Luận tạng Tây Tạng (Tengyur) — Tập 169

ནི་སྨྲས་པ་དང་། །དགྲ་རྣམས་འཇོམས་པར་བྱེད་པ་བདག་གིས་གུས་པར་མཆོད། །ཞགས་པས་ཀུན་ནས་ལྡང་བའི་འོད་ཅན་འདི་ཡིས་ནི། །འཕྲོག་པའི་གློག་གི་ཚོགས་ལྟར་གཟུགས་ནི་འཛིན་པ་ཡི། །ཐལ་མོའི་བར་ན་འཇིགས་པས་རྣམ་གཡོ་
མིག་ལྡན་པའི། །དགྲ་རྣམས་བརྙས་པས་སྐད་ཅིག་ཏུ་ནི་བདག་གིས་བཀུག །དེ་ནས་རི་དགས་དགྲས་ནི་སྦྲུལ་དེ་ལ་སྨྲས་པ། །བདག་ལ་ནོར་གྱིས་ཅུང་ཟད་ཀྱང་ནི་དགོས་པ་མེད། །གལ་ཏེ་ལྟོ་འཕྱེའི་བདག་པོའི་དྲིན་ནི་ཡོད་གྱུར་ན། །འགྲོ་བར་འདོད་མ་བདག་ལ་ཞགས་པ་འདི་གསོལ་

ཅིག །གྲོགས་པོ་ཆེན་པོ་དགའ་བའི་སྲོག་རྣམས་འདི་ནི་ཁྱེད་ཅག་ལ། །བདག་གིས་སྦྱིན་བགྱི་ཞགས་པ་དོན་ཡོད་འདི་ནི་སྨོས་ཅི་དགོས། །དེ་ལྟར་བརྗོད་ནས་ནོར་དང་ལྷན་ཅིག་དགའ་བའི་ཡིད་ཅན་གྱི། །དེ་ལ་ལྟོ་འཕྱེའི་བདག་པོར་གྲགས་པས་དེ་བྱིན་གྱུར། །རྔོན་པ་དེས་ཀྱང་
གསེར་དང་ནོར་བུ་དང་མུ་ཏིག་མང་པོ་དང་ཞགས་པ་དོན་ཡོད་འཛིན་པའི་ལྟོ་འཕྱེའི་བདག་པོ་དེས་རང་གི་ཁྱིམ་དུ་ཁྲིད་པར་གྱུར་ཏོ། །ལྟོ་འཕྱེའི་བདག་པོ་དག་སླར་ཆུའི་རྟེན་དེ་ལ་ལོག་པར་གྱུར་པ་ལ་རྔོན་པ་དེས་ཞགས་པ་དེ་གདན་མཐོན་པོ་ལ་བཞག་པར་བྱས་ནས། །བསྐྱོད་ཅིང་ཁྱབ་པ་སྦྲུལ་གྱི་ཤུན་པ་ལྟར་
འཇིགས་པ། །སྲབ་པ་ཨུཥྚི་ར་ཡི་བྱུག་པས་བྱུགས་པ་སྟེ། །རི་དགས་གླ་ཡི་རྩིས་ཀྱང་རི་མོ་བྲིས་བྱས་པ། །བིལ་བའི་ཤིང་གི་མེ་ཏོག་རྣམས་ཀྱིས་ཀུན་ནས་གཏོར། །དེ་ནས་དུས་གཅིག་གི་ཚེ་ན་པདྨ་ཅན་དེ་ནད་ཀྱིས་འཇིག་རྟེན་ཕ་རོལ་དུ་ཉེ་བར་སོང་བ་སྟེ། །དེའི་བུ་ཨུཏྤལ་ཅན་ཞེས་བྱ་བ་ཅིག་ཡོད་
དེ་དེས་ཀྱང་ཕའི་དྲུང་ནས་ཞགས་པའི་ཆེ་བའི་བདག་ཉིད་དེ་ཉེ་བར་ཐོབ་པ་དེ་ལྟ་བུའི་ཞགས་པ་ལ་མཆོད་ཅིང་འདུག་གོ། །དུས་གཅིག་གི་ཚེ་ན་རི་དགས་དགྲའི་བུ་དེས་ལྟོ་འཕྱེའི་བདག་པོ་ཆུ་དྲི་མ་མེད་པ་དང་ལྡན་པའི་ཆུའི་རྟེན་ཐོབ་ནས་དྲང་སྲོང་དེ་ལ་དགའ་བས་རྣམ་པ་སྣ་ཚོགས་པས་ཡུན་རིང་པོར་
བསྟེན་པར་གྱུར་ཏོ། །དེས་ཀྱང་སྦྲུལ་གྱི་མཆོག་གི་ཆུ་དྲི་མ་དང་བྲལ་བའི་རྟེན་དང་ཉེ་བ་དེ་ལ། ངས་ཀྱང་དེར་ནི་སྦྲུལ་གྱི་མཆོག་ཉིད་ཀྱི། །དྲི་མ་དང་བྲལ་ཆུ་རྟེན་ཉེ་བ་ནི། །གླུ་དང་བཅས་པ་འཇམ་པའི་པི་ཝང་སྒྲས། །འདོད་པ་གསལ་བར་བྱེད་པ་ཐོབ་པར་གྱུར། །དེ་ནས་ཨུཏྤལ་ཅན་གྱིས་དྲང་སྲོང་
དེ་ལ་དྲིས་པ། བཅོམ་ལྡན་འདས་བུད་མེད་ཀྱི་རོལ་པ་དང་རྒོད་པས་པི་ཝང་གི་སྒྲ་དང་འདྲེས་པའི་གླུའི་སྒྲས་གནས་གང་དུ་ཐོས་སོ་ཞེས་ཟེར་རོ། །གླུའི་སྒྲས་གང་ནས་ཐོས་ཞེས་བྱ་བའོ། །ཐུབ་པས་སྨྲས་པ། མི་འམ་ཅིའི་རྒྱལ་པོ་ལྗོན་པ་ཞེས་བྱ་བའི་བུ་མོ་ཡིད་འཕྲོག་མ་ཞེས་བྱ་བ་ཡོད་དེ།
གཟུགས་དང་ལང་ཚོ་མཛེས་པས་ལྷའི་བུ་མོའི་སྐྱེ་བོ་སྐྱེངས་པར་བྱས་པ། སྲིང་མོ་བརྒྱ་ཕྲག་ལྔ་དང་ལྷན་ཅིག་ཏུ་ཉེ་བར་གླུ་ལེན་བཞིན་པ་རྣམས་ལྟོ་འཕྱེའི་བདག་པོ་རིས་བཀྲའི་ཆུ་རྟེན་ལ་དགའ་སྟོན་དང་དུས་ཚིགས་ཀྱི་ཞག་རྣམས་ལ་ཆུ་ལ་རྩེ་བ་ཉམས་སུ་མྱོང་བར་བྱེད་དོ་ཞེས་ཟེར་རོ། །རྔོན་པས་

སྨྲས་པ། བཅོམ་ལྡན་འདས་ངོ་མཚར་བའི་དབང་གིས་བདག་འདྲ་བ་སྟེ། མི་འམ་ཅི་མོ་འདི་རྣམས་དབང་དུ་བྱ་བའི་ཕྱིར་ཇི་ལྟར་ཡང་ནུས་པ་ཡིན་ཟེར་རོ། །ཐུབ་པས་སྨྲས་པ། གང་གི་ཞགས་པ་དོན་ཡིད་ཡོད། །ཆུ་ལྷའི་འདྲ་བ་རྒྱས་པ་ནི། །བརྟན་བདག་ཉིད་དེ་དེས་བཅིངས་ནས། །མིའམ་
ཅི་མོ་དབང་དུ་བྱེད། །ད་ནས་ཨུཏྤལ་ཅན་གྱིས་དེ་ཐོས་ནས་མི་འམ་ཅི་མོ་འཛིན་པ་ལ་བློ་གྲོས་ངེས་པར་བྱས་པ་བདག་ལ་ནི་ཞགས་པ་དོན་ཡོད་པ་ཡོད་དེ། དེ་བས་ན་ཇི་སྲིད་དུ་ཆུ་ལ་རྩེ་བ་ཉམས་སུ་མྱོང་ནས་འདི་རྣམས་ཇི་སྲིད་དུ་མ་སོང་བ་དེ་སྲིད་དུ་ཡིད་འཕྲོག་མ་ཉིད་ཞགས་པ་དེས་གཟུང་
བར་བྱའོ་སྙམ་དུ་རྣམ་པར་བསམས་ཏེ། དྲང་སྲོང་དེ་ལ་གསོང་པོར་སྨྲ་ཞིང་གོམས་པས་མྱུར་བར་ཁང་པར་འོངས་ཏེ། ཞགས་པ་དེ་བླངས་ནས་ལྟོ་འཕྱེ་མཆོག་གི་ཆུ་རྟེན་དང་ཉེ་བར་འོངས་ནས། ཤིང་རྣམས་ཀྱིས་ལུས་ལ་སྒྲིབ་པར་བྱས་པས་མི་འམ་ཅི་མོ་དེ་རྣམས་ཆུ་ལ་རྩེ་བ་ཉམས་སུ་མྱོང་བར་
བྱེད་པ་མཐོང་བར་གྱུར་ཏེ། དེ་ནས་འགའ་ཞིག་ཆུ་ནི་རླབས་ཅན་ལ། །ཞུགས་ནས་མིག་གི་ཨུཏྤལ་རྒྱས་པ་ནི། །ཨུཏྤལ་རབ་ཏུ་རྒྱས་པ་མྱོང་བ་སྟེ། །མིག་ཟླུམ་རྣ་བ་ལ་ནི་ཨུཏྤལ་ལྷུང་། །ཡངས་པའི་མིག་ནི་རྣམ་པར་ཟླུམ་བྱས་པ། །གློ་བུར་ལག་པས་གདོང་ནི་བཀབ་བྱས་ཏེ། །ལག་པ་
ཐལ་སྦྱར་བསྡམས་པའི་ཆུ་རྣམས་ཀྱིས། །འགའ་ཞིག་དེ་དག་ཕྲད་འདོད་གཏོང་བར་གྱུར། །ཡིད་འོང་དོ་ཤལ་གསལ་བར་བྱས་པ་ནི། །གཞན་ནི་གླང་པོ་དཔྲལ་འབུར་ལྟར་ཚོ་བའི། །ནུ་མ་དག་ལ་བ་ཟླའི་ཕྱེད་མ་ལྟར། །ཡིད་འཕྲོག་པདྨའི་རྩི་ནི་དོར་བར་གྱུར། །སྒེག་བཅས་ལྟར་འདི་མི་
ནུས་པར་འགྲོ་ཞིང་། །རྐང་པ་ལ་སྦྱོར་ཆུ་ཡི་རྫི་བསྐྱོད་ཅན། །འགྲམ་ན་ངུར་པ་དག་ནི་ཕོ་མོ་གཉིས། །འགའ་ཞིག་ཕྲད་འདོད་སྐད་ཅིག་ཙམ་མཐོང་ངོ་། །གྲོགས་མོ་བདག་ནི་ཆུ་ལ་རིང་པོར་མི་འཇུག་སྟེ། །ཀུན་ནས་རྒུད་པ་འདི་ལྟ་བུ་ནི་ཐོང་ཞིག་ཅི། །གཞན་དག་གཞན་དག་གིས་ནི་
འཇུག་པར་གྱུར་པ་ན། །ལག་པའི་རྩེ་མོ་ཕྱིར་ལ་གཡོབ་པས་འདི་ལྟར་སྨྲས། །གཞན་དག་གློ་བུར་དུ་ནི་རྒོད་བཅས་གདོང་ཅན་རྣམས། །ཕན་ཚུན་ཡན་ལག་རྣམས་ལ་ཆུ་ནི་གཏོར་བྱེད་ཅིང་། །པདྨོ་ཅན་ནི་བསྐྱོད་ཅིང་ཁྱབ་པའི་པདྨ་ཅན། །འགའ་ཞིག་ཏུ་ནི་བུང་བ་འཁོར་བར་རབ་

བྱས་འགྱུར། །གཞན་ནི་འགྲམ་ན་ཉེ་བར་གནས་པ་སྲབ་པ་ཡི། །པདྨའི་འདབ་ལྟར་དམར་སྐྱའི་སོར་མོ་རྣམས་ཀྱིས་ནི། །དྲི་ནི་ཞིམ་དང་ཁུ་བྱུག་ལྟར་སྔོ་ཅུང་ཟད་རློན། །སྐྲ་ཡི་ལོ་མ་རྣམ་པར་གསལ་བར་འགྱུར། །དེ་ལྟར་ཆུ་ནི་ཨུཏྤལ་ཆེན་པོ་གཡོགས་པ་ཟླ་བ་
བཞིན་གསལ་བ། །པདྨ་རྣམས་ཀྱི་འདབ་མ་དང་ནི་བཅས་པ་རོལ་པས་རྒྱན་བྱེད་པ། །སྟོན་ཀའི་ཆུ་གཏེར་ལ་ནི་གློག་རྣམས་ལྟར་ནི་རྣམ་པར་འཕྲོ་བྱེད་པ། །རི་དགས་དགྲ་དེས་གཡོ་མེད་མི་འམ་ཅི་མོ་དེ་རྣམས་མཐོང་བར་གྱུར། །དེ་ནས་ཆུ་ལ་རྩེས་པའི་མཐར་ཅུང་ཟད་དམར་སྐྱའི་མིག་གི་ཨུཏྤལ་
དང་ལྡན་པས་ཨུཏྤལ་ཀུན་ནས་སྣོམ་ཞིང་བུང་བ་ལྟར་ནག་པའི་སྐྲ་ལོའི་རྩེ་མོ་ལས་ལྷུང་བར་གྱུར་པའི་ཆུའི་ཐིགས་པ་རྣམས་ཀྱིས་ཀུན་ནས་སྤངས་པར་གྱུར་པའི་ཡངས་ཤིང་ཚོ་བའི་འོ་མ་འཛིན་པ་དང་ལྡན་པ། བྲང་གི་མཐིལ་ངལ་བར་བྱེད་ཅིང་འོ་མ་འཛིན་པའི་ཁུར་བུས་ཕྲག་དོག་བྱེད་པ་དང་འདྲ་
བར། མདུན་ན་ཡང་དག་པར་གནས་པའི་ཉེ་འཁོར་གྱི་སྐྱེ་བོའི་ལག་མཐིལ་དུ་གཏད་པའི་སྣ་ཚོགས་པའི་རྒྱན་རྣམས་ལ་བལྟ་བས་རྣམ་པར་འབྲེལ་པ་ཅན། གྲོགས་མོ་རྣམས་ཀྱི་ཁ་དོག་དང་དྲི་ཞིམ་པོས་རྗེས་སུ་བྱུག་པར་གྱུར་པ་རང་བཞིན་གྱི་ཡིད་འཕྲོག་མ་མཐོང་ནས་རྔོན་པ་དེས་ངེས་པར་
མི་འམ་ཅིའི་བདག་པོ་རབ་མཆོག་གི་བུ་མོ་འདི་ཡིན་ཏེ། དེ་བས་ན་རེ་ཞིག་འདི་ཉིད་གཟུང་བར་བྱའོ་སྙམ་དུ་རྣམ་པར་བསམས་ནས་ཤིན་ཏུ་བསྐྱོད་པར་གོམས་པ་རྣམས་མདུན་དུ་ཞུགས་ཤིང་འདུག་གོ། །མི་འམ་ཅི་མོ་དེ་རྣམས་ཀྱིས་ཀྱང་དེ་མཐོང་ནས། རི་དགས་མོ་རྣམས་ལ་སེང་གེའི་འཇིགས་པ་དང་འདྲ་བར་
ལངས་ཏེ་མྱུར་དུ་རྒྱན་དང་གོས་རྣམས་འཛིན་ཅིང་ནམ་མཁའ་ལ་སོང་བར་གྱུར་པ་དང་། རྔོན་པ་དེས་ཀྱང་ཤིན་ཏུ་མྱུར་བར་ཡིད་འཕྲོག་མའི་སླད་དུ་ཞགས་པ་འཕངས་པར་གྱུར་ཏེ། དེ་ནས་ཞགས་པ་དེས་ནི་རྐེད་པར་ཀུན་བཅིང་སྟེ། །ཡིད་འཕྲོག་མ་དེ་ཤིན་ཏུ་ཡིད་འཕྲོག་ཡན་ལག་ཅན། །ནམ་
མཁའ་རི་དགས་དགྲ་ཡི་ཡིད་ནི་འཕྲོག་བྱེད་ཅིང་། །གློག་ལྟར་འཕྲོ་བར་བྱེད་པ་རྣམ་པར་སྣང་བར་གྱུར། །ཞགས་པ་དེས་ཀྱང་བཀུག་པར་གྱུར་པ་ནི་ཐུར་དུ་ལྟ་བས་གནས་པའི་སྐྲའི་ལོ་མ་ནས་བ་ཀུ་ལའི་ཕྲེང་བ་རྣམ་པར་ལྷུང་བ་དང་། ནོར་བུ་ལྟེ་བ་དང་བཅས་པ་ཕྲེང་གཅིག་པའི་སྐ་རགས་

ཚོགས་དང་སྟེང་གོས་བུད་པ། སྐྲག་པའི་དབང་གིས་རྣམ་པར་གཡོ་བའི་མིག་དང་ལྡན་པ་ལྷའི་གླང་པོ་ཆེའི་སྣས་དཔག་བསམ་གྱི་ཤིང་གི་ལྗོན་པ་རྩ་བ་ནས་འདོན་པ་དང་འདྲ་བ་ལེགས་པར་བྱས་པ་ཟད་པས་འཆི་བ་མེད་པའི་བུད་མེད་ལྟར་ནམ་མཁའ་ལས་ལྷུང་བར་གྱུར་ཏོ། །མི་འམ་ཅི་མོ་དེ་
རྣམས་ཀྱང་སྐྱེ་བོ་ཐ་མལ་པའི་ལག་ཏུ་སོང་བའི་ཡིད་འཕྲོག་མ་མཐོང་ནས། ཀྱི་ཧུད་ཅེས་བརྗོད་ཅིང་མྱུར་བར་འོངས་ཤིང་གཏམ་དེ་ཕ་ལ་སྨྲས་པར་གྱུར་ཏོ། །དེས་ཀྱང་སྙིང་རྗེ་བ་ཀུན་ནས་ཕོངས་པའི་ཡི་གེ་འདི་ལྟར་སྨྲེ་སྔགས་འདོན་པར་གྱུར་ཏེ། ཡིད་འཕྲོག་མ་འདི་ཞགས་པས་
བཅིངས་པ་ཞེས་བྱ་བ། །སྐྱེས་པ་སུ་ཞིག་གིས་ཀྱང་ནམ་མཁར་འགྲོ་འགྱུར་བའི། །བདག་གི་སྲིང་མོ་རྣམས་ལས་ཕ་མ་དག་གོས་ཐོས། །མྱ་ངན་གྱིས་ནི་བློ་ནི་འགགས་པ་བྱུང་བར་འགྱུར། །སྲིང་མོ་དེ་རྣམས་གང་དུ་ཕ་མ་གང་དུ་སྟེ། །གཞན་གྱི་དབང་དུ་སོང་བ་བདག་ཀྱང་གང་དུ་ནི། །
ཀྱེ་མ་དགར་གྱུར་འདི་ནི་རྣམ་པར་འཐོར་བ་སྟེ། །ཚོགས་ནི་སྣ་ཚོགས་བསྐྱེད་པ་ཁྱོད་ཀྱིས་དེ་རིང་ཅི། །ཡིད་འཕྲོག་བུ་མོ་ཁྱོད་ནི་གང་དུ་སོང་བ་སྟེ། །འཇིག་རྟེན་གསུམ་གྱི་སྡུག་བསྔལ་ཅི་ལྟར་བཟོད་པར་འགྱུར། །བདག་ནི་མ་དེ་དེ་ལྟར་བརྗོད་ཅིང་སྙིང་རྗེ་བར། །ཡུན་རིང་པོར་ནི་ཡང་དང་ཡང་དུ་ངུ་
བར་འགྱུར། །དེ་ནས་རྔོན་པ་དེས་ཤིན་ཏུ་ངུ་བ་དེ་ལ་བཟང་མོ་ངུ་བ་དེས་ཆོག་ཅིང་ཆོག་གིས་ཁྱེད་ལ་འཇིགས་པ་ཅུང་ཟད་བདག་ལས་ཡོད་པ་མ་ཡིན་ཞེས་བྱ་བ་སྨྲས་པར་གྱུར་པ་དང་། དེས་ཀྱང་དེ་ལ་སྨྲས་པར་གྱུར་པ། མིང་པོ་གལ་ཏེ་ཁྱེད་ལ་བདག་ལ་བརྩེ་བ་ཅུང་ཟད་ཡོད་ན་དེ་བས་ན་བདག་ཞགས་པས་
བཅིངས་པ་ལས་བཀྲོལ་ཏེ། སྐྱེས་བུ་མཆོག་སུ་ཞིག་ལ་སྦྱིན་པར་འོས་ཞེས་ཟེར་རོ། །རྔོན་པས་སྨྲས་པ། །ཞགས་པས་བཅིངས་པ་རྒྱས་པ་འདི། །གལ་ཏེ་ཁྱོད་ལ་བདག་བཀྲོལ་གྱུར། །ངེས་པར་ནམ་མཁའ་ལ་འཕུར་ནས། །རང་གི་གནས་སུ་འགྲོ་བར་འགྱུར། །མི་འམ་ཅི་མོས་སྨྲས་པ།
བདག་གི་མིང་པོ་ནི་རྣམ་པ་ཐམས་ཅད་དུ་དད་པ་མ་ཡིན་ཏེ། གཙུག་གི་ནོར་བུ་འདི་ཡི་མཐུས། །ནམ་མཁའ་ལ་ནི་བདག་འགྲོ་སྟེ། །གྲིབ་མ་ཕོགས་པ་མགོ་བོ་ལས། །བདག་ནི་འདི་དེ་བཟུང་བར་མཛོད། །གློ་བུར་དུ་ནི་རྒོད་པའི་ཟླ་འོད་དུ་མ་བྱས་པ་ཡི། །བརྟན་པ་བྲལ་བའི་ལྗོན་ཤིང་བུ་མོ་

མཚན་མོ་ལས། །གསལ་བའི་གཙུག་གི་ནོར་བུའི་ཟླ་བ་གུས་པ་ཡིས། །དེ་ནས་རྔོན་པའི་སྒྲ་གཅན་དེས་ནི་གཟུང་བར་གྱུར། །ཕྱིས་ཀྱང་འདི་ལྟར་བསམས་ཤིང་འདུག་གོ། །གལ་ཏེ་ནོར་བཟངས་ཀྱིས་ནི་ཐོས་པའམ། །ཤིན་ཏུ་གཟུགས་བཟང་མི་ཅི་མོ་མཐོང་
ན། །ཁྲོས་པ་ཆེན་པོའི་བཟོད་པ་བཞིན་དུ་ནི། །ནད་ཀྱིས་བདག་ལ་ངེས་པར་གཅོད་པར་འགྱུར། །དེ་ཡི་ཕྱིར་ན་མིག་ནི་བཟང་མོ་འདི། །ལྷ་ཡི་གནས་ལས་ལྷ་ཡི་བུ་མོ་ལྟར། །ལྷུང་བ་ནོར་བཟངས་ཉིད་ལ་སྦྱིན་བྱས་ཏེ། །སླར་ཡང་དེ་ལས་ནོར་ནི་བདག་ཐོབ་འགྱུར། །དེ་ལྟར་
རྔོན་པས་བསམ་པར་བྱས་ནས་དེ་ལ་སྨྲས་པ། བཟང་མོ་མྱ་ངན་ཡོངས་སུ་དོར་བར་མཛོད་ཅིག་དང་། འདིར་ནི་ནོར་བཟངས་ཞེས་བྱ་བ་རྒྱལ་པོ་གཞོན་ནུ་ལྷའི་གཞོན་ནུ་དང་འགྲན་པ། ཡོན་ཏན་མང་པོ་རྣམས་ཀྱི་ལྷའི་རྟེན་ཡོད་དེ་དེ་ལ་བདག་གིས་ཁྱེད་སྦྱིན་པར་བྱའོ་ཞེས་ཟེར་རོ། །དེས་ཀྱང་
མཆི་མས་ཡོངས་སུ་འགགས་པར་གྱུར་པའི་ཚིག་ངར་ངར་པོ་དང་ལྡན་པས་ནི་ཁྱོད་ཇི་ལྟར་ཤེས་པར་འགྱུར་བ་དེ་ལྟར་གྱིས་ཤིག་ཅེས་བྱ་བ་ཡང་དང་ཡང་དུ་རྒྱུན་མ་ཆད་པའི་མཆི་མའི་ཐིགས་པ་རྣམས་ཀྱིས་འགྲམ་པ་བཀྲུས་པར་གྱུར་པས་ཀྱི་ཧུད་མ་ཀྱི་ཧུད་ཕ་ཞེས་སྨྲེ་སྔགས་འདོན་ཅིང་ངུ་
བར་གྱུར་ཏོ། །གཞོན་ནུ་ནོར་བཟངས་ཀྱིས་ཤིང་རྟ་མཆོག་ལ་ཞོན་ནས་ཡིད་ཆེས་པའི་སྐྱེ་བོ་ཉུང་ཟད་ཙམ་གྱིས་ཡོངས་སུ་བསྐོར་ནས་སྐྱེད་མོས་ཚལ་འགའ་ཞིག་ལ་རྩེ་བར་བྱས་ཏེ། རང་གི་གནས་སུ་སོང་ཞིང་མི་འམ་ཅི་མོ་དེའི་སྨྲེ་སྔགས་འདོན་པའི་སྒྲ་དེ་ཐོས་ནས་སུ་ཞིག་འདི་ངུ་བ་ཡིན་སྙམ་
དུ་རྣམ་པར་བསམས་ནས་རིམ་གྱིས་ཉེ་བར་འོངས་ཏེ། མི་འམ་ཅི་མོ་དེ་ཨུཏྤལ་ཅན་གྱི་ལག་ཏུ་སོང་བ་མཐོང་བར་གྱུར་ཏོ། །ཨུཏྤལ་ཅན་གྱིས་ཀྱང་ནོར་བཟངས་ལ་མངོན་པར་ཕྱག་བཙལ་ནས་སྨྲས་པ། གཞོན་ནུ་ལགས་ཡིད་འཕྲོག་མ་ཞེས་བྱ་བའི་བུ་མོ། འདི་ནི་མི་འམ་ཅིའི་རྒྱལ་པོ།
ལྗོན་པའི་ཤིང་རྣམས་ཀྱིས་ཁྱབ་པ། །ཆུ་ལ་རྩེ་བར་བྱས་ནས་ནི། །ཀླུ་ནི་རིས་བཀྲའི་ཆུ་རྟེན་ལ། །མི་འམ་ཅི་མོ་གཞན་ལྷན་ཅིག །ནམ་མཁའི་དཀྱིལ་དུ་འགྲོ་བཞིན་པ། །བདག་གིས་ཞགས་པ་དོན་ཡོད་པས། །རི་དགས་མོ་བཞིན་བཟུང་བྱས་པ། །འདི་ཡང་ཁྱོད་ལ་འོས་པ་ཞིག །

དེ་ལྟར་ཡང་ཡང་རྗེས་བསམས་ནས། །བདག་གིས་བཟུང་ནས་འོས་པ་སྟེ། །དེ་བས་ཁྱོད་ཀྱིས་འདི་ཟུང་ཅིག །གསེར་ལ་རིན་ཆེན་ཐུར་མ་དང་། །ཀུ་མུ་ཏ་འབྱུང་ཟླ་འོད་དང་། །འདི་ཡང་ཁྱེད་ལ་གནས་བཞིན་པ། །གསུམ་པོ་ལེགས་པར་མཛེས་པ་ཡིན། །འདི་ནི་ནོར་བུ་འདི་ཡི་མཐུ་
ཡིས་ནམ་མཁའ་ལ། །ཡིད་འཕྲོག་གདོང་ཅན་མ་ནི་མྱུར་དུ་འགྲོ་བ་སྟེ། །དེ་བས་གསལ་བའི་འོད་ཟེར་ཅན་གྱི་ནོར་བུ་འདི། །ཟུང་མཛོད་གཞོན་ནུས་དེ་ལ་ཀུན་ནས་འཛིན་པར་འགྱུར། །དེ་ནས་རྒྱལ་པོའི་སྲས་ཀྱིས་དེ་ནི་མཐོང་ནས་ཀྱང་། །ངོ་ཚས་ཅུང་ཟད་ཐུར་དུ་ལྟ་བ་འབྱུང་གྱུར་པ། །གློ་བུར་
དུ་ནི་འདོད་པའི་ལྷ་ཡི་གླགས་ཚོལ་བ། །མདའ་རྣམས་ཀྱིས་ནི་འབེན་དུ་གྱུར་པ་འབྱུང་བར་གྱུར། །དེ་ཡང་བུང་བ་གཉིས་ལྟར་ཨུཏྤལ་མིག་ཅན་དགག་བྱས་པ། །ཡན་ལག་མེད་པ་ལྟར་ནི་གཟུགས་ནི་མཛེས་པ་དེ་མཐོང་ནས། །གཡོ་བར་གྱུར་པའི་མེ་ཏོག་མཚོན་ཆས་རྣམ་པར་རྒྱས་བཞིན་པ། །
ཇི་ལྟར་ཡང་ནི་ཡན་ལག་ནུས་མེད་སྲོག་ཤིང་ཁ་གདངས་བཀག །ཨེ་མ་གལ་ཏེ་བདག་ལ་གཞོན་ནུ་འདི་ནི་ཁྱེར་གྱུར་ན། །མཛེས་པས་མེ་ཏོག་གཞུ་ཅན་གཉིས་མེད་ལྟར་ནི་དཔལ་གྱིས་ཀྱང་། །བུད་མེད་ཀུན་ལས་ལྷག་པར་བདག་ནི་འགྱུར་ཞེས་རབ་འཛིན་ཏེ། །ཕ་དང་རྣམ་བྲལ་བྱས་པའི་
སྡུག་བསྔལ་དེ་ནི་བསམས་མ་གྱུར། །ནོར་ནི་འདོད་པ་འགའ་ཞིག་ཏུ་ནི་མཐོང་ནས་གཏེར་ལྟར་ནི། །ཡུལ་གཞན་སོང་བ་ལྟར་ནི་གྲོགས་པོ་རྒུད་པ་ལ་གནས་པ། །གང་ཕྱིར་འཇིག་རྟེན་དམ་མིན་སྐྱེ་བ་མ་བརྩམས་པ་ཐོབ་ནས། །ཕལ་ཆེར་གཉེན་དང་བྲལ་བའི་སྡུག་བསྔལ་དྲན་པར་མི་འགྱུར་
རོ། །ནོར་བཟངས་ཀྱིས་ནི་དེ་ནི་བླངས་ཏེ་ནོར་ལ་ཆགས་པ་ཡིས། །རྔོན་པ་དེ་ལ་ནོར་ནི་མང་བ་རབ་ཏུ་སྦྱིན་བྱས་ནས། །འགྲོ་བས་སྐད་ཅིག་ཙམ་དུ་རྒྱན་ནི་རབ་སྐྱོད་ཤིང་རྟ་ལ། །ཁྱིམ་ནི་རྟེན་གྱུར་ཡིད་ཀྱི་རེ་བའི་འབྲས་བུ་ཐོབ་པ་ལྟར། །དེ་ནས་ནོར་བཟངས་ཀྱིས་མི་འམ་ཅི་མོ་རྙེད་པའི་གཏམ་ཕ་མ་དག་
ལ་སྨྲ་ཞིང་འདུག་གོ། །རྒྱལ་པོ་དེས་མི་འམ་ཅི་མོ་དེ་གཞན་དང་མི་འདྲ་བའི་གཟུགས་དང་ལྡན་པ་མཐོང་ནས་གཞོན་ནུ་ཉིད་ལ་ཁྱིམ་ཐབ་ཏུ་འོས་པ་འདི་ཞེས་སྨྲས་ཏེ། །གྲོང་ཁྱེར་དེ་རྒྱལ་མཚན་དང་བ་དན་རྣམས་ཀྱིས་མཐོ་བ་དང་། རྟ་བབས་རྣམས་ལ་མེ་ཏོག་གི་ཕྲེང་བས་ཀུན་ནས་བཅིངས་པ། ལྷའི་

གྲོང་ཁྱེར་དང་འདྲ་བར་ལྷག་པར་མཛེས་པ་ཅན་བྱེད་དུ་བཅུག་གོ། །དེ་ནས་དཔྱིད་ཀའི་ཟླ་བ་ལ་མེ་ཏོག་འབྱུང་བའི་སྣ་ཚོགས་པའི་ཤིང་རྣམས་ལ་འདོད་པའི་ལྷ་གཉིད་ལོག་པ་ལྟར་ཤིན་ཏུ་འཇམ་པའི་སྐད་ཀྱིས་ཁུ་བྱུག་མ་རབ་ཏུ་སད་པར་བྱེད་ཅིང་ཁྱོ་ཤི་བ་ལྟར་མཚན་མོ་རྣམས་རབ་
ཏུ་ཐུང་བར་གྱུར་ཅིང་། ཞག་བཟང་པོ་ལ་རྣམ་པ་སྣ་ཚོགས་པ་ངོ་མཚར་བའི་ལྟད་མོ་དང་བཀྲ་ཤིས་པར་བྱེད་བཞིན་པའི་མིའི་བདག་པོའི་ཕོ་བྲང་དུ་བག་མ་ལེན་པའི་དུས་ཤེས་ནས། རྒྱན་རྣམས་འདོགས་པ་ལ་མཁས་པའི་བུད་མེད་གཞོན་ནུ་མ་རྣམས་ཀྱིས་མི་འམ་ཅི་མོ་ལ་རྒྱན་གདགས་པའི་ཕྱིར་
བརྩམས་པར་གྱུར་ཏེ། འདི་ཡི་རྣ་བ་དག་ལ་དྲི་ཞིམ་ཁ་ཕྱེ་བ། །ལ་ལ་ཞིག་གིས་ལྷན་ཅིག་བྱེད་པའི་སྙེ་མ་བཏགས། །གཞན་གྱིས་དྲི་ཞིམ་རླབས་ཅན་མགོ་ལས་སྐྱེས་པ་རྣམས། །ཟེའུ་འབྲུའི་ཕྲེང་བ་རྣམས་ཀྱིས་རྫོགས་པ་བཅིངས་པར་གྱུར། །ཡིད་འོང་མཛེས་པའི་ཡན་ལག་རྣམས་ལ་བསྒོ་བྱས་
ནས། །ལ་ལ་ཞིག་ནི་བར་མེད་ཤིན་ཏུ་མཐུག་པ་ནི། །སྨུག་རྩི་དང་བཅས་འོ་མ་འཛིན་པ་དག་བྱས་གྱུར། །ལག་ངར་ཕྲ་ཞིང་ཕྲ་ལ་འཇམ་པའི་སོར་མོ་ཅན། །གོས་འཕྲོག་དང་བཅས་གཞན་གྱིས་ལག་པས་བྱས་གྱུར་ཏེ། །ལ་ལ་ཞིག་ནི་རིན་ཆེན་སྤེལ་ལེགས་ཀྱིས་སྣང་བ། །ཡིད་འཕྲོག་མུ་
ཏིག་ཧར་ནི་བྲང་ལ་རྣམ་པར་བརྒྱན། །མཚོ་སྐྱེས་ཀུན་ལ་སྦྱར་བ་ཁ་བ་དང་འདྲ་བའི། །བར་མེད་བདག་པོ་རྗེས་སུ་ཆགས་པར་འདོད་པ་ནི། །ཡིད་ནི་འཕྲོག་པ་འདི་ཡི་གདོང་བར་ཁྱད་པར་ནི། །རྔུལ་གྱི་ཐིགས་པ་རྣམས་ཀྱིས་བྱས་པ་བྱུང་བར་གྱུར། །དེ་ལྟར་ཀུན་ནས་ངེས་པའི་རབ་
ཏུ་བསྒྲུབས་པ་དེ། །ལྗོན་པའི་བུ་མོ་ལ་དམིགས་ལག་པའི་པདྨ་ཅན། །འདུད་པར་བྱས་པའི་གདོང་ཅན་ཡིད་འཕྲོག་མིག་ཅན་ནི། །ས་ཡི་བདག་པོའི་སྲས་ནི་གྲགས་པས་བཟུང་བར་གྱུར། །དེ་ནས་དུས་གཅིག་གི་ཚེ་ན། གཞོན་ནུས་དབེན་པར་བུད་མེད་དེ་དུས་དང་མཚུངས་པའི་ངོ་
ཚ་བས་མི་སྨྲ་བའི་བརྟུལ་ཞུགས་སྤྱོད་པ་དང་འདྲ་བར་ངོ་མཚར་བས་འདི་སྐད་སྨྲ་ཞིང་འདུག་གོ། །ལེགས་པའི་ལུས་ཅན་དེ་རིང་གི་བར་དུ་ཡང་བདག་ཅག་ལ་ཚིག་གི་བདུད་རྩི་རྗེས་སུ་འཛིན་པར་ཅིའི་ཕྱིར་མི་བྱེད་དེ། ཁྱེད་ནི་འདི་ལྟར་བགོ་སྐལ་མི་སྤྱོད་པའི་ངང་ཚུལ་ཅན་ཅི་ལྟར་ཡིན་ཞེས་ཟེར་ཏེ། ཁྱེད་ཀྱི་སོ་

ཡི་འོད་ཟེར་གེ་སར་རྩེ་མོ་ལ། །བདག་གི་ལྟ་བའི་བུང་བ་མོ་ནི་ཀུན་ནས་འཁོར། །ལྟ་བའི་ཕྱིར་ནི་མངོན་པར་འདོད་པར་བྱས་པ་ནི། །འཇིགས་མ་བཞིན་གྱི་པདྨ་ཡིད་འོང་དགོད་པ་ཡིས། །རི་བོང་ཅན་ལྟར་མཛེས་ལྡན་དུས་གཅིག་ཚེ་ན་དེས། །གཉིད་བརྫུན་བཏབ་པས་འདི་ཡི་བཞིན་ལ་ལྟ་བས་བྲེལ། །དེས་
ཀྱང་ངོ་ཚས་དེར་ནི་འོས་པར་གྱུར་དེ་ལ། །གློ་བུར་དུ་ནི་མིག་ནི་ཕྱེ་ནས་བགད་པར་གྱུར། །འཁྱིལ་པའི་སྐྲ་ཡིས་གདོང་ནི་བརྒྱན་པ་དེ་ནས་ནི། །དགོད་པས་ཡང་དག་བསྟན་པའི་སོ་ཡི་རྩེ་མོ་ཅན། །རྣམ་པར་རྒྱས་པའི་མེ་ཏོག་ལ་གནས་བུང་བ་ཅན། །ཀུན་དའི་རྩི་ཤིང་གཞོན་ནུ་ལྟར་ནི་དེ་མཛེས་གྱུར། །
དེ་ལྟར་དགོད་པ་འཇམ་པ་དེ་དང་ལྷན་ཅིག་ཏུ། །ལྷ་དང་ལྷ་མིན་བུད་མེད་ལྟར་ནི་ཡིད་འོང་བ། །ཡན་ལག་མེད་ལ་མཁས་པ་མི་ཡི་བདག་པོའི་སྲས། །ལོ་ནི་སྐད་ཅིག་མ་ནི་གཅིག་ལྟར་བསམས་པར་གྱུར། །དེ་ནས་དྲང་སྲོང་ཆུ་གཅོད་དང་ལྷག་པར་གནས་པའི་ཕྱོགས་ལས་བསྟན་བཅོས་དུ་མ་ཡང་དག་པར་
རྟོགས་པའི་གཉིས་སྐྱེས་དག་མིང་གིས་རིགས་བཟང་པོ་དང་བརྟུལ་ཞུགས་བཟང་པོས་འོངས་ཏེ། རྒྱལ་པོ་དེ་ལ་མི་རྣམས་ཚོགས་པའི་དུས་སུ་ཞུགས་ནས་ཤིས་པ་བརྗོད་པར་བྱས་ཤིང་སྟན་ལ་ཉེ་བར་འདུག་སྟེ། བསྟན་བཅོས་ཀྱི་གཏམ་གྱིས་ངོ་མཚར་བ་བྱུང་བར་གྱུར་ཏོ། །དེ་ནས་རྒྱལ་པོ་དེས་རིགས་བཟང་
པོ་མདུན་ན་འདོན་ཉིད་ལ་ཞུགས་ཤིང་འདུག་གོ། །ནོར་བཟངས་ཀྱིས་ཀྱང་ལེགས་པའི་བརྟུལ་ཞུགས་བློན་པོའི་གནས་སུ་ཞུགས་ཤིང་གནས་སོ། །དེ་ནས་དུས་འདས་པ་ན་བསྟན་བཅོས་ཀྱི་གཏམ་འབྱུང་བ་ལ། སྣ་ཚོགས་མཁས་པ་རྣམས་ཀྱི་མདུན་སར་བརྟུལ་ཞུགས་བཟང་། །བརྙས་པས་
རིགས་བཟངས་ལ་ནི་ཕམ་པར་བྱེད་འགྱུར་ཏེ། །སྨྱོན་ཆུ་དང་ལྡན་གླང་པོ་ཆེ་དག་འདྲ་བར་ནི། །དེ་དག་གི་ནི་ཡིད་དགའ་རྙོག་པ་ཅན་དུ་འགྱུར། །དེ་ནས་རིགས་བཟངས་ཀྱིས་ནོར་བཟངས་བསྟེན་པ་ལ་བརྙས་པས་ལེགས་པའི་བརྟུལ་ཞུགས་ཅན་འདི་དག་ལ་ཉི་མ་རེ་རེར་སྨོད་པས་ཚ་བའི་ཚིག་གི་མདའ་
རྣམས་ཀྱིས་རྣམ་པ་ཐམས་ཅད་དུ་གནོད་པར་བྱེད་པ་དེས་ན་ནོར་བཟངས་ཉིད་ཐབས་གང་གིས་སྐྱེ་བ་གཞན་དུ་ཁྱེར་བར་བྱ་ཞེས་ཟེར་རོ། །གཞོན་ནུ་འདི་ཡང་མི་འམ་ཅི་མོ་ལ་ཤིན་ཏུ་ཡང་རྗེས་སུ་ཆགས་པས་བཅིངས་པ་དེ་བས་ན་མི་འམ་ཅི་མོ་ཉམས་པར་བྱེད་པའི་ཐབས་ཉིད་བདག་གིས་

བསམ་པར་བྱ་ཞེས་རྣམ་པར་དཔྱོད་ཅིང་། དམ་པ་མ་ཡིན་པའི་དཔྱོད་པ་འདི་ལྟ་བུ་ཡིད་ལ་བྱས་པར་གྱུར་ཏོ། །ཡིད་འཕྲོག་མ་དང་བྲལ་བས་ནོར་བཟངས་དེ་ཉིད་ནི། །མྱ་ངན་སྐྱེས་པར་གྱུར་ན་འཇིགས་པར་འགྲོ་བར་འགྱུར། །ལྷན་ཅིག་མིན་པར་ཀུན་ནས་རྣམ་པར་
འཕྲོ་བའི་ལུས། །ཆུ་བོས་ཉ་ནི་རྣམ་པར་བྲལ་བར་གྱུར་པ་ལྟར། །རབ་ཏུ་སྐྱེས་པའི་ངང་ཚུལ་འཇིག་པ་ཉེར་འོངས་པ། །དེ་ལ་བརྟེན་པ་ངེས་པར་འཇིགས་པར་འགྱུར་བ་སྟེ། །ཆུ་ནི་ཟད་པར་གྱུར་པ་ཉི་མའི་འོད་ཟེར་གྱིས། །མཚོ་ལས་སྐྱེས་པ་རྣམས་ལ་མངོན་མཐོང་འབྱུང་བ་མིན། །དེ་ལྟར་གདུག་པའི་
བདག་ཉིད་འདིས་མི་འམ་ཅི་མོ་འཇིག་པའི་ཕྱིར་ཇི་ལྟར་དེ་དང་དེའི་ཐབས་དཔྱོད་པར་གྱུར་ཏོ། །དེ་ནས་དུས་གཅིག་གི་ཚེ་ན་གོས་ཅན་ཞེས་བྱ་བའི་རྒྱལ་པོ་མཐའ་འཁོབ་ན་གནས་ཏེ། དེས་ཀྱང་མིའི་བདག་པོ་ནོར་ཅན་གྱི་བཀའ་བཅག་པར་གྱུར་ཏོ། །དེ་ནས་ནོར་ཅན་གྱིས་གཞོན་ནུ་ནོར་བཟངས་ལ་བོས་པ། །
གཞོན་ནུ་ཡན་ལག་བཞི་དང་ལྡན་པའི་དམག་ཚོགས་ཡོངས་སུ་བསྐོར་ནས་སོང་ལ་རྒྱལ་པོ་གོས་ཅན་དབང་དུ་གྱིས་ཤིག །དེ་ལྟར་བགྱི་ཞེས་བྱ་བ་ཡང་ནོར་བཟངས་ཀྱིས་ཡབ་ལ་མངོན་དུ་ཕྱག་བཙལ་ནས་ཡིད་འཕྲོག་མ་ལས་ཐོབ་པའི་གཙུག་གི་ནོར་བུ་དེ་བླངས་ནས་མའི་དྲུང་དུ་འོངས་ཤིང་ཕྱག་
བཙལ་ནས་སྨྲས་པ། བདག་ཉིད་ནི་དུས་ཅུང་ཟད་ཙམ་གོས་ཅན་དང་ལྷན་ཅིག་ཏུ་བཟང་བའམ་ལྷན་ཅིག་ཏུ་འཐབ་མོ་བྱེད་པར་འགྱུར་བའི་ནོར་བུ་དེ་ནི་འདི་ཡིན་ཏེ། གང་གི་མཐུས་ཡིད་འཕྲོག་མ་ནམ་མཁའ་ལ་འགྲོ་བར་གྱུར་པ་འདི་དེ་བས་ཤིན་ཏུ་སྦ་བར་འོས་ཏེ། གང་གི་ཚེ་ཡིད་འཕྲོག་མ་ལ་
ཅུང་ཟད་སྲོག་ལ་ཐུག་པ་སྐྱེས་པར་གྱུར་ན་དེའི་ཚེ་ནོར་བུ་འདི་དེ་ལ་རབ་ཏུ་སྦྱིན་པར་བྱའོ་ཞེས་པ་སྨྲས་ནས། ནོར་བུ་དེ་མའི་ལག་པར་གཞག་ཅིང་རང་གི་ཕོ་བྲང་དུ་འོངས་ཏེ། མི་འམ་ཅི་མོ་མཆི་མའི་ཆུས་མིག་བསྒྲིབས་པ་ལ་དྲིས་ཏེ། འཁྱུད་ནས་ཤིང་རྟ་མཆོག་ལ་གནས་ཏེ། དམག་
ཚོགས་ཀྱིས་ཡོངས་སུ་བསྐོར་བ་རང་གི་ཕོ་བྲང་ནས་བྱུང་བར་གྱུར་ཏེ། དེ་ནས་རྒྱ་ཆེན་པོའི་སྐར་ཁུང་ལ་གནས་པ། །ལྗོན་པའི་བུ་མོ་མཆི་མས་གདོང་ནི་རྣམ་དག་པ། །གཡོ་བ་མེད་པའི་མིག་ཅན་མྱ་ངན་དང་བཅས་པ། །དེས་ནི་ནོར་ཅན་བདག་སྐྱེས་ཤིན་ཏུ་རིང་བར་མཐོང་། །མིག་

གཉིས་ཆུ་ཡི་ཐིགས་པའི་ཕྲེང་བ་རྣམས་གཏོང་ཞིང་། །གསེར་གྱི་རང་བཞིན་སྐུ་གཟུགས་འདྲ་བ་གནས་པ་ནི། །ཇི་ལྟར་ཡང་ནི་བསྐོར་ཏེ་མྱ་ངན་གྱིས་དེ་ལ། །དེ་ལ་མི་སྐྱོང་དེ་སྲས་ཀྱང་ནི་རིང་ནས་བལྟ་བར་གྱུར། །དེ་ནས་མིག་གི་ལམ་ནས་ནོར་བཟངས་སོང་གྱུར་ལ། །ཤིན་ཏུ་རིང་པོར་མི་འམ་ཅི་མོ་ཕྲད་
འདོད་པ། །བྲལ་བའི་མདའ་རྣམས་ཀྱིས་ནི་རིམ་གྱིས་ཕོག་པ་ནི། །ཀུན་ནས་ཁྱབ་པ་དམག་གི་དབུས་སུ་ལྷུང་བར་གྱུར། །དགའ་བོ་རྣམ་པར་བྲལ་བ་ཡང་ནི་འདི་ལྷུང་གྱུར། །ཕྲད་པའི་རེ་བ་ཡང་ནི་སྙིང་ལ་འདོགས་པར་བྱེད། །སོ་གའི་དུས་ན་ལམ་གྱི་དུབ་པས་སྡུག་བསྔལ་བས། །སྐྱེ་བོ་
སྐོམ་པས་གདུངས་པ་ལ་ནི་ཆུ་ཀླུང་བཞིན། །གྲོགས་མོ་ཞུམ་པ་རྣམ་པར་དོར་ཅིག་དགྲ་ཀུན་ལས་ནི་རྒྱལ། །དོན་གྲུབ་ཁྱོད་ཀྱི་མཛའ་བོ་སླར་ཡང་ཉེ་བར་འོང་གྱུར་ཏེ། །དེ་ལྟར་དེ་ནི་མིག་གི་མཆི་མས་གདོང་ནི་བངས་བྱས་ཤིང་། །གྲོགས་མོ་རྣམས་ཀྱི་ཚོགས་ཀྱིས་ཤིན་ཏུ་རིང་བར་བསྟན་པར་བྱས། །
དེ་ལྟར་དེ་གྲོགས་མོའི་སྐྱེ་བོའི་ལག་པ་དག་གིས་མཆི་མ་དང་བཅས་པའི་མིག་གིས་ཨུཏྤལ་ཕྱིས་པར་གྱུར་པ། དབུགས་རིང་བའི་དབང་གིས་ཅུང་ཟད་མངོན་པར་གསལ་བར་གྱུར་པ་སོའི་ནོར་བུའི་འོད་ཟེར་རྣམས་ཀྱི་བཞིན་གྱི་ཟླ་བ་ལྟ་བར་བྱས་པ་ནོར་བཟངས་དང་རྣམ་པར་བྲལ་བའི་སྡུག་བསྔལ་མི་
བཟད་པར་གྱུར་པ་ཇི་ལྟར་ཡང་བདག་ཉིད་འཛིན་ཅིང་གནས་སོ། །དུས་སོང་བ་དང་ཁྲུས་གཅིག་པུས་སྐྲ་ཡགས་པ་འཛིན་པ། བཀྲ་ཤིས་པ་ཙམ་གྱིས་ལག་གདུབ་བཅིང་བ་འགྲམ་པའི་མཐིལ་དུ་འཕྱང་ཞིང་འཁྱོག་པའི་སྐྲ་རྣམས་ཡང་དང་ཡང་དུ་རྣ་བའི་བར་དུ་འཛུགས་སོ། །དགའ་བ་བྲལ་བའི་
ཞག་རྣམས་དྲན་པའི་ཕྱིར་ནི་གང་དང་གང་། །ས་ལ་དམར་བའི་འོད་ཅན་སེན་མོས་རི་མོ་བྱས་གྱུར་པ། །དེ་དང་དེར་ནི་ཡངས་ཤིང་གཡོ་བའི་མིག་རྫིའི་རྩེ་མོས་འབིགས། །མུ་ཏིག་སྐུད་ལྟར་འོད་ལྡན་མཆི་མ་རྣམས་ཀྱིས་ཀུན་ཕྱི་གྱུར། །དེ་ནས་ནོར་བཟངས་ལ་བགྲོད་པར་དཀའ་བ་ལ་བརྟེན་པའི་གོས་
ཅན་དེ་དང་ལྷན་ཅིག་ཏུ་མཐུན་པའམ་རྩོད་པ་བྱེད་ཅིང་ཅུང་ཟད་མ་ཚང་བའི་ལོ་འདས་པར་གྱུར་ཏོ། །དེ་ནས་དུས་གཅིག་གི་ཚེ་ན་རྒྱལ་པོ་ནོར་ཅན་དེ་ཐོ་རངས་ཀྱི་དུས་ན་ལངས་ཏེ་དབེན་པར་འདུག་ནས་མདུན་ན་འདོན་ལ་བོས་ཏེ། རྨི་ལམ་འདི་ལྟར་སྨྲ་ཞིང་གནས་ཏེ། རྨི་ལམ་དུ་ནི་དགྲ་བོ་རྣམས་ཀྱིས་

བདག་གི་ལྟོ་དྲལ་ནས། །གྲོང་ཁྱེར་འདི་ནི་རྒྱུ་མ་རྣམས་ཀྱིས་ཀུན་ནས་དཀྲིས་བྱས་པ། །རྨི་ལམ་འདི་ཡི་འབྲས་བུ་ཅི་ཞིག་འབྱུང་བར་འགྱུར་བ་ཞེས། །ཐམས་ཅད་མཁྱེན་འདྲ་ཁྱོད་ཀྱིས་མ་ལུས་པ་ཉིད་གསུངས་པར་མཛོད། །དེ་ནས་མདུན་ན་འདོན་གྱིས་དེ་ལྟར་ལགས་
མོད་ཀྱིས་ཀྱང་བདག་གིས་དགའ་བར་འགྱུར་བའི་ཐབས་རྙེད་པར་བྱ་ཡི། རྒྱལ་པོ་འདིས་རྨི་ལམ་མཐོང་ནས་མི་འམ་ཅི་མོ་འཇིག་པའི་ཕྱིར་བདག་གིས་ཕྱིན་ཅི་ལོག་ཏུ་བརྗོད་པ་བྱའོ་སྙམ་དུ་རྣམ་པར་བསམས་ཏེ་འདུག་པའི་བདག་ཉིད་དེས་རྒྱལ་པོ་ལ་གསོལ་པ། ལྷ་ལགས་བདག་གིས་རྨི་
ལམ་གྱི་འབྲས་བུ་ནི་ལེགས་པར་མ་མཐོང་སྟེ། །ཟླ་བ་གསུམ་ན་འཆི་བ་ནི། །མི་བདག་ཁྱོད་ལ་འབྱུང་འགྱུར་ཏེ། །མཐོ་རིས་ལས་ནི་ལྷ་རྣམས་ལྟར། །རྒྱལ་སྲིད་ཆེ་ལས་འཚོ་བར་འགྱུར། །དེ་ནས་རྒྱལ་པོ་དེ་འཆི་བའི་འཇིགས་པས་མདུན་ན་འདོན་དེ་ལ་སྨྲས་པ། སླར་ཡང་དུས་མ་ཡིན་པའི་འཆི་བ་གང་
གིས་བདག་འཇིག་རྟེན་ཕ་རོལ་དུ་མི་འགྲོ་བ་དང་རྒྱལ་སྲིད་ལས་ཀུན་ནས་ཉམས་པར་མི་འགྱུར་བ་དེ་ལྟར་ཐབས་འགའ་ཞིག་རྙེད་པར་འགྱུར་རམ། མདུན་ན་འདོན་གྱིས་སྨྲས་པ། ཐབས་ཤིག་ཡོད་དེ་གལ་ཏེ་ལྷས་དེ་མཛད་པར་ནུས་ན་དེའི་ཕྱིར་བདག་གིས་བརྗོད་པར་བགྱིའོ། །རྒྱལ་པོས་གསུངས་པ། སྡུག་
བསྔལ་རྣམས་ཀྱིས་ཀྱང་གནོད་པ། །ཡུན་རིང་འཚོ་བར་འདོད་པ་སྟེ། །འབྱུང་བའི་ངང་ཚུལ་འདོད་མི་ཆགས། །རྟག་ཏུ་བདེ་ལྡན་སྨོས་ཅི་དགོས། །དེ་བས་ན་བདག་གིས་རང་གི་སྲོག་གི་དོན་དུ་བྱ་དཀའ་བ་ཡང་བགྱིད་པས་བླ་མ་རྣམས་ཀྱིས་བརྗོད་པར་འོས་སོ། །མདུན་ན་འདོན་གྱིས་སྨྲས་པ། གལ་ཏེ་དེ་ལྟར་
ཡིན་ན་དེ་བས་ན་རྒྱལ་པོ་ཆེན་པོས་གསན་པར་འོས་པ་སྟེ། རྫིང་བུ་ཡངས་པ་མཆོད་སྦྱིན་ལ། །ཕྱུགས་རྣམས་ཁྲག་གིས་བཀང་བྱས་པར། །ཞུགས་ཏེ་དེ་ནས་སྦྱིན་པ་ནི། །གཉིས་སྐྱེས་རྣམས་ལ་རབ་བྱིན་ནས། །མི་འམ་ཅི་མོའི་ཚིལ་གྱི་མེ། །ཁྱེད་ཉིད་ཀྱིས་ནི་སྦྱིན་བསྲེག་བྱ། །དེ་ནས་རྒྱལ་སྲིད་
འདི་བསྲུང་ཞིང་། །ཡུན་རིང་འཚོ་བར་འབྱུང་བར་འགྱུར། །རྒྱལ་པོས་གསུངས་པ། དམ་པ་མཆོད་སྦྱིན་ལས་འབྱུང་བའི། །ཆོ་ག་འདི་ནི་བྱ་དཀའ་ཡིན། །མི་འམ་ཅི་མོའི་ཚིལ་བུ་ནི། །འདི་ནི་ག་ལས་འབྱུང་བར་འགྱུར། །མདུན་ན་འདོན་གྱིས་སྨྲས་པ། །དངོས་པོ་ཉེ་བར་གནས་ལ་

ཡང་ལྷ་ལ་ཀུན་ནས་ཁྱབ་པ་འདི་ཉིད་འདི་ལྟར་ཅིའི་ཕྱིར་ཏེ། ཁྱིམ་ཐབ་མོ་འདི་ནོར་བཟངས་ཀྱི། །རྒྱལ་དེར་མི་འམ་ཅི་མོ་ཡོད། །མཆོད་སྦྱིན་གྱི་ནི་ཆོ་ག་ལ། །ཆོ་གའི་སྔོན་འགྲོར་དེ་བསད་བྱ། །རྒྱལ་པོས་གསུངས་པ། འདི་ནི་བྱ་དཀའ་བར་བདག་གིས་མཐོང་བ་སྟེ། སྲོག་རྣམས་ནོར་
བཟངས་ཀྱི་ནི་དོར། །མི་འམ་ཅི་མོ་ལ་གནས་པ། །གལ་ཏེ་དེ་ནི་མེད་འགྱུར་ན། །བདག་གི་བུ་ཡི་སྲོག་གཏོང་འགྱུར། །མདུན་ན་འདོན་གྱིས་སྨྲས་པ། བུ་འམ་དེ་བཞིན་ཆུང་མ་དང་། །ནོར་རྣམས་མང་བ་དེ་བཞིན་དུ། །བདག་ཉིད་བསྲུང་བའི་དོན་དུ་ནི། །ས་སྐྱོང་རྣམས་ཀྱིས་འདི་ཐམས་ཅད། །འཚོ་ཞིང་
གཞན་དབང་ཡོན་ཏན་ཅན། །ཁྱོད་ཀྱི་བུ་རྣམས་འབྱུང་འགྱུར་ཏེ། །ལུས་ཅན་འཆི་བ་འགྲོ་བ་ལ། །མཉེས་གཤིན་པ་ཡང་རྗེས་འགྲོ་མིན། །འཚོ་ཞིང་བདེ་བ་མ་ལུས་ཉམས་སུ་མྱོང་བའི་འཇིག་རྟེན་ལ། །དགའ་བ་རྣམས་ནི་མཐོང་དང་སྣ་ཚོགས་གཏམ་ནི་ཐོས་ཡིན་ཏེ། །དགེ་བ་དེ་དེ་འཇིག་རྟེན་ཕ་རོལ་
ས་བོན་བྱེད་པ་ནི། །དེ་བས་བདག་ཉིད་གསལ་བའི་བློ་ཅན་གྱིས་ནི་ཡོངས་སུ་བསྐྱང་། །དེ་ནས་རྒྱལ་པོ་དེས་ཡང་དག་པར་འཕགས་པས་སྨྲས་པ་ཞེས་བྱ་བ་སྨྲས་སོ། །དེ་བས་ན་མཆོད་སྦྱིན་གྱི་ཆོ་ག་རྩོམ་པར་མཛོད་ཅིག །དེ་ནས་སྡིག་ཅན་དེས་ཨེ་མ་ཐབས་འདི་ནོར་བཟངས་འཇིག་
པའི་ཕྱིར་གྲུབ་པོ་སྙམ་ནས་རང་གི་ཁྱིམ་དུ་འོངས་ཏེ། མཆོད་སྦྱིན་གྱི་ཆོ་ག་བརྩམས་པར་གྱུར་ཏོ། །མི་འམ་ཅི་མོ་འཇིག་པའི་གཏམ་འདི་ཡོལ་བས་ཆོད་པའི་བཙུན་མོས་ཐོས་ནས་མིག་མཆི་མ་དང་བཅས་པས་དབེན་པའི་གནས་སུ་མི་འམ་ཅི་མོ་ལ་སྨྲས་ནས་ཡང་འདི་སྐད་ཅེས་
སྨྲས་པར་གྱུར་ཏེ། བུ་མོ་ཇི་སྲིད་འདིར་ནི་མཆོད་སྦྱིན་བྱ་བའི་དུས་མིན་པར། །མི་སྐྱོང་ཕན་པའི་ཕྱིར་ནི་མདུན་ན་འདོན་གྱིས་གསོད་པ་ནི། །སླར་ཡང་གཙུག་གི་ནོར་བུ་འདི་ནི་སྤྱི་བོ་ལ་བཅིངས་པ། །དེ་སྲིད་ཁྱོད་ཀྱིས་ཕ་ཡི་ཁྱིམ་དུ་ནམ་མཁའ་ནས་འགྲོ་མཛོད། །ཁྱོད་ནི་འཚོ་ན་ཡུན་རིང་པོར། །
ནོར་བཟངས་འཚོ་བར་བདག་གིས་མཐོང་། །གལ་ཏེ་ཁྱོད་ནི་མེད་གྱུར་ན། །བདག་གི་བུ་ག་ལ་མཐོང་བ། །བཙུན་མོའི་ཚིག་འདི་ཐོས་ནས་ནི། །འཇིགས་པས་མིག་ནི་ཀུན་དུ་ཁྱབ། །རི་དགས་མོ་ནི་མདས་ཕུག་ལྟར། །ཡིད་འཕྲོག་མ་ནི་འདར་བར་གྱུར། །དེ་ནས་བཙུན་མོས་གཙུག་གི་

ནོར་བུ་བཅིངས་པའི་མི་འམ་ཅི་མོ་ལ་སླར་སྨྲས་པ། མཆོད་སྦྱིན་ལ་གནས་པའི་རྒྱལ་པོ་ལ་བདག་ཉིད་བསྟན་པར་བྱས་ནས་ཁྱོད་ཀྱིས་ཀྱང་ཕའི་ཁྱིམ་དུ་འགྲོ་བར་གྱིས་ཤིག་དེ་ལྟར་བྱས་ནས་བདག་ལ་སྐྱོན་འབྱུང་བར་མི་འགྱུར་ཞེས་སྨྲས་པ་ལ། དེ་ལྟར་བགྱིའོ་ཞེས་བཙུན་
མོ་ལ་ཕྱག་བཙལ་ནས་མཆི་མ་དང་བཅས་པ་དང་། སའི་བདག་པོའི་སྒོ་བ་ཐོག་མར་འོངས་པས་བརྟེན་པ་དང་མི་ལྡན་པ་རྣམས་ཀྱིས་ཀུན་ནས་བསྐོར་བ་བྱུང་སྟེ། མཆོད་སྦྱིན་ལ་མངོན་པར་ཕྱོགས་པས་ཆས་པ་འདི་ལྟར་བསམས་པར་གྱུར་ཏེ། སླར་ཅི་ནས་ཀྱང་བདག་གིས་གཞོན་ནུ་མཐོང་བར་འགྱུར་
རམ་ཞེས་བྱ་བ་ཡང་དང་ཡང་དུ་མཆི་མའི་ཐིགས་པའི་ཕྲེང་བ་བར་མ་ཆད་པའི་མུ་ཏིག་བརྒྱུད་པ་དང་འདྲ་བ་རྣམས་ཀྱིས་གསེར་གྱི་པདྨ་ཁ་ཟུམ་པའི་རྣམ་པ་ཅན་གྱི་འོ་མ་འཛིན་པ་གཉིས་བངས་པར་གྱུར་ཏོ། །དེ་ཡང་འོངས་པར་གྱུར་བཞིན་པ་མཐོང་ནས། ནོར་བཟངས་ཀྱི་འཁོར་གྱི་སྐྱེ་བོ་མཆི་མ་དང་
བཅས་པའི་མིག་ཅན་རིམ་གྱིས་ཕན་ཚུན་དུ་སྨྲས་པ། གཞོན་ནུ་ཤིར་ཤ་ལྟ་བུར་འཇམ་པའི་ལུས་ཀྱི་སྲོག་ཤིང་ནི། །འཆི་བ་ཞེས་བྱ་ཕྱིར་ནི་ཡང་ཡང་མཆི་མས་ཁྱབ་པའི་མིག །མཆོད་སྦྱིན་ཤེས་པ་རྣམས་ཀྱིས་འདི་ནི་གསོད་པར་འགྱུར་བའི་ལུས། །གསོན་བཞིན་པ་ནི་ལྟ་བའི་དོན་དུ་སུ་ཞིག་
གིས་ནུས་འགྱུར། །ཁྱུ་ནས་ཡར་བའི་རི་དགས་ཕྲུ་གུ་ལྟར་ནི་གཡོ་བའི་མིག །སྐྲག་པ་བྱུང་བས་སྐད་ཅིག་ཆད་ཅིང་རང་བཞིན་གྱིས་ནི་འཇིགས། །འདི་འདྲའི་སྐྱེ་བོ་ལ་ཡང་གང་ཞིག་ས་སྐྱོང་རྣམས་ཀྱི་སྙིང་། །ཀྱེ་མ་རྩུབ་པས་བདག་གི་དོན་དུ་གསོད་པ་ལ་ཡང་མངོན་པར་ཕྱོགས། །དེ་ནས་མདུན་
ན་འདོན་པ་དེས་མི་འམ་ཅི་མོ་འོངས་པ་མཐོང་ནས་མི་འམ་ཅི་མོ་འདིར་རྙེད་པ་རྙེད་པ་སྟེ། རྒྱལ་པོ་ཆེན་པོ་ཁྲག་གི་རྫིང་བུར་ཀུན་ནས་ཞུགས་པར་འོས་སོ་ཞེས་ཟེར་རོ། །དེས་ཀྱང་དེ་ལྟར་བྱ་ཞེས་སྨྲས་ནས། རྒྱལ་པོ་དེ་ཡང་ལངས་ཏེ། མི་འམ་ཅི་མོ་དེ་ཡང་ནམ་མཁའི་དཀྱིལ་དུ་སོང་ནས། །བདག་
ཉིད་ལ་གནས་པ་སྨྲས་པར་གྱུར་པ། སླར་ནི་ནོར་བཟངས་མཐོང་འགྱུར་རམ། །འཇིག་རྟེན་ལ་བྱམས་འཚོ་བཞིན་པ། །དེ་ལྟར་རྒྱལ་པོའི་ཁྱིམ་སྤངས་ནས། །བདག་ནི་ཕ་ཡི་ཁྱིམ་དུ་འགྲོ། །དེ་སྐད་སྨྲས་ནས་རླུང་གི་ལམ་ནས་རང་གི་ཁྱིམ་དུ་འོངས་ཏེ་འདི་ནི་རྨི་ལམ་ཡིན་ནམ་འོན་ཏེ་ཅི་ཞིག་སྒྱུ་མ་ཡིན། །

འོན་ཏེ་ཅི་ཞིག་འདི་ནི་བདག་གི་བུ་མོ་སྙམ་དུ་སེམས་ཤིང་དགའ་བས་མཆི་མའི་ཐིགས་པ་བྱུང་བར་གྱུར་པ་ལས་མིག་གི་རྫི་མ་རློན་པར་བྱས་ཏེ། དེ་ནས་ཕ་ལ་ཀུན་ནས་མཉེས་བྱས་ཤིང་། །མི་འམ་ཅི་མོས་མྱུར་དུ་མ་ལ་ཡང་། །དགའ་བའི་ཡིད་ཅན་སྤུན་ཟླ་མོ་རྣམས་ཀྱང་། །དགོད་པས་མཚོན་བྱ་ཡིད་
འོང་སོ་ཕྲེང་འོད། །དེས་ཀྱང་བདག་ཉིད་ཀྱི་གཏམ་དེ་ལ་རིམ་པ་བཞིན་དུ་ཐམས་ཅད་སྨྲས་པར་གྱུར་ཏོ། །དེ་ནས་རྒྱལ་པོ་ནོར་ཅན་གྱིས་འདི་ཅི་ཞིག་ཡིན་སྙམ་དུ་རྟོག་པར་བྱེད་ཅིང་འོག་ཏུ་ལྟ་བས་ཡང་དག་པར་གནས་པར་གྱུར་ཏོ། །འདུག་པའི་བདག་ཉིད་ཅན་མདུན་ན་འདོན་པ་དེ་ཡང་ཡང་དག་པར་
འོངས་ཏེ་རྒྱལ་པོ་ལ་འདི་སྐད་ཅེས་སྨྲས་ཏེ། སྨར་སེར་སྐྱའི་ཚོགས་ལྡན་པ། །མེ་སྟག་ལྟར་ནི་སེར་བའི་མིག །བྲམ་ཟེ་སྲིན་པོས་གང་དུ་ཡང་། །སྟག་གིས་རི་དགས་འདི་བཞིན་ཁྱེར། །དེ་བས་རིག་བྱེད་ལས་གསུངས་གཞན། །ཞི་བའི་རྒྱུ་ཅན་ལས་རྣམས་ཀྱིས། །ཁྱེད་ནི་ཚེ་ལྡན་བྱེད་འགྱུར་
བ། །དེ་བས་སྡུག་བསྔལ་དོར་བར་མཛོད། །རྒྱལ་པོས་དེ་ལྟར་བགྱིའོ་ཞེས་སྨྲས་ནས་བྲམ་ཟེ་རྣམས་ལ་སྦྱིན་པ་བྱིན་ཏེ་མདུན་ན་འདོན་དང་ལྷན་ཅིག་རང་གི་ཕོ་བྲང་དུ་འོངས་པར་གྱུར་ཏོ། །དེ་ནས་མདུན་ན་འདོན་གྱིས་འདི་ལྟར་མི་འམ་ཅི་མོ་འཇིག་པ་མེད་ཀྱང་རྣམ་པ་ཐམས་ཅད་དུ་གཞོན་ནུ་འཇིག་པའི་ཐབས་
གྲུབ་པ་ཉིད་དོ་སྙམ་དུ་བསམས་པར་གྱུར་ཏོ། །ཅིའི་ཕྱིར་ཞེ་ན་ཕོ་བྲང་དཔལ་ལྡན་སྤངས་ན་ནི། །མི་འམ་ཅི་མོ་འདི་སོང་བ། །དེ་ལྟར་ཐོས་ནས་གང་དུ་ཡང་། །ནོར་བཟངས་ངེས་པར་སྲོག་གཏོང་འགྱུར། །ནོར་བཟངས་འཇིག་པ་ཐོབ་པ་ལ། །སྐྱེ་ངན་ལེགས་པའི་བརྟུལ་ཞུགས་ཅན། །བློན་པོ་ཉིད་ལས་དེ་
ལྷུང་བྱ། །འགྲམ་གྱི་ཤིང་ལ་ཆུ་ཚོགས་ལྟར། །དེ་ནས་ཡིད་འཕྲོག་ནོར་བཟངས་དང་བྲལ་བའི་སྡུག་བསྔལ་གྱིས་ལུས་སྲབ་པའི་ལུས་ཀྱི་སྲོག་ཤིང་ཀུན་ནས་སྐྱ་བ་རྒྱུ་ཞིང་ཡངས་པའི་སྐྲ་འཁྱིལ་བའི་རྩེ་མོས་འགྲམ་པའི་མཐིལ་དུ་འདྲེས་པ། སླར་ཅི་ཞིག་བདག་གིས་གཞོན་ནུ་མཐོང་བར་འགྱུར་རམ། འོན་
ཏེ་མིན་སྙམ་དུ་སེམས་པའི་མིག་གི་མཆི་མའི་ཐིགས་པ་སྐྱེས་པས་འོ་མ་འཛིན་པ་དག་བངས་པ། རྣམ་པ་ཐམས་ཅད་དུ་བདག་མེད་པས་གཞོན་ནུ་དེ་མངོན་པར་དགའ་བར་འགྱུར་རམ་མི་འགྱུར་བ་དེ་བས་ན་དེ་ལ་འདིར་འོངས་པའི་ཕྱིར་ལམ་རབ་ཏུ་སྟོན་པར་བྱེད་པའི་ཡི་གེ་རྣམས་ཀྱི་རྟེན་དང་སྨན་བདུད་རྩི་ཞེས་བྱ་བ་

ཡང་བླངས་ཏེ། དྲང་སྲོང་ཆེན་པོ་དེའི་དྲུང་དུ་བདག་གིས་མངོན་པར་འགྲོ་བར་བྱའོ་སྙམ་དུ་རྣམ་པར་བསམས་ནས་གློ་བུར་ཉིད་དུ་ནམ་མཁའི་དབུས་ནས་སོང་ནས་དྲང་སྲོང་དེ་ཅན་ཀུན་ནས་ཉེ་བར་འོངས་ནས། གསོང་པོར་སྨྲ་བས་ཕྱོགས་གཅིག་ཏུ་འདུག་ནས་མངོན་པར་
སྨྲས་པ། རི་དགས་དགྲས་ནི་བདག་ནི་འཛིན་བྱེད་ཐུབ་ཆེན་པོ། །བརྩེ་བ་དང་ལྡན་འཆི་བའི་ལམ་ནི་འཛིན་བྱེད་པ། །ཁྱོད་ཀྱིས་ཨེ་མ་དཀའ་ཐུབ་འབྲས་བུ་ཆེན་པོ་བརྙེས། །ལྗོན་པའི་བུ་མོ་མི་འམ་ཅི་མོ་དེ་ཉིད་ཉེར་འོངས་པ། །ཞེས་ནི་ཇི་སྲིད་བདག་ལ་སླར་ཡང་སྡུག་བསྔལ་བར་མི་
འཇོག །སྙིང་རྗེའི་བདག་ཉིད་ཁྱེད་ལ་ཅུང་ཟད་སྨྲ་བར་བྱས་ནས་ནི། །དེ་སྲིད་དུ་ནི་རླུང་གི་ལམ་ནས་མྱུར་བར་རབ་ཏུ་འགྲོ། །ཐུབ་པས་སྨྲས་པ། བཟང་མོ་བདག་ལ་འདི་ལྟར་ཤིན་ཏུ་དགོས་པ་བྱ་བར་ཁྱོད་འོས་པ་མ་ཡིན་ཏེ། རྔོན་པ་འདི་ཡིས་དོན་ཡོད་པ། །ཞགས་ཆེན་ཡོད་ཅེས་མི་
ཤེས་ཤིང་། །དྲང་པོ་ཉིད་དུ་བདག་གིས་ནི། །དེ་ཚེ་བདེན་པར་ཁྱེད་གཏམ་བྱས། །གནོད་བྱེད་ལ་ཡང་སྡང་བ་ནི། །བདག་ལ་མེད་ན་ཁྱོད་ཅི་སྨོས། །མི་ཤེས་པས་བྱས་བདག་གི་སྐྱོན། །དེ་བས་ཡིད་འཕྲོག་མ་བཟོད་མཛོད། །དེ་ནས་མི་འམ་ཅི་མོ་དེས་དྲང་སྲོང་དེ་ལ་མངོན་དུ་ཕྱག་
བཙལ་ནས་སྨྲས་པ། གང་ཞིག་བདག་གིས་རྩུབ་སྨྲས་པ། །ཁྱོད་ཀྱི་སེམས་ལ་རབ་ཚ་བ། །བརྟན་པ་དམིགས་ནས་དེ་ཐམས་ཅད། །བདག་ལ་ཡང་ནི་བཟོད་པར་འོས། །སྨན་ཆེན་བདུད་རྩི་འདི་དང་ནི། །དམ་པ་ཡི་གེ་འདི་ཡང་ནི། །བདག་ཉིད་ཆེན་པོ་དེ་ཉིད་ལ། །སོར་གདུབ་འདི་ཡང་
སྦྱིན་པར་མཛོད། །དེ་ཡང་ཁྱེད་ཀྱིས་བདག་གི་ཚིག་གིས་འདི་ལྟར་བརྗོད་པར་མཛོད་ཅིག །ཅི་ལྟར་བདུད་རྩི་འདིས་མ་སྨིན་པ་བཀྲེས་པ་དང་སྐོམ་པ་དང་ངལ་བ་བསལ་བའི་ཕྱིར་ཉེ་བར་སྦྱར་བར་བྱས་ནས་ཡི་གེ་འདི་མཐོང་སྟེ། མི་འམ་ཅིའི་རྒྱལ་པོ་ལྗོན་པའི་ཕོ་བྲང་དུ་འོང་བར་མཛོད་ཅིག་ཅེས་སྨྲས་ཏེ།
ཐབས་ཡོད་པ་དང་བརྩོན་འགྲུས་དང་། །བདག་ལ་མཉེས་གཤིན་ཆེན་པོས་ནི། །བྲལ་བས་དུབ་པ་བདག་བལྟ་ཕྱིར། །ཁྱོད་ནི་ཅི་ལྟར་འོང་མི་འགྱུར། །གཞན་ཡང་དྲང་སྲོང་ཆེན་པོ། བུད་མེད་རྣམས་ཀྱི་ཉལ་པོའི་གཏམ། །བླ་མ་རྣམས་ཀྱི་མདུན་མི་རིགས། །བྱ་བ་ལ་གུས་འདི་དག་

ལ། །ངོ་ཚ་ངེས་པར་འགེགས་པར་བྱེད། །ཐུབ་པས་སྨྲས་པ། ཁྱོད་ཀྱི་གཏམ་འདི་ཐམས་ཅད་བདག་གིས་ནོར་བཟངས་ལ་སྨྲ་བར་བྱ་ཡིས་ཁྱོད་ནི་བདེ་བར་འདུག་ཅིག་ཅེས་ཟེར་རོ། །དེ་ནས་མི་འམ་ཅི་མོ་དེ་དྲང་སྲོང་དེ་ལ་གསོང་པོར་སྨྲས་ནས། སླར་ཡང་ནམ་མཁའི་དབུས་སུ་སོང་སྟེ་ཡབ་
ཀྱི་ཕོ་བྲང་དུ་ཉེ་བར་སོང་བར་གྱུར་ཏོ། །ཡུན་རིང་པོ་མ་ཡིན་པར་སོང་བ་དེ་ལ་ཡང་། ས་བདག་དེ་ནི་དཔུང་གི་སྟོབས་ཀྱིས་རྒྱལ་ནས་རྒྱལ་བ་པོ། །ཡོན་ཏན་ནོར་ཅན་ནོར་བཟངས་ཀྱིས་ནི་དེ་ལས་ནོར་འཛིན་ཏེ། །བདག་ཉིད་ཆེན་པོས་དེ་ལ་རང་གི་ཡུལ་ནི་རབ་བྱིན་ནས། །ཉི་མ་ནུབ་ནས་དཔལ་ལྡན་ཡབ་ཀྱི་གྲོང་
ཁྱེར་འོངས་པར་གྱུར། །ལྗོན་པའི་བུ་མོ་ཡན་ལག་སྐེམས་པ་བདག་གིས་མཐོང་འགྱུར་རམ། །རང་གི་མཛེས་པས་རི་བོང་ཅན་གྱི་ཆ་ལྟར་མཛེས་པ་བཞིན། །དེ་ལས་ཀུན་ནས་འབྲི་ཞིང་ཡིད་རེའི་སྐྱ་རིས་ཀྱིས། །འདི་ལྟར་ཡང་ནས་ཡང་དུ་ཕྲད་འདོད་འདིས་ནི་བསམས་པར་གྱུར། །ཕྱི་ནས་
རིམ་གྱིས་ཉེ་བར་འོངས་ཏེ་ལག་པ་གཉིས་ཀྱིས་ནི། །དེ་ཡི་མིག་གཉིས་གློ་བུར་དག་ཏུ་འགེབས་གྱུར་པ། །དེ་ལྟར་ཕྲད་པར་འདོད་པའི་ངོ་མཚར་བདག་གིས་དི་རིང་ནི། །ཉི་མ་འདས་པར་ཡང་ནི་རབ་ཏུ་དགའ་བས་མཚོན་པ་མིན། །དེ་ནས་ནོར་ཅན་གྱིས་ནོར་བཟངས་རྣམ་པར་རྒྱལ་བ་རྙེད་ནས་
གྲོང་ཁྱེར་དང་ཉེ་བར་འོངས་པ་ཐོས་ནས། ནོར་བཟངས་ལ་གློ་བུར་ཉིད་དུ་མི་འམ་ཅི་མོ་དང་བྲལ་བ་བརྗོད་པར་བྱ་བ་མ་ཡིན་ཏེ། ནམ་ཞིག་དེས་ཐོས་ནས་སྲོག་ཉིད་ཡོངས་སུ་དོར་བར་འགྱུར་སྙམ་དུ་རྣམ་པར་བསམས་ནས། སྒོ་བ་ལ་སྨྲས་པ། སོང་ལ་ནོར་བཟངས་ལ་འདི་སྐད་ཅེས་
སྨྲོས་ཤིག །སྐྱེད་མོས་ཚལ་དུ་མཚན་མོ་གཅིག །ལོ་གཅིག་དང་འདྲ་བཀས་སྡོད་མཛོད། །དེ་ནས་ནང་པར་ཞག་བཟང་ལ། །བུ་ཁྱོད་ཕོ་བྲང་དུ་ཞུགས་ཤིག །སྒོ་བ་དེས་ཀྱང་རྒྱལ་པོའི་བཀའ་བཟུང་ནས་ནོར་བཟངས་ཅན་དུ་ཉེ་བར་འོངས་ཏེ་དེ་སྐད་ཅེས་སྨྲས་པར་གྱུར་ཏོ། །ནོར་བཟངས་
ཀྱིས་ཀྱང་དེ་ལྟར་བྱའོ་སྙམ་དུ་བསམས་ནས་སྐྱེད་མོས་ཚལ་དུ་ཞུགས་ཏེ། མལ་གྱི་སྟེང་དུ་ལྷག་པར་གནས་ནས་ཡིད་འཕྲོག་མ་དང་བྲལ་བའི་སྡུག་བསྔལ་བ་ཉིད་ཀྱིས་གཉིད་ཀྱིས་ཕེབས་པར་མ་གྱུར་ཅིང་འདི་སྙམ་དུ་སེམས་ཏེ། དི་རིང་གཉིད་འདི་ཁྲོས་པ་བཞིན་དུ་ཇི་ལྟར་མིག་དག་ལ། །བརྟེན་

པར་ཕྲད་པར་འདོད་པ་བདག་གི་འཛུམས་པར་བྱེད་པ་མིན། །དེས་ཀྱང་འདི་འདྲ་བདག་གི་གཏམ་གྱིས་དི་རིང་ངེས་པར་ནི། །གྲོགས་མོ་རྣམས་དང་ལྷན་ཅིག་ཏུ་ནི་མཚན་མོ་འདའ་བར་བྱེད། །དེ་ནས་ཉི་མ་གཞན་ལ་ཕོ་བྲང་དུ་ཞུགས་ནས། ཕ་དང་མ་དག་ལ་མངོན་པར་
ཕྱག་བཙལ་ཏེ། གནས་པའི་ཁྱིམ་དུ་འོངས་ནས་མལ་དུ་ཡང་དག་པར་ཉེ་བར་ཞུགས་ཤིང་། སྒོ་སྐྱོང་མ་ལ་སྨྲས་པ། བཟང་མོ་སོང་ལ། བདག་གི་ཚིག་གིས་ཡིད་འཕྲོག་མ་ལ་སྨྲོས་ཤིག་དང་། །བྲལ་བས་ཕྲད་པར་འདོད་པའི་ཡིད་ཅན་བདག་ལ་ནི། །གཞོན་ནུ་འཇིགས་པ་ཅི་ཕྱིར་དྲུང་དུ་
འོང་མི་བྱེད། །ཅི་ཕྱིར་རང་བཞིན་གྱིས་ནི་ལྕི་བའི་ངོ་ཚ་འདི། །བུད་མེད་སྐྱེ་བོས་དེ་རིང་ཡང་ནི་ཁྱོད་འཛིན་བྱེད། །དེ་ནས་སྒོ་སྐྱོང་མ་དེ་ལ་ཡིད་འཕྲོག་མ་དེ་ནི་ག་ལ་ཡོད་དེ་གང་ཞིག་ལ་འགྲོ་བར་བྱས། བདག་གིས་འདི་སྐད་སྨྲས་པར་གྱུར་སྙམ་དུ་རྣམ་པར་བསམ་ཞིང་མྱ་ངན་གྱི་དབང་གིས་མཆི་མའི་ཆུས་
རྙོགས་པའི་ལྟ་བ་བྱུང་བར་གྱུར་ཏོ། །དེ་ནས་དོགས་དང་བཅས་པའི་ཡིད་ཅན་ནོར་བཟངས་ཀྱིས་སྒོ་སྐྱོང་མ་དེ་ལ་སྨྲས་པ། སོང་ལ་སྐེམས་པ་དེ་ལ་སྨྲོས་ཤིག །བདག་གིས་འདོད་བཅས་སྨྲས་པ་གང་། །བཟང་མོ་ཁྱོད་ལ་བདེ་བ་འདི། །མཆི་མས་རྙོགས་མིག་ཅི་ཕྱིར་སྐྱེས། །ཡང་ན་ཁྱེད་ཀྱིས་
མཆི་མས་བརྗོད་པ་སྟེ། །དགའ་མོ་དེ་ནི་དུས་ཀྱི་དབང་སོང་ཞེས། །འདི་ནི་འཁྲུལ་པ་ཉིད་དུ་ཉེར་སོང་བ། །བདག་ཡིད་དེ་ལྟར་ན་ཡང་ཐེ་ཚོམ་ཟ། །དེ་ནས་ནོར་བཟངས་ཀྱིས་མྱུར་དུ་ལངས་ནས་མངོན་པར་སོང་སྟེ་མ་ལ་དྲིས་པར་གྱུར་ཏོ། །མ་ལགས་ཡིད་འཕྲོག་མ་འདི་གང་ན་ཡོད་ཅེས་སྨྲས་སོ། །དེ་ནས་
བཙུན་མོས་འདི་ནི་ཡུན་རིང་པོ་ཅི་ཙམ་དུ་བསླུ་བར་ནུས་པར་འགྱུར་སྙམ་དུ་རྣམ་པར་བསམས་ནས་དབེན་པའི་སར་མི་འམ་ཅི་མོ་དང་རྣམ་པར་བྲལ་བའི་གཏམ་དེ་ནོར་བཟངས་ལ་སྨྲས་པ། དེ་ནས་བཙུན་མོའི་ཚོགས་དེ་ཐོས་པར་གྱུར་ནས་ནི། །ཡིད་འཕྲོག་མ་ཁྱོད་ད་ནི་གང་དུ་སོང་ཞེས་སྨྲས་པ་
སྟེ། །མི་གཡོ་མཉམ་པའི་རྩ་ནི་རྡོ་རྗེས་བཅོམ་པ་ལྟར། །ནོར་བཟངས་ས་ལ་བརྒྱལ་ཞིང་འགྱེལ་བ་ཉིད་དུ་གྱུར། །ཡུན་རིང་པོས་ཀྱང་འདུ་ཤེས་སོ་སོར་རྙེད་པ་མངོན་པར་ལངས་ཏེ། ངུ་བཞིན་པའི་མས་ལྟ་བར་གྱུར་པ། གོས་ཕྲག་པར་འཛིན་པ། རང་གི་འཁོར་གྱི་སྐྱེ་བོས་སྤངས་ནས་ཉི་

མ་རིའི་རྩེ་མོར་ནུབ་པ་ལ་དམིགས་པ་ལ་དེ་དང་དེའི་སྨྲེ་སྔགས་འདོན་ཅིང་སྨྱོན་པ་ཉིད་དུ་ཉེ་བར་སོང་བ་རང་གི་ཕོ་བྲང་ནས་ཕྱིར་བྱུང་སྟེ། ཀྱི་ཧུད་ཡིད་འཕྲོག་མ་བདག་ཡོངས་སུ་དོར་ནས་ཁྱོད་གང་དུ་སོང་ཞེས་ཟེར་ཞིང་། །ས་འཛིན་པ་དང་ནགས་རྣམས་གཞན་དེ་དང་དེ་ལ་འཁོར་བར་གྱུར་ཏོ། །དེ་ནས་ནོར་
བཟངས་དང་བྲལ་བའི་སྡུག་བསྔལ་གྱི་མེས་ཡིད་ཀུན་ནས་གདུངས་པའི་བཙུན་མོ་དེ་རྣམ་པ་མང་དུ་འདི་ལྟར་སྨྲེ་སྔགས་འདོན་པ་ལ་རྩེ་གཅིག་པ་བྱུང་བར་གྱུར་ཏེ། བདག་ཡོངས་དོར་ནས་ཡན་ལག་སྐེམས། །ཡིད་འཕྲོག་མ་ཁྱོད་གང་དུ་སོང་། །སྨྲེ་སྔགས་འདོན་ཅིང་བདག་གི་བུ། །འདི་ལྟར་
མཚན་མོ་གཡང་ལྷུང་ངམ། །སྦྲུལ་གྱིས་སོ་བཏབ་གྱུར་ཏམ་ཅི། །འོན་ཏེ་སྟག་གིས་ཟོས་པ་ནི། །རྒྱན་ནི་ཕྲོགས་ནས་དྲག་པོ་ཡི། །ཆོམ་རྐུན་རྣམས་ཀྱིས་བསད་དམ་ཅི། །རྩ་བ་བཅིངས་པའི་སྐྱེ་བོ་འདི། །མཉེས་གཤིན་འདི་འདྲ་ཀྱེ་མ་སྨོད། །གཉེན་བཤེས་རྣམས་ཀྱི་སྡུག་བསྔལ་ཆེ། །
གང་ཕྱིར་རྣམ་བྲལ་ལ་མཐོང་མིན། །སྐར་མའི་མེ་ཏོག་རྣམས་ཀྱིས་འདི། །ནམ་མཁའི་དཀྱིལ་ན་མཆོད་བྱེད་ཅིང་། །མཚན་མོའི་མ་ཁྱོད་གང་དུ་ཡང་། །ཉལ་བ་བདག་གི་བུ་སྲུངས་ཤིག །ཉིན་མཚན་དག་གི་མར་མེ་ཡིས། །ཀུ་མུ་ཏ་དང་ཆུ་སྐྱེས་འབྱེད། །བདག་གི་བུ་འཁོར་གང་དུ་ཡང་། །
ཟླ་བ་ཉི་མས་བསྲུང་པར་མཛོད། །གནས་པ་འམ་ནི་འགྲོ་བཞིན་པ། །བདག་གིས་བདག་སྐྱེས་དེ་ཉལ་ཡང་། །ཆུ་སྐྱེས་འདབ་མ་ལྟར་མིག་ལྡན། །ནགས་སུ་ནགས་ལྷ་མོས་སྲུངས་ཤིག །གྲོགས་མོ་མི་གཡོའི་མིག་ལྡན་པ། །ནོར་བཟངས་འགྲོ་བ་འདི་ལྟོས་ཤིག །འདི་ནི་མཐོང་ལ་
དགེ་བ་ནི། །མིག་གི་འབྲས་བུ་ཡོངས་རྫོགས་པ། །མིག་གི་དགའ་སྟོན་གྱུར་པ་ནི། །ཡིད་ལས་བྱུང་བ་དངོས་བཞིན་དུ། །ཨེ་མ་སྐལ་ལྡན་བུད་མེད་དེ། །གང་ཞིག་འདི་ཡི་ཆུང་མར་གྱུར། །ཨེ་མ་གཟུགས་ལྡན་རྣམས་ཀྱིས་ནི། །བ་དན་འཕྲོག་འདིས་འཇིག་རྟེན་དུ། །གསེར་གྱི་
ནོར་བུ་ལྟར་འདི་ནི། །ས་ཡི་དཀྱིལ་འཁོར་འདི་བརྒྱན་བྱས། །ཇི་ལྟར་སྐལ་ཆེན་འདི་ལ་ནི། །རྒྱ་ཆེན་མིག་ལྡན་བདག་གིས་མཐོང་། །དེ་སྲིད་བདག་ནི་མིག་གནོད་པའི། །བུང་བ་གྲོགས་མོ་བཟློག་པར་མཛོད། །གཅིག་པུ་ཁྱོད་ཀྱིས་བཀག་པ་ནི། །རླུང་གི་སྟེགས་བུ་ཆེན་པོ་འདི། །

འགྲོ་བ་དཔལ་ལྡན་རྣམས་མཆོག་འདི། །བདག་གིས་ཅི་ལྟར་མཐོང་བར་གྱུར། །སྐལ་ཆ་མི་སྟེར་ངང་ཚུལ་ཅན། །གྲོགས་མོ་ཁྱོད་ཀྱི་ལྟ་བ་འདི། །གང་ཞིག་གཅིག་པུ་ཉིད་འདི་ནི། །གཞོན་ནུ་བརྟེན་པ་ལྟ་བར་འདོད། །དེ་ལྟར་མི་གཡོ་རྒྱ་ཆེན་ལྟ་བ་རྣམས་ཀྱིས་མཐོང་བ་ནི། །གྲོང་
ཁྱེར་བུད་མེད་རྣམས་ཀྱིས་གང་ཞིག་འདོད་བཅས་ཡུན་རིང་པོར། །རི་ཡི་ནགས་ལ་དི་རིང་བདག་གི་བུ་དེ་འཁོར་བཞིན་པ། །འཇིགས་པས་སྐད་ཅིག་ཏུ་ནི་རི་དགས་བུད་མེད་རྣམས་ཀྱིས་ལྟ། །ཡིད་ནི་འཕྲོག་པ་སེའུ་འབྲུའི་སྙིང་པོ་ལྟར་དམར་སྐྱ། །སེན་མོ་འོད་ལྡན་རྣམས་ཀྱིས་བརྒྱན་བྱས་སོར་མོ་ཅན། །
ཀུ་ཤ་ལྡན་པ་སའི་སྟེང་འཇམ་པའི་རྐང་པ་དག །བདག་གི་བུ་དེ་ཅི་ལྟར་དེ་རིང་འཇོག་པར་འགྱུར། །ཨུཏྤལ་སྔོན་པོ་སར་པ་རྣམས་ཀྱིས་ཡིད་འཕྲོག་པ། །དྲི་ཞིམ་ནོར་བུའི་སྣོད་དུ་བརྟན་པའི་ཆང་འཐུངས་ནས། །བདག་གི་དེ་ནི་འཁོར་ཞིང་སྐོམ་འདོད་སྙིམ་པ་ཡིས། །ཅུང་ཟད་དྲོ་བའི་ཆུ་ནི་དི་རིང་ཇི་
ལྟར་འཐུང་། །སློང་བ་མ་བསླབས་པ་ནི་རིགས་ནི་མཐོང་ལྡན་པ། །སྦྱིན་པ་ཉིད་དུ་མངོན་པར་བརྩོན་པ་རྟག་ཏུ་བདེ། །དྲེགས་པས་ཀུན་ནས་རིད་དང་སྐྱ་བའི་ལུས་ལྡན་པ། །དེས་ནི་ཅི་ལྟར་གཞན་ལ་བྱིན་ཞེས་སྨྲ་བར་འགྱུར། །བདག་ཅག་ཡུན་རིང་ཕྱིར་ན་ཡིད་རེ་མང་པོ་ཡིས། །སྐོམ་པ་དང་ལྡན་
བུ་ལ་ཆགས་པ་སེམས་ལྡན་མ། །རབ་ཏུ་བྱིན་ནས་བརྩེ་བྲལ་སྐྱེད་བྱེད་ཁྱོད་ཀྱིས་ནི། །ཅི་ཕྱིར་བུ་ཡི་བདུད་རྩི་བསྙེན་པ་ཁྱེད་ཀྱིས་འཕྲོག །འདིར་ནི་དི་རིང་ལ་ལ་གནས་ཏེ་བདག་ལ་སྟོན། །ཕྱོགས་ཆ་འདིས་ནི་སོང་བ་ཞེས་བྱ་ནུས་མེད་པ། །ཡིད་འཕྲོག་དེ་ཡི་གོམ་པ་རྣམས་ཀྱིས་རྣམ་བརྒྱན་པ། །ལམ་རྗེས་
བདག་གིས་དེ་ཕྱིར་རྗེས་སུ་འགྲོ་བར་བགྱི། །བརྩེ་ལྡན་ཁྱོད་ཀྱིས་སྡུག་བསྔལ་བརྒྱ་ཡིས་ཉེར་འཚེ་བ། །གཞན་མ་ཡང་ནི་མྱ་ངན་བྱེད་ཅིང་རྗེས་སུ་བརྩེ་བྱེད་པ། །ཀྱེ་མ་སྨྲེ་སྔགས་འདོན་ཅིང་མ་ནི་དམ་པ་དག །བུ་བཟངས་འོངས་ནས་ཁྱོད་ཀྱིས་ཅི་ཕྱིར་དབུགས་མི་འབྱིན། །ཡིད་འཕྲོག་མ་ཁྱོད་མི་འམ་ཅིའི་རྒྱལ་
ལུས་ལས་སྐྱེས། །སྙིང་རྗེ་བྲལ་ཉིད་འདི་འདྲ་ཁྱེད་ལ་ཅི་ལྟར་ཡིན། །བདག་གི་བུ་ལ་འཁོར་བ་གཅིག་པུ་ཉིད་འོངས་ནས། །གང་ཕྱིར་དི་རིང་དབུགས་འབྱུང་མ་བྱེད་དེ་ནི་མཚར། །དེ་ལྟར་ནོར་བཟངས་རྣམ་པར་བྲལ་བས་འཇིགས་པ་དེ། །རྒྱུན་མི་འཆད་པར་མཆི་མས་འགགས་པའི་དམར་ལྟ་བ། །

ས་ཡི་བདག་པོ་མིག་ནི་མཆི་མས་སྐད་ཅིག་ཏུ། །མིག་གི་འགགས་པ་ཇི་ལྟར་ཡང་ནི་ངུ་འཕྲོ་བཅད། །དེ་ནས་མི་འམ་ཅི་མོ་དང་བྲལ་བ་ལས་སྨྱོ་བ་སྐྱེས་པའི་ནོར་བཟངས་རི་དང་ནགས་ཀྱི་ནང་རྣམས་ན་ཀུན་ནས་འཁོར་ཞིང་། བྱའམ་རི་དགས་གང་དང་གང་ཉིད་མཐོང་བར་གྱུར་བ་དེ་དང་དེ་ཉིད་ལ་
དྲིས་པར་གྱུར་ཏོ། །དེ་ནས་དུས་གཅིག་གི་ཚེ་ན་མེ་ཏོག་སྐྱེས་པའི་ས་ལ་ཤིར་ཤའི་ཤིང་ལ་ངེས་པར་གནས་པ་ལྷན་ཅིག་སྤྱོད་མའི་སྐད་འབྱིན་པའི་ནེ་ཙོ་ལ་འདི་ལྟར་དྲིས་པར་གྱུར་ཏོ། །གསལ་ཞིང་ཡིད་འོང་ཤིར་ཤའི་མེ་ཏོག་རྩེ་མོ་འདྲ། །དང་པོའི་མྱ་ངན་མེད་པའི་འདབ་མ་ལྟ་བུར་ནི། །དམར་བའི་རྐང་པ་ནེ་
ཙོ་ཀིམ་ཤུ་ཀ་ཤིང་གནས། །བདག་གི་འདོད་མ་ཁྱོད་ཀྱིས་ནགས་རྣམས་ན་མཐོང་ངམ། །ལྷན་ཅིག་སྤྱོད་མ་ལ་སྐད་འདོན་ཅིང་ཁྱོད་ཀྱིས་བདག་གི་ལན་ཉན་པར་མི་བྱེད་ཅིང་དེ་བས་ན་ཁྱེད་ནི་བདེ་བར་གནས་པར་གྱིས་ཤིག །ད་ནི་ནོར་བུ་ཨིན་དྲ་ནཱི་ལ་དང་ཡོངས་སུ་འདྲེས་པ་མརྐ་ཏའི་ཚོགས་དང་རྗེས་སུ་
མཐུན་པ་རྒྱ་ཆེ་བའི་མཇུག་སྒྲོ་དང་ལྡན་པ། ཀུ་མ་ཏ་སར་པ་ལྟར་མིག་གི་མཐའ་མ་དཀར་བ། བྲག་གི་སྟེང་ན་གནས་པའི་རྨ་བྱ་འདི་ལ་དྲི་བར་བྱ་སྟེ། ས་འཛིན་མགོ་བོ་ལ་ནི་ཅོད་པན་དུ་གྱུར་པ། །ཐོག་མའི་སྤྲིན་ནི་འོངས་པས་གར་གྱི་རྩེད་མོ་བ། །རྨ་བྱ་མཆོག་ལགས་ནགས་གསེབ་འདི་ན་ཁྱོད་ཀྱིས་
ནི། །བདག་གི་བུད་མེད་འཁོར་བར་བྱེད་པ་རྣམས་མཐོང་ངམ། །ཁྱེད་ཀྱང་མི་སྨྲ་བ་ཉིད་དུ་ཇི་ལྟར་གནས་ཏེ་རྣམ་པ་ཐམས་ཅད་དུ་ཁྱོད་ནི་ངོ་བསྲུང་དང་བྲལ་ལམ། ཡང་ན་ཁྱོད་ལ་སྐྱོན་མི་རིགས་ཏེ། གཡོ་མེད་མིག་གཉིས་ལྡན་པ་རི་ཡི་བྲག་ལ་གནས་པ་ནི། །བསམ་གཏན་ལ་ནི་ཞུགས་འདྲ་ཡན་ལག་མི་
གཡོ་ཁྱེད་གནས་པ། །སྐེམས་པ་མི་འམ་ཅི་རྒྱལ་བུ་མོས་དོར་བ་ཅི་ལྟར་བདག །ཁྱོད་ཀྱང་རྨ་བྱ་མོས་ནི་ངེས་པར་དེ་ལྟར་དོར་བ་ཡིན། །དེ་བས་ན་བུད་མེད་དང་བྲལ་བ་སུ་ཞིག་ལ་ཡང་འདོར་བྱེད་པའི་ཕྱིར་རིགས་པ་མ་ཡིན་ནོ། །ད་ནི་ཡིད་འཕྲོག་མ་དང་འདྲ་བའི་མིག་འཇམ་ཞིང་རྩྭ་སྔོན་པོ་ལ་ཉེ་བར་
གནས་པའི་མིག་དང་འདྲ་བ་སྐྱུག་ལྡད་ཀྱིས་ཁའི་མདུན་བསྐྱོད་པའི་རི་དགས་འདི་ལ་བདག་གིས་དྲི་བར་བྱ་སྟེ། རི་དགས་ཁྱུ་ཡི་བདག་པོ་བདག་གི་མཛེས་མ་དང་། །འདྲ་བའི་མིག་ལྡན་ཀུནྡ་ལྟར་ནི་ལྟོ་བ་དཀར། །ཀུན་ནས་འཁོར་བར་བྱེད་པ་ཁྱོད་ཀྱིས་ནགས་འདི་ལ། །ལྗོན་པའི་བུ་མོ་དེ་རིང་ཁྱོད་ཀྱིས་

མངོན་མཐོང་ངམ། །ཁྱེད་ཀྱང་བདག་ལ་དགའ་བ་མ་སྨྲས་པར་ལངས་ཏེ། །བདག་ལས་འཇུག་པ་ཁོ་ན་སྟེ། །ཡང་ན་ཁྱོད་ཀྱང་སོང་ཤིག །ལྷན་ཅིག་སྤྱོད་མ་དང་ལྷན་ཅིག་ཏུ་སྦྱོར་བར་གྱིས་ཤིག །ནམ་གྱི་ཚེ་ཡང་བདག་དང་འདྲ་བ་མི་འམ་ཅི་མོ་དང་བྲལ་བས་
གནས་སྐབས་འདི་ནམ་ཡང་ཉམས་སུ་མྱོང་བར་མ་གྱུར་ཅིག །དེ་བས་ན་ད་ལྟར་དུ་མའི་ཤིང་དང་ཤིང་གེལ་པའི་མེ་ཏོག་གི་ཆང་གིས་མྱོས་པ་བདག་གི་བུད་མེད་ཀྱི་མིག་གི་འབྲས་བུ་ལྟར་ནག་པའི་བུང་བ་འདི་ལ་བདག་གིས་དྲི་བར་བྱ་སྟེ། །པདྨོ་རྣམ་པར་ཁ་ཕྱེ་སྒེག་མོ་རྣམས་ཀྱིས་ནི། །པདྨའི་གདོང་རྣམས་ལ་ནི་བསྐྱོད་
ཅིང་ལྕང་ལོའི་སྐྲ། །བུང་བའི་མཆོག་ལགས་སྲབ་པའི་ཡན་ལག་ཡིད་འཕྲོག་མ། །རི་ཡི་ནགས་འདིར་འགའ་ཞིག་ཁྱོད་ཀྱིས་མཐོང་ངམ་ཅི། །ཇི་ལྟར་ཁྱོད་ཀྱང་ལན་མི་སྟེར་བ་ཉིད་ཡིན་ཏེ་ལྗོན་ཤིང་བུད་མེད་རྣམས་ཀྱིས་ཉེ་བར་སྦྱིན་པ་རང་གི་མེ་ཏོག་གི་སྣོད་ན་གནས་པ་དེའི་མེ་ཏོག་གི་རོས་ཀུན་ནས་གསལ་བར་བྱས་
པའི་གདོང་ཅན་ཁྱེད་ཆང་འཐུང་བར་བརྩམས་པ་སྟེ། རྣམ་པ་ཐམས་ཅད་དུ་ཁྱོད་ནི་བརྩེ་བ་དང་བྲལ་བས་གང་གི་ཕྱིར་དགའ་མོ་དང་བྲལ་བས་ཀུན་ནས་ཡིད་གདུངས་བའི་བདག་ལ་མེ་ཏོག་ཆང་གི་བཏུང་བ་མངོན་པར་འདོད་པ། པདྨོའི་ཚོགས་ཀྱི་དབུས་སུ་ཉེར་འོངས་སྐད་ཅིག་ཏུ། །སླར་ནི་ལྗོན་ཤིང་མེ་ཏོག་
ཚོགས་ནི་འོང་བ་སྟེ། །བུང་བ་སྐད་ནི་མི་སྟེར་བ་སྟེ་ཅི་ཡི་ཕྱིར། །བུང་བ་མོ་དང་བྲལ་བ་འདི་ལ་ངེས་པར་འབྱུང་བར་འགྱུར། །སྡུག་བསྔལ་རྣམས་ནི་ཉམས་སུ་མྱོང་། །ཆུ་ཡང་གང་གི་འཇིག་རྟེན་དུ། །དེ་ཉིད་གཞན་གྱི་སྡུག་བསྔལ་རྣམས། །ཤེས་ནས་ཀུན་ནས་གདུང་བར་འགྱུར། །བརྩེ་བ་དང་བྲལ་བ་སྦྲང་
བྱེད་ངན་པ་འདིས་ཅི་ཞིག་བྱ་སྟེ། དེ་བས་ན་ད་ལྟར་འདིར་ཆུ་བོའི་འགྲམ་གྱི་སྟེང་ཁྱད་པར་དུ་བྱེད་པའི་ངུར་པ་ལ་བདག་གིས་དྲི་བར་བྱ་ཡིས། པདྨའི་འདབ་མ་ལྟར་མིག་ཅན། །ལུས་སྐེམས་དགོད་པ་ཡིད་འོང་ཅན། །ངུར་པ་ཁྱོད་ཀྱིས་ཡིད་འཕྲོག་མ། །མཐོང་བར་གྱུར་ཏམ་འོན་ཏེ་ཅི། །ཁྱོད་ཀྱང་མཚན་མོ་
ཐོབ་ནས་ནི། །ངུར་པ་མོ་དང་རྣམ་བྲལ་བར། །དེ་ལྟར་སྡུག་བསྔལ་འདི་ཤེས་ཤིང་། །ཅི་ལྟར་མི་སྨྲ་ཉིད་དུ་གནས། །བདག་གི་ཡིད་འཕྲོག་མ་མཐོང་ངམ་འོན་ཏེ་མིན་ཞེས་བྱ་བ་འདི་ཙམ་ངུར་པ་ངན་པ་འདི་མི་སྨྲ་བར་གྱུར་པ་ལ་ངལ་བ་ཅི་ཙམ་འགྱུར། དེ་བས་ན་འདི་ཡང་དང་ཡང་དུ་དྲིས་པས་ཆོག་སྟེ།

གང་ཞིག་འདི་རལ་གྲི་གཡའ་དག་པ་ལྟར་ནག་བའི་འོད། །ཚང་འདི་ལས་ལུས་ཕྱེད་ཕྱུང་བའི་ལྟོ་འཕྱེ་སྟེ། །དེ་ནི་འདི་ལ་བདག་གིས་དྲི་བར་བྱའོ་སྙམ་མོ། །དབང་ཕྱུག་ཆེན་པོའི་རྒྱན་དང་འཆི་བདག་གཞུ་ཡི་མདའ། །ཨུཏྤལ་སྔོན་པོའི་ཕྲེང་བ་གསལ་བ་རྗེས་སུ་མཐུན། །ལྟོ་འཕྱེ་འཕྲོ་བར་བྱེད་པའི་རྩེ་
ཡི་རྩེ་མོ་ཅན། །བདག་གི་འདོད་མ་ཁྱེད་ནི་འཁོར་བས་འདིར་མཐོང་ངམ། །འདི་ཡང་ཁྲོ་བའི་དབང་གིས་ཕུད་ཅེས་བྱ་བའི་སྒྲ་དང་བཅས་པར་གདེངས་ཀ་ཅུང་ཟད་རྒྱས་པར་བྱས་ནས་ཅི་ལྟར་ཚང་ཉིད་དུ་ཞུགས་སོ། །ལྟོ་འཕྱེའི་དུག་ལས་ཀྱང་ནི་སྡུག་བསྔལ་བ། །གང་ཕྱིར་འདོད་པ་བྲལ་སྐྱེས་སྡུག་བསྔལ་ཆེ། །
དེ་ལྟར་ལྟོ་འཕྱེ་ལ་ནི་དྲིས་པ་དང་། །རྒྱུ་མེད་ཁོ་བོ་ཅག་ལ་ཁྲོ་བར་བྱེད། །ཡང་ན་དཀའ་ཐུབ་པ་རང་བཞིན་གྱིས་བློ་རབ་ཏུ་ཆུང་བའི་དུད་འགྲོ་འདི་རྣམས་བདག་གི་མཛའ་མོ་ཅིའི་ཕྱིར་ཤེས་པར་འགྱུར་ཏེ། །ད་ནི་ཇི་སྲིད་དུ་འགྲོ་བ་ཐམས་ཅད་ཀྱི་མར་མེ་བཅོམ་ལྡན་འདས་ཉིད་ལ་ཡིད་འཕྲོག་མའི་གཏམ་
བདག་གིས་དྲི་བར་བྱའོ་སྙམ་མོ། །མུན་པའི་ཚོགས་ནི་མ་ལུས་འཇོམས། །འཇིག་རྟེན་མིག་གཅིག་ཁྱོད་ཀྱིས་ནི། །ཉི་མ་བདག་དང་བྲལ་བས་རིད། །ཡིད་འཕྲོག་མ་ནི་མ་མཐོང་ངམ། །ཇི་ལྟར་འདི་ཡང་མྱུར་བ་ཉིད་དུ་ནུབ་པར་ཉེ་བར་སོང་བ་སྟེ། ད་ནི་ཀུ་མུ་དའི་ཚོགས་ཀྱིས་གཉེན་ཆུའི་དབུས་
ནས་འབྱུང་བ་ལྟ་བུའི་བདག་པོའི་གླང་པོ་ཆེའི་དཔྲལ་འབུར་དང་འདྲ་བ་ཡང་དག་པར་འབྱུང་བཞིན་པ་ཟླ་བ་ལ་བདག་གིས་དྲི་བར་བྱ་སྟེ། བཅོམ་ལྡན་འདས། མཚན་མོའི་བུད་མེད་ཀྱི་ཐིག་ལེ། །བདག་དང་བྲལ་བས་ཡན་ལག་རིད། །མཚན་མོ་བྱེད་ལྡན་ཡིད་འཕྲོག་མ། །འདིར་ནི་མཚན་མོ་བྱེད་
ཁྱོད་ཀྱིས། །ཡིད་འཕྲོག་མ་འདི་མཐོང་གྱུར་ཏམ། །སྐར་མ་བཙུན་མོའི་འཁོར་ལ་ནི། །ཁྱོད་ནི་རྒྱལ་པོའི་རོལ་བས་གནས། །གདུངས་པ་བདག་ལ་བརྙས་བྱས་ནས། །བསིལ་བའི་འོད་ཅན་ལན་མི་འདེབས། །སྣར་མ་ལྷན་ཅིག་བྲལ་བ་ནི། །ནམ་ཡང་ཁྱོད་ལ་ཡོད་པ་སྟེ། །དེ་ལྟར་རང་
སྡུག་བསྔལ་ཤེས་ཤིང་། །ཅི་ཕྱིར་བདག་ལ་བརྩེ་མི་བྱེད། །བདག་ལ་དཔལ་མེད་མཐོང་ནས་ནི། །ཁྱོད་ཀྱིས་བརྙས་པ་མ་མཛད་ཅིག །སྒྲ་གཅན་གྱིས་ཟོས་ཁྱོད་ཀྱང་ནི། །རང་གི་དཔལ་ནི་འདོར་བ་ཡིན། །ཕལ་ཆེར་གནས་གནས་ལ་གུས་པ། །དགོས་ལྡན་སྐྱེ་བོས་བྱེད་པ་སྟེ། །

རྙེད་དཀའ་དེ་ནི་འཇིག་རྟེན་དུ། །གང་ཞིག་སྡུག་བསྔལ་གནས་པ་བརྙས། །ཇི་ལྟར་ལན་མ་བཏབ་པ་ཉིད་ནི་ཁྱོད་ཀྱང་ནུབ་པར་གྱུར་པ་དེ་བས་ན་ད་ནི་ཀླུ་རིས་བཀྲའི་ཆུ་རྟེན་གྱི་མཐའ་མ་ལ་གནས་པ་དེ་ཡང་རེ་ཞིག་དཀའ་ཐུབ་ཀྱི་ནགས་སུ་འགྲོ་བར་བྱས་ནས་དྲི་བར་བྱའོ་སྙམ་དུ་རྣམ་པར་
བསམས་ནས། ཐོ་རངས་ཀྱི་དུས་སུ་མེ་ལ་སྦྱིན་སྲེག་བྱས་པ། ཤིང་ལོ་ལས་བྱས་པའི་ཁང་པའི་སྒོ་ལ་གཞག་པའི་སའི་གདན་ལ་གནས་པ། །རལ་པའི་ཚོགས་ཀུན་ནས་འཕྱང་བས་མགོ་འཛིན་པ་འདེགས་པ། །ཤིན་ཏུ་རིད་པའི་ལུས་ཅན། བགྲང་ཕྲེང་གིས་ལག་ངར་དཀྲིས་པ། དཔུང་པ་ལ་ཁྲི་སྙན་ས་
ལེའི་པགས་པ་རྣམ་པར་བཀོད་པའི་དྲང་སྲོང་དེའི་གན་དུ་ཉེ་བར་འོངས་ནས་དབེན་པའི་སར་འདུག་སྟེ་དྲིས་པ། ཁྱད་པར་དུ་ནི་དག་པའི་བརྟུལ་ཞུགས་ལྷ་ཡི་མིག་གིས་ནི། །སྡང་དང་གྲོགས་པོ་རྣམས་ལ་མཉམ་པའི་སེམས་ལྡན་པ། །ཡིད་འཕྲོག་མ་ནི་ཞེས་བྱ་ཡིད་འཕྲོག་གདོང་ལྡན་མ། །བདག་གི་མཛའ་མོ་
ཁྱོད་ཀྱིས་འདིར་ནི་མ་མཐོང་ངམ། །བདག་གིས་ནེ་ཚོ་རྨ་བྱ་རི་དགས་བུང་བ་ངུར་པ་དང་། །ལྟོ་འཕྱེ་ཉིན་མོར་བྱེད་དང་རྫོགས་པའི་ཟླ་བ་རྣམས་ལ་དྲིས། །སྙིང་རྗེ་དང་བྲལ་དེ་རྣམས་ཀྱིས་ཀྱང་བདག་གི་མཛའ་མོ་ནི། །མ་སྨྲས་བརྟན་པའི་སེམས་ཅན་ཁྱོད་ཀྱང་དེ་ལྟར་མ་གྱུར་ཅིག །དེ་ནས་དཀའ་ཐུབ་ཀྱི་ནོར་ཅན་ནོར་བཟངས་
ལ་རྗེས་སུ་བརྩེ་བར་གྱུར་པས་འདི་སྐད་ཅེས་སྨྲས་སོ། །ཚེ་དང་ལྡན་པ་བདག་ཉིད་བརྟན་པར་གྱིས་ཤིག །ཡིད་འཕྲོག་མས་ནི་ཁྱོད་ལ་མི་འམ་ཅིའི་རྒྱལ་པོའི་གྲོང་ཁྱེར་གྱི་ལམ་བསྟན་པའི་ཕྱིར་བདག་གི་ལག་པར་ཡི་གེ་འདི་དང་སོར་གདུབ་འདི་དང་དག་པའི་བདུད་རྩི་ཞེས་བྱ་བའི་སྨན་འདི་ཡང་བ་ཞག་སྟེ། འདི་ནི་
མར་སྨིན་པ་ཤིན་ཏུ་ཡང་བཀྲེས་པ་དང་སྐོམ་པའི་ངལ་བ་སེལ་བར་བྱེད་པ་བཟའ་བར་བྱས་ནས། ཚེ་དང་ལྡན་པས་ཡིད་འཕྲོག་མ་ཐོབ་པར་བྱ་བའི་ཕྱིར་མིའམ་ཅིའི་བདག་པོ་ལྗོན་པའི་གྲོང་ཁྱེར་དུ་མངོན་པར་འགྲོ་བར་བྱེད་པ། ཁྱོད་ཀྱི་སྐྱེ་བོ་ངན་པ་དང་རྗེས་སུ་མཐུན་པ་སྨྱོན་པའི་སྨྲ་བ་ཉིད་འདིས་ཆོག་སྟེ།
བརྟན་པར་འདུག་ཤིག་དང་ཡིད་འཕྲོག་མ་ཐོབ་པར་འགྱུར་རོ་ཞེས་ཟེར་རོ། །ལེ་ལོའི་བདག་ཉིད་ཅན་འགྱུར་ཏེ། །བ་ལང་རྗེས་ལའང་སྒྱིད་ལུག་པ། །བརྩོན་འགྲུས་དང་ལྡན་ཐབས་ལ་མཁས། །རྒྱ་མཚོ་ལ་ཡང་རྒལ་བར་བྱེད། །དེ་ནས་ནོར་བཟངས་ཀྱིས་ཐུབ་པ་དེའི་གདམས་ངག་གི་སྒྲོན་མེའི་སྣང་

བས་སྨྱོ་བའི་མུན་པ་བསལ་བར་བྱས་ཤིང་ཡིད་དགའ་བར་སོར་གདུབ་དེ་བླངས་ནས་འདི་སྙམ་དུ་བསམས་ཏེ། མཛའ་བོའི་ལྗོན་ཤིང་མེ་ཏོག་ནི། །སོར་གདུབ་དེ་རིང་བདག་གིས་རྙེད། །དེ་མཐོང་འབྲས་བུ་ནམ་གྱི་ཚེ། །སེམས་བདེ་བ་ནི་རྙེད་པར་འགྱུར། །ཕྱིས་དྲང་སྲོང་དེ་ལ་སྨྲས་པ། །བཅོམ་ལྡན་
འདས་ཀྱིས་གདམས་ངག་གི་ཆུའི་དབང་བསྐུར་བ་འདིས་སྨྱོ་བའི་གདུང་བ་ཟད་པར་གྱུར་པ་བདག་གིས་འདི་ལྟར་མཐོང་སྟེ། ཀིམྤ་ཀའི་འབྲས་བུ་དང་འདྲ་བ་ལ་ཉེ་བར་ལོངས་སྤྱོད་པར་གྱུར་པ། ཟ་བའི་དུས་ན་ནི་བདེ་བའི་རོ་ཉེ་བར་སྐྱེད་ལ་མཐར་ནི་སྡུག་བསྔལ་བསྐྱེད་པ་རྣམས་ཏེ། སུ་ཞིག་ཅེས་བྱ་
བའི་འདོད་པའི་འདམ་དུ་བདག་ཉིད་ནུབ་ཅིང་། བདེ་བ་ཉམས་སུ་མྱོང་བར་གྱུར་པ་དེ་ལྟར་ཡང་ཤེས་ཤིང་། གང་གི་ཕྱིར་བདག་འདི་ལྟར་ཡིད་འཕྲོག་མ་ཐོབ་པར་འདོད་པ་དེ་བས་ན། འདི་ལ་རྒྱུ་ནི་འདི་ཡིན་ཏེ། །མཛའ་བོའི་སྐྱེ་བོ་དང་ནི་བྲལ་བས་འཇིགས་པ་ཡི། །མཛེས་མ་རྣམས་ཀྱི་མེ་ཏོག་ལྟར་
འཇམ་ཡིད་རྣམས་ནི། །བདག་དང་བྲལ་བའི་དུག་གིས་ཡན་ལག་བརྒྱལ་བ་ཅན། །ལྗོན་པའི་དུས་ལ་སྐྱེས་པར་ངེས་པར་སྲོག་རྣམས་འདིར། །བདག་ལ་བརྟེན་ནས་གལ་ཏེ་སྲོག །དཀའ་ཐུབ་ཅན་མ་ངེས་དོར་ན། །གལ་ཏེ་བདག་ནི་གསོན་པོར་གནས། །བརྩེ་བྲལ་གཞན་ནི་ཅི་འདྲ་ཡོད། །
དེ་བས་ཇི་སྲིད་སྲོག་རྣམས་ཉིད། །བདག་དང་བྲལ་བས་དེ་འདོར་བ། །དེ་སྲིད་དེ་ཐོབ་ཕྱིར་བརྩོན་འགྲུས། །སྙིང་རྗེས་བསྐུལ་ནས་བརྩོམ་པར་བྱ། །དེ་ནས་དྲང་སྲོང་དེ་ལ་གསོང་པོར་སྨྲས་ཏེ། ཡི་གེ་དང་སོར་གདུབ་བཟུང་བ་དང་བདུད་རྩིའི་སྨན་ཞེས་བྱ་བ་བཟུང་ཞིང་། ཤིང་གི་ལོ་མའི་ཁང་
པ་དེ་ནས་རྣམ་པར་བྱུང་སྟེ། འདི་ལྟར་བསམས་པར་གྱུར་ཏོ། །གལ་ཏེ་རྣམ་པ་གང་གིས་ཀྱང་ལོ་རྒྱུས་འདི་ཕ་མ་དག་ལ་སྨྲས་པར་གྱུར་ན་ངེས་པར་འདི་དག་བདག་ལ་མི་འམ་ཅིའི་རྒྱལ་པོའི་གྲོང་ཁྱེར་དུ་འགྲོ་བ་ལ་གེགས་བྱེད་པར་འགྱུར་གྱིས་སྙམ་དུ་རྣམ་པར་བསམས་ནས། ཅུང་ཟད་ཡུལ་
གཞན་དུ་སོང་སྟེ། གྲོགས་པོ་སུ་ཞིག་གི་ཁྱིམ་དུ་སྨན་དེ་མར་གྱིས་སྨིན་པ་ཟོས་ནས་ཡི་གེར་བྲིས་པ་པི་ཝང་དང་ལྕགས་ཀྱི་ཕུར་པ་གཉིས་དང་ཐོ་བ་དང་རལ་གྲི་དང་བཅས་པའི་མདའི་རྟེན་རྣམས་བླངས་ཏེ། རིམ་གྱིས་མུ་ཏིག་གི་ཚོགས་ལྟར་དཀར་བའི་ཁ་བ་དང་ལྡན་པ་ཁ་བ་ཅན་གྱི་རི་ལས་འདས་ནས་འགྲམ་ངན་ཞེས་

བྱ་བའི་རི་རྗེས་སུ་ཐོབ་པར་གྱུར་ཏོ། །དེ་ནས་ནོར་བཟངས་ཀྱིས་རས་དེ་ལ་བྲིས་པ་མ་ལུས་པ་ཡིད་ལ་བྱས་ནས་ས་འཛིན་དེ་ལ་མིའི་སྐད་དང་ལྡན་པའི་སྤྲེའུའི་བདག་པོ་ལ་འབྲས་བུ་སྣ་ཚོགས་པ་རྣམས་ཀྱིས་བདག་ཏུ་བྱས་ནས་སྨྲས་པ། སྤྲེའུའི་བདག་པོ་མྱུར་དུ་ནི། །སྦྲུལ་རྣམས་དུ་
མས་ཀུན་ཁྱབ་པ། །འགྲམ་ངན་རི་འདི་ལས་ནི་བདག །ད་ལྟར་ཁྱེད་ཀྱིས་སྒྲོལ་བར་མཛོད། །དེ་ནས་སྤྲེའུའི་བདག་པོ་དེས་ནོར་བཟངས་ལ་སྨྲས་པ། ཁྱེད་ཚུར་ཤོག་ལ་བདག་གི་རྒྱབ་ཏུ་ཞོན་ཅིག་ཅེས་ཟེར་རོ། །སྐད་ཅིག་མ་ཉིད་ཀྱིས་སྤྲེའུ་དེའི་རྒྱབ་ཏུ་ཞོན་པར་བྱས་པའི་བདག་ཉིད་ཆེན་པོ་དེས་རི་དེ་ལས་
བརྒལ་ནས་མ་སྐྱེས་པའི་ལམ་ཞེས་བྱ་བའི་རི་ལ་ཞུགས་པར་བྱས་ནས་སྤྲེའུ་ཆེན་པོ་དེ་ལྡོག་པར་འགྱུར་བ་ལ། དེར་ཆེ་བའི་ཚད་ལམ་འགེགས་པར་བྱེད་ཅིང་མངོན་པར་རྒྱུག་པར་བྱེད་པའི་སྦྲུལ་ཆེན་པོ། མདའ་འཕངས་པས་སྐྱེ་བ་གཞན་དུ་ཉེ་བར་ཁྱེར་ནས། །ལམ་མ་སྐྱེས་པའི་ས་འཛིན་ལས་བརྒལ་
ནས་འདོད་པའི་གཟུགས་ཅན་ཞེས་བྱ་བའི་རི་ལ་སོང་བར་གྱུར་ཏོ། །དེ་ན་ཡང་སྲིན་མོ་འདོད་པའི་གཟུགས་ཅན་མ་ཞེས་བྱ་བ་ཡོད་དེ་སྡུག་བསྔལ་དང་ལྡན་པ་དེས་ཀྱང་རིག་པ་འཛིན་མའི་གཟུགས་སུ་མངོན་པར་སྤྲུལ་ནས་ནོར་བཟངས་ཀྱི་དྲུང་དུ་འོངས་ནས་སྨྲས་པ། སྐལ་བ་ཆེན་པོ་ལགས་བདག་གི་ཁྱོ་དྲག་
པ་རིག་པ་འཛིན་པ་གཞན་དག་རྣམས་ཀྱིས་གཡུལ་ངོར་གཤིན་རྗེའི་གནས་སུ་ཉེ་བར་ཁྲིད་པ་དེས་ན་བདག་ངུ་བ་སྟེ། དེ་བས་ན་གལ་ཏེ་ཁྱེད་ལ་རིག་པ་འཛིན་པ་ཉིད་ཀྱི་ཕྱིར་མངོན་པར་འདོད་པ་ཡོད་ན་དེ་བས་ན་བདག་ལས་སྔགས་རྣམས་ཟུང་ཤིག་དང་། བདག་ནི་ཁྱོད་དང་ལྷན་ཅིག་ཏུ་ཆོས་སྤྱོད་མར་འབྱུང་
བར་འགྱུར་ཞེས་ཟེར་ཏེ། མི་ཡི་བདེ་བ་ཆུང་བ་སྙིང་མེད་འདི་ནི་སྤང་བྱས་ནས། །དི་རིང་ཤོག་ཤིག་བདག་དང་ལྷན་ཅིག་ནམ་མཁའི་དཀྱིལ་དུ་འགྲོ་བར་མཛོད། །མ་ལ་ཡ་ཡི་རི་ཡི་ཙན་དན་རྣམས་ཀྱི་སྣ་ཚོགས་པ་ཡི་ནགས། །རི་བོ་རྩེ་མོ་དགའ་བ་རྣམས་ཀྱང་རེ་ཞིག་མཐོང་བར་མཛོད། །དེ་ནས་བདག་ཉིད་
ཆེན་པོ་དེ་ལ་རྒྱུས་ཤེས་པ་སྲིན་མོ་འདོད་པའི་གཟུགས་ཅན་མ་འདི་དེ་ཞེས་བྱ་བ་རྣམ་པར་བསམས་ནས་སྨྲས་པ། །སྲིན་མོ་བདག་ནི་རིག་པ་འཛིན་པ་ཉིད་མངོན་པར་འདོད་པ་མ་ཡིན་ཏེ། གང་ཞིག་རིག་པ་འཛིན་པ་ཉིད་ཀྱིས་དོན་དུ་གཉེར་བ་གཞན་ལ་ལ་ཞིག་ཁྱོད་ཀྱིས་བསླུ་བར་གྱིས་ཤིག་ཅེས་ཟེར་རོ། །དེ་

ནས་སྐད་ཅིག་དེ་ཉིད་ཀྱིས་འབར་བའི་མེ་ལྕེའི་ཚོགས་ལྟར་སེར་སྐྱའི་སྐྲའི་ཚོགས་ཀྱིས་ཁྱབ་ཅིང་ཀུན་ནས་འཁྱོག་པའི་མཆེ་བ་ཀུན་ནས་བཏགས་པ་ལས་ཀུན་ནས་བསླང་བའི་སྲེག་བླུགས་འཛིན་པའི་མེ་སྟག་གིས་རྐན་གྱི་བུག་པ་ཁྱབ་པ་འཕྲོས་ཤིང་མངའ་བའི་མཁའ་སྣང་དང་འདྲ་བ་དང་མིག་སྨན་གྱི་རིའི་ཕུག་གི་སྒོ་དང་འདྲ་
བའི་ངོ་བོ་གདོང་མངོན་པར་བསྟན་ནས། ཆུའི་སྒྲ་སྒྲོགས་པའི་ཆུ་འཛིན་པ་ལྟར་ལྟོ་བ་ཆེ་བ་ལྷོད་ཅིང་འཕྱང་བའི་ནུ་མ་གཉིས་ཀྱིས་ཀུན་ནས་རིག་པའི་བུམ་པ་དང་རྗེས་སུ་མཐུན་པའི་པུས་མོ་གཉིས་དང་ལྡན་པ། བྲག་དགྲ་སྟ་རྣོན་པོའི་སོ་དང་འདྲ་བ་ཆུའི་རྒྱུན་འཛིན་པའི་དུས་ཀྱི་མཚན་མ་ལྟར་ཤིན་ཏུ་འཇིགས་པའི་གཟུགས་
ཅན་ནོར་བཟངས་ལ་མངོན་པར་རྒྱུག་པར་གྱུར་ཏོ། །དེ་ནས་ནོར་བཟངས་ཀྱིས་དགོད་ཅིང་དེ་ལ་སྨྲས་པ། བཟང་མོ་སྔར་བྱུང་བ་དང་འདྲ་བའི་ཁྱོད་ཀྱིས་རིག་པ་འཛིན་པའི་གཟུགས་ཀྱིས་བདག་གི་སེམས་འདོད་པ་དང་སྨྲ་བ་ཉིད་དུ་ཁྲིད་པས་ཡིན་ཏེ། གཟུགས་རྣམ་པར་བསྒྱུར་བ་འདིས་ཁྱེད་ལ་བདག་གིས་ཇི་ལྟར་འདོད་
པ་བགྱི་ཞེས་སྨྲས་ཏེ། དེ་བས་ན་སོང་ཤིག་དང་ཡོངས་སུ་ངལ་བ་འདིས་ཅི་ཞིག་བྱ། གལ་ཏེ་ཡང་བདག་ལ་མངོན་པར་རྒྱུག་པ་ཁྱོད་ཀྱིས་གནས་པར་མི་འགྱུར་ན་དེ་བས་ན་མདའ་འདིས་ཁྱེད་དུས་རིང་པོར་འཇིག་པར་འགྱུར་ཞེས་ཟེར་རོ། །གང་གི་ཚེ་དེས་མངོན་པར་རྒྱུག་པ་དེའི་ཚེ་ནོར་བཟངས་ཀྱིས་པི་ཝང་བརྡུངས་
པར་གྱུར་ཏེ། དེ་ནས་པི་ཝང་སྒྲ་ཐོས་ཏེ། །ཡིད་དང་རྣ་བ་འཕྲོག་བྱེད་པ། །སྲིན་མོ་འཇིགས་མ་ལེགས་སོ་ཞེས། །སྨྲས་ནས་དེ་ཉིད་མྱུར་དུ་ནུབ། །དེ་ནས་ནོར་བཟངས་ཀྱིས་འདོད་པའི་གཟུགས་ཅན་གྱི་རི་བོ་དེ་ལས་འདས་པར་བྱས་ཏེ། སོ་གཅིག་པ་ཞེས་བྱ་བའི་རི་ལ་སོང་བར་གྱུར་ཏོ། །དེ་ཡང་
ཐབས་གཞན་གྱིས་ནི་བརྒལ་བར་ནུས་པ་མ་ཡིན་ནོ་སྙམ་དུ་རྣམ་པར་བསམས་ཏེ། ས་འཛིན་དེ་ལ་ལྕགས་ཕུར་ནི། །ཤིན་ཏུ་ལྕི་བའི་ཐོ་བ་ཡིས། །སོར་བཅུ་གཉིས་སུ་བརྟན་བྱེད་ཕྱིར། །ཡང་དང་ཡང་དུ་བརྡུངས་བར་གྱུར། །ཕུར་པ་དེ་ལ་ཞོན་ནས་ནི། །སླར་ཡང་གཞན་གྱིས་བརྐོས་པར་གྱུར། །
དེར་ནི་གནས་ནས་ཕུར་བུ་དེ། །འོག་ནས་དེ་ནི་བཏོན་པར་གྱུར། །དེ་ལྟར་ཐབས་ནི་ཆེན་པོ་ཡིས། །བརྩོན་འགྲུས་དེ་ལྡན་ནོར་བཟངས་ནི། །མི་འམ་ཅི་མོ་ཐོབ་བྱའི་ཕྱིར། །རི་བོ་དེ་ལས་བརྒལ་བར་གྱུར། །དེ་ནས་སོ་གཅིག་པ་བརྒལ་བར་བྱས་ནས། རྡོ་རྗེ་ཅན་ཞེས་བྱ་བའི་རི་ལ་སོང་བར་གྱུར་

ཏོ། །དེའི་ཡང་རྩེ་མོ་ལ་གནས་པ་སྟག་གི་སེན་མོ་ལྟར་འཁྱོག་ཅིང་རྣོ་བའི་མཆུ་དང་ལྡན་པ། བྱ་རྒོད་མོ་མཐོང་ནས་འདི་བྱ་རྒོད་ཀྱི་གཟུགས་ཅན་སྲིན་མོའོ་སྙམ་དུ་བསམས་སོ། །ད་ནི་ཐབས་དང་བཅས་པར་འདི་ལས་བདག་ཉིད་རྡོ་རྗེ་ཅན་གྱིས་འཛིན་ལས་འདའ་བར་བྱའོ་
སྙམ་དུ་རྣམ་པར་བསམས་ཏེ། ཤིང་གི་རྩ་བར་འོངས་ནས་ནོར་བཟངས་གཞུ་དང་ལྡན་རྣམས་ཀྱི། །མཆོག་ཏུ་གྱུར་པ་གཞུ་ནི་བདུངས་པ་བྱས་ནས་གཞུ་ལ་མཁས། །རྩ་ནི་ཤིན་ཏུ་འཇམ་པའི་གཏན་པ་ཉིད་དུ་འཛིན་བྱེད་པའི། །རི་དགས་ལ་ནི་རྣོ་བའི་མདའ་ཡིས་ཀུན་ནས་བསྣུན་པར་གྱུར། །
རི་དགས་དེ་ཡི་ཁྲག་འཛགས་པས། །རི་དགས་ལྟ་བུའི་མིག་ལྡན་པ། །ཕྱི་རོལ་དུ་ལྡན་པགས་པ་ཡིས། །ལུས་ནི་བསྒྲིབས་ཤིང་གནས་པར་གྱུར། །དེ་ནས་བྱ་རྒོད་གཟུགས་འཛིན་དེས། །གཡོ་བ་དང་བྲལ་གནས་པ་ནི། །ཤུགས་ཀྱིས་རི་དགས་ལྤགས་ལྡན་པ། །དེ་ནི་བཏོན་ནས་རི་ལ་ཁྱེར། །
པགས་པ་དེ་ནི་ཕུག་བྱས་ནས། །ལམ་ནི་རྙེད་ཕྱིར་ལམ་ལ་ནི། །བརྩོན་འགྲུས་ལྡན་པ་དེས་སྲིན་མོའི། །མགོ་ནི་རལ་གྲིས་གཅོད་པར་གྱུར། །དེ་ནས་སེང་ལྡེང་མོད་པ་སེང་ལྡེང་ཅན་ཞེས་བྱ་བའི་རི་ལ་འོངས་ཏེ་བསམས་པ། རི་འདི་ནི་མུན་པ་དང་བཅས་པའི་ཕུག་གི་སྒོ་འདི་ལས་ངེས་པར་བརྒལ་བར་བྱའོ་སྙམ་
མོ། །ངེས་པར་གནས་ཆེན་པོ་འདི་ཡིན་ཏེ་གང་དུ་ཡོན་ཏན་ལྔ་དང་ལྡན་པ་ཀླུ་རྣམས་ཀྱིས་ཡོངས་སུ་བཟུང་བ་སྨན་ཆེན་པོ་དེ་བྲག་རྣམས་ཀྱིས་བཀག་པ་ཞིག་ཡོད་དེ། །སྨན་ཆེན་པོ་དེ་ཡང་མུན་པ་འཇོམས་བྱེད་འོད་ཀྱིས་ནི། །གྲང་དང་དྲོ་དང་དུག་ཉམས་བྱེད། །སྦྲུལ་དང་སྲིན་པོ་ཆོམ་རྐུན་ལས། །བྱུང་བའི་འཇིགས་པའང་སྤོང་བར་བྱེད། །
གང་ཡང་འདི་སོ་སོར་འཛིན་པའི་ཀླུ་དེས་གཉིད་ལོག་པར་གནས་པར་བྱས་ཏེ། ཅིའི་སླད་དུ་ཞེ་ན། གང་གི་ཕྱིར་སྨན་ཆེན་པོ་འདི་ནི་མར་མེའི་རྩེ་མོ་ལྟར་གནས་འདི་སྣང་བར་བྱེད་དོ། །དེ་བས་ན་ཇི་སྲིད་དུ་ལྟོ་འཕྱེ་འདི་གཉིད་ལོག་པ་དེ་སྲིད་དུ་བྲག་འདི་བཏོན་ནས་སྨན་བཟུང་བར་བྱའོ་སྙམ་དུ་རྣམ་པར་བསམས། ལྕི་བའི་བྲག་དེ་ནི་ལག་པའི་
སྟོབས་ཀྱིས་བསལ་བར་བྱས་ཏེ་སྨན་དེ་མགོ་བོར་བཅིངས་ལ་ཕུག་དེར་ཞུགས་ཏེ། མྱུར་དུ་ཕུར་བུའི་རྩ་དག་གིས། །རི་ཡི་ཕྱོགས་དག་མདའ་དག་གིས། །ངལ་བའི་སྐྱེད་བྱེད་ཕུག་བྱས་ནས། །རྣམ་པར་མི་གཡོ་དེས་བྱས་གྱུར། །དེ་ནས་ཅུང་ཟད་ཕར་སོང་སྟེ། །ལྕགས་ཀྱི་སྐྱེས་པ་གཉིས་དག་གིས། །

རལ་གྲི་བཟུང་བར་བྱས་པ་དག །མྱུར་དུ་མདའ་དག་གིས་ཕུག་སྟེ། །ཕུར་བ་ཡིས་ནི་མངོན་དུ་བྱས། །དེ་དག་མི་གཡོ་བ་ཉིད་དུ་ཐོབ་པར་འགྱུར་བས་བདག་གི་བར་ནས་བྱུང་སྟེ་སོང་བར་གྱུར་ཏོ། །དེ་ནས་སྒྱོགས་དུ་མ་རྣམས་བཅག་ནས་འཛིན་པ་དང་ལྡན་པའི་ཆུ་བོ་དེ་དང་དེ་རྣམས་ལས་ཀྱང་བརྒལ་ནས་སྦའི་
ཆུ་བོ་རྗེས་སུ་རྙེད་པར་གྱུར་ཏེ། དེ་ནས་རྣམ་པ་གང་གིས་སྤའི་ལྕུག་གཉིས་ཕ་རོལ་ནས། །དྲག་པའི་རླུང་གིས་ཀུན་ནས་ཁྱེར་བའི་མདུན་དུ་བཟུང་ནས་ནི། །ཆུ་བོ་ཆེན་པོ་དེ་ལས་བདག་ཉིད་ཆེན་པོ་བརྒལ་གྱུར་པ། །མངོན་དུ་བྱས་པ་འབྲས་བུ་ཆེན་པོ་སྟེར་བའི་དམ་བཅས་ལྟར། །དེ་ནས་སྦའི་ཆུ་བོ་
ལས་འདའ་བར་བྱས་ནས་གསེར་གྱི་ར་བའི་སྟེགས་བུ་རྣམས་ཀྱིས་ཉེ་བར་མཛེས་པ་སྐྱེད་མོས་ཚལ་དུ་མས་ཡིད་འཕྲོག་པ། ཡིད་འཕྲོག་མའི་ཡབ་ཀྱི་གྲོང་ཁྱེར་མཐོང་བར་གྱུར་ཏོ། །དེར་ཡང་ཕྱོགས་གཅིག་ཏུ་རིག་པ་འཛིན་པ་རྣམས་ཀྱི་སྐྱེད་མོས་ཚལ་དུ་རྗེས་སུ་ཞུགས་ནས་ཤིང་རྣམས་བསྒྲིབས་པར་གནས་པར་
གྱུར་ཏེ། གཅིག་དང་བསྡོངས་པར་བྱས་པའི་བཞི་པོ་རྣམས་ཀྱང་ནི། །མི་འམ་ཅི་ཡི་བུ་མོ་བརྒྱ་ཕྲག་རྣམས་ཀྱང་འདིར། །ཆུ་བོ་ལ་ནི་རབ་ཏུ་དང་བའི་ཆུ་ཉིད་ནི། །བུམ་པ་རྣམས་ཀྱིས་ཡང་དག་འཛིན་པར་བྱེད་མཐོང་འགྱུར། །དེ་ནས་དེ་རྣམས་སོང་བ་དང་དེར་རྒས་པར་ནུས་པ་ཉེ་བར་གདུངས་པ་གཅིག་པུ་ཆུ་དང་
བཅས་པའི་གསེར་གྱི་བུམ་པ་འཛིན་པའི་ནུས་པ་དང་མི་ལྡན་པ་དབུགས་ཕྱུང་ནས་རྫིང་བུའི་འགྲམ་གྱི་མཐའ་མར་གནས་པར་གྱུར་ཏོ། །དེ་ནས་ནོར་བཟངས་ཀྱིས་བདག་ལ་ཕན་པའི་ཕྱིར་མི་འམ་ཅིའི་འབངས་མོ་འདི་རྒས་པས་ནུས་པ་འཕྲོགས་པ་སྟེ། གཞན་དུ་ན་བདག་གིས་འདིར་གཅིག་པུ་འདི་ཅིའི་ཕྱིར་
ཡིད་འཕྲོག་མའི་གཏམ་ཉེ་བར་དམིགས་པའི་ཕྱིར་རྙེད་པར་འགྱུར་སྙམ་དུ་རྣམ་པར་བསམས་ནས་ཉེ་བར་འོངས་ཏེ་དེ་ལ་དྲིས་པ། འཕགས་མ་ཆུ་འདི་གང་དུ་ཉེ་བར་ཁྱེར་བ་ཡིན། །མི་འམ་ཅིའི་འབངས་མོ་རྒས་པ་དེས་ཀྱང་ནོར་བཟངས་ལ་བལྟས་ནས་རིག་པ་འཛིན་པའི་སྐྱེད་མོས་ཚལ་འདི་ལས་ངེས་པར་བྱུང་ནས་
གཞོན་ནུ་རིག་པ་འཛིན་པ་འདི་ངོ་མཚར་བའི་ལྟད་མོའི་དབང་གིས་བདག་ལ་དྲིའོ་སྙམ་དུ་རྣམ་པར་བསམས་ནས་སྨྲས་པ། བཞིན་བཟངས་ཉོན་ཅིག །ཡིད་འཕྲོག་མ་ཞེས་བྱ་བ་ལྗོན་པའི་བུ་མོ་སྟེ། །ས་ཡི་བདག་པོ་མི་འམ་ཅི་ཡི་ཡིད་འཕྲོག་མ། །དེ་ཡང་སྐྱེས་པས་སྔོན་དུ་ཉེ་བར་ལོངས་སྤྱོད་པ། །ཇི་ལྟར་སླར་

ཡང་འདིར་ནི་མངོན་པར་འོངས་པ་ཡིན། །དེ་ཡི་ཕས་ནི་མི་ཡི་དྲི་ནི་ཀུན་ནས་འབྱུང་བཞིན་པ། །ཡན་ལག་ལས་ནི་སྣོམ་པར་ནུས་པ་མ་ཡིན་ཏེ། །ཉི་མ་རེ་རེར་བུམ་པའི་ཁ་ལས་འབྱུང་བ་ཡི། །དྲི་ཡི་ཆུ་ཡིས་དེ་ཕྱིར་དེ་ནི་འཁྲུ་བ་ཡིན། །དེ་ནས་ནོར་བཟངས་ཕྲད་འདོད་དེ་ལ་སྨྲས་
གྱུར་པ། །དོགས་པ་དང་བཅས་ཕྱོགས་རྣམས་ཡང་ཡང་བལྟ་བྱས་ཏེ། །འོད་ཀྱིས་བརྒྱན་པའི་སོར་གདུབ་འདི་ནི་དོགས་དང་བཅས། །ཡིད་འཕྲོག་མ་ལ་འདི་ནི་རབ་ཏུ་སྦྱིན་པར་མཛོད། །དེས་ཀྱང་དེ་ལྟར་བགྱི་ཞེས་སྨྲས་ནས་སོར་གདུབ་དེ་བཟུང་བར་གྱུར་ཏོ། །བྱང་ཆུབ་སེམས་དཔས་ཀྱང་ཆུའི་བུམ་པ་
དེའི་རྐེད་པར་བཞག་ནས་སླར་སྐྱེད་མོས་ཚལ་དེ་ཉིད་དུ་ཞུགས་པར་གྱུར་ཏོ། །དེ་ནས་མི་འམ་ཅིའི་འབངས་མོ་རྒན་མོ་ཡང་དག་པར་ཉེ་བར་འོངས་ཏེ་ཁྲུས་ཀྱི་ཐ་མར་ཡིད་འཕྲོག་མ་སོར་གདུབ་དེ་ཕང་པར་གཞག་ཅིང་གནས་ཏེ། དེ་ནས་སོར་གདུབ་དེ་ནི་ཡང་དག་བླངས་བྱས་ཏེ། །ཡིད་འཕྲོག་མས་ནི་ཁྱིམ་དུ་
བུད་མེད་དེ་ལ་ནི། །འཕགས་མས་འདི་ནི་གང་ནས་ཡང་དག་རྙེད་པ་ཞེས། །འདོད་པས་གང་བའི་ཡིད་དང་ལྡན་པས་དྲིས་པར་གྱུར་ཏེ། དེ་ནས་དེས་གཞོན་ནུ་རིག་པ་འཛིན་པས་སོར་གདུབ་འདི་བདག་གི་ལག་ཏུ་གཏད་པ་སྟེ། ཡིད་འཕྲོག་མ་ལ་འདི་སྦྱིན་པར་གྱིས་ཤིག་ཅེས་སྨྲས་པར་གྱུར་ཏོ། །དེ་ནས་
མི་འམ་ཅིའི་བདག་པོའི་བུ་མོས་ངེས་པར་འཕགས་པའི་སྲས་འོངས་སོ་སྙམ་དུ་རྣམ་པར་བསམས་ནས། སླར་དེ་ལ་འཕགས་མས་གལ་ཏེ་འདིར་འགུགས་པར་ནུས་ན་ཤིན་ཏུ་ཡང་དོན་ཆེན་པོ་དང་ལྡན་པར་འགྱུར་ཞེས་བྱ་བ་སྨྲས་སོ། །དེས་སྨྲས་པ། རེ་ཞིག་འབད་པར་བགྱི་སྟེ་གལ་ཏེ་བདག་གིས་
ནུས་པར་གྱུར་ན་དེ་བས་ན་གཞོན་ནུ་རིག་པ་འཛིན་པ་དེ་འོང་བར་བགྱི་ཞེས་བྱ་བ་སྨྲས་ནས་སྐྱེད་མོས་ཚལ་དེར་སོང་སྟེ་ནོར་བཟངས་ལ་སྨྲས་པ། བཟང་པོ་ཡིད་འཕྲོག་མ་ནི་ཁྱོད་ལ་ལྟ་བར་འདོད་དོ་ཞེས་སྨྲས་ཏེ། དེ་ནས་བུད་མེད་ཀྱི་ནི་ཆ་བྱད་ཡིད་འོང་དུ་བྱས་ཏེ། །མཚན་མོའི་མུན་པ་མཐུག་པ་ཉིད་དུ་འགྱུར་བ་ལ། །དེ་རིང་
བདག་དང་ལྷན་ཅིག་ཕྲད་འདོད་ཡིད་འཕྲོག་མའི། །གློ་བུར་ཉིད་དུ་ཕོ་བྲང་དུ་ནི་ཞུགས་པར་མཛོད། །དེ་ལྟར་བགྱི་ཞེས་བརྟན་པ་འདིས་ནི་ཤེས་བྱས་ཏེ། །སྒེག་པའི་ཆ་བྱད་ཀྱིས་ནི་ཡན་ལག་བསྒྲིབས་བྱས་པ། །མི་འམ་ཅིའི་གཡོག་རྒན་མོའི་རྗེས་སུ་འགྲོ་བཞིན་པ། །མཚན་མོ་ཡིད་འཕྲོག་མ་ཡི་ཁྱིམ་དུ་

ཞུགས་པར་གྱུར། །དེ་ནས་ནོར་བཟངས་མཐོང་ནས་དགའ་བའི་ཁུར་གྱིས་ཡན་ལག་ལེ་ལོ་ཅན། །ཅི་ལྟར་ཡང་ནི་འཇིགས་པ་ཉིད་ཀྱིས་དེས་ནི་མལ་ཆ་དོར་བར་གྱུར། །དེས་ཀྱང་གཡོ་བའི་རི་དགས་མིག་ལྟར་མཛའ་མོ་དེ་ལ་དཔུང་དག་གིས། །ཤིན་ཏུ་རིང་བར་བྲལ་བར་རིད་པ་མི་འམ་ཅི་མོ་ལ་ནི་འཁྱུད། །དེ་ནས་
དེས་ཇི་ལྟར་ཡང་ནོར་བཟངས་ཀྱི་ཚིག་གིས་ཡུན་རིང་པོར་བྲལ་བའི་སྡུག་བསྔལ་གྱིས་འཇིགས་པ་སེལ་བ་ཡིད་ལ་རེ་བའི་འབྲས་བུ་ཐོབ་ནས་སྨྲས་པ། ཨེ་མ་བདག་གི་དོན་དུ་འཕགས་པའི་སྲས་ཀྱིས་འོངས་པའི་སྡུག་བསྔལ་མང་པོ་ཉམས་སུ་མྱོང་བ་སྟེ། རྣམ་པ་ཐམས་ཅད་དུ་བདག་ནི་སྙིང་སྲ་བ་སྟེ་གང་གི་ཕྱིར་བདག་
གིས་འཕགས་པའི་སྲས་འདི་ལྟར་ཀུན་ནས་ངལ་བར་བྱས་སོ་ཞེས་ཟེར་རོ། །ནོར་བཟངས་ཀྱིས་སྨྲས་པ། འཇིགས་མ་དེ་ལྟར་ནི་མ་ཡིན་ཏེ། །སྡུག་བསྔལ་མི་བཟད་ཆེན་པོ་ལ་ཡང་བསམ་པར་མ་བྱས་ཤིང་། །བདེ་བས་རྗེས་འབྲེལ་མི་གཡོ་ཆོས་ཀྱི་ལམ་ཡང་དོར་བྱས་ནས། །ཕལ་ཆེར་ཡུན་རིང་མངོན་
པར་འདོད་པའི་སྐྱེ་བོའི་དོན་དུ་ནི། །གཉེན་བཤེས་པས་ནི་མ་སྤྱད་པ་ཡང་སྐྱེ་བོས་བྱེད་པ་ཡིན། །ཡིད་འཕྲོག་མས་སྨྲས་པ། ཨེ་མ་བདག་ནི་དོན་དང་བཅས་པ་སྟེ། །གང་གི་ཕྱིར་བདག་གི་དོན་དུ་འཕགས་པའི་སྲས་ལ་མཉེས་གཤིན་པ་ལ་རྩེ་གཅིག་པ་ཉིད་ཡིན་ཏེ། དེ་བས་ན། ད་ལྟར་ཡུན་རིང་བྲལ་བའི་ཉི་མ་དང་འབྲེལ་
གདུངས་པས་ནི། །ཟོས་པ་འདི་ནི་བསྐུམ་པ་ཉིད་དུ་མངོན་པར་ཐོབ། །བདག་གི་སྙིང་གི་ཀུ་མུ་ད་ནི་མཐོང་ཤར་བྱས། །ཤིན་ཏུ་དགའ་བ་ཟླ་བ་ཡིས་ནི་རབ་སད་བྱས། །དེ་ནས་ཡིད་འཕྲོག་མས་མི་འམ་ཅིའི་འབངས་མོ་རྒན་མོ་ལ་བོས་ཏེ་ས