Sự Nghiệp Anh Hùng (Apadāna)

to, 
agāreva tadā mayaṁ; 
Vīsavassasahassāni, 
vicarimha atanditā. 
Tatiyaṁ bhāṇavāraṁ. 
Komāribrahmacariyaṁ, 
rājakaññā sukhedhitā; 
Buddhopaṭṭhānaniratā, 
muditā satta dhītaro. 
Samaṇī samaṇaguttā ca, 
bhikkhunī bhikkhudāyikā; 
Dhammā ceva sudhammā ca, 
sattamī saṅghadāyikā. 
Khemā uppalavaṇṇā ca, 
paṭācārā ca kuṇḍalā; 
Gotamī ca ahañceva, 
visākhā hoti sattamī. 
Tehi kammehi sukatehi, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
giribbajapuruttame; 
Jātā seṭṭhikule phīte, 
sabbakāmasamiddhine. 
Yadā rūpaguṇūpetā, 
paṭhame yobbane ṭhitā; 
Tadā parakulaṁ gantvā, 
vasiṁ sukhasamappitā. 
Upetvā lokasaraṇaṁ, 
suṇitvā dhammadesanaṁ; 
Anāgāmiphalaṁ patto, 
sāmiko me subuddhimā. 
Tadāhaṁ anujānetvā, 
pabbajiṁ anagāriyaṁ; 
Na cireneva kālena, 
arahattamapāpuṇiṁ. 
Tadā upāsako so maṁ, 
upagantvā apucchatha; 
Gambhīre nipuṇe pañhe, 
te sabbe byākariṁ ahaṁ. 
Jino tasmiṁ guṇe tuṭṭho, 
etadagge ṭhapesi maṁ; 
‘Bhikkhuniṁ dhammakathikaṁ, 
nāññaṁ passāmi edisiṁ. 
Dhammadinnā yathā dhīrā, 
evaṁ dhāretha bhikkhavo’; 
Evāhaṁ paṇḍitā homi, 
nāyakenānukampitā. 
Pariciṇṇo mayā satthā, 
kataṁ buddhassa sāsanaṁ; 
Ohito garuko bhāro, 
bhavanetti samūhatā. 
Yassatthāya pabbajitā, 
agārasmānagāriyaṁ; 
So me attho anuppatto, 
sabbasaṁyojanakkhayo. 
Iddhīsu ca vasī homi, 
dibbāya sotadhātuyā; 
Paracittāni jānāmi, 
satthusāsanakārikā. 
Pubbenivāsaṁ jānāmi, 
dibbacakkhu visodhitaṁ; 
Khepetvā āsave sabbe, 
visuddhāsiṁ sunimmalā. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ dhammadinnā bhikkhunī imā gāthāyo abhāsitthāti. 
Dhammadinnātheriyāpadānaṁ tatiyaṁ. 

Therīapadāna 
Kuṇḍalakesīvagga 
Sakulātherīapadāna 
“Padumuttaro nāma jino, 
sabbadhammāna pāragū; 
Ito satasahassamhi, 
kappe uppajji nāyako. 
Hitāya sabbasattānaṁ, 
sukhāya vadataṁ varo; 
Atthāya purisājañño, 
paṭipanno sadevake. 
Yasaggapatto sirimā, 
kittivaṇṇagato jino; 
Pūjito sabbalokassa, 
disāsabbāsu vissuto. 
Uttiṇṇavicikiccho so, 
vītivattakathaṅkatho; 
Sampuṇṇamanasaṅkappo, 
patto sambodhimuttamaṁ. 
Anuppannassa maggassa, 
uppādetā naruttamo; 
Anakkhātañca akkhāsi, 
asañjātañca sañjanī. 
Maggaññū ca maggavidū, 
maggakkhāyī narāsabho; 
Maggassa kusalo satthā, 
sārathīnaṁ varuttamo. 
Mahākāruṇiko satthā, 
dhammaṁ desesi nāyako; 
Nimugge kāmapaṅkamhi, 
samuddharati pāṇine. 
Tadāhaṁ haṁsavatiyaṁ, 
jātā khattiyanandanā; 
Surūpā sadhanā cāpi, 
dayitā ca sirīmatī. 
Ānandassa mahārañño, 
dhītā paramasobhaṇā; 
Vemātā bhaginī cāpi, 
padumuttaranāmino. 
Rājakaññāhi sahitā, 
sabbābharaṇabhūsitā; 
Upāgamma mahāvīraṁ, 
assosiṁ dhammadesanaṁ. 
Tadā hi so lokagaru, 
bhikkhuniṁ dibbacakkhukaṁ; 
Kittayaṁ parisāmajjhe, 
aggaṭṭhāne ṭhapesi taṁ. 
Suṇitvā tamahaṁ haṭṭhā, 
dānaṁ datvāna satthuno; 
Pūjitvāna ca sambuddhaṁ, 
dibbacakkhuṁ apatthayiṁ. 
Tato avoca maṁ satthā, 
‘nande lacchasi patthitaṁ; 
Padīpadhammadānānaṁ, 
phalametaṁ sunicchitaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādā, 
orasā dhammanimmitā; 
Sakulā nāma nāmena, 
hessati satthu sāvikā’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Paribbājakinī āsiṁ, 
tadāhaṁ ekacārinī; 
Bhikkhāya vicaritvāna, 
alabhiṁ telamattakaṁ. 
Tena dīpaṁ padīpetvā, 
upaṭṭhiṁ sabbasaṁvariṁ; 
Cetiyaṁ dvipadaggassa, 
vippasannena cetasā. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Yattha yatthūpapajjāmi, 
tassa kammassa vāhasā; 
Pajjalanti mahādīpā, 
tattha tattha gatāya me. 
Tirokuṭṭaṁ tiroselaṁ, 
samatiggayha pabbataṁ; 
Passāmahaṁ yadicchāmi, 
dīpadānassidaṁ phalaṁ. 
Visuddhanayanā homi, 
yasasā ca jalāmahaṁ; 
Saddhāpaññāvatī ceva, 
dīpadānassidaṁ phalaṁ. 
Pacchime ca bhave dāni, 
jātā vippakule ahaṁ; 
Pahūtadhanadhaññamhi, 
mudite rājapūjite. 
Ahaṁ sabbaṅgasampannā, 
sabbābharaṇabhūsitā; 
Purappavese sugataṁ, 
vātapāne ṭhitā ahaṁ. 
Disvā jalantaṁ yasasā, 
devamanussasakkataṁ; 
Anubyañjanasampannaṁ, 
lakkhaṇehi vibhūsitaṁ. 
Udaggacittā sumanā, 
pabbajjaṁ samarocayiṁ; 
Na cireneva kālena, 
arahattamapāpuṇiṁ. 
Iddhīsu ca vasī homi, 
dibbāya sotadhātuyā; 
Paracittāni jānāmi, 
satthusāsanakārikā. 
Pubbenivāsaṁ jānāmi, 
dibbacakkhu visodhitaṁ; 
Khepetvā āsave sabbe, 
visuddhāsiṁ sunimmalā. 
Pariciṇṇo mayā satthā, 
kataṁ buddhassa sāsanaṁ; 
Ohito garuko bhāro, 
bhavanetti samūhatā. 
Yassatthāya pabbajitā, 
agārasmānagāriyaṁ; 
So me attho anuppatto, 
sabbasaṁyojanakkhayo. 
Tato mahākāruṇiko, 
etadagge ṭhapesi maṁ; 
Dibbacakkhukānaṁ aggā, 
sakulāti naruttamo. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ sakulā bhikkhunī imā gāthāyo abhāsitthāti. 
Sakulātheriyāpadānaṁ catutthaṁ. 

Therīapadāna 
Kuṇḍalakesīvagga 
5 Nandātherīapadāna 
“Padumuttaro nāma jino, 
sabbadhammāna pāragū; 
Ito satasahassamhi, 
kappe uppajji nāyako. 
Ovādako viññāpako, 
tārako sabbapāṇinaṁ; 
Desanākusalo buddho, 
tāresi janataṁ bahuṁ. 
Anukampako kāruṇiko, 
hitesī sabbapāṇinaṁ; 
Sampatte titthiye sabbe, 
pañcasīle patiṭṭhapi. 
Evaṁ nirākulaṁ āsi, 
suññataṁ titthiyehi ca; 
Vicittaṁ arahantehi, 
vasībhūtehi tādibhi. 
Ratanānaṭṭhapaññāsaṁ, 
uggatova mahāmuni; 
Kañcanagghiyasaṅkāso, 
bāttiṁsavaralakkhaṇo. 
Vassasatasahassāni, 
āyu vijjati tāvade; 
Tāvatā tiṭṭhamāno so, 
tāresi janataṁ bahuṁ. 
Tadāhaṁ haṁsavatiyaṁ, 
jātā seṭṭhikule ahuṁ; 
Nānāratanapajjote, 
mahāsukhasamappitā. 
Upetvā taṁ mahāvīraṁ, 
assosiṁ dhammadesanaṁ; 
Amataṁ paramassādaṁ, 
paramatthanivedakaṁ. 
Tadā nimantayitvāna, 
sasaṅghaṁ lokanāyakaṁ; 
Datvā tassa mahādānaṁ, 
pasannā sehi pāṇibhi. 
Jhāyinīnaṁ bhikkhunīnaṁ, 
aggaṭṭhānamapatthayiṁ; 
Nipacca sirasā dhīraṁ, 
sasaṅghaṁ lokanāyakaṁ. 
Tadā adantadamako, 
tilokasaraṇo pabhū; 
Byākāsi narasārathi, 
‘lacchase taṁ supatthitaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādā, 
orasā dhammanimmitā; 
Nandāti nāma nāmena, 
hessati satthu sāvikā’. 
Taṁ sutvā muditā hutvā, 
yāvajīvaṁ tadā jinaṁ; 
Mettacittā paricariṁ, 
paccayehi vināyakaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tato cutā yāmamagaṁ, 
tatohaṁ tusitaṁ gatā; 
Tato ca nimmānaratiṁ, 
vasavattipuraṁ tato. 
Yattha yatthūpapajjāmi, 
tassa kammassa vāhasā; 
Tattha tattheva rājūnaṁ, 
mahesittamakārayiṁ. 
Tato cutā manussatte, 
rājānaṁ cakkavattinaṁ; 
Maṇḍalīnañca rājūnaṁ, 
mahesittamakārayiṁ. 
Sampattiṁ anubhotvāna, 
devesu manujesu ca; 
Sabbattha sukhitā hutvā, 
nekakappesu saṁsariṁ. 
Pacchime bhave sampatte, 
suramme kapilavhaye; 
Rañño suddhodanassāhaṁ, 
dhītā āsiṁ aninditā. 
Siriyā rūpiniṁ disvā, 
nanditaṁ āsi taṁ kulaṁ; 
Tena nandāti me nāmaṁ, 
sundaraṁ pavaraṁ ahu. 
Yuvatīnañca sabbāsaṁ, 
kalyāṇīti ca vissutā; 
Tasmimpi nagare ramme, 
ṭhapetvā taṁ yasodharaṁ. 
Jeṭṭho bhātā tilokaggo, 
pacchimo arahā tathā; 
Ekākinī gahaṭṭhāhaṁ, 
mātarā paricoditā. 
‘Sākiyamhi kule jātā, 
putte buddhānujā tuvaṁ; 
Nandenapi vinā bhūtā, 
agāre kiṁ nu acchasi. 
Jarāvasānaṁ yobbaññaṁ, 
rūpaṁ asucisammataṁ; 
Rogantamapicārogyaṁ, 
jīvitaṁ maraṇantikaṁ. 
Idampi te subhaṁ rūpaṁ, 
sasīkantaṁ manoharaṁ; 
Bhūsanānaṁ alaṅkāraṁ, 
sirisaṅghāṭasannibhaṁ. 
Puñjitaṁ lokasāraṁva, 
nayanānaṁ rasāyanaṁ; 
Puññānaṁ kittijananaṁ, 
ukkākakulanandanaṁ. 
Na cireneva kālena, 
jarā samadhisessati; 
Vihāya gehaṁ kāruññe, 
cara dhammamanindite’. 
Sutvāhaṁ mātu vacanaṁ, 
pabbajiṁ anagāriyaṁ; 
Dehena na tu cittena, 
rūpayobbanalāḷitā. 
Mahatā ca payattena, 
jhānajjhena paraṁ mama; 
Kātuñca vadate mātā, 
na cāhaṁ tattha ussukā. 
Tato mahākāruṇiko, 
disvā maṁ kāmalālasaṁ; 
Nibbindanatthaṁ rūpasmiṁ, 
mama cakkhupathe jino. 
Sakena ānubhāvena, 
itthiṁ māpesi sobhiniṁ; 
Dassanīyaṁ suruciraṁ, 
mamatopi surūpiniṁ. 
Tamahaṁ vimhitā disvā, 
ativimhitadehiniṁ; 
Cintayiṁ ‘saphalaṁ meti, 
nettalābhañca mānusaṁ. 
Tamahaṁ ehi subhage, 
yenattho taṁ vadehi me; 
Kulaṁ te nāmagottañca, 
vada me yadi te piyaṁ. 
Na vañcakālo subhage, 
ucchaṅge maṁ nivāsaya; 
Sīdantīva mamaṅgāni, 
pasuppaya muhuttakaṁ’. 
Tato sīsaṁ mamaṅge sā, 
katvā sayi sulocanā; 
Tassā nalāṭe patitā, 
luddhā paramadāruṇā. 
Saha tassā nipātena, 
piḷakā upapajjatha; 
Pagghariṁsu pabhinnā ca, 
kuṇapā pubbalohitā. 
Pabhinnaṁ vadanañcāpi, 
kuṇapaṁ pūtigandhanaṁ; 
Uddhumātaṁ vinilañca, 
pubbañcāpi sarīrakaṁ. 
Sā paveditasabbaṅgī, 
nissasantī muhuṁ muhuṁ; 
Vedayantī sakaṁ dukkhaṁ, 
karuṇaṁ paridevayi. 
‘Dukkhena dukkhitā homi, 
phusayanti ca vedanā; 
Mahādukkhe nimuggamhi, 
saraṇaṁ hohi me sakhī. 
Kuhiṁ vadanasobhaṁ te, 
kuhiṁ te tuṅganāsikā; 
Tambabimbavaroṭṭhaṁ te, 
vadanaṁ te kuhiṁ gataṁ. 
Kuhiṁ sasīnibhaṁ vaṇṇaṁ, 
kambugīvā kuhiṁ gatā; 
Doḷālolāva te kaṇṇā, 
vevaṇṇaṁ samupāgatā. 
Makuḷakhārakākārā, 
kalikāva payodharā; 
Pabhinnā pūtikuṇapā, 
duṭṭhagandhittamāgatā. 
Vedimajjhāva sussoṇī, 
sūnāva nītakibbisā; 
Jātā amejjhabharitā, 
aho rūpamasassataṁ. 
Sabbaṁ sarīrasañjātaṁ, 
pūtigandhaṁ bhayānakaṁ; 
Susānamiva bībhacchaṁ, 
ramante yattha bālisā’. 
Tadā mahākāruṇiko, 
bhātā me lokanāyako; 
Disvā saṁviggacittaṁ maṁ, 
imā gāthā abhāsatha. 
‘Āturaṁ kuṇapaṁ pūtiṁ, 
passa nande samussayaṁ; 
Asubhāya cittaṁ bhāvehi, 
ekaggaṁ susamāhitaṁ. 
Yathā idaṁ tathā etaṁ, 
yathā etaṁ tathā idaṁ; 
Duggandhaṁ pūtikaṁ vāti, 
bālānaṁ abhinanditaṁ. 
Evametaṁ avekkhantī, 
rattindivamatanditā; 
Tato sakāya paññāya, 
abhinibbijjha dakkhasi’. 
Tatohaṁ atisaṁviggā, 
sutvā gāthā subhāsitā; 
Tatraṭṭhitāvahaṁ santī, 
arahattamapāpuṇiṁ. 
Yattha yattha nisinnāhaṁ, 
sadā jhānaparāyaṇā; 
Jino tasmiṁ guṇe tuṭṭho, 
etadagge ṭhapesi maṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ nandā bhikkhunī janapadakalyāṇī imā gāthāyo abhāsitthāti. 
Nandātheriyāpadānaṁ pañcamaṁ. 

Therīapadāna 
Kuṇḍalakesīvagga 
Soṇātherīapadāna 
“Padumuttaro nāma jino, 
sabbadhammāna pāragū; 
Ito satasahassamhi, 
kappe uppajji nāyako. 
Tadā seṭṭhikule jātā, 
sukhitā pūjitā piyā; 
Upetvā taṁ munivaraṁ, 
assosiṁ madhuraṁ vacaṁ. 
Āraddhavīriyānaggaṁ, 
vaṇṇesi bhikkhuniṁ jino; 
Taṁ sutvā muditā hutvā, 
kāraṁ katvāna satthuno. 
Abhivādiya sambuddhaṁ, 
ṭhānaṁ taṁ patthayiṁ tadā; 
Anumodi mahāvīro, 
‘sijjhataṁ paṇidhī tava. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādā, 
orasā dhammanimmitā; 
Soṇāti nāma nāmena, 
hessati satthu sāvikā’. 
Taṁ sutvā muditā hutvā, 
yāvajīvaṁ tadā jinaṁ; 
Mettacittā paricariṁ, 
paccayehi vināyakaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
jātā seṭṭhikule ahaṁ; 
Sāvatthiyaṁ puravare, 
iddhe phīte mahaddhane. 
Yadā ca yobbanappattā, 
gantvā patikulaṁ ahaṁ; 
Dasa puttāni ajaniṁ, 
surūpāni visesato. 
Sukhedhitā ca te sabbe, 
jananettamanoharā; 
Amittānampi rucitā, 
mama pageva te piyā. 
Tato mayhaṁ akāmāya, 
dasaputtapurakkhato; 
Pabbajittha sa me bhattā, 
devadevassa sāsane. 
Tadekikā vicintesiṁ, 
‘jīvitenālamatthu me; 
Cattāya patiputtehi, 
vuḍḍhāya ca varākiyā. 
Ahampi tattha gacchissaṁ, 
sampatto yattha me pati’; 
Evāhaṁ cintayitvāna, 
pabbajiṁ anagāriyaṁ. 
Tato ca maṁ bhikkhuniyo, 
ekaṁ bhikkhunupassaye; 
Vihāya gacchumovādaṁ, 
‘tāpehi udakaṁ’ iti. 
Tadā udakamāhitvā, 
okiritvāna kumbhiyā; 
Culle ṭhapetvā āsīnā, 
tato cittaṁ samādahiṁ. 
Khandhe aniccato disvā, 
dukkhato ca anattato; 
Khepetvā āsave sabbe, 
arahattamapāpuṇiṁ. 
Tadāgantvā bhikkhuniyo, 
uṇhodakamapucchisuṁ; 
Tejodhātumadhiṭṭhāya, 
khippaṁ santāpayiṁ jalaṁ. 
Vimhitā tā jinavaraṁ, 
etamatthamasāvayuṁ; 
Taṁ sutvā mudito nātho, 
imaṁ gāthaṁ abhāsatha. 
‘Yo ca vassasataṁ jīve, 
kusīto hīnavīriyo; 
Ekāhaṁ jīvitaṁ seyyo, 
vīriyamārabhato daḷhaṁ’. 
Ārādhito mahāvīro, 
mayā suppaṭipattiyā; 
Āraddhavīriyānaggaṁ, 
mamāha sa mahāmuni. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ soṇā bhikkhunī imā gāthāyo abhāsitthāti. 
Soṇātheriyāpadānaṁ chaṭṭhaṁ. 

Therīapadāna 
Kuṇḍalakesīvagga 
Bhaddākāpilānītherīapadāna 
“Padumuttaro nāma jino, 
sabbadhammāna pāragū; 
Ito satasahassamhi, 
kappe uppajji nāyako. 
Tadāhu haṁsavatiyaṁ, 
videho nāma nāmato; 
Seṭṭhī pahūtaratano, 
tassa jāyā ahosahaṁ. 
Kadāci so narādiccaṁ, 
Upecca saparijjano; 
Dhammamassosi buddhassa, 
Sabbadukkhabhayappahaṁ. 
Sāvakaṁ dhutavādānaṁ, 
aggaṁ kittesi nāyako; 
Sutvā sattāhikaṁ dānaṁ, 
datvā buddhassa tādino. 
Nipacca sirasā pāde, 
taṁ ṭhānamabhipatthayiṁ; 
Sa hāsayanto parisaṁ, 
tadā hi narapuṅgavo. 
Seṭṭhino anukampāya, 
imā gāthā abhāsatha; 
‘Lacchase patthitaṁ ṭhānaṁ, 
nibbuto hohi puttaka. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Kassapo nāma gottena, 
hessati satthu sāvako’. 
Taṁ sutvā mudito hutvā, 
yāvajīvaṁ tadā jinaṁ; 
Mettacitto paricari, 
paccayehi vināyakaṁ. 
Sāsanaṁ jotayitvāna, 
so madditvā kutitthiye; 
Veneyyaṁ vinayitvā ca, 
nibbuto so sasāvako. 
Nibbute tamhi lokagge, 
pūjanatthāya satthuno; 
Ñātimitte samānetvā, 
saha tehi akārayi. 
Sattayojanikaṁ thūpaṁ, 
ubbiddhaṁ ratanāmayaṁ; 
Jalantaṁ sataraṁsiṁva, 
sālarājaṁva phullitaṁ. 
Sattasatasahassāni, 
pātiyo tattha kārayi; 
Naḷaggī viya jotantī, 
rataneheva sattahi. 
Gandhatelena pūretvā, 
dīpānujjalayī tahiṁ; 
Pūjanatthāya mahesissa, 
sabbabhūtānukampino. 
Sattasatasahassāni, 
puṇṇakumbhāni kārayi; 
Rataneheva puṇṇāni, 
pūjanatthāya mahesino. 
Majjhe aṭṭhaṭṭhakumbhīnaṁ, 
ussitā kañcanagghiyo; 
Atirocanti vaṇṇena, 
saradeva divākaro. 
Catudvāresu sobhanti, 
toraṇā ratanāmayā; 
Ussitā phalakā rammā, 
sobhanti ratanāmayā. 
Virocanti parikkhittā, 
avaṭaṁsā sunimmitā; 
Ussitāni paṭākāni, 
ratanāni virocare. 
Surattaṁ sukataṁ cittaṁ, 
cetiyaṁ ratanāmayaṁ; 
Atirocati vaṇṇena, 
sasañjhova divākaro. 
Thūpassa vediyo tisso, 
haritālena pūrayi; 
Ekaṁ manosilāyekaṁ, 
añjanena ca ekikaṁ. 
Pūjaṁ etādisaṁ rammaṁ, 
kāretvā varavādino; 
Adāsi dānaṁ saṅghassa, 
yāvajīvaṁ yathābalaṁ. 
Sahāva seṭṭhinā tena, 
tāni puññāni sabbaso; 
Yāvajīvaṁ karitvāna, 
sahāva sugatiṁ gatā. 
Sampattiyonubhotvāna, 
devatte atha mānuse; 
Chāyā viya sarīrena, 
saha teneva saṁsariṁ. 
Ekanavutito kappe, 
vipassī nāma nāyako; 
Uppajji cārudassano, 
sabbadhammavipassako. 
Tadāyaṁ bandhumatiyaṁ, 
brāhmaṇo sādhusammato; 
Aḍḍho santo guṇenāpi, 
dhanena ca suduggato. 
Tadāpi tassāhaṁ āsiṁ, 
brāhmaṇī samacetasā; 
Kadāci so dijavaro, 
saṅgamesi mahāmuniṁ. 
Nisinnaṁ janakāyamhi, 
desentaṁ amataṁ padaṁ; 
Sutvā dhammaṁ pamudito, 
adāsi ekasāṭakaṁ. 
Gharamekena vatthena, 
Gantvānetaṁ sa mabravi; 
‘Anumoda mahāpuññaṁ, 
Dinnaṁ buddhassa sāṭakaṁ’. 
Tadāhaṁ añjaliṁ katvā, 
anumodiṁ supīṇitā; 
‘Sudinno sāṭako sāmi, 
buddhaseṭṭhassa tādino’. 
Sukhito sajjito hutvā, 
saṁsaranto bhavābhave; 
Bārāṇasipure ramme, 
rājā āsi mahīpati. 
Tadā tassa mahesīhaṁ, 
itthigumbassa uttamā; 
Tassāti dayitā āsiṁ, 
pubbasnehena bhattuno. 
Piṇḍāya vicarante te, 
aṭṭha paccekanāyake; 
Disvā pamudito hutvā, 
datvā piṇḍaṁ mahārahaṁ. 
Puno nimantayitvāna, 
katvā ratanamaṇḍapaṁ; 
Kammārehi kataṁ pattaṁ, 
sovaṇṇaṁ vata tattakaṁ. 
Samānetvāna te sabbe, 
tesaṁ dānamadāsi so; 
Soṇṇāsane paviṭṭhānaṁ, 
pasanno sehi pāṇibhi. 
Tampi dānaṁ sahādāsiṁ, 
kāsirājenahaṁ tadā; 
Punāhaṁ bārāṇasiyaṁ, 
jātā kāsikagāmake. 
Kuṭumbikakule phīte, 
sukhito so sabhātuko; 
Jeṭṭhassa bhātuno jāyā, 
ahosiṁ supatibbatā. 
Paccekabuddhaṁ disvāna, 
kaniyassa mama bhattuno; 
Bhāgannaṁ tassa datvāna, 
āgate tamhi pāvadiṁ. 
Nābhinandittha so dānaṁ, 
tato tassa adāsahaṁ; 
Ukhā āniya taṁ annaṁ, 
puno tasseva so adā. 
Tadannaṁ chaḍḍayitvāna, 
duṭṭhā buddhassahaṁ tadā; 
Pattaṁ kalalapuṇṇaṁ taṁ, 
adāsiṁ tassa tādino. 
Dāne ca gahaṇe ceva, 
apace padusepi ca; 
Samacittamukhaṁ disvā, 
tadāhaṁ saṁvijiṁ bhusaṁ. 
Puno pattaṁ gahetvāna, 
sodhayitvā sugandhinā; 
Pasannacittā pūretvā, 
saghataṁ sakkaraṁ adaṁ. 
Yattha yatthūpapajjāmi, 
surūpā homi dānato; 
Buddhassa apakārena, 
duggandhā vadanena ca. 
Puna kassapavīrassa, 
nidhāyantamhi cetiye; 
Sovaṇṇaṁ iṭṭhakaṁ varaṁ, 
adāsiṁ muditā ahaṁ. 
Catujjātena gandhena, 
nicayitvā tamiṭṭhakaṁ; 
Muttā duggandhadosamhā, 
sabbaṅgasusamāgatā. 
Sattapātisahassāni, 
rataneheva sattahi; 
Kāretvā ghatapūrāni, 
vaṭṭīni ca sahassaso. 
Pakkhipitvā padīpetvā, 
ṭhapayiṁ sattapantiyo; 
Pūjanatthaṁ lokanāthassa, 
vippasannena cetasā. 
Tadāpi tamhi puññamhi, 
bhāginīhaṁ visesato; 
Puna kāsīsu sañjāto, 
sumitto iti vissuto. 
Tassāhaṁ bhariyā āsiṁ, 
sukhitā sajjitā piyā; 
Tadā paccekamunino, 
adāsiṁ ghanaveṭhanaṁ. 
Tassāpi bhāginī āsiṁ, 
moditvā dānamuttamaṁ; 
Punāpi kāsiraṭṭhamhi, 
jāto koliyajātiyā. 
Tadā koliyaputtānaṁ, 
satehi saha pañcahi; 
Pañcapaccekabuddhānaṁ, 
satāni samupaṭṭhahi. 
Temāsaṁ tappayitvāna, 
adāsi ca ticīvaraṁ; 
Jāyā tassa tadā āsiṁ, 
puññakammapathānugā. 
Tato cuto ahu rājā, 
nando nāma mahāyaso; 
Tassāpi mahesī āsiṁ, 
sabbakāmasamiddhinī. 
Tadā rājā bhavitvāna, 
brahmadatto mahīpati; 
Padumavatīputtānaṁ, 
paccekamuninaṁ tadā. 
Satāni pañcanūnāni, 
yāvajīvaṁ upaṭṭhahiṁ; 
Rājuyyāne nivāsetvā, 
nibbutāni ca pūjayiṁ. 
Cetiyāni ca kāretvā, 
pabbajitvā ubho mayaṁ; 
Bhāvetvā appamaññāyo, 
brahmalokaṁ agamhase. 
Tato cuto mahātitthe, 
sujāto pipphalāyano; 
Mātā sumanadevīti, 
kosigotto dijo pitā. 
Ahaṁ madde janapade, 
sākalāya puruttame; 
Kappilassa dijassāsiṁ, 
dhītā mātā sucīmati. 
Ghanakañcanabimbena, 
nimminitvāna maṁ pitā; 
Adā kassapadhīrassa, 
kāmehi vajjitassamaṁ. 
Kadāci so kāruṇiko, 
gantvā kammantapekkhako; 
Kākādikehi khajjante, 
pāṇe disvāna saṁviji. 
Gharevāhaṁ tile jāte, 
disvānātapatāpane; 
Kimī kākehi khajjante, 
saṁvegamalabhiṁ tadā. 
Tadā so pabbajī dhīro, 
ahaṁ tamanupabbajiṁ; 
Pañcavassāni nivasiṁ, 
paribbājavate ahaṁ. 
Yadā pabbajitā āsi, 
gotamī jinaposikā; 
Tadāhaṁ tamupagantvā, 
buddhena anusāsitā. 
Na cireneva kālena, 
arahattamapāpuṇiṁ; 
Aho kalyāṇamittattaṁ, 
kassapassa sirīmato. 
Suto buddhassa dāyādo, 
kassapo susamāhito; 
Pubbenivāsaṁ yo vedi, 
saggāpāyañca passati. 
Atho jātikkhayaṁ patto, 
abhiññāvosito muni; 
Etāhi tīhi vijjāhi, 
tevijjo hoti brāhmaṇo. 
Tatheva bhaddākāpilānī, 
tevijjā maccuhāyinī; 
Dhāreti antimaṁ dehaṁ, 
jitvā māraṁ savāhanaṁ. 
Disvā ādīnavaṁ loke, 
ubho pabbajitā mayaṁ; 
Tyamha khīṇāsavā dantā, 
sītibhūtāmha nibbutā. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ bhaddākāpilānī bhikkhunī imā gāthāyo abhāsitthāti. 
Bhaddākāpilānītheriyāpadānaṁ sattamaṁ. 

Therīapadāna 
Kuṇḍalakesīvagga 
Yasodharātherīapadāna 
Ekasmiṁ samaye ramme, 
iddhe rājagahe pure; 
Pabbhāramhi varekamhi, 
vasante naranāyake. 
Vasantiyā tamhi nagare, 
ramme bhikkhunupassaye; 
Yasodharābhikkhuniyā, 
evaṁ āsi vitakkitaṁ. 
“Suddhodano mahārājā, 
gotamī ca pajāpatī; 
Abhiññātā mahātherā, 
theriyo ca mahiddhikā. 
Santiṁ gatāva āsuṁ te, 
dīpaccīva nirāsavā; 
Lokanāthe dharanteva, 
ahampi ca sivaṁ padaṁ. 
Gamissāmī”ti cintetvā, 
passantī āyumattano; 
Passitvā āyusaṅkhāraṁ, 
tadaheva khayaṁ gataṁ. 
Pattacīvaramādāya, 
nikkhamitvā sakassamā; 
Purakkhatā bhikkhunībhi, 
satehi sahassehi sā. 
Mahiddhikā mahāpaññā, 
sambuddhaṁ upasaṅkami; 
Sambuddhaṁ abhivādetvā, 
satthuno cakkalakkhaṇe; 
Nisinnā ekamantamhi, 
idaṁ vacanamabravi. 
“Aṭṭhasattativassāhaṁ, 
pacchimo vattate vayo; 
Pabbhāramhi anuppattā, 
ārocemi mahāmuni. 
Paripakko vayo mayhaṁ, 
parittaṁ mama jīvitaṁ; 
Pahāya vo gamissāmi, 
kataṁ me saraṇamattano. 
Vayamhi pacchime kāle, 
maraṇaṁ uparuddhati; 
Ajjarattiṁ mahāvīra, 
pāpuṇissāmi nibbutiṁ. 
Natthi jāti jarā byādhi, 
maraṇañca mahāmune; 
Ajarāmaraṇaṁ puraṁ, 
gamissāmi asaṅkhataṁ. 
Yāvatā parisā nāma, 
samupāsanti satthuno; 
Aparādhamajānantī, 
khamantaṁ sammukhā mune. 
Saṁsaritvā ca saṁsāre, 
khalitañce mamaṁ tayi; 
Ārocemi mahāvīra, 
aparādhaṁ khamassu me”. 
Sutvāna vacanaṁ tassā, 
munindo idamabravi; 
“Kimuttaraṁ te vakkhāmi, 
nibbānāya vajantiyā. 
Iddhiñcāpi nidassehi, 
mama sāsanakārike; 
Parisānañca sabbāsaṁ, 
kaṅkhaṁ chindassu yāvatā”. 
Sutvā taṁ munino vācaṁ, 
bhikkhunī sā yasodharā; 
Vanditvā munirājaṁ taṁ, 
idaṁ vacanamabravi. 
“Yasodharā ahaṁ vīra, 
agāre te pajāpati; 
Sākiyamhi kule jātā, 
itthiaṅge patiṭṭhitā. 
Thīnaṁ satasahassānaṁ, 
navutīnaṁ chaduttari; 
Agāre te ahaṁ vīra, 
pāmokkhā sabbā issarā. 
Rūpācāraguṇūpetā, 
yobbanaṭṭhā piyaṁvadā; 
Sabbā maṁ apacāyanti, 
devatā viya mānusā. 
Kaññāsatasahassapamukhā, 
Sakyaputtanivesane; 
Samānasukhadukkhatā, 
Devatā viya nandane. 
Kāmadhātumatikkamma, 
saṇṭhitā rūpadhātuyā; 
Rūpena sadisā natthi, 
ṭhapetvā lokanāyakaṁ”. 
Sambuddhaṁ abhivādetvā, 
iddhiṁ dassesi satthuno; 
Nekā nānāvidhākārā, 
mahāiddhīpi dassayī. 
Cakkavāḷasamaṁ kāyaṁ, 
sīsaṁ uttarato kuru; 
Ubho pakkhā duve dīpā, 
jambudīpaṁ sarīrato. 
Dakkhiṇañca saraṁ piñchaṁ, 
nānāsākhā tu pattakā; 
Candañca sūriyañcakkhi, 
merupabbatato sikhaṁ. 
Cakkavāḷagiriṁ tuṇḍaṁ, 
jamburukkhaṁ samūlakaṁ; 
Bījamānā upāgantvā, 
vandantī lokanāyakaṁ. 
Hatthivaṇṇaṁ tathevassaṁ, 
pabbataṁ jaladhiṁ tathā; 
Candimaṁ sūriyaṁ meruṁ, 
sakkavaṇṇañca dassayi. 
“Yasodharā ahaṁ vīra, 
pāde vandāmi cakkhuma”; 
Sahassalokadhātūnaṁ, 
phullapadmena chādayi. 
Brahmavaṇṇañca māpetvā, 
dhammaṁ desesi suññataṁ; 
“Yasodharā ahaṁ vīra, 
pāde vandāmi cakkhuma. 
Iddhīsu ca vasī homi, 
dibbāya sotadhātuyā; 
Cetopariyañāṇassa, 
vasī homi mahāmuni. 
Pubbenivāsaṁ jānāmi, 
dibbacakkhu visodhitaṁ; 
Sabbāsavā parikkhīṇā, 
natthi dāni punabbhavo. 
Atthadhammaniruttīsu, 
paṭibhāne tatheva ca; 
Ñāṇaṁ mayhaṁ mahāvīra, 
uppannaṁ tava santike. 
Pubbānaṁ lokanāthānaṁ, 
saṅgamaṁ te nidassitaṁ; 
Adhikāraṁ bahuṁ mayhaṁ, 
tuyhatthāya mahāmune. 
Yaṁ mayhaṁ pūritaṁ kammaṁ, 
Kusalaṁ sarase mune; 
Tuyhatthāya mahāvīra, 
Puññaṁ upacitaṁ mayā. 
Abhabbaṭṭhāne vajjetvā, 
vārayitvā anācaraṁ; 
Tuyhatthāya mahāvīra, 
sañcattaṁ jīvitaṁ mayā. 
Nekakoṭisahassāni, 
bhariyatthāyadāsi maṁ; 
Na tattha vimanā homi, 
tuyhatthāya mahāmuni. 
Nekakoṭisahassāni, 
upakārāyadāsi maṁ; 
Na tattha vimanā homi, 
tuyhatthāya mahāmuni. 
Nekakoṭisahassāni, 
bhojanatthāyadāsi maṁ; 
Na tattha vimanā homi, 
tuyhatthāya mahāmuni. 
Nekakoṭisahassāni, 
jīvitāni pariccajiṁ; 
Bhayamokkhaṁ karissanti, 
dadāmi mama jīvitaṁ. 
Aṅgagate alaṅkāre, 
vatthe nānāvidhe bahū; 
Itthimaṇḍe na gūhāmi, 
tuyhatthāya mahāmuni. 
Dhanadhaññapariccāgaṁ, 
gāmāni nigamāni ca; 
Khettaṁ puttā ca dhītā ca, 
pariccattā mahāmuni. 
Hatthī assā gavā cāpi, 
dāsiyo paricārikā; 
Tuyhatthāya mahāvīra, 
pariccattā asaṅkhiyā. 
Yaṁ mayhaṁ paṭimantesi, 
dānaṁ dassāmi yācake; 
Vimanaṁ me na passāmi, 
dadato dānamuttamaṁ. 
Nānāvidhaṁ bahuṁ dukkhaṁ, 
saṁsāre ca bahubbidhe; 
Tuyhatthāya mahāvīra, 
anubhuttaṁ asaṅkhiyaṁ. 
Sukhappattānumodāmi, 
na ca dukkhesu dummanā; 
Sabbattha tulitā homi, 
tuyhatthāya mahāmuni. 
Anumaggena sambuddho, 
yaṁ dhammaṁ abhinīhari; 
Anubhotvā sukhaṁ dukkhaṁ, 
patto bodhiṁ mahāmuni. 
Brahmadevañca sambuddhaṁ, 
gotamaṁ lokanāyakaṁ; 
Aññesaṁ lokanāthānaṁ, 
saṅgamaṁ te bahuṁ mayā. 
Adhikāraṁ bahuṁ mayhaṁ, 
tuyhatthāya mahāmuni; 
Gavesato buddhadhamme, 
ahaṁ te paricārikā. 
Kappe ca satasahasse, 
caturo ca asaṅkhiye; 
Dīpaṅkaro mahāvīro, 
uppajji lokanāyako. 
Paccantadesavisaye, 
nimantetvā tathāgataṁ; 
Tassa āgamanaṁ maggaṁ, 
sodhenti tuṭṭhamānasā. 
Tena kālena so āsi, 
sumedho nāma brāhmaṇo; 
Maggañca paṭiyādesi, 
āyato sabbadassino. 
Tena kālenahaṁ āsiṁ, 
kaññā brāhmaṇasambhavā; 
Sumittā nāma nāmena, 
upagacchiṁ samāgamaṁ. 
Aṭṭha uppalahatthāni, 
pūjanatthāya satthuno; 
Ādāya janasammajjhe, 
addasaṁ isimuggataṁ. 
Cirānugataṁ dayitaṁ, 
atikkantaṁ manoharaṁ; 
Disvā tadā amaññissaṁ, 
saphalaṁ jīvitaṁ mama. 
Parakkamaṁ taṁ saphalaṁ, 
addasaṁ isino tadā; 
Pubbakammena sambuddhe, 
cittañcāpi pasīdi me. 
Bhiyyo cittaṁ pasādesiṁ, 
ise uggatamānase; 
Deyyaṁ aññaṁ na passāmi, 
demi pupphāni te isi. 
‘Pañca hatthā tava hontu, 
tayo hontu mamaṁ ise; 
Tena saddhiṁ samā hontu, 
bodhatthāya tavaṁ ise’. 
Catutthaṁ bhāṇavāraṁ. 
Isi gahetvā pupphāni, 
āgacchantaṁ mahāyasaṁ; 
Pūjesi janasammajjhe, 
bodhatthāya mahāisi. 
Passitvā janasammajjhe, 
dīpaṅkaro mahāmuni; 
Viyākāsi mahāvīro, 
isi muggatamānasaṁ. 
Aparimeyye ito kappe, 
dīpaṅkaro mahāmuni; 
Mama kammaṁ viyākāsi, 
ujubhāvaṁ mahāmuni. 
‘Samacittā samakammā, 
samakārī bhavissati; 
Piyā hessati kammena, 
tuyhatthāya mahāisi. 
Sudassanā supiyā ca, 
manāpā piyavādinī; 
Tassa dhammesu dāyādā, 
viharissati iddhikā. 
Yathāpi bhaṇḍasāmuggaṁ, 
anurakkhati sāmino; 
Evaṁ kusaladhammānaṁ, 
anurakkhissate ayaṁ. 
Tassa te anukampantī, 
pūrayissati pāramī; 
Sīhova pañjaraṁ bhetvā, 
pāpuṇissati bodhiyaṁ’. 
Aparimeyye ito kappe, 
yaṁ maṁ buddho viyākarī; 
Taṁ vācaṁ anumodentī, 
evaṅkārī bhaviṁ ahaṁ. 
Tassa kammassa sukatassa, 
tattha cittaṁ pasādayiṁ; 
Devamanussakaṁ yoniṁ, 
anubhotvā asaṅkhiyaṁ. 
Sukhadukkhenubhotvāhaṁ, 
devesu mānusesu ca; 
Pacchime bhave sampatte, 
ajāyiṁ sākiye kule. 
Rūpavatī bhogavatī, 
yasasīlavatī tato; 
Sabbaṅgasampadā homi, 
kulesu abhisakkatā. 
Lābhaṁ silokaṁ sakkāraṁ, 
lokadhammasamāgamaṁ; 
Cittañca dukkhitaṁ natthi, 
vasāmi akutobhayā. 
Vuttañhetaṁ bhagavatā, 
‘rañño antepure tadā; 
Khattiyānaṁ pure vīra, 
upakārañca niddisi. 
Upakārā ca yā nārī, 
yā ca nārī sukhe dukhe; 
Atthakkhāyī ca yā nārī, 
yā ca nārīnukampikā’. 
Pañcakoṭisatā buddhā, 
navakoṭisatāni ca; 
Etesaṁ devadevānaṁ, 
mahādānaṁ pavattayiṁ. 
Adhikāraṁ mahā mayhaṁ, 
dhammarāja suṇohi me; 
Ekādasakoṭisatā, 
buddhā dvādasa koṭiyo. 
Etesaṁ devadevānaṁ, 
mahādānaṁ pavattayiṁ; 
Adhikāraṁ mahā mayhaṁ, 
dhammarāja suṇohi me. 
Vīsakoṭisatā buddhā, 
tiṁsakoṭisatāni ca; 
Etesaṁ devadevānaṁ, 
mahādānaṁ pavattayiṁ. 
Adhikāraṁ mahā mayhaṁ, 
dhammarāja suṇohi me; 
Cattālīsakoṭisatā, 
paññāsa koṭisatāni ca. 
Etesaṁ devadevānaṁ, 
mahādānaṁ pavattayiṁ; 
Adhikāraṁ mahā mayhaṁ, 
dhammarāja suṇohi me. 
Saṭṭhikoṭisatā buddhā, 
sattatikoṭisatāni ca; 
Etesaṁ devadevānaṁ, 
mahādānaṁ pavattayiṁ. 
Adhikāraṁ mahā mayhaṁ, 
dhammarāja suṇohi me; 
Asītikoṭisatā buddhā, 
navutikoṭisatāni ca. 
Etesaṁ devadevānaṁ, 
mahādānaṁ pavattayiṁ; 
Adhikāraṁ mahā mayhaṁ, 
dhammarāja suṇohi me. 
Koṭisatasahassāni, 
honti lokagganāyakā; 
Etesaṁ devadevānaṁ, 
mahādānaṁ pavattayiṁ. 
Adhikāraṁ mahā mayhaṁ, 
dhammarāja suṇohi me; 
Navakoṭisahassāni, 
apare lokanāyakā. 
Etesaṁ devadevānaṁ, 
mahādānaṁ pavattayiṁ; 
Adhikāraṁ mahā mayhaṁ, 
dhammarāja suṇohi me. 
Koṭisatasahassāni, 
pañcāsītimahesinaṁ; 
Pañcāsītikoṭisatā, 
sattatiṁsā ca koṭiyo. 
Etesaṁ devadevānaṁ, 
mahādānaṁ pavattayiṁ; 
Adhikāraṁ mahā mayhaṁ, 
dhammarāja suṇohi me. 
Paccekabuddhā vītarāgā, 
aṭṭhaṭṭhamakakoṭiyo; 
Adhikāraṁ mahā mayhaṁ, 
dhammarāja suṇohi me. 
Khīṇāsavā vītamalā, 
asaṅkhiyā buddhasāvakā; 
Adhikāraṁ mahā mayhaṁ, 
dhammarāja suṇohi me. 
Evaṁ dhamme suciṇṇānaṁ, 
sadā dhammassa cārinaṁ; 
Dhammacārī sukhaṁ seti, 
asmiṁ loke paramhi ca. 
Dhammaṁ care sucaritaṁ, 
na naṁ duccaritaṁ care; 
Dhammacārī sukhaṁ seti, 
asmiṁ loke paramhi ca. 
Nibbinditvāna saṁsāre, 
pabbajiṁ anagāriyaṁ; 
Sahassaparivārena, 
pabbajitvā akiñcanā. 
Agāraṁ vijahitvāna, 
pabbajiṁ anagāriyaṁ; 
Aḍḍhamāse asampatte, 
catusaccamapāpuṇiṁ. 
Cīvaraṁ piṇḍapātañca, 
paccayaṁ sayanāsanaṁ; 
Upanenti bahū janā, 
sāgareyeva ūmiyo. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ. 
Evaṁ bahuvidhaṁ dukkhaṁ, 
sampattī ca bahubbidhā; 
Visuddhibhāvaṁ sampattā, 
labhāmi sabbasampadā. 
Yā dadāti sakattānaṁ, 
puññatthāya mahesino; 
Sahāyasampadā honti, 
nibbānapadamasaṅkhataṁ. 
Parikkhīṇaṁ atītañca, 
Paccuppannaṁ anāgataṁ; 
Sabbakammaṁ mamaṁ khīṇaṁ, 
Pāde vandāmi cakkhuma”. 
Itthaṁ sudaṁ yasodharā bhikkhunī bhagavato sammukhā imā gāthāyo abhāsitthāti. 
Yasodharātheriyāpadānaṁ aṭṭhamaṁ. 

Therīapadāna 
Kuṇḍalakesīvagga 
9 Yasodharāpamukhadasabhikkhunīsahassaapadāna 
“Kappe ca satasahasse, 
caturo ca asaṅkhiye; 
Dīpaṅkaro nāma jino, 
uppajji lokanāyako. 
Dīpaṅkaro mahāvīro, 
viyākāsi vināyako; 
Sumedhañca sumittañca, 
samānasukhadukkhataṁ. 
Sadevakañca passanto, 
vicaranto sadevakaṁ; 
Tesaṁ pakittane amhe, 
upagamma samāgamaṁ. 
Amhaṁ sabbapati hohi, 
anāgatasamāgame; 
Sabbāva tuyhaṁ bhariyā, 
manāpā piyavādikā. 
Dānaṁ sīlamayaṁ sabbaṁ, 
bhāvanā ca subhāvitā; 
Dīgharattañca no sabbaṁ, 
pariccattaṁ mahāmune. 
Gandhaṁ vilepanaṁ mālaṁ, 
dīpañca ratanāmayaṁ; 
Yaṁ kiñci patthitaṁ sabbaṁ, 
pariccattaṁ mahāmuni. 
Aññaṁ vāpi kataṁ kammaṁ, 
paribhogañca mānusaṁ; 
Dīgharattañhi no sabbaṁ, 
pariccattaṁ mahāmuni. 
Anekajātisaṁsāraṁ, 
bahuṁ puññampi no kataṁ; 
Issaramanubhotvāna, 
saṁsaritvā bhavābhave. 
Pacchime bhave sampatte, 
sakyaputtanivesane; 
Nānākulūpapannāyo, 
accharā kāmavaṇṇinī. 
Lābhaggena yasaṁ pattā, 
pūjitā sabbasakkatā; 
Lābhiyo annapānānaṁ, 
sadā sammānitā mayaṁ. 
Agāraṁ pajahitvāna, 
pabbajimhanagāriyaṁ; 
Aḍḍhamāse asampatte, 
sabbā pattāmha nibbutiṁ. 
Lābhiyo annapānānaṁ, 
vatthasenāsanāni ca; 
Upenti paccayā sabbe, 
sadā sakkatapūjitā. 
Kilesā jhāpitā amhaṁ, 
…pe… 
viharāma anāsavā. 
Svāgataṁ vata no āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ yasodharāpamukhāni dasabhikkhunīsahassāni bhagavato sammukhā imā gāthāyo abhāsitthāti. 
Yasodharāpamukhadasabhikkhunīsahassāpadānaṁ navamaṁ. 

Therīapadāna 
Sumedhāvagga 
2 Mekhalādāyikātherīapadāna 
“Siddhatthassa bhagavato, 
thūpakārāpikā ahuṁ; 
Mekhalikā mayā dinnā, 
navakammāya satthuno. 
Niṭṭhite ca mahāthūpe, 
mekhalaṁ punadāsahaṁ; 
Lokanāthassa munino, 
pasannā sehi pāṇibhi. 
Catunnavutito kappe, 
yaṁ mekhalamadaṁ tadā; 
Duggatiṁ nābhijānāmi, 
thūpakārassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ mekhalādāyikā bhikkhunī imā gāthāyo abhāsitthāti. 
Mekhalādāyikātheriyāpadānaṁ dutiyaṁ. 

Therīapadāna 
Kuṇḍalakesīvagga 
10 Yasodharāpamukhaaṭṭhārasabhikkhunīsahassaapadāna 
Aṭṭhārasasahassāni, 
bhikkhunī sakyasambhavā; 
Yasodharāpamukhāni, 
sambuddhaṁ upasaṅkamuṁ. 
Aṭṭhārasasahassāni, 
sabbā honti mahiddhikā; 
Vandantī munino pāde, 
ārocenti yathābalaṁ. 
“Jāti khīṇā jarā byādhi, 
maraṇañca mahāmuni; 
Anāsavaṁ padaṁ santaṁ, 
amataṁ yāma nāyaka. 
Khalitañce pure atthi, 
sabbāsampi mahāmuni; 
Aparādhamajānantī, 
khama amhaṁ vināyaka”. 
“Iddhiñcāpi nidassetha, 
mama sāsanakārikā; 
Parisānañca sabbāsaṁ, 
kaṅkhaṁ chindatha yāvatā”. 
“Yasodharā mahāvīra, 
manāpā piyadassanā; 
Sabbā tuyhaṁ mahāvīra, 
agārasmiṁ pajāpati. 
Thīnaṁ satasahassānaṁ, 
navutīnaṁ chaduttari; 
Agāre te mayaṁ vīra, 
pāmokkhā sabbā issarā. 
Rūpācāraguṇūpetā, 
yobbanaṭṭhā piyaṁvadā; 
Sabbā no apacāyanti, 
devatā viya mānusā. 
Aṭṭhārasasahassāni, 
sabbā sākiyasambhavā; 
Yasodharāsahassāni, 
pāmokkhā issarā tadā. 
Kāmadhātumatikkamma, 
saṇṭhitā rūpadhātuyā; 
Rūpena sadisā natthi, 
sahassānaṁ mahāmuni”. 
Sambuddhaṁ abhivādetvā, 
iddhiṁ dassaṁsu satthuno; 
Nekā nānāvidhākārā, 
mahāiddhīpi dassayuṁ. 
Cakkavāḷasamaṁ kāyaṁ, 
sīsaṁ uttarato kuru; 
Ubho pakkhā duve dīpā, 
jambudīpaṁ sarīrato. 
Dakkhiṇañca saraṁ piñchaṁ, 
nānāsākhā tu pattakā; 
Candañca sūriyañcakkhi, 
merupabbatato sikhaṁ. 
Cakkavāḷagiriṁ tuṇḍaṁ, 
jamburukkhaṁ samūlakaṁ; 
Bījamānā upāgantvā, 
vandantī lokanāyakaṁ. 
Hatthivaṇṇaṁ tathevassaṁ, 
pabbataṁ jaladhiṁ tathā; 
Candañca sūriyaṁ meruṁ, 
sakkavaṇṇañca dassayuṁ. 
“Yasodharā mayaṁ vīra, 
pāde vandāma cakkhuma; 
Tava cirapabhāvena, 
nipphannā naranāyaka. 
Iddhīsu ca vasī homa, 
dibbāya sotadhātuyā; 
Cetopariyañāṇassa, 
vasī homa mahāmune. 
Pubbenivāsaṁ jānāmi, 
dibbacakkhu visodhitaṁ; 
Sabbāsavā parikkhīṇā, 
natthi dāni punabbhavo. 
Atthadhammaniruttīsu, 
paṭibhāne tatheva ca; 
Ñāṇaṁ amhaṁ mahāvīra, 
uppannaṁ tava santike. 
Pubbānaṁ lokanāthānaṁ, 
saṅgamaṁ no nidassitaṁ; 
Adhikārā bahū amhaṁ, 
tuyhatthāya mahāmune. 
Yaṁ amhaṁ pūritaṁ kammaṁ, 
kusalaṁ sarase mune; 
Tuyhatthāya mahāvīra, 
puññānupacitāni no. 
Abhabbaṭṭhāne vajjetvā, 
vārayimha anācaraṁ; 
Tuyhatthāya mahāvīra, 
cattāni jīvitāni no. 
Nekakoṭisahassāni, 
bhariyatthāyadāsi no; 
Na tattha vimanā homa, 
tuyhatthāya mahāmune. 
Nekakoṭisahassāni, 
upakārāyadāsi no; 
Na tattha vimanā homa, 
tuyhatthāya mahāmune. 
Nekakoṭisahassāni, 
bhojanatthāyadāsi no; 
Na tattha vimanā homa, 
tuyhatthāya mahāmune. 
Nekakoṭisahassāni, 
jīvitāni cajimhase; 
Bhayamokkhaṁ karissāma, 
jīvitāni cajimhase. 
Aṅgagate alaṅkāre, 
vatthe nānāvidhe bahū; 
Itthibhaṇḍe na gūhāma, 
tuyhatthāya mahāmune. 
Dhanadhaññapariccāgaṁ, 
gāmāni nigamāni ca; 
Khettaṁ puttā ca dhītā ca, 
pariccattā mahāmune. 
Hatthī assā gavā cāpi, 
dāsiyo paricārikā; 
Tuyhatthāya mahāvīra, 
pariccattaṁ asaṅkhiyaṁ. 
Yaṁ amhe paṭimantesi, 
‘dānaṁ dassāma yācake’; 
Vimanaṁ no na passāma, 
dadato dānamuttamaṁ. 
Nānāvidhaṁ bahuṁ dukkhaṁ, 
saṁsāre ca bahubbidhe; 
Tuyhatthāya mahāvīra, 
anubhuttaṁ asaṅkhiyaṁ. 
Sukhappattānumodāma, 
na ca dukkhesu dummanā; 
Sabbattha tulitā homa, 
tuyhatthāya mahāmune. 
Anumaggena sambuddho, 
yaṁ dhammaṁ abhinīhari; 
Anubhotvā sukhaṁ dukkhaṁ, 
patto bodhiṁ mahāmune. 
Brahmadevañca sambuddhaṁ, 
gotamaṁ lokanāyakaṁ; 
Aññesaṁ lokanāthānaṁ, 
saṅgamaṁ tehi no bahū. 
Adhikāraṁ bahuṁ amhe, 
tuyhatthāya mahāmune; 
Gavesato buddhadhamme, 
mayaṁ te paricārikā. 
Kappe ca satasahasse, 
caturo ca asaṅkhiye; 
Dīpaṅkaro mahāvīro, 
uppajji lokanāyako. 
Paccantadesavisaye, 
nimantetvā tathāgataṁ; 
Tassa āgamanaṁ maggaṁ, 
sodhenti tuṭṭhamānasā. 
Tena kālena so āsi, 
sumedho nāma brāhmaṇo; 
Maggañca paṭiyādesi, 
āyato sabbadassino. 
Tena kālena ahumha, 
sabbā brāhmaṇasambhavā; 
Thalūdajāni pupphāni, 
āharimha samāgamaṁ. 
Tasmiṁ so samaye buddho, 
dīpaṅkaro mahāyaso; 
Viyākāsi mahāvīro, 
isimuggatamānasaṁ. 
Calatī ravatī puthavī, 
saṅkampati sadevake; 
Tassa kammaṁ pakittente, 
isimuggatamānasaṁ. 
Devakaññā manussā ca, 
mayañcāpi sadevakā; 
Nānāpūjanīyaṁ bhaṇḍaṁ, 
pūjayitvāna patthayuṁ. 
Tesaṁ buddho viyākāsi, 
jotidīpa sanāmako; 
‘Ajja ye patthitā atthi, 
te bhavissanti sammukhā’. 
Aparimeyye ito kappe, 
yaṁ no buddho viyākari; 
Taṁ vācamanumodentā, 
evaṅkārī ahumha no. 
Tassa kammassa sukatassa, 
tassa cittaṁ pasādayuṁ; 
Devamānusikaṁ yoniṁ, 
anubhotvā asaṅkhiyaṁ. 
Sukhadukkhenubhotvāna, 
devesu mānusesu ca; 
Pacchime bhave sampatte, 
jātāmha sākiye kule. 
Rūpavatī bhogavatī, 
yasasīlavatī tato; 
Sabbaṅgasampadā homa, 
kulesu abhisakkatā. 
Lābhaṁ silokaṁ sakkāraṁ, 
lokadhammasamāgamaṁ; 
Cittañca dukkhitaṁ natthi, 
vasāma akutobhayā. 
Vuttañhetaṁ bhagavatā, 
‘rañño antepure tadā; 
Khattiyānaṁ pure vīra, 
upakārañca niddisi. 
Upakārā ca yā nārī, 
yā ca nārī sukhe dukhe; 
Atthakkhāyī ca yā nārī, 
yā ca nārīnukampikā. 
Dhammaṁ care sucaritaṁ, 
na naṁ duccaritaṁ care; 
Dhammacārī sukhaṁ seti, 
asmiṁ loke paramhi ca’. 
Agāraṁ vijahitvāna, 
pabbajimhanagāriyaṁ; 
Aḍḍhamāse asampatte, 
catusaccaṁ phusimha no. 
Cīvaraṁ piṇḍapātañca, 
paccayaṁ sayanāsanaṁ; 
Upanenti bahū amhe, 
sāgarasseva ūmiyo. 
Kilesā jhāpitā amhaṁ, 
bhavā sabbe samūhatā; 
Nāgīva bandhanaṁ chetvā, 
viharāma anāsavā. 
Svāgataṁ vata no āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ. 
Evaṁ bahuvidhaṁ dukkhaṁ, 
sampattī ca bahubbidhā; 
Visuddhabhāvaṁ sampattā, 
labhāma sabbasampadā. 
Yā dadanti sakattānaṁ, 
puññatthāya mahesino; 
Sahāyasampadā honti, 
nibbānapadamasaṅkhataṁ. 
Parikkhīṇaṁ atītañca, 
paccuppannaṁ anāgataṁ; 
Sabbakammampi no khīṇaṁ, 
pāde vandāma cakkhuma”. 
“Nibbānāya vadantīnaṁ, 
Kiṁ vo vakkhāma uttari; 
Santasaṅkhatadosañhi, 
Pappotha amataṁ padaṁ”. 
Itthaṁ sudaṁ yasodharāpamukhāni aṭṭhārasabhikkhunīsahassāni bhagavato sammukhā imā gāthāyo abhāsitthāti. 
Yasodharāpamukhaaṭṭhārasabhikkhunīsahassāpadānaṁ dasamaṁ. 
Kuṇḍalakesīvaggo tatiyo. 
Tassuddānaṁ 
Kuṇḍalā gotamī ceva, 
dhammadinnā ca sakulā; 
Varanandā ca soṇā ca, 
kāpilānī yasodharā. 
Dasasahassabhikkhunī, 
aṭṭhārasasahassakā; 
Gāthāsatāni cattāri, 
cha ca sattatimeva ca. 

Therīapadāna 
Khattiyāvagga 
1 Yasavatīpamukhaaṭṭhārasabhikkhunīsahassaapadāna 
“Bhavā sabbe parikkhīṇā, 
bhavā santi vimocitā; 
Sabbāsavā ca no natthi, 
ārocema mahāmune. 
Purimaṁ kusalaṁ kammaṁ, 
yaṁ kiñci sādhupatthitaṁ; 
Paribhogamayaṁ dinnaṁ, 
tuyhatthāya mahāmune. 
Buddhapaccekabuddhānaṁ, 
sāvakānañca patthitaṁ; 
Paribhogamayaṁ dinnaṁ, 
tuyhatthāya mahāmune. 
Uccanīcamayaṁ kammaṁ, 
bhikkhūnaṁ sādhupatthitaṁ; 
Uccākulaparikammaṁ, 
katametaṁ mahāmune. 
Teneva sukkamūlena, 
coditā kammasampadā; 
Mānusikamatikkantā, 
jāyiṁsu khattiye kule. 
Uppatte ca kate kamme, 
jātiyā vāpi ekato; 
Pacchime ekato jātā, 
khattiyā kulasambhavā. 
Rūpavatī bhogavatī, 
lābhasakkārapūjitā; 
Antepure mahāvīra, 
devānaṁ viya nandane. 
Nibbinditvā agāramhā, 
pabbajimhanagāriyaṁ; 
Katipāhaṁ upādāya, 
sabbā pattāmha nibbutiṁ. 
Cīvaraṁ piṇḍapātañca, 
paccayaṁ sayanāsanaṁ; 
Upanenti bahū amhe, 
sadā sakkatapūjitā. 
Kilesā jhāpitā amhaṁ, 
bhavā sabbe samūhatā; 
Nāgīva bandhanaṁ chetvā, 
viharāma anāsavā. 
Svāgataṁ vata no āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti. 
Yasavatīpamukhaaṭṭhārasabhikkhunīsahassāpadānaṁ paṭhamaṁ. 

Therīapadāna 
Khattiyāvagga 
2 Caturāsītibhikkhunīsahassaapadāna 
“Cullāsītisahassāni, 
brāhmaññakulasambhavā; 
Sukhumālahatthapādā, 
pure tuyhaṁ mahāmune. 
Vessasuddakule jātā, 
devā nāgā ca kinnarā; 
Cātuddīpā bahū kaññā, 
pure tuyhaṁ mahāmune. 
Kāci pabbajitā atthi, 
sabbadassāvino bahū; 
Devā ca kinnarā nāgā, 
phusissanti anāgate. 
Anubhotvā yasaṁ sabbaṁ, 
Patvāna sabbasampadā; 
Tumhaṁ pasādaṁ paṭiladdhā, 
Bujjhissanti anāgate. 
Amhe brāhmaṇadhītā tu, 
brāhmaññakulasambhavā; 
Pekkhato no mahāvīra, 
pāde vandāma cakkhuma. 
Upāhatā bhavā sabbe, 
mūlataṇhā samūhatā; 
Samucchinnā anusayā, 
puññasaṅkhāradālitā. 
Samādhigocarā sabbā, 
samāpattivasī katā; 
Jhānena dhammaratiyā, 
viharissāma no sadā. 
Bhavanetti avijjā ca, 
saṅkhārāpi ca khepitā; 
Sududdasaṁ padaṁ gantvā, 
anujānātha nāyaka”. 
“Upakārā mamaṁ tumhe, 
dīgharattaṁ katāvino; 
Catunnaṁ saṁsayaṁ chetvā, 
sabbā gacchantu nibbutiṁ”. 
Vanditvā munino pāde, 
katvā iddhivikubbanaṁ; 
Kāci dassenti ālokaṁ, 
andhakāramathāparā. 
Dassenti candasūriye, 
sāgarañca samacchakaṁ; 
Sineruṁ paribhaṇḍañca, 
dassenti pārichattakaṁ. 
Tāvatiṁsañca bhavanaṁ, 
yāmaṁ dassenti iddhiyā; 
Tusitaṁ nimmite deve, 
vasavattī mahissare. 
Brahmāno kāci dassenti, 
caṅkamañca mahārahaṁ; 
Brahmavaṇṇañca māpetvā, 
dhammaṁ desenti suññataṁ. 
Nānāvikubbanaṁ katvā, 
iddhiṁ dassiya satthuno; 
Dassayiṁsu balaṁ sabbā, 
pāde vandiṁsu satthuno. 
“Iddhīsu ca vasī homa, 
dibbāya sotadhātuyā; 
Cetopariyañāṇassa, 
vasī homa mahāmune. 
Pubbenivāsaṁ jānāma, 
dibbacakkhu visodhitaṁ; 
Sabbāsavā parikkhīṇā, 
natthi dāni punabbhavo. 
Atthadhammaniruttīsu, 
paṭibhāne tatheva ca; 
Ñāṇaṁ amhaṁ mahāvīra, 
uppannaṁ tava santike. 
Pubbānaṁ lokanāthānaṁ, 
saṅgamaṁ no nidassitaṁ; 
Adhikāraṁ bahuṁ amhaṁ, 
tuyhatthāya mahāmune. 
Yaṁ amhehi kataṁ kammaṁ, 
kusalaṁ sara taṁ mune; 
Tuyhatthāya mahāvīra, 
puññānupacitāni no. 
Satasahassito kappe, 
padumuttaro mahāmuni; 
Puraṁ haṁsavatī nāma, 
sambuddhassa kulāsayaṁ. 
Dvārena haṁsavatiyā, 
gaṅgā sandati sabbadā; 
Ubbāḷhā nadiyā bhikkhū, 
gamanaṁ na labhanti te. 
Divasaṁ dve tayo ceva, 
sattāhaṁ māsikaṁ tato; 
Catumāsampi sampuṇṇaṁ, 
gamanaṁ na labhanti te. 
Tadā ahu sattasāro, 
jaṭilo nāma raṭṭhiko; 
Oruddhe bhikkhavo disvā, 
setuṁ gaṅgāya kārayi. 
Tadā satasahassehi, 
setuṁ gaṅgāya kārayi; 
Saṅghassa orime tīre, 
vihārañca akārayi. 
Itthiyo purisā ceva, 
uccanīcakulāni ca; 
Tassa setuṁ vihārañca, 
samabhāgaṁ akaṁsu te. 
Amhe aññe ca mānujā, 
vippasannena cetasā; 
Tassa dhammesu dāyādā, 
nagare janapadesu ca. 
Itthī pumā kumārā ca, 
bahū ceva kumārikā; 
Setuno ca vihārassa, 
vālukā ākiriṁsu te. 
Vīthiṁ sammajjanaṁ katvā, 
kadalīpuṇṇaghaṭe dhaje; 
Dhūpaṁ cuṇṇañca mālañca, 
kāraṁ katvāna satthuno. 
Setuvihāre kāretvā, 
nimantetvā vināyakaṁ; 
Mahādānaṁ daditvāna, 
sambodhiṁ abhipatthayiṁ. 
Padumuttaro mahāvīro, 
tārako sabbapāṇinaṁ; 
Anumodanīyaṅkāsi, 
jaṭilassa mahāmuni. 
‘Satasahassātikkante, 
kappo hessati bhaddako; 
Bhavābhavenubhotvāna, 
pāpuṇissati bodhiyaṁ. 
Kāci hatthaparikammaṁ, 
katāvī naranāriyo; 
Anāgatamhi addhāne, 
sabbā hessanti sammukhā’. 
Tena kammavipākena, 
cetanāpaṇidhīhi ca; 
Uppannā devabhavanaṁ, 
tuyhaṁ tā paricārikā. 
Dibbasukhaṁ asaṅkhiyaṁ, 
mānusañca asaṅkhiyaṁ; 
Tuyhaṁ te paricārema, 
saṁsarimha bhavābhave. 
Satasahassito kappe, 
sukataṁ kammasampadaṁ; 
Sukhumālī manussānaṁ, 
atho devapure vare. 
Rūpabhogayase ceva, 
atho kittiñca sakkataṁ; 
Labhāma satataṁ sabbaṁ, 
sukataṁ kammasampadaṁ. 
Pacchime bhave sampatte, 
jātāmha brāhmaṇe kule; 
Sukhumālahatthapādā, 
sakyaputtanivesane. 
Sabbakālampi pathaviṁ, 
na passāma na laṅkataṁ; 
Cikkhallabhūmimasuciṁ, 
na passāma mahāmune. 
Agāraṁ vasante amhe, 
sakkāraṁ sabbakālikaṁ; 
Upanenti sadā sabbaṁ, 
pubbakammaphalena no. 
Agāraṁ pajahitvāna, 
pabbajitvānagāriyaṁ; 
Saṁsārapathanitthiṇṇā, 
vītarāgā bhavāmase. 
Cīvaraṁ piṇḍapātañca, 
paccayaṁ sayanāsanaṁ; 
Upanenti sadā amhe, 
sahassāni tato tato. 
Kilesā jhāpitā amhaṁ, 
…pe… 
viharāma anāsavā. 
Svāgataṁ vata no āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ caturāsītibrāhmaṇakaññābhikkhunīsahassāni bhagavato sammukhā imā gāthāyo abhāsitthāti. 
Caturāsītibhikkhunīsahassāpadānaṁ dutiyaṁ. 

Therīapadāna 
Khattiyāvagga 
Uppaladāyikātherīapadāna 
“Nagare aruṇavatiyā, 
aruṇo nāma khattiyo; 
Tassa rañño ahuṁ bhariyā, 
ekajjhaṁ cārayāmahaṁ. 
Rahogatā nisīditvā, 
evaṁ cintesahaṁ tadā; 
‘Kusalaṁ me kataṁ natthi, 
ādāya gamiyaṁ mama. 
Mahābhitāpaṁ kaṭukaṁ, 
ghorarūpaṁ sudāruṇaṁ; 
Nirayaṁ nūna gacchāmi, 
ettha me natthi saṁsayo’. 
Evāhaṁ cintayitvāna, 
pahaṁsetvāna mānasaṁ; 
Rājānaṁ upagantvāna, 
idaṁ vacanamabraviṁ. 
‘Itthī nāma mayaṁ deva, 
purisānittarā ahu; 
Ekaṁ me samaṇaṁ dehi, 
bhojayissāmi khattiya’. 
Adāsi me tadā rājā, 
samaṇaṁ bhāvitindriyaṁ; 
Tassa pattaṁ gahetvāna, 
paramannena pūrayiṁ. 
Pūretvā paramaṁ annaṁ, 
saha sugandhalepanaṁ; 
Mahācelena chāditvā, 
adāsiṁ tuṭṭhamānasā. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Sahassadevarājūnaṁ, 
mahesittamakārayiṁ; 
Sahassacakkavattīnaṁ, 
mahesittamakārayiṁ. 
Padesarajjaṁ vipulaṁ, 
gaṇanāto asaṅkhiyaṁ; 
Nānāvidhaṁ bahuṁ aññaṁ, 
tassa kammaphalaṁ tato. 
Uppalasseva me vaṇṇo, 
abhirūpā sudassanā; 
Itthisabbaṅgasampannā, 
abhijātā jutindharā. 
Pacchime bhave sampatte, 
ajāyiṁ sākiye kule; 
Nārīsahassapāmokkhā, 
suddhodanasutassahaṁ. 
Nibbinditvā agārehaṁ, 
pabbajiṁ anagāriyaṁ; 
Sattamīrattisampattā, 
catusaccamapāpuṇiṁ. 
Cīvaraṁ piṇḍapātañca, 
paccayaṁ sayanāsanaṁ; 
Parimetuṁ na sakkomi, 
piṇḍapātassidaṁ phalaṁ. 
Yaṁ mayhaṁ pūritaṁ kammaṁ, 
Kusalaṁ sarase muni; 
Tuyhatthāya mahāvīra, 
Paricattaṁ bahuṁ mayā. 
Ekattiṁse ito kappe, 
yaṁ dānamadadiṁ tadā; 
Duggatiṁ nābhijānāmi, 
piṇḍapātassidaṁ phalaṁ. 
Dve gatiyo pajānāmi, 
devattaṁ atha mānusaṁ; 
Aññaṁ gatiṁ na jānāmi, 
piṇḍapātassidaṁ phalaṁ. 
Ucce kule pajānāmi, 
mahāsāle mahaddhane; 
Aññe kule na jānāmi, 
piṇḍapātassidaṁ phalaṁ. 
Bhavābhave saṁsaritvā, 
sukkamūlena coditā; 
Amanāpaṁ na passāmi, 
somanassakataṁ phalaṁ. 
Iddhīsu ca vasī homi, 
dibbāya sotadhātuyā; 
Cetopariyañāṇassa, 
vasī homi mahāmune. 
Pubbenivāsaṁ jānāmi, 
dibbacakkhu visodhitaṁ; 
Sabbāsavā parikkhīṇā, 
natthi dāni punabbhavo. 
Atthadhammaniruttīsu, 
paṭibhāne tatheva ca; 
Ñāṇaṁ mama mahāvīra, 
uppannaṁ tava santike. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ uppaladāyikā bhikkhunī bhagavato sammukhā imā gāthāyo abhāsitthāti. 
Uppaladāyikātheriyāpadānaṁ tatiyaṁ. 

Therīapadāna 
Khattiyāvagga 
4 Siṅgālamātutherīapadāna 
“Padumuttaro nāma jino, 
sabbadhammāna pāragū; 
Ito satasahassamhi, 
kappe uppajji nāyako. 
Tadāhaṁ haṁsavatiyaṁ, 
jātāmaccakule ahuṁ; 
Nānāratanapajjote, 
iddhe phīte mahaddhane. 
Pitunā saha gantvāna, 
mahājanapurakkhatā; 
Dhammaṁ buddhassa sutvāna, 
pabbajiṁ anagāriyaṁ. 
Pabbajitvāna kāyena, 
pāpakammaṁ vivajjayiṁ; 
Vacīduccaritaṁ hitvā, 
ājīvaṁ parisodhayiṁ. 
Buddhe pasannā dhamme ca, 
saṅghe ca tibbagāravā; 
Saddhammassavane yuttā, 
buddhadassanalālasā. 
Aggaṁ saddhādhimuttānaṁ, 
assosiṁ bhikkhuniṁ tadā; 
Taṁ ṭhānaṁ patthayitvāna, 
tisso sikkhā apūrayiṁ. 
Tato maṁ sugato āha, 
karuṇānugatāsayo; 
‘Yassa saddhā tathāgate, 
acalā suppatiṭṭhitā; 
Sīlañca yassa kalyāṇaṁ, 
ariyakantaṁ pasaṁsitaṁ. 
Saṅghe pasādo yassatthi, 
ujubhūtañca dassanaṁ; 
Adaliddoti taṁ āhu, 
amoghaṁ tassa jīvitaṁ. 
Tasmā saddhañca sīlañca, 
pasādaṁ dhammadassanaṁ; 
Anuyuñjetha medhāvī, 
saraṁ buddhāna sāsanaṁ’. 
Taṁ sutvāhaṁ pamuditā, 
apucchiṁ paṇidhiṁ mama; 
Tadā anomo amito, 
byākarittha vināyako; 
‘Buddhe pasannā kalyāṇī, 
lacchase taṁ supatthitaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādā, 
orasā dhammanimmitā; 
Siṅgālakassa mātāti, 
hessati satthu sāvikā’. 
Taṁ sutvā muditā hutvā, 
yāvajīvaṁ tadā jinaṁ; 
Mettacittā paricariṁ, 
paṭipattīhi nāyakaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
giribbajapuruttame; 
Jātā seṭṭhikule phīte, 
mahāratanasañcaye. 
Putto siṅgālako nāma, 
mamāsi vipathe rato; 
Diṭṭhigahanapakkhando, 
disāpūjanatapparo. 
Nānādisā namassantaṁ, 
piṇḍāya nagaraṁ vajaṁ; 
Taṁ disvā ovadī buddho, 
magge ṭhatvā vināyako. 
Tassa desayato dhammaṁ, 
panādo vimhayo ahu; 
Dvekoṭinaranārīnaṁ, 
dhammābhisamayo ahu. 
Tadāhaṁ parisaṁ gantvā, 
sutvā sugatabhāsitaṁ; 
Sotāpattiphalaṁ pattā, 
pabbajiṁ anagāriyaṁ. 
Na cireneva kālena, 
buddhadassanalālasā; 
Anussatiṁ taṁ bhāvetvā, 
arahattamapāpuṇiṁ. 
Dassanatthāya buddhassa, 
sabbadā ca vajāmahaṁ; 
Atittāyeva passāmi, 
rūpaṁ nayananandanaṁ. 
Sabbapāramisambhūtaṁ, 
lakkhīnilayanaṁ varaṁ; 
Rūpaṁ sabbasubhākiṇṇaṁ, 
atittā viharāmahaṁ. 
Jino tasmiṁ guṇe tuṭṭho, 
etadagge ṭhapesi maṁ; 
‘Siṅgālakassa yā mātā, 
aggā saddhādhimuttikā’. 
Iddhīsu ca vasī homi, 
dibbāya sotadhātuyā; 
Cetopariyañāṇassa, 
vasī homi mahāmuni. 
Pubbenivāsaṁ jānāmi, 
dibbacakkhu visodhitaṁ; 
Sabbāsavā parikkhīṇā, 
natthi dāni punabbhavo. 
Atthadhammaniruttīsu, 
paṭibhāne tatheva ca; 
Ñāṇaṁ mama mahāvīra, 
uppannaṁ tava santike. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ siṅgālamātā bhikkhunī imā gāthāyo abhāsitthāti. 
Siṅgālamātutheriyāpadānaṁ catutthaṁ. 

Therīapadāna 
Khattiyāvagga 
Sukkātherīapadāna 
“Ekanavutito kappe, 
vipassī nāma nāyako; 
Uppajji cārudassano, 
sabbadhammavipassako. 
Tadāhaṁ bandhumatiyaṁ, 
jātā aññatare kule; 
Dhammaṁ sutvāna munino, 
pabbajiṁ anagāriyaṁ. 
Bahussutā dhammadharā, 
paṭibhānavatī tathā; 
Vicittakathikā cāpi, 
jinasāsanakārikā. 
Tadā dhammakathaṁ katvā, 
hitāya janataṁ bahuṁ; 
Tato cutāhaṁ tusitaṁ, 
upapannā yasassinī. 
Ekattiṁse ito kappe, 
sikhī viya sikhī jino; 
Tapanto yasasā loke, 
uppajji vadataṁ varo. 
Tadāpi pabbajitvāna, 
buddhasāsanakovidā; 
Jotetvā jinavākyāni, 
tatopi tidivaṁ gatā. 
Ekattiṁseva kappamhi, 
vessabhū nāma nāyako; 
Uppajjittha mahāñāṇī, 
tadāpi ca tathevahaṁ. 
Pabbajitvā dhammadharā, 
jotayiṁ jinasāsanaṁ; 
Gantvā marupuraṁ rammaṁ, 
anubhosiṁ mahāsukhaṁ. 
Imamhi bhaddake kappe, 
kakusandho jinuttamo; 
Uppajji narasaraṇo, 
tadāpi ca tathevahaṁ. 
Pabbajitvā munimataṁ, 
jotayitvā yathāyukaṁ; 
Tato cutāhaṁ tidivaṁ, 
agaṁ sabhavanaṁ yathā. 
Imasmiṁyeva kappamhi, 
koṇāgamananāyako; 
Uppajji lokasaraṇo, 
araṇo amataṅgato. 
Tadāpi pabbajitvāna, 
sāsane tassa tādino; 
Bahussutā dhammadharā, 
jotayiṁ jinasāsanaṁ. 
Imasmiṁyeva kappamhi, 
kassapo munimuttamo; 
Uppajji lokasaraṇo, 
araṇo maraṇantagū. 
Tassāpi naravīrassa, 
pabbajitvāna sāsane; 
Pariyāpuṭasaddhammā, 
paripucchā visāradā. 
Susīlā lajjinī ceva, 
tīsu sikkhāsu kovidā; 
Bahuṁ dhammakathaṁ katvā, 
yāvajīvaṁ mahāmune. 
Tena kammavipākena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
giribbajapuruttame; 
Jātā seṭṭhikule phīte, 
mahāratanasañcaye. 
Yadā bhikkhusahassena, 
parivuto lokanāyako; 
Upāgami rājagahaṁ, 
sahassakkhena vaṇṇito. 
Danto dantehi saha purāṇajaṭilehi, 
Vippamutto vippamuttehi; 
Siṅgīnikkhasavaṇṇo, 
Rājagahaṁ pāvisi bhagavā. 
Disvā buddhānubhāvaṁ taṁ, 
sutvāva guṇasañcayaṁ; 
Buddhe cittaṁ pasādetvā, 
pūjayiṁ taṁ yathābalaṁ. 
Aparena ca kālena, 
dhammadinnāya santike; 
Agārā nikkhamitvāna, 
pabbajiṁ anagāriyaṁ. 
Kesesu chijjamānesu, 
kilese jhāpayiṁ ahaṁ; 
Uggahiṁ sāsanaṁ sabbaṁ, 
pabbajitvā cirenahaṁ. 
Tato dhammamadesesiṁ, 
mahājanasamāgame; 
Dhamme desiyamānamhi, 
dhammābhisamayo ahu. 
Nekapāṇasahassānaṁ, 
taṁ viditvātivimhito; 
Abhippasanno me yakkho, 
bhamitvāna giribbajaṁ. 
Kiṁ me katā rājagahe manussā, 
Madhuṁ pītāva acchare; 
Ye sukkaṁ na upāsanti, 
Desentiṁ amataṁ padaṁ. 
Tañca appaṭivānīyaṁ, 
asecanakamojavaṁ; 
Pivanti maññe sappaññā, 
valāhakamivaddhagū. 
Iddhīsu ca vasī homi, 
dibbāya sotadhātuyā; 
Cetopariyañāṇassa, 
vasī homi mahāmune. 
Pubbenivāsaṁ jānāmi, 
dibbacakkhu visodhitaṁ; 
Sabbāsavā parikkhīṇā, 
natthi dāni punabbhavo. 
Atthadhammaniruttīsu, 
paṭibhāne tatheva ca; 
Ñāṇaṁ mama mahāvīra, 
uppannaṁ tava santike. 
Kilesā jhāpitā mayhaṁ, 
…pe… 
viharāmi anāsavā. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ sukkā bhikkhunī imā gāthāyo abhāsitthāti. 
Sukkātheriyāpadānaṁ pañcamaṁ. 
Pañcamaṁ bhāṇavāraṁ. 

Therīapadāna 
Khattiyāvagga 
6 Abhirūpanandātherīapadāna 
“Ekanavutito kappe, 
vipassī nāma nāyako; 
Uppajji cārudassano, 
sabbadhammesu cakkhumā. 
Tadāhaṁ bandhumatiyaṁ, 
iddhe phīte mahākule; 
Jātā surūpā dayitā, 
pūjanīyā janassa ca. 
Upagantvā mahāvīraṁ, 
vipassiṁ lokanāyakaṁ; 
Dhammaṁ suṇitvā saraṇaṁ, 
upesiṁ naranāyakaṁ. 
Sīlesu saṁvutā hutvā, 
nibbute ca naruttame; 
Dhātuthūpassa upari, 
soṇṇa