Luận tạng Tây Tạng (Tengyur) — Tập 169

་དྲག་པའི་ཤུགས་དང་ལྡན་པ་རླུང་གིས་ནི། །འགྲོ་བ་ཆུ་གཏེར་ཚོགས་ནི་རིང་མིན་འབྱུང་བ་བཞིན། །དུས་མཐའི་དུས་ལ་རབ་ཏུ་སྟོབས་ལྡན་མེས་འབར་བ། །ཡང་ཡང་ལྟོ་བ་ཟླུམ་པོའི་ཉ་ཡིས་
ཀུན་ནས་ཁྱབ། །ས་འོག་གནས་པ་འཇིགས་པའི་སྦྲུལ་གྱི་ཚོགས་ལྡན་པ། །རྒྱ་མཚོ་ཆེན་པོ་ཡང་ནི་ཟད་པར་འགྲོ་བར་འགྱུར། །སྣ་ཚོགས་པ་ཡི་དཔག་བསམ་ཤིང་གིས་པར་བརྒྱན་པ། །ལྷ་ཡི་བུད་མེད་རྣམས་ཀྱིས་པདྨོའི་ཆུ་བརྟེན་པ། །གསེར་གྱི་ཕུང་པོ་མེ་ཡིས་རྣམ་
པར་ཞུ་བ་ནི། །རི་རབ་ཀྱང་ནི་རས་བལ་བཞིན་དུ་ཡང་བར་འགྱུར། །མཆོད་སྦྱིན་བརྒྱ་པའི་ཡིད་ནི་འཕྲོག་པ་རྣམས་སྤངས་ནས། །ལྷ་རྣམས་ཀྱིས་ནི་གྲོང་ཁྱེར་ལྷ་མིན་རབ་ཚ་བ། །འབྱོར་པ་འབར་བ་གང་དུ་ཡང་ནི་འགྲོ་འགྱུར་ཏེ། །སྤྲིན་རྣམས་ཟད་ལ་སྒེག་པ་མེད་པའི་
གློག་བཞིན་ནོ། །འདི་དག་ཀྱང་ནི་མུན་པ་རྣམ་རྒྱས་འབིགས་བྱེད་པ། །ཉིན་དང་མཚན་མོའི་ཁྱད་པར་དག་ནི་ལྡན་པ་ལྟར། །འགྲོ་བའི་མར་མེ་ཉི་མ་བསིལ་བའི་འོད་ཟེར་དག །དམར་བའི་སྟོབས་ལྡན་དཀྱིལ་འཁོར་སྣང་བར་གྱུར་པ་མིན། །གང་ཞིག་སྐྱེ་བ་དང་ལྡན་ཅུང་ཟད་ས་
གསུམ་པོ་འདིར་ཡོད། །དེ་དག་ཐམས་ཅད་ཉིད་ནི་ངེས་པར་འཇིག་པའི་མཐའ་མ་ཅན། །དེ་ལྟར་ཤེས་ན་སྐྱེ་དང་འཆི་བའི་སྡུག་བསྔལ་རྗེས་འབྲེལ་བའི། །འཇིག་རྟེན་ལ་ནི་རྣམ་སྐྱོ་ཞི་བ་ཉིད་ལ་ཡིད་གཏད་བྱ། །གང་ཞིག་བློ་ངན་གཉེན་འདུན་རྣམས་ལ་མཉེས་གཤིན་ངེས་ཞུགས་བྱེད། །
དེ་ནི་ཐ་མར་ཡོངས་གདུངས་མྱ་ངན་བྱེད་ཅིང་ཉེར་འགྲོ་བ། །འཇིགས་པའི་ཆུ་སྲིན་ལ་བརྟེན་ཆུ་བོའི་དབུས་དག་ཅེས། །རྒྱ་མཚོར་གཟིངས་དང་བྲལ་བས་རབ་ཏུ་ལྟུང་བ་སྟེར་བར་བྱེད། །སུ་ཡི་རྣམ་བྲལ་ཡོད་པར་མི་འགྱུར་ཏེ། །སྐྱེ་བོ་མཉེས་གཤིན་དེ་རིང་མི་འགྱུར་བ། །བཟང་མོ་འབྱུང་བར་

འགྱུར་རམ་མི་འགྱུར་བ། །དེ་ལྟར་ཁྱེད་ཀྱིས་མྱ་ངན་བསང་བར་གྱིས། །དེ་ལྟར་བུད་མེད་དེས་བྱང་ཆུབ་སེམས་དཔའི་ཚིག་ཡང་དག་པར་ཤེས་ནས་དྲན་པ་ཉེ་བར་རྙེད་པས་སྨྲས་པ། ཨེ་མའོ་ཁྱོད་ཀྱིས་གདམས་ངག་གི་མར་མེ་འདིས་གང་ནས་ཀྱང་འོངས་བ་ཅི་ཡང་ཡང་དག་པ་མ་ཡིན་པའི་ཀུན་
དུ་རྟོག་པའི་མུན་པ་བསལ་བ་ཞེས་བྱ་བའོ། །ཁྱེད་ལ་བརྟེན་ནས་བདག་གི་སེམས། །ཇི་ལྟར་སོས་པ་ཉེར་སོང་བ། །དེ་བཞིན་ཡང་དག་ལམ་དམིགས་ནས། །ཁྱེད་ཀྱང་མྱ་ངན་འདས་ཐོབ་ཤོག །དེ་ནས་བྱང་ཆུབ་སེམས་དཔས་བུད་མེད་དེ་རང་བཞིན་དུ་གནས་པ་བཟུང་ནས་གཉེན་འདུན་རྣམས་ཀྱི་
མདུན་དུ་ཁྲིད་པར་གྱུར་ཏོ། །ཐབས་འདི་ནི་བདག་གི་བུད་མེད་འདི་ལ་གདོན་དེ་ཀུན་ནས་བསལ་བར་བྱས་སོ་ཞེས་བྱ་བ་ཡང་རང་གི་སློབ་མ་རྣམས་ལ་སྨྲས་པར་གྱུར་ཏོ། །བདག་ཉིད་ཆེན་པོ་དེར་སོང་བ་ལ་ཡང་འཇིགས་པ་དང་འདྲ་བ་གྲོང་ཁྱེར་དེ་ལས་ནད་རྣམས་སླར་རབ་ཏུ་འཇིག་པར་འགྱུར་རོ། །
དེ་ནས་དེར་ལ་ལ་ཞིག་བློ་གྲོས་གསལ་བའི་ཉེ་གནས་པས་བྱང་ཆུབ་སེམས་དཔའ་ལ་འདི་ལྟར་ཡང་དག་པར་བསྟོད་ཅིང་གནས་ཏེ། ཁྱོད་ཀྱི་ཤེས་རབ་ལྷག་བྱས་ནས། །བློ་ལྡན་རྣམས་ཀྱི་བློ་རྣམས་ལས། །ལྷག་པར་ཁྱེད་ཀྱི་ཤེས་རབ་འཇུག །དེ་ཉིད་མཐོང་བ་རྣམས་དབེན་རྣམས་ཀྱི་བླ་མ་ཁྱེད་ལ་
ནི། །ལྕི་བའི་ཚིག་ལྡན་ངེས་པའི་གཏམ་ནི་རྣམ་པར་རྒྱས་བྱེད་ལ། །མཁས་པ་རྣམས་ཀྱི་ཡིད་ནི་མུན་པས་ཟིལ་གྱིས་གནོན་མིན་ཏེ། །ཁང་པའི་ནང་ན་མར་མེ་འབར་བར་བྱེད་པ་བཞིན་དུ་ཡིན། །འདུན་པར་བློ་ལྡན་རྣམས་ཀྱི་འདུན་པ་ཆེན་པོ་འཇོམས་ཕྱིར་མི་ཤེས་པ་ནི་རབ་འབྱུང་མིན། །ཁྱེད་
ཀྱི་ངག་གི་རྣམ་པར་དབེན་བྱེད་ཐེ་ཚོམ་གཅོད་ཅིང་ཉོན་མོངས་མེད་པ་མ་ཐོབ་ནས། །གང་ཕྱིར་མཁའ་སྣང་རྣམས་ཀྱི་འོད་ཟེར་མཚན་མོ་ལས་བྱུང་རྣམ་ཁྱབ་རབ་རིབ་འཇོམས་པ་མིན། །མར་མེའི་ལྕེ་ནི་གཅིག་པུར་དྲི་མ་མེད་པས་སྲབ་པ་དེ་ནི་མ་ལུས་སེལ་བར་བྱེད། །ཁྱེད་ནི་རང་རིགས་མཁའ་
ཆེན་གྱི་ནི་ཟླ་ཡིན་ཁྱེད་ཀྱི་གྲགས་པ་རྣམས་ནི་སྐར་མ་རྣམས། །མཐུག་པའི་མུན་པའི་ཚོགས་ནི་རབ་ཏུ་ཉམས་པར་བྱེད་པ་ཁྱེད་ཀྱི་ངག་ནི་ཟླ་ཚེས་ཡིན། །ཉན་པ་པོ་རྣམས་ཀུ་མུ་ཏ་ཡི་འབྱུང་གནས་ལྟར་ནི་མདུན་དུ་འདི་རྣམས་རབ་ཏུ་སད་པར་འགྲོ། །ཨེ་མ་རྣམ་པར་ངེས་པའི་

གཏམ་གྱི་རྩོམ་པ་མཚན་མོའི་སྒོར་འབྱུང་ཀུན་ནས་རྫོགས་པ་འདི། །དོན་སྤྱིའི་གྲུབ་མཐའ་ལ་ནི་ཤིན་ཏུ་རྣོན་པོས་ཀྱང་ནི་ཉིད་ཀྱི་བརྗོད་བྱ་ཇི་ཙམ་རྟོགས། །དེ་ཉིད་མཐོང་བ་ཁྱོད་ཀྱི་གྲོལ་བ་ལ་ནི་ཉན་པ་པོས་ནི་དེ་ཉིད་གསལ་བར་མཐོང་། །སྔོན་རོལ་དུ་ནི་ཕྲད་པར་
འདོད་པའི་ཅི་ནུས་འཇོ་བར་བྱས་པའི་བ་ལས་འཐུང་བས་ནི། །ཕྱིས་ནི་ཤེ་མ་སྐྱོ་བར་མི་འགྱུར་སེམས་དང་ལྡན་པའི་ཕྱིར་ནི་བདེ་བར་འོ་མ་འཛིན། །དེ་བས་ན་སྐྱེ་བོ་འདི་མགོན་དང་བཅས་པ་སྟེ་གང་གི་གཟུགས་དང་ལྡན་པ་ལྟར་དམ་པའི་ཆོས་དང་ལྡན་པའི་མཁན་པོ་ཉིད་རྗེས་སུ་བསྟན་
པར་བྱེད་པ་ཡོད་དོ། །ཞེས་བྱ་བའོ། །དེ་ལྟར་ན་བཅོམ་ལྡན་འདས་དེ་བྱང་ཆུབ་སེམས་དཔར་གྱུར་པ་ན་འཇིག་རྟེན་པ་རྣམས་ལ་ཕན་པའི་དོན་ཉིད་ཀྱི་ཕྱིར་བདག་ཉིད་ཤེས་རབ་ཀྱིས་གསལ་བར་མཛད་པ་སྟེ། རང་གི་གྲགས་པ་ལ་ཆགས་པས་ནི་མ་ཡིན་ནོ་སྙམ་དུ་རྣམ་པར་བསམས་ནས་རྟག་
ཏུ་བཅོམ་ལྡན་འདས་ཉིད་ལ་དད་པ་བསྐྱེད་པར་བྱ་བའོ། །གཞན་རྣམས་ལ་ཕན་པར་བྱེད་པས་སམ་འཇིག་རྟེན་ལ་གུས་པར་བྱེད་པས་ཤེས་རབ་ཉེ་བར་འཕེལ་བར་བྱ་ཞེས་བྱ་བ་སྟེ། སྐྱེས་ཆེན་ལྷན་ཅིག་ཏུ་ནི་བདག་ཉིད་མཉམ་ཉིད་འདོད་པའི་དོན་དུ་གལ་ཏེ་བློ་ཡོད་ན། །ཡིད་ནི་གཞན་དུ་མིན་པའི་མི་ཡིས་
ཐོག་མ་ཉིད་དུ་ཡོན་ཏན་རྣམས་ལ་གུས་པར་བྱ། །ཐོས་པ་ལ་སོགས་ཡོན་ཏན་རྣམས་ལ་སྐྱེས་ན་ལེ་ལོ་ཅན་ནི་ཇི་ལྟར་གུས་བསྐྱེད་འགྱུར། །ནོར་བུ་ལ་ཡང་ཡིད་འོང་ཉིད་ནི་ཡོད་པ་འདུས་མ་བྱས་པར་སྐྱེ་འགྱུར་མ་ཡིན་ནོ། །སྲེད་མེད་ཀྱི་སྐྱེས་པའི་རབས་ཏེ་སྐྱེས་རབས་བདུན་པའོ།། །།
ཤེས་རབ་གསལ་བས་ངོ་མཚར་མིན་པ་རྣམས། །འཇིག་རྟེན་པ་ཡི་དོན་ནི་བྱེད་བཞིན་པ། །དོན་དམ་ཚོལ་བར་བྱེད་ལ་བརྟེན་པ་རྣམས། །སུ་ཞིག་ལ་ནི་ངོ་མཚར་སྐྱེད་མ་ཡིན། །འདི་ལྟར་རྗེས་སུ་ཐོས་ཏེ། རྒྱལ་པོའི་ཡོན་ཏན་ཐམས་ཅད་དང་ལྡན་པའི་རྒྱལ་པོ་ཚངས་པས་བྱིན་གྱི་བརྒྱན་པར་
བྱས་པའི་བཱ་རཱ་ཎ་སཱིའི་རྒྱལ་པོའི་ཁབ་ཏུ། མཚན་མོ་ཟླ་བ་ལྟར་བྲམ་ཟེ་ལ་ལ་ཞིག་རིག་བྱེད་འདོན་པ་ལ་མཁས་པ། ཁྱིམ་ན་གནས་པ་རྗེས་སུ་སྐྱོང་ཞིང་མེའི་མཆོད་པ་ལ་རྩེ་གཅིག་པ། འཇིག་རྟེན་ཐམས་ཅད་ཀྱི་མཆོད་གནས་ཁྱིམ་ལ་ལྷག་པར་གནས་པར་གྱུར་ཏོ། །དུས་གཅིག་གི་

ཚེ་ན་དེས་སྨན་གྱི་དོན་དུ་རི་དགས་ཀྱི་ཚོགས་དུ་མས་ཁྱབ་པ་ཤིན་ཏུ་མཐུག་པའི་ཤིང་རྣམས་ཀྱི་མུན་པ་དང་ལྡན་པ་ཤིན་ཏུ་ཡིད་འཕྲོག་པའི་ཆུ་བོའི་ཆུ་འགྲམ་གྱི་ཤིང་རྣམས་ཀྱི་རྩ་བའི་ཚོགས་དཀྲུགས་པ་གཡོ་བའི་རི་བོའི་ནགས་ཀྱི་ནང་དུ་རབ་ཏུ་ཞུགས་པར་གྱུར་ཏོ། །དཀའ་བའི་ནད་རྣམས་གཅོད་པའི་
སྨན་རྣམས་ཀྱི་ཁུར་པོ་བླངས་ནས་ཆུ་བོ་དང་ཉེ་བའི་བྲག་གི་དཀྱིལ་འགའ་ཞིག་ལ་ལྷག་པར་གནས་ཤིང་ངལ་བསོ་བར་གྱུར་ཏེ། སར་པའི་ཀ་ནི་ཀ་རའི་མེ་ཏོག་ལྟར་དཀར་པོ་ངེས་པར་འབྲེལ་བ་མི་གཡོ་བ་བུང་བའི་ཚོགས་ལྟར་སྐྲ་ལོ་ནག་པ། པདྨོའི་འདབ་མ་དང་རྗེས་སུ་མཐུན་པའི་མིག་དང་ལྡན་
པ། གསེར་དང་ཆུ་ཤིང་གི་སྙིང་པོ་ལྟར་ཡིད་དུ་འོང་བ་ཚོ་བའི་བརླ་གཉིས་དང་ལྡན་པ། ལང་ཚོ་དང་པོས་ཉེ་བར་རྒྱས་པའི་ལྕི་བའི་འོ་མ་འཛིན་པའི་ཁུར་བུས་ཡན་ལག་གི་སྲོག་ཤིང་ནུས་པ་མེད་ཅིང་དབུས་སྲབ་པ། རི་དང་ནགས་མཛེས་པའི་དོན་དུ་ལས་ཀྱི་བཟོ་བོ་རྣམས་ཀྱིས་སྐྱེས་པར་བྱས་པ་
དང་འདྲ་བའི་མི་འམ་ཅི་མོ་མཐོང་བར་གྱུར་ཏོ། །དེ་ནས་ཀྱང་དེའི་གཟུགས་མཛེས་པས་སྙིང་ཀུན་ནས་འགུགས་པ་ཅི་ལྟར་ཡང་རྣམ་པར་འགྱུར་བར་ཡང་དག་པར་སོང་བར་གྱུར་ཏེ། མི་འམ་ཅི་མོ་དེ་ནི་དེ་ལ་ངེས་པར་འབྲེལ་བའི་མིག །དབུགས་ཀྱིས་གསལ་བར་བྱས་པའི་སོ་ཡིས་མཛེས་པ་ཅན། །
འདར་བར་གྱུར་པའི་སེམས་ལ་མྱོས་བྱེད་མདའ་ཡིས་ནི། །གླགས་ནི་རྣམ་པར་ཤེས་པ་ཀུན་ནས་གདུང་བར་གྱུར། །སེམས་དང་རྣ་བ་དགའ་སྟོན་པ་ཡི་གླུ་ཡིས་ནི། །རི་དགས་རྣམས་ཀྱི་ཡང་ནི་ཡིད་ལ་ཆགས་པ་སྐྱེད། །དེས་ནི་རིམ་གྱིས་མེ་ཏོག་རྣམས་ནི་འཐུ་བྱེད་པ། །བྲམ་ཟེ་དེ་
དང་ཉེ་བར་ཀུན་ནས་འོངས་པར་གྱུར། །དེ་ནས་རྣ་བར་མིག་ནི་འགེགས་པ་དེ་མཐོང་ནས། །རི་བོང་ཅན་གྱི་མཚན་མའི་རི་མོ་ལྟར་མཐོང་དགའ། །མེ་ཏོག་རྒྱལ་མཚན་འགྲོ་བའི་ཡིད་ནི་རྨོངས་བྱེད་པའི། །མདའ་རྣམས་ཀྱི་ནི་ཡུལ་དུ་གྱུར་པར་དེ་སོང་གྱུར། །དེ་ནས་འཇིགས་པས་ཁྱབ་པ་དེ་ནི་དེ་ལ་སྨན་
འགྱུར་ཏེ། །ཡལ་ག་རྣམ་པར་དོར་ནས་ཀུན་འདར་ལག་པ་ཅན། །བུང་བ་མིག་ལ་རྣམ་པར་གནོད་པར་བྱེད་པ་འདི་ལས་ནི། །འཇིགས་པ་བདག་ལ་བྲམ་ཟེ་གཙོ་བོས་བསྐྱབ་པར་མཛོད། །དེ་ནས་དེ་ནི་ལངས་ཏེ་གློ་བུར་ཟླ་བའི་བཞིན། །རི་དགས་མོ་ཡི་མིག་ལྟར་རྒྱས་པའི་མིག་

ཅན་དེ་ལ་སྨྲས། །ཁྱོད་ཀྱི་མིག་ལ་གནོད་པའི་བུང་བ་ལ་ནི་བདག་གིས་དགག །ཆུ་ཤིང་ལྟ་བུའི་བརླ་ལྡན་དོགས་མེད་མེ་ཏོག་འདི་ཐུས་ཤིག །དེ་སྐད་སྨྲས་ནས་དེའི་གདོང་ལ་མངོན་པར་ལྷུང་བའི་བུང་བ་བསྲེལ་ཞིང་གནས་སོ། །མི་འམ་ཅི་མོ་དེས་ཀྱང་མེ་ཏོག་རྣམས་བཏུས་ཏེ་སྨྲས་པ།
གཡོ་བའི་སྦྲང་བྱེད་འདི་ལས་བདག་ནི་འཕགས་པའི་སྲས་ཀྱིས་ཡོངས་སུ་སྐྱོབ་པ་སྟེ། ཕན་པར་བྱས་པ་ལ་ཡང་གདོན་མི་ཟ་བར་སླར་ཕན་པར་བྱའོ། །དེ་བས་ན་འཕགས་པ་སྤྱོན་ཅིག །བདག་གི་གནས་སུ་བྱོན་ནས་ངལ་བསོ་སྟེ་གནས་ན་རུང་བའི་ཁ་ཟས་བཟའ་བར་བྱ་སྟེ་རང་གི་གནས་སུ་ཁྱེད་གཤེགས་པར་
མཛོད་ཅིག་ཅེས་ཟེར་རོ། །དེས་ཀྱང་དེ་ལྟར་བགྱིའོ་ཞེས་སོ་སོར་མཉན་ནས་མི་འམ་ཅི་མོ་དེ་དང་ལྷན་ཅིག་ཏུ་སོང་བར་གྱུར་ཏོ། །དེ་ནས་མི་འམ་ཅི་མོ་དེས་སྒོ་འགེགས་པར་བྱེད་པ་བྲག་ཆེན་པོ་བསལ་བར་བྱས་ནས་སྨྲས་པར་གྱུར་པ། འཕགས་པ་ཕུགས་འདིར་ཞུགས་ཤིག་ཅེས་ཟེར་རོ། །དེར་ཞུགས་པ་ལ་སླར་བྲག་དེས་ཕུག་གི་
སྒོ་སྒྲིབ་པར་བྱེད་པ་བྱས་པར་གྱུར་ཏེ། དེ་ནས་ཁྲེལ་ཡོད་པས་ནི་དུད་པའི་གདོང་ཅན་དེས་དེ་ལ། །འོ་མ་འཛིན་པ་དག་ནི་ལག་པ་གཉིས་ཀྱིས་དགབ་བྱས་ཤིང་། །དགོད་པས་འཇམ་པ་མངོན་པར་སྨྲ་བ་ལ་ནི་ཕྲད་འདོད་པ། །རྩེ་བར་གྱུར་ཏེ་ལྷ་ཡི་རྣམ་པར་རོལ་མ་བཞིན་དུ་ནི། །དེ་དང་ལྷན་ཅིག་འདོད་ལྷའི་མདའ་ཡིས་སེམས་ནི་
འབིགས་བྱེད་པ། །ཡིད་འཕྲོག་རི་མོ་གསུམ་གྱིས་ཡིད་དུ་འོང་བའི་དབུས་ལྡན་པས། །གཉིས་སྐྱེས་དེས་ནི་མཚན་མོ་སྐད་ཅིག་མ་ལྟར་བསམས་པ་ནི། །ཕྲད་པར་འདོད་པ་ཡིད་ཀྱི་བདེ་བ་ཀུན་ནས་ཉམས་མྱོང་བཞིན། །དེ་ནས་དུས་གཅིག་གི་ཚེ་ན་མི་འམ་ཅི་མོ་དེའི་ལྟོ་བར་བྱང་ཆུབ་སེམས་དཔའ་ཡང་དག་པར་སྐྱེས་
པར་གྱུར་ཏོ། །དུས་ཀྱི་རིམ་པས་ཀྱང་མཚན་ཉིད་ཐམས་ཅད་ཀྱིས་བརྒྱན་པར་བྱས་ཤིང་རང་གི་ལུས་ཀྱི་འོད་ཀྱིས་ཕུག་སྣང་བར་བྱེད་པ་དང་ལྷའི་གཞོན་ནུ་ལྟར་དེ་ལས་བུ་བཙས་པར་གྱུར་ཏོ། །དེ་ཡང་གང་གི་ཚེ་སྐྱེས་ནས་ལོ་བརྒྱད་ལོན་པ་དེའི་ཚེ་ཕའི་དྲུང་ནས་བསྟན་བཅོས་དུ་མ་རྣམས་ལྷག་པར་རྟོགས་པར་གྱུར་ཏོ། །
སྐར་མའི་རྩིས་ལ་ཡང་དེ་ལ་ཤིན་ཏུ་སྤོབས་པ་སྐྱེས་པར་གྱུར་ཏོ། །དེ་ནས་མ་དང་ལྷན་ཅིག་དེའི་ཕྱིར་བྱུང་ནས་ཤེས་བྱ་ལྷག་མ་རྟོགས་པར་བྱ་བའི་ཕྱིར་ཐུབ་པ་རྣམས་ལ་ཉེ་བར་བརྟེན་པར་གྱུར་ཏོ། །དེ་རྣམས་ལས་ཀྱང་ཤེས་པ་ཀུན་ནས་རྟོགས་ཏེ་ཉེ་བར་འོངས་ནས་ཕ་ལ་སྨྲས་པ། །ཕ་ལགས་གོམ་པའི་རྣམ་པར་

བཀོད་པས་ཀྱང་བདག་གིས་ནི་ཆོམ་རྐུན་ཤེས་སོ་ཞེས་ཟེར་རོ། །ཕས་སྨྲས་པ། ཆོམ་རྐུན་གྱི་རྐང་རྗེས་སུ་སླར་ཇི་ལྟ་བུ་ཡིན་ཞེས་བརྗོད་པར་གྱིས་ཤིག །དེས་སྨྲས་པ། སོར་མོ་བསྐྱོད་པས་ཐ་མར་རྡུལ་གྱིས་རྣམ་ཁྱབ་པ། །ཀུན་ནས་ཁྱབ་པ་ཉིད་ཀྱིས་མཉམ་པར་ཞུགས་པ་མིན། །དོགས་པའི་ཡིད་ཅན་
གྱི་ནི་རྐང་རྗེས་ཤེས་བྱས་ཏེ། །མྱུར་བའི་དབང་གིས་མདུན་གྱི་གོམ་པ་ལ་གནོད་པ། །གང་ཕྱིར་རྐང་རྗེས་རྣམ་པར་བཀོད་པས་ནི། །ཤེས་རབ་ཆེན་པོ་དེས་ནི་ཆོམ་རྐུན་ཤེས། །སྐྱེད་པར་བྱེད་པས་དེ་ཕྱིར་དེ་ཡིས་ནི། །རྐང་རྗེས་ཤེས་པ་ཞེས་བྱར་མིང་ནི་བསྒྲགས། །དེ་ནས་དུས་གཅིག་གི་ཚེ་ན་བདག་
ཉིད་ཆེན་པོ་དེ་མེ་ཏོག་དང་འབྲས་བུ་དང་རྩ་བ་ཉེ་བར་འོངས་པའི་ཕྱིར་མ་མོ་སོང་བ་དང་ཕ་ལ་དྲིས་པར་གྱུར་ཏེ། རེ་ཞིག་པའི་སྐྱེས་པ་འདི་ཉིད་ཡིན་ནམ་འོན་ཏེ་གཞན་འགའ་ཞིག་ཏུ་ཡིན་ནམ་ཅི་ཞེས་བྱ་བའོ། །བྲམ་ཟེས་སྨྲས་པ། བུ་བཱ་རཱ་ཎ་སཱི་ཞེས་བྱ་བ་རྒྱལ་པོའི་ཁབ་ཡོད་དེ་དེ་ནི་བདག་གི་སྐྱེས་པའི་ས་
ཞེས་ཟེར་རོ། །རྐང་རྗེས་ཤེས་པས་སྨྲས་པ། གལ་ཏེ་འདིར་ནི་གནས་ཤིང་སྐྱེས་པ་དང་ནི་ཕྲད་འདོད་ན། །ཕ་ལགས་མྱུར་དུ་བདག་དང་ལྷན་ཅིག་ཅི་ཡི་ཕྱིར་མི་འགྲོ། །མཁས་པ་རྣམས་ཀྱི་མདུན་སར་བསྟན་བཅོས་རྣམས་དབེན་བསལ་ཚིག་རྣམས། །ཉན་པའི་དོན་དུ་བདག་ལ་ཡང་ནི་ལྟད་མོ་སླར་
ཡང་ཡོད། །བྲམ་ཟེས་སྨྲས་པ། བུ་གལ་ཏེ་འདིར་ཤིན་ཏུ་ལྕི་བའི་བྲག་བསལ་བར་བྱ་བའི་ཕྱིར་ཚེ་དང་ལྡན་པ་ཁྱོད་ལ་ནུས་པ་ཡོད་པར་གྱུར་ན་དེ་ནས་ཕྱིར་དབྱུང་བར་བྱའོ། །དེ་ནས་རྐང་རྗེས་ཤེས་པས་བྲག་དེ་ལ་འབད་པ་མེད་པར་བསལ་བར་བྱས་ཏེ། ཕ་དང་ལྷན་ཅིག་ཏུ་བཱ་རཱ་ཎ་སཱིར་ཀུན་ནས་སོང་བར་གྱུར་ཏོ། །
བྲམ་ཟེ་དེས་ཀྱང་རྐང་རྗེས་ཤེས་པ་དེ་ལག་པ་ནས་བཟུང་སྟེ་སྒོ་སྐྱོང་རྣམས་ཀྱིས་རྣམ་པར་བསལ་བར་བྱས་པ་ཕྱི་རོལ་ན་གནས་པའི་སྐྱེ་བོ་མང་པོས་ཁྱབ་པ་དང་། ཉེ་བར་འདུག་པའི་གླང་པོ་ཆེའི་ཕྲུག་པ་དང་གླང་མོའི་རྐེད་པ་རྣམས་ལ་ཆབ་འོག་གི་རྒྱལ་པོ་ཀུན་ནས་འཇུག་པ་དང་། བོས་ཤིང་མྱུར་དུ་མངོན་པར་
ཕྱོགས་པའི་ཕོ་ཉ་འཇུག་པ་དང་། ཉེ་བར་གནས་པའི་སྒོས་སྟོང་པའི་རྟ་རྣམས་ཀྱི་ཁ་ནས་ཕོ་ཞིང་དབུ་བའི་དུམ་བུས་སའི་སྟེང་འདྲེས་པ་དང་། སའི་བདག་པོ་མཐོང་བའི་དུས་མངོན་པར་འདོད་པའི་གོས་དཀར་པོ་དང་ལྡན་པའི་ལག་པའི་དཀྱིལ་ནས་མེ་ཏོག་རྣམས་རྣམ་པར་གཞག་པའི་ཞབས་ཐོགས་པ་

རྣམས་ཀྱིས་གདན་འཛིན་པའི་གཉིས་སྐྱེས་རྣམས་ཀྱི་སྒོ་རྣམ་པར་མཐོང་བར་གྱུར་པ། ཕྲག་པ་གཡོན་པར་བཀལ་བའི་རལ་གྲི་དང་ལྡན་པའི་རྐང་ཐང་རྣམས་ཀྱིས་ཕྱོགས་གཅིག་ཏུ་ལྷག་པར་གནས་པ། མདུན་སར་ཚོགས་པའི་དུས་སུ་རྒྱལ་པོ་ཚངས་སྦྱིན་གྱི་རྒྱལ་པོའི་ཁབ་ཀྱི་ཉེ་འཁོར་
ཀུན་ནས་མཐོང་ཞིང་སྒོ་བ་ལ་ཞུས་ནས་ཞུགས་ཏེ། སེང་གེའི་ཁྲི་ལ་གནས་པའི་རྒྱལ་པོ་ལ་རྒྱལ་བའི་ཤིས་པ་བརྗོད་པས་མངོན་དུ་ཕྱོགས་པར་བྱས་ཏེ་སྨྲས་པ། རྐང་རྗེས་ཤེས་པ་བདག་གི་བུ་འདི་ནི། །ལྷ་ལགས་ཆོམ་རྐུན་རྐང་རྗེས་ཀྱིས་ཤེས་ཏེ། །འགྲོ་བ་ལ་ནི་སྦྱོར་ཞིང་ཡོངས་སྐྱོང་ཕྱིར། །དེ་བས་
ཁྱེད་ཀྱིས་འདི་ནི་བཟོད་པའི་རིགས། །དེ་ནས་རྒྱལ་པོ་དེས་ངོ་མཚར་བའི་བློ་དང་ལྡན་པས་རྐང་རྗེས་ཤེས་པ་ལ་གཟིགས་ནས་གསུངས་པ། འདི་ནི་གསེར་རྣམས་གཅད་པའི་འོད་ཀྱིས་གཟུགས་ལྡན་བྲང་ནི་སེང་གེ་ལྟར་རྒྱས་པ། །སེན་མོ་འཇམ་པའི་གྲིབ་མ་ཅན་ཏེ་བཞིན་ནི་རི་བོང་འཛིན་ལ་ལྷག་པར་གནས། །
བུང་བ་ལྟར་ནི་སྐྲ་རྣམས་ནག་ལ་མིག་གཉིས་རྒྱས་ཤིང་དཀར་བ་སྟེ། །དེ་ཉིད་རྣམས་ནི་རབ་ཏུ་རྟོགས་པ་འདི་ཡི་བློ་གྲོས་ཇི་ལྟར་འགྱུར་བ་མིན། །དེ་ལྟར་བརྗོད་པས་རྒྱལ་པོ་དེས་རྐང་རྗེས་ཤེས་པ་ལ་བཀུར་སྟི་ཆེན་པོ་བྱས་སོ། །དེ་ནས་བྱང་ཆུབ་སེམས་དཔས་སྨྲས་པ། ཁྱིམ་གཅིག་ལ་གནས་དོགས་པ་
ཡིས། །ཀུན་ནས་ཁྱབ་པའི་མིག་ལྡན་པ། །གང་ཞིག་བདག་གིས་སྟོན་པར་འགྱུར། །མི་བདག་ཁྱོད་ཀྱིས་དེ་བསད་མིན། །དེ་ལྟར་བགྱི་ཞེས་རྒྱལ་པོའི་བཀའ་ཐོས་ནས་རྐང་རྗེས་ཤེས་པའི་ཁྱིམ་དུ་ཀུན་ནས་འོངས་པར་གྱུར་ཏེ། དེ་ཡང་འདི་ལྟར་ཤེས་རབ་ཆེན་པོ་དང་ལྡན་པ་རྐང་རྗེས་ཤེས་གནས་
པ་ལ་གཞན་གྱི་རྫས་འཕྲོག་པ་ལས་རྣམ་པར་ལོག་པའི་ཆོམ་རྐུན་རྣམས་བསྐོར་བ་ལ་སོགས་པའི་ཐབས་ཀྱིས་སྲོག་འཚོ་བར་བྱེད་པས་འགྱུར་བ་ནི། སྒོ་རྣམས་ལྕགས་ནི་མ་བཅུག་པ། །བདེ་བར་སྐྱེ་བོ་གཉིད་ལོག་པའི། །ཁྱིམ་བདག་ནོར་ནི་བསལ་བར་བྱས། །མཚན་མོའི་ཁྱིམ་ན་གནས་པར་གྱུར། །
དེ་ནས་དུས་གཅིག་གི་ཚེ་ན་རྒྱལ་པོ་ཚངས་པས་བྱིན་ཤིང་རྟ་མཆོག་ལ་ཞོན་ནས་སྐྱེ་བོའི་འཁོར་དང་བཅས་པ་མདུན་ན་འདོན་རྟའི་ཐོག་ན་གནས་པ་དང་ལྷན་ཅིག་ཏུ་གཏམ་བྱེད་ཅིང་། །ཟླ་ཚེས་ཤར་བའི་དུས་ལྟར་ཤིན་ཏུ་དགའ་བར་གྱུར་པའི་བཙུན་མོའི་འཁོར་གྱི་སྐྱེད་མོས་ཚལ་ན་གནས་པ། མྱོས་ཤིང་

རབ་ཏུ་དགའ་བའི་སྐྱེ་བོ་དང་ལྡན་པའི་རང་གི་གྲོང་ཁྱེར་ལ་གཟིགས་ཤིང་ཕྱི་རོལ་དུ་ངེས་པར་འབྱུང་བར་གྱུར་ཏོ། །འགའ་ཞིག་གི་ཕྱོགས་གཅིག་ལ་ཡང་མྱོས་པའི་དབང་གིས་གཉིད་ལ་ཉེ་བར་ཞུགས་པ་ཕྲག་པའི་ཕྱོགས་ལས་མདུད་པའི་མེ་ཏོག་དང་བཅས་པའི་སྐྲ་ལོ་ལས་རྟ་བབས་ལས་ཀུན་ནས་
འཕོ་བའི་ཡ་ཕུབས་དང་འདྲ་བའི་གོས་ཀྱིས་ཕྱོགས་གཅིག་ཏུ་ལྷོད་ཅིང་རྣམ་པར་འབྲེལ་བའི་མུ་ཏིག་གི་ཧར་དང་ལྡན་པའི་བཟང་མོ་ཞེས་བྱ་བར་རེས་མའི་གཙོ་བོས་མཐོང་སྟེ། མདུན་ན་འདོན་ལ་སྨྲས་པ། བློ་གྲོས་ཆེན་པོ་དང་ལྡན་པ་ཆོམ་རྐུན་གྱི་རྐང་རྗེས་ཤེས་པའི་མཐུ་ལ་འཕགས་པས་གཟིགས་ཤིག །
གསལ་བར་བྱེད་པའི་བུད་མེད་འདི་ལ་ནི། །མྱོས་པའི་དབང་གིས་ཤིན་ཏུ་གཉིད་སྐྱེས་པའི། །གང་ཞིག་བཅིངས་པ་ཡང་ནི་ལྷོད་པ་འདི། །སུ་ཞིག་འཇིགས་པ་མུ་ཏིག་ཧར་མི་འཕྲོག །དེ་ནས་གདུག་པའི་བདག་ཉིད་མདུན་ན་འདོན་དེ་རང་བཞིན་གྱིས་གཡོ་བའི་ཡིད་དང་ལྡན་པས་བྱང་ཆུབ་སེམས་
དཔའི་ཡོན་ཏན་བརྗོད་པ་ལ་མི་བཟོད་པར་གྱུར་པས་སྨྲས་པ། །ཆོམ་རྐུན་གྱི་རྐང་རྗེས་ཤེས་པའི་སྐྱོན་ཅན་ཉིད་ལྷས་མཁྱེན་པ་མ་ཡིན་དེ་བས་ན་དེའི་འདི་ལྟར་ཡོན་ཏན་རྣམས་ཀྱི་བདག་ཉིད་ཆེན་པོ་བརྗོད་པར་མཛད། །རྒྱལ་པོས་སྨྲས་པ། སླར་དེའི་སྐྱོན་རྣམས་ནི་ཅི་ལྟ་བུ་ཡིན། མདུན་ན་འདོན་
གྱིས་སྨྲས་བ། །རང་ཉིད་ཀྱིས་ནི་ནོར་ཕྲོགས་པ། །ཁྱིམ་པ་རྣམས་ལ་མཚན་མོ་འདི། །གཡོན་ཅན་ཆོམ་རྐུན་རྐང་རྗེས་ཤེས། །ལྷ་ཡི་དྲུང་དུ་གསལ་བར་བྱེད། །དེ་ནས་རྒྱལ་པོ་དེས་དེ་ལྟར་བདག་གིས་བྱེད་པར་འགྱུར་ཏེ། ཇི་ལྟར་འཕགས་པས་ཆོམ་རྐུན་གྱི་རྐང་རྗེས་ཤེས་པའི་བདག་ཉིད་ཆེན་པོ་དད་པར་
འགྱུར་སྙམ་དུ་བརྗོད་ནས་ཤིང་རྟ་ལས་བབས་ཏེ། རང་ཉིད་ཀྱིས་རེས་མའི་གཙོ་མོ་དེས་མུ་ཏིག་གི་ཧར་དེ་བླངས་ནས་ལན་གསུམ་བསྐོར་བ་བྱས་ནས་རང་གི་ཕོ་བྲང་བཱ་རཱ་ཎ་སཱིར་འོངས་ཏེ། སེང་གེའི་ཁྲིའི་བདག་ཉིད་དུ་ས་ལ་བསྐོས་ཤིང་གཞག་པར་གྱུར་ཏོ། །དེ་ནས་རེས་མའི་གཙོ་མོ་དེ་མྱོས་པ་རྣམ་པར་
ཆད་པས་དྲན་པ་ཡང་དག་པར་ཉེ་བར་སྐྱེས་པ་གཉིད་ལས་རབ་ཏུ་སད་ནས་གོས་ཀྱི་མཐའ་མ་མཐོང་སྟེ། ཀྱི་ཧུད་བདག་གི་མུ་ཏིག་གི་ཧར་སུ་ཞིག་གིས་ཕྲོགས་སྙམ་དུ་རྣམ་པར་བསམས་ནས། ཡང་དག་པར་ཉེ་བར་འོངས་ཏེ་རྒྱལ་པོ་ལ་ཞུས་ཤིང་གནས་སོ། །གོས་ཀྱི་མདུད་པ་ལྷོད་པ་བཀྲོལ་བྱས་

ནས། །ས་ཡི་སྐྱོང་བ་བདག་ནི་གཉིད་ལོག་པའི། །གང་གིས་ཀྱང་ནི་མུ་ཏིག་ཧར་ཕྲོགས་པ། །ཟླ་འོད་ལྟར་དང་ནོར་བུའི་གཞི་ཡིས་ལྕི། །དེ་ནས་རྒྱལ་པོ་དེས་མདུན་ན་འདོན་གྱི་མངོན་སུམ་དུ་ཆོམ་རྐུན་གྱི་རྐང་རྗེས་ཤེས་པ་ལ་བོས་ནས་སྨྲས་པ། བཟང་མོ་འདི་ཡི་རིན་ཐང་
ཆེ་བའི་མུ་ཏིག་གི་ཧར་སུ་ཞིག་གིས་ཁྱེར་བ་སྟེ། དེ་བས་ན་ཆོམ་རྐུན་བརྗོད་པར་གྱིས་ཤིག་ཅེས་ཟེར་རོ། །དེ་ནས་ཆོམ་རྐུན་པའི་རྐང་རྗེས་ཤེས་པས་ཕྱི་རོལ་དུ་བྱུང་སྟེ། རྐང་པའི་རྗེས་བཀོད་པ་མཐོང་ཞིང་གྲོང་ཁྱེར་དེ་ལ་ལན་གསུམ་བསྐོར་བ་བྱས་ཤིང་། མིའི་བདག་པོའི་ཕོ་བྲང་དུ་རྗེས་སུ་ཞུགས་ནས་
སེང་གེའི་ཁྲིའི་འོག་གིས་ཀུན་ནས་མཐོང་ཞིང་ཡང་ཡང་དུ། །མི་ཡི་བདག་པོའི་བཞིན་ལྟ་ཞིང་། །བློ་གྲོས་ཆེན་པོ་དེ་བགད་གྱུར། །རྒྱལ་པོས་སྨྲས་པ། ཅིའི་ཕྱིར་འདི་དགོད་པ་སྟེ་འོ་ན་སྨྲོས་ཤིག་ཅེས་ཟེར་རོ། །རྐང་རྗེས་ཤེས་པས་སྨྲས་པ། ལྷ་ལགས་ཇི་ལྟར་བདག་གིས་མཐོང་བ་ནི་གང་
ཞིག་བཟང་མོ་འདི་ཡི་མུ་ཏིག་གི་ཧར་ཁྱེར་བའི་ཆོམ་རྐུན་པ་འདི་ཐ་མལ་པ་ནི་མ་ཡིན་ནོ། །རྒྱལ་པོས་སྨས་པ། འོ་ན་སྨྲོས་ཤིག་དང་། རྐང་རྗེས་ཤེས་པས་སྨྲས་པ། ལྷས་ནི་དཔེ་ཅིག་གསན་པར་འོས་པ་སྟེ་ཞེས་བྱ་བའོ། །ས་འཛིན་རྩིག་པའི་ལོགས་ལ་ས་ནི་རྐོ་བྱེད་ཅིང་། །འགའ་ཞིག་ཏུ་
ནི་རྫ་མཁན་རིགས་ནི་རྒྱས་པའི་ཕྱིར། །ས་དེ་ལྷུང་བར་བྱེད་པས་མནན་པར་གྱུར་པའི་ལུས། །སྡུག་བསྔལ་གྱིས་ཕོངས་དེས་ནི་སྐད་ཅིག་འདི་སྐད་སྨྲས། །གང་ལ་ཤིང་རྣམས་ཆེན་པོ་སྐྱེ་བར་འགྱུར་བ་དང་། །སྲོག་འཛིན་རྣམས་ཀྱིས་རྣམ་པར་སྦྱོར་ཕྱིར་ལོ་ཏོག་རྣམས། །ས་དེ་ཉིད་ཀྱིས་དེ་
རིང་བདག་གིས་ལུས་བཅག་པ། །འགྲོ་བ་འདིར་ནི་བདག་གིས་ཅི་ཕྱིར་བདེ་ཐོབ་འགྱུར། །དེ་ལྟར་བརྗོད་ནས་ཅང་མི་སྨྲ་བར་གྱུར་ཏོ། །དེ་ནས་རྒྱལ་པོ་དེས་རྐང་རྗེས་ཤེས་པ་ལ་སྨྲས་པ། འོ་ན་གསལ་བར་སྨྲ་བར་གྱིས་ཤིག །རྐང་རྗེས་ཤེས་པས་སྨྲས་པ། གལ་ཏེ་འདི་ལས་ཀྱང་ལྷས་ཤིན་
ཏུ་གསལ་བར་སྨྲ་བ་བཞེད་ན་དེ་བས་ན་དཔེས་གཞན་བརྗོད་པར་བྱ་སྟེ། མེ་ལ་མཆོད་པ་གཉིས་སྐྱེས་ལ་ལ་ཡོད་གྱུར་ཏེ། །ཆོ་ག་བཞིན་དུ་མེ་ལ་རབ་ཏུ་མཆོད་ཅིང་གྲགས་པ་ནི། །དེ་ཡི་མེ་སྟག་གིས་ནི་ལག་པ་ཚིག་པ་དེ། །ཁྱབ་པ་ཉེ་བར་སོང་བ་འདི་སྐད་སྨྲས་པར་གྱུར། །གང་ཞིག་བདག་

ནི་ཉིན་རེར་བསྲེག་ལུགས་ཀྱིས་མཆོད་པ། །འདུད་པའི་སེམས་ཀྱིས་ཀྱང་ནི་ཕྱག་ནི་བཙལ་བྱས་པ། །མེ་འདི་དེ་ཉིད་ཀྱེ་མ་བདག་ལ་སྲེག་བྱེད་པ། །ལུས་ཅན་རྣམས་ཀྱི་སུ་ཞིག་སྐྱབས་ནི་འབྱུང་བར་འགྱུར། །དེ་ཙམ་ཞིག་བརྗོད་ནས་སླར་ཡང་མི་སྨྲ་བར་གནས་པར་གྱུར་ཏོ། །རྒྱལ་པོས་སྨྲས་པ།
ཁྱེད་ཀྱི་ཚིག་འདི་བདག་ཅག་གིས་ཤེས་པ་མ་ཡིན་ཏེ། །དེ་བས་ན་ཤིན་ཏུ་མངོན་པར་གསལ་བའི་དོན་ཅི་ལྟར་འགྱུར་བ་དེ་ལྟར་སྨྲོས་ཤིག་ཅེས་ཟེར་རོ། །རྐང་རྗེས་ཤེས་པས་སྨྲས་པ། གལ་ཏེ་རྒྱལ་པོ་ཆེན་པོ་ཤིན་ཏུ་རབ་ཏུ་གསལ་བར་གཞན་ཡང་བཞེད་ན་དེ་བས་ན་གསན་པར་འོས་པ་སྟེ། ལ་ལ་ཁྲུས་ནི་
བྱ་ཕྱིར་ཆུ་བོའི་ཆུ་ལ་འཇུག་པ་སྟེ། །བྲམ་ཟེ་དེས་ནི་ཁྱེར་བར་གྱུར་པས་འདི་ལྟར་སྨྲས། །གང་ཞིག་ཆུ་ཞེས་སྐྱེས་སོ་འཚོ་བར་བྱེད་པ་དེ་ཉིད་ནི། །སྡུག་བསྔལ་ཅན་བདག་ཁྱེར་ཏེ་སུ་ལ་སྐྱབས་སུ་འགྲོ། །དེ་ལྟར་བརྗོད་ནས་སླར་ཡང་ཅང་མི་སྨྲ་བར་གནས་པར་གྱུར་ཏོ། །དེ་ནས་རྒྱལ་པོ་དེས་སླར་དེ་ལ་སྨྲས་པ། བྲམ་ཟེ་
ཆེན་པོ་འོ་ན་ཤིན་ཏུ་གསལ་བར་བརྗོད་པར་མཛོད་ཅིག་དང་། རྐང་རྗེས་ཤེས་པས་སྨྲས་པ། གལ་ཏེ་དེ་ལྟར་ཡིན་ན་དེ་བས་ན་ལྷས་གསན་པར་འོས་སོ་ཞེས་ཟེར་རོ། །ནགས་མཐའ་འགའ་ཞིག་ཏུ་ནི་འདབ་ཆགས་རྣམས་གནས་པ། །ཡུན་རིང་སྣ་ཚོགས་ཤིང་གི་ས་བོན་ཟ་བ་ནི། །དེ་ལས་བྱུང་བའི་རབ་
ཏུ་སྟོབས་ལྡན་མེ་ཡིས་ནི། །གཟི་བརྗིད་གསལ་བས་མཚན་རྣམས་སྟོབས་ཀྱིས་ཚིག་པར་བྱས། །གང་ཞིག་ནགས་ནི་མཐུག་པ་ཡིས། །ཤིང་གི་གྲིབ་ལྡན་འདབ་ཆགས་རྣམས། །དེ་ཉིད་ལས་ནི་བྱུང་བའི་མེ། །དེ་རྣམས་གང་ལ་སྐྱབས་སུ་འགྲོ། །རྒྱལ་པོས་སྨྲས་པ། འོ་ན་ཚིག་གི་དོན་རྣམ་པར་
གསལ་བར་ཁྱེད་ཀྱིས་སྨྲ་བར་འོས་པ་སྟེ། །ད་དུང་ཡང་བདག་ཅག་གིས་ཤེས་པར་འགྱུར་བ་མ་ཡིན་ནོ། །ཞེས་ཟེར་རོ། །རྐང་རྗེས་ཤེས་པས་སྨྲས་པ། རྒྱལ་པོ་ཆེན་པོ་ཤིན་ཏུ་གསལ་བའི་དཔེ་གསོན་ཅིག །ཞིང་པ་ལ་ལ་ཞིག་ཞིང་ལ། །ལོ་ཏོག་བསྐྱེད་པར་འདོད་པ་ནི། །ཐོང་གཤོལ་གྱིས་
ནི་རྨོ་ཞིང་གནས། །དགའ་བས་གཉའ་ཤིང་འཛིན་པ་ནི། །དེ་ཡི་བུ་མོ་འབྲས་ཆན་ནི། །བཟུང་ནས་གུས་པས་རྩེ་གཅིག་པ། །མྱུར་བར་ཞིང་སར་འོངས་པ་སྟེ། །ལང་ཚོས་ཡངས་པའི་མིག་ལྡན་པ། །དེ་ནས་འབྲས་སྣོད་འཇོག་བྱེད་ཅིང་། །དེ་ཡི་བསྟན་དང་ཡང་དག་ལྡན། །སྐེ་རགས་དང་

བྲལ་ལྷོད་པ་ནི། །མཚན་མའི་གོས་ནི་ལྷུང་བར་འགྱུར། །དེ་ནི་གཅེར་བུ་དེ་མཐོང་ཞིང་། །གྲོང་གནས་པ་ཡི་ཡིད་ལས་བྱུང་། །སོ་སོར་རྟོག་པ་མ་ཐོབ་པར། །འདོད་དང་བཅས་པ་སེམས་བཅས་འགྱུར། །དེ་ནས་ངོ་ཚས་འཇིགས་པས་གཡོ་བའི་མིག་ལྡན་དེ། །ལག་
པ་རྣམས་འདར་མཆི་མ་འབྱུང་བའི་མིག་ལྡན་པ། །ཡིད་འབྱུང་བས་ནི་ཆོས་ཀྱི་སེམས་དཔའ་རྒྱལ་བ་ནི། །འོངས་ཏེ་གཟུགས་འགྱུར་སྡུག་བསྔལ་ལྡན་མ་ཡང་། །བཙན་ཐབས་ཀྱིས་ནི་བྱ་མིན་ནད་པས་བྱས་ནས་ནི། །ཕྱིས་ནས་འགྱོད་པ་སྐྱེས་པས་གདུང་བ་དེས་སྨྲས་པ། །བྱ་མིན་འདི་
ལྟར་བྱེད་པ་བདག་ལ་ཇི་ལྟར་ནི། །བུ་མོ་ཁྱོད་ཀྱི་དི་རིང་འདིར་ནི་གེགས་མ་བྱས། །བུ་མོ་དེས་ནི་ངོ་ཚ་དང་བཅས་ཕ་དེ་ལ་སྨྲས་པ། །འཕགས་པ་ལགས་སྡུག་བསྔལ་ལྡན་པ་བདག་ལ་ཁྱོད་ཉིད་སྐྱབས་ཡིན་ཏེ། །དལ་བ་མིན་པ་ཆེན་པོ་གལ་ཏེ་ཁྱོད་ལས་འདི་འབྱུང་ན། །ད་ནི་གཞན་ལས་ཅི་ཡི་
ཕྱིར་ནི་བདག་ཉིད་སློང་བར་བགྱིད། །མངའ་བདག་ཉིད་ཀྱི་དྲུང་ནས་ནི། །གལ་ཏེ་སྡུག་བསྔལ་ཆེན་པོ་འབྱུང་། །འཇིག་རྟེན་འདི་ཡི་ཡིད་འཕྲོག་མ། །བདེ་བ་གང་ལས་སྐྱེ་བར་འགྱུར། །མུན་པ་འཕྲོས་པའི་འོད་ལྡན་པ། །གལ་ཏེ་མར་མེ་ཉིད་བྱེད་ན། །སྣང་བཅས་ཁྱིམ་ནི་འདོད་རྣམས་ཀྱིས། །སྣང་བ་
གང་ནས་སློང་བར་འགྱུར། །དེ་ལྟར་བདག་ཉིད་ཆེན་པོ་དེས་སྨྲས་ནས་སླར་ཡང་ཅང་མི་སྨྲ་བར་གནས་པར་གྱུར་ཏོ། །རྒྱལ་པོས་སྨྲས་པ། ཁྱེད་ཀྱིས་འདི་ཙམ་པ་སྨྲས་ཀྱང་འདི་ཅི་ཡིན་ཞེས་བདག་གིས་ཤེས་པ་མ་ཡིན་ནོ། །རྐང་རྗེས་ཤེས་པས་སྨྲས་པ། གལ་ཏེ་རྒྱལ་པོ་ཆེན་པོ་གཞན་ལ་ཉེ་བར་བསྟན་
པས་སྨྲས་པ། མཁྱེན་པ་མ་ཡིན་ན་དེ་བས་ན་གསལ་བར་བདག་གིས་བརྗོད་པར་འགྱུར་ཏེ། སྐྱེད་མོས་ཚལ་གྱི་ཐ་མར་གཉིད། །ལོག་པའི་ན་ཆུང་ལ་གསལ་བར། །མུ་ཏིག་གི་ཧར་ཁྱེད་ཉིད་ཀྱི། །མདུན་ན་འདོན་འདིས་མངོན་དུ་འཕྲོགས། །རྒྱལ་པོས་སྨྲས་པ། དེ་ནི་སླར་བདག་གིས་
གང་དུ་གཞག་པར་འགྱུར་ཞེས་ཟེར་རོ། །རྐང་རྗེས་ཤེས་པས་སྨྲས་པ། གལ་ཏེ་དེ་ལྟར་ཡིན་ན་དེ་བས་ན་སེང་གེའི་ཁྲི་འདི་བསལ་བར་མཛོད་ཅིག་དང་སེང་གེའི་ཁྲི་ཡང་བསལ་བ་དང་། དེ་ནས་དེའི་ས་འོག་བརྐོས་ནས་ནི། །སྐྱེ་བོ་དགོད་པས་རྣམ་པར་མཐོང་བར་གྱུར་པ་ནི། །ལྟོ་འཕྱེ་དཀར་

པོ་གཉིད་ལོག་ལྟར་ནི་རབ་བཟུང་ནས། །ཡིད་འཕྲོག་མུ་ཏིག་ཧར་ནི་ཀུན་ནས་བཏོན་པར་གྱུར། །དེ་ནས་རྒྱལ་པོ་ངོ་མཚར་སྐྱེས་ཏེ་སྐྱེ་བོས་ཀྱང་ནི་དེར། །དོན་དམ་ལ་ནི་མ་ལུས་འབྲེལ་བའི་བློ་ཅན་དེ་ཡི་མཁྱེན་པ་ཡིས། །སྐྱེ་ངན་དངོས་པོས་ཡིད་ནི་སྨོད་ཅིང་སྐྱེ་བཟང་ལ་བརྙས་ཅན། །ཁྲོ་བ་དང་བཅས་
ཉིད་ནི་མདུན་ན་འདོན་དེ་འབྱུང་བར་འགྱུར། །སྐྱེ་བོ་ཡོན་ཏན་ཅན་རྣམས་ཀྱི། །ཡོན་ཏན་ཕུན་ཚོགས་ཆེར་གྲགས་པ། །སེར་སྣས་ནོན་པའི་སེམས་ལྡན་པའི། །སྐྱེ་བོ་ངན་རྣམས་བཟོད་པ་མིན། །རེས་མའི་གཙོ་མོ་དེས་ཀྱང་མུ་ཏིག་གི་ཧར་བླངས་ནས་སེམས་དགའ་ཞིང་རང་གི་ཁྱིམ་དུ་སོང་བར་
གྱུར་ཏོ། །བྱང་ཆུབ་སེམས་དཔས་ཀྱང་གདན་ལ་ཀུན་ནས་ཉེ་འཁོར་དང་བཅས་པ་རྒྱལ་པོ་དེའི་ལམ་བཟང་པོ་རྟོགས་པར་བྱ་བའི་ཆོས་ཀྱི་བསྟན་པ་འདི་ལྟར་བྱས་པར་གྱུར་ཏེ། སྐྱེ་བོ་འདི་ཡི་ཕུན་ཚོགས་འདི། །སྡུག་བསྔལ་གྱིས་ནི་ཡང་དག་ལྡན། །དུག་ཅན་སྦྲུལ་གྱིས་ཤིས་བརྗོད་པ། །དུག་དང་ལྷན་ཅིག་སྐྱེས་
པ་ལྟར། །ནོར་གྱི་ཕྱིར་ནི་བྱ་མིན་རྣམས། །བདེ་བ་འདོད་པས་བྱེད་འགྱུར་བ། །དམྱལ་བའི་སྡུག་བསྔལ་ལས་འབྱུང་བས། །སྡུག་བསྔལ་ཆེན་པོ་མཐོང་མིན་པ། །ཡུལ་གྱི་མུན་པ་ལས་ནུབ་པའི། །ཚད་ནི་ཀུན་ནས་མཐོང་བྱེད་ཅིང་། །སྐྱེ་བོ་ཤི་བ་མིན་པས་སེམས་ཀྱི་ཁྱིམ་ལ་འབྲེལ་པ་འདེབས་
པར་བྱེད། །ཡུན་རིང་རེ་བའི་ལྟོ་འཕྱེ་མོ་ནི་ཉེ་བར་ཞི་བའི་བདེ་བའི་ཕྱིར། །ཆོག་ཤེས་སྔགས་ནི་ཐོབ་པའི་སྐྱེས་པ་ལ་ནི་ཀུན་ནས་ཡོད་པར་བྱེད། །ལོངས་སྤྱོད་རྣམས་ནི་ཐོབ་པའི་ཡིད་ལྡན་ངལ་བ་རྣམས་ལ་མ་བལྟས་གཞན་རྣམས་ལ་ནི་བརྟེན། །བསྙེན་པ་སྡུག་བསྔལ་སྐྱེད་པར་བྱེད་པ་སུ་ལའང་གནོད་
པར་མི་བྱེད་དགྲ་སྟའི་སོ་ལྟར་ནི། །གལ་ཏེ་གཏན་དུ་བ་ཡི་བདེ་བ་འདོད་ན་དེ་བས་ཆོག་ཤེས་ལ་ནི་དམིགས་པར་མཛོད། །རེ་བའི་མེ་སྟག་ཆོག་ཤེས་ལ་ནི་ཡང་དག་གནས་པའི་ཡིད་ནི་ཚིག་བྱེད་མ་ཡིན་ནོ། །དེ་ནས་རྒྱལ་པོ་དེས་ལེགས་སོ་ལེགས་སོ་ཞེས་བྱ་བས་བྱང་ཆུབ་སེམས་དཔའ་ལ་མངོན་
པར་བསྟོད་དེ། ཡོ་བྱད་ཆེན་པོས་གུས་པར་བྱས་ཏེ་རང་གི་ཁྱིམ་དུ་རྣམ་པར་བཏང་བར་གྱུར་ཏོ། །དེ་ལྟར་བཅོམ་ལྡན་འདས་དེས་སོ་སོའི་སྐྱེ་བོའི་གནས་སྐབས་སུ་ཡོད་པ་ན་ཡང་ཤེས་རབ་ཀྱིས་འཇིག་རྟེན་པ་རྣམས་ངོ་མཚར་བར་མཛད་ན། མངོན་པར་རྫོགས་པར་སངས་རྒྱས་ནས་ལྟ་སྨོས་

ཀྱང་ཅི་དགོས་སྙམ་དུ་རྣམ་པར་བསམས་ནས། སེམས་དང་ལྡན་པ་སུ་ཞིག་སངས་རྒྱས་བཅོམ་ལྡན་འདས་ལ་དང་བ་བསྐྱེད་པར་མི་བྱེད་ཅེས་བྱ་བའོ། །རྐང་རྗེས་ཤེས་པའི་སྐྱེས་པའི་རབས་ཏེ་སྐྱེས་རབས་བརྒྱད་པའོ།། །།ཡུལ་གྱི་དགྲ་རྣམས་ཀྱིས་ནི་
བསྐུལ་གྱུར་པ། །ཤིན་ཏུ་འཇིགས་པའི་ས་ཡི་འོག་ཏུ་སྡིག །སྐྱེ་བོ་རིང་པོ་ནས་ནི་འགེགས་བྱེད་དེ། །ལེགས་པར་གསུངས་པ་མྱུར་དུ་གྲོགས་པོ་ལྟར། །འདི་ལྟར་རྗེས་སུ་ཐོས་ཏེ་གྲོང་ཁྱེར་གཞན་ཞིག་ན་དྲང་སྲོང་རྒྱས་པའི་རིགས་བརྒྱན་པར་བྱེད་འདོད་པ་ལྟར་གར་གྱི་ཆ་རྣམས་ལ་མཁས་པའི་
དྲང་སྲོང་རྒྱས་པའི་སྲས་སུ་ཞིག་གི་ཁྱིམ་བདག་མོའི་ལྟོ་བ་ན་བྱང་ཆུབ་སེམས་དཔའ་སྐྱེ་བར་འགྱུར་ཏེ། རྒྱས་པའི་སྲས་ཀྱི་མཆོག་གི་བུད་མེད་དེ་ལ་ནི། །དུས་ནི་འདས་ནས་མཚན་མོའི་ཟླ་བའི་ཆ་ལྟ་བུར། །ཡིད་འཕྲོག་ཡན་ལག་ཅན་ནི་བུ་མོའི་རྒྱུ་ཡིས་ནི། །གཟུགས་ལྡན་གར་གྱི་ཆ་དང་འདྲ་བ་
སྐྱེས་པར་གྱུར། །དེ་ཡི་གཟུགས་ནི་ཁྱད་པར་དུ་ཡང་མཛེས་པ་མཐོང་ནས་ནི། །ཆུ་ལས་སྐྱེས་པའི་རྡུལ་ལྟར་འཇམ་པའི་ལུས་ཀྱི་སྲོག་ཤིང་གི། །བཞིན་གྱི་རི་བོང་ཅན་གྱི་མཛེས་པ་མ་ལུས་འཕྲོག་བྱེད་པའི། །ཕ་ནི་དགའ་བས་དཔེ་མེད་མ་ཞེས་མིང་དུ་བཏགས་པར་གྱུར། །དེ་ནས་དཔེ་མེད་མས་ལོ་གཉིས་ལོན་པ་
དང་དེའི་ཕ་མ་དག་འཇིག་རྟེན་གཞན་དུ་ཉེ་བར་སོང་བར་གྱུར་ཏོ། །རྒྱས་པའི་སྲས་དེའི་གཞན་དག་ལ་རྒྱས་པ་ཐམས་ཅད་ཀྱི་མཆོག་ཏུ་གྱུར་པའི་གཙོ་བོ་གྲོགས་པོ་བྱུང་བར་གྱུར་ཏོ། །དེས་ཀྱང་ཡང་དག་པར་ཉེ་བར་འོངས་ཏེ་དཔེ་མེད་མའི་རང་གི་སྐྱེ་བོ་ལ་སྨྲས་པ། མཐོ་རིས་སུ་ཉེ་བར་སོང་བའི་གྲོགས་པོ་དེ་ལ་
དཔེ་མེད་མ་འདིའི་འོ་མ་བདག་ནི་ཕ་ཡིན་ཏེ། དེ་བས་ན་མྱ་ངན་གྱིས་ཆོག་གིས་གལ་ཏེ་ཡང་ཁྱེད་ཅག་ལ་འདོད་ན་དེ་བས་ན་བདག་གི་འདི་གར་གྱི་ཆ་རྣམས་ལ་མཁས་པ་བྱེད་པར་འགྱུར་ཞེས་ཟེར་རོ། །རང་གི་སྐྱེ་བོས་དེ་ལྟར་བགྱི་ཞེས་བྱ་བ་སོ་སོར་ཐོས་པ་ལ་གཙོ་བོ་དེས་དཔེ་མེད་མ་བླངས་ནས་རང་གི་ཁྱིམ་དུ་ཁྱེར་ཏེ་
དུས་རིང་བ་མ་ཡིན་པ་ཉིད་ཀྱིས་ཡི་གེ་རྣམས་ལ་མཁས་པར་བྱས་ཏེ། གར་གྱི་ཆ་རྣམས་ལ་གོམས་ཤིང་མཁས་པར་བྱས་པར་གྱུར་ཏེ། འདིས་ནི་ལེགས་པར་བདག་ནི་གནས་ལ་ངེས་སྦྱར་ཏེ། །བདག་ཉིད་ཆེན་པོ་གཙོ་བོ་རྣམས་ཀྱི་མཆོག་གིས་ནི། །དེ་ལྟར་རབ་ཏུ་འཛིན་ལྟར་ཕྲད་འདོད་དེ་ལ་ནི། །ཉི་མ་

རེ་རེར་གར་གྱི་ཆས་ནི་ཀུན་འཁྱུད་གྱུར། །དེ་ནས་གཙོ་བོ་དེས་གར་གྱི་ཆ་མ་ལུས་པ་དེ་ལ་གྲུབ་པའི་ངོ་བོར་བྱས་ནས་བུ་མཆོག་ལ་རབ་ཏུ་བྱིན་པར་གྱུར་ཏོ། །གྲོང་ཁྱེར་དེ་ལ་ཡང་མིའི་བདག་པོས་བོས་ནས་གཙོ་བོ་དེ་ལ་སྨྲས་པ། ཀློག་དང་གར་ནི་མ་ལུས་པ། །གང་གིས་ཁྱེད་ཀྱིས་མཉེན་དང་
མཐོང་། །འཇིག་རྟེན་འདི་ལ་དེ་ཉིད་ཀྱི། །འབྲས་བཅས་རྣ་བ་མིག་དང་སེམས། །དེ་བས་འདིར་ནི་གར་མཆོག་ནི། །གར་གྱི་དབང་ཕྱུག་སྟོན་བྱེད་པའི། །ཁྱེད་ལ་ལྟ་བར་འདོད་པ་སྟེ། །ཁྱིམ་དུ་བཙུན་འཁོར་བཅས་སྐྱེ་བོ། །གཙོ་བོས་སྨྲས་པ། ཁྱེད་འདྲ་རྟོགས་ལྡན་ས་ཡི་དབང་ཕྱུག་ཡོད་པ་ལ། །
སྦྱོར་བ་བྱེད་པའི་ཡིད་ནི་བདེ་བླག་བྱ་བར་འགྱུར། །ཤར་ནས་གནས་པའི་བདེ་མཐོང་འགྲོ་བའི་འོད་ཅན་ལ། །ཟེའུ་འབྲུ་ཀུན་ནས་དབུགས་ནི་འབྱུང་བ་པདྨ་ལྟར། །ཨེ་མ་ཡིད་ཀྱི་རྣམ་འགྱུར་གསལ་བར་རབ་ཏུ་འགྲོ་སྟེ་གང་གི་ཉམས་རྣམས་ཀྱིས། །ཤིན་ཏུ་གླུ་ཡི་རྣམ་འགྱུར་དེ་རྣམས་རྗེས་
ལྷུང་ཉམས་ཀྱི་དབང་གིས་གདོན་པར་མཛོད། །ཀུན་ནས་འགྲོ་བ་འདི་ཡང་སྒེག་ཅིང་རྐང་པ་རྣམ་པར་བཀོད་པས་འཇམ་པ་ནི། །དེ་ལྟར་བརྗོད་ཅིང་ལྟད་མོ་བ་ནི་འཕྲོག་བྱེད་གར་མཁན་ལ་ཡང་སྤྲོ་བ་སྐྱེད། །དེ་ལྟ་བུར་གྱུར་པའི་ལྷ་ཡང་ལྟད་མོ་བ་སྟེ་དེ་བས་ན་བདག་གི་རྗེས་སུ་འཛིན་པ་སྟེ་གལ་
ཏེ་བདག་གར་གྱི་བསྟན་བཅོས་རབ་ཏུ་སྦྱོར་ཞིང་ལྷས་མཐོང་བར་འདོད་ཅེས་ཟེར་རོ། །རྒྱལ་པོས་སྨྲས་པ། །དེ་བས་ན་དུས་འདའ་བས་ཆོག་སྟེ་གར་གྱི་ཆོ་ག་རབ་ཏུ་རྩོམ་པ་ཉིད་དུ་མཛོད་ཅིག་ཅེས་ཟེར་རོ། །དེ་ལྟར་བགྱི་འོ་ཞེས་བྱ་བ་གཙོ་བོ་དེས་སོ་སོར་མཉན་ནས་མིག་ལ་དགའ་བར་གྱུར་པ་ལྟད་མོའི་
ཁྱིམ་རྣམ་པར་བསམས་ན། །བཙུན་མོའི་འཁོར་དང་བློན་པོ་དང་གྲོང་ཁྱེར་བའི་ཚོགས་དང་བཅས་པའི་རྒྱལ་པོ་དེ་ཡང་དག་པར་ཉེ་བར་བཞུགས་པ་ལ་རྫ་རྔའི་སྒྲས་ཀུན་ནས་ཁྱབ་པའི་མིའི་བདག་པོའི་ཕོ་བྲང་དུ་ཟློས་གར་མཁན་གྱིས་ཤིས་པ་བརྗོད་པའི་ཚིགས་སུ་བཅད་པ་གདོན་པ་སྔོན་དུ་འགྲོ་
བར་གར་གྱི་ཆོ་ག་རབ་ཏུ་སྐབས་ཕྱེ་བར་བྱས་པ་ལ། གཙོ་བོ་དེས་དཔེ་མེད་མ་དང་ལྷན་ཅིག་ཏུ་ལྟད་མོ་བ་རྣམས་ཀྱི་སར་རབ་ཏུ་ཞུགས་པར་གྱུར་ཏོ། །ཀུན་ནས་ཐོས་པར་བྱེད་ཅིང་རྫ་རྔའི་སྤྲིན་གྱི་སྒྲ་ཆེན་པོ། །གར་དེ་སྤྲིན་གྱི་དུས་ན་མིག་རྣམས་ལ་ནི་མངོན་པར་དགའ། །དགོད་པས་སྣང་བར་

བྱས་པའི་གདོང་ཅན་སྒེག་ཅིང་མངོན་དགའ་བ། །གར་མཁན་མོ་ཡི་གློག་དེ་མ་ལུས་པ་ནི་བརྒྱན་པར་བྱས། །གཙོ་བོའི་དཔྱིད་ནི་མཛེས་པ་མ་ཉམས་ཡང་དག་ཐོབ་ནས་ནི། །དེ་ནི་འཇམ་པས་དགོད་པའི་དབང་གིས་བཞིན་གྱི་ཆུ་སྐྱེས་ཀྱི། །སོར་ཕྲེང་འོད་ཟེར་ཟེའུ་འབྲུ་
ཅན་ན་ཅུང་ཟད་དུ། །དཔེ་མེད་མ་ཡིན་པདྨོ་སྒེག་དང་བཅས་པར་གསལ་བྱས་གྱུར། །ཉམས་ནི་གང་གང་སྟོན་པར་བྱེད་ཅིང་སྒེག་དང་བཅས་པར་ཉམས་ལྡན་ནས། །དེ་ནི་གང་དུ་ཤིན་ཏུ་དགར་འགྱུར་ཡན་ལག་སྲོག་ཤིང་ཅན། །མཚར་བས་ལེགས་སོ་ལེགས་སོ་ཞེས་ནི་སྐྱེ་བོ་ཀུན་བརྗོད་
ཅིང་། །དེ་ལ་བལྟས་ནས་ཕྲད་འདོད་ཕྱིར་ནི་དེ་རང་བཞིན་ལྟར་འགྱུར། །བུད་མེད་གཟུགས་ནི་ཟླ་བ་ལྟར་ནི་ཡིད་འོང་སྒེག་སྤངས་ཀྱང་། །སྐྱེ་བོ་སེམས་ནི་ཕྲད་པར་འདོད་པ་བྱེད་པ་ཉིད་ཡིན་ཏེ། །ངོ་ཚ་སྒེག་དང་འཇམ་པའི་དགོད་པས་མཆུ་ནི་བསྐུམ་བྱས་པ། །ཡིད་ཀྱི་རྣམ་འགྱུར་ལྡན་པའི་སྣ་
ཚོགས་ཆ་མཁས་སྨོས་ཅི་དགོས། །དེ་ནས་དཀའ་ཐུབ་པའི་སྲས་གཞན་དག་དཀའ་ཐུབ་སྤྱོད་པའི་ཡོངས་སུ་ངལ་བས་ཡིད་སྐྱོ་བ་ཉིད་ཀྱིས་འདི་ལྟར་བསམས་པར་གྱུར་ཏོ། །རང་བཞིན་གྱིས་རྩུབ་པའི་རྩ་བ་དང་འབྲས་བུ་མངོན་པར་ཟོས་པས་མོད་པའི་སྡུག་བསྔལ་ཉེ་བར་ལྷུང་བས་བཟོད་པར་དཀའ་
བའི་རི་དགས་ཀྱི་པགས་པ་དང་ཤིང་གི་ལོ་མ་ཙམ་གྱོན་པས་སྲ་བ་ལ་ཉལ་བས་ལུས་སྐྱོ་བའི་དཀའ་ཐུབ་ཀྱི་ནགས་ན་གནས་པས་བདག་ལ་ཆོག་སྟེ། དེ་བས་ན་བདག་ནི་སོང་སྟེ་ཁྱིམ་ན་གནས་པ་ཉིད་དུ་བྱ་དགོས་སྙམ་མོ། །རབ་ཏུ་དགའ་བའི་ཁྱིམ་བདག་མོ་ཀུན་ནས་དོན་དུ་གཉེར་བའི་སྐྱེ་བོ་ཚོ་བར་
གྱུར་པ་ན་མེ་མཆོད་ཀྱི་དུ་བས་གཙང་བར་བྱས་པ་དང་། བུད་མེད་རྣམས་ཀྱིས་བ་རྣམས་ཀྱི་བེའུ་ལ་རབ་ཏུ་རྩེ་བར་བྱེད་པ་དང་། ཤིན་ཏུ་དྲི་ཞིམ་པའི་མེ་ཏོག་རྣམས་ཀྱིས་ལྷའི་གནས་མཆོད་པ་དང་། ཀུན་ནས་འབྱུང་བའི་ཀུནྡ་སར་པ་ལྟར་དཀར་བའི་ཞོ་དང་བསྲེས་པའི་གཏོར་མ་རྣམ་པར་བཀོད་པས་
ཤར་ཕྱོགས་སུ་བསྲེས་པ་དང་། ཐོ་རངས་དང་མཚན་མོའི་སྒོ་རྣམས་ལ་བ་ལང་སྐྱོང་བར་བྱེད་པ་རྣམས་ཀྱིས་བ་རྣམས་འཇོ་བར་བྱེད་པས་འོ་མའི་རྒྱུན་གྱི་སྒྲ་ཐོས་པ་དང་། ཉི་མ་རེ་རེའི་རྗེས་ལ་མངོན་པར་འོངས་པའི་གྲོགས་པོ་སྐྱེ་བོའི་གཏམ་གྱིས་དགའ་བར་གྱུར་པ་བྲམ་ཟེ་ཉན་པ་པོ་ཁྱིམ་པ་སུ་ཞིག་

ཅེས་བྱ་བའི་ཁྱིམ་སྙིང་དགའ་བར་མི་འགྱུར་སྙམ་དུ་རྣམ་པར་བསམས་ནས་གྲོང་ཁྱེར་དུ་འོངས་ཏེ། མིའི་བདག་པོའི་ཕོ་བྲང་དུ་རྫ་རྔའི་སྒྲ་ཐོས་ནས་གྲོང་ཁྱེར་བའི་སྐྱེ་བོ་ཡང་དེ་ལ་མངོན་པར་ཕྱོགས་པར་མཐོང་ནས། རེ་ཞིག་བདག་གིས་ཀྱང་འགྲོ་བར་བགྱིས་ཏེ་ལྟད་མོ་བལྟ་བར་བགྱིའོ་སྙམ་དུ་རྣམ་པར་
བསམས་ནས་མིའི་བདག་པོའི་ཕོ་བྲང་དུ་རྗེས་སུ་ཞུགས་ཏེ་མཐའ་གཅིག་ཏུ་སྤའི་གདན་ལ་ཉེ་བར་གནས་ཤིང་སྒེག་པའི་རྐང་པ་རྣམ་པར་བཀོད་པ་དང་། ཡན་ལག་གཡོ་བ་དང་སྨིན་མ་མཐོན་པོས་འདི་ལྟར་རབ་ཏུ་བསྐུལ་བ་འདྲ། །འདི་ལྟར་གྱུར་པའི་གཞོན་ནུ་མ་ཡི་གཟུགས་ནི་ཨེ་མ་སྒེག་པ་ཡི། །མཛེས་
པ་ཡིད་འོང་སུ་ཞིག་ཡིད་ལ་བདེ་བར་བྱེད་མ་ཡིན། །བུད་མེད་ཀྱི་གཟུགས་འདི་ལྟ་བུ་རྣམས་དཀའ་ཐུབ་ཀྱི་ནགས་ན་གནས་པ་རྣམས་ཀྱི་མིག་གི་ཡུལ་དུ་གང་ན་འགྲོ་བ་ཡིན་ཏེ། གླུའི་སྒྲ་རྣམས་ནི་རྣ་བའི་ལམ་དུ་ཇི་ལྟར་འགྲོ་བ་ཡིན་སྙམ་པ་དེ་བས་ན་བདག་གི་དཀའ་ཐུབ་ཀྱི་
ནགས་ན་གནས་པ་ཡོངས་སུ་དོར་བ་ནི་གནས་ཡིན་ནོ་སྙམ་དུ་རྣམ་པར་སེམས་ཤིང་། མིག་མི་གཡོ་བ་དང་ལྡན་པས་དཔེ་མེད་མ་མཐོང་བར་གྱུར་ཏེ། དེ་བས་གཙོ་བོ་ལྟ་བས་འབྲེལ་བ་མིག་ནི་དཀར་རྒྱས་པ། །དེ་ཡི་གོས་ནི་འོ་མའི་རྒྱ་མཚོའི་ལྦུ་བ་ལྟར་དཀར་བ། །གསེར་གྱི་པདྨ་
ཟུམ་དང་རྗེས་སུ་མཐུན་པ་འཛིན་པ་ཡི། །འོ་མ་འཛིན་པ་གཉིས་ལས་གློ་བུར་དུ་ནི་ཅུང་ཟད་ལྷུང་བར་གྱུར། །འོ་མ་འཛིན་པ་གཉིས་ནི་འབྱུང་བ་སྲབ་པའི་དབུས་ཀྱི་ཆ། །དེ་ལ་དེ་ནས་རྒྱས་པ་མཐོང་ནས་ཅུང་ཟད་དགོད་བྱས་ཏེ། །གླགས་ནི་ཚོལ་ལ་རྩེ་གཅིག་པ་དང་གཡོ་བའི་བསམ་པ་ཅན། །
ཡིད་ལས་སྐྱེས་པའི་དབང་གིས་ཀུན་ནས་འདོད་པ་སོང་བར་གྱུར། །བུད་མེད་གཟུགས་ནི་མཐོང་ནས་ནི། །དཀའ་ཐུབ་ནོར་ཅན་ལེགས་བློ་ཡང་། །བརྟན་ནི་སྐད་ཅིག་ཏུ་ནི་དོར། །ཐ་མལ་སྐྱེ་བོ་སྨོས་ཅི་དགོས། །དེ་ནས་དཔེ་མེད་མ་སྟེང་གོས་ལྷུང་བ་བླངས་ནས་གཙོ་བོ་དེ་ཡན་
ལག་མེད་པའི་དབང་དུ་སོང་བར་ཤེས་ནས་མུན་པ་དང་བཅས་པའི་སྐྱེ་བོའི་སྒྲོན་མར་གྱུར་པའི་ལེགས་པར་བཤད་པ་འདི་ལྟར་རབ་ཏུ་སྨྲས་པར་གྱུར་ཏོ། །ཆོས་ལ་ཡིད་ནི་ཉམས་པ་མེད་པར་ཤིན་ཏུ་རིང་བཏང་ནས། །སུ་ཞིག་དྲི་མ་དང་བཅས་ལས་ནི་དམྱལ་བའི་དོན་དུ་བྱེད། །གང་ཞིག་མཚན་མོ་རྣམས་ལ་

མར་མེ་སྣང་བར་བྱེད་པ་དོར། །ལམ་ལས་ཉམས་པ་ངེས་པར་དེ་ནི་མི་མཉམ་རྣམས་ལ་འགྲོ། །དེ་ནས་གཙོ་བོ་དེས་ལེགས་པར་བཤད་པ་དེས་སློབ་མ་སློབ་དཔོན་གྱི་ལྟར་ལམ་ངན་པ་ལ་འཇུག་པ་ཡང་དག་པའི་ལམ་ལ་ཞུགས་པར་བྱས་ཏེ། ལེགས་སོ་ལེགས་སོ་
ཞེས་བྱ་བ་བརྗོད་ནས་རང་གི་སྟེང་གོས་དཔེ་མེད་མ་ལ་བྱིན་པར་གྱུར་ཏོ། །དཀའ་ཐུབ་པའི་སྲས་དེ་ཡང་ངོ་མཚར་བའི་བློ་ཨེ་མ་འོ་ལེགས་པར་བཤད་པ་ཞེས་བྱ་བ་བརྗོད་ནས་དཔེ་མེད་མའི་མདུན་དུ་ཤིང་གི་ལོ་མ་དང་བཅས་པའི་ཁྲི་སྙན་ས་ལེ་ནག་པོའི་པགས་པ་བཞག་པར་གྱུར་ཏེ།
ལེགས་སོ་ལེགས་སོ་ཞེས་བརྗོད་པའི། །དེར་ཡང་དགའ་བའི་ཡིད་དག་གི། །གོས་དག་ཟླ་བ་ལྟར་དཀར་བ། །ཚོང་བ་གཉིས་པོས་བཞག་པར་འགྱུར། །བློན་པོ་དང་ནི་རྒྱལ་པོའི་སྲས། །དེ་བཞིན་ངོ་མཚར་དེ་ལྡན་པས། །ཟླ་བས་གོས་དག་བཞག་གྱུར་ཏེ། །སོར་མོའི་འདབ་མ་
དག་འཁོར་བ། །དེ་ནས་གར་གྱི་ལྟད་མོ་རྫོགས་པ་ལ་ཐོག་མ་ཉིད་དུ་རྒྱལ་པོ་དེས་གཙོ་བོ་ལ་དྲིས་པར་གྱུར་པ། ཁྱོད་ཀྱིས་ནི་དཔེ་མེད་མ་རང་གི་གོས་ཀྱིས་ཅིའི་དོན་དུ་མངོན་པར་བརྒྱན་པར་བྱ་ཞེས་ཟེར་རོ། །གཙོ་བོས་སྨྲས་པ། ལྷས་གསན་པར་མཛོད་ཅིག །ལྷུང་བའི་གོས་ཅན་
འདི་ཡིས་ནི། །གཟུགས་ཀྱི་ཡིད་འོང་ཉིད་མཐོང་ནས། །བརྟན་པ་དང་བྲལ་བདག་གི་སེམས། །གཞན་ལས་སྐྱེས་པ་མིན་པས་བྱས། །འདི་ཡི་བཞིན་གྱི་ཟླ་བའི་དཀྱིལ་འཁོར་ལ་འཇུག་པ། །ཤིན་ཏུ་ཡང་ནི་དག་གི་ཟླ་ཚེས་གསལ་བ་ཡིས། །ཆོས་ཀྱི་ལམ་ལས་
འགེགས་པར་བྱེད་པ་བདག་གི་མཐུས། །ཆགས་པའི་རང་བཞིན་མུན་པ་ཆེན་པོ་བྲལ་བར་བྱས། །དེ་ནས་བདག་གི་ཡན་ལག་ལས་ནི་སྤུན་སྣལ་མ་ལས་བྱུང་བ་བསལ་བྱས་ནས། །འདི་ལ་གཙང་དང་བརྟན་པའི་སེམས་ལྡན་འདི་ལ་སྦྱིན་པ་སྟེ། །མུན་པ་འབིགས་པའི་ལེགས་པར་
བཤད་པ་རབ་ཏུ་བྱུང་བ་ནི། །སེམས་དཔའ་དང་ལྡན་དེ་ནི་སྐྱེ་བོ་སུ་ཞིག་བརྟེན་མི་བྱེད། །དེ་ནས་རྒྱལ་པོ་དེས་དྲང་སྲོང་གི་སྲས་ལ་བོས་ནས་སྨྲས་པ། རེ་ཞིག་བརྗོད་པར་མཛོད་ཅིག་ཅིའི་ཕྱིར་ཁྱོད་ཀྱིས་ཤིང་གི་ལོ་མ་དང་བཅས་པའི་ཁྲི་སྙན་ས་ལེའི་པགས་པ་ནག་པོ་དེ་དཔེ་མེད་མའི་མདུན་དུ་གཞག་ཅེས་ཟེར་

རོ། །དཀའ་ཐུབ་པས་སྨྲས་པ། །རྒྱལ་པོ་ཆེན་པོས་གསན་པར་འོས་ཏེ་བདག་གིས་སྔོན་རོལ་དུ་ཀུན་ནས་བསངས་པར་གྱུར་ཏེ། །ཇི་ལྟར་ཀུན་ནས་ཉོན་མོངས་པ་མ་ཡིན་པའི་དཀའ་ཐུབ་པའི་རབ་ཏུ་བྱུང་བ་ཉིད་སྤངས་ནས་ཁྱིམ་ན་གནས་པ་ཉིད་རྗེས་སུ་སྐྱོང་བར་བྱེད་པར་འགྱུར་སྙམ་མོ། །རྒྱས་པའི་བུད་
མེད་འདི་ཡི་ལེགས་པར་བཤད་པས་ཀླན་ཀ་བྱས་པ་དང་འདྲ་བར་ཇི་ལྟར་དུས་འདི་ཙམ་གྱི་བར་དུ་ཤིན་ཏུ་བྱ་དཀའ་བའི་དཀའ་ཐུབ་ཀྱིས་བདག་ཉིད་རྣམ་པར་སྦྱངས་ཏེ། གླང་པོ་ཆེའི་ཁྲུས་དང་རྗེས་སུ་མཐུན་པ་སྐྱོན་དུ་མ་རྣམས་ཀྱི་གཏེར་ཁྱིམ་ན་གནས་པ་ཉིད་དམིགས་པར་ཁྱོད་འདོད་པ་དེའི་ཕྱིར་སླར་ཉིད་
དཀའ་ཐུབ་ཀྱི་ནགས་ཉིད་དུ་འགྲོ་བར་འདོད་པས། ཡིད་ནི་འཕྲོག་བྱེད་གྲོལ་བའི་ལམ་ནི་སྟོན་པ་པོ། །དེ་བས་ལེགས་པར་བཤད་པ་ཆེན་པོ་མཆོད་གྱུར་པས། །བག་མེད་པས་ནི་འདི་ཡི་མདུན་དུ་དཀའ་བ་བཟོད་པ་ཡི། །ཤིང་ལོ་དང་བཅས་པགས་པ་འདི་ནི་བདག་གིས་བསྐུར། །
དེ་ནས་རྒྱལ་པོ་དེས་ཚོང་པ་དེ་དག་ལ་དྲིས་པར་གྱུར་ཏེ། །འོ་ན་ཁྱོད་གཉིས་ཀྱིས་བརྗོད་པར་གྱིས་ཤིག །ཅིའི་ཕྱིར་ཁྱེད་ཅག་དག་གིས་གོས་གཉིས་བསྐྱུར་ཞེས་ཟེར་རོ། །ཚོང་པ་དེ་དག་གི་གང་ཡང་རུང་བས་གཞན་དག་གིས་ནི་བརྗོད་ཅིང་གནས་སོ། །ལྷས་གསན་པར་འོས་ཞེས་ཟེར་རོ། །
དེད་དཔོན་སུ་ཞིག་ཡུལ་གཞན་དུ་འགྲོ་བར་འདོད་པས་བདག་གི་ལག་ཏུ་རིན་ཆེ་བའི་མུ་ཏིག་གི་ཧར་གཞག་པ་སྟེ། དེ་ཡང་དུས་གཅིག་གི་ཚེ་ན་དགའ་སྟོན་གྱི་ཞག་ལ་བདག་གི་ལྷན་ཅིག་ཆོས་སྤྱོད་མས་མགྲིན་པའི་རྒྱན་ཉིད་དུ་གཞག་པ་སྟེ། བདག་གི་གྲོགས་པོ་འདི་ཁྱིམ་བདག་མོས་མཐོང་
བས་དེ་ནས་བདག་གི་ཁྱིམ་ཐབ་མོ་དེས་སྨྲས་པ་ཁྱོད་ལ་འདི་ལྟ་བུའི་མུ་ཏིག་གི་ཧར་འདི་གང་ནས་བྱུང་ཞེས་ཟེར་རོ། །དེ་ནས་དེས་སྨྲས་པར་གྱུར་པ་དེད་དཔོན་སུ་ཞིག་གིས་བདག་གི་བདག་པོའི་ལག་ཏུ་བཞག་པ་སྟེ། དེར་ཡང་ཁྱོད་ཀྱི་ཁྱོ་བོས་དབང་པོ་ཉིད་བྱས་པར་གྱུར་ཏོ། །དེ་ནས་དེས་སྨྲས་པ།
དེད་དཔོན་དེར་འོངས་པ་ལ་གལ་ཏེ་བདག་གི་ཁྱོ་བོས་སྨྲས་པར་མི་འགྱུར་ན་དེ་ནས་འདི་བདག་ཅག་ལ་སྤྱི་མར་མུ་ཏིག་གི་ཧར་འབྱུང་བར་འགྱུར་རོ། །ཞེས་ཟེར་རོ། །ཁྱིམ་བདག་མོ་གཉིས་ཀྱི་བཟང་པོ་མ་ཡིན་པའི་ལམ་ལ་དམིགས་པའི་ཚིག་དེ་ཐོས་ནས་བདག་ཅག་ལ་ཡང་འདོད་པས་

ཟིལ་གྱིས་ནོན་པའི་ཡིད་དག་དེ་ལྟར་བགྱི་ཞེས་ཁས་བླངས་པ་ཞེས་བྱ་བའོ། །དེ་བས་ཐུབ་པའི་ལྟར་ནི་མུན་པ་ཆེན་པོ་འཇོམས་པ་འདིའི། །རྒྱས་པའི་བུད་མེད་ཀྱི་ནི་ལེགས་པར་བཤད་པ་འདི་མཉན་ནས། །དགེ་བའི་ལམ་འཕྲོག་བརྣབ་སེམས་དེ་ནི་དོར་བར་བྱས་ནས་ནི། །
བདག་ཅག་སླར་ནི་སྐྱེ་བ་བཟང་པོའི་ལམ་ལ་ངེས་པར་ཞུགས། །དེ་བས་བདག་དང་བདག་པའི་སེམས་ལྡན་འདི་ཡིས་ནི། །ཆགས་པས་དམྱལ་བའི་མེ་ཡི་བུད་ཤིང་རྣམས་སྤངས་ནས། །ས་ཡི་དབང་ཕྱུག་ལེགས་སོ་ཞེས་བྱའི་ཚིག་བརྗོད་དེ། །བདེན་པར་གློ་བུར་ཉིད་དུ་གོས་དག་དོར་བར་བྱ། །
དེ་ནས་རྒྱལ་པོ་དེས་བློན་པོ་དེ་ལ་དྲིས་པར་གྱུར་པ་འོ་ན་ཁྱོད་ཀྱིས་ཀྱང་རེ་ཞིག་སྨྲ་བས་འོས་ཏེ། ཁྱོད་ཀྱི་སླར་གོས་ནི་ཅིའི་ཕྱིར་བསྐྱུར་ཞེས་ཟེར་རོ། །བློན་པོ་དེས་ཀྱང་ས་ལ་པུས་མོ་དག་རྣམ་པར་བཙུགས་ནས་སྨྲས་པ། །ལྷ་ལགས་གལ་ཏེ་ཁོ་བོ་ཅག་ལ་ལྷས་མི་འཇིགས་པ་སྦྱིན་པར་འགྱུར་ན་དེ་བས་ན་
བདག་གིས་བརྗོད་པར་བགྱི་ཞེས་གསོལ་ཏོ། །རྒྱལ་པོ་དེས་ཀྱང་མདའ་དང་བཅས་པར་མི་འཇིགས་པ་བྱིན་པར་གྱུར་ཏོ། །དེ་ནས་བློན་པོ་དེས་དབེན་པའི་ས་ལ་རྒྱལ་པོ་དེ་ལ་བརྗོད་ཅིང་གནས་སོ། །ལྷས་གསན་པར་འོས་ཞེས་བྱ་བའོ། །གདུག་པའི་བདག་ཉིད་བདག་དང་ལྷའི་བཙུན་མོ་གཙོ་བོ་འདིས་
ངེས་པར་འདི་ལྟར་བྱས་པར་གྱུར་ཏེ། །ས་སྐྱོང་འདི་ནི་མཚན་མོ་གཉིད་ལོག་པ། །དུག་གིས་སམ་ནི་རལ་གྲི་རྣོན་པོ་ཡིས། །རྣམ་པར་བསད་དེ་དེ་ནས་དབང་རྗེས་འགྲོ། །ནོར་འཛིན་འདི་ནི་རབ་ཏུ་བྱེད་འགྱུར་བ། །རྒྱས་པའི་བུད་མེད་ཀྱིས་ནི་མཚན་མོའི་ཟླ་བ་ལས། །གསལ་བར་ལེགས་པར་བཤད་པ་
གསལ་བར་ཐོབ་ནས་ནི། །ཡང་དག་མ་ཡིན་རྣམ་རྟོག་ལས་བྱུང་མངོན་པ་སྟེ། །ཡོན་ཏན་རྣམ་འཇོམས་མྱུར་དུ་བདག་གིས་གསལ་བར་བྱས། །དམ་པ་དམ་པ་མ་ཡིན་བརྟེན་པ་ཤིན་ཏུ་མཁས། །མི་ཤེས་མུན་པ་མ་ལུས་རྣམ་འཇོམས་ལེགས་པའི་གསུང་། །དབང་པོའི་སྒྲ་ལས་རྒྱལ་བ་
ཀུན་ནས་མཆོད་བྱེད་པའི། །བདག་གི་གོས་དེ་འདི་ལྟར་སྐད་ཅིག་ལ་ནི་དོར། །དེ་ནས་རྒྱལ་པོ་དེས་ནི་རྒྱལ་ཚབ་ཏུ་དབང་བསྐུར་བའི་སྲས་ཀྱི་ཐུ་བོ་ལ་དྲིས་པ། ད་ནི་ཚེ་དང་ལྡན་པ་ཁྱོད་ཀྱིས་སྨྲོས་ཤིག །ཅིའི་ཕྱིར་ཚེ་དང་ལྡན་པས་གོས་བསྐྱུར་ཞེས་ཟེར་རོ། །རྒྱལ་ཚབ་ཏུ་དབང་བསྐུར་བས་སྨྲས་

པ། ཡབ་ཀྱིས་གསན་པར་འོས་ཞེས་ཟེར་ཏེ། །བློན་ཆེན་སྡིག་པ་ཅན་ལྷན་ཅིག །རིགས་ལས་སུན་འབྱིན་མ་མོ་ནི། །གསང་བར་བྱ་ཞེས་ཀུན་རྟོག་ནི། །བདག་གིས་འདི་ནི་ཐོག་མར་བྱས། །ལེགས་པར་བཤད་པ་འདི་མཉན་བྱ། །རྒྱལ་བའི་བུད་མེད་ཀྱིས་མཉེན་ནས། །རང་གིས་ཕན་
འཇོམས་མ་དཔྱད་པས། །བདག་གི་སེམས་ནི་རྣམ་པར་བཟློག །དེ་ནས་བརྟན་མོའི་དབུས་སུ་ཡང་། །ལེགས་སོ་ལེགས་སོ་ཞེས་བརྗོད་པས། །མ་དཔྱད་པར་ནི་མཉེས་གཤིན་པ། །ལེགས་གསུང་སྲེད་པས་མ་དཔྱད་པར། །བདག་གིས་ཀྱང་ནི་གོས་བསྐྱུར་རོ། །ལམ་མིན་པས་
ནི་སྐྱེ་བོ་རྣམ་བཟློག་ཅིང་། །སྙིང་ལ་བདེ་བ་ལེགས་བཤད་བདུད་རྩི་ནི། །དང་བ་དང་ལྡན་ཡིད་བཅས་སུ་ཞིག་གིས། །འདི་ལྟར་སློབ་དཔོན་བཞིན་དུ་མངོན་མཆོད་མིན། །དེ་ནས་རྒྱལ་པོ་དེས་ལེགས་སོ་ཞེས་བྱ་བ་བརྗོད་ཅིང་དཔེ་མེད་མ་ལ་བོས་ནས་ནོར་ཡང་དག་པར་རབ་ཏུ་སྦྱིན་པ་ཆེན་
པོས་གུས་པར་བྱས་ནས་བསྟོད་པའི་ཕྱིར་བརྩམས་པ། ངེས་པར་རྣལ་འབྱོར་ནུས་པ་ཡིས། །ཐུབ་ཆེན་བློ་ལྡན་སུ་ཡང་ནི། །བུད་མེད་གཟུགས་ནི་བཟུང་ནས་ནི། །འགྲོ་བ་ཞི་ཕྱིར་ཁྱོད་འོངས་པ། །ཁྱོད་ཀྱི་སྐྱོན་ནི་སེལ་བ་ཡི། །ལེགས་པར་གསུངས་པའི་ལྕགས་ཀྱུས་ནི། །ཡོན་
ཏན་སྣ་ཚོགས་རི་བོའི་ནགས་རྣམས་ཀུན་ནས་འཕྲོག་བྱེད་ཅིང་། །ཁ་ཅིག་ཅེས་བྱ་སྙིང་གི་མཆེ་བ་གཉིས་པ་སྨྱོན་ཆུས་བསླད། །སྐད་ཅིག་དེར་ནི་སྨད་པའི་ལམ་ལ་རབ་འགྲོ་བཀག་མིན་ནམ། །དེ་བས་ན་བདག་གི་གྲོང་ཁྱེར་འདི་མགོན་དང་བཅས་པ་སྟེ། གང་ཞིག་ཁྱེད་ཀྱིས་བྱིན་
གྱིས་བརླབས་པ་ཞེས་བྱ་བ་མངོན་པར་བསྟོད་ནས་རྒྱལ་པོ་ནང་དུ་རབ་ཏུ་ཞུགས་པར་གྱུར་ཏོ། །དཀའ་ཐུབ་པའི་སྲས་དེས་ཀྱང་སླར་དཀའ་ཐུབ་ཀྱི་ནགས་ཉིད་དུ་སོང་བར་གྱུར་ཏོ། །རྒྱས་པ་དེ་རྣམས་ཀྱང་དཔེ་མེད་མ་དང་ལྷན་ཅིག་ཏུ་རྒྱལ་པོའི་གུས་པས་དགའ་བ་རང་གི་ཁྱིམ་དུ་སོང་
བར་གྱུར་ཏེ། དེ་ལྟར་ན་བཅོམ་ལྡན་འདས་དེས་བུད་མེད་དུ་གྱུར་པ་ན་ཡང་ལེགས་པར་བཤད་པའི་མར་མེས་འཇིག་རྟེན་ལ་ལམ་བཟང་པོའི་སྣང་བ་མཛད་ནས་མངོན་པར་རྫོགས་པར་སངས་རྒྱས་ནས་ནི་ལྟ་ཅི་སྨོས་སྙམ་དུ་རྣམ་པར་བསམས་ནས། སངས་རྒྱས་བཅོམ་ལྡན་འདས་ལ་གུས་པ་བསྐྱེད་

པར་བྱ་ཞེས་བྱ་བའོ། །རྨོངས་པའི་མུན་པ་འཇོམས་ཤིང་དམ་པའི་སྐྱེ་བོའི་རྗེས་མཐུན་པ། །ཆོས་ལས་མི་འདའ་ལམ་ནི་གསལ་བྱེད་ལེགས་བཤད་ཟླ་བ་ལ། །གང་གི་སེམས་ནི་ངེས་པར་ཞུགས་བྱེད་དགེ་བ་ཉེར་ཐོབ་ཕྱིར། །དེ་ཡི་ལྟ་བ་ནམ་ཡང་མུན་པས་འགེགས་པར་མི་
འགྱུར་རོ། །དཔེ་མེད་མའི་སྐྱེས་པའི་རབས་ཏེ་སྐྱེས་རབས་དགུ་པའོ།། །།གང་ཞིག་གཞན་ནི་རྒུད་པར་སོང་བ་འདོན། །དེ་ཡི་ཤེས་པ་འབྲས་བུ་དང་བཅས་ཏེ། །གང་ཞིག་གཞན་གྱི་རྒུད་པ་རྣམས་ཀྱི་རྒྱུས། །སྐྱེ་བོ་དེ་ནི་ཉོན་མོངས་མི་བྱེད་དོ། །འདི་ལྟར་རྗེས་སུ་ཐོས་ཏེ། བཱ་རཱ་ཎ་
སཱིའི་རྒྱལ་པོའི་ཁབ་ན་རྒྱལ་པོ་ཚངས་པས་བྱིན་མཐོ་རིས་སུ་ཡུན་རིང་པོ་མ་ཡིན་པར་སོང་བ་ལ་དེའི་བློན་པོ་རྣམས་ཀྱིས་གྲོང་ཁྱེར་བའི་ཚོགས་ལ་བོས་ནས་སྨྲས་པ། ལྷའི་བཀའ་ཉོན་ཅིག་ཅེས་ཟེར་རོ། །ཇི་ལྟར་བདག་གི་སྲས་ལྔ་པོ་རྣམས་ཀྱི་ནང་ནས་གང་གི་འབྱུང་བ་རྣམས་སེང་
གེའི་ཁྲི་ནམ་མཁའ་ལ་གནས་པ་འཛིན་པར་འགྱུར་བ་དང་། ཉིད་ཀྱི་ཅོད་པན་སྤྱི་བོ་ལ་གནས་པར་གྱུར་ཏེ། གདུགས་ཀྱང་མ་བཟུང་བ་ཉིད་དུ་མི་གཡོ་བར་སྟེང་དུ་གནས་པར་འགྱུར་བ་དང་། བཙུན་མོའི་འཁོར་རྣམས་ཀྱང་མངོན་དུ་ལྡང་བ་བྱེད་པར་འགྱུར་ལ། ཚིག་ལེའུར་བྱས་པ་འདི་ཡང་གང་
ཞིག་གིས་དོན་ཇི་ལྟ་བ་བཞིན་དུ་འཆད་པར་འགྱུར་བ་ནི། ཕྱི་དང་ནང་དུ་ཡང་གཏེར་ཏེ། །དེ་བཞིན་ནང་དང་ཕྱི་རོལ་མིན། །པདྨ་རྣམས་བཀབ་ཆུ་ལ་ནི། །ཤིང་དང་རི་བོ་རྣམས་ཀྱི་རྩར། །དེ་ཡི་དབང་བསྐུར་བྱ་ཞེས་ཟེར། །གྲོང་ཁྱེར་བ་རྣམས་ཀྱིས་སྨྲས་པ། གང་ཞིག་ལྷའི་བཀའ་དེ་ཆོ་ག་
བཞིན་དུ་རྗེས་སུ་བསྒྲུབ་པར་བྱ་ཞེས་གསོལ་ཏོ། །དེ་ནས་དངོས་པོ་དེ་རྣམས་གོ་རིམས་བཞིན་དུ་ཉེ་བར་བཀོད་པར་གྱུར་པ་རྒྱལ་པོའི་སྲས་བཞི་པོ་ལ་དོན་ཇི་ལྟར་མ་གྱུར་པ་རྣམས་འབྱུང་བར་གྱུར་ཏོ། །མེ་ལོང་གི་གདོང་ཅན་ཞེས་བྱ་བ་ཆུང་བ་གཞོན་ནུ་ལྔ་པ་བྱང་ཆུབ་སེམས་དཔའ་སྟེ་དེའི་ཡང་། སེང་
གེ་རྣམ་པར་གནོན་པ་ཅན་གྱི་སེང་གེའི་ཁྲི། །འབྱུང་བ་རྣམས་ནི་བདེན་པའི་སྨོན་ལམ་ནུས་ཅན་གྱི། །ཀུན་ནས་འཛེག་པར་འདོད་པའི་མི་དགེའི་དགྲ་ཟད་པའི། །ས་ལས་བརྟེན་ཏེ་བར་སྣང་ལ་ནི་འཛིན་པར་འགྱུར། །འདིའི་གདུགས་ཀྱང་གསེར་གྱི་ཡུ་བ་ལྡན་པ་ནི། །མུ་ཏིག་དང་ནི་ནོར་བུའི་

གཡེར་ཁས་འབྲེལ་པ་ནི། །ཕྱི་ནས་ཉེ་བར་འོངས་ཏེ་རི་བོང་ཅན་མཚན་པའི། །གཟུགས་བརྙན་ལྟར་གསལ་སྟེང་དུ་རང་ཉིད་ཀྱིས་ནི་གནས། །མདུན་ན་འདོན་པས་ཀྱང་ནི་འདི་ཡི་སྔོན་དུ་བཟུང་། །རྣམ་གཡོ་འོད་ལྡན་ནོར་བུའི་འོད་ཟེར་དྲ་བ་ཅན། །ཤར་གྱི་རི་ཡི་ཉི་མའི་གཟུགས་ཅན་ལྟ་བུ་
ནི། །རང་ཉིད་ཀྱིས་ནི་སྤྱི་བོར་ཅོད་པན་གནས་པར་གྱུར། །དེ་ནས་བྱང་ཆུབ་སེམས་དཔའི་ཉི་མ་དེ་ནི་ལྟ་བྱས་ནས། །བློ་ཡི་འོད་ཟེར་སྣང་བས་མུན་པ་རིང་དུ་བྱས་པ་ནི། །ལངས་པའི་གདོང་གི་ཆུ་སྐྱེས་དགོད་པས་མཛེས་པ་ལངས་པ་སྟེ། །རྒྱལ་བའི་བཙུན་མོའི་པདྨོའི་ནགས་ནས་
ཤིན་ཏུ་མཛེས་པར་གྱུར། །དེ་ནས་བློན་པོ་དེ་རྣམས་ཚིག་ལེའུར་བྱས་པ་དེ་ཉེ་བར་བཟུང་སྟེ་སྨྲས་པར་གྱུར་པ། གཞོན་ནུ་ལགས་རེ་ཞིག་ཚིགས་སུ་བཅད་པ་འདིའི་དོན་ནི་མཁྱེན་པར་མཛོད་ཅིག་ཅེས་ཟེར་རོ། །དེ་ནས་བྱང་ཆུབ་སེམས་དཔའ་དེ་རྗེས་སུ་བརྗོད་ནས་སྨྲས་པ། ཕོ་བྲང་འདིའི་
ནང་དང་ཕྱི་རོལ་དུ་དབུས་སུ་བཙུན་མོའི་འཁོར་ལ་འོས་པའི་ནགས་ཀྱི་རྫིང་བུ་ལ་རྒྱལ་པོའི་ཉེ་འཁོར་གྱི་ཤིང་ཙཱུ་ཏ་དང་སེང་གེའི་ཁྲིའི་འོག་ཏུ་གལ་ཏེ་གཏེར་རྣམས་ཡོད་པར་གྱུར་ན་དེ་ནས་ཚིགས་སུ་བཅད་པ་འདིའི་དོན་གསལ་བར་བྱ་ཞེས་ཟེར་རོ། །བློན་པོ་དེ་རྣམས་ཀྱང་གནས་དེ་
རྣམས་ཐམས་ཅད་ལས་གཏེར་རྣམས་བརྐོ་ཞིང་གནས་པར་གྱུར་ཏོ། །དེ་ནས་ཡིད་ནི་དགའ་འགྱུར་ཏེ། །གྲོང་ཁྱེར་བློན་པོ་ལྷན་ཅིག་བཅས། །སྐྱེ་དགུ་སྦྱོར་ཕྱིར་དབང་བསྐུར་ཏེ། །བྱང་ཆུབ་སེམས་དཔའ་མདུན་གནས་ཏེ། །དེར་ནི་རྒྱལ་སྲིད་རྗེས་སུ་བརྟན་པ་ཡང་དག་པར། །
ས་ཡི་བདག་ལ་ལྷ་ཡི་བདག་པོ་ལྟར་ནི་མཐོ་རིས་ས། །བདེ་བ་རྙེད་པས་ཡོ་བྱད་འཕེལ་བར་གྱུར་པ་ཡིན། །བསོད་ནམས་བརྟེན་པ་འཇིག་རྟེན་ཡུན་རིང་དགའ་བར་འགྱུར། །གང་དུ་ས་ཡི་བདག་པོ་དྲི་མ་བྲལ་བ་ནི། །དེས་ནི་འགྲོ་བ་འཕེལ་བ་ལྷག་པར་འགྱུར་བ་ཡིན། །སྤྲིན་དང་བྲལ་
བས་དྲི་མ་མེད་པའི་ཉི་མ་ལ། །དཔལ་ནི་མཚོ་ལས་སྐྱེས་པའི་ནགས་རྣམས་སྟེན་པར་བྱེད། །སྐྱེ་བོའི་གནས་དེ་ལ་ཡང་གནས་ཤིང་བྲམ་ཟེ་དབྱིག་པ་ཅན་ཞེས་བྱ་བ་རྟག་ཏུ་དབུལ་བའི་སྡུག་བསྔལ་ཉེ་བར་ལྟུང་བས་ཡིད་འཁྲུགས་པ། གླང་པོ་ཆེ་ཕྲུ་གུའི་སྐྲ་ལྟར་སྐྲ་དང་སྨ་ར་རྩུབ་པ།

ལུས་ཤིན་ཏུ་ཆེ་བ་ཉིད་ཀྱི་ཕྱིར་ཤིང་གི་བང་མཛོད་ཀྱི་རྣམ་པར་འཛིན་ཅིང་། ཤིན་ཏུ་རབ་ཏུ་འབར་བའི་ལྟོ་བའི་མེ་ཉིད་ཀྱི་ཕྱིར་བཟོད་པར་དཀའ་བ། ལྟོ་འཕྱེའི་ཕྲུ་གུ་རབ་ཏུ་འགྲོ་བ་ལྟར་འཁྱོག་པའི་རྩའི་དྲ་བ་རྣམས་ཀྱིས་ཉེ་བར་བསགས་པའི་མི་མཉམ་པའི་རྗེ་ངར་སྦོམ་པ།
མཆེ་བ་གཉིས་པའི་ཕྲུ་གུའི་དཔྲལ་འབོར་དང་རྗེས་སུ་མཐུན་པའི་པུས་མོ་གཉིས་དང་ལྡན་པ། བིལ་བའི་རྣམ་པ་ཅན་གྱི་རྐང་པ་ལ་ཕོལ་བྱུང་བ་དང་རྐང་པ་གཉིས་པ་ལ་རྒད་པོའི་ལྕེ་ལྟར་རྩུབ་ཅིང་གས་པ་དང་། བ་ལང་གི་མཇུག་མ་དང་མིག་ལྟར་མིག་མི་བཟང་བ། བར་ཡོད་པའི་སྔོ་བའི་སོ་
ཅན། ཀུན་ནས་ཉེག་ཅིང་སྦོམ་པའི་སྣའི་གཟངས་དང་ལྡན་པ། རྩུབ་ཅིང་མི་མཉམ་པའི་སོར་མོའི་སེན་མོ་ཅན། བསོད་ནམས་དང་བྲལ་བ་ཉིད་ཀྱིས་རང་གི་སྐྱེ་བོ་རྣམས་ལ་ཡང་ཡིད་འབྱུང་བ་སྐྱེད་པ། རྟག་ཏུ་སློང་བའི་དུས་སུ་དམན་པའི་སྐྱེ་བོའི་སྨིན་མ་གཡོ་བའི་གཞུས་བསྐུལ་
བའི་གུས་པ་མ་ཡིན་པའི་དུག་གིས་བཅུག་པའི་འགེགས་པའི་མདའ་རྣམས་ཀྱང་ཕོངས་པའི་སྡུག་བསྔལ་གྱི་ཁྲབ་དོར་བའི་ཡིད་ཀྱིས་མ་བཅིངས་པར་གནས་ཏེ། དམན་པ་དོན་གཉེར་ལས་འཇིགས་མིན། །སྨིན་གཡོ་སྦྲུལ་ལས་ཇི་ལྟར་ཏེ། །དེ་རྣམས་ཀྱིས་ནི་ཀུན་ཤེས་བརྗོད། །
སྲེད་པའི་རིག་པ་དུག་གི་སྨན། །དེས་ཀྱང་རང་དང་འདྲ་བའི་བྲམ་ཟེ་ལས་བ་ལང་དག་གཡར་ནས་ཞིང་གི་ལས་བྱས་པར་གྱུར་ཏོ། །དེ་ནས་བ་ལང་དེ་དག་ཐོང་གཤོལ་གྱི་བྱ་བས་ཀུན་ནས་ངལ་བའི་དབང་གིས་བགྲོལ་ཏེ་ཞིང་གི་མཐའ་མར་གཉིད་ལོག་པར་གྱུར་ཏོ། །དེར་གཉིད་ལོག་པ་ཡང་རེ་ཞིག་
བ་ལང་དག་རབ་ཏུ་ཉམས་པར་གྱུར་ཏེ། དེས་ཀྱང་རིམ་གྱིས་ལངས་ནས་ཀྱི་ཧུད་ཆོམ་རྐུན་རྣམས་ཀྱིས་བ་ལང་དག་ཕྲོགས་སོ་སྙམ་དུ་སེམས་ཤིང་དགོན་པ་ཐམས་ཅད་ཀུན་ནས་བསྐོར་ཏེ། ཇི་ལྟར་ཡང་བ་ལང་དག་ཀུན་ནས་རྙེད་ནས་བྲམ་ཟེ་དེ་ལ་ཉེ་བར་གཏད་པར་གྱུར་ཏོ། །བྲམ་ཟེ་དེས་ཀྱང་དེ་ལ་སྨྲས་པ།
དེ་རིང་ཁྱེད་ཀྱི་ཁྱིམ་དུ་བཅིངས་ནས་བདག་གི་བ་ལང་འདི་དག་ལ་རྩྭ་སྦྱིན་པར་འོས་ཏེ། ནང་བར་བདག་གིས་ཁྱིམ་དུ་ཁྱེར་བར་བྱའོ་ཞེས་ཟེར་རོ། །དེས་ཀྱང་དེ་ལྟར་བགྱི་ཞེས་སོ་སོར་མཉན་ནས་བ་ལང་དེ་དག་དགོན་པར་གྲོལ་ཏེ་སླར་ཡང་གཉིད་ཀྱི་དབང་དུ་སོང་བར་གྱུར་ཏོ། །དེ་དག་

ཀྱང་སླར་དེ་ལྟ་ཉིད་དུ་རབ་ཏུ་མི་སྣང་བར་གྱུར་ཏོ། །བྲམ་ཟེ་དེས་ཀྱང་དབྱིག་པ་ཅན་ལ་འོངས་ཏེ་སྨྲས་པ། བ་ལང་དག་སྦྱིན་པར་མཛོད་ཅིག་ཅེས་ཟེར་རོ། །དབྱིག་པ་ཅན་གྱིས་སྨྲས་པ། གང་ཚེ་ཁྱོད་ལ་བདག་སྨྲས་གུས་བཅས་འོངས་ནས་ནི། །བ་ལང་རྒན་པོ་འདི་དག་ཁྱིམ་དུ་ཟུང་ཤིག་ཅེས། །དེ་
ཚེ་སྐྱོན་ཅན་གྱིས་ནི་ཅི་ཕྱིར་མ་བཟུང་བ། །ད་ནི་གང་ནས་དེ་དག་ཁྱོད་ལ་བདག་གིས་སྦྱིན། །བྲམ་ཟེས་སྨྲས་པ། དབྱིག་པ་ཅན་གཞན་ནས་གཞན་དག་གིས་འདི་ལྟ་བུའི་ཐ་སྙད་གཞན་སུ་ཞིག་གིས་ཤེས་པར་འགྱུར་ཏེ། བྱིས་པའི་སྨྲ་བ་འདིས་ཅི་ཞིག་བྱ་བས་ཞོག་ཅིག །མེ་ལོང་གི་
གདོང་ཅན་མིའི་བདག་པོའི་མདུན་དུ་ཐ་སྙད་ཀྱི་ཕྱིར་བདག་ཅག་འགྲོ་བར་བགྱིའོ་ཞེས་ཟེར་ཞིང་དེས་ནན་གྱིས་འགུགས་པར་གྱུར་ཏེ། རིམ་གྱིས་ཀྱང་དེ་དག་སོང་བ་ལ་རྟ་སྐྱོང་གིས་རྟ་རྣམས་དགོན་པར་ཁྲིད་ཅིང་རྟ་ཅིག་ལམ་ནས་འདའ་བར་བྱས་ཏེ། གཞན་དུ་སོང་བར་གྱུར་ཏོ། །དེ་ནས་རྟ་རྫི་དེས་དབྱིག་པ་
ཅན་ལ་སྨྲས་པ། རེ་ཞིག་རྟ་གདུག་པ་ཅན་འདི་ལམ་ཡོངས་སུ་དོར་བ་བཟློག་པར་གྱིས་ཤིག་ཅེས་ཟེར་རོ། །དེ་ནས་དབྱིག་པ་ཅན་གྱིས་རྟ་བཟློག་པའི་ཕྱིར་རྡོ་བ་འཕངས་པར་གྱུར་ཏེ། རྟ་ཡི་རྨིག་པའི་སྒྲ་བྱུང་བའི། །ལམ་ནི་དོར་ནས་སོང་བ་ཡི། །རྟ་ཡི་རྗེ་ངར་འཕངས་པ་ཡི། །རྡོ་བས་དེ་ནི་ཆག་
པར་གྱུར། །དེ་ནས་ཐག་པས་མགྲིན་བཅིངས་ནས། །རྟ་རྫི་དེས་ནི་སྡུག་བསྔལ་བ། །ཆད་པར་འོས་པ་དབྱིག་པ་ཡིས། །དབྱིག་ཅན་དེ་ལ་བརྡུངས་ཤིང་སྨྲས། །རྟ་འདིའི་རྗེ་ངར་བཅག་ནས་ནི། །ད་ནི་ཁྱོད་ཀྱིས་གང་དུ་འགྲོ། །དེ་ལྟ་ཐ་སྙད་ཉིད་ཀྱི་ཕྱིར། །འོ་ན་རྒྱལ་པོའི་དྲུང་དུ་འགྲོ། །དེ་ནས་དབྱིག་པ་ཅན་
དེ་དག་གིས་བཀུག་པར་གྱུར་པ་ཆུ་བོའི་བར་ན་ཕ་རོལ་གྱི་འགྲམ་ནས་མགོ་བོ་ལ་རྣམ་པར་དཀྲིས་པའི་ཐུམ་པོ་ཆེན་པོ་ཅན་སོ་རྣམས་ཀྱིས་སྟེའུ་འཛིན་པའི་ཤིང་མཁན་མཐོང་སྟེ་སྨྲས་པ། ཤིང་མཁན་ཆུ་བོ་ལ་ནི་རྣམ་པར་ཞུགས་བྱེད་ཅིང་། །སྟེའུ་ལེགས་པར་འཛིན་པ་སོ་རྣམས་ཀྱིས་ནི་མཛོད། །ནམ་
ཞིག་འདི་ནི་ཆུ་ལ་ངེས་པར་ལྟུང་བ་སྟེ། །དེ་བས་བདག་ནི་བློ་དམན་ཁྱོད་ལ་རྗེས་སུ་བསྟན། །དེ་ནས་ཤིང་མཁན་དེས་ཁྲོ་བས་ཁྲོ་གཉེར་བ་སྐྱེད་པས་མི་མཉམ་པར་བྱས་པའི་གདོང་ཅན་དེ་ལ་སྨྲས་པ། རེ་ཞིག་ཁྱོད་ཀྱིས་བདག་ཉིད་འདིར། །བློ་གྲོས་ཆེན་པོ་རྗེས་སུ་སྟོན། །བདག་ལ་

དོན་མེད་ཅི་ཕྱིར་བསླབ། །ཁྱོད་ནི་བདག་གི་མཁན་པོ་མིན། །དེ་ལྟར་བརྗོད་ཅིང་ཤིང་མཁན་དེའི། །ཁྲོ་བས་འཁྲུགས་པའི་བདག་ཉིད་ཀྱི། །ཆུ་བོའི་ཆུ་ལ་མ་དཔྱད་པར། །སྟེའུ་ཁ་ནས་ལྷུང་བར་གྱུར། །དེ་ནས་དབྱིག་པ་ཅན་བཟུང་ནས། །ཆུ་བོ་བརྒལ་ནས་ཤིང་
མཁན་དེས། །ཐག་པས་མགྲིན་པར་བརྟན་བཅིངས་ནས། །ཁྲོས་པས་འདི་སྐད་སྨྲས་པར་གྱུར། །གལ་ཏེ་མགྲིན་པ་ནུབ་པའི་ཆུ་བོ་འདི་ལ་བདག །རབ་ཏུ་བརྒལ་ཞིང་ཁྱོད་ཀྱིས་སླེབ་པར་མི་འགྱུར་བ། །ཁྱོད་ཀྱི་ལན་ནི་སྨྲ་བས་གཡོ་བའི་མཆུ་ལྡན་པའི། །བདག་གི་ཁ་
ནས་སྟེའུ་ཆུ་ལ་ལྷུང་མི་འགྱུར། །ཆུ་འདི་ལ་ནི་སྟེའུ་ཀུན་ནས་གདོན་བྱས་ནས། །རྣོ་བའི་སོ་ཡི་རྩེ་མོ་དེ་ཉིད་བདག་ལ་བྱིན། །གལ་ཏེ་ཁྱོད་ནི་ཆུ་ལ་ཞུགས་པར་མི་ནུས་ན། །དེ་ནས་ཤོག་ཤིག་རྒྱལ་པོའི་དྲུང་དུ་འགྲོ་བར་གྱིས། །དེ་ནས་དབྱིག་པ་ཅན་འཇིགས་ཤིང་འཇིགས་པ་ཅན་
དེས་ཀྱང་བཀུག་སྟེ་སོང་བར་གྱུར་ཏོ། །རིམ་གྱིས་ཀྱང་དེ་རྣམས་ཐམས་ཅད་དབྱར་གྱི་ཉིན་མོར་བྱེད་པས་ལུས་གདུངས་པར་གྱུར་པ་མཐུག་པའི་པ་ལ་ཤའི་ཤིང་གི་གྲིབ་མ་ལ་བ་གླང་གི་ཚོགས་གནས་པ་དང་། དྲུང་ན་རྫིང་བུའི་ཁང་པའི་ཉེ་འཁོར་ན་ཉེ་བར་གནས་པའི་འཐུང་བར་འདོད་པའི་
ལམ་གྱི་འགྲུལ་རྣམས་ཀྱིས་ཆུ་འཐུང་བར་གྱུར་པ་དང་། ཁང་པ་རྣམས་ཀྱི་སྒོ་ལ་གཏོར་མ་བཏང་བ་ཡང་དག་པར་མཐོང་བས་རབ་ཏུ་དགའ་ཞིང་ཀུན་ནས་ལྷུང་བའི་གཏོར་མ་ཟ་བ་དང་ལྡན་པ་དང་། འགའ་ཞིག་བཟའ་བའི་དུས་ལ་བཟའ་བའི་སྣོད་འཁྲུ་བཞིན་པ་དང་། གཞན་བྱེད་བཞིན་པའི་
ཁྱིམ་གྱི་ནང་དུ་བྱུག་པ་བྱས་པ་དང་། མེ་མཆོད་པས་འབྱུང་བའི་དུ་བའི་དྲི་མ་དང་ལྡན་པ་དང་། གཞན་དུ་གནས་པའི་ཁ་གྱེན་དུ་ལྟ་བའི་ཁྱི་རྣམས་ལྟ་བཞིན་པར་གྱུར་པའི་ཕྱེད་ཟོས་པའི་བ་ལང་གི་རྫི་བོ་དང་ལྡན་པ་དང་། གཏུན་ཤིང་རྡུང་བས་བརྡུང་བཞིན་པའི་རབ་ཏུ་འགྲོ་ཞིང་ཤའི་དྲི་དང་ལྡན་པ་དང་།
འགའ་ཞིག་ཏུ་དོན་དུ་གཉེར་བའི་སྐྱེ་བོ་རྣམས་ཀྱིས་འབྲུ་སྣ་ཚོགས་པ་ཟ་བཞིན་པ་དང་། །དབུས་སུ་ཉེ་བར་གནས་པའི་གྲོང་དུ་ཉིན་མོ་ལར་ལ་བསོ་བའི་ཕྱིར་རབ་ཏུ་ཞུགས་པར་གྱུར་ཏོ། །དེ་ཡང་ཆང་འཚོང་བའི་བུད་མེད་ཀྱིས་དབྱིག་པ་ཅན་ལ་སྨྲས་པར་གྱུར་པ། །འཕགས་པ་ཤོག་ཤིག་ཁྱེད་ལ་

སྦྱིན་པར་བྱའོ་ཞེས་ཟེར་རོ། །དབྱིག་པ་ཅན་གྱིས་སྨྲས་པ། བདག་གིས་ཇི་སྲིད་སྦྱིན་པ་ཀུན་ནས་བླངས་གྱུར་ཏེ། །བུད་མེད་འདིས་ནི་ཆོ་ག་བཞིན་དུ་སྦྱིན་འགྱུར་བ། །འདི་ཉིད་དུ་ནི་དེ་སྲིད་བདག་ལ་སྡོད་མཛོད་ཅིག །སྐད་ཅིག་ཏུ་ནི་ཁྱེད་ཅག་སྙིང་རྗེ་ལ་དམིགས་པ། །བྲམ་ཟེ་དང་རྟ་རྫི་དང་ཤིང་
མཁན་དེ་རྣམས་ཀྱང་དེ་གྲོལ་ནས་དེ་ལ་སྨྲས་པར་གྱུར་པ། སོད་ཤིག་དང་སྦྱིན་པ་བླངས་ནས་མྱུར་དུ་ཤོག་ཤིག་ཅེས་ཟེར་རོ། །དེས་ཀྱང་དེ་ལྟར་བགྱི་ཞེས་བྱ་བ་སོ་སོར་མཉན་ནས་ཆང་འཚོང་བའི་བུད་མེད་དེའི་ཁྱིམ་དུ་ཞུགས་པ་ལ། གོས་ཀྱིས་བཀབ་པ་གཉིད་ལོག་པའི་བྱིས་པའི་མལ་གྱི་སྟེང་
དུ་འདུག་པར་གྱུར་ཏེ། །རྡོ་དང་འདྲ་བའི་ལྟོ་བ་དང་ལྡན་དེ་ཡི་ཁུར་གྱིས་ནི། །ཕག་ལྟར་དྲི་མ་ཅན་གྱི་ལུས་དང་ལྡན་པའི་བྲམ་ཟེ་ཡི། །ཀུན་ནས་མནན་པས་བརྒྱལ་བའི་ལུས་ཉམས་བྲལ་བྱས་ནས། །བུ་ཆུང་དེ་ནི་མཚམས་ནི་རྣམ་གྲོལ་ཤི་བ་ཉིད་དུ་གྱུར། །དེ་ནས་བུད་མེད་དེ་མངོན་
པར་བྱུང་ནས་དབྱིག་པ་ཅན་བསློངས་ཏེ་བྱིས་པ་དེ་ཤི་བ་མཐོང་ནས་ཀྱི་ཧུད་ཀྱི་ཧུད་བདག་གི་བུ་ནུ་མ་འཐུང་བ་འདི་ཁྱོད་ཀྱིས་བསད་དོ་ཞེས་སྨྲ་ཞིང་སྨྲེ་སྔགས་རྣམ་པ་མང་པོ་བཏོན་ནས་དབྱིག་པ་ཅན་བཟུང་སྟེ། ཚུར་ཤོག་རྒྱལ་པོའི་དྲུང་དུ་ཐ་སྙད་ཀྱི་ཕྱིར་འགྲོ་བར་བྱའོ་ཞེས་བྱ་བ་སྨྲས་པར་གྱུར་ཏོ། །
དབྱིག་པ་ཅན་གྱིས་སྨྲས་པ། ཁྱོད་ཀྱིས་གང་ཞིག་བསམས་པ་དེ། །བདག་ལ་རེ་ཞིག་སྦྱིན་པར་བྱིན། །དེ་ནས་རྒྱལ་དྲུང་ཁྱོད་ལྷན་ཅིག །ཐ་སྙད་ཕྱིར་ནི་འགྲོ་བར་བགྱི། །ངོ་ཚ་མེད་ཁྱོད་གཉིས་སྐྱེས་རགས། །གང་ཕྱིར་བདག་གི་བུ་འདི་ནི། །བསད་ནས་ངུ་བའི་བདག་ཉིད་ནི། །སྦྱིན་པ་
ཁྱོད་ཀྱིས་བསློངས་པར་འདོད། །དེ་ལྟར་བརྗོད་ནས་དེས་ཀྱང་དེ་ལ་བཅིངས་ཏེ་དེ་རྣམས་གཞན་དང་ལྷན་ཅིག་ཏུ་རྒྱལ་པོ་མེ་ལོང་གདོང་གི་ཕོ་བྲང་དུ་མངོན་པར་རབ་ཏུ་སོང་བར་གྱུར་ཏོ། །དབྱུག་པ་ཅན་ཡང་རིགས་ཀྱི་བུད་མེད་སུ་ཞིག་ནང་འཁོར་དང་བཅས་པའི་བདག་པོའི་ཁྱིམ་དུ་སོང་བར་སོ་སོར་ངོ་
ཤེས་པར་གྱུར་པ། དེ་ནས་དེ་ལ་སྨྲས་པ། མཁན་པོ་ཁྱོད་ནི་གང་དུ་འགྲོ་ཞེས་ཟེར་རོ། །དབྱིག་པ་ཅན་གྱིས་སྨྲས་པ། རང་དབང་ཅན་བདག་མི་འགྲོ་སྟེ། །སྐལ་བ་མེད་པས་སྟོབས་ཆུང་བ། །གདུག་པའི་བདག་ཉིད་འདི་རྣམས་ཀྱིས། །ནན་གྱིས་བཟང་མོ་རྒྱལ་དྲུང་ཁྲིད། །

དེ་ནས་དེ་རྣམས་ཀྱིས་དེ་ལ་སྨྲས་པར་གྱུར་པ། ཨེ་མའོ་ནོངས་པ་མེད་པ་དུལ་བའི་དཀའ་ཐུབ་ཅན། །ནན་གྱིས་བདག་ཅག་གིས་རྒྱལ་པོའི་དྲུང་དུ་ཁྲིད་དོ་ཞེས་ཟེར་རོ། །རིགས་ཀྱི་བུད་མེད་ཀྱིས་སྨྲས་པ། མཁན་པོ་ཤེས་རབ་ཆེ་བ་རྒྱལ་པོ་མེ་ལོང་གདོང་ཅན་ལ་
ཁྱོད་ཀྱིས་དྲི་བར་འོས་ཏེ། ཅི་ལྟར་ཞེ་ན། གང་ཚེ་བདག་ནི་བདག་པོའི་ཁྱིམ་ན་གནས་པ་དེ་ཡི་ཚེ། །བདག་གི་ཡིད་ནི་ཕ་ཡི་ཁང་པར་ཕྲད་པར་འདོད་པ་སྟེ། །གང་གི་ཕ་ཡི་ཁྱིམ་དུ་བདག་ནི་གནས་ནས་དེ་ཡི་ཚེ། །ཤིན་ཏུ་ཕྲད་པར་འདོད་པས་སླར་ཡང་བདག་པོའི་ཁྱིམ་ནི་དྲན། །ཇི་ལྟར་བདག་
གི་ཕྲད་འདོད་འདི། །སེམས་ལ་གནོད་བྱེད་མི་འགྱུར་བ། །དེ་ལྟར་དེ་ཉིད་ས་སྐྱོང་ནི། །བློ་གྲོས་ཆེན་པོས་ཤེས་པ་ཡིན། །དེ་ནས་ཚང་ལས་འཕྱེ་བའི་ལྕགས་ཀྱི་སྲོག་ཤིང་ལྟར་གཟུགས་ནག་པ་ལྕེ་གཉིས་རབ་ཏུ་འཕྲོག་པར་བྱེད་པའི་ལྟོ་འཕྱེ་ཕྱི་རོལ་དུ་བྱུང་སྟེ། དབྱིག་པ་ཅན་ལ་
སྨྲས་པ། བྲམ་ཟེ་ཆེན་པོ་ཀྱེ། བདག་གི་ཚིག་གིས་རྒྱལ་པོ་མེ་ལོང་གདོང་ཅན་ལ་ཁྱོད་ཀྱིས་དྲི་བར་བྱས་ཏེ། སེམས་འདི་སྲེག་པར་འདོད་ཅིང་མེ་ལྟར་ཅི་ཡི་ཕྱིར་ན་ནི། །ཚང་ལས་ཕྱི་རོལ་བྱུང་ཞིང་བདག་ལ་བཟོད་པའི་དགྲ་འབྱུང་སྟེ། །དེ་ལ་གནས་ཤིང་ཁྲོས་པ་ཉེ་བར་བྲལ་བ་ཞི་བ་ནི། །
ཏིང་ངེ་འཛིན་ལ་རྩེ་གཅིག་ཐུབ་པ་ལྟར་ནི་སེམས་ནི་འགྱུར། །དེ་ལས་མདའི་སྙེ་མའི་རྩ་ལས་ཤང་ཤང་དེའུ་མངོན་པར་སྨྲས་པར་གྱུར་པ། བྲམ་ཟེ་ཆེན་པོ་བདག་གི་ཚིག་གིས་ཀྱང་འདི་ལྟར་རྒྱལ་པོ་མེ་ལོང་གདོང་ཅན་ལ་དྲི་བར་བྱ་སྟེ། ཇི་ལྟར་ཞེ་ན། མདའ་ཡི་སྙེ་མར་འདིར་གནས་ཤིང་། །
བརྟན་པ་མཆོག་ནི་བདག་གིས་རྙེད། །གཞན་དུ་གནས་པས་ཅི་ཕྱིར་ནི། །བདག་ལ་འཁྲུགས་པ་ཉིད་དུ་འགྱུར། །དབྱུག་པ་ཅན་གྱིས་སྨྲས་པ། གལ་ཏེ་འདི་རྣམས་ཀྱི་དྲུང་ནས་བདག་ལ་གྲོལ་བར་འབྱུང་བར་གྱུར་ན། དེ་ནས་གཏམ་འདི་ཐམས་ཅད་རྒྱལ་པོ་ལ་བདག་གིས་ཞུས་པར་གྱུར་ཞེས་
བྱ་བའོ། །རིམ་གྱིས་ཀྱང་དེ་རྣམས་སོང་བ་ཉིད་ལ་ཉི་མ་ནུབ་པའི་རི་ལ་ལྷག་པར་འཛེགས་པ་སྟེ། དེ་ནས་དེ་རྣམས་ཐམས་ཅད་ཉིད་ནི་ཤིང་ནྱ་གྲོ་དྷའི་འོག་ཏུ་ཤིང་གེལ་བའི་གནས་ལ་གནས་བཅས་པར་གྱུར་ཏོ། །དེ་ནས་མཚན་ཕྱེད་ཀྱི་དུས་ལ་དེ་རྣམས་གཉིད་ལོག་པ་ལ་དབྱུག་

པ་ཅན་གྱིས་འདི་ལྟར་བསམས་པར་གྱུར་ཏོ། །གལ་ཏེ་ཇི་ལྟར་ཡང་བདག་འདི་རྣམས་ཀྱི་ཐ་སྙད་ཀྱིས་ཕམ་པར་གྱུར་ན་དེ་ནས་ཆད་པ་བདག་གིས་གང་ནས་སྦྱིན་པར་བྱ་ཞེས་ཟེར་རོ། །རྒྱལ་པོའི་སྐྱེ་བོ་རྣམས་ཀྱིས་སྡུག་བསྔལ་སྦྱིན་པར་བྱེད་པ་སྡུག་བསྔལ་ཆེན་པོ་བཟོད་པར་ནུས་པ་ལ་མ་ཡིན་ཏེ། དེ་
བས་ན་ཤིང་ནྱ་གྲོ་དྷ་ལ་འཛེགས་ནས་བདག་ཉིད་ལྕེབས་པར་འགྱུར་བ་ཞེས་རྣམ་པར་བསམས་ནས་ཡང་བཅིངས་པ་བཀྲོལ་ནས་ཤིང་ནྱ་གྲོ་དྷ་ལ་འཛེགས་པ་སྟེ་བདག་ཉིད་ལ་ཐག་པས་འགག་དམིག་བཅུག་པར་གྱུར་ཏོ། །དེ་ནས་དེ་མི་ཁུར་ཆེན་པོས། རོ་ལངས་མཉམ་པའི་ཆོས་ལྡན་པའི། །
ཤིང་གི་ཡལ་ག་ཆག་གྱུར་ཏེ། །དེ་ལས་ཡང་དག་སྐྱེས་པའི་སྒྲ། །དེ་ནས་གེལ་བའི་བདག་པོ་དེ། །གཉིད་ལོག་སྟོང་དུ་སྐད་ཅིག་གིས། །ལུས་ཆེ་བ་ནི་ལྷུང་འགྱུར་ཏེ། །ཐག་པས་བཅིངས་པའི་སྐྱེ་བོ་ཅན། །གེལ་བའི་བདག་པོས་འཇིགས་པ་ནི། །དེ་ནས་ལག་ངར་
ཆག་ལངས་ནས། །གཉེན་རྣམས་ལོངས་ཤིང་གནས་པ་སྟེ། །འཁྲུག་པས་འདི་ལྟར་ངེས་བརྗོད་ཅིང་། །ཤིང་ནྱ་གྲོ་དྷ་འདི་ལས་ཤ་ཟ་ལྷུང་བས་བདག་གི་རྗེ་ངར་འདི་ཆག་པ་སྟེ། དེ་བས་ཁྱེད་ཅག་རྣམས་ཀྱིས་མར་མེ་རབ་ཏུ་སྦར་བར་མཛོད་ཅིག་ཅེས་ཟེར་རོ། །དེ་ནས་དེར་ཁ་ཅིག་རང་བཞིན་གྱིས་
འཇིགས་པ་རྣམས་ཤ་ཟ་ཞེས་བྱ་བ་ཐོས་ནས་ཕྱོགས་རྣམས་སུ་མི་སྣང་བར་གྱུར་ཏོ། །གཞན་དག་ནི་མེ་མར་སྦར་བར་བྱ་སྟེ། །བྲམ་ཟེ་དེ་ལ་མཐོང་བར་གྱུར་ཏེ། །ལྷུང་བས་རྨ་བྱུང་བའི་སྡུག་བསྔལ་གྱིས་ཀུན་ནས་འཁྲུགས་པའི་བློ་ཅན་དབུགས་དབྱུང་བ་མཐོང་ནས་ཀྱང་གདུག་པའི་བདག་ཉིད་ཅན། ཁྱོད་
ཀྱིས་གེལ་བའི་བདག་པོའི་རྗེ་ངར་ཆག་པ་སྟེ། དེ་བས་ན་ཚུར་ཤོག་རྒྱལ་པོའི་དྲུང་དུ་འགྲོ་བར་བྱ་ཞེས་ཟེར་རོ། །གེལ་བ་སྲུང་བ་དེ་རྣམས་ཀྱིས་ཀྱང་ཐོ་རངས་ཀྱི་དུས་ན་གཞན་དེ་རྣམས་དང་ལྷན་ཅིག་ཏུ་རྒྱལ་པོའི་དྲུང་དུ་ཁྲིད་པར་གྱུར་ཏོ། །དེ་ནས་མདུན་སར་བཞུགས་པའི་དུས་ལ་དབྱིག་པ་ཅན་དང་ལྷན་ཅིག་ཏུ་དེ་
རྣམས་ཐམས་ཅད་སྒོ་བས་རྒྱལ་པོ་མེ་ལོང་གདོང་ཅན་གྱི་དྲུང་དུ་ཉེ་བར་ཁྲིད་དེ། གཉིས་སྐྱེས་དེ་ནི་ཤིན་ཏུ་འཇིགས་པས་བརྒྱལ་བའི་ཡིད། །དེ་ནས་ས་ཡི་བདག་པོས་དེ་ནི་མཐོང་གྱུར་ན། །སྙིང་རྗེའི་དབང་གིས་བརླན་པའི་ཡིད་ནི་འགྱུར་བ་སྟེ། །ས་གསུམ་ལ་ནི་གཅིག་ཏུ་ཕན་ཕྱིར་ཡང་དག་བརྩོན། །དེ་

རྣམས་ཐམས་ཅད་ཀྱིས་ཀྱང་རིམ་གྱིས་དབྱིག་པ་ཅན་གྱི་ཉེས་པ་བརྗོད་པར་གྱུར་པ་དང་དེ་ནས་རྒྱལ་པོ་དེས་ཡིན་པར་གྱིས་ཤིག །ཐབས་དང་བཅས་པར་བདག་གིས་བྲམ་ཟེ་འདི་གྲོལ་བར་བྱེད་པར་འགྱུར་སྙམ་དུ་རྣམ་པར་བསམས་ནས་སྨྲས་པ། ཐ་སྙད་མ་ཐོབ་པའི་བྲམ་
ཟེ་འདི་ཅིའི་ཕྱིར་ཁྱེད་རྣམས་ཀྱིས་བསད་པ་དང་བཅིངས་པའི་ཀུན་ནས་ཉོན་མོངས་པས་ཀུན་ནས་ཁྱེར་བ་སྟེ། དེ་བས་ན་ཁྱེད་རྣམས་ཐམས་ཅད་ཉིད་ཆད་པ་གཅད་པར་འོས་སོ་ཞེས་ཟེར་རོ། །ཡང་ན་བྲམ་ཟེ་འདི་གྲོལ་བར་གྱིས་ཤིག་ཅེས་ཟེར་རོ། །དེ་རྣམས་ཀྱང་ཆད་པས་འཇིགས་པས་དེ་
བཀྲོལ་ནས་གནས་ཇི་ལྟ་བར་ཀུན་ནས་སོང་བར་གྱུར་ཏོ། །དབྱིག་པ་ཅན་དགའ་བའི་ཡིད་ཅན་དེས་ཀྱང་རྒྱལ་པོ་དེ་ལ་ཤིས་པ་བརྗོད་པ་རྣམས་ཀྱིས་མངོན་པར་བསྟོད་པར་བྱས་ཏེ། རིགས་ཀྱི་བུད་མེད་ལ་སོགས་པ་དེ་རྣམས་ཀྱི་གཏམ་དེ་ཞུས་པར་གྱུར་ཏོ། །དེ་ནས་རྒྱལ་པོ་དེས་ཐོས་ནས་སྨྲས་པ།
རིགས་ཀྱི་བུད་མེད་དེ་ལ་འདི་ལྟར་བརྗོད་པར་བྱ་བ་སྟེ། བདག་པོའི་ཁྱིམ་དུ་སོང་བ་ཕའི་ཁྱིམ་དུ་ཡང་། །སྐྱེས་པ་གཞན་དག་འདོད་པ་གདུངས་པ་མངོན་པར་འདོད། །དེ་ལྟར་འདར་བར་བྱེད་ཅིང་མེ་དང་སོལ་བ་ལྟར། །གཞན་དང་འབྲེལ་བའི་སེམས་ལྡན་བརྟན་པ་ཁྱོད་མི་རྙེད། །གལ་
ཏེ་ཡིད་ནི་འཚོ་འདོད་ན། །དེ་དག་ལས་ནི་སེམས་ཟློག་ཅིག །དོན་མེད་ཀུན་རྟོག་གིས་རྨོངས་པའི། །སྐྱེ་བོ་འགའ་ཞིག་བདེ་བ་མེད། །སྦྲུལ་ལ་ཡང་ནི་བརྗོད་བྱ་སྟེ། །གལ་ཏེ་ཁྱོད་ནི་བདེ་བར་འདོད། །སྲོག་ཆགས་སུ་ཞིག་མཐོང་ནས་ནི། །ཁྲོ་བ་བྱེད་པར་འོས་པ་མིན། །གང་ཞིག་ཁྲོ་བའི་
མེ་ནི་སྦར་བྱས་ནས། །རང་གི་ཡིད་ནི་ཚིག་སྟེ་གཞན་ཡང་སྲེག །ངེས་པར་རྨོངས་པའི་སེམས་དང་ལྡན་པ་དེ། །དམྱལ་བའི་མེ་ཡི་བུད་ཤིང་ཉིད་དུ་འགྲོ། །ཤང་ཤང་དེའུ་ལ་ཡང་སྨྲ་བར་བྱ་སྟེ། ཇི་ལྟར་ཞེ་ན། མདའ་ཡི་གེལ་བའི་འོག་ཏུ་ནི། །གཏེར་ནི་ཡོད་པ་དེས་ཁྱོད་ནི། །གནས་ཤིང་
ཤིན་ཏུ་དེ་ལ་ཡང་། །ཡིད་ནི་བརྟན་ལྡན་སྐྱེ་བ་ཡིན། །གཏེར་དེ་ཡང་བརྐོས་ནས་ཁྱེད་དབུལ་བའི་སྡུག་བསྔལ་དང་རྣམ་པར་བྲལ་བ་བདེ་བར་ཁྱིམ་གྱི་གནས་རྗེས་སུ་སྐྱོང་བར་འགྱུར་ཏེ། དེ་བས་ན་སོང་ཤིག་ཅེས་བྱ་བའོ། །དེ་ནས་དབྱིག་པ་ཅན་རྒྱལ་པོ་དེའི་བློའི་ཁྱད་པར་གྱིས་བློ་ལ་ངོ་མཚར་སྐྱེས་པས་ཞུས་པར་

གྱུར་ཏེ། རྒྱལ་པོ་ཆེན་པོ་ཁྱེད་ལ་གང་དུ་སྨོན་ལམ་ཡོད་ཅེས་བྱ་བ་བརྗོད་པར་འོས་སོ། །བྱང་ཆུབ་སེམས་དཔས་སྨྲས་པ། བླ་ན་མེད་པའི་བྱང་ཆུབ་བདག །ཞི་བའི་ཕྱིར་ནི་ཐོབ་པར་འདོད། །སྲིད་གསུམ་རྒྱ་མཚོར་ནུབ་གྱུར་པའི། །འཇིག་རྟེན་འདི་ནི་གདོན་ཕྱིར་རོ། །དབྱིག་པ་ཅན་གྱིས་སྨྲས་པ། གང་ཚེ་
ཁྱོད་ཀྱིས་བྱང་ཆུབ་ཐོབ། །མི་ཤེས་རབ་རིབ་གཅོད་པ་ནི། །དེ་ཚེ་ཁྱོད་ཀྱིས་སླེབ་པར་བདག །གྱུར་ཅིག་དེས་ནི་སོ་སོར་ཐོས། །དེ་ནས་བྲམ་ཟེ་དེ་སོང་ནས་གཏམ་དེ་དེ་རྣམས་ལ་སྨྲས་ཏེ། གཏེར་དེ་བཏོན་ནས་དགའ་བའི་ཡིད་དང་ལྡན་པ་གཉེན་འདུན་རྣམས་དང་ལྷན་ཅིག་ཏུ་ནོར་གྱིས་ཕོངས་པའི་སྡུག་བསྔལ་རྣམ་
པར་བསལ་ཏེ་བདེ་བར་གནས་པར་གྱུར་ཏོ། །དེ་ནས་བློན་པོའི་གཙོ་བོ་ལ་ལ་ཞིག་བྱང་ཆུབ་སེམས་དཔའ་ལ་ཡང་ནས་ཡང་དུ་འདི་ལྟར་བསྟོད་པའི་སྐུད་པར་བརྒྱུས་པའི་ཚིག་གི་མེ་ཏོག་རྣམས་ཀྱིས་མངོན་པར་མཆོད་ཅིང་གནས་སོ། །ལྷའི་འདི་ལྟ་བུ་ཤེས་པ་ཆེ་བའི་བདག་ཉིད་ཀྱིས་སུ་ཞིག་ཅེས་བྱ་
བ་ངོ་མཚར་བར་བཀུག་པ་མ་ཡིན་ཞེས་སྨས་ཏེ། རི་ལ་གནས་པའི་མེ་ནི་རིང་པོ་ནས་ཀྱང་དུ་བའི་རྗེས་སུ་དཔག་པས་རྗེས་དཔོག་བྱེད། །འཇིག་རྟེན་འདི་ན་རྗེས་སུ་དཔོག་བྱེད་དཔག་པར་བྱ་བའི་ཡུལ་ཅན་རྗེས་དཔོག་བློ་ནི་མཐོང་། །རྗེས་སུ་དཔག་བྱའི་དངོས་པོ་ཐེ་ཚོམ་ཅན་ལ་སྐྱེ་བོ་ཐེ་ཚོམ་བསྐྱེད། །ཐེ་
ཚོམ་མེད་པའི་བློ་ལྡན་ཁྱེད་འདྲ་རྣམས་ལ་དབང་པོ་ལས་ནི་འདས་ཀྱང་མངོན་སུམ་ལྡན། །གང་ཕྱིར་འཇིག་རྟེན་འདི་ན་ཡིད་ནི་ཆུང་བ་ཡུལ་ཅན་དབང་པོ་རྣམས་ཀྱི་དབང་བྱས་ཏེ། །དེ་ཕྱིར་མཁས་པ་རྣམས་ནི་དབང་པོ་ཞེས་བརྗོད་དེ་ལ་དབང་དུ་བྱེད་པ་ཡོད་པ་ལ། །ཁྱེད་ནི་མ་ལུས་ཤེས་བྱའི་ཕ་རོལ་ཕྱིན་ལ་
གང་ཕྱིན་དབང་པོ་རྣམས་ལྷག་དབང་བྱེད་པ། །ཁྱེད་ལ་དབང་བ་ཉིད་ནི་མ་ཐོབ་དབང་པོ་ཤེས་པར་བྱ་བ་དོན་མེད་བརྗོད་པ་ཡིན། །དེ་བས་ནོར་ལྡན་ཀུན་མཆོག་བཅས། །རྡོ་རྗེ་ཅན་གྱིས་མཐོ་རིས་ལྟར། །སྲིད་པ་རྣམས་གཅོད་རྣམ་ཞུགས་པའི། །སེམས་དང་ལྡན་པ་ཁྱོད་ཉིད་ཀྱིས། །དེ་ལྟར་ན་བཅོམ་
འདས་དེ་བྱང་ཆུབ་སེམས་དཔར་གྱུར་པ་ན་སྐྱོན་མང་བའི་རྒྱལ་སྲིད་ཀྱང་རྗེས་སུ་སྐྱོང་བར་མཛད་པས་ཤེས་རབ་ཆེ་བའི་བདག་ཉིད་ཀྱིས་རྒུད་པར་སོང་བ་རྣམས་ལ་ཀུན་ནས་གདོན་པར་མཛད་དོ་སྙམ་དུ་རྣམ་པར་བསམས་ནས། སངས་རྒྱས་བཅོམ་ལྡན་འདས་དད་པ་རྩེ་གཅིག་པ་རྣམས་ཀྱིས་གནས་པར་

བྱ་ཞེས་བྱ་བའོ། །མེ་ལོང་གི་གདོང་ཅན་གྱི་སྐྱེས་པའི་རབས་ཏེ་སྐྱེས་རབས་བཅུ་པའོ། །སྡོམ་ལ། སྦྲུལ་དང་རི་དྭགས་གནོད་སྦྱིན་གནོད། །རྩ་བ་ཅན་དང་མི་ཅི་མོ། །འབར་ཅན་སྨན་པ་རྐང་རྗེས་ཤེས། །གར་བྱེད་མེ་ལོང་གདོང་ཅན་ནོ།། །།བདེ་
བའི་ཆ་ཡིས་ཀུན་རྟོག་རྨོངས་སེམས་ཀྱི། །སེམས་ནི་ཤིན་ཏུ་བཅིངས་པའི་རྩ་བ་ཅན། །དམ་པ་རྣམས་ནི་ཆགས་བྲལ་གཏམ་གྱི་ཆུས། །ཆགས་པའི་མེ་ནི་ཞི་བར་མཛད་པ་ཡིན། །འདི་ལྟར་རྗེས་སུ་ཐོས་ཏེ། ཡོ་བྱད་ཡོངས་སུ་རྫོགས་པས་རབ་ཏུ་དགའ་བའི་སྐྱེ་བོ་རྣམས་ཀྱིས་
དགའ་བར་གྱུར་པ། རྣམ་པ་སྣ་ཚོགས་པའི་སྐྱེད་མོས་ཚལ་རྣམས་ཀྱིས་མཐའ་ཀུན་ནས་ཁྱབ་པའི་འཇོག་པོའི་བྲག་ཅེས་བྱ་བའི་རྒྱལ་པོའི་ཁབ་ན། བསྟན་བཅོས་དུ་མ་རྣམས་ལ་ཀུན་ནས་འདྲིས་པས་རྣམ་པར་དག་པའི་བློ། དམ་པ་མ་ཡིན་པའི་སྐྱེ་བོ་དང་འབྲེལ་པ་ལ་རྒྱབ་ཏུ་
ཕྱོགས་པ། སྐྱེ་བོ་བཟང་པོ་དང་འབྲེལ་པ་ལ་མངོན་པར་དགའ་བ། །དུལ་བ་དང་དེས་པ་དང་བཟོད་པས་རྣམ་པར་བརྒྱན་པ། འཇིག་རྟེན་ཐམས་ཅད་ཀྱི་གཉེན་དང་འདྲ་བའི་དེད་དཔོན