Luận tạng Tây Tạng (Tengyur) — Tập 169

ྟེན་པ། །དམ་པ་ལ་ནི་སུ་ཞིག་ཐོགས། །སྙིང་རྗེ་ལྡན་པ་ཡོན་གནས་སོ། །བདག་ཉིད་ཆེན་པོ་དེ་ལ་ཡང་རབ་ཏུ་ཞི་བའི་བདེ་བ་འདོད་པས་དཀའ་ཐུབ་ཀྱི་ནགས་དེ་དང་ཤིན་ཏུ་རིང་བ་མ་ཡིན་པ་ལ་རྣམ་པར་
ཁ་ཕྱེ་བའི་པདྨའི་འབྱུང་གནས་ཀྱིས་ཉེ་བར་མཛེས་པའི་ཕྱོགས་གཅིག་གི་རིའི་མཐར་ཐུག་པར་ཤིང་ལོའི་ར་བ་དགའ་བར་བྱས་ཏེ། བསམ་གཏན་སྒྲུབ་པ་ལ་ངེས་པར་ཞུགས་སོ། །གང་ཕྱིར་དབང་པོའི་ཡུལ་ངོར་རོ། །གཅིག་པ་ལ་ནི་བསམ་གཏན་སྒྲུབ། །དེ་ཕྱིར་གཉིས་མེད་ནགས་ཀྱི་ནང་། །ཞི་བ་
ལྷག་པར་གནས་པར་གྱུར། །དཀའ་ཐུབ་རྣམས་ཀྱི་བརྟན་པོ་དང་། །ཆོས་ཀྱི་དོན་ལ་ཉེར་བརྟེན་པ། །གཏི་མུག་རྣམ་གཅོད་ཞི་བ་ནི། །མྱ་ངན་འདས་ཕྱིར་གཏམ་བྱས་གྱུར། །དེ་ནས་དུས་གཅིག་གི་ཚེ་ན་ཆུ་འཛིན་རྣམས་ལས་ཆར་པ་དང་བྲལ་བའི་ཕྱིར། །ལྗོན་ཤིང་དང་། རྩྭ་ཀུན་ནས་སྐམས་པས་

ནགས་ཀྱི་ནང་དུ་འོངས་པའི་སྐྱོན་གྱི་ཆ་གཞན་དང་བ་འཛིན་པའི་ཁྱིམ་ན་གནས་པ་རྣམས་ཡོད་པ་དང་། འབྲས་བུ་རྣམས་འགྲིབ་པ་དང་། རབ་ཏུ་སྲབ་པ་དང་། སྐམ་པ་དང་། རྒས་པའི་འདབ་མ་ཅན་གྱི་ཤིང་རྣམས་ཡོད་པ་དང་། ཁྱོ་མེད་པ་དང་འདྲ་བའི་རབ་ཏུ་སྲ་བར་གྱུར་པའི་
སྟེགས་དང་ལྡན་པ་ཡོད་པ་དང་། རྩྭ་ཉུང་བ་ཟ་བ་ཉིད་ཀྱིས་ཀུན་ནས་སྟོབས་ཆུང་བའི་ཡན་ལག་རི་དགས་ཀྱི་ཁྱུ་ཡོད་པ་དང་། རབ་ཏུ་གྲགས་པའི་ཁྲོ་བ་དང་ལྡན་པའི་རྒྱལ་པོ་བཞིན་དུ་སྐྱེ་བོ་ཐམས་ཅད་ལ་གདུང་བར་བྱེད་པའི་ཉི་མ་ཡོད་པ་དང་། ཉིན་མོ་བྱེད་པའི་འོད་ཟེར་རྣམས་དང་འབྲེལ་པས་
ལྷག་པར་གདུང་བ་དང་། འོད་མ་ཡོངས་སུ་སྨིན་པ་ཆགས་པའི་སྒྲ་ལས་སྡིགས་མཛུབ་པ་དང་འདྲ་བར་རྨ་བྱ་དང་། ཤང་ཤང་ཏེའུ་དང་། ཁུ་བྱུག་དང་། རི་དགས་ཀྱི་ཚོགས་རྣམས་ཀྱིས་ལམ་དོར་བ་དང་། ནགས་ཀྱི་སྲེག་ལུགས་འཛིན་པ་རབ་ཏུ་འགྲོ་ཞིང་སྲེག་ལུགས་འཛིན་པའི་ཤིང་རྟ་འདྲེན་པས་རབ་
ཏུ་བསྐྱོད་པའི་རྡུལ་གྱི་ཚོགས་ཀྱི་དབུས་སུ་འཁོར་ཞིང་ཀུན་ནས་སྐྱོ་བའི་རྩྭའི་ཉག་མས་མ་ལུས་པའི་ཤིང་རྣམས་ཀྱི་འདབ་མ་ཅན་གྱི་ནོར་ལྡན་མ་ལ་ཆུ་འཛིན་པར་མ་ཤར་བས་འཐུང་བར་འདོད་པ་ཉེ་བར་བསགས་པས་མགྲིན་པས་ཀུན་ནས་སྐམས་པའི་རྨ་བྱ་རྣམས་ཡོད་པ་ལ། རྩ་བ་དང་། འབྲས་བུ་ཀུན་
ནས་ཟད་པའི་དགོན་པ་དེ་ལ་དཀའ་ཐུབ་པ་དེ་རྣམས་དཀའ་ཐུབ་དང་བཀྲེས་པས་ཤིན་ཏུ་ལྷག་པར་ཀུན་ནས་སྐྱ་བའི་ལུས་ཅན། དཀའ་ཐུབ་ཀྱི་ནགས་དེ་ལས་གྲོང་ཁྱེར་དང་། གྲོང་ལ་སོགས་པ་རྣམས་ལ་མངོན་པར་འགྲོ་བ་ཀུན་ནས་འདོད་ཅིང་བྱང་ཆུབ་སེམས་དཔའ་དང་ཉེ་བར་འོངས་ནས་སྨྲས་པ།
ཆར་ནི་ཆད་པས་རྩྭ་བའམ་ནི་འབྲས་བུ་འདི། །རི་ཡིས་ས་ལ་ཟད་པ་གྲགས་པ་མ་ཟད་ལགས། །དེ་ནི་མེད་པས་ཁོ་བོ་ཅག་ལ་སྲོག་གསོ་མེད། །ལུས་ལ་གནས་ཕྱིར་དེ་ལ་སྐྱེ་བོའི་ནང་འགྲོ་བགྱི། །ཁ་ཟས་ཡོད་ན་ལུས་ནི་རྒྱས་པ་སྐྱེ་བ་སྟེ། །རྒྱས་པ་ཡོད་ན་རྣལ་འབྱོར་ནུས་པ་ཡོད། །རྣལ་
འབྱོར་གོམས་པས་དེ་ཉིད་རྙེད་ནས་རྣལ་འབྱོར་པ། །སྣང་བ་མཐོང་བས་འཇིག་རྟེན་ཆགས་པ་འདོར་པར་བྱེད། །དེ་བས་མུ་གེའི་སློང་མོ་སྟེར་བ་དམན་པ་ནི། །གྲོང་གི་མཐའ་འམ་གྲོང་ཁྱེར་དུ་ནི་ཐོབ་བྱས་ནས། །འཇིག་རྟེན་འདིར་ནི་ལོ་ཏོག་སྐྱེས་པས་དགའ་བ་སྐྱེས་པ་ལ། །སླར་ནི་ནགས་ནང་ཞི་བའི་

ཁྱིམ་ནི་གནས་པར་བྱ། །བསམ་གཏན་རྙེད་པས་ཁྱེད་རྣམས་ལྟ་བུ་ཐུབ་རྣམས་ལ། །གྲོང་ནང་ཅི་འདྲ་དེ་འདྲར་རི་ཡི་ས་ཕྱོགས་ཏེ། །རྣལ་འབྱོར་རྣམས་ཀྱི་རྣལ་འབྱོར་དག་པ་དགའ་འཕེལ་བ། །ཕོངས་དང་ང་རྒྱལ་སེམས་ནི་ནམ་ཡང་འགྲོ་བ་མིན། །བློ་གཏེར་ཁྱོད་ཀྱི་ངག་ནི་མེ་ཏོག་འདི་རྣམས་ནི། །
དོར་བར་མི་བྱེད་འབྲས་བུ་སྟེར་བར་ཞི་བའི་ཕྱིར། །ཉེར་འཚེ་དང་བྲལ་སྐྱེ་བོ་ལ་ནི་གནས་བྱེད་པ། །ཁོ་བོ་ཅག་ནི་རང་ཡང་ཁྱེད་དང་ཕྲད་པར་འདོད། །བྱང་ཆུབ་སེམས་དཔས་སྨྲས་པ། གང་གི་ཕྱིར་དུལ་བ་རྣམས་ལ་ནི་སྐྱེ་བོའི་གནས་ལ་གནས་པ་སྐྱོན་མང་བ་སྟེ། གང་གི་ཕྱིར་དང་སྐྱེས་བུའི་
སྙིང་འགུགས་པར་བྱེད་པ་དང་། འཇམ་པའི་དགོད་པས་རྣམ་པར་གསལ་བར་གྱུར་པའི་སའི་ནོར་བུའི་འོད་རྣམས་ཀྱིས་གདོང་བརྒྱན་པ་དང་། ཕྱིར་ཕྱོགས་པས་ལྟ་བ་སྒེག་པ་ལ་མཁས་པ་དང་། ལྕི་བའི་བུད་མེད་ཀྱི་དབང་པོའི་ཁུར་བུས་འགྲོ་བ་མི་ནུས་པས་གར་གསལ་བར་བྱས་པ་འདྲ་བ་དང་།
སྨིན་པའི་ལྗོན་ཤིང་ལ་གྱེན་དུ་འཛེག་པ་ཙམ་གྱིས་གཞུ་བདུངས་པའི་ཕྱིར་འདོད་པའི་ལྷས་བཀའ་བསྒོ་བ་དང་འདྲ་བའི་བུད་མེད་ཀྱི་གཟུགས་རྣམས་ཡོད་དོ། །གང་ཞིག་དཀའ་ཐུབ་པ་རྣམས་ཀྱི་ཡང་སྙིང་འཕྲོག་པར་བྱེད་པ་སྟེ། རྣམ་པ་ཐམས་ཅད་དུ་མདོར་བསྡུས་པ་ནི་འདི་ཡིན་ཏེ། མཁས་པ་རྣམས་
ནི་བུད་མེད་མ་མཐོང་ཞིང་ཕྱིར་སྨྲ་བ་སྟེ། དེ་མཐོང་བ་ལ་མངོན་པར་སྨྲ་བ་ཡོངས་སུ་སྤོང་ན་ནི། །སྨྲ་བ་ལ་ཡང་བུ་མོ་དང་ནི་སྲིང་མོའི་འདུ་ཤེས་ཅན། །ནམ་ཡང་མང་པོ་རྣམས་ཀྱི་དབང་དུ་སོང་བར་འགྱུར་བར་མིན། །རྣོ་བའི་མདའ་ནི་ཀུན་ནས་ཕོག་པ་རྣོ་བ་རི་དགས་འདོད་མིན་ཏེ། །རྣ་བ་དང་ནི་
སྙིང་ནི་འཕྲོག་པར་སྨོན་པའི་གླུ་ལ་སྙན་པ་སྟེ། །བདེ་བའི་ཆ་ཡིས་སེམས་ནི་འཕྲོག་པ་རྣམ་པར་དབེན་པ་ཉལ་བའི་བློ། །སྐྱེ་བོ་འདི་ནི་བཟོད་པར་དཀའ་བའི་སྡུག་བསྔལ་མཐར་ནི་སྤྱོད་མི་བྱེད། །དེ་ལྟར་ན་བུད་མེད་དང་བྲལ་བའི་སྐྱོན་གྱིས་སྐྱེ་བོའི་ཕ་རོལ་གྱི་སྐྱོན་བལྟས་པ་དང་། མང་ཞིང་མོད་
པའི་སྐྱེ་བོ་དང་ལྡན་པ་དང་། དབང་པོ་དང་ཕྲད་པ་རྙེད་པར་དཀའ་བ་དང་། དབང་ཕྱུག་གི་ཆ་མྱང་པ་ལ་རྩེ་གཅིག་པ་དང་། གཞན་ལ་ཕན་པ་རབ་ཏུ་སྲབ་པ་དང་། གཞན་གྱི་རྗེས་སུ་དྲངས་པའི་ངལ་བ་མང་བ་འགའ་ཞིག་ཏུ་དམིགས་པར་གྱུར་པའི་བཟའ་བ་ཙམ་གྱིས་ད་ཁྱེད་ཅག་རྣམས་ལ་

བདག་གིས་སྐྱེ་བོའི་གནས་ལ་གནས་པར་རྗེས་སུ་ཤེས་པར་བྱའོ། །དེའི་ཕྱིར་རེ་ཞིག་བདག་གི་ཁང་པ་འདིར་ཟས་ཅུང་ཟད་ཁྱེད་ཅག་རྣམས་ཀྱིས་གསོལ་བར་མཛོད་ཅིག །གལ་ཏེ་དེ་ལྟ་བུའི་ཁ་ཟས་འདོད་པར་གྱུར་ན་དེ་ནས་ཉི་མ་རེ་རེར་བདག་ཁྱེད་ཅག་རྣམས་ལ་སྲོག་
གནས་པའི་ཕྱིར་འབད་པར་བགྱིའོ། །མི་སྨྲ་བ་ཉིད་ཀྱི་ཕྱིར་སྤྱན་དྲང་བ་འདི་དཀའ་ཐུབ་ནོར་བཅས་རྣམས་ལ་རྗེས་སུ་འདོད་དོ་ཞེས་བྱ་བ་རྣམ་པར་བསམས་ནས་བྱང་ཆུབ་སེམས་དཔས་སྨྲས་པ། འདིར་ཡུད་ཙམ་སྡོད་ཅིག་དང་ཇི་སྲིད་དུ་བདག་གིས་བྱང་གི་སྒྲ་མི་སྙན་ནས་ཁ་ཟས་བླང་བར་བྱའོ་ཞེས་ཟེར་
རོ། །དེ་ནས་ས་ཡི་རང་བཞིན་ལྷུང་བཟེད་དེ་བཟུང་ནས། ཁྲི་སྙན་པགས་པ་དང་ནི་ཤིང་ཤུན་ངེས་འབྲེལ་བ། །དཀའ་ཐུབ་ནོར་ཅན་རྣམས་ཀྱིས་དགའ་བ་གྱེན་བལྟས་པ། །ནམ་མཁའ་དྲི་མེད་རལ་གྲི་ལྟར་གནག་མཛེས་པར་འགྱུར། །སྐད་ཅིག་མ་ཉིད་ཀྱིས་ཀྱང་བསྐལ་བའི་ཤིང་གི་མེ་ཏོག་
དྲི་དང་ལྡན་པ་སྐྱེས་དང་འདྲ་བ་འཛིན་ཅིང་གྲོགས་པོ་དང་འདྲ་བའི་རླུང་གིས་སོ་སོར་འབྱུང་བ་ནམ་མཁའ་ལས་བབས་ཏེ། གསེར་གྱི་ཤིང་དང་། ལྗོན་ཤིང་གི་ནགས་རྣམས་ལྟ་ཞིང་། མརྒད་དང་། བཻ་ཌཱུརྱ་དང་། ཨིནྡྲ་ནཱི་ལ་དང་། པདྨ་རཱ་ག་དང་། གསེར་གྱི་རང་བཞིན་གྱི་ཁྱིམ་གྱི་རྩིག་པ་
རྣམས་ཀྱི་དགའ་བའི་བྱང་གི་སྒྲ་མི་སྙན་དུ་ཞུགས་ཏེ་དེ་ལས་ཀྱང་ལྷའི་བུ་མོ་དང་འདྲ་བ་བུད་མེད་རྣམས་ཀྱིས་ཉེ་བར་སྦྱིན་པའི་བདུད་རྩི་ལྟར་ཞིམ་པའི་བསོད་སྙོམས་ཉེ་བར་བླངས་ནས་ནམ་མཁའ་ལྡིང་དང་འདྲ་བར་ནམ་མཁའ་ལ་འཕུར་ཞིང་སྔ་མ་བཞིན་དུ་རང་གི་ཁང་པར་འོངས་པར་གྱུར་ཏོ། །དེ་ནས་
ནགས་ཀྱི་ཤིང་རྣམས་འོག་ཏུ་ཉེར་གནས་པ། །རབ་ཏུ་ཞི་བའི་གཟུགས་ཅན་དཀའ་ཐུབ་པ་རྣམས་དེ། །དྲི་ཞིམ་པ་ཡི་ཁ་ཟས་ཀྱིས་ནི་ལུས་ལ་སྟོབས་སྦྱིན་པའི། །ཉེ་བར་ཞི་བའི་ཡིད་ཅན་དེས་ནི་ཚིམ་པར་མཛད། །དཀའ་ཐུབ་གཏེར་དེས་ཇི་ལྟ་ཇི་ལྟར་ཁ་ཟས་སྦྱིན། །དེ་ལྟ་དེ་ལྟར་དེ་ནི་ཤིན་
ཏུ་འཕེལ་བར་གྱུར། །བདག་ཉིད་ཆེན་པོ་རྣལ་འབྱོར་རྣམས་ཀྱི་དངོས་པོ་ནི། །ཆུང་ཡང་རྣལ་འབྱོར་སྟོབས་ཀྱིས་རྒྱ་ཆེན་ཉིད་དུ་འགྱུར། །ཉི་མ་རེ་རེ་ལ་ཡང་བྱང་གི་སྒྲ་མི་སྙན་ནས་འོངས་པའི་ཁ་ཟས་དེ་ལྟ་བུས་དཀའ་ཐུབ་པ་དེ་རྣམས་ལ་བདག་ཉིད་ཆེན་པོ་དེས་བཀུར་སྟི་བྱས་པར་གྱུར་ལ། ཕྱིས་

ཀྱང་བདེན་པའི་བྱིན་གྱི་རླབས་འདི་བྱས་པར་གྱུར་ཏེ། །བདག་ལ་ནམ་ཡང་སྲིད་པའི་མཐར་ནི་ཡིད་འདི་ནི། །ཇི་ལྟར་འདོད་པའི་རྣམ་རྟོག་རྡུལ་གྱིས་མ་ཁྱབ་པ། །བདེན་པ་འདིས་ནི་དེ་ལྟར་ལྷ་ཡི་དབང་པོ་ནི། །འགྲོ་བའི་དབང་ཕྱུག་ཕྱིར་ནི་ཆུ་ནི་སྟེར་བར་ཤོག །དྲང་སྲོང་ཆེན་པོ་དེས་བདེན་པའི་བྱིན་གྱི་
རླབས་བྱས་པས་ཀྱང་སྐད་ཅིག་དེ་ཉིད་ལ་དེའི་བསོད་ནམས་ཀྱི་དབང་དུ་བྱེད་པས་མགུ་བའི་ལྷའི་བདག་པོས་ཀུན་ནས་བསྐྱོད་པའི་ཡན་ལག་སྤྲོས་པས་སྣང་བའི་ལྟོ་བ་ལྷའི་དབང་པོའི་གཞུའི་རྒྱན་འཛིན་པ། ཨུཏྤལ་སྔོན་པོ་སར་བའི་ཕུང་པོ་ལྟར་སྔོ་བའི་ཆུ་ལྕི་བ་ཉིད་ཀྱིས་ཕྱོགས་ཀྱི་སྒོ་འཕྱང་བར་གྱུར་
པའི་ཆུ་འཛིན་པ་རྣམས་ཀྱིས་ནམ་མཁའི་དཀྱིལ་གཡོགས་པར་གྱུར་ཏེ། དེ་ནས་ཆུ་འཛིན་ཡང་དག་འབྲེལ་བས་བསིལ་བ་ནི། །མེ་ཡི་གྲོགས་པོ་ཤིང་རྣམས་བསྐྱོད་པ་རབ་རྒྱུ་གྱུར། །རི་དང་ནགས་ལ་ཡང་ནི་རྒྱགས་པས་སྒེག་པ་ནི། །རྨ་བྱའི་ཚོགས་ཀྱི་སྐད་རྣམས་རྣམ་པར་རྒྱས་པར་
གྱུར། །ས་ཡི་དཀྱིལ་འཁོར་དྲི་ཞིམ་པར་ནི་འགྲོ་འགྱུར་ཏེ། །དང་པོ་བསིལ་བ་ལྷུང་བས་ཡིད་ནི་འཕྲོག་བྱེད་པ། །གླང་པོའི་རྭ་དང་འདྲ་བར་སར་པའི་ཀེ་ཏ་ཀ །དྲི་ཞིམ་དྲི་དང་ལྡན་པས་བུང་བས་ཞུགས་པར་གྱུར། །ས་ནི་སྔོ་བར་འགྱུར་ཏེ་སར་པར་བྱུང་བར་གྱུར། །ཤིར་ཥ་སར་པའི་མེ་ཏོག་
རྩེ་མོ་ལྟར་སྔོ་རྩྭ། །རྩྭ་ཟ་བ་ཡི་བ་རྣམས་ལ་ཡང་སྟོབས་འབྱུང་བ། །ཆུ་ཡི་དབང་གིས་ཀྱང་ནི་ཆུ་རྣམས་ལྟག་པར་གྱུར། །ནོར་ལྡན་མ་ནི་མཐུག་པའི་ལོ་ཐོག་གིས་ནོར་འཕྲོག །ཞིང་པ་རྣམས་ཀྱིས་མཐོང་ནས་དགའ་བར་འགྱུར་བ་སྟེ། །འགྲམ་དུ་ལྷུང་བ་ཡང་དག་འབྱུང་བའི་སྒྲ་ལྡན་པ། །
ཆུ་ནི་ཆུ་བོ་རྣམས་ཀྱིས་རྙོག་པ་ཉིད་དུ་གྱུར། །དེ་ལྟར་ཐང་སྐྱེས་ཀ་དམ་པས་ནི་བསྒོས་པའི་རི། །སྤྲིན་གྱི་དུས་ནི་མཐོང་ནས་དཀའ་ཐུབ་དེ་རྣམས་ནི། །གྲོགས་པོ་བཞིན་དུ་བཟློག་པ་ཡུལ་ནི་གཞན་དག་ལས། །གསལ་བའི་བསམ་པས་བརྟན་པ་ལྷག་པར་འགྲོ་བར་གྱུར། །དེ་ནས་བྱང་ཆུབ་
སེམས་དཔའ་མི་ཤེས་པའི་རབ་རིབ་འཕྲོག་པར་བྱེད་པའི་ཆོས་དང་འབྲེལ་བའི་གཏམ་གྱིས་མཚན་མོ་བྱེད་པའི་འོད་ཀྱིས་མཚན་མོར་ཀུན་ནས་སོང་བ་དང་འདྲ་བ་དཀའ་ཐུབ་པ་དེ་རྣམས་ལམ་ལོག་པར་ཞུགས་པ་ཐམས་ཅད་ལམ་བཟང་པོ་ལ་འཇུག་ཅིང་གནས་སོ། །དེ་རྣམས་ཀྱང་བདག་ཉིད་ཆེན་

པོ་དེ་ལ་ཉེ་བར་འོངས་ཏེ། བསྟོད་པའི་མེ་ཏོག་རྣམས་ཀྱིས་མཆོད་ཅིང་གནས་སོ། །སྔོན་དུ་ཟང་ཟིང་སྦྱིན་པས་ནི། །ཁྱོད་ཀྱིས་བདག་ཅག་ཚིམ་པ་སྟེ། །དམ་ཆོས་བདུད་རྩི་སྦྱིན་པས་ནི། །དེ་ནས་ངེས་ལེགས་ལ་འཇུག་པ། །གཏི་མུག་རབ་རིབ་འཇོམས་བྱེད་པ། །
མཚན་མོའི་མུན་པ་ཉི་མ་ལྟར། །དེ་བཞིན་མཉམ་དང་མི་མཉམ་པ། །ལམ་རྣམས་ཁྱོད་ཀྱིས་བསྟན་པར་མཛད། །གལ་ཏེ་ཁྱེད་འདྲ་བརྟན་བདག་ཉིད། །གྲུར་ནི་གྱུར་པ་མེད་གྱུར་ན། །དུཿཁ་ཆུ་བོ་ཆེན་པོ་ཡི། །འཇིག་རྟེན་འདི་ནི་བུམ་པར་གྱུར། །ཨེ་མ་བདེ་བ་སྐྱེད་པ་ནི། །སྐྱེ་བོ་ལ་བྱམས་
སྐྱེ་བོ་ཡི། །ཡོན་ཏན་ཅན་མཆོག་ཡོན་ཏན་ནི། །མཉེས་གཤིན་བཞིན་དུ་ཁྱོད་ལ་འབྲེལ། །རབ་རིབ་ཆེན་པོའི་ཚོགས་ཀུན་ནི། །ཡེ་ཤེས་མར་མེས་མ་ལུས་འཇོམས། །མཁས་པ་རྣམས་ཀྱི་དང་པོ་ཁྱེད། །རིག་བྱེད་རྣམས་ཀྱི་ཨོཾ་ཡིག་བཞིན། །ཤིན་ཏུ་གཙང་བ་ཁྱེད་ཀྱི་ཡོན་ཏན་རྣམས་
ཀྱིས་ནི། །ས་འདི་རྣམས་ལ་བར་ཆད་མེད་པར་བརྒྱན་བྱས་ཏེ། །སྟོན་ཀའི་དྲི་མེད་འོད་ཅན་འོད་ཟེར་རྣམས་ཀྱིས་ནི། །མཚན་མོ་བྱེད་པའི་ཀུ་མུ་ཏ་ཚོགས་དགོད་པ་ལྟར། །དེ་ལྟར་དཀའ་ཐུབ་པ་དེ་རྣམས་བདག་ཉིད་ཆེན་པོ་དེ་རྣམས་ལ་མངོན་པར་བསྟན་པར་བྱས་ནས་རང་གི་གནས་སུ་ལྷག་པར་སོང་
ཞེས་བསམ་གཏན་ལ་རྩེ་གཅིག་ཏུ་བྱུང་བར་གྱུར་ཏོ། །དེ་ལྟར་ན་བཅོམ་ལྡན་འདས་དེས་བྱང་ཆུབ་སེམས་དཔར་གྱུར་པ་ན་བདེན་པ་སྨྲ་བས་སེམས་ཅན་རྣམས་ལ་ཟང་ཟིང་གི་སྦྱིན་པ་དང་། ཆོས་ཀྱི་སྦྱིན་པས་རྗེས་སུ་བཟུང་ངོ་ཞེས་བྱ་བ་རྣམ་པར་བསམས་ནས། །སངས་རྒྱས་བཅོམ་ལྡན་འདས་ལ་
དད་པ་བསྐྱེད་པར་བྱ་ཞེས་བྱ་བའོ། །དཀའ་ཐུབ་པའི་སྐྱེས་པའི་རབས་ཏེ་སྐྱེས་པའི་རབས་བདུན་པའོ།། །།རྒྱན་རྣམས་མེད་པའི་རྒྱན་ནི་བཟོད་པ་སྟེ། །ནུས་པ་གཡོ་བ་མེད་པའི་བཟོད་ཅན་གྱི། །སྟོབས་ཡོད་པ་ལ་བཟོད་པ་བྱེད་པ་སྟེ། །བཟོད་པའི་སྟོབས་ཀྱི་ཚོལ་བ་ཤེས་
རབ་ཅན། །འདི་ལྟར་རྗེས་སུ་ཐོས་ཏེ། ཉེ་འཁོར་དང་སྐྱེ་བོ་རྗེས་སུ་གནས་པ་རྟག་ཏུ་ནོར་མི་ཟད་པ་ནོར་གྱི་བདག་པོ་ཡོ་བྱད་དང་མཚུངས་པའི་ཆུ་བོ་གང་གཱས་བདག་པོར་བྱས་པའི་གྲོང་ཁྱེར་ལས་འཛིན་པ་རྣམས་ཀྱི་རི་རབ་བཞིན་དུ་སའི་བདག་པོ་ཐམས་ཅད་ཀྱི་བདག་ཉིད་ཆེན་པོས་སྟེང་ན་གནས་པ། གཟི་

བརྗིད་ཐམས་ཅད་ཀྱི་རང་བཞིན་དང་འདྲ་བའི་རི་རབ་ཅེས་བྱ་བའི་རྒྱལ་པོ་བྱུང་བར་གྱུར་ཏོ། །དེས་ཀྱང་དུས་གཅིག་གི་ཚེ་ན་དུལ་བ་དང་། ཤུགས་དང་ལྡན་པའི་ཟླ་བའི་འོད་ཟེར་ལྟར་སྤུ་དང་ལྡན་པ་དང་། མཚན་ཉིད་ཐམས་ཅད་དང་ལྡན་ཞིང་རྟ་བདུན་དང་ལྡན་པའི་ཤིང་རྟའི་མཆོག་ལ་ཞོན་ནས་རི་དགས་ཤོར་
བའི་ཕྱིར་རབ་ཏུ་སོང་བའི་རི་དགས་དང་འདྲེས་པའི་ཤིང་རྟའི་རྐང་པའི་སྒྲས་ཀུན་ནས་སྐྲག་པར་འཕུར་ཞིང་བསྐྱོད་པའི་ཚོགས་ཀྱིས་བར་དུ་གཡོབ་བཞིན་པ་དང་། རྫིང་གི་ཆུ་ལས་བདག་རྒལ་བའི་ཕག་གི་ལུས་ལས་ཀུན་ནས་ལྟུང་བའི་འདམ་གྱི་ཆ་ལ་རྩའི་མྱུ་གུ་རྣམས་ཀྱིས་ཁྱབ་པ་དང་། གླང་པོ་རྣམས་
ཀྱིས་སྨྱོན་ཆུ་དྲི་ཞིམ་པ་དང་། འགའ་ཞིག་ཏུ་རབ་ཏུ་དྲག་པོའི་རླུང་གིས་མངོན་པར་བཏེག་བཞིན་པའི་སྲེག་ལུགས་འཛིན་པ་ལས་ཡང་དག་པར་བྱུང་བའི་ཐུག་ཐུག་གི་སྒྲས་འཇིགས་པ་དང་། རབ་ཏུ་ཞུགས་པའི་རྔོན་པའི་ཚོགས་ཀྱི་མདའི་རྩེ་མོ་རྣམས་ཀྱི་སྟག་གི་རྐང་པས་མཚོན་པའི་རྡུལ་
མཐོང་བའི་རིའི་ནགས་རྣམས་ལ་རྣམ་པར་སྤྱོད་པར་གྱུར་ཏེ། གང་དང་གང་དུ་འཇིགས་པ་དང་ལྡན་པར་འགྲོ་བ། །རི་དགས་ཚོགས་ནི་ཤིན་ཏུ་འཁྲུག་པའི་མིག་ལྡན་པ། །མི་ཡི་དབང་པོ་དེ་ནི་ཤིང་རྟས་དེ་དང་དེར། །དོང་བ་ནས་ནི་མདའ་ནི་བཏོན་ཞིང་བདས་པར་གྱུར། །ཤིང་རྟའི་འཁོར་ལོ་གཉིས་
ནི་བར་དང་བྲལ་བའི་རྩིབས། །ཤུགས་ཀྱིས་གཡོ་བ་མེད་ཅིང་འཁོར་ཞིང་སྡོད་པ་འདྲ། །ཤིང་རྟའི་རྟ་རྣམས་ཀྱང་ནི་མྱུར་བས་འབྱུང་བ་སྟེ། །སྐད་ཅིག་དམིགས་ཤིང་གཡོ་བ་རྔོག་མའི་རྩེ་མོ་ཅན། །དེ་ནས་རྒྱལ་པོ་དེ་ཤིང་རྟ་འགྲོ་བས་ཅོད་པན་མི་བརྟན་པ་ཀུན་ནས་ངལ་བ་རྣམ་པར་གསལ་བའི་ཕྱིར་
གྲིབ་མ་མཐུག་པའི་རྐང་འཐུང་སུ་ཞིག་ཉེ་བར་འོངས་ནས། རིང་པོ་ནས་དོར་བའི་དམག་ཚོགས་ལ་སྡོད་ཅིང་འདུག་གོ། །རིམ་གྱིས་ཀྱང་ཤིང་རྟའི་འཁོར་ལོས་ཕྱེ་མའི་རྣམ་པར་བྱས་པའི་སོ་སོའི་རྩེ་མོར་ལྷུང་བའི་སྐྱུ་རུ་རའི་འབྲས་བུ་ངེས་པར་བྱུང་བས་འཁོར་ལོའི་མཐའ་མར་རི་མོ་དམའ་བ་བརླན་པར་
བྱས་པ་དང་། མྱུར་བའི་རྟའི་གདོང་ནས་ཀུན་ནས་ལྷུང་བའི་ཁ་སྤུའི་ཆས་ཤིང་རྟའི་རྩ་བརླན་པ་དང་། གཉའ་ཤིང་གི་བུ་གའི་རྩེ་མོས་ཀུན་ནས་འབྱུང་བའི་མེ་ཏོག་འབྱུང་བའི་ལྗོན་ཤིང་གི་ཐ་མ་དང་། ཀུན་ནས་འཁོར་བའི་སྦྲང་བྱེད་ཀྱི་ཚོགས་ཅན་གྱི་མལ་ལ་རྗེས་སུ་འབྲངས་ནས་དམག་དེས་རྒྱལ་

པོ་དེ་ལ་དུལ་བ་དང་བཅས་པར་ཉེ་བར་སོང་བར་གྱུར་ཏོ། །རྒྱལ་པོ་དེས་ཀྱང་རིམ་གྱིས་འགྲོ་ཞིང་ནགས་ལ་གནས་པ་ཙམ་ནི་རིང་པོ་ནས། །སྣོད་ལ་ལྟ་བར་བྱེད་ཅིང་ཕྲད་པར་འདོད་པའི་དེད་དཔོན་ནི། །ངལ་ཞིང་གནས་པའི་རྟ་ཡིས་ཁྱབ་པ་བ་གླང་དང་བྲལ་བ། །གླང་པོའི་ཕྲུ་གུ་
འདུག་པའི་ཚོང་པའི་ཚོགས་ནི་མཐོང་བར་གྱུར། །དེ་ནས་ཚོང་པ་དེ་རྣམས་ཀྱིས་རྒྱལ་པོ་དེ་ལ་རྣམ་པ་སྣ་ཚོགས་པའི་སྐྱེས་ཉེ་བར་བུལ་ཞིང་ཕྱག་བཙལ་ནས། ལྷ་ལགས་བདག་ཅག་ནི་བྱང་ཕྱོགས་ནས་འོངས་ཞེས་བྱ་བ་སྨྲ་ཞིང་འདུག་གོ། །དེ་ནས་བྱང་ཕྱོགས་ཀྱི་གཏམ་སྐབས་སུ་བབ་པ་ལ་
ཚོང་པ་རྣམས་ཀྱི་བདག་པོ་དེ་རྡོ་རྗེ་དབྱུག་པ་ཅན་ཞེས་བྱའི་རྒྱལ་པོ་ལ་ཆེ་བའི་བདག་ཉིད་བརྗོད་ཅིང་འདུག་གོ། །དེས་ཀྱང་ཇི་ལྟ་ཇི་ལྟར་མིའི་བདག་པོ་དེའི་ནུས་པ་གསུམ་གྱི་ཕུན་སུམ་ཚོགས་པ་ཉན་པ་དེ་ལྟ་དེ་ལྟར་ཆུ་འཛིན་གྱི་འབྲུག་གི་ཁོང་ཁྲོ་བ་མངོན་པར་འཕེལ་བ་རི་དགས་ཀྱི་བདག་པོ་ལྟར་རྒྱལ་པོ་
རི་རབ་མཆོག་ཏུ་ཁྲོས་པར་གྱུར་ཏེ། །ཕལ་ཆེར་ས་ཡི་བདག་པོ་རྣམས། །རྒྱས་པ་རྣམས་ཀྱི་གནས་བྱས་པ། །ཡན་ལག་རྣམས་ཀྱི་སྟོབས་འབྱུང་བ། །གསལ་བར་བྱས་པ་བཟོད་མ་ཡིན། །རྒྱལ་པོ་དེས་ཀྱང་རང་གི་གྲོང་ཁྱེར་དུ་སོང་སྟེ་ཕོ་བྲང་དུ་རྗེས་སུ་ཞུགས་ནས། རྡོ་རྗེ་དབྱིག་པ་ཅན་གྱི་ཆེ་
བའི་བདག་ཉིད་རྗེས་སུ་སྒྲོགས་པས་ང་རྒྱལ་སྐྱེས་པས་ཇི་ལྟར་ཡང་ཉི་མ་ཕྱི་དེ་གཉིད་དང་བྲལ་བ་ཉིད་ཀྱིས་མཚན་མོ་འདས་པ་རྟོགས་པར་གྱུར་ཏོ། །དེ་ནས་ཐོ་རངས་ཀྱི་རྔའི་སྒྲ་ཀུན་ནས་ཁྱབ་པའི་ཕོ་བྲང་གི་ས་ཕྱོགས་གཞན་རྣམས་སུ་སའི་བདག་པོ་རི་རབ་ལ་ཐོ་རངས་ཀྱི་དུས་ཞེས་བྱ་བ་སྒོ་སྐྱོང་མ་
རྣམས་ཀྱིས་སྨྲ་ཞིང་གནས་ཏེ། མིའུ་ཐུང་གཟུགས་ཉིད་འཛིན་པར་བྱེད་པ་ནི། །དུམ་བུ་བ་བླའི་སྡོང་བུ་ལྟར་སྣང་བ། །མར་མེའི་རྩེ་མོ་མཚན་མོའི་ཐ་མ་ལ། །སྡོང་བུ་ཆུང་བར་བྱས་པས་སྐྱེས་པ་ཡིན། །སྨྱོན་ཆུའི་ཆ་ཡིས་རྩ་ནི་བསྒོ་བྱས་པ། །ལུས་ནི་ཀུན་ནས་མནན་པས་དྲོད་དང་འབྲེལ། །
ཁྱོད་ཀྱི་གླང་པོ་རྣམས་ཀྱི་མལ་སྤྱོད་པ། །མཚན་མོ་ཟད་པས་དོར་བར་འགྱུར་བ་ཡིན། །ནོར་བུ་རྣམས་ཀྱིས་ཁྱབ་པ་དང་འདྲ་བ། །དྲི་མེད་འོད་ནི་སྣ་ཚོགས་ཕུང་པོ་སྟེ། །ཁྱིམ་གྱི་རྨ་བྱ་བསྐྱོད་པའི་སྒྲོ་ལྡན་པ། །གནས་ཀྱི་སྲོག་ཤིང་ལས་ནི་འཇུག་པ་ཡིན། །གཉིད་ནི་ཆད་པས་ཀུན་ནས་

ལངས་པ་ཡི། །དབུགས་ཀྱིས་ཀུན་ནས་ཁྱབ་པའི་སྨྲ་བ་ཅན། །བཙུན་འཁོར་སྐྱེ་བོ་རྒོད་པ་དང་བཅས་པ། །གཉིད་བྲལ་ནེ་ཙོ་ལ་ནི་སྨྲར་བཅུག་གོ། །ཆུ་སྐྱེས་རྡུལ་ལྟར་སེར་སྐྱ་མུན་པ་ཉེ་བར་འཇོམས་པ་ནི། །ཉི་མའི་འོད་ཟེར་གཞོན་ནུ་འདིར་ནི་རྣམ་པར་རྒྱས་གྱུར་པ། །རླུང་གི་སྟེགས་བུར་ཁྱབ་པ་
ཁྱོད་ཀྱི་ཕོ་བྲང་རྣམས་ལ་ཤིང་། །ལྟ་བ་དང་ནི་ཡིད་འཕྲོག་རི་མོ་རྣམས་ནི་སྣང་བར་བྱེད། །དེ་ནས་རྒྱལ་པོ་དེ་གཉིད་སད་པ་དང་། ཐོ་རངས་ཀྱི་བྱ་བ་བྱས་ཏེ་མྱུར་བ་ཉིད་དུ་འདུན་སའི་སྐྱེ་བོའི་ཚོགས་སྐྱེ་བར་བྱས་ནས་འདུན་ཁང་དུ་ཞུགས་ཏེ། བློན་པོ་རྣམས་དང་ལྷན་ཅིག་ཏུ་གྲོས་བྱས་ནས་ཕོ་ཉ་ལ་བོས་ཏེ་
སྨྲས་པ། །རིགས་ནི་ཆེ་ཞིང་གཙང་ལ་གཞན་གྱི་དགོངས་པ་ཤེས། །ནུབ་པ་དང་ནི་གཟུགས་དང་ལྡན་པ་མ་ཆགས་བློ། །བསྟན་བཅོས་དོན་མཐོང་ཡུལ་རྣམས་ཀྱིས་ནི་མ་ཕྲོགས་པ། །སྒྲུབ་པའི་ཕྱིར་ནི་ཕོ་ཉ་མཁས་པ་རྣམས་ཀྱིས་སྨྲས། །དེ་ཁྱོད་འདི་ལྟ་བུའི་ཡོན་ཏན་དང་ལྡན་པ་དེའི་ཕྱིར་བྱང་
ཕྱོགས་ཀྱི་བདག་པོ་རྡོ་རྗེའི་དབྱུག་པ་ཅན་གྱི་རྒྱལ་པོ་རྟོགས་ནས་གོམ་པ་མྱུར་བས་ཁྱོད་ཀྱིས་འོང་བར་གྱིས་ཤིག་དང་། འོན་ཏེ་འོང་བར་མི་འགྱུར་ན་དེ་བས་ན་བདག་གིས་ཁྱོད་ལ་ནན་ཏན་བྱེད་ཅིང་དབང་དུ་ཉེ་བར་སོང་ནས་བཀའ་སྦྱིན་པར་བྱ་ཞེས་བྱ་བ་སྨྲོས་ཤིག། །ཕོ་ཉ་དེས་ཀྱང་དེ་ལྟར་བྱ་ཞེས་བྱ་བ་སོ་སོར་
མཉན་ནས་རིམ་གྱིས་རྡོ་རྗེ་དབྱུག་པ་ཅན་གྱི་རྒྱལ་པོའི་དྲུང་དུ་ཉེ་བར་སོང་ནས་དེ་ལྟར་སྨྲས་པར་གྱུར་ཏོ། །དེ་ནས་རྒྱལ་པོ་ཕོ་ཉའི་ཚིག་གིས་བུད་ཤིང་གིས་སྦར་བའི་ཁྲོ་བའི་སེམས་དང་ལྡན་པས་བདག་འདི་འོངས་པ་ཉིད་ཇི་ལྟར་འགྲོ་བར་བྱ་ཞེས་བྱ་བ་སྨྲས་ནས་ཕོ་ཉ་དེ་ལ་འགྲོ་བར་བཅུག་ནས་དཔུང་གི་ཚོགས་ཡན་
ལག་བཞི་དང་ལྡན་པས་ཡོངས་སུ་བསྐོར་ཏེ། དམག་ཚོགས་ཀུན་ནས་འཛིན་པ་རྣམ་པར་འབྱེད་ཅིང་རྣམ་པར་བསྐྱོད་པའི་རླབས། །ཉ་ཡི་ཚོགས་ཀྱིས་ཀུན་ནས་གྲོལ་བའི་འགྲམ་གྱི་ཆུ་ལྡན་པ། །ཆུ་སྐྱར་ཀུན་ནས་འཁོར་ཞིང་ངང་སྐྱ་ཕྲད་པ་འདོད་པ་ནི། །སིན་དྷུ་འགྲམ་གྱི་ཤིང་རྣམས་ཀྱི་ནི་ཡིད་
འཕྲོག་རྒལ་བར་གྱུར། །རྒལ་ནས་མྱུར་བའི་རྟ་ཡི་རྨིག་པས་མཚོན་པའི་འགྲམ་ལྡན་པ། །ཚངས་པའི་སྲས་དེ་ཟླ་བའི་འོད་ཟེར་རྣམས་ལྟར་རབ་དཀར་བ། །དམག་ཚོགས་རྒྱལ་མཚན་གྱིས་ནི་བཏུངས་པའི་ས་སྐྱེས་ཡལ་བསྐྱོད་པ། །དགའ་བ་ཆེན་པོ་ལམ་གསུམ་ནས་འགྲོའི་འགྲམ་དུ་

ལྷག་གནས་གྱུར། །དེ་ནས་ཐོས་ཏེ་རི་རབ་ཀྱང་ནི་རི་རབ་བྲག་དཀྱིལ་ལྟར། །བྲང་གི་མཐིལ་ཅན་རྣམས་ལ་དེ་ནི་དབང་པོའི་འགྲམ་ལས་རྒྱལ། །འཇིགས་པས་རྣམ་བྲལ་རྡོ་རྗེའི་དབྱུག་པ་ཅན་དེ་མངོན་སོང་བ། །དམག་གི་ཆ་བྱད་གསལ་ཞིང་འཇིགས་པའི་སྒྲ་ལྡན་བྱས་པར་
གྱུར། །དེ་ནས་ས་སྐྱོང་དེ་དག་ལ་ནི་སྐད་ཅིག་གིས། །མཆེ་བ་གཉིས་པའི་དཔུང་པར་གླང་པོ་སྐྱོང་བ་འདུག་པ་ལ། །མ་སྤྱད་པར་ནི་དམག་གི་སྟོབས་དག་དེ་དག་ནི། །གཡུལ་ངོར་འཇུག་པ་བསྒྲུབ་པའི་ཕྱིར་ནི་རྩོམ་པར་གྱུར། །མྱུར་དུ་གོ་ཆ་ལ་ལ་ཞིག་གིས་བཅིངས་བྱས་ཏེ། །དགྲ་སྟ་རྣོན་པོ་ལ་
ལ་ཞིག་གིས་ཉེ་བར་བཟུང་། །གཞན་ནི་ས་ལ་ནུབ་པའི་མཐའ་མ་ཅུང་ཟད་ནི། །གཞུ་ནི་བདུངས་པར་གྱུར་ཏེ་སྨིན་མ་བསྐྱོད་པ་ཅན། །གཡོ་མེད་དྲིལ་བུ་དཀྲོལ་བ་མཚོན་ཆ་འཛིན་པ་ནི། །རྣ་བར་འཕྱང་བའི་ངང་པ་དཀར་པོའི་དུང་ལྡན་པ། །བཙག་གི་རྡུལ་ནི་མཐུག་པས་ཡན་ལག་ཁ་བསྒྱུར་བ། །
གླང་པོ་ཆེ་ལ་མྱུར་དུ་གཞན་ནི་ཞོན་པར་གྱུར། །གཞན་ནི་ལྕི་བའི་ལྕགས་ཀྱི་ཚོགས་ལས་སྦྲུལ་ནག་པོ། །པགས་པ་བརྗེས་པ་ལྟར་ནི་ཅུང་ཟད་མིག་ཟུམ་པ། །མཉམ་ཉིད་ཉེ་བར་ཁྲིད་ཕྱིར་དཔུང་པ་གྱེན་དུ་བཏེག །ཡུད་ཙམ་ཡུད་ཙམ་དུ་ནི་ལུས་ནི་བསྐྱོད་ཅིང་འདུག །གཞན་ནི་ཞོན་ཏེ་གཡེར་
ཀ་དཀྲོལ་བ་ཅན་གྱི་རྟ། །ཁ་ནས་དབུ་བའི་ཆ་ནི་ངེས་པར་འབྱུང་བ་ཅན། །སྲ་བ་གཞུ་རྒྱུད་བདུངས་པའི་གཞུ་ཡང་བྲང་དུ་ནི། །སྲ་ཞིང་མཐོ་བ་དཔུང་པའི་ཟུར་དུ་འཛིན་པར་གྱུར། །དེ་ནས་མི་དབང་རི་རབ་མཐོ་བས་འདོད་པ་ཅན། །རལ་གྲི་བ་སོའི་ཡུ་བ་ཅན་ལ་ལག་བཟུང་བྱས། །གནས་པ་ངེས་
པར་འཛིན་པ་མཁས་པ་གཡས་གནས་པ། །ཤིང་རྟ་རླུང་གིས་རྒྱལ་མཚན་བསྐྱོད་པ་ཞོན་པར་གྱུར། །དེ་ནས་མཐོན་པོ་གཞུ་དང་རླབས་དང་ལྡན་པ་ལྟར། །རབ་ཏུ་ཁྱབ་པའི་མདའ་རྣམས་ཉ་དང་ལྡན་པ་ལྟར། །ཤིང་རྟ་ཆེན་པོའི་ཡན་ལག་དྲངས་པའི་ལྡེ་སྒྲ་ལྡན། །འཁོར་ཞིང་འགའ་ཞིག་ཏུ་ནི་
འཁོར་བ་ལྡན་པ་ལྟར། །གྱེན་དུ་འགྲོ་བ་རྡུལ་རྣམས་ཀྱིས་ནི་བར་མེད་པ། །ཀུན་ནས་འཕྲོ་བའི་ཆུ་རྣམས་རྙོག་པའི་ཆུ་རྣམས་དང་འདྲ་བ། །བ་དན་རྣམས་ཀྱིས་མཛེས་པ་འབྱུང་བ་འགའ་ཞིག་ཏུ། །དྲི་མེད་དབུ་བའི་ཕྲེང་བ་རྣམས་ཀྱིས་མཐུག་བྱས་པ། །གླང་པོའི་རྣར་འཕྱང་དུང་རྣམས་ཀྱིས་ནི་འགའ་ཞིག་

ཏུ། །གཡོ་བའི་ངང་སྐྱ་བཞིན་དུ་རི་བོང་མཚན་ལྟར་སྐྱེ། །སྐད་ཅིག་གིས་ནི་རི་རབ་ས་ཡི་དབང་ཕྱུག་གི། །དམག་དེ་རྒྱ་མཚོའི་དུས་བཞིན་དུ་ནི་འགྲོ་བར་གྱུར། །སྐྱེ་བོའི་མིག་གི་ལམ་དུ་སོང་བ་སྐད་ཅིག་ཏུ། །མུ་ཏིག་རྡོག་མའི་ཕུང་པོ་འདྲ་བས་རབ་ཁྱབ་པ། །ནམ་མཁར་སོན་པར་རྡུལ་གྱིས་
འགགས་པར་གྱུར་པ་ནི། །ས་ལ་གཉིས་འཐུང་རྣམས་ཀྱི་རླུང་ནི་ལྟུང་མི་འགྱུར། །དེ་ནས་མྱུར་དུ་གླང་པོ་རྒྱུ་བའི་དམག་དག་ལ། །ཀུན་ནས་འཕྲོ་བའི་འཕེན་མདུང་རྩེ་མོ་འོད་ཟེར་ཅན། །རྣོ་བའི་མདའ་རྣམས་ཀྱི་ནི་རྟ་ཡི་སྒྲ་ནི་ལངས་པ་ཡིས། །ཀུན་ནས་ལྟུང་བའི་སྒྲས་ནི་ནམ་མཁའ་ཀུན་ནས་གང་
བར་གྱུར། །གོ་ཆ་རྣམ་པར་ཕིགས་ནས་ལུས་ནི་སྐད་ཅིག་ཏུ། །ཁྲོས་པས་སྨིན་མ་བསྐྱོད་པ་རབ་ཏུ་ཕངས་རྣམས་ཀྱི། །མདའ་རྣམས་ཁྲག་གིས་གོས་པའི་སྣོད་དང་ལྡན་པ་ནི། །ཉོན་མོངས་མེད་པའི་ཤུགས་ཅན་ས་སྟེངས་ལྷུང་བར་གྱུར། །གླང་པོའི་དབང་པོའི་ཐབ་མོ་བྱས་པ་ཤུགས་ལྡན་
པ། །ཁྲོས་བྱས་འདུག་སྟེ་སྐད་ཅིག་ཙམ་གྱིས་གཡོ་མེད་མིག་ཅན་ནི། །ཕན་ཚུན་འཁྱུད་པའི་དབང་གིས་མཆེ་བ་ཅན་རྣམས་ལ། །ཤིན་ཏུ་གདོང་རྣམས་ལ་ནི་རྩེ་གསུམ་ནུབ་པར་གྱུར། །མདའ་དང་འཕེན་མདུང་དང་ནི་དགྲ་སྟས་ཟད་པ་ནི། །ཤིན་ཏུ་ལྕགས་ཀྱུ་རྣམས་ཀྱིས་བཀག་པར་གྱུར་པ་ཡང་། །
ཆུ་གཏེར་ཕྲེང་བ་རླུང་གིས་བརྡུངས་པ་ལྟ་བུ་ཡི། །གླང་པོ་རྣམས་ཀྱི་ཁྱུ་ནི་གཡུལ་ངོར་བྱེད་པར་གྱུར། །མདའ་ཡིས་ཡན་ལག་རྨས་པ་ཤིང་རྟ་ལས་ལྷུང་འདོད། །ཀུན་ནས་འཛག་པའི་ཁྲག་གིས་དམར་བའི་གོ་ཆ་ཅན། །རིམ་གྱིས་བརྒྱབ་པས་མིག་ནི་འཛུམས་པར་བྱེད་པ་ཡི། །ཁ་ལོ་སྒྱུར་བའི་ལག་ནས་
ལྕག་ནི་ལྟུང་བར་འགྱུར། །ཕུར་པ་རྣོན་པོས་མགོ་ལ་རྣམ་པར་འབིགས་པར་གྱུར། །གླང་པོའི་དབང་པོའི་དཔྲལ་སྒོ་རིམ་དང་རིམ་གྱིས་འདོད། །གཞུ་ལྡན་གྱིས་ནི་འོག་ཏུ་སོང་བར་འགྱུར་བའི་མདའ། །སོར་མོ་གློད་པར་ཁུ་ཚུར་ནས་ནི་གཞུ་ནི་ལྟུང་། །དགྲ་སྟ་དང་ནི་རལ་གྲིས་འཚོ་བའི་མགྲིན་
སྨྲས་པའི། །མཛེས་པ་དང་ནི་བྲལ་བ་ཅོད་པན་རྣམ་འཕྱང་བ། །མི་རྣམས་ཀྱི་ནི་ཀུན་ནས་ས་སྟེངས་ནས་ལྷུང་བའི། །ཤིན་ཏུ་ཤིང་རྟའི་ཡན་ལག་མགོ་བོ་རྣམས་ལ་ལྷུང་། །རྣམ་པར་འཕྱང་བ་སྲོག་ནི་མེད་པ་མདས་འབིགས་པ། །བརྟན་པའི་མགྲིན་ཐག་རྣམས་ཀྱིས་འགོག་པའི་རྐང་པ་ནི། །

ས་དབང་ཕྱུག་རྣམས་ཀུན་ནས་བསྐྱོད་པའི་དཔུང་པ་ཅན། །གླང་པོ་རྣམས་ཀྱི་རྣ་བར་ཕྲེང་བ་ཅན་དུ་གྱུར། །རྣམ་པར་འདའ་བར་གྱུར་པའི་རྒྱལ་མཚན་རྣམས་ཀྱིས་ནི། །བསྐྱོད་པའི་ཤིང་རྟའི་ཡན་ལག་ལྷུང་བའི་མཚོན་ཆས་ཁྱབ། །ཁ་ལོ་སྒྱུར་བས་བདག་པོ་གསོད་པའི་ཤིང་རྟ་
རྣམས། །གླང་པོ་རྣམས་ཀྱིས་ཀུན་ནས་བཅག་གྱུར་ཀུན་ནས་ལངས་པའི་སྒྲ། །ཤུགས་ཀྱིས་སྣ་བུག་དང་ནི་མིག་ནི་རབ་རྒྱས་པ། །ཀུན་ནས་ངལ་བའི་རྡུལ་གྱི་ཕགས་པ་བར་མཚམས་མེད། །མྱུར་དུ་འགྲོ་བ་རྣམས་ཀྱི་རྨིག་པས་བརྟན་པ་ཉིད། །ས་ཡི་སྟེང་དུ་ཁྲག་གིས་འགྲེས་པ་རྙེད་མི་འགྱུར། །
འགའ་ཞིག་ཏུ་ནི་ཐུན་མཚམས་སྤྲིན་ལྟར་ཁྲག་གིས་འབྲེལ། །འགའ་ཞིག་ལྷར་བཅས་ལྷར་ནི་གླང་དབང་རླུང་གིས་ནི། །འགའ་ཞིག་གློག་བཅས་ལྟར་ནི་ལག་རྣམས་གོ་ཆ་བཅས། །འཐབ་མོའི་ས་ནི་ནམ་མཁའ་བཞིན་དུ་རྣམ་མཛེས་གྱུར། །དེ་ནས་ཉི་མ་ལ་ནི་རི་རབ་ལྕོག་ནི་ཆེ་བར་གཏོང་
འདོད་པ། །འོད་ཟེར་རྣམས་ཀྱིས་རྒྱ་མཚོའི་ཆུ་རྣམས་ཀྱང་ནི་ཆུ་ལྷ་འདྲ་བར་བྱེད། །ཇི་ལྟར་ཡང་ནི་ཡང་དག་འདས་པ་གཡུལ་ངོར་ཆགས་པ་དོར་བྱས་ཏེ། །བསིལ་བའི་སར་ནི་མ་སོང་ངལ་བའི་གླང་པོ་རྟ་དང་འཐད་པར་ལྡན། །མུན་པའི་གོས་ཀྱིས་དཀྲིས་པར་བྱས་པའི་ཕྱོགས་ཀྱི་བུད་མེད་ཀྱི་
གདོང་དང་། །རབ་ཏུ་གསལ་བར་འབྱུང་བའི་སྐར་མའི་ཚོགས་དང་ལྡན་པས་ནམ་མཁའ་འདྲེས་པར་བྱས་པ་དང་། །རྣམ་པར་ཟུམ་པར་བྱས་པའི་དཔལ་དང་བྲལ་བ་པདྨའི་འབྱུང་གནས་བརྩམས་པའི་མཚན་མོའི་སྒོ་ལ་རང་གི་གནས་རྣམས་སུ་ཞུགས་ཏེ། འཁོར་གྱི་སྐྱེ་བོ་རྣམས་ཀྱི་ལག་པས་
འཛིན་པའི་མདའ་དང་འཕེན་མདུད་་དང་རལ་གྲི་རྣམས་ཀྱིས་སྨས་པའི་ལུས་མདའ་དང་། ཤིང་རྟ་དང་། གླང་པོ་རྣམས་ལས་ཡང་དག་པར་ཞུགས་པ་ནས། མར་མེའི་སྣང་བས་གསལ་བར་བྱས་པའི་ལུས་གཡུལ་ངོར་རྡུལ་གྱིས་ཀུན་ནས་འོད་མེད་པར་བྱས་པའི་མགོ་ལས་སྐྱེས་པ་གུས་པ་དང་བཅས་
པར་སྨན་པ་རྣམས་ཀྱིས་ཟུག་རྔུ་འདོན་པའི་སའི་བདག་པོ་རྣམས་དང་། རྐང་ཐང་རྣམས་རྨའི་སྡུག་བསྔལ་གྱིས་གཉིད་ཉེ་བར་འཕྲོག་པ་སླར་གཡུལ་ངོའི་རོལ་པས་སྐྱོ་བ་གཅིག་ཏུ་མངོན་པར་གསལ་བར་འདོད་པས་ཇི་ལྟར་ཡང་ནུས་པ་རི་དང་ཉེ་བར་རྙོག་པ་ཅན་གྱི་རི་བོང་གིས་མཚན་པའི་དཀྱིལ་

འཁོར་དེ་དང་ལྡན་པས། །ཀུན་ནས་རྙིང་བའི་ཀུ་མུ་ཏ་དང་ཀུན་ནས་སྐྱེ་བ་བར་ཆད་པའི་སྐར་མས་མཚན་པའི་ནམ་མཁའ་དང་ལྡན་པ་དང་། རྣམ་པར་རྒྱས་པར་གྱུར་པའི་ཐུན་མཚམས་ཀྱི་ཡོལ་བས་ཤར་ཕྱོགས་སྒྲིབ་པར་བྱས་པའི་མཚན་མོ་འདའ་བར་བྱས་ནས་ཐོ་རངས་ཀྱི་རྔ་དང་། དུང་གི་སྒྲ་རྣམས་མ་
བཟོད་པས་གཉིས་ཀའི་དམག་ཚོགས་ལས་བྱུང་བའི་མི་བཟོད་ཅིང་ཀུན་ནས་ལངས་ཏེ། རང་རང་གི་རྟ་དང་ཤིང་རྟ་རྐང་ཐང་དང་བཞོན་པ་རྣམས་ལ་ལྟ་ཞིང་འདུག་གོ། །དེ་ནས་རི་རབ་ཀྱི་རྒྱལ་པོ་ལ་དབེན་པའི་ས་ཕྱོགས་སུ་བློན་པོ་རྣམས་ཀྱིས་འདི་སྐད་ཅེས་གསོལ་ཏོ། །གཡེང་བ་མེད་པའི་ལྷས་རེ་
ཞིག་བདག་གིས་འདོད་པ་གསན་པ་འོངས་ཏེ། གལ་ཏེ་ལྷ་ལ་འདོད་པར་གྱུར་ན་དེ་ལྟར་བསྒྲུབ་པར་བྱའོ་ཞེས་ཟེར་རོ། །དེ་ལྟར་བྱའོ་ཞེས་བྱ་བ་ནི་རི་རབ་ཀྱིས་སོ་སོར་མཉན་པ་དང་། སླར་བློན་པོ་དེ་རྣམས་ཀྱིས་སྨྲས་པ། །རྒྱལ་པོ་རྡོ་རྗེའི་དབྱུག་པ་ནི། །ས་སྐྱོང་ས་སྟེ་ཁྱེད་ཀྱང་ནི། །ལྷག་པར་མི་
རྣམས་དང་ལྡན་པ། །སྟོབས་དང་བཞོན་པ་མཉམ་པ་སྟེ། །ཕན་ཚུན་མཉམ་པར་འཇིག་པའི་ཕྱིར། །ས་སྐྱོང་མཉམ་པ་ཉིད་དག་ལ། །འཐབ་མོ་མཉམ་པ་ཀུན་ལྟུང་བ། །མ་སྨིན་བུམ་པ་དག་བཞིན་དུ། །སྒྲུབ་ཕྱིར་མཐུན་པའི་ལེགས་པ་ནི། །མཁས་པ་རྣམས་ནི་ཀུན་ནས་སྨྲ། །དེ་ཉིད་ཐོག་
མར་བྱ་བ་སྟེ། །འདི་ལྟར་འདོད་པ་དགེ་བ་ཡིས། །ས་སྐྱོང་རྡོ་རྗེའི་དབྱུག་ལྡན་ཅིག། །བདག་ཅག་མཐུན་པ་ཉིད་དུ་འདོད། །ཕན་ཚུན་རྣམ་པར་འཇིག་པ་ནི། །འབྲས་བུ་ཅུང་ཟད་མཐོང་བ་མིན། །དེ་ལྟར་བློན་པོ་རྣམས་འདོད་པ། །རྒྱལ་པོས་གཞན་ཡང་དེར་སྦྱངས་ནས། །རྡོ་རྗེ་དབྱུག་དང་མཐུན་
འདོད་པས། །དེ་ལྟར་བྱ་ཞེས་ཁས་བླངས་གྱུར། །རྒྱལ་པོ་རྡོ་རྗེའི་དབྱུག་པས་ཀྱང་། །གསོད་ཅིང་གཅོད་པ་མཐོང་ནས་ནི། །རྐང་ཐང་རྟ་གླང་འཇིག་པ་ནི། །སྟོབས་ནི་སྟོབས་ཆུང་བྱུང་བར་གྱུར། །དེང་ནི་གཞོམ་པར་ནུས་མིན་ཏེ། །བཀྲེས་པས་ལྟོ་ནི་ཀུན་ཏུ་རིད། །གཞུ་འཛིན་པ་རྣམས་གཞུ་རྣམས་
ནི། །དཔུང་པའི་སྟོབས་འབྱུང་ཟད་པ་ནི། །གཞུ་ཡི་རིག་བྱེད་ཤེས་རྣམས་ལ། །ཁ་ཟས་བཅད་པ་རིད་པའི་ལས། །གཞུ་ནི་གཞུ་རྒྱུད་སྒྲ་ལྡན་པ། །དེ་རྣམས་ལ་ནི་ཐོས་མི་འགྱུར། །སྐབས་ཏེ་ཉུང་བའི་རྩྭ་ཟོས་པས། །སྟོབས་ཀྱི་ཕུན་སུམ་ཚོགས་བྲལ་བ། །ལྟོ་བ་དམའ་བ་འཇིག་འགྱུར་པའི། །

གླང་པོའི་སྨྱོན་ཆུ་གཅོད་པར་གྱུར། །ཀུན་ནས་སྟོབས་ཆུང་ཡན་ལག་གི །འོད་མའི་མཛེས་པ་འཛིན་བྱེད་ཅིང་། །རྟ་རྣམས་རིགས་དང་ལྡན་པ་ཡང་། །ནད་ཀྱི་ཞུགས་པ་ཟད་པར་གྱུར། །རིད་པ་རོལ་པའི་དེ་ཉིད་ཤེས། །རོལ་ཆ་རྣམས་ནི་བརྡུངས་མི་འགྱུར། །རྨ་བྱ་
རྣམས་ཀྱི་གར་རྣམས་ཀྱང་། །དྲེགས་པ་བསལ་བ་དྲན་པར་གྱུར། །རྨ་བྱའི་གར་ནི་བདེ་བ་སྐྱེད་པར་མི་བྱེད་དེ། །འཇམ་པའི་གླུ་ཡི་སྒྲ་ཡིས་ཡིད་ནི་འཕྲོག་མི་བྱེད། །ནགས་ཀྱི་མེ་ནི་བུད་ཤིང་མེད་པས་སྲབ་པར་གྱུར། །ཉི་མའི་ཕྱི་ནས་སྐྱེ་བོ་ལེ་ལོ་ཅན་དུ་གྱུར། །དེ་ནས་རྒྱལ་པོ་རྡོ་རྗེའི་དབྱུག་པ་ཅན་དམག་
ཚོགས་ཀྱི་ནུབ་པ་འགྲིབ་པར་གྱུར་པ་མཐོང་ནས་རི་རབ་དང་ལྷན་ཅིག་ཏུ་མཐུན་པ་ཉིད་ཡོངས་སུ་ཚོལ་བར་གྱུར་ཏོ། །དེ་ནས་རྒྱལ་པོ་དེ་གཉི་ག་དག་དང་ཕོ་ཉ་བཏང་ནས་དབུགས་འབྱུང་བ་སྐྱེས་ཏེ་མཐུན་པ་ཉིད་དུ་བྱས་པར་གྱུར་ཏེ། ཕན་ཚུན་ཡིད་འབྱུང་སྐྱེས་པ་ནི། །ས་བདག་དག་ནི་མཐུན་འདོད་པ། །
དུག་དག་ཚ་བ་ཉིད་ལ་ནི། །ཀུན་ནས་འབྲེལ་པ་ཉེ་བར་སྐྱེ། །དེ་ནས་རྒྱལ་པོ་རི་རབ་ཀྱིས་གུས་པ་དང་བཅས་པར་རང་གི་གྲོང་ཁྱེར་དུ་འོངས་ཏེ། རྡོ་རྗེའི་དབྱུག་པ་ཅན་ལ་ནོར་སྦྱིན་པ་ལ་སོགས་པའི་གུས་པས་གུས་པར་བྱས་ཏེ། ཉིན་ཞག་འགའ་ཞིག་འདས་པ་རྣམས་ལ་རྣམ་པར་ཕྱེ་བའི་འབྲས་བུ་ཅན་གྱི་མེ་
ཏོག་ལྟར་སྔོ་ཞིང་དཀར་བའི་གཟི་བརྗིད་དང་ལྡན་པ་དང་། ཆུ་འཛིན་རྣམས་ལས་རྣམ་པར་གྲོལ་ཞིང་ཁྱད་པར་དུ་རྣམ་པར་དག་པ་མ་ལུས་པའི་རི་བོང་ཅན་གྱི་དཀྱིལ་འཁོར་དང་རྗེས་སུ་མཐུན་པའི་གདོང་དང་ལྡན་པ་དང་། མྱ་ངན་མེད་པའི་འདབ་མ་ལྟར་རྐང་ལག་འཇམ་པ་དང་། ཤིན་ཏུ་དཀར་བ་མ་
ཡིན་པའི་མིག་གི་འབྲས་བུ་ཅན་དང་། བུང་བས་བསྲེས་པའི་མིག་གི་ཨུཏྤ་ལ་གྱི་འདབ་མའི་མཐའ་ཡས་ཀུན་ནས་བཟོད་པའི་རྣ་བ་དང་མཚོག་མ་དང་ལྡན་པ་དང་། ཁུ་བྱུག་གཞོན་ནུ་མའི་མགྲིན་པ་ལྟར་སྐྲ་ལོ་མངོན་པར་གནག་པ་དང་། ཤེལ་གྱི་དུམ་བུ་ལྟར་དང་བའི་སོའི་ནོར་བུའི་འོད་ཟེར་
རྣམས་ཀྱིས་མཆུ་སྣང་བར་བྱས་པ་དང་། པདྨ་ཁ་མ་ཕྱེ་བ་དང་། རྗེས་སུ་མཐུན་པའི་འོ་མ་འཛིན་པ་འབྱུང་བས་ཀུན་ནས་སྐྱ་བའི་བྲང་དང་ལྡན་པ་དང་། གསེར་དང་ཆུ་ཤིང་གི་སྙིང་པོའི་རྣམ་པ་ཡིད་འཕྲོག་པའི་བློ་དང་ལྡན་པ་དང་། རབ་ཏུ་སྲབ་པའི་རི་མོ་གསུམ་གྱི་རླབས་ཀྱིས་དབུས་ཀྱི་ཆ་དགའ་བར་

གྱུར་པ་དང་། མིག་བཙུམས་པས་མི་ཉིད་རྗེས་སུ་དཔག་པའི་བུ་མོ་རྒྱལ་པོ་དེ་ལ་བྱིན་པར་གྱུར་ཏོ། །དེ་ནས་ཚོང་པ་བསྐྱོད་པའི་བ་དན་ཆེན་པོ་ཅན། །ཀུན་ནས་རྟ་བབས་རྣམས་ལ་མེ་ཏོག་ཕྲེང་བཅིངས་པ། །ཀུན་ནས་མེ་ཏོག་རྣམས་ཀྱིས་མཆོད་པའི་ས་སྟེངས་ནི། །ཚང་བ་ཡིད་འོང་མཛེས་པ་འབྱུང་བ་
བྱས་པར་གྱུར། །འབད་པས་རྣ་བ་དག་ལ་ཨུཏྤལ་བརྩམས་པ་ནི། །སྲབ་པའི་སིན་དྷུ་ར་ཡི་ཁྱད་པར་གྱིས་མཚན་པ། །དྲི་མེད་མེ་ལོང་དང་ནི་ངེས་འབྲེལ་མིག་ལྡན་པ། །གར་མཁན་མོ་རྣམས་ཀྱི་ནི་གདོང་པ་འབྱུང་བར་གྱུར། །རྫ་རྔའི་སྒྲ་ཡིས་བར་ནི་གང་བ་བྱས་པར་གྱུར། །འཇམ་པའི་པི་
བང་སྒྲ་དང་གླུ་ཡི་སྒྲ་འདྲེས་པ། །ཁྱད་པར་དང་བཅས་རྒྱན་རྣམས་ཀྱིས་ནི་མངོན་དགའ་བ། །ས་སྐྱོང་བཙུན་མོའི་འཁོར་ནི་འདོད་པ་ཅན་དུ་གྱུར། །མེ་ཏོག་རྒྱུ་བས་བསོད་པའི་སོར་མོ་དང་ལྡན་པ། །བུད་མེད་སུ་ཞིག་འོག་ཏུ་ལྟ་བར་འདུག་པ་སྟེ། །རྣ་བའི་ཨུཏྤ་ལ་ཁ་ཕྱེ་རྣམ་པར་དོར་བ་ནི། །བུང་བ་
ལྷགས་པ་ཀུན་ནས་ཁྱབ་པའི་རྒྱ་ཆེན་མིག །གསེར་གྱི་ལྗོན་ཤིང་སྲབ་པས་ཡིད་འཕྲོག་ཡན་ལག་ཅན། །ལག་པ་འདར་བས་རྣམ་པར་འདར་བའི་དོ་ཤལ་ཅན། །ལག་གདུབ་རབ་ཏུ་བསྐྱོད་ཅིང་འགའ་ཞིག་འབིགས་པར་བྱེད། །གདེངས་ཅན་པགས་པ་ལྟར་དཀར་དུས་ལས་འབྱུང་བ་རྣམས། །
བསྐྱོད་པའི་དཔུང་པ་རྣམ་པར་འཕྱང་བའི་སྐྲ་ལོ་ཅན། །གཡོ་བའི་རྣ་བའི་རྒྱན་དང་དཔྲལ་འཕྱང་སྐྲ་ལྡན་པ། །གཞན་ལ་དྲི་ཞིམ་དྲི་རྣམས་འཐག་པར་བྱེད་པ་སྟེ། །བར་ཆད་རྡུལ་གྱི་ཐིགས་པས་མཚན་པའི་གདོང་ཟླ་ཅན། །རྒྱས་པ་འཕེལ་བ་ཤིན་ཏུ་དམར་བའི་འགྲམ་རྣམས་ཀྱིས། །བསྣམས་
པའི་དུས་མཚན་རི་བོང་ཅན་གྱི་དཔལ་མཆོག་ཅིང་། །བུད་མེད་གཞན་དག་སྒེག་དང་བཅས་པས་ཆང་དང་ནི། །སྦྲང་གི་ཆང་རྣམས་ཆགས་པའི་འབྲེལ་པ་འཐུང་བར་གྱུར། །དེ་ལྟར་བག་མའི་བྱ་བ་ཆེན་པོ་དེ་ལ་རོལ་ཆ་དང་ནི་གླུའི། །སྒྲས་ནི་རྨ་བྱ་དགའ་བར་བྱས་པ་གར་གྱི་རོལ་པས་མངོན་དགའ་ལ། །
རྣམ་པ་མང་བའི་བྱ་བ་ལ་ནི་གཡོག་འཁོར་གཡེང་བ་བྱེད་ལྡན་པ། །ལྷ་ཡི་གྲོང་ཁྱེར་བཞིན་དུ་དགའ་བའི་ཕོ་བྲང་རི་རབ་ཀྱི་ནི་བྱུང་བར་གྱུར། །དེ་ནས་གཞན་གྱི་ངོ་དང་བྲལ་བ་རང་གི་ཕོ་བྲང་ལྟར་གནས་ཏེ། ཆུ་བོ་གང་གཱས་བདག་པོར་བྱས་པའི་གྲོང་ཁྱེར་ལ། རྡོ་རྗེ་དབྱུག་པ་ཅན་སྙིང་རབ་ཏུ་དགའ་བས།

རི་རབ་ཀྱི་བུ་མོ་གཉེན་འདུན་དང་རྣམ་པར་བྲལ་བའི་མྱ་ངན་གྱི་ཟུག་རྔུས་མཆི་མའི་ཆུའི་ཐིགས་པ་འབབ་པར་བྱེད་ཅིང་བག་མའི་བྱ་བ་བྱས་པ་བླངས་ཏེ། འོ་མའི་རྒྱ་མཚོའི་དབུ་བ་ལྟར་དཀར་བའི་ཁ་བ་དང་ལྡན་པ་དང་། བསིལ་བའི་རི་བོང་ཅན་གྱི་འོད་ཟེར་ཅན་གྱི་ཚོགས་བཞིན་དུ་
སྤུངས་པར་བྱས་པ་དང་། རྩེ་མོ་ཆེ་བ་ལས་ཀུན་ནས་འབབ་པའི་ཆུ་འཛིན་པ་དང་། རླུང་གིས་རྣམ་པར་འདར་བའི་ཤིང་འདྲ་བ་དང་། །གྲོག་དང་། ཐང་ཤིང་དང་། རི་རབ་མ་ཡིན་པ་ལྟ་བུའི་ཤིང་རྣམས་ཀྱང་ནགས་ཀྱི་རི་སུལ་བར་སྔོ་བ་དང་། དམག་ཚོགས་ཀྱིས་ཀུན་ནས་སྐྲག་པར་རབ་ཏུ་འགྲོ་
བའི་གཡག་གི་ཚོགས་ཀྱི་རྨིག་པས་མཚོན་པའི་ཕྱོགས་གཅིག་དང་ལྡན་པ་དང་། ཤིན་ཏུ་རྒྱ་ཆེ་བ་དང་། མཐོ་བ་དང་། མིའམ་ཅི་དང་། རིག་པ་འཛིན་པ་རྣམས་ཀྱི་བུད་མེད་ཀྱི་སྐྱེ་བོ་ཞུགས་པས་ལམ་གསུམ་ནས་འགྲོ་བའི་ཆུ་ཀུན་ནས་འཁྲུགས་པའི་ཁ་བ་དང་ལྡན་པའི་རི་རྒལ་ནས། རིམ་
གྱིས་སྐྱོ་བ་མེད་པར་དམག་ཁྲིད་ཅིང་དུས་འགའ་ཞིག་འདས་པ་ལས། །ཤིན་ཏུ་རི་ཡི་ཆུ་རྣམས་ཀྱིས་ནི་དྲི་ཞིམ་པ་ལྡན་མེ་ཏོག་ཉེར་སྤྱོད་བྱིན་པ་ནི། །བ་དན་ཕྲེང་བ་རླུང་གིས་བསྒུལ་བར་བྱས་པ་རྣམས་ཀྱིས་ཚོང་དུས་ས་ནི་འདྲེས་པ་དང་། །མི་བསྐྱོད་དེ་རིང་ཡོངས་ཤེས་སྐྱེ་བོ་རབ་ཏུ་དགའ་བས་རྟ་བབས་
ཕྲེང་བ་བཅིངས་པ་ནི། །ལྷ་ཡི་བདག་པོ་བཞིན་དུ་ས་སྐྱོང་གྲོགས་པ་རང་གི་གྲོང་ཁྱེར་དུ་ནི་འོངས་པར་གྱུར། །འབྲས་བུའི་འདོད་པ་མ་ཉམས་པ། །དོན་བསྒྲུབ་ཕྱིར་ནི་རབ་གནས་པའི། །སྐྱེས་པའི་རང་ཡུལ་འོངས་པ་ནི། །དགའ་བ་ཆེན་པོ་བྱེད་པ་ཡིན། །དེ་ནས་དུས་གཅིག་གི་ཚེ་ན་བཙུན་མོ་རི་རབ་
ཀྱི་བུ་མོ་ལ་འགྲོ་བ་མ་ལུས་པ་ལ་ཕན་པའི་ཕྱིར་བྱང་ཆུབ་སེམས་དཔའ་མངལ་དུ་སྐྱེས་པར་གྱུར་ཏེ། མངལ་རྣམ་པར་འཕེལ་བས་ཀུན་ནས་འགྲམ་པ་སྐྱ་བ་འོ་མ་འཛིན་པའི་སྔོག་མ་སྔོ་བར་འབྱུང་ཞིང་། ཤིན་ཏུ་ལྕི་བའི་མོའི་དབང་པོའི་ཁུར་བུས་འགྲོ་བར་མི་ནུས་པ་དེ་ལ་གྲོགས་མོའི་སྐྱེ་བོས་མངལ་གྱི་
མཚན་ཉིད་དྲིས་པར་གྱུར་ཏོ། །དེ་ནས་ཡང་དང་ཡང་དུ་རྗེས་སུ་སྦྱར་བར་གྱུར་པ་འདི་ལྟར་སྨྲས་པ། ས་ཡི་བདག་པོའི་རི་བོང་ཅན་ལྟར་དཀར་བས་མཚན་མའི་གདུགས། །གལ་ཏེ་བདག་ལ་ཁྱད་པར་ཡིད་ལ་མངོན་དགའ་འཛིན་གྱུར་ན། །བཙོན་གང་གནས་པའི་སྐྱེ་བོ་གལ་ཏེ་འདིར་ནི་གཏོང་གྱུར་ན། །

དེ་ཕྱིར་བདག་གི་ངག་གི་མཚན་ཉིད་འབྲས་བུ་དང་བཅས་འགྱུར། །དེ་ནས་རྒྱལ་པོ་དེ་བཙུན་མོ་ལ་མངལ་གྱི་མཚན་ཉིད་དེ་ཉེ་བར་ཐོས་ནས། །ཡིད་ངོ་མཚར་བ་དང་བཅས་པས་སུ་ཞིག་ཡང་འདི་མཐུ་ཆེན་པོ་དང་ལྡན་པ་བདག་གི་རིགས་ཀྱི་རྒྱུན་གྱི་རྒྱུ་མངལ་འདི་ལས་ཡང་དག་པར་སྐྱེས་པ་ཞེས་བྱ་བ་
རྣམ་པར་ངེས་ནས་རང་གི་ཡུལ་ནས་བཙོན་གཏོང་བར་བྱེད་པར་གྱུར་ཏོ། །དེ་ཡང་མུ་ཏིག་གི་དྲ་བས་མངོན་པར་བརྒྱན་པར་བྱེད་པའི་གསེར་གྱི་ཡུ་བ་ཅན་འཛིན་པ་ཉིད་བཙུན་མོའི་མགོའི་སྟེང་དུ་གནས་པའི་གདུགས་མཐོང་ནས་མཆོག་ཏུ་ངོ་མཚར་བར་སོང་བར་གྱུར་ཏེ། །དེ་ནས་ས་སྐྱོང་སྲས་ནི་ཡིད་འོང་དེར་
ནི་སྐྱེས་པ་ལ། །གཏེར་དང་འདྲ་བར་འོད་ཟེར་འདྲ་བས་ཀུན་ནས་འཕྲོ་བར་བྱེད། །གྲོང་ཁྱེར་དེ་ནི་ཀུན་ནས་མཛེས་པ་མཆོག་ནི་སོང་བ་སྟེ། །ནམ་མཁར་དང་བའི་འོད་ཅན་བསིལ་བའི་འོད་ཟེར་ཤར་བ་བཞིན། །བདག་ཉིད་ཆེན་པོ་དེ་ཡང་མཚན་ཉིད་ཐམས་ཅད་དང་ལྡན་པ། རིམ་གྱིས་
ལང་ཚོའི་མཛེས་པས་འོད་ཀྱི་མཛེས་པ་ཉེ་བར་བསགས་གྱུར་པ། །བསྟན་བཅོས་ཐམས་ཅད་ཀྱི་ནང་དུ་བློ་སོང་བ་བློ་དང་ལྡན་པ་རྣམས་ཀྱི་མདུན་དུ་སོང་བ་གཟུགས་དང་ལྡན་པའི་བཟོད་པས་ཡིད་འཐད་པ་དང་འདྲ་བ། གཉེན་ལྟར་འཇིག་རྟེན་དུ་བྱུང་བར་གྱུར་ཏོ། །སྐྱེ་བོས་ཤིན་ཏུ་ལྕི་བའི་མངའ་
བདག་ཉིད་མེད་པར། །ཤིན་ཏུ་གཞན་ལས་རྔན་ཅན་བཟོད་པར་འགྱུར་བ་སྟེ། །མངའ་བདག་ཉིད་ནི་ཡིད་ཀྱང་བརྟན་པའི་ཡིད་ཅན་ཏེ། །ཉེས་པ་བྱས་པའི་སྐྱེ་བོ་དེ་ཡང་དེ་བཟོད་འགྱུར། །ཡང་དག་མིན་པའི་རྣམ་རྟོག་རི་བོ་དབུས་སོང་བ། །ཡོན་ཏན་ཞིང་ནི་ཆེན་པོ་རྣམས་ལ་རྣམ་གཅོད་པ། །
དེ་ཡིས་ཁྲོ་བ་མཆེ་བ་གཉིས་པ་གནས་མིན་ཏེ། །ཡིད་ཀྱིས་བཟོད་པ་གཉའ་རལ་ཅན་ནི་ཡོངས་སུ་འཛིན། །རྒྱུ་དང་མི་རྒྱུ་བཅས་པའི་འགྲོ་བ་སྣང་བྱེད་ཅིང་། །རྣམ་དག་ཁྲོ་བ་མུན་པ་ཆེན་པོ་འབིགས་བྱེད་པ། །དེ་ནས་བྱང་ཆུབ་སེམས་དཔའ་དེ་ནི་མཚན་མོ་བྱུང་། །ཤིན་ཏུ་བཟོད་པའི་ཟླ་ཚེས་རྣམ་པར་
མཛེས་པར་གྱུར། །དེ་ནས་མི་སྐྱོང་རྒས་པས་དབང་པོ་ཉེར་གདུངས་པ། །ཡུལ་གྱི་བདེ་བ་ལས་ནི་འདོད་པ་ལོག་པ་ནི། །ཐོས་པའི་ངང་ཚུལ་ཚུལ་ལ་མཁས་པའི་སྲས་དེ་ནི། །དབང་བསྐུར་བྱས་ནས་ལྷ་ཡི་གནས་སུ་སོང་བར་གྱུར། །བྱང་ཆུབ་སེམས་དཔས་ཀྱང་ཡབ་ལས་ཀུན་ནས་འོངས་པའི་ཆོས་

ཀྱི་རྒྱལ་སྲིད་རྗེས་སུ་བསྟན་ཅིང་འདི་ལྟར་བསམས་པར་གྱུར་ཏོ། །བདག་གི་ཕོ་བྲང་ན་ལྷའི་ཁ་ཟས་དང་། གོས་དང་། རྒྱན་ཆ་རྣམས་ཅི་ཞིག་ཅེས་བྱ་བ་འབྱུང་བར་གྱུར་ཅིག་ཅེས་བསམས་པ་དང་། དེའི་མོད་ལ་དེའི་མངོན་པར་འདོད་པ་ཐམས་ཅད་དུ་བྱུང་བར་གྱུར་ཏོ། །
མཛའ་བོ་རྣམས་ལ་ཡང་སྡོམ་ཆངས་གུས་པས་དགའ་བར་གྱུར་ཏེ། དེ་བས་ན་དགའ་བའི་སྡོམ་ཆངས་ཞེས་བྱ་བ་ཉིད་དེ་དང་རྗེས་སུ་མཐུན་པའི་མིང་འཇིག་རྟེན་ལ་གྲགས་པར་གྱུར་ཏོ། །དེའི་མཐུས་ཀྱང་རྔ་སྒྲའི་བརྒྱུད་པ་དེའི་ཡུལ་ན་གནས་པ་རྣམས་ཀྱི་ཁྱིམ་དང་ཁྱིམ་ན་མངོན་པར་འདོད་པའི་
ལྷའི་ལོངས་སྤྱོད་རྣམས་འབྱུང་བར་འགྱུར་ཞིང་། དེ་ནས་བློ་གྲོས་ངན་པ་ཞེས་བྱ་བའི་བློན་པོ་ངན་པ་རང་བཞིན་གྱིས་ཡིད་རྩུབ་པ་ཉིད་ཀྱིས་འདི་ལྟར་བསམས་པར་གྱུར་ཏོ། །ཇི་ལྟར་དགའ་བའི་སྡོམ་ཆངས་འདིའི་ཐབས་ཀྱིས་གཤིན་རྗེའི་ཁྱིམ་དུ་ཁྱེར་བར་བྱ་ཞེས་སྨྲས་ཏེ། དེ་ནས་སྐྱེ་བོ་འདི་བདག་
ལ་དབང་དུ་སོང་བར་འབྱུང་བར་འགྱུར་ཞེས་ཟེར་རོ། །བསམ་དང་སྨྲ་བའི་ལས་རྣམས་ནི། །གང་གིས་རང་གཞན་ཉམས་པའི་ཕྱིར། །དུག་ཅན་སྦྲུལ་ལྟར་ཁྲོས་པ་དེ། །བྱིས་པ་རི་བོར་དོར་བར་བྱ། །དེ་ནས་གདུག་པའི་བདག་ཉིད་བློ་གྲོས་ངན་པས་རྒྱལ་པོ་རི་རབ་ལ་ཡིག་ཕྲིན་འདི་ལྟར་གཏོང་
བར་གྱུར་ཏེ། །དགའ་བའི་སྡོམ་ཆངས་འདི་ནི་ཁྱེད་ཀྱི་དགྲའི་སྲས་ཏེ། དེ་བས་ན་འདི་ནི་ཐབས་སམ་རྣམ་པར་གནོན་པར་ངེས་པར་བསད་ནས་འཛམ་བུ་གླིང་ཐམས་ཅད་དུ་ལྷས་བདག་པོ་ཉིད་བྱེད་པར་གྱུར་ཏོ། །བདག་ཀྱང་ལྷའི་ཞབས་ཀྱི་དྲུང་ཉིད་དུ་སོང་བར་འགྱུར་ཞེས་ཟེར་རོ། །དེ་ནས་གདུག་
པ་ཅན་གྱི་བློན་པོས་རབ་ཏུ་སྤྲོ་བ་བསྐྱེད་པའི་རྒྱལ་པོ་རི་རབ་དགའ་བའི་སྡོམ་ཆངས་ཅན་ལ་ཕོ་ཉ་བཏང་བར་གྱུར་ཏེ། ཕོ་ཉ་ཡང་དགའ་བའི་ཆང་བ་ཅན་དུ་ཉེ་བར་འོངས་ཏེ། རི་རབ་ཀྱི་ཕྲིན་འདི་ལྟར་མངོན་པར་སྨྲ་བར་གྱུར་ཏོ། །ཁྱེད་ཀྱི་ཡབ་ཀྱིས་འོངས་ཏེ་བདག་གི་སྐྱེ་བོ་འདི། །ནོར་ནི་འཕྲོག་
པར་སྡུག་བསྔལ་ཅན་བྱས་ཏེ། །བདག་གི་སྟོབས་ནི་ཆེན་པོ་རྣམས་ཀྱི་ད་ལྟར་ནི། །ཁྱེད་ཀྱིས་ཀྱང་ནི་འདི་ལྟར་གནོད་པ་བཟོད་པར་གྱིས། །དེ་ནས་དགའ་བའི་སྡོམ་ཆངས་ཅན་གྱིས་ཕོ་ཉའི་ཚིག་ཉེ་བར་ཐོས་ནས། །གལ་ཏེ་རྒྱལ་པོ་རི་རབ་འདིར་འོངས་པར་གྱུར་ན་དེ་ནས་ཁོ་བོ་ཅག་གི་སྐྱེ་བོའི་

ཚོགས་འདི་དེའི་མཆེ་བ་གཉིས་པ་རྣམས་ཀྱིས་ཀུན་གཅོག་བཞིན་པའི་སྐྱེད་མོས་ཚལ་དང་། སྐྱེས་བུ་དྲག་པོ་རྣམས་ཀྱིས་རང་གི་ནོར་ཕྲོག་པ་འཐབ་མོའི་དུས་སུ་ཡང་མཚོན་ཆ་རྣོན་པོ་རྣམས་ཀྱིས་མི་དང་གླང་པོ་ཆེ་དང་། རྟ་མང་བ་རྣམ་པར་ལྷུང་བཞིན་པའི་སྡུག་བསྔལ་ཆེན་པོར་འགྲོ་བར་འགྱུར་
རོ། །དེ་བས་ན་འདི་འདིར་ཐོབ་པ་ཞེས་བྱ་བ་ངེས་པར་ཕོ་ཉ་དེ་ལ་སྨྲས་པ། །བྱིས་པ་བདག་གིས་བླ་མ་དེ་རྣམས་མངོན་པར་འགྲོ་བར་བྱ་བ་སྟེ། དེ་བས་ན་བདག་ཉིད་ཀྱིས་འོང་བར་བགྱི་ཞེས་བྱ་བ་ཞུ་བར་མཛོད་ཅིག །དེ་ལྟར་བྱའོ་ཞེས་བྱ་བ་དེ་ཡང་སོ་སོར་ཐོས་ཏེ། ཕོ་ཉ་དེ་འོངས་ནས་རྒྱལ་པོ་རི་རབ་ལ་
དགའ་བའི་སྡོམ་ཆངས་ཅན་གྱི་ཕྲིན་སྨྲས་པར་གྱུར་ཏོ། །དེ་ནས་བྱང་ཆུབ་སེམས་དཔའ་འཇིག་པའི་དུས་ཀྱི་རླུང་གི་སྟོབས་ཀྱིས་རྣམ་པར་འཁྲུག་པར་བྱས་པའི་ཆུའི་གཏེར་ལྟར་བརྟན་པའི་སྒྲས་མཆེ་བ་གཉིས་པའི་སྨྱོན་ཆུས་བསྒོས་པའི་ཕྱོགས་གཞན་དང་ཉིན་མོར་བྱེད་པའི་འོད་ཟེར་རྣམས་ཀྱིས་སྤྲོས་
པའི་གོ་ཆ་དང་འཕེན་མདུང་གི་རྩེ་མོའི་འོད་ཟེར་དང་ལྡན་པ་དང་། རླུང་གིས་བསྐྱོད་པའི་རྒྱལ་མཚན་དང་། བ་དན་རྣམས་ཀྱིས་རྣམ་པ་སྣ་ཚོགས་པའི་སྟོབས་ཀྱི་ཚོགས་ཆེན་པོས་ཡོངས་སུ་བསྐོར་བ་ལམ་གསུམ་འགྲོ་བའི་འགྲམ་དུ་ལྷག་པར་གནས་ཤིང་བློ་གྲོས་ངན་པ་ལ་འདི་སྐད་སྨྲས་པར་
གྱུར་ཏོ། །སོང་ལ་བདག་གི་མེས་པོ་ལ་ཞུ་བ་གྱིས་ཤིག་ཅེས་ཟེར་རོ། །བླ་མ་བས་ཀྱང་ཤིན་ཏུ་བླ། །མཉེས་གཤིན་ངོ་བོ་གཉེན་དང་ནི། །རང་བཞིན་དག་པ་དག་ལ་ནི། །ཁྱེད་དང་ལྷན་ཅིག་ཅེས་མི་མཐུན། །དེ་ནས་གདུག་པའི་བདག་ཉིད་བློ་གྲོས་ངན་པ་དེ་ཡོངས་ནས་བསྒོ་བ་ཞུས་པའི་
ཞུགས་པ་རྗེས་སུ་གནང་བ་སྟན་ཡོངས་སུ་འཛིན་པར་བྱས་པ་དབེན་པར་རྒྱལ་པོ་རི་རབ་ལ་མི་བདེན་པའི་ཚིག་རྣམས་ཀྱིས་སྦྱོར་ཞིང་འདུག་གོ། །རྒྱལ་པོ་ཆེན་པོ་དགའ་བའི་སྡོམ་ཆངས་ཀྱི་ཕྲིན་གསོན་ཅིག་ཅེས་ཟེར་རོ། །བདག་ནི་རྩེ་གཅིག་པ་ཞེས་བྱ་བ་རྒྱལ་པོ་རི་རབ་ཀྱིས་སྨྲས་པ་ལ་བློ་གྲོས་ངན་
པས་སྨྲས་པ། འཇིག་པ་ལ་མངོན་པར་ཕྱོགས་པའི་བློ་ཅན་བདག་ཉིད་མི་ཤེས་པ་དགའ་བའི་སྡོམ་ཆངས་ལྷ་ལ་འདི་ལྟར་མངོན་པར་སྨྲ་བ་སྟེ། ཅི་ལྟར་ཞེ་ན། གཉའ་རལ་ཅན་བཞིན་ང་རྒྱལ་མཐོ་བ་དག་ལ་ནི། །གློ་བུར་གང་གཱའི་འགྲམ་དུ་ཀུན་ནས་འོངས་པ་ལ། །ཕྱོགས་རྣམས་ཉེ་བར་མཐོང་སྟེ་

འཕྲོ་བའི་ལུས་ཅན་ནི། །རི་དགས་འཇིགས་པ་བཞིན་དུ་ཁྱོད་ནི་ཅི་ཕྱིར་གནས། །འདི་ལྟར་བདག་ལ་དགའ་བའི་སྡོམ་ཆངས་པས་ང་རྒྱལ་དང་བཅས་པས་ཇི་ལྟར་ཕྲིན་བྱས་པ་དེའི་ཕྱིར་ཤིན་ཏུ་རྒྱལ་པོ་རི་རབ་ལ་ཁྲོ་བའི་སྲེག་ལུགས་འཛིན་པ་ཡིད་ལ་འབར་བར་གྱུར་ཏོ། །རྒྱལ་པོ་
རི་རབ་ཀྱང་ཁྲོས་པ་མཐོང་ནས་སླར་བློ་གྲོས་ངན་པས་སྨྲས་པ། ལྷ་ལགས་དགའ་བའི་སྡོམ་ཆངས་ཅན་ཁྱེད་ལ་གནོད་པ་ཆུང་བ་ཡང་བྱེད་པར་ནུས་པ་མ་ཡིན་ཏེ། ཅིའི་ཕྱིར་ཞེ་ན། སྟོབས་དང་ལྡན་ལ་དུས་མེད་པར་ནི་མངོན་སོང་ཞིང་། །སྟོབས་ཆུང་ངེས་པར་རྣམ་པར་འཇིག་པར་འགྲོ་བ་སྟེ། །བུད་
ཤིང་གིས་སྦར་འོད་ནི་འཕྲོ་བ་འདུལ་བ་ཡི། །རྒྱལ་མཚན་ལ་ནི་བདག་ཉིད་གསད་ཕྱིར་དཔེ་ཆག་ལྟུང་། །དེ་ནས་རྒྱལ་པོ་རི་རབ་གླང་པོ་ཆེ་དང་། རྟ་དང་། ཤིང་རྟ་དང་། རྐང་ཐང་གི་ཚོགས་གོ་ཆ་དང་བཅས་པས་ཡོངས་སུ་བསྐོར་བ་འཐབ་མོ་མངོན་པར་འདོད་པ་དགའ་བའི་སྡོམ་ཆངས་ཅན་གྱི་
དམག་ཚོགས་དང་ཉེ་བར་གནས་པར་གྱུར་ཏོ། །དགའ་བའི་སྡོམ་ཆངས་ཅན་ཡང་བསྐུལ་བ་རྣམས་འཕངས་པས་ཤུགས་བསྐྱེད་པ་ལྷའི་གཞལ་ཡས་ཁང་དང་རྗེས་སུ་འདྲ་བའི་གྲུ་ཆེན་པོ་ལ་ལྷག་པར་གནས་ནས། ཉེ་བར་གླུ་ལེན་བཞིན་པའི་མཐུན་པའི་སྐྱེས་བུ་རྣམས་ཀྱིས་ཡོངས་སུ་བསྐོར་བ་གང་གཱའི་
ཆུ་ལ་རྩེ་བ་ཉམས་སུ་མྱོང་ཞིང་ཞུགས་ནས་ཁྲུས་བྱས་ཏེ། རྗེས་སུ་བྱུག་པ་བཟའ་བའི་དུས་སུ་རྔ་སྒྲ་བྱས་པར་གྱུར་ཏེ། །དེ་ནས་རྔ་ཡི་སྒྲ་དེས་ཕྱོགས་ཀྱི་སྒོ་རྣམས་ནི། །ཀུན་ནས་བཀང་སྟེ་རིང་པོར་རྣམ་པར་འགྲོ་བཞིན་པ། །གདུག་པའི་སྤྲིན་རྣམས་ཀྱིས་ནི་སྒྲ་དང་མཉམ་པ་ནི། །དོགས་
མེད་རི་རབ་ཀྱི་ནི་རྣ་བར་ཁྱབ་པར་གྱུར། །དེ་ནས་རྒྱལ་པོ་རི་རབ་འཁྲུགས་པ་དང་བཅས་པར་བློ་གྲོས་ངན་པ་ལ་སྨྲས་པ། ད་ལྟ་ནི་དགའ་བའི་སྡོམ་ཆངས་ཅན་འདི་ཅི་ཞིག་བྱེད་འདོད་པར་གྱུར་ཞེས་ཟེར་རོ། །བློ་གྲོས་ངན་པས་གསོལ་པ། །དགའ་བའི་སྡོམ་ཆངས་ཅན་ནི་ད་ལྟར་རྔའི་སྒྲས་ལྷའི་ཁ་ཟས་
དང་། བཏུང་བ་བསྐྱེད་ནས་ནང་འཁོར་གྱི་སྐྱེ་བོ་དང་ལྷན་ཅིག་བཟའ་བར་འདོད་པ་ཞེས་བྱ་བའོ། །རྒྱལ་པོ་རི་རབ་ཀྱིས་སྨྲས་པ། གང་གི་བསོད་ནམས་ཀྱི་མཐུ་འདི་ཞེས་བྱ་བ་ཅི་ལྟར་བདག་ཉེ་འཁོར་དང་བཅས་པའི་སྟེང་དུ་འབར་བའི་ཐོག་ཇི་ལྟར་ལྟུང་བར་བྱེད་པར་འགྱུར་ཞེས་ཟེར་རོ། །ངེས་པར་བདག་

ཅག་གི་ཚའུ་འདི་བཟོད་པ་དང་ཡོངས་སུ་དྲིས་པས་བདག་ལ་ཉེ་བར་དྲིས་པར་བྱེད་དོ། །དེའི་ཕྱིར་རྣམ་པ་ཐམས་ཅད་དུ། བློ་གྲོས་ངན་པ་འདི་ལྟར་ཞེས་བྱེད་ཀྱི། །གནས་ལ་དོན་དམ་བློ་ངན་གྲགས་པ་སྟེ། །གང་ཞིག་འདི་ལྟར་ཆེན་པོ་ས་དབང་དང་། །བདག་ལ་མི་མཐུན་པ་ནི་བྱེད་པ་ཡིན། །དེ་
ནས་དགའ་བའི་སྡོམ་ཆངས་ཅན་དོགས་པ་དང་བཅས་པར་སོང་བ་རྣམས་ལས་རྒྱལ་པོ་རི་རབ་ཉེ་བར་དམིགས་ནས་ཐབས་དང་བཅས་པར་འདི་ལ་བདག་གིས་རྗེས་སུ་གཟུང་བར་བགྱི་ཞེས་བྱ་བ་རྣམ་པར་བསམས་ནས། སྐྱེ་བོའི་གཏམ་འདི་ལྟར་ཡུལ་དེ་ལ་གསང་བའི་སྐྱེས་བུ་རྣམས་ཀྱིས་རབ་ཏུ་
སྒྲོག་པར་བྱེད་ཅིང་གནས་ཏེ། གལ་ཏེ་ཁྱེད་ནི་རྨོངས་པས་བདག་དང་ལྷན་ཅིག་མཐུན་མི་བྱེད། །དེ་ནས་བཟོད་པ་སྤངས་ཏེ་ཁྲོ་བ་དང་ནི་ངེས་འབྲེལ་བདག །མེ་འོད་རྣམས་ཀྱིས་སྣང་བར་བྱས་པའི་ཕྱོགས་ཀྱི་སྒོ་ཡི་མཐའ། །ཟབ་པའི་དབྱངས་ཅན་ཐོགས་འོངས་ནས་ནི་བདག་གིས་
ཁྱེད་ལ་འཕང་བར་བྱ། །དེ་ནས་རྒྱལ་པོ་རི་རབ་གཏམ་དེ་ལ་ཉེ་བར་དམིགས་ནས་དགའ་བའི་སྡོམ་ཆངས་ཅན་དང་ལྷན་ཅིག་ཏུ་མཐུན་པར་བྱས་པར་གྱུར་ཏེ། དགའ་བའི་ཆངས་པ་ཅན་ཡང་རྒྱལ་པོ་དེ་རང་གི་གནས་སུ་འོངས་ནས་ཆོ་ག་བཞིན་དུ་བཀུར་སྟི་བྱས་པར་གྱུར་ཏོ། །དེ་ནས་རྒྱལ་པོ་དེ་རི་རབ་
ཀྱིས་དགའ་བའི་སྡོམ་ཆངས་ཅན་ལ་འདི་ལྟར་རྣམ་པ་མང་པོས་རབ་ཏུ་བསྔགས་པར་བྱས་ཏེ། བུ་ལེགས་སོ་ལེགས་སོ། །དམ་པ་རྣམས་ནི་རང་གི་ཡོན་ཏན་གསང་བར་བྱེད། །བདེ་ལེགས་མདུན་དུ་བྱས་པ་ཁྲེལ་ནི་ཤེས་པ་རྣམས། །དེ་ལྟ་ན་ཡང་ཁྱེད་ནི་མདུན་དུ་བདག་གིས་བསྟོད། །ནན་གྱིས་
བདག་གི་ཡིད་ནི་རོ་ལྡན་ཉིད་ཀྱིས་ཕྲོགས། །ཁྱེད་ཀྱི་ཡོན་ཏན་ལམ་ལ་བརྟེན་ནས་བདག་གི་ནི། །ཕྲད་པར་འདོད་ཕྱིར་སྨྲ་བར་འདོད་པ་སོང་བ་ལ། །རྒྱས་པའི་ལྷན་ཅིག་བྱེད་པའི་སྙེ་མ་རྣམས་མཐོང་ནས། །ཇི་ལྟར་བུང་བ་མི་སྨྲ་བར་ནི་འདུག་པར་གྱུར། །ཨེ་མ་ཁྱོད་ཀྱི་ཡོན་ཏན་ལམ་ལ་བརྟེན་ནས་
བདག་གིས་ནི། །རྒྱ་མཚོའི་མཐར་ཐུག་ཕྱོགས་ཀྱི་བུད་མེད་རྣམས་ནི་བརྒྱན་པར་བྱེད། །ས་འདི་ཁྱེད་ཀྱི་གྲགས་པའི་གོས་ནི་འཛིན་པ་ནི། །རང་གི་དཔལ་གྱིས་མཐོ་རིས་ལ་ནི་དགོད་བྱེད་འདྲ། །ཆེན་པོ་ཉིད་དང་དཀར་བ་ཉིད་ཀྱིས་ཡང་དག་གནས། །འགྲོ་བ་གཞན་ནི་ཡོན་ཏན་འདས་ནས་ཁྱེད་ཡོན་ཏན། །

ཆུ་བོའི་རླབས་ནི་ཅུང་ཟད་མཐོང་བ་འདྲ་བ་ནི། །འོ་མའི་རྒྱ་མཚོའི་རླབས་ནི་ཀུན་ནས་དགོད་པ་སྟེ། །འགྲོ་བར་བྱེད་པའི་ལྟ་བའི་མུན་པ་འཇོམས་པར་བྱེད། །རང་གི་བློས་ནི་བློ་ཡི་ཀུ་མུ་ཏ་ནི་སད་བྱེད་པ། །དམ་པའི་ཆོས་ཀྱི་འོད་ཀྱི་དཀྱིལ་འཁོར་རྣམས་རྒྱས་པ། །ཁྱེད་ནི་
ཡེ་ཤེས་རང་བཞིན་མཚན་མོ་བྱེད་ལངས་པ། །ཁྱེད་ནི་མེད་པས་འབྱུང་བ་ཉིད་དུ་རློམ་པ་སྟེ། །བདུན་པ་མུན་པ་དང་ལྡན་ཉིད་ནི་འདུན་ས་མཁས། །ཁྱོད་ནི་ཡོན་ཏན་འོད་གསལ་གནས་པ་དེ་ཉིད་ནི། །མར་མེ་བཏང་བ་བཞིན་དུ་རྣམ་མཛེས་གྱུར། །རང་གི་མཛེས་པས་ཟླ་བའི་དཀྱིལ་འཁོར་ངོ་མཚར་
བྱས། །ས་ཀུན་པདྨའི་རྩ་ལྡན་རྣམ་པར་ཞུགས་བྱས་ནས། །ཕ་རོལ་མེད་པའི་ཕ་རོལ་འདི་ནི་ཡོངས་འཁོར་བའི། །ཁྱོད་ཀྱི་གྲགས་པ་ངང་པའི་ཚོགས་དང་འདྲ་བར་བྱེད། །ཉི་མ་དང་ནི་རི་བོང་འཛིན་པའི་འོད་ཟེར་ལྡན་མཐོང་ནས། །མེ་ཆུས་ཉི་མ་ཟླ་བའི་ནོར་བུ་དག་ནི་སྤྲུལ་བྱེད་པ། །རྒྱུ་ཡི་རིམ་པ་
མེད་པར་འབྲས་བུ་སྐྱེ་བ་མེད་པ་སྟེ། །ཁྱོད་ནི་འདི་གཉིས་དོར་ནས་གཞན་གྱི་དོན་ལ་འབད་པར་མཛད། །དེ་བས་ན་བདག་གི་དོན་དང་བཅས་པ་སྟེ་གང་གི་བདག་ལ་ལྷ་ལས་བྱུང་བའི་མཐུ་དང་ལྡན་པ་འདི་ལྟ་བུ་བུ་མོའི་བུ་སྐྱེས་སོ་ཞེས་ཟེར་རོ། །བྱང་ཆུབ་སེམས་དཔས་ཀྱང་རང་བཞིན་གྱིས་དྲག་པོའི་ཡིད་ཅན་བློ་
གྲོས་ངན་པ་ལ་ཡང་གདུག་པའི་བདག་ཉིད་དེ་བཟོད་པར་བྱས་པ་ཉིད་དེ། །དེ་ནས་རི་རབ་གུས་པ་ཆེན་པོས་གུས་པར་བྱས་ནས་ནི། །ཆོས་ལྡན་ལམ་ལ་སྐྱེ་བོ་དེ་ནི་བཅུག་ནས་བརྟན་པ་སྟེ། །རླུང་གིས་གདུངས་པའི་གྲོ་གའི་ཤིང་ཆེན་ཁ་བ་ཅན་གྱི་རི། །རྒལ་ནས་ཀུན་ད་ལྟར་དཀར་རང་གི་གྲོང་ཁྱེར་སོང་
བར་གྱུར། །དེ་ནས་བཅོམ་ལྡན་འདས་དེས་བྱང་ཆུབ་སེམས་དཔར་གྱུར་པ་ན་གནོད་པ་བྱས་པ་རྣམས་ལ་ཡང་བཟོད་པ་ལྷོད་པར་མ་མཛད་དོ་ཞེས་བྱ་བ་རྣམ་པར་བསམས་ནས་ཁྱེད་ཅག་རྣམས་ཀྱིས་བཟོད་པ་བསྒོམས་པས་བདག་ཉིད་དག་པར་བྱ་ཞེས་བྱ་བའོ། །དགའ་བའི་སྡོམ་ཆངས་ཅན་ཞེས་བྱ་བའི་སྐྱེས་
རབས་ཏེ་སྐྱེས་པའི་རབས་བརྒྱད་པའོ།། །།གང་ཞིག་བཟོད་པའི་འབྲས་བུ་ཤེས་པ་སྟེ། །འདོད་ཆགས་ལ་སོགས་ཞི་བ་རྗེས་འདོད་ཅིང་། །དགྲ་བོས་མཚོན་འདེབས་པ་ལ་བཟོད་པ་ནི། །བརྟན་པ་དེ་ཉིད་བྱེད་པར་འགྱུར་བ་ཡིན། །འདི་ལྟར་རྗེས་སུ་ཐོས་ཏེ། རྣམ་པ་སྣ་ཚོགས་

པའི་ཤིང་གི་མེ་ཏོག་རྣམས་ཀྱི་དྲིས་བསྒོས་པའི་ཕྱོགས་ཀྱི་བར་དང་། ཆུ་བོ་རི་འབའི་ཆུས་བཀྲུ་བར་བྱས་པ་རྒྱ་ཆེ་བའི་བར་ཅན་བྲག་གི་དཀྱིལ་དང་། རླུང་གིས་བསྐྱོད་པའི་འོད་མའི་ཚལ་གྱི་འདབ་མ་ཤོད་ཤོད་སྒྲའི་སྐྲག་པས་རི་དགས་ཀྱི་རྣ་བ་བསྐྱོད་པར་བྱས་པ་དང་། འགའ་ཞིག་ཏུ་མེ་རབ་ཏུ་སོང་བ་
ཉིད་ཀྱིས་བྱའི་ཚོགས་འཕུར་བ་དང་། འགའ་ཞིག་ཏུ་རྩེ་མོ་མཐོན་པོ་ལ་གནས་པའི་སྤྲིན་དཀར་པོའི་གྲིབ་མས་འོག་གི་ཆ་སྔོ་བར་བྱས་པ་དང་། འགའ་ཞིག་ཏུ་གླང་པོ་ཆེའི་ཚོགས་ཀྱིས་ཤིང་གཅོག་པར་བྱས་པའི་དྲིས་རི་སུལ་བར་མ་དྲི་ཞིམ་པར་བྱས་པ་དང་། འགའ་ཞིག་ཏུ་སྔོན་པོའི་བུད་མེད་ཀྱི་
སྐྱེ་བོས་ལྷུང་ཞིང་བར་ཆད་པ་རྨ་བྱའི་མདོངས་སྒྲོ་ཀུན་ནས་བཏུད་བཞིན་པ་དང་། ཟླ་བའི་འོད་ཟེར་གྱི་དྲི་མ་མེད་པའི་ཆུ་རབ་ཏུ་འཛག་པ་དང་། །གཞན་དུ་དཀའ་ཐུབ་པའི་བུ་མོའི་ཚོགས་ཀྱིས་བཟུང་བར་གྱུར་པའི་མེ་ཏོག་གི་ལྗོན་ཤིང་གི་མེ་ཏོག་རྣམས་ལ་ཀུན་ནས་འཁོར་བའི་བུང་བའི་ཚོགས་ཀྱིས་ཉེ་བར་གླུ་
བླངས་པ་དང་། ནེ་ཙོ་ལྟར་སྔོ་བའི་རྩྭས་སའི་སྟེང་དགའ་བར་བྱས་པའི་རི་བོ་འབིགས་བྱེད་ཀྱིས་འཛིན་ལ་སྟོན་ཀའི་ཆུ་འཛིན་གྱི་རྣམ་པ་དང་། ལུས་ཆེ་བ་ལྟོ་འཕྱེ་ལྷག་མའི་ལུས་དང་འདྲ་བའི་སྣ་དང་ལྡན་པ་དང་། པདྨ་ལྟར་དམར་བའི་སྣའི་ནང་དང་། མོན་ལུག་སར་པ་ལྟར་དྲི་ཞིམ་པའི་སྨྱོན་
ཆུའི་རི་མོས་མགྲིན་པ་སྔོ་བ་དང་། ལེགས་པར་གནས་པའི་སེན་མོ་དང་། རྐང་པ་ཅན་གསེར་དང་། དངུལ་གྱི་བུམ་པའི་རྣམ་པ་ཅན་གྱི་དཔྲལ་འབུར་ལྡན་པ་དང་། བཟོད་པའི་ལྕགས་ཀྱུས་ལམ་དུ་འགྲོ་བ་བཟློག་པར་བྱས་པ་དང་། ཡོན་ཏན་ཐམས་ཅད་ཀྱི་གནས་པ་དང་འདྲ་བ་བྱང་ཆུབ་སེམས་
དཔའ་སྤོས་ཀྱི་གླང་པོ་མཆེ་བ་དྲུག་པ་གླང་པོ་ཆེའི་ཚོགས་ཀྱི་བདག་པོ་བྱུང་བར་གྱུར་ཏོ། །ཟླ་བའི་འོད་ཟེར་ལྟར་དཀར་ཚོགས་ཀྱི་བདག་པོ་དེ་མཛེས་ཏེ། །མུ་ཏིག་གིས་ནི་ལྷག་པར་དཀར་བའི་སོ་ཅན་དཔྲལ་འབོར་ཆེ། །སྔོན་པོ་སྤུང་བར་བྱས་པ་གར་གྱི་དུས་སུ་ཕྱུགས་བདག་གི །རྒོད་པ་ཆེན་
པོ་མཚན་མོ་རྗེས་སུ་མཐུན་པར་འཕྲོག་བྱས་འདྲ། །རླུང་གིས་གདུངས་པའི་ཀུ་མུ་ཏ་རྣམས་ཡང་དག་སྤྲུལ་བྱེད་ཅིང་། །ཟེའུ་འབྲུའི་ཆ་ཡིས་ཀུན་ནས་སེར་བར་བྱས་པའི་གེ་སར་ཅན། །ཡལ་ག་ཅན་རྣམས་ཁ་ཡི་རིས་ལྟར་དཀར་བ་གླང་དབང་སྟེ། །གུས་པས་བུང་བའི་སྒྲ་ཡིས་མངོན་པར་སྟོད་

པར་བྱེད་པ་འདྲ། །ཡལ་ག་ཅན་རྣམས་མེ་ཏོག་རིང་ནས་སྤང་བྱས་ཏེ། །འདབ་མ་བསྐྱོད་པའི་པདྨ་རྣམས་ཀྱང་དེ་བཞིན་དུ། །དེ་ཡི་འགྲམ་པ་སྨྱོན་ཆུས་གོས་པར་བྱས་པ་ཡིན། །རིམ་གྱིས་དགའ་བ་བུང་བ་རྣམས་ནི་འོངས་པར་གྱུར། །བར་ནི་བྲལ་བ་ཚོ་བའི་འགྲམ་པས་
མཛེས་པ་ནི། །ཀུན་ནས་ཕྱོགས་ཀྱི་སྒོ་ཡི་བར་ནི་བསྒོས་བྱས་པ། །སྨྱོན་ཆུ་རིམ་གྱིས་འཐུང་ཞིང་ཚོགས་ནི་འཛིན་པ་དེས། །བུང་བ་རྣམས་ནི་རྣ་བའི་གཡོ་བས་ཟློག་མི་བྱེད། །ཡིད་འཕྲོག་རྒྱུན་ནི་མི་འཆད་པ། །རབ་མཆོག་སློང་མོ་པ་ལྟར་ནི། །རྐང་དྲུང་དེ་ལས་སྨྱོན་ཆུ་ནི། །སྦྱིན་བདག་ལྟར་
ནི་འཛིན་པར་གྱུར། །ཚོགས་ཀྱི་བདག་པོ་དེས་ཀྱང་རི་བོ་འབིགས་བྱེད་ལ་ཀུན་ནས་བརྟེན་པ་གསེར་གྱི་རི་བོ་ལས་ཀྱང་བདག་ཉིད་མངོན་པར་ལྷག་པར་སེམས་པར་གྱུར་ཏོ། །གླང་པོ་ཆེའི་ཚོགས་དེ་ཡང་དེས་ཡང་དག་པར་ཀུན་ནས་སྐྱོང་བར་བྱས་པ་དང་། རྒྱལ་པོ་དང་ལྡན་པ་འདྲ་བར་རྒྱལ་སྲིད་
འཕེལ་བར་གྱུར་ཏོ། །བཟང་མོ་དང་ནི་ཤིན་ཏུ་བཟང་། །དེ་ཡིས་སེམས་བཟང་རང་བཞིན་གྱིས། །བཟོད་མ་དགའ་བ་དགའ་མོ་ནི། །གླང་མོ་གཉིས་ནི་བྱུང་བར་གྱུར། །དེ་ནས་དུས་གཅིག་གི་ཚེ་ན་རླུང་གིས་བསྐྱོད་པའི་བ་དན་ལྟར་འཁྱོག་པ། གློག་གི་ཡལ་ག་ཀུན་ནས་འཕྲོས་པ་ལྟར་ཀུན་
ནས་ཕྱེ་བའི་རྒྱ་ཆེ་བའི་མིག་དང་ལྡན་པ་དང་། ཆུ་འཛིན་པས་ལྕི་བའི་ཆུ་འཛིན་པའི་འབྲུག་གི་སྒྲས་ཀུན་ནས་སྐྲག་པ་འདར་བའི་ཡན་ལག་དང་ལྡན་པ་དང་། སྲབ་པའི་དཔུང་པའི་ཡལ་ག་འཕངས་པས་ཀུན་ཏུ་མཐོང་ཞིང་ལྕི་བའི་འོ་མ་འཛིན་པ་དང་ལྡན་པ་དང་། རལ་གྲིའི་འོད་ཀྱིས་སྣང་བར་བྱས་
པའི་ལག་པ་གཡས་པ་དཔག་བསམ་གྱི་ཤིང་གི་རྣམ་རྟོག་སྣོམ་པའི་དགའ་པོ་དེ་ལ་འཁྱུད་པར་བྱེད་པ་དང་། རྣ་བའི་ཨུཏྤལ་ལྟུང་བ་དང་། ལྷོད་པའི་སྐྲ་ལོས་དཔུང་པའི་ཕྱོགས་བཀབ་པ་དང་རླུང་གིས་བསྐྱོད་པའི་སྟེང་གི་གོས་འཛིན་པར་བྱེད་པ་དང་། འཕྲོས་པའི་རྒྱན་གྱི་ནོར་བུ་རྣམས་ཀྱི་འོད་ཟེར་
གྱིས་ལུས་ཀྱི་སྲོག་ཤིང་སྣང་བར་བྱས་པ་དང་། ནམ་མཁའ་ལ་འགྲོ་བའི་རིག་པ་འཛིན་པ་ལ་ཟེའུ་འབྲུ་བཞིན་དུ་འཇམ་པའི་ལག་པ་ལས་པདྨ་ཆེན་པོ་སར་པ་དྲིས་ཕྱོགས་རྣམས་ཀྱི་བར་གྱི་དྲི་ཞིམ་པར་བྱས་པ་དང་བུང་བའི་ཚོགས་ཀྱིས་ཀུན་ནས་གླུ་བླངས་པ་དང་། གསེར་གྱི་ཁབ་དང་འདྲ་བ་གེ་

སར་དང་ལྡན་པ་དང་། ཤིང་རྟའི་འཁོར་ལོའི་ཚད་ཅན་བ་གླང་ལྟར་སེར་བའི་རོ་དང་ལྡན་པ་དང་། མཚོ་མ་ཕང་ལས་ཡང་དག་པར་བྱུང་བ་ཀུན་ནས་ལྷུང་བ་ནགས་ཀྱི་རི་དེ་ལ་གཅིག་པུར་གནས་པའི་གླང་པོའི་བདག་པོ་དེའི་མདུན་དུ་ལྷུང་བར་གྱུར་ཏོ། །པདྨ་དེ་ཡང་བླངས་ནས་དེས་འདི་ལྟར་བསམས་སོ། །
བཟང་མོ་དང་ཤིན་ཏུ་བཟང་མོ་བདག་གི་ཆུན་མ་ལས་གང་ཞིག་དང་པོ་འོངས་པར་གྱུར་པ་དེ་ལ་བདག་གི་བཀའ་དྲིན་སྦྱིན་པར་བྱའོ་ཞེས་ཟེར་ཏེ། ཀུན་ནས་འཁོར་བའི་བུང་བའི་ཚོགས་ཀྱིས་ནང་ཁྱབ་པ། །དྲི་ཞིམ་ཟེའུ་འབྲུས་རྣམ་པར་ཁྱབ་པའི་གེ་སར་ཅན། །འདི་ནི་དགོད་ཅིང་ཡིད་འོང་འདབ་མའི་
ཆོགས་ལྡན་པ། །དགའ་བས་པདྨ་ཆེན་པོ་རབ་ཏུ་སྦྱིན་པར་བགྱི། །དེ་ནས་ཤིན་ཏུ་བཟང་མོ་དང་པོར་འོངས་པ་ལ་གསེར་གྱི་རང་བཞིན་གྱི་ཆུ་སྐྱེས་དེའི་གླང་པོའི་བདག་པོ་དེས་བྱིན་པར་གྱུར་ཏོ། །དེས་ཀྱང་དེ་མནོས་ནས་གུས་པ་དང་བཅས་པར་མགོ་བོ་ལ་བཏགས་ཏེ་འདུག་གོ། །ཕྱིས་བཟང་མོ་ནི་ཀུན་
ནས་ཉེ་བར་འོངས་ནས་ཤིན་ཏུ་བཟང་མོའི་དཔྲལ་འབུར་གཉིས་ཀྱི་དབུས་ན་གནས་པའི་པདྨ་དེ་མཐོང་ནས་ངེས་པར་ཆུ་སྐྱེས་འདི་བདག་ལ་བརྙས་པར་བྱེད་ཅིང་ཆུན་མ་འདི་ལ་ཚོགས་ཀྱི་བདག་པོས་བྱིན་ནོ་སྙམ་དུ་བསམས་ནས། མཆོག་ཏུ་ཕྲག་དོག་སྐྱེས་པས་མཆེ་བ་གཉིས་ཀྱི་བདག་པོ་དེ་སྤངས་
ནས། །གཞན་གྱི་རྣམ་པར་གནས་པར་གྱུར་ཏོ། །དེས་ནི་གང་གི་ཞག་ལ་མཆེ་བ་གཉིས་པ་བྱིན་པས་མཐོང་། །དཀར་པོ་དྲི་ནི་ཞིམ་པ་པདྨ་ཁ་ཕྱེ་ཆུན་མ་ལས། །དེར་ནི་ཕྲག་དོག་གིས་ནི་ཀུན་བཟུང་རྩྭ་ནི་ཟ་མི་འགྱུར། །སྒོམ་པས་ཀྱང་ནི་གཟུགས་ནི་ཟོས་པས་ཆུ་ནི་འཐུང་མི་འགྱུར། །དམ་མིན་
རྣམ་རྟོག་དགང་ལུགས་ཀྱིས། །ཡིད་བཅས་སྐྱེ་བོ་སུ་ཞེས་བྱ། །ཕྲག་དོག་མེ་ལྕེ་འབར་བ་ཡིས། །བདག་ཉིད་བསྲེག་ཕྱིར་སུ་ཞེས་འཕེལ། །གང་ཞིག་ལམ་མིན་མི་འགྲོ་བ། །གང་གིས་ཕྲག་དོག་ལྟོ་འཕྱེ་མོ། །ཡིད་ཀྱི་ཁྱིམ་ལ་ལྷག་གནས་མིན། །རྟག་པ་དེ་རྣམས་བདེ་བར་ཉལ། །དེ་
ནས་བཟང་མོ་རི་བོ་འབིགས་བྱེད་ཀྱི་བྲག་གི་དབུས་ན་ཤིང་གི་གྲིབ་མས་བཀག་པར་སྐྱིལ་མོ་ཀྲུང་རྣམ་པར་བཅིངས་ཏེ། བསམ་གཏན་གྱི་གཡོ་བ་མེད་པའི་མིག་མྱོས་པའི་ཤང་ཤང་ཏེའུའི་མིག་ཀུན་ནས་བྲིས་པ་དང་འདྲ་བ། ཆོས་གོས་དམར་པོ་ཡན་ལག་ལ་གཡོགས་པའི་རང་སངས་རྒྱས་མཐོང་

ནས། མཚོ་ནས་ཀུ་མུ་ཏ་རྣམ་པར་བླངས་ནས་མཆོད་ཅིང་འདུག་གོ། །དེ་ནས་འཕངས་ནས་མངོན་པར་བཀག་པ་བསྒོམ་པས་ཉི་མ་དེ། །ཀུ་མུ་ཏ་ཡི་ཕྲེང་བ་དེ་རྣམས་ཀྱིས་ནི་ཐུབ་པ་མཛེས། །ཀུན་ནས་སྣང་བར་རིམ་མིན་འོད་ཟེར་སྣང་བའི་ཡན་ལག་ཅན། །ཐུན་མཚམས་
ཆུ་ནི་འཛིན་པ་ལྟར་ནི་སྟེང་དུ་སྐར་མ་ཡིས། །དེ་ནས་གླང་མོ་དེ་རི་བོ་འབིགས་བྱེད་ཀྱི་འགྲམ་དུ་གནས་ཏེ། རང་སངས་རྒྱས་མཆོད་པའི་དགེ་བའི་རྩ་བ་འདི་ལས་གང་ཞིག་འབྲས་བུ་འབྱུང་བ་དེས་བདག་སྤོས་ཀྱི་གླང་པོ་འདི་གསད་པའི་ཕྱིར། རྒྱལ་པོའི་བཙུན་མོར་གྱུར་ཅིག་སྙམ་དུ་རྣམ་པར་བསམས་
ནས་བདག་ཉིད་ལྕེབས་པར་གྱུར་ཏོ། །ལུས་ལྕི་བས་ཤིང་གི་ཡལ་ག་ཀུན་ནས་ཆག་པ་དེ་ལྷུང་བའི་སྒྲ་ཐོས་ནས། རྨ་བྱ་རྣམས་རབ་བསྐྱོད་པའི་མདོངས་སྒྲོ་ཅན་ནི་འཕུར་བ་སྟེ། །སྟག་ནི་རབ་ཏུ་ཉལ་ཞིང་ལྟ་བ་ཀུན་ནས་ཕྱེ་བར་གྱུར། །ཀུན་ནས་སྐྲག་པའི་རྩྭ་ཡི་བཟའ་བ་རྣམས་སྤངས་ནས། །རྣ་བ་གྱེན་
སོང་རི་དགས་ཚོགས་ནི་འཁྲུག་པར་བྱུང་བར་གྱུར། །དེ་ཡང་དུས་བྱས་ནས་རྒྱལ་པོ་གཞན་དག་ལ་སྐྱེ་བ་དྲན་པའི་བུ་མོ་བཙས་པར་གྱུར་ཏོ། །ཅུང་ཟད་སྐྱེས་བཞིན་པའི་ཁ་མ་བྱེ་དེ་རི་མོ་གསུམ་གྱི་རིམ་པའི་སྐས་ཀྱི་ཕྲེང་བ་ལ་ལྷག་པར་འཛེག་པས་ངལ་བ་སྐྱེས་པ་དང་འདྲ་བའི་ལང་ཚོ་སར་པའི་བཟོ་བོས་
འདོད་པ་དང་བཅས་པ་ལུས་ཀྱི་མཛེས་པ་ཉེ་བར་འཕེལ་བཞིན་པ། ངོ་ཚ་བ་དང་དགོད་པའི་རྩེ་བ་རབ་ཏུ་བརྩམས་པ། བུང་བའི་ཚོགས་ཀྱི་སྐྲ་ལོ་ལྗང་པ། གསེར་བཅད་པ་ལྟར་འོད་གསལ་བ། གཟུགས་དང་ལྡན་པའི་དཔལ་དང་འདྲ་བ་མིའི་བདག་པོ་སུ་ཞིག་ཉིད་ལ་བྱིན་པར་གྱུར་ཏོ། །དེས་ཀྱང་
རྒྱལ་པོ་དེ་ལ་གཞན་མ་ཡིན་པའི་བུད་མེད་དག་འདྲ་བའི་བུད་མེད་ཀྱི་ཡོན་ཏན་རྣམས་ཀྱིས་དབང་པོ་འཕྲོགས་པར་བྱས་ནས། དུས་གཅིག་གི་ཚེ་ན་ཙན་དན་གྱིས་རྗེས་སུ་བྱུགས་པའི་ཡན་ལག་ཅན་དབུགས་ཀྱིས་ཀུན་ནས་འཁུམས་པའི་མཆུ་གཉིས་དང་ལྡན་པ་བདག་ཉིད་འབར་བ་དང་འདྲ་བ་བསྟན་
ཞིང་འདུག་གོ། །གང་གི་ཚེ་སྨན་པ་རྣམས་ཀྱིས་གསོ་བཞིན་པ་ཡང་དེ་ལྟ་བུ་ཉིད་དུ་རིམ་གྱིས་གཡོ་བས་ཀུན་ནས་དཀྲིས་པར་གྱུར་པ་དེའི་ཚེ། དེའི་ཁྱོད་ཤིན་ཏུ་དགའ་བ་དང་བྲལ་བ་ཀུན་ནས་འོངས་པར་གྱུར་ཏོ། །དེས་ཀྱང་དེ་ལ་སྨྲས་པ། བདག་གི་རིམས་འདི་ཙན་དན་གྱི་མཆོག་གིས་ཀྱང་མ་ཡིན་ཏེ། །

སྤྲིན་ལས་བསིལ་བའི་རླུང་གིས་ཀྱང་ནི་མ་ཡིན་ཏེ། །ཞི་བར་འགྱུར་བ་མིན་ཏེ་ཤེལ་ལྟར་དྲི་མེད་པ། །མཚན་མོར་བྱེད་པའི་འོད་ཟེར་ཚོགས་ཀྱང་མ་ཡིན་ཏེ། །འབིགས་བྱེད་རི་ལ་མཆེ་གཉིས་ལྷག་རྒྱལ་ཡོད་པ་སྟེ། །ཆུ་གཏེར་དཀར་པོ་འདྲ་བ་རྩུབ་མིན་རྭ་ཅན་གྱི། །པདྨའི་རྩ་བ་ལྟར་དཀར་ཆེན་པོ་དེ་ཡི་ནི། །
སོ་རྣམས་ལ་ནི་ས་སྐྱོང་མུ་ཏིག་རྣམས་ནི་ཡོད། །བཏགས་པ་ཆུ་ཡི་ཐིགས་པ་ལྟར་ནི་དྲི་མ་མེད་པ་ཡི། །དེ་རྣམས་ཀྱིས་ནི་གལ་ཏེ་བདག་གི་ལུས་བྱུག་པ། །དེ་ཡི་བ་སོས་གལ་ཏེ་མལ་ཆ་བྱེད་གྱུར་ན། །དེ་ཚེ་རིམས་འདི་དེ་ནས་ཞི་བར་འགྱུར་བ་ཡིན། །དེ་ནས་རྒྱལ་པོ་དེ་ངེས་པར་བཙུན་མོ་འདི་སྐྱེ་བ་གཞན་
ལ་འབིགས་བྱེད་ཀྱི་ནགས་ལ་གནས་པ་སྤོས་ཀྱི་གླང་པོ་ཐོས་པའམ། །མཐོང་བ་ཞེས་བྱ་བ་ངེས་པར་སྐྱེས་ནས་རྔོན་པ་ལ་བོས་ཏེ་སྨྲས་པ། །རི་བོ་འབིགས་བྱེད་ལ་མཆེ་བ་དྲུག་པ་སྤོས་ཀྱི་གླང་པོ་ཆེ་ཡོད་དེ། །གལ་ཏེ་བ་སོ་རྣམས་བླངས་པར་གྱུར་ན། །དེ་ནས་བདག་ཁྱོད་ལ་ནོར་ཆེན་པོ་རྣམས་སྦྱར་
བར་བྱ་ཞེས་ཟེར་རོ། །རྔོན་པས་གསོལ་པ། གལ་ཏེ་ནུས་ན་དེ་ལྟར་བྱ་ཞེས་ཟེར་རོ། །བཙུན་མོས་སྨྲས་པ། ཇི་ལྟར་སྤོས་ཀྱི་གླང་པོ་འདི་དབུགས་དབྱུང་བར་འགྱུར་བ་ཞེས་བྱ་བ་དེའི་ཐབས་བདག་གིས་ཤེས་ཏེ། ཁ་བསྒྱུར་གོས་ནི་འཛིན་བྱེད་པ། །རབ་ཏུ་བྱུང་བ་ཞིག་མཐོང་ནས། །བློ་ལྡན་སློབ་
མ་བཟང་པོ་ལྟར། །བཏུད་ནས་གཉིས་འཐུང་མཆོད་པར་བྱེད། །ཁྱོད་ཀྱིས་ཁ་བསྒྱུར་གོས་དག་ནི། །དེ་བས་ཡང་དག་པར་གོན་ནས། །འདི་ནི་དུག་གིས་བྱུགས་པའི་མདས། །གནད་དུ་ཀུན་ནས་འབིགས་པར་གྱིས། །དེས་དེ་ལྟར་ཞེས་བྱ་བ་སོ་སོར་ཐོས་ནས་ཁ་བསྒྱུར་བའི་གོས་ཀྱིས་ཡན་
ལག་དཀྲིས་ཏེ་མདའ་དང་བཅས་པའི་གཞུ་བླངས་ནས་རི་བོ་འབིགས་བྱེད་ལ་སོང་བར་གྱུར་ཏོ། །དེ་ནས་རི་བོའི་ནགས་ཀྱི་ནང་དུ་དེའི་འཆག་པ་མཐོང་ནས་གླང་པོ་ཆེའི་ཚོགས་དེ་དོགས་པ་དང་བཅས་པ་གླང་པོ་ཆེའི་བདག་པོ་ལ་ཞུས་ཤིང་འདུག་གོ། །ཁ་བསྒྱུར་གོས་ཅན་སུ་ཞིག་ནི། །མེ་སྟག་བཞིན་དུ་སེར་
སྐྱའི་མིག །ལྕགས་ཀྱི་ཀ་བ་ལྟར་ནི་ལུས། །སེམས་ཅན་སྐྲག་བཞིན་པར་ནི་སྣང་། །བྱང་ཆུབ་སེམས་དཔས་སྨྲས་པ། ཁ་བསྒྱུར་བ་ཡི་གོས་ཅན་ལ། །དོགས་པ་བྱ་བ་མ་ཡིན་ཏེ། །ཁྱེད་རྣམས་ལྟ་བར་གྱིས་ཤིག་དང་། །ཁྲེལ་ཡོད་ཞི་བའི་ལམ་ནི་མཚོན་པར་བྱེད་པ་པོ། །ཐུབ་པ་རྣམས་

ཀྱིས་རྒྱལ་མཚན་དྲེགས་པ་གཅོད་པའི་རྒྱུ། །གལ་ཏེ་དམར་པོར་ཁ་བསྒྱུར་ལུས་ལ་བརྒྱན་བྱེད་པ། །གོས་ནི་སྐྱེ་བོ་རྣམས་ཀྱི་དབུགས་འབྱིན་རྒྱུ་མཚན་ནོ། །དེ་ནས་ཚོགས་དེ་དང་ཤིན་ཏུ་ཧ་ཅང་རིང་བ་མ་ཡིན་པར་གནས་པའི་རྔོན་པ་དེས་ཤིང་གིས་བདག་ཉིད་ལ་བསྒྲིབས་ཏེ།
གཞུ་བདུངས་ཤིང་གནས་ཏེ། དེ་ནི་པགས་པའི་སྙིང་པོའི་རང་བཞིན་ལ་ནི་ཀུན་ནས་འཛིན་བྱེད་ཅིང་། །གླང་པོའི་རྒྱལ་པོ་བསད་ཕྱིར་གཞུ་རྒྱུད་ལ་ནི་མདེའུ་རྣོན་མདའ། །ཤིང་རྣམས་ཀྱི་ནི་ཡལ་གའི་ལག་པ་ཟེའུ་འབྲུའི་སོར་མོ་རྣམས། །རླུང་གིས་བསྒུལ་བ་རྣམས་ཀྱིས་འབིགས་བྱེད་ལོག་པར་
བྱེད་པ་འདྲ། །སྨྱོན་ཆུས་བཙུམ་བྱས་པ་ཡི་མིག་ཅན་མཆེ་བར་སྣ་ནི་རྣམ་བཀོད་པ། །སྨྱོན་ཆུས་བསྒོས་པར་བྱས་པའི་འགྲམ་པ་ཤིང་ལས་སྤྲུག་པར་བྱེད་པ་ཅན། །དགེ་བའི་ལམ་ནི་ཤེས་པར་བྱེད་པ་གཉིས་འཐུང་དབང་པོ་མདའ་ཡིས་ནི། །རི་དགས་དགྲས་ནི་ཉེས་མགྲིན་ཐོབ་ནས་དཔྲལ་འབུར་
ལ་ནི་བརྒྱབ་པར་གྱུར། །དེ་ནས་གཞུ་ཡི་སྟེང་འོག་ཀུན་ནས་ལྷུང་བ་ནི། །མཆེ་གཉིས་ཚོགས་ཀྱིས་ཁྲོས་པས་རྗེས་སུ་འགྲོ་བཞིན་པ། །རི་དགས་དགྲ་ནི་གླང་པོའི་བདག་པོས་ཉེར་སྦས་པ། །བུ་ལྟར་ཀུན་ནས་ཚངས་པ་འཇིགས་པར་ཁྱབ་པ་ནི། །ཨེ་མ་དགྲ་འདི་གནོད་པ་བྱས་པ་གང་དུ་སྟེ། །མཆེ་
གཉིས་བདག་པོའི་སྙིང་རྗེ་འདི་འདྲ་འདི་གང་སྟེ། །ས་འཛིན་ནགས་ཀྱི་ནང་གི་ལྷ་མོ་རྣམས་ལ་ནི། །ངེས་པར་འདི་ལྟར་སེམས་ལ་ངོ་མཚེར་བྱུང་བར་གྱུར། །རྣོ་བའི་མདའ་ནི་ངེས་པར་འབིགས་པ་དེར་ནི་གླང་ཆེན་མགོན་པོ་ལ། །འཛག་པ་ཁྲག་གི་ཆ་ཡིས་མཚན་པའི་ཁ་ནི་ཅུང་ཟད་འདར་བྱེད་པ། །གླང་
པོའི་ཚོགས་དེ་ཤིང་རྣམས་ལ་ནི་དྲི་ནི་ཞིམ་པར་གྲོལ་བྱས་ཏེ། །མྱ་ངན་ལྕི་བ་བྲལ་བ་དང་ནི་འདབ་མ་རྣམས་ནི་ཕྱེད་ཟད་པ། །དེ་ནས་མདའ་དེ་བླངས་ནས་འདོན་པར་གྱུར་པ་སྟེ། །ཅུང་ཟད་མདུད་པའི་སྣ་ཡི་ནང་དུ་སྣ་ཡིས་ནི། །ནན་གྱིས་གླང་པོ་ཤིན་ཏུ་བཟང་མོས་གླང་པོ་ཆེའི། །ཁྲོ་བ་བཟོད་པ་ལྟར་ནི་
བདག་པོ་འདི་ནི་སུ་ཞིག་གིས། །སྡུག་བསྔལ་ལྡན་པ་གླང་པོའི་བདག་པོ་དེ་ཡི་ནི། །ནན་གྱིས་རྨ་ནི་ཁྲག་གི་ཆུ་ཡིས་བྱུག་བྱས་པ། །རྣམ་པར་ཆད་པའི་མུ་ཏིག་ཡོན་ཏན་འདྲ་བ་ཡིས། །དེ་ནི་བསིལ་བའི་ཆུ་ཡིས་བླངས་པར་བྱས་པར་གྱུར། །སྐོམ་པས་ཆུ་ནི་རྣམ་པར་འཛིན་པར་གྱུར་པ་ནི། །སྨྱོན་

ཆུས་བདག་ལ་སུ་ཞིག་དྲི་ཞིམ་བྱེད་པར་འགྱུར། །དེ་ལྟར་བསལ་བ་འཁོར་ལོའི་རླབས་ཀྱི་སྒྲ་ལྡན་པ། །ཤིན་ཏུ་ཟླ་སྐྱེས་མྱ་ངན་ལྟ་བུར་སྒྲ་དོན་གྱུར། །ཁྱེད་ལ་དེ་རིང་མདའ་ནི་འཕངས་པས་བྱུང་བ་ནི། །སྡུག་བསྔལ་གླང་པོ་དབང་པོ་བསྲབས་ཉིད་འགྱུར་བ་ཉིད། །དེ་ལྟར་འཁོར་བར་བྱེད་ཅིང་བསྐྱོད་པའི་
འགྲམ་དག་ལ། །རིམ་གྱིས་བུང་བའི་ཕྲེང་རྣམས་ཀྱིས་ནི་བྲིས་འདྲར་གྱུར། །རྣམ་འགྲོ་ཨ་ཀ་རུ་ནག་དུ་བས་འོད་མེད་པ། །རྣམ་པར་བསྐྱོད་པའི་གློག་གིས་དཀྲིས་པས་ལྟོ་བ་མཚན། །སྤྲིན་རྣམས་ཀྱི་ནི་དཔྲལ་ཚ་དྲོ་བའི་འོད་ཟེར་ནི། །དེ་ལ་བདེ་ཕྱིར་ལྷ་ཡི་དབང་པོས་ཀུན་བསྒྲིབས་གྱུར། །དང་བ་ཟླ་སྐྱེས་
ཆུ་དང་ཆགས་པས་བསིལ་བ་ནི། །རབ་ཏུ་རྒྱས་པའི་མེ་ཏོག་སྣ་ཚོགས་དྲིས་བསྒོས་པ། །གཉེན་ལྟར་གཉིས་འཐུང་བདག་པོ་ལ་ནི་ཀུན་འོངས་པ། །མདས་ནི་ཕིགས་པ་དེ་ལ་རླུང་ནི་གཡོབ་པར་གྱུར། །དེ་ནས་གླང་པོའི་དབང་པོས་གལ་ཏེ་རྣམ་པ་གང་གིས་ཀྱང་བདག་དུས་བྱེད་པར་འགྱུར་བ་དེ་ལས་ན་
གླང་པོ་ཆེའི་ཚོགས་འདི་ནི་མགོན་མེད་པར་འགྱུར་རོ་སྙམ་དུ་རྣམ་པར་བསམས་ནས་བདེན་པའི་བྱིན་གྱི་རླབས་འདི་ལྟར་བྱས་པར་གྱུར་ཏེ། ཇི་ལྟར་རི་དགས་ཤོར་འདི་ལ། །གནོད་བྱེད་ལ་ཡང་མཉེས་གཤིན་པ། །དེ་ལྟར་དེ་རིང་བདེན་པ་དེས། །བདག་གི་དུག་ནི་ཟད་གྱུར་ཅིག །དེ་ནས་བདེན་པའི་
བྱིན་གྱི་རླབས་ཀྱི་མཐུས་སྐད་ཅིག་དེ་ཉིད་ལ་གླང་པོའི་རྒྱལ་པོ་དེའི་མདས་བརྒྱབ་པའི་སྡུག་བསྔལ་ལས་ལྡོག་པ་བྱུང་བར་གྱུར་ཏོ། །དེ་ནས་དེ་ལྟར་གསོན་པར་གྱུར་པ་མཐོང་ནས་རྔོན་པ་དེས་བཏུད་ནས་རྒྱལ་པོའི་བཙུན་མོའི་གཏམ་དེ་བརྗོད་ཅིང་སྨྲས་པ། གླང་པོའི་མགོན་པོ་གསོད་དོན་དུ། །དྲག་པོའི་
མདའ་ཡིས་དྲག་པོའི་ཡིད། །ཞེ་སྡང་འཇོམས་པ་ཁྱེད་ལ་བརྡེགས། །སྣོད་མ་ཡིན་ལ་བདག་གིས་ནི། །དེ་ལྟར་རྔོན་པ་དེ་ཡི་ཚིག། །ཐོས་ནས་མཆེ་གཉིས་བདག་པོས་ནི། །མཆེ་བ་ཀུན་ནས་བཏོན་པ་སྟེ། །ལག་པས་བཟུང་ནས་སྡུག་བསྔལ་མེད། །ཁྲག་འཛག་པས་ནི་ངེས་འབྲེལ་བ། །སྣ་
དེ་དེ་ཡིས་མཛེས་པར་གྱུར། །བན་དྷུ་ཀ་ཕྲེང་ཆགས་པ་ནི། །པདྨ་དཀར་པོ་འདྲ་བའི་དཔལ། །བདེན་པའི་ཚིག་ནི་དེ་ཉིད་ཀྱིས། །གླང་པོའི་མགོན་པོ་དེ་ཡི་ནི། །དུང་ནི་ཆག་པ་ལྟར་དཀར་བ། །མཆེ་བ་སྐད་ཅིག་སླར་ནི་བྱུང་། །དེ་ནས་སླར་ནི་མཆེ་བ་བྱུང་བས་ངོ་མཚར་བ། །ཆུ་འཛིན་དཀར་

པོའི་འོད་ལྡན་གླང་པོའི་བདག་པོ་ཡི། །མཆེ་བ་ཉེ་བར་བཟུང་ནས་ནགས་ཀྱི་ནང་གནས་ཏེ། །རི་དགས་དགྲ་ནི་ས་སྐྱོང་ཕོ་བྲང་འགྲོ་བར་གྱུར། །དེ་ནས་མཆེ་བ་མཐོང་བས་རབ་ཏུ་དགའ་བའི་ཡིད་ཅན་རྒྱལ་པོ་དེས་རྔོན་པ་དེ་ལ་ཇི་ལྟར་ཁས་བླངས་པའི་ནོར་སྦྱར་ཞིང་འདུག་གོ། །
རྒྱལ་པོ་དེ་ཡང་བརྫུན་པའི་རིམས་དེ་ཡང་སྤངས་ནས་མཆེ་བ་དེ་རྣམས་མཐོང་སྟེ། །ཕྱིས་འགྱོད་པ་སྐྱེས་པ་དང་། ཕྲག་དོག་གི་གཏམ་སྐྱེ་བ་གཞན་ལ་ཉམས་སུ་མྱོང་བ་བདག་པོ་ལ་སྨྲས་ནས། མིག་གི་ཨུཏྤ་ལ་མཆི་མའི་ཆུས་ཁྱབ་པས་དེ་དང་དེའི་སྨྲེ་སྔགས་འདོན་པ་འགྱུར་ཏེ། ཀྱེ་ཧུད་སྨད་པ་
ཕྲག་དོག་ཡོན་ཏན་ཕྱོགས་འཇོམས་པ། །གང་གིས་བདག་ནི་རྨོངས་བྱེད་དམ་པའི་སེམས་ལྡན་པ། །ནགས་ལ་གནས་ཤིང་དཀའ་ཐུབ་པ་ནི་ཞི་བའི་ཡིད། །ཚོགས་ཀྱི་བདག་པོ་དེ་ནི་བདག་གིས་ཟད་བྱས་གྱུར། །བདག་ཉིད་ཆེན་པོ་གང་གིས་ཡུན་རིང་སྐྱོང་བ་ནི། །གླང་པོ་གཞན་གྱིས་རབ་ཏུ་གནོད་ཕྱིར་
ནུས་མ་ཡིན། །དི་རིང་གླང་པོ་དེ་ནི་མེད་པས་ཀུན་འཁྲུགས་པ། །གླང་པོའི་ཚོགས་དེ་ཇི་ལྟར་ཉིད་དུ་བྱུང་བར་གྱུར། །གང་གིས་བར་ཆད་མེད་པར་སྨྱོན་ཆུ་འཐུང་འདོད་པ། །ཡུད་ཙམ་དུ་ནི་ཡོངས་སུ་འཁོར་དེ་འགྲམ་དག་ལ། །དེ་ནི་མེད་པར་དི་རིང་དཀའ་ཐུབ་འཁྲུགས་པ་ནི། །རིང་པོ་ནས་ནི་
པདྨའི་རྩ་བའི་ནགས་འགྲོ་གྱུར། །ཡུད་ཙམ་དུ་ནི་གླང་པོའི་བདག་པོ་དེ་ཡི་གང་ཞིག་འབྱུང་། །དཔྲལ་བ་དྲག་པས་ཀུན་ནས་འཕྲོས་པའི་འདབ་མ་ཅན། །ཡུན་རིང་ཕྱིར་དེ་སྨྱོན་ཆུ་ཆ་ཡིས་བསྒོས་པ་དེ། །ངེས་པར་ཤིན་ཏུ་བཟང་མོ་ཡན་ལག་ཅན་མི་འདོར། །རྒྱ་མཚོའི་དུས་ནི་སྐྱེ་རགས་ཀྱིས་ནི་
རྣམ་བརྒྱན་པ། །ཀུན་ནས་དབུགས་བྱུང་འཇམ་པའི་རྩྭ་ཡི་གོས་ལྡན་པ། །བདག་པོའི་གཙོ་བོ་གསོད་ཕྱིར་བདག་ནི་ཅི་ཞིག་འཛིན། །ས་ལས་བདག་ལ་ཅི་ཕྱིར་རྐོ་བ་སྦྱིན་མི་འགྱུར། །དེ་ནས་རྒྱལ་པོ་དེ་དེ་ལྟར་སྨྲེ་སྔགས་འདོན་པ་ལ་རྩེ་གཅིག་པར་རྔོན་པ་དེས་འཛིན་ཅིང་འདུག་གོ། །བཙུན་
མོ་མྱ་ངན་མ་བྱེད་ཅིག །བདེན་པའི་བྱིན་གྱི་རླབས་ཆེ་བའི་བདག་ཉིད་ཀྱིས་བདག་ཉིད་ཆེན་པོ་དེ་སླར་ཡིད་འཕྲོག་པའི་མཆེ་བ་ཆེན་པོ་བྱུང་བ། །མདའི་དུག་གི་ཤུགས་ཀུན་ནས་བཟློག་པའི་སེམས་ཅན་རྣམས་ལ་ཕན་པའི་ཕྱིར། སྲོག་རྣམས་འཛིན་ཅིང་གླང་པོ་ཆེའི་ཚོགས་ཆེན་པོ་དེའི་བདག་པོ་ཉིད་

བྱེད་དོ་ཞེས་ཟེར་རོ། །དེ་ནས་ཚོགས་འདི་དེ་ལས་ཐོས་པར་གྱུར་ནས་ནི། །མི་དབང་བཙུན་མོ་རབ་ཏུ་ཡིད་ཅན་སླར་གྱུར་ཏེ། །ས་བདག་ཀྱང་ནི་ངོ་མཚར་བར་ནི་སོང་བར་གྱུར། །མཆེ་གཉིས་བདག་པོའི་སྙིང་རྗེ་ཡུད་ཙམ་རྣམས་བསམས་ནས། །དེ་ལྟར་བཟོད་པའི་འབྲས་བུ་མངོན་པར་འདོད་པའི་ཐུགས་
རྗེའི་བདག་ཉིད་ཅན་རྣམས་དགྲ་བོ་མཚོན་བྱས་ཀྱང་རབ་ཏུ་ཕོག་པར་བྱེད་པ་ལ་ནུས་པ་ཡོད་ཀྱང་བདག་ཉིད་ཆེན་པོ་རྣམས་བཟོད་པ་བྱེད་པ་ཉིད་དོ་སྙམ་དུ་ཤེས་ནས་བཟོད་པ་ལ་གུས་པར་བྱ་ཞེས་བྱ་བའོ། །གླང་པོ་ཆེའི་སྐྱེས་པའི་རབས་ཏེ་སྐྱེས་པའི་རབས་དགུ་པའོ།། །།སྦྲུལ་ནི་
མཆེ་བ་འཕྲོག་པ་ལྟ་བུ་སྟེ། །ནུས་པ་མེད་པར་ཁྲོ་བཅས་ཀྱང་ནི་བཟོད། །ནུས་པ་ཡོད་ཀྱང་གང་ཞིག་འདོར་མི་བྱེད། །བཟོད་པ་དེ་ནི་བཟོད་ལྡན་ཤེས་པར་བྱ། །འདི་ལྟར་རྗེས་སུ་ཐོས་ཏེ། རྣམ་པར་གནོན་པའི་ཚུལ་གྱི་མཐུས་རྒྱལ་པོ་གཞན་དང་ཆགས་འོག་གི་རྒྱལ་པོ་ལས་རྣམ་པར་རྒྱལ་
བ། གླང་པོ་ཆེ་དང་། རྟ་དང་། མཛོད་ཕུན་སུམ་ཚོགས་པ་མང་པོ་དང་ལྡན་པ། གཟི་བརྗིད་ཅན། བརྟན་ཤིང་ཐོས་པ་འདོད་པ་ལ་སོགས་པ་ཤེས་རབ་ཀྱི་ཡོན་ཏན་རྣམས་ཀྱིས་ལྷག་པར་གནས་པ། ཚོགས་གསུམ་དང་རྗེས་སུ་མཐུན་པའི་རང་བཞིན་ཅན། རང་བཞིན་གྱིས་མཆོད་པར་བྱས་
པ་ལྷོ་ཕྱོགས་ཀྱི་བདག་པོ་ཀ་ལིང་ཀའི་རྒྱལ་པོ་ཞེས་བྱ་བའི་རྒྱལ་པོ་བྱུང་བར་གྱུར་ཏེ། ལག་པའི་བརྩོན་འགྲུས་ཀྱིས་འཕམ་དགྲ་ལས