Kinh tạng Tây Tạng (Kangyur Đại Học) — 011_འདུལ་བ།_ད

་མོ་ལ་ནི་མ་
བབ་ན་བཟའ་འདི་ལྟ་བུ་ག་ལས་འོངས་ཞེས་དྲིས་པ་དང་། བདག་ལ་ལྷས་ཁྱོད་ཀྱི་ཁྱོ་དེང་འོང་ངོ་ཞེས་བསྟན་པས་ན། ཁྱོད་ཀྱི་ཕྱིར་འདི་ལྟར་སྟ་གོན་བགྱིས་སོ་ཞེས་སྨྲས་སོ། །བྲམ་ཟེས་ཨེ་མ་ཧོ་ང་ནི་བསོད་ནམས་ཅན་དུ་བས་ཏེ། བདག་གི་ཆུང་མའི་རྨི་ལམ་དུ་ཡང་ལྷས་བསྟན་པ་ལྟ་ཞེས་
སྨྲས་ཏེ། དེས་ཟན་ཟོས་ནས་ཁྲུས་བྱས་ཏེ་མལ་དུ་ཉལ་ནས་གཅིག་ལ་གཅིག་མཛའ་བས་དགེའམ། ཉོན་མ་མོངས་སམ་ཞེས་གཏམ་འདྲིའོ། །དེ་ནས་ཆུང་མས་ཇོ་བོས་ཅུང་ཟད་མཆིས་སམ་ཞེས་དྲིས་པ་དང་། དེས་སྨྲས་པ། ཅུང་ཟད་ཅིག་འོངས་སོ། །དེ་ནས་ཆུང་མས་བརྡ་ཚིག་
ཏུ་སྨྲས་པ། འདི་ནི་ཅི་ཟེར་བ་རྣས་ཉོན། རྣ་བོ་ཆེ་དེས་སྨྲས་པ། གསེར་གྱི་དོང་ཙེ་ལྔ་བརྒྱ་པོ་བདག་ལ་མ་བསྟན་ན་གར་བཞག །དེས་སྨྲས་པ། ནོགས་ཐུབ་པར་གྱིས་དང་ཡོད་དོ། །དེ་གང་དུ་བཞག །དེས་སྨྲས་པ། སང་བསྟན་ཏོ། །དེ་ནས་བུད་མེད་དེས་སྨྲས་པ། བདག་ཁྱོད་
ཀྱི་ལུས་ཕྱེད་ན་ཅིའི་ཕྱིར་གསང་། བྲམ་ཟེ་རང་བཞིན་གྱིས་དྲང་བས་ན་གྲོང་ཁྱེར་གྱི་ཕྱི་རོལ་དུ་བཞག་གོ་ཞེས་སྨྲས་པ་དང་། བུད་མེད་དེས་སྨྲས་པ། ཉོན་ཅིག་རྣ་བོ་ཆེ་ས་ཕྱོགས་གང་དུ་བཞག་ཅེས་སྨྲས་པ་དང་། བྲམ་ཟེ་དེས་དུར་ཁྲོད་ཀྱི་ཤིང་ནྱ་གྲོ་དྷཱའི་དྲུང་དུ་ས་བརྐོས་ཏེ་བཞག་གོ་ཞེས་སྨྲས་
པ་དང་། དེ་ནས་བྲམ་ཟེ་མོ་དེས་ཇོ་བོ་ལམ་ནས་བརྡབ་བརྡབ་སྟེ་མཉེལ་བ་བདག་གིས་ཀྱང་གཙེས་ཏེ། ད་ཁྱོད་མནོལ་ཅིག་ཅེས་སྨྲས་སོ། །དེ་ནས་དེ་གཉིད་ཀྱིས་ལོག་པར་རིག་ནས་རྣ་བོ་ཆེ་ལ་གང་ཁྱོད་ཀྱིས་ཐོས་པ་དེ་མྱུར་དུ་སྒྲུབས་ཞེས་བྱས་པ་དང་། དེ་ནས་རྣ་བོ་ཆེ་དལ་བུས་འཇབ་
ཅིང་ཁྱིམ་དེ་ནས་བྱུང་སྟེ་དུར་ཁྲོད་དུ་སོང་ངོ་། །དེས་ཇི་ལྟར་བསྟན་པ་བཞིན་དུ་དུར་ཁྲོད་ཀྱི་ཤིང་ནྱ་གྲོ་དྷཱའི་དྲུང་ནས་དེ་བླངས་ཏེ་རྣ་བོ་ཆེ་བདག་གི་ཁྱིམ་དུ་སོང་ངོ་། །བྲམ་ཟེ་དེ་དེའི་ཕྱི་དེ་ཉིན་བལྟས་ཏེ་དུར་ཁྲོད་དུ་སོང་ནས་བལྟས་ན་དེའི་ཕྱོགས་ནས་མ་རྙེད་དོ། །དེ་ནས་མགོ་དང་བྲང་རྡུང་ཞིང་ཁྱིམ་དུ་འོངས་

པ་དང་། ཆུང་མ་དང་། གཉེན་འདུན་དང་། གཞན་གྲོགས་པོ་དང་། ཕུ་ནུ་དག་གིས་ཅི་ཉེས་ཞེས་དྲིས་པ་དང་། དེས་གསེར་གྱི་དོང་ཙེ་ལྔ་བརྒྱ་བསླངས་ནས་ཁྱེར་ཏེ་འོངས་ནས་ཁར་རྩང་མི་རྒྱུན་ཆད་པའི་དུས་སུ་དུར་ཁྲོད་དུ་བརྐོས་ཏེ་བཞག་ནས་ཁྱིམ་དུ་སོང་ངོ་། །དེ་རིང་བདག་གིས་བཙལ་
ན་མི་སྣང་ངོ་ཞེས་སྨྲས་པ་དང་། དེ་དག་གིས་སྨན་ཆེན་པོའི་དྲུང་དུ་སོང་དང་། བློན་པོའི་མཆོག་དེ་མཁས་ཤིང་ཤེས་ལ་བརྟག་པ་དང་། དཔྱད་པ་ཡང་རྟོགས་ཤིང་དོན་རྣམས་ལ་རྗེས་སུ་དཔོག་པས་རིག་གིས་དེ་ལ་སྐྱབས་སུ་སོང་ཤིག་དང་། དེས་གལ་ཏེ་ཐོབ་པར་བྱེད་ཀྱང་
སྲིད་ཀྱིས་སྐྱབས་གཞན་མི་སྣང་ངོ་ཞེས་བསྟན་པ་དང་། དེ་ནས་བྲམ་ཟེ་དེ་གདོང་ལ་མཆི་མ་ཟག་ཅིང་ངུ་བཞིན་དུ་སྨན་ཆེན་པོའི་དྲུང་དུ་ཕྱིན་ནས་རྒྱལ་བ་དང་། ཚེ་རིང་བར་ཤོག་ཤིག་ཅེས་བརྗོད་ནས་གསོལ་པ། ལྷ་འདི་ལྟར་བདག་གིས་བསླངས་པ་འཚལ་ཏེ་མཆིས་ནས་ཁར་རྩང་མི་
རྒྱུན་ཆད་པའི་དུས་ན་དུར་ཁྲོད་དུ་བརྐོས་ཏེ་སྦས་ནས་ཁྱིམ་དུ་མཆིས། དེང་བདག་སླར་དེར་མཆིས་ན་མ་རྙེད་པར་གྱུར་ཏོ། །དེ་ནས་བློན་པོའི་མཆོག་སྨན་ཆེན་པོ་དེ་ཇི་ལྟ་བུ་ཞིག་ཅེས་སྐད་ཅིག་ཅང་མི་སྨྲ་བར་འདུག་ནས། བྲམ་ཟེ་དེ་ལ་ཀྱེ་བྲམ་ཟེ་ཁྱོད་ཀྱིས་ཕྱོགས་གང་དུ་བཞག །དུས་ནི་ཇི་
ཙམ་ན། ཁ་ཅིག་གིས་མཐོང་བའམ། ཁ་ཅིག་ལ་སྨྲས་པ་ལྟ་མེད་དམ་ཞེས་དྲིས་པ་དང་། དེས་ཇི་ལྟ་བུར་གྱུར་པ་ཞིབ་ཏུ་སྨྲས་སོ། །དེ་ནས་ཡང་བྲམ་ཟེ་མོ་དེ་སྐྱེས་པ་གཞན་ལ་ཆགས་ཏེ་དེའི་སྒྱུ་ཡིན་པར་གདོན་མི་ཟའོ་ཞེས་བསམས་ནས། བྲམ་ཟེ་དེ་དབུགས་དབྱུང་བའི་ཕྱིར་ཁྱོད་མི་དགའ་
བར་མ་བྱེད་ཅིག་དང་། དེ་མེད་ན་བདག་ཉིད་ཀྱི་ནོར་ལས་སྦྱིན་ནོ། །དེ་ལྟར་བྲམ་ཟེ་དབུགས་ཕྱུང་ནས་སྨྲས་པ། ཁྱོད་ཀྱི་ཁྱིམ་ན་ཁྱི་ལྟ་ཡོད་དམ། བྲམ་ཟེ་དེས་མཆིས་སོ་ཞེས་སྨྲས་སོ། །སོང་ལ་བྲམ་ཟེ་བརྒྱད་བོས་ཤིག །བཞི་ནི་ཁྱོད་ཉིད་ཀྱིས་བོས་ཤིག །བཞི་ནི་ཆུང་མ་ལ་ཁྱོད་ཀྱིས་ཀྱང་
བོས་ཤིག་ཅེས་བསྒོ་ལ་དེ་ནས་འདི་སྐད་སྨྲོས་ཤིག །བདག་ཁྱིམ་དུ་སླར་དགེ་ཞིང་བཀྲ་ཤིས་པར་འཁོར་ན་བྲམ་ཟེ་བརྒྱད་ཟན་སྦྱིན་པར་ལྷ་དབང་ཕྱུག་གི་སྤྱན་སྔར་ཁས་བླངས་སོ་ཞེས་བྱོས་ཤིག །དེ་ནས་དེ་ཁྱིམ་དུ་སོང་བ་ཆུང་མ་ལ་བདག་ལམ་དུ་ཞུགས་ཏེ་སོང་བའི་ཚེ་ལྷའི་སྤྱན་སྔར་ཇི་སྟེ་དགེ་ཞིང་

བཀྲ་ཤིས་ཏེ་སླར་འཁོར་ན་བྲམ་ཟེ་བརྒྱད་ཟན་སྦྱིན་པར་དམ་བཅས་པ་དེང་བོད་ཀྱིས་ཁྱོད་ཀྱིས་ནི་བཞི་བོས་ཤིག །བདག་གིས་ཀྱང་བཞི་བོད་དོ། །དེ་བཞིན་བྱའོ་ཞེས་མཉན་ནས་བྲམ་ཟེ་དེས་བཞི་བོས། བྲམ་ཟེ་མོས་ཀྱང་བཞི་མགྲོན་དུ་བོས་སོ། །དེ་ལྟར་མགྲོན་
དུ་བོས་ནས་སྨན་ཆེན་པོའི་དྲུང་དུ་སོང་སྟེ་དེ་དག་བོས་ལགས་སོ་ཞེས་སྨྲས་པ་དང་། དེ་ནས་ཡང་སྨན་ཆེན་པོས་སྨྲས་པ། ནམ་དེ་དག་ཁྱིམ་དུ་ཁྲིད་པ་ན་བདག་གི་དྲུང་ནས་མི་འདི་ཁྲིད་ལ་དེ་དག་ནང་དུ་འདོང་བའི་ཚེ་སྒོར་ཞོག་ཤིག །ཟན་ཟ་བའི་ཚེ་ཅི་ཡང་བྱེད་དུ་མ་གཞུག་པར་མདུན་དུ་ཞོག་ཤིག །
མི་དེ་ལ་ཡང་ཁྱོད་ཀྱིས་མཚན་མ་རྣམས་བཟུང་སྟེ། དེ་དག་ནང་དུ་འཇུག་པའི་ཚེ་བྲམ་ཟེ་གང་ལ་ཁྱི་ཟུགས་པ་དང་། གང་ལ་མཇུག་མ་འདྲིལ་བར་འགྱུར་བ་ལྟོས་ཤིག །ཁྱིའི་ཚུལ་ནི་འདི་ལྟ་བུའོ་ཞེས་དེ་ལ་བསྒོའོ། །བྲམ་ཟེ་དེ་ལ་ཡང་ཁྱོད་ཀྱིས་བྲམ་ཟེ་དེ་རྣམས་ལ་མ་འབྲིམ་པར་བྲམ་ཟེ་མོ་དེ་ཉིད་
འབྲིམ་དུ་ཆུག་ཤིག་ཅེས་བསྒོའོ། །མི་དེ་ཡང་ཁྱོད་ཀྱིས་བརྟག་པ་ནི་བྲམ་ཟེ་མོ་དེ་འབྲིམ་པའི་ཚེ། གང་ལ་མཚན་མར་བྱེད་མིག་བཙུགས་ཤིང་ལྟ་བ་དང་། དགོད་ཅིང་ཚིག་འབྱིན་ལ་ལྷག་པར་འབྲིམ་པ་རྣམས་ཤེས་པར་གྱིས་ཤིག་ཅེས་བསྒོའོ། །དེ་ལྟར་བསྟན་པ་དང་། བྲམ་ཟེ་
དེས་མི་དེ་ཁྲིད་དེ་སྒོ་དྲུང་དུ་བཞག་གོ། །བྲམ་ཟེ་མོ་ལ་ཁྱོད་ཀྱིས་བྲམ་ཟེ་གང་མགྲོན་དུ་བོས་པ་དེ་དག་ཁྱོད་ཉིད་ཀྱིས་བོས་ཤིག་ཅེས་བསྒོ་ནས་རང་གིས་གང་མགྲོན་དུ་བོས་པ་དེ་དག་ཀྱང་བདག་ཉིད་ཀྱིས་བོས་སོ། །དེ་དག་རིམ་གྱིས་ནང་དུ་དོང་བ་ལ་ཁྱི་ཟུགས་སོ། །ནམ་རྣ་བོ་ཆེ་དེ་འོངས་པ་དང་ཁྱི་དེས་
བལྟས་ནས་རྣ་བ་ཕབ་མཇུག་མ་དྲིལ་ནས་ཕྱི་བཞིན་དུ་འབྲངས་ཏེ། ནང་དུ་ཞུགས་ནས་ཁྱི་འདྲིས་པའི་སྒྲ་འབྱིན་པ་དང་། རྒྱལ་པོའི་མི་དེས་རྣ་བོ་ཆེ་འདི་ཡིན་པར་ཤེས་སོ། །དེ་ནས་དེས་ཟས་འབྲིམ་པ་ལ་བལྟས་ན་བྲམ་ཟེ་མོ་དེ་འབྲིམ་པ་ལ་ཞུགས་པ་དང་། རྣ་བོ་ཆེ་ལ་སྨིན་མའི་བརྡ་བྱེད་
ཅུང་ཟད་དགོད། མིག་དེར་ཆགས། དེ་དང་ལྷན་ཅིག་གཏམ་ཟེར་ལྷག་པར་ཡང་དེར་འབྲིམ་པ་དང་། དེ་ནས་རྒྱལ་པོའི་མི་དེས་ཇི་ལྟར་མཐོང་བ་བཞིན་དུ་ཇོ་བོ་ཚུལ་འདི་འདྲའོ་ཞེས་སྨན་ཆེན་པོ་ལ་བཟླས་པ་དང་། སྨན་ཆེན་པོས་དེ་ཐོས་མ་ཐག་ཏུ་རྣ་བོ་ཆེ་དེ་ཁུག་ཤིག་ཅེས་རྒྱལ་པོའི་མི་

བཏང་ངོ་། །དེ་འོངས་ནས་སྨན་ཆེན་པོས་དེ་ལ་གཞན་གྱི་ནོར་དབྲོག་པར་བྱ་བ་དེ་ལྟ་བུ་ཅི་བྲམ་ཟེའི་ཆོས་ཡིན་ནམ། ཁྱོད་ཀྱིས་ཁྱེར་བ་དེ་སླར་བྱིན་ཅིག་ཅེས་བསྒོ་ན། དེས་སྡིག་པ་ཞི་བར་གྱུར་ཅིག་བདག་གིས་ཡོང་མ་འཚལ་ཏོ་ཞེས་སྨྲས་པ་དང་། དེ་ནས་སྨན་ཆེན་པོས་མི་རྣམས་
ལ་ངན་པ་ཅན་འདི་བཙོན་རར་ཆུག་ལ་ཇི་ནས་རུས་པ་བྱུང་བ་དེ་ལྟ་བུར་ནན་ལ་འོར་ཅིག་ཅེས་བསྒོ་བ་དང་། དེ་དེ་ལྟ་བུས་བསྡིགས་པས་འཇིགས་སྐྲག་ཤིན་ཏུ་གདུངས་པས་ན་ལྷས་སྐྱོབས་ཤིག །བདག་གིས་དེ་སླར་འབུལ་ལོ་ཞེས་སྨྲས་སོ། །དེ་ནས་རྣ་བོ་ཆེ་དེ་བདག་གི་ཁྱིམ་
ནས་གསེར་གྱི་དོང་ཙེ་གནའ་མ་ལྔ་བརྒྱ་ཇི་ལྟར་བཅིངས་པ་བཞིན་དུ་ཁྱེར་ཏེ་འོངས་ནས་སྨན་ཆེན་པོ་ལ་ཕུལ་ལོ། །དེ་ནས་སྨན་ཆེན་པོས་ཀྱང་བྲམ་ཟེ་དེ་ལ་བྱིན་ནོ། །དེ་ནས་བྲམ་ཟེ་དེ་དགའ་མགུ་ནས། ཡིད་རབ་ཏུ་དགའ་བར་གྱུར་ཏེ། དེ་ནས་བྲམ་ཟེ་དེ་འདི་སྙམ་དུ་སེམས་པར་གྱུར་ཏོ། །
བདག་གི་གསེར་གྱི་དོང་ཙེ་གནའ་མ་ལྔ་བརྒྱ་མེད་པ་ལས་སླར་རྙེད་པ་ནི་ཐམས་ཅད་ཀྱང་སྨན་ཆེན་པོའི་མཐུ་ཡིན་ཏེ། ཇི་ནས་བདག་གིས་དེ་ལ་བཀུར་སྟི་བྱ་ཞིང་ལན་གླན་ནོ། །སྨན་ཆེན་པོ་བདག་ལ་བྱམས་པ་དང་། བདག་གིས་ཀྱང་ལན་གློན་པར་འགྱུར་རོ། །སྙམ་དུ་བསམས་
ནས། དེས་གསེར་གྱི་དོང་ཙེ་གནའ་མ་དེ་དག་ལས་ཕྱེད་ཁྱེར་ཏེ་སྨན་ཆེན་པོའི་དྲུང་དུ་སོང་ནས་སྐྱེས་འདི་བཞེས་ཤིག་ཅེས་ཕུལ་ལོ། །སྨན་ཆེན་པོས་ཀྱང་བླངས་ནས་དེ་ཉིད་ལ་སླར་བྱིན་ནོ། །དེའི་སྙན་པས་ཀྱང་གྲོང་ཁྱེར་དེར་ཁྱབ་པར་གྱུར། རྒྱལ་པོ་དང་། བློན་པོ་དང་། གྲོང་ཁྱེར་
པ་རྣམས་ཀྱིས་ཀྱང་དེ་མཁས་པ་དང་ལྡན་ནོ། །ཞེས་བྱ་བའི་སྒྲ་ཀུན་དུ་བསྒྲགས། བདག་ཅག་བསོད་ནམས་དང་ལྡན་པས་ན་འདི་འདྲ་བའི་བློན་པོ་བདོག་གོ་སྙམ་དུ་སེམས་སོ། །དེ་ནས་མི་གཞན་ཞིག་རང་གི་དོན་ཅིག་གི་ཕྱིར་ཡུལ་གཞན་དུ་སོང་སོང་བ་ལས་སླར་ལོག་སྟེ། རྫིང་
འགྲམ་ཞིག་ཏུ་འོངས་ནས་ཕྱེའི་རྐྱལ་པ་ཁ་ཕྱེ་སྟེ་ཕྱུང་ནས་ཟན་ཟོས་སོ། །ཟན་ཟོས་ནས་རྐྱལ་པ་ཁ་མ་བཅིངས་བཞིན་དུ་ཕྱི་རོལ་གྱི་སར་སོང་ངོ་། །དེ་དེར་འདུག་པ་དང་སྦྲུལ་རེག་ན་གདུག་པའི་དུག་ཅན་དེའི་རྐྱལ་པའི་ནང་དུ་ཞུགས་སོ། །མི་དེ་སླར་འོངས་ཏེ་དེས་མ་བརྟགས་པར་རྐྱལ་

པའི་ཁ་བཅིངས་ཏེ་ཕྲག་པ་ལ་ཐོགས་ནས་གྲོང་ཁྱེར་ཆེན་པོར་ཕྱིན་པ་དང་། དེ་ནས་ལྟས་མཁན་ཞིག་གིས་རིགས་ཀྱི་བུ་འདི་ནི་འཚོ་བ་དང་འབྲལ་དུ་ཉེའོ་ཞེས་ལུང་བསྟན་ཏོ། །མི་དེས་ཀྱང་སླར་ལོག་སྟེ་དེ་ལ་བལྟས་སོ། །དེ་ནས་དེ་ལ་ཚིག་དེ་སྐད་ཐོས་པའི་འོག་ཏུ་ཅིའི་ཕྱིར་
བདག་གིས་ལྟས་མཁན་དེ་ལ་མ་དྲིས་ཞེས་འགྱོད་པ་སྐྱེས་སོ། །དེ་ཐེ་ཚོམ་སྐྱེས་ནས་བདག་གིས་དོན་དེའི་ཕྱིར་བློན་པོ་སྨན་ཆེན་པོ་ལ་མ་དྲིས་ཀྱི་བར་དུ་ཁྱིམ་དུ་མི་འགྲོའོ་སྙམ་དུ་བསམས་ནས་ཚིག་ཏུ་ཡང་སྨྲས་སོ། །དེ་སྨན་ཆེན་པོའི་དྲུང་དུ་སོང་སྟེ། འདི་ལྟར་བདག་གྲོང་ཁྱེར་དུ་མཆི་
བའི་ཚེ་ལྟས་མཁན་གྱིས་འདི་ལྟར་ལུང་བསྟན་པའི་དོན་དེ་དག་སྨྲས་ནས། དེ་ལ་སླར་བདག་གིས་ནི་མ་དྲིས་ཏེ་དེ་བས་ན་ཁྱོད་ལ་གསོལ་ལོ་ཞེས་དྲིས་པ་དང་། སྨན་ཆེན་པོས་གང་ནས་འོངས་ཞེས་དྲིས་ནས་དེས་ཇི་ལྟ་བུར་གྱུར་པ་ཞིབ་ཏུ་སྨྲས་སོ། །དེས་བསམས་པ། རྐྱལ་པའི་ནང་
དུ་སྦྲུལ་རེག་ན་གདུག་པ་ཡོད་ཡང་དག་གིས་ལྟས་མཁན་དེས་ཀྱང་དེའི་ཕྱིར་སྨྲས་སོ་སྙམ་ནས། དེ་ནས་སྨན་ཆེན་པོས་སྐྱེ་བོ་མང་པོའི་མངོན་སུམ་དུ་རྐྱལ་པ་འདི་ཁ་ཁྲོལ་ལ་རྒྱང་མ་ནས་ཤིང་གིས་ཁ་ཕྱེ་ཤིག་དང་གདོད་ཤེས་པར་འགྱུར་རོ། །དེ་ལྟ་བུར་བྱས་པ་དང་། རེག་ན་གདུག་
པ་དེའི་ནང་ནས་མགོ་ནི་བཏེག །དབུགས་ནི་རྒོད། ལྕེ་ནི་བསྐྱོད་བཞིན་དུ་ཕྱིར་བྱུང་བ་དང་། སྨན་ཆེན་པོས་ཁྱོད་ཀྱི་དོགས་པ་དེ་ནི་འདི་ཡིན་ནོ་ཞེས་སྨྲས་སོ། །དེ་ནས་སྨན་ཆེན་པོ་ཡུལ་བལྟ་བའི་ཕྱིར་ཡན་ལག་བཞིའི་སྟོབས་མང་པོ་རྣམས་གོ་བསྐོན་ཏེ་ཕྱིར་བྱུང་ངོ་། །དེ་ནས་གྲོང་དང་།
གྲོང་ཁྱེར་དང་། ཚོང་དུས་དག་བལྟས་ན་གྲོང་དང་། གྲོང་ཁྱེར་དང་། གྲོང་འདབ་འདི་སུའི་ཡིན་ཞེས་དྲིས་ན། ཡུལ་ན་གནས་བདག་གིས་འདི་ནི་བློན་པོ་ཆེ་གེ་མོ་ཞིག་གི་ལགས་སོ། །འདི་ནི་འདི་དག་གིའོ་ཞེས་སྨྲས་པ་དང་། དེ་ནས་སྨན་ཆེན་པོས་བརྟགས་ཏེ་བལྟས་ན་འདི་
ལྟར་ཡུལ་ཐམས་ཅད་བློན་པོ་དྲུག་གིས་ཀུན་བསྣམས་ཏེ་རྒྱལ་པོ་སྐྱེད་པ་ནི་བཟའ་བ་དང་། བཏུང་བ་ཙམ་འབའ་ཞིག་ལ་དབང་ངོ་སྙམ་དུ་བསམས་སོ། །དེ་ནས་སྨན་ཆེན་པོས་ལྷ་གྲོང་དང་། རི་བྲགས་ཀྱི་གྲོང་དང་། གྲོང་ཁྱེར་རྣམས་སུ་དབང་ཞེས་གསོལ་པ་དང་། རྒྱལ་པོ་དེ་

ཇི་ལྟར་བྱ་དེའི་ཕྱིར་སྙིང་བརྩེ་བའི་ལྷ་རྣམས་ཀྱིས་བདག་ལ་བསྟན་པ་ནི་པཱུརྞ་ཀཙྪའི་རི་བྲགས་ཀྱི་གྲོང་ན་གང་པོ་ཞེས་བྱ་བའི་བུ་སྨན་ཆེན་པོ་ཁྱོད་ཀྱི་བློན་པོ་ཆེན་པོར་ཆུག་ཤིག་དང་། ཁྱོད་ཀྱི་ཡུལ་རྣམས་རྒྱས་པར་བྱས་པས་འབུལ་བར་འགྱུར་ཏེ། དེའི་ཚེ་ན་ཁྱོད་ཉིད་ཀྱང་ཐམས་ཅད་ལ་
དབང་བའི་རྒྱལ་པོར་འགྱུར་རོ་ཞེས་ལུང་བསྟན་ཏེ། ཁྱོད་ནི་འདི་ལྟ་བུར་དགོས་པའི་ཕྱིར་བདག་གིས་རུམ་ན་འདུག་ཚུན་ཅད་བདེ་བའི་ཡོ་བྱད་ཀྱིས་བསྐྱེད་པ་ཡིན། ད་ལྟར་ཡང་བློན་པོའི་མཆོག་ཏུ་བཅུག་ན་ད་ནི་ལྷའི་ཚིག་དང་། ཁྱོད་བདག་གི་བློས་ལྕོགས་པ་སྟོན་པ་ཅི་ནས་
བདག་རྒྱལ་པོའི་དབང་ཕྱུག་ཏུ་འགྱུར་བར་བྱོས་ཤིག་ཅེས་སྨྲས་པ་དང་། དེ་ནས་སྨན་ཆེན་པོས་རྒྱལ་པོ་སྐྱེད་པ་ལ་ཕྱག་བྱས་ནས་ཐུགས་བརྟན་པར་མཛོད་ཅིག་དང་། ཇི་ལྟར་བདག་གིས་ལྷ་མཉེས་པར་འགྱུར་བ་དེ་ལྟར་བགྱིའོ་ཞེས་སྨྲས་སོ། །དེ་ནས་སྨན་ཆེན་པོས་ཡུལ་དང་། གྲོང་
དང་། གྲོང་ཁྱེར་དང་། རི་བྲགས་ཀྱི་གྲོང་དེ་དག་ན་གཙོ་བོ་གང་ཡིན་པ་དེ་རྣམས་དབྱེན་བཅུག་སྟེ་སོ་སོར་ཕྱེ་ནས་ཅི་ནས་ཁྱེད་བདག་ལ་དགའ་བར་གྱུར་པ་དེ་ལྟ་བུར་བདག་གིས་བྱའོ། །བློན་པོ་དེ་དག་ནི་འདོད་ཆེན་ཆེ་བས་དཔྱ་ནར་མ་དང་། བླ་སྐྱེས་དག་ཀྱང་མི་རིགས་པར་འབེབས་ཏེ།
གནོད་པར་གྱུར་པས་ན་དེའི་ཕྱིར་རིག་པར་བྱས། འདི་ལྟར་བདག་གི་ཚིག་བཞིན་དུ་བྱས་ན་བདག་གིས་ཀྱང་ཁོང་དུ་ཆུད་པར་བསྟན་ཏེ་དཔྱ་ཡང་རིགས་པར་དབབ། གཞན་ཡང་བདེ་བར་དགོད་ཅིང་། བདེ་བའི་ཡོ་བྱད་རྣམས་ཀྱིས་ཀྱང་བསྐྱང་བར་བྱས། ཅི་ནས་ཁྱོད་ཅག་མི་མཐུན་
པར་བྱོས་ཤིག །ཁྱེད་མི་མཐུན་པར་བྱས་པ་ལས་ཇི་སྟེ་རྒྱལ་པོ་དང་། བློན་པོ་རྣམས་ལྷགས་ན་ཡང་བདག་མེད་ཀྱི་བར་དུ་དེ་དག་གི་དབང་དུ་མ་འགྲོ་བར་འདི་སྐད་སྨྲོས་ཤིག །དེ་སྟེ་བློན་པོའི་མཆོག་སྨན་ཆེན་པོ་འོངས་ན་དེ་ལ་བདག་ཅག་གིས་བློན་པོ་དེའི་དབང་དུ་བྱའི་གཞན་ལ་
མ་ཡིན་ནོ་ཞེས་སྨྲོས་ཤིག །དེ་ནས་དེས་འདི་ལྟ་བུའི་རིག་པ་སྔར་སྦྱར་ནས་ཡུལ་དེ་དག་ཀུན་མི་མཐུན་པར་བྱེད་ཅིང་བྱེད་དུ་བཅུག་པས་ན་བཀའ་རྣམས་ཀྱང་བཅོག་པར་གྱུར་ཏོ། །དེ་ནས་བློན་པོ་དེ་དག་གིས་རྒྱལ་པོ་ལ་གསོལ་པ་དང་། འདི་ལྟར་རྒྱལ་པོ་སྐྱེད་པས་བློན་པོ་དྲུག་པོ་དེ་དག་

ཉིད་ཡན་ལག་བཞིའི་སྟོབས་མང་པོ་དང་ལྷན་ཅིག་བཀྱེ་ཡང་དེ་དག་གིས་གྲོང་དང་རི་བྲགས་ཀྱི་གྲོང་གཅིག་ལ་ཡང་དབང་བྱེད་པར་མ་ནུས་སོ། །དེ་ནས་རྒྱལ་པོ་ལ་ལྷ་ཉིད་མ་བྱོན་ན་འདི་དག་དབང་དུ་བགྱིར་མི་ནུས་སོ་ཞེས་ཕོ་ཉ་བཏང་བ་དང་། དེ་ནས་རྒྱལ་པོ་ཉིད་འོངས་
ཀྱང་རི་བྲགས་ཀྱི་གྲོང་གཅིག་ཀྱང་དབང་བྱར་མ་ནུས་ཏེ། འཐབས་པས་མང་ཞིག་ཤི་བ་དང་། རྒྱལ་པོ་དང་། བློན་པོ་དྲུག་པོ་དེ་དག་ཀྱང་མི་དགའ་བར་གྱུར་ཏོ། །དེ་ནས་རི་བྲགས་ཀྱི་གྲོང་མི་དག་གིས་དེ་སྟེ་སྨན་ཆེན་པོ་འདིར་འོངས་ན་དེའི་ངག་མཉན་ཅིང་དེའི་དབང་བཞིན་དུ་བགྱིས་ཏེ་
བདག་ཅག་རྒྱལ་པོ་སྐྱེད་པ་དང་མི་མཐུན་པར་བགྱིད་པ་ནི་མ་ལགས་ཀྱི་བློན་པོ་རྣམས་བདག་ཅག་ལ་གནོད་པར་བགྱིད་པའི་ཕྱིར་རོ་ཞེས་སྨྲས་པ་དང་། དེ་ནས་རྒྱལ་པོས་སྨན་ཆེན་པོ་ལ་ངེད་ཀྱིས་ཡུལ་རྣམས་ཕེབས་པར་མ་ནུས་ཀྱིས་ཁྱོད་ཚུར་ཤོག་ཤིག་ཅེས་ཕོ་ཉ་བཏང་ངོ་། །དེ་ནས་སྨན་ཆེན་
པོས་ཡི་གེ་དེ་མཐོང་མ་ཐག་ཏུ་རྒྱལ་པོའི་དྲུང་དུ་འོངས་སོ། །དེ་མཐོང་ནས་ཡུལ་མི་ཀུན་གྱིས་ཕྱག་བྱས་ཏེ་ཡུལ་མི་དེ་རྣམས་ལ་མ་འཇིགས་ཤིག །དཔྱ་ཡང་ཆོས་བཞིན་དབབ། དམན་པ་དང་། དབུལ་བ་དང་། སྐྱབས་མེད་པ་རྣམས་ཀྱང་དབུགས་དབྱུང་བར་བྱས། ཡུལ་ན་གནས་པ་
དང་། གྲོང་ཁྱེར་པ་རྣམས་ལ་ཕ་མ་དང་། ཕུ་ནུ་དང་། རང་གི་སྐྱེ་བོ་བཞིན་བཀུར་སྟི་དང་བྱ་དགའས་ཀུན་སྙོམས་པར་བྱས་ནས་པང་ནས་འཁྱུད་དོ། །དེ་ནས་ཡུལ་ན་གནས་པའི་རྒན་པ་དང་། གཞོན་པ་དང་། བུད་མེད་དེ་དག་ཐམས་ཅད་ཀྱིས་ཀྱང་སྨན་ཆེན་པོ་ལ་བུ་དང་བདག་གི་མིང་པོ་
བཞིན་དུ་ལྟ་བར་གྱུར། །དེས་ཀྱང་ཐམས་ཅད་ལ་སེམས་དགའ་བར་བྱས་ཤིང་། དེ་ནས་མཐར་གྱིས་ཡུལ་ཐམས་ཅད་གཅིག་ཏུ་བསྡུས་ཏེ་རྒྱལ་པོ་སྐྱེད་པ་དང་ལྷན་ཅིག་སླར་རྒྱལ་པོའི་ཕོ་བྲང་དུ་འོངས་སོ། །དེ་ལྟ་བུའི་ལས་བྱས་པས་རྒྱལ་པོ་གཞན་དག་ལ་ཡང་སྙན་པའི་སྒྲ་གྲགས་པར་
གྱུར་ཏོ། །དེ་ནས་རྒྱལ་པོ་མཉེས་པས་ན་བདག་གི་བུ་མོ་སྨན་ཆེན་པོའི་ཆུང་མར་བྱིན་ཏེ་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་ནས་ཡང་ཡུལ་གཞན་ཞིག་ནས་རྒྱལ་པོ་ལོངས་སྤྱོད་ཉམས་པ་ཞིག་རྒྱལ་པོ་སྐྱེད་པའི་དྲུང་དུ་འོངས་ནས་རྒྱལ་པོ་སྐྱེད་པས་ཀྱང་དེ་མ་འདོད་ནས་དེ་སྨན་ཆེན་པོའི་དྲུང་

དུ་འོངས་སོ། །དེས་སྙིང་རྗེ་བའི་དབང་གིས་བླངས་ཏེ་ལོངས་སྤྱོད་ཀྱང་བྱིན་ནོ། །དེ་ནས་དུས་ཕྱི་ཞིག་ན་བྲམ་ཟེ་ཞིག་འོངས་ཏེ། དེ་ནས་བྲེ་གང་ཞིག་བསླངས་པ་དང་དེས་ཀྱང་ཁས་བླངས་ཏེ་བང་ཀ་བ་ལ་གཏད་ན་སང་སྦྱིན་གནངས་སྦྱིན་ལས་མ་བྱིན་ནོ། །དེ་ནས་དུས་ཕྱི་ཞིག་ན་རྒྱལ་པོ་ལ་བློན་པོ་རྣམས་
དང་། གྲོང་ཁྱེར་པ་དང་། ལྗོངས་པ་དག་གིས་བསྐོར་ཏེ་མི་མང་པོ་ཕྱག་འཚལ་བའི་གནས་ན་འདུག་གོ། །དེས་བློན་པོ་རྣམས་ལ་ཀྱེ་བློན་པོ་རྣམས་གསང་བ་ནི་སུ་ལ་སྨྲ་བར་བྱ། གང་ལ་ཡིད་བརྟན་པར་བྱ་ཞེས་སྨྲས་པ་དང་། དེ་ནས་བློན་པོ་དག་སེམས་པ་ལ་ཞུགས་སོ། །དེ་དག་ལས་
གཅིག་གིས་ནི་མཛའ་བོ་ལ་སྨྲ་བའི་རིགས་ཞེས་བྱས། ཁ་ཅིག་གིས་ནི་ལྷ་དེ་ཆུང་མ་ལ། ཁ་ཅིག་གིས་ནི་མ་ལ། ཁ་ཅིག་གིས་ནི་སྲིང་མོ་དང་ཕ་ལ། ཁ་ཅིག་གིས་ནི་ཕུ་ནུ་ལའོ་ཞེས་གཞན་དག་གིས་དེ་སྐད་སྨྲས་པ་དང་། རྒྱལ་པོས་སྨན་ཆེན་པོ་གཞན་གྱིས་ནི་ཇི་ལྟར་བསམས་པ་
བཞིན་སྨྲས་ན་ཁྱོད་ཀྱིས་ཅིའི་ཕྱིར་མི་སྨྲ་ཞེས་དྲིས་པ་དང་། དེ་ནས་སྨན་ཆེན་པོས་རྒྱལ་པོ་ལ་ལྷ་བདག་གིས་ནི་འདི་སྙམ་དུ་བསམས་ཏེ། གསང་བ་དེ་ནི་སུ་ལ་ཡང་བགྱི་བར་མི་རིགས་ན་ཆུང་མ་ལྟ་ཅི་སྨོས་ཏེ། དེ་ནི་བདག་གིས་ལྷའི་སྤྱན་སྔར་མངོན་པར་བགྱིའོ་ཞེས་སྨྲས་སོ། །དེ་
ནས་ཕྱི་ཞིག་ན་རྒྱལ་པོའི་རྨ་བྱ་སྟོར་བ་སྨན་ཆེན་པོས་བཙལ་ཏེ་ཕྱོགས་གཞན་ཞིག་ཏུ་སྦས་ནས་དེ་དང་འདྲ་བ་གཞན་ཞིག་བཟུང་སྟེ། ཆུང་མ་ཁྱོད་ཀྱིས་རྒྱལ་པོའི་ཕོ་བྲང་ནས་རྨ་བྱ་སྟོར་བ་ཐོས་སམ་ཞེས་དྲིས་པ་དང་། དེས་ཀྱང་བདག་གིས་ཐོས་སོ་ཞེས་སྨྲས་སོ། །སྨན་ཆེན་
པོས་ཁྱོད་ཀྱིས་སུ་ལ་ཡང་མ་ཟེར་བར་འདི་མྱུར་དུ་ཚོས་ཤིག་དང་བཟའོ་ཞེས་བསྒོའོ། །དེས་རི་བྲགས་ཀྱི་གྲོང་མི་འདིས་རྒྱལ་པོའི་རྨ་བྱ་ཟ་བ་ལྟོས་ཤིག །བདག་གི་ཕ་ནི་འདི་ལ་ཤིན་ཏུ་ཡིད་བརྟན་པར་བྱེད་ན་འདི་ནི་རྒྱལ་པོ་ལ་གནོད་པའི་ལས་བྱེད་དོ་སྙམ་དུ་བསམས་སོ། །ཡང་རེ་ཞིག་
ན་རྒྱལ་པོའི་བཙུན་མོ་འདྲ་བ་བུད་མེད་སྨད་འཚོང་མ་ཞིག་རྒྱན་ཐམས་ཅད་ཀྱིས་བཀླུབས་ཏེ་བདག་གི་བུད་མེད་ཀྱི་ནང་དུ་བཅུག་ནས་ཆུང་མ་ལ་འདི་ནི་རྒྱལ་པོའི་བཙུན་མོ་འདི་ཞེས་བྱ་བ་ཡིན་ཏེ། བདག་འདི་ལ་ཤིན་ཏུ་ཡིད་བརྟན་གྱིས་ཁྱོད་བདག་ལ་སྡུག་ན་སུ་ལ་ཡང་མ་ཟེར་ཅིག་ཅེས་བསྒོ་བ་དང་།

དེ་ནས་རྒྱལ་པོའི་བུ་མོ་དེ་འདི་ནི་སྨན་ཆེན་པོ་དང་ལྷན་ཅིག་ཏུ་འདུག་གོ་སྙམ་བསམས་ནས་ཁྲོས་པས་འཁྲུག་པ་སྐྱེས་ཏེ་ཕ་ལ་འཕྱ་ནས་བདག་གི་ཕ་འདི་ལྟ་བུར་དོན་ལ་རྟོག་པ་ཅིའང་མེད་དེ། རི་བྲགས་ཀྱི་གྲོང་མི་རིགས་ངན་པ་ལས་བྱུང་ན་བློན་པོའི་མཆོག་ཏུ་བཅུག་ཅིང་ངན་པ་འདི་
ལ་རྒྱལ་པོའི་དོན་ཐམས་ཅད་གཏད་པ་ག་ལ་རིགས། དེ་ཅི་ནས་སྔོན་གྱི་གནས་རྙིང་པར་གཞག་པ་དེ་ལྟ་བུར་བྱའོ་ཞེས་བསམས་ཏེ་སོང་ནས་ཕ་ལ་ཡབ་ཀྱིས་ངན་པ་དེ་ལྟ་བུ་མ་བརྟགས་པར་བློན་པོའི་མཆོག་ཏུ་བཅུག་ཅིང་ཡིད་བརྟན་པར་བགྱིས་པ་ག་ལ་རིགས། དེས་འདི་ལྟར་རྒྱལ་པོའི་
བཙུན་མོ་ལ་གློ་བ་རིངས་ཏེ་ཡབ་ཀྱི་བཙུན་མོ་འདི་ཞེས་བགྱི་བ་དང་ལྷན་ཅིག་ཏུ་སྤྱོད། རྒྱལ་པོའི་རྨ་བྱ་དེ་ཡང་འདིས་ཟོས། ཡུལ་གཞན་ནས་མི་འོངས་པ་རྣམས་ཀྱང་བསྙེན་ཅིང་ཡོ་བྱད་ཀུན་སྦྱོར་བར་བགྱིད་ན་ཡབ་ནི་རྟག་ཏུ་ཡང་བདག་ལ་སྨན་ཆེན་པོ་འདི་ཐམས་ཅད་པས་སྡུག །འདི་
ལས་ཡིད་དུ་འོང་བ་མེད་དོ་ཞེས་གསུང་ན་དེ་ནི་འདི་ལྟ་བུ་མི་བགྱི་བ་རྣམས་བགྱིད་ཀྱིས་ཇི་ལྟ་བུ་ཡིན་པ་མཁྱེན་པར་གྱིས་ཤིག་ཅེས་སྨྲས་པ་དང་། དེ་ནས་རྒྱལ་པོས་དོན་དེ་དག་བརྟག་པའི་ཕྱིར་གཤེད་མ་མི་རྣམས་ལ་སོད་ཅིག་ཅེས་བཀྲིའོ། །དེ་ནས་རིགས་ངན་པ་དེ་དག་གིས་ཤིང་ཀ་
ར་བཱི་རའི་མེ་ཏོག་གི་ཕྲེང་བ་ནི་མགུལ་དུ་བཏགས། བོང་སྐད་ལྟ་བུའི་རྔ་བརྡུངས། ཚིག་རྩུབ་པོས་སྤྱོས། བསྡིགས། ཚར་བཅད་དེ་མཚོན་ཐོགས་པ་གཤིན་རྗེའི་མི་ལྟ་བུའི་རིགས་ངན་རྣམས་ཀྱིས་དུར་ཁྲོད་དུ་ཁྲིད་མོད་ཀྱི། དེ་གསད་པར་ནི་གང་ཡང་མི་དད་དོ། །གྲོང་ཁྱེར་གྱི་
སྐྱེ་བོ་དང་ལྗོངས་པ་རྣམས་ནི་མིག་ནས་མཆི་མ་ཟག་ཅིང་བདག་གི་བུ་བསད་པ་ལྟར་སྡུག་བསྔལ་ནས་ཉམ་ཐག་པའི་སྒྲ་འབྱིན་ཅིང་ལྷ་དག་ལ་གསོལ་བ་འདེབས་སོ། །ཅི་ཙམ་ཞིག་ན་སྨན་ཆེན་པོས་རྒྱལ་རིགས་དབུལ་པོ་བསྙེན་ཅིང་ལོངས་སྤྱོད་བགོས་ཏེ་བྱིན་པ་དེ་དག་གིས་རྒྱལ་པོའི་མི་རྣམས་ལ་
བདག་ཅག་གིས་འདི་བསད་ཀྱིས་ཁྱེད་ཅག་སླར་ལོག་ཤིག་ཅེས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་བཞི་པ། ཅི་ཙམ་ན་དེ་གྲོང་ཁྱེར་ནས་བྱུང་བ་དང་། བྲམ་ཟེ་མོང་རྟུལ་ཞེས་བྱ་བས་གོས་ཀྱི་མཐའ་མ་ནས་འཇུས་ནས་ཁྱོད་ཀྱིས་ནས་བྲེ་གང་སྦྱིན་པར་

བྱས་པ་དེ་བྱིན་ལ་སོང་ཤིག་ཅེས་ཟེར་རོ། །སྨན་ཆེན་པོས་གནས་དེར་ཚིགས་སུ་བཅད་དེ་སྨྲས་པ། རྒྱལ་པོ་གྲོགས་སུ་འགྱུར་བ་མེད། །གདོལ་པ་ལ་ནི་བཤེས་པ་མེད། །བུད་མེད་རྣམས་ལ་གསང་མི་བརྗོད། །རྨ་བྱའི་ཤ་ནི་བཟའ་མི་བྱ། །བྲམ་ཟེ་མོང་རྟུལ་པོ་ཡི་ནི། །ནས་བྲེ་གང་
ཡང་འཆགས་མི་བྱ། །དེས་དེ་སྐད་སྨྲ་ཞིང་སོང་བ་དང་། དེ་ནས་གཤེད་མ་མི་རྣམས་ཀྱིས་སྨྲས་པ། སྨན་ཆེན་པོ་དེ་ཅི་ཁྱོད་ཤེས་པ་དང་། རྣམ་པར་ཤེས་པ་ཕུན་སུམ་ཚོགས་པ་ཡིན་ན་བླ་བར་བྱེད་དམ། སྨན་ཆེན་པོས་སྨྲས་པ། ཁོ་བོ་ནི་མི་བླ་སྟེ། འོན་ཀྱང་དེ་ཅི་བླ། དེས་སྨྲས་
པ། ལྷ་བདག་མི་བླ་སྟེ། འོན་ཀྱང་བདག་སྡུག་བསྔལ་གྱིས་ཉམ་ཐག་ནས་དགོས་པ་སྨྲའོ། །དེ་ཅི་ཡིན། དེས་སྨྲས་པ། རྒྱལ་པོ་གྲོགས་སུ་འགྱུར་བ་མེད་ཅེས་བྱ་བ་རྒྱ་ཆེར་རོ། །དེས་ཡང་སྨྲས་པ། ལྷ་གསོལ་བ་འཚལ་ན་རེ་ཞིག་གསན་དུ་གསོལ། བདག་གིས་རྒྱལ་པོ་གྲོགས་
སུ་འགྱུར་བ་མེད་ཅེས་གང་སྨྲས་པ་ནི་སྔོན་ལྷ་གྲོང་ངམ། གྲོང་ཁྱེར་རམ། གྲོང་རྡལ་རྣམས་ཀྱི་དོན་གང་ལ་ཡང་མི་མངའ་བར་གྱུར་ཏེ། ཁྱོད་གང་གི་ཕྱིར་དེ་སྐད་སྨྲ་བ་སྨྲས་པ་དེའི་དོན་ཁྱོད་ཀྱིས་མ་གོ་བར་ཟད་དོ། །དེ་རྣམས་སོང་སྟེ། རྒྱལ་པོ་སྐྱེད་པ་ལ་སྨན་ཆེན་པོ་ཅི་ཞིག་བླ་ན་དེ་བླ་བ་ཟློས་
སུ་སྩལ་བར་གསོལ་ཞེས་སྨྲས་སོ། །དེ་ནས་རྒྱལ་པོས་བོས་ནས་དྲིས་པ། ཞལ་ཟས་དང་། བཏུང་བ་དང་། སླས་གང་དག་ལགས་པ་དེ་ལ་མངའ་བ་ལས་ལྷ་དེང་ས་ལ་དབང་བའི་རྒྱལ་པོ་དང་། རྒྱལ་སྲིད་དང་། དཔུང་དང་། མཛོད་དང་། དམག་ལ་མངའ་མཛད་པར་གྱུར་པ་གང་
ལགས་པ་དེ་ལྟ་བུ་བདག་གིས་བགྱིས་ན་བདག་ལ་ཁྱོད་ཀྱིས་སྔོན་བྱས་པ་གཟོ་བ་ཉིད་མ་དགོངས་པར་ལྷས་དགུམ་དུ་བཏང་བས་དེའི་སླད་དུ་བདག་འདི་སྐད་དུ་རྒྱལ་པོ་གྲོགས་སུ་འགྱུར་བ་མེད་ཅེས་མཆིའོ། །གདོལ་པ་ལ་ནི་བཤེས་པ་མེད་ཅེས་བགྱི་བ་ནི་ལྷ་གདོལ་པ་མལ་དང་གོས་དང་བྲལ་བ་འདི་རྒྱལ་
པོ་སྐྱེད་པས་བདག་ལ་འཚོ་བའི་ཡོ་བྱད་བྱིན་ན་དེས་བདག་འཚོ་བར་བྱའོ་སྙམ་ནས་ལྷའི་དྲུང་དུ་མཆིས་པ་ལས་ལྷས་ཡོངས་སུ་མ་བཟུང་ངོ་། །བདག་གིས་ནི་བཀྲེན་པའོ་སྙམ་པ་དང་། ཡུལ་ནས་འཁྱམས་པའོ་སྙམ་ནས་བགོ་བཤའ་བགྱིས་པ་ལས་འདི་ལྟར་དེང་སང་བདེ་བར་གྱུར་པ་ལགས་ན་དེང་

བདག་དགུམ་པའི་སླད་དུ་ཆས་པས་དེའི་སླད་དུ་བདག་འདི་སྐད་དུ་གདོལ་པ་ལ་ནི་བཤེས་པ་མེད་ཅེས་མཆིའོ། །བུད་མེད་རྣམས་ལ་གསང་མི་བརྗོད་ཅེས་བགྱི་བ་ནི་རྒྱལ་པོ་དུས་གཅིག་ན་འཁོར་གྱི་ནང་དུ་བཞུགས་ནས་ཚིག་འདི་སྐད་དུ་ཇི་ལྟར་སུ་ལ་ཡིད་གཅུགས་
པར་བྱ་ཞེས་གསུངས་པ་དང་། དེ་ན་བློན་པོ་རྣམས་ཀྱིས་ཕ་དང་། མ་དང་། སྲིང་མོ་དང་། ནེའུ་ལྡངས་རྣམས་ལའོ་ཞེས་གང་ལ་སྨྲ་བར་བགྱི་བ་དེ་སྨྲས་སོ། །ལྷས་ཀྱང་ཆུང་མ་ལ་བརྗོད་པར་བྱ་སྟེ། འདི་ལྟར་ཆུང་མ་ནི་ལུས་ཀྱི་ཕྱེད་ཡིན་པས་དེའི་ཕྱིར་བརྗོད་པར་བྱའོ་ཞེས་གསུངས་
སོ། །དེ་ནས་བདག་གིས་དོན་འདི་ལྷའི་སྤྱན་སྔར་བབ་པར་བགྱིའོ་སྙམ་ནས་བགམ་པའི་སླད་དུ་རྒྱལ་པོའི་རྨ་བྱ་སྦས་ནས་རྨ་བྱ་གཞན་ཞིག་བླངས་ཏེ་འཚལ་ལོ། །སླས་ལས་ཀྱང་སླས་ཆེ་གེ་མོ་ཞིག་ལས་རྒྱན་བཙལ་ཏེ་སྨད་འཚོང་མ་ཆེ་གེ་མོ་ཞིག་གི་མགུལ་དུ་བཏགས་ནས་ཁྱིམ་དུ་
བཞག་སྟེ་ལྷ་སྨད་འཚོང་མ་དེ་ཡང་གཟིགས་སུ་གསོལ། དེ་ནས་རྒྱལ་པོས་བཀུག་ནས་སླས་དང་། སྨད་འཚོང་མ་ཕྱོགས་གཅིག་ཏུ་གཞག་སྟེ་གཉི་ག་བལྟས་ན། རྟགས་དང་། ཁ་དོག་དང་། ཚུལ་དང་། དབྱིབས་མཚུངས་ཏེ་གཅིག་ལ་ཡང་ཁྱད་པར་དམིགས་པ་
མ་ཡིན་ལ་ཅིག་ཤོས་ལ་ཡང་མ་ཡིན་ནོ། །དེ་ནས་རྒྱལ་པོས་བརྟགས་ནས་བདག་གིས་སྨན་ཆེན་པོ་ནི་ཉེས་པ་མེད་པར་ཁོང་དུ་ཆུད་དོ། །བྲམ་ཟེ་མོང་རྟུལ་པོ་ཡི་ནི། །ནས་བྲེ་གང་ཡང་ཆགས་མི་བྱ། །ཞེས་གང་སྨྲས་པ་ནི་བདག་ལྷས་དགུམ་པར་བཏང་ནས་གཤེད་མ་པ་རྣམས་
ཀྱིས་ཁྲིད་པ་ན་དེས་ནས་བྲེ་གང་བྱིན་ཅིག་ཅེས་ནས་བྲེ་གང་གི་དོན་དུ་གོས་ཀྱི་མཐའ་ནས་བཟུང་བས་དེའི་སླད་དུ་བདག་གིས་དེ་སྐད་སྨྲས་སོ། །དེ་ནས་རྒྱལ་པོ་དོན་དེ་ཐམས་ཅད་མངོན་སུམ་དུ་བསྟན་པས་དགའ་སྟེ་བཀྲོལ་ནས་བཀུར་སྟི་ཆེན་པོས་བཀུར་སྟི་བྱས་སོ། །དེ་ནས་རྒྱལ་པོ་
ལ་ཕྱག་བྱས་ནས་གསོལ་པ། ལྷ་ཁྱོད་ཀྱིས་བུད་མེད་རྣམས་ཀྱི་གསང་གཟིགས་སམ། ཁྱོད་ཀྱི་སྲས་མོ་ནི་བདག་ལ་ཡོང་དགོས་པ་མ་མཆིས་སོ། །འོན་ཀྱང་རིགས་དང་། གཟུགས་དང་། ངང་ཚུལ་དང་། ཤེས་རབ་བདག་དང་འདྲ་བ་དེ་ཁོ་ན་ལྟ་བུའི་མཆིས་འབྲང་ཞིག་བླང་

བར་བགྱིའོ། །དེས་རྒྱལ་པོ་ལ་གནང་བ་གསོལ་ནས་བདག་ཉིད་བྲམ་ཟེའི་ཆ་བྱད་དུ་བྱས་ཏེ་ལག་པ་གཡས་པ་བྱ་མ་བུམ་ཐོགས། ལུས་མཆོད་ཕྱིར་ཐོགས་ཀྱིས་མཛེས་པར་བྱས། ལུས་ལ་རི་དགས་ཀྱི་པགས་པ་གོས་སུ་བགོས། གདོང་ལ་བྱུགས་རིས་གསུམ་བྱས་ནས་རི་འོར་ནགས་ཀྱི་
ཚང་ཚིང་ཅན་ག་ལ་བ་དེར་བུ་མོ་བཙལ་བའི་ཕྱིར་ཆས་སོ། །ཇི་ཙམ་ན་ལམ་གྱི་བར་དུ་གྲོང་ཞིག་ཏུ་མུན་སྲོས་པར་གྱུར་ཏོ། །ཐ་གི་ཙམ་ན་བྲམ་ཟེ་ཞིག་གིས་དྲིས་པ་གང་ནས་འོངས། དེས་སྨྲས་པ། ལུས་འཕགས་པའི་ལྗོངས་ནས་སོ། །གང་དུ་འགྲོ་བར་སེམས། ནགས་ཀྱི་ཚང་
ཚིང་ཅན་དུའོ། །ཅི་གང་གི་ཁྱིམ་དུ་བྲང་གདབ་པའི་ངོ་ཤེས་འགའ་ཁྱོད་ལ་ཡོད་དམ། དེས་སྨྲས་པ་མེད་དོ། །དེ་ནས་དེས་ཁྱིམ་དུ་ཁྲིད་དེ་ཚུལ་དང་མཐུན་པའི་འབྱོར་པས་ཕུ་དུད་བྱས་སོ། །དེས་དེའི་ཆུང་མ་ལ་ཡང་འདི་ནི་སྐྱེས་པ་གཞན་ལ་ཆགས་པས་རུང་བ་མ་ཡིན་ནོ་ཞེས་འཕྲིགས་
སོ། །དེ་ཕྱི་དེ་ཉིན་དྲིས་ནས་ཆས་པ་དང་། བྲམ་ཟེས་ཀྱང་སྨྲས་པ། གྲོགས་པོ་བདག་གི་ཁྱིམ་འདི་སྟེ། ཕན་ཚུན་འགྲོ་བའི་ཚེ་ཕྱིན་པ་ན་རང་གི་ཁྱིམ་བཞིན་དུ་སོམས་ཤིག །དེ་བཞིན་བགྱིའོ་ཞེས་སྨྲས་ནས་ཆས་སོ། །ཇི་ཙམ་ན་ལམ་གྱི་བར་ཞིག་ན་ནས་ཀྱི་ཞིང་ཞིག་
ཡོད་པ་དེ་ན་བུ་མོ་གཟུགས་བཟང་ཞིང་བལྟ་ན་སྡུག་པ། རིགས་བཙུན་པ་ཤིན་ཏུ་ཞི་བ་དང་ལྡན་པ་ཞིག་མཐོང་ངོ་། །མཐོང་ནས་ཀྱང་དེའི་ཡིད་དེ་ལ་ཞེན་ཏོ། །དེ་ནས་དྲིས་པ། བཟང་མོ་ཁྱོད་གང་ཞིག་ཡིན། སུའི་ཡིན། ཁྱོད་ཀྱི་མིང་ཅི། དེས་སྨྲས་པ། ས་གའོ། །
ཁྱོད་སུའི་ཡིན། སྨྲས་པ། གང་ཞིག་གྲོང་ཐམས་ཅད་ཀྱི་ཤིང་སྒྲུབ་པར་བྱེད་པའིའོ། །དེ་ནས་སྨན་ཆེན་པོས་བསམས་པ། འདི་བྱད་ནི་བཟང་མོ་ཞིག་ཡིན་ན་ད་རེ་ཞིག་བློ་ཅི་འདྲ་བ་བློ་བགམ་པར་བྱའོ་སྙམ་མོ། །དེ་ནས་དེ་གྲོ་ཞིང་ཞིག་ཏུ་ཞུགས་ཏེ་ལག་པ་བསྒྲེང་ནས་ལག་པ་ཕངས་
པར་བྱ་བའི་ཕྱིར་རྐང་པས་གྲོ་ཕུར་བ་དང་། དེ་ནས་ས་གས་སྨྲས་པ། མཁན་པོ་ཇི་ལྟར་ལག་པ་ཕངས་པ་དེ་བཞིན་དུ་ཁྱོད་རྐང་པ་གཉིས་ཀྱང་ཕངས་པར་གྱིས་ཤིག །དེས་བསམས་པ། བུ་མོ་འདི་ནི་མཛངས་མ་ཞིག་གོ་སྙམ་མོ། །དེ་ནས་ཡང་བྲམ་ཟེས་བགད་ནས་སྨྲས་པ། བུ་མོ་

ཁྱོད་ཀྱིས་རྣ་ཆ་གདུབ་ཀོར་གདུ་གུ་ཞིག་སྟེ་ཤིན་ཏུ་ལྷང་ངེའོ། །ས་གས་སྨྲས་པ། མཁན་པོ་རྣ་བ་གཉིས་དགབ་པའི་སླད་དུའོ། །དེ་ནས་སྨན་ཆེན་པོས་སྨྲས་པ། བུ་མོ་བྱད་བཟང་ཞིང་བལྟ་ན་སྡུག་པ་མཛེས་པ་ཡིན་ནོ། །ས་གས་སྨྲས་པ། གྲོང་གི་བདག་པོ་
རྣམས་ཀྱི་བཀའ་དྲིན་གྱིས་སོ། །ཅུང་ཞིག་འདུག་ནས་སྨྲས་པ། ཁྱོད་ཀྱི་ཕ་གར་སོང་། བུ་མོས་སྨྲས་པ། ལམ་གཅིག་གཉིས་སུ་བགྱིད་དུ་མཆིས་ཏེ་ཚེར་མའི་ཡལ་ག་བསྡུས་ནས་ལམ་གཅོད་པར་བགྱིད་དོ། །དེས་ན་སྐྱེ་བོ་དག་ཤུལ་གཉིས་པ་བགྱིད་དོ། །ཁྱོད་ཀྱི་མ་ཡང་གར་
སོང་། ཞིང་ཐོག་ནས་ས་བོན་གྱི་ཕྱིར་མཆིས་སོ། །བུ་མོ་ངའི་ཆུང་མ་བྱའམ། བུ་མོས་སྨྲས་པ། གལ་ཏེ་གྲོང་གི་བདག་པོ་བཏུབ་ནའོ། །དེས་སྨྲས་པ། ནགས་ཀྱི་ཚང་ཚིང་ཅན་དུ་ལམ་གང་ནས་འགྲོ་ན་བདེ་བ་དང་མི་འཁྱོག་པ་དེ་སྟོན་ཅིག །ཡང་སྨྲས་པ། ནགས་ཀྱི་ཚང་
ཚིང་ཅན་གྱི་ལམ། །ཚེར་མ་མེད་ཅིང་ཐིབས་པོ་མེད། །བདེ་ཞིང་མི་འཁྱོག་འཇམ་པ་ནི། །གང་ནས་བདག་འགྲོ་དྲིས་པ་སྟོན། །དེས་དེ་ལ་ལམ་འཁྱོག་པ་ཞིག་བསྟན་ནས། ལམ་གཞན་ནས་མདུན་དུ་རྒྱུགས་ཏེ། རྫིང་བུ་ཞིག་ཏུ་གོས་རྣམས་ཕུད་ནས་མིག་ཡ་གཅིག་བཙུམས་ཏེ་ཅི་ངོ་
ཤེས་སམ། འོན་ཏེ་མ་ཡིན་ཞེས་གློ་གཅིག་གིས་སྙེས་ཏེ་འདུག་གོ། །ཡང་སྨྲས་པ། གང་གིས་ཟ་བགྱིད་དེ་ནས་བཞུད། །གང་གིས་ཟ་བར་མི་བགྱིད་པ། །དེ་ནི་དོར་བར་བགྱིས་ནས་སུ། །ཟན་གྱི་ནགས་སུ་བཞུད་པར་མཛོད། །དེ་ནས་སྨན་ཆེན་པོས་ཇི་སྐད་བསྟན་པའི་ལམ་ནས་
སོང་བ་དང་། ཅི་ཙམ་ན་རྒྱང་རིང་པོ་ནས་དེ་ངོ་ཤེས་ནས་སྨྲས་པ། རས་བལ་ཐགས་སུ་བཏགས་པ་མི་བདོག་པས། །མ་བཀལ་ཐགས་སུ་མ་བཏགས་གྱོན་བྱེད་པ། །མཛེས་ལྡན་གཡོན་པའི་མིག་ཅན་གང་ནས་ནི། །མེ་ཏོག་གྲོང་དུ་འགྲོ་བ་བདག་ལ་སྟོན། །དེ་ནས་བུ་མོས་ཅུང་ཞིག་
བགད་ནས་སྨྲས་པ། འདིར་ནི་གཡོན་པའི་ལམ་འོར་ལ། །གང་ན་ཡོས་ནི་ཡོད་པ་དང་། །པ་ལ་ཤ་ཡི་མེ་ཏོག་རྒྱས། །དེ་ནས་བྲམ་ཟེ་བཞུད་དུ་གསོལ། །དེ་སོང་སོང་སྟེ་ཕྱིན་ནས་སྨྲས་ཏེ་ས་གའི་ཕའི་ཁྱིམ་དུ་སོང་ན་དེའི་ཕ་མ་མི་སྣང་ངོ་། །དེ་ནས་གྲོང་གི་བདག་པོ་རྣམས་ལ་སྨྲས་

པ། གལ་ཏེ་ཁྱོད་ཀྱིས་གནང་ན་ས་ག་འདི་བདག་གི་ཆུང་མ་བགྱིད་དོ། །ཚིག་དེ་སྨྲས་མ་ཐག་ཁོ་ནར་གྲོང་གི་བདག་པོ་དེ་ཐམས་ཅད་ཀྱིས་ཚིག་མཐུན་པར་བྲམ་ཟེ་ངན་པ་སློང་མོ་པ་ཁྱོད་གང་ངེད་ཀྱི་ས་ག་ལྷའི་བུ་མོ་འདྲ་བ་སློང་བ་ངོ་མི་ཚའམ། ཡུལ་འདི་ནས་ཡེ་སོང་ཤིག །ཁྱོད་ལ་ཁྱི་མི་སྲུན་
པ་དག་ཟར་བཅུག་ག་རེ་ཞེས་སྤྱོས་སོ། །དེ་སྐྱེ་བོས་བསྐྲད་ནས་དེ་ཁོ་ནའི་དྲུང་དུ་སོང་བ་དང་། ས་གས་རྒྱང་རིང་པོ་ནས་མཐོང་ནས་བྱོན་པ་ལེགས་སོ་ཞེས་སྨྲས་སོ། །དེ་ནས་སྨན་ཆེན་པོས་དེ་རྣམས་ཀྱིས་དེའུ་བརྡེགས་སོ་ཞེས་གྲོང་གི་བདག་པོ་རྣམས་ཀྱི་གཏམ་སྨྲས་པ་དང་། ས་གས་
སྨྲས་པ། ཁྱོད་ཀྱིས་ཇི་ལྟར་རམ་ཐབས་ཅི་ཞིག་གིས་སྨྲས། དེ་ནས་སྨན་ཆེན་པོས་གཏམ་ཇི་ལྟ་བ་བཞིན་དུ་བསྙད་པ་དང་། དེ་ནས་ས་གས་སྨན་ཆེན་པོ་ལ་སྨྲས་པ། བྲམ་ཟེ་ཆེན་པོ་ཁྱོད་ཐ་གི་མི་སྒོམ་མོ། །བུ་མོ་བསླང་བ་ཇི་ལྟར་ཁྱོད་ཀྱིས་མཛད་པ་དེ་ལྟར་བགྱིའམ། བྲམ་ཟེས་སྨྲས་པ།
གཞན་དུ་ཇི་ལྟར་བྱ། བུ་མོས་སྨྲས་པ། རེ་ཞིག་སྔར་ཉེ་བར་བཞུད་དོ། །དེ་ནས་རྗེས་སུ་མཐུན་པར་བགྱིའོ། །རྗེས་སུ་མཐུན་པར་བགྱིས་ནས་མགྲོན་དུ་འབོད་ཅིང་ཟས་སྐོམ་བདའ་བའི་སྟོན་མོས་སྟོན་ཏེ་སླད་ཀྱིས་ཁྱོད་ཀྱི་བགྱི་བ་གང་ལགས་པ་དེ་བགྱི་མོད། དེས་སོང་སྟེ་ཇི་སྐད་བསྟན་པ་བཞིན་
དུ་གྲོང་གི་བདག་པོ་རྣམས་ཁ་ཟས་གྱི་རྣམ་པ་བསོད་པས་སྟོན་ཏོ། །དེ་ནས་ལངས་ཏེ་ས་ག་བསླངས་པ་དང་། དེ་རྣམས་ཀྱིས་དེང་ཁྱོད་ཀྱི་ཡིད་ལ་བསམས་པ་བཞིན་རྫོགས་པར་བྱའོ་ཞེས་ཁས་བླངས་སོ། །དེ་ལྟ་བུའི་དོན་ལ་ཞུགས་པ་ན་ཐ་གི་ཙམ་ན་དེའི་ཕ་མ་འོངས་སོ། །དེ་ནས་སྨན་ཆེན་པོ་
དང་གྲོང་གི་བདག་པོས་ཕ་མ་ལ་གསོལ་བ་བཏབ་པ་དང་སྨྲས་པ། དོན་དེ་བསམས་དགོས་སོ། །དེ་ནས་གྲོང་གི་བདག་པོ་རྣམས་ཀྱིས་སྨྲས་པ། འདི་ལ་ཅི་བསམ་དུ་ཡོད། བྲམ་ཟེ་གཞོན་ནུ་བྱད་བཞིན་བཟང་ཞིང་བལྟ་ན་སྡུག་ལ་བསྟན་བཅོས་མང་པོ་ཤེས་ཤིང་རིག་བྱེད་དང་རིག་བྱེད་ཀྱི་ཡན་
ལག་གི་ཕ་རོལ་དུ་སོན་པ་ཞིག་ཡིན་པས་ཅིར་ཡང་མི་འགྱུར་གྱིས་བྱིན་ཅིག །དེ་ནས་སྨན་ཆེན་པོས་ཀྱང་བྲམ་ཟེ་རྣམས་བོས་ནས་བུ་མོ་བླང་བར་བྱས་སོ། །དེ་ནས་ཉི་མ་གཞན་ཞིག་ལ་གྱོས་པོ་དང་སྒྱུག་མོ་བོས་ནས་བཀུར་སྟི་བྱས་ཏེ་གོས་བསྐོན་ནས་གཉོད་བཅུག་སྟེ་ལུས་འཕགས་སུ་སྐྱེད་པའི་དྲུང་དུ་ཆས་

སོ། །དེ་ནས་འགྲོ་བ་ན་དེ་བྲམ་ཟེ་ཞིག་གིས་བཅུ་བཞི་པའི་སྟོན་མོས་སྟོན་ཏེ་ཡོན་དུ་ནས་བྲེ་གང་བྱིན་ནོ། །དེས་ནས་བྲེ་གང་གོས་ཀྱི་མཐའ་མར་ཕུར་ཏེ་གྲོགས་པོའི་ཁྱིམ་དུ་སོང་ནས་སྒོ་བརྡུངས་པ་དང་། བྲམ་ཟེ་མོས་སྨྲས་པ། དེ་སུ་ཞིག །དེས་སྨྲས་པ། ང་ནི་ཁྱོད་ཀྱི་ཁྱིམ་
ཐབ་ཀྱི་གྲོགས་པོ་དེ་ཡིན་ནོ། །དེས་སྨྲས་པ། འདི་ན་དེ་ཡང་མེད་ལ་འགའ་ཡང་མེད་པས་ཁྱིམ་བདག་དེ་མེད་པར་སྐྱེས་པ་གཞན་ཁྱིམ་དུ་འཇུག་ཏུ་མི་རུང་གིས་གཞན་ཞིག་ཏུ་བྲང་ཐོབ་ཤིག །ཅི་ཙམ་ན་སྨན་ཆེན་པོས་བདག་ཅིའི་ཕྱིར་འཇུག་ཏུ་མི་སྟེར་སྙམ་དཔྱད་ན་རེ་ཞིག་ན་སྐྱེས་པ་གཞན་
བཅུག་པར་མཐོང་ངོ་། །དེ་ནས་སྨན་ཆེན་པོས་སྨྲས་པ། འདིས་འཇུག་ཏུ་མ་སྟེར་བ་ནི་རུང་ངོ་། །དེ་དེ་ལྟར་སེམས་པ་དང་། ཐ་གི་ཙམ་ན་བྲམ་ཟེ་དེ་གྲོང་གཞན་ཞིག་ནས་འོངས་ནས་སྒོར་བོས་པ་དང་། དེས་ཁྱོའི་སྒྲ་ཐོས་ནས་དེ་ཇི་ལྟར་བྱ་སྙམ་ནས་མི་དགའ་སྟེ་དེ་སྤྱད་དུ་བཅུག་གོ། །
དེ་ནས་གཉི་ག་ཞུགས་ནས་བདེ་བར་འཁོད་དོ། །ཅི་ཙམ་ན་སྨན་ཆེན་པོས་བྲམ་ཟེ་མོ་ལ་སྨྲས་པ། ནས་འདི་དག་གར་གཞག །བྲམ་ཟེ་མོས་སྨྲས་པ། ས་ལའོ། །བྲམ་ཟེས་སྨྲས་པ། བྱི་བས་ཟོས་པར་འོང་མོད་དེས་མལ་གྱི་འོག་དང་། ཁྱིམ་གྱི་གྲ་ཕན་ཚུན་དུ་བརྟགས་
ན་དེ་མི་སྣང་ངོ་། །ཐ་གི་ཙམ་ན་ཕྱོགས་གཅིག་ན་སྤྱད་ཞིག་སྣང་བ་དང་། དེས་དེ་ནི་འདི་ན་ཡོད་དོ་སྙམ་མོ། །དེ་ནས་སྨན་ཆེན་པོས་སྨྲས་པ། སྤྱད་འདིར་ནས་བླུགས་སོ། །བྲམ་ཟེ་མོས་སྨྲས་པ། འདི་ན་བདག་གི་ནོར་གཅེས་པ་ཡོད་ན་འདིར་ནས་ཇི་ལྟར་བླུགས།
དེ་ནས་ཁྱོས་སྨྲས་པ། བྲམ་ཟེ་མོ་སྐྱོན་ཅན་དེ་སྣོད་གང་ཡང་རུང་བ་ཞིག་ཏུ་བྱོ་ཤིག་དང་། དེ་ནས་དེར་ནས་ལྡུགས་སོ། །སྨན་ཆེན་པོས་ཀྱང་སྨྲས་པ། གཞན་དུ་ནི་ནས་རྣམས་བྱི་བས་མ་རུང་བར་བྱེད་པས་དེའི་ཕྱིར་འདིར་བླུགས་པར་བྱའོ། །དེ་ནས་བྲམ་ཟེ་མོས་ངེས་པར་
རྟོགས་ནས་འཇིགས་ཤིང་སྐྲག་སྟེ་སྨྲས་པ། སྤྱད་འདི་ཡང་གཤེར་ལ་ནས་རྣམས་ཀྱང་མ་རུང་བར་འགྱུར་རོ། །དེ་ནས་སྨན་ཆེན་པོས་བྲམ་ཟེ་མོ་ལ་སྨྲས་པ། ཡང་ཁྱོད་ཀྱིས་སེམས་ཁྲལ་བྱ་མི་དགོས་པར་ཁོ་བོས་ཅི་ནས་ཀྱང་གཤེར་བར་མི་འགྱུར་བ་དང་། ནས་ཀྱང་མ་རུང་བར་

མི་འགྱུར་བ་དེ་ལྟར་བྱའོ་ཞེས་དེས་ལངས་ནས་རི་དགས་ཀྱི་པགས་པ་སྔ་ལོག་ཕྱི་ལོག་བྱས། མཆོད་ཕྱིར་ཐོགས་ཉིས་ལྟབ་ཏུ་མགུལ་དུ་ཐོགས་ཏེ་སྤྱད་སྐམ་མོ་ཞེས་སྤྱད་དུ་བ་ལང་གི་ལྕི་བ་དང་ཤིང་དག་བསྐྱ་བར་བརྩམས་པ་དང་། དེ་ནས་བྲམ་ཟེ་མོ་སྡུག་པ་དང་བྲལ་བ་ལས་
སྐྱེས་པའི་སྡུག་བསྔལ་མངོན་དུ་མཐོང་སྟེ། འདི་ད་ནི་མེད་པར་འོང་ངོ་སྙམ་ནས་བྱི་བོ་དེའི་ཁྱིམ་དུ་འདི་ལྟར་གྱུར་གྱིས་མྱུར་དུ་ཤེག་ཤིག་ཅེས་བང་ཆེན་བཏང་ངོ་། །དེ་ནས་དེའི་ཕས་ཐོས་མ་ཐག་ཁོ་ནས་སོང་སྟེ་སྨན་ཆེན་པོ་ལ་སྨྲས་པ། སྤྱད་འདི་རིན་གྱིས་བླང་ངོ་། །དེས་
སྨྲས་པ། བག་རྟོན་ལ་ལོང་ཤིག །ཇི་ལྟར་བྱ། གསེར་གྱི་དོང་ཚེ་ལྔ་བརྒྱ་དག་གིས་ཡིན་གྱི་གཞན་དུ་ནི་མ་ཡིན་ནོ་ཞེས་དེ་སྐད་ཀྱང་ཟེར་ཞིང་སྤྱད་དེའི་ཉེན་ཀོར་དུ་མེ་སྒྲོན་ཡང་སྦོར་བར་བྱེད་པ་དང་། དེའི་ཕས་བསམས་པ། དོན་འདི་ནི་བསྙད་དུ་མི་རུང་ངོ་སྙམ་ནས་ཁྱིམ་སྒོ་ཕྱེ་སྟེ་མི་
སྟོབས་པོ་ཆེས་བཏེག་ནས་རང་གི་ཁྱིམ་དུ་ཁྱེར་རོ། །སྨན་ཆེན་པོས་ཀྱང་ཕྱི་དེ་ཉིན་གསེར་གྱི་དོང་ཚེ་བརྒྱ་ཕྲག་གཅིག་ནི་ཁྱིམ་བདག་དེ་ལ་བྱིན་ཏེ། དེ་ལ་ཁྱོད་ཀྱི་ཆུང་མ་དེ་ནི་འདི་ལྟ་བུ་ཡིན་ནོ་ཞེས་ཁྱིམ་གྱི་གཏམ་དེ་དང་དེ་བས་ན་ཁྱོད་ཀྱིས་བག་གྱིས་ཤིག་ཅེས་སྨྲས་སོ། །གསེར་གྱི་དོང་ཚེ་
ལྷག་མ་བཞི་བརྒྱ་ནི་བྲམ་ཟེ་དེའི་ལག་ཏུ་གཏད་ནས་འདི་རྣམས་ནགས་ཀྱི་ཚང་ཚིང་ཅན་དུ་སོང་ལ་བདག་གིས་བསླངས་པའི་ས་ག་ལ་བྱིན་ཅིག །དེ་དག་ལ་ཁོ་བོ་བྲམ་ཟེ་མ་ཡིན་ཏེ། ཁོ་བོ་ནི་ལུས་འཕགས་པའི་རྒྱལ་པོ་སྐྱེད་པའི་བློན་པོའི་མཆོག་སྨན་ཆེན་པོ་ཞེས་བྱ་བ་ཡིན་ཏེ་ཁོ་བོ་རྟགས་
འདིས་ཚོལ་བའི་ཕྱིར་འོངས་པར་ཟད་དོ། །དེའི་ཕྱིར་བུ་མོ་ཡོངས་སུ་སྐྱོངས་ཤིག་ཅེས་ཀྱང་གྱིས་ཤིག་དེས་གསེར་གྱི་དོང་ཚེ་དེ་རྣམས་བརྫངས་ནས་ཕྲིན་ཡིག་ཀྱང་སྤྲིང་སྟེ་རྒྱལ་པོ་སྐྱེད་པའི་དྲུང་དུ་སོང་ངོ་། །བྲམ་ཟེ་དེས་ཀྱང་ནགས་ཀྱི་ཚང་ཚིང་ཅན་དུ་སོང་སྟེ། ས་ག་ལ་ཕྲིན་
ཡིག་དང་གསེར་གྱི་དོང་ཚེ་སུམ་བརྒྱ་བྱིན་ནོ། །ཅི་ཙམ་ན་ས་གས་བཀླགས་ན། བཞི་པོ་ཡི་ནི་ཆ་དག་ལས། །གལ་ཏེ་ཅ་གཅིག་མ་སྟེར་ན། །ཤིང་གི་སུ་མི་འདོད་བླངས་ནས། །དེར་འདི་ཆུག་ལ་ཆ་དོ་ཤིག །དེས་གསེར་གྱི་དོང་ཚེ་བརྒྱ་ཕྲག་གཅིག་མ་ཐོབ་པར་མཐོང་ནས་དེ་ནས་

རིངས་པར་མལ་གྱི་འོག་ཏུ་ཚོལ་བ་དང་། དེས་སྨྲས་པ། དེར་ཅི་ཚོལ། དེས་སྨྲས་པ། ཕོ་བྲང་འཁོར་ནས་རྒྱལ་པོའི་མི་འོངས་ན་གནོད་པ་བྱེད་པ་ཟུང་ཤིག་ཅེས་བྱུང་སྟེ། དེའི་ཕྱིར་སུ་མ་འདོང་ཚོལ་ལོ། །དེས་བླངས་ཏེ་བྲམ་ཟེ་དེ་ལ་སྨྲས་པ། དེར་དེ་ལྟ་
བུ་སུ་ཞིག་ཁྲིད་ཀྱང་ཁོ་མོས་མ་ཤེས་ན་རེ་ཞིག་འདིར་རྐང་པ་ཆུད་དམ་མི་ཆུད་སད་ཀྱིས་ཐང་ཅིག་ཆུག་ཤིག །བྲམ་ཟེས་ཀྱང་བསམ་པ་མནག་པའི་ཕྱིར་རྐང་པ་བཅུག་པ་དང་། དེས་རིངས་པར་གཟེར་བ་བཏབ་པོ། །བྲམ་ཟེས་སྨྲས་པ། ང་ཅིའི་ཕྱིར་གཟུང་། དེས་སྨྲས་པ། དེས་བཞི་
བརྒྱ་བཀུར་ན་ཁྱོད་ཀྱིས་དེ་ལས་བརྒྱ་བསྐུམས་པས་སོ། །དེ་ནས་བྲམ་ཟེ་ཡ་མཚན་སྐྱེས་ཏེ། དེས་བསམས་པ། སྨན་ཆེན་པོ་དང་། འདི་ནི་འདྲེ་དག་ཅིག་སྟེ། འདྲེ་ཆེན་པོ་གཉིས་གནས་གཅིག་ཏུ་འདུས་པར་གྱུར་ཏོ་སྙམ་ནས་དེས་ལྷག་མ་བྱིན་ནོ། །ཐ་གི་ཙམ་ན་ཕ་མ་འོངས་པ་དང་
གསར་དེ་བསྟན་ནས་དེ་ནི་བྲམ་ཟེ་མ་ལགས་ཏེ་དེ་ནི་ལུས་འཕགས་པའི་རྒྱལ་པོ་སྐྱེད་པའི་བློན་པོའི་མཆོག་སྨན་ཆེན་པོ་ཞེས་བགྱི་བ་ལགས་སོ་ཞེས་སྨྲས་པ་ཐོས་ནས་ཕ་མ་དང་བུ་མོ་དེའི་གཉེན་འདུན་གྱི་སྐྱེ་བོ་དག་བདག་ཅག་གིས་ནི་ཆེན་པོ་དང་གཉེན་དུ་བྱས་སོ། །བདག་ཅག་ནི་བསོད་ནམས་
དང་ལྡན་པ་དང་གཙང་བྱེད་ཡིན་ཏེ། ད་ནི་བདག་ཅག་གི་རིགས་སྨན་ཆེན་པོས་གསོལ་བར་བྱས་སོ་ཞེས་ཤིན་ཏུ་དགའ་བ་དང་ལྡན་ནོ། །དེ་ཕྱིན་ཆད་ས་ག་དེ་བསྐུ་མཉེ་དང་། ཁྲུས་དང་། ཟས་སྐོམ་དང་། གོས་དང་། རྒྱན་གྱི་ཁྱད་པར་དག་གིས་ཤིན་ཏུ་བྱི་དོར་བྱ་བར་བརྩམས་པ་
དང་རིང་པོ་མ་ལོན་པར་ཇེ་ཁྱད་པར་གཟུགས་ཤིན་ཏུ་བཟང་བ་དང་ཤིན་ཏུ་མཛེས་པར་གྱུར་ཏོ། །དེ་ནས་སྨན་ཆེན་པོ་གྲོང་ཁྱེར་དུ་སོང་བ་དང་། རྒྱལ་པོས་འོངས་སོ་ཞེས་ཐོས་སོ། །དེ་ནས་རྒྱལ་པོ་དང་བློན་པོ་རྙིང་པ་རྣམས་སྨན་ཆེན་པོ་འོངས་སོ་ཞེས་ཤིན་ཏུ་དགའ་བ་སྐྱེས་སོ། །རྒྱལ་པོ་
སྐྱེད་པས་སྨྲས་པ། ཇི་ལྟར་འོངས། དེས་སྨྲས་པ། བདག་གིས་མཆིས་འབྲང་རྙེད་དོ། །རྒྱལ་པོས་སྨྲས་པ། ཅི་འདྲ་བ་ཞིག །སྨན་ཆེན་པོས་སྨྲས་པ། གཟུགས་བཟང་ཞིང་བལྟ་ན་སྡུག་ལ་མཛེས་པ་དང་། བློ་ཕུན་སུམ་ཚོགས་པ་ཞིག་སྟེ། དེ་ནི་བདག་གི་སྦུ་ལ་འབབ་པ་

ལགས་སོ། །དེ་ལྟ་ལགས་ཀྱིས་ཀྱང་ལྷ་ལ་ད་བླང་བར་བགྱི་འམ་ཞེས་ཞུའོ། །དེ་ནས་རྒྱལ་པོས་སྨྲས་པ། ང་མ་གཏོགས་པ་གཞན་སུ་ཞིག་ཁྱོད་ཀྱི་ཐོག་ཏུ་འབབ་སྟེ། དེ་ཅིའི་ཕྱིར་ཞེ་ན། ཁྱོད་ནི་བློན་པོའི་མཆོག་ཡིན་ནོ། །དེ་ལྟ་བས་ན་དེ་ཅི་ནས་ཀྱང་ང་མགུ་བར་འགྱུར་བ་དེ་ལྟ་
བུའི་འབྱོར་པས་བླང་བར་བྱའོ། །ལྷ་དེ་ལྟར་འཚལ་ལོ་ཞེས་སྨྲས་ནས་སྨན་ཆེན་པོ་བློན་པོའི་ཚོགས་ཀྱིས་བསྐོར་ཅིང་བྲམ་ཟེ་དང་། ཁྱིམ་བདག་དང་། སྐྱེ་བོའི་ཚོགས་མགྲོན་དུ་བོས་པ་གཞན་རྣམས་དང་། གླང་པོ་ཆེ་བ་དང་། རྟ་པ་དང་། ཤིང་རྟ་པ་དང་། དཔུང་བུ་ཆུང་
གི་ཚོགས་མང་པོས་བསྐོར་ནས་རི་འོར་ནགས་ཀྱི་ཚང་ཚིང་ཅན་དུ་གྱོས་པོའི་ཁྱིམ་དུ་སོང་ངོ་། །སོང་ནས་བག་མ་བླང་བ་ཆེན་པོ་བྱས་ཏེ་མཐར་གྱིས་ཆུང་མ་ཁྲིད་ནས་གྲོང་ཁྱེར་དུ་འོངས་ཏེ་དེ་ན་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་
བྱང་ཕྱོགས་ནས་ཚོང་པ་ལྔ་བརྒྱ་ཞིག་ཟོང་དུ་རྟ་ཁྱེར་ནས་ལུས་འཕགས་པའི་ལྗོངས་སུ་རྒྱལ་པོ་སྐྱེད་པའི་དྲུང་དུ་ལྷགས་སོ། །གནས་དེ་ན་སྨད་འཚོང་མ་ཚུལ་དང་། འདུལ་བ་དང་། གཟུགས་དང་། རྒྱ་ཆེ་བ་དང་མཐུན་པར་བྱེད་པ་དང་། བགད་པ་དང་། སྒེག་པ་དང་། སྤྲོ་བ་བསྐྱེད་
པ་དང་། གླུ་དང་། གར་དང་། ཟུར་སྟེགས་དང་། བསམ་པ་མཁས་པ་དེ་ལྟ་བུ་ལྔ་བརྒྱ་འཁོད་པས་ཚོང་པ་གང་དག་འོངས་ཤིང་ལྷགས་པ་རྣམས་རྫས་མེད་པར་བྱེད་དོ། །དེ་ནས་དེ་རྣམས་ཀྱིས་བྱང་ཕྱོགས་ནས་ཚོང་པའི་འགྲོན་པ་ཇི་ལྟར་ལྷགས་པ་ཐོས་ནས་དེ་རྣམས་ཀྱིས་
རེ་རེས་ཚོང་པ་རེ་རེ་ལ་རིམ་གྲོ་བྱ་བར་ཁས་བླངས་པས་ཉེ་བར་བཟུང་སྟེ་དེ་དག་རྣམས་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་དེ་རྣམས་ཀྱི་དེད་དཔོན་གང་ཡིན་པ་དེ་ནི་བག་ཡོད་པ་ཅན་ཞིག་པས་དེ་དེ་རྣམས་དང་ལྷན་ཅིག་བག་མེད་པ་
མི་བྱེད་དོ། །སྨད་འཚོང་མ་དེ་རྣམས་ཀྱི་ནང་ན་ཀུན་གྱི་གཙོ་མོ་གང་ཡིན་པ་དེ་ནི་དེད་དཔོན་དེ་འདོད་ན་དེད་དཔོན་ནི་མི་བཏུབ་པོ། །དེ་ནས་དེས་ཚོང་པ་དེ་རྣམས་བསྡུས་ནས་གསོལ་བ་བཏབ་པ་བདག་དང་དེད་དཔོན་མཐུན་པར་མཛོད་ཅིག །དེ་ནས་ཚོང་པ་དེ་རྣམས་དང་སྨད་འཚོང་མ་དེ་

རྣམས་ཀྱིས་ཉིན་གཅིག་བཞིན་རྒྱུན་དུ་ཕེའུ་བྱས་ན་བག་མེད་པའི་དབང་དུ་མི་འགྲོའོ། །དེ་ནས་སྨད་འཚོང་མ་དེ་རང་ཉིད་འོངས་ཤིང་དེད་དཔོན་དང་ལྷན་ཅིག་བགད་པ་དང་། ག་ཞ་བྱས་པ་དང་། དེ་ནས་དེད་དཔོན་གྱིས་སྨྲས་པ། ང་ལ་འཁྲུལ་བར་བྱ་
བར་མི་ནུས་ན་ཅིའི་ཕྱིར་ཉོན་མོངས། དེས་སྨྲས་པ། གལ་ཏེ་འཁྲུལ་བར་བགྱི་ན་ཤེས་ལྡན་གྱིས་ཅི་སྩལ། དེས་སྨྲས་པ། རྟའི་མཆོག་ལྔ་སྦྱིན་ནོ། །འོ་ན་འཁྲུལ་བར་མ་བགྱིས་ན་སླད་ཀྱིས་ཀཱར་ཥཱ་པ་ཎ་མ་མཆིས་བཞིན་དུ་རྗེས་སུ་འཇུག་པར་བགྱིའོ། །དེ་ནས་དེ་
ལྟར་སྐུགས་བཙུགས་ནས་འབད་དེ་ཉེ་བར་སྤྱད་པ་ལས་ཀྱང་མ་ནུས་སོ། །ཅི་ཙམ་དུས་གཞན་ཞིག་ན་ཚོང་པ་དེ་རྣམས་ཀྱིས་སྨྲས་པ། དེད་དཔོན་གྲོང་ཁྱེར་གྱི་གཙོ་མོ་སྨད་འཚོང་མ་གཞག་པ་ལས་མ་ཐུག་གིས་འཇིག་རྟེན་གྱི་ཚུལ་གྱིས་ཤིག །དེ་ནས་དེད་དཔོན་གྱིས་དེ་
རྣམས་ལ་སྨྲས་པ། གྲོགས་པོ་དག་མཚན་མོ་རྨི་ལམ་ན་དེ་ལ་ཡོངས་སུ་སྤྱད་དོ། །ཚོང་པ་རྣམས་ཀྱིས་ཀྱང་དེ་ལ་བསྙད་པ་དང་། དེས་དེད་དཔོན་དེ་རྒྱལ་པོའི་མི་རྣམས་འཛིན་དུ་བཅུག་ནས་ཁྱོད་བདག་དང་འདོད་པ་སྤྱད་ཀྱིས་རྟའི་མཆོག་ལྔ་བྱིན་ཅིག །དེད་དཔོན་གྱིས་སྨྲས་པ།
ངན་པ་མོ་བརྫུན་དུ་སྨྲ་བ་ཟེར་རམ་ཞེས་དེ་གཉིས་རྩོད་ཅིང་རྒྱལ་པོའི་ཕོ་བྲང་དུ་དོང་ངོ་། །དེ་ནས་རྒྱལ་པོ་འཁོར་དང་བཅས་པ་ལས་ཤགས་བཀྱེ་བ་ལས་ཉི་མ་ནུབ་ཀྱི་བར་དུ་གཅིག་ཀྱང་མ་ཕམ་ལ། ཅིག་ཤོས་ཀྱང་མ་ཡིན་ནོ། །རྒྱལ་པོ་དང་བློན་པོ་ཐམས་ཅད་ཀྱང་སྐྱོ་བར་
གྱུར་ནས་བཀྲེས་པས་ཉེན་ཏེ་ཕྱིས་དཔྱད་དོ་ཞེས་རང་གི་ཁྱིམ་དུ་དོང་ངོ་། །དེ་ནས་སྨན་ཆེན་པོ་ནུབ་མོ་རང་གི་ཁྱིམ་དུ་སོང་ནས་ས་གས་དྲིས་པ། རྗེའི་སྲས་དེ་རིང་ཅིའི་སླད་དུ་ཐོགས། དེས་ཞལ་ཆེ་གཅད་པར་ཡང་མ་ནུས་པའི་གཏམ་དེ་ཐམས་ཅད་རྒྱ་ཆེར་བསྙད་དོ། །དེ་
ནས་ས་གས་སྨྲས་པ། ཁྱོད་དེ་ལྟར་རྟོག་པ་དང་། སེལ་བ་ཕུན་སུམ་ཚོགས་པ་དེ་ལྟ་བུ་ཐམས་ཅད་ཀྱིས་གཅད་པར་མ་སྤྱོད་ན་ཁྱོད་སྐྱེས་པའི་ཚུལ་དེ་ལྟ་བུ་ལགས་པ་ལྟ། སྨན་ཆེན་པོས་སྨྲས་པ། དེ་ནི་དེ་ལྟ་བུ་ཡིན་ན་ཅི་ཁྱོད་ཀྱིས་གཅད་ནུས་སམ། དེས་སྨྲས་

པ། རྔོ་ཐོག་སྟེ། བདག་གི་བློའི་ནུས་པ་ལ་གཟིགས་ཤིག །དེས་སྨྲས་པ། གཤེགས་ལ་རྫིང་བུའི་འགྲམ་དུ་རྟའི་མཆོག་ལྔ་བཞག་སྟེ། དེ་ནས་གནས་དེ་ཉིད་དུ་རྒྱལ་པོ་དང་བློན་པོ་རྣམས་ཀྱང་འདུས་ཏེ་ཤགས་འགྱེད་དུ་སྩལ་ཅིག །གལ་ཏེ་སྨད་འཚོང་མ་གཉིས་དང་།
གཉིས་འདོད་པ་སྤྱད་དོ་ཞེས་མཆི་ན་རྟའི་མཆོག་ལྔ་ཁྱེར་ཅེས་གསུངས་ཤིག །འོན་ཏེ་རྨི་ལམ་ན་འདོད་པ་སྤྱད་དོ་ཞེས་མཆི་ན་དེ་ནས་རྟའི་གཟུགས་བརྙན་ཆུ་ན་མཆིས་པ་དག་སྟོན་ཅིག །གལ་ཏེ་བླང་དུ་མི་རུང་བ་འདི་དག་བདག་ལ་ཅི་དགོས་ཞེས་སྨྲ་ན། དེ་ནས་ཇི་ལྟར་འདི་བླང་དུ་
མི་རུང་བཞིན་དུ་རྨི་ལམ་གྱི་འདོད་པ་སྤྱད་པ་ཡང་དེ་དང་འདྲའོ་ཞེས་གསུངས་ཤིག །དེ་ཐོས་ནས་སྨན་ཆེན་པོ་ཉིད་ཇེ་ཡ་མཚན་དུ་གྱུར་ཏོ། །དེ་ཕྱི་ཉིན་པར་རྒྱལ་པོ་ཡང་འདུས་པ་དང་། བློན་པོ་རྣམས་ཀྱང་ཚོགས་ནས་རྟའི་མཆོག་ལྔ་ཁྲིད་དེ་རྫིང་བུར་ལྷགས་ཏེ། དེར་རྟའི་མཆོག་ལྔ་
བཏགས་ནས་ཤགས་འགྱེད་དུ་བཅུག་གོ། །དེ་ནས་ས་གས་བསྟན་པ་བཞིན་དུ་སྨན་ཆེན་པོས་ཞལ་ཆེ་བཅད་པ་དང་། རྒྱལ་པོ་དང་བློན་པོ་དང་ཁྲམ་གྱི་རུ་རྣམས་ཀྱིས་ཐོས་ནས་ཡ་མཚན་སྐྱེས་སོ། །རྒྱལ་པོས་སྨྲས་པ་ཀྱེ་སྨན་ཆེན་པོ་གང་འདི་ཁར་ཚང་སྨྲས་པ་དང་། ང་དང་། བློན་པོ་
རྣམས་དང་། སྐྱེ་བོ་གཞན་ཡང་ཉོན་མོངས་པར་མི་འགྱུར་བ་ཞིག་ན་ཁྱོད་ཀྱི་ཐབས་སུ་ལས་བྱུང་། དེས་སྨྲས་པ། འདི་ནི་ས་གའི་ཐབས་ལགས་ཏེ། དེས་ཀྱང་ཁར་ཚང་བསྟན་ལགས་སོ། །དེ་ནས་རྒྱལ་པོ་དང་། བློན་པོ་དག་དང་། སྐྱེ་བོའི་ཚོགས་གཞན་རྣམས་ཀྱང་ཡ་མཚན་
སྐྱེས་ཏེ། ཀྱེ་མ་འོ་ཤིང་མཁན་གྱི་བུ་མོ་ས་ག་ནི་ཤིན་ཏུ་མཁས་སོ། །ས་ག་བློ་དང་ལྡན་ནོ་ཞེས་ཡུལ་ཐམས་ཅད་དུ་སྒྲ་གྲགས་པར་གྱུར་ཏོ། །དེ་ནས་བྱང་ཕྱོགས་ཀྱི་ཚོང་པ་ཞིག་གིས་རྒོད་མ་གཉིས་ཤིག་རྒྱལ་པོ་ལ་སྐྱེས་སུ་ཕུལ་ཏེ། ལྷ་རྒོད་མ་འདི་དག་སྨད་ལགས་ན། མ་འམ་བུ་གང་ལགས་
པ་ནི་གཞན་གྱིས་མ་འཚལ་ཏོ། །དེ་ལ་ཡང་རྒྱལ་པོ་འཁོར་དང་བཅས་པ་དེ་དག་སྐྱོ་བར་གྱུར་ནས་དེ་ཁོ་ན་བཞིན་དུ་ཤིང་མཁན་གྱི་བུ་མོ་ས་ག་ལ། སྨན་ཆེན་པོས་སྨྲས་པ་དང་། རྗེའི་སྲས་གང་གི་སྤུ་གཤོར་བ་དེ་ནི་མའོ། །གང་གི་སྤུ་འཇམ་པ་ནི་བུའོ། །ཕྱི་དེ་ཉིན་དེ་བཞིན་དུ་སྨན་ཆེན་པོས་

སྨྲས་ནས། ལྷ་ས་གའི་ཐབས་ལགས་སོ་ཞེས་སྨྲས་པ་དང་། དེ་ལ་ཡང་རྒྱལ་པོ་ཡ་མཚན་སྐྱེས་སོ། །དུས་གཞན་ཞིག་ན་སྦྲུལ་ཁས་སྡིགས་པ་ཞིག་གིས་སྦྲུལ་གཉིས་ཁྱེར་ཏེ་འོངས་ནས་དེ་ལ་གཅིག་ནི་ཕོ། ཅིག་ཤོས་ནི་མོ་ལགས་ན་གང་ཕོ་གང་མོ་ལགས་
པ་ནི་མ་འཚལ་ཏོ། །དེ་ནས་རྒྱལ་པོ་དང་། བློན་པོ་དང་། མདུན་ན་འདོན་རྣམས་སྐྱོ་ནས་དེ་ཁོ་ན་བཞིན་དུ་སྨན་ཆེན་པོས་ས་ག་ལ་དྲིས་ཤིང་། གང་ཞིག་ཕོ་འམ་མོ་ཡིན་པར་མ་ཤེས་པ་ཡང་རྒྱས་པར་སྨྲས་པ་དང་། དེ་ནས་ས་གས་ཅུང་ཞིག་བགད་དེ་སྨྲས་པ། གང་དག་དོན་འདི་
ལྟ་བུ་མི་རྟོགས་པ་དེ་ལྟ་བུ་ཁྱོད་ཀྱང་བློན་པོའམ། ཡོང་རྒྱལ་པོ་གོ་བློན་པོ་རྟོག་པ་དང་། སེལ་བ་ཕུན་སུམ་ཚོགས་པ་དེ་ལྟ་བུ་དྲུག་གིས་བརྒྱན་པ་ལྟ་ཞིག་དྲི་ཡིས་ཅི་ཁྱོད་ཀྱིས་ཤེས་སམ། སྨྲས་པ། ཧ་ཅང་མོད་འོད་མའི་རྩེ་མོའམ། སྨིག་མའི་རྩེ་མོ་ལ་རས་བལ་གྱི་འདབ་
མའམ། བལ་གྱིས་དཀྲིས་ཏེ་གཉི་གའི་རྒྱབ་ཏུ་རེག་པར་བགྱིས་པ་དང་། དེ་དག་ལས་གང་རེག་ཏུ་མི་བཟོད་པ་དེ་ནི་ཕོ་ལགས་སོ། །ཕྱི་དེ་ཉིན་དེ་བཞིན་དུ་བྱས་པ་ལས་རྒྱལ་པོ་མགུ་བར་གྱུར་ཏོ། །དེ་ནས་དུས་གཞན་ཞིག་ན་ལྷོ་ཕྱོགས་ནས་ཚོང་པ་དག་ཅིག་ཙན་དན་གྱི་སྡོང་པོ་ཞིག་ཁྱེར་
ཏེ་འོངས་པ་དེའི་མགོ་མཇུག་མ་ཤེས་ཏེ། དེ་ནས་དེ་ཁོ་ན་བཞིན་དུ་ཆུང་མ་ལ་དྲིས་པ་དང་། རྗེའི་སྲས་རྫིང་བུའི་ནང་དུ་བོར་དང་། རྩ་བ་གང་ལགས་པ་དེ་འོག་ཏུ་འབྱིང་ངོ་། །དེ་ཡང་རྒྱལ་པོ་སྐྱེད་པ་དང་། གཞན་ཡང་སྐྱེ་བོའི་ཚོགས་དག་གིས་ཐོས་ནས་ཡ་མཚན་སྐྱེས་སོ། །རྒྱལ་པོ་
སྐྱེད་པའི་བློ་སྐྱེས་པ་ངའི་བློན་པོ་དག་གི་ནང་ན་ནོར་བུ་རིན་པོ་ཆེ་རྟོག་སུ་མཁས་ཤེས་པར་བྱའོ་སྙམ་ནས། དེས་ཁང་པ་རྩེག་མའི་སྟེང་དུ་རྒྱལ་མཚན་གྱི་རྩེ་མོ་ལ་རིན་པོ་ཆེ་བཏགས་སོ། །དེའི་འོག་ན་རྫིང་བུ་ཞིག་ཡོད་དོ། །རྒྱལ་པོས་ཀྱང་སུས་ནོར་བུ་རིན་པོ་ཆེ་འདི་ཤེས་པ་འདི་ལ་སྦྱིན་པར་
དམ་པ་བསྟབས་སོ། །རྫིང་བུ་དེར་ཞུགས་ནས་འོད་དེ་བླང་བ་ལ་ཞུགས་ན་བླང་ཡང་མ་ནུས་སོ། །དེ་ནས་ཤིང་མཁན་གྱི་བུ་མོ་ས་ག་ལ་སྨྲས་པ་དང་། རྗེའི་སྲས་སྟེང་དུ་གཟིགས་ཤིག་དང་། དེ་རྒྱལ་མཚན་གྱི་རྩེ་མོ་ལ་བཏགས་པ་དེའི་མཐུས་གཟུགས་བརྙན་གདའ་མོད་ཀྱི་ནང་དུ་བཞུད་

དེ་རྒྱལ་མཚན་གྱི་རྩེ་མོ་ལས་བླང་བར་བགྱིའོ། །དེས་ཕྱི་དེ་ཉིན་དེ་བཞིན་དུ་བྱས་པ་དང་། རྒྱལ་པོས་སྨྲས་པ། འདི་སུའི་ཐབས། དེས་ས་གའི་ཐབས་ལགས་སོ་ཞེས་སྨྲས་པ་དང་། མགུ་ནས་རྣམ་པ་ཐམས་ཅད་དུ་ཤིན་ཏུ་མཁས་སོ་ཞེས་བསྟོད་དོ། །དེ་ནས་ས་ག་ཤིན་ཏུ་གཟུགས་
དང་ལྡན་པར་བློན་པོ་དྲུག་གིས་ཤེས་ཏེ། དེ་བདག་ཅག་གིས་ནོར་བུ་དང་། དངུལ་དང་། དབྱིག་དང་། གསེར་དང་། ཨན་ད་རྙིལ་དང་། པད་མ་རཱ་ག་དང་། རྡོའི་སྙིང་པོ་ལ་སོགས་པས་བྲིད་ལ་ལྷན་ཅིག་ཕྲད་པར་བྱའོ་སྙམ་པ་ལས་མ་ཟུག་གོ། །དེ་དག་རྒྱུན་དུ་སྨྲ་བ་དང་།
དེས་སྨན་ཆེན་པོ་ལ་སྨྲས་པ། ཁྱོད་ཀྱིས་ཡུལ་ཆོས་ཀོ་བུད་མེད་གང་སུ་ཡང་རུང་གཞོན་ཞིང་གཟུགས་བཟང་བ་དེ་གཞན་གྱི་སྐྱེས་པས་སླུ་བ་དེ་ལྟ་བུ་ཞིག་ལྟ། དེས་སྨྲས་པ། འདི་ནི་ཐམས་ཅད་ཀྱི་ཆོས་ཏེ། སྐྱེས་པ་རྣམས་ནི་བུད་མེད་ཐམས་ཅད་ལ་དོན་དུ་གཉེར་མོད་ཀྱི་བུད་མེད་ཉིད་
ཀྱིས་ཤེས་པར་བྱས་ཏེ། གལ་ཏེ་བུད་མེད་མཛངས་ན་དེ་བྱེད་དུ་མི་བཏུབ་པོ། །དེ་ནས་ས་གས་སྨྲས་པ། རྗེའི་སྲས་གལ་ཏེ་དེ་ལྟ་བུ་ལ་ཅོ་དྲི་བའམ། གནོད་པ་ཞིག་བགྱིས་ན་དེ་ལ་ཉེན་དུ་མི་འགྱུར་གྲང་། སྨན་ཆེན་པོས་སྨྲས་པ། བག་རྟོན་ལ་བྱོས་ཤིག །དེ་ནས་དེས་ཁྱེད་ཀྱིས་
ནའོ་ཞེས་སྒྱུ་མཛོད་ཅིག་དང་། དེ་ནས་མཐོ་བཙམ་པར་བགྱིའོ། །དེ་མིན་པར་སྒྱུ་བྱས་ཏེ་འདུག་པ་དང་། དེས་ཀྱང་དེ་དག་གི་ཕོ་ཉ་གང་དག་ཡིན་པ་དེ་དག་ལས་བཟླུགས་པ་འདི་མི་བདེ་མོད་ཀྱི། ཇི་ལྟར་བཀའ་སྩལ་པ་དེ་བཞིན་དུ་རིམ་གྲོ་འཚལ་ལོ་ཞེས་འདི་སྐད་དུ་སོ་སོར་སྤྲིང་ངོ་། །དེས་ཀྱང་
ཤིང་ལས་སྨན་ཆེན་པོའི་གཟུགས་བརྙན་བྱས་ནས་དེ་གོས་ཀྱིས་གཡོགས་ཏེ་མལ་དུ་བསྙལ་ལོ། །དེ་དག་སོ་སོ་ལ་ཡང་སྨྲས་པ། སྨན་ཆེན་པོ་འདི་ནི་ཉམ་ཆུང་སྟེ། ཆེ་གེ་མོ་ཞིག་དང་། ཆེ་གེ་མོ་ཞིག་གི་དུས་སུ་གཞན་གྱིས་མ་འཚལ་བར་སྤྱོན་ཅིག་ཅེས་བྱས་ནས་སྒྲོམ་ཆེན་པོ་
དྲུག་བྱས་ཏེ་རང་གི་ཁང་པ་དྲུག་ཏུ་བཅུག་གོ། །དེ་ནས་དེ་དག་འོངས་པ་དང་སྒྲོམ་དུ་བཅུག་སྟེ་བཅིངས་ནས་ཕྱི་དེ་ཉིན་སྨན་ཆེན་པོ་ཤིའོ་ཞེས་སྒྲ་ཡང་བཏང་ངོ་། །དེ་ནས་རྒྱལ་པོའི་བཙུན་མོའི་འཁོར་དང་བཅས་པ་དང་། གཞན་ཡང་སྐྱེ་བོའི་ཚོགས་དག་གིས་ཐོས་ནས་མྱ་ངན་ཆེན་

པོ་དང་ལྡན་ཏེ། བདག་ཅག་སེམས་ཅན་འདི་ལྟ་བུ་དང་བྲལ་བར་གྱུར་ཏོ་ཞེས་རབ་ཏུ་སེམས་ཤིང་མྱ་ངན་གྱི་རྒྱ་མཚོར་ཞུགས་ནས་སྙིང་རྗེ་རྗེ་སྐད་དུ་སྨྲའོ། །ཤིང་མཁན་གྱི་བུ་མོ་ས་ག་དེས་ཀྱང་བློན་པོ་སྒྲོམ་དུ་བཅུག་པ་དེ་དྲུག་ལེགས་པར་བསྡམས་ནས་རྒྱལ་པོ་སྐྱེད་པའི་དྲུང་
དུ་ཁྱེར་ཏེ་ལྷ་སྨན་ཆེན་པོ་ནི་དུས་ལས་འདས་ཏེ། དེའི་ནོར་གང་ལགས་པ་དབྱིག་དང་། གསེར་དང་། དར་དང་། རིན་པོ་ཆེ་ལ་སོགས་པ་དེ་དག་དེ་ཉིད་ཀྱི་རྒྱས་བཏབ་པ་འདི་དག་ལགས་སོ། །དེ་ནས་རྒྱལ་པོས། དེ་ནི་དེ་རིང་ཤི་ནས་དེང་ཉིད་ང་ལ་འདི་ཕུལ་ལོ་ཞེས་ཤིན་ཏུ་མྱ་ངན་གྱིས་གདུངས་
སོ། །དེའི་སྐབས་སུ་སྨན་ཆེན་པོ་ཉིད་གནས་གཞན་ཞིག་ནས་མེ་ཏོག་གིས་བརྒྱན་ཏེ་དགོད་ཅིང་རྒྱལ་པོའི་ཕོ་བྲང་དུ་ཕྱིན་ནས་རྒྱལ་པོ་ལ་ཕྱག་བྱས་ཏེ་སྨྲས་པ། ལྷས་བདག་གདུགས་འགའ་ཡང་བྱམས་པས་མ་བཟུང་སྟེ། དེང་ཉིད་སྡུམ་པ་རྒྱལ་པོས་བཞེས་ལགས་སམ།
རྒྱལ་པོས་སྨྲས་པ། ངས་མ་བླངས་ཏེ། ཁྱོད་ཉིད་ཀྱི་ཁྱིམ་ནས་ཁྱེར་ཏེ་འོངས་སོ། །ཡང་སྨྲས་པ། རྒྱལ་པོ་ཆེན་པོ་སྨན་ཆེན་ནི། །འདི་ནས་འཇིག་རྟེན་ཕ་རོལ་མཆིས། །དེ་ཡི་རིན་ཆེན་འདི་རྣམས་ལགས། །དེ་དག་མི་དབང་བཞེས་སུ་གསོལ། །རྒྱལ་ཆེན་བདག་ནི་
ཡུགས་ས་སྟེ། །ཁྱིམ་ཐབ་དང་ནི་བྲལ་བས་ན། །བདག་ལས་བརྙས་པ་བགྱིས་ནས་ལགས། །བདག་ལས་ནོར་ནི་ཕྲོགས་སུ་མཆི། །དེ་ནས་སྨན་ཆེན་པོས་བློན་པོའི་མཆོག་རྣམས་ཀྱི་བློའི་དཔྱོད་པའི་ལེགས་པ་ཡང་བསྟན་ཏོ། །རྒྱལ་པོ་སྐྱེད་པས་ཀྱང་བལྟས་ན་སྐྲ་དང་ཁ་སྤུ་
བྲེགས། རྐང་ལག་བཞི་བསྐུམས་པའི་བློན་པོ་དྲུག་མཐོང་ནས། བགད་དེ་སྨན་ཆེན་པོ་ལ་སྨྲས་པ། སྨན་ཆེན་པོ་ཐབས་འདི་སུའི་ཡིན་སྨྲོས་ཤིག །དེས་ས་གའིའོ་ཞེས་ཐམས་ཅད་རྒྱས་པར་སྨྲས་སོ། །དེ་ནས་རྒྱལ་པོས་བསམས་པ། ཀྱེ་མ་བུད་མེད་ཀྱི་བློ་གྲོས། ཀྱེ་མ་
བརྟན་པ། ཀྱེ་མ་བློའི་དཔྱོད་པ། དེས་བློན་པོའི་མཆོག་འདི་དག་འདི་ལྟར་ཅོ་དྲིས་སོ་ཞེས་མགུ་ནས་དེ་བཀུར་བ་ཆེར་བྱས་སོ། །ཡུལ་ཐམས་ཅད་དུ་ཡང་ཤིང་མཁན་གྱི་བུ་མོ་ས་ག་ནི་དེ་ལྟར་བློ་དང་ལྡན་ནོ་ཞེས་སྙན་པ་གྲགས་སོ།། །།སྡོམ་ནི། ང་ཡང་སྨན་གྱིས་དེ་བཞིན་ནོ། །ཁྱི་དང་

ཕྱུགས་ལ་བཟས་བསོད་སྦྱིན། །དམ་བཅའ་རྡོ་བ་རོལ་མོ་རྣམས། །ཨུ་དུམ་བཱ་ར་སྒྱུར་མོར་འདྲ། །སེ་མོ་དོ་ཡང་སྟོར་བ་སྟེ། །ནེ་ཙོ་གསང་ཡང་བསྙད་པའོ། །བར་མདོ་གཉིས་པའི་ཚིགས་བཅད་དོ། །དེ་ནས་རྒྱལ་པོས་ས་ག་མཁས་ཤིང་མཛངས་པར་ཤེས་ནས་སྨན་ཆེན་པོ་
བསོད་ནམས་དང་ལྡན་པས་ནི་འདི་ལྟ་བུའི་ཆུང་མ་བློ་དང་ལྡན་པ་རྙེད་དོ་སྙམ་མོ། །དེ་ནས་རྒྱལ་པོས་སྨན་ཆེན་པོ་ལ་སྨྲས་པ། གལ་ཏེ་ཁྱོད་དགའ་བར་ལྟ་ན་ང་ལ་ཡང་ཆུང་མ་འདི་ལྟར་བློ་དང་ལྡན་པ་ཞིག་བཙལ་ཏེ་བླངས་ན་ཁྱིམ་གྱི་སྲིད་དང་། གཞན་ཡང་ཕྱི་རོལ་རྒྱལ་པོའི་ཕོ་བྲང་གི་དོན་
འདི་ལ་བདེ་བར་གནས་སོ། །སྨན་ཆེན་པོས་སྨྲས་པ། གང་ནས་བཙལ་བར་བགྱི། གང་གི་ཕྱིར་རྒྱལ་པོ་སྐྱེད་པས་སྨྲས་པ། ལྔ་ལེན་གྱི་རྒྱལ་པོའི་བུ་མོ་སྨན་ལྡན་ཞེས་བྱ་བ་གཟུགས་བཟང་ཞིང་མཛེས་པ། གཞན་ཡང་དྲན་པ་དང་ཤེས་བཞིན་ཅན་འདི་ལྟར་ས་ག་ཅི་འདྲ་བའི་བློ་དང་
ལྡན་པ་ཞིག་ཡོད་ཅེས་ཐོས་པ་དེ་ཆུང་མར་ལོང་ཤིག །དེ་ནས་སྨན་ཆེན་པོས་སྨྲས་པ། ལྷ་འདི་ལ་ཐབས་ཞིག་བགྱི་ན་དེ་ཡང་ལྷའི་མཚམས་ལས་གཞན་པ་དགྲ་ལྟ་བུར་མཆིས་པ་སྟེ། དེ་ལ་སྔར་ཐབས་བཙལ་བར་བགྱིའོ། །དེ་ནས་རྒྱལ་པོ་སྐྱེད་པས་བློན་པོ་མདུན་ན་འདོན་དག་བཏང་
སྟེ། དེ་དག་སློང་བ་ལ་ཞུགས་སོ། །དེ་ནས་ལྔ་ལེན་གྱི་རྒྱལ་པོས་བློན་པོ་རྣམས་བསྡུས་ཏེ། ཇི་ལྟར་བྱ་ཞེས་དྲིས་པ་དང་། དེ་དག་གིས་སྨྲས་པ། རྒྱལ་པོ་སྐྱེད་པ་འདི་སྔན་ཆད་ལྷའི་བཀའ་མི་ཉན་ཏེ་དོན་འདིས་འོ་སྐོལ་གྱི་དབང་དུ་འགྱུར་བ་ནི་དེ་དག་མཆིས་ནས་ཇི་ལྟར་བགྱི་བ་གདོད་
མཛད་ཀྱིས་རེ་ཞིག་སྩོལ་ཅིག་དེས་བྱིན་ནས་ཆེ་གེ་མོ་ཞིག་ན་ཟླ་བ་ཕྱེད་ཀྱི་ཉིན་པར་ཡུད་ཙམ་པ་དག་དང་སྦྱར་ཏེ། བག་མ་ལེན་དུ་ཤོག་ཤིག་ཅེས་བྱས་ནས་ཕྱིར་སོང་སྟེ། རྒྱལ་པོ་སྐྱེད་པ་ལ་བུ་མོ་སྨན་ལྡན་ནི་ཐོབ་པོ་ཞེས་ཤེས་པར་བྱས་སོ། །ཇི་ལྟར་ནམ་བླང་བར་བྱ། དེ་དག་གིས་ཚེས་
གྲངས་ཆེ་གེ་མོ་ཞིག་དང་། ཡུད་ཙམ་པ་དང་སྦྱོར་ལ་ཤོག་ཤིག་ཅེས་མཆིའོ། །དུས་དེའི་འོག་ཏུ་ལྔ་ལེན་གྱི་རྒྱལ་པོས་དེས་བག་མ་གཏང་བའི་དོན་དུ་བརྩམས་པ་ནི་བཟའ་བ་དང་བཏུང་བ་དག་སྟ་གོན་བྱས་ཏེ། བཟའ་བ་དང་བཏུང་བའི་རྣམ་པ་ཐམས་ཅད་དུག་དང་བསྲེ་བ་བྱས་ནས་ལྔ་

ལེན་གྱི་རྒྱལ་པོས་བསྡོགས་པ་འདི་ལས་མ་འཕྱི་བར་ཤོག་ཤིག་ཅེས་ཕོ་ཉ་བཏང་ངོ་། །དེ་ནས་དེ་ཐོས་པ་དང་། སྨན་ཆེན་པོས་རྒྱལ་པོ་སྐྱེད་པ་ལ་སྨྲས་པ། ལྷ་རེ་ཞིག་འཕྲལ་དུ་བགྱིར་མི་རུང་སྟེ། དེ་ཅིའི་སླད་དུ་ཞེ་ན། དེ་ནི་གང་གི་ཕྱིར་ལྷའི་མཚམས་ལས་གཞན་
པའི་རྒྱལ་པོ་སྟེ། དེ་དང་རྟག་ཏུ་རྩོད་ཅིང་འདིས་རྒྱུན་དུ་མི་མཐུན་པ་ལྷན་ཅིག་ཏུ་བགྱིས་པས་བརྟག་པར་བགྱིའོ། །རྒྱལ་པོས་སྨྲས་པ། སུ་རྟོག་ཏུ་བཏང་། དེས་སྨྲས་པ། རྒྱལ་པོ་བདེ་བར་བཞུགས་ཤིག །བདག་ལ་ནེ་ཙོ་སྤྱོད་གསལ་ཞེས་བགྱི་བ་མཁས་པ། གསལ་བ།
ཡིད་གཞུངས་པ་དེ་དེར་བཏང་ལ་དེས་ཐམས་ཅད་ལ་གཏམ་བགྱིས་ནས་སླར་མཆི་བར་བགྱིའོ། །དེ་བཞིན་གྱིས་ཤིག །དེ་དེར་སོང་ནས་བསམས་པ། སུ་ལ་བཅར་ཏེ་གང་གིས་ན་ལྷན་ཅིག་འགྲོགས་ཤིང་གཏམ་བྱ། དེས་ཀུན་ཏུ་བལྟས་ན་ཅུང་ཟད་ཀྱང་མ་མཐོང་ངོ་། །འཇིག་རྟེན་གྱི་
ཐ་སྙད་གང་གིས་བྱ་བསམ་མོ། །ཇི་ཙམ་ན་རྒྱལ་པོའི་ཕོ་བྲང་དུ་ཞུགས་ཏེ་དེར་བལྟས་ན་གདུང་གི་བར་ན་རི་སྐེགས་ཞིག་འདུག་པ་མཐོང་སྟེ། དེ་དེར་སོང་ནས་ཀྱང་དེ་གཉིས་ཕན་ཚུན་གཅིག་ལ་གཅིག་དགའ་བས་ཡང་དག་པར་མགུ་བར་བྱས་ནས་གང་ནས་འོངས་ཞེས་དྲིས་སོ། །
ནེ་ཙོས་སྨྲས་པ། བྱང་ཕྱོགས་ཀྱི་རྒྱལ་པོ་ཤི་བི་ཞེས་བྱ་བ་དེ་ནས་ཁོ་བོ་འོངས་སོ། །ཁོ་བོ་སྐྱེད་མོས་ཚལ་སྲུང་སྟེ། དེ་ལ་ཁོ་བོའི་ཆུང་མ་དམ་པ་གཟུགས་བཟང་བ་མཛངས་ཤིང་རྗེས་སུ་མཐུན་པ་ཡིད་དུ་འོང་བ་སྨྲ་བ་རི་སྐེགས་མོ་ཞིག་ཡོད་པ་ལས་རི་སྐགས་དེ་ཡང་གཞན་
དུ་སོང་བ་ལས་ཁྲས་ཁྱེར་ཏེ། དེས་ན་ཁོ་བོ་མྱ་ངན་གྱིས་སེམས་གདུངས་ཤིང་ཕན་ཚུན་འཁྱམ་པ་ལས་ཁྱོད་ཀྱི་དྲུང་དུ་ཕྱིན་ནོ། །བཟང་མོ་ཁྱོད་ཁོ་བོའི་ཆུང་མར་མི་རུང་ངམ། དེས་སྨྲས་པ། ཇི་ལྟར་ན་ནེ་ཙོའི་ཆུང་མ་རི་སྐེགས་ཡིན་ཞེས་མ་ཐོས་མ་མཐོང་སྟེ། དེ་ལྟ་མོད་ཀྱི་ནེ་
ཙོའི་ཆུང་མ་ནི་ནེ་ཙོ་ཉིད་ཡིན་ནོ་ཞེས་ཐོས་སོ། །དེ་ནས་སྤྱོད་གསལ་གྱིས་གཞན་དག་ཕན་ཚུན་འོང་ཞིང་འགྲོ་བའི་རྣམ་གྲངས་ཀྱི་རྣམ་པས་ཉེ་བར་བསྙེན་ཏོ། །ཡང་སྨྲས་པ། བཟང་མོ་བདག་ནི་ཤི་བིའི་རྒྱལ། །སྐྱེད་མོས་སྲུང་བར་གྱུར་པ་སྟེ། །ཁོ་བོའི་ཆུང་མ་རི་སྐེགས་ནི། །འཇམ་

པའི་ཚིག་ཏུ་སྨྲར་གྱུར་པ། །བྱས་ནི་ནན་གྱིས་ཁྱེར་བས་ན། །བདག་ནི་དེ་ཡིས་གདུངས་པར་གྱུར། །ཁོ་བོ་འདོད་པས་གདུངས་ནས་ནི། །ཁྱོད་ཀྱི་གན་དུ་འོངས་པ་ཡིན། །རི་སྐེགས་ཀྱིས་སྨྲས་པ། ནེ་ཙོའི་ཆུང་མ་རི་སྐེགས་ནི། །མི་རིགས་པར་ནི་བདག་གིས་བསམས། །ནེ་ཙོའི་
ཆུང་མ་ནེ་ཙོ་བར། །འདི་སྐད་དུ་ནི་མཁས་པས་བསྒྲགས། །དེ་ནས་དེ་བཞིན་དུ་སྨྲས་ཤིང་བསམས་པ་བསྒྲུབས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་ནེ་ཙོ་སྤྱོད་གསལ་གྱིས་རྒྱལ་པོའི་ཕོ་བྲང་ན་བཟའ་བ་མང་པོ་སྦྲང་རྩིའི་
མཆོག་ཅེས་བྱ་བ་དང་། མྱ་ངན་མེད་སྒྱུར་དང་། ཕེའུ་ཏེའུ་དག་དོག་ལེར་འཚེད་པ་དང་། བུ་རམ་ལས་བྱས་པའི་ཁ་ཟས་མང་པོ་མཐོང་ནས་རི་སྐེགས་ལ་སྨྲས་པ། ཅིའི་ཕྱིར་འདི་དག་འཚེད། ཅི་སྟེ་བདག་ཅག་གིས་ཐོབ་བམ། དེ་ནས་རི་སྐེགས་ལ་ཚིགས་སུ་བཅད་དེ་སྨྲས་
པ། དོག་ལེར་མར་སར་མང་པོ་ནི། །འཚེད་པར་བྱེད་པ་འདི་རྣམས་དག །ཁ་ཅིག་བདག་ཅག་གིས་ཐོབ་བམ། །རི་སྐེགས་ཀྱིས་ནི་འཇམ་པོར་སྨྲོས། །རི་སྐེགས་ཀྱིས་སྨྲས་པ། དོག་ལེར་བཅའ་བ་ཁུར་བ་དག །འཚེད་པར་བྱེད་པ་འདི་དག་ཀྱང་། །ནེ་ཙོ་མཁས་པ་
སྤྱོད་གསལ་བ། །འདི་རྣམས་ཁྱོད་ཀྱི་བཟའ་བ་མིན། །འདི་དག་སྐྱེད་པའི་ཆེད་དུ་ནི། །དུག་གིས་ཐམས་ཅད་བསྲེས་པ་ཡིན། །དེ་ནས་སྤྱོད་གསལ་གྱིས་རིག་པ་སྔོན་དུ་བཏང་ནས་རི་སྐེགས་ལ་ཐབས་ཀྱིས་ཡང་སྨྲས་པ། ལྔ་ལེན་རང་གི་བུ་མོ་བ། །སྐྱེད་པ་ལ་ནི་བྱིན་ནོ་ཞེས། །
དེ་ལྟ་བུ་ཡང་སྒྲ་དག་གིས། །ཕྱོགས་ཀུན་དུ་ནི་རྒྱས་གྱུར་ན། །དེ་ལ་སུ་ཡི་ཚིག་བདེན་ཞིང་། །གང་གི་ཚིག་དེ་དེ་བཞིན་ཡིན། །རི་སྐེགས་ཀྱིས་སྨྲས་པ། ནེ་ཙོ་མཁས་པ་སྤྱོད་གསལ་བ། །གཏུམ་པོ་དེས་ནི་མི་བྱིན་ཏེ། །བློ་གྲོས་ངན་པ་ཉིད་དག་གིས། །དེ་ལ་གསད་པ་དག་ཏུ་
བརྩོན། །དེ་དག་ཐོས་ནས་སླར་ལོག་སྟེ་ནེ་ཙོ་སྤྱོད་གསལ་གྱིས་མཐོང་ཞིང་ཐོས་ནས་རྟོགས་ཤིང་ཤེས་པ་ནི་ཚོང་པས་དོན་གྱི་རྙེད་པ་ཐོབ་པ་ཡོངས་སུ་གྲུབ་པ་བཞིན་ནོ། །རི་སྐེགས་ལ་ཤི་བིའི་ཕྱིར་སྨྲས་པ། བདག་གིས་ཆུང་མ་འདྲ་རྙེད་པ། །རི་སྐེགས་འཇམ་པར་སྨྲ་བ་ནི། །ཤི་

བིའི་རྒྱལ་པོས་མཁྱེན་བྱའི་ཕྱིར། །བཟང་མོ་བདག་ནི་འགྲོ་བར་བྱ། །རི་སྐེགས་ཀྱིས་སྨྲས་པ། གལ་ཏེ་རྗེ་ཡི་སྲས་གཤེགས་ན། །ཤི་བིའི་རྒྱལ་པོ་མཁྱེན་གསོལ་ནས། །དགུང་བདུན་དག་ལས་གཞན་དུ་ནི། །ཡུན་མི་རིང་བར་མཁྱེན་པར་མཛོད།
བདག་གི་རིགས་དང་རུས་དག་དང་། །ལོངས་སྤྱོད་ཀྱང་ནི་འདི་འདྲ་བར། །ཤི་བིའི་རྒྱལ་པོས་མཁྱེན་པར་མཛོད། །བདག་ཀྱང་སླད་རྗེས་ཁྱེད་མ་དགུམ། །དེ་སོང་ནས་ཕྱིན་པ་དང་། བློན་པོ་སྨན་ཆེན་པོ་ལ་རྒྱ་ཆེར་ཐམས་ཅད་སྨྲས་སོ། །དེ་ནས་སྨན་ཆེན་པོས་རྒྱལ་པོ་སྐྱེད་པ་
ལ་མཁྱེན་པར་བྱས་སོ། །དེ་ནས་ལྔ་ལེན་གྱི་རྒྱལ་པོས་ཀྱང་མི་འོང་བར་རྟོགས་ནས་དཔུང་གི་ཚོགས་ཡན་ལག་བཞི་གོ་བསྐོན་ནས་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་དག་རྒྱལ་པོ་སྐྱེད་པའི་དྲུང་དུ་ཕྱིན་ནས་རྒྱལ་པོ་སྐྱེད་
པའི་ཕོ་བྲང་བསྐོར་བར་བྱས་པ་དང་། དེ་ནས་བློན་པོའི་མཆོག་སྨན་ཆེན་པོས་བསམས་པ་འདིས་ལྷན་ཅིག་ཐབ་མོ་འགྱེད་པར་ཡང་མི་ནུས་ན་ཇི་ལྟར་བྱ་དབྱེན་ཞིག་བྱ་སྙམ་མོ། །དེས་ལྔ་ལེན་གྱི་རྒྱལ་པོའི་བློན་པོ་ལྔ་བརྒྱ་ལ་རྣམ་པ་སྣ་ཚོགས་ཀྱི་སྐྱེས་བསྐུར་ཏེ་དབྱེན་བྱས་སོ། །དབྱེན་
བྱས་ནས་རྒྱལ་པོ་སྐྱེད་པས་ལྔ་ལེན་གྱི་རྒྱལ་པོ་ལ་ཕོ་ཉ་བཏང་སྟེ། ཁོ་བོ་ཁྱོད་ལ་རྒོལ་བ་མི་ནུས་པ་མ་ཡིན་མོད་ཀྱི་ཁོ་བོ་དང་ཁྱོད་གཉེན་ཏེ། ཁྱོད་ཉིད་གྱོས་པོ་ཡིན་པས་མི་རྒལ་ལོ། །འོན་ཀྱང་ཁྱོད་ངའི་ལག་ཏུ་འཚོའམ་གཤིན་པ་ནི་ཤིན་ཏུ་རིག་པར་གྱིས་ཤིག །ངེད་ཀྱིས་ནུས་
པར་གྱུར་ཀྱང་ཁྱོད་ལ་མི་རྒལ་ཏེ། གལ་ཏེ་ཡང་ཁྱོད་ཐེ་ཚོམ་དུ་གྱུར་ན་སྐྱེས་འདི་དང་འདི་དག་ནི་བློན་པོ་ཆེ་གེ་མོ་རྣམས་ལ་བསྐུར་བར་བརྟག་པར་བྱའོ་ཞེས་དེས་སྤྲིང་བ་ལས་སྐྱེས་དང་བཅས་སུ་བཟུང་ངོ་། །དེ་ནས་ལྔ་ལེན་གྱི་རྒྱལ་པོ་དེ་ཉིད་ཀྱི་ནུབ་མོ་ཆས་ནས་རང་གི་ཁྱིམ་དུ་སོང་སྟེ་ཕྱིན་པ་དང་།
བློན་པོ་ལྔ་བརྒྱ་དེ་དག་བསད་དེ། དེ་དག་གི་བུ་རྣམས་ཀྱང་བློན་པོར་བཅུག་པ་བདེན་ནོ་ཞེས་སྨྲས་པ་འདིས་རྒྱལ་པོ་སྐྱེད་པ་དང་ལྷན་ཅིག་པ་དག་དགའ་བ་སྐྱེས་པར་གྱུར་ཏོ། །སྨན་ཆེན་པོས་ཀྱང་དེ་དག་བསད་པར་ཐོས་ནས་བདག་གིས་དེ་ལྟ་བུ་དག་བྱས་སོ་སྙམ་སྟེ་དགའ་བར་གྱུར་ཏོ། །

དེ་དག་ཀྱང་བསད་ནས་རྒྱལ་པོ་ལ་སྨན་ཆེན་པོས་གསོལ་པ། འདི་ལྟར་བདག་ཉིད་དངོས་དེར་མཆིས་ལ་ཐོབ་བམ་མི་ཐོབ་བརྟག་པར་བགྱིའོ། །ཞེས་སྨྲས་སོ། །གང་གི་ཕྱིར་དེ་དེར་བདག་ཉིད་ཀྱི་དཔུང་དང་བཅས་ནས་ལྔ་ལེན་གྱི་རྒྱལ་པོའི་ཡུལ་དུ་སོང་བ་དང་། ལྔ་ལེན་གྱི་རྒྱལ་པོས་
གྲོང་ཁྱེར་གྱི་ནང་དུ་ཤོག་ཤིག་ཅེས་སྨྲས་སོ། །དེས་སྨྲས་པ། སྐྱེད་མོས་ཚལ་འདི་ཉིད་དུ་མཆིས་སོ། །ཇི་སྟེ་ཡང་བདག་ངེས་པར་ནང་དུ་མཆི་ན། བློན་པོ་ཆེ་གེ་མོ་ཞིག་གི་ཁྱིམ་དུ་མཆི་བར་འཚལ་ལོ། །དེ་ནས་ལྔ་ལེན་གྱི་རྒྱལ་པོ་བག་ཚ་སྟེ། ཅིའི་ཕྱིར་འདི་འདི་སྐད་དུ་སྨྲ།
རེ་ཞིག་གཞན་ཡང་བདག་དང་བློན་པོ་དག་དབྱེན་བྱེད་དོ་སྙམ་སྟེ། དེ་ལྟར་དགའ་ན་དེ་ཉིད་དུ་འདུག་ཤིག་ཅེས་སྤྲིང་ངོ་། །དེའི་བློན་པོ་རྣམས་ཀྱིས་འདི་ལ་བགྲོས་པ། བདག་ཅག་གི་ཕ་ཆུད་གསན་པར་བྱས་པ་དེ་ཐམས་ཅད་ནི་སྨན་ཆེན་པོ་འདི་ཡིན་པས་བདག་ཅག་གིས་སྔོན་གྱི་ཤ་ཁོན་
རྗེས་སུ་དྲན་པར་བྱས་ཏེ། རྒྱལ་པོ་ལ་དེ་བཞིན་དུ་གལ་གྱིས་བཅུས་ལ་དེ་ལྟར་འདི་ཕྱིར་མི་འགྲོ་བར་བྱའོ་ཞེས་འདུས་ནས་རྒྱལ་པོ་ལ་དེ་དག་གིས་སྨྲས་པ། རྒྱལ་པོ་སྐྱེད་པ་གང་ལ་བློའི་དཔྱོད་ཚུལ་འདི་ལྟ་བུ་དེ་ནི་སྨན་ཆེན་དེའི་ལགས་སོ། །དེ་ལ་རྒྱལ་པོ་སྐྱེད་པ་ནི་ཕ་རོལ་
ལ་གནོད་པ་བགྱིད་མི་ནུས་ཏེ། དེ་ལྟར་ན་དེ་འདི་ཉིད་ན་མཆིས་པའི་ཚེ་བདག་ཅག་གིས་གཞན་ནས་རྒྱལ་པོ་སྐྱེད་པའི་དྲུང་དུ་མཆིའོ། །དེས་སྨྲས་པ། ལེགས་པར་སྨྲས་སོ། །དེ་ནས་དཔུང་གི་ཚོགས་ཡན་ལག་བཞི་པ་གོ་བསྐོན་ཏེ། གླང་པོ་ཆེའི་ཚོགས་དང་། རྟ་པའི་
ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་དག་རྒྱལ་པོའི་ཕོ་བྲང་གང་ན་བ་དེར་སོང་ངོ་། །རྒྱལ་པོ་སྐྱེད་པ་འདིས་ཀྱང་སྟ་གོན་བྱས་སོ། །སྨན་ཆེན་པོས་ཀྱང་ལྔ་ལེན་གྱི་རྒྱལ་པོ་ལམ་ཆེ་གེ་མོ་ཞིག་ནས་རྒྱལ་པོ་སྐྱེད་པའི་ཡུལ་དུ་སོང་བར་ཤེས་སོ། །དེས་ཀྱང་
དེར་ཅུང་ཟད་ཞིག་འདུག་ནས་ཕྱོགས་ཆེ་གེ་མོ་ཞིག་ན་རྒྱལ་པོའི་མཛོད་ཡོད་དེ། མཛོད་དེ་ན་རྒྱལ་པོའི་བུ་མོ་སྨན་ལྡན་མ་ཞེས་བྱ་བ་འདུག་པར་ཤེས་སོ། །དེ་ནས་དེས་ནང་འཁོར་མ་ཞིག་ཁྲིད་དེ་འཁོར་བཞག་ནས་ཇི་ཙམ་ན་རྒྱལ་པོའི་མཛོད་དུ་ཞུགས་ཏེ་མཛོད་ཕྱེ་ནས་བུ་མོ་དང་། འབྱོར་

བ་དབྱིག་དང་གསེར་དག་བླངས་ནས་དཔུང་གི་ཚོགས་ཡན་ལག་བཞི་གོ་བསྐོན་ཏེ་ལམ་གཞན་ཞིག་ནས་རྒྱལ་པོ་སྐྱེད་པའི་དྲུང་དུ་སོང་ངོ་། །དེ་ནས་རྒྱལ་པོ་སྐྱེད་པ་དང་། བློན་པོ་དང་། གྲོང་མི་རྣམས་དང་། གཞན་དག་ཀྱང་ལས་ཆེན་པོས་བསྒྲུབས་སོ་ཞེས་རབ་ཏུ་
དགའ་སྟེ་རྗེད་ཅིང་རི་མོར་བྱ་བ་མང་པོ་དག་བྱས་སོ། །ལྔ་ལེན་གྱི་རྒྱལ་པོའི་བློན་པོ་མཆོག་ཀྱང་འོངས་ན་སྨན་ཆེན་པོས་བུ་མོ་དང་མཛོད་ཁྱེར་བ་དང་། རྒྱལ་པོའི་ཕོ་བྲང་དེ་དག་གིས་སྤངས་ཏེ་རང་གི་ཡུལ་དུ་སོང་ངོ་། །རྒྱལ་པོ་སྐྱེད་པས་ཀྱང་གང་གི་ཕྱིར་བཀྲ་ཤིས་ཀྱི་རྣམ་པ་དག་
གིས་བུ་མོ་བག་མར་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་ལྔ་ལེན་གྱི་རྒྱལ་པོས་བུ་མོ་སྨན་ལྡན་ལ་ཕོ་ཉ་ཞིག་བཏང་ནས་འདི་ལྟ་བུ་སུའི་ཐབས་སུས་བརྟགས། སུས་དབྱེན་བྱས་པ་དག་གི་དོན་ཤེས་པར་གྱིས་ལ་རྟོགས་
ལ་སྤྲིངས་ཤིག །དེས་བརྟགས་ནས་ཕོ་ཉ་བཏང་བ་ལ་སྨན་ཆེན་པོ་འདི་ལ་ནེ་ཙོ་སྤྱོད་གསལ་ཞེས་བྱ་བ་མིའི་སྐད་དུ་སྨྲ་བ་དེས་འདི་ལྟར་བརྟགས་སོ། །དེ་ནས་ལྔ་ལེན་གྱི་རྒྱལ་པོས་སྨྲས་པ། ནེ་ཙོ་སྤྱོད་གསལ་ཅི་ནས་ཀྱང་སླར་ཐོང་ཤིག །དེ་ནས་དེས་རབ་ཏུ་འབད་པས་རྙིས་བཟུང་སྟེ་
དེ་ལ་བསྐུར་རོ། །དེ་ནས་རྒྱལ་པོ་ཁྲོ་བས་དཀྲིས་པས་རྣམ་པ་མང་པོར་སྤྱོས་ཏེ་སོད་ཅིག་ཅེས་བསྒོའོ། །དེ་ནས་ནེ་ཙོ་སྤྱོད་གསལ་གྱིས་རྐང་པ་ལ་གཏུགས་ཏེ་རྒྱལ་པོ་ལ་གསོལ་པ། ལྷ་བདག་གི་ཕ་དང་མེས་པོ་ཇི་ལྟར་བཀུམ་པ་དེ་བཞིན་དུ་དགུམ་པར་ཅི་གནང་། གལ་ཏེ་དེ་ལྟ་ན་དེ་
བཞིན་དུ་འདི་གསད་པར་གྱིས་ཤིག་ཅེས་ནས་གནང་ངོ་། །ཇི་ལྟ་བུ་ཉིད་དུ་ཕ་དང་མེས་པོ་བསད་ཅེས་དེས་དེ་ལ་དྲིས་པ་དང་། རས་བལ་གྱིས་མཇུག་མ་དཀྲིས་ཏེ་ཡུངས་མར་གྱིས་བསྐུས་ནས་བསྲེགས་ཏེ་གཏང་བ་དང་། དེ་ནམ་མཁའ་ལ་ཕུར་ཏེ་རྒྱལ་པོའི་ཕོ་བྲང་ཀུན་ནས་འབར་བར་བྱས་ཆུར་
ཞུགས་སོ། །དེ་ནས་རྒྱལ་པོ་སྐྱེད་པའི་དྲུང་དུ་སོང་བ་དང་། སྨན་ཆེན་པོས་ཀྱང་དྲིས་པ་ཁྱོད་ག་ལས་འདིར་ཕྱིན། དེས་ཇི་ལྟར་བྱས་པ་ཐམས་ཅད་ཤེས་པར་བྱས་པ་དང་། དེ་མགུ་བར་གྱུར་ཏོ། །ལྔ་ལེན་གྱི་རྒྱལ་པོ་ཁྲོ་བས་དཀྲིས་པས་ཡང་ཡི་གེ་བསྐུར་བ། དེས་རྣམ་པ་འདི་ལྟ་བུས་

གནོད་པ་བྱས་ཏེ་ངེས་པར་སླར་ཐོང་ཤིག །དེས་ཀྱང་བཟུང་སྟེ་བསྐུར་རོ། །ལྔ་ལེན་གྱི་རྒྱལ་པོ་ཁྲོས་པས་སྤུ་རིལ་ཕྱི་ནས་ཤའི་རི་ལུར་བཞག་སྟེ་འགྲོ་ན་སོང་ཤིག་ཅེས་ཕྱི་རོལ་དུ་བོར་བ་དང་། ཁྲས་ཁྱེར་རོ། །དེས་ཀྱང་ཁྲ་ལ་གསོལ་བ་བཏབ་པ། ཁོ་བོ་ཟོས་པ་ནི་ཉིན་གཅིག་གི་ཟས་སུ་ཟད་དེ་ཁོ་བོ་
བཏང་ན་ནི་ཉིན་གཅིག་བཞིན་དུ་ཇི་ལྟ་བུའི་དགོས་པ་དང་བཟའ་བ་མང་པོ་དག་དེ་བཞིན་དུ་སྦྱར་བར་བྱའོ་ཞེས་དེས་ཡིད་ཆེས་པར་མནའ་བོར་ནས་བཏང་སྟེ། སྤྱོད་གསལ་གྱིས་སྨྲས་པ། ཕྱོགས་ཆེ་གེ་མོ་ཞིག་ན་རྒྱལ་པོའི་གཙུག་ལག་ཁང་དེར་ཞོག་ཤིག །དེས་དེ་བཞིན་དུ་བྱས་པ་དང་། དེ་
གཙུག་ལག་ཁོང་དུ་སོང་སྟེ་བུ་ག་ཞིག་ཏུ་ཞུགས་པ་དང་། ཕྱི་དེ་ཉིན་བྲམ་ཟེ་དག་ལྷ་མཆོད་པའི་ཕྱིར་དེར་ལྷགས། ལྷ་དྲི་མ་ཕྱིས་ཏེ། བདུག་པ་དང་། མེ་ཏོག་དང་། ལྷ་བཤོས་དང་། གཏོར་མ་སྦྱིན་པར་བརྩོན་ན། སྤྱོད་གསལ་དེས་ཀྱང་སྨྲས་པ། ཀྱེ་བྲམ་ཟེ་རྒྱལ་པོ་སྡིག་
པ་ཅན་ལྔ་ལེན་གྱི་རྒྱལ་པོ་ལ་ངའི་ཚིག་འདི་བརྗོད་པར་བྱའོ། །ཉེས་པ་འདི་དང་འདི་དག་བྱས་པ་དེ་ནི་ངས་གནོད་པར་བྱས་པ་ཡིན་ནོ། །གལ་ཏེ་ངའི་ཚིག་བཞིན་མ་བྱས་ན་ཕྱིར་ཡང་བྱའོ། །དེ་ལྟར་རེ་ཞིག་ཉིན་རེ་ཞིང་ཤ་རྗེན་དམར་པོ་དང་། ཏིལ་དང་། འབྲས་ཐུག་པོ་ཆེ་བྲེའུ་ཆུང་གང་གི་
ལྷ་བཤོས་བྱས་པ་དང་དེ་ནས་ཕྱིས་བསམ་མོ། །སོང་ནས་དེས་ལྔ་ལེན་གྱི་རྒྱལ་པོ་ལ་ཁོང་དུ་ཆུད་པར་བྱས་སོ། །རྒྱལ་པོས་ཀྱང་དེའི་དོན་ཁོ་ནར་ལྷ་བཤོས་དང་། གཏོར་མ་བྱ་བ་ལ་ཞུགས་ཏེ། ཉིན་གཅིག་བཞིན་དུ་རྒྱལ་པོ་དང་། བློན་པོ་དང་། མདུན་ན་འདོན་དག་ལྷགས་ནས་
ལྷ་ལ་གནང་ངམ་མི་གནང་བཀའ་སྩལ་པར་གསོལ་བ་བཏབ་པ་དང་། དེ་བཞིན་དུ་བྱའོ་ཞེས་སོ། །འདི་ལྟར་དུས་མང་དུ་ལོན་ནས་ནེ་ཙོ་སྤྱོད་གསལ་དེའི་གཤོག་པ་སྐྱེས་ཤིང་འཕུར་ནུས་པར་གྱུར་པ་དང་། ཡང་འགྲོ་བའི་བློ་སྐྱེས་ཏེ། དེ་ལ་ཡང་སྨྲས་པ། འདི་ལྟར་ང་ལ་
གང་ཁྱེད་སྟོབས་ཀྱི་དཔུང་དང་། ལྷ་མོ་དང་། གཞོན་ནུ་དང་། བློན་པོ་དག་དང་ལྷན་ཅིག་མགོ་གཏུན་བཞིན་བྲེགས་ལ་ངའི་དྲུང་དུ་ཤོག་ཤིག་དང་། འདི་ལྟར་བཟོད་ཅིང་གནང་བར་བྱའོ། །དེས་རྒྱལ་པོ་ལ་ཁོང་དུ་ཆུད་པར་བྱས་པ་དང་། རྒྱལ་པོས་ཀྱང་དེ་བཞིན་དུ་བྱས་ཏེ།

དེ་ལྟར་ཐམས་ཅད་མགོ་གཏུན་བཞིན་དུ་བྲེགས་ནས་ལྷ་གང་དུ་སོང་སྟེ་རྐང་པ་ལ་གཏུགས་ནས་བཟོད་པ་གསོལ་པ་དང་། དེ་ནས་ནེ་ཙོ་ནམ་མཁའ་ལ་འཕུར་ཏེ་ཚིགས་སུ་བཅད་པ་འདི་སྨྲས་སོ། །བྱེད་པ་ལ་ནི་སླར་བྱས་ཏེ། །ཕྱི་བས་སླར་ནི་ཕྱི་ལ་ལྟོས། །འདིར་ནི་
གཅིག་པུ་ཕྱི་བ་ཡིས། །བཙུན་མོ་ཀུན་དང་ལེགས་པར་ཕྱི། །དེས་འདི་སྐད་དུ་སྨྲས་ཏེ། དེ་ནས་ཡང་སྨན་ཆེན་པོའི་དྲུང་དུ་སོང་བ་དང་། སྤྱོད་གསལ་ཡུན་རིང་ཞིག་ཏུ་མ་མཐོང་ན་གང་ནས་ཕྱིན་ཅེས་དྲིས་སོ། །དེས་འདི་དང་འདི་ལྟ་བུའི་ཐབས་དེ་དག་བདག་གིས་བགྱིས་སོ་ཞེས་རྒྱ་
ཆེར་སྨྲས་སོ། །དེ་ནས་སྨན་ཆེན་པོ་ཡིད་དགའ་ཞིང་མགུ་སྟེ། རྒྱལ་པོ་སྐྱེད་པ་ལ་ནེ་ཙོ་སྤྱོད་གསལ་གྱིས་འདི་ལྟར་བགྱིས་སོ་ཞེས་སྨྲས་པ་དང་། རྒྱལ་པོ་ཡང་མཆོག་ཏུ་དགའ་བ་དང་ལྡན་ནས་སྨྲས་པ། ཨེ་མའོ་འདི་ལྟར་ཁྱོད་མཁས་པ་ཤ་སྟག་དང་ཕྲད་པ་ནི་བསོད་ནམས་དང་ལྡན་ནོ་ཞེས་
སྨྲས་སོ། །དེ་ནས་ཡང་དུས་ཕྱི་ཞིག་ན་རྒྱལ་པོས་བློན་པོ་རྣམས་ལ་གང་རབ་ཏུ་མཁས་པ་ཉམས་སད་དོ་སྙམ་བློ་སྐྱེས་ནས་དེ་དག་བོས་ཏེ་སོ་སོར་ཁྱི་རེ་རེ་བྱིན་ནས་འདི་དག་དུས་འདི་ཙམ་ན་ཐམས་ཅད་མི་སྐད་དུ་སྨྲ་བར་གྱིས་ཤིག་དེ་དག་གིས་དེ་ཁྱིམ་དུ་ཁྲིད་དེ་གསོ་བར་བྱས་པ་ནི་ཤེས་ཀྱི་མི་སྐད་དུ་ཟེར་བ་མི་
ཤེས་སོ། །སྨན་ཆེན་པོས་ཁྱི་དེ་ཁྱིམ་དུ་ཁྲིད་དེ་སོང་ནས་ཁྲི་ལས་མི་རིང་བ་ཞིག་ཏུ་ཕུར་བ་ལ་བཏགས་ཏེ་བཞག་གོ། །ནམ་སྨན་ཆེན་པོའི་ཁ་ཟས་དྲངས་ནས་བཅའ་བ་དང་། བཟའ་བ་དང་། ཁུ་བ་སྣ་ཚོགས་སུ་སྦྱར་བ་ཟ་བར་མཐོང་ཡང་ལེན་མི་ནུས་སོ། །དེ་ནས་ངན་པ་ཅུང་ཟད་ཅིག་
བྱིན་པས་མ་ཤི་མ་སོས་ཙམ་དུ་ཉམ་ཆུང་ལ་རིད་དེ་སྐེམ་པར་གྱུར་ཏོ། །དེ་ནས་རྒྱལ་པོས་ཁྱི་དེ་དག་ལོབས་སམ། མ་ལོབས་བལྟས་ཁྲིད་དེ་ཤོག་ཤིག་པར་བསྒོའོ། །དེ་དག་གིས་ནི་ཐབས་ལ་མི་མཁས་པས་བསླབ་མ་ནུས་སོ། །དེ་ནས་སྨན་ཆེན་པོ་ལ་ཁྱོད་ཀྱི་ཅི་འདྲ་ཁྲིད་དེ་ཤོག་ཅེས་སྨྲས་ནས་
རྒྱལ་པོའི་མདུན་དུ་འོངས་ཏེ་བལྟས་ན་སྐེམ་ཞིང་རིད་དོ། །དེས་འདི་ཅིའི་ཕྱིར་རིད་ཅེས་དྲིས་པ་དང་། སྨན་ཆེན་པོས་ལྷ་བདག་གིས་ཅི་ཟོས་ཅི་འཚལ་བ་དེ་བཞིན་འདི་ལ་སྩལ་ཏོ་ཞེས་སྨྲས་པ་དང་། ཁྱིས་སྨྲས་པ། ལྷ་འདི་ནི་བརྫུན་མཆིས་ཏེ། བདག་ལྟོགས་ཏེ་དེའུ་བཀུམ་མོ། །དེ་ནས་སྨན་ཆེན་

པོས་བདག་གིས་འདི་ལྟར་འདི་མིའི་སྐད་དུ་སྨྲ་བར་བགྱིས་སོ་ཞེས་གསོལ་ཏོ། །དེ་ནས་རྒྱལ་པོ་དགྱེས་པར་གྱུར་ཏོ། །དེ་ནས་ཡང་དུས་ཕྱི་ཞིག་ན་ཡང་ཉམ་སྐྱེད་པར་འདོད་ནས་ལུག་འདི་རྣམས་ཁྱེད་ཀྱིས་བཟའ་བཏུང་ཞིམ་པོ་སྩལ་ལ་ཚིལ་མེད་ལ་མཐུ་དང་ལྡན་པར་བྱོས་ཤིག་ཅེས་བསྒོའོ། །དེ་ནས་བློན་
པོ་ལྔ་བརྒྱ་པོ་དེ་དག་ནི་ཐབས་མི་ཤེས་ཏེ། དེ་གསོས་ཏེ་ཚོན་པོར་བྱས་སོ། །སྨན་ཆེན་པོས་ནི་བཟའ་བ་ཞིམ་པོ་མདུན་དུ་བཞག་ནས་ཤིང་ལ་སྤྱང་ཀིའི་གཟ