Luận tạng Tây Tạng (Tengyur) — Tập 169

ྨྲས་པ། གང་ཞིག་འཕགས་པའི་སྲས་འདིར་གནས་བཞིན་པ་ཡབ་ཀྱིས་
གང་ནས་ཀྱང་ཐོས་པར་གྱུར་ན་དེ་ནས་ཁྲོ་བ་སྐྱེས་ཏེ་མི་ལེགས་པ་ཅི་ཡང་བྱེད་པར་འགྱུར་རོ་ཞེས་ཟེར་རོ། །དེ་བས་ན་འདི་འདིར་རྙེད་པ་རིག་པ་འཛིན་པའི་སྐྱེད་མོས་ཚལ་དེ་ཉིད་དུ་འཕགས་པའི་སྲས་ལ་མཚན་མོའི་དུས་སུ་རིག་པ་འཛིན་པའི་སྐྱེད་མོའི་ཚལ་དེ་ཉིད་དུ་སྲོད་ཀྱི་དུས་ལ་འཕགས་པའི་སྲས་ཁྱོད་
ཀྱིས་ཁྲིད་པར་འོས་པ་སྟེ། བདག་ཅག་ནང་པར་དེ་ཉིད་སྨྱུང་བ་དང་བཅས་པ་ཡན་ལག་མེད་པ་ལ་མཆོད་པའི་ཚུལ་གྱིས་འགྲོའོ་ཞེས་ཟེར་རོ། །ནོར་བཟངས་ཀྱིས་ཀྱང་མཛའ་མོས་ཡང་དག་པར་སྨྲས་སོ་ཞེས་བྱ་བ་སྨྲས་ནས་སྲོད་ཀྱི་དུས་སུ་རྒན་མོ་དེ་དང་ལྷན་ཅིག་རིག་པ་འཛིན་པའི་སྐྱེད་མོས་ཚལ་དུ་

ཞུགས་ནས་མཚན་མོ་འདས་པར་གྱུར་ཏོ། །དེ་ནས་ཡིད་འཕྲོག་མས་ཐོ་རངས་ཀྱི་དུས་ལ་གོས་དཀར་པོ་འཆང་ཞིང་ཉེ་གནས་མ་རྣམས་ཀྱིས་དྲི་དང་མེ་ཏོག་གི་ཕྲེང་བ་འཛིན་པས་སྐྱེད་མོས་ཚལ་དེ་དང་དེར་ཉེ་བར་འོངས་ཏེ། ཉེ་གནས་མ་དེ་རྣམས་ལ་སྨྲས་པ། སྨྱུང་བ་དང་བཅས་ཁྲུས་
བྱས་གཙང་། །མི་མོ་འབད་པ་ཆེན་པོ་ཡིས། །འདོད་པའི་ལྷ་ལ་བརྟེན་བྱས་ཏེ། །དེ་བས་གཅིག་པུ་མཆོད་པར་མཛོད། །སྐྱེད་ཚལ་འདི་ཡི་ཕྱི་རོལ་དུ། །མཆོད་གསུམ་མེ་ཏོག་མཚོན་ཆ་ལས། །ཁྱེད་ཅག་རྣམ་པར་ལོག་མཛོད་ཅིག །བདག་ནི་གཅིག་པུ་ཉིད་ཞུགས་བགྱི། །དེ་ནས་ཉེ་གནས་མ་རྣམས་
ཀྱིས་ཉེ་བར་འོངས་པའི་དྲི་དང་མེ་ཏོག་གི་ཕྲེང་བ་ལ་སོགས་པ་བཟུང་ནས་སྐྱེད་མོས་ཚལ་དུ་ཞུགས་ཏེ། རབ་ཏུ་དགའ་བའི་དགོད་པས་རྣམ་པར་ཁ་བྱེ་བའི་སོའི་ནོར་བུའི་འོད་ཟེར་རྣམས་ཀྱིས་བཞིན་ཀུན་ནས་སྣང་བར་བྱེད་པའི་ཡིད་འཕྲོག་མས་ནོར་བཟངས་ལ་དྲི་ཞིམ་པོའི་ཁ་དོག་གིས་བྱུགས་པར་གྱུར་ཏོ། །དེ་ནས་བྱང་
ཆུབ་སེམས་དཔས་དགོད་ཅིང་སྨྲས་པ། མཛེས་མ་ཡན་ལག་མེད་པའི་མཆོད་པ་ལ་ཉེ་བར་འཁོར་བའི་བྱུག་པ་འདི་བདག་ཅག་གི་ཡན་ལག་ལ་ཅིའི་ཕྱིར་སྦྱོར་བར་བྱེད། འོ་ན་འདོད་པའི་མཆོད་པ་མཛོད་ཅིག་ཟེར་རོ། །ཡིད་འཕྲོག་མས་དགོད་ཅིང་སྨྲས་པ། ཁྱོད་ཀྱི་ཚིག་རྣམས་ཉིད་ནི་མེ་ཏོག་མདའ་རྣམས་དྲི་ཞིམ་པ། །
གཟུགས་ནི་ཆུ་སྲིན་རྒྱལ་མཚན་འདི་ནི་གཞུ་ནི་འཛིན་བྱེད་པ། །དེ་བས་ཁྱེད་ཉིད་བདག་གི་སླད་དུ་མེ་ཏོག་རྒྱལ་མཚན་ཏེ། །མྱོས་བྱེད་དབང་ཕྱུག་ཁྲོས་པས་སྲེག་པ་སུ་ཞིག་དད་པར་བྱེད། །དེ་ནས་ཕན་ཚུན་འདི་ལྟར་དགོད་པའི་གཏམ་གྱིས་ཀུན་ནས་རྗེས་སུ་ཆགས་པ་འཕེལ་བ་དེ་དག་ལ་དེར་གནས་པར་བྱེད་པ་ལ་བཙུན་མོའི་
འཁོར་དང་ནང་འཁོར་དང་བཅས་པའི་མི་འམ་ཅིའི་བདག་པོ་སྐྱེད་མོས་ཚལ་དེར་འོངས་པར་གྱུར་ཏོ། །དེ་ནས་ཡབ་འོངས་པར་ཤེས་ནས་ལངས་ཏེ། ཡིད་འཕྲོག་མ་འཇིགས་པ་དང་བཅས་པས་ནོར་བཟངས་ལ་སྨྲས་པ། འཕགས་པའི་སྲས་ལགས་བདག་གི་བླ་མའི་སྐྱེ་བོ་ཀུན་ནས་འོངས་པ་སྟེ། །དེ་བས་ན་མྱུར་དུ་ལྗོན་ཤིང་
གི་ཁྱིམ་འདིར་ཞུགས་པར་འོས་སོ་ཞེས་ཟེར་རོ། །དེ་ནས་ནོར་བཟངས་ཀྱིས་མྱུར་དུ་ལངས་ཏེ་འཇིགས་ཤིང་གོམ་པ་བཀོད་པས་སོང་སྟེ། ལྗོན་ཤིང་གི་ཁང་པར་ཞུགས་པར་གྱུར་ཏོ། །དེ་ནས་ཡིད་འཕྲོག་མ་ཉེ་བར་འོངས་ཏེ་མས་དྲིས་པར་གྱུར་པ། །བུ་མོ་བར་ཆད་མེད་པར་ཁྱོད་ཀྱིས་མྱོས་བྱེད་ཀྱི་མཆོད་པས་རྫོགས་པར་

བྱས་སམ་ཞེས་ཟེར་རོ། །ཡིད་འཕྲོག་མས་སྨྲས་པ། བདག་ནི་མཆོད་པ་མྱོས་བྱེད་པ་ཡི་ཕྱིར་མ་ལགས། །ནུས་པས་སྐྱེད་མོས་ཚལ་འདིར་མངོན་བརྩམས་པ། །ཡིད་བྱུང་གནས་འདི་སྐད་ཅིག་མ་ནི་དེ་ཉིད་ལ། །ཡབ་ཀྱི་སྐྱེ་བོས་བར་ཆད་མེད་པར་དགག་པར་བྱས། མས་སྨྲས་པ། བདག་གི་བུ་མོ་ནི་
སེམས་མཉམ་པར་བཞག་པ་མྱོས་བྱེད་ཀྱི་མཆོད་པ་རྫོགས་པར་གྱིས་ཤིག་དང་། བདག་ནི་ནང་འཁོར་འདིར་འོངས་པར་གྱུར་པ་ཟློག་པར་འགྱུར་ཞེས་ཟེར་རོ། །ཡིད་འཕྲོག་མས་ཀྱང་མེ་ཏོག་མཚོན་ཆ་ལ་མཆོད་པ་བྱས་ཏེ། དེ་ལྟར་བགྱི་ཞེས་འདི་ལྟར་བསམ་ཞིང་གནས་སོ། །བདག་གིས་ནི་དུས་ཇི་ཙམ་ཉིད་
དུ་འཕགས་པའི་སྲས་སྦ་བར་བྱ་བར་ནུས་ཏེ། དེ་བས་ན་མ་ལ་སྨྲ་བར་བྱའོ་ཞེས་རྣམ་པར་བསམས་ནས་སྨྲས་པ། གལ་ཏེ་མ་ཡི་མག་པ་འདི། །ཇི་ལྟར་ཡང་ནི་འདིར་འོངས་འགྱུར། །ཁྱོད་ཀྱི་སེམས་ནི་དགའ་འགྱུར་ཏེ། །ཡབ་ནི་གཅིག་ཏུ་ཁྲོས་པར་འགྱུར། །མས་སྨྲས་པ། བུ་མོ་གལ་ཏེ་མག་པ་དེ། །
བདག་གི་འདིར་ནི་འོངས་གྱུར་ན། །ཁྱེད་ཀྱི་ཡབ་ནི་དང་བྱས་ནས། །བདག་ནི་ཤིན་ཏུ་དགའ་བར་འགྱུར། །ཡིད་འཕྲོག་མས་སྨྲས་པ། གལ་ཏེ་དེ་ལྟར་ཡིན་ན་དེ་བས་ན། །མ་ལ་མག་པ་བསྟན་པར་འགྱུར། །ཞེས་སྨྲས་ནས། རྒན་པོ་དེ་ལ་སྨྲས་པ། སོང་ལ་ལྗོན་ཤིང་གི་ཁྱིམ་འདི་ན་གནས་པའི་
འཕགས་པའི་སྲས་ལ་སྨྲ་བར་གྱིས་ཤིག་དང་། དེ་ནས་བྱུང་སྟེ་མ་ལ་གསོང་པོར་སྨྲ་བར་གྱིས་ཤིག་ཅེས་ཟེར་རོ། །དེས་ཀྱང་དེ་ལྟར་བགྱི་ཞེས་བྱ་བས་སོ་སོར་མཉན་ཏེ། ལྗོན་ཤིང་གི་ཁྱིམ་ན་གནས་པའི་ནོར་བཟངས་ལ་ལོ་རྒྱུས་དེ་སྨྲས་པར་གྱུར་ཏོ། །དེ་ནས་ནོར་བཟངས་ལྗོན་ཤིང་གི་ཁྱིམ་དེ་ལས་བྱུང་བར་
གྱུར་ཏོ། །ཡིད་འཕྲོག་མས་སྨྲས་པ། མས་མག་པ་མཐོང་བར་འོས་སོ་ཞེས་ཟེར་རོ། །མས་སྨྲས་པ། གཞོན་ནུ་རིག་པ་འཛིན་པ་འདི། །ལྗོན་ཤིང་ཁྱིམ་ནས་འོངས་པ་ནི། །གང་དུ་ཡང་ནི་མག་པ་དེ། །བདག་འཇིགས་རྗེས་སུ་འགྲོ་འགྱུར་རམ། །དེ་ནས་ཡིད་འཕྲོག་མས་དགོད་ཅིང་སྨྲས་
པ། འོ་ན་མའི་མག་པ་འདི་ཉིད་ཡིན་ཞེས་ཟེར་རོ། །མས་སྨྲས་པ། གལ་ཏེ་དེ་ལྟར་ཡིན་ན། །བདག་གི་བུ་མོ་ཁྱོད་མྱ་ངན་བྱ་བ་མ་ཡིན་ཏེ། དེ་ནས་ནོར་བཟངས་ཀྱིས་ཀུན་ནས་ཉེ་བར་འོངས་ཏེ། ཡིད་འཕྲོག་མའི་མ་ལ་མངོན་པར་ཕྱག་བཙལ་བར་གྱུར་ཏོ། །དེས་ཀྱང་བྱང་ཆུབ་སེམས་དཔའི་སྤྱི་བོར་

སྣོམ་ཞིང་འདི་ལྟར་ཤིས་པར་བརྗོད་པ་རབ་ཏུ་སྦྱར་གྱུར་ཏེ། ད་ནི་བདག་གི་བུ་མོ་དང་། །རིགས་ནི་རྣམ་གྲངས་ཁྱོད་དང་ནི། །གང་གཱ་རྒྱ་མཚོ་དག་ལྟར་ནི། །ནམ་ཡང་རྣམ་ཆད་མ་གྱུར་ཅིག །ད་ནི་དེ་བས་ན་བུ་མོ་ཁྱོད་ཀྱི་ཡབ་ལ་ལོ་རྒྱུས་འདི་བདག་གིས་སྨྲ་བར་བགྱི་ཞེས་བྱ་བ་མངོན་
པར་སྨྲས་ཏེ། ལྗོན་པའི་དྲུང་དུ་མངོན་པར་སོང་སྟེ་སྐབས་དང་མངོན་དུ་འགྲོ་བར་འདི་སྐད་ཅེས་སྨྲས་པ། འཕགས་པའི་སྲས་ལགས། གལ་ཏེ་ཇི་ལྟར་ཡང་ཡིད་འཕྲོག་མའི་བདག་པོ་འོངས་པར་གྱུར་ནས་འཕགས་པའི་སྲས་ཀྱིས་སླར་ཅི་ཞིག་བྱེད་པར་འགྱུར་ཞེས་ཟེར་རོ། །དེ་ནས་ལྗོན་པས་སྨིན་མ་
བསྐྱོད་པས་གསལ་བར་བྱས་པའི་ཁྲོ་བ་དང་ལྡན་པས་སྨྲས་པ། རིགས་མིན་ལམ་ལ་གནས་པ་དེ། །གལ་ཏེ་བདག་གིས་མཐོང་གྱུར་ན། །ཁྲག་ནི་རབ་ཏུ་འཛིན་ལྡན་པ། །མཚོན་ཆས་གཅོད་དེ་ཕྱོགས་རྣམས་དོར། །ཡིད་འཕྲོག་མའི་མས་སྨྲས་པ། ཕན་པར་བྱེད་པ་དེའི་སྟེང་དུ་མི་མཐུན་པ་སེམས་
པར་བྱེད་པ་ནི་རིགས་པ་མ་ཡིན་ནོ། །ལྗོན་པས་སྨྲས་པ། འོ་ན་འདི་ལྟར་ཕན་པར་བྱེད་པ་ཞེས་བྱ་བར་སྨྲོས་ཤིག་དང་། དེས་སྨྲས་པ། ཡིད་འཕྲོག་མ་འོངས་པ་ཙམ་གྱིས་བདག་ལ་སྨྲས་པ་དེ། ཅི་ལྟར་ཞེ་ན། རྔོན་པ་དྲག་པོ་ལས་བླངས་ཏེ། །རྒྱལ་པོའི་སྲས་དེའི་ཁྱིམ་དུ་ནི། །བདག་བཅུག་ནས་
ནི་དེ་དང་དེའི། །ལོངས་སྤྱོད་རྣམས་ཀྱིས་ཡང་དག་བསྟེན། །ལྗོན་པས་སྨྲས་པ། གལ་ཏེ་དེ་ལྟར་བདག་ཅག་ལ་དེ་བདེན་པར་ཕན་པར་བྱེད་པ་ཞེས་ཟེར་རོ། །དེ་ནས་དེས་ལྗོན་པ་ཁྲོ་བ་རྣམ་པར་ཟློག་པ་ཤེས་ནས་སླར་སྨྲས་པ། གལ་ཏེ་ཁྱེད་ནི་དང་བ་ཡིན་ན་དེ་བས་ན་བདག་འཕགས་པའི་སྲས་ལ་
བདེན་པར་སྨྲ་བ་སྟེ། ཁྱོད་ཀྱི་མག་པ་དེ་འོངས་པ་ཁོ་ན་ཞེས་ཟེར་རོ། །གཞན་ཡང་། འདི་ནི་མིང་ཙམ་མ་ཡིན་ཏེ། །ས་བདག་སྲས་ནི་བདག་གི་སླད། །གང་གིས་བགྲོད་དཀའ་འདི་ལྟར་ལམ། །བདག་གི་བུ་མོའི་ཕྱིར་ནི་བསྙེགས། །ལྗོན་པས་སྨྲས་པ། གལ་ཏེ་འདི་ལྟར་བདག་ཅག་ལ་དེ་
བདེན་པ་ཡིན་ན་དེ་བས་ན་བདག་གིས་མག་པ་དེ་མཐོང་བར་འདོད་པ་སྟེ། དེ་ནས་དེ་ནོར་བཟངས་ཉེ་བར་འོངས་པའི་ཕྱིར་སྒོ་སྲུངས་མ་བཏང་བར་གྱུར་ཏོ། །སྒོ་སྲུངས་མས་ཀྱང་སོང་སྟེ་བྱང་ཆུབ་སེམས་དཔའ་ལ་སྨྲས་པ། མིའམ་ཅིའི་བདག་པོ་ནི་ཚེ་དང་ལྡན་པ་མཐོང་བར་འདོད་དོ་ཞེས་ཟེར་རོ། །དེ་ནས་

ནོར་བཟངས་ཀུན་ནས་ཉེ་བར་འོངས་ཏེ། ལྗོན་པ་ལ་གསོང་པོར་བྱས་མངོན་པར་ཕྱག་འཚལ་བར་གྱུར་ཏོ། །དེ་ནས་མིའམ་ཅིའི་བདག་པོ་ཁྲོ་བའི་ལྷག་མ་ཅུང་ཟད་དང་ལྡན་པས་ཤེས་པར་བརྗོད་པ་བྱིན་ཏེ། ཆུ་བོའི་འགྲམ་དུ་ཁྲིད་ནས་བྱང་ཆུབ་སེམས་དཔའ་ལ་སྨྲས་པ། གཞོན་ནུ་ཆུ་བོའི་འགྲམ་གྱི་
ས་ལ་སྐྱེས་པར་གྱུར་པ་ནི། །དཔག་ཚད་བསྒྲིབས་པའི་མདའ་རྣམས་ཀྱིས་ནི་ནགས་འདི་ཕྱུང་བྱས་ནས། །གལ་ཏེ་ཉིན་རེར་དེ་ཉིད་དུ་ནི་བདག་ལ་ཕྲད་བྱེད་ན། །ཁྱོད་ལ་བུ་མོ་དང་ནི་ནོར་ཡང་དེ་དང་དེ་སྦྱིན་བྱ། །བྱང་ཆུབ་སེམས་དཔས་ཀྱང་དེ་ལྟར་བགྱི་ཞེས་མཉན་ནས་ཏོག་རྩེ་བླངས་ནས་ལྕགས་ངར་གྱིས་
འབིགས་པར་བྱེད་པའི་མདའ་རྣམས་ཀྱིས་ནི་ནགས་དེ་རྩ་བ་ནས་གདོན་པར་བྱ་བའི་ཕྱིར་དུ་བརྩམས་ཏེ། ལྗོན་པ་ཡང་རང་གི་ཕོ་བྲང་དུ་སོང་བར་གྱུར་ཏོ། །དེ་ནས་ཡིད་འཕྲོག་མ་ཡིད་མི་བདེ་བས་འདི་ལྟར་བསམས་ཏེ། མདའ་རྣམས་ཀྱིས་ནི་ནགས་མཐུག་པ། །བདག་གི་དགའ་བོ་གཅིག་པུ་ཉིད། །འཇམ་
པའི་ལག་པ་དག་གིས་ནི། །ཇི་ལྟར་རྩ་བ་ནས་འདོན་འགྱུར། །དེ་ནས་ལྷ་རྣམས་ཀྱི་བདག་པོས་ནོར་བཟངས་མདའ་རྣམས་རྩ་བ་ནས་འདོན་པར་བྱེད་པ་མཐོང་ནས་བྱང་ཆུབ་སེམས་དཔའ་འདིས་མདའ་རྣམས་རྩ་བ་ནས་བཏོན་པ་ཉི་མ་གཅིག་གིས་ནུས་པར་འགྱུར་བ་མ་ཡིན་ནོ་སྙམ་དུ་རྣམ་པར་བསམས་
ཏེ། གནོད་སྦྱིན་གཞོན་ནུ་རྣམས་བོས་ནས་བྱང་ཆུབ་སེམས་དཔའ་འདི་གཅིག་པུ་ཉིད་མདའ་རྣམས་འདོན་ནུས་པ་མ་ཡིན་ཞེས་སྨྲས་པ། དེ་ནས་ད་ལྟར་ནི། མཆེ་བ་འཁྱོག་ཅིང་སྤྲིན་ནི་སར་པ་ལྟར་ནི་ནག །ཕག་གི་གཟུགས་ཅན་གློ་བུར་དུ་ནི་བྱས་ནས་ཀྱང་། །ཇི་སྲིད་ཉི་མ་ནུབ་པར་མ་གྱུར་དེ་སྲིད་དུ། །སྐད་
ཅིག་གིས་ནི་མདའ་རྣམས་ཀུན་ནས་གདོན་པར་གྱིས། །དེ་ནས་གནོད་སྦྱིན་གཞོན་ནུ་དེ་རྣམས་ཀྱིས་དེ་ལྟར་བགྱི་ཞེས་བྱ་བས་ལྷའི་དབང་པོ་ལ་མངོན་པར་ཕྱག་འཚལ་ནས། མི་འམ་ཅིའི་བདག་པོའི་གྲོང་ཁྱེར་དུ་འོངས་ཏེ་ཕག་གི་གཟུགས་སུ་མངོན་པར་སྤྲུལ་ཅིང་མདའི་ནགས་དེ་ཐམས་ཅད་རྩ་བ་
ནས་འདོན་པར་བྱེད་ཅིང་གནས་ཏེ། བདག་ཉིད་ཆེན་པོ་འཇིག་རྟེན་ཕན་རྗེས་འཇུག་རྣམས་ལ། །སྐྱེ་བ་དུ་མར་ཉེ་བར་བསགས་པའི་ལས་དང་ནི། །ཟུག་རྔུར་གྱུར་པའི་དགེ་བས་ཀྱང་ནི་བསྐུལ་བ་ཡི། །ལྷ་ཡི་སྐྱེ་བོ་ཡང་ནི་གྲོགས་ཉིད་འགྱུར། །དེ་ནས་གནོད་སྦྱིན་ཕག་གི་གཟུགས་ཅན་དེ་རྣམས་

སོང་བ་དང་བྱང་ཆུབ་སེམས་དཔའ་ཡང་འོངས་ཏེ། ལྗོན་པ་ལ་མདའ་རྣམས་ཀྱི་ནགས་བདག་གིས་རྩ་བ་ནས་བཏོན་ཏེ་ཞེས་བྱ་བ་སྨྲས་པར་གྱུར་ཏོ། །དེ་ནས་ལྗོན་པས་རང་ཉིད་མངོན་སུམ་དུ་བྱས་ཏེ། གཞོན་ནུ་འདི་ནི་སྟོབས་དང་ལྡན་ནོ། །ཞེས་བྱ་བ་སྨྲ་ཞིང་། སླར་ཡང་
རྣམ་པར་བསམས་ཏེ་བྱང་ཆུབ་སེམས་དཔའ་ལ་བཀས་གནང་བར་གྱུར་ཏེ། མདེའུ་དང་བཅས་མདའ་རྣམས་འདི། །ཆུ་བོའི་ཕ་རོལ་པར་དོར་ནས། །ཏིལ་གྱི་བྲེ་ཆེན་འདི་བཏབ་སྟེ། །དེ་སྲིད་སླར་ཡང་འོང་བར་མཛོད། །དེ་ནས་བྱང་ཆུབ་སེམས་དཔས་ཐོས་ཏེ་ཆུ་བོ་དེའི་ཕ་རོལ་དུ་མདའ་རྣམས་དོར་བར་
བྱ་བའི་ཕྱིར་བརྩམས་སོ། །སླར་ཡང་ལྷའི་བདག་པོའི་མཐུས་ཤིན་ཏུ་སྟོབས་དང་ལྡན་པའི་རླུང་གིས་མདའ་རྣམས་དེ་གློ་བུར་ཉིད་དུ་ཆུའི་ཕ་རོལ་དུ་ཁྱེར་བར་གྱུར་ཏོ། །དེ་ནས་བྱང་ཆུབ་སེམས་དཔས་ཞིང་དེ་ལ་ཏིལ་རྣམས་རབ་ཏུ་གཏོར་ཏེ་སླར་ཡང་བཏུ་བའི་ཕྱིར་བརྩམས་པར་གྱུར་ཏོ། །དེ་ནས་
བརྒྱ་བྱིན་ལྷའི་བདག་པོས་སླར་གནོད་སྦྱིན་གྱི་གཞོན་ནུ་དེ་རྣམས་ཏིལ་རྣམས་བསྡུ་བའི་ཕྱིར་གྲོག་མའི་གཟུགས་ཀྱིས་བཏང་བར་བྱས་སོ། །དེ་རྣམས་ཀྱིས་ཀྱང་ཏིལ་དེ་རྣམས་བཏུས་ཏེ་བྲེ་བོ་ཆེ་འགེངས་ཤིང་གནས་པར་གྱུར་ཏོ། །དེ་ནས་བྱང་ཆུབ་སེམས་དཔས་ཏིལ་རྣམས་ཀྱི་བྲེ་བོ་ཆེ་དེ་བཟུང་ནས་
ཉི་མ་དེ་ཉིད་ལ་ལྗོན་པ་ལ་སྟོན་ཞིང་གནས་སོ། །དེ་ནས་མི་འམ་ཅིའི་བདག་པོ་དེས་ཨེ་མའོ་ངོ་མཚར་ཆེའོ་སྙམ་དུ་རྣམ་པར་བསམས་ནས་སླར་ཡང་སྨྲས་པ། བདག་གི་གཞོན་ནུ་འདི་ཐ་མལ་པའི་སྐྱེས་པའི་ལས་ལ་ངེས་པར་སྦྱར་བའི་ཕྱིར་རིགས་པ་མ་ཡིན་ཞེས་ཟེར་ཏེ། བདག་གི་སྲས་རྣམས་
འདི་དང་ལྷན་ཅིག་ཏ་ལ་བདུན། །ལྕགས་ཀྱི་རང་བཞིན་ཕག་མོ་བདུན་པོ་རྣམས་ཀྱང་ནི། །ལྕགས་ཀྱི་རང་བཞིན་གལ་ཏེ་མདས་ནི་ཕིགས་གྱུར་ན། །དེ་ནས་ཡིད་འཕྲོག་མ་ནི་ཁྱོད་ལ་རབ་ཏུ་སྦྱིན། །དེ་ལྟར་བགྱི་ཞེས་བྱ་བ་ཡང་བྱང་ཆུབ་སེམས་དཔས་སོ་སོར་ཐོབ་པར་ཏ་ལ་བདུན་དང་ཕག་མོ་བདུན་ཡང་གྲོང་ཁྱེར་ལས་
ཕྱི་རོལ་དུ་མི་འམ་ཅིའི་རྒྱལ་པོས་བཙུགས་ཤིང་གནས་སོ། །དེ་ནས་བྱང་ཆུབ་སེམས་དཔའ་དང་ལྷན་ཅིག་ཏུ་མིའམ་ཅིའི་གཞོན་ནུ་ཐམས་ཅད་ལག་པ་ན་གཞུ་ཐོགས་པ་རྣམས་ཡབ་འཁོར་དང་བཅས་པ་རྗེས་སུ་འགྲོ་ཞིང་འབེན་གྱི་གནས་སུ་སོང་བར་གྱུར་ཏོ། །འཁོར་རྣམས་ཀྱིས་རྣམ་པར་བཤམས་

པའི་གདན་ལ་ཉེ་བར་གནས་པའི་ལྗོན་པ་ལ་སྔོན་རོལ་ཉིད་དུ། ལྕགས་ཀྱི་འབེན་རྣམས་ཐམས་ཅད་རྣོ་བའི་གདོང་ཅན་གྱིས། །སླར་ཡང་འཕགས་པའི་སྲས་ཀྱིས་འབིགས་པར་གྱུར་པ་ནི། །དེ་ལྟར་བསམ་ཞིང་མཆི་མ་དང་བཅས་མིག་ལྡན་པ། །ཡིད་འཕྲོག་མ་ནི་རྣམ་འཁྲུགས་ཉིད་དུ་
སོང་བར་གྱུར། །དེ་ནས་ལྗོན་པའི་བདག་སྐྱེས་དེ་རྣམས་ཀྱིས་ནི་དེར། །འདུས་པ་ཆེན་པོར་སྟོབས་ཀྱིས་ཤིན་ཏུ་ང་རྒྱལ་ཅན། །ལ་ལ་ཞིག་གིས་རྣོ་བའི་མདའ་ཡིས་ཏ་ལ་གཅིག །ཕིགས་པར་གྱུར་ཏེ་འགའ་ཞིག་གིས་ནི་ཏ་ལ་གཉིས། །དེ་ཙམ་གྱི་དཔུང་པའི་སྟོབས་དང་ལྡན་པ་ཉེ་བར་གནས་པའི་མི་འམ་ཅི་
གཞོན་ནུ་དེ་རྣམས་ལ། སྔོན་དུ་ཁུ་ཚུར་བརྟན་བྱས་ཏེ། །མི་གཡོའི་མིག་ཅན་མི་གཡོ་བར། །ནོར་བཟངས་གཞུ་ནི་བདུངས་བྱས་ནས། །རྣོ་བའི་མདའ་ནི་འཕངས་པར་གྱུར། །དེ་ནས་ལྕགས་ཀྱི་རང་བཞིན་ཏ་ལ་དེ་རྣམས་ཕུག་བྱས་ནས། །ལྕགས་ཀྱི་རང་བཞིན་ཕག་མོ་བདུན་པོ་དེ་རྣམས་
ཀྱང་། །ས་འོག་མཐོང་བ་དང་འདྲ་མདའ་ནི་འདོད་ལྡན་བྱས། །ལྟོང་ནི་ནུབ་ཅིང་རྩ་ལ་རབ་ཏུ་ཞུགས་པར་གྱུར། །དེ་ནས་གློ་བུར་ཉིད་དུ་ལེགས་སོ་ལེགས་སོ་ཞེས་བྱ་བ་ངོ་མཚར་བས་ཀུན་ནས་འཁོར་བའི་སོར་མོ་དང་ལྡན་པའི་མ་ལུས་པ་མི་འམ་ཅིའི་འཇིག་རྟེན་བྱང་ཆུབ་སེམས་དཔའ་ལ་མངོན་
དུ་ཕྱོགས་པ་བྱུང་བར་གྱུར་ཏེ། མི་འམ་ཅིའི་བདག་པོ་ཡང་མཆོག་ཏུ་ངོ་མཚར་སྐྱེས་པར་གྱུར་ཏོ། །འབེན་རྣམས་རྣོ་བའི་གདོང་ཅན་གྱིས་ནི་འབིགས་འགྱུར་བ། །བདག་ཉིད་ཆེན་པོ་སྟོབས་ཆེན་ལྡན་པ་དེ་ཡིས་ནི། །དགོད་པའི་འོད་ཀྱིས་སྣང་བར་བྱས་པའི་སོ་ཡི་ཕྲེང་། །ཡིད་འཕྲོག་མ་ཡི་
བཞིན་ནི་དེ་ལྟར་བླང་བར་འགྱུར། །དེ་ནས་མི་འམ་ཅིའི་བདག་པོས་ཕོ་བྲང་དུ་འོངས་ཏེ། སླར་ནོར་བཟངས་ལ་སྨྲས་པ། གཟུགས་དང་ལང་ཚོ་མཉམ་པར་རྣམ་པར་བརྒྱན་པ་རྣམས། །བདག་གི་བུ་མོའི་དབུས་སུ་འཇུག་པ་ཁྱོད་ཀྱིས་ནི། །གློ་བུར་དུ་ནི་ལྷན་ཅིག་ཆོས་སྤྱོད་རང་གིས་ནི། །གལ་
ཏེ་རིག་པར་གྱུར་ན་དེ་བས་དེ་སྦྱིན་བྱ། །དེ་ལྟར་བགྱི་ཞེས་བྱ་བ་སོ་སོར་མཉན་ནས། བྱང་ཆུབ་སེམས་དཔས་རང་གི་གནས་སུ་འོངས་ཏེ། མི་འམ་ཅི་མོ་འབངས་མོ་རྒན་མོ་དེ་ཡིད་འཕྲོག་མ་ལ་བཏང་བར་གྱུར་ཏེ། གལ་ཏེ་གཟུགས་དང་ལང་ཚོ་དང་། །ཆ་བྱད་དང་རྒྱན་མཉམ་པའི་སྲིང་མོ་རྣམས་ཀྱི་

དབུས་སུ་གནས་པའི་ཡིད་འཕྲོག་མ་ཁྱོད་ཀྱིས་ཤེས་པར་གྱུར་ན། དེ་ནས་བདག་གིས་དེ་ཁྱོད་ཀྱི་ཆུང་མ་ཉིད་དུ་སྦྱིན་པར་བྱ་ཞེས་ཟེར་རོ། །འདི་ཡང་ཤིན་ཏུ་དཀའ་བ་ཁྱོད་ཀྱི་ཕས་ཉེ་བར་བཀོད་པ་འདི་ལ་ཐབས་གང་ཡིན་པ་ཞེས་འདྲིའོ། །དེ་ནས་ཡིད་འཕྲོག་མས་
སྨྲས་པ། བདག་གི་སྲིང་མོ་ཀུན་གྱི་ནང་ནས་ནི། །གོས་ཀྱིས་བསྒྲིབས་པའི་རྐང་པ་རྐང་གདུབ་ཅན། །རྐང་གདུབ་གཉིས་པོ་རབ་ཏུ་གསལ་བ་ནི། །དེ་ཡི་དབུས་སུ་བདག་ནི་འབྱུང་བར་འགྱུར། །དེ་བས་ན་མཚན་མ་འདི་ལ་བལྟས་ནས་བདག་ནི་འཕགས་པའི་སྲས་ཀྱིས་སྲིང་མོ་རྣམས་ཀྱི་དབུས་ན་
གནས་པ་གཟུང་བར་བྱ་ཞེས་ཟེར་རོ། །འབངས་མོ་དེས་ཀྱང་བྱང་ཆུབ་སེམས་དཔའ་ལ་དེ་ལྟར་སྨྲ་བར་བྱའོ། །དེ་ནས་ནོར་བཟངས་ཡིད་དགའ་བ་མི་འམ་ཅིའི་བདག་པོས་ཡང་དག་པར་བོས་པ་དེ་དང་དེར་ཉེ་བར་འོངས་ཏེ། ལང་ཚོ་དང་གཟུགས་དང་། རྒྱན་མཉམ་པར་དེ་རྣམས་གློག་ལྟར་སྣང་བར་གྱུར་
པའི་མི་འམ་ཅི་མོ་རྣམས་མཐོང་བར་གྱུར་ཏོ། །དེ་ནས་ལྗོན་པས་གཞོན་ནུ་དེ་ལ་སྨྲས་པ། གང་ཞིག་ཁྱེད་ཀྱིས་མཛའ་མོ་དེ་ཟུང་ཅིག་ཅེས་ཟེར་ཏེ། དེ་ནས་རྐང་པ་གཉིས་ཀྱིས་གསལ་བར་བྱས་པ་དེས། །གསལ་ཞིང་འོད་དང་ལྡན་པའི་སྐྱོད་པའི་རྐང་གདུབ་ཀྱིས། །ས་ལ་རྣམ་པར་འབྲེལ་
པས་ལྟ་བའི་ཡིད་འཕྲོག་མ། །ངོ་ཚེའི་གདོང་ཅན་ལག་པའི་རྩེ་མོས་བཟུང་བར་གྱུར། །དེ་ནས་ལྗོན་པ་སྙིང་དགའ་བས་ནོར་བཟངས་ལ་སྨྲས་པ། ཚེ་དང་ལྡན་པས་བར་ཆད་མེད་པར་བདག་གི་བཀའ་རྣམས་ཐམས་ཅད་བསྒྲུབས་ཏེ། དེ་བས་ན་ཡིད་འཕྲོག་མ་འདི་ཁྱོད་ཀྱིས་ལྷན་ཅིག་ཆོས་སྤྱོད་མ་སོ་སོར་
བཟུང་བར་མཛོད་ཅིག །གཞན་ཡང་། གང་ཕྱིར་སྔོན་དུ་འཇམ་པའི་ལུས་ཅན་ཁྱོད་ནི་ངལ་བྱས་པ། །མངོན་པར་འོངས་པ་བརྩེ་བ་བྲལ་བ་བདག་གིས་དོན་མེད་ཁྱོད། །དེ་ནི་གཞོན་ནུ་དུལ་བའི་ངོ་བོ་བཟོད་པར་འོས་པ་སྟེ། །གང་ཞིག་བླ་མའི་སྐྱེ་བོ་མཁས་རྣམས་བཟོད་མིན་དེ་ནི་ཅི། །ནོར་བཟངས་ཀྱིས་
སྨྲས་པ། འོ་ན་བླ་མ་རྣམས་ཀྱིས་བཀའ་རབ་ཏུ་སྦྱིན་པས་བདག་ནི་རྗེས་སུ་འཛིན་པ་སྟེ། ལྕི་བའི་སེམས་ལྡན་བླ་མ་རྣམས། །གང་ཞིག་ཉིད་ནི་བྱ་བ་སྟེ། །བཀའ་ནི་རབ་སྦྱིན་མཁས་པ་ཉིད། །དེ་རྣམས་ལས་ནི་དེ་ཉིད་སྐྱེ། །དེ་ནས་ལྷའི་གཞོན་ནུ་ལྷའི་བུ་མོ་དང་ལྷན་ཅིག་པ་འདྲ་བར་མིའམ་ཅི་མོ་དེ་དང་ལྷན་ཅིག་ལྗོན་པའི་ཕོ་བྲང་དུ་

དུས་ཅུང་ཟད་ཅིག་གནས་ཏེ། བྱང་ཆུབ་སེམས་དཔས་མི་འམ་ཅིའི་བདག་པོ་ལ་སྨྲས་པ། ལྷ་ལགས་གལ་ཏེ་བཀའ་དྲིན་ཡོད་ན། དེ་ནས་ཡིད་འཕྲོག་མ་དང་ལྷན་ཅིག་ཏུ་ཡབ་ཀྱི་ཕོ་བྲང་དུ་འགྲོ་བར་བགྱིའོ་ཞེས་ཟེར་རོ། །དེ་ནས་ལྗོན་པས་ཅི་ལྟར་གཞོན་ནུ་འདོད་པ་དེ་ལྟར་བྱའོ་ཞེས་སྨྲས་ནས། བུ་མོ་
རྣམས་ལ་སྨྲས་པ། བུ་མོ་རྣམས་སོང་ལ་གྱོས་པོའི་རིགས་ལ་མངོན་པར་འཇུག་པའི་ཡིད་འཕྲོག་མ་བརྒྱན་པར་མཛོད་ཅིག་ཅེས་ཟེར་རོ། །དེ་རྣམས་ཀྱིས་ཀྱང་དེ་ལྟར་བགྱིའོ་ཞེས་བྱ་བ་སོ་སོར་མཉན་ནས། སྲིང་མོ་ཁྱོ་བོ་ཡོན་ཏན་མཐོང་དང་ལྷན་ཅིག་ཏུ། །གྱོས་པོའི་རིགས་ལ་ཁྱེད་ནི་དེ་རིང་འགྲོ་འགྱུར་ཏེ། །
སྲིང་མོ་དེ་ལྟར་མཆི་མ་དང་བཅས་མིག་རྣམས་ཀྱིས། །ཆོ་ག་བཞིན་དུ་མི་འམ་ཅི་མོ་དེ་བརྒྱན་གྱུར། །བདག་ཅག་གིས་ནི་བརྒྱན་བྱ་མིན། །རང་གི་མཛེས་པས་འདི་བརྒྱན་པ། །དེ་ལྟར་རྒྱན་རྣམས་འདི་ཡི་ནི། །ལུས་ལ་ངོ་ཚར་བཅས་ལྟར་གནས། །དེ་ནས་ཡིད་འཕྲོག་མ་རྒྱན་རྫོགས་པ། སྲིང་མོ་རྣམས་ཀྱིས་
རྗེས་སུ་འགྲོ་བར་གྱུར་པས་དུལ་བ་དང་བཅས་པས་ཉེ་བར་འོངས་ཏེ། ཡུན་རིང་ཕྱག་རྣམས་དཔག་མེད་བཞིན་གྱི་ཆུ་སྐྱེས་ཅན། །མཆི་མ་དང་བཅས་ཉེ་བར་སྐྱེ་བོས་རྣམ་བལྟས་པ། །ཕ་དང་མ་ཡིས་མཆི་མ་དང་བཅས་མིག་ལྡན་པ། །སྐད་ཅིག་རྐང་པ་མཆི་མའི་ཐིགས་པ་རྣམས་ཀྱིས་སྦངས། །ཁྱེད་ནི་མེད་
པར་བདག་ནི་བརྟེན་པ་མི་འཐོབ་སྟེ། །བུ་མོ་ནམ་ཞིག་ཚེ་ན་སླར་ཡང་འོངས་པར་འགྱུར། །དེ་ལྟར་རྗོད་པར་བྱེད་ཅིང་མས་ནི་ཡིད་འཕྲོག་མ། །སྐད་ཅིག་ཏུ་ནི་ཀུན་ནས་བརྟེན་ཏེ་ནུས་མིན་དུ། །དེ་ནས་མིའམ་ཅིའི་བདག་པོས་འབྱུང་བར་འགྱུར་བའི་བུ་མོ་དང་བྲལ་བས། སྡུག་བསྔལ་གྱིས་
ཁྱབ་པའི་བདག་ཉིད་ཇི་ལྟར་ཡང་བརྟན་པར་བྱས་ནས་ཡིད་འཕྲོག་མའི་མ་ལ་སྨྲས་པ། གསལ་བའི་ཉི་མའི་དཀྱིལ་འཁོར་འདི་ནི་མཁའ་ལ་ཆ་ནི་གསུམ་དུ་སོང་བ་ལ། །སེམས་རྣམས་སྦེད་ཅིང་སྐད་ཅིག་ལུས་ནི་འཛིན་པ་རྣམས་ལ་ཉི་མའི་དྲོད་ནི་བརྟེན་འགྱུར་ཏེ། །གཞོན་ནུ་འདི་ནི་ཁྱོད་ཀྱི་བུ་མོ་ཆུ་བྲལ་པད་མོ་
ལྟར་ནི་རྙིང་པར་འགྱུར་བ་སྟེ། །དེ་བས་སོང་ཤིག་སླར་ཡང་འོངས་འགྱུར་ཏེ། །མི་བརྟན་པ་ནི་ཡོངས་སུ་དོར་བར་མཛོད། །དེ་ནས་ནོར་བཟངས་ཀྱི་སྤྱི་བོའི་གཙུག་གི་ནོར་བུ་བཅིངས་ནས་ལྗོན་པས་སྨྲས་པ། ནོར་བུ་འདི་ཡི་མཐུ་ཡིས་ནི། །མཐུ་ནི་ཆེན་པོ་ཁྱོད་ལ་ཡང་། །ལྷ་ཡི་ལྟར་ནི་ཐོགས་མེད་པ། །

ནམ་མཁའ་ལས་ནི་འགྲོ་བར་འགྱུར། །དེ་བས་ད་ནི་ཡིད་འཕྲོག་མ་ལ་དམིགས་ནས་ནམ་མཁའི་དཀྱིལ་དུ་འབྱུང་སྟེ། ཚེ་དང་ལྡན་པ་ཉེ་བར་རྒྱས་པའི་ཡབ་ཀྱི་ཕོ་བྲང་དུ་འགྲོ་བར་མཛོད་ཅིག །བདག་གི་བུ་མོ་འདི་ལེགས་དང་། །དཔལ་ལྡན་རྣམས་ཀྱིས་ཁྱེད་མདུན་འགྲོ། །ཚིག་
དང་དོན་དག་ལྟར་ཁྱེད་ཅག །ཕན་ཚུན་བརྟེན་པ་འབྱུང་གྱུར་ཅིག །དེ་ནས་འཕྲོག་པའི་སེམས་ལྡན་བླ་མ་དག་བཏུད་ནས། །སྐད་ཅིག་ཏུ་ནི་མི་འམ་ཅི་མོའི་སྐྱེ་བོ་འཁྱུད་བྱས་ཏེ། །ཀུན་ནས་འཕྲོས་པའི་རྒྱན་དང་རིན་ཆེན་འོད་ལྡན་པ། །བཟའ་མི་གཉིས་ནི་མྱུར་དུ་ནམ་མཁའ་ལ་ནི་སོང་བར་གྱུར། །ཕྱིར་
ལྟའི་མིག་ཅན་མཆི་མའི་ཆ་ནི་གྲོལ་བཞིན་པ། །བདག་པོ་དང་ནི་ལྷན་ཅིག་ནམ་མཁའ་ལ་འཇུག་པ། །མི་འམ་ཅི་མོ་དེ་ལ་མཆི་མ་བྱུང་བའི་མས། །ཇི་སྲིད་མིག་ལས་འདས་པ་དེ་སྲིད་མཐོང་བར་འགྱུར། །དེ་ནས་ནོར་བཟངས་ཀྱིས་རང་གི་སྐྱེ་བོ་དང་བྲལ་བས་སྐྲག་པའི་ཡིད་འཕྲོག་མ་ལ་ཡང་ནས་ཡང་དུ་མཆི་མ་
རྣམས་ཕྱིས་ནས། རྔུལ་གྱི་ཆ་དང་བཅས་པ་དེ་ཡི་གདོང་ནི་དེས་མཐོང་ནས། །པདྨ་རྒྱས་པ་ཆུ་ཡི་ཐིགས་པས་རྗེས་སུ་འབྲེལ་པ་ལྟར། །ཉིན་པར་འགྲོ་ཞིང་ཉི་མའི་འོད་ཟེར་བཟློག་པའི་དོན་དུ་ནི། །ལག་པ་གཉིས་ནི་བཏེག་ནས་སྣམ་བུ་ཆེན་པོ་བརྐྱང་བར་གྱུར། །དེ་ནས་གློ་བུར་ཉིད་དུ་གླང་པོ་ཆེའི་གྲོང་ཁྱེར་དང་ཉེ་
བར་གྱུར་ཏོ། །སྲབ་ཅིང་ཡིད་འཕྲོག་ནོར་ཅན་མཛེས་པ་ལ་ནི་དམིགས་བྱས་ནས། །རླུང་གིས་ཅུང་ཟད་སྣམ་བུ་བསྐྱོད་པར་བྱས་པས་འགྲོ་བ་ནི། །རིག་པ་འཛིན་པ་འདི་ནི་ནམ་མཁའ་ལས་ནི་འོངས་སམ་ཅི། །ཞེས་ནི་གྲོང་ཁྱེར་སྐྱེ་བོ་མི་གཡོ་མིག་ཅན་གྱིས་མཐོང་གྱུར། །དེ་ནས་ནོར་བཟངས་ནམ་མཁའི་
དཀྱིལ་ནས་ཡང་དག་པར་བརྒལ་བ་མཐོང་སྟེ། ཡིད་དགའ་བའི་སྒོ་བ་རྣམས་ཀྱིས་རྒྱལ་པོ་ནོར་ཅན་ལ་ལྷ་ལགས། ཡིད་འཕྲོག་མ་དང་ལྷན་ཅིག་ཏུ་ནོར་བཟངས་འོངས་སོ་ཞེས་བྱ་བ་སྨྲ་ཞིང་གནས་པར་གྱུར་ཏོ། །དེ་ནས་རྒྱལ་པོ་དེས་བདེན་ནམ་འོན་ཏེ་མིན་སྙམ་ནས། མཛའ་བོ་རྣམས་ནི་སྡུག་བསྔལ་
གྱིས་དད་པར་བྱ་ཞེས་བྱ་བ་སྨྲས་ཏེ། སྟན་ལས་ལངས་ཏེ་མི་འམ་ཅི་མོ་དང་བཅས་པའི་ནོར་བཟངས་ཉིད་ཞུགས་པ་མཐོང་ནས། འདི་ནི་རྨི་ལམ་ཡིན་ནམ་འོན་ཏེ་ཅི་སྙམ་དུ་རབ་ཏུ་དགའ་བས་ཡང་ནས་ཡང་དུ་འཁྱུད་དེ། འདི་མའི་དྲུང་དུ་ཁྲིད་པར་གྱུར་ཏོ། །དེ་ནས་ཀུན་ནས་ལངས་ཏེ་བྲལ་བར་མི་ནུས་

པ། །རབ་ཏུ་དགའ་བའི་མཆི་མའི་ཆུ་ཡིས་མིག་འགགས་པ། །མས་ནི་ཡུན་རིང་པོ་ནས་བདག་སྐྱེས་དེ་མཐོང་སྟེ། །སྐད་ཅིག་ཀུན་ནས་འཁྱུད་དེ་སྤྱི་བོར་འོ་བྱས་གྱུར། །དེ་ནས་ཡིད་འཕྲོག་མས་བཙུན་མོ་ལ་མངོན་པར་ཕྱག་བཙལ་ནས་སྨྲས་པ། །བདེ་བའི་འཕགས་པའི་སྲས་ཀྱིས་ཀྱང་། །བདག་
གི་དོན་དུ་རྩོལ་བྱས་པ། །གང་ཞིག་སྡུག་བསྔལ་རྣམས་མྱོང་བ། །འཕགས་མས་བདག་གི་དེ་བཟོད་མཛོད། །བཙུན་མོས་སྨྲས་པ། བུ་མོ་ཁྱོད་ནི་བདག་གི་རིགས་ལ་བསྔགས་པར་བྱ་བ་སྟེ། ཅིའི་ཕྱིར་ཁྱོད་ཀྱི་སྟེང་དུ་བདག་ནི་ཁྲོ་བ་དང་ལྡན་པ་བྱུང་བར་གྱུར་པ་དེ་བས་ན་ལྟོས་ཤིག །
ལྟོ་འཕྱེ་ཆེན་པོའི་ནོར་བུ་ནི། །གྲིབ་མས་གསལ་བྱས་ས་འོག་གི། །རྒྱ་མཚོ་ལས་ནི་རྩོལ་མ་བྱས། །སུ་ཞིག་རིན་ཆེན་རྙེད་པར་འགྱུར། །དེ་ནས་དྲི་མ་མེད་པ་གྲགས་པའི་གཏེར་ནི་འོངས་པ་ཡིས། །བདག་ཉིད་ཆེན་པོ་ཐོས་ཆེན་གྲལ་ལ་གནས་པའི་སྲས་ལ་ནི། །ཡུན་རིང་གྲོང་ཁྱེར་ལྷ་ཡི་རྣམ་པར་
འབྱོར་པ་ལྟ་བུ་ཡིས། །དུས་མིན་ཟླ་འོད་མི་ཡི་བདག་པོས་བྱེད་དུ་བཅུག་པར་གྱུར། །རིགས་བཟངས་པ་དང་ཁྲོ་བ་ཕྲག་དོག་གི་གཏམ་ཐོས་པའི་རྒྱལ་པོ་ནོར་ཅན་གྱིས་གཉིས་སྐྱེས་འདི་བསད་པར་བྱ་བ་མ་ཡིན་སྙམ་དུ་དགོངས་ནས་རང་གི་ཡུལ་ནས་བཏོན་པར་གྱུར་ཏོ། །བཅོམ་ལྡན་འདས་ཀྱིས་སྐྱེས་རབས་
འདི་དགེ་སློང་རྣམས་གྱི་མདུན་དུ་འདི་ལྟར་བསྟན་པར་མཛད་དེ། བརྩོན་འགྲུས་སྟོབས་དང་ལྡན་པ་ནི། །ནོར་བཟངས་རྒྱལ་སྲས་བདག་ཡོད་འགྱུར། །གཟུགས་དང་སྐལ་བཟང་ལྡན་པ་ནི། །མི་འམ་ཅི་མོ་གྲགས་འཛིན་གྱུར། །དེ་ཡི་དོན་དུ་བདག་གིས་ནི། །སྔར་ནི་སྡུག་བསྔལ་དེ་དེ་ཐོབ། །
ཕལ་ཆེར་འདོད་པས་ཁེངས་བདག་ཉིད། །ཉོན་མོངས་རྣམས་ཀྱི་སྣོད་དུ་གྱུར། །དེ་ཕྱིར་ཡུལ་སྐྱེས་བདེ་བའི་ཆ་ནི་དང་པོར་རྟོགས་བྱས་ནས། །ཡིད་འཕྲོག་ཡུལ་འདོད་རྣམས་ཀྱི་ཡོངས་སུ་སྨིན་ལ་དགའ་བ་ནི། །བདག་ཉིད་འདོད་པ་རྣམས་ཀྱིས་རིང་པོར་འདི་རྣམས་ཡོངས་སྤངས་སྐད། །འདོད་
པ་རྣམས་ནི་སྐད་ཅིག་སྦྲུལ་ལྟར་ཡུན་རིང་སྤང་བར་མཛོད། །མི་འམ་ཅི་མོ་དང་ནོར་བཟངས་ཀྱི་སྐྱེས་པའི་རབས་ཏེ་སྐྱེས་རབས་ལྔ་པའོ།། །།བསམ་གཏན་གྱི་ནི་མར་མེ་སྣང་བ་ཡིས། །སྣང་བ་ཐོབ་ཀྱང་མྱ་ངན་འདས་མི་འགྲོ། །གང་ཕྱིར་བྱང་ཆུབ་ཐོབ་པར་འདོད་པའི་ཡིད། །དེ་ནི་

སེམས་ཅན་ཕན་རྗེས་འབྲེལ་ཕྱིར་རོ། །འདི་ལྟར་རྗེས་སུ་ཐོས་ཏེ། རིག་བྱེད་ཀྱི་དེ་ཁོ་ན་ཉིད་ཡང་དག་པར་རྟོགས་པ་དང་། སྣ་ཚོགས་པའི་བསྟན་བཅོས་རྣམས་ལ་གོམས་པས་སྲིད་པ་དང་བྲལ་བའི་བློ་མཁས་པ་དུ་མ་རྣམས་ཀྱི་མདུན་ས་རྣམས་ལ་གྲགས་པས་ཁྱབ་པ།
རང་གི་གྲུབ་མཐའི་བྱ་བ་རྣམས་ལ་རྩེ་གཅིག་པ། ཁྱིམ་གྱི་གནས་ལ་ལྷག་པར་གནས་ཤིང་དུས་གཅིག་གི་ཚེ་ན་བྱང་ཆུབ་སེམས་དཔའ་བྲམ་ཟེ་འབར་བ་ཅན་ཞེས་བྱ་བ་བྱུང་བར་གྱུར་ཏོ། །བདག་ཉིད་ཆེན་པོ་དེ་ཡང་ཁྱིམ་ན་གནས་པའི་སྐྱོན་ཤེས་པ་རབ་ཏུ་ཞི་བའི་བདེ་བ་མངོན་པར་འདོད་པ་ཡོ་བྱད་ཀྱིས་
ཡོངས་སུ་གང་བའི་ཁྱིམ་ན་ཡང་དགའ་བ་ཐོབ་པར་མ་གྱུར་ཅིང་དུས་གཅིག་གི་ཚེ་ན་འདི་ལྟར་བསམས་ཏེ། ཡོ་བྱད་ཡོད་ན་རྒྱགས་པ་སྐྱེ་འགྱུར་ཏེ། །དེ་ཡོད་ན་ནི་རབ་ཞི་ག་ལ་འགྱུར། །རབ་ཞི་མེད་ན་ངོ་ཚ་བྲལ་བ་ནི། །དྲི་མ་ཅན་གྱི་ལས་ནི་སྐྱེ་བོས་འདོད། །དགའ་མིན་ཡང་དག་སྦྱོར་བའི་སྡུག་བསྔལ་སྐད་ཅིག་ཙམ། །
སེམས་ཀྱི་བདེ་བ་སྐད་ཅིག་ཏུ་ནི་དགའ་བྲལ་དུས། །ནོར་ནི་རྙེད་པར་བྱ་ཕྱིར་ཡིད་ནི་ངལ་རྣམས་ཀྱི། །གལ་ཏེ་དེ་ཕྱིར་འདོད་པའི་སྡུག་བསྔལ་འབྲས་བུ་མེད། །དེ་ལྟར་ཁྱིམ་པ་རྣམས་ནི་རྟག་ཏུ་སེམས་འཁྲུགས་པའི། །རང་གི་སྐྱེ་བོས་མཉེས་གཤིན་ངེས་འབྲེལ་ཡིད་ལྡན་པ། །བདེ་བ་ཞེས་བྱ་འབྲས་
མེད་མངོན་པའི་ང་རྒྱལ་བརྟེན། །ཁྱིམ་པ་རྣམས་ལ་ཡིད་བདེ་ཅུང་ཟད་ཀྱང་ནི་མེད། །ཁྱིམ་ཞེས་བྱ་བ་དེ་ལྟར་དགའ་བ་སྤངས་ནས་ནི། །འཆིང་བ་བྱེད་པ་འདི་ནི་མྱུར་དུ་བདག་འདོད་པ། །དཀའ་ཐུབ་རྣམས་ནི་མངོན་པར་འཕེལ་ཕྱིར་ནགས་ནང་དུ། །དེ་བས་རབ་ཏུ་ཞི་བའི་གནས་ནི་བདག་གིས་བརྟེན། །
དེ་ལྟར་བདག་ཉིད་ཆེན་པོ་དེས་བསམས་ནས་ཁྱིམ་ན་གནས་པ་ཡོངས་སུ་དོར་ཏེ། ཆུ་གཡོ་བ་མེད་ཅིང་འབབ་པ་འགྲམ་གྱི་ཤིང་མེ་ཏོག་སྐྱེས་པ་རྣམས་ཀྱིས་ཉེ་བར་མཛེས་པ། བསྟན་བཅོས་རྣམས་ལ་གོམས་པས་དྲི་མ་དང་བྲལ་བའི་ཤེས་རབ་དང་འདྲ་བའི་ཆུ་བོས་བརྒྱན་པར་བྱས་པའི་ས་འཛིན་གྱི་
ཕྱོགས་གཅིག་ན། རི་དགས་ཀྱི་ཚོགས་དབུགས་འབྱུང་བའི་སོ་རྣམས་ཀྱིས་རྩྭ་སྔོན་པོ་གཅོད་པས་ཡིད་དགའ་བས་པདྨོའི་ནགས་ཀྱི་ཚོགས་ན་ངང་པ་དང་། ངང་སྐྱ་དང་། ངུར་པ་རྣམས་ཀྱིས་ཉེ་བར་མཛེས་པའི་རྣལ་འབྱོར་པ་རྣམས་ཀྱི་ཡིད་དང་རྗེས་སུ་མཐུན་པའི་ཤིན་ཏུ་ཆེ་བ་ནགས་ཀྱི་ནང་འགའ་ཞིག་

ན། ཁྲི་སྙན་ས་ལེའི་པགས་པས་བྲང་གི་མཐིལ་འདྲེས་པར་བྱས་པའི་གནས་ཀྱི་ཁྱད་པར་ཐོབ་པ། ཀུན་ནས་དགའ་བ་དང་འདྲ་བ་ཚངས་པའི་དཔལ་གྱིས་འཁྱུད་པར་བྱ་བའི་གཟུགས་ཅན་ཆོག་ཤེས་པ། གཟུགས་དང་ལྡན་པ་དང་འདྲ་བར་ཤིང་འགའ་ཞིག་ལ་བརྟེན་ནས་རྣལ་འབྱོར་དང་ཡིད་
འབྲེལ་པས་དཀའ་ཐུབ་བྱ་བའི་ཕྱིར་བརྩམས་ཏེ། བསམ་གཏན་ལ་ནི་རྩེ་གཅིག་ཡིད་ལྡན་དབང་པོས་རྣམ་རྒྱལ་བ། །ཆོག་ཤེས་རྙེད་པས་བདེ་བ་སྙིང་རྗེ་དང་ནི་ལྡན་པ་དང་། །རྒྱ་ཆེན་བློ་ལྡན་གཉིས་སྐྱེས་དེས་ནི་གང་ཞིག་བརྟེན་པ་ནི། །ཤིང་དེས་ཤིང་ཉིད་དོན་ནི་བྱས་པ་དགའ་བཞིན་འདོད་པར་
འགྱུར། །རྩྭ་ཡི་གདིང་བ་བཏིང་བྱས་ནས། །སྣ་ཡི་རྩེ་མོར་མིག་བརྟན་པས། །བསྒོམ་པ་རྣམས་ཀྱི་མཆོག་དེས་ནི། །བསྒོམ་བྱ་རྩེ་གཅིག་ཡིད་འཛིན་འགྱུར། །བརྩོན་འགྲུས་ཕ་རོལ་ཕྱིན་པའི་ལམ། །བཞོན་པ་ཉེར་བསགས་ངལ་བ་ནི། །བསམ་གཏན་ཕ་རོལ་ཕྱིན་བསྟན་པ། །དེ་
ནས་དེ་ནི་ངལ་སོས་གྱུར། །འདོད་པ་དགེ་བ་རྣམས་དང་ནི། །ཆོས་རྣམས་ལ་ནི་སོ་སོར་གནས། །རྟོག་བཅས་དཔྱོད་པ་དང་བཅས་པ། །རྣམ་དག་བདག་ཉིད་དབེན་པ་ལས། །དགའ་དང་བདེ་བ་མྱོང་བྱས་པ། །ཞི་བའི་བདུད་རྩི་མྱང་བྱས་ཏེ། །བསམ་གཏན་ལམ་ནི་ཐོབ་པའི་ཕྱིར། །བསམ་
གཏན་དང་པོ་དེས་ཐོབ་གྱུར། །རྟོག་མེད་དཔྱོད་པ་མེད་པ་དང་། །དེ་ནས་དཔྱོད་པ་ལ་མཁས་པ། །དེས་ནི་ནང་བདག་ཉིད་དང་བཅས། །བསམ་གཏན་གཉིས་པ་འཛིན་པར་འགྱུར། །རིམ་གྱིས་དགའ་བ་ལས་བྲལ་ཏེ། །དྲན་པ་དང་ལྡན་བཏང་སྙོམས་ལྡན། །བརྟན་པ་ལུས་བདེ་མྱོང་བ་ཅན། །
བསམ་གཏན་གསུམ་པ་དེས་ཐོབ་འགྱུར། །བཏང་སྙོམས་ཀྱིས་ནི་ཡོངས་དག་པ། །བདེ་སྡུག་དག་ནི་སྤངས་པའི་ཕྱིར། །དགའ་བས་འདོད་ཆགས་བྲལ་བའི་ཕྱིར། །དེ་ནས་བསམ་གཏན་བཞི་པ་བརྙེས། །དེ་ལྟར་འདི་ནི་བསམ་གཏན་བཞི་སྐྱེས་པར་བྱས་པ། གཟུགས་དང་ལྡན་པ་དང་འདྲ་
བའི་སྙིང་རྗེས་འཁྱུད་པ། ཉེ་བར་ཞི་བ་ལ་རྩེ་གཅིག་པས་དུད་འགྲོ་རྣམས་ལ་ཡང་གཉེན་དང་འདྲ་བར་ནགས་དེ་ན་དབུགས་འབྱུང་བའི་རྒྱུ་གནས་པར་གྱུར་ཏེ། རི་དགས་དང་ནི་ཕུག་རོན་རྨ་བྱ་རི་སྐེགས་རྣམས། །བསམ་བཟང་སྦྲུལ་དང་རི་དགས་རྣམས་ཀྱང་དེ་དང་དེ། །གནས་ནས་སློབ་མ་ལྟར་ནི་

ནགས་ཀྱི་ནང་དུ་ནི། །དེ་དང་ཉེ་བར་འོངས་ཏེ་རྣམ་པར་ངལ་བསོ་གྱུར། །དེ་ནས་དུས་གཅིག་གི་ཚེ་ན་བདག་ཉིད་ཆེན་པོ་དེས་སྐྱིལ་མོ་ཀྲུང་བཅས་པའི་དེའི་རྐང་པ་དང་ཉེ་བར་གནས་པའི་རི་དགས་ཕོ་མོ་གཉིས་ནི་བསམ་གཏན་གྱིས་གཡོ་བ་མེད་པའི་མིག་གིས་ཕུག་རོན་
མོ་མངལ་བཙའ་བ་དང་ཉེ་བར་རྩྭ་རྣམས་དང་རྩྭའི་དུམ་བུ་རྣམས་ཀྱང་མཆུས་བཟུང་ནས། རལ་པའི་ཚོགས་རྣམ་པར་བཅིངས་པའི་ཅོད་པན་གྱིས་མགོ་བོ་ལ་འདུག་ནས་ཅུང་ཟད་དམའ་བའི་ཚང་བརྩམ་པར་བྱས་ཏེ། དེར་སྒོ་ང་རྣམས་བཞག་ནས་རྩྭ་དང་ས་བོན་རྣམས་དང་འབྲས་བུ་རྣམས་ཟ་བར་འདོད་པས་
ནམ་མཁའ་ལ་སོང་སྟེ་ནགས་གཞན་རྣམས་ལ་གནས་ནས་ཡང་ནས་ཡང་དུ་འོངས་ཏེ། སྒོ་ང་དེ་རྣམས་གཟུང་ཞིང་རྣམ་པར་གནས་པར་གྱུར་ཏོ། །དེ་ནས་ཕུག་རོན་མོ་ནི་སྲབ་པའི་མཇུག་སྒྲོས་ཁྱབ། །དེ་ཡི་ཡན་ལག་ཀུན་ནས་བཙིར་བས་དྲོད་ནི་བསགས་པ་ཡི། །ཚང་ན་སྒོ་ང་དཀར་དང་དམར་བའི་ཡན་ལག་ཅན། །
ཕུག་རོན་ཕྲུག་པ་རྣམས་ནི་ཀུན་ནས་འབིགས་འབྱུང་འགྱུར། །དེ་ནས་ཕུག་རོན་མོ་ནི་ཕུག་པ་རྣམས་མཐོང་སྟེ། །ཡང་ཡང་ཟ་བར་འདོད་པས་མཆུའི་རྩེ་ཕྱི་བ་ནི། །རང་གི་བཀྲེས་ཆེན་མ་བསམས་པྲི་ཡང་ཀུ་ཏ་ནི། །མ་རྨོས་འཁྲུངས་པའི་འབྲས་བུ་རྣམས་ཀྱིས་དེ་རྒྱས་གྱུར། །ཕུག་རོན་དེ་རྣམས་
ལུས་ལས་སྐྱེས་པ་རབ་འབྱུང་བ། །མ་ནི་ས་བོན་འཛིན་པ་ལ་ནི་བལྟ་བྱས་ནས། །སྐད་ཅིག་རབ་གཡོ་རྩེ་མོའི་སྒྲོ་ཅན་གདོང་རྣམས་ནི། །རབ་ཏུ་ཕྱེ་ཞིང་གནས་གྱུར་སྐད་ནི་གདོན་བྱས་པ། །དེ་ནས་བསམ་གཏན་རྫོགས་པའི་དུས་ན་ཤིང་དང་འབྲས་དོན་དུ། །དབང་པོ་ཞི་བ་ཐུབ་པ་དེ་ནི་ནགས་ནས་
འགྲོ་འདོད་པ། །ཕུག་རོན་མོ་ནི་རྩྭ་དང་ཤིང་གི་འབྲས་བུ་འཛིན་མཐོང་ནས། །ཚད་དང་ལྡན་པའི་མགོ་ལ་འབྲེལ་བཞིན་པ་ནི་གནས་པར་གྱུར། །དེ་ནས་བྱང་ཆུབ་སེམས་དཔས་ངེས་པར་བདག་གི་རལ་པའི་ཚོགས་འདི་རྩྭ་དང་ཤིང་བུའི་དུམ་བུས་ཚང་རྣམ་པར་བརྩམས་པའི་ཕུག་རོན་མོ་འདི་
བཙས་པ་སྟེ། གལ་ཏེ་ཡང་བདག་གིས་ལངས་ནས་ཤིང་རྣམས་དང་སྡོང་བུ་དང་རྩ་བ་དང་། འབྲས་བུ་རྣམས་འོངས་པའི་ཕྱིར་འགྲོ་བར་གྱུར་ན་དེ་ནས་ངེས་པར་དཀའ་ཐུབ་མ་འདི་ནི་གནས་འདིར་འོངས་ཏེ། འདི་རྣམས་དམར་བའི་རྐན་དང་ལྡན་པ་གསལ་བྱས་པ། །དེ་རིང་ཕུག་རོན་ཕྲུ་གུ་མཐོང་

བར་མ་གྱུར་པ། །ཤིང་རྣམས་ལ་ནི་ཡང་ཡང་མྱ་ངན་གྱིས་གནས་ཏེ། །ནམ་མཁའ་ལ་ནི་འཕུར་ནས་ཀུན་ནས་འཁོར་བར་འགྱུར། །ཨེ་མ་སྐྱེ་བ་བརྒྱར་འཁོར་བའི། །བག་ཆགས་འདི་ནི་རྗེས་སུ་འཇུག །དུད་འགྲོ་རྣམས་ཀྱང་ཕྲུ་གུ་ལ། །གང་ཕྱིར་མཉེས་གཤིན་ཀུན་ནས་འཕེལ། །གལ་ཏེ་
བུ་རྣམས་མེད་གྱུར་ན། །གཉེན་རྣམས་གྲོགས་པོ་ཉིད་གང་དུ། །རང་ཉིད་ན་མེད་ལ་འགྱུར་ཏེ། །གཉེན་བཤེས་ས་བོན་མེད་གང་ལ། །མཉེས་གཤིན་མེད་པ་ལ་སེམས་ནི། །མི་བདེ་རྣམས་ནི་ཡོད་མི་འགྱུར། །ཡིད་མི་བདེ་མེད་ཆགས་བྲལ་བ། །ཞི་བ་ལྡན་པ་བདེ་བར་གནས། །བུ་
ཞེས་བྱ་བའི་སྡུག་བསྔལ་རྣམས། །ཉོན་མོངས་ཀྱིས་རྨོངས་སྐྱེ་བྱས་ནས། །རྨོངས་པའི་སྐྱེ་བོ་ལ་ཐོབ་སྟེ། །ཕྱི་ནས་འགྱོད་པས་གདུང་པ་ཅན། །བ་ལང་རེ་ལྡེ་མི་འདོད་ཀྱང་ནི་སྟོབས་ལྡན་པའི། །རེ་ལྡེ་ཅན་གྱིས་ཇི་ལྟར་ནན་གྱིས་སྦྱོར་བར་བྱེད། །སྐྱེ་བོ་བློ་ངན་འདི་ནི་དགེ་དང་མི་དགེ་བས། །
སྲིད་པའི་རྒྱ་མཚོ་ལ་ནི་ལས་ཀྱིས་བསྐུལ་བར་འགྱུར། །དེ་ཕྱིར་ཕུག་རོན་ཕྲུ་གུ་རྣམས་ནི་ཇི་སྲིད་སྒྲོ་སྐྱེས་པར། །མ་གྱུར་བདག་གི་རལ་པའི་ཚང་ན་གནས་པ་དེ་སྲིད་དུ། །བསམ་གཏན་བདུད་རྩིས་ཉེ་བར་བསགས་པའི་སེམས་དང་ལུས་དགའ་བ། །འདིར་ནི་གཡོ་མེད་གཟུགས་དང་ལྡན་པ་ཉིད་དུ་
གནས་པར་བགྱི། །དེ་ལྟར་བྱང་ཆུབ་སེམས་དཔས་རྣམ་པར་བསམས་ཏེ་ཕུག་རོན་གྱི་ཕྲུ་གུ་རྣམས་ལ་རྗེས་སུ་བརྩེ་བས་དཀྲིས་པ་ལ་རྣམ་པར་མ་བརྩིས་པར་ཡང་སྐྱིལ་མོ་ཀྲུང་བཅིངས་ནས་བསམ་གཏན་གྱི་བདེ་བས་བདག་ཉིད་ཚིམ་ཞིང་གནས་སོ། །ཕུག་རོན་ཕྲུ་གུ་སྒྲོ་རབ་ཏུ་འཕེལ་བ་དེ་རྣམས་མ་
དང་ལྷན་ཅིག་ནམ་མཁའ་ལ་འཕུར་ཞིང་སོང་བ་རྣམས་ལ། དེ་དང་ཉེ་བར་གནས་པའི་ལྷ་མོས་ཀུན་ནས་ཉེ་བར་འོངས་ཏེ། བྱང་ཆུབ་སེམས་དཔའ་ལ་བལྟས་ནས་ངོ་མཚར་བས་ཀུན་ནས་ལྷག་པར་གནས་པའི་བློ་དང་ལྡན་པས་ཨེ་མའོ་བདག་ཉིད་ཆེན་པོ་དྲང་སྲོང་འདི་སེམས་ཅན་རྣམས་ལ་རྗེས་སུ་བརྩེ་
བ་སྟེ། གང་གི་ཕྱིར་སྔར་བྱུང་བའི་བསམ་གཏན་ལས་ལངས་ཏེ་ཕུག་རོན་རྣམས་ཀུན་ནས་བསྲུང་བའི་ཕྱིར་སླར་ཡང་བསམ་གཏན་གྱིས་བདག་ཉིད་གཡོ་བ་མེད་པར་བྱས་ཤིང་ཡང་དག་པར་གནས་ཏེ། བདག་ཉིད་ཆེན་པོ་འདི་ཡང་ཕུག་རོན་འདི་རྣམས་སོང་བ་རྣམས་ལ་ཡང་ཚང་འདི་

མགོ་བོ་ལས་ཀུན་ནས་མེད་པར་འགྱུར་བ་མ་ཡིན་ཏེ། དེ་བས་ན་བདག་གི་རལ་པའི་ཅོད་པན་ན་རྣམ་པར་བསགས་པའི་ཕུག་རོན་གྱི་ཚང་འདི་བཤིག་པར་བྱའོ་སྙམ་དུ་རྣམ་པར་བསམས་ནས། འགའ་ཞིག་སྒོ་ངའི་དུམ་བུ་རྣམས་ཀྱིས་ནང་ཁྱབ་པ། །ཤིན་ཏུ་ཐོབ་
པ་མཆོག་གི་ཚང་དེ་དེ་ཡིས་ནི། །རིམ་གྱིས་རིམ་གྱིས་འདབ་མ་ལྟར་ནི་འཇམ་པ་ཡི། །ལག་པ་གཉིས་ཀྱིས་མགོ་བོ་ལས་ནི་ཉེར་ཁྱེར་གྱུར། །ལྷ་མོ་དེ་ཡང་སོང་བ་ལ་བྱང་ཆུབ་སེམས་དཔས་བསམ་གཏན་ལས་སེམས་བཟློག་སྟེ། མགོ་བོའི་ཡང་བ་ཉིད་ཤེས་ནས་འདི་ལྟར་བསམ་ཞིང་གནས་
ཏེ། སྒྲོ་རྣམས་རབ་ཏུ་རྫོགས་པ་ཕུག་རོན་ཕྲུ་གུ་རྣམས། །མ་དང་ལྷན་ཅིག་ནགས་ཀྱི་ནང་དུ་སོང་བ་ལ། །ངེས་པར་གུས་པ་རྩེ་གཅིག་པ་ནི་སུ་ཞིག་གིས། །དེ་ཡི་ཚང་ནི་བདག་གི་མགོ་ལས་ཉེར་ཁྱེར་གྱུར། །དེ་ལྟར་རྣམ་པར་བསམས་ནས་བདག་ཉིད་ཆེན་པོ་དེས་ལངས་ནས་ཤིང་དང་ཀུ་ཤ་དང་མེ་ཏོག་
དང་འབྲས་བུ་རྣམས་འོངས་ཏེ་ཁྲུས་བྱས་པ། འཕྲོ་བའི་འོད་ཟེར་འབྱུང་བའི་མེ་ལ་བསྲེག་བྱས་ཉིན་ཕྱེད་ན། །དྲི་དང་འབྲེལ་པའི་འདམ་དང་བྲལ་བའི་འབྲས་བུ་ཉེར་ཟོས་ཏེ། །སྣ་ཡི་རྩེ་མོར་གནས་པའི་མིག་ལྡན་ཤིང་གི་འོག་ཏུ་ནི། །སེམས་གཅིག་པ་ནི་སླར་ཡང་རྣལ་འབྱོར་བརྩམས་པར་གྱུར། །དེ་ལྟར་
བསམ་གཏན་གྱིས་དེ་ཁོ་ན་ཉིད་རྣམ་པར་མཐོང་བ་མྱ་ངན་ལས་འདས་པ་ཉེ་བར་འགྲོ་བའི་ཕྱིར་ནུས་ཀྱང་བཅོམ་ལྡན་འདས་དེ་བྱང་ཆུབ་སེམས་དཔར་གྱུར་པ་ན་འཇིག་རྟེན་རྣམས་ལ་ཕན་པའི་ཕྱིར་ཉེ་བར་འཚེ་བ་མང་བའི་འཁོར་བ་ལ་ཡང་ཀུན་ནས་འཁོར་བར་འགྱུར་སྙམ་དུ་རྣམ་པར་བསམས་ནས་
སངས་རྒྱས་བཅོམ་ལྡན་འདས་ལ་མཆོག་ཏུ་དང་བ་བསྐྱེད་པར་བྱ་ཞེས་བྱ་བའོ། །དྲང་སྲོང་འབར་བ་ཅན་གྱི་སྐྱེས་པའི་རབས་ཏེ་སྐྱེས་རབས་དྲུག་པའོ།། །།ཤེས་རབ་བམ་ནི་བརྩོན་འགྲུས་ལྡན་པས་ཀྱང་། །བསོད་ནམས་ཆེན་པོ་རྣམ་པར་དག་པ་འམ། །མཐོ་བའི་བློ་ལྡན་ཆེན་པོ་
རྣམས་ཀྱིས་ནི། །འདི་དག་ཐམས་ཅད་འཇིག་རྟེན་ཕན་ཕྱིར་རོ། །འདི་ལྟར་རྗེས་སུ་ཐོས་ཏེ། བསྟན་བཅོས་སྣ་ཚོགས་ལ་ཡོངས་སུ་འདྲིས་པ། དྲི་མ་དང་བྲལ་བའི་ཡིད་དང་ལྡན་པ། འཇིག་རྟེན་པ་ཐམས་ཅད་ཀྱི་གཉེན་དུ་གྱུར་པ། །དུལ་བ་གཟུགས་དང་ལྡན་པ་འདྲ་བར་གཞན་ལ་ཕན་པ་ལ་འབྲས་

བུ་རྩེ་གཅིག་པ། འདབ་ཆགས་ངལ་བ་རྣམས་ལ་ཤིང་ཆེན་པོ་འདྲ་བར་སྐྱེས་བུའི་ཡོན་ཏན་ཐམས་ཅད་ཀྱིས་བརྟེན་པ། སྙན་པར་སྨྲ་བ་ཉིད་ཀྱིས་འཇིག་རྟེན་པ་ཐམས་ཅད་ཀྱི་ཡིད་འཕྲོག་པ། ལེགས་པར་བཤད་པ་རྣམས་ལ་རྩོམ་པ་པོ་འཇིག་རྟེན་ན་མཁས་པ་གཙང་བ་བག་དང་ལྡན་པ་རྒྱལ་པོའི་
རིགས་ཀྱི་རྒྱལ་མཚན་དུ་གྱུར་པ་དེ་དུས་གཅིག་གི་ཚེ་ན། གྲོང་ཁྱེར་འགའ་ཞིག་ཏུ་བྱང་ཆུབ་སེམས་དཔའ་ཀེ་ཤ་པ་ཞེས་བྱ་བའི་མིང་ཅན་བྱུང་བར་གྱུར་ཏེ། བདག་ཉིད་ཆེན་པོ་དེས་ཀྱང་འཚོ་བ་ཡོངས་སུ་དག་པར་སླར་སུ་ཞིག་ཡིན་སྙམ་དུ་སེམས་སོ། །བདག་གིས་གང་ལ་གནས་ན་བདེ་བར་
འཇིག་རྟེན་ལ་ཕན་པ་བསྒྲུབ་པར་ནུས་སྙམ་མོ། །རེ་ཞིག་བསྟེན་པ་ནི་མི་བདེན་པ་དང་། ང་རྒྱལ་དང་། རྒྱགས་པ་དང་། ཆགས་པ་དང་། འཚེ་བའི་སྐྱོན་དུ་མ་རྣམས་ཀྱི་རྒྱུ་ཡིན་པས་དེ་ལ་གནས་ཤིང་འབད་པ་དང་ལྡན་པ་ཡང་ནམ་ཞིག་གི་ཚེ་ཞི་བ་ཉེ་བར་ཐོབ་པར་འགྱུར། ཅིའི་ཕྱིར་ན།
མི་ཡི་བདག་པོ་སྣ་ཚོགས་སྟོན་པའི་འདབ་མ་ལ་བསམ་ནུས་པ་ཡི། །སྐྱེས་བུ་རྣམས་ཀྱི་སེམས་ནི་དང་བ་སྐྱེས་པ་འབྱུང་བར་འགྱུར་མ་ཡིན། །འཁྲུག་པ་མང་བའི་འདམ་ཅན་ཆུ་ལ་གོས་ནི་འཁྲུ་བར་བྱེད་བཞིན་པ། །ནམ་ཡང་དཀར་བ་ཉིད་དུ་འགྲོ་བར་འགྱུར་བ་ཉིད་ནི་མ་ཡིན་ཏེ། །ཚོང་ཡང་ཉོ་
ཚོང་གི་དུས་ན་བརྫུན་པའི་ཚིག་མང་བས་ཆོས་ལས་འདའ་བ་ཉིད་དོ། །ཞིང་གི་ལས་ཀྱང་བ་ལང་རྣམས་ལ་ལྕག་དང་དབྱུག་པ་བརྒྱབ་པས་སྡུག་བསྔལ་སྐྱེད་པར་བྱེད་དེ། རྣམ་པ་ཐམས་ཅད་དུ་སྨན་པ་ཉིད་བདག་ཉིད་དག་པ་དང་འཇིག་རྟེན་ལ་ཕན་པ་དང་བདེ་བར་བྱེད་པར་མཐོང་བ་ཡིན་ཏེ། དེ་བས་
ན་སྨན་པ་ཉིད་ཚོལ་བར་སྙམ་དུ་རྣམ་པར་བསམས་ནས་དུས་རིང་པོས་དེའི་རྟོག་པ་སྐྱེས་པར་གྱུར་ཏེ། ལྕི་བའི་སེམས་ལྡན་དེ་ལ་གནས་པ་ཡི། །ཡོན་ཏན་ཅན་དག་ནད་པ་རྣམས་ཀྱི་ནད་གཅོད་ལ། །ནམ་ཡང་ནད་ཀྱིས་གདུང་བར་འགྱུར་མིན་ལ། །ལུས་ཅན་རྣམས་ཀྱི་ལུས་ངལ་བསྲུང་བྱས་
བཞིན། །བར་ཆད་མེད་པར་དམ་པ་རྣམས་ལ་སྨྲས། །དེ་ནི་མེད་པས་མདུན་ས་མཛེས་མི་འགྱུར། །གཙང་བའི་མར་མེ་བྲལ་བས་འོད་མེད་པའི། །མཚན་མོ་ལ་ནི་རི་མོའི་ཁྱིམ་བཞིན་དུ། །འགྲོ་ལ་འདོད་པ་བསྐྱེད་ཅིང་མུན་པ་འཕྲོག །དེ་ནི་བདེ་ལྡན་མདུན་སར་གང་ཞིག་འགྲོ། །

ཤིན་ཏུ་དགའ་བར་གྱུར་པ་དེ་འགྱུར་ཏེ། །རི་བོང་ཅན་ནི་ཤར་ལ་ཟླ་ཚེས་ལྟར། །ཆེན་པོ་འགྲོ་བའི་དོན་ནི་བྱེད་པ་ཡི། །ཡོན་ཏན་བརྟེན་པ་གསལ་བའི་དེ་ཉིད་མཐོང་། །ཟླ་ལྟར་རྣམ་དག་སེམས་ལྡན་རྣམས་ཀྱིས་ནི། །སྐྱེ་བོ་ཡོན་ཏན་ལྡན་ལས་འབྱུང་བར་འགྱུར། །དེ་ལྟར་
འགྲོ་བའི་ལམ་ནི་གནོད་བྱེད་སེལ་བ་ལ་མཁས་པ། །ཡོན་ཏན་མང་བ་རྣམས་ཀྱི་མངོན་སུམ་དུ་ནི་གཏེར་དང་འདྲ། །དེ་ནི་ཤེས་རབ་ཡོངས་སུ་འདྲིས་པས་དག་པའི་བློར་འགྱུར་ཏེ། །ཀུན་ནས་ཡོངས་སུ་འདྲིས་པ་མེད་ཀྱང་གཉེན་ལྟར་གྱུར་པ་ཡིན། །དེ་ནས་དུས་གཅིག་གི་ཚེ་ན་ལེགས་པའི་བློ་ཅན་གྱི་སློབ་
མས་རྗེས་སུ་འགྲོ་བཞིན་པ། བྱང་ཆུབ་སེམས་དཔའ་ཡུལ་གཞན་དུ་སོང་བ་ལ་གླགས་རྙེད་པ་དང་འདྲ་བའི་ནད་ཀྱིས་བུད་མེད་འགའ་ཞིག་གི་བདག་པོ་སྲིད་པ་གཞན་དུ་ཉེ་བར་སོང་བར་གྱུར་ཏོ། །དེས་ཀྱང་འཇམ་པའི་ལག་པ་གཉིས་ཀྱིས་བརྡབས་པས་ཀུན་ནས་དཀར་དམར་དུ་བྱས་པའི་ལྕི་བའི་འོ་མ་
འཛིན་པ་མིག་གི་མཆི་མའི་ཐིགས་པ་རྣམས་ཀྱིས་བཞིན་བཀྲུས་པ། རྒྱན་རྣམ་པར་བཀྲོལ་བ། སྐྲ་ལོ་ལྷོད་པ་དང་རྣམ་པར་གྲོལ་བའི་ཁུར་གྱིས་སྐུ་ཀུནྡ་རའི་མེ་ཏོག་ཀུན་ནས་དོར་བ། ཀུནྡའི་ལྗོན་ཤིང་ལྟར་སྦྲང་བྱེད་ཀྱི་ཚོགས་ཀྱིས་མེ་ཏོག་འགེགས་པ། མེ་ཏོག་མཚོན་ཆའི་བུད་མེད་དང་འདྲ་བ།
ཀྱི་ཧུད་ཁྱིམ་ཐབ་ཁྱོད་གང་དུ་སོང་སྙམ་དུ་རྣམ་པ་མང་པོ་དེ་ལྟར་སྨྲེ་སྔགས་འདོན་ཅིང་འབྱུང་པོས་བཟུང་བར་གྱུར་ཏོ། །དེ་ནས་དྲན་པ་རྣམ་པར་རྨོངས་པ་ཉིད་ཀྱིས་སྨྲས། །རང་གི་སྐྱེ་བོ་མཆི་མ་གྲོལ་བར་ཉེར་འོངས་དང་། །དེ་རིང་བདག་གི་ཁྱིམ་འདིར་ཅི་ཕྱིར་ངུ་བ་སྟེ། །འཇིགས་པ་བྲལ་བ་བདག་གི་
ཁྱིམ་ཐབ་གསོན་པ་ཡིན། །དེ་ལྟར་སྨྲས་ནས་དགོད་དང་བཅས་པས་མི་འཁྲུགས་པར། །རི་བོང་ཅན་གྱི་གདོང་ཅན་ཁྱད་པར་རྣམ་བསམས་ཏེ། །ཤིན་ཏུ་མཐུག་པར་དགའ་བས་ཀུན་ནས་འཁྱུད་བྱས་ཏེ། །བདག་པོ་ཤི་བ་ལ་ནི་མལ་གྱི་སྟེང་གནས་སྨྲས། །དེ་རིང་བདག་ལ་མངོན་པར་མི་སྨྲ་ཅི་ཕྱིར་
འདི། །མཛའ་བོ་ཁྲོ་བ་དགའ་བ་ལ་གནོད་དོར་བར་མཛོད། །གལ་ཏེ་བདག་ནི་ནོངས་པར་བྱེད་པ་འབྱུང་འགྱུར་ན། །ཁྱེད་ཀྱི་ཡིད་ནི་ཁྲོས་པ་དོན་མེད་འབྱུང་བ་མིན། །ཀྱེ་ལགས་བཙུམས་པའི་མིག་ལྡན་གཡོ་སྒྱུ་ཉིད་ཀྱིས་ནི། །འོན་ཀྱང་ཁྱོད་ཀྱི་སྐྱོན་བཅས་ཉིད་ནི་བདག་གིས་ཤེས། །དེ་ལྟར་

དགོད་ཅིང་ཕྲད་པར་འདོད་པའི་ཡིད་ཅན་གྱིས། །དེ་ལ་ཉེ་བར་སྦས་ནས་འགྲམ་དུ་འོང་བྱེད་འགྱུར། །ངེས་པར་ཁྱོད་ནི་ཟླ་འདྲ་བཞིན་དང་ལྡན་པ་སུ་ཞིག་གི། །འདོད་པ་དགའ་བ་གཞོན་ནུ་མ་ནི་གཞན་ལ་དགའ་བར་བྱེད། །དེ་བས་སོང་ལ་ཡུན་རིང་ཁྱོད་ཀྱིས་འདོད་པ་འབྲས་བཅས་གྱིས། །
ཆགས་ལ་རྩེ་གཅིག་ཁྱེད་ལ་འདི་ལྟར་བདག་གིས་གེགས་མི་བྱེད། །ཤིན་ཏུ་རིང་ཤར་མ་ལུས་རི་བོང་ཅན་མཚན་མཐོང་ནས་ནི། །མཆི་མའི་ཆུ་ཡིས་ལྟ་བ་འགེགས་པ་དབུགས་ནི་ཕྱུང་བྱས་ཏེ། །དེ་ནི་ཁྱོད་དང་ཕྲད་པའི་ཡིད་རེ་ཁུར་གྱིས་ངལ་བ་ལ། །མལ་གྱི་དབུས་སུ་ཡན་ལག་རྣམས་ནི་རྒྱགས་བཞིན་
བསྙལ་བར་འགྱུར། །མཛེས་པ་ཁྱོད་ནི་ངེས་པར་འཇིགས་ཏེ་བདག་གི་ཚོགས་འདི་ནི། །མཉན་ནས་གང་གི་ཁྱེད་ནི་རྩུབ་པ་ཉིད་དུ་ཉེར་སོང་བ། །ལོངས་ཤིག་བདག་ནི་ཁྲོས་པ་མིན་ཞེས་ཀུན་ནས་བརྗོད་བཞིན་པ། །དེས་ནི་དེ་ཡི་མིག་ནི་སོར་མོ་རྣམས་ཀྱིས་ཕྱེ་བར་གྱུར། །དེ་ནས་དེ་ཡི་
རང་གི་སྐྱེ་བོའི་ཚོགས་དེས་ངེས་པར་འདི་དཀའ་ཐུབ་མ་འབྱུང་པོས་བཟུང་བ་སྟེ། གང་གིས་ཁྱོ་ཤི་བ་ལ་ཡང་འཁྱུད་ནས་འདི་ལྟར་མང་པོ་སྨྲ་བ་ཉིད་དུ་ཉེ་བར་སོང་བ་ཞེས་བྱ་བ་བརྗོད་དེ་ངུ་བས་ཀུན་ནས་ངལ་བས་གཉིད་ཀྱི་དབང་དུ་སོང་བར་གྱུར་ཏོ། །ཁྱིམ་ན་སྐྱེ་བོའི་སྒྲ་མེད་པ་མཐོང་ནས་དེས་སྲོག་དང་
བྲལ་བས་བྱ་བ་དང་བྲལ་བའི་ལུས་ཁྱོ་བོ་དེ་ཕྲག་པ་ལ་བཀལ་ཏེ་མཚན་མོ་ཡོངས་སུ་སྨིན་པས་འོད་མེད་པའི་ཟླ་བའི་དཀྱིལ་འཁོར་དང་ལྡན་པའི་ནམ་མཁའ་ལ་གྲོང་ཁྱེར་གྱི་སྒོ་རྣམས་རྣམ་པར་གྲོལ་བར་གྱུར་པའི་སྒོ་དང་ལྡན་པ་རྣམས་ལ། མཆིལ་པ་སྐད་འདོན་པས་ཁྱབ་པའི་གྲོང་དང་གྲོང་ཁྱེར་གྱི་ཤིང་
རྣམས་ཡོད་པ་དང་མཁའ་སྣང་གི་རྣམ་པའི་མར་མེའི་རྩེ་མོ་རྣམས་ཡོད་པ་དང་། ལྷག་མ་དང་བཅས་པའི་གཉིད་ཀྱིས་ཁྱབ་པའི་མིག་དང་ལྡན་པའི་སྐས་ཀྱི་རིམ་པས་མཚན་པའི་རྐང་པ་བྱས་ནས་ལམ་ནས་འགྲོ་བ་རྣམས་སོ་སོར་གནས་པར་གྱུར་པ་དང་། ཉི་མ་སྤྲིན་གྱིས་བསྒྲིབས་པའི་
དུས་ལྟར་ཀུན་ནས་འོད་མེད་པ་དང་འདྲ་བའི་ནོར་ལྡན་ཡོད་པ་དང་། ཐོ་རངས་ཀྱི་རྔའི་སྒྲས་ཀུན་ནས་གང་བའི་བར་དང་ལྡན་པའི་ལྷའི་ཁང་པ་རྣམས་ཡོད་པ་དང་ཁྱིམ་བྱའི་སྒྲ་ཀུན་ནས་ཐོས་པར་གྱུར་པ་དང་ལྡན་པའི་གྲོང་དང་གྲོང་ཁྱེར་རྣམས་ཡོད་པ་ལ་བུད་མེད་དེས་གང་དང་གང་དུ་ཕྱིན་

པར་གྱུར་པ་དེ་དང་དེ་ཉིད་དུ། དུས་རིང་ཉིད་ཀྱིས་རྣམ་པར་རྙིངས་པ་ཡི། །དྲི་མ་ཅན་གྱི་གོས་ནི་གོན་བཞིན་པ། །ཕེག་རྡོབ་བྱེད་པའི་སྒྲ་ལྡན་བྱིས་རྣམས་ཀྱིས། །ཀུན་ནས་འོད་མེད་མཛེས་པ་ཡོངས་སུ་བསྐོར། །དེ་ནི་མཐོང་ནས་བྱིས་པ་རྣམས་དགོད་འགྱུར། །མིག་ནི་
མཆི་མ་དང་བཅས་བུད་མེད་རྣམས། །འགྱུར་ཏེ་རང་ཉིད་ཀྱིས་འདི་ཀྱེ་མ་རྨོངས། །དྲི་མེད་བློ་ལྡན་མི་རྣམས་ཀྱིས་འདི་སྨྲས། །དེ་ནས་དུས་ཀྱི་རིམ་པས་རྣག་དང་བཅས་པ་ཤ་དང་པགས་པ་ལྷུང་བས་དཀར་རྩིས་རྗེས་སུ་བྱུགས་པ་དང་འདྲ་བར་རུས་པའི་ལྷག་མ་ཅན་ལུས་དེ་དེས་འཛིན་པར་བྱེད་ཅིང་
དུས་གཅིག་གི་ཚེ་ན། །རིའི་གནས་གཞན་རྣམས་དང་དུར་ཁྲོད་རྣམས་སུ་ཡང་ཀུན་ནས་འཁོར་བར་གྱུར་ཏོ། །དུས་གང་གི་ཚེ་ཡོངས་སུ་ངལ་བ་དང་ལྡན་པར་གྱུར་པ་དེའི་ཚེ་ཤིང་གི་རྩ་བ་འགའ་ཞིག་ན་ངལ་བསོ་སྟེ། དེའི་ལུས་དྲི་མ་དང་བྲལ་བའི་ཆུ་བོ་ལ་ཁྲུས་བྱས་ནས་ཉི་མའི་འོད་ཟེར་རྩུབ་པས་
བདག་གི་ཁྱིམ་ཐབ་ཀུན་ནས་ངལ་བ་ཞེས་བྱ་བ་བརྗོད་ཅིང་། སྐད་ཅིག་སྐད་ཅིག་དུ་ནི་ཀེང་རུས་དཀར་པོ་དེ། །རིམ་གྱིས་རིམ་གྱིས་པད་རྩ་མ་ཡིན་པས་ནི་བྱུགས། །དེ་ཡི་མགོ་ལས་སྐྱེས་པ་འཕོས་པའི་མགོ་ལ་ནི། །གསལ་ཞིང་ཨུཏྤལ་སྔོན་པོའི་ཕྲེང་བ་བཅིངས་པར་གྱུར། །ཀུན་ནས་
དམར་བའི་འདབ་མ་ནགས་ཀྱི་ནང་ནས་ནི། །ཉེ་བར་བཏུས་ནས་རྣ་བའི་བུ་གར་སྦྱོར་བར་གྱུར། །དཔྲལ་བ་དཀར་པོ་རི་མོ་མཐོང་ལ་བཙག་གིས་ནི། །ཐིག་ལེ་ཀུན་ནས་རྫོགས་པར་བྱེད་པ་ཉིད་དུ་འགྱུར། །སོ་རྣམས་རྩ་བ་གསལ་བ་མང་བའི་རྒྱ་སྐྱེགས་ཀྱིས། །ཚོན་གྱིས་དམར་བའི་འོད་
དང་ལྡན་པ་བྱས་པར་འགྱུར། །ཀུན་ནས་འཁྲུགས་པའི་པདྨའི་རྩ་ལྟར་དཀར་བའི་འོད། །ལག་པ་གཉིས་པ་མེ་ཏོག་རྩི་ནི་སྦྱར་བར་འགྱུར། །སྲབ་པའི་མར་མེའི་རྩེ་མོའི་མིག་སྨན་གྱིས་ནག་པ། །སྨིན་མཚམས་གཉིས་ཀྱི་ཤུལ་དག་རིམ་གྱིས་བྱས་པར་གྱུར། །རྒྱ་ཆེན་མིག་གི་བུག་པ་དག་
ལ་དགོད་བཅས་པས། །མིག་ཐུར་ཡང་ནས་ཡང་དུ་འཁོར་ཞིང་གནས། །དེ་ནས་སྤྲིན་མེད་ཟླ་བའི་འོད་ཟེར་གྱིས་དག་པ། །པདྨོའི་ལོ་མའི་ནང་ན་ཆུ་ནི་བཞག་བྱས་ཏེ། །དགོད་པ་སྔོན་དུ་འགྲོ་བ་ཅན་གྱི་ཀེང་རུས་དེར། །དགའ་བས་རྣམ་པར་ལྟ་བར་བྱེད་ཅིང་ཀུན་ནས་སྨྲས། །ཁྱོད་ཀྱི་ལུས་ནི་རྒྱན་

རྣམས་ངེས་པར་བྱས་པ་ནི། །སྐལ་བཟང་ཉིད་ཀྱིས་དགའ་བ་ཉིད་དུ་ཉེར་སོང་བ། །དྲི་མ་མེད་པའི་ཆུ་ཡི་མེ་ལོང་འདི་ལ་ཁྱོད། །བརྩེ་ལྡན་རེ་ཞིག་བཞིན་གྱི་ཟླ་བ་རྣམ་ལྟ་མཛོད། །དེ་ནས་མཚན་མོ་འོངས་པ་དང་མིའི་རུས་པ་བཞི་ས་ལ་བརྐོས་ཤིང་དེའི་དབུས་སུ་ནི་འདབ་མ་རྣམས་ཀུན་ནས་བཀྲམ་སྟེ་
པདྨོའི་འདབ་མ་རྣམས་ཀྱི་མལ་ཆ་རྣམས་བཀོད་ནས། །ཀེང་རུས་དེ་ལ་འཕགས་པའི་སྲས་ཚུར་ཤོག །ཨ་ག་རུ་དང་སྤོས་ཀྱིས་བསྒོས་ཤིང་གནས་པའི་ཁང་པ་བདག་གིས་བརྩམས་པ་འདིར་གླང་པོ་ཆེ་ཕྲུ་གུའི་སོའི་རང་བཞིན་རྐང་པ་དང་ལྡན་པ་འཇམ་པའི་མལ་ཆ་དང་བཅས་པ་ལ་
ཞུགས་ཤིག་ཅེས་སྨྲས་སོ། །དེ་ནས་མོན་ལུག་སོ་རྣམས་ཀྱིས་ནི་དུམ་བྱས་ཏེ། །ཀེང་རུས་དེ་ཡི་ཁ་ལ་དགོད་པར་བྱས་ནས་ནི། །དེ་ལ་དེ་ཉིད་དུ་ནི་རྨོངས་པས་ཀུན་འཁྱུད་དེ། །མི་ཡིས་སྣང་བར་བྱས་པ་ཤིང་ཁང་མཐར་ནི་བསྙལ། །དེ་ནས་བྱང་ཆུབ་སེམས་དཔས་སློབ་མ་དང་རྗེས་སུ་
འགྲོ་བ་སྐྱེ་བོའི་དྲུང་ནས་ཀུན་ནས་མངོན་པར་འོངས་ཏེ། །སྐྱེ་བོ་རྣམས་ཀྱི་དྲུང་ནས་བུད་མེད་དེ་གདོན་གྱིས་བཟུང་བ་མཐོང་ནས་སློབ་མ་ལ་སྨྲས་པ། །ཡང་དག་མ་ཡིན་ཀུན་བརྟགས་ཀྱིས། །དེ་ལྟར་སྐྱེ་བོ་འདི་རྨོངས་པ། །ཤིན་ཏུ་བདག་འཛིན་བྱེད་པ་སྟེ། །ཅི་ལྟར་དངོས་པོ་མེད་པ་ཡང་། །
བདག་གི་ནད་ལྡན་རྣམས་ཀྱི་ནད། །སྨན་རྣམས་ཀྱིས་ནི་ཟད་པར་བྱས། །བུད་མེད་དེ་ཡི་གདོན་ཐབས་ཀྱིས། །བདག་གིས་ཟད་པར་བྱེད་པར་འགྱུར། །ཇི་ལྟར་མེ་ཏོག་མཐེ་བོ་ནི། །མེད་པར་སོར་མོས་འཛིན་མི་འགྱུར། །དེ་བཞིན་ཐབས་དང་རྣམ་བྲལ་བའི། །བྱ་བ་འབྲས་བུ་ཐོབ་མི་འགྱུར། །སློབ་
མས་སྨྲས་པ། བློ་དང་ལྡན་པ་རྣམས་ལ་ནི་ནུས་པར་བྱ་བ་མ་ཡིན་པ་ཞེས་བྱ་བ་ཅི་ཞིག་ཡོད་དེ། བདག་ཉིད་ཆེན་པོ་དེ་ཡང་སྙིང་རྗེའི་ཁ་ལོ་སྒྱུར་བས་རབ་ཏུ་བསྐུལ་བར་གྱུར་པའི་ཡིད་ཀྱི་ཤིང་རྟ་ཁྱིམ་དུ་མི་འགྲོ་ཞིང་། ཉིན་མོར་བྱེད་པ་ནུབ་པའི་དུས་ཀྱི་མཚམས་བགྲོད་པར་དཀའ་བ་ལ་མ་བརྩིས་
ཤིང་། ངེས་པར་བུད་མེད་དེ་ཁྱིམ་དང་ཡོངས་སུ་འདྲིས་པར་དུར་ཁྲོད་ཀྱི་ས་ཉིད་ལ་མངོན་པར་དགའ་བར་བྱེད་སྙམ་དུ་རྣམ་པར་བསམས་ཏེ། འབར་བའི་སྲེག་ལུགས་འཛིན་པའི་སྣང་བས་ནྱ་གྲོ་དྷའི་ཤིང་ལ་གནས་པའི་བྱ་རྒོད་དང་བྱའི་མཐའ་མ་གསལ་བར་བྱས་པ། མེས་འཇིགས་པ་དང་འདྲ་བའི་དཀྱིལ་

འཁོར་ལ་གནས་པའི་གླང་པོ་ཆེའི་ཚོགས་ལྟར་ནག་པའི་ཡུན་རིང་པོ་ནས་མུན་པས་ལྟ་བར་གྱུར་པ་དང་འདྲ་བར་ཅེ་སྤྱང་གི་ཚོགས་ཀྱིས་ལུས་མི་སྣང་བར་བྱས་པ་དང་། བར་མེད་པར་རྩུབ་པའི་སྐྲ་ཤད་ཀྱིས་སའི་དཀྱིལ་ཁྱབ་པ་དང་། མེའི་དབུས་སུ་བཙོས་བཞིན་པའི་ཁ་ཟླུམ་
པའི་མི་ལུས་དང་ལྡན་པ་དང་། པདྨའི་རྩ་བ་གསར་པ་ལྟར་ཀུན་ནས་དཀར་བའི་སྡུག་པ་རྣམས་ཀྱིས་ཁྱབ་པ་དང་། འགའ་ཞིག་ཏུ་རི་མོར་བྲིས་པའི་བུམ་པའི་གྱོ་མོ་རྣམས་ཀྱིས་བར་མཚམས་མེད་པ་དང་། ཕྱེད་ཚིག་པའི་ཤི་བའི་གོས་དྲི་མ་ཅན་གྱི་དུམ་བུ་རྣམས་ཀྱིས་ཀུན་ནས་ཁྱབ་པ་དང་། ཉེ་
བར་གནས་པའི་ཤ་ཟའི་བུད་མེད་ཀྱི་སྐྱེ་བོ་རྣམས་ཀྱིས་མིའི་ཤ་རྣམ་པར་འགོད་པར་འགྱུར་བ་དང་། གཞན་དུ་གློ་བུར་དུ་བྱུང་བའི་སྐྱེས་པ་རྣམས་ཀྱིས་ཤ་ཆེན་འཚོད་པར་གྱུར་པ་དང་། གང་ཞིག་ཏུ་ཚིག་པར་གྱུར་པའི་ལུས་ལས་འཕོ་བར་གྱུར་པའི་ཚིལ་གྱི་ཐིགས་པའི་ཕྲེང་བ་རྣམས་ཀྱིས་སོལ་བ་
འམ་མེ་ཤི་བར་གྱུར་པ་དང་། རབ་ཏུ་ཚ་བའི་མེ་ལྕེས་ཀུན་ནས་དམར་སྐྱའི་རྩ་བས་སྟེང་དུ་ཆུ་འཛིན་པ་ལྟར་སྔོ་བའི་སིན་དྷཱུ་ར་དང་རམས་ཀྱིས་བཙོས་པའི་སྣམ་བུ་གཉིས་དང་འདྲ་བའི་དུ་བའི་ཚོགས་ཆེན་པོས་སྟེང་ནས་བསྒྲིབས་པར་བྱས་པ་དང་། སྐྱེ་བོ་མ་ལུས་པ་རྣམས་ཡིད་འབྱུང་བ་སྐྱེད་
པར་འདོད་པ་ཉིད་དང་འདྲ་བའི་མི་རྟག་པ་གསལ་བར་བྱས་པ་དང་། ཤི་བའི་ལུས་ཀྱི་རང་བཞིན་གཡུལ་ངོའི་གནས་དང་འདྲ་བར་ཤིན་ཏུ་འཇིགས་པ། སྭཱ་ཧཱའི་བདག་པོའི་རླུང་གི་ཤུགས་ཀྱིས་རྣམ་པར་འདར་བ་ཡིས། །ཀུན་ནས་སྤྱན་དྲངས་ལྟར་ནི་འབར་བའི་འོད་ལྡན་མི་རྣམས་ཀྱིས། །
འབྱུང་བའི་ཅེ་སྤྱང་ཕོ་མོའི་ཚོགས་ལྟར་གྷོ་ཀའི་སྒྲ་ལྡན་པ། །དོགས་པ་མེད་པའི་ཡིད་ཅན་དེས་ནི་དུར་ཁྲོད་ཞུགས་པར་གྱུར། །བུད་མེད་དེ་ནི་གང་ན་གནས་པར་འགྱུར་སྙམ་དུ་ཀུན་ནས་འཁོར་ཞིང་དེས་ཤ་ཟ་མོ་རྣམས་ཀྱི་ལུས་ཀྱི་བྱ་བ་དེ་རྣམས་ཀུན་ནས་མཐོང་ནས། སློབ་མའི་བསྲུང་བའི་
སྔགས་ཀྱིས་གཙུག་ཕུད་འཆིང་བར་བྱས་པར་གྱུར་ཏོ། །དེར་ཡང་མི་ཡི་ཁྲག་གིས་དཔྲལ་བར་ཐིག་ལེ་བྱས་ནས་ནི། །སེར་སྐྱའི་སྨིན་མཚམས་གཉིས་ལྡན་ཆེན་པོའི་ལྟ་བ་ཅན། །ཁྱོ་ཕོས་འཛིན་པར་བྱས་པ་རྣོ་བའི་སོ་ལྡན་པའི། །དགྲ་སྟ་ལ་ནི་ལ་ལ་ཞིག་གིས་གདོང་མཐོང་

འགྱུར། །ཁྲག་གི་ཆང་གིས་གང་བ་ཟླ་བ་ལྟར་དཀར་བ། །ཐོད་པའི་སྣོད་ནི་གཞན་གྱིས་ས་ལ་རྣམ་བཀོད་ནས། །གཡོ་བའི་ཆུ་ཡི་དབུས་སུ་གནས་པའི་ཟླ་བ་ལྟར་གཡོ་བའི། །དགྲ་སྟ་གཡམ་པ་ལ་ནི་བརྡར་བར་བྱས་པར་གྱུར། །མེ་ཡི་ཚ་བས་བཙུམས་པར་བྱས་པའི་མིག་ལྡན་
པ། །གཞན་དག་མི་ནི་ཕྱེད་ནི་ཚིག་པའི་ལུས་ལྡན་པ། །ལྷུང་ཞིང་དྲོ་བའི་རྐང་མར་ཆ་ལྡན་ཞུ་བ་ནི། །གློ་བུར་དུ་ནི་དུར་ཁྲོད་དབུས་ནས་འགུགས་པར་འགྱུར། །ཁྲག་འཛག་པ་ཡི་རྐང་མར་ཆ་ཡིས་ཉེ་བར་བྱུགས་པ་ཡི། །རྡོ་ལ་ཁ་ཆུ་སྐྱེས་བཞིན་པས་ནི་རྣམ་པར་བཞག་པ་ནི། །
སྐྱེས་པའི་དུམ་བུ་བཅག་པས་ཡང་དག་འབྱུང་བའི་འཇིགས་སྒྲ་ལྡན། །གཞན་དག་གིས་ནི་རྡོ་བས་རྣམ་པར་གཅོད་པ་ཉིད་དུ་འགྱུར། །མཛའ་བོའི་ལག་པའི་མཐིལ་གྱིས་ཉེ་བར་ཁྱེར་བར་བྱེད་བཞིན་པ། །ཡ་བའི་མེ་ཏོག་ལྟར་ནི་མངོན་པར་དམར་པོ་དམར་ལྡན་པ། །ཐོད་པ་ཡང་དག་གནས་
པའི་ཁྲག་གི་ཆང་གིས་གཞན་དག་ནི། །འགྱུར་བའི་གདོང་ཅན་ཤ་དང་ཉེ་བར་བཅས་པ་འཐུང་བར་འགྱུར། །ཤ་ཟ་མོ་དེ་རྣམས་ཀྱང་འདི་ལྟར་བྱ་བ་ལ་རྩེ་གཅིག་པར་ཡང་དག་པར་མཐོང་ནས། ཨེ་མའོ་མཚན་མོ་རྒྱུ་བ་འདི་རྣམས་ཀྱི་རང་བཞིན་ནི་དྲག་པ་སྟེ། དྲག་པ་ཞེས་བྱ་བ་རྣམ་པར་བསམས་
ནས་ཕྱོགས་གཞན་ལ། ཤ་དང་འབྲས་ཀྱིས་འགའ་ཞིག་ཏུ། །ཆང་བཅས་ཉ་ཡིས་འགའ་ཞིག་ཀྱང་། །ས་ཡིས་མཐར་ཐུག་ཁྱབ་པ་ནི། །རི་ཡི་གཏོར་མས་འགའ་ཞིག་ཏུ། །དུར་ཁྲོད་མེ་ཡི་གྲིབ་མས་ནི། །གསལ་བར་བྱས་པའི་ལུས་ལྡན་པ། །ཤུགས་དང་བྲལ་བའི་རལ་གྲིར་
ལྡན། །ཕྱོགས་སྐྱོང་རྣམས་ཀྱིས་སྣང་བར་བྱས། །རིག་པའི་དངོས་གྲུབ་མངོན་འདོད་པའི། །བརྟེན་པར་བཟླས་པས་རབ་མགུལ་ཆུ། །བདག་ཉིད་ཆེན་པོ་རབ་འབྱུང་བས། །དབུས་སུ་བྱིན་གྱིས་བརླབས་པར་བྱས། །ཐལ་བར་རྩེ་གསུམ་རྣམས་བཀོད་པས། །བར་དུ་འགྲོ་བར་བྱས་པ་
ནི། །མེ་ཏོག་དམར་པོ་ཀུན་ཁྱབ་པའི། །དཀྱིལ་འཁོར་ཆེན་པོ་མཐོང་བར་འགྱུར། །འགའ་ཞིག་ཏུ་ཡང་ཁྲག་གིས་མངོན་པར་དམར་བར་བྱས་པའི་སོ་དང་ལྡན་པའི་རི་དགས་སྐྱོན་ཅན་རྣམས་ཀྱིས་ཀུན་ནས་དབུགས་ཕྱུང་བར་གྱུར་པའི་ཕྱིར་རྒྱུ་མའི་དྲ་བ་རྡོལ་བ། འདབ་ཆགས་རྣམས་ཀྱི་

མཆུས་མིག་ཕྱུང་བའི་བུ་ག་རྣམས་ཀྱིས་འཇིགས་སུ་རུང་བའི་གདོང་དང་ལྡན་པ། ཤི་བའི་ཆོམ་རྐུན་པས་འཚོ་བའི་ཡོ་བྱད་ཕྲོགས་པར་བྱས་པའི་བུད་མེད་མཐོང་ནས་ཡིད་བྱུང་བའི་བློ་དང་ལྡན་པ། ཀྱེ་མ་འདོད་ཆགས་དང་ལྡན་པ་རྣམས་ཀྱིས་འདོད་ཆགས་ཀྱི་བདག་
ཉིད་དུ་འདུག་པ་སྟེ། གང་རྣམས་ཀྱིས་འདི་ལྟ་བུའི་ལུས་ལས་བདེ་བའི་བློ་སྐྱེ་བར་འགྱུར་སྙམ་ནས་སྨྲས་པ། ཡང་ཡང་ཀུན་ནས་ཉམས་པ་འདོད་ཅིང་འདོད་པ་ནི། །སྐྱེ་བོའི་མིག་གི་བུང་བའི་ཚོགས་ཀྱིས་གང་ཞིག་ལ། །དེ་ནི་དེ་རིང་བུད་མེད་ལྗོན་ཤིང་ལས་བྱུང་བའི། །ཡིད་འོང་མཛེས་
དགོད་མེ་ཏོག་ཇི་ལྟར་མཐོང་མི་འགྱུར། །ཡན་ལག་མེད་པ་ཁྱོད་ཀྱིས་དགོད་པའི་བདག་ཉིད་ཀྱིས། །གང་ལ་འདབ་རྟེན་སྔོན་དུ་ཡང་དག་འགེངས་པ་སྟེ། །ཁྱོད་ཀྱིས་དི་རིང་བུད་མེད་ལུས་ཅན་དེ་ལ་ནི། །སྐྱོན་ཅན་བཙན་ཐབས་ཀྱིས་ནི་ཅི་ཕྱིར་མདའ་མི་གཏོང་། །གང་ཞིག་ཡང་ཡང་འདོད་
པའི་བདག་ཉིད་འཁྱུད་བྱས་པ། །པགས་པས་གཡོགས་ལ་འདོད་ཆགས་ཅན་གྱི་སྐྱེ་བོ་གང་། །དེ་རིང་དེ་འདི་རུས་པའི་རང་བཞིན་ལུས་འདི་ནི། །སྣ་ནི་འགེགས་པ་ཉིད་ནི་སྤངས་ནས་གྲོལ་བར་འགྱུར། །མཆི་མ་དང་བཅས་མིག་དང་ལྡན་པའི་ངོ་གདོང་འདི་ནི་ཅི་ཕྱིར་འདུད་མི་བྱེད། །
རི་བོང་ཅན་གྱི་གདོང་ཅན་སྐྱོན་དང་བྲལ་བའི་མཐུན་པ་བདག་ལ་དོན་མེད་ཁྲོས་པས་ཅི། །དེ་ལྟར་ངེས་པར་བརྗོད་པར་བྱེད་པའི་བདག་པོས་གང་ལ་མགོ་བོ་རྣམས་ཞུགས་པ། །དེ་ཡི་རྐང་པ་གཉིས་པོ་ལ་ནི་འདི་ཡི་ཁྱེད་རྣམས་ཀྱིས་ནི་སོ་རྣམས་གནས། །བདེ་བ་མྱོང་ཞིང་སྨིག་རྒྱུ་རྗེས་སུ་
ཚོལ་ཞིང་ཀུན་ནས་སྐྱེ་བར་གྱུར་པའི་འདོད་པ་ཅན། །ངལ་བ་བྱིས་པའི་སྐྱེ་བོ་སེམས་ཀྱི་རི་དགས་སྔོན་དུ་གང་གིས་བཀྲི་བར་བྱས་པ་ནི། །འབད་པས་འདོད་པའི་ལྷ་ཡི་རྔོན་པས་དེ་ནི་བརྩམས་པར་གྱུར་པ་ཇི་ལྟར་གང་གིས་ཀྱང་། །སྣང་རུང་མིན་པའི་གཟུགས་ཅན་གྱིས་ནི་ཆུང་རོལ་པ་ཡི་རང་
བཞིན་འདྲ་བ་རྣམས་ཆེད་བྱས། །དེ་ལྟར་བདག་ཉིད་ཆེན་པོ་དེས་བུད་མེད་ཀྱི་ལུས་མཐོང་བས་འདོད་ཆགས་དང་བྲལ་བ་ཡང་དག་པར་བྱུང་བས་སྨྲས་པར་གྱུར་པ། །ཀྱེ་མ་མི་རོའི་དྲི་མི་ཞིམ་པས་སྣ་ཡི་དབང་པོ་སྐྱོ་བར་བྱས་པ། སྡོང་ཁང་གི་མེའི་དུ་བས་ཡང་དག་པར་རེག་པས་བདག་ཉིད་

མི་གཙང་བ་རློམ་པར་བྱེད་པ་ནི་འདི་ལྟ་སྟེ། འདི་ཡང་ཆུ་འཛིན་ལྟོ་བའི་འོད་ནི་འཕྲོག་པའི་དུ་བ་འདིས་ནི་ཡུན་རིང་པོར་ནི་སོང་བ་ཡིན། །དུར་ཁྲོད་ལས་བྱུང་རྣམ་པར་འཕྲོ་བྱེད་འོད་ནི་འཕྲོ་བ་དྲི་མ་ཅན་དུ་ཁྱེར་བར་བྱེད། །ཆུ་གཏེར་རླབས་ལྡན་ཆུ་ལ་ཁྲུས་ནི་བྱས་ལྟར་གྲོང་བས་ཁྱབ་པ་རིམ་གྱིས་
ནུབ་པ་ནི། །རི་བོང་ཅན་ནི་ཟླ་ཚེས་གོས་རློན་ལྟ་བུར་འཛིན་ཅིང་ཇི་ལྟར་ཡང་ནི་འགྲོ་བར་འགྱུར། །སློབ་མས་སྨྲས་པ། བདག་གི་སྡུག་བསྔལ་མི་བཟོད་ཅིང་། །ཐེ་ཚོམ་བྱེད་པར་གྱུར་པ་ཡང་། །གཞན་གྱི་རྗེས་འཛིན་བྱ་བའི་ཕྱིར། །སོ་སོའི་སྐྱེ་བོས་ནུས་པ་མིན། །བྱང་ཆུབ་སེམས་དཔས་སྨྲས་
པ། །ཚེ་དང་ལྡན་པས་ཡང་དག་པར་མངོན་པར་སྨྲས་ཏེ། ད་ནི་དེ་བས་ན་མ་མོའི་ཁྱིམ་རྙིང་པ་འདི་རུ་དུར་ཁྲོད་ཀྱི་སྲེག་ལུགས་འཛིན་པའི་སྣང་བས་རྩིག་ངོས་ལ་བྲིས་པའི་ཕྱུགས་ཀྱི་ཁྲག་གིས་རྩེ་གསུམ་པ་གསལ་བར་བྱས་པ་ལ་རྗེས་སུ་ཞུགས་ཏེ། མཚན་མོའི་ལྷག་མ་འདའ་བར་བྱེད་ཅིང་། ད་
ནས་ཤིང་གིས་ཀུན་ནས་མཚན་པའི་སྒོ་དང་དྲིལ་བུའི་ཚོགས་ལྡན་པ། །རྒྱལ་མཚན་ལས་ལྷུང་རྨ་བྱའི་མགྲིན་པ་རྡུལ་ནི་འབྱུང་བའི་ས་ལྡན་པ། །ཕྱི་དང་ནང་དུ་མེ་ཏོག་རྙིང་པ་རོ་སྐུད་རྣམས་ཀྱིས་ཉེར་བསགས་པ། །མ་ཧེའི་མགོ་བོ་གང་ལ་བྱ་རྒོད་འདི་ནི་ངེས་པར་གནས་པ་ཡིན། །སློབ་
མས་སྨྲས་པ། མཁན་པོ་ཇི་ལྟར་བཀའ་སྩོལ་བ་བཞིན་དུ་བྱའོ་ཞེས་ཟེར་རོ། །དེ་ནས་ཀེ་ཤ་བས་མ་མོའི་ཁྱིམ་དེར་ཞུགས་ནས་ཅུང་ཟད་གཉིད་ལོག་པར་བྱས་ཏེ། སོ་སོར་རྣམ་པར་སད་པར་བྱས་ནས་སྨྲས་པ། ཚེ་དང་ལྡན་པ་ཕྱི་རོལ་དུ་བྱུང་ལ་རེ་ཞིག་མཚན་མོའི་ལྷག་མ་ཅི་ཙམ་ཡོད་པ་དེ་
ཤེས་པར་བྱོས་ཤིག །དེས་ཀྱང་དེ་ལྟར་བགྱི་ཞེས་སོ་སོར་མཉན་ནས་མངོན་པར་བྱུང་སྟེ་སྨྲས་པ། མཁན་པོ་ཐོ་རངས་ཉིད་ཡིན་ཏེ། དེ་ལྟར་ན། །མཚན་མོ་ཆད་པར་ཤེས་ནས་ཤིང་གི་ཚང་འདི་ལ་ནི་བཟོད་པ་ཅན་ཉིད་འདི་ལ་བརྟེན་པར་བྱེད། །ཟད་པར་གྱུར་པའི་བུད་ཤིང་ལྡན་པ་རོ་བསྲེགས་
མིའི་འོད་རྣམས་ཅུང་ཟད་དྲི་མ་ཅན་འཛིན་ཏེ། །ཉི་མ་ཤར་བའི་འོད་ཟེར་འཕྲོ་བ་རྣམས་ཀྱིས་རེག་པར་འགྱུར་བའི་ས་འཛིན་རྣམས་ཀྱི་གྲིབ་མ་རྣམས། །བར་ནི་སྔོ་བར་བྱས་པའི་བུང་བ་ལྟར་ནི་སེར་སྐྱའི་འོད་ལྡན་ས་ཕྱོགས་མཉམ་པར་སྐྱེ་བ་ཡིན། །དེ་ནས་བྱང་ཆུབ་སེམས་དཔའ་ཕྱིར་བྱུང་སྟེ་

སློབ་མ་ལ་སྨྲས་པ། ཚེ་དང་ལྡན་པས་ནད་པ་རྣམས་ནད་མེད་པར་བྱ་བའི་ཕྱིར་གྲོང་ཁྱེར་དུ་སོང་ཤིག་དང་། བདག་གིས་ཀྱང་ཁྱོ་ཤི་བ་དེ་ཐབས་གང་གིས་ཀྱང་འགྱུར་བ་མེད་པར་བྱའོ་ཞེས་ཟེར་རོ། །སློབ་མས་ཀྱང་དེ་ལྟར་བགྱིའོ་ཞེས་བྱ་བས་དེ་ལ་གསོང་པོར་སྨྲས་
ཏེ་ཤིན་ཏུ་རིངས་པར་གྲོང་ཁྱེར་དུ་སོང་བར་གྱུར་ཏོ། །བྱང་ཆུབ་སེམས་དཔས་ཀྱང་བུད་མེད་དཀའ་ཐུབ་ཅན་དེ་སླར་གང་ན་ཡོད་པར་གྱུར་སྙམ་དུ་བསམས་ནས་དེ་བལྟ་བའི་ཕྱིར་ཀུན་ནས་ཡོངས་སུ་འཁོར་བར་གྱུར་ཏོ། །ན་ཆུང་དེ་ཡང་ལངས་ཏེ་བདག་པོའི་ལུས་དེ་ལ་བཟུང་ནས་ཆུ་བོ་ལ་མངོན་པར་
འགྲོ་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཡང་དག་པར་སོང་སྟེ་དེའི་ཉལ་བའི་གནས་མཐོང་ནས་འདི་ལྟར་བསམས་པར་གྱུར་ཏེ། འདིར་ནི་དཀའ་ཐུབ་ཅན་མ་དེ་ཉལ་བར་འགྱུར་བ་ཡིན་ནོ། །དེ་ཅིའི་ཕྱིར་ཞེ་ན། པདྨོའི་འདབ་མ་རྣམས་ཀྱིས་མལ་ནི་བྱས་པ་འདི། །སྲབ་པའི་དྲོད་ཀྱིས་
འདབ་མ་དུད་ཁ་རྙིང་བྱས་པ། །མཚན་མ་ཉེ་བར་མནན་པས་དབུས་ནི་རྣམ་ནུབ་ཅིང་། །མལ་ནི་དེ་དང་བྲལ་བས་རྣམ་སྣང་འགྱུར། །དེ་ནས་བདག་པོའི་ལུས་འཛིན་པ་དེ་ཆུ་བོར་འགྲོ་བཞིན་པ་མཐོང་ནས་ཨེ་མ་ཐབས་དང་བཅས་པར་འདི་ནི་ནད་དང་བྲལ་བར་བྱའོ་སྙམ་དུ་རྣམ་པར་བསམས་ནས་
བདག་ཉིད་ཆེན་པོ་དེས་བུད་མེད་ཤི་བའི་ལུས་ཕྲག་པ་ལ་བཀལ་ཏེ། བུད་མེད་དེ་ལ་རྗེས་སུ་འབྲང་བར་གྱུར་ཏོ། །དེས་ཀྱང་རུས་པའི་ཀེང་རུས་དེ་འགྲམ་གྱི་ཤིང་གི་སྡོང་པོ་ལ་བཅིངས་ནས་གཞག་ཅིང་སྨྲས་པ། རེ་ཞིག་འཕགས་པའི་སྲས་སྡོད་ཅིག །ད་ནི་ཁྱོད་ནི་ཤིང་འདི་ལ། །གདོང་པ་འཁྲུ་
བའི་ཆུ་དེ་ནི། །ཇི་སྲིད་བདག་གིས་ཁྱེར་ལ་འོང་། །གདོང་པ་བཀྲུས་པ་གཉིད་བྲལ་བས། །དཀར་དང་དམར་བའི་མིག་ལྡན་པ། །གི་ཝང་ཨུ་ཤིར་མདའ་རྣམས་ཀྱིས། །ཁྱོད་ནི་བརྒྱན་པར་འགྱུར་བ་ཡིན། །དེ་ལྟར་མངོན་པར་སྨྲས་ནས་དེའི་ཆུ་བོ་ལ་འཇུག་ཅིང་རང་གི་གྲིབ་མ་ཀུན་ནས་
དག་པའི་མེ་ལོང་གི་དབུས་ལྟར་དྲི་མ་མེད་པའི་ཆུ་ལ་རྣམ་པར་བལྟས་ནས་ངེས་པར་བུད་མེད་འདི་དག་གིས་ཁྱོ་འཕྲོག་པར་འདོད་དོ་སྙམ་དུ་རྣམ་པར་བསམས་ནས། བདག་ཉིད་ཀྱི་གྲིབ་མ་འདི་ལྟར་ཀུན་ནས་བསྡིགས་ཤིང་གནས་ཏེ། འཁྱོག་ཅིང་རྒྱས་པའི་སྨིན་མ་ཀུན་ནས་སྤྱོད་བྱེད་

ཅིང་། །དགོད་པར་གསལ་བར་བྱས་པའི་སོ་ཡི་ཕྲེང་བ་ཅན། །སྐྱོན་ཅན་མ་ནི་ཕྲད་འདོད་ངེས་པར་བུད་མེད་ཁྱོད། །བདག་གི་མཛའ་བོ་ཁྱོད་ནི་ཡིད་འཕྲོག་འདོད་མ་ཡིན། །དགོད་པ་ཡིད་དུ་འོང་བས་རྣམ་པར་ཆགས་བྱེད་པ། །ཡིད་འཕྲོག་མིག་གི་མཐའ་མས་རྣམ་
པར་བལྟ་བས་ཀྱང་། །བདག་གི་མཛའ་བོ་དུལ་བ་ངོ་ཚ་མེད་པ་ཁྱོད། །ཅི་ལྟར་བདག་ལས་གཡོ་བ་ཅན་ཁྱོད་དགོས་མེད་གྱུར། །ཁྱོད་ནི་དགོད་པ་གསལ་བར་བྱེད་ཅིང་བདག་གི་ནི། །མཛའ་བོ་ཅེ་སྤྱང་མོ་ཡང་བསམ་པར་མི་བྱེད་དོ། །དེ་ལྟ་ན་ཡང་རྨོངས་ལས་ལྡོག་པར་མི་འགྱུར་
ཏེ། །དོན་མེད་ཀུན་ནས་འཁོར་བར་བྱེད་པ་འགྲོ་བར་གྱིས། །སྐྱེས་པས་ཀུན་ནས་འོངས་ཏེ་གལ་ཏེ་བསྟེན་འདོད་ན། །དེ་ནས་སྐྱེ་བོ་ལ་ནི་བུད་མེད་ཆུང་བར་འགྲོ། །འདོད་པར་མ་བྱས་གལ་ཏེ་ནན་གྱིས་འདོད་བྱེད་ན། །དགོད་པའི་དངོས་པོ་ལ་ནི་གང་གིས་གཏད་མི་བྱེད། །བདག་གིས་
ཁྱོད་ནི་འདི་ལྟར་ཀུན་ནས་སྐྲག་བྱས་ཀྱང་། །ནན་གྱིས་བདག་གི་མཛའ་བོ་འདི་ནི་གལ་ཏེ་འཛིན། །དེ་བས་ཁྱོད་ལ་སྐྱོན་ཉིད་བཟོད་པར་མི་འགྱུར་ཏེ། །གང་ཕྱིར་ཕྲག་དོག་ཡིད་ནི་ཤིན་ཏུ་གདུང་བར་བྱེད། །བདག་གིས་དེ་ལྟར་ཁྱད་པར་རྩུབ་པར་སྨྲས་ཀྱང་ནི། །ཁྱོད་ནི་ང་རྒྱལ་དང་བཅས་ཅི་
ཕྱིར་འདི་དགོད་འགྱུར། །ཅི་ཕྱིར་ཐ་མལ་པ་ཡི་ཁྱིམ་ལ་འདི་བརྗོད་པ། །མཛེས་མ་དོན་མེད་ངལ་བ་ཀྱོག་པོ་འཚོང་བ་ནི། །དེ་ལྟར་གདོན་གྱིས་དྲན་པ་ཉམས་པ་ཁྲོ་བ་དང་བཅས་པ། །དེས་ནི་ངོ་གདོང་ཁྲོ་གཉེར་མིག་ནི་གཡོ་བར་བྱས་པ་སྟེ། །དྲི་མ་མེད་པའི་ཆུ་ཡི་ནང་ན་གནས་པར་སྒྲ་
སྒྲོགས་ཤིང་། །རང་གི་གྲིབ་མ་ལ་ཡང་རྡོ་རྣམས་ཀྱིས་ནི་ཀུན་བརྡུངས་འགྱུར། །རང་གི་གྲིབ་དང་ལྷན་ཅིག་ཆུ་ལ་གནས་པས་ཕྲག་དོག་བཅས། །དེ་ནི་འདི་ལྟར་བྱེད་ཅིང་ཡང་ཡང་རྩོད་པའི་ཐད་གནས་པ། །འཁྲུལ་འཁོར་ཤིན་ཏུ་དྲི་མེད་གསལ་བའི་སོ་ཡི་ཕྲེང་བ་ཅན། །དེ་ལས་སྐྱེས་པའི་ངོ་
མཚར་དང་འདྲ་རུང་བའི་རང་བཞིན་དང་། །དེ་ནས་བུད་མེད་དེ་གལ་ཏེ་བདག་གིས་དེ་ལྟར་རྡོ་བ་རྣམས་ཀྱིས་ཀུན་ནས་བརྡུངས་པར་གྱུར་པ་ཡང་ཁྱོད་འགྲོ་བར་མི་འགྱུར་ན་དེའི་ཕྱིར་བདག་གིས་འཕགས་པའི་སྲས་བཟུང་ནས་དེར་འགྲོ་བར་འགྱུར་ཏེ། གང་དུ་སླར་འདི་མཐོང་བར་འགྱུར་བ་མ་

ཡིན་པ་ཞེས་བྱ་བ་བདག་ཉིད་ཀྱི་གྲིབ་མ་དེ་ལ་སྨྲས་ནས་ལུས་དེ་ཕྲག་པ་ལ་བཀལ་ཏེ་སོང་བར་གྱུར་ཏོ། །ཅིའི་ཕྱིར་སྐྱེས་པ་འདི་སླར་བུད་མེད་འཛིན་ཅིང་འབྲོས་པར་གྱུར་པ་རེ་ཞིག་འདི་ལ་དྲི་བར་བྱའོ་སྙམ་དུ་རྣམ་པར་བསམས་ནས། །ཀེ་ཤའི་དྲུང་དུ་ཉེ་བར་འོངས་ཏེ་སྨྲས་པ། །
བདག་ནི་ཁྱོ་དང་ལྡན་པ་འགྲོ་ཞིང་རྣམ་མཐོང་ནས། །ཁྱེད་ནི་ཀུན་ནས་དོགས་པར་གྱུར་པ་ཅི་ཕྱིར་འབྲོས། །བདག་ཉིད་ཆེན་པོ་བདག་ནི་ཤ་ཟའི་བུད་མེད་མིན། །དེ་བས་དོགས་པ་དོར་ཅིག་བདག་ལ་ཉེར་བསྟན་འདིར། །བྱང་ཆུབ་སེམས་དཔས་སྨྲས་པ། སྲིང་མོ་བདག་ནི་ཁྱེད་ལ་འཇིགས་པ་
མ་ཡིན་ཏེ། །འོན་ཀྱང་སྐྱེས་པ་གཞན་ལ་སྡང་བར་བྱེད་པའི་ཆུང་མ་འདི་བཟུང་ནས་གང་དུ་མི་རྣམས་ཡོད་པ་མ་ཡིན་པ་དེར་འགྲོ་བར་བགྱིའོ། །ཁྱོད་ཀྱི་ཁྱོ་བོ་འདི་ནི་ལྷན་ཅིག་ཆོས་སྤྱོད་མ། །བདག་གི་འདི་ལ་མཉེས་གཤིན་པར་ནི་གཞན་ཡང་ལྟ། །ཁྱོད་ནི་མཛའ་བོ་ཡང་ནི་མཐོང་
ནས་ངོ་ཚ་བས། །བདག་གི་མཛའ་བོ་མིག་གཉིས་པོ་ནི་འཛུམས་པར་བྱེད། །ཇི་ལྟར་ཀུན་ནས་མཐོང་སྟེ་ཡང་ཡང་རྣམ་པར་དགའ། །གསལ་བར་བྱེད་ཅིང་འཇམ་པར་བྱས་ནས་ངོ་མཚར་བྱེད། །དེ་ལྟར་བདག་གི་ལྷན་ཅིག་ཆོས་སྤྱོད་མ་འདི་ལ། །ཁྱོད་ཀྱི་མཛའ་བོ་འདིས་ནི་འཕྲོག་
བྱེད་ཀུན་ནས་རྟོག །བདག་གི་བུད་མེད་འདི་ནི་དགའ་བར་བྱེད་མཐོང་ནས། །མཛེས་པའི་མིག་ནི་བརླ་དང་འོ་འཛིན་གཉིས་མཛེས་པ། །ཐུབ་པ་རྣམས་ཀྱི་སེམས་ཀྱང་གཞན་དུ་འགྱུར་བ་སྟེ། །བུད་མེད་ཁྱོད་ནི་འདོད་པ་ཅན་འདི་ལྟ་ཅི་སྨོས། །དེ་བས་འདི་ནི་རི་བོང་ཅན་གྱི་དཀྱིལ་འཁོར་
ལྟར། །བཞིན་ལྡན་རང་གི་མཛེས་པས་ལྷ་དབང་བུད་མེད་ནི། །ངོ་ཚ་དང་བཅས་དབུ་མ་ལྟར་ནི་དབང་ཆེན་གྱིས། །ལུས་ལ་བཟུང་ནས་ས་འཛིན་རྣམས་ཀྱི་ཕུག་རྣམས་སུ། །བདག་ཉིད་ཀྱིས་ནི་ཡུན་རིང་གནས་པར་བགྱི་བ་ལགས། །དེས་སྨྲས་པ། འཕགས་པས་འདི་ལྟར་ཀུན་
ནས་དོགས་པར་བྱ་བ་མ་ཡིན་ཏེ། །ཁྱོད་ཀྱི་ཆུང་མ་ཚུལ་ཁྲིམས་བཟང་ལྡན་ཕྱིར། །འདི་ནི་ཇི་ལྟར་སྐྱེས་པ་གཞན་ལ་སྡང་། །གཞན་གྱི་ཁྱིམ་ཐབ་སྤོང་བའི་སེམས་ལྡན་པ། །དེ་བཞིན་བདག་གི་ཁྱོ་བོ་འདི་ཡང་ཡིན། །རང་གི་བཟང་མོ་འདི་ནི་ཁྱོད་ཀྱིས་རྣམ་བརྒྱན་ཅིང་། །

བདག་ཀྱང་མཛེས་པའི་རྒྱན་གྱིས་ཅིག་ཅར་གནས་པར་བགྱི། །ཚུལ་ཁྲིམས་སྡུག་བསྔལ་མཉམ་པ་རྣམས་ལ་གྲོགས་པོ་ཉིད། །ཤེས་བྱའི་གྲགས་པ་འབྲས་བུ་དང་ནི་བཅས་པར་གྱིས། །བྱང་ཆུབ་སེམས་དཔས་སྨྲས་པ། ཁྱོད་ནི་བདག་པོའི་ཚུལ་ཁྲིམས་ཞེས། །གལ་ཏེ་བུད་མེད་
མཆོག་བདེན་ནས། །དེ་བས་ཆུ་བོ་འདི་བརྟེན་ནས། །བདག་ཅག་འདིར་ནི་གཅིག་ཏུ་གནས། །དེས་སྨྲས་པ། བློ་ལྡན་འཕགས་པའི་སྲས་ཀྱིས་ནི། །ཚུལ་ཁྲིམས་ཇི་ལྟར་མ་ཤེས་ནས། །ཁྱེད་ལ་འདི་ལྟར་སྨྲ་འགྱུར་བ། །དེ་བས་དོགས་པ་ཡོངས་སུ་དོར། །དེ་ལྟར་བགྱི་ཞེས་བྱ་བ་ཡང་
བྱང་ཆུབ་སེམས་དཔས་ཁས་བླངས་ཆུ་བོའི་འགྲམ་གྱི་ཤིང་གི་རྩ་བ་ལ་རུས་པའི་ཀེང་རུས་དེ་བཞག་ནས་རྒྱན་བྱེད་པའི་ཕྱིར་བརྩམས་པ་ལ་བུད་མེད་དེས་ཀྱང་བདག་ཉིད་ཀྱི་ཁྱོ་ཤི་བའི་ལུས་ལ་བརྒྱན་པར་བྱས་ཏེ། གཉིད་ཀྱི་དབང་དུ་སོང་བར་གྱུར་ཏོ། །དེ་ན་བྱང་ཆུབ་སེམས་དཔས་དེ་གཉིད་ལོག་
པར་ཤེས་ནས། གཉིས་པོ་དེ་དག་སྐྱེ་ནི་ཐག་པས་དེར་བཅིངས་ཏེ། །ལུས་གཉིས་བཀྲུས་པའི་པདྨའི་རྩ་བ་ལྟར་དཀར་བ། །འགྲམ་གྱི་མཐའ་མར་གོམ་པ་སྒྲ་མེད་ཉེར་སོང་ནས། །ཆུ་བོ་དེ་ལ་མ་དཔྱད་པར་ནི་དོར་བར་གྱུར། །མྱ་ངན་གྱིས་ནི་ཧ་ཧ་ཞེས་བརྗོད་ཐབས་ཤེས་པ། །དེ་ནས་གཉིད་ཀྱི་
དབང་སོང་དེ་ལ་དེས་ནི་རབ་བསད་ནས། །བདག་གི་མཛའ་མོ་ཁྱོད་ཀྱི་བདག་པོ་འདི་ནི་འཕྲོག་པ་སྟེ། །དེ་ལྟར་ཤིན་ཏུ་ཕོངས་པའི་ཡི་གེ་དང་ལྡན་དེ་སྨྲས་གྱུར། །དེ་ནས་གཉིས་པོ་དེ་དག་ཀྱང་ཤི་བའི་ལུས་གཉིས་ཆུས་ཁྱེར་བར་གྱུར་པ་ཀུན་ནས་མཐོང་ཞིང་ཀྱི་ཧུད་ཧ་ཧ་ཞེས་བྱ་བ་བརྗོད་ཅིང་ཆུ་བོ་དེའི་
འགྲམ་ནས་མངོན་པར་རྒྱུག་པར་གྱུར་ཏེ། དེ་དག་དེ་ལྟར་མྱུར་རྒྱུག་ཅིང་། །རོ་གཉིས་རྣམ་པར་མཐོང་བ་དག །དབུ་བ་འཁོར་ཞིང་གཡོ་བ་ཡིས། །ཆུ་བོ་དེ་ནི་དགོད་དང་འདྲ། །དེ་ནས་བུད་མེད་དེ་ཆུ་བོའི་འགྲམ་ནས་རྒྱུག་ཅིང་ཤི་བའི་རོ་ལ་མིག་མཆི་མས་ཡོངས་སུ་གང་བ་དང་ལྡན་པས་ཡང་
ནས་ཡང་དུ་འདི་ལྟར་ངན་པ་སྨྲ་བར་གྱུར་པ། གང་ཞིག་ཨུ་ཤི་ར་ཡི་རྣམ་པའི་བྱུག་རྣམས་ཀྱིས། །གསལ་བའི་དྲིས་ནི་བདག་གིས་ཁྱོད་བརྒྱན་པ། །གཞན་གྱི་ཁྱིམ་ཐབ་འཕྲོག་པ་ཁྱོད་ཀྱིས་ནི། །མཉེས་གཤིན་འབྲས་བུ་དེ་འདི་གསལ་བར་བྱས། །བདག་གིས་བསྟོད་ཚིག་བར་མཚམས་

མ་ཆད་དང་། །ལག་པ་ཡང་དག་འཛིན་དང་གུས་ལྟ་དང་། །ཤིན་ཏུ་དྲག་པའི་སེམས་ལྡན་ཁྱོད་ཀྱིས་ནི། །ཇི་ལྟར་གསུམ་པོ་འདི་ནི་བསམ་མ་བྱས། །ཤིན་ཏུ་འཇམ་པ་བདག་གི་བུད་མེད་ནི། །སྐལ་བཟང་གལ་ཏེ་ཡང་ནི་འདིར་གྱུར་ན། །དེ་ལྟ་ན་ཡང་རྟག་ཏུ་རྗེས་
འཇུག་འདིར། །འཕགས་མིན་བདག་ནི་དོར་བར་བྱེད་མཛེས་མིན། །བུད་མེད་རྣམས་ཀྱི་ཡིད་ནི་གསོ་བ་སྟེ། །སྐྱེ་བོའི་གྲགས་པ་འདི་ནི་མི་བདེན་འགྱུར། །བདག་ཉིད་དམ་པ་དི་རིང་དོར་ནས་འགྲོ། །སྐྱེས་པ་རྣམས་ལ་བདེན་ཉིད་ཁྱོད་ཀྱིས་གཞག །གཞན་གྱི་བུད་མེད་ལ་ནི་ཆགས་པ་རྣམ་
འགྲེལ་ཁྱེད་ཉིད་ལ། །མཉེས་གཤིན་མེད་པའི་སེམས་ལྡན་བརྩེ་དང་དུལ་བ་རྣམ་བྲལ་བ། །བདག་གི་ཚིག་ནི་ཕོངས་ཤིང་ཕོངས་འདི་གནས་པ་མ་ཡིན་ཏེ། །ཚ་བའི་ལྕགས་ལ་ཉུང་བའི་ཆུ་ནི་རྣམ་པར་བླུགས་པ་བཞིན། །དེ་ནས་བྱང་ཆུབ་སེམས་དཔས་དེ་ལྟར་ཤི་བའི་ལུས་ལ་ངན་པ་སྨྲ་བཞིན་པ་
དེ་ལ་སྐད་ཅིག་གིས་སྡུག་བསྔལ་དང་ལྡན་པ་དང་། སྐད་ཅིག་གིས་ཁྲོ་བ་དང་ལྡན་པ་དང་། སྐད་ཅིག་གིས་སྨྲེ་སྔགས་འདོན་པ་དེ་ལ་སྨྲས་པ། །མཉེས་གཤིན་པ་དང་བྲལ་བའི་ཡིད་ལྡན་ཁྲེལ་དང་རྣམ་བྲལ་བ། །འཇིག་རྟེན་སྨོད་པ་ལ་ནི་རྒྱབ་ཕྱོགས་གཡོ་ལ་མངོན་བརྩོན་པ། །མཉེས་
གཤིན་སྐྱེ་བོ་ངན་ལ་གང་ཞིག་འདི་ལྟར་མངོན་སྨྲ་བ། །རྨོངས་པས་དོན་མེད་དགོན་པར་ངུ་བ་དེས་ནི་བྱེད་པར་འགྱུར། །བདག་གིས་ཁྱོད་ལ་ཡང་དང་ཡང་དུ་སྨྲས་པ་སྟེ། ཅི་ལྟར་ཁྱོད་ཀྱི་ཁྱོ་ཕོ་འདི་བདག་གི་བུད་མེད་ངོ་ཚ་བས་ཐུར་དུ་ལྟ་བའི་གདོང་ཅན་ལ་ཡང་དགོད་ཅིང་སྒེག་པ་དང་བཅས་པར་ལྟ་བ་ངེས་
པར་འདི་བདག་གི་བུད་མེད་འདོད་པ་ཞེས་ཟེར་རོ། །དེ་ལ་ཡང་ཁྱོད་ཀྱིས་དད་པར་བྱ་བ་མ་ཡིན་ནོ་ཞེས་དེ་ལྟར་སྨྲས་ནས་བདག་ཉིད་ཆེན་པོ་དེས་ལྷན་ཅིག་སྐྱེས་པ་མ་ཡིན་པའི་སྨྲེ་སྔགས་འདི་ལྟར་བྱས་པར་གྱུར་ཏོ། །སྒེག་མོ་དེས་ནི་བདག་གི་མིག་ནི་འཛིན་བྱེད་ཅིང་། །ཀུན་ནས་འཛག་པའི་
མཆི་མས་མིག་ནི་བཀག་བྱས་པ། །བུད་མེད་ཁྱོད་ཀྱི་སྲོག་དང་མཉམ་པ་དེས་བདག་གི། །མཛའ་མོ་ཕྲོགས་ཏེ་ཉི་མར་ལྡན་པས་མཚན་མོ་ལྟར། །བདག་ནི་དེ་དང་བྲལ་བས་བརྟན་པ་རྙེད་འགྱུར་མིན། །རྟག་ཏུ་རྗེས་འབྲེལ་གླང་ཆེན་གྱིས་ནི་གླང་མོ་ལྟར། །བདག་དང་བྲལ་བས་དེས་

ཀྱང་བརྟན་པ་ཐོབ་མི་འགྱུར། །རི་དགས་མོ་ནི་ནུས་མེད་རི་དགས་དང་བྲལ་ལྟར། །དེ་ལྟར་བྱང་ཆུབ་སེམས་དཔས་སྨྲེ་སྔགས་འདོན་ཅིང་བུད་མེད་དེ་གོས་ཀྱིས་མགྲིན་པར་བཅིངས་ཏེ་གུས་པར་བྱེད་ཅིང་སྨྲས་པ། དེ་བས་ཐ་སྙད་ཕྱིར་ཤོད་ཅིག །རྒྱལ་བར་ངེས་པར་བདག་ཅག་འགྲོ། །ཡང་
ན་བདག་གི་མོ་འོངས་ཤིག །བདག་ཉིད་ངན་པ་དེས་ཕྲོགས་པ། །དེ་ལྟར་བྱང་ཆུབ་སེམས་དཔས་འགུགས་པར་གྱུར་པར་དེ་འཇིགས་པས་ཡིད་སྐྱོ་ནས་སྨྲས་པ། །ད་ནི་བདག་གི་ཆུང་མ་དེ་ཡོད་པར་ཅིའི་ཕྱིར་ནུས་ཏེ་འཕགས་པས་བཀའ་དྲིན་མཛོད་ཅིག་དང་། བདག་གི་སྲིང་མོའི་བུ་མོ་
ཡོད། །ཅུང་ཟད་ནུ་མ་མངོན་འབྱུང་བ། །སློབ་མ་བཟང་ལ་སྔགས་བཞིན་དུ། །བདག་གིས་ཁྱེད་ལ་དེ་སྦྱིན་གྱི། །བྱང་ཆུབ་སེམས་དཔས་སྨྲས་པ། བདག་ལ་ལྷའི་བུ་མོ་གཞན་གྱིས་ཀྱང་དགོས་པ་ཡོད་པ་མ་ཡིན་ཏེ། མཆོག་གི་གདོང་ཅན་ཆུང་མ་དེ་ཁྲིད་ལ་ཤོག་ཅེས་སྨྲས་སོ། །གལ་ཏེ་
ཁྱོད་ཀྱི་དེ་མོའོ། །བདག་གི་བུད་མེད་གཡོན་ལྟའི་མིག །རྡོ་བ་ཆེན་པོ་འདི་ཡིས་ནི། །ཁྱོད་ཀྱི་མགོ་བོ་ཕྱེ་མར་བྱ། །དེ་ནས་བྱང་ཆུབ་སེམས་དཔའ་རྡོ་བ་བླངས་ནས་བུད་མེད་དེ་ལ་ཀུན་ནས་བརྡུང་བར་འདོད་པ་བཞིན་དུ་ཁྲོ་གཉེར་གསལ་བར་བྱས་སོ། །དེ་ནས་བུད་མེད་དེ་འཇིགས་
པས་འཕགས་པ་བཀའ་དྲིན་མཛོད་ཅིག་དང་། བདག་ནི་ཕོངས་པ་དང་གཉེན་འདུན་མེད་པ་རྣམ་པར་འཇིགས་པར་འོས་པ་མ་ཡིན་ཏེ། ནོངས་པ་བྱས་ཀྱང་བུད་མེད་སྐྱེ་བོ་ནི། །རང་བཞིན་གྱིས་ཕོངས་སྐྱེ་བཟངས་རྩེ་བར་བྱེད། །དེ་ལྟར་ཁྲོས་པ་འདི་ནི་བསྡུས་མཛོད་ཅིག །བློ་གྲོས་བརྟན་པ་བདག་ནི་
གསད་བྱ་མིན། །དེ་ལྟར་སྨྲས་ནས་བྱང་ཆུབ་སེམས་དཔའི་རྐང་པ་དག་ལ་གཏུགས་པར་གྱུར་ཏོ། །དེ་ནས་བདག་ཉིད་ཆེན་པོ་དེས་འཇིགས་པ་དེ་ཤེས་ནས་སྨྲས་པ། གལ་ཏེ་ཁྱོད་ཁོ་བོ་ཅག་གི་ཚིག་བྱེད་པར་གྱུར་ན། དེ་བས་ན་བདག་གི་རྡོ་བ་འདི་ཁྱོད་ཀྱི་མགོ་བོ་ལ་ཕོག་པར་འགྱུར་བ་མ་ཡིན་ནོ། །
དེས་སྨྲས་པ། ཁྱོད་ཀྱི་བཀའ་ནི་བདག་གིས་འདའ་བར་བྱ་བ་མ་ཡིན་ཏེ་འཕགས་པས་སྨྲ་བར་འོས་སོ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། གལ་ཏེ་ཁྱོད་ནི་འདའ་བར་མི་བྱེད་ན་བདེ་བ་དང་ལྡན་པ་འབྱུང་བར་འགྱུར་རོ། །དེ་བས་ན་ཉོན་ཅིག་དང་། ཁྱོད་ཀྱིས་ཁྱོ་བོ་ཤི་བ་ཡི། །

ལུས་པོ་དེ་ནི་ཕྲག་པར་ཁྱེར། །དེ་ལྟར་རྨོངས་པ་རྣམས་ཤེས་ན། །མུན་པ་བཞིན་དུ་དོར་བར་གྱིས། །ཡང་དང་ཡང་དུ་འགྲོ་འགྲོ་ཞིང་། །ཡང་དང་ཡང་དུ་སྟེང་དུ་འབྱུང་། །སྐྱེ་དགུའི་བདག་པོ་ལག་ཐོབ་པ། །སྐྱེ་འདི་ཕོ་ལོང་བཞིན་དུ་བྱེད། །ནན་གྱིས་དུས་མིན་གསོད་
པར་བྱེད་པ་སུ་ཡི་འདི། །མི་རྟག་པ་ཉིད་གཟུགས་ནི་མནན་ནས་འབྱུང་བ་མིན། །རབ་ཏུ