Luận tạng Tây Tạng (Tengyur) — Tập 169

ྱིས་ཀུན་ནས་བྱུགས་པའི་དང་བའི་གུར་གུམ་གྱིས་རྗེས་སུ་བྱུགས་པ་དང་འདྲ་བའི་ཁང་བཟངས་ཀྱི་སྟེང་དུ། གྲོགས་
མོའི་སྐྱེ་བོ་དང་བཅས་པ་ཕོ་ལོང་གི་རལ་པའི་སྒེག་པས་རེས་ཀྱིས་འདྲེ་བཞིན་པའི་དཔུང་པའི་ལྗོན་ཤིང་སྲབ་པ། ལྗོན་ཤིང་བཞིན་དུ་དཀར་བ་མ་ཡིན་པའི་འགྲོ་བ་ཁ་ལོ་སྒྱུར་བའི་དབང་གིས་དམའ་བར་གྱུར་པ་དང་མཐོ་བར་གྱུར་པ་འཕྲོས་པའི་རྒྱན་གྱི་ནོར་བུ་རྣམས་ཀྱི་འོད་ཟེར་གྱི་ཚོགས་ཀྱིས་ལུས་ཀྱི་སྲོག་

ཤིང་བརྒྱན་པར་བྱས་པས། རྣམ་པར་ཆད་པའི་མུ་ཏིག་གི་ཆུན་པོའི་སྐུད་པ་ལས་རྣམ་པར་ལྷུང་བའི་མུ་ཏིག་ཚོགས་འཐོར་བར་གྱུར་པས་གསེར་གྱི་ཟ་མ་ཏོག་དང་རྗེས་སུ་མཐུན་པའི་ནུ་མ་གཉིས་དང་ལྡན་པ། རྣམ་པར་བསྐྱོད་པའི་མིག་གི་འབྲས་བུ་འདྲེས་པའི་མིག་རྣམ་པར་
འཕྲོག་པའི་བུང་བའི་ཚོགས་ཀྱིས་རྗེས་སུ་འགྲོ་བ་ནི། ཨུཏྤ་ལའི་འདབ་མ་རྣམས་དང་འདྲ་བའི་ཕྱོགས་རྣམས་མཐོང་བར་བྱེད་ཅིང་། ཀུན་ནས་ངལ་བའི་དབང་གིས་ཀུན་ནས་འབྱུང་བཞིན་པའི་རྔུལ་གྱི་ཐིགས་པའི་ཚོགས་ཀྱིས་སིན་དྷུ་རའི་ཁྱད་པར་ཅན་དང་འཁྲུགས་པས་ཀུན་ནས་ལྷུང་བའི་རྣ་བའི་
མེ་ཏོག་གི་ཕྲེང་བ་དང་སྐྲ་ལོ་དང་ལྡན་པ་དང་། གྲོགས་མོའི་ཀྱེ་ཕོ་ལོང་གི་རྩེ་བ་གསལ་བ་འདི་ལས་ལོག་པར་མཛོད་ཅིག །ཁྱེད་ནི་ཤིན་ཏུ་ངལ་བ་སྟེ་ཤིར་ཤའི་མེ་ཏོག་སར་པ་ལྟར་འཇམ་པའི་ཡན་ལག་རྣམས་ལ་ཉི་མ་འདི་དྲག་པར་འགྱུར་བ། ཁྱེད་ལ་ངལ་བའི་རྒྱུ་ཞེས་བྱ་བ་གྲོགས་མོའི་སྐྱེ་བོས་རྣམ་པར་
ཟློག་པར་གྱུར་པ་རོལ་པ་ལས་རྣམ་པར་བཟློག་ནས་མཛེས་པ་ཐིགས་པ་ཉིད་དུ་ཉེ་བར་སོང་བཞིན་པ་ལ་ཡང་དག་པར་འགེགས་པ་རྔུལ་གྱི་ཐིགས་པའི་ཚོགས་གོས་ཀྱི་མཐའ་ལས་ཕྱིས་ཏེ། སྟན་ལ་ཉེ་བར་འདུག་སྟེ། འཁོར་གྱི་སྐྱེ་བོ་རྣམས་ཀྱིས་ལག་པས་རླུང་གཡབ་ཐོགས་པས་རླུང་གི་ཡང་དག་པར་རེག་
པས་མིག་ཟུམ་པར་བྱས་པས་ངལ་སོ་བར་བྱེད་ཅིང་། ཁྱིམ་དང་ཉེ་བར་སོང་བའི་མེ་ཏོག་གི་གཞུ་དང་ལྡན་པ་དང་འདྲ་བར་ཅུང་ཟད་ལང་ཚོ་དང་ཉེ་བར་མཛེས་པ་ཉེ་བར་བསགས་པ། རྒྱལ་པོ་གསེར་གྱི་བློན་པོའི་སྲས་ལ་དབུགས་ཕྱུང་བས་ཡིད་ལ་བྱུང་བའི་རྣམ་པར་འགྱུར་བ་ཡང་དག་པར་མཚོན་པ་ཡུན་རིང་པོར་
འབྲས་བུ་མི་གཡོ་བའི་ལྟ་བ་ཀུན་ནས་བཅིངས་པར་གྱུར་ཏོ། །ཕྲད་འདོད་བཅས་པར་བློན་པོའི་སྲས་ཀྱིས་དེ་ལ་ཡང་། །དབུགས་ཀྱི་བྱུང་བས་ཀུན་ནས་མཚོན་པའི་འདོད་ཅན་གྱི། །བུ་མོའི་ལྗོན་ཤིང་དགོད་པས་ཡིད་འོང་མེ་ཏོག་ཅན། །དེ་ལ་མྱོས་བཞིན་ལྟ་བའི་བུ་མོ་འགྲོ་བར་གྱུར། །ཕན་ཚུན་མིན་
པར་གཏད་པའི་སྲོག་ཤིང་གཅིག་དག་ལ། །དགོད་པའི་རོལ་པས་གསོལ་བའི་སོ་ཕྲེང་འོད་ལྡན་པ། །དེ་དག་གིས་ནི་ཡིད་དག་འདོད་ལྷས་སྦྱར་བ་སྟེ། །མྱུར་དུ་གཞུ་ནི་ལྷག་པར་བདུངས་པར་བྱེད་པ་ཡིས། །མེ་ཏོག་མཚོན་ཆ་ཉ་བས་སྐུལ་བར་བྱེད་པ་ནི། །གསལ་བའི་རོལ་པས་མཆིལ་པ་

ཡིས་ནི་བུ་མོ་ཡི། །རྟེན་པ་སྲབ་པ་ཆུ་ཡི་རྟེན་ལ་མཐར་སྤྱོད་པ། །བློན་པོའི་སྲས་ཀྱི་སེམས་ཀྱི་ཉ་ནི་འཛིན་བྱས་གྱུར། །དེ་ནས་དེར་ནི་མིག་དང་ངེས་འབྲེལ་དེ་ལ་ནི། །དགའ་བྱེད་ཀུན་ནས་བྲིས་པ་འདྲ་བ་མཐོང་ནས་དེ། །གྲོགས་མོ་རྣམས་ཀྱི་སྐྱེ་བོ་དེ་ནི་སྐད་ཅིག་དགོད། །དེ་ཡང་ཅུང་ཟད་ཐུར་དུ་ལྟ་
བ་བྱུང་བར་གྱུར། །དེ་རྣམས་དགའ་བའི་གྲོགས་མོ་སོང་བར་གྱུར་པ་ལ། །མི་སྐྱོང་བདག་ལས་སྐྱེས་པ་ཁྱིམ་གྱི་ནང་ཞུགས་གྱུར། །བློན་པོའི་སྲས་ཀྱང་ཤིན་ཏུ་ཕྲད་པར་འདོད་པ་ནི། །དེ་ལ་བཅིངས་པའི་ཡིད་ལྡན་ཁྱིམ་དུ་སོང་བར་གྱུར། །དེ་ནས་དུས་གཅིག་གི་ཚེ་ན་འདི་ལྟར་རྣམ་པར་མཐོང་བ་ཙམ་
གྱིས་སྲེག་ལུགས་ཀྱི་འདོད་པའི་མི་རྣམ་པར་འཕེལ་བ་ཀུན་ནས་སྐྱ་བ་དང་ཡོངས་སུ་རིད་པའི་འགྲམ་པ་དང་ལྡན་པ། རྟག་ཏུ་དབུགས་རྔུབ་པས་གཉིད་དང་བྲལ་བས་མི་གཡོ་བའི་མིག་ཉིད་ཀྱིས་འཁོར་གྱི་སྐྱེ་བོས་ཕན་ཚུན་གྱི་རྣམ་པར་ཤེས་པ་དེ་དག་གི་ལུས་དག་རབ་ཏུ་སྲབ་པ་ཉིད་དུ་སོང་བར་གྱུར་ཏོ། །
སོ་སོར་རྟོག་དང་བྲལ་བའི་ཕྱིར། །ཀུན་རྟོག་དབང་གིས་སྐྱེ་བོ་ལ། །སྐྱོན་ནི་ཚོལ་བ་ཡིད་བྱུང་འདི། །རྣམ་པར་འགྱུར་བར་ཁྲིད་པ་ཉིད། །དེ་ནས་དུས་གཅིག་གི་ཚེ་ན་དགའ་སྟོན་ལ་འཇུག་པས་རབ་ཏུ་དགའ་བ་རྣམ་པ་སྣ་ཚོགས་པའི་བྱ་བ་རྣམས་ཀྱིས་སྐྱེ་བོ་ཀུན་ནས་ཁྱབ་པའི་མིའི་བདག་པོའི་ཕོ་བྲང་ལ།
ཡུན་རིང་པོས་ནུབ་པའི་ཉིན་མོ་བྱེད་པའི་སྣང་བས་ཀུན་ནས་སྐྱ་བ་དང་དམར་བའི་ཆུ་བདག་གི་ཕྱོགས་ལ་གནས་ཀྱི་སྲོག་ཤིང་དུ་འགྲོ་བར་འདོད་པ་དང་། མངོན་པར་ཕྱོགས་པའི་རབ་ཏུ་འགུལ་བའི་མགྲིན་པ་དང་ལྡན་པ་མགྲིན་པ་སྔོན་པོ་དང་། ཁྱིམ་བྱ་རྣམས་ཡོད་པ་ལ་བུད་མེད་གཞོན་ནུ་མའི་མིག་གི་
འབྲས་བུ་ནག་པོ་ལྟར་མུན་པའི་ཚོགས་བསལ་བས་མཉམ་པ་དང་མི་མཉམ་པ་རྣམ་པར་ལྟ་བཞིན་པ་མ་ཡིན་པའི་ས་ལ་རབ་ཏུ་འབར་བཞིན་པའི་མེའི་འོད་ཀྱིས་ཀུན་ནས་སྣང་བའི་ཁྱིམ་གྱི་ནང་ཡོད་པ་རྣམས་ལ། འགའ་ཞིག་འགའ་ཞིག་ཏུ་མངོན་པར་གསལ་བར་གྱུར་པའི་ཟས་ཀྱི་ཚོགས་དང་ལྡན་པའི་ནམ་
མཁའ་ལ་རྣམ་པར་བྲལ་བས་ཕྲད་པར་འདོད་པའི་ངུར་པ་ཕོ་མོ་གཉིས་དང་ལྡན་པའི་ཀུན་ནས་འཛུམ་པར་བྱས་པའི་པདྨའི་འབྱུང་གནས་ཡོད་པ་རྣམས་ལ། ཅུང་ཟད་ས་འཛིན་གྱི་རྩེ་མོས་བར་དུ་ཆོད་པའི་དཀྱིལ་འཁོར་དང་ལྡན་པའི་ཤར་ཕྱོགས་ཀྱི་ཆ་ལ་གསལ་བཞིན་པར་སྣང་བའི་རི་བོང་གི་མཚན་མ་

ཡོད་པ་ལ། དུས་བཏབ་པའི་བློན་པོའི་སྲས་སྒྲ་གྲག་པའི་རྐང་གདུབ་དང་། སྐ་རགས་ཀྱི་ཚོགས་ཀྱིས་བརྒྱན་པར་བྱས་པའི་རྐང་པ་གཉིས་དང་། རྐེད་པའི་ཆ་དང་ལྡན་པའི་བཅོས་པའི་ནུ་མ་དག་གིས་མཐོ་བར་གྱུར་པའི་བུད་མེད་ཀྱི་སྟོད་གཡོགས་སར་པའི་མེ་ཏོག་བ་ཀུ་
ལའི་ཕྲེང་བས་ཀུན་ནས་གང་བའི་དཔུང་པའི་ཕྱོགས་ལ་སྒྲ་ལོས་འདུད་པ་དང་། དཔྲལ་བའི་དབུས་ལ་སིན་དྷུ་རས་རི་མོ་བྲིས་པ་དང་། རྐང་པའི་ལོང་བུའི་མཐར་སྲབ་ཅིང་མཐུག་པའི་གོས་རབ་ཏུ་འཕྱང་བ་དང་། ཡུན་རིང་པོ་ནས་འདུད་པའི་ནེ་ཙོའི་དམར་བ་ཉིད་ཀྱི་དུས་ལས་བྱུང་བའི་དཀྲིགས་པའི་བུ་
མེད་ཀྱི་ཆ་ལུགས་སུ་བྱས་ནས་ཕོ་ཉ་མོ་དང་རྗེས་སུ་འགྲོ་ཞིང་། གསེར་གྱི་སྣང་བའི་གྲོགས་མོ་ཞེས་བྱ་བ་འདི་དབུགས་ཕྱུང་བའི་སྒོ་ནས། བློན་པོ་དང་ལྡན་པའི་སའི་བདག་པོའི་ཕོ་བྲང་དུ་ཞུགས་ཏེ། ཁྱད་པར་དང་བཅས་པའི་རྒྱན་འཛིན་པ་བར་ཆད་མེད་པར་བློན་པོའི་སྲས་ཅི་ཞིག་འོང་བར་གྱུར་ཏམ་
འོན་ཏེ་མིན་ཞེས་བྱ་བའི་ཀུན་ནས་འཕྲོག་པ་དང་ཐེ་ཚོམ་ཟ་བའི་སྙིང་དང་ལྡན་པས་སྟན་ལས་ལངས་ནས་སླར་མལ་ལ་འདོད་པའི་ཁུར་གྱིས་མི་བཟོད་པ་དང་འདྲ་བའི་ཡན་ལག་རྣམས་གྲོལ་ཞིང་ཉེ་བར་འོངས་ཏེ། འཇིགས་པས་མངོན་པར་ལངས་པ་མི་དྲན་པའི་རྒྱལ་པོའི་བུ་མོ་དབེན་ས་ལ་དེའི་དུས་དང་རྗེས་སུ་
མཐུན་པའི་གཏམ་གྱིས་དབུགས་དབྱུང་བ་སྐྱེད་པ་ལ། ཅུང་ཟད་ངོ་ཚས་ཀུན་ནས་འདུད་པའི་གདོང་ཅན་ལྷུང་བའི་གོས། །ཀུན་ནས་རྒྱས་པར་བྱེད་ཅིང་དབུགས་ཀྱིས་རབ་འདར་ནུ་གཉིས་ལ། །ལག་པ་འདར་བའི་རྣམ་པར་འདར་བས་ཕ་རོལ་འཕྲོག་པ་ལ། །ཡན་ལག་མེད་པས་རྒྱས་པའི་རོ་དེས་རོལ་
ཞིང་བྱུང་བར་གྱུར། །ཤིན་ཏུ་མངོན་པར་ཆགས་པས་རྣམ་པར་འཕེལ་བའི་སྟོབས་ཉིད་ཀྱི་ཕྱིར་ཡིད་ལ་སྐྱོས་པ་ལ་སླར་ཡང་ཉི་མ་ལྔ་ཙམ་གྱི་ད་ལྟ་ཉིད་དུ་བུད་མེད་ཀྱི་ཆ་བྱད་འཛིན་པ་དེ། དྲི་ཞིམ་ཚད་ལྡན་གསེར་དང་རབ་ཏུ་འདྲ་བའི་ཟེར། །ཀུན་ནས་འཕྲོག་པའི་སོ་ཡི་ནོར་བུ་རབ་སྣང་བ། །རོལ་པའི་བར་གྱིས་
ཁྱད་པར་མཛེས་པ་སྤང་བྱ་བ། །གསེར་གྱི་སྣང་བ་དེ་དང་དེས་ནི་རོལ་པར་འགྱུར། །དེ་ནས་དུས་གཅིག་གི་ཚེ་ན་བུད་མེད་ཀྱི་ཆ་ལུགས་དང་རྒྱན་གསལ་བ་ཉིད་ལ་མཛེས་པའི་དགའ་བ་ཉེ་བར་ལོངས་སྤྱོད་པས་ཀུན་ནས་ངལ་བའི་དབང་གིས་གཉིད་ཀྱི་བདེ་བ་མངོན་པར་འཕེལ་བ་ཐོ་རངས་དུས་སུ་རྣམ་པར་

མ་ཤེས་པ་སའི་བདག་པོའི་བུ་མོ་དང་ལྷན་ཅིག་ཏུ་མལ་ན་ཉལ་བ་མཐོང་ནས། ཚོགས་ཀྱི་ནང་ན་གནས་པ་རྣམས་ཀྱིས་ཀྱི་ཧུད་ཅེས་བྱ་བ་བརྗོད་ཅིང་རྒྱལ་པོ་ལ་ཞུས་ཤིང་གནས་པར་གྱུར་ཏོ། །རྒྱལ་པོ་དེ་ཡང་རང་བཞིན་གྱིས་རབ་ཏུ་དྲག་པའི་ཁྲོ་བ་ཉིད་ཀྱི་ཕྱིར་ཁྲོ་གཉེར་གྱིས་འབྲེལ་བའི་འགྲམ་གྱི་ཕྱོགས་མི་
མཉམ་པར་བྱས་པ། རིགས་ཉམས་པར་བྱས་པ་འདིས་ཅི་ཞིག་བྱ། ཁྱེད་རྣམས་སོང་ཤིག །བློན་པོའི་སྲས་མི་སྡུག་པ་དང་ལྷན་ཅིག་ཏུ་འདི་འཆི་བདག་གི་དབང་དུ་གྱིས་ཤིག་ཅེས་བསྒོའོ། །དེ་རྣམས་ཀྱིས་ཀྱང་དེ་ལྟར་བགྱི་ཞེས་བྱ་བ་རྒྱལ་པོའི་བཀའ་བཟུང་ནས། ཕྱི་ནས་བློན་པོའི་སྲས་ཀྱི་དཔུང་པ་
བཅིངས་པ། བུ་མོ་གསེར་དུ་སྣང་བ་དང་ལྷན་ཅིག་ཏུ་བཏོན་ནས་སྙིང་རྗེ་དང་བྲལ་བའི་སྙིང་སྲ་བ་དང་ལྡན་པའི་གཤེད་མའི་སྐྱེས་བུ་རྣམས་ལ་གཏད་ཅིང་གནས་པར་གྱུར་ཏེ། སྔགས་དང་ཡེ་ཤེས་མ་ཐོབ་པ། །བདེ་ཆས་ཕྲོགས་པའི་བདག་རྣམས་ལ། །དྲག་པོའི་ཡུལ་གྱི་སྦྲུལ་རྣམས་ནི། །རྣམ་
པར་འཇིག་ཕྱིར་འབྱུང་བ་ཉིད། །དྲག་པའི་སྒྲ་ཅན་ཆུ་འཛིན་སར་པ་ལྟར་ནི་སྔོ་བའི་དུ་བ་སྟེང་གོས་ཅན། །ཁྲོས་པ་ལྟར་ནི་འཕྲོག་པར་བྱེད་པ་ཁ་ཕྱེ་འདར་བའི་མེ་ལྕེའི་ཚོགས་ལྡན་པ། །ནག་པོའི་ལམ་ཅན་འབར་བ་ལ་ནི་གཟུགས་མྱང་ཕྱེ་མ་ལེབ་ནི་ལྷུང་བ་སྟེ། །རབ་སྲ་ཡིད་ཅན་རྣམས་ལ་དབང་རྣམས་
ལས་གཞན་དྲག་པའི་དགྲ་ནི་ཡོད་པ་ཡིན། །དེ་ནས་རྒྱལ་པོའི་བུ་མོ་འགྲོ་བཞིན་པ་དེ་རང་གི་ཕོ་བྲང་གི་ཉེ་འཁོར་ན་གནས་པའི་མིང་པོ་གསེར་གྱི་གོ་ཆ་མཐོང་ནས་མཆི་མའི་ཆུས་མིག་ཀུན་ནས་འགགས་བཞིན་པས་ངོ་ཚ་བས་ཅུང་ཟད་སྨྲ་མི་ནུས་ཤིང་ཐུར་དུ་ལྟ་བར་གྱུར་ཏོ། །བློན་པོའི་སྲས་དེ་གནས་སྐབས་དེ་ལ་
ཡང་མ་ཕོངས་པའི་ཚིག་གསེར་གྱི་གོ་ཆ་ལ་འདི་སྐད་ཅེས་སྨྲས་སོ། །ཉེས་པ་བྱས་པ་འབྱུང་བཞིན་པ་ཡི་ལུས་ཅན་ལ། །ས་དབང་ཕྱུག་ལ་ཆད་པ་ཞེས་བྱ་བཟོད་པ་སྟེ། །ཉེས་པ་བྱས་པ་ལ་ཡང་ཤིན་ཏུ་གཡོ་བའི་སེམས། །བུད་མེད་རྣམས་ལ་གསོད་པ་ནམ་ཡང་འདོད་མ་ཡིན། །དེ་བས་ཁྱེད་ནི་
སྲིང་མོ་འདི་ལ་འཇིགས་ཆེན་ལས། །བརྩེ་བས་ཡང་དག་དམིགས་ཏེ་སྟོབས་ཀྱིས་སྐྱོང་བར་གྱིས། །དེ་རིང་བདག་ལ་སྨོད་སྨྲས་འབྲས་བུའི་ལས་ཀྱིས་ནི། །མཉམ་པར་གནས་པའི་གྲོང་ཁྱེར་ཞུགས་ཕྱིར་འདོད་པ་སྟེ། །ཉེས་པ་བྱས་པ་དྲི་མ་ཅན་གྱི་བདག་ཉིད་ཀྱི། །ཆོས་སྨོད་ལས་ནི་བདག་གི་སླད་

དུ་ཤི་བ་མཆོག། །གང་ཕྱིར་ཤི་བ་མིས་ནི་སྨོད་སྨྲ་ཚ་བ་ཡི། །ཚིག་རྣམས་དག་ནི་སུས་ཀྱང་ནམ་ཡང་ཐོས་མ་ཡིན། །འཇིགས་པའི་རི་དགས་མོ་ཡི་མིག་ལྟར་རྒྱ་ཆེའི་མིག་ལྡན་དེ་ཡི་ཡང་། །ས་ཡི་དབང་ཕྱུག་བུ་མོ་ཡི་ནི་མ་དཔྱད་ལས་བྱས་པའི། །ཡིད་ལ་གནས་པའི་
ཟླ་བ་བྱེད་པའི་ཡི་གེ་ཚིག་རྣམས་ནི། །སྲུངས་ཤིག་ཅེས་བྱ་མཆི་མའི་ཐིགས་པ་ཉིད་ལྟར་ཡོངས་གྱུར་པ། །དེ་ནས་སྐད་ཅིག་དེ་ལ་གསེར་གྱི་གོ་ཆས་གོ་ཆ་བཅིངས་བྱས་ཏེ། །ཆེ་བའི་བསམ་པ་ཉེ་བར་བསགས་པ་སེམས་ཅན་དོན་ཕྱིར་བརྟན་པའི་བདག །ཆེ་བའི་བྱང་ཆུབ་སེམས་དཔས་དེ་གཉིས་ལ་ནི་
གཟུང་བྱས་ནས། །མྱུར་དུ་རྟ་ཡི་བཞོན་པ་ཞོན་པ་ལ་ནི་ལྷག་པར་གནས་པ་ཉིད་དུ་གྱུར། །དེ་ནས་བྱང་ཆུབ་སེམས་དཔའ་ལ་ཤིན་ཏུ་མཉེས་གཤིན་པ་དང་འཇིགས་པས་ཡིད་སྐྱོ་བའི་གྲོགས་པོ་དང་བརྟེན་པ་རྣམས་ཁ་ཅིག་གིས་འདི་སྐད་ཅེས་སྨྲས་པར་གྱུར་ཏོ། །ཁྲོ་དྲག་ས་སྐྱོང་རྣམས་ཀྱིས་ནི། །བདག་
གི་བ་ཞེས་སུ་ཞིག་མིན། །སྦྱིན་སྲེག་མཁན་པོའི་སྲེག་ལུགས་ཀྱང་། །མེས་ནི་རེག་པས་སྲེག་པར་བྱེད། །དེ་བས་ན་ཁྱེད་ལ་རང་གི་སྲོག་ལ་ལྟོས་པ་མེད་པའི་རྣམ་པར་རྟོག་པ་འདིས་ཆོག་གོ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། རེ་ཞིག་རྒུད་པ་ལ་གནས་པ་གཞན་དག་ཀྱང་ནུས་པ་
ཡོད་པས་སྐྱོབ་པར་རིགས་ན། གཉེན་འདུན་གྱི་སྐྱེ་བོ་ལྟ་སྨོས་ཀྱང་ཅི་དགོས། མནར་མེད་པ་ཡི་གཙུག་ཕུད་ཅན་གྱི་ཆེན་པོའི་དྲུང་དུ་ནི། །གལ་ཏེ་སྡུག་བསྔལ་ཆེན་པོས་མངོན་གདུངས་སེམས་ཅན་ཡོད་གྱུར་ན། །རང་གི་སྲེག་པའི་སྡུག་བསྔལ་ལ་ནི་མ་བསམས་འགྲོ་ཕན་འདོད། །དེ་ལ་འགྲོ་བའི་ཕྱིར་ནི་
འགྲོ་བར་ཡང་བདག་བརྩོན་པ་ཉིད། དེ་ལྟར་བརྗོད་ནས་བདག་ཉིད་ཆེན་པོ་དེ་གཞུ་རྒྱུད་བདུངས་པའི་གཞུ་འཛིན་པ་ཤིང་རྟའི་ཁ་ལོ་བ་ལ་སྨྲས་པ། ད་ནི་རྟ་རྣམས་རབ་ཏུ་བསྐུལ་བར་གྱིས་ཤིག་ཅེས་ཟེར་རོ། །དེས་ཀྱང་དེ་ལྟར་བགྱི་ཞེས་ལྕག་གིས་རེག་པའི་དབང་གིས་ཤིན་ཏུ་མྱུར་བར་འགྲོ་བ་ཐག་པ་རྣམ་པར་མ་
གྲོལ་བའི་རྟ་རྣམས་བྱས་པར་གྱུར་ཏེ། གྲོང་ཁྱེར་མཆོག་དེ་ལས་ངེས་པར་བྱུང་ནས། ཤིང་རྟའི་ཤུགས་ཀྱི་དབང་གིས་ཟམ་པ་ཆད་པས་ཆུའི་ཚོགས་ཀུན་ནས་རྙོག་པ་ཅན་དང་འདྲ་བར་རབ་ཏུ་སོང་ཞིང་། རྟ་རྣམས་ཀྱི་རྨིག་པ་ལས་ཀུན་ནས་བསླང་བའི་ནེའུ་ལེ་ལྟར་ཀུན་ནས་འོད་མེད་པའི་རྡུལ་གྱི་ཚོགས་དང་

ལྡན་པའི་ལམ་ལ་ལྟ་ཞིང་། ཤིང་རྟའི་འཁོར་ལོའི་སྒྲས་སྐྲག་པ་དང་། རྣམ་པར་འབྱེད་པར་གྱུར་པའི་རི་དགས་ཀྱི་ཚོགས་དཀར་པོ་མ་ཡིན་པའི་འགྲོ་བས་རྩྭ་སྐམ་པོའི་ནགས་སྲེག་བཞིན་པ་དང་། འདབ་དང་བཅས་པའི་ནགས་ཀྱི་མ་ཧེ་རྣམས་ཀྱིས་ཀུན་ནས་བསྐོར་བས་ཤིང་རྣམས་ཀྱི་སྡོང་པོའི་འོག་གི་
ས་ཕྱོགས་དྲི་མ་ཅན་དུ་བྱས་པ་དང་། ཨིནྡྲ་ནཱི་ལའི་དུམ་བུ་རྣམས་དང་འདྲ་བའི་རྨ་བྱའི་མདོངས་རྣམས་ཀྱིས་འདྲེས་པར་བྱས་པ་དང་། བསེའི་སེན་མོས་ཀུན་བརྐོས་བཞིན་པའི་སའི་བུག་པར་རབ་ཏུ་སོང་བའི་མན་དུ་ཀའི་གེ་སར་གྱིས་ཀུན་ནས་སྐྱ་བའི་ཚོགས་དང་ལྡན་པ་དང་། གླང་པོ་ཆེའི་ཚོགས་ཀྱིས་
གཅོག་བཞིན་པའི་རིའི་ཤིང་དང་ཤིང་རྣམས་ལ་དྲི་རབ་ཏུ་ཁྱབ་པའི་རིའི་མཐའ་མ་ལ་རྙིང་ནས། ད་ནི་ཤུགས་འགག་པའི་རྟ་རྣམས་གྱིས་ཤིག་ཅེས་བྱ་བ་ཁ་ལོ་སྒྱུར་བ་ལ་འདི་ལྟར་སྨྲས་ནས། ཡང་གསུངས་པ། བགྲོད་པར་དཀའོ་ནགས་འདི་ཀུན་ནས་བརྟེན་པ་ནི། །བདག་ཅག་འཛིན་པའི་སཱ་ལ་
རྣམས་ཀྱིས་དཀྲིས་བྱས་པ། །བརྟན་པའི་ཡིད་དག་གིས་ནི་དམིགས་ནས་འཇིགས་པ་ནི། །ཁྱེད་ཅག་ཐོང་ཤིག་བདག་ནི་བསྲུང་བར་བརྩོན་པ་ཡིན། །དེ་ནས་རྒྱལ་པོ་དེ་དེའི་གཏམ་ཤེས་པ་ཁྲོས་པའི་དབང་གིས་སྲས་ལ་མཉེས་གཤིན་པ་དང་བྲལ་བས་བྱང་ཆུབ་སེམས་དཔའ་ལ་ཚར་གཅད་པའི་དོན་
དུ། གོ་ཆ་ཀུན་ནས་བགོས་པ་དྲོ་བའི་འོད་ཀྱིས་རེག་པས་བྲོས་པའི་གསོར་མདུང་གི་རྩེ་མོའི་འོད་ལྟར་གསལ་བའི་དམགས་ཚོགས་གཏོང་བར་གྱུར་ཏོ། །མྱུར་དུ་བྱང་ཆུབ་སེམས་དཔའ་ལ་རྗེས་སུ་སོང་ནས་འཐབ་མོ་བ་ཁ་ཅིག་གིས་སྨྲས་པར་གྱུར་པ། ས་སྐྱོང་བ་ཡི་བུ་མོ་འདི་ནི་གཏད་མཛོད་ཅིག། །ངེས་
པར་སྐྱོན་དང་བཅས་པ་བློན་པོའི་སྲས་ཀྱིས་ནི། །ཕྱོགས་རྣམས་མཐའ་མར་རྣམ་པར་གནོན་པའི་འོད་གྲགས་པའི། །ཡབ་ཀྱི་བཀའ་ནི་འདའ་བར་བྱས་ནས་ཅི་ཕྱིར་གཤེགས། །དེ་ནས་བདག་ཉིད་ཆེན་པོ་དེས་དེ་ཐོས་ནས་འཁྱོག་པ་གཉིས་ཀྱི་མཐིལ་ལ་རྣམ་པར་ཞུགས་བྱས་པའི་གཞུ་བཟུང་ནས་ཁ་ལོ་བ་
ཤིང་རྟ་འདི་ཁ་བསྒྱུར་བར་གྱིས་ཤིག་ཅེས་བྱ་བ་རབ་ཏུ་སྨྲས་པར་གྱུར་ཏོ། །དེའི་བཀའ་ལ་མཁས་པའི་ཁ་ལོ་བས་ཤིང་རྟའི་མཆོག་ཁ་སྒྱུར་བ་དེ་ལ། མདའི་སྣོད་ནས་ཀུན་འདོན་པ་མཐོང་ན་ནི། །མདའ་དེས་ལག་པས་མནན་པའི་ལྟོང་གི་ཤུགས་ལྡན་པ། །སྡུག་བསྔལ་གྱིས་ཕོངས་སྐད་ཅིག་མི་གཡོ་མིག་

ལྡན་པ། །ས་ཡི་བདག་པོའི་དམག་དེ་བྲིས་པ་བཞིན་དུ་གནས། །བྱང་ཆུབ་སེམས་དཔས་སྨྲས་པ། ཁྱེད་ཅག་རྣམས་ཀྱིས་ཀུན་ནས་ངལ་བ་དོན་མེད་པས་འཁྲུགས་ཏེ། །སྲོག་རྣམས་འབད་པས་བསྲུང་བྱས་ཀྱང་། །བྱེ་མའི་ཆང་བ་བཞིན་དུ་འདོར། །འཇིགས་པས་
ཀུན་ནས་འཁོར་བའི་མིག །སྐྱབས་སུ་འོས་པ་མ་ཡིན་ནོ། །དེ་ནས་འཐབ་མོ་བ་དེ་རྣམས་དེའི་ངེས་པ་དེ་ཤེས་ནས་ཕན་ཚུན་དུ་འདི་སྐད་ཅེས་སྨྲས་པར་གྱུར་ཏོ། །རེ་ཞིག་འདི་ཡི་ཆོ་ག་འདི་ནི་མི་བྱེད་པ། །མི་སྐྱོང་སྲས་ཀྱི་རྣམ་པར་གནོན་པ་ཆེན་པོ་ཡང་། །ཤིན་ཏུ་མི་མཉམ་གནས་པ་འདི་ནི་དེ་ཡི་ཕྱིར། །
བདག་ཅག་འཐབ་མོ་འདིར་ནི་འོངས་ལ་འབྲས་བུ་མེད། །སྒྲུབ་མིན་ཆེན་པོ་ཡོད་པ་ཞེས་བྱའི་དངོས་པོ་ལ། །ངལ་ཕྱིར་འགའ་ཞིག་སྐྱེ་བོས་བྱ་བ་མེད་པ་སྟེ། །ལྷུང་བའི་ཕྱེ་མ་ལེབ་རྣམས་ཀྱིས་ནི་གཡོ་བའི་ཕྱིར། །ནོར་བུའི་སྒྲོན་མའི་རྩེ་མོ་ནུས་པ་མ་ཡིན་ནོ། །དུས་ནམ་ཞིག་ཏུ་རྗེ་བོས་ཀྱང་སྲས་ཚར་
བཅད་པའི་ཕྱིར་དུ་ཕྱི་ནས་འགྱོད་པ་འབྱུང་བར་འགྱུར་བ་དེ་བས་ན་བདག་ཅག་ལ་བཟློག་པ་ཉིད་རིགས་སོ་ཞེས་བྱ་བར་རབ་ཏུ་བཟུང་ནས། ཇི་ལྟར་འོངས་པའི་ལམ་དེ་ཉིད་ནས་དམག་ཚོགས་དེ་སླར་སོ་སོར་ལོག་པར་གྱུར་ཏོ། །བྱང་ཆུབ་སེམས་དཔའ་ཡང་འཇམ་པོའི་རྨིག་པ་རྣམ་པར་བགོད་པའི་རྟ་
མཆོག་རྣམས་ཀྱིས་ཤིང་རྟ་འདྲེན་བཞིན་པའི་རིའི་ནགས་དེ་ལས་ཡང་དག་པར་འདའ་བར་བྱེད་པ་རི་རབ་ཀྱི་རྩེ་མོ་འཛིན་པའི་བཙག་གི་ཕྱེ་མས་དམར་བར་བྱས་པའི་མཆེ་བ་གཉིས་པའི་དཔྲལ་འབུར་གྱི་རྣམ་པ་ཅན་གྱི་ཉིན་མོ་བྱེད་པ་ཡོད་པ་ལ། རྡུལ་གྱི་ཚ་བ་དང་བྲལ་བའི་ལམ་རྣམས་ལ་རང་གི་གནས་སུ་འགྲོ་
བར་ཀུན་ནས་ཕྱོགས་པའི་རི་དགས་ཀྱི་ཚོགས་རྣམས་ཡོད་པ་དང་། འདབ་ཆགས་རྣམས་ཀྱིས་རྣམ་པར་གྲོལ་བར་གྱུར་པའི་ཚང་ཚིང་དང་ལྡན་པ་དང་། ཤིང་རྣམས་ལ་ངེས་པར་འབྲེལ་བར་གྱུར་པའི་གཏོར་མ་ཟ་བ་དང་བྱ་རྒོད་ཀྱི་གཤོག་པ་རྣམས་ཀྱིས་འགུལ་བཞིན་པའི་འདབ་མའི་ཚོགས་དང་ལྡན་པའི་ནྱ་གྲོ་
དྷ་ཡོད་པ་དང་། ཁ་ཟས་མངོན་པར་འདོད་པས་སྤྱོད་ཅིང་གནས་པར་འཇུག་པའི་གྲོང་ཁྱེར་དང་ཉེ་བ་ལ་མངོན་པར་ཕྱོགས་པའི་མི་སྲུན་པའི་རི་དགས་ཡོད་པ་དང་། སྐྱོན་དང་བཅས་ཤིང་མ་དཔྱད་པའི་ལས་བྱས་པའི་སྐྱེས་བུ་རྣམས་དང་། ཆོམ་རྐུན་རྣམས་ལ་དགའ་བའི་དུས་ལ་སྡོང་ཁང་གི་དུ་བའི་རི་མོ་

མཐོང་ནས། ངེས་པར་འདིར་གྲོང་ཁྱེར་རམ་གྲོགས་པོ་ཡོད་དོ་ཞེས་བྱ་བ་རྣམ་པར་བསམས་ནས་ཁ་ལོ་བ་ལ་སྨྲས་པ། ཁ་ལོ་བ་གང་འདི་ཆུ་གཏེར་སར་པའི་ཚོགས་དང་རྗེས་སུ་མཐུན་པའི་དུ་བ་སྣང་བའི་ས་ཕྱོགས་དེར་ཤིང་རྟ་དྲང་བར་གྱིས་ཤིག་ཅེས་ཟེར་ཞིང་། ཐག་ཉེ་བར་སོང་ནས་འདི་རྣམས་ཐམས་ཅད་སྐྱེ་བོ་
མེད་པའི་གྲོང་ཁྱེར་འདི་ཞེས་བྱ་བ་འཛིན་པར་གྱུར་པ་དང་། དེ་ནས་བློན་པོའི་སྲས་ཀྱིས་བྱང་ཆུབ་སེམས་དཔའ་ལ་སྨྲས་པ། ར་བའི་རྩིག་པ་རྣམ་པར་ལྟུང་བས་ལམ་ནི་བཀག་པ་ཡང་། །གྲོང་ཁྱེར་གྲགས་པ་ཆེ་བའི་ལམ་ལྡན་ཁྱེད་ནི་འོངས་པ་ལ། །འདི་ནི་སྔ་མ་བཞིན་དུ་དགའ་ཞིང་མཛེས་པ་འབྱུང་
འགྱུར་ཏེ། །ལུས་དང་ལྡན་པའི་ལུས་ནི་རྣམ་པར་ཤེས་པ་ལྡན་པ་ལྟར། །གང་ལ་ཡོན་ཏན་རིན་ཆེན་རྟེན་པ་སྐྱེས་པ་རྣམས་མེད་པ། །ཡུལ་ནི་གནས་ཀྱང་བདག་གི་དོན་དུ་དེ་ནི་སྤོང་པ་ཉིད། །མེ་ཏོག་དང་ནི་འབྲས་བུ་ཀུན་ནས་འབྱུང་ཡང་མཛེས་པ་མེད། །ཨརྒའི་ནགས་ནི་ནམ་ཡང་སྐྱེད་མོས་ཚལ་དུ་འགྲོ་
བ་མིན། །ཁ་ལོ་བས་སྨྲས་པ། བདག་ཀྱང་འདི་ལྟ་བུ་ཉིད་དུ་མཐོང་བ་མང་པོས་སྨྲས་པས་ཅི་ཞིག་བྱ་སྟེ། ལོགས་ཀྱི་མཐའ་མར་འཕྱང་པའི་གོ་ཆར་ལྡན་པ་འཁོར་གྱི་སྐྱེ་བོས་རྣམ་པར་འཛིན་པའི་མཐུར། །གདོང་ནས་བཀག་པས་སྦུ་བ་འཛིན་པའི་དུམ་བུར་ལྡན་པ་སྟན་གྱིས་སྟོང་པའི་རྟ་རྣམས་ཀྱིས། །
ཁྱེད་ཀྱི་འགྲོ་བ་མཚོན་པར་གྱུར་པ་ཁྱིམ་གྱི་སྒོ་ནི་གྲོང་ཁྱེར་འདི་ལ་སྐྱེས་རྣམས་ཀྱིས། །ཀུན་ནས་ཁྱབ་པ་གླང་མོ་དང་ནི་གླང་ཕྲུག་སྐྱེད་པ་ལ་ནི་གླང་པོ་སྐྱོང་བ་གནས། །དེ་ནས་བྱང་ཆུབ་སེམས་དཔའ་ཤིང་རྟའི་འཁོར་ལོའི་མཐའ་མས་ཀུན་ནས་བཙིར་བར་བྱས་པས་ཆགས་པའི་སའི་གོང་བུའི་དུམ་བུ་དང་ལྡན་
པ་ཀ་བ་དང་རྟ་བབས་ཀྱི་ས་ལ་འབིགས་པ་ཀུན་ནས་ལྷུང་བ་དང་། འཆི་བ་མེད་པའི་ལྷའི་ཉེ་འཁོར་གྱི་སྒོ་མ་ཀུན་ནས་འབྲེལ་བ་དང་འཕོ་བའི་སྤྲེའུ་དང་། འདབ་ཆགས་རྣམས་ཀྱི་སྒོ་ང་དང་ཐོད་པ་རྣམས་ཀྱིས་སའི་སྟེང་འདྲེས་པ་དང་། འཕགས་པའི་ཁྱིམ་གྱི་སྒོ་འབུར་དུ་བཏོད་པ་ལ། །ཕྱེད་མདུད་པའི་རྒྱལ་མཚན་
གྱི་རྩེ་མོ་ལ་རྨ་བྱའི་མགྲིན་པ་ལྷུང་བ་དང་། ཀུན་ནས་འབྱུང་བའི་རྩྭའི་མྱུ་གུ་རྣམས་ཀྱིས་ལམ་གྱི་བར་བགྲོད་དཀའ་བ་དང་། ཅུང་ཟད་མར་གྱིས་སྣུམ་པའི་རྫ་མའི་གྱོ་མོག་གི་དབུས་ལ་གནས་པའི་མི་གཡོ་བའི་གྲོག་སྦུར་རྣམས་ཀྱིས་ཁྱབ་པ་དང་། རླུང་གིས་བསྐུལ་པར་གྱུར་པའི་རི་བོང་གི་ལྟོ་བའི་སྤུ་ལྟར་འཇམ་

པའི་ཨརྒའི་ཤིང་བལ་དང་འདྲེས་པ་ལྡུམ་གྱི་ཚོགས་དང་ལྡན་པ་དང་། ཤིན་ཏུ་དུས་རིང་བ་ཉིད་ཀྱིས་གནས་ནས་ཀུན་ནས་འཕོ་བའི་མེ་ཟད་པ་དང་། སྣུམ་པའི་ཤིང་གི་རང་བཞིན་གྱི་རྣམ་པར་འདྲེས་པ་རྣམས་ཀྱི་ཤིང་གི་རྩ་བར་ལྷག་པར་གནས་པ་ཤིན་ཏུ་མཐོང་བས་འཇིགས་པ་ནི། །
མི་གཡོའི་བྱི་ལས་འགའ་ཞིག་ཏུ། །བྱི་བའི་སྒྲ་ནི་ཐོས་བཞིན་པ། །ནེའུ་ལེས་རྣམ་ཆད་འགའ་ཞིག་ཏུ། །འཕྲོས་པས་འཇིགས་པའི་ལྟོ་འཕྱིར་ལྡན། །འགའ་ཞིག་ཚང་གིས་ཕྱེད་འགགས་པ། །དགྲ་ཡིས་སོ་སོར་གྲོལ་བར་ལྡན། །བྱ་རྒོད་རྡུག་བྱུགས་འགའ་ཞིག་ཏུ། །ནྱ་གྲོ་དྷ་ཡི་འདབ་
མས་ཁྱབ། །དྲི་མས་མཚན་པའི་གོ་ཆ་ལྟར། །ལྗང་གུ་མི་གཡོ་སྤང་རྣམས་ཀྱིས། །བ་གླང་ཕྲེང་རྣམས་འདོགས་པ་ནི། །སྦྲང་རྣམས་ཚོགས་ཀྱིས་འགའ་ཞིག་ཏུ། །འགའ་ཞིག་འུག་སྐད་ཀྱིས་སྐྲག་པའི། །གཉིད་བྲལ་འཁོར་བའི་ཁྭ་ད་བཅས། །གཞན་དུ་བྷ་རོ་ཊི་སྐད་ནི། །མེ་བཅད་
རྣམས་ཀྱིས་འཇིགས་ཤིང་འཇིགས། །འགའ་ཞིག་ཏུ་ནི་སྡོང་ཁང་བསྲེག་ཟ་ཡི། །ས་ཡི་དཀྱིལ་འཁོར་གསལ་བར་བྱས་པ་དང་། །འགའ་ཞིག་ཏུ་ནི་མི་རུས་རྣམས་ཀྱི་ནི། །པདྨའི་རྩ་ལྟར་སྐྱ་བས་བསགས་པ་དང་། །དུས་རིང་ཉིད་ཀྱིས་ཆུང་བ་ལྷག་མའི་དྲི་ལྡན་པ། །སྦྲང་དང་ཀ་པི་ཏ་ཡི་བུམ་
ཆེན་བུམ་ཆུང་དུ་མ་ཡིས། །ཆགས་པས་དུམ་བུར་སོང་བ་ཁ་ཅིག་གིས་ནི་ཡང་། །ངེས་བསགས་འཕོ་བ་ཆང་འཚོང་མ་ཡིས་ཚོང་སའི་མཐར། །འཕོ་བ་སྒྲོ་ཡིས་སྟོང་པ་ལྟོང་ནི་ཆགས་པ་དང་། །རྒྱུས་པ་ལྷོད་པ་ཀུན་ནས་དོར་བར་བྱས་པ་ནི། །ཀུན་ནས་རྙིངས་པའི་མདའ་རྣམས་ཀྱི་ནི་དུམ་བུ་ཡིས། །
གཡང་སའི་བུ་ཡི་ལྷག་གནས་གསལ་བྱས་འགའ་ཞིག་ཏུ། །པདྨ་རྣམས་ལྷུང་འགའ་ཞིག་ཏུ་ཡང་རྔ་དང་ནི། །གཞན་དུ་ཡང་ནི་གཙུག་ཕུད་དམར་བའི་སྒྲོ་ཚོགས་ཀྱིས། །བ་རྣམས་ཀྱིས་ནི་རོ་ལ་རབ་དོར་དྲི་མ་ཅན། །རྭ་རྣམས་ཀྱིས་ནི་ཀུན་ནས་རྔོན་པའི་ཁྱིམ་མཚོན་བྱས། །མེ་ཏོག་དུམ་བུར་
སོང་བའི་འཕོ་བ་མ་མོའི་ཕྲེང་། །དབང་ཕྱུག་ཁྱིམ་གྱི་བར་གྱི་ས་ནི་འགེགས་བྱས་པ། །གཡུལ་ངོར་འཐབ་པའི་གཟུགས་ནི་འཛིན་པར་བྱེད་པ་ན། །ཤི་བ་ཀུན་ནས་དོར་བའི་རྐང་པས་ཤིན་ཏུ་ཁྱབ། །ཁྱིམ་གྱི་རྩིག་པ་ཞིག་པས་ཆག་ཅིང་སྐམས་པ་ནི། །ལྷོད་པའི་ཆུ་ཤིང་ཚོགས་ཀྱིས་ཉེ་འཁོར་

ནང་བསགས་པ། །རྒྱ་ཤུག་ཤིང་གིས་བཟུང་ཞིང་སྐྱེས་པ་ཀུ་བའི་ཤིང་། །གནས་ལ་སྟོད་གཡོགས་བྲལ་བའི་འུག་པའི་སྣང་བས་བརྟེན། །ཚང་ལས་ལྷུང་བས་དབུས་སུ་བརླན་པ་འགའ་ཞིག་ཏུ་ནི་ནང་། །ཕུག་རོན་སྒོ་ངའི་དུམ་བུ་རྣམས་ཀྱིས་ཁྱིམ་གྱིས་བསགས་པ། །གཞན་དུ་རྣོ་ཞིང་འདྲེས་པ་
སར་བ་མིན་དང་སར་རྣམས་ཀྱིས། །འགའ་ཞིག་བར་ཆད་མེད་པའི་དུམ་བུ་རྣམས་ཀྱིས་ཀུན་ནས་ཁྱབ། །འགའ་ཞིག་ཏུ་ཡང་ཁ་སྐྱེས་དབྱུག་པ་དམའ་བར་བྱ་བའི་ཡན་ལག་གིས། །ཞོ་ནི་སྲུབ་པར་ངེས་པའི་ཀུན་ནས་བསགས་པའི་འོ་མ་ཕྱུགས་ཀྱི་ལྷས། །ཀུན་ནས་དྲི་མ་ཅན་དང་རྙིང་བ་རྣམས་ཀྱིས་
གཞན་དུ་ཁྱབ་པས་ཆག །ལྷོད་ཅིང་བར་ཆད་རྩིབ་མ་ཤ་རེ་ཀ་ཡི་དྲ་བ་རྣམས་ཀྱིས་ཁྱབ། །དེ་ནས་བྱང་ཆུབ་སེམས་དཔའ་འཁོར་དང་བཅས་པ་གཏོར་མ་རྒྱས་པའི་སྐད་ཀྱིས་གཉིད་སད་པས་ཀུན་ནས་དོགས་པའི་བྱ་ཀཽ་ཤི་ཀས་ལྷག་པར་གནས་བཞིན་པའི་ནྱ་གྲོ་དྷའི་བར་དང་ལྡན་པའི་ཁྱིམ་འགའ་
ཞིག་ཏུ་གཉིད་ཀྱིས་མཚན་མོ་འདས་པ་དང་སྐར་མའི་ཚོགས་རབ་ཏུ་བར་ཆད་པར་གྱུར་པའི་ནམ་མཁའ་ལ། ཁྱོད་ཤི་བའི་འགྲམ་པ་ཀུན་ནས་སྐྱ་བ་ལྟར་གཟུགས་སྲབ་པའི་ནུབ་པའི་རིའི་རྩེ་མོ་འཛིན་པའི་བསིལ་བའི་འོད་ཟེར་ཡོད་པ་ལ། ཕན་ཚུན་ཡང་དག་པར་སྦྱོང་བཞིན་པས་རབ་ཏུ་དགའ་བ་པདྨའི་
སྡོང་བུ་ལ་རྐང་པ་གཞག་པ་དང་ལྡན་པའི་ངུར་པ་ཕོ་མོ་གཉིས་ཡོད་པ་དང་། རི་བོང་ཅན་གྱི་འོད་ཟེར་ལ་ཀུན་ནས་ཆགས་པ་དང་བྲལ་བའི་མྱ་ངན་དང་འདྲ་བར་ཀུ་མུ་ཏའི་འབྱུང་གནས་ཀུན་ནས་ཟུམ་པ་ལ། བུང་བའི་ཕྲེང་བ་འཁོར་བའི་པི་ཝང་གི་སྒྲས་རབ་ཏུ་སད་པ་དང་འདྲ་བར་རྣམ་པར་འཕྲོ་བཞིན་པའི་པདྨའི་
གདོང་དང་ལྡན་པ་བསྐྱོད་པའི་རླབས་ཀྱིས་ལག་པས་རག་པའི་འགྲམ་དང་འབྲེལ་བ་དབུ་བའི་གདུ་བུ་དང་ལྡན་པ། སྒྲ་སྒྲོགས་པའི་ངང་པའི་རྐང་གདུབ་དང་ལྡན་པའི་པདྨོའི་བུད་མེད་རྣམས་ཡོད་པ་ལ། ཁ་ཕྱེ་བའི་ཛ་བའི་མེ་ཏོག་གི་ཕུང་པོ་ལྟར་མངོན་པར་གསལ་བཞིན་པའི་དཀྱིལ་འཁོར་ཅན་གྱི་ཉི་མ་ཡོད་
པ་དང་། ཉི་མའི་འོད་ཟེར་གཞོན་ནུས་རྗེས་སུ་མཆོད་བཞིན་པའི་རྩེ་མོའི་མདུང་དང་ལྡན་པའི་ས་འཛིན་རྣམས་ཡོད་པ་ལ། དེའི་དུས་དང་རྗེས་སུ་མཐུན་པའི་མལ་སྟན་ལས་ལངས་ཏེ། ཀུན་ནས་འཁོར་བས་གྲོང་ཁྱེར་དེ་མཐོང་ཞིང་འདི་བསམས་པར་གྱུར་ཏེ། འདིར་ནི་བསྟན་བཅོས་དུ་མ་རྣམས་ཀྱིས་ཀུན་

ནས་འཕེལ་བའི་མཛེས་པའི་གཏམ་འབྱུང་སྟེ། །སྒེག་པའི་ཉམས་ཀྱིས་འཇམ་པའི་བྷ་ར་ཏ་ཡི་གར་ནི་འདི་ལས་འབྱུང་འགྱུར་ཏེ། །རྟེན་ནས་འཇིགས་པར་འགྱུར་བ་ཅི་ཞིག་འབྱུང་བ་ཞེས་བྱ་བ་ནི་མི་རྟག་པ། །ཨེ་མ་དེ་ལྟར་གྲོང་ཁྱེར་འདི་ནི་ཕུག་རོན་རྣམས་ཀྱི་སྐད་ཀྱི་སྨྲ་བ་འདྲ། །
དེ་ནས་དེར་ཅུང་ཟད་ལོངས་མ་སྤྱད་པས་གུ་ཤིང་གི་འདབ་མ་ལྟར་ལྗང་སེར་ཆུ་ནང་གི་རྩའི་ཚོགས་ཀྱིས་རྫིང་བུའི་ཆུ་བཀབ་པ་དང་། ཕག་རྣམས་ཀྱིས་གནས་བཟང་པོ་དང་མོན་ལུག་དང་ཀ་ཤེ་རུ་ཀ་རྣམས་རྩེ་བ་ནས་འདོན་པ་དང་། ཤིན་ཏུ་རབ་ཏུ་འཕེལ་བའི་རྩའི་ཚོགས་ལ་ལྷན་ཅིག་བྱེད་པ་དང་། ཏི་ལ་
ཀའི་སྡོང་པོ་དང་། ཙམ་པ་ཀའི་སྡོང་པོ་ནུབ་པ་དང་། ནགས་ཀྱི་མ་ཧེ་རྒལ་བ་རྣམས་ཀྱི་རྭ་འཕངས་པས་ཀུན་ནས་འཕུར་བ་དང་། ཀུན་ནས་འབྲེལ་བཞིན་པའི་བུང་བ་རྣམས་ཀྱིས་རྫིང་བུའི་པདྨ་ཀུན་ནས་འགྲོ་བས་མཛེས་པ་འདས་པ་དང་འདྲ་བ་རྗེས་སུ་བསམ་ཞིང་སྐྱེད་མོས་ཚལ་རྙིང་པར་རབ་ཏུ་ཞུགས་པར་གྱུར་
ཏོ། །དེར་ཡང་མ་རལ་བ་དྲི་མ་ཅན་གྱི་གོས་ཀྱིས་ཡན་ལག་བཀབ་པ། སྐྲ་ལོ་དང་ལག་པ་ཀུན་ནས་རྩུབ་པ། མེ་ཏོག་གི་ཡལ་ག་ལ་ལག་པས་འཛིན་པ། ཡལ་ག་ལ་གནས་པའི་རི་དགས་རྣམས་མཐོང་ནས་ངོ་མཚར་བ་ལས་ཡང་དག་པར་སྐྱེས་པའི་འཛུམ་པས་གསལ་བཞིན་པའི་སོའི་ནོར་བུའི་འོད་
ཟེར་རྣམས་ཀྱིས་སྣང་བར་བྱས་པའི་མེ་ཏོག་བན་དུ་ཀ་ལྟར་ཤིན་ཏུ་དམར་བའི་མཆུ་དང་ལྡན་པ་དང་། རྒྱན་མེད་ཀྱང་ཡིད་འཕྲོག་པ། ཡོངས་སུ་སྨིན་པའི་རྩྭའི་རྒྱལ་པོའི་འབྲས་བུ་ལྟར་རྗེས་སུ་མཐུན་པའི་འོ་མ་འཛིན་པ་དང་ལྡན་པ། ཆུ་འཛིན་པའི་ཁྱིམ་གྱི་ནང་དུ་རོལ་པར་བྱེད་པའི་གློག་གི་བུ་མོ་དང་འདྲ་
བའི་བུ་མོས་མེ་ཏོག་རྣམས་ཐུ་ཞིང་མཐོང་བར་གྱུར་ཏོ། །དེའི་དྲུང་དུ་ཉེ་བར་འོངས་ཏེ་དེ་ལ་དྲིས་པར་གྱུར་ཏེ། སྐྱེ་བོ་མེད་པའི་གྲོང་ཁྱེར་འདི་ནི་ཅི་ཕྱིར་ཁྱོད། །མིག་གི་མཐའ་མའི་ཟིམ་པར་སོང་བའི་མིག་མཐར་ལྡན། །སྐྱེ་བོ་རྣམས་ཀྱིས་མ་མཐོང་བ་ཡི་གཟུགས་མཛེས་པ། །གཟུགས་དང་ལྡན་པ་ཉ་ཕྱིས་
སོན་པའི་མེ་ཏོག་འདྲ། །དེས་སྨྲས་པ། བདག་ནི་རྒྱལ་པོའི་བུ་མོ་སྟེ་དབང་པོ་ལས་འདས་པར་གྲོང་ཁྱེར་འདི་གནོད་སྦྱིན་དྲུག་ཅུ་ཙམ་གྱིས་མི་དང་མིའི་སྐྱེ་བོ་དང་། གླང་པོ་ཆེ་དང་རྟ་དང་བ་གླང་དང་མ་ཧེ་རྣམས་མངོན་པར་བྱས་པ་སྟེ། བདག་ནི་གཅིག་པུ་ཉེ་བ་རྣམས་ཀྱི་མྱ་ངན་གྱིས་སྡུག་བསྔལ་བསགས་

པ་སྐལ་བ་དམན་པའི་དྲག་པོ་དེ་རྣམས་ཀྱིས་རང་ཉིད་ལ་བསྙེན་བཀུར་གྱི་དོན་དུ་ལྷག་མར་བྱས་པ་ནི། །གང་ལ་ནྱ་གྲོ་དྷའི་ཤིང་འདི། །སྡོང་ཁང་དུ་བ་ལྟར་འོད་མེད། །གནོད་སྦྱིན་དེ་རྣམས་རྣམ་འགྱུར་བ། །ད་ལྟ་ཕྱོགས་འདི་ནས་འོངས་འགྱུར། །དེ་ཕྱིར་འབད་ལྡན་ཁྱོད་ཀྱིས་ནི། །ཤིན་ཏུ་ལེགས་པར་
གནས་པར་བྱ། །ཀུན་ཏུ་དུས་ཀུན་སྐྱེས་པ་རྣམས། །གང་ཕྱིར་བག་ཡོད་འབྱོར་པའི་ཕྱིར། །གཞན་ཡང་སྐལ་བ་ཆེན་པོ། ནོར་བུ་མཛེས་པའི་སྐྱེ་བ་ལྟར་ནི་བདག་མཛེས་པ། །ཁྱོད་ཀྱི་རྣམ་པ་ཉིད་ནི་ཆེ་བ་ཉིད་ནི་སྨྲ། །དེ་ལྟ་ན་ཡང་བདག་གིས་ཁྱོད་ཀྱི་མིང་རྟོགས་ཕྱིར། །འདོད་དེ་གང་ཕྱིར་བུད་
མེད་རྣམས་ནི་ཕྲ་བའི་བློ། །དེ་ནས་བྱང་ཆུབ་སེམས་དཔས་དེ་ལ་རང་གི་གཏམ་སྨྲས་པ། དེས་ཀྱང་གཏམ་ཐོས་པ་པདྨའི་འདབ་མ་དང་རྗེས་སུ་མཐུན་པའི་རྐང་པའི་མཐེ་བོང་གིས་ས་ལ་ཅུང་ཟད་འབྲི་ཞིང་དཔུང་པའི་ཡལ་ག་ལོགས་འཛིན་ཅིང་ཅུང་ཟད་གོས་ཀྱི་ཁ་ཚར་ཀུན་ནས་གཡོ་བར་བྱེད་ཅིང་ཐུར་དུ་འདུད་
པའི་བཞིན་དང་ལྡན་པ་ཨེ་མའོ། །གལ་ཏེ་རྣམ་པ་དང་བཅས་པར་འདིར་བདག་ནི་ཆུན་མ་ཉིད་དུ་ཉེ་བར་འདོད་པ་ཡིན་ན་དེ་བས་བདག་གི་བུད་མེད་ཉིད་དོན་དང་བཅས་པར་འགྱུར་ཞེས་ཟེར་རོ། །འདོད་པ་དང་ལྡན་བཞིན་པ་ཡང་ངོ་ཚ་བས་མི་སྨྲ་ཞིང་བུད་མེད་འདོད་པ་དང་བཅས་པས་འདོད་པ་ཅན་ལ་ཁྱོད་ཀྱིས་བདག་
ཇི་ལྟར་འདོད་པར་གྱིས་ཤིག་ཅེས་བྱ་བ་ཇི་ལྟ་བ་བཞིན་དུ་སྨྲ་བར་འགྱུར་ཏེ། དེ་བས་ན་བདག་ནི་ཞེ་འདོད་ཀྱིས་བདག་པོ་དངོས་པོ་འདི་ལ་གསལ་བར་བྱའོ་སྙམ་དུ་རྣམ་པར་བསམས་ནས་བྱང་ཆུབ་སེམས་དཔའ་ལ་སྨྲས་པ། རང་གི་འདོད་པ་ཡིད་གནས་པ། །ཁྱོད་ལ་ཅུང་ཟད་སྨྲ་བར་འདོད། །དེ་ནི་བདག་གི་
ངོ་ཚ་བ། །ཆུན་མ་ལྟར་ནི་ཡང་ཡང་འགེགས། །དེ་ཡི་འདོད་པ་དེ་ཡང་ནི། །བློ་གྲོས་ཆེན་པོ་དེས་ཤེས་ནས། །ངོ་ཚས་འདུད་པའི་མིག་ཡངས་པ། །མཆོག་གི་གདོང་ཅན་བླངས་པར་གྱུར། །དེ་ནས་གྲོང་ཁྱེར་རྙིང་པར་ཀུན་ནས་འོངས་ནས་ནི། །དེ་དང་རྗེས་སུ་སོང་སྟེ་ཕོ་དྲང་དུ་ཞུགས་ནས། །
དེ་ཡི་རྙེད་པ་བསྡུས་དང་ལྡན་པ་སྨྲས་ནས་ནི། །གནོད་སྦྱིན་ཉེར་འོངས་དེ་རྣམས་ལ་ནི་དེ་སྨྲས་སོ། །དེ་ནས་ཁ་ལོ་བས་ནི་མྱུར་དུ་མཚོན་ཆ་དང་ལྡན་པ། །རྟ་རྣམས་སྦྱོར་བ་ཤིང་རྟ་འཐབ་པའི་ཕྱིར་ནི་དེ་བྱེད་བཅུག། །མ་མཆུ་མནན་ནས་གཞུ་ནི་བདུངས་ཏེ་མཐོ་བའི་དཔུང་པར་ལྡན། །གསེར་ལས་བྱས་

པའི་ལུས་ནི་སྐྱོང་བ་སྐད་ཅིག་དེ་ལ་བཅིངས། །རྐང་པ་མྱུར་བར་གསང་བ་པ་ནི་དེ་རྣམས་ཡོངས་བྱས་ཏེ། །ཤིང་རྟ་མཆོག་ལ་གནས་པ་དཔུང་བ་དེ་མཐོང་ནས། །ཁྲོས་པས་འབར་བའི་མིག་ནི་མེ་ཡི་འོད་ལྡན་པ། །རྩེ་མོ་རྣོ་བའི་མེ་ནི་སྤྲུལ་པའི་མདའ་རྣམས་བཏང་བར་གྱུར། །དཔུང་
པའི་ཚ་བ་གོ་ཆར་ལྡན་པ་དེ་ཡི་ལུས་ལ་ནི། །གསང་བ་པས་བསྐུལ་མདའ་རྣམས་ཀྱིས་ཀྱང་སྒྲ་ནི་འབྱུང་བ་སྟེ། །ཀུན་ནས་སྐྲག་པས་ཤིན་ཏུ་རྒྱུག་འདྲའི་རི་དགས་རྣམས་ཀྱིས་ནི། །རི་ཡི་མཐའ་མར་རྨིག་པར་སྦྱར་བའི་དགྲ་དང་རྗེས་སུ་མཐུན། །གནོད་སྦྱིན་འདི་རྣམས་ཕམ་པར་གྱུར་པ་རྣམས་ལ་གཡུལ་
ངོར་ནི། །སྐྱེ་བོ་ཆེན་པོའི་ཡུན་རིང་དུ་ནི་ཞི་བར་འབྱུང་འགྱུར་ཏེ། །དེ་ལྟར་རྣམ་བསམས་སྙིང་རྗེ་ཆེ་བར་ཡང་ནི་དེར་གྱུར་ནས། །དོན་ཡོད་སྟོབས་ཀྱི་མཐུ་དང་ལྡན་པས་གཞུ་ནི་འཛིན་པར་གྱུར། །བྱང་ཆུབ་སེམས་དཔའི་ཡང་དང་ཡང་དུ་ལྟུང་བ་ནི། །མདའ་ནི་དེ་རྣམས་ཟད་པ་ཅུང་ཟད་བྱས་མི་འགྱུར། །
ངེས་པར་དེ་ཉིད་ཀྱང་ནི་ཆེན་པོ་འབྱུང་འགྱུར་ཏེ། །བསོད་ནམས་མཐུ་དེ་གང་ཕྱིར་སྡུག་བསྔལ་མ་གྱུར་ཏོ། །དེ་ནས་དེ་ཡི་རྣོ་འཕངས་པ། །མདའ་རྣམས་གནོད་སྦྱིན་ལུས་འབིགས་པ། །རྣ་བའི་མཐར་ནི་ཁུ་ཚུར་བཅངས། །རྟག་ཏུ་སྦྱར་བ་འདྲ་བར་གྱུར། །གནོད་སྦྱིན་གྱིས་དོར་དེའི་གོ་ཆར། །མདའ་
རྣམས་འབྲས་བུ་བཅོམ་པར་གྱུར། །སྐལ་བ་མེད་པས་ཐོབ་དཀའ་བའི། །དངོས་པོ་ལ་ནི་ཡིད་རེ་བཞིན། །ཤིང་རྟ་ཆེན་པོ་སྟེགས་ཀྱི་འདྲ་བར་འགྱུར་བ་སྟེ། །དབྱངས་ནི་བྷ་ཥ་ཊ་བྱས་སྒྲ་དང་འདྲ་བར་གནས། །གཞུ་ཆེན་རྩེ་མོ་མཐོ་བ་གཉའ་ཤིང་འདྲ་བ་སྟེ། །མི་དབང་སྲས་པོ་དེས་ཀྱང་སྦྱིན་སྲེག་བྱེད་པ་འདྲ། །
ལྷ་དང་གྲུབ་ཐོབ་ཀླུ་རྣམས་ཀྱིས་ནི་མཐོང་བཞིན་པ། །སྐད་ཅིག་ལྷུང་བའི་མདའ་རྣམས་བུད་ཤིང་ཚོགས་ལྡན་པ། །འདི་ལྟ་བུ་ཡི་གཡུལ་ངོའི་རྟ་ཅང་དེ་ལ་ནི། །གནོད་སྦྱིན་རྣམས་ཀྱང་རང་ཉིད་ཀྱིས་ནི་ཕྱུགས་སོང་གྱུར། །དེ་ནས་བསད་པའི་ལྷག་མ་གནོད་སྦྱིན་དེ་རྣམས་ལ་མདའ་རྣམས་ཀྱིས་ཡན་ལག་ལ་རྨ་བཏོད་
པས་ཁྲག་འཛེག་པ་དང་། ནུས་པ་ཟད་པ་རབ་ཏུ་འདར་བ་ཐོབ་པ་རྣམས་ལ་གསང་བ་པ་གཅིག་དེ་དང་ཉེ་བར་འོངས་ནས་བྱང་ཆུབ་སེམས་དཔའ་ལ་སྨྲས་པ། །ཁྱབ་བདག་ང་ནི་ཁྱོད་ཀྱི་གྲོགས་ཏེ་འབྱོར་བའི་ཕྱིར། །དེ་ཕྱིར་རིང་པོ་ནས་ནི་གཞུ་ནི་དབབ་པར་མཛོད། །རྒྱལ་སྟེར་ཤིན་ཏུ་ཆེ་བ་མཛོད་ཀྱི་ཕུན་ཚོགས་ནི། །

གཏེར་དུ་བྱས་པས་འདི་དག་ལ་ནི་རབ་བརྟན་བགྱི། །དེ་ལྟར་བགྱི་ཞེས་བྱ་བས་ཕན་ཚུན་དུ་མདའ་དང་བཅས་པར་བྱང་ཆུབ་སེམས་དཔའ་ཁས་བླངས་པ་ལ་གནོད་སྦྱིན་དེ་འོངས་ནས་གཏེར་མང་པོ་གཏེར་སྐྱོང་རྣམས་ཀྱིས་ལྷག་པར་བསྲུང་བ་བརྐོས་ནས་ཉེ་བར་འབུལ་བར་གྱུར་ཏོ། །ཀུན་ནས་ཡང་བྱང་ཆུབ་སེམས་དཔའ་
རྣམས་ཀྱི་ཡོན་ཏན་རྣམས་ཀྱི་ཆེ་བའི་བདག་ཉིད་སྐྱེ་བོའི་གནས་རྣམས་ལ་རབ་ཏུ་གྲགས་པར་གྱུར་ཏོ། །དེ་ནས་རབ་ཏུ་དགའ་བའི་ཡིད་ལ་ལྡན་པའི་སྐྱེ་བོའི་གནས་རྣམས་རེ་ལྡི་དང་། བ་ལང་དང་། མ་ཧེ་དང་། གླང་པོ་ཆེའི་ཕྲུ་གུ་རྣམས་ལ་ཡོ་བྱད་རྣམ་པ་སྣ་ཚོགས་པ་དང་སྣོད་རྣམས་ཀུན་ནས་བཀལ་བ་ནི།
སྟོབས་མཆོག་ཡུལ་རྣམས་བོར་ནས་ནི། །གཞན་དག་ཚེར་མ་མེད་པ་རྣམས། །ཚེར་མ་མེད་ཅིང་ཉེར་འཚེ་མེད། །གྲོང་ཁྱེར་ཆེན་པོ་དེར་འོངས་གྱུར། །ཚོང་རྣམས་འཚོང་བར་བྱེད་པ་ནི། །ཉི་མ་རེ་རེར་ཉེ་བར་ཡང་། །བར་ཆད་མེད་པར་སྐྱེ་ཚོགས་ཀྱིས། །སླར་ནི་ཚོང་ས་གང་བར་གྱུར། །སིན་དྷུ་རས་
དམར་དཔྲལ་འབོར་ཅན། །ཨེ་ལ་བཅག་ལྟར་དྲི་ཞིམ་པའི། །གླང་པོ་རྣམས་ཀྱི་སྨྱོན་ཆུ་སླར། །ཀ་བ་དྲི་ཞིམ་སླར་སྐྱེས་གྱུར། །ཐོ་རངས་སེང་གེའི་ཁྲིར་གནས་པ། །མི་སྐྱོང་གསེར་གྱི་གོ་ཆ་ལ། །སྐྱེ་བོ་འཐབ་པས་བགྲོད་དཀའ་བའི། །རྒྱལ་པོའི་ཉེ་འཁོར་སླར་སྐྱེས་འགྱུར། །ཟུག་རྔུ་ཉེ་བའི་ས་རྣམས་རི་
བོང་མཚན་པའི་འོད། །ཆུ་བོ་གཙང་བའི་ཆུ་ཡིས་བུ་རམ་ཤིང་རྣམས་སྤངས། །ཐོང་ལྕགས་ཀྱིས་ནི་མོན་ལུག་རྣམ་པར་འབིགས་བཞིན་པ། །དྲི་ཞིམ་ཞིང་གི་ས་རྣམས་སླར་ནི་བྱུང་བར་གྱུར། །བ་གླང་ཕྲུ་གུས་ཀུན་ནས་ཁྱབ་པའི་ཉེ་འཁོར་གྱི། །ཁྱིམ་རྣམས་སུ་ནི་སླར་ཡང་གཏུན་ཤིང་དགྲ་རྣམས་ནི། །
བུད་མེད་རྣམས་ཀྱི་གདུ་བུའི་སྒྲས་ནི་རྗེས་འབྲེལ་བ། །མེ་ཏོག་རྣམས་ཀྱིས་མཆོད་པ་ཀུན་ནས་ཐོས་པར་གྱུར། །བུད་མེད་རྣམས་ནི་མེ་ཏོག་ལྡན་པའི་ལུས་ཅན་ལ། །ཀུན་ནས་གཏོར་མ་རྣམས་ནི་སླར་ཡང་འཛིན་པར་གྱུར། །གཉིས་མེད་སྔགས་ཀྱི་ཚིག་དང་རྗེས་འབྲེལ་གྱིས་གཙང་བ། །སླར་ནི་མར་གྱི་
སྲེག་ལུགས་མེ་ལ་ངེས་པར་ལྷུང་། །ཉི་མ་སོང་ལ་ནགས་ཀྱི་མཐའ་ནས་བ་རྣམས་ནི། །བསྐྱོད་པའི་དྲིལ་བུའི་སྒྲས་ནི་ཉེར་འོངས་མཚོན་པ་རྣམས། །ཀུན་ནས་དལ་བའི་རྐང་པ་སླར་ནི་ལྕི་བ་ཡི། །ནུ་འཇིང་རྣམས་ནི་ཁུར་བུས་བ་ལང་ཚོགས་ལ་ཞུགས། །ཉམས་དང་རྗེས་འབྲེལ་ཏིང་ཏིང་ཤགས་ཀྱི་སྒྲ་

དང་བཅས། །གསལ་ཟླ་ཟླ་ཚེས་ལྡན་པའི་མཚན་མོ་རྣམས་ལ་ནི། །བུད་མེད་རྣམས་ཀྱི་འཇམ་པ་དང་ནི་སྙན་པའི་གླུ། །ས་ཡི་དཀྱིལ་འཁོར་རྣམས་ལ་སླར་ནི་ཐོས་པར་གྱུར། །ཅུང་ཟད་བུད་མེད་མཚན་མ་བསྐྱོད་པས་སྟེང་གཡོགས་བསྐྱོད་པ་ནི། །རྒྱས་པ་ཨ་ཐཱ་ས་ཡི་མེ་
ཏོག་ལྟར་ནི་སྔོ་མཐུག་བླ་གོས་ཅན། །དུས་འབྱུང་རི་ཡི་ནང་དུ་བ་གླང་ཚོགས་རྣམས་ལ་ནི་སླར། །ཀ་པི་ཏ་ལྟར་དྲི་ཞིམ་ཆུ་ནི་འབྲོག་ནས་སྲུབ་པར་གྱུར། །ཆུ་རྣམས་འཛིན་པའི་ཆུ་ནི་རྒྱན་གྱིས་ནི། །སྤངས་པའི་འབྲུ་རྣམས་སྐྱེས་པ་ནི། །བ་རྣམས་མང་པོའི་སོ་ཡིས་རྩྭ་ནི་གཞོན་ནུའི་མྱུ་གུའི་རྩེ་བཅད་པ། །སློང་
པའི་སྐྱེ་བོས་གྲོང་གི་ཉེ་འཁོར་ནང་དུ་ཀུན་ནས་ཁྱབ་པ་ནི། །སླར་ཡང་མཛེས་པ་ཉེ་བར་བསགས་པ་དེར་ནི་ཡུལ་རྣམས་འབྱུང་བར་གྱུར། །དེ་ནས་རྒྱལ་པོ་གསེར་གྱིས་ཉི་མ་རེ་རེར་མངོན་པར་འཕེལ་བཞིན་པས་དགའ་བར་གྱུར་པའི་སྲས་ཀྱི་ཆེ་བ་ཉིད་དེ་ཉེ་བར་ཐོས་ནས་དེ་དེ་གུས་པར་བྱ་བའི་ཕྱིར་ཕོ་ཉ་བཏང་བར་གྱུར་
ཏོ། །དེ་ཡང་སྒོ་སྐྱོང་རྣམས་ལ་ཞུས་ཤིང་རྗེས་སུ་གནང་བར་གྱུར་པས་རབ་ཏུ་ཞུགས་པར་གྱུར་ཏོ། །སྟན་ཡོངས་སུ་འཛིན་པར་བྱས་པ་བདེ་བ་འདྲི་བ་སྔོན་དུ་འགྲོ་བས་བྱང་ཆུབ་སེམས་དཔའ་ལ་ཞུས་པ། ཨེ་མ་ཁྱོད་ཀྱི་དཔུང་པ་ལ་ནི་རྒྱས་མིན་སྟོབས། །ཨེ་མ་ཡིད་ནི་བསམ་པའི་ཁྱད་པར་གྱིས་བསྟན་
པ། །གཅིག་པུ་ཉིད་གྱིས་ཤེས་བྱ་ཁྱེད་ཀྱིས་ཕམ་པ་གང་། །ས་སྐྱོང་རང་བཞིན་གྱིས་ནི་དྲག་པའི་གནོད་སྦྱིན་རྣམས། །འདི་ལ་ཅི་ཞིག་ཤིན་ཏུ་ངོ་མཚར་ངོ་མཚར་འདོད། །ཁྱོད་ཀྱི་འདི་ནི་བརྩོན་འགྲུས་གྲོགས་ལྡན་སེམས་ལྡན་པའི། །གླང་པོ་རྣམས་ཀྱི་ཚོགས་ནི་མཐོང་ནས་ཡིད་སྟོབས་ཀྱིས། །ནམ་
ཡང་གཉའ་རལ་ཅན་ནི་བཀུམ་པ་ཉེར་འགྲོ་མིན། །འཇིག་རྟེན་ཚེར་མ་རྩད་ནས་བཏོན་པ་ཆེན་པོ་ཉིད། །དྲི་མེད་མཐོང་བའི་སེམས་ལྡན་རྣམས་ཀྱི་གཞན་དོན་ཉིད། །འགྲོ་བ་ཀུན་ནས་བདེ་ཕྱིར་འོད་ཟེར་རྣམས་ཀྱིས་ནི། །དྲི་མེད་འོད་ཟེར་ཅན་གྱི་རང་བཞིན་འདི་ཉིད་དོ། །དེ་བས་ན་སྐྱེ་བོའི་གནས་འདི་མགོན་
པོ་དང་བཅས་པ་སྟེ། གང་གི་མཐུ་ཆེན་པོ་དང་ལྡན་པ་ཁྱེད་ཅག་ལྟ་བུ་སྲུང་པ་པོ་ཡོད་ཅེས་ཟེར་རོ། །བྱང་ཆུབ་སེམས་དཔས་སྨྲས་པ། །གལ་ཏེ་གནོད་སྦྱིན་འཇིག་རྟེན་འཇིག །རྒྱལ་བའི་ཕྱིར་ནི་ནུས་མི་འགྱུར། །རྒྱལ་དཀའ་ཉོན་མོངས་གནོད་སྦྱིན་དེ། །ཇི་ལྟར་བདག་གིས་ཕམ་པར་འགྱུར། །

གལ་ཏེ་བཅོས་མའི་གྲོང་ཁྱེར་ནི། །ཞུགས་ཕྱིར་བདག་ལ་ཐེ་ཚོམ་ཡོད། །མྱ་ངན་འདས་པའི་གྲོང་ཁྱེར་དེ། །འཇིགས་པ་གཅོད་ལྟར་ཞུགས་པར་འགྱུར། །གལ་ཏེ་བརྩོན་འགྲུས་ཀྱིས་རྒྱལ་སྲིད། །སྐྱོན་མེད་འདི་ནི་ཐོབ་མི་འགྱུར། །ཆོས་ཀྱི་རྒྱལ་སྲིད་བདག་ཇི་ལྟར། །འགྲོ་བ་ཞི་ཕྱིར་ཀུན་ཐོབ་འགྱུར། །
གྲོང་ཁྱེར་ཕུན་ཚོགས་ཆེན་པོ་འདི། །གལ་ཏེ་བྱེད་པར་མི་འགྱུར་ན། །དེ་ཚེ་སློབ་མའི་བརྒྱུད་པ་ནི། །ཇི་ལྟར་རྒྱས་པར་ཁྲིད་པར་འགྱུར། །ཕོ་ཉས་སྨྲས་པ། གང་ཁྱོད་ཀྱི་ནི་འདི་ལྟ་བུ་ཡི་སྤྱོད་པ་ངོ་མཚར་བ། །སེམས་ཅན་དོན་དུ་བརྩོན་པའི་རྣམ་པར་གནོན་པས་དག་པའི་བློ། །གང་ཞིག་གོ་འཕང་
དེ་ནི་ཐུབ་ཆེན་རྣམས་ཀྱིས་ལྷག་གནས་པ། །དེ་ནི་ཁྱེད་ཀྱིས་ཇི་ལྟར་མི་ཐོབ་སྙམ་དུ་ངེས་པར་བྱ། །འདི་ནི་མ་འོངས་པ་ཡི་རྒྱལ་བ་ཡོན་ཏན་རྣམས་ཀྱི་རྟེན། །སྙིང་རྗེ་ཁྱེད་ཀྱིས་ཡུན་ནི་རིང་པོར་ཅི་ཡི་ཕྱིར་ནི་འགེགས། །དེ་ལྟར་ཁྱེད་ནི་བློ་ཡི་གཏེར་ལགས་ཕྲད་པར་འདོད་འདྲ་བའི། །བྱང་ཆུབ་བུད་
མེད་ཀྱིས་ནི་ཡུན་རིང་པོར་ནི་སྡོད་པར་བགྱི། །སེང་གེའི་ཁྲི་ལ་གནས་པ་མངོན་པར་རྫོགས་པའི་བྱང་ཆུབ་ཐོབ་པ་ཁྱེད་ཀྱི་འཁོར་བའི་སྡུག་བསྔལ་རྣམས་གཅོད་པར་བྱེད་པའི་ཆོས་དང་འབྲེལ་པའི་གཏམ་གང་རྣམས་ངེས་པར་ལེགས་པ་འདོད་པ་ཐོབ་པར་འགྱུར་བ་དེ་རྣམས་ནི་རྣམ་པ་ཐམས་ཅད་དུ་དོན་དང་
བཅས་པའོ། །དེ་ལྟ་ན་འདི་ཉིད་འཇིག་རྟེན་པ་ཐམས་ཅད་ལ་ཤིན་ཏུ་ཕན་པས་འཇུག་པའི་བཅོམ་ལྡན་འདས་འདི་སོ་སོ་སྐྱེ་བོའི་གནས་སྐབས་སུ་ཡང་བྱུང་བར་གྱུར་ཏོ་ཞེས་བྱ་བ་རྣམ་པར་བསམས་ནས་དད་པ་དང་ལྡན་པའི་དགེ་བའི་བསམ་པ་ཅན་གྱི་རིགས་ཀྱི་བུ་གྲོལ་བར་འདོད་པས་སངས་རྒྱས་བཅོམ་ལྡན་འདས་
ལ་དང་བས་རྩེ་གཅིག་པར་གནས་པར་བྱ་ཞེས་བྱའོ། །གསེར་གྱི་གོ་ཆའི་སྐྱེས་པའི་རབས་ཏེ་སྐྱེས་པའི་རབས་གསུམ་པའོ།། །།དགྲ་ཡང་ནད་ཀྱིས་བཏབ་ན་སྙིང་རྗེ་ཡིས། །འཇམ་པའི་སེམས་ལྡན་བཏང་སྙོམས་མི་མཛད་དེ། །འཇིག་རྟེན་པ་ཡི་གཉེན་དུ་གྱུར་པ་རྣམས། །སྐྱེ་བ་
མ་ཆད་པ་ལ་སྨོས་ཅི་དགོས། །འདི་ལྟར་རྗེས་སུ་ཐོས་ཏེ། རིག་བྱེད་དང་རིག་བྱེད་ཀྱི་མཐའ་དང་། སྔོན་བྱུང་བའི་གཏམ་ཡང་དག་པར་རྟོགས་པའི་དོན་དམ་པར་ཤེས་པ་དོན་དམ་པར་མངོན་པར་འདོད་པ། སེམས་ཅན་ཐམས་ཅད་ལ་བརྩེ་བ་དང་ལྡན་པའི་བྲམ་ཟེ་བརྩེ་བ་ཅན་ཞེས་བྱ་བ་བྱུང་བར་གྱུར་ཏེ། བདག་

ཉིད་ཆེན་པོ་དེས་ཀྱང་ནད་དང་ལྡན་པ་རྣམས་ཀྱི་ནད་རབ་ཏུ་ཞི་བར་བྱ་བའི་ཕྱིར་ཁ་བ་ཅན་དང་། མན་དྭ་རའི་རི་དང་། ཀུན་ནས་སོང་བ་དང་། བཟོད་བྱས་པ་དང་། འབིགས་བྱེད་ཀྱི་ནགས་ཀྱི་ནང་རྣམས་སུ་སྨན་བཙལ་བའི་ཕྱིར་རྣམ་པར་རྒྱུ་བར་གྱུར་ཏེ། དེ་ནས་ལྟོ་འཕྱེ་རྣམས་ཀྱིས་བསྐོར་བའི་
མཐུག་པ་དང་བཅས་པ། །ཙན་དན་གྱི་ནི་ནགས་རྣམས་སོ་གའི་དུས་ལ་ལྟ་བྱེད་ཅིང་། །ཅོག་གི་རྩེ་མོ་རྣམ་པར་ལྷུང་བས་སྤྲིན་གྱི་ཚོགས་རྒས་པ། །དུས་གཅིག་ཚེ་ན་གྲུབ་ཐོབ་རྟེན་ནི་མ་ལ་ཡར་འཁོར་འགྱུར། །བྱ་ཁྱུང་མཆུ་ཡིས་ཀུན་ནས་དུམ་པས་རྣམ་པར་འཕོ་བ་ནི། །ཕོ་བ་རིས་ནི་སར་པ་ཕུག་གི་སྒོ་
རྣམས་ལ་མཐོང་ཞིང་། །རླུང་གིས་བསྐྱོད་པའི་མེ་ཏོག་རྣམས་ཀྱི་དྲི་ནི་སྣོམ་བྱེད་ཅིང་། །བརྟན་པ་དེ་ནི་ངལ་བ་སྤང་ཕྱིར་བདག་ལ་ལྷག་གནས་འགྱུར། །ཀུན་ནས་ངལ་བ་བསལ་བར་བྱས་པ་ཡང་དག་པར་བླངས་ཏེ་སྨན་ཆེན་པོ་རྣམས་ཀྱི་རྩ་བཟོར་བས་བཏོན་པར་གྱུར་ཏོ། །སྨན་གྱི་ཁུར་བུ་ཆེན་པོ་བཅིངས་
ནས་ད་ནི་འགྲོ་བར་བགྱིས་ཏེ་སྨན་རབ་ཏུ་སྦྱིན་པས་སྐྱེ་བོ་ནད་མེད་པར་བྱའོ་ཞེས་བྱ་བ་རྣམ་པར་བསམས་ཏེ། རི་བོ་མ་ལ་ཡ་ནས་རབ་ཏུ་གནས་བཞིན་པ་ཤིན་ཏུ་ནད་ཆེན་པོས་ལུས་ཀུན་ནས་སྐྱ་བ་དང་། རིད་པ་ཆེ་བའི་མཐར་སྤྱིའུ་བླུགས་དང་། ལྷུང་བཟེད་གཞག་པ་ཡོངས་སུ་སྨིན་པའི་རྩེའི་མལ་དུ་ཉེ་བར་
གནས་པ། མདུན་དུ་རི་དགས་ཀྱི་ཚོགས་འདུག་པ། ཐུན་མཚམས་གསར་པ་དང་འདྲ་བའི་ཆོས་གོས་ཀྱི་ཡན་ལག་ལ་བགོས་པ་ཉེ་བར་ཞི་བའི་རང་སངས་རྒྱས་མཐོང་བར་འགྱུར་ཏེ། དེ་ནས་ཞི་བ་དེ་ནི་མཐོང་ནས་དུལ་བ་ལ་དམིགས་པ། །དཔུང་པ་ལས་ནི་རྩ་བ་དང་བཅས་ཁུར་ཆེན་གཞག་བྱས་
ཏེ། །གུས་པས་དང་བ་འཛིན་པ་ཀུན་ནས་འབྱུང་བ་ལྟར་རིང་གནས། །ས་རྡུལ་ཀུན་ནས་འབྱོར་པའི་སྤྱི་བོས་ཕྱག་ནི་བཙལ་བར་གྱུར། །འདི་ལ་ནད་མེད་སྔོན་དུ་འགྲོ་བར་དགེ་སློང་དེས། །ནད་ཀྱིས་རིད་པར་བྱས་པའི་ཡན་ལག་འདི་ལྟར་སྨྲས། །ཁྱོད་ནི་འཇིག་རྟེན་སྡུག་བསྔལ་ཉེ་བར་ཞི་ཕྱིར་ནི། །
འཁོར་བ་རྣམ་གཅོད་སངས་རྒྱས་གོ་འཕང་ཐོབ་པར་ཤོག །བྲམ་ཟེ་དེས་ནི་འདི་ལ་འདི་ལྟར་དྲིས་པ་སྟེ། །འཕགས་པ་ལུས་ནི་ན་བར་བདག་གིས་མཐོང་བ་ནི། །ཆགས་པ་ཟིལ་གྱིས་གནོན་པར་གནས་པས་རབ་རིད་པའི། །ཚིག་གིས་རང་སངས་རྒྱས་ནི་དེ་ལ་སྨྲ་བར་གྱུར། །འདི་ཡང་གྲོག་

མའི་ཚང་དང་འདྲ་བ་ཡི་ནི་ལུས། །ལས་དང་བརྒྱུད་པའི་རྒྱུ་རྣམས་ཀྱིས་ནི་སྐྱེད་བྱས་ན། །སེམས་ཀྱིས་སྡུག་བསྔལ་བྱེད་པའི་འགྲོ་རྣམས་དུ་མ་ཡིས། །ནད་ཀྱི་ལྟོ་འཕྱེ་རྣམས་ཀྱིས་ཀྱང་ནི་ལྷག་པར་གནས། །རྒས་པའི་གཉའ་རལ་ཅན་མོ་འདི་ནི་གང་གི་ཚེ། །མི་ཡི་ལུས་ལ་ཀུན་ནས་གནོད་པར་བྱེད་པ་ནི། །
དེ་ཚེ་སྡུག་བསྔལ་གྱིས་ནི་དབང་པོའི་ཡུལ་དང་བྲལ། །སེམས་ཀྱི་མཆེ་བ་གཉིས་པ་ང་རྒྱལ་དོར་བར་འགྱུར། །དེ་ནས་འཆི་བདག་གཞན་ནི་རྒྱུ་མཚན་མེད་པའི་དགྲ །ལུས་ཀྱིས་རང་བཞིན་ཁང་པ་འདི་ནི་འཇོམས་པར་བྱེད། །གང་ཕྱིར་གང་ལ་འཇོམས་པ་ལ་ནི་སྐད་ཅིག་གིས། །སྐྱེ་བོའི་བྱ་བ་
ཐམས་ཅད་ཀྱིས་ནི་སྤོང་བ་འབྱུང་། །ཤི་དང་རྒས་དང་ནད་ཀྱི་དགྲ་གསུམ་འདི་རྣམས་ཀྱི། །ལས་ཀྱིས་ཀུན་ནས་བསྐུལ་བའི་སྐྱེ་བོས་རབ་ཏུ་གནོད། །རྒྱུན་མི་འཆད་པར་ཉོན་མོངས་བསྲེག་ལུགས་ཟ་འབྱུང་བའི། །དེ་ཉིད་ཀྱིས་ནི་སྲིད་འདི་འཕགས་རྣམས་ཀྱིས་མི་འདོད། །དེ་ལྟར་
དཔྱད་ནས་ཁྱེད་ནི་རྣམ་དཔྱོད་ལ་མཁས་པ། །སོ་སོར་འཇིགས་པས་ལྟོ་འཕྱེ་དང་མཚུངས་སྲིད་པ་རྣམས། །ཞི་བའི་ལམ་ལ་ཡིད་ཀྱི་རེ་བ་རྣམས་ཞུགས་ནས། །བརྩོན་འགྲུས་རང་བཞིན་ཤིང་རྟ་ལ་ནི་ལྷག་གནས་མཛོད། །དེ་ནས་བྱང་ཆུབ་སེམས་དཔའ་ཨེ་མའོ་ལེགས་པར་བཤད་པ་
ཞེས་བྱ་བརྗོད་ནས། རང་རྒྱལ་བ་དེ་ལ་འདི་ལྟར་ཕྱག་བཙལ་ནས་སྨྲས་པ། ལེགས་བཤད་ནོར་བུའི་རྙེད་པ་ནི། །མ་རིག་རབ་རིབ་གཅོད་བྱེད་པ། །དང་ཟབ་བློ་ཆུང་དམ་པ་ཡི། །རྒྱ་མཚོ་ལ་ནི་གཞན་དུ་ཕྱིན། །སྐྱེས་བུ་དམ་པས་ཀུན་ནས་བསྐུལ་བ་སྐྱེས་བུ་ཡིས། །ཆོས་ལ་བརྩོན་
འགྲུས་ཤིན་ཏུ་གསལ་བ་ཉིད་འགྲོ་སྟེ། །གཟིངས་ནི་རླུང་གིས་རབ་ཏུ་བསྐུལ་བ་འདྲ་བ་ནི། །ཆུ་ཡི་གཏེར་ལ་གནས་པའི་མཁས་པ་སྐྱ་ཆེན་འཛིན། །དེ་བས་ན་བཙུན་པ་ལ་རེ་ཞིག་བདག་གིས་ཡང་དག་པར་བསྙེན་བཀུར་བྱེད་པར་འགྱུར་བ་ཇི་སྲིད་དུ་ནད་འདི་ལས་དགོན་པ་ཆེན་པོ་དང་འདྲ་
བ་ལས་ཀུན་ནས་རྒལ་བ་ཞེས་བྱ་བ་བརྗོད་ནས། ནམ་མཁའི་དབུས་དང་ཉེ་བར་འོད་ཟེར་གྱི་ཚོགས་འཕྲོས་པའི་ཉི་མ་ཡོད་པ་ལ་ཤིང་རྣམས་ཀྱིས་གྲིབ་མ་དང་ཀུན་འབྲེལ་པ་དབུགས་ཀྱི་དབང་གིས་ཀུན་ནས་འཕྲོས་པའི་ལྕེ་དང་རྐན་གསལ་བ་མིག་གི་མཐའ་མ་དཀར་བ་རྫིང་གི་ཆུ་འཇུག་པ་

ལ། བྲད་པར་འདོད་པ་ཆུ་དང་བཅས་པའི་ཆུ་འཛིན་པ་ལྟར་སྔོ་བ་ནགས་ཀྱི་མ་ཧེའི་ཁྱུ་མཆོག་རྣམས་ཡོད་པ་ལ། དྲི་ཞིམ་པའི་ཙན་དན་གྱི་ཤིང་གི་སྡོང་པོ་རྣམས་ལ་བདེ་བླག་ཏུ་ཀུན་ནས་བསྐོར་བའི་ལྟོ་འཕྱེ་རྣམས་ཡོད་པ་ལ་ཤིན་ཏུ་དྲག་པའི་ཉི་མའི་འོད་ཟེར་འཁྱུད་པས་
རྡུལ་གྱི་ཚོགས་ཀུན་ནས་ཚ་བ། ལམ་ནས་འགྲོ་བའི་སྐྱེ་བོ་རྣམས་ཀྱིས་ལམ་རྣམས་རྣམ་པར་བཏང་བཞིན་པ་རྣམས་ཡོད་པ་ལས། རི་བོ་མ་ལ་ཡའི་ཤིང་གི་ཁྱིམ་བདག་རྣམས་ཀྱིས་བྱིན་པའི་ཡོངས་སུ་སྨིན་ཞིང་འཇམ་པ་དང་། དྲི་ཞིམ་པའི་རྣམ་པ་སྣ་ཚོགས་པའི་འབྲས་བུ་ཅན་བསོད་སྙོམས་བླངས་
ནས་ཉི་མའི་འོད་ཟེར་ཞི་བར་བྱ་བའི་ཕྱིར། དེ་ནི་འདབ་མ་རྣམས་ཀྱི་གདུགས། །ཆེ་བྱ་འབྲས་བུ་ཟ་བ་ཡི། །རང་སངས་རྒྱས་ལ་འཛིན་པར་བྱས། །ཐབས་ལ་མཁས་པའི་ཚོང་པ་ནི། །གང་ཞིག་ངལ་བ་མི་སེམས་པ། །དེས་ནི་ཕྱོགས་བཞི་འཁོར་བཞི་པ། །རྙེད་པ་ཆེན་པོ་ཐོབ་
པར་འགྱུར། །བྱང་ཆུབ་སེམས་དཔའ་འདི་བསམས་ནས། །དེ་ལྟར་བསྙེན་བཀུར་བྱེད་བཞིན་པས། །བཀྲེས་མིན་དྲག་པའི་ཉི་འོད་མིན། །ངལ་བ་ཡང་ནི་མ་བརྩིས་སོ། །གལ་ཏེ་འགྲོ་བའི་བླ་མ་མཁས་པ་རྙེད་མ་གྱུར། །སྐྱེ་བོ་ལེགས་པར་བཤད་པ་ཐོབ་པར་མི་འགྱུར་ཏེ། །གང་ཞིག་
ནོར་གྱི་ཕྱིར་ནི་རིན་ཆེན་སར་འགྲོ་བ། །དེ་ནི་རིན་ཆེན་ཁྱད་པར་ཕུན་ཚོགས་ཀྱིས་ནི་སྦྱར། །དེ་ལྟར་དེ་ནི་འཕགས་པ་འཇུག་པ་བསྙེན་བཀུར་ཞིང་། །བརྟན་པའི་སེམས་ཅན་དགེ་བའི་འབྲས་བུ་ཉེར་བསགས་ཕྱིར། །ཉི་མ་རེ་རེར་ཀུན་ནས་ཉེར་བསགས་དང་བ་ནི། །སྐྱེ་བ་རྙེད་པ་འབྲས་
བཅས་ལེགས་པར་བསམས་པར་གྱུར། །དེ་ནས་རང་རྒྱལ་བ་དེ་བྱང་ཆུབ་སེམས་དཔའ་ལ་ཤིན་ཏུ་ཉིས་འགྱུར་གྱི་དང་བ་བསྐྱེད་པའི་དོན་དུ་ནམ་མཁའི་དཀྱིལ་འཁོར་དུ་གནས་ཤིང་རྫུ་འཕྲུལ་དེ་དང་བསྟན་པར་མཛད་དེ། །ཀུན་ནས་རྣམ་པར་འཕྲོ་བ་འོད་ཟེར་ཁྱབ་པའི་སྐུ། །ཆུ་དང་འདྲ་བའི་
དྲི་མེད་ནམ་མཁའ་ལ་ནི་རྒལ། །གསེར་གྱི་རི་དང་མཚུངས་པ་མཛེས་པར་འགྱུར་བ་སྟེ། །པདྨའི་གདན་གྱི་དབུས་སུ་གནས་དབང་ལྡན་པ་དེ། །སྐད་ཅིག་གིས་ནི་ཀུན་ནས་ཕག་གི་ས་ལ་ཞུགས། །རིམ་གྱིས་སླར་ནི་ཉི་མ་བཞིན་དུ་འཆར་བར་མཛད། །རྣལ་འབྱོར་སྟོབས་

ཀྱིས་མང་བ་ཉིད་ནི་དེ་བསྟན་ཏེ། །དཔུང་པ་དག་ལས་ཅིག་ཅར་དུ་ནི་ཆུ་དང་མེ། །རྣམ་པར་བསྐྱོད་པའི་སེན་མོའི་འོད་ལྡན་པདྨ་ཡིས། །མཚུངས་པའི་ཕྱག་གིས་ཉི་མ་ལ་ནི་རེག་པར་མཛད། །སྐྱེ་བའི་འཇིགས་པ་སོང་བ་མང་བ་ཉིད་འགྲོ་འགྱུར། །ཉི་མ་དག་པའི་དབྱིངས་ནི་ཆུ་རྣམས་ལ་ནི་ལྟར། །
རྫུ་འཕྲུལ་སྟོབས་ཆེན་དེ་ལ་འདི་ལྟར་བལྟས་ནས་ནི། །འོད་དང་ལྡན་པ་དྲོ་བ་མིན་པའི་འོད་ཅན་ལྟར། །རིང་དུ་རིང་བར་མི་གཡོ་མཛད་པའི་སྤྱན་གཉིས་ལྡན། །ཤིན་ཏུ་གཉིས་སྐྱེས་གཙོ་བོ་དེ་ནི་དགའ་སྐྱེས་གྱུར། །དེ་ནི་རྫུ་འཕྲུལ་གྱིས་ནི་ཤིན་ཏུ་དགའ་བར་གྱུར་བའི་མཐུ། །རང་སངས་རྒྱས་ནི་
མཐོང་བར་བྱས་ནས་དང་བ་བརྟན་པ་ཡི། །རིག་པ་འཛིན་པ་རྣམས་ཀྱི་མཁའ་ལ་འགྲོལ་བར་གྲོལ་གྱུར་ཏེ། །ཟེའུ་འབྲུ་འབྲས་བུའི་རྡུལ་གྱིས་ལྟོ་བ་སེར་སྐྱའི་མེ་ཏོག་རྣམས། །དེ་ནས་བྱང་ཆུབ་སེམས་དཔའ་སའི་སྟེང་དུ་པུས་མོ་རྣམ་པར་གཞག་ཅིང་རབ་ཏུ་དགའ་བས་སྙིང་ཁེངས་པར་གྱུར་པས་
སྤྱི་བོར་ཐལ་མོ་སྦྱར་བ་རྣམ་པར་བཞག་པས་རང་རྒྱལ་བ་དེ་ལ་ཚིག་གི་ནོར་བུ་འོད་གསལ་བ་རྣམས་ཀྱིས་མངོན་པར་མཆོད་ཅིད་གནས་པར་གྱུར་ཏེ། རྫུ་འཕྲུལ་དང་ལྡན་སྐུ་འདི་ནི། །ཁྱོད་ཀྱིས་ཀུན་ནས་མཐོང་བ་ལ། །ཚངས་པའང་ངོ་མཚར་བར་གྱུར་ན། །བདག་འདྲ་སོ་སོའི་སྐྱེ་ཅི་སྨོས། །འབར་
བའི་གཟི་བརྗིད་ཁྱོད་ཀྱིས་ནི། །རྫུ་འཕྲུལ་བསྟན་པར་བྱེད་པ་ལ། །ནམ་མཁའ་འདི་ནི་ལྷག་གནས་པ། །ཉི་མ་གཉིས་ལྡན་འདྲ་བར་མཚོན། །ཁྱེད་འདྲ་རྣལ་འབྱོར་རྣམས་ཀྱིས་ནི། །ངོ་མཚར་འཕེལ་བའི་བདག་ཉིད་ཆེ། །གཞན་ལ་རྗེས་སུ་འཛིན་སྒྲུབ་པ། །མཁས་པ་རྣམས་ཀྱིས་
གསལ་བར་བྱེད། །ཤར་ཕྱོགས་ཁྱད་པར་དྲན་ཟླ་ནི། །བདག་གི་དོན་དུ་སྣང་བ་མིན། །ཆེན་པོ་དག་སེམས་ལྡན་རྣམས་ཀྱི། །སྐྱེ་བ་གཞན་དོན་ཉིད་དུ་ཡིན། །གལ་ཏེ་བདག་ནི་འདི་ལ་ཉེ་བར་འགྲོ་མི་འགྱུར། །ཙན་དན་ཤིང་གིས་མུན་པར་ལྡན་པ་མ་ལ་ཡ། །ཁྱེད་ཀྱི་བསྙེན་བཀུར་
བྱས་པ་ལས་ནི་ཀུན་འབྱུང་བས། །གྲོལ་བའི་ལམ་གྱི་ས་བོན་དགེ་བ་ཐོབ་མི་འགྱུར། །བདག་ལ་རྗེས་སུ་གཟུང་བ་འདོད་པས་འཛིན་བྱེད་པ། །སྐུ་འདི་སྲ་བ་མིན་པའི་མཐུ་ཡིས་ལྕི་བ་ནི། །རི་བོ་མ་ལ་ཡ་ཡི་ནགས་ནང་ཁྱེད་གནས་པ། །ངེས་པར་ཉོན་མོངས་རྣམས་ནི་ཟད་པ་གཡོ་སྒྱུ་

ཡིས། །རྒྱ་མཚོ་རྣམས་ནི་འབར་བའི་འོད་ཅན་ནོར་བུ་འཛིན། །ཆུ་གཏེར་རྣམས་ནི་ཤེལ་སྤྱད་ལྟར་དཀར་ཆུ་ཡི་ནི། །ཤིང་རྣམས་འབྲས་བུ་ཕུན་སུམ་ཚོགས་པ་ཆེན་པོ་ཡང་། །ཁྱེད་ཅག་ལྟ་བུ་གཞན་དོན་ཡུན་རིང་པོར་ནི་ཐོབ། །ཁྱེད་ཀྱི་ཚིག་སྐུད་རྣམས་ཀྱི་ཡོན་ཏན་
བསྟོད་པའི་མེ་ཏོག་ཕྲེང་། །བརྒྱུས་ནས་གང་ཞིག་དགེ་བའི་རྩ་བའི་འབྲས་བུ་བདག་གིས་ཐོབ། །དེས་ནི་ཤེས་རབ་ཀྱི་སྟེ་སྟོབས་བཅུ་ཉིད་ནི་ཐོབ་བྱས་ནས། །འགྲོ་བ་འདི་ལ་སྲིད་པ་འཇིག་པའི་རྒྱུར་ནི་བདག་གྱུར་ཅིག །དེ་ནས་རང་སངས་རྒྱས་དེ་བྲམ་ཟེ་དེའི་སངས་རྒྱས་ཉིད་ཀྱི་ཕྱིར་སྨོན་
ལམ་གསན་ནས་ཡིད་རབ་ཏུ་དགའ་བས་དེ་ཉིད་དུ་མི་སྣང་བར་གྱུར་ཏོ། །བྱང་ཆུབ་སེམས་དཔས་ཀྱང་རྙེད་པ་ཆེན་པོ་དང་འདྲ་བར་རྟོགས་ནས། །རང་སངས་རྒྱས་ཀྱི་ཞབས་ཀྱི་རྡུལ་ནི་སྤྱི་བོར་གཞག་བྱས་ནས། །འདིས་ནི་དང་བས་བ་སྤུའི་བུ་ག་ཀུན་ནས་ལངས་པ་དང་། །རི་བོ་མ་ལ་
ཡའི་ནགས་ཀྱི་བར་ནས་སྨན་རྙེད་པ། །འཇིག་རྟེན་པ་ཡི་ནད་ནི་བསལ་ཕྱིར་སྐྱེ་བོའི་ནང་དུ་འགྲོ་བར་འགྱུར། །དེ་ལྟར་ན་བཅོམ་ལྡན་འདས་དེས་བྱང་ཆུབ་སེམས་དཔར་གྱུར་པ་ན་འཇིག་རྟེན་ཐམས་ཅད་ཀྱི་ཉོན་མོངས་པ་བསལ་བར་འདོད་པས་སྙིང་རྗེས་རབ་ཏུ་སྤྲོ་བར་བྱས་པའི་བརྩོན་འགྲུས་
ཀྱི་སྟོབས་རང་གི་ངལ་བ་ལ་མ་བལྟས་པར་རང་སངས་རྒྱས་ནད་པ་ལ་དེས་བསྙེན་བཀུར་བྱས་པར་གྱུར་ཏོ། །དེ་བས་ན་དགེ་བའི་འབྲས་བུ་མངོན་པར་འདོད་པའི་རིགས་ཀྱི་བུས་ནད་པའི་བསྙེན་བཀུར་བྱེད་པ་ལ་གུས་པ་མ་ཡིན་པས་གནས་པར་མི་བྱ་ཞེས་བྱ་བའོ། །རྩ་བ་ཅན་གྱི་སྐྱེས་པའི་རབས་ཏེ་སྐྱེས་པའི་རབས་བཞི་པའོ།། །།
བདག་སླད་དེ་ནི་འཇིག་རྟེན་ལ་བདེ་བ། །གང་གི་འགའ་ཞིག་ཏུ་ཡང་སྦེད་པ་བྱེད། །དེ་ཡང་དགྲ་དང་མཚུངས་པ་སྐྱེད་པ་སྟེ། །འཇིགས་པ་ཆེན་པོའི་སྡུག་བསྔལ་སྐྱེས་པ་ཡིན། །འདི་ལྟར་རྗེས་སུ་ཐོས་ཏེ། ཚོགས་པ་གསུམ་ཉེ་བར་བསགས་པ་ལ་འཇུག་པའི་སྐྱེ་བོའི་གནས་དང་། དེ་མངོན་པར་འཕེལ་བས་ཀུན་ནས་ཚིམ་
པའི་རིགས་ཀྱི་གནས་དང་། དགེ་སྦྱོང་དང་བྲམ་ཟེའི་སྐྱེ་བོའི་སྤྱོད་པས་གཙང་བ་དང་། རྟག་ཏུ་ལོ་ལེགས་པས་རབ་ཏུ་དགའ་བའི་གྲོང་དང་ལྷའི་རིགས་ཀྱི་ནང་དུ་འཇུག་པའི་གར་བྱེད་པ་མཐོང་བས་ལེགས་པར་སྨྲ་བའི་གྲོང་བའི་ཚོགས་དང་ལྡན་པའི་གླང་པོ་ཆེའི་གྲོང་གི་གྲོང་ཁྱེར་གྱི་མཆོག་ལ་

ནོར་ཆེན་པོ་དང་ལྡན་པའི་ནོར་ཅན་ཞེས་བྱ་བའི་རྒྱལ་པོ་བྱུང་བར་གྱུར་ཏོ། རྒྱལ་པོ་དེས་སྲས་ཀྱི་དོན་དུ་སྣ་ཚོགས་པའི་ལྷ་ཉེ་བར་མཆོད་པ་ལ་རྩེ་གཅིག་པའི་དུས་གཅིག་གི་ཚེ་ན་བཙུན་མོའི་ལྟོ་བར་བྱང་ཆུབ་སེམས་དཔའ་བཙས་པར་གྱུར་ཏེ། ཇི་ལྟ་ཇི་ལྟར་མངལ་གྱིས་ཀུན་ལ་ལེ་ལོ་ཅན། །
དེ་ནི་སྐྱེ་བ་ཡིད་འཕྲོག་བཞིན་ལྡན་འབྱུང་འགྱུར་བ། །དེ་ལྟ་དེ་ལྟར་དེ་ལ་ལྟ་ཞིང་མི་སྐྱོང་ནི། །ཕྲད་པར་འདོད་པས་བདེ་བླག་ཏུ་ནི་ཉེར་འགྲོ་འགྱུར། །སྲས་ནི་རིང་པོར་བྱིས་པ་ཉིད་དུ་བདག་ལ་རོལ་འགྱུར་བ། །གཞོན་ནུ་ཉིད་ནི་རིགས་ཀྱི་ཁུར་བུ་ཆེན་པོ་འཛིན་གྱུར་ཏེ། །བདག་ནི་འཇིག་
རྟེན་གཞན་དུ་འགྲོ་བ་ཤིང་ནི་སྟེར་བྱེད་པ། །དེ་ལྟར་སྐྱེ་བོ་དེ་ཕྱིར་ངན་སོང་སྡུག་བསྔལ་མཐོང་མི་འགྱུར། །དེ་ནས་དུས་ཀྱི་རིམ་པ་ལས་བཙུན་མོ་མཚན་ཐམས་ཅད་ཀྱིས་བརྒྱན་པའི་ལུས་ལྷའི་གཞོན་ནུ་དང་འདྲ་བའི་གཟུགས་དང་ལྡན་པ་གནས་གྱི་ཁྱད་པར་འདོད་པའི་རྒྱལ་པོའི་
ཡོན་ཏན་དུ་མ་རྣམས་སོ་སོར་སྐྱོང་བཞིན་པ་དང་འདྲ་བའི་དཔལ་ལྡན་སྲས་སྐྱེས་པར་གྱུར་ཏེ། དེ་ནས་དེར་ནི་སྲས་སྐྱེས་པ་ལ་སྲས་ནི་འདོད་པ་ཡི། །བསོད་ནམས་བདག་ཉིད་ནོར་མང་བ་ཡི་ནོར་ཅན་རྒྱལ་པོ་ཡི། །གྲོང་ཁྱེར་དེ་ལ་འཕྲོ་བའི་རིན་ཆེན་འོད་ཟེར་སྣང་བ་ཅན། །ས་ཡི་གཏེར་རྣམས་ཀུན་
ལས་རབ་ཏུ་འབྱུང་བར་གྱུར་པ་ནི། །འཕྲོས་པ་དྲི་མ་མེད་པའི་འོད་ཅན་རིན་ཆེན་རྣམས་ཁ་ཅིག །དྲི་མ་མེད་པའི་འོད་ལྡན་མུ་ཏིག་ཚོགས་ནི་གཞན་དག་ཀྱང་། །ས་སྐྱོང་རྣམས་ཀྱིས་རྒྱ་མཚོའི་འགྲམ་ལ་ལྷག་གནས་བྱས་པ་ནི། །སྣ་ཚོགས་པ་ཡི་ནོར་ནི་ནོར་ཅན་རྣམས་ལ་རབ་ཏུ་སྐུར། །
དེ་སྐྱེས་པ་ལ་གང་ཕྱིར་ནོར། །ནོར་ཅན་གྱི་ནི་དུ་མར་འགྱུར། །དེ་ཕྱིར་ནོར་བཟངས་ཞེས་བྱ་ཉིད། །སྐྱེ་བོ་དེ་ཡི་མིང་བཏགས་གྱུར། །དེ་ནས་དུས་གཅིག་གི་ཚེ་ན་རིག་པ་འཛིན་པར་ནུས་པ་ནོར་བཟངས་ཤེས་ནས་གཞུའི་རིག་བྱེད་ཤེས་པ་རྒྱལ་པོའི་བསྟན་བཅོས་འཆད་པ་ལ་
མཁས་པ་རྣམས་དང་། གླང་པོ་ཆེའི་བསླབ་པའི་རང་གི་མཚན་ཉིད་ཤེས་པའི་མཁན་པོ་རྣམས་ལ་ནོར་ཅན་གྱིས་སློབ་མ་ཉིད་དུ་སོང་བར་གྱུར་ཏེ། སྤོབས་པའི་གྲུ་ནི་མ་རྡོལ་བ། །རིང་པོར་འགྲོ་བ་ལ་ཞུགས་ནས། །རིག་པའི་ཆུ་བོ་ཟབ་རྣམས་ཀྱི། །ཕ་རོལ་དུ་ནི་ཀུན་སོང་

གྱུར། །ལང་ཚོས་སར་པའི་བཟོ་བོ་ཡིས། །འབད་པས་བྱེད་བཞིན་པ་ཡི་ཡང་། །བཞིན་གྱི་རྒྱན་དང་འདྲ་བར་ནི། །ཅུང་ཟད་སྨ་ར་བྱུང་གྱུར་ཏེ། །འདོད་པ་ཇི་ལྟར་བསྟེན་བཞིན་པ། །བདེན་པར་སེམས་ནི་བདེ་བའི་རྟེན། །དེ་ལ་རྟག་ཏུ་ཆོས་དོན་གྱི། །འབྲེལ་
པ་གང་དང་དེ་དག་བཞིན། །སྙིང་སྟོབས་སྒོ་བས་ཕྲག་དོག་བཅས། །རིང་ནས་སྡིགས་མཛུབ་པ་ལྟར་ནི། །རྡུལ་དང་མུན་པ་དག་དེ་ཡིས། །སེམས་ཀྱི་ཁྱིམ་ལ་རྟེན་མ་གྱུར། །དེས་ན་ནོར་བཟངས་མངོན་པར་འགྲོ་བར་བྱེད་པའི་ཡོན་ཏན་རྣམས་དང་ལྡན་པ་མཐོང་ནས་རྒྱལ་པོ་
དེའི་བློན་པོ་བརྒྱ་ཕྲག་ལྔ་རྣམས་རང་རང་གི་བུ་རྣམས་ལ་སྨྲས་པ། གང་ཞིག་སྔོན་དུ་བསྙེན་པ་ཡོན་ཏན་ཅན་ལ་བྱེད། །འབྲས་བུ་དོན་གཉེར་དེ་ནི་དེ་སྐྱེས་འབྲས་བུ་ཐོབ། །ཆུས་ནི་རབ་ཏུ་སྦངས་པས་ས་ལ་སྐྱེས་པ་ཡི། །མེ་ཏོག་ཁ་བཙུམ་བསགས་པ་ཉི་མ་རེ་རེར་བཞིན། །
དེ་བས་ན་ཁྱེད་ཅག་རྣམས་ཀྱིས་འདི་ཉིད་གཞོན་ནུ་ནོར་བཟངས་བསྟེན་པར་བྱ་བ་སྟེ། ངེས་པར་ས་རྗེས་སུ་སྐྱོང་བ་འདི་ལ་ཁྱེད་ཅག་རྣམས་ཀྱིས་བློན་པོའི་གནས་ཐོབ་པར་འགྱུར་ཞེས་ཟེར་རོ། །བློན་པོའི་སྲས་དེ་རྣམས་ཀྱིས་ཀྱང་དེ་ལྟར་བགྱིའོ་ཞེས་བྱ་བ་བརྗོད་ནས་ནོར་བཟངས་ཉེ་བར་བསྙེན་
པར་གྱུར་ཏེ། བློན་པོའི་སྲས་ནི་དེ་རྣམས་ནམ་ཡང་ཉིད་དུ་ནི། །འབྱོར་པའི་ཕྱིར་ནི་བདག་ཉིད་ལྡན་པ་དེ་དོར་མིན། །ཤིན་ཏུ་ཡོན་ཏན་རྣམས་ཀྱིས་ཕན་ཚུན་ཉེར་འབྲེལ་བའི། །ཆོས་དང་དོན་དང་འདོད་པ་ལྟར་ནི་སྐལ་ལྡན་ལའོ། །དེ་ནས་དབང་པོའི་སྡེ་ཆེན་པོ་ཞེས་བྱ་བའི་རྒྱལ་པོ་རྒྱལ་པོ་ནོར་ཅན་
དང་མི་མཐུན་པ་སྟེ། དེ་ཡང་རང་བཞིན་གྱིས་གདུལ་བར་དཀའ་བ་ཉིད་ཀྱི་ཕྱིར་ཉི་མ་རེ་རེར་བདག་ཉིད་ཀྱི་ཡུལ་ལ་དམ་པ་མ་ཡིན་པའི་ཆད་པས་གནོད་པ་བྱས་པར་གྱུར་ཏོ། །རིམ་གྱིས་ཀྱང་དེའི་ཡུལ་ན་གནས་པ་རྣམས་མུ་གེའི་སྐྱོན་གྱིས་ཡོ་བྱད་དང་ནོར་དང་འབྲས་བུའི་ཚོགས་ཟད་པས་
ཀུན་ནས་སྲབས་པ་ཉིད་ཀྱིས་ལུས་ཀྱི་འབད་པ་མེད་པ་དང་། ཀུན་ནས་རྙིངས་ཤིང་དྲི་མ་དང་བཅས་པའི་བླ་གོས་དང་ལྡན་པ་དང་། ཀུན་ནས་ཉམ་ཆུང་བ་དང་། བྱིས་པ་རབ་ཏུ་ངུ་བ་ཡུན་རིང་པོར་སྒྱེད་པོའི་མེ་ཤི་བ་རྣམ་པར་ཟློག་པར་གྱུར་པ། ཀུན་ནས་རིད་པའི་གླང་རྒན་པོའི་ཁ་ནས་

བཀུག་པའི་རྩ་དང་ལྡན་པ་རང་རང་གི་ཁྱིམ་མཐོང་ནས་ཡིད་འབྱུང་བ་སྐྱེས་པ་ཀུན་ནས་ཡི་གེས་ཕོངས་པར་འདི་སྐད་ཅེས་སྨྲས་པར་གྱུར་ཏོ། །ཀྱེ་མ་གནས་སྐབས་འདི་ནི་དཀའ་བ་ཞེས་བྱ་བ་སྟེ་ཁྱིམ་རྣམས་གང་ཞིག་ཉིད་དགའ་སྟོན་གྱི་དུས་སུ་རབ་ཏུ་དགའ་བའི་ཀུ་སུམ་བྷའི་མེ་ཏོག་ལྟར་དམར་བའི་
གོས་འཛིན་པའི་བུད་མེད་རྣམས་ཀྱིས་སློང་མོའི་སྐྱེ་བོས་ཀུན་ནས་ཞུགས་པར་གྱུར་པ་དང་། སྲུབ་བྱེད་དང་གཏུན་ཤིང་གི་སྒྲས་བར་ཆད་པ་མེད་པ་དང་། མེ་ཏོག་རྣམས་ཀྱིས་མཆོད་པ་དང་། བ་གླང་གི་ལྕི་བ་སེར་པོས་ཉེ་བར་བྱུགས་པ་དང་བེའུ་ཚོ་བ་རྣམས་རབ་ཏུ་རྩེ་བ་དང་། མཚན་མོའི་དུས་སུ་བ་
གླང་གི་ཚོགས་ཀྱིས་ཉེ་བར་འདུག་པའི་བ་གླང་གི་ཚོགས་ཀྱི་སྐྱུགས་ལྡད་ཐོས་བཞིན་པ་བསྐྱོད་པའི་དྲིལ་བུ་ཆུང་གི་སྒྲ་འཇམ་པ་དང་ལྡན་པ་ཁོ་བོ་ཅག་ལ་དགའ་བའི་ཕྱིར་འབྱུང་བར་གྱུར་པ་དེ་རྣམས་ཉིད། མིའི་བདག་པོ་འདིའི་དམ་པ་མ་ཡིན་པ་ལས་འཇུག་པའི་ཆད་པས་ཡོ་བྱད་ཟད་
པས་སེམས་དང་བཅས་པ་གང་གིས་ཡིད་འབྱུང་བསྐྱེད་པར་མི་འགྱུར་སྙམ་སྟེ་རྫ་མ་ཟས་དང་བྲལ་བ་བཀྲེས་པར་ཉེ་བར་གདུངས་པ་འཁོར་ནི་སྡུག་པ་དང་། མར་མེ་མེད་པར་མཚན་མོའི་སྒོར་ནི་མུན་པ་རབ་རིབ་བཀག་པས་ཟ་བ་ནི། །དོན་གཉེར་རྣམས་ཀྱིས་སྒོ་ནི་མ་མནན་པ་སྟེ། དགའ་
སྟོན་ལ་རྫོགས་ཀྱེ་མ་ནི། །ཁྱིམ་ནི་བཙོན་ར་མཚུངས་ཏེ་ཁྱིམ་དང་ལྡན་པའི་མྱ་ངན་ཕྱིར་ནི་འབྱུང་བར་འགྱུར། །ཐབས་མེད་པར་བློན་པོ་འདི་རྣམས་ནི་ཆོས་མ་ཡིན་པ་ལ་རྩེ་གཅིག་པ་ཡང་འདི་ལྟར་དབང་པོའི་སྡེ་ཆེན་པོའི་རྒྱལ་པོ་ལ་བསྙེན་པར་བྱེད་སྙམ་དུ་ཁོ་བོ་ཅག་སེམས་པར་བྱེད་དེ།
བརྙས་པས་འོད་མེད་ཀྱང་ནི་ཨེ་མ་མི་སྐྱོང་ལས། །བསྙེན་པོའི་སྐྱེ་བོས་བདེ་བ་ཀུན་ནས་རྗེས་འདོད་དོ། །འགའ་ཞིག་ཏུ་ནི་འཐུང་འདོད་ལམ་ནས་འགྲོ་བ་ན། །ལམ་དུ་ཆུ་ནི་འདམ་བཅས་ཀྱང་ནི་འཐུང་བར་བྱེད། །ཤེས་རབ་ཀྱིས་རྒན་པ་རྣམས་ཀྱིས་ཀྱང་དམ་པ་མ་ཡིན་པའི་ལམ་ལས་རྒྱལ་
པོ་འདི་ལོག་པར་གྱུར་པ་འགྱོད་པར་མི་འགྱུར་ཏེ་རྣམ་པ་ཐམས་ཅད་དུ་རང་བཞིན་ནི་ཟློག་པར་དཀའོ་སྙམ་མོ། །གཞན་གྱི་གྲགས་པ་བརྗོད་པར་བྱ་བ་འོངས་པ་ནི། །ཡུན་རིངས་ཕྱིར་ནི་གང་དག་འཇིགས་ཕྱིར་ངེས་འགྱུར་ཏེ། །རླུང་པོ་དེ་ནི་རྨོངས་པས་བསལ་བར་འདོད་པ་སྟེ། །ཟླ་བའི་དཀྱིལ་འཁོར་ལས་ནི་

མཚན་མ་དྲི་མར་བཅས། །གང་ཞིག་སྐྱེས་བུ་དམ་པ་ཁྱད་པར་ལས་ལེགས་གནས་སྤངས་ཏེ། །དམ་པ་མ་ཡིན་ལམ་ནས་འགྲོ་སྟེ་དབང་པོ་མ་རྒྱལ་ཕྱིར། །སའི་དབང་ཕྱུག་ཐ་མར་མ་ལེགས་སྐྱེས་བུ་རིང་པོ་ནས། །སྤང་བར་འོས་ཏེ་ལམ་ནས་འགྲོ་བས་ཁྱིམ་གྱི་ཁྲོན་པ་
ལྟར། །དེ་བས་ན་ཡུལ་འདི་དམ་པ་མ་ཡིན་པའི་ཆད་པས་བཙིར་བ་སྤངས་ནས་རིགས་པའི་ལམ་འཛིན་པའི་རྒྱལ་པོ་ནོར་ཅན་གྱི་ཡུལ་དུ་འགྲོ་བར་བྱའོ་ཞེས་བྱ་བ་བརྗོད་ནས་ཁྱིམ་གྱི་བདག་པོ་རྣམས་ཤི་བ་ལས་ལྷག་མའི་གླང་གི་ཚོགས་བཟུང་ནས། སྣོད་ཀྱི་ཡོ་བྱད་འཛིན་པ་རྣམས་ཕའི་ཁང་
པ་དང་འདྲ་བ་དབུགས་དང་ལྡན་པ་ཉིད་རྒྱལ་པོ་ནོར་ཅན་གྱི་ཡུལ་དུ་འོངས་པར་གྱུར་ཏོ། །དེ་ནས་དབང་པོའི་སྡེ་ཆེན་པོའི་རྒྱལ་པོས་སྲིན་པོ་རྣམས་ཀྱིས་སྐྲོད་པ་དང་འདྲ་བའི་རང་གི་ཡུལ་མཐོང་ནས་བློན་པོ་རྣམས་ལ་སྨྲས་པ། བདག་གི་ཡུལ་འདི་ཅིའི་ཕྱིར་སྟོང་པར་སོང་བ་སྟེ། སའི་བདག་པོ་ནོར་
ཅན་གྱི་རྟག་ཏུ་ལོ་ལེགས་པས་དགའ་བའི་ཡུལ་ཞེས་བྱའོ། །སླར་བློན་པོ་རྣམས་ཀྱིས་དེ་ལ་སྨྲས་པར་གྱུར་པ། གལ་ཏེ་བ་ནི་ལྷག་མ་མེད་པར་ཤེས་པས་འཇོ་མིན་ན། །དེ་ནི་བེའུའི་ཕྱིར་ནི་ཉི་མ་རེ་རེར་འོ་མ་འཐུང་། །དེ་བཞིན་རྒྱལ་པོ་གལ་ཏེ་ཆད་པ་ཡང་དག་འཛིན་གྱུར་ན། །ས་ནི་
ཉམས་པར་མི་འགྱུར་བ་དང་དེ་ཡང་ནོར་ལྡན་འགྱུར། །རྒྱལ་པོ་གལ་ཏེ་ས་ཡི་བ་འདི་འཇོ་བར་མི་འགྱུར་ན། །དེས་ན་དེ་རིང་བེའུ་ལྟར་འཇིག་རྟེན་འདི་ནི་རྒྱས་པར་མཛོད། །གང་ཕྱིར་ཡང་དག་པར་ནི་ཉིན་མཚན་མེད་རྒྱས་བཞིན་འདི་ལ། །སྣ་ཚོགས་འབྲས་ལྡན་སར་ནི་གྱུར་ཏེ་དཔག་བསམ་ཡལ་ག་
ལྟར། །རིགས་པ་ལས་མ་འདས་པའི་ལམ་འཛིན་པ་མིའི་བདག་པོ་ནོར་ཅན་གྱི་ཡུལ་ན་ནམ་ཡང་མུ་གེ་ལ་སོགས་པའི་སྐྱོན་འབྱུང་བར་མི་འགྱུར་ཏེ། དེར་ཡང་རིས་བཀྲ་ཞེས་བྱ་བ་ལྟོ་འཕྱེ་རྣམས་ཀྱི་བདག་པོ་ཆུའི་རྟེན་ལ་གནས་པ་སྟེ། དེའི་མཐུས་རྟག་པ་ཉིད་དུ་དུས་མ་ཉམས་པའི་ཆུའི་ཁུར་བུས་རྣམ་
པར་འཕྱང་བའི་ཆུ་འཛིན་པ་རྣམས་གྲོགས་པོ་རྣམས་དང་འདྲ་བར་རྒྱལ་པོ་དེའི་ས་གཞི་འབྲུ་དང་ལྡན་པར་བྱེད་ཅེས་ཟེར་རོ། །དབང་པོའི་སྡེ་ཆེན་པོས་སྨྲས་པ། གལ་ཏེ་དེ་ལྟར་ཡིན་ན་བདག་ཀྱང་དི་རིང་ཉིད་ནས་བརྩམས་ཏེ། ལྷག་མེད་སྐྱེ་བོ་ཆད་པ་མེད། །ལོ་བདུན་དུ་ནི་བགྱི་བ་སྟེ། །རིས་

བཀྲའི་ཀླུ་ཡི་མཐུ་ཡང་ནི། །འདིར་ནི་ཇི་ལྟར་འབྱུང་བར་འགྱུར། །བློན་པོ་རྣམས་ཀྱིས་སྨྲས་པ། །ལྷས་ནི་དངོས་པོ་འདི་ལ་ཀུན་ནས་འཁྲུགས་པས་གནས་པར་མི་བྱ་སྟེ། བདག་ཅག་གིས་ཐབས་དེ་ལྟ་བུ་བྱེད་པར་གྱུར་པ་གང་ཞིག་རྒྱལ་པོ་ཆེན་པོའི་ཡུལ་དུ་གནས་པ་ཉིད་དུ་རིས་བཀྲ་འབྱུང་
བར་འགྱུར་ཞེས་བྱ་བ་རྒྱལ་པོ་ལ་སྨྲས་པར་གྱུར་ཏོ། །དེ་ནས་བློན་པོ་དེ་རྣམས་རང་གི་ཁྱིམ་རྣམས་སུ་འོངས་ཏེ་ཉི་མ་རེ་རེ་བཞིན་དུ་འདི་ལྟར་ཡུལ་དེ་ལ་རིང་པོར་རྗོད་པར་བྱེད་ཅིང་གནས་པར་གྱུར་པ་དང་། གང་གིས་རིས་བཀྲ་སྦྲུལ་གྱི་རྒྱལ་པོ་འདི་ནི་འོངས་གྱུར་པ། །ནོར་ཅན་གྲོང་ཁྱེར་ལ་ནི་རིག་
པའི་སྟོབས་ནི་ཆེན་པོ་ཡིས། །དབང་པོའི་སྡེ་ཅན་དགའ་བ་ཤིན་ཏུ་གྲོགས་པོ་དང་མཚུངས་པ། །དེ་ལ་གསེར་གྱི་སྣོད་ནི་ས་སྐྱོང་གིས་ནི་བྱིན་པར་གྱུར། །རིང་པོར་བརྗོད་པ་དེ་ཡང་ཉེ་བར་ཐོས་ནས་ལ་ལ་ཞིག་སྔགས་གྲུབ་པ་ཀུན་ནས་འོངས་ཏེ་སྨྲ་བ། གསེར་གྱིས་བཀང་བའི་སྣོད་ཁྱེར་ལ་
ཤོག་ཤིག་དང་། བདག་ནི་སྔགས་ཀྱི་སྟོབས་ཀྱིས་ཀླུའི་རྒྱལ་པོ་རིས་བཀྲ་གླང་པོ་ཆེ་ལྟར་ཞགས་པས་བཅིངས་ཏེ་འོངས་པར་བགྱི་ཞེས་ཟེར་རོ། །བློན་པོ་རྣམས་ཀྱིས་ཀྱང་གསེར་གྱིས་བཀང་བའི་སྣོད་ཁྱེར་ཏེ་འོངས་ནས་སྨྲས་པ། ལས་ཀྱི་བྱ་དཀའ་གྲུབ་པ་ནི། །གང་གིས་མངོན་སུམ་དུ་
ཡང་ནི། །བདེན་པར་འགྱུར་རམ་མིན་ཞེས་བྱེད། །ལུས་ཅན་རྣམས་ཀྱི་ཐེ་ཚོམ་བཞིན། །དེ་ཕྱིར་གསེར་གྱིས་གང་བའི་སྣོད། །བཏང་སྙོམས་པ་ལ་གཏད་པར་མཛོད། །ཁྱོད་ཀྱི་རིས་བཀྲ་འོངས་པ་ན། །འདི་ནི་ཁྱོད་ཀྱིས་འཛིན་པར་འགྱུར། །དེས་ཀྱང་དེ་ལྟར་བྱ་ཞེས་བྱ་བ་སོ་
སོར་ཐོས་ནས་རྒྱལ་པོ་ནོར་ཅན་གྱི་ཡུལ་དུ་འོངས་ཏེ་བདག་ཉིད་ལ་བསྲུང་བར་བྱས་ནས་རིས་བཀྲ་ལྷག་པར་གནས་པའི་མཚོ་དེ་མཐོང་སྟེ་ཕྱོགས་བཅུ་སྔགས་ཀྱིས་བཅིངས་པར་གྱུར་ཏེ། ཕྱོགས་རྣམས་ཀུན་ནས་བཅིངས་པ་རྣམས་ལ་གློ་བུར་དུ་ནི་དེས། །དྲག་པོའི་སྔགས་ཀྱི་འབྲས་བུ་ཐོབ་
པ་ལ་ནི་རྩེ་གཅིག་པ། །སྦྲུལ་གྱི་དུག་གིས་རྣམ་པར་དུད་པའི་གདེངས་ཀའི་ཚོགས་ལྡན་པ། །ཀུན་ནས་འཁྲུགས་པའི་མགོ་བོའི་ནད་ནི་དྲག་པོ་བྱུང་བར་གྱུར། །དེ་ནས་ལྟོ་འཕྱེའི་བདག་པོ་རིས་བཀྲ་ཆུ་རྟེན་དེ་ལས་བཞིན་མ་མཐོང་བར་གྱུར་པས་བརྒལ་ནས་འགྲམ་ཤིང་གི་འོག་ཏུ་གནས་

པ་བགྲང་ཕྲེང་ཡོངས་སུ་འདྲེན་པས་ལག་པ་གཡས་པའི་མཐེ་བོང་དང་སོར་མོ་བསྐྱོད་པས་ཅུང་ཟད་བཟླས་པའི་དབང་གིས་ཀུན་ནས་འཕྲོ་བའི་མཆུ་དང་ལྡན་པ། མེ་སྟག་གིས་ཀུན་ནས་སེར་སྐྱའི་མིག་དང་ལྡན་པ། ཀུན་ནས་སྨིན་པའི་འབྲས་ཀྱི་རྩེ་མོ་དམར་བ་ལྟར་སྐྲ་
དང་སྨ་ར་སེར་སྐྱ་དང་ལྡན་པ། བསྙུངས་པ་རྣམས་ཀུན་ནས་རིད་པའི་ལུས་མ་ཁྲོས་ཀྱང་ཁྲོས་པ་དང་འདྲ་བའི་བྲམ་ཟེ་སྲིན་པོའི་གཟུགས་དང་འདྲ་བའི་རིག་པ་སྨྲ་བ་དེ་མཐོང་ནས་འཇིགས་པའི་ཡིད་ཀྱིས་བསམ་ཞིང་གནས་སོ། །རིག་པ་འཛིན་པ་འདི་སྔགས་ཀྱི་མཐུས་ངེས་པར་བདག་ཁྱེར་བར་འདོད་པ་
སྟེ། དེ་ནི་དེ་བས་ན་གང་ལ་སྐྱབས་སུ་འགྲོ་སྙམ་དུ་རྣམ་པར་བསམས་ནས་སྐད་ཅིག་ཙམ་འོག་ཏུ་ལྟ་བས་ཀུན་ནས་གནས་པར་གྱུར་ཏོ། །ཆུ་རྟེན་དེ་དང་ཤིན་ཏུ་རིང་པོ་མ་ཡིན་པ་ན་དཀའ་ཐུབ་ཀྱིས་ཀུན་ནས་རིད་པའི་ལུས་དཀའ་ཐུབ་ཀྱི་ནོར་ཅན་སོ་སོར་གནས་པར་གྱུར་ཏེ། དཀའ་ཐུབ་ཀྱི་ནོར་ཅན་
དེ་ལ་ཡང་པདྨ་ཅན་ཞེས་བྱ་བ་ཉ་ཤོར་བ་ཉེ་བར་འོངས་ནས་ཉི་མ་རེ་རེར་བསྙེན་བཀུར་བྱེད་པར་གྱུར་ཏོ། །དེ་ནས་ཀླུ་དེས་རིག་པ་སྨྲ་བ་དེ་ལ་ཉེ་བར་སྤྱོད་པའི་ཁྱིམ་ཐབ་གང་ཡིན་པ་ཞེས་བྱ་བ་རྣམ་པར་སྤྱད་པར་གྱུར་ཏེ། རྒྱལ་པོ་འདི་ནི་འདི་ལ་སྐྱོབ་པར་མི་འགྱུར་ཏེ། །རིག་པ་གྲུབ་པ་ལས་ནི་དཀའ་ཐུབ་འདི་
མ་ཡིན། །དེ་བས་ཉ་ཤོར་འདི་ནི་ལྟོང་ནི་ཐོབ་པ་ནི། །སོང་ནས་མྱུར་དུ་ཡང་དག་པར་ནི་གསོལ་བ་གདབ། །དེ་ནས་ཉ་ཤོར་བ་དེ་ནི་ཐུབ་པ་དེ་ལ་འབྲས་བུ་རྣམས་ཕོངས་ཏེ་སྙན་པ་སྨྲ་བར་བྱེད་ཅིང་ཤིང་ལོ་ལས་བྱས་པའི་ཁང་པའི་ཉེ་འཁོར་གྱི་བྱུག་པ་བྱས་པས། རང་གི་གནས་སུ་འོང་བར་བྱེད་པ་
བར་དུ་རིས་བཀྲས་བྲམ་ཟེའི་ཆ་བྱད་དུ་མངོན་པར་སྤྲུལ་ནས། དགེ་ལེགས་སྨྲ་བས་མངོན་པར་ཕྱོགས་པར་བྱས་ཏེ་སྨྲས་པ། རེ་ཞིག་ཚེ་དང་ལྡན་པ་ཅུང་ཟད་དྲི་བར་བྱའོ་ཞེས་ཟེར་རོ། །རྔོན་པ་དེས་ཀྱང་ཕྱག་བྱས་ནས་དེ་ལ་སྨྲས་པ། འཕགས་པ་དྲི་བར་མཛོད་ཅིག་ཅེས་ཟེར་རོ། །རིས་
བཀས་སྨྲས་པ། །འདི་དག་ཆུ་གཏེར་རྣམས་ནི་གློག་བརྒྱ་རྣམས་ཀྱིས་ནི། །ཕྱོགས་རྣམས་ཀྱི་ནི་སྒོ་རྣམས་ཀུན་ནས་སྣང་བཞིན་པ། །ནོར་ཅན་ཡུལ་ན་མིག་སྨན་རི་བོ་ལྟར་གནས་པ། །གང་གི་མཐུ་ཡིས་ཆུ་ནི་སྟེར་བར་བྱེད་པར་འགྱུར། །རྒན་པོ་ཉེ་བར་བསྙེན་པས་ཡོན་ཏན་དེ་

ཉིད་རྙེད། །ཆོས་ཀྱི་རྗེས་སུ་འཇུག་པའི་ངེས་པར་རྒྱལ་པོ་འདི། །མུ་གེའི་འཇིགས་པ་དང་བྲལ་གང་ཕྱིར་འདི་ཡི་ནི། །ཡུལ་འདི་རྟག་ཏུ་མེ་ཏོག་འབྲས་བུ་ཤིང་གིས་རྒྱས། །རྒྱུན་མི་འཆད་པའི་ཚལ་གྱི་མདུན་སས་རྣམ་བརྒྱན་པ། །གནས་གཞན་གནས་པ་འཚོ་བའི་བ་གླང་ཚོགས་ལྡན་
པའི། །ཡུལ་ནས་སྐྱོང་རིགས་པའི་ལམ་ནི་འཛིན་པ་ཡི། །ཉེ་བར་འཚེ་བ་རྣམས་ནི་ནམ་ཡང་ཡོད་པ་མིན། །པདྨ་ཅན་གྱིས་སྨྲས་པ། ངེས་པར་འཕགས་པ་གློ་བུར་དུ་འོངས་པ་སྟེ་གང་གི་ཕྱིར་འདི་ལྟར་མི་ཤེས་ཤིང་འདྲི་བར་བྱེད། ཉོན་ཅིག་མཚོ་ཆེན་པོ་འདི་ལ་ཀླུའི་རྒྱལ་པོ་རིས་བཀྲ་ཞེས་བྱ་
བ་སོ་སོར་གནས་ཏེ། དེའི་མཐུས་ཡུལ་འདི་ཆུའི་ཚོགས་ཀྱིས་ལྕི་བ་གློག་གི་འོད་ཟེར་རྣམས་ཀྱིས་ཆོས་ཀྱི་སྒོ་རྣམས་སྣང་བར་བྱས་པ། ཤེལ་གྱི་སྲོག་ཤིང་ལྟར་གཙང་བའི་ཆུའི་རྒྱུན་རྣམས་ཀྱི་ཆུ་འཛིན་པ་རྣམས་ལོ་རེ་རེར་འབྲུ་ཐམས་ཅད་སྒྲུབ་པར་བྱེད་ཅེས་ཟེར་རོ། །རིས་བཀྲས་སྨྲས་
པ། གལ་ཏེ་དེ་ལྟར་ན་ཁྱོད་གཏམ་ཤེས་པ་དེ་བས་ན་བདེན་པའི་དོན་ཁྱེད་ལ་བདག་གིས་སྨྲ་བར་བགྱིའོ། །ལྟོ་འཕྱེའི་བདག་པོ་རིས་བཀྲ་དེ་རྒུད་པར་སོང་བ་ནི་བདག་སྟེ། དེ་བས་ན་ཁྱེད་ཉིད་བདག་ལ་སྐྱབས་སུ་གྱུར་ཅིག་ཅེས་ཟེར་རོ། །དེ་ནས་རྔོན་པ་དེས་ཀུན་ནས་འཁྲུགས་ཤིང་ངོ་མཚར་བ་དང་
བཅས་པས་ཕྱག་བྱས་ནས་རབ་ཏུ་བཏུད་དེ་སྨྲས་པ། དེ་ལྟར་མཐུ་ལྡན་གདེངས་ཅན་དབང་ཕྱུག་ཁྱེད་ཀྱི་ཡང་། །དཀའ་བ་དེ་ནི་ཅི་ཞིག་འགྱུར་བ་ཞེས་བྱ་སྟེ། །དེ་ལྟར་མཐུ་ལྡན་ཁྱོད་ལ་ཡང་ནི་དཀའ་བ་ནི། །གདེངས་ཅན་དབང་པོ་ཅི་ཞིག་ཅེས་བྱ་དེ་འགྱུར་ཏེ། །སྣང་བའི་བློ་ལྡན་རི་དགས་
གསོད་པ་ལ་ཆགས་པ། །གང་ཕྱིར་བདག་ལ་བརྟེན་ནས་མེད་པར་འགྲོ་བ་ཡིན། །རིས་བཀྲས་སྨྲས་པ། འདི་ནི་ཁྱོད་ཀྱིས་བལྟ་བར་འོས་པ་སྟེ་ཤིང་གི་འོག་ན་གནས་པ་བཟླས་པ་བྱེད་ཅིང་འདུག་པ་མཐོང་བ་དྲག་ཤུལ་འདི་ཡིན་ཏེ། བདག་ནི་འདིས་རིག་པའི་སྟོབས་ཀྱིས་ཆུ་རྟེན་འདི་ནས་བཀུག་སྟེ།
རྒྱལ་པོ་དབང་པོའི་སྡེ་ཆེན་པོའི་ཡུལ་དུ་ཁྱེར་བར་འདོད་དོ་ཞེས་སྨྲས་ཏེ། །དཔུང་པའི་བརྩོན་འགྲུས་དང་ལྡན་བསྲེག་ལུགས་ཟ་བ་མཆོད་ཅིང་དེ། །ལ་ངར་མཆེ་བ་བཟླས་པས་སྐད་ཅིག་ཏུ་ནི་བསྐྱོད་པའི་ཆུ་ལྡན་པ། །འདི་ནི་བརྟན་པར་རི་དགས་ལྟར་ནི་མཆེ་བ་རྣོ་བ་ཡི། །དུག་གིས་བྱུགས་པའི་མདའ་

ཡིས་གནད་དུ་རྣམ་པར་འབིགས་པར་མཛོད། །རྔོན་པས་སྨྲས་པ། བདག་ཅག་ལྟ་བུ་རྣམས་ལ་ལས་འདི་སྒྲུབ་པར་བླ་བ་སྟེ་དེ་བས་ན་བདེ་བར་གནས་ཤིང་ལྟོ་འཕྱེའི་བདག་པོས་རང་གི་ཁྱིམ་དུ་སོང་ཤིག་ཅེས་ཟེར་རོ། །དེ་ནས་རིས་བཀྲ་གདེངས་ཀ་
ཅན་ཆུའི་གནས་སུ་ཞུགས་པ་ལ་རྔོན་པ་དེས་ཉ་བའི་ཁྱིམ་དུ་འོངས་ཏེ། མཚན་མོ་འདའ་བར་བྱས་ནས་ཐོ་རངས་ཀྱི་དུས་ལ་མཚོའི་དྲུང་དུ་སོང་ནས་རིག་པ་སྨྲ་བ་དེ་མཐོང་བར་གྱུར་ཏོ། །དེ་ཡང་ས་ལ་པུས་མོ་གཉིས་རྣམ་པར་གཞག་པ་ཁྲུས་བྱས་པ་ཙམ་བཀྲུས་པའི་གོས་རྣམས་
ཡན་ལག་ལ་བགོས་པ། ཡུངས་ཀར་ཕྱེ་མ་སྲེག་པ་མཐོང་ནས་ཤིང་གི་ནགས་ལ་བརྟེན་ནས་རེ་ཞིག་བལྟ་བར་བྱ་སྟེ། རེ་ཞིག་རིག་པ་སྨྲ་བ་འདིའི་སྔགས་ཀྱི་ནུས་པ་བདེན་པ་ཉིད་དུ་ཅི་ཞིག་འགྱུར་རམ། གང་གིས་ལྟོ་འཕྱེའི་བདག་པོ་ལ་འགུགས་པར་འགྱུར་རམ་ཞེས་བྱ་བ་རྣམ་པར་བསམས་
ནས་གཞུ་བདུངས་ཤིང་གནས་སོ། །དེ་ནས་རྣམ་བསྐྱོད་པདྨ་རྣམས་ལ་ར་མིག་གཉིས་པ་འཁོར་ཞིང་འཇིགས། །འཕྲོས་པ་ཆེ་བའི་རླབས་རྣམས་ཀྱི་ནི་དབུ་བའི་མེ་ཏོག་ཕྲེང་གཡོགས་པ། །མེ་དེ་ལ་ནི་ཡུངས་ཀར་གཏོར་བར་བྱེད་ཅིང་སྔགས་ཀྱིས་བསྒྲུབས་པ་ལ། །འཇིགས་བཅས་
འདྲ་བར་ཉ་ནི་འཁོར་བ་དེ་ཡི་ཆུས་ནི་སྒྲ་ཡང་སྒྲོགས་པར་འགྱུར། །དྲི་མ་མེད་པའི་ཆུ་ཡི་དབུས་ལས་མྱུར་དུ་བྱུང་སྟེ་འཇིག་པ་ནི། །ལྕེ་ཡི་རྩེ་མོ་རབ་ཏུ་བསྐྱོད་པ་བུ་མོའི་སྐྲ་དང་མཚུངས་པའི་འོད། །སྦྲུལ་ནི་མེ་དང་ཉེ་བར་སྔགས་ཀྱི་རིག་པས་འགུགས་པར་གྱུར་པ་ནི། །དེ་ཡི་ཆུ་ཡི་སྣོད་ནི་
ཆེན་པོ་དེས་ནི་ལྷག་པར་གནས་པར་གྱུར། །དེ་ནས་རྔོན་པ་དེས་གྲུ་གང་གི་ཚད་ཀྱི་ཆུའི་སྣོད་ལ་གནས་པའི་རིས་བཀྲ་མཐོང་སྟེ། ད་ནི་དུས་འདའ་བ་རིགས་པ་མ་ཡིན་ནོ་སྙམ་དུ་རྣམ་པར་བསམས་ནས། མིག་གི་མཐའ་མའི་ཕྱོགས་ལ་གཞུ་རྒྱུད་རྣམ་ཞུགས་པ། །གཞུ་ནི་བྱས་ཏེ་ཅུང་ཟད་གཡོས་པའི་ལྟ་
བ་ཅན། །རིག་པ་འཛིན་པས་ཤིན་ཏུ་མདེའུ་རྣོན་པོ་ཡི། །མདའ་ཡིས་དེ་ལ་གནད་དུ་ཡང་ནི་འབིགས་པར་གྱུར། །གློ་བུར་ཉེ་བར་འོངས་ནས་འདི་ལ་སྨྲས་པ་ནི། །ལྟོ་འཕྱེའི་རྒྱལ་པོ་འདི་ནི་རྣམ་པར་གྲོལ་བར་མཛོད། །རྔོན་པ་དེ་ནི་ཀུན་ནས་འོངས་པ་མཐོང་ནས་ནི། །སྦྲུལ་

གྱི་དབང་པོ་དེ་ནི་ཆུ་ལས་དེས་ནི་བཏང་བར་གྱུར། །ད་ནས་རྔོན་པས་དེ་ཡི་མགོ་བོ་ཁྲ་བོ་དང་བཅས་པ། །ལྟོ་འཕྱེའི་འོད་ལྡན་རལ་གྲིས་རྣམ་པར་བཅད་པར་གྱུར། །ཁྲོས་པས་རི་དགས་དགྲ་ནི་འཇིགས་པས་མཐོང་བ་ལྟར། །རབ་ཏུ་འཕྲོས་པའི་འོད་ལྡན་མེ་ནི་ཞི་བར་གྱུར། །དེ་ནས་ཀླུའི་རྒྱལ་པོ་རིས་
བཀྲ་ཡིད་རབ་ཏུ་དགའ་བས་དྲི་མ་མེད་པའི་ནོར་བུའི་འཕྲོས་པའི་འོད་ཀྱིས་གདེངས་ཀའི་ཚོགས་སྣང་བར་བྱས་པ། གཡོ་བའི་འོད་ཟེར་རྣམས་ཀྱིས་ཀུན་ནས་ཁ་བསྐྱུར་བའི་ཨིནྡྲ་ནཱི་ལའི་བྲག་ལྟར་བྲང་གི་མཐིལ་རྒྱས་པ། བསིལ་བའི་འོད་ཟེར་ཉེ་བ་དང་འདྲ་བའི་ཆུ་འཛིན་ལྟར་ཉེ་བར་འོངས་ཏེ། རྔོན་པ་དེ་ལ་
དགའ་བ་དུ་མ་རྣམས་སྨྲས་པར་གྱུར་ཏེ། གཉེན་འདུན་ས་འོག་གནས་པ་དང་། །བདག་ལ་རྣམ་པར་བྲལ་བ་ནི། །གང་ཕྱིར་མ་སྐྱེས་དེ་ཐམས་ཅད། །ཁྱོད་ཀྱི་མཐུ་ནི་ཆེན་པོ་འདི། །དེ་བས་ཤིན་ཏུ་གྲོགས་ཤོག་ཅིག །ཆུ་ཡི་གནས་སུ་ཞུགས་པར་བགྱི། །དགོས་པ་ཅུང་ཟད་གང་ཡིན་
པ། །དེ་ནི་ཁྱོད་ལ་བདག་གིས་བགྱི། །དེ་སྐད་ཅེས་སྨྲས་ནས་རྔོན་པ་དེ་ལག་པ་ནས་བཟུང་ནས་འོག་ཏུ་ཞུགས་པར་གྱུར་ཏོ། །དེ་ནས་ལྟོ་འཕྱེའི་བདག་པོ་དེས་འདི་རྒྱན་དུ་མ་འཛིན་པར་བྱས་ནས་ཉི་མ་རེ་རེར་སྦྲུལ་གྱི་མཆོག་ལ་ཉེ་བར་མཁོ་བའི་ཁ་ཟས་ཀྱིས་ཀུན་ནས་ཚིམ་པར་བྱེད་ཅིང་ཉེ་བར་ལོངས་སྤྱོད་
པར་བྱས་པར་གྱུར་ཏེ། །དེ་ནས་དུས་གཅིག་ན། གསེར་གྱི་ཨུཏྤལ་རྣམས་ཀྱིས་དོན་ཡོད་ཞགས། །མཆོད་ཅིང་ཀླུ་ཡི་རྒྱལ་པོ་དེ། །རྔོན་པས་ཀླུ་ཡི་རྒྱལ་པོ་དེ། །མཆོད་ཅིང་དེ་ནི་མཐོང་བར་གྱུར། །དེ་ནས་ངོ་མཚར་བས་དེ་ལ་འདི་དྲིས་པར་གྱུར་ཏེ། ལྟོ་འཕྱེ་ཆེན་པོས་འདི་ལ་ཅི་ཞིག་མཆོད་པ་སྟེ། །
དེས་ཀྱང་ཞགས་པ་དོན་ཡོད་འདི་