Kinh tạng Tây Tạng (Kangyur Đại Học) — 011_འདུལ་བ།_ད

བཞུགས་སོ། །བཅོམ་ལྡན་འདས་ཀྱིས་ཆོས་སྟོན་པའི་དགེ་སློང་གི་གྲོགས་དགེ་སློང་བཞི་བསྐོ་བར་བྱའོ་ཞེས་གསུངས་པ་དང་། དགེ་སློང་དག་གང་དུ་མགྲོན་དུ་བོས་ཤིང་འགྲོ་བ་དེར་ཆོས་སྟོན་པའི་དགེ་སློང་

གསོལ་བ་བཏབ་སྟེ། གྲོགས་དགེ་སློང་བཞི་བསྐོས་པ་དང་། དེ་དག་གིས་མ་བརྟགས་པར་བཤང་བ་དང་། གཅི་བ་དང་། རིགས་ཀྱི་ཁྱིམ་དག་ཏུ་སོང་སྟེ། དེ་ཉིད་ཉེས་དམིགས་སུ་གྱུར་ནས་དེའི་སྐབས་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །
བཅོམ་ལྡན་འདས་ཀྱིས་བཀའ་སྩལ་པ། གང་ཆོས་སྟོན་པའི་དགེ་སློང་གི་གྲོགས་སུ་བསྐོས་པ་དེ་དག་གིས་དེ་ལ་མ་བརྟགས་པར་གཞན་དུ་འདོང་བར་མི་བྱའོ། །སོང་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །མཉན་ཡོད་ན་བྲམ་ཟེ་ཞིག་
གིས་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཆུང་མ་སེམས་ཅན་དང་ལྡན་པར་གྱུར་ཏོ། །དེ་
ཟླ་བ་དགུ་ནས་བུ་ཁྱེའུ་ཞིག་བཙས་སོ། །དེ་བཙས་ནས་བཙས་པའི་བཙས་སྟོན་རྒྱ་ཆེར་བྱས་ཏེ་རིགས་དང་མཐུན་པར་མིང་བཏགས་སོ། །དེ་དུས་གཞན་ཞིག་ན་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། དེའི་ཁམས་མ་སྙོམས་པར་ན་བར་
གྱུར་ཏེ། དེ་སྨན་པའི་དྲུང་དུ་སོང་ནས་སྨྲས་པ། བཞིན་བཟངས་བདག་གི་ལུས་ཀྱི་གནས་སྐབས་འདི་འདྲ་བར་གྱུར་ན་སྨན་དཔྱད་སྟོན་ཅིག །དེས་སྨྲས་པ། འཕགས་པ་འདི་དང་འདི་ལྟ་བུའི་བསྐ་བ་བྱོས་དང་སོས་པར་འགྱུར་རོ། །དེའི་བསྐ་བ་བྱས་པ་དང་།
ཇི་ཙམ་ན་ལན་གཅིག་འཁྲུས་ནས་དེས་ཆུ་གྲང་མོས་ཁྲུས་བྱས་པ་དང་ཆད་དོ། །སྨན་པས་སྨྲས་པ། འཕགས་པ་བསྐ་བས་ལེགས་པར་གྱུར་ཏམ། དེས་སྨྲས་པ། བཞིན་བཟངས་མ་ལེགས་ཏེ་ལན་གཅིག་ཁོ་ན་ལས་མ་འཁྲུས་སོ། །དེས་སྨྲས་པ།
འཕགས་པ་ཁྱོད་ཀྱིས་ཆུ་གྲང་མོས་ཁྲུས་མ་བྱས་སམ། དེས་སྨྲས་པ། བཞིན་བཟངས་ཇི་ལྟར་ཁྱོད་ཀྱིས་སྨྲས་པ་བཞིན་ནོ། །དེས་སྨྲས་པ། འཕགས་པ་མ་ལེགས་པ་ཞིག་བྱས་ཏེ་ཆུ་གྲང་མོས་ཆད་ན་ཇི་ལྟར་འཁྲུ་བར་འགྱུར། དེ་ནི་དེར་ཟད་ཀྱིས་ཡང་འདི་ལྟར་

བསྐ་བ་དེ་ཉིད་བྱོས་ལ་སྔར་ཁྲུས་མ་བྱེད་པར་འཁྲུ་བ་མཐར་ཕྱིན་ནས་ཁྲུས་བྱོས་ཤིག །དེས་སྨྲས་པ། བཞིན་བཟངས་བཅོམ་ལྡན་འདས་ཀྱིས་མ་གནང་ངོ་། །དེས་སྨྲས་པ། འཕགས་པ་དེ་ལྟ་ན་བསྐ་བའི་ཆོ་ག་ངས་ཇི་ལྟར་བྱ་ཞེས་
པ་དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ཕྱི་བ་དག་གཞག་པར་བྱ་ཞིང་འཁྲུ་བ་མཐར་ཕྱིན་ནས་ཁྲུས་བྱའོ། །བཅོམ་ལྡན་འདས་ཀྱིས་ཕྱི་བ་དག་
གཞག་པར་བྱའོ་ཞེས་གསུངས་པ་དང་། དགེ་སློང་དག་གིས་ཇི་ལྟ་བུ་དག་གིས་ཕྱི་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། བོང་བའམ། ལོ་མའམ། རས་མ་དག་གིས་ཕྱི་བར་བྱ་ཞིང་། འཁྲུ་བ་མཐར་ཕྱིན་ནས་ཆུ་དྲོན་པོས་བཀྲུ་བར་བྱའོ། །
གླེང་གཞི་ནི་མཉན་ཡོད་ནའོ། །དེ་ནས་ཡང་དེའི་ཚེ་ནགས་ན་སྦྲུལ་གདུག་པ་ཞིག་གནས་ཏེ། ཇི་ཙམ་ན་ནགས་དེར་བ་ལང་རྫིས་མེ་བཏང་བ་དང་། སྦྲུལ་གདུག་པ་དེ་མེས་བསྲེགས་ནས་ཕན་ཚུན་དུ་སོང་ནས་ཡང་མེའི་འོད་ཀྱིས་བསྐོར་བས་མ་ཤི་ཙམ་དུ་འདུག་སྟེ།
མེས་བསྲེགས་པ་ལས་མཆོངས་ཏེ་ཤིང་ཞིག་གི་དྲུང་དུ་བསྐྱིལ་ནས་དཀྲིས་ཏེ་འདུག་གོ། །ཇི་ཙམ་ན་ཚེ་དང་ལྡན་པ་ཤཱ་རིའི་བུ་ལྗོངས་རྒྱུ་ཞིང་ཕྱོགས་དེར་ཉེ་བར་འོངས་ཏེ། དེས་ཤིང་དྲུང་དུ་སོང་སྟེ་བལྟས་ན་སྦྲུལ་གདུག་པ་ཞིག་མེས་ཚིག་སྟེ་རབ་ཏུ་ཚིག་ནས་སྡུག་བསྔལ་
གྱི་ཚོར་བས་ཉམ་ཐག་པར་མཐོང་སྟེ། མཐོང་ནས་ཀྱང་དེའི་རྒྱུད་ལ་ཅི་དགེ་བའི་རྩ་བ་ཅུང་ཟད་ཡོད་དམ་མེད་པ་རྟགས་ན་ཡོད་པར་མཐོང་ངོ་། །གང་གི་དབང་དུ་འགྱུར་བ་བརྟགས་པ་ན་ཡང་བདག་ཉིད་ཀྱིས་ཏེ། དེས་དེ་ལ་ཆུས་གཏོར་ནས་ཆོས་ཚིག་གསུམ་ཞིག་
བཤད་པ། བཞིན་བཟངས་འདུས་བྱས་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བ་སྟེ། ང་ལ་སེམས་རབ་ཏུ་དང་བར་གྱིས་ཤིག་དང་འདི་ལྟར་དུད་འགྲོའི་འདོད་ཆགས་དང་བྲལ་ནས་བདེ་འགྲོར་སྐྱེ་བར་འགྱུར་

རོ་ཞེས་སྨྲས་ནས་སོང་བ་དང་། དེ་མ་ཐག་ཏུ་བྱ་ཁྲ་ཞིག་གིས་ཁྱེར་རོ། །དེ་ཚེ་དང་ལྡན་པ་ཤཱ་རིའི་བུ་ལ་སེམས་མངོན་པར་དད་ནས་དུས་ལས་འདས་ཏེ། མཉན་ཡོད་ན་བྲམ་ཟེ་ལས་དྲུག་དང་ལྡན་པ་ཞིག་གི་རིགས་སུ་སྐྱེས་སོ། །ཚེ་དང་ལྡན་པ་ཤཱ་རིའི་བུས་
བསམས་པ། སྦྲུལ་གདུག་པ་དེ་གོར་མ་ཆག་པར་དུས་ལས་འདས་ན་གང་དུ་སྐྱེས་པར་གྱུར་ཅེས་ཐ་གི་ཟད་ཅིག་བརྟགས་ན་མཉན་ཡོད་ན་བྲམ་ཟེ་ལས་དྲུག་དང་ལྡན་པ་ཞིག་གི་རིགས་སུ་སྐྱེས་པར་མཐོང་ངོ་། །མཐོང་ནས་ཀྱང་དེ་གདུལ་བར་བྱ་བའི་ཕྱིར་དེའི་ཁྱིམ་དུ་འགྲོ་
བར་བརྩམས་ཏེ། དེར་སོང་ནས་བྲམ་ཟེ་དང་ཆུང་མར་བཅས་པ་སྐྱབས་སུ་འགྲོ་བ་དང་བསླབ་པའི་གཞི་ལ་རབ་ཏུ་བཀོད་དོ། །དེས་དུས་གཞན་ཞིག་ན་གཅིག་པུ་དེའི་ཁྱིམ་དུ་སོང་བ་དང་དེ་ལ་བྲམ་ཟེས་སྨྲས་པ། འཕགས་པ་ཅི་ཕྱི་བཞིན་འབྲང་བའི་དགེ་སྦྱོང་འགའ་
ཡང་མ་མཆིས་སམ། ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་ཅི་བདག་གི་ཕྱི་བཞིན་འབྲང་བའི་དགེ་སྦྱོང་རྩྭ་ཀུ་ཤའམ། ཀ་ཤ་ལྟ་བུར་གཞན་ནས་སྐྱེ་བར་མི་འགྱུར་གྱི་གང་ཁྱེད་ལྟ་བུ་ལས་ཐོབ་པ་དེ་བདག་གི་ཕྱི་བཞིན་འབྲང་བའི་དགེ་སྦྱོང་དུ་འགྱུར་
རོ། །དེས་སྨྲས་པ། འཕགས་པ་བདག་ལ་འཕགས་པའི་ཕྱི་བཞིན་འབྲང་བའི་དགེ་སྦྱོང་དུ་འོང་བའི་ཁྱེའུ་སུ་ཡང་མ་མཆིས་སོ། །བདག་གི་མཆིས་འབྲང་སེམས་ཅན་དང་ལྡན་པ་ལ་གལ་ཏེ་ཁྱེའུ་ཞིག་བཙས་པར་གྱུར་ན། དེ་བདག་གིས་འཕགས་པའི་ཕྱི་བཞིན་
འབྲང་བའི་དགེ་སྦྱོང་དུ་དབུལ་ལོ། །དེས་སྨྲས་པ། ནད་མེད་པར་གྱུར་ཅིག་བླང་བར་བྱའོ་ཞེས་སྨྲས་ནས་སོང་ངོ་། །ཇི་ཙམ་ན་བྲམ་ཟེ་མོ་དེ་ཟླ་བ་དགུ་འདས་ནས་ཁྱེའུ་ཞིག་བཙས་སོ། །དེ་བཙས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་
བྱས་ཏེ་རིགས་དང་མཐུན་པའི་མིང་བཏགས་སོ། །དེ་འོ་མ་དང་། ཞོ་དང་། མར་སར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དེ་དག་གིས་སྲིང་བར་བྱེད། སྐྱེད་པར་བྱེད། རྫིང་ན་གནས་པའི་པད་མ་བཞིན་དུ་མྱུར་

དུ་སྐྱེད་པར་བྱེད་དོ། །དེ་མའི་ནུ་མ་འཐུང་བ་ན་གལ་ཏེ་བག་མེད་པས་སོའམ་སེན་མོས་ནུ་མ་ལ་རེག་ན་སྐྲང་བར་འགྱུར་རོ། །དེ་ཆེན་པོར་གྱུར་ནས་གང་གི་ཚེ་ཁྱེའུ་དང་བུ་མོ་དག་དང་ལྷན་ཅིག་རྩེ་བ་དེའི་ཚེ་དེ་རྣམས་གལ་ཏེ་ཁྲོ་བའི་ཀུན་ནས་དཀྲིས་
པ་ལ་གནས་པ་ན་སོའམ་སེན་མོས་བཏབ་ན་ཕྱོགས་དེ་རིང་པོ་མི་ཐོགས་པར་སྐྲང་བར་འགྱུར་རོ། །ཇི་ཙམ་ན་ཚེ་དང་ལྡན་པ་ཤཱ་རིའི་བུས་དེ་རབ་ཏུ་དབྱུང་བའི་དུས་ཤེས་ནས་ཁྱིམ་དེར་སོང་སྟེ། དེས་བྲམ་ཟེ་དེའི་ཆུང་མ་ལ་ཆོས་བཤད་དེ། ཁྱེའུ་འདི་ནི་བདག་གི་ཕྱི་
བཞིན་འབྲང་བའི་དགེ་སྦྱོང་ཡིན་ནོ་ཞེས་མཚན་མ་ཞིག་བསྟན་པ་དང་། བྲམ་ཟེ་དེས་སྨྲས་པ། བུ་ཁྱོད་ནི་མ་སྐྱེས་པ་ནས་ངས་ཚེ་དང་ལྡན་པ་ཤཱ་རིའི་བུའི་ཕྱི་བཞིན་འབྲང་བའི་དགེ་སྦྱོང་དུ་ཕུལ་གྱིས་སོང་ཤིག །སྲིད་པ་ཐ་མ་པའི་སེམས་ཅན་དེ་ཚེ་དང་ལྡན་པ་ཤཱ་རིའི་
བུའི་གདོང་དུ་རིང་ཞིག་བརྟགས་ནས་དེའི་རྗེས་བཞིན་རྗེས་བཞིན་དུ་འབྲངས་པ་དང་། དེའི་ཚེ་ཚེ་དང་ལྡན་པ་ཤཱ་རིའི་བུས་རབ་ཏུ་ཕྱུང་སྟེ་བསྙེན་པར་རྫོགས་པར་བྱས་སོ། །དེས་སོ་ཤིང་ཞིག་ཟོས་ཏེ་ལྕེ་བཞར་ནས་མ་བཀྲུས་པར་བཞག་པ་དང་། དེ་ལ་སྦྲང་མ་ཞིག་གིས་ཟོས་
ཏེ་དེ་དུས་ལས་འདས་སོ། །དེ་ནས་སྲོག་ཆགས་ཁྱིམ་སྦྱོང་གིས་ཅུང་ཟད་ཟོས་པ་དང་དེ་ཡང་དུས་ལས་འདས་སོ། །དེ་ནས་ཡང་བྱ་སྣ་ཚོགས་ཀྱིས་ཟོས་པ་དང་དེ་ཡང་དུས་ལས་འདས་སོ། །དེ་ལ་བྱི་ལས་ཟོས་པ་དང་དེ་ཡང་དུས་ལས་འདས་སོ། །གང་སྦྲང་
མ་ཞིག་དང་གྲོག་མ་མང་པོ་དག་གིས་ཟོས་ནས་དེ་དག་ཐམས་ཅད་ཀྱང་དུས་ལས་འདས་སོ། །དེ་བཞིན་དུ་ཇི་ལྟར་སྲོག་ཆགས་མང་པོ་དག་དུས་ལས་འདས་པ་དངར་ཞིང་འདུག་པ་དང་། ཅི་ཙམ་ན་ཕྱི་དེ་ཉིན་པར་དགེ་སློང་དག་ཕྱོགས་དེར་སོ་ཤིང་བཟའ་བར་བརྩམས་
པ་དང་། དེ་དག་གིས་སྲོག་ཆགས་དུས་ལས་འདས་པ་དག་མཐོང་ནས། དེ་ལ་གཅིག་གིས་སྨྲས་པ། ཚེ་དང་ལྡན་པ་དག་སྲོག་ཆགས་མང་པོ་འདི་དག་ཅིའི་ཕྱིར་དུས་ལས་འདས། གཞན་དག་གིས་སྨྲས་པ། མི་ཤེས་སོ་ཞེས་དེ་དག་དེ་བཞིན་དུ་དཔྱོད་པ་

དང་། དགེ་སློང་གཞོན་ནུ་གཞན་ཞིག་འོངས་ཏེ། དེས་སྨྲས་པ། ཚེ་དང་ལྡན་པ་དག་ཕྱོགས་འདིར་བྲམ་ཟེ་ལས་རབ་ཏུ་བྱུང་བ་ཚེ་དང་ལྡན་པ་ཤཱ་རིའི་བུའི་ལྷན་ཅིག་གནས་པ་དེས་སོ་ཤིང་ཟོས་ཏེ་ལྕེ་བཞར་ནས་མ་བཀྲུས་པར་བཞག་པ་དེ་ལ་སྲོག་ཆགས་མང་པོས་ཟོས་
ཏེ། འདི་ལྟར་ལྕེའི་དྲི་མ་ཟོས་པས་དུས་ལས་འདས་སོ་ཞེས་དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ་དང་། དགེ་སློང་དག་སྐྱེས་བུ་གདུག་པ་འདི་ལྟ་བུ་ཁ་ཅིག་ཡོད་དེ་དེ་ལྟ་བས་ན་དགེ་སློང་དག་
གིས་སོ་ཤིང་མ་བཀྲུས་པར་དེ་བཞིན་དུ་དོར་བར་མི་བྱའོ། །བོར་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་སོ་ཤིང་ཟོས་ནས་བཀྲུ་བར་བྱའོ་ཞེས་གསུངས་པ་དང་། དགེ་སློང་གཞན་དག་གིས་ཆུ་ཉུང་བར་གྱུར་ཏེ་དེ་དག་གིས་ཇི་ལྟར་བསྒྲུབ་
པར་བྱ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གང་ལ་ཆུ་ཉུང་བར་གྱུར་པ་དེས་རེ་ཞིག་ས་ལ་བྲུད་ནས་ལྕེའི་དྲི་མ་མེད་པར་བྱའོ། །དེ་དུས་གཞན་ཞིག་ན་བཙོ་བླག་བྱ་བར་བརྩམས་ཏེ་དེས་གོས་དག་ཚོན་དུ་བཙོས་ཏེ་ཟློག་ཅིང་སྐེམས་པ་
དང་། ཇི་ཙམ་ན་ཕྱོགས་དེར་ཚེ་དང་ལྡན་པ་ཉེ་དགའ་འོངས་ཏེ་དེས་དེ་མཐོང་ནས། དེས་སྨྲས་པ། ཚེ་དང་ལྡན་པ་བདག་གིས་གྲོགས་བགྱིའོ། །དེས་སྨྲས་པ། གནས་བརྟན་ལེགས་ཀྱིས་མཛོད་ཅིག་ཉེ་དགའ་རང་བཞིན་གྱིས་གནས་ངན་ལེན་ཀུན་དུ་
སྤྱོད་པ་དེས་གོས་སར་པ་རྣམས་ནི་གྲིབ་མ་ལ་བསྐམས། གང་རྙིང་པ་རྣམས་ནི་ཉི་མ་ལ་བསྐམས། གང་གཤེར་བ་རྣམས་ནི་གྲིབ་མ་ལ་བཞག་པ་དང་། དེས་གནས་བརྟན་དེ་ལྟར་མ་མཛད་ཅིག །དེས་ཡང་དང་ཡང་དུ་བྱས་ཏེ་ལྡོག་ཏུ་མ་བཏུབ་བོ། །དེ་ཀུན་
ནས་དཀྲིས་པས་ཉེ་དགའི་སྟེང་དུ་བརྒྱུགས་པ་དང་། དེས་འབྲོས་པར་བརྩམས་སོ། །ཇི་ཙམ་ན་ཚེ་དང་ལྡན་པ་ཤཱ་རིའི་བུ་ཕྱོགས་དེར་འོངས་ཏེ། དེར་ཚེ་དང་ལྡན་པ་ཅི་བྱེད་ཅི་བྱེད་ཅེས་སྨྲས་ན་ཡང་དེ་ཀུན་ནས་དཀྲིས་པ་ཁྲོ་བ་འཕེལ་བར་གྱུར་ནས་སྡོད་དུ་མ་བཏུབ་སྟེ་ཉེ་

དགའ་ཕྱི་བཞིན་དུ་འབྲང་ངོ་། །ཉེ་དགའས་ནྱ་གྲོ་དྷའི་ཤིང་གིས་བརྡེག་པར་བརྩམས་ན་ཡང་སྡོད་དུ་མ་བཏུབ་སྟེ། དེ་ལ་ཡང་ཚེ་དང་ལྡན་པ་ཤཱ་རིའི་བུས་བཞམས་ཏེ་བཟུང་ནས་ཉེ་དགའ་འབྲོས་སུ་བཏང་བ་དང་། དེས་འོན་ཀྱང་ནྱ་གྲོ་དྷའི་ཤིང་ལ་སོས་
བཏབ་ནས། དེས་ནྱ་གྲོ་དྷའི་ཤིང་གི་འདབ་མ་ཐམས་ཅད་ལྷགས་སོ། །དེའི་སྐབས་དགེ་སློང་དག་གིས་ཐོས་ཏེ་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུ་ཁྲོ་བར་མི་བྱའོ། །བཅོམ་ལྡན་འདས་ཀྱིས་དེ་བཞིན་དུ་ཁྲོ་
བར་མི་བྱའོ་ཞེས་གསུངས་པ་དང་། ཇི་ཙམ་ན་དུས་གཞན་ཞིག་ན་ཉེ་དགའ་ལ་དགེ་སྐོས་བབ་སྟེ། དེའི་དྲུང་དུ་སོང་ནས། དེས་སྨྲས་པ། ཚེ་དང་ལྡན་པ་ལས་འདི་ལྟ་ཞིག་བབ་ཀྱིས་བྱོས་ཤིག་ཅེས་བསྒོ་བ་དང་། དེས་དེ་མཐོང་མ་ཐག་ཏུ་དེ་བཞིན་དུ་ཀུན་དུ་དཀྲིས་པ་
དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གང་འདི་འདྲ་བའི་ཁྲོ་བ་འཁོན་ཡོད་པ་ལ་རང་གིས་མངོན་སུམ་དུ་ལས་བསྒོ་བར་མི་བྱའོ། །འོན་ཀྱང་དེའི་དྲུང་ན་འདུག་པའི་དགེ་སློང་གིས་བསྒོ་བར་བྱ་སྟེ།
དེས་དེ་ལ་ཁྱོད་ཀྱིས་ལས་འདི་ལྟ་བུ་བྱོས་ཤིག་ཅེས་སྨྲ་བར་བྱའོ། །དེས་ཀྱང་དེ་ལ་བཞམས་ཏེ་ལས་འདི་ལྟ་བུ་བྱོས་ཤིག་ཅེས་བརྗོད་པར་བྱའོ། །དེས་ཀྱང་ནན་ཏན་དང་། བརྩོན་འགྲུས་དྲག་པོས་འབད་པས་དེ་བཞིན་དུ་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་
བ་འདི་ཉིད་རིག་སྟེ། འདུས་བྱས་སུ་གྱུར་པ་ཐམས་ཅད་འཇིག་པ་དང་། ལྟུང་བ་དང་། གྱེས་པ་དང་། འཇིག་པའི་ཆོས་ཅན་དུ་ཁོང་དུ་ཆུད་ཅིང་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་མངོན་སུམ་དུ་གྱུར་ཏེ། ཁམས་གསུམ་པ་ལས་འདོད་
ཆགས་དང་བྲལ་བ་བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མི་རྟོག་ཅིང་རིག་པས་སྒོ་ངའི་སྦུབས་དྲལ་ཅིང་རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་

ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དགེ་སློང་རྣམས་ཀྱིས་
ཚེ་དང་ལྡན་པ་ཤཱ་རིའི་བུ་ལ་སྨྲས་པ། ཚེ་དང་ལྡན་པ་ཤཱ་རིའི་བུ་ཁྱོད་དང་ལྷན་ཅིག་གནས་པ་ལྷག་པར་ཁྲོ་བ་འདི་འདྲ་བས་ཀྱང་དགྲ་བཅོམ་པ་ཉིད་ཐོབ་པ་ནི་ངོ་མཚར་ཆེའོ། །དེས་དེའི་སྔོན་བྱུང་བ་རྣམས་དགེ་སློང་དེ་དག་ལ་རྒྱ་ཆེར་བཤད་པ་དང་། དགེ་སློང་དག་ཐེ་
ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དགེ་སློང་འདིས་ལས་ཅི་ཞིག་བགྱིས་ན་དེ་སྦྲུལ་གདུག་པར་སྐྱེས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་འདིས་ལས་ཚོགས་
རྙེད་པ། རྐྱེན་ཡོངས་སུ་བསྒྱུར་བ་འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་དགེ་སློང་འདི་ཉིད་ཀྱིས་ལས་བྱས་ཤིང་བསགས་པ་གཞན་སུ་ཞིག་གིས་སོ་སོར་མྱོང་བར་འགྱུར་ཏེ། དགེ་སློང་དག་ལས་
བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་
ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་
ཀྱི་ཚེ་ལོ་ཉི་ཁྲི་ཐུབ་པ་ན་སྟོན་པ་འོད་སྲུང་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། གྲོང་

ཁྱེར་བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེས་དེའི་བསྟན་པ་ལས་རབ་ཏུ་བྱུང་སྟེ། དགེ་སློང་བྱམས་པ་ལ་གནས་པ་ཞེས་བྱ་བར་གྱུར་ཏོ། །དེ་ལ་དགེ་སློང་རྣམས་ཀྱིས་བྱམས་པ་ལ་གནས་པ།
བྱམས་པ་ལ་གནས་པ་ཞེས་རབ་ཏུ་དགོད་དེ་སྨྲས་པ་དང་། དེས་དེ་དག་ལ་དགག་ན་ཡང་འདུག་ཏུ་མ་བཏུབ་པ་དང་། དེ་ཁྲོ་བ་དྲག་པོས་ཀུན་ཏུ་དཀྲིས་པས་དེ་དག་ལ་ངན་སེམས་ཀྱིས་ང་ནི་བྱམས་པ་ལ་གནས་པ་ཡིན་གྱི་ཁྱེད་ཅག་ནི་སྐྱེས་བུ་གདུག་པ་ཞེས་ངག་གིས་ལས་
དྲག་པོ་བརྗོད་དོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ཇི་སྙམ་དུ་སེམས། ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་བྱམས་པ་ལ་གནས་པ་ཞེས་བྱ་བ་གང་ཡིན་པ་དེ་ནི་དགེ་སློང་འདི་ཉིད་ཡིན། དེའི་ཚེ་དེའི་དུས་ན་
འདི་ལྟར་ཡང་དག་པར་རྫོགས་པའི་སངས་རྒྱས་འོད་སྲུང་གི་ཉན་ཐོས་རྣམས་ལ་སྐྱེས་བུ་གདུག་པའོ་ཞེས་སྨྲས་ཤིང་ཀུན་དུ་སྤྱད་པ་དེའི་ལས་ཀྱི་རྣམ་པར་སྨིན་པས་ཚེ་རབས་ལྔ་བརྒྱའི་བར་དུ་སྦྲུལ་གདུག་པར་སྐྱེས་ཏེ། དེ་ད་ལྟར་ཡང་ལས་དེ་ཉིད་ཀྱི་ལྷག་མས་སྦྲུལ་གདུག་པ་འདིར་
སྐྱེས་སོ། །གང་དེ་ཉིད་དུ་ལུང་ཕོག་པ་དང་། བཀླགས་པ་དང་། ཁ་ཏོན་བཏོན་པ་དང་། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པ་དག་བྱས་
ཏེ། དེས་ན་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་སོ། །དེ་ལྟ་བས་ན་དགེ་སློང་དག་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན། གཅིག་ཏུ་དཀར་བ་རྣམས་ཀྱི་ནི་རྣམ་པར་སྨིན་པ་
གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་ཏེ། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ་ལས་གཅིག་ཏུ་དཀར་བ་རྣམས་ལ་ནི་བརྩལ་བར་བྱ་སྟེ། དགེ་སློང་དག་དེ་ལྟ་བུ་ལ་བསླབ་པར་བྱའོ། །བཅོམ་ལྡན་འདས་ཀྱིས་

དེ་སྐད་ཅེས་བཀའ་སྩལ་ནས་དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།སྡོམ་ནི། སྣམ་སྦྱར་དག་ནི་ཅི་རིགས་བགོ། །དགོན་པ་པ་དང་འཚོ་བ་ཅན། །ཁུར་བ་སྒྲ་དང་བཅས་མི་བཟའ། །བཱ་རཱ་ཎ་སཱིར་སྤྱོད་ཡུལ་མིན། །སངས་
རྒྱས་བཅོམ་ལྡན་འདས་མཉན་ཡོད་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་རྣམས་ཀྱིས་སྣམ་སྦྱར་བགོས་ནས་ཆག་ཆག་འདེབས་ཤིང་བའི་ལྕི་བ་འཇམ་པོ་དག་གིས་ཉུག་པར་བྱེད། བཤང་ས་དག་ཏུ་བཤང་བ་དང་གཅི་བར་བྱེད་ཅིང་། གཞན་
ཡང་བཙོ་བླག་གི་ལས་དག་བྱེད་ཅིང་དེར་དེ་བཞིན་དུ་སྟོད་གཡོགས་དང་། སྨད་གཡོགས་དག་ཀྱང་གྱོན་ནོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དགེ་སློང་འདི་དག་ཆོས་གོས་དག་ལ་བྱེ་བྲག་མེད་པར་ཡོངས་སུ་སྤྱོད། བཅོམ་ལྡན་འདས་ཀྱིས་ནི་སྣམ་སྦྱར་ཆོས་གོས་
ཀྱི་མཆོག་གོ་ཞེས་གསུངས་ན། དེ་ཇི་ལྟར་སྣམ་སྦྱར་ཆོས་གོས་ཀྱི་མཆོག་ཁྱད་པར་མེད་པར་ཡོངས་སུ་སྤྱོད། གཞན་ཞིག་གིས་སྨྲས་པ། ཚེ་དང་ལྡན་པས་སྨྲས་པ་བདེན་ཏེ། འདི་ལ་གོར་མ་ཆག་པར་རྒྱུ་ཞིག་ཡོད་དེ། བརྟག་པར་བྱའོ་ཞེས་དེའི་སྐབས་དགེ་སློང་རྣམས་ཀྱིས་
བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་རྣམས་འདི་སྐད་སྨྲ་བའི་གཞིར་གྱུར་གྱིས་དགེ་སློང་དག་སྣམ་སྦྱར་ནི་རྒྱལ་པོ་ལྟ་བུ་ཡིན་ཏེ། དེ་ལྟ་བས་ན་སྣམ་སྦྱར་གྱོན་ཏེ་ལས་ཐམས་ཅད་མི་བྱའོ། །བཅོམ་ལྡན་
འདས་ཀྱིས་སྣམ་སྦྱར་གྱོན་ཏེ་ལས་ཐམས་ཅད་མི་བྱའོ་ཞེས་གསུངས་པ་དང་། དགེ་སློང་རྣམས་ཀྱིས་སྣམ་སྦྱར་བགོས་ཏེ་ཇི་ལྟར་བྱ་བ་དང་། ཇི་ལྟར་མི་བྱ་བ་མ་ཤེས་ཏེ། དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་སྤྱོད་ཡུལ་དུ་འགྲོ་བ་དང་། ཟས་ཀྱི་ཐོག་མ་ལ་འདུག་པ་དང་། མཆོད་རྟེན་དག་ལ་ཕྱག་བྱེད་པ་དང་། སྟོན་པའི་ལུང་ནོད་ཅིང་སོ་སོར་གོ་བར་བྱ་བ་དང་། ཉིན་པར་ཆོས་ཉན་པ་དང་། མཚན་མོ་ཆོས་ཉན་པ་དང་། གྲལ་དུ་འདུག་སྟེ་ཟ་བ་དང་། མཁན་

པོ་དང་སློབ་དཔོན་ལ་ཕྱག་བྱེད་པ་དང་། གཞན་ཡང་ཚངས་པ་མཚུངས་པར་སྤྱོད་པ་དང་ལྷན་ཅིག་འདུག་པའི་ཚེ་སྣམ་སྦྱར་བགོ་བར་བྱའོ། །སྟོད་གཡོགས་ནི་ཕྱོགས་གཙང་མར་བགོ་ཞིང་ལས་ཐམས་ཅད་བྱའོ། །སྨད་གཡོགས་ནི་ཅི་བདེར་ཡོངས་སུ་
སྤྱོད་ཅིག །གླེང་གཞི་ནི་མཉན་ཡོད་ནའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཉི་མ་ནི་ཤར་ཏོ། །བྱ་རོག་ནི་ཟེར་རོ། །ཞིང་དག་ནི་རྨེད་དོ། །ཆོམ་རྐུན་པ་དག་ནི་ངུའོ། །དགེ་སློང་དག་ཉི་མ་ནི་ཤར་ཏོ་ཞེས་བྱ་བ་ནི་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བའི་ཚིག་བླ་དགས་སོ། །བྱ་རོག་ཟེར་རོ་ཞེས་བྱ་བ་ནི་ཆོས་སྨྲ་བ་རྣམས་ཀྱི་གང་ཟག་གི་ཚིག་བླ་དགས་སོ། །ཞིང་པ་དག་ནི་ཞིང་རྨེད་དོ་ཞེས་བྱ་བ་ནི་སྦྱིན་བདག་དང་སྦྱིན་པ་པོ་ཞེས་བྱ་བའི་ཚིག་
བླ་དགས་སོ། །ཆོམ་རྐུན་པ་དག་ངུ་ཞེས་བྱ་བ་ནི་བདུད་ཀྱི་འཁོར་ཅེས་བྱ་བའི་ཚིག་བླ་དགས་སོ། །དགེ་སློང་དག་སྟོན་པ་གང་ཡིན་པ་དེ་ནི་ཉན་ཐོས་རྣམས་ལ་ཐུགས་བརྩེ་བ་ཅན་ཐུགས་རྗེའི་དོན་དུ་ཕན་པར་མཛད་པར་དགྱེས་པས་ཁྱེད་རྣམས་ལ་ངས་ཐུགས་རྗེས་གཟིགས་ཏེ་ཁྱོད་
རྣམས་ཀྱིས་བྱ་བ་ནི་དགོན་པ་དང་། ཤིང་དྲུང་དང་། ཁང་སྟོང་དང་། རི་དང་། རི་ཁྲོད་དང་། རིའི་ཕུག་དང་། འདམ་བུའི་སྟན་དང་། བླ་གབ་མེད་པ་དང་། དུར་ཁྲོད་དང་། ནགས་ཁྲོད་དང་། བས་མཐའི་གནས་མལ་དུ་བསམ་གཏན་གྱིས་ལ། དགེ་སློང་དག་བག་མེད་པ་དང་ཕྱིས་
འགྱོད་པར་མ་བྱེད་ཅིག །འདི་ནི་ངའི་བསྟན་པ་ཡིན་ནོ། །བཅོམ་ལྡན་འདས་ཀྱིས་དགེ་སློང་རྣམས་བག་ཡོད་པར་གནས་མལ་དེ་ལྟ་བུར་བསམ་གཏན་བྱོས་ཤིག་ཅེས་གསུངས་པ་དང་། དགེ་སློང་རྣམས་ཀྱིས་ཇི་སྐད་བསྟན་པའི་གནས་མལ་དུ་བསམ་གཏན་བྱ་བར་བརྩམས་
པ་དང་། ཇི་ཙམ་ན་དགེ་སློང་ཐོས་པ་ཉུང་ངུ་ཞིག་དེ་བཞིན་དུ་དགོན་པར་སོང་སྟེ་འདུག་ནས་ནུབ་མོ་ཡང་གྲོང་དུ་མི་འོང་ཉིན་པར་ཡང་བསོད་སྙོམས་ཀྱི་དུས་མ་གཏོགས་པར་དེ་ཕྱོགས་དེར་བཅས་པ་དང་། བ་ལང་རྫི་དང་། ཕྱུགས་རྫི་དང་། རྩྭ་ཐུན་དང་། ཤིང་ཐུན་དང་། ལམ་གྱིས་འཚོ་

བ་དང་། ལམ་གོལ་བས་འཚོ་བའི་མི་རྣམས་ཀྱིས་འདུག་པར་ཤེས་སོ། །ཇི་ཙམ་ན་དུས་གཞན་ཞིག་ན་ཆོམ་རྐུན་པ་དག་རི་བྲགས་ཀྱི་གྲོང་གཞན་ཞིག་ཏུ་འཇོམས་སུ་སོང་སྟེ་དེ་དག་དེར་བརྡེགས་ཤིང་རྣམ་པར་བརྡེགས་ཏེ་བཅོམ་ནས་དེ་རྣམས་བྲོས་ཏེ་ཕྱོགས་གཞན་ཞིག་ཏུ་ཕྱིན་
ནས་དེ་རྣམས་ཤེས་ལྡན་དག་གང་དུ་འདེང་ཕྱོགས་གར་འདོང་སྨྲོས་ཤིག་ཅེས་བགྲོས་པ་དང་། དེ་ནས་གཅིག་གིས་ཁོ་བོ་ནི་རབ་ཏུ་སྣད་དེ་འགྲོ་མི་ནུས་སོ་ཞེས་སྨྲས་སོ། །ལ་ལས་ནི་ཁོ་བོ་ནི་སྐོམ་མོ་ཞེས་སྨྲས་སོ། །ལ་ལས་ནི་ཁོ་བོ་ནི་བཀྲེས་སོ་ཞེས་སྨྲས་སོ། །གཞན་ཞིག་གིས་
ཤེས་ལྡན་དག་ཕྱོགས་འདི་ན་དགེ་སྦྱོང་ཤཱཀྱའི་སྲས་ཞིག་གནས་གནས་ཏེ། དགེ་སྦྱོང་ཤཱཀྱའི་སྲས་ནི་མཁས་པ། སྙིང་རྗེ་ཅན་དགོན་པ་དེ་ན་འཇིགས་པ་མེད་དེ་གལ་ཏེ་ཤེས་ལྡན་དག་དད་ན་དེར་འདོང་ངོ་། །དེར་སོང་ན་དེར་ནི་བདག་ཅག་གིས་ངེས་པར་ཅུང་ཟད་རྙེད་དོ་ཞེས་སྨྲས་
སོ། །དེ་དག་གིས་ཤེས་ལྡན་དག་དེ་ལྟར་ལེགས་ཏེ། ཤེས་ལྡན་དག་ཚུར་ཤེག་དེར་འདོང་ངོ་ཞེས་སྨྲས་ནས། དེ་དག་གླང་པོ་ཆེའི་སྣ་བཞིན་འཕང་བསྟོད་དེ་རེ་བ་དང་བཅས་ནས་མཐར་གྱིས་དེའི་དྲུང་དུ་འོངས་ནས་དེས་དེ་དག་ལ་ལེགས་པར་འོངས་སམ་ཞེས་ཡང་དག་པར་རབ་ཏུ་དགའ་
བའི་གཏམ་ཀུན་དུ་སྨྲས་པ་དང་། དེ་དག་རབ་ཏུ་དགའ་སྟེ་ཡིད་རབ་ཏུ་བརྟན་ནས་ཅུང་ཟད་ཅིག་བསྡད་དེ་སྨྲས་པ། འཕགས་པ་བདག་ཅག་ནི་གྲང་བས་སྦྲེབས་ནས་མེ་ཅུང་ཟད་མཆིས་སམ། དེས་སྨྲས་པ། ཁོ་བོ་ནི་དགོན་པ་པའོ། །གཞན་ཞིག་གིས་སྨྲས་པ། བདག་ཅག་ནི་
སྐོམ་པར་གྱུར་ན་ཆུ་ཅུང་ཟད་མཆིས་སམ། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གིས་སྨྲས་པ། འཕགས་པ་རྨ་ཁར་གླན་པའི་ཕྱེ་ཅུང་ཟད་མཆིས་སམ། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གིས་སྨྲས་པ། འཕགས་པ་རྨ་ཁར་དཀྲིར་རུང་བའི་རས་
མ་ཅུང་ཟད་མཆིས་སམ། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གིས་སྨྲས་པ། རྨ་ཁར་གླན་པའི་མར་ཅུང་ཟད་མཆིས་སམ། དེས་སྨྲས་པ། ཁོ་བོ་ནི་དགོན་པ་པའོ། །བདག་ཅག་བཀྲེས་ན་འབྲས་ཆན་དང་། ཟན་དྲོན་ཅུང་ཟད་མཆིས་སམ། དེས་སྨྲས་པ། ཁོ་བོ་ནི་དགོན་

པ་པའོ། །དེ་དག་གིས་སྨྲས་པ། དེ་རིང་ཚེས་གྲངས་ནི་ཅི་རྒྱུ་སྐར་ནི་གང་། ཉི་མ་ནི་གང་ལ་བབ། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གི་ནང་ན་གཅིག་ཅིག་དགེ་སློང་གི་སྤྱོད་པ་ཤེས་ཏེ་ཀུན་ནས་དཀྲིས་པས་སྨྲས་པ། འཕགས་པ་དེ་ནི་དེར་བས་
ན་འདི་ལྟ་བུ་ཞིག་དྲིའོ། །རེ་ཞིག་ཅི་ཁྱོད་དགྲ་བཅོམ་པའམ། ཕྱིར་མི་འོང་བའམ། ལན་གཅིག་ཕྱིར་འོང་བའམ། རྒྱུན་དུ་ཞུགས་པ་ཡིན་ནམ། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གིས་སྨྲས་པ། འཕགས་པ་དེ་ནི་དེར་བས་ན་གཞན་འདི་ལྟ་བུ་ཞིག་འདྲིའོ། །ཅི་
ཁྱོད་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཐོབ་བམ། འོན་ཏེ་ཅུང་ཟད་མེད་པའི་སྐྱེ་མཆེད་དམ། རྣམ་ཤེས་མཐའ་ཡས་སྐྱེ་མཆེད་དམ། ནམ་མཁའ་མཐའ་ཡས་སྐྱེ་མཆེད་དམ། བསམ་གཏན་བཞི་པའམ། བསམ་གཏན་གསུམ་པའམ། བསམ་གཏན་གཉིས་པའམ།
བསམ་གཏན་དང་པོ་ཐོབ་པ་ཡིན། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གིས་སྨྲས་པ། འཕགས་པ་དེ་ནི་དེར་བས་ན་ཅི་ཁྱོད་སྡེ་སྣོད་གསུམ་པའམ། འོན་ཏེ་མདོ་སྡེ་འཛིན་པའམ། འདུལ་བ་འཛིན་པའམ། མ་མོ་འཛིན་པ་ཡིན། དེས་སྨྲས་པ། ཁོ་བོ་ནི་
དགོན་པ་པའོ། །དེ་དག་གིས་སྨྲས་པ། དེ་དག་ནི་དེར་བས་ན་གཞན་འདི་ལྟ་བུ་ཞིག་དྲིའོ། །ཁྱོད་ཀྱི་མིང་ཅི། དེས་སྨྲས་པ། ཁོ་བོ་ནི་དགོན་པ་པའོ། །དེ་དག་གིས་སྨྲས་པ། འཕགས་པ་ཕྱོགས་འདི་གང་། དེས་སྨྲས་པ། ཁོ་བོ་ནི་དགོན་པ་པའོ། །ཞེས་དེས་དེ་བཞིན་
དུ་རྣམ་པ་ཐམས་ཅད་དུ་དགོན་པ་པའོ་ཞེས་སྨྲས་པ་དང་། དེ་དག་ཤིན་ཏུ་ཁྲོས་པར་གྱུར་ནས་སྨྲས་པ། ཤེས་ལྡན་དག་བདག་ཅག་ནི་ཆོམ་རྐུན་པ་ཡིན་ནམ། འདི་ནི་ཆོམ་རྐུན་པ་ཆེན་པོ་ཞིག་སྟེ། གང་རང་གི་མིང་ཙམ་ཡང་མི་ཤེས་ལ། མཚན་མ་ཙམ་འཛིན་པ་འཇིག་རྟེན་
རྣམས་ལ་སླུ་བར་བྱེད་པའོ་ཞེས་དེ་དག་དེ་ལ་མི་བཟོད་པ་སྐྱེས་ནས་ཤིན་ཏུ་བརྡེགས་ཏེ། མགོ་དང་ལྷུང་བཟེད་དང་འཁར་གསིལ་ཡང་བཅོམ་ཆོས་གོས་ཀྱང་དྲལ་ཏེ་མ་ཤི་ཙམ་དུ་བྱས་ནས་དེ་དག་མཚན་མོ་ཉིད་ཕྱོགས་དེ་ནས་དོང་ངོ་། །དེ་ཡང་མཚན་མོ་ནམ་ནངས་ནས་དེ་བཞིན་དུ་ཚུལ་མི་

སྡུག་པར་རྒྱལ་བྱེད་ཀྱི་ཚལ་དུ་སོང་བ་དང་། དགེ་སློང་དག་གིས་མཐོང་སྟེ། དེ་དག་གིས་སྨྲས་པ། ཚེ་དང་ལྡན་པ་གང་གིས་འདི་འདྲ་བའི་གནས་སུ་བཞག །དེས་ཇི་ལྟར་གྱུར་པ་ཞིབ་ཏུ་སྨྲས་པ། དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་
ལྡན་འདས་ཀྱིས་བཀའ་སྩལ་པ། དགོན་པ་པ་རྣམས་ཀྱི་དགེ་སློང་གི་ཀུན་དུ་སྤྱད་པའི་ཆོས་བཅའ་བར་བྱ་སྟེ། དགོན་པ་པའི་དགེ་སློང་གིས་རྟག་ཏུ་མེ་དག་གཞག་པར་བྱ། ཕྱེ་ཉུང་ཟད་ཙམ་བཅང་བར་བྱ། རས་མ་དག་གཞག་པར་བྱ། གང་འབྲས་ཅན་དང་།
ཟན་དག་ཟོས་པའི་ལྷག་མ་ཡང་གཞག་པར་བྱ། རྒྱུ་སྐར་དང་། ཚེས་གྲངས་དང་། ཉི་མ་དག་ལ་མཁས་པར་བྱ། ཕྱོགས་ལ་མཁས་པར་བྱ། སྤྱོད་ཡུལ་ལ་མཁས་པར་བྱ། ཆུ་དག་གཞག་པར་བྱ། མར་དང་འབྲུ་མར་ཅུང་ཟད་བཅང་བར་བྱ། མདོ་སྡེ་འཛིན་
པ་དང་། འདུལ་བ་འཛིན་པ་དང་། མ་མོ་འཛིན་པ་དང་། ཐ་ན་སྙན་པར་སྨྲ་བ་ཙམ་ལ་ཡང་མཁས་པར་བྱ་སྟེ། དགོན་པ་པའི་དགེ་སློང་ཇི་ལྟར་ཀུན་ཏུ་སྤྱད་པའི་ཆོས་བཅས་པ་ལ་ཡང་དག་པར་མི་འཛིན་ཅིང་མི་སྒྲུབ་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་
མཉན་ཡོད་ནའོ། །མཉན་ཡོད་ན་འཚོ་བ་པ་ཞིག་གནས་པ་དེ་དུས་གཞན་ཞིག་ན་ནད་ཀྱིས་ཐེབས་པར་གྱུར་ཏེ། དེ་སྨན་པའི་དྲུང་དུ་སོང་ནས་བཞིན་བཟངས་སྨན་གྱི་ལུང་སྟོན་ཅིག །དེས་སྨྲས་པ། འཕགས་པ་བསྲོ་གང་གི་ཁྲུས་ཀྱིས་ཁྲུས་གྱིས་ཤིག་དང་སོས་པར་འགྱུར་
རོ། །དེས་སྨྲས་པ། བཞིན་བཟངས་བདག་ནི་སློང་མོ་ལ་རྒྱུ་ཞིང་འཚོ་བར་བྱེད་པ་ཡིན་ན། ཇི་ལྟར་བདག་གིས་བསྲོ་གང་དུ་ཁྲུས་འབྱོར་པར་འགྱུར། དེས་སྨྲས་པ། འཕགས་པ་དགེ་སྦྱོང་ཤཱཀྱའི་བུ་དག་ཟླ་བ་ཕྱེད་ཕྱེད་ཅིང་ཁྲུས་བྱེད་ཀྱིས་དེར་སོང་ལ་ཁྲུས་བྱོས་ཤིག །
དེས་ཁྲུས་བྱ་བར་བརྩམས་ཏེ། དགེ་སློང་དག་གི་ནང་དུ་ཞུགས་པ་དང་། དེའི་གོས་ས་དམར་དུ་ཁ་བསྒྱུར་བ་གྱོན་ནས་དགེ་སློང་ཐམས་ཅད་ཀྱིས་དེ་ཡང་དགེ་སློང་ཞིག་གོ་སྙམ་སྟེ། སུས་ཀྱང་མ་བགགས་སོ། །དེ་ཡང་མྱུར་བ་མྱུར་བར་ཁྲུས་བྱས་ཏེ། མི་བདེ་ཞིང་

འདུག་པ་དང་ཇི་ཙམ་ན་དགེ་སློང་དག་ཅིག་ཕྱོགས་དེར་འོངས་ཏེ། དེ་དག་གིས་དེ་མཐོང་ནས། དེ་དག་ལས་གཅིག་ཅིག་སེམས་ངེས་པ་ཞིག་སྟེ། དེས་སྨྲས་པ། ཚེ་དང་ལྡན་པ་དག་འདི་ན་དགེ་སློང་རྒན་ཞུགས་ཞིག་འདུག་གིས་ཁྲུས་བྱའོ། །
དེ་དག་གིས་སྨྲས་པ་ལེགས་ཀྱིས་དེ་བཞིན་དུ་བྱའོ། །དེ་དག་དེའི་དྲུང་དུ་སོང་སྟེ། རྒན་ཞུགས་ཚུར་ཤོག་ཁྲུས་བྱའོ་ཞེས་སྨྲས་སོ། །དེས་མགོ་འདྲིལ་བ་དང་། དེ་དག་གིས་དེའི་དཔུང་པ་ནས་བཟུང་སྟེ་བསླང་ངོ་། །དེས་སྨྲས་པ། དགེ་སློང་ཤཱཀྱའི་བུ་མི་
གཙང་བ་ཁྲུས་མ་བྱས་པ་དག་གིས་ཁྲུས་བྱས་པ་ལ་རེག་གོ། །དེ་དག་གིས་སྨྲས་པ། ངེད་ནི་དགེ་སྦྱོང་ཤཱཀྱའི་བུ་དག་ཡིན་ནོ། །རྒན་ཞུགས་ཁྱོད་ལྟ་བུ་སུ་ཞིག །དེས་སྨྲས་པ། བདག་ནི་འཚོ་བ་པའོ། །དེ་དག་གིས་སྨྲས་པ། ཀྱེ་འཚོ་བ་པ་ཁྱོད་སུས་ཁྲུས་བྱས་
ཞེས་དེའི་སྐབས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་དེའི་ཕྱིར་དགེ་སློང་རྣམས་ཀྱིས་བསྲོ་གང་དུ་ཁྲུས་བྱེད་པའི་ཚེ་སྒོ་སྲུངས་དག་གཞག་པར་བྱ་ཞིང་ནང་དུ་འོང་བའི་དགེ་སློང་དག་གི་
མིང་དྲི་བར་བྱའོ། །དེ་དག་གིས་དགེ་སློང་མིང་ཤེས་པ་ཡང་དྲི་བར་བརྩམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ངོ་ཤེས་པའི་དགེ་སློང་དག་གི་མིང་ནི་མ་འདྲི་ཤིག །སངས་རྒྱས་བཅོམ་ལྡན་འདས་ཀོ་ས་ལ་ནས་ལྗོངས་རྒྱུ་ཞིང་གཤེགས་པ་ན། འདོད་
པ་མཐུན་པར་བྱོན་ནས་འདོད་པ་མཐུན་པ་ན་འདོད་པ་མཐུན་པའི་ནགས་ཁྲོད་ན་བཞུགས་སོ། །དེ་ནས་ཡང་དེའི་ཚེ་བྲམ་ཟེ་པད་མའི་སྙིང་པོ་ཞེས་བྱ་བ་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་དཔྱ་རྒྱུ་རྩྭ་དང་། ཤིང་དང་། ཆུར་བཅས་པ་བྲམ་ཟེའི་སྦྱིན་མཐོངས་སུ་བྱིན་ནས་ཤས་
ཆེན་པོ་རྒྱས་པ་ལ་ལོངས་སྤྱོད་དོ། །བྲམ་ཟེ་པད་མའི་སྙིང་པོའི་སློབ་མ་བྲམ་ཟེ་ཁྱེའུ་མ་སྡུག་ཅེས་བྱ་བ་མང་དུ་ཐོས་པ་ཚིག་གསལ་བ་ཐགས་ཐོགས་མེད་པ་ཞིག་ཡོད་དེ། བྲམ་ཟེ་པད་མའི་སྙིང་པོའི་བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེ་རྣམས་ཀྱི་གསང་ཚིག་འདོན་དུ་འཇུག་གོ། །

བྲམ་ཟེ་པད་མའི་སྙིང་པོས་དགེ་སྦྱོང་གཽ་ཏ་མ་ཤཱཀྱའི་སྲས་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ནས་ཤེས་ལྡན་གཽ་ཏ་མ་དེའི་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་འདི་ལྟ་བུ་འདི་ཕྱོགས་དང་ཕྱོགས་མཚམས་སུ་གྲགས་ཏེ། འདི་ལྟར་བཅོམ་ལྡན་འདས་གཽ་ཏ་མ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ་ནི་འཇིག་རྟེན་ལྷ་དང་བཅས། བདུད་དང་བཅས། ཚངས་པ་དང་བཅས།
དགེ་སྦྱོང་དང་བྲམ་ཟེའི་སྐྱེ་དགུ་དང་བཅས། ལྷ་དང་མིའི་སྐྱེ་དགུ་དང་བཅས་པ་འདི་ལ་མཐོང་བའི་ཆོས་འདི་ཁོ་ན་ལ་རང་ཉིད་ཀྱིས་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་ངའི་ཟག་པ་ཟད་དོ། །ཚངས་པར་སྤྱོད་པ་ལ་བསྟེན་ཏོ། །བྱ་བ་བྱས་སོ། །འདི་
ལས་སྲིད་པ་གཞན་མི་ཤེས་སོ། །དེའི་ཆོས་ཀྱང་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཚངས་པར་སྤྱོད་པ་ཡང་དག་
པར་རབ་ཏུ་སྟོན་པའོ་ཞེས་གོ་བར་བྱེད་པ་དེ་གསང་ཚིག་ལས་ཀྱང་འབྱུང་སྟེ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་དེ་དག་དང་ལྡན་པའི་སྐྱེས་བུ་ཆེན་པོའི་འགྲོ་བ་ནི་གཉིས་ལས་གཞན་དུ་མི་འགྱུར་ཏེ། གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་མཐའ་
བཞིར་རྣམ་པར་རྒྱལ་བ། ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་བུ་ཡིན་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་

པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཉིད་ཡིན་ནོ། །དེ་ལ་ཡང་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་
འཇོམས་པ། སྟོང་ཡང་ཚང་བར་འགྱུར་ཞིང་དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །
གལ་ཏེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བར་འཇིག་རྟེན་དུ་སྒྲ་རྣམ་པར་གྲགས་པར་འགྱུར་བ་དེ་ཀོ་ས་ལ་
ནས་ལྗོངས་རྒྱུ་ཞིང་གཤེགས་ནས། འདོད་པ་མཐུན་པར་བྱོན་ནས་འདོད་པ་མཐུན་པ་ན་འདོད་པ་མཐུན་པའི་ནགས་ཁྲོད་ན་བཞུགས་སོ་ཞེས་ཐོས་སོ། །ཐོས་ནས་ཀྱང་བྲམ་ཟེའི་ཁྱེའུ་མ་སྡུག་ལ་སྨྲས་པ། མ་སྡུག་གང་ཡིན་པ་ཤེས་སམ། ཁོ་བོས་དགེ་སྦྱོང་གཽ་ཏ་མ་
ཤཱཀྱའི་སྲས་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཞེས་བྱ་བ་ནས། འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་བྱ་བའི་བར་དུ་སྟེ། ཁོ་བོས་དེ་གསང་ཚིག་
ལས་བཏོན་པས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་དེ་དག་དང་ལྡན་པའི་སྐྱེས་བུ་ཆེན་པོའི་འགྲོ་བ་ནི་གཉིས་ལས་གཞན་དུ་མི་འགྱུར་ཏེ། གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཞེས་བྱ་བ་ནས། འཇིག་
རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་བྱ་བའི་བར་དུ་སྟེ། དེ་ཀོ་ས་ལ་ནས་ལྗོངས་རྒྱུ་ཞིང་གཤེགས་པ་ན། འདོད་པ་མཐུན་པར་བྱོན་ནས། འདོད་པ་མཐུན་པ་ན་འདོད་པ་མཐུན་པའི་ནགས་ཁྲོད་ན་བཞུགས་སོ། །ཞེས་ཐོས་ཀྱིས་བྲམ་

ཟེའི་ཁྱེའུ་ཚུར་ཁྱོད་ཤེས་ལྡན་གཽ་ཏ་མ་གང་ན་བ་དེར་སོང་ཤིག་དང་ཕྱིན་ནས། ཇི་ག་ཤེས་ལྡན་གཽ་ཏ་མ་དེའི་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་ཕྱོགས་དང་ཕྱོགས་མཚམས་སུ་ཇི་ལྟར་གྲགས་པ་དེ་ཁོ་ན་བཞིན་ཡིན་
ནམ་མ་ཡིན་པ་དང་། དེའི་མཚན་རྣམས་གྲགས་པ་ཡང་དག་པ་ཡིན་ནམ་མ་ཡིན་ཤེས་པར་འགྱུར་གྲང་། བྲམ་ཟེའི་ཁྱེའུ་མ་སྡུག་གིས་བྲམ་ཟེ་པད་མའི་སྙིང་པོའི་ལྟར་མཉན་ནས་ཤས་ཆེ་བའི་བྲམ་ཟེ་རྒན་རབས་མང་པོ་དང་ལྷན་ཅིག་ཏུ་ཤས་ཆེ་
བ་ནས་བྱུང་ནས། བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། ཕྱོགས་གཅིག་ཏུ་འདུག་གོ། །དེ་ནས་ཤས་ཆེ་བའི་བྲམ་ཟེ་རྣམས། བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་། ཡང་དག་
པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས། བཅོམ་ལྡན་འདས་ཀྱིས་ཤས་ཆེ་བའི་བྲམ་ཟེ་རྣམས་ལ་ཆོས་དང་ལྡན་པའི་གཏམ་ཡང་དག་པར་སྟོན་པར་མཛད། ཡང་དག་
པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། བཅོམ་ལྡན་འདས་ཤས་ཆེ་བའི་བྲམ་ཟེ་རྣམས་ལ་ཆོས་དང་ལྡན་པའི་གཏམ་གསུང་བ་ན། བྲམ་ཟེའི་ཁྱེའུ་མ་སྡུག་
མཆིལ་ལྷམ་དང་བཅས་པས་འཆག་ཅིང་གློ་བུར་དུ་གཏམ་དག་གླེང་བར་བྱེད་ལ། གཏམ་དེ་མཐར་ཕྱིན་པར་མི་སྡོད་པར་མ་གུས་པས་སྙེམས་ཤིང་བཟློག་པར་སེམས་སོ། །དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་མ་སྡུག་ལ་འདི་སྐད་ཅེས་བཀའ་
སྩལ་ཏོ། །བྲམ་ཟེའི་ཁྱེའུ་ཁྱོད་བྲམ་ཟེ་གསུམ་རིག་པ་རྣམས་དང་ལྷན་ཅིག་གློ་བུར་དུ་གཏམ་དེ་ལྟ་བུ་སྨྲའམ། ཀྱེ་གཽ་ཏ་མ་གཏམ་ཇི་ལྟ་བུ་ཞིག །དེ་བཞིན་གཤེགས་པ་ཤས་ཆེ་བའི་བྲམ་ཟེ་རྣམས་ཆོས་དང་ལྡན་པའི་གཏམ་གསུང་བ་ན།

ཁྱོད་མཆིལ་ལྷམ་དང་བཅས་པས་འཆག་ཅིང་གློ་བུར་དུ་གཏམ་གླེང་བར་བྱེད་ལ། གཏམ་དེ་མཐར་ཕྱིན་པར་མི་སྡོད་པར་མ་གུས་པས་སྙེམས་ཤིང་སླར་བཟློག་པར་སེམས་པ་ལྟ་བུའོ། །ཀྱེ་གཽ་ཏ་མ་བྲམ་ཟེ་འགྲོ་བ་རྣམས་ནི། འགྲོ་བ་རྣམས་
དང་ལྷན་ཅིག །འགྲེང་བ་རྣམས་ནི། འགྲེང་བ་རྣམས་དང་། འདུག་པ་རྣམས་ནི། འདུག་པ་རྣམས་དང་། ཉལ་བ་རྣམས་ནི། ཉལ་བ་རྣམས་དང་། ཕན་ཚུན་ལེགས་པར་སྨྲའི། དགེ་སྦྱོང་མགོ་རེག་ནག་པོའི་རྩ་ལག་ཕོ་རེང་གང་དག་དང་ནི་ཁོ་
བོ་ལྷན་ཅིག་ཏུ་འདི་ལྟ་བུའི་གློ་བུར་གྱི་གཏམ་གླེང་དུ་རུང་སྟེ། དཔེར་ན་ད་ལྟར་ཤེས་ལྡན་གཽ་ཏ་མ་དང་གླེང་བ་བཞིན་ནོ། །བྲམ་ཟེའི་ཁྱེའུ་ཁྱོད་དོན་དུ་གཉེར་བ་ལ་ཞུགས་ནས། འདིར་འོངས་ན། དེ་ལྟ་བུ་ནི་བསྙེན་བཀུར་མ་བྱས་པ་ལས། གཞན་ལ་
མེད་པས་བྲམ་ཟེའི་ཁྱེའུ་མ་སྡུག་ནི་བླ་མའི་ཚོགས་ལས་བསྙེན་བཀུར་མ་བྱས་པ་ཞིག་ཡིན་པ་ལྟ། དེ་ནས་བཅོམ་ལྡན་འདས་ཀྱིས། བྲམ་ཟེའི་ཁྱེའུ་མ་སྡུག་ལ་བཀུར་སྟི་མེད་པའི་ཚིག་གིས་སྤྱོས་པ་ན་ཁྲོས། འཁྲུགས། རྔམ་ཞིང་ཡིད་མ་རངས་ནས། བཅོམ་ལྡན་
འདས་ལ་ཁ་བྱ་བར་འདོད། སྤོབས་པར་འདོད། བརྩད་པར་འདོད། དྲན་པར་བྱ་བར་འདོད་དེ། འདི་ཙམ་གྱིས་དགེ་སྦྱོང་གཽ་ཏ་མ་ལ་ཁ་བྱ་བ་དང་། སྤོབས་པ་དང་། བརྩད་པ་དང་། དྲན་པར་བྱས་པར་འགྱུར་རོ། །སྙམ་དུ་རིག་ནས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །འདི་ལྟར་ཀྱེ་གཽ་ཏ་མ་ཤཱཀྱ་འདི་དག་ནི་ད་བྱུང་ཁོ་ན་ཡིན་ཏེ། ད་བྱུང་གི་རིགས་ཡིན་པས་བྲམ་ཟེ་རྣམས་ལ་བླ་མ་དང་། རི་མོ་དང་། ཞེ་ས་དང་མཆོད་པ་མི་བྱེད་དོ། །ཅི་བྲམ་ཟེའི་བུ་ཁྱོད་ལ་ཤཱཀྱ་རྣམས་ཀྱིས་གནོད་པ་ཆུང་ཟད་བྱས་སམ། ཀྱེ་གཽ་ཏ་
མ་དུས་གཅིག་ཅིག་ན་བདག་ཉིད་དང་མཁན་པོ་བྱ་བ་ཞིག་ལ་གྲོང་ཁྱེར་སེར་སྐྱའི་གཞིར་ཕྱིན་པ་ན། བདག་ལ་ཤཱཀྱ་རྣམས་དང་ཤཱཀྱའི་བུ་མོ་རྣམས་ཁང་བཟངས་ཀྱི་སྟེང་དུ་སོང་ནས་མཛུབ་ཀེར་གྱིས་སྟོན་པར་བྱེད་དེ། བྲམ་ཟེ་པད་མའི་སྙིང་པོའི་སློབ་མ་བྲམ་ཟེའི་

ཁྱེའུ་མ་སྡུག་ཡིན་ནོ། །བྲམ་ཟེ་པད་མའི་སྙིང་པོའི་སློབ་མ་བྲམ་ཟེའི་ཁྱེའུ་མ་སྡུག་ཡིན་ནོ། །ཞེས་དེ་དག་བདག་ལ་མཛུབ་ཀེར་ཁོ་ནས་སྟོན་པར་བྱེད་ཀྱི། བདག་ལ་བཀུར་སྟི་དང་། བླ་མ་དང་། ཞེ་ས་དང་། མཆོད་པ་ནི་མི་བྱེད་དོ། །
བྲམ་ཟེའི་ཁྱེའུ་རེ་ཞིག་བྱེའུ་ཁུག་རྟ་ཡང་རང་གི་ཚང་ན་འདུག་ན་ཅི་དགར་སྐད་འབྱིན་ན། ཤཱཀྱ་རྣམས་ལྟ་སྨོས་ཀྱང་ཅི་དགོས་ཏེ། བྲམ་ཟེའི་ཁྱེའུ་འདི་ལྟ་སྟེ། གྲོང་ཁྱེར་སེར་སྐྱའི་གཞི་འདི་ནི་ཤཱཀྱ་རྣམས་ཀྱི་རང་གི་ཡིན་ནོ། །ཀྱེ་གཽ་ཏ་མ་རིགས་
ནི་འདི་བཞི་སྟེ། བྲམ་ཟེ་དང་། རྒྱལ་རིགས་དང་། རྗེའུའི་རིགས་དང་། དམངས་རིགས་སོ། །འདི་ལྟར་ཀྱེ་གཽ་ཏ་མ་རིགས་བཞི་པོ་འདི་དག་ནི་བྲམ་ཟེ་རྣམས་ལ་བཀུར་སྟི་བྱེད། བླ་མར་བྱེད། ཞེ་ས་བྱེད། མཆོད་པར་བྱེད་དོ། །འོན་ཀྱང་
ཤཱཀྱ་འདི་དག་ནི་ད་བྱུང་ཁོ་ན་ཡིན་ཏེ། ད་བྱུང་གི་རིགས་ཡིན་པས། བྲམ་ཟེ་རྣམས་ལ་བཀུར་སྟི་མི་བྱེད། བླ་མར་མི་བྱེད། ཞེ་ས་མི་བྱེད། མཆོད་པ་མི་བྱེད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མ་བྲམ་ཟེའི་ཁྱེའུ་མ་སྡུག་
ཤཱཀྱ་རྣམས་ལ་ཨེ་མའོ་ཤཱཀྱ་རྣམས་ནི་ད་བྱུང་ཡིན་ནོ། །ཨེ་མའོ་ཤཱཀྱ་རྣམས་ནི་ད་བྱུང་གི་རིགས་ཡིན་ནོ་ཞེས་ཧ་ཅང་ཁ་ཟེར་བས་མ་ལ་ངས་འདིའི་སྔོན་གྱི་རིགས་བརྒྱུད་པ་བཙལ་ལོ་སྙམ་ནས། བཅོམ་ལྡན་འདས་ཀྱིས་བྲམ་ཟེའི་ཁྱེའུ་མ་སྡུག་གི་སྔོན་གྱི་རིགས་
བརྒྱུད་པ་བཙལ་བ་དང་། བྲམ་ཟེའི་ཁྱེའུ་མ་སྡུག་ནི་ཤཱཀྱ་རྣམས་ཀྱི་བྲན་མོའི་བུར་གྱུར་ལ། ཤཱཀྱ་རྣམས་ནི་དེའི་ཇོ་བོའི་བུར་གྱུར་པར་གཟིགས་སོ། །དེ་ནས་བཅོམ་ལྡན་འདས་ཀྱིས། བྲམ་ཟེའི་ཁྱེའུ་མ་སྡུག་ལ་འདི་སྐད་ཅེས་བཀའ་སྩལ་ཏོ། །ཀྱེ་བྲམ་ཟེའི་
ཁྱེའུ་ཁྱོད་ཀྱི་རིགས་ཅི་ཡིན། ཀྱེ་གཽ་ཏ་མ་མིག་མི་འཛུམས་ཀྱི་བུའོ། །བྲམ་ཟེའི་ཁྱེའུ་འདི་ནས་ཁྱོད་ཀྱི་སྔོན་གྱི་རིགས་བརྒྱུད་པ་བཙལ་ན་ཁྱོད་ནི་ཤཱཀྱ་རྣམས་ཀྱི་བྲན་མོའི་བུར་གྱུར་ལ་ཤཱཀྱ་དག་ནི་ཇོ་བོའི་བུར་གྱུར་པ་ཡིན་པར་མཐོང་ངོ་།། །།

འདུལ་བ་ཕྲན་ཚེགས་ཀྱི་གཞི། བམ་པོ་བཞི་བཅུ་རྩ་དྲུག་པ། དེ་ནས་ཤས་ཆེ་བའི་བྲམ་ཟེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་ཁྱོད་བྲམ་ཟེའི་ཁྱེའུ་མ་སྡུག་ལ་བྲན་མོའི་བུ་ཞེས་ཚིག་ཏུ་མ་གསུང་ཤིག །དེ་ཅིའི་སླད་དུ་ཞེ་ན། བྲམ་ཟེའི་
ཁྱེའུ་མ་སྡུག་ནི་མང་དུ་ཐོས་པ། ཚིག་གསལ་བ། ཐགས་ཐོགས་མེད་པར་སྨྲ་བ་སྟེ། གཞན་ཡང་བྲམ་ཟེའི་ཁྱེའུ་མ་སྡུག་གིས་གཞི་འདི་ལ་ཤེས་ལྡན་གཽ་ཏ་མ་ལ་ཆོས་དང་མཐུན་པས་ལན་གདབ་པར་རྔོ་ཐོག་གོ། །བྲམ་ཟེ་དག་གལ་ཏེ་ཁྱེད་འདི་སྙམ་དུ་བྲམ་ཟེའི་ཁྱེའུ་མ་སྡུག་གང་ལ་ཆོས་དང་
མཐུན་པས་ལན་ལྡོན་ནུས་སོ་སྙམ་དུ་སེམས་ན། ཁྱེད་ཅག་ཅང་མ་སྨྲ་བར་བྲམ་ཟེའི་ཁྱེའུ་མ་སྡུག་གཞི་འདི་ལ་ཆོས་དང་མཐུན་པས་དེ་ལ་ལན་འདེབས་སུ་ཆུག་ཤིག །བྲམ་ཟེ་དག་ཁྱེད་ཅག་གལ་ཏེ་འདི་སྙམ་དུ་བྲམ་ཟེའི་ཁྱེའུ་མ་སྡུག་གཞི་འདི་ལ་ང་ལ་ཆོས་དང་མཐུན་པས་ལན་འདེབས་མི་ནུས་སོ་
སྙམ་དུ་སེམས་ན། བྲམ་ཟེའི་ཁྱེའུ་མ་སྡུག་ཅང་མ་སྨྲ་བར་ཤེས་ལྡན་ཁྱེད་ཀྱིས་གཞི་འདི་ལ་ང་ལ་ཆོས་དང་མཐུན་པས་ལན་ཐོབ་ཤིག །ཀྱེ་གཽ་ཏ་མ་བྲམ་ཟེའི་ཁྱེའུ་མ་སྡུག་ཉིད་མང་དུ་ཐོས་པ། ཚིག་གསལ་བ། ཐགས་ཐོགས་མེད་པར་སྨྲ་བ་ལགས་ཏེ། བྲམ་ཟེའི་ཁྱེའུ་མ་སྡུག་གིས་གཞི་
འདི་ལ་ཤེས་ལྡན་གཽ་ཏ་མ་ལ་ཆོས་དང་མཐུན་པས་ལན་གདབ་པར་རྔོ་ཐོག་གི་གཞན་གྱིས་ནི་མ་ལགས་སོ། །དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་མ་སྡུག་ལ་འདི་སྐད་ཅེས་བཀའ་སྩལ་ཏོ། །བྲམ་ཟེའི་ཁྱེའུ་སྔོན་བྱུང་བ་རྒྱལ་པོ་བུ་རམ་ཤིང་སྐྱེས་ཞེས་བྱ་བ་ཞིག་བྱུང་སྟེ། རྒྱལ་པོ་
བུ་རམ་ཤིང་སྐྱེས་ལ་བུ་བཞི་ཡོད་པ་སྐར་མདའི་གདོང་དང་། ལག་རྣ་དང་། གླང་པོ་ཆེས་འདུལ་བ་དང་། རྐང་རྒྱན་ལྡན་ནོ། །རྒྱལ་པོ་བུ་རམ་ཤིང་སྐྱེས་ཀྱིས་དེ་དག་ཉེས་པ་འགའ་ཞིག་གི་ཕྱིར་སྤྱུགས་ནས། དེ་དག་རང་རང་གི་སྲིང་མོ་ཁྲིད་དེ་ཡུལ་འཁོར་གཞན་དང་ཡུལ་གཞན་དུ་དོར་
ནས། རིམ་གྱིས་གངས་ཅན་གྱི་ཕྱོགས་ཆུ་བོ་སྐལ་ལྡན་ཤིང་རྟའི་འགྲམ། སེར་སྐྱའི་གནས་ནས་མི་རིང་བ་ཞིག་ཏུ་སོང་སྟེ། ཤིང་གི་ཡལ་ག་དང་། ལོ་མ་དག་ལས་སྤྱིལ་བུ་བྱས་ཏེ་གནས་ཤིང་འཁོད་དོ། །དེ་དག་གིས་དེར་རང་རང་གི་སྲིང་མོ་བཏང་སྟེ། མས་དབེན་གྱི་སྲིང་མོ་རྣམས་

དང་ལྷན་ཅིག་འཚོག་ནས་འཁོད་དོ། །དེ་དག་དེ་ན་འཚོ་ཤིང་འཁོད་པ་ལས་བུ་ཁྱེའུ་དང་བུ་མོ་དག་བཙས་སོ། །དེ་ནས་དུས་གཞན་ཞིག་ན་རྒྱལ་པོ་བུ་རམ་ཤིང་སྐྱེས་བུ་སྡུག་པ་རྣམས་དྲན་ནས་བློན་པོ་རྣམས་ལ་སྨྲས་པ། ཀྱེ་གྲོང་པ་དག་གཞོན་ནུ་རྣམས་གར་དོང་། ལྷས་གཞོན་ནུ་དེ་
དག་ནོངས་པ་འགའ་ཞིག་གི་སླད་དུ་སྤྱུགས་ནས། དེ་དག་རང་རང་གི་སྲིང་མོ་ཁྲིད་དེ་ཡུལ་འཁོར་གཞན་དང་ཡུལ་གཞན་དུ་དོང་སྟེ། རིམ་གྱིས་གངས་ཅན་གྱི་ཕྱོགས་ཆུ་བོ་སྐལ་ལྡན་ཤིང་རྟའི་འགྲམ་ན་ཁྱེའུ་དང་བུ་མོ་དག་བཙས་ཤིང་འཁོད་དོ། །དེ་ནས་རྒྱལ་པོ་བུ་རམ་ཤིང་སྐྱེས་ཀྱིས་བློན་པོ་
རྣམས་ལ་སྨྲས་པ། ཀྱེ་གྲོང་པ་དག་གཞོན་ནུ་དག་གིས་དེ་ལྟར་ནུས་སམ། ལྷ་རྔོ་ཐོག་ལགས་སོ་དེ་ནས་རྒྱལ་པོ་བུ་རམ་ཤིང་སྐྱེས་རོ་སྟོད་བསྟོད་ནས་ལག་པ་གཡས་པ་བརྐྱང་སྟེ། ཆེད་དུ་བརྗོད་པས་ཆེད་དུ་བརྗོད་པ། ཀྱེ་མའོ་གཞོན་ནུ་རྣམས་ཀྱིས་རབ་ཏུ་ནུས་སོ་ཞེས་སེམས་ཅན་དབང་ཆེ་
བར་གྲགས་པས། ཀྱེ་མ་གཞོན་ནུ་རྣམས་ཀྱིས་ནུས་སོ་ཞེས་ཚིག་ཏུ་སྨྲ་སྟེ། ཤཱཀྱ་ཤཱཀྱ་ཞེས་བྱ་བར་གྲགས་སོ། །བྲམ་ཟེའི་བུ་ཁྱོད་ཀྱིས་ཤཱཀྱ་རྣམས་དེ་ལས་སྐྱེས་པས་མགོ་འཛུགས་པ་དེ་ཡིན་པ་དང་། དེ་དག་གི་རིགས་རྒྱུད་དེ་ཡིན་པར་ཅུང་ཟད་ཐོས་སམ། ཀྱེ་གཽ་ཏ་མ་བདག་གིས་ཤཱཀྱ་
རྣམས་དེ་ལས་སྐྱེས་པས་མགོ་འཛུགས་པ་དེ་ཡིན་པ་དང་། དེ་དག་གི་རིགས་རྒྱུད་དེ་ཡིན་པར་ཐོས་སོ། །བྲམ་ཟེའི་ཁྱེའུ་རྒྱལ་པོ་བུ་རམ་ཤིང་སྐྱེས་ཀྱི་བྲན་མོ་སྔོ་ཕོད་མ་ཞེས་བྱ་བ་གཟུགས་བཟང་བ་བལྟ་ན་སྡུག་པ། མཛེས་པ་ཞིག་ཡོད་པ་དང་། དྲང་སྲོང་གདོལ་པའི་རིགས་ཞིག་
དང་ལྷན་ཅིག་འདུས་ནས། དེ་གཉིས་ལྷན་ཅིག་འདུས་པ་ལས་ཁྱེའུ་ཞིག་བཙས་སོ། །གཞོན་ནུ་བཙས་མ་ཐག་ཏུ་ཡུམ་རེ་ཞིག་བདག་དྲིལ་ཕྱི་དང་། བཀྲུ་བ་གྱིས་ལ་མི་གཙང་བ་ལས་ཐར་བར་གྱིས་ཤིག་ཅེས་སྨྲས་སོ། །དེ་ནས་དུས་གཞན་ཞིག་ན་ཤ་ཟ་རྣམས་ཀྱིས་མིག་མི་འཛུམས་
ཀྱི་བུ་ཞེས་བྱ་བ་ལ་གཞོན་ནུ་བཙས་མ་ཐག་ཏུ་ཚིག་ཏུ་བདག་རེ་ཞིག་དྲིལ་ཕྱི་དང་། མི་གཙང་བ་ལས་ཐར་བར་གྱིས་ཤིག་དང་། ཨེ་མའོ་མིག་མི་འཛུམས་ཀྱི་བུ་ཞིག་སྐྱེས་སོ་ཞེས་མིག་མི་འཛུམས་ཀྱི་བུ་མིག་མི་འཛུམས་ཀྱི་བུ་ཞེས་བྱ་བར་གྲགས་སོ། །བྲམ་ཟེའི་ཁྱེའུ་ཁྱོད་ཀྱིས་

མིག་མི་འཛུམས་ཀྱི་བུ་རྣམས་དེ་ལས་སྐྱེས་པས་མགོ་འཛུགས་པ་དེ་ཡིན་པ་དང་། དེ་དག་གི་རིགས་རྒྱུད་དེ་ཡིན་པར་ཅུང་ཟད་ཐོས་སམ། དེ་སྐད་ཅེས་བཀའ་སྩལ་པ་དང་། བྲམ་ཟེའི་ཁྱེའུ་མ་སྡུག་ཅང་མི་སྨྲའོ། །ལན་གཉིས་ལན་གསུམ་དུ་ཡང་བཅོམ་ལྡན་འདས་
ཀྱིས་བྲམ་ཟེའི་ཁྱེའུ་མ་སྡུག་ལ་འདི་སྐད་ཅེས་བཀའ་སྩལ་ཏོ། །བྲམ་ཟེའི་ཁྱེའུ་ཁྱོད་ཀྱིས་མིག་མི་འཛུམས་ཀྱི་བུ་རྣམས་སུ་དེ་ལས་སྐྱེས་པ་སྐྱེ་མགོ་འཛུགས་པ་དེ་ཡིན་པ་དང་། དེ་དག་གི་རིགས་རྒྱུད་དེ་ཡིན་པར་ཅུང་ཟད་ཐོས་སམ། ལན་གཉིས་ལན་གསུམ་དུ་ཡང་བྲམ་ཟེའི་ཁྱེའུ་མ་སྡུག་
ཅང་མི་སྨྲའོ། །དེ་ནས་གནོད་སྦྱིན་ལག་ན་རྡོ་རྗེས་རྡོ་རྗེ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་འབར་བ། བྲམ་ཟེའི་ཁྱེའུ་མ་སྡུག་གི་མགོ་བོའི་སྟེང་ན་འཛིན་ཅིང་གལ་ཏེ་བྲམ་ཟེའི་ཁྱེའུ་མ་སྡུག་ལ། བཅོམ་ལྡན་འདས་ཀྱིས་ལན་གསུམ་གྱི་བར་དུ་རྨ་བ་རྨས་
པ་ལས། རྣ་ལ་གཟོན་ཅིང་ལན་མ་གསོལ་བར་གྱུར་ན། རྡོ་རྗེ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་འབར་བ་འདིས་སྤྱི་བོ་ཚལ་པ་བདུན་དུ་དགས་པར་བྱའོ་སྙམ་པ་དང་། གནོད་སྦྱིན་ལག་ན་རྡོ་རྗེ་དེ་བཅོམ་ལྡན་འདས་ཀྱིས་གཟིགས་ནས་སངས་རྒྱས་
ཀྱི་མཐུས་བྲམ་ཟེའི་ཁྱེའུ་མ་སྡུག་གིས་ཀྱང་མཐོང་ངོ་། །དེ་ནས་བྲམ་ཟེའི་ཁྱེའུ་མ་སྡུག་སྔངས་སྐྲག་བྱེད་ཅིང་སྤུ་ཟིང་ཞེས་བྱས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་མིག་མི་འཛུམས་ཀྱི་བུ་རྣམས་དེ་ལས་སྐྱེས་པས་མགོ་འཛུགས་པ་དེ་ལགས་པ་དང་། དེ་
དག་གི་རིགས་རྒྱུད་དེ་ལགས་པར་བདག་གིས་ཐོས་ལགས་སོ། །དེ་ནས་ཤས་ཆེ་བའི་བྲམ་ཟེ་རྒན་རབས་རྒན་རབས་རྣམས་དང་། ཁྱིམ་བདག་རྣམས་འདི་སྙམ་དུ་བསམས་ཏེ། བཙུན་པ་གཽ་ཏ་མས་འདི་སྐད་ཅེས་བྲམ་ཟེའི་ཁྱེའུ་མ་སྡུག་ནི་ཤཱཀྱ་རྣམས་ཀྱི་བྲན་མོའི་བུ་ཉིད་ཡིན་ལ། ཤཱཀྱ་
རྣམས་ནི་དེའི་ཇོ་བོའི་བུ་ཡིན་ནོ་ཞེས་གསུངས་པ་གང་ཡིན་པ་བདེན་ན། བདག་ཅག་ཤེས་ལྡན་གཽ་ཏ་མས་གསུངས་པ་ལ་ཡིད་མ་ཆེས་པར་ཟད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་ཤས་ཆེ་བའི་བྲམ་ཟེ་རྣམས་དང་། ཁྱིམ་བདག་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་ཅག་བྲམ་

ཟེའི་ཁྱེའུ་མ་སྡུག་ལ་བྲན་མོའི་ཁྱེའུ་ཞེས་ཧ་ཅང་ཚིག་ཏུ་མ་སྨྲ་ཤིག །དེ་ཅིའི་ཕྱིར་ཞེ་ན། འདི་དེའི་ཚེ་དྲང་སྲོང་རྫུ་འཕྲུལ་ཆེ་བ། མཐུ་ཆེ་བ་ཞིག་ཏུ་གྱུར་པ་ལས་རྒྱལ་པོ་བུ་རམ་ཤིང་སྐྱེས་ཀྱིས་ཉེས་པ་འགའ་ཁོ་ནའི་ཕྱིར་བྲམ་ཟེའི་ཆད་པས་བཅད་དོ། །བྲམ་ཟེའི་ཆད་པས་བཅད་པ་དང་། དེ་ཕྱིས་
རྒྱལ་པོ་བུ་རམ་ཤིང་སྐྱེས་འཇིགས་སྐྲག་བྱེད་སྤུ་ཟིང་ཞེས་བྱེད་ནས་ལག་པ་གཡོན་པས་བུ་མོ་ཆེན་མོ་རྒྱན་ཐམས་ཅད་ཀྱིས་བརྒྱན་པ་བཟུང་ལག་པ་གཡས་པས་གསེར་གྱི་བྱ་མ་བུམ་ཐོགས་ཏེ་དྲང་སྲོང་དེ་ལ་ཆུང་མར་བྱིན་ན་དྲང་སྲོང་གིས་དེ་མ་བླངས་སོ། །དེ་ནས་བཅོམ་ལྡན་འདས་ཀྱིས་བྲམ་
ཟེའི་ཁྱེའུ་མ་སྡུག་ལ་བྲན་མོའི་བུ་ཡིན་ནོ་ཞེས་བཀའ་སྩལ་པས་ཞུམ་ཞུམ་པོར་གྱུར་ནས་ཕྲག་པ་བཅུམ། མགོ་སྨད་དེ་སྤོབས་པ་མེད་ཅིང་གཏད་ཁོང་དུ་ཆུད་ནས་ཅང་མི་སྨྲ་བར་འདུག་གོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ་བྲམ་ཟེའི་ཁྱེའུ་མ་སྡུག་འདི་བྲན་མོའི་བུ་ཡིན་ནོ་ཞེས་ངས་ཚིག་
ཏུ་སྨྲས་པས་ཞུམ་ཞུམ་པོར་གྱུར་ཏེ། ཕྲག་པ་བཅུམ་ནས་མགོ་སྨད་དེ་སྤོབས་པ་མེད་ཅིང་གཏད་ཁོང་དུ་ཆུད་ནས་མི་སྨྲ་བར་གྱུར་གྱིས་མ་ལངས་འདི་ལ་ཕྱིས་གཏམ་འདྲེ་བར་བྱའོ་སྙམ་དུ་དགོངས་ནས། བྲམ་ཟེའི་ཁྱེའུ་མ་སྡུག་ལ་འདི་སྐད་ཅེས་བཀའ་སྩལ་ཏོ། །བྲམ་ཟེའི་ཁྱེའུ་དཔེར་ན་རྒྱལ་
རིགས་གཞོན་ནུ་དང་། བྲམ་ཟེའི་བུ་མོར་ལྷན་ཅིག་འདུས་པར་གྱུར་ཏེ། དེ་གཉིས་ལྷན་ཅིག་འདུས་པ་ལས་ཁྱེའུ་ཞིག་བཙས་ན་དེ་བྲམ་ཟེ་རྣམས་ལས་སྟན་ནམ། ཆུའམ། གསང་ཚིག་གམ། གདོན་པ་འཐོབ་བམ། ཀྱེ་གཽ་ཏ་མ་འཐོབ་ལགས་སོ། །དེ་ལ་རྒྱལ་རིགས་རྣམས་
ཀྱིས་རྒྱལ་རིགས་ཀྱི་དབང་བསྐུར་བས་དབང་སྐུར་རམ། ཀྱེ་གཽ་ཏ་མ་དབང་སྐུར་ལགས་ཏེ། དེ་ཅིའི་སླད་དུ་ཞེ་ན། སྤུན་གྱི་བུ་ལགས་པས་རྒྱལ་རིགས་རྣམས་ཀྱིས་ཚ་བོ་དབང་སྐུར་ལགས་སོ། །བྲམ་ཟེའི་ཁྱེའུ་དཔེར་ན་བྲམ་ཟེ་གཞོན་ནུ་དང་རྒྱལ་རིགས་ཀྱི་བུ་མོར་ལྷན་ཅིག་འདུས་
པར་གྱུར་ལ། དེ་གཉིས་ལྷན་ཅིག་འདུས་པ་ལས་བུ་ཁྱེའུ་ཞིག་བཙས་ན། དེ་བྲམ་ཟེ་རྣམས་ལས་སྟན་ནམ། ཆུའམ། གསང་ཚིག་གམ། གདོན་པ་འཐོབ་བམ། ཀྱེ་གཽ་ཏ་མ་འཐོབ་ལགས་སོ། །དེ་ལ་རྒྱལ་རིགས་ཀྱིས་དབང་བསྐུར་བས་དབང་སྐུར་རམ། ཀྱེ་གཽ་ཏ་མ་དབང་

སྐུར་ལགས་ཏེ། དེ་ཅིའི་སླད་དུ་ཞེ་ན། ཚ་བོ་ལགས་པའི་སླད་དུ་རྒྱལ་རིགས་རྣམས་ཀྱིས་ཚ་བོ་དབང་སྐུར་ལགས་སོ། །བྲམ་ཟེའི་ཁྱེའུ་དཔེར་ན་རྒྱལ་རིགས་གཞོན་ནུ་རྒྱལ་རིགས་དག་གིས་ཉེས་པ་འགའ་ཁོ་ནའི་ཕྱིར་སྤྱུགས་པར་གྱུར་ན། དེ་བྲམ་ཟེ་རྣམས་ལས་སྟན་
ནམ། ཆུའམ། གསང་ཚིག་གམ། གདོན་པ་འཐོབ་བམ། ཀྱེ་གཽ་ཏ་མ་འཐོབ་ལགས་སོ། །དེ་ལ་རྒྱལ་རིགས་དབང་བསྐུར་བས་དབང་སྐུར་རམ། ཀྱེ་གཽ་ཏ་མ་དབང་སྐུར་ལགས་ཏེ། དེ་ཅིའི་སླད་དུ་ཞེ་ན། ཕུ་ནུ་བོ་ལགས་པའི་སླད་དུ་རྒྱལ་རིགས་རྣམས་ཀྱིས་ཕུ་ནུ་བོ་དབང་སྐུར་
ལགས་སོ། །བྲམ་ཟེའི་ཁྱེའུ་དཔེར་ན་བྲམ་ཟེ་གཞོན་ནུ་བྲམ་ཟེ་རྣམས་ཀྱིས་ཉེས་པ་འགའ་ཁོ་ནའི་ཕྱིར་སྤྱུགས་པར་གྱུར་ན། དེས་བྲམ་ཟེ་རྣམས་ལས་སྟན་ནམ། ཆུའམ། གསང་ཚིག་གམ། གདོན་པ་འཐོབ་བམ། ཀྱེ་གཽ་ཏ་མ་མི་འཐོབ་ལགས་སོ། །དེ་རྒྱལ་རིགས་རྣམས་
ཀྱིས་རྒྱལ་རིགས་ཀྱི་དབང་བསྐུར་བས་དབང་སྐུར་རམ། ཀྱེ་གཽ་ཏ་མ་དབང་མི་སྐུར་ཏེ། དེ་ཅིའི་སླད་དུ་ཞེ་ན། བྲམ་ཟེ་གདོལ་པ་ལགས་པའི་སླད་དུ་རྒྱལ་རིགས་རྣམས་བྲམ་ཟེ་དབང་མི་སྐུར་ལགས་སོ། །བྲམ་ཟེའི་ཁྱེའུ་དེ་ལྟར་ན་རུས་དང་རིགས་དང་མནད་ཀྱིས་རྒྱལ་རིགས་རིགས་
ཀྱི་མཆོག་ཡིན་གྱི་བྲམ་ཟེ་ནི་མ་ཡིན་ནོ། །བྲམ་ཟེའི་ཁྱེའུ་མི་མཇེད་ཀྱི་བདག་པོ་ཚངས་པས་ཚིགས་སུ་བཅད་དེ་སྨྲས་པ། རུས་དང་འབྲེལ་པ་གང་ཡིན་པའི། །རྒྱལ་རིགས་རྐང་གཉིས་ནང་ན་བཙུན། །ལྷ་དང་མི་རྣམས་ནང་ན་ཡང་། །རིགས་དང་ཞབས་སུ་ལྡན་པ་བཙུན། །
བྲམ་ཟེའི་ཁྱེའུ་མི་མཇེད་ཀྱི་བདག་པོ་ཚངས་པ་ཚིགས་སུ་བཅད་དེ་སྨྲས་པ་ནི་ལེགས་པར་སྨྲས་པ་སྟེ་ཉེས་པར་སྨྲས་པ་མ་ཡིན། ལེགས་པར་བརྗོད་པ་ཡིན་གྱི་ཉེས་པར་བརྗོད་པ་མ་ཡིན་ཏེ་འདི་ལྟར། རུས་དང་འབྲེལ་པ་གང་ཡིན་པའི། །རྒྱལ་རིགས་རྐང་གཉིས་ནང་ན་བཙུན། །ལྷ་
དང་མི་རྣམས་ནང་ན་ཡང་། །རིགས་དང་ཞབས་སུ་ལྡན་པ་བཙུན། །དེ་ཅིའི་ཕྱིར་ཞེ་ན། བྲམ་ཟེའི་ཁྱེའུ་ང་ཡང་འདི་སྐད་ཅེས་སྨྲས་ཏེ། རུས་དང་འབྲེལ་པ་གང་ཡིན་པའི། །རྒྱལ་རིགས་རྐང་གཉིས་ནང་ན་བཙུན། །ལྷ་དང་མི་རྣམས་ནང་ན་ཡང་། །རིགས་དང་ཞབས་སུ་ལྡན་

པ་བཙུན། །བྲམ་ཟེའི་ཁྱེའུ་ཇི་སྙམ་དུ་སེམས། གང་ན་བག་མ་ལེན་པ་དང་། བག་མ་གཏོང་བ་ཡོད་པ་དེ་ནས་བྲམ་ཟེ་རྣམས་ཀྱིས་སྟན་ནམ། ཆུའམ། གསང་ཚིག་གམ། གདོན་པ་འཐོབ་བམ། ཀྱེ་གཽ་ཏ་མ་གང་ན་བག་མ་ལེན་པ་དང་། བག་མ་གཏོང་བ་མཆིས་པ་དེ་ནས་བྲམ་ཟེ་རྣམས་
ཀྱིས་སྟན་ནམ། ཆབ་བམ། གསང་ཚིག་གམ། གདོན་པ་འཐོབ་ལགས་སོ། །བྲམ་ཟེའི་ཁྱེའུ་གང་ན་བག་མ་ལེན་པ་དང་། བག་མ་གཏོང་བ་ཡོད་པ་དེ་ན་རིགས་ཀྱིས་སྙེམས་པ་ཡང་ཡོད། རུས་ཀྱིས་སྙེམས་པ་ཡང་ཡོད། བྲམ་ཟེའི་བུའི་སྙེམས་པ་ཡང་ཡོད་དོ། །བྲམ་ཟེའི་ཁྱེའུ་སེམས་ཅན་
རིགས་ཀྱིས་སྙེམས་པས་རྣམ་པར་བཅིངས་པ་དང་། རུས་ཀྱིས་སྙེམས་པས་རྣམ་པར་བཅིངས་པ་དང་། བྲམ་ཟེའི་བུའི་སྙེམས་པས་རྣམ་པར་བཅིངས་པ་ཇི་སྙེད་པ་དེ་དག་རིག་པ་དང་ཞབས་སུ་ལྡན་པ་བླ་ན་མེད་པ་འདི་ཉིད་མངོན་སུམ་དུ་མ་བྱས་པ་མངོན་སུམ་དུ་བྱ་བའི་སྐལ་བ་མེད་ཀྱི་བྲམ་ཟེའི་བུ་རིགས་
ཀྱིས་སྙེམས་པ་སྤངས་པ། རུས་ཀྱིས་སྙེམས་པ་སྤངས་པ། བྲམ་ཟེའི་བུའི་སྙེམས་པ་སྤངས་པ་དེ་ལྟར་ན་རིག་པ་དང་ཞབས་སུ་ལྡན་པ་བླ་ན་མེད་པ་འདི་མངོན་སུམ་དུ་མ་བྱས་པ་མངོན་སུམ་དུ་བྱེད་པར་འགྱུར་རོ། །ཤེས་ལྡན་གཽ་ཏ་མ་ལ་བདག་གང་སྔོན་ཡང་མ་བྱུང་། ཕྱིས་ཀྱང་མི་འབྱུང་། ད་ལྟ་
ན་ཡང་མ་མཆིས་པ་དེ་ལྟ་བུ་མངོན་པར་དད་ལགས་ཀྱིས་ཤེས་ལྡན་གཽ་ཏ་མས་བདག་ལ་ཇི་ལྟར་རིག་པ་དང་ཞབས་སུ་འཚལ་བར་འགྱུར་བ་དེ་ལྟར་ཆོས་བཤད་དུ་གསོལ། བྲམ་ཟེའི་ཁྱེའུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བྲམ་ཟེའི་ཁྱེའུ་སྟོན་པ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་འདིར་བྱུང་སྟེ། དེས་ཆོས་བཤད་
པ་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། རྣམ་པར་བྱང་བ། ཚངས་པར་སྤྱོད་པ་རབ་ཏུ་སྟོན་ཏེ། ཆོས་དེ་ཁྱིམ་བདག་གམ་ཁྱིམ་བདག་གི་བུས་མཉན་ནས། དེས་ཆོས་དེ་

ཐོས་ནས་དད་པ་རབ་ཏུ་ཐོབ་པོ། །དེ་དག་དད་པ་རབ་ཏུ་ཐོབ་པ་དང་ལྡན་པས་འདི་ལ་སོ་སོ་ཡང་དག་པར་སློབ་པར་བྱེད་དེ། ཁྱིམ་གྱི་གནས་ནི་ཉམ་ང་བ་རྡུལ་དག་གི་གནས་ཡིན་ནོ། །རབ་ཏུ་བྱུང་བ་ནི་བླ་ན་མེད་པ་ཡིན་ན། ཁྱིམ་པ་ཁྱིམ་ན་གནས་པ་རྣམས་ཀྱི་ཇི་སྲིད་འཚོའི་བར་དུ་
ཚངས་པར་སྤྱོད་པ་གཅིག་ཏུ་སལ་གྱིས་དག་པ་ཡོངས་སུ་རྫོགས་པ། ཡོངས་སུ་དག་པ། རྣམ་པར་བྱང་བ་ནི་སྤྱོད་པ་དཀའ་བས་མ་ལ་བདག་གིས་སྐྲ་དང་ཁ་སྤུ་བྲེགས་ལ། གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་སྙམ་ནས་དེས་དེ་ལྟར་སོ་སོར་
བརྟགས་ཏེ་ལོངས་སྤྱོད་ཀྱི་ཚོགས་མང་ཉུང་དང་། ཉེ་དུའི་འཁོར་མང་པོ་རྣམས་སྤངས་ཏེ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཚུལ་ཁྲིམས་ལ་གནས་པ་ཡིན། སོ་སོར་ཐར་པའི་སྡོམ་པས་བསྡམས་པ་ཡིན། ཆོ་ག་དང་
སྤྱོད་ཡུལ་ཕུན་སུམ་ཚོགས་པ་ཡིན་ཁ་ན་མ་ཐོ་བ་ཕྲ་མོ་ཙམ་ལ་ཡང་འཇིགས་པར་ལྟ་བ་ཡིན། བསླབ་པའི་གཞི་ཡང་དག་པར་མནོས་ཏེ་སློབ་པ་ཡིན། དེས་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་ཡིན་ཏེ། ཆད་པ་སྤངས་པ་ཡིན། མཚོན་ཆ་སྤངས་པ་ཡིན། ངོ་ཚ་དང་ལྡན་པ་
ཡིན་ཏེ། སེམས་ཅན་སྲོག་ཆགས་སུ་གྱུར་པ་ཐམས་ཅད་ལ་ཆུང་ངུ་ན་སྲོག་ཆགས་གྲོག་སྤུར་ཡན་ཆད་ལ་སྲོག་གཅོད་པ་ལས་སླར་ལོག་པ་ཡིན་ནོ། །དེས་མ་བྱིན་པར་ལེན་པ་སྤངས་ནས་མ་བྱིན་པར་ལེན་པ་ལས་སླར་ལོག་པ་ཡིན་ཏེ། བྱིན་པ་ལེན་པ་ཡིན། བྱིན་པ་ལེན་པ་ལ་དགའ་བ་ཡིན། སྦྱིན་
པ་ལ་ལྷུག་པར་གཏོང་བ་ལ་དགའ་བ་ཡིན་ཏེ། རྐུན་མ་མ་ཡིན། འདོད་ཆེན་ཅན་མ་ཡིན། གཙང་བ་ཡིན། བཏང་བ་ཡིན། ཁ་ན་མ་ཐོ་བ་མེད་པ་ཡིན། བདག་ཉིད་བསྲུངས་པས་མ་བྱིན་པར་ལེན་པ་ལས་སླར་ལོག་པ་ཡིན་ནོ། །དེ་མི་ཚངས་པར་སྤྱོད་པ་སྤངས་ནས་མི་ཚངས་པར་སྤྱོད་པ་ལས་སླར་
ལོག་པ་ཡིན་ཏེ། ཚངས་པར་སྤྱོད་པ་ཡིན། སྤྱོད་པ་ངན་པ་སྤངས་པས་དག་པ་ཡིན། གཙང་བ་ཡིན། དྲི་ང་བ་མེད་པ་ཡིན། འཁྲིག་པ་དང་བྲལ་བ་ཡིན། སྨད་རིམ་གྱི་ཆོས་དང་བྲལ་བ་ཡིན། མི་ཚངས་པར་སྤྱོད་པ་ལས་སླར་ལོག་པ་ཡིན་ནོ། །དེ་བརྫུན་དུ་སྨྲ་བ་སྤངས་ནས་བརྫུན་དུ་སྨྲ་

བ་ལས་སླར་ལོག་པ་ཡིན་ཏེ། བདེན་པར་སྨྲ་བ་ཡིན། བདེན་པ་ལ་དགའ་བ་ཡིན། དད་པ་ཡིན། ཡིད་ཆེས་པ་ཡིན། བརྟན་པ་ཡིན་འཇིག་རྟེན་ལ་མི་སླུ་བ་ཡིན་ཏེ། བརྫུན་དུ་སྨྲ་བ་ལས་སླར་ལོག་པ་ཡིན་ནོ། །དེ་ཕྲ་མ་སྤངས་ནས་ཕྲ་མ་ལས་སླར་ལོག་པ་ཡིན་ཏེ། དེ་ཚུ་རོལ་པོ་དག་ལས་མཉན་
ཏེ་དེ་དག་དབྱེ་བའི་ཕྱིར་ཕ་རོལ་པོ་དག་ལ་སྨྲ་བ་མ་ཡིན། ཕ་རོལ་པོ་དག་ལས་མཉན་ཏེ་དེ་དག་དབྱེ་བའི་ཕྱིར་ཚུ་རོལ་པོ་དག་ལ་སྨྲ་བ་མ་ཡིན། བྱེ་བ་རྣམས་སྡུམས་བྱེད་པ་ཡིན། མཐུན་པ་རྣམས་གཟེངས་བསྟོད་པ་ཡིན། མཐུན་པ་ལ་དགའ་བ་ཡིན། མཐུན་པ་ལ་མགུ་བ་ཡིན། མཐུན་པར་
བྱེད་པའི་ཚིག་སྨྲ་བ་ཡིན་ཏེ། ཕྲ་མ་ལས་ཕྱིར་ལོག་པ་ཡིན་ནོ། །དེ་ཚིག་རྩུབ་པོ་སྤངས་ནས་ཚིག་རྩུབ་པོ་ལས་སླར་ལོག་པ་ཡིན་ཏེ། དེ་གང་ལ་ཡང་ཚིག་གདུག་པ་དང་། རྩུབ་པ་དང་། ཕ་རོལ་ལ་མི་སྙན་པ་དང་། ཕ་རོལ་སྤ་གོང་བར་བྱེད་པ་དང་། སྐྱེ་བོ་མང་པོའི་ཡིད་ལ་མི་འཐད་པ་དང་།
སྐྱེ་བོ་མང་པོའི་སྙིང་དུ་མི་སྡུག་པ་དང་། སྐྱེ་བོ་མང་པོ་མི་དགའ་བ་དང་། སྐྱེ་བོ་མང་པོའི་ཡིད་དུ་མི་འོང་བ་དང་། མཉམ་པར་གཞག་པ་མ་ཡིན་པ་དང་། མཉམ་པར་འཇོག་པར་འགྱུར་བ་མ་ཡིན་པ་དེ་ལྟ་བུའི་ཚིག་སྤངས་པ་ཡིན་མི་ཚུགས་པ་དང་། རྣར་སྙན་པ་དང་། སྙིང་ཚིམ་པར་བྱེད་པ་དང་།
དགའ་བར་བྱེད་པ་དང་། ཕོ་བྲང་འཁོར་གྱི་སྐད་དང་། སྙན་ཅིང་འཇེབས་པ་དང་། རྣམ་པར་གསལ་བ་རྣམ་པར་རིག་པར་བྱེད་པ་དང་། མཉན་པར་འོས་པ་དང་། མི་རྟེན་པ་དང་འགལ་བ་མ་ཡིན་པ་དང་། ཐུག་པ་མེད་པ་དང་། སྐྱེ་བོ་མང་པོ་ལ་སྡུག་པ་དང་། སྐྱེ་བོ་མང་པོ་མགུ་བ་དང་། སྐྱེ་བོ་
མང་པོ་དགའ་བ་དང་། སྐྱེ་བོ་མང་པོའི་ཡིད་དུ་འོང་བ་དང་། མཉམ་པར་བཞག་པ་དང་། མཉམ་པར་འཇོག་པར་འགྱུར་བ་དེ་ལྟ་བུའི་ཚིག་སྨྲ་བས་དེ་ཚིག་རྩུབ་པོ་ལས་སླར་ལོག་པ་ཡིན་ནོ། །དེ་ཚིག་ཀྱལ་བ་སྨྲ་བ་སྤངས་ནས་ཚིག་ཀྱལ་པ་ལས་སླར་ལོག་པ་ཡིན་ཏེ། དེ་དུས་སུ་སྨྲ་བ་ཡིན།
ཡང་དག་པར་སྨྲ་བ་ཡིན། དེ་ཁོ་ན་ཉིད་སྨྲ་བ་ཡིན། དོན་སྨྲ་བ་ཡིན། ཆོས་སྨྲ་བ་ཡིན། ངེས་པར་སྨྲ་བ་ཡིན། རྟོགས་པར་སྨྲ་བ་ཡིན། ཁོང་དུ་ཆུད་པར་བྱེད་པའི་ཚིག་སྨྲ་བ་ཡིན་ཏེ། དུས་དང་མ་འདྲེས་པ་དང་། གླེང་གཞི་དང་བཅས་པ་དང་། དན་རྟགས་དང་བཅས་པ་དང་། ཆོས་དང་ལྡན་

པ་ཡིན་ཏེ། དེ་ཚིག་ཀྱལ་པ་སྤངས་ནས་ཚིག་ཀྱལ་པ་ལས་སླར་ལོག་པ་ཡིན་ནོ། །དེ་ཉོ་ཚོང་སྤངས་ནས་ཉོ་ཚོང་ལས་སླར་ལོག་པ་ཡིན་ཏེ། དེ་གཞལ་བླུགས་ལ་གཡོ་བྱེད་པ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་སྤངས་ནས་དེ་གཞལ་བླུགས་ལ་གཡོ་བྱེད་པ་
དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་ལས་སླར་ལོག་པ་ཡིན་ནོ། །དེ་གསུག་ལེན་པ་དང་། འདྲིད་པ་དང་། བསྡིགས་ནས་རང་གིར་བྱེད་པ་སྤངས་ནས་གསུག་ལེན་པ་དང་། འདྲིད་པ་དང་། བསྡིགས་ནས་རང་གིར་བྱེད་པ་ལས་སླར་ལོག་པ་ཡིན་ནོ། །དེ་གསོད་པ་
དང་། འཆིང་བ་དང་། གཅད་པ་དང་། དབུག་པ་དང་། བརྡེག་པའི་བསམ་པ་སྤངས་ནས་གསོད་པ་དང་། འཆིང་བ་དང་། གཅད་པ་དང་། འབིགས་པ་དང་། བརྡེག་པའི་བསམ་པ་ལས་སླར་ལོག་པ་ཡིན་ནོ། །དེ་འོད་དང་། བུད་མེད་ཅན་དང་ལྷན་ཅིག་ཏུ་ཉལ་བ་སྤངས་ནས་འོད་དང་། བུད་མེད་
ཅན་དང་ལྷན་ཅིག་ཉལ་བ་ལས་སླར་ལོག་པ་ཡིན་ནོ། །དེ་ཞིང་གི་གཞི་དང་། ཁྱིམ་གྱི་གཞི་དང་། ཚོང་ཁོང་གི་གཞི་ལེན་པ་སྤངས་ནས། ཞིང་གི་གཞི་དང་། ཁྱིམ་གྱི་གཞི་དང་། ཚོང་ཁང་གི་གཞི་ལེན་པ་ལས་སླར་ལོག་པ་ཡིན་ནོ། །དེ་གླང་པོ་ཆེ་དང་། རྟ་དང་། བ་ལང་དང་། ལུག་
དང་། བྱ་གག་དང་། ཕག་ལེན་པ་སྤངས་ནས་གླང་པོ་ཆེ་དང་། རྟ་དང་། བ་ལང་དང་། ལུག་དང་། བྱ་གག་དང་། ཕག་ལེན་པ་ལས་སླར་ལོག་པ་ཡིན་ནོ། །དེ་བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལེན་པ་དག་སྤངས་ནས་བྲན་ཕོ་དང་། བྲན་མོ་དང་། ལས་
བྱེད་པ་དང་། ཞོ་ཤས་འཚོ་བ་ལེན་པ་དག་ལས་སླར་ལོག་པ་ཡིན་ནོ། །དེ་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ལེན་པ་སྤངས་ནས་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ལེན་པ་ལས་སླར་ལོག་པ་ཡིན་ནོ། །དེ་གསེར་དང་། དངུལ་ལེན་པ་སྤངས་ནས། གསེར་
དང་། དངུལ་ལེན་པ་ལས་སླར་ལོག་པ་ཡིན་ནོ། །དེ་འབྲུ་མ་ཉམས་པ་ལེན་པ་དག་སྤངས་ནས་འབྲུ་མ་ཉམས་པ་ལེན་པ་ལས་སླར་ལོག་པ་ཡིན་ནོ། །དེ་ཟན་གཅིག་པ་ཡིན་ཏེ། ནུབ་མོ་སྤངས་ཤིང་དུས་མ་ཡིན་པའི་ཁ་ཟས་སྤངས་པ་ཡིན། དུས་སུ་རྒྱུ་ཞིང་དུས་སུ་སྤྱོད་པ་ལས་སྦྱོར་བ་ལ་བརྩོན་པ་

ཡིན། དེ་ལུས་ཀྱི་བགོ་བ་རན་པས། ཆོག་ཤེས་ཤིང་ཚོད་ཟིན་པ་ཡིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པ་ཡིན། དེ་ལུས་ཀྱི་བགོ་བ་རན་པས་ཆོག་ཤེས་ཤིང་ཚོད་ཟིན་པ་ཡིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པ་ཡིན་པས་གང་དང་གང་དུ་
འགྲོ་བ་ན་ལྷུང་བཟེད་དང་བཅས་ཆོས་གོས་དང་བཅས་པར་འགྲོའོ། །དཔེར་ན་འདབ་ཆགས་བྱ་གང་དང་གང་དུ་ལྡིང་བ་དེར་འདབ་མ་དང་ཆས་གཤོག་པ་དང་ཆས་ཏེ་ལྡིང་བ་དེ་བཞིན་དུ་དེ་ལུས་ཀྱི་བགོ་བ་རན་པ་ཆོས་གོས་ཀྱིས་ཆོག་ཤེས་ཤིང་ཚོད་ཟིན་པ་ཡིན། བསོད་སྙོམས་ལྟོ་འགྲངས་ཀྱིས་
ཆོག་ཤེས་ཤིང་ཚོད་ཟིན་པ་ཡིན་ཏེ། གང་དང་གང་དུ་འགྲོ་བ་དེར་ལྷུང་བཟེད་དང་བཅས། ཆོས་གོས་དང་བཅས་ཤིང་འགྲོ་བ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ས་བོན་གྱི་ཚོགས་དང་། འབྱུང་པོའི་ཚོགས་སྣ་ཚོགས་རྩོམ་པ་ལ་སྦྱོར་བར་
བརྩོན་པས་གནས་པ་འདི་ལྟ་སྟེ། རྩ་བའི་ས་བོན་དང་། སྡོང་བུའི་ས་བོན་དང་། ཐོར་ཏོའི་ས་བོན་དང་། འགས་པའི་ས་བོན་དང་། ལྔ་པ་ནི་ས་བོན་གྱི་ས་བོན་ཉིད་དེ། དགེ་སྦྱོང་དང་བྲམ་ཟེ་རྣམས་ཀྱི་ས་བོན་གྱི་ཚོགས་དང་། འབྱུང་པོའི་ཚོགས་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་
བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་སྦྱིན་པ་དག་སྤྱད་ནས་སོགས་འཇོག་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། ཟས་ཀྱི་སོགས་འཇོག་དང་། སྐོམ་གྱི་སོགས་འཇོག་དང་། གོས་ཀྱི་སོགས་འཇོག་དང་།
དྲིའི་སོགས་འཇོག་དང་། རོའི་སོགས་འཇོག་དང་། ལོ་མའི་སོགས་འཇོག་དང་། མེ་ཏོག་གི་སོགས་འཇོག་དང་། འབྲས་བུའི་སོགས་འཇོག་སྟེ། དགེ་སྦྱོང་དང་། བྲམ་ཟེ་རྣམས་ཀྱི་སོགས་འཇོག་རྣམ་པ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་
ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གནས་མལ་མཐོན་པོ་དང་། གནས་མལ་ཆེན་པོ་རྩོམ་པ་ལ་སྦྱོར་བར་བརྩོན་པས་གནས་པར་བྱེད་པ་འདི་ལྟ་སྟེ། སྟན་དང་། ཁྲི་དང་། ཁྲི་སྣམ་བུ་ཅན་དང་། རས་ཀྱི་སྣམ་བུ་ཅན་དང་། སྟན་

ནང་ཚངས་ཅན་དང་། རས་ཡུག་ཆེན་དང་། རས་ཁྲ་བོ་དང་། པ་ལེ་ལའི་རས་ཀྱིས་གཡོགས་པ་དང་། གླང་པོ་ཆེའི་འཐབ་སྟན་དང་། རྟའི་འཐབ་སྟན་དང་། ངོས་གཅིག་བལ་ལས་བྱས་པ་དང་། ངོས་གཉིས་བལ་ལས་བྱས་པ་དང་། སྟོད་བལ་ལས་བྱས་པ་དང་། རྒྱབ་བལ་
ལས་བྱས་པ་དང་། ཀ་ལིང་གི་གོས་ཀྱི་སྟོད་གཡོགས་དང་། སྟེང་གཡོགས་དང་བཅས་པའི་གོས་དང་། ཕྱོགས་གཉིས་སུ་སྔས་དམར་པོ་ལས་བྱས་པ་སྟེ། དགེ་སྦྱོང་དང་། བྲམ་ཟེ་རྣམས་ཀྱི་མལ་མཐོན་པོ་དང་། གནས་མལ་ཆེན་པོ་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །
མ་སྡུག་འདི་ལྟར་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཆ་བ་དང་། གཞག་པ་རྣམ་པ་སྣ་ཚོགས་རྩོམ་པ་ལ་སྦྱོར་བས་བརྩོན་པར་གནས་པ་འདི་ལྟ་སྟེ། མཉེ་བ་དང་། བཀྲུ་བ་དང་། དྲིལ་ཕྱི་དང་། ཕྲེང་བ་དང་། དྲི་དང་། བྱུག་པ་དང་། ཁ་དོག་འཆང་བ་དང་། སེན་མོའི་
ཁ་དོག་དང་། སོའི་ཁ་དོག་དང་། ཁའི་ཕྱེ་མ་དང་། གདོང་གི་བྱི་དོར་དང་། མེ་ལོང་ལ་ལྟ་བ་དང་། ལག་ངར་བརྒྱན་པ་དང་། གཙུག་ཏོར་འཆིང་བ་དང་། གདུགས་ཀྱི་རྩ་བ་སྦུ་བུ་ཅན་དང་། རལ་གྲི་དང་། རྔ་ཡབ་ནོར་བུའི་ཡུ་བ་ཅན་དང་། མཆིལ་ལྷམ་ཁྲ་བོ་དང་། གོས་སར་པ་དང་། རས་
སར་པ་ཁ་ཚར་རིང་པོ་ཅན་འཆང་བའི་རང་བཞིན་ཅན་དག་སྟེ། དགེ་སྦྱོང་དང་། བྲམ་ཟེ་རྣམས་ཀྱི་གཞག་པ་དང་། ཆ་བ་རྣམ་པ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་
ལྟད་མོ་སྣ་ཚོགས་རྩོམ་པ་ལ་སྦྱོར་བར་བརྩོན་པ་ལ་གནས་པ་འདི་ལྟ་སྟེ། གླང་པོ་ཆེས་འགྱེད་པ་དང་། རྟས་འགྱེད་པ་དང་། ཤིང་རྟས་འགྱེད་པ་དང་། དཔུང་བུ་ཆུང་གིས་འགྱེད་པ་དང་། དབྱུག་པས་འགྱེད་པ་དང་། ཁུ་ཚུར་གྱིས་འགྱེད་པ་དང་། ཁྱུ་མཆོག་གིས་འགྱེད་པ་དང་། མ་ཧེས་འགྱེད་
པ་དང་། རས་འགྱེད་པ་དང་། བྱ་གག་འཐབ་པ་དང་། མཆིལ་པ་འཐབ་པ་དང་། འུར་པ་འཐབ་པ་དང་། བུད་མེད་འཐབ་པ་དང་། སྐྱེས་པ་འཐབ་པ་དང་། གཞོན་ནུ་འཐབ་པ་དང་། གཞོན་ནུ་མ་འཐབ་པ་དང་། ཤིང་ལ་འཛེག་པ་དང་། བྲོ་གར་གྱི་ཚོགས་དང་། ཕྲག་པ་ནས་

མཆོང་བ་དང་། རྒྱལ་མཚན་གྱི་རྩེ་མོ་དང་། སྟོབས་ཀྱི་མཆོག་དང་། དམག་གི་ཚོགས་མང་པོ་ལ་ལྟ་བ་དང་། མང་པོ་འདུས་པ་ལ་ལྟ་བར་འདོད་པ་སྟེ། དགེ་སྦྱོང་གི་ལྟད་མོ་རྣམ་པ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་
སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་དེ་སྒྲ་རྣམ་པ་སྣ་ཚོགས་ཉན་པར་རྩོམ་པ་ལ་སྦྱོར་བར་བརྩོན་པ་གནས་པ་འདི་ལྟ་སྟེ། གླང་པོ་ཆེའི་སྒྲ་དང་། རྟའི་སྒྲ་དང་། ཤིང་རྟའི་སྒྲ་དང་། དཔུང་བུ་ཆུང་གི་སྒྲ་དང་། དུང་གི་སྒྲ་དང་། རྔ་པ་ཊ་ཧའི་སྒྲ་དང་། རྔ་བོ་ཆེའི་
སྒྲ་དང་། རོལ་མོ་སྣ་ཚོགས་པའི་སྒྲ་དང་། གར་མཁན་གྱི་གླུ་སྒྲ་དང་། རོལ་མོའི་སྒྲ་དང་། ཁར་གསིལ་གྱི་སྒྲ་དང་། སེ་གོལ་གྱི་སྒྲ་དང་། ཐལ་མོའི་སྒྲ་དང་། བུམ་པའི་སྒྲ་དང་། རང་བཟོའི་སྒྲ་དང་། སྙན་ངག་དང་། ཡི་གེ་སྣ་ཚོགས་དང་། ཚིག་སྣ་ཚོགས་དང་། འཇིག་རྟེན་རྒྱང་འཕེན་པ་
དང་ལྡན་པའི་གྲགས་པའི་གཏམ་ཉན་འདོད་པ་དག་སྟེ། དགེ་སྦྱོང་རྣམས་ཀྱི་སྒྲ་རྣམ་པ་སྣ་ཚོགས་ཉན་པར་རྩོམ་པ་ལ་སྦྱོར་བ་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས། ཨུག་ཤུད་དང་།
ཁྲས་དང་། ཆོ་ལོ་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། མིག་བརྒྱད་པ་དང་མིག་བཅུ་པ་དང་། ན་ཡའི་མིག་དང་། ཕྱོགས་ཕྱོགས་ནས་འགྱེད་པ་དང་། བུམ་པ་དང་། སྟོབས་དང་། སྐྱོད་པ་དང་། ཕེག་དང་། ཆོ་ལོ་དང་། ཨུག་ཤུད་དང་། གུལ་ཚབ་དང་། ཐུར་མ་དང་།
ལག་བརྒྱན་ནམ། ཇི་ལྟར་སྐུགས་བཙུགས་ནས་འགྱེད་པ་སྟེ། དགེ་སྦྱོང་རྣམས་ཀྱིས་ཨུག་ཤུད་དང་། ཁྲས་དང་། ཆོ་ལོ་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་གཏམ་
རྣམ་པ་སྣ་ཚོགས་རྩོམ་པ་ལ་སྦྱོར་བར་བརྩོན་པར་གནས་པ་འདི་ལྟ་སྟེ། རྒྱལ་པོའི་གཏམ་དང་། ཆོམ་རྐུན་པའི་གཏམ་དང་། དམག་གི་གཏམ་དང་། ཟས་ཀྱི་གཏམ་དང་། སྐོམ་གྱི་གཏམ་དང་། གོས་ཀྱི་གཏམ་དང་། ཚོང་འདུས་ཀྱི་གཏམ་དང་། སྨད་འཚོང་མའི་གཏམ་དང་། ལམ་

ངན་པར་བརྗོད་པའི་གཏམ་དང་། རྒྱ་མཚོ་བརྗོད་པའི་གཏམ་དང་། ལྗོངས་དང་། སྣ་ཆེན་པོ་ལ་གཏོགས་པ་བརྗོད་པའི་གཏམ་སྟེ། དགེ་སྦྱོང་རྣམས་ཀྱི་གཏམ་རྣམ་པ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་
སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་རྩོད་པ་རྣམ་པ་སྣ་ཚོགས་རྩོམ་པ་ལ་སྦྱོར་བར་བརྩོན་པ་ལ་གནས་པ་འདི་ལྟ་སྟེ། ཁོ་བོས་ནི་ཆོས་འདུལ་བ་འདི་རབ་ཏུ་ཤེས་སོ། །ཁྱོད་ཀྱིས་ནི་ཆོས་འདུལ་བ་འདི་མི་ཤེས་སོ། །ཇི་ལྟར་ཁོ་བོས་ཆོས་འདུལ་བ་འདི་ཀུན་ཤེས་
པ་ལྟར་ཁྱོད་ཀྱིས་ཀྱང་ཆོས་འདུལ་བ་འདི་ཀུན་མི་ཤེས་སོ། །ཁོ་བོས་ནི་རིགས་པ་དང་ལྡན་པར་ཡིན་གྱི། ཁྱོད་ཀྱིས་ནི་རིགས་པ་དང་ལྡན་པར་མ་ཡིན་ནོ། །ཁོ་བོས་ནི་འབྲེལ་པར་ཡིན་གྱི་ཁྱོད་ཀྱིས་ནི་འབྲེལ་པར་མ་ཡིན་ཏེ། སྔར་སྨྲ་བར་བྱ་བ་ནི་ཕྱིས་སྨྲས། ཕྱིས་སྨྲ་བར་བྱ་བ་ནི་སྔར་སྨྲས་ལ།
ཁྱོད་ཀྱིས་ཧ་ཅང་མྱུར་བར་སྨྲས་པས་མི་གསོལ་ལོ། །བརྩད་པས་མཇུག་བརྟུལ་གྱིས་ཁྱོད་ཀྱིས་བརྩད་པའི་དོན་དུ་སྨྲས་པའི་ཚིག་དེ་ཐོང་ཤིག །ཚར་བཅད་པར་ཤེས་སམ། གལ་ཏེ་ལན་ཐེབས་པ་ལྟ་ན་དྲིས་དང་སྨྲོས་ཤིག་ཅེས་བྱ་བ་དགེ་སྦྱོང་རྣམས་ཀྱི་རྩོད་པ་རྣམ་པ་སྣ་ཚོགས་རྩོམ་པ་
ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་ཕོ་ཉར་འགྲོ་བ་དང་གཏོང་བ་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། དེ་དག་རྒྱལ་པོའིའམ། བློན་པོ་ཆེན་པོ་རྣམས་ཀྱིའམ། བྲམ་
ཟེ་རྣམས་ཀྱིའམ། ཁྱིམ་བདག་རྣམས་ཀྱིའམ། གྲོང་མི་རྣམས་ཀྱིའམ། ཡུལ་མི་རྣམས་ཀྱིའམ། ཚོང་དཔོན་རྣམས་ཀྱིའམ། དེད་དཔོན་རྣམས་ཀྱི་ཕོ་ཉ་ཚུ་བི་ནས་ཁྲིད་དེ་ཕ་བིར་སྣ་འདྲེན་པར་བྱེད་པ་དང་། ཕ་བི་ནས་ཕོ་ཉ་ཁྲིད་དེ་ཚུ་བིར་སྣ་འདྲེན་པར་བྱེད་པ་སྟེ། དགེ་སྦྱོང་རྣམས་ཀྱི་ཕོ་ཉར་
འགྲོ་བ་དང་གཏོང་བ་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་སུ་སྤྱད་ནས་ཚུལ་འཆོས་པ་དང་། ཁ་གསག་དང་། གཞོགས་སློང་དང་། འཐོབ་ཀྱིས་འཇལ་བ་དང་རྙེད་པ་ལས་རྙེད་པ་སྒྲུབ་

པར་བྱེད་དེ། དགེ་སྦྱོང་རྣམས་ཀྱི་ཚུལ་འཆོས་པ་དང་། ཁ་གསག་དང་། གཞོགས་སློང་དང་། འཐོབ་ཀྱིས་འཇལ་བ་དང་། རྙེད་པ་ལས་རྙེད་པ་སྒྲུབ་པར་བྱེད་པ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་ཡོངས་
སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། གནམ་གྲུམ་པ་དང་། རྨ་མཚན་དང་། རྨི་ལམ་གྱི་མཚན་མ་དང་། མེས་ཚིག་པ་དང་། ཆུས་རེག་པ་དང་། བྱི་བས་ཟོས་པ་དང་། འབེབས་པ་དང་། ཚིག་སྙན་པ་དང་། འབྱུང་པོ་ཐམས་ཅད་ཀྱི་སྐད་དང་།
ལུས་ཀྱི་དཔྱད་དང་། ཁྱིམ་སའི་དཔྱད་དང་། ནེ་ཙོའི་དཔྱད་དང་། བྱའི་དཔྱད་དང་། སོར་མོའི་དཔྱད་དང་། སྦྱོར་བ་དག་བྱེད་དེ། དགེ་སྦྱོང་རྣམས་ཀྱི་ཡོན་པོའི་དཔྱད་ཀྱིས་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །མ་སྡུག་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་
བྱིན་པ་དག་ཡོངས་སུ་སྤྱད་ནས་ཡོན་པོའི་དཔྱད་ཀྱི་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཡུད་ཙམ་རྣམས་ཀྱི་སྦྱོར་བ་དང་། རྒྱུ་སྐར་རྣམས་ཤར་བ་དང་། རོ་ཡོངས་སུ་བརྟག་པ་དང་། ཞི་བའི་ལས་དང་། རྒྱས་པའི་ལས་དང་། དྲག་པོའི་ལས་དང་། བསང་གཏོར་གྱི་ལས་
དང་། ཡིག་འབྲུ་དང་། རྩིས་དང་། གྲངས་དང་། ལག་རྩིས་དང་། མེ་ལོང་གི་དཔྱད་ལ་སྦྱོར་བར་བྱེད་དེ། དགེ་སྦྱོང་རྣམས་ཀྱི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །མ་ས