Luận tạng Tây Tạng (Tengyur) — Tập 169

་ཅན། །ཡུན་རིང་གང་དག་ལོ་མ་ལྟར་འཇམ་འོད་ལྡན་པ། །སྨུག་རྩི་
དང་བཅས་གྲོགས་མོའི་སྐྱེ་བོས་བྱས་གྱུར་པ། །འགྲམ་པའི་རུས་པ་ལྷག་མ་ཅན་ནི་དེ་དག་གི། །མ་དྷ་ཀ་ལྟར་སྐྱ་བ་ད་ལྟར་གང་དུ་སོང་། །དེ་བས་བཙུམས་པར་བྱས་པའི་མིག་དང་ལྡན་པའི་གཞོན་ནུ་མའི། །བ་སྤུའི་ཚོགས་ནི་ལངས་པ་གང་ཞིག་དགའ་བོས་རེག་པ་ནི། །ནུ་འབུར་གཉིས་ནི་
འགྱུར་བའི་ཁྲག་གིས་ཤིན་ཏུ་དམར་བ་ཡི། །དེ་ལ་ཁྱི་སོ་རྣམས་ཀྱིས་དེ་རིང་ཀུན་ནས་འབིགས་པར་བྱེད། །དགའ་བོའི་དཔུང་རྒྱན་གྱིས་ནི་སྐྲ་ལོའི་མེ་ཏོག་ལྷུང་བ་ནི། །གང་ཞིག་བཙུམས་པར་བྱས་པའི་མིག་ཅན་འཁྱུད་ནས་བདེ་བར་ཉལ། །དེ་ནི་དུར་ཁྲོད་ས་ཡི་མལ་སྟན་ལ་ནི་ཉལ་བཞིན་པ། །གློ་བུར་

འོངས་ནས་ཤིན་ཏུ་དགའ་མར་ཅི་སྟེ་འཁྱུད་མི་བྱེད། །རྒྱུས་པ་རུས་པ་ཤ་དང་ཁྲག་དང་རྒྱུ་མའི་རང་བཞིན་ལས། །བུད་མེད་ཅེས་བྱ་མང་བའི་སྐྱོན་གྱི་སྦྲུལ་གྱིས་ཁྱབ་འདི་ལ། །ཡང་དག་མ་ཡིན་ཀུན་ཏུ་བརྟགས་པས་ཉམས་པའི་སྐྱེ་བོ་འདི། །འདོད་ཆགས་དང་བྲལ་དངོས་པོ་ལ་ནི་དོན་མེད་ཆགས་པར་
འགྱུར། །དེ་རྣམས་སྐྱེ་ངན་ཚོགས་ཀྱི་རྣོན་པོའི་མདའ་རྣམས་ཀྱིས་མི་འབིགས། །བརྟན་པ་དེ་ཞི་བ་དེའི་ལོངས་སྤྱོད་དེ་རྣམས་ཉིད། །བུད་མེད་དུག་ནི་ལྗོན་ཤིང་གི་ནི་རྣམ་སྤངས་ནས། །གང་དག་ཞི་བའི་འབྲས་བུ་ཅན་གྱི་དཀའ་ཐུབ་ནགས་རྣམས་གནས། །དེ་ནས་དེར་དུ་བའི་ཕུང་པོ་མངོན་
པར་འཐུལ་བའི་མཆོད་སྦྱིན་གྱི་ཤིང་དང་ལྡན་པ། མིའི་རྐང་མར་ཡོངས་པས་དགང་བླུགས་ངེས་པར་ལྷུང་ཞིང་འབར་བར་སོལ་བའི་ཕུང་པོ་རྣམས་ལས་སྭ་ར་སྭ་རའི་སྒྲ་འབྱུང་བ་དང་། བྷཎྜ་ཀའི་བྱའི་སྐད་མངོན་སྤྱོད་ཀྱི་སྔགས་བརྩམས་པའི་ལས་དང་ལྡན་པའི་དུར་ཁྲོད་ཀྱི་མཆོད་སྦྱིན་ལ་
མཚོན་ཆ་རྣོན་པོས་ཡན་ལག་རྣམས་ཀུན་ནས་བཞོགས་ཏེ། སྦྲང་རྩི་དང་ནི་མར་དག་གིས། །འཛག་པའི་ཆུ་ཡི་རྒྱུན་གྱིས་བརླན། །གྲོག་སྦུར་རྣམས་ཀྱིས་ཟོས་བཞིན་པ། །བདག་ཉིད་བདག་ཉིད་ཀྱིས་ནི་འདི། །ལྔ་བདག་ཕྱུགས་ཉིད་དུ་ནི་ཁྱེར། །དེར་ཡང་དྲི་མས་རྩུབ་པའི་རིལ་བུར་བྱས་
པའི་གོ་ཆ་ལྟར་དྲི་མར་བཅས་པའི་འོད་གླང་པོ་ཆེའི་ཁྲག་གིས་ཉེ་བར་གོས་པའི་རི་དགས་ཀྱི་བདག་པོའི་སེན་མོ་ལྟར་འཁྱོག་ཅིང་དམར་ཞིང་རྣོ་བའི་མཆུ་དང་ལྡན་པ། ལྟོ་འཕྱེ་ཁྲོས་པའི་མིག་དང་འདྲ་བའི་མིག་ཅན། ལྕགས་ཀྱི་ཚེར་མ་ལྟར་རྩུབ་པའི་སེན་མོ་རྩུབ་ཅིང་དངར་བ་མ་ཡིན་པའི་སྐད་ཀྱིས་
བྱའི་ཚོགས་གཞན་རྣམས་ཀུན་ནས་སྐྲག་པར་བྱས་པ། བྱ་རྣམས་ཀྱིས་སྲ་བའི་འདབ་མའི་སྒྲས་འགྲོ་བ་ཀུན་དུ་མཚོན་བཞིན་པ། མཐོན་པོར་འགྲོ་བ་ཞེས་བྱ་བའི་འདབ་ཆགས་ནི། རི་བོ་ལྟར་ནི་མཐོན་པོའི་གཟུགས་ཅན་དེ་ཡི་ཕྲག་པར་བྱ་དེས་ནི། །གློ་བུར་དུ་ནི་མངོན་པར་འཛེག་པར་བྱས་
ནས་མཐོ་ཡོར་ལྟར། །ཨུཏྤ་ལ་ཆེན་པོའི་འདབ་མ་དང་མཚུངས་མིག་ནི་གདོན་བྱས་ནས། །ཁྲག་གིས་ཁྱབ་པའི་མིག་རྫིའི་རི་མོ་སླར་ཡང་ལྷུང་བར་གྱུར། །ཕྲུག་པ་རྗེ་སྐྱོང་དོན་དུ་མཉེས་གཤིན་པས་ནི་རེག་བྱས་པ། །རི་དགས་མོ་ནི་མངོན་པར་ཕྱོགས་པར་སྟག་ལ་ཡང་ནི་རབ་ཏུ་འགྲོ། །མཉེས་གཤིན་པ་ཡང་

སྙིང་རྗེ་ཞེས་བྱ་གཞན་དོན་སྒྲུབ་པའི་ཕྱིར། །སྐྱེད་བྱེད་བྱང་ཆུབ་སེམས་དཔའ་ལ་ནི་ཇི་ལྟར་གནོད་པར་བྱེད། །དེ་ནས་ནམ་མཁའ་ལ་འགྲོ་བ་དེས་བྱང་ཆུབ་སེམས་དཔའ་ལ་དྲིས་པར་གྱུར་ཏོ། །ངེས་པར་བདག་གི་འདོན་བཞིན་པའི་མིག་འདི་ལ་ཁྱེད་ཀྱི་སྡུག་བསྔལ་ཆེན་པོ་
ཉམས་སུ་མྱོང་ངམ་ཞེས་སོ། །བྱང་ཆུབ་སེམས་དཔས་སྨྲས་པ། །གལ་ཏེ་གང་གིས་ཀྱང་མི་དགོས་པའི་བདག་གི་ལུས་ཟད་པར་སོང་བར་གྱུར་ན་དེ་ནས་བདག་ལ་སྡུག་བསྔལ་འབྱུང་བར་འགྱུར་ཏེ། ད་ལྟའི་ཉེ་བར་དགོས་བར་གྱུར་བ་སེམས་ཅན་དུ་མ་རྣམས་ཀྱིས་མཐོང་ནས་མཆོག་ཏུ་
དགའ་བ་བདག་གིས་ཉམས་སུ་མྱོང་ཞེས་ཟེར་རོ། །གལ་ཏེ་ལུས་པོ་འདི་ནི་སྡུག་བསྔལ་རྣམས་ཀྱི་རྟེན། །ཡན་ལག་ཅན་རྣམས་ལ་ནི་འགྲུབ་པ་ཉིད་དུ་འགྲོ། །ཆེ་མིང་མང་འདོད་རྣམས་ལ་དེ་ལྟར་རིན་ཆེན་ལྡན། །འདི་ལས་གཞན་དུ་ལྟོ་འཕྱེ་བཞིན་དུ་སྐྱོན་མང་ངོ་། །དེ་ནས་བྱང་ཆུབ་སེམས་
དཔས་ཤ་ཟ་རྣམས་ཀྱིས་ཇི་ལྟར་བདེ་བར་བདག་ལ་ཟོ་ཤིག་ཅེས་རྣམ་པར་བསམས་ནས། བདག་ཉིད་རི་དགས་དང་འདྲ་བར་སྟོན་ཞིང་འདུག་གོ། །དེ་ན་བྱ་རྣམས་ཡང་དག་འོངས་པ་ལ། །རྒྱུན་མི་འཆད་པའི་སྐད་ཀྱིས་འཇིགས་བྱས་པ། །དེ་ཡི་ཤ་ནི་ཅིག་ཅར་ཟད་འགྱུར་ཏེ། །སེམས་ཀྱི་བརྟན་
པ་ལ་ནི་རྒྱབ་ཕྱོགས་མིན། །དེ་ནས་དེ་ཡི་ལུས་ནི་ཡོན་ཏན་མེ་ཏོག་གི །དྲི་ཡིས་ལྷག་པར་དྲི་ཞིམ་བྱས་ནས་སྲོག་རྣམས་ཀྱིས། །ཇི་ལྟར་ཡང་ནི་རྣམ་པར་སྤངས་ཏེ་སྐྱེས་པ་ཡི། །སྡུག་བསྔལ་གྱིས་ཁྱབ་བྱ་རྣམས་ལྟུང་བའི་གནས་ཤིང་བཞིན། །དེ་ནས་ནུས་པའི་རིའི་རྩེ་མོ་ནས་ཤིན་ཏུ་རིང་བར་
ཀུན་ནས་ལོངས་སྤྱོད་པའི་བུང་བ་བཞིན་དུ་ཀུན་ད་ལྟར་དཀར་སྐར་མའི་བདག་པོ་སྤངས་ནས་མཚན་མོ་སོང་བ་ལ། བཟླས་པའི་མེ་ཏོག་རྩེ་མོ་དང་འདྲ་བར་ཉི་མའི་གདོང་གིས་ཉེ་བར་འབྲེལ་བར་གྱུར་པའི་ཤར་གྱི་རིའི་རྩེ་མོར་ཉི་མ་ཡོད་པ་ལ་ཉིན་མོར་བྱེད་པའི་འོད་ཟེར་རྣམས་ཀྱི་ལག་པས་ཡང་དག་པར་
རེག་པའི་བདེ་བ་དང་འདྲ་བར་མངོན་པར་གསལ་བར་གྱུར་པའི་པདྨའི་སྡོང་བུའི་ཚེར་མ་རྣམས་ཀྱིས་ཁ་སྤུ་ལངས་ཤིང་གཉིད་དང་བྲལ་བའི་པདྨའི་བུད་མེད་རྣམས་ཡོད་པ་ལ་སྲོག་ཆགས་ཀུ་ར་ར་རྣམས་ཀྱི་སྐད་རྗེས་སུ་བྱེད་པའི་རྣམ་པར་གྲོལ་བར་གྱུར་པའི་གྲོང་ཁྱེར་གྱི་སྒོ་དང་སྒོ་གླེགས་ཡོད་པ་ལ་གཉིད་

སད་ནས། བྱང་ཆུབ་སེམས་དཔའི་མི་འདོད་པའི་དོགས་པས་ཡིད་སྡུག་བསྔལ་བར་གྱུར་པ་གྲོགས་པོ་དང་འཁོར་གྱི་སྐྱེ་བོ་དང་། གཉེན་འདུན་གྱི་ཚོགས་དང་བཅས་པ་བུ་ཚོལ་བས་སེམས་གཡེངས་པ་དེ་དང་དེ་ལ་སེམས་ཤིང་འདུག་གི། བདག་གི་བུ་དེ་མཚན་མོ་ཀུན་ནས་འཁོར་ཞིང་སྦྲུལ་གྱིས་
སོས་བཏབ་གྱུར་ཏམ་ཅི། །འོན་ཏེ་སྙིང་རྗེ་དང་བྲལ་སོ་སོར་འགུགས་བྱེད་རྣམས་ཀྱིས་རྒྱན་རྣམས་ཕྲོགས་ནས་བསད། །ས་ཡི་དབང་ཕྱུག་མཆེ་བ་ཅན་གྱི་མཆེ་བས་བྲང་དུ་ཀུན་ནས་བརྒྱབ་པས་ཟད་པར་གྱུར། །བཅིངས་པའི་ཀ་བ་བཅག་པར་བྱས་ནས་གཤིན་རྗེའི་གྲོང་ཁྱེར་ཅི་ཞིག་སོང་བར་གྱུར། །
རིམ་གྱིས་ཉེ་བར་སོང་ནས་དུར་ཁྲོད་ཀྱི་ཕྱོགས་གཅིག་ཏུ་བྱ་རྒོད་རྣམས་ཀྱིས་ཤ་ལ་གཅོད་པར་བྱེད་བཞིན་པའི་བྱང་ཆུབ་སེམས་དཔའ་རྣམ་པ་གང་གིས་ཀྱང་མངོན་པར་ཤེས་ནས་སྐྱེ་བོ་དེས་ཚོང་དཔོན་ལ་སྨྲ་ཞིང་འདུག་གོ། །ཀྱེ་མ་བདག་ཉིད་ཆེན་པོ་འདི་ཤི་བ་ཉིད་དུ་ཉེ་བར་སོང་སྟེ། ཇི་ལྟར་རྟོག་
པར་བྱེད་པ་དེ་ལྟར་ངེས་པར་འདིས་བདག་ཉིད་དུད་འགྲོ་རྣམས་ལ་སྦྱིན་པར་བྱ་ཞེས་བྱ་བའོ། །དེ་ཡང་ཐོས་ནས་ཚོང་དཔོན་དེ་དགྲ་སྟས་མ་ལུས་པར་གཅོད་པའི་ཤིང་བཞིན་དུ་ལྟུང་བར་གྱུར་ཏེ། ཡུན་རིང་པོར་འདུ་ཤེས་སོ་སོར་སྐྱེས་པ་འདི་ལྟར་སྨྲེ་སྔགས་འདོན་པ་ལ་རྩེ་གཅིག་པར་གྱུར་ཏོ། །བདག་
སྐྱེས་འདི་ནི་བྱ་རྣམས་ཀྱིས་ནི་གཅོད་བཞིན་པ། །རུལ་པའི་འབྲེལ་པ་ལྷོད་པ་འདི་ལྟར་རྣམ་མཐོང་ནས། །ཀྱེ་མ་ལྷ་ཡི་ཉེས་པར་སྤྱད་པ་ཆེན་པོས་ནི། །དེ་ལྟ་ན་ཡང་རྩུབ་པའི་བསམ་ལྡན་བདག་ནི་འཚོ། །དུད་འགྲོ་རྣམས་ཀྱི་བརྩེ་བ་འདི་འདི་འདྲ། །གལ་ཏེ་རང་གི་ལུས་ནི་སྦྱིན་པས་གསལ་
བྱས་པ། །སྡིག་པ་མེད་པའི་ཕ་དག་ཀུན་ནས་དོར་བྱེད་པ། །ཁྱོད་ཀྱིས་ཇི་ལྟར་སྙིང་རྗེ་མེད་པ་ཉིད་ནི་བརྩམས། །འཇམ་པའི་ལྟན་ལྡན་མལ་ཆ་ཡིད་ནི་འཕྲོག་བྱེད་པར། །དཀར་པོ་སྟེང་དུ་གཡོགས་པར་བདེ་བར་ཉལ་བྱས་ནས། །དེ་རིང་འདིར་ནི་རུས་པ་རྣམས་ཀྱིས་ཀུན་ཁྱབ་པའི། །ཐལ་བ་
དང་བཅས་ཤིང་ཁང་ས་མལ་ཇི་ལྟར་ཉལ། །དེ་རིང་མཐོ་རིས་སོང་བའི་སྙིང་རྗེའི་གྲོགས་ལྡན་དུ་ཁྱོད་ལ། །སྐྱེ་བོས་ལྟ་འདོད་བྱས་པ་རང་བདེ་ལ་ནི་མ་ལྟོས་པ། །དམ་པའི་ཡོན་ཏན་གཏམ་གྱིས་མེ་ཏོག་རྣམས་མཆོད་གཏམ་རྣམས་ལ། །ཡིད་ནི་འཕྲོག་བྱེད་གང་གི་ཚོགས་རྣམས་བདག་གིས་

ཐོས་པར་གྱུར། །ཁྱོད་ཀྱིས་བདག་ལ་གཤིན་པའི་ཆུ་སྙེམས་མཆི་མས་འདྲེས་པ་ནི། །ལྟ་འདོད་སྦྱིན་པར་གྱུར་ཅེས་བྱ་བ་གང་ཞིག་ནམ་བསམས་པ། །མཉེས་གཤེན་པས་བརླན་དག་པའི་ཡིད་ཀྱིས་དེ་ཤེས་འགྱུར་ན་ནི། །བུད་མེད་ཀྱིས་ནི་བདག་ཡིད་རེ་བ་ཅི་ཕྱིར་
ཉམས་པར་བྱས། །དེ་ལྟར་ཚོང་དཔོན་གྱིས་ཡུན་རིང་པོར་སྨྲེ་སྔགས་འདོན་པར་བྱས་ནས་བྱང་ཆུབ་སེམས་དཔའི་ལུས་ལ་མེས་འདུ་བྱས་ཏེ། མིག་གི་ཆུ་རབ་ཏུ་འཛག་པས་དབང་བསྐུར་བར་བྱས་པའི་བཞིན་དང་ལྡན་པས་སྟོང་པ་དང་འདྲ་བར་སྨྲེ་སྔགས་ཀྱི་སྒྲ་དང་བཅས་པར་རང་གི་ཁྱིམ་དུ་
སོང་བར་གྱུར་ཏོ། །དེ་ནས་རི་རབ་ཀྱི་ནི་ཕྱོགས་རེར་ཕུག་རྣམས་ལས་ནི་སྒྲ་ཆེན་གྲག། །གསེར་གྱི་རྔེའུ་ཆུང་དང་ནི་རྔ་ཆེན་རྔ་ཆུང་རྣམས་ནི་བརྡུང་བྱས་ནས། །ལྷ་ཡི་ཚོགས་ཀྱིས་མྱ་ངན་འདས་པའི་མེ་ནི་དེ་ལ་དྲི་ཞིམ་པའི། །མེ་ཏོག་ཆར་ནི་བྱང་ཆུབ་སེམས་དཔའི་རུས་པའི་ཕུང་པོ་ལ་འབེབས་
གྱུར། །དེ་ལྟར་བཅོམ་ལྡན་འདས་དེས་བྱང་ཆུབ་སེམས་དཔའི་སྤྱོད་པ་སྤྱད་ཅིང་གཞན་གྱི་དོན་དུ་བདག་ཉིད་ལན་དུ་མར་ཡོངས་སུ་གཏོང་བ་ཞེས་བྱ་བ་རྣམ་པར་བསམས་ནས་སངས་རྒྱས་བཅོམ་ལྡན་འདས་ལ་མཆོག་ཏུ་དད་པ་བསྐྱེད་པར་བྱའོ་ཞེས་བྱ་བའོ། །ཚོང་དཔོན་གྱི་སྐྱེས་པའི་རབས་ཏེ་སྐྱེས་
པའི་རབས་བདུན་པའོ།། །།གཞན་གྱི་དོན་ནི་ཡང་དག་བསྒྲུབ་པའི་ཕྱིར། །བྱང་ཆུབ་སེམས་དཔའ་རྩྭ་བཞིན་ལུས་ནི་བཏང་། །གཞན་ལ་བདེ་བ་སྒྲུབ་བྱེད་བརྟན་པ་རྣམས། །རང་གི་བདེ་བ་ལ་ནི་ལྟོས་པ་མིན། །འདི་ལྟར་རྗེས་སུ་ཐོས་ཏེ། སྟོན་ཀར་ཆུ་འཛིན་གྱི་ཚོགས་གསལ་
བའི་ནམ་མཁའ་ལ་ཟླ་བ་ལྟར། མ་ལུས་པའི་རི་བོང་ཅན་གྱི་དཀྱིལ་འཁོར་གྱི་འོད་ཟེར་རྣམས་ཀྱིས་སྣང་བར་བྱས་པའི་མཚན་མོ་ལ་ཀུ་མུ་དའི་ཚོགས་ཁ་བྱེ་བ་དང་འདྲ་བར། རབ་ཏུ་མྱོས་པའི་ནགས་ཀྱི་ས་ལ་པདྨའི་འབྱུང་གནས་བཞིན་དུ། ལང་ཚོ་དང་པོ་ཕུན་སུམ་ཚོགས་པ་ལ་དུལ་བ་དང་འདྲ་བ།
གསལ་བ་དང་འཇམ་པའི་ཡི་གེའི་ཚིག་དང་ལྡན་པའི་ངག་ལ་དོན་དང་འདྲ་བར་སྟོན་ཀའི་ཟླ་ཚེས་རིང་པོ་ཉིད་དུ་སོང་བ་ལྟར་དྲི་མ་མེད་པའི་ཆུ་དང་ལྡན་པའི་གསལ་བའི་ཉའི་ཚོགས་ཀྱིས་གཏིང་དུ་ཁྱབ་པ། འགྲམ་གྱི་ཤིང་རྣམས་ཀྱི་མེ་ཏོག་གི་རྡུལ་གྱིས་ཀུན་ནས་སེར་སྐྱར་བྱས་པའི་དབུ་བའི་ཕྲེང་བའི་

སྐྱེ་རགས་ཀྱི་ཚོགས་དང་ལྡན་པའི་བཱ་རཱ་ཎ་སཱི་ཞེས་བྱ་བའི་ཆུ་བོས་བརྒྱན་པར་བྱས་པའི་རང་བཞིན་གྱིས་དགེ་བར་གྱུར་པའི་བཱ་རཱ་ཎ་སཱིར་རྒྱལ་པོའི་ཕོ་བྲང་དུ། སྤྲོས་པའི་སོའི་ནོར་བུ་རྣམས་ཀྱི་འོད་ཟེར་གྱི་སྣང་བས་མངོན་པར་བརྒྱན་པར་བྱས་པའི་བཞིན་གྱི་པདྨ་ཅན་ཞེས་བྱ་བའི་རྒྱལ་པོ་བྱང་ཆུབ་སེམས་
དཔའ་བྱུང་བར་གྱུར། མཛེས་པ་དང་ནི་གཟུགས་དང་གཟི་བརྗིད་རྣམས་ཀྱིས་ཀྱང་། །བདེ་བ་དང་ནི་རྨོངས་པར་བྱེད་པ་གདུང་བའི་རྒྱུ། །རི་བོང་མཚོན་དང་མེ་ཏོག་མཚོན་ཆ་དྲོ་བའི་འོད། །གང་ཞིག་ཉམས་པས་ཅིག་ཅར་དུ་ནི་རྒྱལ་བར་བྱས། །ནམ་མཁར་འགྲོ་བ་རྣམས་ལ་འབྲས་བུ་དང་
བཅས་ཤིང་། །པདྨའི་ནགས་ལ་བུང་བའི་ཚོགས་རྣམས་དང་ནི་འདྲ། །གཅིག་ཏུ་འགྲོ་བ་རྣམས་ཀྱི་གཉེན་དུ་གྱུར་རྣམས་ལ། །གང་ལ་གྲོགས་པོ་བཞིན་དུ་བདེ་བ་འབྱུང་བར་གྱུར། །འགྲོ་རྣམས་དོན་ནི་སྒྲུབ་བེད་ཡང་དག་བརྩོན་པའི་བདག་ཉིད་ཅན། །སྙིང་རྗེས་ཡོངས་སུ་འཛིན་དང་རྣམ་
པར་དག་པའི་བློ་ལྡན་པ། །གང་གི་སྙིང་གར་སེར་སྣ་རབ་ཏུ་རྣམ་པར་མ་ཞུགས་ཏེ། །ཁྱིམ་གྱི་སྦྲུལ་ནི་སྔགས་རྣམས་ཀྱིས་ནི་བསྲུང་བར་བྱས། །གང་གི་བསམ་པ་ཆེ་བ་རབ་ཏུ་གྲགས་པའི་སྦྱིན་པས་ནི། །སེར་སྣ་རྣམ་པར་བཟློག་པར་བྱས་ཤིང་ཕྱོགས་རྣམས་སུ་ནི་ཁྱབ། །སློང་བའི་སྐྱེ་བོས་
ནམ་ཡང་བྱིན་ཞེས་བྱ་བའི་ཚིག་རྣམས་ནི། །ཆུང་བར་བྱེད་པའི་སླར་ཡང་འཇིག་རྟེན་པས་ནི་ཐོས་མ་གྱུར། །སྙིང་གི་ཁ་བའི་རི་ལས་སྦྱིན་པ་མཉམ་པའི་ས་ལས་འཇུག་པ་ནི། །ཀུན་ནས་རྡུལ་ནི་ཉེ་བར་བཟློག་པ་འཇིག་རྟེན་མ་ལུས་ཁྲུས་བྱས་པ། །གང་ཞིག་ས་རྣམས་ཀུན་གྱིས་འདུད་བྱ་གཞན་
དོན་གཅིག་པའི་འབྲས་བུ་ཅན། །རི་བོང་ཅན་གྱི་འོད་ཟེར་རྣམ་དག་གྲགས་པའི་གང་གཱ་གཟུང་བར་གྱུར། །གང་གི་རྒུད་པ་བསལ་བྱས་ཏེ། །དེ་རིང་ནོར་གྱིས་ཚིམ་བྱས་གང་། །ཞི་བའི་ལམ་ལ་གཞག་པ་གང་། །འདི་འདྲ་གང་གིས་གནས་པར་འགྱུར། །བདག་ཉིད་སྲིད་པ་རྣམ་གཅོད་ཕྱིར། །
ལམ་བཟང་ལ་ནི་བཞག་འདོད་པས། །གཞན་དོན་མེད་པས་འགའ་ཞིག་གཞན། །བྱ་བ་བདག་ཉིད་ཆེན་རྣམས་མེད། །དཔུང་པ་དང་ནི་བརྩོན་འགྲུས་ཀྱིས་འཕམ་དགྲ་ལས་རྒྱལ། །གཞན་གྱི་ཡུལ་དུ་སྟོབས་ཅན་གང་གི་སྟོབས་རྣམས་ནི། །མངོན་པར་སོང་སྟེ་མཐོང་བའི་འཕེལ་བ་བྱུང་བ་ཡི། །

རྒྱ་མཚོའི་ཆུ་རྣམས་འགྲམ་གྱི་མཐར་ནི་སོང་བ་བཞིན། །སྒྲ་སྒྲོགས་ཕན་ཚུན་ཡིན་པའི་རྔ་དང་ལྡན་པ་ཡིས། །གང་གིས་ཁྲོས་པ་རྣམ་པར་རྒྱས་བཞིན་གླང་པོ་རྣམས། །ཀུན་ནས་དབང་དུ་སོང་བ་བྱེས་སུ་འགྲོ་བའི་ཚེ། །ལྕགས་ཀྱུ་འཛིན་རྣམས་ཇི་ལྟར་ཡང་ནི་འབྱུང་
བར་འགྱུར། །འཇིག་པའི་དབང་གིས་སྨྱོན་ཆུ་འབྱུང་བ་ཉེར་ཞི་བ། །རལ་གྲི་དང་ནི་མདའ་སྟན་ཁུ་ཚུར་ལྷོད་བྱས་པའི། །གཡུལ་ངོས་དགྲ་རྣམས་གང་གི་ང་རྒྱལ་བཟོད་མིན་ཏེ། །རི་དགས་བདག་པོ་ལ་ནི་གླང་པོ་ཆེ་རྣམས་ལྟར། །གང་ལ་གྲགས་པའི་གཟི་བརྗིད་ཅན་གྱིས་ཕན་ཚུན་དུ། །དོན་
གཉེར་བདེ་བའི་དངོས་པོ་རྣམ་འཕེལ་ཕུན་ཚོགས་ཅན། །འབྲས་བུ་སྟེར་བའི་ཤིང་ལ་བྱ་བཞིན་སྐྱེ་དགུ་རྣམས། །རྟག་པ་ཉིད་ནི་བདེ་བའི་ཕྱིར་ནི་ངལ་སོ་འགྱུར། །དེ་ནས་དུས་གཅིག་གི་ཚེ་རྒྱལ་པོ་དེའི་ཡུལ་དུ་ཁམས་མི་སྙོམས་པས་ལྟོ་བའི་མེ་ཉེ་བར་འགྲིབ་པར་འགྱུར་ཏེ། ཉིན་རེ་བཞིན་དུ་ཀུན་
ནས་སྐྱ་བ་དང་སྟོབས་ཆུང་བའི་ལུས་ཅན་གཟི་བརྗིད་མེད་པའི་སྐྱེ་བོའི་ཚོགས་ནད་ཆེན་པོས་བཏབ་པར་གྱུར་ཏོ། །བྱང་ཆུབ་སེམས་དཔའི་བཀས་སྨན་པ་རྣམས། འབད་པ་དང་བཅས་པར་ཡང་དཔྱད་བྱེད་ཅིང་ནད་དེ་བསལ་བའི་ཕྱིར་སྐྱེ་བོ་དེ་ལ་ནུས་པར་མ་གྱུར་ཏོ། །དེ་ནས་རྒྱལ་པོ་དེས་སྨན་པ་དེ་
རྣམས་ལ་སྨྲས་པ། ཐབས་གང་གིས་སྐྱེ་བོ་རྣམས་ཀྱི་ནད་འདི་བསལ་ནུས་པར་འགྱུར་ཞེས་ཟེར་རོ། །སྨན་པ་རྣམས་ཀྱིས་སྨྲས་པ། ལྷ་ལགས་གལ་ཏེ་ཉ་རོ་ཧི་ཏའི་ཤ་ཡོད་པར་གྱུར་ན་དེ་ནས་བདག་ཅག་གིས་སྐྱེ་བོ་འདི་རྣམས་ནད་མེད་པར་བྱེད་ནུས་སོ་ཞེས་གསོལ་ཏོ། །དེ་ནས་རྒྱལ་པོ་དེས་མཆོག་
ཏུ་འབད་པར་བྱས་ཀྱང་གང་ནས་ཀྱང་ཉ་རོ་ཧི་ཏ་ཉེ་བར་རྙེད་པར་མ་གྱུར་ཏོ། །དེ་ནས་ནམ་ཞིག་དེ་ནི་ཕྱི་རོལ་བྱུང་བ་དང་། །གླང་ཆེན་སྐྱེད་པར་གནས་པས་ཡིད་ཀྱི་དབང་ཕྱུག་ནི། །དཀར་པོའི་གདུགས་ཀྱིས་རབ་ཏུ་ལོག་པའི་ཉི་མ་ལ། །རླུང་ཡབ་གཡབས་པས་རྣམ་པར་གཡོས་པའི་ན་བཟའ་ཅན། །དེ་ནས་
གཡོག་འཁོར་སྐྱེ་བོས་རྗེས་སུ་སོང་བའི་ས་སྐྱོང་ནི། །གླང་པོའི་བདག་པོ་རྙེད་ནས་ནད་པ་རྣམས་ཀྱིས་རྣམ་མཐོང་ནས། །མི་ནུས་བཞིན་ལྡན་གློ་བུར་ཉིད་དུ་ལག་པ་རྣམ་བཏེག་སྟེ། །མི་སྐྱོང་ནད་ལས་བདག་ཅག་སྐྱོབས་ཤིག་ཅེས་ནི་ཚིག་སྨྲས་གྱུར། །དེ་ནས་བྱང་ཆུབ་སེམས་དཔས་ནད་དང་ལྡན་ཞིང་ཡིད་

འཁྲུག་པ་དེ་རྣམས་ཀྱིས་སྙིང་རྗེ་བའི་འོ་དོད་འབོད་པའི་སྒྲ་ཐོས་ནས། སེམས་སྡུག་བསྔལ་བར་གྱུར་པ་དང་ལྡན་པ་བརྩེ་བ་དང་ཡོངས་སུ་འདྲིས་པ་སྡུག་བསྔལ་གྱི་མཆི་མས་མིག་གང་བར་བྱས་པས་འདི་སྙམ་དུ་སེམས་པར་གྱུར་ཏོ། །བདག་ལ་རྒྱལ་སྲིད་ཀྱི་བདེ་བས་ཅི་ཞིག་བྱ་སྟེ། གང་དུ་བདག་གི་
ཡུལ་འཁོར་ན་གནས་པ་རྣམས་ལ་གནས་སྐབས་འདི་ཞེས་བྱ་བ་བསམས་པར་གྱུར་ཏོ། །ཁྱིམ་དུ་ཞུགས་ནས་བློན་པོ་རྣམས་ལ་བོས་ཏེ། བདག་གིས་ནི་སྲས་དབང་བསྐུར་བ་རབ་ཏུ་བྱ་བའི་ཕྱིར་འདོད་པ་ཞེས་འདི་སྐད་ཅེས་སྨྲས་སོ། །དེ་ནས་བློན་པོ་རྣམས་ཀྱིས་སྨྲས་པ། ལང་ཚོ་སར་པས་རྩུབ་
པའི་ལུས་འདི་ཡོད་པ་ལ། །སྡང་བ་འཇིགས་པར་བྱེད་པའི་ཕ་རོལ་གནོན་པ་ནི། །གཞན་དོན་རྒྱུ་ཡི་མངོན་པར་མཐོང་བ་ཡོད་པ་སྟེ། །ཁྱེད་ནི་ནགས་སུ་འགྲོ་བར་འདོད་པ་དུས་མིན་ཅི། །རྒྱལ་པོས་གསུངས་པ། ཇི་ལྟར་ཁྱེད་ཅག་རྣམས་ཀྱིས་རྟོག་པར་བྱེད་པ་དེ་ལྟར་ནི་མ་ཡིན་ནོ། །བློན་པོ་རྣམས་
ཀྱིས་དེའི་ཕྱིར་སླར་འདི་ལ་ཞུས་པ། ལྷ་ཡི་དགོངས་པ་གང་ཞིག་ཡིན། །རྒྱལ་པོས་གསུངས་པ། རྨི་ལམ་ངན་པ་མཐོང་བས་དོགས་པ་སྐྱེས་པ་བདག་འདི་ལྟར་རྟོག་པར་བྱེད་དེ་དུས་འགའ་ཞིག་ན་མ་བརྟགས་པ་ཉིད་དུ་མི་རྟག་པ་འདི་ཀུན་ནས་འོངས་ཏེ་བདག་ཉིད་ཉམས་པར་བྱེད་དེ་དེ་བས་ན་སྲས་
དབང་བསྐུར་བ་ལྟ་བའི་ཕྱིར་འདོད་དོ་ཞེས་ཟེར་རོ། །བློན་པོ་རྣམས་ཀྱིས་སྨྲས་པ། ཇི་ལྟར་ལྷས་བཀའ་སྩལ་བ་དེ་བཞིན་ནོ་ཞེས་བྱ་བའོ། །དེ་ནས་ཀུན་ནས་མཐོ་བ་གསེར་གྱི་རྟ་བབས་ཅན། །སིལ་སྙན་མཆོག་གིས་གསལ་བ་ཡི་སྒྲ་ཁྱིམ་མཆོག་ལ། །སྲས་ལ་དབང་ནི་བསྐུར་བར་བྱས་གྱུར་སྲས་
ལ་བྱམས། །ས་ཡི་བདག་པོ་ས་སྐྱོང་རྣམས་ཀྱིས་འདུད་བྱས་པའོ། །དེ་ནས་གཞོན་ནུ་དེས་ཡབ་ཀྱི་དྲུང་དུ་སོང་ནས་ཞུས་པ། བདག་གིས་ཇི་ལྟར་གནས་པར་བགྱི་ཞེས་བྱ་བ་ཡབ་ཀྲིས་བཀའ་སྩལ་བར་མཛོད་ཅིག །རྒྱལ་པོས་གསུངས་པ་བུ་ཉོན་ཅིག་རྣམ་པ་ཐམས་ཅད་དུ་དུས་ནམ་ཞིག་ན་ཡང་ཚེ་
ལྡན་ཁྱོད་ཀྱིས་དོན་དུ་གཉེར་བ་རྣམས་ཀྱི་སྟེང་དུ་གུས་པ་མེད་པར་གནས་པར་མི་བྱ་ཞེས་བྱ་བའོ། །ལྟོས་ཤིག །སྨོད་པའི་རྒྱུ་སྟེ་བདེ་འགྲོ་རྣམས་ནི་འགོག་བྱེད་པ། །བསགས་པ་ཤ་ཟ་མོ་ནི་སྟོང་པའི་ཁང་པ་སྟེ། །ལེགས་པའི་ཟམ་པ་འཇིག་པར་བྱེད་པའི་ཆུ་ཚོགས་ནི། །འདོད་པས་ལོང་བ་

རྣམས་ལ་སེར་སྣ་དགྲ་གྱུར་པ། །སྔོན་ནི་རང་གི་ནོར་ལ་ཆགས་པའི་སྨན་པ་རྣམས། །ཉ་ཡི་རྒྱལ་པོ་ཟོས་པས་བདག་ཉིད་ཚིམ་བྱས་ནས། །སྨིན་མ་བསྐྱོད་པས་འོད་འབར་རྩུབ་པའི་ཚིག་རྣམས་ཀྱིས། །ཐ་མར་མེད་ཅེས་སློང་བ་པོ་ནི་སྲེག་པར་བྱེད། །བློ་ལྡན་དེ་རྣམས་
ལེགས་པའི་སྐྱེ་བོ་འཕགས་པ་རྣམས། །སྐྱེ་བོ་གཞན་དང་དེ་རྣམས་ངན་སོང་མི་མཐོང་སྟེ། །གང་རྣམས་ཀྱིས་ནི་བདག་ཉིད་སྡུག་བསྔལ་རྒྱུ་ལས་འདོན། །སེར་སྣའི་སྦྲུལ་གྱིས་ཁད་པ་ཉིད་དུ་མ་བྱས་པའོ། །གཞན་ཡང་གང་ཞིག་དགག་པའི་རྡུལ་གྱི་དྲི་མ་ཅན་གྱི་ཕོངས་པའི་ཚིག་ནི་སྨྲ་བ་
སྟེ། །རིང་ནས་སྐྱེ་བོ་དེ་ནི་རེ་བ་སླུ་བར་བྱེད་པས་སློང་མོ་རྣམས་ཀྱིས་ཡོངས་སུ་སྤོང་། །སྐོམ་པས་རྐན་ནི་སྐམས་པར་གྱུར་པ་ལམ་ཞུགས་རྣམས་ཀྱང་ཁྲུས་དང་བཏུང་བའི་བྱ་བ་རྣམས། །དྲི་མ་མེད་པའི་སྐྱེ་བོ་འགྲོ་བའི་ཁྱིམ་གྱི་སྒོ་ཡི་ཆུ་ལ་བྱེད་པར་མི་འགྱུར་རོ། །ཁ་སྤུ་རིང་བ་རྣམས་ཀྱིས་མུན་
པའི་གདོང་ཅན་རིང་པོར་རབ་ཞུགས་པ་ཡི་མིག་ལྡན་པ། །སྐྱེ་བོ་དབྱིག་པ་འཛིན་པ་རྣམས་ཀྱིས་གང་ཚེ་ཆུ་ནི་དོན་གཉེར་ཡི་དགས་རྣམས་ནི་བཟློག། །དེ་ཉིད་མཁྱེན་པ་སྐྱེ་དགུ་རྣམས་ཀྱི་གཉེན་ནི་རྒྱལ་བས་སེར་སྣའི་འབྲས་བུ་དེ་གསུངས་ཏེ། །དེ་ལྟར་ཡང་དག་བསམས་ནས་གཞན་ལ་
ཕན་པ་རྒྱབ་ཏུ་ཕྱོགས་པའི་བློ་གྲོས་སྐྱེས་པས་མི་བྱའོ། །བུ་གཞན་ཡང་འཇིག་རྟེན་དུ་བདག་ཉིད་ཆེ་བར་འདོད་པ་ཁྱོད་ཀྱི་བདེན་པ་དང་། གཏོང་བ་དང་། བཟོད་པ་དང་། སྦྱིན་གནས་ལ་སོགས་པའི་ཡོན་ཏན་གྱི་ནོར་བུ་རྣམས་ཀྱིས་བདག་ཉིད་མངོན་པར་བརྒྱན་པར་བྱའོ། །ཡོན་ཏན་ལྡན་ཞིང་ཞི་བ་
འགྲོ་བ་རྣམས་ལ་ཕན་མིན་རྣམ་གཅོད་ལ་མཁས་པ། །ཡོན་ཏན་ཅན་ནི་མཉེས་གཤིན་རྣམ་འཇུག་ལེགས་པའི་བློ་ལྡན་ཤིན་ཏུ་བདེན་པའི་ཚིག། །དཔལ་དང་ཡོངས་སུ་ཆགས་པ་རྒྱས་པའི་དྲི་མས་དྲི་མ་དང་བཅས་མིན་པ་ནི། །སྐྱེས་པ་རྣམས་ཀྱིས་སྐྱེས་པའི་གྲངས་སོགས་མཛེས་པའི་སྐྱེ་བོ་
རྣམས་ནི་འཇོག་པར་བྱེད། །གང་དག་དྲལ་འཛིན་འགྲོ་བ་མ་ལུས་ནང་གི་ནད་ཀྱིས་དུབ་པ་སེལ་བྱེད་པ། །གང་དག་གིས་ནི་བློ་རྣམས་དང་བ་མུན་བྲལ་ནོར་བུ་རྣམས་ཀྱི་འོད་བཞིན་དུ། །གང་དག་སློང་མོ་བ་ནི་འདི་ལ་སྲོག་རྣམས་ཀྱིས་ཀྱང་དགའ་བ་བྱེད་འདོད་ཅིང་། །དེ་རྣམས་ཡོན་ཏན་ལྡན་པ་རྣམས་

ཀྱི་དང་པོའི་གྲངས་ལ་ཇི་ལྟར་འཇུག་མི་བྱ། །ཁྱོད་ཀྱིས་ཀྱང་སྐྱེས་བུ་ཐུན་མོང་བ་ལྟར། ཡོན་ཏན་དང་ལྡན་པ་རྣམས་ལ་གུས་པ་མེད་པར་གནས་པར་མི་བྱའོ། །ལྟོས་ཤིག་མ་དྲོས་འོད་ཟེར་འཐོན་ནས་ཡོན་ཏན་ཅན་བཞིན་དོན་དུ་གཉེར་བ་རྣམ་དག་ཐོབ། །ཆུ་འཕེལ་བས་ནི་རྒྱ་མཚོ་སྐད་ཅིག་དེར་ནི་
ཀུན་ནས་འཁྲུལ་བཞིན་གྲགས་པར་བྱེད། །མཚར་བ་དང་ལྡན་དེ་ཉིད་ལ་ནི་རྒྱ་མཚོ་རྣམས་ཀྱི་ཆུ་འཕེལ་མི་འགྱུར་ཏེ། །རབ་ཏུ་དགའ་བ་འབྱུང་བ་ཆེན་པོ་ཆེན་པོ་རྣམས་ཉིད་ལ་ནི་འབྱུང་བར་འགྱུར། །དེ་ནས་གསལ་བར་གྱུར་པའི་སྐར་མའི་ཚོགས་དང་འདྲེས་པའི་ནམ་མཁའ་ལ་རི་བོང་ཅན་གྱི་ཁྱད་པར་
བརྩམས་པའི་ཤར་གྱི་ཕྱོགས་ལ་དཔེ་ཆགས་པའི་ཚོགས་ལྷུང་བས་རྣམ་པར་བསྐྱོད་པའི་མར་མེའི་རྩེ་མོའི་སོར་མོས་སྡིགས་མཛུབ་དང་འདྲ་བར་སར་པའི་ཆུ་གཏེར་ལྟར་སྔོ་བར་སྣང་བའི་མུན་པས་བར་རྣམ་པར་གྲོལ་བའི་ཁྱིམ་རྣམས་ལ་གནས་པའི་སྲོག་ཤིང་ལ་རྣམ་པར་འབྲེལ་པའི་གཡོ་བ་མེད་
པའི་ཁྱིམ་བྱ་ཡོད་པ་དང་། ཨ་ཀ་རུའི་སྤོས་ཀྱི་དྲིས་དྲི་ཞིམ་པར་བྱས་པའི་བྱུག་པའི་བྱ་བས་གཡོ་ཞིང་སྒྲ་སྒྲོགས་པའི་གདུ་བུ་རྣམས་ཀྱིས་བརྒྱན་པར་བྱས་པའི་ལག་པའི་པདྨ་ཅན་གྱི་བུད་མེད་རྣམས་ཀྱིས་ལྷག་པར་གནས་པ་དང་། འཇམ་པའི་མལ་སྟན་གྱི་དཀྱིལ་དང་ལྡན་པའི་གནས་པའི་ཁང་
པ་རྣམས་ལ་རབ་ཏུ་མ་འབྲེལ་བའི་སྐྱེ་བོ་ཉོ་ཚོང་གྱུར་པ་འགའ་ཞིག་ཏུ་རྣམ་པར་མ་བྱས་པར་གྱུར་པའི་ཚོང་དུས་ཀྱི་སར་བྱང་ཆུབ་སེམས་དཔས་སྲས་ལ་རྗེས་སུ་བསླབས་ནས། མར་མེའི་སྣང་བས་སྣང་བར་གྱུར་པའི་རྒྱན་རྣམས་ཀྱིས་མཛེས་པ་དང་ལྡན་པའི་ཁྱིམ་གྱི་མཆོག་གི་ས་ལ་འཛེགས་ནས།
བཙུན་མོའི་འཁོར་གྱི་སྐྱེ་བོ་ཐམས་ཅད་བཏང་བར་བྱས་པ་བཱ་རཱ་ཎ་སཱིའི་ཆུ་བོ་དེ་ལ་བདག་ཉིད་མཆོང་བར་འདོད་ཅིང་འདི་སྐད་ཅེས་སྨྲས་པར་གྱུར་ཏོ། །ཆུ་བོ་འདི་ལ་ལུས་ཆེ་བ། །རིན་ཆེན་དཀར་པོ་ལྟར་དྲི་མེད། །ཆུ་ལ་འཇིག་རྟེན་ནད་ཞིའི་ཕྱིར། །རོ་ཧི་ཏ་ཉར་བདག་གྱུར་ཅིག །དེ་ལྟར་སྐྱེ་དགུའི་
དོན་དུ་ཡོངས་འཕེལ་ཤར་ལྡན་པ། །བརྩེ་བའི་ཁྱད་པར་རྗེས་སུ་འགྲོ་བའི་ཡོན་ཏན་ལུས། །ལུས་ནི་བཏང་བར་བྱས་ཏེ་སྤྲོ་ཞིང་ཁྱབ་པའི་མཆོག། །ཆུ་བོ་བཱ་རཱ་ཎ་སཱིར་ས་ཡི་དབང་ཕྱུག་གིས། །དེ་ནས་ས་བདག་དེ་ནི་རྣམ་པར་མཛེས་པར་གྱུར། །རང་གི་ཁྱིམ་ནས་ཆུ་ལ་ངེས་པར་མཆོད་བྱེད་ཅིང་། །

རི་བོ་མཆོག་རབ་འགྲམ་ནས་བསྐལ་པའི་ཤིང་འདྲ་བར། །ལྷ་ཡི་དབང་ཕྱུག་གླང་པོ་དཔྲལ་འབུར་གྱིས་བརྡུངས་པ། །དེ་ནས་ས་ཡི་སྐྱོང་བས་མཆོངས་པར་གྱུར་པ་ལ། །རླུང་གིས་བཤིག་པའི་དཀར་བས་ཁྱབ་པའི་ནམ་མཁའ་ཅན། །ཆུ་ཡིས་བསྐྱོད་པར་བྱས་པའི་ཉ་
ཡི་ཚོགས་དང་ལྡན། །བསྐྱོད་པའི་ངང་སྐྱ་ཅན་གྱི་འགྲམ་ནི་རྒལ་བར་གྱུར། །ཆུ་བོ་དེ་ལ་མཆོངས་པས་སྐད་ཅིག་གིས་ནི་དེ། །ཀུན་ནས་མཐོ་བའི་ཆུ་ཡི་སྒྲས་ནི་འཇིགས་བྱས་པ། །ཁ་བ་ཅན་གྱི་རི་མཉམ་པ་དང་འདྲ་བའི་ལུས། །རོ་ཧིའི་ཉ་ནི་མི་ཡི་དབང་པོ་བྱུང་བར་གྱུར། །བདག་ཉིད་
ཆེན་པོ་དེས་བྱེ་མ་དཀར་པོ་ལྟར་ཡིད་འཕྲོག་པའི་ཆུ་བོའི་འགྲམ་ནས་རྒལ་ནས་གལ་ཏེ་སྐྱེ་བོའི་ཚོགས་འདི་བདག་སྲོག་རྣམས་ལས་རྣམ་པར་བྲལ་བར་བྱེད་ན་དེ་ནས་ཉེས་པར་སྤྱད་པའི་འབྲས་བུ་དང་ལྡན་པས་ངན་འགྲོ་ལ་མངོན་དུ་ཕྱོགས་པར་འགྱུར་ཞེས་བྱ་བའོ། །དེ་བས་ན་འདིར་རྙེད་པ་འདི་
རང་ཉིད་ཀྱིས་དབང་པོ་ཐམས་ཅད་འགགས་པར་བྱས་ནས་སྲོག་ཡོངས་སུ་དོར་བར་བྱའོ་ཞེས་བྱ་བ་རྣམ་པར་བསམས་ནས་སྲོག་རྣམས་དོར་བར་གྱུར་ཏོ། །དེ་ནས་རྙོག་པ་ཅན་གྱི་ཆུས་དབང་བསྐུར་བ་དཀར་པོ་མཆེ་བ་གཉིས་པ་དཔྲལ་བར་འབུར་གཉིས་ལྡན་པ། ནུབ་པའི་རིའི་རྩེ་མོ་བཟུང་བའི་
བསིལ་བའི་འོད་ཟེར་ཅན་ཡོད་པ་ལ་ཤིན་ཏུ་སྲབ་པའི་རྡུལ་གྱིས་ཉེ་བར་བསམས་པའི་ཤེལ་གྱི་ནོར་བུ་དང་འདྲ་བའི་རབ་ཏུ་སྲབ་པར་གྱུར་པའི་སྐར་མ་ཡོད་པ་རྣམས་ལ་ཀུ་མུ་དའི་ཚོགས་ཟུམ་པར་གྱུར་པ་ལ་པདྨའི་འབྱུང་གནས་གཉིད་ལོག་པ་དང་བྲལ་བར་གྱུར་པ་རྣམས་ཡོད་པ་དང་། བ་བླའི་
རྡུལ་དང་འདྲ་བའི་ཆུང་བའི་འོད་ཟེར་གྱིས་རིའི་རྩེ་མོ་རྣམས་ཀུན་ནས་བྱུག་པར་བྱས་པ་ཡོད་པ་རྣམས་ལ་མིའི་བདག་པོས་སྟོང་པའི་མལ་ཆ་སྐྱོང་བར་བྱེད་པའི་སྐྱེ་བོ་ལས་ཉེ་བར་ཐོས་ནས། བློན་པོ་རྣམས་ཀྱིས་རྒྱལ་པོ་དེ་གང་དུ་གཤེགས་པར་གྱུར་ཅེས་བྱ་བ་ཁྱིམ་དང་ཉེ་བར་སྐྱེས་པའི་སྐྱེད་མོས་ཚལ་
ཉེ་བར་མཐོང་ནས་ཀུན་ནས་ཡོངས་སུ་བསྐོར་ཅིང་། བཱ་རཱ་ཎ་སཱི་ཞེས་བྱ་བའི་རྒྱ་མཚོའི་བུད་མེད་ཀྱི་འགྲམ་དུ་མུ་ཏིག་གི་ཕུང་པོ་ལྟར་རིང་བར་གྱུར་པ་ཉ་རོ་ཧི་ཏ་ཞེས་བྱ་བ་མཐོང་བར་གྱུར་ཏོ། །གཟུགས་མ་མཐོང་བར་གྱུར་པ་ནམ་མཁའ་ལ་གནས་པའི་ལྷ་རྣམས་ཀྱི་ཟབ་པའི་ཚིག་དེ་རྣམས་ཀྱིས་ཀྱང་ཐོས་

པར་གྱུར་ཏེ། ནད་ཀྱི་སྡུག་བསྔལ་རྣམ་གཅོད་ཕྱིར། །སྐྱེ་བོ་འདི་ལ་ས་བདག་དེ། །བདག་ཉིད་ཆུ་བོའི་ཆུ་ལ་ནི། །དོར་ནས་རོ་ཧི་ཏ་ཉར་གྱུར། །དེ་ནས་བློན་པོ་དེ་རྣམས་ཀྱིས་དེ་ཐོས་ནས་མྱ་ངན་གྱི་སྡུག་བསྔལ་གྱིས་ཡིད་སྡུག་བསྔལ་བར་གྱུར་པས་འདི་སྐད་ཅེས་སྨྲས་སོ། །ཀྱེ་མ་སྙིང་རྗེས་རྒྱལ་
པོའི་བདག་ཉིད་སེམས་ཅན་རྣམས་ལ་ཕན་དོན་དུ་འདི་ལྟར་ཡོངས་སུ་དོར་བར་བྱེད་ཅིང་། ས་ལ་མ་ལུས་པ་འདི་མགོན་མེད་པར་གྱུར་པ་ཞེས་བྱ་བ་རྣམ་པ་མང་པོར་དེ་ལྟར་སྨྲེ་སྔགས་བཏོན་ནས་ཡིད་སྟོང་ཞིང་རང་གི་ཁྱིམ་རྣམས་སུ་མངོན་པར་སོང་བར་གྱུར་ཏོ། །གཏམ་འདི་བློན་པོ་རྣམས་ལས་ནི། །ཉེ་
བར་དམིགས་ནས་མུན་པས་ཁྱབ། །ལྷ་མོ་མཆི་མ་འཛག་པའི་མིག། །ས་བདག་དེ་ལ་སྨྲེ་སྔགས་འདོན། །འཇིག་རྟེན་གཉེན་གྱུར་ཁྱོད་ནི་ཐོས་པ་ཙམ་གྱིས་ཀྱང་། །རང་ཉིད་ཀྱིས་ནི་ས་བདག་མཐོ་རིས་སོང་བ་ཞེས། །དེ་ལྟར་ན་ཡང་མཐའ་མེད་སྡུག་བསྔལ་སྐལ་བ་ཅན། །འཚོ་བར་འདོད་
པ་བདག་ནི་རྣམ་སྤངས་ཕྱིར་ནི་འདོད་མ་ཡིན། །ཤིན་ཏུ་འཇམ་པའི་སེམས་ལྡན་ཁྱེད་ཀྱིས་བརྩེ་བ་ནི། །ནམ་ཡང་སེམས་ནི་རྩུབ་མེད་སྡང་བར་བྱེད་པ་ཡང་། །སྐྱོན་མེད་པར་ནི་རྗེས་སུ་འགྲོ་བའི་སྐྱེ་བོ་འདི། །རྗེས་སུ་ཆགས་ཅན་རྣམ་སྤངས་ཅི་ཕྱིར་ཁྱོད་ནི་སོང་། །ཁྲོས་པ་ཤིན་ཏུ་ཆེ་བ་དྲག་མོ་རྣམ་པར་
མཐོང་། །བུད་མེད་སྐྱེ་བོའི་མདུན་དུ་འདི་ལྟར་སྨྲ་བྱེད་ཅིང་། །རྒྱུ་མཚན་མེད་པའི་ཕྲག་དོག་གིས་ཁྲོས་ཐུར་དུ་བལྟ། །བདག་ལ་དི་རིང་ཉེ་བར་འོངས་ནས་སུ་ཞིག་དང་། །རྣ་བར་ཁ་ཕྱེ་ཨུཏྤལ་སར་པ་བྱས་པ་ཅན། །དཔྲལ་འཕྱང་སྐྲ་རྣམས་མཛེས་པ་རླབས་ཅན་བྱས་ནས་ནི། །རྒྱན་གྱི་དོན་དུ་ས་
ལ་གནས་པར་རིམ་གྱིས་ཏེ། །ཡིད་འཕྲོག་ཐིག་ལེ་བདག་ལ་སུ་ཞིག་བྱེད་པར་འགྱུར། །གང་ཞིག་སྤང་པར་ཞུགས་པས་གཡོབ་བ་བྱས་གྱུར་པ། །བདག་གི་དགའ་བོས་ཆགས་ལྡན་དགའ་མོ་བཞིན་དུ་གང་། །དེ་མེད་པས་ནི་དེ་རིང་པི་ཝང་དེ་ཡུན་རིང་། །ཁྱིམ་དུ་བསམ་གཏན་ལྡན་པ་འབྱུང་
བར་འགྱུར། །གང་ཞིག་གཞན་གྱི་ཟླ་བ་མཛེས་པས་ཞུགས་འགྱུར་བ། །པདྨ་གཅིག་པར་གནས་པའི་ཆུ་དང་མཚུངས་པ་ཉིད། །དེ་ཉིད་མྱ་ངན་བྱེད་པ་བཞིན་དུ་ཀྱེ་མ་ནི། །ཐོ་རངས་ཟླ་བའི་རྣམ་པ་མེ་ལོང་འདི་ནི་བྱུང་། །ཡིད་འཕྲོག་ཤིང་གི་ར་བའི་དབུས་སུ་འཇུག་པ་ནི། །ཡོངས་སྨིན་འཛམ་

བུར་ལྡན་པ་ཁྱེད་ཅག་ལ་བྱིན་ནས། །བདག་གི་དགའ་བོ་མེད་པས་ཤིར་ཥའི་མེ་ཏོག་འདྲ། །ནེ་ཙོ་ཁྱོད་ལ་དི་རིང་སུ་ཞིག་ཀློག་པར་འགྱུར། །བདག་གི་འགའ་བོ་གྲོགས་དང་བྲལ་བ་དེས་སོང་བས། །སླར་ཡང་བདག་ལ་སྐྲ་ལོ་བཞག་པས་དགོས་པ་མེད། །ཡུན་རིང་
ཁྱོད་ནི་མེད་པར་བྱེད་པ་དོན་གཉེར་ཅན། །བདག་གི་དི་རིང་སྐྲ་ལོ་ཅི་ཕྱིར་འཆིང་མི་འགྱུར། །དེ་ནས་བཙུན་མོའི་འཁོར་གྱི་མཛེས་མའི་སྐྱེ་བོ་ནི། །དེ་ལྟར་ལྷ་མོའི་སྨྲེ་སྔགས་འདོན་པ་ཉེས་བྱས་ནས། །མེ་ལོང་ལྟ་བུའི་གུས་པ་གཏོང་བ་སྐད་ཅིག་གིས། །ཡིད་ནི་འཕྲོག་པ་རྒྱན་འདོགས་ས་
ནི་དོར་བར་གྱུར། །གང་དག་མིག་ནི་ཐ་མ་དང་འབྲེལ་མིག་ཐུར་ནི། །མིག་སྨན་བྱེད་པར་འདོད་པ་མྱུར་དུ་རྣམ་སྤངས་ནས། །སྡུག་བསྔལ་དང་ནི་ལྡན་པ་ཕྱེད་རྫོགས་བུད་མེད་ནི། །མཆི་མ་དང་བཅས་རྒྱན་གྱིས་ཁྱབ་པར་ཕྱིས་པར་གྱུར། །རྣམ་པར་ཕྱི་ཞིང་གེ་སར་དང་བཅས་མེ་ཏོག་ནི། །མགོ་
ལ་སྐྱེས་པ་རྣམས་ནི་ཀུན་ནས་བཀྲོལ་ནས་ནི། །ནུས་མེད་དྲི་ཞིམ་ཐིགས་པའི་དབྱེ་བས་སེར་སྐྱ་ཅན། །ཁ་ཅིག་ལྷན་ཅིག་བྱེད་པའི་སྙེ་མ་བྲལ་བར་བྱས། །རྣམ་པར་བསྐྱོད་པའི་ཕྲེང་བའི་རྒྱན་གྱིས་ཁྱབ་པའི་གོས། །གཞན་དག་གིས་ནི་འཁྱོག་པའི་དཔྲལ་གནས་སྐྲས་ཁྱབ་པ། །བུད་མེད་
རྣམས་ནི་ལྷུང་གྱུར་བུང་བས་འཁོར་བ་སྟེ། །བསྐལ་པའི་རླུང་གིས་གདུངས་པ་ཡིད་འཕྲོག་བསྐལ་ཤིང་འདྲ། །ཁ་ཅིག་བསྙེན་བཀུར་བ་ཡི་སྐྱེ་བོ་ལས་ཤེས་ནས། །མཆི་མ་བཅས་པའི་མིག་ཅན་ས་བདག་ཤི་བ་ཉིད། །མཚན་མོའི་པདྨ་ལྟར་ཁྱབ་པ་ཡི་ཚིག་ལྡན་པ། །ས་ལ་ལྷུང་སྟེ་བུད་
མེད་རྣམས་ནི་ཤི་བར་གྱུར། །གཞན་ནི་རིམ་གྱིས་འཁོར་བའི་སྐྱེ་བོས་རྣམ་པར་མཐོང་བཞིན་པ། །མི་བདག་ཟླ་བའི་འོད་ནི་རྣམ་པར་རྒྱལ་བ་དེ་བྲིས་ནས། །པང་དུ་ཡང་དག་གནས་པ་བུད་མེད་ངུ་ཞིང་སྡུག་བསྔལ་གྱིས། །རི་མོའི་ཤིང་ལེབ་སྐྱ་རིས་རྣམས་དང་ལྷན་ཅིག་དོར་བར་གྱུར། །སྐྲ་
རྣམས་རྣམ་པར་འཛིངས་ནས་དྲི་ཞིམ་ཀུན་ནས་ཆད་པ་ཡི། །སྐུད་པ་རྣམས་ཀྱིས་མེ་ཏོག་ཁ་ཕྱེ་རྣམས་ཀྱིས་ལྡན་པ་ནི། །གཞོན་ནུ་མ་ནི་ཁ་ཅིག་གདུ་གུ་ཆད་པའི་པདྨ་ལྟར། །དམར་བའི་ལག་པ་རྣམས་ཀྱིས་བྲང་ནི་སྐད་ཅིག་དེ་ལ་བརྡུངས། །དེ་ནས་བློན་པོ་ཆེན་པོ་དེ་རྣམས་མྱ་ངན་གྱི་དབང་གིས་

མིག་གི་མཆི་མའི་ཐིགས་པ་འབྱུང་བའི་སྙིང་རྗེ་རྗེ་འདྲ་བའི་སྨྲེ་སྔགས་འདོན་པ་དང་ལག་པའི་སྲས་ཆེ་བ་དེས། གཞན་ལ་སྙིམ་པའི་ཆུ་སྦྱིན་པར་བྱས་ནས་བཙུན་མོའི་འཁོར་དེ་རྣམས་རྣམ་པ་གང་གིས་ཀྱང་དབུགས་འབྱུང་བར་བྱས་ཏེ། ནད་ཀྱིས་མནར་བའི་སྐྱེ་བོ་དེ་ལ་སྨྲས་པར་གྱུར་ཏོ། །རྒྱལ་
པོ་དེའི་དགོངས་པ་ལྟར་གྱིས་ཤིག །དེ་ལྟར་ན་དེ་མཆོད་པར་འགྱུར་རོ་ཞེས་ཟེར་རོ། །དེ་ནས་སྐྱེ་བོའི་ཚོགས་དེས་མཚོན་ཆ་རྣམས་ཀྱིས་བཅད་ནས་ཉ་རོ་ཧི་ཏ་དེའི་ཤ་ལས་བླངས་ནས་སྨན་པས་བསྒོ་བའི་རིམ་པས་ཉེ་བར་ལོངས་སྤྱོད་པར་བྱས་ཏེ་ནད་དེ་ལས་རབ་ཏུ་གྲོལ་བར་གྱུར་ཏོ། །དེ་ལྟར་ན་
བཅོམ་ལྡན་འདས་དེ་བྱང་ཆུབ་སེམས་དཔར་གྱུར་པའི་ཚེ་ན་ཡང་སེམས་ཅན་རྣམས་ཀྱི་དོན་དུ་དཀའ་བ་སྤྱད་པ་རྣམས་མཛད་པ་དེ་བས་ན་སྙིང་རྗེ་ཆེན་པོ་དང་ལྡན་པའི་སངས་རྒྱས་བཅོམ་ལྡན་འདས་དེ་ལ་སེམས་དང་བཅས་པའི་སྐྱེ་བོ་སུ་ཞིག་ཅེས་བྱ་བ་གུས་པ་དང་ལྡན་པར་མི་འགྱུར་རམ་ཞེས་བྱ་བའོ། །
པདྨ་ཅན་གྱི་སྐྱེས་རབས་ཏེ་སྐྱེས་པའི་རབས་བརྒྱད་པའོ།། །།བདག་ཉིད་ཀུན་ནས་གདུང་བར་བྱས་ཀྱང་ནི། །སྦྱིན་པའི་འབྲས་བུ་ཤེས་པས་སྦྱིན་པ་བཏང་། །དེ་ནི་ཞིང་གི་ས་ལ་ངལ་བ་སྟེ། །གང་ཞིག་ས་བོན་ལས་ནི་འབྲས་བུར་དད། །འདི་ལྟར་རྗེས་སུ་ཐོས་ཏེ། བཱ་རཱ་ཎ་སཱིའི་
རྒྱལ་པོའི་ཕོ་བྲང་ན་ཚུལ་གྱི་སྟོབས་ཀྱིས་ཕ་རོལ་རྣམ་པར་གནོན་པས་རྒྱལ་པོའི་ཚོགས་གཞན་དབང་དུ་བྱས་པ། འཁོར་ལོས་སྒྱུར་བ་ལྟར་ཐོགས་པ་མེད་པའི་འཁོར་ལོ་ཅན་ཁྱད་པར་རྣམ་པ་བཞིས་བློན་པོའི་ཚོགས་བརྟགས་པར་བྱས་པ། ཐོས་པ་དང་། ཚུལ་ཁྲིམས་དང་། གཏོང་བ་ལ་སོགས་
པའི་ཡོན་ཏན་ནོར་བུ་རྣམས་ཀྱི་གཏེར་དོན་དུ་གཉེར་བའི་སྐྱེ་བོ་དང་ཐུན་མོང་བའི་དབང་ཕྱུག་དང་ལྡན་པ། ནོར་བུ་དཀར་པོ་བཅད་པ་ལྟར་དཀར་བའི་གྲགས་པས་རྒྱ་མཚོའི་ཕ་རོལ་ཀུན་ནས་བརྒལ་བར་བྱས་པ་གཞན་གྱི་དོན་སྒྲུབ་པའི་ཕྱིར་འབད་པས་རྩོལ་བ་དེ་དུས་གཅིག་གི་ཚེ་ན། བྱང་ཆུབ་ཆེན་
པོ་ཉེ་བར་རྒྱས་པར་བྱས་པའི་བྱང་ཆུབ་སེམས་དཔའ་ཚངས་པས་བྱིན་ཞེས་བྱ་བའི་རྒྱལ་པོ་བྱུང་བར་གྱུར་ཏོ། །སུ་ཞིག་རྒུད་པ་བསལ་བྱས་ཏེ། །དེ་རིང་ནོར་གྱིས་ཚིམ་བྱས་གང་། །སུ་ཞིག་ཞི་བའི་ལམ་ལ་གཞག །གང་གི་འདི་འདྲ་གནས་པ་འབྱུང་། །བདག་ཉིད་སྲིད་པ་རྣམ་གཅོད་

ཕྱིར། །ལམ་བཟང་པོ་ལ་གཞག་འདོད་དེ། །གཞན་དོན་མེད་པར་གཞན་འགའ་ནི། །བདག་ཉིད་ཆེ་རྣམས་བྱ་བ་མེད། །དེར་ཡང་ཆོས་ཀྱི་རྒྱལ་སྲིད་རྗེས་སུ་སྐྱོང་བའི་རྒྱལ་པོ་ལ་དུས་གཅིག་ན་མུ་གེ་ཤིན་ཏུ་དྲག་པོ་བྱུང་བར་གྱུར་ཏོ། །རིམ་གྱིས་ཀྱང་ཡུལ་དེར་རབ་ཏུ་སྲབ་
པའི་ཆུ་གཏེར་མཐོང་བ་གཅོད་པའི་དབང་གིས་ཀུན་ནས་སྐམས་པའི་ཀུ་བའི་ལྗོན་ཤིང་ཆུས་བཀབ་པའི་ཚོགས་དང་ལྡན་པ་དང་། བང་མཛོད་སྟོང་པའི་བུག་པ་ནས་ཞུགས་པའི་བྱི་བ་རྣམས་ཀྱིས་ཕྱིར་འབྱུང་བཞིན་པའི་རབ་ཏུ་སྲབ་པའི་སཱ་ལུའི་སྣུམ་པས་རྩིག་པའི་རྩ་བ་ཁྱབ་པ་དང་། གཏུན་ཤིང་དང་སྲུབ་
པའི་སྒྲ་མ་རྟོགས་པ་དང་། བཀྲེས་པས་རིད་པའི་ངུ་བའི་སྐྱེ་བོས་མཐོང་བཞིན་པའི་སྒེད་པོ་ལ་ཀུན་ནས་གཞག་པའི་རླངས་པ་དང་ལྡན་པའི་ལོ་མའི་ཕུང་པོ་དང་ལྡན་པ་དང་། དོན་དུ་གཉེར་བའི་སྐྱེ་བོ་རྣམས་གྱིས་སྒོ་རྣམས་ན་ལྷག་པར་མི་གནས་པ་དང་། བུ་མོ་རྣམས་ཀྱིས་བཏུས་བཞིན་པའི་
ཀུན་ནས་རྙིང་བའི་ལོ་མ་ནི་ལོ་མ་དང་ལྡན་པ་དང་། ཤི་བ་ལས་ལྷག་མར་གྱུར་པའི་སྟོབས་ཆུང་བའི་བ་གླང་གི་ཚོགས་ཀྱིས་ལྷག་པར་གནས་པར་གྱུར་པའི་སྐམས་པ་དང་རབ་ཏུ་ཆད་ཅིང་འགྲིབ་པའི་བ་གླང་གི་ཚོགས་དང་ལྡན་པ་དང་། མཚན་མོ་མར་མེ་དང་བྲལ་བས་ཞུགས་པའི་མུན་པས་བགྲོད་
པར་དཀའ་བ་དང་། དྲི་མ་ཅན་དང་རྙིང་པའི་གོས་གྱོན་པའི་དབུལ་བའི་སྐྱེ་བོ་དང་ལྡན་པ་དང་ཁ་བས་ཕྱིད་པའི་པདྨོའི་ནགས་ལྟར་ཁྱིམ་རྣམས་དཔལ་མེད་པ་ཉིད་དུ་སོང་བར་གྱུར་ཏོ། །དེ་ནས་སྐྱེ་བོའི་ཚོགས་དེས་ཀུན་ནས་ཉེ་བར་འོངས་ཤིང་རྒྱལ་པོ་ལ་སྨྲས་པ། འགྲོ་བའི་དོན་དུ་འབད་པ་ཀུན་
ནས་བརྩམས་པ་ཡིས། །བརྒྱ་བྱིན་དང་མཚུངས་ས་ཡི་དབང་ཕྱུག་ཁྱོད་ནི་ཡོད་པ་ལ། །སྐྱེ་བོ་འདི་ནི་བཀྲེས་པའི་མེ་ཡིས་གདུངས་པས་ཉམས་པ་ནི། །སྟོབས་ཆུང་ཡན་ལག་སྲོག་ཤིང་ཇི་ལྟར་སྐམས་པར་གྱུར། །དེ་ནས་སྐྱེ་བོ་དེ་ནི་དྲི་བཅས་རྙིང་པའི་གོས་ལྡན་པ། །འོད་ནི་རྩུབ་པ་དྲེགས་
པས་ཉེ་བར་གདུངས་ཤིང་སྡུག་བསྔལ་བ། །བྱ་བ་རྣམ་པར་བྲལ་བ་ཡང་དག་མཐོང་ནས་ས་བདག་ནི། །མིག་དག་སྡུག་བསྔལ་གྱིས་ནི་མཆི་མ་ཡང་དག་འབྱུང་བར་འགྱུར། །དེ་ནས་རྒྱལ་པོ་དེས་ལོ་ལེགས་པ་དུས་འདི་ཙམ་ནས་འབྱུང་བར་འགྱུར་ཞེས་བྱ་བ་རྣམ་པར་ཤེས་ནས་བང་མཛོད་

ནས་འབྲས་སོ་བའི་ཚད་ཡོངས་ཏེ། སྐྱེ་བོའི་ཚོགས་དེ་ལ་འབྲས་ཆང་པ་རེ་རེ་ཉི་མ་རེ་རེ་ཞིང་བྱིན་པར་གྱུར་ཏོ། །བདག་ཉིད་ཀྱིས་ཀྱང་ཆང་པ་གཉིས་མངོན་པར་འཚལ་བར་གྱུར་ཏོ། །སྐྱེ་བོའི་གྲངས་འཇུག་པར་གྱུར་པ་དེ་ལ་བྲམ་ཟེ་གཞན་དག་སྡོད་པར་མ་གྱུར་ཏོ། །དེས་ཀྱང་ཡུན་རིང་པོ་ནས་གཏམ་
དེ་ཐོས་ནས་ཉེ་བར་འོངས་ཏེ། བྱང་ཆུབ་སེམས་དཔའི་མདུན་དུ་སྡུག་བསྔལ་གྱིས་ཡོངས་སུ་ཕོངས་པའི་ཡི་གེ་འདི་སྨྲས་སོ། །རང་གི་སྐྱེ་བོའི་གྲོགས་དང་རྣམ་བྲལ་བས། །འདོད་པའི་ཕུན་སུམ་ཚོགས་པ་མ་འོངས་པས། །སྣ་ཚོགས་རྒུད་པ་རྣམས་ཀྱི་སྐྱོན་གྱིས་ཀྱང་། །ཀྱེ་མ་འགྲོ་བ་གཏམ་ནི་
མང་བ་ཡིན། །བསྟན་པའི་སྡུག་བསྔལ་ཟིལ་གནོན་པའི། །སློང་བ་སྡུག་བསྔལ་ཆེན་པོའི་ཕྱིར། །ཡུན་རིང་ལམ་གྱིས་ཀུན་དུབ་པའི། །མདུན་དུ་རི་ལ་འཛེག་པ་ལྟར། །སྡུག་བསྔལ་བསྟན་པ་ཡིད་རེ་ང་། །འབྲས་བུ་མ་ཐོབ་སྐྱེ་བོ་ནི། །ཡུན་རིང་བྱ་བྱེད་འཆིང་བདག་གིས། །ཤིན་ཏུ་
འདི་ནི་སྡུག་བསྔལ་བྱེད། །བདེ་བའི་རེ་བའི་ཁྱིམ་རྨོངས་པས། །མཐོན་པོར་འཛེག་པའི་མི་རྣམས་ལ། །སྡུག་བསྔལ་སྐས་རིམ་ཕྲེང་བ་རྣམས། །མདུན་དུ་འཕེལ་བ་ཉིད་དུ་གྱུར། །འདི་ནི་མི་ལུས་སྡུག་བསྔལ་ཉིད། །སྐྱེ་བ་དང་ལྡན་འགག་པ་དང་། །དེ་ལྟ་ན་ཡང་རྨོངས་རྣམས་
ལ། །བདེ་པའི་འདུ་ཤེས་འཇུག་པར་གྱུར། །རྨོངས་པས་སེམས་ཀྱི་གླང་པོ་སྐྱོན། །དྲན་པའི་སྟོབས་ཀྱིས་ལྕགས་ཀྱུ་དོར། །དབང་པོའི་མཆེ་བ་གཉིས་རྣམས་ཀྱིས། །སྡུག་བསྔལ་རྒྱུ་ཡིས་རིངས་ནས་ཕྲོགས། །སོ་གའི་དུས་ཀྱིས་གདུངས་པར་བྱས་པའི་རྨ་བྱ་ཡང་། །ས་ཡི་སྟེང་དུ་
གནས་པའི་ཆུ་ནི་འཐུང་མི་བྱེད། །ནམ་མཁའ་ལ་འཁོར་ཆར་དུས་སྐྱེས་ལ་སྡོད་པ་ནི། །ཁྱད་པར་འདོད་པའི་སྡུག་བསྔལ་སྟེན་བྱེད་སྐྱེ་བོ་ཡིན། །གལ་ཏེ་དབང་པོ་གཅིག་ལ་གནས་པར་བྱས་པར་གྱུར་ན་དེ་ཉིད་ལ་ནི་སྡུག་བསྔལ་འབྱུང་། །སྟོབས་དང་ལྡན་པ་གཅིག་གིས་ཀྱང་ནི་ཁུར་བོ་ཆེན་པོ་
ཁུར་བོར་ནུས་པ་མ་ཡིན་ཏེ། །དེ་ལྟར་ལྷ་ཡི་ལམ་གྱི་རྗེས་འབྲང་སྡུག་བསྔལ་ཤིན་ཏུ་ཆེ་བ་བདག་གིས་རྣམ་བསམས་ནས། །བདག་ཉིད་རྣམ་པ་དུ་མར་ཁྱབ་བདག་ཉིད་ཀྱིས་བྱས་ཏེ་དབང་པོ་ཐམས་ཅད་ལ་ནི་གནས། །རྒྱལ་བོས་གསུངས་པ། བྲམ་ཟེ་ཆེན་པོ་བདག་ཉིད་ཀྱི་སྡུག་བསྔལ་འདི་ལྟར་

ཡང་དང་ཡང་དུ་རྗེས་སུ་བརྗོད་པ་རྣམས་ཀྱིས་ཅི་ཞིག་བྱ། །གང་གིས་དགོས་པ་དེ་མྱུར་དུ་བརྗོད་པར་གྱིས་ཤིག་ཅེས་ཟེར་རོ། །བྲམ་ཟེས་སྨྲས་པ། བླངས་པར་མ་གྱུར་པ་ཡང་ལྷ་ཡི་དབང་པོས་སྟེར། །གཙང་ཞིང་མང་བའི་ཆུ་ནི་ཆུང་བ་སློང་བ་ལ། །དེ་ལྟ་ན་ཡང་མི་བརྟན་
དེ་ནི་སྐད་ཅིག་སློང་། །དོན་གཉེར་སྐྱེ་བོ་འཇིགས་པ་གང་ཕྱིར་རང་བཞིན་ཉིད། །འདོད་པ་ཆུང་བ་བདག་ཡིད་ཀྱང་། །སྒྲུབ་པར་བྱེད་པ་མ་ཚང་བས། །འགྱོད་དེ་གུས་པ་སྟེར་དེ་བས། །སྡོམ་ཆངས་གཅིག་ནི་བདག་ལ་རྩོལ། །དེ་ནས་བྱང་ཆུབ་སེམས་དཔས་འདི་ལྟར་རྣམ་པར་བསམས་
པར་གྱུར་ཏེ། །ཀྱེ་མ་འདོད་པ་ཆེན་པོ་ཉིད་ཅེས་བྱ་བ་སྡུག་བསྔལ་ཐམས་ཅད་ཀྱི་རྒྱུ་མཚན་དུ་གྱུར་པ་ནི། འདོད་པ་ཆུང་བ་ལ་ཡང་དགོས་པའི་བསམ་པ་ངལ་བར་བྱེད་པ་ཉིད་དུ་འགྱུར། །འདོད་པ་ཆེ་བ་ལ་ནི་ངལ་བ་མ་སྤྱད་ལྷག་པར་ཡིད་ནི་སྡུག་བསྔལ་བྱེད། །མེ་ནི་ཁུར་མེད་པ་ཡང་དཀའ་
བས་ས་འཛིན་ལ་ནི་ཀུན་ནས་འཛེག་པ་སྟེ། །ཕྲག་པར་བཀོད་པའི་ཆེ་ཤིང་ལྕི་བའི་ཁུར་བུས་རབ་ཏུ་གནོན་པ་སྨོས་ཅི་དགོས། །དེ་ནས་རྣམ་པར་བསམས་ནས་རྒྱལ་པོ་དེས་བྲམ་ཟེ་དེ་ལ་ཉི་མ་རེ་རེ་ཞིང་བདག་ཉིད་ཀྱི་ཁམ་གཉིས་པོ་དེ་ལས་ཁམ་གཅིག་བྱིན་པར་གྱུར་ཏོ། །ཁམ་གཅིག་ཟོས་པ་དེའི་
དེ་ཉིད་དུ་ཡིད་ཚིམ་ཞིང་རྣམ་པར་བཞུགས་པར་གྱུར་ཏོ། །དེ་ནས་བློན་པོ་རྣམས་ཀྱིས་རྒྱལ་པོ་དེ་ལ་ངོ་མཚར་བ་དང་བཅས་པས་འདི་སྐད་ཅེས་སྨྲས་པར་གྱུར་ཏོ། །ཨེ་མ་ཁམ་གཅིག་ཟོས་པས་ཀྱང་ལྷའི་ལུས་ལ་སྟོབས་དང་འོད་རྣམས་འགྲིབ་པར་མ་གྱུར་ཏོ། །རྒྱལ་པོས་གསུངས་པ། གང་
གི་ཕྱིར་འདིར་ཆོག་ཤེས་པ་ནི་བསྔགས་པར་བྱ་བ་སྟེ། ཁྱེད་ཅག་རྣམས་ལྟོས་ཤིག །ཆོག་ཤེས་པ་དང་ཆོག་མི་ཤེས་དག་ནི། །བདེ་སྡུག་རྣམ་པར་བྱེད་པ་ཤེས་བྱས་ནས། །སྐྱེ་བོ་འདི་ནི་བདེ་བ་འདོད་པ་སྟེ། །ཆོག་མི་ཤེས་ནི་གཏོང་བར་མི་བྱེད་དོ། །བདེ་བའི་སྲེད་པ་མ་བཏང་ཞིང་། །
ཆགས་པ་ལ་སོགས་འཇུག་བྱེད་པ། །སྡུག་བསྔལ་སྐས་རིམ་ཕྲེང་རྣམས་ཀྱི། །མཐར་ནི་སུ་ཞིག་འགྲོ་བར་འགྱུར། །ལྕགས་ཀྱིས་ལྕགས་ཀྱང་བརྡུང་བར་བྱས་ན་འཇིག་པར་འགྱུར་བ་སྟེ། །ཀ་བ་སྟོབས་ལྡན་ཡང་ནི་གཉིས་འཐུང་དབང་པོས་གཅོག་པར་བྱེད། །ལྷ་ཡི་དགྲ་སྟའི་སོ་

ཡིས་ཀྱང་ནི་ཡུད་ཙམ་དུ་ལྷུང་བ། །སྲིད་པའི་ལྗོན་ཤིང་འདི་ནི་རྣམ་པ་གང་གིས་གཅོད་མི་འགྱུར། །ཆོག་ཤེས་སྔགས་ཀྱིས་ཡོངས་སུ་སྐྱོང་བར་བྱེད་པའི་སེམས་འཇུག་པ། །ཡུལ་གྱི་སྦྲུལ་གྱི་འཇིགས་པ་རྣམ་སྤངས་བདེ་བར་གནས་པ་སྟེ། །བརྟེན་པ་ཡང་ནི་འབྲས་བུ་མི་འབྱུང་ཡིད་འདོད་ཤིང་རྣམས་
ལ། །ལྷ་ཡི་གཉིས་འཐུང་གིས་ནི་ཆགས་པ་རྣམས་ལ་ཟད་མི་འགྱུར། །བསྙེན་པ་ཕོངས་པས་ནམ་ཡང་མགོ་ནི་འདུད་པར་མི་བྱེད་དོན་དུ་གཉེར་བ་ཆུང་ཡང་མི་འགྲོ་སྟེ། །ནོར་གྱི་ང་རྒྱལ་རྣམས་ཀྱི་མདུན་དུ་རྗེ་བོ་བཀའ་སྩོལ་ཞེས་པའི་ཚིག་ནི་སྨྲ་མིན་ཏེ། །སྐྱེ་བོ་ངན་པ་སྦྲུལ་རྣམས་དག་གི་མེ་ནི་
ཕྲག་དོག་ཞན་པར་མི་འགྱུར་ཏེ། །ཆོག་ཤེས་ཐོབ་པ་གཅིག་པུ་སྐྱེ་བར་ལྡན་པ་ཉིད་ནི་བདེ་བར་འབྲས་བུ་དང་ལྡན་བླངས་པར་གྱུར། །དེ་བས་ན་ཤིན་ཏུ་བདེ་བ་འདོད་པའི་སྐྱེས་བུས་ཆོག་ཤེས་པ་ལ་ཡོངས་སུ་འདྲིས་པར་བྱའོ། །དེ་ལྟར་ཨེ་མ་ལེགས་པར་གསུངས་པ་ཞེས་བྱ་བ་བྱང་ཆུབ་སེམས་དཔའི་ཚིག་
ལ་མངོན་པར་བསྟེན་པར་བྱས་ཏེ། བློན་པོ་དེ་རྣམས་རང་གི་ཁྱིམ་དུ་སོང་བར་གྱུར་ཏོ། །དེ་ནས་ལྷའི་དབང་པོ་ལ་རྒྱལ་པོ་དེའི་དཀའ་བ་སྤྱད་པ་དེ་དང་གཞན་ལ་ཕན་པའི་སྒྲུབ་པ་ལ་མངོན་པར་ཕྱོགས་པ་མཐོང་ནས་འདི་ལྟར་བྱུང་བར་གྱུར་ཏོ། །ཨེ་མ་ངོ་མཚར་བ་སྟེ་གང་གི་ཕྱིར་རྒྱལ་པོ་ཚངས་པས་བྱིན་
འདི་རང་གི་ལུས་ཀྱི་སྡུག་བསྔལ་ཡང་མ་བརྩིས་པར་ཉི་མ་རེ་རེ་ཉིད་དུ་སེམས་ཅན་གྱི་དོན་དུ་སྒྲུབ་པར་བྱེད་ཅེས་བྱ་བའོ། །དེ་བས་ན་འདིའི་ངེས་པ་རེ་ཞིག་ཤེས་པར་བྱ་ཞེས་རྒྱལ་པོ་དེའི་བཟའ་བའི་དུས་ན་བྲམ་ཟེའི་གཟུགས་སུ་མངོན་པར་སྤྲུལ་ནས་ལོ་མའི་ཐུམ་པོ་གཟུང་ཞིང་མདུན་དུ་གནས་ཏེ་
སྨྲས་པར་གྱུར་པ། ཅིས་ཀྱང་དུག་གི་ཤུགས་ཀྱིས་བརྒྱལ་བ་ཡི། །དོན་གཉེར་རྣམས་ཀྱིས་བདག་གི་སྡུག་བསྔལ་བསལ་བྱ་སྟེ། །སྐོམ་པར་གྱུར་ཀྱང་མ་ངུས་པར་ནི་ནུ་མ་དག །འཐུང་འདོད་ལ་ཡང་མ་ནི་ནུ་མ་སྟེར་མི་འགྱུར། །དྲེགས་པས་གདུངས་པའི་ལུས་ལྡན་པ། །ཡུན་རིང་ལམ་
གྱིས་སྡུག་བསྔལ་བསྐྱེད། །སློང་བཞིན་པ་ལ་ས་བདག་ཁྱེད། །བཟང་བ་ཅུང་ཟད་བདག་ལ་སྩོལ། །དེ་ནས་བྱང་ཆུབ་སེམས་དཔས་རང་གི་བསམ་པས་ཡིད་ཚིམ་པར་བྱས་པ་རབ་ཏུ་དགའ་བ་མཆོག་གི་རྗེས་སུ་འགྲོ་བས་ཁམ་གཅིག་པོ་དེ་གཉིས་སྐྱེས་ཀྱི་གཟུགས་དང་ལྡན་པའི་ལྷའི་བདག་

པོ་ལ་བྱིན་པར་གྱུར་ཏོ། །དེ་ནས་ལྷའི་དབང་ཕྱུག་དྲི་མ་མེད་པ་དང་རྣམ་པ་སྣ་ཚོགས་པའི་ཅོད་པན་གྱི་ནོར་བུ་རྣམས་ཀྱི་འོད་ཀྱིས་ཀུན་ནས་བསླང་བའི་དབང་པོའི་གཞུའི་ཁོར་ཡུག་གིས་ཀུན་ནས་སོང་བའི་ལུས་དང་ལྡན་པ་པུས་མོའི་མཐར་རབ་ཏུ་འཕྱང་བའི་མུ་ཏིག་གི་གཏེར་
གྱིས་མངོན་པར་བརྒྱན་པར་བྱས་པ་མགྲིན་པར་བསྐོར་བར་བྱས་པའི་དྲི་ཞིམ་པོའི་མན་དཱ་ར་བའི་མེ་ཏོག་གི་ཕྲེང་བ་དང་ཉེ་བར་བསྐོར་བའི་བུང་བའི་ཚོགས་དང་ལྡན་པའི་བདག་ཉིད་ཀྱིས་གཟུགས་གསལ་བར་བྱས་ཏེ། ཡང་དང་ཡང་དུ་འདི་ལྟར་བྱང་ཆུབ་སེམས་དཔའ་ལ་མངོན་པར་བསྟོད་པ་བྱས་པར་གྱུར་ཏོ། །
བདག་གི་ངོར་ནི་བྱང་ཆུབ་ཀྱང་། །ལུས་ཅན་རྣམས་ནི་སྦྱིན་པ་སྟེར། །རང་གི་སྡུག་བསྔལ་མ་བསམས་པར། །ཁྱེད་ལས་གཞན་གྱིས་སྟེར་བ་མིན། །སྙན་སྨྲ་དམ་པའི་སྐྱེ་བོའི་ལམ་ནི་སྟེན་བྱེད་པ། །གཞན་ལ་ཕན་པའི་ཕྱིར་ནི་རྟག་ཏུ་བརྩོན་པ་རྣམས། །ཁྱེད་ཅག་དོན་དུ་གཉེར་བ་སུ་ཞིག་བདེ་
མི་བྱེད། །འབྲས་བུ་རྗེས་སུ་འབྲེལ་པས་ཡིད་ཀྱི་རེ་བ་བཞིན། །གང་ཕྱིར་དོན་གཉེར་མཉེས་གཤིན་པས་ནི་གཉེན་བཞིན་དགའ་བ་སྐྱེས་པའི་མིག་གིས་བལྟ་བ་སྟེ། །གང་ཞིག་འདས་པའི་དུས་མིན་འཇམ་པ་སྟེར་བར་གྱུར་ཏེ་གང་ཞིག་གུས་པ་ཉུང་བ་ཡང་། །དོན་དུ་གཉེར་ལ་ལྷག་མའི་བདེ་བ་བྱིན་ན་གང་ཞིག་
ལན་མང་བདེ་བ་ཐོབ་འགྱུར་བ། །དེ་ནི་རིང་བྱས་པ་ཡི་ལྷག་མའི་སྦྱིན་པའི་སྤྱོད་པ་མཁས་པ་རྣམས་ཀྱིས་སྦྱིན་པ་པོ་ནི་སྨྲ། །རྣམ་པ་ཐམས་ཅད་དུ་ས་འདི་མགོན་དང་བཅས་པ་གང་ལ་ཁྱེད་ནི་བསྲུང་བ་པོ་སྟེ་དེ་བས་ན་ཞིང་པ་རྣམས་ལ་ས་བོན་ཐམས་ཅད་འདེབས་པར་མཛོད་ཅིག །བདག་ནི་དི་རིང་ཉིད་ནས་
བརྩམས་ཏེ་ཆར་པ་འབེབས་པར་འགྱུར་ཞེས་བྱ་བ་སྨྲས་ནས་མི་སྣང་བར་གྱུར་ཏོ། །དེ་ནས་འབྲས་ཀྱི་སོ་བ་ཐམས་ཅད་འདེབས་པ་ཡོད་པ་ལ་ལྷའི་བདག་པོའི་མཐུས་བསྐྱོད་པར་བྱས་པའི་གློག་གིས་ཀུན་ནས་དཀྲིས་པར་བྱས་པའི་ལྟོ་བ་ཅན། གསེར་གྱིས་བརྒྱན་པར་བྱས་པའི་གླང་པོ་ཆེ་དང་འདྲ་བར་ཀུན་ནས་
གསེར་གྱི་རྒྱན་གྱིས་བརྒྱན་པའི་གླང་པོ་ཆེ་བཞིན་དུ་ཀུན་ནས་ཆུས་སྦོས་པའི་ཆེ་བའི་གཟུགས་དང་ལྡན་པ། བསིལ་བ་དང་འཇམ་པའི་རླུང་གིས་རེག་པའི་དབང་གིས་རབ་ཏུ་སྲབ་པར་གྱུར་པའི་དབུགས་ཀྱིས་གཉའ་བ་བསྐྱོད་པའི་རྨ་བྱ་གྱེན་དུ་ལྟ་བ་རྣམས་ཀྱིས་སྒྲ་འབྱིན་པ་དང་། ཆུ་འབྱུང་བའི་དུས་ལ་

ཀུན་ནས་ཚིམ་པའི་བརྟན་པ་རྣམས་ཀྱི་འབྲུག་དང་འདྲ་བར་ཀུན་ནས་ཕྱོགས་ཀྱི་སྒོ་དང་བཅས་པ་བར་སྣང་ལ་ཆུ་འཛིན་པ་རྣམས་ཀུན་ནས་འཁྲིགས་པར་གྱུར་ཏོ། །དེ་ནས་ཀ་དམ་པ་དང་ཨ་རྫུ་ན་ཡི་དྲིས། །འབྱེད་པའི་བསིལ་བའི་རླུང་གིས་ཀུན་ནས་གདུངས་པ་སྟེ། །ལྟོ་འཕྱེ་རྣམས་ཀྱིས་རིང་བར་ཙན་དན་ཤིང་
རྣམས་ནི། །ཀུན་ནས་དབུགས་འབྱུང་གཉེན་དང་འདྲ་བར་གཏོང་བར་གྱུར། །ཙཱུ་ཏའི་གསེར་བཞིན་སེར་སྐྱ་འབྲས་བུ་སྤངས་བྱས་ནས། །འཇུག་ཅིང་ངེས་པར་འབྱུང་བའི་སྟོབས་ལྡན་ནེ་ཙོས་ནི། །ཤིང་ལོ་དང་མཚུངས་མཆུ་དང་འཛམ་བུའི་འབྲས་བུར་ལྡན། །ལྕེ་ནི་གསལ་བ་ཡོངས་སུ་སྨིན་པ་
དུམ་བུར་བྱས། །ཆུ་འཛིན་དུས་ནི་ཡུན་རིང་པོས་ནི་འབྱུང་འགྱུར་བ། །བདེ་བ་དང་ལྡན་ཁྱིམ་བདག་གི་ནི་པང་གནས་འདྲ། །རྩྭ་ཡི་མྱུ་གུ་ཆད་པས་གོས་མེད་བྱས་པ་སྟེ། །ས་ནི་སྤུ་ལངས་ལྡན་པ་འདྲ་བ་བྱུང་བར་གྱུར། །ཆུ་བོ་རབ་ཏུ་འཇུག་པའི་ཆུས་ནི་འགྲམ་འབིགས་པ། །སཱ་ལུ་སྐྱེས་པ་
ཨུཏྤལ་ཟུམ་པས་ཁྱབ་པ་ནི། །ཞིང་གི་ས་རྣམས་ཀུན་ལས་ཡུན་ནི་རིང་པོར་ཡང་། །རྣམ་པར་མཐོང་ཞིང་ཞིང་པ་རྣམས་ནི་དགའ་བར་གྱུར། །ཤིན་ཏུ་ཤ་ནི་ཉེ་བར་འཕེལ་བས་པགས་པ་མཐོ། །སྔོ་བའི་རྩྭ་ཡི་མྱུ་གུ་ཀུན་ནས་ཟད་བཞིན་པའི། །ཞག་རེར་འོ་མ་འཕེལ་བར་འགྱུར་བའི་བ་རྣམས་
ཀྱི། །ནུ་འཇིང་རྣམས་ནི་ལྕི་བ་ཉིད་དུ་སོང་བར་གྱུར། །རིམ་གྱིས་ཀྱང་ཀུན་ནས་སྲབ་པ་དཀར་པོའི་ཆུ་འཛིན་གྱི་དུམ་བུ་རྣམས་ཀྱིས་ཁྱབ་པའི་ནམ་མཁའ་དང་ལྡན་པ་དཀར་བའི་ཀ་ཤའི་མེ་ཏོག་གི་གོས་ཀྱི་ཆུ་བོ་རྣམས་ཀྱིས་བར་ཁྱབ་པ། ཁ་ཕྱེ་བའི་པདྨ་དང་ཨུཏྤ་ལ་རྣམས་ཀྱིས་བརྒྱན་པར་བྱས་པའི་
ཆུའི་རྟེན་སྟོན་ཀ་བྱུང་བ་ལ། མཐིང་ཤིང་གིས་ཁ་བསྒྱུར་བའི་ཁྱིམ་གྱི་རྩིག་པ་དང་འདྲ་བར་ནམ་མཁའ་སྔོ་བ་ལ་ཆུ་འཛིན་གྱི་གོས་དང་བྲལ་བ། ངོ་ཚ་བ་དང་བཅས་པའི་མཚན་མོའི་བུད་མེད་ལྟར་མཐོང་ནས་ངོ་མཚར་བར་གྱུར་པ་དང་འདྲ་བར་སྐྱེ་བོ་རྣམས་ཀྱི་མིག་ལ་དགའ་སྟོན་དུ་གྱུར་པའི་རི་བོང་ཅན་
ཡོད་པ་ལ། རབ་ཏུ་ཕྱེ་བའི་ཨུཏྤལ་སྔོན་པོའི་རྡུལ་འཕྲོག་པའི། །རྣམ་པར་འགྲོ་བའི་རླུང་གིས་ཅུང་ཟད་འདོར་བ་ནི། །དྲི་ཞིམ་སཱ་ལུ་རྣམས་ཀྱི་སྲབ་པའི་དྲ་བའི་ཚོགས། །སྨིན་མ་ཆ་ཆར་སེར་སྐྱ་ཉིད་དུ་ཁྱེར་བར་འགྱུར། །སར་པ་གསེར་གྱི་ཕྱེ་མ་དང་ནི་མཚུངས་པའི་འོད་ལྡན་པ། །སྦྲང་གིས་བརླན་པ་

ཨུཏྤལ་དང་ནི་པདྨའི་སྣོད་གནས་པ། །གསལ་ཞིང་མེ་ཏོག་རོ་ཡི་ཆ་ཡིས་སློང་མོ་ངལ་བ་ཡི། །སྦྲང་བྱེད་དགེ་སློང་ལ་ནི་སྟོན་ཀའི་བུད་མེད་སྦྱིན་པར་གྱུར། །མུན་པ་ཟད་ཅིང་མཚན་མོ་རྣམས་ལ་འོད་ནི་འོངས་པ་སྟེ། །ཟླ་བའི་ནོར་བུ་དཀར་པོའི་འཇིག་པའི་དག་པ་འགྲོ་
བཞིན་པ། །སྒྲ་བྲལ་ཆུ་ནི་རླབས་ཀྱི་རི་མོ་ཉུང་ཞིང་དང་བ་ཉིད། །ཆུ་བོ་རྣམས་ཀྱི་གསལ་བའི་ཉ་ཡི་ཚོགས་ལྡན་འགྲོ་བར་གྱུར། །ཕྱོགས་རྣམས་ཀྱི་ནི་བར་མཚམས་ཅུང་ཟད་འདྲེས་པར་གྱུར། །སུམ་ཅུའི་བདག་པོའི་གཞུ་ཡིན་དབུས་སུ་ཆད་པ་བྱས་པ་ནི། །ཀུན་ནས་སྐྱེ་ཞིང་འཛག་པ་གློག་ནི་རབ་
ཏུ་ཐིམ། །སྤྲིན་གྱི་ཚོགས་རྣམས་རླུང་གིས་ཉེ་བར་གཡོ་བ་ཉིད་དུ་གྱུར། །རྒྱ་ཆེ་བ་ཡི་མུན་པ་བུང་བ་ལྟར་སྔོ་གསལ་འདོད་ཅིང་། །གདེངས་ཀའི་དགྲ་དང་གཉིས་འཐུང་བདག་པོའི་དཔྲལ་འབུར་དང་མཉམ་པའི། །མཚན་མོའི་རི་བོང་ཅན་གྱི་བུམ་པས་སྦྱིན་པར་གྱུར་པ་ནི། །ཟླ་ཚེས་ཆུ་
ཡི་ཀུ་མུ་ཏ་ནི་འཐུངས་ཏེ་བཏུང་འདོད་པ། །དེ་ནས་མུ་གེའི་སྡུག་བསྔལ་གྱིས་ཉེ་བར་འཚེ་བ་རྣམ་པར་བཟློག་པའི་སྐྱེ་བོའི་ཚོགས་དེས་བདེ་བར་བཞུགས་ཤིང་བློན་པོའི་ཚོགས་ཀྱིས་ཀུན་ནས་བསྐོར་བའི་རྒྱལ་པོ་དེའི་གན་དུ་འོངས་ནས། །འདུན་པ་ལ་སོགས་པའི་དུས་སུ་གུས་པ་དང་བཅས་པས་
འདི་ལྟར་སྨྲས་པར་གྱུར་ཏོ། །ཁྱོད་ཀྱི་བསོད་ནམས་མཐུ་ཡིས་ནི། །ཤིན་ཏུ་ཆེ་བའི་མི་དབང་ཕྱུག །འགྲོ་བའི་སྡུག་བསྔལ་བསལ་བ་སྟེ། །ལོ་ལེགས་པ་ནི་ཡང་བྱུང་ངོ་། །ས་སྟེངས་དགའ་སྟོན་གྱུར་པ་ཡི། །འབྱུང་པོ་ཀུན་ལ་བརྩེར་ལྡན་པ། །ས་ཡི་བདག་པོ་ས་འདི་ནི། །མགོན་པོ་ཁྱོད་
ཀྱི་མགོན་དང་ལྡན། །རིན་ཆེན་ཚོགས་ནི་གཙང་བའི་གཟི་བརྗིད་རྒྱ་མཚོ་དང་། །བསིལ་བའི་འོད་ཟེར་ཅན་གྱི་འོད་ཚོགས་དྲི་མེད་པ། །ཡལ་ག་ཆེན་པོ་ཅན་གྱི་འབྲས་བུ་ཕུན་ཚོགས་དང་། །ལྷ་ལགས་ཁྱོད་ཀྱི་ཕུན་ཚོགས་རྣམས་ཀྱང་གཞན་དོན་ཕྱིར། །རྒྱ་མཚོའི་རླབས་ཆེན་ཆུ་ནི་བ་ཚྭ་ཅན་
ཡིན་ཏེ། །ཟླ་བ་ལ་ནི་མཚན་མ་དྲི་མ་ཅན་ཡོད་དེ། །ཨེ་མ་ཁྱེད་ཅག་ལྟ་བུ་ལེགས་པའི་སྐྱེ་རྣམས་སླར། །ཡིད་ནི་སྐྱོན་གྱི་དྲི་མ་རྣམ་པར་བྲལ། །ཁྱེད་ནི་རྒྱ་ཆེའི་བློ་ལྡན་གཏི་མུག་མུན་པ་ནི། །ཟད་པར་བྱེད་པ་གལ་ཏེ་སྐྱེ་བར་མ་གྱུར་ན། །སྡུག་བསྔལ་རྒྱ་མཚོའི་ཆུ་ལ་སྐྱོབ་པར་བྱེད་པ་ནི། །འགྲོ་བ་མ་

ལུས་རྣམ་པར་ཁྱབ་པ་ཉམས་པར་གྱུར། །དེ་ལྟར་ན་བཅོམ་ལྡན་འདས་དེ་ཉིད་བྱང་ཆུབ་སེམས་དཔར་གྱུར་པ་ན། བདག་ཉིད་ཀྱང་སྡུག་བསྔལ་བར་མཛད་ནས་སེམས་ཅན་རྣམས་རྗེས་སུ་བཟུང་ངོ་ཞེས་བྱ་བ་རྣམ་པར་བསམས་ནས་རྒལ་བར་དཀའ་བའི་འཁོར་བའི་རྒྱ་མཚོ་འདི་རྒལ་བར་འདོད་པས་དཀའ་བ་མཆོག་
ལ་ཡང་སྦྱིན་པ་ལ་རྩེ་གཅིག་པས་གནས་པར་བྱ་ཞེས་པའོ། །ཚངས་པས་བྱིན་གྱི་སྐྱེས་པའི་རབས་ཏེ་སྐྱེས་པའི་རབས་དགུ་པའོ།། །།རང་གི་ནད་ལ་བརྩི་བར་མ་བྱས་ཏེ། །གང་ཞིག་རང་སངས་རྒྱས་ལ་མར་ནི་ཕུལ། །ཉོན་མོངས་པ་ཡི་ནད་ཀྱི་གསོ་བ་ནི། །དེ་ཉིད་སྐྱེ་བོ་འདི་ལ་
བྱས་པར་གྱུར། །འདི་ལྟར་རྗེས་སུ་ཐོས་ཏེ། ཁ་བ་ཅན་གྱི་ས་འཛིན་པའི་རྩེ་མོ་དང་རྗེས་སུ་མཐུན་པའི་ལྷ་རྣམས་ཀྱི་ཉེ་འཁོར་གྱི་མངོན་པར་བརྒྱན་པར་བྱས་པ། རྟག་ཏུ་ལོ་ལེགས་པའི་ཕྱིར་རབ་ཏུ་དགའ་བའི་ཁྱིམ་བདག་གིས་ཀུན་ནས་མཆོད་པར་གྱུར་པའི་དོན་དུ་གཉེར་བའི་སྐྱེ་བོ་དང་ལྡན་པ།
ནོར་གྱི་བདག་པོའི་ཕུན་སུམ་ཚོགས་པ་དང་འདྲ་བར་ཤིན་ཏུ་དགའ་བར་གྱུར་པ་ཀུ་མུ་ཏ་དང་ལྡན་པ་ཞེས་བྱ་བའི་རྒྱལ་པོའི་ཕོ་བྲང་བྱུང་བར་གྱུར་ཏེ། དེ་ལྟ་བུར་གྱུར་པའི་རྒྱལ་པོའི་ཕོ་བྲང་འདི་པ་ཡང་། དགྲ་ཡི་སྐྱེ་བོ་ཉེ་ཞིང་སྐྱེ་བོ་ལ་བྱམས་པ། །ཡོན་ཏན་ནོར་ཅན་དཔལ་གྱི་ནོར་སྦྱིན་དང་མཉམ་པ། །རྩུབ་
མིན་སྐྱེས་བུའི་བྱ་བ་བརྟན་པར་གྲགས་པ་ནི། །སྐྱེས་བུ་སེང་གེ་ཞེས་བྱ་ས་སྐྱོང་བྱུང་བར་གྱུར། །ཀུ་མུ་ཏ་ཡི་མདོག་ཅན་ཞེས། །འོད་དང་ལྡན་པ་ཟླ་ཚེས་ལྟར། །ས་སྐྱོང་དེ་ཡི་བཙུན་མོ་ནི། །མཆོད་སྦྱིན་བརྒྱ་པའི་བཙུན་མོ་བཞིན། །དེ་ནས་དགེ་མོ་དེའི་སྲས་ནི། །དགེ་བའི་ཡོན་ཏན་རྣམས་ཀྱི་སྣོད། །
བུ་ལ་དགའ་བ་དམ་པ་ནི། །ཡིད་མིག་དགའ་བྱེད་སྐྱེས་པར་གྱུར། །ངག་ནི་དོན་ལྡན་བཞིན་དག་པ། །ཚུལ་ནི་མིག་ལྡན་འདྲ་བ་དང་། །དེས་ནི་ལྷག་པར་དེ་མཛེས་ཏེ། །མཚན་མོ་ཟླ་བ་ལྡན་པ་བཞིན། །དེ་ནས་སྲས་སྐྱེས་པས་རབ་ཏུ་དགའ་བའི་ས་སྐྱོང་ལ་རྒྱལ་མཚན་དང་བ་དན་རབ་ཏུ་མཐོ་བའི་
རྣམ་པ་སྣ་ཚོགས་པའི་ཚོང་དུས་ཀྱི་བཞི་མདོ་ཅན། ཤིན་ཏུ་དྲི་ཞིམ་པའི་དྲིའི་ཆུས་རྒྱལ་པོའི་ལམ་ཆག་ཆག་བཏབ་པ། ལམ་གྱི་སྐྱེ་བོའི་མཆོད་པ་ལ་གཡེངས་པའི་མིའི་བདག་པོའི་ནང་མིའི་སྐྱེ་བོ་དང་ལྡན་པ། ཀུན་ནས་བརྡུང་བཞིན་པ་རྣམ་པ་སྣ་ཚོགས་པའི་རོལ་ཆའི་སྐད་ཀྱིས་བཙུན་མོའི་འཁོར་

གྱི་གནས་གང་བར་བྱས་པ། བརྒྱན་བཞིན་པའི་གར་མཁན་མོའི་ཚོགས་དང་ལྡན་པ། གར་རྟོག་པའི་ཁང་པའི་མཛེས་པ་ལ་ཉེ་བར་གནས་པའི་གར་གྱི་སློབ་དཔོན་རྣམས་ཀྱིས་བལྟ་བར་གྱུར་པ། བཙོན་ཁང་གི་སྐྱེས་བུ་བཀྲོལ་བར་གྱུར་པའི་ལྷའི་གྲོང་ཁྱེར་གྱི་རྣམ་
པ་ཅན་གྱི་གྲོང་ཁྱེར་དེ་བྱུང་བར་གྱུར་ཏོ། །དེར་ནི་མི་ཡི་དབང་ཕྱུག་ལ་ནི་སྲས་དེ་སྐྱེས་པ་ཡི། །གང་ཕྱིར་སེམས་ཅན་རྣམས་ལ་ཡིད་ནི་ཕན་འདོད་འགྱུར། །དི་རིང་གཞོན་ནུའི་ཡོན་ཏན་རྗེས་མཐུན་པ། །སྐྱེ་བོས་ཕན་འདོད་ཅེས་བྱ་མིང་དུ་བཏགས་པར་གྱུར། །དེ་ནས་བྱང་ཆུབ་སེམས་དཔའ་ཕན་
འདོད་མཚོན་རྣམས་ཐམས་ཅད་གསལ་བས་ཀུན་ནས་མཚོན་བཞིན་པའི་འབྲས་བུ་ཆེན་པོ་དང་ལྡན་པ། ཤིང་གཞོན་ནུ་ལྟར་སྐྱེད་བཞིན་པའི་མེ་ཏོག་དྲུང་བ་ཉི་མ་རེ་རེ་ཞིང་དོན་དུ་གཉེར་བའི་སྐྱེ་བོ་རྣམས་ཀྱིས། ལོངས་སྤྱོད་ཆེན་པོའི་སྙིང་པོ་ལ་ཉེ་བར་ལོངས་སྤྱོད་པ། བྱེས་སུ་སོང་བ་ཟློག་པའི་རིམ་
པས་དགའ་བོའི་གྲོགས་པོ་ལྟར་ལང་ཚོ་སར་པས་ཀུན་ནས་ཁྱབ་པ་ནི། འཇིག་རྟེན་སྡུག་བསྔལ་བྱེད་རྣམས་ལ། །སྡུག་བསྔལ་དྲག་པོ་བྱེད་འགྱུར་བ། །ལུས་ཀྱི་ཕྱེད་ནི་སྐམ་བྱེད་པའི། །ནད་ཀྱིས་འདི་ནི་ཉམས་པར་བྱེད། །དེ་ནི་ནད་ཀྱིས་ཅུང་ཟད་ཅིག །ཀུན་ནས་སྐྱེ་བོ་ཉིད་དུ་གྱུར། །མཚན་
མོ་མུན་པ་འཇིགས་པ་ལ། །ཕྱེད་ནི་ཟད་པའི་ཟླ་བ་བཞིན། །ཇི་ལྟ་ཇི་ལྟར་རིམ་གྱིས་དེའི། །ལུས་ཀྱི་ཕྱེད་ནི་ཟད་འགྱུར་བ། །དེ་ལྟ་དེ་ལྟར་འཇིག་རྟེན་གྱི། །སྙིང་གི་ནད་ནི་འཕེལ་བར་འགྱུར། །ཡོན་ཏན་ཅན་རྣམས་ཕུན་ཚོགས་རྒུད། །བདེ་སྡུག་བྱེད་པར་འགྱུར་རྣམས་ལ། །སྐྱེ་དགུ་མ་
ལྟར་འགྲོ་བ་སྟེ། །བདེ་སྡུག་ཉམས་སུ་མྱོང་བ་ཅན། །དེ་ནས་རྒྱལ་པོ་དེས་མྱ་ངན་གྱི་ཟུག་རྔུས་སྙིང་ཟད་པར་ཉི་མ་རེ་རེ་ཞིང་ལུས་ཕྱེད་འགྲིབ་པར་གྱུར་པའི་ཕན་འདོད་མཐོང་ནས་སྨན་པ་རྣམས་ལ་སྨྲས་པ། གང་གིས་བདག་གི་རིགས་རྒྱུད་འདི་རྣམས་རྣམ་པར་ཆད་པར་མི་འགྱུར་བ་དེ་ལྟར་འབད་པར་མཛོད་
ཅིག །ཁྱེད་རྣམས་ཉོན་ཅིག །བདག་གིས་དགྲ་རྣམས་ཐམས་ཅད་ཕམ་པར་བྱས་པ་སྟེ། །ནོར་རྣམས་བྱིན་ཏེ་གྲགས་པ་ཡང་ནི་རྗེས་སུ་བསྐྱངས། །འདིར་ཡང་མི་སྐྱོང་དཔལ་ནི་སྲས་ལ་རྣམ་བཀོད་ནས། །བདག་ཞི་བ་ཡི་ཆེད་དུ་དཀའ་ཐུབ་ནགས་སུ་འགྲོ་འགྱུར་རམ། །དེ་ནས་བྱང་ཆུབ་

སེམས་དཔས་ནད་དང་རྒས་པ་དང་། འཆི་བ་དང་ཡང་འབྲེལ་པའི་གཏམ་གྱིས་ནང་མིའི་ཚོགས་དང་བཅས་པའི་ཡབ་ཀྱི་ཡིད་སྐྱོ་བ་བསྐྱེད་ཅིང་འདུག་གོ། །ལྟོ་འཕྱེ་རྣམས་ཀྱི་ཚད་པ་ཡི། །ནད་རྣམས་ཀྱིས་འཁྲུགས་ལུས་ལ་ནི། །བདེ་བ་བསམས་བཞིན་ཅི་ཕྱིར་འདི། །ལུས་ཅན་རྣམས་ལ་འབྱུང་
བར་འགྱུར། །མི་བདེ་བ་ཡི་ཚོར་བ་ཀུན་ནས་ཁྱབ་པ་ནི། །མཆི་མ་དང་ལྡན་གཉེན་རྣམས་ཀྱིས་ནི་མཐོང་གྱུར་པ། །གང་ཚེ་ནད་ཀྱི་མདའ་རྣམས་ཀྱིས་ནི་འབིགས་འགྱུར་བ། །དེ་ཚེ་མི་ནི་སྲིད་པ་ལས་ནི་སྐྱོང་བར་གྱུར། །ནད་ཀྱིས་བཏབ་པས་རིད་བྱས་ཡན་ལག་སྲོག་ཤིང་ནི། །ལམ་དུ་ཀུན་ནས་འདྲེ་
ཞིང་ལྡོག་པས་ཁྱབ་པ་ལ། །ཁ་བའི་སྨན་ནི་འཐུངས་པས་མཐོང་ནས་འཇིགས་ལྡན་པའི། །སྐྱེ་བོའི་ཡུལ་གྱི་འདོད་པ་རྣམ་པར་བཟློག་པར་གྱུར། །དབང་པོ་རྣམས་དང་དྲན་པའི་སྟོབས་ནི་ཉེ་བར་གདུང་བ་འདི། །ལུས་ཅན་རྣམས་ཀྱི་སྤྱི་བོར་རྐང་པ་རྣམ་པར་བཞག་ནས་ནི། །རབ་ཏུ་སྐྱེ་བར་འདོད་
པའི་རྟོགས་པས་ང་རྒྱལ་རྒས་པ་ལ། །སྐྲ་དཀར་གཡོ་བས་འབད་པ་དང་བཅས་རྒོད་པ་འདྲ་བར་བྱེད། །དབང་པོ་རྣམས་ཀྱིས་སྒྲིབ་པ་ཆེན་པོ་ཉེ་བར་བྱེད་པ་འདི། །རྒས་པ་རླུང་གི་རི་དགས་ལྟར་ནི་རིང་པོ་ནས་མཐོང་ནས། །སྐྱེས་བུའི་ལང་ཚོའི་རྒྱགས་པ་འདོད་པ་དང་ནི་ལྷན་ཅིག་ཏུ། །རབ་
ཏུ་འཕྲོས་པར་འགྱུར་ཏེ་འཇིགས་པས་ཁྱབ་པའི་རི་དགས་བཞིན། །ཡན་ལག་ཅན་རྣམས་ཀྱིས་ནི་ལྷོད་པ་ཉིད་དུ་ཉེ་བར་སོང་བ་འདི། །ཡུལ་རྣམས་ཉེ་བར་ལོངས་སྤྱོད་ཀུན་ནས་སྟོབས་ཆུང་དབང་པོར་ལྡན། །རྒས་པ་འདིས་ནི་ཀུན་ནས་ལྷག་པར་ཞོན་པའི་བཙན་ཐབས་ཀྱིས། །གཟུགས་ནི་སྒུར་
བར་བྱེད་དེ་གཞུ་རྒྱུད་ཀྱིས་ནི་གཞུ་བཞིན་ནོ། །ཚུལ་མིན་གཙོ་བོ་གང་ཉིད་དུ་ནི་ངེས་གནས་བྱེད་པ་ཞེས། །ཀྱེ་མ་ལུས་འདི་དེ་ཉིད་རྒས་པ་ཉིད་དུ་ཇི་ལྟར་འབྱེད། །གང་གི་ཡུན་རིང་འོག་ཏུ་འདུག་པ་འབྲས་བུ་རྣམས་སྟེར་བ། །ཡལ་ག་ཅན་དེ་ལ་ནི་སུ་ཞིག་དགྲ་སྟ་ལྟུང་བར་འདོད། །རྣོན་པོ་སྐྱོན་གྱི་
མདའ་རྣམས་ཀྱིས་ནི་ཇི་ལྟར་ཡང་ནི་དྲག་པོའི་ཡིད་ལ་གདུང་བྱེད་པའི། །རིང་གནས་གནད་ལ་བྱེད་ནི་ངེས་གདུང་མིན་ནམ་གང་ཕྱིར་གསོན་པོ་བཞིན་དུ་གནས་པར་བྱེད། །གང་དུ་ཡང་ནི་ཡུན་རིང་གནས་པའི་ཤི་བའི་རྔོན་པས་འདི་ནི་རྣམ་པར་རྒྱས་བྱེད་པ། །སེམས་ཀྱི་རི་དགས་ཁྱེད་ནི་རྒས་པའི་སྙིང་

ནི་རིལ་པོ་ལས་ནི་ཇི་ལྟར་འདའ་བར་འགྱུར། །དེ་ནས་དམན་པ་རྣམས་ཀྱིས་གནས་དབེན་པ་ལ་སྐྱེས་བུའི་སེང་གེ་དང་འདྲ་བར་ཡིང་པ་དེ་ལ་སྨྲས་པ། སྨན་རྣམས་ཡོད་པར་གྱུར་པ་རྣམས་ལ་ཡང་འདབ་ཆགས་ཤང་ཤང་དེའུའི་ཤ་མེད་པས་མར་ཆེན་པོ་སྨིན་པ་ཡང་འདི་ནས་
རབ་ཏུ་ཞི་བར་བྱེད་པར་ནུས་པར་འགྱུར་བ་མ་ཡིན་ཏེ། དེ་བས་ན་འདིར་ཅི་ཞིག་བྱ་ཞེས་ཟེར་རོ། །དེ་ནས་རྒྱལ་པོ་དེས་བྱ་འཛིན་པ་ལ་མཁས་པའི་བྱ་ཤོར་བ་གཉིས་བོས་ནས་བཀའ་བསྒོ་བ། བྱ་ཤང་ཤང་དེའུ་གང་ནས་ཀྱང་ཁྱེད་ཅག་གིས་ལོང་ཤིག །དེའི་ཕྱིར་ནོར་ཆེན་པོ་རབ་ཏུ་བྱིན་པས་ཁྱེད་
ཅག་ལ་སྦྱར་བར་བྱ་སྟེ། གཞན་དུ་ན་བྱ་ཤོར་བའི་ཚོགས་ཐམས་ཅད་ཉིད་བསྐྲད་པར་བྱ་ཞེས་ཟེར་རོ། །དེ་ནས་བྱ་ཤོར་བ་དེ་དག་གིས་རྒྱལ་པོ་དེ་ལ་ཞུས་པར་གྱུར་པ། ལྷ་ལག་རྒྱ་མཚོའི་འགྲམ་ན་ཡལ་ག་ཅན་གཞན་རྣམས་ཀྱི་བདག་པོ་དང་འདྲ་བ་སྤྲེའུའི་ཆུ་ཞེས་བྱ་བའི་ཤིང་ཆེན་པོ་ཡོད་དེ། དེར་
ཡང་མི་སྐད་སྨྲ་བའི་ཤང་ཤང་དེའུ་རྣམས་སོ་སོར་གནས་པ་སྟེ་དེ་རྣམས་ཀྱང་རྒྱལ་པོ་ལ་ཉེ་བར་མཁོ་བའི་ཚོགས་པས་འཛིན་པར་ནུས་ཀྱི་གཞན་དུ་ནི་མ་ཡིན་ཞེས་གསོལ་ཏོ། །རྒྱལ་པོས་གསུངས་པ། གང་དང་གང་གི་དགོས་པ་དེ་དང་དེ་ཐམས་ཅད་བདག་གི་མཛོད་འདི་ནས་ཉེ་བར་ལོང་
ཤིག་ཅེས་ཟེར་རོ། །ཇི་ལྟར་ལྷས་བཀའ་སྩལ་པ་ཞེས་རྒྱལ་པོའི་བཀའ་ཐོབ་ནས། །དེ་ནས་བྱ་བ་ཡོ་བྱད་འཛིན་པར་བྱས་པ་དེ་དག་ནི། །དེའི་ཚོགས་དང་ཆུ་བོ་དེ་དང་དེ་རྣམས་རྒལ་བྱས་ནས། །ཡལ་ག་ཅན་དེའི་ཡལ་ག་འབྲས་བུ་ཅན་རྣམས་འདུད་པ་ཆེ་བ་ནི། །རྒྱ་མཚོའི་འགྲམ་སྐྱེས་གྱེན་
ལྟའི་གདོང་ཅན་དག་གིས་མཐོང་བར་གྱུར། །རིམ་གྱིས་ཀྱང་ཀུན་ནས་དེར་ཕྱིན་ནས་གས་པའི་ཉ་ཕྱིས་ཁ་སྦྱོར་ཁ་ཕྱེ་ནས་བྱུང་བའི་མུ་ཏིག་གི་རྡོག་མ་རྣམས་ཀྱིས་ཁྱབ་པའི་དཀར་པོའི་འགྲམ་དང་ལྡན་པའི་དབུས་སུ་རབ་ཏུ་རྒྱུག་པའི་སྤྲེའུ་དང་བྱར་ལྡན་པ། མིག་སྨན་གྱི་ཕྱེ་མའི་ཚོགས་ལྟར་སྔོ་
བའི་ཆུ་དང་ལྡན་པ། རླབས་ཆེན་པོའི་རྒྱུན་གྱིས་ལ་པ་ཀའི་མེ་ཏོག་བསྐུལ་བས་ཀུན་ནས་བསྲེས་པའི་དབུ་བའི་ཕྲེང་བས་བསྐོར་བར་བྱས་པའི་འགྲམ་གྱི་རི་མོ་ཅན། ཤིན་ཏུ་མྱུར་བའི་གཟིངས་འགྲོ་བས་སྒྲ་བསྐྱོད་པ། ནང་དུ་ཆུ་སྲིན་ཀུན་ནས་འཁོར་བས་ཀུན་ནས་ཆག་པའི་གཞོན་ནུ་མའི་བྱི་རུ་ཅན།

ཆུའི་གླང་པོ་རྣམས་ཀྱི་སྣས་མངོན་པར་བརྡུངས་པའི་གཡོ་བའི་དུང་གི་ཚོགས་དང་ལྡན་པ་དང་། སྦྲུལ་མཆོག་རྣམས་ཀྱི་ནོར་བུ་སྟོང་གི་འོད་རྣམས་ཀྱིས་ས་འོག་སྣང་བར་བྱས་པ་དང་། མཁའ་ལྡིང་གི་གཤོག་པ་གཉིས་བསྐྱོད་པས་རླབས་ཆེན་པོའི་ཚོགས་རྣམ་པར་འཁྲུག་པར་བྱས་པ། ཤིན་ཏུ་
ཡིད་འཕྲོག་པའི་ན་ལི་གེ་ལ་དང་པ་ན་ས་དང་ཀ་པུན་ཏ་དང་བ་ཀུ་ལ་དང་། པུན་ན་ཀ་དང་། ཙམ་པ་ཀ་དང་། ཏི་ལ་ཀ་དང་། མྱ་ངན་མེད་དང་། ལྷན་ཅིག་བྱེད་པ་དང་། ཨུ་དུམ་བཱ་ར་དང་། །པ་ལ་ཀྵ་དང་། ནྱ་གྲོ་དྷའི་ཤིང་གི་ནགས་རྣམས་ཀྱི་མཐའ་མི་མངོན་པ་དང་། མཐའ་མེད་པའི་ངོ་མཚར་
སྣ་ཚོགས་པའི་གཞི་དང་། ཀེ་ཏ་ཀའི་ཚོགས་ཀྱི་མེ་ཏོག་རྣམས་རེག་པས་དྲི་ཞིམ་པའི་རླུང་གི་སྟོབས་ཀྱིས་ཙན་དན་གྱི་ཤིང་རྣམ་པར་འཁྲུགས་པས་ཉེ་བར་སྦས་པ་དང་། མ་ལ་ཡའི་རི་བོ་ལས་འབབ་པའི་དུས་ཀྱི་ཆུས་དག་པར་བྱས་པའི་བྲག་གི་དཀྱིལ་ན་ཉེ་བར་གནས་པའི་རིག་པ་འཛིན་པ་ཕོ་མོ་གཉིས་
ཀྱིས་ལྟ་བར་གྱུར་པའི་རྒྱ་མཚོ་ཆེན་པོ་ལ་ལྟ་བར་བྱེད་པའི་བྱ་བ་གཉིས་ཀྱིས་འོངས་ནས་མཐོང་སྟེ། ཤིང་གི་ཚོགས་དེ་ལ་ངེས་པར་འབྲེལ་བའི་ཤང་ཤང་དེའུ་རྣམས་ཡལ་ག་ཅན་དེའི་འོག་ཏུ། པདྨ་རྣམས་ཀྱིས་བཀབ་པའི་ཆུ་ནི་ཆེ་བ་ལ། །འགྲམ་གྱི་མཐའ་ཡི་ཕྱོགས་ན་དུང་རྒྱན་རྣམས་ཀྱིས་ནི། །
མལ་ནི་ཆེན་པོ་གོས་ཀྱིས་ཀུན་ནས་བསྐོར་བྱས་པའི། །ཡིད་དུ་འོང་བ་དྲི་ཞིམ་པོ་ནི་བཏིང་བར་གྱུར། །རྒྱ་སྐྱེགས་ཁུ་བས་མཚན་མའི་ཤེལ་བཞིན་ཤིན་ཏུ་དམར། །ཆང་གི་རླུང་གི་རླབས་ནི་འབྱུང་བར་བྱས་པ་ནི། །རྒྱ་ཆེན་གསེར་གྱི་སྣོད་རྣམས་ལ་ནི་དེ་དག་གིས། །ཆང་ནི་བླུགས་ཤིང་འདུག་པ་
ཉིད་དུ་གནས་པར་གྱུར། །དེར་ཡང་བྱ་བ་གཉིས་སོང་བ་ལ་ཤིང་དེ་ལས་བབས་ནས་ཤང་ཤང་དེའུ་གཉིས་རོ་མྱང་བས་བཀུག་བཞིན་པའི་རྙི་དང་ལྡན་པ། མལ་དེ་ལ་འབྲེལ་ནས་ཆང་དེ་མྱང་ཞིང་འདུག་པར་གྱུར་ཏོ། །མྱངས་ནས་ཀྱང་མྱོས་པའི་དབང་གིས་དྲན་པ་རྣམ་པར་རྨོངས་པས་ཀུན་ནས་
འཕུར་མི་ནུས་ཤིང་དེ་ཉིད་དུ་ཉལ་བར་གྱུར་ཏོ། །དེ་ནས་སྣ་ཚོགས་གོས་ཅན་མལ་གྱི་དབུས་སུ་ཉལ་བཞིན་པ། །ཅུང་ཟད་བཙུམས་པར་བྱས་པའི་མིག་ཅན་ཀུན་ནས་བཏུད་པའི་གདོང་། །མྱུར་བར་འོངས་ནས་བྱ་འཛིན་པ་ལ་མཁས་པ་དེ་དག་གིས། །རིམ་གྱིས་རྟོགས་པར་བྱས་ནས་བྱ་ནི་གཉིས་

པོ་བཟུང་བར་གྱུར། །ཡུལ་གྱི་བདེ་བ་ལ་ནི་ངེས་འབྲེལ་ཡིད་ལྡན་པའི། །རང་གི་ཕན་དང་གནོད་པ་འཇུག་པ་རྟོག་བྱེད་པའི། །མོད་ལ་ལྕི་བའི་སྡུག་བསྔལ་རྗེས་སུ་འབྲེལ་བའི་རྒྱུ། །བག་མེད་ཅི་ཞིག་བཞིན་དུ་འབྱུང་བར་མི་འགྱུར་རོ། །དེ་ནས་ཤང་ཤང་དེའུ་དེ་དག་
རིམ་གྱིས་ཆང་འཐུངས་པའི་མྱོས་པ་དང་བྲལ་ནས་བྱ་ཤོར་བ་གཉིས་པོ་དེ་ལ་སྨྲས་པར་གྱུར་པ། བཞིན་བཟངས་དག་ཁྱེད་ཅག་གིས་བདག་ཅག་དགོས་པ་ཅི་ཞིག་གི་ཕྱིར་འཛིན་པ་སྨྲ་བར་གྱིས་ཤིག །བྱ་ཤོར་བ་དག་གིས་ཀྱང་གཏམ་དེ་སྨྲས་པར་གྱུར་ཏོ། །དེ་ནས་ཤང་ཤང་དེའུ་གཅིག་གིས་
འདི་སྐད་ཅེས་སྨྲས་སོ། །བྱ་ཤང་ཤང་དེའུ་འདི་བཟུང་ནས་རེ་ཞིག་ཁྱེད་གཉིས་སྡོད་ཅིག །ཇི་སྲིད་དུ་བདག་གིས་སོ་དྷ་ཞེས་བྱ་བའི་སྨན་བཅུད་ཀྱིས་ལེན་གྱི་གཙོ་བོར་གྱུར་པ་ཡོད་པར་བྱ་ཡིས། །དེས་མར་བཙོ་བར་བྱས་ནས་རྒྱལ་པོའི་སྲས་དེ་ལ་སྦྱིན་པར་བྱ་སྟེ། དེ་འཐུངས་པས་ཀྱང་འདི་ཤིན་
ཏུ་སྐྱེས་བུའི་ཚེ་དང་ལྡན་པ་དང་། གཟུགས་དང་སྟོབས་ཀྱིས་ཕ་རོལ་རྣམ་པར་གནོན་པ་འབྱུང་བར་འགྱུར་རོ་ཞེས་ཟེར་རོ། །རྒྱལ་པོ་དེ་ཡང་དགེ་བ་ལ་སྦྱར་བར་འགྱུར་རོ་ཞེས་ཁས་བླངས་པས། བྱ་ཤོར་བ་དེ་དག་གི་ནང་ནས་ཤང་ཤང་དེའུ་ཅིག་སོང་ནས་སྨན་དེ་བླངས་ཏེ་མྱུར་བར་འོངས་ཏེ་བྱ་ཤོར་བ་དེ་
དག་ལ་གཏད་ཅིང་འདུག་གོ། །དེ་ནས་ཀྱང་བྱ་དེ་དག་དེར་འདི་སྐད་སྨྲས་ནས་དེ་སྨན་དེ་བླངས་ནས་རྒྱལ་པོའི་གན་དུ་ཉེ་བར་འོངས་ཏེ་ཤང་ཤང་དེའུའི་ཕྲིན་དེ་སྨྲས་ནས་སྨན་དེ་སྨན་པ་རྣམས་ལ་གཏད་ཅིང་འདུག་པར་གྱུར་ཏོ། །རྒྱལ་པོ་དེས་ཀྱང་ནོར་སྦྱིན་པ་ཆེན་པོས་བྱ་ཤོར་བ་དེ་དག་ཡང་དག་པར་མགུ་བར་
མཛད་དོ། །དེ་ནས་འབྱུང་པོའི་རིག་པ་ལ་ཡོངས་སུ་མཐོང་བ་ཉེ་བར་སྤྱོད་པ་ཆེན་པོས་སྨན་པ་དེ་རྣམས་ཀྱིས་བཅུད་ཀྱིས་ལེན་ཏེ། ཀུན་ནས་བཙོས་ཏེ་བྱང་ཆུབ་སེམས་དཔའ་ལ་དངུལ་གྱི་སྣོད་དུ་བཞག་ནས་བཏུང་བའི་ཕྱིར་ཉེ་བར་ཕུལ་བར་གྱུར་ཏོ། །གྲོང་ཁྱེར་དེ་དང་ཤིན་ཏུ་རིང་བ་མ་ཡིན་པར་དབུགས་
བྱུང་བའི་རི་དགས་ཀྱི་ཚོགས་ཀྱིས་ལྷག་པར་གནས་པའི་ཤིང་ལོའི་ཁང་པའི་ཉེ་འཁོར་དང་ལྡན་པ་དང་། ཤིང་དུ་མའི་མེ་ཏོག་རྣམས་ཀྱིས་དྲི་ཞིམ་པར་བྱས་པའི་རླུང་གིས་རྣམ་པར་བསྐྱོད་པའི་པདྨའི་ཚོགས་དང་ལྡན་པ་དང་། དཀའ་ཐུབ་ཀྱི་ནོར་ཅན་གྱི་སྐྱེ་བོས་ཁྱབ་པའི་དཀའ་ཐུབ་ཀྱི་ནགས་

ཆེན་པོ་ཡོད་དེ། དེར་ཡང་རང་སངས་རྒྱས་སོ་སོར་གནས་པ་དེས་ལྷའི་མིག་གིས་བྱང་ཆུབ་སེམས་དཔའ་མཐོང་སྟེ། གཞོན་ནུ་ཕན་འདོད་པ་འདི་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་འདོད་པ་སྟེ། བདག་ལ་ཡང་ནད་འདི་ཉིད་ཡོད་དེ་བས་ན་བཅུད་ཀྱིས་ལེན་གྱིས་བཙོས་པའི་མར་འདི་ལ་
བསླང་བར་བྱའོ་སྙམ་མོ། །དེས་ཀྱང་ཁོ་བོ་ཅག་ལ་དེ་རབ་ཏུ་བྱིན་ནས་ནད་དེ་ལས་གྲོལ་བར་འགྱུར་རོ། །སྦྱིན་པའི་འབྲས་བུ་ཆེན་པོ་ཡང་སྦྱོར་བར་འགྱུར་ཞེས་རྣམ་པར་བསམས་ནས། བུད་མེད་མཆོག་གི་མིག་གི་འབྲས་བུ་ལྟར་ནག་པའི། །ལྷུང་བཟེད་བཟུང་ནས་དེ་ནི་ཆོས་གོས་རྣམ་འཕྱང་
བ། །ཤུགས་ཀྱིས་མཁའ་ལས་ཀུན་ནས་བསམས་ཏེ་མཁའ་ལྡིང་ལྟར། །ས་སྐྱོང་ཁྱིམ་ནི་མཛེས་པར་རྣམ་པར་བཞུགས་པར་གྱུར། །ས་སྐྱོང་བ་ཡི་ཁྱིམ་དེར་རབ་ཏུ་ཞུགས་ནས་ནི། །ཆེ་བ་ཉིད་ཀྱིས་སྒོ་སྲུང་རྣམས་ཀྱིས་མ་མཐོང་བར། །ཞི་བ་ཉེ་བར་འོངས་ནས་འགྲོ་ལ་ཕན་འདོད་པ། །བྱང་
ཆུབ་ཏུ་ནི་རྩེ་གཅིག་ཕན་འདོད་ལ་ནི་གསུངས། །དཔག་མེད་འོད་ཅན་ས་སྐྱོང་སྲས་ལགས་བདག་ལ་ཡང་། །ནད་ནི་ཆེན་པོ་དོན་མིན་ལུས་ནི་སྐམས་བྱེད་པ། །འདི་ནི་རབ་ཏུ་དང་བས་བཞུ་བའི་སེམས་ཀྱིས་ནི། །མར་དེ་ལས་ནི་བདག་ཅག་ལ་ཡང་རབ་སྦྱིན་མཛོད། །དེ་ནས་ཐུབ་པ་དེ་ལ་དེ་ནི་
དང་བ་ལྡན། །ནད་དེ་གུས་པའི་དབང་གིས་བསམ་པར་མ་བྱས་ཤིང་། །དགའ་བས་ས་ལ་པུས་མོ་གཉིས་ནི་བཙུགས་བྱས་ནས། །མར་དེ་བདག་ཉིད་ཀྱིས་ནི་གུས་བཅས་ཕུལ་བར་གྱུར། །ཇི་ལྟ་ཇི་ལྟར་འདིས་ནི་དྲི་མེད་འདི་འཐུངས་པ། །རིམ་གྱི་རིམ་གྱིས་སྙིང་རྗེ་ཅན་ནི་ཐུབ་པ་ཆེ། །རྟག་པར་
རྟག་ཏུ་སྤོབས་པ་རྙེད་པ་ཕན་འདོད་ཅན། །དེ་ལྟ་དེ་ལྟར་འཇིགས་པ་བཞིན་དུ་ནད་ཀྱིས་བཏང་། །དེ་ནས་ནད་དང་རྣམ་པར་བྲལ་བའི་བྱང་ཆུབ་སེམས་དཔའ་དེ་མཐོང་ནས་དེ་ལ་ཉིས་འགྱུར་གྱི་དང་བ་སྐྱེས་པའི་ཕྱིར། རལ་གྲི་ཕྱིས་ལྟར་སྔོ་བའི་ནམ་མཁའི་དཀྱིལ་དུ་སོང་ནས་རང་སངས་རྒྱས། །ཉིན་
མོ་བྱེད་པ་འོད་ཟེར་འབར་བ་ཀུན་ནས་རེག་པ་སྟེ། །མེ་ནི་འོད་རྣམས་འབྱུང་བ་སྐད་ཅིག་གིས་ནི་སྤྲུལ་པ་སྟེ། །བར་ཆད་མེད་པར་དཀར་བའི་ནོར་བུ་ཆག་ལྟར་དྲི་མ་མེད། །ཆུ་ནི་དཔུང་པས་ཆུ་གཏེར་བཞིན་དུ་སྤྲུལ་པ་ཉིད་དུ་གྱུར། །དེ་ནས་བདག་ཉིད་ཆེན་པོ་དེས་རབ་ཏུ་དགའ་བའི་ཡིད་ཀྱིས་བྱང་ཆུབ་སེམས་

དཔའ་མདུན་དུ་སོང་བའི་སྐྱེ་བོས་ཕྱག་བཙལ་བར་གྱུར་ཅིང་དཀའ་ཐུབ་ཀྱི་གནས་དེ་ཉིད་དུ་ལོག་པར་གྱུར་ཏོ། །དགའ་བའི་ཡིད་དང་ལྡན་པའི་ཕན་འདོད་གདན་ལ་འདུག་སྟེ་གུས་པ་དང་བཅས་པར་ཉེ་བར་གནས་པའི་སྐྱེ་བོའི་ཚོགས་དེ་ལ་ཕན་པ་ཚོལ་ཞིང་ཆོས་ལས་མ་འདའ་བའི་
གཏམ་འདི་ལྟར་བྱས་པར་གྱུར་ཏོ། །རང་སངས་རྒྱས་ནི་དེ་ལ་ཡང་། །གུས་བཅས་མར་ནི་ཕུལ་བ་ལ། །བདག་གི་ལུས་ནི་སྐད་ཅིག་དེས། །སྡུག་བསྔལ་མེད་ཅིང་ནད་མེད་གྱུར། །སྦྱིན་པའི་ཞིང་གི་མེ་ཏོག་དང་། །འདི་ལ་མ་འོངས་འབྲས་བུ་ཆེ། །དེ་ལྟར་ཁྱེད་རྣམས་ཀྱིས་ཤེས་ནས། །
སེར་སྣ་འབྱུང་དོར་འབྱུང་གྱུར་ཅིག། །དོན་གཉེར་ཉིད་ཀྱིས་བདག་ཅག་ཆུང་བར་གྱུར་ཏེ་འདི་ལ་ཤིན་ཏུ་དགེ་བ་འབྱུང་གྱུར་ཅིག །ངོ་ཚ་བ་ཡི་བུད་མེད་བདག་ཅག་གིས་ནི་བཏང་སྟེ་གྲགས་པའི་བུད་མེད་བསྟེན་ཅིང་ཡུན་རིང་དུ། །འདི་ནི་ཡང་དག་བསམས་བཞིན་རང་གི་ངལ་བ་བྲལ་བ་གང་
རྣམས་སྦྱིན་པ་པོར་འོངས་པ། །གྲོགས་པོ་དང་ནི་དོན་གཉེར་ཕན་པ་ཚོལ་བ་དེ་རྣམས་ཀྱིས་མཚུངས་གཞན་ནི་སུ་ཞིག་ཡོད། །གྲོགས་པོའི་རང་བཞིན་སྐར་མའི་བདག་པོ་ལྟར་དཀར་མེ་ཏོག་རྣམས་ནི་གང་ཞིག་བསལ་བྱས་ན། །ཆེ་བ་ཞིམ་པའི་རོ་ནི་རྣམ་པར་སྨིན་པ་རྙེད་པར་བླ་བ་དགེ་བའི་འབྲས་
བུ་སྟེ། །གང་ཞིག་སྦྱིན་པའི་བདག་པོ་ཡི་ནི་སྙིང་ལ་བདེ་བ་བསྟོད་པའི་གྲིབ་མས་བྱེད་པ་སྟེ། །སློང་བ་པོ་ཡི་ཞིང་དེ་རབ་ཏུ་སྦྱིན་པའི་ཆུ་ཆེན་པོས་ནི་སུ་ཞིག་སྦེངས་མི་བྱེད། །གང་ཞིག་སྦྱིན་པའི་ཕ་རོལ་ཕྱིན་པས་ས་ལ་བྱང་ཆུབ་སེམས། །སེམས་ཅན་དོན་དུ་བརྩོན་པའི་བློ་ཅན་རིམ་བཞིན་སྦྱང་
བར་བྱེད། །གནས་ལ་དོན་གཉེར་བཅོམ་ལྡན་འདས་དེ་དོན་དམ་མཁྱེན་པ་ནི། །དགེ་བའི་བཤེས་གཉེན་ཞེས་བྱ་དེ་ནི་བདེ་བར་གཤེགས་པས་གསུངས། །བྱང་ཆུབ་སེམས་དཔའི་ཚོགས་དེ་ལ་ལེགས་སོ་ལེགས་སོ་ཞེས་བྱ་བ་མངོན་པར་བསྒྲུབ་པར་བྱས་ནས་སྐྱེ་བོའི་ཚོགས་དེ་སྦྱིན་པ་ལ་རྩེ་གཅིག་
པ་བྱུང་བར་གྱུར་ཏོ། །དེ་ལྟར་ན་བདག་ཉིད་ཀྱི་སྡུག་བསྔལ་ལ་ཡང་མ་བརྩིས་ཤིང་། བཅོམ་ལྡན་འདས་དེ་བྱང་ཆུབ་སེམས་དཔར་གྱུར་པ་ན་གཞན་དོན་ཉིད་མཛད་དོ་ཞེས་བྱ་བ་རྣམ་པར་བསམས་ནས་སངས་རྒྱས་བཅོམ་ལྡན་འདས་ལ་རྟག་ཏུ་དད་པ་དང་ལྡན་པ་རྣམས་ཀྱིས་གནས་པར་བྱ་ཞེས་བྱ་བའོ། །

ཕན་འདོད་ཀྱི་སྐྱེས་པའི་རབས་ཏེ་སྐྱེས་པའི་རབས་བཅུ་པའོ། །སྡོམ་ལ། རབ་སྣང་དེད་དཔོན་ལེགས་བཤད་ནི། །དོན་གཉེར་རི་བོང་མགོ་བོ་གཏོང་། །ནུ་སྦྱིན་ཚོང་དཔོན་ཉ་དང་ཡང་། །སྡོམ་ཆངས་སྦྱིན་དེ་བཞིན་མར་སྦྱིན།། །།སྙིང་རྗེས་རྗེས་སུ་འབྲེལ་པ་གཞན་དོན་དུ། །སྲོག་
ནི་གཏོང་ཞིང་རྩ་བཞིན་འདོད་པ་སྟེ། །སྲ་བའི་ཡིད་ཅན་རྣམས་ཀྱི་ཡང་ནི་ཡིད། །བདག་ཉིད་ཆེ་རྣམས་འཇམ་པ་ཉིད་དུ་ཁྱེར། །འདི་ལྟར་རྗེས་སུ་ཐོས་ཏེ། ཆུ་བཏང་བ་ཉིད་ཀྱིས་ཟླ་ཚེས་ཞུ་བར་གྱུར་པ་ལྟར་འཇམ་པའི་རླུང་གིས་བསྐུལ་བའི་ཆུའི་རླབས་ཀྱི་ཚོགས་དང་ལྡན་པའི་ངུར་པ་ཕོ་མོ་གཉིས་
ཀྱིས་ཉེ་བར་མཛེས་པར་བྱས་པའི་འགྲམ་དང་ལྡན་པའི་བཱ་རཱ་ཎ་སཱི་ཞེས་བྱ་བའི་ཆུ་བོས་མངོན་པར་བརྒྱན་པར་བྱས་པའི་རི་བོའི་བར་ན། རྣམ་པ་སྣ་ཚོགས་པའི་ཤིང་རྣམས་ཀྱི་གྲིབ་མས་ཆུ་རྟེན་གྱི་ཆུ་བསྒྲིབས་པར་བྱས་པ་རྩྭ་སྔོན་པོས་སའི་ཆ་སྔོན་པོར་བྱས་པའི་འབྲོག་དགོན་པ་འགའ་ཞིག་ན། བྱང་
ཆུབ་སེམས་དཔའ་རི་དགས་ཀྱི་ཚོགས་ཀྱི་བདག་པོ་བྱུང་བར་གྱུར་ཏོ། །འོ་མའི་རྒྱ་མཚོའི་དབུ་བ་ལྟར་ནི་དཀར་ཞིང་ལྟོ་བ་སྲབ། །རྒྱབ་ཀྱང་བུང་བ་རྣམས་ཀྱི་ཚོགས་ལྟར་ནག་པར་གྱུར་པ་ནི། །གང་ཞིག་ནགས་ཀྱི་མཐའ་ཡི་ས་ལ་ཟུར་མིག་གིས་ལྟ་འདྲ་བ་ཡི། །སྒེག་པའི་མིག་འབྲས་འདྲེས་ཤིང་སྤྲོ་བའི་
མིག་རྫིས་མདུན་ནི་མཛེས། །དེ་ལྟར་གྱུར་པའི་བྱང་ཆུབ་སེམས་དཔའ་དེའི་ཅུང་ཟད་གཟུགས་དང་མདངས་དང་ཚད་རྗེས་སུ་འདྲ་བའི་ལྷ་སྦྱིན་དེ་དང་ཉེ་བར་སྤྱོད་པ་ནི་ཤིན་ཏུ་ཆེ་བ་མ་ཡིན་པའི་རི་དགས་ཀྱི་ཚོགས་ལ་བདག་པོ་ཉིད་བྱས་པར་གྱུར་ཏོ། །དེ་དག་བདག་པོ་དེ་དག་གིས། །རྩྭ་ནི་ཟ་ཞིང་སྐྱོང་
བྱས་པ། །དོགས་པ་རྣམས་བྲལ་དབུགས་ཕྱུང་བར། །རི་དགས་ཚོགས་དག་ལ་སྤྱོད་འགྱུར། །དེ་ནས་དུས་འགའ་ཞིག་ན་རི་དགས་ཤོར་བ་ལ་ཆགས་ཤིང་གོམས་པར་བྱས་པ་ཚངས་པས་སྦྱིན་ཞེས་བྱ་བའི་རྒྱལ་པོ་བཱ་རཱ་ཎ་སཱིར་ངེས་པར་འབྱུང་སྟེ། །འཁྱོག་ཅིང་བྲང་གི་མཐིལ་ལ་གཞུ་རྣམ་
པར་ཞུགས་པར་བྱས་པ། རྟ་མཆོག་ལ་ཞོན་པ་དང་རང་དང་འདྲ་བའི་སྐྱེ་བོས་རྗེས་སུ་འབྲེང་བ། རྟ་རྣམས་ཀྱི་རྨིག་པ་ལས་ཀུན་ནས་འབྱུང་བའི་རྡུལ་གྱིས་ཀུན་ནས་དྲི་མ་ཅན་དུ་སོང་བའི་མིག་གི་རྫི་མ་ཉིན་མོ་བྱེད་པས་ཀུན་ནས་གདུངས་པའི་རྡུལ་གྱི་ཐིགས་པ་སྐྱེས་པས་དཔྲལ་བའི་ཕྱོགས་ཀུན་

ནས་མནན་པ། དམག་ཚོགས་ཀྱི་སྒྲས་ཀུན་ནས་སྐྲག་པས་སྟེང་དུ་འཕུར་བའི་རྨ་བྱ་དང་ཏིཏྟི་རི་དང་ཙ་ཀོ་རའི་ཚོགས་དང་ཁྱིམ་བྱ་ཅན་དང་། མི་མཉམ་པ་དང་མཐོན་པོ་དང་དམའ་བའི་སའི་ཆ་དང་ལྡན་པ་དང་། འགའ་ཞིག་ཏུ་རྐང་ཐང་རྣམས་ཀྱི་རྐང་པ་དང་རི་དགས་རྣམས་ཀྱི་
རྨིག་པ་རྣམ་པར་བཀོད་པས་ངོ་མཚར་བ་དང་སྤྲོས་པ་དང་ཉའི་ཚོགས་ཀྱིས་རྣམ་པར་བསྟེན་པའི་ཆུ་ཀླུང་གི་འགྲམ་གྱི་ཆུ་དང་ལྡན་པ་དང་། མྱོས་པའི་གླང་པོའི་བདག་པོ་དཔྲལ་འབུར་བྲད་པས་ཡང་དག་པར་ཞུགས་པའི་སྨྱོན་ཆུས་དྲི་དང་བཅས་པ་དང་། ཤིང་གི་སྡོང་བུ་དང་ཉེ་བར་འཁོར་བཞིན་པ་སྦྲང་རྩིའི་
བྱེད་པའི་ཚོགས་དང་ལྡན་པ་དང་། འགྲམ་གྱི་ཤིང་རྣམས་ཀྱི་ཡལ་ག་ལ་འབྱར་བ་སྐམས་པའི་ཤ་མོ་དང་མིག་གི་འབྲས་བུ་དང་། བྱཱ་ཀ་རཎྜ་དང་། ངུར་སྐྱའི་མཇུག་སྒྲོ་དང་ཀུན་ནས་འདྲེས་པའི་ཀ་ཤ་དང་། རྩྭ་ཀུ་ཤ་དང་། སྨྱུག་མའི་སྡོང་པོ་དང་། ལོ་མའི་ཚོགས་ཀྱིས་མཚོན་པར་བྱེད་བཞིན་
པ་ཡུན་རིང་པོར་འདས་པའི་རི་བོ་རྣམས་དང་ཆུ་ཀླུང་དང་ལྡན་པ་དང་། རྫིང་བུ་རྣམས་ཀྱི་འདབ་ལ་ཁྱད་པར་དུ་བྱིང་བའི་སྟག་གི་རྗེས་ཅན་དང་། ཨུ་དུམ་བཱ་ར་སྨིན་པའི་དྲིས་དྲི་ཞིམ་པར་བྱས་པའི་ཚང་ཚིང་དང་ལྡན་པ་དང་། རླུང་གིས་བསྐྱོད་པའི་བ་དན་སྲབ་པ་རྣམས་ལྟར་འཁྱོག་པའི་ལྟོ་འཕྱེ་རྣམས་
འགྲོ་བ་རྣམས་ཀྱིས་མཚོན་པར་བྱས་པའི་ལམ་གྱི་རྡུལ་དང་ལྡན་པ་དང་། ནགས་ཀྱི་ནང་རྣམས་སུ་རྣམ་པར་མཐོང་ཞིང་ཅུང་ཟད་འདའ་བར་བྱས་ནས། རི་དགས་ཀྱི་ཚོགས་གཉིས་དེ་དབུགས་འབྱིན་ཞིང་གནས་པ་དམག་ཚོགས་ཀྱིས་ཀུན་ནས་བསྐོར་ཞིང་འདུག་གོ། །དེ་ནས་དམག་གི་གཞུ་ནི་
བདུངས་པ་རྣམས་མཐོང་ནས། །བསྐྱོད་པའི་གཡེར་ཁ་ལས་ནི་བྱུང་བའི་སྒྲ་ལྡན་པ། །སྐྱབས་མེད་ཚོགས་པ་རྣམས་ནི་ཀུན་ནས་འབྱེར་བ་ཅན། །འཇིགས་པའི་དབང་གིས་རི་དགས་རྣམས་ནི་ཀུན་ན