Kinh tạng Tây Tạng (Kangyur Đại Học) — 011_འདུལ་བ།_ད

།དེས་སྨྲས་པ། ངས་ཚང་འདི་བཀང་སྟེ་བཞག་ན། གལ་ཏེ་ཁྱོད་ཀྱིས་མ་ཟོས་ན་འོ་ན་ཚང་འདི་ཅིའི་ཕྱིར་འགྲིབས་པར་གྱུར། དེས་སྨྲས་པ། ཚང་འདི་ཅིའི་ཕྱིར་འགྲིབས་མ་ཤེས། བདག་གིས་ནི་འདི་ལས་འབྲས་བུ་ཅིག་
ཀྱང་མ་ཟོས་སོ། །ཁྱོད་ཀྱིས་ཟོས་སོ་ངས་མ་ཟོས་སོ་ཞེས་དེ་གཉིས་ལན་དང་ཡང་ལན་འདེབས་པ་ན་ཐབ་མོ་བྱུང་སྟེ་དེས་ཐི་བ་མོ་དེ་མཆུས་བསྣུན་ནས་སྲོག་དང་བྲལ་ཏེ་དེ་དེ་ཉིད་ན་འཕྱང་ཞིང་འདུག་གོ། །རེ་ཞིག་ཅིག་ན་དུས་མ་ཡིན་པའི་ཆར་ཆེན་པོ་བབ་པ་དང་། ཡང་ཚང་དེ་དེ་ཁོ་ན་
བཞིན་དུ་འབྲས་བུ་དེ་དག་གིས་གང་ནས་དེས་བསམས་པ། ཚང་འདི་འབྲས་བུ་དག་གིས་ཡང་གང་བ་ལས་ན་དེས་འདི་དག་མ་ཟོས་སོ་སྙམ་ནས། དེས་དེ་ལ་བཟོད་པ་གསོལ་བར་བརྩམས་པ། ཁྲ་མོ་སྡུག་པ་ལོངས་ཤིག །འདི་དག་ཁྱོད་ཀྱིས་མ་ཟོས་ཏེ་བདག་གི་ཚང་འདི་གང་གིས་
ཉེས་པ་ཅིག་བཟོད་པར་མཛོད་ཅིག་ཅེས་བྱས་པ་དང་། ལྷས་ཚིགས་སུ་བཅད་དེ་སྨྲས་པ། ནགས་ཚལ་རྒྱུ་བའི་ཐི་བ་ནི། །འདབ་མ་ཁྲ་བོ་མིག་དམར་བ། །རང་གིས་སྡུག་མ་བསད་ནས་ནི། །བློ་ངན་ཅི་ཞིག་མྱ་ངན་བྱེད། །ཇི་ལྟར་ཐི་བ་བབ་ཅོལ་སྤྱོད་པ་ཡིས། །འདི་ན་སྡུག་པ་

ཉེས་མེད་བསད་ནས་ནི། །བློ་རྨོངས་མྱ་ངན་བྱེད་ཅིང་བཟང་མོ་ཞེས། །དེ་ལ་བཞམས་ཏེ་ཉེས་ཅིག་བཟོད་གསོལ་བ། །དེ་བཞིན་རྒྱལ་པོ་གཟུ་ལུམས་སྤྱོད་པ་ཡིས། །ཞི་བ་ཡིད་དང་འཐད་པ་འདིར་བསད་ནས། །བློ་རྨོངས་མྱ་ངན་བྱེད་ཅིང་བཟང་མོ་ཞེས། །དེ་ལ་བཞམས་
ཏེ་ཉེས་ཅིག་བཟོད་པ་གསོལ། །ཞེས་བགྱི་བ་ལགས་ཏེ། ལྷ་ཁྱོད་ཀྱིས་གསུངས་པའི་དོན་ནི་བདག་དཔེ་དེ་དང་འདྲ་བ་སྙམ་བགྱིད་དོ། །ལྷ་གཞན་ཡང་ཁྱིམ་བདག་ཅིག་དབྱར་འདས་པ་དང་སྟོན་གྱི་དུས་སུ་སྲན་མའི་ཁུར་འཚལ་ནས་ཞིང་ཐོག་ཏུ་ཆས་སོ། །དེས་སྲན་མའི་
ཁུར་དེ་ཤིང་དྲུང་ཞིག་ཏུ་བཞག་ནས་ཕ་ཟད་དུ་བཤང་བའི་སར་མཆིས་པ་དང་། ཇི་ཙམ་ན་སྤྲེའུ་ཞིག་ཤིང་དེ་ལས་བབས་ནས་སྲན་མ་ལས་སྤར་གང་བླངས་ཏེ་ཡང་ཤིང་དེ་ལས་འཛེགས་སོ། །དེ་འཛེག་པ་ན་སྲན་མ་འབྲུམ་བུ་གཅིག་ཤོར་དེ་ས་ལ་ལྷུང་ནས་དེས་སྲན་མ་སྤར་གང་པོ་དེ་
བོར་ཏེ། སྲན་མ་འབྲུམ་བུ་ཅིག་པོ་དེ་བཙལ་བར་བརྩམས་པ་ན། ཁྱིམ་བདག་དེས་དེ་ལ་བོང་བ་ཅིག་བསྣུན་ཏེ་དེ་དུས་ལས་འདས་པ་དང་ལྷས་ཚིགས་སུ་བཅད་དེ་སྨྲས་པ། སྲན་མ་སྤར་གང་བོར་ནས་སུ། །གང་ཞིག་འབྲས་བུ་གཅིག་ཚོལ་བ། །ཤིན་ཏུ་ཚོགས་མང་ལྡན་པ་ཡི། །
སྤྲེའུ་འདི་ཀྱེ་མ་རེ་མི་མཛངས། །ཞེས་བགྱི་བ་ལགས་ཏེ་ལྷས་གསུངས་པའི་དོན་གང་ཞིག་བ་ལང་སྐྱོང་གི་མ་བཀུམ་ནས། ཡང་བཟོད་པ་གསོལ་བར་བཞེད་པ་ནི་བདག་དཔེ་དེ་དང་འདྲ་བ་སྙམ་བགྱིད་དོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་ཚིག་ཅིག་ཁོ་ནའི་ཁ་ལ་བ་ལང་
སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། སྟོན་པ་གང་ཟག་ཟླ་མེད་པ། །གཅིག་པུ་ཚིག་ནི་གཅིག་གསུང་སྟེ། །གསུང་བ་དེ་ནི་ངེས་ལགས་པས། །འདི་ལ་བདག་བློ་འགྱུར་མ་མཆིས། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་
གང་གི་ཕྱིར་བ་ལང་སྐྱོང་གི་མ་ཞི་བ་བསད་པས་ང་ལོང་བར་བྱས་སོ། །དེས་སྨྲས་པ། ལྷ། ལྷ་དང་མིར་བཅས་འཇིག་རྟེན་འདིར། །ལོང་བ་གཉིས་ནི་ངེས་གྲུབ་པ། །རང་བཞིན་གྱིས་ནི་དམུས་ལོང་དང་། །གང་ཡང་ཆོས་ལ་མི་གནས་པའོ། །འཇིག་རྟེན་འདི་དང་ཕ་

རོལ་དུ། །གཞན་ཡང་ལོང་བ་གཉིས་ལགས་ཏེ། །གང་ལ་སྡིག་ལྟ་དེ་ཡོད་དམ། །གང་ཞིག་ཁྲིམས་ལ་མི་བརྟེན་པའོ། །ཞེས་བགྱི་བ་ཁྱོད་ཀྱིས་མ་གསན་ཏམ། །སྡོམ་ནི། སྒྲེན་མོ་ཅིར་ཡང་མི་རུང་དང་། །མ་སྤྱད་གཏུན་དང་ལན་གཅིག་དང་། །ནད་དང་བག་ཚ་བརྙས་
པ་དང་། །དེ་བཞིན་དུ་ནི་བགས་ཀྱིས་སོ། །བྱིས་པ་དང་ནི་བཤེས་དག་དང་། །སྐྱེས་བུ་ཐ་ཤལ་ཉིད་དང་ནི། །ཤིང་རྟ་ཡིས་ནི་འཁོར་ལོ་དང་། །གཡོ་གཏོགས་པར་ནི་ཡོངས་སུ་རྫོགས། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་
བསད་པས་ང་སྒྲེན་མོར་བྱས་སོ། །དེས་སྨྲས་པ། ལྷ་སྒྲེན་མོ་གསུམ་གྱི་མི་མཛེས་པ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གསུམ་གང་ཡིན། ལྷ། ཀླུང་ནི་ཆུ་མེད་སྒྲེན་མོ་སྟེ། །ཡུལ་འཁོར་འགྲོན་མེད་སྒྲེན་མོའོ། །གལ་ཏེ་མིང་པོ་བཅུ་ཡོད་
ཀྱང་། །ཁྱོ་མེད་བུད་མེད་སྒྲེན་མོའོ། །ཞེས་བགྱི་བ་ལགས་སོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་ཅིར་ཡང་མི་རུང་བར་བྱས་སོ། །དེས་སྨྲས་པ། ལྷ་འཇིག་རྟེན་ན་ཅིར་ཡང་མི་རུང་བ་གསུམ་མཆིས་པར་
ཁྱོད་ཀྱིས་མ་གསན་ཏམ། དེས་སྨྲས་པ། གསོས་པ་གསུམ་གང་ཡིན། ལྷ། རྟ་བོ་ཐལ་ཀར་བང་བུལ་དང་། །སྟོན་མོ་བྱ་ན་མེད་པ་དང་། །བུད་མེད་གང་ཞིག་ཁྱིམ་སུན་འབྱིན། །འདི་གསུམ་ཅིར་ཡང་མི་རུང་བའོ། །རྒྱལ་པོས་སྨྲས་པ། གསོས་པ་བ་
ལང་སྐྱོང་གི་མ་ཞི་བ་ལོངས་མ་སྤྱད་པར་ཁྱོད་ཀྱིས་བསད་དོ། །དེས་སྨྲས་པ། ལྷ། སོལ་བ་བྱེད་པའི་གོས་དང་ནི། །བཀྲུ་བཤལ་བྱེད་པའི་ལྷམ་དག་དང་། །རྒྱལ་པོའི་བཙུན་མོའི་འཁོར་རྣམས་ནི། །ལོངས་མ་སྤྱད་པར་དེངས་པར་འགྱུར། །ཞེས་བགྱི་བ་ཁྱོད་ཀྱིས་
མ་གསན་ཏམ། ལྷ་དེ་དག་འབའ་ཞིག་ཏུ་མ་བས་གཞན་ཡང་གསུམ་སྟེ། ནགས་ཀྱི་ཤིང་གི་མེ་ཏོག་དང་། །དཀའ་ཐུབ་ཅན་གྱི་ལང་ཚོ་དང་། །ཤིང་རྟ་མཁན་གྱི་ཆུང་མ་དག །ལོངས་མ་སྤྱད་པར་དེངས་པར་འགྱུར། །རྒྱལ་པོས་སྨྲས་པ། གསོས་པ་གང་གི་

ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་གཏུན་གྱིས་བརྡེག་པའི་རྒྱུའོ། །དེས་སྨྲས་པ། ལྷ། ཤིང་མཁན་རྩང་རྩིང་འཇོག་པ་དང་། །བཟང་མཁན་སྐུད་པ་རིང་པོ་དང་། །ཁ་ལོ་སྒྱུར་བ་མིག་རྒྱང་ཐུང་། །དེ་གསུམ་གཏུན་གྱིས་བརྡེག་རྒྱུའོ། །ཞེས་
བགྱི་བ་ཁྱོད་ཀྱིས་མ་གསན་ཏམ། ལྷ་དེ་དག་འབའ་ཞིག་ཏུ་མ་བས། གཞན་ཡང་གསུམ་སྟེ། ཕོ་ཉའི་ཕོ་ཉ་གང་ཡིན་དང་། །མངག་གཞུག་པ་ཡི་མངག་གཞུག་དང་། །བུད་མེད་འཕྱོན་མ་བྱེད་པ་གང་། །དེ་གསུམ་བཏུན་གྱིས་བརྡེག་རྒྱུའོ། །ལྷ་དེ་དག་འབའ་ཞིག་ཏུ་མ་བས་
གཞན་ཡང་གསུམ་སྟེ། གནག་རྫི་གྲོང་ན་རྒྱུ་བ་དང་། །འབྲེག་མཁན་ནགས་ན་རྒྱུ་བ་དང་། །མག་པ་རྟག་ཏུ་འོང་བྱེད་པ། །དེ་གསུམ་གཏུན་གྱིས་བརྡེག་རྒྱུའོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་བ་ལང་སྐྱོང་གི་མ་ཞི་བ་ལན་གཅིག་གིས་བསད་དོ། །དེས་སྨྲས་པ། ལྷ།
རྒྱལ་པོ་སྨྲ་བ་ལན་གཅིག་སྟེ། །བུ་མོ་སྦྱིན་པ་ལན་གཅིག་གོ། །འཕགས་པའི་གཟིགས་པ་ལན་གཅིག་སྟེ། །དེ་གསུམ་ལན་རེ་ལན་རེའོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་
ཁྱོད་ནི་རང་གིས་ནད་བསླངས་སོ། །དེས་སྨྲས་པ། ལྷ། སྡར་མ་སྣ་ཚོགས་གོ་གྱོན་དང་། །རྩྭ་མཇིང་ཆུང་ངུ་ནོར་མང་དང་། །རྒན་པོ་ཆུང་མ་གཞོན་ལེན་པ། །དེ་དག་རང་གིས་ནད་བསླངས་སོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་
ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་ནི་ཁྱོད་ལ་བག་ཚའོ། །དེས་སྨྲས་པ། ལྷ། དཀའ་ཐུབ་ཅན་ནི་བླུན་མཐོང་དང་། །དཔའ་བོ་རྨ་མཚན་མེད་པ་དང་། །བུ་མོ་ཆེན་མོ་མཐོང་ནས་ནི། །སྙིང་ལ་བག་ཚ་སྐྱེ་བར་འགྱུར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་
པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་བརྙས་སོ། །དེས་སྨྲས་པ། ལྷ། ཅལ་ལེ་ཅོལ་ལེ་སྨྲ་བ་དང་། །གཉིས་པ་གོས་ངན་གྱོན་པ་དང་། །སྐྲུ་ཞིང་ཟ་བ་གང་ཡིན་པ། །དེ་གསུམ་བརྙས་པར་བྱ་བ་ཡིན། །ཞེས་བགྱི་བ་ཁྱོད་ཀྱིས་

མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ངས་ཁྱོད་དགྲ་ཞིག་བགས་ཀྱིས་སྤེལ་ཏོ། །དེས་སྨྲས་པ། ལྷ། ཉ་ནི་བགས་ཀྱིས་བཟའ་བར་བྱ། །རི་བོ་ལ་ནི་བགས་ཀྱིས་གཟེག །དོན་རྣམས་བགས་ཀྱིས་
བསྒྲུབ་བྱ་སྟེ། །འདི་གསུམ་བགས་ཀྱིས་བགས་ཀྱིས་བྱ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བྱིས་པའོ། །དེས་སྨྲས་པ། ལྷ། མ་འདྲིས་པ་ལ་ཡིད་རྟོན་དང་། །མ་
རུངས་པ་ལ་སྟེན་པ་དང་། །གྱ་ཙོམ་དུ་ནི་ཡོངས་གཏོང་བ། །བྱིས་པའི་མཚན་ཉིད་རྣམ་གསུམ་མོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བཤེས་པ་འབྱེད་པ་ཡིན་ནོ། །
དེས་སྨྲས་པ། ལྷ། བཤེས་རྣམས་ལ་ནི་མི་སྟེན་དང་། །གཉིས་པ་ཧ་ཅང་སྟེན་པ་དང་། །དུས་མ་ཡིན་པར་སློང་བྱེད་པ། །དེས་ནི་བཤེས་རྣམས་འབྱེད་པར་བྱེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་
ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སྐྱེས་བུ་ཐ་ཤལ་ཡིན་ནོ། །དེས་སྨྲས་པ། ལྷ། རྟག་ཏུ་གཞན་གྱི་ནོར་དང་ནི། །བདག་ཉིད་འདོད་པ་རྣོག་བྱེད་དང་། །དེ་བཞིན་སྡུག་བསྔལ་ལ་དགའ་བ། །དེ་གསུམ་སྐྱེས་བུ་ཐ་ཤལ་ཡིན། །ཞེས་བགྱི་བ་ཁྱོད་ཀྱིས་མ་
གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་ཤིང་རྟའི་འཁོར་ལོས་གསད་རྒྱུ་ཡིན་ནོ། །དེས་སྨྲས་པ། ལྷ། རི་མོ་མཁན་ནི་ཚོན་གཏོང་མི་ཤེས་དང་། །འཁྲུལ་འཁོར་མཁན་ནི་འབྱོར་ཀ་མི་ཤེས་དང་། །གྱད་གྱི་བུ་
ནི་དོར་ཐབས་མི་ཤེས་པ། །གསད་བྱ་གསད་པར་རྟག་ཏུ་བཟློག་པ་མེད། །ཅེས་བགྱི་བ་ལྷས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་གཡོ་ཅན་ཡིན་ནོ། །དེས་སྨྲས་པ། ལྷ། བུད་མེད་ཁྱོ་གསུམ་

བརྒྱུད་པ་དང་། །དགེ་སློང་ཕྱིར་ནི་འོངས་པ་དང་། །བྱ་ནི་རྒྱ་ལས་ཤོར་དང་གསུམ། །གཡོ་ཅན་ནང་ན་དེ་གཡོ་ངན། །ཞེས་བགྱི་བ་ཁྱོད་ཀྱིས་མ་གསན་ཏམ། སྡོམ་ནི། རྙེད་པར་དཀའ་དང་གཞན་དང་གཅིག །བསགས་དང་དེ་བཞིན་མི་མཐུན་དང་། །བརྡུངས་
དང་མེད་པ་ཉིད་དང་ནི། །མི་འཚམ་པ་ནི་དོན་མེད་དོ། །གསོས་པ་ཁྱོད་ཀྱིས་བ་ལང་སྐྱོང་གི་མ་རྙེད་དཀའ་བ་བསད་དོ། །དེས་སྨྲས་པ། ལྷ། རི་བོང་རྭ་ཅན་རྙེད་པར་དཀའ། །རུ་སྦལ་སྤུ་ཅན་རྙེད་པར་དཀའ། །སྨད་འཚོང་གཅིག་པུ་འདུག་པ་དང་། །གཟུ་བོ་དྲང་པོར་སྨྲ་རྙེད་
དཀའ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་གཞན་གྱི་ཆེད་དུ་བ་ལང་སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། གཏམས་པ་ལེན་དང་གཉའ་བོ་དང་། །གཡོན་ཅན་གྱི་ནི་ཆེ་བཞི་དང་། །སྨྱན་བྱེད་བློ་ཞན་བཞི་པོ་དག །གཞན་
གྱི་དོན་དུ་མ་རུང་འགྱུར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་གཅིག་པུར་བྱས་སོ། །དེས་སྨྲས་པ། ལྷ། སྐྱེ་བ་ན་ཡང་འདི་གཅིག་སྐྱེ་བར་འགྱུར། །དེ་བཞིན་འཆི་བ་ན་ཡང་འདི་
གཅིག་འཆི། །སྐྱེ་བོ་གཅིག་པུས་འདི་ན་སྡུག་བསྔལ་མྱོང་། །འཁོར་བ་ལ་ནི་གྲོགས་ཡོད་མ་ཡིན་ནོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་བ་ལང་སྐྱོང་གི་མ་ཞི་བ་ཚོགས་བསགས་པ་བསད་དོ། །དེས་སྨྲས་པ། ལྷ། ཉ་སྒོང་ཨ་མྲའི་
མེ་ཏོག་དང་། །སྡུག་བསྔལ་གྱུར་པའི་དོན་གཉེར་བ། །དཔེར་ན་སྟོན་ཀའི་སྤྲིན་བཞིན་དུ། །བསགས་པ་རྣམས་ཀྱང་དོན་མེད་འགྱུར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་མི་
མཐུན་པ་ཡིན་ནོ། །དེས་སྨྲས་པ། ལྷ། ཉི་མ་གྲིབ་མར་མི་མཐུན་ཞིང་། །སྣང་བ་དང་ནི་མུན་པ་དང་། །ཉིན་པར་མཚན་མོར་མི་མཐུན་ཏེ། །ཆོས་དང་ཆོས་མིན་རྟག་མི་མཐུན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་

སྐྱོང་གི་མ་ཞི་བ་བསད་པས་ཁྱོད་ནི་བརྡུང་རྒྱུའོ། །དེས་སྨྲས་པ། ལྷ། གོས་རྣམས་བརྡུངས་ན་འཇམ་པོ་དག་ཏུ་འགྱུར། །བོང་བུ་བརྡུངས་ན་དེ་དག་མགྱོགས་པར་འགྱུར། །བུད་མེད་རྣམས་ནི་བརྡུངས་ན་དབང་དུ་འགྱུར། །རྔ་དག་མ་བརྡུངས་སྒྲ་འབྱིན་མི་འགྱུར་རོ། །ཞེས་བགྱི་བ་ཁྱོད་
ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་མེད་པར་བྱ་བ་ཡིན་ནོ། །དེས་སྨྲས་པ། ལྷ། རླུང་གིས་སྦུན་པ་མེད་པར་བྱེད། །སྐྱེ་བོའི་སྒྲ་ཡིས་གླུ་དེ་བཞིན། །སྐྱེས་བུ་ངན་པ་བསྟེན་པ་དང་། །མི་མཛེས་ཡོན་
ཏན་མེད་པར་བྱེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་འཚམ་པ་མ་ཡིན་ནོ། །དེས་སྨྲས་པ། ལྷ། རྒྱལ་པོ་བརྫུན་དུ་སྨྲ་བ་དང་། །སྨན་པ་གསུང་དང་དགེ་སྦྱོང་འཁྲུག །
བློ་དང་ལྡན་པ་ཀུན་རྨོངས་པ། །བཞི་ནི་འཚམ་པ་མ་ཡིན་ནོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་དོན་མེད་པར་བ་ལང་སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། ཉིན་པར་མར་མེ་བུས་པ་དོན་མེད་དོ། །རྒྱ་མཚོར་
ཆར་པ་བབ་པ་དོན་མེད་དོ། །འགྲངས་ལ་སྟོན་མོ་བྱིན་པ་དོན་མེད་དོ། །སྐྱེས་བུ་ངན་པ་བསྟེན་པ་དོན་མེད་དོ། །ཞེས་བགྱི་བ་ཁྱོད་ཀྱིས་མ་གསན་ཏམ། སྡོམ་ནི། སླུ་དང་བལྟ་དང་མ་ལེགས་དང་། །བསྐྲད་དང་འཇིགས་དང་མི་དགའ་གཏང་། །སྲེད་དང་མ་བསམས་
མྱ་ངན་གཏོགས། །དེ་ནི་ཚོགས་སུ་ཡང་དག་བསྒྲགས། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སླུ་བ་ཡིན་ནོ། །དེས་སྨྲས་པ། ལྷ། སླུ་བ་བཞི་མཆིས་པར་ཁྱོད་ཀྱིས་མ་གསན་ཏམ། བཞི་གང་ཡིན། ལྷ། མི་
འདོད་པ་ལ་འདོམས་པ་དང་། །གཉིད་ཀྱིས་དུབ་ལ་འཆད་པ་དང་། །དོན་དུ་གཉེར་མིན་དོན་གཉེར་དང་། །སྟོབས་དང་ལྡན་རྣམས་འགྱེད་པའོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བལྟ་བར་བྱ་བ་ཡིན་ནོ། །དེས་སྨྲས་པ།

ལྷ། གཡུལ་ངོར་དཔའ་བོ་བལྟ་བྱ་སྟེ། །མི་བཟད་དུག་ལ་གསང་སྔགས་བལྟ། །བཟའ་བཏུང་ཚེ་ན་ཉེ་དུ་སྟེ། །དོན་རྟོགས་བྱ་ལ་མཁས་པ་བལྟ། །ཞེས་བགྱི་བ་ཁྱོད་ཀྱིས་མ་གསན་ཏམ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་
ཀྱིས་བ་ལང་སྐྱོང་གི་མ་ཞི་བ་བསད་པས་མ་ལེགས་པ་བྱས་སོ། །དེས་སྨྲས་པ། ལྷ། ཁྱིམ་པ་ལེ་ལོ་མ་ལེགས་ཆགས་མ་ལེགས། །རབ་བྱུང་ཡང་དག་སྡོམ་པ་མིན་མ་ལེགས། །རྒྱལ་པོ་གཟུ་ལུམས་སྤྱོད་པའང་མ་ལེགས་ཏེ། །མཁས་གང་འཁྲུག་བྱེད་དེ་
ཡང་མ་ལེགས་སོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བསྐྲད་པར་བྱ་བ་ཡིན་ནོ། །དེས་སྨྲས་པ། ལྷ། མི་མཁས་ཤིང་རྟ་གཅོག་པ་དང་། །ཁལ་ཆེན་འགེལ་
བས་གླང་གསོད་དང་། །ཧ་ཅང་བཞོས་པས་བེའུ་གསོད་དང་། །ཉེ་དུའི་ཁྱིམ་འདུག་ཆུང་མ་བསྐྲད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་མཐོང་ན་ང་འཇིགས་སོ། །
དེས་སྨྲས་པ། ལྷ། འུར་པ་དང་ནི་ཆུ་སྐྱར་དང་། །གསུམ་པ་ཕྱག་དར་སྲིན་བུ་དང་། །བཞི་པ་ལྷམ་བུ་ཆུ་གཤེར་ནི། །འཇིགས་བྱ་མིན་ལ་འཇིགས་པར་བྱེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་བ་ལང་སྐྱོང་གི་མ་ཞི་བ་མེད་པས་
མི་དགའོ། །དེས་སྨྲས་པ། ལྷ། སྤྲེའུ་ནི་གྲོང་ན་མི་དགའ་སྟེ། །ཆུ་སྲིན་བྱིས་པ་གསོད་རི་ལ། །ཆོམ་རྐུན་དགེ་སྦྱོང་ཁྱིམ་དུ་སྟེ། །བྱི་པོ་རང་གི་ཁྱིམ་མི་དགའ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་
བ་ལང་སྐྱོང་གི་མ་ཞི་བ་བསད་པས་ཁྱོད་ནི་གཏང་བར་བྱ་བ་ཡིན་ནོ། །དེས་སྨྲས་པ། ལྷ། རིགས་ཀྱི་ཕྱིར་ནི་གཅིག་གཏང་སྟེ། །གྲོང་གི་ཕྱིར་ནི་རིགས་གཏང་ངོ་། །ཡུལ་གྱི་ཕྱིར་ནི་གྲོང་གཏང་སྟེ། །བདག་གི་ཕྱིར་ནི་ཡུལ་གཏང་ངོ་། །ཞེས་བགྱི་བ་ཁྱོད་ཀྱིས་མ་གསན་

ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ངའི་སྲེད་པ་འཆད་དུ་མི་བཏུབ་པོ། །དེས་སྨྲས་པ། ལྷ། རྩ་མེད་གཞན་གྱི་བུད་མེད་དང་། །ལག་པ་གཅིག་གིས་ཆུ་འཐུང་དང་། །གཞན་གྱིས་ཆང་བླུད་གང་ཡིན་པ། །
དེ་དག་སྲེད་པ་འཆད་པ་མེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་མ་བསམས་པ་ཁོ་ནར་བ་ལང་སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། རྒྱལ་པོ་རྒྱལ་པོའི་མཛོད་ནི་མ་བསམས་པར། །ལམ་དུ་ཞུགས་ལ་ཆོམ་
པོར་མ་བསམས་པར། །ཁྱིམ་ན་བུད་མེད་ཐབ་མོ་མ་བསམས་པར། །རབ་ཏུ་བྱུང་བའི་རྙེད་པ་མ་བསམས་པར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་མྱ་ངན་བྱ་བ་ཡིན་ནོ། །དེས་
སྨྲས་པ། ལྷ། ཆགས་ཅན་རྒས་པའང་མྱ་ངན་བྱ་བ་སྟེ། །མི་བཟང་པོར་མོའང་མྱ་ངན་བྱ་བ་ཡིན། །སྨད་འཚོང་རྒས་པའང་མྱ་ངན་བྱ་བ་སྟེ། །རབ་བྱུང་གཏུམ་པོའང་མྱ་ངན་བྱ་བ་ཡིན། །སྡོམ་ནི། བལྟ་བས་མི་ངོམས་ཡིད་འཐད་དང་། །བརྩེ་བར་མི་བྱ་ནོར་དང་ནི། །སྨྲ་བར་
མི་བྱ་རབ་སྡང་དང་། །མགོན་མེད་བཤེས་དང་ཡིད་བརྟན་པའོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་ངའི་བ་ལང་སྐྱོང་གི་མ་ཞི་བ་བལྟ་བས་མི་ངོམས་པ་བསད་དོ། །དེས་སྨྲས་པ། ལྷ། གླང་པོའི་གཙོ་དང་རྒྱལ་པོ་དང་། །རྒྱ་མཚོ་དང་ནི་རི་རབ་དང་། །སངས་རྒྱས་སྨྲ་བ་
རྣམས་ཀྱི་མཆོག །བལྟ་བ་ཡིས་ནི་མི་ངོམས་ཡིན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་བ་ལང་སྐྱོང་གི་མ་ཞི་བ་ངའི་ཡིད་དང་འཐད་པ་བསད་དོ། །དེས་སྨྲས་པ། ལྷ། གཟུགས་བཟང་མོ་དང་རིགས་ལྡན་དང་། །དེས་དང་
རིགས་ནི་འཕེལ་བྱེད་པ། །དར་ལ་བབ་དང་བུད་མེད་ལྔ། །རྒྱལ་ཆེན་ཡིད་དང་འཐད་པ་ཡིན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་དང་ལྷན་ཅིག་རྩེ་བར་མི་བྱ་བ་ཡིན་ནོ། །དེས་

སྨྲས་པ། ལྷ། བྱིས་པ་སྦྲུལ་དང་སྦལ་བ་དང་། །གང་གི་མ་ནི་གཡེམ་པ་དང་། །མི་གང་མཛའ་ནི་མི་རྟག་དང་། །ལྷན་ཅིག་རྩེ་བར་མི་བྱའོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་
མ་ཞི་བ་བསད་པས་ཁྱོད་ཀྱིས་ནོར་འཕྲོག་པ་བྱས་སོ། །དེས་སྨྲས་པ། ལྷ། རོལ་མོ་མཁན་དང་དམག་མི་དང་། །སྨན་པ་ཆོམ་རྐུན་བཙོན་རྫི་སྟེ། །དེ་དག་ཉམ་ཐག་གྱུར་པ་ལའང་། །ནོར་ནི་འཕྲོག་པར་བྱེད་པ་ཡིན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་
པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སྨྲ་བར་བྱ་བ་མ་ཡིན་ནོ། །དེས་སྨྲས་པ། ལྷ། ཧ་ཅང་ཕྱུག་དང་ཧ་ཅང་དབུལ། །དམའ་དང་ཧ་ཅང་མཐོ་གང་དང་། །ཧ་ཅང་རིང་དང་ཧ་ཅང་ཉེ། །དེ་དྲུག་སྨྲ་བར་བྱ་བ་མིན། །ཞེས་བགྱི་
བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སེམས་རབ་ཏུ་སྡང་བ་ཡིན་ནོ། །དེས་སྨྲས་པ། ལྷ། སྦྱིན་པ་མི་སྣང་མི་མཐུན་བྱེད་པ་དང་། །མཐུན་པར་མི་བྱེད་ཉེས་སྤྱོད་སྒྲོགས་པ་དང་། །
སྦྱིན་པ་བྱིན་ནས་རིམ་གྱིས་ལྡོག་བྱེད་པ། །དེ་དག་རབ་ཏུ་སྡང་བའི་རྟགས་ཡིན་ནོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་མགོན་མེད་པར་གྱུར་ཏོ། །དེས་སྨྲས་པ། ལྷ།
གནས་བརྟན་རྒྱལ་པོ་རྒན་པོ་དང་། །ཚུལ་མེད་བཀའ་བློ་མི་བདེ་དང་། །བླ་མ་ལ་ནི་གནོད་བྱེད་གང་། །དེ་དྲུག་མགོན་ནི་མེད་པར་བཤད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་གང་གི་ཕྱིར་བ་ལང་སྐྱོང་གི་མ་ཞི་བ་བསད་
པས་ཁྱོད་དང་ལྷན་ཅིག་བཤེས་པར་བྱ་བ་མ་ཡིན་ནོ། །དེས་སྨྲས་པ། ལྷ། བཞད་གད་མཁན་དང་གར་མཁན་དང་། །ཕོ་ཉ་སྨད་འཚོང་ཆང་དད་ཅན། །མ་ནིང་དེ་བཞིན་གཞུང་ངན་པ། །དེ་དག་དང་ནི་བཤེས་མི་བྱ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་

སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་ཡིད་བརྟན་པར་བྱ་བ་མ་ཡིན་ནོ། །དེས་སྨྲས་པ། ལྷ། སྐེ་ཙམ་ནུབ་པའི་ཆུ་དང་རྟ་དང་ནི། །གླང་པོ་ཆེ་དང་སྤྲེའུ་དང་སྦྲུལ་ནག་དང་། །སྤུ་འགྲེང་བ་དང་གདོང་གཉེར་གང་བ་དང་། །ཁ་སྤུ་ཉུང་
ལ་ཡིད་ནི་བརྟན་མི་བྱ། །ཞེས་བགྱི་བ་ཁྱོད་ཀྱིས་མ་གསན་ཏམ། སྡོམ་ནི། གཉིད་མེད་འདོད་པ་མ་ཡིན་དང་། །ཀུན་ནས་མནར་སེམས་དངོས་པོ་དང་། །དེ་བཞིན་སྙིང་རྗེ་ཁྭ་དང་ནི། །ཟློག་ཐབས་ཐ་མ་སྟོབས་ཡིན་ནོ། །རྒྱལ་པོས་སྨྲས་པ། གསོས་པ་གང་གི་ཕྱིར་
ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་གཉིད་མེད་དོ། །དེས་སྨྲས་པ། ལྷ། གཡེམ་དང་སྐེམ་ནད་ཅན་དང་ནི། །ཆམ་པས་ཐེབས་དང་སྡུག་བསྔལ་དང་། །དོན་སེམས་ཁྲོས་དང་བརྩོན་པ་དང་། །འཇིགས་པ་དེ་ནི་རྣམ་ཀུན་ཏུ། །གཉིད་མི་འོང་སྟེ་འཇིག་རྟེན་ན། །
བརྒྱད་ནི་རང་བཞིན་སྡུག་བསྔལ་ལོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་འདོད་པ་མ་ཡིན་ནོ། །དེས་སྨྲས་པ། ལྷ། འདོད་པ་མ་ཡིན་པའི་དངོས་པོ་བརྒྱད་ཅེས་བགྱི་
བ་ཁྱོད་ཀྱིས་མ་གསན་ཏམ། གསོས་པ་བརྒྱད་གང་ཡིན། །ན་དང་རྒ་དང་འཆི་བ་དང་། །སྡུག་བྲལ་མི་སྡུག་ཕྲད་པ་དང་། །སེར་བ་ཐོག་ཏོག་མི་རྟག་ཉིད། །བརྒྱད་ནི་འཇིག་རྟེན་འདོད་མིན་རབ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་
སྐྱོང་གི་མ་ཞི་བ་བསད་པས་ང་ཁྱོད་ལ་ཀུན་ནས་མནར་སེམས་སྐྱེས་སོ། །དེས་སྨྲས་པ། ལྷ། ཀུན་ནས་མནར་སེམས་དགུ་འདུལ་བ་ཞེས་བགྱི་བ་ཁྱོད་ཀྱིས་མ་གསན་ཏམ། གསོས་པ་དགུ་གང་ཡིན། ལྷ་འདི་ནི་བདག་ལ་གནོད་པར་འདོད་པ་ཕན་པ་མ་ཡིན་པར་འདོད་པ་བདེ་
བ་མ་ཡིན་པར་འདོད་པ་རེག་པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ་སྟེ། འདིས་བདག་ལ་འདོད་པ་བྱས་སོ་བྱེད་དོ་བྱེད་པར་འགྱུར་རོ་སྙམ་མོ། །ཡང་དེ་འདི་སྙམ་དུ་སེམས་ཏེ། གཞན་ལས་བདག་གི་འདི་ལྟར་གྱུར་ན་མི་རུང་བས་བདག་གི་འདི་

ཁོ་ན་ལྟར་འགྱུར་བར་བྱའོ་ཞེས་བྱ་བ་འདི་འགྲུབ་པར་ག་ལ་འགྱུར་སྙམ་ནས། དེ་དེ་ལ་ཀུན་ནས་མནར་སེམས་སྐྱེས་པ་སེལ་བར་བྱེད་དོ། །འདི་ནི་གང་ཞིག་བདག་ལ་གནོད་པར་འདོད་པ་ཕན་པ་མ་ཡིན་པར་འདོད་པ། བདེ་བ་མ་ཡིན་པར་འདོད་པ། རིག་
པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ། དེ་ལ་གནོད་པར་འདོད་པ། ཕན་པ་མ་ཡིན་པར་འདོད་པ། བདེ་བ་མ་ཡིན་པར་འདོད་པ། རེག་པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ་སྟེ། འདིས་དེ་ལ་གནོད་པ་
བྱས་སོ་བྱེད་དོ་བྱེད་པར་འགྱུར་རོ་སྙམ་མོ། །ཡང་དེ་འདི་སྙམ་དུ་སེམས་ཏེ། གཞན་ལས་བདག་གི་འདི་ལྟར་གྱུར་ན་མི་རུང་བས་བདག་གིས་འདི་ཁོ་ན་ལྟར་འགྱུར་བར་བྱའོ་ཞེས་བྱ་བ་འདི་འགྲུབ་པར་ག་ལ་འགྱུར་སྙམ་ནས། དེ་དེ་ལ་ཀུན་ནས་མནར་སེམས་སྐྱེས་པ་སེལ་བར་
བྱེད་དོ། །འདི་ནི་གང་ཞིག་བདག་ལ་གནོད་པར་འདོད་པ། ཕན་པ་མ་ཡིན་པར་འདོད་པ། བདེ་བ་མ་ཡིན་པར་འདོད་པ། རེག་པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ། དེ་ལ་དོན་དུ་འདོད་པ། ཕན་པར་འདོད་པ། བདེ་བར་འདོད་པ། རེག་
པར་འདོད་པ། གྲུབ་པ་དང་བདེ་བར་འདོད་པ་སྟེ། འདིས་དེ་ལ་ཕན་པར་བྱས་སོ་བྱེད་དོ་བྱེད་པར་འགྱུར་རོ་སྙམ་མོ། །ཡང་དེ་འདི་སྙམ་དུ་སེམས་ཏེ། གཞན་ལས་བདག་གིས་འདི་ལྟར་གྱུར་ན་མི་རུང་བས་བདག་གིས་འདི་ཁོ་ན་ལྟར་འགྱུར་བར་བྱའོ་ཞེས་བྱ་བ་འདི་གྲུབ་པར་
ག་ལ་འགྱུར་སྙམ་ནས། དེ་དེ་ལ་ཀུན་ནས་མནར་སེམས་སྐྱེས་པ་སེལ་བར་བྱེད་དོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སྙིང་རྗེ་མེད་པ་ཡིན་ནོ། །དེས་སྨྲས་པ། ལྷ། ཁྱོད་ཀྱིས་སྙིང་རྗེ་མེད་པ་བཅུ་པོ་ཤན་པ་དང་།
བྱ་གག་འཚོང་པ་དང་། ཕག་འཚོང་པ་དང་། ཉ་པ་དང་། རི་དགས་ཀྱི་རྔོན་པ་དང་། བྱ་བ་དང་། རི་བོང་རྒྱས་འཆོར་བ་དང་། ཆོམ་རྐུན་པ་དང་། གཤེད་མ་པ་དང་། བ་ལང་གསོད་པ་ལགས་པར་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་

ལང་སྐྱོང་གི་མ་ཞི་བ་བསད་པས་ཁྱོད་ནི་ཁྭ་ལྟ་བུ་ཡིན་ནོ། །དེས་སྨྲས་པ། ལྷ། ཡན་ལག་བཅུ་དང་ལྡན་ན་ཁྭ་ལྟ་བུ་ལགས་སོ་ཞེས་བགྱི་བ་ཁྱོད་ཀྱིས་མ་གསན་ཏམ། གསོས་པ་བཅུ་གང་ཡིན། ལྷ། གཅོར་བ་དང་། མུ་ཅོར་སྨྲ་བ་དང་། ཐུབ་ཆོད་བྱེད་པ་དང་། འཁུ་བ་དང་།
བྱས་པ་མི་གཟོ་བ་དང་། སྙིང་རྗེ་མེད་པ་དང་། མ་བྱིན་པར་ལེན་པ་དང་། བསོགས་པ་དང་། དགང་དཀའ་བ་དང་། འཆལ་པ་ལགས་སོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་ཟློག་ཐབས་ཅན་ཡིན་ནོ། །དེས་
སྨྲས་པ། ལྷ། ཟློག་ཐབས་ཅན་བཅུ་ཞེས་བགྱི་བ་ཁྱོད་ཀྱིས་མ་གསན་ཏམ། གསོས་པ་བཅུ་གང་ཡིན། ལྷ། ཉི་མ་ཟློག་ཐབས་ཅན་དང་། ཟླ་བ་ཟློག་ཐབས་ཅན་དང་། མེ་ཟློག་ཐབས་ཅན་དང་། ཆུ་ཟློག་ཐབས་ཅན་དང་། གཞོན་ནུ་མ་ཟློག་ཐབས་ཅན་དང་། བུད་མེད་
ཟློག་ཐབས་ཅན་དང་། བྲམ་ཟེ་ཟློག་ཐབས་ཅན་དང་། གཅེར་བུ་པ་ཟློག་ཐབས་ཅན་དང་། དགེ་སློང་ཟློག་ཐབས་ཅན་དང་། སླད་ས་ཟློག་ཐབས་ཅན་ལགས་སོ། །དེ་ལ་ཉི་མ་ཟློག་ཐབས་ཅན་ནི་ཉི་མ་ནི་དགུན་གློ་ནས་མཆི་ན་དྲོ་བར་ཡང་མི་འགྱུར་ལ། སོ་ག་ཐག་རིང་པོ་ནས་
མཆི་ན་འོན་ཀྱང་དྲོ་བར་འགྱུར་ཏེ། འདི་ནི་ཉི་མ་ཟློག་ཐབས་ཅན་ཞེས་བགྱིའོ། །ཟླ་བ་ཟློག་ཐབས་ཅན་གང་ཞེ་ན། ཟླ་བ་ནི་གང་གི་ཚེ་ཤས་ཆུང་བ་དེའི་ཚེ་སྐྱེ་བོ་ཐམས་ཅད་ཀྱིས་ཕྱག་བྱ་བར་འགྱུར་ལ། གང་གི་ཚེ་རྣམ་པ་ཐམས་ཅད་ཡོངས་སུ་རྫོགས་པར་གྱུར་པ་དེའི་ཚེ་སུ་
ཡང་ཕྱག་མི་འཚལ་ཏེ། འདི་ནི་ཟླ་བ་ཟློག་ཐབས་ཅན་ཞེས་བགྱིའོ། །མེ་ཟློག་ཐབས་ཅན་གང་ཞེ་ན། མེ་ནི་ཚིག་པ་མེ་ཉིད་དུ་སྲེག་སྟེ། འདི་ནི་མེ་ཟློག་ཐབས་ཅན་ཞེས་བགྱིའོ། །ཆུ་ཟློག་ཐབས་ཅན་གང་ཞེ་ན། ཆུ་ནི་དགུན་རྫིང་ན་བསིལ་ན་འོན་ཀྱང་བཏུང་དུ་མི་རུང་
གི། ཁྲོན་པ་ན་དྲོ་ན་འོན་ཀྱང་བཏུང་དུ་རུང་ལ། སོ་གར་རྫིང་ན་དྲོ་ན་འོན་ཀྱང་བཏུང་དུ་རུང་ལ། ཁྲོན་པ་ན་བསིལ་ན་འོན་ཀྱང་བཏུང་དུ་མི་རུང་སྟེ། འདི་ནི་ཆུ་ཟློག་ཐབས་ཅན་ཞེས་བགྱིའོ། །གཞོན་ནུ་མ་ཟློག་ཐབས་ཅན་གང་ཞེ་ན། གཞོན་ནུ་མ་ནི་གང་གི་ཚེ་མ་བྱིན་པ་

དེའི་ཚེ་གྱོས་པོའི་ཁྱིམ་ལ་དགའ་ལ། གང་གི་ཚེ་གྱོས་པོའི་ཁྱིམ་དུ་ཁྱེར་བ་དེའི་ཚེ་ཁྱིམ་ལ་ཁོང་དུ་ཡང་དགའ་ལ་ངུ་བར་བྱེད་དེ། འདི་ནི་གཞོན་ནུ་མ་ཟློག་ཐབས་ཅན་ཞེས་བགྱིའོ། །བུད་མེད་ཟློག་ཐབས་ཅན་གང་ཞེ་ན། བུད་མེད་ནི་གང་གི་ཚེ་གཞོན་ཞིང་བལྟ་
ན་ཡིད་དུ་འོང་བ་དེའི་ཚེ་ལུས་བཀབ་སྟེ་འགྲོ་ལ། གང་གི་ཚེ་རྒས་ཤིང་ཡིད་དུ་མི་འོང་བ་དེའི་ཚེ་ཕྱེ་ནས་འགྲོ་སྟེ། འདི་ནི་བུད་མེད་ཟློག་ཐབས་ཅན་ཞེས་བགྱིའོ། །བྲམ་ཟེ་ཟློག་ཐབས་ཅན་གང་ཞེ་ན། བྲམ་ཟེ་ནི་གང་གི་ཚེ་བྱིས་པ་སྟེ་འདོད་པའི་འདོད་ཆགས་མ་སྐྱེས་པ་དེའི་ཚེ་
ཚངས་པར་སྤྱད་པ་སྤྱོད་པ་ལ་གང་གི་ཚེ་དར་ལ་བབ་སྟེ་འདོད་པའི་འདོད་ཆགས་སྐྱེས་པ་དེའི་ཚེ་འདོད་པ་དག་སྟེན་པར་བྱེད་དེ། འདི་ནི་བྲམ་ཟེ་ཟློག་ཐབས་ཅན་ཞེས་བགྱིའོ། །གཅེར་བུ་པ་ཟློག་ཐབས་ཅན་གང་ཞེ་ན། གཅེར་བུ་པ་ནི་གང་གི་ཚེ་ཁྱིམ་ན་འདུག་པ་དེའི་ཚེ་གོས་གྱོན་
ཞིང་འདུག་ལ་གང་གི་ཚེ་སྤྱོད་ཡུལ་དུ་འགྲོ་བ་དེའི་ཚེ་ནི་གཅེར་བུར་འགྲོ་སྟེ། འདི་ནི་གཅེར་བུ་པ་ཟློག་ཐབས་ཅན་ཞེས་བགྱིའོ། །དགེ་སློང་ཟློག་ཐབས་ཅན་གང་ཞེ་ན། དགེ་སློང་ནི་གང་གི་ཚེ་གཞོན་ནུ་ལང་ཚོ་ལ་བབ་ཅིང་ཟོས་པ་དང་འཐུངས་པ་དང་། འཆོས་པ་དང་མྱངས་པ་
རྣམས་འཇུ་བར་ནུས་པ་དེའི་ཚེ་དེ་དག་མི་རྙེད་ལ། གང་གི་ཚེ་རྒས་ཏེ་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་འཇུ་བར་མི་ནུས་པ་དེའི་ཚེ་དེ་དག་རྙེད་དེ། འདི་ནི་དགེ་སློང་ཟློག་ཐབས་ཅན་ཞེས་བགྱིའོ། །སླད་ས་ཟློག་ཐབས་ཅན་གང་ཞེ་ན། སླད་ས་
ནི་གང་གི་ཚེ་གཤེར་བ་དེའི་ཚེ་ཆུའི་སྟེང་ན་འཕྱོ་ལ། གང་གི་ཚེ་སྐམས་པ་དེའི་ཚེ་འབྱིང་སྟེ། འདི་ནི་སླད་ས་ཟློག་ཐབས་ཅན་ཞེས་བགྱིའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་པ། རྒྱལ་པོས་སྨྲས་པ། གསོས་པ་ཐམས་ཅད་གོ་སྟེ་ཆོག་
གོ། །འདི་དྲིས་དྲང་པོར་སྨྲོས་ཤིག །ཁྱོད་ཀྱིས་སྟོབས་གང་གིས་བ་ལང་སྐྱོང་གི་མ་ཞི་བ་བསད་དེས་སྨྲས་པ། ལྷ་བདག་ལ་གང་གིས་ན་བ་ལང་སྐྱོང་གི་མ་ཁུམས་པའི་སྟོབས་ག་ལ་མཆིས། ལྷ་འོན་ཀྱང་འཕགས་པ་ཀ་ཏྱའི་བུ་ཆེན་པོ་འདི་གང་གི་ཉན་ཐོས་ལགས་པ་དེ་ནི་དེ་

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི། ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་ལགས་ཏེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཐོགས་པ་མི་མངའ་བའི་སྟོབས་ཀྱིས་འཁོར་ལོས་སྒྱུར་བ་དེ་ལ་གང་དག་དང་ལྡན་ན་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་
ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་པ་སྟོབས་བཅུ་མངའོ། །བཅུ་གང་ལགས་ཞེ་ན། ལྷ་དེ་ནི་གནས་ལ་ཡང་གནས་སུ། གནས་མ་ཡིན་པ་ལ་ཡང་གནས་མ་ཡིན་པར་ཡང་དག་པར་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ལྷ་འདི་ནི་དེའི་སྟོབས་དང་པོ་
ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སེམས་ཅན་རྣམས་ཀྱི་ལས་དང་ཆོས་ཡང་
དག་པར་བླངས་པ་འདས་པ་དང་། མ་འོངས་པ་དང་། ད་ལྟར་བྱུང་བ་རྣམས་ལ་གནས་དང་། གཞི་དང་། རྒྱུ་དང་། རྣམ་པར་སྨིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེས་སེམས་ཅན་རྣམས་ཀྱི་ལས་དང་ཆོས་ཡང་དག་པར་བླངས་པ་འདས་པ་
དང་། མ་འོངས་པ་དང་། ད་ལྟར་བྱུང་བ་རྣམས་གནས་དང་། གཞི་དང་། རྒྱུ་དང་། རྣམ་པར་སྨིན་པར་ཡང་དག་པར་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་གཉིས་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་
རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ། གཞན་ཡང་དེས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་

ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་རྣམ་པར་གཞག་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱི་ཀུན་
ནས་ཉོན་མོངས་པ་དང་། རྣམ་པར་བྱང་བ་རྣམ་པར་གཞག་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་གསུམ་པ་ལགས་ཏེ། སྟོབས་དེ་དང་ལྡན་པས་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་
ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་ན་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སེམས་ཅན་གཞན་རྣམས་དང་གང་ཟག་གཞན་རྣམས་ཀྱི་དབང་པོ་མཆོག་དང་། མཆོག་མ་ཡིན་པ་ཉིད་ཡང་དག་པ་ཇི་ལྟ་བ་བཞིན་དུ་རབ་
ཏུ་མཁྱེན་ཏོ། །དེས་སེམས་ཅན་གཞན་རྣམས་དང་གང་ཟག་གཞན་རྣམས་ཀྱི་དབང་པོ་མཆོག་དང་། མཆོག་མ་ཡིན་པ་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་དེའི་སྟོབས་བཞི་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་
གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སེམས་ཅན་གཞན་རྣམས་དང་། གང་ཟག་གཞན་རྣམས་ཀྱིས་མོས་པ་སྣ་ཚོགས་ཉིད་ཡང་དག་པ་
ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེས་སེམས་ཅན་གཞན་རྣམས་དང་། གང་ཟག་གཞན་རྣམས་ཀྱི་མོས་པ་སྣ་ཚོགས་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་ལྔ་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་
པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་འཇིག་རྟེན་ཁམས་སྣ་ཚོགས་པ་དང་། ཁམས་དུ་མ་པའོ་ཞེས་བགྱི་བར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །

དེས་འཇིག་རྟེན་ཁམས་སྣ་ཚོགས་པ་དང་། ཁམས་དུ་མ་པའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་དྲུག་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་
བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་ཀུན་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེས་ཀུན་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་
སྟོབས་བདུན་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་
ཏེ། འདི་ལྟ་སྟེ། ཚེ་གཅིག་ཀྱང་དགོངས། ཚེ་གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། ཚེ་བརྒྱ་དང་། ཚེ་སྟོང་དང་། ཚེ་བརྒྱ་སྟོང་དང་།
ཚེ་བརྒྱ་ཕྲག་དུ་མ་དང་། ཚེ་སྟོང་ཕྲག་དུ་མ་དང་། ཚེ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་
པ་དང་འཆགས་པའི་བསྐལ་པ་དུ་མ་ཡང་རྗེས་སུ་དགོངས་ཏེ། གང་དུ་བདག་གི་མིང་ནི་འདི་ཞེས་བྱ། རིགས་ནི་འདི་ལྟ་བུ། རུས་ནི་འདི་ལྟ་བུ། ཁ་ཟས་ནི་འདི་ལྟ་བུ་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང་། ཚེ་ནི་འདི་ཙམ་ཐུབ། ཡུན་ནི་འདི་
སྲིད་ཅིག་གནས་གནས། ཚེའི་མཐའ་ནི་འདི་སྲིད་ཅིག་ཡིན་པར་གྱུར་པ་ན་སེམས་ཅན་ནི་དེ་དག་བྱུང་ངོ་། །བདག་གནས་དེ་ནས་ཤི་འཕོས་ནས་ནི་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་ནི་འདིར་སྐྱེས་སོ་ཞེས་སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་

ཕྱོགས་དང་བཅས་པར་རྗེས་སུ་དགོངས་སོ། །དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་ཏེ། འདི་ལྟ་སྟེ། ཚེ་གཅིག་ཀྱང་དགོངས་པ་ནས། འདིར་སྐྱེས་ཞེས་བྱ་བའི་བར་སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་ཕྱོགས་དང་
བཅས་པར་རྗེས་སུ་དགོངས་པ་གང་ལགས་པ་འདི་ནི་ལྷ་དེའི་སྟོབས་བརྒྱད་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་
མཛད་དོ། །ལྷ་གཞན་ཡང་དེས་ལྷའི་སྤྱན་རྣམ་པར་དག་པ་མིའི་ལས་འདས་པས་སེམས་ཅན་འཆི་འཕོ་བ་དང་། སྐྱེ་བ་དང་། ཁ་དོག་བཟང་པོ་དང་། ཁ་དོག་ངན་པ་དང་། དམན་པ་དང་། གྱ་ནོམ་པ་རྣམས་ཀྱང་གཟིགས་ལ་སེམས་ཅན་ལས་ཇི་ལྟ་བ་བཞིན་དུ་ཉེ་བར་འགྲོ་
བ་བདེ་འགྲོ་དང་། ངན་འགྲོར་འགྲོ་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་པ། ངག་དང་། ཡིད་ཀྱི་ཉེས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ། ལོག་པར་
ལྟ་བ་ཅན་ཡིན་ཏེ་ལོག་པར་ལྟ་བའི་ལས་དང་ཆོས་ཡང་དག་པར་བླངས་པའི་ཕྱིར་རྒྱུ་དེ་དང་རྐྱེན་དེས་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་གི་ནང་དུ་སྐྱེ་བར་འགྱུར་རོ། །སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་
དང་ལྡན་པ། ངག་དང་ཡིད་ཀྱི་ལེགས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་མི་འདེབས་པ། ཡང་དག་པའི་ལྟ་བ་ཅན་ཏེ། ཡང་དག་པའི་ལྟ་བའི་ལས་དང་ཆོས་ཡང་དག་པར་བླངས་པའི་རྒྱུས་རྒྱུ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་སུ་ལྷ་
དག་གི་ནང་དུ་སྐྱེ་བར་འགྱུར་རོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ལྷའི་སྤྱན་ཞེས་བྱ་བ་ནས། བདེ་འགྲོ་མཐོ་རིས་སུ་ལྷ་དག་གི་ནང་དུ་སྐྱེ་བར་འགྱུར་རོ་ཞེས་བྱ་བའི་བར་སྔ་མ་བཞིན་ནོ། །འདི་ནི་ལྷ་དེའི་སྟོབས་དགུ་པ་ལགས་ཏེ། སྟོབས་དེ་དང་

ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེ་ཟག་པ་རྣམས་ཟད་པའི་ཕྱིར་མཐོང་བའི་ཆོས་ཁོ་ན་ལ་ཟག་པ་མེད་པའི་
སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་རང་གི་མངོན་པར་ཤེས་པས་མངོན་སུམ་དུ་བྱས་ནས་རྫོགས་པར་བྱས་ཏེ། བདག་གི་ཟག་པ་ཟད་དོ། །ཚངས་པར་སྤྱོད་པ་བསྟན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་གསུང་
ངོ་། །དེ་ཟག་པ་རྣམས་ཟད་པའི་ཕྱིར་མཐོང་བའི་ཆོས་ཁོ་ན་ལ་ཟག་པ་མེད་པའི་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་ཞེས་བྱ་བ་ནས། འདི་ལས་སྲིད་པ་གཞན་མི་ཤེས་སོ་ཞེས་བྱ་བའི་བར་སྔ་མ་བཞིན་ནོ། །ལྷ་འདི་ནི་དེའི་སྟོབས་བཅུ་པ་
ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །དེ་སྐད་ཅེས་སྨྲས་པ་དང་། རྒྱལ་པོ་རབ་སྣང་སྤོབས་པ་མེད་ནས་
ཅང་མི་ཟེར་བར་འདུག་གོ། །གསོས་པས་བསམས་པ། ལྷ་ནི་སྤོབས་པ་མེད་དེ་ཅང་མི་ཟེར་བར་འདུག་ན་འདི་དང་བ་ལོང་སྐྱོང་གི་མ་ཞི་བ་ཇི་སྲིད་མཐོ་བཙམ་སྙམ་ནས་དེས་དེ་ངོམ་ཟུང་གནག་བཞིན་ཁྲིད་ནས་རྒྱལ་པོའི་རྐང་པ་གཉིས་ལ་ཕྱག་འཚལ་ཏེ། རྒྱལ་པོ་ལ་བཟོད་
པ་གསོལ་བར་ཞུགས་པ། ལྷ། མི་ཡི་དབང་པོས་འདིར་རྟག་ཆོས་ཀྱི་ཚུལ། །བགྲོད་ཅིང་རྗེས་སུ་བགྲོད་པ་ཡང་དག་གཟིགས། །བཟོད་པ་རྒྱལ་པོ་རྣམས་ཀྱི་ཆོས་གཙོ་ལྷ། །བ་ལང་སྐྱོང་གི་མ་ཡི་ནོངས་བཟོད་མཛོད། །འཇིག་རྟེན་བལྟ་བྱ་ལེགས་གསུངས་རིན་པོ་ཆེ། །
ཇི་སྟེ་གཟིགས་པར་མ་གྱུར་གསན་མ་གྱུར། །ཁྱོད་ཀྱིས་གླང་པོ་ཆེ་ཡང་གདུལ་བར་སྤྱོད་ལགས་ན། །ཅུང་ཟད་ནོངས་བགྱིད་བུད་མེད་སྨོས་ཅི་འཚལ། །ཁྱོད་ལས་མི་འཕྱོ་གཟུགས་དང་ཡོན་ཏན་ལྡན། །སྔོན་དང་ཕྱིས་ཀྱང་དེ་བཞིན་བཙུན་མོ་ལགས། །རྗེ་སླད་ཁོ་ནར་

ལྷ་གཅིག་བ་ལང་མའི། །ཐམས་ཅད་བཟོད་པ་མཛོད་ཅེས་དེ་སྐད་མཆིའོ། །རྒྱལ་པོས་ཀྱང་གསོས་པ་ལ་ཚིགས་སུ་བཅད་དེ་སླར་སྨྲས་པ། རབ་སྨྲས་ལེགས་པར་སྨྲས་འདི་ཁྱོད་ཀྱིས་ནི། །ང་ལ་སྙིང་ཉེ་བསྐྱེད་དེ་སྨྲས་པ་ཡིན། །དེ་ལྟས་ཁྱོད་ལ་ཀ་ནྱཱ་
ཀུབ་ཛ་སྦྱིན། །ང་ཡིས་ཞི་བ་ལ་ཡང་སྙིང་ནས་བཟོད། །གསོས་པའི་ལན་རྫོགས་སྟོ།། །།སྡོམ་ནི། དྲག་ཤུལ་ཅན་གྱིས་གསེར་སྣོད་དང་། །འོད་བཟངས་མ་དང་དགོན་པ་པ། །འཚོ་བྱེད་དང་ནི་འབྲས་སྨན་དང་། །འཁོར་ནི་མང་པོ་སུན་བྱེད་པའོ། །
སངས་རྒྱས་བཅོམ་ལྡན་འདས་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་བྲམ་ཟེ་དང་ཁྱིམ་བདག་མང་པོ་དཔོང་ས་ན་འདུས་ཤིང་འཁོད་པ་དག་བར་སྐབས་ཀྱི་གཏམ་འདི་ལྟ་བུ་དག་གླེང་སྟེ། ཤེས་ལྡན་དག་
དགེ་སྦྱོང་གཽ་ཏ་མ་དང་དེའི་ཉན་ཐོས་རྣམས་ཀྱང་འདོད་ཆེན་ཆེ་བའོ། །མུ་སྟེགས་ཅན་དག་ནི་དེ་ལྟ་མ་ཡིན་ནོ་ཞེས་ཟེར་རོ། །དེའི་ཚེ་ཁྱིམ་བདག་དྲག་ཤུལ་ཅན་འཁོར་དེ་ཉིད་དུ་འདུས་ནས་འདུག་པར་གྱུར་ཏོ། །དེ་ནས་ཁྱིམ་བདག་དྲག་ཤུལ་གྱིས་ཡངས་པ་ཅན་གྱི་བྲམ་ཟེ་
དང་ཁྱིམ་བདག་མང་པོ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་རེ་ཞིག་སྡོད་ཅིག་དང་། ངས་བཅོམ་ལྡན་འདས་འདོད་ཆེན་ཆེའམ། འདོད་ཆེན་ཆུང་བ་དང་། དེའི་ཉན་ཐོས་འདོད་ཆེན་ཆེའམ། འདོད་ཆེན་ཆུང་བ་དག་ཁྱེད་ཀྱིས་མངོན་སུམ་དུ་བྱའོ་
ཞེས་བྱས་ནས། དེ་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་དག་བསྡོགས་ནས། སངས་རྒྱས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དང་ལྷན་ཅིག་མངོན་སུམ་དུ་ཡང་དག་པར་དགའ་བ་དང་། ཡང་དག་པར་མགུ་བའི་
གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཆོས་ཀྱི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་ལེན་དུ་འཇུག་པར་མཛད། ཡང་དག་པར་

གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་མཐུན་པའི་གཏམ་གྱིས་ཡང་དག་པར་བསྟན། ཡང་དག་པར་ལེན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་
བཞུགས་སོ། །དེ་ནས་ཁྱིམ་བདག་དྲག་ཤུལ་ཅན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་
ཅིག་ཏུ་བདག་གི་སྡུམ་པར་སང་གདུགས་ཚོད་གསོལ་བར་ཅི་གནང་ཞེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་དྲག་ཤུལ་ཅན་གྱིས་བཅོམ་ལྡན་འདས་ཅང་མི་གསུང་བར་གནང་བར་རིག་ནས།
བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ཅིང་རྗེས་སུ་ཡི་རངས་ནས་སྟན་ལས་ལངས་ཏེ་སོང་ངོ་། །དེས་མུ་སྟེགས་ཅན་རྣམས་ལ་ཡང་ཤེས་ལྡན་དག་སང་བདག་གི་ཁྱིམ་དུ་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་གདུགས་ཚོད་ལ་
སྤྱན་དྲངས་ཀྱིས་ཁྱེད་ཀྱང་དེ་ཉིད་དུ་ཟན་ལ་ཤོག་ཤིག་ཅེས་མགྲོན་དུ་བོས་སོ། །ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལ་ཡང་ཤེས་ལྡན་དག་བདག་གིས་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང་། མུ་སྟེགས་ཅན་རྣམས་སང་
བདག་གིས་ཁྱིམ་དུ་གདུགས་ཚོད་ལ་སྤྱན་དྲངས་ཀྱིས་ཁྱེད་ཀྱང་དེའི་ཚེ་གྲོགས་བྱེད་དུ་ཤོག་ཤིག་ཅེས་བསྒོའོ། །དེ་ནས་རང་གི་ཁྱིམ་དུ་སོང་སྟེ་ཞོ་ཤས་འཚོ་བ་རྣམས་ལ་བསྒོ་བ་ཤེས་ལྡན་དག་ཞལ་ཟས་གཙང་ཞིང་བསོད་པ་མང་པོ་དག་སྟ་གོན་གྱིས་ཤིག །དེ་དག་གིས་ཞལ་
ཟས་གཙང་ཞིང་བསོད་པ་མང་པོ་དག་སྟ་གོན་བྱས་སོ། །དེ་ནས་ཁྱིམ་བདག་དྲག་ཤུལ་ཅན་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་སྦྱར་ལགས་ཏེ། ད་དེའི་དུས་ལ་བབ་ན་བཅོམ་ལྡན་འདས་

ཀྱིས་དེའི་དུས་ལ་བབ་པར་དགོངས་སུ་གསོལ་ཞེས་གདུགས་ཚོད་གདས་པར་གསོལ་ཏོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་མནབས་ལྷུང་བཟེད་བསྣམས་ཏེ། ཁྱིམ་བདག་དྲག་ཤུལ་ཅན་གྱི་བཀད་ས་གང་ན་བ་དེར་གཤེགས་
ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་དྲག་ཤུལ་ཅན་ཡུལ་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་དང་ལྷན་ཅིག་ཏུ་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་རྣམས་སངས་རྒྱས་
ལ་སོགས་པ་དགེ་སློང་གི་དགེ་འདུན་རྣམས་ལ་འབྲིམ་པར་ཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱིམ་བདག་དྲག་ཤུལ་ཅན་ནི་བརྟག་པའི་བསམ་པས་གསེར་དང་། དངུལ་དང་།
བཻ་ཌཱུརྱ་དང་། ཤེལ་གྱི་སྣོད་རྣམས་འབྲིམ་གྱིས་དགེ་སློང་ཁྱེད་ཅག་སུ་ཡང་མ་ལེན་ཅིག་བར་སྒོ་ཤིག་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཙུན་པ་དེ་ལྟར་འཚལ་ལོ་ཞེས་བཅོམ་ལྡན་འདས་ཀྱི་ལྟར་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་
བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་བགམ་པའི་བསམ་པས། གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་རྣམས་འབྲིམ་གྱིས་དགེ་སློང་ཁྱེད་ཅག་སུ་ཡང་མ་ལེན་ཅིག་ཅེས་བཀའ་སྩལ་ཏོ། །ཞེས་བསྒོ་བ་དང་། བཙུན་པ་ཀུན་དགའ་བོ་བཅོམ་
ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་དུ་མི་བླང་བར་བགྱིའོ་ཞེས་སྨྲས་ནས་དེ་དག་གིས་མ་བླངས་སོ། །དེ་ནས་ཁྱིམ་བདག་དྲག་ཤུལ་ཅན་གྱིས་ཟངས་ལས་བྱས་པ་དང་། ཁར་བ་ལས་བྱས་པའི་སྣོད་རྣམས་བྲིམས་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་
རྣམས་བདེ་བར་བཞུགས་པར་རིག་ནས་རང་གིས་ལག་དར་ཏེ་བཟའ་བ་དང་བཅའ་བ་གཙང་ཞིང་བསོད་པས་ཡང་དག་པར་ཚིམ་པར་བྱེད། ཡང་དག་པར་སྟོབས་པར་བྱེད་དོ། །རྣམ་གྲངས་དུ་མར་རང་གིས་ལག་དར་ཏེ་བཟའ་བ་དང་བཅའ་བ་གཙང་ཞིང་བསོད་པས་ཡང་དག་པར་

ཚིམ་པར་བྱས། ཡང་དག་པར་བསྟབས་ནས། བཅོམ་ལྡན་འདས་བཤོས་གསོལ་ཏེ་ཕྱག་བཅབས་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བཏིང་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་
དྲག་ཤུལ་ཅན་ལ་ཆོས་དང་མཐུན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་ལེན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་མཐུན་པའི་གཏམ་གྱིས་
ཡང་དག་པར་སྟོན་པར་མཛད། ཡང་དག་པར་ལེན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་ནས་ཡོན་བསྔོ་བ་བརྗོད་ནས་གདན་ལས་བཞེངས་ཏེ་གཤེགས་སོ། །དེ་ནས་མུ་སྟེགས་ཅན་མ་དུལ་བའི་ཆ་བྱད་
ཅན་དག་བབ་བབ་ཏུ་ཅ་ཅོ་ཟེར་ཞིང་འདུག་པ་དང་། ཁྱིམ་བདག་དྲག་ཤུལ་ཅན་གྱིས་སྒོ་བའི་མི་ལ། ཀྱེ་ནང་རྗེ་གལ་ཏེ་མུ་སྟེགས་ཅན་འགའ་ཞིག་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་སྣོད་རྣམས་ཁྱེར་ཏེ་སྒོར་
འགྲོ་ན་མ་སྦྱིན་ཅིག །ཇི་སྟེ་ངེད་ལ་ཁྱིམ་བདག་གིས་བྱིན་ནོ་ཞེས་ཟེར་དང་། ཀྱེ་ཁྱེད་ལ་ཁྱིམ་བདག་གིས་ཟན་གྱི་ཕྱིར་ཡིན་གྱི་གཏན་ནི་མ་བྱིན་ནོ་ཞེས་བྱོས་ཤིག །དེ་སྟེ་ཡང་མི་སྟེར་ན་རྒྱོབ་ལ་ཕྲོགས་ཤིག་ཅེས་བསྒོ་བ་དང་། ཁྱིམ་བདག་དེ་ལྟར་འཚལ་ལོ་ཞེས་མི་དེས་ཁྱིམ་
བདག་དྲག་ཤུལ་ཅན་གྱི་ལྟར་མཉན་ནོ། །དེ་ནས་ཁྱིམ་བདག་དྲག་ཤུལ་ཅན་གྱིས་མུ་སྟེགས་ཅན་རྣམས་ལ་གསེར་དང་། དངུལ་དང་། བཻ་ཌཱུརྱ་ལས་བྱས་པའི་སྣོད་རྣམས་བྲིམ་པར་བརྩམས་པ་དང་། སྒྲ་མཐོན་པོ་དང་། སྒྲ་མང་པོ་བཏོན་ནས་ལ་ལ་ན་རེ་ཁྱིམ་བདག་
བདག་ལ་གསེར་ལས་བྱས་པ་བྱིན་ཅིག་ཅེས་ཟེར། ལ་ལ་ནི་བདག་ལ་དངུལ་ལས་བྱས་པ་བྱིན་ཅིག་ཅེས་ཟེར་ཞིང་དེ་ལྟར་དེ་དག་ཀུ་ཅོ་འདོན་པ་དེའི་ཚེ་འཐབ་མོ་བྱུང་ནས་ཕན་ཚུན་དུ་ཁུ་ཚུར་དང་། ཐལ་ལྕག་དང་། དབྱུག་པ་དང་། ལྟག་དབྱུག་དང་། རྡོག་པས་བརྡེག་པར་

བརྩམས་པ་དང་། དེ་དག་ཁྱིམ་བདག་དྲག་ཤུལ་ཅན་གྱིས་བསྡིགས་པ་དང་། གཞོམ་པ་དང་། དབྱེ་བའི་སྦྱོར་བས་ནན་གྱི་ཟན་ཟར་བཅུག་གོ། །གང་གིས་སྣོད་གང་དུ་ཟན་ཟོས་པ་དེས་དེ་ཉིད་ཁྱེར་ཏེ་འགྲོ་བར་བརྩམས་པ་དང་། སྒོ་བས་གཟུང་བར་བརྩམས་
སོ། །དེ་རྣམས་ཀྱིས་སྨྲས་པ། ཀྱེ་ནང་རྗེ་ཁྱིམ་བདག་གིས་ངེད་ལ་བྱིན་ན་ཅིའི་ཕྱིར་བཟུང་། དེས་སྨྲས་པ། ཁྱིམ་བདག་གིས་ཁྱེད་ཅག་ཟན་གྱི་ཕྱིར་བྱིན་གྱི་གཏན་ནི་མ་བྱིན་ནོ་ཞོག་ལ་དེང་ཤིག །དེ་དག་གིས་མ་བཞག་པ་དང་། སྒོ་བས་དེ་དག་བརྡེགས་ནས་ཀུ་ཅོ་རབ་ཏུ་ཆེ་
བར་གྱུར་པ་དང་། ཡངས་པ་ཅན་ན་གནས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཞེས་བྱ་བ་སྐྱེ་བོའི་ཚོགས་ཆེན་པོ་ཐམས་ཅད་འདུས་པར་གྱུར་ཏོ། །ཁྱིམ་བདག་དྲག་ཤུལ་ཅན་གྱིས་མི་སྡུག་པ་དེ་དག་མཐོང་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་
རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཀྱིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང་དེ་དག་གི་ཁྱད་པར་མཐོང་ངམ། དེ་དག་གིས་སྨྲས་པ། ཁྱིམ་བདག་མཐོང་ངོ་། །དེས་སྨྲས་པ། ཤེས་ལྡན་དག་དེ་ལྟར་ན་བཅོམ་ལྡན་འདས་ཀྱང་
བཞེད་ཆེན་ཆུང་ལ། དེའི་ཉན་ཐོས་དག་ཀྱང་འདོད་ཆེན་ཆུང་གིས་མུ་སྟེགས་ཅན་ཉེས་པར་བཤད་པའི་ཆོས་འདུལ་བ་ཅན་འདི་དག་ནི་དེ་ལྟ་མ་ཡིན་ནོ། །དེ་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་མངོན་པར་མ་དད་པ་མང་པོ་ནི་མངོན་པར་དད་པར་གྱུར་ཏོ། །
བར་མ་རྣམས་ལས་ཀྱང་ཁ་ཅིག་ནི་བཅོམ་ལྡན་འདས་ལ་དད་པར་གྱུར་ཏོ། །དེ་ནས་བཅོམ་ལྡན་འདས་གཙུག་ལག་ཁང་དུ་གཤེགས་ནས་ཞབས་བཀྲུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་ཀྱང་བཅོམ་ལྡན་
འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན། ཚོད་རིག་པ་ལ་ཕན་ཡོན་དེ་དང་གཞན་དག་ཀྱང་ཡོད་པས་དེའི་ཕྱིར་དགེ་སློང་གིས་གསེར་དང་། དངུལ་དང་། བཻ་ཌཱུརྱ་དང་། ཤེལ་ལས་བྱས་པ་ལ་སོགས་པ་རིན་པོ་ཆེའི་སྣོད་དུ་བཟའ་བར་མི་བྱ་

སྟེ། ཟ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་གསེར་དང་། དངུལ་དང་། བཻ་ཌཱུརྱ་དང་། ཤེལ་ལ་སོགས་ཏེ་རིན་པོ་ཆེའི་སྣོད་དུ་བཟའ་བར་མི་བྱའོ་ཞེས་བཀའ་སྩལ་པ་དང་། དགེ་སློང་སྐྱོན་དང་བྲལ་བ་གཞན་དག་ཅི་ཡོད་པ་དེ་
དག་གི་དབང་གིས་སོ་སོའི་སྐྱེ་བོ་དག་ལྷའི་གནས་དང་། ཀླུའི་གནས་སུ་སོང་བ་ལས་དེར་དེ་དག་ཟན་ལ་བོས་པ་དང་། དེ་དག་གི་ཁྱིམ་ན་རང་གི་བསོད་ནམས་ལས་གྲུབ་པའི་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་ཡོད་ཀྱི་གཞན་མེད་པས་དེ་དག་དེར་
འགྱོད་དེ་ཟན་མ་ཟོས་སོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་གང་དུ་སྣོད་གཞན་རྙེད་པ་མེད་པ་དེར་ནི་གསེར་དང་། དངུལ་དང་། བཻ་ཌཱུརྱ་དང་། ཤེལ་ལ་
སོགས་པའི་སྣོད་དུ་ཟ་བར་གནང་གིས་འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་
བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །
དེ་དང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་དེ་ལ་སེམས་ཅན་ཞུགས་པར་གྱུར་ཏོ། །གང་གི་ཉིན་མོ་དེ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉིན་མོ་ནས་མདངས་བཟང་བར་གྱུར་ཏོ། །དེ་ཟླ་བ་བརྒྱད་
དམ་དགུ་འདས་ནས་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ནས་མཉན་ཡོད་ཀུན་དུ་ཁྱིམ་བདག་ཆེ་གེ་མོ་ཞིག་གི་བུ་མོ་

གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ཏོ་ཞེས་སྒྲ་དེ་གྲགས་པ་དང་། སྲོག་ཆགས་བརྒྱ་སྟོང་ཕྲག་མང་པོ་ངོ་མཚར་དུ་གྱུར་ནས་ཁྱིམ་
བདག་དེའི་ཁྱིམ་དུ་འདུས་སོ། །རེ་ཞིག་ན་བྲམ་ཟེ་ལྟས་མཁན་ཞིག་ཡུལ་གཞན་ནས་འོངས་པ་དེ་ཡང་ངོ་མཚར་གྱི་ཕྱིར་དེ་ཉིད་དུ་འདུས་ཏེ་དེས་དེ་ལ་ཕན་ཚུན་དུ་བལྟས་ནས་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཁྱེད་ཀྱིས་བུ་མོ་འདི་མཐོང་ངམ། དེ་དག་གིས་སྨྲས་པ་མཐོང་ངོ་། །ཤེས་ལྡན་
དག་བུ་མོ་འདི་ནི་ཅི་ནས་ཀྱང་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་འགྱུར་རོ། །དེ་དག་གིས་སྨྲས་པ། བྲམ་ཟེ་འདིའི་གཟུགས་འདི་ལྟར་མཛེས་པ་དང་སྦྱར་ན་འདི་ནི་གདོན་མི་ཟ་བར་སྐྱེས་པ་ལྔ་བརྒྱ་དང་དགའ་མགུར་སྤྱོད་པར་འགྱུར་རོ། །མཉན་ཡོད་ཐམས་
ཅད་དུ་ཡང་ཁྱིམ་བདག་ཅིག་གི་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་ཏེ། དེ་བཙས་པའི་ཚེ་དེའི་ཁྱིམ་དེ་ཉི་མའི་འོད་བཞིན་དུ་སྣང་བར་གྱུར་ཏོ། །དེ་ལ་མཚན་མཁན་གྱིས་བུ་མོ་འདི་ནི་སྐྱེས་
པ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་ལུང་བསྟན་ཏོ་ཞེས་སྒྲ་གྲགས་ནས་གང་གིས་སྒྲ་ཐོས་པ་དེ་ཡང་དེར་འོང་བར་གྱུར་ཏོ། །ཞག་བདུན་གསུམ་ཉི་ཤུ་རྩ་གཅིག་ཏུ་དེ་བཙས་པའི་བཙས་སྟོན་རྒྱ་ཆེན་པོ་བྱས་ནས་མིང་འདོགས་པར་བྱེད་དེ། བུ་མོ་འདིའི་མིང་ཇི་སྐད་དུ་
གདགས། ཉེ་དུ་དག་གིས་སྨྲས་པ། བུ་མོ་འདི་བཙས་པའི་ཚེ་ཁྱིམ་ཉི་མའི་འོད་བཞིན་དུ་སྣང་བར་གྱུར་པས། དེའི་ཕྱིར་བུ་མོའི་མིང་འོད་བཟང་མ་ཞེས་གདགས་སོ་ཞེས་དེའི་མིང་འོད་བཟང་མ་ཞེས་བྱ་བར་བཏགས་སོ། །འོད་བཟང་མ་མ་མ་བརྒྱད་པོ་པང་ན་འཚོ་བའི་མ་མ་གཉིས་
དང་། ནུ་ཞོ་ལྡུད་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་གཏད་དེ། དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་སར་དང་། མར་ཀར་དང་། མར་གྱི་སྙིང་གུ་དང་། གཞན་ཡང་ཡོ་བྱད་ཀྱི་ཁྱད་པར་གཙོ་བོ་གཙོ་བོ་

དག་གིས་བསྐྱེད་བསྲིངས་ཏེ་རྫིང་གི་པདྨ་བཞིན་དུ་སྐྱེ་དྲག་པར་གྱུར་ཏོ། །དེ་གང་གི་ཚེ་ཆེན་མོར་གྱུར་པ་དེའི་ཚེ་གཟུགས་དང་། ལང་ཚོ་མཛེས་པ་དང་། གཡེར་བ་དང་། སྒྱུ་རྩལ་གྱི་ཡོན་ཏན་གྱི་ཁྱད་པར་དང་ལྡན་པས་ནགས་ཚལ་མེ་ཏོག་རྒྱས་པའི་ནང་ན་ནགས་ཚལ་གྱི་ལྷ་
བཞིན་དུ་ཁྱིམ་དེ་ན་མཛེས་སོ། །དེའི་གཟུགས་དང་། ལང་ཚོ་དང་། ཁ་དོག་དང་། རྒྱུ་བ་དང་། གནས་པའི་ཁྱད་པར་གྱིས་འཇིག་རྟེན་པའི་ལམ་གྱིས་འདོད་ཆགས་དང་བྲལ་བའི་དྲང་སྲོང་དག་ཀྱང་སེམས་འཕྲོག་པར་བྱེད་ན་ཐོག་མ་མེད་པའི་དུས་ནས་ཉོན་མོངས་པ་ཀུན་
དུ་སྤྱོད་པ་བསགས་པ་རིགས་དང་། གཟུགས་དང་། ལང་ཚོ་དང་། དབང་ཕྱུག་གི་དྲེགས་པས་རྒྱགས་པའི་མི་རྣམས་ལྟ་སྨོས་ཀྱང་ཅི་དགོས། ཁྱིམ་བདག་དེ་ཡང་ནང་མིའི་སྐྱེ་བོའི་འཁོར་དང་བཅས་ཏེ་དེ་སྲུང་བ་ལྷུར་ལེན་ཅིང་གཉིད་ཀྱང་མི་ལོག་གོ། །ཡུལ་ཀོ་ས་
ལའི་རྒྱལ་པོ་གསལ་རྒྱལ་བཙུན་མོའི་འཁོར་དང་། གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་བཅས་པ་དང་། གཞན་ཡང་འདབ་ཆགས་ན་གནས་པའི་རྒྱལ་པོ་དང་། བློན་པོའི་བུ་དང་། མདུན་ན་འདོན་གྱི་བུ་ལ་སོགས་པས་བསླང་བར་བསམས་ཀྱང་
བུ་མོ་འོད་བཟང་མ་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་མཚན་མཁན་གྱིས་ལུང་བསྟན་པས་ན་འཇིག་རྟེན་གྱི་དཔྱས་སུ་དོགས་པའི་ཕྱིར་སུས་ཀྱང་མ་བསླངས་སོ། །དེ་ཡང་དེའི་ཁྱིམ་གྱི་སྐར་ཁུང་དྲ་བ་ཅན་དང་། སྐར་ཁུང་དང་། སྟེགས་བུ་དང་། ཁང་ཐོག་
ཏུ་འདུག་ནས་སུ་སློང་སྙམ་ཞིང་སྐྱེས་པ་དག་ལ་ལྟ་བར་བྱེད་དོ། །ཁྱིམ་བདག་དེས་དེའི་སྤྱོད་པ་མཐོང་ནས་རང་གི་རིགས་རྒྱུད་དང་མཐུན་པ་གཞན་དག་ལ་མི་སློང་ཡང་དེ་བཞིན་དུ་སྦྱིན་པར་བརྩམས་ན་འགའ་ཡང་ལེན་དུ་མ་བཏུབ་པོ། །དེ་ནས་ཁྱིམ་བདག་དེ་དེ་སུ་ཡང་མ་འདོད་པས་
ཡིད་མི་བདེ་བ་སྐྱེས་ཏེ་བྱ་བ་ཐམས་ཅད་ཀྱི་བློ་བཏང་ནས་དེ་སྦྱིན་པའི་ཐབས་སེམས་པས་ལུས་སྐྱ་བོ་བསེང་བསེང་པོ་ཤ་བྲི་ངན་པ་རྐེ་བ་ཤིག་ཤིག་པོ་ཞིག་ཏུ་གྱུར་ཏོ། །དེའི་ཚེ་མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་གནས་པ་དེས་རིགས་

མཉམ་པ་ལས་ཆུང་མ་བླངས་ཀྱང་དེ་རང་གི་ལས་ཀྱིས་ཤི་བར་གྱུར་ཏོ། །དེ་བཞིན་དུ་གཉིས་པ་དང་། གསུམ་པ་ནས་བདུན་པའི་བར་བླངས་ཀྱང་དེ་ཡང་རང་གི་ལས་ཀྱིས་ཤི་བར་གྱུར་ཏོ། །དེ་དག་གིས་ཀྱང་ཚེ་ཐུང་བར་འགྱུར་བའི་ལས་བྱས་ལ་དེས་
ཀྱང་དཔྱ་བར་འགྱུར་བའི་ལས་བྱས་པས་དེའི་མིང་ཆུང་མ་གསོད་པ་ཆུང་མ་གསོད་པ་ཞེས་བྱ་བར་ཆགས་སོ། །དེས་གཞན་དུ་བསླངས་པ་དང་། དེ་དག་གིས་སྨྲས་པ། ངེད་ཀྱི་བུ་མོ་ཅི་སྟེ་གསད་ཅེས་ཟེར་རོ། །དེས་ཡུགས་ས་མོ་དག་ཀྱང་བསླང་བར་བརྩམས་པ་དང་།
དེ་དག་ཀྱང་ངེད་ཀྱི་ལུས་ཅིའི་ཕྱིར་དོར་ཞེས་ཟེར་ནས་དེ་ལ་ཐམས་ཅད་ཀྱིས་ཀྱང་མ་སྟེར་བ་དང་། ཆུང་མ་མེད་ཀྱང་བླ་ཞེས་ཆུང་མ་འདོད་པའི་རེ་ཐག་བཅད་ནས་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་དུ་རྒྱུ་རྣམས་དང་ལྷན་ཅིག་བསྟེན་པར་བརྩམས་སོ། །དེའི་ཕ་
སངས་རྒྱས་པའི་དགེ་བསྙེན་ཞིག་པས་དེས་བསམས་པ། བདག་གི་ཕ་སངས་རྒྱས་པའི་དགེ་བསྙེན་ཡིན་ན། བདག་ལ་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་དུ་རྒྱུ་བ་རྣམས་ཀྱིས་ཅི་ཞིག་བྱ། བཅོམ་ལྡན་འདས་ཀྱི་ཉན་ཐོས་པ་རྣམས་ལ་བསྙེན་
བཀུར་བྱ་ཞིང་དེ་དག་ལ་བྱ་བ་བྱས་ནས་དེ་ཉིད་དུ་རབ་ཏུ་འབྱུང་ངོ་སྙམ་ནས་དེ་ཡང་དང་ཡང་དུ་རྒྱལ་བྱེད་ཀྱི་ཚལ་དུ་འགྲོ་བར་གྱུར་ཏོ། །ཇི་ཙམ་དུས་གཞན་ཞིག་ན་མཛའ་བོ་ཞིག་གིས་མཐོང་ནས། དེས་སྨྲས་པ། གྲོགས་པོ་ཁྱོད་རྒྱལ་བྱེད་ཀྱི་ཚལ་དུ་ཡང་དང་ཡང་དུ་འགྲོ་ན་རབ་
ཏུ་འབྱུང་བར་མི་རྩོལ་གྲང་། གྲོགས་པོ་བདག་རབ་ཏུ་བྱུང་ཟིན་ན་ཡང་རབ་ཏུ་འབྱུང་ཅི་དགོས། བདག་གིས་ཆུང་མ་གཅིག་བླངས་ཀྱང་རང་གི་ལས་ཀྱིས་ཤི་བར་གྱུར། དེ་བཞིན་དུ་གཉིས་པ་དང་། གསུམ་པ་ནས་བདུན་པའི་བར་ཡང་རང་གི་ལས་ཀྱིས་ཤི་བར་གྱུར་ཏེ། དེ་དག་
གིས་ཀྱང་ཚེ་ཐུང་བར་འགྱུར་བའི་ལས་བྱས། ཁོ་བོས་ཀྱང་དཔྱ་བར་འགྱུར་བའི་ལས་བྱས་པས་ཁོ་བོའི་མིང་ཆུང་མ་གསོད་པ་ཆུང་མ་གསོད་པ་ཞེས་བྱ་བར་ཆགས་ནས་བདག་ཡི་ཆད་དོ་དགེ་སློང་དག་ལ་ངེས་པར་བསྙེན་བཀུར་བྱ་བ་ནི་བདག་གི་ཕའི་ལུགས་ཡིན་ཏེ་འདི་མི་བྱ་ན་གཞན་

སུ་ལ་བསྙེན་བཀུར་བྱ། དེས་སྨྲས་པ། གྲོགས་པོ་དེ་ཡང་བདེན་ན་འོན་ཀྱང་གདོན་མི་ཟ་བར་བུ་བསྐྱེད་དགོས་ཏེ་གཞན་དུ་ན་རབས་འཆད་པར་འགྱུར་ན་ཅི་སྟེ་གཞན་གྱི་བུ་མོ་སློང་བར་མི་བྱེད། དེས་སྨྲས་པ། གྲོགས་པོ་ཅི་ཕན་གང་ལ་བསླངས་པ་དེ་ངད་ཀྱི་བུ་མོ་ཅི་སྟེ་གསད་
ཅེས་ཟེར་རོ། །དེས་སྨྲས་པ། གྲོགས་པོ་གལ་ཏེ་དེ་ལྟ་ན་ཡུགས་ས་མོ་དག་བསླང་ན་ཅི་ཉེས། དེས་སྨྲས་པ། གྲོགས་པོ་བདག་གིས་བསླང་ན་དེ་དག་ཀྱང་ངའི་ལུས་ཅིའི་ཕྱིར་ཡོངས་སུ་དོར་ཞེས་ཟེར་རོ། །དེས་སྨྲས་པ། གྲོགས་པོ་གལ་ཏེ་དེ་ལྟ་ན་འོད་བཟང་མ་ཅིའི་ཕྱིར་མི་
བསླང་། དེས་སྨྲས་པ། གྲོགས་པོ་འཇིག་རྟེན་ཀུན་དུ་གྲགས་པ་དེས་ཇི་སྨད་འཚོང་མའི་ཁྱིམ་དུ་བྱའམ། དེས་སྨྲས་པ། གྲོགས་པོ་ཁྱོད་དད་པ་ཅན་ཡིན་པས་ཁྱོད་ཀྱིས་ཁྱིམ་དུ་དགེ་སློང་ལས་སུ་ཞིག་འོང་སློངས་ཤིག །དེས་སྨྲས་པ། གྲོགས་པོ་གལ་ཏེ་དེ་ཡང་མི་སྟེར་
མོད། གྲོགས་པོ་སློངས་ཤིག་དང་། དེའི་ཕ་ཡང་སྐྱོ་ཞིང་འདུག་པས་སྟེར་བར་འགྱུར་རོ། །དེ་ཁྱིམ་བདག་དེའི་ཁྱིམ་དུ་སོང་སྟེ་དེས་སྨྲས་པ། བདེ་ལེགས་སུ་གྱུར་ཅིག །བདེ་ལེགས་སུ་གྱུར་ཅིག །ཁྱིམ་བདག་དེས་སྨྲས་པ། ཅི་ཞིག་འདོད། འོད་བཟང་མའོ། །
སྦྱིན་ནོ། །དེས་དེ་དཔལ་གྱི་འབྱོར་པ་ཆེན་པོས་བག་མར་བླངས་ཏེ་ལྡེ་མིག་དང་། ལྡེ་མིག་ཀྱོག་པོ་དག་བྱིན་ནས་ཁྱིམ་གྱི་བདག་མོར་བཅུག་སྟེ་སྨྲས་པ། བཟང་མོ་ཁོ་བོ་ཅག་གི་རིགས་ཀྱི་ལུགས་ཀྱིས་ནི་སྟོན་པ་སངས་རྒྱས་དང་། དགེ་སློང་དག་སྦྱིན་གནས་ཡིན་པས་ཁྱོད་ཀྱིས་
ཀྱང་དེ་དག་ལ་བྱ་བ་བྱོས་ཤིག །དེས་སྨྲས་པ། ཇོ་བོ་ལེགས་ཀྱིས་དེ་བཞིན་དུ་བགྱིའོ། །ཁྱིམ་བདག་དེའི་ཁྱིམ་དུ་དགེ་སློང་དག་ཉིན་གཅིག་བཞིན་དུ་ཟན་ཟ་བ་ལ་འོད་བཟང་མ་རང་གིས་ལག་དར་ཏེ་འབྲིམ་མོ། །དེ་ན་དགེ་སློང་གང་དག་ཁ་དོག་དང་། དབྱིབས་དང་། ལང་
ཚོའི་ཁྱད་པར་ཕུན་སུམ་ཚོགས་པ་དེ་དག་དེས་མཐོང་ནས་རྣམ་པར་རྟོག་པ་སྐྱེས་པར་གྱུར་ཏོ། །དེ་དེ་དག་ལ་རྟོག་པ་འཕེལ་བས་ཡིད་བདེ་བ་སྐྱེས་པར་གྱུར་ཏོ། །ཁྱིམ་བདག་དེ་ཡང་རི་འོར་ཞིག་ཏུ་དོན་ཞིག་ཡོད་ནས་དེས་བཟང་མོ་ཁོ་བོ་ནི་རི་འོར་ཆེ་གེ་མོ་ཞིག་ཏུ་དོན་ཅིག་ཡོད་དེ།

བདག་དེར་འགྲོས་ཁྱོད་ཀྱིས་ཡོན་གནས་དག་དེ་བཞིན་དུ་བཤོས་གསོལ་ཅིག་ཅེས་བསྒོ་བ་དང་། དེས་སྨྲས་པ། རྗེའི་སྲས་ལེགས་ཀྱིས་དེ་བཞིན་དུ་བགྱིས་བཞུད་ཅིག །དེས་དགེ་སློང་རྣམས་ལ་ཡང་འཕགས་པ་བདག་ནི་རི་འོར་ཆེ་གེ་མོ་ཞིག་ཏུ་བགྱི་བ་
ཞིག་བྱུང་ནས་བདག་དེར་མཆིའི་ཁྱེད་ཅག་དེ་བཞིན་དུ་བདག་གི་སྡུམ་པར་བཤོས་གསོལ་ཅིག་ཅེས་སྨྲས་པ་དང་། དེ་དག་གིས་སྨྲས་པ། ཁྱིམ་བདག་སོང་ཞིག་ནད་མེད་པར་གྱུར་ཅིག །ཟན་བཟའ་བར་བྱའོ་ཞེས་བྱས་པ་དང་། དེ་ཡང་རི་འོར་གྱི་གྲོང་དུ་སོང་ངོ་། །དགེ་སློང་དག་
ཀྱང་དེ་བཞིན་དུ་དེའི་ཁྱིམ་དུ་ཟན་བཟའ་བར་བརྩམས་པ་དང་། འོད་བཟང་མ་བདག་གི་ཁྱོ་མེད་དོ་སྙམ་ནས། བུད་མེད་ཀྱི་གཡོ་དང་། བུད་མེད་ཀྱི་སྒྱུ་དང་། བུད་མེད་ཀྱི་ཚུལ་འཆོས་པ་གང་དག་ཡིན་པ་དེ་དག་དགེ་སློང་རྣམས་ལ་སྟོན་པར་རྩོམ་པ་དང་། དགེ་སློང་རྣམས་ཀྱིས་
གཅིག་ལ་གཅིག་ཉེས་དམིགས་བྱུང་ན། འདི་ལ་ཇི་ལྟར་བསྒྲུབ་པར་བྱ་ཞེས་བགྲོས་པ་དང་། དེ་ན་ཁ་ཅིག་གིས་སྨྲས་པ། འདི་ལ་བསྒྲུབ་ཏུ་ཅི་ཡོད། སང་ནས་མི་འོང་དུ་ཟད་མོད། གཞན་དག་གིས་སྨྲས་པ། ཚེ་དང་ལྡན་པ་བདག་ཅག་ནི་བསོད་སྙོམས་པ་ཡིན་པས་
སང་ནས་བསོད་སྙོམས་ལ་འདོང་དུ་ཟད་མོད། གཞན་དག་གིས་ཀྱེ་ལེགས་ཀྱིས་དེ་བཞིན་དུ་བྱའོ་ཞེས་སྨྲས་ནས། དེ་དག་ཕྱི་དེ་ཉིན་ནས་བསོད་སྙོམས་ལ་ཞུགས་སོ། །ཇི་ཙམ་དུས་གཞན་ཞིག་ན་ཁྱིམ་བདག་དེ་སླར་འོངས་ནས་འོད་བཟང་མ་ལ་དྲིས་པ། འོད་བཟང་མ་
ཡོན་གནས་དག་བཤོས་གསོལ་ཏམ། དེས་སྨྲས་པ། ཉིན་གཅིག་བྱོན་ནས་དེ་ཕན་ཆད་ཡེ་མ་བྱོན་ཏོ། །དེས་བསམས་པ། ངེས་པར་འདིས་དེ་དག་གི་མདུན་དུ་བུད་མེད་ཀྱི་གཡོ་དག་བསྟན་ཏེ་བཀུར་སྟི་མ་བྱས་པས་འཛེམ་ནས་དེ་དག་མ་འོངས་སོ་སྙམ་སྟེ། དེས་དེ་དག་
གི་དྲུང་དུ་སོང་ནས་ཡང་སྤྱན་དྲངས་པ་དང་། དེ་དག་གིས་སྨྲས་པ། ཁྱིམ་བདག་བདག་ཅག་ནི་བསོད་སྙོམས་པ་ཡིན་པས་བསོད་སྙོམས་ལ་རྒྱུའོ། །དེས་སྨྲས་པ། འཕགས་པ་བདག་གིས་འཚལ་གྱིས་གཤེགས་དང་དེ་ལྟ་བུའི་ཉེས་དམིགས་མི་མཆིའོ། །དེ་དག་གིས་ཁས་

བླངས་པ་དང་། དེ་དག་གི་རྐང་པ་ལ་ཕྱག་འཚལ་ནས་སོང་ངོ་། །དགེ་སློང་དག་ཕྱི་དེ་ཉིན་དེའི་ཁྱིམ་དུ་འོངས་པ་དང་། ཁྱིམ་བདག་དེས་འོད་བཟང་མ་ཁྱིམ་དུ་བཅུག་ནས་ཕྱི་སྒོ་བཅད་དེ་བཞག་ནས་དེ་ནས་དེ་དག་ལ་རང་གིས་ལག་དར་ཏེ་འབྲིམ་བར་བརྩམས་པ་ན་འོད་བཟང་མ་ཁྱིམ་
གྱི་ནང་ན་འདུག་བཞིན་དུ་དགེ་སློང་ཟན་ཟ་བ་དེ་དག་ལ་རྣམ་པར་རྟོག་པ་སྐྱེས་པར་གྱུར་ཏེ་འཕགས་པ་ཆེ་གེ་མོ་ཞིག་གི་རྐང་པ་ནི་འདི་འདྲ། བྱིན་པ་ནི་འདི་འདྲ། བརླ་ནི་འདི་འདྲ། རྐེད་པ་དང་། རྩིབ་ལོགས་དང་། རྒྱབ་དང་། ལྟོ་དང་། བཞིན་དང་། སོ་དང་། མཆུ་དང་། སྣ་
དང་། མིག་དང་། དཔྲལ་བ་དང་། མགོ་ནི་འདི་འདྲའོ་ཞེས་དེ་དེ་ལྟར་རྣམ་པར་རྟོག་པ་ན་ས་བཅུ་པའི་འདོད་ཆགས་ཀྱི་མེ་བྱུང་བར་གྱུར་པ་རྣམ་པར་རྟོག་པའི་རླུང་གི་ཤུགས་བདོ་བ་དེས་སྤར་བས་རྟུལ་ཏེ་དེ་ཉིད་དུ་འཆི་བའི་དུས་བྱས་སོ། །དགེ་སློང་དག་ཟན་ཟོས་ཏེ་ཡོན་
བཤད་པ་བྱས་ནས་དོང་བ་དང་། ཁྱིམ་བདག་དེས་སྒོ་ཕྱེ་ནས་སྨྲས་པ། འོད་བཟང་མ་ཚུར་ཤོག་ཟན་ཟོ་ཞེས་བྱས་ན་དེ་དུས་ལས་འདས་པས་སུ་ཞིག་ལན་འདེབས། དེས་ནང་དུ་ཞུགས་ན་ཅི་ཙམ་ན་ས་ལ་འགྱེལ་བ་མཐོང་ངོ་། །དེས་བསམས་པ་གདོན་མི་ཟ་བར་འདི་
གཉིད་ཀྱིས་ལོག་གིས་བསླང་ངོ་སྙམ་ནས་དེས་དེ་བསྒུལ་བར་བརྩམས་པ་དང་། རེ་ཞིག་ན་དུས་ལས་འདས་པར་མཐོང་ནས་དེ་ངོམ་ཟུང་གནག་ཅིང་སྨ་བབ་ནས་ནང་མི་དག་ལ་སྨྲས་པ། ཤེས་ལྡན་དག་བདག་ལྟ་བྱུར་ངན་པ་ཆུང་མ་རིན་པོ་ཆེ་འདི་ལྟ་བུ་དང་བྲལ་བར་གྱུར་གྱིས་
མཛའ་གྲོགས་དང་། ཕུ་ནུ་དང་། གཉེན་དག་ལ་འོད་བཟང་མ་དུས་ལས་འདས་སོ་ཞེས་སྦྲོན་ཅིག་ཅེས་བྱས་པ་དང་། དེ་དག་གིས་ཀུ་ཆོ་བཏོན་ཏེ། ཁ་ཅིག་ནི་ས་ལ་སྒྱེལ་ནས་ངུ་ཞིང་འདུག །ཁ་ཅིག་ནི་ཁྱིམ་བདག་ངུ་བའི་ལག་པ་དང་། རྐང་པ་ནས་འཛིན་པར་བྱེད། མཛའ་
བཤེས་དང་། ཕུ་ནུ་དང་། གཉེན་ཁ་ཅིག་ནི་ངུད་མོའི་སྒྲ་འབྱིན་པར་བྱེད་དོ། །ཁྱིམ་བདག་དེ་རང་གི་སྐྱེ་བོ་དང་བཤེས་ཀྱི་འཁོར་རྒྱ་ཆེ་བ་ཞིག་པས་དེ་རྣམས་ཇི་སྲིད་དུ་ངུ་བ་དེའི་བར་དུ་ཉི་མ་ནུབ་ནས་དེ་དག་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གིས་ཁྱོགས་

བརྒྱན་ཏེ། བཀུར་སྟི་ཆེན་པོས་དེ་དུར་ཁྲོད་དུ་ཁྱེར་རོ། །རེ་ཞིག་ཅིག་ན་མི་རྒོད་ལྔ་བརྒྱ་ཙམ་ཞིག་རི་འོར་ཞིག་ཏུ་སོང་ནས་རྙེད་པ་དང་ཁེ་ཕྱིན་ནས་དུར་ཁྲོད་དེ་དང་ཧ་ཅང་མི་རིང་བར་འོངས་པ་གྲོང་ཁྱེར་ན་གནས་པའི་མི་ཞིག་གིས་མཐོང་ནས་དེས་བསམས་པ། སྐྱེ་བོའི་
ཚོགས་ཆེན་པོ་གྲོང་ཁྱེར་ནས་བྱུང་སྟེ་འོད་བཟང་མ་སྐྱེལ་བར་དུར་ཁྲོད་དུ་སོང་བ་རྣམས་མི་རྒོད་དེ་དག་གིས་ཚུལ་མ་ཡིན་པར་གནོད་པ་བྱས་ན་མི་རུང་གིས་སྦྲན་ཏོ་སྙམ་ནས་དེ་མགྱོགས་པར་སོང་སྟེ། སྐྱེ་བོའི་ཚོགས་ཆེན་པོ་དེ་དག་ལ་ཤེས་ལྡན་དག་མི་རྒོད་ལྔ་བརྒྱ་ཙམ་ཧ་ཅང་མི་རིང་བ་ཞིག་ན་
འདུག་གིས་བྲོས་ཤིག་ཅེས་སྦྲན་པ་དང་། དེ་དག་གིས་ཀྱང་སང་རིམ་གྲོ་བྱའོ་ཞེས་སྲུང་མ་གཞག་སྟེ། འོད་བཟང་མ་ཇི་ལྟར་རྒྱན་སྣ་ཚོགས་ཀྱིས་བཀླུབས་པ་དང་། དྲི་དང་། བདུག་པ་དང་། གོས་དང་། ཕྱེ་མ་དང་། གདུགས་དང་། རྒྱལ་མཚན་དང་། བ་དན་དག་གིས་མཛེས་
པར་བྱས་ཏེ་ཕྱུང་ནས་བསྙལ་བ་བཞིན་དུ་བོར་ཏེ་འབྲོས་བསླང་ནས་གྲོང་ཁྱེར་དུ་ཞུགས་སོ། །ཅི་ཙམ་ན་མི་རྒོད་དེ་དག་ཕྱོགས་དེར་ཕྱིན་པ་དང་། སྲུང་མ་རྣམས་བྲོས་སོ། །མི་རྒོད་རྣམས་ཀྱིས་རབ་ཏུ་བརྒྱན་པ་དེ་མཐོང་ནས་མཆོག་ཏུ་ངོ་མཚར་སྐྱེས་སོ། །དེ་ནས་འོད་བཟང་མའི་གོས་
རྣམས་བཤུས་ནས་བལྟས་པ་དང་། དེ་དག་གིས་དེའི་གཟུགས་གཞོན་ལ་མཛེས་པ་མཐོང་ནས་རབ་ཏུ་ཆགས་ཏེ་ཤེས་ལྡན་དག་གར་བསྐོར་ཀྱང་བུད་མེད་འདི་ལྟ་བུ་དང་ལྷན་ཅིག་དགའ་མགུར་སྤྱད་པར་ཟད་དོ་ཞེས་སྨྲས་ནས་དེ་དག་གིས་དེ་དང་ལྷན་ཅིག་དགའ་མགུར་སྤྱད་དེ་ཀཱར་ཥཱ་པ་ཎ་ལྔ་
བརྒྱ་བཞག་པ་དང་། འོད་བཟང་མའི་རོ་ལ་ཡང་སྐྱེས་བུ་ལྔ་བརྒྱས་ཀཱར་ཥཱ་པ་ཎ་ལྔ་བརྒྱ་བྱིན་ཏེ་དགའ་མགུར་སྤྱོད་དོ་ཞེས་ཀུན་ཏུ་སྒྲ་གྲགས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཁྱིམ་བདག་གི་མཆིས་
འབྲང་འོད་བཟང་མས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་འོད་དང་ལྡན་པར་གྱུར་ཅིང་བཙས་མ་ཐག་ཏུ་ཁྱིམ་ཐམས་ཅད་འོད་ཀྱིས་སྣང་བར་བགྱིས་པ་དང་། གུམ་ནས་ཀྱང་མི་རྒོད་ལྔ་བརྒྱས་ཀཱར་ཥཱ་པ་ཎ་ལྔ་བརྒྱ་སྩལ་ནས་དགའ་མགུར་སྤྱད་ལགས། བཅོམ་ལྡན་འདས་ཀྱིས་བཀའ་

སྩལ་པ། དགེ་སློང་དག་ཁྱིམ་བདག་གི་ཆུང་མ་འོད་བཟང་མ་ཉིད་ཀྱིས་ལས་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། དབའ་རྒལ་བཞིན་དུ་ཉེ་བར་གནས་པ་ངེས་པར་གྱུར་པ་ཡིན་ཏེ། འོད་བཟང་མས་ལས་བྱས་ཤིང་བསགས་པ་དག་གཞན་སུ་ཞིག་གིས་མྱོང་བར་
འགྱུར། དགེ་སློང་དག་ལས་བྱས་ཤིང་བསགས་པ་རྣམས་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་དགེ་བ་དང་མི་དགེ་བའི་ལས་བྱས་ཤིང་བསགས་པ་རྣམས་ནི་ཟིན་
པའི་ཕུང་པོ་དང་ཁམས་དང་སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་ཏེ། བསྐལ་པ་བརྒྱ་ཕྲག་རྣམས་སུ་ཡང་། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་སྔོན་བྱུང་བ་བསྐལ་པ་བཟང་
པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་འོད་སྲུང་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་
བྱུང་སྟེ། བཱ་རཱ་ཎ་སཱིའི་གྲོང་ཁྱེར་ན་ཉེ་བར་རྟེན་ཅིང་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །དེའི་ཚེ་དེའི་དུས་ན་བཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཀྲྀ་ཀཱི་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ། རྒྱལ་སྲིད་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་།
སྐྱེ་བོ་དང་། མི་མང་པོས་གང་བ་དང་། འཐབ་པ་དང་། རྩོད་པ་དང་། ནང་འཁྲུག་དང་། འཁྲུག་གློང་རབ་ཏུ་ཞི་བ། ནད་མེད་པ། སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ་ཆོས་ཀྱི་རྒྱལ་པོས་ཆོས་བཞིན་བྱེད་དུ་འཇུག་གོ། །ཇི་ཙམ་ན་
ཡང་དག་པར་རྫོགས་པའི་སངས་རྒྱས་འོད་སྲུང་སངས་རྒྱས་ཀྱི་མཛད་པ་མཐའ་དག་མཛད་ནས་བུད་ཤིང་ཟད་པའི་མེ་བཞིན་དུ་ཕུང་པོ་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་། རྒྱལ་པོ་ཀྲྀ་ཀཱི་བཙུན་མོ་དང་། གཞོན་ནུ་དང་། བློན་པོ་དང་། ཕོ་བྲང་

འཁོར་གྱི་མི་དང་བཅས་པས་དེའི་སྐུ་གདུང་ལ་བཀུར་སྟི་ཆེན་པོས་སྐུ་གདུང་གི་མཆོད་པ་བྱས་ནས་རིན་པོ་ཆེ་སྣ་བཞིའི་མཆོད་རྟེན་ཁོ་ར་ཁོར་ཡུག་ཏུ་དཔག་ཚད་གཅིག་པ་ཕང་དུ་དཔག་ཚད་ཕྱེད་པ་གཅིག་བརྩིགས་སོ། །དེ་ན་ཚོང་དཔོན་གྱི་བུ་མོ་ཞིག་དད་
པ་སྐྱེས་ནས་སྲོག་ཤིང་ལ་མེ་ལོང་ཅིག་བཏགས་སོ། །དགེ་སློང་དག་ཇི་སྙམ་དུ་སེམས། ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་དད་པ་སྐྱེས་ནས་སྲོག་ཤིང་ལ་མེ་ལོང་བཏགས་པ་གང་ཡིན་པའི་ཚོང་དཔོན་གྱི་བུ་མོ་དེ་ནི་ཁྱིམ་བདག་གི་ཆུང་མ་འོད་
བཟང་མ་འདི་ཉིད་ཡིན་ཏེ། དེའི་ཚེ་དེའི་དུས་ན་གང་འདིས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་གྱི་སྲོག་ཤིང་ལ་མེ་ལོང་བཏགས་པ་དེའི་ལས་ཀྱི་རྣམ་པར་སྨིན་པས་འོད་དང་ལྡན་བཞིན་དུ་སྐྱེས་ལ་སྐྱེས་མ་ཐག་ཏུ་ཡང་ཁྱིམ་ཐམས་ཅད་འོད་ཀྱིས་སྣང་
བར་གྱུར་པ་ཡིན་ནོ། །གང་ཡང་ཤི་ནས་སྐྱེས་བུ་ལྔ་བརྒྱས་ཀཱར་ཥཱ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་པ་དེ་ཡང་ཉོན་ཅིག །དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཚངས་བྱིན་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ། རྒྱལ་སྲིད་འབྱོར་པ་དང་། རྒྱས་
པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། རྩོད་པ་དང་། ནང་འཁྲུག་དང་། འཁྲུག་གློང་རབ་ཏུ་ཞི་བ། ཆོམ་རྐུན་དང་། ནད་དང་བྲལ་བ་སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ། ཆོས་ཀྱི་
རྒྱལ་པོས་ཆོས