Kinh tạng Tây Tạng (Kangyur Đại Học) — 011_འདུལ་བ།_ད

་བཞིན་བྱེད་དུ་འཇུག་གོ། །དེའི་ཚེ་དེའི་དུས་ན་བཱ་རཱ་ཎ་སཱི་ན་གཟུགས་ཀྱིས་འཚོ་བ་བཟང་མོ་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། སྐྱེས་པའི་ཡིད་དུ་འོང་བ། སྔོན་རྒྱལ་པོ་ཚངས་བྱིན་གྱི་ཞང་པོས་ཡོངས་སུ་སྤྱད་པ་ཞིག་འདུག་གོ། །
རེ་ཞིག་དུས་གཞན་ཞིག་ན་དགའ་འདུན་པ་ལྔ་བརྒྱ་བཟའ་བ་དང་བཅའ་བ་མང་པོ་དག་སྦྱར་ཏེ་སྐྱེད་མོས་ཚལ་དུ་དོང་ནས་ཕན་ཚུན་ཤེས་ལྡན་དག་བདག་ཅག་གིས་སྐྱེད་མོས་ཚལ་གྱི་ལོངས་སྤྱོད་ཐམས་ཅད་ནི་བཤམས་ན་བུད་མེད་མེད་ཀྱིས་དོང་ལ་སྨད་འཚོང་འགའ་ཞིག་དགུག་གོ་ཞེས་

སྨྲས་པ་དང་། ལེགས་ཀྱིས་དེ་བཞིན་དུ་བྱ་ན་སུ་ཞིག་དགུག །བཟང་མོའོ། །དེ་དག་བཟང་མོའི་དྲུང་དུ་སོང་སྟེ་བཟང་མོ་ཚུར་ཤོག །སྐྱེད་མོས་ཚལ་དུ་འདོང་ངོ་། །དེས་སྨྲས་པ། གལ་ཏེ་ཀཱར་ཥཱ་པ་ཎ་སྟོང་བྱིན་ན་འགྲོའི་གཞན་དུ་ནི་མ་ཡིན་ནོ། །དེ་དག་གིས་སྨྲས་པ། ཀཱར་
ཥཱ་པ་ཎ་ལྔ་བརྒྱ་ཇེ་ཁྱེར་ཅིག །ལྔ་བརྒྱ་ནི་དགའ་མགུར་སྤྱད་ནས་སྦྱིན་ནོ། །དེས་སྨྲས་པ། ལེགས་ཀྱིས་དེ་བཞིན་དུ་བྱས་བྱིན་ཅིག །དེ་དག་གིས་ཀཱར་ཥཱ་པ་ཎ་ལྔ་བརྒྱ་བྱིན་ནས། དེས་སྨྲས་པ། དེང་ཤིག་དྲི་དང་། ཕྲེང་བ་དང་། གོས་དག་བགོས་ལ་འོང་ངོ་ཞེས་བྱས་པ་དང་། དེ་དག་དོང་ངོ་། །དེ་འགྱོད་པ་སྐྱེས་
ནས་གལ་ཏེ་བདག་དགའ་འདུན་པ་ལྔ་བརྒྱ་དང་ལྷན་ཅིག་དགའ་མགུར་སྤྱད་ན་བདག་གི་གནས་སྐབས་ཅི་འདྲ་བར་འགྱུར། བདག་གིས་ཀཱར་ཥཱ་པ་ཎ་ལྔ་བརྒྱ་ཞིག་ཀྱང་བླངས་ན་ད་ཇི་ལྟར་བྱ་སྙམ་པ་ལས། དེས་བདག་རྒྱལ་པོའི་ཞང་པོས་ཡོངས་སུ་སྤྱད་པས་དེ་ཁོ་ན་ལ་སྐྱབས་འཚལ་གྱི་གཞན་དུ་ནི་མ་ཡིན་
ནོ་སྙམ་པའི་བློ་སྐྱེས་ནས་དེས་དེའི་གན་དུ་བྲན་མོ་མངག་གཞུག་མ་མངགས་ཏེ། བུ་མོ་རྒྱལ་པོའི་ཞང་པོའི་དྲུང་དུ་སོང་ལ། སོང་ནས་འདི་སྐད་ཅེས་བདག་ངན་ཏེ་དགའ་འདུན་པ་ལས་ཀཱར་ཥཱ་པ་ཎ་ལྔ་བརྒྱ་བླངས་ན་དགའ་འདུན་པ་དེ་དག་ལྔ་བརྒྱ་ཡོད་དེ། ཇི་སྟེ་བདག་དགའ་འདུན་པ་ལྔ་
བརྒྱ་དང་ལྷན་ཅིག་དགའ་མགུར་སྤྱད་པར་གྱུར་ན་བདག་གི་གནས་སྐབས་ཅི་འདྲ་བར་འགྱུར། ཁྱོད་ཀྱིས་སྔོན་བདག་ཡོངས་སུ་བཟུང་བས་དེའི་སླད་དུ་ཁྱོད་ཀྱིས་བདག་དེ་དག་ལས་ཡོངས་སུ་བསྐྱབ་པའི་རིགས་ཞེས་སྨྲོས་ཤིག །བུ་མོ་དེས་དེའི་དྲུང་དུ་སོང་སྟེ་སྨྲས་པ་དང་། དེ་ཡང་རྒྱལ་པོ་
ལ་རྟེན་པ་ཡིན་པས་དེ་དག་ལས་དེ་ཕྲོགས་སོ། །སངས་རྒྱས་རྣམས་འབྱུང་བ་མེད་པ་ན་རང་སངས་རྒྱས་དམན་པ་དང་། ཕོངས་པ་ལ་ཐུགས་བརྩེ་བ། བས་མཐའི་གནས་མལ་ལ་དགའ་བ་འཇིག་རྟེན་གྱི་སྦྱིན་གནས་གཅིག་པུར་གྱུར་པ་དག་འཇིག་རྟེན་དུ་བྱུང་ངོ་། །དེ་ནས་རང་སངས་
རྒྱས་ཤིག་ལྗོངས་རྒྱུ་ཞིང་བཱ་རཱ་ཎ་སཱིར་ཕྱིན་ཏེ། བདག་ཉིད་ཆེན་པོ་ཞི་བའི་བདག་ཉིད་ཅན་རབ་ཏུ་དབེན་པར་གནས་པ་དེ་རབ་ཏུ་དབེན་པར་གནས་ཚོལ་ཞིང་སྐྱེད་མོས་ཚལ་དེར་ཕྱིན་པ་དང་། དགའ་འདུན་པ་དེ་དག་གིས་ལུས་མཛེས་པ་དང་། སེམས་མཛེས་པ་མཐོང་ནས་དེ་དག་གིས་བསམས་

པ། གར་བསྐོར་ཀྱང་ཡོན་གནས་ཀྱི་ཞིང་འདི་ལྟ་བུ་ལ་བྱ་བ་བྱ་དགོས་སོ་སྙམ་ནས་དེ་དག་གིས་གཅིག་ལ་གཅིག་དྲིས་ཏེ། དེ་ལ་གཙང་ཞིང་བསོད་པའི་བཟའ་བ་དང་བཅའ་བ་དག་གིས་ལྷུང་བཟེད་བཀང་སྟེ་ཕུལ་ལོ། །བདག་ཉིད་ཆེན་པོ་དེ་དག་ནི་ངག་གིས་ཆོས་མི་
སྟོན་གྱི་ལུས་ཀྱིས་ཆོས་སྟོན་པ་ཡིན་པས་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབབ་པ་དང་། གློག་འགྱུ་བ་ལ་སོགས་པའི་ཆོ་འཕྲུལ་བྱ་བར་བརྩམས་པ་དང་། སོ་སོའི་སྐྱེ་བོ་ནི་རྫུ་འཕྲུལ་གྱིས་དད་པར་འགྱུར་བས་ཤིང་རྩ་བ་ནས་བཅད་
པ་བཞིན་དུ་ཞབས་ལ་གཏུགས་ནས་གང་བདག་ཅག་གིས་ཡང་དག་པའི་སྦྱིན་གནས་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་འདིས་བདག་ཅག་གཟུགས་ཀྱིས་འཚོ་བ་ལ་ཐ་ན་ཤི་ན་ཡང་ཀཱར་ཥཱ་པ་ཎ་ལྔ་བརྒྱ་བྱིན་ནས་དགའ་མགུར་སྤྱོད་པར་ཤོག་ཤིག་ཅེས་སྨོན་ལམ་བཏབ་བོ། །དགེ་སློང་
དག་ཇི་སྙམ་དུ་སེམས། གཟུགས་ཀྱིས་འཚོ་བ་བཟང་མོ་ཞེས་བྱ་བ་གང་ཡིན་པ་དེ་ནི་ཁྱིམ་བདག་གི་ཆུང་མ་འོད་བཟང་མ་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་དགའ་འདུན་པ་ལྔ་བརྒྱ་པོ་དེ་དག་ནི་མི་རྒོད་ལྔ་བརྒྱ་པོ་འདི་དག་ཉིད་ཡིན་ཏེ། དེའི་ཚེ་དེའི་དུས་ན་གང་འདི་དག་གིས་རང་སངས་
རྒྱས་ལ་བསོད་སྙོམས་ཕུལ་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་འདི་དག་གིས་འཁོར་བར་འཁོར་བ་ན་ཚེ་རབས་ལྔ་བརྒྱར་ཀཱར་ཥཱ་པ་ཎ་ལྔ་བརྒྱ་བྱིན་ཞིང་དགའ་མགུར་སྤྱད་དེ་ད་ལྟར་ཁྱིམ་བདག་གི་ཆུང་མར་གྱུར་པ་ལས་ཤི་བའི་བར་དུ་ཡང་ཀཱར་ཥཱ་པ་ཎ་ལྔ་བརྒྱ་བྱིན་ནས་དགའ་
མགུར་སྤྱད་པ་ཡིན་ནོ། །དེ་ལྟར་ན་དགེ་སློང་དག་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན། གཅིག་ཏུ་དཀར་བ་རྣམས་དང་། འདྲེན་མ་རྣམས་ཀྱི་ཡང་འདྲེན་མ་རྣམས་ཡིན་ནོ། །དེ་ལྟ་བས་ན་དགེ་སློང་དག་གཅིག་ཏུ་གནག་པའི་
ལས་རྣམས་དང་། འདྲེན་མ་རྣམས་སྤངས་ཏེ་གཅིག་ཏུ་དཀར་བའི་ལས་ཁོ་ན་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དགོངས་པ་ཉེས་དམིགས་གང་ཅུང་ཟད་བྱུང་བ་ནི་དགེ་སློང་དག་དེ་ལྟ་བུའི་ཁྱིམ་དུ་འགྲོ་བ་ལས་

གྱུར་གྱིས། དེའི་ཕྱིར་དགེ་སློང་དག་དེ་ལྟ་བུའི་ཁྱིམ་དུ་འགྲོ་བར་མི་བྱ་བར་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་བདག་གི་ཆུང་མ་འོད་བཟང་མ་དགེ་སློང་མཐོང་ནས་རྟོག་པ་སྐྱེས་ཏེ་སྲོག་དང་བྲལ་བར་གྱུར་གྱིས་དེ་ལྟ་བས་ན་དགེ་སློང་དག་དགེ་
སློང་གིས་གང་འདི་ལྟ་བུའི་ཉེས་དམིགས་འབྱུང་བར་འགྱུར་བ་དེ་ལྟ་བུའི་ཁྱིམ་དུ་འགྲོ་བར་མི་བྱའོ། །དགེ་སློང་དེ་ལྟ་བུའི་ཁྱིམ་དུ་འགྲོ་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་རྒྱལ་པོའི་ཁབ་ནའོ། །དགེ་སློང་སྤོང་བ་པ་ཞིག་ཡོད་པ་ཡང་དང་ཡང་དགོན་པའི་གནས་སུ་
སོང་ནས་བསམ་གཏན་བྱེད་དོ། །དེར་དེ་ལ་བདུད་ཀྱི་རིས་ཀྱི་ལྷ་མོ་ཞིག་གིས་ཚུལ་མ་ཡིན་པར་སྤྱད་པ་བསྒུགས་པ་ལས་དེ་མ་བཏུབ་པ་དང་། དེས་འཕགས་པ་ཁྱོད་མ་བཏུབ་དང་གནོད་པར་བྱའོ། །དེས་སྨྲས་པ། སྲིང་མོ་ང་ནི་དགེ་སློང་ཚུལ་ཁྲིམས་ཅན་ཡིན་ན་ཁྱོད་ཀྱིས་ང་ལ་
གནོད་པ་བྱར་ཅི་ཡོད། དེས་འཇལ་ཞེས་བྱས་ནས་དེ་ལ་གླགས་ཚོལ་བ་ལྷུར་ལེན་ཅིང་འདུག་གོ། །དེས་དུས་གཞན་ཞིག་ན་སྣམ་སྦྱར་པུས་ཁྱུད་ལྟར་མདུད་པ་བོར་ནས་གཉིད་ལོག་པར་གྱུར་པ་དང་། ལྷ་མོ་དེས་བསམས་པ། འདི་ལ་ཤ་གླན་པའི་དུས་ནི་འདི་ཡིན་ནོ་སྙམ་ནས་
དེས་དེ་བླངས་ཏེ། རྒྱལ་པོ་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་སྟེང་ན་གཉིད་ཀྱིས་ལོག་པའི་སྟེང་དུ་བོར་རོ། །དེ་སྔངས་ནས་གཉིད་སད་དེ་དེ་མཐོང་ནས་ཁྱོད་སུ་ཞེས་དྲིས་པ་དང་། དེས་སྨྲས་པ། དགེ་སྦྱོང་ངོ་། །དགེ་སྦྱོང་གི་ནང་ན་གང་ཞིག །ཤཱཀྱའི་བུའི་དགེ་
སྦྱོང་ངོ་། །འཕགས་པ་ཁྱོད་ཇི་ལྟར་འདིར་འོང་། དེས་དེ་ལ་ཇི་ལྟར་གྱུར་པ་སྨྲས་པ་དང་། དེས་སྨྲས་པ། འཕགས་པ་ཁྱོད་ཅིའི་ཕྱིར་དེ་ལྟ་བུའི་གདུག་པ་མང་པོ་ཅན་གྱི་གནས་མལ་དུ་གནས། ཇི་སྟེ་བདག་བཅོམ་ལྡན་འདས་ལ་དད་པར་མ་གྱུར་ན་བདག་གིས་ཁྱོད་བསད་པར་
འགྱུར་བའམ། བསྟན་པ་དང་བྲལ་བར་འགྱུར་རོ་ཞེས་བྱས་པ་དང་། དེ་ཅང་མི་ཟེར་བར་འདུག་གོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་དག་དེ་ལྟ་བུའི་གདུག་

པ་མང་པོ་ཅན་གྱི་གནས་མལ་ན་གནས་པ་ལས་གྱུར་གྱིས། དེའི་ཕྱིར་དགེ་སློང་གིས་དེ་ལྟ་བུའི་གདུག་པ་མང་པོ་ཅན་གྱི་གནས་མལ་དུ་གནས་པར་མི་བྱ་བར་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་རྒྱལ་པོ་གཟུགས་ཅན་སྙིང་པོ་འཕྱ་བ་ནི་ཐོག་ཏུ་བབ་བོ། །
དེ་བས་ན་དགེ་སློང་གིས་དེ་ལྟ་བུའི་གདུག་པ་མང་པོ་ཅན་གྱི་གནས་མལ་དུ་གནས་པར་མི་བྱའོ། །དགེ་སློང་དེ་ལྟ་བུའི་གདུག་པ་མང་པོ་ཅན་གྱི་གནས་མལ་དུ་གནས་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་དགེ་སློང་གཞོན་ནུ་ཞིག་ཁ་ཟས་དང་སྤྱོད་ལམ་ཉེས་
པ་ལས་འབྲས་ཞེས་བྱ་བའི་ནད་ཀྱིས་ཐེབས་ནས། དེ་ནད་ཀྱིས་གཟེར་བས་མཁུན་འབྱིན་ཅིང་དགེ་སློང་རྣམས་ཀྱིས་དེ་བསྐོར་ནས་འདུག་གོ། །ཇི་ཙམ་ན་སྨན་པའི་རྒྱལ་པོ་འཚོ་བྱེད་འོངས་ཏེ། དེས་འཕགས་པ་དག་འདི་ཅི་ཞིག་ཅེས་དྲིས་པ་དང་། དགེ་སློང་དག་གིས་སྨྲས་པ། འཚོ་བྱེད་
དགེ་སློང་གཞོན་ནུ་འདི་ནད་ཅིག་གིས་ཐེབས་ན་ནད་ཅི་ཡིན་པ་དང་། དཔྱད་ཅི་བྱ་བ་ལྟོས་ཤིག །དེས་བལྟས་ནས་སྨྲས་པ། འཕགས་པ་འབྲས་ཡིན་པས་བརྟོལ་ན་ཕན་ནོ། །དགེ་སློང་རྣམས་ཀྱིས་སྨྲས་པ། གལ་ཏེ་དེ་ལྟ་ན་རྟོལ་ཅིག །དེས་དེ་ལ་བརྟོལ་བ་དང་། དེ་བྱ་བ་ཅུང་
ཟད་ཅིག་བྱུང་ནས་དེས་དེར་གླན་པ་མ་བྱས་པར་སོང་ངོ་། །དེ་རབ་ཏུ་ན་བར་གྱུར་ནས་དགེ་སློང་དག་གིས་ཚེ་དང་ལྡན་པ་དག་གང་མཁས་པ་དེས་གླན་པ་གྱིས་ཤིག་ཅེས་སྨྲས་པ་དང་། དེ་ལ་དགེ་སློང་གཞོན་ནུ་གཞན་ཞིག་གིས་གླན་པ་བྱས་སོ། །འཚོ་བྱེད་ཀྱིས་བསམས་པ། བདག་
གིས་འཕགས་པ་དེའི་གླན་པ་མ་བྱས་པར་སླར་འགྲོའོ་སྙམ་ནས་དེ་སླར་ལོག་སྟེ་དྲིས་པ་འཕགས་པ་དག །འཕགས་པ་གང་ཞིག་བདག་གིས་འབྲས་བརྟོལ་བ་དེ་ག་རེ། དགེ་སློང་རྣམས་ཀྱིས་སྨྲས་པ། དེ་ཅི་ཞིག་བྱ། འཕགས་པ་གླན་པར་བགྱིའོ། །འཚོ་བྱེད་དེ་གླན་པ་བྱས་ཟིན་
ནོ། །འཕགས་པ་སུས་བགྱིས། གཞོན་ནུ་འདིས་སོ། །འཕགས་པ་ཇི་ལྟར་བགྱིས་བལྟའོ། །ཞེས་དེ་དེའི་དྲུང་དུ་སོང་སྟེ་བལྟས་ན་ལེགས་པར་གླན་པ་མཐོང་ནས་དེས་སྨྲས་པ། འཕགས་པ་གླན་པ་ལེགས་ལགས་ཀྱིས་བདག་མ་མཆིས་ན་ཡང་སླན་ཆད་དེ་བཞིན་དུ་མཛོད་ཅིག །དེས་

སྨྲས་པ། འཚོ་བྱེད་འདི་ཡང་རེ་ཞིག་བདག་གིས་གནང་བ་མེད་པར་བྱས་ན་ཡང་བྱ་བ་ལྟ་སྨོས་ཀྱང་ཅི་དགོས་ཏེ། བཅོམ་ལྡན་འདས་ཀྱིས་གནང་ངམ་མི་གནང་གི་གཏོལ་མེད་དོ། །དེས་སྨྲས་པ། འཕགས་པ་བཅོམ་ལྡན་འདས་ནི་ཐུགས་རྗེ་ཅན་ལགས་པས་ཅིའི་ཕྱིར་གནང་བར་མི་འགྱུར།
སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གང་མཁས་པ་དེས་གློན་དུ་གནང་ངོ་། །བཅོམ་ལྡན་འདས་ཀྱིས་དགེ་སློང་གང་མཁས་པ་དེས་གློན་དུ་གནང་ངོ་ཞེས་བཀའ་སྩལ་པ་དང་། དེ་དག་གིས་
ཁྱམས་དང་། རྫིང་དྲུང་དང་། སྒོ་ཁང་དང་། བང་རིམ་དག་ཏུ་གླན་པ་དང་། བཅོམ་ལྡན་འདས་ཀྱིས་བཀའ་སྩལ་པ། དབེན་པའི་ཕྱོགས་སུ་གྱིས་ཤིག །གཞན་དུ་བྱས་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །བྲམ་ཟེ་དང་ཁྱིམ་བདག་དད་པ་ཅན་
དག་གཙུག་ལག་ཁང་དུ་འོངས་ནས་དགེ་སློང་རྣམས་ལ་འཕགས་པ་བདག་ནད་འདི་ལྟ་བུ་དང་འདི་ལྟ་བུས་ཐེབས་ན་བདག་གིས་གཡར་ཟས་ནི་ཇི་ལྟ་བུ་ཞིག་འཚལ་བར་བགྱི། སྨན་ནི་ཇི་ལྟ་བུ་ཞིག་བསྟེན་པར་བགྱི་ཞེས་ཟས་ཀྱི་ཆོ་ག་དྲིས་པ་དང་། དེ་ན་དགེ་སློང་གང་དག་མི་ཤེས་པ་དེ་དག་ནི་ཅི་
ཡང་མི་སྨྲའོ། །ཤེས་པ་རྣམས་ནི་ཐེ་ཚོམ་དུ་གྱུར་ནས་མ་སྨྲས་པ་དང་། བྲམ་ཟེ་དང་ཁྱིམ་བདག་དད་པ་ཅན་རྣམས་མི་དགའ་བཞིན་དུ་དོང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་
སློང་གང་མཁས་པ་དེས་ཁ་ཟས་ཀྱི་ཆོ་ག་དང་། སྨན་དཔྱད་རྣམས་སྟོན་པར་གནང་གིས་འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཆོ་འཕྲུལ་ཆེན་པོ་བསྟན་པས་མུ་སྟེགས་ཅན་རྣམས་ནི་ཐག་བཅུག །ལྷ་དང་མི་རྣམས་ནི་ཀུན་དགའ་
བར་མཛད། སྐྱེས་བུ་དམ་པ་རྣམས་ནི་མགུ་བར་མཛད་པ་དེའི་ཚེ་ཡུལ་ཐ་དད་པ་ན་གནས་པའི་མི་མ་ཡིན་པ་དག་གྲོང་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དེ་དང་དེ་དག་དང་། འཇིག་རྟེན་གྱི་ཁམས་གཞན་ནས་ཀྱང་མཉན་ཡོད་དུ་འོངས་སོ། །བཅོམ་ལྡན་འདས་

ལ་མངོན་པར་དད་པའི་ལྷ་དང་། ཀླུ་དང་། གནོད་སྦྱིན་དང་། ཀོ་ས་ལའི་རྒྱལ་པོ་གསལ་རྒྱལ་དང་། བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་དང་། ཕྱ་མཁན་དྲང་སྲོང་བྱིན་དང་། རྙིང་བ་དག་དང་། རི་དགས་འཛིན་གྱི་མ་ས་ག་དང་། གཞན་
ཡང་དད་པ་ཅན་མང་པོ་མཉན་ཡོད་དུ་འོངས་ནས་དེར་ཟང་ཟིང་གི་རྙེད་པ་དང་མཆོད་པའི་བཀུར་སྟིས་སྐྱེ་བོའི་ཚོགས་མང་པོ་ཡོངས་སུ་ཚིམ་པར་བྱས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་གཅིག་པ། དེ་ལྟ་བུའི་འབྱོར་པ་མཆོག་མཐོང་ནས་མི་མ་
ཡིན་པ་ཁ་ཅིག་ནི་དེ་ཉིད་དུ་མངོན་པར་དགའོ། །ཁ་ཅིག་ནི་རང་གི་ཡུལ་གྱི་གནས་ཉིད་དུ་དོང་ངོ་། །གང་དག་དེར་མངོན་པར་དགའ་བ་དེ་དག་གང་གི་ཚེ་སེམས་འདོད་པའི་འདོད་ཆགས་ཀྱིས་ཀུན་ནས་དཀྲིས་པར་གྱུར་པ་དེའི་ཚེ་བུད་མེད་གང་དག་གི་ཁྱོ་ཕྱི་རོལ་དུ་དོན་གཉེར་དུ་སོང་བ་དེའི་ཆ་ལུགས་
སུ་བདག་ཉིད་མངོན་པར་སྤྲུལ་ནས་དེ་དག་དང་ལྷན་ཅིག་ཏུ་དགའ་མགུར་སྤྱོད་པར་བྱེད་དོ། །དེ་ནས་བུད་མེད་དེ་དག་ལས་རྒྱུ་མཐུན་པ་ལས་སྐྱེ་བའི་ཁྱེའུ་དང་བུ་མོ་དག་རྐང་ལག་དང་མིག་དང་ལུས་མི་སྡུག་པར་སྐྱེས་ཏེ། ཁ་ཅིག་ནི་གནག་ལ་མིག་དམར། ཁ་ཅིག་ནི་མགོ་ཆེ་ལ་ལུས་ཆུང་།
ཁ་ཅིག་ནི་མགོ་སེར། ཁ་ཅིག་ནི་སྐྲ་ལྗང་གུའོ། །དེ་དག་མ་དེ་དག་གིས་མཐོང་བ་དང་སྔངས་ནས་ཁྱིམ་གྱི་བར་དང་། ཚང་ཚིང་གི་ཕྱོགས་དག་ཏུ་བོར་བ་དང་། དེ་དག་མི་མ་ཡིན་པའི་མདངས་ཀྱིས་གསོ་བར་བྱེད་དོ། །ཁ་ཅིག་ནི་མིའི་གཟུགས་སུ་མི་གསལ་བར་སྐྱེ་ཞིང་། གང་གི་ཚེ་
ཆེར་སྐྱེས་པ་དེའི་ཚེ་འགྱུར་བར་སྟོན་པར་བྱེད་དོ། །དེ་དག་ཀྱང་མས་ལམ་པོ་ཆེའི་ཁར་བོར་བ་དང་། དེ་ཡང་མི་མ་ཡིན་པའི་མདངས་ཀྱིས་གསོ་བར་བྱེད་དོ། །དྲུག་སྡེ་རྣམས་ཀྱི་ཀུན་ཏུ་སྤྱོད་པ་ནི་དེ་དག་ཇི་སྙེད་རབ་ཏུ་འབྱིན། བསྙེན་པར་རྫོགས་པར་བྱེད་པ་དེ་དག་དང་ཇི་སྲིད་དུ་གནས་ངན་ལེན་ཀུན་
ཏུ་སྤྱོད་པར་མི་ཤེས་པ་དེ་སྲིད་དུ་ལྷན་ཅིག་གནས་སོ། །གང་གི་ཚེ་ཡོངས་སུ་ཤེས་པ་དེའི་ཚེ་རང་བཞིན་དུ་གནས་པའི་དགེ་སློང་དག་དང་ལྷན་ཅིག་ཏུ་གནས་ཏེ་གཞན་དུ་ན་སྟོན་པའི་བཀས་དུས་གསུམ་དུ་ནི་ལྟར་འགྲོའོ། །རེ་ཞིག་ཚེ་དང་ལྡན་པ་ཉེ་དགའ་སྔ་དྲོ་ཤམ་ཐབས་བགོས་ལྷུང་བཟེད་དང་

ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་བསོད་སྙོམས་ལ་རྒྱུ་བ་ན་སྲང་ན་སྐྲ་ལྗང་གུ་ཅན་ཞིག་མཐོང་ནས་དེས་བསམས་པ། འདི་ནི་ལྷུང་བཟེད་ནག་པོ་ཅན་དག་གིས་ཕྲོགས་པར་མི་འགྱུར་བས་གལ་ཏེ་རབ་ཏུ་འབྱུང་ན་འདི་རབ་ཏུ་དབྱུང་ངོ་སྙམ་དུ་བསམས་ནས་དེའི་
དྲུང་དུ་སོང་སྟེ་དྲིས་པ། བཞིན་བཟངས་ཁྱོད་སུའི། དེས་སྨྲས་པ། འཕགས་པ་བདག་ལ་སུ་ཡང་ག་ལས་མཆིས། བདག་མགོན་མེད་པ་ཞིག་ལགས་སོ། །དེས་སྨྲས་པ། བཞིན་བཟངས་གལ་ཏེ་དེ་ལྟ་ན་ཅིའི་ཕྱིར་རབ་ཏུ་མི་འབྱུང་། དེས་སྨྲས་པ། འཕགས་པ་སྐྲ་ལྗང་གུ་ཅན་བདག་སུ་
ཞིག་རབ་ཏུ་འབྱིན། བཞིན་བཟངས་བཅོམ་ལྡན་འདས་ཀྱིས་བསྟན་པ་ནི་སྙིང་རྗེས་རབ་ཏུ་ཕྱེ་བ་ཡིན་པས་གལ་ཏེ་སུས་ཀྱང་རབ་ཏུ་མ་བྱུང་ན་ཚུར་ཤོག་ངས་རབ་ཏུ་བྱུང་གིས་འདོང་ཞེས་བྱས་པ་དང་། དེ་ཡིད་བདེ་བ་སྐྱེས་ཏེ་རྒྱལ་བྱེད་ཀྱི་ཚལ་དུ་སོང་ནས་དེས་དེ་རབ་ཏུ་ཕྱུང་བསྙེན་པར་རྫོགས་
པར་བྱས་སོ། །དེ་ནས་ཉིན་ཞག་མི་མང་བ་ཞིག་ཏུ་ཀུན་ཏུ་སྤྱད་པར་བྱ་བའི་ཆོས་རྣམས་བསླབས་ཏེ་བསྒོ་བ། བཞིན་བཟངས་རི་དགས་ཀྱིས་རི་དགས་མི་གསོས་ཀྱིས་མཉན་ཡོད་རང་གི་སྤྱོད་ཡུལ་ཡངས་པ་ཡང་ཡིན་ལ་ཕའི་ཡུལ་ཡང་ཡིན་པས་སློང་མོ་ལ་རྒྱུ་བས་འཚོ་བར་གྱིས་ཤིག་
དེ་མི་དགའ་ནས་ཕྱི་དེ་ཉིན་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ལ་ཞུགས་སོ། །རེ་ཞིག་ན་བུད་མེད་གཅིག་བསོད་སྙོམས་ཁྱེར་ཏེ་ཕྱིར་བྱུང་བ་ལས་དེས་དེ་མཐོང་བ་དང་བྲང་བརྡུངས་ནས་སྨྲས་པ། འཕགས་པ་ཁྱོད་སྐྲ་ལྗང་གུ་ཅན་
ན་སུས་རབ་ཏུ་ཕྱུང་། དེས་སྨྲས་པ། སྲིང་མོ་མཁན་པོ་ཉེ་དགའས་སྙིང་རྗེས་བདག་རབ་ཏུ་ཕྱུང་ངོ་། །དེས་སྨྲས་པ། གནས་ངན་ལེན་ཀུན་ཏུ་སྤྱོད་པ་དེ་མ་ཡིན་པ་གཞན་སུ་ཞིག་བཅོམ་ལྡན་འདས་ཀྱི་བསྟན་པ་ཀུན་ནས་མཛེས་པ་སུན་པར་བྱེད་ཅེས་བྱས་པ་དང་། གཞན་དག་
ཀྱང་དེ་བཞིན་དུ་འཕྱ་སྟེ། མ་དད་པ་ཁ་ཟེར་བ་རྣམས་སྲང་དང་། བཞི་མདོ་དང་། སུམ་མདོ་དག་ཏུ་དགེ་སྦྱོང་ཤཱཀྱའི་བུ་པ་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །ཚངས་པའི་ཚུལ་ཡང་ཚིག་སྟེ། ད་ནི་སྐྲ་ལྗང་གུ་ཅན་དག་ཀྱང་རབ་ཏུ་འབྱིན་ཏོ་ཞེས་མི་སྙན་པ་སྨྲ་བའི་སྐབས་དེ་དགེ་སློང་

རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་རྣམས་དེ་ལྟ་བུ་དག་ཀྱང་རབ་ཏུ་འབྱིན་པ་ལས་གྱུར་གྱིས། དེའི་ཕྱིར་དགེ་སློང་གིས་དེ་ལྟ་བུ་དག་རབ་ཏུ་དབྱུང་བར་མི་བྱའོ་སྙམ་དུ་
མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཐོག་ཏུ་བབ་བོ། །དེ་ལྟ་བས་ན་དགེ་སློང་གིས་འཁོར་སུན་པར་བྱེད་པའི་འཁོར་ཉེ་བར་གཞག་པར་མི་བྱའོ། །དགེ་སློང་གིས་འཁོར་སུན་པར་བྱེད་པའི་འཁོར་ཉེ་བར་གཞག་ན་འགལ་
ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་འཁོར་སུན་པར་བྱེད་པའི་འཁོར་ཉེ་བར་གཞག་པར་མི་བྱའོ་ཞེས་བཀའ་སྩལ་པ་དང་། དགེ་སློང་རྣམས་ཀྱིས་འཁོར་སུན་པར་བྱེད་པ་ཇི་ལྟ་བུ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་
འཁོར་གྱིས་འཁོར་སུན་པར་བྱེད་པ་ནི་རྒྱུ་གཉིས་ཀྱིས་ཏེ། གང་དག་གིས་ཤེས་ན་རིགས་དང་། མཚན་མས་སོ། །དེ་ལ་རིགས་ཀྱིས་ནི་རིགས་གང་ཡང་རུང་བས་ཏེ། མ་རབས། དམན་པ། ཕོངས་པ། དཀོས་ཐག་པ། བཀྲེན་པ། བཟའ་བ་དང་། བཏུང་བ་ཆེན་པོ་མི་
བདོག་པ་དེ་ལྟ་བུའི་རིགས་དག་ལས་སོ་སོར་སྐྱེས་པར་གྱུར་པ་དེ་དག་དགེ་སློང་རྣམས་རབ་ཏུ་འབྱིན་པར་བྱེད་ན་དེ་ལྟ་བུ་ནི་རིགས་ཀྱིས་ཡིན་ནོ། །མཚན་མས་ཇི་ལྟ་བུ་ཞེ་ན། སྐྲ་སེར་དང་ནི་སྐྲ་ལྗང་གུ། །དེ་བཞིན་དུ་ནི་སྐྲ་དམར་དང་། །མི་རྣམས་སྐྲ་ནི་དཀར་བ་དང་། །གླང་ཆེན་སྐྲ་དང་སྐྲ་
མེད་པ། །འདི་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །འབར་འབུར་མགོ་དང་གླང་པོ་ཆེ། །མགོ་སྨྱུང་དང་ནི་མགོ་ལེབ་དང་། །བོང་བུ་ཕག་གི་མགོ་དང་ནི། །མི་གང་མགོ་ནི་གཉིས་ཡོད་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །གླང་
པོའི་རྣ་དང་རྟ་རྣ་དང་། །བ་ལང་རྣ་དང་སྤྲེའུ་རྣ་དང་། །བོང་བུ་ཕག་གི་རྣ་བ་དང་། །རྣ་གཅིག་དང་ནི་རྣ་མེད་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །མིག་དམར་ཧ་ཅང་མིག་ཆེ་དང་། །མིག་ཆུང་མིག་ནི་ཧ་ཅང་སེར། །ཤེལ་མིག་དང་ནི་མིག་འབུར་དང་། །མིག་

གཅིག་དང་ནི་མིག་མེད་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །གླང་པོའི་སྣ་དང་རྟ་སྣ་དང་། །བ་ལང་དང་ནི་སྤྲེའུ་སྣ་དང་། །བོང་བུ་ཕག་གི་སྣ་དག་དང་། །སྣ་སྦུབས་གཅིག་དང་སྣ་མེད་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་
ཡིན། །རྟ་དང་གླང་ཆེན་ཀོས་ཀོ་དང་། །བ་ལང་སྤྲེའུའི་ཀོས་ཀོ་དང་། །བོང་བུ་ཕག་གི་ཀོས་ཀོ་དང་། །ཀོས་གཅིག་པ་དང་ཀོས་མེད་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །གླང་ཆེན་སོ་དང་རྟ་སོ་དང་། །བ་ལང་སྤྲེའུ་ཡི་སོ་དང་ནི། །བོང་བུ་ཕག་
གི་སོ་དག་དང་། །སོ་གཅིག་པ་དང་སོ་མེད་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །འཇིང་བུ་ཐུང་དང་སྐེ་རིངས་དང་། །ཕག་མིག་དང་ནི་སྒུར་པོ་དང་། །མཚན་རྡུམ་པ་ནི་རླིག་རླུགས་དང་། །རླིག་གཅིག་དང་ནི་རླིག་མེད་པ། །དེ་ལྟ་བུ་ཡི་མི་དག་ནི། །
དྲང་སྲོང་ཆེན་པོས་སྤངས་པ་ཡིན། །ཧ་ཅང་རིང་དང་ཧ་ཅང་ཐུང་། །སྐེམ་དང་ངལ་སྐྱེན་ཧ་ཅང་ཚོ། །ཤ་མདོག་ཁ་དོག་བཞི་པ་དང་། །གྱོལ་པོ་གྲུམ་པོ་སོ་སྟོ་བ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །ལག་རྡུམ་དང་ནི་རྐང་རྡུམ་དང་། །ལག་སོར་ཟླུམ་
པོར་འཇས་པ་དང་། །མཆུ་མེད་ལུས་ནི་རི་མོ་ཅན། །ཧ་ཅང་རྒན་དང་ཧ་ཅང་གཞོན། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །ཐེང་པོ་སྨད་འཆལ་ཞར་བ་དང་། །སོར་རྡུམ་སྒུར་པོ་མིའུ་ཐུང་དང་། །ལྦ་བ་ཅན་དང་ལྐུགས་པ་དང་། །འོན་པ་རྟེན་འཕྱེ་རྐང་
འབམ་པ། །དེ་ལྟ་བུ་ཡི་མི་དག་ནི། །དྲང་སྲོང་ཆེན་པོས་སྤངས་པ་ཡིན། །མཛེ་ཅན་འབྲས་ཅན་ཕོལ་མིག་ཅན། །གཏའ་གམ་ཤུ་བ་གཡེན་པ་དང་། །ནད་ནི་གཞན་ཅན་ཐམས་ཅད་ཀྱང་། །དྲང་སྲོང་ཆེན་པོས་སྤངས་པ་ཡིན། །བུད་མེད་ལམ་དང་ཁུར་གྱིས་དུབ། །ཡ་ཟ་མ་ལུག་
གཏའ་གམ་དང་། །དེ་དག་དང་གཞན་ཡན་ལག་ཉམས། །དེ་ཀུན་འཁོར་སུན་བྱེད་པ་ཡིན། །མཛེས་པ་རབ་ཏུ་དབྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །ཉེ་དགའས་སྐྲ་ལྗང་གུ་ཅན་

དེའི་སྐྲ་དག་ཀྱང་གར་མཁན་གྱི་ལག་ཏུ་བཙོངས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་སྐྲ་བཙོང་བར་མི་བྱའོ། །བྱེད་ན་ཉེས་པ་སྦོམ་པོར་འགྱུར་རོ། །སྡོམ་ལ།
བྲན་ཅན་དང་ནི་སྐྱོང་བ་དང་། །གླེང་གཞི་དང་ནི་ཞུ་བ་དང་། །ཆོ་འཕྲུལ་ཆེ་དང་སྙན་ལྡན་དང་། །དམག་ཀུན་དང་ནི་སྲིན་བུ་རི། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་བ་འཁོར་
གྱིས་དགེ་ཚུལ་གཉིས་པོ་བྲན་ཅན་དང་། སྐྱོང་བ་སྟེ། དེ་དག་ཕན་ཚུན་གཏམ་འདྲེས་པ། ཕེབས་པར་སྨྲ་བ། སྨོས་འདྲིན། འགྲོགས་བཤེས་ཡིན་ནོ། །དེ་གཉིས་ལས་གཅིག་གིས་ཁྱོད་བསྙེན་པར་རྫོགས་ཤིག་དང་ངས་མཁན་པོ་དང་ཁྱོད་ཀྱི་རིམ་གྲོ་བྱའོ་ཞེས་སྨྲས་པ་དང་།
ཅིག་ཤོས་ཀྱིས་ཀྱང་དེ་ཁོ་ན་བཞིན་དུ་སྨྲས་ཏེ། དེ་དག་ཕན་ཚུན་སྟངས་བྱེད་པས་གཉི་ག་ཡང་བསྙེན་པར་མ་རྫོགས་པར་གྱུར་ཏོ། །དེ་ནས་ཚེ་དང་ལྡན་པ་ཉེ་བ་འཁོར་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་
གཅིག་ཏུ་འདུག་ནས། ཚེ་དང་ལྡན་པ་ཉེ་བ་འཁོར་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་མཁན་པོ་གཅིག་དང་། སློབ་དཔོན་གཅིག་དང་། གསོལ་བའི་ལས་གཅིག་གིས་གཉིས་བསྙེན་པར་རྫོགས་སུ་རུང་ལགས་སམ། ཉེ་བ་འཁོར་རུང་ངོ་། །
དེ་གཉིས་གང་རྒན་ལགས། གང་ཡང་མ་ཡིན་ནོ། །བཙུན་པ་མཁན་པོ་གཅིག་དང་། སློབ་དཔོན་གཅིག་དང་། གསོལ་བའི་ལས་གཅིག་གིས་གསུམ་བསྙེན་པར་རྫོགས་སུ་རུང་ལགས་སམ། ཉེ་བ་འཁོར་རུང་ངོ་། །དེ་དག་ལས་གང་རྒན་པ་ལགས། གང་ཡང་མ་ཡིན་
ནོ། །བཙུན་པ་མཁན་པོ་གཅིག་དང་། སློབ་དཔོན་གཅིག་དང་། གསོལ་བའི་ལས་གཅིག་གིས་བཞི་བསྙེན་པར་རྫོགས་སུ་རུང་ལགས་སམ། ཉེ་བ་འཁོར་མི་རུང་ངོ་། །དེ་ཅིའི་ཕྱིར་ཞེ་ན། ཉེ་བ་འཁོར་ཚོགས་ཀྱིས་ཚོགས་ཀྱི་ལས་དག་མི་བྱ་བས་དགེ་འདུན་གྱིས་དགེ་

འདུན་བསྙེན་པར་རྫོགས་པར་འགལ་ཏེ། དགེ་འདུན་གྱིས་དགེ་འདུན་བསྙེན་པར་རྫོགས་པར་བྱེད་ན་འགལ་ཚབས་ཅན་དུ་འགྱུར་རོ། །ཚེ་དང་ལྡན་པ་ཉེ་བ་འཁོར་གྱིས་དེ་གཉིས་གསོལ་བའི་ལས་གཅིག་གིས་བསྙེན་པར་རྫོགས་པར་བྱས་པ་དང་། དེ་གཉིས་གང་ལ་ཕྱག་བྱ་བ་དང་།
ལས་སུ་ཇི་ལྟར་བསྐོ་བར་བྱ་བ་དང་། རྙེད་པ་ཇི་ལྟར་བླང་བ་མི་ཤེས་པའི་སྐབས་དེ་ཚེ་དང་ལྡན་པ་ཉེ་བ་འཁོར་གྱིས་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཉིས་ཀྱིས་གཅིག་ལ་གཅིག་ཕྱག་ནི་མི་བྱའོ། །རྙེད་པ་ནི་གང་སྔར་
འོངས་པས་བླང་བར་བྱའོ། །ཕྱིས་འོངས་པ་དེ་ནི་སྔར་ལས་སུ་བསྐོ་ཞིང་རྙེད་པ་ཕྱིས་སྦྱིན་པར་བྱའོ། །གླེང་གཞི་ནི་མཉན་ཡོད་ནའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་མ་འོངས་པའི་དུས་ན་དགེ་སློང་དྲན་པ་ཉམས་པ་དྲན་པ་
ཞན་པ་དག་འབྱུང་སྟེ། དེ་དག་གིས་གནས་དང་། གྲོང་དང་། གྲོང་རྡལ་གང་དང་། གང་དུ་མདོ་སྡེ་གང་བཤད་པ་དང་། བསླབ་པའི་གཞི་གང་བཅས་པ་མ་འཚལ་བར་གྱུར་ན་དེ་དག་གིས་ཇི་ལྟར་བསྒྲུབ་པར་བགྱི། གཞན་ཡང་མདོ་སྡེ་དང་། འདུལ་བ་དང་། ཆོས་མངོན་
པར་བསྐྱུད་པར་གྱུར་ན་དེ་དག་གིས་ཇི་ལྟར་བསྒྲུབ་པར་བགྱི། གཞན་ཡང་རྒྱལ་པོ་དང་། ཁྱིམ་བདག་དང་། དགེ་བསྙེན་རྣམས་ཀྱི་སྔོན་གྱི་བཀའ་མཆིད་དག་ལ་གནས་དང་། རྒྱལ་པོ་དང་། གྲོང་ཁྱེར་དང་། གྲོང་རྡལ་དང་། ཁྱིམ་བདག་དང་། དགེ་བསྙེན་རྣམས་ཀྱིས་མིང་བསྐྱུད་
པར་གྱུར་ན་དེ་དག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་གང་གིས་གནས་ལ་སོགས་པའི་མིང་བརྗེད་པར་གྱུར་པ་དེ་དག་གིས་གྲོང་ཁྱེར་ཆེན་པོ་དྲུག་ལས་གང་ཡང་རུང་བའམ། ཡང་ན་དེ་བཞིན་གཤེགས་པ་གང་དུ་ལན་མང་དུ་ཞུགས་
པ་བརྗོད་པར་བྱའོ། །ཇི་སྟེ་རྒྱལ་པོའི་མིང་བརྗེད་ན་ནི་གསལ་རྒྱལ་ལོ། །ཁྱིམ་བདག་གི་མིང་ནི་མགོན་མེད་ཟས་སྦྱིན་ནོ། །དགེ་བསྙེན་མ་ནི་རི་དགས་འཛིན་གྱི་མ་ས་གའོ། །སྔོན་གྱི་གཏན་གྱི་གནས་ནི་བཱ་རཱ་ཎ་སཱིའོ། །རྒྱལ་པོ་ནི་ཚངས་སྦྱིན་ནོ། །ཁྱིམ་བདག་ནི་ཁྱིམ་བདག་སྡུམས་བྱེད་དོ། །

དགེ་བསྙེན་མ་ནི་ཁྱིམ་བདག་གསོ་སྦྱོང་སྐྱེས་ཀྱི་ཆུང་མ་བརྗོད་པར་བྱའོ། །མདོ་སྡེ་དང་། འདུལ་བ་དང་། ཆོས་མངོན་པ་རྣམས་བརྗེད་པར་གྱུར་ན་གླེགས་བུ་ལ་བྲིས་ནས་བཅང་བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་
མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། གྲོང་མི་དང་། ལྗོངས་ཀྱི་མི་དང་། ཕྱུག་པོ་དང་། ཚོང་དཔོན་དང་། དེད་དཔོན་རྣམས་ཀྱིས་རིམ་གྲོར་བྱས། བླ་མར་བྱས། ཕུ་དུད་དུ་བྱས། མཆོད་པ་བྱས་པས་
བཅོམ་ལྡན་འདས་ཀྱིས་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་གསོས་ཀྱི་རྐྱེན་སྨན་དང་། ཡོ་བྱད་རྣམས་ཀྱང་བརྙེས་སོ། །མུ་སྟེགས་རྣམས་ནི་རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། གྲོང་མི་དང་། ལྗོངས་ཀྱི་མི་དང་། ཕྱུག་པོ་
དང་། ཚོང་དཔོན་དང་། དེད་དཔོན་རྣམས་ཀྱིས་རིམ་གྲོ་མ་བྱས། བླ་མར་མ་བྱས། ཕུ་དུད་མ་བྱས། མཆོད་པ་མ་བྱས་པས་ཆོས་གོས་དང་། བསོད་སྙོམས་དང་། མལ་སྟན་དང་། ནད་གསོས་ཀྱི་རྐྱེན་སྨན་དང་། ཡོ་བྱད་རྣམས་ཀྱང་མ་རྙེད་པར་གྱུར་ཏོ། །དེ་ནས་བདུད་སྡིག་ཅན་འདི་
སྙམ་དུ་བདག་གིས་ཡུན་རིང་པོ་ནས་དགེ་སྦྱོང་གཽ་ཏ་མ་ལ་རྣམ་པར་མཐོ་བཙམས་ན་གླགས་མ་རྙེད་ཀྱིས་མ་ལ་བདག་གིས་མུ་སྟེགས་རྣམས་ལ་རྣམ་པར་མཐོ་བཙམ་མོ་སྙམ་མོ། །དེའི་ཚེ་རྫོགས་བྱེད་ལ་སོགས་པ་སྟོན་པ་དྲུག་པོ་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་ང་རྒྱལ་བྱེད་པ་
རྣམས་རྒྱལ་པོའི་ཁབ་ན་རྟེན་ཅིང་འཁོད་དོ། །དེ་ནས་བདུད་སྡིག་ཅན་གྱིས་བདག་ཉིད་རྫོགས་བྱེད་ཀྱི་ཆ་བྱད་དུ་མངོན་པར་སྤྲུལ་ནས་ཀུན་ཏུ་རྒྱུ་གནག་ལྷས་ཀྱི་བུ་ག་ལ་བ་དེར་སོང་སྟེ་ཕྱིན་པ་དང་། ཀུན་ཏུ་རྒྱུ་གནག་ལྷས་ཀྱི་བུའི་མདུན་དུ་འབར་བ་དང་། སྣང་བ་དང་། ཆར་འབབ་པ་དང་། གློག་
འགྱུ་བའི་ཆོ་འཕྲུལ་དག་བསྟན་པ་དང་། ཀུན་ཏུ་རྒྱུ་གནག་ལྷས་ཀྱི་བུས་སྨྲས་པ། རྫོགས་བྱེད་ཁྱོད་ཀྱིས་འདི་ལྟ་བུའི་ཡོན་ཏན་གྱི་ཚོགས་རྣམས་ཐོབ་བམ། ཐོབ་བོ། །དེ་བཞིན་དུ་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་

གཉེན་གྱི་བུ་གཅེར་བུ་པའི་མདུན་དུ་འབར་བ་དང་། སྣང་བ་དང་། ཆར་འབབ་པ་དང་། གློག་འགྱུ་བའི་ཆོ་འཕྲུལ་རྣམས་བསྟན་པ་དང་། དེས་ཀྱང་སྨྲས་པ། རྫོགས་བྱེད་ཁྱོད་ཀྱིས་འདི་ལྟ་བུའི་ཡོན་ཏན་གྱི་ཚོགས་རྣམས་ཐོབ་བམ། ཐོབ་བོ། །དེ་བཞིན་དུ་བདག་ཉིད་ཀུན་ཏུ་རྒྱུ་གནག་
ལྷས་ཀྱི་བུའི་ཆ་བྱད་དུ་མངོན་པར་སྤྲུལ་ནས་ཐམས་ཅད་ཀྱི་དྲུང་དུ་སོང་བ་ནས་དེ་བཞིན་དུ་བདག་ཉིད་མི་ཕམ་སྐྲའི་ལ་བ་ཅན་དུ་མངོན་པར་སྤྲུལ་ནས་ཐམས་ཅད་ཀྱི་དྲུང་དུ་སོང་ནས་འདི་ལྟ་བུའི་ཡོན་ཏན་གྱི་ཚོགས་རྣམས་ཁྱོད་ཀྱིས་ཐོབ་བམ། ཐོབ་བོ། །ཞེས་བྱ་བའི་བར་སྔ་མ་བཞིན་ནོ། །དེ་བཞིན་དུ་
བདག་ཉིད་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་གྱི་ཆ་བྱད་དུ་མངོན་པར་སྤྲུལ་ནས་ཐམས་ཅད་ཀྱི་དྲུང་དུ་སོང་ནས་ཞེས་བྱ་བའི་བར་སྔ་མ་བཞིན་ནོ། །དེ་བཞིན་དུ་བདག་ཉིད་ཀ་ཏྱའི་བུ་ནོག་ཅན་གྱི་ཆ་བྱད་དུ་མངོན་པར་སྤྲུལ་ནས་ཐམས་ཅད་ཀྱི་དྲུང་དུ་སོང་ནས་ཞེས་བྱ་བའི་བར་སྔ་མ་བཞིན་ནོ། །
དེ་བཞིན་དུ་བདག་ཉིད་གཅེར་བུ་པ་གཉེན་གྱི་བུའི་ཆ་བྱད་དུ་མངོན་པར་སྤྲུལ་ནས་ཐམས་ཅད་ཀྱི་དྲུང་དུ་སོང་ནས་ཞེས་བྱ་བའི་བར་སྔ་མ་བཞིན་ཏེ། དེ་རྣམས་སོ་སོ་ནས་བསམས་པ། བདག་གཅིག་པུ་མ་གཏོགས་པ་འདི་དག་ཐམས་ཅད་ནི་མཐུ་ཆེ་བ་རྫུ་འཕྲུལ་ཆེ་བའོ་སྙམ་མོ། །དེ་ནས་དུས་གཞན་
ཞིག་ན་རྫོགས་བྱེད་ལ་སོགས་པ་སྟོན་པ་དྲུག་པོ་རྣམས་རྟོག་ཁང་དུ་འདུས་ཤིང་འཁོད་པ་ན་བར་སྐབས་ཀྱི་གཏམ་འདི་ལྟ་བུ་དག་གླེང་སྟེ། ཤེས་ལྡན་དག་སྔོན་ནི་བདག་ཅག་རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། གྲོང་མི་དང་། ལྗོངས་ཀྱི་མི་དང་། ཕྱུག་པོ་དང་།
ཚོང་དཔོན་དང་། དེད་དཔོན་རྣམས་ཀྱིས་བཀུར་སྟིར་བྱས། རི་མོར་བྱས། མཆོད་པར་བྱས་པས་ཆོས་གོས་དང་། བསོད་སྙོམས་དང་། མལ་སྟན་དང་། ན་བའི་རྐྱེན་སྨན་དང་། ཡོ་བྱད་རྣམས་ཀྱང་རྙེད་པར་གྱུར་ཏོ། །ད་ནི་བདག་ཅག་ལ་བཀུར་སྟི་མི་བྱེད། རིམ་གྲོ་མི་
བྱེད། བླ་མར་མི་བྱེད། མཆོད་པར་མི་བྱེད་ཅེས་བྱ་བ་ནས་ཆོས་གོས་དང་། བསོད་སྙོམས་དང་། མལ་སྟན་དང་། ན་བའི་གསོས་ཀྱི་རྐྱེན་སྨན་དང་། ཡོ་བྱད་རྣམས་མི་རྙེད་དོ་ཞེས་བྱ་བའི་བར་སྔ་མ་བཞིན་ནོ། །ཤེས་ལྡན་དག་དགེ་སྦྱོང་གཽ་ཏ་མ་དེ་ལ་ནི་བཀུར་སྟིར་བྱས། རི་མོར་བྱས།

ཞེས་བྱ་བ་ནས། དགེ་སྦྱོང་གཽ་ཏ་མས་ནི་ཆོས་གོས་དང་། བསོད་སྙོམས་དང་། མལ་སྟན་དང་། ནད་གསོས་ཀྱི་རྐྱེན་སྨན་དང་། ཡོ་བྱད་རྣམས་ཀྱང་རྙེད་དོ་ཞེས་བྱ་བའི་བར་སྔ་མ་བཞིན་ནོ། །ཤེས་ལྡན་དག་དེ་ལྟ་བས་ན་བདག་ཅག་གིས་དགེ་སྦྱོང་གཽ་ཏ་མ་
མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་དགུག་པར་བྱ་ཞིང་། གལ་ཏེ་དགེ་སྦྱོང་གཽ་ཏ་མས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་གཅིག་བསྟན་ན་བདག་ཅག་གིས་གཉིས། དགེ་སྦྱོང་གཽ་ཏ་མས་གཉིས་ན་བདག་ཅག་གིས་བཞི། དགེ་སྦྱོང་གཽ་ཏ་མས་བཞི་ན་བདག་ཅག་
གིས་བརྒྱད། དགེ་སྦྱོང་གཽ་ཏ་མས་བརྒྱད་ན་བདག་ཅག་གིས་བཅུ་དྲུག །དགེ་སྦྱོང་གཽ་ཏ་མས་བཅུ་དྲུག་ན་བདག་ཅག་གིས་སུམ་བཅུ་རྩ་གཉིས་ཏེ། དགེ་སྦྱོང་གཽ་ཏ་མས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ཇི་སྙེད་བསྟན་པ་ལས་བདག་ཅག་གིས་མིའི་ཆོས་བླ་མའི་རྫུ་འཕྲུལ་
གྱི་ཆོ་འཕྲུལ་ཉིས་གྱུར་སུམ་གྱུར་དུ་བསྟན་པར་བྱའོ། །དེ་ནས་རྫོགས་བྱེད་ལ་སོགས་པ་སྟོན་པ་དྲུག་པོ་རྣམས་རྒྱལ་པོ་གཟུགས་ཅན་སྙིང་པོ་གང་ན་བ་དེར་སོང་སྟེ་ཕྱིན་ནས་རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང་ཚེ་སྤེལ་བ་བྱས་ནས་འདི་སྐད་ཅེས་སྨྲས་སོ། །ལྷ་བདག་ཅག་
ནི་རྫུ་འཕྲུལ་དང་ལྡན་པ། ཡེ་ཤེས་ཅན་དུ་སྨྲ་བ་ལགས། དགེ་སྦྱོང་གཽ་ཏ་མ་ཡང་བདག་ཉིད་རྫུ་འཕྲུལ་དང་ལྡན་པ། ཡེ་ཤེས་ཅན་དུ་སྨྲ་བ་ལགས་པར་སེམས་ན་དེའི་སླད་དུ་ཡེ་ཤེས་དང་ལྡན་པར་སྨྲ་བ་དང་། ཡེ་ཤེས་དང་ལྡན་པར་སྨྲ་བ་ལྷན་ཅིག་ཏུ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་
སྟོན་དུ་སྩལ་བའི་རིགས་སོ། །གལ་ཏེ་དགེ་སྦྱོང་གཽ་ཏ་མས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་གཅིག་བསྟན་ན་བདག་ཅག་གིས་གཉིས་ཞེས་བྱ་བ་ནས་བདག་ཅག་གིས་མིའི་ཆོས་བླ་མའི་ཆོ་འཕྲུལ་ཉིས་གྱུར་སུམ་གྱུར་དུ་བསྟན་པར་བགྱིའོ་ཞེས་བྱ་བའི་བར་སྔ་མ་བཞིན་ནོ། །དགེ་སྦྱོང་
གཽ་ཏ་མ་ཡང་ཤུལ་གྱི་ཕྱེད་དུ་དགུག་ཏུ་གསོལ། བདག་ཅག་ཀྱང་ཤུལ་གྱི་ཕྱེད་དུ་མཆིའོ། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྫོགས་བྱེད་ལ་སོགས་པ་སྟོན་པ་དྲུག་པོ་རྣམས་ལ་འདི་སྐད་ཅེས་སྨྲས་སོ། །ཀྱེ་རོ་དང་འདྲ་བ་ཁྱེད་ཀྱིས་ཀྱང་བཅོམ་ལྡན་འདས་མིའི་ཆོས་བླ་

མའི་རྫུ་འཕྲུལ་གྱི་ཆོ་འཕྲུལ་ལ་དགུག་གམ་རྒྱལ་པོས་དེ་སྐད་ཅེས་སྨྲས་པ་དང་། དེ་དག་དོང་ངོ་། །ཇི་ཙམ་དུས་གཞན་ཞིག་ན་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་རྒྱལ་པོའི་ཁབ་ནས་ཕྱུང་སྟེ། བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་བཅོམ་
ལྡན་འདས་ཀྱི་སྤྱན་སྔར་སོང་བ་དང་། དེ་དག་དེའི་ལམ་ཀར་སོང་ནས། རྒྱལ་པོ་ལ་རྒྱལ་བ་དང་ཚེ་སྤེལ་བ་བྱས་ནས་འདི་སྐད་ཅེས་སྨྲས་སོ། །ལྷ་བདག་ཅག་ནི་རྫུ་འཕྲུལ་དང་ལྡན་པ་ཡེ་ཤེས་ཅན་དུ་སྨྲ་བ་ལགས་ཞེས་བྱས་ནས། མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ཉིས་གྱུར་
སུམ་གྱུར་དུ་བསྟན་པར་བགྱི་ན་དགེ་སྦྱོང་གཽ་ཏ་མ་ཤུལ་གྱི་ཕྱེད་དུ་དགུག་ཏུ་གསོལ། བདག་ཅག་ཀྱང་ཤུལ་གྱི་ཕྱེད་དུ་མཆིའོ་ཞེས་བྱ་བའི་བར་སྔ་མ་བཞིན་ནོ། །རྒྱལ་པོས་སྨྲས་པ། ཀྱེ་འདིའི་ཚེ་ནི་དེར་ཟད། གལ་ཏེ་ཁྱེད་དོན་འདི་ལན་གསུམ་གྱི་བར་དུ་ཟེར་ན་ཁྱེད་སྤྱུགས་ཏེ་བཏང་ངོ་
ཞེས་དེས་དེ་དག་ཐག་བཅུག་པ་དང་སླར་སོང་ངོ་། །རང་གི་གནས་སུ་ཕྱིན་པ་དང་། ཡང་བགྲོས་པ། ཤེས་ལྡན་དག་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ནི་དགེ་སྦྱོང་གཽ་ཏ་མ་ཕྱོགས་བྱེད་པས་མཉན་ཡོད་ན་ཀོ་ས་ལའི་རྒྱལ་པོ་གསལ་རྒྱལ་གཟུ་བོ་ལྟ་བུ་ཞིག་
ཡོད་ཅེས་གྲག་གིས། གང་གི་ཚེ་དགེ་སྦྱོང་གཽ་ཏ་མ་མཉན་ཡོད་དུ་འོངས་པ་དེའི་ཚེ་བདག་ཅག་གིས་དགེ་སྦྱོང་གཽ་ཏ་མ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་དགུག་པར་བྱའོ། །ཅི་ཙམ་དུས་གཞན་ཞིག་ན་བཅོམ་ལྡན་འདས་རྒྱལ་པོའི་ཁབ་ཏུ་ཇི་སྲིད་དགྱེས་ཀྱི་བར་དུ་བཞུགས་
ནས་མཉན་ཡོད་གང་ན་བར་ལྗོངས་རྒྱུ་ཞིང་གཤེགས་སོ། །རིམ་གྱིས་ལྗོངས་རྒྱུ་ཞིང་གཤེགས་པ་ལས་མཉན་ཡོད་དུ་བྱོན་ནས། མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་རྫོགས་བྱེད་ལ་སོགས་པ་སྟོན་པ་དྲུག་པོ་
རྣམས་ཀྱང་བཅོམ་ལྡན་འདས་ཀྱི་རྗེས་བཞིན་མཉན་ཡོད་དུ་དོང་ངོ་། །དེ་ནས་རིམ་གྱིས་མཉན་ཡོད་དུ་ཕྱིན་པ་དང་། དེ་དག་ལམ་གྱིས་དུབ་པ་ངལ་བསོ་ནས་ཀོ་ས་ལའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་པ་དང་། ཀོ་ས་ལའི་རྒྱལ་པོ་གསལ་རྒྱལ་ལ་རྒྱལ་བ་དང་ཚེ་

སྤེལ་བ་བྱས་ནས་སྨྲས་པ། ལྷ་བདག་ཅག་ནི་རྫུ་འཕྲུལ་དང་ལྡན་པ། ཡེ་ཤེས་ཅན་དུ་སྨྲ་བ་ལགས། དགེ་སྦྱོང་གཽ་ཏ་མ་ཡང་བདག་ཉིད་རྫུ་འཕྲུལ་དང་ལྡན་པ། ཡེ་ཤེས་ཅན་དུ་སྨྲ་བ་ལགས་པར་སེམས་ན། དེའི་སླད་དུ་ཡེ་ཤེས་ཅན་དུ་སྨྲ་བ་དང་། ཡེ་
ཤེས་ཅན་དུ་སྨྲ་བ་ལྷན་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་སྟོན་དུ་སྩལ་བའི་རིགས་སོ། །གལ་ཏེ་དགེ་སྦྱོང་གཽ་ཏ་མས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་གཅིག་བསྟན་ན་བདག་ཅག་གིས་གཉིས། དགེ་སྦྱོང་གཽ་ཏ་མས་གཉིས་ན་བདག་ཅག་གིས་བཞི། དགེ་སྦྱོང་
གཽ་ཏ་མས་བཞིན་བདག་ཅག་གིས་བརྒྱད། དགེ་སྦྱོང་གཽ་ཏ་མས་བརྒྱད་ན་བདག་ཅག་གིས་བཅུ་དྲུག །དགེ་སྦྱོང་གཽ་ཏ་མས་བཅུ་དྲུག་ན་བདག་ཅག་གིས་སུམ་བཅུ་རྩ་གཉིས་ཏེ། དགེ་སྦྱོང་གཽ་ཏ་མས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ཇི་སྙེད་བསྟན་པ་ལས་བདག་ཅག་
གིས་ཉིས་གྱུར་སུམ་གྱུར་ཏུ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་པར་བགྱིས། དགེ་སྦྱོང་གཽ་ཏ་མ་ཤུལ་གྱི་ཕྱེད་དུ་དགུག་ཏུ་གསོལ། བདག་ཅག་ཀྱང་ཤུལ་ཕྱེད་དུ་མཆིའོ། །ཀོ་ས་ལའི་རྒྱལ་པོ་གསལ་རྒྱལ་གྱིས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་བདག་གིས་
བཅོམ་ལྡན་འདས་ལ་ཞུས་ཏེ་བྱས་རེ་ཞིག་སྡོད་ཅིག །དེ་རྣམས་ཀྱིས་སྨྲས་པ། ལྷ་ལེགས་ཀྱིས་དེ་ལྟར་མཛད་དུ་གསོལ་སྡོད་དོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་
འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཙུན་པ་མུ་སྟེགས་ཅན་དེ་རྣམས་བཅོམ་ལྡན་འདས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་སྤྱན་འདྲེན་ན་དེའི་སླད་
དུ་བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་དུ་གསོལ། མུ་སྟེགས་ཅན་རྣམས་ཐག་སྩལ་དུ་གསོལ། ལྷ་དང་མི་རྣམས་དགའ་བར་བགྱིར་གསོལ། སྐྱེས་བུ་དམ་པ་རྣམས་གློ་བ་རངས་པར་བགྱིར་གསོལ། དེ་སྐད་ཅེས་གསོལ་པ་དང་། བཅོམ་

ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ང་ནི་ཉན་ཐོས་རྣམས་ལ་འདི་སྐད་དུ་དགེ་སློང་དག་ཁྱེད་ཚུར་བྲམ་ཟེ་དང་ཁྱིམ་བདག་འོངས་ཤིང་འོངས་པ་རྣམས་ལ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་སྟོན་ཅིག་ཅེས་ཆོས་སྟོན་པར་མི་བྱེད་
ཀྱི། འོན་ཀྱང་ང་ནི་ཉན་ཐོས་རྣམས་ལ་འདི་སྐད་དུ་དགེ་སློང་དག་དགེ་བ་ནི་མ་སྤྱོམས་ཤིག །སྡིག་པ་ནི་ཤོགས་ཏེ་གནོས་ཤིག་ཅེས་ཆོས་སྟོན་ཏོ། །ཀོ་ས་ལའི་རྒྱལ་པོ་གསལ་རྒྱལ་གྱིས་ལན་གཉིས་ལན་གསུམ་གྱི་བར་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་
མུ་སྟེགས་ཅན་དེ་རྣམས་བཅོམ་ལྡན་འདས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་སྤྱན་འདྲེན་ན་དེའི་སླད་དུ་བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་དུ་གསོལ། མུ་སྟེགས་ཅན་རྣམས་ཐག་སྩལ་དུ་གསོལ། ལྷ་དང་མི་རྣམས་དགའ་བར་བགྱིར་གསོལ།
སྐྱེས་བུ་དམ་པ་རྣམས་གློ་བ་རངས་པར་བགྱིར་གསོལ། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་ལན་གཉིས་ལན་གསུམ་གྱི་བར་དུ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ང་ནི་ཉན་ཐོས་རྣམས་ལ་འདི་སྐད་དུ་དགེ་སློང་དག་ཁྱེད་ཚུར་བྲམ་ཟེ་དང་ཁྱིམ་བདག་འོངས་ཤིང་
འོངས་པ་རྣམས་ལ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་སྟོན་ཅིག་ཅེས་ཆོས་སྟོན་པར་མི་བྱེད་ཀྱི། འོན་ཀྱང་ང་ནི་ཉན་ཐོས་རྣམས་ལ་འདི་སྐད་དུ་དགེ་སློང་དག་དགེ་བ་ནི་མ་སྤྱོམས་ཤིག །སྡིག་པ་ནི་ཤོགས་ཏེ་གནོས་ཤིག་ཅེས་ཆོས་སྟོན་ཏོ། །སངས་རྒྱས་བཅོམ་ལྡན་འདས་རྣམས་ཀྱི་
ངེས་པར་མཛད་པ་ནི་ལྔ་ཡིན་ཏེ། ལྔ་གང་ཞེ་ན། སྔ་ཕྱི་མེད་པའི་སེམས་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་མཛད་པ་དང་། ཉན་ཐོས་དགེ་བའི་རྩ་བ་བསགས་པ་རྒྱལ་ཚབ་ཏུ་དབང་བསྐུར་བས་དབང་བསྐུར་བར་མཛད་པ་དང་། ཡབ་དང་ཡུམ་
བདེན་པ་ལ་འགོད་པར་མཛད་པ་དང་། མཉན་ཡོད་དུ་ཆོ་འཕྲུལ་ཆེན་པོ་བསྟན་པར་མཛད་པ་དང་། སངས་རྒྱས་ཀྱིས་གདུལ་བར་བྱ་བ་ཐམས་ཅད་འདུལ་བའོ། །བཅོམ་ལྡན་འདས་ཀྱིས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོ་འཕྲུལ་ཆེན་པོ་གང་དུ་བསྟན་ཅེས་

དགོངས་ན་མཉན་ཡོད་དུ་ཡིན་པར་གཟིགས་སོ། །ཡང་སྐྱེ་བོའི་ཚོགས་ཆེན་པོས་དུས་ཇི་ཙམ་ན་ཁོང་དུ་ཆུད་པར་འགྱུར་ཞེས་དགོངས་ན་ཞག་བདུན་ལོན་ནས་འགྱུར་བར་མཁྱེན་ནས་ཀོ་ས་ལའི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་སོང་ལ་
དེ་བཞིན་བྱས་ཅི་རིགས་པར་སྒྲུབས་ཤིག་ཅེས་གྱིས་ཤིག །བཅོམ་ལྡན་འདས་དུས་ཇི་ཙམ་ན། རྒྱལ་པོ་ཆེན་པོ་ཞག་བདུན་ནའོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་སྟེ། མུ་
སྟེགས་ཅན་རྣམས་ལ་སྨྲས་པ། ཀྱེ་བཅོམ་ལྡན་འདས་ནི་ཞག་བདུན་ན་རྫུ་འཕྲུལ་གྱི་ཆོ་འཕྲུལ་ཆེན་པོ་སྟོན་པར་མཛད་ཀྱིས་ཁྱེད་ཅག་གིས་བྱ་ཞིང་བཤམ་དགོས་པ་ཅི་ཡོད་པ་དེ་གྱིས་ཤིག །མུ་སྟེགས་ཅན་རྣམས་ཀྱིས་བགྲོས་པ། ཤེས་ལྡན་དག་ཡང་ན་ནི་དགེ་སྦྱོང་གཽ་ཏ་མ་འབྲོས་པར་
འགྱུར་རོ། །ཡང་ན་ནི་གྲོགས་ཚོལ་བར་འགྱུར་ན་དེ་ལ་ཇི་ལྟར་བསྒྲུབ། དེ་དག་འདི་སྐད་ཅེས་ཀྱེ་དགེ་སྦྱོང་གཽ་ཏ་མ་ནི་གདོན་མི་ཟ་བར་གྲོགས་ཚོལ་བར་འགྱུར་བས་ཇི་སྟེ་དེ་ལྟར་གྱུར་ན་བདག་ཅག་གིས་ཀྱང་གྲོགས་བཙལ་ལོ། །དེའི་ཚེ་ཀུ་ཤའི་གྲོང་ཁྱེར་ན་ཀུན་དུ་རྒྱུ་ཤིན་ཏུ་བཟང་པོ་ཞེས་བྱ་
བ་རྒས་པ། འཁོགས་པ། གཏུགས་པ། ཀུ་ཤའི་གྲོང་ཁྱེར་གྱི་གྱད་རྣམས་ཀྱིས་དགྲ་བཅོམ་པར་བཀུར་ཞིང་རིམ་གྲོ་བྱས། བཀུར་སྟིར་བྱས། བླ་མར་བྱས། མཆོད་པར་བྱས་པ་ཞིག་འདུག་གོ། །དེ་རྣམས་ཀྱིས་གྲོས་བཅས་ནས་དེའི་དྲུང་དུ་སོང་སྟེ་སྨྲས་པ། ཤིན་ཏུ་བཟང་
པོ་ཁྱོད་དང་བདག་ཅག་ཚངས་པ་མཚུངས་པར་སྤྱོད་པ་ཡིན་ཏེ། བདག་ཅག་གིས་དགེ་སྦྱོང་གཽ་ཏ་མ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་བོས་ཀྱིས་གྲོགས་གྱིས་ཤིག །དེས་སྨྲས་པ། ཀྱེ་ཁྱེད་ཀྱིས་དགེ་སྦྱོང་གཽ་ཏ་མ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་བོས་པ་ནི་མ་ལེགས་
པ་ཞིག་བྱས་སོ། །དེ་ཅིའི་ཕྱིར་ཞེ་ན། དེ་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་ནོ། །ཇི་ལྟར་ཤེས། འཐད་པ་ལགས་སོ། །འདི་ལ་གཏན་ཚིགས་ཅི་ཡོད། ཤེས་ལྡན་དག་གང་གི་ཚེ་དགེ་སྦྱོང་གཽ་ཏ་མ་འཇིག་རྟེན་དུ་མ་བྱུང་བ་དེའི་ཚེ་ཁོ་བོ་དལ་གྱིས་འབབ་པ་ཞེས་བྱ་བའི་མཚོ་འགྲམ་

ན་ཉིན་མོ་གནས་ཤིང་ཁོ་བོ་བསོད་སྙོམས་བླངས་ནས་མཚོ་ཆེན་པོ་མ་དྲོས་པར་སོང་སྟེ་ཟའོ། །དེ་ན་ཁོ་བོ་ཕྱོགས་གཅིག་ན་འདུག་པ་ལ་མ་དྲོས་པ་ན་གནས་པའི་ལྷ་རྣམས་ཀྱིས་ཆུ་བཅུས་ཤིང་སྦྱིན་པར་བྱེད་དོ། །གང་གི་ཚེ་དགེ་སྦྱོང་གཽ་ཏ་མ་འཇིག་རྟེན་དུ་བྱུང་བ་དེའི་ཚེ་དེའི་ཉན་ཐོས་ཀྱི་མཆོག་ཤཱ་
རིའི་བུ་ཞེས་བྱ་བ་དེའི་དགེ་སྦྱོང་སྐུལ་བྱེད་ཅེས་བྱ་བ་དེས་ཕྱག་དར་ཁྲོད་པ་ཁྱེར་ནས་མཚོ་ཆེན་པོ་མ་དྲོས་པར་འོངས་པ་དང་། མ་དྲོས་པ་ན་གནས་པའི་ལྷ་དེ་རྣམས་དེའི་ཕྱག་དར་ཁྲོད་པ་དེ་དག་བཀྲུས་ནས་འབུལ་བར་བྱེད་ལ། བཀྲུས་པའི་ཆུ་དེས་ཀྱང་བདག་ཉིད་ཀྱི་མགོ་བོར་འདེབས་པར་བྱེད་དོ། །
དེ་ལྟ་བས་ན་བདག་ཅག་གང་གི་ཡང་སློབ་མ་དང་ཡང་མི་མཉམ་པ་དེ་ཁྱེད་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་བོས་པ་ནི་མ་ལེགས་པར་བྱས་སོ། །དེ་རྣམས་ཕན་ཚུན་དུ་ཀྱེ་འདི་ཡང་དེའི་ཕྱོགས་ཞིག་ཡིན་པས་བདག་ཅག་གཞན་ཚོལ་དུ་འདོང་ངོ་ཞེས་སྨྲས་ནས་དེ་རྣམས་ཀྱིས་དེ་ལ་གཡོའི་
ཀུན་ཏུ་སྤྱོད་པས་བཀུར་སྟི་བྱ་བ་ལྟར་བྱས་ཏེ་དོང་ནས་ས་ཕྱོགས་དབེན་པ་གཞན་ཞིག་ཏུ་འདུག་ནས་བགྲོས་པ། ཀྱེ་བདག་ཅག་གིས་གྲོགས་གཞན་ཇི་ལྟར་བཙལ་བར་བྱ་སྨྲོས་ཤིག །དེ་ལས་ཁ་ཅིག་གིས་སྨྲས་པ། གྲོང་ཁྱེར་སྐྱེད་མོས་ཚལ་གྱི་ནགས་ཞེས་བྱ་བ་འདི་ན་ལྔ་མངོན་པར་
ཤེས་པ་ཆེ་གེ་མོ་ཞིག་གནས་པས་དེའི་གན་དུ་དོང་དང་། དེ་བདག་ཅག་གི་གྲོགས་བྱེད་པར་འགྱུར་རོ། །ཁ་ཅིག་གིས་སྨྲས་པ། དེས་མི་ནུས་ཀྱི་འོན་ཀྱང་དཀའ་ཐུབ་ཀྱི་ནགས་ཚལ་ཆེ་གེ་མོ་ཞེས་བྱ་བ་ན་དཀའ་ཐུབ་ཅན་ལྔ་མངོན་པར་ཤེས་པ་ཆེ་གེ་མོ་ཞེས་བྱ་བ་གནས་པ་དེའི་དྲུང་དུ་དོང་ན་དེ་
བདག་ཅག་གི་གྲོགས་བྱེད་པར་འགྱུར་རོ། །དེའི་ཚེ་གངས་རིའི་སུལ་ཤིང་སྣ་ཚོགས་ཀྱི་ནགས་ཚལ་གྱིས་བརྒྱན་པ། ཆུ་མིག་དང་། མེ་ཏོག་དང་། འབྲས་བུ་དང་། རྩ་བ་ཕུན་སུམ་ཚོགས་པ། འབབ་ཆུ་དང་། མཚེ་འུས་མཛེས་པར་བྱས་པ་ན་དྲང་སྲོང་ལྔ་བརྒྱ་ཙམ་ཞིག་གནས་ཏེ་
ཕལ་ཆེར་མངོན་པར་ཤེས་པ་ལྔ་དང་ལྡན་པའོ། །དེའི་ནང་ནས་དྲང་སྲོང་མངོན་པར་ཤེས་པ་ལྔ་དང་ལྡན་པ་གཅིག་གྲོང་ཁྱེར་གྱི་ཉེ་འཁོར་དུ་འོངས་ནས་དེ་ཕན་ཚུན་འཕྱན་པ་ལས་དེ་རྣམས་ཀྱི་དྲུང་དུ་འོངས་པ་དང་། དེ་རྣམས་ཀྱིས་དེ་ལ་བྱོན་པ་ལེགས་སོ་ཞེས་བྱ་བ་ཀུན་ཏུ་སྤྱད་ནས་ཁྱོད་གང་

ནས་འདིར་འོངས་ཞེས་དྲིས་པ་དང་། དེས་ཇི་ལྟར་གྱུར་པ་རྣམས་བརྗོད་དོ། །དེ་རྣམས་ཡིད་བདེ་བ་སྐྱེས་ནས་དེ་དག་གི་དྲུང་དུ་སོང་ངོ་། །དེ་ནས་ཕན་ཚུན་ཡང་དག་པར་དགའ་བར་བྱས་ནས་ལམ་གྱིས་དུབ་པ་ངལ་བསོ་སྟེ། ཀྱེ་ཁྱེད་དང་བདག་ཅག་ཚངས་པ་མཚུངས་པར་
སྤྱོད་པ་ཡིན་ཏེ། བདག་ཅག་གིས་དགེ་སྦྱོང་གཽ་ཏ་མ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་བོས་ན་ཁྱེད་ཀྱིས་ཀྱང་གྲོགས་གྱིས་ཤིག །དེ་དག་གིས་སྨྲས་པ། ཀྱེ་ལེགས་ཏེ་དེ་བཞིན་དུ་བྱ་ན་འོན་ཀྱང་ངེད་ལ་མཚན་མ་སྟོན་ཅིག །དེ་རྣམས་ཡིད་བདེ་བ་སྐྱེས་ནས་དེ་དག་ལ་གུས་པར་སྨྲ་
བས་མགུ་བར་བྱས་ཏེ་དོང་ངོ་། །རེ་ཞིག་ན་ཀོ་ས་ལའི་རྒྱལ་པོ་གསལ་རྒྱལ་གྱི་མས་དབེན་གྱི་ནུ་བོ་རྒྱལ་བུ་གཞོན་ནུ་ན་གུ་ཞེས་བྱ་བ་དེ་དྲི་དང་མེ་ཏོག་གི་ཕྲེང་བས་བརྒྱན་ནས་རྒྱལ་པོའི་ཕོ་བྲང་གི་དྲུང་ན་མར་སོང་བ་ལས་དེའི་བཙུན་མོ་ཞིག་སྟེང་གི་ཁང་བཟངས་ཀྱི་ཐོག་ནས་མེ་ཏོག་གི་ཕྲེང་བ་
བོར་བ་དང་། དེའི་ལུས་ལ་ཕོག་པ་གཞན་ཞིག་གིས་མཐོང་ངོ་། །འཇིག་རྟེན་ན་མཛའ་བ་དང་མི་མཛའ་བ་དང་ཐ་མལ་པ་ཡིན་པས་དེས་ཀྱང་བློན་པོ་ལ་བྱས་སོ། །བློན་པོས་ཀྱང་རྒྱལ་པོ་ལ་ལྷ་རྒྱལ་བུ་གཞོན་ནུ་ན་གུ་ནི་ལྷའི་བཙུན་མོ་དང་ཁྲིའོ་ཞེས་གསོལ་ཏོ། །རྒྱལ་པོ་རྣམས་ནི་མ་བརྟགས་
པར་བྱེད་པ་ཡིན་པས་དེས་བློན་པོ་རྣམས་ལ་ཤེས་ལྡན་དག་ངས་རྒྱལ་བུ་གཞོན་ནུ་ན་གུ་ཡོངས་སུ་བཏང་གིས་དེང་ལ་རྐང་ལག་མེད་པར་གྱིས་ཤིག་ཅེས་བསྒོ་བ་དང་། དེ་དག་གིས་དེ་སྲང་དུ་ཁྲིད་ནས་རྐང་ལག་མེད་པར་བྱས་ཏེ་བཞག་ནས་དེའི་གཉེན་མིག་མཆི་མས་གང་བ་རྣམས་དང་། སྐྱེ་
བོའི་ཚོགས་ཆེན་པོ་གཞན་དག་གིས་ཀྱང་ཡོངས་སུ་བསྐོར་ཅིང་འདུག་གོ། །ཅི་ཙམ་ན་མུ་སྟེགས་ཅན་རྣམས་ཀྱང་ཕྱོགས་དེར་འོངས་པ་དང་། དེ་དག་ལ་དེའི་གཉེན་རྣམས་ཀྱིས་འཕགས་པ་རྒྱལ་བུ་གཞོན་ནུ་ན་གུའི་ཡན་ལག་དང་ཉིང་ལག་དག་ཇི་ལྟར་སྔ་མཁོ་བཞིན་དུ་འགྱུར་བའི་
བདེན་པའི་ཚིག་མཛད་དུ་གསོལ་ཞེས་སྨྲས་པ་དང་། དེ་དག་སྤོབས་པ་མེད་ནས་ཅང་མི་ཟེར་བར་ལངས་ཏེ་དོང་ངོ་། །ཇི་ཙམ་ན་ཚེ་དང་ལྡན་པ་ཀུན་དགའ་བོ་བསོད་སྙོམས་ལ་རྒྱུ་བ་ལས་ཕྱོགས་དེར་ཕྱིན་པ་དང་། དེ་དག་གིས་དེ་ལ་སྨྲས་པ། འཕགས་པ་རྒྱལ་བུ་གཞོན་ནུ་ན་གུ་ཡན་

ལག་དང་ཉིང་ལག་ཇི་ལྟར་སྔ་མཁོ་བཞིན་དུ་འགྱུར་བར་བདེན་པའི་ཚིག་མཛད་དུ་གསོལ། དེས་སྨྲས་པ། ཤེས་ལྡན་དག་བཅོམ་ལྡན་འདས་ལ་ཞུས་ཏེ་འོང་ངོ་ཞེས་བྱས་པ་དང་། དེ་དག་འདི་ད་ནི་སོས་ཟིན་ཏོ་ཞེས་དབུགས་ཕྱིན་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་རིངས་པ་
རིངས་པར་མཉན་ཡོད་དུ་སོང་སྟེ་བསོད་སྙོམས་བཞག་ནས་བཅོམ་ལྡན་འདས་ཀྱི་སྤྱན་སྔར་སོང་སྟེ་སྐབས་དེ་བཅོམ་ལྡན་འདས་ལ་རྒྱ་ཆེར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། །ཀུན་དགའ་བོ་སོང་ལ་རྒྱལ་བུ་གཞོན་ནུ་ན་གུའི་གཉེན་གྱིས་ཡན་ལག་དང་ཉིང་ལག་
དག་གནས་ཇི་ལྟ་བ་བཞིན་དུ་འཇོག་ཏུ་ཆུག་ལ་བདེན་པའི་ཚིག་འདི་ལྟར་གྱིས་ཤིག །བདེན་པ་དང་བདེན་པའི་ཚིག་གང་གིས་སེམས་ཅན་རྐང་པ་མེད་པ་དང་། རྐང་གཉིས་དང་། རྐང་བཞི་པ་དང་། རྐང་མངས་དང་། གཟུགས་ཅན་དང་། གཟུགས་མེད་པ་དང་། འདུ་ཤེས་ཡོད་
པ་དང་། འདུ་ཤེས་མེད་པ་དང་། འདུ་ཤེས་མེད་འདུ་ཤེས་མེད་མིན་གང་སུ་ཡང་རུང་དེ་དག་གི་ནང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཆོག་ཏུ་གསུངས་པ་དང་། འདུས་བྱས་དང་། འདུས་མ་བྱས་ཀྱི་ཆོས་གང་ཅི་ཡང་རུང་བ་དེ་དག་གི་ནང་ན་འདོད་
ཆགས་དང་བྲལ་བའི་ཆོས་མཆོག་ཏུ་གསུངས་པ་དང་། འདུས་པའམ། མང་པོའམ། ཚོགས་པའམ། འཁོར་གང་སུ་ཡང་རུང་དེ་དག་གི་ནང་ན་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མཆོག་ཏུ་གསུངས་པ་དང་། ཚུལ་ཁྲིམས་དང་། བརྟུལ་ཞུགས་དང་། དཀའ་
ཐུབ་དང་། ཚངས་པར་སྤྱོད་པ་ལ་གནས་པ་གང་ཅི་ཡང་རུང་བ་དེ་དག་གི་ནང་ན་འཕགས་པ་དགྱེས་པའི་ཚུལ་ཁྲིམས་མཆོག་ཏུ་གསུངས་པའི་བདེན་པ་དང་བདེན་པའི་ཚིག་འདིས་རྒྱལ་བུ་གཞོན་ནུ་ན་གུའི་ཡན་ལག་དང་ཉིང་ལག་དག་སྔོན་གྱི་ཇི་ལྟ་བ་བཞིན་དུ་གྱུར་ཅིག་ཅེས་བྱོས་ཤིག་དང་སྔ་མཁོ་བཞིན་
དུ་འགྱུར་རོ། །ཚེ་དང་ལྡན་པ་ཀུན་དགའ་བོས་བཙུན་པ་དེ་ལྟར་འཚལ་ལོ་ཞེས་བཅོམ་ལྡན་འདས་ཀྱི་ལྟར་མཉན་ནས་དེའི་གཉེན་རྣམས་ཀྱིས་ཡན་ལག་དང་ཉིང་ལག་གནས་ཇི་ལྟ་བ་བཞིན་དུ་བཞག་ནས་འདི་ལྟར་བདེན་པའི་ཚིག་བྱ་བར་བརྩམས་ཏེ། བདེན་པ་དང་བདེན་པའི་ཚིག་གང་གིས་

སེམས་ཅན་རྐང་པ་མེད་པ་དང་ཞེས་བྱ་བ་ནས། གང་སུ་ཡང་རུང་དེ་དག་གི་ནང་ན་འཕགས་པ་དགྱེས་པའི་ཚུལ་ཁྲིམས་མཆོག་ཏུ་གསུངས་པའི་བདེན་པ་དང་བདེན་པའི་ཚིག་དེས་དེ་ཡན་ལག་དང་ཉིང་ལག་སྔ་མཁོ་བཞིན་དུ་གྱུར་ཅིག་ཅེས་བྱ་བའི་བར་སྔ་མ་བཞིན་དུ་བྱས་པ་དང་།
བདེན་པའི་ཚིག་གིས་དེའི་ཡན་ལག་དང་ཉིང་ལག་ཇི་ལྟར་སྔ་མ་བཞིན་དུ་གནས་པར་གྱུར་ནས་སྐྱེ་བོའི་ཚོགས་ཀྱིས་ངོ་མཚར་དུ་གྱུར་པའི་མིག་ཕྱེ་སྟེ། ཨ་ལ་ལ་འཕགས་པ་ཀུན་དགའ་བོས་མུ་སྟེགས་ཅན་ཕམ་པར་བྱས་སོ་ཞེས་སྒྲ་བོ་ཆེ་བཏོན་ཏོ། །དེ་ནས་ཚེ་དང་ལྡན་པ་ཀུན་དགའ་བོས་རྒྱལ་བུ་
གཞོན་ནུ་ན་གུ་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་བཙུན་པ་རྒྱལ་བུ་གཞོན་ནུ་ན་གུ་དེ་ནི་འདི་
ལགས་སོ་ཞེས་གསོལ་པ་དང་། དེ་ནས་རྒྱལ་བུ་གཞོན་ནུ་ན་གུས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་དེ་དང་འཚམ་པའི་ཆོས་
བསྟན་པ་མཛད་དོ། །རྒྱལ་བུ་གཞོན་ནུ་ན་གུས་དེ་ཐོས་མ་ཐག་ཏུ་བདེན་པ་མངོན་པར་རྟོགས་ཏེ་ཕྱིར་མི་འོང་བའི་འབྲས་བུ་མངོན་དུ་བྱས་ཤིང་རྫུ་འཕྲུལ་ཡང་ཐོབ་པར་གྱུར་ཏོ། །ཀོ་ས་ལའི་རྒྱལ་པོ་གསལ་རྒྱལ་གྱིས་འཕགས་པ་ཀུན་དགའ་བོས་བདེན་པའི་ཚིག་ཇི་ལྟ་བ་བཞིན་དུ་བྱས་པས་རྒྱལ་
བུ་གཞོན་ནུ་ན་གུའི་ཡན་ལག་དང་ཉིང་ལག་སྔ་མཁོ་བཞིན་དུ་གྱུར་ཏོ་ཞེས་ཐོས་སོ། །ཐོས་ནས་ཀྱང་རྒྱལ་བུ་གཞོན་ནུ་ན་གུ་གང་ན་བ་དེར་སོང་སྟེ་ཕྱིན་ནས། རྒྱལ་བུ་གཞོན་ནུ་ན་གུ་ལ་འདི་སྐད་ཅེས་སྨྲས་སོ། །གཞོན་ནུ་ཚུར་ཤོག་ཁྱིམ་དུ་འདོང་། དེས་སྨྲས་པ། ལྷ་བདག་ནི་བཅོམ་ལྡན་
འདས་ལ་བསྙེན་བཀུར་འཚལ་ཞིང་འདི་ཉིད་དུ་མཆིས་སོ། །ལེགས་ཀྱིས་དེ་བཞིན་དུ་གྱིས་ཤིག་ཅེས་དེས་ཀུན་དགའི་ར་བའི་ནང་དེར་འཆགས་བྱས་སོ། །དེ་དེ་ན་འདུག་པ་ན་དེའི་ཡན་ལག་དང་ཉིང་ལག་དུམ་བུ་སླར་འབྱོར་པས་དེའི་མིང་དུམ་བུའི་ཀུན་དགའ་ར་བ་པ་དུམ་བུའི་ཀུན་དགའ་ར་བ་པ་

ཞེས་བྱ་བར་ཆགས་སོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བཅོམ་ལྡན་འདས་ཀྱིས་གནང་ན་བདག་གིས་མཉན་ཡོད་ནས་རྒྱལ་བྱེད་ཀྱི་ཚལ་ཇི་སྲིད་པ་དེའི་བར་དུ་ཆོ་འཕྲུལ་ཆེན་པོ་བསྟན་པའི་འདུན་ཁང་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་ཀྱིས་
གྱིས་ཤིག་དང་དེར་གདོན་མི་ཟ་བར་སྐྱེ་བོའི་ཚོགས་ཆེན་པོ་འདུ་བར་འགྱུར་རོ་ཞེས་བཀའ་སྩལ་པ་དང་། ཀོ་ས་ལའི་རྒྱལ་པོ་གསལ་རྒྱལ་གྱིས་མཉན་དུ་ཡོད་པ་དང་། རྒྱལ་བྱེད་ཀྱི་ཚལ་ཇི་སྲིད་པ་དེའི་བར་དུ་ས་གཞི་ཡོངས་སུ་སྦྱངས་ནས་ཆོ་འཕྲུལ་ཆེན་པོ་བསྟན་པའི་འདུན་ཁང་བཤམས་
ཏེ་འདུན་ཁང་གོས་བརྒྱ་སྟོང་རི་བས་གཡོགས་པ། ཙན་དན་གྱི་ཆུས་ཆག་ཆག་བཏབ་པ། དྲི་ཞིམ་པོའི་བདུག་པའི་སྣོད་བཞག་པ། བ་དན་དང་རྒྱལ་མཚན་བསྒྲེང་བ། དར་གྱི་ཆུན་འཕྱང་གི་ཚོགས་དཔྱངས་པ། མེ་ཏོག་སིལ་མ་སྣ་ཚོགས་བཀྲམ་པ། ལྷ་རྣམས་ཀྱི་དགའ་
ཚལ་གྱི་སྐྱེད་མོས་ཚལ་བཞིན་དུ་ཉམས་དགའ་བར་བྱས་ནས་དེར་བཅོམ་ལྡན་འདས་ཀྱི་ཕྱིར་རྡོ་རྗེ་དང་། བཻ་ཌཱུརྱ་དང་། མརྒད་དང་། བྱི་རུ་དང་། ནོར་བུ་དང་། མུ་ཏིག་དང་། ཨན་ད་རྙིལ་དང་། མཐོན་ཀ་ཆེན་པོ་དང་། པདྨ་རཱ་གས་བརྒྱན་ཅིང་སྤྲས་པའི་གསེར་གྱི་སེང་གེའི་ཁྲི་
ཡང་བཤམས་སོ། །མུ་སྟེགས་ཅན་གྱི་དགེ་བསྙེན་རྣམས་ཀྱིས་ཀྱང་རང་གི་འབྱོར་པ་དང་མཐུན་པའི་གོས་ཀྱིས་གཡོགས་པའི་འདུན་ཁང་དྲུག་ཀྱང་བྱས། སྟན་དྲུག་ཀྱང་བཤམས་ནས་དེ་དག་ཏུ་མུ་སྟེགས་ཅན་རྣམས་རང་གི་འཁོར་གྱིས་བསྐོར་ནས་སྔར་འོངས་ཏེ་འདུག་ནས་རྒྱལ་པོ་ལ་ལྷ་
བདག་ཅག་ནི་མཆིས་ལགས་ན་དགེ་སྦྱོང་གཽ་ཏ་མ་དགུག་ཏུ་གསོལ་ཞེས་ཕོ་ཉ་བཏང་ངོ་། །རྒྱལ་པོས་ཐོས་ནས་ཀྱང་བཙུན་མོ་དང་། གཞོན་ནུ་དང་། ཕོ་བྲང་འཁོར་གྱི་མི་དང་བཅས་ཏེ་ཆོ་འཕྲུལ་ཆེན་པོའི་འདུན་ཁང་དུ་སོང་ནས་དེས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་ཚུར་ཤོག །

བཅོམ་ལྡན་འདས་གང་ན་བཞུགས་པ་དེར་སོང་ལ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བདག་གི་མཆིད་ནས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོའམ། སྟོབས་དང་བདེ་བ་ལ་རེག་
པར་གནས་སམ། ཁ་ན་མ་ཐོ་བ་མི་མངའའམ་ཞེས་སྙུན་གསོལ་ལ་འདི་སྐད་ཅེས་བཙུན་པ་མུ་སྟེགས་ཅན་དེ་རྣམས་ཚོགས་ཤིང་མཆིས་ལགས་ན། བཅོམ་ལྡན་འདས་ཀྱིས་དེའི་དུས་ལ་བབ་པར་དགོངས་སུ་གསོལ་ཞེས་ཀྱང་གསོལ་ཅིག །ལྷ་དེ་ལྟར་འཚལ་ལོ་ཞེས་བྲམ་ཟེའི་
ཁྱེའུ་བླ་མ་ཀོ་ས་ལའི་རྒྱལ་པོ་གསལ་རྒྱལ་གྱི་ལྟར་མཉན་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་དང་ལྷན་ཅིག་ཕན་ཚུན་ཡང་དག་པར་དགའ་བ་དང་། ཡང་དག་པར་མགུ་བར་གྱུར་པའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ །
ཕྱོགས་གཅིག་ཏུ་འདུག་ནས་བྲམ་ཟེའི་ཁྱེའུ་བླ་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱཻ་གཽ་ཏ་མ་ཀོ་ས་ལའི་རྒྱལ་པོ་གསལ་རྒྱལ་གཽ་ཏ་མའི་ཞབས་ལ་ཕྱག་འཚལ་ནས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོའམ། སྟོབས་དང་བདེ་བ་ལ་
རེག་པར་གནས་སམ། ཁ་ན་མ་ཐོ་བ་མི་མངའ་འམ་ཞེས་སྙུན་གསོལ་ཞིང་མཆིས་ཞེས་གསོལ་པ་དང་། བྲམ་ཟེའི་ཁྱེའུ་བླ་མ་ཀོ་ས་ལའི་རྒྱལ་པོ་གསལ་རྒྱལ་དང་། ཁྱོད་བདེ་བར་གྱུར་ཅིག །ཀོ་ས་ལའི་རྒྱལ་པོ་གསལ་རྒྱལ་གྱི་མཆིད་ནས་ཀྱེ་གཽ་ཏ་མ་མུ་སྟེགས་ཅན་རྣམས་ཆོ་
འཕྲུལ་ཆེན་པོའི་འདུན་ཁང་དུ་ལྷགས་ནས་འདུས་ཤིང་མཆིས་ན་བཅོམ་ལྡན་འདས་ཀྱིས་དེའི་དུས་ལ་བབ་པར་དགོངས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བླ་མ་སོང་ཤིག་ང་ཡང་འོང་ངོ་ཞེས་བཀའ་སྩལ་པ་དང་། བྲམ་ཟེའི་ཁྱེའུ་བླ་མ་སོང་ངོ་། །བཅོམ་ལྡན་འདས་
ཀྱིས་ཇི་ལྟར་ངང་པའི་རྒྱལ་པོ་འདབ་མ་བརྐྱང་བ་དེ་ལྟར་བྱིན་གྱིས་བརླབས་ནས་ནམ་མཁའི་དཀྱིལ་དུ་འཕགས་ཏེ། སྲོག་ཆགས་བརྒྱ་སྟོང་དུ་མ་ངོ་མཚར་གྱི་མིག་ཕྱེ་ནས་ཨ་ལ་ལ་ཞེས་ཅ་ཅོ་དང་ག་ཞའི་སྒྲ་བཏོན་ཏེ་ལྟ་བཞིན་དུ་ནམ་མཁའ་ལས་ཆོ་འཕྲུལ་ཆེན་པོའི་འདུན་ཁང་དུ་གཤེགས་

སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་འབྱོར་པ་དེ་དག་མཐོང་ནས་ཡ་མཚན་གྱིས་ཡིད་དད་པར་གྱུར་ཏེ་མུ་སྟེགས་ཅན་རྣམས་ལ་འདི་སྐད་ཅེས་སྨྲས་སོ། །ཀྱེ་བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཟིན་ཏེ། ད་ནི་ཁྱེད་ཀྱི་རེས་ལ་བབ་ཀྱིས་
ཁྱེད་ཀྱིས་སྟོན་ཅིག །དེ་རྣམས་ཀྱིས་སྨྲས་པ། ལྷ་གཞེས་ཤིག་སྐྱེ་བོའི་ཚོགས་ཆེན་པོ་འདིར་འདུས་ལགས་ན་ཆོ་འཕྲུལ་ཆེན་པོ་འདི་ཅི་དགེ་སྦྱོང་གཽ་ཏ་མ་ལགས་སམ། འོན་ཏེ་བདག་ཅག་གི་ལགས་སམ་གང་གི་ལགས་སུས་འཚལ། དེ་ནས་དེའི་མོད་ལ་དུམ་བུའི་ཀུན་དགའ་
ར་བ་པའི་རྫུ་འཕྲུལ་གྱིས་རི་སྤོས་ཀྱི་ངད་ལྡང་ལས་ཤིང་ཨ་མྲ་ཡལ་ག་དང་། ལོ་མ་དང་། འདབ་མ་དཀར་པོ་དུ་མས་བཀླུབས་པ། བྱའི་ཚོགས་དུ་མ་སྐད་འབྱིན་པ་བླངས་ནས་ཆོ་འཕྲུལ་ཆེན་པོའི་འདུན་ཁང་གི་བྱང་ཕྱོགས་སུ་བཞག་པ་དང་། དེ་ཡང་རྒྱལ་པོས་མཐོང་ནས་ཡིད་བདེ་
བ་སྐྱེས་ཏེ་ལན་གཉིས་ཀྱི་བར་དུ་མུ་སྟེགས་ཅན་རྣམས་ལ་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཟིན་ཏེ། ད་ནི་ཁྱེད་ཀྱི་རེས་ལ་བབ་ཀྱིས་ཁྱེད་ཀྱིས་སྟོན་ཅིག །དེ་དག་གིས་སྨྲས་པ། ལྷ་བདག་ཅག་གིས་ཁྱོད་ལ་
སྔར་མ་གསོལ་ཏམ། ལྷ་སྐྱེ་བོའི་ཚོགས་ཆེན་པོ་འདིར་འདུས་ལགས་ན་ཆོ་འཕྲུལ་ཆེན་པོ་འདི་ཅི་དགེ་སྦྱོང་གཽ་ཏ་མའི་ལགས་སམ། འོན་ཏེ་བདག་ཅག་གི་ལགས་སམ། སུའི་ལགས་སུས་འཚལ། དེ་ནས་དེའི་མོད་ལ་ཁྱིམ་བདག་ངན་ལེགས་སྦྱིན་གྱིས་རྫུ་འཕྲུལ་གྱིས་སུམ་
བཅུ་རྩ་གསུམ་གྱི་ལྷའི་དཔག་བསམ་གྱི་ཤིང་བླངས་ནས་ཆོ་འཕྲུལ་ཆེན་པོའི་འདུན་ཁང་གི་ལྷོ་ཕྱོགས་ཀྱི་ངོས་སུ་བཞག་པ་དང་། དེ་ཡང་ཀོ་ས་ལའི་རྒྱལ་པོ་གསལ་རྒྱལ་གྱིས་མཐོང་ནས་ཡང་ཤིན་ཏུ་དགའ་བ་དང་མགུ་བ་སྐྱེས་ནས་ལན་གསུམ་གྱི་བར་དུ་མུ་སྟེགས་ཅན་རྣམས་ལ་འདི་
སྐད་ཅེས་སྨྲས་སོ། །ཀྱེ་བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཟིན་ཏེ། ད་ནི་ཁྱེད་ཀྱི་རེས་ལ་བབ་ཀྱིས་ཁྱེད་ཀྱིས་སྟོན་ཅིག །དེ་དག་གིས་སྨྲས་པ། བདག་ཅག་གིས་གསོལ་ལགས་མོད་ཀྱི། འོན་ཀྱང་ལན་གསུམ་གྱི་བར་དུ་གསོལ་བ་

བགྱི་སྟེ། ལྷ་སྐྱེ་བོའི་ཚོགས་ཆེན་པོ་འདིར་འདུས་ལགས་ན་ཆོ་འཕྲུལ་ཆེན་པོ་འདི་ཅི་དགེ་སྦྱོང་གཽ་ཏ་མའི་ལགས་སམ། འོན་ཏེ་བདག་ཅག་གི་ལགས་སམ། སུའི་ལགས་སུས་འཚལ། དེ་ནས་བཅོམ་ལྡན་འདས་ཀྱི་ཆོ་འཕྲུལ་ཆེན་པོ་ལྟ་བར་སྤྲོ་བའི་སྲོག་
ཆགས་བརྒྱ་སྟོང་དུ་མ་ཡང་འདུས། ལྷ་བརྒྱ་སྟོང་དུ་མ་ཡང་ནམ་མཁའི་དཀྱིལ་དུ་འདུས་པར་གྱུར་པ་དང་། བཅོམ་ལྡན་འདས་ཀྱིས་གཙུག་ལག་ཁང་གི་ཕྱི་རོལ་དུ་ཞབས་བཀྲུས་ཏེ་གཙུག་ལག་ཁང་དུ་གཤེགས་ནས་གདན་བཤམས་པ་ཉིད་ལ་བཞུགས་ཏེ་མེའི་ཁམས་ལ་སྙོམས་པར་
ཞུགས་སོ། །དེ་ནས་སྒོ་འཕར་གྱི་གསེབ་ནས་འོད་ཟེར་བྱུང་བས་ཆོ་འཕྲུལ་ཆེན་པོའི་འདུན་ཁང་ཐམས་ཅད་བསྲེག་པར་བརྩམས་པ་དང་། མུ་སྟེགས་ཅན་རྣམས་ཀྱིས་སྨྲས་པ། ལྷ་ད་ནི་དགེ་སྦྱོང་གཽ་ཏ་མ་ཆོ་འཕྲུལ་ཆེན་པོའི་ཁང་པ་ཚིག་ཅིང་མཆིས་ན་གལ་ཏེ་དགེ་སྦྱོང་
གཽ་ཏ་མས་རྔོ་ཐོག་ན་འདིར་མཆིས་ལ་ཞི་བར་བགྱིད་གྲང་ཞེས་བྱས་པ་དང་། རྒྱལ་པོ་ཅང་མི་ཟེར་བར་སེམས་ཁོང་དུ་ཆུད་ཅིང་འདུག་གོ། །དེ་བཞིན་དུ་བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་དང་། ཕྱ་མཁན་དྲང་སྲོང་བྱིན་དང་། རྙིང་པ་དང་། ཁྱིམ་བདག་
མགོན་མེད་ཟས་སྦྱིན་དང་། རི་དགས་དགྲའི་མ་ས་ག་དང་། གཞན་ཡང་དད་པ་ཅན་མང་པོ་དང་། བར་མར་གནས་པ་ཁ་ཅིག་ཀྱང་ཅང་མི་ཟེར་བར་འདུག་གོ། །མུ་སྟེགས་ཅན་རྣམས་དང་། དེའི་སློབ་མ་རྣམས་ནི་རབ་ཏུ་དགའ་བར་གྱུར་ཏོ། །དེ་ནས་མེ་དེས་ཆོ་འཕྲུལ་
ཆེན་པོའི་འདུན་ཁང་གི་དྲི་མ་ཐམས་ཅད་བསྲེགས་ནས་རང་ཉིད་ཞི་བར་གྱུར་ཏེ། འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་ཆོ་འཕྲུལ་ཆེན་པོའི་འདུན་ཁང་དྲི་མ་མེད་ཅིང་གསལ་ལ་མཛེས་པར་གྱུར་ཅིང་འདུག་གོ། །དེ་ནས་ཡང་
རྒྱལ་པོ་སྲོག་ཤོར་བ་ལས་རྙེད་པ་ལྟ་བུར་དགའ་བ་དང་། ཡིད་བདེ་བ་སྐྱེས་ནས་མུ་སྟེགས་ཅན་རྣམས་ལ་འདི་སྐད་ཅེས་སྨྲས་སོ། །ཀྱེ་བཅོམ་ལྡན་འདས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཟིན་ཏེ། ད་ནི་ཁྱེད་ཀྱི་རེས་ལ་བབ་ཀྱིས་ཁྱེད་ཀྱིས་སྟོན་ཅིག་ཅེས་

བྱས་པ་དང་། དེ་དག་སྤོབས་པ་མེད་ནས་ཅང་མི་ཟེར་བར་འདུག་གོ། །དེ་ནས་བཅོམ་ལྡན་འདས་ཀྱིས་མངོན་པར་འདུ་བྱ་བ་དང་བཅས་པར་ཞབས་གཡས་པ་དྲི་གཙང་ཁང་གི་ནང་དུ་བསྣུན་པ་དང་ས་རྣམ་པ་དྲུག་ཏུ་གཡོས་པར་གྱུར་ནས་ས་ཆེན་པོ་འདི་གཡོས། ཀུན་
དུ་གཡོས། ཀུན་དུ་རབ་ཏུ་གཡོས། འགུལ། ཀུན་ཏུ་འགུལ། ཀུན་དུ་རབ་ཏུ་འགུལ་བར་གྱུར་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། ལྷོ་ཕྱོགས་མཐོ་ན་བྱང་
ཕྱོགས་དམའ། དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བར་གྱུར་ཏོ། །ས་གཡོས་པ་དེས་གངས་རིའི་ཁྲོད་ཀྱི་ཀུན་དགའ་ར་བ་ན་གནས་པའི་དྲང་སྲོང་རྣམས་བསྐུལ་བས་དེ་དག་ཕན་ཚུན་དུ་ཤེས་ལྡན་དག་བདག་ཅག་ལ་ཚངས་པ་མཚུངས་པར་
སྤྱོད་པ་དེ་དག་གིས་མཚན་མ་དག་བསྟན་ཀྱིས་འདོང་ངོ་ཞེས་སྨྲས་ནས་དེ་དག་དོང་བ་དང་། བཅོམ་ལྡན་འདས་ཀྱིས་དེ་རྣམས་འདུལ་བ་ལ་གཟིགས་ཏེ་ཉི་མ་སྟོང་བས་ལྷག་པའི་འོད་གསེར་གྱི་ཁ་དོག་ལྟ་བུའི་འོད་ཟེར་བཀྱེ་བས་དེ་དག་གིས་བཅོམ་ལྡན་འདས་ཀྱི་དྲུང་ནས་
དྲང་སྲོང་དེ་རྣམས་ཀྱི་བར་ཐག་ཇི་སྲིད་པ་དེ་གསེར་བཞུན་མ་ལྟ་བུར་གྱུར་ཏོ། །དྲང་སྲོང་དེ་རྣམས་ཀྱིས་སངས་རྒྱས་བཅོམ་ལྡན་འདས་ཉི་མ་དང་པོ་ཤར་བའི་དཀྱིལ་འཁོར་ལྟར་མཛེས་པ། གསེར་སྦྱངས་པའི་དུམ་བུའི་ཚོགས་སྤུངས་པ་ལྟ་བུ། མེ་ཏོག་ཀུ་རན་ད་ཀ་དང་།
མྱ་ངན་འཚང་གི་ཕུང་པོ་ལྟ་བུའི་མདངས་ཅན། གསུང་དབྱངས་སྤྲིན་ཆུ་དང་བཅས་པ་དང་། རྒྱ་མཚོ་དང་། ཁྱུ་མཆོག་དང་། རྔ་སྒྲ་ལྟར་ཟབ་ཅིང་བརྟན་ལ་རྣམ་པར་གསལ་བ། མཉན་ན་བདེ་ཞིང་སྙན་པ། འཕྲལ་བའི་ཕྱོགས་འོ་མའི་རྒྱ་མཚོའི་དབུ་བ་དང་། མུ་ཏིག་
གི་དོ་ཤལ་དང་། པདྨའི་རྩ་ལག་དང་། ངང་པ་དང་། མེ་ཏོག་ཀུན་ད་དང་། ཤེལ་སྤུངས་པ་ལྟ་བུར་དཀར་བའི་མཛོད་སྤུས་རྣམ་པར་བརྒྱན་པ། ཡོན་ཏན་རྨད་དུ་བྱུང་བ་བསམ་གྱིས་མི་ཁྱབ་པ་གྲངས་མེད་པའི་ཚོགས་ཀྱིས་གནས་པ། སྲིད་པའི་དགའ་བ་དང་བདེ་བ་

དང་། བཀུར་སྟི་ལ་མངོན་པར་དགའ་བའི་དྲི་མའི་འདམ་གྱི་སྐྱོན་དང་བྲལ་བ། དུས་དཔག་ཏུ་མེད་པ་ནས་ཚོགས་བསགས་པའི་ཡེ་ཤེས་བླ་ན་མེད་པ་ཕུལ་དུ་ཕྱིན་པའི་རྒྱན་གྱིས་བརྒྱན་པའི་གྲགས་པ་ཅན། ལྷའི་དབང་པོའི་ཅོད་པན་རིན་པོ་ཆེའི་མྱུ་གུས་ཞབས་གཉིས་ལ་
གཏུགས་པ། ལྷ་དང་། ལྷ་མ་ཡིན་དང་། མི་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། སྔགས་འཆང་དང་། བྲང་འགྲོ་མཆོད་འོས་རྣམས་ཀྱིས་རྗེད་པ། མདོར་ན་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་
ཅུས་རྣམ་པར་སྤྲས་པ། འོད་འདོམ་གང་པས་བརྒྱན་པ། འོད་ཉི་མ་སྟོང་བས་ལྷག་པ། རིན་པོ་ཆེའི་རི་འགྲོ་བ་ལྟ་བུ་ཀུན་ནས་བཟང་བ་མཐོང་ངོ་། །ཇི་ལྟར་སེམས་ཅན་དགེ་བའི་རྩ་བ་བསགས་པའི་རྒྱུ་ཅན་གྱིས་དང་པོ་སངས་རྒྱས་མཐོང་བ་ལྟར་ལོ་བཅུ་གཉིས་སུ་ཞི་གནས་ཀྱི་སེམས་གོམས་
པའམ། བུ་མེད་པས་བུ་རྙེད་པའམ། བཀྲེན་པས་གཏེར་མཐོང་བའམ། རྒྱལ་པོ་མངོན་པར་འདོད་པ་དང་པོ་རྒྱལ་པོར་དབང་བསྐུར་བ་ནི་དེ་ལྟ་མ་ཡིན་པས་དྲང་སྲོང་དེ་རྣམས་ཀྱིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །བཅོམ་
ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་འཕགས་པའི་བདེན་པ་བཞི་རྟོགས་པར་འགྱུར་བ་དེ་ལྟ་བུའི་ཆོས་བསྟན་པ་མཛད་པ་དང་། དེ་རྣམས་ཀྱིས་དེ་ཐོས་ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་
རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་རྣམས་བདེན་པ་མཐོང་ནས་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་ལེགས་པར་གསུངས་
པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་ན་བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་པར་འཚལ་ལོ། །བཅོམ་ལྡན་འདས་ཀྱིས་དེ་རྣམས་རབ་ཏུ་ཕྱུང་བསྙེན་པར་རྫོགས་པར་མཛད་དེ་གདམས་ངག་ཕོག་

པ་དང་། དེ་རྣམས་ཀྱིས་འབད་བརྩལ་བསྒྲིམས་པས་འཁོར་བའི་འཁོར་ལོ་གཡོ་བ་དང་མི་གཡོ་བ་ཆ་ལྔ་པ་འདི་ཉིད་རིག་ནས་འདུ་བྱེད་ཀྱི་རྣམ་པ་ཐམས་ཅད་འཇིག་པ་དང་། ལྟུང་བ་དང་། འགྱེས་པ་དང་། འཇོམས་པའི་ཆོས་ཅན་དུ་རྟོགས་ཏེ་ཉོན་མོངས་པ་ཐམས་ཅད་
སྤངས་ནས་དགྲ་བཅོམ་པ་ཉིད་མངོན་སུམ་དུ་བྱས་ཏེ། དགྲ་བཅོམ་པ་ཁམས་གསུམ་གྱི་འདོད་ཆགས་དང་བྲལ་བ། གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་འདྲ་བ། ཙན་དན་དང་སྟེ་འུར་མཚུངས་པ། རིག་པས་མ་རིག་པའི་སྒོ་ངའི་སྦུབས་བཅོམ་
པ། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་རྙེད་པ་ལ་ཆགས་པ་དང་། བསྙེན་བཀུར་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དུ་བཅས་པའི་ལྷ་རྣམས་ཀྱིས་མཆོད་པ་དང་། རྗེད་པར་བྱ་བ་དང་། གུས་པར་བྱ་བར་གྱུར་ཏོ། །
དེ་ནས་བཅོམ་ལྡན་འདས་འཁོར་དགྲ་བཅོམ་པ་ལྔ་བརྒྱ་དང་ཐབས་ཅིག་ཟླ་བ་ཁམ་པ་ལྟ་བུར་བསྐོར་ནས་ཆོ་འཕྲུལ་ཆེན་པོའི་འདུན་ཁང་ག་ལ་བ་དེར་གཤེགས་ཏེ་བྱོན་ནས་འཁོར་བརྒྱ་ཕྲག་དུ་མའི་གུང་ལ་སེང་གེའི་ཁྲི་ལ་བཞུགས་སོ། །དེ་ནས་དགེ་བསྙེན་མ་རྫུ་འཕྲུལ་ལེན་གྱི་མ་
བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐུགས་ཁྲལ་ཆུང་ངུར་མཛད་དུ་གསོལ། བདག་གིས་མུ་སྟེགས་ཅན་རྣམས་དང་ལྷན་ཅིག་མིའི་ཆོས་
བླ་མའི་རྫུ་འཕྲུལ་གྱི་ཆོ་འཕྲུལ་བསྟན་པར་བགྱི་ཞིང་མུ་སྟེགས་ཅན་རྣམས་ཐག་སྩལ་བར་བགྱི། ལྷ་དང་མི་རྣམས་དགའ་བར་བགྱི། སྐྱེ་བོ་དམ་པ་རྣམས་གློ་བ་རངས་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྫུ་འཕྲུལ་ལེན་གྱི་མ་ཁྱོད་སེམས་ཁྲལ་ཆུང་
ངུར་གྱིས་ཤིག །ཁྱོད་ཀྱིས་མུ་སྟེགས་ཅན་རྣམས་དང་ལྷན་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཅིང་མུ་སྟེགས་ཅན་རྣམས་ཐག་གཞུག་པ་དང་། ལྷ་དང་མི་རྣམས་དགའ་བར་བྱ་བ་དང་། སྐྱེ་བོ་དམ་པ་རྣམས་སྙིང་རངས་པར་བྱ་བར་ནུས་མོད་ཀྱི། འོན་ཀྱང་འདི་རྣམས་

ཁྱོད་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་མི་འབོད་ཀྱི། འདི་རྣམས་ང་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་འབོད་པས་ང་ཉིད་ཀྱིས་འདི་དག་ལ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་པར་བྱའོ། །གལ་ཏེ་ཁྱོད་ཀྱིས་འདི་རྣམས་དང་ལྷན་ཅིག་མིའི་
ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ན་མུ་སྟེགས་ཅན་རྣམས་དགེ་སྦྱོང་གཽ་ཏ་མ་ལ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་མེད་ཀྱི། འོན་ཀྱང་འདིའི་ཉན་ཐོས་མ་རྫུ་འཕྲུལ་ལེན་གྱི་མ་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་བ་ཞིག་ངེད་དང་ལྷན་ཅིག་མིའི་ཆོས་བླ་མའི་རྫུ་
འཕྲུལ་གྱི་ཆོ་འཕྲུལ་སྟོན་ཏོ་ཞེས་སྨྲ་བར་འགྱུར་བས། ཁྱོད་རང་གི་སྟན་ཇི་ལྟ་བ་ལ་འདུག་ཤིག །ཅེས་བཀའ་སྩལ་པ་དང་། དེ་རང་གི་སྟན་ཇི་ལྟ་བ་ལ་འདུག་སྟེ། ཁྱིམ་བདག་ངན་ལེགས་སྦྱིན་དང་། དགེ་ཚུལ་སྐུལ་བྱེད་དང་། དགེ་ཚུལ་མ་བརྗེད་མེད་དང་། དགེ་
སློང་མ་ཨུཏྤ་ལའི་མདོག་དང་། གཞན་ཡང་རྫུ་འཕྲུལ་དང་ལྡན་པ་ཕལ་མོ་ཆེ་དག་ཀྱང་དེ་དང་འདྲའོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐུགས་ཁྲལ་ཆུང་ངུར་མཛད་དུ་གསོལ། བདག་གིས་མུ་སྟེགས་ཅན་རྣམས་དང་ལྷན་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་པར་བགྱི་ཞིང་། མུ་སྟེགས་ཅན་རྣམས་ཐག་སྩལ་བར་བགྱི། ལྷ་དང་
མི་རྣམས་དགའ་བར་བགྱི། སྐྱེ་བོ་དམ་པ་རྣམས་གློ་བ་རངས་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་ཁྱོད་སེམས་ཁྲལ་ཆུང་ངུར་གྱིས་ཤིག །ཁྱོད་ཀྱིས་མུ་སྟེགས་ཅན་རྣམས་དང་ལྷན་ཅིག་མིའི་ཆོས་བླ་མའི་རྫུ་འཕྲུལ་
གྱི་ཆོ་འཕྲུལ་བསྟན་ཅིང་། མུ་སྟེགས་ཅན་རྣམས་ཐག་གཞུག་པ་དང་། ལྷ་དང་མི་རྣམས་དགའ་བར་བྱ་བ་དང་། སྐྱེ་བོ་དམ་པ་རྣམས་སྙིང་རངས་པར་བྱ་བར་ནུས་མོད་ཀྱི། འོན་ཀྱང་འདི་རྣམས་ཁྱོད་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་མི་འབོད་ཀྱི།

ང་འདི་རྣམས་ཀྱིས་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་ལ་བོས་པས། ང་ཉིད་ཀྱིས་འདི་དག་ལ་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་པར་བྱའོ། །གལ་ཏེ་ཁྱོད་ཀྱིས་མུ་སྟེགས་ཅན་རྣམས་དང་ལྷན་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ན། མུ་སྟེགས་
ཅན་རྣམས་དགེ་སྦྱོང་གཽ་ཏ་མ་ལ་ནི་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་མེད་ཀྱི། འོན་ཀྱང་འདིའི་ཉན་ཐོས་དགེ་སློང་མཽད་གལ་གྱི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཞིག་ངེད་དང་ལྷན་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་སྟོན་ཏོ། །ཞེས་སྨྲ་བར་
འགྱུར་བས་ཁྱོད་རང་གི་སྟན་ཇི་ལྟ་བ་ལ་འདུག་ཤིག །ཅེས་བཀའ་སྩལ་པ་དང་། དེ་ཡང་རང་གི་སྟན་ཇི་ལྟ་བ་ལ་འདུག་གོ། །དེ་ནས་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པ་ལ་མུ་སྟེགས་
ཅན་རྣམས་དང་ལྷན་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་པར་གསོལ་པ་འདེབས་པ་སུ་ཡིན། དེ་ནས་ཀོ་ས་ལའི་རྒྱལ་པོ་གསལ་རྒྱལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་
བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མུ་སྟེགས་ཅན་རྣམས་དང་། ཐབས་ཅིག་མིའི་ཆོས་བླ་མའི་རྫུ་འཕྲུལ་གྱི་ཆོ་འཕྲུལ་བསྟན་ཅིང་། མུ་སྟེགས་ཅན་རྣམས་ཐག་སྩལ་པ་དང་། ལྷ་དང་མི་རྣམས་
དགའ་བར་བགྱི་བ་དང་། སྐྱེ་བོ་དམ་པ་རྣམས་གློ་བ་རངས་པར་བགྱི་བར་གསོལ་བ་བདག་ལགས་ཏེ། དེ་ནི་དགེ་སྦྱོང་དང་བྲམ་ཟེར་བཅས། ལྷ་དང་མིར་བཅས་པའི་སྐྱེ་དགུ་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་ལགས་
སོ། །ཞེས་གསོལ་པ་དང་། བཅོམ་ལྡན་འདས་ཀྱི་ཀོ་ས་ལའི་རྒྱལ་པོ་གསལ་རྒྱལ་ལ་ཅང་མི་གསུང་བས་གནང་ངོ་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་རང་གི་སྟན་ཇི་ལྟ་བ་ལ་འདུག་གོ། །དེ་

ནས་བཅོམ་ལྡན་འདས་ཀྱིས་ཇི་ལྟར་ཐུགས་མཉམ་པར་བཞག་ན་ཉིད་ཀྱི་གདན་ལས་མི་སྣང་བར་གྱུར་ནས། ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ཏེ་སྤྱོད་ལམ་བཞི་པོ་འདི་ལྟ་སྟེ། གཤེགས་པ་དང་། འགྲེང་བ་དང་། བཞུགས་པ་དང་། གཟིམས་
པ་མཛད་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །མེའི་ཁམས་ལ་སྙོམས་པར་ཞུགས་ཏེ་སངས་རྒྱས་བཅོམ་ལྡན་འདས་མེའི་ཁམས་ལ་སྙོམས་པར་ཞུགས་པའི་སྐུ་ལས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་
པོ་དང་། བཙོད་ཀ་དང་། ཤེལ་གྱི་ཁ་དོག་ལྟ་བུ་དག་འཐོན་ཏོ། །ཟུང་གི་ཆོ་འཕྲུལ་སྐུའི་སྨད་ནས་ནི་མེ་འབར། སྐུའི་སྟོད་ནས་ནི་ཆུ་གྲང་མོའི་རྒྱུན་འབབ་པ་དང་། སྐུའི་སྟོད་ནས་ནི་མེ་འབར། སྐུའི་སྨད་ནས་ནི་ཆུ་གྲང་མོའི་རྒྱུན་འབབ་པ་དག་ཀྱང་སྟོན་པར་མཛད་དོ། །ཤར་
ཕྱོགས་སུ་ཇི་ལྟ་བར་ལྷོ་དང་། ནུབ་དང་། བྱང་ཕྱོགས་སུ་ཡང་དེ་དང་འདྲ་སྟེ། ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་མཛད་པ་བཏང་སྟེ་སེང་གེའི་ཁྲི་ལ་བཞུགས་སོ། །དེ་ནས་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་
གསལ་ར