Kinh tạng Tây Tạng (Kangyur Đại Học) — 011_འདུལ་བ།_ད

ྒྱལ་ལ་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པའི་རྫུ་འཕྲུལ་འདི་ནི་ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་ཡིན་ནོ། །རྒྱལ་པོ་ཆེན་པོ་དེ་བཞིན་གཤེགས་པ་མུ་སྟེགས་ཅན་རྣམས་དང་སྐྱེ་བོའི་ཚོགས་ཀྱི་མདུན་དུ་བླ་ན་མེད་པའི་ཆོ་འཕྲུལ་
ཆེན་པོ་བསྟན་པར་གསོལ་བ་འདེབས་པ་སུ་ཡིན། དེ་ནས་ཀོ་ས་ལའི་རྒྱལ་པོ་གསལ་རྒྱལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་
པ་བཅོམ་ལྡན་འདས་ཀྱིས་མུ་སྟེགས་ཅན་རྣམས་དང་། སྐྱེ་བོའི་ཚོགས་ཀྱི་མདུན་དུ་བླ་ན་མེད་པའི་ཆོ་འཕྲུལ་ཆེན་པོ་བསྟན་ཅིང་མུ་སྟེགས་ཅན་རྣམས་ཐག་སྩལ་པ་དང་། ལྷ་དང་མི་རྣམས་དགའ་བར་མཛད་པ་དང་། སྐྱེ་བོ་དམ་པ་རྣམས་གློ་བ་རངས་པར་མཛད་པར་བཅོམ་ལྡན་འདས་

ལ་གསོལ་པ་བདག་ལགས་ཏེ། དེ་ནི་དགེ་སྦྱོང་དང་བྲམ་ཟེར་བཅས། ལྷ་དང་མིར་བཅས་པའི་སྐྱེ་དགུ་ལ་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་ལགས་སོ་ཞེས་གསོལ་པ་དང་། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་ཅང་མི་གསུང་
བས་གནང་ངོ་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་རང་གི་སྟན་ཇི་ལྟ་བ་ལ་འདུག་གོ། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་གཉིས་པ། དེ་ནས་བཅོམ་ལྡན་འདས་ཀྱིས་ཕྱག་
འཁོར་ལོ་དང་། བཀྲ་ཤིས་དང་། གཡུང་དྲུང་ཅན་དྲ་བས་འབྲེལ་པ། བསོད་ནམས་བརྒྱ་ཕྲག་དུ་མ་ལས་འཁྲུངས་པ། འཇིགས་པ་རྣམས་དབུགས་འབྱིན་པར་མཛད་པས་ས་ལ་རེག་པར་མཛད་དེ། ཀྱེ་མ་ཀླུ་རྣམས་ཀྱིས་པདྨ་ཤིང་རྟའི་འཁོར་ལོ་ཙམ་འདབ་མ་སྟོང་དང་ལྡན་
པ། ཐམས་ཅད་གསེར་ལས་བྱས་པ། རིན་པོ་ཆེའི་ཆུ་བ་དང་། རྡོ་རྗེའི་ཟེ་བ་ཅན་ཁྱེར་ཏེ་འོངས་ཀྱང་སླ་ན་སྙམ་དུ་འཇིག་རྟེན་པའི་ཐུགས་བསྐྱེད་པ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་གང་གི་ཚེ་འཇིག་རྟེན་པའི་ཐུགས་བསྐྱེད་པ་དེའི་ཚེ་སྲོག་ཆགས་
གྲོག་སྦུར་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་པར་འགྱུར་ལ། གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་པ་དེའི་ཚེ་ནི་ཉན་ཐོས་དང་། རང་སངས་རྒྱས་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་པར་མི་འགྱུར་ན།
དུད་འགྲོའི་སྐྱེ་གནས་སུ་སོང་བ་ཀླུ་རྣམས་ཀྱིས་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་ཅིའི་ཕྱིར་ས་ལ་རེག་པར་མཛད་སྙམ་ན་ཆོ་འཕྲུལ་ཆེན་པོ་སྟོན་པར་མཐོང་ནས་དེ་དག་གིས་པདྨ་ཤིང་རྟའི་འཕང་ལོ་ཙམ་འདབ་མ་སྟོང་དང་ལྡན་པ། ཐམས་ཅད་གསེར་ལས་བྱས་པ། རིན་པོ་ཆེའི་
ཆུ་བ་དང་། རྡོ་རྗེའི་ཟེ་བ་ཅན་ཁྱེར་ཏེ་ས་བརྟོལ་ནས་བྱུང་བ་དང་། བཅོམ་ལྡན་འདས་པདྨ་དེའི་སྙིང་པོ་ལ་བཞུགས་སོ། །དེ་ནས་བཅོམ་ལྡན་འདས་ཀྱི་གཡས་གཡོན་དུ་པདྨ་དེ་འདྲ་བ་གཞན་རབ་ཏུ་མང་པོ་དག་བྱུང་བར་གྱུར་ཏེ། དེ་དག་རེ་རེ་ལ་ཡང་སྤྲུལ་པའི་སངས་རྒྱས་རྣམས་བཞུགས་པར་གྱུར་

ཏོ། །དེ་དག་གི་གཡས་གཡོན་དུ་ཡང་པདྨ་དེ་འདྲ་བ་གཞན་དག་བྱུང་བར་གྱུར་ཅིང་དེ་དག་ལ་ཡང་གཞན་ཏེ་དེ་བཞིན་དུ་འོག་མིན་གྱི་གནས་ཀྱི་བར་དུ་སངས་རྒྱས་ཕལ་པོ་ཆེ་སྤྲུལ་ཏོ། །དེ་ན་སངས་རྒྱས་ཁ་ཅིག་ནི་འབར། ཁ་ཅིག་ནི་གསལ་བར་མཛད། ཁ་ཅིག་
ནི་ཆར་འབེབས། ཁ་ཅིག་ནི་གློག་འབྱིན། ཁ་ཅིག་ནི་ཀུན་ཤེས་པ་ལུང་སྟོན། ཁ་ཅིག་ནི་ཞུ་བ་ཞུ། ཁ་ཅིག་ནི་ལན་འདེབས། ཁ་ཅིག་ནི་འཆག་པ་མཛད། ཁ་ཅིག་ནི་གཞེས། ཁ་ཅིག་ནི་བཞེངས། ཁ་ཅིག་ནི་བཞུགས། ཁ་ཅིག་ནི་གཟིམས་ཏེ། ཇི་ལྟར་བྱིས་པ་གཞོན་
ནུ་རྣམས་ཀྱིས་ཀྱང་སྒྲིབ་པ་མེད་པར་སངས་རྒྱས་ཀྱི་སྐུ་མཐོང་བ་དེ་ལྟར་ཡང་བྱིན་གྱིས་བརླབས་སོ། །ཆོ་འཕྲུལ་དེ་མཐོང་ནས་ཀོ་ས་ལའི་རྒྱལ་པོ་གསལ་རྒྱལ་བཙུན་མོའི་འཁོར་དང་། གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་བཅས་པ་དང་། ཡུལ་སྣ་ཚོགས་
ནས་འོངས་པའི་སྲོག་ཆགས་འབུམ་ཕྲག་དུ་མ་དང་། ནམ་མཁའི་དཀྱིལ་ན་ལྷ་འབུམ་ཕྲག་དུ་མ་བཅོམ་ལྡན་འདས་ཀྱི་ཆོ་འཕྲུལ་ཆེན་པོ་ལ་མིག་མི་འཛུམས་པར་ལྟ་ཞིང་རྒྱུན་མི་འཆད་པར་ཕྱག་འཚལ་ལོ། །ནམ་མཁའ་ལ་གནས་པའི་ལྷ་རྣམས་ཀྱང་རྔ་དག་རྡུང་ངོ་། །གནས་གནས་ན་
ཡང་རྔ་བོ་ཆེ་རྣམས་ནི་རྡུང་། དུང་སྒྲིལ་མ་ནི་འབུད། རོལ་མོའི་སྒྲ་རྣམ་པ་སྣ་ཚོགས་ནི་འབྱིན་ཅིང་། ལ་ལ་ནི་གླུ་ལེན། ལ་ལ་ནི་གར་བྱེད་དོ། །བྱོལ་སོང་གི་སྐྱེ་གནས་སུ་གཏོགས་པའི་སྲོག་ཆགས་རྣམས་ཀྱང་ཡིད་བདེ་བ་སྐྱེས་ནས་རང་གི་རིས་དང་འདྲ་བའི་སྒྲ་སྐད་རྣམ་པ་སྣ་
ཚོགས་སྒྲོགས་པ་འདི་ལྟ་སྟེ། རྟ་རྣམས་ནི་འཚེར། གླང་པོ་ཆེ་རྣམས་ནི་ངུར། རྔ་མོ་རྣམས་ནི་འཁོང་། བ་ལང་རྣམས་ནི་འབོད། རྨ་བྱ་རྣམས་ནི་འགྱུར་ཏེ། ལྷ་དང་མིར་བཅས་པའི་འགྲོ་བ་དགའ་བ་དང་རབ་ཏུ་དགའ་བ་སྐྱེས་ནས། བཅོམ་ལྡན་འདས་ལ་མཆོད་པ་བྱ་བར་
སྤྲོ་བར་གྱུར་ཏོ། །དེ་ནས་ལྷ་རྣམས་ཀྱིས་ལྷའི་མེ་ཏོག་ཨུཏྤ་ལ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། མན་དཱ་ར་བ་རྣམས་གཏོར་ཏོ། །ལྷའི་ཨ་ག་རུའི་ཕྱེ་མ་དང་། རྒྱ་སྤོས་ཀྱི་ཕྱེ་མ་དང་། ཙན་དན་གྱི་ཕྱེ་མ་དང་། ལྷ་རྫས་ཀྱི་གོས་དག་ཀྱང་གཏོར། མི་དང་མི་

མ་ཡིན་པའི་བར་དག་ཀྱང་དེ་བཞིན་ནོ། །དེ་ལྟ་བུའི་དགའ་སྟོན་ཆེན་པོ་བྱུང་བ་ན་གདུལ་བའི་སྐྱེ་བོས་རྟོགས་པར་མཛད་པའི་ཕྱིར་བཅོམ་ལྡན་འདས་ཉིད་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བརྩམ་པར་བྱ་ཞིང་ངེས་འབྱུང་བྱ། །སངས་རྒྱས་བསྟན་ལ་འབད་པར་བྱ། །འདམ་བུའི་
ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་ཆོས་འདུལ་འདི་ལ་ནི། བག་དང་ལྡན་པར་སྤྱོད་བྱེད་པ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་གྱི་ནི་མཐར་བྱེད་འགྱུར། །ལྷག་མ་སྤྲུལ་པའི་སངས་རྒྱས་རྣམས་ཀྱིས་ཀྱང་གཅིག་ཅར་དུ་
ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་སྲིད་ཉི་མ་མ་ཤར་བ། །དེ་སྲིད་སྲིན་བུ་མེ་ཁྱེར་གསལ། །མཁའ་ལ་ཉི་མ་ཤར་བ་ན། །མོག་མོག་པོར་འགྱུར་གསལ་མི་འགྱུར། །ཇི་སྲིད་དེ་བཞིན་གཤེགས་མ་བྱུང་། །རྟོག་གེ་ཅན་རྣམས་སྔོན་གསལ་ཏེ། །རྫོགས་པའི་
སངས་རྒྱས་འཇིག་རྟེན་སྣང་། །རྟོག་གེ་མི་གསལ་དེའི་སློབ་མིན། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཆོ་འཕྲུལ་ཆེན་པོ་མི་སྣང་བར་འགྱུར་གྱིས་མཚན་མ་ཟུང་ཤིག །བཅོམ་ལྡན་འདས་ཀྱིས་དེ་སྐད་གསུངས་མ་ཐག་ཏུ་མོད་ལ་མི་
སྣང་བར་གྱུར་ཏོ། །དེ་མི་སྣང་བར་གྱུར་པ་དང་། ཀོ་ས་ལའི་རྒྱལ་པོ་གསལ་རྒྱལ་གྱིས་མུ་སྟེགས་ཅན་རྣམས་ལ་འདི་སྐད་ཅེས་སྨྲས་སོ། །ཀྱེ་བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཟིན་ཏེ། ད་ནི་ཁྱེད་ཀྱི་རེས་ལ་བབ་པས་ཁྱེད་ཀྱིས་སྟོན་ཅིག །
དེ་ནས་འོད་སྲུང་རྫོགས་བྱེད་ཅང་མི་སྨྲ་བར་ཀུན་ཏུ་རྒྱུ་གནག་ལྷས་ཀྱི་བུ་ལ་གྲུ་ཕུགས་བྱས་སོ། །དེས་ཀྱང་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལའོ། །དེས་ཀྱང་མི་ཕམ་སྐྲའི་ལ་བ་ཅན་ལའོ། །དེས་ཀྱང་ཀ་ཏྱའི་བུ་ནོག་ཅན་ལའོ། །དེས་ཀྱང་གཅེར་བུ་པ་གཉེན་གྱི་བུ་ལའོ། །
དེས་ཀྱང་འོད་སྲུང་རྫོགས་བྱེད་ལ་བྱས་ན་འགའ་ཡང་སྨྲ་བར་མི་བྱེད་དོ། །དེ་དག་ལ་ལན་གཉིས་ལན་གསུམ་གྱི་བར་དུ་རྒྱལ་པོས་དེ་སྐད་ཅེས་སྨྲས་ན། དེ་བཞིན་དུ་གཅིག་ལ་གཅིག་གྲུ་ཕུགས་བྱེད་ཅིང་ཅང་མི་ཟེར་བར་གྱུར། ཡུལ་ཡུལ་པོར་གྱུར། ཞུམ་ཞུམ་པོར་གྱུར་ནས་

མགོ་སྨད་ཅིང་སྤོབས་པ་མེད་དེ་སེམས་ཁོང་དུ་ཆུད་ཅིང་འདུག་གོ། །དེ་ནས་གནོད་སྦྱིན་ལག་ན་རྡོ་རྗེ་འདི་སྙམ་དུ་སྐྱེས་བུ་བླུན་པོ་འདི་རྣམས་ཡུན་རིང་པོ་ནས་བཅོམ་ལྡན་འདས་ལ་ཐོ་བཙམ་པས་དེའི་ཕྱིར་གང་གིས་ན་འདི་རྣམས་ཀུན་ཏུ་འབྲོས་པར་འགྱུར་བའི་ཐབས་ཞིག་བྱའོ་སྙམ་
ནས། དེས་གང་གིས་ན་ཆོ་འཕྲུལ་གྱི་འདུན་ཁང་དེ་དེ་རྣམས་ཀྱི་མིག་ལམ་དུ་ཡང་མི་འབབ་པ་དེ་ལྟ་བུའི་རླུང་མར་དང་ཆར་དྲག་བཏང་བ་དང་། དེ་ན་ཁ་ཅིག་ནི་བྲེད་ནས་རིའི་གསེབ་ཏུ་ཞུགས། ཁ་ཅིག་ནི་རྩྭའི་ཚང་ཚིང་དུ། ཁ་ཅིག་ནི་ནགས་ཐིབས་པོར། ཁ་ཅིག་ནི་འདུན་ཁང་དུ།
ཁ་ཅིག་ནི་ལྷ་ཁང་དུ་ཞུགས་སོ། །བཅོམ་ལྡན་འདས་ནི་ཉིད་ཀྱི་ཆོ་འཕྲུལ་ཆེན་པོའི་འདུན་ཁང་ན་བཞུགས་ཤིང་ཚིགས་སུ་བཅད་པ་དག་བཀའ་སྩལ་པ། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ཀུན་དགའ་ར་བ་ལྗོན་ཤིང་དང་། །མཆོད་རྟེན་
རྣམས་ལ་སྐྱབས་སུ་འགྲོ། །སྐྱབས་དེ་གཙོ་བོ་མ་ཡིན་ཞིང་། །སྐྱབས་དེ་མཆོག་གྱུར་མ་ཡིན་ཏེ། །སྐྱབས་དེ་དག་ལ་བརྟེན་ནས་ནི། །སྡུག་བསྔལ་ཀུན་ལས་རབ་མི་ཐར། །གང་ཞིག་གང་ཚེ་སངས་རྒྱས་དང་། །ཆོས་དང་དགེ་འདུན་སྐྱབས་སོང་ཞིང་། །འཕགས་པ་ཡི་ནི་བདེན་
པ་བཞི། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འདས་པ་དང་། །མྱ་ངན་འདས་བདེར་འགྲོ་བ་ཡི། །འཕགས་ལམ་ཡན་ལག་བརྒྱད་པོ་དག །ཤེས་རབ་ཀྱིས་ནི་ལྟ་བྱེད་ན། །སྐྱབས་དེ་དག་ནི་གཙོ་ཡིན་ཞིང་། །སྐྱབས་དེ་དག་ནི་མཆོག་ཡིན་ཏེ། །སྐྱབས་དེ་
དག་ལ་བརྟེན་ནས་ནི། །སྡུག་བསྔལ་ཀུན་ལས་རབ་ཏུ་ཐར། །དེ་ནས་བཅོམ་ལྡན་འདས་ཀྱིས་འཁོར་དེའི་བསམ་པ་དང་བག་ལ་ཉལ་དང་ཁམས་དང་རང་བཞིན་ཐུགས་སུ་ཆུད་ནས་དེ་ལ་བརྟེན་ཏེ་གང་ཐོས་ན་སེམས་ཅན་བརྒྱ་ཕྲག་མང་པོས་ཁྱད་པར་ཆེན་པོ་ཐོབ་པར་འགྱུར་བ་དེ་ལྟ་བུའི་ཆོས་བསྟན་
པས་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་

ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། འཁོར་དེ་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་
བཀོད་དོ། །དེ་ནས་བཅོམ་ལྡན་འདས་ཀྱིས་འཁོར་དེ་དག་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་ལེན་དུ་བཅུག །ཡང་དག་པར་གཟེངས་བསྟོད། ཡང་དག་པར་དགའ་བར་མཛད་དེ་གདན་ལས་བཞེངས་ནས་གཤེགས་སོ། །དེ་ནས་འོད་སྲུང་རྫོགས་
བྱེད་ལ་སློབ་མ་རྣམས་ཀྱིས་དྲིས་པ། མཁན་པོ་དེ་ཁོ་ན་ཉིད་ཇི་ལྟ་བུ་ལགས་པ་གསུང་ཤིག །དེས་སློབ་མ་དེ་དག་ཁ་ཅིག་ལ་ནི་བུ་འདི་ལྟ་སྟེ། འཇིག་རྟེན་རྟག་པ་འདི་ནི་དེ་ཁོ་ན་ཉིད་ཡིན་ནོ་ཞེས་སྨྲས། གཞན་དག་ལ་ནི་མི་རྟག་གོ། །གཞན་དག་ལ་ནི་རྟག་ཀྱང་རྟག་མི་རྟག་ཀྱང་
མི་རྟག་གོ། །གཞན་དག་ལ་ནི་རྟག་པ་ཡང་མ་ཡིན་མི་རྟག་པ་ཡང་མ་ཡིན་ནོ། །གཞན་ལ་ནི་མཐའ་ཡོད་དོ། །མཐའ་མེད་དོ། །མཐའ་ཡོད་ཀྱང་ཡོད་མཐའ་མེད་ཀྱང་མེད་དོ། །མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་ནོ། །སྲོག་དེ་ལུས་ཡིན་ནོ། །སྲོག་ཀྱང་
གཞན་ལ་ལུས་ཀྱང་གཞན་ཡིན་ནོ། །དེ་བཞིན་སོང་བ་ཤི་ཕན་ཆད་ཡོད་དོ། །མེད་དོ། །ཡོད་ཀྱང་ཡོད་ལ་མེད་ཀྱང་མེད་དོ། །དེ་བཞིན་སོང་བ་ཤི་ཕན་ཆད་ཡོད་པ་ཡང་མ་ཡིན་མེད་པ་ཡང་མ་ཡིན་པ་འདི་ནི་བདེན་གྱི་གཞན་ནི་རྨོངས་པ་ཡིན་ནོ་ཞེས་རྣམ་པ་གཞན་དང་གཞན་གྱིས་
བསླུས་སོ། །དེ་ཡང་ངོ་ཚ་ནས་མགོ་སྨད་དེ་མྱ་ངན་གྱི་མེས་གདུངས་པས་ཆུ་བསིལ་བ་འདོད་པའི་ཕྱིར་རྫིང་བུར་སོང་བ་དང་། དེ་ནས་ལམ་དུ་མ་ནིང་ཞིག་གིས་མཐོང་ནས་དེས་ཚིགས་སུ་བཅད་དེ་སྨྲས་པ། ཐུག་རེ་རྭ་མཐུ་ཆག་པ་ལྟ་བུ་ཡི། །མདངས་མེད་ཁྱོད་ཅིག་ག་ལས་རིངས་པར་འོངས། །
ཤཱཀྱའི་ཆོས་ནི་རྣམ་པར་མ་ཤེས་པས། །བོང་བུ་བཞིན་དུ་འཛེམ་པ་མེད་པར་འཕྱན། །དེས་ཀྱང་ཚིགས་སུ་བཅད་དེ་སྨྲས་པ། ང་ཡི་མདུན་ན་འདུག་འདི་འཆི་བདག་དེས། །བདག་གི་ལུས་ལ་སྟོབས་དང་བརྩོན་པ་མེད། །དངོས་པོ་ཐམས་ཅད་བདེ་དང་སྡུག་བསྔལ་སྟེན། །ཐར་ཟིན་

ང་ནི་བདེ་བ་བྱེད་དུ་འགྲོ། །ཉི་ཟེར་རབ་ཏུ་ཚ་བར་བྱེད་རྣམས་ཀྱིས། །ལུས་དང་སེམས་ཀུན་གདུངས་ཤིང་ངལ་གྱུར་གྱིས། །མི་སྲུན་ཐོང་ལ་རྫིང་རབ་བསིལ་བ་དེ། །ག་ལ་ཡོད་པ་བདག་ལ་མྱུར་དུ་སྨྲོས། །དེས་ཀྱང་ཚིགས་སུ་བཅད་དེ་སྨྲས་པ། ཕོ་ངན་སྡིག་ཅན་
སྐྱེས་མཆོག་མ་ཡིན་པ། །མཚེའུ་ལྟར་པད་མ་ངང་པ་དང་ལྡན་ཞིང་། །གངས་ཀྱི་ཆུ་ལྟར་ཆུ་ཡོངས་གཙང་བ་ཡི། །རྫིང་བུ་ཤིན་དུ་བཟང་པོ་མ་མཐོང་ངམ། །དེས་ཀྱང་ཚིགས་སུ་བཅད་དེ་སྨྲས་པ། ཁྱོད་ཀྱང་ཕོ་མིན་མི་ཡི་ཆུང་མའང་མིན། །དེ་བརྡ་ཕྲད་ཀྱིས་ཟུང་ལ་ལམ་ཕྱེ་དང་། །རྫིང་
བུ་ཆུ་བཟང་ཆུ་བསིལ་གང་བར་ནི། །གདུང་བ་བསིལ་བར་བྱ་ཕྱིར་བདག་འགྲོའོ། །དེ་ལམ་དེ་ནས་བཟུར་བ་དང་རྫོགས་བྱེད་ཀྱང་རྫིང་བུའི་དྲུང་དུ་སོང་སྟེ་མགུལ་དུ་བུམ་པ་བྱེ་མས་བཀང་བ་བཏགས་ནས་དེར་ནུབ་སྟེ། དེ་ཉིད་དུ་དུས་ལས་འདས་སོ། །དེ་ནས་དེའི་སློབ་མ་རྣམས་ཀྱིས་གཅིག་
ལ་གཅིག་དྲིས་པ། མཁན་པོ་ཁྱེད་སུས་མཐོང་། དེ་རྣམས་ཀྱིས་སྨྲས་པ། མ་མཐོང་ངོ་། །ཁྱེད་ལས་མཁན་པོས་ལུང་བསྟན་པ་སུ་ཡོད། དེ་ན་ཁ་ཅིག་གིས་སྨྲས་པ། ཤེས་ལྡན་དག་ངེད་ལ་ནི་མཁན་པོས་འཇིག་རྟེན་རྟག་པ་འདི་ནི་བདེན་གྱི་གཞན་ནི་རྨོངས་པ་ཡིན་ནོ་ཞེས་ལུང་
བསྟན་ཏོ། །ཁ་ཅིག་གིས་སྨྲས་པ། ངེད་ལ་ནི་མི་རྟག་གོ་ཞེས་བསྟན་ཏོ། །གཞན་དག་གིས་སྨྲས་པ། ངེད་ལ་ནི་རྟག་ཀྱང་རྟག་མི་རྟག་ཀྱང་མི་རྟག་གོ། །རྟག་པ་ཡང་མ་ཡིན་མི་རྟག་པ་ཡང་མ་ཡིན་ནོ། །མཐའ་མེད་དོ། །མཐའ་ཡོད་དོ། །མཐའ་ཡོད་ཀྱང་ཡོད་མཐའ་མེད་ཀྱང་
མེད་དོ། །མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་ནོ། །དེ་བཞིན་སོང་བ་ཤི་ཕན་ཆད་ཡོད་དོ། །མེད་དོ། །ཡོད་ཀྱང་ཡོད་ལ་མེད་ཀྱང་མེད་དོ། །དེ་བཞིན་སོང་བ་ཤི་ཕན་ཆད་ཡོད་པ་ཡང་མ་ཡིན་མེད་པ་ཡང་མ་ཡིན་པ་འདི་ནི་བདེན་གྱི་གཞན་ནི་རྨོངས་པ་ཡིན་ནོ་ཞེའོ། །
དེ་རྣམས་ཀྱིས་སྨྲས་པ། ཤེས་ལྡན་དག་འདི་ལྟ་སྟེ། སྣ་ཚོགས་སུ་བཏགས་པས་བདག་ཅག་ཐམས་ཅད་མི་མཐུན་པར་གྱུར་གྱིས་མ་ལ་བདག་ཅག་གིས་མཁན་པོ་ཀུན་དུ་བཙལ་ལ་དེ་ཁོ་ན་ཉིད་ཇི་ལྟ་བུ་ཡིན་དྲིའོ་ཞེས་དེ་རྣམས་དོང་བ་དང་། དེ་རྣམས་ཀྱིས་ལམ་གྱི་དབུས་སུ་བུ་མོ་ཞིག་མཐོང་

ནས་དེ་རྣམས་ཀྱིས་དེ་ལ་ཚིགས་སུ་བཅད་པས་དྲིས་པ། ཆོས་ཀྱི་གོས་ནི་གྱོན་པ་པོ། །དཀའ་ཐུབ་ནལ་ཟེ་གང་ཟ་བ། །རྫོགས་བྱེད་འདི་ནས་སོང་གྱུར་པ། །བཟང་མོ་ཁྱོད་ཀྱིས་མ་མཐོང་ངམ། །དེས་ཀྱང་ཚིགས་སུ་བཅད་པས་སྨྲས་པ། ངན་སོང་སེམས་ཅན་དམྱལ་བ་པ། །
ལག་པ་བརྐྱང་ནས་འགྲོ་བ་ཡི། །རྫོགས་བྱེད་དེ་ནི་ཆུས་གཡེངས་ནས། །རྐང་ལག་སྐྱ་བོར་གྱུར་ཅིང་འདུག །དེ་རྣམས་ཀྱིས་ཀྱང་ཚིགས་སུ་བཅད་པས་སྨྲས་པ། ཆོས་ཀྱི་གོས་ནི་གྱོན་པ་པོ། །ཆོས་སྤྱོད་ཐུབ་པ་དེ་ལ་ནི། །ཁྱོད་ཀྱིས་སྨྲས་དེ་ལེགས་མིན་གྱིས། །བཟང་
མོ་དེ་སྐད་མ་ཟེར་ཅིག །དེས་ཀྱང་ཚིགས་སུ་བཅད་དེ་སྨྲས་པ། ཕོ་མཚན་གྱི་ནི་རྟགས་སྐྱེས་པ། །བློ་ལྡན་དེས་སུ་འཇིག་རྟེན་ན། །རྟག་ཏུ་འཇིག་རྟེན་གྱིས་མཐོང་བར། །གཅེར་བུར་གྲོང་དུ་རྒྱུ་བར་བྱེད། །ཕོ་མཚན་མདུན་ནས་དཔྱོད་བྱེད་པ། །གང་གི་ཆོས་ནི་འདི་འདྲ་བ། །
དེ་ནི་རྒྱལ་པོ་རྣམ་ཐོས་བུས། །མདའ་ནི་སྟེའུ་ཀས་གཅོད་འདོང་ཤིག །ཅེས་བྱས་པ་དང་། དེ་དག་ཅང་མི་ཟེར་བར་དོང་ནས་དེ་དག་རྫིང་བུར་ཕྱིན་པ་དང་། རེ་ཞིག་ན་རྫོགས་བྱེད་བུམ་པ་བྱེ་མས་བཀང་བ་མགུལ་དུ་བཏགས་ནས་དུས་ལས་འདས་པ་མཐོང་ནས། དེ་རྣམས་ལས་གང་
དག་བསླབ་པ་འདོད་པ་དེ་རྣམས་ཀྱིས་ཤེས་ལྡན་དག་འདི་ནི་བདེན་གྱི་གཞན་ནི་རྨོངས་པ་ཡིན་ནོ་ཞེས་སྨྲས་ནས། དེ་དག་ཀྱང་བུམ་པ་བྱེ་མས་བཀང་བ་མགུལ་དུ་བཏགས་ནས་དེ་ཉིད་དུ་དུས་ལས་འདས་སོ། །ལྷག་མ་རྣམས་ནི་སླར་ལོག་ནས་མཐའ་འཁོབ་ཏུ་དོང་ནས་འདུག་གོ། །གང་
གི་ཚེ་བཅོམ་ལྡན་འདས་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ཐོགས་པ་མེད་པའི་སྟོབས་ཀྱི་འཁོར་ལོས་སྒྱུར་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བ་དེའི་ཚེ་མུ་སྟེགས་ཅན་ཐམས་ཅད་ཀྱིས་མིའི་
ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་སྤྱན་དྲངས་པ་ལས་མུ་སྟེགས་ཅན་ཐམས་ཅད་ཐག་སྩལ་ཕམ་པར་མཛད་རྒྱབ་ཀྱིས་ཕྱོགས་པར་མཛད། སྤོབས་པ་མེད་པར་མཛད་དེ། དེ་ནས་མཐའ་འཁོབ་ཀྱི་ལྗོངས་རྣམས་སུ་རྟེན་པར་གྱུར་ཏོ། །དེ་ན་དགེ་སློང་རྣམས་ཐེ་ཚོམ་སྐྱེས་ནས། བཙུན་

པ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་སྤྱན་དྲངས་པ་ལས་མུ་སྟེགས་ཅན་ཐམས་ཅད་ཐག་སྩལ། ཕམ་པར་མཛད། རྒྱབ་ཀྱིས་ཕྱོགས་པར་མཛད།
སྤོབས་པ་མེད་པར་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་།
སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་གྲོལ་ཏེ། ཐམས་ཅད་མཁྱེན་པ། རྣམ་པ་ཐམས་ཅད་མཁྱེན་པ། ཤེས་པ་དང་། ཤེས་བྱ་ཐམས་ཅད་ལ་དབང་ཐོབ་པ། སྐྱེས་བུ་འདུལ་བའི། ཁ་ལོ་སྒྱུར་བ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་བྱང་ཆུབ་ནས་མུ་སྟེགས་ཅན་ཐམས་ཅད་ཐག་བཅུག །ཕམ་པར་བྱས། རྒྱབ་ཀྱིས་ཕྱོགས་པར་བྱས། སྤོབས་པ་མེད་པར་བྱས་པ་འདི་ལ་ངོ་མཚར་ཅི་ཆེ། འདས་པའི་དུས་ན་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག་
དང་བཅས་པ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་མ་གྲོལ་བ་ན་ཡང་སྟོན་པ་དྲུག་པོ་འཁོར་དང་བཅས་པ་འདི་དག་ཐག་བཅུག །ཕམ་
པར་བྱས། རྒྱབ་ཀྱིས་ཕྱོགས་པར་བྱས། སྤོབས་པ་མེད་པར་བྱས། ཚར་བཅད་དེ་མཐའ་འཁོབ་ཀྱི་ལྗོངས་རྣམས་སུ་རྟེན་དུ་བཅུག་པ་དེ་བཤད་ཀྱིས་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག །དགེ་སློང་དག་སྔོན་བྱུང་བ་འདས་པའི་དུས་ན་ལུས་འཕགས་ཞེས་བྱ་བའི་
ལྗོངས་ན་རྒྱལ་པོ་སྐྱེད་པ་ཞེས་བྱ་བ་རྒྱལ་སྲིད་འབྱོར་པ་དང་རྒྱས་པ་ཞེས་བྱ་བ་ནས། བྱེད་དུ་འཇུད་དོ་ཞེས་བྱ་བ་རྒྱས་པར་རོ། །དེ་ནས་རྒྱལ་པོ་སྐྱེད་པས་བཙུན་མོ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད།

དགའ་མགུར་སྤྱོད་པར་བྱེད་དོ། །དེ་ནས་བཙུན་མོ་དེ་ལ་སེམས་ཅན་ཞུགས་པར་གྱུར་ནས་རིམ་གྱིས་ཟླ་བ་དགུ་ལོན་པ་དང་། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བཙས་སོ། །གཞོན་ནུ་དེ་བཙས་པ་ན་ལུས་འཕགས་ཀྱི་ལྗོངས་རྣམས་ལོ་ལེགས་པ་
དང་། བཟའ་བ་དང་། བཏུང་བ་མོད་པར་གྱུར་ཅིང་ལྷས་ཀྱང་ཆར་དུས་བཞིན་དུ་ཕབ། དུས་དང་མཐུན་པའི་རླུང་ཡང་ལྡང་སྟེ། དེས་ན་རྟག་ཏུ་བཟའ་བ་དང་། བཏུང་བ་མོད་པར་གྱུར་ཏོ། །དེ་ནས་གཞོན་ནུའི་བཙས་སྟོན་རྒྱ་ཆེར་བྱས་ནས། གཞོན་ནུའི་མིང་ཅིར་
གདགས་ཞེས་རྒྱལ་པོ་སེམས་པ་ན་གང་གི་ཕྱིར་གཞོན་ནུ་འདི་བཙས་པ་ན་ཡུལ་དུ་བཟའ་བ་དང་། བཏུང་བ་མོད་པར་གྱུར་པ་དེའི་ཕྱིར་གཞོན་ནུའི་མིང་བཟའ་བཏུང་ཞེས་བཏགས་ནས། དེ་ནས་གཞོན་ནུ་བཟའ་བཏུང་མ་མ་བརྒྱད་ལ་རྗེས་སུ་གཏད་དོ། །གང་གི་ཚེ་དེ་ཆེན་པོར་གྱུར་པ་
དེའི་ཚེ་ཡི་གེ་སློབ་ཏུ་བཅུག་པ་དང་། རིང་པོ་མ་ཐོགས་པར་མཐར་ཕྱིན་པར་གྱུར་ཏོ། །རིགས་ཀྱི་བཟོའི་གནས་ལ་ཡང་རིང་པོ་མ་ཐོགས་པར་མཁས་པར་གྱུར་ཏོ་ཞེས་གོང་མ་བཞིན་དུ་རྒྱས་པར་བརྗོད་པར་བྱའོ། །གཞོན་ནུ་དེ་ཡང་དཔའ་བ། ཚམ་ཚོམ་མེད་པ། གཏུམ་པ་རེམ་
པར་གྱུར་ཏོ། །དེ་ནས་བཙུན་མོ་བུས་སྙེམས་ནས་རྒྱལ་པོ་ཡབ་ཀྱི་བཀའ་ཤིན་ཏུ་མི་ཉན་ཅིང་ཟློག་ཐབས་བྱེད་པར་གྱུར་ཏོ། །རྒྱུ་དེས་རྒྱལ་པོ་ཡང་མི་དགའ་བས་གདུངས་པ་དང་། དེ་མི་དགའ་བ་བློན་པོ་རྣམས་ཀྱིས་ཤེས་ནས་སྨྲས་པ། ལྷ་ཅིའི་སླད་དུ་མི་དགྱེས་པར་གྱུར། རྒྱལ་
པོས་སྨྲས་པ། ངའི་བཙུན་མོ་བུས་སྙེམས་ནས་ད་ནི་ངའི་བཀའ་ཤིན་ཏུ་མི་ཉན་ཅིང་ཟློག་ཐབས་བྱེད་དེ་རྒྱུ་དེས་ན་ང་མི་དགའ་བར་གྱུར་ཏོ། །དེ་ནས་བློན་པོ་རྣམས་ཀྱིས་སྨྲས་པ། ལྷ་གལ་ཏེ་འདི་བཀའ་བཞིན་མི་བགྱིད་ན་ད་གཞན་ཞིག་བླང་བར་བགྱི་སྟེ། དེས་ན་འདི་ཡང་དབང་དུ་
འགྱུར་ལ། ལྷ་ཡང་གཞན་དང་ལྷན་ཅིག་དགྱེས་པ་བསྟར་པར་འགྱུར་རོ། །རྒྱལ་པོས་སྨྲས་པ། གང་ནས་བླང་བར་བྱ། བློན་པོ་རྣམས་ཀྱིས་སྨྲས་པ། ཉི་འོག་གི་རྒྱལ་པོ་འདིའི་དེ་ནས་བླང་བར་བགྱིའོ། །རྒྱལ་པོས་སྨྲས་པ། དེ་དང་ང་མི་མཛའ་བ་ཡིན་ན་ཇི་ལྟར་དེ་ནས་བླང་། བློན་

པོས་སྨྲས་པ། ཉི་འོག་གི་རྒྱལ་པོ་འདི་ནི་ཆུང་བས་གཉེན་དུ་བགྱིས་ན་བཤེས་པར་འགྱུར་ལགས་ཀྱིས་ཐམས་ཅད་དུ་ཐུགས་ཁྲལ་ཆུང་བར་བཞུགས་ཤིག་དང་། འདི་བདག་ཅག་གིས་བསྒྲུབ་པར་བགྱིའོ། །དེ་ནས་བློན་པོ་རྣམས་ཉི་འོག་གི་རྒྱལ་པོ་དེའི་ཐད་དུ་སོང་
ནས་དེར་དེ་དག་གིས་དེ་ཤིན་ཏུ་རངས་པར་བྱས་པ་དང་། དེས་སྨྲས་པ་ངས་དམ་ཞིག་བཅས་ནས་བུ་མོ་སྦྱིན་ཏེ། གལ་ཏེ་ངའི་ཚ་བོ་ཞིག་ཡོད་ལ་དེ་རྒྱལ་ཚབ་ཀྱི་ཐབས་སྦྱིན་ན་དེ་ལྟ་ན་ངས་སྦྱིན་པར་བྱའོ། །དེ་རྣམས་ཀྱིས་སྨྲས་པ། དེ་བཞིན་དུ་བགྱིའོ། །རྒྱལ་པོས་སྨྲས་པ།
རེ་ཞིག་སྔར་རྒྱལ་པོ་དེ་ལ་གྱིས་ལ། དེ་གལ་ཏེ་དམ་བཅས་པ་དེ་བཞིན་དུ་བཏུབ་ན་དེའི་འོག་ཏུ་སྦྱིན་པར་བྱའོ། །དེ་ནས་བློན་པོ་རྣམས་ཀྱིས་དེ་ལ་ཕྱག་འཚལ་ཏེ་སྨྲས་པ། ལྷ་རྒྱལ་ཚབ་ཏུ་སྩལ་བར་བློན་པོ་རྣམས་ཀྱི་དད་པར་བྱས་པས་ཅི་ནས་ལྷའི་དབོན་པོ་ཞིག་མཆིས་ན་དེ་རྒྱལ་
ཚབ་དུ་སྩལ་བ་ཡེ་བགྱིའོ། །དེ་ནས་ཐོབ་སྟེ། དཔལ་གྱི་འབྱོར་པ་ཆེན་པོས་བག་མར་བླངས་ནས་དེ་དང་རྒྱལ་པོ་སྐྱེད་པ་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་བཙུན་མོ་དེ་གཡེར་བག་ཆེ་བ་ཞིག་པས་ཇི་ལྟར་རྒྱལ་པོ་དམ་པ་དེ་ལྟར་
མཉེས་པར་བྱས་པ་དང་། རྒྱལ་པོས་སྨྲས་པ། ཁྱོད་ལ་དམ་པ་ཅི་ཞིག་སྦྱིན། དེས་ཐལ་མོ་སྦྱར་ནས་སྨྲས་པ། གལ་ཏེ་བདག་ལ་ལྷས་སྐབས་ཕྱེ་ན་བདག་གི་བུ་བཙས་པ་གང་ལགས་པ་དེ་རྒྱལ་ཚབ་ཏུ་སྩལ་བར་སྩོལ། དེའི་ཚིག་ཐོས་མ་ཐག་ཏུ་རྒྱལ་པོ་མཚོན་གྱིས་གནད་དུ་
བསྣུན་པ་བཞིན་དུ་ཏིང་ཞེས་བྱེད་ནས་བསམས་པ། བདག་གིས་འདི་ལ་དམ་པ་སྦྱིན་པར་སྐབས་ཕྱེ་བ་དང་། འདིས་ཀྱང་དེ་ལྟ་བུའི་དམ་པ་བསླང་ལ་བདག་གི་བུ་བཟའ་བཏུང་འདི་ཡང་དཔའ་ཞིང་བརྩོན་པ། གཟུགས་བཟང་ཞིང་བལྟ་ན་སྡུག་པ། རིགས་དང་མཐུན་པར་སྐྱེས་པའི་བུ་གཅིག་
པ་ཡིན་ན་ཇི་ལྟར་ན་འདི་བཏང་སྟེ་གཞན་རྒྱལ་ཐབས་སྦྱིན་པར་བྱས་ཏེ། ད་འདི་ལ་ཇི་ལྟར་བྱ་ཞེས་ཐེ་ཚོམ་སྐྱེས་ནས་སེམས་པ་ལ་ཞུགས་པ་དང་། རེ་ཞིག་ན་བློན་པོ་རྣམས་ཀྱིས་རྒྱལ་པོ་ཡིད་མི་བདེ་བར་རིག་ནས་ལྷ་ཅི་དགོངས་ཞེས་དྲིས་པ་དང་། རྒྱལ་པོས་དེ་རྣམས་ལ་རང་བཞིན་སྨྲས་ཏེ།

ངས་བཙུན་མོ་ལ་དམ་པ་སྦྱིན་པའི་སྐབས་ཕྱེ་བ་དང་། དེས་ཀྱང་བུ་ཞིག་མཆིས་པར་གྱུར་ན་རྒྱལ་ཚབ་ཏུ་སྩལ་བར་གསོལ་ཞེས་གསོལ་བ་བཏབ་ནས། དེའི་ཕྱིར་ང་སེམས་ཁོང་དུ་ཆུད་པར་གྱུར་ཏོ། །དེ་ནས་བློན་པོ་རྣམས་ཀྱིས་སྨྲས་པ། ལྷ་འདིར་ཡང་མ་བས་ཏེ། ཉི་འོག་གི་རྒྱལ་པོ་
གང་ལས་བདག་ཅག་གིས་འདི་བསླང་བ་དེ་ལས་ཀྱང་དམ་འདི་ལྟ་བུ་བཅས་པས་སྩལ་མོད་ཀྱི། ལྷ་འོན་ཀྱང་མཆིས་པར་འགྱུར་རམ། མ་མཆིས་པར་འགྱུར་རམ། ཁྱེའུའམ་བུ་མོར་འགྱུར་བ་ད་དུང་སུས་འཚལ་རེ་ཞིག་དེ་ལ་མཆོག་སྩོལ་ཅིག །དེ་ནས་རྒྱལ་པོས་ཀྱང་དེ་བཞིན་
དུ་བྱའོ་ཞེས་བསྒོའོ། །དེ་ནས་གཞན་ཞིག་ན་བཙུན་མོ་སེམས་ཅན་དང་ལྡན་པར་གྱུར་ནས་ཟླ་བ་དགུ་ཚང་བ་དང་། གཞོན་ནུ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་བཙས་ཏེ། དེའི་བཙས་སྟོན་རྒྱ་ཆེར་བྱས་ནས་གཞོན་ནུ་འདིའི་མིང་ཅིར་གདགས་ཞེས་
མིང་འདོགས་པར་བྱེད་དོ། །དེ་ནས་རྒྱལ་པོ་སྐྱེད་པས་བསམས་པ། གང་གི་ཕྱིར་འདི་མ་བཙས་པ་ནས་རྒྱལ་སྲིད་མངོན་པར་འདོད་ཅིང་མངོན་པར་དགའ་བས་ན་དེའི་ཕྱིར་གཞོན་ནུ་འདིའི་མིང་རྒྱལ་སྲིད་ལ་མངོན་པར་དགའ་བ་ཞེས་བྱ་བར་བཏགས་སོ། །དེ་མ་མ་བརྒྱད་པོ་
རྣམས་ལ་གཏད་ནས་དེ་དག་གིས་ཀྱང་དྲིལ་བ་དང་། ཕྱི་བ་དང་། བཀྲུ་བ་དང་། འོ་མ་དང་། སྦྲང་རྩི་དང་། མར་དཀར་རྣམས་ཀྱིས་བསྐྱེད་ནས་གང་གི་ཚེ་ཆེན་པོར་གྱུར་ཀྱང་རྒྱལ་ཚབ་ཏུ་མ་བཅུག་གོ། །དེ་ནས་དེའི་མ་མེས་ཉི་འོག་གི་རྒྱལ་པོས་ལུས་འཕགས་ཀྱི་རྒྱལ་
པོ་སྐྱེད་པ་ལ་ཕོ་ཉ་བཏང་སྟེ། ཇི་སྟེ་བདག་གི་ཚ་བོ་རྒྱལ་སྲིད་ལ་མངོན་པར་དགའ་བ་རྒྱལ་ཚབ་ཏུ་མ་བཅུག་ན་བདག་དཔུང་གི་ཚོགས་ཡན་ལག་བཞི་པ་གོ་བསྐོན་ཏེ་ཁྱོད་ཀྱི་གན་དུ་འོང་ངོ་ཞེས་སྤྲིང་བ་དང་། དེས་ཕོ་ཉའི་ཚིག་ཐོས་ནས་འཇིགས་སྐྲག་ནས་ཡིད་མི་བདེ་ཞིང་འདུག་
གོ། །དེ་ནས་བློན་པོ་རྣམས་ཀྱིས་རྒྱལ་པོ་སྐྱེད་པ་སྐྲག་ཅིང་མི་དགའ་བར་རིག་ནས་སྨྲས་པ། ལྷ་ཅིའི་སླད་དུ་འདི་ལྟར་མི་དགྱེས་པར་མཛད། སྐྱེད་པས་སྨྲས་པ། ཉི་འོག་གི་རྒྱལ་པོ་དེས་ཚ་བོའི་ཕྱིར་ཕོ་ཉ་བཏང་ནས་ཕོ་ཉ་དེ་འདི་སྐད་ཅེས་ཅི་སྟེ་ངའི་ཚ་བོ་རྒྱལ་ཚབ་ཏུ་མི་གཞུག་ན་ང་

འོངས་ཏེ་ཁྱོད་རྒྱལ་པོ་ལས་ཕྱུང་ལ་ངའི་ཚ་བོ་གཞུག་གོ་ཞེས་ཟེར་རོ། །དེ་ནས་བློན་པོ་རྣམས་ཀྱིས་སྨྲས་པ། ལྷ་རྒྱལ་སྲིད་ལ་མངོན་པར་དགའ་བ་རྒྱལ་ཚབ་ཀྱི་ཐབས་སྩལ་ལ། གཞོན་ནུ་བཟའ་བཏུང་འདི་དགུམ་པར་བགྱིའོ། །དེ་ནས་རྒྱལ་པོ་སྐྱེད་པས་བློན་
པོ་རྣམས་ལ་སྨྲས་པ། ཆོས་དང་མི་ལྡན་པའི་ཚིག་དེ་ལྟ་བུ་མ་སྨྲ་ཤིག །འདི་ལྟར་འདི་ན་བུ་ཕ་གསོད་པ་ཐོས་ཀྱི་ཕ་བུ་གསོད་པ་ནི་མ་ཡིན་པས་ང་ནི་དེ་ལྟར་གཏན་མི་བྱེད་དོ། །དེ་དག་གིས་སྨྲས་པ། ཇི་སྟེ་མི་དགུམ་ན་ཡང་ཡན་ལག་མ་མཆིས་པར་བགྱིའོ། །དེ་ནས་རྒྱལ་
པོ་སྐྱེད་པས་བློན་པོ་རྣམས་ལ་སྨྲས་པ། གལ་ཏེ་ཡན་ལག་མེད་པར་བྱས་ན་བསད་པ་ཁོ་ནར་ཟད་མོད། དེ་ནས་བློན་པོ་རྣམས་ཀྱིས་རྒྱལ་པོ་སྐྱེད་པའི་ཚིག་ཐོས་ནས་རྒྱལ་པོ་ལ་སྨྲས་པ། ལྷ་འདི་ལ་གཞན་བགྱིར་ཅི་མཆིས། བསྐྲད་པར་བགྱིའོ། །རྒྱལ་པོས་སྨྲས་པ། ཉེས་
པ་མེད་པ་ཇི་ལྟར་བསྐྲད་པར་བྱ། བློན་པོ་རྣམས་ཀྱིས་སྨྲས་པ། ཅིའི་སླད་དུའང་མི་བསྡོ་རིང་པོ་མི་ཐོགས་པར་གཞོན་ནུ་ལ་ནོངས་པ་འབྱུང་བར་རྔོ་ཐོག་གིས་རེ་ཞིག་རྒྱལ་སྲིད་ལ་མངོན་པར་དགའ་བ་ལ་ཐབས་སྩོལ་ཅིག །དེ་ནས་ནི་གཞོན་ནུ་བཟའ་བཏུང་རང་ཉིད་ཀྱིས་འཚལ་བར་
འགྱུར་རོ། །དེ་ནས་རྒྱལ་པོ་སྐྱེད་པས་དབང་ཐང་གི་ཉི་མ་ཤིས་པ་ལ་བཀྲ་ཤིས་དང་ཤིས་པར་བརྗོད་པ་བྱས་ནས་རྒྱལ་སྲིད་ལ་མངོན་པར་དགའ་བ་རྒྱལ་ཚབ་ཀྱི་ཐབས་བྱིན་ནོ། །དེ་ཐབས་བྱིན་པར་གཞོན་ནུ་བཟའ་བཏུང་གིས་ཐོས་ནས་བསམས་པ། ལྷས་ནི་བདག་སྤངས་པར་གྱུར་ཀྱིས་
ད་བདག་འདིར་འདུག་ཀྱང་ཅི་ཞིག་རུང་སྟེ། བདག་བསད་པར་འོང་ངོ་སྙམ་ནས་དེ་མའི་ཐད་དུ་སོང་སྟེ་མི་བདེ་བའི་ལོ་རྒྱུས་བཤད་ནས་སྨྲས་པ། བདག་རྒྱལ་པོ་ལྔ་ལེན་གྱི་ཡུལ་དུ་མཆིས་མཁྱེན་པར་མཛོད་ཅིག །དེ་ནས་དེ་ཡང་སྡུག་བསྔལ་རྣམ་པ་སྣ་ཚོགས་ཀྱིས་ནི་མྱོས། བུ་དང་
བྲལ་བའི་སྡུག་བསྔལ་དང་ནི་ལྡན། བུའི་མགུལ་ནས་ནི་འཁྱུད་དེ་སྙིང་རྗེ་རྗེ་སྐད་སྨྲེ་སྔགས་བཏོན་ཏེ། སྨྲས་པ། དུ་གུལ་རས་ཀྱི་གདིང་བས་མཛེས་བྱས་པའི། །མལ་སྟན་ཆེ་ལ་འོས་པར་བདེར་ཉལ་བ། །བུ་གཅིག་ད་ནི་ས་སྟེང་ཐང་བུ་ལ། །གོས་ཀྱིས་ཕྱོགས་གཅིག་བཏིང་ནས་

ཇི་ལྟར་ཉལ། །མལ་དུ་བདེ་བར་ཉལ་ནས་རོལ་མོ་དང་། །གླུ་སྒྲ་སྣ་ཚོགས་དག་གིས་སད་བྱས་པ། །གྲང་དང་ཚ་བའི་ཆུ་ཡིས་ཕོག་གྱུར་ན། །མདངས་ཅན་ལུས་ནི་ཇི་ལྟར་ནགས་ན་དགའ། །སྔོན་ཆད་རྒྱལ་པོས་གནང་བའི་བཟའ་བཏུང་དང་། །སྟེན་དང་བཞོན་དང་ཐེག་མཆོག་ལ་སྤྱོད་
པ། །བྱུག་པ་རྒྱན་དང་གོས་ཀྱིས་ཕོངས་བཞིན་དུ། །སུ་ཡི་དབང་གིས་སྡུག་བསྔལ་གྱུར་པར་འཁྱམ། །འཇིག་རྟེན་དང་ཕྲད་སྐྱེ་བོའི་ཚོགས་རྣམས་ཀྱིས། །ཐལ་མོ་རབ་སྦྱར་རྔ་སྒྲ་གླུ་དབྱངས་དག །ཡིད་དང་རྣ་འོང་རྣམས་ཀྱིས་ལེགས་མཆོད་པ། །སྐོམ་པས་མངོན་
པར་གདུངས་བཞིན་གང་དུ་འཁྱམ། །གཞོན་ནུས་སྨྲས་པ། གཏན་དུ་བདེ་བ་ཡང་ནི་སུ་ཞིག་ཡོད། །གཏན་དུ་སྡུག་བསྔལ་བ་ཡང་སུ་ཞིག་ཡོད། །མི་བདེ་མ་ཐོབ་པ་ཡང་སུ་ཞིག་ཡོད། །འཐོབ་པར་མི་འགྱུར་བ་ཡང་སུ་ཞིག་ཡོད། །འགྱུར་བའི་དབང་གིས་མི་རྣམས་བདེ་
སྡུག་སྟེ། །རྒྱུ་སྐར་འཁོར་ལོ་མཁའ་ལ་འཁོར་བ་བཞིན། །བདེ་བས་དགའ་མིན་སྡུག་པས་མི་དགའ་མེད། །མི་དབང་རིགས་རྗེས་འགྲོ་བའི་རྟགས་ཡིན་ནོ། །དེས་མ་ལ་དེ་ལྟ་བུ་རྣམ་པ་མང་པོ་ཁོང་དུ་ཆུད་པར་བྱས་ཏེ་ཡུལ་ལྔ་ལེན་གང་ན་བ་དེར་སོང་ངོ་། །དེ་དེར་གྲོང་
དང་ཉེ་བར་ཕྱིན་ནས་ལུས་ངལ་བ་དང་། ལུས་བཀྲེས་པས་ཤིང་གི་གྲིབ་མ་ཞིག་ལ་ཉལ་ཞིང་འདུག་གོ། །ཇི་ཙམ་ཞིག་ན་རྒྱལ་པོའི་བྱ་བ་ཅུང་ཟད་ཅིག་གི་ཕྱིར་ལྔ་ལེན་གྱི་བཀྲབས་པ་དག་གཅིག་ཕྱོགས་དེར་འོངས་པ་དང་། བཟའ་བཏུང་གྲིབ་མ་དེ་ལ་ཉལ་ཞིང་འདུག་པ་མཐོང་ནས་སྨྲས་
པ། འདི་ལྟ་བུར་གཟུགས་བཟང་བ། བལྟ་ན་སྡུག་པ། མཁྲང་བ། སྲ་བ། ལེགས་པར་འབྲེལ་པ་རོ་སྟོད་ཆེ་བ། དཔུང་པ་རིང་བའི་སྐྱེས་བུ་འདི་སུ་ཞིག་ཅེས་དེ་དག་གིས་དེ་བསླངས་ནས་སུའི་བུ་ཡིན་ཞེས་དྲིས་པ་དང་། དེས་སྨྲས་པ། བདག་ནི་ལུས་འཕགས་ཀྱི་རྒྱལ་པོ་སྐྱེད་
པའི་བུ་བཟའ་བཏུང་ཞེས་བྱ་བ་ཡིན་ནོ། །དགོས་པ་ཅི་ཞིག་གི་ཕྱིར་འོངས། དེས་དེ་རྣམས་ལ་ཇི་ལྟར་གྱུར་པ་སྨྲས་སོ། །དེ་ནས་བཀྲབས་པ་དེ་དག་གིས་རྒྱལ་པོའི་བུ་དེ་སྐྱེས་སུ་ཁྱེར་ནས་ལྔ་ལེན་གྱི་རྒྱལ་པོའི་གན་དུ་སོང་སྟེ་བཟའ་བཏུང་དེ་ལ་ཕུལ་ནས། ལྷ་འདི་རྒྱལ་པོ་སྐྱེད་པའི་བུ་

བཟའ་བཏུང་ཞེས་བགྱི་བ་ལགས་ཏེ། ཕས་འདི་ལྟ་བུ་ཞིག་གི་སླད་དུ་བསྐྲད་ནས་འདིར་ཕྱིན་པ་ལགས་སོ། །དེ་ནས་བཟའ་བཏུང་གིས་ཀྱང་ལྔ་ལེན་གྱི་རྒྱལ་པོ་ལ་ཐམས་ཅད་རྒྱས་པར་བསྙད་དོ། །ཡང་སྨྲས་པ། མི་ཡི་བདག་པོ་སྐྱེད་པ་ནི། །དབང་པོ་འདྲ་བའི་
སྲས་འདི་སྟེ། །གཟུགས་ལྡན་ཡོན་ཏན་ཕུན་ཚོགས་པ། །རྒྱལ་སྲིད་ཉམས་ནས་འདིར་མཆིས་སོ། །དེ་ནས་ལྔ་ལེན་གྱི་རྒྱལ་པོས་མགུལ་ནས་འཁྱུད་དེ། དགའ་བར་འགྱུར་བའི་གཏམ་རྣམ་པ་སྣ་ཚོགས་སྨྲས་ནས་དགའ་བ་ཁོང་དུ་ཆུད་པར་བྱས་ཏེ། དེ་ལ་བུ་མོ་དང་ཡུལ་དག་ཀྱང་བྱིན་ནོ། །
དེ་ཡང་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་རེ་ཞིག་ན་སྐྱེ་དགུའི་བདག་མོ་དེ་སེམས་ཅན་དང་ལྡན་པར་གྱུར་ཏེ་ཟླ་བ་དགུ་ཚང་བ་དང་། ཁྱེའུ་གཟུགས་བཟང་བ་བལྟ་ན་སྡུག་པ། མཛེས་པ། མཐོང་ག་སེང་གེ་ལྟར་འདུག་པ། དཔུང་
པ་རིང་བ། རོ་སྟོད་སེང་གེ་འདྲ་བ་ཞིག་བཙས་ནས། དེའི་བཙས་སྟོན་རྒྱ་ཆེར་བྱས་ནས་གཞོན་ནུའི་མིང་ཅིར་གདགས་སྙམ་པ་ལས། བདག་གི་མིང་བཟའ་བཏུང་ཡིན་པས་འདི་ནི་བཟའ་བཏུང་མང་པོའོ། །དེ་ནས་གཞོན་ནུ་བཟའ་བཏུང་མང་པོ་མ་མ་བརྒྱད་པོ་རྣམས་ལ་གཏད་
པ་དང་། དེ་དག་གིས་བསྐུ་བ་དང་། ཕྱི་བ་དང་། བཀྲུ་བ་དང་། འོ་མ་དང་། སྦྲང་རྩི་དང་། མར་དཀར་རྣམས་ཀྱིས་བསྐྱེད་ནས་གང་གི་ཚེ་ཆེན་པོར་གྱུར་པ་དེའི་ཚེ། ཁྱེའུ་ཡི་གེ་སློབ་པའི་གྲྭར་ཡི་གེ་སློབ་ཏུ་བཏང་ངོ་། །དེའི་ཕ་བཟའ་བཏུང་ནི་ནད་ཀྱིས་བཏབ་ནས་དེ་སྨན་པ་དང་།
སྨན་དང་ནད་གཡོག་རྣམས་ཀྱིས་ཀྱང་གསོ་བར་མ་ནུས་ནས་དུས་ལས་འདས་སོ། །དེ་དུས་ལས་འདས་པ་དང་། རྒྱལ་པོའི་བུ་མོ་ཤིན་ཏུ་མྱ་ངན་གྱིས་ཐེབས་ནས་ཆོ་ངེས་བཏབ་སྟེ་སྨྲེ་སྔགས་འདོན་ཏོ། །དེ་ནས་ལྔ་ལེན་གྱི་རྒྱལ་པོས་བསམས་པ། བུད་མེད་ཐམས་ཅད་ཀྱི་བསམ་པ་
ནི་ཕལ་ཆེར་སྐྱེས་པ་འདོད་པ་ཡིན་པས་གཅིག་ལ་སྦྱིན་ནོ་སྙམ་ནས། དེས་དེ་དང་གཞོན་ནུ་བཟའ་བཏུང་མང་པོ་དང་བཅས་པར་མདུན་ན་འདོན་ལ་བྱིན་ནོ། །དེ་ནས་མདུན་ན་འདོན་དེ་དེ་དང་ལྷན་ཅིག་དགའ་བ་རྒྱ་ཆེན་པོ་ཉམས་སུ་མྱོང་བར་བྱེད་དོ། །རེ་ཞིག་མདུན་ན་འདོན་དེའི་ཁྱིམ་དྲུང་ན་

བྱ་གག་ཅིག་སྐད་འབྱིན་པ་ཕྱོགས་དེ་ན་བྲམ་ཟེ་ལྟས་མཁན་ཞིག་འགྲོ་བས་ཐོས་ནས་དེས་མི་གང་གིས་དེའི་ཤ་ཟོས་པ་དེ་རྒྱལ་པོར་འགྱུར་རོ་ཞེས་སྨྲས་པ་དང་། ཚིག་དེ་མདུན་ན་འདོན་གྱིས་ཐོས་ནས་དེས་བྲམ་ཟེ་དེ་ལ་ཡང་དྲིས་ཏེ། དེ་ནས་མདུན་ན་འདོན་གྱིས་བྱ་གག་བཟུང་ནས་བསད་དེ་
ཆུང་མ་ལ་སྨྲས་པ། བྱ་གག་འདི་འཕྲལ་དུ་ཚོས་ཤིག་དང་། ང་རྒྱལ་པོའི་ཕོ་བྲང་ནས་སླར་འོང་ངོ་ཞེས་བྱས་ནས་དེ་རྒྱལ་པོའི་ཕོ་བྲང་དུ་སོང་ངོ་། །ཇི་ཙམ་ན་ཁྱེའུ་བཟའ་བཏུང་མང་པོ་གྲྭ་ནས་བཀྲེས་ཏེ་ཁྱིམ་དུ་འོངས་ན་མ་ཡང་མི་སྣང་ངོ་། །དེ་ནས་དེས་བདག་ཅག་གི་ཅི་དག་བཙོས།
ཅི་ཞིག་བཟའ་སྙམ་ནས་རེ་ཞིག་ན་མ་ནི་མི་སྣང་གི་བལྟས་ན་རྫེའུ་ཞིག་གི་ནང་ན་བྱ་གག་ཅིག་མགོ་གྱེན་དུ་བྱུང་ཞིང་འདུག་པ་མཐོང་ངོ་། །དེ་ནས་དེས་ཀྱང་རྫེའུའི་ནང་ན་འདུག་བཞིན་དུ་མགོ་བཅད་དེ་ཟོས་སོ། །ཇི་ཙམ་ན་མ་འོངས་ནས་དེ་ལ་མགོ་སུས་ཟོས་ཞེས་དྲིས་པ་དང་། དེས་
བདག་གིས་འཚལ་ཏོ་ཞེས་བྱས་པ་དང་། དེ་ནས་ཟན་བྱིན་ཏེ་གྲྭར་བཏང་ངོ་། །མདུན་ན་འདོན་ཀྱང་འོངས་ནས་བཟའ་ཞེས་བྱས་པ་དང་། བྱ་གག་གི་མགྲིན་པ་མི་སྣང་ནས་འདིའི་མགྲིན་པ་ག་རེ། ཆུང་མས་སྨྲས་པ། ཁྱེའུས་འཚལ་ཏོ་ཞེས་བྱས་པ་དང་། དེ་ནས་བྱ་གག་
གི་ལྷག་མ་ཟོས་ནས་བསམས་པ། ཅི་རེ་ཞིག་བྱ་གག་རིལ་གྱིས་ཟོས་པས་རྒྱལ་པོར་འགྱུར་རམ། འོན་ཏེ་ཡན་ལག་མ་ཚང་བ་ཟོས་པས་ཀྱང་རྒྱལ་པོར་འགྱུར་སྙམ་དུ་ཐེ་ཚོམ་སྐྱེས་ནས་ཐེ་ཚོམ་གཅད་པའི་ཕྱིར་ཐབས་གཞན་ཞིག་གིས་བྲམ་ཟེ་ལྟས་མཁན་དེ་ཉིད་བོས་ཏེ་ཀྱེ་བྲམ་ཟེ་
ཆེན་པོ་ཁྱོད་ཀྱིས་སྔར་གང་གིས་བྱ་གག་ཟོས་པ་དེ་རྒྱལ་པོར་འགྱུར་རོ་ཞེས་བྱ་བ་ཅི་ཡན་ལག་མ་ཚང་བ་ཟོས་པས་དེར་འགྱུར་རམ། འོན་ཏེ་རིལ་གྱིས་ཟོས་པས་འགྱུར། དེས་སྨྲས་པ། ཡན་ལག་མ་ཚང་ཡང་གང་གིས་དེའི་མགོ་ཟོས་པ་དེ་རྒྱལ་པོར་འགྱུར་རོ། །ཡང་ན་གང་
གིས་དེའི་མགོ་ཟོས་པ་དེ་བསད་དེ་དེའི་མགོ་ཟོས་ན་དེ་ཉིད་རྒྱལ་པོར་འགྱུར་རོ། །དེ་ནས་མདུན་ན་འདོན་གྱི་བློ་སྐྱེས་པ་གཞོན་ནུ་འདི་བསད་ནས་འདིའི་མགོ་བཟའ་ན་མས་ཤེས་པར་མ་བྱས་ན་ནི་གསད་པའམ་བཟའ་བར་མི་ནུས་པས་རེ་ཞིག་བཏུབ་བམ་མི་བཏུབ་འདི་ཉིད་ཀྱི་མའི་ཉམ་

དྲོད་བླང་ངོ་སྙམ་ནས། དེས་སྙན་པའི་ཚིག་རྣམ་པ་དུ་མས་བཞམས་ཏེ། བཟང་མོ་ཅི་ཁྱོས་རྒྱལ་པོ་བྱས་ན་ལེགས་སམ། འོན་ཏེ་བུས་རྒྱལ་པོ་བྱས་ན་ལེགས་ཞེས་སྨྲས་པ་དང་། དེས་ཟུར་དང་སྣོལ་དག་ལས་ལེགས་པར་བརྟགས་ཏེ་བསམས་པ། གལ་ཏེ་བུས་
རྒྱལ་པོ་བྱས་ན་ལེགས་ཞེས་སྨྲས་ན། འདི་བདག་ལས་གྱེད་པར་འགྱུར་བས་ཅི་ནས་ཀྱང་དེ་དང་མཐུན་པར་སྨྲའོ་སྙམ་ནས་དེས་ཁྱོས་རྒྱལ་པོ་བྱས་ན་ལེགས་སོ་ཞེས་སྨྲས་སོ། །བུད་མེད་དེ་ཡང་མཁས་ཤིང་མཛངས་ལ་དཔྱོད་པ་ཅན་ཞིག་པས་དེས་བསམས་ན། བྱ་གག་གི་མགོའི་ཕྱིར་ཁོན་
དུ་བཟུང་ནས་བདག་གི་བུ་བསད་པར་ཆད་པར་འཕྲིགས་ཏེ་ད་ནི་དུས་ལ་བབ་ཀྱིས་ཅི་ནས་ཀྱང་བུ་བསྲུང་བར་བྱའོ་སྙམ་ནས་དེས་བུ་ལ་གསང་སྟེ་བུ་ཁྱོད་ཀྱིས་བྱ་གག་གི་མགོ་ཟོས་པ་ནི་མ་ལེགས་པ་ཞིག་བྱས་ཀྱིས་ཡུལ་འདི་ནས་མྱུར་དུ་སོང་ཤིག །སོང་ནས་མེས་པོ་རྒྱལ་པོ་བྱེད་པ་དེ་ན་
ཁྱོད་ཀྱི་རང་གི་སྐྱེ་བོའི་ཚོགས་ཡོད་པ་དེར་བདེ་བར་འདུག་ཤིག །དེ་སྐད་སྨྲས་པ་དང་། དེ་བྲོས་ནས་ལུས་འཕགས་སུ་སོང་ངོ་། །དེ་ངལ་ཞིང་བཀྲེན་སྐོམ་པས་ལུས་གཟིར་ཏེ་གནས་ཀྱི་ཉེན་ཀོར་གྱི་སྐྱེད་མོས་ཚལ་གྱི་ཤིང་ཞིག་གི་དྲུང་དུ་གོས་ཞིག་བཏིང་ནས་ཉལ་ཞིང་འདུག་གོ། །དེའི་
ཚེ་རྒྱལ་སྲིད་ལ་མངོན་པར་དགའ་བ་ནད་ཀྱིས་ཐེབས་ནས་སྨན་པ་དང་། སྨན་དང་། ནད་གཡོག་རྣམས་ཀྱིས་གསོ་བར་མ་ནུས་ནས་དེ་ཤི་སྟེ་རྒྱལ་པོ་རབས་ཆད་དོ། །འདི་ནི་རྒྱལ་པོའི་ཆོས་ཉིད་དེ། ཇི་སྲིད་དུ་གཞན་རྒྱལ་པོར་དབང་མ་བསྐུར་བ་དེ་སྲིད་དུ་རྒྱལ་པོའི་རོ་མི་འབྱིན་ཏོ། །ཅི་ཙམ་
ན་བློན་པོ་རྣམས་དང་། རྒྱལ་པོའི་མི་གཞན་དང་། བྲམ་ཟེ་དང་། ལྟས་མཁན་རྣམས་གལ་ཏེ་བསོད་ནམས་ཀྱིས་དབང་ཆེ་བར་གྲགས་པའི་སེམས་ཅན་འགའ་ཞིག་རྙེད་ན་དེ་རྒྱལ་སྲིད་ལ་གཞག་གོ་ཞེས་ཕན་ཚུན་ཚོལ་ཞིང་སོང་སྟེ། དེ་རྣམས་ཀྱིས་བཙལ་བ་ལས་གྲོང་ཁྱེར་གྱི་ཕྱི་རོལ་
ཤིང་དྲུང་ཞིག་ན་ཁྱེའུ་གཞོན་ནུ་གཟུགས་བཟང་བ། བལྟ་ན་སྡུག་པ། མཛེས་པ། མཐོང་ཀ་སེང་གེ་འདྲ་བ། ཉི་མ་ཡོལ་ཡང་ཤིང་གི་གྲིབ་མ་ཤར་ཕྱོགས་སུ་མི་འཁོར་བར་དེའི་ལུས་མི་གཏོང་བ་ཞིག་ཉལ་ཞིང་འདུག་པ་མཐོང་ངོ་། །དེ་ནས་བློན་པོ་དྲུག་པོ་དེ་རྣམས་ཀྱིས་དེ་མཐོང་ནས་

ངོ་མཚར་དུ་གྱུར་ཏེ་སྨྲས་པ། བདག་ཅག་གི་བསོད་ནམས་ཀྱིས་དབང་ཆེ་བར་གྲགས་པའི་སེམས་ཅན་འདི་ལས་གཞན་བསོད་ནམས་ཀྱི་སྟོབས་དང་ལྡན་པ་མ་མཐོང་ངོ་། །ཡང་འདི་ནི་གཟུགས་བཟང་བ། བལྟ་ན་སྡུག་པ། མཛེས་པ། མཚན་དང་ལྡན་པ་ཞིག་པས་འདི་ནི་རྒྱལ་སྲིད་ལ་གཞག་
པར་འོས་སོ་ཞེས་གཅིག་ཏུ་ངེས་པར་བྱས་ནས་བུ་ལོངས་ལོངས་ཞེས་བསླང་ངོ་། །དེ་ཡང་ལངས་ཏེ་དྲིས་པ། ང་བསླང་སྟེ་ཅི་བྱ། དེ་དག་གིས་སྨྲས་པ། རྒྱལ་པོར་གཞུག་གོ། །དེས་སྨྲས་པ། རྒྱལ་པོ་ཉལ་བ་དེ་ལྟར་བསླང་ངམ། བློན་པོ་རྣམས་ཀྱིས་སྨྲས་པ། འོ་ན་ཇི་ལྟར་
བསླང་། གཞོན་ནུས་སྨྲས་པ། གླུ་དང་། སིལ་སྙན་དང་། རོལ་མོའི་སྒྲ་མི་གྲག་པས་བསླང་མོད། དེ་རྣམས་ཀྱིས་དེ་ཐོས་པ་དང་འདི་སྙམ་དུ་འདི་ནི་རིགས་དམའ་བ་ལས་བྱུང་བ་མ་ཡིན་གྱི་འདི་ངེས་པར་རིགས་མཐོན་པོ་ལས་སྐྱེས་པ་ཡིན་ནོ་སྙམ་ནས་དེ་དག་གིས་དྲིས་པ། ཁྱོད་སུ་ཞིག །
སུའི་བུ་ཡིན། དེ་ནས་ཁྱེའུ་གཞོན་ནུ་དེས་ཀྱང་སེང་གེའི་བཞིན་དུ་བསྒྱེངས་ནས་རང་གི་རིགས་སྨྲས་པ། ལུས་འཕགས་ཀྱི་རྒྱལ་པོ་སྐྱེད་པ་ཞེས་བྱ་བ་དེའི་བུ་ནི་བཟའ་བཏུང་ངོ་། །བཟའ་བཏུང་དེའི་བུ་ནི་བཟའ་བཏུང་མང་པོ་ཞེས་བྱ་སྟེ་ང་ཡིན་ནོ། །དེ་ནས་བློན་པོ་དྲུག་པོ་རྣམས་འཛུམ་
ཕྱུང་ནས་བདག་ཅག་གིས་ནི་བདག་ཅག་ཉིད་ཀྱི་གཞོན་ནུ་རྙེད་དོ་ཞེས་སྨྲས་སོ། །དེ་ནས་གནས་དེ་ཉིད་ནས་སྐྱེ་བོའི་ཚོགས་ཆེན་པོས་ཡོངས་སུ་བསྐོར་ཅིང་གླུ་དང་། སིལ་སྙན་དང་། རོལ་མོའི་སྒྲ་དང་། ཤིས་པར་བརྗོད་པ་ལ་སོགས་པས་མདུན་དུ་དྲངས་ཏེ་གྲོང་ཁྱེར་དུ་བཅུག་ནས་
རྒྱལ་པོར་དབང་བསྐུར་ཏོ། །གང་གི་ཕྱིར་འདིས་རྒྱལ་པོའི་རྒྱུད་ཆད་པ་བསབས་པ་དེའི་ཕྱིར་མིང་སྐྱེད་པ་ཁོ་ནར་བཏགས་ནས། དེའི་མིང་བཟའ་བཏུང་མང་པོ་ཞེས་བྱ་བ་གང་ཡིན་པ་དེ་མེད་པར་གྱུར་ཏོ། །དེ་ནས་དེ་རྒྱལ་སྲིད་བྱེད་དུ་འཇུག་པ་ན་བྱིས་པའོ་སྙམ་ནས་བློན་པོ་རྣམས་ཀྱིས་དེ་ཁྱད་དུ་
བསད་དེ་དེ་ལ་དབང་ཅུང་ཟད་ཀྱང་མེད་དོ། །དེ་ནས་དུས་གཞན་ཞིག་ན་རྒྱལ་པོ་བཟའ་བཏུང་མང་པོ་ཡུལ་བལྟར་སོང་སྟེ། དེས་གྲོང་དང་། གྲོང་ཁྱེར་དང་། ཚོང་དུས་རྣམས་བལྟས་ནས་གྲོང་དང་། གྲོང་ཁྱེར་དང་། རི་འོར་པ་འདི་རྣམས་སུའི་ཡིན་ཞེས་དྲིས་པ་དང་། དེ་དག་གིས་བློན་

པོ་དེ་དྲུག་ཁོ་ནའི་ལགས་སོ་ཞེས་སྨྲས་པ་དང་། དེ་གཅིག་པུས་བསམས་པ། གྲོང་དང་། གྲོང་ཁྱེར་དང་། རི་འོར་པ་འདི་སུའི་ཡིན་ཞེས་དེ་སྐད་དུ་གང་དང་གང་ལས་དྲིས་པ་དེ་དག་ཐམས་ཅད་དེ་སྐད་ཟེར་བས་བདག་ལྟ་ཞིག་བཟའ་བ་དང་བགོ་བ་ཙམ་ལ་དབང་ཕྱུག་བྱེད་
ཀྱི་གཞན་ཅི་ལ་ཡང་མ་ཡིན་ནོ་སྙམ་དུ་རང་གིས་རིག་ནས་དེ་སེམས་ཁོང་གི་རྒྱ་མཚོར་ཆུད་ནས་འདི་ཇི་ལྟར་བྱ་ཞེས་སེམས་སོ། །དེ་དེ་ལྟར་སེམས་པ་ན་ལྷ་ཞིག་གིས་རྒྱལ་པོ་མི་དགའ་བར་མ་བྱེད་ཅིག །འདི་ལྟར་ཁྱོད་ཉིད་ཀྱི་ཡུལ་ན་རི་འོར་གང་པོའི་མཚན་ཞེས་བྱ་བ་དེ་ན་སྣ་ལ་གཏོགས་པ་གང་
པོ་ཞེས་བྱ་བ་དེ་ལ་བུ་སྨན་ཆེན་པོ་ཞེས་བྱ་བ་ཞིག་ཡོད་པར་འགྱུར་གྱིས་དེ་ཁྱོད་ཀྱིས་བློན་པོར་ཆུག་ཤིག་དང་། དེས་ཡུལ་བདག་གིར་བྱས་ནས་ཁྱོད་ལ་འབུལ་བས་ཁྱོད་ལ་ཕན་པ་དང་། བདེ་བ་དང་། འདོད་པ་དང་ལྡན་པར་འགྱུར་རོ་ཞེས་བསྒོའོ། །དེ་ནས་བཟའ་བཏུང་མང་པོས་མི་
དག་མངགས་ཏེ་རི་འོར་གང་པོའི་མཚན་དེ་ན་སྣ་ལ་གཏོགས་པ་གང་པོ་ཞེས་བྱ་བ་དེ་ཚོལ་ཏོ། །གལ་ཏེ་རྙེད་དང་དེའི་ཆུང་མ་ལ་བུ་ཡོད་དམ་མེད་རྟོགས་ཤིག་ཅེས་བསྒོའོ། །དེ་དག་སོང་སྟེ་མཐོང་ནས་དྲིས་ན་དེས་བདག་གི་ཆུང་མ་ལ་བུ་ཡོད་དོ་ཞེས་སྨྲས་པ་དང་། དེ་དག་སླར་འོངས་ནས་
རྒྱལ་པོ་ལ་གསོལ་པ། རྒྱལ་པོ་སྣ་ལ་གཏོགས་པ་དེ་མཆིས་ཏེ་དེའི་མཆིས་འབྲང་ཡང་སྦྲུམ་ལགས་སོ། །དེ་ནས་རྒྱལ་པོས་ཡི་གེ་སྤྲིང་སྟེ། གང་པོ་བཀུག་ནས་བཤེས་པའི་ཚིག་གིས་དེ་ལ་རི་འོར་དེ་བྱིན་ནས་འདིར་རང་གི་བུ་མའི་ལྟོ་ན་འདུག་པ་དེ་དེང་ཕྱིན་ཆད་ཡོངས་སུ་
སྐྱོངས་ལ་ཅི་ནས་ཀྱང་དེ་ཡན་ལག་གང་ཡང་ཉམས་པར་མི་འགྱུར་བ་དེ་ལྟར་གྱིས་ཤིག་ཅེས་བསྒོའོ། །དེ་ནས་དེ་ཟླ་བ་དགུ་ཚང་བ་དང་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་བཙས་ནས་ཅི་འབྱོར་བའི་བཙས་སྟོན་རྒྱ་ཆེར་བྱས་ཏེ། ཁྱེའུ་འདི་མིང་ཅིར་གདགས་
ཞེས་བྱས་ན་དེའི་མས་སྨྲས་པ། བདག་འདི་ལྟར་ཡུན་རིངས་སུ་ནད་བུ་ཅན་དུ་གྱུར་ཏེ། སྨན་པ་དང་སྨན་དང་། ནད་གཡོག་རྣམས་ཀྱིས་ནད་ཞི་བར་བྱ་མ་ནུས་པ་ལས་གང་གི་ཚེ་ཁྱེའུ་འདི་ལྟོར་ཞུགས་པ་དེ་ཉིད་ནས་ནད་ཞི་བར་གྱུར་པས་དེས་ན་འདིའི་མིང་སྨན་ཆེན་པོར་གདགས་སོ། །སྨྲས་

པ། སྨན་རྣམས་ཀུན་གྱི་ནང་ན་ནི། །བདག་གི་བུ་ནི་སྨན་ཆེན་པོ། །འདི་ནི་སྨན་པས་ལྷག་པའི་སྨན། །དེ་ལྟས་འདིའི་མིང་སྨན་ཡིན་ནོ། །དེ་ནས་སྨན་ཆེན་པོ་ཕའི་ཕྲག་པ་ལ་ཞོན་ཏེ་ཁྲུས་བྱ་བའི་ཕྱིར་སྲང་གི་དབུས་ནས་རྫིང་བུར་ཁྱེར་ཏེ་སོང་བ་ལས་རེ་ཞིག་ན་སའི་སྟེང་ན་ཉའི་དུམ་
བུ་ཞིག་འདུག་པ་མཐོང་ནས། དེས་དེ་ལ་རིན་པོ་ཆེ་ཡིན་ནོ་སྙམ་ནས་དེ་རྐང་པའི་མཐེ་བོས་སའི་སྟེང་ནས་བླང་བར་བརྩམས་པ་དང་། ཇི་ཙམ་ན་སྨན་ཆེན་པོས་སྨྲས་པ། ཕ་གཅིག་གང་པོ་རིན་ཆེན་ལྷུང་སྙམ་སྟེ། །ལས་བཏང་མིག་མི་འཛུམས་པར་ཉ་དུམ་ལ། །རྟོག་ཅིང་དེ་ནས་རིན་
ཆེན་ཡིན་པར་སེམས། །ཕ་གཅིག་གང་པོ་རྟོགས་ཤིག་རིན་ཆེན་མིན། །ཉ་དུམ་དམར་པོ་རྐང་གིས་འདྲིལ་བར་ཟད། །རྣམ་ཐོས་བུ་དེ་བག་མེད་སྤྱོད་མ་ཡིན། །དེ་ནས་དེ་རྫིང་དུ་སོང་ནས་གང་པོས་སྨན་ཆེན་པོ་དང་། གོས་རྫིང་འགྲམ་དུ་བཞག་སྟེ་ཁྲུས་བྱ་བའི་ཕྱིར་ཆུར་ཞུགས་
པ་ན་པད་མའི་སྟེང་ན་ཆུ་སྐྱར་ཞིག་འདུག་པ་དང་དེས་ཆུ་སྐྱར་དེ་བཟུང་ངོ་སྙམ་ནས་དེ་དེའི་དྲུང་དུ་སོང་བ་དང་། དེ་ཡང་དེ་ནས་འཕུར་ཏོ། །དེ་ནས་སྨན་ཆེན་པོས་སྨྲས་པ། པད་མའི་སྟེང་ནས་ཆུ་སྐྱར་འཕུར། །ཆུ་སྐྱར་འཕུར་བས་པད་མ་ལྷགས། །པད་མའི་སྟེང་ནས་ཆུ་སྐྱར་མོ། །འཕུར་
བ་རེ་ཞིག་ཕ་གཅིག་གཟིགས། །དེ་ནས་ཡང་དུས་ཕྱི་ཞིག་ན་དེས་སྨན་ཆེན་པོ་ཕྲག་པ་ལ་ཁྱེར་ནས་ཆུ་བོ་གང་གཱར་ཁྲུས་བྱེད་དུ་སོང་སྟེ། དེས་དེ་དང་གོས་ཆུ་འགྲམ་དུ་བཞག་ནས་ཆུར་ཞུགས་ཏེ་ཁྲུས་བྱེད་པ་ན་ཁར་གཞོང་ཞིག་ཆུ་བོས་ཁྱེར་བ་དེའི་སྟེང་ན་ངང་མོ་ཞིག་འདུག་པ་མཐོང་ངོ་། །དེ་མཐོང་
ནས་སྨན་ཆེན་པོས་སྨྲས་པ། ཆུ་བོ་གང་གཱས་ཁར་གཞོང་ཁྱེར། །ཁར་གཞོང་དེ་སྟེང་ངང་མོ་འདུག །ཁར་གཞོང་ངང་མོ་ལྷན་ཅིག་ཏུ། །གང་གཱས་ཁྱེར་བ་ཕ་གཅིག་གཟིགས། །ཇི་ཙམ་དུ་དུས་གཞན་ཞིག་ན་ཡང་ཁྲུས་བྱེད་ཅིང་སྨན་ཆེན་པོ་ཆུ་འགྲམ་དུ་གཞག་པ་དང་། རེ་ཞིག་ན་ཆུ་
བོ་གང་གཱའི་རྒྱུན་ཕྱོགས་སུ་བུམ་པ་ཞིག་ཁྱེར་བ་དེའི་སྟེང་ན་ཆུ་སྲེགས་ཞིག་འདུག་པ་དེ་མཐོང་ནས་སྨན་ཆེན་པོས་ཕ་ལ་སྨྲས་པ། ཆུ་བོ་གང་གཱས་བུམ་པ་ཁྱེར། །དེ་ཡི་སྟེང་ན་ཆུ་སྲེགས་འདུག །རེ་ཞིག་ཕ་གཅིག་བུམ་པ་ནི། །ཆུ་སྲེགས་གང་གཱ་བཅས་ཏེ་གཟིགས། །ཇི་ཙམ་དུས་

གཞན་ཞིག་ན་ཡང་ཁྲུས་བྱེད་པར་འདོད་ནས་ཆུ་བོ་གང་གཱར་སོང་སྟེ། དེས་སྨན་ཆེན་པོ་ཆུ་འགྲམ་དུ་བཞག་ནས་དེར་ཁྲུས་བྱེད་པ་ལ་ཞུགས་པ་དང་། རེ་ཞིག་ན་ཆུ་བོ་གང་གཱའི་རྒྱུན་ཕྱོགས་སུ་ལུག་ཐུག་ཅིག་ཁྱེར་བ་དེའི་སྟེང་ན་བྱ་གར་ཞིག་འདུག་པ་མཐོང་ངོ་། །དེ་ནས་
དེ་སྨན་ཆེན་པོས་མཐོང་ནས་སྨྲས་པ། ཆུ་བོ་གང་གཱས་ལུག་ཐུག་ཁྱེར། །དེ་བཞིན་དེ་སྟེང་བྱ་གར་འདུག །ལུག་ཐུག་བྱ་གར་ལྷན་ཅིག་ཏུ། །གང་གཱས་ཁྱེར་བ་ཡབ་གཅིག་གཟིགས། །དེ་ནས་སྨན་ཆེན་པོ་དེ་ན་བྱིས་པ་རྣམས་དང་ལྷན་ཅིག་རྩེ་བ་ལས་རེ་ཞིག་ན་བྱིས་པ་དེ་
དག་འདུས་ནས་དེ་རྒྱལ་པོར་བཅུག་གོ། །དེས་ཀྱང་ཁ་ཅིག་བློན་པོར་བཅུག་ནས་དེ་དེ་དག་དང་ལྷན་ཅིག་རྩེ་ཞིང་འདུག་གོ། །ཅི་ཙམ་ན་བྲམ་ཟེ་རྒན་པོ་ཞིག་ཆུང་མ་གཞོན་ནུ་དར་ལ་བབ་པ་ཞིག་དང་ཁྱོ་ཤུག་ལྷན་ཅིག་ཏུ་ལམ་དུ་ཞུགས་ནས་ཡུལ་གཞན་དུ་འགྲོ་བ་ལས་རེ་ཞིག་ན་
བྲམ་ཟེ་བཤང་གཅིའི་སར་སོང་ངོ་། །དེ་ནས་གཡོན་ཅན་ཕོ་ཞིག་གིས་འཕྲིགས་ནས་བུད་མེད་དེའི་དྲུང་དུ་སོང་སྟེ་སྨྲས་པ། བཟང་མོ་ཁྱོད་ཀྱི་ཕ་དེ་གར་སོང་། བུད་མེད་ཀྱིས་སྨྲས་པ། གང་ཞིག །དེ་ནས་གཡོན་ཅན་གྱིས་སྨྲས་པ། དེ་མེས་པོ་ཡིན་པ་ལྟ་ཞིག །སྨྲས་པ། འདི་
ཅི་ཟེར་བ་ཞིག །དེ་ནས་གཡོན་ཅན་གྱིས་སྨྲས་པ། དེ་ཁྱོད་ཀྱི་ཡང་མེས་པོ་ཡིན་པ་ལྟ་ཞིག །བུད་མེད་ཀྱིས་སྨྲས་པ། ངའི་ཕ་ཡང་མ་ཡིན། མེས་པོ་ཡང་མ་ཡིན། ཡང་མེས་པོ་ཡང་མ་ཡིན་གྱི་དེ་ནི་ངའི་ཁྱོ་ཡིན་ནོ། །དེ་ནས་གཡོན་ཅན་གྱིས་ཅུང་ཟད་ཅིག་བགད་དེ་སྨྲས་པ། བླུན་
མོ་ཁྱོད་གྲོགས་མོའམ་ངོ་ཚ་ཤེས་པ་གཞན་གྱི་དྲུང་དུ་འདི་ལྟ་བུ་ངའི་ཁྱོ་ཡིན་ནོ་ཞེས་སྨྲ་བ་ངོ་མི་ཚའམ། ས་སྐལ་བ་ལྡན་པ་འདིའི་སྟེང་ན་སྐྱེས་བུ་ལྷའི་གཟུགས་འདྲ་བས་རབ་ཏུ་གང་བ་ཁྱོད་ཀྱིས་མ་མཐོང་ངམ། འདི་ལྟ་བུའི་གཟུགས་མཛེས་པ་ཆུད་ཟོས་སོ། །ངས་ཁྱོད་ཀྱི་ཁྱོ་བྱས་ཚུར་
བདག་ཅག་ལྷན་ཅིག་འདོང་། གལ་ཏེ་ཁྱོད་ཀྱི་ཕྱིར་བྲམ་ཟེ་རྒན་པོ་དང་ང་འཐབ་མོ་བྱུང་དང་དེར་ཡང་ཁྱོད་ཀྱིས་སྐྱེ་བོའི་ཚོགས་ཆེན་པོ་ལ་ངའི་ཁྱོ་འདི་ཡིན་ནོ་ཞེས་ང་ཁྱོ་ཡིན་པར་ཕྱེ་ཤིག་ཅེས་བྱས་པ་དང་དེ་དང་གཡོན་ཅན་འགྲོགས་ཏེ་སོང་ངོ་། །བྲམ་ཟེ་ཡང་བཤང་གཅི་དང་བཀྲུ་བཤལ་བྱས་ནས་

ལངས་པ་དང་། དེས་དེ་མ་མཐོང་ངོ་། །རེ་ཞིག་ན་སྒང་བུ་མཐོན་པོ་ཞིག་གི་སྟེང་དུ་འཛེགས་ནས་བལྟས་ན་སྐྱེས་པ་གཞན་ཞིག་དང་འགྲོགས་ཏེ་སོང་བ་མཐོང་ནས་བྲམ་ཟེ་དེས་བརྒྱུགས་ཏེ་ལག་པ་ཡ་གཅིག་ནས་བཟུང་ངོ་། །གཡོན་ཅན་གྱིས་ཀྱང་ལག་པ་ཡ་གཅིག་ནས་བཟུང་བ་དང་དེ་ནས་བྲམ་
ཟེས་སྨྲས་པ། ངའི་ཆུང་མ་ཅིའི་ཕྱིར་དབྲོག །གཡོན་ཅན་གྱིས་སྨྲས་པ། འདི་ངའི་ཆུང་མ་ཡིན་ན། ཀྱེ་མ་ཁྱོད་རེའོ་བརྒྱལ། བྲམ་ཟེས་ཀྱང་ངའི་ཡིན་ནོ། །ཞེས་སྨྲས་ནས་དེ་གཉིས་ལམ་ཀར་འཐབ་མོ་བྱུང་སྟེ་ཕར་དྲངས་ཚུར་དྲངས་པ་དང་། གཡོན་ཅན་དེ་དར་ལ་བབ་པས་
སྟོབས་ཆེ་ནས་བྲམ་ཟེ་ལས་དྲངས་ཏེ་ཕྲོགས་སོ། །དེ་ནས་བྲམ་ཟེ་བཅོམ་པས་འབྲོག་དེར་བྲམ་ཟེར་མ་བྱས་ཀྱིས་ར་མདའ་ལོག་ཅེས་བྱས་སོ། །དེའི་ཚེ་ན་སྨན་ཆེན་པོ་བྱིས་པ་རྣམས་དང་ལྷན་ཅིག་དགོན་པ་ན་རྩེ་ཞིང་འདུག་པ་ལས་བྲམ་ཟེར་མ་བྱས་སོ་ཞེས་བྱ་བ་དེ་ཡང་བྱིས་པ་དག་གིས་
ཐོས་སོ། །དེ་ནས་བྱིས་པ་དེ་དག་གིས་སྨྲས་པ། ཀྱེ་སྨན་ཆེན་པོ་ཁྱེད་ཅག་ན་རེ་ང་རྒྱལ་པོའོ་ཞེ་ན། བྲམ་ཟེ་ཕ་བི་བྲམ་ཟེར་མ་བྱས་སོ་ཞེས་འབོད་ན། དེ་ཅིའི་ཕྱིར་འཇིགས་པ་ལས་མི་སྐྱོབ། དེ་ནས་དེས་བྱིས་པ་རྣམས་ལ་སོང་སྟེ་ཁྲིད་དེ་ཤོག་ཤིག་ཅེས་བཀྱེ་བ་དང་། བྱིས་པ་དེ་དག་
གིས་དེ་ཀུན་ཁྲིད་དེ་འོངས་སོ། །འདི་ཅི་ཞིག་ཅེས་དྲིས་པ་དང་། བྲམ་ཟེས་སྨྲས་པ། བདག་གྲོགས་མ་མཆིས་ཤིང་ཉམ་ཆུང་བའི་ཆུང་མ་གཡོན་ཅན་སྟོབས་པོ་ཆེ་འདིས་ཕྲོགས་སོ། །གཡོན་ཅན་གྱིས་སྨྲས་པ། འདི་བརྫུན་མཆི་སྟེ། འདི་ནི་བདག་གི་ཆུང་མ་ལགས་སོ། །བུད་མེད་
དེས་ཀྱང་བདག་གི་ཁྱོ་འདི་ལགས་སོ་ཞེས་གཡོན་ཅན་དེ་ཉིད་ཡིན་པར་ཕྱེའོ། །དེ་ནས་སྨན་ཆེན་པོས་བྲམ་ཟེ་དེ་མ་འོས་པར་ཡི་ཆད་པར་ཤེས་ནས་བགམ་པར་བྱའོ་སྙམ་ནས། ཀྱེ་ནང་རྗེ་ཁྱོད་ད་གཟོད་བུད་མེད་འདི་དང་འགྲོགས་ཏེ་གང་ནས་འོངས། གཡོན་ཅན་གྱིས་སྨྲས་པ། གྱོས་
པོའི་ཁྱིམ་ནས་མཆིས་སོ། །དེར་ཅི་དག་ཟོས་སམ་འཐུངས། དེས་སྨྲས་པ། ཤ་དང་སྣུམ་ཁུར་དང་བེ་ཏང་དང་ཆང་དག་འཚལ་ཏོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་གསུམ་པ། སྨན་ཆེན་པོས་སྨྲས་པ། གལ་ཏེ་དེ་ལྟ་ན་སྐྱུགས་ཤིག་དང་།

བདེན་ནམ་བརྫུན་བལྟའོ་ཞེས་སྨྲས་པ་དང་། དེས་མཛུབ་མོ་ཁར་བཅུག་སྟེ། སྐྱུགས་ན་ཁ་ཟས་དེ་ལྟ་བུར་ཅང་མ་བྱུང་ངོ་། །བྲམ་ཟེ་དེ་ལ་གང་ནས་འོངས་ཞེས་དྲིས་པ་དང་། བྲམ་ཟེ་དེས་གྱོས་པོའི་ཁྱིམ་ནས་མཆིས་སོ་ཞེས་སྨྲས་སོ། །དེར་ཅི་ཟོས་དེས་དར་
བ་དང་ཟན་དང་ལ་ཕུག་དང་ནས་ཀྱི་ཁུ་བ་རྣམས་ཟོས་ཞེས་སྨྲས་སོ། །དེས་སྐྱུགས་ཤིག་ཅེས་བསྒོ་བ་དང་། དེས་སྐྱུགས་པ་དང་། ཅི་ཟོས་ཅི་འཐུངས་པ་མངོན་དུ་བྱུང་ངོ་། །དེ་ལྟ་བུར་གྱུར་ནས་སྨན་ཆེན་པོས་སྐྱེས་པ་གཡོན་ཅན་འདིས་ནི་གཞོན་ནུ་མ་བསླུས་ཏེ་བྲམ་ཟེའི་ཆུང་མ་
ཕྲོགས་སོ་སྙམ་བསམས་ནས་གཡོན་ཅན་དེ་དབྱུག་པ་དང་ཁུ་ཚུར་གྱིས་བརྡེགས་ནས་མི་ནུབ་པའི་དོང་བརྐོས་ཏེ་མགྲིན་པ་མན་ཆད་བཅུག་ནས་རྨ་བྱའི་མཁྲིས་པས་ཕྲལ་བར་བྲིས་ཏེ་གང་སུ་ཡང་རུང་། བུད་མེད་ལ་འདི་བཞིན་དུ་རྐུ་ན་སྨན་ཆེན་པོས་འདི་ལྟ་བུའི་ཆད་པས་གཅད་དོ། །གང་
གིས་བུད་མེད་བརྐུས་པ་བཞིན་དུ་རྒྱས་པར་བྱིས་པ་རྐུ་བ་དང་། གླང་རྐུ་བ་དང་། ལ་བ་རྐུ་བ་དང་། སྐུད་པ་རྐུ་བ་ལ་སོགས་པ་འདི་ལྟ་བུ་ལྔ་བརྒྱ་ཙམ་བཟུང་ནས་དབྱིག་པ་དང་། ཁུ་ཚུར་གྱིས་བརྡེགས་ཏེ་མགྲིན་པ་མན་ཆད་དོང་དུ་བཅུག་ནས་ཕྲལ་བར་རྨ་བྱའི་མཁྲིས་པས་དེ་རྣམས་ཀྱི་
མིང་དང་། གཞན་གང་ཡང་རུང་རྐུན་པོ་བྱེད་ན་ཐམས་ཅད་སྨན་ཆེན་པོས་འདི་ལྟར་ཆད་པས་གཅད་ཅེས་བྲིས་སོ། །དེ་ནས་བློན་པོ་དྲུག་གིས་ཡུལ་ས་མངོན་དུ་ཟོས་པར་རྒྱལ་པོས་མཐོང་ནས་འདི་སྙམ་དུ་བློ་སྐྱེས་སོ། །སྨན་ཆེན་པོ་དེ་ད་ལྟར་ཅི་འདྲ་བར་འདུག་པ་ལྟད་མོ་བལྟའོ་སྙམ་
ནས། བློན་པོ་རྣམས་ལ་ང་ནི་རི་དགས་ཤོར་དུ་འགྲོའོ་ཞེས་བྱས་ལ་རི་བྲགས་ཀྱི་གྲོང་རྡལ་དུ་བལྟའོ་སྙམ་ནས་རི་དགས་ཤོར་དུ་འགྲོ་བ་ལྟར་བྱས་ཏེ་འཁོར་མང་པོ་འདུས་པ་དང་རི་བྲགས་ཀྱི་གྲོང་རྡལ་ལོགས་སུ་ཆས་པ་དང་། གཡོན་ཅན་ལྔ་བརྒྱ་སའི་དོང་དུ་བཅུག་པས་རྒྱལ་པོ་དེ་མཐོང་
ནས་མང་པོ་ཀུན་གྱིས་རྒྱལ་པོ་ཞེས་བོས་སོ། །རྒྱལ་པོས་སྒྲ་དེ་ཐོས་ན་མི་མི་སྣང་ནས་ཀུན་དུ་བལྟས་ཀྱང་དེ་སྐད་ཀྱི་སྒྲ་གྲག་ནས་དེ་ལ་གཡོན་ཅན་གཅིག་གིས་མཐོང་ནས་རྒྱལ་པོ་ལ་བཟླས་ཏེ། རྒྱལ་པོས་བལྟས་པ་དང་ཕྲལ་བ་ལ་རྨ་བྱའི་མཁྲིས་པས་བྲིས་པ་བཀླགས་ན། གང་བུད་མེད་རྐུ་བ་དང་།

བྱིས་པ་རྐུ་བ་དང་། གླང་རྐུ་བ་དང་། ལ་བ་རྐུ་བ་ལ་སོགས་པ་རྣམས་སྨན་ཆེན་པོས་འདི་ལྟ་བུའི་ཆད་པས་གཅད་དོ་ཞེས་བྲིས་སོ། །སྨན་ཆེན་པོ་ལ་སོགས་པ་བྱིས་པ་དེ་རྣམས་རྒྱལ་པོ་འོང་བ་མཐོང་ནས་ཀུན་དུ་བྲོས་སོ། །དེ་ནས་རྒྱལ་པོ་དེས་དེའི་ལས་བྱས་པ་མཐོང་ནས་སེམས་ལ་དགའ་མགུ་
སྟེ་བྱིས་པ་ཡིན་མོད་ཀྱི་འདི་ལྟ་བུ་བྱེད་པ་ལ་བལྟས་ན་འདི་དག་ཉེས་པ་ནི་མ་ཡིན་ནོ་སྙམ་བསམས་ནས་རྒྱལ་པོས་དེ་དག་ཕྱུང་སྟེ་བཀྱེའོ། །པཱུརྞ་ཀཙྪ་ན་གང་པོས་རྒྱལ་པོ་དེར་ཕྱིན་པ་ཐོས་ནས་བུམ་པ་ཆུས་བཀང་བ་དང་། གདུགས་དང་། བ་དན་དང་། རྒྱལ་མཚན་ལ་སོགས་པས་བསུ་བ་དང་། རྒྱལ་
པོས་ཀྱང་མ་འཇིགས་ཤིག་ཅེས་བྱས་ནས་གང་པོ་ལ་ཁྱོད་ཀྱི་བུ་བལྟས་ཁྲིད་དེ་ཤོག་ཅེས་སྨྲས་པ་དང་། གང་པོས་ལྷ་བྱིས་པ་ཆུང་ཆེས་པས་ན་དེ་ལྷའི་སྤྱན་སྔར་མི་དགུག་གོ་ཞེས་གསོལ་ཏོ། །རྒྱལ་པོས་ཡང་ཁྲིད་དེ་ཤོག་ཅེས་སྨྲས་པ་དང་། དེ་ནས་ཕས་ཁྲིད་དེ་འོངས་ནས་རྒྱལ་པོས་
བལྟས་ན་གཟུགས་ལེགས་ཤིང་། བལྟ་ན་སྡུག་པ། བཟང་བ། དཔའ་བོ་ཞིག་ན། བྱིས་པ་སྟེ་ཤེད་མ་རྫོགས་ནས་དེའི་ཕ་ལ་རྣམ་པ་དུ་མར་བསྒོ་ཞིང་གཏང་ནས་སླར་ཆས་སོ། །དུས་ཕྱི་ཞིག་ན་རྒྱལ་པོས་སྨན་ཆེན་པོ་དེ་བློ་ཅི་བདོག་པ་བགམ་ན་ཅི་འདྲི་བར་བྱ་ཞེས་བསམས་ནས་
རྒྱལ་པོ་སྐྱེད་པས་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་གྲོང་དཔོན་གང་པོ་ལ་ཕོ་ཉ་བཏང་ནས་བྱེ་མ་ལས་བྱས་པའི་ཐག་པ་ཁྲུ་བརྒྱ་པ་ཅིག་འདིར་སྐུར་ཅིག་ཅེས་སྤྲིང་སྟེ། ཕོ་ཉ་དེ་སོང་ནས་རི་བྲགས་ཀྱི་གྲོང་རྡལ་དུ་གང་པོའི་དྲུང་དུ་ཕྱིན་ནས་རྒྱལ་པོས་བཀའ་སྩལ་པ། བྱེ་མ་ལས་བྱས་པའི་
ཐག་པ་ཁྲུ་བརྒྱ་པ་ཅིག་བསྐུར་ཅིག་ཅེས་བྱས་པ་དང་། གྲོང་དཔོན་གང་པོས་དེ་ཐོས་ནས་རབ་ཏུ་སེམས་ཤིང་མི་དགའ་སྐྲག་སྔངས་ཏེ། བདག་འདི་ཙམ་དུ་སྐྱེས་ནས་མ་མཐོང་མ་ཐོས་པའི་ཀླན་ཀ་ཞིག་བདག་ལ་ཚོལ་ལོ་ཞེས་སྨྲས་ཏེ་ཤིན་ཏུ་མི་དགའ་བ་དང་། གང་པོ་ལ་སྨན་ཆེན་པོས་
ཕ་ཅི་ཉེས་ཏེ་མི་དགའ་ཞེས་དྲིས་པ་དང་། ཕས་བུ་བདག་གིས་ཚོར་ཀྱང་མ་ཐོས་མ་མཐོང་བ་རྒྱལ་པོས་ཕས་ནི་ཅིའི་ཐབས་ཞིག་གིས་ཆད་པས་གཅོད་པར་བྱེད་དམ་མི་ཤེས་སོ་ཞེས་སྨྲས་པ་དང་། དེ་ནས་སྨན་ཆེན་པོས་སྨྲས་པ། མི་དེ་བདག་དང་སྤྲོད་ཅིག་དང་རྒྱལ་པོ་སྐྱེད་པ་ལ་ལན་

བདག་གིས་སྤྲིང་ངོ་ཞེས་བྱས་པ་དང་། ཕས་ཕོ་ཉ་དང་སྤྲད་པ་དང་། སྨན་ཆེན་པོས་ཕོ་ཉ་ལ་བདག་གི་གསོལ་བ་འདི་རྒྱལ་པོ་ལ་མ་བརྗེད་པར་གྱིས་ཤིག །བདག་ཅག་ཡུལ་སྐོལ་བ་བློ་རྩིང་ལ་མི་མཁས་ཤིང་བླུན་པས་མ་འཚལ་ཏེ། རྒྱལ་པོ་བཀའ་སྩལ་ན་བཀལ་
བར་འཚལ་ན་ལྷས་དཔེ་ཁྲུ་གང་པ་ཅིག་བཀལ་ཏེ་བདག་ལ་སྐུར་ན་དཔེ་དེ་ལས་བལྟས་ཁྲུ་བརྒྱ་བས་སྟོང་ཡང་བཀལ་ཏེ་རྡོ་ཐོག་པར་བགྱིས་ནས་བསྐུར་བར་འཚལ་ལོ་ཞེས་སྤྲིང་བ་དང་། དེ་སོང་སྟེ་རྒྱལ་པོ་ལ་ལྷ་ཁོང་ཏ་འདི་སྐད་མཆིའོ་ཞེས་སྨྲས་པ་དང་། རྒྱལ་པོས་སྨྲས་པ། འདི་སྐད་
གང་པོ་ཟེར་རམ་བུ་ཟེར་ཞེས་དྲིས་ན་ཕོ་ཉས་ལྷ་སྨན་ཆེན་པོ་གཞོན་ནུ་འདི་སྐད་མཆིའོ་ཞེས་སྨྲས་པ་དང་། དེ་ནས་རྒྱལ་པོ་ངོ་མཚར་སྐྱེས་ཏེ་བསམས་པ། འདི་ནི་ལྷས་བསྟན་པ་ཡང་དག་སྟེ། འདིས་ནི་བདག་གི་རྒྱལ་སྲིད་རྒྱས་པར་བྱེད་པར་མངོན་ནོ། །དེ་ནས་ཡང་དུས་ཕྱིས་ཞིག་ན་
རྒྱལ་པོས་སྨན་ཆེན་པོ་བགམ་པར་འདོད་ནས་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་གང་པོའི་དྲུང་དུ་ཕོ་ཉ་བཏང་སྟེ་འབྲས་ཆན་གཏུན་གྱིས་ཀྱང་མ་བརྡུངས་ལ་དུམ་བུར་ཆག་པ་ཡང་མེད་པར་གྱིས་ཏེ། ཁྱིམ་གྱི་ནང་ན་ཡང་མ་ཡིན། ཕྱི་རོལ་ཀྱང་མ་ཡིན། མེས་ཀྱང་མ་ཡིན། མེ་མེད་
པར་ཡང་མ་ཡིན་པར་ཚོས་ལ། ལམ་དུ་ཡང་ཁྱེར་ཏེ་མི་འོང་། ལམ་མ་ཡིན་པར་ཡང་ཁྱེར་ཏེ་མི་འོང་། ཉི་མས་ཀྱང་མ་ཕོག །གྲིབ་མ་ཡང་མ་ཡིན། བུད་མེད་ཀྱིས་ཀྱང་མི་བསྐུར། སྐྱེས་པས་ཀྱང་མ་ཡིན། བཞོན་པས་མི་བསྐུར། རྐང་པས་ཀྱང་མ་ཡིན་པར་
འབྲས་ཆན་ཞིག་བསྐུར་ཅིག་ཅེས་སྤྲིང་བ་དང་། རྒྱལ་པོའི་བཀའ་ཁྱེར་ནས་ཕོ་ཉ་དེ་རིམ་གྱིས་གྲོང་དང་། གྲོང་ཁྱེར་དང་། གྲོང་རྡལ་ལྟ་ཞིང་རིམ་གྱིས་རི་བྲགས་ཀྱི་གྲོང་རྡལ་ག་ལ་བ་དེར་སོང་སྟེ་ཕྱིན་ནས་གང་པོ་དེ་བོས་ཏེ། གང་པོ་དེ་དང་དགའ་བའི་གཏམ་སྣ་ཚོགས་བྱས་
ནས། དེ་ནས་རྒྱལ་པོའི་ཚིག་ཇི་ལྟ་བུ་ཀུན་བསྒོ་ནས་རྒྱལ་པོས་བཀའ་འདི་སྐད་ཅེས་སྩལ་ཏོ། །ཞེས་སྨྲས་པ་དང་། དེས་ཚིག་དེ་ཐོས་མ་ཐག་ཏུ་དེ་ཤིན་ཏུ་མི་དགའ་རབ་ཏུ་མི་དགའ་བ་དང་། སྨན་ཆེན་པོས་ཕ་ཅི་ཉེས་ཏེ་ཡི་མ་རངས་ཞེས་དྲིས་པ་དང་། གང་པོས་བུ་ཅི་ཉེས་ཏེ་

མི་སེམས། རྒྱལ་པོ་སྐྱེད་པས་རྣམ་པ་འདི་ལྟ་བུ་དག་བསྒོའོ་ཞེས་སྨྲས་སོ། །ཇི་ལྟ་བུ་ཞེས་དྲིས་པ་དང་། གང་པོས་སྔ་མ་བཞིན་དུ་ཐམས་ཅད་ཞིབ་ཏུ་སྨྲས་པ་དང་། དེ་ནས་སྨན་ཆེན་པོས་སྨྲས་པ། ཕ་མི་དགའ་བར་མ་བྱེད་ཅིག །བདག་གིས་ཀུན་ནུས་པར་བྱའོ། །དེ་
ནས་སྨན་ཆེན་པོས་འབྲས་ཉི་མ་ལ་བསྐམས་ནས་སྐྱེས་པ་དང་། བུད་མེད་ཕལ་པོ་ཆེ་སོགས་ཏེ་མི་གཅིག་ཀྱང་འབྲས་སྤར་རེ་རེ་བྱིན་ནས་སེན་མོས་ཤུས་ལ་མ་ཆག་པར་བྱོས་ཏེ་འབྲུ་རེ་རེ་ནས་སོལ་ཅིག །དེ་དག་གིས་མ་ཆག་པར་བསལ་ཏེ་རྫེའུར་བླུགས་ཏེ་སྒོའི་ཐེམ་པའི་སྟེང་དུ་བཙོས་
ནས་མེས་ཀྱང་མ་ཡིན། མེ་མེད་པར་ཀྱང་མ་ཡིན་པར་ཚོས་ཤིག་པ་དེ་ནི་དེའི་ངོས་སུ་ནི་མེ་སྟེང་དུ་ནི་ཉི་མས་བཙོས་སོ། །ལམ་དུ་མ་ཡིན། ལམ་མ་ཡིན་པར་ཡང་མ་ཡིན་པར་ཁྱེར་ཏེ་ཤོག་ཤིག་པ་ནི་སྐྱེས་བུ་ལ་བསྒོ་བ། རྐང་པ་ཡ་གཅིག་ལམ་དུ་སོང་ལ་རྐང་པ་ཡ་གཅིག་ལམ་མ་ཡིན་པར་
སོང་ཤིག །ཉི་མ་ལ་ཡང་མ་ཡིན། གྲིབ་མ་ལ་ཡང་ཁྱེར་ཏེ་མ་འོང་ཤིག་པ་ནི་མི་དེ་ལ་བསྒོ་བ་དབྱུག་པའི་རྩེ་མོ་ལ་རྫེའུ་ཆིངས་ལ་གོས་སྲབ་མོས་གཡོགས་ཏེ་སོང་ཤིག །བཞོན་པས་ཀྱང་མ་ཡིན། རྐང་པས་ཀྱང་མ་ཡིན་པར་ཁྱེར་ཏེ་ཤོག་ཤིག་པ་ནི་མི་དེ་ལ་བསྒོ་བ། རྐང་པ་ཡ་གཅིག་ལྷམ་
གྱོན་ཡ་གཅིག་ལྷམ་མེད་པར་བྱོས་ལ་སོང་ཤིག །སྐྱེས་པས་ཀྱང་མ་ཡིན། བུད་མེད་ཀྱིས་ཀྱང་མ་ཡིན་པས་ཁྱེར་ཏེ་ཤོག་ཤིག་པ་ནི་མ་ནིང་ལ་བསྐུར་རོ། །རྒྱལ་པོ་སྐྱེད་པའི་དྲུང་དུ་དེས་ཁྱེར་ཏེ་འོངས་ནས། རྒྱལ་པོ་སྐྱེད་པས་མི་དེ་ལ་དྲིས་པ། དེས་རྒྱལ་པོ་ལ་ཞིབ་ཏུ་སྨྲས་པ་དང་།
རྒྱལ་པོས་ཐོས་ནས་དགའ་སྟེ། ཅི་གང་པོས་བསྒོས་ཏེ་བསྐུར་རམ། འོན་ཏེ་སྨན་ཆེན་པོས་བསྒོ་ཞེས་དྲིས་པ་དང་། ཕོ་ཉས་སྨན་ཆེན་པོས་བསྐུར་རོ་ཞེས་སྨྲས་སོ། །དེ་ནས་རྒྱལ་པོས་སྨྲས་པ། སྨན་ཆེན་པོ་དེ་ནི་རྟོགས་པ་དང་། ལན་ལྡོན་པ་དང་། ཚུལ་དང་། ཆོ་ག་ལ་
སོགས་པར་ལྡན་ནོ། །དེ་ནས་དུས་ཕྱིས་ཞིག་ན་ཕོ་ཉ་གཞན་ཞིག་བཏང་སྟེ་འདི་ལྟར་སྐྱེད་མོས་ཚལ་ལྡུམ་ར་དང་། བཟའ་ཤིང་དང་། རྫིང་བུ་ལྡན་པ་སྐུར་ཅིག་ཅེས་སྤྲིང་བ་དང་། དེ་ནས་ཕོ་ཉ་དེ་པཱུརྞ་ཀཙྪའི་གྲོང་རྡལ་དུ་ཕྱིན་པ་དང་། གང་པོ་ལ་རྒྱལ་པོས་འདི་སྐད་ཅེས་བཀའ་སྩལ་

ཏོ། །སྐྱེད་མོས་ཚལ་ལྡུམ་ར་དང་། བཟའ་ཤིང་དང་། རྫིང་བུ་བཅས་པ་ཞིག་སྐུར་ཅིག་ཅེས་བསྒོ་བ་དང་། གང་པོས་དེ་ཐོས་ནས་མི་དགའ་སྟེ། སྐྱེད་མོས་ཚལ་འདི་སྔོན་མ་མཐོང་ན་ཐབས་ཇི་ལྟ་བུར་བྱ་ཞེས་རབ་ཏུ་སེམས་པ་དང་། དེ་ནས་སྨན་ཆེན་པོ་
གཞོན་ནུས་ཕ་སེམས་པ་མཐོང་ནས་སྨན་ཆེན་པོས་སྨྲས་པ། ཕ་ཅི་ཞིག་མི་དགའ་ཞེས་དྲིས་པ་དང་། གང་པོས་དེ་ལ་བུ་ཅིའི་ཕྱིར་མི་དགའ་བར་མི་འགྱུར། རྒྱལ་པོས་བདག་ལ་འདི་སྐད་དུ་བསྒོ་སྟེ། སྐྱེད་མོས་ཚལ་ལྡུམ་ར་དང་། བཟའ་ཤིང་དང་། རྫིང་བུར་ལྡན་པ་ཞིག་སྐུར་ཅིག་ཅེ་ན་
ཇི་ལྟ་བུར་སྦྱར་ཞེས་སྨྲས་པ་དང་། སྨན་ཆེན་པོས་སྨྲས་པ། བསམ་པ་མ་མཛད་ཅིག །རྒྱལ་པོ་ཇི་ལྟར་མཉེས་པར་འགྱུར་བ་བདག་གིས་དེ་ལྟར་བགྱིའོ། །དེ་ནས་ཕོ་ཉ་བོས་ནས་སྨན་ཆེན་པོས་སྨྲས་པ། རྒྱལ་པོ་ལ་སླར་འདི་སྐད་ཅེས་གསོལ་ཅིག །རི་བྲགས་ཀྱི་སྐྱེད་མོས་ཚལ་འདི་
དག་ནི་ལེགས་པར་ནི་ཅི་ཡང་མ་འཚལ་ན་ཇི་ལྟར་བགྱིས་ན་མཆི་བར་འགྱུར་བ་རྒྱལ་པོའི་ཕོ་བྲང་གི་སྐྱེད་མོས་ཚལ་ཞིག་རྒྱལ་པོས་བསྐུར་བར་གསོལ། ཕས་ཀྱི་སྐྱེད་མོས་ཚལ་དེ་ཇི་ལྟར་མཆི་བ་བལྟས་ཏེ་བསླབས་ནས། དེའི་རྗེས་བཞིན་དུ་གཏང་བར་འཚལ་ལོ་ཞེས་སྤྲིང་བ་དང་། དེ་ནས་
ཕོ་ཉ་དེ་སླར་བཏང་སྟེ་རྒྱལ་པོ་ལ་དེས་ཇི་ལྟར་སྤྲིང་བ་བཞིན་གསོལ་ཏོ། །རྒྱལ་པོ་དགའ་སྟེ་ཅི་གང་པོ་རང་གི་བློས་སྨྲས་པ་ཡིན་ནམ། འོན་ཏེ་སྨན་ཆེན་པོས་སྨྲས་པ་ཡིན་ཞེས་དྲིས་པ་དང་། དེ་ནས་ཕོ་ཉས་སྨན་ཆེན་པོས་སྤྲིང་བ་ལགས་སོ་ཞེས་སྨྲས་པ་དང་། རྒྱལ་པོས་སྨྲས་པ། འདི་
ལྟར་གཞོན་ནུ་དེ་ནི་ཤེས་རབ་དང་ལྡན་པ་ཞིག་གོ་ཞེས་བསམས་ནས། ཡང་དུས་ཕྱི་ཞིག་ན་ཕོ་ཉ་དེ་ལྟ་བུ་ཞིག་བཏང་ནས། རི་བྲགས་ཀྱི་གྲོང་རྡལ་དེར་ཤིང་སྐྱེད་ལ་ལོ་གཅིག་ལོན་པ་དེ་ལ་མེ་ཏོག་དང་ལྡན་པའི་འབྲས་བུར་ལྡན་པ་ཞིག་སྐུར་ཅིག་ཅེས་སྤྲིང་བ་དང་། ཕོ་ཉ་དེ་སོང་སྟེ་གང་པོ་ལ་
བསྒོ་བ་དང་། གང་པོ་སྔ་མ་བཞིན་དུ་རབ་ཏུ་སེམས་ནས་མི་དགའ་བ་སྨན་ཆེན་པོས་མཐོང་ནས་སྨྲས་པ། ཕ་མི་དགའ་བར་མ་མཛད་ཅིག་དོན་དེ་མི་དཀའོ་ཞེས་སྨྲས་ནས། དེས་ཨེ་རཎྜའི་ཤིང་ཞིག་བསྐྱེད་ནས་བསྐུར་ཏེ་དེའི་ལོ་ལ་འབྲས་བུ་དང་། མེ་ཏོག་བྱུང་བ་རྒྱལ་པོས་མཐོང་ནས་

ངོ་མཚར་བར་བསམས་ཏེ། ཕོ་ཉ་ལ་འདི་ཅི་གང་པོའི་ཐབས་སམ། སྨན་ཆེན་པོའམ་སུའི་ཞེས་སྨྲས་པ་དང་། ཕོ་ཉས་སྨྲས་པ། སྨན་ཆེན་པོའི་ལགས་སོ། །ལེགས་སོ་ལེགས་སོ་ཞེས་སྨྲས་ནས་ཅང་མི་ཟེར་བར་འདུག་གོ། །དེ་ནས་དུས་ཕྱི་ཞིག་ན་རྒྱལ་པོས་རི་བྲགས་ཀྱི་གྲོང་རྡལ་
དེར་གང་པོ་ལ་གླང་ལྔ་བརྒྱ་བདས་ནས་འདི་རྣམས་ལ་རྩྭ་བྱིན་ཏེ་ཞོས་ལ་འོ་མ་དང་། ཞོ་དང་། མར་དང་། པྲིས་མ་དང་། ཆུར་བ་རྣམས་བྱོས་ལ་སྐུར་ཅིག །ཕོ་ཉ་དེས་རྒྱལ་པོའི་བཀའ་མཉན་ཏེ་རིམ་གྱིས་གྲོང་དུ་སོང་ནས་གང་པོ་ལ་ཡིད་ཆེས་པའི་ཚིག་གིས་བྱས་ནས་བོས་ཏེ་
སྨྲས་པ། རྒྱལ་པོས་གླང་ལྔ་བརྒྱ་པོ་འདི་བདས་ཏེ་འདི་རྣམས་ཞོས་ལ་འོ་མ་དང་། ཞོ་དང་། མར་དང་། པྲིས་མ་དང་། ཆུར་བ་གྱིས་ལ་སྐུར་ཅིག་ཅེས་བྱུང་ངོ་། །གང་པོ་དེ་སྐད་དུ་ཐོས་ནས་ཡི་ཆད་དེ་གྲོང་མི་གཞན་དག་ལ་སྨྲས་པ། རྒྱལ་པོ་ནི་ཐབས་འདི་ལྟ་བུས་ཆད་པས་གཅད་
པར་ངེས་ནས་གླང་ལས་འོ་མ་གྱིས་ཤིག་ཅེས་བྱུང་ནས་རབ་ཏུ་སེམས་ཤིང་འདུག་པ་དང་། སྨན་ཆེན་པོས་སྨྲས་པ། ཕ་ཁྱོད་མི་དགའ་བར་མ་མཛད་ཅིག་དང་། བདག་གིས་དེའི་ལན་བསམས་ལ་ཇི་ནས་རྒྱལ་པོ་མཉེས་པར་གྱུར་ཅིང་དེ་རྣམས་ཀྱང་བྱེད་དུ་མི་གཞུག །དེ་ནས་སྨན་
ཆེན་པོས་སྤད་གཉིས་ཤིག་བསླབས་ཏེ་བཏང་ནས་ཁྱོད་གྲོང་ཁྱེར་ཆེན་པོར་རྒྱལ་པོ་ལས་མི་རིང་བ་ཞིག་ཏུ་སོང་ལ་ཤིང་གི་གཞོང་ཁུང་ཅིག་ལྟོར་ཆོར་ལ་གོས་ཀྱིས་དཀྲིས་ཏེ་ས་ལ་ཕར་འགྲེ་ཚུར་འགྲེ་ཞིང་ངུ་བ་ལྟར་བྱོས་ཤིག །དེ་ནས་ཁྱེའུ་ཁྱོད་ཀྱིས་ཕྱོགས་ཀུན་དུ་གསོལ་བ་ཐོབ་ལ་མེ་ཏོག་དང་།
སྤོས་དང་། བཤོས་ཀྱིས་ཕྱོགས་བཅུར་གཏོར་ལ་ཕ་འདི་བདེ་ཞིང་ལེགས་ལ་བཀྲ་ཤིས་པར་བུ་བྱུང་ཞིག་ཅེས་བརྗོད་ཅིག །དེ་སྤད་གཉིས་ཇི་ལྟར་བསྟན་པ་བཞིན་དུ་ཡུལ་པཱུརྞ་ཀཙྪའི་གྲོང་རྡལ་ནས་རྒྱལ་པོ་སྐྱེད་པའི་དྲུང་དུ་སོང་སྟེ། མི་རིང་བ་ཞིག་ཏུ་འདུག་ནས་ཇི་ལྟར་བསྟན་པའི་
ཆོས་དང་། སྨྲེ་ཞིང་ངུ་བ་ལ་སོགས་པ་བྱས་ཏེ། གང་འཇིག་རྟེན་ན་འཇིག་རྟེན་སྐྱོང་བས་བདག་གི་ཕ་འདི་སྲུང་ལ་བདེ་ཞིང་ལེགས་ལ་བཀྲ་ཤིས་པར་བུ་བཙས་པར་ཤོག་ཤིག་ཅེས་དེ་སྐད་དུ་བོས་པ་རྒྱལ་པོ་སྐྱེད་པས་ཐོས་ནས་དེ་ཅི་རྟོགས་ཤིག་ཅེས་མི་གཅིག་བཏང་ངོ་། །དེ་སོང་སྟེ་བལྟས་ན་སྐྱེས་

པ་ཞིག་གསུས་པ་ཆེ་ལ་ས་ལ་འགྲེ་ལྡོག་ཅིང་ངུ་བ་མཐོང་ངོ་། །དེའི་བུ་ཡང་གཤིན་རྗེ་དང་། ཀླུའི་རྒྱལ་པོ་དང་། ངལ་བསོ་པོ་དང་། བ་ས་ལ་སོགས་པ་ལྷའི་དབང་པོ་རྣམས་ལ་གསོལ་བ་འདེབས་པ་མཐོང་སྟེ། དེ་དག་གིས་དེ་ཅིའི་ཕྱིར་ཞེས་དྲིས་ན། དེ་ནས་ཁྱེའུས་
བདག་གིས་ཕ་ལས་བུ་འབྱུང་བར་བྱ་བའི་ཕྱིར་རོ། །དེ་དག་གིས་དོང་ནས་རྒྱལ་པོ་ལ་གསོལ་པ་དང་། རྒྱལ་པོས་དེ་སྤད་གཉིས་བོས་ནས་ཁྱེའུ་དེས་བདག་གི་ཕ་ལས་བུ་བྱུང་བར་ཤོག་ཤིག་ཅེས་དེ་བཞིན་དུ་སྨྲའོ། །དེ་ནས་རྒྱལ་པོས་བགད་དེ་ངས་གང་ན་ཡང་འདི་ལྟར་སྐྱེས་པ་ལས་བུ་བྱུང་བ་
ནི་མ་ཐོས་མ་མཐོང་ངོ་ཞེས་སྨྲས་པ་དང་། དེ་ནས་ཁྱེའུ་དེས་ལྷ་ཁྱོད་དེ་བཞིན་དུ་གསུང་བ་བཞིན་ལགས་སམ། དེ་བཞིན་ནོ། །དེ་ནས་ཁྱེའུ་དེས་དེ་ལྟར་ན་ཅིའི་སླད་དུ་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་གླང་ལྔ་བརྒྱ་བདས་ཏེ་འདི་རྣམས་ལས་འོ་མ་དང་། ཞོ་དང་། མར་སར་དང་། ཆུར་བ་དག་སྐུར་
ཅིག་ཅེས་བྱུང་ན་ཁྱོད་ཀྱིས་གླང་སྦྲུམ་སྟེ་བུ་བྱུང་བ་གང་ན་གཟིགས། གང་ན་གསན་ཅེས་སྨྲས་པ་དང་། དེ་ནས་རྒྱལ་པོས་བགད་དེ་ཅི་གང་པོའི་ཡིད་བརྟན་པ་ཕ་ཟེར་རམ་འོན་ཏེ་སྨན་ཆེན་པོའི་འམ་སུའི་ཞེས་དྲིས་པ་དང་། ཕོ་ཉས་ལྷ་སྨན་ཆེན་པོ་ལགས་སོ་ཞེས་སྨྲས་པ་དང་། རྒྱལ་པོ་དང་། བློན་པོ་
རྣམས་ཀྱིས་ཤིན་ཏུ་ངོ་མཚར་དང་ལྡན་པར་བཟུང་ངོ་། །དེ་ནས་ཡང་དུས་ཕྱི་ཞིག་ན་རྒྱལ་པོས་བགམ་པའི་ཕྱིར་ཕོ་ཉ་དྲེའུ་ཅིག་བཀྲི་སྟེ་བཏང་ནས་པཱུརྞ་ཀཙྪའི་རི་བྲགས་ཀྱི་གྲོང་དུ་སོང་སྟེ། གང་པོ་ལ་དྲེའུ་འདི་མ་བཅིང་བར་སྲུང་ཤིག །བླ་གབ་ཡོད་པར་མ་གཞུག་པར་འཚོ་ཤིག་ཅེས་བསྒོ་ཤིག །
ཕོ་ཉ་དེ་རིམ་བཞིན་དུ་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་སོང་སྟེ། གང་པོ་ལ་ཁྱོད་ཀྱིས་དྲེའུ་འདི་སྲུང་ཤིག །དེ་ལྟ་བུའི་ཚུལ་ལས་བརྒྱལ་ཤོར་ན་ལུས་ལ་ཆད་པས་ཆེར་གཅད་དོ་ཞེས་བསྒོ་བ་དང་། དེ་དེ་སྐད་ཐོས་ནས་སྐྲག་སྟེ། དེ་དག་ཐམས་ཅད་ནི་བྱར་རུང་གི་ད་ནི་འདི་ལ་མི་རུང་སྟེ།
དེས་བདག་ལ་འདི་འདྲ་བར་བཀའ་སྩལ་པ་ནི་ལྷས་ཀྱང་བདེ་བར་བྱེད་མི་ནུས་སོ་སྙམ་སྟེ་རབ་ཏུ་སེམས་ཤིང་འདུག་པ་དང་། སྨན་ཆེན་པོས་ཕ་རབ་ཏུ་སེམས་པར་མཐོང་ནས་མི་དགའ་བར་མ་བྱེད་ཅིག་ཅེས་སྨྲས་ཏེ་དྲེའུ་དེ་ཉིན་མོ་ནི་གཟས་ལ་ཅི་བདེར་བཙས་ནས་ནུབ་མོ་མི་ཉི་ཤུས་བསྐོར་ནས་མི་ལྔ་ལྔས་

མེལ་ཙེ་ཐུན་རེ་རེར་བྱས་ནས་རྐང་ལག་ལ་མི་རེ་རེས་བཟུང་དྲེའུ་དེའི་སྟེང་དུ་རྟག་པར་མི་གཅིག་ཞོན་ཏེ་འདུག་གོ། །ཐབས་དེ་ལྟ་བུར་མི་ཉི་ཤུས་བླ་གབ་མེད་པ་ལ་སྲུང་ཞིང་འདུག་གོ། །རྒྱལ་པོ་སྐྱེད་པས་མངག་གཞུག་བྱེད་པའི་མི་གཅིག་གང་པོའི་དྲུང་དུ་དེ་ཇི་ལྟར་འཚོ་ལྟོས་ཤིག་ཅེས་རྟོག་ཏུ་བཏང་ངོ་། །
དེས་མཐོང་སྟེ་རྒྱལ་པོ་ལ་ལྷ་འདི་ལྟ་བུའི་ཐབས་སུ་བགྱིད་དོ་ཞེས་གསོལ་པ་དང་། རྒྱལ་པོས་དེ་ལྟར་བསྲུངས་ན་འབྲོས་མི་ནུས་ཀྱིས་མི་དེ་རྣམས་ལས་གཅིག་ཁ་དྲང་ངོ་ཞེས་སྨྲས་པ་དང་། བློན་པོས་གང་ཁ་དྲང་བར་བགྱི་ཞེས་ཞུས་པ་དང་། རྒྱལ་པོས་ནུབ་མོ་སྟེང་ན་ཞོན་པ་དེ་ཁ་དྲངས་ན།
གཞན་གཉིད་ཀྱིས་ལོག་པ་དང་། དེ་ཁྲིད་དེ་འོང་ངོ་ཞེས་སྨྲས་ཏེ། དེ་ནས་རྒྱལ་པོས་སྟེང་ན་ཞོན་པ་དེ་ཁ་དྲངས་ནས་དེས་ཀྱང་དྲེའུ་ཁྱེར་ཏེ་འོངས་སོ། །ནམ་ལངས་པ་དང་གང་པོ་ལ་དྲེའུ་དེ་བྲོས་སོ་ཞེས་སྨྲས་པ་དང་། དེང་ནི་བདག་གི་འཚོ་བ་མ་རུང་བར་གྱུར་ཏོ་ཞེས་སྐྲག་ནས་སྨྲེ་
སྔགས་འདོན་པར་བྱེད་པ་ནི་གང་ཇི་ལྟར་བྱ་ཞེས་དེ་མི་དགའ་ཞིང་འདུག་པ་སྨན་ཆེན་པོས་མཐོང་ནས་དེ་ཡང་སེམས་པ་ལ་ཞུགས་ཏེ་ཐབས་དེ་དག་ཐམས་ཅད་ནི་ཐབས་ཀྱིས་བསྒྲུབས་ན་འདིའི་ཐབས་ནི་མི་སྣང་ངོ་ཞེས་མི་སྨྲ་སྟེ། དེ་ཡང་སྐྲག་ནས་དེའི་ཐབས་སེམས་པ་ལས་དེས་ཕ་ལ་ཁྱོད་ཀྱིས་
དོན་དེ་བསྒྲུབ་པར་ནུས་ན་ཐབས་གཅིག་ཡོད་དོ་ཞེས་སྨྲས་སོ། །ཕས་ཅི་ཞིག་ཡོད་ཅེས་དྲིས་པ་དང་། སྨན་ཆེན་པོས་ཇི་ནས་བདག་ཉིད་ལ་མཐོ་བཙམ་པར་བཟོད་ན་གདོད་དོན་སྒྲུབ་པར་འགྱུར་རོ་ཞེས་སྨྲས་པ་དང་། དེ་ནས་གང་པོས་སྨྲས་པ། ཇི་ནས་བདག་གི་འཚོ་བ་དང་བྲལ་བར་མི་འགྱུར་
བ་དེ་ལྟར་གྱིས་ཤིག །དེ་ནས་སྨན་ཆེན་པོས་ཕའི་མགོ་བོ་སྐྲ་ཁྲེམ་གཉེར་བདུན་དུ་བྲེགས་ཏེ་ལེ་ཀྲུ་དང་། སྣག་ཙ་དང་། མཐིང་ཤིང་དང་། དཀར་པོ་ལ་སོགས་པས་མགོ་རི་མོར་བྱས་ནས་བོང་བུ་ལ་བསྐྱོན་ཏེ། རིམ་གྱིས་གྲོང་ཁྱེར་ཆེན་པོར་དོང་བ་དང་། སྨན་ཆེན་པོ་འོང་ངོ་ཞེས་ཀུན་དུ་སྒྲ་
བསྒྲགས་སོ། །དེས་ཕའི་མགོ་བོ་ཁྲེམ་གཉེར་བདུན་དུ་བྲེགས་ཤིང་བོང་བུ་ལ་ཞོན་ཏེ་འོངས་སོ་ཞེས་ཀྱང་གྲགས་སོ། །དེ་ནས་རྒྱལ་པོ་དང་། བློན་པོ་དག་གིས་དེ་ལྟ་བུར་གྱུར་པ་ཐོས་ནས་སྨྲས་པ། དེ་མཁས་པའོ། །མཛངས་པའོ་ཞེས་གཏམ་སྙན་པ་ཐམས་ཅད་དུ་གྲགས་པ་ནི་

ལེགས་ན་ཅིའི་ཕྱིར་ན་མི་རིགས་པ་འདི་ལྟ་བུ་བྱས། དེ་ནས་རྒྱལ་པོ་སྐྱེད་པ་བློན་པོ་དང་འཁོར་དུ་བཅས་ནས་སྨན་ཆེན་པོ་ལྟར་དོང་སྟེ། ཅི་དེ་འདྲ་བ་དང་འོང་ངམ། འོན་ཏེ་བརྫུན། རྒྱལ་པོ་འཁོར་དང་བཅས་པས་དེ་ལྟ་བུ་མངོན་སུམ་དུ་མཐོང་བ་དང་། བློན་པོ་དག་
གིས་རྒྱལ་པོ་ལ་ལྷ་ཅིའི་ཕྱིར་སྨན་ཆེན་པོ་ལ་མཁས་པའོ། །གསལ་བའོ། །མཛངས་པའོ་ཞེས་བསྔགས། དེས་མི་རིགས་པ་འདི་ལྟ་བུ་བགྱིད་པ་གདའའམ་ཞེས་གསོལ་པ་དང་། དེ་ནས་རྒྱལ་པོས་སྨན་ཆེན་པོ་ལ་སྨན་ཆེན་པོ་ཅི་འདི་ལྟ་བུར་ཕ་ལ་མཐོ་བཙམ་པར་བྱས་ཞེས་དྲིས་པ་
དང་། དེས་སྨྲས་པ། ལྷ་འདི་ནི་མཐོ་བཙམ་པ་མ་ལགས་ཀྱིས་མཆོད་པར་བགྱིས་ཏེ་བདག་ཀྱང་ཕ་བས་ཤིན་ཏུ་མང་དུ་འཚལ་བས་ན་བདག་གིས་འདི་ལ་རྣམ་པར་མཆོད་པར་བགྱིས་སོ། །རྒྱལ་པོས་སྨྲས་པ། ཅི་ཁྱོད་བཟང་ངམ། འོན་ཏེ་ཕ་བཟང་། དེས་བདག་བཟང་གི་ཕ་ངན་
ཏོ་ཞེས་སྨྲས་པ་དང་། རྒྱལ་པོས་སྨྲས་པ། ཕ་བས་བུ་བཟང་བ་ནི་ངས་གང་དུ་ཡང་མ་ཐོས་མ་མཐོང་མོད་ཀྱི་ཕས་བུ་གྲགས་པར་བྱེད། མས་ནི་གསོ་བ་དང་སྐྱེད་པ་དང་སྲུང་བའི་ཕྱིར་ཏེ། དེ་བས་ན་ངེད་ཀྱིས་ནི་ཅི་ནས་ཕ་བཟང་བ་ཡིན་ནོ་སྙམ་དུ་བསམས་སོ། །དེ་ནས་སྨན་ཆེན་པོས་རྒྱལ་
པོ་ལ་ཡང་ཕ་དེ་ལྟར་ལགས་སམ་མ་ལགས་ཤིན་ཏུ་རྟོགས་ཤིག་ཅེས་སྨྲས་པ་དང་། རྒྱལ་པོ་དང་བློན་པོས་དེ་བཞིན་ཡིན་གྱི་གཞན་མ་ཡིན་ནོ་ཞེས་སྨྲས་པ་དང་། དེ་ནས་སྨན་ཆེན་པོས་རྒྱལ་པོའི་རྐང་པ་ལ་གཏུགས་ཏེ་ལྷ་དེ་ལྟར་ལགས་མད་ན། ལྷས་བདག་ཅག་ལ་དྲེའུ་འཚོར་སྩལ་པ་དེ་
བྲོས་ཏེ། ལྷ་དང་བློན་པོ་རྣམས་ཀྱིས་བཀའ་སྩལ་པ་ཡང་ཕ་རབ་ཏུ་བཟང་ངོ་ཞེས་བསྟོད་ན། དྲེའུ་དེའི་ཕ་ནི་བོང་བུ་འདི་ལགས་ན་སྐྱིན་པར་བཞེས་པར་གསོལ་ཞེས་སྨྲས་པ་དང་། དེ་ནས་རྒྱལ་པོ་དང་བློན་པོས་དེའི་ཚིག་གིས་ཐབས་དེ་ལྟ་བུར་སྦྱར་བ་ཐོས་ནས་ཡ་མཚན་དུ་བཟུང་ཞིང་ཨེ་མ་ཧོ་ཞེས་
ཏེ་རིགས་པ་དང་མི་རིགས་པར་བྱ་བ་འདི་ལྟ་བུ་མཁས་སོ། །དེ་ལྟ་བུར་ཁོང་དུ་ཆུད་དེ་རྒྱལ་པོ་མགུ་རངས་རབ་ཏུ་དགའ་བའི་སེམས་སྐྱེས་ནས་རྣམ་པ་མང་པོའི་རྒྱན་བཀླུབས་ཏེ་བློན་པོའི་དབང་བྱིན་ནོ། །ཕ་ལ་ཡང་རི་བྲགས་ཀྱི་གྲོང་དེ་བྱིན་ནོ། །བར་གྱི་སྡོམ་སྟེ། བྱེ་མ་བཀལ་བ་འབྲས་ཅན་དང་། །

ཨེ་རན་ཌ་ཡི་ཤིང་དང་གླང་། །དྲེའུ་དང་དེ་རུ་སོང་བ་དང་། །དེ་ལ་བློན་པོའི་ཐབས་བྱིན་པའོ། །དེ་ནས་སྨན་ཆེན་པོས་བློན་པོའི་དབང་བྱིན་པ་དང་ཅི་བྱ་བ་དང་། རྒྱལ་པོའི་དོན་ཇི་ལྟར་བྱ་ཞེས་རབ་ཏུ་བདེ་བར་སེམས་པ་ལ་ཞུགས་པ་དང་། གྲོང་ཁྱེར་ཀུན་ཏུ་ཡང་སྨན་ཆེན་པོ་བློན་པོར་
བཅུག་སྟེ་མཛངས་ལ་མཁས་པའི་སྒྲ་སྒྲོགས་སོ། །དེ་ནས་དུས་ཕྱི་ཞིག་ན་བྲམ་ཟེ་ཞིག་གིས་བུ་མོ་ཞིག་བག་མར་བླངས་པའི་ཡོ་བྱད་དུ་ནོར་མང་ཞིག་ཟད་ནས་དེ་དང་ལྷན་ཅིག་མང་ཞིག་ཏུ་ཡོངས་སུ་སྤྱད་དེ་བདག་གིས་བག་མ་བླངས་པའི་ཡོ་བྱད་དུ་ནོར་མང་དུ་ཟད་པས་ད་ནི་འདི་ལྟར་ནོར་དུ་
འགྱུར་བ་ཆེན་པོ་མེད་ལ་ཁྱིམ་ན་འདུག་ན་མ་ལེགས་པར་འགྱུར་རོ་སྙམ་དུ་བསམས་ཏེ། བྲམ་ཟེ་དེ་ཁ་ཏོན་མང་དུ་ལོབས་པ་སྨྲང་དང་སྨྲང་གི་ཡན་ལག་ཏུ་ལྡན་པས་ཕ་རོལ་ཏུ་ཕྱིན་པ་ནོར་བསྒྲུབས་པའི་ཕྱིར་ལྗོངས་གཞན་དུ་སོང་ངོ་། །དེ་ཡང་དེ་ན་མཐར་གྱིས་རྒྱུ་ཞིང་སོང་བ་ལས་དེས་གསེར་གྱི་དོང་
ཙེ་གནའ་མ་ལྔ་བརྒྱ་རྙེད་དེ་དེ་ཁྱེར་ནས་སླར་བདག་གི་ཁྱིམ་དུ་འོངས་སོ། །དེས་བདག་སྔར་ནོར་ཁྱེར་ལ་ཁྱིམ་དུ་མི་འཇུག་གོ། །བུད་མེད་ཀྱི་སེམས་ཀྱི་སྤྱོད་པ་སུས་ཀྱང་མི་རིག་སྟེ། བྲམ་ཟེ་མོ་དེ་ཡང་དབྱིབས་ལེགས་ཤིང་བལྟ་ན་སྡུག་པ་བཟང་བས་ན་བདག་མེད་པའི་ཕྱིན་སྐྱེས་པ་གཞན་དང་ཆགས་ཤིང་
འདུག་ཀྱང་སྲིད་ཀྱིས་སྙམ་དུ་བསམས་ནས། དེས་ནམ་སྲོས་པ་དང་། དུར་ཁྲོད་དུ་སོང་ནས་ཤིང་ནྱ་གྲོ་དྷཱའི་དྲུང་དུ་ཁུང་བརྐོས་ནས་དེའི་ནང་དུ་བཅུག་སྟེ་ནམ་སྲོས་ནས་ཁྱིམ་དུ་ཕྱིན་པ་དང་། ཆུང་མ་དེ་ཡང་སྐྱེས་པ་གཞན་བྲམ་ཟེ་རྣ་བོ་ཆེ་ཞེས་བྱ་བ་དེ་ལ་ཆགས་ཏེ། དེའི་ཚེ་ན་ལྷན་ཅིག་ཁ་ཟས་
ཞིམ་པོ་ཟོས་ནས་བསུང་ཞིམ་པོས་ལུས་བྱུགས་ཏེ་ཉལ། མལ་གྱི་སྟེང་ན་དེ་གཉིས་དགའ་བ་མྱོང་ཞིང་འཁོད་པ་ལས་བྲམ་ཟེ་དེ་ཡང་བདག་གི་ཁྱིམ་དུ་ཕྱིན་ནས་སྒོ་ཕྱེ་ཞེས་བོས་པ་དང་། བུད་མེད་དེས་སྨྲས་པ། ཀྱེ་ཁྱེད་སུ་ཞིག་ཅེས་སྨྲས་སོ། །དེས་བདག་གི་མིང་ཕྱུང་བ་དང་། མོ་
ཉིད་ཀྱིས་དགའ་དང་མགུ་བའི་སྒྲ་ཕྱུང་ནས་རྣ་བོ་ཆེ་ཉལ་ནས་བསླང་སྟེ། མལ་གྱི་འོག་ཏུ་སྦས་ནས་སྒོ་འབྱེད་དུ་འོངས་ཏེ། དེས་ཁྱོ་ལ་གཡོ་བྱེད་ཅིང་རྗེས་བྱས་ཏེ་འོངས་ནས། སྒོ་ཕྱེ་སྟེ་ངུས་ནས་མགྲིན་པ་ནས་འཇུས་མཆོད་པ་དང་ཡོན་འབུལ་ལོ། །ཟས་བསོད་པ་བྱིན་ནོ། །བྲམ་ཟེ་དེ་ཟ་ཞིང་འདི་

ནི་སྐྱེས་པ་གཞན་ཞིག་ལ་ཆགས་པར་ངེས་པས་ན་འདི་ལྟར་མཚན་མོ་ཁ་ཟས་འདི་ལྟ་བུ་སྦྱར་རོ་སྙམ་དུ་བསམས་སོ། །དེ་ཡང་དྲང་བའི་རང་བཞིན་ཅན་ཞིག་སྟེ། དེ་ལ་ཀྱེ་བཟང་མོ་ཚེས་གྲངས་ཅན་ནི་མ་ཡིན་དུས་ཀྱི་སྟོན་མོའམ། གྲོང་ཁྱེར་གྱི་དུས་ཀྱི་སྟོན