Luận tạng Tây Tạng (Tengyur) — Tập 169

་རྒྱལ་བྱས་པའི། །གང་གི་སྟོབས་རྣམས་སྟོབས་དང་ལྡན་པ་གཞན་གྱི་ཡུལ། །མངོན་པར་སོང་སྟེ་མཐོ་བའི་འཕེལ་བ་བྱུང་བ་ཡི། །ཆུ་ཡི་ཕུང་པོའི་ཆུ་
རྣམས་འགྲམ་གྱི་མཐའ་བཞིན་ནོ། །ཕན་ཚུན་མིན་པའི་རྔ་ལྡན་སྒྲ་ནི་སྒྲོགས་བྱེད་པ། །གང་གི་སྟོབས་རྣམས་ཁྲོ་བ་རྣམ་པར་རྒྱས་པ་བཞིན། །ཀུན་ནས་འགྲོ་བའི་དུས་སུ་དབང་དུ་སོང་བ་ནི། །ལྕགས་ཀྱུ་འཛིན་པ་རྣམས་ཀྱི་ཇི་ལྟར་ཡང་ནི་འབྱུང་། །དེ་ལྟ་བུའི་སྟོབས་འབྱུང་བ་འབད་པ་དང་
བཅས་པ་རྣམས་ཀྱིས་ང་རྒྱལ་མ་ཆགས་པའི་མིའི་བདག་པོ་དེའི་ཆགས་པའི་རྒྱུན་ཞེས་བྱ་བ་གཉིས་སྐྱེས་ཀྱི་བློན་པོ་བྱུང་བར་གྱུར་ཏོ། །རྒྱལ་པོ་དེ་ཡང་རིགས་ཀྱི་རྒྱུན་རྣམ་པར་ཆད་པ་ལ་འཇིགས་པས་དུས་གཅིག་གི་ཚེ་ན་སྲས་ཀྱི་དོན་དུ་ལྷའི་བྱེ་བྲག་དུ་མ་ལ་ཉེ་བར་སོང་བར་གྱུར་ཏོ། །དེ་ནས་

ཆགས་པའི་རྒྱུན་གྱིས་རྒྱལ་པོ་དེ་ལ་གསོལ་པ། །བཙུན་མོའི་འཁོར་གྱི་ནང་དུ་ལྷས་ཞུགས་པར་མཛོད་ཅིག་དང་། བདག་གིས་ནི་ལྷའི་སྲས་ཀྱི་དོན་དུ་ལྷ་ལ་ཉེ་བར་བརྟེན་པར་བགྱི་ཞིང་རྒྱལ་སྲིད་ཀྱང་སོ་སོར་བསྐྱང་བར་བགྱི་ཞེས་སོ། །རྒྱལ་པོས་ཀྱང་དེ་ལྟར་བྱའོ་ཞེས་
མངོན་པར་བརྗོད་ནས་བཙུན་མོའི་འཁོར་དུ་ཞུགས་ཏེ། ཡུལ་རྣམས་ལ་གཞན་དབང་དུ་སོང་བར་གྱུར་ཏོ། །ཆགས་པའི་རྒྱུན་གྱིས་ཀྱང་རང་གི་མིང་གིས་མཚན་མའི་ཡོ་བྱད་ཀྱི་ཚོགས་ཐམས་ཅད་བྱས་ནས་རྒྱལ་སྲིད་རྗེས་སུ་སྐྱོང་བ་བྱེད་པར་གྱུར་ཏོ། །ཀ་ལིང་ཀའི་རྒྱལ་པོས་ཀྱང་སྣ་ཚོགས་པའི་
གར་དང་། གླུ་ལྟ་ཞིང་ཉན་པས་སྙིང་འཕྲོག་པར་བྱས་པ། ལྷའི་བདག་པོའི་བུ་མོའི་ཚོགས་ཀྱིས་ཡོངས་སུ་བསྐོར་བ་དང་འདྲ་བར་གཞན་གྱིས་ཀྱང་ནོར་དང་། སྐྱེ་བོའི་དབུས་སུ་སོང་བ་རྣམ་པར་གནས་པར་གྱུར་ཏོ། །ཡིད་ནི་འཕྲོག་པ་བློན་པོ་མ་དྷུ་ཀ་ལྟར་སྐྱ། །ཟླ་བའི་འོད་ཟེར་ཀུན་ནས་
འཕྲོ་བར་བྱེད་པ་འདྲ། །ལ་ལ་ཞིག་གི་མེ་ལོང་ངེས་འབྲེལ་ལྟ་ཅན་གྱི། །འགྲམ་པ་དག་ནི་སྨུག་རྩིས་བསྐུས་པར་བྱས་པར་གྱུར། །གཞན་ནི་གཡོ་མེད་རྒྱས་པའི་མིག་ཅན་མཐོང་བ་སྟེ། །དགོད་པ་ཅུང་ཟད་བསྐྱོད་པའི་མཆུ་ཡི་རྩེ་མོ་ནི། །ཨུཏྤལ་སར་པ་ལ་ནི་ཉེར་གནས་ཨུཏྤལ་གྱིས། །དུང་
བ་བསྐྱོད་པ་ཅན་ནི་འགྲིབ་པར་གྱུར་པ་སྟེ། །རྒྱལ་ཕྱོགས་ལ་ལ་ཞིག་ནི་བསྟན་ལ་ལྷག་གནས་པ། །ཡིད་འཕྲོག་ཐང་ཀའི་རི་མོ་ལྟ་བར་བྱེད་པ་ནི། །རྐང་པ་སྒྲ་མེད་ས་བདག་དེ་ཉིད་ཉེར་འོངས་ནས། །ལག་པ་གཉིས་ཀྱིས་མིག་ནི་བཀབ་པ་བྱས་པར་གྱུར། །ལག་པ་རྣམ་པར་འདར་ཞིང་བདག་
དང་ལྷན་ཅིག་ཆོག །ཞེས་བྱ་མངོན་དགའ་གནས་པ་ཚིག་ནི་ཆད་པ་ཅན། །ནུ་མ་དག་ནི་གོས་ཀྱིས་འགེབས་པར་བྱེད་པ་ནི། །ཕོ་ཉ་མོ་ཡང་འདར་བའི་ཡན་ལག་འཛིན་པར་གྱུར། །ཁྱེད་ཉིད་བདག་ལ་མ་འོངས་པ་ན་སྲོག་མཆོག་སྟེ། །ཚིག་གིས་དགོད་པ་བདག་ལ་ལྟ་བ་འཛིན་པར་གྱིས། །
དེ་ལྟར་བརྗོད་པའི་ལ་ལ་ཞིག་ནི་གཡོན་ཕྱོགས་ན། །གནས་པའི་བུད་མེད་ཇི་ལྟར་ཡང་ནི་མགུ་ཞིག་འདུག །ཅུང་ཟད་བསྐྱོད་པའི་སྒྲ་ནི་སྒྲོགས་པ་རྐང་གདུབ་བརྒྱན་པ་ཡི། །རྐང་པས་ས་ཡི་སྟེང་དུ་སྒེག་པ་དང་བཅས་གནོན་བྱེད་ཅིང་། །བུད་མེད་དགོད་ཅིང་རྣ་བ་ལ་ནི་ཅི་ཡང་སྨྲ་བྱེད་པ། །གཞན་

གྱི་བུད་མེད་མིག་གི་མདའ་ནི་ཕོག་པར་མཚོན་པར་བྱས། །དེ་ནས་མ་ཉམས་པའི་ཡུལ་གྱི་བདེ་བ་ཉམས་སུ་མྱོང་བར་བྱེད་པ་མིའི་བདག་པོ་དེའི་བཙུན་མོའི་འཁོར་གྱི་མྱོས་པའི་བུད་མེད་དེ་རྣམ་པ་སྣ་ཚོགས་པའི་འཇམ་པའི་དགོད་པས་གཏམ་དང་། ཁྲོ་བ་དང་ཕྲག་དོག་གིས་སྨིན་མ་བསྐྱོད་པས་
ཡིད་འཕྲོག་པའི་སྒེག་པ་རྣམས་ཀྱིས་ཤིན་ཏུ་ཡང་སྙིང་ཀུན་ནས་བཏེག་པར་གྱུར་ཏེ། ཀུན་ནས་དགོད་པའི་དུས་སུ་བསྐྱོད་ཅིང་མཐོང་བའི་སྨིན་མ་ཅན། །དགོད་པའི་ཟླ་ཚེས་ཀུན་ནས་སོང་བའི་གདོང་བའི་ཟླ་བ་ལྡན། །རི་མོ་གསུམ་གྱིས་རྣམ་པར་བསྐྱོད་ཅིང་སྲབ་པའི་སྤུ་ཕྲེང་ཅན། །བུད་མེད་རྣམས་
ནི་སུ་ཡིད་འཕྲོག་པར་མི་བྱེད་དེ་སྨྲོས་ཤིག །འཕྲོག་པར་བྱེད་ཅིང་གསལ་བའི་སོ་ཡི་ཕྲེང་བའི་འོད་ལྡན་པ། །ཀུན་ནས་ཟླ་བའི་འོད་ནི་འཛག་པར་བྱེད་པ་འདྲ་བ་སྟེ། །བུད་མེད་སྐྱེ་བོའི་རབ་ཏུ་དྲེགས་པའི་རྒྱན་ཅན་ཚིག་རྣམས་ནི། །ལ་བ་ལི་ལྟར་དྲི་ཞིམ་པོ་ནི་སུ་ཞིག་འཕྲོག་མི་བྱེད། །འགྲོ་བ་
གསུམ་ལ་ཡང་བ་ཉིད་ནི་དེ་རྣམས་སོང་མིན་ནམ། །བདེ་ལྡན་དེ་རྣམས་ཉིད་དང་ལེགས་པའི་བློ་ཅན་དེ་རྣམས་ཉིད། །སྐྱོན་མང་པ་ཡི་སྦྲུལ་གྱིས་ངེས་པར་བསགས་པ་བརྟེན་མིན་པ། །རྣམ་པར་སྒེག་པའི་དུག་གི་ལྗོན་ཤིང་ཡལ་གའི་ནགས་རྣམས་ཀྱིས། །དེ་ནས་དུས་འདས་པ་དང་། བཙུན་མོ་
སེམས་ཅན་ཀུན་ནས་ཆགས་པ་བྱུང་བར་གྱུར་ཏོ། །དེ་ཡི་ཡོན་ཏན་གཏེར་འཕེལ་བ། །ཉི་མ་རེ་རེར་མངལ་འགྲོ་བ། །མདུན་དུ་འོ་མ་ཀུན་འཛིན་པ། །ནུ་མ་དག་ནི་སྔོ་བར་གྱུར། །པུས་མོའི་སྟེང་དུ་བཀོད་བྱས་ནས། །ལག་པ་འདབ་མ་ལྟར་འཇམ་པ། །ཇི་ལྟར་ཡང་ནི་རྟག་ལས་དེ། །ཁྱོད་ནི་
མཐོང་ནས་ལངས་པར་གྱུར། །སང་ངམ་ཞེས་བྱ་ངོ་མཚར་བཅས། །བུ་འདོད་པ་དག་མཉེས་གཤིན་པར། །ཡང་དང་ཡང་དུ་དེ་མཐོང་གྱུར། །དེ་ནས་ཞག་རྣམ་པར་དག་པ་ལ་དངོས་སུ་གཏེར་དང་འདྲ་བ་རང་གི་འོད་ཀྱིས་མིའི་བདག་པོའི་ཕོ་བྲང་གི་ནང་རྣམ་པར་བྱས་པ། འཆི་བ་མེད་པའི་
གཞོན་ནུའི་རྣམ་པ་ཅན། །མ་ལུས་པའི་ས་ལ་རྒྱན་དུ་གྱུར་པའི་སྲས་སྐྱེས་པར་གྱུར་ཏེ། ལུས་ཀྱི་འོད་ཀྱིས་ཟླ་བ་ཡི། །གང་ཕྱིར་འོད་ནི་དེས་འཕྲོག་པ། །གཉེན་འདུན་རྣམས་ཀྱིས་ཟླ་བ་ཞེས། །དེ་བས་དེ་ཡི་མིང་དུ་བཏགས། །སུམ་ཅུ་རྩ་བཞིའི་ཚད་རྒྱལ་མོ་གཞན་རྣམས་ལ་ཡང་སྲས་རྣམས་

སྐྱེས་པར་གྱུར་ཏོ། །དེ་ནས་ལོ་བརྒྱད་ལོན་པའི་གཞོན་ནུ་རྣམས་གཞོན་ནུ་ཟླ་བ་དང་ལྷན་ཅིག་རྒྱལ་པོའི་རིག་པ་འཛིན་པའི་ཕྱིར་བླ་མ་གང་ཞིག་ལ་བརྟད་ཅིང་འདུག་གོ། །གཞོན་ནུ་ཐམས་ཅད་ཀྱང་རི་དགས་ཤོར་བ་ལ་སོགས་པའི་ཆགས་པ་ལ་རྩེ་གཅིག་པ་ཡོན་ཏན་
གྱི་ཆ་དུ་མ་རྣམས་ཀྱང་གཟི་བརྗིད་དང་། དཔུང་པའི་སྟོབས་ཀྱི་གཞོན་ནུ་ཟླ་བ་ལྷག་པར་གྱུར་ཏེ། ཡོན་ཏན་གཉེན་དང་བློ་གྲོས་བཟང་པོ་སྐྱེས་ཏེ་ཤིན་ཏུ་ལྕི་བ་བསྔགས་པར་བྱ་བའི་གནས། །སྐྱོན་ནི་ཆེན་པོ་ཁ་ཅིག་ལ་ནི་སྐྱེ་བའི་མཐར་ཐུག་ཡང་བ་ཉིད་ནི་བཀག་བྱས་པ། །གང་ཕྱིར་མི་རྣམས་རིགས་
ཆེན་ལས་ནི་སྐྱེས་ཀྱང་ཁྱི་དང་མཉམ་པ་མཐོང་བར་འགྱུར་བ་སྟེ། །རྒྱ་མཚོ་རིན་པོ་ཆེ་ཡི་ཚོགས་ལྡན་ལས་ནི་ཆུ་ཡི་ཉ་ཕྱིས་ཅི་ཞིག་སྐྱེ་བར་མི་འགྱུར་རམ། །བདེན་པར་སྔོན་པོ་ཉིད་མཚུངས་པར། །ཨིནྡྲ་ནཱི་ལ་རྨ་བྱའི་མདོངས། །རིན་ཆེན་ལ་གནས་དེ་བསྔགས་པ། །གང་ཕྱིར་དམ་པ་ལ་གནས་དགེ། །
ཡོན་ཏན་སྐྱེས་པ་ལ་མེད་པ། །རྣམ་ལྡན་ལ་ཡང་འགའ་ཞིག་ཏུ། །མཆིང་བུ་ཨིནྡྲ་ནཱི་ལའི་མདོག །འཛིན་ཀྱང་དེ་ཡི་ཡོན་ཏན་ཡིན། །དེ་ནས་རྒྱལ་པོ་དེ་བྱང་ཆུབ་སེམས་དཔའ་རྒྱལ་ཚབ་ཏུ་དབང་བསྐུར་ནས་གཞོན་ནུ་དེ་རྣམས་ལ་ཡང་ཡུལ་འགའ་ཞིག་བྱིན་པར་གྱུར་ཏོ། །དེ་ནས་ཟླ་བ་མིའི་
བདག་པོས་རྗེས་སུ་གནང་བས་སྤུན་ཟླ་རྣམས་དང་ལྷན་ཅིག་ཏུ་རང་གི་ཡུལ་དུ་སོང་ནས་དུམ་བུ་འཛིན་པའི་མིང་གིས་མཚན་པའི་ཡོ་བྱད་ཐམས་ཅད་མཐོང་ནས་སྨྲས་པ། རྣམ་པ་ཐམས་ཅད་དུ་ཡུལ་ཙམ་གྱིས་ཁོ་བོ་ཅག་གི་ཡབ་རྒྱལ་པོ་སྟེ། ཆགས་པའི་རྒྱུན་ཉིད་དང་བདག་པོ་ཞེས་བྱ་བའོ། །
གཞོན་ནུ་རྣམས་ཀྱིས་སྨྲས་པ། འོ་ན་དུམ་བུ་འཛིན་པའི་མིང་འདི་སྤངས་ནས་རང་རང་གི་རང་གི་ཡུལ་གྱི་མིང་རྣམས་བདག་ཅག་གི་ཡོ་བྱད་ཐམས་ཅད་ལ་བྲི་བར་བྱ་ཞེས་ཟེར་རོ། །དེ་ལྟར་བྱའོ་ཞེས་ཟླ་བས་ཀྱང་ཁས་བླངས་པ་ལ་དང་པོར་ཟླ་བའི་མིང་དེ་རྣམས་ཀྱིས་འབྲི་ཞིང་འདུག་གོ། །དེ་ཡང་དེ་
ལྟར་བསྒྲུབ་པ་རྣམ་པར་ཤེས་ནས་དུམ་བུ་འཛིན་པ་ཁྲོས་པས་མཆོག་ཏུ་འོངས་ཏེ། བྲམ་ཟེ་རྣམས་ཚོགས་སུ་བཅུག་ནས་དབེན་པར་སྨྲས་པར་གྱུར་པ། རྒྱལ་པོའི་སྲས་འདིས་བདག་ལ་བདག་པོ་ཉིད་འཕྲོགས་པ་སྟེ། དེ་བས་ན་འདིར་འདི་ཐོབ་པ་ཐབས་གང་གིས་ཀྱང་ཟླ་བ་ཡིད་འཕྲོག་དང་རྣམ་པར་བྲལ་

བར་བྱ་ཞེས་བྱ་བར་ཁྱེད་ཅག་རྣམས་ཀྱིས་བལྟ་བར་གྱིས་ཤིག །འབྲས་བུ་ཆུང་བའམ་ནི་ཆེ་བ་མངོན་པར་འདོན་པ་ཐོབ་པའི་ཡིད་དང་ནི། །བྱ་བ་མེད་པའི་བློ་དང་ལྡན་པས་སྐད་ཅིག་ཙམ་ཡང་གནས་པར་མི་རིགས་ཏེ། །གལ་ཏེ་རྫ་མཁན་འཁོར་ལོ་ཉིན་མཚན་མེད་པར་དབྱུག་གུས་འཁོར་བར་མི་བྱེད་ན། །
རྫ་ཕོར་རམ་ནི་བུམ་པ་ས་ནི་ཡོད་ཀྱང་འབྱུང་བ་ཉིད་དུ་མི་འགྱུར་རོ། །བྲམ་ཟེ་རྣམས་ཀྱིས་སྨྲས་པ། དངོས་པོ་འདི་ལ་ཁྱེད་ཉིད་ཐབས་རྟོགས་པར་ནུས་པ་ཞེས་ཟེར་རོ། །དུམ་བུ་འཛིན་པས་སྨྲས་པ། གལ་ཏེ་དེ་ལྟར་ཡིན་ན་དེ་ནས་གལ་ཏེ་རྣམ་པ་གང་གིས་ཀྱང་རྒྱལ་པོ་འདི་རྨི་ལམ་ཁྱེད་རྣམས་ཀྱི་མདུན་དུ་སྨྲ་
བར་གྱུར་ན། དེ་ལ་ཁྱེད་ཅག་རྣམས་ཀྱིས་སྨྲ་བར་བྱ་སྟེ། ལྷ་ལགས་དུམ་བུ་འཛིན་པའི་རྨི་ལམ་གྱི་འབྲས་བུ་མངོན་པར་ཤེས་པ་སྟེ་དེ་ཉིད་ལ་དྲི་བར་བྱ་ཞེས་ཟེར་རོ། །དེ་ལྟར་བགྱི་ཞེས་བྲམ་ཟེ་རྣམས་ཀྱིས་ཁས་བླངས་པར་གྱུར་ཏོ། །དེ་ནས་དུས་གཅིག་གི་ཚེ་ན་རྒྱལ་པོ་དེ་རྨི་ལམ་མཐོང་བས་སྙིང་སྐྱོ་བས་
བྲམ་ཟེ་དེ་རྣམས་ལ་རྨི་ལམ་སྨྲ་ཞིང་འདུག་གོ། །བྲམ་ཟེ་རྣམས་ཀྱིས་ཀྱང་དུམ་བུ་འཛིན་པ་ནི་རྨི་ལམ་གྱི་འདོན་པ་རིག་པ་ཞེས་བྱ་བ་བསྟན་ཏོ། །དེ་ནས་རྒྱལ་པོ་དེས་དུམ་བུ་འཛིན་པ་ལ་བོས་ནས་རྨི་ལམ་འདི་ལྟར་སྨྲ་ཞིང་གནས་ཏེ། རྨི་ལམ་དུ་ནི་དིང་སང་གྲོང་ཁྱེར་མ་ལུས་བསྔགས་རྣམས་ཀྱིས། །འདི་ནི་
ཀུན་ནས་བསྐོར་བ་འོད་མེད་ཕོངས་པའི་འཇིག་རྟེན་ཅན། །བཅིངས་ཤིང་ལུས་ནི་ཀུན་ནས་བཙིར་བ་བདག་ནི་ས་སྐྱོང་གིས། །ཤིང་ཁང་ས་ལ་ལུས་ཀྱིས་ཀུན་ནས་ཁྱབ་པར་བཅུག་པ་མཐོང་། །དེ་བས་ན་རེ་ཞིག་རྨི་ལམ་འདིའི་འབྲས་བུ་བླ་མ་རྣམས་ཀྱིས་སྨྲ་བར་འདོད་ཅེས་ཟེར་རོ། །དུམ་བུ་འཛིན་པས་
སྨྲས་པ། ལྷ་ལགས་རྨི་ལམ་གྱི་རྣམ་པར་སྨིན་པ་ནི་དཀའ་བ་མཐོང་བ་ཡིན་ཏེ། རྒྱལ་སྲིད་ཆེན་པོ་ལས་ཉམས་པ། །ཁྱོད་ཀྱི་རྨི་ལམ་འདིས་མཚོན་ཏེ། །ཟླ་བ་གཉིས་ཀྱིས་འགྲོ་བྱས་པ། །ཡང་ན་ཁྱོད་ཀྱིས་བསྟེན་པའི་མཐའ། །བྲམ་ཟར་དེ་ཡི་ཚིག་ནི་ཐོས་པས་ས་སྐྱོང་ནི། །ཤི་དགོས་ཞེས་བྱ་
འཇིག་པ་ཉིད་ནི་འོང་བའི་ཕྱིར། །སྐྱེད་མོས་ཚལ་གྱི་ས་དང་ཁྱིམ་དུ་མངོན་དགའ་མིན། །འཆི་བ་རང་བཞིན་གྱིས་ནི་རྣམ་པར་བསམས་བཞིན་པ། །རིང་པོར་ཡང་ནི་ཡིད་ལ་སྡུག་བསྔལ་བྱེད་པ་སྟེ། །སྟེང་དུ་སོང་བའི་གདེངས་ཀའི་སྦྲུལ་ལྟར་བལྟ་དཀའ་བ། །ལུས་ཅན་ཤིན་ཏུ་དོར་བ་ཉིད་ནི་སྨོས་ཅི་དགོས། །

དེ་ནས་རྒྱལ་པོ་དེས་དུམ་བུ་འཛིན་པ་ལ་སྨྲས་པ། སླར་ཐབས་འགའ་ཞིག་ཡོད་པར་འགྱུར་རམ། གང་གིས་བདག་རྒྱལ་སྲིད་ལས་ཀུན་ནས་ཉམས་པའམ་དུས་མ་ཡིན་པར་འཆི་བ་ཐོབ་པར་མི་འགྱུར་ཞེས་ཟེར་རོ། །དུམ་བུ་འཛིན་པས་གསོལ་པ། དེས་ན་ལྷ་ཐབས་
གསན་པ་འོངས་ཏེ་ཟླ་བ་གཞོན་ནུ་དང་ལྷན་ཅིག་གཞོན་ནུ་ཐམས་ཅད་སྲོག་ཆགས་གཞན་དག་ཀྱང་མཆོད་སྦྱིན་གྱི་ལས་ལ་གསད་པར་བྱ་དགོས་ཟེར་ཏེ། དེའི་ཁྲག་ནི་ནེ་ཙོའི་མཆུ་ལྟར་ཁྱད་པར་གྱིས་ནི་དམར་བ་ཡི། །གང་བ་ཡངས་པའི་སར་ནི་རྫིང་བུ་ཤིན་ཏུ་རྒྱ་ཆེ་ལ། །ས་སྐྱོང་གལ་ཏེ་འཇུག་པར་གྱུར་ན་
དེའི་ཕྱིར་རྒྱལ་སྲིད་ལས། །ཉམས་པའམ་ནི་ཕྱི་རོལ་སོང་བའི་བདག་པོའི་དབང་མི་འགྲོ། །དེ་ནས་རྒྱལ་པོ་དེ་བདག་འཚོ་བར་གྱུར་པ་ལ་སླར་ཡང་སྲས་རྣམས་ལྷག་པའི་ཡོན་ཏན་དང་ལྡན་པར་འགྱུར་ཞེས་བྱ་བ་རྣམ་པར་བསམས་ནས། གཞོན་ནུ་དེ་རྣམས་ལྕགས་སྒྲོག་གིས་བཅིངས་པ་བླངས་ནས་
དུམ་བུ་འཛིན་པ་ལ་མཆོད་སྦྱིན་གྱི་ལས་བརྩམས་པར་གྱིས་ཤིག་ཅེས་སྨྲས་སོ། །དེ་ནས་གཞོན་ནུ་རྣམས་ནི་ཤིན་ཏུ་སྡུག་བསྔལ་བ། །རྒྱུན་བདུན་པ་ཡི་ལས་ནི་རབ་ཏུ་འཇུག་པར་བྱེད་པ་ཡིས། །ས་སྐྱོང་ཆེ་བའི་སྲས་ནི་མེད་པར་འཁྲུག་པ་ནི། །སྐྱོན་ཅན་བློན་པོ་དེས་ནི་རྒྱལ་པོ་ལ་ནི་སྨྲས། །མི་
ཡི་ཟླ་བ་ཟླ་བ་དེ་ནི་ཁྱོད་ལུས་སྐྱེས། །སྟོབས་ཀྱིས་བརྙས་པ་གལ་ཏེ་ཡོད་པར་མི་འགྱུར་ན། །ཁྱོད་ཀྱི་མི་དགེ་འཇོམས་པའི་མཆོད་སྦྱིན་ཆོ་ག་འདི། །འབྲས་བུ་ཆེན་པོའི་ཕྱིར་ནི་འབྱུང་བར་འགྱུར་བ་མིན། །རྒྱལ་པོས་སྨྲས་པ། ཟླ་བ་གཞོན་ནུ་ནི་བླ་མའི་སྐྱེ་བོ་ལ་གུས་པ་སྟེ། དེ་བས་ན་
བདག་གི་བཀའ་ལས་འདའ་བར་འགྱུར་བ་མ་ཡིན་ཏེ་དེ་བས་ན་འདི་ལ་ཕོ་ཉ་ཐོང་ཤིག་ཅེས་བསྒོ་བ་དང་། དེ་ལྟར་བྱའོ་ཞེས་དུམ་བུ་འཛིན་པས་ཁས་བླངས་ནས་རྒྱལ་པོ་དེས་ཕོ་ཉ་ལ་བོས་ནས་བསྒོ་བ་སོང་ཤིག་གང་དེར་གནས་པའི་ཟླ་བ་ལ་སྨྲོས་ཤིག་དང་། བདག་གི་དྲུང་དུ་མྱུར་བར་འོང་བར་གྱིས་
ཤིག་ཅེས་ཟེར་རོ། །དེ་ལྟར་བགྱིའོ་ཞེས་ཕོ་ཉ་དེ་ཡང་རྒྱལ་པོའི་བཀའ་ཉེ་བར་འཛིན་པས་བྱང་ཆུབ་སེམས་དཔའི་དྲུང་དུ་ཀུན་ནས་འགྲོ་བར་གྱུར་ཏོ། །བདག་ཉིད་ཆེན་པོ་དེ་ཡང་འཁོར་དང་བཅས་པ་དཔྱིད་ཀའི་དུས་ཀྱི་ཟླ་བ་ལ་ལྷན་ཅིག་བྱེད་པའི་སྙེ་མ་བརྩམས་པ་དང་། ཨ་ཏི་མུ་ཀ་ཏ་དང་།

མྱ་ངན་མེད་དང་། ཐིག་ལེའི་དྲིས་ལྷག་པར་དྲིས་བསྒོས་པའི་སྐྱེད་མོས་ཚལ་དུ་ཅུང་ཟད་ཞུགས་ཏེ་བདག་ཉིད་རྣམ་པར་རྩེ་ཞིང་འདུག་གོ། །སྒོ་བ་ལ་ཞུས་པས་ཞུགས་པར་མངོན་པར་རྗེས་སུ་གནང་བའི་ཕོ་ཉ་དེ་རབ་ཏུ་མཐུག་པའི་མཆི་མའི་ཐིགས་པ་འབབ་པའི་གདོང་གིས་ཟླ་བ་ལ་ཕྱག་འཚལ་ནས་
རྣམ་པ་གང་གིས་ཀྱང་སེམས་ཅན་དུ་མ་རྣམ་པར་འཇིག་པའི་ཕྱིར་ཉེ་བར་བརྩམས་པའི་མཆོད་སྦྱིན་གྱི་གཏམ་དེ་བརྗོད་ནས་རྒྱལ་པོའི་བཀའ་སྨྲ་ཞིང་འདུག་གོ། །དེ་ནས་བྱང་ཆུབ་སེམས་དཔའ་ལ་གྲོགས་བཤེས་དང་གཉེན་འདུན་རྣམས་ཀྱིས་འདི་སྐད་ཅེས་སྨྲས་སོ། །འདི་ཐམས་ཅད་མཁྱེན་ལ་རྣམ་
པར་འཇིག་པའི་ཕྱིར་འདུག་པའི་བདག་ཉིད་ཅན་གྱི་དུམ་བུ་འཛིན་པའི་གཡོའི་རྣམ་པར་སྤྱོད་པ་སྟེ། ཀྱེ་མ་སྐྱོན་ཅན་དེའི་བསྡམས་པ་ཅན་དང་འདྲ་བར་ལུས་ཀྱི་བྱ་བ་ཞི་བ་དང་། སྲིན་པོ་དང་འདྲ་བར་ནང་གི་བྱེད་པ་མ་དག་པའོ། །ཀྱེ་མ་གདུག་པའི་བདག་ཉིད་ཅན་རྣམས་ཀྱི། །ཡོ་བྱད་རྣམས་ཀྱི་རྣམ་
པ་ཐམས་ཅད་དུ། །རབ་ཞིའི་ཆ་བྱད་ཀྱང་ནི་རྣམ་པར་རྩུབ་པའི་ཡིད། །སྐྱེ་བོ་ངན་ལ་ཅུང་ཟད་ཡིད་བརྟན་མི་བྱ་སྟེ། །གང་ཕྱིར་ཆུ་སྐྱར་གཡོ་མེད་འགྲམ་ལ་གནས་ཀྱང་ནི། །ཀུན་ནས་འཕྲོས་པའི་ཉ་ནི་གསོད་པ་མིན་ནམ་ཅི། །སྡུག་བསྔལ་ཉེ་བར་ལེན་པར་བྱེད་པ་བརྟེན་པ་རྣམས་ལ་བརྟེན་པ་ཡང་། །
ཀུན་ནས་རྨོངས་པ་སྐྱེད་པར་བྱེད་པ་ནང་དུ་གདུང་བ་ངེས་པར་འཛིན། །སྦྲུལ་གྱི་དུག་ལྟར་རྨ་ལས་བྱུང་བ་མཐའ་གཅིག་ཏུ་ནི་ཆེ་བ་སྟེ། །སྤྱོད་པ་བརྟེན་བཞིན་མིན་པ་སྐྱེ་བོ་ངན་པས་བཟོད་པ་ཉིད་དུ་དཀའ། །དེ་བས་ན་གཞོན་ནུས་བཀའ་སྩོལ་ཅིག། །ཇི་སྲིད་དུ་གདུག་པའི་བདག་ཉིད་ཤ་ཟའི་འཇུག་པ་ཅན་
འབྲས་བུ་མེད་པའི་བྲམ་ཟེའི་མིང་ཅན་དུམ་བུ་འཛིན་པ་འདི་བཅིངས་ནས་འོང་བར་བྱ་བའམ། ཕ་རོལ་ཏུ་སོང་བ་རྣམས་ཀྱིས་མགོན་པོའི་དབང་དུ་ཐོབ་པར་བྱ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། བདེན་མོད་ཀྱི་བདག་ལ་ཡང་དུམ་བུ་འཛིན་པའི་དོན་དུ་ཅུང་ཟད་ཁྲོ་བ་མངོན་པར་སྡང་བ་བྱུང་
བར་གྱུར་ཏེ། །དེ་ནི་བདག་གི་སྲེག་ལུགས་འཛིན་པ་ཆུའི་རྒྱུན་དང་འདྲ་བའི་བཟོད་པས་ཉེ་བར་ཞི་བར་སོང་སྟེ། གལ་ཏེ་ཡང་བདག་ཅག་གི་སྲོག་གིས་བླ་མ་རྣམས་ཡུན་རིང་པོར་གསོ་བར་གྱུར་ན་དེ་ལྟ་ན་བདག་ཅག་ནི་དོན་དང་བཅས་པ་ཞེས་བྱ་བའོ། །དེ་བས་ན་དུམ་བུ་འཛིན་པའི་ཕྱིར་ཁྱེད་རྣམས་

ཀྱི་ཁྲོས་པས་ཚོག་སྟེ་བདག་གིས་ནི་འགྲོ་བ་ཁོ་ནར་བགྱིའོ། །དེ་ནས་ཕོ་ཉ་ངོ་མཚར་བས་འདི་ལྟར་སྨྲས་པར་གྱུར་ཏེ། ཨེ་མ་ངོ་མཚར་བ་ཆེན་པོ་ནི་རྣམ་པ་ཐམས་ཅད་དུ་གཞོན་ནུ་དོན་དམ་པར་བཟོད་པ་དང་ལྡན་པ་སྟེ། ཅིའི་ཕྱིར་ཞེ་ན། གལ་ཏེ་དགྲ་བོ་ཟད་ཕྱིར་ཀུན་
ནས་ལྡང་གྱུར་པ། །ཁྲོ་བའི་སྦྲུལ་ནི་བཟོད་པའི་རིགས་པ་འགེགས་པ་སྟེ། །དགེ་ལེགས་ཐོབ་ལ་དགའ་བའི་བསམ་པ་བཅིངས་རྣམས་ཀྱི། །བཟོད་བརྟེན་རྣམས་ཀྱི་སྣང་ཐོབ་དེ་ནི་མདུན་འགྲོ་བ། །དེ་ནས་བྱང་ཆུབ་སེམས་དཔའ་ལ་མཆི་མའི་ཆུའི་ཐིགས་པ་བཏང་བའི་རང་གི་ནང་འཁོར་གྱི་སྐྱེ་
བོས་རྗེས་སུ་འགྲོ་བཞིན་པ་ཤིང་རྟ་མཆོག་ལ་ཞོན་ཏེ། མཆོད་སྦྱིན་གྱི་ནང་ན་གནས་པའི་ཡབ་ཀྱི་དྲུང་དུ་འོངས་ཏེ་ཕྱག་བཙལ་ནས་གསོལ་བ། རང་གི་སྲོག་ནི་རྗེས་ཚོལ་བའི། །གལ་ཏེ་ཡབ་ཀྱིས་བདག་བཏང་ན། །བདག་གི་ལུས་འདི་མཆོད་སྦྱིན་ལ། །ཕྱུགས་ཉིད་དུ་ནི་ཉེར་བརྟག་མཛོད། །
བདག་གིས་བུ་ཁྱོད་བཏང་བ་ཞེས། །ས་ཡི་བདག་པོས་བརྗོད་པ་ལ། །ཟླ་བའི་སྟེང་དུ་སྡུག་བསྔལ་གྱིས། །མཆི་མའི་ཐིགས་པ་ལྷུང་བར་གྱུར། །གང་ཚེ་ཡུན་རིང་པོར་གནས་ཀྱང་། །འཆི་བདག་སྤྱོད་ཡུལ་བགྲོད་བྱ་བ། །དེ་ཚེ་གཞན་ནི་རྣམ་འཇིག་པས། །ཚེ་ནི་གནས་པར་སུ་ཞིག་འདོད། །
དེ་ནས་དུམ་བུ་འཛིན་པས་མཆོད་སྦྱིན་བྱེད་པ་པོ་དེ་རྣམས་ལ་སྨྲས་པ། མཁན་པོ་རྣམས་གསོན་ཅིག །སྲེག་ལུགས་དང་པོ་སོ་སོར་སྦྱིན་པར་གྱུར་པ་ལ་གཞོན་ནུ་ཟླ་བ་ཐོག་མར་གསད་པར་བྱ་སྟེ་ཕྱིས་ནི་གཞོན་ནུ་འདི་རྣམས་ཞེས་ཟེར་རོ། །དེ་སྐད་སྨྲ་བའི་དུམ་འཛིན་ལ། །མགྲིན་པ་བཏེག་པའི་
གཞོན་ནུ་རྣམས། །འཇམ་པའི་ཡན་ལག་ལྟར་གྱུར་ཏེ། །སེང་གེ་ལ་ནི་རི་དགས་བཞིན། །དེ་ནས་གཞོན་ནུ་དེ་རྣམས་ཐལ་མོ་སྦྱར་བས་བྱང་ཆུབ་སེམས་དཔའ་ལ་འདི་ལྟར་ཞུ་བ་བྱེད་ཅིང་གནས་པར་གྱུར་ཏེ། བདག་ཉིད་ཆེན་པོ་བསྔགས་པར་མཐོང་བའི་སེམས་ལྡན་པ། །འཇིག་རྟེན་ལ་
བྱམས་སྤུན་ཟླ་ཁྱེད་ནི་གནས་པ་ལ། །བདག་ཅག་ཕྱུགས་བཞིན་བརྩེ་མེད་འདི་ནི་ཇི་ལྟར་ནི། །དུམ་བུ་འཛིན་པ་སྙིང་རྗེ་མེད་པས་ཁྱེར་བར་འགྱུར། །དེ་ནས་སྤུན་ཟླ་དེ་རྣམས་ཀྱིས་ཚིག་གསན་ནས་སྙིང་ནས་སྡུག་བསྔལ་བར་གྱུར་པས་བྱམས་པ་དང་ཡང་དག་པར་ལྡན་པའི་ཏིང་ངེ་འཛིན་ལ་ཀུན་

ནས་དམིགས་པར་གྱུར་ཏེ། རྣམ་པར་དག་པའི་སེམས་ལྡན་པ་ཡི་ཏིང་འཛིན་གྱིས། །མཉམ་པར་གཞག་པའི་བདག་ཉིད་ཀུན་ནས་ཆགས་པ་འདྲ། །ངོ་མཚར་བཅས་པའི་བདག་ཉིད་མི་སྐྱོང་སྲས་རྣམས་ཀྱི། །ལྟོ་འཕྱེ་ལྟར་སྔོའི་ལྕགས་སྒྲོག་ཆག་པར་གྱུར། །ལྕགས་སྒྲོག་ཆག་པས་ངོ་
མཚར་བར་གྱུར་པའི་རྒྱལ་པོ་དེ་ལ་འདི་ཅི་ཡིན་ཞེས་བྱ་བ་རྟོག་པ་སྐྱེས་པའི་དུམ་བུ་འཛིན་པ་དེ་ལ་ཆུ་ཡིས་ལྕི་བའི་ཆུ་གཏེར་བྱུང་བར་གྱུར་ཏེ། ས་ནི་བསྒྲིབས་ཤིང་དབང་ཕྱུག་ཆེན་པོའི་མགྲིན་ལྟར་སྔོ། །འཕྲོ་བའི་འོད་དང་ལྡན་པའི་གློག་གི་ཁྲོ་གཉེར་གྱིས། །ཁྲོས་པས་སྲིན་པོ་བཞིན་དུ་སྒྲ་ཆེན་སྒྲོགས་
པར་གྱུར། །འདབ་ཆགས་གྲོལ་བས་རྣམ་པར་འཆག་པའི་ཤིང་རྣམས་ནི། །སྒྲ་དང་ལྡན་པ་རབ་ཏུ་སྐྱོ་བའི་བྲག་གི་དཀྱིལ། །རི་བོ་རྣམས་ཀྱི་རྩེ་མོ་ཀུན་ནས་ལྷུང་བྱེད་ཅིང་། །མི་ཡི་གྲོགས་པོ་དྲག་པོའི་ཤུགས་ཅན་རབ་ཏུ་རྒྱུ་བར་གྱུར། །མཐུག་པའི་དྲ་བ་རྡོ་བའི་ཚོགས་ནི་མཐུག་པ་དེས། །
དེ་ནས་སྤྲིན་རྣམས་མཐུག་ལས་རབ་ཏུ་གྲོལ་བར་གྱུར། །ཤིན་ཏུ་འཁྲུགས་པའི་སེམས་ལྡན་གཉིས་སྐྱེས་རྣམས་ཀྱི་ནི། །ཨོཾ་གྱི་སྒྲ་ནི་མཆོད་ཕྱིར་དབུས་སུ་ཞི་བར་གྱུར། །ཀུན་ནས་དཀར་དམར་བྱེད་ཅིང་ཆུ་ནི་འཛིན་རྣམས་ཀྱི། །ལྟོ་བ་རྣམས་ནི་འོད་དང་ཆུ་ཡི་ལྕི་བ་ནི། །མྱུར་དུ་ཉི་མ་ནུབ་པར་གྱུར་
ཏེ་རྒྱལ་པོ་ཡི། །སྡུག་བསྔལ་རྣམས་ལ་བལྟ་བར་མི་ནུས་བཞིན་དུ་གསེར་ལས་བྱས་པའི་བུམ་པ་རྣམས། །མཆོད་སྦྱིན་ས་ལ་བཞག་པས་རབ་ཏུ་བརྡེགས་བཞིན་པ། །ནམ་མཁའ་ལས་ལྷུང་རྡོ་བ་རྣམས་ཀྱིས་མྱུར་དུ་ནི། །ཆག་པར་བྱས་པ་བསྐྱོད་ཅིང་ཀུན་ནས་སྒྲ་འདོན་འགྱུར། །ནམ་མཁའ་ལས་
ལྷུང་རྡོ་བ་རྣམས་ཀྱིས་བརྡེགས་པ་ནི། །མཆོད་སྦྱིན་མེ་ནི་འཇིགས་པ་འདྲ་བར་རབ་ཏུ་ཞི། །ཀུན་ནས་རབ་ཏུ་འཕོས་པའི་མེ་སྟག་ཁྱབ་པ་ཅན། །བསྐྱོད་ཅིང་ལྷོད་པ་སྐྱ་བའི་དུ་བའི་ཚོགས་དང་ལྡན། །གླང་པོ་རྣམས་ཀྱི་ལྕི་བའི་ལྕགས་ཤུབས་ཀྱིས་བཅིངས་པ། །མཆེ་བས་འགྲམ་ལ་མངོན་པར་བརྡེགས་
པས་ས་འབྲེལ་བ། །རྡོ་བས་མངོན་པར་བསྣུན་པ་ཀུན་ནས་སྒྲ་སྒྲོགས་ཤིང་། །རབ་ཏུ་འཕྲོ་བའི་འོད་ལྡན་མེ་སྟག་འཕྲོས་པར་གྱུར། །རྨ་བྱ་གནས་པའི་སྲོག་ཤིང་ལས་ནི་ཀུན་ནས་ལྷུང་བ་སྟེ། །ཁྱིམ་བྱ་རོ་དང་བྲལ་ཞིང་འཇིགས་པས་སྒྲ་འདོན་གྱུར། །རྡོ་བས་ཀུན་ནས་བརྡེགས་པས་གཡོ་བའི་མིག་

ལྡན་པའི། །རི་དགས་རྣམས་ནི་ཁྱིམ་གྱི་ནང་དུ་ཞུགས་པར་གྱུར། །བསིལ་བ་ཆུ་གཏེར་རླུང་ནི་འཐུང་བར་བྱེད་འདོད་ཅིང་། །རྒྱ་ཆེའི་ཚང་ལས་རྣམ་པར་འབྱུང་བའི་ཕྱེད་ཀྱི་ལུས། །གདེངས་ཀ་ཅན་གྱི་བུ་ཡི་སྒྲ་བཅས་མྱུར་དུ་རྣམ་རྒྱལ་ནས། །ལྟོ་འཕྱེ་རྡོ་བས་ཀུན་ནས་
བརྡེགས་པས་རབ་ཏུ་ཞུགས། །བྱང་ཆུབ་སེམས་དཔའ་རིང་པོ་ནས་ནི་ཡོངས་གསལ་ནས། །གཞོན་ནུ་དང་བཅས་ཀུན་ནས་ལྷུང་བ་ཤུགས་ལྡན་པ། །རྡོ་བ་རྣམས་ལ་མི་སྐྱོང་དུམ་འཛིན་བཅས་པ་ནི། །ཕོ་བྲང་འཇིགས་པའི་སྐྱེ་བོས་ཁྱབ་པར་འཇུག་པར་གྱུར། །བློན་པོ་དང་ནི་ས་ཡི་བདག་པོ་སོང་བདག་
ལ། །གློག་གི་འོད་ཀྱིས་རྣམ་པར་སྣང་བའི་ལམ་ལ་ནི། །ཐོག་གིས་མགོ་བོ་དག་ནི་རྣམ་པར་ཆག་པ་ཡི། །ཀླད་པ་བྱུང་བའི་ཆ་ཡིས་ཉེ་བར་གོས་པའི་སྐྲ་ལྡན་པ། །མཆི་མ་དང་ལྡན་སྐྱེ་བོ་ལས་ནི་ཤི་ཐོས་ནས། །ས་ཡི་སྐྱོང་བ་རྣམས་ཀྱིས་བཀའ་ལ་མཆོད་པ་སྟེ། །འཇམ་པའི་སེམས་ཉིད་
ཤིན་ཏུ་སྡུག་བསྔལ་ཁུར་གྱིས་ནི། །བཙུན་མོ་གློ་བུར་དུ་ནི་སྲོག་ནི་གཏོང་བར་གྱུར། །དེ་ནས་འཇིགས་པའི་སྐྱེ་བོ་རྣམས་ཀྱིས་ནང་དོར་བ། །ས་ཡི་བདག་པོའི་ཕོ་བྲང་སྒོ་ནི་ཆག་གྱུར་པ། །རྡོ་བ་རྣམས་ཀྱིས་ཀུན་ནས་བརྡུངས་པས་སྐད་ཅིག་དེར། །གསེར་གྱི་ཀ་བ་རྣམས་ཆག་སྒྲ་སྐྱེས་ལྷུང་བར་
གྱུར། །ཤི་བར་གྱུར་ཏམ་འོན་ཏེ་འཚོ་འམ་ཅི། །གཡོ་སྒྱུའི་བསམ་པས་ས་བདག་དུམ་བུ་འཛིན་པ་དག། །དེ་ལྟར་འཕྲོས་པ་ཀུན་ནས་ཆུ་ནི་འཛིན་པ་རྣམས། །ཁྲོས་པ་ལྟར་ནི་གློག་གི་མིག་གིས་རྣམ་བལྟས་གྱུར། །དེ་ནས་ཐོ་རངས་ཀྱི་དུས་སུ་བྱང་ཆུབ་སེམས་དཔའ་ཕ་མ་དག་ལ་མེས་བསྲེག་
པར་བྱས་ཏེ། ཤི་བ་ལ་ཆུའི་སྙིམ་པ་སྟེར་ཅིང་ཀུན་ནས་སྐྱོ་བའི་བློ་ཅན་གྱིས། །ཨེ་མའོ་སངས་རྒྱས་བཅོམ་ལྡན་འདས་རྣམས་ཀྱིས་དངོས་པོ་ཐམས་ཅད་སྐྱེས་མ་ཐག་ཏུ་རབ་ཏུ་འཇིག་པའོ་ཞེས་བྱ་བ་ལེགས་པར་གསུངས་པ་འདི་ལ་རྣམ་པར་བསམས་ནས་སྤུན་ཟླ་དེ་རྣམས་ལ་སྨྲས་པ། འཕེལ་ཕྱིར་བུ་
ཡི་ཤི་བདག་ནི། །མཉེས་གཤིན་ཡིད་མ་དེས་སྤངས་ནས། །བདག་ལས་འབྲས་བུ་མ་ཐོབ་པ། །བདག་གི་མ་ནི་གང་དུ་སོང་། །ས་ཡི་སྐྱོང་བ་བདག་གི་ཡབ། །ས་ནི་སྐྱོང་བར་མཛད་ནས་ནི། །ཆོས་འཇིག་དུམ་བུ་འཛིན་པ་དང་། །ལྷན་ཅིག་ཏུ་ནི་གང་དུ་གཤེགས། །དྲན་པར་བྱ་ཡི་ཕུན་

ཚོགས་འདི། །རྟ་བབས་ཀ་བ་ལྷུང་གྱུར་པ། །བླ་མའི་ཁྱིམ་ན་མྱ་ངན་བྱེད། །ས་ལ་གཅོག་བྱེད་རྣམ་ལྷུང་བ། །འདི་དག་མི་མཉམ་ཡང་དག་ལྷུང་། །ཆགས་པའི་སོ་པག་འབྱུང་བ་ནི། །འོད་མེད་རི་མའི་རྩིག་པ་རྣམས། །བདག་ཉིད་མྱ་ངན་བྱེད་པ་འདྲ། །ཅི་ཞིག་གླུ་ཡི་ར་བ་འདི། །འོན་
ཏེ་གནས་ཀྱི་ཕོ་བྲང་ཡིན། །ཁང་པ་ཞིག་པའི་ཆ་རྣམས་ནི། །དཀའ་བས་འདི་ལྟར་དཔོག་པར་གྱུར། །གནས་འདི་ཕོ་བྲང་ཡོད་འགྱུར་ཏེ། །དཔལ་ལྡན་ས་ཡི་བདག་པོ་དེའི། །དེ་ལྟར་ཕྲད་འདོད་སྐྱེ་བོ་ནི། །གཞན་ལ་སྨྲར་འགྱུར་མྱ་ངན་གྱིས། །དཔལ་བྲལ་རྡོ་བ་བསྣུན་པ་ཡིས། །ནེ་ཙོ་ཁུ་བྱུག་ཤི་
བ་ནི། །ས་ཡི་བདག་པོའི་ཕོ་བྲང་གི། །སྐྱེད་མོས་ཚལ་འདི་སྒོམ་བྱེད་འདྲ། །མི་གནས་བདེ་བ་རེ་ཅན་གྱི། །རྒྱུན་པ་ཡོངས་སུ་སྐྱོང་བྱེད་ཅིང་། །དེ་ལྟར་དགྲ་ནི་རྫོགས་དོན་དུ། །ཕྲད་པ་འདོད་པ་འདྲ་བར་གནས། །བྱ་བ་མ་ཆད་སྐྱེས་རྣམས་ཀྱི། །བྱེད་པར་འགྱུར་དང་བྱེད་པ་དང་། །བྱས་འགྱུར་
རྫོགས་པའི་དོན་དུ་ནི། །ཤིང་བྱའི་སྒྲ་ནི་མི་རྟག་ཉིད། །བདག་ཀྱང་གནས་ལ་ནམ་མཁའ་ནི། །རྟག་པ་ཞེས་བྱ་མངོན་པར་བརྗོད། །འདི་ལྟར་སྟེང་དུ་མཐོང་བ་ལྟར། །ཁྲོས་པས་མི་རྟག་པ་ཉིད་གནས། །གཞན་དབང་མིན་པར་འཇུག་པའི་ཕྱིར། །ཡིད་ལ་ཞི་བ་ཉེར་ཐོབ་པ། །གཉེན་རྣམས་
མཉེས་གཤིན་སྤངས་པ་ནི། །ཆགས་པ་བྲལ་བས་བདེ་བར་གནས། །ཀུན་ནས་རྟོག་པར་ཡུལ་རྣམས་མངོན་པར་འདོད་པ་སྐྱེ་བོ་ལ་ནི་སྲིད་པར་གནས་མི་བྱེད། །སྲེད་པས་ཡིད་ནི་བཅིངས་པ་རང་བཞིན་གྱིས་ནི་དྲི་བཅས་བརྟེན་པའི་ཐལ་མོ་འཆིང་བར་བྱེད། །བསྟེན་པས་གདུངས་པ་མཆོག་
དུ་བསྟེན་པར་འདོད་པས་ལོང་བ་བཞིན་དུ་ཀུན་ནས་འཇོམས་པར་བྱེད། །ཀུན་ནས་འཇོམས་པ་སྡུག་བསྔལ་རྒྱུན་ནི་ཀུན་ནས་བརྙས་པའི་ཉོན་མོངས་རྣམས་ཀྱིས་བྱིན་གྱིས་བརླབས། །དཀའ་བས་རྙེད་པ་ཡང་ནི་རིམ་གྱིས་རབ་ཏུ་ཉམས་པའི་བདེ་བ་སླར་ནི་འགྱུར་བ་སྟེ། །དེ་ཉམས་པ་ལ་སྐྱེས་པ་
བསམས་པའི་མེ་ནི་སྦར་ཞིང་ཡོངས་སུ་གདུང་བ་ཉིད་དུ་འགྲོ། །སྡུག་བསྔལ་འདི་ནི་སྲིད་པའི་རྗེས་འབྲེལ་ཀུན་ནས་བསགས་པ་གཡོ་སྒྱུ་ཅན་གྱི་རྒྱུ་ཡིན་ཏེ། །དེ་རྣམས་ཤིན་ཏུ་བདེ་ལྡན་གང་རྣམས་ཀྱིས་ནི་ཡང་དག་ཆུང་འདོད་ཡིད་རྣམས་ལ་ནི་བཞག །དེ་བས་རྒྱལ་སྲིད་དོར་ནས་བདག། །སྡུག་

བསྔལ་མང་པོའི་ཚེར་མ་ཅན། །ཞི་ཕྱིར་ཞི་བའི་ལམ་གནས་ནི། །དཀའ་ཐུབ་ནགས་སུ་འགྲོ་བར་བགྱི། །དེ་ནས་རྗེས་སྐྱེས་བྱ་བ་བྱས་པ་དབང་བསྐུར་ནས། །སྤུན་ཟླ་གཉིས་སྐྱེས་རྣམས་ཀྱིས་ཤིས་པ་རྩོམ་པ་ནི། །དཔལ་ནི་སྤངས་ཏེ་དཀའ་ཐུབ་རྣམ་པར་འཕེལ་བའི་
ཕྱིར། །བརྟེན་པའི་ཡིད་ཅན་དེ་ནི་ནགས་སུ་སོང་བར་གྱུར། །དེ་ལྟར་བཅོམ་ལྡན་འདས་དེས་བྱང་ཆུབ་སེམས་དཔར་གྱུར་པ་ན། གནོད་བྱེད་ལ་ཡང་བཟོད་པ་ལྷོད་པར་མ་མཛད་དོ་ཞེས་བྱ་བ་རྣམ་པར་བསམས་ནས་དགེ་བ་ཚོལ་བ་རྣམས་ཀྱིས་བཟོད་པའི་སྟོབས་དང་ལྡན་པས་གནས་པར་བྱ་ཞེས་
བྱ་བའོ། །ཟླ་བའི་སྐྱེས་པའི་རབས་སྟེ་སྐྱེས་པའི་རབས་བཅུ་པའོ། །སྡོམ་ལ། རི་དགས་རྨ་བྱ་ཐུབ་པ་དང་། །སྔོ་བསངས་དཀའ་ཐུབ་གསུམ་དེ་བཞིན། །དགའ་བའི་སྡོམ་ཚངས་གླང་པོ་དང་། །ས་སྐྱོང་སྲས་ནི་ཟླ་བ་ཡིན།། །།དམ་མིན་འཇུག་རྣམས་ཉིན་རེར་མ་གུས་ཀྱང་། །གང་
ཞིག་རང་གི་ཁྲོ་བ་འདུལ་བར་བྱེད། །དེ་ནི་གཞན་དག་རྣམས་ཀྱི་འགྲོ་བ་ཡང་། །དུལ་བ་དང་ལྡན་བརྟན་པས་འདུལ་བར་བྱེད། །འདི་ལྟར་རྗེས་སུ་ཐོས་ཏེ། དྲི་མ་མེད་པའི་མེ་ལོང་གི་དཀྱིལ་ལྟར་ཆུ་དང་བ་འགའ་ཞིག་ལ་ཚུལ་སྤྱོད་པའི་འདབ་ཆགས་རྣམས་ཀྱི་གཤོག་པ་རྣམ་པར་འཕངས་པས་པདྨ་
རྣམས་ཀྱི་ཚོགས་འཁྲུག་པར་བྱས་པ་དང་། འདོད་ཆགས་དང་བྲལ་བའི་སེམས་ཐུབ་པ་རྣམས་ཀྱིས་འཇུག་ངོགས་ལ་བརྟེན་པ་དང་། འཇམ་པའི་རླུང་གིས་རྣམ་པར་འབིགས་བཞིན་པའི་ཆུ་རླབས་ཀྱི་རྒྱུན་གྱིས་བསྐུལ་བའི་སྦུ་བ་དཀར་པོའི་ཕྲེང་བས་འགྲམ་གྱི་རི་མོ་འདྲེས་པར་བྱས་པ་དང་། འགྲམ་
གྱི་ཤིང་རྣམས་ཀྱི་མེ་ཏོག་གིས་བྲག་གི་དཀྱིལ་བཀྲམ་པ་དང་། སྐྱེ་བོ་བཟང་པོའི་སྤྱོད་པ་ལྟར་འཇིག་རྟེན་ཐམས་ཅད་ལ་བདེ་བར་བྱེད་པའི་ལྟོ་འཕྱེ་ཆེན་པོའི་གནས་མཚོ་ཆེན་པོ་ལ་དྲི་མ་དང་བྲལ་བའི་ནོར་བུ་རྣམས་ཀྱི་གདེངས་ཅན་གྱི་ཚོགས་རྣམ་པར་བརྒྱན་པར་བྱས་པའི་བྱང་ཆུབ་སེམས་དཔའ་དར་དར་ཞེས་
བྱ་བའི་སྦྲུལ་བྱུང་བར་གྱུར་ཏོ། །ལྟོ་འཕྱེ་སྐྱེ་བོ་ལ་ཡང་གནས་པར་བྱེད་བཞིན་པ། །བཟོད་པ་འདོད་པས་དེ་ནི་བསམ་པ་ངེས་འབྲེལ་བ། །ནམ་ཡང་ཁྲོ་བའི་སེམས་ནི་གདུང་བྱེད་མི་འགྱུར་ཏེ། །ས་ལས་སྐྱེས་པ་ཆུ་ནི་སྤངས་པ་མི་ལྟར་ནི། །རྟག་ཏུ་བྱམས་པ་གོས་བྱེད་པའི། །མཁས་པ་རྣམས་

ཀྱིས་རིག་པ་སྟེ། །སེམས་ནི་གྲོགས་དང་དགྲ་རྣམས་ལ། །སྙིང་རྗེ་ཐ་ནི་མི་དད་འབྱུང་། །བདག་ཉིད་ཆེན་པོ་དེ་ཡང་ཆོས་དང་རྗེས་སུ་མཐུན་པའི་དགེ་སློང་མ་དཀའ་ཐུབ་པ་མཐོང་ནས་མིའི་ཆ་བྱད་དུ་བྱས་ཏེ་མདུད་པ་དང་བཅས་པས་ཉེ་བར་བརྟེན་པར་གྱུར་ཏོ། །བློ་གྲོས་ཆེན་པོ་དེའི་ཡང་གདེངས་ཀའི་
ནོར་བུ་དང་། ལུས་ཀྱི་པགས་པ་འདྲ་བར་ཉེ་བའི་དར་དར་ཞེས་བྱ་བའི་སྤུན་ཟླ་ཡོད་པར་གྱུར་ཏོ། །དེ་དག་ཕན་ཚུན་དུ་ཕན་པས་རྩེ་གཅིག་པའི་ཡིད་ལ་བྱེད་པ་དང་། ཕ་རོལ་གྱི་རྣམ་པར་འཚེ་བའི་སྡུག་བསྔལ་ལས་ལོག་པ་དཀའ་ཐུབ་ཀྱི་ནོར་ཅན་དང་འདྲ་བའི་ཆུ་འཛིན་པ་དེ་ལ་རྣམ་པར་གནས་པར་གྱུར་
ཏེ། དེར་ཡང་གདེངས་ཅན་རྣམས་ཀྱིས་རང་བཞིན་གྱི་བསམ་པ་བཟང་པོའི་བྱང་ཆུབ་སེམས་དཔའ་ཉེ་བར་གནས་བཞིན་པ་ལ་མི་བཟོད་པར་གྱུར་ཏོ། །ཉམས་པ་མེད་ཀྱང་མི་དགའ་བའི་ཚིག་དེ་དང་དེ་རྣམས་ཀྱིས་ཉི་མ་རེ་རེ་ཞིང་འདི་ལ་གནོད་པར་གྱུར་ཏེ། །དངོས་པོ་ཀུན་གྱི་རང་བཞིན་ཉིད། །བདག་
ཉིད་དྲི་བཅས་སྐྱེ་ངན་གྱིས། །རྨོངས་པ་རྣམས་ཀྱི་རང་བཞིན་ཉིད། །ཞི་བའི་སེམས་ལྡན་རྣམས་ལ་ཡང་། །གང་ཕྱིར་རྒྱུ་ཉིད་དྲག་ཉིད་འབྲེལ། །དེ་ནས་ཉེ་བའི་དར་དར་ལྟོ་འཕྱེའི་ཚོགས་ཀྱི་དྲུང་ནས་རྔན་ཅན་དེ་མ་བཟོད་ཅིང་ང་རྒྱལ་གྱིས་མངོན་པར་གནས་པའི་ཡིད་ཅན་ཅུང་ཟད་ཀྱང་བཟོད་པར་མི་ནུས་ཤིང་
དར་དར་ལ་སྨྲས་པ། དམ་པ་མ་ཡིན་པའི་རང་བཞིན་མིག་གིས་ཐོས་པ་འདི་རྣམས་ཀྱི་རྔན་ཅན་འདི་བདག་ཅག་གིས་མ་ནུས་པ་བཞིན་དུ་ཅིའི་ཕྱིར་བཟོད་པར་བྱེད། གང་གི་ཕྱིར་ཆུའི་རྟེན་གཞན་རྣམས་ལས་ལྷག་པར་གནས་པར་བྱས་པ་སྟོབས་དང་ལྡན་པའི་གྲོགས་པོ་རྣམས་ལྟོ་འཕྱེའི་བདག་པོ་
ཡོད་དེ། དེ་རྣམས་ལ་སྤྲོ་བ་བསྐྱེད་ནས་འཐབ་མོས་ལྟོ་འཕྱེ་འདི་རྣམས་མཚོ་འདི་ལས་ངེས་པར་གདོན་པར་བྱ་བའམ། འཇིག་པ་ཉིད་དུ་ཁྱེར་བར་བྱ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། བཞིན་བཟངས་དམ་པ་མ་ཡིན་པའི་སྐྱེ་བོ་དང་ལྷན་ཅིག་སྐྱེས་པའི་ཁྲོ་བ་འདི་སོ་སོར་སྡུད་པའི་
སྟོབས་ཀྱིས་ཡོངས་སུ་དོར་བར་གྱིས་ལ་ཁྱོད་ལྟོས་ཤིག་དང་། བཟོད་པའི་ལྕགས་ཀྱུས་གནས་པའི་ལམ་ནི་འདའ་བྱེད་པ། །རིང་པོར་ཁྲོ་བའི་མཆེ་གཉིས་གང་ཞིག་འགག་བྱེད་པ། །དེ་ཡི་ཡིད་ནི་ནམ་ཡང་འགྱོད་པར་མི་འགྱུར་ཏེ། །ཕ་རོལ་དུ་ཡང་ངན་པའི་འགྲོ་བ་ཐོབ་པར་འགྱུར། །ལམ་མིན་

ནས་འགྲོ་ངོ་ཚ་དོར་བར་བྱེད་པ་སྟེ། །བློ་ལྡན་རྣམས་ཀྱི་གསོ་བའི་ངག་ནི་ཐོས་མིན་པ། །དམ་མིན་སྐྱེ་བོ་ཆགས་པས་སྨོད་པའི་སྐྱེ་བོ་ནི། །སྐད་ཅིག་གིས་ནི་བཟང་པོ་ཡང་ནི་བཟང་ཉིད་འདོར། །གང་ཞིག་ཚེར་མ་དང་བཅས་ལམ་ལ་གོམ་པ་ནི། །འཇུག་བྱེད་དེ་
ལས་ལངས་པའི་སྡུག་བསྔལ་དེས་ཐོབ་སྟེ། །དེ་ལྟར་བརྟགས་ནས་སྐྱེ་ངན་ཚེར་མ་དྲག་པ་ཅན། །གནས་པ་མཁས་པ་བདེ་བ་དོན་གཉེར་ཡོངས་སུ་དོར། །ཇི་སྲིད་ཁྲོ་བའི་མེ་ནི་མེ་སྟག་དང་ལྡན་པ། །སེམས་ནི་སྲེག་པར་བྱེད་ཅིང་འཕེལ་བར་མི་འགྲོ་བ། །དེ་སྲིད་སྐྱེས་པས་བཟོད་པའི་ཆུ་ཡིས་རབ་
སྤངས་པའི། །བདེ་བ་སྦྱིན་པ་ཉིད་ནི་མྱུར་དུ་གསད་པར་བྱ། །དེ་ལྟར་དགྲ་བཞིན་ཀུན་འཇུག་པ། །ནད་ནི་ཀུན་ནས་འབྱུང་བ་ལྟར། །བཟོད་དགྲ་བཟོད་པས་རྒྱལ་བྱས་ཏེ། །རབ་ཞི་ལ་ནི་ཡིད་བཟུང་མཛོད། །གཞན་ཡང་ཤིན་ཏུ་དགའ་བ་རི་བོང་ཅན་གྱི་འོད་ཟེར་ལྟར་དྲི་མ་དང་བྲལ་བའི་ཆུ་དང་
ལྡན་པའི་ཆུའི་རྟེན་རྣམས་ནི་གཞན་དག་ཀྱང་ཡོད་དོ། །ནུས་པ་མེད་པ་དང་འདྲ་བར་མཚོ་འདི་ལ་ཅིའི་ཕྱིར་གནས་པར་བྱ། །དེ་བས་ན་འོང་བར་མཛོད་ཅིག་དང་མཚོ་གཞན་ལ་གནས་པར་བྱ་ཞེས་ཟེར་རོ། །ཇི་ལྟར་ཕུ་བོས་བཀའ་སྩལ་པ་ཞེས་བྱ་བ་མངོན་པར་བརྗོད་ནས་ནུ་བོ་དང་རྗེས་སུ་འགྲོ་བཞིན་
པའི་བྱང་ཆུབ་སེམས་དཔའ་ཤེལ་གྱི་ནོར་བུའི་ཚོགས་ཞུ་བ་དང་འདྲ་བའི་ཆུ་སྐྱེས་ཀྱི་ནགས་ཀྱིས་བསྒྲིབས་པ་དང་། ནང་དུ་རབ་ཏུ་འགྲོ་བའི་གསལ་བའི་ཉའི་ཚོགས་ཀྱིས་ཁྱབ་པ་དང་ཉེ་བར་ཤིང་གི་གྲིབ་མས་འགྲམ་གྱི་ཆུ་བཀབ་པ་དང་། །འདབ་ཆགས་ཀྱི་ཚོགས་དུ་མས་བར་མཚམས་མེད་པའི་
མཚོ་ཆེན་པོར་མངོན་པར་འཇུག་པར་གྱུར་ཏེ། དེ་ནས་ས་འོག་ཀུན་ནས་འཇུག་པར་འདོད་པའི་དེ་ལ་ནི། །བརྟེན་པ་རབ་ཏུ་ཞི་ལ་ངེས་པར་འབྲེལ་པའི་ཡིད་ཅན་ལ། །པདྨའི་འདབ་མ་ཚོགས་ཀྱིས་འདྲེས་པ་སྦུ་བའི་མཆོད་ཡོན་ནི། །མཚོ་ཡི་རླབས་རྣམས་ཀྱིས་ནི་སྐྱེས་པ་འདྲ་བར་བྱིན་པར་
གྱུར། །བདག་གི་ཆུ་ནི་གཙང་བར་མཛོད། །དེ་ལ་དེ་ལྟར་མངོན་བརྗོད་ཅིང་། །རྐང་དྲུག་སྨིན་མའི་ལྗོན་ཤིང་འདེགས། །པདྨའི་ཚོགས་ལྡན་བྱས་པར་གྱུར། །ནོར་བུའི་འོད་ཀྱིས་བསླང་བ་ཡིས། །དེར་ནི་དེ་དག་ནུབ་གྱུར་ལ། །དབང་པོ་གཞུ་དང་ཆུ་དེ་ནི། །སྐད་ཅིག་བར་མཚམས་མེད་

གནས་གྱུར། །མཚོ་དེ་རྒྱ་ཆེ་དེ་དག་གིས། །ས་འོག་ལྷག་པར་གནས་པ་ནི། །ཁ་ཕྱེའི་པདྨ་ཨུཏྤལ་ཅན། །བདག་ཉིད་གཙང་བ་འདྲ་བར་སེམས། །དེ་ནས་པདྨ་ཆེན་པོ་དང་ལྡན་པའི་ཆུའི་གནས་དེར་རང་བཞིན་གྱིས་དྲག་པ་དང་། དྲི་མ་ཅན་གྱི་བསམ་པ་དང་ལྡན་པའི་སྦྲུལ་ཆེན་པོས་དེ་དག་གི་
རང་བཞིན་གྱིས་ངེས་པར་སྐྱེས་པའི་བཟང་བ་ཉིད་ཤེས་ནས་ཉི་མ་རེ་རེར་འདི་ལྟར་རྔན་ཆེན་གྱི་དུག་དང་འབྲེལ་བ་ཚ་བའི་ཡི་གེ་རྣམས་སྨྲས་པར་གྱུར་ཏོ། །ལྟོ་འཕྱེ་ཉིད་ནི་ཡོད་ཅིང་ཡང་དག་བརྟེན། །བཟོད་ལྡན་ཉིད་ནི་ཁྱེད་ཅག་བདག་ལ་ཅི་ཕྱིར་འགྱུར། །ཟབ་པའི་ཆུ་ལྡན་ཆུ་བོའི་བདག་པོའི་གནས་ལ་
ཡང་། །ཆུ་རྟའི་གདོང་གི་མེ་ནི་བསིལ་བར་མི་འགྱུར་རོ། །རྣམ་ཁྱབ་ཁྲོ་བའི་སྲེག་ལུགས་ཟ་བ་ཡོད་པ་ལ། །བཟོད་པ་མངོན་པར་སྨྲ་བ་ཉིད་འདི་རིགས་མིན་ཏེ། །ཨེ་མ་ཁྱེད་ཅག་གི་ནི་མི་བདེན་ཆེན་པོ་ཡིས། །ཤིན་ཏུ་བདག་དང་སྐྱེ་བོ་ཡང་ནི་སླུ་བར་བྱེད། །གང་ཞིག་བདག་ཉིད་བཟོད་
པ་དང་ལྡན་ཞེས་སྨྲ་བ། །ཁྲོས་པས་ཉེ་བར་སྦས་པ་ལུས་ཅན་གྱི་ནི་སེལ། །ཁྲི་སྙན་ལྤགས་དང་ཤིང་ལོའི་གོས་ནི་འཛིན་པ་ཡིན། །གནོད་སྦྱིན་དེ་ཡི་གཡོ་སྒྱུས་དཀའ་ཐུབ་བརྟུལ་ཞུགས་ཅན། །ཁྲོ་བའི་མེ་ནི་ཡོད་ལ་འགྲོ་བའི་སྡུག་བསྔལ་གྱི་ནི་རྒྱུ། །ཁྱེད་གཉིས་བཟོད་པའི་སྐྱེ་བོས་དད་
པར་བྱས་པ་མ་ཡིན་ཏེ། །ཆོས་ཀྱི་བདག་ཉིད་ཇི་ལྟར་དོན་མིན་འདི་ནི་ཁྱེད་ཅག་གི། །བདག་གི་སླད་དུ་དགོད་པའི་དངོས་པོ་སྲིད་པར་འགྱུར་བ་ཡིན། །དེ་བས་ན་བདག་ཅག་གི་ཆུའི་རྟེན་གྱི་གནས་འདི་ནས་འགྲོ་བར་གྱིས་ཤིག་ཅེས་ཟེར་རོ། །ཆུའི་སྦྲུལ་དེ་ཡང་དེ་ལྟར་རྒྱུ་མེད་པར་ངག་རྩུབ་པར་
སྨྲ་བ་མཐོང་ནས་དར་དར་ནི་རང་བཞིན་གྱིས་རྣམ་པར་དག་པའི་བློ་བདག་ཉིད་ནང་དུ་སྨྲས་པ། དམ་པ་རྣམས་ཀྱི་ཚིག་ནི་ཚིག་གི་དགྲ་སྟས་འཇིགས་པར་བྱེད་ཅིང་ཤུགས་དང་ལྡན་པ་ནི། །རིང་པོ་ནས་མཐོང་འཇིགས་དང་བཅས་འདྲར་དམ་པ་རྣམས་ཀྱི་གཉེན་འདུན་ཡོན་ཏན་རྣམས་ཀྱིས་དོར། །དེ་ལྟར་གཅེར་
བུ་བཞིན་དུ་མཐོང་ནས་འདུལ་བ་ཉམས་པས་དམ་པ་མིན་པའི་སྐྱེ་བོ་ནི། །དམ་པའི་སེམས་ཀྱི་ཁྱིམ་བདག་མོ་ནི་ངོ་ཚ་དང་ལྡན་གནས་པར་བསམ། །དེ་ནས་སྦྲུལ་ཆེན་པོ་དེའི་སྐྱེ་བོ་ངན་པའི་དངོས་པོའི་གཞུ་ལས་དྲངས་པའི་ཚིག་རྩུབ་མོའི་མདའ་རྣམས་བཟོད་པར་མི་ནུས་ཤིང་ཉེ་བའི་དར་དར་ཁྲོས་

པས་ཀུན་ནས་བསྐྱོད་བཞིན་པའི་ཡིད་སོའི་རྩེ་མོ་རྣམས་ཀྱིས་མ་མཆུ་འཛིན་ཅིང་དར་དར་ལ་སྨྲས་པ། སྤུན་ཟླ་ལགས་སྦྲུལ་ཆེན་པོ་འདིའི་བརྙས་པ་འདི་ཅིའི་ཕྱིར་བཟོད་པར་བགྱི། །གང་གི་ཕྱིར་འདི་ནི་རྒྱུ་མེད་པར་ཉི་མ་རེ་རེ་ཞིང་བདག་ཅག་ལ་དེ་ལྟར་ལྷག་པར་རྒོལ་བར་བྱེད། །
འདིའི་ཆུའི་རྟེན་འདི་ཉོས་པ་འདི་མ་ཡིན་ཏེ། དེ་བས་ན་མང་པོ་མངོན་པར་བརྗོད་པས་ཅི་ཞིག་དགོས། ཐོག་མར་གཡོ་སྒྱུ་ལྡན་པ་འདི་ནི་སྐད་ཅིག་གི་ཚིག་སྟེ། །ཆོས་དང་འབྲེལ་བའི་ལམ་ཉམས་རྒྱུ་མཚན་མེད་པར་དགྲར་འཛིན་པ། །གློག་གི་རྒྱས་པ་ལྟར་ནི་སེར་སྐྱའི་དུག་གི་མེ་ཡིས་ནི། །
སྦྲུལ་ཆེན་ཚོགས་རྣམས་ཀུན་ནས་འཕྲོ་བར་གདུལ་དུ་གཏང་བར་བགྱི། །བྱང་ཆུབ་སེམས་དཔས་སྨྲས་པ། སྡུག་བསྔལ་དང་ལྡན་པ་འདིའི་སྟེང་དུ་སེམས་ལ་སྨོད་པ་ཆོག་ཅིང་ཆོག་གོ། །འདི་ནི་བཟོད་པ་ཁོ་ན་མཛེས་པ་སྟེ་ཅིའི་ཕྱིར་ཞེ་ན། སྟོབས་དང་སྟོབས་ཆུང་ལ་བཟོད་པོ། །སྡིག་བཅས་ལ་
ཡང་གང་ཞིག་བྱེད། །དོན་དམ་བཟོད་ཅན་དམ་རྣམས་ཀྱིས། །དེ་ནི་འགྲོ་བར་མངོན་པར་བརྗོད། །དོན་མེད་ཁྲོ་བའི་མེ་འབར་བ། །རྩུབ་པའི་ཡི་གེ་སྨྲ་བ་ནི། །སྨན་ནི་ཅུང་ཟད་ལན་མིན་ལས། །སྐྱེ་ངན་ལ་གཞན་ཡོད་མིན་ཏེ། །དེ་བས་རྩུབ་པའི་ཚིག་སྨྲོས་ཤིག །རྒྱུ་མཚན་མེད་པར་འདི་ཡང་
ནི། །མིང་སྨྲའི་ངོ་བོས་རྒྱལ་བྱས་ཏེ། །དམ་མིན་སྐྱེ་བོ་རྨོངས་པའི་བློ། །དོན་མེད་སྡིག་པ་སོག་བྱེད་པ། །བདག་ལ་སྨོད་ཅིང་སྐྱེ་བོ་ངན། །དེ་ཕྱིར་དེ་ལ་བརྩེ་བ་ཉིད། །མཁས་པས་བྱ་བར་འོས་པ་ཡིན། །དེ་བས་འདི་འདྲའི་བློ་ནི་ཉེ་བར་བརྩམས་མཛོད་ཅིག། །གཞན་ནི་ཉེ་བར་གསོད་ཕྱིར་
འདི་ནི་ཉེ་བར་ཀུན་ལངས་པ། །འདུལ་བ་མིན་པར་དགྲ་སྟས་བདག་ཉིད་ཟད་པ་ལ། །ཐོས་པ་ཆེ་བ་རྣམས་ལ་སྙིང་རྗེ་ཉིད་ནི་མཛེས། །དེ་ནས་ཉེ་བའི་དར་དར་རས་གུས་པ་དང་བཅས་པས་བཏུད་ནས་བྱང་ཆུབ་སེམས་དཔའ་ལ་ཕན་པ་ཉེ་བར་སྟོན་པ་ཆེན་པོ་རྣམས་ཀྱི་ཚིག་རྣམས་ནི་མངའ་བར་བྱ་བ་མ་ཡིན་ནོ་ཞེས་
བྱ་བ་བརྗོད་ཅིང་བཟོད་པའི་ཆུའི་དབང་བསྐུར་བས་རང་གི་ཁྲོ་བའི་མེ་རྣམ་པར་ཞི་བར་བྱས་ཏེ། སྐྱེ་བཟང་རྣམས་ཀྱིས་གནས་པ་ཆེན་པོ་བྱས་པ་ནི། །ས་གསུམ་འདུལ་བ་མིན་པ་སོ་སོར་འགོག་བྱེད་པ། །ཡོན་ཏན་ངེས་འབྲེལ་ཡིད་ནི་ངོ་ཚ་དང་ལྡན་པ། །དགེ་བ་ཉིད་ལ་སྐྱེ་བོ་སོ་སོར་བསྐྱང་བར་བྱ། །སྦྲུལ་

ཆེན་པོ་དེ་ཡང་དེའི་བཟོད་པ་ཀུན་ནས་འདྲིས་པས་འདུལ་བའི་ཡི་གེ་བྱང་ཆུབ་སེམས་དཔའི་ཚིག་ལ་མཉན་ན་སླར་འགྱོད་པ་དང་ལྡན་པས་རྒྱུ་མཚན་མེད་པར་སྡང་བ་དང་ངེས་པར་འབྲེལ་བ་བདག་ལ་ཉི་མ་རེ་རེ་བཞིན་དུ་ཤིན་ཏུ་རྩུབ་པའི་ཚིག་མངོན་པར་བརྗོད་པ་ལ་བདག་ཉིད་ཆེན་པོ་འདི་ཉུང་བ་ཡང་
སེམས་ལ་རྩུབ་པ་སྐྱེས་པ་མ་ཡིན་པ་ཞེས་བྱ་བ་དེ་བས་ནི། །ཨེ་མའོ་ངོ་མཚར་ཆེན་པོ་ཞེས་བྱ་བ་རྣམ་པར་བསམས་ནས། བླ་མ་དང་འདྲ་བར་སོ་སོར་བལྟ་བར་བྱ་བའི་བྱང་ཆུབ་སེམས་དཔའི་དྲུང་དུ་ཉེ་བར་འོངས་ནས། བཟོད་པར་གསོལ་ཞིང་རྣམ་པ་མང་པོའི་གཏམ་འདི་ལྟར་སྨྲ་བར་གྱུར་ཏེ། ཡང་
དང་ཡང་དུ་རྔན་ཆེན་འདི་ནི་བདག་གིས་བྱས། །ཁྱེད་ཀྱི་ཡིད་ནི་འགྱུར་བ་དང་ལྡན་མ་མཛད་དེ། །ཁྱེད་ནི་ངེས་པར་གདེངས་ཅན་རྣམས་ནི་འདུལ་བའི་ཕྱིར། །ཐུབ་པ་ཆེན་པོས་ཀྱང་ནི་ལྟོ་འཕྱེ་ཉིད་ནི་མཛད། །སྦྲུལ་ཉིད་འཇིགས་པར་བྱེད་པ་འདི་ནི་གང་དུ་སྟེ། །ཤིན་ཏུ་ཞི་བ་དང་ལྡན་ཡིད་ནི་གང་དུ་ཡང་། །
བསྐོར་བར་བྱས་ནས་སྡང་བ་ཉིད་ནི་སྤངས་བྱས་ཏེ། །འདབ་ཆགས་རྒྱལ་པོ་ཡང་ནི་ཁྱོད་ལ་མཆོད་པར་བྱེད། དེ་ལྟར་སྦྲུལ་ཆེན་པོ་དེ་རྩུབ་པའི་ཚིག་རྣམ་པར་ཟློག་སྟེ། བྱང་ཆུབ་སེམས་དཔའི་འདུལ་བའི་རྗེས་སུ་འཇུག་པས་རང་གི་གནས་སུ་འོངས་ཏེ་རང་བཞིན་བཟང་པོ་བཟུང་བར་གྱུར་ཏོ། །དེ་
ལྟར་ན་བཅོམ་ལྡན་འདས་དེས་བྱང་ཆུབ་ཀྱི་སྤྱོད་པ་ལ་གནས་ནས། ལྟོ་འཕྱེའི་སྐྱེ་གནས་སུ་གནས་ཀྱང་། །བཟོད་པ་གོམས་པས་དྲག་པོའི་ཡིད་ཅན་རྣམས་ཀྱང་བཟང་པོ་ཉིད་དུ་ཉེ་བར་ཁྱེར་བ་ཞེས་བྱ་བ་རྣམ་པར་ངེས་ནས་བཟོད་པ་ལ་ཡོངས་སུ་འདྲིས་པར་བྱའོ། །དར་དར་གྱི་སྐྱེས་པའི་རབས་ཏེ་སྐྱེས་པའི་
རབས་དང་པོའོ།། །།བརྩོན་འགྲུས་མེད་པར་འདོད་པའི་འབྲས་བུ་ནི། །འགྲོ་བར་སྦྱར་ཕྱིར་ཆུང་བའང་ཐོབ་པ་མིན། །དེ་ལྟར་ངལ་བ་རྩི་བར་མ་བྱས་པར། །སྐལ་བ་ཆེན་པོ་རྣམས་ནི་བརྩོན་འགྲུས་རྩོམ། །འདི་ལྟར་རྗེས་སུ་ཐོས་ཏེ། དྲི་མ་མེད་པའི་ཆུ་འབབ་པའི་ལྕང་མའི་ཕྲེང་
བས་འགྲམ་གྱི་རི་མོ་སྔོ་བར་བྱས་པ་འགའ་ཞིག་ཏུ་ཀ་རན་ཏ་ཀའི་ཚོགས་ཀྱི་རྗེས་སུ་འགྲོ་བཞིན་པའི་བསྐྱོད་པའི་ཉའི་ཚོགས་ཀྱི་ཆུའི་དཀྱིལ་ཁྱབ་པ་དང་། རབ་ཏུ་བརྐྱང་བའི་གོས་ལྟར་དཀར་བའི་འགྲམ་དང་ལྡན་པའི་ཆུ་བོས་ཀུན་ནས་འཕངས་པའི་ས་འཛིན་གྱི་ལོགས་དང་ལྡན་པ་འགའ་ཞིག་ལ་ནགས་

ཀྱི་མེས་ཕྱེད་ཚིག་པ་ཡོངས་སུ་སྨིན་པའི་སྐྱུ་རུ་ར་དང་། ཕྲེང་བ་དང་། རྒྱ་ཤུག་རྣམས་ཀྱིས་སའི་དཀྱིལ་ཁྱབ་པ་དང་། མར་ཀ་ཏའི་ཁབ་ལྟར་ཀུ་ཤའི་མྱུ་གུ་སྔོན་པོས་ཉེ་བར་བསགས་པ་དང་། འགའ་ཞིག་ཏུ་ཕག་རྣམས་འཇུག་པས་ཀུན་ནས་སྐྲག་པ་དང་། ཀུན་ནས་
གྲོལ་བར་གྱུར་བའི་རྫིང་གི་འགྲམ་གྱི་མཐའ་དང་ལྡན་པ་དང་། གཞན་དུ་རི་དགས་ཀྱི་ཤས་མེ་སྦར་བས་རབ་ཏུ་ཉལ་བའི་སྟག་རྣམས་ཀྱིས་ཕུག་གི་སྒོར་ལྷག་པར་གནས་པ་དེ། སྣ་ཚོགས་པའི་ཡལ་གས་བསྐོར་བས་ཀུན་ནས་བསྐོར་བའི་དམའ་བ་དང་། འཁྱོག་པའི་རི་མོས་མཚན་པའི་ཤིང་རྣམས་ཀྱི་སྡོང་
བུ་དང་ལྡན་པ། མཐུག་པའི་འདབ་མ་ཅན་གྱི་འོད་མའི་ནགས་ཀྱིས་བཀབ་པའི་མདུན་མ་ཅན་གྱི་རིའི་སུལ་བར་པ་དང་ལྡན་པའི་ནགས་ཀྱི་ནང་ན་བྱང་ཆུབ་སེམས་དཔའ་རི་དགས་ཀྱི་ཚོགས་ཀྱི་བདག་པོ་བྱུང་བར་གྱུར་ཏོ། །བདག་ཉིད་ཆེན་པོ་དེས་ཀྱང་དམ་པའི་སྤྱོད་པ་མིའི་བདག་པོས་རྒྱལ་སྲིད་རྗེས་སུ་
སྐྱོང་བར་གྱུར་པ་དང་འདྲ་བར་རི་དགས་ཀྱི་ཚོགས་གང་དུ་ཡང་འཇིགས་པ་མེད་པར་འཕེལ་བ་ཆེན་པོར་འགྲོ་བར་གྱུར་ཏེ། རི་དགས་འཕྲོག་བྱེད་མགྲིན་པ་ལྟར་ནི་སྔོ་བའི་རྒྱབ། །སེང་གེ་ལྟར་ནི་བསམ་ལྡན་སྔོ་བའི་རྩྭ་ཟ་ཞིང་། །དམ་དང་དམ་མིན་ལམ་ཤེས་རི་དགས་རྣམས་དེ་ནི། །སློབ་བཟངས་
མཁན་པོ་ལ་ལྟར་དེ་ལ་རྗེས་འགྲོ་གྱུར། །དེ་ནས་དུས་གཅིག་གི་ཚེ་ན་རི་དགས་ཤོར་བ་ལ་དགའ་བས། སའི་བདག་པོ་སུ་ཞིག་གི་རི་དགས་ཀྱི་ཚོགས་དེ་རྔོན་པའི་དྲུང་ནས་རྣ་བའི་ལམ་དུ་སོང་བར་གྱུར་ཏོ། །རྒྱལ་པོ་དེ་ཡང་གཞུ་འཛིན་པའི་རྟའི་མཆོག་ལ་ལྷག་པར་ཞོན་པ། །དམག་ཚོགས་ཀྱིས་
བསྐོར་བ་ནགས་དེར་འོངས་ནས། །རིང་པོ་ནས་རི་དགས་ཀྱི་ཚོགས་དེ་ལྟ་ཞིང་གནས་ཏེ། དེ་ནས་སྐྱུགས་ལྡད་སྤངས་ཏེ་གྱེན་དུ་ལྟ་བའི་གདོང་། །ཁྲི་སྙན་ས་ལེ་མདའ་ནི་མདའ་ཕོགས་དོགས་པ་ཅན། །མདའ་ཡི་ཡུལ་དུ་རི་དགས་ཁྱེར་འདོད་མི་ཡི་དབང་པོ་ནི། །དམག་གི་མདུན་དུ་སོང་བ་ལྟ་ཞིང་
གནས་པར་གྱུར། །གཡེར་ཁའི་སྒྲ་ནི་ཀུན་ནས་འབྱུང་བ་རྣམས་མཐོང་ནས། །གསོད་འདོད་དམག་ཚོགས་དེ་ནི་གཞུ་ནི་གཞུ་རྒྱུད་བདུངས། །མིག་གཉིས་བསྐྱོད་པས་བལྟ་བའི་རི་དགས་རྣམས་ཀྱིས་བསྐོར། །ཚོགས་ཀྱི་བདག་པོ་དེས་ནི་འདི་ནི་ངེས་པར་བསམས། །ས་བདག་བདེ་བ་སྐྱོང་

བ་བདེ་བ་དོན་གཉེར་ནི། །སྐྱེ་དགུ་འཇིགས་པ་མ་སྐྱེས་དགེ་བ་བརྟེན་པའི་ཕྱིར། །བདག་ལ་སོང་བ་ཀུན་ནས་ངལ་བ་མ་བསམས་ནས། །སྲུང་བྱེད་དེ་ནི་གང་ཞིག་ཕོངས་པ་ལ་ཡང་སྲུང་། །འཇིགས་པས་འཁོར་བ་རྒྱ་ཆེའི་མིག་ལྡན་འདི་རྣམས་ནི། །ཀུན་ནས་ཟག་པའི་ཁྲག་གིས་ས་སྟེངས་སྦངས་པ་ནི། །
རི་དགས་རྣམས་ནི་མདུན་དུ་ལྷུང་ཞིང་ལུས་འཕྲོས་པ། །མདའ་རྣམས་ཀྱིས་ནི་བསྣུན་པ་ཇི་ལྟར་བལྟ་བར་འགྱུར། །དེ་ལྟར་རི་དགས་འདི་རྣམས་རི་དགས་གསོད་པ་ཡི། །མདའ་ནི་རྣོན་པོ་རྣམས་ཀྱིས་ཇི་སྲིད་བསྣུན་མིན་པ། །སྟོབས་ཀྱིས་དེ་སྲིད་འཇིགས་པས་བསྐྱོད་པའི་མིག་ལྡན་པ། །འདི་
རྣམས་ལ་ནི་བསྲུང་བའི་དོན་དུ་འབད་པར་བགྱི། །ནགས་འདི་ཡང་དམག་གི་ཚོགས་འདིས་ཀུན་ནས་ཡོངས་སུ་འཕངས་པ་སྟེ། དེ་བས་ན་ཕྱོགས་གང་གིས་རི་དགས་ཀྱི་ཚོགས་ཀུན་ནས་འབབ་པར་བགྱི་ཞེས་བྱ་བ་ཀུན་ནས་བལྟས་ཏེ། ཡིན་མོད་ཐབས་འདི་རྙེད་དེ། རིའི་ཆུ་བོ་འདི་ལས་རྒལ་ནས་རི་
དགས་རྣམས་ལ་བདེ་བར་འགྱུར་ཞེས་བྱ་བ་བརྟག་པར་བགྱིའོ། །རིམ་པ་གཅིག་གིས་རི་དགས་འདི་རྣམས་མྱུར་དུ་ཆུ་འབབ་པའི་རྒྱ་མཚོའི་ཆུན་མ་འདི་ལ་རྒལ་བར་ནུས་པ་མ་ཡིན་ནོ་ཞེས་ཟེར་རོ། །དེ་བས་ན་འདི་འདིར་ཐོབ་པ་དེ་ཆུ་བོ་འདིའི་དབུས་སུ་གནས་པ་བདག་གི་རྒྱབ་ལ་གོམ་པ་འདོར་ཞིང་རི་དགས་
འདི་རྣམས་བདེ་བར་འགྲོ་བར་འགྱུར་སྙམ་དུ་རྣམ་པར་བསམས་ནས། འགྲམ་གྱི་ཤིང་གི་རྩེ་མོ་ལ་རབ་ཏུ་འབབ་པའི་ཆུ་འགའ་ཞིག་ལ་ཀུན་ནས་བསྐོར་བའི་འཁོར་དོང་གི་དབུས་སུ་མནན་པས་སྦུ་བའི་ཚོགས་རྣམ་པར་འཁྲུག་པའི་ས་འཛིན་གྱི་ཆུ་བོ་དེ་ལ་དབུས་སུ་ཞུགས་ནས་བདག་ཉིད་བརྟན་པར་བྱས་ཏེ།
བདག་ཉིད་ཆེན་པོ་དེས་རི་དགས་རྣམས་ལ་སྨྲས་པ། འགྲམ་འདི་ལས་ནི་ཀུན་མཆོངས་ཏེ། །བདག་གི་རྒྱབ་ཏུ་གོམ་བཞག་ནས། །དཀའ་བ་འདི་ལ་ཚོགས་མཚུངས་པ། །མྱུར་དུ་འཇིགས་མེད་སོང་ཤིག་གོ། །ཆ་ཤས་ལྡན་ཕྱིར་བདག་གི་ལུས། །ཆོས་མེད་ཕྱིར་ཡང་དོན་མེད་དེ། །ཁྱེད་
ཅག་བསྒྲལ་བས་སྙིང་པོ་འདི། །ཤིན་ཏུ་རིང་ནས་ཐོབ་པར་འགྱུར། །གཞན་ཕན་པ་ལ་རྒྱབ་ཕྱོགས་པ། །གང་ཚེ་ལུས་ཀྱི་རྨ་དེ་ཚེ། །གང་ཚེ་གཞན་ལ་ཕན་དམིགས་པ། །ལུས་ཀྱི་རིན་ཆེན་འདི་དེ་ཚེ། །གལ་ཏེ་ཁྱེད་ཅག་མི་སྐྱོང་དམགས་གིས་རྗེས་འབྲེལ་བ། །བདག་ནི་འཇིགས་པས་

ཡོངས་སུ་སྐྱོང་བར་ནུས་པ་ནི། །བདག་གི་ཚོགས་ཀྱི་བདག་པོ་ཉིད་ཀྱི་དགྲ་འདི་ནི། །དེ་ཕྱིར་ས་ལ་དི་རིང་འབྲས་བཅས་འགྱུར་བ་ཡིན། །དེ་ནི་རེ་ཞིག་ཉིད་དུ་དེ་ཕྱིར་འོང་བར་མཛོད་ཅིག་དང་། །ཇི་སྲིད་ཁྱེད་རྣམས་ལ་ཡང་རྣོན་པོའི་མདའ་རྣམས་ལྷུང་མིན་པ། །བདག་
གི་རྒྱབ་ནི་མི་གཡོ་ཆུ་བོའི་ཆུ་ལ་ཟམ་གྱུར་ལ། །ཞོན་ནས་དམག་ཚོགས་འཇིགས་པ་འདི་ལ་ཀུན་ནས་རྒལ་བར་མཛོད། །དེ་ནས་རི་དགས་དེ་རྣམས་ཤི་བའི་འཇིགས་པས་ཚོགས་ཀྱི་བདག་པོའི་རྒྱབ་ལ་གོམ་པ་བཞག་ནས་ཆུ་བོའི་ཆུ་ལས་རྒལ་ནས་འགྲམ་གཉིས་པ་ལ་ཉེ་བར་འགྲོ་བའི་ཕྱིར་ཀུན་ནས་
བརྩམས་པར་གྱུར་ཏེ། །ཇི་ལྟ་ཇི་ལྟར་ཤིན་ཏུ་ལྷུང་བ་དེ་ཡི་ནི། །རྒྱབ་ཏུ་སྐྲག་པས་རྣམ་བསྐྱོད་མིག་ཅན་རི་དགས་རྣམས། །དེ་ལྟ་དེ་ལྟར་རི་དགས་ཚོགས་ནི་འཛིན་པ་འདི། །མྱུར་དུ་རྨིག་པ་རྣམས་ནི་བརྟན་ཉིད་སོང་བར་གྱུར། །དེ་ནས་རི་དགས་རྣམས་ཀྱི་བདག་པོའི་ཤ་ནི་ཀུན་ནས་བརྐོས་པའི་ཁྲག །
རྨིག་པ་གཉིས་ཀྱིས་ཀུན་ནས་ཐིགས་པ་དེ་ཡི་རྒྱབ་ནི་འཛག་པར་གྱུར། །རི་དགས་ཚོགས་ནི་རི་ཡི་མཐའ་མར་འགྲོ་ཞིང་རིང་ནས་བལྟ་བྱས་ཏེ། །སྡུག་བསྔལ་མ་བརྩིས་པ་སྟེ་དེ་ནི་དག་པ་ཉིད་ལ་དམིགས་པར་གྱུར། །སེམས་ཅན་ཡོངས་སུ་སྐྱོང་བྱེད་པའི། །ཐབས་དང་དེ་བཞིན་སྟོབས་ཀྱིས་ཀྱང་། །
ནང་གི་དགའ་བའི་རྒྱུད་པ་ནི། །ཆེན་པོ་རྣམས་ཀྱི་སྡུག་བསྔལ་འགེགས། །དེ་ནས་རྒྱལ་པོ་དེ་རི་དགས་ཀྱི་ཚོགས་ཀུན་ནས་བསྒྲལ་བའི་ཕྱིར་ཆུ་བོའི་དབུས་སུ་ཟམ་པར་གྱུར་པའི་ཚོགས་ཀྱི་བདག་པོ་མཐོང་ནས། །ངོ་མཚར་བས་འོངས་ཏེ་མདའི་སྟན་རྣམས་ལ་མདའ་རྣམས་འཛིན་པར་བྱེད་པའི་དམག་
གི་སྐྱེ་བོ་ལ་སྨྲས་པ། །གང་ལ་ལ་ཞིག་རི་དགས་ལ་རྡེག་པར་གྱུར་ན་དེ་ནི་བདག་ལ་གཤེད་མ་ཞེས་བྱ་བའོ། །དེ་ནས་གདམས་ངག་ཐོས་ནས་ནི། །ས་བདག་དེ་ཡི་སྐྱེ་བོ་དེ། །སྐད་ཅིག་མདའ་དང་སྦྱོར་བྲལ་བ། །གཞུ་ཡི་རྒྱུད་རྣམས་བྱས་པར་གྱུར། །བྱང་ཆུབ་སེམས་དཔས་ཀྱང་རི་དགས་ཐམས་ཅད་
ཅི་ཞིག་རྒལ་བར་གྱུར་ཏམ་འོན་ཏེ་མ་ཡིན་ཞེས་བྱ་བ་ཕྱི་ནས་ལྟ་ཞིང་ཤིན་ཏུ་ཡང་འཇིགས་པས་བསྐྱོད་པའི་མིག་ཅན་ཚོགས་འདྲ་བར་གྱུར་པ་ལྟ་བར་བྱེད་ཅིང་། མ་ནུས་པས་གོམ་པ་གཞག་པར་སྤྲོ་བ་མེད་པར་ཕྱོགས་གང་ནས་འགྲོ་བར་བྱ་ཞེས། རེས་ཀྱིས་འདྲེ་བའི་སྙིང་དང་ལྡན་པའི་རི་དགས་ཀྱི་ཕྲུག་

པ་གཅིག་མཐོང་བར་གྱུར་ཏོ། །མཐོང་ནས་ཀྱང་མཆོག་ཏུ་སྙིང་རྗེས་དམིགས་པར་གྱུར་ཏེ། །དོགས་པ་དོར་ཅིག་བྱང་ཆུབ་སེམས་དཔའ་ཁྱོད་ལ་ནི། །བྱིས་པ་གཅིག་པུར་འདོར་བར་འགྱུར་བ་མ་ཡིན་ཏེ། །བུང་བའི་སྒྲ་རྣམས་ཀྱིས་ནི་དེ་ལྟར་མེ་ཏོག་ལྡན། །ཤིང་རྣམས་དེ་ལ་དབུགས་ནི་འབྱིན་པའི་
འདྲར་གནས་འགྱུར། །དེ་ནས་ཚོགས་ཀྱི་བདག་པོ་ཆུ་བོ་དེ་ལས་སོ་སོར་རྒལ་ཏེ། །རི་དགས་ཀྱི་ཕྲུག་པ་དེ་ལ་སྨྲས་པ། །བདག་གི་རྒྱབ་ཏུ་བུ་འཛེགས་ནས། །ཤི་བའི་སྡུག་བསྔལ་རྣམས་གྲོལ་གྱིས། །ཁྱོད་ནི་ཆུ་བོའི་ཕ་རོལ་དུ། །འགྲམ་འདི་ནས་ནི་བདག་གིས་ཁྲིད། །གང་གིས་འཇིག་
རྟེན་སྲིད་རྒྱལ་མཚོས། །རྒལ་ཕྱིར་བརྩོན་འགྲུས་བརྩམས་པ་ནི། །དེ་ཁྱོད་རྒལ་བར་མི་འགྱུར་བ། །ཆུ་བོའི་ཆུ་ལས་ཇི་ལྟར་ཅིག །དེ་ནས་དེ་ནི་འདི་ལ་ཞོན། །རི་དགས་ཕྲུག་པ་བརྩོན་ལྡན་ལ། །ཆུ་བོ་རླབས་ཀྱི་ཕྲེང་བ་ཅན། །སྙིང་རྗེ་དམིགས་པས་འཛིན་པར་འགྱུར། །ཁྱེད་ཀྱི་རྒྱབ་ལ་རྨ་
རྣམས་འདི་དག་ཤིན་ཏུ་ནི། །སྡུག་བསྔལ་ཤིན་ཏུ་སྐྱེད་པར་བྱེད་པ་ཡིན་ནམ་ཅི། །དེ་ལྟར་སྨྲ་བ་བཞིན་དུ་ཀུན་ནས་རྒལ་བ་ནི། །ཆུ་བོ་རླབས་ཀྱི་ལྷག་པ་རྣམས་ཀྱིས་དེ་ལ་སྨྲས་པ། དེ་ནས་ཚོགས་ཀྱི་བདག་པོས་རི་དགས་ཀྱི་ཕྲུག་པ་དེ་ཆུ་བོ་དེ་ལས་བསྒྲལ་བར་བྱས་ནས་རབ་ཏུ་དགའ་བས་རྒྱས་
པའི་མིག་ཅན་མ་དང་ཡང་དག་པར་སྦྱར་ཞིང་གནས་སོ། །དེ་ནས་ས་ལ་པུས་མོ་དག། །མཐོང་འདོད་རི་དགས་ཕྲུག་བྱས་ཏེ། །ནུ་མ་འོ་མ་འབྱུང་བ་དག །མྱུར་དུ་མ་ཡིས་འཛིན་པར་གྱུར། །དེ་ནི་ཁ་འདི་ལོག་བྱས་ནས། །ནུ་མ་འཐུང་བས་གཡོ་བའི་གདོང་། །ལྕེ་ཡི་རྩེ་མོ་བསྐྱོད་པ་ཡིས། །
མཉེས་གཤིན་པས་ནི་ལྡག་པར་གྱུར། །དེ་ནས་བྱང་ཆུབ་སེམས་དཔའ་ཀུན་ནས་ངལ་བའི་དབང་གིས་རྨིག་པའི་རྨའི་སྡུག་བསྔལ་གྱིས་ལུས་ཀྱིས་འབད་པ་ནུས་པ། ཇི་ལྟར་ཡང་ནི་རྨིག་མཚན་རྩ་ལྡན་བཙལ་བྱས་ནས། །རིམ་གྱིས་རི་དགས་རྣམས་ཀྱི་ལམ་ནི་ཀུན་འཁྲུག་པ། །དལ་བུས་
ཁྲག་གིས་བརླན་པས་ས་ལ་འདུག་ནས་ནི། །ངལ་བ་བསགས་པ་དེ་ནི་སྐད་ཅིག་ངལ་བསོ་གྱུར། །གནས་སྐབས་འདི་ནི་སྙིང་རྗེ་མེད་པ་འདི་རིང་བུ། །མ་ནི་ཡོད་ཀྱང་བདག་གིས་ཁྱོད་ནི་ཁྱེར་བྱས་པ། །དེ་ནས་ཡན་ལག་སྨྲས་པ་སྙིང་རྗེས་རྗེས་གདུངས་པ། །དེ་ལ་ལྟ་བཞིན་པ་ནི་མྱུར་དུ་

ངུ་བ་འདྲ། །རྒྱལ་པོ་དེ་ཡང་ཆུ་བོ་དེ་ལས་རྒལ་ནས་འཁོར་དང་བཅས་པ་རྟ་ལས་བབས་ཏེ། ངོ་མཚར་བའི་ཡིད་ཅན་བདག་ཉིད་ཆེན་པོ་དེ་དང་ཉེ་བར་འདུག་པར་གྱུར་ཏོ། །ཚོགས་ཀྱི་བདག་པོ་དེ་ཡང་རྒྱལ་པོ་དེ་མཐོང་ནས་སྨྲས་པ། ལངས་པར་འོས་པ་མཐོང་ནས་
ནི། །ངལ་བས་བདག་ནི་ཉམས་བྱས་པ། །གང་ཕྱིར་ཁྱོད་ལ་བདག་མ་ལངས། །འདི་ནི་བདག་གིས་མ་གུས་མིན། །དེ་ནས་རྒྱལ་པོ་དེ་གུས་པ་དང་བཅས་པས་ཉེ་བར་འདུག་སྟེ་བདེའམ་ཞེས་དྲིས་ཏེ། ཚོགས་ཀྱི་བདག་པོ་ལ་འདི་ལྟར་ཀུན་ནས་བརྟེན་ཅིང་སྨྲས་པ། ངོ་ཚ་མེད་པ་གཞན་ལ་ཉེ་བར་
འཚེ་ཕྱིར་མཚོན་བཟུང་བ། །ལོངས་སྤྱོད་འདོད་པ་རབ་རིབ་ཀྱིས་ནི་བློ་ཡི་མིག་འགག་པ། །བདག་ཅག་ལྟ་བུ་མི་ཡི་ཕྱུགས་རྣམས་ཀྱིས་ནི་ཆོས་ཤེས་ཁྱོད། །སྙིང་རྗེའི་གྲོགས་པོ་རི་དགས་ཐུབ་པ་ཁྱོད་ནི་མཆོད་པར་བྱ། །མི་སྐྱོང་བྲན་རྣམས་འཐབ་མོའི་དུས་ལ་མི་འཇིགས་པ། །བདག་ཉིད་སྲུང་
བར་བྱེད་པར་འདོད་པས་འཛིན་པ་སྟེ། །རང་གི་ཚོགས་ལ་བསྲུང་བར་མཁས་པ་ཐམས་ཅད་དུ། ཁྱེད་ཀྱི་ཚུལ་གྱིས་ས་སྐྱོང་རྣམས་ཀྱིས་ཚུལ་ལས་རྒྱལ། །གལ་ཏེ་བྲན་ནི་མང་པོ་གཡུལ་ངོ་ཡི་ནི་དབུས་གནས་པ། །ས་སྐྱོང་ལ་ནི་ཡོངས་སུ་སྐྱོང་བྱེད་འདི་ལས་ངོ་མཚར་ཅི། །རི་དགས་མང་པོ་འདི་རྣམས་
ཁྱེད་ནི་གཅིག་པུ་ཞེས་བྱ་བས། །གང་ཕྱིར་སྐྱོང་བར་བྱས་པ་དེ་ནི་འདིར་ནི་ངོ་མཚར་ཏེ། །ཡོན་ཏན་མང་ཞིང་སྙིང་རྗེ་ལྡན་པ་ཁྱོད་ཀྱི་འདི། །ཡོན་ཏན་བྲལ་ཞིང་སྙིང་རྗེས་རྣམ་བྲལ་ཆུང་བ་ནི། །བདག་གིས་མི་ཉིད་འདི་ནི་རི་དགས་ཉིད་ཁྱབ་པར། །འཐོབ་པའི་ཕྱིར་ནི་ཉེ་བར་དགོད་པར་འདྲ་བར་བྱེད། །
དེ་ལྟར་མངོན་པར་བརྟེན་ནས་རྒྱལ་པོ་དེས་ཚོགས་ཀྱི་བདག་པོ་ལ་དྲིས་པ། གཞན་ལ་ཕན་པ་ལ་མཁས་པའི་བརྩོན་འགྲུས་འདིས་ཁྱོད་ཡང་གོ་འཕང་ཅི་ལྟ་བུ་ཞིག་མངོན་པར་འདོད། བྱང་ཆུབ་སེམས་དཔས་སྨྲས་པ། རྒྱལ་པོ་ཆེན་པོ་གསོན་ཅིག །སངས་རྒྱས་ཉིད་ནི་རྟོགས་བྱའི་ཕྱིར། །བདག་
གི་བརྩོན་འགྲུས་བརྩོན་ལྡན་རྣམས་ཀྱི་མཆོག །རི་དགས་ཉིད་ལའང་ཅི་ནུས་པར། །ཡོད་པ་འདི་ནི་ཉམས་མི་འགྱུར། །ཇི་ལྟར་བདག་གི་རི་དགས་འདི་རྣམས་འཇིགས་པས་ཁྱབ། །འཇིགས་པའི་ཤུགས་ཅན་ཆུ་བོའི་ཆུ་ལས་རབ་རྒལ་བ། །དེ་ལྟར་ཉོན་མོངས་མང་པོས་ཀུན་ཁྱབ་འགྲོ་བ་ནི། །སྲིད་

པའི་སྡུག་བསྔལ་ཆུ་འཛིན་པས་ནི་རྒྱལ་གྱུར་ཅིག། །རྒྱལ་པོ་ཆེན་པོ་བརྩོན་འགྲུས་ལ་རྒྱབ་ཏུ་ཕྱོགས་པའི་སྟོབས་དང་ལྡན་པས་ཀྱང་མངོན་པར་འདོད་པའི་གོ་འཕང་ལ་མངོན་པར་འགྲོ་བར་ནུས་པ་མ་ཡིན་ཏེ་ལྟོས་ཤིག་དང་། ལེ་ལོས་གྲོགས་དང་བཅས་པ་ཡང་། །སྐྱེ་བོ་འཆར་བར་འགྲོ་བ་མིན། །
ལག་པའི་རྩེ་མོ་སར་བརྡབས་པ། །ཕོ་ལོང་ཆུ་ཡིས་བངས་པ་བཞིན། །གཞན་ཡང་། མཁས་པས་ཀྱང་ནི་ལེ་ལོའི་བློ་ཅན་བདེ་བ་ཡི་ནི་རྟེན། །གནས་ནི་མཐོ་བར་མངོན་པར་འགྲོ་བར་ནུས་པ་མ་ཡིན་ཏེ། །གཟིངས་ནི་སྐྱ་བ་འཛིན་པ་རྣམས་ཀྱིས་བསྐུལ་བ་མ་ཡིན་པ། །རྒྱ་མཚོའི་ཕ་རོལ་
ཡུན་རིང་པོས་ཀྱང་འགྲོ་བ་མ་ཡིན་ནོ། །རྒྱལ་པོས་སྨྲས་པ། རི་དགས་ཀྱི་ཚོགས་ཀྱི་བདག་པོས་ཡང་དག་པར་མངོན་པར་སྨྲས་པ་སྟེ། ཅིའི་ཕྱིར་ཞེ་ན། གྲགས་པ་རྣམ་པར་དག་པའི་རིགས་ལས་སྐྱེས་པ་ཡང་ནི་ལོངས་སྤྱོད་འབྱུང་བར་རབ་གྲགས་པ། །འདུན་པ་རྣམས་ལ་མཁས་པའི་
གྲལ་ནི་མཆོག་ཏུ་ཤིན་ཏུ་མཁས་པ་ཉིད་ཀྱིས་ཐོབ་པ་ཡང་། །ལེ་ལོས་ཡིད་ཀྱི་རེ་བ་ལན་ཅིག་ཡང་ནི་སྐྱེས་པའི་འབྲས་བུ་ཐོབ་པ་མ་ཡིན་ཏེ། །གཞུ་རྒྱུད་ལ་ནི་བརྟད་པའི་མདའ་ཡང་འཕེན་པ་པོ་ཡི་འབད་པ་མེད་པར་འབེན་ལ་མི་འགྲོའོ། །དེ་བས་ན་འདི་ལྟར་བརྩོན་འགྲུས་ལ་དམིགས་པ་ཁྱོད་
ཀྱིས་སངས་རྒྱས་ཀྱི་གོ་འཕང་རྟོགས་པར་ནུས་པ་ཞེས་བྱ་བའོ། །གང་དག་ཞི་བའི་གོ་འཕང་འཛེག་འདོད་པ་ཡི་ངང་ཅན་འདིར་ནི་ཉོན་མོངས་རྣམས་ཀྱིས་བསམ་པ་མི་ཕྱེད་པ། །ཁྱེད་ལས་སྔར་ནི་བྱ་བ་བྱས་ཤིང་སྨོན་ལམ་བྱས་པའི་སྐྱེ་བོ་བྱང་ཆུབ་ལ་སློབ་པ། །དེ་རྣམས་ཀྱིས་ནི་ལམ་ལ་རྟ་ལྟར་
ཀུན་ནས་ངལ་བས་རིམ་གྱིས་རྒྱུག་པར་བྱེད་པ་ནི། །ཅང་ཤེས་ལྟར་ནི་ངལ་བའི་འཇིགས་པ་ཀུན་ནས་དོར་བ་མ་འོངས་ཁྱེད་ནི་མདུན་འགྲོ་བ། །ཀུན་ནས་བསྐོར་བའི་མུན་པ་བྲལ་བ་ལུས་ཀྱི་འོད་ཅན་རྣམས་ཀྱིས་ཚོགས་པ་འཛིན་བྱེད་ཅིང་། །ཆོས་ཀྱི་གཏམ་ལ་མངོན་པར་འདོད་པའི་སྐྱེ་བོ་
ལ་ནི་ཡང་ཡང་ཆོས་ནི་རབ་སྒྲོགས་ཤིང་། །ཉོན་མོངས་ངེས་པར་བཅིངས་པ་གཅོད་པ་ཡོན་ཏན་ནོར་ཅན་མཁས་པ་རྣམས་ཀྱིས་མངོན་མཆོད་པ། །ཁྱེད་ནི་སངས་རྒྱས་ཉིད་དུ་ཉེ་ཐོབ་སྲིད་སོང་སྐྱེ་བོ་བསོད་ནམས་ཅན་གྱིས་མཐོང་བར་འགྱུར། །དེ་ནས་རྒྱལ་པོ་དེ་བྱང་ཆུབ་སེམས་དཔའ་ལ་མངོན་

པར་བརྟེན་ནས་སྨྲས་པ། ཨེ་མའོ་ཁྱོད་འདི་ལྟར་ཆོས་ལ་མངོན་པར་ཕྱོགས་པ་མཐོང་ནས་བདག་ཀྱང་ཆོས་ལ་མངོན་པར་འདོད་པ་སྐྱེས། ཆོས་ཤེས་རྣམས་ཀྱི་མཆོག་ཆོས་ནི། །དེ་བས་བློ་ཆེན་བསྲུང་བར་མཛོད། །དག་པ་རྟེན་བཞིན་གང་གིས་ནི། །ངན་འགྲོར་
བདག་ནི་འགྲོ་མི་འགྱུར། །བྱང་ཆུབ་སེམས་དཔས་སྨྲས་པ། །གལ་ཏེ་དེ་ལྟར་ཡིན་ན་དེ་བས་ན་རྒྱལ་པོ་ཆེན་པོས་མཉན་པར་འོངས་པ་སྟེ། །སྡིག་པ་ལ་ནི་རྣམ་རྟོག་དང་། །དགེ་བ་ལ་རྟེན་འཇུག་པ་དང་། །ཆོས་ཀྱི་དེ་ཉིད་འདི་ཡང་དག། །གྲགས་པའི་བློ་ཅན་རྣམས་ཀྱིས་གསུངས། །དེ་ཉིད་
གསལ་བྱས་འདི་ལ་ནི། །དགེ་དང་མི་དགེ་གསལ་བྱས་པ། །གང་ཞིག་ལམ་མིན་ནས་འགྲོ་བ། །དེ་ནི་མིག་ཡོད་ཀྱང་ནི་ལོང་། །དེ་ལྟར་ཤེས་རབ་སྒྲོན་མ་ཡིས། །ལམ་ཆེན་རྣམ་པར་སྣང་བྱས་པ། །ཉོན་མོངས་ཟད་ཕྱིར་ལས་རྣམས་ནི། །དགེ་བ་ཉིད་ལ་བརྟེན་པར་གྱིས། །ས་དབང་མི་
ཤེས་ཟད་བྱས་པ། །ཆོས་ཀྱིས་ས་ནི་སྐྱོང་བར་གྱིས། །ས་སྐྱོང་ཆད་པ་རྣོ་ལྡན་ལས། །སྐྱེ་བོ་རྟག་ཏུ་སྐྱོ་བར་འགྱུར། །གལ་ཏེ་པདྨའི་རྩ་ཆག་ལྟར་དཀར་གྲགས་པ་ལ། །འགྲོ་བ་སྣང་བྱེད་ཁྱེད་ལ་འདོད་པ་ལ་ལ་ཡོད། །འབྲས་བུ་མངོན་པར་འདོད་པ་ཐོབ་པར་འདོད་པའམ། །དེ་བས་ཡོན་
ཏན་རྒྱན་ནི་རྣམ་དག་འཛིན་པར་གྱིས། །དེ་ནས་མིའི་བདག་པོ་དེ་ཨེ་མའོ་ཁྱོད་ཀྱིས་ཆོས་བསྟན་པ་འདིས་བདག་གི་སྙིང་འདི་རབ་ཏུ་བདེ་བར་བྱས་ཞེས་བྱ་བ་བརྗོད་ནས་མཆོག་ཏུ་དགའ་བས་འགྲོ་བར་གྱུར་ཏོ། །དེ་ནས་ཚོགས་ཀྱི་བདག་པོ་དེའི། །རྨིག་པའི་རྨ་ཡིས་ཀུན་བསླངས་ནས། །སྡུག་བསྔལ་
ལྕི་བ་ཞུགས་པ་ཡི། །མིག་དག་ཀུན་ནས་བཙུམས་པར་གྱུར། །དེ་ནས་མི་བདག་དེའི་གདུང་ཁང་། །ཙན་དན་ཤིང་རྣམས་ཀྱིས་བྱས་ཏེ། །བསོད་ནམས་ལས་སྐྱེས་བྱ་བྱས་ལ། །མེ་ཡིས་འདུ་བྱེད་བྱས་པར་གྱུར། །དེ་ནས་གྲོགས་པོ་ལྟར་ནི་མཐོ་རིས་དེར་སོང་ལ། །རི་དགས་སྙིང་རྗེས་དྲི་མ་བྲལ་བའི་
རང་བཞིན་ལ། །ཡུན་རིང་མྱ་ངན་བྱས་ཏེ་ས་ཡི་བདག་པོ་ནི། །སྡུག་བསྔལ་ཡིད་ཅན་མྱུར་དུ་གྲོང་ཁྱེར་འགྲོ་བར་གྱུར། །རི་དགས་དེ་ནི་སེམས་ཅན་ཕན་པར་བྱེད་པ་མཁས། །གཉེན་ལྟར་ཤི་བར་གྱུར་ལ་རི་དགས་མོ་འདྲ་བའི། །མིག་ཅན་དགེ་བ་ལྡན་པ་བྱ་བ་བྲལ་བ་ནི། །ནགས་ཀྱི་ལྷ་མོ་རྣམས་

ཀྱིས་མི་འཆད་མཆི་མ་བཏང་། །དེ་ནས་ས་ནི་འགུལ་བས་རི་བོའི་རྩེ་མོ་འགུལ་བ་སྟེ། །རླུང་གི་ཤུགས་ཀྱིས་ཀུན་ནས་འཕེལ་བའི་རྒྱ་མཚོའི་རླབས་ཅན་ནི། །བུང་བ་འཁོར་བས་འདྲེས་པ་དང་ནི་དྲིས་ནི་རྣམས་ཁྱབ་པ། །མན་དཱ་ར་བའི་མེ་ཏོག་ཚོགས་ནི་ནམ་མཁའ་ལས་ལྷུང་གྱུར། །མྱ་ངན་འདའ་བའི་
དུས་སུ་ཡང་བཅོམ་ལྡན་འདས་ཀྱིས་དགེ་སློང་རྣམས་ཀྱི་དྲུང་དུ་སྐྱེས་པའི་རབས་འདི་མངོན་པར་བརྗོད་པར་མཛད་དོ། །དེར་ནི་རི་དགས་ཚོགས་དག་ནི། །ནགས་ལ་དེ་ཚེ་བདག་བྱུང་གྱུར། །རབ་ཏུ་མཛེས་པ་བཟང་པོ་ནི། །རི་དགས་ཕྲུག་པ་བྱུང་བར་གྱུར། །བཅོམ་ལྡན་འདས་ཡོངས་སུ་མྱ་ངན་ལས་
འདས་པའི་སྔོན་རོལ་དུ་རབ་ཏུ་བྱུང་བ་མཛེས་པ་བཟང་པོ་དེ་ལ་དགེ་སློང་རྣམས་ཀྱིས་དྲིས་པར་གྱུར་ཏོ། །མཛེས་པ་བཟང་པོས་ལས་རྣམས་ནི་སླར་གང་ཞིག་བྱས་པ་སྟེ། གང་གི་ཕྱིར་ཉན་ཐོས་ཐམས་ཅད་ལས་ཕྱིས་དགྲ་བཅོམ་པའི་འབྲས་བུ་ཐོབ་ནས་བཅོམ་ལྡན་འདས་ཀྱི་དང་པོ་ཉིད་དུ་ཡོངས་སུ་མྱ་
ངན་ལས་འདའ་སྙམ་མོ། །བཅོམ་ལྡན་འདས་ཀྱིས་བཀའ་སྩལ་པ། །འོད་སྲུངས་ཞེས་བྱའི་སངས་རྒྱས་བྱུང་། །ཤེས་བྱའི་རྒྱ་མཚོ་ཕ་རོལ་ཕྱིན། །དགེ་སློང་མིང་གིས་མྱ་ངན་མེད། །སྐྱོབ་པ་དེ་ཡི་ཚ་བོར་གྱུར། །རྙེད་སླ་བདག་གི་གསལ་བ་མཆོག། །བདེ་གཤེགས་ཞང་པོ་ཡོད་
པ་ལ། །མྱ་ངན་མེད་ཀྱིས་ཀུན་བསམས་ནས། །ཞེས་བྱ་གྲོལ་ཕྱིར་བརྩོན་མ་བྱས། །དེ་ནས་ཡུལ་གཞན་མྱ་ངན་མེད། །སོང་ལ་སྲིད་པ་གཞན་བྲལ་བ། །འོད་སྲུངས་བྱ་བ་བྱས་པའི་མཆོག །མྱ་ངན་འདས་ལ་ཐུགས་མཛད་དོ། །དེ་ནས་མྱ་ངན་མེད་ཤིང་འོག་ཏུ་གནས་པ་ཡི། །དགེ་
སློང་མྱ་ངན་མེད་དང་རྣམ་འབྲེལ་མྱ་ངན་ཅན། །ས་སྐྱེས་དེ་ལ་ལྷག་པའི་གནས་སུ་བྱས་པ་ནི། །ལྷ་མོ་མུ་ཏིག་ལྟར་འདྲ་མཆི་མ་བཏང་བར་གྱུར། །དི་རིང་འབྱུང་བར་འགྱུར་ཞེས་རྣམ་པར་བསམ་བྱེད་པ། །རྒྱལ་བའི་མྱ་ངན་འདས་པ་སྨོན་པ་མེད་པ་ནི། །ཕ་རོལ་སོང་བ་དེ་ཡི་མཆི་མ་དྲོན་པོ་ནི། །
ནགས་ཀྱི་ལྷ་མོའི་ལུས་ལ་ལྷུང་བར་གྱུར་པ་ཡིན། །ནམ་མཁའ་འདི་ནི་སྤྲིན་དང་བྲལ་བ་ཅི་ཕྱིར་ནི། །བདག་གི་ལུས་ལ་ཆུ་འདི་ལྷུང་བའི་ཕྱིར། །དེ་ལྟར་བརྗོད་ཅིང་གྱེན་ཕྱོགས་སུ་ནི་ལྟ་འགྱུར་བ། །དེས་ནི་ལྷ་མོ་ངུ་བར་བྱེད་ཅིང་དེ་མཐོང་གྱུར། །ཀུན་ནས་ཕོངས་པས་གཞན་པ་འདི་ལ་

དྲིས་གྱུར་པ། །ལྷ་མོ་མྱ་ངན་སྐྱེས་པ་ཅི་ཕྱིར་ཁྱོད་ངུ་སྟེ། །དེས་ཀྱང་མགྲིན་པར་མི་གསལ་བརྗོད་པ་འདི་ཡིས་ནི། །དགེ་སློང་ལ་ནི་ཇི་ལྟར་སྨྲ་བ་ཡང་འབྱུང་འགྱུར། །ཐུབ་པ་ཆེན་པོའི་སྙིང་རྗེ་ཅན་ནི་དབང་བྱེད་པ། །ཉོན་མོངས་བུད་ཤིང་བསྲེག་པ་འགྲོ་ལ་ཕན་སྤངས་པ། །འོད་
སྲུངས་དེ་ལྟ་མྱ་ངན་འདའ་འགྱུར་སྐྱེ་བོ་ལ། །མྱ་ངན་བྱིན་ནས་ཕོངས་པ་དེ་ཕྱིར་བདག་ནི་ངུ་། །རྒོལ་བའི་ཚིག་གི་ཕྱེ་མ་ལེབ་ཀྱིས་མ་གཡོས་པ། །ཀུན་ནས་གསལ་བྱས་དམ་པའི་ལམ་དང་ལམ་མིན་པ། །ཐུབ་པའི་སྒྲོན་མེ་ཡོངས་སུ་མྱ་ངན་འདས་འགྱུར་ལ། །འགྲོ་བ་གསུམ་ལ་ཁྱབ་པའི་མུན་པ་
འབྱུང་བར་འགྱུར། །ནགས་ཀྱི་ལྷ་མོའི་ཚིག་ནི་འདི་དག་ཐོས་བྱས་ནས། །མདའ་ནི་རྣོན་པོས་དེ་ནི་གནད་དུ་བསྣུན་པ་བཞིན། །རྣམ་པར་ཟུམ་པའི་མིག་ལྡན་ས་ལ་ལྷུང་བ་སྟེ། །རིམ་གྱིས་ཀུན་ནས་ལངས་ཏེ་སྨྲེ་སྔགས་འདོན་པར་གྱུར། །ནགས་ཀྱི་ལྷ་མོ་འདོད་ལྡན་འདི་ལ་དྲིས་བྱས་ཏེ། །
དགེ་སློང་རབ་ཏུ་སྨྲོས་ཤིག་ཅི་ཕྱིར་དུ་ནི་ངུ་། །བཅོམ་ལྡན་འདས་དེ་བདག་གི་ཞང་པོ་དེ་ཕྱིར་ནི། །སྡུག་བསྔལ་ཅི་ཕྱིར་མི་འགྱུར་དེས་ཀྱང་འདི་སྨྲས་གྱུར། །ཡིད་འཕྲོག་ཚིག་གི་མེ་ཏོག་རྒྱལ་བའི་ཞིང་ལས་ནི། །ཤིན་ཏུ་ཆུང་བ་འདི་ནི་བདག་མེད་པས་བཟུང་བ། །འགྲོ་བ་གསུམ་གྱི་ཉོན་མོངས་
རྒུད་པ་འཕྲོག་པ་ནི། །འབྲས་བུ་བློ་ཆུང་བདག་གིས་ཐོབ་པ་མ་ཡིན་ཏེ། །བདག་གི་ཡིད་ནི་ཁྱིམ་ལ་གནས་པར་བྱས་པ་ཡིས། །གྲོལ་བའི་ལམ་ལ་འགག་པར་བྱེད་པས་འཇིགས་པ་ནི། །དེ་བཞིན་གཤེགས་པའི་ཚིག་གི་འོད་རྣམས་ཀྱིས་མུན་པ། །རྣམ་བཅོམ་ཅི་ཕྱིར་ཁྱེད་ནི་མྱ་ངན་འདས་མི་
འགྲོ། །དེ་ནས་ལྷ་མོ་དེས་དགེ་སློང་དེ་ལ་འདི་སྐད་ཅེས་སྨྲས་པར་གྱུར་ཏོ། །ཤིན་ཏུ་སྡུག་བསྔལ་བས་ཆོག་སྟེ་ཇི་སྲིད་དུ་སངས་རྒྱས་བཅོམ་ལྡན་འདས་དེ་མྱ་ངན་ལས་འདའ་བ་དང་ཉེ་བར་སོང་བ་དེ་སྲིད་ཉིད་དུ་ཁྱེད་སྔགས་ཀྱི་མཐུས་ནམ་མཁའ་ནས་ཁྱེར་བ་ཉིད་དུ་བགྱིའོ། །དེ་བས་ན་ཁྱེད་ཀྱིས་
བདག་རྗེས་སུ་བརྩེ་བར་འགྱུར་ཞེས་བྱ་བ་དེར་དེ་བཞིན་གཤེགས་པའི་ཚ་བོ་དེ་སྐད་སྨྲ་བར་གྱུར་པ་ལ་ནགས་ཀྱི་ལྷ་མོ་དེ་མྱ་ངན་མེད་པ་དེ་ལས་སྔགས་ཀྱིས་ཀུན་ནས་བཟླས་པའི་མེ་ཏོག་རྣམས་བླངས་ནས་བདག་ལ་མྱ་ངན་མེད་པའི་མེ་ཏོག་གི་སྙིམ་པ་འདི་ལྟ་བར་གྱུར་པས་ནམ་མཁའ་ལ་འགྲོ་ཞིང་

བདག་ལ་རྗེས་སུ་སོང་ཤིག་ཅེས་བྱ་བ་སྨྲས་པར་གྱུར་ཏེ། དེ་ནས་ནམ་མཁའ་ལས་ནི་ལྷ་མོ་དེ་རྗེས་སོང་། །མྱ་ངན་མེད་པའི་མེ་ཏོག་སྙིམ་པ་མི་འབྲེལ་དེ། །དེ་བཞིན་གཤེགས་པའི་དྲུང་དུ་སྐད་ཅིག་གིས་འོངས་ཏེ། །ཡང་དང་ཡང་དུ་མཆི་མ་བྱུང་ཞིང་སྨྲ་བར་གྱུར། །བདག་མེད་བྱིས་པ་བློ་ཡི་
གྲུ་དང་བྲལ་བ་ནི། །མི་ཤེས་རྒྱ་མཚོ་ཆེན་པོ་ལ་ནི་ནུབ་གྱུར་པ། །ཐུབ་དབང་བདག་ནི་སྡུག་བསྔལ་རླབས་ཆེན་གནོད་བྱས་པ། །སྐད་ཅིག་གིས་ནི་རྒལ་བར་མ་བྱས་ཇི་ལྟར་གཤེགས། །དེ་ལྟར་སྨྲ་བ་ཀུན་ནས་ཤུགས་འབྱིན་ཡི་གེ་ཅན། །མཆི་མ་གཏོང་ཞིང་རྙོག་པར་བྱས་པའི་མིག་ལྡན་པ། །
ལམ་ངན་ལས་ནི་ལོག་སྟེ་སྐད་ཅིག་གིས་གྲོལ་ཕྱིར། །རྣམ་པར་དག་པའི་ལམ་གྱིས་རྒྱལ་བས་ཁྲིད་པར་མཛད། །དེ་ནས་སྲིང་མོའི་བུ་དགྲ་བཅོམ་པའི་འབྲས་བུ་ལ་སྐལ་བ་དང་ལྡན་པར་མཛད་ནས། འཇིག་རྟེན་མ་ལུས་པའི་ཚིག་གི་འོད་ཟེར་རྣམས་ཀྱིས་གསལ་བར་མཛད་ནས། ཡང་དག་
པར་རྫོགས་པའི་སངས་རྒྱས་འོད་སྲུངས་མྱ་ངན་ལས་འདའ་བར་གྱུར་ཏོ། །དེར་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ལ་ལྷ་དང་ལྷ་མ་ཡིན་དང་མི་འམ་ཅི་དང་། ལྟོ་འཕྱེ་ཆེན་པོ་དང་གནོད་སྦྱིན་དང་མི་རྣམས་མྱ་ངན་གྱི་དབང་དུ་བྱས་པ་རྣམས་ལ་ནམ་མཁའ་ལས་མེ་ཏོག་མན་དཱ་ར་བའི་ཆར་ཀུན་
ནས་བབ་པ་ལ་ལྷ་མོ་དེ་མྱ་ངན་གྱི་དབང་གིས་འདི་ལྟར་དེ་དང་དེ་སྨྲེ་སྔགས་འདོན་ཞིང་བརྩམས་པ། སེང་གེའི་ཁྲི་ལ་ཉེར་བཞུགས་པའི། །ཚིག་གི་མེ་ཏོག་རྣམ་གྲོལ་བ། །ཆོས་ནི་དོན་གཉེར་ཆོས་སྟོན་པ། །འཇིག་རྟེན་འདིར་ནི་སུ་ཡིས་ཐོས། །མགོན་པོ་སྣང་བ་མཆོག་ཁྱོད་ནི། །ཐོབ་ལ་ཉི་མ་
ནུབ་པ་ལྟར། །མུན་པ་བསལ་བ་དཀའ་བ་ཡིས། །འགྲོ་བ་འདི་ནི་བཙུན་པར་བྱས། །དེ་རིང་ཁྱེད་ནི་ཞིར་སོང་ལ། །མ་ཞི་བ་ཡི་ཡིད་འབྱུང་བས། །འགྲོ་བ་ངེས་པར་རྨོངས་བྱེད་ཕྱིར། །སླར་གཞུ་ཀུན་ནས་བདུང་བར་བྱས། །ཐུབ་པ་ཞི་བར་སོང་ལ་རྟེན་མེད་བདག་ཅག་ནི། །སེམས་ཀྱི་
བརྣག་པ་འབྱུང་བ་གང་དུ་ངལ་སོ་བགྱི། །ཡོན་ཏན་རྣམས་ཀྱིས་འདི་ལྟར་ཤེས་བྱའི་ལམ་མཐར་སོང་། །ཁྱེད་ནི་མེད་པས་ཐུབ་དབང་ཀུན་ནས་རྣམ་སྨྲས་འདྲ། །བྱང་ཆུབ་དོན་དུ་སྨོན་ལམ་ལ་ནི་དམིགས་པར་བྱས་ཏེ་ས་གསུམ་ལ་ནི་ཁྱོད། །སེམས་ཅན་དོན་ལ་འཁོར་ཞིང་བརྟན་པའི་བློ་གྲོས་

བདག་ལ་གཏོང་བར་མ་བྱེད་ཅིག། །ཁྱེད་ནི་སྐྱེ་བར་བྱེད་པ་བདག་ལ་ཀུན་ནས་དོར་ཏེ་ཅི་ཕྱིར་བྱམས་པར་གྱུར་པ་ནི། །ཁྱོད་ནི་དེ་ལྟར་རབ་ཏུ་སོང་ལ་ཕ་རོལ་སྙིང་རྗེ་ངུ་བ་ལྟ་བུར་བྱས། །དེ་ནས་དགེ་སློང་དེས་སྨྲས་པ། ལྷ་མོ་སྡུག་བསྔལ་གྱིས་ཆོག་ཅིང་ཆོག་སྟེ། མི་
རྟག་པ་འདི་འགའ་ཞིག་ཏུ་རབ་ཏུ་གནོད་པར་མི་བྱེད་པ་མ་ཡིན་ཏེ། གང་དུ་འདི་ལྟར་རྡོ་རྗེ་ལྟར་ལྕི་བ་དང་སྙིང་པོ་ཅན་བཅོམ་ལྡན་འདས་མེད་པ་ཞེས་བྱ་བའོ། །དེ་ནས་ལྷ་མོ་དེ་རྣམས་གང་གིས་ཀྱང་བདག་ཉིད་བརྟན་པར་བྱས་ནས། སྨོན་ལམ་འདི་ལྟར་བྱས་པར་གྱུར་ཏེ། བདག་ལ་བརྟེན་ནས་ཇི་ལྟར་
འདི། །དགེ་སློང་གིས་ནི་འབྲས་བུ་ཐོབ། །དེ་བཞིན་ཤཱཀ་ཐུབ་སློབ་མ་ནི། །ཕྱི་མར་དེ་ཚེ་བདག་གྱུར་ཅིག། །དགྲ་བཅོམ་འབྲས་བུ་ཉན་ཐོས་ནས། །མྱ་ངན་དུས་སུ་ཐུབ་དེ་ལས། །མྱ་ངན་བཟོད་པར་མི་ནུས་ཤིང་། །སྔོན་དུ་མྱ་ངན་འདས་གྱུར་ཅིག། །དེ་ནས་བཅོམ་ལྡན་འདས་དགེ་སློང་རྣམས་
ཀྱི་དྲུང་དུ་འདི་བརྗོད་པར་མཛད་ནས་སླར་ཡང་གསུངས་པ། མྱ་ངན་མེད་བརྟན་གང་ཞིག་འདི། །ནགས་ཀྱི་ལྷ་མོ་བྱུང་གྱུར་པ། །དེ་ནི་བཟང་མཛེས་རབ་བྱུང་འདི། །བདག་གི་ཉན་ཐོས་འདི་སོང་བ། །བདག་ནི་མྱ་ངན་འདས་ཐོག་མར། །དེ་ཉིད་ལས་ཀྱང་མྱ་ངན་འདས། །དེ་ལྟར་སྐྱེས་རབས་འདི་ནི་
ངོ་མཚར་བ། །ཆོ་ག་བཞིན་དུ་ཤཱཀ་ཐུབ་ཀྱི་གསལ་མཛད། །མཁས་པ་རྣམས་ཀྱི་ཡིད་ནི་རབ་ཞི་ཕྱིར། །འཇམ་པ་མངོན་པར་སྨྲ་བས་རབ་གྲགས་བྱས། །གཞན་ལ་ཕན་བྱེད་ཕྱིར་ནི་དམ་བཅས་ཤིན་ཏུ་གྲགས་པ་རྣམས་ཀྱིས་ཀྱང་། །རྒུད་པ་ལ་ནི་བརྩོན་འགྲུས་གོ་ཆ་བཅིངས་པ་རྣམ་པར་གྲོལ་བ་མིན། །
དེ་ལྟར་ཀུན་ནས་རྣམ་པར་དྲངས་ནས་ཤིན་ཏུ་མཐར་ཐུག་ཐོབ་བྱའི་ཕྱིར། །ས་རྣམས་ཕན་པར་བྱེད་པ་ལ་ནི་ལེ་ལོ་ཉིད་དུ་མ་འགྲོ་ཅིག །རི་དགས་ཀྱི་སྐྱེས་པའི་རབས་ཏེ་སྐྱེས་པའི་རབས་གཉིས་པའོ།། །།འགྲོ་བ་མ་ལུས་སྡུག་བསྔལ་ཞི་བྱའི་ཕྱིར། །བློ་བཟང་གང་གིས་སྨོན་ལམ་
བྱས་པ་སྟེ། །དེས་ནི་གཉེན་འདུན་སྐྱེ་བོ་སྡུག་བསྔལ་ལས། །སྐྱོབ་པ་ཞེས་བྱ་འདིར་ནི་ཐེ་ཚོམ་འདི། །འདི་ལྟར་རྗེས་སུ་ཐོས་ཏེ། སྐྱེད་མོས་ཚལ་གྱི་པདྨ་རྒྱས་པ་ནི་པདྨའི་འབྱུང་གནས་དང་འདྲ་བ་དང་། མཚན་མོའི་སྒོའི་ཆུ་འཛིན་པའི་ཚོགས་རྣམ་པར་ཆད་པས་དྲི་མ་དང་བྲལ་བའི་ཟླ་བ་

ཚེས་པ་བཞིན་དང་། ཆུ་སྦྱིན་པའི་དུས་ཀྱི་གློག་གི་ལྗོན་ཤིང་དང་འདྲ་བ་དང་། ལང་ཚོའི་འོད་དང་འདྲ་བ་དང་། བུད་མེད་ཀྱི་བཞིན་གྱི་ཐིག་ལེ་མཛེས་པ་དང་འདྲ་བ་དང་། དུལ་བའི་སྐྱེ་བོའི་བཟོད་པ་དང་འདྲ་བ་དང་། རྣམ་པར་རྒྱལ་བར་འདོད་པའི་ཚུལ་དང་འདྲ་བ་དང་། ཕྱུག་པོའི་མངོན་པར་སྐྱེས་པ་
ཉིད་དང་འདྲ་བ་དང་། རིགས་ལས་སྐྱེས་པའི་མཁས་པ་ཉིད་དང་འདྲ་བ་དང་། སའི་དཀྱིལ་འཁོར་གྱི་རྒྱན་རྟག་ཏུ་ཡོ་བྱད་ཀྱི་སྙིང་པོའི་དོན་དུ་གཉེར་བའི་སྐྱེ་བོ་རྣམས་ཀྱིས་ཉེ་བར་ལོངས་སྤྱོད་པར་འགྱུར་བ་དང་། ལྷའི་བདག་པོའི་འབྱོར་པ་ཤིན་ཏུ་ཉམས་དགའ་བ་དང་འདྲ་བ་དང་། དུས་ཐམས་
ཅད་ཀྱི་བདེ་བའི་ཁྱིམ་གྱི་བདག་པོ་རྣམས་ཀྱི་ཁྱིམ་དང་ལྡན་པ་དང་། རི་རབ་མན་དཱ་རའི་རྩེ་མོ་དང་རྗེས་སུ་འདྲ་བའི་ལྷའི་ཁང་པ་དང་ལྡན་པ་དང་། གཏམ་སྨྲ་བ་ལ་འཇུག་པའི་རྣམ་པ་སྣ་ཚོགས་པའི་གཏམ་དང་བཞད་གད་ཀྱིས་སྐྱེ་བོ་རབ་ཏུ་དགའ་བར་གྱུར་པ་དང་། དོན་དུ་གཉེར་བའི་སྐྱེ་བོའི་མ་དང་
འདྲ་བ་དང་། རྣལ་འབྱོར་པ་ཆེན་པོ་རྣམས་ཀྱི་སྤྲུལ་པའི་སྲོག་དང་འདྲ་བ་དང་། ཤིན་ཏུ་མང་བའི་རྙེད་པའི་རིགས་དང་རིགས་ཀྱི་གནས་ཀྱི་རྗེས་སུ་སྐྱོང་བར་གྱུར་པའི་ཆོས་ཀྱི་གནས་པ་དང་། མུ་གེའི་གནོད་པས་ཉེ་བར་འཚེ་བ་དང་བྲལ་བ་དང་། རྟག་ཏུ་དགའ་སྟོན་ལ་འཇུག་ཅིང་དགའ་སྟོན་བྱེད་པའི་
སྐྱེ་བོ་དང་ལྡན་པ་དང་། རྡོ་བའི་བཻ་ཌཱུརྱ་དང་། ཨིནྡྲ་ནཱི་ལ་དང་། པདྨ་རཱ་ག་དང་། མར་ཀ་ཏ་དང་། གསེར་དང་ལྡན་པ་ཞེས་བྱ་བའི་རྒྱལ་པོའི་ཕོ་བྲང་བྱུང་བར་གྱུར་ཏོ། །དེ་ལ་ཡང་ནུས་པ་གསུམ་གྱི་མཐུས་ཆགས་འོག་གི་རྒྱལ་པོ་ཐམས་ཅད་ཉེ་བར་འདུས་པ་ཉི་མ་རེ་རེར་ཆད་པའི་ཚུལ་གྱིས་ཆེ་བའི་
བདག་ཉིད་མངོན་པར་འཕེལ་བར་གྱུར་པ་ཤིན་ཏུ་དྲི་མ་མེད་པའི་མིག་ཆེ་བས་རྒྱལ་པོ་གཞན་གྱི་གཏམ་ལྟས་པ། གླང་པོ་ཆེ་དང་། རྟ་དང་། ཤིང་རྟ་དང་། རྐང་ཐང་གི་ཚོགས་ལེགས་པར་བྱས་པའི་རྒྱལ་པོ་གསེར་ཞེས་བྱ་བ་བྱུང་བར་གྱུར་ཏོ། །འཇིགས་པའི་དབང་གིས་རྒྱགས་པ་འབྱུང་བ་ཧེར་ཞི་བ། །
རལ་གྲི་མདའ་བསྟན་ཁུ་ཚུར་ལྷོང་པར་བྱས་པ་ནི། །རི་དགས་བདག་པོ་ལྟར་ནི་དགྲ་རྣམས་གང་གིས་ནི། །ང་རྒྱལ་གཡུལ་ངོ་གླང་པོ་བཞིན་དུ་བཟོད་མི་འགྱུར། །གཟི་བརྗིད་གྲགས་པར་བྱས་པ་གང་ལ་ཕན་ཚུན་དུ། །དོན་གཉེར་བདེ་བས་རྣམ་པར་འཕེལ་བས་ཕུན་ཚོགས་པས། །འབྲས་སྟེར་ཤིང་

ལ་འདབ་ཆགས་བཞིན་དུ་སྐྱེ་དགུ་རྣམས། །རྟག་པ་ཉིད་དུ་བདེ་བའི་ཕྱིར་ནི་ངལ་སོར་གྱུར། །དེ་ལྟ་བུའི་ཡོན་ཏན་གྱི་མཐུ་དང་ལྡན་པ་ནོར་ལྡན་མའི་བདག་པོ་དེའི་སྐར་མའི་བདག་པོའི་འོད་ཟེར་གྱི་ཚོགས་ཀྱིས་དཀར་བའི་གྲགས་པའི་གོས་ཀྱིས་ཕྱོགས་ཀྱི་བུད་མེད་ཀྱི་སྣོད་དཀྲིས་
པ། ལྷའི་བདག་པོ་ལྟར་ཉོན་མོངས་པ་མེད་པའི་ཡུལ་གྱི་བདེ་བ་ཉམས་སུ་མྱོང་བ་དེ་ལ་དུས་གཅིག་གི་ཚེ་ན་དུས་འགྲོ་བ་ལ། བཙུན་མོ་མན་དུ་ཀ་ལྟར་ཀུན་ནས་སྐྱེ་བའི་འགྲམ་མཛེས་ལྡན། །གྲགས་པའི་རྒྱུན་ནི་མངལ་གྱི་བརྗོད་པ་ཀུན་ནས་འཛིན་གྱུར་ཏེ། །སྣང་བར་བྱེད་པའི་ཡོངས་སུ་རྫོགས་པའི་
ཆ་ཡི་ཚོགས་ལྡན་པ། །འོད་ལྡན་ཟླ་བའི་གཟུགས་ནི་གྲོང་ཁྱེར་འཇིགས་པའི་ཕྱོགས་ལྟར་ནི། །ཉི་མ་འོད་ཟེར་སར་པ་འདྲ་བའི་བུད་མེད་དེ་དེ་ནས། །དཔལ་གྱིས་འབར་བའི་མེ་ཡིས་བུ་དང་རྗེས་སུ་མཐུན་པ་ནི། །སྐྱེ་བོའི་མིག་ལ་མངོན་པར་དགའ་བར་བྱེད་པ་བདག་ལ་སྐྱེས། །གྲགས་པའི་གཏེར་ནི་
གཏེར་དང་འདྲ་བར་མཛེས་པ་སྐྱེས་པར་གྱུར། །དེ་ནས་རྒྱལ་པོ་གསེར་གྱིས་གསེར་གྱི་ཕུང་པོ་དཔལ་གྱིས་འབར་བ་དང་འདྲ་བ་བདག་ལ་སྐྱེས་པ་མཐོང་ནས། ཡིད་དགའ་བ་འཇམ་པའི་རླུང་གིས་གཡོ་བར་གྱུར་པའི་རྣམ་པ་སྣ་ཚོགས་པའི་བ་དན་རྣམས་ཀྱིས་ཚོང་སའི་བར་ཉེ་བར་མཛེས་པ། ཀུན་
ནས་བཅིངས་པར་གྱུར་པའི་རྟ་བབས་རྣམས་མེ་ཏོག་གི་ཕྲེང་བ་རྣམས་ཀྱི་དྲིས་འཁོར་བའི་བུང་བའི་ཚོགས་འགུགས་པར་བྱས་པ། ཤིན་ཏུ་འབར་བའི་རྒྱན་རྣམས་ཀྱིས་ཉེ་བར་མཛེས་པའི་རབ་ཏུ་དགའ་བའི་གྲོང་ཁྱེར་བའི་ཚོགས་དང་ལྡན་པ། ལྷག་པར་འཇུག་པའི་གར་དང་གླུས་རབ་ཏུ་དགའ་བ་
བཙོན་ར་ན་བཟུང་བའི་སྐྱེ་བོ་ཀུན་ནས་གྲོལ་བར་གྱུར་པ། གཉིས་སྐྱེས་དང་མཁས་པའི་སྐྱེ་བོ་དང་གྲོགས་པོའི་ཚོགས་ཀུན་ནས་མཆོད་པར་གྱུར་པའི་གྲོང་ཁྱེར་གྱི་ཚོགས་དེ་ལྷག་པར་མཛེས་པ་དང་ལྡན་པར་བྱས་པར་གྱུར་ཏོ། །སྲས་དེ་ལ་ཡང་བཀྲ་ཤིས་པའི་ཚེས་དང་ཡུད་ཙམ་དང་། སྐར་མ་རྣམས་
ལ་ཕ་མ་དག་གིས་གསེར་གྱི་གོ་ཆ་ཞེས་བྱ་བའི་མིང་དུ་བཏགས་པར་གྱུར་ཏེ། །ཆེ་བའི་བདག་ཉིད་མ་འོངས་དེའི། །མཚན་རྣམས་དེ་ནས་མཚོན་པ་སྟེ། །ཡལ་ག་ཅན་གྱི་མེ་ཏོག་རྣམས། །འབྱུང་བར་གྱུར་པ་འབྲས་བུ་བཞིན། །དེ་ནས་ལོ་བརྒྱད་ལོན་པ་ནི། །གཟི་བརྗིད་ཀྱིས་ནི་གཞོན་ནུ་

འདྲ། །རྒྱལ་པོ་ཤེས་པ་ཆེ་རྣམས་ཀྱི། །དེ་ནི་སློབ་མ་ཉིད་འགྲོ་གྱུར། །ཤེས་རབ་ཡོན་ཏན་རྣོན་པོ་རྣམས། །ཐེ་ཚོམ་མདུད་པ་གཅོད་པ་དེའི། །བསྟན་བཅོས་དོན་ནི་རབ་ཤེས་པ། །སློབ་དཔོན་རྣམ་པས་ལྷག་པར་གྱུར། །བདག་ཅག་གིས་ནི་གནས་ལ་འདི། །བྱང་ཆུབ་སེམས་དཔའ་ནམ་སྐྱེ་
འགྱུར། །དེ་ལྟར་འདོད་པ་ལྟར་ཡོན་ཏན། །དེ་ཡི་སྐྱེ་བ་སོ་སོར་སྐྱོང་། །སྦྱིན་དང་ཚུལ་ཁྲིམས་བཟོད་ལ་སོགས། །དེ་ལ་ཡོན་ཏན་འཇུག་པ་སྟེ། །པདྨས་བརྒྱན་བྱས་ཆུ་ལྡན་པའི། །ཆུ་རྟེན་ལ་ནི་བུང་རྣམས་བཞིན། །གང་ཞིག་ཉིད་ནི་ལེགས་པའི་སྣོད། །དེ་ཉིད་ཡོན་ཏན་རྣམས་རྟེན་པ། །
རྣམ་འཕྲོས་འོད་ཅན་མུ་ཏིག་གི །ཆུ་བོ་ཉ་ཕྱིས་སྣོད་མ་ཡིན། །དེ་ནས་དེ་ཡི་ལུས་ལས་འབྱུང་། །ཡང་དག་བཏགས་པའི་འོད་ལྡན་པ། །ལང་ཚོས་རྣམ་པར་སྤངས་པ་ནི། །བྱིས་པ་ཉིད་ནི་ཕྲད་འདོད་འདྲ། །མི་དབང་སྲས་དེ་རིགས་ལས་སྐྱེས་པའི་ངོ་བོ་ལས། །རྒྱགས་པའི་རྒྱུ་ཡང་ལང་ཚོ་ལ་ནི་
ལྷག་གནས་ལ། །རྣམ་པར་དུལ་བས་འདུལ་བཞིན་པ་ཡི་སེམས་ལྡན་པ། །རྣམ་འགྱུར་གཉིས་འཐུང་བཟང་པོ་ལྟར་ནི་རྟེན་མ་གྱུར། །དེ་ནས་དུས་ཀྱི་རིམ་པས་རྒྱལ་པོའི་བཙུན་མོ་དེས་གཟུགས་དང་ལྡན་པའི་དཔལ་དང་འདྲ་བ་དང་ནོར་བུའི་ཐུར་མའི་འོད་དང་འདྲ་བ་དང་། དཀར་པོའི་ཕྱོགས་ལ་རྣམ་པར་
བྱུང་བའི་ཟླ་ཚེས་ལྟར་སྐྱེ་བོ་རྣམས་ཀྱི་མིག་དང་སྙིང་ལ་མཛེས་པའི་བུ་མོ་བཙས་པར་གྱུར་ཏོ། །དེ་ནས་དེ་ལ་གསེར་གྱི་འོད་ཅེས་བྱ་བའི་མིང་གཉེན་འདུན་རྣམས་ཀྱིས་བཏགས་པར་གྱུར་ཏེ། དེ་ནས་དུས་གཅིག་གི་ཚེ་ན་དེ་འདོད་པའི་རྟེན་གྱིས་ལང་ཚོ་སར་པས་ཤིན་ཏུ་ཉིས་འགྱུར་དུ་གཟུགས་ཀྱི་མཛེས་པ་འདོགས་པར་
གྱུར་པ། དཔྱིད་ཀྱི་ཟླ་བས་ནགས་ཀྱི་ཚོགས་འབྱུང་བར་གྱུར་པའི་མེ་ཏོག་རྣམས་ཀྱིས་བརྒྱན་པར་བྱས་པའི་ཤིང་དང་ལྗོན་ཤིང་རྣམ་པར་མཛེས་པར་བྱེད་ཅིང་། སྐྱ་རེངས་སར་པའི་འོད་ཟེར་རྣམས་ཀ