Kinh tạng Tây Tạng (Kangyur Đại Học) — 011_འདུལ་བ།_ད

ད་ཀྱི་མཁན་མོའི་མིང་ཅི། བདག་གི་མིང་ནི་འདི་ཞེས་བགྱི། དོན་གྱི་སླད་དུ་མཚན་ནས་སྨོས་ཏེ་མཁན་མོའི་མིང་ནི་འདི་ཞེས་བགྱིའོ། །མིང་འདི་
ཞེས་བྱ་བ་ཁྱོད་ཉོན་ཅིག །བུད་མེད་ཀྱི་ལུས་ལ་གནོད་པར་འགྱུར་བ་ལུས་ཀྱི་ནད་འདི་འདྲ་བ་ཡོད་དེ། དེ་འདི་ལྟ་སྟེ། མཛེ་དང་། འབྲས་དང་། ཤུ་བ་དང་། ཕོལ་མིག་དང་། ཚད་པ་དང་། ཤ་བཀྲ་ཅན་དང་། རྐོམ་པོ་དང་། གློག་པ་དང་། རབ་ཏུ་གཡའ་བ་དང་། སྐྱུགས་པ་དང་། གཞང་
འབྲུམ་དང་། སྐྱིགས་བུ་དང་། རིམས་དང་། ཟ་ངད་དང་། མྱོས་པ་དང་། ངལ་བ་དང་། མགོ་གཡུང་དང་། ཚད་པ་དང་། ལུད་པ་དང་། དབུགས་མི་བདེ་བ་དང་། སྐེམ་པ་དང་། བརྗེད་བྱེད་དང་། འཇས་པ་དང་། ནད་དཀར་པོ་དང་། རྐང་འབམ་དང་། མཚན་བར་རྡོལ་བ་དང་། སྐྲན་
དང་། །ཁྲག་ནད་དང་། མཁྲིས་པ་དང་། རྐུབ་འབྲུམ་དང་། ལྷོག་པ་དང་། ཡན་ལག་ཚ་བ་དང་། རྩིབ་ལོགས་ཚ་བ་དང་། རུས་པ་ཞིགས་པ་དང་། རིམས་དྲག་པོ་དང་། རིམས་ཞག་གཅིག་པ་དང་། གཉིས་པ་དང་། གསུམ་པ་དང་། བཞི་པ་དང་། རིམས་ཉིན་རེ་བ་དང་། འདུས་པའི་
རིམས་དང་། རིམས་ལྡང་དུབ་པ་དང་། རྟག་པའི་རིམས་དང་། ཁྱོད་ཀྱི་ལུས་ལ་འདི་ལྟ་བུའི་ལུས་ཀྱི་ནད་དང་། ལུས་ལ་གནོད་པར་འགྱུར་བ་དང་། དེ་ལས་གཞན་ཀྱང་མེད་དམ་དེ་ལས་ཁྱོད་ཀྱིས་ཡང་དག་པ་ཇི་བཞིན་པར་སྨྲོས་ཤིག།། །།འདུལ་བ་ཕྲན་ཚེགས་ཀྱི་གཞི། བམ་

པོ་སུམ་བཅུ་རྩ་བདུན་པ། དེ་ནས་གསོལ་བ་བྱེད་པའི་དགེ་སློང་གིས་གསོལ་བ་ཐོབ་སྟེ་ལས་བྱོས་ཤིག །གསོན་ཅིག་བཙུན་པའི་དགེ་འདུན་གཉི་ག་རྣམས། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བ་དགེ་འདུན་གཉི་ག་ལས་བསྙེན་པར་རྫོགས་པར་འཚལ་ཏེ། མིང་འདི་
ཞེས་བགྱི་བ་མཁན་མོ་མིང་འདི་ཞེས་བགྱི་བས་དགེ་འདུན་གཉི་ག་ལས་བསྙེན་པར་རྫོགས་པར་གསོལ་ཏེ། བུད་མེད་ཀྱང་ལགས། བུད་མེད་ཀྱི་དབང་པོ་དང་ལྡན། བུད་མེད་ཁྱིམ་ན་གནས་པ་ལོ་བཅུ་གཉིས་སམ། གཞོན་ནུ་མ་ལོ་ཉི་ཤུ་ཚང་བ་སྟེ། འདིའི་ཆོས་གོས་ལྔ་དང་ལྷུང་
བཟེད་དུ་ཡང་ལྡན། ཕ་མ་དང་ཁྱིམ་ཐབ་ཀྱིས་ཀྱང་གནང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག །འདིས་ཚངས་པར་སྤྱོད་པ་ཡང་ལེགས་པར་སྤྱད། དགེ་སློང་མའི་དགེ་འདུན་གྱིས་འདི་ལ་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་ཡང་ཕོག་སྟེ། འདིས་ལོ་
གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་བསླབ་པ་ཡང་བསླབས། དགེ་སློང་མའི་དགེ་འདུན་མ་རྣམས་ཀྱིས་འདི་ལ་ཆོས་གསུམ་གྱིས་ཚངས་པར་སྤྱད་པ་སྐྱེད་པའི་སྡོམ་པ་ཡང་བྱིན། དགེ་སློང་མའི་དགེ་འདུན་རྣམས་ཀྱིས་འདི་ལ་བྱ་བ་རྣམས་ཀྱང་སྔོན་དུ་བྱས་ཟིན། དགེ་སློང་མའི་དགེ་
འདུན་རྣམས་ཀྱི་སེམས་མཉེས་པར་བྱིན་ཟིན། བར་ཆད་ཀྱི་ཆོས་རྣམས་གཙང་ངོ་ཞེས་བདག་ཉིད་མཆི་ན། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་སྟེ། དགེ་འདུན་གཉི་ག་ལས་བསྙེན་པར་རྫོགས་པར་གསོལ་ན། དེ་སྟེ་དགེ་འདུན་གཉི་གའི་དུས་ལ་བབ་ཅིང་བཟོད་ན། དགེ་
འདུན་གཉིས་ཀས་གནོང་ལ་དགེ་འདུན་གཉིས་ཀས་མིང་འདི་ཞེས་བགྱི་བ་འདི་མཁན་མོའི་མིང་འདི་ཞེས་བགྱི་སྟེ་བསྙེན་པར་རྫོགས་པར་གསོལ་ཅིག །འདི་ནི་གསོལ་བའོ། །ལས་ནི་འདི་ལྟར་བྱོས་ཤིག །གསོན་ཅིག་བཙུན་པའི་དགེ་འདུན་གཉི་གའི་རྣམས། མིང་འདི་ཞེས་བགྱི་
བ་འདི་མཁན་མོའི་མིང་འདི་ཞེས་བགྱི་བ་གཉིས་ཀའི་དགེ་འདུན་ལས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས་གཉི་གའི་དགེ་འདུན་ལས་བསྙེན་པར་རྫོགས་པར་གསོལ་ཏེ། བུད་མེད་ཀྱང་ལགས། བུད་མེད་ཀྱི་དབང་པོ་དང་ཡང་

ལྡན། །བུད་མེད་ཁྱིམ་ན་གནས་པ་ལོ་བཅུ་གཉིས་སམ། གཞོན་ནུ་མ་ལོ་ཉི་ཤུར་ཡང་ཚང་སྟེ། འདི་ལ་ཆོས་གོས་ལྔ་དང་ལྷུང་བཟེད་དུ་ཡང་ལྡན། ཕ་མ་དང་ཁྱིམ་ཐབ་ཀྱིས་ཀྱང་གནང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག །འདིས་ཚངས་པར་སྤྱོད་པ་ཡང་ལེགས་
པར་སྤྱད། དགེ་སློང་མའི་དགེ་འདུན་གྱིས་འདི་ལ་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་བསླབ་པ་ཕོག་སྟེ། འདིས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་ལ་ཡང་བསླབས། དགེ་སློང་མའི་དགེ་འདུན་རྣམས་ཀྱིས་འདི་ལ་ཚངས་པར་སྤྱད་པ་
སྐྱེད་པའི་སྡོམ་པ་ཡང་བྱིན། དགེ་སློང་མའི་དགེ་འདུན་གྱིས་འདི་ལ་བྱ་བའི་རྣམས་ཀྱང་སྔོན་དེ་བྱས་ཟིན་བདག་གིས་དགེ་སློང་མའི་དགེ་འདུན་གྱི་སེམས་མཉེས་པར་ཡང་བྱས། བར་ཆད་ཀྱི་ཆོས་རྣམས་གཙང་ངོ་ཞེས་བདག་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་
བགྱི་སྟེ། དགེ་འདུན་གཉི་ག་ལས་བསྙེན་པར་རྫོགས་ཤིང་དགེ་སློང་མའི་དགེ་འདུན་རྣམས་ཀྱི་མིང་འདི་ཞེས་བགྱི་བ་འདི་མཁན་མོའི་མིང་འདི་ཞེས་བགྱི་སྟེ། དགེ་འདུན་གཉི་གས་བསྙེན་པར་རྫོགས་པར་མཛད་ན། ཚེ་དང་ལྡན་པ་རྣམས་མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་
བགྱི་སྟེ། དགེ་འདུན་གཉི་གས་བསྙེན་པར་རྫོགས་པར་མཛད་དེ། དགེ་འདུན་གཉི་གས་བཟོད་ཅིང་གནང་ན་ཅང་མ་གསུང་ཤིག །གང་ལ་མི་བཟོད་པ་དག་ནི་གསུང་ཤིག །འདི་ནི་ལས་དང་པོའི་ཚིག་སྟེ། དེ་བཞིན་དུ་ལས་ཀྱི་ཚིག་རྣམས་ལན་གཉིས་ལན་གསུམ་དུ་སྨྲ་བར་བྱའོ། །
མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བ་སྟེ། དགེ་འདུན་གཉི་གས་བསྙེན་པར་རྫོགས་པར་མཛད་དེ། དགེ་འདུན་གཉི་གས་བཟོད་ཅིང་གནང་བས་ན་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནས་གྲིབ་མ་གཅལ་བར་བྱའོ། །དགེ་སློང་མ་དག་གིས་རིང་པོ་རིང་
པོས་གྲིབ་མ་གཅལ་བ་དང་། བཅོམ་ལྡན་འདས་ཀྱིས་ཤིང་ལྕུག་མ་རིང་ཞིང་རིང་པོས་གྲིབ་མ་གཅལ་བར་མ་བྱེད་ཅིག་ཅེས་བཀའ་སྩལ་ཏོ། །རྐང་པས་གཅལ་ནས་བཅོམ་ལྡན་འདས་ཀྱིས་རྐང་པས་གཅལ་བར་མི་བྱའོ། །ཤིང་བུ་སོར་བཞི་པས་གཅོལ་ཅིག །ཤིང་བུ་ཇི་སྲིད་

པ་དེ་ཙམ་ལ་སྐྱེས་བུ་ཞེས་བྱའོ། །དེའི་འོག་ཏུ་དུས་ཚོད་རིག་པར་བྱོས་ཤིག །དགུན་གྱི་དུས་དང་། དཔྱིད་ཀྱི་དུས་དང་། དབྱར་གྱི་དུས་དང་། དབྱར་ཟད་པ་དང་དུས་རིང་པོའོ། །དེ་ལ་དགུན་གྱི་དུས་ནི་ཟླ་བ་བཞིའོ། །དཔྱིད་ཀྱི་དུས་ནི་ཟླ་བ་བཞིའོ། །དབྱར་གྱི་དུས་ནི་ཟླ་
བ་གཅིག་གོ། །དབྱར་ཟད་པ་ནི་ཉིན་ཞག་གཅིག་གོ། །དུས་རིང་པོ་ནི་ནུབ་གཅིག་གིས་ཉུང་བའི་ཟླ་བ་གསུམ་མོ། །དུས་ཀྱང་རིག་པར་བྱ་སྟེ། སྐྱ་རེངས་དང་པོ་དང་། སྐྱ་རེངས་བར་མ་དང་། སྐྱ་རེངས་ཐ་མ་དང་། ཉི་མ་མ་ཤར་བ་དང་། ཉི་མ་ཤར་བ་དང་། ཉི་མ་ཤར་བའི་བརྒྱད་ཆ་
དང་། །ཉི་མ་ཤར་བའི་བཞི་ཆ་དང་། ཉི་མ་མ་ཕྱེད་པ་དང་། ཉི་མ་ཕྱེད་པ་དང་། ཉི་མ་ཕྱེད་ཡོལ་བ་དང་། ཕྱི་དྲོའི་བཞི་ཆ་དང་། ཕྱི་དྲོའི་བརྒྱད་ཆ་དང་། ཉི་མ་ནུབ་པ་དང་། ཉི་མ་མ་ནུབ་པ་དང་། སྐར་མ་མ་ཤར་བ་དང་། སྐར་མ་ཤར་བའོ། །དེ་ནས་གནས་གསུམ་སྨྲ་བར་བྱའོ། །
མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་མཁྱེན་ཅིང་གཟིགས་ཏེ། འདི་ལྟ་བུར་རབ་ཏུ་བྱུང་ཞིང་བསྙེན་པར་རྫོགས་པའི་དགེ་སློང་མ་ལ་གནས་འདི་གསུམ་གསུངས་ཏེ། དགེ་སློང་མས་དེ་ལ་
གནས་ན་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ། དགེ་སློང་མའི་དངོས་པོར་འགྱུར་བ་སྟེ། གསུམ་གང་ཞེ་ན། ཆོས་གོས་ཀྱི་ནང་དུ་རྡུལ་ཁྲོད་པ་ནི་རུང་བ་དང་མོད་པ་སྟེ། གང་ལ་གནས་ན་དགེ་སློང་མ་ལེགས་པར་བཤད་པའི་ཆོས་འདུལ་བ་ལ་རབ་
ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་འགྱུར་བ་རྡུལ་ཁྲོད་པའི་ཆོས་གོས་ཀྱིས་ཚེ་དང་ལྡན་མ་མིང་འདི་ཞེས་བྱ་བ་ཁྱོད་དུས་འདི་ནས་ནམ་འཚོའི་བར་དུ་ཆོག་པར་དད་དམ། དེས་དད་དོ་ཞེས་སྨྲོས་ཤིག །ལྷག་པར་བྱེད་ན་དར་རམ། རས་སམ། བགོ་བའམ།
སེང་རས་སམ། ལྡུམ་བུ་ཤ་ནའི་གོས་སམ། སྲིན་པའམ། རས་ཨ་མི་ལའམ། སོ་མི་ལའམ། ལ་བའི་ཁ་དོག་སྲིན་བུ་སྨུག་པོ་འདྲ་བའམ། ཀ་ཤི་ཀའི་ཕྲ་མོའམ། ཟར་མའི་ཕྲ་མོའམ། རྩྭ་དུ་གུ་ལ་ཀ་ཕྲ་མོའམ། རས་ཀོ་ཏམ་པ་ཀ་ཕྲ་མོ་རྣམས་ཏེ། གང་གཞན་ཡང་

རུང་བའི་གོས་དགེ་འདུན་ལས་རྙེད་དམ་གང་ཟག་ལས་ཀྱང་རུང་སྟེ་དེ་དག་ལས་ཁྱེད་ཀྱིས་ལོང་ལ་ཚོད་ཟིན་པར་གྱིས་ཤིག །ཅི་དེ་འདྲ་བའི་གནས་ལ་མངོན་དུ་ཡི་དམ་འཆའ་འམ། དེས་ཀྱང་མངོན་དུ་ཡི་དམ་བཅའོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་
ཅིག །ཟས་ཀྱི་ནང་ན་བསོད་སྙོམས་ནི་རུང་བ་མོད་པ་སྟེ། དེ་ལ་གནས་ན་དགེ་སློང་མ་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་མའི་དངོས་པོར་འགྱུར་རོ། །བསོད་སྙོམས་ཀྱི་ཟས་ཀྱིས་མིང་འདི་ཞེས་བྱ་བ་ཁྱོད་དེང་ནས་ནམ་འཚོའི་བར་
དུ་ཆོག་པར་དད་དམ། དེས་དད་དོ་ཞེས་སྨྲོས་ཤིག །ལྷག་པར་རྙེད་ན་འབྲས་ཆན་ནམ། སྐྱོ་མའམ། ཐུག་པའམ། རྟག་པའིའམ། མགྲོན་དུ་བོས་པའིའམ། འཕྲལ་ལ་བོས་པའི་འམ། སྤགས་པའིའམ། ལྔ་སྟོན་ནམ། བརྒྱད་པའིའམ། བཅུ་བཞི་པའིའམ། ཉ་
སྟོན་རྣམས་ཀྱི་སྟེ། གང་གཞན་ཡང་རུང་བའི་བསོད་སྙོམས་དགེ་འདུན་ལས་སམ། གང་ཟག་ལས་རུང་སྟེ། དེ་དག་ལས་ཀྱང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཅི་འདི་འདྲ་བའི་གནས་ལ་ཡི་དམ་འཆའ་འམ། དེས་ཀྱང་ཡི་དམ་བཅའོ་ཞེས་གྱིས་ཤིག །མིང་
འདི་ཞེས་བྱ་བ་ཁྱོད་ཉོན་ཅིག །བཀུས་པའི་སྨན་ནི་རུང་བ་དང་མོད་པ་སྟེ། དེ་ལ་གནས་ན་དགེ་སློང་མ་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་དེང་ནས་ནམ་འཚོའི་བར་
དུ་བཀུས་ཏེ་བོར་བའི་སྨན་གྱིས་ཆོག་པར་དད་དམ། དེས་དད་དོ་ཞེས་སྨྲོས་ཤིག །ལྷག་པར་རྙེད་ན་མར་དང་། འབྲུ་མར་དང་། སྦྲང་རྩི་དང་། བུ་རམ་དང་། རྩ་བའི་སྨན་དང་། སྡོང་བུའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲས་བུའི་སྨན་དང་།
སྔ་དྲོ་བ་དང་། ཕྱི་དྲོ་བ་དང་། བདུན་པའི་དང་། ནམ་འཚོའི་བར་དུའོ། །དེ་ལྟ་བུ་ལ་སོགས་ཏེ་གཞན་ཡང་རུང་བའི་སྨན་དག་དགེ་འདུན་ལས་སམ། གང་ཟག་ལས་རྙེད་ཀྱང་རུང་སྟེ། དེ་དག་ལས་ཀྱང་ཁྱོད་ཀྱིས་ལོང་ལ་ཚོད་རིག་པར་གྱིས་ཤིག །ཅི་འདི་འདྲ་བའི་གནས་

ལ་མངོན་དུ་ཡི་དམ་འཆའ་འམ། དེས་ཀྱང་ཡི་དམ་བཅའོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་མཁྱེན་ཅིང་གཟིགས་ནས་འདི་ལྟར་རབ་ཏུ་བྱུང་ཞིང་བསྙེན་པར་རྫོགས་པར་དགེ་
སློང་མ་ལ་ལྟུང་བའི་ཆོས་བརྒྱད་གསུངས་ཏེ། དགེ་སློང་མས་གནས་དེ་ལ་གང་ཡང་རུང་སྟེ། བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན་ནོ། །དགེ་སློང་མའི་དངོས་པོ་མེད་པར་འགྱུར། དགེ་སྦྱོང་མའི་ཡང་མེད་པར་འགྱུར་ཏེ་མེད་
པའོ། །བསྲུབས་པའོ། །ལྟུང་བའོ། །ཕས་ཕམ་པ་སྟེ། དེ་ལ་དགེ་སྦྱོང་མར་སླར་དབྱུང་དུ་མེད་དོ། །འདི་ལྟ་སྟེ་ཤིང་ཏ་ལའི་མགོ་བཅད་པ་བཞིན་ཏེ་སྔོན་པོར་མི་འགྱུར། མི་སྐྱེ། མི་རྒྱས། མི་འཕེལ་ལོ། །ཆེར་སྐྱེར་སྐལ་བ་མེད་པ་དེ་ལྟར་དེ་བཞིན་དུ་དགེ་སློང་མས་གནས་དེ་
བརྒྱད་ལས་གང་ཡང་རུང་། གནས་དེ་བརྒྱད་ལ་བརྟུན་ཅིང་བྱས་ན་དེ་ལ་བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན་ནོ། །དགེ་སློང་མའི་དངོས་པོ་མེད་པར་འགྱུར། དགེ་སྦྱོང་མའི་ཡང་མེད་པར་འགྱུར་ཏེ་མེད་པའོ། །བསྲུབས་
པའོ། །ལྟུང་བའོ། །ཕས་ཕམ་པ་སྟེ། དེ་ལ་དགེ་སྦྱོང་མར་སླར་དབྱུང་དུ་མེད་དོ། །མིང་འདི་ཞེས་བྱ་བ་ཁྱོད་ཉོན་ཅིག །བརྒྱད་གང་ཞེ་ན། བཅོམ་ལྡན་འདས་ཀྱིས་རྣམ་གྲངས་དུ་མ་ལས་ཀྱང་འདོད་པ་སྨད་པ་ནི་འཛིན་པའོ། །འདོད་པ་ནི་ཆགས་པའོ། །འདོད་པ་ནི་སེམས་
པའོ། །འདོད་པ་ནི་སྡུག་པའོ། །འདོད་པ་ནི་གནས་སོ། །འདོད་པ་ནི་གདོན་མི་ཟ་བའོ། །འདོད་པ་ནི་ཤིན་ཏུ་ཆགས་པ་སྟེ། འདོད་པ་སྤངས་པ་ནི་སོ་སོར་བསྔགས་པའོ། །སླར་བསྐུར་བའོ། །ཟད་པའོ། །འདོད་ཆགས་དང་བྲལ་བའོ། །འཕགས་པའོ། །རྣམ་པར་
ཞི་བའོ། །ནུབ་པའོ་ཞེས་བསྟོད་པའོ། །བསྟོད་དུ་འཇུག་གོ། །བསྔགས་སོ། །བསྒྲགས་པ་ཡིན་གྱིས། མིང་འདི་ཞེས་བྱ་བ་ཁྱོད་ཀྱིས་དེང་ཕན་ཆད་ཆགས་པའི་སེམས་ཀྱིས་སྐྱེས་པ་ལ་མིག་གིས་མིག་ཚུགས་སུ་ཡང་ཆགས་ཤིང་མི་བལྟ་ན་གཉིས་སྤྲད་ཅིང་མི་ཚངས་

པར་སྤྱོད་པ་འཁྲིག་པའི་ཆོས་སུ་སྤྱད་པ་ལྟ་ཅི་སྨོས། བཅོམ་ལྡན་འདས་ཀྱིས་གསུངས་པ་ཡང་དགེ་སློང་མ་དགེ་སློང་མ་དང་ལྷན་ཅིག་ཏུ་བསླབ་པ་མཚུངས་པ་མཉམ་པར་གྱུར་པ་ལས་བསླབ་པ་མ་ཕུལ་ལམ། བསླབ་པ་སྟོབས་ཆུང་ངམ། མ་བཤམས་པར་མི་ཚངས་
པར་སྤྱོད་པ་འཁྲིག་པའི་ཆོས་བྱས་ན་ཆུང་ངུ་ན་བྱོལ་སོང་གི་སྐྱེ་གནས་སུ་གཏོགས་པ་དང་ལྷན་ཅིག་པ་ཡང་རུང་སྟེ། དེ་ལྟ་བུའི་གནས་གང་དུ་ཡང་རུང་། དགེ་སློང་མས་བརྟུན་ཅིང་བྱས་ན། བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་
ཡིན། །དགེ་སློང་མའི་དངོས་པོ་མེད་པར་འགྱུར། དགེ་སྦྱོང་མའི་དངོས་པོ་ཡང་མེད་པར་འགྱུར་ཏེ། མེད་པའོ། །བསྲུབས་པའོ། །ལྟུང་བའོ། །ཕས་ཕམ་པ་སྟེ། དགེ་སློང་མར་སླར་དབྱུང་དུ་མེད་དོ། །འདི་ལྟ་སྟེ་ཤིང་ཏ་ལའི་མགོ་བཅད་པ་བཞིན་སྔོན་པོར་མི་རུང་། སྐྱེར་མི་
རུང་། །འཕེལ་ཞིང་རྒྱས་པར་མི་རུང་སྟེ། དེ་བཞིན་དུ་དགེ་སློང་མས་འདི་འདྲ་བའི་གནས་ལ་བརྟུན་ཅིང་བྱས་ན། དེ་བརྟུན་དེ་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན། དགེ་སློང་མའི་དངོས་པོ་མེད་པར་འགྱུར། དགེ་སྦྱོང་
མའི་དངོས་པོ་ཡང་མེད་པར་འགྱུར་ཏེ། མེད་པའོ། །བསྲུབས་པའོ། །ལྟུང་བའོ། །ཕས་ཕམ་པ་སྟེ། དགེ་སྦྱོང་མར་སླར་དབྱུང་དུ་མེད་དོ། །དེ་ལ་ཁྱོད་ཀྱིས་དེང་ཕན་ཆད་མི་སྤྱོད་པ་དང་། བརྟུན་ཅིང་མི་འཇུག་པ་དང་། མི་སྤྱོད་པར་སྤོང་བ་ལ་སྨྱུར་ཏེ་སེམས་སྲུངས་ལ། དྲན་
པ་དང་། བག་ཡོད་པ་དང་། བརྩོན་པར་གྱིས་ཤིག །ཅི་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་རྣམ་གྲངས་དུ་མ་ལས་ཀྱང་མ་བྱིན་པར་ལེན་པ་ནི་རྣམ་པར་སྨད་དོ། །མ་བྱིན་པར་ལེན་པ་
སྤངས་པ་ནི་བསྟོད་དོ། །བསྟོད་དུ་འཇུག་གོ། །བསྔགས་སོ། །བསྒྲགས་པ་ཡིན་གྱིས་དེང་ཕན་ཆད་མིང་འདི་ཞེས་བྱ་བ་ཁྱོད་རྐུ་བའི་སེམས་ཀྱིས་ཕ་རོལ་པོའི་མ་བྱིན་པར་ཏིལ་གྱི་ཕུབ་མ་ན་ཡང་མི་བླངས་ན། མཱ་ཤ་ལྔའམ། མཱ་ཤ་ལྔ་ལས་འདས་པ་ལྟ་ཅི་སྨོས་བཅོམ་ལྡན་

འདས་ཀྱིས་ཀྱང་གསུངས་པ། དགེ་སློང་མ་གྲོང་ན་འདུག་པའམ། དབེན་པ་ན་འདུག་པ་ཡང་རུང་། གཞན་གྱིས་མ་བྱིན་པར་རྐུ་བར་གྲགས་པ་བླངས་ན་ནི་ཅི་ཙམ་མ་བྱིན་པར་བླངས་པས་དེ་རྒྱལ་པོའམ། བློན་པོས་ཀྱང་རུང་བཟུང་ནས་བསད་པ་དང་། བཅིང་བ་དང་། སྤྱུགས་པ་
ཡང་རུང་དེ་ལ་འདི་སྐད་ཅེས་ཟེར་རོ། །ཀྱེ་ཁྱེད་ནི་རྐུ་བའོ། །མི་ཤེས་པ། བླུན་པའོ། །རྐུ་བའོ་ཞེས་འདི་ལྟ་བུའི་གནས་སུ་བརྟུན་ཅིང་བྱས་ན། དེས་བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན་ནོ་ཞེས་བྱ་བ་ནས་སྔ་མ་བཞིན་
ཏེ། །དྲན་པས་བག་ཡོད་པ་དང་། བརྩོན་པར་གྱིས་ཤིག་པའི་བར་དུ་སྦྱར་རོ། །ཅི་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་བྱོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་སྲོག་གཅོད་པ་ནི་རྣམ་གྲངས་དུ་མ་ལས་ཀྱང་རྣམ་པར་
སྨད་དོ། །སྲོག་གཅོད་པ་སྤངས་པ་ལ་བསྟོད་དོ། །བསྟོད་དུ་འཇུག་གོ། །བསྔགས་སོ། །བསྒྲགས་པ་ཡིན་གྱིས་མིང་འདི་ཞེས་བྱ་བ་ཁྱོད་ཀྱིས་དེང་ཕན་ཆད་སྲོག་ཆགས་གྲོག་སྦུར་ཡང་བསམས་བཞིན་དུ་སྲོག་མི་གཅད་ན། མིའམ་མི་ལུས་སུ་གྱུར་པ་ལྟ་ལ་ཅི་སྨོས་བཅོམ་ལྡན་
འདས་ཀྱིས་གསུངས་པ། གང་ཡང་དགེ་སློང་མས་མིའམ་མིའི་ལུས་སུ་གྱུར་པ་ཡང་རུང་། བསམས་ནས་རང་གི་ལག་གིས་སྲོག་བཅད་པ་དང་། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་ལ་འཆི་བ་བསྐུལ་ཏམ། དེ་ལ་འཆི་བའི་ཡོན་ཏན་
བསྔགས་ཀྱང་དེ་འདི་སྐད་ཅེས་ཟེར་ཏེ། ཀྱེ་མི་ཁྱོད་འདི་ལྟར་སྡིག་པ་མི་གཙང་བར་སྡུག་ཅིང་འཚོ་བ་ཅི་རུང་གི་ཀྱེ་སྐྱེས་བུ་འཚོ་བ་བས་ཆེས་ཤི་ན་ལེགས་སོ་ཞེས་སེམས་ལ་བསམ། སེམས་ལ་བརྟུན་ཅིང་རྣམ་གྲངས་དུ་མར་འཆི་བར་དེ་ལ་བསྐུལ་ཏམ། དེས་འཆི་བའི་ཡོན་ཏན་
བསྔགས་ཀྱང་རུང་སྟེ། དེ་ཡང་དེ་ལྟ་བུའི་ཐབས་ཀྱིས་དུས་བྱས་ཏེ། དེ་ལྟ་བུའི་གནས་སུ་དགེ་སློང་མས་བརྟུན་ཅིང་བྱས་ན། དེ་བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན། དགེ་སློང་མའི་དངོས་པོ་མེད་པར་

འགྱུར་བ་ནས་སྔ་མ་བཞིན་ཏེ་དྲན་པར་གྱིས་ལ་བག་ཡོད་པ་དང་བརྩོན་པའི་བར་དུ་སྦྱར་རོ། །གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བརྫུན་དུ་སྨྲ་བ་ནི་བཅོམ་ལྡན་འདས་ཀྱིས་རྣམ་གྲངས་དུ་
མ་ལས་ཀྱང་རྣམ་པར་སྨད་དེ། བརྫུན་དུ་སྨྲ་བ་སྤངས་པ་ལ་བསྟོད་དོ། །བསྟོད་དུ་འཇུག་གོ། །བསྔགས་སོ། །བསྒྲགས་པ་ཡིན་གྱིས་མིང་འདི་ཞེས་བྱ་བ་ཁྱོད་ཉོན་ཅིག །ཆུང་ངུ་ན་རྩེད་མོའི་ཕྱིར་ཡང་ཤེས་བཞིན་པའི་བརྫུན་མི་སྨྲ་བར་བྱ་ན། མེད་ལ་ཀུན་མེད་བཞིན་
དུ་མིའི་བླ་མའི་ཆོས་བརྫུན་དུ་སྨྲ་བ་ལྟ་ཅི་སྨོས། བཅོམ་ལྡན་འདས་ཀྱིས་གསུངས་པ། ཡང་གང་ཡང་དགེ་སློང་མ་མངོན་དུ་མི་ཤེས། ཀུན་དུ་མི་ཤེས་ཤིང་མེད་ལ། ཀུན་མེད་བཞིན་དུ་མིའི་བླ་མའི་ཆོས་ཀྱི་སྒྲུབ་པ་འཕགས་པའི་ཁྱད་པར་ཆུད་པར་ཤེས་པའམ། མཐོང་
བའམ། རེག་པར་གནས་པ་ཡང་རུང་སོ་སོར་ཤེས་ཏེ། འདི་ཤེས་སོ། །འདི་མཐོང་ངོ་ཞེས་ཟེར་བ་ལས་ཅི་ཤེས་ཞེ་ན། སྡུག་བསྔལ་ཤེས་སོ། །ཀུན་འབྱུང་བ་དང་། འགོག་པ་དང་། ལམ་ཤེས་སོ། །ཇི་མཐོང་ཞེ་ན། ལྷ་མཐོང་ངོ་། །ཀླུ་དང་། གནོད་སྦྱིན་དང་། ནམ་
མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་མཐོང་ངོ་། །ལྷ་རྣམས་ཀྱིས་ཀྱང་བདག་མཐོང་ངོ་། །ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་
ཆེན་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་རྣམས་ཀྱིས་ཀྱང་བདག་མཐོང་ངོ་། །ལྷ་རྣམས་ཀྱི་སྒྲ་ཐོས་སོ། །ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། ཡི་དགས་དང་།
གྲུལ་བུམ་དང་། ལུས་སྲུལ་པོ་རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་རྣམས་ཀྱིས་

ཀྱང་བདག་གི་སྒྲ་ཐོས་སོ། །ལྷ་རྣམས་ལ་ལྟར་འགྲོའོ། །ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་རྣམས་ལ་ལྟར་འགྲོའོ། །ལྷ་རྣམས་ཀྱང་བདག་ལ་ལྟར་འོང་ངོ་། །
ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་རྣམས་ཀྱང་བདག་ལ་བལྟ་བའི་ཕྱིར་འོང་ངོ་། །ལྷ་རྣམས་དང་ལྷན་ཅིག་ཏུ་སྨྲའོ། །ཀུན་དུ་སྨྲའོ། །སོ་སོར་དགའ་བར་
བྱེད། རྟག་ཏུ་ལྷན་ཅིག་ཏུ་འདུག་གོ། །ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་རྣམས་ཀྱིས་ལྷན་ཅིག་ཏུ་སྨྲའོ། །ཀུན་དུ་སྨྲའོ། །སོ་སོར་དགའ་བར་
བྱེད། རྟག་ཏུ་ལྷན་ཅིག་ཏུ་འདུག་གོ། །ལྷ་རྣམས་ཀྱང་བདག་དང་ལྷན་ཅིག་ཏུ་སྨྲའོ། །ཀུན་དུ་སྨྲས་སོ། །སོ་སོར་དགའ་བར་བྱེད། རྟག་པར་ལྷན་ཅིག་ཏུ་འདུག་གོ། །ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། དྲི་ཟ་དང་། ལྟོ་འཕྱེ་ཆེན་པོ་དང་། མིའམ་ཅི་དང་། ཤ་
ཟ་དང་། ཡི་དགས་དང་། གྲུལ་བུམ་དང་། ལུས་སྲུལ་པོ་རྣམས་ཀྱང་བདག་དང་ལྷན་ཅིག་ཏུ་རྟག་ཏུ་སྨྲའོ། །ཀུན་དུ་སྨྲའོ། །སོ་སོར་དགའ་བར་བྱེད། རྟག་ཏུ་ལྷན་ཅིག་ཏུ་འདུག་གོ། །འདི་ལྟར་མ་ཐོབ་བཞིན་དུ་ངས་མི་རྟག་པའི་འདུ་ཤེས་ཐོབ་པོ་ཞེས་ཟེར་བ་དང་། མི་རྟག་པ་ལ་
སྡུག་བསྔལ་བར་འདུ་ཤེས། སྡུག་བསྔལ་བ་ལ་བདག་མེད་པར་འདུ་ཤེས། ཟས་ལ་མི་མཐུན་པར་འདུ་ཤེས། འཇིག་རྟེན་ཐམས་ཅད་ལ་མི་མོས་པར་འདུ་ཤེས། ཉེས་པའི་དམིགས་སུ་འགྱུར་བར་འདུ་ཤེས། སྤང་བར་འདུ་ཤེས། འདོད་ཆགས་དང་བྲལ་བར་འདུ་ཤེས། འགོག་
པར་འདུ་ཤེས། འཆི་བར་འདུ་ཤེས། མི་གཙང་བར་འདུ་ཤེས། རྣམ་པར་སྔོས་པར་འདུ་ཤེས། རྣམ་པར་རྣགས་པར་འདུ་ཤེས། རྣམ་པར་རུལ་བར་འདུ་ཤེས། རྣམ་པར་འབུས་གཞིགས་པར་འདུ་ཤེས། རྣམ་པར་བམ་པར་འདུ་ཤེས། རྣམ་པར་ཟོས་པར་འདུ་ཤེས། རྣམ་

པར་དམར་བར་འདུ་ཤེས། རྣམ་པར་འཐོར་བར་འདུ་ཤེས། རུས་གོང་དུ་འདུ་ཤེས། སྟོང་པ་ཉིད་དུ་སོ་སོར་རྟོགས་པར་འདུ་ཤེས། མ་ཐོབ་བཞིན་དུ་ངས་ཐོབ་པོ་ཞེས་ཟེར་བ་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་
རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅུང་ཟད་མེད་པའི་སྐྱེ་མཆེད་དང་། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྣམས་སོ། །མ་ཐོབ་བཞིན་དུ་ངས་ཐོབ་པོ་ཞེས་ཟེར་བ་རྒྱུན་དུ་ཞུགས་པའི་འབྲས་བུ་
དང་། །ལན་གཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། རྫུ་འཕྲུལ་གྱི་ཡུལ་དང་། རྫུ་འཕྲུལ་གྱི་རྣ་བ་དང་། གཞན་གྱི་སེམས་ཤེས་པ་དང་། སྔོན་གྱི་གནས་དང་། ཤི་འཕོ་དང་། སྐྱེ་བ་དང་། ཟག་པ་ཟད་པ་དང་། དགྲ་བཅོམ་པ་དང་། རྣམ་པར་
ཐར་པ་བརྒྱད་ལ་སྒོམ་པ་དང་། ཆ་གཉིས་ལས་རྣམ་པར་གྲོལ་བ་དེ་འདྲ་བའི་གནས་ལ་དགེ་སློང་མས་བརྟུན་ཅིང་བྱས་ན་དེས་བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན། དགེ་སློང་མའི་དངོས་པོ་མེད་པར་འགྱུར། དགེ་སྦྱོང་མའི་དངོས་པོ་
ཡང་མེད་པར་འགྱུར་ཏེ། མེད་པའོ། །བསྲུབས་པའོ། །ལྟུང་བའོ། །ཕས་ཕམ་པ་སྟེ། དགེ་སྦྱོང་མར་སླར་དབྱུང་དུ་མེད་དོ། །དེ་འདི་ལྟ་སྟེ། ཤིང་ཏ་ལའི་མགོ་བཅད་པ་བཞིན་ཏེ་སྔོན་པོར་མི་རུང་། སྐྱེར་མི་རུང་། འཕེལ་ཞིང་རྒྱས་པར་མི་རུང་ངོ་། །དེ་ལྟར་དེ་འདྲ་བ་ལ་དགེ་སློང་
མས་བརྟུན་ཅིང་བྱས་ན་དེས་བརྟུན་ཏེ་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན། དགེ་སློང་མའི་དངོས་པོ་མེད་པར་འགྱུར། དགེ་སྦྱོང་མའི་དངོས་པོ་མེད་པར་འགྱུར་ཏེ་མེད་པའོ། །བསྲུབས་པའོ། །ལྟུང་བའོ། །ཕས་ཕམ་པ་སྟེ།
དགེ་སྦྱོང་མར་སླར་དབྱུང་དུ་མེད་དོ། །དེ་ལ་ཁྱོད་ཀྱིས་དེང་ཕན་ཆད་མི་སྤྱོད་པ་དང་། བརྟུན་ཅིང་མི་འཇུག་པ་དང་། མི་སྤྱོད་པར་སྤོང་བ་ལ་སྨྱུར་ཏེ་སེམས་སྲུངས་ལ་དྲན་པ་དང་། བག་ཡོད་པ་དང་། བརྩོན་པར་གྱིས་ཤིག །གང་སུ་ཞིག་གནས་འདི་ལྟ་བུ་ལ་མི་སྤྱོད་དམ།

དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་གསུངས་པ་གང་ཡང་དགེ་སྦྱོང་མ་ཆགས་བཞིན་དུ་ཆགས་ནས་སྐྱེས་པ་དང་ལྷན་ཅིག་མན་ཆད། པུས་མོ་ཡན་ཆད་རེག་ཅིང་ཀུན་རེག་པ་ལ་དགའ་བར་ཚོར་རམ། དགེ་སློང་མས་འདི་
འདྲ་བའི་གནས་ལ་བརྟུན་ཅིང་བྱས་ན་དེ་བརྟུན་ཏེ་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན་ནོ་ཞེས་བྱ་བ་ནས་བརྟུན་ཅིང་མི་འཇུག་པ་དང་། མི་སྤྱོད་པར་སྤོང་བ་ལ་སྨྱུར་ཏེ་སེམས་སྲུངས་ལ་དྲན་པ་དང་། བག་ཡོད་པ་དང་། བརྩོན་པའི་བར་
དུ་སྦྱར་རོ། །གང་སུ་ཞིག་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་གསུངས་པ། གང་ཡང་དགེ་སློང་མ་ཆགས་ཤིང་ཆགས་ནས་སྐྱེས་པ་དང་ལྷན་ཅིག་ཏུ་བརྡའི་ཚིག་དང་། རྩེ་བ་དང་།
དགོད་པ་དང་། དྲེགས་པ་དང་། རྒྱུག་པ་དང་། ལུས་ལ་འཚོག་པར་བྱེད་པ་དང་། བསྟན་ཏམ་དུས་འདོར་རམ། མཚན་མ་འཛུགས་པ་དང་། སྐྱེས་པ་འོངས་སམ། སོང་ཡང་རུང་དགའ་བར་ཚོར་ན་དེ་དང་འདྲ་བས་ཕྱོགས་དེར་ལུས་ཕབ་ཅིང་སྐྱེས་པའི་དབང་དུ་བུད་མེད་གྱུར་ཏེ་དངོས་
པོ་དེ་ལྟ་བུ་བརྒྱད་དང་ལྡན་ཞིང་དགེ་སློང་མས་འདི་འདྲ་བའི་གནས་ལ་བརྟུན་ཅིང་བྱས་ན་དེས་བརྟུན་ཏེ་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན་པ་ནས། གང་བརྟུན་ཅིང་མི་འཇུག་པ་དང་། མི་སྤྱོད་པར་སྤོང་བ་ལ་སྨྱུར་ཏེ་སེམས་སྲུངས་ལ་དྲན་པ་
དང་། །བག་ཡོད་པ་དང་། བརྩོན་པའི་བར་དུ་བྱའོ། །གང་སུ་ཞིག་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་གསུངས་པ། གང་ཡང་དགེ་སློང་མ་ཞིག་གིས་སྔོན་ཕས་ཕམ་པ་བྱུང་ཞིང་
མི་གནས་པར་གྱུར་པ་དགེ་སློང་མ་ཞིག་གིས་ཤེས་ཀྱང་དེས་གང་གི་ཚེ་ཤི་བར་གྱུར་པའམ། སླར་བབས་པར་གྱུར་པའམ། ཡུལ་གཞན་དུ་བྲོས་པ་དེའི་འོག་ཏུ་འདི་སྐད་དུ་འཕགས་མ་དག་སྔོན་བདག་གིས་དགེ་སློང་མ་དེ་ཇི་ལྟར་ཕས་ཕམ་སྟེ་གནས་སུ་མི་རུང་བར་ཤེས་སོ་ཞེས་སྨྲས་

ཏེ། དགེ་སློང་མའི་ཁ་ན་མ་ཐོ་བ་དང་བཅབས་པ་དེ་འདྲ་བའི་གནས་ལ་བརྟུན་ཅིང་བྱས་ན། དེས་བརྟུན་ཏེ་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་མ་མ་ཡིན། ཤཱཀྱའི་སྲས་མོ་མ་ཡིན་པ་ནས་སྔ་མ་བཞིན་ཏེ་མི་སྤྱོད་དམ། མི་སྤྱོད་དོ། །སྐྱོ་བ་དང་། རབ་ཏུ་
བསམ་པས་ཀུན་དུ་བསྲུངས་ཏེ་དྲན་པ་དང་། བག་ཡོད་པ་དང་། བརྩོན་པའི་བར་དུ་བྱའོ། །གང་སུ་ཞིག་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་ཀྱང་གསུངས་པ། གང་ཡང་དགེ་སློང་
མས་འདི་ལྟར་དགེ་སློང་ཕ་དགེ་སློང་གི་དགེ་འདུན་འདུས་པས་སྤང་བར་འགྱུར་བའི་ལས་བྱས། དགེ་སློང་མའི་དགེ་འདུན་འདུས་པར་གྱུར་པས་ཀྱང་དེ་ལ་ཕྱག་མི་སྟེར་བར་སྡོམ་པ་བཅས་པར་གྱུར་ནས། དེ་སྐྲ་ལངས་པ་དང་། ཉལ་བཞིན་དུ་དགེ་འདུན་རྣམས་ལ་སྤུ་ཉལ་བར་
བྱེད། །འབྱུང་བར་འཇུག །ཕྱག་བྱེད་པར་སྟོན། མཚམས་ཀྱི་ནང་ན་འདུག་ཅིང་བཟོད་པ་གསོལ་བར་ཤེས་བཞིན་དུ་དེ་ལ་འདི་སྐད་ཅེས་ཟེར་རོ། །འཕགས་པ་ཁྱོད་སྐྲ་ཉལ་བ་དང་། ལངས་བཞིན་དུ་དགེ་འདུན་རྣམས་ལ་སྤུ་ཉལ་བ་དང་། འབྱུང་བར་འཇུག་པ་ཡང་
མ་བྱེད་ཅིག །ཕྱག་བྱེད་པར་སྟོན་པ་དང་། མཚམས་ཀྱི་ནང་ན་འདུག་ཅིང་བཟོད་པ་གསོལ་བ་ཡང་མ་བྱེད་ཅིག །བདག་གིས་འཕགས་པ་ཁྱོད་ཀྱི་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་དང་། ཀློག་པ་དང་། ཁ་ཏོན་དང་། རྣལ་
འབྱོར་ཡིད་ལ་བྱ་བ་དང་། འཕགས་པ་ལ་ཅི་དང་ཅིས་བྲེལ་བར་གྱུར་པ་དེ་དང་དེ་དག་ཐམས་ཅད་ཀྱིས་མི་བྲེལ་བར་བྱེད་པའི་དགེ་སློང་མ་དེ་ལ་དགེ་སློང་མ་རྣམས་ཀྱིས་འདི་སྐད་དུ་བསྒོ་ཤིག །འཕགས་མ་ཁྱེད་དགེ་སློང་ཕ་དེ་ནི་འདུས་པའི་དགེ་འདུན་གྱིས་སྤངས་པའི་ལས་
བྱས་པ་ཡིན། དགེ་སློང་མའི་དགེ་འདུན་གྱིས་ཀྱང་དེ་ལ་ཕྱག་མི་བྱ་བའི་སྡོམ་པ་བཅས་པ་ཡིན་ཏེ། དགེ་སློང་ཕ་དེ་སྐྲ་ལངས་པ་དང་ཉལ་བ་བཞིན་དུ་དགེ་འདུན་ལ་སྤུ་ཉལ་བར་བྱེད། འབྱུང་བར་འཇུག །ཕྱག་བྱེད་པར་སྟོན། མཚམས་ཀྱི་ནང་ན་འདུག་ཅིང་བཟོད་པ་གསོལ་

བར་ཤེས་བཞིན་དུ་དེ་ལ་འཕགས་མ་ཁྱོད་ཀྱིས་འདི་སྐད་ཅེས་མ་སྨྲ་ཤིག །འཕགས་པ་ཁྱོད་སྐྲ་ཉལ་བ་དང་ལངས་བཞིན་དུ་དགེ་འདུན་ལ་སྤུ་ཉལ་བ་དང་འབྱུང་བར་འཇུག་པ་ཡང་མ་བྱེད་ཅིག །ཕྱག་བྱེད་པར་སྟོན་པ་དང་། མཚམས་ཀྱི་ནང་ན་འདུག་ཅིང་བཟོད་པར་གསོལ་
བར་ཡང་མ་བྱེད་ཅིག་དང་། བདག་གིས་ཁྱོད་ལ་ཀུན་སྦྱར་ཏེ། ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་དང་། ཀློག་པ་དང་། ཁ་ཏོན་དང་། རྣལ་འབྱོར་ཡིད་ལ་བྱ་བ་དང་། ཅི་དང་ཅིས་འཕགས་པ་ཁྱོད་ལ་བྲེལ་བར་གྱུར་པ་དེ་དང་དེ་དག་ཐམས་ཅད་
བདག་གིས་མི་བྲེལ་བར་སྦྱར་རོ། །འཕགས་མ་ཁྱོད་ཀྱིས་སྤངས་པའི་རྗེས་སུ་འཇུག་པའི་ཚིག་གིས་ལམ་དེ་ལྟ་བུ་ཐོང་ཤིག་ཅེས་དགེ་སློང་མ་དེ་ལ་དེ་ལྟ་བུར་དགེ་སློང་མ་རྣམས་ཀྱིས་བསྒོ་སྟེ། དོན་དེ་ལྟར་བཏང་ན་ནི་ལེགས། དེ་སྟེ་མ་བཏང་ན་ལན་གཉིས་ལན་གསུམ་གྱི་བར་དུ་བསྒོ་
ཞིང་སྟོན་ཅིག །དོན་དེ་སླར་སྤང་བའི་ཕྱིར་ལན་གཉིས་ལན་གསུམ་དུ་བསྒོ་ཞིང་བསྟན་པ་ལས་དོན་དེ་སླར་བཏང་ན་ནི་ལེགས། དེ་སྟེ་མ་བཏང་ཞིང་དགེ་སློང་མ་སྤངས་པའི་རྗེས་སུ་འཇུག་ཅིང་དེ་ལྟ་བུའི་གནས་སུ་བརྟུན་ཅིང་བྱས་ན་དེ་བརྟུན་ཅིང་བྱས་མ་ཐག་ཏུ་དགེ་སློང་མ་མ་ཡིན། དགེ་སྦྱོང་
མ་མ་ཡིན། ཤཱཀྱའི་སྲས་མོ་མ་ཡིན་པ་ནས་སྔ་མ་བཞིན་ཏེ། རབ་ཏུ་བསམས་པས་ཀུན་ཏུ་བསྲུང་སྟེ་དྲན་པ་དང་། བག་ཡོད་པ་དང་། བརྩོན་པའི་བར་དུ་བྱའོ། །གང་སུ་ཞིག་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་དོ་ཞེས་སྨྲོས་ཤིག །མིང་འདི་ཞེས་བྱ་བ་ཁྱོད་
ཉོན་ཅིག །བརྒྱད་པོ་འདི་དག་ནི་བཅོམ་ལྡན་འདས་མཁྱེན་ཅིང་གཟིགས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འདི་ནི་རབ་ཏུ་བྱུང་ཞིང་བསྙེན་པར་རྫོགས་པའི་དགེ་སློང་མ་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་སུ་
བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །བརྒྱད་གང་ཞེ་ན། མིང་འདི་ཞེས་བྱ་བ་བུད་མེད་ཀྱིས་དགེ་སློང་རྣམས་ལས་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་འགྱུར་བར་རབ་ཏུ་རྟོགས་པར་བྱའོ། །མིང་འདི་ཞེས་བྱ་བ་

བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་དང་པོར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །དགེ་སློང་མ་རྣམས་ཀྱིས་ཟླ་བ་ཕྱེད་ཕྱེད་ཅིང་དགེ་སློང་ཕ་རྣམས་ལས་སྟོན་
པའི་ལུང་རྗེས་སུ་བསྟན་པ་བཙལ་བར་བྱའོ། །མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་གཉིས་སུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །དགེ་སློང་ཕ་མེད་པའི་
གནས་སུ་དགེ་སློང་མ་དབྱར་ཚུལ་དུ་མ་འཇུག་ཤིག །མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་གསུམ་དུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །དགེ་སློང་མས་
དབྱར་ཚུལ་ནས་བྱུང་བའི་ཚེ་དགེ་འདུན་སྡེ་གཉིས་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་དུ་སྐབས་དབྱེ་བར་བྱའོ། །མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བཞིར་བཅས་ཏེ། དེ་
ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །དགེ་སློང་མས་དགེ་སློང་ལ་ཚུལ་ཁྲིམས་ཉམས་སམ། ལྟ་བ་ཉམས་སམ། སྤྱོད་པ་ཉམས་སམ། འཚོ་བ་ཉམས་ཀྱང་རུང་མ་གླེང་ཤིག །དྲན་པར་མ་བྱེད་ཅིག །དགེ་སློང་མས་དགེ་སློང་ཕ་ཚུལ་ཁྲིམས་ལས་
ཉམས་སམ། ལྟ་བ་ལས་ཉམས་སམ། སྤྱོད་པ་ལས་ཉམས་སམ། འཚོ་བ་ལས་ཉམས་ཀྱང་རུང་གླེང་ཞིང་དྲན་པར་བྱེད་པ་མི་གནང་ངོ་། །དགེ་སློང་ཕས་ནི་དགེ་སློང་མས་ཚུལ་ཁྲིམས་ཉམས་སམ། ལྟ་བ་ཉམས་སམ། སྤྱོད་པ་ཉམས་སམ། འཚོ་བ་ཉམས་པ་ལ་གླེང་བ་དང་།
དྲན་པར་བྱེད་པ་ལ་མི་གནང་བ་མེད་དེ། འདི་ནི་མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་ལྔར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །དགེ་སློང་མས་དགེ་སློང་ལ་ཁ་ངན་

མི་བྱ། །ཁྲོ་བར་མི་བྱ། བསྡིགས་པར་མི་བྱ། དགེ་སློང་མས་དགེ་སློང་ལ་ཁ་ངན་དང་། ཁྲོ་བ་དང་། བསྡིགས་པ་མི་གནང་སྟེ། མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་དྲུག་ཏུ་བཅས་ཏེ། དེ་ལ་བུད་
མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །དགེ་སློང་མ་ལ་བླ་མའི་ཆོས་ཤིག་བྱུང་ན། དེས་དགེ་འདུན་གཉི་ག་ལ་ཟླ་བ་ཕྱེད་ཀྱི་བར་དུ་ཡིད་དགའ་བར་བྱ་བ་སྤྱོད་ཅིག །མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་
བྱ་བའི་ཕྱིར་བླ་མའི་ཆོས་བདུན་དུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་མས་ད་གཟོད་བསྙེན་པར་རྫོགས་པའི་དགེ་སློང་ལ་ཚིག་སྙན་པ་དང་། བསྟོད་པ་དང་། ལྡང་བ་དང་། ཐལ་མོ་
སྦྱར་བ་དང་། ཕྱག་བྱ་བ་བྱས་ཏེ། མིང་འདི་ཞེས་བྱ་བ་བཅོམ་ལྡན་འདས་ཀྱིས་འདི་ནི་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་དུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཅི་བླ་མའི་ཆོས་འདི་བརྒྱད་ཡང་དག་
པར་བཟུང་སྟེ་སྤྱོད་དམ། སྤྱོད་དོ། །མིང་འདི་ཞེས་བྱ་བ་ཁྱོད་ཉོན་ཅིག །བཅོམ་ལྡན་འདས་ཀྱིས་བཞི་པོ་འདི་དག་ནི་སྔ་མ་བཞིན་ཏེ། ཡང་དག་པར་རྫོགས་པའི་སངས་རྒྱས་ཀྱིས་ཤེས་པའི་བར་དུ་སྦྱར་རོ། །བཞི་གང་ཞེ་ན། དེང་ཕན་ཆད་མིང་འདི་ཞེས་བྱ་བ་ཁྱོད་ངན་པར་སྨྲ་
བ་ལ་སླར་མི་སྨྲ། ཁྲོས་པ་ལ་སླར་མ་ཁྲོ་ཤིག །རྡེག་པ་ལ་སླར་མི་རྡེག །འཕྱ་བ་ལ་སླར་མི་འཕྱ། མིང་འདི་ཞེས་བྱ་བ་ཁྱོད་ཉོན་ཅིག །ཁྱོད་སྔོན་འདི་ལྟར་བདག་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་ཤོག་ཤིག་ཅེས་
སྨོན་པ་དེ་ནི་ཁྱོད་རབ་ཏུ་བྱུང་ཞིང་བསྙེན་པར་རྫོགས་ཏེ། མཁན་མོ་ཚུལ་ཁྲིམས་དང་ལྡན་པ་དང་། སློབ་དཔོན་ཚུལ་ཁྲིམས་དང་ལྡན་པ་དང་། དགེ་འདུན་གཉི་ག་ཚོགས་འདུས་པས། གསོལ་བ་དང་བཞིའི་ལས་ཀྱི་ཕྱིར་བྱ་བ་མེད་པ་དང་། གཞག་པར་བྱ་བ་མེད་པས་རབ་ཏུ་བྱུང་ཞིང་

བསྙེན་པར་རྫོགས་སོ། །མིང་འདི་ཞེས་བྱ་བ་ཁྱོད་ཉོན་ཅིག །གང་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་མས་བསླབ་པ་དེ་ནི་དེང་བསྙེན་པར་རྫོགས་པས་ཀྱང་དེ་ལ་བསླབ་པར་བྱའོ། །གང་དེང་བསྙེན་པར་རྫོགས་པས་བསླབ་པ་དེ་བསྙེན་པར་རྫོགས་ནས་
ལོ་བརྒྱ་ལོན་པས་ཀྱང་དེ་བསླབ་པར་བྱའོ། །གང་ཚུལ་ཁྲིམས་མཚུངས་པར་བསླབ་པ་མཐུན་པ་དང་། སོ་སོར་ཐར་པའི་མདོ་ཁ་ཏོན་ཀློག་པར་མཚུངས་པ་ལ་དེང་ཕན་ཆད་ཁྱོད་ཀྱིས་མཉེས་པར་བྱའོ། །མི་མཉེས་པར་མི་བྱའོ། །དེང་ཕན་ཆད་མིང་འདི་ཞེས་བྱ་བའི་མཁན་མོ་ལ་མར་
འདུ་ཤེས་གཞག་པར་བྱའོ། །མཁན་མོས་ཀྱང་དེ་ལ་བུ་མོར་འདུ་ཤེས་གཞག་པར་བྱའོ། །དེང་ཕན་ཆད་ཁྱོད་ཀྱིས་མཁན་མོ་ལ་ནམ་འཚོའི་བར་དུ་བསྙེན་བཀུར་བྱོས་ཤིག །མཁན་མོས་ཀྱང་ཁྱོད་ལ་ནམ་འཚོའི་བར་དུ་བསྙེན་བཀུར་བྱོས་ཤིག །དེང་ཕན་ཆད་མིང་འདི་ཞེས་བྱ་བ་ཁྱོད་
ཀྱིས་འཇིགས་པའི་དབང་དུ་བྱས་ཤིང་བླ་མ་དང་ཚངས་པ་མཚུངས་པར་སྤྱོད་པ་དང་། གནས་བརྟན་མ་དང་། བར་མ་དང་། གསར་བུ་རྣམས་ལ་རི་མོ་བྱོས་ཤིག །མིང་འདི་ཞེས་བྱ་བ་ཁྱོད་དེང་ཕན་ཆད་ལུང་ནོས་ཤིག །ལྷོགས་ཤིག །ཁ་ཏོན་གྱིས་ཤིག །ཕུང་པོ་ལ་མཁས།
ཁམས་ལ་མཁས། སྐྱེ་མཆེད་ལ་མཁས། རྟེན་ཅིང་འབྲེལ་བར་འབྱུང་བ་ལ་མཁས། གནས་དང་གནས་མ་ཡིན་པ་ལ་མཁས་པར་བྱའོ། །ཁྱོད་ཀྱིས་མ་ཐོབ་པ་ཐོབ་པའི་ཕྱིར། ཁོང་དུ་མ་ཆུད་པ་ཁོང་དུ་ཆུད་པའི་ཕྱིར། མངོན་དུ་མ་བྱས་པ་མངོན་དུ་བྱ་བའི་ཕྱིར་བརྩོན་འགྲུས་མ་གཏང་
ཤིག །འདི་དག་ནི་ངས་ཁྱོད་ལ་ཆེན་པོ་ཆེ་བའི་རྣམས་བསླབ་པའི་གཞིར་བཤད་དོ། །གཞན་ནི་ཁྱོད་ཀྱི་སློབ་དཔོན་དང་། མཁན་མོ་དང་། སློབ་དཔོན་གཅིག་པ་དང་། མཁན་མོ་གཅིག་པ་དང་། སྨྲ་བ་དང་། ཀུན་དུ་སྨྲ་བ་དང་། བསྟོད་པ་དང་། མཛའ་བ་དག་གིས་ཀྱང་དེ་བཞིན་
སྟོན་ཏོ། །ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་ཀློག་པ་ལ་ཉོན་ཅིག །འདི་ལྟར་བསྙེན་པར་རྫོགས་པ་ནི། ཤེས་རབ་མཆོག་གི་བསྟན་པ་ལ། །ད་ནི་བསྙེན་པར་ཁྱོད་རྫོགས་ཏེ། །ཁོམ་པ་ཕུན་སུམ་ཚོགས་རྙེད་དཀའ། །འདི་ལ་སྐྱོ་བར་མ་བྱེད་ཅིག །བཟང་མོ་ལས་ནི་རབ་

ཏུ་བྱུང་། །ཡོངས་སུ་དག་ལས་བསྙེན་པར་རྫོགས། །བདེན་ཞེས་བྱ་བའི་སངས་རྒྱས་ཀྱིས། །རབ་ཏུ་མཁྱེན་ནས་གསུངས་པའོ། །མིང་འདི་ཞེས་བྱ་བ་ཁྱོད་བསྙེན་པར་རྫོགས་ཀྱིས་བག་ཡོད་པར་སྤྱོད་ཅིག །གླེང་གཞི་ནི་མཉན་དུ་ཡོད་པ་ན་སྟེ། ནམ་སངས་རྒྱས་བཅོམ་ལྡན་
འདས་ཀྱིས་གཽ་ཏ་མཱི་སྐྱེ་དགུའི་བདག་མོ་ཆེན་མོ་འཁོར་ཤཱཀྱ་མོ་ལྔ་བརྒྱ་རྣམས་ཀྱིས་བླ་མའི་ཆོས་ཡི་དམ་བཅས་ཏེ་རབ་ཏུ་བྱུང་ནས་བསྙེན་པར་རྫོགས་ཏེ་དགེ་སློང་མའི་དངོས་པོ་ལ་རྗེས་སུ་ཡི་རང་བ་དེའི་ཚེ་དེ་དག་གིས་གཞན་དག་དགེ་སློང་མར་རབ་ཏུ་བྱུང་ཞིང་བསྙེན་པར་རྫོགས་པར་བྱས་སོ། །
དེ་དག་གིས་ཀྱང་གཞན་དག་སྟེ། དེ་ན་དགེ་སློང་མའི་དགེ་འདུན་མ་མང་ཞིང་འཕེལ་བར་གྱུར་ཏོ། །དེ་ནས་དགེ་སློང་མ་གནས་བརྟན་དང་གནས་བརྟན་མ་དེ་དག་སྐྱེ་དགུའི་བདག་མོ་ཆེན་མོ་གང་ན་བ་དེར་དོང་སྟེ་ཕྱིན་པ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་འདི་སྐད་སྨྲས་སོ། །ཨེ་མའོ་
འཕགས་མ་དགེ་སློང་མ་གནས་བརྟན་མ་འདི་དག་ལ་གང་དགེ་སློང་ཕ་གསར་བུ་དང་། བར་མ་དང་། གཞོན་ནུ་རབ་ཏུ་བྱུང་ནས་རིང་པོ་མ་ལོན་པ་དེ་དག་གཅིག་ལ་གཅིག་རྒན་རིམས་སུ་ཕྱག་འཚལ་དང་ཅེས་འདི་སྐད་སྨྲས་པ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོས་དགེ་སློང་མ་དེ་དག་
ལ་འདི་སྐད་ཅེས་སྨྲས་སོ། །དེ་བས་ན་ནུ་མོ་དག་སྡོད་ཅིག་དང་། བདག་གིས་འཕགས་པ་ཀུན་དགའ་བོ་ལ་ཞུས་ཏེ་བྱའོ། །དེ་ལྟར་གྱུར་པ་གཽ་ཏ་མཱི་སྐྱེ་དགུའི་བདག་མོ་ཆེན་མོས་ཚེ་དང་ལྡན་པ་ཀུན་དགའ་བོ་ལ་སྨྲས་སོ། །དེ་སྐད་སྨྲས་པ་དང་། ཚེ་དང་ལྡན་པ་ཀུན་དགའ་
བོས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་དེ་བས་ན་གཽ་ཏ་མཱི་སྡོད་ཅིག་དང་། བདག་གིས་བཅོམ་ལྡན་འདས་ལ་གསོལ་ལོ་ཞེས་སྨྲས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །
ཕྱོགས་གཅིག་ཏུ་འདུག་ནས། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཨེ་མའོ་བཅོམ་ལྡན་འདས་དགེ་སློང་མའི་གནས་བརྟན་དང་གནས་བརྟན་མ་དེ་དག་ལ་གང་དགེ་སློང་ཕ་གསར་བུ་དང་། བར་མ་དང་། གཞོན་ནུ་རབ་ཏུ་བྱུང་ནས་རིང་པོ་མ་ལོན་པ་འདི་དག་གཅིག་

ལ་གཅིག་ཇི་ལྟར་རྒན་རིམས་སུ་ཕྱག་འཚལ་ཡང་མི་བསྔོའོ་ཞེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་འདི་ལྟ་བུའི་ཚིག་ཕྱིན་ཆད་མ་སྨྲ་ཤིག །དེ་ཅིའི་ཕྱིར་ཞེ་ན། གལ་ཏེ་ཀུན་
དགའ་བོ་བུད་མེད་དག་ལེགས་པར་བཤད་པའི་ཆོས་འདུལ་བ་ལ་རབ་ཏུ་མ་བྱུང་བར་གྱུར་ན་ནི་ད་དུང་ཡང་དད་པའི་བྲམ་ཟེ་དང་། ཁྱིམ་བདག་དག་གིས་དགེ་སློང་ལ་བསོད་སྙོམས་དྲ་བ་བཀང་སྟེ་ཐེག་དྲོད་ཀྱིས་སྟེར་རོ། །ཀུན་དགའ་བོ་བུད་མེད་དག་ལེགས་པར་བཤད་པའི་ཆོས་འདུལ་བ་
ལ་རབ་ཏུ་མ་བྱུང་ན་ནི་ད་དུང་ཡང་བྲམ་ཟེ་དང་། ཁྱིམ་བདག་དད་པ་དག་གིས་མ་བགོས་པའི་གོས་སར་པ་ཁ་ཚར་རིང་པོ་དག་སྲང་གི་ནང་དུ་བཏིང་སྟེ་འདི་སྐད་ཅེས་སྨྲ་བར་འགྱུར་རོ། །དགེ་སྦྱོང་དག་རས་སར་པ་ཁ་ཚར་རིང་པོ་བཏིང་པ་འདིའི་སྟེང་དུ་གཤེགས་ཤིག །བདག་ཅག་ཡུན་
རིང་པོའི་དོན་དང་ཕན་པ་དང་བདེ་བར་འགྱུར་རོ། །གལ་ཏེ་ཀུན་དགའ་བོ་བུད་མེད་རྣམས་ལེགས་པར་བཤད་པའི་ཆོས་འདུལ་བ་ལ་རབ་ཏུ་མ་བྱུང་བར་གྱུར་ན་ནི་ད་དུང་ཡང་བྲམ་ཟེ་དང་ཁྱིམ་བདག་དད་པ་དག་གིས་ཡན་ལག་གི་མཆོག་ལས་སྐྱེས་པའི་སྐྲ་ས་ལ་བཏིང་སྟེ། དགེ་སྦྱོང་
དག་སྐྲ་འདིའི་སྟེང་དུ་གཤེགས་ཤིག །དེ་ནི་བདག་ཅག་ལ་ཡུན་རིང་པོའི་དོན་དང་ཕན་པ་དང་བདེ་བར་འགྱུར་ཞེས་སྨྲའོ། །གལ་ཏེ་ཀུན་དགའ་བོ་བུད་མེད་རྣམས་ལེགས་པར་བཤད་པའི་ཆོས་འདུལ་བ་ལ་རབ་ཏུ་མ་བྱུང་བར་གྱུར་ན་ནི་ད་ཡང་ངའི་ཉན་ཐོས་པ་དག་གི་འོད་ཀྱིས་
ཟླ་བ་དང་། ཉི་མ་འདི་གཉིས་ལྟ་བུ་མཐུ་ཆེ་བ་དང་རྫུ་འཕྲུལ་ཆེ་བ་ཡང་ཟིལ་ཀྱིས་གནོན་ན་མུ་སྟེགས་ཅན་རྣམས་ལྟ་ཅི་སྨོས། ཀུན་དགའ་བོ་བུད་མེད་རྣམས་ལེགས་པར་བཤད་པའི་ཆོས་འདུལ་བ་ལ་རབ་ཏུ་མ་བྱུང་ན་ནི་ད་དུང་ངའི་བསྟན་པ་ལོ་སྟོང་ཚང་བར་ཉེས་པ་མེད་ཅིང་ཉམས་
པ་མེད་པར་གནས་པར་འགྱུར་རོ། །དེ་ལྟ་བས་ན་ཀུན་དགའ་བོ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་མས་ཀྱང་ད་གཟོད་བསྙེན་པར་རྫོགས་པའི་དགེ་སློང་ཕ་ལ་ཚིག་སྙན་པ་དང་། བསྟོད་པ་དང་། ལྡང་བ་དང་། ཐལ་མོ་སྦྱར་བ་དང་། ཕྱག་བྱ་བ་ལ་སོགས་པའི་ལས་

བྱོས་ཤིག །གླེང་གཞི་མཉན་དུ་ཡོད་པ་ན་སྟེ། དགེ་སློང་མ་རྣམས་ལས་སྡེ་བཞི་འདུས་པས་བྱ་བ་དང་། སྡེ་ལྔ་འདུས་པས་བྱ་བ་དང་། སྡེ་བཅུ་གཉིས་འདུས་པས་ལས་བྱ་བ་ཡང་ཡོད་དེ། དེ་དག་གིས་དགེ་འདུན་གཉི་ག་བསྡུས་པ་དང་བྱ་བ་མང་པོར་གྱུར་ཏོ། །བྱ་བ་མང་
པོས་བཤད་པ་དང་། བཀླག་པ་དང་། བཟླས་པ་དང་། རྣལ་འབྱོར་དང་། ཡིད་ལ་བྱ་བ་རྣམས་ཀྱི་བར་ཆད་དུ་གྱུར་ཏོ། །དེ་ལྟར་གྱུར་པའི་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དབྱུང་བ་དང་། བསྙེན་པར་རྫོགས་པ་དང་། སྤྱིས་བྱ་བའི་
ལས་མ་གཏོགས་པར་དགེ་སློང་ཕའི་ལས་ཀྱང་ལོགས་ཤིག་ཏུ་བྱོས་ཤིག །དགེ་སློང་མ་རྣམས་ཀྱང་ལོགས་ཤིག་ཏུ་བྱོས་ཤིག་ཅེས་བཀའ་སྩལ་ཏོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་དུས་ན་མཉན་དུ་ཡོད་པ་ན་ཁྱིམ་བདག་གཞན་ཞིག་འདུག་སྟེ་རིགས་མཉམ་པ་ལས་
ཆུང་མ་ཞིག་བླངས་ཏེ་དེ་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་ལ་རྩེ་དགའ་ཡོངས་སུ་སྤྱོད་པ་ལས་ཕྱི་ཞིག་ན་དེའི་ཆུང་མ་སེམས་ཅན་དང་ལྡན་པར་གྱུར་ཏེ་ཟླ་བ་དགུ་འདས་པ་དང་བུ་མོ་ཞིག་བཙས་ནས་དེ་བཙས་མ་ཐག་ཕ་དུས་ལས་འདས་སོ། །དེ་མས་གསོས་ཤིང་བསྐྱེད་
དེ་ཆེན་པོར་གྱུར་པ་དང་། དེའི་མ་ཡང་དུས་ལས་འདས་སོ། །དེ་ནས་དུས་ཕྱི་ཞིག་ན་སྦོམ་དགའ་མོ་བསོད་སྙོམས་ཀྱི་ཕྱིར་ཞུགས་པ་དང་། དེས་དེ་སྲང་ཞིག་ཏུ་མཐོང་སྟེ་བུ་མོ་ཁྱོད་སུའི་ཡིན་ཞེས་སྨྲས་པ་དང་། དེས་འཕགས་མ་སུའི་ཡང་མ་ལགས་ཏེ་མགོན་མེད་པའོ་ཞེས་སྨྲས་
པ་དང་། དེས་བུ་མོ་དེ་སྟེ་དེ་བཞིན་ན་ཅིའི་ཕྱིར་རབ་ཏུ་མི་འབྱུང་ཞེས་སྨྲས་པ་དང་། དེས་སུ་ཞིག་གིས་རབ་ཏུ་འབྱིན་ཞེས་སྨྲས་པ་དང་། དེས་བུ་མོ་ངས་རབ་ཏུ་དབྱུང་གིས་ཚུར་ཤོག །འདོང་ཞེས་སྨྲས་པ་དང་ལེགས་སོ་ཞེས་ཟེར་ཏེ་དེ་དང་ལྷན་ཅིག་ཏུ་དབྱར་མོ་ཁང་དུ་དོང་ནས་སྦོམ་དགའ་མོས་
རབ་ཏུ་ཕྱུང་བ་དང་། དེ་ཉོན་མོངས་པས་གཟིར་ནས་སླར་བབས་སོ། །སྦོམ་དགའ་མོ་བསོད་སྙོམས་ལ་ཞུགས་པ་དང་། མཐོང་ནས་དེས་བུ་མོ་ཇི་ལྟར་འཚོ་ཞིང་འདུག་ཅེས་སྨྲས་པ་དང་། དེས་རྐང་པ་ལ་ཕྱག་བྱས་ཏེ་སྨྲས་པ། འཕགས་མ་སྡུག་བསྔལ་ཞིང་འཚོའོ། །བུ་མོ་དེ་

སྟེ་དེ་བཞིན་ན་ཅིའི་ཕྱིར་ཡང་རབ་ཏུ་མི་འབྱུང་། དེས་སྨྲས་པ། འཕགས་མ་སུ་ཞིག་བདག་སླར་བབས་པ་ལས་རབ་ཏུ་འབྱིན། བུ་མོ་བདག་གིས་རབ་ཏུ་དབྱུང་ངམ། ལེགས་སོ་ཞེས་སྨྲས་པ་དང་། དེས་རབ་ཏུ་ཕྱུང་སྟེ་བསོད་སྙོམས་ལ་ཞུགས་པ་དང་བྲམ་ཟེ་དང་ཁྱིམ་བདག་
དག་གིས་མཐོང་ནས་མ་ལེགས་སོ། །དགེ་སློང་ཤཱཀྱའི་བུ་མོ་དག་ནི་ཆོས་ལ་ངལ་བསོས་ཤིང་ངལ་བསོས་ཤིང་ཆོས་ལ་སྤྱོད་དོ་ཞེས་འཕྱའོ། །དེ་ལྟར་གྱུར་པ་དགེ་སློང་མ་དག་གིས་དགེ་སློང་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ།
གང་ཉེས་པའི་དམིགས་སུ་གྱུར་པ་ནི་དགེ་སློང་མ་དག་བབས་ཤིང་སླར་རབ་ཏུ་བྱུང་བའི་ཕྱིར་ཏེ། དེ་ལྟ་བས་ན་དགེ་སློང་མ་དག་གིས་བབས་པ་ལས་སླར་རབ་ཏུ་མི་དབྱུང་བར་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་ནི་རིགས་པར་
འཕྱ་སྟེ། དེ་ལྟ་བས་ན་དགེ་སློང་མ་དག་གིས་ལན་གཅིག་བབས་པ་མཐུ་མེད་པ་དགེ་སློང་མ་རབ་ཏུ་མ་དབྱུང་ཤིག །རབ་ཏུ་འབྱིན་ན་འདས་པ་དང་བཅས་པར་འགྱུར་རོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་བརྒྱད་པ། མདོར་ན། འཕྱན་
པ་དག་དང་འདོད་ཆེན་དང་། །གཤེ་བ་དང་ཡང་འཕྱ་བ་སྟེ། །དགེ་སློང་ལ་ནི་དགེ་སློང་མ། །འཕྱ་བ་དགེ་སློང་དགེ་ཚུལ་མའོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་ན་ཡུལ་འཁོར་
མོ་འཇིག་ན་ཁྱིམ་བདག་གཽ་ཏ་མ་ཞེས་བྱ་བ་ཞིག་འདུག་པ་ཕྱུག་ལ་ནོར་མང་ལ་ལོངས་སྤྱོད་ཆེན་པོ་ཞིག་སྟེ། དེས་རིགས་མཉམ་པ་ལས་ཆུང་མ་ཞིག་བླངས་ནས་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་དུས་ཕྱི་ཞིག་ན་ཟོང་ཁྱེར་ནས་ཡུལ་རྡོ་འཇོག་ཏུ་སོང་སྟེ་ཁྱིམ་བདག་གཞན་
ཞིག་གི་ཁྱིམ་དུ་ཕྱིན་པ་དང་། དེས་དེ་ལ་བདེ་བར་འོངས་སམ་ཞེས་བྱ་བའི་ཚིག་གིས་སྙན་པ་བརྗོད་ནས་ངལ་བསོས་ཏེ། གཅིག་ལ་གཅིག་བྱམས་པ་ལས་ཁྱིམ་བདག་གཽ་ཏ་མ་དེ་དང་ལྷན་ཅིག་མཛའ་བོར་གྱུར་ཏོ། །ཁྱིམ་བདག་གཽ་ཏ་མས་ཟོང་རྣམས་བཙོངས་ཏེ་སླར་གྱི་ཟོང་

རྣམས་ཁྱེར་ནས་གྲོང་ཁྱེར་འཁོར་མོ་འཇིག་ཏུ་སོང་ངོ་། །ཡུལ་རྡོ་འཇོག་གི་ཁྱིམ་བདག་ཀྱང་དུས་ཕྱི་ཞིག་ན་ཟོང་ཁྱེར་ནས་འཁོར་མོ་འཇིག་ཏུ་འོངས་ཏེ། དེ་ཡང་ཁྱིམ་བདག་གཽ་ཏ་མ་ཁྱིམ་དུ་ཕྱིན་པ་དང་། དེས་ཀྱང་དེ་ལ་རི་མོ་དང་མཛའ་བའི་ཚིག་གིས་བདེ་བར་འོངས་
སམ་ཞེས་སྨྲས་ནས་ངལ་བསོས་སོ། །དེ་གཉིས་གཅིག་ལ་གཅིག་མཛའ་བ་རབ་ཏུ་སྐྱེས་པར་གྱུར་ཏོ། །ཡུལ་རྡོ་འཇོག་ན་གནས་པའི་ཁྱིམ་བདག་གིས་ཁྱིམ་བདག་གཽ་ཏ་མ་ལ་གྲོགས་པོ་བདག་ཅག་གཉིས་དུས་ལས་འདས་པའི་འོག་ཏུ་བུ་དང་། ཚ་བོ་དང་། ཡང་ཚ་དང་། སུམ་
ཚ་དག་མཛའ་བའི་རྒྱུན་མི་འཆད་པར་བྱ་བའི་ཐབས་ཅི་ཡོད་ཅེས་སྨྲས་པ་དང་། གཽ་ཏ་མས་སྨྲས་པ། གྲོགས་པོ་ལེགས་ཏེ། བདག་གིས་ཀྱང་དེ་སྙམ་བསམས་སོ། །དེ་བས་ན་ཚུར་ཤོག་བུ་མ་བྱུང་བ་ནས་གཉེན་དུ་བྱས་ཏེ། དེ་སྟེ་བདག་ལས་བུ་ཕོ་ཞིག་བྱུང་ལ་ཁྱོད་ལས་བུ་མོ་ཞིག་
བྱུང་ན་ཁྱོད་ཀྱིས་བདག་གི་བུ་ལ་བྱིན་ཅིག །འོན་ཏེ་ཁྱོད་ལ་བུ་ཕོ་ཞིག་སྟེ། བདག་ལ་བུ་མོ་ཞིག་ན་བདག་གིས་ཁྱོད་ཀྱི་བུ་ལ་སྦྱིན་ནོ། །དེས་སྨྲས་པ། གྲོགས་པོ་ལེགས་ཀྱིས་དེ་བཞིན་བྱའོ་ཞེས་ཟེར་ནས་ཡུལ་རྡོ་འཇོག་ན་གནས་པའི་ཁྱིམ་བདག་དང་། ཁྱིམ་བདག་གཽ་ཏ་མ་
གཉིས་ལྷན་ཅིག་ཏུ་བུ་མ་བྱུང་བ་ནས་གཉེན་དུ་འཐམས་ནས་དེས་ཟོང་བཙོངས་ཏེ་སླར་གྱིས་ཟོང་ཁྱེར་ནས་ཡུལ་རྡོ་འཇོག་ཏུ་སོང་ངོ་། །དེས་དེ་ན་ཆུང་མ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་པ་ལས་ཕྱི་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས་དེ་ཟླ་བ་བརྒྱད་དམ་དགུ་
འདས་པ་དང་བཙས་ན་བུ་ཕོ་ཞིག་བྱུང་ངོ་། །དེ་ཞག་བདུན་གསུམ་ཉི་ཤུ་གཅིག་གི་བར་དུ་བཙས་པའི་བཙས་སྟོན་ཆེན་པོ་རྒྱས་པར་བྱས་ཏེ། དེ་རིགས་དང་མཐུན་པའི་མིང་ཞིག་བཏགས་སོ། །འཁོར་མོ་འཇིག་གི་ཁྱིམ་བདག་གིས་ཡུལ་རྡོ་འཇོག་གི་ཁྱིམ་བདག་ལས་བུ་ཕོ་ཞིག་
བཙས་པར་ཐོས་ནས། དེས་བདག་གི་གྲོགས་པོ་ལ་བུ་ཕོ་ཞིག་བཙས་ཏེ་ཁྱེའུ་དེ་ནི་བདག་གི་མག་པར་འགྱུར་ཡང་སྲིད་ཀྱིས་དེའི་གོས་དང་རྒྱན་རྣམས་བསྐུར་རོ་སྙམ་བསམས་ནས། དེས་དེ་ལ་གོས་དང་རྒྱན་རྣམས་བསྐུར་ཏེ། ཡུལ་རྡོ་འཇོག་ན་གནས་པའི་ཁྱིམ་བདག་དེ་ལ་གྲོགས་པོ་ཁྱོད་ལ་

བུ་ཕོ་ཞིག་བཙས་སོ་ཞེས་ཐོས་ནས་གྲོགས་པོ་ལས་བུ་བཙས་པ་བདག་ཤིན་ཏུ་དགའ་སྟེ་ཁྱེའུའི་ཕྱིར་གོས་དང་རྒྱན་ཞིག་བསྐུར་གྱིས་ལོང་ཤིག་ཅེས་ཡི་གེ་སྤྲིང་ངོ་། །དེས་སྤྲིང་ཡིག་བཀླགས་ཏེ་སླར་གྱི་ལན་སྤྲིང་བ་དང་། ཁྱིམ་བདག་གཽ་ཏ་མས་དེ་བཀླགས་ནས་བུ་
མོ་ཞིག་འབྱུང་དུ་སྨོན་ཏེ་ཆུང་མ་དང་ལྷན་ཅིག་རྩེ་དགའ་ཡོངས་སུ་སྤྱོད་དོ། །དེ་ལ་རྩེ་དགའ་ཡོངས་སུ་སྤྱོད་པ་ལས་ཆུང་མ་སེམས་ཅན་དང་ལྡན་པར་གྱུར་ནས་དེ་ཟླ་བ་དགུ་འདས་པ་དང་བཙས་ན་བུ་མོ་ཞིག་བྱུང་སྟེ། གཟུགས་ལེགས་ཤིང་བལྟ་ན་སྡུག་པ་དང་། བཟང་མོ་ཞིག་ན་
ཆུང་ཟད་དུ་རིད་ཅིང་ཉམ་ཆུང་བ་ཞིག་ནས་དེ་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་ཆེན་པོ་རྒྱས་པར་བྱས་ནས་མིང་འདོགས་པ་ལ་ཞུགས་ཏེ། བུ་མོ་འདི་མིང་ཅིར་གདགས་ཞེས་བགྲོས་པ་དང་། གཉེན་དག་གིས་སྨྲས་པ། བུ་མོ་འདི་རིད་ཅིང་ཉམ་ཆུང་ཁྱིམ་
བདག་གཽ་ཏ་མའི་བུ་མོ་སྟེ། དེ་བས་ན་བུ་མོ་འདིའི་མིང་ནི་སྐེམ་མོ་གཽ་ཏ་མ་ཞེས་མིང་དུ་བཏགས་སོ། །ཡུལ་རྡོ་འཇོག་ན་གནས་པའི་ཁྱིམ་བདག་གིས་འདི་ལྟར་འཁོར་མོ་འཇིག་གི་ཁྱིམ་བདག་གཽ་ཏ་མ་ལ་བུ་མོ་ཞིག་བཙས་སོ། །ཞེས་ཐོས་ནས་དེས་བདག་གི་གྲོགས་ལས་བུ་མོ་ཞིག་
བཙས་ཏེ་བུ་མོ་དེ་ནི་བདག་གི་མནའ་མར་འགྱུར་བར་ངེས་ཀྱིས་དེ་ལ་གོས་དང་རྒྱན་རྣམས་བསྐུར་བར་རིགས་སྙམ་བསམས་ཏེ། ཁྱིམ་བདག་གཽ་ཏ་མ་ལ་གྲོགས་པོ་བདག་གིས་ནི་ཁྱོད་ལས་བུ་མོ་ཞིག་བཙས་སོ་ཞེས་ཐོས་ནས་བདག་ཤིན་ཏུ་དགའ་སྟེ་གྲོགས་པོའི་བུ་མོ་ལ་གོས་
དང་རྒྱན་རྣམས་བསྐུར་གྱིས་ལོང་ཤིག་ཅེས་དེས་སྤྲིང་ངོ་། །དེས་ཡི་གེ་བཀླགས་ཏེ་སླར་གྲོགས་པོ་མཛའ་བོས་བྱས་པ་དེ་ནི་ལེགས་ཏེ། བདག་དང་གཉེན་བྱས་ཏེ་བུ་མོ་སྐྱེས་ནས་བླང་བར་བྱའོ་ཞེས་ལན་སྤྲིང་ངོ་། །ཁྱིམ་བདག་གཽ་ཏ་མས་ཡི་གེ་བཀླགས་ནས་བུ་མོ་དེ་བུད་མེད་
ཀྱིས་བསླབ་པ་རྣམས་སློབ་ཏུ་བཅུག་གོ། །ཡུལ་རྡོ་འཇོག་ན་གནས་པའི་ཁྱིམ་བདག་གིས་ཀྱང་བུ་དེ་བསླབ་པ་སློབ་ཏུ་བཅུག་སྟེ། དེས་སྨད་འཚོང་མ་དག་དང་སྔོན་ལྷན་ཅིག་འདུག་འདུག་པ་དེ་ལ་བུ་མོ་འདི་བསླབ་པ་རྣམས་སློབ་ཤིག་པར་གཏད་དོ། །དེས་དེ་ལ་བསླབ་པར་

བརྩམས་སོ། །དེས་ཇི་སྲིད་ཚིག་ཏུ་བསླབས་པ་དང་། དེ་ན་རེ་བདག་གིས་བསླབ་པ་རྣམས་ལོབས་ཀྱིས་ད་ནི་འགྲོའོ། །ཞེས་སྨྲས་པ་དང་། བུད་མེད་དེས་བུ་ལེགས་ཀྱིས་ལོབས་པར་བྱས། ད་དུང་དུ་མ་འགྲོ་ཤིག་ཅེས་སྨྲས་པ་དང་། དེས་མ་མ་བདག་གིས་ལེགས་པར་ལོབས་
ཟིན་གྱིས་ང་འགྲོའོ་ཞེས་ཟེར་རོ། །དེས་རྒྱ་སྐྱེགས་ཀྱི་ཐུམ་པོ་ཞིག་ཐོགས་ཏེ་བུ་དེ་སྟེ་ཁྱོད་བཤོལ་བཞིན་དུ་འགྲོ་བར་འདོད་ན་བདག་གིས་མགོ་བོ་བརྡུང་ངོ་། །ཞེས་སྨྲས་པ་དང་། དེས་མ་མ་དེ་ལྟར་མ་བྱེད་དང་བདག་མི་འགྲོ་བར་བྱའོ། །དེ་འདུག་པ་དང་། མོས་སྨྲས་པ། བཀྲེན་པ་
ཁྱོད་ན་རེ་ངས་བསླབ་པའི་རྣམས་ལོབས་སོ་ཞེས་ཟེར་ན་ཁྱོད་ཀྱིས་འདི་ཙམ་ཡང་མ་ཤེས་སོ། །གཞན་གྱི་བུའི་ཕྱིར་མགོ་བོ་བརྡུང་། ཁྱོད་ནི་ཤེས་པ་ཅན་མ་ཡིན་ནོ། །དེ་ཡང་ཅི་སྲིད་ཅིག་ཏུ་འདུག་ནས་མ་མ་འགྲོའོ་ཞེས་ཟེར་བ་དང་། མོས་བུ་འདུག་ཤིག་ཅེས་སྨྲས་ཀྱང་དེ་འདུག་ཏུ་
མི་བཏུབ་པ་དང་། མོས་བུ་དེ་སྟེ་ཁྱོད་བཤོལ་བཞིན་དུ་ཡང་འགྲོ་བར་འདོད་ན་བདག་གི་ལུས་ཁྲོན་པར་མཆོང་ངོ་ཞེས་སྨྲས་པ་དང་། དེས་མ་མ་དེ་ལྟར་ན་བདག་མི་འགྲོས་མ་བྱེད་ཅིག་འདུག་གོ་ཞེས་སྨྲས་པ་དང་། མོས་སྨྲས་པ་བཀྲེན་པ་ཁྱོད་ན་རེ་ངས་བསླབ་པ་རྣམས་ལོབས་ཟིན་ཏོ་
ཞེས་ཟེར་ན། འདི་ཙམ་ཀྱང་ཁྱོད་ཀྱིས་མི་ཤེས་ཏེ། འདི་ལྟར་གཞན་གྱི་བུའི་ཕྱིར་བདག་ཉིད་ཁྲོན་པར་ཅིའི་ཕྱིར་མཆོང་སྟེ། ཁྱོད་འདུག་ཏུ་མ་བཏུབ་ན་བདག་གིས་ཁྲོན་པའི་ནང་གློད་བཅས་པ་དེར་བདག་འདུག་ཏུ་ཟད་ཀྱི་ཁྱོད་ཤེས་པ་ཅན་མ་ཡིན་གྱིས་འདུག་ཤིག །དེས་ཀྱང་ཇི་སྲིད་
ཅིག་ཏུ་འདུག་ནས་མ་མ་མཆིའོ་ཞེས་སྨྲས་པ་དང་། མོས་སྨྲས་པ། བུ་དེ་སྟེ་འདི་ལྟར་དུས་ཀྱིས་ཐེན་ན་སྡོད་ལ་འོ་ཐུག་བཙོས་ཏེ་འཐུང་ལ་སོང་ཤིག །དེ་འདུག་པ་དང་། དེས་འོ་ཐུག་བཙོས་ཏེ་དེ་ཉིད་ཀྱི་མདུན་དུ་སྣོད་དུ་མར་དང་སྦྲང་རྩིས་བཏབ་སྟེ་འཐུངས་ནས་སྣོད་དེ་ཉིད་དུ་སླར་
སྐྱུགས་སོ། །སྐྱུགས་ནས་ཡང་རྫེའུ་དེ་ཉིད་དུ་བླུགས་ནས་མོས་བུ་ཚུར་ཤོག །འདི་འཐུང་ཤིག་ཅེས་སྨྲས་པ་དང་། དེས་མ་མ་འདི་ནི་སྐྱུགས་པ་ཡིན་ན་ཇི་ལྟར་བཏུང་ཞེས་སྨྲས་པ་དང་། མོས་ངུ་བ་ལྟར་བྱས་པ་དང་། ཁྱིམ་ཚེས་དེ་དག་གིས་ཐོས་ནས་དེ་དག་ཐམས་ཅད་

འདུས་ཏེ་ཀྱེ་ཅིའི་ཕྱིར་ངུ་ཞེས་དྲིས་པ་དང་། དེས་ཇི་ལྟར་གྱུར་པ་ཐམས་ཅད་ཞིབ་ཏུ་སྨྲས་ནས་དེ་དག་གིས་བུ་ཁྱོད་ཀྱི་ཕྱིར་ཐུག་པ་འདི་སྦྱར་ན་ཅིའི་ཕྱིར་མི་འཐུང་ཞེས་སྨྲས་པ་དང་། དེས་ཀྱེ་འདི་ནི་སྐྱུགས་པ་ན་སྐྱུགས་པ་ཇི་ལྟར་བཏུང་ཞེས་སྨྲས་སོ། །དེ་ཕྱི་ཕྱིར་བྲང་
བརྡུངས་ཏེ་ངུ་ཞིང་འདུག་ནས། ཀྱེ་ཅིའི་ཕྱིར་ཁོ་མོས་འདི་ལ་སྐྱུགས་པ་བླུད་ཅེས་སྨྲས་པ་དང་། དེ་འཁོར་གྱི་ཁྱིམ་ཚེས་དེ་དག་གིས་ནན་གྱིས་བླུད་ནས་དེས་འཐུང་བར་བརྩམས་པ་དང་། མོས་དེའི་ལག་པ་ནས་བཟུང་སྟེ། གདོང་དུ་ཐལ་མོ་ཞིག་བརྒྱབ་ནས་སྨྲས་པ། བཀྲེན་པ་
ཁྱོད་ན་རེ་ངས་བསླབ་པ་རྣམས་ལོབས་སོ་ཞེས་ཟེར་ན། ཇི་ལྟར་ན་ཁྱོད་ཀྱིས་བསླབ་པ་རྣམས་ལོབས་འདི་ལྟར་ཁྱོད་ཀྱིས་མངོན་སུམ་དུ་སྐྱུགས་པ་མཐོང་ཡང་འཐུང་བར་ཤོམ་ན་ཁྱོད་ནི་ཤེས་པ་ཅན་མ་ཡིན་ནོ་ཞེས་སྨྲས་ནས་དེས་དེ་བསྐྲད་དེ་བཏང་ངོ་། །དེ་དུས་ཕྱི་ཞིག་ན་ཚོང་པ་ལྔ་བརྒྱ་དང་
ལྷན་ཅིག་ཏུ་ཟོང་ཁྱེར་ཏེ་ཡུལ་གྱི་དབུས་སུ་དོང་ངོ་། །དེས་ཚོང་པ་དེ་དག་གི་མདུན་དུ་ཕྱི་ཕྱིར་ཞིང་བུད་མེད་ལ་སྨོད་དོ། །དེ་དག་རིམ་བཞིན་དུ་འཁོར་མོ་འཇིག་ཏུ་ཕྱིན་ཏོ། །ཚོང་པ་དེ་དག་སྔོན་ནི་སྨད་འཚོང་མ་དེ་དག་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་དག་ཀྱང་དེ་དང་
བསྟེན་པས་ཀྱང་བུད་མེད་ལ་སྨོད་དེ་སྨད་འཚོང་མ་གང་གི་ཁྱིམ་དུ་ཡང་མི་འདོང་བ་དང་། སྨད་འཚོང་མ་དེ་དག་གཅིག་ལ་གཅིག་གྲོས་བྱེད་དེ། དེ་དག་ལས་གཅིག་གིས་ཆེ་ཞེ་སྔོན་ནི་ཡུལ་རྡོ་འཇོག་གི་ཚོང་པ་དག་ལྷགས་ནས་དེ་དག་ཡུ་བུ་ཅག་དང་ལྷན་ཅིག་ཏུ་ཡོངས་སུ་སྤྱོད་པར་འོང་ན་ད་
ནི་ཐམས་ཅད་ཀྱང་འདོད་ཆགས་དང་བྲལ་བར་གྱུར་ཏེ། སུ་ཡང་བདག་ཅག་དང་ལྷན་ཅིག་ཡོངས་སུ་མི་སྤྱོད་དོ་ཞེས་སྨྲས་པ་དང་། གཞན་གྱིས་ཆེ་ཞེ་བདག་གིས་ནི་དེ་དག་གི་དེད་དཔོན་དེ་ནི་གཡེམ་པའི་ཆོ་ག་ལ་མཁས་པས་བུད་མེད་ལ་ཤིན་ཏུ་སྤྱོད་དོ་ཞེས་ཐོས་སོ། །དེ་དང་བསྟེན་
པས་ན་དེ་དག་ཀུན་ཀྱང་བདག་ཅག་དང་ལྷན་ཅིག་ཏུ་མི་སྤྱོད་དོ་ཞེས་སྨྲས་པ་དང་། དེ་དག་གི་ནང་ནས་སྨད་འཚོང་མ་རྒན་མོ་ཞིག་གིས་སྨྲས་པ། བུ་མོ་དེ་སྐྱེས་པ་ཡིན་ནམ་འོན་ཏེ་མ་ཡིན། དེ་དག་གིས་ཆེ་ཞེ་དེ་ནི་སྐྱེས་པ་སྟེ་སྐྱེས་པའི་དབང་པོ་དང་ལྡན་པའོ་ཞེས་སྨྲས་པ་དང་།

དེས་དེ་སྟེ་བདག་གི་བུ་མོས་དེ་བསྒྱུར་ན་དེ་སྟེ་ཁྱོད་ཀྱིས་དཔོན་མོར་གཞུག་གམ་ཞེས་སྨྲས་པ་དང་། དེ་དག་གིས་གཞུག་ཏུ་མི་རུང་ན་དེ་སྟེ་མ་འགྱུར་ན་ཁྱོད་ཀྱིས་ཅི་སྦྱིན་ཞེས་སྨྲས་པ་དང་། མོས་སྨྲས་པ། ཀཱར་ཥཱ་པ་ཎ་ལྔ་བརྒྱ་ཁྱོད་ལ་སྦྱིན་ནོ། །དེ་དག་གིས་སྨྲས་པ། ལེགས་ཀྱིས་
དེ་བཞིན་བྱའོ། །དེ་ནས་བུད་མེད་རྒན་མོ་དེས་དེ་དག་དང་ཉེ་བའི་ཁྱིམ་ཞིག་གླས་ནས་སྣོད་སྤྱད་མང་དུ་བསགས་པ་དང་། དེ་དེད་དཔོན་དེའི་ཁྱེའུ་དག་དེར་འོངས་ཤིང་ལྷགས་ཏེ་སྣོད་སྤྱད་དག་རྙེན་ནོ། །དེས་དེ་དག་ལ་བུ་ཁྱེད་སུ་ཞེས་དྲིས་པ་དང་། དེ་དག་གིས་སྨྲས་པ། མ་མ་
བདག་ཅག་ནི་ཡུལ་རྡོ་འཇོག་གི་དེད་དཔོན་གྱིའོ། །དེས་སྨྲས་པ། བུ་བདག་གི་བུ་ཡང་དེད་དཔོན་ཡིན་ཏེ་ཟོང་ཁྱེར་ནས་ཡུལ་གཞན་དུ་སོང་ན། དེའི་ཁྱེའུ་དག་ཀྱང་ཇི་ལྟར་ཁྱེད་བཞིན་དུ་དེ་དག་ཀྱང་གཞན་ལས་སྣོད་རྙེན་པ་སྙམ་གྱིས་དེ་བས་ན་ཁྱིམ་འདི་ན་སྣོད་ཡོད་པ་དེ་དག་ཀུན་ཁྱེད་
ཅག་ཉིད་ཀྱི་དང་འདྲས་ཅི་བདེ་བར་སྤྱོད་ཅིག །དེ་ནས་སྣོད་སྤྱད་ཉིན་གཅིག་བཞིན་བླངས་ཤིང་འོངས་པ་དང་། དེ་དག་ལ་དེད་དཔོན་གྱིས་ཀྱེ་ཁྱེད་ལ་ཉིན་གཅིག་བཞིན་སྣོད་སྤྱད་དང་ཡོ་བྱད་སུས་བྱིན་ཞེས་དྲིས་པ་དང་། དེ་དག་གིས་དེད་དཔོན་གནས་འདི་ནི་དེད་དཔོན་གྱི་མ་ཞིག་འདུག་
སྟེ། །དེ་ན་རེ་བདག་གི་བུ་ཡང་ཡུལ་གཞན་དུ་ཟོང་ཁྱེར་ཏེ་སོང་ན་དེའི་ཁྱེའུ་དག་ཀྱང་འདི་ལྟར་ཁྱེད་བཞིན་དུ་གཞན་ལས་སྣོད་སྤྱད་རྙེན་དུ་གདོན་མི་ཟས་དེ་ལྟ་བས་ན་ཁྱིམ་འདི་ན་སྣོད་སྤྱད་ཡོད་པ་དེ་དག་ཀུན་ཁྱེད་ཅག་ཉིད་ཀྱི་དང་འདྲས་ཅི་བདེར་སྤྱོད་ཅིག་ཅེས་མཆི་སྟེ། དེ་ནས་སྣོད་
སྤྱད་འཚལ་ཞིང་མཆིའོ་ཞེས་སྨྲས་པ་དང་། དེས་དེ་ལ་བྱམས་པ་སྐྱེས་ནས། ཀྱེ་ཁྱེད་དེ་ལ་དེ་དང་བྱམས་པར་བྱེད་ན། དེ་བདག་གི་ཡང་མ་ཡིན་ནོ་ཞེས་སྨྲས་སོ། །དེ་དག་གིས་དེ་ལ་སྨྲས་པ། མ་མ་དེད་དཔོན་ནི་ཁྱེད་ལ་ཡོན་ཏན་ཤིན་ཏུ་བརྗོད་དོ། །འདི་ལྟར་ཁྱེད་ལ་ཀུན་
སྦྱོར་བ་དེ་བདག་གི་ཡང་མ་ཡིན་ནོ་ཞེས་ཟེར་རོ། །མོས་དེ་ལྟར་ན་བུ་མཐོང་ཡང་ཅི་མ་རུང་ཞེས་སྨྲས་པ་དང་། དེ་དག་གིས་ཀྱང་མ་མ་ལེགས་ཀྱིས་དེད་དཔོན་ལ་བགྱིའོ་ཞེས་སྨྲས་ནས་དེ་དག་གིས་དེ་ལ་དེད་དཔོན་མ་མ་ནི་ཁྱེད་ལ་ལྟ་བར་འཚལ་ལོ་ཞེས་སྨྲས་པ་དང་། དེས་ཀྱང་

ཀྱེ་ལེགས་ཀྱིས་འདོང་ངོ་ཞེས་སྨྲས་ནས་དེ་དེའི་ཁྱིམ་དུ་སོང་ངོ་། །མོས་དེ་བསྟི་སྟང་དུ་བཅས་པས་བདེ་བར་འོངས་སམ་ཞེས་བྱ་བའི་ཚིག་སྙན་པ་བརྗོད་དེ་བུ་བདག་གི་བུ་ཡང་ཁྱོད་ཅི་འདྲ་བ་བཞིན་ནོ་ཞེས་སྨྲས་པ་དང་དེས་ཀྱང་མིང་སྨོས་སོ། །མོས་སྨྲས་པ།
བུ་དེའི་མིང་ཡང་དེ་བཞིན་ཏེ། མདོར་ན་ཁྱོད་དང་དེ་གཉིས་བདག་གི་བུ་ཁྱད་པར་མེད་ཀྱིས་ཁྱོད་གཞན་དུ་མ་སེམས་ཤིག་ཅེས་སྨྲས་སོ། །དེས་སྨྲས་པ། མ་མ་དེ་ལྟར་ན་དེ་བཞིན་ཏེ་དེ་ཉིད་བདག་སྟེ། ཁྱོད་ཀྱི་བུ་དང་ཁྱད་པར་མེད་དོ། །དེས་ཁྱིམ་བདག་གི་ཆུང་མ་དེས་བུ་མོ་
བོས་ཏེ་བུ་མོ་ཚུར་ཤོག །མིང་པོའི་ཞབས་ལ་ཕྱག་འཚོལ་ཅིག་ཅེས་བོས་སོ། །དེའི་ཕྱིར་བྱུང་ན་ན་ཚོད་དང་དེས་དེའི་གཟུགས་བཟང་པོ་དར་ལ་བབ་ཅིང་མཛེས་པ་མཐོང་ནས་རླུང་གི་ཤུགས་བཞིན་དུ་འདོད་ཆགས་ཀྱི་མཐུས་ཡོག་པས་ན་བདག་ཉིད་ཀྱིས་མ་ཚོར་བར་གྱུར་ཏེ། དེས་དེ་ལ་ཀུན་
དུ་བརྟགས་ནས་མ་མ་བུ་མོ་འདི་སུའི་ཞེས་དྲིས་པ་དང་། མོས་སྨྲས་པ། བུ་ཁྱོད་ཉིད་ཀྱི་སྲིང་མོ་ཡིན་ནོ། །དེས་སྨྲས་པ། མ་མ་གཞན་ལ་བྱིན་ནམ་མ་བྱིན། མོས་སྨྲས་པ། བུ་འདི་སུ་ལ་ཡང་མ་བྱིན་ནོ། །དེས་དེ་སྟེ་དེ་ལྟར་ན་ཁོ་བོ་ལ་ཅི་ཕྱིར་མི་སྦྱིན་ཞེས་སྨྲས་པ་དང་། མོས་སྨྲས་པ།
བུ་གཞན་ལྟ་སུ་ཞིག་ལ་སྦྱིན། ཅུང་ཟད་དུ་ན་ཁྱོད་ལ་ཉེས་པ་ཞིག་ཡོད་དེ། ཁྱེད་ནི་བཤེས་མི་བརྟན་པས་ཆུང་མར་བླངས་ཤིང་བླངས་ནས་བོར་ཞིང་འདོང་ངོ་། །དེས་སྨྲས་པ། མ་མ་སྩོལ་ཅིག་དང་མི་འདོར་བར་མཐོན་དམན་དུ་ཁྲིད་དེ་མཆིའོ། །མོས་སྨྲས་པ། བུ་ཁྱོད་ཀྱིས་
བདག་གི་རྫས་ཐམས་ཅད་འདིར་བསྐྱས་ཏེ་བཞག་ན་གདོང་མཐོན་དམན་དུ་ཁྲིད་ཅི་འགྲོ་བར་ཁོ་མོ་ཡིད་ཆེས་སོ། །དེས་སྨྲས་པ། མ་མ་དེ་ལྟར་ན་གཞག་པར་བྱའོ། །དེས་དེའི་ཁྱིམ་དུ་རྫས་རྣམས་བསྐྱས་ན། དེའི་ཁྱིམ་གཉིས་ཡོད་དེ་དེས་ནི་སྒོ་གཅིག་ནས་ནང་དུ་བསྐྱས་ན། མོས་
ཀྱང་སྒོ་གཉིས་པ་ནས་གུད་དུ་བསྐྱས་སོ། །ནམ་དེས་ནོར་རྫས་ཐམས་ཅད་བསྐྱས་པ་དང་། མོས་ཀྱང་གུད་དུ་བསྐྱས་ནས་གདོད་དེ་ལ་བུ་མོ་བྱིན་ནོ། །དེས་ཞག་དང་ཚེས་གྲངས་དང་མཐུན་པར་སྦྱར་ཏེ་བག་མ་ལེན་པའི་ཚེ་མོས་སྨད་འཚོང་མ་རྒྱན་སྣ་ཚོགས་ཀྱིས་བརྒྱན་པ་ཀུན་མགྲོན་

དུ་བོས་ཏེ་དེས་བག་མ་བླང་བ་དེ་ན་ཕན་ཚུན་དུ་རྒྱུ་ཞིང་འཁོད་པ་དང་། དེད་དཔོན་དེས་སྨྲས་པ། མ་འདི་ན་ཐམས་ཅད་ཀྱང་བུད་མེད་དེ་སྐྱེས་པ་གཅིག་ཀྱང་མེད་དམ། དེས་བརྒྱངས་སོ། །གཞན་ཞིག་གིས་དེའི་རྣ་དྲུང་དུ་གསང་སྟེ། དེད་དཔོན་འདི་ལྟ་བུར་གྱུར་པ་ཁྱོད་ཀྱིས་མ་ཤེས་
སམ། །བདག་ཅག་ཀུན་ཀྱང་སྨད་འཚོང་མ་ཡིན་ན། སྐྱེས་པ་ག་ལ་ཡོད་ཅེས་སྨྲས་པ་དང་། དེས་བདག་གིས་ནི་སྨད་འཚོང་མ་ཞིག་བླངས་བ་ལྟ་སྟེ། མདོར་ན་འདི་ནི་བདག་བསླུས་སོ་སྙམ་དུ་བསམས་སོ། །བུ་མོ་ང་ཡང་དེ་དང་ལྷན་ཅིག་ཇི་སྲིད་ཅིག་ཏུ་ལོངས་སྤྱོད་དེ་ཇོ་བོ་ཀཱར་ཥཱ་པ་
ཎ་སྩོལ་ཅིག་ཅེས་སྨྲས་པ་དང་། དེས་སྨྲས་པ། བཟང་མོ་བདག་གི་ནོར་རྫས་ཅི་ཡོད་དོ་ཅོག་ཐམས་ཅད་འདིར་བསྐྱས་ཏེ། འོངས་ན་བདག་ལ་ཀཱར་ཥཱ་པ་ཎ་གཞན་ག་ལ་ཡོད་ཅེས་སྨྲས་པ་དང་། དེ་གཉིད་ཀྱིས་ཤིན་ཏུ་ལོག་པ་དང་མོས་རེ་ལྡེའི་ནང་དུ་དཀྲིས་ཏེ་ཚོང་དུས་ཀྱི་དབུས་སུ་བོར་
རོ། །ནང་པར་ནམ་ནངས་པ་དང་གྲོང་ཁྱེར་ན་གནས་པའི་སྐྱེ་བོ་མང་པོ་དག་འོངས་ཤིང་འདོང་བས་སད་པར་བྱས་ནས་བདག་གིས་བལྟས་པ་དང་། དེས་བདག་ཉིད་མི་རིགས་པ་མཐོང་ནས་སེམས་དང་སེམས་ལས་བྱུང་བའི་རྒྱུ་བ་རྣམས་ཉམས་ཏེ་མིག་མཆི་མས་གང་ནས་འཁོར་མོ་འཇིག་གི་
ཚོང་དུས་དང་། སྲང་དང་ལམ་གྱི་བཞི་མདོ་དང་། སུམ་མདོ་དག་ན་འཁྱམས་པ་ལས་བཀྲེས་པས་གཟིར་ཏེ་ཟས་ཚོལ་བའི་ཕྱིར་གླ་མི་དག་གནས་པར་སོང་ནས་འདུག་གོ། །དེའི་ཚེ་ན་ཁྱིམ་བདག་གཽ་ཏ་མའི་ཁྱིམ་རྩིག་སྟེ། དེར་གླ་མི་རྣམས་ཚོལ་བ་ལས་དེ་མི་གཞན་ཞིག་གིས་ཁྱིམ་
བདག་གཽ་ཏ་མ་དྲུང་དུ་ཁྲིད་པ་དང་། དེས་དེ་མཐོང་ནས་ཀྱེ་འདི་ནི་རབ་ཏུ་གཞོན་ཞིང་ཤིན་ཏུ་གཞོན་པ་ཞིག་སྟེ་སྔོན་སུའི་ལས་ཀྱང་མ་བྱས་པ་ཞིག་གིས་གཞན་ཞིག་ཚོལ་ཅེས་སྨྲས་པ་དང་། དེའི་མིག་མཆི་མས་གང་བཞིན་དུ་ཁྱིམ་བདག་གཽ་ཏ་མའི་གདོང་དུ་ལྟའོ། །དེ་ལ་ཁྱིམ་བདག་
གཽ་ཏ་མས་བུ་ཁྱོད་སུའི་ཡིན་གང་ནས་འདིར་འོངས་པ་སྨྲོས་ཤིག་ཅེས་དྲིས་པ་དང་། དེ་སྙིང་རྗེ་ཞིང་དམན་ལ་སྡུག་བསྔལ་བས་མིག་མཆི་མས་གང་སྟེ་ཚིག་ཀྱང་བརྣངས་བཞིན་དུ་ངལ་ནས་སྨྲས་པ། ཕ་བདག་ནི་བྱང་ཕྱོགས་ན་རྡོ་འཇོག་གི་གྲོང་ཁྱེར་དེ་ནས་སྔོན་གྱི་ལས་ཀྱིས་འདིར་བདེ་བར་

ཕྱིན་ན་ད་ནི་གར་མཆིས་ཀྱང་མ་འཚལ་ཏེ། བར་མ་དོར་དུས་ལས་འདའ་བ་ཞིག་ཏུ་འགྱུར་ཡང་མ་འཚལ་ལོ་ཞེས་སྨྲས་པ་དང་། དེས་དེའི་ཉམས་དང་ཚིག་གི་རྒྱུད་ཐོས་ཏེ། ཁྱིམ་བདག་གཽ་ཏ་མས་དེ་ལ་ཡིད་ཀྱིས་སྡུག་པར་གྱུར་ཏེ། བུ་རྡོ་འཇོག་ན་གནས་པའི་སྐྱེ་བོ་མང་
པོ་དག་ཁྱོད་ཀྱིས་ཤེས་སམ་ཞེས་དྲིས་སོ། །ཕ་འཚལ་ཏོ། །བུ་ཁྱིམ་བདག་འདི་ཞེས་བྱ་བ་ཁྱོད་ཀྱིས་ཤེས་སམ། ཕ་དེ་ནི་བདག་སྐལ་བ་ཉམས་པའི་ཕ་ལགས་ཏེ་འཚལ་ལོ། །ཁྱིམ་བདག་གཽ་ཏ་མ་ཡིད་ལ་ཡང་ཤིན་ཏུ་སྡུག་པར་གྱུར་ནས་བུ་མི་དགའ་བར་བྱ་མི་དགོས་ཀྱིས་མ་ངུ་ཤིག །
ཁྱོད་ནི་ངའི་མག་པར་འགྱུར་ཏེ་ཁྱིམ་འདི་དག་ཁྱོད་ཉིད་ཀྱི་ཡིན་ནོ་ཞེས་སྨྲས་ཏེ། དེ་ཡང་སྤྲོ་བསྲིངས་ཏེ་དེ་ཡང་མི་དགའ་བ་དང་བྲལ་ལོ། །ཁྱིམ་བདག་གཽ་ཏ་མས་བྱུག་པ་དང་། བཟའ་བ་དང་། བཏུང་བ་དང་། གོས་དང་རྒྱན་དང་། ཁྱིམ་དང་། མལ་སྟན་དང་། གཡོག་དང་། དགའ་
བའི་ཚིག་གིས་ངལ་བསོས་ཏེ་ཆུང་མ་ལ་སྨྲས་པ། བཟང་མོ་ཁྱོད་ཀྱི་མག་པ་འོངས་ཏེ། བུ་མོ་བག་མར་གཏང་གིས་སྟ་གོན་བྱོས་ཤིག །དེས་དེའི་ཉི་མ་དང་། ཚེས་གྲངས་དང་། སྐད་ཅིག་མ་དང་། སྐར་མ་དག་བརྟགས་ཏེ། རིམ་བཞིན་དུ་བཤམས་ནས་ཕུ་ནུ་དང་། མཛའ་བོ་
དང་། །གཉེན་བཤེས་སུ་བཅས་པས་བུ་མོ་ལོང་ཤིག་ཅེས་སྨྲས་པ་དང་། དེས་ཕ་སྐད་ཅིག་མི་བླང་གི་ནོར་རྣམས་ཇེ་བཙལ་བར་བྱའོ་ཞེས་སྨྲས་པ་དང་། དེས་བུ་ཁྱིམ་ན་ནོར་ཡོད་པ་འདི་དག་ཐམས་ཅད་ཁྱོད་ཀྱི་ཡིན་ནོ། །ནོར་གྱིས་ཅི་ཞིག་བྱ་ཞེས་སྨྲས་པ་དང་། དེ་ཡང་སྨད་འཚོང་
མ་དེ་ལ་འཁོན་ལན་གློན་པར་འདོད་ནས་སྨྲས་པ། ཕ་དེ་ནི་དེ་ལྟ་ལགས་མོད་ཀྱི་བདག་མི་མ་རབས་བཞིན་དུ་བག་མ་མི་ལེན་ཏོ་ཞེས་སྨྲས་པ་དང་། དེ་ཅང་མི་ཟེར་བར་འདུག་གོ། །དེ་འཁོར་མོ་འཇིག་ནས་བྱུང་སྟེ་ཡན་མན་དུ་འཁྱམ་ཞིང་འདུག་པ་ལས་ཆུ་འགྲམ་དུ་སོང་བ་དང་། ཆུ་དེའི་
ནང་ནས་མི་རོ་ཞིག་ཁྱེར་འོངས་ཏེ། བྱ་རོག་ཞིག་ཆུའི་འགྲམ་དུ་འདུག་ནས་མི་རོ་དེ་ཟ་བར་འདོད་ན་མཆུས་མ་སླེབས་སོ། །དེ་ནས་མཆུ་དེ་ཤིང་བུ་ཞིག་ལ་བདར་བ་དང་། རིང་པོ་ཞིག་ཏུ་གྱུར་ཏེ་དེས་རོ་དེ་ཟོས་སོ། །དེ་ནས་ཡང་དེས་ཤིང་གཞན་ཞིག་ལ་མཆུ་བདར་བ་དང་། ཇི་ལྟར་སྔ་མ་བཞིན་

དུ་གྱུར་ཏོ། །དེད་དཔོན་དེས་ཀྱང་ལག་པས་ཤིང་བུ་དེ་གཉིས་བླངས་ཏེ་ཁྱིམ་དུ་སོང་ངོ་། །དེ་ནས་ཀཱར་ཥཱ་པ་ཎ་ལྔ་བརྒྱ་ཁྱེར་ནས་སྨད་འཚོང་མ་དེའི་ཁྱིམ་དུ་སོང་སྟེ་བཟང་མོ་ཁྱོད་ཀྱིས་བདག་ལ་ཀཱར་ཥཱ་པ་ཎ་མེད་པའོ་ཞེས་བསྐྲད་ན། ད་ནི་ཀཱར་ཥཱ་པ་ཎ་འདི་རེ་ཡོངས་སུ་སྤྱད་ཀྱིས་ཚུར་ཤོག་ཅེས་སྨྲས་
པ་དང་། དེ་ཡང་ཀཱར་ཥཱ་པ་ཎ་ལ་ཆགས་ནས་དེ་དང་ལྷན་ཅིག་ཏུ་ཡོངས་སུ་སྤྱད་དོ། །དེ་ནས་དེད་དཔོན་དེས་དེ་ལ་ཡོངས་སུ་སྤྱད་དེ། དེའི་སྣ་ཤིང་བུ་དེས་བདར་བ་དང་ཤིན་ཏུ་རིང་བར་གྱུར་ནས་དེས་སྨན་པ་ཐམས་ཅད་བཀུག་སྟེ་བསྟན་ན་ཡང་དེ་དག་གིས་སྨན་དཔྱད་བྱ་བར་མ་ནུས་ཏེ། དེ་ལྟར་དེ་
སྨན་པ་ཐམས་ཅད་ཀྱིས་སྤངས་པ་དང་། དེས་དེད་དཔོན་ལ་ཇོ་བོ་བཟོད་པར་གསོལ། འདིའི་སྨན་དཔྱད་མཛོད་ཅིག་ཅེས་སྨྲས་པ་དང་། དེས་སྨྲས་པ། དེ་སྟེ་ཁྱེར་བ་དེ་ཀུན་སླར་སྦྱིན་པར་དམ་བཅའ་ན་གདོད་བྱའོ། །མོས་ཇོ་བོ་ཉི་རིམ་དུ་ཡང་སླར་འབུལ་གྱིས་མཛོད་ཅིག་ཅེས་སྨྲས་པ་
དང་། དེས་ཤིང་བུ་གཉིས་པས་བདར་ན། ཇི་ལྟར་སྔ་མ་བཞིན་དུ་གྱུར་ཏེ་དེས་ཟོང་ཅི་ཁྱེར་བ་ཐམས་ཅད་དེ་ལ་སླར་བྱིན་ནོ། །དེ་ནས་དེད་དཔོན་དེས་བུ་མོ་སྐེམ་མོ་གཽ་ཏ་མཱི་དཔལ་ཆེན་པོ་དང་སྦྱར་ཏེ་བག་མར་བླངས་སོ། །ཁྱིམ་བདག་གཽ་ཏ་མ་རི་བྲགས་ཀྱི་གྲོང་གཞན་ཞིག་ན་ཞིང་རྨེད་དེ།
དེས་མག་པ་དེ་ལ་སྨྲས་པ། བུ་ཁྱོད་ཀྱིས་ཆུང་མ་འདི་ཁྲིད་ལ་རི་བྲགས་ཀྱི་གྲོང་འདི་ཞེས་བྱ་བར་འདུག་ཤིག །དེས་དེ་ལ་རི་བྲགས་གྲོང་གི་ཞིང་ཐམས་ཅད་བྱིན་ནས་དེས་སྐེམ་མོ་གཽ་ཏ་མཱི་ཤིང་རྟ་ལ་ཞོན་ཏེ་དེར་སོང་ནས་འདུག་གོ། །དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་དེ་
ལ་རྩེ་དགའ་ཡོངས་སུ་སྤྱོད་པ་ལས་དུས་ཕྱི་ཞིག་ན་སྐེམ་མོ་གཽ་ཏ་མཱི་སེམས་ཅན་དང་ལྡན་པར་གྱུར་ནས་དེ་བུ་འབྱུང་བའི་དུས་ལ་བབ་པ་དང་། ཇོ་བོ་བདག་བུ་བཙར་ཉེས་བདག་གཉེན་གྱི་ཁྱིམ་དུ་མཆིའོ། །དེར་བདག་ལ་བདག་གི་མ་གཡོག་བགྱིད་དོ་ཞེས་སྨྲས་པ་དང་། དེས་
ཀྱང་ལེགས་སོ་ཞེས་སྨྲས་ནས་དེས་བུ་མོ་གཉེན་གྱི་ཁྱིམ་དུ་བསྐྱལ་བ་དང་། དེ་ལ་དེར་བཙས་ན་བུ་ཁྱེའུ་ཞིག་བྱུང་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་ཆེན་པོ་རྒྱས་པར་བྱས་ཏེ་རིགས་དང་མཐུན་པའི་མིང་བཏགས་ནས། དེས་ཁྱེའུ་དེ་ཁྱེར་ཏེ་སླར་རི་བྲགས་

ཀྱི་གྲོང་ཉིད་དུ་འོངས་སོ། །དེ་ཕྱིས་ཡང་སེམས་ཅན་དང་ལྡན་པར་གྱུར་ནས་བུ་འབྱུང་བའི་དུས་སུ་བབ་པ་དང་། ཇོ་བོ་བུ་འབྱུང་བའི་དུས་ལ་བབ་ཀྱིས་གཉེན་གྱི་ཁྱིམ་དུ་མཆིའོ། །དེར་བདག་ལ་མ་བདག་གི་གཡོག་བགྱིད་དོ་ཞེས་སྨྲས་པ་དང་། དེས་ཀྱང་བཟང་མོ་ལེགས་
ཀྱིས་འདོང་བར་བྱའོ་ཞེས་སྨྲས་པ་དང་། དེས་མ་དང་བུར་བཅས་ཏེ་ཤིང་རྟ་ལ་བསྐྱོན་ནས་དོང་བ་དང་། དེ་ལམ་གྱི་ཕྱེད་དུ་བུ་བཙས་པར་གྱུར་ཏོ། །དེས་བུ་བཙས་པར་མཐོང་ནས་ཤིང་རྟ་ལ་བབས་ཏེ་ཤིང་གཞན་ཞིག་གི་དྲུང་དུ་འདུག་པ་དང་དེ་ཉིད་དུ་གཉིད་ཀྱིས་ལོག་གོ། །དེ་གཉིད་ཀྱིས་ཆེར་
ལོག་པ་དང་སྦྲུལ་གདུག་པས་ཟིན་ནས་དུས་ལས་འདས་སོ། །མོ་ཡང་ཤིང་རྟའི་སྟེང་ཉིད་དུ་བུ་ཁྱེའུ་ཞིག་བཙས་ཏེ་དེ་ཤིང་རྟ་ལས་བབས་ནས་ཤིང་དྲུང་དུ་སོང་སྟེ། ཇོ་བོ་ཁྱོད་ཀྱི་བུ་ཁྱེའུ་ཞིག་བཙས་ཀྱིས་དགྱེས་པ་སྐྱེད་ཅིག་ཅེས་སྨྲས་པ་དང་། དེ་སེམས་མེད་པས་ལན་མ་གླན་ནོ། །དེས་ལག་པས་
བསྒུལ་ཏེ་བརྟགས་ན་དུས་ལས་འདས་པ་མཐོང་ངོ་། །མོ་དེ་ན་ངུ་བར་གྱུར་པ་དང་། བ་ལང་ཡང་མ་བྱིན་པར་ལེན་པས་ཕྲོགས་སོ། །དེ་ནས་དེ་རིང་ཞིག་ཏུ་ངུས་ནས་མི་དགའ་བ་སྐྱེས་ཏེ་ཕྱོགས་བཞིར་བལྟས་ཏེ་དེས་བུ་ད་གཟོད་བཙས་པ་ནི་པང་དུ་ཐོགས་སྔ་མ་ནི་ལག་པ་ནས་བཟུང་སྟེ་སོང་བ་
དང་། །དེ་ན་དུས་མ་ཡིན་པའི་སྤྲིན་ཆེན་པོ་ལངས་ཏེ་དེས་མཚོ་དང་། ལྟེང་ཀ་དང་། ཁྲོན་པ་དག་ཆུས་གང་ནས་དེའི་ལམ་ཀ་ན་ཆུ་བོ་རྒལ་དགོས་པར་གྱུར་ནས། དེས་བསམས་པ་དེ་སྟེ་ཁྱེའུ་དང་ལྷན་དུ་རྒལ་ན་ནི་བདག་ཀྱང་མེད་ཁྱེའུ་ཡང་མེད་པར་འགྱུར་ན་རེ་ཞིག་ཁྱེའུ་ཇེ་བསྒྲལ་ལོ། །
ཕུ་བོ་དེ་ཆུ་བོའི་འགྲམ་དུ་བཞག་སྟེ་ཆུང་ངུ་ཁྱེར་ཏེ་རྒལ་ཏོ། །དེ་ནས་དེ་ཡང་འགྲམ་དུ་བཞག་སྟེ་ཕུ་བོའི་ཕྱིར་ཡང་རྒལ་ཏེ་ཆུ་བོ་ཕྱེད་དུ་ཕྱིན་པ་དང་ཁྱེའུ་ཆུང་ངུ་དེ་ཝས་ཁྱེར་རོ། །དེ་ནས་མོས་ཆུ་བོའི་དབུས་སུ་འདུག་སྟེ་ལག་པ་གཡབས་ནས་ཀུ་ཀུ་ཞེས་བོས་པ་དང་། ཁྱེའུ་ཕུ་བོ་དེ་མ་
བདག་ལ་བོད་དོ་སྙམ་བསམས་ནས་དེ་ཆུའི་ནང་དུ་མཆོངས་པ་དང་། ཆུ་འགྲམ་ཡང་གད་པ་ཆད་པ་ཞིག་སྟེ་ལྷུང་མ་ཐག་ཏུ་དུས་ལས་འདས་ནས་དེ་ནས་མོ་རིངས་ཤིང་མྱུར་བར་བྱུང་སྟེ། ཝ་དེའི་རྗེས་བཞིན་དུ་བསྙགས་པ་དང་དེས་དེ་བོར་ཏེ་སོང་ནས་དེ་ལ་བལྟས་ན་དུས་ལས་འདས་པར་མཐོང་

བ་དང་མོས་ངུས་ནས་དེ་ཆུར་བོར་ཏེ། དེ་ནས་བུ་ཆེན་པོ་དེ་ཡང་ཆུས་ཁྱེར་བར་མཐོང་ནས་དེ་མི་དགའ་བ་ཆེར་གྱུར་ཏེ་ངུ་ཤིང་བརྒྱུགས་པ་དང་དེ་ཡང་དུས་ལས་འདས་པར་མཐོང་ངོ་། །དེ་ཁྱོ་དང་བུ་ལས་བྲལ་བས་ཡི་ཆད་པར་གྱུར་ནས་གཅིག་པུ་གོས་གཅིག་གི་སྨད་གཡོགས་ཏེ་ཆུ་བོའི་འགྲམ་
ན་རླུང་དང་ནགས་ཆེན་པོ་དང་། ཆུ་བོ་རྣམས་ཀྱི་སྒྲ་དང་བྱའི་སྒྲ་དུ་མ་རྣམས་མཉན་ཅིང་ཐོས་ནས་ཀྱི་ཧུད་ཀྱི་ཧུད་ཁྱོ། ཀྱི་ཧུད་བུ་ཆེན་པོ། ཀྱི་ཧུད་བུ་ཆུང་ངུ་མ་ཞེས་སྙིང་རྗེ་ཞིང་བརྩེ་བས་མཆི་མས་བརྣངས་བཞིན་དུ་ངུ་སྟེ་ས་ལ་ཕན་ཚུན་འགྲེ་ཞིང་འདུག་པ་དང་། ལས་ཀུན་རྒྱས་ཤིང་རྫོགས་
པར་ངེས་པ་གདོན་མི་ཟ་བར་རྣམ་པར་སྨིན་པར་འགྱུར་ཏེ། དེ་མ་ཐག་ཏུ་འདི་ཕ་དང་མ་དང་ཁྱིམ་གྱི་སྐྱེ་བོ་མང་པོ་དག་གནམ་ལྕགས་ཀྱིས་ཕོག་སྟེ་ཤིའོ། །དེའི་ནང་ནས་སྐྱེས་པ་གཅིག་ཅིག་ཐར་ཏེ། སྙིང་རྗེ་ཞིང་བརྩེ་བས་མཆི་མས་བརྣངས་བཞིན་དུ་མྱུར་བར་འགྲོ་ཞིང་དེའི་མདུན་ལོགས་
སུ་འོངས་པ་དང་། མོས་དེ་སྐྲག་པ་ལྟ་བུར་མཐོང་ནས་ཀྱེ་སྐྱེས་བུ་ཅིའི་ཕྱིར་རིངས་པར་རྒྱུག་ཅེས་དྲིས་པ་དང་། དེས་དེའི་མདུན་དུ་རང་གི་ལུས་བརྡབས་ནས་ངུ་ཞིང་མཆི་མས་བརྣངས་བཞིན་དུ་སྨྲས་པ། ཁྱོད་ཀྱི་ཕ་དང་མ་དང་ཁྱིམ་གྱི་སྐྱེ་བོ་མང་པོ་ཀུན་གནམ་ལྕགས་བབ་པས་ཕོག་སྟེ་བདག་གཅིག་
པུ་ནི་ལས་ཀྱིས་ཐར་རོ། །དེ་ཐོས་ནས་ཕྱི་ཕྱིར་མྱ་ངན་སློས་ཤིང་ངུས་པར་གྱུར་པ་བདག་གིས་སྔོན་གྱི་ཚེ་རབས་སུ་སྡིག་ཅི་ཞིག་བྱས་ན་དུས་གཅིག་ཏུ་ཁྱོ་དང་བུ་ལ་སོགས་པ་གཉེན་བཤེས་དང་བྲལ། དེ་བས་ཁྱིམ་ན་གནས་པས་ཅི་ཞིག་བྱས། །སྐལ་བ་མེད་པས་གང་དུ་ཅི་སྙེད་པ། །ཁྱོ་དང་
གཉེན་བཤེས་དང་ཡང་བདག་བྲལ་བ། །བདག་འགྲོ་ཁྱིམ་ན་གནས་པར་མི་རིགས་ཏེ། །དགོན་པ་རྣམ་པར་དབེན་པ་དེ་དག་དང་། །ཁྱིམ་སྟོང་དེ་དག་ཏུ་ནི་གནས་པར་བླ། །ཁྱིམ་ན་གནས་པ་སྡིག་སྟེ་ཅིར་མི་རུང་། །མྱ་ངན་སྡུག་བསྔལ་རྣམ་པར་འཕེལ་བར་གྱུར། །དེར་ཕྱོགས་
གཅིག་ཏུ་ཞུགས་ཏེ་སོང་ནས་ཕན་ཚུན་དུ་འཁྱམ་འཁྱམ་པ་ལས་རི་བྲགས་ཀྱི་གྲོང་གཞན་ཞིག་ཏུ་ཕྱིན་ནས། དེ་ན་བུད་མེད་རྒན་མོ་གཞན་ཞིག་རས་འཁལ་བ་ཞིག་འདུག་སྟེ་དེ་དེའི་དྲུང་དུ་སོང་བ་དང་། དེས་དེ་ལ་ངལ་བསོས་ནས་དེ་དང་ལྷན་ཅིག་ཏུ་རས་འཁལ་བ་ལ་ཞུགས་སོ། །དེ་ན་

ཐ་ག་པ་ཁྱེའུ་གཞོན་ནུ་གཞན་ཞིག་རང་གི་བཟོས་འཚོ་བ་ལ་ཞུགས་ཏེ། དེ་ལ་བུད་མེད་རྒན་མོ་དེ་དུས་དུས་སུ་རས་ཀྱི་སྐུད་པ་དེ་ལ་འཚོང་ངོ་། །དེ་ནས་གཞན་ཞིག་ཏུ་དེས་སྐུད་པ་ཕྲ་མོ་ཞིག་ཁྱེར་ཏེ་དེའི་དྲུང་དུ་སོང་བ་དང་། དེས་མ་མ་ཁྱོད་ཀྱིས་སྔོ