Kinh tạng Tây Tạng (Kangyur Đại Học) — 004_འདུལ་བ།_ང

འཇིག་རྟེན་ཐམས་ཅད་དབང་དུ་བྱ་བ་ཞིག །དེ་ལ་ཤཱཀྱ་རྣམས་ཀྱིས་བཤེས་པའི་ཚིག་གིས་སྨྲས་པ། ལྷ་སྦྱིན་བཅོམ་
ལྡན་འདས་ནི་རྫུ་འཕྲུལ་ཆེ་བ་མཐུ་ཆེ་བ་ཡིན་གྱིས་དེ་སྐད་མ་སྨྲ་ཤིག་ཅེས་བཟློག་ནས་ཅང་མི་སྨྲ་བར་འདུག་གོ། །ཚངས་པས་བསྐོར་བའི་སྐྱེད་མོས་ཚལ་དུ་འདི་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་མ་གཏོགས་པར་བྲེ་བོ་ཟས་ལ་སོགས་པ་ཤཱཀྱ་བདུན་
ཁྲི་དྲུག་སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་ན་ཡང་ལྷ་སྦྱིན་དེ་ཁོ་ན་བཞིན་དུ་ཁ་ཟེར་རོ། །རོ་ཧི་ཏ་ཀའི་སྐྱེད་མོས་ཚལ་དུ་འདི་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་མ་གཏོགས་པར་བདུད་རྩི་ཟས་ལ་སོགས་པ་ཤཱཀྱ་བདུན་ཁྲི་ལྔ་
སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་ན་ཡང་ལྷ་སྦྱིན་དེ་ཁོ་ན་བཞིན་དུ་ཁ་ཟེར་རོ། །འཁོར་ལྷག་མ་རྣམས་ལས་ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་
པ་ཐམས་ཅད་སྤངས་ཏེ་དགྲ་བཅོམ་པར་གྱུར། ཁ་ཅིག་གིས་ནི་སངས་རྒྱས་ལ་སྐྱབས་སུ་སོང་། ཁ་ཅིག་གིས་ནི་ཆོས་ལ། ཁ་ཅིག་གིས་ནི་དགེ་འདུན་ལ་སྟེ། འཁོར་དེ་དག་ཀྱང་ཕལ་ཆེར་ཀྱང་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་པར་བཀོད་
དོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། སྔོན་ནི་བཅོམ་ལྡན་འདས་ལྷ་དང་ལྷ་མ་ཡིན་གྱི་འགྲོ་བར་བཅས་པས་མཆོད་པ་དང་། རྗེད་པ་དང་མངོན་དུ་སྨྲ་བར་བྱ་བར་གྱུར་ན། ད་ལྟ་ནི་མིས་མཆོད་ཀྱི་ལྷས་ནི་མ་ཡིན་ནོ་སྙམ་མོ། །དེ་ནས་ཤཱཀྱ་གཞོན་ནུ་ཞིག་གིས་ཚིགས་

སུ་བཅད་དེ་གསོལ་པ། དྲང་སྲོང་ཆེན་པོ་སྨྲ་མཆོག་དམ་ཆོས་ཀྱི། །ཆར་པས་འགྲོ་བ་འདི་ནི་ཚིམ་མཛད་དོ། །མི་བཟད་ལམ་དུ་ལྷུང་བའི་འཇིག་རྟེན་འདི། །དྲོངས་ཏེ་ཐར་བའི་ལམ་ལ་སྦྱར་བར་མཛོད། །རྒྱལ་པོ་ཟས་གཙང་ནི་འདི་སྙམ་དུ་བདག་གི་བུ་འབའ་ཞིག་འདི་ལྟར་རྫུ་འཕྲུལ་
ཆེ་ཞིང་འདི་ལྟར་མཐུ་ཆེ་བ་ཡིན་ནོ་སྙམ་སྟེ། ལྷག་པར་དགའ་བས་བདེན་པ་མ་མཐོང་ངོ་། །བཅོམ་ལྡན་འདས་ཀྱིས་དགོངས་པ། རྒྱལ་པོ་ཟས་གཙང་གིས་ཅིའི་ཕྱིར་བདེན་པ་མ་མཐོང་སྙམ་པ་ལས་དེ་འདི་སྙམ་དུ་བདག་གི་བུ་འབའ་ཞིག་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ནོ་སྙམ་སྟེ།
ལྷག་པར་དགའ་བར་གྱུར་གྱིས་མདོར་ན་དེའི་དྲེགས་པ་སྤོང་དུ་གཞུག་གོ། །རྒྱུ་གཉིས་ཀྱིས་བདེན་པ་རྣམས་མཐོང་བར་མི་འགྱུར་ཏེ། ཧ་ཅང་ཞུམ་པ་དང་། ཤིན་ཏུ་དགའ་བའོ། །དེ་ལ་ཞུམ་པའི་སེམས་དང་ཤིན་ཏུ་དགའ་བ་ཡོད་ཀྱིས། མ་ལ་ངས་དེའི་ཞུམ་པ་དང་། ཤིན་
ཏུ་དགའ་བ་གཉིས་སྤོང་དུ་གཞུག་གོ་སྙམ་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་རྒྱལ་པོ་ཟས་གཙང་ལ་སོམས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་
ལྡན་འདས་ལས་མཉན་ནས་རྒྱལ་པོ་ཟས་གཙང་གང་ན་བ་དེར་སོང་བ་དང་། རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་
བུ་ཆེན་པོ་ཚུར་སྤྱོན། མཽད་གལ་གྱི་བུ་ཆེན་པོ་ཁྱོད་བྱོན་པ་ལེགས་སོ། །བཙུན་པ་མཽད་གལ་གྱི་བུ་ཆེན་པོ་གདན་བཤམས་པ་ཉིད་ལ་བཞུགས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་སྟན་བཤམས་པ་ཉིད་ལ་འདུག་གོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་སེམས་
ཇི་ལྟར་མཉམ་པར་བཞག་ན་རང་གི་སྟན་ལས་མི་སྣང་བར་གྱུར་ཏེ། ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་བྱེད་དེ། འདི་ལྟ་སྟེ་འཆག་པ་དང་། འགྲེང་བ་དང་། འདུག་པ་དང་། ཉལ་བར་བྱེད་དོ། །མེའི་ཏིང་ངེ་འཛིན་ལ་ཡང་སྙོམས་

པར་འཇུག་པར་བྱེད་དོ། །མེའི་ཏིང་ངེ་འཛིན་ལ་སྙོམས་པར་ཞུགས་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོའི་ལུས་ལས་འོད་ཟེར་རྣམ་པ་སྣ་ཚོགས་དག་འབྱིན་པར་བྱེད་དོ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་།
ལེ་བརྒན་དང་། ཤེལ་གྱི་ཁ་དོག་དག་གོ། །ཆོ་འཕྲུལ་ཟུང་དུ་ཡང་སྟོན་པར་བྱེད་དེ། ལུས་ཀྱི་སྟོད་ནས་འབར་བར་བྱེད་ལ། ལུས་ཀྱི་སྨད་ནས་ཆུ་གྲང་མོའི་རྒྱུན་འབེབས་པར་བྱེད་དོ། །ལུས་ཀྱི་སྨད་ནས་མེ་འབར་བར་བྱེད་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབེབས་
པར་བྱེད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས། རྫུ་འཕྲུལ་མངོན་པར་འདུ་བྱ་བ་བསྡུས་ཏེ་སྟན་བཤམས་པ་
ཉིད་ལ་འདུག་གོ། །དེ་ནས་རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱི་ཉན་ཐོས་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་གཞན་ཡང་མཆིས་ལགས་སམ། རྒྱལ་པོ་ཆེན་པོ་མཆིས་
སོ་ཞེས་ཚིགས་སུ་བཅད་དེ་སྨྲས་པ། མཐུ་ཆེ་བ་དང་གསུམ་རིག་དང་། །སེམས་ཀྱི་རྣམ་གྲངས་ཤེས་པ་དང་། །ཟག་ཟད་དགྲ་བཅོམ་གང་ཡིན་པ། །ཐུབ་པའི་ཉན་ཐོས་མང་དུ་མཆིས། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བདག་གི་བུ་འབའ་ཞིག་
འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བར་མ་ཟད་དེ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བའི་རབ་ཏུ་བྱུང་བ་གཞན་ཡང་ཡོད་དོ་སྙམ་ནས་དེ་ཤིན་ཏུ་དགའ་བ་གང་ཡིན་པ་དེ་དང་བྲལ་བར་གྱུར་ཏོ། །སྐབས་དེར་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་དེ། ཀྱེ་མ་བརྒྱ་བྱིན་དང་
ཚངས་པ་ལ་སོགས་པ་ལྷ་རྣམས་འོངས་ན་ལྷའི་འཁོར་དག་པ་ལ་ཆོས་བཤད་དོ་སྙམ་པ་དང་། ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་པ་དེའི་ཚེ་སྲོག་ཆགས་གྲོག་སྦུར་རྣམས་ཀྱི་སེམས་ཀྱིས་ཀྱང་བཅོམ་ལྡན་

འདས་ཀྱིས་དགོངས་པ་ཤེས་པར་འགྱུར་ན། བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཀྱིས་ལྟ་སྨོས་ཀྱང་ཅི་དགོས། གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་པ་དེའི་ཚེ། ཉན་ཐོས་ཆེན་པོ་རྣམས་ཀྱི་སེམས་ཀྱིས་ཀྱང་བཅོམ་ལྡན་འདས་ཀྱི་དགོངས་པ་མི་ཤེས་ན། བརྒྱ་
བྱིན་དང་ཚངས་པ་ལ་སོགས་ཏེ་ལྷ་རྣམས་ཀྱིས་ལྟ་ཅི་སྨོས། སྲོག་ཆགས་གྲོག་སྦུར་རྣམས་ཀྱིས་ལྟ་ག་ལ་ཤེས། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བཅོམ་ལྡན་འདས་ཅིའི་ཕྱིར་འཇིག་རྟེན་པའི་ཐུགས་བསྐྱེད་པ་མཛད་དོ་སྙམ་པ་ལས་དེ་འདི་སྙམ་དུ་སེམས་ཏེ།
ལྷའི་འཁོར་དག་པ་རྣམས་ལ་ཆོས་འཆད་པར་བཞེད་དོ་སྙམ་ནས། དེས་ལྷའི་བུ་བཟོ་ཐམས་ཅད་པ་ལ་བསྒོ་བ། བཟོ་ཐམས་ཅད་པ་བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་པར་བཞེད་ཀྱིས་ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་རྩེག་མ་གདན་སྣ་ཚོགས་བཤམས་
པ་ཞིག་སྤྲུལ་ཅིག །ཀཽ་ཤི་ཀ་ཁྱོད་ཀྱི་མཆོག་ཏུ་བཟང་ངོ་ཞེས་ལྷའི་བུ་བཟོ་ཐམས་ཅད་པས་ལྷའི་དབང་པོ་བརྒྱ་བྱིན་ལས་མཉན་ཏེ་ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་རྩེག་མ་གདན་སྣ་ཚོགས་བཤམས་པ་ཞིག་སྤྲུལ་ཏོ། །དེ་ནས་རྒྱལ་པོ་ཆེན་པོ་བཞི་སྒོ་བཞིན་འཁོད་པའི་ཡུལ་
འཁོར་སྐྱོང་དང་། འཕགས་སྐྱེས་པོ་དང་། མིག་མི་བཟང་དང་། ལུས་ངན་པོ་སྟེ། ཤར་ཕྱོགས་ན་ནི་ཡུལ་འཁོར་སྐྱོང་དཔུང་རྒྱན་དང་། རྣ་ཆ་གདུབ་ཀོར་དང་། ཕྲེང་བ་དང་། རྒྱན་སྣ་ཚོགས་ཀྱིས་བརྒྱན་པའོ། །ལྷོ་ཕྱོགས་ན་ནི་འཕགས་སྐྱེས་པོ་ལྷའི་རྒྱན་ཐམས་ཅད་ཀྱིས་
བརྒྱན་པའོ། །ནུབ་ཕྱོགས་ན་ནི་མིག་མི་བཟང་རིན་པོ་ཆེ་སྣ་ཚོགས་ཀྱིས་བརྒྱན་པའོ། །བྱང་ཕྱོགས་ན་ནི་ལུས་ངན་པོ་རྒྱན་ཐམས་ཅད་ཀྱིས་བརྒྱན་པའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ནྱ་གྲོ་དྷའི་ཀུན་དགའ་ར་བ་ཆེ་ཐང་དུ་བརྒྱན་དུ་བཅུག་སྟེ། བཅོམ་ལྡན་འདས་གང་ན་བ་
དེར་སོང་སྟེ་ཕྱིན་ནས་བཅོམ་ལྡན་འདས་ལ་དོན་དེ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་བརྒྱ་བྱིན་དང་ཚངས་པ་ལ་སོགས་པ་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་ཁང་པ་བརྩེགས་པར་ཞུགས་ཏེ། ལྷའི་འཁོར་ཕལ་པོ་ཆེའི་གུང་ལ་རིན་པོ་ཆེ་སྣ་ཚོགས་ཀྱིས་བརྒྱན་པའི་

སེང་གེའི་ཁྲི་ལ་བཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྒྱལ་པོ་ཟས་གཙང་ཁྲིད་དེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་ནང་དུ་ཞུགས་པ་དང་། རྒྱལ་པོ་ཟས་གཙང་ལ་རྒྱལ་པོ་ཆེན་པོ་ཡུལ་
འཁོར་སྐྱོང་གིས་རྒྱལ་པོ་ཆེན་པོ་ནང་དུ་མ་འགྲོ་བར་སྡོད་ཅིག་ཅེས་བཟློག་གོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ཁྱོད་སུ་ཞིག །ཡུལ་འཁོར་སྐྱོང་
གིས་སྨྲས་པ། རྒྱལ་པོ་ཆེན་པོ་བདག་ནི་ཡུལ་འཁོར་སྐྱོང་ངོ་། །དེ་ནས་རྒྱལ་པོ་ཟས་གཙང་ལྷོ་སྒོར་སོང་བ་དང་། རྒྱལ་པོ་ཆེན་པོ་འཕགས་སྐྱེས་པོས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ཁྱོད་སུ་
ཞིག །འཕགས་སྐྱེས་པོས་སྨྲས་པ། རྒྱལ་པོ་ཆེན་པོ་བདག་ནི་འཕགས་སྐྱེས་པོའོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །དེ་ནས་རྒྱལ་པོ་ཟས་གཙང་ནུབ་སྒོར་སོང་བ་དང་། རྒྱལ་པོ་ཆེན་པོ་མིག་མི་
བཟང་གིས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ཁྱོད་སུ་ཞིག །མིག་མི་བཟང་གིས་སྨྲས་པ། རྒྱལ་པོ་ཆེན་པོ་བདག་ནི་མིག་མི་བཟང་ངོ་། །ཅིའི་ཕྱིར། བཅོམ་ལྡན་འདས་ལྷའི་འཁོར་
དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །དེ་ནས་རྒྱལ་པོ་ཟས་གཙང་བྱང་སྒོར་སོང་བ་དང་། རྒྱལ་པོ་ཆེན་པོ་རྣམ་ཐོས་ཀྱི་བུས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག །རྒྱལ་པོ་ཟས་གཙང་གིས་སྨྲས་པ། བཞིན་བཟངས་
ཁྱོད་སུ་ཞིག །རྣམ་ཐོས་ཀྱི་བུས་སྨྲས་པ། རྒྱལ་པོ་ཆེན་པོ་བདག་ནི་རྣམ་ཐོས་ཀྱི་བུའོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །དེ་ནས་རྒྱལ་པོ་ཟས་གཙང་ཀྱེ་མའོ་བཅོམ་ལྡན་འདས་ལྷའི་འཁོར་དག་

པ་ལ་ཆོས་འཆད་པ་དེ་བདག་གིས་བལྟའོ་སྙམ་པའི་འདོད་པ་སྐྱེས་སོ། །དེ་ནས་རྒྱལ་པོ་ཟས་གཙང་ཞུམ་པའི་རྒྱུད་གང་ཡིན་པ་དེ་དང་བྲལ་བར་གྱུར་ཏོ། །བཅོམ་ལྡན་འདས་ཀྱིས་དགོངས་པ། རྒྱལ་པོ་ཟས་གཙང་གིས་གལ་ཏེ་ང་མ་མཐོང་ན་ཁྲག་དྲོན་མོ་སྐྱུགས་ནས་འཆི་བར་འགྱུར་
བའི་གནས་སྐབས་གང་ཡིན་པ་དེ་ཡོད་པས་དེ་ལ་ཐབས་ཤིག་བཤམ་པར་བྱའོ་སྙམ་ནས། བཅོམ་ལྡན་འདས་ཀྱིས་རིན་པོ་ཆེ་སྣ་བཞིའི་ཁང་པ་བརྩེགས་པ་གང་ཡིན་པ་དེ་ཤེལ་ལས་བྱས་པར་སྤྲུལ་པ་དང་། དེས་ན་རྒྱལ་པོ་ཟས་གཙང་གིས་སངས་རྒྱས་ཀྱི་སྐུ་སྒྲིབ་པ་མེད་པར་མཐོང་ངོ་། །
མཐོང་ནས་ཀྱང་དགའ་བ་དང་མགུ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་འཕགས་
པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་གིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་བདེན་པ་མཐོང་
ནས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་པ། བཙུན་པ་བཅོམ་ལྡན་འདས་བདག་ལ་ཕས་མ་བགྱིས། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེ་རྣམས་ཀྱིས་མ་ལགས།
སྡུག་པ་དང་། རང་གི་སྐྱེ་བོ་དང་། གཉེན་གྱི་ཚོགས་ཀྱིས་མ་ལགས་པ་གང་ལགས་པ་དེ་ནི་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་དག་ལས་ནི་བསྒྲལ། ངན་སོང་གི་སྒོ་རྣམས་ནི་བཀུམ། མཐོ་རིས་དང་ཐར་པའི་སྒོ་རྣམས་
ནི་ཕྱེ། བདག་ལྷ་དང་མི་རྣམས་སུ་ནི་བཞག་གོ། །ཡང་གསོལ་པ། ཕ་ལ་ལན་དུ་ཕན་གདགས་པ། །དམ་པའི་བུས་ནི་བགྱི་བ་གང་། །ཁྱོད་ཀྱིས་བདག་ལ་མཛད་ལགས་ཏེ། །སེམས་ནི་གྲོལ་བར་གཞོལ་བར་བགྱིས། །ཁྱོད་ཀྱིས་བདག་ནི་ངན་འགྲོ་ལས། །དྲངས་ཏེ་

མཐོ་རིས་ཐར་པ་ལ། །བསྒྲིམ་མི་འཚལ་བར་བཞག་ལགས་ཏེ། །ཁྱོད་ཀྱིས་དཀའ་བ་མཛད་པ་ལེགས། །མགོན་པོ་བྱམས་པ་ཁྱོད་ཀྱིས་ནི། །བདག་ནི་ཚོང་པ་རྙེད་ལྡན་ལྟར། །མཐོ་རིས་རྙེད་པས་སྲིད་པ་ཡི། །ལོངས་སྤྱོད་དག་ནི་རྙེད་པར་མཛད། །དེ་ནས་
རྒྱལ་པོ་ཟས་གཙང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་
གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་རྒྱལ་པོ་ཟས་གཙང་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་ཟས་གཙང་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་
བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་ཆས་ཏེ། ཟས་དཀར་གང་ན་བ་དེར་སོང་སྟེ་ཕྱིན་ནས་ཟས་དཀར་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་རྒྱལ་སྲིད་ཐོབ་ཀྱིས་རྒྱལ་སྲིད་ཁྱེར་ཅིག །ཅིའི་སླད་དུ་ངས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བས་སོ། །
གང་གི་གདུགས་ལ་ལགས། དེ་རིང་ཁོ་ནའོ། །བདག་གིས་ཀྱང་བཅོམ་ལྡན་འདས་ཀྱིས་གང་གི་ཉི་མ་ལ་ནྱ་གྲོ་ངྷའི་ཀུན་དགའ་ར་བར་ཆོས་བཤད་པ་དེའི་ཉི་མ་ལ་ཤཱཀྱ་བདུན་ཁྲི་བདུན་སྟོང་དང་ལྷན་ཅིག་བདེན་པ་མཐོང་ལགས་སོ། །དེ་བཞིན་དུ་བྲེ་བོ་ཟས་ལ་རྒྱལ་སྲིད་ཁྱེར་ཅིག་ཅེས་སྨྲས་
པ་དང་། དེས་སྨྲས་པ། བདག་གིས་ཀྱང་བཅོམ་ལྡན་འདས་ཀྱིས་གང་གི་ཚེ་ཚངས་པས་བསྐོར་བའི་སྐྱེད་མོས་ཚལ་དུ་ཆོས་བཤད་པ་དེའི་ཚེ་ཤཱཀྱ་བདུན་ཁྲི་དྲུག་སྟོང་དང་ལྷན་ཅིག་བདེན་པ་མཐོང་ལགས་སོ། །དེ་བཞིན་དུ་བདུད་རྩི་ཟས་ལ་རྒྱལ་སྲིད་ཁྱེར་ཅིག་ཅེས་སྨྲས་པ་དང་། དེས་
སྨྲས་པ། བདག་གིས་ཀྱང་གང་གི་ཚེ་བཅོམ་ལྡན་འདས་ཀྱིས་རོ་ཧི་ཏ་ཀའི་སྐྱེད་མོས་ཚལ་དུ་ཆོས་བཤད་པ་དེའི་ཚེ་ཤཱཀྱ་བདུན་ཁྲི་ལྔ་སྟོང་དང་ལྷན་ཅིག་བདེན་པ་མཐོང་ལགས་སོ། །གལ་ཏེ་དེ་ལྟར་གྱུར་ན་ད་སུ་ཞིག་རྒྱལ་སྲིད་ལ་གཞག །དེ་རྣམས་ཀྱིས་སྨྲས་པ། ཤཱཀྱའི་རྒྱལ་པོ་

བཟང་ལྡན་གྱིས་བགྱིའོ་ཞེས་དེ་རྣམས་འདུས་ནས་ཤཱཀྱའི་རྒྱལ་པོ་བཟང་ལྡན་རྒྱལ་སྲིད་ཀྱི་དབང་ཕྱུག་ལ་དབང་བསྐུར་རོ། །དེ་ནས་རྒྱལ་པོ་ཟས་གཙང་གིས་དེ་ཉིད་ཀྱི་མཚན་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། གདན་
བཤམས་ཤིང་ནོར་བུའི་ཆུ་སྣོད་བཞག་ནས་བཅོམ་ལྡན་འདས་ལ་སྤྱན་འདྲེན་གྱིས་གདུགས་ཚོད་གསོལ་པ། བཙུན་པ་བཅོམ་ལྡན་འདས་གདུགས་ཚོད་ལགས་ན། ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་
དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་རྒྱལ་པོ་ཟས་གཙང་གི་བཀད་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་
ཟས་གཙང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་རང་གི་ལག་ནས་
བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་གསེར་གྱི་བྱ་མ་བུམ་བླངས་ཏེ། བཅོམ་ལྡན་འདས་ལ་ནྱ་གྲོ་ངྷའི་ཀུན་དགའ་ར་བ་ཕུལ་ལོ། །བཅོམ་ལྡན་འདས་ཀྱིས་ཡན་ལག་ལྔ་དང་ལྡན་པའི་གསུང་དབྱངས་
ཀྱིས་ཡོན་བསྔོ་བ་མཛད་པ། སྦྱིན་པའི་བསོད་ནམས་གང་ཡིན་འདིས། །ཤཱཀྱ་རྣམས་ཀྱིས་བསམས་པ་ཡི། །ཡིད་ལ་རེ་བ་རྫོགས་ནས་ནི། །རྟག་པའི་གནས་ནི་ཐོབ་པར་ཤོག །དེ་ནས་བཅོམ་ལྡན་འདས་སེར་སྐྱའི་གཞི་ཤིང་ནྱ་གྲོ་ངྷའི་ཀུན་དགའ་ར་བ་ན་བཞུགས་སོ། །
དེ་བཞིན་དུ་གནས་བརྟན་རྣམས་ཀྱིས་ཀྱང་མདོ་སྡེ་ལ་བཅོམ་ལྡན་འདས་སེར་སྐྱའི་གཞི་ཤིང་ནྱ་གྲོ་ངྷའི་ཀུན་དགའ་ར་བ་ན་བཞུགས་སོ་ཞེས་གདགས་པར་བྱས་སོ། །བཅོམ་ལྡན་འདས་སེར་སྐྱའི་གཞི་དེ་ཉིད་ན་བཞུགས་ནས་ཉི་མ་གཅིག་ནི་རྒྱལ་པོའི་ཕོ་བྲང་དུ་གདུགས་ཚོད་གསོལ།

ཉི་མ་གཅིག་ནི་བཙུན་མོའི་ནང་དུ་གསོལ་ལོ། །རྒྱལ་པོ་ཟས་གཙང་གིས་རལ་པ་ཅན་ལས་རབ་ཏུ་བྱུང་བའི་དགེ་སློང་རྣམས་སྤྱོད་ལམ་ཞི་ཞིང་སེམས་དང་བ་ཡིན་ན་དཀའ་ཐུབ་དྲག་པོའི་བརྟུལ་ཞུགས་ཀྱི་ཁྱད་པར་དག་གིས་ལུས་གདུངས་པས་ལུས་མི་མཛེས་པར་
མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། འདི་ལྟར་རལ་པ་ཅན་འདི་དག་སྤྱོད་ལམ་ཞི་ཞིང་སེམས་དང་བ་ཡིན་མོད་ཀྱི། ལུས་མཛེས་པ་མ་ཡིན་ན་འཁོར་ཅི་འདྲ་བ་ཞིག་གིས་བཅོམ་ལྡན་འདས་མཛེས་པར་འགྱུར་སྙམ་པ་ལས། དེས་བསམས་པ། ཤཱཀྱའི་འཁོར་
གྱིས་ཡིན་ནོ་སྙམ་ནས། དེ་ནས་ཤཱཀྱ་ཐམས་ཅད་བསོགས་ཏེ་སྨྲས་པ། ཤེས་ལྡན་དག་གལ་ཏེ་གཞོན་ནུ་དོན་ཐམས་ཅད་གྲུབ་པ་རབ་ཏུ་མ་བྱུང་བར་གྱུར་ན་ཅིར་འགྱུར། འཁོར་ལོས་སྒྱུར་བའི་རྒྱལ་པོར་འགྱུར་རོ། །ཁྱེད་ཅག་ཅི་ཞིག་བྱེད་པར་འགྱུར། གཡོག་བགྱིད་པར་འགྱུར་
རོ། །ད་ལྟར་གཞོན་ནུ་དོན་ཐམས་ཅད་གྲུབ་པ་བླ་ན་མེད་པའི་ཆོས་ཀྱི་རྒྱལ་པོར་གྱུར་ན། ཁྱེད་ཅག་ཅིའི་ཕྱིར་གཡོག་མི་བྱེད། ལྷ་ཅི་རབ་ཏུ་འབྱུང་ངམ། རབ་ཏུ་བྱུང་ཤིག །ཅི་ཐམས་ཅད་དམ། ཁྱིམ་རེ་ནས་རེ་རེའོ། །བཀའ་བཞིན་འཚལ་ཞེས་རྒྱལ་པོ་ཟས་གཙང་གིས་གྲོང་
ཁྱེར་སེར་སྐྱའི་གཞིར་དྲིལ་སྒྲོགས་སུ་བཅུག་པ། རྒྱལ་པོའི་ཞལ་ནས་ངའི་ཡུལ་ན་གནས་པའི་ཤཱཀྱ་རྣམས་ཀྱིས་ཁྱིམ་རེ་ནས་རེ་རེ་རབ་ཏུ་བྱུང་ཤིག་ཅེས་དེ་སྐད་བཀའ་སྩལ་ཏོ། །བྲེ་བོ་ཟས་ལ་བུ་གཉིས་ཡོད་པ་མ་འགགས་པ་དང་། མིང་ཆེན་ནོ། །མིང་ཆེན་ནི་ཞིང་བླས་ཀྱི་མཐའ་
ལ་ལྷག་པར་བརྩོན་ནོ། །མ་འགགས་པ་ནི་སྟེང་གི་ཁང་བཟངས་ཀྱི་གཞི་ལ་འདུག་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །མིང་ཆེན་ལ་མས་སྨྲས་པ། བུ་རྒྱལ་པོས་དྲིལ་སྒྲོགས་སུ་བཅུག་པ། ཤཱཀྱ་རྣམས་ལས་
ཁྱིམ་རེ་ནས་རེ་རེ་རབ་ཏུ་བྱུང་ཤིག་ཅེས་བསྒོས་ཁྱོད་རབ་ཏུ་བྱུང་ཤིག །དེས་སྨྲས་པ། བདག་ནི་རབ་ཏུ་མི་འབྱུང་གིས་ཁྱོད་ཀྱི་བུ་སྡུག་པ་བདེ་བ་དང་ལྡན་པར་གནས་པ་གང་ཡིན་པ་དེ་རབ་ཏུ་ཕྱུང་ཤིག །བུ་བསོད་ནམས་ཀྱི་དབང་ཐང་ཆེན་པོ་ཅན་གྱི་སེམས་ཅན་དེ་ལ་ཁྱོད་འགྲན་མ་

ཚོལ་ཅིག །ཡུམ་ཁྱོད་གང་ལ་དགྱེས་པ་དེ་བསོད་ནམས་ཀྱི་དབང་ཐང་ཆེན་པོ་ཅན་ལགས་མོད། དེ་རིང་དེ་ལ་ཆུང་ཟད་ཀྱང་མ་བསྐུར་དང་། ཅི་བསོད་ནམས་ཀྱི་དབང་ཐང་ཆེན་པོ་ལེགས་སམ་མ་ལེགས་མངོན་པར་འགྱུར་རོ། །བུ་དེ་བཞིན་དུ་བྱས་ཏེ་ཡིད་ཆེས་པར་བྱའོ། །
དེས་གཟེབ་སྟོང་པ་རྫེའུ་ཡིས་བཀང་ནས་ཁ་རས་དཀར་པོས་དཀྲིས་ཏེ་རྒྱ་སྐྱེགས་ལ་རྒྱས་བཏབ་ནས་བུ་མོ་མངག་གཞུག་མའི་ལག་ཏུ་བསྐུར་ནས་བསྒོ་བ། གལ་ཏེ་དེ་ན་ཅི་ཡོད་ཅེས་འདྲི་དང་ཅི་ཡང་མ་མཆིས་སོ་ཞེས་སྨྲོས་ཤིག །དེས་དེ་ལ་ཁྱེར་ནས་སོང་བ་དང་། ལྷ་རྣམས་ཀྱི་དབང་
པོ་བརྒྱ་བྱིན་གྱི་ཤེས་པ་མཐོང་བ་འོག་ཏུ་འཇུག་པ་ཡིན་པས་དེས་བསམས་པ། རང་སངས་རྒྱས་ཀུན་ཤེས་པ་ལ་བསོད་སྙོམས་ཕུལ་བ་གང་ཡིན་པ་དེ་དེང་ཅིའི་ཕྱིར་ཟས་ཀྱིས་ཕོངས་པར་བྱ། དེའི་ཟན་སྦྱར་བར་བྱའོ་ཞེས་དེས་རྫེའུ་དེ་རྣམས་སུ་སྲན་ཚོད་དང་། ཚོད་མ་སྣ་
ཚོགས་རོ་དང་ལྡན་པ་དང་ཟས་ཀྱིས་བཀང་ངོ་། །ཇི་ཙམ་ན་མངག་གཞུག་མ་དེས་ཁྱེར་ནས་མ་འགགས་པའི་དྲུང་དུ་ཕྱིན་པ་དང་། དེས་སྨྲས་པ། བུ་མོ་འོ་ན་ནི་ཅི་ཡོད། དེས་སྨྲས་པ། གཞོན་ནུ་ཅི་ཡང་མ་མཆིས་སོ། །མ་འགགས་པས་བསམས་པ། བདག་ལ་མ་
བྱམས་ན་འདི་སྟོང་པར་ཅི་སྟེ་བསྐུར། གདོན་མི་ཟ་བར་འདི་ནི་ཅི་ཡང་མ་ཡིན་པ་ཞེས་བྱ་བའི་ཟས་ཤིག་བསྐུར་གྱིས་རེ་ཞིག་བལྟའོ། །ཞེས་ཅི་ཙམ་ན་ཁ་ཕྱེ་བ་དང་། སྐྱེད་མོས་ཚལ་དེ་ཐམས་ཅད་ཟས་ཀྱི་དྲི་ཞིམ་པོས་གང་བར་གྱུར་ཏེ། དེ་བསྣམས་ནས་མ་འགགས་པ་མཆོག་ཏུ་
ཡ་མཚན་སྐྱེས་སོ། །དེ་མ་ལ་གུས་པ་ཡིན་པས་དེས་མ་ལ་ཟས་ཀྱི་ཕུད་བསྐུར་ནས་སྤྲིང་པ། ཡུམ་གདུགས་རེ་རེ་ཞིང་ཟས་ཅི་ཡང་མ་ཡིན་པ་ཞེས་བགྱི་བ་འདི་ལྟ་བུ་ཤ་སྟག་བསྐུར་བའི་རིགས་སོ། །དེས་ཀྱང་མཐོང་ནས་མཆོག་ཏུ་ཡ་མཚན་སྐྱེས་ཏེ། དེས་མིང་ཆེན་ལ་བསྟན་ནས།
བུ་མཐོང་ངམ། ཡུམ་མཐོང་ལགས་སོ། །ཁྱོད་ལ་ཁོ་མོས་སྔར་བསོད་ནམས་ཀྱི་དབང་ཐང་ཆེན་པོའི་སེམས་ཅན་མི་སྐལ་བ་བཟང་པོ་དང་ལྡན་པ་ལ་ཁྱོད་འགྲན་མ་ཚོལ་ཅིག་ཅེས་མ་སྨྲས་སམ། དེས་སྨྲས་པ། ཡུམ་བསོད་ནམས་ཀྱི་དབང་ཐང་ཆེན་པོ་དང་ལྡན་ཡང་རུང་མི་ལྡན་ཡང་རུང་བདག་ནི་

རབ་ཏུ་མི་འབྱུང་ངོ་ཞེས་ཇི་ལྟར་མིང་ཆེན་གནས་སྐབས་ཐམས་ཅད་དུ་རབ་ཏུ་བྱུང་བར་ཁས་ལེན་དུ་མ་བཏུབ་བོ། །དེ་ནས་དེས་མ་འགགས་པ་ལ་སྨྲས་པ། བུ་རྒྱལ་པོས་དྲིལ་སྒྲོགས་སུ་བཅུག་པ་ཤཱཀྱ་རྣམས་ལས་ཁྱིམ་རེ་ནས་རེ་རེ་རབ་ཏུ་བྱུང་ཤིག་ཅེས་བསྒོ་ན་ཁྱོད་ཅི་རབ་
ཏུ་འབྱུང་ངམ། འོན་ཏེ་ཁྱིམ་པར་འདུག །དེས་སྨྲས་པ། ཡུམ་རབ་ཏུ་བྱུང་བ་ལ་ཕན་ཡོན་ཅི་མཆིས། ཉེས་དམིགས་ཅི་མཆིས། ཁྱིམ་པར་མཆིས་པ་ལ་ཕན་ཡོན་ཅི་མཆིས། ཉེས་དམིགས་ཅི་མཆིས། བུ་རབ་ཏུ་བྱུང་བས་ལེགས་པར་བསྒྲུབས་ན། མྱ་ངན་ལས་འདས་
པ་ཐོབ་པར་འགྱུར་རོ། །ལེགས་པར་མ་བསྒྲུབས་ན་ལྷ་དང་མི་ཐོབ་པར་འགྱུར་རོ། །ཁྱིམ་པར་འདུག་སྟེ་ལེགས་པར་བསྐྱངས་ན་ལྷ་དང་མི་ཐོབ་བོ། །མ་བསྐྱངས་ན་སེམས་ཅན་དམྱལ་བ་དང་། དུད་འགྲོ་དང་། ཡི་དགས་འཐོབ་བོ། །ཡུམ་རབ་ཏུ་བྱུང་བའི་ཉེས་དམིགས་
གང་ལགས་པ་དེ་ནི་ཁྱིམ་ན་གནས་པའི་ཕན་ཡོན་ལགས་པས་དེ་བས་ན་ཁྱིམ་ན་གནས་པ་མི་འཚལ་གྱིས་གནང་བར་མཛོད་ཅིག་དང་རབ་ཏུ་འབྱུང་ངོ་། །དེས་སྨྲས་པ། བུ་ལེགས་ཀྱིས་དེ་བཞིན་དུ་གྱིས་ཤིག །མ་འགགས་པའི་ནེའུ་ཟླ་ཤཱཀྱའི་རྒྱལ་པོ་བཟང་ལྡན་ཡིན་པས་དེ་དེའི་དྲུང་
དུ་སོང་ངོ་། །དེའི་ཚེ་ཤཱཀྱའི་རྒྱལ་པོ་བཟང་ལྡན་པི་བང་ལེན་ཏེ། དེ་པི་བང་ལེན་པ་ན་རྒྱུད་ཆད་ནས་སྒྲ་གཞན་དུ་གྱུར་ཏོ། །མ་འགགས་པ་པི་བང་ལེན་པ་ལ་བྱང་བ་ཡིན་པས་དེས་སྒྲ་ཅི་འདྲ་བར་གྱུར་པའི་རྟགས་བཟུང་ནས་དེ་སྒོར་བསྡད་དེ་སྒོ་སྲུང་གི་མི་ལ་སྨྲས་པ། ཀྱེ་ནང་རྗེ་སོང་
ལ་རྒྱལ་པོ་བཟང་ལྡན་ལ་མ་འགགས་པ་ལྷའི་ཞལ་མཐོང་བར་འཚལ་ནས་སྒོ་ན་སྡོད་ཅིང་མཆིས་སོ་ཞེས་གསོལ་ཅིག །སྒོ་སྲུང་སོང་ནས་ཤཱཀྱའི་རྒྱལ་པོ་བཟང་ལྡན་ལ་སྨྲས་པ། ལྷ་མ་འགགས་པ་ལྷའི་ཞལ་མཐོང་བར་འཚལ་ནས་ཆབ་སྒོ་ན་སྡོད་ཅིང་མཆིས་སོ། །དེས་སྨྲས་པ།
ཤེས་ལྡན་མ་འགགས་པ་ལ་སུ་འགོག །ཤེས་ལྡན་མ་འགགས་པ་ནང་དུ་ཐོང་ཤིག །དེ་ནང་དུ་ཞུགས་པ་དང་། རྒྱལ་པོས་འཁྱུད་ནས་འདུག་ཏུ་བཅུག་སྟེ་སྨྲས་པ། ཁྱོད་འོངས་ནས་ཇི་སྲིད་ལོན། དེས་སྨྲས་པ། གང་གི་ཚེ་ཁྱོད་པི་བང་ལེན་པ་ན་རྒྱུད་ཆད་ནས་སྒྲ་གཞན་དུ་གྱུར་པ་

ནའོ། །དེ་མཆོག་ཏུ་ཡ་མཚན་སྐྱེས་ནས་དེས་སྨྲས་པ། ཁྱེད་པི་བང་ལེན་པ་ལ་བྱང་བ་ཡིན་ནོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། གཞོན་ནུ་དོན་ཅི་ཞིག་ལ་འོངས། མ་འགགས་པས་སྨྲས་པ། ལྷ་རྒྱལ་པོ་ཟས་གཙང་གིས་དྲིལ་སྒྲོགས་སུ་བཅུག་པ་ཤཱཀྱ་རྣམས་
ལ་ཁྱིམ་རེ་ནས་རེ་རེ་རབ་ཏུ་བྱུང་ཤིག་པར་བསྒོ་བས་དེ་ཁྱོད་ཀྱིས་མཁྱེན་པར་མཛོད་ཅིག་རབ་ཏུ་འབྱུང་ངོ་། །རྒྱལ་པོས་སྨྲས་པ། གལ་ཏེ་དེ་ལྟ་ན་ཁོ་བོ་ཡང་རབ་ཏུ་འབྱུང་སྟེ། གྲོས་བྱ་བ་ཡོད་ཀྱིས་ཁྱོད་དེ་རིང་འདི་ཉིད་དུ་གནས་ཐོབ་ཤིག །དེ་དེ་ཉིད་དུ་གནས་བཏབ་བོ། །མ་ལ་
འཆའ་བས་རིམས་བག་གི་དྲི་ཅན་གྱི་གོས་ཀྱིས་བཏིང་ཞིང་མེ་ཏོག་གི་སིལ་མས་བཀྲམ་པའི་མལ་དུ་མ་འགགས་པ་ཉལ་བ་དང་། དེའི་འོག་ན་མེ་ཏོག་གི་རྩ་བ་ཡོད་པའི་རེག་པ་དེའི་ཉམས་སུ་ཚོར་ནས་སྨྲས་པ། ཅི་འདིའི་འོག་ན་རྡོ་ཕྲེའུ་ཡོད་དམ། དེ་རྣམས་ཀྱིས་བརྟག་པར་
བརྩམས་པ་ན་མེ་ཏོག་གི་རྩ་བ་ཞིག་མཐོང་ནས་དེ་རྣམས་མཆོག་ཏུ་ངོ་མཚར་སྐྱེས་སོ། །མ་འགགས་པ་མཚན་མོ་མི་བདེ་བཞིན་ཉལ་ནས་ནམ་ནངས་སོ། །རྒྱལ་པོས་སྨྲས་པ། མ་འགགས་པ་ཅི་ག་བདེ་བར་གཉིད་ལོག་གམ། དེས་སྨྲས་པ། ལྷ་བདེ་བར་གཉིད་མ་ལོག་གོ །
རྒྱལ་པོས་སྨྲས་པ། ཅིའི་ཕྱིར། མ་འགགས་པས་སྨྲས་པ། ལྷ་རིམས་བག་གི་དྲི་ཅན་གྱི་གོས་བཏིང་བར་མེ་ཏོག་གི་སིལ་མ་བཀྲམ་པའི་མེ་ཏོག་གི་རྩ་བས་ལུས་གནད་ལགས་སོ། །རྒྱལ་པོས་མལ་འཆའ་བ་བཀུག་ནས་ཁྱོད་ཀྱིས་རིམས་བག་གི་དྲི་ཅན་གྱི་གོས་བཏིང་སྟེ་
ཅི་བྱ། མལ་འཆའ་བས་སྨྲས་པ། ལྷ་བདག་ལ་དཀོར་བས་གཏད་པ་ལགས་སོ། །རྒྱལ་པོས་དཀོར་བ་བཀུག་ནས་སྨྲས་པ། ཁྱོད་ཀྱིས་རིམས་བག་གི་དྲི་ཅན་གྱི་གོས་ཕོག་སྟེ་ཅི་བྱ། དེས་སྨྲས་པ། ལྷ་བདག་ལ་ཐག་པས་གཏད་པ་ལགས་སོ། །རྒྱལ་པོས་ཐག་པ་
བཀུག་ནས་སྨྲས་པ། ཁྱོད་ཀྱིས་ཅིའི་ཕྱིར་རིམས་བག་གི་དྲི་ཅན་གྱི་གོས་དབུལ། ཐ་ག་པས་སྨྲས་པ། ལྷ་སྣམ་བུ་འཐག་པའི་འཕྲོ་ཅུང་ཞིག་ལུས་པ་ན་བདག་རིམས་ཀྱིས་ཐེབས་བཞིན་བགྱིས་པ་ལགས་སོ། །རྒྱལ་པོས་སྨྲས་པ། གཞོན་ནུ་ཁྱོད་ཀྱིས་ཇི་ལྟར་

ཤེས། དེས་སྨྲས་པ། ཚ་བའི་རེག་པ་ཉམས་སུ་མྱོང་བས་རིམས་བག་གི་དྲི་ལགས་སོ། །རྒྱལ་པོ་མཆོག་ཏུ་ཡ་མཚན་སྐྱེས་ཏེ་སྨྲས་པ། ཤེས་ལྡན་མ་འགགས་པ་ནི་ཤཱཀྱ་སྐལ་བ་བཟང་པོ་དང་ལྡན་པ་ཡིན་ནོ། །དེ་ནས་ཤཱཀྱའི་རྒྱལ་པོ་བཟང་ལྡན་
གྱིས་སྨྲས་པ། གཞོན་ནུ་གལ་ཏེ་ཁོ་བོ་རབ་ཏུ་བྱུང་ན་ལྷ་སྦྱིན་ཤཱཀྱ་རྣམས་ཀྱི་རྒྱལ་པོར་གྱུར་ཏེ། དེ་ཤཱཀྱ་རྣམས་ལ་གནོད་པར་བྱེད་པར་འགྱུར་གྱིས། མ་ལ་བདག་ཅག་ཐམས་ཅད་འདུས་ལ་ལྷ་སྦྱིན་སྤྲོ་བ་བསྐྱེད་པར་བྱའོ་ཞེས་ཤཱཀྱའི་རྒྱལ་པོ་བཟང་ལྡན་གྱིས་དེ་བཀུག་སྟེ། དེ་
ནས་ཐམས་ཅད་འདུས་ནས་སྨྲས་པ། ལྷ་སྦྱིན་ཁོ་བོ་ཅག་ཐམས་ཅད་རབ་ཏུ་འབྱུང་ན་ཁྱོད་ཅི་བྱེད། ལྷ་སྦྱིན་གྱིས་བསམས་པ་གལ་ཏེ་རབ་ཏུ་མི་འབྱུང་ངོ་ཞེས་སྨྲས་པ་དང་། ཤཱཀྱའི་རྒྱལ་པོ་བཟང་ལྡན་རབ་ཏུ་འབྱུང་བར་མི་འགྱུར་གྱིས། དེ་ལ་ཐབས་ཅིག་བཤམ་པར་བྱ་སྟེ་
བསླུའོ། །གཞན་ཡང་བཅོམ་ལྡན་འདས་ཀྱིས་གང་གི་ཉི་མ་ལ་ནྱ་གྲོ་དྷའི་ཀུན་དགའ་ར་བར་སྒྱུ་མའི་ཆོ་འཕྲུལ་བསྟན་པ་དེའི་ཚེ་བདག་བློ་སྐྱེས་པ། ཇི་ལྟར་འདིའི་སྒྱུ་མས་སྐྱེ་བོའི་ཚོགས་ཆེན་པོ་དབང་དུ་བྱེད་པ་དེ་བཞིན་དུ་བདག་གིས་ཀྱང་དབང་བྱའོ་ཞེས་བསམས་སོ་སྙམ་ནས་
སྨྲས་པ། ཁྱེད་ཅག་རབ་ཏུ་འབྱུང་ན་བདག་ཅི་སྟེ་འདུག །ཤཱཀྱའི་རྒྱལ་པོ་བཟང་ལྡན་གྱིས་བསམས་པ། འདི་ནི་བརྫུན་དུ་སྨྲ་བ་ཡིན་གྱིས་དམ་འཆར་བཅུག་ལ་འགྲོ་བ་མང་པོས་སོ་སོར་རིག་པར་བྱའོ་སྙམ་མོ། །དེ་ནས་རྒྱལ་པོས་ཚིག་དེ་གླེགས་བུ་ལ་བྲིས་ནས་གྲོང་ཁྱེར་སེར་
སྐྱའི་གཞིར་དྲིལ་སྒྲོགས་སུ་བཅུག་པ། གྲོང་ཁྱེར་སེར་སྐྱའི་གཞི་ན་གནས་པའི་ཤེས་ལྡན་དག་ཉོན་ཅིག །བཟང་ལྡན་དང་། ནམ་གྲུ་དང་། མ་འགགས་པ་དང་། ལྷ་སྦྱིན་ལ་སོགས་ཏེ་ཤཱཀྱ་ལྔ་བརྒྱ་རབ་ཏུ་འབྱུང་བར་འགྱུར་གྱིས། ཐོས་པར་གྱིས་ལ་རབ་ཏུ་དགའ་བ་སྐྱེད་ཅིག་
ཅེས་བསྒོའོ། །ལྷ་སྦྱིན་གྱིས་དེ་ཐོས་ནས་སྡུག་བསྔལ་ཆེན་པོ་དང་ཡིད་མི་བདེ་བ་སྐྱེས་ནས། གལ་ཏེ་བདག་གིས་ཤཱཀྱའི་རྒྱལ་པོ་བཟང་ལྡན་ངེས་པར་རབ་ཏུ་འབྱུང་བ་ཤེས་པར་གྱུར་དང་བདག་ཁས་ལེན་པར་མི་འགྱུར་བ་ཞིག་ན། ད་ནི་གལ་ཏེ་རབ་ཏུ་མ་བྱུང་ན་བརྫུན་དུ་སྨྲ་བ་ཡིན་ནོ་ཞེས་རྒྱལ་སྲིད་

ཀྱང་ཐོབ་པར་མི་འགྱུར་བས་ཐམས་ཅད་ཀྱི་ཐམས་ཅད་དུ་དུས་འདིར་ཟད་དམ་ཅིས་རབ་ཏུ་བྱུང་ལ་བདག་རབ་ཏུ་བྱུང་བཞིན་དུ་རྒྱལ་སྲིད་བྱའོ་སྙམ་མོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། ཤཱཀྱ་རྣམས་ཀྱི་ཐ་མའི་འབྱོར་པ་ལ་བལྟའོ་སྙམ་ནས་དེས་གྲོང་ཁྱེར་གསེག་མ་དང་གྱོ་མོ་
བསལ། ཙན་དན་གྱི་ཆུས་ཆག་ཆག་བཏབ། གདུགས་དང་། རྒྱལ་མཚན་བསྒྲེང་། དར་གྱི་ཆུན་འཕྱང་མང་པོ་དཔྱངས། ཤིན་ཏུ་དྲི་ཞིམ་པོའི་པོག་པོར་ཉེ་བར་བཞག །མེ་ཏོག་སྣ་ཚོགས་ཀྱི་སིལ་མས་དགའ་དགའ་ལྟར་བྱེད་དུ་བཅུག་གོ། །དེ་ནས་ཤཱཀྱ་བརྒྱ་སྟོང་ཕྲག་དུ་མས་
ཡོངས་སུ་བསྐོར་ནས་གྲོང་ཁྱེར་གྱི་སྒོ་ན་སེང་གེའི་ཁྲི་ལ་འདུག་གོ། །ཤཱཀྱ་མོ་དང་ཤཱཀྱ་གཞོན་ནུ་མ་ངོ་མཚར་སྐྱེས་པ་རྣམས་ཀྱང་སྐར་ཁུང་ཁོལ་མ་ཅན་དང་། སྐར་ཁུང་དང་། སྟེགས་བུ་དག་ལ་འདུག་གོ། །ཤཱཀྱ་རྣམས་ཀྱི་འབྱོར་པ་ལ་བལྟ་བར་འདོད་པའི་སྐྱེ་བོའི་ཚོགས་ཡུལ་སྣ་
ཚོགས་ནས་ལྷགས་པ་དག་ཀྱང་ལམ་པོ་ཆེ་འམ། ཚོང་འདུས་དང་། བཞི་མདོ་དང་། སུམ་མདོ་རྣམས་སུ་འདུག་གོ། །ཤཱཀྱ་ལས་སུ་དག་གིས་ནི་མཉེས་པར་འགྱུར། སུ་དག་གིས་ནི་ཐུགས་བྱུང་བར་འགྱུར་བ་བརྟག་པའི་ཕྱིར་བྲམ་ཟེ་དང་། མཚན་མཁན་དང་། ལྟས་མཁན་
དག་བཀུག་གོ། །ཤཱཀྱ་རྣམས་དོ་ཤལ་དང་། གདུ་བུ་དང་། དཔུང་རྒྱན་དང་། རྒྱན་གྱིས་བརྒྱན་པ་རྣམས་ཀྱིས་ཕ་དང་མ་དག་ལ་བལྟས་ནས་སོ་སོའི་ཤིང་རྟར་ཞུགས་ཏེ་ཕྱིར་འབྱུང་བར་བརྩམས་པ་ན། ཤཱཀྱའི་རྒྱལ་པོ་བཟང་ལྡན་སྣ་ལ་བྱུང་བ་མཚན་མཁན་རྣམས་ཀྱིས་མཐོང་
ནས་དེ་དག་གིས་སྨྲས་པ། རེ་ཞིག་འདིས་ནི་མཉེས་པར་བྱེད་པར་འགྱུར་རོ། །དེ་བཞིན་དུ་ནམ་གྲུ་དང་། མ་འགགས་པ་ལ་སོགས་པ་ཕྱིར་བྱུང་བ་ན་དེ་རྣམས་ཀྱང་མཚན་མཁན་རྣམས་ཀྱིས་ལུང་བསྟན་ཏོ། །དེ་ནས་ལྷ་སྦྱིན་ཕྱིར་བྱུང་སྟེ། དེ་ཕྱིར་བྱུང་བ་ན་བྱ་ཁྲས་གཙུག་གི་ནོར་བུ་
ཕྲོགས་པ་མཚན་མཁན་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། འདིའི་རྟགས་དང་སྦྱར་ན་གདོན་མི་ཟ་བར་སྟོན་པ་ལ་འཁུས་ནས་དམྱལ་བ་ལ་གཞོལ་བར་འགྱུར་རོ། །ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏ་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཕྱིར་བྱུང་བ་དང་

བོང་བུའི་སྐད་གྲག་ནས་དེ་དག་ཀྱང་མཚན་མཁན་རྣམས་ཀྱིས་བསྟན་པ། འདི་དག་གིས་ཀྱང་ཉན་ཐོས་ཆེན་པོ་རྣམས་ལ་ཚིག་ངན་པ་སྨྲས་ནས་དམྱལ་བར་གཞོལ་བར་འགྱུར་རོ། །ཉེ་དགའ་གླང་པོ་ཆེ་ལ་ཞོན་ནས་ཕན་ཚུན་དུ་ལྟ་བར་བྱེད་པ་ན་མུ་ཏིག་གི་དོ་ཤལ་ལྷུང་
བ་དང་། དེ་གླང་པོ་ཆེ་ལས་བབས་ཏེ་བླངས་སོ། །དེ་ཡང་དེ་རྣམས་ཀྱིས་ལུང་བསྟན་པ། འདི་ཧ་ཅང་འདོད་ཆེན་ཆེས་པས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དེ་ནས་བཟང་ལྡན་དང་། ནམ་གྲུ་དང་། མ་འགགས་པ་དང་། ལྷ་སྦྱིན་ལ་སོགས་པ་ཤཱཀྱ་ལྔ་བརྒྱ་པོ་
དེ་རྣམས་སྐྱེད་མོས་ཚལ་དུ་དུས་སྟོན་ལ་འགྲོ་བ་བཞིན་དུ་བཟང་པོས་འགྲན་ཅིང་བཅོམ་ལྡན་འདས་གང་ན་བ་དེར་དོང་ངོ་། །བཅོམ་ལྡན་འདས་ཀྱིས་དགོངས་པ། གལ་ཏེ་ངས་ཤཱཀྱ་རྣམས་ལ་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་ན་ཁ་ཅིག་གིས་ནི་མཉེས་པར་བྱེད་པར་འགྱུར།
ཁ་ཅིག་གིས་ནི་མཉེས་པར་བྱེད་པར་མི་འགྱུར་ཏེ། མཉེས་པར་བྱེད་པར་མི་འགྱུར་བ་གང་ཡིན་པ་དེ་དག་གཞན་དུ་སེམས་ལ། དགེ་སློང་ཚུར་ཤོག་ཅེས་བྱ་བ་ནི་ཐམས་ཅད་སྲིད་པ་ཐ་མ་ཡིན་པས་མ་ལ་ངས་ཐམས་ཅད་དགེ་སློང་རྣམས་ཀྱིས་གསོལ་བ་དང་བཞིའི་ལས་ཀྱིས་རབ་ཏུ་
བྱུང་བ་དང་བསྙེན་པར་རྫོགས་སུ་གཞུག་གོ་སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་སེར་སྐྱའི་གཞིའི་ཤཱཀྱ་རྣམས་གསོལ་བ་དང་བཞིའི་ལས་ཀྱིས་རབ་ཏུ་འབྱུང་བ་དང་བསྙེན་པར་རྫོགས་པར་གྱིས་ཤིག །བཙུན་པ་བཀའ་བཞིན་འཚལ་ཞེས་དགེ་
སློང་དེ་རྣམས་ཀྱིས་བཅོམ་ལྡན་འདས་ལས་མཉན་ཏོ། །རྒྱལ་པོ་ཟས་གཙང་གིས་ཤཱཀྱ་རྣམས་ཀྱི་འབྲེག་མཁན་ཉེ་བ་འཁོར་ཞེས་བྱ་བ་དེ་རྣམས་རབ་ཏུ་འབྱིན་པ་ན་སྐྲ་འབྲེག་པར་བཏང་ནས་ཤཱཀྱའི་རྒྱལ་པོ་བཟང་ལྡན་གྱི་སྐྲ་འབྲེག་པ་ན་དེ་ངོམ་ཟུང་གནག་ཅིང་མཆི་མ་འཛག་ལ་སྐད་
འཛེར་ཅིང་དབུགས་བརྫགས་པར་སྐྲ་འབྲེག་པར་བྱེད་དོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། ཉེ་བ་འཁོར་ཅིའི་ཕྱིར་དུ། དེ་སྙིང་རྗེ་རྗེ་སྐད་དུ་གཅོམ་ཆུང་ངུ་དལ་བུས་ཚིག་རེ་ནས་སྨྲས་པ། ལྷ་བདག་འཛམ་བུའི་གླིང་གི་སྐྱེས་བུ་གཙོ་བོ་རྣམས་ལ་བསྙེན་བཀུར་བགྱིད་པ་

མི་ཕལ་པ་རྣམས་ལ་ཡང་བསྙེན་བཀུར་བགྱིད་པར་འགྱུར་བ་ལྟ་ཞིག །ཁྱེད་ཀྱིས་སྤངས་ཏེ་གསོན་པ་བས་ནི་འགུམ་མི་བསྡོའོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། ཉེ་བ་འཁོར་ཁྱོད་ཀྱིས་ཇོ་བོ་ལ་སྙིང་ཉེ་བའི་མཉེས་པར་བྱ་བ་བསྟན་ཟིན་ཏེ། ཆོག་གིས་མྱ་ངན་མ་
བྱེད་ཅིག །ངས་ཇི་ལྟར་མི་ཕལ་པ་རྣམས་ལ་བསྙེན་བཀུར་བྱེད་པར་མི་འགྱུར་བ་དེ་ལྟར་བྱའོ་ཞེས་སྨྲས་ནས་དེས་ཕྱོགས་གཅིག་ཏུ་རས་ཞིག་བཏིང་ནས་ཤཱཀྱ་གཞོན་ནུ་རྣམས་ལ་སྨྲས་པ། ཤེས་ལྡན་གཞོན་ནུ་དག་ཉོན་ཅིག །འབྲེག་མཁན་ཉེ་བ་འཁོར་འདིས་བདག་ཅག་ལ་བཀུར་
སྟི་བྱས་ལ་བདག་ཅག་ཀྱང་སླར་ཁྱིམ་དུ་མི་གནས་ཀྱིས་རྒྱན་རྣམས་དེའི་འཚོ་བའི་རྐྱེན་དུ་རས་ཀྱི་སྟེང་དུ་ཞོག་ཤིག །དེ་རྣམས་ཀྱིས་སེ་མོ་དོ་དང་། དོ་ཤལ་དང་། མགུལ་རྒྱན་དང་། གདུ་བུ་དང་། དཔུང་རྒྱན་དང་། རྣ་རྒྱན་ལ་སོགས་པ་རིན་པོ་ཆེ་སྣ་ཚོགས་ཀྱིས་བརྒྱན་པའི་རྒྱན་
ཁྱད་པར་ཅན་རྣམས་ཀྱིས་རས་ཀྱི་སྟེང་དུ་ཕུང་པོ་ཆེན་པོར་སྤུངས་སོ། །ཉེ་བ་འཁོར་གྱིས་དེ་རྣམས་མཐར་གྱིས་སྐྲ་བྲེགས་ཏེ་དེ་རྣམས་ཁྲུས་ལ་དོང་བ་དང་། དེས་བསམས་པ། རེ་ཞིག་གཞོན་ནུ་འདི་དག་རིགས་དང་། འབྱོར་པ་དང་། ལང་ཚོ་ལ་བབ་ཅིང་ཆུང་མ་དང་ལྡན་ལ། མཛོད་
དང་བང་མཛོད་ཀྱིས་རྒྱས་པ་ཡང་སྤངས་ནས་རབ་ཏུ་འབྱུང་ན། བདག་རྒྱན་འདི་ཙམ་ལ་ཆགས་པ་ནི་ཚུལ་མ་ཡིན་པས་སྡུག་བསྔལ་བར་འགྱུར་རོ། །གལ་ཏེ་བདག་རིགས་ངན་དུ་མ་སྐྱེས་ན་བདག་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་ཆུ་བོ་ལས་རྒལ་བ་
དང་། སྦྱོར་བ་ལས་ཡང་དག་པར་འདའ་བར་བྱ་བའི་ཕྱིར་བརྩལ་བ་དང་འབད་པ་ལ་བརྩོན་པར་བྱ་བ་ཞིག་སྙམ་མོ། །འདི་ནི་ཆོས་ཉིད་ཡིན་ཏེ། ཇི་ལྟར་སངས་རྒྱས་བཅོམ་ལྡན་འདས་རྣམས་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་
གཟིགས་པ་དེ་བཞིན་དུ་ཉན་ཐོས་ཆེན་པོ་རྣམས་ཀྱང་བྱེད་པས་ཚེ་དང་ལྡན་པ་ཤཱ་རིའི་བུས་འབྲེག་མཁན་ཉེ་བ་འཁོར་ལྷག་པར་སྐྱོ་བ་སྐྱེས་པར་མཐོང་ངོ་། །མཐོང་ནས་ཀྱང་འབྲེག་མཁན་ཉེ་བ་འཁོར་གང་ན་བ་དེར་སོང་སྟེ་ཕྱིན་ནས་འབྲེག་མཁན་ཉེ་བ་འཁོར་ལ་འདི་སྐད་ཅེས་སྨྲས་

སོ། །ཉེ་བ་འཁོར་ཁྱོད་ཅིའི་ཕྱིར་ཤིན་ཏུ་མི་དགའ་བས་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་ཉེ་བ་འཁོར་གྱིས་སྨྲས་པ། བཙུན་པ་ཤཱ་རིའི་བུ་གང་གི་ཕྱིར་ད་ལྟར་གཞོན་ནུ་འདི་དག་རིགས་དང་། འབྱོར་པ་དང་། ལང་ཚོ་ལ་བབ་ཅིང་ཆུང་མ་
དང་ལྡན་ལ། མཛོད་དང་བང་མཛོད་ཀྱིས་རྒྱས་པ་ཡང་སྤངས་ནས་རབ་ཏུ་འབྱུང་ན། བདག་རྒྱན་འདི་ཙམ་ལ་ཆགས་པ་ནི་ཚུལ་མ་ཡིན་པས་སྡུག་བསྔལ་བར་འགྱུར་རོ། །གལ་ཏེ་བདག་རིགས་ངན་དུ་མ་སྐྱེས་ན་བདག་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་
ཆུ་བོ་ལས་རྒལ་བ་དང་། སྦྱོར་བ་ལས་ཡང་དག་པར་འདའ་བར་བྱ་བའི་ཕྱིར་བརྩལ་བ་དང་འབད་པ་ལ་བརྩོན་པར་བགྱི་བ་ཞིག་ན། བདག་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། ཚེ་དང་ལྡན་པ་ཤཱ་རིའི་བུས་སྨྲས་པ། བཞིན་བཟངས་ཐུབ་པའི་དབང་པོའི་གསུང་རབ་འདི་ལ་ནི་
རིགས་སྙིང་པོར་བྱེད་པ་མ་ཡིན། རུས་སྙིང་པོར་བྱེད་པ་མ་ཡིན། རྒྱུད་སྙིང་པོར་བྱེད་པ་མ་ཡིན། ཐོས་པ་སྙིང་པོར་བྱེད་པ་མ་ཡིན་ཏེ། འདི་ལྟར་ཐུབ་པའི་དབང་པོའི་གསུང་རབ་འདི་ལ་ནི་སྒྲུབ་པ་སྙིང་པོར་བྱེད་པ་ཡིན་ནོ། །དེ་བཞིན་གཤེགས་རྣམས་རིགས་དང་ནི། །རྒྱུད་དང་
རུས་ལ་རྟོག་མི་མཛད། །འདས་ནས་ཡུན་རིང་ལོན་པ་ཡི། །ལས་རྣམས་ལ་ནི་རྟོག་པར་མཛད། །གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འདོད་ན་ཚུར་བཅོམ་ལྡན་འདས་ཀྱི་སྤྱན་སྔར་འདོང་དང་། ཁྱོད་བཅོམ་
ལྡན་འདས་ཀྱིས་རབ་ཏུ་འབྱིན་པར་འགྱུར་རོ།། །།འདུལ་བ་གཞི། བམ་པོ་དགུ་བཅུ་རྩ་གཉིས་པ། དེས་ཁས་བླངས་སོ། །དེ་ནས་ཚེ་དང་ལྡན་པ་ཤཱ་རིའི་བུས་འབྲེག་མཁན་ཉེ་བ་འཁོར་ཁྲིད་དེ་བཅོམ་ལྡན་འདས་གང་ན་བ་དེར་དོང་ནས་ཕྱིན་པ་དང་། བཅོམ་ལྡན་འདས་
ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཉེ་བ་འཁོར་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོ་འཚལ་ལགས་ན་ཐུགས་བརྩེ་བ་ཉེ་བར་གཟུང་སྟེ།

བཅོམ་ལྡན་འདས་ཀྱིས་འདི་རབ་ཏུ་འབྱུང་བ་དང་བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་དེ་ལ་བཀའ་སྩལ་པ། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པའི་མོད་ཁོ་ནར་སྐྲ་བྱི་བ་དང་། སྣམ་སྦྱར་གྱོན་པ་དང་།
ལག་པར་ལྷུང་བཟེད་དང་བྱ་མ་བུམ་གྱིས་འབྲེལ་བ་དང་། སྐྲ་དང་ཁ་སྤུ་སྐྱེས་ནས་ཞག་བདུན་ལོན་པ་ཙམ་དང་། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་
སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཤཱཀྱ་རབ་ཏུ་བྱུང་བ་རྣམས་ནི་རྒན་རབས་ཇི་ལྟ་བུ་བཞིན་དུ་འདུད་པར་བྱེད་པས་ཤཱཀྱའི་རྒྱལ་པོ་བཟང་ལྡན་འདུད་པར་བྱེད་པ་ན། ཉེ་བ་
འཁོར་གྱི་རྐང་པ་ཡིན་པར་ཤེས་སོ། །དེ་ནས་དེས་གདོང་བཏེག་སྟེ་གསོལ་པ། བཅོམ་ལྡན་འདས་འདི་ནི་ཉེ་བ་འཁོར་ལགས་ན། ཅི་བདག་གིས་འདིའི་རྐང་པ་གཉིས་ལ་ཡང་འདུད་པར་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། བུ་ང་རྒྱལ་སྤང་བའི་ཕྱིར་རབ་ཏུ་བྱུང་བ་
ཡིན་ཏེ། འདི་རྒན་གྱིས་ཁྱོད་ཀྱིས་ང་རྒྱལ་གྱི་དྲེགས་པ་ཆོག་ལ་ཐུད་ཅིག །དེས་དེའི་རྐང་པ་ལ་གཏུགས་པ་ན་ས་ཆེན་པོ་ལན་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་སྟེ།
ཤར་ཕྱོགས་མཐོ་ན་ནི་ནུབ་ཕྱོགས་དམའ། ནུབ་ཕྱོགས་མཐོ་ན་ནི་ཤར་ཕྱོགས་དམའ། ལྷོ་ཕྱོགས་མཐོ་ན་ནི་བྱང་ཕྱོགས་དམའ། བྱང་ཕྱོགས་མཐོ་ན་ནི་ལྷོ་ཕྱོགས་དམའ། དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བར་གྱུར་ཏེ། དེ་ལྟར་ཐམས་ཅད་ཀྱིས་
རིམ་བཞིན་དུ་གཏུགས་སོ། །ལྷ་སྦྱིན་གྱིས་མ་བཏུད་པ་དང་། བཅོམ་ལྡན་འདས་ཀྱིས་བཀའ་སྩལ་པ། བུ་ང་རྒྱལ་སྤང་བའི་ཕྱིར་རབ་ཏུ་བྱུང་བ་ཡིན་གྱིས་ཐུད་ཅིག །དེས་གསོལ་པ། བདག་གིས་དེའི་རྐང་པ་ལ་མ་གཏུགས་ན་ཁྱོད་ལ་གནོད་པ་ཅི་མཆིས་ཞེས་དེ་འདུད་དུ་

མ་བཏུབ་སྟེ། དེར་ཐོག་མར་བཅོམ་ལྡན་འདས་ཀྱི་བཀའ་ལྷ་སྦྱིན་གྱིས་བཅག་གོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཤཱཀྱའི་རྒྱལ་པོ་བཟང་ལྡན་གྱིས་ཉེ་བ་འཁོར་
ལ་ཕྱག་བགྱིས་པ་དང་ས་ཆེན་པོ་འདི་རྣམ་པ་དྲུག་ཏུ་གཡོས་པར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། འདི་ནི་ཆོས་ཉིད་ཡིན་ཏེ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད། འདི་ལྟར་འདས་པའི་དུས་ན་ཡང་འདིས་དེའི་རྐང་པ་ལ་གཏུགས་པ་
ན་ས་ཆེན་པོ་རྣམ་པ་དྲུག་ཏུ་གཡོས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་བཅུག་གོ། །དེའི་ཚེ་
བཱ་རཱ་ཎ་སཱིའི་གྲོང་ཁྱེར་ན་སྨད་འཚོང་མ་བཟང་མོ་ཞེས་བྱ་བ་ཞིག་གནས་པ་དེའི་དྲུང་དུ་བྲམ་ཟེའི་ཁྱེའུ་མཛེས་དགའ་ཞེས་བྱ་བ་སོང་ནས་སྨྲས་པ། བཟང་མོ་དགའ་མགུར་སྤྱད་ཀྱིས་ཚུར་ཤོག །དེས་སྨྲས་པ། ཁྱོད་ལ་ཀཱར་ཥཱ་པཱ་ཎ་ལྔ་བརྒྱ་ཡོད་དམ། དེས་སྨྲས་པ་མེད་དོ། །སོང་
ལ་ཀཱར་ཥཱ་པ་ཎ་ལྔ་བརྒྱ་ཁྱེར་ཏེ་ཤོག་ཤིག །དེ་ལ་འབྱོར་པ་མེད་ཀྱང་དེ་དེ་ལ་ལྷག་པར་ཆགས་པས་དུས་དུས་སུ་མེ་ཏོག་དང་འབྲས་བུ་རྣམ་པ་སྣ་ཚོགས་སྐྱེལ་བར་བྱེད་པ་དང་། དེ་དེ་ལ་སྡུག་པ་སྐྱེས་སོ། །ཇི་ཙམ་དུས་གཞན་ཞིག་ན་བཱ་རཱ་ཎ་སཱིར་དུས་སྟོན་བྱུང་ནས་བུད་མེད་ཐམས་ཅད་གོས་
དང་། ཕྲེང་བ་དང་། རྒྱན་རྣམས་ཀྱིས་བཀླུབས་ནས་རང་གི་ཁྱིམ་ན་རྩེ་ཞིང་དགའ་བ་མང་པོས་གནས་པ་དེ་བྲམ་ཟེའི་ཁྱེའུ་མཛེས་དགའས་མཐོང་ནས་ཡི་ཆད་པར་གྱུར་ཏེ། སྨད་འཚོང་མ་བཟང་མོས་བསམས་པ། དེ་རིང་བཱ་རཱ་ཎ་སཱིའི་མི་རྣམས་གོས་དང་། ཕྲེང་བ་དང་། རྒྱན་རྣམས་
ཀྱིས་བཀླུབས་ནས་རང་རང་གི་ཆུང་མ་རྣམས་དང་ལྷན་ཅིག་དགའ་མགུར་སྤྱོད་པར་འགྱུར་ན། བྲམ་ཟེའི་ཁྱེའུ་མཛེས་དགའ་སུ་ཞིག་དང་དགའ་མགུར་སྤྱོད་པར་འགྱུར་ཞེས་དེ་དེ་སྙམ་དུ་སེམས་ཤིང་བྲམ་ཟེའི་ཁྱེའུ་མཛེས་དགའ་གང་ན་ཡོད་པའི་ཕྱོགས་དེར་འོངས་ནས། དེས་དེ་མཐོང་བ་དང་།

སྔོན་གྱི་བྱས་པ་དྲིན་དུ་གཟོ་བ་ཡིད་ལ་བསྐྱེད་ནས་སྨྲས་པ། བྲམ་ཟེའི་ཁྱེའུ་སོང་ལ་ཤིན་ཏུ་དྲི་ཞིམ་པའི་མེ་ཏོག་དག་ཁྱེར་ཏེ་ཤོག་ཤིག །བདག་ཅག་ལྷན་ཅིག་དགའ་མགུར་སྤྱད་པར་བྱའོ། །དེ་ཤི་བ་ལས་སོས་པ་བཞིན་དུ་དགའ་བས་སེམས་ཀྱི་རྒྱུད་ངོ་མཚར་གྱིས་བསྡུས་ནས་སོང་ངོ་། །
དེའི་གཟུགས་དང་། ལང་ཚོ་དང་། གཡེར་བའི་ཡོན་ཏན་བརྟགས་ནས་མོས་ཤིང་ཞེན་པས་མཚན་ཐོག་ཐག་གཉིད་མ་ལོག་པས་ནམ་ནངས་པ་དང་མཚན་མོ་གཉིད་ཀྱིས་ཤིན་ཏུ་ལྕི་བར་གྱུར་ནས། ཇི་ཙམ་ཉི་མ་ཤར་གྱི་བར་དུ་གཉིད་ལོག་ནས་གང་གི་ཚེ་འཇིག་རྟེན་གྱི་དུས་སྟོན་གྱི་ཆེད་
དུ་མེ་ཏོག་ཐམས་ཅད་བཏུས་ཟིན་པ་དེའི་ཚེ་སད་ནས་མེ་ཏོག་གི་ཆེད་དུ་ཕན་ཚུན་སོང་བ་ན་མ་རྙེད་ནས། དེས་ཤིང་ཤིརྵ་ཞེས་བྱ་བའི་མེ་ཏོག་ཅིག་ཁྱེར་ནས་དེའི་དྲུང་དུ་སོང་སྟེ་ཚིགས་སུ་བཅད་དེ་སྨྲས་པ། གཡང་གཞི་ཐོགས་པ་བུ་ཕོ་མཛེས་དགའ་ནི། །མ་ཤ་ཕྱེད་མེད་རྒྱུད་
གཞན་སྙོམ་ལས་ཀྱིས། །དེ་རིང་ཤིང་རྣམས་མེ་ཏོག་རྒྱས་དུས་ན། །སྦྱིན་པའི་མེ་ཏོག་ཤིརྵ་ད་འདི་ཡིན་ནོ། །དེས་སྨྲས་པ། སོང་ལ་མེ་ཏོག་གཞན་དག་ཁྱེར་ལ་ཤོག་ཤིག །འདོད་པ་རྣམས་ལ་སོ་སོར་རྟེན་པར་བྱེད་པ་ནི་ཀུན་དུ་སྦྱོར་བ་ལ་སོགས་ཏེ། དེའི་འདོད་ཆགས་
རབ་ཏུ་འཕེལ་བས་སོ་ཀའི་ཟླ་བའི་ཐ་མའི་ཉིན་པར་སྤྲིན་མེད་ཅིང་རླུང་མི་ལྡང་བར་འདུག་པའི་ཉི་མ་ཕྱེད་ཀྱི་དུས་ན་གྲོང་ཁྱེར་ནས་ཤིན་ཏུ་ཐག་རིང་བའི་ཡུལ་དགོན་པ་དག་ཏུ་མགོ་འདྲེན་པ་དང་དཀྱུས་མ་ངག་དབྱངས་སུ་ལེན་ཅིང་མེ་ཏོག་ཐུའོ། །རྒྱལ་པོ་ཚངས་སྦྱིན་ཡང་རི་དགས་ཤོར་དུ་ཆས་
པ་ན་དེ་ཉི་མའི་གཟེར་རྣོན་པོས་གདུངས་ནས་གྲིབ་མའི་ཆེད་དུ་ཕྱོགས་དེར་སོན་པ་དང་། དེའི་གླུའི་སྒྲ་ཐོས་ནས་ཚིགས་སུ་བཅད་ནས་སྨྲས་པ། སྟེང་ནས་ཉི་མས་གདུང་བྱེད་ཅིང་། །འོག་ནས་བྱེ་མས་གདུངས་པ་ལ། །གླུ་ལེན་ཁྱོད་ཀྱི་ལུས་ལ་ནི། །ཅི་ཕྱིར་ཉི་མའི་གདུང་བ་མེད། །
མཛེས་དགའས་ཀྱང་ཚིགས་སུ་བཅད་དེ་སྨྲས་པ། བདག་ནི་ཉི་མས་མ་གདུངས་ཏེ། །རྟོག་པ་ཡིས་ནི་བདག་གདུངས་ལགས། །བྱ་བ་བྱ་བ་མ་ཡིན་པས། །འཇིག་རྟེན་འདི་གདུངས་ཉི་མ་མིན། །རྒྱལ་པོས་བསམས་པ། བྲམ་ཟེའི་ཁྱེའུ་འདི་ནི་གདོན་མི་ཟ་བར་བསིལ་

བར་བྱེད་པའི་གཏམ་ལ་མཁས་པ་ཞིག་ཡིན་ཏེ། དེས་ན་ཉི་མ་ཕྱེད་ཀྱི་ཚེ་འདུག་ནས་མེ་ཏོག་ཐུའོ་སྙམ་ནས། དེས་བཀུག་སྟེ་སྨྲས་པ། བྲམ་ཟེའི་ཁྱེའུ་རེ་ཞིག་བསིལ་བར་བྱེད་པའི་གཏམ་དག་བྱོས་ཤིག་མཉན་ཏོ། །དེས་བསམས་པ། རྒྱལ་པོ་དེ་ནི་
གདོན་མི་ཟ་བར་ལུས་གདུངས་པ་ཡིན་ཏེ། དེས་ན་འདི་སྐད་སྨྲའོ་སྙམ་ནས། དེས་བསིལ་བར་བྱེད་པའི་གཏམ་རྣམ་པ་སྣ་ཚོགས་དེ་ལ་སྨྲས་པ་ཐོས་ནས་རྒྱལ་པོ་ལུས་གདུང་བ་དང་བྲལ་བར་གྱུར་ཏོ། །རྒྱལ་པོ་མངོན་པར་དགའ་བར་གྱུར་ནས་བློན་པོ་རྣམས་ལ་སྨྲས་པ། ཤེས་ལྡན་དག་
རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་སྲོག་སྦྱིན་པ་གང་ཡིན་པ་དེ་ལ་ལན་དུ་ཕན་ཅི་གདགས། ལྷ་རྒྱལ་སྲིད་ཕྱེད་ཀྱིས་སོ། །དེ་ནས་རྒྱལ་པོ་དེས་སྨྲས་པ། བྲམ་ཟེའི་ཁྱེའུ་དེ་རིང་རྒྱལ་པོའི་ཕོ་བྲང་དུ་གནས་ཐོབ་ཅིག་དང་། སང་རྒྱལ་སྲིད་ཀྱི་ཕྱེད་སྦྱིན་ནོ། །དེ་རྒྱལ་པོའི་
ཕོ་བྲང་དུ་མ་ལ་བཟང་པོ་བྱིན་ནས་དེ་དེ་ལ་ཉལ་བ་ན་བཟང་མོ་རྗེས་སུ་དྲན་པར་སེམས་ཤིང་རྒྱལ་སྲིད་ཕྱེད་པོ་དེ་ཡང་སྨད་འཚོང་བཟང་མོའི་ཕྱིར་བླང་ངོ་སྙམ་མོ། །ཡང་བསམས་པ། རྒྱལ་སྲིད་ཕྱེད་པོ་དེ་ལ་ལོངས་སྤྱོད་པའི་རྒྱལ་པོ་དེ་ཅི་འདྲ་བ་ཞིག །མ་ལ་བདག་གིས་དེ་སྲོག་དང་དབྲལ་
བར་བྱའོ་སྙམ་མོ། །ཡང་བསམས་པ། རྒྱལ་པོ་བསད་པའི་རྒྱལ་སྲིད་གང་ཡིན་པ་དེས་ཅི་ཞིག་བྱ་སྙམ་ནས་ཚིགས་སུ་བཅད་དེ་སྨྲས་པ། དོན་མ་གྲུབ་ན་འདོད་འགྱུར་ལ། །དོན་གྲུབ་འདོད་པ་ལྡོག་མི་འགྱུར། །མ་གྲུབ་ན་ནི་ཕོངས་གྱུར་པས། །དེ་བས་དོན་ནི་དོན་མ་
ཡིན། །ཇི་ཙམ་ནམ་ནངས་སུ་ཉེ་བ་ན་དེ་འགྱོད་པ་སྐྱེས་ནས་མལ་ནས་བབས་ཏེ་གཡང་གཞི་ས་ལ་བཏིང་ནས་ཉལ་ལོ། །ནམ་ནངས་པ་ན་རྒྱལ་པོས་སྨྲས་པ། ཤེས་ལྡན་དག་བྲམ་ཟེའི་ཁྱེའུ་དེ་ཁུག་ཤིག །དེ་ལ་རྒྱལ་སྲིད་ཕྱེད་སྦྱིན་ནོ། །རྒྱལ་པོའི་ཕོ་ཉ་དག་འོངས་པ་ནམ་ལ་
ཆེན་པོ་ནས་བབས་ཏེ་གཡང་གཞི་ས་ལ་བཏིང་ནས་ཉལ་བ་མཐོང་ངོ་། །མཐོང་ནས་ཀྱང་མ་དད་པ་བསྐྱེད་དེ་རྒྱལ་པོའི་གན་དུ་སོང་ནས་སྨྲས་པ། ལྷ་འདི་ནི་རྒྱལ་སྲིད་ཀྱི་འོས་མ་ལགས་སོ། །རྒྱལ་པོས་སྨྲས་པ། ཅིའི་ཕྱིར། དེ་རྣམས་ཀྱིས་སྨྲས་པ། ལྷ་ཉོན་མོངས་

མལ་ཆེན་པོ་གྱ་ནོམ་པ་སྤངས་ཏེ་གཡང་གཞི་ས་ལ་བཏིང་ནས་མཆིས་ཉལ་བའི་དམན་པ་ལ་མོས་པ་གང་ལགས་པ་དེ་རྒྱལ་སྲིད་སྩལ་ཏེ་ཅི་རུང་། རྒྱལ་པོས་སྨྲས་པ། ཤེས་ལྡན་དག་ཤེས་རབ་ཅན་དེ་དེ་ལ་རྒྱུ་ཞིག་ཡོད་པར་འགྱུར་གྱིས་ཁུག་ཤིག །དེ་རྣམས་ཀྱིས་དེ་བཀུག་པ་དང་
རྒྱལ་པོས་སྨྲས་པ། ཀྱེ་བྲམ་ཟེའི་ཁྱེའུ་ཁྱོད་ཅིའི་ཕྱིར་མལ་ཆེན་པོ་ནས་བབས་ཏེ་གཡང་གཞི་ས་ལ་བཏིང་ནས་ཉལ། དེས་ཇི་ལྟར་གྱུར་པ་རྣམས་རྒྱལ་པོ་ལ་རིག་པར་བྱས་ནས་དེ་ནས་སྨྲས་པ། ལྷ་གནང་བར་མཛོད་ཅིག་རབ་ཏུ་འབྱུང་ངོ་། །རྒྱལ་པོས་སྨྲས་པ། དམ་ཞིག་བཅས་ཏེ་
གལ་ཏེ་ཁྱོད་རབ་ཏུ་བྱུང་ན་ཁྱོད་ཀྱིས་ཡོན་ཏན་གྱི་ཚོགས་ཆུང་ཟད་རྟོགས་པ་ང་ལ་བརྗོད་པ་ལྟ་ན་གནང་ངོ་། །དེས་དེ་བཞིན་དུ་བགྱིའོ་ཞེས་ཁས་བླངས་སོ། །དེ་ནས་དེས་ཞི་བའི་ཕྱོགས་སུ་སོང་ནས་མཁན་པོ་དང་སློབ་དཔོན་མེད་པར་རང་བྱང་ཆུབ་རྟོགས་པར་བྱས་ནས་རང་སངས་རྒྱས་དེས་
བསམས་པ། བདག་གིས་རྒྱལ་པོ་དེ་ལ་སྔོན་ཁས་བླངས་པས་སོང་ལ། ཁས་བླངས་པ་དེ་རིག་པར་བྱའོ་ཞེས་དེ་རྒྱལ་པོའི་དྲུང་དུ་སོང་ནས་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་
བྱ་བར་བརྩམས་སོ། །རྒྱལ་པོས་དེའི་རྐང་པ་གཉིས་ལ་གཏུགས་ཏེ་ཚིགས་སུ་བཅད་པས་སྨྲས་པ། དགེ་བ་ཅི་ཞེས་བཙལ་ཕྱིར་རབ་བྱུང་བའི། །བྲམ་ཟེའི་ཁྱེའུས་རྙེད་པ་ལེགས་རྙེད་དེ། །ཆུང་ཟད་ལས་ཀྱི་རྣམ་སྨིན་བསྐྱེད་པ་ཡི། །ཉེར་འགྲོས་ཁྱད་པར་ཆེན་པོ་འདིར་རྟོགས་ལྟོས། །
རྒྱལ་པོ་ཚངས་སྦྱིན་གྱི་སྐྲ་མཁན་གང་ག་སྐྱོང་ཞེས་བྱ་བ་ཞིག་ཡོང་བ་དེ་དེས་མཛེས་དགའས་ཚིགས་སུ་བཅད་པས་སྨྲས་པ་འཛིན་དུ་བཅུག་ནས་སྨྲས་པ། གང་ག་སྐྱོང་ང་ལ་ཚིགས་སུ་བཅད་པ་དེ་ཡང་དང་ཡང་དུ་དྲན་པར་གྱིས་ཤིག །སྐྲ་མཁན་གང་ག་སྐྱོང་རང་གི་བཟོ་ལ་ཤིན་ཏུ་བྱང་བ་
ཡིན་པས་དེ་གང་གི་ཚེ་རྒྱལ་པོ་ཚངས་སྦྱིན་གྱི་ཁ་སྤུ་འཆོས་པ་དེའི་ཚེ་དེ་གཉིད་ལོག་པར་འགྱུར་ཞིང་སེ་གོལ་གྱིས་སད་པར་བྱས་ཏེ། སད་ནས་ཀྱང་གང་ག་སྐྱོང་ལ་མཆོག་གང་འདོད་པ་གསོལ་ཅིག་ཅེས་མཆོག་སྦྱིན་པར་བྱེད་པ་ན་དེས་སྨྲས་པ། ལྷ་གསོལ་བ་ཞིག་མཆིས་སོ། །གང་གི་

ཚེ་གང་ག་སྐྱོང་གིས་རྒྱལ་པོ་ལ་ཚིགས་སུ་བཅད་པ་དྲན་པར་བྱེད་པ་དེའི་ཚེ་རྒྱལ་པོ་འདོད་པའི་གཏམ་ལ་སེམས་ཀྱང་མི་འགྲོ་ན་འདོད་པ་ལ་ཞེན་ཅིང་སྤྱོད་པ་ལྟ་སྨོས་ཀྱང་ཅི་དགོས་ཏེ། བཙུན་མོ་ལ་བལྟ་བར་ཡང་མི་བྱེད་དོ། །བཙུན་མོ་རྣམས་ཉོན་མོངས་པས་མྱོས་ཤིང་ཞེན་
ནས་གང་ག་སྐྱོང་ལ་སྨྲས་པ། ཞང་པོ་གང་གི་ཚེ་རྒྱལ་པོ་ཁྱོད་ལ་ལྷས་མཆོག་སྦྱིན་པར་མཛད་པ་དེའི་ཚེ་ལྷ་གལ་ཏེ་བདག་ལ་དགྱེས་ན་ཚིགས་སུ་བཅད་པ་འདིའི་དོན་རྒྱས་པར་བཤད་དུ་གསོལ་ཅིག །རྒྱལ་པོས་ཚིགས་སུ་བཅད་པ་དེའི་དོན་རྒྱས་པར་རྣམ་པར་བཀྲོལ་བ་དང་། དེ་སྐྱོ་བ་སྐྱེས་ནས་རྐང་པ་
ལ་གཏུགས་ཏེ་སྨྲས་པ། ལྷ་བདག་གིས་བསྙེན་བཀུར་བགྱིས་ལགས་ཀྱིས་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ངོ་། །རྒྱལ་པོས་སྨྲས་པ། གལ་ཏེ་རབ་ཏུ་བྱུང་ནས་ཡོན་ཏན་གྱི་ཚོགས་ཆུང་ཟད་རྙེད་ན་ང་ལ་རིག་པར་བྱོས་ཤིག །དེས་སྨྲས་པ། ལྷ་བཀའ་བཞིན་འཚལ་སྙན་དུ་གསོལ་
བར་བགྱིའོ། །དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་ཏུ་བྱུང་ནས་དེས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེ་འདི་སྙམ་དུ་སེམས་ཏེ། བདག་གིས་རྒྱལ་པོ་ཚངས་སྦྱིན་ལ་སྔོན་ཁས་བླངས་ཀྱིས་སོང་ལ་ཁས་བླངས་པ་དེ་རིག་པར་བྱའོ་སྙམ་ནས། དེས་རྒྱལ་པོ་ཚངས་སྦྱིན་གང་ན་
བ་དེར་སོང་སྟེ་ཕྱིན་ནས་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེས་རྐང་པ་ལ་གཏུགས་ཏེ་སྨྲས་པ།
འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་རྟོགས་སམ། རྟོགས་སོ། །རྒྱལ་པོ་ཚངས་སྦྱིན་གྱིས་དྲང་སྲོང་གང་ག་སྐྱོང་གི་རྐང་པ་ལ་གཏུགས་པས་ས་རྣམ་པ་དྲུག་ཏུ་གཡོས་པར་གྱུར་ཏོ། །ཡང་དེའི་མས་ཚིགས་སུ་བཅད་དེ་སྨྲས་པ། ཚངས་སྦྱིན་བློ་དང་ལྡན་པ་པོ། །འདི་
རུ་འབྲེག་མཁན་ལག་ཆ་དག །བཞག་ནས་རབ་ཏུ་བྱུང་འདི་ལ། །ལྷ་ཁྱོད་འདུད་པའི་ཚུལ་མ་ཡིན། །རྒྱལ་པོ་ཚངས་སྦྱིན་གྱི་མས་ཁོང་དུ་ཆུད་པར་བྱ་བའི་ཕྱིར་ཚིགས་སུ་བཅད་པ་སྨྲས་པ། འདི་ལྟར་ཐུབ་པས་བསླབ་པའི་གཞི་རྣམས་ལ། །དེས་ནི་དཀའ་སྤྱད་འདི་དག་སྤྱད་

ལགས་ཏེ། །བློ་རྒྱ་ཆེན་པོར་གྱུར་པ་གང་ལགས་པ། །གང་ག་སྐྱོང་ལ་ཆུང་ཟད་མ་གསུང་ཤིག །དཀའ་ཐུབ་ཟིལ་གྱིས་སྡིག་པ་ཐམས་ཅད་མནན། །དཀའ་ཐུབ་ཟིལ་གྱིས་འཇིག་རྟེན་ཐམས་ཅད་མནན། །དཀའ་ཐུབ་ཟིལ་གྱིས་འབྲེག་མཁན་སྣོད་བཅོམ་སྟེ། །དཀའ་ཐུབ་
འབར་ལ་ཆུང་ཟད་མ་གསུང་ཤིག །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཚངས་སྦྱིན་ཞེས་བྱ་བར་གྱུར་པ་གང་ཡིན་པ་དེ་བཟང་ལྡན་འདི་ཉིད་ཡིན་ནོ། །དྲང་སྲོང་གང་ག་སྐྱོང་ཞེས་བྱ་བ་གང་ཡིན་པ་དེ་ནི་ཉེ་བ་འཁོར་འདི་ཉིད་ཡིན་ཏེ། དེ་ན་ཡང་ཤཱཀྱའི་རྒྱལ་པོ་
བཟང་ལྡན་ཚངས་སྦྱིན་དུ་གྱུར་པ་ན་ཉེ་བ་འཁོར་དྲང་སྲོང་གང་ག་སྐྱོང་ཞེས་བྱ་བར་གྱུར་པ་ལ་ཕྱག་བྱས་པ་ནས་རྣམ་པ་དྲུག་ཏུ་གཡོས་པར་གྱུར་ཏོ། །ད་ལྟར་ཡང་བཟང་ལྡན་གྱིས་ཉེ་བ་འཁོར་རབ་ཏུ་བྱུང་བ་ལ་ཕྱག་བྱས་པ་ནས་རྣམ་པ་དྲུག་ཏུ་གཡོས་པར་གྱུར་ཏོ།། །།སྡོམ་ལ། ཀཽཎྜི་
ནྱ་དང་རིལ་བའི་དབྱིབས། །ཐམས་ཅད་སྐྱོབ་ནོར་ཤིང་རྟ་དང་། །གདུགས་དང་སྲིན་བུ་ཀི་ཏ་ཀ། །བྱམས་པའི་དྲིལ་སྒྲོགས་བཅུག་པ་དང་། །དགའ་སྐྱོང་ལ་དུ་བཏུང་བ་དང་། །སྣུམ་ཁུར་གནས་འཇོག་སྦྲང་རྩི་ཅན། །འདུལ་བ་འཛིན་མཆོག་བགྲང་བའོ། །གང་གི་ཚེ་ཚེ་དང་ལྡན་
པ་ཀུན་ཤེས་ཀཽཎྜི་ནྱས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་བཅོམ་ལྡན་འདས་ཀྱིས་ཀྱང་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་བསྟན་པ་དེའི་ཚེ་དགེ་སློང་རྣམས་ཐེ་ཙོམ་སྐྱེས་ཏེ་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་
ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན་དེས་ན་བཅོམ་ལྡན་འདས་ཀྱིས་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་ཤེས་ཀཽཎྜ་ནྱི་འདི་ཉིད་ཀྱིས་ལས་
ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་དགེ་སློང་ཀཽཎྜི་ནྱ་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་

ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་
དང་། ཁམས་དང་། སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་
རྣམས་ཀྱི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་
འོད་སྲུང་ཞེས་བྱ་བ་བྱུང་སྟེ། དེ་གྲོང་ཁྱེར་བཱ་རཱ་ཎ་སཱིར་ཉེ་བར་བརྟེན་ནས་རི་བོ་རིལ་བའི་དབྱིབས་ཞེས་བྱ་བ་ལ་བཞུགས་སོ། །ཇི་ཙམ་དུས་གཞན་ཞིག་ན་ཡང་དག་པར་རྫོགས་པའི་སངས་རྒྱས་འོད་སྲུང་སྔ་དྲོ་ན་བཟའ་ཤམ་ཐབས་མནབས་ཆོས་གོས་དང་ལྷུང་བཟེད་བསྣམས་ཏེ། བཱ་རཱ་ཎ་
སཱིར་བསོད་སྙོམས་ལ་ཞུགས་པ་དང་། དགེ་འདུན་ལྔ་བརྒྱ་ཙམ་དོང་བའི་དགེ་འདུན་དེ་རྣམས་ཀྱིས་སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། སྐུ་དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། འོད་འདོམ་གང་
གིས་བརྒྱན་པ། འོད་ཟེར་ཉི་མ་སྟོང་བས་ལྷག་པའི་འོད་ཅན། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པར་མཐོང་ངོ་། །མཐོང་མ་ཐག་ཏུ་དད་པ་བསྐྱེད་ནས་གྲོས་བྱ་བར་བརྩམས་པ། ཤེས་ལྡན་དག་བདག་ཅག་འདི་ལས་རབ་ཏུ་འབྱུང་བར་བྱའོ་ཞེས་དེ་རྣམས་ཀྱིས་དེ་
ལྟར་གྲོས་བྱས་པ་ལས་ཁ་ཅིག་ནི་རྒྱ་མཚོ་ཆེན་པོར་ཞུགས་སོ། །ཁ་ཅིག་ནི་ཡུལ་གྱི་མཐར་དོང་ངོ་། །ཁ་ཅིག་ནི་ཤི་བའི་ཆོས་དང་ལྡན་པར་གྱུར་ཏེ། སྐྱེ་བོ་བཅུ་དྲུག་ཞིག་ལུས་པ་དེ་རྣམས་རི་བོ་རིལ་བའི་དབྱིབས་ལ་དོང་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལས་རབ་

ཏུ་བྱུང་སྟེ། དེ་རྣམས་དེ་ན་བསམ་གཏན་དང་། ཀློག་པ་དང་། རྣལ་འབྱོར་གྱིས་གནས་སོ། །ཇི་ཙམ་དུས་གཞན་ཞིག་ན་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཤིང་ཟད་པའི་མེ་བཞིན་དུ་དྲང་སྲོང་སྨྲ་བ་རི་དགས་ཀྱི་ནགས་
སུ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་རྣམས་ལ་ལྷ་རྣམས་ཀྱིས་སྨྲས་པ། ཤེས་ལྡན་དག་ཡང་དག་པར་རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་ཏེ། དེ་ཡོངས་སུ་མྱ་ངན་ལས་འདས་ནས་དེ་རིང་
དུ་ཞག་བདུན་ལོན་ཏེ། དེའི་བསྟན་པ་ཡང་ནུབ་ན་ཁྱེད་ཅག་འབྲས་བུ་མེད་པའི་སྦུན་པ་འབྲུ་ཞིང་འདུག་སྟེ། ཅི་རུང་ཞེས་བྱས་པ་ཐོས་ནས་བྱ་བ་མ་བྱས་པའི་སྡུག་བསྔལ་ཆེན་པོས་གདུངས་སོ། །དེ་ནས་ལྔ་ནི་ཐོས་མ་ཐག་ཏུ་རི་བོ་རིལ་བའི་དབྱིབས་ལས་བབས་ནས་བཱ་རཱ་ཎ་སཱིར་ཞུགས་སོ། །
དྲུག་གིས་ནི་དེ་ཉིད་དུ་ཡིད་བྱུང་བས་བརྩོན་འགྲུས་བརྩམས་ནས་རང་བྱང་ཆུབ་མངོན་སུམ་དུ་བྱས་སོ། །ཕྱི་ནས་ལྔ་ཡང་བབས་ནས་བཱ་རཱ་ཎ་སཱི་ཉིད་དུ་འཇུག་པར་བརྩམས་པ་ན་ཇི་ཙམ་ན་ཤིང་རྟས་འཚོ་བའི་ཚོང་པ་དག་འགྲོ་བ་ན་ཤིང་རྟས་འཚོ་བ་ཅིག་གི་གླང་དག་ཉམ་ཆུང་བཞིན་དུ་དེ་དག་ལ་
དེས་ལྕག་གཟེར་བུ་ཅན་གྱིས་ཡང་ནས་ཡང་དུ་གཞུས་ཏེ། དེ་རྣམས་ཉམ་ཆུང་བས་ཤི་ལ་ཐུག་ཅིང་འགྲོ་མི་ནུས་བཞིན་དུ་ཤིང་རྟས་འཚོ་བའི་སྣ་ལ་འགྲོ་བ་དང་། དེ་ལ་དགེ་སློང་དེ་རྣམས་ཀྱིས་སྨྲས་པ། ཀྱེ་ཤིང་རྟས་འཚོ་བ་ཁྱོད་ཀྱི་གླང་ཉམ་ཆུང་བ་འདི་རྣམས་ལ་ལྕག་གཟེར་བུ་ཅན་གྱིས་
ཡང་ནས་ཡང་དུ་གཞུས་ཏེ་ཅི་རུང་། གལ་ཏེ་འགྲོ་མི་ནུས་ན་དལ་བུས་འགྲོར་ཆུག་ལ་ཕྱི་ནས་སོང་ངོ་ཅོག །དེས་སྨྲས་པ། བདག་སྣ་ལ་ཤིང་རྟས་འཚོ་བའི་ཚོང་པ་དང་ལྷན་ཅིག་མཆི་མི་ནུས་ཞེས་གལ་ཏེ་བདག་ཕྱི་ནས་ཆས་ན་གདོན་མི་ཟ་བར་ཤིང་རྟས་འཚོ་བའི་ཚོང་པ་འདིས་བདག་
བོར་ནས་དོང་བར་འགྱུར་རོ། །དེ་རྣམས་ཀྱིས་ཤིང་རྟས་འཚོ་བ་དེ་ལས་བཟུར་བཟུར་ནས་མི་དགའ་སྟེ། གཅིག་ལ་གཅིག་སྨྲས་པ། ཤེས་ལྡན་དག་ཡང་དག་པར་རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་ཏེ་བདག་ཅག་ལུས་ན་འདིས་ཀྱང་བདག་ཅག་ལ་

སྐུལ་མ་བཏབ་ཀྱིས། མ་ལ་བདག་ཅག་གིས་བརྩོན་འགྲུས་བརྩམ་པར་བྱའོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། ཐུབ་པ་ཆེན་པོ་འོད་སྲུང་གི། །གལ་ཏེ་ཆོས་ནི་ནུབ་གྱུར་ཀྱང་། །ཡང་དག་སངས་རྒྱས་ཀྱིས་བཤད་པའི། །བརྩོན་འགྲུས་འདོར་
བར་མི་བྱའོ། །བདག་ཅག་གི་ནི་ཟག་པ་ཡང་། །གལ་ཏེ་ཟད་པར་མ་གྱུར་ན། །ཤཱཀྱ་སེང་གེ་སྐྱོབ་པ་ཡི། །ཉན་ཐོས་མཆོག་ཏུ་འགྱུར་བར་བྱ། །དེ་རྣམས་བཱ་རཱ་ཎ་སཱ་རི་ཞུགས་ནས་བསོད་སྙོམས་སྤྱད་དེ་སླར་ཡང་རི་བོ་རིལ་བའི་དབྱིབས་ལ་དོང་ནས་བསམ་གཏན་དང་། ཀློག་
པ་དང་། རྣལ་འབྱོར་གྱིས་གནས་པ་ན་དེ་རྣམས་ལས་བཞི་ཤིའོ། །གཅིག་ཅིག་ལུས་པ་དེ་མི་དགའ་བ་སྐྱེས་ཤིང་ཡིད་བྱུང་བས་ཆེད་དུ་བརྗོད་པ་ཆེད་དུ་བརྗོད་པ། རི་བོ་རིལ་བའི་དབྱིབས་གང་ཡིན་པ་འདི་ཉིད་ལ་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་
བཀུར་བྱས་ལ་དེའི་དགེ་སློང་ཉི་ཁྲི་ཡང་མཐོང་ན། བདག་འབའ་ཞིག་འཛམ་བུའི་གླིང་མཐའ་དག་ན་སྣམ་སྦྱར་གྱི་རྒྱལ་མཚན་འཛིན་པ་ལྟ་ཞིག་སྙམ་ནས། དེས་སྨོན་ལམ་གདབ་པར་བརྩམས་པ། འདི་ལྟར་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལས་འདི་
སྲིད་དུ་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་ཆུང་ཟད་ཀྱང་མ་རྟོགས་ཀྱིས། དགེ་བའི་རྩ་བ་འདིས་བདག་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་འགྱུར་རོ་ཞེས་ལུང་བསྟན་པ་དེའི་བསྟན་པ་ལས་བདག་རབ་ཏུ་བྱུང་ནས། དེར་ཐོག་མར་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས། བཅོམ་ལྡན་འདས་ཤཱཀྱ་ཐུབ་པ་
དེས་བདག་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་ཡོངས་སུ་མྱ་ངན་ལས་འདས་པའི་དགེ་སློང་ཉི་ཁྲི་

ཡོད་པ་ལས་དགེ་སློང་གཅིག་ལུས་པས་འཛམ་བུའི་གླིང་མཐའ་དག་ན་སྣམ་སྦྱར་གྱི་རྒྱལ་མཚན་བཟུང་སྟེ། རི་བོ་རིལ་བའི་དབྱིབས་གང་ན་བ་དེར་སོང་ནས་སྨོན་ལམ་བཏབ་པ་གང་ཡིན་པ་དེ་ནི་དགེ་སློང་ཀུན་ཤེས་ཀཽཎྜི་ནྱ་འདི་ཉིད་ཡིན་ཏེ། དེའི་སྨོན་ལམ་གྱི་དབང་གིས་ད་ལྟར་
ཡང་བཅོམ་ལྡན་འདས་ཀྱིས་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་
ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས་དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །གང་གི་ཚེ་བཅོམ་ལྡན་འདས་
ཀྱིས་ཚེ་དང་ལྡན་པ་ཀཽཎྜི་ནྱ་ལ་ཆོས་བཤད་ནས་ཡང་དང་ཡང་དུ་རྨེད་པར་མཛད་དེ། ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ལགས་སོ་ཞེས་གསོལ་པ་དེའི་
ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན། དེས་ན་བཅོམ་ལྡན་འདས་ཀྱིས་ཆོས་བཤད་ནས་ཡང་དང་ཡང་དུ་རྨེད་པ་མཛད་དེ། ཀཽཎྜི་ནྱ་
ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ལགས་སོ་ཞེས་གསོལ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀཽཎྜི་ནྱ་འདི་ཉིད་ཀྱིས་
ལས་བྱས་ཞིང་བསགས་པ། ཚོགས་རྙེད་པ་ཞེས་བྱ་བ་ནས་ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱིར་རྒྱལ་པོ་ཚངས་སྦྱིན་ཞེས་བྱ་བ་འབྱོར་བ་དང་། རྒྱས་པ་དང་། བདེ་བ་དང་། ལོ་ལེགས་

པ་སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེ་དུས་གཞན་ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་
མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་གཟུགས་བཟང་ཞིང་མཛེས་པ། བལྟ་ན་སྡུག་པ། ཡན་ལག་གི་མཆོག་ཐམས་ཅད་དང་ལྡན་པ་ཞིག་བཙས་སོ། །བཙས་ནས་དེའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་
མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ཡུལ་དབུས་ཀྱི་ཡུལ་ཆོས་ཀྱིས་ནི་གཟུགས་བཟང་ཞིང་མཛེས་པ་བལྟ་ན་སྡུག་པ་ལགས་ན་དེ་མཛེས་དགའ་ཞེས་འདོགས་ལགས་ལ། ཁྱེའུ་འདི་ཡང་གཟུགས་བཟང་ཞིང་མཛེས་པ་བལྟ་ན་སྡུག་ཅིང་ཡུལ་ཀ་ཤིའི་རྒྱལ་པོའི་
སྲས་ཀྱང་ལགས་པས་ཁྱེའུའི་མིང་ཀ་ཤི་མཛེས་དགའ་ཞེས་བགྱི་བར་གདགས་སོ་ཞེས་དེའི་མིང་ཀ་ཤི་མཛེས་དགའ་ཞེས་བྱ་བར་བཏགས་སོ། །ཁྱེའུ་ཀ་ཤི་མཛེས་དགའ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་
མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ་མ་མ་བརྒྱད་ལ་རྗེས་སུ་གཏད་ནས་དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་པོ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་
ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །ཡང་རྒྱལ་པོ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་ཏེ། གང་གི་ཉི་མ་ལ་བཙས་པ་དེ་
ཉིད་ཀྱི་ཉི་མ་ལ་བཱ་རཱ་ཎ་སཱིར་ཡུལ་མི་དང་གྲོང་མི་འཐབ་མོ་ཆེན་པོ་བྱུང་ངོ་། །དེ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །བཙུན་མོའི་ཚོགས་ཀྱིས་སྨྲས་པ། ལྷ་འདི་བཙས་པ་ན་བཱ་རཱ་ཎ་སཱིར་གྲོང་མི་དང་ཡུལ་མི་རྣམས་

འཐབ་མོ་ཆེན་པོ་བྱུང་བས་དེའི་སླད་དུ་ཁྱེའུའི་མིང་འཐབ་མོ་སྐྱེས་སུ་གདགས་སོ་ཞེས་བཏགས་སོ། །རྒྱལ་པོ་ཚངས་སྦྱིན་ནི་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་སྟེ། གཞོན་ནུ་ཀ་ཤི་མཛེས་དགའས་ཕ་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་པ་མཐོང་ངོ་། །
མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་ཀྱང་ཡབ་འདས་ན་རྒྱལ་པོར་འགྱུར་ཞིང་བདག་གིས་ཀྱང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ནས་དམྱལ་བར་གཞོལ་བར་འགྱུར་གྱིས། མ་ལ་བདག་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས་དེ་ཕའི་དྲུང་དུ་སོང་
སྟེ་རྐང་པ་ལ་གཏུགས་ཏེ་སྨྲས་པ། ཡབ་གནང་བར་མཛད་དུ་གསོལ། བདག་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ལགས་སོ། །དེས་སྨྲས་པ། བུ་གང་གི་དོན་དུ་མཆོད་སྦྱིན་མཆོད་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་རྒྱལ་སྲིད་
ཁྱོད་ཀྱི་ལག་ཏུ་འོངས་ན་ཅིའི་ཕྱིར་རྒྱལ་སྲིད་སྤངས་ཏེ་རབ་ཏུ་འབྱུང་། དེས་ཚིགས་སུ་བཅད་པས་སྨྲས་པ། ནགས་ན་ཤིང་ཤུན་རྩྭ་གྱོན་ཞིང་། །རྩ་བ་འབྲས་བུ་འཆའ་བ་དང་། །རི་དགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་
རོལ་འཇིག་བྱེད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་བཅིང་དང་རྡེག་པ་དག །བགྱིད་པ་དེ་ལྟ་མ་ལགས་སོ། །རྒྱལ་པོས་སྨྲས་པ། གཞོན་ནུ་ཤེས་པར་གྱིས་ཤིག །ཁྱོད་ནི་ངའི་བུ་གཅིག་པ་སྡུག་པ། ཡིད་དུ་འོང་བ། བཟོད་པ། མི་མཐུན་
པ་མེད་པ་ཡིན་ཏེ། ང་ཤི་བར་གྱུར་ན་མི་འདོད་བཞིན་དུ་ཁྱོད་དང་འབྲལ་གྲང་། གསོན་བཞིན་དུ་ལྟ་ག་ལ་བཏང་། གཞོན་ནུ་ཀ་ཤི་མཛེས་དགའས་སྨྲས་པ། ཡབ་གལ་ཏེ་གནང་ན་དེ་ལྟ་ན་ལེགས། གལ་ཏེ་མི་གནང་ན་འཚལ་མ་ཡང་མི་འཚལ། ཕྱག་ཡང་མི་འཚལ་
ལོ། །དེ་ན་གཞོན་ནུ་ཀ་ཤི་མཛེས་དགའས་ཉི་མ་གཅིག་ཀྱང་ཟན་གཅད་པ་བྱས་པ་ནས། གཉིས་དང་། གསུམ་དང་། དྲུག་གི་བར་དུ་ཟན་གཅད་པ་བྱས་སོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །བུ་གཞོན་ནུ་

ཤེས་པར་གྱིས་ཤིག །ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་བྱ་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་བས་མཐའ་དག་ཏུ་གནས་པས་མནགས་དཀའོ། །གཅིག་པུ་
དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་རྣམས་དང་ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་
དབེན་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་། རྩེད་མོ་དག་ལས་དབེན་པར་བྱ་དགོས་སོ། །བུ་གཞོན་ནུ་ཁྱོད་ཚུར་ཤོག །འདི་ཉིད་དུ་འདུག་ལ་རྒྱལ་ཚབ་བྱོས་ཏེ་འདོད་པ་དག་ལ་ཡང་སྤྱོད་ཅིག །སྦྱིན་བདག་ཀྱང་བྱིན་ཅིག །བསོད་ནམས་དག་
ཀྱང་བྱོས་ཤིག །དེ་སྐད་ཅེས་སྨྲས་ཀྱང་གཞོན་ནུ་ཀ་ཤི་མཛེས་དགའ་ཅང་མི་སྨྲའོ། །དེ་ནས་རྒྱལ་པོ་ཚངས་སྦྱིན་གྱིས་བཙུན་མོ་དང་། བློན་པོ་དང་། མདུན་ན་འདོན་ལ་བསྒོ་བ། ཤེས་ལྡན་དག་རེ་ཞིག་གཞོན་ནུ་སློང་ཤིག །ལྷ་བཀའ་བཞིན་འཚལ་ཞེས་བཙུན་མོ་དང་། བློན་
པོ་དང་། མདུན་ན་འདོན་རྣམས་གཞོན་ནུ་ཀ་ཤི་མཛེས་དགའ་གང་ན་བ་དེར་དོང་སྟེ་ལྷགས་ནས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པས་སྡུག་བསྔལ་མི་མཁྱེན་ཏེ། ཚངས་
པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པ་དགའ་བར་བགྱི་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་། བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །
ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་

འཚོའི་བར་དུ་མིའི་དགའ་བའི་རྩེད་མོ་རྣམས་ལས་དབེན་པར་བགྱི་འཚལ་ལོ། །སྲས་གཞོན་ནུ་ཁྱོད་ཚུར་སྤྱོན། འདི་ཉིད་དུ་བཞུགས་ལ་རྒྱལ་ཚབ་མཛོད་དེ། འདོད་པ་རྣམས་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་གྱིས་ཤིག་ཅེས་
དེ་སྐད་སྨྲས་པ་ན། གཞོན་ནུ་ཀ་ཤི་མཛེས་དགའ་ཅང་མི་སྨྲ་བར་འདུག་གོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ཀ་ཤི་མཛེས་དགའ་དང་ལྷན་ཅིག་རྡུལ་ཁྲོད་ན་རྩེ་རྩེ་བའི་བློན་པོའི་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞན་ཡང་གཞོན་ནུ་རྣམས་ལ་བསྒོ་བ་གཞོན་
ནུ་དག་ཚུར་རེ་ཞིག་གཞོན་ནུ་ཀ་ཤི་མཛེས་དགའ་སློང་ཤིག །དེ་ནས་བློན་པོའི་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞོན་ནུ་རྣམས་ཀྱིས་རྒྱལ་པོ་ཚངས་སྦྱིན་ལས་མཉན་ནས། གཞོན་ནུ་ཀ་ཤི་མཛེས་དགའ་གང་ན་བ་དེར་དོང་སྟེ་ལྷགས་ནས་གཞོན་ནུ་ཀ་ཤི་མཛེས་དགའ་
ལ་འདི་སྐད་ཅེས་སྨྲས་སོ། །གཞོན་ནུ་དེས་པ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་
མལ་དགོན་པ་ནགས་ཁྲོད་རི་དྲུང་དང་། བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་
གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བའི་རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་ཁྱོད་ཚུར་སྤྱོན། འདི་ཉིད་དུ་
བཞུགས་ལ་རྒྱལ་ཚབ་མཛོད་དེ། འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་གྱིས་ཤིག་ཅེས་སྨྲས་པ་ན། གཞོན་ནུ་ཀ་ཤི་མཛེས་དགའ་ཅང་མི་སྨྲ་བར་འདུག་གོ། །དེ་ནས་བློན་པོའི་བུ་རྣམས་དང་། མདུན་ན་འདོན་གྱི་བུ་

རྣམས་དང་། གཞོན་ནུ་རྣམས་རྒྱལ་པོ་ཚངས་སྦྱིན་གང་ན་བ་དེར་སོང་སྟེ་ཕྱིན་ནས་རྒྱལ་པོ་ཚངས་སྦྱིན་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །གཞོན་ནུ་དེས་པ་ཀ་ཤི་མཛེས་དགའ་གུམ་ན་ཅི་རུང་། འདི་ལྟར་རབ་ཏུ་བྱུང་བ་ནི་མཁས་པ་རྣམས་ཀྱིས་
བསྔགས་པ་ལགས་ཏེ། གལ་ཏེ་དེ་ལ་མངོན་པར་དགའ་བར་གྱུར་ན་གསོན་པོར་དེ་ལ་གཟིགས་པར་འགྱུར་རོ། །གལ་ཏེ་མངོན་པར་དགའ་བར་མ་གྱུར་ཏེ། སླར་ཡང་དྲང་སྲོང་རྣམས་ལས་ལོག་པར་གྱུར་ན་བུའི་གནས་ནི་ཕ་དང་མ་མ་ལགས་པ་གཞན་གང་དུ་མཆི་བར་འགྱུར། རྒྱལ་
པོ་ཚངས་སྦྱིན་གྱིས་སྨྲས་པ། གཞོན་ནུ་དག་གལ་ཏེ་དེ་ལྟ་ན་གནང་བར་བྱའོ། །དེ་ནས་བློན་པོའི་བུ་རྣམས་དང་། མདུན་ན