ཁ་ཚར་ཅན་ན་དེ་ནི་ས་གསུམ་པར་རོ། །གང་གིས་བྱི་དོར་བྱས་པ་ན་དེ་ནི་ས་བཞི་པར་རོ། །གང་གིས་བཀྲུས་ཤིང་བཅགས་པ་ན་དེ་ནི་ས་ལྔ་པར་རོ། །གོས་རིན་པོ་ཆེས་ནི་ས་དྲུག་པར་རོ། །ངང་རིས་
ཅན་གྱིས་ནི་ས་བདུན་པར་རོ། །ལྷའི་གོས་ཀྱིས་ནི་ས་བརྒྱད་པར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་གི་མགོ་ལ་རིན་པོ་ཆེའི་ཕྲེང་བ་འམ། རྒྱན་གྱི་ཕྲེང་བ་ཐོགས་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་
དགུ་པོ་དག་ཏུ་བལྟ་སྟེ། དེ་ལ་བདུད་ཀྱི་ལས་ཀྱང་མེད། ལས་ཀྱི་སྒྲིབ་པ་ཡང་མེད་ན་རང་གི་ཉེས་པས་ངེས་པར་མི་འབྱུང་བས་དེས་ཐོས་པ་ཡོངས་སུ་བཙལ་བར་བྱ་ཞིང་ཆོས་ཀྱང་བསྒོམ་པར་བྱ། ཐབ་མོ་མེད་པ་དང་རྩོད་པ་མེད་པར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་
དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །རིན་པོ་ཆེ་སྣ་གཅིག་གི་ཕྲེང་བས་ནི་ས་དང་པོར་རོ། །རིན་པོ་ཆེ་སྣ་བདུན་གྱིས་ནི་ས་བདུན་པའི་བར་དུའོ། །འཁོར་ལོས་སྒྱུར་བའི་ནོར་བུ་རིན་པོ་ཆེས་ནི་ས་བརྒྱད་པར་རོ། །ལྷའི་ནོར་བུ་རིན་པོ་ཆེས་ནི་ས་དགུ་པར་
ཏེ། བདུད་ཀྱི་ལས་ནི་མ་གཏོགས་སོ། །ལས་དང་པོ་པས་མཚན་མ་དེ་དག་མཐོང་ན་འཕྱར་བར་འགྱུར་ཞིང་ལེ་ལོ་སྐྱེ་བར་ཡང་འགྱུར། བག་འབེབས་པར་ཡང་བྱེད། གཞན་ལ་བརྙས་པར་ཡང་བྱེད་པས་དེའི་ཕྱིར་དེས་བདུད་ཀྱི་ལས་ནི་རྟོགས་པར་བྱའོ། །རྡོ་རྗེས་རབ་
འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་གི་མགོ་ལ་མེ་ཏོག་གི་ཕྲེང་བ་ཐོགས་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་བརྒྱད་པོ་དག་ཏུ་བལྟ་སྟེ། དེ་ལ་ལས་ཀྱི་སྒྲིབ་པ་ནི་མེད་ལ་བདུད་ཀྱི་ལས་ནི་ཡོད་དོ། །དེས་གལ་ཏེ་དང་
པོ་དང་། དབུས་དང་ཐ་མར་ངེས་པར་རྟོགས་ནས་དད་པར་བྱས་ཤིང་ཐམས་ཅད་ཡོངས་སུ་གཏོང་བས་སྐྱོ་བ་མེད་པར་བྱས་ནས། དེས་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །མེ་ཏོག་སྣ་གཅིག་གི་ཕྲེང་བས་ནི་ས་དང་པོར་རོ། །

མེ་ཏོག་སྣ་གཉིས་ཀྱི་ཕྲེང་བས་ནི་ས་གཉིས་པར་རོ། །མེ་ཏོག་སྣ་ཚོགས་ཀྱི་ཕྲེང་བས་ནི་ས་གསུམ་པར་རོ། །མེ་ཏོག་ཐམས་ཅད་ཀྱི་འཕྲེང་བ་ས་ནི་ས་བཞི་པར་རོ། །ཀླུའི་མེ་ཏོག་གི་ཕྲེང་བས་ནི་ས་ལྔ་པར་རོ། །ལྷའི་མེ་ཏོག་གི་ཕྲེང་བས་ནི་ས་དྲུག་པར་རོ། །ལྷའི་མེ་ཏོག་
སྣ་ཚོགས་ཀྱི་ཕྲེང་བས་ནི་ས་བདུན་པར་རོ། །ལྷ་དང་མིའི་མེ་ཏོག་གི་ཕྲེང་བ་འོད་འབྱུང་བས་ནི་ས་བརྒྱད་པར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་མེ་ཏོག་སིལ་མ་དག་སྲེལ་བར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་
བདུན་པོ་དག་ཏུ་བལྟ་སྟེ། དེས་ནི་བྱང་ཆུབ་སེམས་དཔའ་དག་ཡང་དག་པར་འཛིན་དུ་གཞུག་པར་བྱའོ། །གང་ཟག་དེ་ནི་གཡོག་འཁོར་མང་བ་དང་། རྐྱེན་མང་བ་ཡིན་ཏེ། དེས་གལ་ཏེ་བསམ་པ་རྣམ་པར་སྦྱང་བར་བྱས་ན་དེས་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་
བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་བདག་ཁ་དོག་དང་ལྡན་པའི་མེ་ཏོག་སིལ་མ་དག་སྲེལ་བར་ཀུན་ཏུ་ཤེས་ན་དེ་ནི་ས་དང་པོ་པར་རོ། །དྲི་དང་ལྡན་པས་ནི་ས་གཉིས་པར་རོ། །རེག་དང་ལྡན་པས་ནི་ས་གསུམ་པར་རོ། །སྣ་ཚོགས་ཀྱིས་ནི་ས་བཞི་པར་རོ། །
ཆུ་ལས་སྐྱེས་པ་དང་། སྐམ་ལས་སྐྱེས་པས་ནི་ས་ལྔ་པར་རོ། །ཐམས་ཅད་ཁ་འབུས་པར་གྱུར་པས་ནི་ས་དྲུག་པར་ཏེ། ས་གོང་མ་བཞི་པོ་དག་ལ་མངོན་པར་བརྩོན་པའམ། བདུད་ཀྱི་ལས་ཀྱི་མཚན་མ་ནི་དེ་དག་ཡིན་ཏེ། ཡིད་དུ་འོང་བ་དང་། ཡིད་དུ་མི་འོང་བ་ཐམས་ཅད་ཀྱང་
འབུལ་བར་བྱེད་དོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་རྔ་བོ་ཆེ་རྡུང་བའམ། །རོལ་མོའི་སྒྲ་འབྱིན་པར་ཀུན་ཏུ་ཤེས་ན། བྱང་ཆུབ་སེམས་དཔའ་དེ་ནི་ས་དགུ་པོ་དག་ལས་ས་གང་ཡང་རུང་བར་བལྟ་སྟེ། དེ་ལ་ལས་ཀྱི་སྒྲིབ་པ་དང་། བདུད་
ཀྱི་ལས་ཤས་ཆེ་བ་ཡིན་པས་དེས་བརྩོན་འགྲུས་བརྩམ་ཞིང་ཐོས་པ་ལ་མངོན་པར་བརྩོན་པར་བྱའོ། །དེས་སེམས་ཅན་ཐམས་ཅད་ལ་སེམས་མཉམ་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་ཐིབས་

པོར་སོང་སྟེ་རྔ་བོ་ཆེ་རྡུང་བར་བྱེད་ན་དེ་ནི་ས་དང་པོ་པར་རོ། །གང་ས་མཉམ་པར་སོང་སྟེ་རྡུང་ན་དེ་ནི་ས་གཉིས་པར་རོ། །གང་གྲོང་དུ་སོང་སྟེ་རྡུང་ན་དེ་ནི་ས་གསུམ་པར་རོ། །གང་གྲོང་ཁྱེར་ཆེན་པོར་ན་དེ་ནི་ས་བཞི་པར་རོ། །གང་སྐྱེ་བོ་ཕལ་པོ་ཆེའི་དབུས་སུ་ན་དེ་ནི་ས་ལྔ་པར་
རོ། །གང་སྐྱབས་སུ་སོང་སྟེ་ན་དེ་ནི་ས་དྲུག་པར་རོ། །གང་རི་ལ་ན་དེ་ནི་ས་བདུན་པར་རོ། །གང་རི་བོའི་རྩེ་མོར་ན་དེ་ནི་ས་བརྒྱད་པར་རོ། །གང་ནམ་མཁའ་ལ་འདུག་སྟེ་ན་དེ་ནི་ས་དགུ་པར་རོ། །ཡེ་ཤེས་ལ་བརྩོན་པ་ལ་བདུད་ཀྱི་ལས་ནི་མ་གཏོགས་སོ། །རྡོ་རྗེས་རབ་འཇོམས་
གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་ཉི་མ་གཟས་ཟིན་པའམ་ཟླ་བ་གཟས་ཟིན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་དྲུག་པོ་དག་ཏུ་བལྟ་སྟེ། ཆོས་ཀྱིས་ཕོངས་པར་འགྱུར་བའི་ལས་དང་ལྡན་ཞིང་ཉོན་མོངས་པ་མང་བ་ཡིན་པས་དེས་ནི་དངོས་པོ་
ཐམས་ཅད་ཡོངས་སུ་བཏང་བར་བྱ་ཞིང་། རྣམ་པར་སྨིན་པ་མི་འདོད་པ་ལ་ཡང་མངོན་པར་བརྩོན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །ཉི་མ་འམ་ཟླ་བ་འཆར་ཀར་གཟས་ཟིན་པར་ཀུན་
ཏུ་ཤེས་ན་དེ་ནི་ས་དང་པོ་པར་བལྟའོ། །སྔ་དྲོའི་དུས་སུ་ན་ས་གཉིས་པར་རོ། །སྤྲིན་ཡང་འཁྲུགས་ན་ས་གསུམ་པར་རོ། །རླུང་ཡང་འཁྲུགས་ན་ས་བཞི་པར་རོ། །རྡུལ་གྱིས་ངེས་པར་བཅོམ་ན་ས་ལྔ་པར་རོ། །ཉི་མ་ཕྱེད་པའི་དུས་སུ་ན་ས་དྲུག་པར་ཏེ། ལས་ཀྱི་སྒྲིབ་པ་
དང་། བདུད་ཀྱི་ལས་ནི་མ་གཏོགས་སོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་མི་གཙང་བས་བསྐུས་པར་ཀུན་ཏུ་ཤེས་ན། བྱང་ཆུབ་སེམས་དཔའ་དེ་ནི་ས་དང་པོ་གསུམ་པོ་དག་ཏུ་བལྟ་སྟེ། སྔོན་འཕགས་པ་ལ་སྐུར་པ་བཏབ་པའི་
བྱང་ཆུབ་སེམས་དཔའ་དམུ་རྒོད་ཡིན་པས་དེས་ལོ་གསུམ་དུ་ཕུང་པོ་གསུམ་པ་ལ་ཇི་ལྟར་ལུང་ཕོག་པ་བཞིན་དུ་གདོན་པར་བྱ་ཞིང་། གང་ལ་ཡང་མ་དད་པར་མི་བྱ་བར་མོས་པ་ཡང་མང་དུ་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་

བར་ཡང་འགྱུར་རོ། །ལུས་ཐམས་ཅད་མི་གཙང་བའི་རྫབ་ཀྱིས་བསྐུས་ན་ས་དང་པོ་པར་རོ། །ལུས་ཀྱི་གཞོགས་ཕྱེད་བསྐུས་ན་ས་གཉིས་པར་རོ། །ཡན་ལག་དང་ཉིང་ལག་བསྐུས་ན་ས་གསུམ་པར་རོ། །ས་དྲུག་པའི་བར་དག་ལ་ནི་བདུད་ཀྱི་ལས་སུ་རྟོགས་པར་བྱའོ། །རྡོ་རྗེས་
རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་རྒྱལ་པོར་གྱུར་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་བཅུ་པོ་ཐམས་ཅད་ལས་ས་གང་ཡང་རུང་བར་བལྟ་སྟེ། དེ་ལ་དགེ་བའི་རྩ་བ་སྟུག་ལ་བར་ཆད་ཀྱང་སྟུག་པ་ཡིན་པས་དེས་ན་རློམ་སེམས་མེད་པར་
བྱ་ཞིང་གཞན་ལ་གཡོ་མི་བྱ་བ་དང་། ཀུན་བགེད་པའི་ངང་ཚུལ་ཅན་དང་། བདག་ལ་མི་བསྟོད་པ་དང་། གཞན་ལ་མི་སྨད་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་། བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གྲོང་ན་འདུག་སྟེ་རྒྱལ་པོར་
ཀུན་ཏུ་ཤེས་ན་དེ་ནི་ས་དང་པོ་པར་བལྟའོ། །གཙུག་ལག་ཁང་ན་འདུག་སྟེ་རྒྱལ་པོར་ཀུན་ཏུ་ཤེས་ན་དེ་ནི་ས་གཉིས་པར་བལྟའོ། །སྐྱེད་མོས་ཚལ་ན་འདུག་སྟེ་རྒྱལ་པོར་ཀུན་ཏུ་ཤེས་ན་དེ་ནི་ས་གསུམ་པར་བལྟའོ། །ལྷ་ཁང་ན་འདུག་སྟེ་རྒྱལ་པོར་ཀུན་ཏུ་ཤེས་ན་དེ་ནི་ས་བཞི་པར་བལྟའོ། །
གྲོང་ཁྱེར་ཆེན་པོ་ན་འདུག་སྟེ། རྒྱལ་པོར་ཀུན་ཏུ་ཤེས་ན་དེ་ནི་ས་ལྔ་པར་བལྟའོ། །རིའི་རྩེ་མོ་ན་འདུག་སྟེ་རྒྱལ་པོར་ཀུན་ཏུ་ཤེས་ན་དེ་ནི་ས་དྲུག་པར་བལྟའོ། །འཛམ་བུའི་གླིང་གི་རྒྱལ་པོར་ཀུན་ཏུ་ཤེས་ན་དེ་ནི་ས་བདུན་པར་བལྟའོ། །འཁོར་ལོས་སྒྱུར་བའི་རྒྱལ་པོར་
ཀུན་ཏུ་ཤེས་ན་དེ་ནི་ས་བརྒྱད་པར་བལྟའོ། །རྒྱ་མཚོའི་དབུས་སུ་ན་དེ་ནི་ས་དགུ་པར་བལྟའོ། །རི་རབ་ཀྱི་རྩེ་མོར་ན་དེ་ནི་ས་བཅུ་པར་བལྟ་སྟེ། བདུད་ཀྱི་ལས་ལ་མངོན་པར་བརྩོན་པ་དང་། སངས་རྒྱས་དང་། བྱང་ཆུབ་སེམས་དཔས་མ་དགོངས་པ་ནི་མ་གཏོགས་སོ། །
རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་རྒྱལ་པོའི་སྤྱན་སྔ་འམ། རྒྱལ་པོའི་བློན་པོ་ཆེན་པོའམ། །སྐྱེ་བོ་ཕལ་པོ་ཆེའི་མདུན་ན་འདུག་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་བརྒྱད་པོ་དག་ཏུ་བལྟ་སྟེ། ཀུན་ནས་ཉོན་

མོངས་པ་དང་བཅས་པ་ཡིན་པས་དེས་ནི་སེམས་ཅན་ཡོངས་སུ་སྨིན་པར་བྱ་ཞིང་ཉེ་དུའི་མཆོད་པ་སྤང་བར་བྱ་བ་དང་། ཤིན་ཏུ་ཡོངས་སུ་དག་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །དེ་ལ་སྦྱིན་པས་ཀུན་ནས་
ཉོན་མོངས་པར་གྱུར་ན་ས་དང་པོ་པར་རོ། །ཚུལ་ཁྲིམས་ཀྱིས་ནི་ས་གཉིས་པར་རོ། །ཐོས་པས་ནི་ས་གསུམ་པར་རོ། །ཏིང་ངེ་འཛིན་གྱིས་ནི་ས་བཞི་པར་རོ། །གཟུངས་ཀྱིས་ནི་ས་ལྔ་པར་རོ། །མངོན་པར་ཤེས་པ་རྣམས་ཀྱིས་ནི་ས་དྲུག་པར་རོ། །ཆོས་སྟོན་པས་ནི་ས་བདུན་པར་རོ། །
གཡོག་འཁོར་ཕུན་སུམ་ཚོགས་པས་ནི་ས་བརྒྱད་པར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་སྐྱེད་མོས་ཚལ་དུ་སོན་བར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་དགུ་པོ་དག་ཏུ་བལྟ་སྟེ། དེས་ནི་བསམ་གཏན་གྱི་ཕ་རོལ་ཏུ་ཕྱིན་
པ་ལ་མངོན་པར་བརྩོན་པར་བྱའོ། །བྱང་ཆུབ་སེམས་དཔའ་དེ་ནི་འཇིག་རྟེན་གྱི་ཟང་ཟིང་ནི་རྙེད་ལ། ཤེས་པས་ནི་མ་ཡིན་པས་བདུད་ཀྱི་ལྕགས་ཀྱུས་ཀུན་ཏུ་དྲངས་པ་ཡིན་ཏེ། ལས་ཀྱི་སྒྲིབ་པ་ནི་ཆུང་ངོ་། །དེས་ན་ཆོས་སྨྲ་བ་ལ་ཉེ་བར་འཚོ་བ་དག་བསྒྲུབ་པར་བྱ་ཞིང་ནང་དུ་ཡང་དག་
འཇོག་ཀྱང་བསྒྲུབ་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །དེ་ལ་ས་དང་པོ་ལ་ནི་སྤྱོད་པའི་ཤེས་པ་མེད་དོ། །ས་གཉིས་པ་ལ་ནི་ཐོས་པའི་ཤེས་པ་མེད་དོ། །ས་གསུམ་པ་ལ་ནི་ངེས་པའི་ཤེས་
པ་མེད་དོ། །ས་བཞི་པ་ལ་ནི་བསམ་གཏན་གྱི་ཤེས་པ་མེད་དོ། །ས་ལྔ་པ་ལ་ནི་གཟུངས་ཀྱི་ཤེས་པ་མེད་དོ། །ས་དྲུག་པ་ལ་ནི་སོ་སོ་ཡང་དག་པར་རིག་པའི་ཤེས་པ་མེད་དོ། །ས་བདུན་པ་ལ་ནི་སྒྲུབ་པའི་ཤེས་པ་མེད་དོ། །ས་བརྒྱད་པ་ལ་ནི་བཀོད་པའི་ཤེས་པ་མེད་དོ། །
ས་དགུ་པ་ལ་ནི་སྨོན་ལམ་གྱི་ཤེས་པ་མེད་དོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་སྔོན་མ་མཐོང་བའི་གཙུག་ལག་ཁང་ངམ། གྲོང་ངམ། ཡུལ་ལམ། ལྗོངས་མཐོང་ན་བྱང་ཆུབ་སེམས་དཔའ་དེ་ནི་ས་དང་པོ་དྲུག་པོ་དག་ཏུ་བལྟ་སྟེ། །དེ་

ནི་བར་ཆད་མང་བ་ཡིན་པས་དེས་སངས་རྒྱས་རྗེས་སུ་དྲན་པ་བསྒོམ་པར་བྱ་ཞིང་དད་པར་ཡང་བྱ། བྱ་བ་ཐམས་ཅད་ལ་དད་པའི་སྦྱིན་པས་མོས་པར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་མཚན་མའི་བྱ་བ་
དེ་དག་བྱི་དོར་མ་བྱས་པར་མཐོང་ན་དེ་ནི་ས་དང་པོར་རོ། །གང་གིས་བྱི་དོར་བྱས་པར་མཐོང་ན་དེ་ནི་ས་གཉིས་པར་རོ། །གང་གིས་རྒྱན་གྱིས་བརྒྱན་པར་མཐོང་ན་དེ་ནི་ས་གསུམ་པར་རོ། །འཁོར་བཞི་པོ་དག་འདུས་ན་དེ་ནི་ས་ལྔ་པར་རོ། །ལྷའི་འཁོར་དག་འདུས་ན་དེ་ནི་ས་དྲུག་པར་རོ། །
རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན། གདུགས་རྙེད་ན་དེ་ནི་ས་དང་པོ་བདུན་པོ་དག་ཏུ་བལྟ་སྟེ། །སངས་རྒྱས་ཀྱི་བྱིན་གྱིས་བརླབས་ཀྱང་ཡོད། བར་ཆད་ཀྱང་མང་། མི་ཆོམས་པ་ཡང་ཡིན་ནོ། །དེས་ནི་ཆོས་སྨྲ་བ་ལ་བརྙས་པར་མི་བྱ་སྟེ། དེས་ན་དེའི་
ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །དེ་ལ་ལོ་མའི་གདུགས་ཀྱིས་ནི་ས་དང་པོར་རོ། །འོད་མའི་གདུགས་ཀྱིས་ནི་ས་གཉིས་པར་རོ། །གྲོ་བའི་གདུགས་ཀྱིས་ནི་ས་གསུམ་པར་རོ། །རས་ཀྱི་གདུགས་ཀྱིས་ནི་ས་བཞི་པར་རོ། །
ཁྲ་བོས་ནི་ས་ལྔ་པར་རོ། །དྲིལ་བུ་གཡེར་ཀས་ཡོངས་སུ་བསྐོར་བས་ནི་ས་དྲུག་པར་རོ། །རིན་པོ་ཆེའི་དྲ་བས་གླགས་པས་ནི་ས་བདུན་པར་རོ། །བདུད་ཀྱི་ལས་དང་། མངོན་པར་མི་བརྩོན་པ་ནི་མ་གཏོགས་སོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་
ལམ་ན་བདག་སྐྱེ་བོ་ཕལ་པོ་ཆེའི་དབུས་ན་འདུག་སྟེ་ཆོས་སྟོན་པར་ཀུན་ཏུ་ཤེས་ན། བྱང་ཆུབ་སེམས་དཔའ་དེ་ནི་ས་བཅུ་པོ་ཐམས་ཅད་དུ་བལྟ་སྟེ། དེས་ས་དག་ལ་བདུད་ཀྱི་ལས་དང་ལས་ཀྱི་སྒྲིབ་པ་ཡང་། ཇི་ལྟ་བ་བཞིན་དུ་རྟོགས་པར་བྱ་ཞིང་། དེས་སྤོབས་པ་ཡོངས་སུ་བཙལ་བར་བྱ་སྟེ།
སྤོབས་པ་རྙེད་ནས་ཀྱང་རྣམ་པར་ངེས་པར་སྒྲུབ་པའི་ལུང་དབོག་པར་བྱའོ། །དངོས་པོ་ཐམས་ཅད་ལ་ཡང་ལྷག་པར་ཞེན་པ་མེད་པར་བྱ་ཞིང་། དེས་དངོས་པོ་རྙེད་པ་ལ་ཡང་ཡང་དག་པར་དགའ་བར་འགྱུར་བའི་ངང་ཚུལ་ཅན་དུ་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་

ཞིང་། བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །སྦྱིན་པའི་གཏམ་སྟོན་པར་ཀུན་ཏུ་ཤེས་ན་ས་དང་པོ་ལ་གནས་པར་འགྱུར་རོ། །དགེ་བ་བཅུའི་ལས་ཀྱི་ལམ་གྱིས་ནི་ས་གཉིས་པར་རོ། །ཐོས་པའི་གཏམ་གྱིས་ནི་ས་གསུམ་པར་རོ། །སྦྱངས་པའི་ཡོན་ཏན་དང་ཡོ་བྱད་
བསྙུངས་པའི་གཏམ་གྱིས་ནི་ས་བཞི་པར་རོ། །སྙོམས་པར་འཇུག་པའི་གཏམ་གྱིས་ནི་ས་ལྔ་པར་རོ། །ལེགས་པར་སྦྱར་བ་ཡོངས་སུ་རྗོད་པའི་གཏམ་གྱིས་ནི་ས་དྲུག་པར་རོ། །བདག་མེད་པའི་གཏམ་གྱིས་ནི་ས་བདུན་པར་རོ། །ཡེ་ཤེས་བཀོད་པའི་གཏམ་གྱིས་ནི་ས་བརྒྱད་པར་རོ། །སངས་རྒྱས་བཀོད་
པའི་གཏམ་གྱིས་ནི་ས་དགུ་པར་རོ། །ལུས་ཀྱི་ཚད་ཀྱི་གཏམ་གྱིས་ནི་ས་བཅུ་པར་རོ། །ས་དང་པོ་ལ་ནི་ཡོ་བྱད་ལ་རྩོལ་བ་དང་བཅས་པའོ། །ས་གཉིས་པ་ལ་ནི་ཚུལ་ཁྲིམས་ལ་རྩོལ་བ་དང་བཅས་པའོ། །ས་གསུམ་པ་ལ་ནི་འོད་ལ་རྩོལ་བ་དང་བཅས་པའོ། །ས་བཞི་པ་ལ་ནི་ནོར་བདུན་ལ་རྩོལ་བ་
དང་བཅས་པའོ། །ས་ལྔ་པ་ལ་ནི་མི་གནས་པ་ལ་རྩོལ་བ་དང་བཅས་པའོ། །ས་དྲུག་པ་ལ་ནི་རྣམ་པར་གཏན་ལ་དབབ་པ་ལ་རྩོལ་བ་དང་བཅས་པའོ། །ས་བདུན་པ་ལ་ནི་ངེས་པ་ལ་རྩོལ་བ་དང་བཅས་པའོ། །ས་བརྒྱད་པ་ལ་ནི་མངོན་པར་ཤེས་པ་དང་སོ་སོ་ཡང་དག་པར་རིག་པ་ལ་རྩོལ་བ་དང་
བཅས་པའོ། །ས་དགུ་པ་ལ་ནི་སྤྱོད་པ་ལ་རྩོལ་བ་དང་བཅས་པའོ། །ས་བཅུ་པ་ལ་ནི་ཚད་མེད་པ་ལ་རྩོལ་བ་དང་བཅས་པའོ། །དེའི་ས་དང་པོ་ལ་ནི་དགེ་བའི་རྩ་བ་ལ་བར་ཆད་ཡོད་དོ། །ས་གཉིས་པ་ལ་ནི་ཚུལ་ཁྲིམས་ལ་བར་ཆད་ཡོད་དོ། །ས་གསུམ་པ་ལ་ནི་མངོན་པར་བརྩོན་པ་ལ་བར་ཆད་ཡོད་དོ། །
ས་བཞི་པ་ལ་ནི་དམིགས་པ་ལ་བར་ཆད་ཡོད་དོ། །ས་ལྔ་པ་ལ་ནི་རྣམ་པ་ལ་བར་ཆད་ཡོད་དོ། །ས་དྲུག་པ་ལ་ནི་ཟབ་མོའི་བཟོད་པ་ལ་བར་ཆད་ཡོད་དོ། །ས་བདུན་པ་ལ་ནི་རྣམ་པར་འབྱེད་པའི་ཡེ་ཤེས་ལ་བར་ཆད་ཡོད་དོ། །ས་བརྒྱད་པ་ལ་ནི་སེམས་ཅན་ཡོངས་སུ་སྨིན་པར་བྱ་བ་ལ་བར་ཆད་ཡོད་དོ། །ས་དགུ་པ་
ལ་ནི་རྣམ་པར་ཤེས་པའི་ཚོགས་ལ་བར་ཆད་ཡོད་དོ། །ས་བཅུ་པ་ལ་ནི་ཞིང་ཡོངས་སུ་དག་པར་བྱ་བ་ལ་བར་ཆད་ཡོད་དོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་གྲོང་ཁྱེར་ན་གནས་པར་བྱེད་པར་ཀུན་ཏུ་ཤེས་ན། བྱང་ཆུབ་སེམས་དཔའ་དེ་ནི་ས་བརྒྱད་པོ་དག་ལ་ཕྱིར་

མི་ལྡོག་པར་ལུང་བསྟན་དུ་ཉེ་བ་ཡིན་ཏེ། དེས་ནི་ཟབ་མོ་ལ་མོས་པའི་གང་ཟག་ལ་བསྟེན་པར་བྱ་ཞིང་། བསྙེན་བཀུར་བྱ། མཆོད་པར་བྱའོ། །ཆོས་ལ་ཐེ་ཙོམ་མང་ཞིང་སྒྲིབ་པ་ཡོད་པས་དེས་ཆོས་སྨྲ་བ་ལ་བསྟེན་ཅིང་བསྙེན་བཀུར་བྱེད། མཆོད་པར་བྱེད་ན་འགྱོད་པ་སེལ་བར་འགྱུར་ལ། དེས་ན་
དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་། བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །དེ་ལ་ས་དང་པོ་ལ་གནས་པ་ནི་སངས་རྒྱས་སུ་འགྱུར་རམ། འོན་ཀྱང་མི་འགྱུར་སྙམ་དུ་བྱང་ཆུབ་ལ་ཐེ་ཙོམ་ཟའོ། །ས་གཉིས་པ་ལ་གནས་པ་ནི་ཡང་དག་པར་བླང་བ་ལ་ཐེ་ཙོམ་
ཟའོ། །ས་གསུམ་པ་ལ་གནས་པ་ནི་ཡེ་ཤེས་ལ་ཐེ་ཙོམ་ཟའོ། །ས་བཞི་པ་ལ་གནས་པ་ནི་ཏིང་ངེ་འཛིན་སྒྲུབ་པ་ལ་ཐེ་ཙོམ་ཟའོ། །ས་ལྔ་པ་ལ་གནས་པ་ནི་ཡང་དག་པ་ཇི་ལྟ་བ་བཞིན་གྱི་ཤེས་པ་ལ་ཐེ་ཙོམ་ཟའོ། །ས་དྲུག་པ་ལ་གནས་པ་ནི་ལམ་དང་འབྲས་བུ་ལ་ཐེ་ཙོམ་ཟའོ། །
ས་བདུན་པ་ལ་གནས་པ་ནི་ངེས་པའི་ཚིག་ལ་ཐེ་ཙོམ་ཟའོ། །ས་བརྒྱད་པ་ལ་གནས་པ་ནི་རྣམ་པར་འཕྲུལ་བ་ལ་ཐེ་ཙོམ་ཟའོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་ཟམ་པ་འདོགས་ཤིང་ཆུ་བོའི་དབུས་སུ་སོང་བར་ཀུན་ཏུ་ཤེས་ན་བྱང་ཆུབ་སེམས་
དཔའ་དེ་ནི་ས་དང་པོ་བདུན་པོ་དག་ཏུ་བལྟ་སྟེ། དེ་ལ་ལས་ཀྱི་སྒྲིབ་པ་ཤས་ཆེ་ཞིང་བདུད་ཀྱི་ལས་ཀྱང་ཤས་ཆེ་བས་དེས་ནི་འདུན་པ་དྲག་པོར་བྱ་ཞིང་རྟེན་པ་མེད་པ་དང་། དབྱེ་བ་ལ་མི་གནས་པར་བྱ་བ་དང་། ཚོགས་པ་ལ་མངོན་པར་བརྩོན་པར་བྱས་ན་མི་སྐྱེ་བའི་ཆོས་ཀྱི་སྣང་བ་རྣམ་པར་དག་
པར་འགྱུར་རོ། །གང་གིས་ཤེས་པའི་སྣང་བ་ལ་བར་ཆད་ཡོད་པ་དེ་ནི་ས་དང་པོར་རོ། །གང་གིས་ཇི་ལྟར་བརྩོན་པའི་དགེ་བའི་རྩ་བ་ལ་ལུས་ཉམས་བདེ་བ་མེད་ན་བྱང་ཆུབ་སེམས་དཔའ་དེ་ནི་ས་གཉིས་པར་རོ། །སེམས་ཀྱི་བར་དག་ལ་ཉམས་བདེ་བ་མེད་ན་བྱང་ཆུབ་སེམས་དཔའ་དེ་ནི་ས་གསུམ་པར་
རོ། །གང་ལ་སྣང་བ་འགའ་ཞིག་ཡོད་ན་བྱང་ཆུབ་སེམས་དཔའ་དེ་ནི་ས་བཞི་པར་རོ། །གང་ལ་མི་འཇིགས་པ་ཆུང་བ་དེ་ནི་ས་ལྔ་པར་རོ། །གང་ལ་ཡོངས་སུ་སྨིན་པར་བྱ་བ་ལ་བར་ཆད་ཡོད་པ་དེ་ནི་ས་དྲུག་པར་རོ། །གང་གིས་བསྟན་པ་ལ་བར་ཆད་ཡོད་པ་དེ་ནི་ས་བདུན་པར་རོ། །རྡོ་རྗེས་རབ་འཇོམས་

གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་གྲུ་འདྲེན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དྲུག་པོ་དག་ཏུ་བལྟ་སྟེ། ཕ་རོལ་ཏུ་ཕྱིན་པ་དྲུག་པོ་ཐམས་ཅད་ལ་ཆ་མཉམ་པར་སྤྱོད་ཅིང་བར་ཆད་དང་བཅས་པ་ཡིན་པས་དེས་ནི་མི་གནས་པར་
ཕ་རོལ་ཏུ་ཕྱིན་པ་དྲུག་པོ་ཐམས་ཅད་ལ་བསྟེན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གྲུའི་ཤིང་མ་སྦྱངས་པ་འདྲེན་པར་ཀུན་ཏུ་ཤེས་ན་ས་དང་པོར་རོ། །སྦྱངས་པས་ནི་ས་གཉིས་པར་རོ།། །།
གཤིབས་པས་ནི་ས་གསུམ་པར་རོ། །མ་གཤིབས་པས་ནི་ས་བཞི་པར་རོ། །སྐྱེ་བོ་ཞུགས་པས་ནི་ས་ལྔ་པར་རོ། །སྒྲོལ་བས་ནི་ས་དྲུག་པར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་སྤྲིན་ལས་འབྲུག་གྲག་པའམ། གློག་འབྱུང་བར་
བདག་གིས་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་ལྔ་པོ་དག་ཏུ་བལྟ་སྟེ། །དེ་ལ་བདུད་ཀྱི་ལས་ནི་ཤས་ཆེ་ལ་ལས་ཀྱི་སྒྲིབ་པ་ནི་ཆུང་བས་དེས་ངེས་པར་བརྟག་པ་མང་དུ་བྱ་ཞིང་སྡུག་པའི་དངོས་པོ་ཡོངས་སུ་བཏང་སྟེ། གཟུངས་ཡང་དག་པར་བསྒྲུབ་པར་བྱའོ། །དེས་
ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་སྤྲིན་ནམ་གློག་མཐོང་ནས་སྐྲག་ན་དེ་ནི་ས་དང་པོར་རོ། །གང་མི་སྐྲག་ན་དེ་ནི་ས་གཉིས་པར་རོ། །གང་ཆོས་ཡིད་ལ་བྱེད་ན་དེ་ནི་ས་གསུམ་པར་རོ། །གང་སངས་རྒྱས་
ཡིད་ལ་བྱེད་ཅིང་རིའི་རྩེ་མོ་ན་འདུག་ན་དེ་ནི་ས་བཞི་པར་རོ། །གང་ནམ་མཁའ་ལ་ན་དེ་ནི་ས་ལྔ་པར་ཏེ། དེ་ལ་བདུད་ཀྱི་ལས་ནི་མ་གཏོགས་སོ། །ཀླུ་འོངས་ཤིང་བྱི་དོར་རམ་སྒོམ་པར་བྱེད་ནས་གོང་མ་དག་ཏུའོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་
རྨི་ལམ་ན་མཚོན་ཆའམ་གོ་ཆ་རྙེད་ན་བྱང་ཆུབ་སེམས་དཔའ་དེ་ནི་ས་དང་པོ་གསུམ་པོ་དག་ཏུ་བལྟ་སྟེ། དེ་ལ་བདུད་ཀྱི་ལས་དང་ལས་ཀྱི་སྒྲིབ་པ་ཆེ་བ་ཡིན་པས་དེས་ནི་བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཀུན་དུ་བསྟེན་པར་བྱའོ། །དེས་ན་དེའི་ལས་ཀྱི་

སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་གིས་མཚོན་ཆའམ་གོ་ཆ་དྲི་མ་ཅན་རྙེད་ན་དེ་ནི་ས་དང་པོ་པར་བལྟའོ། །དྲི་མ་མེད་པས་ནི་ས་གཉིས་པར་རོ། །རྣོན་པོས་ནི་ས་གསུམ་པར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་
སེམས་དཔའ་གང་གིས་རྨི་ལམ་ན་སྣོད་དག་རྙེད་ན་བྱང་ཆུབ་སེམས་དཔའ་དེ་ནི་ས་བདུན་པོ་དག་ཏུ་བལྟ་སྟེ། དེས་མཚན་མ་ཇི་ལྟ་བ་བཞིན་དུ་ཡོངས་སུ་གདུལ་བར་བྱའོ། །དེ་ལ་ནི་བདུད་ཀྱི་ལས་དང་། ལས་ཀྱི་སྒྲིབ་པ་ཡང་མ་ངེས་པ་ཡིན་པས་དེས་བསྡུ་བའི་དངོས་པོ་བཞི་པོ་དག་གིས་
མངོན་པར་བརྩོན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །ས་དྲུག་པོ་དག་ལ་ནི་ཕྱིར་མི་ལྡོག་པའི་ཆོས་རྣམས་སྤྱད་པར་བྱའོ། །ས་བདུན་པ་ལ་ནི་ངའོ་སྙམ་པའི་ང་རྒྱལ་ཤེས་པར་བྱའོ། །རྡོ་རྗེས་
རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་སེམས་ཅན་རྣམས་ལ་ལམ་སྟོན་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་བཅུ་པོ་ཐམས་ཅད་དུ་འགྱུར་ཏེ། དེས་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པའི་དངོས་པོ་ཇི་ལྟ་བ་བཞིན་དུ་
རྟོགས་པར་བྱ་ཞིང་ཆོས་སྨྲ་བ་ལ་བསྙེན་བཀུར་བྱ་བ་དང་། དངོས་པོ་ཐམས་ཅད་ཡོངས་སུ་གཏང་བར་བྱ་བ་དང་། བརྩོན་འགྲུས་བརྩམ་པར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །
བཞོན་པའི་ལམ་གཙང་མ་སྟོན་ན་ས་དང་པོར་རོ། །སྐྱེད་མོས་ཚལ་གྱི་ལམ་གྱིས་ནི་ས་གཉིས་པར་རོ། །གྲོང་ཁྱེར་གྱི་ལམ་གྱིས་ནི་ས་གསུམ་པར་རོ། །ལམ་པོ་ཆེས་ནི་ས་བཞི་པར་རོ། །རིའི་ལམ་གྱིས་ནི་ས་ལྔ་པར་རོ། །རྒྱ་མཚོའི་ལམ་གྱིས་ནི་ས་དྲུག་པར་རོ། །ལྷའི་
ལམ་གྱིས་ནི་ས་བདུན་པར་རོ། །འདི་ནི་ཉན་ཐོས་ཀྱི་སའི་ལམ་མོ་ཞེས་བྱ་བས་ནི་ས་བརྒྱད་པར་རོ། །བྱང་ཆུབ་སེམས་དཔའི་ལམ་གྱིས་ནི་ས་དགུ་པར་རོ། །སངས་རྒྱས་ཀྱི་ལམ་གྱིས་ནི་ས་བཅུ་པར་ཏེ། ས་དང་པོ་དྲུག་པོ་དག་ལ་བདུད་ཀྱི་ལས་དང་། ལས་ཀྱི་སྒྲིབ་

པ་ཡང་རྟོགས་པར་བྱའོ། །ས་གོང་མ་བཞི་པོ་དག་ལ་ནི་སྐྱོན་དེ་དག་མེད་དོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་སྐྱེད་མོས་ཚལ་དུ་ཞུགས་པར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་བརྒྱད་པོ་དག་ཏུ་བལྟ་སྟེ།
དེའི་རྨི་ལམ་དུ་བདུད་ཀྱི་ལས་དང་། ལས་ཀྱི་སྒྲིབ་པ་དག་རྣམ་པར་སྨིན་པར་འགྱུར་ཞིང་རྨི་ལམ་ན་སྐྲག་པར་ཡང་འགྱུར་ལ། དེ་སད་པ་ན་ཡིད་མི་བདེ་བ་ཉམས་སུ་མྱོང་བར་ཡང་འགྱུར་བས། །དེས་སྟོང་པ་ཉིད་བསྒོམ་པར་བྱ་ཞིང་ཆོས་ཟབ་མོ་ཡང་མཉན་པར་བྱ། ནང་དུ་ཡང་དག་འཇོག་
ཀྱང་གཟུང་བར་བྱ། རྨུག་པ་དང་གཉིད་ཀྱང་སྤང་བར་བྱ། བྱང་ཆུབ་རྣམ་པར་གཏན་ལ་འབེབས་པ་ལ་མཁས་པའི་གང་ཟག་ལ་ཡང་བསྟེན་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །རྒྱལ་སྲིད་རྣམ་པར་
ཉམས་པས་འཇིགས་ན་ས་དང་པོར་རོ། །ཚུལ་ཁྲིམས་རལ་པས་འཇིགས་ན་ས་གཉིས་པར་རོ། །ཆོས་ནུབ་པས་འཇིགས་ན་ས་གསུམ་པར་རོ། །ཆོས་སྨྲ་བ་འཆི་བས་འཇིགས་ན་ས་བཞི་པར་རོ། །མེས་ཚིག་པས་འཇིགས་ན་ས་ལྔ་པར་རོ། །བདག་བསད་པ་དང་འགོ་བའི་ནད་
ཀྱིས་འཇིགས་ན་ས་དྲུག་པར་རོ། །རི་ལས་གཡང་དུ་ལྟུང་བས་འཇིགས་ན་ས་བདུན་པར་རོ། །སྟོན་པ་ཡོངས་སུ་མྱ་ངན་ལས་འདའ་བས་འཇིགས་ན་ས་བརྒྱད་པར་ཏེ། ས་བརྒྱད་པོ་དག་ལ་མངོན་པར་བརྩོན་པ་ལ་བདུད་ཀྱི་ལས་ཀྱང་རྟོགས་པར་བྱའོ། །རྡོ་རྗེས་རབ་འཇོམས་གཞན་ཡང་
བྱང་ཆུབ་སེམས་དཔའ་གང་གིས་རྨི་ལམ་ན་ལོ་ཏོག་ཕུན་སུམ་ཚོགས་པར་མཐོང་ན་བྱང་ཆུབ་སེམས་དཔའ་དེ་ནི་ས་དང་པོ་བརྒྱད་པོ་དག་ཏུ་བལྟ་སྟེ། ས་དང་པོ་ལ་གནས་པས་ས་གཉིས་པ་ལ་མངོན་པར་བརྩོན་པས་དེ་ལྟ་བུར་མཐོང་ན་བདུད་ཀྱི་ལས་ལ་ཡིད་རྟོན་པར་འགྱུར་བའམ།
སྔོན་གྱི་རྒྱལ་བ་ལ་བྱ་བ་ལྷག་པར་བྱས་བ་འམ། བར་ཆད་མང་བ་ཡིན་པས་དེས་ནི་འཇིག་རྟེན་ཐམས་ཅད་ལ་རྟེན་པར་མི་བྱ་ཞིང་མི་ལྟ་བར་ཡོངས་སུ་གཏོང་བ་དང་། །རྣམ་པ་གསུམ་ལེགས་པར་བསྡམ་པར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་།

བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གལ་ཏེ་བྱང་ཆུབ་སེམས་དཔའ་བདག་གམ་ཡོའི་ལོ་ཏོག་ཕུན་སུམ་ཚོགས་པར་མཐོང་ན་དེ་ནི་ས་གསུམ་པར་རོ། །གྲོང་གི་ལོ་ཏོག་ཕུན་སུམ་ཚོགས་པར་མཐོང་ན་ས་བཞི་པར་རོ། །ལྗོངས་ཀྱི་ལོ་ཏོག་ཕུན་སུམ་ཚོགས་པར་མཐོང་ན་ས་ལྔ་
པར་རོ། །འཛམ་བུའི་གླིང་གི་ལོ་ཏོག་ཕུན་སུམ་ཚོགས་པར་མཐོང་ན་ས་དྲུག་པར་རོ། །གླིང་བཞི་པའི་ལོ་ཏོག་ཕུན་སུམ་ཚོགས་པར་མཐོང་ན་ས་བདུན་པར་རོ། །སྟོང་གསུམ་པའི་ལོ་ཏོག་ཕུན་སུམ་ཚོགས་པར་མཐོང་ན་ས་བརྒྱད་པར་རོ། །ལོ་ཏོག་ཡོངས་སུ་
སྨིན་པ་ཕུན་སུམ་ཚོགས་པར་མཐོང་ན་ས་དགུ་པར་རོ། །དེ་ལ་འཇུག་པར་བྱེད་ན་ས་བཅུ་པར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་སེམས་ཅན་ནད་པ་རྣམས་གསོ་བར་ཀུན་ཏུ་ཤེས་ན་བྱང་ཆུབ་སེམས་དཔའ་དེ་ནི་ས་དང་པོ་བརྒྱད་
པོ་དག་ལས་ས་གང་ཡང་རུང་བར་བལྟ་སྟེ། །དེ་ལ་ལས་ཀྱི་སྒྲིབ་པ་ཆུང་ལ་བདུད་ཀྱི་ལས་ཤས་ཆེ་བས་དེས་སྙིང་རྗེ་ཆེན་པོས་ཡོངས་སུ་སྦྱང་བར་བྱ་ཞིང་གཞན་ལ་ཕན་པ་ལ་བརྩོན་པ་དང་། ཕྱིར་རེ་བ་མེད་པར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་
འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །གང་ཁྱེའུ་གསོ་བར་བྱེད་ན་དེ་ནི་ས་དང་པོར་རོ། །གང་བུད་མེད་གསོ་བར་བྱེད་ན་དེ་ནི་ས་གཉིས་པར་རོ། །གང་མི་ཆེན་པོ་གསོ་བར་བྱེད་ན་དེ་ནི་ས་གསུམ་པར་རོ། །གང་རིམས་ཀྱིས་བཏབ་པ་གསོ་བར་བྱེད་ན་དེ་ནི་ས་
བཞི་པར་རོ། །གང་སྐྱེ་རྦབ་ཀྱི་ནད་ཀྱིས་བཏབ་པ་གསོ་བར་བྱེད་ན་དེ་ནི་ས་ལྔ་པར་རོ། །གང་ཤ་བཀྲའི་ནད་ཀྱིས་བཏབ་པ་གསོ་བར་བྱེད་ན་དེ་ནི་ས་དྲུག་པར་རོ། །གང་སྐེམ་ནད་ཀྱིས་བཏབ་པ་གསོ་བར་བྱེད་ན་དེ་ནི་ས་བདུན་པར་རོ། །གང་འབྱུང་པོས་ཟིན་པ་གསོ་བར་བྱེད་
ན་དེ་ནི་ས་བརྒྱད་པར་ཏེ། བདུད་ཀྱི་ལས་ནི་མ་གཏོགས་སོ། །སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་དེས་བཟོད་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་ལྷག་པའི་བསམ་པ་ཕུན་སུམ་ཚོགས་པར་བྱའོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་

དཔའ་གང་གིས་རྨི་ལམ་ན་བདག་བྱང་ཆུབ་ཏུ་ལུང་བསྟན་པའི་སྒྲ་ཐོས་ན་བྱང་ཆུབ་སེམས་དཔའ་དེ་ནི་ས་བཅུ་པོ་དག་ལས་ས་གང་ཡང་རུང་བར་བལྟ་སྟེ། །དེས་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་བཅུ་པོ་དག་ཏུ་ཇི་ལྟར་ལུང་བསྟན་པ་ལ་བདུད་ཀྱི་ལས་དང་།
ལས་ཀྱི་སྒྲིབ་པ་དག་རྟོགས་པར་བྱའོ། །བཅུ་གང་ཞེ་ན། ས་དང་པོ་ལ་བྱང་ཆུབ་ཏུ་ལུང་སྟོན་པ་དང་། ས་གཉིས་པ་ལ་བྱང་ཆུབ་ཀྱི་སྤྱོད་པར་ལུང་སྟོན་པ་དང་། ས་གསུམ་པ་ལ་བཟོད་པར་ལུང་སྟོན་པ་དང་། །ས་བཞི་པ་ལ་སྨོན་ལམ་དུ་ལུང་སྟོན་པ་དང་། ས་ལྔ་པ་ལ་མཉམ་པ་
ཉིད་དུ་ལུང་སྟོན་པ་དང་། ས་དྲུག་པ་ལ་ཡེ་ཤེས་སུ་ལུང་སྟོན་པ་དང་། ས་བདུན་པ་ལ་ཐབས་ལ་མཁས་པར་ལུང་སྟོན་པ་དང་། །ས་བརྒྱད་པ་ལ་ཉན་ཐོས་དང་རང་སངས་རྒྱས་ཀྱིས་ལས་ཡང་དག་པར་འདས་པ་ཐམས་ཅད་མཁྱེན་པ་ཉིད་དུ་ལུང་སྟོན་པ་དང་། ས་དགུ་པ་ལ་སྐྱེ་
བ་གཅིག་གིས་ཐོགས་པར་ལུང་སྟོན་པ་དང་། ས་བཅུ་པ་ལ་སངས་རྒྱས་སུ་དབང་བསྐུར་བར་ལུང་སྟོན་པའོ། །དེས་ནི་སྙིང་རྗེ་ཆེན་པོ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པ་ལ་བསྟེན་པར་བྱའོ། །དེས་ན་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །རྡོ་
རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བདག་མངོན་པར་རྫོགས་པར་སངས་རྒྱས་པར་ཀུན་ཏུ་ཤེས་ན། བྱང་ཆུབ་སེམས་དཔའ་དེ་ནི་ས་ཕྱི་མ་གསུམ་པོ་དག་ཏུ་བལྟ་སྟེ། དེས་ནི་བདུད་ཀྱི་ལས་རྟོགས་པར་བྱ་ཞིང་རྟག་ཏུ་མངོན་པར་བརྩོན་པར་
ཡང་བྱ་ལྷག་པའི་བསམ་པ་བསྒྲུབ་པར་ཡང་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའ་གང་གིས་རྨི་ལམ་ན་བུམ་པ་གང་བ་རྙེད་ན་བྱང་ཆུབ་སེམས་
དཔའ་དེ་ནི་ས་བཅུ་པོ་ཐམས་ཅད་དུ་བལྟའོ། །དེས་ན་ཡུལ་ཇི་ལྟ་བ་བཞིན་རྟོགས་པར་བྱ་སྟེ། གལ་ཏེ་གྲོང་ནས་རྙེད་ན་དེ་ནི་ས་དང་པོ་པར་བལྟའོ། །གལ་ཏེ་སྒོ་ནས་རྙེད་ན་དེ་ནི་ས་གཉིས་པར་བལྟའོ། །གལ་ཏེ་ལམ་ནས་རྙེད་ན་དེ་ནི་ས་གསུམ་པར་བལྟའོ། །གལ་ཏེ་ཤིང་དྲུང་

ནས་རྙེད་ན་དེ་ནི་ས་བཞི་པར་བལྟའོ། །གལ་ཏེ་འགྲེང་སྟེ་རྙེད་ན་དེ་ནི་ས་ལྔ་པར་བལྟའོ། །གལ་ཏེ་འདུག་ཏེ་རྙེད་ན་དེ་ནི་ས་དྲུག་པར་བལྟའོ། །གལ་ཏེ་མ་ལ་ནས་རྙེད་ན་དེ་ནི་ས་བདུན་པར་བལྟའོ། །གལ་ཏེ་ནམ་མཁའ་ལས་རྙེད་ན་དེ་ནི་ས་བརྒྱད་པར་བལྟའོ། །གལ་ཏེ་ཟས་ཟ་བའི་
ཚེ་རྙེད་ན་དེ་ནི་ས་དགུ་པར་བལྟའོ། །གལ་ཏེ་བཞོན་པ་ལ་ཞོན་པ་འམ། །སྐྱེད་མོས་ཚལ་ན་འདུག་པ་ན་རྒྱན་གྱིས་བརྒྱན་པ་རྙེད་ན་དེ་ནི་ས་བཅུ་པར་བལྟ་སྟེ། །བདུད་ཀྱི་ལས་དང་ལས་ཀྱི་སྒྲིབ་པ་ནི་རྟོགས་པར་བྱའོ། །དེས་ན་དེའི་ལས་ཀྱི་སྒྲིབ་པ་དེ་རྣམ་པར་དག་པར་འགྱུར་
ཞིང་བྱང་ཆུབ་ཏུ་ངེས་པར་འབྱུང་བར་ཡང་འགྱུར་རོ། །རྡོ་རྗེས་རབ་འཇོམས་གཞན་ཡང་བྱང་ཆུབ་སེམས་དཔའི་མཚན་མ་བརྒྱ་རྩ་བརྒྱད་པོ་དེ་དག་གིས་ནི་གང་ཟག་བྱང་ཆུབ་སེམས་དཔའི་ཐེག་པ་པ་ཡིན་པར་རིག་པར་བྱ་ཞིང་ཤེས་པར་བྱའོ། །དེ་ནས་དེའི་ཚེ་བཅོམ་ལྡན་
འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ལ་མཚན་མ་དེ་དག་ཡོད་གྱུར་པ། །དེ་ནི་བདག་ཉིད་ཆེ་བར་ཐེ་ཙོམ་མེད། །སྤྱོད་པ་ཅུང་ཟད་ཙམ་ཞིག་རྟོགས་གྱུར་ཀྱང་། །ཡོན་ཏན་ཤེས་པས་ཉེས་པ་མ་སྐྱེད་ཅིག །རྒྱ་མཚོ་ཆེན་པོ་ལས་ནི་མེ་འབར་
ཅིང་། །མེ་ཡི་དབུས་ནས་ཆུ་ནི་བྱུང་གྱུར་ཀྱང་། །གང་ལ་མཚན་མ་གཅིག་ཙམ་ཡོད་གྱུར་པ། །དེ་ནི་བྱང་ཆུབ་ཕྱིར་ལྡོག་ངས་མ་མཐོང་། །སྡིག་སྦྲུལ་སོས་ནི་ལྷུན་པོ་བཟུང་གྱུར་ཅིང་། །གང་གཱའི་བྱེ་སྙེད་ཞིང་དུ་འགྲོ་གྱུར་ཀྱང་། །དེ་འདྲའི་བྱེད་རྒྱུ་དེ་དག་ཡོད་པར་ནི། །བྱང་ཆུབ་
སེམས་ལས་ཕྱིར་ལྡོག་ཡོད་མ་ཡིན། །སྤྱོད་པས་ས་ལས་ལོག་པར་སྣང་གྱུར་ཀྱང་། །འདི་ལ་བྱང་ཆུབ་ཕྱིར་ལྡོག་འགའ་ཡང་མེད། །གང་ཟག་ཇི་ཙམ་ཡོན་ཏན་ཆུང་བས་ཀྱང་། །ལྷག་པའི་བསམ་པས་བསྐྱོད་ན་བྱང་ཆུབ་འཐོབ། །ནམ་མཁའི་ཁམས་དང་དེ་བཞིན་སེམས་
ཅན་ཁམས། །སངས་རྒྱས་ཡེ་ཤེས་དེ་བཞིན་བྱང་ཆུབ་སེམས། །ཆོས་བཞི་གང་ཡིན་དེ་དག་ཚད་མེད་དེ། །དེ་དག་འཇིག་རྟེན་ཀུན་གྱིས་རྟོགས་མི་ནུས། །གང་དག་བྱང་ཆུབ་སེམས་དཔའི་སྤྱོད་རྟོགས་པ། །དེ་དག་སྨོན་པ་ཡིན་པར་ཤེས་པར་བྱ། །སེམས་ཅན་སྤྱོད་པ་བསམ་

ཡས་སེམས་བྱེད་པ། །གང་ཞིག་རྩྭ་ཡིས་རྒྱ་མཚོ་གཏིང་དཔོག་བཞིན། །གང་ཟག་འཚོ་བར་འདོད་པས་ལྕགས་བཞུན་གྱི། །རྒྱ་མཚོ་ཆེན་པོ་འཐུང་བར་བྱེད་སླ་ཡི། །བྱང་ཆུབ་སེམས་དཔའ་ཐ་བ་མི་སྐྱེད་དེ། །དེ་ཡི་སྡུག་བསྔལ་དེ་ལ་གྲངས་ཀྱང་མེད། །འགའ་
ཞིག་ལས་ཀྱིས་བསྒྲིབས་པར་གྱུར་པའམ། །ཡང་ན་བདུད་ཀྱིས་ཀུན་ཏུ་དཀྲུགས་གྱུར་པ། །དེ་ལ་གང་ཟག་ཕལ་པ་བདེ་འདོད་པ། །སུས་ཀྱང་ཁོང་ནི་ཁྲོ་བར་མི་བྱའོ། །མདོག་ངན་གླེན་ནམ་ཡང་ན་རྙེད་མེད་དམ། །བརྙས་ཤིང་སྨད་པར་བྱ་བ་ཡིན་ན་ཡང་། །མི་ཡི་ཁམས་དང་སྤྱོད་པ་
ཤེས་དཀའ་བས། །དེ་ལ་གྱ་ཚོམ་སྐྱོན་ནི་གདགས་མི་བྱ། །ཤཱ་རིའི་བུ་དབེན་འདུག་སྟེ་སྒོམ་པ་ན། དེས་ནི་སེམས་ཀྱི་སྐད་ཅིག་ལྔ་བཅུ་རྟོགས། །སྟོན་པས་སྐད་ཅིག་གཅིག་ལ་ཚད་མེད་སེམས། །མཁྱེན་པས་དེ་ལ་སོམ་ཉི་མ་བྱེད་གསུངས། །དགྲ་བཅོམ་ཀུན་གྱིས་རང་ཁམས་
མི་ཤེས་ན། །སེམས་ཅན་སྤྱོད་པ་ཤེས་པ་སྨོས་ཅི་དགོས། །ངས་ནི་སྐད་ཅིག་ཙམ་གྱིས་གཞན་ཤེས་པས། །གང་ཟག་དེ་ལ་བརྙས་པར་མ་བྱེད་ཅིག །འདོད་ཆགས་བྲལ་བས་གོས་དམར་བླངས་ནས་ནི། །གྱོན་པར་བྱེད་ཅིང་དེ་བཞིན་མྱུར་དུ་ནི། །སྐད་ཅིག་འཇིག་པར་
འགྱུར་བ་ངས་མཐོང་བས། །སུ་ཞིག་ཉེས་བདེན་འགའ་ཞིག་སྨྲ་བར་བྱེད། །མ་སྐྱེས་དགྲ་ཡིས་ཕ་ནི་བསད་གྱུར་ཅིང་། །དེ་བཞིན་གཤེགས་པ་བགྲོངས་པར་སྦྱར་བྱས་ཀྱང་། །དེ་སེམས་གཅིག་གིས་ངན་འགྲོ་རྣམ་གྲོལ་ན། །གང་ཟག་དམ་པ་གང་ཡིན་སྨོས་ཅི་དགོས། །
སེམས་ཀྱིས་འཆིང་བར་བྱེད་ཅིང་གྲོལ་བྱེད་པས། །ལུས་བེམས་འདི་ལ་ཉེས་པ་ཅི་ཡང་མེད། །ལུས་ཀྱི་འདུ་འཛི་མཐོང་ནས་གཤེ་མ་བྱེད། །ཕ་རོལ་རྒོལ་བར་མ་བྱེད་ལུས་སྦྱོངས་ཤིག །གསེར་ནི་མི་གཙང་ནང་དུ་བཅུག་གྱུར་ཀྱང་། །འབར་བའི་རང་བཞིན་ནམ་ཡང་མི་འབྲི་
ལྟར། །ངེས་པ་གང་ཞིག་འཇིག་རྟེན་ཆོས་སྤྱོད་ཀྱང་། །ནམ་ཡང་བསམ་པའི་རང་བཞིན་ཡོང་མི་སྤོང་། །རྒྱལ་བུ་ཚོང་དཔོན་བུ་དང་ལྷན་ཅིག་ཏུ། །དགའ་བར་བདག་ཉིད་ཆེན་པོ་རྩེ་བ་ལྟར། །དེ་བཞིན་སེམས་ཅན་སྤྱོད་པའི་དབུས་ན་ཡང་། །དེ་ཡང་གཞན་ལ་ལྷར་བཅས་འགྲོ་བའང་

གཞན། །ལ་ལས་དུག་ཟོས་འཆི་བར་མི་འགྱུར་ལ། །མེ་དག་བཟུང་ཡང་འཚིག་པར་མི་འགྱུར་ན། །གང་དག་ཡེ་ཤེས་སྤྱོད་ལ་བསླབས་དེ་དག །བྱིས་པའི་སྤྱོད་པས་མི་འཕྲོགས་སྨོས་ཅི་དགོས། །བྱང་ཆུབ་སེམས་དཔའ་དག་ལ་ཡོན་ཕུལ་ལྟར། །རང་སངས་རྒྱས་དང་
དེ་བཞིན་དགྲ་བཅོམ་གྱིས། །སྟོང་གསུམ་ས་འདི་ཐམས་ཅད་གང་གྱུར་པ། །དེ་དག་མཆོད་བྱས་རྣམ་སྨིན་དཔག་མེད་མིན། །སེམས་དག་གྱུར་ན་སྦྱིན་པའི་གནས་འགྱུར་ཞིང་། །སེམས་དག་གྱུར་པ་རྒྱལ་བ་རྣམས་དང་འདྲ། །གང་དག་རྒྱལ་འདྲའི་བྱང་ཆུབ་སེམས་དཔའ་
དེའི། བྱང་ཆུབ་གཞོལ་བའི་ལྷག་པའི་བསམ་ལ་ལྟོས། །གང་དག་གང་གཱའི་བྱེ་སྙེད་སངས་རྒྱས་ཞིང་། །འགྲོན་བུས་བཀང་སྟེ་རྒྱལ་ལ་ཕུལ་བས་ནི། །གང་གིས་མདོ་འདི་བྲིས་ཏེ་འཆང་བ་ཡི། །དེ་ཡི་བསོད་ནམས་དཔེ་དང་ཆར་མི་ཕོད། །གང་དག་བྱང་ཆུབ་སེམས་ནི་མ་བརྗེད་པ། །
དེ་དག་རྙེད་པ་རབ་རྙེད་ལེགས་འཚོ་བ། །ནོར་འདོད་པ་དག་རྒྱ་མཚོ་ཆེན་པོ་ལྟར། །དེ་བཞིན་དེ་དག་རྙེད་པ་ཕུན་སུམ་ཚོགས། །གང་གིས་སྐྱེ་མང་དོན་དུ་མདོ་སྡེ་ཀུན། །ཀུན་ཏུ་ཆུབ་བྱས་འཆང་ཞིང་ཀློག་པ་བས། །མི་གང་མདོ་སྡེ་འདི་ལ་མཁས་གྱུར་པས། །སེམས་
ཅན་སྤྱོད་པ་མ་རྟོགས་བཅོམ་པ་ཡིན། །གལ་ཏེ་བྱང་ཆུབ་མཆོག་ལ་རེག་འདོད་ན། །དེ་ཕྱིར་བསྟེན་བཞིན་འདི་ལ་བརྩོན་གྱིས་ལ། །བདག་བསྟོད་གཞན་ལ་སྨད་པར་མ་བྱེད་པར། །ལྷག་པའི་བསམ་པས་སྤྱོད་པ་རྣམ་པར་སྦྱོངས། །དགོན་པར་དགའ་ཞིང་རྟག་ཏུ་དབང་བསྡམས་
ལ། །བརྩོན་འགྲུས་བརྩམས་ཤིང་ཉེ་དུ་ཐག་བསྲིངས་ལ། །བྱམས་ལ་གནས་ཤིང་དོན་དམ་མཁས་གྱུར་པ། །དེས་ནི་དེ་འདྲའི་བྱང་ཆུབ་ཐོབ་པར་འགྱུར། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་ལྷ་དང་མིའི་སྐྱེ་དགུ་དྲུག་ཁྲི་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ལྷ་དང་མིའི་སྐྱེ་དགུ་སྔོན་སེམས་མ་བསྐྱེད་པ་ཁྲག་ཁྲིག་ཕྲག་བཅོ་བརྒྱད་ཀྱིས་ནི་བྱང་ཆུབ་ཏུ་སེམས་བསྐྱེད་དེ། དེ་དག་གིས་ཆོས་ཀྱི་རྣམ་གྲངས་འདི་ཐོས་མ་ཐག་ཏུ་བསྐལ་པ་བརྒྱད་ཅུར་འཁོར་བ་ཕྱིར་བསྙིལ་བར་གྱུར་

ཏོ། །དེ་ལྟ་བས་ན་གལ་ཏེ་བྱང་ཆུབ་ཡོངས་སུ་མི་གཏོང་ན་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ་ཞིང་འདུན་པ་དྲག་པོ་དང་། འབད་པ་དང་། སྤྲོ་བ་དང་། རབ་ཏུ་སྤྲོ་བ་དང་། མངོན་པར་བརྩོན་པར་བྱའོ། །དེ་
ནས་འཁོར་དེ་གང་དག་བྱང་ཆུབ་ལས་ཕྱིར་ལྡོག་པར་འདོད་པ། སྐྲག་པ། སྒྱིད་ལུག་པ། སོམ་ཉི་དང་བཅས་པ། ཐེ་ཙོམ་དང་བཅས་པ། ཁྱིམ་གྱི་གནས་སུ་འགྲོ་འདོད་པ། བདུད་ཀྱི་ལས་དང་ལས་ཀྱི་སྒྲིབ་པ་མི་ཤེས་པའི་བྱང་ཆུབ་སེམས་དཔའ་ཁྲིས་བཅོམ་ལྡན་
འདས་ཀྱི་སྤྱན་སྔ་ནས་ཆོས་ཀྱི་རྣམ་གྲངས་འདི་ཐོས་ནས་སྐྱོན་ཡོངས་སུ་སྤངས་ཤིང་། ལྷག་པའི་བསམ་པ་རྣམ་པར་སྦྱངས་ཏེ། དེ་དག་འཇིག་རྟེན་གྱི་ཁམས་གཞན་དུ་སྐྱེ་བར་འགྱུར་ཞིང་དེ་དག་ཐམས་ཅད་བྱང་ཆུབ་སེམས་དཔའ་བྱམས་པ་དང་ལྷན་ཅིག་ཏུ་མངོན་པར་རྫོགས་
པར་འཚང་རྒྱ་བར་འགྱུར་ཏེ། དེ་དག་གིས་ནི་བསྐལ་པ་ཉི་ཤུར་བདུད་ཀྱི་ལས་རྣམ་པར་སྦྱོང་བར་འགྱུར་རོ། །གང་དག་འཇིག་རྟེན་གྱི་ཁམས་གཞན་དུ་སྐྱེས་པ་སྐྱེ་བ་གཅིག་གིས་ཐོགས་པ་ལ་གནས་པ་སྟན་ལ་འཁོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་
བྱམས་པ་དང་ལྷན་ཅིག་ཏུ་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་དག་གིས་ནི་བསྐལ་པ་ཉི་ཤུར་བདུད་ཀྱི་ལས་དང་། ལས་ཀྱི་སྒྲིབ་པ་རྣམ་པར་སྦྱངས་སོ། །དེ་ལྟར་ན་ཆོས་ཀྱི་རྣམ་གྲངས་འདི་ཐོས་པ་ཡང་བྱང་ཆུབ་སེམས་དཔའ་
རྣམས་ཀྱིས་གཅེས་སྤྲས་བྱེད་པ་ཡིན་ན། འཛིན་པ་དང་། སྟོན་པ་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་རྡོ་རྗེས་རབ་འཇོམས་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་
བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་རྨི་ལམ་བསྟན་པའི་ལེའུ་ཞེས་བྱ་བ་སྟེ་བཞི་པ་རྫོགས་སོ།། །།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ལེའུ་ལྔ་པ་སྟེ། འོད་དཔག་མེད་ཀྱི་བཀོད་པ། བམ་པོ་དང་པོ། །རྒྱ་གར་སྐད་དུ། ཨཱརྱ་ཨ་མི་ཏཱ་བྷ་བྱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འོད་དཔག་མེད་ཀྱི་
བཀོད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སུམ་ཁྲི་ཉིས་སྟོང་གི་དགེ་སློང་གི་དགེ་འདུན་
ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། གནས་པ་དང་ལྡན་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། བདག་གི་དོན་རྗེས་སུ་
ཐོབ་པ། རྣམ་པར་རྒྱལ་བ་དང་ལྡན་པ། དུལ་བ་དང་ཞི་བའི་མཆོག་ཐོབ་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། མངོན་པར་ཤེས་པ་དྲུག་དང་ལྡན་པ། དབང་དང་ལྡན་པར་གྱུར་པ། རྣམ་པར་ཐར་
པ་བརྒྱད་ལ་བསམ་གཏན་པ། སྟོབས་ཐོབ་པ། མངོན་པར་ཤེས་པ། གནས་བརྟན་ཉན་ཐོས་ཆེན་པོ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང་། ཚེ་དང་ལྡན་པ་རྟ་ཐུལ་དང་། ཚེ་དང་ལྡན་པ་བརླང་པ་དང་། ཚེ་དང་ལྡན་པ་མིང་ཆེན་དང་། ཚེ་དང་ལྡན་པ་
རྒྱལ་བཟངས་དང་། ཚེ་དང་ལྡན་པ་གྲགས་ལྷ་དང་། ཚེ་དང་ལྡན་པ་དྲི་མ་མེད་པ་དང་། ཚེ་དང་ལྡན་པ་ལག་བཟངས་དང་། ཚེ་དང་ལྡན་པ་གང་པོ་དང་། ཚེ་དང་ལྡན་པ་བ་ལང་བདག་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། ཚེ་དང་ལྡན་པ་ཆུ་ཀླུང་འོད་སྲུང་དང་། ཚེ་དང་ལྡན་པ་
ག་ཡ་འོད་སྲུང་དང་། ཚེ་དང་ལྡན་པ་གཞོན་ནུ་འོད་སྲུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་ཀ་བིན་ཆེན་པོ་དང་། ཚེ་དང་ལྡན་པ་སྐུལ་བྱེད་ཆེན་པོ་དང་། ཚེ་དང་ལྡན་

པ་མ་འགགས་པ་དང་། ཚེ་དང་ལྡན་པ་གྲུབ་པོ་དང་། ཚེ་དང་ལྡན་པ་དགའ་ཡོད་དང་། ཚེ་དང་ལྡན་པ་ཀིམ་པི་ལ་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་ནམ་གྲུ་དང་། ཚེ་དང་ལྡན་པ་སེང་ལྡེང་ནགས་པ་དང་། ཚེ་དང་ལྡན་པ་བཀྐུ་ལ་དང་། ཚེ་དང་ལྡན་པ་
ལེགས་འོངས་དང་། ཚེ་དང་ལྡན་པ་དོན་ཡོད་རྒྱལ་བ་དང་། ཚེ་དང་ལྡན་པ་ཕ་རོལ་སོན་དང་། ཚེ་དང་ལྡན་པ་ལམ་བསྟན་དང་། ཚེ་དང་ལྡན་པ་ལམ་ཕྲན་བསྟན་དང་། ཚེ་དང་ལྡན་པ་སྒྲ་གཅན་ཟིན་དང་། །ཚེ་དང་ལྡན་པ་དགའ་བོ་དང་། དེ་དག་དང་གཞན་ཡང་མངོན་པར་ཤེས་པ་མངོན་པར་ཤེས་
པ་གནས་བརྟན་ཉན་ཐོས་ཆེན་པོ་ཤ་སྟག་སྟེ། གང་ཟག་གཅིག་མ་གཏོགས་པ་ནི་འདི་ལྟ་སྟེ། སློབ་པའི་ལམ་ལ་གོང་དུ་བྱ་བ་ཡོད་པ་ཚེ་དང་ལྡན་པ་ཀུན་དགའ་བོའོ། །བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་མང་པོ་དང་ཡང་ཐབས་ཅིག་གོ། །དེ་ནས་ཚེ་དང་ལྡན་པ་
ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱོད་ཀྱི་དབང་པོ་རྣམས་ནི་ཤིན་ཏུ་
དང་། ཞལ་གྱི་མདོག་ནི་ཡོངས་སུ་དག །པགས་པའི་མདོག་ནི་ཡོངས་སུ་བྱང་ཞིང་སེར་པོར་གདའ་སྟེ། འདི་ལྟ་སྟེ། དཔེར་ན་སྟོན་གྱི་གོས་སེར་སྐྱ་ཡོངས་སུ་དག་པ། ཡོངས་སུ་སྦྱངས་པ་སེར་པོར་གདའ་བ་དེ་བཞིན་དུ་བཅོམ་ལྡན་འདས་ཀྱི་དབང་པོ་རྣམས་ནི་ཤིན་ཏུ་དང་། ཞལ་གྱི་
མདོག་ནི་ཡོངས་སུ་དག །པགས་པའི་མདོག་ནི་ཡོངས་སུ་བྱང་ཞིང་སེར་བར་གདའ་སྟེ། བཙུན་པ་བཅོམ་ལྡན་འདས་འདི་ལྟ་སྟེ། དཔེར་ན་འཛམ་བུའི་ཆུ་བོའི་གསེར་བརྒྱ་ཚད་པ་མགར་བ་འམ་མགར་བའི་སློབ་མ་མཁས་པས་ཞི་གའི་ནང་དུ་སྩལ་ཏེ། ཤིན་ཏུ་སྦྱངས་ནས་ལ་བ་སེར་པོའི་ནང་དུ་
སྩལ་ན་ཤིན་ཏུ་ཡོངས་སུ་དག་ཅིང་ཡོངས་སུ་བྱང་ལ་སེར་པོར་གདའ་བར་འགྱུར་རོ། །དེ་བཞིན་དུ་བཅོམ་ལྡན་འདས་ཀྱི་དབང་པོ་རྣམས་ནི་ཤིན་ཏུ་དང་། ཞལ་གྱི་མདོག་ནི་ཡོངས་སུ་དག །པགས་པའི་མདོག་ནི་ཡོངས་སུ་བྱང་ཞིང་སེར་བར་གདའོ། །བཅོམ་ལྡན་འདས་བདག་གིས་སྔ་བས་

ཀྱང་ཆེས་སྔ་བ་ན་དེ་བཞིན་གཤེགས་པའི་དབང་པོ་རྣམས་འདི་ལྟར་དང་བ་དང་། ཞལ་གྱི་མདོག་འདི་ལྟར་ཡོངས་སུ་དག་པ་དང་། པགས་པའི་མདོག་ཡོངས་སུ་བྱང་ཞིང་སེར་བར་གདའ་བར་མ་འཚལ་ཏོ། །བཅོམ་ལྡན་འདས་དེ་ལ་བདག་འདི་སྙམ་བགྱིད་དེ། །དེ་བཞིན་གཤེགས་པ་དེ་རིང་འདས་པ་དང་།
མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་རྗེས་སུ་དགོངས་ཤིང་། དེ་བཞིན་གཤེགས་པ་དེ་རིང་སངས་རྒྱས་ཀྱི་གནས་པས་བཞུགས་ཏེ། རྒྱལ་བའི་གནས་པ་དང་། ཐམས་ཅད་མཁྱེན་པ་ཉིད་ཀྱི་གནས་པ་དང་། གླང་པོ་ཆེའི་
གནས་པས་བཞུགས་པ་སྙམ་བགྱིད་དོ། །དེ་སྐད་ཅེས་གསོལ་པ་དང་། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ལེགས་སོ་ལེགས་སོ། །ཅི་དོན་འདི་ཁྱོད་ལ་ལྷ་རྣམས་ཀྱིས་བསྙད་དམ། འོན་ཏེ་སངས་རྒྱས་བཅོམ་ལྡན་འདས་རྣམས་ཀྱིས་
སམ། འོན་ཏེ་བདག་རང་གི་དཔྱོད་པའི་ཤེས་པས་དེ་ལྟར་ཤེས། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་དོན་འདི་ནི་ལྷ་རྣམས་ཀྱིས་བདག་ལ་བསྙད་པ་ཡང་མ་མཆིས། སངས་རྒྱས་བཅོམ་ལྡན་འདས་
རྣམས་ཀྱིས་ཀྱང་མ་ལགས་ཀྱི། བཅོམ་ལྡན་འདས་བདག་རང་གི་དཔྱོད་པའི་འཚལ་བས་འདི་སྙམ་དུ་དེ་བཞིན་གཤེགས་པ་ནི་དེ་རིང་འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་རྗེས་སུ་དགོངས་ཤིང་། དེ་བཞིན་
གཤེགས་པ་དེ་རིང་སངས་རྒྱས་ཀྱི་གནས་པས་བཞུགས་ཏེ། རྒྱལ་བའི་གནས་པ་དང་། ཐམས་ཅད་མཁྱེན་པ་ཉིད་ཀྱི་གནས་པ་དང་། གླང་པོ་ཆེན་པོའི་གནས་པས་བཞུགས་པ་སྙམ་བགྱིད་དོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་
ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱི་རྟོག་པ་རྒྱ་ཆེ་སྟེ། དཔྱོད་པ་བཟང་ཞིང་སྤོབས་པ་དགེ་སྟེ། ཀུན་དགའ་བོ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་ཞུགས་པ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོའི་ཚོགས་ཕལ་པོ་ཆེ་དང་། ལྷ་དང་མི་རྣམས་ཀྱི་

དོན་དང་ཕན་པ་དང་བདེ་བའི་ཕྱིར་ཁྱོད་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ལེགས་སོ་ལེགས་སོ། །ཀུན་དགའ་བོ་དེ་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་གྲངས་མེད་པ་དག་གིས་ཡེ་ཤེས་མཐོང་བ་
སྡུད་ཀྱང་དེ་བཞིན་གཤེགས་པའི་ཡེ་ཤེས་མཐོང་བ་ལ་གནོད་པ་མེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པའི་ཡེ་ཤེས་མཐོང་བ་ཐོགས་པ་མེད་པའི་ཕྱིར་ཏེ། ཀུན་དགའ་བོ་དེ་བཞིན་གཤེགས་པ་བཞེད་ན་བསོད་སྙོམས་གཅིག་གིས་བསྐལ་པའམ། བསྐལ་པ་བརྒྱ་འམ།
བསྐལ་པ་སྟོང་ངམ། བསྐལ་པ་བརྒྱ་སྟོང་ངམ། དེ་བས་ཀྱང་ལྷག་པར་བཞུགས་ཀྱང་དེ་བཞིན་གཤེགས་པའི་དབང་པོ་རྣམས་ལ་ཉམས་པ་མེད་དོ། །ཞལ་གྱི་མདོག་གཞན་དུ་འགྱུར་བ་མེད་དོ། །པགས་པའི་མདོག་ལ་གནོད་པ་མེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེ་བཞིན་
གཤེགས་པ་ནི་ཏིང་ངེ་འཛིན་གྱི་བདེ་བའི་ཕ་རོལ་ཏུ་བྱོན་པའོ། །ཀུན་དགའ་བོ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་ཤིན་ཏུ་དཀའ་སྟེ། འདི་ལྟ་སྟེ། དཔེར་ན་ཨུ་དུམ་བ་རའི་མེ་ཏོག་འཇིག་རྟེན་དུ་འབྱུང་བར་དཀའ་བ་དེ་བཞིན་དུ་ཀུན་དགའ་བོ་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་ཅན་ཐམས་ཅད་ཀྱི་དོན་བཞེད་པ། ཕན་པ་བཞེད་པ། ཐུགས་བརྩེ་བ་ཅན། ཐུགས་རྗེ་ཆེན་པོ་ལ་ཞུགས་པ་རྣམས་འཇིག་རྟེན་དུ་འབྱུང་བ་ནི་ཤིན་ཏུ་དཀའོ། །ཀུན་དགའ་བོ་གང་ཁྱོད་འཇིག་རྟེན་ཐམས་ཅད་ཀྱི་སློབ་དཔོན་ཁོང་
དཔའ་བ་དག་འཇིག་རྟེན་དུ་འབྱུང་བར་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་གྱི་ཕྱིར་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་དེ་ནི་དེ་བཞིན་གཤེགས་པའི་མཐུ་ཡིན་ནོ། །ཀུན་དགའ་བོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། ངས་
ཁྱོད་ལ་བཤད་དོ། །ཀུན་དགའ་བོས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་སྔོན་བྱུང་བ་འདས་པའི་དུས་ན་འདི་ནས་བསྐལ་པ་གྲངས་མེད་པའི་ཡང་ཆེས་གྲངས་མེད་པ།

ཤིན་ཏུ་རྒྱས་པ་ཚད་མེད་པ་བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཅེས་བྱ་བ་འཇིག་རྟེན་དུ་བྱུང་ངོ་། །ཀུན་དགའ་བོ་དེ་བཞིན་གཤེགས་པ་མར་མེ་མཛད་ཀྱི་སྔ་རོལ་གྱི་ཡང་ཆེས་སྔ་རོལ་དུ་དེ་བཞིན་
གཤེགས་པ་འོད་ལྡན་ཞེས་བྱ་བ་བྱུང་ངོ་། །དེའི་སྔ་རོལ་གྱི་ཡང་ཆེས་སྔ་རོལ་དུ་དེ་བཞིན་གཤེགས་པ་འོད་མཛད་ཅེས་བྱ་བ་བྱུང་ངོ་། །དེའི་སྔ་རོལ་གྱི་ཡང་ཆེས་སྔ་རོལ་དུ་དེ་བཞིན་གཤེགས་པ་ཙན་དན་གྱི་དྲི་ཞེས་བྱ་བ་བྱུང་ངོ་། །ཀུན་དགའ་བོ་དེ་བཞིན་གཤེགས་པ་ཙན་དན་གྱི་དྲི་དེའི་སྔ་རོལ་
གྱི་ཡང་ཆེས་སྔ་རོལ་དུ་དེ་བཞིན་གཤེགས་པ་རི་རབ་ལྟ་བུ་ཞེས་བྱ་བ་བྱུང་ངོ་། །དེ་བཞིན་དུ་དེ་བཞིན་གཤེགས་པ་ཟླ་བའི་ཞལ་ཞེས་བྱ་བ་བྱུང་ངོ་། །དེ་བཞིན་གཤེགས་པ་དྲི་མ་མེད་པའི་ཞལ་ཞེས་བྱ་བ་དང་། དེ་བཞིན་གཤེགས་པ་མི་གོས་པ་ཞེས་བྱ་བ་དང་། དེ་བཞིན་གཤེགས་པ་འོད་
དྲི་མ་མེད་པ་ཞེས་བྱ་བ་དང་། དེ་བཞིན་གཤེགས་པ་ཀླུ་ཟིལ་གྱིས་གནོན་ཅེས་བྱ་བ་དང་། དེ་བཞིན་གཤེགས་པ་ཉི་མའི་ཞལ་ཞེས་བྱ་བ་དང་། དེ་བཞིན་གཤེགས་པ་རིའི་རྒྱལ་པོའི་དབྱངས་ཞེས་བྱ་བ་དང་། དེ་བཞིན་གཤེགས་པ་རི་རབ་བརྩེགས་ཞེས་བྱ་བ་དང་། དེ་བཞིན་གཤེགས་པ་
གསེར་འོད་ཅེས་བྱ་བ་དང་། དེ་བཞིན་གཤེགས་པ་སྐར་མའི་འོད་ཅེས་བྱ་བ་དང་། དེ་བཞིན་གཤེགས་པ་བཻ་དཱུརྱར་སྣང་བ་ཞེས་བྱ་བ་དང་། དེ་བཞིན་གཤེགས་པ་ཚངས་པའི་དབྱངས་ཞེས་བྱ་བ་དང་། དེ་བཞིན་གཤེགས་པ་ཟླ་བ་ཟིལ་གྱིས་གནོན་ཅེས་བྱ་བ་དང་། དེ་བཞིན་གཤེགས་པ་
ཉི་མའི་དབྱངས་ཞེས་བྱ་བ་དང་། དེ་བཞིན་གཤེགས་པ་མེ་ཏོག་སིལ་མའི་འོད་ཀྱིས་བརྒྱན་ཅེས་བྱ་བ་དང་། དེ་བཞིན་གཤེགས་པ་དཔལ་བརྩེགས་ཞེས་བྱ་བ་དང་། དེ་བཞིན་གཤེགས་པ་རྒྱ་མཚོ་མཆོག་གི་བློས་རྣམ་པར་རོལ་པའི་མངོན་པར་མཁྱེན་པ་ཞེས་བྱ་བ་དང་། དེ་བཞིན་
གཤེགས་པ་འོད་མཆོག་ཅེས་བྱ་བ་དང་། དེ་བཞིན་གཤེགས་པ་སྤོས་ཀྱི་རྒྱལ་པོ་ཆེན་པོར་སྣང་བ་ཞེས་བྱ་བ་དང་། དེ་བཞིན་གཤེགས་པ་ཐ་བ་དང་དྲི་མ་དང་ཁོང་ཁྲོ་བ་དང་བྲལ་བ་ཞེས་བྱ་བ་དང་། དེ་བཞིན་གཤེགས་པ་དཔལ་བརྩེགས་ཞེས་བྱ་བ་དང་། དེ་བཞིན་གཤེགས་པ་

རིན་པོ་ཆེ་གཏོང་བ་ཞེས་བྱ་བ་དང་། དེ་བཞིན་གཤེགས་པ་ཡོན་ཏན་ཆེན་པོ་མངའ་བའི་བློ་བརྙེས་པའི་མངོན་པར་མཁྱེན་པ་ཞེས་བྱ་བ་དང་། དེ་བཞིན་གཤེགས་པ་འོད་ཀྱིས་ཉི་ཟླ་ཟིལ་དུ་རླག་པར་མཛད་ཅེས་བྱ་བ་དང་། དེ་བཞིན་གཤེགས་པ་བཻ་དཱུརྱ་སྦྱངས་པར་སྣང་བ་
ཞེས་བྱ་བ་དང་། དེ་བཞིན་གཤེགས་པ་སེམས་ཀྱི་རྒྱུད་ཀྱི་བློ་ཤིན་ཏུ་རྒྱས་པ་མངོན་པར་འཕགས་པ་ཞེས་བྱ་བ་དང་། དེ་བཞིན་གཤེགས་པ་མེ་ཏོག་གི་ཕྲེང་བའི་ནགས་ཀྱི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་མཁྱེན་པ་ཞེས་བྱ་བ་དང་། དེ་བཞིན་གཤེགས་པ་མེ་ཏོག་གི་འབྱུང་
གནས་ཞེས་བྱ་བ་དང་། དེ་བཞིན་གཤེགས་པ་ཆུ་ཟླ་ལྟ་བུ་ཞེས་བྱ་བ་དང་། དེ་བཞིན་གཤེགས་པ་མ་རིག་པའི་མུན་པ་རྣམ་པར་འཇོམས་པ་ཞེས་བྱ་བ་དང་། དེ་བཞིན་གཤེགས་པ་འཇིག་རྟེན་དབང་པོ་ཞེས་བྱ་བ་དང་། དེ་བཞིན་གཤེགས་པ་མུ་ཏིག་གི་བྱི་རུ་འདྲ་བའི་གདུགས་ཞེས་བྱ་བ་
དང་། དེ་བཞིན་གཤེགས་པ་བཞེད་པ་ཞེས་བྱ་བ་དང་། དེ་བཞིན་གཤེགས་པ་ཆོས་ཀྱི་བློ་གྲོས་ཀྱིས་བསྒྲགས་པའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་སེང་གེ་དང་རྒྱ་མཚོ་དང་བརྩེགས་པ་ལྟར་བསྒྲགས་པའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་རྒྱ་མཚོ་རི་རབ་
ཟླ་བ་ཞེས་བྱ་བ་དང་། དེ་བཞིན་གཤེགས་པ་ཚངས་པའི་དབྱངས་ཀྱི་ང་རོ་ལ་མངོན་པར་དགྱེས་པ་ཞེས་བྱ་བ་དང་། དེ་བཞིན་གཤེགས་པ་མེ་ཏོག་འབྱུང་ཞེས་བྱ་བ་དང་། དེ་བཞིན་གཤེགས་པ་སྡེ་བརྙེས་ཞེས་བྱ་བ་དང་། དེ་བཞིན་གཤེགས་པ་ཉི་ཟླ་ཞེས་བྱ་བ་དང་། དེ་བཞིན་གཤེགས་
པ་ལྷུན་པོ་བརྩེགས་ཞེས་བྱ་བ་དང་། དེ་བཞིན་གཤེགས་པ་ཟླ་འོད་ཅེས་བྱ་བ་དང་། དེ་བཞིན་གཤེགས་པ་དྲི་མ་མེད་པའི་སྤྱན་ཞེས་བྱ་བ་དང་། དེ་བཞིན་གཤེགས་པ་རི་བོའི་རྒྱལ་པོའི་སྒྲ་དབྱངས་ཞེས་བྱ་བ་དང་། དེ་བཞིན་གཤེགས་པ་མེ་ཏོག་འོད་ཅེས་བྱ་བ་དང་། དེ་བཞིན་གཤེགས་པ་
མེ་ཏོག་གི་ཆར་རབ་ཏུ་འཐོར་བ་ཞེས་བྱ་བ་དང་། དེ་བཞིན་གཤེགས་པ་རིན་པོ་ཆེའི་གདུགས་ཞེས་བྱ་བ་དང་། དེ་བཞིན་གཤེགས་པ་པདྨས་སྲང་མཛེས་པར་མཛད་ཅེས་བྱ་བ་དང་། དེ་བཞིན་གཤེགས་པ་ཙན་དན་གྱི་དྲི་ཞེས་བྱ་བ་དང་། དེ་བཞིན་གཤེགས་པ་རྒྱ་སྤོས་ཀྱི་དྲི་ཞེས་

བྱ་བ་དང་། དེ་བཞིན་གཤེགས་པ་རིན་པོ་ཆེར་སྣང་བ་ཞེས་བྱ་བ་དང་། དེ་བཞིན་གཤེགས་པ་མུ་ཁྱུད་ཅེས་བྱ་བ་དང་། དེ་བཞིན་གཤེགས་པ་བཀོད་པ་ཆེན་པོ་ཞེས་བྱ་བ་དང་། དེ་བཞིན་གཤེགས་པ་ཐ་བ་དང་ཞེ་སྡང་དང་བྲལ་བ་ཞེས་བྱ་བ་དང་། དེ་བཞིན་གཤེགས་པ་ཚངས་པའི་
དབྱངས་ཞེས་བྱ་བ་དང་། དེ་བཞིན་གཤེགས་པ་རིན་པོ་ཆེ་སྣ་བདུན་གྱི་ཆར་འབེབས་པ་ཞེས་བྱ་བ་དང་། དེ་བཞིན་གཤེགས་པ་ཡོན་ཏན་ཆེན་པོ་མངའ་བ་ཞེས་བྱ་བ་དང་། དེ་བཞིན་གཤེགས་པ་ཏ་མ་ལའི་ལོ་མ་དང་ཙན་དན་གྱི་རྫབ་ཅན་ཞེས་བྱ་བ་དང་། དེ་བཞིན་གཤེགས་པ་མེ་ཏོག་མངོན་པར་
མཁྱེན་ཅེས་བྱ་བ་དང་། དེ་བཞིན་གཤེགས་པ་མི་ཤེས་པ་རྣམ་པར་འཇོམས་ཞེས་བྱ་བ་དང་། དེ་བཞིན་གཤེགས་པ་རལ་པ་ཅན་ཞེས་བྱ་བ་དང་། དེ་བཞིན་གཤེགས་པ་མུ་ཏིག་གི་གདུགས་ཞེས་བྱ་བ་དང་། དེ་བཞིན་གཤེགས་པ་གསེར་གྱི་སྙིང་པོ་ཞེས་བྱ་བ་དང་། དེ་བཞིན་གཤེགས་
པ་བཻ་དཱུརྱརའི་སྙིང་པོ་ཞེས་བྱ་བ་དང་། དེ་བཞིན་གཤེགས་པ་ཏོག་ཆེན་པོ་ཞེས་བྱ་བ་དང་། དེ་བཞིན་གཤེགས་པ་ཆོས་ཀྱི་ཏོག་ཅེས་བྱ་བ་དང་། དེ་བཞིན་གཤེགས་པ་རིན་ཆེན་དཔལ་ཞེས་བྱ་བ་དང་། དེ་བཞིན་གཤེགས་པ་མིའི་དབང་པོ་ཞེས་བྱ་བ་དང་། དེ་བཞིན་གཤེགས་པ་འཇིག་རྟེན་
དབང་པོ་ཞེས་བྱ་བ་དང་། དེ་བཞིན་གཤེགས་པ་ཐུགས་རྗེ་ཅན་ཞེས་བྱ་བ་དང་། དེ་བཞིན་གཤེགས་པ་འཇིག་རྟེན་མཛེས་ཞེས་བྱ་བ་དང་། དེ་བཞིན་གཤེགས་པ་ཚངས་པའི་ཏོག་ཅེས་བྱ་བ་དང་། དེ་བཞིན་གཤེགས་པ་ཆོས་ཀྱི་བློ་གྲོས་ཞེས་བྱ་བ་དང་། དེ་བཞིན་གཤེགས་པ་སེང་གེ་
ཞེས་བྱ་བ་དང་། དེ་བཞིན་གཤེགས་པ་སེང་གེའི་བློ་གྲོས་ཞེས་བྱ་བ་བྱུང་སྟེ། ཀུན་དགའ་བོ་དེ་བཞིན་གཤེགས་པ་སེང་གེའི་བློ་གྲོས་ཀྱི་སྔ་རོལ་གྱི་ཡང་ཆེས་སྔ་རོལ་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དབང་ཕྱུག་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་

རྫོགས་པའི་སངས་རྒྱས་འཇིག་རྟེན་དབང་ཕྱུག་རྒྱལ་པོ་དེའི་བསྟན་པ་ལ་དགེ་སློང་ཆོས་ཀྱི་འབྱུང་གནས་ཞེས་བྱ་བ་ཤས་ཆེར་དྲན་པ་དང་ལྡན་པ། བློ་གྲོས་དང་ལྡན་པ། རྟོགས་པ་དང་ལྡན་པ། ཤེས་རབ་དང་ལྡན་པ། བརྩོན་འགྲུས་དང་ལྡན་པ། རྒྱ་ཆེན་པོ་ལ་མོས་པ་ཞིག་བྱུང་ངོ་། །
ཀུན་དགའ་བོ་དེ་ནས་དགེ་སློང་ཆོས་ཀྱི་འབྱུང་གནས་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་
འདས་ལ་ཕྱག་འཚལ་ཏེ། དེའི་ཚེ་ཚིགས་སུ་བཅད་པ་འདི་དག་གིས་མངོན་སུམ་དུ་བསྟོད་དོ། །འོད་ནི་དཔག་མེད་བློ་ནི་མཐའ་ཡས་མཚུངས། །གཞན་གྱི་འོད་ནི་གང་ཡང་མི་གསལ་ཏེ། །ཉི་ཟླ་ནོར་བུའི་ཚོགས་ཀྱི་འོད་རྣམས་ནི། །འཇིག་རྟེན་ཀུན་ན་ལྷམ་མེ་ལྷན་མ་ལགས། །སེམས་ཅན་སྙིང་
པོའི་གཟུགས་ནི་མཐའ་ཡས་ཏེ། །དེ་བཞིན་སངས་རྒྱས་གསུང་ནི་མཐའ་ཡས་དབྱངས། །ཚུལ་ཁྲིམས་ཏིང་འཛིན་ཤེས་རབ་བརྩོན་འགྲུས་ཀྱང་། །ཁྱོད་འདྲ་འཇིག་རྟེན་འདི་ན་གཞན་མ་མཆིས། །ཟབ་ཅིང་ཤིན་ཏུ་རྒྱས་པའི་ཆོས་བརྙེས་པ། །སངས་རྒྱས་མཆོག་གི་ཐུགས་ནི་རྒྱ་མཚོ་
བཞིན། །དེས་ཀྱང་སྟོན་ལ་ཁེངས་པ་མི་མངའ་སྟེ། །ཐ་བ་ཞེ་སྡང་སྤངས་ནས་ཕ་མཐར་སྒྲོལ། །ཇི་ལྟར་སངས་རྒྱས་མཆོག་གི་གཟི་མཐའ་ཡས། །མི་དབང་གཟི་བརྗིད་ཕྱོགས་ཀུན་ལྷམ་མེར་གདའ། །དེ་ལྟར་བདག་ཀྱང་སངས་རྒྱས་ཆོས་རྒྱལ་གྱུར། །སྐྱེ་དགུ་རྒ་དང་འཆི་ལས་རབ་ཐར་བགྱི། །
སྦྱིན་དང་དུལ་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཏིང་འཛིན་དེ་བཞིན་ཤེས་རབ་མཆོག །བརྟུལ་ཞུགས་འདི་དག་བདག་གིས་ཡང་དག་བླངས། །སེམས་ཅན་ཀུན་སྐྱོབ་སངས་རྒྱས་འགྱུར་བར་བགྱི། །བྱང་ཆུབ་ཞི་མཆོག་མཚུངས་མེད་ཚོལ་བགྱིད་ཅིང་། །སངས་རྒྱས་བྱེ་བ་བརྒྱ་
སྟོང་དུ་མ་ཕྲག །གང་གཱའི་བྱེ་མ་ལྟ་བུར་མཐའ་ཡས་པ། །མགོན་པོ་དེ་ཀུན་བདག་གིས་མཆོད་པར་བགྱི། །གང་གཱའི་རྡུལ་དང་མཉམ་པའི་འཇིག་རྟེན་ཁམས། །དེ་བས་གོང་དུ་མཐའ་ཡས་ཞིང་གི་རྣམས། །དེ་དག་ཀུན་ཏུ་འོད་ནི་རབ་འབྱིན་པ། །འདི་འདྲའི་བརྩོན་འགྲུས་སྟོབས་ནི་བརྩམ་

པར་བགྱི། །བདག་གིས་ཞིང་ཡངས་གཙོ་བོ་དམ་པ་མཆོག །འདུས་བྱས་འདིར་ནི་བརྒྱན་པ་བགྱིས་ནས་སུ། །མཚུངས་པ་མ་མཆིས་མྱ་ངན་འདས་དབྱིངས་བདེ། །དེ་ཡང་མ་མཆིས་པས་ནི་རྣམ་པར་སྦྱང་། །ཕྱོགས་བཅུ་དག་ནས་ལྷགས་པའི་སེམས་ཅན་རྣམས། །དེར་ལྷགས་མྱུར་དུ་བདེ་ལ་
དགའ་བར་འགྱུར། །སངས་རྒྱས་ཚད་མ་འདི་ན་བདག་གི་དཔང་། །མ་ལོག་བརྩོན་འགྲུས་སྟོབས་ནི་བསྐྱེད་པར་འཚལ། །ཕྱོགས་བཅུའི་འཇིག་རྟེན་མི་ཆགས་མཁྱེན་པ་ཅན། །མཁས་པ་དེ་དག་རྟག་ཏུ་བདག་སེམས་མཁྱེན། །བདག་ནི་མཚམས་མེད་མཆིས་ཏེ་རྟག་གནས་བགྱི། །
སྨོན་ལམ་སྟོབས་ལས་ལྡོག་པར་ཡོང་མི་བགྱི། །ཀུན་དགའ་བོ་དེ་ནས་དགེ་སློང་ཆོས་ཀྱི་འབྱུང་གནས་དེས་བཅོམ་ལྡན་འདས་དེ་བཞིན་གཤེགས་པ་འཇིག་རྟ