Kinh tạng Tây Tạng (Kangyur Đại Học) — 011_འདུལ་བ།_ད

ྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་
སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། གསོ་བའི་དཔྱད་དང་། རྩ་བའི་སྨན་དང་། མིག་སྨན་སྦྱིན་པ་དང་། རོ་སྦྱིན་པ་དང་། སྨན་སྦྱིན་པ་དང་། བུད་མེད་ཀྱི་དཔྱད་དང་། སྐྱེས་པའི་དཔྱད་དང་། ཁྱེའུའི་དཔྱད་དང་། གཞོན་ནུ་མའི་དཔྱད་དང་།
སྨན་ལ་སྦྱོར་བ་བྱེད་པ་སྟེ། དགེ་སྦྱོང་རྣམས་ཀྱི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ནོར་བུའི་

མཚན་ཉིད་དང་། དབྱུག་པའི་མཚན་ཉིད་དང་། རལ་གྲིའི་མཚན་ཉིད་དང་། མདའི་མཚན་ཉིད་དང་། མཚོན་ཆའི་མཚན་ཉིད་དང་། གླང་པོ་ཆེའི་མཚན་ཉིད་དང་། རྟའི་མཚན་ཉིད་དང་། ཁྱུ་མཆོག་གི་མཚན་ཉིད་དང་། མ་ཧེའི་མཚན་ཉིད་དང་། རའི་མཚན་ཉིད་དང་། ལུག་གི་
མཚན་ཉིད་དང་། བྱ་གག་གི་མཚན་ཉིད་དང་། འུར་པའི་མཚན་ཉིད་དང་། མཆིལ་པའི་མཚན་ཉིད་དང་། བུད་མེད་ཀྱི་མཚན་ཉིད་དང་། སྐྱེས་པའི་མཚན་ཉིད་དང་། གཞོན་ནུའི་མཚན་ཉིད་དང་། གཞོན་ནུ་མའི་མཚན་ཉིད་དང་། ཚེ་ཐུང་བའི་རྟགས་དང་། ཚེ་རིང་བའི་རྟགས་དང་། སྐལ་བ་ཆུང་
བའི་རྟགས་དང་། སྐལ་བ་ཆེ་བའི་རྟགས་དང་། བསོད་ནམས་ཆུང་བའི་རྟགས་དང་། བསོད་ནམས་ཆེ་བའི་རྟགས་དང་། དབང་ཆུང་བའི་རྟགས་དང་། དབང་ཆེ་བའི་རྟགས་དང་། ཇོ་བོའི་མཚན་ཉིད་དང་། བྲན་གྱི་མཚན་ཉིད་དེ་དགེ་སྦྱོང་རྣམས་ཀྱི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་
བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། སྨན་ཟས་གཅིག་ཅར་གཏོང་བ་དང་། སྦྲེངས་ཏེ་གཏོང་བ་དང་། འཁྲུར་འཇུག་པ་དང་།
ཡར་སྐྱུག་པ་དང་། མར་འཁྲུ་བ་དང་། སྣར་བླུགས་པ་དང་། དུ་བ་རྔུབ་པ་དང་། དུགས་ཀྱི་ལས་དང་། བད་ཀན་གྱི་དཔྱད་དང་། ཕོ་བའི་དཔྱད་དང་། སྨེ་བ་དང་། ཕོལ་མིག་གི་དཔྱད་དང་། རི་དགས་འཁྱིལ་པ་དང་། བྱ་རོག་འཁྱིལ་པ་དང་། མཁུར་བ་འགུལ་བ་དང་། ལྕེ་སོས་ཚོད་པ་
དང་། རོ་ལངས་དང་། རོ་ལངས་ཕྱེད་ལ་སྦྱོར་བར་བྱེད་དེ། དགེ་སྦྱོང་རྣམས་ཀྱི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་
འཚོ་བར་བྱེད་པ་འདི་ལྟ་སྟེ། དགུག་པ་དང་། ཀུན་དུ་དགུག་པ་དང་། རྣམ་པར་དགུག་པ་དང་། རྨོངས་པ་དང་། ཀུན་དུ་རྨོངས་པ་དང་། རྣམ་པར་རྨོངས་པ་དང་། རྣམ་པར་འཐོར་བ་དང་། རྣམ་པར་འཇོམས་པའི་ཆོས་ཅན་དང་། བདེ་བར་བྱེད་པ་དང་། སྡུག་བསྔལ་བར་བྱེད་པ་དང་།

མངལ་དུ་འཆགས་པར་བྱེད་པ་དང་། ཏིལ་གྱི་སྦྱིན་སྲེག་དང་། འབྲས་ཀྱི་སྦྱིན་སྲེག་དང་། གཟེགས་མའི་སྦྱིན་སྲེག་དང་། རྫས་ཀྱི་སྦྱིན་སྲེག་དང་། སྦྱིན་སྲེག་གི་སྦྱིན་སྲེག་དང་། ཉི་མ་ལ་བཀུར་སྟི་བྱ་བ་དང་། སྐར་མ་ལ་བཀུར་སྟི་བྱ་བ་དང་། ལྷ་ལ་བཀུར་སྟི་བྱ་བ་དང་། བཀུར་སྟིའི་
གནས་ཆེན་པོ་ལ་བཀུར་སྟི་བྱེད་པ་སྟེ། དགེ་སྦྱོང་རྣམས་ཀྱི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་འཚོ་བར་
བྱེད་པ་འདི་ལྟ་སྟེ། འཇིགས་པར་འགྱུར་བ་དང་། བདེ་བར་འགྱུར་བ་དང་། ལོ་ཉེས་པར་འགྱུར་བ་དང་། ལོ་ལེགས་པར་འགྱུར་བ་དང་། ཆར་འབབ་མི་མཁས་པར་འགྱུར་བ་དང་། ཆར་འབབ་མཁས་པར་འགྱུར་བ་དང་། ཡམས་ཀྱི་ནད་འབྱུང་བར་འགྱུར་བ་དང་། ཡམས་ཀྱི་ནད་འབྱུང་བར་མི་
འགྱུར་བ་སྟེ། དགེ་སྦྱོང་རྣམས་ཀྱི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ།། །།འདུལ་བ་ཕྲན་ཚེགས་ཀྱི་གཞི། བམ་པོ་བཞི་བཅུ་རྩ་བདུན་པ། འདི་ལྟར་ཡང་མ་སྡུག་དགེ་སྦྱོང་ངམ། བྲམ་ཟེ་ཁ་ཅིག་དད་པས་བྱིན་པ་ཡོངས་སུ་སྤྱད་ནས་ཡོན་པོའི་རིག་པས་ལོག་
པར་འཚོ་བས་འཚོ་བར་བྱེད་པ་འདི་ལྟ་སྟེ། ནང་གི་རྒྱལ་པོ་ནི་རྒྱལ་བར་འགྱུར་བ་དང་། ཕྱིའི་རྒྱལ་པོ་ནི་ཕམ་པར་འགྱུར་བ་དང་། ཕྱིའི་རྒྱལ་པོ་ནི་རྒྱལ་བར་འགྱུར་བ་དང་། ནང་གི་རྒྱལ་པོ་ནི་ཕམ་པར་འགྱུར་བ་དང་། ནང་གི་རྒྱལ་པོ་ནི་འབྲོས་པར་འགྱུར་བ་དང་། ཕྱིའི་རྒྱལ་པོ་སྙེགས་པར་འགྱུར་
བ་དང་། ཕྱིའི་རྒྱལ་པོ་འབྲོས་པ་དང་། ནང་གི་རྒྱལ་པོ་སྙེགས་པར་འགྱུར་བ་སྟེ། དགེ་སྦྱོང་ནི་ཡོན་པོའི་རིག་པས་ལོག་པར་འཚོ་བས་འཚོ་བར་བྱེད་པ་དེ་ལྟ་བུ་ལས་སླར་ལོག་པ་ཡིན་ནོ། །འདི་ལྟར་ཡང་མ་སྡུག་དགེ་སྦྱོང་ངམ། བྲམ་ཟེ་ཁ་ཅིག་དད་པས་བྱིན་པ་ཡོངས་སུ་སྤྱད་དེ། ཡོན་པོའི་
རིག་པས་འཚོ་བས་འཚོ་བར་བྱེད་པ་འདི་ལྟ་སྟེ། ལས་སུ་ནི་ཉི་མ་དང་། ཟླ་བ་ལམ་ལས་གོལ་བར་འགྲོ་བ་དང་། ཉི་མ་གཟའི་ལམ་དང་། ཟླ་བ་གཟའི་ལམ་དང་། སྐར་མདའ་ལྟུང་བ་དང་། ཕྱོགས་སུ་ཤར་བ་དང་། ཕྱོགས་སུ་ཚིག་པ་དང་། བར་སྣང་ལ་ལྷ་རྣམས་རྔ་རྡུང་བ་དང་། ཉི་མའི་

ལམ་གཟའ་མ་ཡིན་པ་དང་། ཟླ་བའི་ལམ་གཟའ་མ་ཡིན་པ་དང་། སྐར་མདའ་ལྟུང་བ་དང་། ཕྱོགས་སུ་ཤར་བ་དང་། ཕྱོགས་སུ་ཚིག་པ་དང་། བར་སྣང་ལ་ལྷ་རྣམས་རྔ་རྡུང་བ་དང་། ཉི་མ་དང་ཟླ་བ་གཉིས་དེ་ལྟ་བུར་འཕྲུལ་ཆེ་བ་མཐུ་ཆེ་བ་དེ་ལྟར་ལམ་དུ་ཤར། ལམ་མ་ཡིན་པར་
ཤར། འདི་ལྟར་ལམ་དུ་ནུབ། འདི་ལྟར་ལམ་མ་ཡིན་པར་ནུབ། ལམ་འདི་ལྟ་བུར་གྱུར་ན་ཉོན་མོངས་པ་དང་། རྣམ་པར་བྱང་བར་སྦྱོར་རོ། །དགེ་སྦྱོང་ནི་ཡོན་པོའི་རིག་པས་ལོག་པར་འཚོ་བས་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །འདི་ལྟར་ཡང་མ་སྡུག་དགེ་སྦྱོང་ངམ། བྲམ་ཟེ་ཁ་ཅིག་དད་པས་བྱིན་
པ་ཡོངས་སུ་སྤྱད་དེ། ཡོན་པོའི་རིག་པས་ལོག་པར་འཚོ་བས་འཚོ་བར་བྱེད་པ་འདི་ལྟ་སྟེ། ཉི་མ་དང་ཟླ་བ་གཉིས་ལམ་གོལ་བ་འདི་ལྟ་བུར་སོང་ན་རྣམ་པར་སྨིན་པ་འདི་ལྟ་བུར་འགྱུར་རོ། །རྣམ་པ་འདི་ལྟ་བུའི་རྣམ་པར་སྨིན་པ་ནི་ཉི་མའི་གཟའ་དང་། ཟླ་བའི་གཟའ་ལས་འདི་ལྟ་བུར་ཞུགས་ཤིང་སྐར་
མདའ་ལྟུང་བ་དང་། ཕྱོགས་སུ་ཤར་བ་དང་། ཕྱོགས་སུ་ཚིག་པ་དང་། བར་སྣང་ལ་ལྷ་རྣམས་རྔ་རྡུང་བ་ན་རྣམ་པ་འདི་ལྟ་བུར་སྨིན། ཉི་མ་དང་ཟླ་བ་འདི་ལྟ་བུར་འཕྲུལ་ཆེ་བ་མཐུ་ཆེ་བ། ལམ་འདི་ལྟ་བུར་ནི་ཤར། ལམ་འདི་ལྟ་བུར་ནི་ནུབ། ལམ་འདི་ལྟ་བུར་གྱུར་ན་ཉོན་མོངས་པ་དང་། རྣམ་པར་བྱང་བ་བདེ་
བ་རྣམ་པར་སྨིན་པ་འདི་ལྟ་བུར་འགྱུར་རོ་ཞེས་སྟོན་གྱི། དགེ་སྦྱོང་ནི་ཡོན་པོའི་རིག་པས་ལོག་པར་འཚོ་བ་དེ་ལྟ་བུ་ལས་སླར་ལོག་པ་ཡིན་ཏེ། དེ་ནི་འཕགས་པའི་ཚུལ་ཁྲིམས་ཀྱི་ཕུང་པོ་དེ་ལྟ་བུ་དང་ལྡན་པས་ན་ནང་གི་ཁ་ན་མ་ཐོ་བ་མེད་པས་བདེ་བ་སོ་སོར་མྱོང་ངོ་། །དེས་དབང་པོ་ཡུལ་ལས་བཟློག་སྟེ།
གནས་པས་ན་དྲན་པ་ཀུན་བསྲུངས་པའོ། །དྲན་པ་གསལ་བ། དྲན་པ་བསྲུངས་པའི་ཡིད་ཀྱིས་སྙོམས་པའི་གནས་སུ་སྤྱོད་དོ། །དེ་མིག་གིས་གཟུགས་མཐོང་ཡང་མཚན་མར་མི་འཛིན་པ་དང་། འབྲུར་མི་འཛིན་པར་འགྱུར་བ་ནི་གང་གི་ཕྱིར་མིག་གི་དབང་པོའི་སྡོམ་པས་མ་བསྡམས་པས་གནས་
པ་ན་ཆགས་པ་དང་། ཡིད་བློང་བ་དང་། འཇིག་རྟེན་གྱི་སྡིག་པ་མི་དགེ་བའི་ཆོས་ཀྱི་སེམས་རྗེས་སུ་འཇུག་པ་དེ་དག་ལ་སྡོམ་པའི་ཕྱིར་ནན་ཏན་བྱེད་དེ། མིག་གི་དབང་པོ་བསྲུངས་པས་མིག་གི་དབང་པོ་སྡོམ་པར་བྱེད་དོ། །དེ་བཞིན་དུ་རྣ་བས་ནི་སྒྲ་ལ། སྣས་ནི་དྲི་ལ། ལྕེས་ནི་རོ་ལ། ལུས་ཀྱིས་

ནི་རེག་བྱ་ལ། ཡིད་ཀྱིས་ནི་ཆོས་ལ་ཤེས་ཀྱང་མཚན་མར་འཛིན་པར་མི་བྱེད། འབྲུར་འཛིན་པར་མི་བྱེད་དེ་གང་གི་ཕྱིར་ཡིད་ཀྱི་དབང་པོའི་སྡོམ་པས་མ་བསྡམས་པར་སྤྱོད་དེ་ཆགས་པ་དང་། ཡིད་བློང་བ་དང་། འཇིག་རྟེན་གྱི་སྡིག་པ་མི་དགེ་བའི་ཆོས་ཀྱི་རྗེས་སུ་འཇུག་པ་དེ་དག་གིས་སྡིག་པ་
འཐོབ་བོ། །ཡིད་ཀྱིས་བསྡམས་པས་ཡིད་ཀྱི་དབང་པོ་སྡོམ་པར་བྱེད་དོ། །དེ་ལ་འཕགས་པའི་ཚུལ་ཁྲིམས་འདི་དང་ལྡན་པས་ན་དབང་པོ་ཡུལ་ལས་བཟློག་པ་འདིས་ན་ནང་གི་ཁ་ན་མ་ཐོ་བ་མེད་དེ་བདེ་བ་སོ་སོར་མྱོང་ངོ་། །དེ་འོང་བ་དང་། འགྲོ་བ་རབ་ཏུ་ཤེས་ཏེ་གནས་པར་གྱུར་པས་ན་སྣང་བ་དང་།
ཀུན་དུ་སྣང་བ་དང་། བསྐུམ་པ་དང་། བརྐྱང་བ་དང་། སྦྱར་མ་དང་། ཆོས་གོས་དག་དང་། ལྷུང་བཟེད་དག་བཟུང་བ་དང་། འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དང་། མི་ཉལ་བ་དང་། སྨྲ་བ་དང་། ཅང་མི་ཟེར་བ་དང་། གཉིད་ཀྱིས་རྨྱ་བ་དང་། མྱ་ངན་བསལ་བར་བྱེད་པ་དག་ཤེས་ཤིང་
གནས་པར་འགྱུར་རོ། །དེས་འཕགས་པའི་ཚུལ་ཁྲིམས་ཀྱི་ཕུང་པོ་དང་ལྡན་པ་དང་། དབང་པོ་དབེན་པ་དང་། དེས་རབ་ཏུ་དྲན་པ་དང་། ཡང་དག་པར་རབ་ཏུ་ཤེས་པ་དང་ལྡན་པས་ནང་གི་ཁ་ན་མ་ཐོ་བ་མེད་པ་བདེ་བ་ཡང་དག་པར་ཚོར་ཏེ། དེ་ནས་དབེན་པར་གནས་ཏེ། དགོན་པ་དང་། ཤིང་དྲུང་
དང་། ཁྱིམ་སྟོང་པ་དང་། དབེན་པར་གྱུར་པའམ། ཤིང་དྲུང་དུ་གྱུར་པའམ། ཁྱིམ་སྟོང་པར་གྱུར་པ་དག་ཏུ་འདུག་སྟེ། སྐྱིལ་མོ་ཀྲུང་བཅས་ནས། ལུས་དྲང་པོར་བསྲང་སྟེ། དྲན་པ་མངོན་དུ་བཞག་ནས་དེས་འཇིག་རྟེན་གྱི་ཆགས་པ་སྤངས་ཏེ། ཆགས་པ་དང་བྲལ་བའི་སེམས་མང་པོར་སྤྱོད་ཅིང་
ཆགས་སེམས་ཡོངས་སུ་སྦྱོང་ངོ་། །གནོད་སེམས་དང་། རྨུགས་པ་དང་། གཉིད་དང་། དྲེགས་པ་དང་། འགྱོད་པ་དང་། ཐེ་ཚོམ་འཇིག་རྟེན་དུ་སྤངས་པས་རེ་བ་དང་བྲལ། ཐེ་ཚོམ་ལས་བྲལ་བ་ཡིན་ནོ། །དེ་དགེ་བའི་ཆོས་འདི་ལྟ་བུའམ། ཇི་ལྟ་བུ་ཞེས་བྱ་བའི་ཐེ་ཚོམ་གྱི་སེམས་ཡོངས་སུ་
སྦྱོང་ངོ་། །འདི་ལྟ་སྟེ་མ་སྡུག་སྐྱེས་བུ་ཞིག་གིས་སྐྱིན་པོ་བླངས་ཏེ། དེས་དེ་ལས་སུ་བྱ་བ་ལ་སྦྱར་ན་དེས་ལས་དེ་ཡང་འབྱོར་ནས་དེས་དེ་སྐྱིན་པོ་དེ་བསབས་ལ་བུད་མེད་དག་གསོ་བ་ཙམ་གྱི་རང་གི་ནོར་ཀྱང་ཡོད་ནས་དེ་འདི་སྙམ་དུ་སེམས་པར་གྱུར་ཏོ། །བདག་གིས་སྐྱིན་པོ་བླངས་ཏེ་ལས་ལ་སྦྱར་

བས་ན་བདག་གིས་ལས་དེ་འབྱོར་ཏེ་དེས་ན་བདག་གིས་སྐྱིན་པོ་དེ་ཡང་བསབས་ལ་བུད་མེད་དག་གསོ་བ་ཙམ་གྱི་ནོར་ཀྱང་ཡོད་དོ་སྙམ་དུ་གྱུར་ནས་དེ་དེའི་རྒྱུས་བདེ་བ་དང་། ཡིད་དགའ་བར་གྱུར་ཏོ། །འདི་ལྟ་སྟེ། མ་སྡུག་སྐྱེས་བུ་ཞིག་ནད་བུ་ཅན་ཏེ། སྡུག་བསྔལ་ཞིང་ནད་ཚབས་ཆེ་བ་དེ་ཁ་
ཟས་ཟོས་པ་དང་ལུས་ལ་གནོད། སྐོམ་འཐུངས་ན་ནི་ལྟོ་མི་བདེ་བར་འགྱུར་རོ། །དེ་དུས་ཕྱི་ཞིག་ན་བདེ་བ་དང་། ནད་མེད་པ་དང་། སྟོབས་དང་ལྡན་པར་གྱུར་པས་ཁ་ཟས་ཟོས་ན་ནི་ལུས་ལ་ཕན་ལ་སྐོམ་འཐུངས་ན་ནི་ལྟོ་ལ་མི་གནོད་ནས་དེ་འདི་སྙམ་དུ་སེམས་པར་གྱུར་ཏོ། །བདག་སྔོན་ནི་ནད་
བུ་ཅན་སྡུག་བསྔལ་ཞིང་ན་ཚབས་ཆེ་བར་གྱུར་ཏེ། བདག་དེ་བས་ན་ཁ་ཟས་ཟོས་ན་ནི་ལུས་ལ་གནོད། སྐོམ་འཐུངས་ན་ནི་ལྟོ་མི་བདེའོ། །བདག་ད་ལྟར་ནི་བདེ་ཞིང་ནད་མེད་དེ་སྟོབས་དང་ལྡན་པས་ཁ་ཟས་ཟོས་ན་ནི་ལུས་ལ་ཕན་ལ་སྐོམ་འཐུངས་ན་ནི་ལྟོ་ལ་མི་གནོད་དོ་སྙམ་ནས་དེ་དེའི་རྒྱུས་བདེ་བར་གྱུར། ཡིད་
དགའ་བར་གྱུར་ཏོ། །འདི་ལྟ་སྟེ། མ་སྡུག་སྐྱེས་བུ་ཞིག་བྲན་དང་། མངག་གཞུག་པ་དང་། བསྒོ་བ་དང་། སྤྱད་པ་དང་། འདི་ལྟར་རང་ཉམ་དུ་འགྲོར་མེད་པར་གྱུར་པ་དེ་དུས་གཞན་ཞིག་ན་བྲན་མ་ཡིན། མངག་གཞུག་པ་མ་ཡིན། བསྒོ་བ་མ་ཡིན། བཀོལ་བ་མ་ཡིན། འདི་ལྟར་རང་ཉམ་དུ་འགྲོར་ཡོད་
དེ་དེ་འདི་སྙམ་དུ་གྱུར་ཏོ། །བདག་སྔོན་བྲན་དང་། མངག་གཞུག་པ་དང་། བསྒོ་བ་དང་། བཀོལ་བ་དང་། འདི་ལྟར་རང་ཉམ་དུ་འགྲོར་མེད་པར་གྱུར་ཏོ། །བདག་ད་ལྟར་ནི་བྲན་མ་ཡིན། མངག་གཞུག་པ་མ་ཡིན། བཀོལ་བ་མ་ཡིན། འདི་ལྟར་རང་ཉམ་དུ་འགྲོར་ཡོད་དེ། དེ་དེའི་རྒྱུས་བདེ་བར་
གྱུར། ཡིད་དགའ་བར་གྱུར་ཏོ། །འདི་ལྟ་སྟེ། མ་སྡུག་སྐྱེས་བུ་ཞིག་ལག་པ་ཕྱིང་ཀ་ལོག་ཏུ་དམ་དུ་བཅིངས་པས་བཅིངས་པར་གྱུར་ནས། དེ་དེ་ལས་ཐར་ནས་བཀྲ་ཤིས་པ་བདེ་བ་མི་འགོད་པ་སྟེ་དེ་འདི་སྙམ་དུ་གྱུར་ཏོ། །བདག་སྔོན་ནི་ལག་པ་ཕྱིང་ཀ་ལོག་ཏུ་བཅིངས་པས་བཅིངས་པར་
གྱུར། བདག་ད་ལྟར་ནི་དེ་ལས་ཐར་བས་བཀྲ་ཤིས་པ་དང་། བདེ་བ་དང་། མ་གོད་པ་སྟེ། དེ་དེའི་རྒྱུས་ཡིད་དགའ་བར་གྱུར་ཏོ། །འདི་ལྟ་སྟེ། མ་སྡུག་སྐྱེས་བུ་ཞིག་འཇིགས་པ་ལས་ནི་བདེ་བར་གྱུར། ལོ་ཉེས་པ་ལས་ནི་ལོ་ལེགས་པར་གྱུར་ནས་དེ་འདི་སྙམ་དུ་གྱུར་ཏོ། །བདག་ནི་འཇིགས་

པ་ལས་བདེ་བར་གྱུར། ལོ་ཉེས་པ་ལས་ནི་ལོ་ལེགས་པར་གྱུར་ཏེ། དེ་དེའི་རྒྱུས་བདེ་བར་གྱུར། ཡིད་དགའ་བར་གྱུར་ཏོ། །དེ་དེ་བཞིན་དུ་ཇི་ལྟར་བགྱིས་པ་དང་། ཇི་ལྟར་ནད་དང་། ཇི་ལྟར་བྲན་དང་། ཇི་ལྟར་བཅིངས་པ་དང་། ཇི་ལྟར་འཇིགས་པ་དེ་བཞིན་དུ་དེས་ངེས་པར་སྒྲིབ་པ་འདི་ལྔ་ལས་
བདག་ཉིད་བྲལ་བར་མཐོང་ངོ་། །དེས་སེམས་ཅན་ལ་ཉེ་བར་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ། གནོད་པའི་ཕྱོགས་མྱ་ངན་ལས་འདའ་བ་དང་། མི་མཐུན་པའི་སྒྲིབ་པ་ལྔ་སྤངས་ཏེ། འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་དབེན་པ། རྟོག་པ་དང་
བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བའི་བསམ་གཏན་དང་པོ་མངོན་དུ་བསྒྲུབས་ནས་གནས་སོ། །དེས་ལུས་འདི་ཉིད་ལས་དབེན་པ་ལས་སྐྱེས་པ་དང་། དགའ་བ་དང་བདེ་བས་མངོན་པར་རླན་ཏོ། །རབ་ཏུ་རླན་ནོ། །ཀུན་དུ་ཚིམ་མོ། །ཀུན་
དུ་ཁྱབ་སྟེ། འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་། བདེ་བས་ལུས་ཐམས་ཅད་དུ་ཁྱབ་པར་མ་གྱུར་པའམ། མ་ཁྱབ་པར་གྱུར་པ་ཅུང་ཟད་ཀྱང་མེད་དོ། །འདི་ལྟ་སྟེ། བྱི་བདར་བའམ། བྱི་བདར་བའི་སློབ་མ་མཁས་པ་ཡང་རུང་སྟེ། དེས་ཁར་ཕོར་རམ། གཞོང་
བུའམ། ཉ་ཕྱིས་ཀྱི་ནང་དུ་ཡང་རུང་། བཀྲུ་བའི་ཕྱེ་མ་ཞིབ་མོ་བླུགས་ཏེ། ཆུས་བཏབ་ཅིང་བཏབ་ནས་གཤེར་བར་བྱས་ཏེ། བཀྲུ་བའི་གོང་བུ་དེ་ཡང་སྣུམ་པ་དང་། སྣུམ་པར་གྱུར་པ་དང་། སྣུམ་པས་ཁྱབ་པ་དང་། གསལ་བར་ནང་དང་ཕྱིའི་སྣུམ་པས་སོ་སོར་མི་འགྱེས་མི་ཟག་གོ། །དེ་ལྟར་དེ་
བཞིན་དུ་ལུས་འདི་ལ་དབེན་པ་ལས་སྐྱེས་པའི་དགའ་བ་དང་། བདེ་བས་མངོན་དུ་རླན། རབ་ཏུ་རླན། ཀུན་དུ་ཚིམ། ཀུན་དུ་ཁྱབ་སྟེ། དེའི་ལུས་ཐམས་ཅད་དུ་དབེན་པ་ལས་སྐྱེས་པའི་དགའ་བ་དང་། བདེ་བས་ཅུང་ཟད་ཀྱང་མ་ཁྱབ་པར་གྱུར་པ་མེད་དོ། །དེ་རྣམ་པར་རྟོག་པ་དང་། རྣམ་པར་
དཔྱོད་པ་ཞི་བར་བྱ་བའི་ཕྱིར་ནང་གི་སེམས་ལ་རབ་ཏུ་དགའ་བ་གཅིག་ཏུ་དམིགས་པས་རྣམ་པར་མི་རྟོག་རྣམ་པར་མི་དཔྱོད་པའི་ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བའི་བསམ་གཏན་གཉིས་པ་མངོན་དུ་བསྒྲུབས་ཏེ་གནས་སོ། །དེའི་ལུས་འདི་ཉིད་ལ་ཏིང་ངེ་འཛིན་ལས་སྐྱེས་པའི་

དགའ་བ་དང་བདེ་བས་མངོན་པར་རླན། རབ་ཏུ་རླན། ཀུན་དུ་ཚིམ། ཀུན་དུ་ཁྱབ་བོ། །འདི་ལྟ་སྟེ། དེའི་ལུས་ཐམས་ཅད་ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེ་འདི་ལྟ་སྟེ། མ་སྡུག་རིའི་སྤྱི་བོར་
བཀོད་པའི་མཚོ་མཚེའུ་དེ་ལ་ཤར་ཕྱོགས་ནས་ཆུ་མི་བབ། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན་ཏེ། བྱང་ཕྱོགས་ནས་ཆུ་འབབ་པར་ཀྱང་མི་འགྱུར། དེར་དུས་དུས་སུ་ཡང་དག་པར་ཆར་པ་ཡང་མི་འབབ་སྟེ། བཀོད་མའི་ཆུ་དེ་ལས་གཞན་ནི་མ་གཏོགས་ཏེ་ཆུའི་རྫིང་གི་ཆུའི་བུ་གུ་
ཆེན་པོ་ནས་ཆུའི་ཕུང་པོ་ཆེན་པོ་འབྱུང་བས་ཆུའི་རྫིང་བུ་དེ་ཐམས་ཅད་ཆུ་གྲང་མོས་མངོན་པར་རླན། རབ་ཏུ་རླན། ཀུན་དུ་ཚིམ། ཀུན་དུ་ཁྱབ་སྟེ་འདི་ལྟ་སྟེ། ཆུ་གྲང་མོས་ཆུའི་རྫིང་བུ་ཐམས་ཅད་དུ་མ་ཁྱབ་པར་གྱུར་པ་ནི་ཅུང་ཟད་ཀྱང་མེད་དེ། དེ་དེ་ལྟར་འདི་བཞིན་དུ་དེ་ལུས་འདི་ཉིད་ལ་ཏིང་ངེ་འཛིན་
ལས་སྐྱེས་པའི་དགའ་བ་དང་བདེ་བས་མངོན་པར་རླན། རབ་ཏུ་རླན། ཀུན་དུ་ཚིམ། ཀུན་དུ་ཁྱབ་སྟེ། འདི་ལྟ་སྟེ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་ལུས་ཐམས་ཅད་དུ་མ་ཁྱབ་པ་དང་། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེས་དགའ་བ་སྤངས་ནས་བཏང་སྙོམས་
དང་། དྲན་པ་དང་། རབ་ཏུ་ཤེས་པ་དང་། བདེ་བས་ལུས་ལ་སོ་སོར་མྱོང་བར་གནས་ཏེ། གང་འཕགས་པ་དག་གིས་གསུངས་པའི་དྲན་པ་དང་ལྡན་པའི་བཏང་སྙོམས་པར་བྱས་ཏེ་བདེ་བར་གནས་སོ་ཞེས་བྱ་བའི་བསམ་གཏན་གསུམ་པ་མངོན་དུ་བསྒྲུབས་ཏེ་གནས་སོ། །དེའི་ལུས་འདི་ལ་དགའ་བ་
མེད་པའི་བདེ་བས་མངོན་པར་རླན། རབ་ཏུ་རླན། ཀུན་དུ་ཚིམ། ཀུན་དུ་ཁྱབ་བོ། །འདི་ལྟ་སྟེ། དགའ་བ་མེད་པའི་བདེ་བས་ལུས་ཐམས་ཅད་དུ་ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེ་འདི་ལྟ་སྟེ། མེ་ཏོག་ཨུཏྤ་ལའམ། པད་མོའམ། ཀུ་མུ་དའམ། པུན་ད་རི་ཀ་དག་ཆུ་ལས་སྐྱེས་
ཏེ། ཆུར་འཕེལ་ཞིང་རྩ་བ་ཆུར་ནུབ་ནས་གནས་སོ། །དེ་དག་ཇི་ཙམ་རྩ་བ་ནས་རྩེ་མོའི་བར་དུ་འདི་ལྟ་སྟེ། བསིལ་བའི་ཆུས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེ་ལྟར་དེ་བཞིན་དུ་ལུས་འདི་ཉིད་ལ་དགའ་བ་མེད་པའི་བདེ་བས་མངོན་པར་རླན། རབ་ཏུ་རླན།

ཀུན་དུ་ཚིམ། ཀུན་དུ་ཁྱབ་པོ། །འདི་ལྟ་སྟེ། དགའ་བ་མེད་པའི་བདེ་བས་ལུས་ཐམས་ཅད་དུ་མ་ཁྱབ་པ་དང་། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེས་བདེ་བ་ཡང་སྤངས། སྡུག་བསྔལ་ཡང་སྤངས་ཏེ། ཡིད་བདེ་བ་དང་ཡིད་མི་བདེ་བ་སྔར་སྤངས་པས་ན་སྡུག་བསྔལ་ཀྱང་མ་ཡིན་བདེ་བ་ཡང་མ་
ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་མངོན་པར་བསྒྲུབས་ནས་གནས་སོ། །དེའི་ལུས་འདི་ཉིད་ལ་ཀུན་དུ་དག་པ་ཡོངས་སུ་དཀར་བ་ལ་ཞུགས་ནས་མོས་པར་བྱས་ནས་ཁྱབ་པར་མངོན་དུ་བསྒྲུབས་ཏེ་གནས་སོ། །འདི་ལྟ་སྟེ། ཁྱིམ་བདག་གམ་ཁྱིམ་བདག་གི་བུ་ཡང་རུང་
བརྒྱད་ཀྱིས་བཏགས་སམ། དགུར་བཏགས་པའི་གོས་ཀྱིས་དེའི་མགོ་ནས་ལག་པ་དང་། རྐང་པ་ཡན་ཆད་དུ་དཀྲིས་ཏེ་དེ་མགོ་བོ་ནས་རྐང་པའི་བར་དུའོ། །འདི་ལྟ་སྟེ། ཀུན་དུ་དག་པའི་རས་ཡོངས་སུ་དཀར་བས་ལུས་ཐམས་ཅད་དུ་མ་ཁྱབ་ཅིང་མ་ཁྱབ་པར་གྱུར་པ་ནི་ཅུང་ཟད་ཀྱང་མེད་དེ། དེ་ལྟར་
དེ་བཞིན་ལུས་འདི་ཉིད་ལ་ཀུན་དུ་དག་པའི་སེམས་ཡོངས་སུ་བྱང་བ་ལ་མོས་ཁྱབ་པར་མངོན་དུ་བསྒྲུབས་ནས་གནས་སོ། །འདི་ལྟ་སྟེ། ཀུན་དུ་དགའ་བའི་སེམས་ཡོངས་སུ་བྱང་བས་ལུས་ཐམས་ཅད་དུ་མ་ཁྱབ་པ་དང་མ་ཁྱབ་པར་གྱུར་པ་ནི་ཅུང་ཟད་ཀྱང་མེད་དོ། །མ་སྡུག་ནམ་འཕགས་པ་ཉན་ཐོས་
པ་དག་གིས་བདེ་བ་ཡང་སྤངས་སྡུག་བསྔལ་ཡང་སྤངས་ཏེ། ཡིད་བདེ་བ་དང་། ཡིད་མི་བདེ་བ་གཉིས་སྔར་ནུབ་པས་བདེ་བ་ཡང་མ་ཡིན་སྡུག་བསྔལ་ཀྱང་མ་ཡིན་པ། བཏང་སྙོམས་དང་དྲན་པ་ཀུན་དུ་དག་སྟེ། བསམ་གཏན་བཞི་པ་མངོན་དུ་བསྒྲུབས་ཏེ་གནས་སོ། །དེའི་སེམས་དེ་ནི་དེའི་ཚེ་ན་
མི་མཐོ་མི་དམའ་བར་གྱུར་ཏོ། །མི་མཐོ་མི་དམའ་བར་གནས་པས་མི་གཡོ་བ་ཐོབ་བོ། །འདི་ལྟ་སྟེ། ཁང་པ་བརྩེགས་པའམ། ཁང་ཆེན་བརྩེགས་པར་ཡུངས་མར་གྱི་མེ་མར་བུས་ཏེ། མེ་ལྕེ་དེ་ལ་རླུང་དང་། བྱ་དང་། མི་དང་། མི་མ་ཡིན་པ་རྣམས་ཀྱིས་མ་བསྒུལ་མ་བསྐྱོད་པ་དེའི་དུས་ན་
མི་མཐོ་མི་དམའ་བར་གྱུར་ཏེ། མི་མཐོ་མི་དམའ་བར་གནས་པས་མི་གཡོ་བར་འབར་རོ། །དེ་ལྟར་དེ་བཞིན་དུ། མ་སྡུག་གང་གི་ཚེ་འཕགས་པ་ཉན་ཐོས་དག་གིས་བདེ་བ་ཡང་སྤངས། སྡུག་བསྔལ་ཡང་སྤངས་ཏེ། ཡིད་བདེ་བ་དང་ཡིད་མི་བདེ་བ་གཉི་ག་ནི་སྔར་ནུབ་པས་སྡུག་བསྔལ་ཀྱང་

མ་ཡིན་བདེ་བ་ཡང་མ་ཡིན་པ་བཏང་སྙོམས་དང་། དྲན་པ་ཀུན་དུ་དག་སྟེ། བསམ་གཏན་བཞི་པ་མངོན་དུ་བསྒྲུབས་ཏེ་གནས་སོ། །དེའི་སེམས་དེ་ནི་དེའི་དུས་ན་མི་མཐོ་མི་དམའ་བར་གྱུར་ཏེ། མི་མཐོ་མི་དམའ་བར་གནས་པས་མི་གཡོ་བ་ཐོབ་སྟེ་དེ་འདི་སྙམ་དུ་གྱུར་ཏོ། །བདག་
གིས་ལུས་འདི་ནི་གཟུགས་ཅན་ཆེ་བ། འབྱུང་བ་ཆེན་པོ་བཞི་སྟེ། འདི་ལ་རྣམ་པར་ཤེས་པ་གནས་སོ། །འདི་ལ་རྟེན་ཏོ། །འདི་ནང་དུ་ཞུགས་སོ། །ཅི་ནས་བདག་གིས་ལུས་ལས་ཡིད་བསྐྱོད་དེ་ལུས་གཞན་གཟུགས་ཅན་ཡིད་ལས་བྱུང་བ་མ་གོད་པ་དབང་པོ་རྣམས་མ་ཉམས་པ་ཞིག་བསྒྲུབ་
བོ་སྙམ་བསམས་ནས། དེས་ལུས་དེ་ལས་ཡིད་བསྐྱོད་དེ། ལུས་གཞན་གཟུགས་ཅན་ཡིད་ལས་བྱུང་བ་མ་གོད་པ་དབང་པོ་རྣམས་མ་ཉམས་པ་མངོན་དུ་སྒྲུབ་པར་བྱེད་དོ། །དེ་འདི་ལྟ་སྟེ། མ་སྡུག་བཻ་ཌཱུརྱའི་ནོར་བུ་ཟུར་བརྒྱད་པ་རང་བཞིན་བཟང་བ་གསལ་ཞིང་རྣམ་པར་དང་བ་སྟེ། དྲི་མ་མེད་པ་ལ་ཚོན་སྣ་
བཞི་པའི་སྐུད་པས་བཏགས་ཏེ། སྔོན་པོ་དང་། སེར་པོ་དང་། དམར་པོ་དང་། རྨའོ། །དེ་ལ་མིག་དང་ལྡན་པའི་སྐྱེས་བུས་མཐོང་ན་འདི་ནི་སྐུད་པའོ། །འདི་ནི་ནོར་བུ་སྟེ་ནོར་བུ་སྐུད་པ་ལ་བརྒྱུས་པར་ཤེས་སོ། །དེ་ལྟར་དེ་བཞིན་དུ་དེས་ལུས་དེ་ལས་ཡིད་བསྐྱོད་དེ། དེ་ལུས་གཞན་གཟུགས་ཅན་ཡིད་ལས་བྱུང་
བ་མ་གོད་པ་དབང་པོ་རྣམས་མ་ཉམས་པ་མངོན་དུ་སྒྲུབ་པར་བྱེད་དོ། །དེ་འདི་ལྟ་སྟེ། མ་སྡུག་སྐྱེས་བུ་ཞིག་གྲེས་མའི་བམ་པོ་ལས་ཉག་མ་གཅིག་དྲངས་པ་དེ་མིག་དང་ལྡན་པའི་སྐྱེས་བུས་མཐོང་ན་འདི་ནི་གྲེས་མའོ། །འདི་ནི་ཉག་མར་དྲངས་པ་ཡིན་པར་ཤེས་སོ། །དེ་ལྟར་དེ་བཞིན་དུ་དེས་ལུས་
དེ་ལས་ཡིད་བསྐྱོད་དེ། ལུས་གཞན་གཟུགས་ཅན་ཡིད་ལས་བྱུང་བ་མ་གོད་པ་དབང་པོ་རྣམས་མ་ཉམས་པ་མངོན་དུ་སྒྲུབ་པར་བྱེད་དོ། །དེ་འདི་ལྟ་སྟེ། མ་སྡུག་སྐྱེས་བུ་ཞིག་གཟེབ་ཀྱི་ནང་ནས་སྦྲུལ་གཅིག་ཕྱིར་ཕྱུང་བ་དེ་མིག་དང་ལྡན་པའི་སྐྱེས་བུ་དེས་མཐོང་ན་འདི་ནི་གཟེབ་བོ། །འདི་ནི་སྦྲུལ་
ཏེ་གཟེབ་ནས་སྦྲུལ་ཕྱུང་བར་ཤེས་སོ། །དེ་ལྟར་དེ་བཞིན་དུ་དེས་ལུས་དེ་ལས་ཡིད་བསྐྱོད་དེ། དེ་ལུས་གཞན་གཟུགས་ཅན་ཡིད་ལས་བྱུང་བ་མ་གོད་པ་དབང་པོ་རྣམས་མ་ཉམས་པར་མངོན་དུ་སྒྲུབ་པར་བྱེད་དོ། །དེ་འདི་ལྟ་སྟེ། མ་སྡུག་སྐྱེས་བུ་ཞིག་རལ་གྲི་ཤུབས་ནས་རལ་གྲི་འབྱིན་པ་དེ་ལ་

མིག་དང་ལྡན་པའི་སྐྱེས་བུས་མཐོང་ན་འདི་ནི་རལ་གྲིའི་ཤུབས་སོ། །འདི་ནི་རལ་གྲིའོ། །འདི་ནི་རལ་གྲི་ཤུབས་ནས་ཕྱུང་བར་ཤེས་སོ། །དེ་ལྟར་དེ་བཞིན་དུ་ལུས་དེ་ལས་དེས་ཡིད་བསྐྱོད་དེ། ལུས་གཞན་གཟུགས་ཅན་ཡིད་ལས་བྱུང་བ་མ་གོད་པ་དབང་པོ་རྣམས་མ་ཉམས་པ་མངོན་དུ་སྒྲུབ་
པར་བྱེད་དོ། །དེས་འདི་བཞིན་མ་གཡེངས་པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པའི་ཉེ་བའི་ཉོན་མོངས་པ་ལས་བྲལ་བ་དྲང་པོར་གྱུར་ཏེ་ལས་སུ་རུང་བར་གནས་པས་མི་གཡོ་བ་འཐོབ་སྟེ། རྫུ་འཕྲུལ་གྱི་ཡུལ་ལ་ཡེ་ཤེས་མངོན་པར་བྱང་བ་དང་། མངོན་པར་ཤེས་པ་ལ་སེམས་
མངོན་པར་འཇུག་གོ། །དེས་རྣམ་པ་དུ་མའི་རྫུ་འཕྲུལ་གྱི་ཡུལ་སོ་སོར་མྱོང་བ་ནི་འདི་ལྟ་སྟེ་གཅིག་ལས་མང་པོར་འགྱུར་རོ། །མང་པོ་ལས་གཅིག་ཏུ་འགྱུར་རོ། །མངོན་པར་སྣང་བ་ལས་མི་སྣང་བའོ། །ཡེ་ཤེས་ཀྱི་སྣང་བ་སོ་སོར་མྱོང་བར་འགྱུར་ཏེ། རྩིག་པ་ལས་ཐལ་བ་དང་། རི་ལས་
ཐལ་བ་དང་། ར་བ་ལས་ཐལ་ཞིང་མི་ཆགས་པར་ལུས་ཀྱིས་འགྲོ་བ་ནི་འདི་ལྟ་སྟེ། ནམ་མཁའ་དང་འདྲ་བའོ། །ས་ལ་ནུབ་ཅིང་འབྱུང་བ་ནི་འདི་ལྟ་སྟེ། ཆུ་བཞིན་ནོ། །ཆུ་རྒྱུན་གྱི་སྟེང་ནས་འགྲོ་བ་ནི་འདི་ལྟ་སྟེ། ས་བཞིན་ནོ། །ནམ་མཁའ་ལས་སྐྱིལ་མོ་ཀྲུང་བཅས་ཏེ་འགྲོ་བ་ནི་འདི་ལྟ་སྟེ། བྱ་
གཤོག་པ་ཅན་བཞིན་ནོ། །ཉི་མ་དང་ཟླ་བ་འདི་གཉིས་འདི་ལྟ་བུར་མཐུ་ཆེ་བ་རྫུ་འཕྲུལ་ཆེ་བ་ཡང་ལག་པས་རེག་ཀུན་དུ་རེག་པར་བྱེད་པ་ཚངས་པའི་འཇིག་རྟེན་གྱི་བར་དུ་ལུས་ཀྱི་དབང་བྱེད་དོ། །དེ་འདི་ལྟ་སྟེ། གསེར་མགར་མཁས་པའམ། གསེར་མགར་གྱི་སློབ་མ་མཁས་པ་ཡང་རུང་།
གསེར་ཤིན་ཏུ་སྦྱངས་པར་ཤེས་ནས་ཅི་དང་ཅི་འདོད་པ་དེ་དང་དེའི་རྐྱེན་གྱིས་ཁྱད་པར་དུ་བྱེད་པ་ནི་དེ་སྟེ། གླེགས་བམ་མམ། དེ་སྟེ་རྣ་ཆའམ། དེ་སྟེ་མགྲིན་རྒྱན་ཏམ། དེ་སྟེ་ལག་གདུབ་བམ། དེ་སྟེ་རྐང་གདུབ་བམ། སོར་གདུབ་བམ། དངུལ་དང་གསེར་གྱི་ཕྲེང་བར་ཡང་རུང་མྱུར་ཞིང་རིངས་
པར་བྱེད་དོ། །དེ་ལྟ་དེ་བཞིན་དུ་འདིས་ཀྱང་མཉམ་པར་གཞག་པའི་སེམས་ཀུན་དུ་དག་པས་ཡོངས་སུ་བྱང་བ་ཉེས་པ་མེད་པ་ཉེ་བའི་ཉོན་མོངས་པ་ལས་བྲལ་བ་དྲང་པོར་གྱུར་པ་ལས་སུ་རུང་བར་གནས་པར་མི་གཡོ་བ་ཐོབ་སྟེ། རྫུ་འཕྲུལ་གྱི་ཡུལ་ལ་ཡེ་ཤེས་མངོན་པར་བྱ་བའི་ཕྱིར་

མངོན་པར་ཤེས་པ་དག་ལ་སེམས་མངོན་པར་ཞུགས་སོ། །དེ་འདི་ལྟ་སྟེ། གཅིག་ལས་མང་པོར་གྱུར་པས་ན། སྔ་མ་བཞིན་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་དུ་བྱེད་དོ། །འདི་ལྟ་སྟེ། རྫ་མཁན་ནམ་རྫ་མཁན་གྱི་སློབ་མ་མཁས་པ་ཡང་རུང་། འཇིམ་
པའི་གོང་བུ་ཤིན་ཏུ་སྦྱངས་པར་ཤེས་ནས་ཅི་དང་ཇི་ལྟ་བུར་འདོད་པའི་སྣོད་ཀྱི་ཁྱད་པར་དེ་དང་དེར་བྱེད་པ་ནི་མྱུར་བ་མྱུར་བར་བྱེད་དེ། དེ་ལྟར་དེ་བཞིན་དུ་དེས་འདི་བཞིན་མཉམ་པར་གཞག་པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ་ཉེ་བའི་ཉོན་མོངས་པ་ལས་བྲལ་བ་ནས་སྔ་
མ་བཞིན་ཏེ་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་བྱེད་དོ། །དེ་འདི་ལྟ་སྟེ་སོ་མཁན་མཁས་པའམ། སོ་མཁན་གྱི་སློབ་མ་མཁས་པ་ཡང་རུང་། སོ་ཤིན་ཏུ་སྦྱངས་པར་ཤེས་ནས་ཅི་དང་ཇི་ལྟ་བུར་འདོད་པའི་གཟུགས་ཀྱི་ཁྱད་པར་དེ་དང་དེར་བྱེད་དེ་མྱུར་ཞིང་རིངས་པར་མངོན་པར་བྱེད་དོ། །
དེ་ལྟར་དེ་བཞིན་དུ་དེས་འདི་བཞིན་དུ་མཉམ་པར་གཞག་པའི་སེམས་ཀུན་དུ་དག་པ་ཡོངས་སུ་བྱང་བ་ནས། སྔ་མ་བཞིན་ཏེ་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་དུ་བྱེད་དོ། །དེས་འདི་བཞིན་མཉམ་པར་གཞག་པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ་ཉེ་བའི་ཉོན་
མོངས་པ་ལས་བྲལ་བ་དྲང་པོར་གྱུར་ཅིང་། ལས་སུ་རུང་བར་གནས་པས་མི་གཡོ་བ་ཐོབ་སྟེ། འཕྲུལ་གྱི་རྣ་བ་ལ་ཡེ་ཤེས་མངོན་པར་བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་འཇུག་གོ། །དེས་འཕྲུལ་གྱི་རྣ་བ་རྣམ་པར་དག་པ་མི་ལས་འདས་པས་སྒྲ་གཉིས་ཐོས་པ་ནི་མི་དང་མི་མ་
ཡིན་པའི་དང་རིང་བའི་དང་ཉེ་བའོ། །དེ་འདི་ལྟ་སྟེ། དུང་འབུད་པའི་སྐྱེས་བུས་རི་མཐོན་པོའི་རྩེ་མོར་འཛེགས་ཏེ། མཚན་མོ་ནམ་ཕྱེད་ཀྱི་དུས་སུ་དུང་བུས་པ་དེའི་སྒྲས་སོ་སོའི་ཕྱོགས་སུ་ཁྱབ་པར་གྲགས་སོ། །དེ་ལྟར་དེ་བཞིན་དུ་དེས་འདི་བཞིན་དུ་མཉམ་པར་གཞག་པའི་སེམས་ཀུན་དུ་དག་པ།
ཡོངས་སུ་བྱང་བ། ཉེས་པ་མེད་པ་ཉེ་བའི་ཉོན་མོངས་པ་ལས་བྲལ་བ་དྲང་པོར་གྱུར་ཅིང་ལས་སུ་རུང་བར་གནས་པས་མི་གཡོ་བ་ཐོབ་སྟེ། འཕྲུལ་གྱི་རྣ་བ་ལ་ཡེ་ཤེས་མངོན་པར་བྱ་བའི་ཕྱིར་མངོན་པར་ཤེས་པ་དེ་དག་ལ་སེམས་མངོན་པར་འཇུག་གོ། །དེས་འཕྲུལ་གྱི་རྣ་བ་རྣམ་པར་དག་པ་མི་ལས་

འདས་པས་སྒྲ་གཉིས་ཐོས་ཏེ། མི་དང་མི་མ་ཡིན་པའི་དང་། རིང་བའི་དང་ཉེ་བའོ། །དེས་འདི་བཞིན་མཉམ་པར་གཞག་པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ་ཉེ་བའི་ཉོན་མོངས་པ་ལས་བྲལ་བ་དྲང་པོར་གྱུར་ཅིང་ལས་སུ་རུང་བར་གནས་པས་མི་གཡོ་བ་ཐོབ་སྟེ།
སེམས་ཀྱི་རྣམ་གྲངས་ལ་ཡེ་ཤེས་མངོན་པར་བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་འཇུག་གོ། །སེམས་ཅན་ཕ་རོལ་དང་། གང་ཟག་ཕ་རོལ་དག་ནི་རྣམ་པར་བརྟགས་པ་དང་། རྣམ་པར་དཔྱད་པའི་ཡིད་ཇི་ལྟར་གྱུར་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་
ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་ཞེས་ཇི་ལྟ་བུ་ཉིད་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་ཞེས་ཇི་ལྟ་བུ་ཉིད་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་
དང་བཅས་པ་དང་། གཏི་མུག་དང་བྲལ་བ་དང་། གཡེང་བ་དང་། མི་གཡེང་བ་དང་། ཞུམ་པ་དང་། རབ་ཏུ་འཛིན་པ་དང་། འཕྱར་བ་དང་། མ་འཕྱར་བ་དང་། ཉེ་བར་ཞི་བ་དང་། ཉེ་བར་མ་ཞི་བ་དང་། མཉམ་པར་གཞག་པ་དང་། མཉམ་པར་མ་གཞག་པ་དང་། མ་བསྒོམས་པ་དང་། བསྒོམས་
པ་དང་། མ་གྲོལ་བའི་སེམས་ལ་མ་གྲོལ་བའི་སེམས་སོ་ཞེས་ཇི་ལྟ་བུ་ཉིད་རབ་ཏུ་ཤེས་སོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་ཞེས་ཇི་ལྟ་བུ་ཉིད་རབ་ཏུ་ཤེས་སོ། །དེ་འདི་ལྟ་སྟེ། མིག་དང་ལྡན་པའི་སྐྱེས་བུས་ཡོངས་སུ་དག་པའི་མེ་ལོང་གི་དཀྱིལ་འཁོར་བཟུང་
སྟེ། བདག་གི་བཞིན་གྱི་མཚན་མ་རྟོག་གོ། །དེ་ལྟར་འདི་བཞིན་དེས་མཉམ་པར་གཞག་པའི་སེམས་ཀུན་དུ་དག་པ། ཡོངས་སུ་བྱང་བ་ཉེས་པ་མེད་པ་ཉེ་བའི་ཉོན་མོངས་པ་ལས་བྲལ་བ་དྲང་པོར་གྱུར་ཅིང་ལས་སུ་རུང་བར་གནས་པས་མི་གཡོ་བ་ཐོབ་སྟེ་སེམས་ཀྱི་རྣམ་གྲངས་ཡེ་ཤེས་མངོན་པར་ཤེས་པར་
བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་འཇུག་པ་ནས་སྔ་མ་བཞིན་ཏེ། ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་ཞེས་ཇི་ལྟ་བུ་ཉིད་རབ་ཏུ་ཤེས་པའི་བར་དུ་སྟེ། འདི་ནི་རྐང་པ་ཞེས་བྱའོ། །རིག་པ་གང་ཞེ་ན། དེས་འདི་བཞིན་མཉམ་པར་གཞག་

པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ། ཉེ་བའི་ཉོན་མོངས་པ་ལས་ཀྱང་བྲལ་བ་དྲང་པོར་གྱུར་ཅིང་ལས་སུ་རུང་བར་གནས་པས་མི་གཡོ་བ་ཐོབ་སྟེ། སྔོན་གྱི་གནས་ལ་རྗེས་སུ་དྲན་པའི་ཡེ་ཤེས་མངོན་པར་བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་
འཇུག་སྟེ། དེས་རྣམ་པ་དུ་མའི་སྔོན་གྱི་གནས་ལ་རྗེས་སུ་དྲན་པ་ནི་འདི་ལྟ་སྟེ། སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱད་
དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དུ་མ་དང་། འཇིག་པའི་བསྐལ་པ་དང་། འབྱུང་བའི་བསྐལ་པ་དང་། འཇིག་པ་དང་འབྱུང་བའི་བསྐལ་པ་དང་། འཇིག་པའི་བསྐལ་པ་དུ་མ་དང་། འབྱུང་བའི་བསྐལ་པ་དུ་མ་དང་། འཇིག་པ་དང་འབྱུང་བའི་བསྐལ་པ་དུ་མ་ཡང་རྗེས་སུ་དྲན་ནོ། །སྐྱེ་བའི་
སེམས་ཅན་དེ་དག་ནི་འདི་ཞེས་བྱ་སྟེ། བདག་ཀྱང་དེ་ན་མིང་འདི་ཞེས་བྱ། རིགས་ནི་འདིའོ། །རུས་ནི་འདིའོ། །ཁ་ཟས་ནི་འདི་ལྟ་བུའོ། །བདེ་བ་དང་། སྡུག་བསྔལ་འདི་ལྟ་བུ་ཡང་སོ་སོར་མྱོང་སྟེ། ཚེ་འདི་ལྟ་བུར་རིང་། འདི་ལྟ་བུར་རིང་དུ་གནས་ཏེ། ཚེའི་མཐའ་ནི་འདི་ཙམ་དུ་གྱུར་ནས་དེ་
ནས་བདག་ཤི་འཕོས་ཏེ་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ཏེ་ཆེ་གེ་མོ་ཞིག་ཏུ་སྐྱེས་ཏེ། དེ་ནས་ཀྱང་ཤི་འཕོས་ཏེ་འདིར་སྐྱེས་སོ་ཞེས་དབྱིབས་དང་། གནས་ཀྱི་གཏན་ཚིགས་སུ་བཅས་པ་རྣམ་པ་དུ་མའི་སྔོན་གྱི་གནས་རྗེས་སུ་དྲན་ནོ། །དེ་འདི་ལྟ་སྟེ། སྐྱེས་བུ་ཞིག་གྲོང་ནས་གྲོང་
དུ་འགྲོའོ། །གྲོང་དེ་ནས་ཡང་གཞན་དུ་སོང་བ་དང་། དེ་འདི་སྙམ་དུ་གྱུར་ཏོ། །བདག་ནི་ཆེ་གེ་མོ་ཞིག་གི་གྲོང་ནས་ཆེ་གེ་མོ་ཞིག་གི་གྲོང་དུ་འགྲོ་སྟེ། དེ་ནས་ཡང་ཆེ་གེ་མོ་ཞིག་ཏུ་འགྲོའོ། །དེ་ནས་གྲོང་འདིར་ཕྱིན་ཏོ། །དེ་ལྟར་འདི་བཞིན་དུ་དེས་འདི་བཞིན་མཉམ་པར་གཞག་པའི་སེམས་ཀུན་དུ་དག་
པ། ཡོངས་སུ་བྱང་བ། ཉེས་པ་མེད་པ། ཉེ་བའི་ཉོན་མོངས་པ་དང་བྲལ་བ་དྲང་པོར་གྱུར་ཅིང་ལས་སུ་རུང་བར་གནས་པས་མི་གཡོ་བ་ཐོབ་སྟེ། སྔོན་གྱི་གནས་ལ་རྗེས་སུ་དྲན་པའི་ཡེ་ཤེས་མངོན་པར་བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་འཇུག་གོ། །དེས་རྣམ་པ་དུ་མའི་སྔོན་གྱི་

གནས་ལ་རྗེས་སུ་དྲན་ཏེ། འདི་ལྟ་སྟེ། གཅིག་ཅེས་བྱ་བ་ནས་སྔ་མ་བཞིན་ཏེ། དབྱིབས་དང་གནས་ཀྱི་གཏན་ཚིགས་སུ་བཅས་ཏེ་རྣམ་པ་དུ་མའི་སྔོན་གྱི་གནས་རྗེས་སུ་དྲན་པའི་བར་དུའོ། །དེས་དེ་བཞིན་དུ་མཉམ་པར་གཞག་པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ་
ཉེ་བའི་ཉོན་མོངས་པ་ལས་བྲལ་བ་དྲང་པོར་གྱུར་ཏེ། ལས་སུ་རུང་བར་གནས་པས་མི་གཡོ་བ་ཐོབ་སྟེ། འཆི་འཕོ་དང་སྐྱེ་བ་ཤེས་པ་མངོན་པར་བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་འཇུག་གོ། །དེས་འཕྲུལ་གྱི་མིག་རྣམ་པར་དག་པ་མི་ལས་འདས་པས་སེམས་ཅན་རྣམས་འཆི་
བ་དང་། སྐྱེ་བ་དང་། ཁ་དོག་སྡུག་པ་དང་། ཁ་དོག་མི་སྡུག་པ་དང་། ངན་པ་དང་། བཟང་པོ་དང་། བདེ་བར་འགྲོ་བར་སོང་བ་དང་། ངན་པར་འགྲོ་བ་རྣམས་མཐོང་ངོ་། །སེམས་ཅན་རྣམས་ཇི་ལྟར་ལས་ཀྱིས་ཉེ་བར་འགྲོ་བ་དེ་ལྟ་བུ་ཉིད་རབ་ཏུ་ཤེས་ཏེ། ཀྱེ་སེམས་ཅན་འདི་དག་གིས་ནི་ལུས་ཀྱིས་
ཉེས་པར་སྤྱད་པ་དང་ལྡན་པ། ངག་དང་ཡིད་ཀྱིས་ཉེས་པར་སྤྱད་པ་དང་ལྡན་ཞིང་འཕགས་པ་དག་ལ་སྐུར་ཏེ་ངན་པར་ལྟ་ཞིང་ངན་པར་ལྟ་བའི་ལས་དང་། ཆོས་ལ་ཡིད་དམ་བཅས་པ་དེའི་རྒྱུ་དེའི་རྐྱེན་གྱིས་ན་ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོར་ལྟུང་སྟེ་སེམས་ཅན་དམྱལ་བར་སྐྱེའོ། །
ཀྱེ་གཞན་ཡང་སེམས་ཅན་འདི་དག་གིས་ནི་ལུས་ཀྱིས་དགེ་བར་སྤྱད་པ་དང་ལྡན། ངག་དང་ཡིད་ཀྱིས་དགེ་བར་སྤྱད་པ་དང་ལྡན་པས་འཕགས་པ་དག་ལ་མ་སྐུར་ཏེ་ཡང་དག་པར་ལྟ་ཞིང་ཡང་དག་པར་ལྟ་བའི་ལས་དང་ཆོས་ལ་ཡིད་དམ་བཅས་པ་དེའི་རྒྱུ་དེའི་རྐྱེན་གྱིས་ནམ་ལུས་དང་བྲལ་བའི་
འོག་ཏུ་བདེ་བར་འགྲོ་བ་མཐོ་རིས་ཀྱི་ལྷར་སྐྱེའོ། །དེ་འདི་ལྟ་སྟེ། མིག་དང་ལྡན་པའི་སྐྱེས་བུ་ཞིག་གིས་ལམ་གྱི་བཞི་མདོ་ཆེན་པོར་འདུག་སྟེ། སྐྱེ་བོ་མང་པོ་འོང་བ་དང་། འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དག་རྣམ་པ་སྣ་ཚོགས་སུ་གནས་པ་དེ་དག་ཀྱང་མཐོང་ངོ་། །དེ་
ལྟར་འདི་བཞིན་དུ་དེའི་འཕྲུལ་གྱི་མིག་རྣམ་པར་དག་པ་མི་ལས་འདས་ཞེས་བྱ་བ་ནས། སྔ་མ་བཞིན་ལྷར་སྐྱེའོ་ཞེས་བྱ་བའི་བར་དུ་སྟེ། དེས་འདི་བཞིན་མཉམ་པར་གཞག་པའི་སེམས་ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ། ཉེ་བའི་ཉོན་མོངས་པ་ལས་བྲལ་བ། དྲང་པོར་གྱུར་ཅིང་ལས་

སུ་རུང་བར་གནས་པས་མི་གཡོ་བ་ཐོབ་སྟེ། ཟག་པ་ཟད་པ་ལས་ཡེ་ཤེས་མཐོང་བར་བྱ་བའི་ཕྱིར་མངོན་པར་ཤེས་པ་དག་ལ་སེམས་མངོན་པར་འཇུག་སྟེ། དེས་སྡུག་བསྔལ་འདི་ནི་འཕགས་པའི་བདེན་པའོ་ཞེས་ཇི་ལྟ་བུ་ཉིད་རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བའོ། །
འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འཇུག་པའི་ལམ་འཕགས་པའི་བདེན་པའོ་ཞེས་ཇི་ལྟ་བུ་ཉིད་རབ་ཏུ་ཤེས་པའོ། །དེས་འདི་བཞིན་ཤེས། འདི་བཞིན་མཐོང་བས་ན་འདོད་པའི་ཟག་པ་ལས་སེམས་རྣམ་པར་གྲོལ། སྲིད་པའི་ཟག་པ་དང་། མ་རིག་པའི་ཟག་
པ་ལས་སེམས་རྣམ་པར་གྲོལ་ལོ། །རྣམ་པར་གྲོལ་ནས་རྣམ་པར་གྲོལ་ལོ་ཞེས་བྱ་བའི་ཡེ་ཤེས་མཐོང་བར་འགྱུར་ཏེ། བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་ཏེ་སྲིད་པ་འདི་ལས་གཞན་མེད་པར་ཤེས་སོ། །དཔེར་ན་འདི་ལྟ་སྟེ། གྲོང་ངམ་གྲོང་འདབ་ཅིག་ནས་ཤིན་ཏུ་མི་
རིང་བ་ཞིག་ནས་ཆུའི་རྫིང་གཏིང་ཟབ་པ། མ་རྙོགས་པ། གསལ་བ། རྣམ་པར་དང་བ་དེ་ལ་མིག་དང་ལྡན་པའི་སྐྱེས་བུ་ཞིག་འགྲམ་དུ་འདུག་པས་གསེག་མའམ། གྱོ་མོའམ། ཉའམ། རུས་སྦལ་ལམ། ཆུ་སྲིན་ཡང་རུང་མཐོང་ངོ་། །དེ་ལྟར་དེས་འདི་བཞིན་མཉམ་པར་གཞག་པའི་སེམས་
ཀུན་དུ་དག་པ། ཡོངས་སུ་བྱང་བ། ཉེས་པ་མེད་པ། ཉེ་བའི་ཉོན་མོངས་པ་དང་བྲལ་བ་དྲང་པོར་གྱུར་ཅིང་ལས་སུ་རུང་བར་གནས་པས་མི་གཡོ་བ་ཐོབ་པ་ནས། སྔ་མ་བཞིན་ཏེ། སྲིད་པ་འདི་ལས་གཞན་མེད་པར་ཤེས་པའི་བར་དུའོ། །འདི་ནི་རིག་པ་ཞེས་བྱ་སྟེ། སྔ་མའི་རིག་པ་དང་། དེ་གཉིས་
གཅིག་ཏུ་བསྡུས་ན་རིག་པ་དང་རྐང་པ་ཞེས་བྱའོ། །ཁྱེའུ་བླ་ན་མེད་པའི་རིག་པ་དང་རྐང་པར་ལྡན་པ་འདི་མངོན་པར་མ་བྱས་པ་མངོན་པར་བྱ་བའི་ཕྱིར་ཐབས་བཞིར་རིག་པར་བྱ་སྟེ། བཞི་གང་ཞེ་ན། འདི་ན་བྲམ་ཟེའི་ཁྱེའུ་དགེ་སྦྱོང་ངམ། བྲམ་ཟེ་ཁ་ཅིག་གིས་བླ་ན་མེད་པའི་རིག་པ་དང་རྐང་པར་ལྡན་པ་
འདི་ཉིད་མངོན་པར་མ་ཆུད་པས་གྲོང་ནས་དགོན་པར་སོང་སྟེ། ཡལ་ག་དང་ལོ་མའི་སྤྱིལ་བུ་བྱས་ནས་གནས་པར་བྱེད་དོ། །བདག་ཅག་འདིར་རྩ་བ་དང་། འབྲས་བུས་འཚོའོ་ཞེས་འཛེར་ཏེ། དེ་དག་རྩ་བ་དང་། འབྲས་བུས་འཚོ་བར་བྱེད་དོ། །བྲམ་ཟེའི་ཁྱེའུ་དེ་ནི་བླ་ན་མེད་པའི་རིག་པ་རྐང་པར་

ལྡན་པ་མངོན་པར་མ་བྱས་པ་མངོན་པར་བྱ་བའི་ཕྱིར་འདི་ནི་ཐབས་དང་པོར་རིག་པར་བྱའོ། །བྲམ་ཟེའི་ཁྱེའུ་ཇི་སྙམ་དུ་སེམས། གང་ངས་བླ་ན་མེད་པའི་རིག་པ་དང་རྐང་པར་ལྡན་པ་དེའི་ཐབས་དང་པོར་བསྟན་པ་དེར་ཁྱོད་སློབ་དཔོན་དང་བཅས་ནས་འདུག་མྱོང་ངམ། ཀྱེ་གཽ་ཏ་མ་མ་མྱོང་ངོ་། །གཞན་
ཡང་བྲམ་ཟེའི་ཁྱེའུ་དགེ་སྦྱོང་ངམ། བྲམ་ཟེ་ཁ་ཅིག་བླ་ན་མེད་པའི་རིག་པ་དང་རྐང་པར་ལྡན་པ་འདི་ཉིད་མངོན་པར་མ་ཆུད་པས་རྩ་བ་དང་འབྲས་བུའི་ཁ་ཟས་དེ་བཏང་སྟེ། ཕྱོགས་གཅིག་ཏུ་སོང་ནས་ལོ་མ་དང་ཡལ་གའི་སྤྱིལ་བུ་བྱས་ཏེ་གནས་པར་བྱེད་དོ། །བདག་ཅག་འདི་ན་ལོ་མའི་ཁ་ཟས་ཀྱིས་
འཚོའོ་ཞེས་སྨྲས་ཏེ། དེ་དག་དེར་ལོ་མ་འབའ་ཞིག་གི་ཁ་ཟས་ཀྱིས་འཚོ་བར་བྱེད་དོ། །བྲམ་ཟེའི་ཁྱེའུ་བླ་ན་མེད་པའི་རིག་པ་དང་རྐང་པར་ལྡན་པ་འདི་མངོན་པར་མ་བྱས་པ་མངོན་པར་བྱ་བའི་ཕྱིར་འདི་ནི་ཐབས་གཉིས་པ་སྟེ་རིག་པར་བྱའོ། །གཞན་ཡང་བྲམ་ཟེའི་ཁྱེའུ་དགེ་སྦྱོང་ངམ། བྲམ་ཟེ་ཁ་
ཅིག་བླ་ན་མེད་པའི་རིག་པ་དང་རྐང་པར་ལྡན་པ་འདི་ཉིད་མངོན་པར་མ་ཆུད་པར་རྩ་བ་དང་། འབྲས་བུའི་ཁ་ཟས་དེ་ཡང་བོར་ཏེ་ཕྱོགས་གཅིག་ཏུ་སོང་ནས་ཡལ་ག་དང་ལོ་མའི་སྤྱིལ་བུ་བྱས་ཏེ། འཚོ་བར་བྱེད་ཅིང་འདིར་ནི་བདག་ཅག་གིས་སྔགས་རྣམས་ནི་བཅང་སྨྲང་རྣམས་ནི་སྦྱར་རོ་ཞེས་སྨྲས་ཏེ།
དེ་དག་སྔར་སྔགས་དག་འཆང་ཞིང་སྨྲང་སྦྱོར་བ་བྲམ་ཟེའི་ཁྱེའུ་བླ་ན་མེད་པའི་རིག་པ་དང་རྐང་པར་ལྡན་པ་འདི་མངོན་པར་མ་བྱས་པ་མངོན་པར་བྱ་བའི་ཕྱིར། ཐབས་གསུམ་པ་སྟེ་ཤེས་པར་བྱའོ། །གཞན་ཡང་བྲམ་ཟེའི་ཁྱེའུ་དགེ་སྦྱོང་ངམ། བྲམ་ཟེ་ཁ་ཅིག་བླ་ན་མེད་པའི་རིག་པ་དང་རྐང་པར་ལྡན་པ་འདི་ཉིད་
མངོན་པར་མ་ཆུད་པར་རྩ་བ་དང་། འབྲས་བུའི་ཁ་ཟས་དེ་དང་། ལོ་མའི་ཁ་ཟས་དེ་དང་། སྔགས་འཆང་བ་དང་སྨྲང་སྦྱོར་བ་དེ་དག་བོར་ཏེ། མངོན་པར་མ་ཆུད་པར་བྱེད་ནས་གྲོང་དུ་ལྷགས་ཏེ། ཁང་པ་སྒོ་བཞི་པ་བརྩིགས་ནས་གནས་པར་བྱེད་ཅིང་འདིར་བདག་ཅག་གིས་སྦྱིན་པ་བྱིན་ཞིང་བསོད་ནམས་བྱས་ཏེ་
འོང་ཞིང་འགྲོ་བའི་དགེ་སྦྱོང་དང་། བྲམ་ཟེ་དག་ལ་ཇི་ལྟར་ནུས་པ་དང་། ཇི་ལྟ་བའི་སྟོབས་ཀྱིས་བསོད་སྙོམས་སྦྱིན་ནོ་ཞེས་འཛེར་ནས་དེ་དག་གིས་དེར་སྦྱིན་པ་བྱིན་ཞིང་བསོད་ནམས་བྱེད་དེ། འགྲོ་བ་དང་འོང་བའི་དགེ་སྦྱོང་དང་བྲམ་ཟེ་དག་ལ་ཇི་ལྟར་ནུས་པ་དང་། ཇི་ལྟ་བུར་འབྱོར་པ་དེ་བསོད་སྙོམས་བྱིན་ནོ། །

བྲམ་ཟེའི་ཁྱེའུ་བླ་ན་མེད་པའི་རིག་པ་དང་རྐང་པར་ལྡན་པ་དེ་མངོན་པར་མ་བྱས་པ་མངོན་པར་བྱ་བའི་ཕྱིར་འདི་ནི་ཐབས་བཞི་པ་ཡིན་ཏེ་ཤེས་པར་བྱའོ། །བྲམ་ཟེའི་ཁྱེའུ་ཇི་སྙམ་དུ་སེམས། གང་ངས་བླ་ན་མེད་པའི་རིག་པ་དང་རྐང་པར་ལྡན་པ་འདི་མངོན་པར་བྱ་བའི་ཕྱིར་ཐབས་རྣམ་པ་བཞིར་བསྟན་པ་
དེར་ཁྱོད་སློབ་དཔོན་དང་བཅས་པས་གནས་མྱོང་ངམ། ཀྱེ་གཽ་ཏ་མ་མ་མྱོང་ངོ་། །བྲམ་ཟེའི་ཁྱེའུ་དེ་ལྟ་བས་ན་ཐབས་དེ་དག་ཀུན་ཁྱོད་ཀྱིས་མ་རྫོགས་བཞིན་དུ་ཅིའི་ཕྱིར་ཁྱོད་ཀྱིས་ཤཱཀྱ་དག་ལ་ཨེ་མའོ་ཤཱཀྱ་དག་ནི་ད་གདོད་ཀྱིའོ། །ཨེ་མའོ་ཤཱཀྱ་དག་ནི་གདོད་བྱུང་བའོ་ཞེས་ཚིག་གིས་སྨྲ་བར་བྱེད།
བྲམ་ཟེའི་ཁྱེའུ་ཇི་སྙམ་དུ་སེམས། སྔོན་གྱི་བྲམ་ཟེ་བྱུང་བ་རྣམས་ནི་བྲམ་ཟེའི་དྲང་སྲོང་དེ་དག་ལ་འདི་ལྟ་སྟེ། ཨ་སྟ་ཀ་དང་། བམ་དེ་བོ་དང་། བྷི་ཤྭ་མི་ཏྲ་དང་། ཛ་མ་དག་ནི་དང་། ཨང་གི་རཱ་དང་། བ་ར་དྭ་ཛ་དང་། བ་ས་ཤྭ་དང་། ཀ་ཤེ་པ་དང་། བྷྀ་གུ་དེ་དག་གིས་སྔགས་རྣམས་བྱས། སྨྲང་
རྣམས་ཕྱུང་བ་དེ་དག་ད་ལྟར་གྱི་བྲམ་ཟེ་རྣམས་དང་སྔོན་གྱི་རྣམས་སྔགས་ཀྱི་ཚིག་དང་། བསྟོད་པ་དང་། དབྱངས་སུ་བྱས་པ་དང་། སྦྱར་བ་དེ་དག་ལ་དབྱངས་སུ་སྦྱར། དེ་དག་ལ་རྗེས་སུ་རྗོད་པར་བྱེད་དོ། །ཇི་ལྟར་ཁྱོད་སློབ་དཔོན་དང་བཅས་པ་ད་ལྟར་འོབས་ཀྱིས་སྐོར་བ། རྩང་བཙུགས་པ་ལྕགས་ཀྱི་
གཟེ་མ་བྲེས་ཤིང་། འགག་པར་བྱེད་པའི་གྲོང་ཁྱེར་ན་གནས་པ་ལྟ་ཅི་དེ་དག་ཀྱང་དེ་བཞིན་ནམ། ཀྱེ་གཽ་ཏ་མ་དེ་ལྟར་མ་ལགས་སོ། །ཇི་ལྟར་ཁྱོད་སློབ་དཔོན་དང་བཅས་བཞིན་དུ་ཕྲག་པར་གཟར་ཅིང་རྒྱལ་མཚན་གྱི་མཆོག་དང་། སྟོབས་ཀྱི་མཆོག་དང་། གཡུལ་བཤམས་པ་དུ་མ་ལ་རབ་ཏུ་
ལྟ་བ་མྱོང་བར་འགྱུར་བ་བཞིན་དུ་ཅི་དེ་དག་ཀྱང་དེ་ལྟར་རམ། ཀྱེ་གཽ་ཏ་མ་མ་ལགས་སོ། །ཇི་ལྟར་ཁྱོད་སློབ་དཔོན་དང་བཅས་པ་རྒོད་མ་སྐྱ་མོ་ཐམས་ཅད་དང་སྦྱར་བའི་ཤིང་རྟ་ལ་ཞོན་ཏེ། གསེར་གྱི་ཁར་བ་དང་། རིལ་བ་བཟུང་སྟེ། བྲམ་ཟེའི་ཁྱེའུ་མང་པོས་བསྐོར། བྲམ་ཟེའི་ཁྱེའུ་མང་པོ་
མདུན་དུ་བྱས་ཏེ་ལྗོངས་སུ་འགྲོ་ཞིང་སོང་བ་ལྟར་ཇི་དེ་དག་ཀྱང་དེ་བཞིན་ནམ། ཀྱེ་གཽ་ཏ་མ་མ་ལགས་སོ། །ཇི་ལྟར་ཁྱོད་སློབ་དཔོན་དང་བཅས་པས་འདི་བཞིན་དུ་སྐྲ་སྤྱི་བོར་བཅིངས་པའི་ཀུན་དུ་རྒྱུ་བ་ལག་པ་གདུ་བུ་ཅན་ནུ་མ་ཕོ་ལོང་བཞིན་པའི་བུད་མེད་ཀྱིས་བསྐུ་བ་དང་། བཀྲུ་བ་དང་། མཉེ་བ་ལ་

སོགས་པ་ཉམས་སུ་ལེན་པ་ལྟར་ཅི་དེ་དག་ཀྱང་དེ་བཞིན་ནམ། ཀྱེ་གཽ་ཏ་མ་མ་ལགས་སོ། །ཇི་ལྟར་ཁྱོད་སློབ་དཔོན་དང་བཅས་པས་གསེར་གྱི་དཔུང་རྒྱན་འཆང་བ། གསེར་གྱི་དོ་ཤལ་ཐོགས་པས་བརྒྱན་པའི་བུད་མེད་དང་ལྷན་ཅིག་ཏུ་རྐང་པ་བརྐྱང་སྟེ་ཉི་མ་ཤར་བའི་བར་དུ་ཉལ་བར་བྱེད་
པ་དེ་བཞིན་ཅི་དེ་དག་ཀྱང་དེ་ལྟར་རམ། ཀྱེ་གཽ་ཏ་མ་མ་ལགས་སོ། །བྲམ་ཟེའི་ཁྱེའུ་ཁྱོད་ཀྱི་མཁན་པོའི་ཉེས་པ་རྣམས་ལ་ཉོན་ཅིག །བྲམ་ཟེའི་ཁྱེའུ་བྲམ་ཟེའི་བུ་པདྨའི་སྙིང་པོ་ཟེར་ནི་མན་ཡུལ་ཀོ་ས་ལའི་རྒྱལ་པོ་ལ་ལྟར་སོང་བ་ནི་རྩིག་པས་བསྒྲིབས་པའམ། ཡོལ་བས་བསྒྲིབས་པ་
ལས་གཞན་དུ་མ་ཡིན་ཏེ། ཅིའི་ཕྱིར་ན་དེ་འདྲ་བར་ཤེས་པའི་སྐྱེས་བུ་དེ་གང་གིས་བཙོས་པའི་ཁ་ཟས་ཟ་བ་དེ་ཉིད་ལ་བཞིན་མངོན་སུམ་དུ་མི་བསྟན་པ་རིགས་སམ། བྲམ་ཟེའི་ཁྱེའུ་ཁྱོད་ཉིད་ཀྱི་ཉེས་པ་ལའང་ཉོན་ཅིག །སྔོན་བྱུང་བ་ནི་བྲམ་ཟེའི་ཁྱེའུ་ཡུལ་ཀོ་ས་ལའི་རྒྱལ་པོ་གསལ་རྒྱལ་
རྒྱལ་པོ་རང་གི་སྟན་ལ་འདུག་སྟེ། སྐྱེས་བུ་གཞན་ཞིག་ལ་ཀྱེ་སྐྱེས་བུ་དོན་ནི་འདི་ལྟ་བུ་སྟེ། འདི་དང་འདི་ལྟ་བུར་བྱོས་ཤིག །འདི་དང་འདི་ལྟ་བུར་སྤྱོད་ཅིག་ཅེས་བསྒོའོ། །དེ་སྐད་བསྒོ་ནས་རྒྱལ་པོ་སྟན་ལས་ལངས་ཏེ་སོང་ངོ་། །དེ་ནས་སྐྱེས་བུ་དེས་ལྐོག་ཏུ་རྒྱལ་པོའི་སྟན་ལ་འདུག་སྟེ།
སྐྱེས་བུ་གཞན་ཞིག་ལའང་ཀྱེ་སྐྱེས་བུ་དོན་འདི་དང་འདི་ལྟ་བུར་བྱོས་ཤིག །འདི་དང་འདི་ལྟ་བུར་སྤྱོད་ཅིག་ཅེས་བསྒོ་ན། བྲམ་ཟེའི་ཁྱེའུ་ཇི་སྙམ་དུ་སེམས། དེ་ལྟར་སྐྱེས་བུ་ལྐོག་ཏུ་རྒྱལ་པོའི་སྟན་ལ་འདུག་ནས་རྒྱལ་པོས་སྨྲས་པ་ནི་སྨྲ། རྒྱལ་པོས་གསུངས་པ་ནི་ཟེར་ན་ཅི་དེ་རྒྱལ་པོ་ཡིན་ནམ།
ཅི་རྒྱལ་པོར་འགྱུར་རམ། ཀྱེ་གཽ་ཏ་མ་མ་ལགས་སོ། །དེ་ལྟར་འདི་བཞིན་དུ་བྲམ་ཟེའི་ཁྱེའུ་ཁྱོད་ཀྱང་དྲང་སྲོང་གིས་བཤད་པ་ནི་འཆད། སྨྲས་པ་ནི་སྨྲ་ན་དྲང་སྲོང་ཡིན་ནམ། དྲང་སྲོང་དུ་འགྱུར་རམ། ཀྱེ་གཽ་ཏ་མ་མ་ལགས་སོ། །བྲམ་ཟེའི་ཁྱེའུ་འོན་ཀྱང་ཁྱོད་དོན་གང་གི་ཕྱིར་འོངས་པའི་དོན་དེ་
ཤིན་ཏུ་ལེགས་པར་ཡིད་ལ་ཟུང་ཤིག་དང་། ཁྱོད་ལ་ཡུན་རིང་པོར་ཕན་པ་དང་། དོན་དང་། བདེ་བར་འགྱུར་རོ། །དེ་ནས་བྲམ་ཟེའི་ཁྱེའུ་མ་སྡུག །བཅོམ་ལྡན་འདས་ཀྱི་སྐུ་ལ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་བརྟགས་པ་དང་། སུམ་བཅུ་ནི་མཐོང་གི་གཉིས་ལ་ཡིད་གཉིས་

དང་། ཐེ་ཚོམ་ཟོས་ཏེ་ཕོ་མཚན་གསང་བ་སྨད་ཀར་ནུབ་པ་དང་། ལྕེ་སྲབ་ལ་ཆེ་བའོ། །དེས་ཚིགས་སུ་བཅད་དེ་སྨྲས་པ། སུམ་བཅུ་རྩ་གཉིས་མཚན་ཞེས་ཐོས། །ཐུབ་ཆེན་ཁྱོད་ལ་སྐྱེས་བུའི་མཚན། །སུམ་བཅུ་རྩ་གཉིས་ཡོད་ཅེས་ཐོས། །གཽ་ཏམ་ཁྱོད་ཀྱི་སྐུ་ལ་ནི། །རྣམ་པ་དེ་
གཉིས་མི་གདའ་ན། །མི་མཆོག་ཁྱོད་ཀྱི་ཕོ་མཚན་གསང་། །དེ་ནི་སྨད་ཀར་ནུབ་བམ་ཅི། །བུད་མེད་ལྟ་བུའི་སྒྲ་ཡི་ཚིག །ལྕེ་ནི་ཐུང་བ་མ་ལགས་གྲང་། །སྲབ་མོ་མྱུར་དུ་ཕྱུང་བ་མཛོད། །བདག་གི་ཐེ་ཚོམ་བསལ་བར་གསོལ། །སྙན་པར་བསྒྲགས་པའི་སངས་རྒྱས་རྣམས། །མཐོང་བར་
རྙེད་པ་ཤིན་ཏུ་དཀའོ། །དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་མ་སྡུག་འདི་ནི་ངའི་ལུས་ལ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་བརྟགས་ན་སུམ་བཅུ་ནི་མཐོང་གི་ཕོ་མཚན་གསང་བ་ནུབ་པ་དང་། སྲབ་ལ་ཆེ་བའི་ལྕེ་གཉིས་ལ་ཡིད་གཉིས་དང་ཐེ་ཚོམ་ཟོས་ཀྱིས། གང་བདག་གིས་ཇི་ལྟར་
བྲམ་ཟེའི་ཁྱེའུ་མ་སྡུག་ངའི་ཕོ་མཚན་གསང་བ་ནུབ་པ་དང་། ཆེ་ལ་སྲབ་པའི་ལྕེ་མཐོང་བར་འགྱུར་བ་དེ་ལྟ་བུའི་མཚན་མ་བསྟན་ཏོ་སྙམ་དུ་དགོངས་ནས། བཅོམ་ལྡན་འདས་ཀྱིས་ཇི་ལྟར་བྲམ་ཟེའི་ཁྱེའུ་མ་སྡུག་བཅོམ་ལྡན་འདས་ཀྱི་ཕོ་མཚན་གསང་བ་སྦུབས་སུ་ནུབ་པ་མཐོང་བར་མཚན་མ་བསྟན་ཏོ། །
ཞལ་གྱི་སྐྲ་མཚམས་ཀྱི་བར་དུ་ཞལ་ནས་ལྕེ་ཕྱུང་སྟེ། གཡོགས་པ་མཐོང་ནས་དེ་ཡང་འདི་སྙམ་དུ་གྱུར་ཏོ། །ཀྱེ་དགེ་སྦྱོང་གཽ་ཏ་མ་ནི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་ནོ། །གང་སྐྱེས་བུ་ཆེན་པོའི་མཚན་དང་ལྡན་པ་ལ་ལམ་གཉིས་སུ་འགྱུར་ཏེ། གཞན་དུ་མ་ཡིན་ནོ། །དེ་སྟེ་
ཁྱིམ་པར་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོར་འགྱུར་བ་ནས་སྔ་མ་བཞིན་ཏེ། འཇིག་རྟེན་དུ་སྒྲས་ཁྱབ་པར་གྲགས་པའི་བར་དུའོ། །དེ་ནས་བྲམ་ཟེའི་ཁྱེའུ་མ་སྡུག །བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ཏེ། བཅོམ་ལྡན་འདས་
ཀྱི་དྲུང་ནས་སོང་ངོ་།། །།འདུལ་བ་ཕྲན་ཚེགས་ཀྱི་གཞི། བམ་པོ་བཞི་བཅུ་རྩ་བརྒྱད་པ། དེ་ནས་དེའི་ཚེ་བྲམ་ཟེ་པད་མའི་སྙིང་པོ་ཁྱིམ་མཆོག་གི་ས་མཐོན་པོ་ཞིག་ན་ཤས་ཆེ་བའི་བྲམ་ཟེ་རྒན་རབས་རྒན་རབས་རྣམས་དང་ལྷན་ཅིག་འདུས་ཤིང་འཁོད་པར་གྱུར་ཏོ། །བྲམ་ཟེའི་ཁྱེའུ་མ་སྡུག་

ཀྱང་སྡོད་ཅིང་འདུག་པ་ལས། བྲམ་ཟེའི་ཁྱེའུ་མ་སྡུག་གིས་བྲམ་ཟེ་པད་མའི་སྙིང་པོ་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་བྲམ་ཟེ་པད་མའི་སྙིང་པོ་གང་ན་བ་དེར་སོང་སྟེ་ཕྱིན་ནས་ཀྱང་བྲམ་ཟེ་པད་མའི་སྙིང་པོའི་རྐང་པ་གཉིས་ལ་མགོ་བོས་ཕྱག་བྱས་ཏེ། ཤས་ཆེ་བའི་བྲམ་ཟེ་གཞན་རྣམས་
ལ་ཡང་ཕྱག་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བྲམ་ཟེའི་ཁྱེའུ་མ་སྡུག་ལ་བྲམ་ཟེ་པད་མའི་སྙིང་པོས་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་ཇི་ག་ཤེས་ལྡན་གཽ་ཏ་མ་དེའི་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་ཕྱོགས་དང་ཕྱོགས་
མཚམས་སུ་རྒྱ་ཆེར་གྲགས་པ་ཇི་ལྟ་བ་དེ་ཁོ་ན་བཞིན་དུ་ཡིན་ནམ། དེའི་མཚན་རྣམས་གྲགས་པ་ཡང་དག་པ་ཡིན་ནམ། མཁན་པོ་མད་ལགས་ཏེ། ཤེས་ལྡན་གཽ་ཏ་མ་དེའི་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་ཕྱོགས་དང་ཕྱོགས་མཚམས་སུ་རྒྱ་ཆེར་གྲགས་པ་ཡང་ཇི་ལྟ་བ་
དེ་ཁོ་ན་བཞིན་ལགས་ལ། དེའི་མཚན་རྣམས་གྲགས་པ་ཡང་ཡང་དག་པ་ལགས་སོ། །བྲམ་ཟེའི་ཁྱེའུ་ཤེས་ལྡན་གཽ་ཏ་མ་དེ་དང་བར་སྐབས་ཀྱི་གཏམ་དག་བྱས་སམ། མཁན་པོ་བགྱིས་ལགས་སོ། །བྲམ་ཟེའི་ཁྱེའུ་ཤེས་ལྡན་གཽ་ཏ་མ་དེ་དང་ལྷན་ཅིག་བར་སྐབས་ཀྱི་གཏམ་ཅི་སྨྲས་པ་དེ་ཐམས་ཅད་
ངེད་ཅག་ལ་རྒྱས་པར་སྨྲོས་ཤིག །དེ་ནས་བྲམ་ཟེའི་ཁྱེའུ་མ་སྡུག་གིས་བཅོམ་ལྡན་འདས་དང་ལྷན་ཅིག་བར་སྐབས་ཀྱི་གཏམ་ཅི་སྨྲས་པ་དེ་ཐམས་ཅད་དེ་བཞིན་དུ་བྲམ་ཟེ་པད་མའི་སྙིང་པོ་ལ་རྒྱས་པར་སྨྲས་སོ། །དེ་སྐད་ཅེས་སྨྲས་པ་དང་། བྲམ་ཟེ་པད་མའི་སྙིང་པོ་ཁྲོས་འཁྲུགས་རྔམ་སྟེ་ཡིད་ལ་
མ་བབ་པར་གྱུར་ནས། མཆིལ་ལྷམ་དང་བཅས་པའི་རྡོག་པས་བྲམ་ཟེའི་ཁྱེའུ་མ་སྡུག་གི་མགོར་བརྒྱབ་ནས་འདི་སྐད་ཅེས་ཀྱང་སྨྲས་སོ། །ཨེ་མའོ་ཕོ་ཉ་བྱེད་པ། ཨེ་མའོ་འཕྲིན་པར་བྱེད་པ། ཚུལ་འདི་འདྲ་བ་དང་། ཕོ་ཉ་བྱེད་པ་འདི་འདྲ་བ་དང་། ཕྲིན་པར་བྱེད་པ་ནི་བདག་ངན་སོང་དུ་ཡང་ལྟུང་བར་
གྱུར་ཏེ། བྲམ་ཟེའི་ཁྱེའུ་ཁྱོད་ཀྱིས་ཤེས་ལྡན་གཽ་ཏ་མ་ལ་ཇི་ལྟ་ཇི་ལྟར་ཁྱད་དུ་བསད་ཅིང་ཟློགས་པར་སེམས་པ་དེ་ལྟ་དེ་ལྟར་ཤེས་ལྡན་གཽ་ཏ་མ་དེས་ཁོ་བོ་ཡང་དེ་དང་དེའི་ཁོངས་སུ་བརྩི་བར་དགོངས་སོ། །ཤེས་ལྡན་དག་དེང་ཁོ་ན་ཁོ་བོ་ཤེས་ལྡན་གཽ་ཏ་མ་དེ་ལ་བལྟ་བ་དང་། བསྙེན་བཀུར་བྱ་ཞིང་འགྲོར་

དགོངས་ཐག་པས་མ་ནུས་པར་ཟད་དེ། འོན་ཀྱང་སང་ཤེས་ལྡན་གཽ་ཏ་མ་ལ་བལྟ་བ་དང་། བསྙེན་བཀུར་བྱ་བའི་ཕྱིར་འགྲོའོ། །དེ་ནས་བྲམ་ཟེ་པད་མའི་སྙིང་པོས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་། བཅའ་བ་དག་བསྡོགས་ནས་ནང་པར་སྔར་ལངས་ཏེ། གཙང་
ཞིང་བསོད་པའི་བཟའ་བ་དང་བཅའ་བ་དག་གིས་ཤིང་རྟ་བཀང་སྟེ་ཁྱེར་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་དང་ལྷན་ཅིག་ཏུ་མངོན་དུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་
གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྲམ་ཟེ་པད་མའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་ལྡན་གཽ་ཏ་མ་བདག་གིས་གཙང་ཞིང་བསོད་པའི་བཟའ་བ་དང་བཅའ་བས་ཤིང་རྟ་བཀང་སྟེ་འཚལ་ཏེ། མཆིས་པ་འདི་ཤེས་ལྡན་གཽ་ཏ་མས་ཐུགས་བརྩེ་བ་ཉེ་བར་
བཟུང་སྟེ་བཞེས་སུ་གསོལ། དེ་ནས་དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ། བཅོམ་ལྡན་འདས་ལ་བསིལ་ཡབ་ཀྱིས་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་
དགའ་བོ་སོང་ལ་འདོད་པ་མཐུན་པ་ན་དགེ་སློང་ཇི་སྙེད་པ་ཉེ་བར་རྟེན་ཅིང་གནས་པ་དེ་ཐམས་ཅད་རིམ་གྲོའི་གནས་སུ་སྡུས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་འདོད་པ་མཐུན་པ་ན་དགེ་སློང་ཇི་སྙེད་ཉེ་བར་རྟེན་
ཅིང་གནས་པ་དེ་ཐམས་ཅད་རིམ་གྲོའི་གནས་སུ་བསྡུས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཙུན་པ་འདོད་པ་མཐུན་པ་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་ཐམས་ཅད་རིམ་གྲོའི་གནས་སུ་འདུས་ཤིང་མཆིས་ལགས་ཏེ། བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། །དེ་ནས་བཅོམ་ལྡན་འདས་རིམ་གྲོའི་གནས་གང་ན་བ་དེར་གཤེགས་ཏེ་བྱོན་ནས་དགེ་སློང་

གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་བྲམ་ཟེ་པད་མའི་སྙིང་པོས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་པ་དུ་མར་
གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་ཉན་པའི་ཕྱིར་འདུག་གོ། །དེ་ནས་
བཅོམ་ལྡན་འདས་ཀྱིས་བྲམ་ཟེ་པད་མའི་སྙིང་པོའི་སྦྱིན་པ་དེ་ལ་རྗེས་སུ་ཡི་རངས་པ་འདིས་རྗེས་སུ་ཡི་རང་བར་མཛད་དེ། སྦྱིན་སྲེག་མཆོད་སྦྱིན་རྣམས་ཀྱི་མཆོག །བསྡེབ་སྦྱོར་མཆོག་ནི་ཉི་མའི་ལྷ། །མི་ཡི་མཆོག་ནི་རྒྱལ་པོ་སྟེ། །རྒྱ་མཚོ་ཆུ་བོ་རྣམས་ཀྱི་མཆོག །ཟླ་བ་རྒྱུ་སྐར་རྣམས་ཀྱི་གཙོ། །ཉི་མ་
སྣང་བྱེད་རྣམས་ཀྱི་གཙོ། །སྟེང་དང་འོག་དང་ཐད་ཀར་ཡང་། །འགྲོ་བའི་འགྲོ་བ་ཇི་སྙེད་པ། །ལྷ་དང་བཅས་པའི་འཇིག་རྟེན་ན། །སྨྲ་བའི་མཆོག་ནི་རྫོགས་སངས་རྒྱས། །དེའི་ཚེ་བྲམ་ཟེ་པད་མའི་སྙིང་པོ་ཡོན་བསྔོ་བ་མཛད་པ་ན་རྒན་ཞུགས་ཞིག་ཏིལ་གྱི་མར་ཁུར་ཟ་བ་མཐོང་སྟེ། མཐོང་
ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅི་ལགས་ཉན་ཐོས་ཐམས་ཅད་ཤེས་ལྡན་གཽ་ཏ་མའི་ཐུགས་མཉེས་པར་བགྱིད་པ་ལགས་སམ། བྲམ་ཟེ་འདི་ལྟ་ངེས་པ་མེད་དེ། ཁ་ཅིག་ནི་མཉེས་པར་བྱེད། ཁ་ཅིག་ནི་མཉེས་པར་མི་བྱེད་དོ། །ཀྱེ་གཽ་ཏ་མ་ཁ་ཅིག་ནི་ཆོས་ཚོལ། ཁ་ཅིག་ནི་ཏིལ་
གྱི་མར་ཁུར་འཚལ་བ་དག་གདའ་ལགས་སོ། །ཀྱེ་གཽ་ཏ་མ་བདག་གི་སློབ་མ་བྲམ་ཟེའི་ཁྱེའུ་མ་སྡུག་མཆིས་ལགས་སམ། བྲམ་ཟེ་འོངས་སོ། །ཤེས་ལྡན་གཽ་ཏ་མ་དེ་དང་ལྷན་ཅིག་བར་སྐབས་ཀྱི་བཀའ་མཆིད་དག་བགྱིས་ལགས་སམ། བྲམ་ཟེ་བྱས་སོ། །ཀྱེ་གཽ་ཏ་མ་དེའི་སླད་དུ་དེ་དང་ལྷན་ཅིག་
བར་སྐབས་ཀྱི་བཀའ་མཆིད་ཇི་སྙེད་གླེངས་པ་དེ་དག་ཐམས་ཅད་བདག་ལ་རྒྱས་པར་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་མ་སྡུག་དང་ལྷན་ཅིག་བར་སྐབས་ཀྱི་གཏམ་ཇི་སྙེད་པ་གླེངས་པ་དེ་དག་ཐམས་ཅད་བྲམ་ཟེ་པད་མའི་སྙིང་པོ་ལ་བཀའ་སྩལ་ཏོ། །དེ་ནས་བྲམ་ཟེ་པད་མའི་

སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་བྲམ་ཟེའི་ཁྱེའུ་མ་སྡུག་ནི་བུས་པ་རང་བཞིན་མ་འཚལ་བ་ལགས་སོ། །ཀྱེ་གཽ་ཏ་མ་བྲམ་ཟེའི་ཁྱེའུ་མ་སྡུག་ལ་ཁྱོད་ཀྱིས་བཟོད་པ་མཛོད་ཅིག །བྲམ་ཟེ་བཟོད་དོ། །ཤེས་ལྡན་གཽ་ཏ་མ་གང་གི་ཚེ་བདག་
ཤིང་རྟའི་ནང་དུ་ཞུགས་པ་དང་། སྲབ་སྐྱོགས་འཛིན་པའམ། ལྕག་སྒྲེང་བའམ། སྐད་ཆེན་པོར་འཆི་བ་གཟིགས་པ་དེའི་ཚེ་བྲམ་ཟེ་པད་མའི་སྙིང་པོ་ངའི་ཞབས་གཉིས་ལ་མགོ་བོས་ཕྱག་འཚལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ། འཚོ་འམ། བསྐྱོད་པ་ཡང་ངམ། སྟོབས་དང་།
བདེ་བ་ལ་རེག་པར་སྤྱོད་དམ་ཞེས་སྙུན་གསོལ་བར་དེ་ལྟར་ཐུགས་སུ་ཆུད་པར་མཛད་དུ་གསོལ། ཀྱེ་ཤེས་ལྡན་གཽ་ཏ་མ་གང་གི་ཚེ་སྲང་གི་དབུས་ནས་མཆིས་པའམ། མཆིལ་ལྷམ་ཕུད་པའམ། ཤུལ་བཟུར་བའམ། སུག་པ་བརྐྱང་བ་གཟིགས་པ་དེའི་ཚེ་བདག་ཤེས་ལྡན་གཽ་ཏ་མ་ལ་ཕྱག་
འཚལ་བར་གཟུང་དུ་གསོལ་ཞེས་བྱ་བ་ནས། རེག་པར་སྤྱོད་དམ་ཞེས་བྱ་བའི་བར་གོང་མ་བཞིན་དུའོ། །ཀྱེ་ཤེས་ལྡན་གཽ་ཏ་མ་གང་གི་ཚེ་བདག་འཁོར་གྱི་ནང་ན་མཆིས་པའམ། རད་པའམ། སྟན་ནམ། གཙུག་ཏོར་ལ་ནོམ་པ་གཟིགས་པ་དེའི་ཚེ་ཤེས་ལྡན་གཽ་ཏ་མ་ལ་བདག་ཕྱག་འཚལ་བར་
གཟུང་དུ་གསོལ་ཞེས་བྱ་བ་ནས། རེག་པར་སྤྱོད་དམ་ཞེས་བྱ་བའི་བར་གོང་མ་བཞིན་དུའོ། །དེ་ཅིའི་སླད་དུ་ཞེ་ན། ཀྱེ་ཤེས་ལྡན་གཽ་ཏ་མ་བྲམ་ཟེ་རྣམས་ནི་གྲགས་པས་ལོངས་སྤྱོད་ཐོབ་ལགས་ཏེ། དེ་དག་ནི་གྲགས་པ་ཁོ་ན་ལས་ལོངས་སྤྱོད་འཚལ་ལགས་སོ། །དེ་ནས་བཅོམ་ལྡན་འདས་འདི་སྙམ་དུ་
དགོངས་ཏེ། ཀྱེ་མའོ་བྲམ་ཟེ་པད་མའི་སྙིང་པོ་འདི་ནི་ང་རྒྱལ་ཤིན་ཏུ་ཆེ་བ་ཞིག་པས་མ་ལ་ངས་འདི་ང་རྒྱལ་སྤང་བའི་ཕྱིར་ཆོས་བཤད་དོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་བྲམ་ཟེ་པད་མའི་སྙིང་པོ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་གཟེངས་
སྟོད་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་རབ་ཏུ་དགའ་བར་མཛད་དོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་དང་ལྡན་པའི་གཏམ་དུས་དང་པོར་བྱ་བ་གང་ཡིན་པ་ནི་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་

གཏམ་དང་། འདོད་པ་རྣམས་ཀྱི་མནོག་དང་། ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་ཕན་ཡོན་དང་། རྣམ་པར་བྱང་བའི་ཕྱོགས་ཀྱི་ཆོས་རྣམས་རྒྱ་ཆེར་ཡང་དག་པར་རབ་ཏུ་སྟོན་པར་མཛད་དོ། །བཅོམ་ལྡན་འདས་
ཀྱིས་གང་གི་ཚེ་དེ་སྙིང་དགའ་བ་དང་། དགེ་བའི་སེམས་དང་། མགུ་བའི་སེམས་དང་། སྒྲིབ་པ་དང་རྣམ་པར་བྲལ་བའི་སེམས་དང་། སྐལ་བ་དང་ལྡན་པ་དང་། མཐུ་དང་ལྡན་པ་དང་། ཡང་དག་ཕུལ་གྱི་ཆོས་བསྟན་པ་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་ཀྱིས་
ཡང་དག་ཕུལ་གྱི་ཆོས་བཤད་པ་འདི་ལྟ་སྟེ། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་སྟེ། འཕགས་པའི་བདེན་པ་བཞི་པོ་རྒྱ་ཆེར་ཡང་དག་པར་རབ་ཏུ་བསྟན་ཏེ། དཔེར་ན་གོས་གཙང་མ་ནག་ནོག་མེད་ཅིང་ཁ་བསྒྱུར་བར་འོས་པ་ཚོན་རྩིའི་ནང་ན་བཅུག་ན། ཚོན་འཇེན་དུ་
བཏུབ་པ་དེ་བཞིན་དུ་བྲམ་ཟེ་པད་མའི་སྙིང་པོས་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ། འདི་ལྟ་སྟེ། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་སོ། །དེ་ནས་བྲམ་ཟེ་པད་མའི་སྙིང་པོས་ཆོས་མཐོང་བ་དང་། ཆོས་ཐོབ་པ་དང་།
ཆོས་རྟོགས་པ་དང་། ཆོས་ཀྱི་རྣམ་གྲངས་ཤེས་པ་དང་། ཆོས་ཀྱི་གཏིང་སླེབས་པ་དང་། ཐེ་ཚོམ་ལས་རྒལ་བ་དང་། སོམ་ཉི་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པའི་བསྟན་པ་ལ་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་
ཏེ། བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་འཕགས་སོ། །མངོན་པར་འཕགས་སོ། །བཅོམ་ལྡན་འདས་ལ་སྐྱབས་སུ་མཆིའོ། །ཆོས་དང་
དགེ་འདུན་ལ་སྐྱབས་སུ་མཆི་ལགས་ཀྱིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་བྲམ་ཟེ་པད་མའི་སྙིང་པོ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ནས་

རྗེས་སུ་ཡི་རངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་སོང་ངོ་། །བཅོམ་ལྡན་འདས་ཀྱིས་དགོངས་པ། བྲམ་ཟེ་པད་མའི་སྙིང་པོ་འཕྱ་བའི་ཉེས་དམིགས་གང་ཡིན་པ་ནི་དགེ་སློང་དག་ཡོན་བསྔོ་བ་བྱེད་པ་ན་ཁ་ཟས་བཟའ་
བ་ལས་གྱུར་ཏེ། དེ་ལྟ་བས་ན་དགེ་སློང་རྣམས་ཡོན་བསྔོ་བ་བྱེད་པ་ན་ཁ་ཟས་བཟའ་བར་མི་བྱ་བར་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེ་པད་མའི་སྙིང་པོ་འཕྱ་བའི་གཞིར་གྱུར་གྱིས། དེ་ལྟ་བས་ན་དགེ་སློང་རྣམས་ཀྱིས་ནི་ཡོན་བསྔོ་བ་བྱེད་པ་ན་ཁ་ཟས་བཟའ་བར་མི་
བྱའོ། །དགེ་སློང་རྣམས་ཀྱིས་ཡོན་བསྔོ་བ་བྱེད་པ་ན་ཁ་ཟས་ཟ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་དག་ཡོན་བསྔོ་བ་བྱེད་པའི་ཚེ། ཁ་ཟས་བཟའ་བར་མི་བྱའོ་ཞེས་བཀའ་སྩལ་པ་དང་། གསར་བུ་ཞིག་དུས་ཚོད་ལས་འདས་པར་གྱུར་ཏེ། དེའི་སྐབས་དགེ་སློང་རྣམས་
ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རེ་ཞིག་དགེ་སློང་སྔོན་ཟན་ཟ་བའི་ཚེ་དེས་དོན་ཀྱང་མ་གོ་སྒྲ་ཡང་མ་ཐོས་ན་དེས་བཟའ་བར་བྱ་སྟེ། དེ་ལ་ཉེས་པ་མེད་དོ། །གང་གིས་སྒྲ་ནི་ཐོས་ལ་དོན་མ་གོ་ན་དེས་ཀྱང་བཟའ་བར་བྱ་སྟེ། དེ་ལ་ཡང་
ཉེས་པ་མེད་དོ། །གང་གིས་སྒྲ་ཡང་ཐོས་ལ་དོན་ཀྱང་གོ་བ་དེས་བཟའ་བར་མི་བྱའོ། །ཟ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་གང་གི་སྒྲ་ཡང་ཐོས། དོན་ཀྱང་གོ་བ་དེ་དག་ཐོས་བཞིན་དུ་ཟ་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་དང་། གཙུག་ལག་ཁང་
གཞན་ཞིག་ཏུ་དགེ་སློང་མང་པོ་འདུས་པར་གྱུར་ཏེ། དེར་དགེ་སློང་རྣམས་གྲལ་ཚར་གཉིས་སུ་བཅས་ཏེ། འདུག་པ་གསར་བུ་རྣམས་དང་། རྒན་པོ་དག་ཏུ་ཉེ་ནས་དེར་དགེ་སློང་གསར་བུ་དེ་དག་ཟ་བ་དང་། དེ་དག་གིས་སྒྲ་ཡང་ཐོས་དོན་ཀྱང་གོ་བར་གྱུར་ཏེ། དེ་དག་འགྱོད་པ་སྐྱེས་ཏེ་མ་
ཟོས་པ་དང་། དེ་དག་སྨྱུང་བར་འདུག་པ་དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཚིགས་སུ་བཅད་པ་གཉིས་གསུམ་བརྗོད་ཀྱི་བར་དུ་བསྡད་ནས་བཟའ་བར་བྱ་སྟེ། དེ་ལ་འགྱོད་པར་མི་བྱའོ། །སངས་རྒྱས་

བཅོམ་ལྡན་འདས་ཡུལ་བཱ་རཱ་ཎ་སཱི་དྲང་སྲོང་གི་གནས་རི་དགས་ཀྱི་ནགས་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་བསྣམས་ལྷུང་བཟེད་ཐོགས་ཏེ་བཱ་རཱ་ཎ་སཱིར་བསོད་སྙོམས་ལ་གཤེགས་པ་དང་། དེ་ནས་དགེ་སློང་གཞན་ཞིག་ཀྱང་སྔ་
དྲོའི་དུས་ཀྱི་ཚེ་ཤམ་ཐབས་དང་ཆོས་གོས་བགོས་ལྷུང་བཟེད་ཐོགས་ཏེ་བཱ་རཱ་ཎ་སཱིར་བསོད་སྙོམས་ཀྱི་ཕྱིར་ཞུགས་སོ། །དེ་ནས་དགེ་སློང་དེ་ཤིང་ཐགས་ཀྱི་དྲུང་དུ་འདུག་སྟེ། མི་དགེ་བའི་རྣམ་པར་རྟོག་པས་རྣམ་པར་རྟོག་ཅིང་སྡིག་པ་ལ་ཆགས་ཤིང་གནས་པ་དང་། བཅོམ་ལྡན་
འདས་ཀྱིས་དགེ་སློང་དེ་ཤིང་ཐགས་ཀྱི་དྲུང་ན་མི་དགེ་བའི་རྣམ་པར་རྟོག་པས་རྣམ་པར་རྟོག་ཅིང་སྡིག་པ་ལ་ཆགས་ཤིང་གནས་པ་དེ་གཟིགས་སོ། །གཟིགས་ནས་ཀྱང་བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་དགེ་སློང་བདག་ཉིད་ས་བོན་ཚ་བ་ལྟ་བུར་
མ་བྱེད་ཅིག །དྲི་ང་བ་དང་། ཟག་པར་མ་བྱེད་ཅིག །དགེ་སློང་ཁྱོད་ཀྱིས་འདིར་བདག་ཉིད་ས་བོན་ཚ་བ་ལྟ་བུ་དང་། དྲི་ང་བ་དང་། ཟག་པར་བྱས་ན་སྦྲང་བུ་དག་གིས་མི་མྱངས་ཤིང་མི་ལྡགས་པའི་གནས་དེ་ལྟ་བུར་འགྱུར་བར་མཁྱེན་ཏོ། །དེ་ནས་དགེ་སློང་དེ་འདི་སྙམ་དུ་སེམས་ཏེ།
བཅོམ་ལྡན་འདས་ཀྱིས་བདག་གི་སེམས་ཀྱི་རྟོག་པ་མཁྱེན་ཏོ་སྙམ་ནས་འཇིགས་སྐྲག་སྔངས་བྲེད་དེ། བ་སྤུ་ལང་ཞེས་བྱེད་ནས་ཤིང་ཐགས་ཀྱི་དྲུང་དེ་ནས་སོང་ངོ་། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཡིན་པ་ནི་དགེ་སློང་སྤྱོད་ཡུལ་མ་ཡིན་པ་ན་འདུག་པ་ལས་
གྱུར་ཏོ། །དེ་ལྟ་བས་ན་དགེ་སློང་སྤྱོད་ཡུལ་མ་ཡིན་པ་ན་འདུག་པར་མི་བྱ་བར་མཁྱེན་ནས་བཱ་རཱ་ཎ་སཱིར་བསོད་སྙོམས་བརྒྱུས་ཏེ་ཟས་ཀྱི་བྱ་བ་མཛད་ནས། བསོད་སྙོམས་ཀྱི་ཟས་ཕྱི་མ་སྤངས་ཏེ། ལྷུང་བཟེད་དང་ཆོས་གོས་གཞག་ནས་ཞབས་གཉིས་བཀྲུས་ཏེ་གཙུག་ལག་ཁང་དུ་ནང་དུ་ཡང་
དག་འཇོག་ལ་ཞུགས་སོ། །དེ་ནས་བཅོམ་ལྡན་འདས། དགོངས་ཀ་ནང་དུ་ཡང་དག་འཇོག་ལས་བཞེངས་ཏེ། དགེ་སློང་གི་དགེ་འདུན་གྱི་མདུན་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །དགེ་

སློང་དག་དེང་འདིར་ང་སྔ་དྲོའི་དུས་ཀྱི་ཚེ་ཆོས་གོས་བགོས་ལྷུང་བཟེད་ཐོགས་ཏེ་བཱ་རཱ་ཎ་སཱིར་བསོད་སྙོམས་ཀྱི་ཕྱིར་གཤེགས་པ་དང་། དགེ་སློང་གཞན་ཞིག་ཀྱང་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་བགོས་ཏེ། ལྷུང་བཟེད་ཐོགས་ནས་བཱ་རཱ་ཎ་སཱིར་བསོད་སྙོམས་ཀྱི་ཕྱིར་
ཞུགས་སོ། །དེ་ནས་དགེ་སློང་དེ་ཤིང་ཐགས་གཞན་ཞིག་གི་དྲུང་དུ་འདུག་སྟེ་མི་དགེ་བའི་རྣམ་པར་རྟོག་པས་རྣམ་པར་རྟོག་ཅིང་སྡིག་པ་ལ་ཆགས་ཤིང་གནས་སོ། །དགེ་སློང་དེ་ཤིང་ཐགས་གཞན་ཞིག་གི་དྲུང་དུ་འདུག་སྟེ། མི་དགེ་བའི་རྣམ་པར་རྟོག་པས་རྣམ་པར་རྟོག་ཅིང་སྡིག་པ་ལ་ཆགས་ཤིང་
གནས་པ་དེ་ངས་མཐོང་ངོ་། །མཐོང་ནས་ཀྱང་དགེ་སློང་དེ་ལ་ངས་འདི་སྐད་ཅེས་བཀའ་སྩལ་ཏོ། །དགེ་སློང་དགེ་སློང་བདག་ཉིད་ས་བོན་ཚ་བ་ལྟ་བུར་མ་བྱེད་ཅིག །དྲི་ང་བ་དང་། ཟག་པར་མ་བྱེད་ཅིག །དགེ་སློང་ཁྱོད་ཀྱིས་འདིར་ས་བོན་ཚ་བ་ལྟ་བུ་དང་། དྲི་ང་བ་དང་། ཟག་པར་བྱས་ན་སྦྲང་བུ་
དག་གིས་མི་མྱངས་ཤིང་མི་ལྡགས་པའི་གནས་དེ་ལྟ་བུར་འགྱུར་བར་མཁྱེན་ཏོ། །དེ་ནས་དགེ་སློང་དེ་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་བདག་གི་སེམས་ཀྱི་རྟོག་པ་མཁྱེན་ཏོ་སྙམ་ནས་འཇིགས་སྐྲག་སྔངས་བྲེད་དེ། བ་སྤུ་ལང་ཞེས་བྱེད་ནས། རིངས་པ་རིངས་པར་ཤིང་ཐགས་
དེ་ཉིད་ཀྱི་དྲུང་ནས་སོང་ངོ་། །དགེ་སློང་དག་དེ་བས་ན་དེའི་ཕྱིར་ཉེས་དམིགས་གང་ཡིན་པ་ནི་དགེ་སློང་སྤྱོད་ཡུལ་མ་ཡིན་པ་ན་འདུག་པ་ཡིན་ཏེ། དེ་ལྟ་བས་ན་དགེ་སློང་དག་གི་སྤྱོད་ཡུལ་མ་ཡིན་པ་ན་འདུག་པར་མི་བྱའོ། །སྤྱོད་ཡུལ་མ་ཡིན་པ་ན་འདུག་ན་འགལ་ཚབས་ཅན་དུ་འགྱུར་
རོ། །དེ་ནས་དགེ་སློང་གཞན་ཞིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འཕགས་པའི་ཆོས་འདུལ་བ་ལ་ས་བོན་ཚ་བ་ཞེས་བགྱི་བ་
ཅི་ལགས། དྲི་ང་བ་ཞེས་བགྱི་བ་གང་ལགས། ཟག་པ་ཞེས་བགྱི་བ་ཅི་ལགས། ཟག་པ་དེའི་སྦྲང་བུ་ཞེས་བགྱི་བ་ཅི་ལགས། དགེ་སློང་ས་བོན་ཚ་བ་ཞེས་བྱ་བ་ནི་སྡིག་པ་མི་དགེ་བ་ལ་རྣམ་པར་རྟོག་པའི་ཚིག་བླ་དགས་ཡིན་ཏེ། འདི་ལྟ་སྟེ། འདོད་པ་ལ་རྣམ་པར་རྟོག་པ་དང་།

གནོད་སེམས་ལ་རྣམ་པར་རྟོག་པ་དང་། འཚེ་བ་ལ་རྣམ་པར་རྟོག་པའོ། །དྲི་ང་བ་ཞེས་བྱ་བ་ནི་འདོད་པའི་ཡོན་ཏན་ལྔ་པོ་དག་གི་ཚིག་བླ་དགས་ཡིན་ཏེ། གཟུགས་དང་། སྒྲ་དང་། དྲི་དང་། རོ་དང་། རེག་བྱ་ཞེས་བྱ་མོད་ཀྱི། དགེ་སློང་འདི་ནི་འདོད་པའི་ཡོན་ཏན་མ་ཡིན་གྱི་གང་འདུན་པ་དང་
ཆགས་པ་དེ་ནི་འདོད་པ་ཞེས་བྱའོ། །ཟག་པ་ཞེས་བྱ་བ་ནི་ཁ་ཅིག་ཇི་ལྟར་སྐྱེ་མཆེད་དྲུག་ལ་རེག་ཅིང་ཟག་པར་གནས་པ་སྟེ། མིག་གི་འདུས་ཏེ་རེག་པའི་སྐྱེ་མཆེད་དང་། རྣ་བ་དང་། སྣ་དང་། ལྕེ་དང་། ལུས་ཀྱི་འདུས་ཏེ་རེག་པའི་སྐྱེ་མཆེད་རྣམས་སོ། །ཟག་པའི་སྦྲང་བུ་ཞེས་བྱ་བ་ནི་
ཁ་ཅིག་ཇི་ལྟར་སྐྱེ་མཆེད་དྲུག་ལ་སྡོམ་པས་མི་སྡོམ་པར་གནས་པ་སྟེ། ཆགས་པ་དང་ཡིད་མི་བདེ་བས་འཇིག་རྟེན་གྱི་སྡིག་པ་མི་དགེ་བའི་ཆོས་ལ་སེམས་རྗེས་སུ་ཟག་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས། སྟོན་པ་བདེ་བར་གཤེགས་པས་གཞན་ཡང་འདི་སྐད་ཅེས་
བཀའ་སྩལ་ཏོ། །གང་གིས་འདོད་པ་འདོད་ཆགས་བསྐྱོད། །མིག་དང་རྣ་བ་མ་བསྲུངས་ཤིང་། །རྣམ་པར་རྟོག་པས་མྱངས་པས་ན། །དགེ་སློང་ས་བོན་ཚ་བར་བྱེད། །དྲི་ང་བ་དང་ཟག་པ་དང་། །སྡིག་ལ་ཆགས་ཤིང་གནས་པ་ཡིན། །གྲོང་ངམ་གལ་ཏེ་དགོན་པའམ། །མཚན་མོའམ་
འོན་ཏེ་ཉིན་མོའང་རུང་། །བདེ་བ་དག་ལས་རིང་དུ་གནས། །ཉམ་ཐག་པ་ཉིད་ཉེ་བར་འགྱུར། །གང་གིས་ནང་གི་ཞི་གནས་དང་། །རང་གིས་མངོན་རིག་བརྩོན་བྱས་ན། །སྦྲང་བུ་དེ་དག་མེད་བྱས་ཤིང་། །དེ་ནི་འཇིག་རྟེན་འདིར་བདེར་གནས། །དགེ་བའི་སྐྱེས་བུར་བསྟེན་པ་ནི། །འཕགས་
པས་ཚིག་བཟང་བཤད་པ་སྟེ། །དེ་ཚིག་ཡང་དག་ཤེས་གྱུར་ན། །ཡང་སྲིད་པར་ནི་མི་འགྲོའོ། །བཅོམ་ལྡན་འདས་ཀྱིས་དགེ་སློང་དག་སྤྱོད་ཡུལ་མ་ཡིན་པར་གནས་པར་མི་བྱའོ་ཞེས་གསུངས་པ་དང་། དགེ་སློང་དག་གིས་སྤྱོད་ཡུལ་མ་ཡིན་པ་རྣམ་པ་དུ་ཡོད་མ་ཤེས་ནས། དེའི་སྐབས་དགེ་སློང་
རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྤྱོད་ཡུལ་མ་ཡིན་པ་རྣམ་པ་ལྔ་སྟེ། རོལ་མོའི་གནས་དང་། སྨད་འཚོང་མའི་གནས་དང་། ཆང་འཚོང་མའི་གནས་དང་། རྒྱལ་པོའི་ཕོ་བྲང་འཁོར་གྱི་སྒོ་དང་། རིགས་ངན་གྱི་གནས་སོ།། །།སྡོམ་ནི།

མལ་ན་སྦྲུལ་ནག་ཉལ་བ་དང་། །ཆོས་གོས་གཅིག་པས་ཕྱག་མི་བྱ། །རྒན་པ་བཞི་ལ་ཕྱག་བྱས་ཏེ། །དེ་བཞིན་ཚོགས་ལའང་ཕྱག་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་
སོ། །མཉན་ཡོད་ན་དགེ་སློང་ཞིག་འདུག་པ་དེས་དགེ་སློང་གྲོགས་པོ་ཞིག་ལ་མལ་སྟན་གཏམས་ཏེ་ལྗོངས་རྒྱུ་ཞིང་སོང་ངོ་། །དགེ་སློང་དེས་མལ་སྟན་དེ་ཇི་ལྟར་བཏིང་བ་བཞིན་དུ་བཞག་ནས་དེར་སུ་ཡང་ཉལ་ཞིང་ལྟ་བར་མི་བྱེད་དེ། མལ་སྟན་དེ་སྟོང་པར་འདུག་པ་དང་། གནམ་བབས་སུ་
སྦྲུལ་གདུག་པ་ཞིག་ཕན་ཚུན་དུ་འཕྱན་ཅིང་རང་དགར་རྒྱུ་ཞིང་གནས་པ་ལས་མལ་སྟན་འདུག་པ་དེར་ཕྱིན་ཏེ། དེ་དེའི་འོག་ཏུ་འཁྱིལ་ཏེ་འདུག་གོ། །ཇི་ཙམ་ན་དགེ་སློང་ཞིག་གློ་བུར་དུ་དགེ་སློང་དེའི་དྲུང་དུ་འོངས་པ་དང་། དགེ་སློང་དེས་དེ་ངལ་བསོས་ཏེ། དེ་ནས་ལམ་གྱི་ངལ་སོས་
པ་དང་། དེས་མཆོད་རྟེན་དང་། ཚངས་པ་མཚུངས་པར་སྤྱོད་པ་ལ་ཕྱག་འཚལ་དུ་བཅུག་ནས། དེས་མཆོད་རྟེན་དག་ལ་ཕྱག་བྱས་ནས་ཉི་མ་ནུབ་སྟེ། དགེ་སློང་དེས་དེ་ལ་འདི་སྐད་ཅེས་ཚེ་དང་ལྡན་པ་ཆུ་དང་ས་དང་ཡུངས་མར་འདི་རེ་མལ་སྟན་ཡང་འདི་ཡིན་ཏེ། ཇི་ལྟར་བཏིང་ཞིང་
འདུག་པ་ལ་ཁྱོད་ལམ་གྱིས་དུབ་པས་རྐང་པ་ཁྲུས་ལ་ཉོལ་ཅིག་ཅེས་སྨྲས་པ་དང་། དེ་སྔོན་གྱི་ལས་ཀྱི་དབང་གིས་བསྐུལ་བས་མལ་སྟན་ལ་མ་བརྟགས་པར་ཉལ་ཏེ། གཉིད་ཀྱིས་ལོག་གོ། །དེ་གཉིད་ཀྱིས་ལོག་པས་སྦྲུལ་གདུག་པ་དེ་གནོན་པ་དང་། དེ་ཕན་ཚུན་འགྲོ་བའི་སྐབས་
མེད་དེ། བཙིར་བའི་སྡུག་བསྔལ་གྱི་ཚོར་བས་གཟིར་ནས་དགེ་སློང་དེའི་ལུས་ལ་བཟུང་ངོ་། །དེ་མཆེ་བས་ཟིན་པའི་སྡུག་བསྔལ་སྐྱེས་པར་གྱུར་པས་ཕན་ཚུན་བསྒྱུར་བ་དང་། དེ་ཡང་ཤི་བར་གྱུར་ཏེ། དེ་གཉིས་ཀ་ཡང་དུས་ལས་འདས་སོ། །ཇི་ཙམ་ན་མཚན་མོའི་ནམ་ནངས་ཏེ།
དགེ་སློང་དེ་དེའི་དྲུང་དུ་སོང་ནས་དལ་ནས་དལ་ནས་སྒོ་འཕར་ལ་བརྡུངས་པ་དང་། དེ་དུས་ལས་འདས་པས་ག་ལ་ཞིག་ལན་འདེབས་ཏེ། དེ་རེ་ཞིག་འདི་ངལ་བས་ཉལ་ཏེ་རང་ལྡང་གྲང་སྙམ་དུ་བསམས་པ་དང་། ཇི་ཙམ་ན་དྲོ་བབ་པར་གྱུར་ཏེ། དགེ་སློང་དེ་ཡང་དེའི་དྲུང་དུ་སོང་ནས་སྒོ་འཕར་ལ་དྲག་

ཏུ་བརྡུངས་ཏེ། ཚེ་དང་ལྡན་པ་དྲོ་བབ་ཀྱིས་ལོང་ཤིག་ཅེས་སྨྲས་པ་དང་། གནས་ཁང་སྟོང་པར་འདུག་པས་ག་ལ་ཞིག་ལན་ཡོད་དེ། དེ་ལ་དགེ་སློང་དག་གིས་ཅིའི་ཕྱིར་སྒོ་འཕར་རྡུང་ཞེས་སྨྲས་པ་དང་། དེས་ཇི་ལྟར་གྱུར་པ་རྒྱས་པར་བརྗོད་དོ། །དགེ་སློང་དག་གིས་ལྡེ་མིག་ཀྱོག་པོ་བླངས་ཏེ་
སྒོ་ཕྱེ་བ་དང་། ཇི་ཙམ་ན་དུས་ལས་འདས་པར་མཐོང་ངོ་། །དེ་དག་གིས་ཕན་ཚུན་དུ་བརྟགས་ན་སྦྲུལ་གདུག་པ་ཞིག་མལ་གྱི་འོག་ཏུ་ནོན་ནས་དུས་ལས་འདས་པར་མཐོང་སྟེ། དེ་ནས་ཁ་ཅིག་གིས་ཚེ་དང་ལྡན་པ་འདི་ནི་སྦྲུལ་གདུག་པ་འདིས་ཟོས་པས་དུས་ལས་འདས་སོ། །དེ་ན་ཁ་ཅིག་ནི་
འདི་ཡང་ཚེ་དང་ལྡན་པ་འདིས་ལུས་བསྒྱུར་བས་དུས་ལས་འདས་སོ་ཞེས་དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ་ཉེས་དམིགས་གང་ཡིན་པ་ནི་དགེ་སློང་མལ་སྟན་གཏམས་པས་མལ་སྟན་གྱི་ཞལ་ཏ་པ་ལ་མ་གཏད་ཅིང་དུས་དུས་
སུ་མ་བརྟགས་ལས་གྱུར་ཏེ། དེ་ལྟ་བས་ན་མལ་སྟན་གཏམས་པར་གྱུར་པ་དེས་མལ་སྟན་གྱི་ཞལ་ཏ་པ་ལ་གཏད་པར་བྱ་ཞིང་ལྟབ་སྟེ་ཆོས་གོས་ཀྱི་གདང་བུ་ལ་དགལ་བར་བྱ་བར་མཁྱེན་ནས་བཀའ་སྩལ་པ། དགེ་སློང་དག་དགེ་སློང་དེས་ནི་བག་མེད་པ་བྱས་པས་ཉེས་དམིགས་སུ་གྱུར་ཏེ། དེ་
ལྟ་བས་ན་དགེ་སློང་གང་ལ་མལ་སྟན་གཏམས་པར་གྱུར་པ་དེས་ཅི་ནུས་ཀྱིས་སྐོམས་ལ་ལྟོབ་སྟེ་མལ་སྟན་གྱི་ཞལ་ཏ་པ་ལ་གཏོད་ཅིག །ཡང་ན་ལྟོབ་ལ་ཆོས་གོས་ཀྱི་གདང་བུ་ལ་བཀལ་ཏེ་གཞག་པར་བྱའོ། །གང་ཞིག་ཉལ་བར་བྱེད་ན་ཡང་མལ་སྟན་ལ་བརྟགས་ཏེ་ཉལ་བར་བྱའོ། །བཅོམ་ལྡན་
འདས་ཀྱིས་མལ་སྟན་ལ་ཉལ་བར་འདོད་པ་དེས་མལ་སྟན་ལ་རྟོགས་ལ་ཉལ་བར་བྱའོ་ཞེས་གསུངས་པ་དང་། དེ་དག་གིས་མེ་མར་ལ་མལ་སྟན་རྟོག་པ་དང་། བཅོམ་ལྡན་འདས་ཀྱིས་བཀའ་སྩལ་པ། མལ་སྟན་མེ་མར་ལ་བརྟག་པར་མི་བྱའོ། །འོན་ཀྱང་ཉིན་པར་མལ་སྟན་ལ་བརྟག་
པར་བྱའོ། །དགེ་སློང་དག་གིས་མལ་སྟན་ཐམས་ཅད་གློངས་པ་དང་། བཅོམ་ལྡན་འདས་ཀྱིས་བཀའ་སྩལ་པ། གང་ཡུན་རིང་དུ་གཞག་པ་དེ་དག་ནི་གཞི་ལས་གློངས་ལ་བརྟག་པར་བྱའོ། །བཏིང་བ་གཞན་ནི་སྤྲུགས་པ་ལ་ཉལ་བར་བྱའོ། །གླེང་གཞི་ནི་མཉན་ཡོད་ནའོ། །དགེ་

སློང་གཉིས་ཤིག་གནས་ཁང་གཅིག་ན་གནས་ཏེ། དེ་གཉིས་ལས་གཅིག་གིས་གཞོན་ནུ་གཞན་ཞིག་རབ་ཏུ་ཕྱུང་བ་དང་། དེ་རབ་ཏུ་གཉིད་ཆེ་བ་ཞིག་སྟེ་རིང་ཞིག་ན་ལྡང་བ་དང་། དེ་ལ་མཁན་པོ་རྟག་ཏུ་གཤེའོ། །ཇི་ཙམ་དུས་གཞན་ཞིག་ན་རིང་ཞིག་གཉིད་
ཀྱིས་ལོག་པ་དང་། སྔངས་ཏེ་ལངས་ནས་རྔུལ་གཟན་ཤམ་ཐབས་སུ་གྱོན་ཏེ། དེ་བཞིན་དུ་མཁན་པོའི་དྲུང་དུ་སོང་བ་དང་། དེ་ཡང་མལ་ནས་ལངས་ནས་ཤམ་ཐབས་གྱོན་ཞིང་འདུག་པ་དེའི་རྐང