Luận tạng Tây Tạng (Tengyur) — Tập 162

ང་ཞིང་སྟན་གཞན་རྩོམ་པའམ་བྱེད་ན་དེ་ལ་ལྟུང་བར་མི་འགྱུར་བ་
བཞིན་དུ་འདིར་ཡང་དེ་དང་འདྲའོ། །འདིར་གཞུང་ནི་ཞུ་བ་ཁ་ཅིག་ལས་དགེ་སློང་གིས་ལོ་དྲུག་གི་མདུན་རོལ་དུ་སྟན་བགྱིད་ཅིང་། ལྟུང་བར་ཡང་མི་འགྱུར་བ་འགའ་མཆིས་སམ། ཡོད་དེ་ལོ་དྲུག་གི་མདུན་རོལ་དུ་བབས་ཤིང་དེ་ཡང་བསྙེན་པར་རྫོགས་ནས་སྟན་གཞན་བྱེད་པ་ལ་ལྟུང་བ་མེད་པ་

ཡིན་ནོ། །སྟན་བརྩམས་ཏེ་བབས་པ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ལོ་དྲུག་ཏུ་བཅང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།བམ་པོ་བཅུ་དགུ་པ། ཅི་ཞིག་བྱས་ན་མཐོ་གང་གི་སྤང་བར་འགྱུར་ཞེ་ན། དེའི་ཕྱིར་གདིང་བ་རྙིང་པ་ལས་
བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་གསར་པ་སྤྱོད་ནའོ་ཞེས་བྱ་བ་སྨྲས་ཏེ། གདིང་བ་གསར་པ་གང་ལ་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་མ་གླན་པ་དེ་ནི་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་མ་གླན་པ་སྟེ། ཁྱད་པར་དེ་ལྟ་བུ་ཅན་
གྱི་གདིང་བ་གསར་པ་སོ་སོར་གདིང་བ་སྤྱོད་ན་སྤྱོད་པའི་སྤང་བའི་ལྟུང་བྱེད་དུ་འགྱུར་རོ། །སར་པ་ཞེས་བྱ་བ་ནི་གསར་དུ་བྱས་པས་སར་པ་དང་། གསར་དུ་རྙེད་པས་སར་པ་སྟེ། དེ་ལས་འདིར་ནི་གསར་དུ་བྱས་པས་སར་པ་བཟུང་ངོ་། །དེའི་ཕྱིར་གལ་ཏེ་གདིང་བ་གསར་དུ་བྱས་པ་ཞིག་ག་ལས་རྙེད་ཀྱང་
རུང་སྟེ། དགེ་སློང་དེས་དེ་ལ་ཡང་རང་གི་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་གླན་པར་བྱའོ། །ཅི་གདིང་བ་རྙིང་པ་མེད་ན་ཡང་བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་གསར་པ་སྤྱོད་པ་ལ་ལྟུང་བ་འདི་རྣམ་པར་གཞག་གམ་ཞེ་ན་མ་ཡིན་ཏེ་དེའི་ཕྱིར།
གལ་ཏེ་ཡོད་ནའོ་ཞེས་བྱ་བ་སྨྲས་ཏེ། གལ་ཏེ་གདིང་བ་རྙིང་པ་ཡོད་ན་དེས་དེ་ལྟར་བྱའོ། །ཅི་གལ་ཏེ་རིལ་གྱིས་ཡོད་ན་ཡང་དེའི་ཕྱིར་ལྟུང་བ་འདིར་འགྱུར་རམ་ཞེ་ན། དེའི་ཕྱིར་དེ་ཙམ་ན་ཡང་ངོ་ཞེས་བྱ་བ་སྨྲས་ཏེ། གལ་ཏེ་བདེ་བར་གཤེགས་པའི་མཐོ་གང་ཙམ་ཞིག་ཡོད་ན་ཡང་ཞེས་བྱ་
བའི་ཐ་ཚིག་གོ། །ཅི་གལ་ཏེ་སྲ་བ་དེ་ཙམ་ཞིག་ཡོད་ནའམ་ཞེ་ན། དེའི་ཕྱིར་བཅོས་པར་ནུས་ན་ཡང་ངོ་ཞེས་བྱ་བ་སྨྲས་ཏེ། གལ་ཏེ་བཅོས་པར་ནུས་ན་སྟེ། གལ་ཏེ་བཅོས་སུ་རུང་བ་ཡིན་ན་ཞེས་བྱ་བའི་ཐ་ཚིག་གོ། །མཐུད་ཅིང་སྦྱར་དུ་རུང་བས་ཀྱང་ངོ་ཞེས་བྱ་བ་ནི། དམ་དུམ་མཐུད་
ཅིང་སྦྱར་དུ་རུང་ན་དེས་ཀྱང་ཞེས་བྱ་བའི་ཐ་ཚིག་སྟེ། དེ་ལྟ་བུ་མེད་ན་ལྟུང་བར་མི་འགྱུར་རོ་ཞེས་བྱ་བའི་ཐ་ཚིག་གོ། །མཐོ་གང་གི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་བལ་ཐོགས་པའི་སྤང་བར་འགྱུར་ཞེ་ན། དེའི་ཕྱིར་ཁྱེར་བ་མེད་ན་དཔག་ཚད་གསུམ་ལས་འདས་

པར་ལུག་གི་བལ་ཁྱེར་ནའོ་ཡོད་ན་ཡང་ངོ་ཞེས་བྱ་བ་སྨྲས་ཏེ། ཁྱེར་བ་མེད་ན་དཔག་ཚད་གསུམ་ལས་འདས་པར་ལུག་གི་བལ་ཁྱེར་ན་རྒྱང་གྲགས་ཀྱི་མཐར་ཕྱིན་ན་སྤང་བའོ། །རྒྱང་གྲགས་ཕྱེད་དུ་ཕྱིན་ན་ཉེས་བྱས་སོ། །ཁྱེར་བ་ཡོད་བཞིན་དུ་བདག་ཉིད་ཀྱིས་ཁྱེར་ན་ནི་རྩོམ་པའི་དུས་ཁོ་ན་ནི་
ཉེས་བྱས་གཞན་གཅིག་གོ། །རྒྱང་གྲགས་ཕྱེད་དུ་ཕྱིན་ན་ཉེས་བྱས་གཞན་གཅིག་གོ། །རྒྱང་གྲགས་ཀྱི་མཐར་ཕྱིན་ན་སྤང་བའི་ལྟུང་བྱེད་དུ་འགྱུར་རོ། །འགྲོ་བ་ནི་གཉིས་སུ་གསུངས་ཏེ་ལྟུང་བ་དང་བཅས་པ་དང་། ལྟུང་བ་མེད་པའོ། །དེ་ལ་ལྟུང་བ་དང་བཅས་པ་ནི་བལ་ཐོགས་པ་དང་
དགེ་སློང་མ་དང་ལྷན་ཅིག་ལམ་དུ་འགྲོ་བ་དང་། དགེ་སློང་མ་དང་ལྷན་ཅིག་གྲུར་འཇུག་པ་དང་། སྐྱེས་པ་མེད་པར་བུད་མེད་དང་ལམ་དུ་འགྲོ་བ་དང་། རྐུན་མ་དང་ལྷན་ཅིག་ལམ་དུ་འགྲོ་བའོ། །ལྟུང་བ་མེད་པ་ནི་ཡང་ཡང་ཟ་བ་དང་། འདུས་ཤིང་ཟ་བ་དང་ཁྲུས་བྱེད་པའོ། །དེ་ལ་ལྟུང་བ་
མེད་པ་ནི་དཔག་ཚད་ཕྱེད་ཕྱེད་དོ་ཞེས་འོག་ནས་འབྱུང་ངོ་། །ལྟུང་བ་དང་བཅས་པ་བསྟན་པའི་ཕྱིར། ལམ་དུ་འགྲོ་བ་ནི་རྒྱང་གྲགས་ཀྱི་བདག་ཉིད་དོ་ཞེས་བྱ་བ་སྨྲས་ཏེ། ལམ་དུ་འགྲོ་བ་ནི་ལམ་དུ་ཞུགས་ཏེ་འགྲོ་བའོ། །འགྲོ་བ་དེ་ནི་རྒྱང་གྲགས་ཀྱི་བདག་ཉིད་དེ་རྒྱང་གྲགས་ཀྱི་མཐར་ཕྱིན་
ན་ལྟུང་བར་འགྱུར་རོ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། བལ་ཐོགས་པ་ལ་སོགས་པ་ལམ་དུ་འགྲོ་བའི་རྒྱུ་ལས་ཁ་ན་མ་ཐོ་བར་འགྱུར་བ་དག་ལ་ནི་རྒྱང་གྲགས་ཀྱི་ཚད་ཙམ་དུ་སོང་ན་དངོས་གཞིར་འགྱུར་རོ། །ཕྱེད་དུ་ན་སྦྱོར་བའོ་ཞེས་བྱ་བ་ནི། རྒྱང་གྲགས་ཀྱི་ཕྱེད་ཀྱི་བདག་ཉིད་
དུ་སོན་ན་སྦྱོར་བར་འགྱུར་ཏེ། དེ་ཙམ་དུ་སོན་ན་སྦྱོར་བ་ཡོངས་སུ་རྫོགས་པ་ཉིད་ཡིན་ནོ། །འདིར་གཞུང་ནི་རྒྱང་གྲགས་ཕྱེད་དུ་སོན་ན་ཉེས་བྱས་སུ་འགྱུར་རོ། །རྒྱང་གྲགས་སུ་སོན་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །རྫུ་འཕྲུལ་ལས་གཞན་པས་ནམ་མཁའ་ལ་འགྲོ་ན་
ཉེས་བྱས་སོ་ཞེས་བྱ་བ་ལ། རྫུ་འཕྲུལ་ལས་གཞན་པས་ཞེས་བྱ་བ་ནི། རྫུ་འཕྲུལ་ལས་གཞན་པ་གསང་སྔགས་ལ་སོགས་པ་ཐབས་གཞན་གྱིས་ཏེ། དེས་ནམ་མཁའ་ལ་འགྲོ་ན་ཉེས་བྱས་སོ། །རྫུ་འཕྲུལ་གྱིས་འགྲོ་ན་ལྟུང་བ་མེད་དོ། །སྤྲུལ་པས་ཀྱང་ངོ་ཞེས་བྱ་བ་ལ། ཀྱང་ངོ་

ཞེས་བྱ་བའི་སྒྲ་ནི་ཉེས་བྱས་སོ་ཞེས་བྱ་བའི་རྗེས་བསྙགས་པའི་ཕྱིར་རོ། །སྤྲུལ་པ་ཡང་རྫུ་འཕྲུལ་གྱིས་བྱས་པ་ཡིན་པས་དེས་འགྲོ་ན་ཡང་ཉེས་པ་མེད་དོ་སྙམ་པ་བསལ་བའི་ཕྱིར་ཉེས་བྱས་སོ་ཞེས་བྱ་བ་སྨྲས་ཏེ། དེ་ནི་ལུས་ཀྱི་རྣམ་པར་རིག་བྱེད་ཀྱི་དབང་དུ་བྱས་པ་ཡིན་
པའི་ཕྱིར་རོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་ནམ་མཁའ་ལས་བལ་འཚལ་ན་ལྟུང་བ་ཅིར་འགྱུར། རྫུ་འཕྲུལ་གྱིས་ཁྱེར་ན་ནི་ལྟུང་བ་མེད་དོ། །རྣམ་པ་གཞན་གྱི་ཁྱེར་ན་ནི་ཉེས་བྱས་སོ། །བཙུན་པ་རེ་ཞིག་དགེ་སློང་གིས་སྤྲུལ་པ་རུང་བ་བགྱིས་པས་འཚལ་ན་
ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཞྭ་དང་ལྷམ་སྒྲོག་གུ་ཅན་དང་། སྟོད་ཀོར་ནང་ཚངས་ཅན་དང་། རྒྱ་ཅང་དང་། ལྕག་པོད་དང་། ཤུར་བུ་ཕྲེའུ་ལ་སོགས་པའི་དོན་དུ་དེ་ཙམ་དག་ལ་ནི་ཉེས་པ་མེད་དོ་ཞེས་བྱ་བ་ནི། ཞྭ་ལ་སོགས་པའི་ཚད་ལྡང་བ་
ཙམ་ཞྭ་ལ་སོགས་པའི་ཆེད་དུ་ཁྱེར་བ་ལ་ནི་ལྟུང་བ་མེད་དོ་ཞེས་བྱ་བའི་ཐ་ཚིག་གོ། །རྒྱང་གྲགས་དང་དཔག་ཚད་ཀྱི་ཚད་རྡུལ་ཕྲ་རབ་ལ་སོགས་པ་ལས་བསྒྱུར་ཏེ་བསྒྲེ་བ་བསྟན་པའི་ཕྱིར། རྡུལ་ཕྲ་རབ་དང་། རྡུལ་ཕྲ་མོ་དང་། ཆུ་དང་། ལྕགས་དང་། རི་བོང་དང་། ལུག་དང་། གླང་
དང་། ཉི་ཟེར་གྱི་རྡུལ་དང་། སྲོ་མ་དང་། ཤིག་དང་། ནས་དང་། སོར་རྣམས་ནི་སྔ་མ་དྲུག་ལ་ཕྱི་མའོ་ཞེས་བྱ་བ་སྨྲས་ཏེ། རྡུལ་ཕྲ་རབ་དང་། རྡུལ་ཕྲ་མོ་དང་། ཆུ་དང་ལྕགས་དང་རི་བོང་དང་། ལུག་དང་གླང་དང་ཉི་ཟེར་ནི་དེ་དག་ཉིད་དེ་སོ་སོར་ཕྱེ་ནས་ཕྱིས་རྡུལ་ཞེས་བྱ་བའི་སྒྲ་དང་སྦྱར་ཏེ་དྲུག་ལ་
ཕྱི་མ་གཅིག་གོ་ཞེས་བྱ་བར་སྦྱར་རོ། །རྡུལ་ཞེས་བྱ་བའི་སྒྲ་ནི་ཆུ་ལ་སོགས་པ་མན་ཆད་དང་སོ་སོར་སྦྱར་བར་བྱ་སྟེ། ཆུ་རྡུལ་དང་། ལྕགས་རྡུལ་དང་། རི་བོང་རྡུལ་དང་། ལུག་རྡུལ་དང་། གླང་རྡུལ་དང་། ཉི་ཟེར་གྱི་རྡུལ་ཞེས་བྱ་བར་སྦྱར་རོ། །དེ་བཞིན་དུ་སྲོ་མ་དང་ཤིག་དང་ནས་དང་སོར་
ཡང་དེ་དག་ཉིད་ཡིན་ཏེ། རྡུལ་ཕྲ་རབ་ལ་སོགས་པ་སོར་གྱི་མཐར་ཐུག་པ་དེ་རྣམས་ནི་སྔ་མ་དྲུག་ལ་ཕྱི་མ་གཅིག་ཏུ་བསྒྱུར་ཅིང་བསྒྲེའོ། །འདི་སྐད་བསྟན་ཏེ། རྡུལ་ཕྲ་རབ་དྲུག་ལ་རྡུལ་ཕྲ་མོ་གཅིག་གོ། །རྡུལ་ཕྲ་མོ་དྲུག་ལ་ཆུ་རྡུལ་གཅིག་གོ། །ཆུ་རྡུལ་དྲུག་ལ་ལྕགས་རྡུལ་གཅིག་

གོ། །ལྕགས་རྡུལ་དྲུག་ལ་རི་བོང་རྡུལ་གཅིག་གོ། །རི་བོང་རྡུལ་དྲུག་ལ་ལུག་རྡུལ་གཅིག་གོ། །ལུག་རྡུལ་དྲུག་ལ་གླང་རྡུལ་གཅིག་གོ། །གླང་རྡུལ་དྲུག་ལ་ཉི་ཟེར་གྱི་རྡུལ་གཅིག་གོ། །ཉི་ཟེར་གྱི་རྡུལ་དྲུག་ལ་སྲོ་མ་གཅིག་གོ། །སྲོ་མ་དྲུག་ལ་ཤིག་གཅིག་གོ། །ཤིག་དྲུག་ལ་
ནས་གཅིག་གོ། །ནས་དྲུག་ལ་སོར་གཅིག་གོ། །སོར་བཞི་དྲུག་ལ་ཁྲུ་གང་ངོ་། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུའོ། །དེ་ལྔ་བརྒྱ་ལ་རྒྱང་གྲགས་སོ་ཞེས་བྱ་བ་ལ། སོར་བཞི་དྲུག་ལ་ཁྲུ་གང་ངོ་ཞེས་བྱ་བ་ནི་སོར་བཞི་ཕྲག་དྲུག་ལ་ཁྲུ་གང་སྟེ། སོར་ཉི་ཤུ་རྩ་བཞི་ལ་
ཁྲུ་གང་དུ་བརྩིའོ་ཞེས་བྱ་བའི་ཐ་ཚིག་གོ། །ཁྲུ་ཕྱེད་དང་བཞི་ལ་མིའི་སྲིད་དོ་ཞེས་བྱ་བ་ནི། མི་གང་ལ་སྲིད་དུ་ཁྲུ་ཕྱེད་དང་བཞི་ཡོད་པ་དེ་དག་ནི་ཁྲུ་ཕྱེད་དང་བཞི་པ་སྟེ། དེ་ནི་ཁྲུ་ཕྱེད་དང་བཞི་ལ་མིའི་སྲིད་ཅེས་བྱའོ། །ཁྲུ་བཞི་ལ་གཞུའོ་ཞེས་བྱ་བ་ནི། གཞུ་གང་ལ་ཁྲུ་བཞིའི་ཚད་ཡོད་
པ་དེ་ནི་ཁྲུ་བཞི་པའི་གཞུའོ། །དེ་ལྔ་བརྒྱ་ལ་རྒྱང་གྲགས་སོ་ཞེས་བྱ་བ་ནི། གཞུ་དེ་ལྔ་བརྒྱ་ལ་རྒྱང་གྲགས་གཅིག་ཅེས་བྱའོ། །རྒྱང་གྲགས་བརྒྱད་ལ་ནི་དཔག་ཚད་གཅིག་གོ། །ནས་འབྲུ་དྲུག་གློས་གཤིབས་པ་ལ་སོར་གཅིག་ཏུ་རིག་པར་བྱ་སྟེ། འདིར་གཞུང་ནི་ནས་དྲུག་ལ་སོར་
མོའི་ཚིགས་གཅིག་གོ་ཞེས་གསུངས་པ་ཡིན་ནོ། །དགོན་པས་འདུལ་བ་ལ་ཐ་སྙད་བཏགས་པའི་ཕྱིར་འདིར་དེའི་ཚད་ཀྱང་བསྟན་པའི་ཕྱིར། དགོན་པའི་དང་པོ་ནི་དེའི་མཐའོ་ཞེས་བྱ་བ་སྨྲས་ཏེ། དགོན་པའི་དང་པོ་ནི་རྒྱང་གྲགས་དེའི་མཐའ་ཡིན་པར་རིག་པར་བྱའོ། །དེ་ཕན་ཆད་ནི་
དགོན་པ་ཡིན་པར་མ་སྨྲས་ཀྱང་གྲུབ་པོ། །ལུས་ཀྱིས་ཁུར་མི་བསྐུར་རོ་ཞེས་བྱ་བ་ལ། ལུས་ཀྱི་ཁུར་ཞེས་བྱ་བ་ནི། ཕྲག་རྡང་གི་ཁུར་ལ་བྱ་སྟེ། ཕྲག་རྡང་གིས་ཁུར་བསྐུར་བར་མི་བྱའོ། །གློ་དང་རྒྱབ་དང་རྐེད་པ་དང་མགོ་བོ་དག་གིས་མི་བསྐུར་རོ་ཞེས་བྱ་བ་ནི། གློ་ལ་སོགས་པས་ཁུར་གང་
ཡང་བསྐུར་བར་མི་བྱའོ། །འདིར་ཐུན་མོང་མ་ཡིན་པ་ཉིད་དུ་དོགས་པར་མི་བྱའོ་ཞེས་བྱ་བ་ནི། ཁུར་བསྐུར་བའི་སྐབས་འདིར་དགེ་སློང་དང་དགེ་སློང་མའི་བསླབ་པའི་གཞི་ཐུན་མོང་མ་ཡིན་པ་ཉིད་དུ་དོགས་པར་མི་བྱ་སྟེ། འདི་ལྟར་ཐུན་མོང་ཉིད་ཡིན་པར་ཤེས་པར་བྱའོ། །འདི་སྐད་བསྟན་ཏེ།

དགེ་སློང་དག་འབའ་ཞིག་གིས་ལུས་ཀྱི་ཁུར་ལ་སོགས་པ་བསྐུར་བར་མི་བྱ་བར་མ་ཟད་ཀྱི་དགེ་སློང་མ་རྣམས་ཀྱིས་ཀྱང་བསྐུར་བར་མི་བྱའོ། །ཁུར་ཕྱེད་ལས་ལྷག་པར་བསྐུར་བར་མི་བྱའོ་ཞེས་བྱ་བ་ནི། མིའི་ཁུར་གྱི་ཕྱེད་གང་ཡིན་པ་དེ་ལས་ལྷག་པའི་ཁུར་དགེ་སློང་གིས་བསྐུར་བར་མི་
བྱའོ། །འདིར་གཞུང་ནི་མིའི་ཁུར་གཅིག་གང་ཡིན་པ་དེ་དགེ་སློང་གཉིས་ཀྱིས་ཁུར་བར་བྱའོ་ཞེས་གསུངས་པ་ཡིན་ནོ། །བལ་ཐོགས་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།བལ་རྨེལ་དུ་འཇུག་པའི་སྤང་བ་བརྗོད་པར་བྱ་སྟེ། དེ་ནི་སྔར་འཁྲུར་འཇུག་པའི་སྤང་བའི་སྐབས་སུ་
བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་བསྒོ་བས་འཁྲུར་བཅུག་གམ། འཚེད་དུ་བཅུག་གམ། འཆག་ཏུ་བཅུག་པ་ཉིད་ནའོ་ཞེས་སྨོས་པ་ཉིད་དང་རྣམ་པ་འདྲ་བ་ཁོ་ནར་རིག་པར་བྱ་སྟེ། འདིར་བྱེ་བྲག་འགའ་ཙམ་ཡོད་པ་གང་ཡིན་པ་དེ་བརྗོད་
པར་བྱ་སྟེ། ཆོས་གོས་རྙིང་པའི་གནས་སུ་ལུག་གི་བལ་དག་གོ་ཞེས་བྱ་བ་ནི། སྔར་འཁྲུར་འཇུག་པའི་སྤང་བའི་སྐབས་སུ་བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་ཅེས་སྨོས་པའི་གནས་སུ་འདིར་ལུག་གི་བལ་དག་ཅེས་བྱ་བར་གཟུང་
བར་བྱའོ། །འཆག་པ་རྨེལ་བའོ་ཞེས་བྱ་བ་ནི། འཁྲུར་འཇུག་པའི་སྤང་བའི་སྐབས་སུ་འཆག་པ་ཞེས་སྨོས་པའི་གནས་སུ་འདིར་རྨེལ་བ་ཞེས་བརྗོད་པར་བྱ་སྟེ། འཁྲུར་བཅུག་པའི་སྤང་བའི་སྐབས་སུ་འཁྲུར་འཇུག་གམ། འཚེད་དུ་འཇུག་གམ། འཆག་ཏུ་བཅུག་པ་དག་ནའོ་ཞེས་སྨོས་པ་
དེ་འདིར་ནི་འཁྲུར་བཅུག་གམ། འཚེད་དུ་བཅུག་གམ། རྨེལ་དུ་བཅུག་པ་དག་ནའོ་ཞེས་བརྗོད་པར་བྱའོ། །བལ་རྨེལ་དུ་འཇུག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་གསེར་དངུལ་ལ་རེག་པའི་སྤང་བར་འགྱུར་ཞེ་ན། དེའི་ཕྱིར་རིན་པོ་ཆེ་བདག་གིར་བྱས་ནའོ་
ཞེས་བྱ་བ་སྨྲས་ཏེ། པདྨ་རཱ་ག་ལ་སོགས་པ་བདག་གིར་བྱས་ཤིང་དང་དུ་ལེན་ན་སྤང་བའི་ལྟུང་བྱེད་དོ། །འདིར་གཞུང་ནི་ཞུ་བ་ཁ་ཅིག་ལས་རྐང་པའི་དྲུང་ན་མོའི་རོ་མྱོང་ངམ། །འཐོབ་པའི་གནས་ན་ས་ལེ་སྦྲམ་གྱི་རྫས་འདུག་པ་བདག་གིར་བྱེད་ན་སྤང་བར་འགྱུར་རོ་ཞེས་གསུངས་པ་ཡིན་ནོ། །གནས་

སྐབས་གང་ལ་བདག་གིར་བྱེད་པ་ཡོངས་སུ་རྫོགས་པར་འགྱུར་ཞེ་ན། དེའི་ཕྱིར་ལྕོགས་པ་ཉིད་ན་དེ་རྫོགས་སོ་ཞེས་བྱ་བ་སྨྲས་ཏེ། བདག་གིར་བྱ་བའི་དངོས་པོ་རིན་པོ་ཆེ་ལ་སོགས་པ་ལྕོགས་པ་ཉིད་དུ་འགྱུར་ཏེ། ཐོབ་པར་ནུས་པ་ཉིད་དང་ལག་ཏུ་འོང་བར་ནུས་པ་ཉིད་ན་བདག་གིར་བྱ་བ་དེ་
ཡོངས་སུ་རྫོགས་པ་ཡིན་ནོ། །དེ་བས་ཕ་ཟད་ན་ནི་ཕྱེད་ཉིད་དོ་ཞེས་བྱ་བ་ནི། ལྕོགས་པ་ཉིད་ཀྱི་གནས་སྐབས་པས་ཕ་ཟད་ན་འདུག་ན་ནི་བདག་གིར་བྱ་བའི་ཕྱེད་ཉིད་དེ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། བདག་གིར་བྱ་བའི་དངོས་པོ་རིན་པོ་ཆེ་ལ་སོགས་པ་ལག་ཏུ་
ཐོབ་པར་རུང་བ་ཉིད་ཡིན་ལ་དེ་ལ་བདག་གིར་བྱེད་ན་ནི་དངོས་གཞིའོ། །མི་རུང་བ་ཉིད་ལ་བདག་གིར་བྱེད་ན་ནི་ཉེས་བྱས་སོ། །དེ་ཡང་ཐོབ་པའི་གནས་ཞེས་བྱ་བ་ལས་རིག་པར་བྱ་སྟེ། ཐོབ་པའི་གནས་ནས་ས་ལེ་སྦྲམ་གྱི་རྫས་འདུག་པ་བདག་གིར་བྱེད་ན་ཞེས་གསུངས་པའི་ཕྱིར་རོ། །ཅི་འདིར་
བདག་གིར་བྱེད་པ་ཞེས་བྱ་བ་གཅིག་པུ་རྗེས་སུ་སྒྲུབ་ན་སྤང་བ་འདིར་འགྱུར་རམ་ཞེ་ན། དེའི་ཕྱིར་རང་གི་རུང་བར་མ་བྱས་པ་ཡང་ངོ་ཞེས་བྱ་བ་སྨྲས་ཏེ། རུང་བ་མ་བྱས་པ་ཞེས་བྱ་བ་ནི། དངོས་པོ་གང་ལ་འོག་ནས་འབྱུང་བའི་རུང་བར་བྱས་པ་ཞེས་བྱ་བ་དེ་མ་བྱས་པ་དེ་ནི་རུང་བར་མ་བྱས་པ་སྟེ། རིན་པོ་
ཆེ་ལ་སོགས་པའི་དངོས་པོ་རུང་བར་མ་བྱས་པ་དེ་ལ་འོག་ནས་འབྱུང་བའི་རེག་པ་དང་། རེག་ཏུ་བཅུག་ན་ཞེས་བྱ་བར་སྦྱར་རོ། །དེ་བས་ན་རིན་པོ་ཆེ་ལ་སོགས་པ་རུང་བར་མ་བྱས་པ་ནི་ལྟུང་བའི་བྱེད་པ་པོ་ཉིད་ཡིན་ནོ། །འོག་ནས་འབྱུང་བའི་ཆོ་གས་རུང་བར་བྱས་པ་ནི་བཟུང་ཡང་ཉེས་པ་མེད་དོ། །འདི་ལྟར་གཞན་གྱི་
རིན་པོ་ཆེ་ལ་རེག་པ་ལྟུང་བྱེད་འབའ་ཞིག་ཏུ་བསྟན་པས་ལྷག་མ་རང་གི་ནི་སྤང་བའི་ཆོ་གར་མཛད་པ་ཡིན་ཏེ། གཞན་གྱི་ལ་སྤང་བ་མེད་པའི་ཕྱིར་རོ། །འདི་ལྟར་སོ་སོར་ཐར་པའི་མདོ་ལས་རང་གི་ཞེས་མ་སྨོས་མོད་ཀྱི་འོན་ཀྱང་ཤུགས་ཀྱིས་ན་དེ་ཡིན་པར་མངོན་ནོ། །དེ་ལྟར་ཡང་གཞུང་ནི་ཡང་དགེ་སློང་རང་གི་རིན་
པོ་ཆེའམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ་ལེན་དུ་བཅུག་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཅི་ཞིག་བྱས་ན་ལྟུང་བར་འགྱུར་ཞེ་ན། དེའི་ཕྱིར་རེག་གམ་རེག་ཏུ་བཅུག་ནའོ་ཞེས་བྱ་བ་སྨྲས་ཏེ། རེག་གམ་ཞེས་བྱ་བ་ནི་རང་གི་ལུས་ཀྱིས་སོ། །རེག་ཏུ་བཅུག་ནའོ་ཞེས་བྱ་བ་ནི་

གཞན་ནོ། །ཚིག་གིས་ཀྱང་བྱེད་ལ་སྤྲིང་ཡིག་ལ་སོགས་པས་ཀྱང་བྱེད་ན་དེ་དག་ལས་འདིར་རེག་པ་གང་ཡིན་པར་རིག་པར་བྱ་ཞེ་ན། དེའི་ཕྱིར་གང་ཡང་རུང་བས་སོ་ཞེས་བྱ་བ་སྨྲས་ཏེ། རྣམ་པ་གང་ཡང་རུང་བས་འདི་ནས་ལོང་ལ་འདིར་ཆུག་ཅིག་ཅེས་བྱ་བ་ལྟ་བུ་དམིགས་
ཀྱིས་མ་སྨྲས་པར་ཕྱོགས་གཅིག་པར་རེག་ན་ཡང་སྤང་བར་འགྱུར་རོ། །སྙད་གདགས་སུ་རུང་བའི་ཟངས་མ་ལ་ནི་ཉེས་བྱས་སོ་ཞེས་བྱ་བ་ནི། དོང་ཙེ་དང་པ་ཎ་ལ་སོགས་པའི་མིང་དུ་བྱས་ཤིང་མཚན་བྱས་པའི་ཟངས་མ་གང་ཡིན་པ་དེ་ནི་སྙད་གདགས་སུ་རུང་བ་ཞེས་བྱ་སྟེ། དེ་ལ་རང་གིས་རེག་
གམ། གཞན་རེག་ཏུ་བཅུག་ན་ཉེས་བྱས་སོ། །གཞན་ལ་ནི་ལྟུང་བ་མེད་དོ་ཞེས་བྱ་བ་ནི། སྙད་གདགས་སུ་རུང་བའི་ཟངས་མ་མཚན་བྱས་པ་ལས་གཞན་པའི་ཟངས་མ་ལའོ་ཞེས་བྱ་བའི་ཐ་ཚིག་གོ། །ཞ་ཉེ་དང་ཁྲོ་ཆུ་དང་རོ་ཉེ་དང་ལྕགས་དག་ལ་ཡང་ངོ་ཞེས་བྱ་བ་ནི། ཞ་ཉེ་ལ་སོགས་པ་ནི་རིན་པོ་
ཆེ་མ་ཡིན་པའི་ཕྱིར་ཞེས་བྱ་བའི་ཐ་ཚིག་སྟེ། དེ་དག་ལ་རེག་གམ་རེག་ཏུ་བཅུག་ན་ལྟུང་བ་མེད་དོ། །དགེ་ཚུལ་གཉིས་ཀྱིས་ཀྱང་ངོ་ཞེས་བྱ་བ་ནི། དགེ་ཚུལ་དང་དགེ་ཚུལ་མ་གཉིས་ཀྱིས་རིན་པོ་ཆེ་ལ་རེག་གམ་རེག་ཏུ་བཅུག་ན་ལྟུང་བ་མེད་དོ། །རང་གི་རུང་བ་མ་བྱས་པ་ཡང་ངོ་ཞེས་སྨྲས་ན་རུང་བ་གང་མ་ཡིན་
པའི་རུང་བ་དེ་ཅི་འདྲ་བ་ཞིག་ཅེ་ན། དེའི་ཕྱིར་སྦྱིན་བདག་བདག་པོ་ཉིད་དུ་མོས་སུ་གཞུག་པ་དང་། ཞལ་ཏ་བྱེད་པ་བདག་པོ་ཉིད་དུ་ཁས་ལན་དུ་གཞུག་པ་དང་། བྱིན་གྱིས་བརླབས་པ་ཞེས་བྱ་བ་ནི་རུང་བ་དག་ཡིན་ནོ་ཞེས་བྱ་བ་སྨྲས་ཏེ། དགེ་སློང་དག་དེ་ལྟ་བས་ན་ཆོས་གོས་ཀྱི་རིན་དག་རྙེད་པ་ན་བླང་
བར་བྱ་ཞིང་བླངས་ནས་ཀྱང་སྦྱིན་བདག་དེ་ཉིད་ལ་ཡིད་བརྟན་ཏེ་བཅང་བར་བྱ་བར་ངས་རྗེས་སུ་གནང་ངོ་ཞེས་གསུངས་པ་དེ་ནི་རུང་བ་དང་པོ་ཡིན་ནོ། །དེ་བཞིན་དུ་དགེ་སློང་རྣམས་ཀྱིས་ཇི་སྲིད་འཚོའི་བར་དུ་རུང་བ་མ་ཡིན་པའི་དངོས་པོ་གང་ཅུང་ཟད་ཇི་སྙེད་པ་དེ་ཐམས་ཅད་སྦྱིན་བདག་སྤྲོ་བར་བྱ་ཞིང་དེའི་
མིང་གིས་བཅང་བར་བྱའོ་ཞེས་གསུངས་པ་དེ་ནི་རུང་བ་གཉིས་པ་ཡིན་ནོ། །རུང་བ་གསུམ་པ་ནི་བྱིན་གྱིས་བརླབས་པ་ཞེས་བྱ་བ་ཡིན་པར་རིག་པར་བྱའོ། །དེ་ལྟར་ཡང་དགེ་སློང་བྲམ་ཟེའི་བུ་མོས་ཞུས་པའི་མདོ་ལས་དགེ་སློང་རྣམས་ཀྱིས་ཆོས་གོས་ཀྱི་རིན་གང་རྙེད་པར་གྱུར་ལ་སྦྱིན་བདག་མེད་པར་

གྱུར་ནས་དགེ་སློང་དག་འགྱོད་པར་གྱུར་ཏེ། མི་ལེན་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་ཀྱང་དགེ་སློང་གི་མདུན་དུ་འགྲེང་སྟེ་འདི་སྐད་ཅེས། ཚེ་དང་ལྡན་པ་དགོངས་སུ་གསོལ། བདག་
དགེ་སློང་མིང་འདི་ཞེས་བྱ་བས་དངོས་པོ་རུང་བ་མ་ལགས་པ་འདི་རྙེད་དེ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ལགས་པ་འདི་བྱིན་གྱིས་བརླབ་བོ། །དངོས་པོ་རུང་བ་མ་ལགས་པ་འདིས་དངོས་པོ་རུང་བ་བསྒྲུབ་པར་བགྱིའོ་ཞེས་དེ་སྐད་ལན་གཉིས་ལན་གསུམ་དུ་བརྗོད་པར་
བྱ་ཞིང་འགྱོད་པར་ཡང་མི་བྱའོ་ཞེས་གསུངས་པ་ཡིན་ནོ། །དེ་ལྟ་བས་ན་དངོས་པོ་རུང་བ་མ་ཡིན་པ་རུང་བར་བྱས་པ་ལ་རེག་གམ་རེག་ཏུ་བཅུག་ན་ཡང་ལྟུང་བ་མེད་དོ། །དེ་ལ་བདག་ཉིད་ཀྱིས་བདག་གིར་ཡང་མི་བྱ་སྟེ། དེའི་ཕྱིར་སྦྱིན་བདག་ལ་ཡིད་བརྟན་ཏེ་བཅང་བར་བྱའོ་ཞེས་གསུངས་སོ། །
གང་ལ་བདག་ཉིད་ཀྱིས་བདག་གིར་བྱེད་པ་ཡོད་པ་དེ་ལ་ནི་རང་གིས་ཀྱང་རེག་པར་མི་བྱ་ལ། གཞན་ཡང་རེག་ཏུ་གཞུག་པར་མི་བྱ་སྟེ། དེ་ལ་རུང་བར་བྱ་བ་གསུམ་ཆར་མི་འཆགས་པའི་ཕྱིར་རོ། །འདི་ལྟར་བདག་གིར་བྱེད་པ་དང་འབྲེལ་བའི་ཕྱིར་རུང་བ་ཉིད་བྱེད་པའི་ཕྱིར་ཏེ། དེ་ལྟར་ན་བྱིན་
གྱིས་བརླབ་པའི་སྔགས་ཉིད་ལས་ཀྱང་འདི་སྐད་ཅེས། བདག་གིས་དངོས་པོ་རུང་བ་མ་ལགས་པ་འདིས་རུང་བ་བསྒྲུབ་པར་བགྱིའོ་ཞེས་གསུངས་པའི་ཕྱིར་རོ། །དངོས་པོ་རུང་བ་ལ་བདག་གིར་བྱའི་མི་རུང་བ་ལ་ནི་མ་ཡིན་ནོ། །རུང་བ་བརྗོད་པའི་ཕྱིར་རེག་ན་ལྟུང་བར་ཡང་མི་འགྱུར་རོ། །བཅོམ་
ལྡན་འདས་ཀྱིས་གཞན་གྱི་རྫས་ལ་ནི་རུང་བ་རྣམ་པ་གསུམ་མ་བསྟན་ཏེ། དེས་ན་དེ་ལ་རེག་གམ་རེག་ཏུ་བཅུག་ན་ལྟུང་བྱེད་འབའ་ཞིག་ཏུ་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གལ་ཏེ་བདག་ཉིད་ཀྱིས་བདག་གིར་བྱ་བ་སྤང་བའི་ཕྱིར་རུང་བ་གསུམ་ལས་རུང་བ་གང་
ཡང་རུང་བས་རུང་བར་བྱེད་ན་དེའི་ཚེ་དངོས་པོ་རུང་བ་མ་ཡིན་པ་ལ་དགོས་པའི་དབང་གིས་རེག་གམ་རེག་ཏུ་བཅུག་ན་ལྟུང་བར་མི་འགྱུར་རོ། །ཇི་སྟེ་རུང་བ་གསུམ་ཡང་བྱེད་བཞིན་དུ་རྫས་དེ་ལ་བདག་ཉིད་ཀྱིས་བདག་གིར་བྱེད་པ་དང་རྗེས་སུ་འབྲེལ་ན་ནི། དེ་ལྟ་ན་ཡང་ཐམས་ཅད་དུ་ལྟུང་བར་འགྱུར་

བ་ཁོ་ན་ཡིན་ནོ། །ཆོས་དང་ལྡན་པའི་དོན་བདོག་པའི་རྐྱེན་ལས་གཞན་པ་ལ་མི་འཆགས་སོ་ཞེས་བྱ་བ་ལ། ཆོས་དང་ལྡན་པ་ཞེས་བྱ་བ་ནི། ཆོས་ལས་མི་འབྲལ་བ་སྟེ། རང་གི་ལྷུང་བཟེད་དང་ཆོས་གོས་དང་སྨན་ལ་སོགས་པ་ཡོ་བྱད་དག་གོ། །དེ་ནི་ཆོས་དང་ལྡན་
པ་ཡང་ཡིན་ལ་དོན་ཡང་ཡིན་པས་ཆོས་དང་ལྡན་པའི་དོན་ཏོ། །དེ་ནི་ཆོས་དང་ལྡན་པའི་དོན་ཀྱང་ཡིན་ལ། མི་བདོག་པ་ཡང་ཡིན་པས་ཆོས་དང་ལྡན་པའི་དོན་མི་བདོག་པའོ། །དེའི་རྐྱེན་ཞེས་བྱ་བ་ནི། དེ་བསྒྲུབ་པའི་རྫས་གང་ཡིན་པ་སྟེ། རྫས་ཅི་ཙམ་གྱིས་ཆོས་དང་ལྡན་པའི་དོན་ཏེ་འགྲུབ་
པར་འགྱུར་བའོ། །རྫས་དེ་ལ་ནི་རུང་བ་དེ་དག་འཆགས་སོ། །རྐྱེན་དེ་ལས་གཞན་པ་ལ་ཞེས་བྱ་བ་ནི་ཆོས་དང་ལྡན་པའི་དོན་བདོག་གོ། །དེའི་རྐྱེན་དུ་མི་དགོས་པའི་རྫས་གཞན་ལ་སྟེ། དེ་ལ་ནི་བྱིན་གྱིས་བརླབ་པ་དེ་དག་མི་འཆགས་སོ། །དེའི་ཕྱིར་ཆོས་དང་ལྡན་པའི་དོན་མི་བདོག་
པའི་རྐྱེན་ལས་གཞན་པ་ལ་མི་འཆགས་སོ་ཞེས་སྨྲས་སོ། །འདི་སྐད་བསྟན་ཏེ། གལ་ཏེ་ཆོས་དང་ལྡན་པའི་དོན་བདོག་པ་ཁོ་ན་ཡིན་ནམ། ཡང་ན་ཆོས་དང་ལྡན་པའི་དོན་ལྷུང་བཟེད་དང་ཆོས་གོས་ལ་སོགས་པ་དེ་དག་གི་རྐྱེན་དུ་གྱུར་པའི་རྫས་གང་ཡིན་པ་དེ་ཡང་བདོག་ལ། ཆོས་ཀྱི་དོན་
གྱི་རྐྱེན་མ་ཡིན་པར་བྱིན་གྱིས་རློབ་པར་བྱེད་ན་དེའི་ཚེ་རུང་བ་དེ་དག་མི་འཆགས་སོ། །དེ་ལྟ་བས་ན་ཆོས་དང་ལྡན་པ་ཞེས་བྱ་བའི་རྐྱེན་ལས་གཞན་པ་ལ་གལ་ཏེ་རུང་བ་གསུམ་བྱེད་དུ་ཟིན་ཀྱང་དགེ་སློང་དེས་དེ་ལ་རེག་གམ་རེག་ཏུ་བཅུག་ན་སྤང་བའི་ལྟུང་བྱེད་དུ་འགྱུར་རོ། །རྐྱེན་ཞེས་སྨོས་པའི་
ལུང་ནི་འདི་ཡིན་པར་རིག་པར་བྱ་སྟེ། ཆོས་གོས་ཀྱི་རིན་དག་རྙེད་པ་ན་སྦྱིན་བདག་ལ་ཡིད་བརྟན་ཏེ་བཅང་བར་བྱའོ་ཞེས་གསུངས་པ་ཡིན་ནོ། །ཆོས་གོས་ལ་སོགས་པའི་ཆེད་དུ་སེམས་པར་བྱེད་པ་ནི་ཆོས་གོས་ལ་སོགས་པའི་རིན་ཏེ། དེ་དག་གིས་ཆོས་གོས་ལ་སོགས་པ་སེམས་པར་བྱེད།
སྒྲུབ་པར་བྱེད་ཅེས་བྱ་བའི་ཐ་ཚིག་གོ། །བདག་པོ་རིང་བ་ཉིད་ཡིན་ན་ཡང་ཉམས་པ་མེད་དོ་ཞེས་བྱ་བ་ནི། བདག་པོ་སྦྱིན་བདག་གམ་ཞལ་ཏ་བྱེད་པ་རིང་བ་ཉིད་ཡིན་ཏེ་ཡུལ་ཐག་རིང་བ་ཉིད་དུ་སོང་ཞིང་ཡུལ་གྱིས་བསྐལ་པ་ཉིད་ཡིན་ན་ཡང་རུང་བ་དག་ལ་ཉེས་པ་མེད་དོ། །བདག་ཉིད་ཀྱི་

དོན་དུ་བཟའ་བ་བྱེད་དུ་གཞུག་ཏུ་རུང་ངོ་ཞེས་བྱ་བ་ནི། བདག་ཉིད་ཀྱི་དོན་དུ་ཞེས་བྱ་བ་བདག་ཉིད་ཀྱི་ཕྱིར་ཟན་སྦྱོར་དུ་གཞུག་ཏུ་རུང་ངོ་། །འདི་སྐད་བསྟན་ཏེ། གལ་ཏེ་དགེ་སློང་གིས་རང་ལ་མཁོ་བའི་ཕྱིར་ལུས་འཚོ་བར་བྱ་བའི་དོན་དུ་ཟོང་དེས་བཟའ་བཏུང་སྦྱོར་དུ་བཅུག་ན་ཡང་དེ་ལྟོ་
འདུན་ཆེ་བར་མི་འགྱུར་ཏེ། འདི་ལྟར་རིགས་པ་ཡིན་ནོ། །ཕྲན་ཚེགས་དག་ལས་ཀྱང་དེ་ཉིད་དང་པོར་བྱས་ནས་ལས་བྱས་པའོ་ཞེས་བྱ་བའི་བར་དུ་གསུངས་པ་དག་འདིར་བཏུས་སོ། །ལམ་བརྒྱགས་ནི་རིན་པོ་ཆེ་མན་ཆད་ལས་སོ་ཞེས་འགོ་ནས་འབྱུང་བ་འབའ་ཞིག་ཕྲན་ཚེགས་སུ་མ་གཏོགས་
ཏེ། གཞུང་དེ་ནི་རྣམ་པར་འབྱེད་པ་དག་ལས་སྣང་བའི་ཕྱིར་རོ། །དེ་བྱེད་པ་ལ་དབུལ་བའི་ཕྱིར་ཀཱར་ཥཱ་པ་ཎ་བླང་བར་ཡང་ངོ་ཞེས་བྱ་བ་ལ། དེ་བྱེད་པ་ལ་ཞེས་བྱ་བ་ནི་བཟའ་བ་བྱེད་པ་ལ་སྟེ་བྱེན་པོ་ལ་སོགས་པའི་གང་ཟག་ལའོ། །དབུལ་བའི་ཕྱིར་ཞེས་བྱ་བ་ནི། བཟའ་བ་བྱེད་དུ་གཞུག་པའི་
དོན་དུ་རིན་དུ་དབུལ་བའི་ཕྱིར་རོ། །དེའི་ཕྱིར་ཀཱར་ཥཱ་པ་ཎ་བླང་བ་ཡང་རུང་ངོ་། །དེའི་ཕྱིར་ཀཱར་ཥཱ་པ་ཎ་བླང་བ་ལ་སོགས་པ་ཡང་རུང་བ་མེད་པར་ནི་བླང་བར་མི་བྱའོ། །དེ་ལྟར་ཡང་ཡོན་བདག་ལ་ཡིད་བརྟན་ཏེ་ཀཱར་ཥཱ་པ་ཎ་བླངས་ནས་ཅི་འདོད་པར་ལོངས་སྤྱད་པར་བྱའོ་ཞེས་གསུངས་པ་
ཡིན་ནོ། །སྦྱིན་བདག་ལ་ཡིད་བརྟན་ཏེ་ཞེས་བྱ་བའི་ཚིག་ལས་ཐམས་ཅད་དུ་ཡང་རུང་བ་བྱས་ཏེ་བླང་བར་བྱ་བ་ཡིན་ནོ། །རུང་བ་མེད་པར་བདག་ཉིད་ལ་སོགས་པའི་དགོས་པའི་དབང་ཁོ་ནས་ནི་བླང་བར་མི་བྱའོ། །ལམ་བརྒྱགས་ནི་རིན་པོ་ཆེ་མན་ཆད་ལས་སོ་ཞེས་བྱ་བ་ནི། ལམ་
བརྒྱགས་ནི་རིན་པོ་ཆེ་མན་ཆད་རིན་པོ་ཆེའི་མཐར་ཐུག་པ་ལས་བསྐུར་དུ་རུང་ངོ་ཞེས་བྱ་བའི་ཐ་ཚིག་གོ། །འདིར་གཞུང་ནི་དགེ་སློང་དག་གིས་ལམ་བརྒྱགས་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་ལམ་བརྒྱགས་ནི་བཟའ་བ་ལྔ་དང་བཟའ་བར་སྨོས་པ་ལྔ་དང་རིན་
པོ་ཆེར་སྨོས་པ་ལྔའོ། །བཟའ་བ་ལྔ་གང་ཞེ་ན། འབྲས་ཆན་དང་ཟན་དྲོན་དང་ཤ་དང་ཉ་ཤ་དང་སྣུམ་ཁུར་རོ། །བཟའ་བར་སྨོས་པ་གང་ཞེ་ན། ཅི་ཚེ་དང་ཁྲེ་རྒོད་དང་རྒྱ་སྲན་དང་བྲ་རྒོད་དང་ཁྲེའོ། །རིན་པོ་ཆེ་ལྔ་གང་ཞེ་ན། གསེར་དང་དངུལ་དང་། བཻ་ཌཱུརྱ་དང་། ཤེལ་དང་། མུ་ཏིག་གོ། །རིན་

པོ་ཆེར་སྨོས་པ་ལྔ་གང་ཞེ་ན། ཞ་ཉེ་དང་། ཟངས་དང་། རོ་ཉེ་དང་། ཁྲོ་ཆུ་དང་ལྕགས་སོ་ཞེས་གསུངས་པ་ཡིན་ནོ། །མེའི་དོན་དུ་མེ་ཤེལ་ཉེ་བར་གཞག་པར་བྱའོ་ཞེས་བྱ་བ་ནི། དགེ་སློང་གིས་མེའི་དོན་དུ་རིན་པོ་ཆེ་མེ་ཤེལ་བཅང་བར་བྱ་སྟེ། འདི་ཡང་ཆོས་དང་ལྡན་པའི་
དགོས་པ་ཡིན་ནོ། །དེ་མ་སྦས་པར་གཞག་པར་མི་བྱའོ་ཞེས་བྱ་བ་ནི་མེ་ཤེལ་དེ་མ་སྦས་མ་བསྲུངས་པར་གཞག་པར་མི་བྱ་བའོ། །མ་བྱིན་པར་ལེན་པ་ལ་བསྟན་པར་མི་བྱའོ་ཞེས་བྱ་བ་ནི། མེ་ཤེལ་དེ་རྐུན་པོ་ལ་བསྟན་པར་མི་བྱའོ། །དེའི་འབྲས་བུ་ཕྱུང་ནས་དེ་ལ་སྦྱིན་པར་བྱའོ་ཞེས་བྱ་བ་ནི། མེ་
ཤེལ་དེའི་འབྲས་བུ་མེ་ཞེས་བྱ་བ་དེ་ཕྱུང་ནས་རྐུན་པོ་དེ་ལ་མེ་སྦྱིན་པར་བྱའོ། །ཆུའི་དོན་དུ་ཆུ་ཤེལ་ཡང་ངོ་ཞེས་བྱ་བ་ནི། དགེ་སློང་གིས་ཆུའི་དོན་དུ་ཆུ་ཤེལ་ཡང་ཉེ་བར་གཞག་པར་བྱ་བ་སྟེ། ཡང་ངོ་ཞེས་བྱ་བའི་སྒྲ་ནི་ཉེ་བར་གཞག་པར་བྱའོ་ཞེས་བྱ་བའི་རྗེས་བསྙགས་པའི་ཕྱིར་རོ། །བསྲུང་བའི་
ཆོ་ག་འདི་འདྲའོ་ཞེས་བྱ་བ་ནི། བསྲུང་བའི་ཆོ་ག་སྦ་བའི་རྣམ་པ་ནི་དེ་མ་སྦས་པར་གཞག་པར་མི་བྱའོ་ཞེས་བྱ་བ་ལ་སོགས་པ་མེ་ཤེལ་སྦ་བའི་ཆོ་ག་སྔར་བསྟན་པ་དང་འདྲ་བར་རིག་པར་བྱའོ། །ཡོ་བྱད་རྗེས་སུ་གནང་བར་རིན་པོ་ཆེ་བདག་གིར་བྱ་བའི་ཤན་བསྲེ་བར་མི་བྱ་བ་ཉིད་དོ་ཞེས་བྱ་བ་ནི། རྒྱ་
ལ་སོགས་པའི་འཚོག་ཆས་ནི་ཡོ་བྱད་དེ། དེ་ནི་རྗེས་སུ་གནང་བ་ཡིན་ནོ། །དེ་རྗེས་སུ་གནང་བའི་ཁོངས་སུ་རིན་པོ་ཆེ་བདག་གིར་བྱ་བའི་ཤན་བསྲེ་བ་གཞུག་པར་མི་བྱ་བ་ཉིད་དོ། །འདི་སྐད་བསྟན་ཏེ། འདི་ལྟར་བཅོམ་ལྡན་འདས་ཀྱིས་རྒྱ་ལ་སོགས་པའི་ཡོ་བྱད་འཆང་བར་རྗེས་སུ་གནང་མོད་ཀྱི།
འོན་ཀྱང་དགེ་སློང་གིས་རིན་པོ་ཆེ་ལས་བྱས་པའི་རྒྱ་ལ་སོགས་པ་བདག་གིར་མི་བྱའོ། །རྒྱ་ལ་སོགས་པ་རྗེས་སུ་གནང་བའི་རྫས་ནི་ངེས་པར་གསུངས་པས་ནི་དེའི་ཕྱིར་མདོ་འདི་བྱས་སོ། །དེ་ལྟར་ཡང་ཕྲན་ཚེགས་དག་ལས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་
གིས་རྒྱ་བཅང་བ་དང་། དགེ་སློང་དག་གིས་ཁབ་དང་སྨན་ཕོར་དང་། ཕུལ་བའི་བཏུང་ཕོར་བཅང་བར་རྗེས་སུ་གནང་ངོ་། །དགེ་སློང་གིས་གསེར་དང་། དངུལ་དང་། བཻ་ཌཱུརྱ་དང་། ཤེལ་ལས་བྱས་པའི་རྒྱ་བཅང་བར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གླེང་གཞི་དག་ལས་

ཀྱང་བཅོམ་ལྡན་འདས་ཀྱིས་དུད་པའི་སྨན་གཅེའུ་བཅང་བར་བྱའོ་ཞེས་གསུངས་པ་དང་། ཞུས་པ་ཇི་ལྟ་བུ་ཞིག་བཅང་བར་བགྱི། བཀའ་སྩལ་པ། ཉེ་བ་འཁོར་རིན་པོ་ཆེ་ལས་བྱས་པ་མ་གཏོགས་སོ། །སྣར་བླུགས་པའི་སྤྱད་དང་། ཕུལ་བའི་བཏུང་ཕོར་དང་། ཁབ་དང་ཁབ་རལ་
དང་། མིག་སྨན་གྱི་གབ་ཚེ་དང་། སྨན་ཕོར་དང་། རྐང་རྟེན་དང་། ཁྲེའུ་དང་། སྨན་གྱི་ནལ་ཟེ་བཅང་བར་བྱའོ། །ལྕགས་ཀྱི་གར་བུ་ལ་ལུ་གུ་རྒྱུད་གདགས་པར་བྱའོ་ཞེས་གསུངས་པ་ཐམས་ཅད་ལ་ཡང་ཇི་ལྟ་བུ་ཞིག་བཅང་བར་བགྱི་ཞེས་བྱ་བ་ནས། ཇི་ལྟ་བུ་ཞིག་གདགས་པར་བགྱི་ཞེས་
བྱ་བའི་བར་དུ་ཞུས་པ་དང་། ཉེ་བ་འཁོར་རིན་པོ་ཆེ་ལས་བྱས་པ་མ་གཏོགས་སོ་ཞེས་བཀའ་སྩལ་པ་དེ་ལྟ་བུའི་ཚིག་ཡོད་དོ། །ར་གན་དང་ཟངས་དང་འཁར་བ་དང་ཤིང་གི་ལྷུང་བཟེད་བདག་གིར་མི་བྱའོ་ཞེས་བྱ་བ་ནི། ལྷུང་བཟེད་ཅེས་བྱ་བའི་སྒྲ་ར་གན་ལ་སོགས་པ་སོ་སོ་དང་སྦྱར་ཏེ། ར་གན་གྱི་
ལྷུང་བཟེད་བདག་གིར་མི་བྱའོ་ཞེས་བྱ་བ་ལ་སོགས་པར་སྦྱར་རོ། །དེ་དག་བདག་གིར་བྱས་པའམ་གཞན་ཡང་རུང་སྟེ། གལ་ཏེ་ཡོངས་སུ་སྤྱད་དགོས་པར་གྱུར་ན་སྨན་ཕོར་གྱིས་ཡོངས་སུ་སྤྱད་པས་སོ་ཞེས་བྱ་བ་ལ། དེ་དག་བདག་གིར་བྱས་པའམ་ཞེས་བྱ་བ་ནི། ར་གན་ལ་སོགས་པའི་ལྷུང་བཟེད་
དེ་དག་བསྙེན་པར་རྫོགས་པའི་གནས་སྐབས་ཀྱི་སྔོན་རོལ་བསྙེན་པར་མ་རྫོགས་པའི་ཚེ་བདག་གིར་བྱས་པའོ། །གཞན་ཡང་རུང་སྟེ་ཞེས་བྱ་བ་ནི། བདག་གིར་མ་བྱས་པ་གཞན་དང་འབྲེལ་བ་དག་གོ། །གལ་ཏེ་ཡོངས་སུ་སྤྱད་དགོས་པར་གྱུར་ན་ཞེས་བྱ་བ་ནི། དེ་ལྟ་བུའི་རྐྱེན་ཅིག་བྱུང་བར་གྱུར་
ནའོ། །སྨན་ཕོར་གྱིས་ཡོངས་སུ་སྤྱད་པས་སོ་ཞེས་བྱ་བ་ནི། དེ་ལྟ་བུའི་རྐྱེན་བྱུང་ན་ར་གན་ལ་སོགས་པའི་ལྷུང་བཟེད་བདག་གིར་བྱས་པ་དང་མ་བྱས་པ་དེ་དག་སྨན་ཕོར་དུ་བསྔོས་ཏེ། དེ་དག་གིས་བཟའ་བ་དང་བཏུང་བ་དག་ཀྱང་ཡོངས་སུ་ལོངས་སྤྱད་པར་བྱའི། ར་གན་ལ་སོགས་པའི་
ལྷུང་བཟེད་ཐམས་ཅད་ཀྱིས་ཐམས་ཅད་དུ་སྤང་བར་བྱ་བ་ནི་མ་ཡིན་ནོ། །བྱིན་གྱིས་མ་བརླབས་པའི་ལྷུང་བཟེད་དང་འདྲ་བར་བསོད་སྙོམས་ལ་སོགས་པ་ལ་བསྐུར་བར་ནི་མི་བྱའོ། །མདོ་སྔ་མ་ཤོས་ཀྱི་ལུང་ནི་འདི་ཡིན་ཏེ། ཉེ་བར་མ་བཞག་པ་དག་ནི་ཉེ་བར་གཞག་པར་མི་བྱའོ་ཞེས་གསུངས་

པའོ། །མདོ་ཕྱི་མ་ཤོས་ཀྱི་ལུང་ནི་འདི་ཡིན་ཏེ། ཉེ་བར་གཞག་པ་དག་ནི་སྨན་ཕོར་གྱིས་ཡོངས་སུ་སྤྱད་པས་ཡོངས་སུ་ལོངས་སྤྱོད་པར་བྱའོ་ཞེས་གསུངས་པ་ཡིན་ནོ། །ལྷུང་བཟེད་ཀྱི་ཞར་ལ་འདི་བརྗོད་དེ། བྱིན་གྱིས་བརླབ་ཏུ་རུང་བ་ནི་གཉིས་ཏེ། ལྕགས་ལས་
བྱས་པ་དང་ས་ལས་བྱས་པའོ་ཞེས་བྱ་བ་ནི། ལྷུང་བཟེད་བྱིན་གྱིས་བརླབ་ཏུ་རུང་བ་ནི་རྣམ་པ་གཉིས་ཁོ་ན་སྟེ། ལྕགས་ལས་བྱས་པ་དང་། ས་ལས་བྱས་པའོ། །རིན་པོ་ཆེ་བདག་གིར་བྱས་ནའོ་ཞེས་འདི་ལྟར་བསྟན་པའི་རིན་པོ་ཆེ་གང་ཡིན་པ་བསྟན་པར་འདོད་ནས། ནོར་བུ་དང་། མུ་ཏིག་
དང་། བཻ་ཌཱུརྱ་དང་། མན་ཤེལ་དཀར་པོ་དང་། བྱི་རུ་དང་། དངུལ་དང་། གསེར་དང་། རྡོའི་སྙིང་པོ་དང་། སྤུག་དང་། དམར་པོ་དང་། གཡས་སུ་འཁྱིལ་བ་ལ་སོགས་པ་ནི་རིན་པོ་ཆེའོ་ཞེས་བྱ་བ་སྨྲས་ཏེ། ནོར་བུ་ཞེས་སྨོས་པས་ནི་ཆུ་ཤེལ་དང་། མེ་ཤེལ་དང་། ཤེལ་དག་འཕངས་སོ། །ནོར་
བུར་གྱུར་པའི་ཁབ་ལོང་ཡང་འཕངས་ཏེ། རྡོ་བར་གྱུར་པའི་ཁབ་ལོང་ནི་རིན་པོ་ཆེ་དག་མ་ཡིན་ཏེ། དེ་ལ་རིན་པོ་ཆེ་ཉིད་མེད་པའི་ཕྱིར་རོ། །དངུལ་ཞེས་བྱ་བ་ནི་དངུལ་སྐྱའོ། །གསེར་ཞེས་བྱ་བ་ནི་ས་ལེ་སྦྲམ་མོ། །སོ་སོར་ཐར་པའི་མདོ་ལས་དེ་གཉིས་འབའ་ཞིག་སྨོས་ཏེ། ཡང་དགེ་སློང་གང་རང་གི་
ལག་གིས་གསེར་དང་དངུལ་ལེན་ཏམ་ལེན་དུ་འཇུག་ན་ཞེས་གསུངས་པ་གང་ཡིན་པ་དེ་ནི་དཔེ་ཙམ་ཡིན་པར་རིག་པར་བྱ་སྟེ། རྣམ་པར་འབྱེད་པ་གཞན་ལས་ནོར་བུ་ལ་སོགས་པ་དག་ལེན་ཏམ་ལེན་དུ་བཅུག་ན་ཡང་སྤང་བའི་ལྟུང་བྱེད་དོ་ཞེས་གསུངས་པའི་ཕྱིར་རོ། །དེ་ལྟར་ཡང་ནོར་བུ་དང་། མུ་
ཏིག་དང་། བཻ་ཌཱུརྱ་ལ་སོགས་པ་ལེན་ན་སྤང་བའི་ལྟུང་བྱེད་དོ་ཞེས་གསུངས་སོ། །རིན་པོ་ཆེ་མ་ཡིན་པ་ཟངས་མ་ལ་སོགས་པ་ལས་སྙད་གདགས་སུ་རུང་བའི་མངོན་མཚན་ཅན་དག་ལེན་པ་ནི་ཉེས་བྱས་སུ་རིག་པར་བྱའོ། །སོགས་པ་ཞེས་སྨོས་པས་ནི། སངས་རྒྱས་ཀྱི་སྐུ་གདུང་ལ་སོགས་པ་དག་
བསྡུའོ། །སྙད་གདགས་སུ་མི་རུང་བ་ལ་ནི་ན་སྨད་པ་ཉིད་དོ་ཞེས་བྱ་བ་ལ། སྙད་གདགས་སུ་མི་རུང་བ་ཞེས་བྱ་བ་ནི། ཉོ་ཚོང་བྱར་མི་རུང་བ་སྟེ། ནོར་བུ་ལ་སོགས་པའི་དོན་སྙད་གདགས་སུ་མི་རུང་བ་ཉོ་ཚོང་བྱར་མི་རུང་བ་དེ་ལེན་ཏམ། ལེན་དུ་བཅུག་ན་དེ་གཉི་ག་ལ་ལྟུང་བ་ན་སྨད་པ་ཉིད་དེ།

ཉེས་བྱས་སོ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། གལ་ཏེ་ནོར་བུ་ལ་སོགས་པའི་དངོས་པོ་འགའ་ཞིག་གིས་མེ་ལ་སོགས་པ་ཉམས་པར་བྱས་པར་གྱུར་ནས་དེ་ཉོ་ཚོང་བྱར་མི་ནུས་པ་གང་ཡིན་པ་དེ་ལེན་ཏམ། ལེན་དུ་བཅུག་ན་ཉེས་བྱས་སོ། །དཔེར་ན་པདྨ་རཱ་ག་ལ་སོགས་
པ་རིན་པོ་ཆེ་ཉིད་དུ་མ་གྱུར་པ་དང་འདྲའོ། །དེ་ཉིད་བསླབ་པའི་གཞི་འོག་མ་མངོན་མཚན་ཅན་གྱིས་སྤྱོད་པ་ཞེས་བྱ་བ་ལ་ཡང་འདྲ་བར་བསྟན་པར་བྱ་བའི་ཕྱིར། འོག་མ་ལ་ཡང་ངོ་ཞེས་བྱ་བ་སྨྲས་ཏེ། དེ་ལ་ཡང་སྙད་གདགས་སུ་མི་རུང་བ་ལ་ནི་ན་སྨད་དོ་ཞེས་བྱ་བའི་ཐ་ཚིག་གོ། །སྙད་གདགས་
སུ་མི་རུང་བ་ཞེས་བྱ་བ་དེ་ཇི་ལྟ་བུ་ཞིག་ཡིན་པར་རིག་པར་བྱ་ཞེ་ན། དེའི་ཕྱིར་དེ་ནི་གས་པ་དང་། ཆག་པ་དང་། དུམ་བུ་དང་། ཚིག་པ་དང་། སྔོན་མ་སྤྱད་པ་དང་། མ་བྱས་པ་དང་། མཚན་དང་མི་ལྡན་པ་དང་། བཅོས་པའོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི། སྙད་གདགས་སུ་མི་རུང་
བའོ། །གས་པ་ཞེས་བྱ་བ་ནི། སེར་ག་བྱུང་བ་སྟེ། འབྱར་ཀྱང་རུང་མ་འབྱར་ཀྱང་རུང་བའོ། །ཆག་པ་ཞེས་བྱ་བ་ནི་བུ་ག་བྱུང་བའོ། །དུམ་བུ་ཞེས་བྱ་བ་ནི་ཕྱོགས་གཅིག་མེད་པའོ། །ཚིག་པ་ཞེས་བྱ་བ་ནི། རིན་པོ་ཆེ་དེ་མེ་དང་ཕྲད་པས་རིན་པོ་ཆེ་མ་ཡིན་པ་ཉིད་དུ་གྱུར་ཏེ། ཉོ་ཚོང་བྱར་མི་རུང་བར་
གྱུར་པ་གང་ཡིན་པར་ཤེས་པར་བྱའོ། །པ་ཎ་ནི་མངོན་མཚན་ཅན་ལྷག་མ་ཡོད་པ་ཙམ་དུ་ཉམས་པ་ཡིན་གྱི། ཐམས་ཅད་ཀྱི་ཐམས་ཅད་དུ་ཐལ་བར་གྱུར་པ་ནི་མ་ཡིན་ཏེ། དེ་ལེན་པ་ལ་ཉེས་པ་མེད་པའི་ཕྱིར་རོ། །སྔོན་མ་སྤྱད་པ་ཞེས་བྱ་བ་ནི། སྔོན་ཉོ་ཚོང་བྱས་པ་ཙམ་ཡང་མི་དྲན་པའི་མངོན་མཚན་གང་ཡིན་པ་སྟེ།
མངོན་མཚན་ཅན་གང་ལ་ཉོ་ཚོང་བྱས་པའི་དུས་ཀྱང་འཇིག་རྟེན་ན་མི་གྲག་པའོ། །མ་བྱས་པ་ཞེས་བྱ་བ་ནི། མངོན་མཚན་ཅན་གང་ལ་མཚན་དུ་མ་བྱས་པ་ཉིད་དོ། །མཚན་དང་མི་ལྡན་པ་ཞེས་བྱ་བ་ནི། དྲུད་པ་ལ་སོགས་པའི་ཉེས་པས་མཚན་དང་བྲལ་བར་གྱུར་པའོ། །བཅོས་པ་ཞེས་
བྱ་བ་ནི། ས་དང་རྩྭ་དང་རྡོ་བ་ལ་སོགས་པ་དག་ལས་ནོར་བུ་དང་། དོང་ཙེ་དང་། མངོན་མཚན་ཅན་དང་། རྒྱན་དང་། འགྲོན་བུ་ལ་སོགས་པའི་རྣམ་པར་གཞག་པ་བྱས་པའོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་གིས་གསེར་གྱི་ཕྲེང་བ་ལ་རེག་ན་སྤང་བའི་ལྟུང་བྱེད་དོ། །དགེ་

སློང་གིས་སོག་མའི་ཕྲེང་བ་ལ་རེག་ན་ཉེས་བྱས་སོ་ཞེས་གསུངས་པ་ཡིན་ནོ། །གསེར་དང་དངུལ་ལ་རེག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་མངོན་མཚན་ཅན་གྱིས་སྤྱོད་པའི་སྤང་བ་བརྗོད་པར་བྱ་སྟེ། གང་ལ་ལྟུང་བ་འདི་འབྱུང་བར་འགྱུར་
ཞེ་ན། དེའི་ཕྱིར་རྙེད་པ་འདོད་པ་ལ་ལྟུང་བ་འབྱུང་ངོ་ཞེས་བྱ་བ་སྨྲས་ཏེ། ཁེ་སྤོགས་འདོད་པ་ཉིད་ཀྱིས་རྙེད་པ་བསྒྲུབ་ཅིང་འདོད་པ་དང་བསྡུ་བ་གང་ཡིན་པ་དེ་ནི་རྙེད་པ་འདོད་པ་སྟེ། རྙེད་པ་འདོད་པའི་ལྟུང་བ་འབྱིན་པ་པོ་དེ་ལ་ལྟུང་བ་འདི་རྣམ་པར་གཞག་གོ། །དེའི་ཕྱིར་འདིར་ནི་སྐྱེད་ཕྱིན་ན་
རྙེད་པ་ཡིན་གྱི་ཐོབ་པ་ཙམ་གྱིས་མ་ཡིན་ནོ། །འདི་སྐད་བསྟན་ཏེ། སྐྱེད་འདོད་པས་སྐྱེད་ཕྱིན་པ་ལ་མངོན་མཚན་ཅན་གྱིས་སྤྱོད་པའི་སྤང་བ་འདི་འབྱུང་ངོ་། །གལ་ཏེ་བདག་ཉིད་ཀྱི་དོན་དུ་རྙེད་པ་འདོད་པ་ཉིད་ཡིན་ན་ནི་སྦྱོར་བ་ལ་ཉེས་བྱས་སུ་འགྱུར་རོ། །གཞན་གྱི་དོན་དུ་ན་ནི་དངོས་གཞིའི་
གནས་ལ་ཉེས་བྱས་སུ་འགྱུར་ལ། སྦྱོར་བ་ལ་ཉེས་བྱས་ཕྲ་མོར་འགྱུར་རོ་ཞེས་བྱ་བའི་ཐ་ཚིག་གོ། །དངོས་གཞིའི་ལྟུང་བ་ཇི་ལྟར་འབྱུང་ཞེ་ན། དེའི་ཕྱིར་ཕ་རོལ་པོ་ཁྱིམ་པ་ཉིད་དང་། ཉེ་དུ་མ་ཡིན་པ་ཉིད་ཡིན་ན་དངོས་གཞིའོ་ཞེས་བྱ་བ་སྨྲས་ཏེ། ཕ་རོལ་པོ་གང་དང་ལྷན་ཅིག་ཏུ་མངོན་མཚན་ཅན་
གྱིས་སྤྱོད་པ་འདི་བྱེད་པ་དེ་གལ་ཏེ་ཁྱིམ་པ་ཉིད་དང་ཉེ་དུ་མ་ཡིན་ན། ཕ་རོལ་པོ་ཁྱིམ་པ་ཉིད་དང་། ཉེ་དུ་མ་ཡིན་པ་ཉིད་ཀྱི་ཡུལ་ལས་དེའི་ཚེ་དངོས་གཞིའི་ལྟུང་བར་འགྱུར་རོ། །འདིར་གཞུང་ནི་ཞུ་བ་ལས་ཉེ་དུ་དང་ལྷན་ཅིག་སྤྱོད་ན་ཉེས་བྱས་སོ། །དེས་ཉེ་དུ་མ་ཡིན་པ་རྣམས་དང་སྤྱོད་ན་དངོས་གཞིའོ་
ཞེས་གསུངས་པ་ཡིན་ནོ། །མངོན་མཚན་ཅན་གྱིས་སྤྱོད་པ་གང་ལ་དངོས་གཞིའི་ལྟུང་བར་འགྱུར་ཞེ་ན། དེའི་ཕྱིར་སྐྱེད་ཕྱིན་ནའོ་ཞེས་བྱ་བ་སྨྲས་ཏེ། གང་གི་ཚེ་སྐྱེད་ཕྱིན་པ་དེའི་ཚེ་ན་དངོས་གཞིའི་ལྟུང་བར་འགྱུར་རོ། །སྐྱེད་མེད་ན་ནི་སྦྱོར་བ་ཙམ་དུ་ཟད་དོ། །འདིར་གཞུང་ནི་སྐྱེད་ཕྱིན་ན་དངོས་
གཞིའི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །བཤགས་པའི་དུས་ན་ཡང་སྐྱེད་ཉིད་སྤང་བར་འོས་པ་ཉིད་ཡིན་གྱི། རྩ་བར་གྱུར་པའི་རྫས་ནི་མ་ཡིན་ནོ། །གལ་ཏེ་རྩ་བ་བས་སྔོན་ནམ་ཕྱིས་སྐྱེད་ཐོབ་པ་དེ་ལ་འདི་རྣམ་པར་གཞག་གོ། །གང་གི་ཚེ་སྐྱེད་དང་རྩ་བ་གཉིས་དུས་གཅིག་ཏུ་

བྱུང་ན་དེའི་ཚེ་ཆ་གང་ལ་ལྟུང་བ་འབྱིན་པ་པོའི་གང་ཟག་སྐྱེད་དུ་གྱུར་པ་ཉིད་དུ་ལྷག་པར་ཆགས་པ་སྐྱེ་བ་དེའི་ཚེ་དེ་ཉིད་སྤང་བར་བྱ་བ་ཡིན་ནོ། །འདིར་གཞུང་ནི་ཇི་སྲིད་དུ་རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སོ། །རྙེད་པ་བདག་གིར་བྱེད་ན་ནི་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་
པ་ཡིན་ནོ། །ད་ནི་མཚན་ཉིད་འདྲ་བར་བྱ་བ་བསྟན་པའི་ཕྱིར། འོག་མ་ལ་ཡང་ངོ་ཞེས་བྱ་བ་སྨྲས་ཏེ། འདིའི་འོག་མར་གྱུར་པའི་བསླབ་པའི་གཞི་ཉོ་ཚོང་བྱེད་པ་ཞེས་བྱ་བ་ལ་སོགས་པ་ལ་ཡང་རྙེད་པ་འདོད་པ་ཁོ་ན་ལ་ལྟུང་བ་འབྱུང་བར་བལྟ་བར་བྱའོ། །དེ་ལ་ཡང་ཕ་རོལ་པོ་ཁྱིམ་པ་ཉིད་དང་། ཉེ་
དུ་མ་ཡིན་པ་ཉིད་དང་། སྐྱེད་ཕྱིན་ན་དངོས་གཞིའི་ལྟུང་བར་འགྱུར་ལ། དེ་ཉིད་སྤང་བར་འོས་པ་ཉིད་ཡིན་ནོ། །སྐྱེད་ཕྱིན་ནའོ་ཞེས་སྨྲས་ན། སྐྱེད་ཕྱིན་པ་ནི་ཚོང་པ་ལ་སོགས་པ་ལས་ཀྱང་འབྱུང་ལ། ཁེ་སྤོགས་འདོད་པ་ཉིད་ལས་ཀྱང་འབྱུང་ན། དེའི་ཕྱིར་མངོན་མཚན་ཅན་གྱིས་སྤྱོད་པའི་
སྤང་བ་འདི་ལ་སྐྱེད་ག་ལས་ཕྱིན་ན། དངོས་གཞིའི་ལྟུང་བར་འགྱུར་ཞེ་ན། དེའི་ཕྱིར་པ་ཎའམ། རིན་པོ་ཆེས་སྤྱོད་པ་ལས་སོ་ཞེས་བྱ་བ་སྨྲས་ཏེ། པ་ཎ་དང་རིན་པོ་ཆེ་དག་གིས་རྙེད་པའི་དོན་དུ་སྐྱེད་བཀྱེ་ཞིང་སྤྱོད་པ་གང་ཡིན་པ་དེ་ལས་སྐྱེད་གང་ཕྱིན་པ་དེ་ལ་མངོན་མཚན་ཅན་གྱིས་སྤྱོད་པའི་སྤང་
བར་འགྱུར་རོ། །གལ་ཏེ་དགེ་སློང་གིས་མངོན་མཚན་ཅན་གྱིས་སྤྱོད་པའི་ཕྱིར་རིན་པོ་ཆེ་ལ་སོགས་པ་ལ་རེག་གམ་རེག་ཏུ་འཇུག་ན་དེ་ལྟ་ན་ནི། རེག་གམ་རེག་ཏུ་འཇུག་པ་ལས་བྱུང་བའི་སྤང་བའི་ལྟུང་བྱེད་སྔ་མས་བསྡུས་པ་ཡིན་པར་རིག་པར་བྱའི། འདིར་གཏོགས་པ་ནི་མ་ཡིན་ནོ། །དགེ་སློང་གང་
གིས་ཉོ་ཚོང་བྱས་ནས་སྐྱེད་པར་བྱེད་པ་དང་། གང་གིས་ཉོ་ཚོང་མ་བྱས་པར་སྔར་ཐོབ་པ་ལ་སོགས་པ་དག་སྐྱེད་པར་བྱེད་པ་དེ་གཉི་ག་ལ་ཡང་རྙེད་པ་གྲུབ་ན་དངོས་གཞིའི་ཁ་ན་མ་ཐོ་བར་འགྱུར་རོ། །གལ་ཏེ་རྙེད་པ་མ་གྲུབ་ན་ནི་དེའི་ཚེ་སྦྱོར་བ་ཞེས་བྱ་བའི་ཉེས་བྱས་སུ་འགྱུར་ཏེ། འདི་ལ་
ཉོ་ཚོང་ནི་ཡན་ལག་མ་ཡིན་པའི་ཕྱིར་རོ། །དེ་ལྟ་བས་ན་ཉོ་ཚོང་མ་བྱས་པར་སྔ་མ་བསྐྱེད་པ་ཙམ་ཁོ་ན་ལས་རྙེད་པ་གྲུབ་ན་ཡང་དེར་གཏོགས་པའི་ཁ་ན་མ་ཐོ་བར་འགྱུར་རོ། །སྦྱོར་བ་ལ་ནི་གཅིག་པ་ཉིད་དོ་ཞེས་བྱ་བ་ནི། སྐྱེད་གྲུབ་པ་བས་མདུན་རོལ་དུ་དགེ་སློང་གིས་རྙེད་པ་བསྒྲུབ་པའི་

ཕྱིར་བཙལ་བ་གང་ཆུད་ཟད་བྱེད་ན་བཙལ་བ་དེ་ཐམས་ཅད་ནི་གཅིག་པ་ཉིད་དོ། །དེ་ལྟར་ཡང་འདིར་གཞུང་ནི་ཇི་སྲིད་དུ་རྙེད་པ་སྒྲུབ་པར་མི་བྱེད་ཀྱི་བར་དུ་ནི་ཉེས་བྱས་སོ། །རྙེད་པ་གྲུབ་ན་ནི་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །ཀུན་
དགའ་ར་བ་པའམ། དགེ་བསྙེན་དག་ཡོད་ན་བསྐོ་བས་དཀོན་མཆོག་གི་དོན་དུ་བསྐྱེད་པར་བྱའོ་ཞེས་བྱ་བ་ནི། ཀུན་དགའ་ར་བ་པའམ། དགེ་བསྙེན་དག་ཡོད་ན་དེ་གཉིས་བསྐོ་བས་དཀོན་མཆོག་གསུམ་གྱི་ཆེད་དུ་པ་ཎ་དང་། རིན་པོ་ཆེ་ལ་སོགས་པ་དག་བསྐྱེད་པའི་ཆེད་དུ་སྐྱེད་དགྱེ་བར་བྱའོ། །
འདི་སྐད་བསྟན་ཏེ། གཙུག་ལག་ཁང་གང་ན་གཙུག་ལག་ཁང་དང་འབྲེལ་བའི་མི་ཀུན་དགའ་ར་བ་པའམ། དགེ་བསྙེན་དག་ཡོད་ན་དེར་དགེ་སློང་དག་གིས་འདི་ལྟ་སྟེ། དཀོན་མཆོག་གསུམ་གྱི་དོན་དུ་རིན་པོ་ཆེ་ལ་སོགས་པ་དེ་དག་ཉིད་བསྐྱེད་པའི་ཆེད་དུ་དེ་གཉིས་བསྐོ་ཞིང་སྐྱེད་དགྱེ་བར་བྱའོ། །
འདིར་གཞུང་ནི་མ་མོ་ལས་འདི་ལྟ་སྟེ། ཡངས་པ་ཅན་གྱི་ཚོང་པ་རྣམས་ཀྱིས། བཅོམ་ལྡན་འདས་ཀྱི་མཆོད་རྟེན་ཡང་བྱེད་དུ་བཅུག །གཙང་ཁང་བྱུར་བུ་ཡང་བྱེད་དུ་བཅུག་ནས། དགེ་སློང་རྣམས་ལ་མཆོད་རྟེན་དང་གཙང་ཁང་བྱུར་བུ་དེ་དག་ཞིག་རལ་དུ་མི་འགྱུར་བའི་ཡོ་བྱད་རྗེས་སུ་གཏད་
པ་ན་དགེ་སློང་དག་འགྱོད་ཅིང་ལེན་པར་མི་བྱེད་ནས། སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་བ། ཀུན་དགའ་ར་བའམ། དགེ་བསྙེན་དག་གིས་མཆོད་རྟེན་ཞིག་རལ་དུ་མི་འགྱུར་བའི་ཡོ་བྱད་བླང་བར་བྱ་ཞིང་བླངས་ནས་ཀྱང་
བསྐྱེད་པར་བྱ་སྟེ། དེ་ལས་རྙེད་པ་ཇི་ཙམ་འབྱུང་བ་དེས་མཆོད་རྟེན་ལ་མཆོད་པར་བྱ་བར་ངས་རྗེས་སུ་གནང་ངོ་ཞེས་གསུངས་པ་ཡིན་ནོ། །གཏའ་ཉི་རིར་བླང་བར་བྱའོ་ཞེས་བྱ་བ་ནི། སངས་རྒྱས་ལ་སོགས་པའི་དཀོར་ཆུད་མི་ཟ་བར་བྱ་བའི་ཕྱིར་གཏའ་ཉི་རིར་བླངས་ནས་དེ་བསྐྱེད་དུ་གཏང་བར་བྱའོ། །
ཇི་ལྟར་བསྐྱེད་དུ་གཏང་བར་བྱ་ཞེ་ན། དེའི་ཕྱིར་དཔང་པོ་དང་ལོ་དང་ཟླ་བ་དང་ཉི་མ་དང་དགེ་འདུན་གྱི་གནས་བརྟན་དང་། དགེ་སྐོས་དང་། ལེན་པ་པོ་དང་། རྫས་དང་སྐྱེད་རྣམས་དཔང་རྒྱར་བྲིས་ནས་སོ་ཞེས་བྱ་བ་སྨྲས་ཏེ། དཔང་པོ་དང་། ལོ་དང་ཟླ་བ་ལ་སོགས་པ་སྐྱེད་ཀྱི་མཐར་ཐུག་པ་དག་དཔང་

རྒྱར་བྲིས་ནས་ཕྱིས་རྫས་དེ་སྦྱིན་པར་བྱའོ། །རྒྱུས་ཤེས་པས་དེ་གཞན་ལ་ཡང་ཁོང་དུ་ཆུད་པར་བྱའོ་ཞེས་བྱ་བ་ལ། རྒྱུས་ཤེས་པ་ཞེས་བྱ་བ་ནི། དགེ་སློང་གང་གིས་གཏའ་དང་བུ་ལོན་ལ་སོགས་པའི་འབྱུང་བའི་མཐའ་དེ་ཤེས་ཤིང་རྫས་དེ་ཙམ་ཞིག་གང་ཟག་ལེན་པ་པོ་ཆེ་གེ་མོ་ཞིག་ལ་གཏད་
དེ་དེས་དུས་ཆེ་གེ་མོ་ཞིག་ན་སྐྱེད་འདི་ཙམ་ཞིག་དང་བཅས་ཏེ་འབུལ་བར་ཤེས་པ་སྟེ། དེ་ནི་རྒྱུས་ཤེས་པ་ཞེས་བྱ་སྟེ་དེས་སོ། །དེ་ཞེས་བྱ་བ་ནི་གཏའ་དང་བུ་ལོན་བདའ་བའི་རྒྱུས་དེའོ། །གཞན་ལ་ཡང་ཞེས་བྱ་བ་ནི། གང་གིས་བྱུང་བའི་མཐའ་དེའི་རྒྱུས་མི་ཤེས་པའི་དགེ་སློང་གཞན་དག་ལ་ཡང་ངོ་། །ཁོང་དུ་ཆུད་པར་བྱའོ་
ཞེས་བྱ་བ་ནི། དགེ་སློང་རྒྱུས་ཤེས་པ་དེས་བྱུང་བའི་མཐའ་དེ་དགེ་སློང་རྒྱུས་མི་ཤེས་པ་གཞན་དག་ལ་སྐབས་སུ་བབ་པ་ན་ཐམས་ཅད་བསྙད་ཅིང་ཁོང་དུ་ཆུད་པར་བྱ་བའོ། །འདིར་གཞུང་ནི་དགེ་སློང་གཉུག་མར་གནས་པ་དག་གིས་དགེ་སློང་གློ་བུར་དུ་ལྷགས་པ་དག་ལ་གང་ཟག་ཆེ་གེ་མོ་ཞིག་ལས་
ཟླ་བ་རེ་རེ་ཞིང་འདི་ཙམ་ཞིག་མནོད་དོ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །མངོན་མཚན་ཅན་གྱིས་སྤྱོད་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཉོ་ཚོང་བྱེད་པའི་སྤང་བ་བརྗོད་པར་བྱ་སྟེ། སྔར་བསྟན་མ་ཐག་པའི་བསླབ་པའི་གཞིར་སྐྱེད་ཕྱིན་ན་དངོས་གཞིའོ་
ཞེས་སྨྲས་ན་གང་གིས་ཡིན་པ་མ་བསྟན་པས། དེའི་ཕྱིར་གཞན་གྱིས་སོ་ཞེས་བྱ་བ་སྨྲས་ཏེ། སྤྱོད་པ་ཞེས་བྱ་བར་སྦྱར་རོ། །པ་ཎ་དང་རིན་པོ་ཆེ་དག་ལས་གཞན་པ་གཞལ་བར་བྱ་བ་ལ་སོགས་པའི་སྤྱོད་པ་དག་ལས་སྐྱེད་ཕྱིན་ན་ལྟུང་བ་འདིར་འགྱུར་རོ། །ཡང་ན་གཞན་གྱིས་སོ་ཞེས་བྱ་བ་ནི་བསྐྱེད་པའི་
ཁེ་སྤོགས་འདོད་པ་ལས་གཞན་པ་ཉོ་ཚོང་གི་སྤྱོད་པ་ལས་སྐྱེད་ཕྱིན་ན་ལྟུང་བ་འདིར་འགྱུར་བའོ། །དེ་ལྟ་བས་ན་སྤང་བ་འདི་གསུམ་གྱི་ཡུལ་ལ་བྱེ་བྲག་ནི་འདི་ཡིན་པར་རིག་པར་བྱ་སྟེ། དང་པོ་ནི་རིན་པོ་ཆེ་ལ་སོགས་པ་ལ་རིག་པ་ལས་སོ། །གཉིས་པ་ནི་ཁེ་སྤོགས་འདོད་པ་ཉིད་ཀྱིས་པ་ཎ་དང་རིན་པོ་
ཆེ་ལ་སོགས་པ་སྤྱོད་པ་ལས་སོ། །གསུམ་པ་ནི་གང་ཡང་རུང་བས་རྙེད་པ་འདོད་ཅིང་ཉོ་ཚོང་ལ་སོགས་པས་སྤྱོད་པ་ལས་སྐྱེད་ཕྱིན་ནའོ། །དགེ་འདུན་གྱི་བཤོས་ཀྱི་ཕྱིར་དགེ་འདུན་གྱི་འབྲས་རིན་གྱིས་ཉོ་བ་ལ་སྦྱིན་པར་བྱའོ་ཞེས་བྱ་བ་ནི། དགེ་འདུན་གྱི་བཤོས་ཀྱི་ཕྱིར་ཞེས་བྱ་བ་དགེ་འདུན་གྱི་འཚོ་

བའི་ཕྱིར། དགེ་འདུན་གྱི་འབྲས་མ་དྲུས་པ་རིན་གྱིས་ཉོ་འདོད་པའི་གང་ཟག་ལ་སྦྱིན་པར་བྱ་སྟེ། ཉོར་ཕྱིན་དེ་ལ་ཉོ་ཚོང་གི་ཉེས་པ་མེད་དོ། །འབྲས་ཞེས་སྨོས་པ་ནི་མཚོན་པ་ཙམ་སྟེ། ཏིལ་དང་མོན་སྲན་སྡེའུ་ལ་སོགས་པ་འབྲུ་ཐམས་ཅད་དང་རས་བལ་ལ་སོགས་
པ་རྫས་ཐམས་ཅད་ལ་ཡང་དེ་བཞིན་དུ་རིག་པར་བྱའོ། །གལ་ཏེ་དེ་ཉིད་ཀྱི་ན་ཐེབ་དང་བཅས་པར་རོ་ཞེས་བྱ་བ་ནི། དགེ་འདུན་མངའ་བའི་འབྲས་ལ་སོགས་པ་ལས་གལ་ཏེ་དེ་ཉིད་ཀྱི་དགེ་འདུན་གྱི་བཤོས་ཀྱི་ཕྱིར་ཉོ་བར་བྱེད་ན་དེ་ལ་ཐེབ་དང་བཅས་པར་བསྐྱེད་དེ། སྦྱིན་པར་བྱའི་རིན་ཐང་བསྙམས་
ཏེ་སྦྱིན་པར་མི་བྱའོ། །ཟད་ན་དགེ་འདུན་གྱིས་ཉོ་བར་བྱའོ་ཞེས་བྱ་བ་ནི། དགེ་འདུན་གྱི་འབྲས་ལ་སོགས་པ་ཟད་ན། དགེ་འདུན་གྱིས་ཀྱང་འབྲས་ལ་སོགས་པ་གཞན་ལས་ཉོ་བར་བྱ་བའོ། །སར་པ་ཡང་ངོ་ཞེས་བྱ་བ་ནི་དགེ་འདུན་གྱིས་འབྲས་ལ་སོགས་པ་འབྲུ་སར་པ་ཡང་ཉོ་བར་བྱའོ།། །།
བམ་པོ་ཉི་ཤུ་པ། གལ་ཏེ་སྲོག་ཆགས་མེད་ན་རྙིང་པ་བཙོང་བར་བྱའོ་ཞེས་བྱ་བ་ནི། འབྲས་ལ་སོགས་པ་རྙིང་པ་དག་ལ་གལ་ཏེ་སྲོག་ཆགས་མེད་ན་རྙིང་པ་དེ་བཙོངས་ནས་སར་པ་ཉོ་བར་བྱའོ། །རིན་ཐང་མི་གདབ་བོ་ཞེས་བྱ་བ་ནི། རྫས་འདིའི་རིན་ཐང་འདི་ཙམ་མོ་ཞེས་དེ་རང་གིས་གདབ་
པར་མི་བྱའོ་ཞེས་བྱ་བའི་ཐ་ཚིག་གོ། །ཁྱིམ་པའི་ཉོ་ཚོང་དག་ཏུ་ལག་གཞུག་པར་མི་བྱའོ་ཞེས་བྱ་བ་ནི། ཁྱིམ་པའི་ཉོ་ཚོང་བྱེད་པ་དག་གི་ནང་དུ་དགེ་སློང་གིས་ལག་གཞུག་པར་མི་བྱ་སྟེ། དགེ་སློང་དེས་དེ་དག་ཏུ་གཏོགས་འདོད་དང་བར་ཚངས་མི་བྱ་བའོ། །རང་གི་ཆོས་གོས་ལ་སོགས་པ་དག་ཇི་
ལྟར་ཉོ་བར་བྱ་ཞེ་ན། དེའི་ཕྱིར་ཁྱིམ་པ་ཉོར་གཞུག་གོ་ཞེས་བྱ་བ་སྨྲས་ཏེ། ཆོས་གོས་ལ་སོགས་པ་དག་ཁྱིམ་པ་ཉོར་གཞུག་པར་བྱའོ། །གལ་ཏེ་ཁྱིམ་པ་མེད་ན་དེའི་ཚེ་སུས་ཉོ་བར་བྱ་ཞེ་ན། དེའི་ཕྱིར་མེད་ན་ལན་གསུམ་གྱི་བར་དུ་ཚིག་བརྗོད་པར་བྱའོ་ཞེས་བྱ་བ་སྨྲས་ཏེ། གལ་ཏེ་ཁྱིམ་པ་མེད་ན་དེའི་ཚེ་
དགེ་སློང་དེས་རང་གི་རྫས་དེའི་རིན་ཐང་ངེས་པར་གཅད་པར་བྱ་ཞིང་ལན་གསུམ་གྱི་བར་དུ་དྲི་བའི་ཚིག་བརྗོད་པར་བྱ་སྟེ། རིན་འདི་ཙམ་གྱིས་བྱིན་ཅིག་ཅེས་ལན་གསུམ་བརྗོད་པར་བྱའོ་ཞེས་བྱ་བའི་ཐ་ཚིག་གོ། །ཟོང་ལ་རྩིག་པ་ནི་གཞན་གྱི་དོན་དུ་ཡང་མི་བྱ་སྟེ། དཀོན་མཆོག་གསུམ་ནི་མ་

གཏོགས་སོ་ཞེས་བྱ་བ་ལ། ཟོང་ཞེས་བྱ་བ་ནི། ཀ་ཀ་ནི་དང་བ་རཱ་ཏ་ཀ་ལ་སོགས་པའོ། །རྩེག་པ་ཞེས་བྱ་བ་ནི། ཉོ་བར་བྱེད་པའི་ཚེ་ན་ཅུང་ཟད་ཅུང་ཟད་བསྐྱེད་པ་དང་འཚོང་བར་བྱེད་པའི་ཚེ་ན་ཅུང་ཟད་ཅུང་ཟད་འབྲི་བར་བྱེད་པ་སྟེ། དེ་ནི་ཟོང་ལ་རྩེག་པ་བྱེད་པ་ཡིན་པར་གྲགས་སོ། །དེའི་
ཕྱིར་དེ་ནི་གཞན་གྱི་དོན་དུ་ཡང་མི་བྱ་ན་རང་གི་དོན་དུ་ལྟ་སྨོས་ཀྱང་ཅི་དགོས། དེ་ལྟར་ན་སྤྱིར་བཏང་བ་བྱས་ནས། དམིགས་ཀྱིས་བསལ་བ་བསྟན་པའི་ཕྱིར། དཀོན་མཆོག་གསུམ་ནི་མ་གཏོགས་སོ་ཞེས་བྱ་བ་སྨྲས་ཏེ། དཀོན་མཆོག་གསུམ་གྱི་དོན་དུ་ནི་ཟོང་ལ་བརྩེག་པར་བྱའོ་ཞེས་བྱ་བའི་ཐ་
ཚིག་གོ། །གཏའ་གཞུག་པར་མི་བྱའོ་ཞེས་བྱ་བ་ལ། གཏའ་ཞེས་བྱ་བ་ནི། གལ་ཏེ་དེ་ཁོ་ན་ལྟ་བུ་མ་ཡིན་ན་ངས་ཀཱར་ཥཱ་པ་ཎ་ལྔ་སྦྱིན་པར་བྱའོ་ཞེས་ཡལ་ཟུག་འཁྲས་པ་མ་ཐུབ་སྟེ་ཡལ་བ་ན་ཞྭ་ལ་སོགས་པའི་རྫས་དེའི་གཏར་འཇོག་པ་སྟེ། དེ་ལྟ་བུའི་གཏའ་གཞུག་པར་མི་བྱའོ། །འདིར་གཞུང་
ནི་དྲུག་སྡེ་དག་ཡལ་ཟུག་འཁྲ་ཞིང་ལྷུང་བཟེད་ལ་སོགས་པ་གཏར་འཇུད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་ཡལ་ཟུག་འཁྲ་ཞིང་གཏའ་གཞུག་པར་མི་བྱའོ། །དགེ་སློང་ཡལ་ཟུག་འཁྲ་ཞིང་གཏའ་འཇུད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །
དགེ་འདུན་གྱི་སྦྱིན་པར་བྱའོ་ཞེས་སྨྲས་ན། དེ་ལ་ཇི་ལྟར་སྦྱིན་པར་བྱ། སུས་རྗེས་སུ་སྦྱིན་པར་བྱ་ཞེ་ན། དེའི་ཕྱིར་དགེ་འདུན་གྱིས་རྫས་དེ་སྤོགས་པ་ལ་དགེ་འདུན་གྱི་ལས་བྱེད་པ་ལས་གཏད་དོ་ཞེས་བྱ་བ་སྨྲས་ཏེ། དགེ་འདུན་གྱིས་དབྱིག་ལ་སོགས་པའི་རྫས་དེ་ཉོ་བ་ལ་སོགས་པའི་སྤྱོད་པས་དགེ་
འདུན་གྱི་རྙེད་པ་བསྒྲུབ་པར་བྱའོ་ཞེས་སྤོགས་བྱེད་ཅིང་འབད་པའི་དགེ་སློང་སྤོགས་པ་ལ་གཏད་པར་བྱའོ། །ཅི་དགེ་འདུན་གྱིས་རང་གི་དབྱིག་ལ་སོགས་པ་སྤོགས་པ་ལ་གཏད་པར་བྱའམ་ཞེ་ན་མ་ཡིན་ཏེ། དེའི་ཕྱིར་དགེ་འདུན་གྱི་ལས་བྱེད་པ་ལ་གཏད་དོ་ཞེས་བྱ་བ་སྨྲས་ཏེ། དགེ་འདུན་གྱི་ལས་
བྱེད་པ་ཞེས་བྱ་བ་དམ་གཞག་པ་ལ་སོགས་པ་ལས་སོ། །འདི་སྐད་བསྟན་ཏེ། དགེ་འདུན་མངའ་བདག་ཏུ་གྱུར་པས་དགེ་འདུན་གྱི་ལས་བྱེད་པ་ལ་དགེ་སློང་སྤོགས་པ་འདི་ལ་དབྱིག་ལ་སོགས་པ་ཕོག་ཤིག་ཅེས་བཀའ་སྩལ་པར་བྱ་ཞིང་། དམ་གཞག་པ་ལ་སོགས་པ་དེས་དགེ་སློང་སྤོགས་པ་

དེ་ལ་དབྱིག་ལ་སོགས་པ་གཏད་པར་བྱ་སྟེ། དགེ་སློང་སྤོགས་པ་དེས་ཆོས་བཞིན་ཚུལ་བཞིན་དུ་དགེ་འདུན་གྱི་རྙེད་པ་བསྒྲུབ་པར་བྱའོ། །འདི་མན་ཆད་ནི་དགེ་སློང་སྤོགས་པ་དེའི་བྱ་བ་བརྗོད་པར་བྱའོ། །རྒན་རབས་རྒན་རབས་དག་ལ་མ་ཞུས་པར་དགེ་འདུན་གྱི་དོན་
དུ་བརྩོན་པར་མི་བྱའོ་ཞེས་བྱ་བ་ནི། དགེ་སློང་སྤོགས་པ་དེས་དགེ་སློང་རྒན་རབས་རྒན་རབས་དག་ལ་མ་ཞུས་པར་དགེ་འདུན་གྱི་དོན་དུ་བརྩོན་པར་མི་བྱ་བའོ། །དེའི་ཚིག་ཡི་གེ་བྲི་བའི་དམ་གཞག་ལ་ནན་ཏན་བྱའོ་ཞེས་བྱ་བ་ནི། དགེ་སློང་སྤོགས་པ་དེས་དབྱིག་ལ་སོགས་པ་མནོས་པ་དང་།
བསབ་པ་དེའི་ཚིག་ཡི་གེ་བྲི་བའི་དམ་གཞག་ལ་ནན་ཏན་བྱ་བའོ། །འདི་སྐད་བསྟན་ཏེ། གང་གི་ཚེ་དགེ་སློང་སྤོགས་པ་དེས་དགེ་འདུན་གྱི་ལས་བྱེད་པ་ལས་དབྱིག་ལ་སོགས་པ་མནོས་པ་དེའི་ཚེ་དེ་མ་ཐག་ཁོ་ནར་ཚིག་ཡི་གེར་བྲི་བར་བྱ་སྟེ། དུས་ཆེ་གེ་མོ་ཞིག་གི་ཚེ་དགེ་འདུན་དང་དགེ་འདུན་གྱི་
ལས་བྱེད་པ་ཆེ་གེ་མོ་དང་། ཞལ་ཏ་བྱེད་པ་ཆེ་གེ་མོས་བདག་ལ་རྫས་འདི་ཙམ་ཞིག་གཏད་པ་ལས་བདག་གིས་དུས་ཆེ་གེ་མོའི་ཚེ་རྫས་དེས་དངོས་པོ་འདི་ལྟ་བུ་ཞིག་རིན་ཐང་འདི་ཙམ་གྱིས་ཉོས་ནས་ཡང་དུས་ཆེ་གེ་མོའི་ཚེ་དངོས་པོ་དེ་ཉིད་རིན་ཐང་འདི་ཙམ་ཞིག་ཏུ་བཙོངས་ཏེ། དེ་ལས་སྐྱེད་
འདི་ཙམ་ཞིག་བྱུང་ནས། དེ་ཡང་དེའི་ཚེ་དགེ་འདུན་གྱི་ལས་མང་ཆེ་གེ་མོ་ཞིག་ཏུ་སྤྱད་དོ་ཞེས་བྱ་བ་ལ་སོགས་པའི་ཚིག་ཡི་གེར་བྲི་བའི་དམ་གཞག་ལ་དགེ་སློང་དེས་ནན་ཏན་བྱའོ། །དེ་དག་ཐམས་ཅད་ནི་གཞན་གྱི་ཕྱར་ཀའི་སྐབས་བསལ་བའི་ཕྱིར་དང་། བདག་ཉིད་ཀྱིས་དྲན་པར་བྱ་བའི་ཕྱིར་
དང་། འགྱོད་པ་མི་བསྐྱེད་པར་བྱ་བའི་ཕྱིར་རོ། །ཉོ་ཚོང་བྱེད་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ལྷུང་བཟེད་འཆང་བའི་སྤང་བ་བརྗོད་པར་བྱ་སྟེ། དེའི་ཕྱིར་ལྷུང་བཟེད་ཀྱིའོ་ཞེས་བྱ་བ་སྨྲས་ཏེ། བྱིན་གྱིས་མ་བརླབས་པའིའོ་ཞེས་བྱ་བར་སྦྱར་རོ། །སྔར་འཆང་བའི་
སྤང་བའི་སྐབས་སུ་ཞག་བཅུར་གོས་འཆང་བར་གཏོགས་པའི་རྣམ་པ་བསྟན་པ་གང་ཡིན་པ་དེ་ཉིད་འདིར་ཡང་སྦྱར་བར་བྱ་སྟེ། སྔར་གོས་ལའོ་ཞེས་བྱ་བ་སྨོས་པའི་གནས་སུ་འདིར་ལྷུང་བཟེད་ཀྱིའོ་ཞེས་བྱ་བ་གཞུག་པར་བྱའོ། །རྣམ་པར་དབྱེ་བ་ཐ་དད་དུ་ཟིན་ཀྱང་དོན་ལ་ཐ་དད་པ་འགའ་

ཡང་མི་འབྱུང་སྟེ། འདི་ལྟར་འདིར་ནི་ཡུལ་དང་ཡུལ་ཅན་གྱི་འབྲེལ་པས་ལྷུང་བཟེད་ཀྱིའོ་ཞེས་སྨོས་པར་རིག་པར་བྱའོ། །དཔེར་ན་སྔར་གོས་ལའོ་ཞེས་སྨོས་པ་ཡུལ་དུ་གྱུར་པ་ལ་རང་གི་ཉིད་དོ་ཞེས་བྱ་བ་གང་ཡིན་པ་དེ་ཡོད་ནའོ་ཞེས་བྱ་བ་དང་འདྲ་བར་ལྷུང་བཟེད་ཀྱིའོ་ཞེས་བྱ་བ་ཡུལ་དུ་གྱུར་
པ་ལ་ཡང་རང་གི་ཉིད་དོ་ཞེས་བྱ་བ་གང་ཡིན་པ་དེ་ཡོད་ནའོ་ཞེས་བྱ་བ་དང་འབྲེལ་པས་ན་དེའི་ཕྱིར་དོན་འདྲ་བ་ཉིད་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ལྷུང་བཟེད་བྱིན་གྱིས་མ་བརླབས་པ་དང་། བྱིན་གྱིས་བརླབས་པ་ཡོད་ནའོ་ཞེས་བྱ་བ་དང་། རང་གི་ཉིད་དོ་ཞེས་བྱ་བ་
དང་། ཞག་བཅུར་རྗེས་སུ་ཞུགས་པ་ཉིད་དོ་ཞེས་བྱ་བ་དང་། གཞན་གྱི་ཉི་མའི་དང་པོ་ལའོ་ཞེས་བྱ་བ་དང་། འདི་ལ་གཞན་ཡོད་ན་བྱིན་གྱིས་མ་བརླབས་པ་དེའི་ཤན་ཚུན་ཆད་ནས་སོ་ཞེས་བྱ་བར་སྦྱར་ཏེ། ཚིག་དེ་དག་ནི་སྔར་གོས་འཆང་བའི་སྤང་བའི་སྐབས་སུ་བཤད་ཟིན་ཏོ།། །།
རབ་ཏུ་བྱུང་བ་ལ་ལྟོས་པའི་དོན་ཉིད་དུ་ངེས་པར་བྱས་པ་ནི་སྤངས་པ་ཉིད་ཡིན་ནོ་ཞེས་བྱ་བ་ནི། རབ་ཏུ་བྱུང་བ་ལ་ལྟོས་པའི་དོན་ཉིད་དུ་ལྷུང་བཟེད་བསྔོས་ཤིང་ངེས་པར་བྱས་པ་སྟེ། གལ་ཏེ་དགེ་ཚུལ་ཕྱིས་འབྱུང་བར་འགྱུར་བ་དེ་ལ་སྦྱིན་པར་བྱའོ་ཞེས་རབ་ཏུ་འབྱུང་བ་ལ་ལྟོས་པའི་དོན་ཉིད་དུ་ལྷུང་
བཟེད་བསྔོས་ཤིང་ངེས་པར་བྱས་པ་གང་ཡིན་པ་དེ་ནི་སྤངས་པ་ཉིད་ཡིན་པས་དེ་འཆང་ཡང་སྤང་བར་མི་འགྱུར་རོ་ཞེས་བྱ་བའི་ཐ་ཚིག་གོ། །སྐྱ་བ་དང་དཀར་བ་དང་ཆེ་བ་རྣམས་ནི་རུང་བ་ཉིད་མ་ཡིན་ནོ་ཞེས་བྱ་བ་ནི། ལྷུང་བཟེད་སྐྱ་བ་དང་། དཀར་བ་དང་ཆེ་བ་རྣམས་ནི་རུང་བ་ཉིད་མ་ཡིན་ཏེ། རུང་བ་
ཉིད་མ་ཡིན་པའི་ཕྱིར་བྱིན་གྱིས་བརླབ་པར་བྱ་བ་མ་ཡིན་པས་དེ་འཆང་ན་ཉེས་བྱས་སོ། །མ་ཚོས་པ་ཡང་ཆུང་ངུ་ཉིད་ཡིན་ནོ་ཞེས་བྱ་བ་ལ། རུང་བ་ཉིད་མ་ཡིན་ནོ་ཞེས་བྱ་བའི་རྗེས་བསྙགས་པའི་ཕྱིར། ཡང་ཞེས་བྱ་བའི་སྒྲ་སྨོས་སོ། །ཇི་ལྟར་ལྷུང་བཟེད་ཆུང་ངུས་ལྷུང་བཟེད་ཀྱི་བྱ་བ་བྱེད་མི་ནུས་པ་
དེ་བཞིན་དུ་ལྷུང་བཟེད་མ་ཚོས་པ་ཡང་དོན་དེ་དང་འདྲ་བས་ཆུང་ངུ་ཉིད་ཅེས་སྨོས་ཏེ། ལྷུང་བཟེད་ནག་པོར་གྱུར་ཀྱང་མ་ཚོས་ན་ཆུང་ངུ་ཉིད་ཀྱང་རུང་བ་མ་ཡིན་པ་ཉིད་ཡིན་པར་རིག་པར་བྱའོ་ཞེས་བྱ་བའི་ཐ་ཚིག་གོ། །འདིར་མདོ་དེ་གཉིས་ཀྱི་གཞུང་ནི་ཞུ་བ་ལས་ལྷུང་བཟེད་མ་ཚོས་པ་འཆང་ན་ཉེས་

བྱས་སོ། །དེ་བཞིན་དུ་ལྷུང་བཟེད་སྐྱ་བོ་དང་། ལྷུང་བཟེད་དཀར་པོ་དང་། ལྷུང་བཟེད་ཆེན་པོ་འཆང་ན་ཉེས་བྱས་སོ་ཞེས་གསུངས་སོ། །འདི་ལྟར་རྣམ་པར་འབྱེད་པ་ལས་ལྷུང་བཟེད་ཆུང་ངུ་འཆང་བ་ལ་ལྟུང་བ་མེད་དོ་ཞེས་བྱ་བ་ལ་སོགས་པ་གསུངས་པ་དེ་ནི་སྨན་
ཕོར་དུ་ཡོངས་སུ་སྤྱད་པའི་བསམ་པས་འཆང་ན་དེ་ལ་ལྷུང་བ་མེད་པར་གསུངས་པ་ཡིན་གྱི། འདིར་ནི་ལྷུང་བཟེད་འཆང་བའི་གནས་སྐབས་དང་། ལྷུང་བཟེད་མེད་པའི་གནས་སྐབས་སུ་དེ་དག་ལྷུང་བཟེད་ཀྱི་དོན་དུ་འཆང་བ་ཉིད་ན་ཉེས་བྱས་སུ་གསུངས་པ་ཡིན་ནོ། །ལྷུང་བཟེད་
ཆུང་ངུ་གཅིག་ལ་ནི་ཉེས་པ་མེད་དོ་ཞེས་བྱ་བ་ནི། ལྷུང་བཟེད་ཆུང་ངུ་གཅིག་ལྷག་པར་འཆང་བ་ལ་ནི་ཉེས་པ་མེད་པ་ཉིད་དུ་རིག་པར་བྱ་སྟེ། འཇིགས་པ་དང་བཅས་པ་ཉིད་དུ་ལྷུང་བཟེད་ཆུང་ངུས་ལྗོངས་རྒྱུར་འགྲོ་བར་བྱའོ་ཞེས་གསུངས་པའི་ཕྱིར་ཏེ། གལ་ཏེ་འཆང་བར་མི་བྱ་ན་ལྷུང་བཟེད་ཆུང་
ངུས་ཇི་ལྟར་འགྲོ་བར་བྱ་ཞེས་བསམས་པ་ཡིན་ནོ། །ལྷུང་བཟེད་འཆང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ལྷུང་བཟེད་ལྷག་པ་ཚོལ་བའི་སྤང་བ་བརྗོད་པར་བྱ་སྟེ། ཚོལ་བ་དེ་ཡང་ཆགས་པའི་དབང་ལས་འབྱུང་བས་དེའི་ཕྱིར་སྤྱིར་འདི་བརྗོད་པར་བྱ་སྟེ། ཧ་ཅང་ཆགས་
པར་མི་བྱའོ་ཞེས་བྱ་བ་ནི། དགེ་སློང་གིས་དངོས་པོ་ཐམས་ཅད་ལ་ཧ་ཅང་ཆགས་པར་མི་བྱ་བ་སྟེ། ཆགས་པའི་ཕྱིར་འདིར་གཞུང་ནི་གནས་མལ་གྱི་གཞིར་ཉེ་དགའི་སྐབས་སུ་གསུངས་པ་ཡིན་ནོ། །ཡོ་བྱད་ལ་ཧ་ཅང་ལྷག་པར་ཆགས་པར་མི་བྱའོ་ཞེས་བྱ་བ་ནི་ལྷུང་བཟེད་ལ་སོགས་པ་ཡོ་བྱད་ལ་དགེ་སློང་
གིས་ཧ་ཅང་ལྷག་པར་ཆགས་པ་ཞེས་བྱ་བ་ནི་ཧ་ཅང་ཞེན་པར་མི་བྱ་བ་སྟེ། འདིར་ཞེན་པར་མི་བྱའོ་ཞེས་བྱ་བའི་ཐ་ཚིག་གོ། །གང་ལ་ཞེན་པ་དེ་བཅང་བར་མི་བྱའོ་ཞེས་བྱ་བ་ལ། ཞེན་པ་ཞེས་བྱ་བ་ནི། ལྷག་པར་ཆགས་པ་སྟེ། ལྷུང་བཟེད་ལ་སོགས་པའི་དངོས་པོ་གང་ལ་ལྷག་པར་ཆགས་པ་འབྱུང་
བ་དེ་བཅང་བར་མི་བྱ་སྟེ། ཡོངས་སུ་སྤང་བར་བྱའོ་ཞེས་བྱ་བའི་ཐ་ཚིག་གོ། །མདོ་དེ་གཉིས་ནི་གོས་ཀྱི་གཞི་ལས་འབྱུང་སྟེ། འདིར་གཞུང་ནི་དེ་ལྟ་བས་ན་དགེ་སློང་གིས་ཡོ་བྱད་ལ་ཧ་ཅང་ལྷག་པར་ཆགས་པ་བསྐྱེད་པར་མི་བྱའོ། །དངོས་པོ་གང་ལ་ཧ་ཅང་ལྷག་པར་ཆགས་པ་འབྱུང་བ་དེ་

ཡོངས་སུ་སྤང་བར་བྱ་སྟེ། ཡོངས་སུ་མི་སྤོང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ལྷུང་བཟེད་ཀྱང་མེད་ན་བསླང་བར་བྱའོ་ཞེས་བྱ་བ་ནི། སློང་བ་དགག་པའོ་གནས་འབྱུང་བ་བཟློག་པའི་ཕྱིར་ཚིག་འདི་བྱས་ཏེ། ལྷུང་བཟེད་ལ་སོགས་པའི་དངོས་པོ་མེད་ན་ལྷུང་
བཟེད་ཀྱང་བསླང་བར་བྱའོ། །ཀྱང་ཞེས་བྱ་བའི་སྒྲས་ནི་ཆོས་གོས་ལ་སོགས་པ་ཡང་མེད་ན་བསླང་བར་བྱ་བ་བསྡུའོ། །དངོས་པོ་གང་ཡོད་ན་ལྷུང་བཟེད་ཚོལ་བ་ལས་འབྱུང་བའི་ཁ་ན་མ་ཐོ་བར་འགྱུར་ཞེ་ན། དེའི་ཕྱིར་དེ་ཡོད་པ་ཉིད་ནའོ་ཞེས་བྱ་བ་སྨྲས་ཏེ། ཚོལ་བར་བྱེད་པ་དེ་ལ་ལྷུང་བཟེད་
དེ་ཡོད་པ་ཉིད་དེ་བདོག་པ་ཉིད་ཡིན་ན་ལྟུང་བ་འདི་འབྱུང་ངོ་། །ཇི་ལྟ་བུ་ཞིག་ཡོད་པ་ཉིད་ན། དེའི་ཕྱིར་ལྷན་པ་བཞི་མན་ཆད་ནས་དེ་དག་རུང་ཞིང་ཡོངས་སུ་སྤྱད་བཟོད་པའོ་ཞེས་བྱ་བ་སྨྲས་ཏེ། ལྷན་པ་བཞི་མན་ཆད་ནས་དེ་དག་རུང་ཞིང་ཞེས་བྱ་བ་ནི། ལྷན་པ་བཞི་མན་ཆད་ནས་གླན་ཟིན་པ་ནས་དེ་
དག་གླན་དུ་རུང་བ་སྟེ། ལྷུང་བཟེད་སྐྱོན་མེད་པ་ཚུན་ཆད་ལྷན་པ་བཞི་མན་ཆད་ནས་གླན་པ་དང་། ལྷན་པ་བཞི་གླན་དུ་རུང་བའི་བར་གྱི་ལྷུང་བཟེད་གང་ཡིན་པ་དེ་ཡོངས་སུ་ལོངས་སྤྱད་པར་བཟོད་པའི་ལྷུང་བཟེད་ཀྱང་ཡིན་པ་དེ་ཡོད་པ་ཉིད་ན་ལྷུང་བཟེད་གཞན་ཚོལ་བར་བྱེད་ན། དེ་ལས་བྱུང་བའི་
ཁ་ན་མ་ཐོ་བར་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ལྷུང་བཟེད་སྐྱོན་མེད་པ་ཡོངས་སུ་ལོངས་སྤྱད་པར་བཟོད་པས་སྙི་བ་ཉིད་ལ་སོགས་པའི་སྐྱོན་དང་བྲལ་བ་གང་ཡིན་པ་དེ་དང་ལྷན་པ་གཅིག་གམ། གཉིས་སམ། གསུམ་མམ། བཞིས་གླན་ཟིན་པ་གང་དག་
ཡིན་པ་དང་། ལྷན་པ་གཅིག་གམ། གཉིས་སམ། གསུམ་མམ། བཞིས་གླན་དུ་རུང་ཞིང་བྱེད་དུ་གཞུག་ནུས་པ་གང་དག་ཡིན་པ་དེ་དག་གི་ནང་ནས་ལྷུང་བཟེད་ཡོངས་སུ་ལོངས་སྤྱད་པར་བཟོད་པ་གང་ཡང་རུང་བ་ཞིག་ཡོད་ཅིང་བདོག་བཞིན་དུ་ལྷུང་བཟེད་གཞན་ཚོལ་བར་བྱེད་ན། དེ་ལ་དེ་ལས་བྱུང་
བ་ཁ་ན་མ་ཐོ་བར་འགྱུར་རོ། །ད་ནི་འདི་བརྗོད་པར་བྱ་སྟེ། ལྷུང་བཟེད་དེ་ཡོད་པ་ཉིད་ན་ཅི་ཞིག་ལྟག་པར་སྤྱད་ན་ཁ་ན་ཐོ་བ་ཅི་འདྲ་བར་འགྱུར་ཞེ་ན། དེའི་ཕྱིར་ཁྱིམ་པ་ཉེ་དུ་མ་ཡིན་པ་ལས་བསླང་བས་ཡོངས་སུ་བཙལ་ནའོ་ཞེས་བྱ་བ་སྨྲས་ཏེ། ཁྱིམ་པ་ཉེ་དུ་མ་ཡིན་པ་ལས་བསླངས་ཏེ་ཡོངས་སུ་

བཙལ་ན་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། གང་ལས་ལྷུང་བཟེད་ཡོངས་སུ་ཚོལ་བར་བྱེད་པ་དེ་གལ་ཏེ་ཁྱིམ་པ་ཡང་ཡིན་ལ་ཉེ་དུ་མ་ཡིན་པ་ཡང་མ་ཡིན་ཞིང་། དེ་ལས་ངག་གི་རྣམ་པར་རིག་བྱེད་ཀྱིས་བསླང་བས་ལྷུང་བཟེད་བཙལ་ཏེ་ཐོབ་ན་དེ་ལས་བྱུང་
བའི་ཁ་ན་མ་ཐོ་བར་འགྱུར་རོ། །དེ་ཉིད་བསླབ་པའི་གཞི་གཞན་ལ་ཡང་འདྲ་བར་བསྟན་པའི་ཕྱིར། དེ་གཉིས་ནི་འོག་མ་གཉིས་ལ་ཡང་ངོ་ཞེས་བྱ་བ་སྨྲས་ཏེ། འདིའི་འོག་མ་བསླབ་པའི་གཞི་གཉིས་པོ་གང་དག་ཡིན་པ་དེ་དག་ལ་ཡང་ཉེ་དུ་མ་ཡིན་པ་དང་། ཁྱིམ་པ་ཉིད་ཅེས་བྱ་བ་འདི་གཉིས་
རིག་པར་བྱའོ་ཞེས་བྱ་བའི་ཐ་ཚིག་གོ། །འོག་མ་གཉིས་ལ་ཡང་ངོ་ཞེས་སྤྱིར་བསྟན་པ་དེའི་བྱེ་བྲག་སྤྱིར་བསྟན་པའི་ཕྱིར། ཐ་ག་པ་དང་སྦྱིན་པ་དང་གཞན་དག་ལའོ་ཞེས་བྱ་བ་སྨྲས་ཏེ། ཐ་ག་པ་དང་། སྦྱིན་པ་དང་། གཞན་ནི་ཐ་ག་པ་དང་། སྦྱིན་པ་དང་། གཞན་དག་སྟེ། དེ་དག་ཉེ་དུ་མ་ཡིན་
པ་དང་ཁྱིམ་པ་དག་ལའོ། །འདི་ལྟར་གཙུག་ལག་ལས་གཞན་གྱིས་ཀྱང་ངོ་ཞེས་གསུངས་མོད་ཀྱི། འོན་ཀྱང་གཞན་ཞེས་བྱ་བའི་སྒྲས་དེ་གཟུང་བར་རིག་པར་བྱ་སྟེ། དེ་ལྟར་ཡང་དེ་ལས་རིན་མེད་པར་ཚོལ་བས་ཕོ་ཉ་ལ་སོགས་པ་གཞན་ལ་འཐག་ཏུ་བཅུག་ན་ཞེས་གསུངས་པ་དེའི་དོན་གཞན་
ཞེས་སྨོས་པས་བསྡུས་པར་རིག་པར་བྱའོ། །འདི་སྐད་བསྟན་ཏེ། ཐ་ག་པ་འཐག་པ་དང་། སྦྱིན་པར་བྱེད་པ་ཁྱིམ་བདག་ལ་སོགས་པ་ལས་གཞན་པའི་ཕོ་ཉ་ལ་སོགས་པ་ཉེ་དུ་མ་ཡིན་པ་ཉིད་དང་། ཁྱིམ་པ་ཉིད་ཡིན་ན་ལྟུང་བ་འོག་མ་གཉིས་སུ་འགྱུར་རོ་ཞེས་བྱ་བའི་ཐ་ཚིག་གོ། །ཉེ་དུ་མ་ཡིན་པ་
ལྟར་ཉེ་དུ་ལས་ནི་སྐྱེད་དང་ལྷུང་བཟེད་གཉིས་མ་གཏོགས་པ་ལ་ཉེས་པ་མེད་དོ་ཞེས་བྱ་བ་ལ། ཉེ་དུ་མ་ཡིན་པ་ལྟར་ཞེས་བྱ་བ་དེ་ནི་ཉེ་དུ་མ་ཡིན་པའི་ཡུལ་ལ་ལྟུང་བ་རྣམ་པར་གཞག་པ་སྟེ། ཉེ་དུ་མ་ཡིན་པ་ལ་བསོད་པ་སློང་བ་ལ་སོགས་པའི་ཁ་ན་མ་ཐོ་བ་གང་ཡིན་པ་དེ་ཉེ་དུ་ལས་སློང་བར་བྱེད་ན་ཁ་ན་
མ་ཐོ་བའི་ཉེས་པར་མི་འགྱུར་བར་ཤེས་པར་བྱ་སྟེ། དོན་ནི་དེ་ཡིན་ནོ། །ཉེ་དུ་ལས་ནི་སྐྱེད་དང་ལྷུང་བཟེད་གཉིས་མ་གཏོགས་པ་ལ་ཉེས་པ་མེད་དོ་ཞེས་བྱ་བ་ནི། ཉེ་དུ་ལས་ཀྱང་སྐྱེད་ཀྱི་བསླབ་པའི་གཞི་ལ་སྤོགས་འདོད་པ་ཉིད་ཀྱིས་འདི་ལྟ་སྟེ། མངོན་མཚན་ཅན་གྱི་སྤྱོད་པ་དང་། ཉོ་

ཚོང་དག་གི་སྤྱོད་པ་དག་ལས་རྙེད་པ་གྲུབ་པ་དང་། ལྷུང་བཟེད་ཚོལ་བའི་བསླབ་པའི་གཞི་ལ་ལྷུང་བཟེད་ལྷག་པར་གྱུར་པའི་ཉེས་པ་ནི་འབྱུང་བར་འགྱུར་བ་ཉིད་ཡིན་ནོ། །དེ་ལས་གཞན་པ་ཐམས་ཅད་ལ་ནི་ཇི་ལྟར་ཉེ་དུ་མ་ཡིན་པ་ལས་ཉེས་པར་འགྱུར་བ་ལྟར་ཉེ་དུ་ལས་ཉེས་པ་མེད་པར་ཤེས་
པར་བྱའོ། །དེ་གཉིས་ཀྱང་ན་སྨད་པ་ཉིད་ཡིན་གྱི། དངོས་གཞིའི་ལྟུང་བར་ནི་མི་འགྱུར་རོ། །འདིར་གཞུང་ནི་རྣམ་པར་འབྱེད་པ་ལས་ཐ་ག་པ་ཉེ་དུས་ཆོས་གོས་འཐག་ན་ཉེ་དུ་ཡིན་ན་ལྟུང་བ་མེད་དོ་ཞེས་གསུངས་པ་གང་ཡིན་པ་དང་། གཅེར་བུ་པ་ལ་བཟའ་བ་ལ་སོགས་པ་སྦྱིན་ན་ཉེ་དུ་
ཡིན་ན་ལྟུང་བ་མེད་དོ་ཞེས་གསུངས་པ་གང་ཡིན་པ་དང་། ཞུ་བ་ལས་ཀྱང་ཉེ་དུ་ལས་ཟས་བསོད་པ་བླངས་ཏེ་རང་ཟ་བ་དང་། གཅེར་བུ་པ་ལ་སྦྱིན་ཞིང་སྡིག་པ་ཅན་གྱི་ལྟ་བའི་རྣམ་པ་ལས་དབྲལ་བར་འདོད་པས་སྦྱིན་པར་བྱེད་ན་ལྟུང་བ་མེད་དོ། །ཉེ་དུ་ཡིན་ན་ཡང་དེ་བཞིན་ནོ་ཞེས་གང་
གསུངས་པ་དེ་ཡིན་ནོ། །ཞར་ལས་བྱུང་བ་བསྟན་ནས་ཁྱིམ་པ་ཉེ་དུ་མ་ཡིན་པ་ལས་བསླང་བས་ཡོངས་སུ་བཙལ་ནའོ་ཞེས་གང་སྨྲས་པའི་ལྟུང་བ་དེའི་སྐབས་སུ་གཏོགས་པ་བསྟན་པའི་ཕྱིར་འདི་བརྗོད་པར་བྱ་སྟེ། ཉེས་བྱས་སོ་ཞེས་བྱ་བ་ནི་ལྷུང་བཟེད་ཚོལ་བ་ཙམ་ལས་ཉེས་བྱས་སུ་འགྱུར་བའོ། །
དེ་ལས་གྲུབ་ན་དངོས་གཞིའོ་ཞེས་བྱ་བ་ནི། ཁྱིམ་པ་ཉེ་དུ་མ་ཡིན་པ་དེ་ལས་བསླང་བས་ལྷུང་བཟེད་བཙལ་ཏེ་ལྷུང་བཟེད་ཐོབ་ན་དངོས་གཞིའི་ཁ་ན་མ་ཐོ་བར་འགྱུར་བའོ། །མེད་པ་ཉིད་ལས་ཡོད་པའི་བློ་ཅན་ལ་ནི་ན་སྨད་དོ་ཞེས་བྱ་བ་ལ། མེད་པ་ཉིད་ལ་ཞེས་བྱ་བ་ནི། ལྷུང་བཟེད་སྔ་མ་བྱིན་གྱིས་
བརླབ་ཏུ་རུང་བ་ཤོས་མེད་པ་ཉིད་ལ་སྟེ། ཆག་པའམ་སྟོར་བ་ལ་སོགས་པའི་ཉེས་པས་མེད་པར་གྱུར་པ་ལའོ། །ཡོད་པའི་བློ་ཅན་ལ་ནི་ཞེས་བྱ་བ་ནི། ཡོད་པའི་བློ་དང་བཅས་པ་ལ་སྟེ། བདག་ལ་ལྷུང་བཟེད་གཞན་ཡོད་དོ་སྙམ་པའི་བློ་གང་ལ་ཡོད་པ་ལའོ། །ན་སྨད་དོ་ཞེས་བྱ་བ་ནི། དེ་ལྟར་
དགེ་སློང་གང་ལྷུང་བཟེད་སྔ་མ་ཤོས་བྱིན་གྱིས་བརླབ་ཏུ་རུང་བ་ཤོས་མེད་བཞིན་དུ་བདག་ལ་ལྷུང་བཟེད་གཞན་ཡོད་དོ་སྙམ་པའི་བློ་ཡོད་ཅིང་དེའི་ཚེ། གལ་ཏེ་ལྷུང་བཟེད་གཞན་ཚོལ་བར་བྱེད་ན་དེ་ལ་ནི་དངོས་གཞིའི་ལྟུང་བ་ན་སྨད་པར་ཤེས་པར་བྱ་སྟེ། ཉེས་བྱས་སུ་འགྱུར་རོ་ཞེས་བྱ་བའི་ཐ་

ཚིག་གོ། །ལྷུང་བཟེད་བཙལ་བ་རྙེད་པའི་དུས་ན་སྔ་མ་ཤོས་དགེ་སློང་དེ་ལ་མེད་པའི་ཕྱིར་ལྷུང་བཟེད་ལྷག་པ་ཉིད་དུ་མི་འགྱུར་རོ། །འདིར་གཞུང་ནི་དགེ་སློང་གིས་ལྷུང་བཟེད་མཆིས་བཞིན་དུ་ལྷུང་བཟེད་གཞན་བླངས་པར་གྱུར་ལ་ལྟུང་བར་ཡང་མི་འགྱུར་བ་འགའ་
མཆིས་སམ། བཀའ་སྩལ་པ། ཡོད་དེ་གལ་ཏེ་བླངས་པ་དང་། སྔ་ཕྱི་མེད་པར་ལྷུང་བཟེད་ཆག་པར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །འདིར་སྤང་བ་མེད་པ་ལས་དགོངས་ནས་ལྟུང་བ་མེད་དོ་ཞེས་གསུངས་པ་ཡིན་པས། དེའི་ཕྱིར་སྦྱོར་བ་ལས་བྱུང་བའི་ཉེས་བྱས་ནི་དང་པོ་ཉིད་
ནས་བྱས་པ་ཡིན་ནོ། །དངོས་གཞིའི་དུས་ན་ནི་ལྷུང་བཟེད་སྔ་མ་ཆུད་ཟོས་པ་ཉིད་ཀྱི་ཕྱིར་ཉེས་བྱས་ཁོ་ནར་ཟད་དོ། །གལ་ཏེ་ཚོལ་བའི་དུས་ན་ཡང་ལྷུང་བཟེད་དེ་ཆུད་ཟོས་པར་གྱུར་ཟིན་ན་ནི། དེའི་ཚེ་ན་སྦྱོར་བའི་ལྟུང་བ་ཡང་ན་སྨད་པ་ཁོ་ནར་འགྱུར་རོ། །རང་གི་ཡོ་བྱད་དག་གིས་སོ་ཞེས་བྱ་
བ་ནི། ལྷུང་བཟེད་ཡོད་དུ་ཟིན་ན་ཡང་གལ་ཏེ་རང་གི་རིན་དུ་གྱུར་པའི་ཡོ་བྱད་དག་གིས་ལྷུང་བཟེད་གཞན་ཚོལ་ལམ་ཉོ་བར་བྱེད་ན་དེ་ལྟ་ན་ཡང་ལྟུང་བ་ན་སྨད་པར་རིག་པར་བྱ་སྟེ། བསླང་བས་བཙལ་བ་དང་ཐོབ་པ་མ་ཡིན་པའི་ཕྱིར་རོ། །དེ་དག་ཡོད་པ་ཉིད་ན་ཡང་ངོ་ཞེས་བྱ་བ་ནི། རང་གི་ཡོ་བྱད་
དག་ཅེས་བྱ་བར་སྦྱར་ཏེ། ལྷུང་བཟེད་ཀྱི་རིན་དུ་གྱུར་པ་རང་གི་ཡོ་བྱད་དག་ཡོད་ཅིང་བདོག་པ་ཉིད་ན་ལྷུང་བཟེད་མེད་ཀྱང་གལ་ཏེ་ལྷུང་བཟེད་རང་གི་ཡོ་བྱད་དག་གིས་ཉོ་བར་མི་བྱེད་པར་འདི་ལྟར་ལྷུང་བཟེད་དེ་སློང་བར་བྱེད་ན་དེ་ལ་ཡང་ལྟུང་བ་ན་སྨད་པར་རིག་པར་བྱ་སྟེ། སློང་བའི་ཚེ་ན་ནི་སྦྱོར་བ་ཞེས་བྱ་
བའི་ཉེས་བྱས་ཕྲ་མོར་འགྱུར་ལ། ཐོབ་ན་ནི་དངོས་གཞི་ཞེས་བྱ་བའི་ཉེས་བྱས་ཁོ་ནར་འགྱུར་རོ། །ཆོས་གོས་ལ་སོགས་པ་དག་ལ་ཡང་རིགས་པ་འདི་ཉིད་རིག་པར་བྱའོ། །བཟང་པོ་འདོད་པས་བརྗེ་ནའོ་ཞེས་བྱ་བ་ལ། ལྷུང་བཟེད་བཟང་པོ་འདོད་པ་ནི་ལྷུང་བཟེད་བཟང་པོ་འདོད་པ་སྟེ། ཨེ་
མའོ་ལྷུང་བཟེད་བཟང་པོ་མཛེས་པ་བདག་གི་ལྷུང་བཟེད་དུ་གྱུར་ཅིག་སྙམ་དུ་དེ་ལྟར་ཞུགས་པའི་འདོད་པ་གང་ཡིན་པ་དེ་ནི་བཟང་པོ་འདོད་པ་ཡིན་ནོ། །བཟང་པོ་འདོད་པ་དེས་བརྗེ་བའི་དོན་དུ་ལྷུང་བཟེད་བཙལ་ཞིང་དེ་སྔོན་དུ་བཏང་སྟེ། རྗེ་བར་བྱེད་ན་ལྟུང་བ་ན་སྨད་པར་ཤེས་པར་

བྱའོ། །འོ་ན་བརྗེ་བ་ལས་ལེན་ན་ལྟུང་བ་མེད་དོ་ཞེས་བྱ་བ་དེར་ལྟུང་བ་མེད་པར་མ་གསུངས་སམ་ཞེ་ན། བདེན་མོད་ཀྱི་འོན་ཀྱང་བཟང་པོ་འདོད་པ་མེད་པར་བརྗེ་བའི་དབང་དུ་བྱས་ཏེ་གསུངས་པ་ཡིན་ནོ། །འདིར་ལྟུང་བ་རྣམ་པར་གཞག་པ་ནི་འདི་ཡིན་ཏེ། ཁྱིམ་པ་ཉེ་དུ་མ་ཡིན་པ་ལས་བསླངས་ཏེ་
ཐོབ་ན་ནི་དངོས་གཞིའོ། །མ་བསླངས་པར་རིན་ལ་སོགས་པས་བཙལ་ན་ཉེ་དུ་ཡིན་ཡང་རུང་ཉེ་དུ་མ་ཡིན་ཡང་རུང་ཁྱིམ་པའམ་རབ་ཏུ་བྱུང་བ་ལས་ཐོབ་ན་ནི་ཉེས་བྱས་སོ། །བདག་པོ་མེད་པའི་ལྷུང་བཟེད་བཙལ་བ་ལས་གྲུབ་པ་གང་ཡིན་པ་དེ་ལ་ཡང་ཉེས་བྱས་སོ། །བཟང་པོ་འདོད་པས་སྔ་མ་
བརྗེས་ནས་གྲུབ་པ་གང་ཡིན་པ་དེ་ལ་ཡང་ཉེས་བྱས་སོ། །སྦྱོར་བ་ཐམས་ཅད་ལ་ཡང་ཉེས་བྱས་སོ། །བཟང་པོ་འདོད་པ་ཉིད་མེད་པར་ལྷུང་བཟེད་བརྗེ་བས་ལྷུང་བཟེད་གྲུབ་ན་ནི་ལྟུང་བ་མེད་དོ། །གང་དག་ལྷུང་བཟེད་ཚོལ་བ་ལས་བྱུང་བའི་ལྟུང་བ་ཐམས་ཅད་བཟང་པོ་འདོད་པ་ཉིད་ཡན་ལག་ཏུ་རྣམ་
པར་འཇོག་པར་བྱེད་པའི་བཟང་པོ་འདོད་པ་ཉིད་དེ་ལ་ནི། ཁྱིམ་པ་ཉེ་དུ་མ་ཡིན་པ་ཉིད་ལས་ལྷུང་བཟེད་ལྷག་པ་གྲུབ་པའི་དངོས་གཞི་ལ་ནི་སྤང་བར་འགྱུར་རོ། །སྦྱོར་བ་ལ་ནི་ཉེས་བྱས་སོ། །ཡན་ལག་གང་ཡང་རུང་བ་མ་ཚང་བ་ལ་ནི་དངོས་གཞི་ལ་ཉེས་བྱས་སོ། །སྦྱོར་བ་ལ་ནི་ཉེས་བྱས་ཕྲ་མོའོ། །
ཡན་ལག་ཏུ་མ་ཚང་བ་ལ་ནི་དངོས་གཞི་ལ་ཉེས་བྱས་ཕྲ་མོའོ། །སྦྱོར་བ་ལ་ནི་ཤིན་ཏུ་ཕྲ་མོའོ། །གལ་ཏེ་ལྷུང་བཟེད་དེ་ཉིད་ཞག་བཅུ་འདས་པར་གྱུར་ན་ནི་དེ་ལ་སྤང་བ་གཞན་ཅིག་ཀྱང་འབྱུང་བར་འགྱུར་ཏེ། བཤགས་པའི་དུས་ན་ཡང་ལྟུང་བ་སྤང་བ་གཉིས་བཤགས་པར་བྱ་དགོས་སོ། །ད་ནི་
སྤང་བ་བཤགས་པའི་སྦྱོར་བ་གཞན་དག་ལས་འདིའི་བཤགས་པའི་སྦྱོར་བའི་བྱེ་བྲག་བསྟན་པའི་ཕྱིར། འདི་ནི་དགེ་འདུན་ལ་སྤང་བའོ་ཞེས་བྱ་བ་སྨྲས་ཏེ། ལྷུང་བཟེད་ལྷག་པ་འདི་ནི་ཞེས་བྱ་བར་སྦྱར་རོ། །ཆོས་གོས་ལ་སོགས་པ་སྤང་བའི་རྫས་གཞན་ནི་གང་ཟག་ལ་སྤང་བར་བྱ་སྟེ། འདི་ལྟར་
ལྷུང་བཟེད་འབྲེལ་བ་མེད་པར་ནི་དགེ་འདུན་ཁོ་ན་ལས་འཐོབ་ཀྱི། གང་ཟག་ལས་མ་ཡིན་པས་དེའི་ཕྱིར་འདི་ནི་དགེ་འདུན་ཁོ་ན་ལ་སྤང་བར་བསྟན་ཏོ། །ཅི་ལྷུང་བཟེད་ཐམས་ཅད་དགེ་འདུན་ལ་སྤང་བར་བྱ་བ་ཡིན་ནམ་ཞེ་ན། མ་ཡིན་ཏེ་དེའི་ཕྱིར་དུ་མ་ཉིད་ཡིན་ན་མཆོག་ཏུ་འདོད་པ་གཅིག་

གོ་ཞེས་བྱ་བ་སྨྲས་ཏེ། ལྷུང་བཟེད་ལྷག་པ་དུ་མ་ཉིད་ཡིན་ན་དེ་དག་གི་ནང་ནས་ལྷུང་བཟེད་མཆོག་ཏུ་འདོད་པ་ཞེས་བྱ་བ་མཆོག་ཏུ་གདམས་པ་གཅིག་དགེ་འདུན་ལ་སྤང་བར་བྱ་བའོ། །འོ་ན་ལྷུང་བཟེད་ལྷག་མ་གཞན་ཇི་ལྟར་བྱ་ཞེ་ན། དེའི་ཕྱིར་གཞན་ནི་ཐམས་ཅད་
ཀྱི་ཐམས་ཅད་དུ་སྤང་བར་བྱ་བ་ཉིད་ཡིན་ནོ་ཞེས་བྱ་བ་སྨྲས་ཏེ། ལྷུང་བཟེད་གཞན་ནི་ཐམས་ཅད་ཀྱི་ཐམས་ཅད་ཁོ་ནར་སྤང་བར་བྱ་བ་ཉིད་ཡིན་གྱི། ཡང་ཕྱིར་བླང་བར་བྱ་བ་ནི་མ་ཡིན་ནོ། །འོ་ན་སུ་ལ་སྤང་བར་བྱ་བ་ཉིད་ཡིན་ཞེ་ན། དེའི་ཕྱིར་རབ་ཏུ་བྱུང་བ་འདི་པ་ལའོ་ཞེས་བྱ་བ་སྨྲས་ཏེ། རབ་
ཏུ་བྱུང་བ་འདི་གང་ལ་ཡོད་པ་དེ་ནི་རབ་ཏུ་བྱུང་བ་འདི་པ་སྟེ་དེ་ལའོ། །དགེ་ཚུལ་ལ་སོགས་པ་གང་ཟག་ཐམས་ཅད་ལ་སྤང་བར་བྱ་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ། །འདིར་གཞུང་ནི་ལྷུང་བཟེད་ལྷག་མ་རྣམས་ནི་དགེ་སློང་རྣམས་ལ་གོ་བར་བྱའོ་ཞེས་གསུངས་པ་ཡིན་ནོ། །དགེ་སློང་ཞེས་སྨོས་
པ་ནི་མཚོན་པ་ཙམ་དུ་ཟད་དེ། ཆོས་འདི་ལ་རབ་ཏུ་བྱུང་བ་ཐམས་ཅད་ཀྱང་སྤྱིར་བསྡུའོ། །ལྷུང་བཟེད་ལྷག་པོ་ཚོལ་བ་ལས་བྱུང་བའི་ལྟུང་བ་འབྱིན་པ་པོའི་དགེ་སློང་དེ་ལ་ལྷུང་བཟེད་གང་སྦྱིན་པར་བྱ་ཞེ་ན། དེའི་ཕྱིར་དེ་ལ་ཐ་ཆད་སྦྱིན་པར་བྱའོ་ཞེས་བྱ་བ་སྨྲས་ཏེ། དགེ་སློང་ཐམས་ཅད་ཀྱི་ལྷུང་
བཟེད་གང་དག་ཡིན་པ་དེ་དག་གི་ནང་ན་ལྷུང་བཟེད་ཐ་ཆད་གང་ཡིན་པ་ཐམས་ཅད་ཀྱི་ནང་ན་ངན་བསྙིགས་དེ་ལྟུང་བ་འབྱིན་པ་པོ་དེ་ལ་སྦྱིན་པར་བྱའི། སྤངས་པ་དེ་དག་ཉི་ཚེའི་ནང་ན་ཐ་ཆད་འབའ་ཞིག་ནི་མ་ཡིན་ནོ། །ཐ་ཆད་ཅེས་བྱ་བ་ནི་དགེ་འདུན་ཐམས་ཅད་ཀྱི་ལྷུང་བཟེད་དག་ལས་ཐ་ཆད་
གང་ཡིན་པ་སྟེ། དེ་ཉིད་དགེ་སློང་ལྟུང་བ་འབྱིན་པ་པོ་དེ་ལ་སྦྱིན་པར་བྱ་བ་ཉིད་ཡིན་ནོ། །ཐབས་གང་གིས་དགེ་འདུན་ལ་ཐ་ཆད་དེ་བསྙིག་པར་བྱ་ཞེ་ན། དེའི་ཕྱིར་བྲིམ་པས་བསྙིག་པར་བྱའོ་ཞེས་བྱ་བ་སྨྲས་ཏེ། སྤང་བའི་ལྷུང་བཟེད་དེ་བྲིམ་པས་དགེ་འདུན་ལས་ལྷུང་བཟེད་ཐ་ཆད་དེ་
བསྙིག་པར་བྱ་བའོ། །བྱེད་པ་པོ་ཅི་ལྟ་བུས་བྲིམ་པས་དགེ་འདུན་ལས་ལྷུང་བཟེད་ཐ་ཆད་དེ་བསྙིག་པར་བྱ་ཞེ་ན། དེའི་ཕྱིར་བསྐོས་པས་སོ་ཞེས་བྱ་བ་སྨྲས་ཏེ། གསོལ་བ་དང་གཉིས་ཀྱི་ལས་ཀྱིས་བསྐོས་པའི་དགེ་སློང་གིས་སོ། །དགེ་སློང་བསྐོས་པ་དེས་ལྷུང་བཟེད་བསྙིགས་

པའི་ཕྱིར་འདྲིམ་པ་ན་དེའི་ཀུན་དུ་སྤྱད་པ་དག་བསྟན་པའི་ཕྱིར། དེས་སང་དེ་བྱེད་པར་འགྱུར་བ་ན་ཚོགས་པའི་དུས་སུ་དགེ་འདུན་ལ་འཇལ་བར་བྱའོ་ཞེས་བྱ་བ་སྨྲས་ཏེ། བསྐོས་པའི་དགེ་སློང་དེས་སང་ཞེས་བྱ་བ་ཕྱི་དེ་ཉིན་པར་འདྲིམ་པར་དེ་བྱེད་པར་འགྱུར་བ་ན་དེས་དགོངས་ཀ་ཚུན་ཆད་དགེ་འདུན་
ནམ་ཚོགས་པའི་དུས་སུ་ཞེས་བྱ་བ་གང་གི་ཚེ་དགེ་འདུན་དུ་གྱུར་པའི་དགེ་སློང་དག་མཆོད་པ་ལ་སོགས་པ་ལ་གནས་གཅིག་ཏུ་ཚོགས་པར་གྱུར་པའི་དུས་སུ་དགེ་སློང་རྣམས་ལ་འཇལ་བར་བྱའོ། །ཇི་སྐད་འཇལ་བར་བྱ་ཞེ་ན། དེའི་ཕྱིར་ཚེ་དང་ལྡན་པ་དག་བདག་སང་ལྷུང་བཟེད་འབྲེལ་པ་མེད་པར་
འདྲིམ་པར་འགྱུར་གྱི། ཁྱེད་ཅག་རང་རང་གི་ལྷུང་བཟེད་དག་ཐོགས་ལ་དགེ་འདུན་གྱི་ནང་དུ་གཤེགས་པར་མཛོད་ཅིག་ཅེས་སོ་ཞེས་བྱ་བ་སྨྲས་ཏེ། ལྷུང་བཟེད་འབྲེལ་བ་མེད་པ་ཞེས་བྱ་བ་ནི་དགེ་འདུན་ལས་ཐོབ་པའི་ལྷུང་བཟེད་ཐ་ཆད་ཀྱི་མིང་ཡིན་པར་རིག་པར་བྱའོ། །དེ་ཡང་ཨུན་ན་ཧ་ན་ཞེས་
བྱ་བ་ནི་འབྲེལ་པ་མེད་པ་ཞེས་བྱ་བ་སྟེ། འདི་ལྟར་ན་ཧ་ཞེས་བྱ་བ་ནི་ཧ་ན་བན་དྷ་ཞེས་བྱ་སྟེ། འབྲེལ་པ་ཡིན་ནོ་ཞེས་སྐད་ཀྱི་དབྱིངས་ལས་འབྱུང་བའི་ཕྱིར་རོ། །ཨུན་ཞེས་བྱ་བ་ནི་ཨུད་ག་ཏ་ཞེས་བྱ་སྟེ། མེད་པའི་དོན་ཡིན་པས་ལྷུང་བཟེད་དེ་འབྲེལ་བ་མེད་པའམ། འབྲེལ་པ་དང་བྲལ་བ་ཡིན་
པས་ན་དེའི་ཕྱིར་དེའི་མིང་འབྲེལ་པ་མེད་པ་ཞེས་བྱའོ། །དེ་ཡང་དགེ་སློང་རྣམས་ཀྱི་ལྷུང་བཟེད་ཀྱི་ཡུལ་ལ་འབྲེལ་བ་ནི་འདི་གཉིས་ཁོ་ནར་ཟད་དེ། བྱིན་གྱིས་བརླབས་པས་བདག་ཉིད་ཀྱིས་སྤྱད་པ་དང་། ཡོངས་སུ་སྤང་བའི་དུས་ན་ཡང་རང་དབང་ཉིད་དུ་བསྟན་པར་བྱ་བ་ཡིན་ན། ལྷུང་བཟེད་
རྣམ་པ་དེ་ལྟ་བུ་འབྲེལ་བ་མེད་པ་འབྲེལ་པ་ལས་འདས་པ་འབྲེལ་བ་དང་བྲལ་བ་དེ་ནི་བྱིན་གྱིས་བརླབ་པའི་འབྲེལ་པ་མེད་པའི་ཕྱིར་དང་། ཡོངས་སུ་སྤང་བའི་འབྲེལ་པ་མེད་པའི་ཕྱིར་འབྲེལ་པ་མེད་པ་ཞེས་བྱ་སྟེ། དེ་ནི་ལྷུང་བཟེད་ཀྱང་ཡིན་ལ་འབྲེལ་བ་མེད་པ་ཡང་ཡིན་