Kinh tạng Tây Tạng (Kangyur Đại Học) — 004_འདུལ་བ།_ང

ན་པ་དང་ལྡན་པ། བདག་ཉིད་

གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་དག་མངོན་སུམ་དུ་མཛད་པར་གྱུར་ཏོ། །ཆོས་དེ་དག་མངོན་སུམ་དུ་མཛད་ནས་ཡང་སྒྱུ་རྩལ་ཤེས་ཀྱི་བུ་རིང་དུ་འཕུར་གང་ན་བ་དེར་གཤེགས་ཏེ་བྱོན་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་ལ་འདི་སྐད་ཅེས་གསུངས་སོ། །
རིང་དུ་འཕུར་ཁྱོད་ཀྱིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་འདི་དག་རང་གི་མངོན་པར་ཤེས་པས་མངོན་སུམ་དུ་བྱས་སམ། དེས་འདི་སྐད་ཅེས་སྨྲས་སོ། །ཚེ་དང་ལྡན་པ་གཽ་ཏ་མ་མད་དེ། བདག་གིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་མངོན་སུམ་དུ་བྱས་སོ། །
བྱང་ཆུབ་སེམས་དཔས་གསུངས་པ། ཚེ་དང་ལྡན་པ་རིང་དུ་འཕུར་བདག་གིས་ཀྱང་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་རང་གི་མངོན་པར་ཤེས་པས་མངོན་སུམ་དུ་བྱས་སོ། །ཚེ་དང་ལྡན་པ་གཽ་ཏ་མ་དེ་ལྟ་ན་ཁྱོད་ཀྱི་ཇི་ཙམ་པ་བདག་གི་ཡང་དེ་ཙམ་ལ། བདག་གི་ཇི་ཙམ་
པ་ཁྱོད་ཀྱི་ཡང་དེ་ཙམ་པས་དོན་འདི་ལའོ་སྐོལ་མཚུངས་ཤིང་མཉམ་སྟེ་འདྲ་བར་ཐོབ་ཀྱིས་ཚུར་སྤྱོན་འོ་སྐོལ་གཉི་གས་འཁོར་འདི་ཡོངས་སུ་དྲང་བར་བགྱིའོ། །དེ་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་བྱང་ཆུབ་སེམས་དཔའི་ཐོག་མའི་སློབ་དཔོན་ཉིད་ཀྱིས་བྱང་ཆུབ་སེམས་དཔའ་
ལ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་དོ། །དེའི་རྟོགས་པ་དག་ལ་ཡང་དགའ་བ་དང་མགུ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ནི་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་
དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་དཔས་ལམ་དེ་ནུས་པ་མེད་པར་རིག་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་ནས་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ། །ལྷག་སྤྱོད་གལ་ཏེ་ཁྱོད་ལ་མི་
བདེ་བ་མེད་ན་ཁྱོད་ཀྱི་དྲུང་དུ་ང་ཚངས་པར་སྤྱོད་པ་སྤྱད་དོ། །དེས་གསོལ་པ་ཚེ་དང་ལྡན་པ་གཽ་ཏ་མ་བདག་ལ་མི་བདེ་བ་མེད་ཀྱིས་ཁྱོད་ཅི་བདེ་བ་ཁོ་ནར་བཞུགས་ཤིག །ཁྱོད་ཀྱིས་ཆོས་ཇི་སྙེད་ཅིག་མངོན་སུམ་དུ་བྱས་ཚེ་དང་ལྡན་པ་གཽ་ཏ་མ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་

ཀྱི་བར་དུའོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། རངས་བྱེད་ཀྱི་བུ་ལྷག་སྤྱོད་དད་པ་ལ་ནི་བདག་ཀྱང་དད་ལ་རངས་བྱེད་ཀྱི་བུ་ལྷག་སྤྱོད་ལ་བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཡོད་པ་ལྟ་བུའི་བརྩོན་འགྲུས་དང་། དྲན་པ་དང་།
ཏིང་ངེ་འཛིན་དང་། ཤེས་རབ་ནི་བདག་ལ་ཡོད་ན་རངས་ཁྱེད་ཀྱི་བུ་ལྷག་སྤྱོད་ཀྱིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་སྙེད་ཅིག་མངོན་སུམ་དུ་བྱས་ན་བདག་གིས་ཀྱང་ཅིའི་ཕྱིར་ཆོས་འདི་དག་མངོན་སུམ་དུ་མི་བྱ་སྙམ་མོ། །དེ་ནས་བྱང་ཆུབ་སེམས་དཔས་ཆོས་
དེ་རྣམས་ཁོ་ན་མ་ཐོབ་པ་ཐོབ་པར་བྱ་བའི་ཕྱིར་དང་། མ་རྟོགས་པ་རྟོགས་པར་བྱ་བའི་ཕྱིར་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་ཏེ། གཅིག་པུ་དབེན་པ་བག་ཡོད་པ་རྟུན་པ་དང་ལྡན་
པ། བདག་ཉིད་གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་མངོན་སུམ་དུ་མཛད་པར་གྱུར་ཏོ། །ཆོས་དེ་མངོན་སུམ་དུ་མཛད་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་པ་དང་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ། །ལྷག་སྤྱོད་ཁྱོད་
ཀྱིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་དུ་ཆོས་འདི་དག་རང་གིས་མངོན་སུམ་དུ་བྱས་སམ། ཚེ་དང་ལྡན་པ་གཽ་ཏ་མ་མད་ལགས་ཏེ་བདག་གིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་དག་མངོན་སུམ་དུ་བགྱིས་སོ། །བྱང་ཆུབ་སེམས་དཔས་
གསུངས་པ། ཚེ་དང་ལྡན་པ་ལྷག་སྤྱོད་བདག་གིས་ཀྱང་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་དག་རང་གིས་མངོན་སུམ་དུ་བྱས་སོ། །ཚེ་དང་ལྡན་པ་གཽ་ཏ་མ་དེ་ལྟ་ན་ཁྱོད་ཀྱི་ཇི་ཙམ་པ་བདག་གི་ཡང་དེ་ཙམ་ལ། བདག་གི་ཇི་ཙམ་པ་ཁྱོད་ཀྱི་ཡང་དེ་ཙམ་པས་
དོན་འདི་ལ་འོ་སྐོལ་མཚུངས་ཤིང་མཉམ་སྟེ་འདྲ་བ་ཐོབ་ཀྱིས་ཚུར་སྤྱོན་འོ་སྐོལ་གཉི་གས་ཚོགས་འདི་ཡོངས་སུ་དྲང་བར་བགྱིའོ། །དེ་ནས་རངས་བྱེད་ཀྱི་བུ་ལྷག་སྤྱོད་བྱང་ཆུབ་སེམས་དཔའི་ཐོག་མའི་སློབ་དཔོན་གྱིས་བྱང་ཆུབ་སེམས་དཔའ་ལ་རྗེད་པ་དམ་པས་རྗེད་ཅིང་མཆོད་པའི་དམ་

པས་མཆོད་དོ། །དེའི་ཤེས་པ་རྣམས་ལ་ཡང་དགའ་བ་དང་མགུ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ནི་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་
པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་དཔའ་ལམ་དེ་ཡང་ནུས་པ་མེད་པར་རིག་ནས་གཤེགས་སོ། །རྒྱལ་པོ་ཟས་གཙང་བུའི་མྱ་ངན་གྱིས་རྟག་ཏུ་གདུངས་ནས་བྱང་ཆུབ་སེམས་དཔའ་བཙལ་བའི་ཕྱིར་ཕོ་ཉ་བཏང་བ་ལས། དེས་ཇི་ལྟར་གཞོན་ནུ་དོན་ཐམས་
ཅད་གྲུབ་པ་རངས་བྱེད་ཀྱི་བུ་ལྷག་སྤྱོད་དང་ལྷན་ཅིག་བཞུགས་པ་ལས་རྒྱལ་པོའི་ཁབ་ནས་ཕྱིར་བྱུང་སྟེ་རིམ་གྲོ་པ་མེད་པར་འཁྱམ་མོ་ཞེས་ཐོས་སོ། །ཐོས་ནས་རིམ་གྲོ་བྱེད་པ་སུམ་བརྒྱ་བཏང་ངོ་། །གྲོང་ཁྱེར་ལྷས་བསྟན་དུ་ཤཱཀྱ་ལེགས་པར་རབ་སད་ཀྱིས་ཀྱང་དེ་བཞིན་དུ་ཐོས་
ནས་དེས་ཀྱང་རིམ་གྲོ་བྱེད་པ་ཉིས་བརྒྱ་བཏང་ངོ་། །དེ་ནས་བྱང་ཆུབ་སེམས་དཔའ་རིམ་གྲོ་པ་ལྔ་བརྒྱས་ཡོངས་སུ་བསྐོར་ནས་དཀའ་ཐུབ་ཀྱི་ནགས་སུ་རྒྱུ་བ་ན་དེས་དགོངས་པ། དཀའ་ཐུབ་ཀྱི་ནགས་གང་བར་སྤྱོད་ཅིང་གནས་པས་ན་བདུད་རྩི་ཐོབ་པར་མི་ནུས་ཀྱིས། མ་ལ་བདག་
གིས་རིམ་གྲོ་བྱེད་པ་ལྔ་ཞིག་བླངས་ལ་ལྷག་མ་ནི་དགྱེའོ་སྙམ་ནས་དེས་ཡུམ་གྱི་ཕྱོགས་ལས་གཉིས། ཡབ་ཀྱི་ཕྱོགས་ནས་གསུམ་ཁྲིད་དེ། དེ་རྣམས་ཀྱིས་དེའི་རིམ་གྲོ་བྱེད་དོ། །དེ་ནས་བྱང་ཆུབ་སེམས་དཔའ་རིམ་གྲོ་པ་ལྔས་ཡོངས་སུ་བསྐོར་ཏེ་ག་ཡཱའི་ལྷོ་ཕྱོགས་ན་ལྟེང་
རྒྱས་འོད་སྲུང་གི་སྡེའི་གྲོང་རྡལ་གང་ན་བ་དེར་རྒྱུ་ཞིང་གཤེགས་ཏེ་བྱོན་ནས་དེ་ཕན་ཚུན་དུ་འཆག་པ་ན་ས་ཕྱོགས་དགའ་དགའ་ལྟར་འདུག་པ། ནགས་ཚང་ཚིང་མཛེས་པ། ཆུ་ཀླུང་ནཻ་རཉྫ་ན་བསིལ་བར་འབབ་པ། གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་
སྔོན་པོ་དང་ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་གཟིགས་སོ། །གཟིགས་ནས་ཀྱང་འདི་སྙམ་དུ་དགོངས་ཏེ། ཀྱེ་མའོ་ས་ཕྱོགས་འདི་ནི་དགའ་དགའ་ལྟར་འདུག་པ། ནགས་ཚང་ཚིང་མཛེས་པ། ཆུ་ཀླུང་ནཻ་རཉྫ་ན་བསིལ་བར་འབབ་པ།

གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་སྔོན་པོ་དང་། ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་སྟེ། ཀྱེ་མ་སྤོང་བ་དོན་དུ་གཉེར་བའི་རིགས་ཀྱི་བུས་ནགས་ཁྲོད་འདིར་བརྟེན་ན་སྤོང་བ་བྱ་བར་ནུས་སོ། །བདག་སྤོང་བ་དོན་དུ་གཉེར་བ་
ཡིན་པས་མ་ལ་བདག་གིས་ཀྱང་ནགས་ཁྲོད་འདིར་བརྟེན་ལ་སྤོང་བ་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་ནགས་ཁྲོད་དུ་ཞུགས་ཏེ་ཤིང་ཞིག་གི་དྲུང་དུ་བཞུགས་ནས་ཚེམས་ལ་ཚེམས་གཏད། ལྗགས་རྐན་ལ་བཅར་ནས་ཐུགས་ཀྱིས་ཐུགས་མངོན་དུ་བཟུང་། མངོན་དུ་
བསྡམས། ཤིན་ཏུ་མངོན་དུ་བསྡམས་སོ། །དེ་ཐུགས་ཀྱིས་ཐུགས་མངོན་དུ་བཟུང་། མངོན་དུ་བསྡམས། ཤིན་ཏུ་མངོན་དུ་བསྡམས་པས་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཏེ། དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བ་ཞིག་ཕྱིང་ཀ་ལོག་ཏུ་བཟུང་།
མངོན་དུ་བསྡམས། ཤིན་ཏུ་མངོན་དུ་བསྡམས་ན་དེའི་བ་སྤུའི་ཁུང་བུ་ཐམས་ཅད་ནས་རྡུལ་འབྱུང་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཚེམས་ལ་ཚེམས་གཏད། ལྗགས་རྐན་ལ་བཅར་ཏེ་ཐུགས་ཀྱིས་ཐུགས་མངོན་དུ་བཟུང་། མངོན་དུ་བསྡམས། ཤིན་ཏུ་མངོན་དུ་བསྡམས་པ་
ན་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་
སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་
བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་རླུང་ཐམས་ཅད་སྤྱི་བོའི་ནང་དུ་སོང་ནས། དེ་དེའི་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ། །དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་སྤྱི་བོར་ལྕགས་ཀྱི་ཕུར་པ་
རྣོན་པོས་བཏབ་ན་དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།
སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་
སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་
སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པས་རླུང་ཐམས་ཅད་སྙན་གཉིས་ཀྱི་བུ་
གནས་རྒྱུས་པར་གྱུར་ཏོ། །དཔེར་ན་མགར་བས་སྦུད་པ་བུས་ན་རླུང་ཐམས་ཅད་ཀྱི་རྒྱུན་གྲྭ་གཉིས་ཀྱི་བུ་གནས་རྒྱུ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་རླུང་ཐམས་ཅད་ཀྱི་རྒྱུན་སྙན་གཉིས་ཀྱི་བུ་གནས་རྒྱུས་པར་གྱུར་
ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་

ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་པར་ཡང་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་
མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་
དབུགས་རྔུབ་པ་དང་འབྱུང་བ་བགགས་པས་ཕྱལ་གྱི་ནང་ཐམས་ཅད་རྒྱས་པར་གྱུར། ཤིན་ཏུ་རྒྱས་པར་གྱུར་ཏོ། །དཔེར་ན་མགར་བའི་སྦུད་པ་བུས་ན་གང་བར་གྱུར། ཤིན་ཏུ་གང་བར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་
དག་ལ་སྙོམས་པར་ཞུགས་པ་ན་ཕྱལ་གྱི་ནང་ཐམས་ཅད་རྒྱས་པར་གྱུར། ཤིན་ཏུ་རྒྱས་པར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་
གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་
ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་
ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་དེའི་ཚེ་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ། །དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་མགོ་འབྲེང་བས་ཡང་ནས་ཡང་དུ་དམ་

དུ་བཅིངས་ན་དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་
ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་
སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེར་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་
འཇུག་པར་བརྩམས་ཏེ། དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་དེའི་ཚེ་ཁོང་དུ་ཁོང་གི་ཚོར་བ་མི་བཟད་པ་
སྐྱེས་སོ། །དཔེར་ན་བ་ལང་གི་ཤེན་པ་མཁས་པའམ། བ་ལང་གི་ཤེན་པའི་སློབ་མ་མཁས་པས་བ་ལང་གསོད་པའི་གྲི་རྣོན་པོས་བ་ལང་གི་ལྟོ་དྲལ་ན་དེའི་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་
དག་ལ་སྙོམས་པར་ཞུགས་པ་ན་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་
བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་

པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་དང་། ཞལ་དང་ཤངས་
ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་། དེའི་ཚེ་སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་སོ། །དཔེར་ན་མི་ཤིན་ཏུ་སྟོབས་དང་ལྡན་པ་གཉིས་ཀྱིས་མི་སྟོབས་ཤིན་ཏུ་ཆུང་བ་ཞིག་ཕྱིང་
ཀ་ལོག་ཏུ་བཟུང་སྟེ་མེ་དོང་གི་ནང་དུ་སྦྱངས་ན་དེའི་ལུས་ལ་ལུས་ཀྱི་གདུང་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་ཀྱང་། དེ་ཞུམ་པ་
མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་
དུ་མི་འོང་བ་དེ་ལྟ་བུའི་ཚོར་བ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ཐམས་ཅད་ཀྱི་ཐམས་ཅད་དུ་ཟས་མི་ཟ་བ་བསྒྲུབ་པར་བྱའོ་སྙམ་མོ། །དེ་ནས་ལྷ་རབ་ཏུ་མང་
པོའི་སེམས་ཀྱིས་བྱང་ཆུབ་སེམས་དཔའི་ཐུགས་ཤེས་ནས་བྱང་ཆུབ་སེམས་དཔའ་གང་ན་བ་དེར་དོང་སྟེ་ཕྱིན་ནས། བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གྲོགས་པོ་གལ་ཏེ་ཁྱོད་མིའི་ཁ་ཟས་ཀྱིས་འཛེམ་པར་མཛད། །ངོ་ཚ་བར་མཛད། སྨོད་པར་མཛད།
རྣམ་པར་སྨོད་པར་མཛད་ན། བདག་ཅག་གིས་ཁྱོད་ཀྱི་བ་སྤུའི་ཁུང་བུ་ཐམས་ཅད་ནས་ལྷའི་མདངས་བསྒྲུབ་པར་བགྱིས་ཏེ། ཁྱོད་ཀྱིས་གཏོར་ཅིག །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། གལ་ཏེ་བདག་གིས་མིའི་ཟས་མི་བཟའ་བར་དམ་བཅས་ལ་

བདག་གི་བ་སྤུའི་ཁུང་བུ་ཐམས་ཅད་དུ་ལྷ་རྣམས་ཀྱིས་ལྷའི་མདངས་བསྒྲུབས་ནས་དེ་བདག་གིར་བྱེད་པ་ནི་བདག་གི་བརྫུན་ཡིན་ལ། བདག་གི་བརྫུན་གང་ཡིན་པ་དེ་ནི་བདག་གི་ལོག་པ་ཡིན་ནོ། །བདག་གི་ལོག་པ་གང་ཡིན་པ་དེའི་རྐྱེན་གྱིས་ནི་འདི་ན་སེམས་
ཅན་ཁ་ཅིག་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་གྱིས། མ་ལ་བདག་གིས་ལྷ་རྣམས་ཀྱི་ཚིག་ནི་ཐམས་ཅད་ཀྱི་ཐམས་ཅད་དུ་སྤངས་ལ་ཁ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་བཟའ་
བའམ། ཡང་ན་མོན་སྲན་སྡེའུའི་ཁུ་བའམ། འོན་ཏེ་རྒྱ་སྲན་གྱི་ཁུ་བའམ། ཡང་ན་ཧ་རེ་ནུ་ཀའི་འབྲས་བུའི་ཁུ་བ་བཏུང་ངོ་སྙམ་མོ། །དེ་ནས་བྱང་ཆུབ་སེམས་དཔས་དེའི་ཚེ་ལྷ་རྣམས་ཀྱི་ཚིག་ཐམས་ཅད་ཀྱི་ཐམས་ཅད་དུ་སྤངས་ནས་ཞལ་ཟས་ཉུང་བ་དང་། ཆུང་བ་དང་། ཆུང་
ཟད་དང་། ཆང་ཆུང་གསོལ་བའམ། ཡང་ན་མོན་སྲན་སྡེའུའི་ཁུ་བའམ། འོན་ཏེ་རྒྱ་སྲན་གྱི་ཁུ་བའམ། ཡང་ན་ཧ་རེ་ནུ་ཀའི་འབྲས་བུའི་ཁུ་བ་གསོལ་ལོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་
ཡན་ལག་དང་ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ། སྐེམ་ཞིང་དཔལ་ཆུང་བར་གྱུར་ཏོ། །དཔེར་ན་ལྡུམ་བུ་ཨ་སི་ཏའི་སྡོང་བུ་དང་། ཀ་ལི་ཀའི་སྡོང་བུ་འཇུམ་ཀུན་དུ་འཇུམ་པས་ཤ་ཆུང་ཞིང་སྐམས་པར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་
བ་དང་། ཆུང་ཟད་དང་། ཆང་ཆུང་གསོལ་བ་ན་ཡན་ལག་དང་ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ་སྐེམ་ཞིང་དཔལ་ཆུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་དེའི་ཚེ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་དབུ་ལ་དབུའི་
པགས་པ་རྙིས་ཀུན་དུ་རྙིས་ཏེ་འཁུམས་ཤིང་འབར་འབུར་དུ་གྱུར་ཏོ། །དཔེར་ན་ཀུ་བ་རྩ་བ་ནས་བཅད་ན་རྙིས་ཀུན་དུ་རྙིས་པས་འཁུམས་ལ་འབར་འབུར་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་

བ་ན་དབུ་ལ་དབུའི་པགས་པ་རྙིས་ཀུན་ཏུ་རྙིས་ཏེ་འཁུམས་ཤིང་འབར་འབུར་དུ་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་
བཞག་པ་ཡིན་ནོ། །བྱང་ཆུབ་སེམས་དཔའ་དེའི་ཚེ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ཞལ་ཟས་ཉུང་བ་
དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ། ཟབ་པ་ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ངོ་། །དཔེར་ན་ཁྲོན་པ་ཟབ་མོའི་ཆུར་སྐར་མའི་གཟུགས་བརྙན་ཕུག་ཏུ་སོང་ཤིན་
ཏུ་ཕུག་ཏུ་སོང་སྟེ། ཟབ་པ་ཤིན་ཏུ་ཟབ་པར་རིང་དུ་སོང་བར་གཏམ་དུ་བྱ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔས་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ། ཟབ་པ་
ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ཡང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །དེའི་ཚེ་བྱང་
ཆུབ་སེམས་དཔའ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་
དང་། ཆུང་ཟད་དང་། ཆང་ཆུང་གསོལ་བ་ན་དེའི་ཚེ་རྩིབ་མའི་བར་མཐོན་དམན་ཅན་དུ་གྱུར་ཏེ། དཔེར་ན་རྩྭ་ཁང་ལོ་གཉིས་སམ་གསུམ་ལོན་པའི་ཕྱམ་དགུ་པོ་མཐོན་དམན་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་།

ཆང་ཆུང་གསོལ་བ་ན་རྩིབ་མའི་བར་མཐོན་དམན་དུ་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་
པ་ཡིན་ནོ། །བྱང་ཆུབ་སེམས་དཔའ་དེའི་ཚེ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ནས་བྱང་ཆུབ་སེམས་དཔའ་ཞལ་
ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་སྒལ་པའི་ཚིགས་འདི་ལྟ་སྟེ། སྐྲའི་ལན་བུ་ལྟ་བུར་གྱུར་ཏོ། །མཇུག་དོ་ནི་འདི་ལྟ་སྟེ་རྔ་མོའི་རྐང་པ་ལྟ་བུར་གྱུར་ཏོ། །དེ་ལན་འགའ་ལྡང་བར་འདོད་ན་ཁ་སྦུབ་ཏུ་འགྱེལ་ལ། ལན་འགའ་འདུག་པར་
འདོད་ན་གན་རྐྱལ་དུ་འགྱེལ་ལོ། །དེ་རོ་སྟོང་ལ་བརྟེན་ནས་རོ་སྨད་འཇོག་པར་བྱེད། རོ་སྨད་ལ་བརྟེན་ནས་རོ་སྟོད་འཇོག་པར་བྱེད་དོ། །དེ་ཕྱག་གཉིས་ཀྱིས་སྐུ་ལ་བྱུགས་ཡོངས་སུ་བྱུགས་ཏེ། དེའི་ཕྱག་གཉིས་ཀྱིས་སྐུ་ལ་བྱུགས་ཡོངས་སུ་བྱུགས་པ་དེའི་ཚེ་བ་སྤུ་རྣམས་དྲུང་རུལ་
བས་ས་ལ་ལྷགས་པར་གྱུར་ཏོ། །དེ་འདི་སྙམ་དུ་དགོངས་ཏེ། ལམ་འདི་ཡང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་ལྷ་གསུམ་ཞིག་བྱང་ཆུབ་སེམས་དཔའ་གང་
ན་བ་དེར་ལྷགས་ཏེ། དེ་ནས་གཅིག་གིས་འདི་སྐད་ཅེས་སྨྲས་སོ། །དགེ་སྦྱོང་གཽ་ཏ་མ་ནི་ནག་པོ་ཞིག་གོ། །གཉིས་པས་འདི་སྐད་ཅེས་སྨྲས་སོ། །འདི་ནག་པོ་ནི་མ་ཡིན་གྱི་འོན་ཀྱང་སྔོ་བསངས་ཞིག་གོ། །གསུམ་པས་འདི་སྐད་ཅེས་སྨྲས་སོ། །འདི་ནག་པོ་ཡང་མ་ཡིན།
སྔོ་བསངས་ཀྱང་མ་ཡིན་གྱི་མདོག་དམར་སྨུག་ཅིག་གོ། །བྱང་ཆུབ་སེམས་དཔའི་སྐུ་མདོག་བཟང་པོར་སྣང་བ་ནི་ཐམས་ཅད་ཀྱི་ཐམས་ཅད་དུ་ནུབ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་གསུམ་ཞིག་སྣང་བ་འདི་ལྟ་སྟེ། ཤིང་རློན་པ་ཆུ་

ཅན་ཞིག་ཆུ་ནས་ཕྱུང་སྟེ་ཉེ་བར་སྐམ་ལ་བཞག་པ་དང་། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་དེར་འོངས་ནས་དེས་དེ་ལ་གཙུབ་སྟན་བྱས་ཏེ་གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་རློན་པ་ཆུ་ཅན་ཡིན་པའི་ཕྱིར་མེ་འབྱུང་བ་དང་། འབར་དུ་མི་བཏུབ་པ་དེ་བཞིན་དུ་དགེ་
སྦྱོང་ངམ་བྲམ་ཟེ་ཁ་ཅིག་འདོད་པ་རྣམས་ལ་ལུས་དང་སེམས་ཀྱིས་ཐག་སྲིང་བར་མི་གནས་ཀྱི། དེ་རྣམས་ཀྱི་འདོད་པ་རྣམས་ལ་འདུན་པ་དང་། འདོད་པ་ལ་ཆགས་པ་དང་། འདོད་པ་ལ་དགའ་བ་དང་། འདོད་པ་ལ་ཞེན་པ་དང་། འདོད་པ་ལ་འཆུམས་པ་དང་། འདོད་པ་ལ་ལྷག་
པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ། གནས་པ་ཡིན་པས་ལུས་དང་སེམས་ཀྱིས་ཐག་སྲིང་བར་མི་གནས་པ་རྣམས་ཀྱི་ནི་དེ་དང་འདྲའོ། །དེ་རྣམས་བདག་ཉིད་གནོན་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་
ཉམས་སུ་མྱོང་མོད་ཀྱི། འོན་ཀྱང་དེ་རྣམས་ཀྱིས་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་དང་པོ་ཡིན་ནོ། །
དཔེར་ན་ཤིང་རློན་པ་ཆུ་ཅན་ཞིག་ཆུ་ནས་ཕྱུང་སྟེ། ཉེ་བར་སྐམ་ལ་བཞག་པ་དང་། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་འོངས་ནས་དེས་དེ་ལ་གཙུབ་སྟན་བྱས་ཏེ། གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་རློན་པ་ཆུ་ཅན་ཡིན་པའི་ཕྱིར་མེ་འབྱུང་བ་དང་
འབར་དུ་མི་བཏུབ་པ་དེ་བཞིན་དུ་དགེ་སྦྱོང་ངམ་བྲམ་ཟེ་ཁ་ཅིག་འདོད་པ་རྣམས་ལ་ལུས་ཀྱིས་སྤོང་བར་གནས་ཀྱི་སེམས་ཀྱིས་མ་ཡིན་པ་དེ་རྣམས་ཀྱི་འདོད་པ་རྣམས་ལ་འདོད་པ་ལ་འདུན་པ་དང་། འདོད་པ་ལ་ཆགས་པ་དང་། འདོད་པ་ལ་དགའ་བ་དང་། འདོད་པ་ལ་ཞེན་པ་
དང་། འདོད་པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ་གནས་པ་ཡིན་ནོ། །དེ་རྣམས་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་མོད་

ཀྱི། འོན་ཀྱང་དེ་རྣམས་ཀྱིས་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་གཉིས་པ་ཡིན་ནོ། །
འདི་ལྟ་སྟེ་ཤིང་སྐམ་ཁོང་སྟོང་ཆུ་མེད་པ་ཞིག་ཆུ་དང་ཐག་རིང་པོར་སྐམ་ལ་བཞག་པ་དང་། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་འོངས་ནས་དེས་དེ་ལ་གཙུབ་སྟན་བྱས་ཏེ། གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་སྐམ་ཞིང་ཁོང་སྟོང་ཡིན་པའི་ཕྱིར་མེ་འབྱུང་བ་
དང་འབར་དུ་བཏུབ་པ་དེ་བཞིན་དུ་དགེ་སྦྱོང་ངམ་བྲམ་ཟེ་ཁ་ཅིག་འདོད་པ་རྣམས་ལ་ལུས་དང་སེམས་ཀྱིས་ཐག་སྲིང་བར་གནས་པ་དེ་རྣམས་ཀྱི་འདོད་པ་རྣམས་ལ་འདོད་པ་ལ་འདུན་པ་དང་། འདོད་པ་ལ་ཆགས་པ་དང་། འདོད་པ་ལ་དགའ་བ་དང་། འདོད་པ་ལ་ཞེན་པ་དང་། འདོད་
པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ་མི་གནས་པ་ཡིན་ནོ། །དེ་རྣམས་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་མོད་ཀྱི། འོན་ཀྱང་དེ་རྣམས་
ཀྱིས་ཤེས་པར་ནུས། མཐོང་བར་ནུས་བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་གསུམ་པ་ཡིན་ནོ། །འདི་ལྟར་དེའི་ཚེ་བྱང་ཆུབ་སེམས་དཔའ་ལ་དཔེ་གསུམ་པ་སྣང་ནས་མ་ལ་བདག་གིས་
ཏིལ་འབྲུ་གཅིག་གི་ཟས་བཟའ་བར་བྱའོ་ཞེས་དེ་ཏིལ་འབྲུ་གཅིག་གི་ཟས་གསོལ་ཏེ། ཇི་སྲིད་དེའི་མདངས་དེ་སྐུ་ལས་ཡལ་བར་མ་གྱུར་གྱི་བར་དུ་ཏིལ་འབྲུ་གཉིས་པའི་ཟས་མི་གསོལ་ཏེ། ཡལ་ནས་ཏིལ་འབྲུ་གཉིས་པའི་ཟས་དེ་གསོལ་བར་མཛད་དོ། །དེ་ཏིལ་འབྲུ་གཅིག་གི་ཟས་
གསོལ་བས་ཡན་ལག་དང་ཉིང་ལག་རྣམས་ཤིན་ཏུ་སྐམས་པར་གྱུར་ཏོ། །ཏིལ་འབྲུ་གཅིག་ཇི་ལྟ་བར་འབྲས་འབྲུ་གཅིག་དང་། སྲན་ཀོལ་འབྲུ་གཅིག་དང་། རྒྱ་སྲན་འབྲུ་གཅིག་དང་། མོན་སྲན་གྲེའུ་འབྲུ་གཅིག་དང་། མོན་སྲན་སྡེའུ་འབྲུ་གཅིག་དང་། རྩྭའི་གདིང་བ་ལ་

མནལ་བར་མཛད་དོ། །རྒྱལ་པོ་ཟས་གཙང་གིས་དཀའ་བ་སྤྱོད་པའི་གནས་སྐབས་དེ་ཐོས་ནས་ཉི་མ་རེ་རེ་ཞིང་རྟོག་པ་ཉིས་བརྒྱ་ལྔ་བཅུ་གཏོང་བར་བྱེད་དོ། །རྒྱལ་པོ་ལེགས་པར་རབ་སད་ཀྱིས་ཀྱང་ཉིས་བརྒྱ་ལྔ་བཅུའོ། །དེ་དག་ཉི་མ་རེ་རེ་ཞིང་དེ་གཉིས་ལ་མྱུར་བ་མྱུར་བར་གཏམ་
སྐྱེལ་བར་བྱེད་དེ། བྱང་ཆུབ་སེམས་དཔའ་ནི་འདི་འདྲ་བའི་དཀའ་བ་སྤྱོད་དེ། ཏིལ་འབྲུ་གཅིག་དང་། འབྲས་འབྲུ་གཅིག་དང་། སྲན་ཀོ་ལ་འབྲུ་གཅིག་དང་། རྒྱ་སྲན་འབྲུ་གཅིག་དང་། མོན་སྲན་གྲེའུ་འབྲུ་གཅིག་དང་། མོན་སྲན་སྡེའུ་འབྲུ་གཅིག་གི་ཟས་གསོལ་ཞིང་རྩྭའི་
གདིང་བ་ལ་མནལ་ཏོ་ཞེས་སྨྲའོ། །དེ་རྒྱལ་པོ་ཟས་གཙང་གིས་ཐོས་ནས་བུའི་མྱ་ངན་གྱིས་ནོན་པས་ལྷག་པར་དང་ཁར་ན་ཞིང་མིག་མཆི་མས་བརྣངས་ཏེ་གདུངས་ནས་བཙུན་མོའི་འཁོར་དང་བཅས་པར་རྩྭའི་གདིང་བ་ལ་ཉལ་བར་བྱེད་དོ། །བཙུན་མོ་གྲགས་འཛིན་ཡང་ཁྱིམ་ཐབ་ཀྱི་
གནས་སྐབས་དེ་ཐོས་ནས་ཁྱིམ་ཐབ་ཀྱི་མྱ་ངན་གྱིས་ནོན་ཏེ་གདོང་མཆི་མས་རླན་ཅིང་མེ་ཏོག་ཕྲེང་དང་། རྒྱན་དང་སྤུད་པ་རྣམས་བོར་ནས་དཀའ་བ་སྤྱོད་པར་བྱེད་དེ། ཏིལ་འབྲུ་གཅིག་དང་། འབྲས་འབྲུ་གཅིག་དང་། སྲན་ཀོ་ལ་འབྲུ་གཅིག་དང་། རྒྱ་སྲན་འབྲུ་གཅིག་དང་།
མོན་སྲན་གྲེའུ་འབྲུ་གཅིག་དང་། མོན་སྲན་སྡེའུ་འབྲུ་གཅིག་གི་ཟས་ཟ་ཞིང་རྩྭའི་གདིང་བ་ལ་ཉལ་བར་བྱེད་དོ། །དེའི་རུམ་མི་བདེའོ་ཞེས་རྒྱལ་པོ་ཟས་གཙང་གིས་ཐོས་ནས་དེས་བསམས་པ། གལ་ཏེ་གྲགས་འཛིན་མས་བྱང་ཆུབ་སེམས་དཔའི་གཏམ་ཉི་མ་རེ་རེ་ཞིང་ཐོས་ན་ཁྱིམ་ཐབ་ཀྱི་
མྱ་ངན་གྱིས་ནོན་ཏེ་དཀའ་བ་སྤྱད་པ་འདིས་མངལ་མི་འཆགས་པའམ། སྲོག་འཆད་པར་འགྱུར་བའི་གནས་འདི་ཡོད་པས་དེས་ན་གྲགས་འཛིན་མ་ལ་བྱང་ཆུབ་སེམས་དཔའི་གཏམ་སུ་ཡང་གླེང་བར་མི་འགྱུར་རོ་སྙམ་ནས། རྒྱལ་པོ་ཟས་གཙང་གིས་བཙུན་མོའི་འཁོར་གྱི་སྐྱེ་བོ་
ཐམས་ཅད་ལ་ཁྲིམས་སུ་བཅས་པ། སུས་ཀྱང་བྱང་ཆུབ་སེམས་དཔའི་གཏམ་གྲགས་འཛིན་མ་ལ་བརྗོད་པར་མི་བྱའོ། །གཏམ་སྐྱེལ་བ་ལ་ཡང་བསྒོ་བ། ང་མ་གཏོགས་པར་སུ་ལ་ཡང་བྱང་ཆུབ་སེམས་དཔའི་གཏམ་བརྗོད་པར་མི་བྱའོ། །རང་གིས་ཐོས་ན་ཡང་གྲགས་འཛིན་

མ་ལ་བསམས་ནས་མྱ་ངན་མནགས་ཏེ་གང་ཐོས་ན་བཙུན་མོ་གྲགས་འཛིན་མ་མི་འཆི་བར་འགྱུར་བའི་གཏམ་གཞན་གྱིས་བཙུན་མོའི་འཁོར་ལ་འདྲིད་པར་བྱེད་དོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ཡང་ཤེས་པར་ནུས་པ་མ་ཡིན།
མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ཁ་ཟས་ཤིན་ཏུ་ངན་པ་བཟའ་བར་བྱའོ་སྙམ་སྟེ། དེས་ཁ་ཟས་ཤིན་ཏུ་ངན་པ་གསོལ་བར་མཛད་དོ། །དེ་ལ་ཟས་ཕལ་པ་ནི་
འདི་ཡིན་ཏེ། བེའུ་བྱུང་ནས་རིང་པོ་མ་ལོན་པར་མའི་འོ་མ་འཐུང་བ་གང་ཡིན་པ་དེ་རྣམས་ཀྱི་གཅིན་དང་ལྕི་བ་ཡིན་ནོ། །ཇི་ལྟར་དེའི་སྐུ་ལས་མདངས་དེ་ཡལ་བར་མ་གྱུར་པ་དེ་སྲིད་དུ་ཟས་གཉིས་པ་མི་གསོལ་ཏེ། ཡལ་ནས་ཁ་ཟས་ཕྱི་མ་གསོལ་བར་མཛད་དོ། །དུར་ཁྲོད་ཆེན་
པོར་གཤེགས་ནས་ཀྱང་མི་རོ་དབུ་རྟེན་དུ་བཅུག །ཞབས་ལ་ཞབས་བཞག་སྟེ་སྣང་བའི་འདུ་ཤེས་དང་། དྲན་པ་དང་ཤེས་བཞིན་དང་། ལྡང་བའི་འདུ་ཤེས་ཡིད་ལ་མཛད་པས་གློ་གཡས་པས་མནལ་བར་མཛད་དོ། །དེའི་ཚེ་གྲོང་ཁྱེར་གྱི་གཞོན་ནུ་རྣམས་དང་། གྲོང་ཁྱེར་གྱི་གཞོན་
ནུ་མ་རྣམས་ལྷགས་ནས་ཤིང་བུས་དེའི་སྙན་གཉིས་ཀྱི་བུ་གར་འཛུགས་པར་བྱེད། རྣ་བ་གཉིས་ནས་འདྲེན་པར་བྱེད་ཅིང་འདི་སྐད་ཅེས་ཀྱེ་ཕྱག་དར་ཁྲོད་ཀྱི་ཤ་ཟ་ལ་ལྟོས། ཀྱེ་ཕྱག་དར་ཁྲོད་ཀྱི་ཤ་ཟ་ལ་ལྟོས་ཞེས་སྨྲ་བར་ཡང་བྱེད་དོ། །དེའི་ཚེ་ཕྱག་དར་དང་བོང་རྡོག་དང་། གསེག་
མས་ཀྱང་འཐོར་བར་བྱེད་དོ། །འོན་ཀྱང་བྱང་ཆུབ་སེམས་དཔའ་ནི་གྲོང་ཁྱེར་གྱི་གཞོན་ནུ་རྣམས་སམ། གྲོང་ཁྱེར་གྱི་གཞོན་ནུ་མ་དེ་རྣམས་ལ་ངན་སེམས་སྐྱེད་པའམ། སྡིག་པའི་ཚིག་དབྱུང་བར་མི་དགོངས་སོ། །བྱང་ཆུབ་སེམས་དཔའ་དེ་ལྟ་བུའི་དཀའ་བ་སྤྱོད་པ་ན་འདི་སྙམ་
དུ་དགོངས་ཏེ། གང་སུ་དག་སྡུག་བསྔལ་སྤང་བར་བརྩོན་པར་གནས་པ་དེ་ཐམས་ཅད་ནི་འདི་ཙམ་དུ་ཟད་དེ། དེ་ལས་ལྷག་པ་ཡང་མེད་དེའི་གོང་ན་ཡང་མེད་ན། ལམ་འདི་ཡང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་

ཆུབ་པར་ནུས་པ་མ་ཡིན་ནོ་སྙམ་ནས། དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨོངས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །དེ་འདི་སྙམ་དུ་དགོངས་ཏེ། ཤེས་པར་
ནུས་པ་དང་། མཐོང་བར་ནུས་པ་དང་། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པའི་ལམ་དེ་གང་ཡིན་སྙམ་ན། དེ་འདི་སྙམ་དུ་དགོངས་ཏེ། བདག་ཡབ་ཤཱཀྱ་ཟས་གཙང་གི་ཁྱིམ་ན་གནས་པའི་ཚེ་ཞིང་ལས་ཀྱི་མཐའི་དྲུང་དུ་སོང་ནས་ཤིང་འཛམ་བུའི་གྲིབ་མ་ལ་འདུག་
སྟེ། འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་དབེན་པ། རྟོག་པ་དང་བཅས་ཤིང་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་པ་དེ་མངོན་པར་དྲན་ཏེ། དེ་ནི་ལམ་ཡིན། དེ་ནི་སྒྲུབ་པ་ཡིན།
ཤེས་པར་ནུས་པ་ཡིན། མཐོང་བར་ནུས་པ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་ཡིན་ན། དེ་བདག་གིས་བསྐྱེད་དུ་ཡང་འདི་ལྟར་རིད་ཅིང་ཉམ་ཆུང་ལ་ཞན་པས་སླ་བ་མ་ཡིན་ཏེ། མ་ལ་བདག་གིས་ཅི་བདེར་དབུགས་རྔུབ་པ་དང་། ཅི་བདེར་དབུགས་
འབྱུང་བ་དང་། ཅི་བདེར་འབྲས་ཆན་དང་ཟན་དྲོན་གྱི་ཁ་ཟས་རགས་པ་བཟའ་ཞིང་ལུས་མར་སར་དང་ཏིལ་མར་གྱིས་བྱུགས་ལ་ཆུ་འཇམ་པོས་ལུས་བཀྲུ་བར་བྱའོ་སྙམ་སྟེ། དེ་ཅི་བདེར་དབུགས་རྔུབ་པ་དང་། ཅི་བདེར་དབུགས་འབྱུང་བ་དང་། ཅི་བདེར་འབྲས་ཆན་དང་ཟན་དྲོན་གྱི་ཞལ་
ཟས་རགས་པ་གསོལ་ཞིང་སྐུ་ཏིལ་མར་དང་མར་སར་གྱིས་བྱུགས་ནས་ཆུ་འཇམ་པོས་སྐུ་འཁྲུ་བར་མཛད་དོ།། །།འདུལ་བ་གཞི། བམ་པོ་བརྒྱད་བཅུ་ལྔ་པ། དེ་ནས་རིམ་གྲོ་པ་ལྔ་པོ་དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་དགེ་སྦྱོང་གཽ་ཏ་མ་འདི་ནི་སྡོམ་པ་
ལྷོད་པ། བྱ་བ་མང་བ། མང་པོས་འཚོ་བ། སྤོང་བ་ཉམས་པར་གྱུར་པ་ཡིན་ཏེ། འདི་ད་ལྟ་འབྲས་ཆན་དང་ཟན་དྲོན་གྱི་ཁ་ཟས་མང་དུ་ཟ་ལ་ལུས་ཞུན་མར་དང་ཏིལ་མར་གྱིས་བྱུགས་ནས་ཆུ་འཇམ་པོས་ལུས་ཁྲུས་བྱེད་དེ། འདིས་ད་ནི་ཆུང་ཟད་ཀྱང་ཐོབ་པར་མི་ནུས་སོ་སྙམ་དུ་བསམས་ནས་

བྱང་ཆུབ་སེམས་དཔའ་བོར་ཏེ་དོང་བ་ལས། རིམ་གྱིས་བཱ་རཱ་ཎ་སཱིར་ཕྱིན་ནས་འཇིག་རྟེན་པའི་དགྲ་བཅོམ་པ་གང་ཡིན་པ་དེ་ལ་བརྟེན་ནས་རབ་ཏུ་བྱུང་སྟེ། ལྔ་པོ་དེ་རྣམས་བློ་མཐུན་ཞིང་ལྷན་ཅིག་འགྲོགས་ལ་ཀུན་དུ་དགའ་བས་རྩོད་པ་མེད་པར་དྲང་སྲོང་སྨྲ་བ་རི་དགས་ཀྱི་ནགས་
ན་གནས་པས་ལྔ་སྡེ་ལྔ་སྡེ་ཞེས་བྱ་བར་གྱུར་ཏོ། །བྱང་ཆུབ་སེམས་དཔས་རིམ་གྱིས་ལུས་ཀྱི་སྟོབས་དང་། མཐུ་དང་བརྩོན་འགྲུས་ཡང་དག་པར་བསྐྱེད་ནས་རིམ་གྱིས་སྡེ་ཅན་གྱི་གྲོང་ཁྱེར་དུ་གཤེགས་སོ། །དེ་ན་གྲོང་ཁྱེར་གྱི་དཔོན་པོ་སྡེ་ཅན་ཞེས་བྱ་བ་དེ་ལ་བུ་མོ་གཉིས་ཡོད་དེ། དགའ་
མོ་དང་། དགའ་སྟོབས་མའོ། །དེ་གཉིས་ཀྱིས་ཤཱཀྱ་རྣམས་ཀྱི་གཞོན་ནུ་གངས་རིའི་ངོས་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བར་བྱུང་བ་དེ་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་
རོ་ཞེས་ལུང་བསྟན་པ་དེ་ཡང་གཟུགས་བཟང་བ། བལྟ་ན་སྡུག་པ། མཛེས་པ། མཚན་ཐམས་ཅད་དང་ལྡན་པ། སྐྱེ་བོ་ཐམས་ཅད་ཀྱི་ཡིད་འཕྲོག་པ་ཡིན་པས་བུད་མེད་གང་གིས་ལོ་བཅུ་གཉིས་སུ་འདི་ལྟ་བུའི་བརྟུལ་ཞུགས་ཡང་དག་པར་བླངས་ཏེ་སྤྱོད་པ་དེའི་ཁྱིམ་ཐབ་ཏུ་འགྱུར་
རོ་ཞེས་ཐོས་སོ། །ཐོས་ནས་ཀྱང་བུད་མེད་ནི་སྐྱེས་པ་ལ་མངོན་པར་དགའ་བ་ཡིན་པས་དེ་གཉིས་ཀྱིས་ལོ་བཅུ་གཉིས་སུ་དཀའ་ཐུབ་བླངས་ཏེ་དེ་རྫོགས་པར་བྱས་ནས་དེ་རྫོགས་པ་དང་། ལན་བཅུ་དྲུག་ཏུ་སྙིང་ཁུར་བྱས་པའི་འོ་ཐུག་སྦྲང་རྩི་ལྟར་མངར་བས་དྲང་སྲོང་དཀའ་ཐུབ་ཀྱིས་ཡོངས་
སུ་དུབ་པ་གློ་བུར་དུ་འོངས་པ་ལ་འབུལ་བར་བྱེད་དོ། །དེ་གཉིས་ཀྱིས་བ་སྟོང་བཞོས་ནས་བ་སྟོང་པོ་དེ་ཉིད་ལ་བླུད་དོ། །དེ་ནས་བ་སྟོང་པོ་དེ་དག་ཉིད་བཞོས་ནས་ལྔ་བརྒྱ་ལ་བླུད་དོ། །དེ་ནས་ལྔ་བརྒྱ་པོ་དེ་དག་བཞོས་ནས་ལྔ་བརྒྱ་པོ་དེ་དག་ཉིད་ལ་བླུད་དོ། །དེ་ནས་ལྔ་བརྒྱ་པོ་དེ་དག་བཞོས་
ནས་ཉིས་བརྒྱ་ལྔ་བཅུ་ལ་བླུད་དོ། །དེ་ནས་ཉིས་བརྒྱ་ལྔ་བཅུ་པོ་དེ་དག་ཉིད་བཞོས་ནས་ཉིས་བརྒྱ་ལྔ་བཅུ་པོ་དེ་དག་ལ་བླུད་དོ། །དེ་ནས་ཉིས་བརྒྱ་ལྔ་བཅུ་པོ་དེ་དག་ཉིད་བཞོས་ནས་བརྒྱ་ཉི་ཤུ་རྩ་ལྔ་ལ་བླུད་དོ། །དེ་ནས་བརྒྱ་ཉི་ཤུ་རྩ་ལྔ་པོ་དེ་དག་བཞོས་ནས་བརྒྱ་ཉི་ཤུ་རྩ་ལྔ་པོ་དེ་དག་ཉིད་ལ་བླུད་

དོ། །དེ་ནས་བརྒྱ་ཉི་ཤུ་རྩ་ལྔ་པོ་དེ་དག་བཞོས་ནས་དྲུག་བཅུ་རྩ་གསུམ་ལ་བླུད་དོ། །དེ་ནས་དྲུག་བཅུ་རྩ་གསུམ་པོ་དེ་དག་བཞོས་ནས་དྲུག་བཅུ་རྩ་གསུམ་པོ་དེ་དག་ཉིད་ལ་བླུད་དོ། །དེ་ནས་དྲུག་བཅུ་རྩ་གསུམ་པོ་དེ་དག་བཞོས་ནས་སུམ་བཅུ་རྩ་གཉིས་ལ་བླུད་དོ། །དེ་ནས་སུམ་བཅུ་རྩ་
གཉིས་པོ་དེ་དག་བཞོས་ཏེ། སུམ་བཅུ་རྩ་གཉིས་པོ་དེ་དག་ཉིད་ལ་བླུད་དོ། །དེ་ནས་སུམ་བཅུ་རྩ་གཉིས་པོ་དེ་དག་བཞོས་ནས་བཅུ་དྲུག་ལ་བླུད་དོ། །དེ་ནས་བཅུ་དྲུག་པོ་དེ་དག་བཞོས་ནས་བཅུ་དྲུག་པོ་དེ་དག་ཉིད་ལ་བླུད་དོ། །དེ་ནས་བཅུ་དྲུག་པོ་དེ་དག་ཉིད་བཞོས་ནས་བརྒྱད་ལ་བླུད་དོ། །
དེ་ནས་བརྒྱད་པོ་དེ་དག་ཉིད་བཞོས་ནས་བརྒྱད་པོ་དེ་དག་ཉིད་ལ་བླུད་དོ། །དེ་ནས་བརྒྱད་པོ་དེ་དག་ཉིད་ལན་བཅུ་དྲུག་ཏུ་སྙིང་ཁུར་བྱས་པ་བཞོས་ཏེ། ཤེལ་ལས་བྱས་པའི་སྣོད་ཀྱི་ནང་དུ་བླུགས་ནས་བསྐོལ་ཏེ་འོ་ཐུག་སྦྲང་རྩི་ལྟར་མངར་བར་བྱེད་པ་ན་གནས་གཙང་མའི་རིས་ཀྱི་ལྷ་རྣམས་
ཀྱིས་བསམས་པ། འོ་མའི་ཐུག་པ་འདི་བྱང་ཆུབ་སེམས་དཔས་གསོལ་ན་དེང་ཉིད་དུ་བླ་ན་མེད་པའི་ཡེ་ཤེས་ཐོབ་པར་འགྱུར་གྱིས་དེ་ལྟ་བས་ན་འདི་ལ་མཐུ་ཞིག་བསྟབས་པར་བྱའོ་སྙམ་ནས། དེ་རྣམས་ཀྱིས་མོད་ལ་མཐུ་སྐྱེད་པ་ཞེས་བྱ་བའི་སྨན་བླུགས་སོ། །འོ་མ་ཁོལ་བ་དེ་ལ་འཁོར་
ལོ་དང་བཀྲ་ཤིས་དང་། གཡུང་དྲུང་འཁྱིལ་བའི་མཚན་མ་དག་སྣང་ངོ་། །དེར་ཡང་ཀུན་ཏུ་འཚོ་ཉེར་འགྲོ་ཞེས་བྱ་བ་འཁྱམ་ཞིང་ཕྱོགས་དེར་ཕྱིན་ན་དེས་འོ་མའི་ཐུག་པ་དེ་མཐོང་ནས། དེས་བསམས་པ། འོ་མའི་ཐུག་པ་འདི་སུས་འཐུངས་པ་དེས་དེང་ཉིད་དུ་བླ་ན་མེད་པའི་ཡེ་ཤེས་ཐོབ་
པར་འགྱུར་གྱིས། མ་ལ་བདག་གིས་འདི་བསླང་ངོ་སྙམ་ནས་རེ་ཞིག་མ་ཕྱུང་གི་བར་དུ་དེ་ཡུད་ཙམ་ཞིག་མཐའ་གཅིག་ཏུ་སོང་སྟེ་བསྡད་ནས་དེས་སོང་སྟེ། སྨྲས་པ། ཁོ་བོ་བཀྲེས་པ་དང་སྐོམ་པས་དུབ་ཅིང་ཉེན་གྱིས་འདི་ཁོ་བོ་ལ་ལུད་ཅིག །དེ་གཉིས་ཀྱིས་སྨྲས་པ། མི་སྦྱིན་ནོ། །
དེ་ཅང་མི་སྨྲ་བར་སོང་ངོ་། །དེ་ནས་དེ་གཉིས་ཀྱིས་ཤེལ་ལས་བྱས་པའི་སྣོད་ཀྱི་ནང་ནས་རིན་པོ་ཆེའི་ཡོལ་གོའི་ནང་དུ་བླུགས་སོ། །ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་དེའི་བྲམ་ཟེའི་ཆ་བྱད་དུ་མངོན་པར་སྤྲུལ་ནས་དེ་གཉིས་ཀྱི་མདུན་

དུ་འདུག་གོ། །ཚངས་པ་ཡང་འོངས་ནས་དེ་དང་ཉེ་བ་ཞིག་ཏུ་འདུག་གོ། །དེ་གཉིས་ཀྱིས་བརྒྱ་བྱིན་ལ་སྦྱིན་པ་སྦྱིན་པར་བརྩམས་པ་དང་། དེས་སྨྲས་པ། ཅི་བདག་ལ་སྦྱིན་ནམ། འོན་ཏེ་བདག་པས་ཆེས་ཁྱད་པར་དུ་འཕགས་པ་གང་ཡིན་པ་དེ་ལ་སྦྱིན་དེ་གཉིས་ཀྱིས་སྨྲས་པ།
ཁྱོད་པས་ཆེས་ཁྱད་པར་འཕགས་པ་གང་ཡིན་པ་དེ་ལ་ཕུལ་ལོ། །དེས་སྨྲས་པ། ཚངས་པ་འདི་ནི་བདག་བས་ཆེས་ཁྱད་པར་དུ་འཕགས་པ་ཡིན་གྱིས་དེ་ལ་ཕུལ་ཅིག །དེ་གཉིས་ཀྱིས་དེ་ལ་སྦྱིན་པར་བརྩམས་པ་དང་། དེས་སྨྲས་པ། ཅི་བདག་ལ་སྦྱིན་ནམ། འོན་ཏེ་བདག་བས་
ཆེས་ཁྱད་པར་དུ་འཕགས་པ་གང་ཡིན་པ་དེ་ལ། དེ་གཉིས་ཀྱིས་སྨྲས་པ། ཁྱོད་པས་ཆེས་ཁྱད་པར་དུ་འཕགས་པ་གང་ཡིན་པ་དེ་ལ་དབུལ་ལོ། །དེས་སྨྲས་པ། གནས་གཙང་མའི་རིས་ཀྱི་ལྷ་འདི་དག་ནི་བདག་བས་ཆེས་ཁྱད་པར་དུ་འཕགས་པ་ཡིན་གྱིས་དེ་དག་ལ་ཕུལ་ཅིག །
དེ་གཉིས་ཀྱིས་དེ་དག་ལ་སྦྱིན་པར་བརྩམས་པ་དང་། དེ་དག་གིས་ཀྱང་སྨྲས་པ། ཅི་བདག་ཅག་ལ་སྦྱིན་ནམ། འོན་ཏེ་བདག་ཅག་བས་ཆེས་ཁྱད་པར་དུ་འཕགས་པ་གང་ཡིན་པ་དེ་ལ། དེ་གཉིས་ཀྱིས་སྨྲས་པ། ཁྱེད་བས་ཆེས་ཁྱད་པར་དུ་འཕགས་པ་གང་ཡིན་པ་དེ་ལའོ། །དེ་
དག་གིས་སྨྲས་པ། བྱང་ཆུབ་སེམས་དཔའ་བཅོམ་ལྡན་འདས་འདི་ཆུ་ཀླུང་ནཻ་རཉྫ་ནར་ཞུགས་ནས་སྐུ་ཁྲུས་མཛད་དེ་ཉམ་ཆུང་བ་ཉིད་ཀྱིས་བཞེངས་མི་སྤྱོད་པ་ཞིག་ཡོད་དེ། དེ་བདག་ཅག་པས་ཆེས་ཁྱད་པར་དུ་འཕགས་པ་ཡིན་གྱིས་དེ་ལ་ཕུལ་ཅིག །དེ་གཉིས་དེའི་དྲུང་དུ་ཆས་པ་དང་། དེའི་
ཚེ་ལྷ་རྣམས་ཀྱིས་ཤིང་ཨརྫུ་ནའི་ཡལ་ག་བཏུད་ནས་བཏུད་པ་ལ་བྱང་ཆུབ་སེམས་དཔའ་འཇུས་ཏེ་ཆུ་ཀླུང་ནཻ་རཉྫ་ན་ནས་བྱུང་ནས་ཆོས་གོས་བགོས་ཏེ་ཆུ་ཀླུང་ནཻ་རཉྫ་ནའི་འགྲམ་ན་བཞུགས་སོ། །དེ་ནས་དེ་གཉིས་ཀྱིས་གུས་པ་དང་བསམ་པ་དྲག་པོས་དེ་ལའོ་ཐུག་སྦྲང་རྩི་ལྟར་མངར་བ་དེ་
ཕུལ་ལོ། །བྱང་ཆུབ་སེམས་དཔས་ཀྱང་དེ་གཉིས་རྗེས་སུ་གཟུང་བའི་ཕྱིར་བཞེས་སོ། །བཞེས་ནས་གསུངས་པ། ཅི་ཡོལ་གོ་འདི་ཡང་ཡོངས་སུ་བཏང་ངམ། དེ་གཉིས་ཀྱིས་གསོལ་པ། བཅོམ་ལྡན་འདས་འདི་ཡང་ཡོངས་སུ་བཏང་ལགས་སོ། །དེ་ནས་བྱང་ཆུབ་སེམས་

དཔས་འོ་ཐུག་སྦྲང་རྩི་ལྟར་མངར་བ་གསོལ་ནས་ཡོལ་གོ་དེ་བཀྲུས་ཏེ་ཆུ་ཀླུང་ནཻ་རཉྫ་ནར་བོར་བ་ཀླུ་རྣམས་ཀྱིས་བླངས་སོ། །འདི་ནི་ཆོས་ཉིད་ཡིན་ཏེ། ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ནམ་མཁའ་ལྡིང་གི་ཆ་བྱད་དུ་སྤྲུལ་ཏེ། ཆུ་
ཀླུང་ནཻ་རཉྫ་ན་དཀྲུགས་ནས་ཀླུ་སྐྲག་པར་བྱས་ཏེ་ཡོལ་གོ་དེ་ཕྲོགས་ནས་སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཁྱེར་ཏེ་ཡོལ་གོའི་མཆོད་པ་ཆེན་པོ་བཙུགས་སོ། །དེ་ནས་བྱང་ཆུབ་སེམས་དཔས་དགའ་མོ་དང་། དགའ་སྟོབས་ལ་གསུངས་པ། སྦྱིན་པ་འདིས་ཅི་ཞིག་དོན་དུ་གཉེར།
དེ་གཉིས་ཀྱིས་གསོལ་པ། བཅོམ་ལྡན་འདས་ཤཱཀྱ་རྣམས་ཀྱི་གཞོན་ནུ་གངས་རིའི་ངོས། ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བར་བྱུང་བ་དེ་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་འཁོར་ལོས་སྒྱུར་བའི་རྒྱལ་པོར་
ལུང་བསྟན་པ་ཞིག་མཆིས་པ་དེ་སེམས་བསྐྱེད་པ་དང་ཞལ་ཟས་ཕུལ་བའི་དགེ་བའི་རྩ་བས་བདག་ཅག་གི་ཁྱིམ་ཐབ་ཏུ་གྱུར་ཅིག །བྱང་ཆུབ་སེམས་དཔས་གསུངས་པ། དེ་འདོད་པ་རྣམས་ལ་དོན་དུ་མི་གཉེར་བས་རབ་ཏུ་བྱུང་ཟིན་ནོ། །དེ་གཉིས་ཀྱིས་གསོལ་པ། བཅོམ་
ལྡན་འདས་གལ་ཏེ་འདོད་པ་རྣམས་དོན་དུ་མི་གཉེར་ན། བསོད་པ་ཕུལ་བའི་བསོད་ནམས་ཅི་མཆིས་པས། །གྲགས་དང་ལྡན་པ་དོན་རྣམས་ཀུན་གྲུབ་པ། །མི་ཡི་མཆོག་གྱུར་བློ་མཆོག་ལྡན་པ་དེའི། །དོན་ཀུན་མྱུར་དུ་ཤིན་ཏུ་གྲུབ་གྱུར་ཅིག །བྱང་ཆུབ་སེམས་དཔས་དེ་བཞིན་
དུ་གྱུར་ཅིག་ཅེས་གསུངས་ནས་འོ་ཐུག་སྦྲང་རྩི་ལྟར་མངར་བ་གསོལ་ཏེ། དབང་པོ་དྲུག་ཚིམ་ཞིང་སྟོབས་དང་མཐུ་ཐོབ་ནས་ཆུ་ཀླུང་ནཻ་རཉྫ་ནའི་འགྲམ་ན་ཕན་ཚུན་དུ་བཞུགས་པའི་ས་བཙལ་བ་དང་། ཇི་ཙམ་ན་རི་བྲགས་ཆེན་པོ་མེ་ཏོག་དང་འབྲས་བུ་སྣ་ཚོགས་དང་ལྡན་པ་ཞིག་གཟིགས་ནས།
དེ་དེ་ལ་འཛེགས་ཏེ་ཕྱོགས་དབེན་ཞིང་གསལ་བའི་ས་ཕྱོགས་སུ་སྐྱིལ་མོ་ཀྲུང་བཅས་ཏེ་བཞུགས་སོ། །བཞུགས་མ་ཐག་ཏུ་རི་དེ་ཉིད་ཉིལ་ཏོ། །བྱང་ཆུབ་སེམས་དཔས་དགོངས་པ། ངེས་པར་བདག་གིས་ལས་སྐྱོན་ཅན་ཞིག་བྱས་ཏེ་དེས་ན་རི་འདི་ཉིལ་ཏོ་སྙམ་མོ། །ལྷ་རྣམས་ཀྱི་སེམས་

ཀྱིས་བྱང་ཆུབ་སེམས་དཔའི་ཐུགས་ཤེས་ནས་གསོལ་པ། བཅོམ་ལྡན་འདས་ཁྱོད་ཀྱིས་སྐྱོན་ཅན་གྱི་ཕྲིན་ལས་མ་མཛད་དོ། །འོན་ཀྱང་འདི་ནི་ཆོས་ཉིད་ལགས་ཏེ། ས་ཐམས་ཅད་ཀྱིས་གཟུང་བར་རྔོ་མི་ཐོག་པ་ནི་གཉིས་ཏེ། དགེ་བའི་རྩ་བ་ཆད་པ་གང་ལགས་པ་དང་།
དགེ་བའི་རྩ་བ་སྦྱངས་པ་གང་ལགས་པའོ། །ཁྱོད་ནི་དགེ་བའི་རྩ་བ་སྦྱངས་པ་ལགས་སོ། །བཅོམ་ལྡན་འདས་འདི་ནི་བྱང་ཆུབ་སེམས་དཔའ་རྣམས་ཀྱི་གནས་མ་ལགས་ཏེ། འོན་ཀྱང་ཆུ་ཀླུང་ནཻ་རཉྫ་ན་རྒོལ་ལ་ཕྱོགས་ཆེ་གེ་མོ་ཞིག་ན་རྡོ་རྗེའི་གདན་མཆིས་ཀྱིས་བཞུད་ཅིག །དེར་ནི་འདས་
པ་དང་། མ་བྱོན་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་བཞུགས་ནས་བླ་ན་མེད་པའི་ཡེ་ཤེས་ཐོབ་པར་གྱུར་ཅིང་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷས་ལམ་བསྟན་པ་བཞིན་གཤེགས་པ་ན་དེའི་ཞབས་བཞག་པར་པད་མ་དག་བྱུང་བར་གྱུར་ཏོ། །
རྒྱ་མཚོ་ཆེན་པོ་བཞི་ལས་ཀྱང་ཆུ་བབ་ནས་པད་མའི་རྫིང་དག་བྱུང་བར་གྱུར་ཏོ། །གོམ་པ་བོར་ནས་མནན་པ་ན་ས་ཆེན་པོ་འདི་ཁར་བའི་སྣོད་བཞིན་དུ་སྒྲ་འབྱིན་པར་བརྩམས་སོ། །བྱ་ཙ་ཤ་དང་རི་དགས་དག་གིས་ཀྱང་བྱང་ཆུབ་སེམས་དཔའ་ལ་སྐོར་བ་བྱེད་དོ། །རླུང་གཏོང་བའི་ལྷའི་བུ་
རྣམས་ཀྱིས་ཀྱང་དལ་བུ་དལ་བུས་རླུང་གཏོང་བར་བྱེད་དོ། །ཆར་པ་འབེབས་པའི་ལྷའི་བུ་རྣམས་ཀྱིས་ཀྱང་ཆར་པ་ཆུང་ཟད་འབེབས་པར་བྱེད་དོ། །བྱང་ཆུབ་སེམས་དཔས་དགོངས་པ། ང་ལ་འདི་འདྲ་བའི་མཚན་མ་བྱུང་བར་གྱུར་པས་དེང་ཉིད་བདག་གིས་བླ་ན་མེད་པའི་ཡེ་ཤེས་ཐོབ་པར་
འགྱུར་རོ་སྙམ་མོ། །ཆུ་ཀླུང་ནཻ་རཉྫ་ནར་ཀླུའི་རྒྱལ་པོ་དུས་ཅན་སྔོན་གྱི་ལས་ཀྱི་རྣམ་པར་སྨིན་པ་ལས་སྐྱེས་པའི་གནས་ཤིག་བྱུང་བར་གྱུར་ཏེ། དེ་སངས་རྒྱས་བྱུང་ཞིང་སངས་རྒྱས་འབྱུང་བ་ན་མིག་ཐོབ་པར་འགྱུར་བ་ཡིན་པས་དེ་སའི་སྒྲ་གྲགས་པས་གནས་ནས་བྱུང་བ་ན་རྒྱང་རིང་པོ་ཁོ་ན་
ནས་བྱང་ཆུབ་སེམས་དཔའ་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་སྤྲས་པ། འོད་འདོམ་གང་གིས་བརྒྱན་པ། ཉི་མ་སྟོང་བས་ལྷག་པའི་འོད་ཟེར་དང་། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ་མཐོང་ངོ་། །

མཐོང་མ་ཐག་ཏུ་བྱང་ཆུབ་སེམས་དཔའ་ལ་ཚིགས་སུ་བཅད་པའི་དབྱངས་ཀྱིས་བསྟོད་པར་བརྩམས་པ། དགའ་བའི་དབྱངས་ཀྱིས་ཀུན་གང་བའི། །ས་ཡི་སྒྲ་ནི་ཐོས་ནས་ཀྱང་། །ཀླུ་ནི་གནས་ནས་བྱུང་ནས་སུ། །ཕྱོགས་ཀུན་དུ་ཡང་ལྟ་བར་བྱེད། །བྲང་གིས་འགྲོ་བའི་གཙོ་བོ་སྟེ། །ཀླུ་ཡི་
རྒྱལ་པོ་མཐུ་ཆེན་གྱིས། །ནཻ་རཉྫ་ནའི་ངོས་སུ་ནི། །འཇིག་རྟེན་འདྲེན་པ་གཤེགས་པ་མཐོང་། །སངས་རྒྱས་བྱུང་བའི་མཐུ་ཡིས་ནི། །ཀླུ་ཡིས་མིག་ནི་ཐོབ་གྱུར་ཏེ། །སེམས་དགའ་ཞིང་ནི་ཡིད་མགུ་ནས། །དེས་ནི་འདི་སྐད་ཚིག་གསོལ་ཏོ། །བདག་གིས་སྔོན་ནི་མཐོང་བ་ཡི། །སངས་
རྒྱས་མཐུ་ཆེན་དེ་རྣམས་དང་། །ཐུབ་པ་ཁྱོད་ནི་མཐོང་གྱུར་ན། །དེ་དང་ཐ་དད་དབྱེར་མ་མཆིས། །ཐུབ་པ་ཇི་ལྟར་ཐོག་མར་ནི། །གཡས་པའི་ཞབས་ནི་བཏེག་པ་ལས། །ཁྱོད་ནི་སངས་རྒྱས་དེང་གྱུར་ནས། །འཇིག་རྟེན་གྱི་ནི་ཡོན་གནས་འགྱུར། །ཇི་ལྟར་ཆོས་གོས་མནབས་པ་དང་། །
ནཻ་རཉྫ་ནའི་ཆུ་བསིལ་ལ། །ཇི་ལྟ་བུར་ནི་འཇུག་པ་ལས། །དེ་རིང་ཁྱོད་ནི་སངས་རྒྱས་འགྱུར། །ཇི་ལྟར་རབ་བརྟེན་འགྲོས་སུ་གཤེགས་པ་དང་། །བ་ལང་ཁྱུ་མཆོག་འགྱིང་བ་ལྟར་གཤེགས་པས། །སྐྱེས་བུ་ཁྱུ་མཆོག་ཆོས་འཛིན་རྣམས་ཀྱི་མཆོག །དེང་འདིར་ཁྱོད་ནི་སངས་རྒྱས་
མཆོག་འགྱུར་རོ། །ད་ལྟར་མཁའ་ལ་ཙ་ཤ་བརྒྱ་ཕྲག་གིས། །ཁྱོད་སྐུ་རྒྱ་ཆེན་རྒྱ་ཆེན་མཛད་དེ་ལ། །ལྡིང་ཞིང་བསྐོར་བ་བགྱིད་པར་གྱུར་པ་ལས། །མི་མཆོག་དེང་ནི་སངས་རྒྱས་མཆོག་འགྱུར་རོ། །ཇི་ལྟར་དྲི་ཞིམ་རླུང་ནི་ལྡང་བ་དང་། །རི་དགས་བྱ་ཡི་ཚོགས་ཀྱང་མི་སྐྲག་ལ། །
ལྗོན་ཤིང་རླུང་གིས་གཡོས་པར་མ་གྱུར་པས། །མི་མཆོག་དེང་ནི་སངས་རྒྱས་མཆོག་འགྱུར་རོ། །ཇི་ལྟར་བཙུན་པ་ཁྱོད་ཀྱི་ཞལ་གྱི་འོད། །དྲི་མེད་གསེར་འོད་འབར་བ་འདྲ་བ་དེ། །རྣམ་པར་མཛེས་ཤིང་ཁ་དོག་ལྡན་པས་ན། །མི་མཆོག་དེང་ནི་སངས་རྒྱས་མཆོག་འགྱུར་རོ།། །།
བར་སྡོམ་ལ། སྒྲ་དང་མཐོང་དང་སངས་རྒྱས་དང་། །རྫོགས་དང་ཞབས་དང་ཆོས་གོས་དང་། །བརྟེན་དང་རྩྭ་ཤ་དེ་བཞིན་རླུང་། །ཁྱོད་གཏོགས་པ་དང་དེ་བཅུའོ། །དེ་ནས་བྱང་ཆུབ་སེམས་དཔའ་ཀླུའི་རྒྱལ་པོ་དུས་ཅན་གྱིས་ཡང་དག་པར་བསྟོད་ནས་རྡོ་རྗེའི་གདན་ལོགས་སུ་གཤེགས་ཏེ་

དེས་དགོངས་པ། རྩྭའི་གདིང་བ་ལ་འདུག་པར་བྱའོ་སྙམ་པ་དང་། དེ་ལ་རྩྭའི་དགོས་པ་བྱུང་བར་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་བྱང་ཆུབ་སེམས་དཔའི་དགོངས་པ་ཤེས་ནས། རི་སྤོས་ཀྱི་ངད་ལྡང་ལས་ཤིང་བལ་གྱི་འདབ་མ་ལྟར་རེག་ན་བདེ་བའི་རྩྭ་ཁུར་གཅིག་
བླངས་ནས་རྩྭ་འཚོང་བཀྲ་ཤིས་ཀྱི་ཁ་དོག་ཏུ་བདག་ཉིད་མངོན་པར་སྤྲུལ་ཏེ་བྱང་ཆུབ་སེམས་དཔའི་སྤྱན་སྔར་བསྡད་དོ། །བྱང་ཆུབ་སེམས་དཔས་གསུངས་པ། བཞིན་བཟངས་རྩྭའོ་ནི་དག་ང་ལ་ཕུལ་ཅིག །ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ཞབས་གཉིས་
ལ་གཏུགས་ནས་གུས་པ་དང་བཅས་པས་ཕུལ་ལོ། །དེ་ནས་བྱང་ཆུབ་སེམས་དཔས་བཀྲ་ཤིས་ཀྱི་རྩྭ་འཚོང་ལས་རྩྭ་བཞེས་ཏེ་ལྷ་རྣམས་ཀྱིས་བསྟན་པའི་ལམ་ནས་བྱང་ཆུབ་ཀྱི་སྙིང་པོ་གང་ན་བ་དེར་གཤེགས་ཏེ་བྱོན་ནས་རྩྭ་རྣམས་མ་འཁྲུགས་པ་དང་། སྟུག་སྲབ་མེད་པ་དགྲམ་པར་
བརྩམས་སོ། །དེ་ནས་རྩྭ་དེ་རྣམས་བསྐོར་ཐབས་སུ་ལྷུང་ནས་བྱང་ཆུབ་སེམས་དཔས་དགོངས་པ། ཇི་ལྟར་རྩྭ་འདི་རྣམས་བསྐོར་ཐབས་སུ་ལྷུང་བ་ལས་བདག་གིས་གདོན་མི་ཟ་བར་དེང་བླ་ན་མེད་པའི་ཡེ་ཤེས་རྟོགས་པར་འགྱུར་རོ་སྙམ་དུ་དགོངས་ནས་རྡོ་རྗེའི་གདན་ལ་འཛེགས་ཏེ་བྲང་
གིས་འགྲོ་བའི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་སྐུ་དྲང་པོར་བསྲང་དྲན་པ་མངོན་དུ་ཕྱོགས་པར་བཞག་སྟེ་བཞུགས་ནས་སེམས་བསྐྱེད་ཅིང་ཚིག་ཏུ་ཡང་གསུངས་པ། ཇི་སྲིད་ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་ཀྲུང་གཞིག་པར་མི་བྱའོ་ཞེས་དེས་རེ་
ཞིག་ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་ཀྲུང་མ་བཤིག་གོ། །བདུད་སྡིག་ཅན་གྱི་རྒྱལ་མཚན་གཉིས་པོ་དགའ་བའི་གནས་དང་། དོགས་པའི་གནས་གཉིས་ཡོད་པ་ལས། དོགས་པའི་གནས་ཀྱི་རྒྱལ་མཚན་གཡོ་བར་བརྩམས་སོ། །སྡིག་ཅན་གྱིས་བསམས་པ། ཇི་ལྟར་
རྒྱལ་མཚན་འདི་གཡོ་བ་ལས་གདོན་མི་ཟ་བར་གནོད་པ་བྱེད་པ་ཞིག་བྱུང་ངོ་སྙམ་སྟེ། དེ་བསམ་པ་ལ་ཞུགས་པ་དང་། ཇི་ཙམ་ན་བྱང་ཆུབ་སེམས་དཔའ་རྡོ་རྗེའི་གདན་ལ་བཞུགས་པ་མཐོང་ངོ་། །དེ་འདི་སྙམ་དུ་སེམས་ཏེ། ཤཱཀྱ་ཟས་གཙང་གི་བུ་འདི་རྡོ་རྗེའི་གདན་ལ་འདུག་གིས། ཅི་ཙམ་

བདག་གི་ཡུལ་ལས་མ་འདས་ཀྱི་བར་དུ་དེ་ལ་བགེགས་བྱའོ་སྙམ་དུ་བསམས་ནས་ཕྲིན་ཡིག་སྐྱེལ་བ་སྐྲ་གྱེན་དུ་འགྲེང་བ། ཤ་ནའི་སྨད་གཡོགས་བགོས་པ་ཞིག་གི་ཁ་དོག་ཏུ་མངོན་པར་སྤྲུལ་ནས། བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་རྟབས་པར་སྨྲས་པ། གྲོང་ཁྱེར་སེར་སྐྱའི་
གཞི་ནི་ལྷས་བྱིན་གྱིས་མནན་ཕོ་བྲང་ནི་བཅོམ། ཤཱཀྱ་རྣམས་ནི་ཁ་བཏག་ན་ཁྱོད་ཅིའི་ཕྱིར་གནས་བཏབ་སྟེ་འདུག །དེ་ན་བྱང་ཆུབ་སེམས་དཔའ་ལ་སྡིག་པ་མི་དགེ་བའི་རྣམ་པར་རྟོག་པ་གསུམ་སྐྱེས་པ་འདི་ལྟ་སྟེ། འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་།
རྣམ་པར་འཚེ་བའི་རྣམ་པར་རྟོག་པའོ། །དེ་ལ་འདོད་པའི་རྣམ་པར་རྟོག་པ་ནི་གྲགས་འཛིན་མ་དང་། རི་དགས་སྐྱེས་དང་། ས་འཚོམ་ལའོ། །གནོད་སེམས་ཀྱི་རྣམ་པར་རྟོག་པ་ནི་ལྷས་བྱིན་ལའོ། །རྣམ་པར་འཚེ་བའི་རྣམ་པར་རྟོག་པ་ནི་དེའི་རྗེས་སུ་འཚོ་བའི་ཤཱཀྱ་རྣམས་ལའོ། །
བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ཅིའི་ཕྱིར་བདག་ལ་སྡིག་པ་མི་དགེ་བའི་རྣམ་པར་རྟོག་པ་གསུམ་སྐྱེས་སྙམ་ན། ཇི་ཙམ་ན་བདུད་སྡིག་ཅན་འདི་ལྟ་སྟེ། དཀྲུག་པའི་ལས་ཀྱི་ཕྱིར་ཉེ་བར་འོངས་པ་གཟིགས་སོ། །དེ་ནས་བྱང་ཆུབ་སེམས་དཔའ་ལ་དགེ་བའི་རྣམ་པར་རྟོག་
པ་གསུམ་སྐྱེས་ཏེ། འདི་ལྟ་སྟེ། ངེས་པར་འབྱུང་བའི་རྣམ་པར་རྟོག་པ་དང་། གནོད་སེམས་མེད་པའི་རྣམ་པར་རྟོག་པ་དང་། རྣམ་པར་མི་འཚེ་བའི་རྣམ་པར་རྟོག་པའོ། །ཡང་བདུད་ཀྱིས་སྨྲས་པ། ཁྱོད་ཅིའི་ཕྱིར་བྱང་ཆུབ་ཀྱི་སྙིང་པོ་ལ་འདུག །བྱང་ཆུབ་སེམས་དཔས་བཀའ་
སྩལ་པ། བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་རོ། །བདུད་ཀྱིས་སྨྲས་པ། ཁྱོད་ཀྱིས་བླ་ན་མེད་པའི་ཡེ་ཤེས་ག་ལ་ཐོབ། བྱང་ཆུབ་སེམས་དཔས་བཀའ་སྩལ་པ། སྡིག་ཅན་ཁྱོད་ཀྱིས་རེ་ཞིག་མཆོད་སྦྱིན་གཅིག་བྱས་པས་ཀྱང་འདོད་པའི་ཁམས་ཀྱི་དབང་ཕྱུག་ཕུན་སུམ་ཚོགས་པར་
གྱུར་ན། ངས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང་། ལག་པ་དང་། རྐང་པ་དང་། མིག་དང་། ཤ་དང་། ཁྲག་དང་། བུ་དང་། ཆུང་མ་དང་། དབྱིག་དང་། གསེར་ལ་སོགས་པ་ཡོངས་སུ་བཏང་

བས་བླ་ན་མེད་པའི་ཡེ་ཤེས་ཐོབ་པར་འགྱུར་བ་ལྟ་སྨོས་ཀྱང་ཅི་དགོས་ཏེ། ངས་བླ་ན་མེད་པའི་ཡེ་ཤེས་ཐོབ་པར་མི་འགྱུར་བ་དེ་སྲིད་རེ་སྐན། དེ་སྐད་ཅེས་བཀའ་སྩལ་པ་དང་། བདུད་ཀྱིས་སྨྲས་པ། རེ་ཞིག་ཇི་ལྟར་བདག་གི་མཆོད་སྦྱིན་གཅིག་གིས་འདོད་པའི་ཁམས་ཀྱི་དབང་
ཕྱུག་ཐོབ་པར་གྱུར་པའི་བདག་གི་དཔང་ནི་ཁྱོད་ཉིད་ཡིན་ན། ཇི་ལྟར་ཁྱོད་ཀྱི་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང་། ལག་པ་དང་། རྐང་པ་དང་།
མིག་དང་། ཤ་དང་། ཁྲག་དང་། བུ་དང་། ཆུང་མ་དང་། དབྱིག་དང་། གསེར་ལ་སོགས་པ་ཡོངས་སུ་བཏང་བར་ཁྱོད་ལ་དཔང་དུ་སུ་ཡོད། དེ་ནས་བྱང་ཆུབ་སེམས་དཔའ་བཅོམ་ལྡན་འདས་ཀྱི་ཕྱག་འཁོར་ལོ་དང་། བཀྲ་ཤིས་དང་། གཡུང་དྲུང་འཁྱིལ་བ་དང་། དྲ་བས་
འབྲེལ་བ་བསོད་ནམས་བརྒྱ་ཕྲག་དུ་མས་བསྐྱེད་པ་སྐྲག་པ་རྣམས་ལ་དབུགས་འབྱིན་པར་མཛད་པས་ས་ལ་རེག་པར་མཛད་ནས་ངས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང་། ལག་པ་དང་། རྐང་པ་
དང་། མིག་དང་། ཤ་དང་། ཁྲག་དང་། བུ་དང་། ཆུང་མ་དང་། དབྱིག་དང་། གསེར་ལ་སོགས་པ་ཡོངས་སུ་བཏང་བའི་ངའི་དཔང་ནི་ས་འདི་ཡིན་ནོ། །དེ་ནས་སའི་ལྷས་ས་བརྟོལ་ནས་ཐལ་མོ་སྦྱར་ཏེ་སྐད་ཕྱུང་བ། སྡིག་ཅན་བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་
དེ་བཞིན་ཡིན་ནོ་ཞེས་དེ་སྐད་སྨྲས་པ་དང་། བདུད་སྡིག་ཅན་ཅང་མི་སྨྲ་བར་གྱུར་ཏེ། ཞུམ་ཞུམ་པོར་གྱུར། བག་འཁུམས་པར་གྱུར། སྤྱི་བོ་སྨད་ནས་སྤོབས་པ་མེད་ལ་སེམས་ཁོང་དུ་ཆུད་ཅིང་འདུག་པར་གྱུར་ཏེ། དེ་སྡུག་བསྔལ་ཞིང་ཡིད་མི་བདེ་བས་བསམས་པ། བདག་གིས་
ཤཱཀྱ་ཟས་གཙང་གི་བུ་ལ་དེ་ལྟར་བྱས་ཀྱང་གླགས་མ་རྙེད་ཀྱིས། མ་ལ་འདི་ལ་བདག་གིས་ཡང་བགེགས་ཤིག་བྱའོ་ཞེས་སྨྲས་ནས་སོང་ངོ་། །དེ་ནས་དེས་བུ་མོ་གསུམ་པོ་སྲེད་མ་དང་། དགའ་བྱེད་མ་དང་། དགའ་སྤྱོད་མ་མངགས་ཏེ་དེ་རྣམས་གཟུགས་དང་། ལང་ཚོའི་རྒྱགས་

པས་དྲེགས་ཤིང་ལྷའི་གོས་དང་རྒྱན་གྱིས་བཀླུབས་ནས་བྱང་ཆུབ་སེམས་དཔའི་མདུན་དུ་བུད་མེད་ཀྱི་གཡོ་རྣམས་བསྟན་པར་བརྩམས་སོ། །དེ་ནས་བྱང་ཆུབ་སེམས་དཔའ་ཐབས་ལ་མཁས་པས་ཇི་ལྟར་རྒན་མོར་གྱུར་པ་དེ་ལྟར་བྱིན་གྱིས་བརླབས་ནས་བདུད་གང་ན་བ་དེར་དོང་བ་དང་།
བདུད་ཀྱིས་དེ་རྣམས་དེ་ལྟ་བུའི་རྣམ་པར་མཐོང་ནས་ཡི་ཆད་ནས་ལག་པ་ལ་འགྲམ་པ་གཏད་དེ་གང་གིས་ན་ཤཱཀྱ་ཟས་གཙང་གི་བུའི་དཀའ་ཐུབ་ལ་བགེགས་བྱེད་པར་འགྱུར་བའི་ཐབས་ལེགས་པ་ཅི་ཡོད་སྙམ་ནས་སེམས་ཁོང་དུ་ཆུད་ཅིང་འདུག་གོ། །དེས་འབྱུང་པོའི་དཔུང་ཚོགས་དང་ལྡན་པ་གླང་
པོ་ཆེ་དང་། རྟ་དང་། རྔ་མོ་དང་། ར་དང་། རི་དགས་དང་། མ་ཧེ་དང་། ཕག་དང་། ཁྱི་དང་། འུག་པ་དང་། ནེའུ་ལེ་དང་། སྤྲེའུ་དང་། ཝ་ལ་སོགས་པ་འདྲ་བ་རལ་གྲི་དང་། མདའ་བོ་ཆེ་དང་། མཚོན་རྩེ་གཅིག་པ་དང་། འཁོར་ལོ་དང་། མདུང་ཐུང་དང་། གཞུ་དང་། ཞགས་
པ་དང་། དགྲ་སྟ་དང་། ལྕགས་ཀྱི་བེར་ཀ་ལ་སོགས་ཏེ་མཚོན་ཆ་ཅན་བྱེ་བ་ཕྲག་སུམ་བཅུ་རྩ་དྲུག་དེད་ནས་རང་ཉིད་གཞུ་རྣ་དྲུང་དུ་བཀང་སྟེ་བྱང་ཆུབ་སེམས་དཔའ་ཡོངས་སུ་བསྐོར་ནས་འདུག་གོ། །དེ་ནས་བྱང་ཆུབ་སེམས་དཔས་གཟུགས་རྣམ་པ་དུ་མ་ཅན་མཚོན་ཆ་རྣམ་པ་སྣ་ཚོགས་མང་པོ་དང་
བཅས་པ་དེ་རྣམས་གཟིགས་ནས་དགོངས་པ། རེ་ཞིག་ཕོ་ཕལ་པ་ཞིག་དང་ལྷན་ཅིག་འཐབ་པར་རྩོམ་ན་ཡང་དེའི་གཉེན་པོའི་ཕྱོགས་ལ་སྦྱོར་བ་བྱེད་ན་འདོད་པའི་ཁམས་ཀྱི་དབང་ཕྱུག་འདི་ལ་ལྟ་སྨོས་ཀྱང་ཅི་དགོས་ཀྱིས། མ་ལ་བདག་གིས་གཉེན་པོའི་ཕྱོགས་ལ་སྦྱར་བར་བྱའོ་སྙམ་དུ་
དགོངས་ནས་དེ་ཞི་བར་འགྱུར་བའི་ཐབས་ལ་དགོངས་པར་བརྩམས་སོ། །བདུད་ཀྱིས་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་དང་ལྷན་ཅིག་ཏུ་བྱང་ཆུབ་སེམས་དཔའི་སྟེང་ནས་འཁོར་ལོ་དང་། མདུང་དང་། མདའ་བོ་ཆེ་དང་། མཚོན་རྩེ་གཅིག་པ་དང་། མདའ་ལ་སོགས་པའི་མཚོན་ཆ་
རྣམས་དབབ་པར་བརྩམས་སོ། །དེ་ནས་བྱང་ཆུབ་སེམས་དཔའ་བྱམས་པ་ལ་སྙོམས་པར་ཞུགས་པ་ན་དེའི་མཚོན་ཆ་དེ་རྣམས་ལྷའི་མེ་ཏོག་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོར་གྱུར་ནས་བྱང་ཆུབ་སེམས་དཔའི་ཉེ་འཁོར་དུ་འབབ་པར་བརྩམས་སོ། །དེ་ནས་བདུད་སྟེང་

གི་བར་སྣང་ལ་མངོན་པར་འཕགས་ཏེ་ཕྱག་དར་གྱི་ཆར་དབབ་པར་བརྩམས་ན། དེ་ཡང་ལྷའི་མེ་ཏོག་མན་དཱ་ར་བ་རྣམས་སུ་གྱུར་ནས་བྱང་ཆུབ་སེམས་དཔའི་སྟེང་ནས་འབབ་པར་བརྩམས་སོ། །དེ་ནས་བདུད་ཀྱིས་གདུག་པའི་རླུང་དང་། རྡོའི་ཆར་ཕབ་པ་དང་། གནས་གཙང་མའི་རིས་
ཀྱི་ལྷ་རྣམས་ཀྱིས་བྱང་ཆུབ་སེམས་དཔའི་སྟེང་དུ་ལོ་མ་ལས་མ་ཡིན་པའི་སྤྱིལ་པོ་མངོན་པར་སྤྲུལ་པས་རྡོའི་ཆར་དང་གདུག་པའི་རླུང་དུ་བཅས་པ་དེས་བྱང་ཆུབ་སེམས་དཔའ་ལ་ཆུང་ཟད་ཀྱང་གནོད་པར་མ་གྱུར་ཏོ། །བདུད་ཀྱིས་བསམས་པ། བདག་གིས་ནམ་དུ་ཡོངས་སུ་བསྐོར་ཏེ་འདུག །བསམ་
གཏན་གྱི་ཚེར་མ་ནི་སྒྲ་ཡིན་གྱི། བྱང་ཆུབ་ཀྱི་ཤིང་ཤེལ་ལས་བྱས་པར་མངོན་པར་སྤྲུལ་ལ་སོང་བ་དང་། དེའི་ལོ་མ་རྣམས་རྟག་པར་སྒྲ་འབྱིན་པས་དེའི་སེམས་རྩེ་གཅིག་པར་མི་འགྱུར་རོ་སྙམ་དུ་བསམས་ནས་བྱང་ཆུབ་ཀྱི་ཤིང་ཤེལ་ལས་བྱས་པར་མངོན་པར་སྤྲུལ་ཏེ། རྣ་བ་གཏད་ནས་བསྒྲིམས་
ཏེ་བསྡད་པ་ན་བྱང་ཆུབ་ཀྱི་ཤིང་གི་ལོ་མ་ཤེལ་ལས་བྱས་པ་རྣམས་མྱུར་བ་མྱུར་བར་སྒྲ་འབྱིན་པར་བརྩམས་པས་བསམ་གཏན་གྱི་ཚེར་མ་ནི་སྒྲ་ཡིན་པས། བྱང་ཆུབ་སེམས་དཔས་སེམས་རྩེ་གཅིག་པ་མ་ཐོབ་བོ། །གནས་གཙང་མའི་རིས་ཀྱི་ལྷ་རྣམས་ཀྱིས་བསམས་པ། ཤེལ་ལས་བྱས་
པའི་བྱང་ཆུབ་ཀྱི་ཤིང་གི་ལོ་མ་ཤེལ་ལས་བྱས་པ་རྣམས་ཀྱི་སྒྲས་བྱང་ཆུབ་སེམས་དཔའ་སེམས་རྩེ་གཅིག་པ་མ་ཐོབ་ཀྱིས་ཐབས་ཤིག་བཤམ་པར་བྱའོ་སྙམ་སྟེ། དེ་ནས་དེ་རྣམས་ཀྱིས་ལོ་མ་རེ་རེ་བཟུང་ན། འོན་ཀྱང་བདུད་ཀྱི་དཔུང་དེ་བཞིན་དུ་གནས་ནས་གནས་གཙང་མའི་རིས་ཀྱི་ལྷ་
རྣམས་ཀྱིས་བསམས་པ། བདུད་སྡིག་ཅན་འདི་ནི་རིང་མོ་ཞིག་ཏུ་བྱང་ཆུབ་སེམས་དཔའ་ལ་རྣམ་པར་འཚེ་བར་འགྱུར་རོ་སྙམ་དུ་བསམས་ནས་བདུད་ཀྱི་དཔུང་དེ་ཁོར་ཡུག་གི་ཕ་རོལ་དུ་འཕངས་སོ། །དེ་ནས་བྱང་ཆུབ་སེམས་དཔའ་བཅོམ་ལྡན་འདས་ལྟེང་རྒྱས་ནས་འབབ་ཆུ་ནཻ་རཉྫ་ནའི་འགྲམ་
བྱང་ཆུབ་ཀྱི་ཤིང་དྲུང་དུ་བཞུགས་ཏེ་རྟག་ཏུ་བྱ་བ་དང་། འགྲུས་སྐྱོང་དང་ལྡན་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་བསྒོམ་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་སོ། །དེ་ནམ་གྱི་ཐུན་དང་པོ་ལ་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་

དགོངས་པ་མངོན་དུ་བཞག་པ་ན། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་མཛད་དེ། འདི་ལྟ་སྟེ་གཅིག་ཏུ་གྱུར་ཅིང་མང་པོར་གྱུར་པ་དང་། མང་པོར་གྱུར་ཅིང་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་གྱུར་པ་ཡེ་ཤེས་གཟིགས་པས་ཉམས་སུ་མྱོང་བར་མཛད་དོ། །
སྐུས་རྩིག་པ་དང་། རི་དང་། ར་བ་ལ་ཡང་ཐད་ཀར་གཤེགས་པར་མཛད་དེ། དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་། བྱིའུ་ཟུལ་མཛད་དེ། དཔེར་ན་ཆུ་ལ་བྱ་བ་བཞིན་ནོ། །ཆུའི་རྒྱུན་ལ་ཡང་མི་ཉམས་པར་གཤེགས་ཏེ། དཔེར་ན་ས་ལ་བྱ་བ་
བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་གཤེགས་པར་མཛད་དེ། དཔེར་ན་འདབ་ཆགས་བྱ་བཞིན་ནོ། །ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་གཟི་བརྗིད་ཆེ་བ་ལ་ཕྱག་གིས་ནོམ་ཞིང་ཉུག་པར་མཛད་ཅིང་ཚངས་པའི་འཇིག་རྟེན་གྱི་བར་དུ་སྐུས་དབང་སྒྱུར་
བར་མཛད་དོ། །ཡང་བདུད་ཀྱིས་བསམས་པ། བསམ་གཏན་གྱི་ཚེར་མ་སྒྲ་ཡིན་པས་མ་ལ་བདག་གིས་རྒྱང་རིང་པོ་ཁོ་ནར་འདུག་ལ་སྒྲ་དབྱུང་བར་བྱའོ་སྙམ་ནས་དེས་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་དང་། འཇིགས་པ་ཆེན་པོ་འཇིགས་སུ་རུང་བའི་སྒྲ་ཕྱུང་ངོ་། །བྱང་ཆུབ་སེམས་
དཔས་ཀྱང་དེ་བསྒྲིབ་པའི་ཕྱིར་དཔག་ཚད་བཅུ་གཉིས་ཀྱི་བར་དུ་ཤིང་ཀ་དམ་པའི་ཚལ་སྤྲུལ་པས་དེས་ན་སྒྲ་དེ་རྡུགས་པས་མི་གྲག་གོ། །བྱང་ཆུབ་སེམས་དཔས་དགོངས་པ། མ་ལ་བདག་གིས་ལྷའི་རྣ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་བཞག་
ནས། དེས་ན་ལྷ་དང་མི་རྣམས་ཀྱི་སྒྲ་གང་དང་གང་དག་ཐོས་པར་འདོད་པ་དེ་དག་མཉན་པར་བྱའོ་སྙམ་དུ་དགོངས་ནས་ལྷའི་རྣ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་བཞག་པ་ན། དེ་ལྷའི་སྙན་རྣམ་པར་དག་པ་མི་རྣམས་ཀྱི་ལས་འདས་པས་སྒྲ་གཉིས་པོ་མི་
རྣམས་དང་། མི་མ་ཡིན་པ་རྣམས་ཀྱི་དང་། གང་དག་རིང་བ་དང་། གང་དག་ཉེ་བ་ཡང་གསན་ཏོ། །དེ་ནས་བྱང་ཆུབ་སེམས་དཔས་དགོངས་པ། བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་ལས་བདག་ལ་སུ་དག་ནི་གནོད་པར་སེམས། སུ་དག་ནི་མ་ཡིན་ཞེས་དེ་དག་ཇི་

ལྟར་ཤེས་པར་བྱ་སྙམ་པ་དང་དེ་འདི་སྙམ་དུ་དགོངས་ཏེ། སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་ནས། དེ་ནམ་གྱི་གུང་ཐུན་ལ་སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་
པ་ན། དེའི་ཐུགས་ཀྱིས་སེམས་ཅན་གཞན་དག་དང་གང་ཟག་གཞན་གྱི་རྣམ་པར་རྟོག་པ་དང་། རྣམ་པར་དཔྱོད་པའི་ཡིད་ཇི་ལྟ་བ་བཞིན་དུ་རབ་ཏུ་མཁྱེན་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདོད་
ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། བསྡུས་པ་དང་། རྣམ་པར་གཡེངས་པ་དང་། ཞུམ་
པ་དང་། རབ་ཏུ་འཛིན་པ་དང་། རྒོད་པ་དང་། མི་རྒོད་པ་དང་། ཉེ་བར་མ་ཞི་བ་དང་། ཉེ་བར་ཞི་བ་དང་། མཉམ་པར་མ་བཞག་པ་དང་། མཉམ་པར་བཞག་པ་དང་། མ་བསྒོམས་པ་དང་། བསྒོམས་པ་དང་། སེམས་རྣམ་པར་མ་གྲོལ་བ་དང་། རྣམ་པར་གྲོལ་བ་ཞེས་ཇི་ལྟ་བ་བཞིན་
དུ་རབ་ཏུ་མཁྱེན་ཏོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་འདི་སྙམ་དུ་དགོངས་ཏེ། བདུད་ཀྱི་མངག་གཞུག་པ་འདི་རྣམས་ལས་སུ་དག་བདག་དང་ཚེ་རབས་གཞན་ན་མར་འབྲེལ་བའམ། ཕར་འབྲེལ་
བའམ། སུ་དག་གཤེད་མའམ། ཕྱིར་རྒོལ་བའམ། དགྲར་གྱུར་པ་དེ་དག་ཇི་ལྟར་ཤེས་པར་བྱ་སྙམ་མོ། །དེ་འདི་སྙམ་དུ་དགོངས་ཏེ། སྔོན་གྱི་གནས་རྗེས་སུ་དྲན་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་ནས། དེ་ནམ་གྱི་གུང་ཐུན་ལ་སྔོན་གྱི་གནས་
རྗེས་སུ་དྲན་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན། དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་ཏེ། འདི་ལྟ་སྟེ། དེས་སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་།

དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱ་དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བརྒྱ་ཕྲག་དུ་མ་དང་། སྐྱེ་བ་སྟོང་ཕྲག་དུ་མ་དང་། སྐྱེ་བ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་
བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་འཆགས་པའི་བསྐལ་པ་དུ་མ་རྗེས་སུ་དགོངས་ཏེ། བདག་སྔོན་སེམས་ཅན་འདི་དག་གི་ནང་ན་གནས་པ་ན་མིང་ནི་འདི་ཞེས་བྱ།
རིགས་ནི་འདི་ཞེས་བྱ། རུས་ནི་འདི་ཞེས་བྱ། ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང་། ཚེ་ནི་འདི་སྲིད་ཅིག་ལོན། ཡུན་ནི་འདི་སྲིད་ཅིག་འདུག་འདུག །ཚེ་ནི་འདི་སྲིད་ཅིག་ལོན་ཏེ་གནས་དེ་ནས་བདག་ཤི་འཕོས་ཏེ་ཆེ་གེ་མོ་ཞིག་ཏུ་སྐྱེས་
སོ། །དེ་ནས་ཀྱང་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་བྱ་བ་རྣམ་པ་དང་བཅས་ཏེ་ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དགོངས་སོ། །དེ་འདི་སྙམ་དུ་དགོངས་ཏེ། བདུད་ཀྱི་མངག་གཞུག་འདི་རྣམས་ལས་
སུ་དག་ནི་ངན་སོང་དུ་འགྲོ། སུ་དག་ནི་མི་འགྲོ་བ་དེ་དག་ཇི་ལྟར་ཤེས་པར་བྱ་སྙམ་མོ། །དེ་འདི་སྙམ་དུ་དགོངས་ཏེ། འཆི་འཕོ་དང་སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་སྟེ། དེ་ནམ་གྱི་ཐུན་ཐ་མ་ལ་འཆི་འཕོ་དང་སྐྱེ་བ་ཤེས་པ་མངོན་སུམ་དུ་བྱ་བའི་མངོན་
པར་ཤེས་པ་ལ་དགོངས་པ་མངོན་དུ་བཞག་པ་ན། དེའི་ལྷའི་སྤྱན་རྣམ་པར་དག་པ་མི་རྣམས་ཀྱི་ལས་འདས་པས་གཟིགས་ན་སེམས་ཅན་རྣམས་ཀྱི་འཆི་འཕོ་དང་། སྐྱེ་བ་དང་། ཁ་དོག་བཟང་པོ་དང་། ཁ་དོག་ངན་པ་དང་། དམན་པ་དང་། གྱ་ནོམ་པ་དང་། བདེ་འགྲོ་དང་། ངན་འགྲོ་
དང་། ངན་འགྲོར་འགྲོ་བའི་སེམས་ཅན་རྣམས་ལས་ཇི་ལྟ་བ་བཞིན་གྱི་རྗེས་སུ་འགྲོ་བ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། ཤེས་ལྡན་སེམས་ཅན་འདི་ཞེས་བྱ་བ་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན། ངག་དང་ཡིད་ཀྱི་ཉེས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་བ་

འདེབས་པ་ལོག་པར་ལྟ་བ་སྟེ། ལོག་པར་ལྟ་བའི་ཆོས་དང་ལས་ཡང་དག་པར་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །ཤེས་ལྡན་སེམས་ཅན་འདི་དག་ནི་ལུས་
ཀྱི་ལེགས་པར་སྤྱོད་པ་དང་ལྡན། ངག་དང་ཡིད་ཀྱི་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་བ་མི་འདེབས་ཤིང་ཡང་དག་པར་ལྟ་བ་སྟེ། ཡང་དག་པར་ལྟ་བའི་ཆོས་དང་ལས་ཡང་དག་པར་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་
རིས་ཀྱི་འཇིག་རྟེན་དུ་ལྷ་དང་མི་རྣམས་སུ་སྐྱེ་བར་འགྱུར་རོ། །དེ་འདི་སྙམ་དུ་དགོངས་ཏེ། ཤེས་ལྡན་སེམས་ཅན་འདི་དག་ནི་འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པས་འཁོར་བ་ན་འཁོར་རོ། །འདི་རྣམས་ཀྱི་འདོད་པའི་ཟག་པ་དང་། སྲིད་པའི་ཟག་པ་དང་།
མ་རིག་པའི་ཟག་པ་དེ་ཇི་ལྟར་སྤང་བ་དེ་ཇི་ལྟར་ཤེས་པར་བྱ་སྙམ་མོ། །དེ་འདི་སྙམ་དུ་དགོངས་ཏེ། ཟག་པ་ཟད་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་སྟེ། དེ་རྟག་ཏུ་བྱེད་པ་དང་། འགྲུས་སྐྱོང་དང་ལྡན་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་བསྒོམ་
པའི་རྣལ་འབྱོར་གྱི་རྗེས་སུ་བརྩོན་པས་གནས་ནས་ཟག་པ་མེད་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན། དེས་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་ནི་སྡུག་བསྔལ་ཀུན་འབྱུང་
བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་དེ་ལྟར་ཤེས་ཤིང་དེ་ལྟར་མཐོང་ན་འདོད་པའི་ཟག་པ་ལས་སེམས་རྣམ་པར་གྲོལ་བར་འགྱུར་ཞིང་སྲིད་པའི་ཟག་
པ་དང་། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ། །རྣམ་པར་གྲོལ་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་ལ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་རྣམ་པར་གྲོལ་བའི་ཡེ་ཤེས་ཉིད་མཐོང་བར་འགྱུར་རོ། །

དེ་ལྟར་དེ་ན་བཅོམ་ལྡན་འདས་བྱང་ཆུབ་མངོན་པར་རྫོགས་པར་སངས་རྒྱས་ཏེ། བྱ་བ་བྱས། བྱེད་པ་བྱས་ནས་མེའི་ཁམས་ལ་སྙོམས་པར་ཞུགས་སོ། །གང་གི་ཚེ་བྱང་ཆུབ་སེམས་དཔས་བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་བྱམས་པའི་མཚོན་གྱིས་མངོན་དུ་བཅོམ་
ནས་བླ་ན་མེད་པའི་ཡེ་ཤེས་བརྙེས་པའི་ཚེ་བདུད་སྡིག་ཅན་གྱིས་གནས་གཞུ་ལྷུང་། རྒྱལ་མཚན་འགྱེལ། གནས་ཀྱང་གཡོས་སོ། །དེ་ནས་བདུད་སྡིག་ཅན་འབྱུང་པོའི་འཁོར་བྱེ་བ་ཕྲག་སུམ་བཅུ་རྩ་དྲུག་སྡུག་བསྔལ་ཞིང་ཡིད་མི་བདེ་བ་ཡིད་ལ་བཅགས་ཏེ་དེ་ཉིད་དུ་མི་སྣང་བར་གྱུར་ཏོ། །
བདུད་ཀྱི་རིས་ཀྱི་ལྷ་རྣམས་ཀྱིས་གྲོང་ཁྱེར་སེར་སྐྱའི་གཞིར་བྱང་ཆུབ་སེམས་དཔའ་ཤཱཀྱ་ཐུབ་པ་ནི་དཀའ་བ་ལོ་དྲུག་སྤྱད་ནས་རྡོ་རྗེའི་གདན་ལ་འཛེགས་ཏེ་རྩྭའི་གདིང་བ་ལ་གྲོངས་སོ་ཞེས་བསྒྲགས་པ་གང་ཡིན་པ་དེ་རྒྱལ་པོ་ཟས་གཙང་བཙུན་མོ་དང་། གཞོན་ནུ་དང་། བློན་པོའི་ཚོགས་དང་། གྲོང་
ཁྱེར་སེར་སྐྱ་ན་གནས་པའི་སྐྱེ་བོའི་ཚོགས་དང་བཅས་པས་ཐོས་ནས་སྡུག་བསྔལ་ཆེན་པོ་དང་ཡིད་མི་བདེ་བས་གདུངས་པར་གྱུར་ཏོ། །ས་འཚོ་མ་དང་། རི་དགས་སྐྱེས་དང་། གྲགས་འཛིན་མ་ཡང་བྱང་ཆུབ་སེམས་དཔའི་ཡོན་ཏན་རྗེས་སུ་དྲན་ནས་བརྒྱལ་ཏེ་ས་ལ་འགྱེལ་ནས་ཆུས་
གཏོར་བ་ལས་སླར་དབུགས་བྱུང་ངོ་། །བཙུན་མོའི་སྤྲོ་བསྲིང་བའི་སྐྱེ་བོ་དག་ནི་མིག་མཆི་མས་གང་ལ་མྱུར་བ་མྱུར་བར་དབུགས་བརྫགས་ཤིང་དལ་བུས་དལ་བུས་སྨྲེ་སྔགས་འདོན་ཅིང་འདུག་གོ། །དེ་དག་སྡུག་བསྔལ་བ་སངས་རྒྱས་ལ་མངོན་པར་དད་པའི་ལྷ་དགའ་བ་སྐྱེས་པ་
རྣམས་ཀྱིས་མཐོང་ནས་བྱང་ཆུབ་སེམས་དཔའ་ཤཱཀྱ་ཐུབ་པ་མ་ནོངས་ཏེ། འདི་ལྟར་དེས་བླ་ན་མེད་པའི་ཡེ་ཤེས་བསྙེས་སོ་ཞེས་སྨྲས་པ་གང་ཡིན་པ་རྒྱལ་པོ་ཟས་གཙང་འཁོར་དང་བཅས་པ་དང་། སེར་སྐྱའི་སྐྱེ་བོའི་ཚོགས་ཀྱིས་ཐོས་ནས་མཆོག་ཏུ་དགའ་བ་སྐྱེས་སོ། །བཅོམ་
ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་པ་ན་གྲགས་འཛིན་མ་ལ་ཡང་ཁྱེའུ་ཞིག་བཙས་སོ། །བདུད་རྩི་ཟས་ཀྱི་ཡང་ཁྱེའུ་ཞིག་བཙས་སོ། །ཟླ་བ་ཡང་སྒྲ་ཅན་གྱིས་ཟིན་ཏོ། །དེ་ནས་རྒྱལ་པོ་ཟས་གཙང་གིས་ཕུན་སུམ་ཚོགས་པ་དེ་མཐོང་ནས། ད