Kinh tạng Tây Tạng (Kangyur Đại Học) — 011_འདུལ་བ།_ད

ན་ནི་སྦོམ་པོར་འཁོལ་ན་ད་
འདི་ལྟ་བུ་གང་ནས་འོངས་ཞེས་དྲིས་པ་དང་། དེས་བུ་འདི་ནི་བདག་གིས་མ་བཀལ་ལོ། །མ་མ་འོ་ན་སུས་བཀལ། བུ་བདག་གི་ཁྱིམ་ན་བུད་མེད་གཅིག་ཅིག་འདུག་སྟེ། དེས་བཀལ་བ་འདི་ཡིན་ནོ་ཞེས་སྨྲས་པ་དང་། དེས་མ་མ་ཁྱོད་ཀྱིས་ཅིའི་ཕྱིར་ན་བདག་ལ་དེ་མི་སྦྱིན་བདག་ལ་ཡང་ཆུང་མ་
མེད་དོ། །བདག་གིས་དེའི་བཟའ་བ་དང་བགོ་བ་དང་འཚོ་བའི་ཡོ་བྱད་དག་སྦྱར་རོ་ཞེས་སྨྲས་པ་དང་། མོས་བུ་རེ་ཞིག་དེ་ལ་གསོལ་བར་བྱ་སྟེ་ཅི་ཟེར་བ་ལས་ལན་ཕྱིས་སྦྱིན་ནོ་ཞེས་སྨྲས་པ་དང་། དེས་དེའི་སྐུད་པའི་རིན་རྒྱལ་བར་བྱིན། ཟན་ཀྱང་བྱིན་ནས་དེ་ནས་དྲི་དང་མེ་ཏོག་གིས་བརྒྱན་ཏེ་བཏང་བ་དང་
སྐེམ་མོ་གཽ་ཏ་མཱིས་སྨྲས་པ། མ་མ་སྐུད་པ་སུ་ལ་བཙོངས་ན་རིན་རྒྱལ་ཞིང་ལེགས་ཏེ་ཁྱོད་ཀྱང་དྲི་དང་མེ་ཏོག་གིས་སུས་བརྒྱན། དེས་བུ་མོ་དྲི་དང་མེ་ཏོག་གིས་བརྒྱན་པ་འབའ་ཞིག་མ་ཡིན་གྱི་ཟན་ཀྱང་བྱིན་ན་ཞེས་སྨྲས་པ་དང་། དེའི་ཕྱིར་འདི་ལྟ་བུ་ག་ལས་བྱུང་ཞེས་འདྲིའོ། །དེས་ཀྱང་ཇི་ལྟར་
གྱུར་པ་ཞིབ་ཏུ་སྨྲས་ནས་ཁྱེའུ་ཐ་ག་པའི་ཡོན་ཏན་གྱི་ཁྱད་པར་སྙན་པར་བརྗོད་དེ་སྨྲས་པ། བུ་མོ་ཁྱེའུ་ཐ་ག་པ་དེ་ཁྱོད་སློང་སྟེ། དེའི་ཆུང་མ་མེད་ཀྱིས་ཁས་ལོང་ཤིག་དང་བདེ་བར་འགྱུར་རོ། །དེས་མ་མཆོག་གིས་ཕྱིན་ཆད་འདི་སྐད་མ་སྨྲ་ཤིག །བདག་ནི་ཁྱིམ་ན་གནས་པས་སྐྱོས་ཇི་ལྟ་
བུར་ཡང་རུང་དེ་ལྟ་བུའི་འཚོ་བ་མི་བྱའོ་ཞེས་སྨྲས་པ་དང་། དེས་སྨྲས་པ། བུ་མོ་བུད་མེད་རྟེན་མེད་པ་ནི་སྡུག་བསྔལ་བའི་གནས་ན་འདུག་སྟེ་ཕྱི་རོལ་གྱི་སྐྱེས་པ་དག་གླགས་ལྟ་བར་ཡང་འགྱུར་གྱིས་གནས་སུ་སོམས་ལ་ཁས་ལོང་སྟེ་འདུག་ཤིག །དེས་ཁས་མ་བླངས་ནས། དེས་དེ་ལ་ཉེས་པའི་
དམིགས་སུ་འགྱུར་བར་སྨྲས་པ་དང་། གདོད་དེས་ཁས་བླངས་སོ། །དེ་ནས་ཁྱེའུ་ཐ་ག་པས་དེ་ཉི་མ་དང་ཚེས་གྲངས་དང་སྐར་མའི་རིམ་དང་སྦྱར་ཏེ་ཁྱིམ་དུ་བླངས་སོ། །དེ་ཡང་མི་སྲུན་ཅིང་སྨྱོ་ལ་ཁྲོ་བས་རྟག་ཏུ་དེ་ལ་དབྱིག་པ་དང་ཐལ་མོས་རྡེག་སྟེ། དེས་བུད་མེད་རྒན་མོ་དེ་ལ་སྨྲས་པ།

མ་མ་ཁྱོད་ཀྱིས་བདག་སྲིན་པོ་ལ་ཕུལ་ཏེ། དེས་བདག་ལ་ཉིན་གཅིག་བཞིན་དུ་དབྱུག་པ་དང་། ཐལ་མོས་རྡེག་ན་ཇི་ལྟར་བྱ་མ་ཤེས་སོ། །བུ་མོ་ནམ་ཁྱོད་ལ་བུ་མ་བྱུང་གི་བར་དུ་ཁྱོད་ལ་ཁོ་རྡེག་གོ། །ཁྱོད་ཀྱང་བུ་མཐུར་གྱུར་པ་དང་། ཁྱིམ་དེ་ཡང་ཁྱོད་ཉིད་དབང་བྱེད་ཀྱིས་མི་དགའ་བར་མ་བྱེད་
ཅིག །དེ་དུས་ཕྱི་ཞིག་ན་དེ་སེམས་ཅན་དང་ལྡན་པར་གྱུར་ནས་ཁྱེའུ་ཐ་ག་པ་དེ་མོ་ལ་བྱམས་པར་གྱུར་ཏོ། །མོ་ཡང་དེ་ལ་བརྙས་པར་བྱེད་དོ། །དེས་ཀྱང་སྡོད་ཅིག་ཅེས་བྱས་ནས་མནགས་སོ། །དེ་ནས་དུས་ཕྱི་ཞིག་ན་ཁྱེའུ་དེ་ཐ་ག་པའི་གྲོགས་པོ་རྣམས་ཀྱིས་ཆང་མང་དུ་བླུད་པས་ར་རོ་ནས་སྨྱོ་ཞིང་
ཁྱིམ་དུ་འོངས་སོ། །དེ་ཡང་སྒོ་བཅད་དེ་བུ་འབྱུང་ཞིང་འདུག་པའི་ཚེ་དེས་སྒོ་ཕྱེ་ཞེས་བྱས་ན་དེ་བུ་འབྱུང་བའི་སྡུག་བསྔལ་གྱིས་ཀུན་ཏུ་གཟེར་བས་སྒོ་མ་ཕྱེ་བ་དང་། དེ་རབ་ཏུ་ཁྲོ་བ་སྐྱེས་ནས་ཕྱོགས་གཅིག་ཏུ་སོང་སྟེ་འདུག་གོ། །དེས་བུ་བྱུང་ནས་སྒོ་ཕྱེ་བ་དང་དེ་ནང་དུ་འོངས་པ་ལ་དེས་གུས་པར་བྱས་ཏེ་སྨྲས་
པ། ཇོ་བོ་དགྱེས་པར་མཛོད་ཅིག །ཁྱོད་ཀྱི་བུ་ཕོ་ཞིག་བཙས་སོ། །དེས་དེ་ལ་ཁྲོ་བས་ཀུན་ཁེབས་པ་དང་ནི་མ་བྲལ་གྱི་གནོད་སེམས་ཀྱིས་ཀུན་དུ་ཁེབས་པར་གྱུར་ཏེ། དེས་འདི་བུ་མ་བྱུང་བས་ཀྱང་བདག་ལ་བརྙས་པར་བྱེད་ན། གང་གི་ཚེ་འདིའི་བུ་སྐྱེས་པར་གྱུར་ན་འདི་དང་བུས་བསྡོངས།
ནས་བདག་ལ་གདོན་མི་ཟ་བར་གསོད་པར་བྱེད་དོ་སྙམ་དུ་བསམས་ནས་དེས་སྨྲས་པ། བཟང་མོ་ཐབ་ཏུ་མེ་བུས་ལ་ཟངས་ཚུགས་ཤིག །དེས་ཐབ་ཏུ་མེ་བུས་ཏེ་ཟངས་བཙུགས་པ་དང་སྨྲས་པ། ཡུངས་མར་ལུགས་ལ་སྐོལ་ཅིག །དེས་ཡུངས་མར་བླུགས་ཏེ་བསྐོལ་བ་དང་། དེས་བུ་
ཆུང་འདིར་ཆུག་ལ་སྐོལ་ཅིག་ཅེས་སྨྲས་པ་དང་མོས་ཇོ་བོ་འདི་ནི་ཁྱོད་ཉིད་ཀྱི་བུ་ཡིན་ན་འདིར་ཅི་ཞིག་ཉེས་གཞོན་ནུར་མ་བསད་ཅེས་སྨྲས་པ་དང་། དེས་དེ་ལ་དབྱིག་པས་བརྡེགས་སོ། །བདག་ལས་སྡུག་པ་མེད་པས་དེས་སྐྲག་སྟེ། དེ་ཡུངས་མར་ཁོལ་བའི་ནང་དུ་བཅུག་པ་དང་དུས་ལས་
འདས་སོ། །ནམ་དེ་ཚོས་པར་གྱུར་པ་ན་དེས་སྨྲས་པ། ད་ཕྱུང་ཞེས་བསྒོ་བ་དང་། དེས་དེ་ཕྱུང་བ་དང་། སྨྲས་པ། ཟོ་ཤིག་ཅེས་བསྒོའོ། །དེས་སྨྲས་པ། ཇོ་བོ་བུའི་ཤ་ཇི་ལྟར་བཟའ་ཞེས་སྨྲས་པ་དང་། དེས་དེ་ཉིད་ཀྱི་ལུས་ཐམས་ཅད་དུ་བརྡེགས་རབ་ཏུ་བརྡེགས་པ་དང་།

དེ་དེས་བརྡེགས་པས་བུའི་ཤ་ཡང་ཟོས་སོ། །བཅོམ་ལྡན་འདས་ཀྱིས་གསུངས་པ། འདོད་ཆགས་ནི་ཁ་ན་མ་ཐོ་བ་ཆུང་མོད་ཀྱི་འབྲལ་བ་ནི་དཀའོ། །ཞེ་སྡང་ནི་ཁ་ན་མ་ཐོ་བ་ཆེ་ལ་འབྲལ་བ་སླ་བས་ཐ་ག་པའི་ཁྱེའུ་དེ་ཕྱིས་འགྱོད་པའི་མེས་གདུངས་ཏེ་རིང་ཞིག་ཏུ་མ་ལོག་པས་
ན་གཉིད་ཀྱིས་མྱོས་ཏེ་དེ་ཤིན་ཏུ་ལོག་པར་གཽ་ཏ་མཱིས་རིག་ནས་བསམས་པ། འདིས་བུ་བསད་ནས་བདག་ལ་ཡང་བུའི་ཤ་ཟར་བཅུག་སྟེ། མི་འདི་ནི་སྲིན་པོ་ཡིན་གྱིས་འབྲོས་སྙམ་ནས་རྒྱགས་ཅི་ཐེག་ཅིག་ཁྱེར་དེ་བྲོས་པ་དང་། བྱང་ཕྱོགས་ཀྱི་ལམ་གྲོགས་དག་ཅིག་ཡུལ་འཁོར་མོ་འཇིག་ཏུ་ཟོང་
རྣམས་བཙོངས་ཏེ་སླར་གྱིས་ཟོང་རྣམས་ཁྱེར་ནས་བྱང་ཕྱོགས་ཀྱི་ལམ་དུ་ཞུགས་ཏེ་འདོང་བ་དང་། དེ་དག་དང་མོ་ལྷན་ཅིག་ཏུ་སོང་ངོ་། །ཇི་ཙམ་ན་དེད་དཔོན་གྱིས་དེའི་གཟུགས་མཛེས་པར་མཐོང་ངོ་། །མཐོང་ནས་དེ་ལ་ཆགས་ཏེ་དེས་ཁྱོད་སུའི་ད་གང་དུ་འགྲོ་ཞེས་དྲིས་པ་དང་། མོས་སྨྲས་པ།
དེད་དཔོན་བདག་གི་ཁྱོ་ནི་སྦྲུལ་གདུག་པས་ཟོས་སོ། །བུ་གཉིས་ལས་གཅིག་ནི་ཝས་སོ། །གཅིག་ནི་ཆུ་བོའི་ནང་དུ་དུས་ལས་འདས་སོ། །མ་དང་ཕ་ནི་གནམ་ལྕགས་ཀྱིས་བསད་དོ། །བདག་ནི་མགོན་མེད་པས་གར་དགའ་བར་འགྲོ་སྟེ་འགྲོན་པ་མང་པོ་དེ་དག་གར་འདོང་བ་དེར་མཆིའོ། །
དེས་བསམས་པ། རིང་དུ་གར་སོང་ཡང་འདི་འདྲ་བའི་བུད་མེད་དང་ལྷན་ཅིག་ཡོངས་སུ་སྤྱོད་དོ། །སྙམ་ནས་དེས་དེ་ཆུང་མ་བྱས་ཏེ། ཇི་ཙམ་ཞིག་ན་འགྲོན་པ་མང་པོ་དེ་དག་མི་རྒོད་ཀྱིས་བཅོམ་སྟེ། དེད་དཔོན་དེ་ཡང་འཐབ་པ་ལས་བསད་དོ། །སྐེམ་མོ་གཽ་ཏ་མཱི་ནི་མི་རྒོད་ཀྱི་དཔོན་གྱིས་
ཆུང་མར་བྱས་པ་དང་། མི་རྒོད་ཀྱི་སྡེ་དཔོན་དེ་ཡང་ཕྱོགས་ཀྱི་རྒྱལ་པོས་བསད་དོ། །སྐེམ་མོ་གཽ་ཏ་མཱི་ནི་རྒྱལ་པོའི་བཙུན་མོ་ཆེན་མོར་གྱུར་ཏོ། །ཇི་ཙམ་ན་རྒྱལ་པོ་དེ་ཡང་དུས་ལས་འདས་ནས་བཙུན་མོ་དང་། གཞོན་ནུ་དང་བློན་པོ་དང་། སྐྱེ་བོ་མང་པོ་དག་གི་དེ་སྐེམ་མོ་གཽ་ཏ་མཱི་དང་ལྷན་
ཅིག་ཏུ་བཀུར་སྟི་ཆེར་བྱས་ཏེ་མཆད་པའི་ནང་དུ་བཅུག་གོ། །བྱང་ཕྱོགས་ཀྱི་མི་རྣམས་དུར་རྐུ་སྟེ། དེ་དག་གི་མཆད་པ་བྲུས་པ་དང་། སྐེམ་མོ་གཽ་ཏ་མཱི་སྣར་རྡུལ་སོང་ནས་དེས་སྦྲིད་པ་བྱུང་བ་དང་། དུར་རྐུ་བའི་མི་རྣམས་སྐྲག་སྟེ་རོ་ལངས་སོ་སྙམ་ནས་དེ་དག་བྲོས་པ་དང་། སྐེམ་མོ་གཽ་ཏ་མཱི་

ཁུང་བུ་བྲུས་ནས་བྱུང་ངོ་། །དེས་སྡུག་བསྔལ་རྣམ་པ་དུ་མར་བརྟགས་པས་རླུང་རབ་ཏུ་ལངས་ཤིང་ཁ་ཟས་མེད་པའི་རྐྱེན་གྱིས་སྨྱོན་མར་གྱུར་ནས་དེས་སྨད་གཡོགས་བོར་ཏེ་ལག་པ་དང་རྐང་པ་གས་ཤིང་རྩུབ་སྐྲ་རིང་ཞིང་སྐྱ་མོ་བསིང་བསིང་མོར་གྱུར་ཏེ། ཕན་ཚུན་འཁྱམ་འཁྱམ་པ་ལས་མཉན་དུ་ཡོད་པར་
ཕྱིན་ཏོ། །བཅོམ་ལྡན་འདས་ཀྱིས་གསུངས་པ། སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པོ། །དེས་སྔོན་བྱས་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མྱོང་བར་གྱུར་ནས་སྔོན་གྱི་ལས་ཀྱིས་ཛེ་ཏའི་ཚལ་དུ་ཕྱིན་ཏོ། །དེའི་ཚེ་བཅོམ་ལྡན་འདས་ཀྱིས་དགེ་
སློང་བརྒྱ་སྟོང་དུ་མའི་མདུན་དུ་ཆོས་འཆད་ཅིང་བཞུགས་པ་སྐེམ་མོ་གཽ་ཏ་མཱིའི་རྒྱང་མ་ནས་སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ནི་ཡང་དག་པར་བརྒྱན། དཔེ་བྱད་བཟང་པོ་བརྒྱད་བཅུས་ནི་སྐུ་ལ་རྣམ་པར་སྤྲས། འོད་ཀྱི་དཀྱིལ་འཁོར་ཉི་མ་སྟོང་ལས་
འདས་པའི་འོད་འདོམ་གང་བ་རིན་པོ་ཆེའི་རི་འགྲོ་བ་བཞིན་པ་ཁོ་ར་ཁོར་ཡུག་ནས་བཟང་བ་མཐོང་ངོ་། །མཐོང་ནས་ཀྱང་བདག་གི་སེམས་དྲན་པ་སླར་ཐོབ་སྟེ་དེ་ངོ་ཚ་བའི་ཚུལ་དུ་གྱུར་ནས་ཕྱོགས་གཅིག་ཏུ་ཙོག་པུར་འདུག་གོ། །དེའི་བར་དུ་ཡང་སངས་རྒྱས་བཅོམ་ལྡན་འདས་ཀྱིས་མི་མཁྱེན་པའམ།
མི་གཟིགས་པའམ། མི་རིག་པའམ། རྣམ་པར་མི་རིག་པ་ཅུང་ཟད་ཀྱང་མེད་དེ། སངས་རྒྱས་བཅོམ་ལྡན་འདས་ནི་ཆོས་ཉིད་ཀྱིས་ཐུགས་རྗེ་ཆེན་པོ་འཇིག་རྟེན་ལ་ཕན་འདོགས་པར་གྱུར་པ། སྲུང་བ་གཅིག་པུ་དཔའ་བོ་གཅིག་པ། གཉིས་སུ་མེད་པ་གཉིས་སུ་མི་སྨྲ་བ། ཞི་གནས་
དང་། །ལྷག་མཐོང་ལ་གནས་པ། དུལ་བའི་དངོས་པོ་གསུམ་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིའི་མཐིལ་རབ་ཏུ་བརྟན་པ། མི་འཇིགས་པ་བཞིས་བསྙེངས་པ་མེད་པ། ཡན་ལག་ལྔ་རྣམ་པར་སྤངས་པ། འགྲོ་བ་ལྔ་ལས་ཡང་དག་པར་འདས་པ།
ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། གནས་དྲུག་ལ་རྟག་ཏུ་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་བརྒྱན་པ། ལམ་གྱི་ཡན་ལག་བརྒྱད་འཆང་བ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་

བཅུའི་སྟོབས་དང་ལྡན་པ། ཕྱོགས་བཅུར་སྙན་པར་གྲགས་པ་རྣམས་བརྒྱ་ཕྲག་བཅུའི་དབང་དུ་གྱུར་པ་ལས་རབ་ཏུ་ངེས་པ་ནི་མཚན་ལན་གསུམ་ཉིན་ལན་གསུམ་དུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ནས་ཡེ་ཤེས་ཀྱི་གཟིགས་པ་འབྱུང་སྟེ། གང་ལ་ཉམས།
གང་ལ་འཕེལ་བར་གྱུར། གང་ལ་སྡུག་བསྔལ་བར་གྱུར། གང་དོག་པར་གྱུར། གང་གནོད་པར་གྱུར། གང་སྡུག་བསྔལ་དང་དོག་པ་དང་གནོད་པར་གྱུར། གང་ངན་སོང་ལ་གཞོལ། གང་ངན་སོང་ལ་འབབ། གང་ངན་སོང་ལ་རབ་ཏུ་འབབས། ངས་གང་ངན་སོང་ནས་ཕྱུང་སྟེ་
མཐོ་རིས་དང་ཐར་པ་ལ་གཞག་པར་བྱ། གང་དགེ་བའི་རྩ་བ་དུ་མ་སྐྱེས་པ་རྣམས་ལ་དགེ་བའི་རྩ་བ་བསྐྱེད་པར་བྱ། གང་བསྐྱེད་པ་རྣམས་ལ་ཡོངས་སུ་སྨིན་པར་བྱ། གང་སྨིན་པ་རྣམས་ལ་རྣམ་པར་གྲོལ་བར་བྱ། ཡང་གསུངས་པ། རྒྱ་མཚོ་ཆུ་སྲིན་གནས་དེ་ཡང་། །གལ་ཏེ་
དུས་ལས་ཡོལ་ཡང་སྲིད། །གདུལ་བར་གྱུར་པའི་སྲས་རྣམས་ལ། །སངས་རྒྱས་དུས་ལས་འདའ་མི་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དེད་དཔོན་གྱི་ཆུང་མ་སྐེམ་མོ་གཽ་ཏ་མཱི་ལ་བླ་གོས་བྱིན་ཅིག་དང་འདི་ལ་ཆོས་
བཤད་པར་བྱའོ། །ཚེ་དང་ལྡན་པ་ཀུན་དགའ་བོས་དེད་དཔོན་གྱི་ཆུང་མ་གཽ་ཏ་མཱི་ལ་བླ་གོས་བྱིན་ནོ། །དེ་ནས་དེད་དཔོན་གྱི་ཆུང་མ་སྐེམ་མོ་གཽ་ཏ་མཱི་གོས་གྱོན་ནས་བཅོམ་ལྡན་འདས་ག་ལ་བ་དེར་སོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་
གོ་ཕྱོགས་གཅིག་ཏུ་འདུག་པ་དང་། དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་རྣམས་མཁྱེན་ནས་འཕགས་པའི་བདེན་པ་བཞི་ཡང་དག་པར་རྟོགས་པར་འགྱུར་བ་དེ་ལྟ་བུའི་ཆོས་བཤད་དོ། །གང་ཐོས་པས་དེད་དཔོན་
གྱི་ཆུང་མ་སྐེམ་མོ་གཽ་ཏ་མཱིས་འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་གྱེན་དུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །དེ་བདེན་པ་མཐོང་ནས་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་

ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་མའི་དངོས་པོར་གྱུར་ཅིང་། བཅོམ་ལྡན་འདས་ཀྱི་དྲུང་དུ་བདག་ཚངས་པར་སྤྱད་པ་སྤྱོད་དུ་གནང་ངམ་བཅོམ་ལྡན་འདས་ཀྱིས་སྐྱེ་དགུའི་བདག་མོ་
ཆེན་མོ་ལ་གཏད་ནས་དེས་རབ་ཏུ་ཕྱུང་སྟེ་བསྙེན་པར་རྫོགས་པར་བྱས་ནས་འདུལ་བ་བསླབས་ཏེ་ལུང་བསྒོ་བ་བྱིན་ནས་དེ་བརྩོན་པ་བྱས། ནན་ཏན་དུ་བྱས། བསྒྲུབ་པར་བྱས་པས་ན་འཁོར་བའི་འཁོར་ལོ་འདི་གཡོ་བ་དང་མི་གཡོ་བ་ཤེས་ཏེ་འདུས་བྱས་ཀྱི་རྒྱུད་ཐམས་ཅད་ཞིག་པ་དང་། ལྷུང་
བ་དང་། རྣམ་པར་འགྱེས་པ་རྣམ་པར་འཇིག་པའི་ཆོས་ཉིད་ཀྱིས་རབ་ཏུ་བཅོམ་སྟེ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་མངོན་དུ་བྱས་ཏེ་དགྲ་བཅོམ་པར་གྱུར་ཏོ། །ཁམས་གསུམ་གྱི་འདོད་ཆགས་དང་བྲལ། བོང་བ་དང་གསེར་དུ་འདྲ། ནམ་མཁའ་ལ་ལག་མཐིལ་
ཆགས་པ་མེད་པ་བཞིན་དུ་སེམས་མཉམ་པ། སྟེའུ་དང་ཙན་དན་དུ་འདྲ་བ། རིག་པས་སྒོ་ངའི་མཛོད་བཅོམ་པ། རིག་པ་དང་མངོན་པར་ཤེས་པ་ཡང་དག་པར་སོ་སོར་རིག་པ་ནི་ཐོབ། སྲིད་པའི་རྙེད་པ་དང་ཆགས་པ་དང་བཀུར་སྟི་ལ་རྒྱབ་ཀྱིས་ཕྱོགས་ཏེ། དབང་པོ་དང་ཉེ་
དབང་པོ་དང་། ལྷར་བཅས་པ་རྣམས་ཀྱིས་མཆོད་ཅིང་ཕྱག་བྱ་བ་དང་ཚིག་སྙན་པས་བརྗོད་པར་གྱུར་ཏོ། །དེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་སོང་བ་དང་། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་མའི་དགེ་
སློང་མ་འདུལ་བ་འཛིན་པའི་ནང་ན་འདི་ལྟ་སྟེ་མཆོག་ནི་དགེ་སློང་མ་སྐེམ་མོ་གཽ་ཏ་མཱིའོ། །ནམ་བཅོམ་ལྡན་འདས་ཀྱིས་དགེ་སློང་མ་གཽ་ཏ་མཱི་འདུལ་བ་འཛིན་པའི་ནང་ན་མཆོག་གོ་ཞེས་གསུངས་པ་དང་། དེའི་ཚེ་དེའི་དྲུང་དུ་དགེ་སློང་མ་རྣམས་འདོང་ངོ་། །དེས་འོངས་པ་དེ་དག་སྐྱོ་བ་བསྐྱེད་
པའི་ཕྱིར་ལས་ཀྱི་རྒྱུད་རྣམས་བརྗོད་དོ། །དགེ་སློང་མ་དག་གིས་ཀྱང་དགེ་སློང་དག་ལ་དེ་ལྟ་བུར་གྱུར་པ་ཞིབ་ཏུ་སྨྲས་སོ། །དེ་ནས་དུས་ཕྱི་ཞིག་ན་སྐེམ་མོ་གཽ་ཏ་མཱི་བཅོམ་ལྡན་འདས་ཀྱི་ཞབས་ལ་ཕྱག་འཚལ་བའི་ཕྱིར་སོང་བ་དང་། དགེ་སློང་དག་གིས་མཐོང་ནས་གཅིག་ལ་གཅིག་དེའི་ལས་ཀྱི་

རྒྱུད་རྣམས་འཛེར་ཏོ། །དེ་ནས་སྐེམ་མོ་གཽ་ཏ་མཱིས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་བཅོམ་ལྡན་འདས་ཀྱི་དྲུང་ནས་སོང་ངོ་། །མཁྱེན་བཞིན་དུ་འདྲི་བ་ནི་སངས་རྒྱས་བཅོམ་ལྡན་འདས་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཅིའི་
ཕྱིར་ཀུན་དགའ་བོ་དགེ་སློང་རྣམས་ཕན་ཚུན་དུ་རྣ་བར་བཅུག་ཅེས་སྨྲས་པ་དང་། དེས་ཞིབ་ཏུ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སེམས་ཅན་རྣམས་ཀྱི་རྒྱུད་དང་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་བོ། །འཇིག་རྟེན་པའི་རྣམས་ནི་རང་གི་ལས་སོ། །
ལས་ནི་སྐྱེ་གནས་སོ། །ལས་ནི་ཉིང་མཚམས་སོ། །ལས་ནི་རྗེས་སུ་འཇུག་པ་སྟེ། གང་གིས་ཇི་ལྟར་ལས་བྱས་པ་དེ་རྣམ་པར་སྨིན་པ་སོ་སོར་མྱོང་བར་འགྱུར་རོ། །དགེ་སློང་དག་ཐེ་ཚོམ་སྐྱེས་པ་དང་། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དགེ་
སློང་མ་སྐེམ་མོ་གཽ་ཏ་མཱིས་ལས་ཅི་བགྱིས་ན་དེའི་ཕྱིར་འདིའི་ཁྱོ་སྦྲུལ་གྱིས་ཟོས་ཏེ་དུས་ལས་འདས། བུ་གཅིག་ཝས་བཀུམ། གཉིས་པ་ནི་ཆུ་བོས་འཚལ་ཏེ་དུས་ལས་འདས། ཕ་མ་གཉིས་ནི་གནམ་ལྕགས་བབས་པས་བཀུམ་པར་གྱུར། བུའི་ཤ་ཡང་འཚལ་ནས་སྨྱོས་ཤིང་གཡེང་བའི་སེམས་
ཀྱིས་དེ་དང་དེ་དག་ཏུ་འཁྱམ་འཁྱམ་པ་ལས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་དུ་བགྱིས། བཅོམ་ལྡན་འདས་ཀྱིས་ཀྱང་འདུལ་བ་འཛིན་མའི་ནང་ན་མཆོག་གོ་ཞེས་ཅིའི་སླད་དུ་བཀའ་སྩལ་ཅེས་ཞུས་པ་དང་། བཅོམ་ལྡན་
འདས་ཀྱིས་གསུངས་པ། དགེ་སློང་དག་དགེ་སློང་མ་སྐེམ་མོ་གཽ་ཏ་མཱི་ཉིད་ཀྱིས་ལས་བྱས་ཤིང་ཚོགས་པས་རྙེད་ཅིང་རྐྱེན་སྨིན་པ་ནི་ཆུ་བོ་བཞིན་མངོན་དུ་འབྱུང་སྟེ་ངེས་པར་འགྱུར་རོ། །སྐེམ་མོ་གཽ་ཏ་མཱིས་ལས་བྱས་ཤིང་བསགས་པའི་གཞན་གྱིས་མྱོང་བར་མི་འགྱུར་རོ། །དགེ་སློང་རྣམས་ལས་
བྱས་ཤིང་བསགས་པ་ནི་ཕྱི་རོལ་གྱི་སའི་ཁམས་ལ་རྣམ་པར་མི་སྨིན། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། ཟིན་པའི་ཕུང་པོ་དང་། ཁམས་དང་། སྐྱེ་མཆེད་འདི་ཉིད་ལ་དགེ་བ་དང་མི་དགེ་བའི་ལས་བྱས་པ་རྣམ་པར་སྨིན་ཏོ། །ལས་རྣམས་

སྟོར་པར་མི་འགྱུར་བ། །བསྐལ་པ་དག་ནི་བརྒྱ་ལོན་ཀྱང་། །དུས་དང་འཕྲོད་ནས་འཐོབ་པ་ནི། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་སྔོན་བྱུང་བ་ནི་རི་བྲགས་ཀྱི་གྲོང་གཞན་ཞིག་ན་ཁྱིམ་བདག་ཅིག་འདུག་སྟེ། ཕྱུག་ལ་ནོར་མང་ཞིང་ལོངས་སྤྱོད་ཆེ་གནས་ཡངས་ཤིང་རྒྱ་ཆེ་བ་ནི་ངལ་
བསོས་པོའི་ནོར་དང་འདྲ་སྟེ། ངལ་བསོས་པའི་ནོར་ལ་སྔོ་བ་ཞིག་ནས་རིགས་དང་མཉམ་པ་ཞིག་ལས་ཆུང་མ་ཞིག་བླངས་ཏེ། དེ་དང་ལྷན་ཅིག་རྩེ་དགའ་ཡོངས་སུ་སྤྱོད་དོ། །དེས་རྩེ་དགའ་ཡོངས་སུ་སྤྱད་ཀྱང་བུ་ཕོ་ཡང་མེད། བུ་མོ་ཡང་མེད་དེ། བདག་གི་ཁྱིམ་དུ་ནོར་དུ་མ་ཞིག་འདུས་ན་དེ་ལ་བུ་
ཕོ་ཡང་མེད་བུ་མོ་ཡང་མེད་དེ། བདག་འདས་པ་དང་བདག་གི་དབང་བ་ཐམས་ཅད་བུ་མེད་པའོ་ཞེས་ཟེར་ཏེ་རྒྱལ་པོའི་དཀོར་དུ་འགྱུར་རོ་ཞེས་དེ་འགྲམ་པ་ལག་པ་ལ་གཏད་དེ་རབ་ཏུ་སེམས་ཤིང་འདུག་པ་དེའི་ཆུང་མས་མཐོང་ནས། ཇོ་བོ་ཁྱོད་ཅིའི་ཕྱིར་ལག་པས་འགྲམ་པར་གཏད་དེ་རབ་ཏུ་སེམས་ཤིང་
འདུག་ཅེས་སྨྲས་པ་དང་། དེས་སྨྲས་པ། བཟང་མོ་བདག་གི་ཁྱིམ་ན་ནོར་དུ་མ་ཞིག་འདུས་ཀྱང་བུ་ཕོ་ཡང་མེད་བུ་མོ་ཡང་མེད་པས་བདག་འདས་པ་དང་བདག་གི་དབང་བ་ཐམས་ཅད་བུ་མེད་པའོ། །ཞེས་ཟེར་ཏེ་རྒྱལ་པོའི་དཀོར་དུ་འགྱུར་ན་ཅིའི་ཕྱིར་རབ་ཏུ་སེམས་ཤིང་མི་འདུག །དེས་བསམས་
པ། ཅི་འདིའི་སྐལ་བ་ཆུང་ངམ། བུ་ཕོ་ཡང་མེད་བུ་མོ་ཡང་མེད་ན། ཅི་བདག་གི་སྐལ་བ་ཆུང་ངམ་འདི་ནི་གཞན་མ་ཡིན་གྱི་བདག་ལ་ཉེས་པའི་སྐྱོན་བཏགས་ཏེ་ཆུང་མ་གཞན་ལེན་པར་འདོད་དོ། །དེའི་ཕྱིར་བདག་གི་མདུན་དུ་འགྲམ་པ་ལག་པར་གཏད་དེ་རབ་ཏུ་སེམས་ཤིང་འདུག་ལ་འདི་སྐད་དུ་
བདག་གི་ཁྱིམ་ན་ནོར་དུ་མ་འདུས་ཀྱང་བུ་ཕོ་དང་བུ་མོ་མེད་པས་བདག་འདས་པ་དང་བདག་གི་དབང་བ་ཐམས་ཅད་བུ་མེད་པའོ་ཞེས་ཟེར་ཏེ་རྒྱལ་པོའི་དཀོར་དུ་འགྱུར་རོ་ཞེས་ཟེར་གྱིས་དེ་བས་ན་བདག་ཉིད་ཐམ་པར་བྱའོ་ཞེས་བསམས་ནས་སྨྲས་པ། ཇོ་བོ་འདི་ལྟར་བདག་སྐལ་བ་ཆུང་བས་ཁྱོད་ཀྱི་བུ་ཕོ་
དང་བུ་མོ་མེད་ཀྱིས་ཆུང་མ་གཞན་ཞིག་ལོང་ཤིག་དང་། དེ་ལས་བུ་ཕོ་དང་བུ་མོ་ཡང་འབྱུང་བར་འགྱུར་རོ། །དེས་སྨྲས་པ། བཟང་མོ་ཁྱོད་ཀྱིས་སྐྱེས་བུ་གང་ལ་ཆུང་མ་གཉིས་ཡོད་ན། དེ་ནི་ནམ་ཡང་ཆུ་གྲང་མོའི་སྐྱོ་མ་མི་འཐུང་སྟེ་རྟག་ཏུ་དེའི་ཁྱིམ་ན་འཐབ་པ་དང་འཁྲུག་པ་དང་མི་འདུམ་

པ་དང་རྩོད་པས་ནང་གི་སྐྱེ་བོ་རྣམས་དཀྲུགས་པར་བྱས་ཏེ་རང་གི་ལས་ལ་བརྩོན་པར་མི་འགྱུར་རོ་ཞེས་མ་ཐོས་སམ། མོས་སྨྲས་པ། ཇོ་བོ་རེ་ཞིག་ལོང་ཤིག་དང་དེ་སྟེ་ཕུ་ནུ་མོ་ཙམ་དུ་གྱུར་ན་ནི་ཕུ་ནུ་མོར་འདུ་ཤེས་ཀྱིས་བསྐྱང་བར་བྱའོ། །འོན་ཏེ་བུ་མོ་ཙམ་ཞིག་ན་ནི་བུ་མོར་འདུ་
ཤེས་ཀྱིས་བསྐྱང་བར་བྱའོ། །དེས་དེ་ལ་གཡོ་བྱས་ཏེ་སྨྲས་པས་དེ་ཡང་བུ་མོ་ཚོལ་བ་ལ་ཞུགས་སོ། །དེ་ནས་རི་བྲགས་ཀྱི་གྲོང་གཞན་ཞིག་ན་ཁྱིམ་བདག་ཅིག་གི་བུ་མོ་ཞིག་བཙས་ནས་སྐྱེས་པ་དང་། ཕ་མ་གཉིས་དུས་ལས་འདས་པ་ཞིག་སྟེ། དེས་དེ་ལ་དེའི་མིང་པོ་ལས་དེ་བསླངས་ནས་དཔལ་
ཆེན་པོ་དང་སྦྱར་ཏེ་བག་མར་བླངས་སོ། །ཐམས་ཅད་ཀྱང་ཆོས་ཉིད་ཀྱིས་སར་པས་རྙིང་པ་ཟིལ་གྱིས་གནོན་པས་དེས་དེ་ལ་ཤིན་ཏུ་བྱམས་ཤིང་སེམས་ཞུགས་པར་གྱུར་ཏོ། །དེ་ནས་དེའི་ཆུང་མ་རྙིང་པ་དེ་རང་བཞིན་གྱིས་ཕྲག་དོག་གིས་མངལ་གྱི་གནས་དག་པར་གྱུར་ཏེ། སེམས་ཅན་དང་ལྡན་
པར་གྱུར་ནས་དེ་དགའ་བ་སྐྱེས་ཏེ་དེ་ལ་སྨྲས་པ། ཇོ་བོ་དགའ་བ་སྐྱེད་ཅིག་བདག་ནི་སེམས་ཅན་དང་ལྡན་པར་གྱུར་ཏོ། །དེས་སྨྲས་པ། བཟང་མོ་ལེགས་སོ། །དེ་སྟེ་བུ་ཕོ་ཞིག་བཙས་ན་ནི་བདག་འདས་པ་དང་ཁྱིམ་གྱི་བདག་པོར་འགྱུར་རོ། །མོས་སྨྲས་པ། ཇོ་བོ་ཁྱོད་ཀྱི་ཆུང་མས་མངལ་
ནས་ལྷུང་བའི་ཆོ་ག་ཞིག་སྦྱར་ཏེ་ལྷུང་བར་མ་བྱས་ན་ནི་ཁྱིམ་གྱི་བདག་པོར་འགྱུར་རོ། །དེས་སྨྲས་པ། བཟང་མོ་སྔོན་ཡང་བདག་གིས་འདི་ལྟ་བུའི་ཕྱིར་སྨྲས་ན། ད་དུང་བུ་ཅུང་ཟད་ཀྱང་མེད་པར་ཁྱོད་ཀྱིས་བརྩམ་མམ། དེ་ལན་མེད་དེ་ཅང་མི་ཟེར་བར་འདུག་གོ། །དེ་ཟླ་བ་བརྒྱད་དམ་དགུ་
འདས་པ་དང་ཁྱེའུ་ཞིག་བཙས་སོ། །དེ་བཙས་པའི་བཙས་སྟོན་ཆེར་བྱས་ཏེ་རིགས་དང་མཐུན་པ་ལས་མིང་བཏགས་སོ། །དེས་སྔོན་ལས་ཀྱིས་འདི་བཙས་ན་སེམས་ཅན་འདི་མ་ཡར་མོ་འདིས་འདི་མི་གསོད་པ་ལ་ཕན་གྱིས་དེ་བས་ན་འདི་ཉིད་ལ་གཞར་རོ་ཞེས་བསམས་ནས་དེས་དེ་ལ་སྨྲས་པ།
ཆེ་ཞེ་ཁྱེའུ་འདི་ཁྱོད་དང་བདག་གི་ཡིན་གྱིས་བདག་ཅག་གཉིས་ཀས་བསྐྱེད་དོ། །དེས་ལེགས་ཀྱིས་འདི་བཞིན་བགྱིའོ་ཞེས་སྨྲས་ནས་དེ་སྐྱེད་པ་ལ་ཞུགས་སོ། །དེས་དེ་བསྐྱེད་ན་ལོག་པར་རྟོག་པ་སྐྱེས་ཏེ་གང་གི་བུ་ཡིན་པ་དེའི་ཁྱིམ་སྟེ། དེ་བས་ན་འདི་བསྐྱེད་ཀྱང་འདི་ལྟར་ཁྱིམ་གྱི་བདག་པོར་

གྱུར་པ་དང་། བདག་ནི་བྲན་མོར་འགྱུར་གྱིས་འདི་ནི་གསད་དོ་སྙམ་ནས་དེ་ལོག་པར་རྟོག་པས་བསྐྱོད་པས་ཁྱེའུ་དེའི་ཁར་སྨིག་མའི་ཐུར་མ་ཞིག་བཙུགས་པ་དང་། དེ་སྡུག་བསྔལ་གྱིས་གཟིར་བས་ངུ་བར་གྱུར་ནས་དེས་སྨྲས་པ། ཁྱེའུ་འདི་ཅིའི་ཕྱིར་ངུ་ཞེས་དྲིས་པ་དང་། དེས་སྨྲས་པ། ཆེ་ཞེ་
ཅིའི་ཕྱིར་ངུ་མ་འཚལ་ཏོ། །དེས་དེ་བླངས་ཏེ་དགའ་བར་བྱ་བར་བརྩམས་ཏེ་ལག་པས་འཁྱུད་དེ་འོ་བྱས་ནས་པང་པར་བླངས་ཀྱང་མི་བཏུབ་ནས། དེས་དེ་ལ་ནུ་མ་བླུད་ནས་ཇི་ཙམ་ན་བལྟས་པ་དང་སྨིག་མའི་ཐུར་མ་ཞིག་ཁར་བཙུགས་པར་མཐོང་ནས། དེས་མྱུར་དུ་ཁ་ཕྱེ་སྟེ་ལག་པས་དྲངས་པ་
དང་ཁྱེའུ་དེ་དབུགས་མེད་དེ་དུས་ལས་འདས་ནས་དེས་བྲང་བརྡུངས་ཏེ་ངུ་ཞིང་ས་ལ་སྒྱེལ་བ་དང་ཁྱིམ་གྱི་སྐྱེ་བོ་དག་བརྒྱུགས་ནས་འདི་ཅི་ཉེས་ཞེས་དྲིས་པ་དང་། དེས་སྙིང་རྗེ་ཞིང་བརྩེ་བས་མཆི་མས་བརྣངས་བཞིན་དུ་སྨྲས་པ། ཀྱེ་མ་མ་ཡར་མོ་སྡིག་པའི་ཆོས་སྤྱོད་པ་འདི་ཕྲག་དོག་གིས་
ཁྲོས་ནས་བདག་གི་བུའི་ཁར་སྨིག་མའི་ཐུར་མ་བཙུགས་ཏེ་བསད་དོ། །དེ་དག་ཀྱང་ངུ་བར་གྱུར་ནས་འཁོར་གྱི་ཁྱིམ་མཚེས་དག་གིས་ཐོས་ནས་དེ་དག་གིས་ཀྱང་བརྒྱུགས་ཏེ་སྨྲས་པ། ཨེ་མའོ་འདི་ནི་གློ་བུར་ཞིག་བྱས་ཏེ་བྱིས་པ་འདི་ཉེས་པ་མེད་ཅིང་གནོད་པ་མེད་པར་བསད་དོ་ཞེས་ཟེར་
ནས། དེ་དེ་ལ་སྐྱེ་བོ་མང་པོ་དག་གིས་ཨེ་མའོ་ཞེས་ཟེར་ཞིང་ཀུན་དུ་བསྐོར་ཏོ། །དེ་ནི་བྲང་རྡུང་ཞིང་ངུ་སྟེ་མནའ་བོར་བ་དེ་སྟེ། བདག་གིས་ཁྱོད་ཀྱི་བུ་བསད་པར་གྱུར་ན་བདག་གི་ཁྱོ་སྦྲུལ་གྱིས་ཟོས་ཏེ་དུས་བྱེད་པར་ཤོག་ཤིག །བུ་གཅིག་ནི་ཝས་ཟོས་པར་ཤོག་ཤིག །གཉིས་པ་ནི་ཆུ་བོར་
ལྷུང་སྟེ་དུས་བྱེད་པར་ཤོག་ཤིག །ཕ་མ་གནམ་ལྕགས་ཀྱིས་གསོད་པར་ཤོག་ཤིག །བུའི་ཤ་ཡང་ཟོས་ལ་སྨྱོས་ཤིང་འཕྱར་བའི་སེམས་ཀྱིས་ཕན་ཚུན་འཁྱམ་པར་ཤོག་ཤིག་ཅེས་མནའ་བོར་རོ། །དགེ་སློང་དག་ཇི་སྙམ་དུ་སེམས། ཁྱིམ་བདག་དེའི་ཆུང་མ་གཉིས་པ་ནི་འདི་ལྟར་འདི་བཞིན་
དགེ་སློང་མ་སྐེམ་མོ་གཽ་ཏ་མཱི་འདིའོ། །འདི་ཤིན་ཏུ་ཉོན་མོངས་པས་ཀུན་དུ་ཁེབས་པས་ན་ཁྱེའུ་བསད་ན་ཡང་བརྫུན་དུ་སྨྲ་ཞིང་མནའ་བོར་བ་དེའི་ལས་ཀྱི་རྣམ་པར་སྨིན་པས་འདིའི་ཁྱོ་སྦྲུལ་གྱིས་ཟོས་ཏེ་དུས་ལས་འདས་སོ། །བུ་གཅིག་ནི་ཝས་བསད་དོ། །གཅིག་ནི་ཆུ་བོར་ལྷུང་སྟེ་དུས་ལས་

འདས་སོ། །ཕ་མ་ནི་གནམ་ལྕགས་ལྷུང་བས་དོག་གོ། །བུའི་ཤ་ཟོས་ཏེ་སྒྲེན་མོར་སྨྱོས་ཤིང་ཡན་མན་དུ་གཡེངས་པའི་སེམས་ཀྱིས་ཕན་ཚུན་དུ་འཁྱམ་མོ། །གཞན་ཡང་བཅོམ་ལྡན་འདས་འོད་སྲུང་ལས་རབ་ཏུ་བྱུང་བར་གྱུར་ཏེ། དེར་འདིས་ཚེ་གཅིག་ཏུ་ཚངས་པར་སྤྱོད་པ་
སྤྱད་ཀྱང་ཡོན་ཏན་མང་པོ་གང་ཡང་མ་ཆུད་དོ། །གང་ལ་རབ་ཏུ་བྱུང་བའི་མཁན་མོ་དེ་བཅོམ་ལྡན་འདས་འོད་སྲུང་ཡང་དག་པར་རྫོགས་པའི་སངས་རྒྱས་ཀྱིས་འདུལ་བ་འཛིན་པའི་ནང་ན་མཆོག་ཏུ་གསུངས་སོ། །དེ་ན་འདིས་འཆི་བའི་ཚེ་སྨོན་ལམ་བཏབ་པ། གང་བདག་གིས་བཅོམ་ལྡན་འདས་འོད་
སྲུང་བླ་ན་མེད་པ་ཡོན་གནས་ཀྱི་དྲུང་དུ་ཚེ་གཅིག་ཏུ་ཚངས་པར་སྤྱོད་པ་སྤྱད་ཀྱང་ཡོན་ཏན་མང་པོ་ཅིག་ཀྱང་མ་ཆུད་དེ་བདག་དགེ་བའི་རྩ་བ་འདིས་ན་གང་བཅོམ་ལྡན་འདས་འོད་སྲུང་ཡང་དག་པར་རྫོགས་པའི་སངས་རྒྱས་ཀྱིས་བྲམ་ཟེའི་བུ་བླ་མ་ལ་བྲམ་ཟེའི་བུ་ཁྱོད་སྐྱེ་བོའི་ཚེ་ལོ་བརྒྱ་ཐུབ་པ་ན་ཤཱཀྱ་ཐུབ་པ་དེ་
བཞིན་གཤེགས་པ་ཡང་དག་པར་རྫོགས་པའི་སངས་རྒྱས་སུ་འགྱུར་བར་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་དུ་བྱས་ནས། ཇི་ལྟར་བདག་གི་མཁན་མོ་འདི་ལ་བཅོམ་ལྡན་འདས་འོད་སྲུང་ཡང་དག་པར་རྫོགས་པའི་སངས་
རྒྱས་ཀྱིས་འདུལ་བ་འཛིན་པའི་ནང་ན་མཆོག་ཏུ་གསུངས་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པ་ཤཱཀྱའི་རྒྱལ་པོ་དེས་འདུལ་བ་འཛིན་པའི་ནང་ན་མཆོག་ཏུ་གསུངས་པར་ཤོག་ཤིག །འདིས་དེ་ན་ཚེ་གཅིག་ཏུ་ཚངས་པར་སྤྱོད་པ་སྤྱད་པས་ན་དེ་ངའི་བསྟན་པ་ལ་རབ་ཏུ་བྱུང་ཞིང་ཉོན་
མོངས་པ་ཐམས་ཅད་སྤངས་ནས་དགྲ་བཅོམ་པ་མངོན་དུ་བྱས་སོ། །གང་འདུལ་བ་འཛིན་པའི་ནང་ན་མཆོག་ཏུ་ཤོག་ཤིག་ཅེས་སྨོན་ལམ་བཏབ་སྟེ། སྨོན་ལམ་དེའི་མཐུས་ན་ད་ལྟར་དེ་བཞིན་གཤེགས་པས་འདུལ་བ་འཛིན་པའི་ནང་ན་མཆོག་ཏུ་གསུངས་སོ། །གཞན་ཡང་དགེ་སློང་དག་གིས་
སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྐེམ་མོ་གཽ་ཏ་མཱི་ཕ་མ་གཉིས་ཀྱིས་ལས་ཅི་བགྱིས་ན་ལས་གང་གི་རྣམ་པར་སྨིན་པས་གནམ་ལྕགས་ལྷུང་སྟེ་གུམ་པར་འགྱུར། ཁྱོས་ལས་ཅི་བགྱིས་ན་སྦྲུལ་གྱིས་འཚལ་ནས་དུས་ལས་འདས། བུ་གཉིས་ཀྱིས་ལས་ཅི་བགྱིས་ན་གཅིག་ནི་

ཝས་འཚལ་གཅིག་ནི་ཆུ་བོར་ལྷུང་སྟེ་དུས་ལས་འདས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་བྱས་ཤིང་བསགས་པས་ཚོགས་རྙེད་ཅིང་རྐྱེན་སྨིན་པ་ནི་ཆུ་བོ་བཞིན་དུ་ཉེ་བར་གནས་པ་ནི་གདོན་མི་ཟ་བར་འགྱུར་རོ། །དེ་དག་གིས་ལས་བྱས་ཤིང་བསགས་པ་
ནི་གཞན་སུས་ཀྱང་མྱོང་བར་མི་འགྱུར་རོ། །དགེ་སློང་རྣམས་ལས་བྱས་ཤིང་བསགས་པ་ནི་ཕྱི་རོལ་གྱི་སའི་ཁམས་ལ་རྣམ་པར་མི་སྨིན། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་འདི་ཉིད་ལ་དགེ་བ་དང་མི་
དགེ་བའི་ལས་བྱས་པ་རྣམ་པར་སྨིན་ཏོ། །ལས་རྣམས་སྟོར་བར་མི་འགྱུར་བ། །བསྐལ་པ་དག་ནི་བརྒྱར་ལོན་ཀྱང་། །དུས་དང་འཕྲོད་ནས་འཐོབ་པ་ནི། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་སྔོན་བྱུང་བ་ན་བསྐལ་པ་བཟང་པོ་འདིར་སྐྱེ་བོ་ཚེ་ལོ་ཉི་ཁྲི་ཐུབ་པ་ན་འོད་སྲུང་ཞེས་བྱ་བའི་སྟོན་
པ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་མཁན་པོ། སངས་རྒྱས་བཅོམ་ལྡན་
འདས་ཡུལ་འཁོར་མོ་འཇིག་གི་གྲོང་ཁྱེར་གྱི་དྲང་སྲོང་བཞིན་གྱི་རི་དགས་གནས་ན་བཞུགས་སོ། །དེའི་དུས་ན་ཡུལ་འཁོར་མོ་འཇིག་ན་ཁྱིམ་བདག་གཞན་ཞིག་གནས་ཏེ་ཕྱུག་པ། ནོར་མང་བ། ལོངས་སྤྱོད་ཆེ་བ། གནས་ཡངས་ཤིང་རྒྱ་ཆེ་བ། ངལ་བསོ་པོའི་བཞིན་ནོར་འདུས་པ། ངལ་
བསོ་པོའི་ནོར་ལ་སྡོ་བ་དེས་ཆུ་བོ་བ་ར་ཀ་ཡའི་ཕ་རོལ་ཏུ་གཙུག་ལག་ཁང་ཞིག་བརྩིགས་ཏེ་དེར་ཡུལ་སོ་སོ་ན་གནས་པའི་དགེ་སློང་དག་གནས་ཏེ། ཁྱིམ་བདག་དེ་ལས་སྐྱེས་བུ་གྲོང་མི་དག་གིས་ཟོང་བླངས་ཤིང་འདོང་ངོ་། །དེ་ལ་གཅིག་གིས་ལན་གསུམ་གྱི་བར་དུ་ཟོང་ཆུད་གསན་པ་དང་། དེས་
དེ་ལ་སྨྲས་པ། འདི་ལྟར་དྲིན་མེད་པ་ཁྱོད་ཀྱིས་བརྣོགས་ཏེ་བདག་གི་ཟོང་ལན་གསུམ་དུ་ཆུད་གསན་གྱིས་མ་བྱིན་གྱི་བར་དུ་མ་འགྲོ་ཤིག །དེས་སྨྲས་པ། ཁྱིམ་བདག་ང་ལན་གཅིག་སྩལ་ལ་དེ་ཆུད་གསན་ན་བདག་གི་བུ་གསུམ་དང་། བདག་ཆུང་མར་བཅས་པ་ཁྱོད་ཀྱི་བྲན་དུ་སྣོམས་ཤིག་དེས་ཡང་

ཚིགས་རྒྱ་བྲིས་ནས་དེ་ལ་ཟོང་བྱིན་ནོ། དེས་ཡང་ཅུང་ཟད་ཀྱང་མི་ནུས་པ་ཞིག་སྟེ། དེ་ཡང་ཆུད་གསན་ནས་ཁྱིམ་བདག་དེས་དེ་ཆུང་མ་དང་བུར་བཅས་ཏེ་གཙུག་ལག་ཁང་དེའི་ལས་བྱེད་པར་ཕུལ་ལོ། །དེ་ཡུལ་འཁོར་མོ་འཇིག་ན་གནས་པས་ཉི་མ་རེ་རེ་ཞིང་ཆུ་བོ་རྒལ་ནས་
གཙུག་ལག་ཁང་དེར་དགེ་སློང་གི་དགེ་འདུན་གྱི་འབྲས་ཆན་འཚེད་དེ། ཆུང་མ་དང་བུ་དག་ནི་ཕྱག་ཚང་བྱེད་དོ། །གཙུག་ལག་ཁང་དེ་ན་དགེ་སློང་དགྲ་བཅོམ་པ་ཞིག་དགེ་འདུན་གྱི་ཞལ་ཏ་བྱེད་དེ། དེ་ནས་དུས་ཕྱི་ཞིག་ན་ཆར་པ་བབ་པས་ཆུ་བོ་བ་ར་ཀ་ཆུས་གང་སྟེ། ལས་བྱེད་པ་བུ་དང་ཆུང་མར་
བཅས་ཏེ་རིང་དུ་ཐོགས་པ་དང་དགེ་སློང་དགྲ་བཅོམ་པ་དེ་འོངས་ནས་སྨྲས་པ། ཀྱེ་སྐྱེས་བུ་གདུགས་ཚོད་འདི་ཙམ་འདས་ཀྱི་བར་དུ་ད་དུང་ཡང་ཁྱོད་མི་འོང་ན་ཅི་དགེ་སློང་གི་དགེ་འདུན་བཤོས་རྣམས་གཅད་པར་བྱའམ། དེ་སྐད་སྨྲས་པ་དང་ཆུང་མ་དང་བཅས་ནས་ཁྲོས་ཏེ་སྨྲས་པ། འདི་འོང་བ་ན་ཀླད་པར་
ཅིའི་ཕྱིར་གནམ་ལྕགས་མ་བབ། བུ་ཕོས་སྨྲས་པ། འདི་སྦྲུལ་གདུག་པས་ཅིའི་ཕྱིར་མ་ཟོས། བུ་འབྲིང་པོས་སྨྲས་པ་འདི་ཅིའི་ཕྱིར་ཆུ་བོར་ལྷུང་སྟེ་དུས་ལས་མ་འདས། བུ་ཆུང་ངུས་སྨྲས་པ། འདི་ཝས་ཅིའི་ཕྱིར་མ་ཟོས། དགེ་སློང་དག་ཇི་སྙམ་དུ་སེམས། གང་ཁྱིམ་བདག་ཆུང་མར་
བཅས་པ་དེ་གཉིས་ནི་སྐེམ་མོ་གཽ་ཏ་མཱི་ཕ་མའོ། །གང་བུ་ཆེན་པོ་དེ་ནི་འདིའི་ཁྱོའོ། །གང་བུ་འབྲིང་པོ་དེ་ནི་འདིའི་བུ་ཆེན་པོའོ། །གང་བུ་ཐ་ཆུངས་དེ་ནི་འདིའི་བུ་ཆུང་ངུ་སྟེ། དེ་ལྟར་དགྲ་བཅོམ་པ་ལ་ངན་སེམས་ཀྱིས་ཚིག་རྩུབ་པོ་ཕྱུང་སྟེ། དེའི་ལས་ཀྱི་རྣམ་པར་སྨིན་པས་གནམ་ལྕགས་དང་།
སྦྲུལ་གདུག་པ་དང་། ཝ་ལ་སོགས་པས་བསད། ཆུ་བོར་ལྷུང་བ་དང་བཞི་ཆར་དུས་ལས་འདས་སོ། །དེ་ལྟ་བས་ན་དགེ་སློང་དག་ཤིན་ཏུ་གནག་པའི་ལས་ཀྱི་རྣམ་པར་སྨིན་པའང་ཤིན་ཏུ་གནག་གོ། །ཤིན་ཏུ་དཀར་བའི་ལས་ནི་ཤིན་ཏུ་དཀར་བ། འདྲེས་པ་ལས་ནི་འདྲེས་པ། དེ་ལྟ་
བས་ན་དགེ་སློང་དག་ཤིན་ཏུ་གནག་པ་དང་འདྲེས་པའི་ལས་སྤངས་ཏེ། ཤིན་ཏུ་དཀར་བའི་ལས་ལ་ནན་ཏན་བྱའོ། །དེ་བཞིན་དུ་དགེ་སློང་དག་ཁྱེད་ཀྱིས་བསླབ་པར་བྱོས་ཤིག །བཅོམ་ལྡན་འདས་ཀྱིས་འདི་སྐད་གསུངས་པ་དང་། དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་

གསུངས་པ་ལ་མངོན་པར་དགའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་དགུ་པ། གླེང་གཞི་མཉན་དུ་ཡོད་པ་ན་སྟེ། ནམ་སྐྱེས་བུ་གླེན་པ་འཕགས་སྐྱེས་པོས་ཤཱཀྱ་རྣམས་ལ་ཉེས་པ་མེད་ཅིང་གནོད་པ་མེད་པར་བསད་པ་དང་ཤཱཀྱའི་ཆུང་མ་རྣམས་ཀྱི་མིང་པོ་དང་།
ཁྱོ་དང་། ཕ་རྣམས་ལས་བྲལ་བར་གྱུར་ནས་སྡུག་བསྔལ་གྱིས་ཉོན་མོངས་ཏེ་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ངོ་། །སྡུག་བསྔལ་ནི་དྲིལ་གྱི་སྒྲ་དང་འདྲ་སྟེ། ནམ་དེ་དག་མྱ་ངན་གྱི་བྲལ་བ་དང་དེའི་ཚེ་འདོད་ཆགས་རབ་ཏུ་ཆེ་བའི་ཉོན་མོངས་པས་གཟིར་ཏེ་བཟོད་པར་བྱ་བ་མ་ནུས་
སོ། །བཅོམ་ལྡན་འདས་ཀྱིས་གསུངས་པ། སྦྲུལ་ནག་པོ་ལ་ཉེས་པའི་དམིགས་ལྔ་སྟེ། ལྔ་གང་ཞེ་ན། ཁྲོ་བ་ཅན་དང་། ཁོན་དུ་འཛིན་པ་ཅན་དང་། སྙིང་རིང་བ་དང་། བྱས་པ་མི་གཟོ་བ་དང་། དུག་རྣོ་བའོ། །དེ་ལྟར་དེ་བཞིན་དུ་བུད་མེད་ཁ་ཅིག་ལ་ཡང་ཉེས་དམིགས་རྣམ་པ་ལྔ་སྟེ།
ལྔ་གང་ཞེ་ན། ཁྲོ་བ་ཅན་དང་། ཁོན་དུ་འཛིན་པ་ཅན་དང་། སྙིང་རིང་བ་དང་། བྱས་པ་མི་གཟོ་བ་དང་། དུག་རྣོ་བའོ། །དེ་ལ་བུད་མེད་ཀྱི་དུག་རྣོ་བ་གང་ཞེ་ན། བུད་མེད་ནི་ཕལ་ཆེར་འདོད་ཆགས་ཆེའོ། །དེ་དག་གཅིག་ལ་གཅིག་གྲོས་བྱས་ནས་དགེ་སློང་མ་སྦོམ་དགའ་མོ་གང་ན་བ་དེར་དོང་
སྟེ་ཕྱིན་པ་དང་སྦོམ་དགའ་མོའི་རྐང་པ་ལ་ཕྱག་བྱས་ཏེ་མདུན་དུ་འཁོད་ནས་འཕགས་མ་ཉོན་མོངས་པ་རྣམས་ནི་གཟུང་བར་དཀའ་སྟེ། བུད་མེད་རྣམས་ལ་བསླུ་བར་བགྱིད་ན་ཇི་ལྟར་བདག་ཅག་གིས་བཟློག་པར་བགྱི་བ་བཤད་དུ་གསོལ། དེས་སྨྲས་པ། ནུ་མོ་དག་དེ་ལ་ཤེས་
པར་བྱ་བ་ཅི་ཞིག་ཡོད་ཁྱེད་ཅག་ནི་ན་ཆུང་དར་ལ་བབ་པ་ཡིན་གྱིས་ངེད་ལ་ཁྲིམས་ཕུལ་ཏེ་ནོར་ཅན་དང་། ཚོང་དཔོན་དང་། དེད་དཔོན་དང་། གཞན་ཡང་ནལ་གྱི་བུ་དང་། སུའི་བུ་གཏོལ་མེད་པ་རྣམས་དང་ལྷན་ཅིག་ཏུ་ཡོངས་སུ་སྤྱོད་ཅིག །དེ་སྟེ་ང་ཡང་གཞོན་ན་ནི་ཁྱེད་ཅག་དང་ལྷན་ཅིག་
ཏུ་འགྲོའོ། །དེས་དེ་དག་བསླུས་པ་དང་རྐང་པ་ལ་ཕྱག་འཚལ་ཏེ་དོང་ནས་སྨྲས་པ། ཆེ་ཞེ་འཕགས་མ་སྦོམ་དགའ་མོ་ན་རེ་འདི་ལ་ཤེས་པར་བྱ་བ་ཅི་ཞིག་ཡོད་ཅེས་ཟེར་རོ། །དེ་དག་ལས་ཁ་ཅིག་གིས་ཆེ་ཞེ་དེས་སྨྲས་པ་ལེགས་ཀྱིས་འདོད་ལ་ཡོངས་སུ་སྤྱོད་དོ་ཞེས་སྨྲས་པ་དང་། ཁ་ཅིག་

གིས་སྨྲས་པ། ནུ་མོ་བུད་མེད་རྣམས་ཀྱིས་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་བ་ནི་རྙེད་པར་དཀའ་ན་སྐད་ཅིག་འཕགས་མ་སྐེམ་མོ་གཽ་ཏ་མཱི་ལ་ཡང་དྲིའོ། །དེ་དག་གིས་ཆེ་ཞེ་ལེགས་ཀྱིས་དེ་བཞིན་དུ་བགྱིའོ་ཞེས་སྨྲས་ཏེ། དེ་དག་སྐེམ་མོ་གཽ་ཏ་མཱིའི་དྲུང་
དུ་དོང་སྟེ་རྐང་པ་ལ་ཕྱག་བྱས་ནས་འཕགས་མ་ཉོན་མོངས་པ་ནི་གཟུང་བར་དཀའ་སྟེ། བུད་མེད་རྣམས་སླུ་བར་བགྱིད་ན་བདག་ཅག་གིས་ཇི་ལྟར་བཟློག་པར་བགྱི་བ་བཤད་དུ་གསོལ། དེས་སྨྲས་པ། ཆེ་ཞེ་དག་འདོད་པ་རྣམས་ཀྱི་མིང་ཡང་མ་འཛིན་ཅིག །དེ་ཅིའི་ཕྱིར་ཞེ་ན། འདོད་པ་ནི་བདེ་
བ་ཆུང་ལ་སྡུག་བསྔལ་ཆེ། ཉེས་པའི་དམིགས་མང་ངོ་། །བཅོམ་ལྡན་འདས་ཀྱིས་གསུངས་པ། ཉེས་པའི་དམིགས་ལྔ་ཡང་དག་པར་མཐོང་ཞིང་མཁས་པས་ནི་འདོད་པ་ལ་བསྟེན་པའི་མི་རིགས་སོ། །ལྔ་གང་ཞེ་ན། འདོད་པ་ནི་དགའ་བ་ཆུང་ཞིང་སྡུག་བསྔལ་ཆེ་ལ་ཉེས་པའི་དམིགས་མང་
པོར་ཡང་དག་པར་མཐོང་བའི་མཁས་པས་འདོད་པ་ལ་བསྟེན་པར་མི་རིགས་སོ། །འདོད་པ་ལ་བསྟེན་པས་སྦྱོར་བའི་རྣམ་པར་འཕེལ་བར་འགྱུར་བར་མཐོང་བའི་མཁས་པས་འདོད་པ་ལ་བསྟེན་པར་མི་རིགས་སོ། །འདོད་པ་ལ་བསྟེན་ན་གཏོང་བ་དང་། ངོམས་པ་དང་། ཆོག་པ་མེད་པར་
མཐོང་བའི་མཁས་པས་འདོད་པ་ལ་བསྟེན་པར་མི་རིགས་སོ། །འདོད་པ་ལ་བསྟེན་པ་ནི་སྡིག་པའི་ལས་མི་བྱེད་པ་ནི་ཅུང་ཟད་ཀྱང་མེད་པར་མཐོང་བའི་མཁས་པས་འདོད་པ་ལ་བསྟེན་པར་མི་རིགས་སོ། །འདོད་པ་ནི་རྣམ་གྲངས་དུ་མ་ལས་ཀྱང་སངས་རྒྱས་དང་། སངས་རྒྱས་ཀྱི་ཉན་ཐོས་
དང་། མཁས་པ་དང་། ཡང་དག་པར་སོང་བའི་སྐྱེས་བུ་དམ་པ་དག་གིས་སྨད་པར་མཐོང་བའི་མཁས་པས་འདོད་པ་ལ་བསྟེན་པར་མི་རིགས་སོ། །ཡོན་ཏན་ལྔ་མཐོང་བའི་མཁས་པ་ནི་རབ་ཏུ་འབྱུང་བ་ལ་མོས་པར་བྱ་བའི་རིགས་སོ། །ལྔ་གང་ཞེ་ན། རང་གི་དོན་མ་འདྲེས་པ་
མཐོང་བའི་མཁས་པས་རབ་ཏུ་བྱུང་བ་ལ་མོས་པར་བྱ་བའི་རིགས་སོ། །བདག་གང་བྲན་མོ་དང་། མངག་གཞུག་མ་དང་། སྐྱོ་བ་དང་། དབང་བྱེད་པ་དང་། གར་དགར་འགྲོར་མེད་པ་ལས་དེ་དག་གིས་མཆོད་པ་དང་། བསྔགས་པར་མཐོང་བའི་མཁས་པས་རབ་ཏུ་འབྱུང་བ་ལ་མོས་

པར་བྱ་བའི་རིགས་སོ། །བླ་ན་མེད་པའི་རྣལ་འབྱོར་བདེ་བ་དང་། མྱ་ངན་ལས་འདའ་བ་འཐོབ་པར་འགྱུར་བ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བའི་རིགས་སོ། །བདག་བླ་ན་མེད་པའི་རྣལ་འབྱོར་བདེ་བ་དང་། མྱ་ངན་ལས་འདའ་བ་འཐོབ་པ་དག་མ་ཐོབ་ན་ཡང་
ལྷར་སྐྱེ་བར་འགྱུར་རོ། །ཞེས་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བའི་རིགས་སོ། །རྣམ་གྲངས་དུ་མ་ལས་ཀྱང་རབ་ཏུ་འབྱུང་བ་ནི་སངས་རྒྱས་དང་། སངས་རྒྱས་ཀྱི་ཉན་ཐོས་དང་། མཁས་པ་དང་། ཡང་དག་པར་སོང་བ་དང་། སྐྱེས་བུ་དམ་པ་དག་གིས་བསྟོད་
པར་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བའི་རིགས་སོ། །ཅི་བདག་གིས་ཚེ་གཞན་དུ་འདོད་པའི་ཕྱིར་སྡུག་བསྔལ་མྱོང་བར་དེ་མཉན་པར་འདོད་དམ། འོན་ཏེ་ཚེ་འདི་ལ་མྱོང་བའི་རྣམས་མཉན་པར་འདོད། དེ་དག་གིས་འཕགས་མ་ཁྱོད་ཀྱིས་ཚེ་གཞན་དུ་འདོད་པའི་
ཕྱིར་སྡུག་བསྔལ་མྱོང་བ་ནི་རེ་ཞིག་ཞོག་ལ་གང་ཚེ་འདི་ལ་མྱོང་བ་རྣམས་གསུང་ཤིག་ཅེས་སྨྲས་པ་དང་། དེས་དེ་དག་ལ་མ་དང་། ཕ་དང་། ཁྱོ་དང་། བུ་རྣམས་ལས་བྲལ་བའི་སྡུག་བསྔལ་དང་། བུའི་ཤ་ཟོས་པའི་སྡུག་བསྔལ་ཇི་ལྟར་གྱུར་པ་ཞིབ་ཏུ་སྨྲས་པ་དང་། དེ་དག་སྐྱོ་ནས་བ་སྤུ་ཀུན་
ཁུང་ནས་གཡོས་ཏེ་རྣ་བ་བྱོ་ནས་སྐེམ་མོ་གཽ་ཏ་མཱིའི་གདོང་དུ་བལྟས་པ་དང་། དེས་དེ་དག་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་རྣམས་ཤེས་ནས་འཕགས་པའི་བདེན་པ་བཞི་ཡང་དག་པར་རྟོགས་པར་འགྱུར་བ་དེ་ལྟ་བུའི་ཆོས་བཤད་དོ། །དེ་ཐོས་པ་ནས་
དེ་དག་གིས་འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་གྱེན་དུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །དེ་དག་བདེན་པ་མཐོང་སྟེ་འཕགས་མ་བདག་ཅག་དོ་ཞིག་གོ། །བདག་ཅག་རབ་ཏུ་དོ་ཞིག་གོ། །འཕགས་མ་སྦོམ་དགའ་མོས་བདག་
ཅག་འདོད་པའི་འདམ་དུ་དོ་བཅུག་གོ་ཞེས་སྨྲས་པ་དང་། སྐེམ་མོ་གཽ་ཏ་མཱིས་ནུ་མོ་དག་ཅི་བྱས་ཞེས་དྲིས་པ་དང་། དེ་དག་གིས་ཀྱང་ཞིབ་ཏུ་སྨྲས་སོ། །དེས་ནུ་མོ་དག་འདི་ལ་ཅི་ཞིག་བྱ། དེ་ནི་ཉེས་པ་སྦོམ་པོ་ལ་སྤྱོད་པ་སྟེ། དེས་བཅོམ་ལྡན་འདས་ཀྱི་བསྟན་པ་ཆུ་འགྲམ་གྱི་གད་པ་

བཞིན་འདོར་རོ་ཞེས་སྨྲས་པ་དང་། དོན་ཆུང་ངུའི་དགེ་སློང་མ་དག་འཕྱ་སྤང་སྟེ། ཁ་ངན་དུ་འཛེར་བ་ནི་དགེ་སློང་མས་དགེ་སློང་མ་དག་སླར་ཁྱིམ་དུ་བསྐྲད་པ་ག་ལ་སྲིད་ཅེས་འཛེར་ཏོ། །དེ་ལྟར་གྱུར་པ་དགེ་སློང་མ་དག་གིས་དགེ་སློང་དག་ལ་སྨྲས་སོ། །དགེ་སློང་དག་
གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་དགེ་སློང་མ་ཁྱིམ་དུ་འཇུག་པར་མ་བྱེད་ཅིག །འཇུག་པར་བྱེད་ན་ཉེས་པ་སྦོམ་པོར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་མ་གཞན་ཞིག་དགེ་
སློང་ལ་སྤྱོས་པ་དང་། དགེ་སློང་དེ་སྐྲག་པར་གྱུར་ཏེ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་ཕ་ལ་སྤྱོ་བར་བྱེད་ན་འདས་པ་དང་བཅས་པར་འགྱུར་རོ། །ཇི་ལྟར་དགེ་སློང་མས་
དགེ་སློང་ཕ་ལ་མི་བྱ་བ་བཞིན་དུ་དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་མི་བྱའོ། །དགེ་སློབ་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་མི་བྱའོ། །དགེ་ཚུལ་མས་དགེ་སློང་ཕ་དང་། དགེ་
སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་ཡང་མི་བྱའོ། །མདོར་ན། །མདུན་དུ་འགྲོ་བར་མི་བྱ་སྟེ། །ལྡང་བར་བྱའོ་དགེ་སློང་མ། །ཞུས་ནས་འདུག་པར་བྱ་བ་དང་། །སྐྱིལ་མོ་ཀྲུང་དང་རྣམ་གྲངས་མེད། །སངས་རྒྱས་བཅོམ་ལྡན་འདས་
མཉན་དུ་ཡོད་པ་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་འོད་སྲུང་ཆེན་པོ་མཉན་དུ་ཡོད་པའི་སྔོན་གྱི་སྐྱེད་མོས་ཚལ་རི་དགས་སྒྲའི་ཁང་པ་ན་འདུག་གོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་སྔ་དྲོ་ཤམ་ཐབས་དང་ཆོས་གོས་གྱོན་
ལྷུང་བཟེད་ཁྱེར་ཏེ་མཉན་དུ་ཡོད་པར་བསོད་སྙོམས་ཀྱི་ཕྱིར་ཞུགས་སོ། །དགེ་སློང་མ་སྦོམ་དགའ་མོ་ཡང་སྔ་དྲོ་ཤམ་ཐབས་དང་ཆོས་གོས་གྱོན་ལྷུང་བཟེད་ཁྱེར་ནས་མཉན་དུ་ཡོད་པར་བསོད་སྙོམས་ལ་ཞུགས་པ་དང་། དེས་ཚེ་དང་ལྡན་པ་འོད་སྲུང་ཆེན་པོ་མཐོང་ནས་གླེན་པ་འདི་ལ་མི་

དགའ་བར་བྱའོ་སྙམ་བསམས་ནས་ཁྱིམ་གང་དུ་ཚེ་དང་ལྡན་པ་འོད་སྲུང་ཆེན་པོ་འགྲོ་བ་དེར་མོ་ཐོག་མར་དོང་སྟེ། སྒོའི་ནང་ལོགས་སུ་འདུག་ནས་འཕགས་པ་ད་ལྟར་ནི་སྦྱར་བ་ཅུང་ཟད་ཀྱང་མེད་ཀྱིས་སོང་ཤིག་ཅེས་སྨྲས་པ་དང་། དེ་ཁྱིམ་གཞན་དུ་སོང་ངོ་། །དེར་ཡང་མོ་སྔར་སོང་སྟེ་
སྔ་མ་བཞིན་དུ་གཙེས་སོ། །འདི་བཞིན་དུ་ཡང་གཅིག་ནས་གཅིག་ཏུ་བྱས་པ་དང་། མ་དགོངས་པར་ནི་དགྲ་བཅོམ་པའི་ཡེ་ཤེས་ཀྱིས་གཟིགས་པ་མི་འཇུག་སྟེ། སུ་ཞིག་བདག་ལ་འཚེ་སྙམ་དགོངས་ན། སྦོམ་དགའ་མོ་ཡིན་པར་གཟིགས་ནས་དེས་སྨྲས་པ། སྲིང་མོ་ཁྱོད་ཀྱིས་ནི་
མ་ཉེས་ཀྱིས་ཚེ་དང་ལྡན་པ་ཀུན་དགའ་བོས་ཉེས་ཏེ། ཉེས་པ་སྦོམ་པོ་སྤྱོད་པའི་བུད་མེད་དག་ལེགས་པར་བཤད་པའི་ཆོས་འདུལ་བ་ལ་རབ་ཏུ་ཕྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་གནང་བར་བྱས་པས་ཉེས་སོ། །དེ་ལྟར་གྱུར་པ་དགེ་སློང་དག་གིས་ཐོས་ནས་
བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། གང་ཅུང་ཟད་དགེ་སློང་མས་དགེ་སློང་ཕ་སྤྱོད་ཡུལ་དུ་འགྲོ་བའི་མདུན་དུ་སོང་ན་ཉེས་པའི་དམིགས་སུ་འགྱུར་ཏེ། དེ་ལྟ་བས་ན་དགེ་སློང་མས་དགེ་སློང་གི་སྤྱོད་ཡུལ་དུ་བསོད་སྙོམས་མི་བསླང་བར་
དགོངས་ནས་བཀའ་སྩལ་པ། དགེ་སློང་དག་དགེ་སློང་འོད་སྲུང་གིས་དགེ་སློང་མ་ལ་རིགས་པར་སྤྱོས་སོ། །དེ་ལྟ་བས་ན་དགེ་སློང་མས་དགེ་སློང་གི་སྤྱོད་ཡུལ་དུ་བསོད་སྙོམས་མ་བསླང་ཤིག །དགེ་སློང་མས་དགེ་སློང་གི་སྤྱོད་ཡུལ་དུ་བསོད་སྙོམས་བསླངས་ན་འདས་པ་དང་བཅས་
པར་འགྱུར་རོ། །བཅོམ་ལྡན་འདས་ཀྱིས་དགེ་སློང་མས་དགེ་སློང་གི་སྤྱོད་ཡུལ་དུ་བསོད་སྙོམས་མ་བསླང་ཤིག་ཅེས་གསུངས་པ་དང་། དགེ་སློང་མས་དགེ་སློང་གི་སྤྱོད་ཡུལ་སྤངས་པ་དང་། དེ་དག་བསོད་སྙོམས་ཀྱིས་ཕོངས་པར་གྱུར་ནས་དེ་ལྟར་གྱུར་པ་དགེ་སློང་མ་རྣམས་ཀྱིས་
དགེ་སློང་རྣམས་ལ་སྨྲས་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དེ་ལྟ་བས་ན་དགེ་སློང་མས་དགེ་སློང་སྤྱོད་ཡུལ་དུ་འདོང་བའི་མདུན་དུ་འགྲོ་བར་མི་བྱའོ། །གང་སྤྱོད་ཡུལ་དགེ་སློང་དག་གིས་སྤངས་པར་དགེ་སློང་མ་དག་དེ་དག་འདོང་བར་བྱོས་

ཤིག་ཅེས་བཀའ་སྩལ་ཏོ། །གླེང་གཞི་ནི་མཉན་དུ་ཡོད་པ་ན་སྟེ། སྦོམ་དགའ་མོ་འཁོར་བརྒྱ་དུ་མའི་མདུན་ན་འདུག་ཅིང་ཆོས་འཆད་དོ། །ཚེ་དང་ལྡན་པ་འོད་སྲུང་ཆེན་པོ་ལམ་དེར་སོང་བ་དང་འཁོར་དེ་དག་གིས་ཚེ་དང་ལྡན་པ་འོད་སྲུང་ཆེན་པོ་མཐོང་ནས་ལངས་སོ། །
སྦོམ་དགའ་མོ་ནི་རྐུབ་ཀྱང་མ་བསྐྱོད་པ་དང་། དེ་དག་གིས་འཕགས་པ་འོད་སྲུང་ཆེན་པོ་ལྷ་དང་མིས་མཆོད་པ་དེ་མཐོང་བ་དང་། བདག་ཅག་ནི་ལངས་ན་ཁྱོད་སྟན་ལས་ཀྱང་མ་འཕགས་པ་ནི་མ་ལེགས་སོ་ཞེས་སྨྲས་པ་དང་། དེས་འདི་ནི་མུ་སྟེགས་ཅན་ལས་རབ་ཏུ་བྱུང་སྟེ། བླུན་པ་རབ་
ཏུ་བླུན་པ། གླེན་པ། རབ་ཏུ་གླེན་པ་ན་བདག་ཤཱཀྱ་མོ་རབ་ཏུ་བྱུང་བ་སྡེ་སྣོད་གསུམ་པ། ཆོས་ཀྱི་གཏམ་ཅན། རིག་པ་དང་གྲོལ་བ་ལ་སྤོབས་པས་ཅི་ཕྱིར་འདི་མཐོང་བ་དང་སྟན་ལས་ལྡང་ཞེས་སྨྲས་པ་དང་། དགེ་སློང་དག་གིས་ཐོས་ཏེ་བཅོམ་ལྡན་འདས་ལ་གསོལ་ནས། །བཅོམ་ལྡན་
འདས་ཀྱིས་བཀའ་སྩལ་པ། དགེ་སློང་དག་དད་པའི་བྲམ་ཟེ་དང་ཁྱིམ་བདག་རྣམས་ནི་རིགས་པར་འཕྱའོ། །དེ་ལྟ་བས་ན་དགེ་སློང་མས་དགེ་སློང་མཐོང་མ་ཐག་ཏུ་སྟན་ལས་ལོངས་ཤིག །མ་ལངས་ན་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་གསུངས་
པ། །དགེ་སློང་མས་དགེ་སློང་མཐོང་མ་ཐག་ཏུ་སྟན་ལས་ལོངས་ཤིག་ཅེས་གསུངས་པ་དང་། དུས་ཕྱི་ཞིག་ན་དགེ་སློང་མ་ཨུཏྤ་ལའི་ཁ་དོག་མ་དབྱར་མོ་ཁང་གི་ཕྱི་རོལ་ན་འཁོར་བརྒྱ་ཕྲག་དུ་མའི་མདུན་ན་འདུག་སྟེ་ཆོས་འཆད་དོ། །ཚེ་དང་ལྡན་པ་ཀུན་དགའ་བོ་སྔ་དྲོ་ཤམ་ཐབས་དང་
ཆོས་གོས་གྱོན་ལྷུང་བཟེད་ཁྱེར་ཏེ་མཉན་དུ་ཡོད་པར་བསོད་སྙོམས་ཀྱི་ཕྱིར་ཞུགས་པ་ལས་མཉན་དུ་ཡོད་པ་ནས་བསོད་སྙོམས་ལས་སླར་བསྐོར་ཏེ། གང་ན་དགེ་སློང་མའི་དབྱར་མོ་ཁང་ཡོད་པ་དེར་སོང་བ་དང་། དགེ་སློང་མ་ཨུཏྤ་ལའི་ཁ་དོག་མ་ཚེ་དང་ལྡན་པ་ཀུན་དགའ་བོ་མཐོང་སྟེ།
མཐོང་མ་ཐག་ཏུ་སྟན་ལས་ལངས་པ་དང་། ཚེ་དང་ལྡན་པ་ཀུན་དགའ་བོ་སྟན་ལ་འདུག་གོ། །འདུག་ནས་སྲིང་མོ་ཁྱོད་ཀྱིས་མདོ་སྡེ་གང་ཞིག་བརྩམས་ཞེས་དྲིས་པ་དང་དེས་སྨྲས་པ། འཕགས་པ་འདི་ཞེས་བགྱི་བའོ། །ཚེ་དང་ལྡན་པ་ཀུན་དགའ་བོས་མདོ་སྡེ་རྒྱས་པར་བཤད་པར་

བརྩམས་པ་དང་། ཨུཏྤ་ལའི་ཁ་དོག་མ་འགྲེང་བཞིན་དུ་རྣ་བ་བྱོ་སྟེ་ཉན་ཏོ། །ཚེ་དང་ལྡན་པ་ཀུན་དགའ་བོ་ཆོས་འཆད་པ་ལ་ཆགས་པས་དེ་ལ་འདུག་ཅེས་མ་སྨྲས་པ་དང་། དེ་རིང་ཞིག་འགྲེང་བས་ཉི་མའི་འོད་ཟེར་ཚ་བས་རྨྱ་སྟེ་བརྒྱལ་བར་གྱུར་ནས་ས་ལ་འགྱེལ་བ་དང་མ་དད་པ་དག་
གིས་སྨྲས་པ། ཀྱེ་དགེ་སློང་མ་ཨུཏྤ་ལའི་ཁ་དོག་མ་འདོད་ཆགས་དང་བྲལ་ལོ་ཞེས་ཐོས་ན་ཤཱཀྱ་གཞོན་ནུ་གཟུགས་སྡུག་པ་མཐོང་བ་དང་འདོད་ཆགས་ཀྱིས་བསྐྱོད་པའི་རྟོག་པས་ས་ལ་འགྱེལ་ཏོ་ཞེས་འཛེར་བ་དགེ་སློང་དག་གིས་ཐོས་ཏེ་བཅོམ་ལྡན་འདས་ལ་གསོལ་ནས། བཅོམ་ལྡན་
འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་དག་རིགས་པར་འཕྱ་སྟེ། དེ་ལྟ་བས་ན་དགེ་སློང་དག་ཆོས་འཆད་ན་འཕགས་མ་འདུག་ཅེས་སྨྲོས་ཤིག །དེ་སྟེ་དགེ་སློང་བྲེལ་ཏེ་མ་དྲན་ན་དགེ་སློང་མས་ཞུས་ལ་འདུག་ཤིག །འཕགས་པ་མཁྱེན་པར་མཛོད་ཅིག་
བདག་མཆིས་སོ་ཞེས་བརྗོད་ཅིག །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེར་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་ཉི་མ་ནི་ཤར། བྱ་རོག་ནི་སྐད་འབྱིན། ཞིང་
པ་ནི་ཞིང་རྨེད། མི་རྒོད་ནི་ངུའོ། །དེ་ལྟ་བས་ན་དགེ་སློང་དག་དོན་འདི་ནི་དཔེ་ཡིན་པར་ཤེས་པར་བྱའོ། །དེའི་དོན་ཡང་འདི་ལྟར་བལྟའོ། །དགེ་སློང་དག་ཉི་མ་ཤར་རོ་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཚིག་བླ་དགས་
སོ། །བྱ་རོག་སྒྲ་འབྱིན་ཏོ་ཞེས་བྱ་བ་ནི་ཆོས་འཆད་པའི་གང་ཟག་གི་ཚིག་བླ་དགས་སོ། །ཞིང་པ་ཞིང་རྨེད་དོ་ཞེས་བྱ་བ་ནི་གཏོང་བ་སྦྱིན་པ་དག་གི་ཚིག་བླ་དགས་སོ། །མི་རྒོད་ངུའོ་ཞེས་བྱ་བ་ནི་བདུད་ཀྱི་འཁོར་གྱི་ཚིག་བླ་དགས་སོ། །དེ་ལྟ་བས་ན་དགེ་སློང་དག་འདི་ལྟར་
སྟོན་པ་རྗེས་སུ་བརྩེ་བ་ཅན་ཐུགས་རྗེ་ཅན་དོན་དུ་བཞེད་པ། ཕན་པར་བཞེད་པ། ཐུགས་རྗེ་བ་ངས་ཉན་ཐོས་ཁྱེད་རྣམས་ལ་བྱ་བ་ནི་བྱས་ཟིན་གྱིས་ད་ནི་ཁྱེད་ཅག་གིས་དགོན་པ་དང་། ཤིང་དྲུང་དང་། ཁྱིམ་སྟོང་པ་དང་། ལུང་བ་དང་། བྲག་ཕུག་དང་། སོག་མ་སྤུངས་

པ་བླ་གབ་མེད་པ་དང་། དུར་ཁྲོད་དང་། ནགས་དང་། རི་དང་། བས་མཐའ་འདི་དག་ཏུ་གནས་ཤིང་སྒོམས་ཤིག །དགེ་སློང་རྣམས་བག་མེད་པར་མ་བྱེད་ཅིག །ཕྱིས་འགྱོད་པ་ཅན་དུ་གྱུར་ཏ་རེ་འདི་ནི་ངའི་བསྟན་པའོ། །དགེ་སློང་དག་མཚོ་དང་། ལྟེང་ཀ་དང་། བྲག་
ཕུག་དང་། སྐྱེད་མོས་ཚལ་དང་། ཆུ་མིག་དང་། མེ་ཏོག་དང་། འབྲས་བུས་བརྒྱན་པའི་ཤིང་དེ་ལྟ་བུའི་སྟེང་ན་ཁྱད་པར་ཅན་དུ་དགའ་བའི་གནས་སུ་དོང་ནས་ཡིད་ལ་བྱེད་པ་སྒྲུབ་པ་ལ་རྩོམ་མོ། །དགེ་སློང་མ་ཡང་རྒྱལ་པོའི་ཀུན་དགའ་ར་བ་དང་ཉེ་བའི་ཚལ་སྟུག་པོར་གཞན་ཡང་བུད་མེད་དང་
མཐུན་པའི་གནས་དག་ཏུ་དོང་སྟེ་ཡིད་ལ་བྱེད་པ་སྒྲུབ་པ་ལ་རྩོམ་མོ། །དེ་སྔོན་གྱི་ལས་ཀྱི་རྣམ་པར་སྨིན་པས་བསྒྱུར་བས་བུད་མེད་ཅེས་བྱ་བའི་རྨའི་སྒོར་སྲོག་ཆགས་དག་ཞུགས་པར་བཅོམ་ལྡན་འདས་ཀྱིས་གསན་ནས་བཀའ་སྩལ་པ། དེ་ལྟ་བས་ན་དགེ་སློང་དག་དགེ་སློང་མ་ཡིད་ལ་བྱེད་
པ་སྒོམ་པ་ན་སྐྱིལ་མོ་ཀྲུང་བཅས་ཏེ་མ་འདུག་པར་སྐྱིལ་མོ་ཀྲུང་ཕྱེད་དུ་ཆོས་ལ་འདུག་པས་ཡིད་ལ་བྱེད་པ་སྒོམས་ཤིག །བཅོམ་ལྡན་འདས་ཀྱིས་དགེ་སློང་མས་སྐྱིལ་མོ་ཀྲུང་ཕྱེད་ཆོས་ཏེ་འདུག་པས་ཡིད་ལ་བྱེད་པ་སྒོམས་ཤིག་ཅེས་གསུངས་ན། དགེ་སློང་མ་དག་གིས་སྐྱིལ་མོ་ཀྲུང་ཕྱེད་དུ་
བཅས་ཏེ་འདུག་ནས་ཡིད་ལ་བྱེད་པ་བསྒོམ་པ་ལ་རྩོམ་པ་དང་། འོན་ཀྱང་དེའི་མོ་མཚན་དུ་སྲོག་ཆགས་ཕྲ་མོ་དག་ཞུགས་པ་གསན་ནས། བཅོམ་ལྡན་འདས་ཀྱིས་བཀའ་སྩལ་པ། གནས་དེར་འདབ་མའམ་ལོ་མ་སྲབ་མོ་ལྷུང་བས་གློན་ལ་སྐྱིལ་མོ་ཀྲུང་ཕྱེད་དུ་ཆོས་ཏེ་འདུག་ཤིག །
གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་ཨུ་པཱ་ལིས་བཅོམ་ལྡན་འདས་ལ་ཞུས་པ། བཙུན་པ་ནམ་དགེ་སློང་མས་ཁྲིམས་ཕུལ་ནས་བབས་པར་གྱུར་པས་ལེགས་པར་བཤད་པའི་ཆོས་འདུལ་བ་ལ་སླར་རབ་ཏུ་ཕྱུང་སྟེ་བསྙེན་པར་རྫོགས་ནས་དགེ་སློང་མའི་དངོས་པོར་འཚལ་
ན་རབ་ཏུ་འབྱུང་ངམ་རབ་ཏུ་མི་འབྱུང་། བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་རབ་ཏུ་མི་འབྱུང་ངོ་། ཨུ་པཱ་ལི་ལན་གཅིག་བབས་པའི་དགེ་སློང་མས་ཕྱིར་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་བ་བསྙེན་པར་རྫོགས་ནས་དགེ་སློང་མའི་དངོས་པོར་དབྱུང་དུ་མེད་

དོ། །གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་ཨུ་པཱ་ལིས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གང་བཅོམ་ལྡན་འདས་ཀྱིས་ནི་འདི་ན་དགེ་སློང་མས་དགེ་སློང་ལ་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པའོ་
ཞེས་གླེང་བར་མི་བྱ། དྲན་པར་མི་བྱའོ་ཞེས་གསུངས་ན། བཙུན་པ་ཅི་དགེ་སློང་མས་དགེ་སློང་ཕ་ལ་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པའོ་ཞེས་གླེང་བར་བགྱི་བ་དང་། དྲན་པར་བགྱི་བའི་རྣམ་གྲངས་འགའ་ཙམ་མཆིས་སམ།
བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་དགེ་སློང་མས་དགེ་སློང་ལ་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པའོ་ཞེས་གླེང་བར་བྱ་བ་དང་། དྲན་པར་བྱ་བའི་རྣམ་གྲངས་གང་ཡང་མེད་དོ།། །།མདོར་ན། ཚོང་དཔོན་གྱིས་ཀྱང་
ཟས་ལྷག་མ། །བཞག་པ་དག་ནི་མི་སྤང་སྟེ། །བར་ཆད་ཆོས་ནི་མི་དྲི་བ། །གཞན་ཕྱིར་དག་དང་ཁྲག་འཛག་པའོ། །གླེང་གཞི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཚོང་དཔོན་གཞན་ཞིག་གནས་པ་ཕྱུག་ལ་ནོར་མང་ཞིང་ལོངས་སྤྱོད་ཆེ་བ་དེས་རིགས་མཉམ་པ་ལས་ཆུང་མ་ཞིག་
བླངས་ཏེ། དེ་དེ་དང་ལྷན་ཅིག་རྩེ་དགའ་ཡོངས་སུ་སྤྱོད་དོ། །དེ་ལ་རྩེ་དགའ་སྤྱོད་ཀྱང་བུ་ཕོ་ཡང་མ་བྱུང་། བུ་མོ་ཡང་མ་བྱུང་ངོ་། །དེ་དུས་ཕྱི་ཞིག་ན་ནོར་ཟད་པར་གྱུར། ལོངས་སྤྱོད་ཀྱང་ཟད་པར་གྱུར་ནས་དེས་ཆུང་མ་ལ་བཟང་མོ་ད་ནི་བདག་རྒས་པས་ནོར་བཙལ་བར་མི་ནུས་ཀྱིས་ཛེ་
ཏའི་ཚལ་དུ་སོང་སྟེ་རབ་ཏུ་འབྱུང་ངོ་ཞེས་སྨས་པ་དང་། དེས་ཇོ་བོ་དེ་སྟེ་ཁྱོད་རབ་ཏུ་འབྱུང་ན། བདག་སུའི་དྲུང་ན་འདུག་གིས་བདག་ཀྱང་རབ་ཏུ་འབྱུང་ངོ་ཞེས་སྨྲས་པ་དང་། དེས་བཟང་མོ་ལེགས་ཀྱིས་འདོང་ཞེས་སྨྲས་ནས། དེ་ཁྲིད་དེ་གཽ་ཏ་མཱི་སྐྱེ་དགུའི་བདག་མོའི་དྲུང་དུ་འོངས་ནས་
རྐང་པ་ལ་ཕྱག་བྱས་ཏེ། འཕགས་མ་རང་གི་སླས་འདི་ལེགས་པར་བཤད་པའི་ཆོས་འདུལ་བ་ལ་རབ་ཏུ་འབྱུང་བར་འཚལ་གྱིས་རབ་ཏུ་ཕྱུང་ཤིག །བདག་ཛེ་ཏའི་ཚལ་དུ་མཆིས་ལ་རབ་ཏུ་འབྱུང་ངོ་ཞེས་སྨྲས་ནས་དེས་སྨྲས་པ། བུ་ཁྱོད་ཆུང་མ་དང་བཅས་ཏེ་སེམས་བསྐྱེད་པ་ནི་ལེགས་ཏེ་རབ་

ཏུ་བྱུང་བ་ནི་བཅོམ་ལྡན་འདས་ཀྱིས་གསུངས་པ་ཡོན་ཏན་ལྔ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བའི་རིགས་སོ་ཞེས་བྱ་བ་ནས། སྔ་མ་བཞིན་དུ་སངས་རྒྱས་དང་། སངས་རྒྱས་ཀྱི་ཉན་ཐོས་པ་དང་། མཁས་པ་དང་། ཡང་དག་པར་སོང་བ་དང་།
སྐྱེས་བུ་དམ་པ་རྣམས་ཀྱིས་རྣམ་གྲངས་དུ་མས་ཀྱང་རབ་ཏུ་འབྱུང་བ་ནི་བསྟོད་ཀྱིས་ལེགས་ཏེ་རབ་ཏུ་དབྱུང་གིས་སོང་ཤིག་ཅེས་སྨྲས་ནས་དེ་རབ་ཏུ་ཕྱུང་ངོ་། །དེ་ཡང་ཛེ་ཏའི་ཚལ་དུ་སོང་ནས་དགེ་སློང་དག་ལས་རབ་ཏུ་བྱུང་སྟེ། དེ་མཉན་དུ་ཡོད་པའི་ཚོང་དཔོན་ཞིག་རབ་ཏུ་བྱུང་ངོ་ཞེས་
མིང་དུ་གྱུར་ཏེ། བསོད་ནམས་ཆེན་པོས་ཐོབ་པ་ནི་ཆོས་གོས་དང་བསོད་སྙོམས་དང་། མལ་སྟན་དང་། ནད་ཀྱི་རྐྱེན་སྨན་དཔྱད་དང་། ཡོ་བྱད་རྣམས་སོ། །དེ་དུས་ཕྱི་ཞིག་ན་བསོད་སྙོམས་ཀྱི་ཕྱིར་ཞུགས་སོ། །དེའི་ཆུང་མ་དེ་ཡང་བསོད་སྙོམས་ལ་ཞུགས་པ་དང་། དེའི་དུས་
ན་མུ་གེ་ཆེན་པོ་བྱུང་སྟེ་དེ་བསོད་སྙོམས་ཀྱིས་ཕོངས་སོ། །དེས་དེ་མཐོང་ནས་སྨྲས་པ། སྲིང་མོ་ཇི་ལྟར་འཚོ་ཞིང་འདུག །དེས་འཕགས་པ་མུ་གེའི་དུས་ལ་བབ་པས་བསོད་སྙོམས་ཀྱི་ཟས་སུ་ཡང་མི་སྟེར་ཏེ་སྡུག་བསྔལ་ཞིང་འཚོ་མོད་ཅེས་སྨྲས་པ་དང་། དེས་སྲིང་མོ་ང་ལ་བསོད་སྙོམས་
འབྱོར་མོད་ཀྱི་བཅོམ་ལྡན་འདས་ཀྱིས་གནང་ན་བསོད་སྙོམས་ཀྱི་ཕྱེད་སྦྱིན་ནོ་ཞེས་སྨྲས་པ་དང་། དེ་ཅང་མི་ཟེར་བར་དབྱར་མོ་ཁང་དུ་སོང་ནས་ཇི་ལྟ་བུར་གྱུར་པ་དགེ་སློང་མ་དག་ལ་སྨྲས་པ། དེ་དག་གིས་དགེ་སློང་ལ་སྨྲས་པ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་
ལྡན་འདས་ཀྱིས་འདི་འདྲ་བའི་དགེ་སློང་མ་ལ་གང་དགེ་སློང་གིས་བསོད་སྙོམས་ཞིག་འབྱོར་ན་དགེ་སློང་དེས་མུ་གེའི་དུས་ན་དེ་ལ་བསོད་སྙོམས་ཀྱི་ཕྱེད་སྦྱིན་པར་བྱ་སྟེ། དེ་ལ་ཐེ་ཚོམ་མ་བྱེད་ཅིག་ཅེས་བཀའ་སྩལ་ཏོ། །བཅོམ་ལྡན་འདས་ཀྱིས་འདི་འདྲ་བའི་དགེ་སློང་མ་ལ་གང་དགེ་སློང་
གིས་བསོད་སྙོམས་ཞིག་འབྱོར་ན་དགེ་སློང་དེས་མུ་གེའི་དུས་ལ་བབ་པ་དང་། དེ་ལ་བསོད་སྙོམས་ཀྱི་ཕྱེད་བྱིན་ཅིག་ཅེས་བཀའ་སྩལ་ནས། དེས་དེ་ལ་བསོད་སྙོམས་ཀྱི་ཕྱེད་བཞག་པ་དང་། དེས་དེ་ཟ་ཤིང་སོང་ངོ་། །དེ་ལ་དུས་ཕྱི་ཞིག་ན་འཕྲལ་བྱིན་པའི་བསོད་སྙོམས་ཞིག་རྙེད་དེ། དགེ་

སློང་དེའི་དྲུང་དུ་མ་སོང་བ་དང་། དགེ་སློང་དེས་བསམས་པ། དེ་ནི་གུད་ནས་ཟས་རྙེད་དུ་ངེས་ཏེ། དེའི་ཕྱིར་འདིར་མ་འོངས་ན་འདི་སུའི་ཕྱིར་གཞག་སྙམ་དུ་བསམས་ནས། དེས་དེ་མ་བཞག་པ་དང་། ཇི་ཙམ་ཞིག་ན་དགེ་སློང་མ་དེ་ཡང་འོངས་ཏེ་དེས་སྲིང་མོ་ཁྱོད་མི་འོང་སྙམ་ནས། བདག་གིས་
བསོད་སྙོམས་མ་བཞག་སྟེ། ཟས་འདི་ནི་བཞག་པ་ཞིག་ན། དེ་སྟེ་བཅོམ་ལྡན་འདས་ཀྱིས་གནང་ན་ནི་འདི་བདག་གིས་སྦྱིན་ནོ་ཞེས་སྨྲས་པ་དང་། དེས་དེའི་རྐང་པ་ལ་ཕྱག་བྱས་ནས་དབྱར་མོ་ཁང་དུ་སོང་སྟེ། དེས་ཇི་ལྟ་བུར་གྱུར་པ་དགེ་སློང་མ་དག་ལ་སྨྲས་ནས་དེ་དག་གིས་དགེ་སློང་
དག་ལ་སྨྲས་ཏེ། དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་བཞག་པ་དགེ་སློང་མས་བྱིན་ལེན་བྱོས་ལ་བཟའ་བར་གནང་ངོ་། །གང་ཡང་དགེ་སློང་མས་བཞག་པ་དེ་ནི་དགེ་སློང་
གིས་བྱིན་ལེན་བྱོས་ཤིག །འདི་ལ་ཐེ་ཚོམ་མ་བྱེད་པར་དགེ་སློང་མས་ནི་དགེ་སློང་ལ་བྱིན་ལེན་བྱའོ། །དགེ་སློང་དག་གིས་ཀྱང་དགེ་སློང་མ་ལས་བྱིན་ལེན་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དག་གིས་དགེ་སློང་མའི་དགེ་འདུན་གྱི་དབུས་སུ་ཐུན་མོང་མ་
ཡིན་པའི་བར་ཆད་ཀྱི་ཆོས་དྲིས་པ་དང་། དེ་ངོ་ཚ་ནས་གདོང་སྨད་དེ་འདུག་གོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་མ་དང་ཐུན་མོང་མ་ཡིན་པའི་བར་ཆད་ཀྱི་ཆོས་དྲི་
བ་མི་བྱའོ། །དགེ་སློང་མ་ཉིད་ཀྱིས་དྲིས་ཤིག །དགེ་སློང་གིས་དགེ་སློང་མ་ལ་དགེ་སློང་མ་དེ་ཐུན་མོང་མ་ཡིན་པའི་བར་ཆད་ཀྱི་ཆོས་འདྲི་ན་འདས་པ་དང་བཅས་པར་འགྱུར་རོ། །དགེ་སློང་ཕ་དག་གིས་ཐུན་མོང་གི་དྲི་བར་བརྩམས་ན་འོན་ཀྱང་ངོ་ཚ་ནས་མ་སྨྲས་པ་དང་། བཅོམ་
ལྡན་འདས་ཀྱིས་བཀའ་སྩལ་པ། དགེ་སློང་མ་དྲུང་དུ་ཞོག་ལ་དྲིས་ཤིག །དེས་ནི་དགེ་སློང་མ་ལ་སྨྲོས་ཤིག །དགེ་སློང་མ་དེས་ཀྱང་དགེ་སློང་ལ་སྨྲོས་ཤིག །གླེང་གཞི་མཉན་དུ་ཡོད་པ་ན་སྟེ། ཚེ་དང་ལྡན་པ་ཤཱ་རིའི་བུ་ལ་དགེ་སློང་མ་གཞན་ཞིག་བསྙེན་པར་རྫོགས་ཏེ། འདི་

ལྟར་ཁྱོད་ཤེས་རབ་མཆོག་གི་བསྟན་པ་ལ་བསྙེན་པར་རྫོགས་ནས་ཇི་ལྟར་ཁོམ་པ་ཕུན་སུམ་ཚོགས་པ་རྙེད་པར་དཀའ་བ་འདི་ལ་སྐྱོ་བར་མ་བྱེད་ཅིག་ཅེས་བསྒོ་བ་དེའི་བར་དུ་དེར་ཁྲག་ཟགས་ནས། དེ་ལ་ཚེ་དང་ལྡན་པ་ཤཱ་རིའི་བུས་སྲིང་མོ་ལོངས་ཏེ་སོང་ཤིག་ཅེས་
སྨྲས་པ་དང་། དེ་ཁྲག་ཟགས་ཏེ་ངོ་ཚ་ནས་ཡིད་ལ་གནོད་བསམ་ལངས་པ་དང་ཚེ་དང་ལྡན་པ་ཤཱ་རིའི་བུས་དེ་ཤེས་ནས་སོང་ངོ་། །དེ་ལ་དགེ་སློང་མ་དག་གིས་ནུ་མོ་དཀྱིལ་འཁོར་ཉིད་དུ་ཁྱོད་ཀྱིས་སློབ་དཔོན་ལ་མ་དད་པར་བྱའམ་ལོངས་ཞེས་བསྒོ་ན་ཁྱོད་ཅི་ཕྱིར་མི་ལྡང་ཞེས་སྨྲས་པ་དང་།
དེས་ཕུ་ནུ་མོ་དག་འདི་ནི་ཡོན་ཏན་ཆེན་པོ་དག་འདི་ལྟ་བུའི་ལས་མེད་ན་ཁྱོད་ཀྱང་འདི་སྐད་སྨྲའམ། བདག་ཙོག་པུར་འདུག་པས་ཁྲག་ཟགས་ན་ཇི་ལྟར་ལྡང་ཞེས་སྨྲས་པ་དང་། དེ་དག་ཅང་མི་ཟེར་བར་འདུག་གོ། །དེ་ལྟར་གྱུར་པ་དེ་དག་གིས་དགེ་སློང་དག་ལ་བྱས་ནས་དགེ་སློང་དག་
གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མ་བསྙེན་པར་རྫོགས་པར་བྱེད་པ་ཙོག་པུར་མ་འདུག་པར་ཕ་གུའམ། རྩྭའམ། སྟན་ནང་ཚངས་ཅན་གྱི་སྟེང་དུ་བཞག་པར་བྱ་སྟེ་བུད་མེད་ལྟོ་སྙི་བའི་ཕྱིར་རོ། །མདོར་ན།
དགེ་སློང་ལྷག་མ་མི་རུང་སྟེ། མི་གཙང་བ་ནི་རྐེད་ཆིངས་དང་། །ནུ་རྟེན་དང་ཡང་ནུ་མཆིངས་ཀྱི། །བར་ཆད་དེ་དག་བཅང་མི་བྱ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་གཽ་ཏ་མཱི་སྐྱེ་དགུའི་བདག་
མོ་ཆེན་མོ་འཁོར་ལྔ་བརྒྱ་དང་ལྗོངས་རྒྱུ་ཞིང་དོང་བ་ལས་ཉི་མ་ནུབ་ཀར་ཛེ་ཏའི་ཚལ་དུ་ཕྱིན་ནས། དེས་མཉན་དུ་ཡོད་པར་འདོང་དུ་ནི་དུས་ལས་ཡོལ་ན་འདི་ཉིད་དུ་འདི་ཇི་ལྟ་བུ་པ་དེ་ལྟ་བུར་ནུབ་མོ་གནས་ཏེ་ནང་པར་ནམ་ནངས་ནས་འདོང་ངོ་སྙམ་བསམས་ཏེ། དེ་ས་ལ་ཉལ་བས་དེའི་ཆོས་གོས་
རྣམས་རྡུལ་གྱིས་གོས་པར་གྱུར་ཏོ། །དེ་ནང་པར་ནམ་ནངས་ནས་ཕྱིར་ཡང་འོང་དགོས་ཀྱིས། ཅིག་ཆར་སྟོན་པ་ལ་ཕྱག་བྱས་ཏེ་འདོང་ངོ་སྙམ་བསམས་ནས། དེ་དག་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ་སྤྱན་སྔར་འཁོད་པ་

དང་། །བཅོམ་ལྡན་འདས་ཀྱིས་དེའི་ཆོས་གོས་ལ་རྡུལ་གོས་པ་གཟིགས་ནས་གཽ་ཏ་མཱི་ཁྱོད་ཀྱི་ཆོས་གོས་ལ་རྡུལ་སུས་བསྒོས་ཞེས་སྨྲས་པ་དང་། དེས་ཇི་ལྟ་བུར་གྱུར་པ་ཞིབ་ཏུ་གསོལ་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་
བོ་དགེ་སློང་དག་གིས་དགེ་སློང་མ་ལ་དགེ་སློང་གིས་མལ་སྟན་གྱི་ལྷག་མ་མ་བྱིན་ནམ། མ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་ལྟ་བས་ན་གནང་བ་ནི་དགེ་སློང་གི་མལ་སྟན་གྱི་ལྷག་མ་དགེ་སློང་མ་ལ་བྱིན་ཅིག །དེ་ལ་ཐེ་ཚོམ་མ་བྱེད་ཅིག །བཅོམ་
ལྡན་འདས་ཀྱིས་དགེ་སློང་དག་གིས་དགེ་སློང་གི་མལ་སྟན་གྱི་ལྷག་མ་དགེ་སློང་མ་ལ་བྱིན་ཅིག་ཅེས་བཀའ་སྩལ་པ་དང་། དགེ་སློང་གཞན་གྱིས་མལ་སྟན་ཤིན་ཏུ་བཟང་པོ་བླངས་ཏེ་དེའི་ལྷག་མ་དགེ་སློང་དག་གིས་དགེ་སློང་མ་དེ་དག་ལ་བྱིན་ནས་བཅོམ་ལྡན་འདས་ཀྱིས་བཀའ་སྩལ་
པ། །བཟང་པོ་ལས་མ་སྦྱིན་པར་གོས་རྙིང་པའམ། སྣམ་བུའམ། རས་ལྟ་བུ་ལས་བྱིན་ཅིག །གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་འོད་སྲུང་ཆེན་པོ་སྔ་དྲོ་ཤམ་ཐབས་དང་ཆོས་གོས་གྱོན། ལྷུང་བཟེད་ཐོགས་ཏེ་མཉན་དུ་ཡོད་པར་བསོད་སྙོམས་ཀྱི་ཕྱིར་
ཞུགས་སོ། །དགེ་སློང་མ་སྦོམ་དགའ་མོ་ཡང་གཙུག་ལག་ཁང་དུ་ཞུགས་ཏེ། སྟོན་གྱི་དུས་སུ་གྱུར་པས་ཆུ་བོ་རྣམས་ཆུས་གང་བས་ན་ཚེ་དང་ལྡན་པ་འོད་སྲུང་ཆེན་པོ་ཟམ་པ་ལ་རྒལ་བ་དང་། སྦོམ་དགའ་མོས་མཐོང་ནས། དེས་བསམས་པ། བླུན་པོ་འདི་མི་དགའ་བར་འགྱུར་བ་
ཞིག་བྱའོ་སྙམ་ནས། དེས་འགྲོས་མགྱོགས་ཤིང་མྱུར་དུ་སོང་སྟེ་དེ་ཟམ་པ་རྒལ་བ་ལ་དེས་ཟམ་པ་དེ་བསྒུལ་བ་དང་། ཚེ་དང་ལྡན་པ་འོད་སྲུང་ཆེན་པོ་ལྷུང་ནས་དེའི་སྦྱར་མ་དང་ཤམ་ཐབས་དག་ཆུས་གཤེར་ལྷུང་བཟེད་ཤོར་བས་ཆུར་ནུབ་པོ། ཁར་གསིལ་ནི་ཁྱེར་རོ། །དེས་སྨྲས་པ།
སྲིང་མོ་འདི་ཁྱོད་ཀྱིས་ནི་མ་ཉེས་ཀྱི། ཚེ་དང་ལྡན་པ་ཀུན་དགའ་བོས་ཉེས་ཏེ། འདི་ལྟར་ཉེས་པ་སྦོམ་པོ་སྤྱོད་པའི་བུད་མེད་རྣམས་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་བ་བསྙེན་པར་རྫོགས་ནས་དགེ་སློང་མའི་དངོས་པོར་རྗེས་སུ་ཡི་རང་བས་ལན། དེ་ལྟར་གྱུར་པ་དགེ་

སློང་དག་གིས་ཐོས་ཏེ། བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་དགོངས་པ། གང་སུ་ཞིག་དགེ་སློང་མ་དང་། དགེ་སློང་དང་ལྷན་ཅིག་ཏུ་ཟམ་པ་གཅིག་རྒལ་ན་ཉེས་པའི་དམིགས་ཡིན་ཏེ། དེ་ལྟ་བས་ན་དགེ་སློང་མས་དགེ་སློང་ཕ་དང་ལྷན་ཅིག་ཏུ་
ཟམ་པ་གཅིག་ལ་མ་རྒལ་ཅིག །རྒལ་ན་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་དགེ་སློང་མ་དགེ་སློང་དང་ལྷན་ཅིག་ཏུ་ཟམ་པ་གཅིག་ལ་མ་རྒལ་ཅིག་ཅེས་བཀའ་སྩལ་པ་དང་། ཟམ་པ་བརྟན་པ་ཞིང་ཆེན་པོ་གཞན་ལ་ཡང་དེ་དག་མ་རྒལ་ནས། བཅོམ་ལྡན་འདས་
ཀྱིས་བཀའ་སྩལ་པ། ཟམ་པ་གང་བརྟན་ཞིང་ཞེང་ཆེ་བ་ལ་ནི་དེ་དག་རྒལ་བར་བྱ་སྟེ། དེ་ལ་ཐེ་ཚོམ་དུ་མ་བྱེད་ཅིག །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་མཉན་དུ་ཡོད་པར་བསོད་
སྙོམས་ཀྱི་ཕྱིར་ཞུགས་ནས། རིམ་བཞིན་དུ་བཙུན་མོ་ཕྲེང་ལྡན་མའི་དྲུང་དུ་སོང་བ་དང་། དེས་བདེ་བར་འོངས་པའི་ཚིག་སྙན་པར་སྨྲས་ནས་སྟན་བཏིང་ངོ་། །དེ་གཏམ་ཟེར་ཞིང་སྐད་ཅིག་འདུག་ནས་ཕྲེང་ལྡན་མ་ཁྱོད་ཀྱི་རྐེད་པ་ཕྲ་ཞིང་ཕྲའོ་ཞེས་སྨྲས་པ་དང་། དེས་འཕགས་མ་
ཁྱོད་ཀྱིས་འདི་དྲིས་ཏེ་ཅིར་དགོས། བདག་ནི་ཇི་ནས་ཀྱང་རྣམ་པ་གང་གིས་ལྷའི་སེམས་མཉེས་པར་བྱེད་དོ་ཞེས་སྨྲས་པ་དང་། དེས་ཕྲེང་ལྡན་མ་དེ་བཞིན་མོད་ཀྱི་འོན་ཀྱང་ཐེ་ཚོམ་དགྲོལ་བ་ཙམ་དུ་དྲིས་སྨྲོས་ཤིག་ཅེས་བྱས་པ་དང་། དེས་འཕགས་མ་བདག་ནི་རྐེད་ཆིངས་བཅངས་
སོ་ཞེས་སྨྲས་པ་དང་། དེས་ལེགས་ཏེ་དེའི་ཕྱིར་ཁྱོད་ལ་སྐྱེ་བོ་མང་པོ་དག་གི་ཡིད་མགུ་བ་དང་དགའ་བར་བྱེད་དོ་ཞེས་སྨྲས་པ་དང་། དེ་ཅང་མི་ཟེར་བར་འདུག་གོ། །སྦོམ་དགའ་མོ་དབྱར་མོ་ཁང་དུ་སོང་ནས་རྐེད་བཅིངས་བཅངས་སོ། །དུས་ཕྱི་ཞིག་ན་སྦོམ་དགའ་མོ་ཆུ་བོ་ཨ་
ཛིར་བ་ཏིའི་དྲུང་ན་དགེ་སློང་མ་དག་དང་ལྷན་ཅིག་ཁྲུས་བྱེད་པ་ན་དེ་དག་གིས་མཐོང་ནས། འཕགས་མ་བདག་ཅག་གི་རྐེད་པ་ནི་སྦོམ་ཞིང་སྦོམ་ལ། ཁྱོད་ཀྱི་ཕྲ་ཞིང་ཕྲ་བ་འདི་ཅིའི་ཕྱིར་ཞེས་དྲིས་པ་དང་། དེས་ནུ་མོ་དག་བདག་ནི་རྐེད་བཅིངས་བཅངས་སོ། །དེ་བས་ན་བདག་གི་

རྐེད་པ་འདི་འདྲའོ་ཞེས་སྨྲས་སོ། །དེ་དག་གིས་འཕགས་མ་ཁྱོད་རྐེད་ཆིངས་བཅང་དུ་རུང་ངམ་ཞེས་དྲིས་པ་དང་། དེས་ནུ་མོ་དག་རུང་ཡང་བླ་མི་རུང་ཡང་བླ་སྟེ་བདག་གིས་ནི་བཅངས་སོ་ཞེས་སྨྲས་པ་དང་། དགེ་སློང་མ་དག་འཕྱ་ཞིང་སྨོད་དོ། །ངན་དུ་འཛེར་བ་ནི་དགེ་སློང་མས་རྐེད་
ཆིངས་འཆང་བ་ལྟ་ག་ལ་སྲིད། དེ་ལྟར་གྱུར་པ་དེ་དག་གིས་དགེ་སློང་རྣམས་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་རྐེད་ཆིངས་མ་འཆང་ཤིག །དགེ་སློང་མས་རྐེད་ཆིངས་
འཆང་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་དགེ་སློང་མ་སྦོམ་དགའ་མོས་སྔ་དྲོ་ཤམ་ཐབས་དང་ཆོས་གོས་བགོས་ལྷུང་བཟེད་ཐོགས་ཏེ་སྔ་མ་བཞིན་དུ། སྐད་ཅིག་འདུག་པའི་བར་དུ་གཏམ་བྱས་པ་དང་། ཕྲེང་ལྡན་མ་ཁྱོད་ཀྱི་ནུ་མ་ཅི་
ཕྱིར་མཐོ་ཞིང་འགྲེང་ཞེས་དྲིས་པ་དང་། འཕགས་མ་འདི་དྲིས་ཏེ་ཁྱོད་ལ་ཅི་དགོས། བདག་ནི་རྣམ་པ་ཅི་དང་ཅིས་ཀྱང་ལྷའི་སེམས་མཉེས་པར་བྱེད་དོ་ཞེས་སྨྲས་པ་དང་། དེས་ཕྲེང་ལྡན་མ་དེ་བཞིན་མོད་ཀྱིས་ཐེ་ཚོམ་དགྲོལ་བའི་ཕྱིར་དྲིས་པ་སྨྲོས་ཤིག་ཅེས་སྨྲས་པ་དང་། དེས་
འཕགས་མ་བདག་ནི་ནུ་རྟེན་འཆང་ངོ་ཞེས་སྨྲས་སོ། །དེས་ལེགས་སོ་དེ་ལྟ་བས་ན་ལྷ་མོ་ཁྱོད་ནི་བུད་མེད་རིན་པོ་ཆེའོ་ཞེས་སྨྲས་པ་དང་། དེ་ཅང་མི་ཟེར་བར་འདུག་གོ། །སྦོམ་དགའ་མོ་དབྱར་མོ་ཁང་དུ་སོང་ངོ་། །དེས་དབྱར་མོ་ཁང་དུ་སོང་ནས་ནུ་རྟེན་བཅངས་པ་ནས། སྔ་མ་དང་
འདྲ་བའི་བར་དུ་སྟེ། དེ་ལྟ་བས་ན་དགེ་སློང་དག་དགེ་སློང་མས་ནུ་རྟེན་མ་འཆང་ཤིག །དགེ་སློང་མས་ནུ་རྟེན་འཆང་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་དང་ཆོས་གོས་བགོས་ལྷུང་བཟེད་
ཐོགས་ཏེ་སྔ་མ་དང་འདྲ་བ་ནས། སྐད་ཅིག་གཏམ་ཟེར་ཞིང་འདུག་པའི་བར་དུ་ཕྲེང་ལྡན་མ་ཅི་ཕྱིར་ཁྱོད་ཀྱི་ནུ་མ་འཕྱར་ཅེས་སྨྲས་པ་དང་། དེས་འཕགས་མ་ཁྱོད་ཀྱིས་འདི་དྲིས་ཏེ་ཅི་དགོས་བདག་གི་རྣམ་པ་ཅི་དང་ཅིས་ལྷའི་སེམས་མཉེས་པར་བགྱིད་དོ་ཞེས་སྨྲས་པ་དང་། ཕྲེང་ལྡན་མ་དེ་

བཞིན་མོད་ཀྱི་ཐེ་ཚོམ་དགྲོལ་བའི་ཕྱིར་དྲིས་པ་སྨྲོས་ཤིག་ཅེས་སྨྲས་པ་དང་། དེས་འཕགས་མ་བདག་ནི་ནུ་མའི་བར་ཆད་འཆང་ངོ་ཞེས་སྨྲས་པ་དང་། དེས་ལེགས་སོ་ཞེས་བྱས་ན། ཁྱོད་ལ་ནང་གི་བཙུན་མོ་དགའ་ཞིང་ཡིད་མགུའོ་ཞེས་སྨྲས་པ་དང་། དེ་ཅང་མི་ཟེར་
བར་འདུག་གོ། །སྦོམ་དགའ་མོ་ཡང་དབྱར་མོ་ཁང་དུ་སོང་ངོ་། །དེས་དབྱར་མོ་ཁང་དུ་སོང་ནས་ནུ་མའི་བར་ཆད་བཅངས་པ་ནས་སྔ་མ་དང་འདྲ་བའི་བར་དུ་སྟེ། དེ་ལྟ་བས་ན་དགེ་སློང་མས་ནུ་མའི་བར་ཆད་མ་འཆང་ཤིག །དགེ་སློང་མ་ནུ་མའི་བར་ཆད་འཆང་ན་འདས་པ་དང་བཅས་
པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་དགེ་སློང་མ་རྐེད་ཆིངས་མ་འཆང་ཤིག་ཅེས་གསུངས་པ་དང་། སྦོམ་དགའ་མོས་རས་ཅི་དང་ཅི་ཡང་རུང་དེས་རྐེད་པ་བཅིངས་པ་དང་། དེ་ནས་དུས་ཕྱི་ཞིག་ན་སྦོམ་དགའ་མོ་ཆུ་བོ་ཨ་ཛིར་བ་ཏིར་དགེ་སློང་
མ་དང་ལྷན་ཅིག་ཏུ་ཁྲུས་བྱེད་པ་དེ་དག་གིས་དེ་མཐོང་ནས། འཕགས་མ་དགེ་སློང་མའི་རྐེད་པ་རྐེད་ཆིངས་ཀྱིས་བཅིང་དུ་བཅོམ་ལྡན་འདས་ཀྱིས་མ་གནང་ན། ཁྱོད་ཀྱི་རྐེད་པ་ཕྲ་བ་ཕྲ་བ་ཞེས་དྲིས་པ་དང་། དེས་ནུ་མོ་བདག་ནི་རས་ཅི་དང་ཅི་ཡང་རུང་བས་དཀྲིས་སོ་ཞེས་སྨྲས་པ་དང་།
དེ་དག་གིས་ཁྱོད་རས་ཅི་དང་ཅིས་ཀྱང་དཀྲིས་རུང་ངམ་ཞེས་དྲིས་པ་དང་། དེས་ནུ་མོ་དག་རུང་ཡང་བླ་མི་རུང་ཡང་བླ་སྟེ། བདག་གིས་ནི་བཅིངས་སོ་ཞེས་ཟེར་བ་དང་། དགེ་སློང་མ་དག་འཕྱ་སྨོད་ངན་དུ་འཛེར་བ་ནི་དགེ་སློང་མས་རས་ཅི་དང་ཅིས་ཀྱང་རྐེད་པ་དཀྲི་བ་ག་ལ་རིགས། དེ་ལྟར་
གྱུར་པ་དེ་དག་གིས་སྔ་མ་དང་འདྲ་བའི་བར་དུ་སྟེ། དགེ་སློང་མས་རས་ཅི་དང་ཅིས་ཀྱང་རུང་རྐེད་པ་མ་དཀྲི་ཤིག །དགེ་སློང་མས་རས་ཅི་དང་ཅིས་ཀྱང་རུང་། རྐེད་པ་དཀྲིས་ན་འདས་པ་དང་བཅས་པར་འགྱུར་རོ།། །།མདོར་ན། བཙོག་པའི་གནས་སུ་མི་དོར་ཏེ། མངལ་དང་
མི་གཙང་མི་བཏུང་ངོ་། །བདག་གི་བུ་ལ་རེག་པར་བྱ། །གཞན་གྱི་བུ་ལ་རེག་མི་བྱའོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། ཚེ་དང་ལྡན་པ་འོད་སྲུང་ཆེན་པོ་སྔ་དྲོ་ཤམ་ཐབས་དང་ཆོས་གོས་

བགོས་ལྷུང་བཟེད་ཐོགས་ཏེ་མཉན་དུ་ཡོད་པར་བསོད་སྙོམས་ཀྱི་ཕྱིར་ཞུགས་སོ། །དགེ་སློང་མ་སྦོམ་དགའ་མོ་ཡང་བསོད་སྙོམས་ཀྱི་ཕྱིར་ཞུགས་པ་དང་། ཚེ་དང་ལྡན་པ་འོད་སྲུང་ཆེན་པོ་བཤང་སའི་ཆུ་ཁུང་དང་ཉེ་བ་ཞིག་ནས་མར་སོང་བ་དང་། སྦོམ་དགའ་མོས་མཐོང་སྟེ། དེས་
བསམས་པ། བླུན་པོ་འདི་མི་དགའ་བར་འགྱུར་བ་ཞིག་བྱའོ་སྙམ་ནས་མྱུར་ཞིང་རིངས་པར་སོང་སྟེ། བཤང་སའི་ཆུ་ཁུང་གི་ནང་དུ་ཕ་གུ་འཕངས་པ་དང་། ཚེ་དང་ལྡན་པ་འོད་སྲུང་ཆེན་པོའི་ཆོས་གོས་དང་བསོད་སྙོམས་ཀྱི་སྣོད་རྣམས་མ་རུང་བར་བྱས་ནས་དེས་སྨྲས་པ། སྲིང་མོ་ཁྱོད་
ཀྱིས་ནི་མ་ཉེས་པ་ནས་སྔ་མ་བཞིན་ཏེ་དེ་ལྟ་བུར་གྱུར་པ་དགེ་སློང་དག་གིས་ཐོས་ནས་བཅོམ་ལྡན་འདས་ལ་གསོལ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་དགེ་སློང་མས་དགེ་སློང་ཕ་ལ་མི་གཙང་བས་མ་རུང་བར་མ་བྱེད་ཅིག །དགེ་སློང་ཕ་
ལ་མི་གཙང་བས་མ་རུང་བར་བྱེད་ན་འདས་པ་དང་བཅས་པར་འགྱུར་རོ། །གླེང་གཞི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་ཞིག་བླངས་ཏེ་དེ་དང་ལྷན་ཅིག་ཏུ་རྩེ་དགའ་
ཡང་ཡོངས་སུ་སྤྱོད་དོ། །དེ་དུས་ཕྱི་ཞིག་ན་ཟོང་ཁྱེར་ནས་ཡུལ་གཞན་དུ་སོང་བ་དང་། དེས་ཆུང་མ་ལ་སྨྲས་པ། བཟང་མོ་ང་ཟོང་ཁྱེར་ཏེ་ཡུལ་གཞན་དུ་འགྲོས་ཁྱོད་མི་གཡེང་ཞིང་བག་ཡོད་པར་ཁྱིམ་སྲུངས་ཤིག །དེས་ཇོ་བོ་ལེགས་ཏེ་དེ་བཞིན་དུ་བགྱིས། དུས་དུས་སུ་
གཏམ་སྤྲིངས་ཤིག་ཅེས་སྨྲས་སོ། །དེ་ཟོང་ཁྱེར་ཏེ་ཡུལ་གཞན་དུ་སོང་བ་དང་། དེའི་ཆུང་མ་དེ་གོས་དང་ཟས་བཟང་བའི་ཕྱིར་ཉོན་མོངས་པས་གཟིར་བར་གྱུར་ཏེ། དེས་སྐྱེས་པ་གཞན་དང་ལྷན་ཅིག་ཏུ་ཡོངས་སུ་སྤྱད་པས་སེམས་ཅན་དང་ལྡན་པར་གྱུར་ནས་བསམས་པ། མངལ་
ན་གནས་པ་བསད་དོ། །བདག་གི་ཁྱོ་འོངས་པ་དང་མ་རུང་བར་བྱེད་དོ་སྙམ་ནས། དེས་མངལ་ན་གནས་པ་བསད་ནས་ལྟུང་བར་བྱ་སྟེ། འདི་ཇི་ལྟར་དོར། གང་དུ་དོར་མི་ཤེས་ཏེ་རབ་ཏུ་སེམས་ཁོང་དུ་ཆུད་ཅིང་འདུག་པ་དང་། སྦོམ་དགའ་མོ་ཁྱིམ་དེར་བསོད་སྙོམས་ལ་

ཞུགས་ཏེ། དེས་མཚན་བཟངས་མ་བསོད་སྙོམས་བྱིན་ཅིག་ཅེས་སྨྲས་པ་དང་། དེས་བདག་མི་དགའ་བས་གཟིར་བས་བསོད་སྙོམས་སྦྱིན་དུ་སུ་ཡང་མེད་ཀྱིས་བཞུད་ཅིག་ཅེས་སྨྲས་པ་དང་། དེས་སྨྲས་པ། མཚན་བཟངས་མ་ཤི་བའམ་ཅིག་མེད་དམ། དེས་
འཕགས་མ་སུ་ཡང་མ་ཤི་མོད་ཀྱི་བདག་ལས་བུ་ཞིག་བྱུང་སྟེ། ཇི་ལྟར་དོར། གང་དུ་དོར་བ་བདག་གིས་མི་ཤེས་སོ་ཞེས་སྨྲས་པ་དང་། དེས་སྨྲས་པ། མཚན་བཟངས་མ་དེ་བདག་གིས་དོར་ན་བདག་ལ་བསོད་སྙོམས་སྦྱིན་ནམ། འཕགས་མ་གསོལ་ལོ། །ཕྱི་བཞིན་འབྲང་
བའི་དགེ་སློང་མ་ལ་ཡང་སྦྱིན་ནམ་གསོལ་ལོ། །དགེ་སྐོས་ལ་ཡང་སྦྱིན་ནམ། གསོལ་ལོ། །ལེགས་ཀྱིས་དོར་རོ། །དེས་དེ་ལྷུང་བཟེད་ཆེན་པོར་བཅུག་སྟེ། ཁང་པ་སྟོང་པར་ཁྱེར་ནས་དེར་དོར་བ་ལ་ཞུགས་པ་དང་། ཁྱིམ་སྟོང་པ་དེར་སྔོན་སྐྱེས་པ་ཞིག་ཞུགས་པ་དེས་
མཐོང་ནས་དེས་མགོ་རེག་དགེ་སྦྱོང་མ་ཅི་བྱེད་ཅེས་སྨྲས་པ་དང་། དེས་ཁྱེད་ཅག་ལྟ་བུ་ནལ་གྱི་བུ་དང་སུའི་བུ་གཏོལ་མེད་པས་རིགས་དང་ལྡན་པའི་བུད་མེད་འདི་འདྲ་བའི་ལས་བྱས་པ་དེ་འདོར་རོ་ཞེས་སྨྲས་པ་དང་། དེས་དེ་ལ་བརྒྱད་བཀག་སྟེ་སོང་ངོ་། །དེས་དགེ་སློང་མ་ཞིག་
མཐོང་ནས་དགེ་སློང་མ་མི་སྲུན་པ་ཁྱོད་ཀྱི་སྦོམ་དགའ་མོས་འདི་དང་འདི་ལྟ་བུ་བྱས་སོ་ཞེས་སྨྲས་པ་དང་། དེ་ལན་མེད་ནས་ཅང་མི་ཟེར་བར་འདུག་གོ། །དེ་ལྟར་གྱུར་པ་དགེ་སློང་མ་དག་གིས་དགེ་སློང་ཕ་དག་ལ་སྨྲས་ཏེ། དགེ་སློང་དག་གིས་བཅོམ་ལྡན་འདས་ལ་གསོལ་
ནས། །བཅོམ་ལྡན་འདས་ཀྱིས་དགོངས་པ། འདི་ལྟར་དགེ་སློང་མས་ལྷུང་བཟེད་ཆེན་པོ་འཆང་ན་ཉེས་པའི་དམིགས་ཡིན་ཏེ། དེ་ལྟ་བས་ན་དགེ་སློང་མ་དག་གིས་ལྷུང་བཟེད་ཆེན་པོ་མི་བཅང་བར་མཁྱེན་ནས་དགེ་སློང་དག་ལ་བཀའ་སྩལ་པ། དགེ་སློང་དག་དགེ་སྦྱོང་མ་མ་ཡིན་
པའི་སྦོམ་དགའ་མོས་དགེ་སློང་མ་མ་ཡིན་པ་བྱས་ཏེ། དེ་ལྟ་བས་ན་དགེ་སློང་མས་འདི་འདྲ་བའི་ལས་མི་བྱ་སྟེ། ལྷུང་བཟེད་ཆེན་པོ་ཡང་མ་འཆང་ཤིག །དགེ་སློང་མས་དེ་འདྲ་བའི་ལས་བྱེད་དམ། ལྷུང་བཟེད་ཆེན་པོ་འཆང་ན་འདས་པ་དང་བཅས་པར་འགྱུར་རོ། །

བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མས་ལྷུང་བཟེད་ཆེན་པོ་མ་འཆང་ཤིག །བཅོམ་ལྡན་འདས་ཀྱིས་བཀའ་སྩལ་པ། གང་དགེ་སློང་གི་ལྷུང་བཟེད་ཆུང་ངུ་ནི་དགེ་སློང་མའི་ཆེན་པོའོ། །གླེང་གཞི་ནི་མཉན་དུ་ཡོད་པ་ན་སྟེ། ནམ་དགེ་སློང་མ་གུབ་ཏས་གཅིན་
གྱི་ཐིགས་པ་ཅིག་ནི་ཁར་བླུགས། ཅིག་ནི་མངལ་གྱི་སྒོར་བཅུག་པ་དང་། སེམས་ཅན་གྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པས་གཞོན་ནུ་འོད་སྲུང་བྱུང་སྟེ། དེ་ལ་གུབ་ཏས་མ་རེག་པ་དང་དེ་ངུ་ནས། །དེའི་གཉེན་བཤེས་དག་གིས་གུབ་ཏ་ཁྱེའུ་ཅིའི་ཕྱིར་ངུ་ཞེས་དྲིས་པ་
དང་། དེ་ཅང་མི་ཟེར་ནས་དགེ་སློང་མ་དག་གིས་ཚེ་དང་ལྡན་པ་བཅོམ་ལྡན་འདས་ཀྱིས་བསླབ་པའི་གཞི་བཅས་ཏེ། དགེ་སློང་མས་སྐྱེས་པ་ལ་མ་རེག་ཤིག །འདིས་དེ་ལ་མ་རེག་སྟེ། དེ་བས་ན་ངུའོ་ཞེས་སྨྲས་པ་དང་། དེ་དག་གིས་བཅོམ་ལྡན་འདས་ནི་ཐུ