Kinh tạng Tây Tạng (Kangyur Đại Học) — 004_འདུལ་བ།_ང

་པས་ཤི་བར་གྱུར་ཏོ། །

དེ་ནས་དྲང་སྲོང་དེ་ཁྲོ་བའི་ཀུན་ནས་དཀྲིས་པས་སྨྲས་པ། རྒྱལ་པོ་ཁྱོད་ནི་ཕུང་ཀྲོལ་སྤྱོད་པ་ངན་པ་ཞིག་སྟེ། དེས་ན་རི་དགས་ང་ལ་སྐྱབས་སུ་འོངས་པ་བསད་དོ་ཞེས་དེ་སྐད་ཅེས་སྨྲས་པ་དང་། རྒྱལ་པོ་དེ་ཞེ་སྡང་གི་ཀུན་ནས་དཀྲིས་པ་ལ་ཞེན་པའི་བློས་བློན་པོ་རྣམས་
ལ་སྨྲས་པ། ཤེས་ལྡན་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་ཁ་ཚས་ཟེར་བ་གང་ཡིན་པ་དེ་ལ་ཆད་པ་ཅི་བཅད་བློན་པོ་རྣམས་ཀྱིས་སྨྲས་པ། ལྷ་ཆད་པས་དགུམ་ལགས་མོད། རྒྱལ་པོས་སྨྲས་པ། གལ་ཏེ་དེ་ལྟ་ན་དྲང་སྲོང་འདི་ངས་ཡོངས་སུ་སྤངས་སོ། །
བློན་པོ་རྣམས་ཀྱིས་དྲང་སྲོང་གསད་པར་བརྩམས་པ་ན་སྟེས་དབང་གིས་རྔོན་པ་དེ་ཡང་དྲང་སྲོང་དེའི་ཉེན་འཁོར་ན་འདུག་ནས་དེས་བསམས་པ། བདག་གསོན་བཞིན་དུ་དྲང་སྲོང་ཅིའི་ཕྱིར་གསོད་དུ་གཞུག་སྙམ་ནས། དེས་གཡུལ་འགྱེད་པར་བརྩམས་པ་ན་དྲང་སྲོང་བྲོས་ནས། དཔུང་
ཆེན་པོའི་ཚོགས་ཀྱིས་དེ་བསད་དོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རྔོན་པ་གང་ཡིན་པ་དེ་ནི་གནོད་སྦྱིན་ཀུམ་བི་ར་འདི་ཉིད་ཡིན་ཏེ། དེ་ན་ཡང་འདིས་
ངའི་ཕྱིར་བདག་ཉིད་ཡོངས་སུ་བཏང་ངོ་། །ད་ལྟར་ཡང་འདིས་ངའི་ཕྱིར་བདག་ཉིད་ཡོངས་སུ་བཏང་ངོ་། །བཅོམ་ལྡན་འདས་ཀྱི་ཞབས་ལ་རྡོ་བའི་དུམ་བུས་རྨ་བྱུང་བ་ཁྲག་འཆད་དུ་མ་བཏུབ་ནས་དེ་བཞིན་དུ་འཛག་གོ། །སྨན་པའི་རྒྱལ་པོ་འཚོ་བྱེད་བཅོམ་ལྡན་འདས་ཀྱི་སྙུན་
བརྟག་པའི་ཕྱིར་དུས་གསུམ་དུ་སྤྱན་སྔར་འགྲོའོ། །རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་དད་པ་ཅན་དང་། ཡུལ་སྣ་ཚོགས་ནས་ལྷགས་པའི་ཡང་དག་པའི་ལྟ་བ་དང་ལྡན་པ་ནོར་ཅན་དང་། ཚོང་དཔོན་དང་། དེད་དཔོན་རྣམས་ཀྱང་འོངས་ཏེ། དེ་ན་ཁ་ཅིག་
གིས་སྨྲས་པ། འཚོ་བྱེད་སྨན་འདི་ནི་དེ་ལ་བཟང་ངོ་། །གཞན་དག་གིས་སྨྲས་པ། འདི་ནི་དེ་བས་ཀྱང་བཟང་ངོ་། །སྨན་པའི་རྒྱལ་པོ་འཚོ་བྱེད་ཀྱིས་སྨྲས་པ། འདི་ལ་མོད་ལ་གདངས་པར་འགྱུར་བའི་སྨན་ཡོད་མོད་ཀྱི་དེ་ནི་རྙེད་པར་དཀའོ། །ཚེ་དང་ལྡན་པ་ཀུན་

དགའ་བོས་སྨྲས་པ། འཚོ་བྱེད་དེ་ཅི་ཡིན། དེས་སྨྲས་པ། ཙན་དན་ས་མཆོག་ཡིན་ནོ། །དེའི་ཚེ་ཙན་དན་ས་མཆོག་རྙེད་པ་ཉིད་མེད་དོ། །ཇི་ཙམ་ན་ཚོང་པ་ཞིག་ཡོད་པས་འདི་ལྟར་བདག་གིས་ཙན་དན་ས་མཆོག་དུས་དུས་སུ་བཙོངས་པས་མ་སྐྱེས་དགྲ་འདི་ནི་གཏུམ་པ་
བརླང་བ། གཟུ་ལུམས་ཅན་ཡིན་པས་གལ་ཏེ་མ་སྟེས་ཏེ་དེ་ལ་ཙན་དན་ས་མཆོག་དགོས་པར་གྱུར་ལ། དེ་མ་རྙེད་ན་གདོན་མི་ཟ་བར་མགོ་གཅོད་པར་ཡང་འགྱུར་རོ་སྙམ་ནས་ཙན་དན་ས་མཆོག་བསྲེས་ཏེ་བཞག་པ་ཞིག་ཡོད་དོ། །དེས་སྨན་པའི་རྒྱལ་པོ་འཚོ་བྱེད་ཀྱིས་ཇི་ལྟར་
བཅོམ་ལྡན་འདས་ཀྱི་སྙུན་ལ་ནི་ཙན་དན་ས་མཆོག་གིས་གདངས་པར་འགྱུར་རོ་ཞེས་བསྟན་པ་ཐོས་ནས་དེས་བསམས་པ། མ་སྐྱེས་དགྲ་འདི་ལྷ་སྦྱིན་གྱིས་རྦད་པས་བཅོམ་ལྡན་འདས་ལ་ཞེ་འགྲས་པའི་བློ་ཡོད་དེ། གལ་ཏེ་བདག་གིས་བཅོམ་ལྡན་འདས་ལ་ཙན་དན་ས་མཆོག་ཕུལ་
ན་བདག་ལ་གནོད་པ་བྱེད་པའི་གནས་གང་ཡིན་པ་དེ་ཡོད་དོ་སྙམ་མོ། །ཡང་བསམས་པ། བཅོམ་ལྡན་འདས་ནི་ལྷ་དང་མིས་མཆོད་པ་ཡིན་པས་གལ་ཏེ་དེའི་དོན་དུ་སྲོག་དང་ཕྲལ་ན་ཡང་ཕྲལ་དུ་ཟད། མ་ལ་བདག་གིས་བཅོམ་ལྡན་འདས་ལ་ཙན་དན་ས་མཆོག་དབུལ་ལོ་སྙམ་ནས། དེས་
ཙན་དན་ས་མཆོག་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་ནས་ཞབས་ལ་གཏུགས་ཏེ་གསོལ་པ། བཅོམ་ལྡན་འདས་བདག་གིས་བཅོམ་ལྡན་འདས་ལ་ཙན་དན་ས་མཆོག་གིས་བགྱི་བ་ཅི་མཆིས་པ་གློ་བར་ཆུད་ན། བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ་འདི་བཞེས་སུ་
གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བདག་ཉིད་ཆེན་པོ་འདི་ལས་ཙན་དན་ས་མཆོག་ལོང་ཤིག །ཚེ་དང་ལྡན་པ་ཀུན་དགའ་བོས་བླངས་སོ། །དེ་ནས་ཚོང་པ་དེ་དགའ་བ་དང་མགུ་བ་སྐྱེས་ནས་བཅོམ་ལྡན་འདས་
ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་

པོ་དང་། དཀར་པོ་དང་། བཙོད་ཀ་དག་བྱུང་ནས་ཁ་ཅིག་ནི་འོག་དུ་འགྲོ། །ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་འགྲོ་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་།
ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་པ་ཅན་དང་། སོ་ཐམས་ཐམས་དང་། ཀྱི་ཧུད་ཟེར་བ་དང་། ཨ་ཅུ་ཟེར་བ་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་སོང་སྟེ། སེམས་
ཅན་དམྱལ་བ་ཚ་བ་གང་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་། དེ་དག་འདི་སྙམ་དུ་
ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་འདི་
ནས་ཤི་འཕོས་པ་ཡང་མ་ཡིན་ལ་གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་ནས་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་
ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་དུ་འགྲོ་བ་དེ་དག་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་དང་། འཐབ་བྲལ་བ་དང་། དགའ་ལྡན་དང་། འཕྲུལ་དགའ་དང་།
གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་

བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། །
བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་
བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྒྲོགས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་རྗེས་བཞིན་དུ་འགྲོ་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་
སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པ་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་
པར་བཞེད་ན་ནི་རྟིང་པར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་གཡོན་པའི་
མཐིལ་དུ་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་
རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་མཛོད་སྤུར་ནུབ་

པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ། བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་
རྣམས་ཀུན་དུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་
བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་
འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །ཀུན་དགའ་བོ་དེ་དེ་བཞིན་ཏེ། དེ་དེ་བཞིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ།
ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་ཚོང་པས་སེམས་མངོན་པར་དད་པར་བྱས་ནས་ཙན་དན་ས་མཆོག་ཕུལ་བ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་ཚོང་བ་དེ་དགེ་བའི་རྩ་བ་དང་། སེམས་བསྐྱེད་པ་དང་། སྦྱིན་པའི་ཆོས་ཡོངས་སུ་
བཏང་བ་དེས་རང་སངས་རྒྱས་ཙན་དན་ཅན་ཞེས་བྱ་བར་འགྱུར་རོ། །དེའི་སྦྱིན་པའི་ཆོས་ནི་འདི་ཡིན་ཏེ། ང་ལ་སེམས་དད་པར་བྱས་པ་གང་ཡིན་པའོ། །འོན་ཀྱང་ཁྲག་དེ་འཆད་དུ་མ་བཏུབ་ནས་དེ་བཞིན་དུ་འཛག་གོ། །འཚོ་བྱེད་ཀྱིས་སྨྲས་པ། ད་ནི་བུད་མེད་གཞོན་ནུའི་འོ་མས་གདབ་
འཚལ་ལོ། །དགེ་སློང་རྣམས་ཀྱིས་བུད་མེད་གཞོན་ནུ་ཅི་འདྲ་བ་མ་ཤེས་ནས། དེས་སྨྲས་པ། བུ་ཐོན་བུ་བཙས་པ་གང་ཡིན་པ་དེ་ནི་བུད་མེད་གཞོན་ནུ་འདོད་དེ། དེའི་འོ་མ་གང་ཡིན་པ་དེ་ནི་བུད་མེད་གཞོན་ནུའི་འོ་མ་ཞེས་བགྱིའོ། །ཚེ་དང་ལྡན་པ་ཀུན་དགའ་བོས་ལྷ་སྦྱིན་དང་། ལྷ་

སྦྱིན་གྱི་ཕྱོགས་མ་གཏོགས་པར་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཕལ་ཆེར་ལ་ཡང་བསྒོ་ནས་ཐམས་ཅད་ཀྱིས་བུད་མེད་གཞོན་ནུའི་འོ་མ་བཙལ་བར་བརྩམས་སོ། །འཁོར་
བཞི་པོ་དང་སྐྱེ་བོའི་ཚོགས་རྣམས་ཚོལ་བ་ན་དེ་རྣམས་ཀྱིས་ཐབས་ཡོད་ཡོད་ཀྱིས་བགེགས་བྱེད་དོ། །ཇི་ཙམ་ན་རྒྱལ་པོའི་ཁབ་ན་བུ་ཐོན་བུ་བཙས་པའི་བུད་མེད་གཞོན་ནུ་འོ་མ་ཉུང་སྟེ་རང་གི་བུ་ཡང་འོ་མས་མི་ངོམས་ན་གཞན་ལ་སྦྱིན་དུ་ལྟ་ག་ལ་ཡོད་པ་ཞིག་འདུག་པ་དེས་ཇི་ལྟར་བཅོམ་
ལྡན་འདས་ལ་བུད་མེད་གཞོན་ནུའི་འོ་མའི་དགོས་པ་བྱུང་བ་ཐོས་ནས་དེས་བསམས་པ། གལ་ཏེ་ཕུལ་ན་ནི་བདག་གི་བུ་ཉམ་ཆུང་བས་འོ་མ་མེད་ན་འཆི་བར་འགྱུར་ལ་ཉེས་དམིགས་དེ་འབའ་ཞིག་ཏུ་མ་ཟད་ཀྱི་གཞན་འདི་ཡང་ཡོད་དེ། ལྷ་སྦྱིན་བཅོམ་ལྡན་འདས་ལ་ཡུན་རིང་པོ་ནས་ཕྱིར་
རྒོལ་བ་དགྲར་གྱུར་བ་ཡིན་ཏེ། དེས་རྦད་པ་ནི་རྒྱལ་པོ་མ་སྐྱེས་དགྲ་ཡིན། ལྷ་སྦྱིན་གྱི་ཕྱོགས་ནི་ཀོ་ཀ་ལི་ཀ་དང་། ཁན་ད་དྲ་བ་བྱ་དང་། ཀ་ཏི་མ་ར་ཀ་ཏི་ཥྱ་དང་། རྒྱ་མཚོས་བྱིན་ཡིན་པས་འདི་དག་གིས་ཀྱང་བདག་གདོན་མི་ཟ་བར་བསད་པར་འགྱུར་རོ་སྙམ་མོ། །ཡང་བསམས་
པ། བདག་བསད་པ་དང་བུ་དང་བྲལ་བ་ནི་བླའི་ལྷ་དང་མིས་མཆོད་པའི་སངས་རྒྱས་བཅོམ་ལྡན་འདས་སྙུན་གྱིས་འོ་བརྒྱལ་བའི་ཚོར་བ་སྐུ་ཉམས་སུ་བརྟར་ནས་དེས་ན་རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཐམས་ཅད་འཁྲུགས་པར་གྱུར་པ་ནི་དེ་ལྟ་མ་ཡིན་གྱི། མ་ལ་བདག་གིས་འོ་མ་ཁྱེར་
ལ་འགྲོའོ་སྙམ་སྟེ། དེ་བཅོམ་ལྡན་འདས་ལ་སེམས་ཤིན་ཏུ་དད་པ་བྱས་ནས་སྣོད་གསར་པར་འོ་མ་བཞོས་ཏེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
འདས་ལ་འཚོ་བྱེད་ཀྱིས་བུད་མེད་གཞོན་ནུའི་འོ་མ་བསྟན་པར་བདག་གིས་འཚལ་ན། བདག་རྗེས་སུ་གཟུང་བའི་སླད་དུ་བུད་མེད་གཞོན་ནུའི་འོ་མ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བསམ་པ་བཟང་པོ་ཅན་

གྱི་བུ་མོ་འདི་ལས་འོ་མ་ལོང་ཤིག །དེས་བླངས་པ་དང་དེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་
ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་བྱུང་ནས། ཁ་ཅིག་ནི་འོག་ཏུ་འགྲོ། །ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་འགྲོ་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་།
བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཆུ་ཟེར་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་།
པད་མ་ལྟར་གས་པ་ཆེན་པོར་སོང་སྟེ། སེམས་ཅན་དམྱལ་བ་ཚ་བ་གང་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་
གཅོད་པར་བྱེད་ཅིང་། དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱི་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ་ཤེས་
ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་ཅན་
དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ།། །།འདུལ་བ་གཞི། བམ་པོ་བརྒྱ་རྩ་གསུམ་པ། གང་དག་སྟེང་དུ་འགྲོ་བ་དེ་དག་ནི་རྒྱལ་ཆེན་བཞིའི་

རིས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་
དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་
དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་། ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་
པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྒྲོགས་པར་བྱེད་དོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་
རྗེས་བཞིན་དུ་སོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་
བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་རྟིང་པར་ནུབ་པར་འགྱུར། །ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་
ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་

ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་
དེ་དག་གིས་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་སྤུར་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡིས། །ཚོགས་རྣམས་ཞལ་གྱི་སྒོ་ནས་བྱུང་གྱུར་
པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་ཏུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མཆིས་པར། །རྩ་
ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་
རྒྱལ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ང་ལ་བུད་མེད་ཀྱིས་སེམས་མངོན་པར་དད་
པར་བྱས་ཏེ་བུད་མེད་གཞོན་ནུའི་འོ་མ་ཕུལ་བ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་བུ་མོ་དེ་ནི་དགེ་བའི་རྩ་བ་དང་། སེམས་བསྐྱེད་པ་དང་། སྦྱིན་པའི་ཆོས་ཡོངས་སུ་བཏང་བ་དེས་རང་སངས་རྒྱས་འོ་མ་སྦྱིན་པ་ཞེས་བྱ་བར་འགྱུར་ཏེ། དེའི་སྦྱིན་
པའི་ཆོས་ནི་འདི་ཡིན་ཏེ། ང་ལ་སེམས་མངོན་པར་དད་པ་གང་ཡིན་པའོ། །འོན་ཀྱང་ཁྲག་དེ་འཆད་དུ་མ་བཏུབ་ནས་དེ་བཞིན་དུ་འཛག་གོ། །ཡུལ་སྣ་ཚོགས་ན་གནས་པའི་དགེ་སློང་རྣམས་དང་། གཞན་ཡང་བྲམ་ཟེ་དང་ཁྱིམ་བདག་དད་པ་ཅན་མང་པོས་བཅོམ་ལྡན་འདས་དེ་ལྟར་ཐུགས་

མི་བདེའོ་ཞེས་ཐོས་ཏེ་ལྷགས་ནས། དེ་ན་ཁ་ཅིག་ནི་སྨན་དག་འདེབས་པར་བྱེད་དོ། །ཁ་ཅིག་ནི་སྔགས་ཀྱི་དཔྱད་བྱེད་དོ། །ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་བདེན་པ་གསོལ་བར་བརྩམས་པ། བཅོམ་ལྡན་ཁྱོད་ཀྱི་ཐུགས་ལ་ནི། །སྲས་དང་དགྲ་བོར་མཚུངས་ཤེ་ན། །
བདེན་པའི་ཚིག་ནི་འདི་ཡིས་སུ། །རྨ་ཡི་འཛག་པ་ཆད་པར་ཤོག །བདེན་པ་གསོལ་ཟིན་པའི་མོད་ཁོ་ནར་ཁྲག་དེ་མི་འཛག་པར་གྱུར་པ་དང་། ལྷ་སྦྱིན་དང་། མ་སྐྱེས་དགྲ་དང་། ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་མ་གཏོགས་
པར་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཕལ་ཆེར་ཐམས་ཅད་རབ་ཏུ་དགའ་བར་གྱུར་ཏོ། །བཅོམ་ལྡན་འདས་ནི་མཁྱེན་བཞིན་དུ་གང་ཞིག་ཇི་ལྟར་དཔྱད་བྱེད་པ་དེ་ལ་དེ་བཞིན་དུ་རྗེས་སུ་དགྱེས་
པར་མཛད་དེ། དེ་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་རོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་བདེན་པ་གསོལ་བས་བཅོམ་ལྡན་འདས་ཀྱི་ཁྲག་འཛག་
པ་ཆད་པར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ང་དུག་འབགས་ནས་ཀུན་ཏུ་འཁྲུགས་པར་གྱུར་པ་ན་འདིས་དུག་ཞི་བར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་
འོར་དང་ཧ་ཅང་ཡང་མི་རིང་བ་ཞིག་ན་སྐྱེད་མོས་ཚལ་རྩ་བ་དང་། སྡོང་བུ་དང་། མེ་ཏོག་དང་། ཆུ་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ། དེ་ན་དྲང་སྲོང་ཆུ་དང་། རྩ་བ་དང་། འབྲས་བུ་ལོངས་སྤྱོད་པ། པགས་པ་དང་། ཤིང་ཤུན་གྱོན་པ། རིག་སྔགས་དང་།
གསང་སྔགས་འཆང་བ་ཞིག་གནས་སོ། །རི་འོར་དེ་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་

དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་དང་ཁྱེའུ་ཞིག་བཙས་ཏེ། ཉི་མ་བདུན་གསུམ་ཉི་ཤུ་རྩ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ཏེ་མིང་བཏགས་ནས་དེ་བསྐྱེད་བསྲིངས་ཏེ་ཆེན་པོར་གྱུར་ཏོ། །དེ་
འཆག་པའམ། འགྲེང་བ་འམ། འདུག་པའམ་ཉལ་བ་ན་ཡང་དགེ་བ་སེམས་ཤིང་དགེ་བའི་ལས་བྱེད་པས་དེ་སྐྱེ་བོའི་ཚོགས་ཀྱིས་ཆོས་འདོད་ཅེས་བྱ་བར་མིང་བཏགས་སོ། །དེ་དགེ་བ་ཅི་ཡིན་ཞེས་ཚོལ་བའི་ཕྱིར་རི་འོར་ནས་བྱུང་ནས་དུས་དུས་སུ་དྲང་སྲོང་དེའི་དྲུང་དུ་འགྲོ་ཞིང་དེ་ལ་བསྙེན་བཀུར་བྱེད་
དེ་དཀའ་ཐུབ་ཀྱི་དྲུང་དུ་འགྲོ་བས་དཀའ་ཐུབ་ལྡན་དཀའ་ཐུབ་ལྡན་ཞེས་བྱ་བར་ཡང་གྲགས་སོ། །དེ་དུས་གཞན་ཞིག་ན་དུག་ཅིག་གིས་འབགས་པ་ལངས་ནས་དེ་ལ་དུག་སྨན་དུ་མ་དང་སྔགས་ཀྱི་སྦྱོར་བས་དཔྱད་བྱས་ན་ཡང་དེའི་ནད་དེ་ཞི་བར་མ་གྱུར་ནས་དེའི་ཕ་དང་མ་གཉིས་དྲང་སྲོང་དེའི་
དྲུང་དུ་སོང་སྟེ། དྲང་སྲོང་ཆེན་པོ་ཁྱོད་ཀྱི་རིམ་གྲོ་བགྱིད་པ་ནི་དུག་གིས་འབགས་ནས་སྲོག་དང་བྲལ་ལ་ཐུག་གིས་དཔྱད་མཛོད་ཅིག །དེས་བདེན་པ་གསོལ་བར་བརྩམས་ཏེ། བུ་གཅིག་ཁྱོད་ཀྱིས་སེམས་ལ་ནི། །དགྲ་དང་མཛའ་བོ་མཚུངས་ཤེ་ན། །བདེན་པའི་ཚིག་ནི་འདི་ཡིས་སུ། །
ཁྱེའུ་ཁྱོད་དུག་ནི་མེད་པར་ཤོག །དེས་བདེན་པ་གསོལ་མ་ཐག །ཁོ་ནར་དུག་ཞི་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱེའུ་གང་ཡིན་པ་དེ་ནི་ང་ཉིད་ཡིན་ནོ། །དྲང་སྲོང་གང་ཡིན་པ་དེ་ནི་འོད་སྲུང་སྟོབས་བཅུ་ལྡན་འདི་ཉིད་ཡིན་ཏེ། དེ་ན་ཡང་
འདིས་བདེན་པ་གསོལ་བས་ང་སོས་བར་བྱས་སོ། །ད་ལྟར་ཡང་འདིའི་བདེན་པ་གསོལ་བས་ང་སོས་པར་བྱས་སོ། །ལྷ་སྦྱིན་སྡུག་བསྔལ་ཞིང་ཡིད་མི་བདེ་བ་དང་འགྱོད་པས་སེམས་པ། བདག་གིས་དགེ་སྦྱོང་གཽ་ཏ་མ་ལ་རྡོ་འཕངས་པ་ནི་དོན་མེད་པ་ཞིག་བྱས་ཏེ། དགེ་སྦྱོང་གཽ་ཏ་མ་
ཡང་མ་སོད་ལ། སྐྱེ་བོ་མང་པོས་ཀྱང་རབ་ཏུ་ཤེས་པར་གྱུར་ཏོ་སྙམ་ནས། དེ་ཤིང་དྲུང་ཞིག་ཏུ་སོང་སྟེ་སེམས་ཁོང་དུ་ཆུད་ཅིང་སྐྱིལ་མོ་ཀྲུང་བཅས་ཏེ་འདུག་གོ། །དགེ་སློང་རྣམས་གནས་དང་གནས་རྣམས་སུ་བཙུན་པ་དག་གཟིགས་ཤིག །ལྷ་སྦྱིན་འདི་འདྲ་བར་ཞེ་གདུག་སྟེ།

གང་གི་ཕྱིར་བཅོམ་ལྡན་འདས་རབ་ཏུ་བྱུང་བ་དེ་ལ་ཡང་ཕ་རོལ་གནོན་པས་སྟེང་དུ་རྡོ་བ་འཕེན་ནོ་ཞེས་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་པ་དང་། ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཀྱིས་སྨྲས་པ།
ཤེས་ལྡན་དག་མ་བརྟགས་པར་བྱུང་རྒྱལ་དུ་ཅི་བརྡོལ། ལྷ་སྦྱིན་ཤིང་ཆེ་གེ་མོ་ཞེས་བྱ་བའི་དྲུང་ན་བསམ་གཏན་བཞི་པ་ལ་སྙོམས་པར་ཞུགས་པ་མ་མཐོང་ངམ། བདག་ཉིད་ཆེན་པོ་དེ་དེ་ལྟ་བུ་བྱེད་པར་ག་ལ་འགྱུར། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་
པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་བདག་ཉིད་ངོ་ཚ་མ་མཆིས་པས་ལྷ་སྦྱིན་ངོ་ཚ་མ་མཆིས་པའི་བསྔགས་པ་སྒྲོགས་པ་ལ་གཟིགས། བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པ་ན་ཡང་ངོ་ཚ་མེད་པ་འདིས་ངོ་ཚ་མེད་པའི་བསྔགས་པ་སྨྲས་པ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཁབ་ཀྱི་མི་རྣམས་དང་རྒྱལ་པོས་དགོས་པ་འགའ་ཞིག་གི་ཕྱིར་ཁྲིམས་སུ་
བཅས་པ། དུར་ཁྲོད་གཉིས་བཤམས་ལ་གཅིག་ཏུ་ནི་སྐྱེས་པ་རྣམས་དོར་བར་བྱའོ། །གཅིག་ཏུ་ནི་བུད་མེད་རྣམས་སོ་ཞེས་བཅས་སོ། །ཇི་ཙམ་དུས་གཞན་ཞིག་ན་མ་ནིང་ཞིག་ཤི་ནས་དེ་དུར་ཁྲོད་གཅིག་ཏུ་ཡང་གནས་སྐབས་མ་རྙེད་ཅིང་གཉིས་པར་ཡང་མ་རྙེད་དོ། །རྒྱལ་པོའི་ཁབ་
ཀྱི་ཕྱོགས་ཞིག་ན་སྐྱེད་མོས་ཚལ་རྩ་བ་དང་འབྲས་བུ་དང་མེ་ཏོག་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ། དེ་ན་དྲང་སྲོང་སྤྱི་ཅེར་ཆུ་དང་རྩ་བ་དང་འབྲས་བུ་ལ་ལོངས་སྤྱོད་པ། པགས་པ་དང་། ཤིང་ཤུན་གྱོན་པ་ཞིག་གནས་སོ། །ཕྱོགས་དེ་ན་ཡང་ཞིང་གྲུ་
གསུམ་ཞིག་ལ་ཤིང་ཨེ་རན་ད་ཞིག་སྐྱེས་ནས་མ་ནིང་གི་རོ་དེ་དེར་བོར་རོ། །རོའི་དྲི་ཚོར་ནས་ཝ་ཞིག་འོངས་ཏེ་དེས་མ་ནིང་གི་རོ་དེ་ལ་བཟའ་བར་བརྩམས་སོ། །བྱ་རོག་གཅིག་ཀྱང་ཤིང་ཨེ་རན་དའི་ཁ་ན་ཚང་བཅས་ཏེ་འདུག་གོ། །དེའི་བློ་སྐྱེས་ནས་ཝ་ལ་བསྔགས་པ་སྨྲས་པ་དང་། གལ་

ཏེ་ན་ཟོས་པའི་ལྷག་མ་སྟེར་རོ་སྙམ་ནས་དེས་དེ་ལ་ཚིགས་སུ་བཅད་དེ་བསྔགས་པ་སྨྲ་ངར་བརྩམས་པ། ཇི་ལྟར་ཁྱོད་ནི་སེང་གེའི་མགྲིན་པ་དང་། །ཇི་ལྟར་ཁྱུ་མཆོག་བཤུལ་དང་ལྡན་པ་ཡི། །རི་དགས་རྒྱལ་པོ་ཁྱོད་ལ་ཕྱག་འཚལ་ནས། །གསོལ་བའི་ཕམ་འབབས་ལས་
ནི་ཐུགས་དཔག་མཛོད། །ཝས་བལྟས་ཏེ་སླར་ཚིགས་སུ་བཅད་པས་སྨྲས་པ། བྱ་ཡི་རབ་མཆོག་མཁའ་འགྲོ་བ། །ཕྱོགས་ཀུན་གསལ་བར་མཛད་ནས་ནི། །རིན་ཆེན་སྦྲམ་ལྟར་མཛེས་གྱུར་པ། །ཤིང་མཆོག་རྩེ་ལ་བཞུགས་འདི་གང་། །བྱ་རོག་གིས་སྨྲས་པ། སྐལ་ལྡན་
ཆེན་པོ་བལྟ་བའི་ཕྱིར། །ཁྱོད་ཀྱི་དྲུང་དུ་བདག་མཆིས་ཏེ། །རི་དགས་རྒྱལ་ཁྱོད་ཕྱག་འཚལ་ན། །གསོལ་བའི་ཕམ་འབབས་ཐུགས་དཔག་མཛོད། །ཝས་སྨྲས་པ། རྨ་བྱའི་མགྲིན་པ་ལྟ་བུ་ཡི། །ཕོ་རོག་བལྟ་ན་སྡུག་པ་ཁྱོད། །ཀུན་དགའ་བྱེད་པ་རྣམས་ཀྱི་གཙོ། །ཅི་
བདེར་གསོལ་གྱིས་མར་སྤྱོན་ཅིག །དེ་བབས་ནས་ཝ་དང་ལྷན་ཅིག་མ་ནིང་གི་རོ་ལ་ཟ་བར་བྱེད་པ་དྲང་སྲོང་གིས་མཐོང་ནས་དེས་ཚིགས་སུ་བཅད་དེ་སྨྲས་པ། ལྗོན་ཤིང་ཐ་ཆད་གྲིབ་མ་ལ། །ངོ་ཚ་མེད་པ་འདུག་ནས་སུ། །ཐ་ཆད་རོ་ལ་ལོངས་སྤྱོད་པ། །ཨེ་མའོ་རིང་ཞིག་ལོན་ནས་
མཐོང་། །བྱ་རོག་གིས་ཐོས་ནས་དེ་མ་བཟོད་ནས་ཚིགས་སུ་བཅད་དེ་སྨྲས་པ། འདི་ལྟར་སེང་གེ་རྨ་བྱ་དག །དམ་པའི་ཤ་ལ་ལོངས་སྤྱོད་ན། །གཞན་གྱིས་བྱིན་པས་འཚོ་བ་ཡི། །སྤྱི་ཅེར་འདིར་ནི་ཅི་ཞིག་གཏོགས། །དྲང་སྲོང་དེ་ཡང་མི་བཟོད་པ་སྐྱེས་ནས་ཚིགས་སུ་བཅད་དེ་སྨྲས་
པ། འདབ་ཆགས་ཐ་ཆད་བྱ་རོག་དང་། །རྐང་བཞི་ཐ་ཆད་ཝ་དང་ནི། །ལྗོན་ཤིང་ཐ་ཆད་ཨེ་རན་ད། །མི་ཡི་ཐ་ཆད་མ་ནིང་རོ། །ཞིང་གི་ཐ་ཆད་གྲུ་གསུམ་སྟེ། །ངོ་ཚ་མེད་རྣམས་འདུས་ལ་ལྟོས། །དེ་ནས་བྱ་རོག་ལྷག་པར་ཡང་མི་བཟོད་པ་སྐྱེས་ནས་དྲང་སྲོང་གི་མེ་ཁང་དུ་
ཞུགས་ཏེ་བལྟ་བར་བརྩམས་པ་ལས། ཅི་ཡང་མི་སྣང་ནས་རིལ་བ་སྤྱི་བླུགས་བཅག་སྟེ་བྲོས་སོ། །ཇི་ཙམ་ན་དྲང་སྲོང་དེ་མེ་ཁང་དུ་ཞུགས་ན་རིལ་བ་སྤྱི་བླུགས་ཆག་པ་མཐོང་ནས། དེས་བསམས་པ། འདི་ནི་བྱ་རོག་གདུག་པ་དེའི་ལས་ཀྱིས་བྱས་ཀྱི་གཞན་ནི་སུ་ཡང་མ་ཡིན་ནོ་

སྙམ་དུ་རིག་ནས་ཚིགས་སུ་བཅད་དེ་སྨྲས་པ། སུ་ལ་འདི་འདྲའང་མི་སྨྲ་སྟེ། །ངོ་ཚ་མེད་པའི་གདུག་སེམས་ཀྱིས། །མེ་ཁང་མ་རུང་བྱས་ནས་ནི། །རིལ་བ་ཡང་ནི་བཅག་པར་གྱུར། །བསྔགས་འོས་སྨད་པར་འོས་ཀྱང་རུང་། །ཡོང་ཡེ་ཅུང་ཟད་སྨྲ་མི་བྱ། །བློ་གྲོས་ལྡན་པས་རྟག་
ཏུ་ནི། །ཁ་རོག་པས་ནི་བདེ་བ་འཐོབ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་ཡིན་ནོ། །དེའི་ཚེ་དེའི་དུས་ཀྱི་བྱ་རོག་གང་ཡིན་པ་དེ་ནི་ཀོ་ཀ་ལི་ཀ་ཡིན་ཏེ། དེ་ན་ཡང་ངོ་ཚ་མེད་པ་དེ་དག་གིས་ངོ་
ཚ་མེད་པའི་བསྔགས་པ་བརྗོད་དོ། །ད་ལྟར་ཡང་ངོ་ཚ་མེད་པ་འདི་དག་ངོ་ཚ་མེད་པའི་བསྔགས་པ་བརྗོད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་དང་ལྷ་སྦྱིན་ཐོག་མར་གང་དུ་མི་མཐུན་པར་
གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་ཤང་ཤང་ཏིའུ་གཉིས་ལུས་གཅིག་ཏུ་གྱུར་ནས་རྒྱ་མཚོའི་འགྲམ་ན་གནས་ཏེ། ཆོས་ཅན་དང་ཆོས་མ་ཡིན་པ་ཞེས་བྱའོ། །ཇི་ཙམ་ན་ཆོས་མ་ཡིན་པ་ནི་གཉིད་ལོག་ཆོས་ཅན་ནི་མེལ་ཙེ་བྱེད་པ་དང་། དེས་བདུད་
རྩིའི་འབྲས་བུ་ཞིག་ཆུས་ཁྱེར་བ་མཐོང་ནས། དེས་དེ་བླངས་ཏེ་བསམས་པ། ཅི་རེ་ཞིག་འདི་ཡང་བསླང་ངམ། འོན་ཏེ་བཟའ་སྙམ་མོ། །ཡང་བསམས་པ། ཐོས་ཀྱང་ལུས་འདི་གཅིག་ཁོ་ན་གསོ་བར་ཟད་དོ་སྙམ་ནས་དེས་དེ་མ་བསླང་བ་དང་། རང་ཉིད་སད་དེ། དེ་སད་པ་ན་ཆོས་ཅན་ལ་
བདུད་རྩིའི་འབྲས་བུའི་སྒྲེགས་པ་བྱུང་བ་ཆོས་མ་ཡིན་པས་ཚོར་ནས་དེས་སྨྲས་པ། དེ་ཅིའི་སྒྲེགས་པ་ཡིན། དེས་སྨྲས་པ། བདུད་རྩིའི་འབྲས་བུའིའོ། །དེ་གང་ནས་རྙེད། དེས་སྨྲས་པ། ཁྱོད་གཉིད་ལོག་པ་ན་ཁོ་བོས་བདུད་རྩིའི་འབྲས་བུ་རྙེད་ནས་ལུས་གཅིག་ཁོ་ན་གསོ་བར་ཟད་དོ་སྙམ་ནས་
ཁྱོད་མ་བསླང་བར་ཁོ་བོས་ཟོས་སོ། །དེས་སྨྲས་པ། ཁྱོད་ཀྱིས་མ་ལེགས་པ་ཞིག་བྱས་ཏེ་ངས་ཀྱང་དུས་ཤེས་པར་བྱའོ། །ཇི་ཙམ་དུས་གཞན་ཞིག་ན་ཆོས་ཅན་གཉིད་ལོག་ནས་ཆོས་མ་ཡིན་པ་མེལ་ཙེ་བྱེད་པ་ན་དེས་དུག་གི་འབྲས་བུ་ཆུས་ཁྱེར་བ་ཞིག་མཐོང་ནས་དེས་དེ་ཟོས་པ་དང་། དེ་གཉི་ག་

བརྒྱལ་བར་གྱུར་ཏོ། །ཆོས་མ་ཡིན་པ་དུག་གི་འབྲས་བུས་ཀུན་ནས་འཁྲུགས་པས་སྨྲས་པ། གང་དང་གང་དུ་སྐྱེས་པའི་ཚེ་རབས་དེ་དང་དེ་དག་ཏུ་ཁྱོད་ལ་གསོད་པ་དང་ཕྱིར་རྒོལ་བ་དང་དགྲ་བོར་གྱུར་ཅིག །ཆོས་ཅན་གྱིས་སྨྲས་པ། བདག་ཀྱང་གང་དང་གང་དུ་སྐྱེས་པའི་ཚེ་རབས་
དེ་དང་དེ་དག་ཏུ་ཁྱོད་ལ་བྱམས་པ་སྒྲུབ་པར་གྱུར་ཅིག་ཅེས་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཆོས་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཆོས་མ་ཡིན་པ་གང་ཡིན་པ་དེ་ནི་ལྷ་སྦྱིན་ཡིན་ནོ། །དེར་ཐོག་
མར་ང་དང་འདི་མི་མཐུན་པར་གྱུར་ཏོ། །ངས་ཀྱང་དེ་ལ་བྱམས་པའི་ཐུགས་བཞག་གོ། །གཞན་ཡང་ཇི་ལྟར་འདིས་ང་ལ་མི་མཐུན་པར་བྱས་པ་དང་། ངས་ཀྱང་འདི་ལ་བྱམས་པར་བསམས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་སྲ་རྩི་ལྡན་ཞེས་བྱ་བ་འབྱོར་བ་
དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེས་ཡུལ་གཞན་གྱི་རྒྱལ་པོའི་བུ་མོ་ཞིག་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་
བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་དེ་དུས་གཞན་ཞིག་ན་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པའི་ཉི་མའི་རྩེ་ན་ཁྱེའུ་གཟུགས་བཟང་པོ་མཛེས་པ་བལྟ་ན་སྡུག་པ་ཞིག་བཙས་ཏེ། དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་
ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ཁྱེའུ་འདི་གདུགས་ཀྱི་རྩེ་ན་བཙས་པས། དེའི་སླད་དུ་ཁྱེའུའི་མིང་ཉི་མའི་མུ་ཁྱུད་ཅེས་བགྱི་བར་གདགས་སོ། །ཞེས་དེའི་མིང་ཉི་མའི་མུ་ཁྱུད་ཅེས་བྱ་བར་བཏགས་ནས་ཁྱེའུ་ཉི་མའི་མུ་ཁྱུད་མ་མ་བརྒྱད་པོ་པང་ན་འཚོ་བའི་མ་མ་
གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དེ། དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་

བོ་གཙོ་བོ་དག་གིས་སྲིད་པར་བྱེད་སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང་། གྲངས་དང་། རྩིས་དང་། ལག་རྩིས་ལ་ཉེ་བར་ཞུགས་ཤིང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡུལ་དང་
དབང་ཕྱུག་དང་མཐུ་ཐོབ་པ་སའི་དཀྱིལ་འཁོར་ཆེན་པོ་མངོན་པར་ཟིལ་གྱིས་མནན་ནས་གནས་པ་རྣམས་ཀྱི་བཟོའི་གནས་དང་ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉར་ཞོན་པ་དང་། རྟ་ལ་ཞོན་པ་དང་། ཤིང་རྟའི་ཐབས་དང་། རལ་གྲིའི་
ཐབས་དང་། འཕོང་དང་། ཕྱིར་བསྣུར་བ་དང་། མདུན་དུ་བསྣུར་བ་དང་། ལྕགས་ཀྱུས་སྒྱུར་ཐབས་དང་། མདའ་བོ་ཆེ་འཕེན་པ་དང་། ཞགས་པ་གདབ་པ་དང་། བཅད་པ་དང་། དྲལ་བ་དང་། དབུག་པ་དང་། འཛིན་སྟངས་དང་། གོམ་སྟངས་དང་། ཐོར་ཚུགས་
དང་། རྒྱང་ནས་ཕོག་པ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེར་ཕོག་པ་སྟེ་བཟོའི་གནས་དང་། ལས་ཀྱི་གནས་ལྔ་པོ་དེ་དག་ལ་ཡང་བྱང་བར་གྱུར་ནས་ཕས་དེ་རྒྱལ་ཚབ་ཏུ་བཅུག་གོ། །རྒྱལ་པོ་སྲ་རྩི་ལྡན་གྱི་བཙུན་
མོ་དམ་པ་ནི་ཆོས་ལྡན་ཞེས་བྱའོ། །བློན་པོའི་མཆོག་ནི་ཕྱུགས་འདུག་ཅེས་བྱ་སྟེ། དེ་ལ་རྒྱལ་པོ་ལྷག་པར་སྙིང་འཇོག་གོ། །ཇི་ཙམ་དུས་གཞན་ཞིག་ན་རྒྱལ་པོ་སྲ་རྩི་ལྡན་ཆོས་ལྡན་མ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་
བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཆོས་ལྡན་མ་སེམས་ཅན་དང་ལྡན་པར་གྱུར་ཏོ། །དེ་མཚན་མཁན་རྣམས་ཀྱིས་ཁྱེའུ་ཞིག་བཙའ་བར་འགྱུར་ཏེ། དེས་རྒྱལ་པོ་སྲོག་དང་ཕྲལ་ནས་རང་ཉིད་ཅོད་པན་བཅིངས་ཏེ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་འགྱུར་རོ། །
ཞེས་ལུང་བསྟན་ཏོ། །ཇི་ཙམ་ན་རྒྱལ་པོ་སྲ་རྩི་ལྡན་ནད་ཀྱིས་ཐེབས་པར་གྱུར་ནས་དེ་ལ་རྩ་བ་དང་། སྡོང་བུ་དང་། འདབ་མ་དང་། མེ་ཏོག་དང་། འབྲས་བུའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏེ། དེས་ལུས་ཀྱི་གནས་སྐབས་རིག་པར་བྱས་ནས་དེས་

བསམས་པ། བདག་འདས་ནས་ཉི་མའི་མུ་ཁྱུད་རྒྱལ་པོར་འགྱུར་ཏེ། དེས་གདོན་མི་ཟ་བར་ཆོས་ལྡན་མ་བསད་པར་མི་འགྱུར་བར་འདིར་ཡེ་ཇི་ལྟར་བྱ་བའི་དུས་ལ་བབ། ཡང་བསམས་པ། བློན་པོ་ཕྱུགས་འདུག་འདི་ལ་བདག་གིས་ལོངས་སྤྱོད་བཟང་པོ་དག་གིས་
བགོ་བཤའ་བྱས་ཤིང་སྤྱན་རས་ཀྱིས་བཙས་པ་ཡིན་གྱིས་འདི་ལ་ཆོས་ལྡན་མ་གཏད་དོ་སྙམ་ནས་དེས་ཕྱུགས་འདུག་བཀུག་སྟེ་བསྒོ་བ། ངའི་བཙུན་མོ་དམ་པ་ནི་ཆོས་ལྡན་མ་ཡིན་ལ། བློན་པོའི་མཆོག་ནི་ཁྱོད་ཡིན་ཏེ། ངས་ལུས་ཀྱི་གནས་སྐབས་ཤེས་ན་གདོན་མི་ཟ་བར་ང་སྲོག་དང་
འབྲལ་བར་འགྱུར་གྱིས། ཁྱོད་ཀྱིས་ང་ལ་སྡུག་པར་སེམས་ན་ཉི་མའི་མུ་ཁྱུད་ཀྱིས་ཆོས་ལྡན་མ་ཇི་ལྟར་ཡང་སྲོག་དང་ཕྲལ་བར་མི་འགྱུར་བ་དེ་ལྟར་གྱིས་ཤིག་དེས་སྨྲས་པ། ལྷ་དེ་ཙམ་ཡང་རྔོ་མི་ཐོག་གམ། ལྷ་ཐུགས་ལས་ཆུང་ངུར་མཛོད་ཅིག་དང་ཇི་ལྟར་མི་བཀུམ་པ་དེ་ལྟར་བགྱིའོ། །
བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །རྒྱལ་པོ་སྲ་རྩི་ལྡན་ཤི་ནས་དེ་གདུགས་དང་། རྒྱལ་མཚན་དང་། བ་དན་ལ་སོགས་པ་བཟང་པོ་རྣམས་ཀྱིས་བཀུར་སྟི་ཆེར་བྱས་
ཏེ་བསྲེགས་སོ། །ཉི་མའི་མུ་ཁྱུད་རྒྱལ་པོའི་རྒྱལ་སྲིད་ཆེན་པོའི་དབང་བསྐུར་བས་དབང་བསྐུར་ཏོ། །དེས་བློན་པོ་རྣམས་ལ་བསྒོ་བ། ཆོས་ལྡན་མ་སོད་ཅིག །ཕྱུགས་འདུག་གིས་སྨྲས་པ། ལྷ་མ་བརྟགས་པར་བཀུམ་སྟེ་ཅི་རུང་། ཅི་ཁྱེའུར་བཙའ་བར་འགྱུར་རམ། འོན་ཏེ་བུ་
མོར་འགྱུར་སུས་འཚལ། གལ་ཏེ་ཁྱེའུ་བཙས་པར་གྱུར་ན། དེ་ཉིད་དགུམ་མོད། རྒྱལ་པོ་ཉི་མའི་མུ་ཁྱུད་ཀྱིས་སྨྲས་པ། དེ་བཞིན་དུ་གྱིས་ལ་ཁྱོད་ཁོ་ནས་སྲུངས་ཤིག །དེས་ཁྱིམ་དུ་བཞག་པ་ན་ཟླ་བ་བརྒྱད་དམ་དགུ་ལོན་ནས་ཁྱེའུ་ཞིག་བཙས་སོ། །དེ་ཉིད་ཀྱི་ཉི་མ་ལ་ཉ་པའི་ཆུང་
མ་ཞིག་ལ་བུ་མོ་ཞིག་བཙས་སོ། །དེས་བཙས་མ་ཐག་ཁོ་ནར་ཉ་པའི་ཆུང་མ་ལ་ནོར་གྱིས་བྲིད་དེ་བརྗེས་ནས་ཕྱུགས་འདུག་གིས་རྒྱལ་པོ་ལ་སྨྲས་པ། ལྷ་ཆོས་ལྡན་མ་ལ་བུ་མོ་ཞིག་བཙས་ལགས་སོ། །ལེགས་པ་ཞིག་སྨྲས་སོ། །ཁྱེའུ་དེ་ཉ་པའི་ཆུང་མས་བསྣུན་བསྙོད་གསོས་ཏེ་

ཆེན་པོར་གྱུར་ནས་ཡིག་འབྲུ་དང་བཀླག་པ་བསླབས་ཏེ། སྙན་དངགས་བྱ་བར་བརྩམས་ནས་དེའི་མིང་ཉ་པའི་ཁྱེའུ་སྙན་དངགས་མཁན་ཉ་པའི་ཁྱེའུ་སྙན་དངགས་མཁན་ཞེས་བྱ་བར་གྱུར་ཏོ། །ཕྱུགས་འདུག་གིས་ཆོས་ལྡན་མ་ལ་སྨྲས་པ། ཁྱོད་ལ་ནི་ཁྱེའུ་སྙན་དངགས་མཁན་ཞིག་
བཙས་པར་གྱུར་ཏོ། །དེ་ཅི་འདྲ་བ་ཞིག་ཡིན་རེ་ཞིག་བལྟའོ། །དེས་སྨྲས་པ། དེ་བལྟ་ཅི་དགོས་ཞོག་ཤིག །དེ་བུ་ལ་མངོན་པར་དགའ་ཞིང་བལྟ་འདོད་པས་འདུག་ཏུ་མི་བཏུབ་བོ། །ཕྱུགས་འདུག་གིས་ངེས་པར་གལ་གྱིས་འཆུ་བར་ཤེས་ནས་ཐབས་ཤིག་བཤམས་ཏེ། ཉ་ཞིག་
བསྐུར་ནས་བཏང་ངོ་། །དེ་ནང་དུ་ཞུགས་པ་དེ་ཁོ་ན་ན་མཚན་མཁན་རྣམས་ཀྱིས་ཉ་པའི་ཁྱེའུ་སྙན་དངགས་མཁན་འདི་ནི་རྒྱལ་པོ་སྲོག་དང་ཕྲལ་ཏེ་རང་ཉིད་ཅོད་པན་བཅིངས་ནས་རྒྱལ་སྲིད་བྱེད་པར་འགྱུར་རོ་ཞེས་ལུང་བསྟན་པ་རྒྱལ་པོས་ཐོས་ནས་དེ་བློན་པོ་རྣམས་ལ་བསྒོ་བ། ཅི་ནས་
ཀྱང་དེ་མ་ཤོར་བར་ཟུང་ཤིག །དེས་གཅིག་ནས་གཅིག་ཏུ་བརྒྱུད་པ་ལས་ཐོས་ནས་དེ་ཕན་ཚུན་བྲོས་པ་ལས་རྒན་མོ་ཞིག་གི་ཁྱིམ་དུ་ཞུགས་པ་དང་དེས་དེ་སྦས་ཏེ། དེ་ནས་ཡུང་དང་འབྲུ་མར་གྱིས་ལུས་བསྐུས་ནས་ཁྱོགས་ཀྱི་སྟེང་དུ་བཞག་སྟེ་རོ་ལྟ་བུར་བཅོས་ནས་ཕྱུང་སྟེ་དུར་ཁྲོད་དུ་བོར་
བ་དང་ལངས་ཏེ་བྲོས་པ་ཕྱོགས་དེ་ན་མི་ཞིག་མེ་ཏོག་དང་འབྲས་བུ་ཚོལ་བ་དེས་དེ་བྲོས་པ་མཐོང་ངོ་། །དེའི་ཕྱི་བཞིན་སྙེགས་ཤིང་རྒྱུགས་པའི་མི་རྣམས་ཀྱིས་མི་དེ་ལ་དྲིས་པ་ཀྱེ་ནང་རྗེ་བོང་ཚོད་དང་ཁ་དོག་འདི་འདྲ་བའི་མི་འགའ་ཞིག་ལམ་འདི་ནས་འགྲོ་བ་ཁྱོད་ཀྱིས་མ་མཐོང་ངམ། དེས་སྨྲས་པ།
མཐོང་སྟེ་ལམ་འདི་ནས་སོང་ངོ་། །དེ་རྣམས་དེའི་རྗེས་བཞིན་དུ་དོང་ངོ་། །དེ་ཡང་རི་འོར་དེར་བཙོ་བླག་མཁན་ཞིག་གི་ཁྱིམ་དུ་ཞུགས་ནས་དེ་ལ་ཇི་ལྟར་གྱུར་པ་སྨྲས་པ་དང་། སྙེགས་མའི་མི་རྣམས་ཀྱིས་རི་འོར་བཙལ་བར་བརྩམས་པ་ན་བཙོ་བླག་མཁན་གྱིས་གོས་ཀྱི་ཐུམ་པོའི་ནང་དུ་བཅུག་ནས་
བོང་བུ་ལ་བཀལ་ཏེ་རི་འོར་ནས་ཕྱིར་བྱུང་སྟེ་ཁྲུས་བྱེད་པའི་སར་ཁྱེར་ནས་བཏང་བ་དང་ལངས་ཏེ་ཕྱོགས་བཞིར་བལྟས་ཏེ་བྲོས་སོ། །དེར་ཡང་མི་གཞན་ཞིག་གིས་མཐོང་ནས། དེས་སྙེགས་མའི་མི་རྣམས་ལ་སྨྲས་པ། ཤེས་ལྡན་དག་ཁྱེད་གང་གི་དོན་དུ་རི་འོར་ན་ཚོལ་བའི་མི་དེ་ནི་ལམ་འདི་

ནས་སོང་གིས་མྱུར་དུ་དེང་ཤིག །དེ་རྣམས་དོང་བ་ལས་དེ་ཡང་གྲོང་གཞན་ཞིག་ཏུ་ལྷམ་མཁན་གྱི་ཁྱིམ་ཞིག་ཏུ་ཞུགས་ནས་དེས་དེ་ལ་ཇི་ལྟར་གྱུར་པ་བསྙད་ནས་སྨྲས་པ། མཆིལ་ལྷམ་བོལ་རྟིང་བར་བལྟས་པ་ཞིག་གྱིས་ཤིག །དེས་སྨྲས་པ། བདག་གིས་སྔོན་ལན་འགའ་
ཡང་མཆིལ་ལྷམ་དེ་ལྟ་བུ་བྱེད་མ་མྱོང་ངོ་། །དེས་ཚིགས་སུ་བཅད་དེ་སྨྲས་པ། བློ་གྲོས་སྣ་ཚོགས་རང་བཞིན་དུ་མ་སྟེ། །དེ་དག་སྲང་གཅིག་ཏུ་ནི་གཞལ་བ་མེད། །ལྷམ་མཁན་ཁྱོད་ཀྱིས་ང་ཡི་ཚིག་བཞིན་འདིར། །རྟིང་པ་གང་དེ་མདུན་དུ་ལྟ་བར་གྱིས། །དེས་ལྷམ་མཁན་དེ་ལ་བསླབས་
ནས་ལྷམ་མཁན་གྱིས་དེ་འདྲ་བའི་མཆིལ་ལྷམ་ཞིག་བྱས་སོ། །རི་འོར་དེར་བས་བསྐོར་བ་ཡིན་པས་དེ་མཆིལ་ལྷམ་དེ་གྱོན་ནས། སྟོར་ཁུང་ནས་འཛུལ་ཏེ་བྲོས་སོ། །སྙེགས་མའི་མི་རྣམས་ཀྱིས་མཆིལ་ལྷམ་གྱི་རྗེས་བཞིན་རི་འོར་དེ་ཉིད་བསྐོར་ཏེ་དེ་ཡང་བྲོས་ནས་སོ། །ཆུར་ཞུགས་པ་
དང་ཀླུ་རྣམས་ཀྱིས་གནས་སུ་ཁྲིད་དོ། །རྒྱལ་པོས་གཅིག་ནས་གཅིག་ཏུ་བརྒྱུད་པ་ལས་དེ་ཇི་ལྟར་ཀླུ་རྣམས་ཀྱིས་ཀླུའི་གནས་སུ་ཁྲིད་དོ་ཞེས་ཐོས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ངའི་ཡུལ་ན་སྦྲུལ་ཁས་སྡིགས་ཇི་སྙེད་གནས་པ་དེ་དག་ཐམས་ཅད་ངའི་སྤྱན་
སྔར་ཁུག་ཤིག །དེ་རྣམས་ཀྱིས་ཡུལ་ཐམས་ཅད་ན་གནས་པའི་སྦྲུལ་ཁས་སྡིགས་རྣམས་རྒྱལ་པོ་ལ་ཕུལ་ལོ། །རྒྱལ་པོས་དེ་རྣམས་ལ་བསྒོ་བ། ཤེས་ལྡན་དག་དེང་ལ་ཀླུའི་གནས་ཆེ་གེ་མོ་ཞེས་བྱ་བར་ཀླུ་ཟུང་ཤིག །ལྷ་བཀའ་བཞིན་འཚལ་ཞེས་སྦྲུལ་ཁས་སྡིགས་ཐམས་ཅད་
ཀྱིས་རྒྱལ་པོ་ལས་མཉན་ནས་ཀླུའི་གནས་སུ་དོང་ངོ་། །འབྲོག་གཅིག་ན་གནོད་སྦྱིན་སེར་སྐྱ་ཞེས་བྱ་བ་ཁྲག་དང་ཤ་ཟ་བ་གཅིག་ཡོད་དོ། །དེས་སྐྲག་པས་གཅན་གཟན་རྣམས་ཀྱིས་ཀྱང་འབྲོག་དེ་ཡོངས་སུ་སྤངས་ན་མི་རྣམས་ཀྱིས་ལྟ་སྨོས་ཀྱང་ཅི་དགོས་ཏེ་དེ་སེར་སྐྱའི་འབྲོག་ཅེས་བྱ་བར་གྲགས་
སོ། །སྦྲུལ་ཁས་སྡིགས་རྣམས་ཀྱི་སྔགས་ཀྱི་མཐུས་ཇི་ལྟར་ཀླུ་དེ་ལ་གནོད་པར་འགྱུར་བ་དེ་ལྟར་བྱས་པས་དེ་སྐྲག་ནས་དེ་སེར་སྐྱའི་འབྲོག་དེ་རྒལ་བར་མི་ནུས་པར་བོར་རོ། །ཀླུ་རྣམས་ཀྱིས་གྲོས་བྱས་པ་བདག་ཅག་གིས་འདི་ལྟར་དེ་སེར་སྐྱའི་འབྲོག་ལས་མ་བསྒྲལ་བ་ནི་མ་ལེགས་པ་ཞིག་བྱས་ཏེ།

དེ་ཡང་གནོད་སྦྱིན་སེར་སྐྱས་བསད་ལ་བདག་ཅག་ཀྱང་དེའི་ཕྱིར་གཙེས་པར་འོང་ན་དེ་ལ་ཇི་ལྟར་བསྒྲུབ་པར་བྱ། ཀླུའི་རྒྱལ་པོ་དེས་སྨྲས་པ། དོན་དེ་སྦྲུལ་ཁས་སྡིགས་རྣམས་ལ་རིག་པར་བྱའོ་ཞེས་དེ་རྣམས་ཀྱིས་སྦྲུལ་ཁས་སྡིགས་རྣམས་ལ་སྨྲས་པ། ཤེས་ལྡན་དག་གང་གི་ཕྱིར་བདག་ཅག་
འཁྲུགས་པར་བྱས་པ་དེ་ནི་བདག་ཅག་གིས་ཐབས་ཀྱིས་བསད་པ་ཉིད་དེ་འདི་ལྟར་སེར་སྐྱའི་འབྲོག་ཏུ་བོར་རོ། །སྦྲུལ་ཁས་སྡིགས་རྣམས་ཀྱིས་དོན་དེ་རྒྱལ་པོ་ལ་སྨྲས་པ་དང་། རྒྱལ་པོས་སྨྲས་པ། གལ་ཏེ་དེ་ལྟ་ན་ཡང་འོན་ཀྱང་ཚོལ་ཅིག །དེ་སེར་སྐྱའི་འབྲོག་ན་ཕན་ཚུན་འཁྱམ་པར་
བརྩམས་པ་ན་གནོད་སྦྱིན་སེར་སྐྱ་ཡང་ཕྱོགས་ཤིག་ན་ཁྱི་རྣམས་ཀྱིས་ཡོངས་སུ་བསྐོར་ཏེ་འདུག་གོ། །དེ་དང་ཁྱི་རྣམས་ཀྱིས་དེ་རྒྱང་རིང་པོ་ཁོ་ན་ནས་མཐོང་ནས་དེས་བསམས་པ། ཅི་འདིས་བདག་ཤི་བར་གྱུར་ཏོ་ཞེས་ཐོས་ནས་དེས་ན་དེ་འདིར་འོངས་སམ་སྙམ་མོ། །དེས་དེ་ལ་ཁྱི་
རྣམས་སྦད་པ་ལས་དེ་བྲོས་ཏེ་ཤིང་ལྗོན་པ་ཞིག་ལ་འཛེགས་པ་དང་། ཁྱི་རྣམས་དང་། སེར་སྐྱས་ལྗོན་ཤིང་གི་དྲུང་དུ་བསྡད་དེ། སེར་སྐྱས་སྨྲས་པ། ཀྭའི་ནང་རྗེ་ཁྱོད་ཀྱི་སེར་སྐྱའི་འབྲོག་ན་མི་མ་ཡིན་པ་སེར་སྐྱ་ཞེས་བྱ་བ་གནས་ཏེ། དེར་སོང་བ་གང་ཡིན་པ་དེ་དེས་གསོད་
པར་འགྱུར་རོ་ཞེས་མ་ཐོས་སམ། ཁྱོད་ཀྱི་དུས་ལ་བབ་ཀྱིས་བོབས་ཤིག །དེས་སྨྲས་པ། ཇི་སྲིད་འཚོ་བ་དེ་སྲིད་དུ་འདུག་གོ། །གནོད་སྦྱིན་སེར་སྐྱ་པུས་སྐྱུད་ཀྱིས་བཅིངས་ཏེ་སྒྲིམ་པས་འདུག་ནས་དེ་ཡུར་བ་ན་དེས་དེའི་སྟེང་དུ་གོས་ཤིག་བོར་རོ། །ཁྱི་རྣམས་ཀྱིས་བསམས་པ།
འདི་ནི་མི་དེ་ཁོ་ན་ལྷུང་བ་ཡིན་ནོ་སྙམ་ནས་དེ་རྣམས་ཀྱིས་གནོད་སྦྱིན་སེར་སྐྱ་ཟོས་ནས་དོང་ངོ་། །དེ་ལྗོན་ཤིང་ལས་དལ་གྱིས་དལ་གྱིས་བབས་ཏེ་སོང་ནས་དེ་དེ་དང་དེ་ན་འཁོར་ཞིང་བསམས་པ། བདག་གི་ཞང་པོ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་བ་ཞིག་ཡོད་ཀྱིས་དེའི་དྲུང་དུ་འགྲོའོ་
སྙམ་ནས་དྲང་སྲོང་དེ་ལ་ཡང་རི་འོར་ཞིག་ན་སྐྱེད་མོས་ཚལ་རྩ་བ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་ཤིང་རྣམ་པ་སྣ་ཚོགས་ཚང་ཚིང་གིས་མཛེས་པར་བྱས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ་དེ་རིམ་གྱིས་ཐོས་པ་གཅིག་ནས་གཅིག་ཏུ་བརྒྱུད་དེ་དེའི་

དྲུང་དུ་འོངས་ནས་གཉེན་དུ་འབྲེལ་བས་སྨྲས་ཏེ་འདུག་གོ། །དེར་ཡང་རྒྱལ་པོའི་མི་རྣམས་ཀྱིས་བཙལ་ཏེ་དེ་རྣམས་ཀྱིས་དེ་གཟུང་བར་བརྩམས་པ་ལས་དེས་རིའི་གཡང་ས་ནས་བདག་ཉིད་མཆོངས་སོ། །དེ་མཆོངས་པ་དང་མི་ཞིག་གིས་གཙུག་པུད་ནས་བཟུང་བ་ལས་གཙུག་
པུད་བྱུང་ནས་དེ་ལྷུང་ངོ་། །དེ་རྣམས་ཀྱིས་བསམས་པ་འདི་ནི་ཤི་བས་འདོང་ངོ་ཞེས་གཙུག་པུད་ཁྱེར་ཏེ་རྒྱལ་པོའི་དྲུང་དུ་སོང་ནས། དེ་རྣམས་ཀྱིས་སྨྲས་པ། ལྷ་ཉ་པའི་ཁྱེའུ་སྙན་དངགས་མཁན་དེ་བཀུམ་ནས་གཙུག་པུད་ཀྱང་འདི་ལགས་སོ། །རྒྱལ་པོ་མགུ་ནས་དེས་དེ་རྣམས་ལ་ལོངས་སྤྱོད་
ཀྱིས་བགོ་བཤའ་བྱས་སོ། །དེ་ནས་དྲང་སྲོང་གི་སྐྱེད་མོས་ཚལ་ན་གནས་པའི་ལྷ་གང་ཡིན་པ་དེས་དྲང་སྲོང་དེ་ལ་སྨྲས་པ། ཁྱོད་ཀྱི་ཚ་བོ་ནི་སྡུག་བསྔལ་མི་བཟད་པ་དོག་པ་ཉམ་ང་བ་ཐོབ་ན་མ་དགོངས་སམ། དེས་སྨྲས་པ། གལ་ཏེ་བདག་གིས་མ་བསམས་པར་གྱུར་ན་དེ་རིང་ཉིད་དུ་སྲོག་དང་
བྲལ་བར་འགྱུར་རོ། །དྲང་སྲོང་དེ་ནི་རིག་སྔགས་དང་གསང་སྔགས་འཆང་བ་ཡིན་ཏེ། གང་གིས་ནི་སྐྱེས་པ་བུད་མེད་དུ་འགྱུར་ཞིང་ཕྱིར་ཡང་སྐྱེས་པར་འགྱུར་བ་དེ་ལྟ་བུའི་རིག་སྔགས་ཤེས་པས་དེས་དེ་ལ་རིག་སྔགས་དེ་བསླབས་ཏེ་སྨྲས་པ། ད་ནི་སོང་ལ་འཇིགས་པ་དང་བག་ཚ་བ་མེད་པས་འདུག་
ཤིག །དེས་རིག་སྔགས་ཀྱིས་དཔེས་བསྐྲུན་པར་མི་ནུས་པའི་བུད་མེད་ཀྱི་ཆ་བྱད་དུ་མངོན་པར་སྤྲུལ་ནས་བཱ་རཱ་ཎ་སཱིར་སོང་སྟེ། རྒྱལ་པོའི་སྐྱེད་མོས་ཚལ་ན་འདུག་པ་སྐྱེད་མོས་ཚལ་གྱི་སྲུང་མས་མཐོང་ནས་མཆོག་ཏུ་ངོ་མཚར་སྐྱེས་ཏེ་དེས་མྱུར་བ་མྱུར་བར་སོང་ནས་རྒྱལ་པོ་ཉི་མའི་མུ་ཁྱུད་ལ་སྨྲས་པ།
ལྷ་སྐྱེད་མོས་ཚལ་ན་བུད་མེད་གཟུགས་ཕུན་སུམ་ཚོགས་པ་དར་ལ་བབ་བ་ཞིག་མཆིས་སོ། །དེས་བསྒོ་བ་ཁྲིད་དེ་ཤོག་ཤིག །དེས་དཔལ་གྱི་འབྱོར་བ་ཆེན་པོས་བླངས་ཏེ་རྒྱལ་པོའི་ཕོ་བྲང་དུ་ཁྲིད་ནས་དེ་ལ་རྒྱལ་པོ་ཉི་མའི་མུ་ཁྱུད་ལྷག་པར་ཆགས་པར་གྱུར་པ་དང་དེས་སྐབས་རྙེད་ནས་དབེན་པ་ན་
འདུག་པ་ལ་བསད་དེ་སླར་ཡང་རིག་སྔགས་བཟླས་ཏེ་སྐྱེས་པར་གྱུར་པ་དང་། དེ་ནས་རང་ཉིད་ཀྱིས་ཅོད་པན་བཅིངས་ཏེ་བློན་པོ་ཕྱུགས་འདུག་ལ་གོ་བར་བྱས་ནས་རྒྱལ་སྲིད་ལ་འདུག་གོ། །ལྷས་ཚིགས་སུ་བཅད་དེ་སྨྲས་པ། གང་གིས་མགོ་མ་བཅད་པ་དེ་བསད་མིན། ཕྱིར་ཡང་ལངས་ནས་

ལས་ནི་བྱེད་པར་འགྱུར། །ཇི་ལྟར་སྙན་དངགས་མཁན་དེ་གླགས་རྙེད་ནས། །སྲ་རྩི་ཅན་བུ་ལྟ་བུ་དེ་བསད་ཡིན། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་སྲ་རྩི་ལྡན་གྱི་བུ་ཉི་མའི་མུ་ཁྱུད་ཅེས་བྱ་བ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་སྙན་
དངགས་མཁན་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་འདིས་ང་ལ་ཤར་གཉེར་ལ་ད་ལྟར་ཡང་འདིས་ཤར་གཉེར་རོ། །གཞན་ཡང་ཇི་ལྟར་འདིས་ང་ལ་ཤར་གཉེར་བ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ནོར་བུ་མཁན་གཉིས་ཤིག་གནས་ཏེ་དེ་གཉིས་ཀྱིས་ལམ་པོ་ཆེ་
དང་གྲོང་བགོས་སོ། །དེའི་ཚེ་ཚོང་པ་འབྱོར་པ་ཡོངས་སུ་ཟད་པ་ཞིག་ཡོད་པ་དེ་ནོར་བུའི་སྣོད་ཁྱེར་ནས་རི་འོར་དེར་ཕྱིན་ཏོ། །ད་ནས་ལམ་གྱིས་དུབ་པ་ངལ་སོས་ནས་ནོར་བུ་མཁན་གཅིག་གི་དྲུང་དུ་སོང་སྟེ་སྨྲས་པ། ནོར་བུའི་སྣོད་འདི་རིན་ཐང་ཆོད་ཅིག །དེས་དེའི་རིན་ཐང་ཆུང་ངུ་ཞིག་ཏུ་
བཅད་པ་དང་། དེས་སྨྲས་པ། འདི་ལྟར་ཁོ་བོ་ལོངས་སྤྱོད་ལས་ཉམས་ཀྱང་ཤེས་རབ་ལས་མ་ཡིན་པས་ཁོ་བོས་འདི་ཅི་རི་བ་ལྟ་ཤེས་ན། དེ་སྐད་དུ་སྨྲ་བ་ཅིའི་ཐ་ཚིག །དེ་དེའི་དྲུང་ནས་ལོག་པ་སྟེ། ཅིག་ཤོས་ཀྱི་དྲུང་དུ་སོང་ནས་སྨྲས་པ། ནོར་བུའི་སྣོད་འདི་རིན་ཐང་ཆོད་ཅིག །
དེས་དེའི་རིན་ཐང་ཐོག་ཏུ་བབ་པར་བཅད་ནས་དེས་སྨྲས་པ། འདི་སྙེད་ཀྱི་རིན་ཐང་རེ་ཞིག་བདག་ལ་མི་བདོག་གོ། །དེས་སྨྲས་པ། ཅི་བདོག་པ་དེ་བྱིན་ལ་ཁྱེར་ཅིག །དེས་བླངས་སོ། །ནོར་བུ་མཁན་ཅིག་ཤོས་པོ་དེས་ཐོས་ནས། དེ་མི་བཟོད་པ་སྐྱེས་ཏེ། དེའི་དྲུང་དུ་སོང་ནས་བདག་
གིས་འདི་ཐོག་མར་ཁྱིམ་དུ་ཁྲིད་ཅིང་བདག་གིས་འདིའི་རིན་ཐང་ཡང་བཅད་ན་ཁྱོད་ཀྱིས་ཅིའི་ཕྱིར་བཀུར། དེ་གཉིས་ཕན་ཚུན་འཁོན་བྱུང་བར་གྱུར་ཏོ། །དགེ་སློང་དག་དེ་ཇི་སྙམ་དུ་སེམས། དེའི་ཚེ་དེའི་དུས་ཀྱི་ནོར་བུ་མཁན་ནོར་བུའི་སྣོད་རིན་ཐང་ཆུང་ངུར་གཅོད་པ་གང་ཡིན་པ་དེ་ནི་ལྷ་སྦྱིན་
འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ནོར་བུ་མཁན་ཅིག་ཤོས་རིན་ཐང་ཐོག་ཏུ་བབ་པར་གཅོད་པ་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་ངེད་ཕན་ཚུན་མི་མཐུན་པར་གྱུར་ཏེ། ད་ལྟར་ཡང་ངེད་ཕན་ཚུན་མི་མཐུན་པར་གྱུར་ཏོ། །གཞན་ཡང་ཇི་ལྟར་ངེད་མི་མཐུན་པར་གྱུར་པ་

དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་
མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས་དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་སོ། །བཙས་ནས་དེའི་ཆུང་མ་ཤིའོ། །དེས་བསམས་པ། ཁྱེའུ་གསོར་གཞུག་པའི་ཕྱིར་གཞན་ཞིག་བླང་ངོ་སྙམ་ནས་དེས་གཞན་ཞིག་བླངས་ཏེ། དེ་
དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དེ་ལས་ཀྱང་ཁྱེའུ་ཞིག་བཙས་ནས་དེ་ཡང་ཤིའོ། །ཁྱིམ་བདག་དེས་བསམས་པ། གལ་ཏེ་གཞན་བླངས་ན་དེ་ཡང་ཤི་བར་འགྱུར་གྱིས་ཁྱེའུ་ཕུ་བོ་ཤོས་ཀྱི་ཁྱིམ་དབུབ་པར་བྱའོ་སྙམ་ནས་དེའི་ཁྱེའུ་ཕུ་བོ་ཤོས་ཀྱི་
ཁྱིམ་ཕུབ་པ་ལས་དེ་ལས་ཁྱེའུ་དང་བུ་མོ་མང་དུ་བཙས་སོ། །དེའི་ཆུང་མ་དེས་སྨྲས་པ། རྗེའི་སྲས་ཁྱེའུ་འདི་ཁྱོད་ཀྱི་ཅིར་མཆི། དེས་སྨྲས་པ། སྤུན་དུ་འོང་སྟེ་ནུ་བོ་ཡིན་ནོ། །དེས་སྨྲས་པ། རྗེའི་སྲས་ཁྱོད་ལ་ནི་སྲས་མང་ལ། འདི་ནི་གཅིག་པུ་ལགས་ན། འདི་དག་དང་འདིའི་
ཁྱིམ་དང་ལོངས་སྤྱོད་མཉམ་པར་སྩལ་ལམ། དེས་སྨྲས་པ། བཟང་མོ་འདི་ནི་འཇིག་རྟེན་གྱི་ཆོས་ཡིན་ནོ། །དེས་སྨྲས་པ། རྗེའི་སྲས་གལ་ཏེ་དེ་ལྟ་ན་འདི་ཁུམ་ཤིག །འདོད་པ་ལ་སོ་སོར་སེན་པ་ནི་སྡིག་པའི་ལས་མི་བྱེད་པ་ཅི་ཡང་མེད་པས་དེས་དེ་མེ་ཏོག་དང་འབྲས་བུ་ལ་བྲིད་ནས་
དགོན་པར་ཁྲིད་དེ་རྡོས་བསྣུན་ཏེ་བསད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གི་བུ་ཕུ་བོ་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ནུ་བོ་ཤོས་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་འདིས་ང་ལ་མི་མཐུན་པར་བྱས་སོ། །ད་
ལྟར་ཡང་འདིས་ང་ལ་མི་མཐུན་པར་བྱས་སོ། །གཞན་ཡང་ངེད་ཇི་ལྟར་མི་མཐུན་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་བྲམ་ཟེ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་

མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཆུང་མ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་བུ་མོ་གཟུགས་བཟང་བ་བལྟ་ན་སྡུག་པ་མཛེས་པ་ཞིག་བཙས་སོ། །བྲམ་ཟེ་དེས་བསམས་པ། དེ་རིང་
བདག་གི་ཁྱིམ་དུ་བྲམ་ཟེ་སུ་བསོད་སྙོམས་ཀྱི་ཕྱིར་ཞུགས་པ་དེ་ལ་བུ་མོ་འདི་བསོད་སྙོམས་ཀྱི་གོར་སྦྱིན་ནོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་ཞིག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་ནས་བཀྲ་ཤིས་པར་གྱུར་ཅིག །བསོད་སྙོམས་བྱིན་ཅིག །བྲམ་ཟེ་དེས་དེ་ལ་བོས་ཏེ་སྨྲས་པ།
བྲམ་ཟེའི་ཁྱེའུ་བུ་མོ་གཞོན་ནུ་འདི་བདག་གིས་ཁྱོད་ལ་བསོད་སྙོམས་ཀྱི་གོར་སྦྱིན་ནོ། །དེས་སྨྲས་པ། དེ་རིང་མི་བླང་གི་ཉི་མ་དང་ཡུད་ཙམ་དག་བསྟུན་ནས་བླང་ངོ་ཞེས་སོང་ངོ་། །ཇི་ཙམ་ན་བྲམ་ཟེའི་ཁྱེའུ་གཞན་ཞིག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་ནས་བཀྲ་ཤིས་པར་
གྱུར་ཅིག །བསོད་སྙོམས་བྱིན་ཅིག །བྲམ་ཟེ་དེས་དེ་ལ་སྨྲས་པ། བྲམ་ཟེའི་ཁྱེའུ་བུ་མོ་གཞོན་ནུ་འདི་བདག་གིས་ཁྱོད་ལ་བསོད་སྙོམས་ཀྱི་གོར་སྦྱིན་ནོ། །དེས་སྨྲས་པ། འདིར་བྲམ་ཟེའི་ཁྱེའུ་གཞན་ཞིག་བསོད་སྙོམས་ལ་ཞུགས་ན་དེ་ལ་ཅིའི་ཕྱིར་མ་བྱིན། དེས་སྨྲས་པ།
དེ་ན་རེ་རྒྱུ་སྐར་མི་བཟང་ཞེས་ཟེར་རོ། །དེས་སྨྲས་པ། གལ་ཏེ་དེ་ལྟར་ན་བླང་བར་བགྱིའོ། །བྲམ་ཟེས་སྨྲས་པ། ཁྱོད་རྒྱུ་སྐར་ལ་ཅིའི་ཕྱིར་མི་སྡོད། དེས་ཚིགས་སུ་བཅད་དེ་སྨྲས་པ། དོན་རྣམས་གྲུབ་པར་གྱུར་ན་ནི། །དེ་དག་ཐམས་ཅད་མཐུན་པ་སྟེ། །རྒྱུ་སྐར་ཐམས་ཅད་བཟང་པོ་
ཡིན། །ཉི་མ་ཐམས་ཅད་དགེ་བ་ཡིན། །རྒྱུ་སྐར་རྩི་བ་ལྷུར་ལེན་པའི། །མི་རྣམས་དོན་ནི་ཉམས་འགྱུར་ཏེ། །འདི་ཡི་དོན་ནི་རྒྱུ་སྐར་ཡིན། །སྐར་མ་རྣམས་ཀྱིས་ཅི་ཞིག་བྱ། །ཞེས་སྨྲས་ནས་དེས་ཁྱེར་ཏེ་སོང་ངོ་། །བྲམ་ཟེ་གཞན་པོ་དེས་བྲམ་ཟེ་དེ་ལས་བྲམ་ཟེ་ཆེ་གེ་མོ་
ཞེས་བྱ་བས་བུ་མོ་ཁྱེར་རོ་ཞེས་ཐོས་ནས་དེ་དེའི་དྲུང་དུ་སོང་སྟེ་སྨྲས་པ། བྲམ་ཟེའི་ཁྱེའུ་བདག་གི་བུ་མོ་དེ་སྔར་ཐོབ་ཟིན་ན་ཁྱོད་ཀྱིས་ཅིའི་ཕྱིར་བཀུར། དེས་སྨྲས་པ། རྒྱུ་སྐར་རྩི་བ་ལྷུར་ལེན་པ་ཁྱོད་རེ་ཞིག་རྒྱུ་སྐར་ལ་རྟོགས་ཤིག །ཁོ་བོ་ལ་ནི་རྒྱུ་སྐར་བཟང་ངོ་ཞེས་བྱས་པ་དང་དེ་

ཁྲོས་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་སྔ་མ་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་ཕྱི་མ་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེ་ན་ཡང་འདི་ང་ལ་མི་
མཐུན་པར་གྱུར་ཏོ། །ད་ལྟར་ཡང་འདི་ང་དང་མི་མཐུན་པར་གྱུར་ཏོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་རྒྱལ་པོ་མ་སྐྱེས་དགྲའི་གླང་པོ་ཆེ་གདུག་པ་ནོར་སྐྱོང་ཞེས་བྱ་བ་ཞིག་ཡོད་པ་དེ་ཉིན་རེ་ཞིང་ཁྱིམ་ནས་བྱུང་
བ་ན་སྐྱེ་བོ་མང་པོ་ཁ་འདོག་པར་བྱེད་དོ། །རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཀྱིས་རྒྱལ་པོ་མ་སྐྱེས་དགྲ་ལ་གསོལ་བ་བཏབ་པ། ལྷ་གླང་པོ་ཆེ་གདུག་པ་ནོར་སྐྱོང་གདུགས་རེ་ཞིང་གནས་ནས་བྱུང་བ་ན་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་སྐྱེ་བོ་མང་པོ་
ཁ་འདོག་པར་བགྱིད་ཀྱིས། ལྷས་གླང་པོ་ཆེའི་འདུལ་མཁན་རྣམས་ལ་བཀའ་སྩལ་ཏེ་ཅི་ནས་གདུགས་རེ་ཞིང་མི་འབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་སུ་སྩལ་བའི་རིགས་སོ། །རྒྱལ་པོས་སྨྲས་པ། དེ་བཞིན་དུ་བྱས་ཁྱེད་དེང་ཤིག །རྒྱལ་པོས་བློན་པོ་རྣམས་ལ་བསྒོ་
བ། ཤེས་ལྡན་དག་གླང་པོ་ཆེའི་འདུལ་མཁན་རྣམས་ཁུག་ཤིག །དེ་རྣམས་ཀྱིས་གླང་པོ་ཆེའི་འདུལ་མཁན་རྣམས་བཀུག་པ་དང་། རྒྱལ་པོས་སྨྲས་པ། ཤེས་ལྡན་དག་རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཀྱིས་ང་ལ་གསོལ་བ། གླང་པོ་ཆེ་གདུག་པ་ནོར་སྐྱོང་
གདུགས་རེ་ཞིང་གནས་ནས་བྱུང་བ་ན་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་རྣམས་སུ་སྐྱེ་བོ་མང་པོ་ཁ་འདོག་པར་བགྱིད་ཀྱིས། ལྷས་གླང་པོ་ཆེ་འདུལ་མཁན་རྣམས་ལ་བཀའ་སྩལ་ཏེ། ཅི་ནས་གདུགས་རེ་ཞིང་མི་དབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་སུ་སྩལ་བའི་རིགས་
སོ་ཞེས་གསོལ་གྱིས། ཁྱེད་ཀྱིས་དེ་ཉིན་རེ་ཞིང་མ་དབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་ཤིག །ལྷ་བཀའ་བཞིན་འཚལ་ཞེས་གླང་པོ་ཆེའི་འདུལ་མཁན་རྣམས་ཀྱིས་རྒྱལ་པོ་མ་སྐྱེས་དགྲ་ལས་མཉན་ནས་རྐང་པ་ལ་གཏུགས་ཏེ་དོང་ངོ་། །རྒྱལ་པོའི་ཁབ་ན་ཁྱིམ་བདག་ཕྱུག་

པ་ནོར་མང་བ་ལོངས་སྤྱོད་ཆེ་བ་ཞིག་གནས་པ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་སོ། །ལྷ་སྦྱིན་གྱིས་ཇི་ལྟར་ཁྱིམ་བདག་ཆེ་གེ་མོ་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་
དྲངས་པ་ཐོས་ནས་དེས་གླང་པོ་ཆེའི་འདུལ་མཁན་ལ་མུ་ཏིག་གི་དོ་ཤལ་བརྒྱ་སྟོང་རི་བ་བྱིན་ནས་སྨྲས་པ། ཁྱིམ་བདག་ཆེ་གེ་མོས་དགེ་སྦྱོང་གཽ་ཏ་མ་ཉན་ཐོས་ཀྱི་དགེ་འདུན་དང་ཐབས་ཅིག་སང་ཁྱིམ་དུ་གདུགས་ཚོད་ལ་སྤྱན་དྲངས་ཀྱིས་དེ་ལ་ཁྱོད་ཀྱིས་གླང་པོ་ཆེ་ནོར་སྐྱོང་རྦོད་ཅིག །དེས་
སྨྲས་པ། འཕགས་པ་དེ་བཞིན་དུ་བགྱི་ལགས་ཀྱིས། འོན་ཀྱང་འོལ་བྱི་ལྷ་ལ་ཡང་མཁྱེན་པར་མཛོད་ཅིག །དེ་ནས་ལྷ་སྦྱིན་རྒྱལ་པོ་མ་སྐྱེས་དགྲ་གང་ན་བ་དེར་སོང་སྟེ་ཕྱིན་ནས། རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཁྱོད་ཀྱིས་ནི་བདག་སངས་རྒྱས་ཉིད་དུ་གཞུག་
མ་ནུས་ན་ཁྱོད་ཀྱིས་ཡབ་སྲོག་དང་བྲལ་ནས་རྒྱལ་སྲིད་ལ་འདུག་ན་བདག་གིས་ཀྱང་དགེ་སྦྱོང་གཽ་ཏ་མ་བསད་ལ་ཐམས་ཅད་མཁྱེན་པ་ཉིད་བྱས། གླང་པོ་ཆེ་དམ་པ་ནོར་སྐྱོང་རྦོད་ཅིག །མ་སྐྱེས་དགྲས་སྨྲས་པ། ཁྱོད་ཀྱིས་སངས་རྒྱས་བཅོམ་ལྡན་འདས་རྣམས་ནི་མ་ཐུལ་བ་འདུལ་བར་མཛད་
པ་ཡིན་ནོ་ཞེས་མ་ཐོས་སམ། དེས་སྨྲས་པ། གལ་ཏེ་མ་དུལ་བ་འདུལ་བ་ཡིན་པར་གྱུར་ན་འདིས་རེ་ཞིག་བདག་ཁོ་ན་འདུལ་བར་འགྱུར་གྲང་ཞེས་དེས་དེ་ལ་འོལ་བྱི་སྨྲས་ནས། གླང་པོ་ཆེའི་འདུལ་མཁན་རྣམས་ཀྱི་དྲུང་དུ་སོང་སྟེ་སྨྲས་པ། ལྷ་ལ་ཡང་བདག་གིས་རིག་པར་བྱས་ཀྱིས་ཁྱོད་
ཀྱིས་སང་གླང་པོ་ཆེ་དམ་པ་ནོར་སྐྱོང་རྦོད་ཅིག །དེ་ནས་གླང་པོ་ཆེའི་འདུལ་མཁན་རྣམས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་དུ་དྲིལ་བསྒྲགས་ནས་རྒྱལ་པོའི་ཁབ་ན་གནས་པའི་གྲོང་མི་ཤེས་ལྡན་དག་ཉོན་ཅིག །སང་གླང་པོ་ཆེ་དམ་པ་ནོར་སྐྱོང་གཏོང་གིས་དེ་བས་ན་ཁྱེད་ཅག་ཐམས་ཅད་སང་རང་
རང་སྲུང་བ་ལ་སྒྲིམས་ཤིག་ཅེས་བསྒྲགས་པ། ཁྱིམ་བདག་དེས་ཐོས་ནས་བདག་འདྲ་བ་བྱུར་ངན་པ་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་ན་གླང་པོ་ཆེ་གདུག་པ་ནོར་སྐྱོང་ཡང་སང་གཏོང་ན་བདག་གིས་སངས་རྒྱས་ལ་སོགས་པ་དགེ་

སློང་གི་དགེ་འདུན་ཇི་ལྟར་གདུགས་ཚོད་གསོལ་བར་བྱ་སྙམ་སྟེ་སེམས་ཁོང་དུ་ཆུད་ཅིང་འདུག་གོ། །ཡང་བསམས་པ། གཡོས་བྱས་ལ་དེ་ཉིད་དུ་ཁྱེར་ཏེ་བཅོམ་ལྡན་འདས་གདུགས་ཚོད་གསོལ་ལོ་སྙམ་ནས་དེས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་
བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས་བཅོམ་ལྡན་འདས་རྒྱལ་པོའི་ཁབ་ཏུ་དྲིལ་བསྒྲགས་པ། སང་གླང་པོ་ཆེ་དམ་པ་ནོར་སྐྱོང་གཏོང་གིས་ཁྱེད་ཅག་རང་རང་སྲུང་བ་ལ་སྒྲིམས་ཤིག་ཅེས་མཆི་བས། དེ་བས་ན་བཅོམ་
ལྡན་འདས་རྒྱལ་པོའི་ཁབ་ཏུ་མ་གཤེགས་ཤིག །ཞལ་ཟས་དང་བཏུང་བ་འཚལ་ཏེ་བདག་འདི་ཉིད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཁྱོད་སེམས་ལས་ཆུང་ངུར་གྱིས་ལ་ཞལ་ཟས་དང་བཏུང་བ་སྟ་གོན་བྱོས་ཤིག་དང་། དེ་བཞིན་གཤེགས་པ་
ནི་གླང་པོ་ཆེའི་བསྙེངས་པ་དང་བྲལ་བ་ཡིན་པས་ང་ཉན་ཐོས་ཀྱི་དགེ་འདུན་དང་ཐབས་ཅིག་རྒྱལ་པོའི་ཁབ་ཏུ་གཤེགས་སོ། །དེ་ནས་ཁྱིམ་བདག་ཡིད་དགའ་ནས་རང་གི་ཁྱིམ་དུ་སོང་སྟེ་ཞལ་ཟས་དང་བཏུང་བ་སྟ་གོན་བྱས་གདན་བཤམས་ནས་བཅོམ་ལྡན་འདས་ལ་སྡོད་ཅིང་འདུག་གོ། །
དེ་ནས་བཅོམ་ལྡན་འདས་སྔ་དྲོ་ན་བཟའ་ཆོས་གོས་མནབས་ལྷུང་བཟེད་བསྣམས་ཏེ་དགེ་སློང་ལྔ་བརྒྱ་དང་ཐབས་ཅིག་རྒྱལ་པོའི་ཁབ་ཏུ་ཞུགས་པ་ན་གླང་པོ་ཆེ་དམ་པ་ནོར་སྐྱོང་ཡང་རྦད་དོ། །གླང་པོ་ཆེའི་དམ་པ་ནོར་སྐྱོང་གིས་བཅོམ་ལྡན་འདས་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་
འགྱིང་ཞིང་སྐད་ཕྱུང་ནས་བཅོམ་ལྡན་འདས་གང་ན་བ་དེ་ལོགས་སུ་མོད་ལ་ཤུགས་ཅི་ཡོད་པས་བང་ཐག་པས་བརྒྱུགས་སོ། །དེ་ནས་ལྷ་སྦྱིན་མ་སྐྱེས་དགྲའི་གྲོགས་ཅན་སྟེང་གི་ཁང་བཟངས་ཀྱི་གཞིར་འཛེགས་ནས་དགེ་སྦྱོང་གཽ་ཏ་མ་གསོད་པ་ལ་ལྟ་ཞིང་འདུག་གོ། །དེ་ནས་ལྷ་སྦྱིན་གྱིས་བཅོམ་ལྡན་འདས་
དེ་མཐོང་ནས་དགའ་བ་དང་། མགུ་བ་དང་། རབ་ཏུ་དགའ་བས་གསང་བསྟོད་དེ་ཚིགས་སུ་བཅད་པས་སྨྲས་པ། གླང་པོ་ཆེ་ཡི་ལས་བལྟས་ན། །ཁྱོད་ནི་གླང་ཆེན་མཐུས་བརྫིས་ནས། །ཤཱཀྱའི་བུ་ཁྱོད་དེ་རིང་དུ། །ཉན་ཐོས་བཅས་ཏེ་རེ་སྙམ་མེད། །བཅོམ་ལྡན་འདས་ཀྱིས་བཀའ་

སྩལ་པ། ལྷ་སྦྱིན་ངན་ཁྱོད་ང་ལ་ནི། །ཁྱད་གསོད་ཅོ་འདྲི་སྨྲ་བར་བྱེད། །སྟོབས་བཅུའི་སྟོབས་ལྡན་རྨད་བྱུང་བའི། །སྟོབས་ཀྱི་མཐུ་ལ་ད་ལྟོས་ཤིག །དེ་ནས་བཅོམ་ལྡན་འདས་ཀྱིས་ཕྱག་གཡས་པའི་མཐིལ་ནས་སེང་གེ་རལ་པ་ཅན་ལྔ་སྤྲུལ་ཏོ། །དེས་དེ་རྣམས་ཀྱི་དྲི་ཚོར་ནས་
གཅིན་དང་རྟུག་པ་ཤོར་ཏེ་འབྲོས་པར་བརྩམས་པ་ན། བཅོམ་ལྡན་འདས་ཀྱིས་ཉིད་ཀྱི་ཞབས་ཀྱི་དྲུང་གྲང་ཞིང་བསིལ་བར་གྱུར་པ་མ་གཏོགས་པར་ཕྱོགས་ཐམས་ཅད་འབར་རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པར་བྱིན་གྱིས་བརླབས་སོ། །དེ་ནས་གླང་
པོ་ཆེ་དམ་པ་ནོར་སྐྱོང་ཕན་ཚུན་དུ་བརྒྱུག་པར་བརྩམས་པ་ན་བཅོམ་ལྡན་འདས་ཀྱི་ཞབས་ཀྱི་དྲུང་དུ་གྲང་ཞིང་བསིལ་བར་གྱུར་པ་མ་གཏོགས་པར་ཕྱོགས་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། །མེ་ལྕེ་གཅིག་ཏུ་གྱུར་པར་མཐོང་ངོ་། །ནོར་སྐྱོང་འཁྲུགས་པ་མཐོང་
ནས་ཚེ་དང་ལྡན་པ་ཀུན་དགའ་བོ་མ་གཏོགས་པར་དགེ་སློང་ཐམས་ཅད་བྲོས་སོ། །དེ་ནས་ནོར་སྐྱོང་དྲེགས་པའི་ཤུགས་དང་བྲལ་ནས་དལ་གྱིས་འགྲོ་བའི་འགྲོས་ཀྱིས་བཅོམ་ལྡན་འདས་ཀྱི་སྤྱན་སྔར་སོང་བ་དང་། བཅོམ་ལྡན་འདས་ཀྱི་ཕྱག་འཁོར་ལོ་དང་། བཀྲ་ཤིས་དང་། །གཡུང་
དྲུང་འཁྱིལ་བས་བརྒྱན་པ། བསོད་ནམས་བརྒྱ་ཕྲག་དུ་མས་བསྐྱེད་པ། སྐྲག་པ་རྣམས་དབུགས་འབྱིན་པར་མཛད་པས་དེའི་མགོ་ལ་བྱུགས་ནས་ཚིགས་སུ་བཅད་དེ་བཀའ་སྩལ་པ། གླང་ཆེན་གཙོ་བོ་ལ་ནི་ཐོ་མ་འཚམ། །གླང་ཆེན་དེ་ལ་ཐོ་འཚམ་སྡུག་བསྔལ་འགྱུར། །གཙོ་ལ་གནོད་
པ་བྱས་པ་ཕ་རོལ་ཏུ། །འགྲོ་བ་བཟང་པོར་འགྱུར་བ་མ་ཡིན་ནོ། །བཞིན་བཟངས་ཁྱོད་རེ་ཞིག་སྔོན་གྱི་ཉེས་པར་སྤྱད་པས་དམན་པ་དུད་འགྲོའི་སྐྱེ་གནས་སུ་སྐྱེས་ན་ཁྱོད་ད་དུང་གཞན་གྱི་སྲོག་གཅོད་ཅིང་གཞན་གྱི་སྲོག་གཅོད་པས་ཡོངས་སུ་དགའ་བར་བྱེད་པ་འདི་ནས་ཤི་འཕོས་ན་ཁྱོད་ཀྱི་འགྲོ་
བ་ནི་ཅིར་འགྱུར། སྐྱེ་བ་ནི་གང་ཚེ་ཕྱི་མ་ནི་ཅིར་འགྱུར། བཞིན་བཟངས་དེ་ལྟ་བས་ན་འདུ་བྱེད་ཐམས་ཅད་ནི་སྡུག་བསྔལ་བ། ཆོས་ཐམས་ཅད་ནི་བདག་མེད་པ། མྱ་ངན་ལས་འདས་པ་ནི་ཞི་བ་ཡིན་གྱིས། ང་ལ་སེམས་མངོན་པར་དད་པར་གྱིས་ལ་ཅི་ནས་ཀྱང་དུད་

འགྲོའི་སྐྱེས་གནས་ལ་འདོད་ཆགས་དང་བྲལ་བར་གྱིས་ཤིག་ཅེས་བཀའ་སྩལ་ནས་ཁྱིམ་བདག་གི་ཁྱིམ་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །ནོར་སྐྱོང་ཡང་བཅོམ་ལྡན་འདས་ཀྱི་རྗེས་བཞིན་རྗེས་བཞིན་སོང་སྟེ་
བཅོམ་ལྡན་འདས་ནང་དུ་གཤེགས་པ་ན་སྒོ་དྲུང་དུ་སྡོད་པ་ལས་བཅོམ་ལྡན་འདས་མ་མཐོང་ནས་ཁྱིམ་གཞིག་པར་བརྩམས་སོ། །བཅོམ་ལྡན་འདས་ཀྱིས་ཁྱིམ་དེ་ཤེལ་གྱི་རང་བཞིན་དུ་སྤྲུལ་ནས་དེ་ལ་སངས་རྒྱས་ཀྱི་སྐུ་སྒྲིབ་པ་མེད་པར་སྣང་ངོ་། །དེས་བཅོམ་ལྡན་འདས་མཐོང་ནས་དེ་མ་
བཤིག་གོ། །བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་གདུགས་ཚོད་གསོལ་ནས་ཡོན་བསྔོ་བ་མཛད་དེ་གཤེགས་སོ། །དེ་བཅོམ་ལྡན་འདས་ཀྱི་རྗེས་བཞིན་རྗེས་བཞིན་སོང་བའི་སྐབས་དེ་བློན་པོ་རྣམས་ཀྱིས་རྒྱལ་པོ་ལ་རིག་པར་བྱས་སོ། །མ་སྐྱེས་དགྲས་ལྷ་སྦྱིན་
ལ་སྨྲས་པ། ཁྱོད་ཀྱིས་བདག་ལ་གནོད་པ་བྱས་ཏེ། གླང་པོ་ཆེ་དམ་པ་འདི་ལ་བརྟེན་ནས་མཚམས་གཞན་གྱི་རྒྱལ་པོ་རྣམས་ཁོ་བོ་ལ་གནོད་པ་བྱེད་པར་མི་འགྱུར་ན་དེ་ཡང་ཁྱོད་ཀྱིས་དུལ་བར་བྱས་སོ། །དེ་ཅང་མི་སྨྲ་བར་འདུག་གོ། །རྒྱལ་པོས་བློན་པོ་རྣམས་ལ་བསྒོ་བ། གང་
གི་ཚེ་བཅོམ་ལྡན་འདས་ཕྱིར་བྱུང་བར་གྱུར་པ་དེའི་ཚེ་གླང་པོ་ཆེ་དམ་པ་ནོར་སྐྱོང་ཇི་ལྟར་ཡང་ཁྱོད་ཀྱིས་བཅོམ་ལྡན་འདས་ཀྱི་ཕྱི་བཞིན་འབྲང་བར་མི་འགྱུར་བར་སྒོ་ཆོད་ལ་ཞོག་ཤིག །བློན་པོ་རྣམས་ཀྱིས་གླང་པོ་ཆེ་འདུལ་མཁན་རྣམས་ལ་བསྒོ་བ། གླང་པོ་ཆེ་དམ་པ་ནོར་སྐྱོང་ཇི་ལྟར་ཡང་བཅོམ་
ལྡན་འདས་ཀྱི་ཕྱི་བཞིན་འགྲོ་བར་མི་འགྱུར་བར་སྒོ་ཆོད་ལ་ཞོག་ཤིག །དེས་བཅོམ་ལྡན་འདས་མ་མཐོང་ནས་རྡོག་པས་སྣ་བརྫིས་ནས་ཤི་བ་དང་རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་སོ།། །།འདུལ་བ་གཞི། བམ་པོ་བརྒྱ་རྩ་བཞི་པ། ཆོས་ཉིད་ཀྱིས་ལྷའི་བུའམ་ལྷའི་བུ་མོ་
ནི་སྐྱེས་ནས་རིང་པོར་མ་ལོན་པར་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །དེས་གླང་པོ་ཆེ་ལས་ཤི་འཕོས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་པ་དང་། བཅོམ་ལྡན་འདས་ལ་སེམས་

མངོན་པར་དད་པར་བྱས་པ་ཡིན་པར་མཐོང་ནས། དེ་ནས་སྔོན་གླང་པོ་ཆེ་བྱེད་བྱེད་པའི་ལྷའི་བུ་འདི་སྙམ་དུ་སེམས་ཏེ། བདག་ཞག་ལོན་ནས་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་གི་ཆ་མ་ཡིན་གྱིས། མ་ལ་བདག་གིས་ཞག་མ་ལོན་པར་བཅོམ་ལྡན་འདས་ལ་བལྟ་བ་དང་བསྙེན་
བཀུར་བྱ་བའི་ཕྱིར་འགྲོའོ་སྙམ་མོ། །དེ་ནས་སྔོན་གླང་པོ་ཆེ་བྱེད་བྱེད་པའི་ལྷའི་བུ་རྣ་ཆ་དྲི་མ་མེད་ཅིང་གཡོ་བ་ཐོགས་ལ། དོ་ཤལ་དང་སེ་མོ་དོས་ལུས་བརྒྱན་ནས་དེ་ཉིད་ཀྱི་མཚན་མོ་ལྷ་རྣམས་ཀྱི་མེ་ཏོག་ཨུཏྤལ་དང་། པད་མ་དང་། ཀུ་མུད་དང་། པད་མ་དཀར་པོ་དང་། མན་དཱ་ར་
བ་རྣམས་ཀྱིས་ཐུ་བ་བཀང་སྟེ། འོད་མའི་ཚལ་བྱ་ཀ་ལན་ད་ཀའི་གནས་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་།
བག་ལ་ཉལ་དང་། ཁམས་དང་། རང་བཞིན་མཁྱེན་ནས་གང་ཐོས་པས་འཕགས་པའི་བདེན་པ་བཞི་སོ་སོར་ཡང་དག་པར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས་སྔོན་གྱི་གླང་པོ་ཆེ་ལྷའི་བུས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་
བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ལ་ཕས་མ་བགྱིས་ཏེ། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྡུག་པས་
མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། སྔོན་གྱི་འདས་པས་མ་ལགས། དགེ་སྦྱོང་དང་བྲམ་ཟེས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ།
ངན་སོང་གི་སྒོ་རྣམས་ནི་བཀུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། བདག་ལྷ་དང་མི་རྣམས་སུ་ནི་བཞག །ཡང་གསོལ་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་བཞིན་བདག་

གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་
ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་
གཡས་ནས་གཡོན་དུ་བསྐོར་བྱས་ནས། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་གླང་པོ་ཆེ་བྱེད་བྱེད་པའི་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཐོག་ལེགས་པ་ལྟ་བུ་དང་། དཔའ་བོ་གཡུལ་ངོ་རྒྱལ་བ་ལྟ་བུ་དང་། ནད་པ་
ནད་ཐམས་ཅད་ལས་ཡོངས་སུ་ཐར་བ་ལྟ་བུར་འབྱོར་པ་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་འབྱོར་པ་དེ་ཉིད་ཀྱིས་རང་གི་གནས་སུ་སོང་ངོ་། །དགེ་སློང་རྣམས་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་པས་གནས་པ་ན། དེ་རྣམས་
ཀྱིས་བཅོམ་ལྡན་འདས་ཀྱི་སྤྱན་སྔ་ན་སྣང་བ་རྒྱ་ཆེན་པོ་མཐོང་ངོ་། །མཐོང་ནས་ཀྱང་ཡིད་གཉིས་སུ་གྱུར་ཏེ་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་བཅོམ་ལྡན་འདས་ལ་བལྟ་བའི་སླད་དུ་མི་མཇེད་ཀྱི་བདག་པོ་ཚངས་པའམ། ལྷ་རྣམས་
ཀྱི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ང་བལྟ་བའི་ཕྱིར་འོངས་པ་ནི་མི་མཇེད་ཀྱི་བདག་པོ་ཚངས་པ་ཡང་མ་ཡིན། །ལྷ་རྣམས་ཀྱི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་
སྐྱོང་བ་བཞི་ཡང་མ་ཡིན་ཏེ། དེ་ལྟ་མོད་ཀྱི་དགེ་སློང་དག་ཁྱེད་ཀྱིས་གླང་པོ་ཆེ་དམ་པ་ནོར་སྐྱོང་ཞེས་བྱ་བ་འདི་ལྟར་གདུག་པ། འདི་ལྟར་གཏུམ་པ་དེས་དེ་བཞིན་གཤེགས་པ་བགྲོངས་པའི་ཕྱིར་ཕ་རོལ་གནོན་པ་བྱས་པ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ངས་དེ་

བཏུལ་ནས་ང་ལ་མངོན་པར་དད་པར་བྱས་ཏེ་ཤི་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པ་ཡིན་ཏེ། དེ་མདང་སུམ་ངའི་སྤྱན་སྔར་འོངས་ནས་ངས་དེ་ལ་ཆོས་བཤད་དེ་བདེན་པ་མཐོང་བར་བྱས་ནས་རང་གི་གནས་སུ་སོང་བ་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་
ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ནོར་སྐྱོང་གིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་དུད་འགྲོར་སྐྱེས་ལགས། ལས་ཅི་ཞིག་བགྱིས་ན་དེས་ན་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ནས་བདེན་པ་མཐོང་བར་བགྱིས་ལགས། བཅོམ་
ལྡན་འདས་ཀྱིས་བཀའ་སྩལ་པ། དགེ་སློང་དག་ནོར་སྐྱོང་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་ཞེས་བྱ་བ་ནས། ལུས་ཅན་དག་ལ་འབྲས་
བུར་འགྱུར། །ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་