Luận tạng Tây Tạng (Tengyur) — Tập 165

་ཉིད་ཀྱིས་ཀྱང་ཕྱག་དར་ཏེ་ནད་པའི་གཡོག་བྱས་པས་དགེ་འདུན་གྱིས་ཀྱང་སྙིང་རྗེ་བའི་ཕྱིར་གཡོག་བྱ་བར་རབ་ཏུ་རིགས་སོ། །དགེ་འདུན་གྱི་སྨན་ལ་ནད་པ་འབའ་ཞིག་གིས་སྤྱད་པར་བརྟགས་པའོ། །དགེ་འདུན་གྱི་སྤྱིའི་སྨན་ལ་
ནད་པས་ནི་སྤྱད་ཅིང་བཟའ་བར་རིགས་ཏེ་བརྟགས་པའོ། །དེ་ནི་སྔོན་མི་ནའང་དགེ་འདུན་ཐམས་ཅད་ལ་དགེ་སློང་སྨན་གྱི་རུབ་མ་བས་སྨན་ཅི་དགོས་ཞེས་ནང་གཅིག་བཞིན་དུ་འབྲིམ་པ་ལས་དྲུག་སྡེས་གྲོགས་ཅིག་ན་བའི་ཕྱིར་མི་ན་བས་ཀྱང་སྨན་མང་དུ་བླངས་ནས་བསྒྱུར་ཅིང་བཙོངས་
ཏེ་སྤྱད་པས་ན་ནད་པ་འབའ་ཞིག་གིས་སྤྱད་པར་བརྟགས་པའོ་ཞེས་བཅས། དེ་མེད་ན་གཡོག་གིས་བསླངས། དགེ་འདུན་སྤྱིའི་སྨན་མེད་ན་ནད་གཡོག་སུ་བྱེད་པས་བསླངས་ཤིང་བཙལ་ཏེ་ནད་པ་གསོའོ། །མ་རྙེད་ན་དགེ་འདུན་གྱིས་སྦྱིན། ནད་གཡོག་གིས་སྨན་བསླང་དུ་མ་རྙེད་
ན་དགེ་འདུན་གྱི་དཀོར་ལས་ཟོང་ཕོག་སྟེ། ནད་གཡོག་ཚོལ་དུ་གཞུག །མེད་ན་སངས་རྒྱས་ཀྱི་སྐུ་ལ་གསོལ་བ་མན་ཆད་ཀྱང་ངོ་། །དགེ་འདུན་གྱི་དཀོར་ལས་སྨན་གྱི་རིན་སྦྱིན་དུའང་མེད་ན་སངས་རྒྱས་ཀྱི་སྐུ་ལ་གསོལ་བའི་རྒྱན་དུ་གཏོགས་པ་མན་ཆད་དཀོར་ལས་ཀྱང་སྦྱིན། སྐོམ་
དང་གདུགས་གཟུགས་པ་ལ་སོགས་པ་མཆོད་པ་དེའི་ཕྱིར་དགེ་འདུན་གྱི་ལས་བྱ། ལྟག་མ་ལྟར་སྨན་བཙལ་ཏེ་གསོས་པས་མ་སོས་ཤིང་ནད་པ་ན་རེ་བསོད་ནམས་ཤིག་བསྐྱེད་ན་ཐིག་གི་བ་སྙམ་ཞེས་ཟེར་ན། དཀོན་མཆོག་གསུམ་ལ་གདུགས་གཟུགས་པ་དང་དགེ་འདུན་ལ་སྐོམ་བྲིམ་
པ་ལ་སོགས་པའི་ཡོ་བྱད་དགེ་འདུན་གྱི་དཀོར་ལས་ཕྱུང་སྟེ་སྤྱད་དོ། །དེའི་མེད་ན་སངས་རྒྱས་ཀྱི་ལས་སོ་ལྟག་མ་ལྟར་དགེ་འདུན་གྱི་དཀོར་མེད་ན་སངས་རྒྱས་ཀྱི་དཀོར་ལས་ཀྱང་ཕྱུང་སྟེ་སྤྱད་དོ། །དེ་དག་གི་བླངས་པ་ལས་མ་ཤི་ཞིང་འབྱོར་ན་སོབས་ཤིག །ལྟག་མ་རྣམས་ལྟར་སྨན་དང་

བསོད་ནམས་བསྐྱེད་དེ་ནད་པ་དེ་སོས་ནས་ནད་པས་ནད་གཡོག་ལ་དཀོན་མཆོག་དང་དགེ་འདུན་གྱི་དཀོར་ལས་བདག་གི་ཕྱིར་ཇི་ཙམ་གོད་ཅེས་སྨྲས་ལ་བདག་གིས་འབྱོར་པ་ཅི་གོད་པའི་སྐྱིན་པ་སོབས་ཤིག །གཡོག་གིས་གཡོག་མི་བྱ་བར་མི་བྱ། དགེ་སློང་ནད་པའི་གཡོག་སུ་བྱེད་
པས་ནད་པ་ལ་ལེ་ལོ་དང་གཡེལ་བར་མི་བྱེད་པའི་ནད་གཡོག་གིས་གུས་ཤིང་ནན་ཏན་དུ་བྱ། དོན་དང་ཆོས་ཀྱི་ངག་མི་བཅག །དོན་དང་ཞེས་པ་ནི་དགེ་སློང་ནད་པ་ན་རེ་སྨན་དང་ཁ་ཟས་འདི་ལྟ་བུ་ཞིག་འདོད་དེ་བྱིན་ན་ནི་སོས་སོ་ཞེས་ཟེར་བ་དང་། ཆོས་ཀྱི་ངག་མི་བཅག་ཅེས་པ་ནི་ཡི་
གེ་ཀླག་པ་ལ་སོགས་པ་བསོད་ནམས་འདི་ལྟ་བུ་ཞིག་སྐྱེད་ཅིག་ཅེས་ཟེར་ནའང་ནད་གཡོག་གིས་ངག་མི་བཅག་པར་སྦྱར་ཞིང་བྱ། ཆགས་པའི་དངོས་པོ་སློང་ན་མི་དགག །ནད་པ་ཁོ་བདག་གི་ནོར་བཟང་པོ་སྡུག་གུ་ཞིག་ལ་ཆགས་ཏེ་ག་རེ་ཞེས་ཟེར་ན་ནད་གཡོག་གིས་ཕྱུང་སྟེ་བསྟན་ཅིང་སྦྱིན་
ནོ། །མི་བཤད་པར་མི་བྱ། ནད་གཡོག་གིས་ནད་པ་ལ་ཚད་མེད་པ་བཞི་དང་བསམ་གཏན་བཞི་དང་འཕགས་པའི་ལམ་ཡན་ལག་བརྒྱད་ལ་སོགས་པའི་ཆོས་བཤད་དེ་རྟག་ཏུ་དྲན་པར་གྱིས་ཤིག་ཅེས་བསྒོ། ནད་པས་དེའི་ངག་མི་བཅག །ནད་གཡོག་གིས་ཆོས་བཤད་པ་ལ་ནད་པས་
ཀྱང་བསྒོ་བ་བཞིན་དུ་མཉན་ཅིང་དྲན་པར་བྱའི་ངག་མི་བཅག་གོ། །ཤི་དོགས་ན་དེས་དགེ་འདུན་གྱི་མལ་སྟན་ལས་ཐེག་ལ་གང་ཟག་གི་ལ་ཞོག་ཤིག །དགེ་སློང་ནད་པ་དེ་ཚབས་ཆེ་སྟེ་ཤིར་དོགས་ན་དགེ་འདུན་གྱི་མལ་སྟན་གྱི་སྟེང་ནས་ཐེག་ལ་གང་ཟག་གི་མལ་སྟན་བཏིང་སྟེ་དེའི་སྟེང་དུ་སྤོ། །
ཇི་ལྟར་སྤོ་བའི་ཐབས་ནི་འོག་ནས་འཆད། བྱུག་པ་དང་བཀྲུ་བའི་གཏམ་གྱི་སྔོན་དུ་སྒྱུ་ཡིས་སོ། །ནད་པ་དགེ་འདུན་གྱི་མལ་སྟན་ལས་ཐེག་ལ་གང་ཟག་གི་མལ་སྟན་ལ་སྤོ་བ་ནི་ཁྱོད་ཤིར་ཉེར་མལ་འཕོས་ཞེས་མི་བྱའི་སྨན་དཔྱད་དམ་ལུས་ལ་བཀྲུ་བའམ་བྱུག་པའི་ཕྱིར་སྤོ་བ་སྐད་དུ་བྱ་
སྟེ་གང་ཟག་གི་མལ་སྟན་ལ་བཞག །དེ་ལྟ་བུར་ཆད་ན་ནན་ཏན་དུའོ། །ནད་པ་ཤིར་ཉེ་སྟེ་མི་འཚོ་བར་གྱུར་ན་ཡང་ནད་གཡོག་གིས་ལེ་ལོ་མི་བྱ་བར་ནད་གཡོག་གིས་ནན་ཏན་དུ་བསྲུང་ཞིང་བལྟ། ཤི་བའི་གོས་མ་རུང་བ་བྱས་ན་དེས་བཀྲུ་དགོས་སོ། །ནད་པ་ཤི་བ་དེས་མལ་སྟན་དང་

གོས་ལ་སོགས་པ་ངན་སྐྱུགས་དང་ཁ་ཟས་ལ་སོགས་པས་རེག་ན་ནད་གཡོག་སུ་བྱེད་བྱེད་པས་བཀྲུའོ། །དགེ་འདུན་འདུ་བར་གནས་བརྟན་ཐོག་མར་འགྲོའོ། །དགེ་འདུན་གང་དུ་འདུ་ཞིང་འདོང་བར་ལས་བརྒྱ་རྩ་གཅིག་པ་ལྟ་བུ་གནས་བརྟན་ནས་ཞུ་ཞིང་བྱ་དགོས་
པ་དང་འཁོར་དང་སློབ་མ་སྟོན་ཅིང་བསྐྱང་བ་ལ་སོགས་པ་བྱ་དགོས་ཏེ་མེད་དུ་མི་རུང་བས་ན་འདོང་བའི་ཐོག་མ་ལ་གནས་བརྟན་འགྲོའོ། །འགྲོ་བའི་ཚེ་ལུས་པ་ལ་བསྡད། གྲོང་དུ་མཆོད་སྟོན་ལ་འདོང་སྟེ་གནས་བརྟན་སྔ་ལ་འཁོར་གསེར་བུ་དག་འཕྱི་སྟེ་ལུས་ན་གནས་བརྟན་གྱིས་
ཀྱང་ལུས་པ་ལ་བསྡད། དེ་དག་གིས་ཀྱང་དེ་ལའོ། །གྲོང་དུ་མཆོད་སྟོན་ལ་འདོང་བ་ལས་གནས་བརྟན་ནི་ཕྱི་འཁོར་སློབ་མ་དག་སྔ་སྟེ་ཕྱི་རོལ་དུ་འཐོན་ན་ཡང་སློབ་མ་དག་གིས་གནས་བརྟན་ལ་བསྡད་དོ། །མ་བྱུང་ན་མི་རིང་བར་སོང་སྟེའོ། །སཱུ་ཏྲ་ལྟག་མ་ལྟར་བསྡད་ཀྱང་གནས་
བརྟན་མ་བྱུང་ན་མི་རིང་བར་འཕགས་ཏེ་གནས་བརྟན་ལ་བསྡད། གྲོང་གི་དྲུང་དུ་ཡང་ངོ་། །སཱུ་ཏྲ་ལྟག་མ་ལྟར་མི་རིང་བར་འཕགས་ཏེ་བསྡད་ཀྱང་གནས་བརྟན་མ་བྱུང་ན་གང་དུ་འགྲོ་བའི་གྲོང་གི་དྲུང་དེར་ཀྱང་གནས་བརྟན་ལ་བསྡད་དོ། །དེ་སྟེ་དེར་འཇུག་ཁར་ཕྱིས་འོང་ན་ཡང་
ངོ་། །སཱུ་ཏྲ་ལྟག་མ་ལྟར་གྲོང་དྲུང་ན་སྡོད་སྡོད་པ་ལས་གནས་བརྟན་མ་བྱུང་སྟེ་ནང་དུ་འདོང་ཁར་གནས་བརྟན་ཕྱིས་འོངས་པ་སྣང་ན་ཡང་སླར་བསྡད་དོ། །དེ་སྡེ་སྤྱན་འདྲེན་པ་འོངས་ན་གནས་བརྟན་མ་འོངས་ཀྱི་བར་དུའོ་ཞེས་སྨྲོས་ཤིག །སཱུ་ཏྲ་ལྟག་མ་ལྟར་སླར་བསྡད་པ་ལས་ཁྱིམ་
བདག་སྤྱན་འདྲེན་པ་འོངས་ཏེ་ནང་དུ་གཤེགས་སུ་གསོལ་ཞེས་ཟེར་ན་ཡང་གནས་བརྟན་ཕྱིས་འོངས་པ་སྣང་གིས། གནས་བརྟན་མ་ཕྱིན་གྱི་བར་དུ་སྡོད་ཅིག་ཅེས་བྱ། ལག་ཆུ་གཏོང་བའི་ཚེ་ན་དེ་སྟེ་ཟས་བཟའ་བར་འཇུག་པའི་དུས་ཡོད་ན་ཡང་ངོ་། །སཱུ་ཏྲ་ལྟག་མ་རྣམས་ལྟར་སྡོད་
སྡོད་པ་ལས་གནས་བརྟན་མ་ཕྱིན་ཏེ་གྲོང་གི་ནང་དུ་ལྷགས་ནས་ལག་ཆུ་བཏང་སྟེ་གདུགས་ཚོད་ཡོད་ན་ཡང་གནས་བརྟན་ལ་བསྡད་དོ། །མེད་དེ་སྟན་ལ་འདུག་ན་བཞག་སྟེའོ། །གནས་བརྟན་ཀྱང་མ་འོངས་ལ་གདུགས་ཚོད་ཀྱང་མེད་ན་གནས་བརྟན་ལ་མི་བསྡད་པར་གནས་

བརྟན་གྱི་གོ་གཞག་ལ་འཁོད་དོ། །འདུག་པ་དང་ཕྱི་རོལ་དུའང་བརྟག །གནས་བརྟན་གྱིས་བདག་གི་འཁོར་ནང་དུ་འཁོད་པའི་ཚེ་དང་མ་འཁོད་པའི་མདུན་གྱི་ཕྱི་རོལ་ཚུན་ཆད་དུ་ཚུལ་བཅོས་པའི་ཕྱིར་བརྟག་ཅིང་བལྟའོ། །སློབ་མ་འཐོར་ཏམ་མ་འཐོར་ཀྱང་བརྟག །ཉེས་པར་
གྱོན་ཏམ་ཉེས་པར་དཀྲིས་ན་མཛེས་པའི་ཕྱིར་དེ་ལ་བརྡ་བྱ། སཱུ་ཏྲ་ལྟག་མ་ལྟར་བརྟགས་ཏེ་ཤམ་ཐབས་ཚུལ་མ་ཡིན་པར་ཉེས་པར་དཀྲིས་སམ་ཆོས་གོས་མི་སྡུག་པར་གྱོན་ན་གང་ཉེས་པར་གྱོན་པ་ལ་ལག་བརྡ་ལ་སོགས་པས་གོ་བར་བྱ་སྟེ་འཆོས་སུ་གཞུག །མ་གོ་ན་གན་ན་འདུག་
པ་ལ་བྱ། སཱུ་ཏྲ་ལྟག་མའི་བརྡས་མ་གོ་ན་གཅིག་ནས་གཅིག་ཏུ་སྦྲན་ཏེ་ཉེས་པར་གྱོན་པའི་གན་ན་སུ་འདུག་པས་འཆོས་སུ་གཞུག །མ་གྲུབ་ན་རང་གིས་ཀྱང་ངོ་། །སཱུ་ཏྲ་ལྟག་མ་གཉིས་ལྟར་བྱས་ཀྱང་མ་གྲུབ་ཅིང་མ་འཆོས་ན་གང་ཉེས་པར་གྱོན་པ་དེ་ཉིད་གནས་བརྟན་གྱི་གན་དུ་བཀུག་
ལ་བདག་ཉིད་ཀྱིས་བཅོས་དེ་ཉིད་ཀྱིས་གསར་བུ་དག་ལ་མ་འཆལ་ཅིག །གནས་བརྟན་གྱིས་འཁོར་དང་གསར་བུ་དག་ལ་བཞད་གད་དང་རྩེད་མོ་དང་ཅལ་ཅོལ་མི་བྱའི་བཙུན་པའི་ཚུལ་དུ་བརྗིད་བྱའོ། །གང་ན་དེ་དག་གཙུག་ལག་ཁང་ངམ་དགོན་པའི་ཚུལ་གྱིས་བསྒོ་ཞིང་བསྒོ་ཤིག །
དགོན་པ་ཞིག་ན་གནས་ནའང་གནས་བརྟན་གྱིས་བདག་གི་འཁོར་རྣམས་དགོན་པའི་ཚུལ་དུ་མི་རྒོད་དང་རྐུན་པོའི་དགྲ་ཐབས་དང་འདྲེ་གདོན་གནོད་པར་བྱེད་པའི་སར་མི་གནས་པ་ལ་སོགས་པ་སློབ་མ་དང་འཁོར་རྣམས་ལ་བསྟན་ཅིང་བསྒོའོ། །གཙུག་ལག་ཁང་ན་གནས་ནའང་འཁོར་
དང་སློབ་མ་རྣམས་ལ་ལྷ་ཁང་གི་འཁོར་གྱི་ཞལ་ཏ་དང་། བྱི་བདར་དང་ལྷ་རིས་ཀྱི་ཞིང་དང་དཀོར་ལ་སོགས་པའི་ལས་བསྟན་ཅིང་བསྒོ། འོངས་པས་བརྟགས་ཏེ་གནས་པ་རྣམས་ལ་མལ་སྟན་གྱི་ཕྱིར་བསྒོ། གུད་ནས་འཁོར་དང་བཅས་པའི་དགེ་སློང་དག་ཅིག་འོངས་ན་འོངས་
པ་དེའི་གནས་བརྟན་གྱིས་བདག་གི་འཁོར་མི་དུ་ཡོད་པ་དང་། མལ་ཆ་དང་གནས་ཁང་ཅི་དགོས་པ་བརྟག་སྟེ་སྔ་ནས་འཁོད་པའི་དགེ་སྐོས་དང་མལ་ཆ་རྫི་ལ་འདི་སྙེད་ཅིག་དགོས་སོ་ཞེས་བསྒོ། འགྲོ་བའི་ས་ན། འཁོར་དང་བཅས་པའི་དགེ་སློང་དག་ཅིག་གུད་དུ་འདོང་ན་ལས་འདི་

ལ་བརྟག་ཅིང་བྱ་སྟེ། ཕྱོགས་དང་། ཡུལ་ཕྱོགས་གང་དུ་འགྲོ་བའི་ལམ་དང་ས་ཕྱོགས་མ་ནོར་བར་བྱ་བ་དང་། ལམ་གྲོགས་དང་། ལམ་ན་མི་འཇིགས་པར་བྱ་བའི་ཕྱིར་ཚོང་བ་ལྟ་བུ་ལ་སོགས་པ་ལམ་གྲོགས་བཟང་པོ་དང་། གནས་དང་། གང་དུ་འདོང་
བའི་གནས་དེ་བདེ་འམ་མི་བདེ་ཡ་ཀར་ཇི་ལྟ་བུ་ཡོད་པ་སྔ་ནས་དྲི་ཞིང་ཤིས་པར་བྱ་བ་དང་། མལ་སྟན་དང་། གནས་དེ་ན་མལ་སྟན་དང་འཚོ་བའི་ཡོ་བྱད་འབྱོར་ཏམ་མི་འབྱོར་པ་བརྟག་པ་དང་། གྲོགས་དག་ན་བ་ལ་མི་འདོར་རམ་ཞེས་བརྟག་སྟེ་འགྲོ། ཚུལ་འགྲོགས་ཏེ་འདོང་བའི་དགེ་
སློང་དག་གྲོགས་དག་ན་ན་འདོར་མི་འདོར་བ་བརྟག་པ་དང་འདི་རྣམས་ལྟར་གནས་བརྟན་གྱིས་བརྟག་ཅིང་སྦྱར་ཏེ་འདོང་ངོ་། །མི་རིང་བར་འཕགས་ཏེ་ཐམས་ཅད་ཀྱི་ཕྱི་ནས་གང་གིས་ཅུང་ཟད་མ་ལུས་སམ་ཞེས་དྲན་པར་བྱ། སཱུ་ཏྲ་ལྟག་མ་ལྟར་འདོང་བ་གནས་ནས་པ་ཟད་དུ་འཕགས་ཏེ་
གནས་བརྟན་གྱིས་འཁོར་རྣམས་ཀྱི་ལྷུང་བཟེད་དང་ཆུ་ཚགས་ལ་སོགས་པ་བཀུར་བའི་རྫས་དག་མ་ལུས་སམ་ཞེས་བསྐུལ་ཞིང་དྲན་པར་བྱ་བའི་ཕྱིར་བསྒོའོ། །མི་གཡེང་བ་དང་། སྒོ་དྲུག་ཡུལ་དྲུག་ལ་འབྲོས་ཤིང་འཕྱར་བར་མི་གཏང་བ་དང་། མི་ཁེངས་པར་གསར་བུ་དག་ལ་
བསྐོ། ལུས་བསྒྱུར་དང་འགྱིང་བ་ལ་སོགས་པ་མ་བྱེད་ཅིག་ཅེས་གནས་བརྟན་གྱིས་འཁོར་རྣམས་ལ་བསྒོ། གྲོང་དག་ཏུ་འཇུག་ནའང་ཐམས་ཅད་ཀྱིས་ཐམས་ཅད་ལའོ། །གྲོང་དུ་མཆོད་སྟོན་ལྟ་བུ་ལ་གནས་བརྟན་སོ་སོའི་འཁོར་མང་པོ་ཞིག་འདུས་ན་གནས་བརྟན་རྣམས་ཀྱིས་
བདག་བདག་གིས་འཁོར་ལ་བཅོས་ཤིང་བསྟན་དགེ་སློང་ཐམས་ཅད་ཀྱིས་ཀྱང་གཅིག་ལ་གཅིག་བསྟན་ཅིང་བཅོས་པ་ལ་བྱ། ཀུན་ཤེས་པར་རོ། །གྲོང་དུ་འཁོད་པ་ལ་ངོ་མི་ཤེས་ཤིང་མི་བདེ་བའི་ཕྱིར་ལོ་དང་དུས་དང་ཉི་ཚོད་ཅི་ལ་ཞུགས་པ་དང་མཁན་པོ་དང་། སློབ་དཔོན་གང་ཡིན་
པ་ལ་སོགས་པ་ཀུན་གྱིས་ཤེས་པར་བྱ། སཱུ་ཏྲ་འོག་མ་ལྟར་སྤྱོད་པ་ཤེས་པར་བྱ་བ་ལའང་བྱ། སྤྱད་པ་དང་། འགྲོ་ཉལ་འདུག་ལངས་བཞིར་ཚུལ་བཞིན་དུ་སྤྱོད་པ་དང་། སྤྱོད་པ། བསོད་སྙོམས་བྱེད་པའི་ཚེ་ཆང་འཚོང་བ་དང་། སྟུ་འཚོང་མ་དང་ཤན་པའི་ནང་དུ་མི་འགྲོ་བར་

བསྟན་པ། བསྟན་པ་དང་། སྤྱད་པ་དང་། སྤྱོད་པ་གཉིས་ཚུལ་བཞིན་དུ་ཞིབ་ཏུ་གནས་བརྟན་གྱིས་འཁོར་ལ་བསྟན་པ་ལ་བྱ། ཉེ་བར་སྟོན་པ་དང་། ཁ་ཐོན་སློབ་ཅིང་འབུལ་བ་ལ་སོགས་པ་དང་། བསམ་གཏན་དང་། ཚད་མེད་པ་བཞི་དང་། ཕུང་པོ་དང་ཁམས་དང་། སྐྱེ་
མཆེད་ལ་སོགས་པ་ལ་བྱ། ཁ་ཟས་དང་། བདག་གི་འཁོར་དང་སློབ་མ་ལ་སོགས་པའི་ཁ་ཟས་མེད་ན་ཁྱིམ་པ་ཡོན་བདག་ལ་སྦྱོར་དུ་གཞུག་པ་དང་། རྙེད་པ་དང་། གོས་ལ་སོགས་པ་འཚོ་བའི་ཡོ་བྱད་ཁྱིམ་པ་ཡོན་བདག་སྦྱོར་དུ་གཞུག་པ་དང་། ན་བའི་གསོས་ལ་
སོགས་ཏེ། ན་བའི་སྨན་བཙལ་ཞིང་བསགས་པ་དང་ཡོན་བདག་སྦྱོར་དུ་གཞུག་པ་ལ་སོགས་པ་དང་། དགོས་པ་འགྲུབ་པར་བསྡུ། དགེ་འདུན་གྱི་སོ་ནམ་དུ་བྱ་བ་ཤིང་ཏོག་དང་ཚོད་རྔད་དང་ཤིང་དང་སྣོད་སྤྱད་དང་། གནས་ཁང་བཅོས་པ་ལ་སོགས་པ་ཡོ་བྱད་དུ་དགོས་སོ་
ཅོག་གནས་བརྟན་གྱིས་སྦྱར་ཞིང་བསྡུ། དབྱར་ཚུལ་དུ་ཞུགས་པས་གཙུག་ལག་ཁང་མ་བཅོས་པ་དག་ཤེས་པར་བྱ་སྟེ་འཆོས་སུ་གཞུག །དབྱར་ཚུལ་དུ་ཞུགས་ནས་ཚུལ་གྱི་ཚེ་གཙུག་ལག་ཁང་མི་འདྲལ་ཞིང་མི་ཟག་པའི་ཕྱིར། གནས་བརྟན་གྱིས་ཡོན་བདག་གམ་
བདག་གི་འཁོར་འཆོས་སུ་གཞུག །འཆོས་སུ་གཞུག་པ་ནི་གནས་བརྟན་གྱིས་བརྟགས་ཤིང་བལྟས་ལ་ཤེས་པར་བྱ་སྟེ་འཆོས་སུ་གཞུག་གོ། །འཆོས་ན་སྤྲོ་བར་བྱ། ཚུལ་གྱི་ཚེ་གཙུག་ལག་ཁང་འཆོས་པ་ཡོན་བདག་དང་བདག་གི་འཁོར་སློབ་མ་གང་བྱེད་པ་དག་ལ་འདི་ལྟར་
འཆོས་ན་ཤིན་ཏུ་དགེ་ཞིང་བསོད་ནམས་ཆེའོ་ཞེས་སྤྲོ་བར་བྱའོ། །ཐམས་ཅད་ཀྱི་འཁོར་དུ་ཆུད་པ་གཏམ་འདོད་པ་མཐུན་པའི་ཆོས་ཀྱིས་བསྟབས་ཤིང་བསྡུ། གནས་བརྟན་སོ་སོའི་འཁོར་དུ་གཏོགས་པའི་སློབ་མ་རྣམས་ལ་སློབ་མ་སོ་སོ་ཅི་འདོད་པ་ཡིད་བཞིན་དུ། ཕུང་པོ་དང་ཁམས་
དང་འདུ་མཆེད་དང་འདུལ་བ་ལ་སོགས་པ་གང་འདོད་པ་བཞིན་དུ། གནས་བརྟན་གྱིས་བཤད་ཅིང་བསླབ་པ་ལ་བྱ། གཅིག་ཏུ་ན་གོ་ཤ་དང་རཀྵི་ཏ་དང་བར་མ་ལྟ་བུ་མིང་མཐུན་པའི་སྡེར་གཏོགས་པ་སོ་སོ་གཅིག་ལ་གཅིག་ཆོས་སློབ་ཅིང་བསྟན་པར་དགེ་བའི་བཤེས་གཉེན་བྱ་སྟེ་སློབ་

ཅིང་ཉན་དུ་གཞུག་པ་ལ་བྱ། དེ་ནི་སོ་སོ་དྲན་པའི་ཚུལ་གྱིས་དགེ་བར་འགྱུར་བའི་ཕྱིར་རོ། །ཁ་རོག་པ་ལ་བག་ཡངས་སུའོ། །སློབ་མ་བསམ་གཏན་སྤྱོད་ཅིང་དབེན་པ་ལ་དགའ་ནའང་བག་ཡོངས་སུ་གཞག །བསམ་གཏན་སྤྱོད་ཅིང་དབེན་པར་འདུག་ཏུ་
གསོལ་ནའང་བསམ་གཏན་གྱི་ལུང་བཤད་ཅིང་བག་ཡངས་སུ་གཞག་ལེ་ལོ་བྱེད་པའི་བག་ཡངས་སུ་ནི་མི་གཞག་གོ། །ཁྱིམ་པ་འོངས་ན་ཟན་བགོ་ཞིང་ངོ་། །གཙུག་ལག་ཁང་ངམ་དགེ་འདུན་གྱི་ནང་དུ་ཁྱིམ་པ་ཞིག་འོངས་ན་ཟན་སྦྱིན། མི་བྱེད་དམ་མི་འདོད་ན་ཆོས་ཀྱི་གཏམ་དེ་
ལ་བྱ་ཞིང་བདག་ཅག་ལ་འདི་ཡོད་དོ་ཞེས་གྱིས་ཤིག །ཁྱིམ་པ་འོངས་པ་དེ་དགེ་འདུན་གྱིས་ཟན་མི་འབྱོར་ཏམ་མི་སྦྱོར་རམ་ཁྱིམ་པ་དེ་ཉིད་ནང་ཟན་མི་འདོད་ཅེས་ཟེར་ན་ཆོས་བཤད་ཅིང་བསྟན་ལ་བདག་ཅག་ལ་མགྲོན་དུ་བྱ་བ་ཆོས་ཡོད་དོ་ཞེས་བྱ། འཁོར་ཅན་གྱིས་ཐམས་ཅད་
ལ་བརྟག །དགེ་འདུན་གྱིས་གནས་བརྟན་གྱིས་བདག་གི་འཁོར་དུ་གཏོགས་པའི་དགེ་སློང་རྣམས་ལེགས་པར་སྤྱོད་དམ་མི་སྤྱོད་པ་བརྟག་ཅིང་བལྟ་དོན་མེད་པ་སྤྱོད་ན་ཆད་པས་བཅད། སཱུ་ཏྲ་ལྟག་མ་ལྟར་བརྟགས་ཏེ། དོན་མེད་པ་དང་མི་དགེ་བ་སྤྱོད་ན་ཆད་པས་བཅད། དེར་
འགྲོ་བ་ལ་སོགས་པ་ཇི་ལྟ་བ་དེ་བཞིན་དུ་བྱ། རིགས་ལྔ་ལ་སོགས་པའི་གྲོང་དུ་འགྲོ་ན་བདག་ཚུལ་བཞིན་དུ་བྱ་ཞིང་ཁྱིམ་པ་ཡིད་དང་མི་འགལ་བར་སྤྲོ་བར་སེམས་བསྐྱེད་པའི་ཕྱིར་ཁོ་དང་ཐབས་མཉམ་པ་དག་གིས་དགེ་བ་སྤྱོད་པའི་ཡོན་ཏན་བརྗོད་པ་དང་། ཁོ་ཉིད་ཀྱི་ཆོས་ལས་
དགེ་བར་འགྱུར་བའི་ཡོན་ཏན་ཀྱང་བརྗོད་དེ་སྤྲོ་བར་བྱ། ཐོད་རྒལ་བ་དང་། གཏམ་གཅིག་མཇུག་མ་རྫོགས་པར་གཏམ་གཅིག་མགོ་འཛུགས་པ་ལ་བྱ། ཕྱལ་བའི་གཏམ་མི་བྱ། དོན་མེད་པ་གཏམ་སྒྲུང་ལྟ་བུ་དང་ཁྱལ་པ་གཅིག་གི་རྗེས་ནས་གཅིག་གིས་མཐུད་དེ་ཟད་མི་ཤེས་
པ་ལྟ་བུ་ལ་བྱ་སྟེ། དེ་ལྟ་བུ་བྱོལ་སོང་ལྟ་བུ་ལ་བྱ་སྟེ། འདི་གཉིས་ལྟ་བུ་མི་བྱ། དགེ་སྦྱོང་ཕྱི་མ་སྔར་མི་འགྲོ། གྲོང་དུ་འགྲོ་ན་དགེ་སྦྱོང་གྲལ་དམའ་བ་སྔོན་དུ་མི་འགྲོ། མི་འདུག །གྲོང་དུ་འགྲོ་བའི་གྲོགས་སུ་སོང་སོང་བས་གཏམ་ཟེར་བའི་མདུན་དུ་སོང་སྟེ་བར་མི་

གཅད། སྨྲ་ན་ལན་གླན། གྲོགས་སུ་སོང་སོང་བ་ལ་ཁྱིམ་མི་དེ་གཏམ་སྨྲ་ན་ལན་གདབ་པས་མི་སྨྲ་བར་སྔར་ཀྱང་མི་སྨྲ་སྨྲ་ན་ལན་མི་གདབ་པར་ཡང་མི་བྱ་བསྒྲུབ་པ་ཡང་ངོ་། །འགྲོགས་སུ་སོང་སོང་བ་དེ་ལ་ཁྱིམ་མི་དེས་ཆོས་ཀྱི་ལས་ཤིག་བཅོལ་ནའང་བསྒྲུབ་ཅིང་
བྱའོ། །གཏམ་གྱི་བར་ཆད་མི་གཞུག་དགེ་སློང་གྲོང་དུ་སོང་སོང་བ་དང་ཁྱིམ་པ་དེ་གཉིས་གཏམ་ཟེར་ཞིང་འཁོད་པ་ལ་འགྲོགས་སུ་སོང་སོང་བས་གཏམ་གྱི་བར་ཆད་གློ་བུར་གྱི་གཏམ་མི་བྱ། ཆོས་མ་ཡིན་པ་སྨྲ་ན་དགག །ཁྱིམ་པ་དང་དགེ་སློང་དེ་གཉིས་འཇིག་རྟེན་གྱི་ཆོས་
དོན་མེད་པ་དང་ལོག་པའི་ཆོས་སྡིག་པ་སྨྲ་ན་གྲོགས་སུ་སོང་སོང་བས་དགག །ཆོས་ཤིག་ན་རྗེས་སུ་ཡི་རང་། ལྷག་མ་དེ་གཉིས་ཆོས་ཤིག་ཏུ་སྨྲ་ན། གྲོགས་སུ་སོང་སོང་བས་བསྟོད་ཅིང་རྗེས་སུ་ཡི་རང་བ་བྱ། ཆོས་ཀྱི་ཕྱིར་གྲུབ་པ་རྙེད་ན་བླངས། ལྟག་མའི་དགེ་སློང་དེས་
ཆོས་བཤད་པ་ལས་ཁྱིམ་པ་དེས་ཡོན་ཞིག་ཕུལ་ནའང་། གྲོགས་སུ་སོང་སོང་བས་བླང་ངོ་། །རིགས་ཀྱང་ན་མི་གཡེང་མི་ཁེངས་འདུག་པར་མ་ཡིན། རིགས་ལྔའི་གྲོང་ལ་སོགས་པར་ལྷགས་ན་དབང་པོ་ལྔ་ཡུལ་ལ་བྲོས་ཏེ་གཡེང་བ་དང་ལུས་སྒྱུར་བྱེད་ཅིང་འགྱིང་བ་མི་བྱ་ཞིང་
གྲོང་བར་དུ་དོན་མེད་པར་ཡུན་རིང་དུ་མི་འདུག །མིག་དབབ། གྲོང་བར་དུ་མིག་དབབ་མིག་ཕབ་ན། དབང་པོ་གཞན་ཡང་མི་རྒོད་པའི་ཕྱིར་རོ། །ཁྱིམ་པ་ལ་ཆོས་ཀྱི་གཏམ་བྱ། ཁྱིམ་པ་ལ་ཁྱིམ་དང་གྲོང་བར་དུ་ཆོས་བཤད་དོ་ཅོག་ཅི་བཤད་པ་དང་ཅི་ལྟར་བྱ་བའི་ཐབས་ནི་
འོག་ནས་འཆད་དོ། །སྦྱིན་པ་དང་། སྦྱིན་པ་བྱས་པའི་ཡོན་ཏན་དང་བསོད་ནམས་བཤད། འདུལ་བ་དང་། དུག་གསུམ་དང་། ང་རྒྱལ་མེད་ཅིང་ཐུལ་བར་བྱ་བ་བཤད། བསྡམ་པ་དང་། འདོད་པ་རྣམ་ལྔ་ལ་མི་ཆགས་པ་དང་ཚུལ་ཁྲིམས་བསྡམ་པའོ། །ཚངས་པར་འཇུག་
པ་དང་། མི་ཚངས་པར་སྤྱོད་པ་ལ་སོགས་པ་ཁྲིམས་ལྔའི་ཡན་ལག་བཤད། གསོ་སྦྱིན་དང་། ཉིན་ཞག་གཅིག་ལ་ཁྲིམས་བཟུང་བའི་ཡོན་ཏན་བཤད། སྐྱབས་སུ་འགྲོ་བ་དང་། དཀོན་མཆོག་གསུམ་ལ་སྐྱབས་སུ་སོང་ན་བསོད་ནམས་ཆེ་བར་བཤད། བསླབ་ཚིག་ལེན་དུ་

དེ་དག་གཞུག །ལྟག་མ་འདི་རྣམས་བཤད་ཅིང་བསྟན་ནས་གང་འདོད་པ་བཞིན་དུ་ཁྲིམས་དཔོག །རྩོམ་པ་ཐམས་ཅད་ལ་ལྷུང་བའི་སྒོར་གྱུར་པ། དྲན་པར་ནན་ཏན་བྱ། ཅི་བྱེད་དོ་ཅོག་ཐམས་ཅད་ལ་ཉེས་པར་འགྱུར་རམ་མི་འགྱུར་སྡིག་ཡོད་དམ་མེད་པ་
ནན་ཏན་དུ་བརྟག་ཅིང་དྲན་པ་སྔོན་དུ་བཏང་སྟེ་ཤེས་པར་བྱ། རག་ལུས་པས་བསྒོ་པ་མི་བྱ་བར་མི་བྱ། གནས་བརྟན་དང་སློབ་དཔོན་ལ་ཆོས་དང་འདུལ་བ་ལ་སོགས་པའི་རག་ལུས་པ་ཡིན་ཏེ། སློབ་མ་ལ་ཆོས་ལ་སོགས་པ་མི་བསྟན་པར་མི་བྱ་བ་མཁན་པོ་ལ་རག་ལས་པས་
བསྒོ་བ་རྣམས་ལ་སློབ་མས་ཀྱང་བྱ་ཞིང་མཉན། འོངས་པ་ལ་ཐོག་མར་མཛའ་བའི་གཏམ་གྱིས་ཚུར་བདེ་བར་འོངས་སམ་ཞེས་བྱ། དགེ་སློང་ཞིག་གུད་ནས་འོངས་ན་མཛའ་བའི་ཚུལ་དུ་བདེ་བར་འོངས་སམ་ཞེས་བྱ། གདོང་གི་ཁ་དོག་མདངས་ཅན་འཛུམ་ཞིང་ཐོག་མར་འགྲོའོ། །
གུད་ནས་འོངས་པའི་གན་དུ་ངོ་མ་ཟུམ་ནག་པར་མི་བྱའི་གདོང་མདངས་ཅན་དུ་བྱས་ལ་འཛུམ་ཞིང་བསུ། ཁྲོ་གཉེར་མེད་པར་རོ། །བསུ་བའི་ཚེ་ཁྲོས་པ་འདྲ་བར་གདོང་བསྡུས་ཏེ་མི་འགྲོ། །འོན་ཏེ་ཁྱིམ་པ་ཞིག་ན་དེ་ལ་ཆོས་ཀྱི་གཏམ་བྱ། ཁྱིམ་པ་ཞིག་གུད་ནས་འོངས་ན་ཡང་
ཆོས་བཤད་པ་ལ་སོགས་པའི་གཏམ་བྱ་ཞིང་བསུའོ། །དེར་མི་འོང་ན་གྲོང་དྲུང་བས་མགུ་བས་ཅི་ནུས་པར་བཙལ། གཙུག་ལག་ཁང་དང་དགེ་འདུན་གྱི་གན་དུ་ཁྱིམ་པ་དག་མི་འོང་ན་གྲོང་དྲུང་གི་གཙུག་ལག་ཁང་ན་འཁོད་པའི་དགེ་སློང་དག་གིས་ཁྱིམ་བདག་ལ་བྲིད་ཅིང་
མགུ་བར་བྱས་ལ་ཅི་ནས་ཀྱང་གཙུག་ལག་ཁང་དང་དགེ་འདུན་གྱི་གན་དུ་འཁོར་བར་བྱ། ཆུ་དང་སྟན་དག་ཀྱང་གཞག །གཙུག་ལག་ཁང་དུ་ཁྱིམ་པ་དག་འོང་བའི་ཕྱིར་མཎྜལ་བྱ་བ་དང་ཁ་ལག་བཀྲུ་བ་དང་ཁྲི་སྟན་ལ་སོགས་པ་གདིང་པར་བྱ། ཕྱག་དར་བྱ་མལ་སྟན་བཅའ་ཆུ་
གཞག །གཙུག་ལག་ཁང་དུ་ནར་མར་བྱ་དགོས་པ་ནི་འདི་རྣམས་ཏེ་གང་གཞོན་པ་ནས་ལས་བྱའོ། །ལྷ་ཁང་གི་འཁོར་ཕྱག་དར་བྱ་དགེ་འདུན་འཁོད་པའི་ཁྲི་སྟན་གདིང་མཎྜལ་དང་ཆག་ཆག་ལ་སོགས་པའི་ཆུ་གཞག །བྲིམ་ཟན་འཇོག་པ་གསར་བུས་བྱ། སྐོམ་བྲིམ་ཞིང་

ཟན་འཇོག་པ་ཡང་དགེ་སྦྱོང་ཡན་ཆད་ན་གཞོན་པས་བྱའོ། །དགེ་སློང་གིས་བྱེད་ནའང་སྔོན་དུ་བྱིན་ལེན་བྱས་ཏེ་བྲིམ། ཕྱི་འཁོར་དག་གམ་མི་མཐུན་པར་བྱེད་ན་མི་དགག །ལྷ་རིས་ཀྱི་འབངས་རྩེ་རྒོད་དང་། ལྟུམ་པ་ལྟ་བུ་སྲོག་གཅོད་པ་དང་ཆང་འཐུང་བ་ལ་སོགས་པ་ལོག་པའི་
ཆོས་བདག་ཅག་དང་མི་མཐུན་པ་ཞིག་བྱེད་ན་མི་དགག་པར་གཞག །དེ་སྟེ་བདག་དང་གཞན་ལ་མི་གནོད་པའོ། །སཱུ་ཏྲ་ལྟག་མ་ལྟར་ལོག་པའི་ཆོས་སྤྱོད་པ་གཞག་པ་ཡང་བདག་དང་གཞན་ལ་མི་གནོད་ན་མི་དགག་པར་གཞག །འོན་ཏེ་དེ་ལྟར་དེ་ནུས་ན་བཅད་ལ་ཆོས་ཀྱིས་
དབྱུང་ཞིང་བསྒོ། །རྩེ་རྒོད་དམ་ལྟུམ་པ་ལ་སོགས་པ་སྤྱོད་པ་བདག་ཅག་གིས་ནུས་ཤིང་ལྕོགས་ན་ཆོས་བཤད་ཅིང་ཁྲིམས་ཕོག་ལ་ཆོས་ཀྱི་ལས་སུ་བསྒོ་ཞིང་བསོད་ནམས་བསྐྱེད་དུ་གཞུག །ཕྱི་འཁོར་དག་དང་འབྱེ་འམ་འབྲོས་ན་དེའི་ཕྱིར་བཅོས། །རྩེ་རྒོད་དང་ལྟུམ་པ་ལ་སོགས་
པ་ཉིད་ལ་ཉེས་པ་ཞིག་ཡོད་དེ་ཚད་མ་ཐུབ་སྟེ་འབྲོས་སམ་དགེ་སློང་དག་ལ་མི་དགའ་སྟེ་གུད་དུ་འགྲོ་ན་ཅི་ནས་ཀྱང་མི་འབྲོས་པར་ཐབས་ཅི་ཡོད་པས་བཅོས། མི་ནུས་ན་གཞན་དུ་སོང་ཤིག །སཱུ་ཏྲ་ལྟག་མ་ལྟར་མི་འབྲོས་པར་འཆོལ་མ་ནུས་ན་རྩེ་རྒོད་དང་ལྟུམ་པ་མི་དགའ་བ་གུད་དུ་
འབྲོས་སུ་མི་གཞུག་གི་དགེ་སློང་ཉིད་གུད་དུ་འགྲོའོ། །དེའི་ཕྱིར་འཐབ་པའི་མི་སྨྲ། རྩེ་རྒོད་མི་མཐུན་པར་བྱེད་པ་དེ་དག་ལ་འཐབ་མོ་དང་ཕྱིས་ཤ་གླན་པ་ལ་སོགས་པའི་ཚིག་མི་སྨྲ། དགེ་འདུན་གྱི་ཀུན་དགའ་ར་བ་ན་གནོད་པ་བྱེད་ན་འདི་ལྟར་བྱ་སྟེ་ཅི་ལྟར་ཐོགས་ཤིང་། འགྲོ་བ་བདག་
གིས་ཟིན་པར་རོ། །རྩེ་རྒོད་དང་ལྟུམ་པ་ལ་སོགས་པ་ཞིག་གཙུག་ལག་ཁང་གི་འཁོར་དུ་རྐུན་པོ་ཞིག་བྱེད་ན་ཤགས་ཀྱིས་ཐུབ་པར་བྱ་ཞིང་སུན་དབྱུང་བའི་ཕྱིར་སྔ་ནས་རྐུ་ཞིང་མི་སྲུན་ནོ་ཞེས་མི་གཙེའི་ནམ་བརྐུས་པའི་ཚེ་རྫས་དང་བཅས་པར་མངོན་སུམ་དུ་ཟིན་པར་བྱ། རྐུན་པོ་
གཞན་ལའང་འདི་འདྲ་བའི་ཚུལ་དུ་བྱ། མ་ལྕོགས་ན་སུ་ལའང་བྱུང་རྒྱལ་དུ་མི་བསྙད་པར། རྐུན་པོ་བྱེད་པ་དེ་རྫས་ལག་ནས་ཟིན་པར་མ་ནུས་ཤིང་རྐུ་བ་མ་ཆོད་ན་འདི་རྐུའོ་མི་སྲུན་ནོ་ཞེས་གཞན་ལ་བྱུང་རྒྱལ་དུ་མི་བསྙད་ཀྱིས་མིང་གིས་སྨོས་པ་འདི་རྣམས་ལ་བྱ་སྟེ། རྐུན་པོ་ཆོད་པར་

ནན་ཏུར་གྱིས་ཆེས་གསོལ། གཞོན་ནུ་དང་། རྒྱལ་པོ་ཤི་ན་འཚབ་མ་བྱེད་པ་ལ་བྱ། མཛའ་བོ་དང་། རྒྱལ་པོ་དང་མཛའ་བ་ལ་བྱ་སྟེ་གནང་ཆེན་ལྟ་བུ། བློན་པོ་དང་། བློན་པོ་ཆེན་པོ་ལས་ལ་གཏོགས་པ་ལ་བྱ། དྲ་མ་དང་བློན་པོའི་ལས་ལ་མ་གཏོགས་
པ་རིགས་བཙུན་པ་ཞང་བློན་དྲ་མ་ལྟ་བུ་དང་། རྒྱལ་བུ་དང་། རྒྱལ་པོའི་ཚབ་མར་འོང་བ་མ་ཡིན་པ་ལྟ་བུ་གཞན་ལ་བྱ། ཞབས་འབྲིང་བ་ལ་སྦྲན་ཏེ་འཁོར་དུ་གཙང་མས་ཐུལ་བར་བྱ། རྒྱལ་པོའི་ཞབས་འབྲིང་བ་ནང་འཁོར་ལྟ་བུ་དང་། འདི་རྣམས་ལ་བྱ་སྟེ་བརྡེག་བཙོག་དང་
བསད་ཕྱག་ལྟ་བུའི་ནན་ཏུར་གྱིས་ནི་མི་བྱའི། ཚིག་གི་ནན་ཏུར་གྱིས་ཕྱིན་ཆད་མི་བྱེད་པར་ཐུལ་བར་བྱ། །དགེ་སློང་གི་གནས་སུ་དགེ་སློང་མའོ། །ལྟག་མ་བཤད་པ་ཐམས་ཅད་དགེ་སློང་གིས་བྱའོ། །ཞེས་འབྱུང་བ་དེ་གཞན་དུ་དགེ་སློང་མས་ཀྱང་བྱའོ། །རབ་ཏུ་འབྱུང་བ་ཐམས་ཅད་
དུའོ། །ལྟག་ཏུ་དགེ་སྦྱོང་ཕ་རབ་ཏུ་དབྱུང་བའི་ཆོ་ག་བྱེད་པ་བཞིན་དུ་དགེ་སློང་མ་རབ་ཏུ་འབྱིན་པའི་ཆོ་ག་ཐམས་ཅད་ཀྱང་དེ་དང་འདྲ་བར་བྱ། བསྙེན་པར་རྫོགས་པའི་ཚེ་ནི་དེར་གསོལ་བ་དང་ལས་བྱེད་པ་ལ་སོགས་པ་ལས་གཞན་དུའོ། །དགེ་སློང་མ་བསྙེན་པར་རྫོགས་པར་བྱེད་
པའི་ཚེ་གསོལ་བར་བྱེད་པ་དང་ཁྲིམས་འབོགས་པ་དང་ཞུ་བ་བྱེད་པ་ནི་དགེ་སློང་གཅིག་གིས་བྱའི། གཞན་ཆོས་གོས་བསྔོ་བ་དང་གྲིབ་མ་འཆལ་བ་ལ་སོགས་པ་ཐམས་ཅད་དགེ་སློང་བསྙེན་པར་རྫོགས་པའི་ཆོ་ག་བཞིན་དུ་དགེ་སློང་མ་དག་ཉིད་ཀྱིས་བྱའོ། །འོག་ནས་ཆོ་ག་འབྱུང་བ་
ཐམས་ཅད་ཀྱང་བར་ཆད་དྲི་བའི་ཟླ་དགེ་སློང་གཅིག་གིས་བྱ། གཞན་ནི་ཐམས་ཅད་དགེ་སློང་མས་བྱའོ། །འདིར་དགེ་འདུན་གཉིས་ཀྱིས་སོ། །དགེ་སློང་མ་བསྙེན་པར་རྫོགས་པའི་ཚེ་ན་དགེ་འདུན་ཕོ་དང་། དགེ་འདུན་མོ་སྡེ་གཉིས་ཀྱིས་བྱ་དགོས་ཏེ་ཡུལ་དབུས་སུ་དགེ་འདུན་ཕོ་བཅུ་མོ་
བཅུ་གཉིས་མཐར་ནི་དགེ་སློང་དཀོན་ན་དགེ་སློང་ལྔ་དགེ་སློང་མ་དྲུག་གིས་བྱའོ། །དགེ་སློང་མ་བར་དུ་བཞག་སྟེ་བར་ཆད་སྨྲ། ཁྲིམས་འབོགས་པའི་ཚེ་བར་ཆད་འདྲི་བ་ལ་དགེ་སློང་ཕ་བར་ཆད་འདྲི་བ་དང་ཁྲིམས་རྫོགས་པར་འདོད་པ་དགེ་སློང་མ་གཉིས་ཀྱི་བར་དུ། དགེ་སློང་མ་མཁས་པ་གཅིག་

འདུག་ལ་གཅིག་ལ་གཅིག་ཚིག་བརྒྱུད་དེ་དྲིའོ། །ངོ་མི་ཚ་བར་བྱ་བའི་ཕྱིར་རོ། །དགེ་སློང་མ་ཞེས་བྱ་བ་བུད་མེད་ཀྱི་རིམ་གཞན་ནོ། །དགེ་སློང་ཕ་ལ་ནི་རབ་ཏུ་འབྱུང་བ་དང་བསྙན་པར་རྫོགས་པའི་ཆོ་ག་གཉིས་ཡོད་ན་དགེ་སློང་མ་ནི་དེ་གཉིས་ཡོད་པའི་སྟེང་དུ། དགེ་སློང་མ་ཞེས་བྱ་བ་ལྷག་
པར་ཡོད་དེ། དགེ་སློབ་མའི་ཆོ་ག་ཅི་ལྟར་བྱེད་པ་ནི་འོག་ནས་འཆད། གནས་ན་དེར་རོ། །དགེ་སློབ་མའི་ཁྲིམས་ནོད་པའི་ཚེ་ནའང་མཁན་མོར་ལན་ཅིག་གསོལ་དགོས། དགེ་སྦྱོང་མ་ནས་དགེ་སློང་མའི་བར་དུ་སྟེ་དུས་ནི་ལོ་གཉིས་ཀྱི་བར་དུ་སྤྱད། དགེ་སློབ་མས་སྤྱད་པའི་སྐབས་ནི།
དགེ་སློང་མར་བྱ། རབ་ཏུ་བྱུང་ནས་དགེ་སློབ་མའི་ཁྲིམས་ནོད་དེ་ལོ་གཉིས་ཀྱི་བར་དུ་དགེ་སློབ་མ་བྱས་ཤིང་སྤྱད་ལ། དེ་ནས་བསྙེན་པར་རྫོགས་པར་བྱ། བསྙེན་པར་རྫོགས་པ་ལས་དེས་ཉུང་ན་སྐྱེ་བའི་དུས་སོ། །བག་མ་མ་བྱས་པའི་དགེ་སློང་མ་ལོ་བཅོ་བརྒྱད་ལོན་པ། དགེ་སློབ་
མའི་ཁྲིམས་ཕོག་སྟེ་དགེ་སློབ་མའང་ལོ་གཉིས་སྤྱད་ལ་ལོ་ཉི་ཤུར་ཀྱང་ཚང་བར་བྱ་སྟེ། བསྙེན་པར་རྫོགས་པར་བྱ། བག་མ་བྱས་པའི་དགེ་སྦྱོང་མ་ནི་ལོ་བཅུ་ལོན་ལ་དགེ་སློབ་མའི་ཁྲིམས་ཕོག་སྟེ། དགེ་སློབ་མའང་ལོ་གཉིས་བྱས་ལ་ལོ་བཅུ་གཉིས་ལོན་ན་བསྙེན་པར་རྫོགས་པར་བྱར་
རུང་ངོ་། །བག་མ་བྱས་ན་ལོ་བཅུ་གཉིས་ཡན་ཆད་བསྙེན་པར་རྫོགས་པར་རོ། །དགེ་སྦྱོང་མ་བག་མ་བྱས་པ་ཞིག་ན་རྒྱོ་མྱོང་ཤིང་ཤེ་ཁྱེར་བའི་ཕྱིར་ལོ་བཅུ་གཉིས་ལོན་པ་ཡན་ཆད་བསྙེན་པར་རྫོགས་པར་བྱར་རུང་ངོ་། །ས་བྱིན་ན་སྐྱེའོ། །དགེ་སློབ་མའི་ཁྲིམས་ཕོག་ཅིང་བྱིན་ན་དགེ་
སློབ་མར་གྱུར་ཏོ། །ལོ་གཉིས་སུ་བརྩི་བའང་དགེ་སློབ་མའི་ཁྲིམས་ཐོབ་པ་ཚུན་ཆད་དུ་བརྩིས། དགེ་སློང་མའི་དགེ་འདུན་གྱིས་སོ། །དགེ་སློང་མའི་ཁྲིམས་དབོག་པ་ནི་དགེ་སློབ་མའི་དགེ་འདུན་གྱིས་དབོག་གོ། །འབོགས་པའི་བདུན་དུ་བར་ཆད་ཀྱང་ལན་ཅིག་དྲི་སློབ་པ་སྡོམ་
པའོ་ཞེས་སྦྱིན། ཁྲིམས་དབོག་པའི་ཚིག་ནི་སློབ་པ་སྡོམ་པའོ་ཞེས་བརྗོད་ཅི་གསོལ་བ་དང་ཞུ་བ་གཉིས་ཀྱིས་བྱ། དེའི་འོག་ཏུ་བསླབ་པ་བརྗོད། དགེ་སློབ་མའི་ཁྲིམས་ཕོག་ཟིན་ནས་ཁྲིམས་ཉིད་གང་ཡིན་པ་བསྟན་ཅིང་བརྗོད་དོ། །ཁྲིམས་ནི་རྒྱང་གྲགས་གཅིག་ཕན་ཆད་གྲོགས་མོ་

གཅིག་དང་འགྲོགས། ཆུ་རྒལ་ན་ལག་པ་སྦྲེལ་སྐྱེས་པ་དང་མི་རེག་སྐྱེས་པ་དང་ཁྱིམ་གཅིག་ཏུ་མི་ཉལ་སྨྱན་མི་བྱ་གྲོགས་ཀྱི་ཉེས་པ་མི་འཆབ་གསེར་དངུལ་ལ་མི་རེག་གསང་བའི་སྤུ་མི་བྲེགས། ས་མི་རྐོ་བྱིན་ལེན་མ་བྱས་པའི་ཟས་མི་བཟའ་རྩྭ་མི་གཅད་པ་
དང་དགེ་སྦྱོང་གི་ཁྲིམས་བཅུས་བསྣན་ཏེ་ཉི་ཤུ་རྩ་གཉིས། ཚངས་པར་སྤྱོད་པའི་གནས་པར་སྡོམ་པ་མ་ཐོབ་ན་བསྙེན་པར་རྫོགས་པ་མ་ཡིན་ནོ། །བསྙེན་པར་རྫོགས་པར་བྱེད་པའི་མདུན་དུ་ཚངས་པར་སྤྱོད་པའི་གནས་སྡོམ་པ་ཞེས་བྱ་བ་གསོལ་བ་དང་ཞུ་བ་གཉིས་ཀྱིས་ཆོ་ག་བྱ་
དགོས་ཏེ་བར་ཆད་ཀྱང་ལན་ཅིག་དྲིས་ལ་ཚངས་པར་སྤྱོད་པའི་གནས་སྡོམ་པ་སྦྱིན་ཚངས་པར་སྤྱོད་པའི་ཆོ་ག་འདི་མ་བྱས་པར་བསྙེན་པར་རྫོགས་པར་བྱས་ཀྱང་ཁྲིམས་མི་འཆགས། སྔར་གསང་སྟེ་སྟོན་པའི་འོག་ཏུ་སྦྱིན། ཚངས་པར་སྤྱད་པའི་གནས་སྡོམ་པ་སྔར་གསང་སྟེ་སྟོན་པས་བར་
ཆད་དྲིས་ལ་སྦྱིན་ཞིང་དབོག །དགེ་འདུན་གྱིས་སོ། །ཚངས་པར་སྤྱོད་པའི་གནས་སུ་སྡོམ་པའི་ཆོ་ག་སྦྱིན་པ་ནི་དགེ་སློང་མའི་དགེ་འདུན་གྱིས་བྱའོ། །བར་ཆད་དྲིས་ཏེའོ། །དགེ་སློང་མའི་དགེ་འདུན་གྱིས་ཚངས་པར་སྤྱོད་པའི་ཆོ་ག་བྱ་བ་ནི་དགེ་འདུན་མ་ཉིད་ཀྱི་གན་དུའང་ལན་ཅིག་དྲི། གསོལ་
ནས་སོ། །ཚངས་པར་སྤྱོད་པ་དགེ་འདུན་གྱིས་དབོག་པ་ཡང་ཁྲིམས་ནོད་པས་གསོལ་བ་བྱས་ནས་དབོག །ཆོས་གོས་ལྔ་དང་ངོ་། །བསྙེན་པར་རྫོགས་པར་བྱེད་པའི་ཚེ་དགེ་སློང་མ་དེ་ལ་ཆོས་གོས་ལྔ་བསྔོ། །གནས་ལ་ཤིང་དྲུང་མ་གཏོགས་པར་རོ། །གནས་བཞི་ལ་ཤིང་དྲུང་མ་
གཏོགས་པར་གནས་གསུམ་བསྐོ། །ལྟུང་བ་བརྒྱད་དང་། ཕས་ཕམ་པ་བརྒྱད་ཀྱང་བསྒོ་སྟེ་མི་ཚངས་པར་སྤྱོད་པ་དང་། རྐུ་བ་དང་མི་ལ་གསོད་པ་དང་། བརྫུན་དུ་སྨྲ་བ་དང་། སྐྱེས་པས་རེག་སྟེ། འདོད་ཆགས་ལངས་པ་དང་། གྲོགས་མོའི་ཕམ་པ་བཞི་ལས་གཞན་ཀྱང་རུང་བཅབས་
པ་དང་དགེ་སློང་མ་ཆད་པས་བཅད་པ་མ་ཆགས་ཤིག་ཅེས་གྲོས་བཏབ་པ་དང་ངོ་། །ལྕི་བའི་ཆོས་བསྒོ་ལྕི་བའི་ཆོས་བརྒྱད་ཀྱང་བསྒོ་སྟེ། དགེ་འདུན་ཕོ་མེད་པར་ཁྲིམས་རྫོགས་པར་བྱས་པ་དང་གསོ་སྦྱིན་དགེ་སློང་ལ་མ་དྲིས་པ་དང་། དགེ་སློང་དང་ཉེ་བར་ཚུལ་དུ་མ་ཞུགས་པ་དང་། དགེ་

སློང་གི་ཉེས་པ་ལ་རྒོལ་བ་དང་དགེ་སློང་ཁྲིམས་པར་འཐབ་མོ་བྱེད་པ་དང་། དགེ་སློང་ཕ་ཁྲིམས་རྫོགས་པ་ལ་ཕྱག་མ་བྱས་པ་དང་ལྷག་མའི་ཆད་པ། དགེ་འདུན་ཕོ་ལ་མ་བྱས་པར་ཕྱུང་བ་དང་། དགེ་འདུན་སྡེ་གཉིས་མེད་པར་ཚུལ་ནས་འབྱུང་བ་འཇུག་པ་དང་བརྒྱད་དོ། །ལྟུང་བ་དང་
དགེ་སྦྱོང་གིས་བྱ་བའི་མཚམས་སུའོ། །ལྕི་བ་བརྒྱད་བསྒོ་བའི་སྐབས་ནི་ཕས་ཕམ་པ་བརྒྱད་བསྒོ་བའི་འོག་ཏུ་བསྒོ། ཀྲིད་དྲུག །དགེ་སློང་མར་མི་གནང་རྣམ་པ་དྲུག་ཡོད་དེ། འོག་ནས་མིང་གིས་བཤད་པ་རྣམས་སོ། །འདི་ལ་ཆོས་མི་སྐྱེའོ་ཞེས་སོ། །མི་གནང་བ་རྣམ་པ་འདི་དྲུག་
ལ་ནི་ཞིང་མ་ཡིན་པས་ཁྲིམས་མི་འཆགས་ཏེ་དགེ་སྦྱོང་དང་དགེ་སློང་མའི་ཁྲིམས་ཀྱང་མི་དབོག་ཁྲིམས་ཕོག་པ་ཞིག་ནའང་དབྱུང་། མཚན་གཉིས་པ། ཕོ་མཚན་མོ་མཚན་གཉིས་ཀ་ཡོད་པ། གླེ་འདམས་པ་སྟུ་དང་རྐུབ་གཉིས་འདམས་ཏེ་གཅིག་ཏུ་གྱུར་པའོ། །རྟག་པར་ཁྲག་ཟག་
པ་དང་། རྒྱུན་མི་འཆད་པར་ཁྲག་ཟག་པའི་མོ་མཚན་ནོ། །ཁྲག་མེད་པ། སྟུ་ཁྲག་ཡང་མི་ཟག་པ་སྟེ་བཅུ་གཉིས་མན་ཆད་ལ་མི་ཟག་པ་དང་ལྔ་བཅུ་ཡན་ཆད་ལ་ཁྲག་མི་ཟག་པ་ནི་མ་གཏོགས་ཏེ་དེ་ལ་མི་བྱའོ། །མཚན་མ་ཙམ་པ། མོ་མཚན་ཆུང་ཞིང་མཚན་མ་ཙམ་དུ་འདུག་པ་ལ་
བྱ། མཚན་མ་ཙམ་དུ་གྱུར་བའི་མཚན་མ་དེ་ལས་གསུངས་སོ། །སཱུ་ཏྲ་ལྟག་མ་མཚན་མ་ཞེས་བྱ་བ་ནི་གཅིན་འོང་བའི་བུ་གུ་ཡོད་པ་ཙམ་དུ་ཟད་ཀྱི་མི་ཚངས་པར་སྤྱོད་དུ་མི་བཟོད་པའོ། །སྔོན་རབ་ཏུ་བྱུང་བ། སྔོན་རབ་ཏུ་བྱུང་སྟེ་ཁྲིམས་ཕུལ་བ་དང་འདི་རྣམས་ལྟ་བུ་དམིགས་ཀྱིས་ཀྱང་
མ་ཡིན་ནམ་ཞེས་དྲིས་ལ་ཡིན་ན་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱ། ཕྲ་མོ་ལ་སོགས་པའི་རབ་ཏུ་དབྱུང་བའི་དངོས་པོར་ཆུད་པའོ། །འདུལ་བའི་སྡེ་ཕྲན་ཚེགས་ཞེས་བྱ་བའི་ནང་ནས་རབ་ཏུ་དབྱུང་བའི་ཆོ་ག་འབྱུང་སྟེ་རྫོགས་སོ།། །།མི་མ་ཡིན་པའི་རྒྱུད་
དང་། བྱང་གི་སྒྲ་མི་སྙན་ནི་སྡོམ་པའི་ཞིང་མ་ཡིན་ནོ། །ལམ་རྒྱུད་ལྔ་ལ་མི་མ་གཏོགས་པའི་ལྷའི་རྒྱུད་ཀྱང་འདོད་པ་རྣམ་པ་ལྔ་ལ་ཆགས་ཤིང་སྐྱིད་པའི་ཕྱིར་ཁྲིམས་མི་འཆགས་བྱོལ་སོང་ཡང་གླེན་པའི་ཕྱིར་ཁྲིམས་མི་འཆགས། ན་རག་ཀྱང་སྡུག་བསྔལ་བས་བསྒྲིབས་པའི་ཕྱིར་

ཁྲིམས་མི་འཆགས། འདྲེ་ཡང་ཁྲོ་བའི་ཕྱིར་ཁྲིམས་མི་འཆགས། བྱང་གི་སྒྲ་མི་སྙན་གྱི་མི་ཡང་ང་དང་ཁྱོད་ཀྱི་བྱ་བ་མེད་ཅིང་བྱེ་བྲག་མི་འབྱེད་པས་ཁྲིམས་མི་འཆགས། ལམ་རྒྱུད་འདི་བཞི་དང་བྱང་གི་སྒྲ་མི་སྙན་གྱི་མི་འདི་ལྟར་ཁྲིམས་མི་འཆགས་པ་
ཡིན་པས་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱ། མཚན་ལན་གསུམ་དུ་གྱུར་ན་ཡང་ཡིན་ནོ། །སྐྱེས་པ་ལས་བུད་མེད་ཀྱི་མཚན་དུ་གྱུར་ཡང་བུད་མེད་ལས་སྐྱེས་པའི་མཚན་དུ་གྱུར། དེ་ལས་ཡང་བུད་མེད་ཀྱི་མཚན་དུ་གྱུར་པ་ལྟ་བུའི་མི་ལ་ནི་ཁྲིམས་ཕོག་ཀྱང་མི་
འཆགས་ཏེ་དེ་ལྟ་བུའི་མི་ལ་ནི་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱའོ། །ཐོག་མ་དག་གིས་ནི་མི་ཞིག་གོ། །དགེ་སློང་ཞིག་ལས་མཚན་གྱུར་ནའང་ཐོག་མ་ལན་གཉིས་ཀྱི་བར་དུ་ནི་ཁྲིམས་མེད་པར་མ་སོང་གི་ལན་གསུམ་དུ་གྱུར་པའི་ཐ་མས་ཁྲིམས་མེད་པར་སོང་སྟེ་དགེ་
སློང་དུ་མི་རུང་ངོ་། །ལེན་པའི་ཚེ་ནའང་སྐྱེའོ། །ཁྲིམས་མི་འབོགས་པའི་ཚེ་ན་སྐྱེས་པ་ལས་བུད་མེད་ཀྱི་མཚན་དུ་གྱུར་ཀྱང་སྐྱེས་པའི་ཁྲིམས་ཕོག་མོད་ཀྱི་བུད་མེད་ཀྱི་ཁྲིམས་ཐོབ་པར་འགྱུར། བུད་མེད་ལས་མཚན་གྱུར་ཀྱང་དེ་བཞིན། མཁན་པོ་མེད་ཀྱང་དེར་རོ། །མཁན་པོ་མེད་པར་
དགེ་འདུན་དང་སློབ་དཔོན་གྱིས་རབ་ཏུ་དབྱུང་བ་དང་། བསྙེན་པར་རྫོགས་པར་བྱས་ཀྱང་ཁྲིམས་འཆགས་སོ། །བསྙེན་པར་མ་རྫོགས་པས་ཀྱང་ངོ་། །དགེ་སྦྱོང་གི་ཁྲིམས་འབོགས་པའི་ཚེ་མཁན་པོ་དགེ་སྦྱོང་ཉིད་དང་ཁྱིམ་པས་བྱས་ཀྱང་འཆགས། དགེ་སློང་བསྙེན་པར་རྫོགས་
པ་ལ་ནི་མཁན་པོ་ཁྱིམ་པ་དང་། དགེ་སྦྱོང་གིས་བྱས་ན་རུང་བ་དང་མི་རུང་ངོ་ཞེས་བཅས་པ་མེད་དོ། །དགེ་སློང་མ་ཡིན་པར་ཤེས་ན་མི་རུང་ངོ་། །སཱུ་ཏྲ་ལྟག་མ་ལྟར་དགེ་སྦྱོང་གི་མཁན་པོ་ཁྱིམ་པ་དག་གིས་བྱ་སྟེ། དགེ་སྦྱོང་གིས་ཁྲིམས་ནོད་པ་ཉིད་ཀྱི་ཡིད་ལ་མཁན་པོ་དགེ་སྦྱོང་དང་ཁྱིམ་པ་
ཡིན་པར་ཤེས་ཏེ་ཁྲིམས་མི་འཆགས་སོ་སྙམ་བསམ་པ་དང་ཕྱིས་མི་རུང་བར་ཤེས་ན་ཁྲིམས་མེད་ཅིང་མི་འཆགས་པར་འགྱུར་རོ། །ཉིད་ཀྱིས་ཕུལ་ན་མི་རུང་ངོ་། །ཁྲིམས་ནོད་པའི་ཚེ་གང་ནོད་པ་དེས་ང་ལ་མཁན་པོ་མི་དགོས་སོ་ཞེས་ཟེར་ཞིང་མི་འདོད་ན་ཁྲིམས་མི་འཆགས་སོ། །དེ་དག་

གི་མིང་མ་བརྗོད་ན་མི་རུང་ངོ་། །ཁྲིམས་ནོད་པའི་ཚེ་མཁན་པོ་དང་ཁྲིམས་ནོད་པ་ཉིད་ཀྱི་མིང་མ་བརྗོད་ན་ཁྲིམས་མི་འཆགས་ཏེ། མཁན་པོའི་མིང་མ་བརྗོད་པ་ནི་མི་འཆགས་པ་ཉིད་དུ་མི་འགྱུར། དབང་ལུས་པ་དགེ་འདུན་གྱི་ནའང་མི་རུང་། ཁྲིམས་ནོད་པའི་ཚེ་དགེ་འདུན་ལས་ཁྲིམས་
འཐོབ་པས་ན་དགེ་འདུན་ལས་བསྙེན་པར་རྫོགས་པར་འཚལ་ལོ་ཞེས་བྱ་བའི་མིང་མ་བརྗོད་ནའང་ཁྲིམས་མི་འཆགས། ཁྱིམ་པ་དང་མུར་འདུག་གི་ཚུལ་གྱིས་ན་མི་རུང་། ཀ་ཤ་མེད་པར་མུར་འདུག་དང་ཁྱིམ་པའི་རྒྱུན་དུ་ཞུགས་ཏེ་རབ་ཏུ་བྱུང་བ་དང་བསྙེན་པར་རྫོགས་པའི་ཁྲིམས་ཕོག་ན་མི་
འཆགས་སོ། །གཅེར་པ་དང་འཁྲུགས་པ་དང་། གོས་མེད་པར་གཅེར་བུ་དང་སེམས་འཁྲུགས་ཤིང་ཁྲོས་པ་དང་། གང་འཆའ་བ་མི་རུང་། བུད་མེད་སྐྱེས་པ་དང་ཉལ་ལོ་ཅོག་ཤི་བ་དང་འདི་རྣམས་ལྟ་བུ་ལ་ཁྲིམས་ཕོག་ཀྱང་མི་འཆགས་སོ། །སྐྱེས་པ་གོང་འཆའ་བ་ནི་གནང་བ་དང་མི་གནང་
བར་ཁྲིམས་བཅས་པ་ནི་མེད་དོ། །འདུལ་བ་འཛིན་པ་ཁ་ཅིག་གིས་ནི་བུད་མེད་དང་འདྲའོ་ཞེས་ཀྱང་བཤད་དོ། །སྤངས་པར་མཚན་མ་ལས་ལྡོག་པ་ཁས་མ་བླངས་ན་མི་རུང་། ཉེས་པ་ཞིག་བྱུང་སྟེ་ཆད་པས་བཅད་ན་ཉེས་པ་མཐོང་ངོ་ཞེས་ཟེར་ཞིང་ཆད་པ་བྱེད་དུ་མི་བཏུབ་པ་དང་ཆད་པས་
བཅད་ན་ངས་ཉེས་མེད་ཀྱི་ཆད་པ་བྱེད་དུ་མི་འདོད་དེ་ཞེས་ཟེར་བ་དང་། སངས་རྒྱས་ཀྱིས་བར་དུ་གཅོད་དོ་ཞེས་གསུངས་པའི་ཆོས་ལ་བར་དུ་གཅོད་པར་མི་འགྱུར་རོ་ཞེས་ཟེར་བ་འདི་ལྟ་བུའི་ཆད་པ་མ་བྱས་སམ། ཉེས་པ་མ་མཐོལ་བར་ཁྲིམས་ཕུལ་ཏེ་ཁྱིམ་པར་སོང་བ་ལས་སླར་ཁྲིམས་ནོད་
ན་སྔོན་གྱི་ཉེས་པ་དོར་རོ་ཞེས་ཁས་མི་ལེན་པར་རབ་ཏུ་དབྱུང་བ་དང་བསྙེན་པར་རྫོགས་པར་བྱས་ཀྱང་ཁྲིམས་མི་འཆགས། སྔ་མའི་རིམ་བཞིན་ནི་ཉེས་བྱས་པ་ཙམ་མོ། །ལྟག་ཏུ་དགེ་བསྙེན་དང་དགེ་སྦྱོང་དག་བསྙེན་པར་རྫོགས་པར་རིམ་པར་ཕོག་ཤིག་ཅེས་རིམ་པར་འབྱུང་བ་བཞིན་དུ་མ་བྱས་
ཏེ། ཅིག་ཅར་བསྙེན་པར་རྫོགས་པར་བྱས་ན་ཁྲིམས་ནི་ཆགས་ཏེ་མཁན་པོ་དང་དགེ་འདུན་ལ་ཉེས་བྱས། མཁན་པོར་མི་གསོལ་བ་ཡང་ངོ་། །མཁན་པོར་གསོལ་བའི་ཚིག་མི་བྱས་པར་ཁྲིམས་ཕོག་ན་ཁྲིམས་མི་འཆགས་ཏེ། མཁན་པོ་དང་དགེ་འདུན་ལ་ཉེས་བྱས། བར་ཆད་མ་དྲིས་

ན་ཡང་ངོ་། །བར་ཆད་མ་དྲིས་པར་ཁྲིམས་ཕོག་ན་ཡང་མཁན་པོ་དང་དགེ་འདུན་ལ་ཉེས་བྱས་སུ་འགྱུར་ཏེ་ཁྲིམས་ནི་འཆགས་སོ། །མེད་ལ་ཁ་བླངས་ཏེ་བྱིན་ན་ཡང་ངོ་། །བསྙེན་པར་རྫོགས་པར་བྱེད་པ་དེ་ལ་འཆགས་མེད་པ་ལྟ་བུ་ཡང་མེད་པར་ཡོད་དོ་ཞེས་
ཟེར་བ་ལ་ཁྲིམས་ཕོག་ན་ཁྲིམས་ནི་འཆགས་ཏེ་མཁན་པོ་དང་དགེ་འདུན་ལ་ཉེས་བྱས། སྐྱེས་པ་བུད་མེད་ལྟ་བུ་དང་བུད་མེད་སྐྱེས་པ་ལྟ་བུ་ནི་མཚན་ཐ་དད་པ་མ་ཡིན་ནོ། །སྐྱེས་པ་བུད་མེད་ཀྱི་གཟུགས་སུ་འདུག་པ་ནི་ཁྲིམས་ཕོག་ཀྱང་ཉེས་བྱས་མཁན་པོ་དང་དགེ་འདུན་ལ་ཡོད་དུ་ཟད་ཀྱི་
ཁྲིམས་ནི་འཆགས་སོ། །ཉེས་པ་ཡོད་པ་ནི་བུད་མེད་སྐྱེས་པ་འདྲ་བ། དགེ་སློང་མའི་ཁྲོད་ན་འདུག་ན་བུད་མེད་ཀྱི་ཁྲོད་ནས་སྐྱེས་པ་གཅིག་ཅིག་གཡོག་བྱེད་ཅིང་འདུག་སྟེ་མི་ཚངས་པར་སྤྱོད་པ་ལྟ་ཞེས་འཕྱ་བའི་ཕྱིར་རོ། །དེ་ལག་ཆད་ལ་སོགས་པའི་ནང་དུ་གཏོགས་སོ། །ལྟག་ཏུ་བཤད་
པ་ཁྲིམས་ནི་འཆགས་ཀྱི་ཉེས་བྱས་ཡོད་དོ་ཞེས་འབྱུང་བའི་སཱུ་ཏྲ་ལྟག་མ་གོང་དུ་ལག་རྡུམ་བཅུག་ན་ཉེས་བྱས་སོ་ཞེས་ཟེར་བ་བཞིན་དུ་ཁྲིམས་ནི་འཆགས་ཀྱི་མཁན་པོ་དང་དགེ་འདུན་ལ་ཉེས་བྱས་སུ་འགྱུར་བ་ལ་བྱ། སྡིག་པའི་མཚན་དང་ཚུལ་ཐ་དད་པ་གླིང་གཞན་ལས་སྐྱེས་པ་ཡང་ངོ་། །
སྨེ་བ་དང་ཤ་མཚན་ལ་སོགས་པ་སྡིག་ཏུ་འགྱུར་བའི་མཚན་དུ་འདུག་པ་དང་། མི་ཡིན་མོད་ཀྱི་རྐང་ལག་ཕྱུགས་སུ་འདུག་པ་ལྟ་བུ་དང་། ཤར་ཕྱོགས་དང་ནུབ་ཕྱོགས་ཀྱི་གླིང་ཆེན་པོ་དང་གླིང་ཕྲན་གྱི་མི་དང་འདི་རྣམས་ལྟ་བུ་དང་ཁྲིམས་ཕོག་ཀྱང་ཉེས་བྱས་སོ། །སེན་མོ་གཅིག་པ་དང་། སོར་
མོ་འབྱར་ཏེ་སེན་མོ་གཅིག་པ་དང་སོར་མོ་མ་འབྱར་བར་སེན་མོ་གཅིག་ཏུ་འདུག་པ། རྐང་ལག་ལྟེབས་པ་དང་། ཤོག་ཤོག་ལྟ་བ་སྟེ་བཀུག་ནས་རྒྱས་བཏབ་པ་ལྟ་བུར་ལྟེབས་པ། ཕྱེད་ཤི་བ་དང་། གཞོགས་ཕྱེད་སྐམས་པ་དང་། སྤྱི་རིང་བ་དང་། སྤྱི་བོ་ཅོག་ཅོག་པོར་རིང་པོར་འདུག་པ། སྐྲ་ར་རི་
ཅན་དང་། སྐྲ་ཚུམ་བུ་ཚུམ་བུ་ར་རི་ཅན་དུ་འདུག་པ། མདུན་དང་རྒྱབ་སྒུར་བ་དང་། མདུན་འབུར་ཏེ་ཕྱིར་དགྱེ་བ་དང་རྒྱབ་ཏུ་འབུར་ཏེ་ནང་དུ་སྒུ་མི་གཅིག་ལ་གཉིས་ཀར་ལྡན་ཡང་རུང་གཅིག་དང་ལྡན་ཡང་རུང་བ་ལ་བྱ། སོར་མོ་དྲུག་པ་དང་། སོར་མོ་དྲུག་དུ་སྐྱེས་པ་དང་། འབྱར་བ་དང་།

སོར་མོ་འབྱར་བ་དང་། མེད་པ་དང་། ལག་མཐིལ་འབའ་ཞིག་ཡོད་པ། རྫི་མ་རུང་བ་ཅན་དང་། རྫི་མའི་སྤུ་ནང་རིམ་དུ་སྐྱེས་ནས་མིག་ལ་རྡུང་ཞིང་འཚག །སྲེ་མོ་དང་འུག་པ་དང་། སྲེ་མོའི་མིག་འདྲ་བ། འུག་པའི་མིག་འདྲ་བ། ལོག་པ་དང་། མིག་གི་གྲྭ་མདུན་རྒྱབ་ཏུ་ལོག་པ།
ཕྲད་པ་དང་། སྣ་གོང་དུ་གྱུར་ཏེ་མིག །འཕྱང་བ་དང་། མིག་གི་འབྲས་བུ་ལྷུང་བར་ཐུག་པར་འཕྱང་བ་དང་། མིག་དམར་པོ་དང་། མིག་གི་སྤྲིན་ཚིལ་བུ་དམར་པོར་འདུག་པ། དཀྱིལ་མིག་གི་མིག་ལྟ་བུ་དང་། མིག་ལ་དཀར་པོ་རིམ་པ་གཅིག་ནག་པོ་རིམ་པ་གཅིག་ཨུ་ཤུད་ཀྱི་རི་མོ་
འདྲ་བར་འདུག་པ། མིག་ཡངས་པ། མིག་རྐྱེན་དུ་མ་བབ་པར་ཆེ་བ། གྲྭ་དང་། མིག་ཏུ། མཛེར་པ་སྐྱེས་པ། འབྲུམ་བུ་ཅན་དང་མིག་ལ་འབྲུམ་བུ་ཡོད་པ་ལ་བྱ། ཤུ་བ་ཅན་གྱི་མིག་དག་དང་། མིག་ལ་ཤུ་བ་ཆེན་པོ་ཤུ་བར་འདུག་པ། རྣ་བ་སེར་པོ། །རྣ་བའི་ཁ་དོག་སེར་པོ་ཡུང་བ་
འདྲ་བ། དཀར་པོ། རྣ་བའི་ཁ་དོག་ཤོག་ཤོག་འདྲ་བ། དམར་པོ། རྣ་བའི་ཁ་དོག་ཁྲག་འདྲ་བ། གཅེའུ་ལྟ་བུ། རྣ་བ་གཅེའུ་འདྲ་བ་སྦུ་གུ་ཅན་ནོ། །གཡན་པ། ཤ་རྟག་ཏུ་གཡའ་བ། ཤུ་བ་ཤུ། ཤུ་བ་རེ་རེ་ཙམ་འདུག་པ། ཆེན་པོ། ཤུ་བ་ཆེན་པོར་བྱུང་བ། རྔོ་དང་། གཡན་པ་ལྟ་བུ།
མཇེ་རླིག་པའི་ནང་དུ་ནུབ་པ་དང་། རླིག་པའི་ནང་ན་མཇེ་འདུག་སྟེ་མཇེ་རླིག་པས་གཡོགས་པ། གླེན་པ། ལེགས་ཉེས་ཀྱི་བྱེ་བྲག་མི་ཕྱེད་པ་དང་། ལྕེ་མེད་ཐོག་མ་ནས་མ་སྐྱེས་པ། རྐང་ལག་གཅིག་པ། རྐང་ལག་ཡ་གཅིག་པ། མེད་པའོ། །གཉིས་ཀ་མེད་པ། སྐྲ་སྔོན་པོ། སྐྲ་མཐིང་
གར་འདུག་པ། བལ་གླང་བ། བལ་གླང་གི་མགོར་འདུག་པ། རྟ་ཁྱི། རྟ་མགོ་འདྲ་བ་ཁྱི་མགོ་འདྲ་བ། བ་ལང་། བ་ལང་གི་མགོ་འདྲ་བ། གཉན། ལུག་གི་མགོ་འདྲ་བ། རི་དགས་རི་དགས་གང་ཡང་རུང་གི་མགོ་འདྲ་བ། ཉ་ཉའི་མགོ་འདྲ་བ། སྦྲུལ། སྦྲུལ་མགོ་འདྲ་བ། རིང་
པོ། མགོ་ལྟག་པ་ནས་འཕྲལ་བར་མཆུ་རིང་དུ་འདུག་པ། མགོ་མང་པོ། ལུས་གཅིག་ལ་མགོ་མང་དུ་ཡོད་པ། ཤིང་ཏཱ་ལའི་མགུལ། མགུལ་རིང་བ་དང་ཏཱ་ལ་འདྲ་བར་མགུལ་ལ་ཁྲམ་ཉེར་དུ་འདུག་པ། སྐྲངས་པས་སྤྱོད་ལམ་ཆད་པ། ལུས་སྐྲངས་ཏེ་སྤྱོད་ལམ་བཞིར་སྤྱོད་མི་

ནུས་པ་ལྟག་ནས་སེན་མོ་གཅིག་པ་ཞེས་བྱ་བ་མན་ཆད་ལྟ་བུར་འདུག་པ་སྤྱོད་ལམ་ཆད་པ། མི་ན་བ་འདི་དག་ཀྱང་ངོ་། །ལྟག་ནས་སེན་མོ་གཅིག་ཅེས་འབྱུང་བ་མན་ཆད་ལྟ་བུར་འདུག་པ་མི་ནར་ཟིན་ཀྱང་བཅུག་ན་ཉེས་བྱས། ན་བ་དེ་དག་ཀྱང་དེར་རོ། །སེན་མོ་གཅིག་
པ་ཞེས་བྱ་བ་མན་ཆད་ཀྱི་གཟུགས་སུ་འདུག་ལ་ན་བའང་བཅུག་ལ་ཉེས་བྱས་ཁྲིམས་ནི་འཆགས། མ་རུང་བར་ནི་རྐུན་པོར་རོ། །ཡུལ་མཐའ་འཁོབ་ཀྱི་བྱེ་བྲག་མི་ཕྱེད་ཅིང་འདུལ་དཀའ་བ་ཞིག་ལས་བཅུག་ནའང་ལྟག་ཏུ་རྐུན་པོའི་རྒྱལ་མཚན་ཅན་བཅུག་ན་ཉེས་བྱས་སོ་ཞེས་འབྱུང་བ་
དང་འདྲ། ཕ་བཞིན་དུ་ཕར་བསམ་པའི་རྒྱལ་པོས་གནང་ན་ཡང་འགྱུར་རོ། །ཕ་མ་ལ་མ་དྲིས་ཀྱང་རྒྱལ་པོའི་འབངས་སུ་གཏོགས་པ་ལས་རྒྱལ་པོས་གནང་སྟེ་བཅུག་ནའང་ཉེས་མེད་དོ། །གནང་བ་དང་དྲི་བ་དང་འཆང་བ་ལ་གསོ་གསོ་བ་ཡང་ཕ་བཞིན། ཕ་མ་ལ་དྲིས་ཏེ་གནང་བ་དང་
ཕ་མ་གཉིས་ཀ་ཤི་སྟེ་མེད་པ་ནི། བུ་ཞིག་གཞན་གྱིས་གསོ་སྟེ་འཆང་འཆང་གསོ་གསོ་བ་ཞིག་ཡིན་ན། ཕ་མ་ལ་དྲི་བ་མ་ཡིན་གྱི་འཆང་ཞིང་གསོ་གསོ་བའི་མི་དེས་གནང་ན། བསྙེན་པར་རྫོགས་པར་རུང་སྟེ་ཉེས་མེད་དོ། །མིའི་རྒྱུད་མ་ཡིན་པ་ལ་མ་ཡིན། ཕ་མ་མིའི་རྒྱུད་མ་ཡིན་ཏེ་བྱོལ་
སོང་ལྟ་ཞིག་ཡིན་ན་དྲི་མི་དགོས་ཏེ་རབ་ཏུ་ཕྱུང་ཡང་ཉེས་མེད་མཚམས་མེད་པར་ཡང་མི་འགྱུར། ཕ་མ་མེད་དེ་གསོ་ཞིང་འཆང་འཆང་བའི་མི་དང་ཕ་མ་བྱོལ་སོང་ཡིན་པ་ཞིག་བསད་ན་མཚམས་མེད་པར་མི་འགྱུར། བསྐྱེད་པ་དག་ལ་དེའོ། །ཕ་མ་བསད་ན་མཚམས་མེད་པར་འགྱུར་ན་ནི་ཕ་མ་གང་
གི་མངལ་དང་ཁུ་བ་ལས་སྐྱེས་པ་དེ་ཉིད་བསད་ན་མཚམས་མེད་པར་འགྱུར། མཚན་དུ་གྱུར་ཀྱང་ངོ་། །བདག་གི་ལུས་བསྐྱེད་པའི་ཕ་མ་ཉིད་ཕོ་མཚན་དང་། མོ་མཚན་གྱུར་པ་ལས་བསད་ཀྱང་མཚམས་མེད་པར་འགྱུར། དེ་ལྟར་བྱས་ན་མ་བསད་པ་ལ་སོགས་པའི་གཙོ་བོ། སཱུ་ཏྲ་ལྟག་མ་
གཉིས་ལྟར་ཕ་མ་མ་ཡིན་ནོ་ཞེས་བཤད་པ་བསད་པའི་ནང་ན་གཙོ་སྟེ། མཚམས་མེད་པར་འགྱུར་བའོ། །བསླུས་པ་ནི་མི་ཚངས་པར་སྤྱོད་པས་ཕམ་པ་ལས་མྱོང་བ་དག་ནའོ། །དགེ་སློང་མས་བསླུས་ན་ཁྲིམས་མི་འཆགས་སོ་ཞེས་འབྱུང་བ་ནི། དགེ་སློང་མ་ཕས་ཕམ་པ་མ་ཡིན་པ་ལ་མི་ཚངས་པར་

སྤྱོད་ན་དགེ་སློང་མ་བསླུས་པ་ཡིན་ཏེ། དགེ་སློང་མ་མི་འདོད་དེ་ནན་གྱིས་མི་ཚངས་པར་སྤྱོད་པ་དང་། དགེ་སློང་མས་ལག་པ་མེར་བཅུག་སྟེ་དགའ་བར་མ་ཚོར་བ་ལྟ་བུ་སྤྱོད་པ་ཡང་དགེ་སློང་མ་བསླུས་པ་ཡིན་ནོ་ཞེས་སཱུ་ཏྲའི་ཊཱི་ཀ་ལས་འཆད་དོ། །ཁ་ཅིག་ན་རེ་དེས་ནི་བསླུས་པར་མི་ཆུད་དེ་མི་
ཚངས་པར་སྤྱོད་པ་ལས་དགའ་བར་དགེ་སློང་མས་ཀྱང་ཚོར་ན་དགེ་སློང་མ་བསླུས་པ་ཡིན་ནོ་ཞེས་བཤད་དོ། །སྐྱེས་པ་མི་ཚངས་པར་སྤྱོད་པ་སོང་སོང་བ་ལས། དགེ་སློང་མ་འདོད་ཆགས་ཀྱི་སེམས་ཀྱིས་སྔར་ནས་ཕམ་ཟིན་པ་མི་ཚངས་པར་སྤྱོད་ཀྱང་དགེ་སློང་མ་བསླུས་པར་མི་ཆུད་དོ། །
དམས་པ་ལས་སྐྱེས་པར་གྱུར་ན་རབ་ཏུ་དབྱུང་བ་དང་། བསྙེན་པར་རྫོགས་པར་བྱ་བའི་རིགས་སོ། །དགེ་སློང་མ་བྱེད་བྱེད་པ་ལས་ཁྲིམས་ཕུལ་བ་ལས་མཚན་གྱུར་པ་ཞིག་བསྙེན་པར་རྫོགས་པར་འདོད་དེ་འོངས་ན་དགེ་སློང་ཕའི་ཁྲིམས་དཔོག་ཏུ་རུང་སྟེ་འཆགས། མི་ཚངས་པའི་ཕས་ཕམ་
པ་སྤྱོད་པ་ཡང་ངོ་། །དགེ་སློང་མ་ལ་ཕས་ཕམ་པ་བརྒྱད་ཡོད་པ་ལས་དགེ་སློང་ཕའི་ཕས་ཕམ་པ་བཞི་མ་གཏོགས་པ་ལྷག་མ་བཞི་ལས་གང་ཡང་རུང་སྟེ་སྤྱད་པའི་འོག་ཏུ་མཚན་གྱུར་པ་ཞིག་བསྙེན་པར་རྫོགས་པའི་ཁྲིམས་ནོད་དུ་འོངས་ན་ཡང་བསྙེན་པར་རྫོགས་པར་བྱར་རུང་སྟེ་ཁྲིམས་
འཆགས། གནས་པས་བུད་མེད་བསྙེན་པར་རྫོགས་པར་གཏོགས་སོ། །དགེ་སློང་མ་ཁྲིམས་རྫོགས་པར་བྱེད་ན་དགེ་འདུན་ཕ་གུད་དུ་མ་བཙལ་གྱི་གང་ཉེ་ཞིང་གསོ་སྦྱིན་དང་ཚུལ་ནས་འབྱུང་ཞིང་འཇུག་པའི་ཕྱིར་ནས་ཞུ་ཞིང་ལས་བྱེད་པའི་དེ་ཉིད་ཀྱི་དགེ་འདུན་ལས་བྱས་ཞིང་མནོད་དོ། །
ཡང་གཅིག་ཏུ་ན་ཁྲིམས་ནོད་པའི་མཁན་པོ་གུད་ནས་གསར་དུ་འོངས་པ་ཞིག་ཡོད་ན་དེ་ལ་མི་བྱའི་སྔ་ན་འཁོད་འཁོད་པའི་ནང་ནས་མཁས་པ་གཅིག་གིས་མཁན་པོ་བྱའོ། །འགྱུར་བའི་གཏམ་ན་ཞིག །ཁྲིམས་ནོད་པ་ཞིག་ཁྲིམས་ཕོག་པའི་ལས་བྱེད་བཞིན་དུ། ང་ཁྲིམས་མི་ནོད་དོ་ཞེས་
བྱ་སྟེ་མནོད་ན་ཁྲིམས་མི་འཆགས། དྲིས་པ་མང་བའི་རབ་ཏུ་དབྱུང་བའི་དངོས་པོར་ཆུད་པ་རྫོགས་སོ།། །།འདུལ་བ་དྲིས་པ་ཞེས་བྱ་བ་དགྲ་བཅོམ་པ་ཨུ་པཱ་ལིས་དྲིས་པ་ལས་རབ་ཏུ་འབྱུང་བའི་ཆོ་ག་འབྱུང་བའི་མདོ། །རང་བཞིན་སྟོར་བས་བྱས་ན་སླར་ཕུལ་བ་མ་ཡིན་

ནོ། །དགེ་སློང་འདྲེ་གདོན་ལ་སོགས་པས་མྱོས་ཤིང་མི་དྲན་པར་གྱུར་པ་དང་ལུས་ཀྱི་ཁམས་ལ་ནད་ཞུགས་ཏེ་ཁོང་ནས་དགེ་སློང་ཕར་མི་དྲན་རང་བཞིན་ཉམས་པས་ཁྲིམས་འབུལ་ལོ་ཞེས་ཀྱང་ཕུལ་བར་མི་འགྱུར་རོ། །དེར་མ་ཡིན་ནོ། །ཕ་རོལ་ཕོ་སཱུ་ཏྲ་ལྟག་མ་ལྟར་
མི་དྲན་ཞིང་མྱོས་པ་ཞིག་ལ་ཁྲིམས་འབུལ་ལོ་ཞེས་བྱས་ཀྱང་ཕུལ་བར་མི་འགྱུར་རོ། །ལྐུགས་པ་ལ་མ་ཡིན་ནོ། །ཕ་རོལ་པོ་ལྐུགས་པ་སྨྲ་མི་ཤེས་པ་དང་། འོན་པ་མི་ཐོས་པ་ཞིག་ལ་ཁྲིམས་འབུལ་ལོ་ཞེས་བྱས་ཀྱང་ཕུལ་བར་མི་འགྱུར་རོ། །མི་མ་ཡིན་པའི་རྒྱུད་ལའང་མ་ཡིན།
ལམ་རྒྱུད་ལྔ་ལ་མི་མ་གཏོགས་པར་རྒྱུད་བཞི་གང་ཡང་རུང་སྟེ་ཁྲིམས་འབུལ་ལོ་ཞེས་བྱས་ཀྱང་ཕུལ་བར་མི་འགྱུར་རོ། །མ་གོ་བ་ལ་མ་ཡིན། ཁམས་གཞན་གྱི་སྐད་མི་མཐུན་ཏེ་བརྡ་མི་ཕྲད་པ་དང་། བརྡ་ཕྲད་ཀྱང་སྒྲ་བསྐྱུངས་ཏེ་སྨྲས་པས་མ་གོ་བ་ལྟ་བུ་ནི་ཁྲིམས་འབུལ་ལོ་ཞེས་ཀྱང་ཕུལ་
བ་མ་ཡིན་ནོ། །དབེན་པ་ལ་ཡང་མ་ཡིན་མི་མེད་པ་དགོན་པའི་ཁང་སྟོང་ལྟ་བུ་དབེན་པ་སུས་ཀྱང་མ་ཐོས་པར་ཁྲིམས་འབུལ་ལོ་ཞེས་བྱས་ཀྱང་ཕུལ་བ་མ་ཡིན་ནོ། །དབེན་པར་འདུ་ཤེས་སུ་འང་མ་ཡིན། དགོན་པ་འམ་ཁང་སྟོང་མི་མེད་པ་སྙམ་དུ་བསམས་ཏེ་ཁྲིམས་འབུལ་ལོ་ཞེས་བྱས་སུ་
ཟིན་ཀྱང་ཁྲིམས་ཕུལ་བར་མི་འགྱུར་སཱུ་ཏྲ་འདི་ཡན་ཆད་ལྟག་མའི་རྣམས་སླར་བཟློག་སྟེ། དེ་རྣམས་ལྟ་བུ་མ་ཡིན་པ་ལ་ཁྲིམས་འབུལ་ལོ་ཞེས་བྱས་ན་ཕུལ་བར་འགྱུར། སློབ་པ་འབུལ་ལོ། །ཡིད་ལ་ཁྲིམས་འབུལ་བར་བསམས་ཏེ་སློབ་པ་འབུལ་ལོ་ཞེས་བྱས་པ་བདག་གནས་ཤིང་
སྤྱོད་པ་སློབ་པ་འབུལ་བ་ཡིན་པས་ཕུལ་བར་འགྱུར། སངས་རྒྱས་ཡིན་ལ་ཁྲིམས་འབུལ་བར་བསམས་ཏེ་སངས་རྒྱས་འབུལ་ལོ་ཞེས་བྱས་ནས་སངས་རྒྱས་ལ་ཕྱོགས་ཤིང་བརྟེན་པ་ཡིན་པའི་ཕྱིར་ཁྲིམས་ཕུལ་བར་འགྱུར་རོ། །ཆོས་ཞི་བའི་ཆོས་མྱ་ངན་ལས་འདས་པའི་ཕྱིར་ཞུགས་པ་
ཆོས་འབུལ་ལོ་ཞེས་བྱས་ནའང་ཁྲིམས་མེད་པར་འགྱུར་རོ། །དགེ་འདུན་ཐོག་མ་བདག་དགེ་འདུན་ལས་འཐོབ་ཅིང་མཚུངས་པར་སྤྱོད་པའི་གྲོགས་དགེ་འདུན་ཡིན་པས་དེ་ཕུལ་ནའང་མེད། མདོ་སྡེ་བདག་ཐོག་མ་མདོ་སྡེའི་ཕྱིར་སློབ་པ་དང་ཉན་པ་དང་སྤྱོད་ཅིང་སྒོམ་པའི་ཕྱིར་ཁྲིམས་བླངས་པ་

ཡིན་པས་མདོ་སྡེ་དབུལ་ཞེ་ན་མེད་པར་འགྱུར། འདུལ་བ། འདུལ་བའི་སྡེ་ཉིད་སློབ་པའི་ཁྲིམས་ཡོད་པས་འབུལ་ལོ་ཞེས་བྱས་ནའང་ཁྲིམས་མེད་པར་འགྱུར་རོ། །མ་ལྟ་བུ། མ་ལྟ་བུ་ནང་དུ་མདོ་སྡེ་དང་འདུལ་བ་ཀུན་འདུས་ཏེ་མྱ་ངན་ལས་འདས་པའི་ཆོས་ཉིད་ཡིན་པས་མ་ལྟ་བུ་འབུལ་
ལོ་ཞེས་བྱས་ན་ཁྲིམས་མེད་པར་འགྱུར། སློབ་དཔོན་སློབ་དཔོན་ལྔ་ལ་གནས་ཤིང་། ཆོས་དང་ཁྲིམས་ལ་སོགས་པ་དེ་ལས་སློབ་པ་ཡིན་པས། དེ་ལ་འབུལ་ལོ་ཞེས་བྱས་ན་ཁྲིམས་མེད་པར་འགྱུར། མཁན་པོ། །བདག་ཐོག་མ་ཁྲིམས་ནོད་པའི་ཚེ་མཁན་པོ་ལ་གནས་ནས་
ཁྲིམས་ནོད་པ་དང་། ཕྱིན་ཆད་ཀྱང་དེ་ལ་གནས་ཤིང་སྤྱོད་པ་ཡིན་པས་དེ་འབུལ་ལོ་ཞེས་བྱས་ནའང་མེད་པར་འགྱུར། ཁྱིམ་གནས་སུ་བདག་ཟུང་ཤིག་གམ། བདག་ཁྱིམ་པར་ཟུང་ཤིག་ཅེས་བྱས་ནའང་ཁྱིམ་པ་ལ་ཁྲིམས་མེད་པ་ཡིན་པས་ཁྲིམས་ཕུལ་བར་འགྱུར་ཏེ། དགེ་སྦྱོང་ངམ་
བདག་དགེ་སྦྱོང་དུ་ཟུང་ཤིག་ཅེས་བྱས་ནའང་། དགེ་སྦྱོང་ལ་ཁྲིམས་ཉིས་བརྒྱ་ལྔ་བཅུ་མེད་པས་ན། ཁྲིམས་ཆེན་པོ་ནི་ཕུལ་བར་འགྱུར། དགེ་སྦྱོང་གི་ཁྲིམས་ནི་ཡོད། ཉུག་རུམ་མམ། མ་ནིང་རྣམ་པ་ལྔ་ལ་མཚན་བཅད་པ་ལ་མ་རུལ་པའམ་སྟེ་ཉུག་རུམ་དུ་ལྟོས་ཤིག་ཅེས་བྱས་
ནའང་ཁྲིམས་མི་འཆགས་ཏེ་མེད་པར་འགྱུར་རོ། །མ་ནིང་ངམ། མ་ནིང་རྣམ་བཞི་ལྟ་བུར་ལྟོས་ཤིག་བྱས་ནའང་ཁྲིམས་མི་འཆགས་པའི་ཕྱིར་ཕུལ་བར་འགྱུར་རོ། །དགེ་སློང་མ་དགེ་སློང་མ་བསླུས་པར་ལྟོས་ཤིག་ཅེས་བྱས་ནའང་དགེ་སློང་མ་བསླུས་པ་ཁྲིམས་མི་འཆགས་པ་ཡིན་པའི་
ཕྱིར་ཁྲིམས་མི་འཆགས་པར་འགྱུར་ཏེ་ཕུལ་བར་འགྱུར། བསླུས་པ་འམ་རྐུན་གནས་སམ། བདག་རྐུན་གནས་སུ་གཟིགས་ཤིག་ཅེས་བྱས་ནའང་རྐུན་གནས་སུ་ཁྲིམས་མི་འཆགས་པའི་ཕྱིར་ཕུལ་བར་འགྱུར། ཐ་དད་དུ་གནས་པ་འམ། སངས་རྒྱས་ཀྱི་ཆོས་ལ་གཞན་ལོག་པར་
བལྟས་པ་དེ་བ་ཧ་ཧིའི་ཆོས་ལྟ་བུ་སྟེ། ཐ་དད་པར་ལྟོས་ཤིག་ཅེས་བྱས་ནའང་ཁྲིམས་ཕུལ་བར་འགྱུར། མི་གནས་པ་འམ། ཚུལ་ཁྲིམས་དང་ལྟ་བ་དང་ལྷན་ཅིག་མི་གནས་པ་སྟེ་ཕས་ཕམ་པ་ལྟ་བུ་ལ་བྱ་སྟེ། མི་གནས་པར་ལྟོས་ཤིག་ཅེས་བྱས་ན་ཁྲིམས་མེད་པར་འགྱུར། མུར་འདུག་གམ་

མུར་འདུག་ཏུ་འཇུག་པ་འམ། དགེ་སློང་ལས་མུར་འདུག་ཏུ་ཞུགས་ཏེ་ཆོས་གོས་བོར་ནས་སྐྱ་རེངས་བྱུང་བ་འམ། ཆོས་གོས་བོར་ཀྱང་སེམས་ཀྱིས་མུར་འདུག་ལ་ཕྱོགས་ན་ཁྲིམས་མེད་པར་སོང་ངོ་ཞེས་བྱ་བ་ལྟ་བུ་སྟེ། མུར་འདུག་ཏུ་འཇུག་པར་ལྟོས་ཤིག་ཅེས་བྱས་
ནའང་ཁྲིམས་མེད་པར་འགྱུར་བའི་ཕྱིར། མ་བསད་པ་མ་བསད་པར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར། ཕ་བསད་པའམ་ཕ་བསད་པར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར། དགྲ་བཅོམ་པ་བསད་པ། དགྲ་བཅོམ་པ་བསད་པར་ལྟོས་ཤིག་ཅེས་བྱས་
ནའང་ཁྲིམས་མེད་པར་འགྱུར། དགེ་འདུན་ཕྱེ་དགེ་འདུན་ཕྱེ་བར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར་རོ། །ཡང་དག་པར་གཤེགས་པ་ལ་ངན་སེམས་ཀྱིས་ཁྲག་ཕྱུང་བའོ། །དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བར་ལྟོས་ཤིག་ཅེས་བྱས་ནའང་ཁྲིམས་མེད་
པར་འགྱུར་ཏེ་ཕུལ་བར་ཆུད། མ་བསད་པ་ཞེས་འབྱུང་བའི་སཱུ་ཏྲ་མན་ཆད་མཚམས་མེད་པ་ཡིན་ཏེ། ཁྲིམས་མི་འཆགས་པས་ན་དེ་ལྟ་བུར་ལྟོས་ཤིག་ཅེས་བྱས་ནའང་ཁྲིམས་ཕུལ་བར་འགྱུར་བ་ཡིན་ནོ། །སཱུ་ཏྲ་འདི་ཡན་ཆད་ཁྲིམས་ཕུལ་བར་འགྱུར་རོ་ཞེས་འབྱུང་བ་ཀུན་དུ་སཱུ་ཏྲ་ཀུན་སེམས་
ཀྱིས་འབུལ་བར་བསམས་ན། སཱུ་ཏྲ་ལྟག་མའི་ཚིག་གང་ཡང་རུང་སྟེ་སྨྲས་ན་ཁྲིམས་མེད་ཅིང་ཕུལ་བར་འགྱུར་རོ། །ཆོག་གོ་བདག་ནི་ཚེ་དང་ལྡན་པ་དག་ཚངས་པ་མཚུངས་པར་སྤྱོད་པ་དང་གནས་པའི་སྤྱོད་པས་ཆོག་གོ། །མི་འདོད་དོ་ཞེས་བྱས་ལ་སེམས་ཀྱིས་ཀྱང་ཁྲིམས་ཕུལ་པར་བསམས་ན་ཁྲིམས་
ཕུལ་བར་འགྱུར་ཏེ། དེ་ལ་གནས་པ་ཞེས་བྱ་བ་ནི་གཙུག་ལག་ཁང་ན་གནས་པར་གཅིག་དང་ཟས་དང་ནོར་རྫས་ལ་སོགས་པ་འཚོ་བའི་ཡོ་བྱད་གཅིག་ཏུ་སྤྱོད་པར་གནས་པ་ལ་བྱ། སྤྱོད་པ་ཞེས་བྱ་བ་ནི་དགེ་འདུན་གྱི་ལས་བརྒྱ་རྩ་གཅིག་ལྟ་བུ་ལ་མཐུན་པར་སྤྱོད་པ་ལ་བྱའོ། །གནས་པ་དང་སྤྱོད་པ་
དང་གཉིས་ཀ་ཆོག་གོ་ཞེས་སྨྲས་ནའང་ཕུལ་བར་འགྱུར། གནས་པ་དང་སྤྱོད་པ་གཅིག་གིས་ཆོག་གོ་ཞེས་བྱས་ནའང་ཕུལ་བར་འགྱུར། ཕུལ་བའི་ཆོ་གའོ།། །།མི་ཚངས་པར་སྤྱོད་པའི་ཕས་ཕམ་པ་འཆད་དོ། །བཅུག་རེག་དགའ་བར་ཚོར་ན་འོ། །མི་ཚངས་པར་སྤྱོད་པ་ཕམ་པའི་ཡན་ལག་དྲུག་

དང་ལྡན་ན་ཕམ་སྟེ་བཅུག་ཀྱང་བཅུག་རེག་ཀྱང་རེག་དགའ་བར་ཚོར་བ་དང་ཡན་ལག་གསུམ། འཛག་བྱེད་དོ། །གཅིན་འཛག་པ་སྟེ་ཕོ་མཚན་ལ་བྱ་སྟེ། ཕོ་མཚན་གྱིས་བཅུག་པ་དང་ཡན་ལག་བཞི་དེར་རོ། །ཕོ་མཚན་གྱིས་མོ་མཚན་དུ་བཅུག་པ་དང་ཡན་ལག་ལྔ་མ་ཉམས་པར་རོ། །
མོ་མཚན་དང་། ཁ་དང་། རྐུབ་གསུམ་མ་སྣད་ཅིང་མ་ཉམས་པར་བྱས་པ་དང་ཡན་ལག་འདི་དྲུག་ལྡན་ན་ཕམ་པར་འགྱུར། ཡན་ལག་གཅིག་མ་ཚང་ན་སྦོམ་པོར་འགྱུར། ཁའམ་རྐུབ་ཀྱི་ལམ་དུའོ། །ཁ་དང་རྐུབ་ཀྱི་ལམ་དུ་མི་ཚངས་པར་སྤྱད་ན་ཡང་མོ་མཚན་དང་འདྲ་སྟེ་ཕམ་མོ། །ཉམས་
པར་ན་སྦོམ་པོའོ། །མོ་མཚན་དང་ཁ་རྐུབ་གསུམ་ཉམས་ཤིང་སྣད་པ་ལྟ་བུ་ལ་མི་ཚངས་པར་སྤྱད་ན་སྦོམ་པོར་འགྱུར་རོ། །མི་བཟོད་པ་ལ་འབྲི། བུད་མེད་ལོ་བཅུ་གཉིས་ལོན་པ་མན་ཆད་རྒྱོར་མི་བཟོད་ཅེས་ཀྱང་བྱ། ཁ་ཅིག་ལོ་མང་ཡང་རྒྱོར་ཡང་མི་བཟོད་པ་ཡང་ཡོད། ཁ་ཅིག་ལོ་ཉུང་
ལ་རྒྱོར་བཟོད་པ་ཡང་ཡོད། མདོར་ན་གང་ཡང་རུང་སྟེ། རྒྱོར་མི་བཟོད་པའམ་མི་རུང་བ་ཞིག་ལ་མི་ཚངས་པར་སྤྱོད་ན་སྦོམ་པོར་འགྱུར། མི་འབྲི་བ་ནི་ཕས་ཕམ་པར་འགྱུར་ཏེ། སྦོམ་པོར་མི་འབྲི་བ་ནི་འོག་ནས་འབྱུང་བ་རྣམས་ལ་མི་ཚངས་པར་སྤྱོད་ནའོ། །མིའི་རྒྱུད་མ་ཡིན་བ། ལམ་རྒྱུད་
ལྔ་ལ་མི་མ་གཏོགས་པའི་ལམ་རྒྱུད་བཞི་གང་ཡང་རུང་སྟེ། སྒོ་གསུམ་ལས་གང་དུ་མི་ཚངས་པར་སྤྱོད་ཀྱང་ཕམ། ཕོ་སྐྱེས་པའི་སྒོ་གཉིས་སུ་སྤྱད་ན་ཡང་ཕམ་མ་ནིང་མ་ནིང་རྣམ་ལྔར་བཤད་པ་ལ་གང་ཡང་རུང་སྒོ་གསུམ་དུ་མི་ཚངས་པར་སྤྱོད་ན་ཕམ། འཇུག་པ། ཕོ་མཚན་དཀྲིས་ཏེ་
མི་ཚངས་པར་སྤྱོད་ན་ཡང་ཕམ། མཇུག་ནས་དཀྲིས་པ། མོ་མཚན་རས་ལྟ་བུས་གཡོགས། ཕོ་མཚན་གྱིས་རས་དང་བཅས་ཏེ་ནང་དུ་བཅུག་ནས་སྤྱད་པ་ཡང་ཕམ། ཕོ་མཚན་དང་མོ་མཚན་གཅིག་དཀྲིས་གཅིག་མ་དཀྲིས་པར་སྤྱད་ཀྱང་རུང་གཉིས་ཀ་དཀྲིས་ཏེ་མི་ཚངས་པར་སྤྱད་ནའང་ཕམ།
ཤི་བ་ལ་ཡང་ངོ་། །ཤི་བའི་རོ་ལ་སྒོ་གསུམ་གང་ཡང་རུང་སྟེ་མི་ཚངས་པར་སྤྱད་ན་ཕམ། མ་ཚོར། གཉིད་ལོག་པ་འམ་ར་རོ་བ་ལྟ་བུ་ལ་མི་ཚངས་པར་སྤྱོད་དེ་ཕ་རོལ་མ་ཚོར་ཡང་ཕས་ཕམ། རང་བཞིན་སྟོར་བར་གྱུར་པ། སྨྱོས་ཤིང་རང་བཞིན་སྟོར་བ་ལ་མི་ཚངས་པར་སྤྱད་དེ་ཕ་རོལ་གྱིས་མ་ཚོར་

ཡང་ཕས་ཕམ། མི་འདོད་པ་ཡང་ཆུད་དོ། །ཕ་རོལ་པོ་མི་ཚངས་པར་སྤྱད་པར་མི་བཏུབ་སྟེ་ནན་གྱིས་མི་ཚངས་པར་སྤྱད་ན་ཡང་ཕས་ཕམ། རང་གི་འཇུག་གནས་སུ་ཡང་ངོ་། །བདག་གི་ཁ་དང་རྐུབ་ཏུ་བདག་གི་ཕོ་མཚན་གྱིས་མི་ཚངས་པར་སྤྱད་ཀྱང་ཕམ་སྟེ། མཚན་རིང་དང་
རྒྱབ་མཉེན་ལས་བཅས། སྔོན་དུ་ཕྱིར་བདར་ཏེ་ནང་དུ་བཏང་བར་བསམས་ན་ཡང་ངོ་། །མོ་མཚན་ཕྱི་རོལ་དུ་དཀུང་དཀུང་ལ་ཁུ་བ་ནང་དུ་བཏང་བ་དང་ནང་དུ་དཀུང་དཀུང་ལ་ཁུ་བ་ཕྱི་རོལ་ཏུ་ཕོ་བ་གཉིས་གང་བྱས་ཀྱང་སྟུ་འཚོང་མ་བྲད་དྲ་ཀ་ཕྱི་ལས་དགེ་སློང་སུན་དྷ་ར་ནན་ད་ལ་འདི་ལྟ་བུར་མི་ཚངས་པར་སྤྱོད་དང་
ཕས་ཕམ་པར་མི་འགྱུར་རོ་ཞེས་བྱས་ནས་དགེ་སློང་དེས་འདི་འདྲ་བར་བྱས་པ་ལས་བཅས། མི་དབེན་པར་ཉིན་མོ་ལོགས་ཀྱིས་ཕབ་སྟེ་མི་ཉལ། ས་མི་དབེན་པར་དགེ་སློང་གཉིད་ལོགས་ཀྱིས་ཕབ་སྟེ་མི་ཉལ། ཉལ་ན་ཉེས་བྱས་དགེ་སློང་གཅིག་ཅིག་ལོགས་ཀྱིས་ཕབ་སྟེ་ཉལ་ཉལ་བ་ལས་ཕོ་མཚན་
སྒྲེན་ཅིང་འདུག་པ་ལ། བུད་མེད་སྦོམ་མོ་ཞེས་བྱ་བས་མཐོང་ནས་ཐལ་བྱུང་མོ་མཚན་དུ་བཅུག་སྟེ་སྤྱད་པ་ལས་བཅས་དབེན་པ་ནི་འོག་ནས་འཆད། དབེན་པ་ནི་རྣམ་པ་གསུམ་སྟེ། ཉིན་མོ་ཉལ་དུ་རུང་བའི་ས་དབེན་པ་ནི་རྣམ་པ་གསུམ་ཡོད་དེ་མིང་གིས་འོག་ནས་འཆད་པ་ཡིན་ནོ། །མཐའ་བསྐོར་ཏེ་
སྒོ་བཅད་ཅིང་གནས་པ་དང་། དབེན་པའི་ས་གཅིག་ནི་ར་བའམ་ཁང་པ་ལྟ་བུ་མཐའ་བསྐོར་ཅིང་འདུག་པ་ལ་སྒོ་གཏན་པ་བཅུག་སྟེ་ཉལ་ན་ཉེས་མེད། དགེ་སློང་སྲུང་དུ་བཅུག་པ་དང་། དབེན་པའི་ས་གཅིག་ང་མ་སད་ཀྱི་བར་དུ་སྲུངས་ཤིག་ཅེས་བསྒོ་སྟེ་ཉལ་བ་ནི་ཉེས་མེད་དེ་དབེན་པ་གཉིས་ཤམ་
ཐབས་ཀྱི་མཐའ་མ་མདུད་པ་བོར་བའོ། །བདག་གི་ཤམ་ཐབས་ཀྱིས་དམ་དུ་དཀྲིས་ཏེ་མདུད་པ་བོར་ནས་ཉལ་ནའང་ཉེས་མེད་དེ་དབེན་པ་འདི་གསུམ་མོ། །ཕས་ཕམ་པའི་ཐོག་མ་སྟེ་རྣམ་པར་འབྱེད་པའི་འོ། །ཕས་ཕམ་པ་དང་པོ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།
འདི་མན་ཆད་ལས་ཀྱི་དངོས་པོ་འཆད་པ་ཡན་ཆད་འདུལ་བ་གཞན་གྱི་ནང་ནས་འབྱུང་བའི་མདོའང་འཆད་མོད་ཀྱི། གཞི་རྣམ་པར་འབྱེད་པས་བཟུང་སྟེ་ཐམས་ཅད་འདུལ་བ་རྣམ་པར་འབྱེད་པའི་ནང་དུ་འདུའོ། །གང་ན་བུད་མེད་འདོད་པ་ཅན་གྱི་དེར་མི་འགྲོ། བུད་མེད་འདོད་ཆགས་ཆེ་ཞིང་སྦྱར་བ་

སྐྱེས་པ་མཐོང་ན་ཟེ་ལྡང་བ་ལྟ་བུའི་དྲུང་དུ་མི་འགྲོ །ཡོན་བདག་ཅིག་གིས་ཤཱཀྱིའི་རིགས་དགེ་སློང་བཟང་པོ་དག་ཅིག་སྤྱན་དྲངས་ཏེ་འོངས་པ་དང་ཡོན་བདག་དེའི་ཆུང་མ་དགེ་སློང་དག་གི་ཤ་ཚུགས་བཟང་པོ་ལས་འདོད་ཆགས་ལངས་ཏེ་ཤི་བ་ལས་བཅས། གང་ན་མི་མ་ཡིན་པས་མི་བདེ་བར་བྱེད་པ་
དེར་མི་གནས། དགོན་པའམ། ཤིང་དྲུང་ལྟ་བུ་ན་གནོད་སྦྱིན་ལ་སོགས་པ་ཀྱལ་ཀ་བྱེད་ཅིང་འོངས་པའི་གནས་སུ་མི་འདུག །དགེ་སློང་གཅིག་ཅིག་དགོན་པ་ན་བསམ་གཏན་སྤྱོད་ཅིང་འདུག་པ་ལ་གནོད་སྦྱིན་མོ་གཅིག་ཅིག་བུད་མེད་དུ་སྤྲུལ་ཏེ་འོངས་ནས་ལན་དུ་མར་མི་ཚངས་པར་
སྤྱད་པར་སྟེན་ཏེ། དགེ་སློང་མ་བཏུབ་པ་དང་རྒྱལ་པོ་བིམ་བི་ས་རའི་མཐོངས་སུ་བོར་བ་ལས་བཅས། འདོད་ཆགས་ཆེ་བས་སྒྲེའུ་ཆོངས་ཤིག །འདོད་ཆགས་ཆེ་ཞིང་ཁུ་བ་རྟག་ཏུ་ཟགས་པས་སྒྲེའུ་བཅང་། དགེ་སློང་མ་མྲྀ་ག་ར་ཏ་རྒྱུན་དུ་ཞུགས་པས། སངས་རྒྱས་ཀྱི་གཅུང་དགེ་སློང་
སུན་དྷ་ར་ནན་ད་ལ་སངས་རྒྱས་དང་ནོར་ཏེ་ཕྱག་བྱས་ནས་རྐང་པ་ལས་བཟུང་བ་དང་། འདོད་ཆགས་ལངས་ཏེ་ཁུ་བ་སྟོར་ནས། དགེ་སློང་མའི་མགོ་སྟེང་དུ་ལྟུང་བ་ལས་བཅས། ར་ལྤགས་སམ་ཤ་བ་འམ་བྱི་བའི་ཡང་ངོ་། །མདོ་ལྟག་མ་ལྟར་སྒྲེའུ་བྱ་བའི་རྒྱུ་ནི་མི་རྩུབ་ཅིང་མི་ན་བའི་ཕྱིར་
རེའུ་དང་ཤེའུ་དང་བྱི་ལའི་པགས་པ་ལས་སྒྲེའུ་བྱའོ། །དྲི་མི་ཞིམ་པར་མི་འགྱུར་བའི་ཕྱིར་བསྔལ་བས་སོ། །སྒྲེའུ་ལ་ཁུ་བ་རེག་པ་དྲི་མི་ཞིམ་པ་མེད་པར་བྱ་བའི་ཕྱིར་དར་ཕྱེ་དང་། ཨ་རུ་ར་དང་། ལས་ལ་སོགས་པའི་ཕྱི་མ་བསྔལ་བས་བསྐུའོ། །བཀྲུ་ཞིང་བསྐམ། སྒྲེའུ་དེ་སྐབས་
སྐབས་སུ་བཀྲུ་ཞིང་བསྐམ་མོ། །དེའི་ཚེའི་ཕྱིར་གཞན་ཡང་ངོ་། །མདོ་ལྟག་མ་ལྟར་བཀྲུ་ཞིང་བསྐམ་པའི་ཚེ་སྒྲེའུ་དགོས་པའི་ཕྱིར་འཐེབ་གཅིག་བྱ། མང་དུ་ཟགས་ན་གདིང་བར་བྱ། ཁུ་བ་མང་དུ་ཟགས་ན་སྒྲེའུའི་ནང་དུ་ཕྱེ་མ་ལ་སོགས་པ་གདིང་། ཕྱེ་མའམ་སས་སོ། །མདོ་ལྟག་མ་
ལྟར་སྒྲེའུ་ནང་དུ་བླུགས་པ་ནི་ཕྱེ་མ་དང་ས་ལས་བླུགས་སོ། །ཕྱག་འཚལ་བ་དང་། བཟའ་བའི་ཚེ་བཞག་ལ་ཁྲུས་བྱས་ཏེའོ། །མཆོད་རྟེན་ལ་ཕྱག་འཚལ་བ་དང་ཟན་བཟའ་བའི་ཚེ་སྒྲེའུ་བཞག་སྟེ་ཁྲུས་བྱས་ལ་འགྲོའོ། །ཕྲ་མོར་གཏོགས་པའི་ཕས་ཕམ་པའི་དང་པོའོ། །འདི་ཡན་ཆད་ནི་

འདུལ་བ་ཕྲ་མོ་ཞེས་བྱ་བའི་ནང་ནས་མི་ཚངས་པར་སྤྱོད་པ་ཕས་ཕམ་པ་འཆད་པའི་མདོ་འབྱུང་བའོ།། །།ཁའི་ནི་སོ་ལས་འདས་པའོ། །མི་ཚངས་པར་སྤྱད་པ་ནི་སོ་ལས་འདས་ན་ཕམ། རྐུབ་ཀྱི་རྒྱུད་ནི་འཛུམས་པའི་མཚམས་སོ། །རྐུབ་ཏུ་མི་ཚངས་པར་སྤྱད་ན་
འཛུམས་པའི་མཚམས་འདས་ན་ཕམ། འཛག་བྱེད་ཀྱི་ནི་ཁ་ཤུན་ནོ། །མོ་མཚན་དུ་མི་ཚངས་པར་སྤྱད་ན་ཕྱི་རོལ་གྱི་པགས་པ་དང་ནང་གི་ཤའི་མཚམས་ཀྱི་ཁ་ཤུན་འདས་ན་ཕམ། ཆུད་པ་ནི་དཀྲིས་སོ། །ཕོ་མཚན་ནི་སྒོ་གསུམ་གྱི་ནང་དུ་དཀྲིས་འདས་ན་ཕམ། ཕྱོགས་སུ་ཡང་ཀུན་སྣང་
ན་སྣང་བའོ། །སྒོ་གསུམ་ལས་ཉམས་པ་ནི་སྦྲུལ་གྱིས་ནི་ཆུང་དུ་ཟོས་ཀྱང་ཉམས་པར་བརྩི་སྲིན་བུས་ནི་ཁ་ནང་དུ་ཆེར་ཟོས་ན་ཉམས་པར་བརྩི་སྐྲངས་པ་ནི་སྒོ་ཉིད་ཀྱི་འཁོར་སྐྲངས་ན་ཉམས་པར་བརྩི། འདི་རྣམས་ཡན་ཆད་ལྟ་བུ་ཞིག་ལ་མི་ཚངས་པར་སྤྱད་ན་སྦོམ་པོར་འགྱུར་ཆུང་ཟད་
སྣང་བ་ལ་ནི་མི་བྱའོ། །སྐྲངས་སམ། སྒོ་གསུམ་ལས་སྐྲངས་པ། རུལ་ཏམ། སྒོ་གསུམ་ལས་རུལ་ཅིང་མྱགས་པའོ། །ཞིགས་སམ། སྒོ་གསུམ་ལས་ཞིགས་པ་དང་གྱེས་པ་དང་ཁམ་བུ་ཁམ་བུར་ཆད་པ་ལྟ་བུ་ལ་བྱ། སྲོག་ཆགས་ཀྱིས་ཟོས་པ་ནི་ཉམས་པའོ། །སྦྲུལ་དང་སྲིན་བུ་ལ་སོགས་པ་སེམས་
ཅན་གྱིས་ཟོས་པ་ལ་བྱ་སྟེ། འདི་རྣམས་ལྟ་བུ་ལ་མི་ཚངས་པར་སྤྱད་ན་སྦོམ་པོར་འགྱུར། རྐེད་པར་བཅང་པའི་གཞུག་གནས་ལ་མི་འབྲི། རོ་ལྟ་བུ་རྐེད་པར་བཅད་པའི་སྒོ་གསུམ་དག་ཀྱང་རུང་སྟེ་སྤྱད་ན་ཕམ། གཞུག་གནས་དབུས་ནས་གཤེགས་ཏེ་སྦྱར་བའི་མཚམས་སུ་མི་མངོན་ན་ཡང་ངོ་། །
རོ་ལྟ་བུ་མོ་མཚན་ནས་ལུས་ཆུ་གཤེགས་སུ་གཤེགས་ཏེ་སླར་སྦྱར་ནས། སྦྱར་བའི་མཚམས་མི་མངོན་པ་ཞིག་ལ་མི་ཚངས་པར་སྤྱད་ན་ཕམ་པར་འགྱུར། མངོན་ན་མདོ་བཞིན་པའི་རིམ་མོ། །མདོ་ལྟག་མ་ལྟར་གཤེགས་པའི་མཚམས་མངོན་པ་ཞིག་ལས་མི་ཚངས་པར་སྤྱད་ན་སྦོམ་པོ། སྦོམ་
པོར་བྱེད་པ་ནི་ཕག་ལ་སོགས་པ་བཅོས་ཏེ་སྤུ་ཕྱི་བའོ། །ཕག་ལ་སོགས་པ་སེམས་ཅན་གྱི་གཟུགས་བཙོ་སྟེ་སྤུ་ཕྱི་བ་ལ་སོགས་པ་ལྟ་བུ་ཞིག་གི་སྒོ་གསུམ་དུ་མི་ཚངས་པར་སྤྱད་ན་སྦོམ་པོ། མགོ་བཅད་པའི་ཁར་ཡང་ངོ་། །མགོ་ལྐོག་མ་ལྟ་བུར་བཅད་པའི་ཁར་མི་ཚངས་པར་སྤྱད་ན་སྦོམ་

པོ། འཇུག་པ་དང་འཇུག་གནས་ལུས་དང་སོ་སོར་བྲལ་བ་ལ་ཡང་ངོ་། །སྒོ་གསུམ་དང་ཕོ་མཚན་ལྟ་བུ་ལུས་དང་བྲལ་ཏེ་གུད་ན་བཅད་ཅིང་འདུག་པ་ལྟ་བུ་ལ་འདོད་ཆགས་ཀྱིས་བདག་གིས་སྤྱད་དམ་ཆད་ཅིང་འདུག་པ་ན་གཅིག་གི་ནང་དུ་གཅིག་བཅུག་ན་སྦོམ་པོ། གཞན་ཡང་ཕ་རོལ་གྱི་དང་
ཕ་རོལ་གྱིར་འཇུག་པའོ། །གཞན་གྱི་མོ་མཚན་དུ་གཞན་གྱི་ཕོ་མཚན་བཅུག་པ་བདག་གིས་བྱས་ན་སྦོམ་པོ་སྟེ་དཔེར་ཕྱུགས་རྒལ་བ་ལྟ་བུ་ཕོ་མཚན་མི་ཆུད་ཅིང་འདུག་པ་ལ་བདག་གིས་ཆུད་པར་བྱས་པ་ལྟ་བུའོ། །གཞན་ཡང་ལུས་བཅད་པའི་ཁུང་བུར་རོ། །རོ་ལྟ་བུ་ལ་བཅད་ཅིང་ཕུག་སྟེ་
དེའི་འཕྲོ་དང་བུ་གུར་མི་ཚངས་པར་སྤྱད་ནའང་སྦོམ་པོ། མ་ནིང་གི་འཇུག་གནས་ཕུག་རྡུགས་སུའོ། །མ་ནིང་གི་མོ་མཚན་གཅིན་འོང་བའི་ཁུང་བུ་ཙམ་ཡོད་དུ་ཟད་དེ་མི་ཚངས་པར་སྤྱད་དུ་མི་རུང་བ་ཞིག་ལ་སྤྱད་ན་སྦོམ་པོ། མཆུ་དག་ལ་ཡང་ངོ་། །མཆུ་དང་མཆུའི་ཕྱི་རོལ་དུ་འམ་འདོད་
ཆགས་ཀྱི་སེམས་ཀྱིས་མི་ཚངས་པར་སྤྱད་པའི་ཕྱིར་ཕོ་མཚན་གྱིས་རེག་ན་སྦོམ་པོའོ། །མཚམས་ཀྱི་ཕྱིར་ཕན་ཆད་ཀྱང་ངོ་། །སོའི་ཕྱི་རོལ་མཆུའི་ནང་རོལ་མཁུར་བ་ཕན་ཆད་དུ་འདོད་ཆགས་ཀྱི་སེམས་ཀྱིས་མི་ཚངས་པར་སྤྱད་ན་སྦོམ་པོ། སྒྲེའུར་ཡང་ངོ་། །སྒྲེའུར་འདོད་ཆགས་ཀྱི་སེམས་
ཀྱིས་མི་ཚངས་པར་སྤྱད་ན་སྦོམ་པོ། བལྟབ་པ་དང་མི་རེག་པར་བཅུག་པར་བྱས་པ་ཡང་ངོ་། །སྐྲ་མི་ནུབ་པའི་ཕྱིར་ཕོ་མཚན་རྐེད་པར་བཀུག་ནས་བལྟབ་སྟེ་བཅུག་པ་དང་མོ་མཚན་ལ་མ་རེག་པ་ཞིག་ཏུ་བཅུག་སྟེ་སྤྱད་ན་སྦོམ་པོ། དེའི་ཐ་མར་བཤད་པ་དཀྲིས་པ་ཞེས་པ་ཐམས་ཅད་ཀུན་མི་
རིག་པར་འགྱུར་བ་མ་ཡིན་ནོ། །ཕོ་མཚན་དཀྲིས་པ་དང་མོ་མཚན་ལ་གཡོགས་ཏེ་ཕུལ་བ་དང་གཡོགས་པ་བཅས་ཏེ་ནང་དུ་སོང་བ་གང་ཡང་རུང་བཀབ་པ་དང་དཀྲིས་པ་གཉིས་ཀ་བྱ་སྟེ། བཅུག་ཀྱང་རུང་སྟེ་འདི་ལྟར་བྱས་ཤིང་སྤྱད་དོ་ཅོག་རེག་པར་མི་འགྱུར་ཞིང་ཕས་མི་ཕམ་པར་འགྱུར་བ་ཡང་མ་
ཡིན་གྱི་དར་ལྟ་བུ་སྲབ་མོས་དཀྲིས་ཏེ་རེག་པའི་དྲོད་དང་ལྡན་པར་མི་ཚངས་པར་སྤྱད་པ་ནི་ཕས་ཕམ་པའོ། །གཞན་གྱིས་དཀྲིས་པ་ནི་མ་རེག་པར་འཇུག་པ་ལ་གསུངས་སོ། །མོ་མཚན་དང་ཕོ་མཚན་དཀྲིས་ཤིང་བཀག་པ་ཀོ་ལྤགས་སམ། སྣམ་བུའམ། ཕྱིང་པ་ལྟ་བུ་སྟུག་པོས་བྱས་ཏེ་རེག་པ་

དང་མི་ལྡན་པར་མི་ཚངས་པར་སྤྱད་ན་སྦོམ་པོ། ཕས་ཕམ་པ་དང་པོ་དྲིས་པའི་ཆུད་པའོ། །ཕས་ཕམ་པ་བཞིའི་དང་པོ་སྟེ་མི་ཚངས་པར་སྤྱད་པ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།དགེ་སློང་ཡིན་པར་མི་དྲན་པ་ནི་རང་བཞིན་ཉམས་པའོ། །འདྲེ་གདོན་
དང་རླུང་ནད་ལ་སོགས་པས་སྨྱོས་ཤིང་མྱོས་ཏེ། དགེ་སློང་ཡིན་པར་མི་དྲན་པར་མི་ཚངས་པར་སྤྱོད་པ་ནི་ཕས་ཕམ་པར་མི་འགྱུར། ཉམས་པ་ནི་གཉིས་ཏེ་ནང་དང་ཕྱིའོ། །མོ་མཚན་ནང་ཉམས་ཤིང་སྣད་ཀྱང་རུང་གཉིས་ཀ་སྣད་ཅིང་ཉམས་ཀྱང་རུང་སྟེ་མི་ཚངས་པར་སྤྱད་ན་སྦོམ་པོ། ཕ་རོལ་གྱིས་
སྨྲས་ནས་ཁས་བླངས་ན་བསླབ་པ་ཞིག་གོ། །དགེ་སློབ་མ་ལ་ཕ་རོལ་པོ་ཞིག་གིས་མི་ཚངས་པར་སྤྱོད་དོ་ཞེས་ཟེར་ཞིང་འོངས་པ་ལ་མི་ཚངས་པར་སྤྱད་པར་བྱའོ་ཞེས་ཁས་བླངས་ན། དགེ་སློབ་མའི་ཁྲིམས་ཞིག་གོ། །དེའང་དབོག་གོ། །མདོ་ལྟག་མ་ལྟར་ཁྲིམས་ཞིག་པ་དེ་སླར་དབོག་
ཏུ་མི་རུང་ངོ་། །ལོ་གཉིས་སུ་བསྡད་པ་ནི་ཁྲིམས་ཕྱི་མ་ཕོག་པ་ནས་བརྩིའོ། །ཁ་ཅིག་ན་རེ་མི་ཚངས་པར་སྤྱད་པར་ཁས་བླངས་ཤིང་མི་ཚངས་པར་སྤྱད་པ་བྱས་པ་ཡང་དབོག་ཏུ་རུང་ཞེས་ཟེར་ཏེ། དེ་ལྟ་མ་ཡིན་གྱི་མི་ཚངས་པར་ནི་མ་སྤྱད་ཁས་ནི་བླངས་ཏེ་བསླབ་པ་ཞིག་པ་དེར་སླར་དབོག་ཏུ་
རུང་ངོ་། །དགེ་སློང་ཕས་ནི་སྦོམ་པོ། དགེ་སློང་ཕལ་གཞན་ཞིག་ན་རེ་ཁྱོད་ཀྱི་རྐུབ་ཏུ་མི་ཚངས་པར་སྤྱད་ན་རུང་ངམ་ཞེས་དྲིས་ཏེ། རུང་ངོ་ཞེས་སྨྲས་ན་སྦོམ་པོ། མ་ཟུམས་པར་གྱུར་པ་ལ་ཡང་ངོ་། །མོ་མཚན་ཆེ་ལ་དངོས་པོར་མ་ཟུམས་པར་འདུག་པ་ལ་མི་ཚངས་པར་སྤྱོད་ན་ཡང་སྦོམ་པོ།
གཞུག་པའི་ཕྱིར་རྨར་ཕུལ་བ་ཡང་ངོ་། །མོ་མཚན་དུ་གཞུག་པར་འདོད་པའི་ཕྱིར་ཅི་འདྲ་བར་འདུག་ཅེས་ལག་པས་མྱངས་ཤིང་མནམས་ན་ཡང་སྦོམ་པོ། འཇིགས་ཤིང་ངོ་ཚ་བས་འདོད་ཆགས་མ་གྲུབ་པ་ཡང་ངོ་། །འཇིགས་པ་ནི་གནོད་སྦྱིན་མོ་ཞིག་བུད་མེད་དུ་འཁྲུལ་ཏེ་མི་ཚངས་པར་སྤྱད་པ་
དང་སྤྱད་པའི་ཚེ་འཕྲུལ་མ་ནུས་ནས་སླར་གནོད་སྦྱིན་ཉིད་ཀྱི་ལུས་སུ་གྱུར་ནས། དགེ་སློང་དེ་སྔངས་ཏེ་སྐྲག་པས་དགའ་བར་མ་ཚོར་བ་ལས་བཅས། ངོ་ཚ་བ་ནི་དགེ་སློང་ཞིག་གིས་མ་ལ་མི་ཚངས་པར་སྤྱད་པ་དང་སྤྱད་པའི་ཚེ་མས་སྨྲས་པ་ཁྱོད་ཐོག་མ་ཡང་འདི་ནས་འོངས་ན་ད་ཡང་སླར་དེར་འཇུག་

ཅིང་སྤྱོད་དམ་ཞེས་བྱས་པ་དང་། དགེ་སློང་དེ་ངོ་ཚ་སྟེ་དགའ་བར་མ་ཚོར་བ་ལས་བཅས་རྣམ་པ་འདི་གཉིས་ལྟར་སྤྱད་ན་སྦོམ་པོ། ཕོ་མཚན་གས་པས་ཁུ་བ་མ་གྲུབ་པ་ཡང་ངོ་། །མོ་མཚན་ཆུང་ངུ་ཞིག་ལ་སྤྱད་དེ་ཕོ་མཚན་སྣད་ཅིང་པགས་པ་རལ་པའམ། འཆུས་པ་ལྟ་བུའམ། ཕོ་མཚན་གས་ཤིང་
སྣད་པ་ལྟ་བུ་ཞིག་གིས་མི་ཚངས་པར་སྤྱད་པ་ལས་དགའ་བར་མ་ཚོར་ན་ཡང་སྦོམ་པོ། མ་སྒྲེན་པར་བཅུག་ན་ཡང་ངོ་། །ཕོ་མཚན་མ་སྒྲེན་པར་མོ་མཚན་དུ་བཅུག་ན་སྦོམ་པོ། ལག་པ་ནས་ལག་པར། རྐང་པ་ནས་རྐང་པར་ཚིགས་ནས་ཚིགས་སུ། མཚན་ནས་མཚན་དུ་མ་འབྱོར་ན་ཡང་ངོ་། །
ལུས་ཆེ་ཆུང་ཞུགས་ཏེ་མོ་མཚན་དུ་མི་ཚངས་པར་སྤྱད་དུ་རུང་ཡང་། རྐང་ལག་དང་ཚིགས་དང་། མཚན་ལ་སོགས་པ་འཕགས་པར་ཆེ་ཆུང་ཞུགས་པ་ལས་མི་ཚངས་པར་སྤྱད་ནའང་སྦོམ་པོར་འགྱུར་རོ། །གཡོས་པ་ཙམ་དང་ལྡན་པ་ཡང་ངོ་། །གཞན་གྱིས་ནན་གྱིས་མི་ཚངས་པར་སྤྱད་དེ་དགའ་བར་
ནི་མ་ཚོར་གྱི། ཆུང་ཟད་བག་ཙམ་གྱི་དགའ་བར་ཚོར་ན་སྦོམ་པོ། དགེ་སློང་རྡོས་བཏབ་པ་ཞིག་གཉིད་ལོག་པ་ལས་ཕོ་མཚན་སྒྲེན་པ་བུད་མེད་ཞིག་གིས་མཐོང་སྟེ་ཐལ་བྱུང་མོ་མཚན་དུ་བཅུག་སྟེ་སྟེང་ནས་བཀུད་པ་དང་དགེ་སློང་ཕས་ཚོར་ཏེ་ཉམ་ཆུང་ཞིང་རྔོན་པས་འཕྲ་འཕྲ་སྟེ་བག་ཙམ་གཡོས་པ་
ལས་བཅས། ཤིང་དང་བ་སོ་དང་། རྡོ་དང་གོས་ཀྱི་གཟུགས་ལ་དེ་ལ་བྱས་ནས་འོན་ཏེ་མཚན་གྱི་མཚམས་ཙམ་ན་ཡང་ངོ་། །མིང་གིས་སྨོས་པ་འདི་རྣམས་ལས་བུད་མེད་ཀྱི་གཟུགས་སུ་བྱས་པ་ལས་མི་ཚངས་པར་སྤྱད་པར་བརྩལ་བ་དང་། ནང་ན་འདྲེ་གདོན་གནས་པས་མོ་མཚན་ཉི་ཚེ་བུད་མེད་
ཀྱི་དང་འདྲ་བ་མ་གྱུར་པ་ཞིག་ལ་སྤྱད་ན་སྦོམ་པོར་འགྱུར། ལུས་ཀྱི་ཡན་ལག་ཐམས་ཅད་ཀྱིས་རེག་པར་གྱུར་ན་རྩ་བའོ། །མདོ་ལྟག་མ་ལྟ་བུའི་གཟུགས་སུ་བྱས་པ་ལ་མི་ཚངས་པར་སྤྱད་པ་དང་ལུས་ཀྱི་ཡན་ལག་ཐམས་ཅད་མི་དང་འདྲ་བར་གྱུར་ན་ཕས་ཕམ་པའོ། །བསྙེན་པར་རྫོགས་
པས་མོ་མཚན་དུ་རྐང་པ་བཅུག་ན་ཡང་ངོ་། །མི་ཚངས་པར་སྤྱོད་དུ་སོང་སོང་བ་ལས་མོ་མཚན་ཆེ་བར་གྱུར་ནས་ཕོ་མཚན་གྱིས་ནི་མ་སྤྱད་ཀྱི་རྐང་པ་བཅུག་པ་ལས་བཅས་ཏེ་མི་ཚངས་པར་སྤྱད་པའི་ཕྱིར་མོ་མཚན་དུ་རྐང་པ་བཅུག་ནའང་སྦོམ་པོ། གཞུག་གནས་ཀྱི་ཕྱི་རོལ་དུ་ཕོ་མཚན་གྱིས་རེག་པ་དེ་

ཙམ་གྱིས་ཀྱང་ངོ་། །བུད་མེད་གཅིག་ཅིག་སྒྲེན་མོར་ཁྲོན་པ་ན་ཆུ་ཆུ་བར་དགུས་པ་དང་། བར་རམ་སབ་མོའི་རྒྱབ་ནས་དགེ་སློང་ཅིག་གིས་སབ་མོ་ལ་བུ་གུ་ཡོད་པའི་ནང་ནས། ཕོ་མཚན་བཅུག་སྟེ་མོ་མཚན་ལ་རེག་པར་བྱས་པ་ལས་བཅས་ཏེ་མོ་མཚན་ལ་ཕོ་མཚན་
རེག་པ་ཙམ་གྱིས་ཀྱང་སྦོམ་པོ། བསྙེན་པའི་ཕྱིར་གཞན་ལ་བསྒོ་ན་ཡང་ངོ་། །མི་གཞན་ལ་ཁྱོད་མི་ཚངས་པར་སྤྱོད་ཅིག་ཅེས་བསྒོ་ན་སྦོམ་པོ། རང་བཞིན་དུ་སྒྲེན་པ་ནི་མི་འབྲིའོ། །ཕོ་མཚན་ཡོད་ནས་སྒྲེན་པས་མི་ཚངས་པར་སྤྱད་ཀྱང་ཕས་ཕམ་པར་མི་འགྱུར་རོ་སྙམ་དུ་བསམས་ཏེ་སྤྱད་ཀྱང་
ཕས་ཕམ་པ་ཡིན་པ་མ་ཡིན་ནོ། །མདུན་དང་རྒྱབ་གཉིས་གང་དུ་བརྩལ་ནས་དེ་ལས་གཞན་དུ་ཟིན་ན་ཡང་ངོ་། །མོ་མཚན་དུ་མི་ཚངས་པར་སྤྱོད་པར་བསམས་ཏེ་སྤྱོད་སྤྱོད་པ་ལས་རྐུབ་ཏུ་སོང་སྟེ་འདོད་ཆགས་གྲུབ་ན་ཡང་ཕས་ཕམ་མོ། །ལམ་གྱི་ལྷག་མར་ཡང་གཞུག་གོ་ཞེ་ན་ཡང་མི་འབྲིའོ། །
སྒོ་གསུམ་ཆར་དུ་མི་ཚངས་པར་སྤྱད་ལ་སྒོ་ཐ་མ་གཅིག་ཏུ་འདོད་ཆགས་གྲུབ་པར་བྱའོ་ཞེས་བསམས་ཏེ་སྤྱད་པ་ལས་སྒོ་གཉིས་སུ་ནི་མ་སྤྱད་ཀྱི་སྒོ་དང་པོར་འདོད་ཆགས་གྲུབ་ནས་གཉིས་སུ་མ་སྤྱད་པའི་ཕྱིར་ཕམ་པར་མི་འགྱུར་བ་མ་ཡིན་ཏེ་ཕམ་མོ། །ཞིག་གོ་ཞེས་བསམས་ན་ཡང་མ་ཡིན་ནོ། །
ཕག་ཅིག་བཅིངས་ཤིང་འདུག་པ་ལས། དགེ་སློང་གིས་སྙིང་རྗེ་བའི་ཕྱིར་ཐུག་ཐུབ་ཏུ་བཏང་བ་ལས་ཕག་བདག་གིས་དགེ་སློང་གིས་བཏང་བར་ཐོས་ནས་དགེ་སློང་ཁྱོད་ནི་ཁྲིམས་ཞིག་ཅིང་མེད་པའོ་ཞེས་བསྒོ་བ་དང་། ཁྲིམས་ཞིག་པ་ནི་མ་ཡིན་མོད་ཀྱི། དགེ་སློང་གིས་ཀྱང་ཁྲིམས་ཞིག་པ་ཡིན་
ནོ་སྙམ་བསམས་ནས་མི་ཚངས་པར་སྤྱད་པ་ལས་བཅས་ཏེ་ཕྱིས་མི་ཚངས་པར་སྤྱོད་པའི་ཚེ་ཕམ་མོ། །ནད་དབྱུང་བའི་ཕྱིར་ཡང་མི་རུང་ངོ་། །ཆུས་བགགས་པ་དང་ཕོ་མཚན་ལ་ཤུ་བ་བྱུང་བའི་ནད་ལ། སྨན་པ་ན་རེ་མི་ཚངས་པར་སྤྱད་ན་ཕན་ནོ་ཞེས་ཟེར་ཏེ་ནད་ལ་ཕན་པའི་ཕྱིར་མི་ཚངས་པར་སྤྱད་ཀྱང་
ཕམ། ལམ་ལ་གཞན་དུ་འདུ་ཤེས་སམ་ཡིད་གཉིས་སུའང་མ་ཡིན། སྣར་ཕོ་མཚན་བཅུག་སྟེ་སྤྱད་པར་བསམས་པ་ལས་ཁར་སོང་སྟེ། འདོད་ཆགས་གྲུབ་པ་དང་། འདོད་ཆགས་ནི་ཁར་སྤྱད་དུ་གྲུབ་ཀྱི། འདོད་ཆགས་ཁར་གྲུབ་བམ་སྣར་གྲུབ་གཏོལ་མེད་དེ་ཐེ་ཚོམ་ཟ་བ་ལྟ་བུ་ཡང་

ཕས་ཕམ་པར་འགྱུར་རོ། །ལམ་མ་ཡིན་པ་ཡང་དེ་ལྟར་སྦོམ་པོའོ། །སྒོ་གསུམ་མ་ཡིན་པར་རྣ་བ་དང་སྣ་ལ་སོགས་པར་མི་ཚངས་པར་སྤྱད་ནའང་སྦོམ་པོ། ལྟུང་བ་མེད་པ་རིངས་པས་བུད་མེད་ཀྱི་སྟེང་དུ་ལྟུང་ནའོ། །སྔངས་པའམ་རིངས་པ་ལྟ་བུས་རྡེག་འཆོས་ཏེ་བུད་མེད་ཀྱི་སྟེང་དུ་འགྱེལ་བ་
ནི་ཉེས་མེད་དོ། །མི་འདོད་བཞིན་དུ་ཕོངས་པས་མགུལ་ནས་འཇུས་ན་ཡང་ངོ་། །བུད་མེད་འདྲེ་ལྟ་བུས་སྔངས་ཏེ་འཇིགས་པའི་ཕྱིར། དགེ་སློང་མི་འདོད་དུ་བཞིན་མགུལ་ནས་འཇུས་ནའང་ཉེས་མེད་དོ། །མཆུ་དང་མཆུར་རེག་པ་ཡང་ངོ་། །སྒོ་ལྟ་བུ་ལ་བུད་མེད་དང་དགེ་སློང་ཕས་བྱུང་ཚུས་བྱུང་
སྟེ་འཕྲལ་ལ་གདོང་ཐུག་ཏུ་ཕྲད་ནས་མཆུ་གཉིས་རེག་ཏུ་ཟིན་ཀྱང་ཉེས་མེད། ཁྱི་མོའི་མདུན་དུ་མི་གཅི་བར་བྱ། དགེ་སློང་གཅིག་ཅིག་ཁྱི་མོའི་མདུན་དུ་ཁ་བལྟས་ཏེ་གཅིན་གཅི་བ་དང་། ཕོ་མཚན་ལ་ཁྱིའི་སྙིང་ལ་ཤ་གཞན་ཞིག་སྙམ་སྟེ་བརྒྱུགས་ནས་ཁར་བཅུག་པ་ལས་བཅས་ཏེ། ཁྱི་མོའི་
མདུན་དུ་ཉེས་བྱས་དགོན་པ་གང་དུ་སྲོག་ལ་དམའ་བ་དེར་མི་གནས། ཆུ་གང་དུ་ཕོ་མཚན་ཟིན་གྱིས་དོགས་པས་སྒྲེན་མོར་མི་འབོག་དགེ་སློང་གཅིག་ཅིག་ཆུ་རྒལ་བ་དང་། ཆུར་གནས་པའི་སེམས་ཅན་ཞིག་གིས་ཕོ་མཚན་ཁར་བཅུག་པ་དང་། དགེ་སློང་གི་ཡིད་ལ་ཕོ་མཚན་སེམས་ཅན་གྱི་ཁར་སོང་
གིས་ཕས་ཕམ་མོ་སྙམ་དུ་ཐེ་ཚོམ་ཟོས་པ་ལས་ཕས་ཕམ་པར་ནི་མི་འགྱུར་གྱི། ཕྱིན་ཆད་ཕོ་མཚན་ཟིན་གྱིས་དོགས་པའི་ཆུ་ལ་རས་ཀྱིས་མ་དཀྲིས་པར་མ་འབོགས་ཤིག་ཅེས་བཅས་ཏེ་རས་ཀྱིས་མ་དཀྲིས་པར་འབོག་ན་ཉེས་བྱས། དེར་གྲུ་ལ་ཤེས་བཞིན་དུ་རྒལ། གྲུ་ལ་རྒལ་བའི་ཚེའང་གྲུ་བུབ་ན་
བུད་མེད་ཀྱིས་མི་ཟིན་པ་དང་རྒྱལ་བའི་ཕྱིར་ཕོ་མཚན་མི་ཟིན་པར་རས་ཀྱིས་དཀྲི་བ་ཤེས་བཞིན་དུ་བྱ། དེ་ལྟར་འདུ་ཤེས་མ་བཞག་ན་ཉེས་བྱས། བའི་ནང་དུ་འགྲོ་ན་ཡང་ངོ་། །བ་ལང་གི་ཁྲོད་དུ་འགྲོ་ན་འང་རྡུང་དུ་འོང་བའི་ཕྱིར་བག་བྱ་བ་དང་བ་ལང་མི་རེག་པར་ཤེས་བཞིན་དུ་མ་བྱས་ན་ཉེས་བྱས། ཁྲོན་
པའི་ཆུར་བརྟག་པ་ཡང་ངོ་། །ཁྲོན་པའི་ནང་ན་བུད་མེད་འགྱེལ་ཞིང་འདུ