Luận tạng Tây Tạng (Tengyur) — Tập 164

ད་ནི་
གོང་དུ་བསྟན་པ་རྣམ་པ་གསུམ་དུའང་མ་ཟད་པས་ན། སྨད་གཡོགས་ནི་གཉིས་དང་ལྔའམ། གཉིས་དང་བཞིའོ་ཞེས་པ་དང་། དཀྱིལ་འཁོར་གསུམ་ཡོག་པ་ཡན་ཆད་ཀྱང་ངོ་ཞེས་པ་ཡིན་ཏེ། སྲིད་དུ་ཁྲུ་ལྔ་ཞེང་དུ་དོ་པ་འམ་སྲིད་དུ་ཁྲུ་བཞི། ཞེང་དུ་ཁྲུ་དོ་པའམ། ལྟེ་བ་དང་
པུས་མོའི་འཁོར་ཡོག་པ་ཡན་ཆད། སྨད་གཡོགས་ཀྱི་ཚད་དུ་སྟོན་པའོ། །ལུས་ཀྱི་བདུན་ཆའི་གཉིས་ཁྲུ་ཚད་དོ་ཞེས་པ་ནི། ཁྲུ་དང་ལུས་ཀྱི་ཁྲུ་རིང་ཐུང་ཡོད་ན་ལུས་ཀྱི་སྲིད་ཇི་ཙམ་པར་སྲད་བུས་གཅལ་ལ་བདུན་དུ་བལྟབས་པའི་བལྟབས་གཉིས་ལ་ཁྲུའི་ཚད་དུ་གྱིས་ཤིག་པའོ། །མི་
འཁྱུད་ན་བསྒྲོག་པར་བྱ་ཞེས་པ་ནི་ལུས་སྦོམ་ཆེས་ཏེ་སྨད་གཡོགས་ཀྱི་ཚད་གོང་དུ་བསྟན་པས་མི་འཁྱུད་ན་ཞབས་མའི་ཐབས་སུ་གྱིས་ཤིག་པའོ། །སྟོད་གཡོགས་ཀྱིས་མི་འཁྱུད་ན་ཡང་སྒྲོག་ཅིང་གསུམ་པར་གྱིས་ཤིག་པའོ། །ཟླ་བའི་སྤང་བ་རྣམ་པར་འབྱེད་པའོ།། །།ཟླ་བའི་སྤང་བ་ཞུས་
པ་ལས་འབྱུང་བ་བསྡུས་ཏེ་སྟོན་པ་ནི། ཆུང་ངུ་བཞིན་དུ་དེ་བས་ཆུང་བ་ནི་ཞེས་བྱའོ་ཞེས་པ་ལ་སོགས་པ་ཡིན་ཏེ། ཁྲུ་གང་ཁོར་ཡུག་ཏུ་མེད་པར་ཆུང་བ་ཁ་སོགས་སུ་བཞག་སྟེ་ཞག་བཅུ་འདས་ན་ཆེ་ཆུང་གི་ཚད་ཇི་ཙམ་པ་བཞིན་དུ་ཉེས་བྱས་སུ་སྟོན་པའོ། །དཀྱིལ་འཁོར་ཕྱེད་མི་ཡོག་པ་
ནི་རེ་བར་མི་བྱ་ཞེས་པ་ནི་དཀྱིལ་འཁོར་ཕྱེད་ཀྱང་མི་ཡོག་པ་ཙམ་གྱི་ཚོད་ཕྱི་མའི་ཁ་སོགས་སུ་བཞག་ན་ཞག་བཅུ་འདས་པས་ཉེས་བྱས་སུ་སྟོན་པའོ། །མི་རུང་བ་ཡང་ངོ་ཞེས་པ་ནི་གསོ་མ་དང་རྔ་བལ་ལ་སོགས་པ་མི་རུང་བ་ཡང་ཁ་སོགས་སུ་མ་འཇོག་ཤིག་པའོ། །གདོང་ཕྱིས་དང་ཆུ་
ཚགས་དང་གདིང་བ་དང་དྲེའུ་རྔོག་ལ་སོགས་པ་དང་ཡོ་བྱད་ཀྱི་གོས་སུ་བྱིན་གྱིས་མ་བརླབས་པ་ཡང་ངོ་ཞེས་པ་ནི་འདི་རྣམས་སོ་སོའི་རྫས་སུ་མ་བསྔོས་ན་འདི་དག་ལས་ཁ་སྩོགས་སུ་མ་འཇོག་ཤིག་པའོ། །ཟླ་བའི་སྤང་བ་ཞུས་པའོ། །ཟླ་བའི་སྤང་བའོ།། །།འཁྲུ་བ་སྤང་བའི་ཞར་ལ་

སྟོན་པ་ནི། སྦྲུམ་པ་ནི་གནས་དབེན་པར་རོ་ཞེས་པ་ལ་སོགས་པ་ཡིན་ཏེ། དགེ་སློང་མ་སྦྲུམ་ན་གནས་དབེན་པར་ཞོག་ཤིག་པའོ། །འདི་དགེ་སློང་མ་དག་གིས་ཡལ་པར་མི་དོར་ཞེས་པ་ནི་དགེ་སློང་མ་སྦྲུམ་པ་འཁྱམ་དུ་མི་གཞུག་པ་ལ་སོགས་པའི་རིམ་གྲོ་དགེ་སློང་མ་གཞན་གྱིས་གྱིས་ཤིག་
པའོ། །འདི་ཁ་ཟས་སྦྱིན་ཞེས་པ་ནི་སྦྲུམ་པ་དེ་དགེ་སློང་མ་གཞན་གྱིས་ཟས་སྐྱོལ་ལ་བྱིན་ཅིག་པའོ། །འདི་ཉིད་དང་འོག་ནས་འབྱུང་བའི་བསླབ་པ་གཉེན་དང་གཉེན་མ་ཡིན་པ་ལས་ལྟུང་བ་དང་མི་ལྟུང་བར་འགྱུར་བས་ན་གཉེན་གྱི་མཚན་ཉིད་ཉི་ཚེ་སྟོན་པ་ནི། གཉེན་ནི་ཕ་མ་གཉིས་ཀྱི་རྒྱུད་རེ་ནས་
བདུན་བརྒྱུད་ཀྱི་བར་དུ་སྔ་བས་སོ་ཞེས་པ་ཡིན་ཏེ། ཕ་མ་གཉིས་ཀྱི་རྒྱུད་རེ་ནས་བདུན་རྒྱུད་ཀྱི་བར་དུ་ཁྱོ་ཤུག་ཟུང་ཤ་སྟག་ཏུ་སྦྱར་བའི་ཉེ་རྒྱུད་དང་བདག་ཉིད་ནས་བུ་ཚ་རབས་བདུན་གྱི་བར་དུ་འབྲེལ་བ་རྣམས་གཉན་དུ་བསྐོར་བའོ། །འཁྲུ་བའི་སྤང་བར་ཅིས་འགྱུར་ཞེ་ན། འདུ་ཤེས་
གཙོར་བྱེད་ཅེས་པ་ཡིན་ཏེ་སྦྱར་བ་དང་རྩ་བ་ཀུན་ལ་འདུ་ཤེས་བརྩན་པར་སྟོན་པའོ། །མདོ་འདི་གོ་སླ་བའི་ཕྱིར། འདི་འབྲིད་ཅེས་པ་ཡིན་ཏེ་འབྲིད་ཅེས་གོང་དུ་སྟོན་པར་འདུ་ཤེས་བརྩན་ནོ་བར་གོ་བར་གྱིས་ཤིག་པའོ། །འདུ་ཤེས་བརྩན་པའི་ཡུལ་གང་ཡིན་ཞེ་ན། དགེ་སློང་
མ་དང་དགེ་བསྙེན་མ་ཡིན་པའོ་ཞེས་པ་ཡིན་ཏེ་དགེ་སློང་མ་ཡིན་བར་འདུ་ཤེས་པ་དང་གཉེན་མ་ཡིན་པར་འདུ་ཤེས་ན་ཉེས་པར་འགྱུར་བའོ། །འདི་ཉི་ཚེར་མ་ཟད་པས་ན། འོག་མ་ཡང་ངོ་ཞེས་པ་ཡིན་ཏེ། ལེན་པའི་སྤང་བ་འོག་ནས་འབྱུང་བ་ལ་ཡང་གོང་དུ་སྨོས་པའི་འདུ་ཤེས་
འདི་གཉིས་བརྩན་པར་སྟོན་པའོ། །ཇི་བྱས་པས་འཁྲུ་བ་སྤང་བར་འགྱུར་ཞེ་ན། བྱིན་གྱིས་བརླབས་པ་བདག་གི་རྙིང་པ་བསྐུར་འོས་པ་ཆོས་གོས་གདིང་བ་རྣམས་གང་ཡང་རུང་སྟེ་འཁྲུ་འཚེད་འཆག་ཏུ་བཅོལ་ནའོ་ཞེས་པ་ཡིན་ཏེ་བྱིན་གྱིས་བརླབས་པ་གསུམ་ལས་གང་ཡང་
རུང་བ་དང་། གདིང་བ་ལ་སོགས་པ་འཁྲུར་བཅུག་ཀྱང་རུང་འཚེད་དུ་བཅུག་ཀྱང་རུང་། འཆག་ཏུ་བཅུག་ཀྱང་རུང་སྟེ་ཉེས་པར་འགྱུར་བའོ། །ཕྱོགས་གཅིག་བྱས་ན་ཡང་ལས་སུ་བྱས་པའོ་ཞེས་པ་ནི་ཕྱོགས་འགའ་འམ་གྲ་འགའ་བཀྲུས་ན་ཡང་རིལ་གྱིས་བཀྲུས་པ་དང་

འདྲའོ། །ལན་ཅིག་ཆུར་བསུབས་ན་ཡང་དེ་བཞིན། བྱས་ན་བྱེད་དུ་བཅུག་པའོ་ཞེས་པ་ནི་བཅོལ་བ་ཙམ་གྱིས་མ་ཡིན་གྱི། དགེ་སློང་མས་བཀྲུ་བ་ལ་སོགས་པའི་ལས་བྱས་ན་གདོད་བྱེད་དུ་བཅུག་པར་ཆུད་པའོ། །ཟིན་གྱི་བར་དུ་གཅིག་གོ་ཞེས་པ་ནི་བཀྲུ་
བ་ལན་རེ་ཞིང་ཉེས་པ་ལན་རེར་བརྩི་བ་མ་ཡིན་གྱིས་ཟིན་གྱི་བར་དུ་ཉེས་པ་གཅིག་ཏུ་བརྩིར་ཟད་དོ། །ལས་སྣ་གཅིག་པུ་ནི་དེ་ལྟར་ཡང་འགྱུར་ན་ལས་ཀྱི་སྣ་གྲངས་ཐ་དད་པ་ཉེས་པ་སོ་སོར་འགྱུར་རོ་ཞེས་པར་དོགས་པ་བསལ་བའི་ཕྱིར་ཚིགས་ཡོད་ཀྱང་འབྲས་བུ་གཅིག་གོ་ཞེས་པ་
ཡིན་ཏེ། འཁྲུ་བ་དང་འཚེད་པ་དང་འཆག་པའི་ཚིགས་ཐ་དད་དུ་ཟིན་ཀྱང་འབྲས་བུ་སྤང་བའི་ལྟུང་བ་གཅིག་ཏུ་ཟད་པར་སྟོན་པའོ། །འདུ་ཤེས་གཙོ་ཡང་དོན་བཞིན་ན་རྩ་བའོ་ཞེས་པ་ནི་འདུ་ཤེས་བརྩན་པ་ཡང་དོན་དེ་བཞིན་ཏེ། མ་ནོར་ན་གདོད་བརྩན་པའོ། །དོན་མི་བཞིན་ན་རྩ་
བ་དང་ཉེ་བའོ་ཞེས་པ་ནི་དོན་ཇི་ལྟ་བ་བཞིན་དུ་འདུ་ཤེས་པར་མ་གྱུར་ན་རྩ་བ་དང་ཉེ་བ་སྟེ་ཉེས་བྱས་སུ་འགྱུར་བར་སྟོན་པའོ། །དཔེར་ན་ཆུ་སྲོག་ཆགས་དང་བཅས་ལ་བཅས་པར་ཡང་ཤེས་ན་ལྟུང་བ་དང་སྲོག་ཆགས་མེད་ལ་ཡོད་པར་འདུ་ཤེས་ན་ཉེས་བྱས་སུ་འགྱུར་བ་དང་འདྲའོ། །
ཐེ་ཚོམ་པ་ནི་འདུ་ཤེས་བཞིན་ཞེས་པ་ནི་གཉེན་དང་དགེ་སློང་མ་ཡིན་ནམ་མ་ཡིན་མ་ངེས་ཏེ་གཉེན་ཙམ་ཡོད་བཞིན་དུ་འཆོལ་ན་འདུ་ཤེས་པ་དང་མགོ་མཉམ་མོ། །འདིའི་སྐབས་སུ་རྣམ་པར་འབྱེད་པ་ལས་འབྱུང་བ་ཞར་ལ་སྟོན་པ་ནི། དགེ་འདུན་གྱི་བྱ་བར་བྱས་པ་བཞིན་དུ་
བསྲུང་ཞེས་པ་ཡིན་ཏེ། དགེ་འདུན་གྱི་ནང་ཁྲིམས་རབ་ཏུ་སྲུངས་ཤིག་པའོ། །འདིར་ལྷགས་པ་ཡང་མི་གཏོགས་པ་མ་ཡིན་ཞེས་པ་ནི་གུད་ནས་འདྲོན་དུ་ལྷགས་པས་ཀྱང་གཞི་པའི་ནང་ཁྲིམས་མི་བསྲུང་དུ་མི་རུང་བར་སྟོན་པའོ། །འདི་ཡོད་དམ་མེད་པ་དང་དངོས་ཤེས་པར་བྱ་བའི་
ཕྱིར་དེས་དྲི་ཞེས་པ་ནི་གུད་ནས་ལྷགས་པ་རྣམས་ཀྱིས་འདི་ནང་ན་ཁྲིམས་ཇི་ཡོད་ན་ཇི་ལྟ་བུ་ཞེས་བརྟག་ཅིང་རྗེས་ཆོད་ཅིག་པའོ། །དེ་ནམ་འདྲི་ཞེ་ན། རིང་པོར་མ་ལོན་ཏེའོ་ཞེས་པ་ཡིན་ཏེ་སྣོད་ལ་སོགས་པ་ཕོག་མ་ཐག་དུ་དྲིས་ཤིག་པའོ། །གོང་དུ་དགེ་འདུན་གྱི་ནང་ཁྲིམས་བསྲུང་ཞེས་

སྨོས་པ་འགྲེལ་པ་ནི། སངས་རྒྱས་ཀྱིས་གསུངས་པ་དགེ་འདུན་གྱིས་སྐྱོར་མེད་ཅེས་པ་ཡིན་ཏེ་བཅོམ་ལྡན་འདས་ཀྱིས་གནང་ངམ་མི་གནང་བར་བསྲུངས་ན་དེ་བརྩན་གྱི་དགེ་འདུན་གྱི་ནང་ཁྲིམས་བརྩན་པར་མ་བྱེད་ཅིག་པའོ། །ལྷུང་བཟེད་དང་གོས་དང་དྲ་བ་དང་ཕོར་བུ་དང་སྐ་
རགས་ལྷག་པ་རྣམས་བྱིན་ན་དགེ་འདུན་གྱི་འཐེབ་ཏུ་བླང་ཞེས་པ་ནི་མིང་གིས་སྨོས་པ་འདི་རྣམས་བདག་ལ་ཡོད་བཞིན་དུ་གཞན་གྱིས་ལྷག་པར་བྱིན་ན་དགེ་འདུན་གྱི་འཐེབ་ཏུ་ལོང་ཤིག་པའོ། །བྲེལ་ན་འཐེབ་དེ་ལས་ཇི་འདོད་པ་བླང་ཞེས་པ་ནི་དགེ་འདུན་འདི་དག་གིས་བྲེལ་ན་འཐེབ་དེ་
ལས་ལོང་ཤིག་པའོ། །འཁྲུ་བའི་སྤང་བ་རྣམ་པར་འབྱེད་པའོ།། །།འཁྲུ་བ་སྤང་བ་ཞུས་པ་ལས་འབྱུང་བ་བསྡུས་ཏེ་སྟོན་པ་ནི། བཤང་གཅི་དང་གཤེར་བ་དང་རྫབ་ལ་སོགས་པས་མ་རུང་སྟེ། འཁྲུར་བཅུག་ན་ཡང་ཉེས་པ་རངས་པར་འགྱུར་བའོ། །དྲེའུ་རྔོག་དང་ཁྱིམ་པའི་
གོས་དང་སྔས་དང་རུང་བར་བྱས་པ་དང་སྤངས་པ་དང་དགེ་འདུན་གྱི་རྣམས་ནི་ཉེས་བྱས་ཞེས་པ་ནི་གཉེན་མ་ཡིན་པའི་དགེ་སློང་མ་ལ་འདི་དག་འཁྲུ་བ་ལ་སོགས་པའི་ལས་བྱེད་དུ་བཅོལ་ན་ཉེས་བྱས་སུ་འགྱུར་བའོ། །འཁྲུ་བ་སྤང་བ་ཞུས་པའོ། །འཁྲུ་བ་སྤང་བའོ།། །།ལེན་པའི་
སྤང་བསྟོན་པར་འདོད་པའི་ཞར་ལ་སྟོན་པ་ནི། དགེ་སློང་མས་གོས་རིན་པོ་ཆེ་བརྗེ་བར་བླང་ཞེས་པ་ལ་སོགས་པ་ཡིན་ཏེ་བཟང་ཞིང་རིན་ཆེ་བའི་གོས་ཁྱིམ་པས་དགེ་སློང་མ་ལ་བྱིན་ན་བདག་གིས་སྤྱད་པའི་ཕྱིར་ནི་མ་ཡིན་གྱི་བརྫེ་བའི་ལོང་ཤིག་པའོ། །དགེ་སློང་མ་དང་བརྫེ་བར་
བྱ་ཞེས་པ་ནི་དགེ་སློང་མ་གོས་བརྗེས་ཤིག་པའོ། །ནོར་ཇི་ལྟ་བུས་བརྗེ་ཞེ་ན། མཚུངས་པའམ་དེ་མགུ་བར་བྱེད་པས་སོ་ཞེས་པ་ཡིན་ཏེ་རི་བའི་རིན་སྦྱིན་པའམ་དེ་མི་མགུ་བ་མེད་པས་བརྗེས་ཤིག་པའོ། །ཇི་ལྟར་བྱས་པས་ལེན་པ་སྤང་བར་འགྱུར་ཞེ་ན། བླངས་པ་ཞེས་
པ་ཡིན་ཏེ་ཕ་རོལ་ལས་བླངས་ཤིང་ཁྱེར་ན་ཉེས་པར་འགྱུར་བའོ། །དེ་ལ་གཉེན་མ་ཡིན་པའི་དགེ་སློང་མ་དང་དེར་འདུ་ཤེས་པ་དང་། ཐེ་ཚོམ་པའི་ཡན་ལག་གཞན་གོང་དུ་བསྟན་པ་ཡིན་ནོ། །ཇི་ལྟར་བླངས་པ་ཞེ་ན། བླངས་པ་ཞེས་སྨྲས་པ་ཡིན་ཏེ་ཁ་རོག་པའམ་ཚིག་

ལས་གཞན་བས་མ་ཡིན་གྱི་ཚིག་གིས་བླངས་ནའོ། །འདི་བླངས་པས་ཤེ་ན། གོས་ཞེས་པ་ཡིན་ཏེ་ཟས་དང་སྐོམ་རྫས་གཞན་མ་ཡིན་བའོ། །དེ་དག་ཀུན་འགྲེལ་པ་ནི་དགེ་འདུན་ལ་གོས་ཕུལ་བ་ནི་ཉེས་མེད་ཅེས་པ་ཡིན་ཏེ། གཉེན་མ་ཡིན་པའི་དགེ་སློང་མས་
དགེ་འདུན་གྱི་ཕྱིར་གོས་ཕུལ་བ་བླངས་པ་ནི་ཉེས་མེད་པར་སྟོན་པའོ། །ལེགས་པར་སྨྲས་པའི་ཕྱིར་ན་ཡང་ངོ་ཞེས་པ་ནི་དམ་པའི་ཆོས་བཤད་པ་ལ་སོགས་པ་ལེགས་པར་སྨྲས་པའི་ཕྱིར་དགེ་སློང་མས་བྱིན་པ་བླངས་པ་ནི་ཉེས་མེད། བསྙེན་པར་རྫོགས་སུ་ཆའམ་སྟོན་ནའོ་
ཞེས་པ་ནི་བསྙེན་པར་རྫོགས་སུ་བྱེད་པ་དང་སྟོན་ན་དགེ་སློང་མ་ལས་ཁྱེར་ཞིང་བླངས་པ་ནི་ཉེས་མེད། མདུན་དུ་གཞག་སྟེ་ནོར་དང་དད་པའི་ཤགས་བཏབ་ནས་ཐག་བཅད་དེ་སོང་ནའོ་ཞེས་པ་ནི་དགེ་སློང་མས་གོས་བྱིན་པ་དགེ་སློང་ལེན་དུ་མ་བཏུབ་པ་དང་བཙུན་པ་བདག་ལ་བརྩེ་བའི་སླད་
དུ་བདག་གི་ནོར་འདི་བཞེས་ཤིག་ཅེས་མདུན་དུ་གཞག་ནས་སོང་བ་ལྟ་བུ་བླངས་པའང་ཉེས་མེད། ལེན་པ་སྤང་བ་རྣམ་པར་འབྱེད་པའོ།། །།ཞུས་པ་ལས་འབྱུང་བ་སྟོན་པ་ནི། ལག་ཏུ་འོངས་པ་ན་ཐོབ་པའོ་ཞེས་པ་ལ་སོགས་པ་ཡིན་ཏེ། ནོར་ལག་ཏུ་འོངས་ན་གདོད་ཐོབ་པར་སྟོན་
པའོ། །མིག་ལམ་དུ་འོངས་ན་འདི་ཐོག་མའོ་ཞེས་པ་ནི་ལག་ཏུ་འོངས་པའི་ཐ་མ་མིག་ལམ་དུ་བབ་པ་ཡིན་པས་ན་མིག་ལམ་དུ་འོངས་པ་ཡང་ཐོབ་པའི་ཁོངས་སུ་གཏོགས་པར་སྟོན་པའོ། །མ་འོངས་པ་ཁས་བླངས་པ་ནི་སྦྱོར་བའོ་ཞེས་པ་གཉེན་མ་ཡིན་པའི་དགེ་སློང་མ་ལ་གོས་བླངས་
པ་ལས་འཕྲལ་དུ་ནི་ས་བྱིན་གྱིམ་སྦྱིན་ནོ་ཞེས་ཟེར་བ་དང་བླང་བར་ཁས་བླངས་ན་སྦྱོར་བར་སྟོན་པའོ། །གོས་བྱིན་པ་ལ་སོགས་པ་བརྩོན་པ་ནི་ཕྱི་གཞག་གི་དབང་གིས་མ་ཡིན་ཞིང་ལག་ཡངས་པས་ནའོ་ཞེས་པ་ནི་ཡོང་གིས་གཏོང་ཕོད་པ་དང་ཁ་མགྲོན་ཙམ་གྱི་དབང་གིས་མ་ཡིན་
བར་གོས་ལ་སོགས་པ་བྱིན་བ་བླངས་པ་ནི་ཉེས་མེད། བརྙ་བའི་སེམས་ཀྱིས་ན་ཉེས་མེད་ཞེས་པ་ནི། དགེ་སློང་མའི་གོས་རེ་ཞིག་བརྙས་པ་ལ་ཉེས་མེད་པར་སྟོན་པའོ། །བརྗེད་དེ་རིན་མ་བྱིན་ནའོ་ཞེས་པ་ནི་རིན་སྦྱིན་པར་བྱས་ཏེ། ཁྱེར་བ་ལས་བརྗེད་ཀྱི་བར་དུ་མ་བྱིན་པ་ནི་ཉེས་

མེད་ལེན་པ་སྤང་བ་ཞུས་པའོ། །ལེན་པ་སྤང་བའོ།། །།སློང་བའི་ལྟུང་བ་སུ་ལས་བྱེད་ཅེ་ན། མིའི་འགྲོ་བར་གཏོགས་པ་ཁྱིམ་པ་ཡིན་པ་གསོན་པོ་གཉེན་མ་ཡིན་པ་རྣམས་ལྟུང་བར་བྱེད་ཅེས་པ་ཡིན་ཏེ། མིང་གིས་སྨོས་པ་འདི་དག་ལས་བླངས་ན་ལྟུང་བར་བྱེད་པའོ། །གོ་སླ་བར་
སྟོན་པ་ནི། འོག་མ་གསུམ་ཡང་ངོ་ཞེས་པ་ཡིན་ཏེ་འདི་འོག་ནས་སློང་བར་འོས་པ་དང་། སྤགས་པ་སློང་བ་དང་། སོ་སོ་ནས་སྤགས་པ་སློང་བ་གསུམ་ཡང་གོང་དུ་སྨོས་པ་འདི་དག་ལས་ཉེས་པར་འགྱུར་བར་སྟོན་པའོ། །ཇི་ལྟ་བུ་ལས་སློང་བའི་ཉེས་པར་འགྱུར་ཞེ་ན། ཕྲོགས་པ་
སྟོར་བ་ཚིག་པ་རླུང་གིས་ཁྱེར་བ་ཆུས་གཡེངས་པའི་གོས་མ་ཡིན་ནའོ་ཞེས་པ་ཡིན་ཏེ། རྣམ་པ་འདི་དག་གིས་རྐྱེན་མེད་པར་བླངས་ན་ཉེས་པར་འགྱུར་བའོ། །ཇི་ལྟར་བྱས་པས་ཉེས་པར་འགྱུར་ཞེ་ན། བླངས་ན་ཉེས་བྱས་ཞེས་པ་དང་། ཐོབ་ན་རྩ་བ་ཞེས་པ་ཡིན་ཏེ། གཉེན་པའི་
ཁྱིམ་པ་ལས་བླངས་ཏེ་ཁྱེར་ན་སློང་བ་དང་། འཐོབ་པའི་ཚེ་ཉེས་བྱས་དང་། རྩ་བར་སྟོན་པའོ། །ཇི་ཐོབ་པ་ཞེ་ན། གོས་ཞེས་པ་ཡིན་ནོ། །དེའི་ཚད་ཇི་ཙམ་ཞེ་ན། མི་ཆུང་བ་ཞེས་པ་ཡིན་ཏེ། བདག་གི་ཆོས་གོས་ཀྱི་ཚད་ལས་མི་ཆུང་ན་ཉེས་པར་འགྱུར་བའོ། །དེ་ཡང་ཇི་འདྲ་
བ་ལས་ཉེས་པར་འགྱུར་ཞེ་ན། རིན་དང་ཁ་དོག་དང་། ཁྲུ་བསླང་བ་ཇི་བཞིན་ནའོ་ཞེས་པ་ཡིན་ཏེ། རིན་ཇི་ཙམ་པ་དང་ཁ་དོག་ཇི་འདྲ་བ་དང་། ཁྲུ་ཚད་ཇི་ཙམ་དུ་བསླངས་པ་བཞིན་དུ་ཐོབ་ན་ཉེས་པར་འགྱུར་བའོ། ཇི་བསླངས་པ་བཞིན་དུ་མ་ཐོབ་པའི་བརྡར་འགྱུར་ཞེ་ན། གཞན་
ན་ཉེས་མེད་ཅེས་པ་ཡིན་ཏེ། གོང་དུ་སྨོས་པ་ལྟར་བསླངས་པ་བཞིན་དུ་མ་རྙེད་དེ་ཆེ་ཆུང་དང་ཁ་དོག་མི་མཐུན་བ་ཞིག་རྙེད་དམ། བསླངས་པའི་དངོས་པོ་ཉིད་མ་ཡིན་བ་གཞན་རྙེད་ན་ཉེས་མེད་པར་སྟོན་པའོ། །དང་པོ་སློང་བའི་ཚེ། ཁ་དོག་ལ་སོགས་པ་དམིགས་ཀྱིས་མ་ཕྱེ་
བར་སྤྱིར་ཇི་བབ་བབ་ཏུ་བསླངས་ན་ནི་ཇི་རྙེད་པ་ཉེས་པར་འགྱུར་བའོ། །རས་མ་དང་ཁ་ཚར་བླངས་པ་ཡང་ངོ་ཞེས་པ་ནི་འདི་དག་བླངས་ཏེ་རྙེད་པའི་ཞར་ལ་གོས་རངས་པ་རྙེད་ཀྱང་ཉེས་པར་མི་འགྱུར་བའོ། །རྒྱུ་སྤུན་ནི་འབྲིའོ་ཞེས་པ་ནི་གོས་ལངས་པའི་རྒྱུ་སྤུན་བསླངས་ཏེ་རྙེད་

ན་ཡང་ཉེས་པ་རངས་པར་མི་འགྱུར་བའོ། །དེའི་རྒྱུའང་དེ་བཞིན་ཞེས་པ་ནི་དེའི་རྒྱུ་སྟེ་བལ་དང་ཤིང་བལ་ལྟ་བུ་ཞིག་བསླངས་ན་ཡང་རྒྱུ་སྤུན་དང་འདྲ་བར་སྟོན་པའོ། །བསླངས་པ་སྤང་བའོ།། །།བསླངས་པའི་རིགས་པ་ཡང་སྟོན་པ་ནི། བྱིན་གྱིས་བརླབས་པ་
ཐམས་ཅད་མེད་ན་སློང་བའི་རིགས་ཞེས་པ་ལ་སོགས་པ་ཡིན་ཏེ་ཡོ་བྱད་བཅུ་གསུམ་མེད་ན་སློང་བའི་རིགས་པར་སྟོན་པའོ། །འདི་དག་གང་ལས་ཉེས་པར་འགྱུར་ཞེ་ན། འདི་ལས་ལྟུང་བར་བྱེད་ཅེས་པ་ཡིན་ཏེ་བསླང་བའི་རིགས་པ་ལས་ལྷག་པར་བསླངས་ན་ཉེས་པར་འགྱུར་
བའོ། །འོག་ནས་ཕྲུགས་སུ་སྟོན་པ་ནི། ཁྱིམ་པའི་གོས་སྟོད་གཡོགས་དང་སྨད་གཡོགས་ཀྱི་དམ་པ་ནི་རས་ཁྲུ་བཅུ་གཉིས་དང་བདུན་དང་གཉིས་སོ་ཞེས་པ་དང་། དགེ་སློང་གི་ནི་སྦྱར་མ་དང་། ཤམ་ཐབས་ཆེན་པོའི་རིམ་པ་ཇི་སྐད་དུ་བཤད་པའོ་ཞེས་པ་ཡིན་ཏེ་ཁྱིམ་པའི་གོས་དམ་པ་
ཕྲུགས་གཅིག་གི་ཚད་ཁྲུ་བཅུ་གཉིས་དང་བདུན་དང་གཉིས་སུ་བསྟན་པ། དགེ་སློང་གིས་གོས་སར་པ་ལས་འགྲུབ་ན་སྦྱར་མ་ཉི་རིམ་དང་ཤམ་ཐབས་ཐང་བ་ཕྲུགས་གཅིག་ཏུ་བྱའམ་རྙིང་ན་སྦྱར་མ་བཞི་རིམ་ཤམ་ཐབས་ཉི་རིམ་ཕྲུགས་གཅིག་ཏུ་སྟོན་པའོ། །གོས་བསླངས་པའི་ཚད་ཇི་
ཙམ་ཞེ་ན། ཕྲུགས་སུ་བསླང་ཞེས་པ་ཡིན་ཏེ་སྟོད་གཡོགས་དང་སྨད་གཡོགས་ཕྲུགས་གཅིག་ལས་ལྷག་པར་མ་སློང་ཤིག་པའོ། །ཁྱིམ་པ་དང་དགེ་སློང་གང་གི་ཕྲུགས་གཅིག་བསླང་ཞེ་ན། གང་ཡང་རུང་ཞེས་པ་ཡིན་ཏེ་གཉིས་ཀྱི་ནང་ནས་གང་བླངས་ཀྱང་སླ་བར་སྟོན་པའོ། །
ཚད་འདི་ལས་ལྷག་པར་མི་བླང་ཞེས་པ་ནི་ཕྲུགས་གཉིས་ཀྱི་ཚད་གོང་དུ་བསྟན་པ་ལས་ལྷག་པར་མ་སློང་ཤིག་པའོ། །སྔ་མ་རྙེད་པ་བསྐང་བ་ཡང་ངོ་ཞེས་པ་ནི་ཁྱིམ་པའི་གོས་ཀྱི་ཚད་དུ་བསླངས་པ་ལས་རངས་པ་ཁོ་ནར་མ་རྙེད་པ་ཙམ་གྱི་ཚོད་ན་རངས་པའང་བསྐང་བའི་ཕྱིར་སློང་བ་མ་བྱེད་
ཅིག་པའོ། །དེ་ལ་ཡང་སྟོད་གཡོགས་ཀྱི་སྲིད་ཁྲུ་ཕྱེད་དང་ལྔ་དང་ཞེང་ཁྲུ་ཕྱེད་དང་གསུམ་དུ་མེད་པ་དང་། སྨད་གཡོགས་འཁོར་གསུམ་ཡང་མི་ཡོག་པ་ཙམ་ཞིག་རྙེད་ན། རངས་ཤིང་བསྐང་བའི་ཕྱིར་བླངས་པ་ནི་ཉེས་མེད་དོ། །ཕྱི་མ་རྙེད་པ་ལས་ལྷག་པ་སྦྱིན་ཞེས་པ་ནི་དགེ་སློང་གི་

སྟོད་གཡོགས་དང་སྨད་གཡོགས་ཀྱི་ཚད་ཀྱང་ལྷག་པར་རྙེད་ན་ཇི་ལྷག་པ་ཆོས་ལ་སླར་བྱིན་ཅིག་པའོ། །ཇི་ལྟར་བསླངས་པས་ལྟུང་བའི་ཉེས་པར་འགྱུར་ཞེ་ན། བསླངས་པ་མ་ཡིན་བསླངས་ན་ཉེས་བྱས་ཞེས་པ་དང་། རྙེད་ན་རྩ་བ་ཞེས་པ་ཡིན་ཏེ། བླང་བའི་ཚད་ཇི་ཙམ་དུ་བསྟན་
པ་ལས་ལྷག་པར་བླངས་ན་སློང་བའི་ཚེ་ནི་ཉེས་བྱས། རྙེད་ན་སྤང་བའི་ལྟུང་བ་སྟོན་པའོ། །དེ་ལ་ཊཱི་ཀ་པ་འཆད་པ་ནི་རྔ་བལ་ལ་སོགས་པ་བསླང་བ་མ་ཡིན་པ་བསླངས་ན་སློང་བའི་ཚེ་ཉེས་བྱས་ཡང་བ་ཐོབ་ན་རྩ་བ་སྟེ་ཉེས་བྱས་ལ་ཆེ་བའོ་ཞེས་འཆད། ཕྱིར་སྦྱིན་པ་མ་བྱིན་ན་
ཡང་ངོ་ཞེས་པ་ནི་ལྷག་པ་སླར་བྱིན་ཅིག་པ་མ་བྱིན་ན་ཡང་སྤང་བར་སྟོན་པའོ། །བསླང་བའི་རིགས་པ་སྤང་བའོ།། །།སློང་བའི་སྤང་བའི་ཁྱད་པར་སྟོན་པ་ནི་སྤགས་ལ་མ་བསྟབས་པར་ཤེས་ན་མ་སྤགས་སུ་ཟད་ཅེས་པ་ཡིན་ཏེ་སྤགས་ནི་སྤགས་ལ་ཁྱོད་སྦྱིན་ནོ་ཞེའམ་ཁྱོད་ཁྱེར་
ཅིག་ཅེས་སྦྱིན་བདག་གིས་བསྟབས་པ་མེད་ན་མ་སྤགས་པ་དང་འདྲ་བས་དེ་ལྟ་བུ་བསླངས་ན་སྤགས་པ་སློང་བའི་ལྟུང་བར་འགྱུར་བའོ། །དོན་དེ་ཉིད་གསལ་བར་སྟོན་པ་ནི། དེ་ཉིད་བཞིན་ནོ་ཞེས་པ་ཡིན་ཏེ། སྤགས་པར་མ་ཤེས་ཏེ་བསླངས་ན་ནི་འདི་ལས་གཞན་པ་སྟེ་སློང་བའི་
ལྟུང་བར་སྟོན་པའོ། །དེ་ལ་སློང་བའི་ཚེ་ནི་སྤགས་པར་མ་ཤེས་ལ་ཐོབ་པའི་ཚེ་ཤེས་ན་སྦྱོར་བ་ནི་སློང་བར་གཏོགས་པའི་ཉེས་བྱས་རྩ་བ་ནི་འདིའི་ལྟུང་བར་འགྱུར་རོ། །སྤགས་པ་སློང་བའི་སྤང་པའོ།། །།སྤགས་པ་སློང་བ་ནི་རྣམ་པ་སྟོན་པ་ནི་སོ་སོར་སྤགས་པ་སློང་བའི་ཞེས་པ་
ཡིན་ཏེ། དེ་སྟོན་པ་ནི་སྟེར་བ་ལག་ཡངས་ཀྱང་ངོ་ཞེས་པ་ཡིན་ནམ་སྦྱིན་བདག་ལག་ཡངས་པས་གཤའ་གཤའ་ལྟར་བྱིན་ན་ཡང་ཡན་ལག་གོང་དུ་སྨོས་པ་རྣམས་དང་ལྡན་ན་ཉེས་པར་འགྱུར་བའོ། །སྦྱོར་བ་གཅིག་གིས་ཐོབ་པ་ནི་གཅིག་གོ་ཞེས་པ་ནི་སྦྱོར་བ་གཅིག་གིས་
སོ་སོར་རམ་སྦྱོར་བ་གཅིག་གཉེན་མ་ཡིན་པའི་དགེ་སློང་མ་དང་ཁྱིམ་པ་ལ་སློང་བ་དང་དབྱར་གྱི་རས་ཆེན་ལ་སོགས་པ་ཐོབ་པ་དུ་མ་ཅིག་ཅར་དུ་གྲུབ་ན་ཡང་ལྟུང་བ་གཅིག་ལས་མེད་པར་སྟོན་པའོ། །སོ་སོར་སྤགས་པ་སློང་བའི་སྤང་བའོ།། །།

ཇི་ལྟར་བྱས་པས་སྐུར་པའི་སྤང་བར་འགྱུར་ཞེ་ན། ལས་མི་རུང་བའི་གོས་ཟོང་སྐུར་བ་བཀྱིགས་པ་ལས་དྲིས་པ་དང་གདོང་ཞལ་ཏ་བ་བསྟན་ཏེ་ཕོ་ཉས་བསྒོ་ནས་གཏན་ཚིགས་བསྙད་ན་གདོང་བསྐུལ་ཞེས་པ་ཡིན་ཏེ་ཡོན་བདག་གིས་གསེར་དངུལ་
ལ་སོགས་པ་མི་རུང་བའི་གོས་ཟོང་ཞིག་བསྐུར་ཏེ་འོངས་ན་ཚེ་དང་ལྡན་པ་ཕོ་ཉ་དགེ་སློང་ལ་གོས་ཟོང་འདི་ནི་མ་བརྟགས་ཀྱིས་བླང་དུ་མི་རུང་ངོ་ཞེས་སྨྲས་པ་དང་། དེ་ན་རེ་འོ་ན་བཙུན་པའི་ཞལ་ཏ་པ་རུང་བ་བགྱིད་པ་སུ་མཆིས་ཞེས་དྲིས་པ་དང་མིང་འདི་ཞེས་བྱའོ་ཞེས་བསྟན་ཏོ། །དེ་
ནས་ཕོ་ཉས་ཀྱང་དེ་ལ་གོས་ཟོང་འདི་ལྟ་སུ་གོས་འདི་ལྟ་བུ་སྤུར་ལ་དགེ་སློང་མིང་འདི་ཞེས་བྱ་བ་འོངས་ཏང་བྱིན་ཅིག་ཅེས་བསྒོ་ནས་སླར་དགེ་སློང་གི་ཐད་དུ་ཕྱིན་ཏེ་བཙུན་པས་བསྟན་པའི་ཞལ་ཏ་བགྱིད་པ་ལ་བདག་གིས་འདི་སྐད་དུ་བསྒོས་བཙུན་པ་དེར་བཞུད་ལ་བཞེས་ཤིག་
ཅེས་ཟེར་ན་གདོད་ཞལ་ཏ་བ་དེ་ལ་བསྐུལ་ཅིག་པའོ། །དེ་ལ་བསྐུལ་བའི་སྙད་ནི་ང་ལ་གོས་རུང་བ་དགོས་སོ་ཞེས་བསྐུལ། བསྐུལ་བ་ལས་དེས་མ་ཐོས་སམ་མ་གོ་ན་བསྐུལ་བར་མི་ཆུད་པར་སྟོན་པ་ནི། གོ་བར་མ་ནུས་ན་བསྐུལ་བ་མ་ཡིན་ཞེས་པ་ཡིན་ཏེ་ར་རོའམ་གཉིད་ཀྱིས་
ལོག་གམ། ནད་ཀྱིས་ཐེབས་སམ་བྲེལ་བ་ལ་སོགས་པས་རྐྱེན་ཏེ་བསྐུལ་བར་མ་ཤེས་མ་<གོན་‚གོ་ན་>བསྐུལ་བའི་གྲང་སུ་མི་ཆུད་པར་སྟོན་པའོ། །བསྐུལ་བ་དྲུག་ཅིག་ཅར་དུ་བསྐུལ་ཀྱང་བསྐུལ་བ་གཅིག་ཏུ་རྩི་མོད་ཀྱི་སོ་སོར་བྱའོ། །མ་གྲུབ་ན་ལན་གཉིས་སུ་ཡང་ངོ་ཞེས་པ་ནི་ལན་
གཅིག་གིས་མ་གྲུབ་ན་ལན་གཉིས་སུའང་བསྐུལ་ཅིག་པའོ། །ལན་གསུམ་དུ་ཡང་ངོ་ཞེས་པ་ནི་གཉིས་ཀྱིས་མ་གྲུབ་ན་གསུམ་གྱི་བར་དུའང་བསྐུལ་ཅིག་པའོ། །དེ་ནས་ལན་གསུམ་གྱི་བར་དུ་ཕྱོགས་སུ་བསྡད་ཅེས་པ་ནི་མ་སྨྲ་བར་ཕྱོགས་སུ་བསྡད་པ་ལན་གསུམ་དུ་གྱིས་ཤིག་
པའོ། །དེ་ལ་རྣམ་པར་འབྱེད་པ་ལས་ནི་ལན་བཞིའམ་ལྔ་དྲུག་གི་བར་དུ་མི་སྨྲ་བར་ཕྱོགས་སུ་སྡོད་ཅིག་ཅེས་འབྱུང་ལ་འདིར་ནི་ལན་གསུམ་གྱི་བར་དུ་ཞེས་སྨོས་པ་ཅི་ཕྱིར་ཞེ་ན་རྣམ་པར་འབྱེད་པ་ལས་དེ་སྐད་དུ་འབྱུང་བ་ཡང་བསྐུལ་བ་ཚུན་ཆུད་ཁོང་བརྟུལ་བའི་ཚིག་ཏུ་ཟད་པས་

ན། གོང་དུ་བསྐུལ་བ་གསུམ་སྨོས་པའི་ཕྱིར་འདི་ཕྱོགས་སུ་བསྡད་པ་གསུམ་ཞེས་སྨོས་པ་ཡིན་ནོ། །མ་གྲུབ་ན་སྦྱིན་པ་པོ་ལ་བསྙད་ཅེས་པ་ནི་དེ་ལྟར་བསྐུལ་དུ་ཟིན་གྱིས་ཀྱང་མ་སྟེར་ན་སྦྱིན་བདག་གི་ཁུངས་པོ་ལ་ཁོ་བོ་ཞལ་ཏ་བྱེད་པས་འདི་ལྟར་མ་སྟེར་གྱིས་ཁྱོད་ཀྱི་ནོར་བར་མ་དོར་དུ་ཆུད་
ཟོས་པ་རེ་ཞེས་སླར་སྦྲོན་ཅིག་པའོ། །དེ་ལྟར་གྱུར་ཏེ་བཏང་བ་དང་། བྱིན་ན་བཏང་ངོ་ཞེས་སྨྲས་ཀྱང་སྦྱིན་བདག་གི་སེམས་བདག་གིས་བསྲུང་བར་བྱའོ་ཞེས་ཁས་ལེན་ན་བསླང་བར་བྱ་ཞེས་པ་ནི་དེ་ལྟར་རེ་ཐག་ཆད་ནས་བཏང་བའི་འོག་ཏུ་དེས་གོས་ཁྱེར་ཏེ་འོངས་ན་ངས་མཏང་སྟེ་
ཡོན་བདག་ལའང་སྦྲན་ཟིན་གྱིས་མི་འདོད་དོ་ཞེས་བྱས་ཀྱང་དེ་ན་རེ་ཡོན་བདག་གི་སེམས་ཁོ་བོས་བསྲུང་གི་མི་བཞེས་སུ་མི་རུང་ཞེས་སྤྲུལ་ན་ལོང་ཤིག་པའོ། །ཇི་ལྟར་བྱས་པས་སྐུར་པ་སྤང་བར་འགྱུར་ཞེ་ན། བསྐུལ་བ་དང་བསྡད་པ་ལས་འདས་སམ་ཁས་མི་ལེན་ནའོ་
ཞེས་པ་ཡིན་ཏེ་བསྐུལ་བ་དང་བསྡད་པ་ལན་དྲུག་ཏུ་བྱ་བ་ལས་འདས་སམ་ཡོན་བདག་གི་སེམས་ཁོ་བོས་བསྲུང་ངོ་ཞེས་ཁས་མི་ལེན་པར་བླངས་ན་སྤང་བར་འགྱུར་བའོ། །དེ་ལ་བསྐུལ་ཞིང་བསྡད་པ་ལན་དྲུག་ལས་འདའ་བའམ་གོ་རིམས་བསྣོར་དུ་མི་རུང་གི་ནང་བསྐུལ་
བ་ནི་ཉེས་མེད་དོ། །སྔར་བྱ་བའི་ལས་དེ་ལྟར་བྱས་ནས་ཉེས་པར་འགྱུར་བ་ཉིད་སྟོན་པ་ནི། ཁྱེར་ནའོ་ཞེས་པ་ཡིན་ཏེ། གོས་བསླངས་སམ་ཁྱེར་ན་གདོད་ཉེས་པར་འགྱུར་བའོ། །སྦྱིན་བདག་དང་ཕོ་ཉ་དང་ཞལ་ཏ་བ་ཇི་ལྟ་བུ་ལས་ཉེས་པར་འགྱུར་ཞེ་ན། གསུམ་ཆར་མི་དང་
ཁྱིམ་པ་ནའོ་ཞེས་པ་ཡིན་ཏེ་འདི་གསུམ་མི་ཡིན་པ་དང་། ཁྱིམ་པ་ཡིན་པ་ལས་ཉེས་པ་རངས་པར་འགྱུར་གྱི་སེལ་ཞིང་གྱུར་ན་ཉེས་པའི་འབྲི་བར་སྟོན་པའོ། །མ་སྨྲས་ན་ཉེས་བྱས་ཞེས་པ་ནི་ཕོ་ཉས་ཞལ་ཏ་པ་ལ་འདི་ལྟར་གཏད་ཀྱིས་འཕགས་པ་དེར་བཞུད་ལ་བཞེས་
ཤིག་ཅེས་མི་ཟེར་བས་བསྐུལ་ན་ཉེས་བྱས་སུ་འགྱུར་བའོ། །མ་བཀྱིགས་ན་ཡང་ངོ་ཞེས་པ་ནི་ཕོ་ཉས་མི་རུང་བའི་གོས་ཟོང་ཁྱེར་ཏེ་འོངས་པའི་ཚེ་མ་བཀྱིགས་ན་ཉེས་བྱས་སུ་འགྱུར་བའོ། །རེ་ཐག་ཆད་པའི་འོག་ཏུ་ཁྱེར་ཏེ་འོངས་པའི་ཚེ་བཀྱིགས་ན་ཡང་དེ་བཞིན་ནོ། །

མ་དྲིས་པར་སྟོན་ན་ཡང་ངོ་ཞེས་པ་ནི་འཕགས་པའི་ཞལ་ཏ་བ་སུ་ལགས་ཞེས་ཕོ་ཉས་མ་དྲིས་པར་བདག་གིས་སྔན་ཚོགས་སུ་བསྟན་ན་ཡང་ཉེས་བྱས་སུ་འགྱུར་བའོ། །རེ་ཐག་ཆད་ནས་མ་བསྙད་ནའོ་ཞེས་པ་ནི། རེ་ཐག་ཆད་པའི་འོག་ཏུ་ཡོན་བདག་ལ་
མ་སྦྲན་ན་ཡང་ཉེས་བྱས་སུ་འགྱུར་བའོ། །དེ་ཁ་ཅིག་འཆད་པ་ནི་གསེར་དངུལ་ལ་སོགས་པ་བརྟག་པར་མ་བྱས་ན་ཆོ་ག་འདི་ལྟར་བྱའི་བརྟག་པར་བྱས་ན་ཆོ་ག་འདི་དག་ལྟར་བྱ་འང་མི་དགོས་ཞེས་འཆད། ཊཱི་ཀ་བས་བྱ་བ་ནི་གཞན་ནི་དེ་ལྟར་ཡང་རུང་གི་གོས་
ཟོང་དུ་བསྐུར་བ་ཞིག་ན་ནི་ཆོ་ག་འདི་ལྟར་མི་སྦྱར་ཡང་མི་རུང་ངོ་ཞེས་འཆད། སྐུར་བ་སྤང་བའོ།། །།སྲིན་བལ་གྱི་སྟན་སྤང་བར་སྟོན་པ་ནི། སྟན་བཅང་ཞེས་པ་ཡིན་ཏེ་རློད་ཅན་དང་ཕྱིང་པའི་སྟན་ཆོངས་ཤིག་པའོ། །དེ་ལ་ཁ་ཅིག་ན་རེ་སྟན་ཞེས་སྨོས་པ་འདི་གདིང་བ་ཡིན་དུ་ཟད་དོ་ཞེས་
ཀྱང་འཆད་མོད་ཀྱི་གདིང་བ་ནི་གཅིག་ཐང་དང་ཉི་རིམ་དུ་བྱ་ཞེས་འབྱུང་སྟན་ནི་རློད་ཅན་དང་། ཕྱིང་པའོ་ཞེས་འབྱུང་བ་དང་། དགོས་པའི་དམིགས་ཀྱང་ཐ་དད་པས་ན། གདིང་བ་དང་སྟན་ནི་གཅིག་ཏུ་མི་རུང་སྟེ་ཐ་དད་དོ། །དེ་ལ་འཁོར་གསུམ་ཡོག་བ་ཙམ་བྱས་ན་ཡང་རྩ་བའི་ཉེས་
པར་འགྱུར་རོ། །དེ་ལས་ཆུང་བ་ནི་ཉེས་པ་འང་དེ་བཞིན་དུ་འབྲིའོ། །དེའི་ཚད་ནི་རབ་འབྲིང་རྣམ་པ་གསུམ་ཡོད་དོ། །དེ་ལ་ཆེན་པོའི་སྲིད་ནི་ཁྲུ་ཕྱེད་དང་ལྔ། ཆུང་ངུའི་སྲིད་ནི་ཁྲུ་ཕྱེད་དང་གསུམ། འབྲིང་གི་སྲིད་ནི་དེ་གཉིས་ཀྱི་བར་དུ་མའོ་ཞེས་པ་ནི་སུམ་ཆར་འདྲ་སྟེ། གདིང་བ་དང་
མཉམ་མོ། །ཇི་ལྟར་བྱས་པས་སྲིན་བལ་སྤང་བར་འགྱུར་ཞེ་ན། སྲིན་བལ་ལས་བྱེད་དམ་བྱེད་དུ་བཅུག་ནའོ་ཞེས་པ་ཡིན་ཏེ་སྲིན་བལ་ལས་བྱེད་པའི་སྟན་བདག་གིས་བྱས་སམ་གཞན་བྱེད་དུ་བཅུག་ན་ཉེས་པར་འགྱུར་བའོ། །བྱེད་པ་འམ་བྱེད་དུ་བཅུག་པ་ཟིན་པའི་ཚད་སྟོན་པ་ནི།
ཐོག་མ་བདལ་བ་ནི་གདིང་བ་བྱས་ཟིན་པའོ་ཞེས་པ་ཡིན་ཏེ་སྲིན་བལ་གྱི་ཁོད་བདལ་ན་བྱས་ཟིན་པའི་དང་པོ་དེ་ཡིན་པས་ན་དེའི་ཚེ་སྤང་བར་འགྱུར་རོ། །བྱས་པ་རྙེད་ཅིང་སྤྱོད་པ་དང་བཅོལ་བ་ལ་ཉེས་མེད་ཅེས་པ་ནི་ཟས་བྱིན་པ་རྙེད་ཅིང་སྤྱོད་པའམ་གཞན་གྱིས་བྱས་པ་བདག་གིས་

བཅོས་པ་ནི་ཉེས་མེད་པར་སྟོན་པའོ། །སྲིན་བལ་སྤང་བ་རྣམ་པར་བྱེད་པའོ། །ཞུས་པ་ལས་བསྡུས་པ་སྟོན་པ་ནི། ཉུང་བ་དང་བསྲེས་པ་ནི་འབྲི་ཞེས་པ་ལ་སོགས་པ་ཡིན་ཏེ་བལ་དང་ཟར་མ་དང་། གསོ་མ་ལ་སོགས་པ་དང་སྲིན་བལ་དུ་བསྲེས་པ་ནི་ཉེས་པ་རངས་པར་མི་འགྱུར་
གྱི་སྲིན་བལ་དང་རིན་ཐང་མཉམ་པ་ཞིག་དང་བསྲེས་ན་ཉེས་པ་རངས་པར་སྟོན་པའོ། །རྫས་ཉམས་ན་ཡང་ངོ་ཞེས་པ་ནི་སྲིན་བལ་རྙིངས་ཤིང་ཉམས་པ་ཞིག་ལས་བྱས་ན་ཡང་ཉེས་པ་རངས་བར་མི་འགྱུར་བའོ། །སྲིན་བལ་གྱི་སྟན་ཞུ་བའོ། །སྲིན་བལ་སྤང་བའོ། །བལ་
ནག་པོ་ཉི་ཚེ་སྤང་བ་ཞིག་གོང་མ་ལས་བླངས་ཏེ་དེའི་བྱེ་བྲག་ཙམ་ཞིག་སྟོན་པ་ནི། བལ་ནག་པོ་ཉི་ཚེས་སོ་ཞེས་པ་ལ་སོགས་པ་ཡིན་ཏེ། བལ་ནག་པོ་འབའ་ཞིག་ལས་བྱས་སམ་བྱེད་དུ་བཅུག་ནའོ། །རང་བཞིན་གྱིས་གནག་པ་འམ་བསྒྱུར་བས་ཤེ་ན། རང་བཞིན་ཞེས་
པ་ཡིན་ཏེ། བསྒྱུར་བ་མ་ཡིན་གྱི་རང་བཞིན་གྱིས་གནག་ནའོ། །སྔོན་པོ་དང་ས་ནག་གི་མདོག་དང་སྔོ་ནག་དག་ཀྱང་དེ་བཞིན་ཞེས་པ་ནི། རང་བཞིན་གྱིས་འདི་དག་ལྟར་འདུག་པ་ཡང་ནག་པོ་དང་འདྲ་བར་སྟོན་པའོ། །ནག་པོ་ཉི་ཚེ་སྤང་བའོ། །ཆ་གཉིས་སྤང་བ་སྟོན་པ་ནི།
དེའི་ཕྱེད་ལས་ལྷག་པའོ་ཞེས་པ་ལ་སོགས་པ་ཡིན་ཏེ། ཕྱེད་ཕྱེད་དུ་མཉམ་པ་ལས་ནག་པོ་ལྷག་པར་བཅུག་ན་སྤང་བར་སྟོན་པའོ། །ཟར་མ་དང་གསོ་མ་ལ་སོགས་པ་འགོད་པ་དང་བསྲེས་པ་ནི་ཉེས་པའང་འབྲི་བར་འགྱུར་རོ། །གཞན་ནི་འཇམ་བལ་དང་ཁོབ་བལ་
ལས་ཤས་མཉམ་དུའོ་ཞེས་པ་ནི་ནག་པོ་ལས་གཞན་པ་སྟེ་དེའི་ཕྱིར་ཤས་སུ་བྱ་བ་ནི་བལ་འདི་གཉིས་ལས་ཕྱེད་ཕྱེད་དུ་སྙོམས་ཤིག་པའོ། །དེ་ལ་འཇམ་བལ་ལས་ལྷག་ན་ནི་ཉེས་བྱས་ཁོབ་བལ་ལས་ལྷག་ན་ནི་ཉེས་མེད་དོ། །དེ་ལ་སྲིན་བལ་དང་བལ་ནག་པོ་ནི་དགོན་པའི་
ཕྱིར་གླག་ཏུ་མི་རུང་བར་སྟོན་གྱི། དཀར་པོ་ལ་སོགས་པ་གཞན་རིན་ཆེ་ན་ཡང་འདི་བཞིན་ཉེས་པར་འགྱུར་རོ། །དེ་ལ་འཇམ་བལ་ནི་གང་ཁོབ་བལ་ནི་གང་ཞེ་ན། རྒྱབ་དང་རྩིབ་ལོགས་དང་གཉའ་བ་ལས་སྐྱེས་པ་ནི་སྔ་མའོ་ཞེས་པ་དང་། མགོ་དང་རྐང་ལག་དང་ལྟོ་ལས་

སྐྱེས་པ་ནི་ཕྱི་མའོ་ཞེས་པ་ཡིན་ཏེ། ཆ་གཉིས་སྤང་བའོ། །ལོ་དྲུག་པ་སྟོན་ཏེ་གོང་དུ་མི་གཙང་ན་མི་གསོལ་ཞེས་པ་ལ་སོགས་པ་ལས་གཞི་བླང་ངོ་། །དེ་ནི་ཆུ་ཞེང་ལས་ལྷག་པ་བཅད་ཅེས་པ་ལ་སོགས་པ་ཡིན་ཏེ། རྟོག་པའི་དགེ་སློང་དག་གིས་ལས་སུ་བྱ་བ་ནི་
ཆུ་ཞེང་ལས་ལྷག་ན་ཆོད་ཅིག་པ་ལ་སོགས་པར་སྟོན་པའོ། །ཐུང་ངམ་ཆུང་ན་སྐྱེད་ཅེས་པ་ནི། ཆུང་ངམ་ཐུང་ན་ཡང་སྐྱེད་ཅིག་པའོ། །ཆད་ན་སྦྱར་ཞེས་པ་སྤྱད་སྤྱད་དེ་རྐེད་དུ་ཆད་ན་ཡང་སླར་སྦྱོར་ཅིག་པའོ། །གཞིགས་སམ་ཟད་དུ་ཆད་ན་གླན་ཅེས་པ་ནི་ཟད་དུ་བྱེད་དམ་
ཁོལ་ཁོལ་དུ་རྡོལ་ན་ལྷན་པས་ཐོབ་ཅིག་པའོ། །བཅོས་སུ་མི་རུང་ན་སྦྱིན་ཞེས་པ་ནི་གོང་དུ་སྨོས་པ་ལྟར་བྱར་ཡང་མི་རུང་སྟེ། སྟན་རྙིངས་ཤིང་ཟེགས་ན་སྡོམ་པ་བྱིན་ཅིག་པའོ། །ལས་སར་པ་པ་ཞེས་སྨོས་མོད་ཀྱི་འདི་འདྲ་བར་རྙིངས་ཤིང་བཅོས་སུ་མི་རུང་ན་སུ་ལ་སྡོམ་པ་བྱིན་
ཀྱང་མི་རུང་བ་མེད། ཇི་ལྟར་བྱས་པས་ལོ་དྲུག་གི་སྤང་བར་འགྱུར་ཞེ་ན། སྡོམ་པ་མ་ཐོབ་པ་གཞན་ཡོད་ཉིད་ཀྱིས་ཐུག་ཐུབ་ཏུ་བཏང་ངམ་ལོ་དྲུག་ལ་མ་ཐུག་པར་སྟན་བྱས་ནའོ། །ཞེས་པ་ཡིན་ཏེ་མིང་གིས་སྨོས་པ་འདི་རྣམས་ལྟ་བུའི་རྐྱེན་ཡོད་ན་སྤང་བར་འགྱུར་བའོ། །
དེ་ལ་སྡོམ་པ་མ་ཐོབ་ཅེས་པ་ནི་དགེ་འདུན་གྱིས་གནང་བ་མ་བྱིན་པའོ། །གཞན་ཡོད་ཅེས་པ་ནི་སྔ་མ་ཡོད་བཞིན་པའོ། །ཐུག་ཐུབ་ཏུ་བཏང་ཞེས་པ་ནི་ལོ་དྲུག་མ་ལོན་བར་སྟན་གཞན་བྱིན་པ་ལ་སོགས་པས་མེད་པར་བྱས་པའོ། །རྩོམ་པ་ན་ཤོམ་བ་ནི་ཡོད་པ་བཞིན་ཞེས་པ་ནི་སྔ་མ་
གཅིག་མ་ཟིན་པར་ཕྱི་མ་བྱེད་ན་ཟིན་པ་ཡོད་བཞིན་དུ་བྱས་པ་དང་འདྲ་སྟེ་ཉེས་བྱས་སུ་འགྱུར་བའོ། །མཐར་ཕྱིན་ན་སྦྱོར་བ་ཉེས་པར་མི་བྱེད་པ་མ་ཡིན་ཞེས་པ་ནི་གོང་མ་ལྟར་བརྩམས་པ་ལས་ཕྱི་མ་ཟིན་པར་བྱས་ན་ཕྱི་མ་དང་པོ་རྩོམ་པའི་ཉེས་བྱས་མེད་པ་མ་ཡིན་པར་སྟོན་པའོ། །རབ་
ཏུ་བྱུང་བ་ཐ་དད་པ་ནི་སོ་སོའོ་ཞེས་པ་ནི་རབ་ཏུ་འབྱུང་བ་ལས་བབས་ཏེ་ཕྱིས་རབ་ཏུ་འབྱུང་ན་སྟན་བྱེད་ན་སྔོན་གྱི་སྟན་ལ་མ་གཏོགས་པར་སྟོན་པའོ། །ལོ་དྲུག་གི་སྤང་བའོ། །ཇི་ལྟར་བྱས་པས་མཐོའི་སྤང་བར་འགྱུར་ཞེ་ན། གདིང་བ་རྙིང་པ་ལས་བདེ་བར་གཤེགས་པའི་མཐོ་གང་

གིས་གདིང་བ་གསར་པ་ལ་མ་གླན་པར་སྤྱོད་ནའོ་ཞེས་པ་ལ་སོགས་པ་ཡིན་ཏེ་འདི་ལྟར་མ་བྱས་ན་ཉེས་པར་འགྱུར་བའོ། །གདིང་བ་རྙིང་པ་མེད་ནས་བདེ་བར་གཤེགས་པའི་མཐོ་གང་གིས་མ་གླན་པར་སྤྱོད་ན་ཉེས་པར་འགྱུར་རམ་ཞེ་ན་ཡོད་ནའོ་ཞེས་པ་ཡིན་ཏེ་ཡོད་ན་གདོད་གོང་མ་ལྟར་
བྱའི་མེད་ན་ཉེས་མེད་པར་སྟོན་པའོ། །རྙིང་པ་རངས་པར་མེད་ཀྱང་འདི་ཙམ་གྱིས་གླན་ཏམ་ཞེ་ན། དེ་ཙམ་ན་ཡང་ངོ་ཞེས་པ་ཡིན་ཏེ་རངས་པ་མེད་དུ་ཟིན་ཀྱང་བདེ་བར་གཤེགས་པའི་མཐོ་གང་ཙམ་གྱིས་གློན་ཅིག་པའོ། །མ་རལ་བ་བདེ་བར་གཤེགས་པའི་མཐོ་གང་ཙམ་གྱིས་གླན་
ཏམ་ཞེ་ན། བཅོས་སུ་རུང་བས་ཀྱང་ངོ་ཞེས་པ་ཡིན་ཏེ་རལ་ན་ཡང་ཆོས་ལ་གློན་ཅིག་པའོ། །དུམ་བུ་བསྡུས་ཏེ་ཡང་ངོ་ཞེས་པ་ནི་དམ་དུམ་དུ་གྱུར་ན་ཡང་བསྡུས་ལ་གློན་ཅིག་པའོ། །མཐོའི་སྤང་པའོ། །ཇི་ལྟར་བྱས་པས་བལ་ཁྱེར་བ་སྤང་བར་འགྱུར་ཞེ་ན། ཁྱེར་པ་མེད་
ན་ལུས་བལ་དཔག་ཚད་གསུམ་ལས་ལྷག་པར་ཁྱེར་བ་ན་ཡོད་ན་ནི་འོང་ཞེས་པ་ཡིན་ཏེ་ཁྱེར་བ་མེད་ན་བདག་གིས་དཔག་ཚད་གསུམ་ལས་མ་ལྷག་པར་ཁྱེར་ཅིག་པའོ། །ཡོད་ན་ནི་དེར་ཡང་མ་ཡིན་ནོ། །ལམ་དུ་འགྲོ་བ་ལས་ཉེས་པར་འགྱུར་བ་དང་། མི་འགྱུར་བ་རྣམ་པ་
གཉིས་ཏེ་བལ་ཁྱེར་བ་དང་དགེ་སློང་མ་དང་ལྷན་ཅིག་ཏུ་ལམ་དང་གྲུར་འགྲོ་བ་དང་སྐྱེས་པ་མེད་པར་བུད་མེད་དང་འགྲོགས་པ་དང་རྐུན་པོ་དང་འགྲོགས་པ་ནི་ཉེས་པར་འགྱུར་བའོ། །ཡང་ཡང་འདུས་ཤིང་ཟ་བ་དང་ཁྲུས་ནི་ཉེས་པར་མི་འགྱུར་བ་སྟེ་དཔག་ཚད་ཕྱེད་ཀྱིས་ཉེས་པར་མི་
འགྱུར་བ་ནི་ཕྱིས་འཆད་ཉེས་པར་འགྱུར་བ་ད་སྟོན་པ་ནི། ལམ་དུ་འགྲོ་ན་རྒྱང་གྲགས་དངོས་སོ་ཞེས་པ་ཡིན་ཏེ་ཉེས་པར་འགྱུར་བ་རྣམས་ནི་རྒྱང་གྲགས་གཅིག་གིས་སོ། །ཕྱེད་ནི་སྦྱོར་བའི་འོ་ཞེས་པ་ནི་རྒྱང་གྲགས་ཕྱེད་ཀྱི་བར་དུ་ཁྱེར་བ་ཉེས་བྱས་སུ་སྟོན་པའོ། །འཕྲུལ་
ལས་གཞན་པས་ནམ་མཁའ་ལས་ཁྱེར་ན་ཉེས་བྱས་ཞེས་པ་ནི་སྔགས་ལ་སོགས་པས། འདི་ལྟར་ཁྱེར་ན་ཉེས་བྱས་སུ་འགྱུར་བའོ། །སྤྲུལ་པས་ཀྱང་ངོ་ཞེས་པ་ནི་སྤྲུལ་པ་རྒྱུར་ན་ཡང་ཉེས་བྱས། ཞྭ་དང་ལྷམ་དང་ཚངས་དང་སྲས་སྐྱོགས་དང་ལྕག་པོད་དང་ཤུར་བུ་ལ་

སོགས་པ་ཙམ་གྱི་ཕྱིར་ཉེས་པ་མེད་ཅེས་པ་ནི་འདི་དག་ཙམ་གྱི་ཕྱིར་ནི་ཇི་སྲིད་དུ་ཁྱེར་ཡང་ཉེས་པར་མི་འགྱུར་བའོ། །རྒྱང་གྲགས་ཀྱི་ཚད་སྟོན་པ་ནི། ཡང་རྡུལ་དང་རྡུལ་ཕྲན་དང་ཆུ་དང་ཁར་བ་དང་རི་བོང་དང་ར་དང་བ་དང་གསེབ་ཉི་ཟེར་གྱི་རྡུལ་དང་སྲོ་མ་དང་
ཤིག་དང་ནས་དང་སོར་རྣམས་སུ་དྲུག་ཅིང་བསྒྲེ་ཞེས་པ་ནི། མིང་གིས་སྨོས་པ་འདི་དག་དྲུག་དྲུག་ཅིང་རིམ་བཞིན་དུ་བསྒྲེའོ། །སོར་བཞི་ཕྲག་དྲུག་ལ་ཁྲུ། ཁྲུ་ཕྱེད་དང་བཞི་ལ་གཞུ། དེ་ལྔ་བརྒྱ་ལ་རྒྱང་གྲགས་ཞེས་པ་ནི་འདི་བཞིན་དུ་བསྒྲེས་ནས་རྒྱང་གྲགས་སུ་སྟོན་པའོ། །
དེའི་མཐའ་ནི་དགོན་པའི་ཐོག་མའོ་ཞེས་པ་ནི་རྒྱང་གྲགས་ཕན་ཆད་དགོན་པར་སྟོན་པའོ། །ལུས་ཀྱིས་ཁུར་མི་བསྐུར་ཞེས་པ་ནི་ཕྲག་ཁུར་མ་ཁྱེར་ཅིག་པའོ། །རྒྱབ་དང་ལོགས་དང་སྟ་ཟུར་དང་མགོས་མ་ཡིན་ཞེས་པ་ནི་འདི་རྣམས་ཀྱིས་ཀྱང་མ་ཁྱེར་ཅིག་པའོ། །འདི་ཁོང་
མི་ཐུལ་བར་རེ་བ་མི་བྱ་ཞེས་པ་ནི་ཁུར་མི་བསྐུར་བར་བསྟན་པ་ནི་འདི་དག་དགེ་སློང་མས་ཀྱང་བསྲུང་དགོས་ཏེ་ཐུན་མོང་བར་སྟོན་པའོ། །ཁུར་ཕྱེད་ལས་ལྷག་པར་མི་གདེག་ཅེས་པ་ནི་མི་ཁུར་ཕྱེད་ལས་ལྷག་མ་གདེག་ཤིག་པའོ། །བལ་ཁྱེར་བའི་སྤང་བའོ།། །།བལ་རྨེལ་
བའི་སྤང་བ་སྟོན་པ་ནི། གོས་རྙིང་པ་ཞེས་པའི་གོར་ལུག་བལ་ལོ་ཞེས་བྱ་བ་དང་། འཆག་པར་རྨེལ་བའོ་ཞེས་པ་ཡིན་ཏེ། ལྟུང་བ་འདི་འཁྲུ་བ་དང་འདྲ་བས་ན་གོང་དུ་གོས་རྙིང་པ་འཁྲུར་བཅུག་ཅེས་སྨོས་པའི་གོར་ལུག་བལ་གཞག་པ་དང་འཆག་ཅེས་པའི་གོས་
རྨེལ་ཞེས་བཅུག་ལ་རིམ་པ་ལ་སོགས་པ་གོང་དུ་བཤད་པ་བཞིན་དུ་རིག་པར་གྱིས་ཤིག་པའོ། །བལ་རྨེལ་བའི་སྤང་བའོ།། །།ཇི་ལྟར་བྱས་པས་གསེར་དངུལ་སྤང་བར་འགྱུར་ཞེ་ན། རིན་པོ་ཆེ་བདག་གིར་བྱས་ནའོ་ཞེས་པ་ལ་སོགས་པ་ཡིན་ཏེ། པད་མ་རཱ་ག་ལ་
སོགས་པའི་རིན་པོ་ཆེ་བདག་གིར་བྱས་ན་ཉེས་པར་འགྱུར་བའོ། །གང་གི་ཚེ་བདག་གིར་བྱེད་པར་རྫོགས་པར་འགྱུར་ཞེ་ན། གན་དུ་ན་དེ་རྫོགས་པའོ་ཞེས་པ་ཡིན་ཏེ་གན་དུ་འོངས་ཤིང་བླངས་ལ་རག་པར་གྱུར་ན་བདག་གིར་བྱ་བ་གྲུབ་པའོ། །དེའི་སྔ་རོལ་ན་ཕྱེད་དོ་ཞེས་པ་ནི་

གན་ཁོ་ནར་མ་ཕྱིན་པ་ཕན་ཆད་གཅིག་ན་འདུག་པ་བདག་གིར་བྱེད་ན་ལྟུང་བའི་ཕྱེད་དེ་ཉེས་བྱས་སུ་འགྱུར་བའོ། །གཞན་ལས་འོངས་པ་བདག་གིར་བྱས་པ་འབའ་ཞིག་སྤང་བར་འགྱུར་རམ་ཞེ་ན། བདག་གི་ཞིག་ན་ཡང་རུང་བར་མ་བྱས་ནའོ་ཞེས་པ་ཡིན་ཏེ། བདག་ཁྱིམ་པ་བྱེད་པའི་ཚེ་
སྲེལ་སྲེལ་བ་ཞིག་ན་ཡང་རུང་བར་བྱིན་གྱིས་མ་བརླབས་པར་རེག་ཅིང་སྤྱོད་ན་ཡང་སྤོང་བར་སྟོན་པའོ། །ཇི་ལྟར་བྱས་པས་ལྟུང་བར་འགྱུར་ཞེ་ན། རེག་གམ་རེག་ཏུ་བཅུག་ནའོ་ཞེས་པ་ཡིན་ཏེ། རིན་པོ་ཆེ་བདག་གིས་རེག་གམ་གཞན་རེག་དུ་བཅུག་ན་ཉེས་པར་འགྱུར་བའོ། །ཇི་ལྟར་
རེག་པས་ཉེས་པར་འགྱུར་ཞེ་ན། ཇི་ལྟར་ཡང་རུང་ཞེས་པ་ཡིན་ཏེ་འདི་ཁོང་འདི་ཁྱེར་འདི་ཙམ་ཁྱེར་ཞེས་པ་ལ་སོགས་པ་ཇི་ལྟར་རེག་ཏུ་བཅུག་ཀྱང་རུང་སྟེ་ཉེས་པར་འགྱུར་བའོ། །ཟོང་གིས་ཟངས་ལ་ཉེས་བྱས་ཞེས་པ་ནི་མཚན་མ་བཏབ་ཅིང་འཚོང་བར་བྱས་པའི་ཟངས་ལ་རེག་པར་ཉེས་
བྱས་སུ་སྟོན་པའོ། །གཞན་ལ་ཉེས་མེད་ཅེས་པ་ནི་མཚན་མས་མ་བཏབ་པ་ལ་སོགས་པའི་ཟངས་གཞན་ལ་ཉེས་མེད་པར་སྟོན་པའོ། །རོ་ཉེ་དང་ཁར་བ་དང་ཚོན་མོ་སྟེང་དང་ལྕགས་ཀྱང་ངོ་ཞེས་པ་ནི་འདི་དག་ལ་རེག་པའང་ཉེས་མེད་པར་སྟོན་པའོ། །དགེ་ཚུལ་དག་གིས་ཀྱང་ངོ་ཞེས་པ་
ནི་དགེ་ཚུལ་ཕ་དང་དགེ་ཚུལ་མ་འཛིན་ཅིང་རེག་ཏུ་བཅུག་པ་ཉེས་མེད་པར་སྟོན་པའོ། །གོང་དུ་བདག་གི་ཞིག་ན་ཡང་རུང་བར་མ་བྱས་ནའོ་ཞེས་བསྟན་པ་དེའི་རུང་བ་ཇི་ལྟ་བུ་ཞེ་ན། སྦྱིན་བདག་བདག་པོར་བསམས་པ་དང་ཞལ་ཏ་བ་བདག་པོར་བླང་བ་དང་བྱིན་གྱིས་བརླབས་པར་རུང་བའོ། །
ཞེས་པ་ཡིན་ཏེ་རྣམ་པ་འདི་གསུམ་གོང་ལྟར་བྱས་ཀྱང་རུང་བར་བྱས་པའི་ཆོ་གར་སྟོན་པའོ། །དེ་ལ་སུས་བསྐུར་བ་ཉིད་བདག་པོར་བསམས་པ་ནི་སྦྱིན་བདག་བདག་པོར་བསམས་པའོ། །ནམ་འཚོའི་བར་དུ་མི་རུང་བའི་རྫས་དགེ་བསྙེན་ཏམ་ལྷ་འབངས་སྤྲོ་བར་བྱས་ལ། དེའི་ཡིན་པར་སྤྱོད་པ་
ནི་ཞལ་ཏ་པ་བདག་པོར་ཁས་བླང་བའོ། །མི་རུང་བའི་ནོར་བར་དུ་བཞག་ལ་ཚེ་དང་ལྡན་པ་དགོངས་ཤིག །བདག་མིང་འདི་ཞེས་བགྱི་བའི་དགེ་སློང་འདི་ལྟ་བུ་མི་རུང་བ་རྙེད་པ་འདི་རུང་བའི་དངོས་པོར་བསྒྱུར་ཞིང་བཙལ་ཏེ་བདག་གིར་བྱའོ་ཞེས་ལན་གཉིས་གསུམ་དུ་བྱིན་གྱིས་རློབ་པ་ནི་

བྱིན་གྱིས་བརླབས་པའོ། །དེ་ལྟ་བས་ན་རུང་བར་བྱས་ཏེ་རེག་གམ་རེག་ཏུ་བཅུག་པ་ནི་ཉེས་མེད་ཀྱི་རུང་བར་བྱས་ཀྱང་བདག་གིར་བྱེད་པ་མི་བཏང་ན་རུང་བ་ཉིད་བདག་གིས་བྱེད་པའི་གཉེན་པོ་བས་ན་ཉེས་པ་རངས་པར་སྟོན་པའོ། །རུང་བར་བྱ་བའི་ཆོ་ག་དེ་དོན་དེ་ཇི་ལྟ་བུ་ལ་
འཆགས་ཤེ་ན། ཆོས་ཀྱི་དོན་མ་ཡིན་པ་ལས་གཞན་དུ་མི་སྐྱེ་ཞེས་པ་ཡིན་ཏེ་སངས་རྒྱས་མཆོད་པ་ལ་སོགས་པ་དང་བདག་གི་ལྷུང་བཟེད་ལ་སོགས་པའི་ཡོ་བྱད་ཀྱི་ཆེད་དུ་མ་ཡིན་ན་གཞན་དུ་དགོས་པའི་ཕྱིར་རུང་བའི་ཆོ་ག་བྱས་ཀྱང་བྱས་པར་མི་འགྱུར་བའོ། །རིང་ཡང་བདག་པོ་མི་
འཇིག་ཅེས་པ་ནི་བདག་པོར་བསམ་པ་དང་། ཞལ་ཏ་པ་རིང་མོ་ཞིག་ན་འདུག་ཏུ་ཟིན་ཀྱང་བདག་པོར་བྱིན་གྱིས་བརླབས་པ་ལ་མི་གདོད་པར་སྟོན་པའོ། །བདག་གི་ཕྱིར་ཟས་སྦྱོར་བ་ནི་རུང་ཞེས་པ་ནི་བདག་གི་ཕྱིར་ཟས་སྦྱོར་ཞིང་ཟས་ལྔ་ཤོམ་པ་ལྟོ་འདུན་ལ་སོགས་པའི་ཉེས་པ་མ་ཡིན་
པར་སྟོན་པའོ། །འདི་མན་ཆད་ཁམ་པ་ཞེས་པ་ཡན་ཆད་ལས་རྒྱགས་སུ་ནི་རིན་པོ་ཆེ་མན་ཆད་དོ་ཞེས་རྣམ་པར་འབྱེད་པ་ལས་འབྱུང་བ་མ་གཏོགས་པ་གཞན་ཐམས་ཅད་ཕྲན་ཚེགས་ལས་འབྱུང་བར་རིག་པར་བྱའོ། །དེ་བྱེད་དུ་གཞུག་པའི་ཕྱིར་ཀཱར་ཥཱ་པ་ཎ་བཟུང་ཞིང་ལོང་ཤིག་པར་
སྟོན་པའོ། །དེ་ཡང་རུང་བར་ནི་བྱ་དགོས་སོ། །རྒྱགས་ནི་རིན་པོ་ཆེ་མན་ཆད་དོ་ཞེས་པ་ནི་རྒྱགས་ཟོང་དུ་ནི་རིན་པོ་ཆེ་མན་ཆད་རིག་ཅིང་ཁྱེར་ན་ཡང་ཉེས་མེད་པར་སྟོན་པའོ། །མེའི་ཆེད་དུ་མེ་ཤེལ་བཅང་ཞེས་པ་ནི་ཆོས་འདི་བདག་གི་ཆེད་དུ་ན་མེ་ཤེལ་ཡང་ཆོངས་ཤིག་པའོ། །
འདི་ནི་དབེན་པར་བཞག་ཅེས་པ་ནི་མེ་ཤེལ་དེ་ལེགས་པར་སྦོས་ཤིག་པའོ། །མ་བྱིན་པར་ལེན་པ་ལ་མི་བསྟན་ཞེས་པ་ནི་འདི་རྐུན་པོས་མ་མཐོང་བར་གྱིས་ཤིག་པའོ། །འདིའི་འབྲས་བུ་ཕྱུང་ལ་སྦྱིན་རྐུན་པོ་ལ་མེ་ཤེལ་མ་བསྟན་པར་མེ་ནི་ཕྱུང་ལ་བྱིན་ཅིག་པའོ། །ཆུའི་ཆེད་དུ་
ཆུ་ཤེལ་ཏོ་ཞེས་པ་ཆུ་དབྱུང་བའི་ཕྱིར་ཆུ་ཤེལ་ཡང་ཆོངས་ཤིག་པའོ། །བསྲུང་བའི་ཆོ་ག་མཚུངས་སོ་ཞེས་པ་ནི་ཆུ་ཤེལ་སྦ་བའི་ཆོ་ག་ཡང་གོང་མ་བཞིན་ཏུ་གྱིས་ཤིག་པའོ། །ཡོ་བྱད་གནང་བའི་ནང་དུ་རིན་པོ་ཆེ་བདག་གིར་བྱེད་པ་གཏོགས་པ་མ་ཡིན་ཞེས་པ་ནི་རྒྱ་དང་ཁབ་

རལ་ལ་སོགས་པ་ཡོ་བྱད་གནང་བ་རིན་པོ་ཆེ་ལས་མ་བྱེད་ཅིག་པར་སྟོན་པའོ། །ར་གན་དང་ཟངས་དང་ཁར་བ་དང་ཤིང་གི་ལྷུང་བཟེད་བདག་གིར་མི་བྱ་ཞེས་པ་ནི་ལྷུང་བཟེད་འདི་དག་ལས་མ་བྱེད་ཅིག་པའོ། །འདི་དག་གམ་གཞན་གལ་ཏེ་བདག་གིར་བྱས་ན་སྨན་སྣོད་ཀྱི་གོར་
སྤྱད་ཅེས་པ་ནི་གོང་དུ་སྨོས་པའི་རིན་པོ་ཆེ་གང་ཡིན་པ་ལས་བྱས་པ་འམ་གཞན་ལས་བྱས་པ་ཡོད་ན་སྨན་སྣོད་དུ་བྱས་པ་ཙམ་གྱི་གོར་སྤྱོད་ཀྱི། བྱིན་གྱིས་བརླབས་པར་ནི་མ་བྱེད་ཅིག་པའོ། །ལྕགས་དང་ཁམ་པ་གཉིས་བྱིན་གྱིས་བརླབ་པའོ་ཞེས་པ་ནི་འདི་གཉིས་ལས་
བྱས་པའི་ལྷུང་བཟེད་ནི་བྱིན་གྱིས་རློབས་ཤིག་པའོ། །གོང་དུ་རིན་པོ་ཆེ་བདག་གིར་བྱེད་ཅེས་སྨོས་པའི་རིན་པོ་ཆེ་གང་ཡིན་པ་སྟོན་པ་ནི། ནོར་བུ་མུ་ཏིག་བཻ་ཌཱུརྱ་ཤེལ་བྱི་རུ་གསེར་དངུལ་ཨསྨ་གརྦྷ། མུ་སར་གལ་བ་དམར་པོ་གཡས་ཕྱོགས་སུ་འཁྱིལ་བ་ལ་སོགས་པ་རིན་
པོ་ཆེའོ་ཞེས་པ་ཡིན་ནོ། །མི་ལྷུམ་བ་ནི་འབྲི་ཞེས་པ་ནི་བདར་སྤྱད་མ་བྱས་པ་ལ་སོགས་པ་མི་སྡོམ་པར་གྱུར་པ་རེག་པ་ནི་ཉེས་པ་འབྲི་བར་སྟོན་པའོ། །འདི་འོག་ནས་འབྱུང་བའི་བསླབ་པ་ཡང་འདི་དང་འདྲ་བར་སྟོན་པ་ནི། འོག་མ་ཡང་ངོ་ཞེས་པ་ཡིན་ཏེ་འོག་ནས་མཚན་མ་
བཏབ་པ་འཚོང་བ་ཡང་མི་སྡོམ་ན་འབྲི་བར་སྟོན་པའོ། །མི་སྡོམ་པ་ཇི་ལྟ་བུ་ཡིན་པ་སྟོན་པ་ནི། ཆད་པ་འཕན་ཅན་ཡར་བ་ཅིག་སྔོན་མི་སྤྱོད་པ་མ་ཐེབས་པ་བྱིད་པ་བཅོས་པ་རྣམས་སོ་ཞེས་པ་ཡིན་ཏེ། འདི་དག་ལྟར་གྱུར་ན་མི་སྡོམ་པ་སྟེ་དེ་ལ་ཆད་ཅེས་པ་ནི་གཅད་པར་བཀྱིགས་པ་ལས་
ཆད་ཀྱང་རུང་བའོ། །འཕན་ཞེས་པ་ནི་བུབ་ཅིང་སྣད་པའོ། །ཡར་ཅེས་པ་ནི་ཕྱོགས་འགའ་ནས་ཁམ་ཚད་དུ་ཡར་བའོ། །སྔོན་མི་སྤྱོད་ཅེས་པ་ནི་སྔོན་སུའང་མི་སྤྱོད་ཅིང་ངོ་མི་ཤེས་པའོ། །མ་ཐེབས་ཞེས་པ་ནི་མཚན་མས་མ་ཐེབས་པའོ། །བྱིད་ཅེས་པ་ནི་བྱང་སྟེ་མཚན་མ་མི་
མངོན་པའོ། །བཅོས་མ་ཞེས་པ་ནི་རྡོ་དང་རྩྭ་ལ་སོགས་པ་ལས་རིན་པོ་ཆེ་དང་འདྲ་བ་འམ་རྒྱན་ལྟ་བུར་བཅོས་བཅོས་པའོ། །གསེར་དངུལ་སྤང་བའོ།། །།མཚན་མས་བཏབ་པ་སྤོགས་བྱེད་པ་སྟོན་པ་ནི། ཁེ་འདོད་ན་ལྟུང་བའོ་ཞེས་པ་ལ་སོགས་པ་ཡིན་ཏེ་ཁེ་འདོད་པས་སྤོགས་

བྱེད་ན་ལྟུང་བར་འགྱུར་བའོ། །དེ་ཡང་བདག་གི་ཕྱིར་ན་དེ་ལྟའི་གཞན་གྱི་ཕྱིར་ན་ཉེས་པ་འབྲིའོ། །ཕ་རོལ་ཁྱིམ་དང་གཉེན་མ་ཡིན་ན་རྩ་བའོ་ཞེས་པ་ནི་སྤོགས་ཟླ་ཁྱིམ་པའང་ཡིན་གཉེན་ཡང་མ་ཡིན་ན་གདོད་ཉེས་པ་རངས་པར་འགྱུར་བའོ། །སྤོགས་བྱེད་པ་གང་གི་ཚེ་རྩ་
བར་འགྱུར་ཞེ་ན། སྤོགས་བྱིན་ནའོ་ཞེས་པ་ཡིན་ཏེ་སྤོགས་བྱེད་པར་ཤོམ་པ་ནི་ཉེས་བྱས་ཀྱི་ནམ་སྤོགས་ཕྱིན་ན་རྩ་བར་འགྱུར་བའོ། །དེ་ལྟ་བས་ན་སྤང་བ་ནི་སྤོགས་ཅི་ཕྱིན་པ་ཉི་ཚེ་སྤང་དགོས་སོ། །བསླབས་ལ་འོག་མ་ཡང་མཚན་ཉིད་འདི་དང་སྦྱོར་བར་སྟོན་པ་ནི། འོག་མ་ཡང་
ངོ་ཞེས་པ་ཡིན་ཏེ་ཁེ་འདོད་ཅེས་པ་ནས་སྤོགས་ཕྱིན་ཅེས་པའི་བར་དུ་སྨོས་པ་འདི་དག་ཉོ་འཚོང་གི་ཡན་ལག་ཏུ་ཡང་སྦྱོར་ཅིག་པའོ། །ཅི་སྤོགས་པས་ཉེས་པར་འགྱུར་ཞེ་ན། པ་ཎི་འམ་རིན་པོ་ཆེ་སྤོགས་ནའོ་ཞེས་པ་ཡིན་ཏེ་པ་ཎི་འམ་གསེར་དངུལ་ལ་སོགས་པའི་རིན་པོ་ཆེ་གང་
སྤོགས་ཀྱང་ཉེས་པར་འགྱུར་བའོ། །སྦྱོར་བ་ནི་གཅིག་གོ་ཞེས་པ་ནི་སྟན་ལས་འཕགས་པ་ལ་སོགས་པ་སྤོགས་ཀྱི་སྦྱོར་བ་མང་པོ་ཞིག་བྱེད་ཀྱང་། སྦྱོར་བ་གཅིག་ཏུ་བརྩི་བར་སྟོན་པའོ། །དཀོན་མཆོག་གི་ཕྱིར་ནི་བྱ་ཞེས་པ་ནི་དཀོན་མཆོག་གི་ཕྱིར་ནི་སྤོགས་བྱོས་ཤིག་པའོ། །
དེ་ཡང་སུ་བྱེད་དུ་བཅུག་ཅེ་ན། ཀུན་དགའ་བའམ་དགེ་བསྙེན་ཡོད་ན་བསྒོ་སྟེའོ་ཞེས་པ་ཡིན་ཏེ། འདི་དག་ལ་ཡོད་ན་སྤོགས་བྱེད་དུ་ཆུག་ཤིག་པའོ། །སྤོགས་ཀྱི་ཐབས་ཇི་ལྟར་བྱ་བ་སྟོན་པ་ནི་གཏའ་ཉིས་རིམ་དུ་བླང་ཞེས་པ་ལ་སོགས་པ་ཡིན་ཏེ། དཀོན་མཆོག་གི་དཀོར་ཆུད་མི་
ཟ་བའི་ཕྱིར་གཏའ་ཉིས་རིམ་དུ་བཟུང་ཤིག་པའོ། །དཔང་ལོ་ཟླ་ཞག་དགེ་འདུན་གྱི་གནས་བརྟན་གཙུག་ལག་ཁང་གི་ཁང་སྐྱོང་། ཁེར་པ་ནོར་ཁེ་རྣམས་ཤོག་ཤོག་བྲི་ཞེས་པ་ནི་ཚིག་རྒྱ་འདི་ལྟར་བྱས་པའི་འོག་ཏུ་གདོད་ནོར་སྐུར་ཅིག་པའོ། །རྒྱུས་ཡོད་པས་གཏན་ཚིགས་གཞན་
ལ་བསྙད་ཅེས་པ་ནི་སྤོགས་ཀྱི་རྒྱུས་ཤེས་པས་དགེ་སློང་གཞན་ལ་གཏན་ཚིགས་རྒྱས་པར་ཤོད་ཅིག་པའོ། །མཚན་མ་བཏབ་པ་སྤོགས་པ་སྤང་བའོ།། །།གོང་དུ་འོག་མ་ཡང་འདི་བཞིན་ནོ་ཞེས་ཉོ་འཚོང་གི་ཡན་ལག་རྒྱས་པར་བསྟན་ཟིན་མོད་ཀྱི་ནོར་གང་ལས་ཉོ་འཚོང་བྱེད་པའི་

བྱེ་བྲག་ཙམ་ཞིག་སྟོན་པ་ནི། གཞན་གྱིས་ཞེས་པ་ལ་སོགས་པ་ཡིན་ཏེ། སྐམ་ཟོང་གིས་མ་ཡིན་གྱི་འབྲུ་ལ་སོགས་པ་གཞན་གྱིས་ཉོ་འཚོང་བྱེད་ན་ཉེས་པར་འགྱུར་བའོ། །དགེ་འདུན་གསོལ་བར་ནས་རིན་གྱིས་ཉོ་ན་དགེ་འདུན་གྱི་ལས་སྦྱིན་ཞེས་པ་ནི་དགེ་འདུན་མཆོད་སྟོན་གསོལ་པའི་
རྒྱུ་དགེ་འདུན་ཉིད་ཀྱིས་བཙང་ལས་རིན་གྱིས་ཉོ་བ་ཡོད་ན་བྱིན་ཅིག་པར་སྟོན་པའོ། །གལ་ཏེ་དེའི་རིན་མདོངས་སོལ་ཞེས་པ་ནི་མཚམས་དེ་ཉིད་ཀྱི་དགེ་འདུན་གསོལ་བར་ཉོ་ན་དེའི་དགེ་འདུན་བདག་གིས་མདོངས་སོལ་གྱིས་ལ་ཀློགས་ཏེ་བྱིན་ཅིག་པའོ། །ཟད་ན་དགེ་འདུན་གྱིས་ཉོ་ཞེས་པ་
ནི་དགེ་འདུན་གྱི་བཙང་ཟད་དུ་བྱེད་ནའང་ཉོས་ཤིག་པའོ། །གསར་ཡང་ངོ་ཞེས་པ་ནི་གསར་ཉོས་ཤིག་པའོ། །དེ་ཡང་གང་གི་ཚེ་ཞེ་ན། ཇིས་ཏེ་སྲོག་ཆགས་མེད་ན་རྙིང་བཙོངས་ཏེ་ཞེས་པ་ཡིན་ཏེ། སྲོག་ཆགས་མེད་པའི་ནས་རྙིང་འཚོངས་ལ་གསེར་ཉོས་ཤིག་པའོ། །རིན་
ཐང་མི་བཅད་ཅེས་པ་ནི་ནོར་འདི་ནི་འདི་རིའོ་ཞེས་པ་ལ་སོགས་པར་ནོར་གྱི་རིན་ཐང་གཅོད་པར་མ་བྱེད་ཅིག་པའོ། །ཁྱིམ་པའི་སྤྱོད་པར་མི་གཅེན་ཞེས་པ་ནི་ཚོང་བྱེད་པ་ལ་སོགས་པ་ཁྱིམ་པའི་ནང་དུ་དགེ་སློང་གཏོགས་འདོད་དང་གཅེན་པ་མ་བྱེད་ཅིག་པའོ། །འོ་ན་བདག་གི་གོས་
ཉོ་བ་ལ་སོགས་པ་ཇི་ལྟར་བྱ་ཞེ་ན། ཁྱིམ་པ་ཉོར་གཞུག་ཅེས་པ་ཡིན་ནོ། །གལ་ཏེ་ཁྱིམ་པ་མེད་ན་ཇི་ལྟར་བྱ་ཞེ་ན། མེད་ན་ཚིག་གསུམ་མན་ཆད་བརྗོད་དེའོ་ཞེས་པ་ཡིན་ཏེ་རིན་འདི་ཙམ་མམ་ཞེས་དགེ་སློང་གིས་ཚིག་གསུམ་གྱི་བར་དུ་སྒྲུབས་ཤིག་པའོ། །དཀོན་མཆོག་གསུམ་གྱི་ཕྱིར་མ་
ཡིན་ན་གཞན་གྱི་ཆེད་དུའང་སྐྱེད་འབྲི་མི་བྱ་ཞེས་པ་ནི་དཀོན་མཆོག་གི་ཕྱིར་མ་ཡིན་ན་གཞན་གྱི་ཕྱིར་ཡང་རིན་ཐང་གི་སྐྱེད་བྲི་མ་བྱེད་ཅིག་པའོ། །རྒྱལ་མི་བྱ་ཞེས་པ་ནི་རྒྱལ་མ་འགོད་ཅིག་པར་སྟོན་པའོ། །ལ་ལ་དགེ་འདུན་གྱི་བཙད་བེད་སྐྱེད་དུ་གཏོང་བར་རྩོལ་བ་ཡོད་ན་ཇི་ལྟར་བྱ་ཞེ་ན། དེའི་
ཕྱིར་ན་དགེ་འདུན་གྱི་ལས་བྱེད་པ་ལ་དགེ་འདུན་གྱི་སྐོར་བཞག་ཅེས་པ་ཡིན་ཏེ་དེ་ལྟ་བུར་རྩོལ་བ་ཡོད་ན་དགེ་འདུན་གྱིས་གསར་བུ་རྒན་པོ་ལ་སོགས་པ་ལ་འདི་བེད་སྐྱེད་དུ་ཆུག་ཤིག་ཅེས་གཏོད་ཅིག་པའོ། །ད་དེའི་ལས་སུ་བྱ་བ་སྟོན་པ་ནི། རྒན་རབས་ལ་མ་དྲིས་པར་དགེ་འདུན་གྱི་ཆེད་དུ་

རྩོལ་བ་མི་གཅད་ཅེས་པ་ལ་སོགས་པ་ཡིན་ཏེ། རྒན་རབས་ལ་མ་དྲིས་པར་དེའི་ལག་ཏུ་ནོར་གཏད་ཅིང་སྐྱེད་མངན་དུ་མ་གཞུག་ཤིག་པའོ། །ཁྱེར་བ་འདིའི་ཕྱིར་གཞན་ཚིགས་ཤོག་ཤོག་ལ་འབྲི་ཞེས་པ་ནི་སྐྱེད་མངན་དེས་བདག་ལ་དྲི་མི་ངས་པ་དང་བརྗེད་བྱང་ལ་སོགས་པའི་ཆེད་
དུ་དབང་རྒྱ་གྱིས་ཤིག་པའོ། །ཉོ་བཙོང་སྤང་བའོ།། །།ད་ལྷུང་བཟེད་འཆང་བའི་སྤང་བ་སྟོན་པ་ནི། ལྷུང་བཟེད་ལས་སོ་ཞེས་པ་ལ་སོགས་པ་ཡིན་ཏེ། གོང་དུ་གོས་ལྷག་པ་འཆང་བ་ཞེས་སྨོས་པའི་གོར་ལྷུང་བཟེད་ཆུག་ལ་དེའི་ཚུལ་བཞིན་དུ་རིག་པར་གྱིས་ཤིག་པའོ། །བྱིན་གྱིས་མ་
བརླབས་ནའོ་ཞེས་པ་ནི་བྱིན་གྱིས་བརླབས་པ་ལ་ཉེས་མེད་ཀྱི་བྱིན་གྱིས་མ་བརླབས་པ་ཞག་བཅུ་འདས་ན་ཉེས་པར་འགྱུར་བའོ། །རབ་ཏུ་འབྱུང་བར་འདོད་པའི་ཆེད་དུ་ངེས་པར་བྱས་ན་བཏང་བའོ་ཞེས་པ་ནི་རབ་ཏུ་འབྱུང་བར་འདོད་པ་སྦྱིན་བར་ཐག་བཅད་ན་བཏང་བ་ཡིན་པས་ན་ཞག་བཅུ་འདས་
པར་བཞག་ཀྱང་ཉེས་པར་མི་འགྱུར་བའོ། །སྲེ་བོ་དང་དཀར་པོ་དང་ཆེས་པ་རྣམས་མི་རུང་ཞེས་པ་ནི་འདི་རྣམས་ལྟ་བུ་ཞིག་ཡིན་ན་མ་བརྟགས་ཤིང་མི་རུང་བར་གཏོགས་པས་ལྷག་པར་བཅངས་སུ་ཟིན་གྱིས་ཀྱང་ཉེས་པར་མི་འགྱུར་བའོ། །མ་ཚོས་པ་ནི་ཆུང་བའི་སྟེང་དུའོ་ཞེས་པ་ནི་
ཁམ་པའི་ལྷུང་བཟེད་མ་ཚོས་ན་ཚད་མ་ཡིན་དུ་ཟིན་གྱིས་ཀྱང་ཆུང་བ་དང་འདྲ་བའི་སྟེང་དུ་མ་བརྟགས་ཡང་ཡིན་པར་སྟོན་པའོ། །ལྷུང་བཟེད་ཆུང་ངུ་གཅིག་པུ་ཉེས་མེད་ཅེས་པ་ནི་ལྷུང་བཟེད་ཆུང་ངུ་འགའ་སེལ་བ་ནི་ཉེས་པར་སྟོན་པའོ། །ལྷུང་བཟེད་འཆང་བ་སྤང་བའོ།། །།ད་ནི་ལྷུང་
བཟེད་ལྷག་པར་ཚོལ་བ་སྤང་བ་སྟོན་ཏེ། དེའང་འདོད་གཅེན་ལས་འགྱུར་བས་ན་སྤྱིའི་ཚིག་ཏུ་ཧ་ཅང་ཡང་འདོད་ཞེན་མི་བྱ་ཞེས་པ་ཡིན་ཏེ་དགེ་སློང་གིས་རྙེད་པའི་ཕྱིར་འདོད་ཞེན་མ་འོས་པ་མ་བྱེད་ཅིག་པའོ། །ཡོ་བྱད་ལ་ཧ་ཅང་ཡང་གདུ་བར་མ་ཡིན་ཞེས་པ་ནི་ཆོས་གོས་དང་
ལྷུང་བཟེད་ལ་སོགས་པའི་ཡོ་བྱད་ལ་ཤིན་ཏུ་གདུ་བར་ཡང་མ་བྱེད་ཅིག་པའོ། །གང་ལ་ཞེན་པ་དེ་མི་བཅང་ཞེས་པ་ནི་ཡོ་བྱད་གང་ལ་ཆགས་པ་དེ་མ་འཆང་བར་སྤོངས་ཤིག་པའོ། །མེད་ན་ལྷུང་བཟེད་ཀྱང་བསླང་ཞེས་པ་ནི་མེད་ན་ལྷུང་བཟེད་དང་ཆོས་གོས་ཀྱང་སློངས་ཤིག་པའོ། །

ལྷུང་བཟེད་ཇི་ལྟར་བཙལ་བས་ཉེས་པར་འགྱུར་ཞེ་ན་འདི་ཡོད་ནའོ་ཞེས་པ་ཡིན་ཏེ་ལྷུང་བཟེད་གཉུགས་མ་ཅིག་ཡོད་བཞིན་དུ་བཙལ་ན་ཉེས་པར་འགྱུར་བའོ། །ཡོད་པ་དེ་ཡང་ཇི་ལྟ་བུ་ཞེ་ན། ལྷན་པ་བཞི་མན་ཆད་དམ་དེ་འོས་པ་འམ་སྤྱད་བཟོད་ནའོ་ཞེས་པ་ཡིན་ཏེ་ལྷན་པ་བཞི་མན་
ཆད་དམ་བཞི་གདབ་ཏུ་འོས་པ་འམ་བཞི་བཏབ་ཏུ་ཟིན་གྱིས་ཀྱང་སྤྱད་བཟོད་པ་བཞིན་དུ་ཕྱི་མ་བཙལ་ན་ཉེས་པར་འགྱུར་བའོ། །ལྷུང་བཟེད་སྔ་མ་ཡོད་བཞིན་དུ་ཇི་ལྟར་བཙལ་བས་ཇི་ལྟ་བུའི་ཉེས་པར་འགྱུར་ཞེ་ན། ཁྱིམ་པ་དང་གཉེན་མ་ཡིན་པ་ལས་སློང་ཞིང་ཚོལ་ནའོ་ཞེས་
པ་ལ་སོགས་པ་ཡིན་ཏེ་འདི་དག་ལས་བཙལ་ན་ཉེས་པར་འགྱུར་བའོ། །འདིས་བསླབ་པ་གཞན་ཡང་གོ་བར་བྱ་བ་ནི་ཕྱི་མ་གཉིས་ཀྱང་འདི་བཞིན་ཞེས་པ་ཡིན་ཏེ་འདིའི་འོག་ནས་འབྱུང་བའི་བསླབ་པ་རྣམ་གཉིས་ཀྱང་ཁྱིམ་པ་དང་གཉེན་མ་ཡིན་པ་འཐག་ཏུ་བཅུག་ན་ཉེས་པར་
འགྱུར་བའོ། །དེའི་བྱེ་བྲག་སྟོན་པ་ནི་ཐ་ག་པ་དང་སྦྱིན་བདག་དང་གཞན་ཡང་ངོ་ཞེས་པ་ཡིན་ཏེ། ཐ་ག་པ་དང་སྦྱིན་བདག་དང་ཕོ་ཉ་གསུམ་ཆར་ཁྱིམ་པ་དང་གཉེན་མ་ཡིན་པ་ཞིག་ན་ཉེས་པར་འགྱུར་བའོ། །གཉེན་མ་ཡིན་པ་གཉེན་ལས་ཉེས་པར་མི་འགྱུར་བ་ལ་མ་
གཏོགས་པ་ནི་སྤོགས་དང་ལྷུང་བཟེད་དོ་ཞེས་པ་ཡིན་ཏེ་གཉེན་མ་ཡིན་པ་ལ་ཟས་བསོད་པ་ལ་སོགས་པ་སློང་དུ་མི་དབང་བ་གཉེན་ལས་ཉེས་པར་མི་འགྱུར་བའི་ནང་དུ་སྤོགས་དང་ལྷུང་བཟེད་མ་གཏོགས་པ་སྟོན་པ་སྟེ་འདི་འང་ཉེས་པ་རངས་པར་མི་འགྱུར་གྱི་འབྲི་བར་འགྱུར་རོ། །སྐབས་སུ་
ཞར་ལ་བཤད་པའི་མཇུག་འདུས་ནས་དཀྱུས་ཀྱི་འཕྲོ་སྟོན་པ་ནི། ཉེས་བྱས་ཞེས་པ་དང་། དེ་ལས་གྲུབ་ན་རྩ་བ་ཞེས་པ་ཡིན་ཏེ། ཚོལ་བའི་ཚེ་ན་ནི་ཉེས་བྱས། རྙེད་པའི་ཚེ་ན་རྩ་བར་འགྱུར་བའོ། །ཡོད་སྙམ་པ་ལས་མེད་པ་འབྲི་ཞེས་པ་ནི་སྔ་མ་ཡོད་བཞིན་དུ་ཕྱི་མ་བཙལ་བ་ལས། སྔ་
མ་དེ་རླག་གམ་ཚིག་སྟེ་མེད་པར་གྱུར་ན། སྔ་མ་མེད་པའི་ཕྱིར་ཉེས་པ་འབྲི་བར་སྟོན་པའོ། །བདག་གི་ཡོ་བྱད་ཀྱིས་ནའོ་ཞེས་པ་ནི་ལྷུང་བཟེད་སྔ་མ་ཡོད་བཞིན་དུ་ཕྱི་མ་བདག་གི་རིན་གྱིས་ཉོས་ན་ཡང་ཉེས་པ་འབྲི་བར་སྟོན་པའོ། །འདི་དག་ཡོད་ནའོ་ཞེས་པ་ནི་ལྷུང་བཟེད་སྔ་མ་མེད་དེ་བཙལ་དགོས་

པའི་ཟོང་ནི་ཡོད་ལ་ཟོང་གིས་མི་འཚལ་བར་གཞན་ལ་སློང་ན་ཡང་ཉེས་པ་འབྲི་བར་སྟོན་པའོ། །བཟང་འདོད་པས་བརྗེས་ནའོ་ཞེས་པ་ནི་བཟང་པོ་འདོད་པའི་ཕྱིར་རྗེ་ན་ཡང་ཉེས་བྱས་སུ་སྟོན་པའོ། །རྣམ་པར་འབྱེད་པ་ལས་བརྗེས་ན་ཉེས་མེད་ཅེས་འབྱུང་བ་ནི་ཐ་མལ་བར་
བརྗེ་བ་ལ་བྱའི་བཟང་འདོད་པའི་ཕྱིར་མ་ཡིན་ནོ། །ལྷག་པར་བཙལ་བ་དེ་ཞག་བཅུ་ལས་ལྷག་པར་བཅངས་ན་ལྷག་པ་བཙལ་བའི་སྟེང་དུ་བཅངས་པའི་ཉེས་པར་ཡང་འགྱུར་རོ། །འདི་སྤང་བ་གཞན་དང་མི་འདྲ་བའི་ཁྱད་པར་སྟོན་པ་ནི། འདི་དགེ་འདུན་ལ་སྤང་ཞེས་པ་ཡིན་ཏེ་ལྷུང་བཟེད་
ལྷག་པར་བཙལ་བ་སྤང་བ་ནི་གཞན་ལ་མ་སྤང་བར་དགེ་འདུན་ལ་སྤོངས་ཤིག་པའོ། །ལྷག་པ་མང་པོ་ཞིག་བཙལ་ཀུན་དགེ་འདུན་ལ་སྤང་ངམ་ཞེ་ན། དུ་མ་ན་གང་འདོད་པའི་མཆོག་གཅིག་གོ་ཞེས་པ་ཡིན་ཏེ་དུ་མ་ཡོད་ན་དེའི་ནང་ནས་གང་བཟང་ཤོས་དགེ་འདུན་ལ་ཕུལ་ཅིག་པའོ། །ལྷག་
མ་གཞན་ཇི་ལྟར་བྱ་ཞེ་ན། གཞན་སྤང་ཞེས་པ་ཡིན་ཏེ་གཞན་ཡང་ཡོང་ཡེ་སྤོངས་ཤིག་པའོ། །སུ་ལ་སྤང་ཞེ་ན། འདིའི་རབ་ཏུ་བྱུང་བ་ལའོ་ཞེས་པ་ཡིན་ཏེ་བདག་ཅག་གི་རབ་ཏུ་བྱུང་བ་དགེ་ཚུལ་ཡན་ཆད་ལ་སྤོངས་ཤིག་པའོ། །ལྷུང་བཟེད་ཚོལ་ཏེ་དེ་ཉིད་ལ་ལྷུང་བཟེད་ཇི་ལྟ་བུ་སྦྱིན་
ཞེ་ན། འདི་ལ་ཐ་ཤལ་སྦྱིན་ཞེས་པ་ཡིན་ཏེ། དེ་ལ་ཐམས་ཅད་ཀྱི་ཐ་ཤལ་བྱིན་ཅིག་པའོ། །གལ་ཏེ་བཙལ་བ་དེ་ཉིད་ཐ་ཤལ་ཞིག་ཡིན་ན་ཡང་དེ་ཉིད་དེ་ལ་བྱིན་ཅིག་པའོ། །དེ་ཡང་ཇི་ལྟར་བྱས་ཏེ་སྦྱིན་ཞེ་ན། བྲིམས་ཏེ་བསྙིགས་པའོ་ཞེས་པ་ཡིན་ཏེ་ཐམས་ཅད་ལ་བྲིམས་ནས་ངན་དུ་
བསྙིགས་ལ་བྱིན་ཅིག་པའོ། །དེ་ལྟར་བསྙིགས་པའི་ལས་སུས་བྱ་ཞེ་ན། བསྐོས་པས་སོ་ཞེས་པ་ཡིན་ཏེ། གསོལ་བ་དང་གཉིས་ཀྱི་ལས་ཀྱིས་བསྐོས་པའི་དགེ་སློང་གིས་གྱིས་ཤིག་པའོ། །དེ་ལྟར་བསྐོས་པའི་དགེ་སློང་གིས་ལས་སུ་བྱ་བའི་ཆོ་ག་སྟོན་པ་ནི། སང་
བྱེད་དུ་ཆ་ན་དེས་དགེ་འདུན་ཚོགས་པའི་ཚེ་སྦྲན་ཞེས་པ་ཡིན་ཏེ་སང་ལྟ་བུ་འདྲིམ་པའི་དེང་ནས་དུ་དགེ་འདུན་ཚོགས་པའི་ཚེ་སྦྲོན་ཅིག་པའོ། །སྦྲན་པའི་སྙད་ཇི་སྐད་དུ་བྱ་ཞེ་ན། ཚེ་དང་ལྡན་པ་དག་སང་བདག་གིས་ལྷུང་བཟེད་ལྷན་པ་མེད་པ་བྲིམ་གྱིས་ཁྱེད་ཅག་སོ་སོའི་ལྷུང་

བཟེད་སྣོམས་ལ་དགེ་འདུན་གྱི་ནང་དུ་སྦྱོན་ཅིག་ཅེས་སོ་ཞེས་པ་ཡིན་ཏེ་སྦྲན་པའི་སྙད་འདི་སྐད་དུ་གྱིས་ཤིག་པའོ། །འཁོད་པའི་ཕྱིར་བཤམ་ཞེས་པ་ནི་དགེ་འདུན་འདུ་བའི་སར་ཆག་ཆག་གདབ་ཅིང་གདན་གདིང་བ་ལ་སོགས་པའི་ཞལ་ཏ་འང་གྱིས་ཤིག་པའོ། །འདམ་དུ་
གཞུག་ཅིང་བྲིམ་ཞེས་པ་ནི་དགེ་འདུན་གྲལ་དུ་བཀོད་པ་དང་བྲིམས་ལ་འདམ་དུ་ཆུག་ཤིག་པའོ། །བྲིམ་ཞིང་འདམ་དུ་གཞུག་པའི་སྙད་ཇི་སྐད་བྱ་ཞེ་ན། གནས་བརྟན་ལྷུང་བཟེད་འདི་སྲབ་ཅིང་ཟླུམ་ལ་ལྷུང་བཟེད་ཀྱིས་གལ་ཏེ་བཞེང་ན་བཞེས་ཤེའོ་ཞེས་བྲིམ་པའི་སྙད་འདི་སྐད་དུ་གྱིས་
ཤིག་པའོ། །ལྷུང་བཟེད་ཇི་འདྲའང་རུང་སྟེ་སྙད་འདི་སྐད་དུ་བྱ་འམ་ཞེ་ན། ཡོན་ཏན་བཞིན་ནོ་ཞེས་པ་ཡིན་ཏེ་གོང་མ་ཁོ་ན་སྐད་དུ་མི་བརྗོད་དུ་མི་རུང་བ་མེད་ཀྱི་ལྷུང་བཟེད་ཉིད་ཀྱི་ཡོན་ཏན་ཇི་བཞིན་དུ་བརྗོད་ཅིག་པའོ། །འདོད་ན་བླང་ཞེས་པ་ནི་བྲིམས་པའི་ཚེ་འདོད་ན་ལོང་ཤིག་པའོ། །
ཆོད་པས་ཁྱེར་ན་མི་བླང་ཞེས་པ་ནི་མི་གཅིག་གཉིས་ཀྱིས་ཆོད་པའི་འོག་ན་འདུག་པས་ཁྱེར་ན་ང་འདོད་དོ་ཞེས་དེ་ལ་མ་སློང་ཤིག་པའོ། །ཚིག་ལན་གཉིས་མ་འདས་ཀྱི་བར་དུ་མི་སྦྱིན་ཞེས་པ་ནི་གལ་ཏེ་གོང་མ་ལྟར་སློང་ན་སློང་བ་ལན་གཉིས་ཀྱི་བར་དུ་ནི་མི་སྦྱིན། ལན་གསུམ་གྱི་
བར་སློང་ན་སྦྱིན་ཅིག་པའོ། །ལྟུང་བ་བྱུང་བ་ལ་མི་འདོར་ཞིང་བྱིན་གྱིས་མི་རློབ་པར་བསྒོ་ཞེས་པ་ནི་ཐ་མར་བསྙིགས་པའི་ལྷུང་བཟེད་ལྷུང་བཟེད་བཅོལ་བའི་དགེ་སློང་དེ་ལ་སྦྱིན་པའི་ཚེ་འདི་འདོར་ཡང་མ་འདོར་བྱིན་གྱིས་ཀྱང་མ་རློབ་པར་ཆོངས་ཤིག་ཅེས་བསྒོ་ལ་བྱིན་པའོ། །མ་ཆག་གི་
བར་དུ་དལ་གྱིས་གཟོབས་ཤིག་ཅེས་སོ་ཞེས་པ་ནི་འདི་མ་ཆག་གི་བར་དུ་ཇི་ནས་ཀྱང་མི་གནོད་པར་གཟོབས་ལ་སྤྱོད་ཅིག་ཅེས་ཀྱང་བསྒོ་བའོ། །འདི་གཉིས་ཀ་སྤྱད་དོ་ཞེས་པ་ནི་དེས་བསོད་སྙོམས་ལ་སོགས་པ་སྤྱོད་པའི་ཚེ་གཉིས་ཀ་སྤྱོད་ཅིག་པར་སྟོན་པའོ། །འདི་ཡོ་བྱད་བཟང་
པོར་བདམས་པར་གཞུག་ཅེས་པ་ནི་ལྷུང་བཟེད་སྣོད་ཀྱང་བཟང་པོར་དེ་གཞུག་པ་ལ་སོགས་པར་རིམ་གྲོ་བསྐྱེད་ཅིག་པའོ། །མི་གཟན་པར་བདམས་པས་ཚེགས་བསྐྱུངས་ཞེས་པ་ནི་དེའི་ནང་དུ་གཞུག་པ་ཡང་རྩུབ་ཅིང་ཚ་བ་ལ་སོགས་པ་གཟན་པ་ན་མ་གཞུག་པར་སྟོན་ཅིག་པའོ། །སྡེར་

དུའང་མ་ཡིན་ཞེས་པ་ནི་དེའི་ནང་དུའང་བཟའ་བར་མ་བྱེད་ཅིག་པའོ། །ལྷུང་བཟེད་ཚོལ་བ་སྤང་བའོ།། །།ཇི་ལྟར་བྱས་པས་འཐག་ཏུ་བཅུག་པའི་སྤང་བར་འགྱུར་ཞེ་ན། རིན་མེད་པར་བཅོལ་ཞིང་གཞན་གྱིས་ཀྱང་བཏགས་ནའོ་ཞེས་པ་ཡིན་ཏེ། གླ་མ་བྱིན་པར་གཉེན་མ་ཡིན་པའི་
ཐག་པ་འཐག་ཏུ་བཅུག་པ་འམ་ཕོ་ཉས་འཐག་ཏུ་བཅུག་ན་ཡང་ཉེས་པར་འགྱུར་བའོ། །གཉེན་མ་ཡིན་པའི་ཐ་ག་པ་ཆེད་འགའ་ནི་གཉེན་དང་བསྡོངས་ཤིང་ཡང་འཐག །ཆེད་འགའ་ནི་རབ་ཏུ་བྱུང་བ་དང་བསྡོངས་ཤིང་ཡང་འཐག་པ་ཉེས་པ་རངས་པར་སྟོན་པ་ནི། གཞན་གྱིས་བསྟངས་ན་
ཡང་དེས་མ་བྱས་པ་མ་ཡིན་ཞེས་པ་ཡིན་ཏེ་གཞན་དང་བསྡོངས་ཤིང་འཐག་ན་ཡང་ཉེས་པ་རངས་པར་འགྱུར་བའོ། འཐག་ཏུ་བཅུག་པ་སྤང་བའོ།། །།ད་ནི་འཐག་པ་ན་སྐྱེད་པའི་ཡན་ལག་ཇེ་སྟོན་པ་ནི། དེའི་ཕྱིར་འཐག་ནའོ་ཞེས་པ་ལ་སོགས་པ་ཡིན་ཏེ། དགེ་སློང་དེའི་ཕྱིར་འཐག་པ་ལ་
འོག་མ་ལྟར་བྱས་ན་ཉེས་པར་འགྱུར་བའོ། །ཐ་ག་པ་ཡུག་ཁྱིམ་ཆེ་བ་དང་ཐགས་རན་བཟང་བར་བྱེད་དུ་བཅུག་ནའོ་ཞེས་པ་ཡིན་ཏེ་ཐ་ག་པ་འདི་ལྟར་བྱེད་དུ་བཅུག་ན་ཉེས་པར་འགྱུར་བའོ། །གལ་ཏེ་སྦྱིན་བདག་གི་གོང་ནའོ་ཞེས་པ་ནི་སྦྱིན་བདག་གིས་དང་པོ་ཅི་སྤགས་པ་ལས་སྐུད་པ་ཡང་རུང་
རིན་ཀྱང་རུང་སྟེ་བསྣན་ཅིང་ལྷག་པར་གོད་ན་ཉེས་པར་འགྱུར་བའོ། །གླ་མ་བྱིན་ནའོ་ཞེས་པ་ནི་དགེ་སློང་གིས་ཁ་ཆོས་བཞིན་དུ་བྱས་པ་ལས་སྒྲོན་སྐྱེ་བའི་གླ་ཐུད་མ་བྱིན་ན་ཉེས་པར་འགྱུར་བའོ། །སྦྱིན་བདག་གིས་དེའི་ཕྱིར་བསྒོ་བ་མེད་ན་བྱེད་དོ་ཞེས་པ་ནི་ཐ་ག་པའི་གན་དུ་སོང་ལ་བདག་
གར་དགའ་བའི་ཁ་ཆོས་གྱིས་ཤིག་ཅེས་དགེ་སློང་ལ་བསྒོ་བ་མེད་པའམ། ཐ་ག་པ་ལ་བསྒོ་བ་མེད་པར་དགེ་སློང་དེར་སོང་ཞིང་ཁ་ཆོས་བྱེད་ན་ཉེས་པར་འགྱུར་བའོ། །གང་གི་ཚེ་རྩ་བའི་ཉེས་པར་འགྱུར་ཞེ་ན། གྲུབ་ན་རྩ་བའོ་ཞེས་པ་ཡིན་ཏེ་ནམ་ལག་ཏུ་ཐོབ་པའི་ཚེ་ཉེས་པ་རངས་
པར་སྟོན་པའོ། །དེའི་ཕྱིར་འདྲི་བ་ཅོག་ཉེས་བྱས་ཞེས་པ་ནི་སྟན་ལས་འཕགས་པ་ལ་སོགས་པ་དེའི་ཕྱིར་ལས་སུ་རྩོལ་ལོ་ཅོག་བསྡུས་ཏེ་ཉེས་བྱས་གཅིག་ཏུ་སྟོན་པའོ། །མ་བསྡམས་པར་དེར་སོང་བའང་དེ་བཞིན་ཞེས་པ་ནི་ཁྱོད་ཀྱི་གོས་ཤིག་འཐག་གིས་དེར་སོང་ཤིག་ཅེས་

ཡོན་བདག་གིས་བོས་པ་མེད་པར་ཐགས་རན་བཟང་པོ་འདོད་པའི་ཕྱིར་དེའི་གན་དུ་ནི་སོང་ལ་ཁ་ཆོས་མི་བྱེད་ན་ཡང་ཉེས་པ་གོང་དང་འདྲ་བར་སྟོན་པའོ། །འཐག་པ་བསྐྱེད་པ་སྤང་བའོ།། །།ཡན་ལག་གིས་འཕྲོག་པ་སྤང་བའི་ཉེས་པར་འགྱུར་ཞེ་ན། དགེ་སློང་ལས་ཕྲལ་ནའོ་ཞེས་
པ་ལ་སོགས་པ་ཡིན་ཏེ་གང་ལས་འཕྲོག་པར་བྱ་བའི་མི་དེ་གསོལ་བ་དང་བཞིའི་ལས་ཀྱིས་བསྙེན་པར་རྫོགས་ཏེ་དགེ་སློང་ཡིན་ན་ཉེས་པར་འགྱུར་བའོ། །བདག་གི་འཕྲོག་ན་ཉེས་པར་འགྱུར་རམ་གཞན་གྱི་འཕྲོག་ན་ཉེས་པར་འགྱུར་ཞེ་ན། འཕྲོག་པ་བདག་གི་མ་ཡིན་ནའོ་ཞེས་པ་ཡིན་ཏེ།
བདག་གི་འཕྲོག་པ་ལྟ་ཅི་སྨོས་ཀྱི་གཞན་གྱིས་བྱིན་པ་དེའི་ཕྱིར་ཕྲོགས་ན་ཡང་ཉེས་པར་འགྱུར་བའོ། །གཞུང་ལས་བདག་གིས་བྱིན་པ་འཕྲོག་ན་ཞེས་འབྱུང་བ་ནི་གླེང་གཞིའི་ཚིག་ཏུ་ཟད་དོ། །དེ་གོས་ཡིན་ནའོ་ཞེས་པ་ནི་གཞན་ལས་འཕྲོག་པ་དེ་ཡང་ནོར་གཞན་མ་ཡིན་གོས་ཡིན་ན་གདོད་
ཉེས་པར་འགྱུར་བའོ། །ལུས་དང་ངག་ལྡན་པའམ་གར་བས་དེའམ། དེས་བསྒོས་པ་དེའི་ཕྱིར་ཞུགས་ན་བྱེད་དོ་ཞེས་པ་ནི་ལུས་དང་ངག་གཉི་ག་ལྡན་པས་འཕྲོག་གམ་ལུས་དང་ངག་ཡ་རེ་འཕྲོག་གམ་བདག་གིས་འཕྲོག་གམ་འཕྲོག་ཏུ་བཅུག་ཀྱང་རུང་སྟེ། ཡན་ལག་འདི་
རྣམས་ཀྱིས་ཉེས་པར་འགྱུར་བའོ། །ཡན་ལག་འདི་དག་ལྟར་ལྡན་པས་འཕྲོག་པ་གང་གི་ཚེ་ཁོ་ན་ཉེས་པར་འགྱུར་ཞེ་ན། ལུས་ལས་ལོགས་ཤིག་ཏུ་བྲལ་བར་གྱུར་ན་མཐའོ་ཞེས་པ་ཡིན་ཏེ་འཕྲོག་པའི་གོས་དེ་ལུས་ལས་ལོགས་ཤིག་ཏུ་བྲལ་བར་གྱུར་ན་གདོད་ལྟུང་བར་སྟོན་པའོ། །
སྦྱོར་བ་ནི་ཉེས་བྱས་ཞེས་པ་ནི་ནམ་ལུས་ལས་མ་བྲལ་གྱི་བར་དུ་སྦྱོར་བའོ་ཅོག་ཉེས་བྱས་གཅིག་ཏུ་སྟོན་པའོ། །འཕྲོག་པ་སྤང་བར་འགྱུར་བ་དེ་སུ་ལ་སྤང་ཞེ་ན། འདི་སླར་སྦྱིན་ཞེས་པ་ཡིན་ཏེ་སུ་ལས་འཕྲོག་པ་དེ་ཉིད་ལ་བྱིན་ཅིག་པའོ། །འདིར་བདག་གི་ཕྱིར་ནི་ཡན་
ལག་མ་ཡིན་ཞེས་པ་ནི་བསླབ་པ་འདིའི་ཚེ་བདག་གིས་བྱིན་པ་ཉི་ཚེ་ཡན་ལག་ཏུ་བརྩི་བར་མ་ཟད་གཞན་གྱི་ཕྱིར་འཕྲོག་ན་ཡང་རྩ་བའི་ཉེས་པར་འགྱུར་བའོ། །བསྙེན་པར་མ་རྫོགས་པ་འབྱིན་པ་དང་འདྲ་ཞེས་པ་མ་རྫོགས་པ་ཕྱི་རོལ་དུ་ཕྱུང་ཞིང་བསྐྲད་པ་དང་དེས་དགེ་སློང་ཕྱུང་ཞིང་

བསྐྲད་པ་ཉེས་པ་རངས་པར་མི་འགྱུར་བ་བཞིན་དུ་གོས་འཕྲོག་པ་འདི་འང་བསྙེན་པར་མ་རྫོགས་པ་ལས་འཕྲོག་གམ་མ་རྫོགས་པས་འཕྲོག་ན་ཉེས་པ་རངས་པར་མི་འགྱུར་བའོ། །འཕྲོག་པ་ལ་རྣམ་པ་གསུམ་སྟེ་བདག་པོ་དང་དབྲལ་བར་འཕྲོག་པ་དང་། ཐོ་འཚམས་
པས་འཕྲོག་པ་དང་། རིགས་པའི་དབང་གིས་འཕྲོག་པའོ། །དེ་ལ་བདག་པོ་དང་འབྲལ་བར་འཕྲོག་པས་རྩ་བའི་ཉེས་པར་སྟོན་པ་ནི་འདི་ནི་བདག་གི་བ་དང་འབྲལ་བར་འཕྲོག་པ་ལ་བརྟན་ཏོ་ཞེས་པ་ཡིན་ཏེ། གོས་དེ་མི་དབང་བར་བྱ་བའི་ཕྱིར་འཕྲོག་ན་གདོད་ཉེས་པར་སྟོན་པའོ། །
འཕྲོག་པ་གཉིས་པོའི་དངོས་པོ་སྟོན་པ་ནི། ཐོ་འཚམས་པས་བྱེད་པ་ནི་ཤན་ནོ་ཞེས་པ་སྟེ་ཐོ་འཚམས་པའི་ཕྱིར་འཕྲོག་ན་ཉེས་པར་འབྲི་བར་སྟོན་པའོ། །རིགས་པའི་དབང་གིས་འཕྲོག་ཀྱང་བླ་བར་སྟོན་པ་ནི། བརླག་ཅིང་གནོད་པའི་གླགས་སུ་འགྱུར་བའི་དགག་པའི་ཕྱིར་ན་
ཉེས་མེད་ཅེས་པ་ཡིན་ཏེ། འཕྲལ་དུ་གཅན་གཟན་དང་རྐུན་ཆོམ་ལ་སོགས་པའི་ཉེས་ཡོ་དང་མི་སྤྲད་པའི་ཕྱིར་གོས་འཕྲོག་པ་དང་རྟེན་ངན་པ་དང་སྡེས་པས་མི་འདོད་པའི་འབྲས་བུ་སྨིན་པར་འགྱུར་བ་ལ་སོགས་པའི་ཉེས་པ་ལས་བཟློག་པའི་ཕྱིར་གོས་འཕྲོག་པ་ལྟ་བུ་ལ་
སོགས་པ་ནི་ཉེས་མེད་པར་སྟོན་པའོ། །འཕྲོག་པ་སྤང་བའོ།། །།རྣམ་པར་འབྱེད་པ་དང་སོ་སོར་ཐར་པ་ལས་ནི་བརྟད་པ་སྤང་བ་སྔར་འབྱུང་ཞུས་པ་ལས་འཕྲོག་པ་སྤང་བའི་འོག་ཏུ་ཞག་དྲུག་སྤང་བ་ལ་འབྱུང་བ་ལས་སློབ་དཔོན་གྱིས་ཞུས་པ་ལས་འབྱུང་བ་བཞིན་དུ་ཞག་དྲུག་དབྲལ་བའི་
སྤང་བ་བསྟན་པ་ནི། དགོན་པ་བག་ཚ་ན་ཆོས་གོས་གཅིག་གྲོང་དུ་བཞག་པ་ནི་བདག་གི་གནས་བཞིན་ཞེས་པ་ཡིན་ཏེ་དགེ་སློང་དགོན་པ་པ་རྐུན་ཆོམ་ལ་སོགས་པས་འཇིགས་ཤིང་བག་ཚ་ན་ཆོས་གོས་གཅིག་གྲོང་དུ་བཞག་ཀྱང་བདག་གི་ཁྱིམ་དུ་བཞག་པ་དང་འདྲ་སྟེ་ཉེས་མེད་པར་
སྟོན་པའོ། །འབྲལ་བའི་ཞག་དུས་ངེས་པར་སྟོན་པ་ནི། འདིས་དོན་གྱི་དབང་དུ་ཁྱིམ་པའི་དེར་བསྐུངས་ན་ཞག་དྲུག་ཏུ་འབྲལ་ཞེས་པ་ཡིན་ཏེ་དོན་ཆེད་ཀྱི་དབང་གིས་གུད་དུ་འགྲོ་ན་དགོན་པའི་ཉེ་གནས་སམ་གྲོང་གི་ཉེ་གནས་ལས་ལོགས་ཤིག་ན་ཞག་དྲུག་གི་བར་དུ་འདུག་ཅིང་

གནས་ཀྱང་བླ་བར་སྟོན་པའོ། །འདིར་ནི་མི་རུང་ཞེས་པ་ནི་ཞག་དྲུག་ལས་ལྷག་ཏུ་ནི་མི་རུང་བར་སྟོན་པའོ། །བར་ཆད་ཀྱི་དབང་གིས་མ་འོངས་པ་ནི་ཉེས་མེད་ཅེས་པ་ནི་རྐུན་ཆོམ་ལ་སོགས་པའི་རྐྱེན་གྱིས་བཙལ་ཏེ་མ་འཁོར་ན་ནི་ཞག་དྲུག་ལས་ལྷག་པར་འདུག་ཀྱང་ཉེས་མེད་པར་སྟོན་པའོ། །
དེ་ལ་ཁ་ཅིག་ནི་དེ་ལྟར་གུད་དུ་འགྲོ་བའི་དགེ་སློང་གིས་ཞག་དྲུག་ལས་མི་ཐོགས་པར་བྱའོ། །ཐར་བསམས་པ་ལ་ནི་ཞག་ཚིགས་འདི་བཞིན་དུ་ཉེས་པར་མི་འགྱུར་གྱི་ཉིད་དུ་སླར་འཁོར་བར་བསམས་ཏེ་སོང་ན་ནི་ཞག་དྲུག་མ་ལོན་དུ་ཟིན་ཀྱང་འབྲལ་བའི་ཉེས་པར་འགྱུར་རོ་ཞེས་འཆད་པ་བཙལ་བའི་
ཕྱིར། འདིར་ཞག་དྲུག་ལོན་པར་བྱའོ་ཞེས་སྤགས་ཏེ་སོང་བ་ཡན་ལག་མ་ཡིན་ཞེས་པ་ཡིན་ཏེ་སྐབས་འདིར་རྒོང་མ་ལྟར་བསམས་པ་དང་མ་བསམས་པའི་ཚིག་མི་བརྩན་གྱི་ཇི་ལྟར་བསམས་ཀྱང་སྟེ་ཞག་དྲུག་གི་བར་དུ་འབྲལ་བ་མེད་པར་སྟོན་པའོ། །ཞག་དྲུག་འབྲལ་བ་སྤང་བའོ།། །།ད་ནི་དབྱར་
གྱི་རས་ཆེན་སྤང་བ་སྟོན་པ་སྟེ། བདག་ནམ་ཚུལ་དུ་འཇུག་པའི་ཟླ་བ་སྔ་མ་ནས་དབྱར་གྱི་རས་ཆེན་བཙལ་ཞེས་ལ་སོགས་པ་ཡིན་ཏེ་བདག་ཚུལ་སྔ་ཕྱི་གང་དུ་འཇུག་པའི་ཟླ་བ་གཅིག་གི་སྔ་རོལ་ནས་དབྱར་གྱི་རས་ཆེན་ཚོལ་ཅིག་པའོ། །བདག་གིས་དབྱར་ལོན་ནས་ཟླ་བ་ཕྱེད་ཚུན་ཆད་བཅང་ཅེས་
པ་ནི་ཚུལ་དུ་ཞུགས་པའི་ཟླ་གྲངས་ཚང་ནས་ཟླ་བ་ཕྱེད་ཚུན་ཆད་དབྱར་གྱི་རས་ཆེན་ཆོངས་ཤིག་པའོ། །ནམ་གྱི་ཚེ་དབྱར་གྱི་རས་ཆེན་སྤང་བའི་ཉེས་པར་འགྱུར་ཞེ་ན། དེའི་སྔ་ཕྱི་དུས་ལ་བྱེད་ཅེས་པ་ཡིན་ཏེ། བཙལ་བ་དང་བཅང་བའི་ཟླ་ཚིགས་གོང་དུ་བསྟན་པ་ལས་སྔ་ཕྱི་ཁྱེར་ན་ཉེས་
པར་སྟོན་པའོ། །སྔ་ཕྱིའི་ཚིགས་དེའང་གང་ཞེ་ན། ཐལ་བར་བཅང་ནའོ་ཞེས་པ་དང་། བཙལ་བ་སྔས་ན་ཉེས་བྱས་གྲུབ་ན་མཐའ་ཞེས་པ་ཡིན་ཏེ་ཟླ་བ་ཕྱེད་ཐལ་བར་བཅངས་པ་དང་ཟླ་བ་གཅིག་པས་ཀྱང་སྔ་མའི་སྔ་རོལ་ནས་བཙལ་ཅིང་རྙེད་ན་ཉེས་བྱས་དང་ལྟུང་བར་སྟོན་པའོ། །
ངན་ན་འབྲི་ཞེས་པ་ནི་རྡོལ་ཅིང་སྲབ་པ་ལ་སོགས་ཏེ། སྤུ་ལ་མ་བབ་པ་ཞིག་ན་རྙེད་དུ་ཟིན་ཀྱང་ཉེས་པ་རངས་པར་མི་འགྱུར་བའོ། །ཚུལ་དུ་འཇུག་པ་སྔ་ཕྱིའི་རིམ་པ་ཕལ་ཆེར་ཡོད་ན་སྔ་མའི་རིམ་པ་དེ་ཕྱི་མའི་རིམ་པར་སྦྱར་བའི་རིགས་སམ་ཇི་ལྟ་ཞེ་ན། དེ་ཇི་ལྟར་འཇུག་པ་

བཞིན་དུ་སྦྱར་ཞེས་པ་ཡིན་ཏེ་ཚུལ་སྔ་ཕྱི་གར་འཇུག་པའི་ཚུལ་བཞིན་དུ་ཟླ་ཚིགས་སྔ་ཕྱིར་སྦྱར་བ་དང་བརྟད་པའི་གོས་བླང་བ་ཡང་ཚུལ་སྔ་ཕྱི་གར་གཞུག་པ་བཞིན་དུ་སྦྱོར་ཅིག་པའོ། །དེ་ལ་བརྟན་བྲུས་པ་ནི་ཚུལ་སྔ་མ་འབའ་ཞིག་གི་ཚེའོ། །དབྱར་གྱི་རས་ཆེན་སྤང་
བའོ།། །།དངོས་པོ་གང་ལས་བརྟད་པ་སྤང་བའི་ཉེས་པར་འགྱུར་ཞེ་ན། དབྱར་གྱི་རྙེད་པ་ལས་བྱེད་ཅེས་པ་ཡིན་ཏེ་དབྱར་གྱི་རྙེད་པ་ལས་བརྟད་པའི་སྤང་བར་འགྱུར་གྱི་མངོན་དུ་རྙེད་པ་ལ་མི་འགྱུར་བར་སྟོན་པའོ། །དེའང་ཇི་ལྟར་བྱས་པས་ཉེས་པར་འགྱུར་ཞེ་ན། དབྱར་གྱི་ཁོངས་
སུ་བདག་གིར་བྱེད་ནའོ་ཞེས་པ་ཡིན་ཏེ་ཚུལ་དུ་ཞུགས་པ་ཟླ་བ་གསུམ་གྱི་ཚེ་རྙེད་པ་བདག་གིར་བྱེད་ཅིང་ལེན་ན་གདོད་ཉེས་པར་འགྱུར་བའོ། །བསྡམས་པ་དེ་ལྟར་བསྟན་ནས་འགྲེལ་པ་སྟོན་པ་ནི། ཐ་མ་ཞག་བཅུའི་ཚེ་བརྟད་པའི་དབང་གིས་རྙེད་པ་ནི་མ་གཏོགས་ཞེས་པ་ཡིན་ཏེ།
ཡོན་བདག་ནད་པ་འམ། འགྲོ་བ་འམ། འཆི་བ་ལ་སོགས་པ་རྐྱེན་བརྟད་བའི་དབང་གིས་འབུལ་ན་ཞག་བཅུས་ཟླ་བ་གསུམ་དུ་མ་ཚང་བ་ཙམ་གྱི་ཚེ་ན་བླངས་ཀྱང་བླ་བར་སྟོན་པའོ། །འདི་འང་བགོས་ནའོ་ཞེས་པ་ནི་གོང་མ་སྟར་བརྟད་དེ་ཕུལ་བ་ཡང་བླང་བར་ནི་བྱའི། མོད་ལ་
བགོས་སུ་ཟིན་ནས་སྤང་བར་བསྟན་པའོ། །མ་བགོས་ན་ཡང་ངོ་ཞེས་པ་ནི་ཚུལ་ནས་བྱུང་བའི་རྗེས་ལ་མ་བགོས་པར་ལུས་ན་ཡང་སྤང་བར་སྟོན་པའོ། །དེའི་འགྲེལ་པ་ནི། སྦྱིན་བདག་གིས་སྨྲས་པའི་དབང་གིས་མ་ཡིན་ནའོ་ཞེས་པ་ཡིན་ཏེ་ཡོན་བདག་གིས་ཡོན་འདི་བདག་
སླར་མ་འཁོར་གྱི་བར་དུ་མི་བགོར་གསོལ་ཞེས་ཟེར་ན་ནི་སྔ་མ་ལྟར་མ་བྱས་ཀྱང་བླའོ། །གང་གི་ཚེ་མ་བགོས་པའི་ཉེས་པར་འགྱུར་ཞེ་ན། དེ་སྦེད་པ་དག་མ་བསྐོས་ལ་ཚུལ་ནས་བྱུང་མ་ཐག་པའི་ཕྱི་དེ་ཉིན་ནའོ་ཞེས་པ་སྟེ་ཚུལ་ནས་བྱུང་བའི་ཕྱི་དེ་ཉིན་པར་ཡང་ཡིན་ལ་ཡོན་
དེའི་རུབ་མ་པ་ཡང་མ་བསྐོས་ན་གདོད་མ་བགོས་པའི་ཉེས་པར་འགྱུར་བའོ། །དེ་ལྟ་བས་ན། འདི་མི་བགོ་བ་མ་ཡིན་ཞེས་པ་ཡིན་ཏེ་གོང་མ་ལྟར་འགྱུར་བས་ན་རུབ་མ་པ་མི་བསྐོར་མི་རུང་བར་སྟོན་པའོ། །བརྟད་པ་སྤོང་བའོ།། །།ཇི་ལྟར་བྱས་པས་བསྔོས་པ་སྤང་བར་འགྱུར་ཞེ་ན།

གོས་གཞན་གྱིས་གང་ཟག་གཞན་ནམ་དགེ་འདུན་ལ་སྤགས་པར་ཤེས་བཞིན་དུ་བདག་གིར་བསྡོས་ཏེ་ཐོབ་ནའོ་ཞེས་པ་ཡིན་ཏེ་ཡོན་བདག་གཞན་གྱིས་གང་ཟག་གཞན་ནམ་དགེ་འདུན་ལ་དབུལ་བར་སྤགས་ཤིང་བསྡོགས་པར་ཤེས་བཞིན་དུ་ཁ་བརྔམས་བྱས་ཏེ་བདག་ལ་འབུལ་དུ་བཅུག་ཅིང་
ཁྱེར་ན་ཉེས་པར་འགྱུར་བའོ། །བསྔོ་བའི་ཚེ་ཉེས་བྱས་ཞེས་པ་ནི་བདག་གིར་བསྔོ་བ་འམ་གྲུབ་ཀྱི་བར་དུ་སྦྱོར་བ་རྣམས་ཉེས་བྱས་སུ་སྟོན་པའོ། །འདིར་གཞན་དུ་ན་ཡང་ཞེས་པ་ནི་སྐབས་འདིའི་ཚེ་གཞན་དུ་བསྔོས་པ་བདག་གིས་ཁྱེར་བ་མ་ཡིན་གྱི་གཞན་འགའ་ཞིག་ལ་ངོས་མགྲོན་བྱས་ཏེ་
བསྔོས་ན་ཉེས་བྱས་སུ་སྟོན་པའོ། །དེའི་འབྲས་བུ་ནའོ་ཞེས་པ་ནི་གོང་མ་ལྟར་བྱས་པ་ཐོབ་ན་ཡང་ཉེས་བྱས་སུ་སྟོན་པའོ། །གཞན་ཡང་ངོ་ཞེས་པ་ནི་གོས་མ་ཡིན་ཏེ་ཟས་ལ་སོགས་པ་བདག་གིས་ཁྱེར་ན་ཉེས་བྱས་སུ་སྟོན་པའོ། །འགོགས་ཤིང་ཀློན་པའི་སེམས་ཅན་མ་ཡིན་ན་ཡང་ངོ་ཞེས་པ་ནི་
རྩིག་པ་དང་ཀ་བ་ལ་སོགས་པ་སེམས་ཅན་མ་ཡིན་པའི་རྒྱན་དང་ཡོ་བྱད་བསྣོར་ཞིང་སྤངས་ན་ཡང་ཉེས་བྱས་སུ་སྟོན་པའོ། །ཕྱོགས་གཅིག་ན་ཡང་ངོ་ཞེས་པ་ནི་ཀ་བ་ཐོག་དྲུང་གི་རྒྱན་བསྣོར་བ་འམ་མཆོད་རྟེན་གྱི་ཁྲི་འཕང་གི་རྒྱན་བསྣོར་ཞིང་བསྐྲུལ་ན་ཡང་ཉེས་བྱས་སུ་སྟོན་པའོ། །ལྷག་རོལ་
ཟ་བའི་བྱོལ་སོང་ལ་སོགས་པ་བཙལ་ཏེ་མ་རྙེད་པ་ནི་ཉེས་མེད་ཅེས་པ་ནི་མི་དང་བྱོལ་སོང་ལ་སོགས་པ་ལྷག་རོལ་ཟ་བ་ལ་ནི་སྦྱིན་པར་བསྔོགས་ཏེ་ཁྱེར་ཁྱེར་བ་ལས་བཙལ་ཏེའང་མ་རྙེད་ནས་གཞན་བྱིན་པ་ན་ཉེས་པ་མེད་པའོ། །བདེ་བར་གཤེགས་པའི་གཟུགས་བརྙན་བརྙན་པོར་ནང་
བསྐྲུལ་བ་ནི་བླ་ཞེས་པ་ནི་སྐུ་གཟུགས་ཀྱི་རྒྱན་བརྙན་པོར་ནང་བསྐྲུལ་བ་ལ་ཉེས་མེད་པར་སྟོན་པའོ། །སྤགས་ཏེ་མ་བྱིན་པ་ནི་ཉེས་བྱས་ཞེས་པ་ནི་ཅི་ཡང་རུང་སྟེ་<པ་‚ཕ་>རོལ་སྦྱིན་པར་བསྡོགས་ཏེ། མ་བྱིན་ན་ཉེས་བྱས་སུ་འགྱུར་བའོ། །མཚམས་ཀྱི་ཕྱི་རོལ་དུ་དོང་སྟེ་དགེ་འདུན་གྱིས་བྱིན་
གྱིས་རློབ་ནའོ་ཞེས་པ་ནི་ཤི་བའི་ནོར་ལྟ་བུ་མཚམས་གཅིག་གི་དགེ་འདུན་སྤྱིར་དབང་བ་ལས་དགེ་འདུན་ཁ་ཅིག་མཚམས་ཀྱི་ཕྱི་རོལ་དུ་འཐོན་ཏེ། དེར་འཐོན་པ་ཉི་ཚེ་དབང་བར་ཁ་བརྔམ་བྱེད་ཅིང་བྱིན་གྱིས་རློབ་ན་ཡང་ཉེས་བྱས་སུ་སྟོན་པའོ། །མ་ཚོགས་པར་འགོད་ནའོ་ཞེས་པ་ནི་ཤི་

བའི་ཡོ་བྱད་འགོད་པའི་ཚེ་དགེ་འདུན་ཀུན་རིལ་གྱིས་མ་ཚོགས་པར་བགོས་ན་ཉེས་བྱས། བྱིན་གྱིས་མ་བརླབས་ནའོ་ཞེས་པ་ནི་ཤི་བའི་ཡོ་བྱད་ལ་སོགས་པ་བདག་ཅག་དབང་བར་བྱིན་གྱིས་མ་བརླབས་པར་བགོས་ན་ཡང་ཉེས་བྱས་སུ་སྟོན་པའོ། །གཅིག་གམ་གཉིས་
སམ་གསུམ་དགེ་འདུན་ལས་ཐོབ་ཅིང་དབང་བྱིན་ནའོ་ཞེས་པ་ནི་དགེ་འདུན་མང་པོ་ཞིག་དབང་བ་ལས་དེའི་ནང་ནས་གཅིག་གཉིས་ཁ་ཟས་སྤག་ཏུ་བོར་ཏེ་མ་བྱིན་བར་བགོས་ན་ཉེས་བྱས་སུ་འགྱུར་བའོ། ཅིའི་ཕྱིར་དེ་ལྟར་ཞེ་ན། འདིར་གཞན་གྱི་ཤས་མེད་པར་མི་འགྱུར་ཞེས་པ་ཡིན་ཏེ་
མ་ཐོབ་པ་རྣམས་ཀྱང་ཤས་དབང་བའི་ཕྱིར་དེ་ལྟའོ། །གོང་དུ་བསྟན་པ་དེ་དག་རྐུ་སེམས་མེད་ན་ནི་དེ་ལྟར་འགྱུར་ན་རྐུ་སེམས་ཡོད་ན་ཇི་ལྟར་འགྱུར་ཞེ་ན། རྐུ་སེམས་ཀྱིས་ན་འཕྲོག་པའོ་ཞེས་པ་ཡིན་ཏེ་མཚམས་ཀྱི་ཕྱི་རོལ་དུ་བྱིན་གྱིས་རློབ་པ་མན་ཆད་རྐུ་སེམས་ཡོད་ན་ནི་ཕམ་པར་
སྟོན་པའོ། །གཙུག་ལག་ཁང་སྟོང་པར་བོར་བའི་ཡོ་བྱད་ཉེན་འཁོར་གྱི་གཙུག་ལག་ཁང་དུ་གཏམས་པ་གཏན་དུ་བསྔོས་པར་མི་འགྱུར་ཞེས་པའི་ཞར་ལ་སྟོན་པ་ནི། འདོད་བྱར་དུ་གཙུག་ལག་ཁང་སྟོང་པར་མི་བྱ་ཞེས་པ་ཡིན་ཏེ་ཕ་རོལ་གྱི་འཁོར་འོང་བ་ལ་སོགས་པ་མི་བདེ་བའི་
རྐྱེན་ཆེན་པོ་མེད་པར་གཙུག་ལག་ཁང་འདོད་བྱར་དུ་སྟོང་པར་མ་བྱེད་ཅིག་པའོ། །དེར་འགོ་བ་ལ་བཅོལ་ཞིང་གཏད་ཅེས་པ་ནི་གལ་ཏེ་སྟོང་པར་དོར་དགོས་པའི་རྐྱེན་ཅིག་བྱུང་ན་གཙུག་ལག་ཁང་དང་དེའི་ཡོ་བྱད་སུ་དེར་འགོ་བ་ལ་གཏད་ཅིང་ཆོལ་ཅིག་པའོ། །མ་འོངས་ན་ལོ་
བཅུར་བསྡད་ཅེས་པ་ནི་དགེ་འདུན་ནམ་ཡོན་བདག་གུད་དུ་དོང་སྟེ་སླར་མ་འཁོར་ན་ལོ་བཅུའི་བར་དུ་ཡང་སྡོད་ཅིག་པའོ། །དེའང་ཇི་ལྟར་བྱས་ཏེ་ལོ་བཅུའི་བར་དུ་བསྡད་ཅེ་ན། ལོ་ལྔ་བསོད་སྙོམས་སོ་ཞེས་པ་དང་། སྦྱིན་བདག་དུས་འདིའི་བར་དུའང་མེད་ན་ཡང་ཉེན་ཀོར་གྱི་
གཙུག་ལག་ཁང་གི་ཞར་ལའོ་ཞེས་པ་ཡིན་ཏེ་ལོ་ལྔའི་བར་དུ་ནི་བསོད་སྙོམས་བཟའ། དེ་ནས་ཡང་ལོ་ལྔའི་བར་དུ་ཉེན་ཀོར་གྱི་གཙུག་ལག་ཁང་གི་ཞར་ལ་འདུག་ཤིག་པའོ། །ཉེན་ཀོར་གྱི་གཙུག་ལག་ཁང་གི་ཞར་ལ་འདུག་པའི་ཐབས་ཇི་ལྟར་བྱ་ཞེ་ན། ལས་ཀྱིས་གསོ་སྦྱིན་

ཐ་དད་ཅིང་རྙེད་པ་གཅིག་པར་བྱ་ཞེས་པ་ཡིན་ཏེ་བཙུན་པའི་དགེ་འདུན་གསོན་ཅིག །གཙུག་ལག་ཁང་མིང་འདི་ཞེས་བགྱི་བའི་བདག་པོ་རྒྱལ་པོས་བཟུང་བའི་སླད་དུ་གལ་ཏེ་དགེ་འདུན་དུས་ལ་བབ་ཅིང་གནང་སྟེ་བཟོད་ན་གཙུག་ལག་ཁང་དེ་དང་འདིར་གསོ་སྦྱིན་ཐ་དད་ཅིང་རྙེད་པ་གཅིག་
ཏུ་བགྱིས་ཏེ་འདི་ནི་གསོལ་བའོ། །བཙུན་པའི་དགེ་འདུན་གསོན་ཅིག་གཙུག་ལག་ཁང་མིང་འདི་ཞེས་བགྱི་བའི་བདག་པོ་རྒྱལ་པོས་བཟུང་བའི་སླད་དུ་གཙུག་ལག་ཁང་དེ་དང་འདིའི་དགེ་འདུན་དུ་གསོ་སྦྱིན་ཐ་དད་ཅིང་རྙེད་པ་གཅིག་པར་བགྱིས། ཚེ་དང་ལྡན་པ་དག་ལས་གང་བཟོད་པ་ནི་
མ་སྨྲ་ཤིག །གང་མི་བཟོད་པ་ནི་སྨྲོས་ཤིག་ཅེས་པ་ནི་ལས་ཏེ་འདི་སྐད་དུ་གསོལ་བ་དང་གཉིས་ཀྱི་ལས་ཀྱིས་གསོ་སྦྱིན་ཐ་དད་ཅིང་རྙེད་པ་གཅིག་པར་གྱིས་ཤིག་པའོ། །སྲུང་བའི་དགེ་སློང་དེས་ཀྱང་བཏང་སྟེ་གུད་དུ་འགྲོ་བའི་ཚེ་ཇི་ལྟར་བྱ་ཞེ་ན། གཏོང་བའི་ཚེ་དངོས་པོ་རྣམས་ཉེན་ཀོར་གྱི་
གཙུག་ལག་ཁང་དུ་གདམས་ཞེས་པ་ཡིན་ནོ། །གནས་ན་སྦྱིན་ཞེས་པ་ནི་གཙུག་ལག་ཁང་དེར་དགེ་འདུན་གནས་ན་གཏམས་པས་ཡོ་བྱད་སླར་བྱིན་ཅིག་པའོ། །གནས་ཐ་དད་པའི་རྫས་གནས་ཐ་དད་པར་མི་སྦྱིན་ཞེས་པ་ནི་གཙུག་ལག་ཁང་སོ་སོའི་ཡོ་བྱད་ཕན་ཚུན་མ་སྦྱིན་ཅིག་པའོ། །དེ་དག་
མི་སྟེར་ན་དགུག་ཅེས་པ་ནི་གཏམས་པ་བརྣོགས་ཏེ་མི་སྟེར་ན་དེར་མ་གནང་བར་ཁུགས་ཤིག་པའོ། །ཁྱིམ་བདག་དེ་ཉིད་ཀྱི་ན་ཡང་ངེས་པ་མི་འཁྲུ་ཞེས་པ་ནི་ཡོན་བདག་གཅིག་གིས་གཙུག་ལག་ཁང་ཁ་གཉིས་སུ་བརྩིགས་ཀྱང་གཙུག་ལག་ཁང་སོ་སོའི་ཡོ་བྱད་གཏན་དུ་ནང་མ་བསྣོར་ཅིག་པའོ། །
མི་སྟེར་ན་མཐུས་བླང་ཞེས་པ་ནི་གཙུག་ལག་ཁང་གི་ཡོ་བྱད་གཏམས་པ་ལ་སོགས་པ་གང་ཡང་རུང་བསྣོགས་ཏེ་སླར་མི་སྟེར་ན་ནན་པོ་ཆེས་ཀྱང་ཕྲོགས་ཤིག་པའོ། །གནས་ཐ་དད་པའི་རྫས་གནས་ཐ་དད་དུ་ཡེ་མི་སྦྱིན་ནམ་ཞེ་ན། བརྙན་པོར་ནི་སྦྱིན་ཞེས་པ་ཡིན་ནོ། །བྱང་ཆུབ་པ་དང་ཆོས་ཀྱི་
འཁོར་ལོ་དང་ཆོ་འཕྲུལ་ཆེན་པོ་དང་ལྷ་ལས་བབས་པ་འདི་དག་མ་གཏོགས་པ་གཞན་མ་གྲུབ་ན་དེའི་རྙེད་པ་མཆོད་རྟེན་གཞན་ལ་བསྡོས་ཀྱང་ཉེས་མེད་ཅེས་པ་མཆོད་རྟེན་ཆེན་པོ་འདི་དག་མ་ཡིན་ན་ནི་མཆོད་རྟེན་ཕལ་ལ་དབུལ་བར་བཤམ་མ་བཤམས་པ་ལས་ཆོམ་རྐུན་ལ