Luận tạng Tây Tạng (Tengyur) — Tập 162

ེ་ལ་ཡང་དགེ་སློང་མ་ཉིད་དང་། དེ་ཉེ་དུ་མ་ཡིན་པ་ཉིད་དག་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེས་བྱ་བར་འདྲ་བར་བསྟན་པའོ། །ཅི་ཞིག་བྱས་ན་འཁྲུར་འཇུག་པའི་
སྤང་བར་འགྱུར་ཞེ་ན། དེའི་ཕྱིར་བྱིན་གྱིས་བརླབས་པ་རང་གི་རྙིང་པ་འཁྲུར་འཇུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་བསྒོ་བས་འཁྲུར་བཅུག་གམ། འཚེད་དུ་བཅུག་གམ། འཆག་ཏུ་བཅུག་པ་དག་ནའོ་ཞེས་བྱ་བ་སྨྲས་ཏེ། བྱིན་གྱིས་བརླབས་པ་རང་
གི་རྙིང་པ་འཁྲུར་གཞུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་བསྒོ་བས་འཁྲུར་བཅུག་པ་དང་། འཚེད་དུ་བཅུག་པ་དང་། འཆག་ཏུ་བཅུག་པ་དག་བྱས་ན་སྤང་བའི་ལྟུང་བར་འགྱུར་རོ་ཞེས་བྱ་བར་སྦྱར་རོ། །བྱིན་གྱིས་བརླབས་པ་ཞེས་སྨོས་པ་ནི།

བྱིན་གྱིས་མ་བརླབས་པ་འཁྲུར་བཅུག་པ་ལ་སོགས་པ་བྱས་ན་ཉེས་བྱས་སུ་བསྟན་པའི་ཕྱིར་རོ། །རང་གི་ཞེས་སྨོས་པ་ནི་གཞན་གྱིས་བསལ་བའི་ཕྱིར་རོ། །རྙིང་པ་ཞེས་སྨོས་པ་ནི་སར་པ་དགག་པའི་ཕྱིར་རོ། །འཁྲུར་གཞུག་པར་འོས་པ་ཆོས་གོས་དང་
གདིང་བ་ཞེས་སྨོས་པ་ནི། དེ་དག་ལས་བཟློག་པ་ཐམས་ཅད་ལ་ཉེས་བྱས་ཀྱི་ལྟུང་བར་བསྟན་པའི་ཕྱིར་རོ། །བྱིན་གྱིས་བརླབས་པ་རང་གི་རྙིང་པ་ཇི་སྲིད་དུ་སྤྱད་ཀྱང་རུང་བ་འཁྲུར་གཞུག་པ་ལ་སོགས་པར་འོས་པ་རྫབ་ལ་སོགས་པས་གོས་པ་ཆོས་གོས་དང་གདིང་བ་དག་ལས་གཅིག་འགའ་
སྣམ་སྦྱར་ལ་སོགས་པ་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅུག་པ་དང་། འཚེད་དུ་བཅུག་པ་དང་། འཆག་ཏུ་བཅུག་པ་དག་བྱས་ན་འཁྲུར་བཅུག་པའི་སྤང་བར་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་པར་འོས་པ་
ཆོས་གོས་དང་གདིང་བ་དག་ལས་འགའ་ཞིག་དགེ་སློང་མ་ཉེ་དུ་མ་ཡིན་པའི་ལག་ཏུ་བསྒོ་བར་འཁྲུར་བཅུག་པ་དང་། འཚེད་དུ་བཅུག་པ་དང་། འཆག་ཏུ་བཅུག་པ་དག་བྱས་ན་སྤང་བའི་ལྟུང་བྱེད་དུ་འགྱུར་རོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་ཆོས་གོས་སྤངས་པ་འཁྲུར་
སྩོལ་ན་ལྟུང་བ་ཅིར་འགྱུར། གལ་ཏེ་མ་སྤངས་པ་འཁྲུར་བཅུག་ན་ནི་སྤང་བར་འགྱུར་རོ། །འོན་ཏེ་སྤངས་པ་འཁྲུར་བཅུག་ན་ནི་ཉེས་བྱས་སུ་འགྱུར་རོ་ཞེས་གསུངས་པ་དེ་ནི་བྱིན་གྱིས་བརླབས་པ་ཞེས་སྨོས་པའི་གཞུང་ཡིན་ནོ། །བཙུན་པ་རེ་ཞིག་དགེ་སློང་གིས་གཞན་དབང་བའི་ཆོས་གོས་
འཁྲུར་སྩོལ་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་དེ་ནི་རང་གི་ཞེས་སྨོས་པའི་གཞུང་ཡིན་ནོ། །རྙིང་པ་ཞེས་བྱ་བ་ནི་དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བར་སྤྱད་པ་གང་ཡིན་པའོ་ཞེས་གསུངས་པ་དེ་ནི་རྙིང་པ་ཞེས་སྨོས་པའི་གཞུང་ཡིན་ནོ། །དེ་
ཡང་མཚོན་པ་ཡིན་པར་རིག་པར་བྱ་སྟེ། གལ་ཏེ་ཇི་སྲིད་སྤྱད་ཀྱང་རུང་མི་གཙང་བ་ལ་སོགས་པས་གོས་པས་འཁྲུར་གཞུག་པར་འོས་པ་ནི་དུས་ཚིགས་སུ་མ་སྤྱད་ན་ཡང་སྤང་བར་འགྱུར་བ་སྐྱེད་པ་ཁོ་ནའོ། །འདིར་གཞུང་ནི་བཙུན་པ་དགེ་སློང་ཆོས་གོས་རུང་བས་གྲོང་དུ་ཞུགས་ཤིང་དེའི་ཚེ་

ཆོས་གོས་དེ་ཡང་ལུས་ལས་མ་ཕུད་པར་དེ་སྤང་བར་འགྱུར་བས་དབྱུང་བར་འགྱུར་བ་མཆིས་སམ། ཉེ་བ་འཁོར་ཡོད་དེ། འདི་ལྟ་སྟེ། ཁྱིམ་གྱི་ནང་དུ་ཞུགས་པའི་ཆོས་གོས་མི་གཙང་བ་ལ་སོགས་པས་གོས་པར་གྱུར་པ་དེ་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅུག་ན་སྤང་བའི་ལྟུང་བྱེད་དུ་
འགྱུར་རོ་ཞེས་གསུངས་པ་ཡིན་ནོ། །བཙུན་པ་རེ་ཞིག་དགེ་སློང་གིས་དགེ་འདུན་གྱི་ཆོས་གོས་འཁྲུར་སྩོལ་ན་ལྟུང་བ་ཅིར་འགྱུར། གལ་ཏེ་གང་ཟག་གིས་སྤྱད་པས་དྲི་མ་ཅན་དུ་གྱུར་པ་ཡིན་ན་ནི་ཉེས་བྱས་སུ་འགྱུར་རོ་ཞེས་གསུངས་པ་དེ་ནི་འཁྲུར་གཞུག་པར་འོས་པའི་གཞུང་ཡིན་ནོ། །ཆོས་གོས་
ཞེས་བྱ་བ་ནི་བདུན་པོ་དག་ལས་གང་ཡང་རུང་བའོ་ཞེས་གསུངས་པ་དེ་ནི་ཆོས་གོས་ཞེས་སྨོས་པ་ནི་གཞུང་ཡིན་ནོ། །འཁྲུར་འཇུག་པ་དང་། འཚེད་དུ་འཇུག་པ་དང་། འཆག་ཏུ་འཇུག་པ་ཞེས་གསུངས་པ་དེ་ནི་འཁྲུར་བཅུག་པ་ལ་སོགས་པ་སྨོས་པའི་གཞུང་ཡིན་ནོ། །བཙུན་པ་རེ་ཞིག་
དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་མངགས་པས་ཆོས་གོས་འཁྲུར་སྩོལ་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་དེ་ནི་བསྒོ་བས་ཞེས་བྱ་བ་དང་། དགེ་སློང་མ་ཉེ་དུ་མ་ཡིན་པ་ཞེས་སྨོས་པའི་གཞུང་ཡིན་ནོ། །ཕྱོགས་ལ་བྱས་པ་ཡང་ལས་བྱས་པ་ཉིད་དོ་
ཞེས་བྱ་བ་ནི། ཆོས་གོས་ཀྱི་ཕྱོགས་གཅིག་ལ་འཁྲུར་འཇུག་པ་ལ་སོགས་པའམ། བྱ་བའི་ཕྱོགས་གཅིག་བྱས་པ་ནི་ལྟུང་བ་བྱེད་པའི་ལས་བྱས་པ་ཉིད་ཡིན་པར་རིག་པར་བྱའོ། །འདིར་གཞུང་ནི་བཙུན་པ་དགེ་སློང་ཆོས་གོས་རུང་བས་གྲོང་དུ་ཞུགས་ཤིང་དེའི་ཆོས་གོས་དེ་ཡང་ལུས་ལས་
མ་ཕུད་པར་དེ་སྤང་བར་འགྱུར་བས་དབྱུང་བར་འགྱུར་བ་མཆིས་སམ་ཞེས་སྔར་བསྟན་པ་དེ་ནི་ཆོས་གོས་ཀྱི་ཕྱོགས་གཅིག་གི་གཞུང་ཡིན་ནོ། །ཐ་ན་ཆུར་སྨྱུག་པར་བྱེད་དམ། ཚོན་དུ་སྨྱུག་པར་བྱེད་དམ། ཐ་ན་ཐལ་མོ་རྡེབ་པར་བྱེད་ན་ཡང་ངོ་ཞེས་གསུངས་པ་ནི་བྱ་བའི་ཕྱོགས་གཅིག་གི་གཞུང་ཡིན་
ནོ། །བྱས་པ་ཉིད་ན་བྱེད་དུ་བཅུག་པ་ཉིད་ཡིན་ནོ་ཞེས་བྱ་བ་ནི། བསྐོས་པའི་དགེ་སློང་མ་ཞེས་བྱ་བའི་གང་ཟག་མོས་གང་གི་ཚེ་འཁྲུར་བཅུག་པ་ལ་སོགས་པའི་ལས་དེ་བྱས་ཤིང་མཐར་ཐུག་པར་གྱུར་ན་ཡང་དེའི་ཚེ་འཁྲུར་བཅུག་པ་ལ་སོགས་པའི་ལས་དེ་བྱས་པ་ཉིད་ཡིན་པར་རིག་པར་བྱའོ། །

བསྐོས་པ་ཙམ་ཁོ་ནས་ནི་མ་ཡིན་ནོ། །འབྲས་བུའི་མཐའ་མན་ཆད་གཅིག་པ་ཉིད་དོ་ཞེས་བྱ་བ་ནི། ཇི་སྲིད་དུ་དེས་འཁྲུར་བཅུག་པ་ལ་སོགས་པ་བསམས་པའི་འབྲས་བུ་གྲུབ་པར་མ་གྱུར་གྱི་བར་དུ་འཁྲུར་འཇུག་པ་ལ་སོགས་པའི་ལས་དེ་གཅིག་པ་ཉིད་ཡིན་པར་རིག་པར་
བྱའོ། །བར་སྐབས་སུ་ཆད་པ་དག་ཐ་དད་པ་ཉིད་མ་ཡིན་ཏེ། དེ་ནི་ཐམས་ཅད་ཀྱི་དབང་དུ་བྱ་བ་ཉིད་ཡིན་པར་རིག་པར་བྱའོ། །རིགས་མཐུན་པའི་ལས་ལ་ནི་གཅིག་པ་ཉིད་དུ་ཡང་རུང་ན། རིགས་མི་མཐུན་པའི་ལས་འཁྲུར་འཇུག་པ་དང་། འཚེད་དུ་འཇུག་པ་དང་། འཆག་ཏུ་འཇུག་
པ་ཞེས་བྱ་བ་དག་ཇི་ལྟར་གཅིག་པ་ཉིད་དུ་རུང་སྙམ་དུ་དོགས་པ་བསལ་བའི་ཕྱིར། ཚིགས་སུ་གྱུར་པ་ཉིད་ལ་འབྲས་བུ་རྣམས་གཅིག་པ་ཉིད་དོ་ཞེས་བྱ་བ་སྨྲས་ཏེ། ཚིགས་སུ་གྱུར་པ་ཉིད་ལ་ཞེས་བྱ་བ་ནི། བར་དུ་ཆད་པར་གྱུར་པ་ཉིད་དང་རིགས་མི་མཐུན་པར་གྱུར་པ་ཉིད་ལ་ཡང་
འབྲས་བུ་རྣམས་གཅིག་པ་ཉིད་དེ། ཁྲུ་བ་ཉིད་དང་། འཚེད་པ་ཉིད་དང་། འཆག་པ་ཉིད་ཅེས་བྱ་བའི་འབྲས་བུ་རྣམས་གཅིག་པ་ཉིད་ཡིན་པར་རིག་པར་བྱའོ། །དེ་དག་ཐ་དད་པའི་དབང་གིས་ལས་ཐ་དད་པ་ཡང་མ་ཡིན་ནོ། །འདིར་གཞུང་ནི་གང་དུ་འཁྲུར་འཇུག་པ་དང་། འཚེད་དུ་འཇུག་
པ་དང་། འཆག་ཏུ་འཇུག་པར་བྱེད་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ཏེ། དེ་ལྟར་འཁྲུར་འཇུག་པ་ལ་སོགས་པ་ནས་རྣམ་པ་གསུམ་ཆར་རྫོགས་པ་ན་ལྟུང་བྱེད་གཅིག་ཏུ་གསུངས་པ་གང་ཡིན་པ་དེ་འདིར་ཁུངས་ཡིན་ནོ། །འདུ་ཤེས་གཙོ་བོ་ཉིད་ལ་ནི་དོན་ཇི་ལྟ་བ་ཉིད་ལ་ནི་དངོས་
གཞིའོ། །དོན་ཇི་ལྟ་བ་ཉིད་མ་ཡིན་པ་ལ་ནི་དངོས་གཞི་དང་ཉེ་བའོ་ཞེས་བྱ་བ་ནི། འདུ་ཤེས་གཙོ་ཆེ་བ་ཉིད་ནི། འདུ་ཤེས་གཙོ་བོ་ཉིད་དེ་དེ་ལ་ནི་བསྟན་བཅོས་གང་དང་གང་དུ་འདུ་ཤེས་གཙོ་ཆེར་བསྟན་པ་དེ་དང་དེར། དོན་ཇི་ལྟ་བ་ཉིད་ལ་ནི་དངོས་གཞི་སྟེ་ཞེས་བྱ་བ་ལ། དོན་ཇི་ལྟ་ཇི་ལྟ་བ་ནི་དོན་
ཇི་ལྟ་བའོ། །དེའི་དངོས་པོ་ནི་དེ་ཉིད་དེ་དེ་ལ་ནི་དངོས་གཞི་སྟེ་སྤང་བ་ཉིད་དུ་འགྱུར་བའོ། །འདི་སྐད་བསྟན་ཏེ། གལ་ཏེ་འདུ་ཤེས་ཇི་ལྟ་བ་བཞིན་དུ་དོན་ཀྱང་གལ་ཏེ་དེ་ལྟ་བུ་ཉིད་ཡིན་ཏེ། དགེ་སློང་མ་ཉེ་དུ་མ་ཡིན་པ་ཉིད་དུ་འདུ་ཤེས་ཤིང་དགེ་སློང་མ་ཉིད་ཀྱང་ཉེ་དུ་མ་ཡིན་པ་ཉིད་ཡིན་ན་དངོས་

གཞི་སྟེ། སྤང་བ་ཉིད་དུ་འགྱུར་རོ། །དོན་ཇི་ལྟ་བ་ཉིད་མ་ཡིན་པ་ལ་ནི་དངོས་གཞི་དང་ཉེ་དུའོ་ཞེས་བྱ་བ་ནི། འདུ་ཤེས་ཀྱང་གཞན་ཏེ། དགེ་སློང་མ་ཉེ་དུ་ཡིན་ནོ་སྙམ་ལ་དོན་ཀྱང་གཞན་ཏེ། དགེ་སློང་མ་ཉིད་ཉེ་དུ་མ་ཡིན་པ་ཉིད་ཡིན་ན། དེའི་ཚེ་དངོས་གཞི་དང་ཉེ་བའི་ལྟུང་བར་འགྱུར་ཏེ། ཉེ་བའི་
ཚིགས་འོག་མར་གྱུར་བའི་ལྟུང་བར་འགྱུར་རོ། །འདི་ལྟ་སྟེ་དཔེར་ན། སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་སྤྱད་ན་ནི་ལྟུང་བྱེད་དུ་འགྱུར་ལ། སྲོག་ཆགས་མེད་པ་ལ་སྲོག་ཆགས་དང་བཅས་པར་འདུ་ཤེས་ན་ནི་ཉེས་བྱས་སུ་འགྱུར་བ་ལྟ་བུའོ། །ཡིད་གཉིས་
ནི་འདུ་ཤེས་དང་འདྲའོ་ཞེས་བྱ་བ་ནི། ཡིད་གཉིས་ནི་ལྟུང་བ་ལ་འདུ་ཤེས་དང་འདྲ་བར་འགྱུར་བར་རིག་པར་བྱའོ། །དོན་དེ་ལ་ཡིད་གཉིས་ཟ་བ་ལ་ཡང་ཇི་ལྟར་འདུ་ཤེས་ལྟུང་བར་འགྱུར་བ་དེ་བཞིན་དུ་ལྟུང་བ་དེ་ཉིད་དུ་འགྱུར་རོ། །འདི་ལྟ་སྟེ་དཔེར་ན། སྲོག་ཆགས་དང་བཅས་པའི་ཆུ་ལ་ཡིད་
གཉིས་ཟ་བའི་འདུ་ཤེས་ཀྱིས་སྤྱད་ན་ནི་ལྟུང་བྱེད་དུ་འགྱུར་ལ། སྲོག་ཆགས་མེད་པ་ལ་ཡིད་གཉིས་ཀྱི་འདུ་ཤེས་ཀྱིས་སྤྱད་ན་ནི་ཉེས་བྱས་སུ་འགྱུར་རོ། །འདིར་རྣམ་པར་འབྱེད་པ་ལས་སྐབས་སུ་གསུངས་པ་གང་ཡིན་པ་དེ་ཡང་བསྡུ་བའི་ཕྱིར། དགེ་འདུན་གྱི་ཁྲིམས་སུ་བྱ་བ་བསྲུང་བར་བྱའོ་ཞེས་
བྱ་བ་སྨྲས་ཏེ། དགེ་འདུན་གྱི་ཁྲིམས་སུ་བྱ་བ་གང་བྱས་པ་དེ་གང་ཟག་གིས་ཀྱང་བསྲུང་བར་བྱའོ། །གློ་བུར་དུ་འོངས་པས་ཀྱང་དེ་ལས་མི་འགལ་བ་ཉིད་དུ་བྱའོ་ཞེས་བྱ་བ་ནི། གང་ཟག་གློ་བུར་དུ་འོངས་པས་ཀྱང་དགེ་འདུན་གཉུག་མར་གནས་པས་ཁྲིམས་སུ་བྱ་བ་བསྲུང་བར་བྱ་བ་དེ་ལས་མི་
འགལ་བ་ཉིད་དུ་བསྲུང་བར་བྱ་སྟེ། ཇི་ལྟར་གཉུག་མར་གནས་པ་དག་གིས་བསྲུང་བར་བྱ་བ་དེ་བཞིན་དུ་གློ་བུར་དུ་འོངས་པས་ཀྱང་བསྲུང་བར་བྱའོ། །ཡོད་དམ་མེད་པ་ཉིད་དང་། ཇི་ལྟ་བུ་ཡོངས་སུ་ཤེས་པར་བྱ་བའི་ཕྱིར་དེས་དེ་དྲི་བར་བྱའོ་ཞེས་བྱ་བ་ནི། ཁྲིམས་སུ་བྱ་བ་ཡོད་པ་དང་མེད་
པ་ནི་ཡོད་དམ་མེད་པའོ། །དེའི་དངོས་པོ་ནི་ཡོད་དམ་མེད་པ་ཉིད་དོ། །ཁྲིམས་སུ་བྱ་བ་དེ་ཡོད་དམ་མེད་པ་དང་ཡོད་པར་གྱུར་ན་ཇི་ལྟ་བུའི་རང་བཞིན་ཡོད་པ་ཡང་ཡོངས་སུ་ཤེས་པར་བྱ་བའི་ཕྱིར། གློ་བུར་དུ་འོངས་པ་དེས་ཁྲིམས་སུ་བྱ་བ་ཡོད་པ་དང་མེད་པ་དང་། ཇི་ལྟ་བུ་ཡོད་པ་དེ་གཉུག་མར་

གནས་པ་དག་ལ་དྲི་བར་བྱའོ། །འདི་སྐད་བསྟན་ཏེ། ཚོགས་འདི་ན་དགེ་འདུན་གྱི་ཁྲིམས་སུ་བྱ་བ་འགའ་ཞིག་ཡོད་དམ། འོན་ཏེ་མེད། ཡོད་ན་ཇི་ལྟ་བུ་ཞིག་ཅེས་དེ་ཡོངས་སུ་ཤེས་པར་བྱ་བའི་ཕྱིར་གློ་བུར་དུ་འོངས་པ་དེས་དེ་དྲི་བར་བྱའོ། །གང་གི་ཚེ་ཞེ་
ན། དེའི་ཕྱིར་ཧ་ཅང་ཡུན་མི་རིང་བར་རོ་ཞེས་བྱ་བ་སྨྲས་ཏེ། ཧ་ཅང་ཡུན་རིང་པོ་འདའ་བར་མ་བྱས་པ་སྟེ། དེ་ཧ་ཅང་ཡུན་རིང་དུ་ངལ་བསོ་བ་མ་བྱས་པར་ཧ་ཅང་ཡུན་རིང་དུ་གནས་པ་བས་སྔ་རོལ་དུ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། འཇུག་པ་དང་། འཇུག་པའི་གནས་
བཙལ་བ་དང་། རྫས་གཞག་པ་དང་། རེ་ཞིག་བསྡད་པ་དེ་དག་ཐམས་ཅད་ཇེ་དང་པོར་བྱའོ། །དེའི་འོག་ཏུ་ཁྲིམས་སུ་བྱ་བ་དྲི་བར་བྱའོ། །དགེ་འདུན་གྱི་ཁྲིམས་སུ་བྱ་བ་བསྲུང་བར་བྱའོ་ཞེས་བྱ་བ་དེའི་དམིགས་ཀྱིས་བསལ་བ་བསྟན་པའི་ཕྱིར། སངས་རྒྱས་ཀྱིས་གསུངས་པ་དགེ་
འདུན་ལས་གཡོ་བ་མེད་དོ་ཞེས་བྱ་བ་སྨྲས་ཏེ། སངས་རྒྱས་ཀྱིས་གསུངས་པ། བཅོམ་ལྡན་འདས་ཀྱི་བཀའ་དགེ་འདུན་ལས་འབྲེལ་པའི་ཁྲིམས་ཀྱི་རྣམ་པ་རྒྱུར་གྱུར་པས་གཡོ་བ་མེད་དེ། གཡོ་བ་ཞེས་བྱ་བ་ནི་འདའ་བ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། དགེ་འདུན་
གྱི་ཁྲིམས་སུ་བྱ་བའི་དབང་གིས་བཅོམ་ལྡན་འདས་ཀྱི་བཀའ་ལས་འདའ་བར་མི་བྱའོ། །དེ་ལྟར་ཡང་བཅོམ་ལྡན་འདས་ཀྱིས་ཉེ་སྡེ་ལ་ངས་དགེ་སློང་དགོན་པ་པ་ལ་དགོན་པ་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་དགོན་པ་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བ་དང་
བལྟར་འགྲོ་བའི་དུས་མ་ཡིན་པ་མེད་དོ་ཞེས་གསུངས་པའི་བཅོམ་ལྡན་འདས་ཀྱི་བཀའི་དབང་གིས་ཚེ་དང་ལྡན་པ་ཉེ་སྡེས་དགེ་འདུན་གྱི་ཁྲིམས་སུ་བྱ་བ་དྲལ་ཀྱང་ལྟུང་བ་མི་འབྱུང་བ་སྟེ། འདི་ལྟར་ཚེ་དང་ལྡན་པ་ཉེ་སྡེས་དང་པོར་ཁྲིམས་སུ་བྱ་བ་དྲལ་ལ་ཕྱིས་བཅོམ་ལྡན་འདས་ཀྱིས་བག་ཡངས་སུ་
མཛད་དུ་ཟིན་ཀྱང་དེ་ལྟ་མོད་ཀྱི་ཉེ་སྡེས་བྱས་པ་གང་ཡིན་པ་དེ་དག་ཐམས་ཅད་བཅོམ་ལྡན་འདས་ཀྱིས་དང་པོ་ཉིད་ནས་དགོངས་པར་གྱུར་ཟིན་ཏོ། །ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ལྷག་པར་འབུལ་བ་ན་དགེ་འདུན་གྱིས་ཉེ་བར་གཞག་པའི་དོན་དུ་བླང་བར་བྱའོ་

ཞེས་བྱ་བ་ནི། གང་ཟག་གང་ཡང་རུང་བས་རྐྱེན་འགའ་ཞིག་གི་དབང་གིས་ཆོས་གོས་ལ་སོགས་པ་ལྷག་པ་འབུལ་བ་ན། དགེ་འདུན་དང་གང་ཟག་གིས་ཀྱང་དགེ་འདུན་གྱི་ཆེད་དུ་བླང་བར་བྱ་སྟེ། ཉེ་བར་གཞག་པའི་དོན་དུ་ཞེས་བྱ་བ་ནི་གཞག་པའི་ཆེད་དུ་ཞེས་བྱ་བའི་ཐ་ཚིག་གོ། །དེ་
ལྟར་ཉེ་བར་གཞག་པ་ནི་དེ་དག་མེད་པ་དག་གིས་ཅི་དགར་བཀུར་རོ་ཞེས་བྱ་བ་ནི། ལྷུང་བཟེད་ལ་སོགས་པ་དེ་དག་མེད་པའི་རབ་ཏུ་བྱུང་བ་དག་གིས་ཅི་བདེར་བླང་བར་བྱ་བའོ། །འཁྲུར་འཇུག་པའི་སྤང་བ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།
འཁྲུར་འཇུག་པའི་སྤང་བ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། བཤང་བ་དང་། གཅི་བ་དང་། ལྗན་ལྗིན་དང་འདམ་རྫབ་ལ་སོགས་པས་མ་རུང་བར་གྱུར་པ་འཁྲུར་འཇུག་པ་ཡང་ན་སྨད་པ་མེད་དོ་ཞེས་བྱ་བ་སྨྲས་ཏེ། བཤང་བ་ལ་སོགས་པས་མ་རུང་བར་གྱུར་པ་འཁྲུར་འཇུག་པ་ལ་ལྟུང་
བ་ན་སྨད་པ་མེད་དོ། །འདི་སྐད་བསྟན་ཏེ། ཅུང་ཟད་ཙམ་གྱིས་བཀྲུ་བར་འོས་པ་ཉིད་ལ་ཡང་ལྟུང་བ་ཆུང་བ་མེད་པ་ཉིད་དོ། །དྲེའུ་རྔོག་དང་ཁྱིམ་པའི་གོས་དང་སྔས་ནང་ཚངས་ཅན་དང་རུང་བར་བྱས་པ་དང་སྤངས་པ་དང་དགེ་འདུན་གྱི་རྣམས་ལ་ནི་ཉེས་བྱས་སོ་ཞེས་བྱ་བ་ནི། ཉེ་དུ་མ་ཡིན་པའི་
དགེ་སློང་མ་ལ་དྲེའུ་རྔོག་ལ་སོགས་པ་དག་འཁྲུ་བ་ལ་སོགས་པ་བྱེད་དུ་འཇུག་ན་ཉེས་བྱས་སོ། །འཁྲུར་འཇུག་པའི་སྤང་བ་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །འཁྲུར་འཇུག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ལེན་པའི་སྤང་བ་སྨྲ་བར་
འདོད་ནས་ཞར་ལས་འོངས་པ་བསྟན་པའི་ཕྱིར། དགེ་སློང་མས་གོས་རིན་པོ་ཆེ་བརྗེ་བའི་ཕྱིར་བླང་བར་བྱའོ་ཞེས་བྱ་བ་སྨྲས་ཏེ། དགེ་སློང་མས་གོས་རིན་པོ་ཆེ་བརྗེ་བའི་ཕྱིར་བླང་བར་བྱའི། ལོངས་སྤྱད་པའི་ཕྱིར་ནི་མ་ཡིན་ནོ། །དགེ་སློང་མ་དང་ལྷན་ཅིག་བརྗེ་བར་བྱའོ་ཞེས་བྱ་བ་ནི། དགེ་
སློང་གིས་དགེ་སློང་མ་དང་ལྷན་ཅིག་གོས་ལ་སོགས་པ་བརྗེ་བར་བྱའོ་ཞེས་བྱ་བའི་ཐ་ཚིག་གོ། །རྫས་ཇི་ལྟ་བུས་ཤེ་ན། དེའི་ཕྱིར་མཉམ་པས་སོ་ཞེས་བྱ་བ་སྨྲས་ཏེ། རིན་གྱི་ཕྱིར་མཉམ་པས་སོ། །ཡང་ན་དེ་དགའ་བ་ཉིད་ཀྱིས་སོ་ཞེས་བྱ་བ་ནི། དགེ་སློང་མ་གང་དང་ལྷན་ཅིག་དེ་བརྗེ་བར་བྱེད་

པའི་དགེ་སློང་མ་དེ་དགའ་བར་འགྱུར་བས་ཞེས་བྱ་བའི་ཐ་ཚིག་གོ། །ཅི་ཞིག་བྱས་ན་ལེན་པའི་སྤང་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ལེན་ནའོ་ཞེས་བྱ་བ་སྨྲས་ཏེ། ཉེ་དུ་མ་ཡིན་པའི་དགེ་སློང་མ་ལ་དེར་འདུ་ཤེས་པའམ་ཡིད་གཉིས་ཟ་བ་ཞེས་སྔར་བསྟན་པ་
ལས་ལེན་ནའོ། །ཇི་ལྟར་ལེན་ཞེ་ན། དེའི་ཕྱིར་རྣམ་པར་རིག་བྱེད་ཀྱིས་སོ་ཞེས་བྱ་བ་སྨྲས་ཏེ། ཅང་མི་སྨྲ་བས་དང་དུ་ལེན་པས་ཀྱང་མ་ཡིན་ལ། ཚིག་ལས་གཞན་པའི་རྣམ་པར་རིག་བྱེད་ཀྱིས་ཀྱང་མ་ཡིན་ནོ། །ཅི་ཞིག་ལེན་ན་ཞེ་ན། དེའི་ཕྱིར་གོས་སོ་ཞེས་བྱ་བ་སྨྲས་ཏེ། ལྷུང་བཟེད་དང་སྨན་
ལ་སོགས་པ་དག་མ་ཡིན་ནོ། །རྣམ་པ་དེ་དག་ཐམས་ཅད་ཀྱི་དམིགས་ཀྱིས་བསལ་བ་བསྟན་པའི་ཕྱིར། དགེ་འདུན་ལ་གོས་འབུལ་བ་དང་ལེགས་པར་སྨྲ་བ་ལ་ལྟུང་བ་མེད་དོ་ཞེས་བྱ་བ་སྨྲས་ཏེ། དགེ་འདུན་ལ་གོས་འབུལ་བ་དང་། ལེགས་པར་སྨྲ་བ་ལ་འབུལ་བ་ལ་ལྟུང་བ་མེད་དོ། །
བསྙེན་པར་རྫོགས་པར་བྱེད་པ་དང་། བོར་རླག་བྱུང་བ་དག་ལའོ་ཞེས་བྱ་བ་ནི། དགེ་སློང་བསྙེན་པར་རྫོགས་པར་བྱེད་པ་དང་། བོར་རླག་བྱུང་བ་དག་གིས་ཉེ་དུ་མ་ཡིན་པའི་དགེ་སློང་མ་ལས་ལེན་པ་ལ་ཡང་ལྟུང་བ་མེད་དོ། །འདི་སྐད་བསྟན་ཏེ། དགེ་སློང་བསྙེན་པར་རྫོགས་པར་བྱེད་
པ་དང་། བོར་རླག་བྱུང་བ་དག་གིས་ཉེ་དུ་མ་ཡིན་པའི་དགེ་སློང་མ་ལས་ཆོས་གོས་ལ་སོགས་པ་ལེན་པར་བྱེད་ན་དེ་དག་ལ་ལྷུང་བ་མེད་དོ། །དད་རྫས་བརྗོད་དེ་མདུན་དུ་བཞག་ནས་མི་ལྟོས་པར་སོང་བ་ལའོ་ཞེས་བྱ་བ་ནི། དགེ་སློང་མ་གང་ཞིག་ཆོས་གོས་འབུལ་བར་བྱེད་པ་ན། གལ་ཏེ་དགེ་
སློང་གིས་དགེ་སློང་མ་དེ་ལ་མི་ལེན་ཏོ་ཞེས་ཕྱིར་སྤོང་བར་བྱེད་ལ་དགེ་སློང་མ་དེས་ཀྱང་དད་རྫས་བརྗོད་དེ། བདག་ལ་རྫས་འདི་ལྟ་དག་མཆིས་ཀྱིས་འཕགས་པས་རྗེས་སུ་ཐུགས་བརྩེ་བའི་སླད་དུ་བཞེས་ཤིག །ཅེས་རྫས་དེ་མདུན་དུ་བཞག་ནས་མི་ལྟོས་པར་སོང་བ་ན་དེའི་ཚེ་བླངས་ན་ལྟུང་
བ་མེད་དོ། །དད་རྫས་ཞེས་བྱ་བ་ནི་ཁ་ཅིག་ན་རེ་བདག་ཉིད་ཀྱི་དད་པ་གྲགས་པ་ལ་བྱ་སྟེ། དེ་བརྗོད་ཅིང་རབ་ཏུ་བསྟན་པ་ལ་བྱའོ་ཞེས་ཟེར་རོ། །ཁ་ཅིག་ན་རེ་རྫས་ནི་ནོར་རྫས་ཏེ། བདག་ཉིད་ཀྱི་དད་པ་དང་ནོར་རྫས་བརྗོད་པ་ཡིན་ནོ་ཞེས་ཀྱང་ཟེར་རོ། །ལེན་པའི་སྤང་བ་རྣམ་པར་འབྱེད་པའོ་

ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ཞུ་བའི་སྐབས་བརྗོད་པར་འདོད་ནས། ལག་ཏུ་འོངས་པ་ཉིད་ཐོབ་པ་ཉིད་དོ་ཞེས་བྱ་བ་སྨྲས་ཏེ། ལག་ཏུ་འོངས་པ་ནི་དོན་ལ་གྲུབ་པའི་བློ་སྐྱེ་བས་དེའི་ཚེ་ན་དོན་དེ་ཐོབ་པ་ཉིད་ཡིན་པར་རིག་པར་བྱའོ། །བལྟ་
བའི་ཉེ་འཁོར་དུ་གྱུར་པ་ནི་དེའི་དང་པོའོ་ཞེས་བྱ་བ་ནི། བལྟ་བའི་ཉེ་འཁོར་དུ་ཕྱིན་པ་ནི་ལག་ཏུ་འོངས་པ་ཉིད་དེའི་དང་པོ་རྩོམ་པ་སྟེ། དེ་ཚུན་ཆད་རྫས་དེ་ལག་ཏུ་འོངས་པ་ཡིན་ནོ། །འདིར་གཞུང་ནི་གོས་ཀྱི་གཞིའི་ཞུ་བ་ལས་ཇི་ཙམ་གྱིས་ན་གོས་ཐོབ་པ་ལགས། གང་ཚུན་ཆད་དེའི་
ལག་ཏུ་འོངས་པར་གྱུར་པའམ། བལྟ་བའི་ཉེ་འཁོར་དུ་གྱུར་པ་ཡིན་ནོ་ཞེས་གསུངས་པ་ཡིན་ནོ། །ཉེ་བར་མ་གྱུར་པ་ནོད་པ་ནི་སྦྱོར་བ་ཉིད་དོ་ཞེས་བྱ་བ་ནི། ཉེ་དུ་མ་ཡིན་པའི་དགེ་སློང་མ་ལས་གོས་ཉེ་བར་མ་གྱུར་པ་ནོད་པ་ལེན་ན། ནོད་པ་དེ་ནི་སྦྱོར་བ་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་
གོ། །འདིར་གཞུང་ནི་ཁ་ཅིག་ལས་གྲོང་ཆེ་གེ་མོ་ཞིག་ན་གོས་མཆིས་ཀྱིས། དེ་ཚེ་དང་ལྡན་པ་ལ་གསོལ་ལོ་ཞེས་ཟེར་བ་ནོད་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །རྒྱ་ཆེ་བ་དང་ཐ་སྙད་ཀྱི་དབང་མ་ཡིན་པ་ཉིད་ལ་ནི་གོས་སྦྱིན་པ་ལ་སོགས་པ་གཙོ་བོ་ཡིན་ནོ་ཞེས་བྱ་བ་ལ། རྒྱ་ཆེ་
བ་ཞེས་བྱ་བ་ནི་ཡངས་པའོ། །ཐ་སྙད་ཀྱི་དབང་མ་ཡིན་པ་ཉིད་ཅེས་བྱ་བ་ནི་ཉོ་ཚོང་དང་བྲལ་བ་ཉིད་དེ། དེ་གཉིས་ཀ་ཚོགས་པ་ན་གོས་སྦྱིན་པ་ལ་སོགས་པ་གཙོ་བོ་ཡིན་ཏེ། གཙོ་བོ་ཡིན་ནོ་ཞེས་བྱ་བའི་ཐ་ཚིག་གོ། །གལ་ཏེ་དགེ་སློང་མ་རྒྱ་ཆེ་བ་ཡང་ཡིན་ལ། ཉོ་ཚོང་དང་བྲལ་བ་ཡང་ཡིན་པས་
དགེ་སློང་ལ་གོས་སྦྱིན་པར་བྱེད་ལ། དགེ་སློང་དེས་ཀྱང་ལེན་པར་བྱེད་ན་དགེ་སློང་དེ་ལ་ལྟུང་བར་མི་འགྱུར་རོ། །དེ་ལྟར་ཡང་གཞུང་ནི་འདི་ཡིན་ཏེ། སྔར་བཞག་པར་གྱུར་ནས་སྨྲས་པ། རྗེས་སུ་གནང་བར་བགྱི་ཡིས་འཕགས་པས་ལོངས་སྤྱད་དུ་གསོལ། བདག་ལ་བསོད་ནམས་སུ་འགྱུར་
རོ་ཞེས་ཟེར་ན་ལྟུང་བ་མེད་དོ་ཞེས་གསུངས་པའོ། །ཡང་ན་ཕྱིར་བསབ་མི་འཚལ་བར་འབུལ་གྱིས་ལོངས་སྤྱད་དུ་གསོལ་ཞེ་འམ། གོས་ཆ་མི་མཐུན་པ་འམ། བརྗེའོ་ཞེས་ཟེར་བ་བླངས་པར་གྱུར་པ་ལས། ཕྱིས་ཚེ་དང་ལྡན་པ་རིན་སྩལ་མི་འཚལ་ལོ་ཞེས་ཟེར་བ་ལ། ལྟུང་བ་མེད་དོ་

ཞེས་གསུངས་པ་གང་ཡིན་པ་དེ་མདོ་འདིས་བསྡུས་པ་ཡིན་ནོ། །རེ་ཞིག་གི་སེམས་ཀྱིས་ནི་ལྟུང་བ་མེད་དོ་ཞེས་བྱ་བ་ནི། ཉེ་དུ་མ་ཡིན་པའི་དགེ་སློང་མ་ལས་རེ་ཞིག་གི་སེམས་ཀྱིས་ཆོས་གོས་ལ་སོགས་པ་ལེན་པ་ལ་ལྟུང་བ་མེད་པ་སྟེ། ཡིད་གཅུགས་པས་
གོས་ལ་སོགས་པ་རེ་ཞིག་གི་ཚུལ་གྱིས་ལེན་པ་ལ་ལྟུང་བ་མེད་དོ་ཞེས་གསུངས་པའི་ཕྱིར་རོ། །རིན་སྦྱིན་པ་བརྗེད་པ་ལའོ་ཞེས་བྱ་བ་ནི། རིན་གྱིས་བླངས་ནས་རིན་སྦྱིན་པ་བརྗེད་ན། འདི་ལྟར་དགེ་སློང་མ་ལས་བླངས་པར་གྱུར་དུ་ཟིན་ཀྱང་དེ་ལྟ་མོད་ཀྱི་ཉེས་པ་མེད་དོ། །འདིར་གཞུང་ནི་
བཅོམ་ལྡན་འདས་ཀྱིས་ཚེ་དང་ལྡན་པ་རིན་སྩལ་མི་འཚལ་ལོ་ཞེས་ཟེར་བ་ལ་ལྟུང་བ་མེད་དོ་ཞེས་གསུངས་པ་སྔར་བསྟན་མ་ཐག་པ་ཉིད་ཡིན་ཏེ། དེ་ལྟར་གང་གིས་མི་དྲན་པ་ལ་ཉེས་པ་མེད་པའོ། །ལེན་པའི་སྤང་བ་ཞུ་བའོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །ལེན་
པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།སློང་བའི་སྤང་བ་འདི་ལ་ལྟུང་བ་བྱེད་པ་གང་ཞེ་ན། དེའི་ཕྱིར་མིའི་འགྲོ་བ་པར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ནི་ལྟུང་བའི་བྱེད་པ་པོ་ཡིན་ནོ་ཞེས་བྱ་བ་སྨྲས་ཏེ། མིའི་འགྲོ་བ་པར་གཏོགས་པ་ཞེས་བྱ་
བ་ནི་མིའི་རྒྱུད་དུ་སྐྱེས་པའོ་ཁྱིམ་པར་གྱུར་པ་ཞེས་བྱ་བ་ནི་རབ་ཏུ་བྱུང་བ་ནི་མ་ཡིན་པའོ། །སྲོག་དང་ལྡན་པ་ཞེས་བྱ་བ་ནི། སྲོག་དང་བྲལ་བ་ནི་མ་ཡིན་པའོ། །ཉེ་དུ་མ་ཡིན་པ་ཞེས་བྱ་བ་ནི། ཉེ་དུའི་མཚན་ཉིད་དང་བྲལ་བའོ། །ལྟུང་བའི་བྱེད་པ་ཞེས་བྱ་བ་ནི། ལྟུང་བ་བྱེད་པས་ན་ལྟུང་
བའི་བྱེད་པའོ། །དོན་སླ་བས་འདྲ་བར་བསྟན་པའི་ཕྱིར། འོག་མ་གསུམ་ལ་ཡང་ངོ་ཞེས་བྱ་བ་སྨྲས་ཏེ། འོག་ཁོ་ན་ནས་འབྱུང་བའི་བསླབ་པའི་གཞི་འོག་མ་གསུམ་ལ་ཡང་དེ་ཉིད་དུ་ལྟུང་བའི་བྱེད་པའོ། །འདིར་དགེ་སློང་ཇི་ལྟ་བུ་ལ་དེ་ལྟུང་བའི་བྱེད་པ་ཡིན་ཞེ་ན། དེའི་ཕྱིར་གོས་ཕྲོགས་པ་
དང་རླག་པ་དང་། ཚིག་པ་དང་རླུང་གིས་ཁྱེར་བ་དང་ཆུས་ཁྱེར་བར་མ་གྱུར་པ་ལའོ་ཞེས་བྱ་བ་སྨྲས་ཏེ། གོས་ཕྲོགས་པར་མ་གྱུར་པ་དང་། རླག་པར་མ་གྱུར་པ་ལ་སོགས་པ་ལའོ། །ཅི་ཞིག་ལྷག་པར་སྤྱད་ན་ལྟུང་བ་ཇི་ལྟ་བུར་འགྱུར་ཞེ་ན། དེའི་ཕྱིར་བསླངས་ན་ཉེས་བྱས་ཀྱིའོ་ཞེས་བྱ་བ་སྨྲས་ཏེ།

བསླངས་པ་ན་ཉེས་བྱས་ཀྱི་བྱེད་པ་པོར་འགྱུར་རོ། །ཐོབ་ན་དངོས་གཞིའོ་ཞེས་བྱ་བ་ནི། བསླངས་པའི་རྒྱུ་དེ་ལས་ཐོབ་པར་གྱུར་ན་དངོས་གཞིའི་སྤང་བའི་ལྟུང་བྱེད་ཅེས་བྱ་བའི་བྱེད་པ་པོར་འགྱུར་རོ། །ཅི་ཞིག་ཐོབ་ཅེ་ན་དེའི་ཕྱིར་ཆོས་གོས་སོ་ཞེས་བྱ་བ་སྨྲས་ཏེ། ཚད་ཅི་ཙམ་ཞིག་ཅེ་ན། དེའི་
ཕྱིར་མི་ཆུང་བ་ཉིད་དོ་ཞེས་བྱ་བ་སྨྲས་ཏེ། ཆོས་གོས་རང་གི་ཚད་དང་ལྡན་པ་ཞེས་བྱ་བའི་ཐ་ཚིག་གོ། །ཅི་ལྟ་བུ་ཞིག་ཅེ་ན། དེའི་ཕྱིར་རིན་ཐང་དང་ཁ་དོག་དང་ཁྲུ་ཚད་ལས་རྣམ་པ་གང་བསླངས་བའོ་ཞེས་བྱ་བ་སྨྲས་ཏེ། རིན་ཐང་ངམ་ཁ་དོག་གམ་ཁྲུ་ཚད་ལས་རྣམ་པ་གང་བསླངས་པའི་རྣམ་
པ་དེ་ལྟ་བུ་ཉིད་ཐོབ་ན་དངོས་གཞིའི་བྱེད་པ་པོ་ཉིད་ཡིན་ནོ། །འདིར་ཡང་གཙུག་ལག་ལས་ཁ་དོག་ཅན་ཞེས་བྱ་བའི་སྒྲ་ནི་སྔོན་པོ་ལ་སོགས་པའི་ཁ་དོག་ཉིད་ལ་སྙེགས་སོ། །དེས་ན་རིན་ཐང་ངམ། ཁ་དོག་གམ། ཁྲུ་ཚད་ཇི་ལྟ་བུ་བསླངས་པ་དེ་ལྟ་བུ་ཉིད་ཐོབ་ན་ལྟུང་བར་འགྱུར་གྱི།
གཞན་གྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །འོ་ན་གཞན་ཐོབ་ན་ཅིར་འགྱུར་ཞེ་ན། དེའི་ཕྱིར་གཞན་ལ་ནི་ལྟུང་བ་མེད་དོ་ཞེས་བྱ་བ་སྨྲས་ཏེ། རིན་ཐང་གཞན་ནམ་ཁ་དོག་གཞན་ནམ། ཁྲུ་ཚད་གཞན་ཐོབ་པ་ལ་ནི་ལྟུང་བ་མེད་དོ། །འདིར་ཁ་དོག་གི་གཞུང་ནི་དགེ་སློང་གིས་ཆོས་
གོས་སྔོན་པོ་སློང་བར་བྱེད་ཅིང་། སྔོན་པོ་ཉིད་ཐོབ་ན་དེ་ལ་སློང་བ་ལ་ཉེས་བྱས་སུ་འགྱུར་ལ། ཐོབ་པ་ནི་སྤང་བའི་ལྟུང་བྱེད་དུ་འགྱུར་རོ། །གཞན་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །རིན་ཐང་གི་གཞུང་ནི་དགེ་སློང་མའི་རྣམ་པར་འབྱེད་པ་ལས། དགེ་སློང་མས་ཆོས་གོས་
ཀཱར་ཥཱ་པ་ཎ་ལྔ་རི་བ་ཞིག་སློང་བར་བྱེད་ཅིང་། ཀཱར་ཥཱ་པ་ཎ་ལྔ་རི་བ་དེ་ཉིད་ཐོབ་ན། དེ་ལ་སློང་བ་ན་ཉེས་བྱས་སོ། །ཐོབ་པ་ན་སྤང་བའི་ལྟུང་བྱེད་དོ། །དེ་ལས་གཞན་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཚད་ཀྱི་གཞུང་ཡང་དགེ་སློང་གིས་ཆོས་གོས་ཁྲུ་ལྔ་པ་སློང་བར་བྱེད་ཅིང་
དེས་གོས་ཁྲུ་ལྔ་པ་ཉིད་ཐོབ་ན། དེ་ལ་སློང་བ་ན་ཉེས་བྱས་སོ། །ཐོབ་པ་ན་སྤང་བའི་ལྟུང་བྱེད་དོ། །གཞན་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །འདིར་གཞན་ལ་ལྟུང་བ་མེད་དོ་ཞེས་བྱ་བ་ནི་ཐ་དད་པར་གྱུར་པ་ཉིད་ལ་ཡིན་པར་རིག་པར་བྱའི། རྒྱུ་གཅིག་ལ་ལྷག་པར་ཐོབ་

པ་ལ་ལྟུང་བ་མེད་པ་མ་ཡིན་ནོ། །ཁ་དོག་ལ་སོགས་པའི་དབྱེ་བ་མ་བྱས་པར་སྤྱིར་བསླངས་པ་ན་གང་ཡང་རུང་བ་ཞིག་ཐོབ་ན་ཡང་སྤང་བའི་ལྟུང་བྱེད་དོ། །རས་མ་དང་ཁ་ཚར་དག་སློང་ནའོ་ཞེས་བྱ་བ་ནི། རས་མ་དང་ཁ་ཚར་དག་སློང་བ་ལ་ལྟུང་བ་མེད་དོ། །ཁ་ཚར་བསླངས་
པ་ལས་རས་མ་ཐོབ་པ་ལ་ཡང་ལྟུང་བ་མེད་དོ། །རས་མ་བསླངས་ན་རས་ཡུག་ཆེན་དང་། རས་ཡུག་ཕྲན་དག་ཐོབ་བོ་སྙམ་ནས་བསླངས་ཤིང་ཐོབ་ན་ཡང་ལྟུང་བ་མེད་པར་རིག་པར་བྱའོ། །རྒྱུ་དང་སྤུན་ལ་ནི་ན་སྨད་པ་ཉིད་དོ་ཞེས་བྱ་བ་ནི། རྒྱུ་ཅི་ཙམ་དང་སྤུན་ཇི་ཙམ་གྱིས་ཆོས་གོས་ཚད་དང་ལྡན་
པ་ལངས་པར་འགྱུར་བ་དེ་ཅི་ཙམ་གྱི་རྒྱུ་དང་སྤུན་དག་སློང་ཞིང་ཐོབ་ན་ཉེས་བྱས་སོ། །འདིས་ནི་ཞུ་བ་ལས་ཉེ་དུ་མ་ཡིན་པ་ལས་ཆོས་གོས་མི་ཆོག་པ་ཉིད་སློང་ན་ཉེས་བྱས་སོ། །རྒྱུ་སློང་ན་ཡང་ཉེས་བྱས་སོ། །སྤུན་སློང་ན་ཡང་ཉེས་བྱས་སོ་ཞེས་གསུངས་པ་དེ་དག་བསྡུས་པ་ཡིན་ནོ། །དེའི་རང་བཞིན་
ནི་དེ་དང་འདྲའོ་ཞེས་བྱ་བ་ནི་རྒྱུ་སྤུན་གྱི་སྐུད་པའི་རང་བཞིན་ནི་རྒྱུ་སྤུན་གྱི་སྐུད་པ་དང་འདྲ་བ་སྟེ། རྒྱུ་སྤུན་གྱི་སྐུད་པའི་རང་བཞིན་ཞེས་བྱ་བ་ནི་བལ་དང་རས་བལ་ལ་སོགས་པའོ། །འདིས་ནི་འཐག་པའི་ཞུ་བ་ལས་བཙུན་པ་རེ་ཞིག་དགེ་སློང་རས་བལ་སློང་བར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་
ཞེས་གསུངས་པ་དེ་བསྡུས་པ་ཡིན་ནོ། །སློང་བའི་སྤང་བའོ་ཞེས་བྱ་བ་དེ་རྣམ་པར་འབྱེད་པ་དང་ཞུ་བའི་སྐབས་ཅིག་ཅར་བཤད་ཟིན་ཏོ།། །།བམ་པོ་བཅོ་བརྒྱད་པ། སློང་བར་རིགས་པའི་སྤང་བ་བསྡུ་བའི་ཕྱིར། བྱིན་གྱིས་བརླབ་པར་བྱ་བ་ཐམས་ཅད་མེད་ན་སློང་བར་རིགས་པ་ཉིད་
དོ་ཞེས་བྱ་བ་སྨྲས་ཏེ། དགེ་སློང་གང་ལ་ཆོས་གོས་གསུམ་ལ་སོགས་པ་བྱིན་གྱིས་བརླབ་པར་བྱ་བ་ཐམས་ཅད་མེད་ན། བྱིན་གྱིས་བརླབ་པར་བྱ་བ་དེ་ཐམས་ཅད་བསླང་བར་རིགས་པ་ཉིད་དོ། །འདི་སྐད་བསྟན་ཏེ། བཅོམ་ལྡན་འདས་ཀྱིས་ཆོས་གོས་བཅུ་གསུམ་པོ་གང་དག་གསུངས་པ་འདི་
ལྟ་སྟེ། སྣམ་སྦྱར་དང་། བླ་གོས་དང་། མཐང་གོས་དང་། གདིང་བ་དང་། རྔུལ་གཟན་དང་། རྔུལ་གཟན་གྱི་གཟན་དང་། ཤམ་ཐབས་དང་། ཤམ་ཐབས་ཀྱི་གཟན་དང་། ལུས་ཕྱིས་དང་། སྐྲ་བཟེད་དང་། གཡན་པ་དགབ་པ་དང་། དབྱར་གྱི་རས་ཆེན་དང་། ཡོ་བྱད་ཀྱི་གོས་སོ། །བཅུ་

གསུམ་པོ་དེ་དག་ལས་ཁ་ཅིག་ལས་ནི་དབྱར་གྱི་རས་ཆེན་མི་སྨོས་པར་ཁྲུས་རས་ཞེས་འབྱུང་སྟེ། དེ་དག་གི་ནང་ནས་གང་དང་གང་མེད་པ་དེ་དང་དེ་ཉིད་སློང་བར་རིགས་པ་ཉིད་ཡིན་ནོ། །མདོར་ན་གང་ལ་དགེ་སྦྱོང་གི་ཡོ་བྱད་ཅེས་བྱ་བའི་དངོས་པོ་གང་གིས་བྲེལ་བ་ཡོད་པ་དེ་ཉིད་དུ་མ་ཡིན་པ་ལས་
སློང་བར་བྱེད་ན་དེ་ལ་ཉེས་པ་མེད་དོ། །འདི་ལ་ལྟུང་བའི་བྱེད་པ་པོ་ཉིད་གང་ཞེ་ན། དེའི་ཕྱིར་དེ་ནི་ལྟུང་བའི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི་སྔར་བསྟན་མ་ཐག་པའི་དགེ་སློང་སློང་བར་རིགས་པ་སྟེ། དེ་འདིར་ལྟུང་བའི་བྱེད་པ་པོ་ཉིད་ཡིན་གྱི། ཆོས་གོས་ནི་མ་ཡིན་ཏེ། མི་སྲིད་
པའི་ཕྱིར་རོ། །ཇི་ལྟར་ན་དགེ་སློང་སློང་བར་རིགས་པ་ཡིན་ཞེ་ན། ཉེ་དུ་མ་ཡིན་པ་ལས་ཆོས་གོས་སློང་བར་རིགས་པའི་ཕྱིར་རོ། །དེ་ཡང་གང་ཞེ་ན། ཆོས་གོས་ཕྲོགས་པ་ལ་སོགས་པའོ། །སློང་བར་མི་རིགས་པ་སློང་བར་བྱེད་ན་ནི་སློང་བའི་སྤང་བར་གཏོགས་པའི་ལྟུང་བའོ། །སློང་བར་
རིགས་པ་སློང་བར་བྱེད་ན་ནི་དེ་ལས་ལྷག་པ་ལེན་ན་ལེན་པའི་སྤང་བར་གཏོགས་པའི་ལྟུང་བར་འགྱུར་རོ། །དེའི་མདོར་བསྡུས་པ་རྣམ་པར་དབྱེ་བ་ཡིན་ནོ། །དེ་གང་ལས་འབྱུང་ཞེ་ན། སོ་སོར་ཐར་པའི་མདོ་ལས་ཆོས་གོས་ཆུས་ཁྱེར་ན་ཉེ་དུ་མ་ཡིན་པའི་ཁྱིམ་བདག་གམ་ཁྱིམ་བདག་གི་ཆུང་མའི་གན་དུ་
སོང་སྟེ། ཆོས་གོས་བསླང་བར་བྱའོ། །དེ་ལ་གལ་ཏེ་བྲམ་ཟེ་དང་ཁྱིམ་བདག་དད་པ་ཅན་དག་གིས་ཆོས་གོས་རབ་ཏུ་མང་པོ་དག་གིས་སྟོབས་པར་བྱེད་པར་གྱུར་ན། དགེ་སློང་དེས་འདོད་ན་ཆོས་གོས་དེ་ལས་སྟོད་གཡོགས་སྨད་གཡོགས་དང་བཅས་པ་མན་ཆད་བླང་བར་བྱའོ། །དེ་ལས་ལྷག་པ་
ལེན་ན་སྤང་བའི་ལྟུང་བྱེད་དོ་ཞེས་སློང་བར་རིགས་པས་བསླངས་ཏེ་ཐོབ་པ་ན་ལྟུང་བྱེད་དོ་ཞེས་རྣམ་པར་གཞག་པའི་ཕྱིར་རོ། །ཟུང་བསླང་བར་བྱ་བ་ཉིད་དོ་ཞེས་འོག་ནས་འབྱུང་བ་དེའི་རང་བཞིན་བསྟན་པར་བྱ་སྟེ། ཁྱིམ་པའི་སྟོད་གཡོགས་ཆེ་ཚད་ནི་རས་ཡུག་ཆེན་ཁྲུ་བཅུ་གཉིས་པའོ། །སྨད་གཡོགས་ནི་
རས་ཡུག་ཕྲན་བདུན་པ་དང་དོ་པའོ་ཞེས་བྱ་བ་ནི། ཁྱིམ་པའི་སྟོད་གཡོགས་དང་སྨད་གཡོགས་ཆེ་ཚད་ནི་འདི་ཡིན་པར་རིག་པར་བྱ་སྟེ། འདི་ལྟ་སྟེ། ཁྱིམ་པའི་སྟོད་གཡོགས་ཆེ་ཚད་རབ་ཀྱི་མཐར་ཕྱིན་པ་ནི། རས་ཡུག་ཆེན་ཁྲུ་བཅུ་གཉིས་པ་སྟེ། རས་ཡུག་ཆེན་གང་ལ་སྲིད་དུ་ཁྲུ་བཅུ་གཉིས་ཀྱི་ཚད་

ཡོད་པ་དེ་ནི་ཁྲུ་བཅུ་གཉིས་པའོ། །རས་ཡུག་ཆེན་དེ་ལྟ་བུ་དེ་ནི་ཁྱིམ་པའི་སྟོད་གཡོགས་དེ་གོས་ཆེན་པོའི་ཚད་ཡིན་ནོ། །འདིར་དེའི་རྐྱེན་ཉིད་ཀྱིས་ཞེང་དུ་ནི་ཤུགས་ཀྱིས་ན་ཁྲུ་གསུམ་པ་ཡིན་པར་ཤེས་པར་བྱའོ། །ཁྱིམ་པའི་སྨད་གཡོགས་ཆེ་ཚད་རབ་ཀྱི་མཐར་ཕྱིན་པ་ནི་རས་ཡུག་
ཕྲན་སྲིད་དུ་ཁྲུ་བདུན་པ་དང་ཞེང་དུ་ཁྲུ་དོ་པ་སྟེ། རས་ཡུག་ཕྲན་དེ་ལྟ་བུ་ནི་ཁྱིམ་པའི་སྨད་གཡོགས་ཏེ། འདིར་ཡང་ཆེ་ཚད་ཅེས་བྱ་བར་སྦྱར་རོ། །དགེ་སློང་གི་ཆེ་ཚད་ནི་སྣམ་སྦྱར་དང་། ཤམ་ཐབས་ཀྱི་རིམ་པ་ཇི་སྐད་བསྟན་པའོ་ཞེས་བྱ་བ་ནི་ཆེ་ཚད་ཅེས་བྱ་བར་སྦྱར་རོ། །སྣམ་སྦྱར་དང་ཤམ་ཐབས་ནི།
སྣམ་སྦྱར་དང་ཤམ་ཐབས་སོ། །རིམ་པ་ཇི་སྐད་བསྟན་པའོ་ཞེས་བྱ་བ་ནི། རིམ་པ་གཉིས་པ་ལ་སོགས་པ་སྟེ། དེ་ནི་ཆོས་གོས་ཆེ་ཚད་ཡིན་པར་རིག་པར་བྱའོ། །འདི་སྐད་བསྟན་ཏེ། དགེ་སློང་གི་སྟོད་གཡོགས་ཆེ་ཚད་ནི་སྣམ་སྦྱར་གྱི་རིམ་པ་ཇི་སྐད་བསྟན་པའོ། །སྨད་གཡོགས་ཆེ་ཚད་ནི་ཤམ་ཐབས་
ཀྱི་རིམ་པ་ཇི་སྐད་བསྟན་པའོ། །ཆོས་གོས་ཇི་སྙེད་བསླང་བར་བྱ་བ་ཉིད་ཡིན་ཞེ་ན། དེའི་ཕྱིར་ཟུང་བསླང་བར་བྱ་བ་ཉིད་དོ་ཞེས་བྱ་བ་སྨྲས་ཏེ། སྟོད་གཡོགས་སྨད་གཡོགས་སུ་བཅས་པ་ཟུང་འདི་བསླང་བར་བྱ་བ་ཉིད་ཡིན་ཏེ། ལྷག་ན་ཐ་དད་པར་གྱུར་ཀྱང་རུང་ཐ་དད་པར་གྱུར་པ་མ་ཡིན་པ་ཡང་རུང་
སྟེ། ལྟུང་བའི་བྱེད་པ་པོ་ཉིད་ཡིན་ནོ། །ཁྱིམ་པ་དང་དགེ་སློང་གི་ཟུང་འདི་གཉིས་ལས་གང་བསླང་བར་བྱ་བ་ཉིད་ཡིན་ཞེ་ན། དེའི་ཕྱིར་གང་ཡང་རུང་བའོ་ཞེས་བྱ་བ་སྨྲས་ཏེ། ཁྱིམ་པའི་སྟོད་གཡོགས་སྨད་གཡོགས་དང་བཅས་པའམ། དགེ་སློང་གི་སྟོད་གཡོགས་སྨད་གཡོགས་དང་བཅས་པའོ། །
ཚད་དེ་ལས་ལྷག་པ་ནི་བསླང་བར་བྱ་བ་ཉིད་མ་ཡིན་པའོ་ཞེས་བྱ་བ་ནི། སྔར་བསྟན་པའི་ཚད་དེ་ལས་ལྷག་པ་ནི་བསླང་བར་བྱ་བ་ཉིད་མ་ཡིན་པའོ། །དེ་ཉིད་བསྟན་པའི་ཕྱིར་སྔ་མ་ཐོབ་ན་ཁ་བསྐང་བ་ཡང་ངོ་ཞེས་བྱ་བ་སྨྲས་ཏེ། བསླང་བར་བྱ་བ་ཉིད་མ་ཡིན་པའི་རྗེས་བསྙགས་པའི་ཕྱིར་ཡང་ངོ་ཞེས་བྱ་
བའི་སྒྲ་སྨོས་སོ། །སྔ་མ་ཐོབ་ན་ཞེས་བྱ་བ་ལ་སྔ་མ་ཞེས་བྱ་བ་ནི་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་སྔར་སྨོས་པ་སྟེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་བས་གོ་རིམས་སྔར་བསྟན་པའི་ཕྱིར་རོ། །ཐོབ་ན་ཞེས་བྱ་བ་ནི་ཁྱིམ་པའི་སྟོད་གཡོགས་སྨད་

གཡོགས་དང་བཅས་པ་སྔ་མའི་ཚད་པས་ཆུང་བ་ཞིག་ཐོབ་ནའོ། །ཁ་བསྐང་བ་ཞེས་བྱ་བ་ནི་དེའི་ཁ་བསྐང་བ་ཡང་བསླང་བར་མི་བྱ་བའོ། །ཚད་ཅི་ཙམ་གྱིས་ཆུང་བ་ཐོབ་ན་དེའི་ཁ་བསྐང་བ་བསླང་བར་མི་བྱ་ཞེ་ན། རས་ཡུག་ཆེན་ཁྲུ་བཅུ་གཉིས་པ་དང་། རས་ཡུག་ཕྲན་བདུན་པ་དང་དོ་བ་མན་ཆད་རས་
ཡུག་ཆེན་ཁྲུ་ཕྱེད་དང་གསུམ་པ་དང་ཕྱེད་དང་ལྔ་པའི་བར་དང་། རས་ཡུག་ཕྲན་འཁོར་གསུམ་ཁེབས་པའི་ཚད་ཀྱི་བར་ནི་ཆུང་བའི་མཐའ་ཡིན་པར་རིག་པར་བྱའོ། །དེ་བས་ཆེས་ཆུང་བ་ཞིག་ཐོབ་ན་ནི་དེའི་ཁ་བསྐང་བ་བསླང་བར་བྱ་སྟེ། ཆེས་ཆུང་བ་ལ་ནི་བྱིན་གྱིས་བརླབ་ཏུ་མི་རུང་བའི་ཕྱིར་རོ། །
རས་ཡུག་ཆེན་ཁྲུ་ཕྱེད་དང་གསུམ་པ་དང་ཕྱེད་དང་ལྔ་པ་དང་རས་ཡུག་ཕྲན་འཁོར་གསུམ་ཁེབས་པའི་ཚད་ནི་འདོད་ལ་ཞེས་བྱ་བའི་སྒྲ་མེད་པར་བྱིན་གྱིས་བརླབ་ཏུ་རུང་སྟེ། མ་དྲས་པ་ཡིན་པའི་ཕྱིར་རོ། །དེ་ལྟར་ཡང་སློབ་དཔོན་ཡོན་ཏན་འོད་ཀྱིས་རང་གི་རྣམ་པར་བཤད་པ་ལས་སྨོས་སོ། །ཆོས་གོས་
མ་དྲས་པ་འཆང་བར་འདོད་པ་གང་ཡིན་པ་དེ་ཉིད་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་འདོད་པ་ཡིན་ཏེ། འགྲེལ་པ་བྱེད་པས་ཀྱང་དེ་ཁོ་ན་སྐད་བཤད་དོ། །གལ་ཏེ་ཆོས་གོས་མ་དྲས་པ་བྱས་ཟིན་པར་མི་འགྱུར་ན་ནི་དེ་བཅད་པར་འདོད་པ་ཉིད་ཀྱང་བསྐྱེད་པར་མི་བྱ་སྟེ། འདོད་ན་ཞེས་བྱ་
བར་སེམས་པའི་ཕྱིར་རོ། །དེའི་ཁ་བསྐང་བ་ཡང་ཅིའི་ཕྱིར་བསླང་བར་མི་བྱ་སྟེ། དེའི་ཕྱིར་དེ་བསམ་མོ། །གལ་ཏེ་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ལས་ལྷག་པ་ཞིག་ཐོབ་ན་ནི་དེའི་ཚེ། ལྷག་པར་སྦྱིན་པར་བྱ་བ་ཉིད་མ་ཡིན་ནོ། །གལ་ཏེ་དགེ་སློང་གིས་སྟོད་གཡོགས་སྨད་གཡོགས་
དང་བཅས་པ་སློང་བར་བྱེད་པ་ན་ཚད་ལས་ཆེས་ལྷག་པ་ཞིག་ཐོབ་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་ཕྱི་མ་ཐོབ་ན་ལྷག་པ་སྦྱིན་པར་བྱ་བ་ཉིད་དོ་ཞེས་བྱ་བ་སྨྲས་ཏེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་ནི་འདིར་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་བས་ཕྱིས་བསྟན་
པའི་ཕྱིར། ཕྱི་མ་ཞེས་བྱ་བའི་སྒྲར་བརྗོད་དེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་ཕྱིས་མ་ཐོབ་ན་གལ་ཏེ་ལྷག་པར་ཐོབ་ན་ཡང་ལྷག་པ་སྦྱིན་པ་དག་ལ་སྦྱིན་པར་བྱ་བ་ཉིད་དེ། དོན་ཡོངས་སུ་རྫོགས་པ་ལས་དེ་ལྷག་པའི་ཕྱིར་རོ། །བསམ་པའི་དབང་གིས་ཀྱང་ཡོངས་སུ་རྫོགས་པ་

ཉིད་ཡིན་ཏེ། ཆིག་རྐྱང་དང་དྲས་པ་ལ་སོགས་པའི་བསམ་པས་སོ། །སློང་བར་མི་རིགས་པའི་དགེ་སློང་གིས་བདག་ནི་སློང་བར་རིགས་པ་ཡིན་ནོ་སྙམ་དུ་རྟོག་པ་འདིས་སློང་བ་ལ་ཞུགས་ན་བྱ་བ་གང་ལ་ལྟུང་བ་ཇི་ལྟ་བུར་འགྱུར་ཞེ་ན། དེའི་ཕྱིར་བསླང་བར་བྱ་བ་མ་ཡིན་པ་
བསླངས་ན་ཉེས་བྱས་སོ་ཞེས་བྱ་བ་སྨྲས་ཏེ། བསླང་བར་བྱ་བ་མ་ཡིན་པ་བསླང་བར་མི་འོས་པའི་གོས་རྔ་བལ་ལ་སོགས་པ་བསླངས་ན་སྦྱོར་བ་ལས་གྱུར་པའི་ཉེས་བྱས་སོ། །ཐོབ་ན་དངོས་གཞིའོ་ཞེས་བྱ་བ་ནི་རུང་བ་མ་ཡིན་པའི་ཕྱིར་ཏེ། དངོས་གཞི་ནི་ཉེས་བྱས་ལྕི་བ་ཡིན་ནོ། །འདི་སྐད་བསྟན་
ཏེ། དངོས་པོ་གང་དང་གང་གི་ཆོས་དང་ལྡན་པའི་དགོས་པ་ཡོད་པ་དེ་དང་དེས་བྲེལ་བ་ཡོད་ན་དགེ་སློང་དེས་སངས་རྒྱས་མཆོད་པ་ལ་སོགས་པའི་དགོས་པས་དངོས་པོ་དེ་ཤིན་ཏུ་མང་པོ་ཡིན་ན་ཡང་བསླང་བར་བྱའོ། །བྲེལ་བ་མེད་ན་རྩྭ་ཙམ་ཡང་བདག་གིར་མི་བྱ་ན། གོས་ལ་སོགས་པ་ལྟ་ཕར་ཞོག་
སྟེ། དེ་ནི་ཉེས་བྱས་སྔ་མར་གཏོགས་སོ། །སྦྱིན་པར་བྱ་བ་མི་སྦྱིན་ན་ཡང་ངོ་ཞེས་བྱ་བ་ལ་དངོས་གཞིའོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ལྷག་པ་སྦྱིན་པར་བྱ་བ་ཉིད་དོ་ཞེས་སྨོས་པ་མ་སྦྱིན་ན་དངོས་གཞི་སྟེ་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་
གོ། །དེ་ལྟ་བས་ན་བསླབ་པའི་གཞི་འདི་ལ་ལྷག་པ་འདི་ཉིད་མ་བྱིན་ན་དངོས་གཞི་ཡིན་པར་ཁོང་དུ་ཆུད་པར་བྱའོ། །སློང་བར་རིགས་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།སྤགས་པ་སློང་བའི་སྤང་བ་ནི་སློང་བའི་སྤང་བའི་རབ་ཏུ་དབྱེ་བར་གྱུར་པ་ཡིན་པས་དེའི་ཕྱིར་སློང་
བའི་སྤང་བའི་སྐབས་སུ་མིའི་འགྲོ་བ་པར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ནི་ལྟུང་བའི་བྱེད་པ་ཡིན་ནོ་ཞེས་བྱ་བ་ལ་སོགས་པ་སྨོས་པའི་རྣམ་པ་ཁས་བླངས་ནས་དེའི་བྱེ་བྲག་བརྗོད་པར་བྱ་སྟེ། དེའི་ཕྱིར་སྤགས་པ་མ་ཕུལ་བར་ཤེས་པ་ནི་མ་སྤགས་པ་དང་འདྲའོ་ཞེས་བྱ་བ་སྨྲས་ཏེ།
མ་ཕུལ་བ་ཞེས་བྱ་བ་ནི་སྦྱིན་བདག་གིས་ལྟུང་བ་འབྱིན་པའི་གང་ཟག་ལ་འདི་ལ་ཆོས་གོས་སྤགས་པ་གང་ཡིན་པ་དེ་སྦྱིན་ནོ་ཞེས་ཆོས་གོས་ཀྱིས་མགྲོན་དུ་མ་གཉེར་བའོ། །ཤེས་པ་ཞེས་བྱ་བ་ནི་དགེ་སློང་དེས་གང་ཡང་རུང་བ་ཞིག་གིས་ཤེས་པའོ། །ཆོས་གོས་སྤགས་པ་དེ་ནི་སློང་བའི་ཕྱིར། མ་སྤགས་

པ་དང་འདྲ་བར་ཤེས་པར་བྱའོ། །འདི་སྐད་བསྟན་ཏེ། ཇི་ལྟར་ཆོས་གོས་མ་སྤགས་པ་མིའི་འགྲོ་བ་པར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ལས་སློང་བ་ན་ཉེས་བྱས་སུ་འགྱུར་ལ་ཐོབ་ན་དངོས་གཞིར་འགྱུར་བ་ཁོ་ན་བཞིན་དུ་སྤགས་པ་ཡང་དེ་དང་འདྲའོ་ཞེས་བྱ་བའི་ཐ་ཚིག་གོ། །
སྤགས་པའམ་སྤགས་པ་མི་ཤེས་པར་གྱུར་པ་ནི་སློང་བའི་སྤང་བའི་ཡུལ་ཡིན་ལ། སྤགས་པ་ཞེས་པ་ནི་འདིའི་ཡུལ་ཡིན་ནོ། །དོན་དེ་ཉིད་བསྟན་པའི་ཕྱིར་དེ་ཉིད་གཞན་ཡིན་ནོ་ཞེས་བྱ་བ་སྨྲས་ཏེ། དེ་ཉིད་ཅེས་བྱ་བ་ནི་ཆོས་གོས་སྤགས་པ་ལྟུང་བ་འཕྱིན་པའི་གང་ཟག་གིས་མི་ཤེས་པའོ། །གཞན་
ཡིན་ནོ་ཞེས་བྱ་བ་ནི་མ་སྤགས་པ་ཉིད་ཡིན་པའོ། །འདི་སྐད་བསྟན་ཏེ། འདི་ནི་སློང་བའི་སྤང་བའི་གཞི་ཉིད་ཀྱི་ཁོངས་སུ་གཏོགས་པར་རིག་པར་བྱའོ། །གལ་ཏེ་སྤགས་པ་མི་ཤེས་པ་སློང་བར་བྱེད་ན་ནི་སློང་བའི་སྤང་བའི་ཁོངས་སུ་གཏོགས་པའི་ཉེས་བྱས་ཡིན་པར་རིག་པར་བྱའོ། །ཤེས་ན་ནི་ཐོབ་
ན་དེའི་ཚེ་སྤགས་པ་སློང་བའི་སྤང་བའི་ཁོངས་སུ་གཏོགས་པའི་དངོས་གཞི་ཡིན་པར་རིག་པར་བྱའོ། །སྤགས་པ་སློང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།འདི་ལྟར་སོ་སོ་ནས་སྤགས་པ་སློང་བ་འདི་ནི་སྤགས་པ་སློང་བའི་སྤང་བའི་རྣམ་པ་ཡིན་མོད་ཀྱི། འོན་ཀྱང་སྦྱིན་པར་
བྱེད་པའི་སྦུངས་ཀྱི་བྱེ་བྲག་ལས་ལྟུང་བ་ཐ་དད་པར་རྣམ་པར་གཞག་པར་བྱ་སྟེ། འདི་ལྟར་ཚེ་དང་ལྡན་པ་ཉེ་དགས་ཁྱིམ་བདག་དང་ཁྱིམ་བདག་གི་ཆུང་མ་ལ་སོ་སོ་ནས་རས་ཡུག་ཆེན་ཡང་དག་པར་སྦྱིན་དུ་གཞུག་པར་བྱས་པའི་ཕྱིར་རོ། །སྤགས་པ་སློང་བར་འདྲ་མོད་ཀྱི་འོན་ཀྱང་བྱེ་བྲག་བརྗོད་པར་བྱ་
སྟེ། སྦྱིན་པར་བྱེད་པ་སྦུངས་ཆེ་བ་ཡང་ངོ་ཞེས་བྱ་བ་ནི་སྤགས་པ་མ་ཕུལ་བར་ཤེས་པ་ནི་མ་སྤགས་པ་དང་འདྲའོ་ཞེས་བྱ་བ་དང་དེ་ཉིད་གཞན་ཡིན་ནོ་ཞེས་བྱ་བ་དེ་དག་ཐམས་ཅད་ཀྱི་རྗེས་སུ་སྦྱར་རོ། །སྦྱིན་པར་བྱེད་པ་སྦུངས་ཆེ་བ་ཞེས་བྱ་བ་ནི་ཚམ་ཚོམ་མེད་པའོ། །ཡང་ངོ་ཞེས་བྱ་བའི་སྒྲས་
ནི་སྔར་བསྟན་པའི་རྣམ་པས་སོ་སོ་བའི་སྤང་བ་རྣམ་པར་འཇོག་པར་བྱེད་དོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སྦྱིན་པར་བྱེད་པ་སྦུངས་ཆེ་བ་མིའི་འགྲོ་བར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པས་ཆོས་གོས་སྤགས་པ་གང་ཟག་ལ་མ་ཕུལ་བར་ཤེས་པ་སློང་

བར་བྱེད་ན་ནི་ཉེས་བྱས་སོ། །ཐོབ་ན་ནི་སོ་སོ་ནས་སྤགས་པ་སློང་བའི་སྤང་བའི་ལྟུང་བྱེད་དོ། །སྤགས་པར་མི་ཤེས་པ་སློང་བར་བྱེད་ན་ནི་སློང་བའི་སྤང་བར་འགྱུར་རོ། །སྦྱོར་བ་གཅིག་པའི་ཕྱིར་ཐོབ་ན་གཅིག་ཉིད་དོ་ཞེས་བྱ་བ་ནི། སྦྱོར་བ་གཅིག་པ་ནི་སྦྱོར་བ་
གཅིག་པ་སྟེ། སྦྱོར་བ་གཅིག་པའི་ཕྱིར་ཐོབ་ན་རྫས་དུ་མ་ཉིད་ཡིན་དུ་ཟིན་ཀྱང་གཅིག་པ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་སྦྱོར་བ་གཅིག་གིས་ཆོས་གོས་སོ་སོ་བ་ཞིག་ཐོབ་ན་དེ་ལྟ་ན་ཡང་ལྟུང་བ་གཅིག་ཁོ་ནར་འགྱུར་རོ། །དེ་ལྟར་གྱུར་ན་ལེན་པ་དང་སློང་བ་དང་སློང་བར་རིགས་པ་དང་སྤགས་
པ་སློང་བ་དང་སོ་སོ་ནས་སྤགས་པ་སློང་བའི་སྤང་བ་དག་ལ་སྦྱོར་བ་གཅིག་གིས་གོས་དུ་མ་ཐོབ་པ་དེ་དག་ལ་ལྟུང་བ་གཅིག་ཁོ་ནར་འགྱུར་རོ། །དགེ་སློང་མ་འམ་ཉེ་དུ་མ་ཡིན་པ་ལ་གོས་དུ་མ་སྦྱིན་པ་དང་ལྷུང་བཟེད་དང་དབྱར་གྱི་རས་ཆེན་ཐོབ་པ་ལ་ཡང་སྦྱོར་བ་གཅིག་ཉིད་ཡིན་ན་འབྲས་བུ་དུ་མ་ཉིད་ཡིན་
དུ་ཟིན་ཀྱང་ལྟུང་བ་གཅིག་ཁོ་ནར་འགྱུར་རོ། །སོ་སོ་ནས་སྤགས་པ་སློང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་བསྐུལ་བའི་སྤང་བར་འགྱུར་ཞེ་ན། དེའི་ཕྱིར་བསྐུལ་བ་རུང་བ་མ་ཡིན་པ་ཆོས་གོས་ཀྱི་རིན་སྤངས་ནས་ཡོངས་སུ་དྲི་བ་སྔོན་དུ་བཏང་ཞིང་
བསྟན་ཏེ་བསྒོ་ཞིང་སྨྲས་པ་བྱུང་བའི་མཐའ་རྗེས་སུ་བརྗོད་པ་སྔར་བྱས་པའི་ཞལ་ཏ་བྱེད་པ་ལ་བསྐུལ་བར་གྱུར་ནའོ་ཞེས་བྱ་བ་སྨྲས་ཏེ། བསྐུལ་བ་ཞེས་བྱ་བ་ནི་ཡོན་བདག་གིས་སོ། །རུང་བ་མ་ཡིན་པ་ཞེས་བྱ་བ་ནི་གསེར་ལ་སོགས་པ་དབྱིག་གོ། །ཆོས་གོས་ཀྱི་རིན་ཞེས་བྱ་བ་ནི། གསེར་
ལ་སོགས་པ་གང་གིས་ཆོས་གོས་ཉོ་བར་བྱེད་པའོ། །སྤངས་ནས་ཞེས་བྱ་བ་ནི། ཚེ་དང་ལྡན་པ་ཕོ་ཉ་དགེ་སློང་དག་ནི་གོས་ཀྱི་རིན་དག་ལེན་དུ་མི་རུང་སྟེ། བདག་ཅག་གོས་སུ་རུང་བ་དུས་སུ་རྙེད་ན་ནི་ལེན་ཏོ་ཞེས་བྱ་བས་སྤངས་ནས་སོ། །ཡོངས་སུ་དྲི་བ་སྔོན་དུ་བཏང་ཞིང་ཞེས་བྱ་བ་ནི། གལ་ཏེ་
ཕོ་ཉ་དེ་དགེ་སློང་དེ་ལ་འདི་སྐད་ཅེས་འཕགས་པ་རྣམས་ཀྱི་ཞལ་ཏ་བགྱིད་པ་འཕགས་པ་རྣམས་ཀྱི་ཞལ་ཏ་ཉམས་སུ་ལེན་པ་གང་ལགས་པ་འགའ་མཆིས་སམ་ཞེས་འདྲི་བར་བྱེད་པ་སྟེ། ཞལ་ཏ་བྱེད་པའི་ཡུལ་གང་ལ་ཡོངས་སུ་དྲི་བ་སྔར་བྱས་པ་གང་ཡིན་པ་དེ་ནི་ཡོངས་སུ་དྲི་བ་སྔོན་དུ་བཏང་བ་སྟེ།

ཡོངས་སུ་དྲི་བ་སྔོན་དུ་བཏང་བའི་ཞལ་ཏ་བྱེད་པ་དེ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། །ཁྱད་པར་ཅི་ལྟ་བུ་ཞིག་ལ་ཞེ་ན། དེའི་ཕྱིར་བསྟན་ཏེ་ཞེས་བྱ་བ་སྨྲས་ཏེ། སྤོང་བར་བྱེད་པའི་དགེ་སློང་གི་ཕོ་ཉ་འདི་ནི་དགེ་སློང་རྣམས་ཀྱི་ཞལ་ཏ་བྱེད་པ་སྟེ། འདི་ནི་དགེ་སློང་རྣམས་ཀྱི་ཞལ་ཏ་
ཉམས་སུ་ལེན་པའོ་ཞེས་ཀུན་དགའ་ར་བའམ་དགེ་བསྙེན་ཞལ་ཏ་བྱེད་པ་ལ་བསྟན་པར་བྱའོ་ཞེས་བྱ་བས་བསྟན་ཅིང་སྨྲས་པ་ཡིན་པར་ཤུགས་ཀྱིས་ཁོང་དུ་ཆུད་པར་བྱའོ། །བསྒོ་ཞིང་ཞེས་བྱ་བ་ནི། དེ་ནས་ཕོ་ཉ་དེས་གོས་ཀྱི་རིན་དེ་དག་ཁྱེར་ནས་ཞལ་ཏ་བྱེད་པ་ག་ལ་བ་དེར་འགྲོ་བར་བྱ་ཞིང་ཕྱིན་
ནས་ཞལ་ཏ་བྱེད་པ་དེ་ལ་འདི་སྐད་ཅེས་ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག །ཁྱོད་ཀྱི་གོས་ཀྱི་རིན་འདི་དག་གིས་གོས་འདི་དང་འདི་ལྟ་བུ་ཅན་ཞིག་ཉོས་ལ་དགེ་སློང་མིང་འདི་ཞེས་བྱ་བ་འོངས་པ་དང་དེ་ལ་གོས་རུང་བ་དུས་སུ་བསྐོན་ཅིག་ཅེས་བྱ་བས་གལ་ཏེ་ཕོ་ཉས་ཞལ་ཏ་བྱེད་པ་དེ་ལ་
བསྒོ་བ་སྟེ། བསྒོ་བའི་ཞལ་ཏ་བྱེད་པ་དེ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། །སྨྲས་པ་ཞེས་བྱ་བ་ནི། དེ་ནས་ཕོ་ཉ་དེས་ཞལ་ཏ་བྱེད་པ་དེ་ལ་ཤིན་ཏུ་ལེགས་པར་ཡང་དག་པར་བསྒོ་ཞིང་ཡང་དག་པར་བསྟན་ནས་དགེ་སློང་དེ་ག་ལ་བ་དེར་འགྲོ་བར་བྱ་ཞིང་ཕྱིན་ནས་ཞེས་བྱ་བ་ལ་སོགས་པས་
གལ་ཏེ་ཕོ་ཉ་དེས་དགེ་སློང་དེ་ལ་སྨྲས་པ་དང་སྦྱར་རོ། །ཇི་སྐད་སྨྲས་ཤེ་ན། དེའི་ཕྱིར་བྱུང་བའི་མཐའ་རྗེས་སུ་བརྗོད་པ་སྔར་བྱས་པ་ཞེས་བྱ་བ་སྨྲས་ཏེ། དགེ་སློང་དེ་ལ་འདི་སྐད་ཅེས་འཕགས་པས་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་པར་བགྱི་ལགས་ཀྱིས་དེའི་གན་དུ་
བཞུད་ཅིག་དང་དེས་ཁྱོད་ལ་གོས་རུང་བ་དུས་སུ་བསྐོན་པར་འགྱུར་རོ་ཞེས་བྱ་བ་སྨྲས་སོ། །དེ་ལྟ་བུའི་ཁྱད་པར་ཅན་གྱི་ཞལ་ཏ་བྱེད་པ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། །བསྐུལ་བར་གྱུར་ནའོ་ཞེས་བྱ་བ་ནི། དགེ་སློང་གིས་ཞལ་ཏ་བྱེད་པ་ལ་བསྐུལ་བར་གྱུར་ན་སྟེ། དགེ་སློང་གོས་
འདོད་པས་ཞལ་ཏ་བྱེད་པའི་གན་དུ་སོང་ལ། ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ། །ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ་ཞེས་ལན་གཉིས་ལན་གསུམ་དུ་བསྐུལ་བར་བྱ་ཞེས་བྱ་ལ་སོགས་པས་སོ། །གལ་ཏེ་སྐུལ་བར་བྱེད་པས་བསྐུར་བར་བྱ་བ་ལ་བསྐུལ་བ་ན་དེས་

ཀྱང་བརྡ་མ་ཕྲད་ན་དེ་བསྐུལ་བ་ཉིད་མ་ཡིན་པར་བསྟན་པའི་ཕྱིར། འགྲོ་བ་མ་ནུས་པ་ཉིད་ན་བསྐུལ་བ་ཉིད་མ་ཡིན་ནོ་ཞེས་བྱ་བ་སྨྲས་ཏེ། འགྲོ་བ་ཞེས་བྱ་བ་ནི་གོ་བར་བྱ་ན་ཁོང་དུ་ཆུད་པར་བྱ་བ་ཡུལ་དུ་གྱུར་པའོ། །མ་ནུས་པའི་དངོས་པོ་ནི་མ་ནུས་པ་ཉིད་དེ་འགྲོ་བ་དེ་གོ་
བར་བྱེད་མ་ནུས་པ་ཉིད་ན་བསྐུལ་བར་བྱ་བ་བསྐུལ་བ་ཉིད་མ་ཡིན་ནོ། །འདི་སྐད་བསྟན་ཏེ། བརྟད་པར་སྨྲས་པ་འམ། གཉིད་ལོག་པའམ། ར་རོ་བ་འམ། བྲེལ་བ་ཉིད་དམ། འོན་པ་ཉིད་དམ། ནད་ཀྱིས་བཏབ་པའམ། གཞན་གྱི་དབང་དུ་གྱུར་པ་ལ་སོགས་པའི་རྐྱེན་དག་གིས་གལ་ཏེ་
ལེགས་པར་བརྡ་ཕྲད་པར་མ་ནུས་ན་དེའི་ཚེ་བསྐུལ་བ་ཉིད་མ་ཡིན་ནོ། །འགྲོ་བ་མ་གོ་བས་བསྐུལ་བ་ཉིད་མ་ཡིན་པ་འབའ་ཞིག་ཏུ་མ་ཟད་ཀྱི། དེ་དང་འབྲེལ་བའི་ཚིག་དང་དོན་དང་བརྡ་དང་བྱ་བ་གཞན་གང་ཡིན་པ་ཐམས་ཅད་ཀྱི་འགྲོ་བ་མ་ནུས་ན་ཡང་དེ་མ་བྱས་པ་ཁོ་ན་ཡིན་ནོ། །བཅོམ་ལྡན་འདས་ཀྱིས་
བསྐུལ་བའི་སྒོ་དྲུག་པོ་གང་དག་གསུངས་པ་དེ་དག་ཀྱང་བགྲོས་ན་བསྐུལ་བ་དག་ཡིན་གྱི། མ་བགྲོས་ན་ནི་མ་ཡིན་ཏེ། འདི་ལྟ་སྟེ་མངོན་པར་སྨྲ་བ་དང་། ལེགས་པར་སྦྱོར་བ་དང་། ཟན་སྐོམ་དག་གི་དབང་དུ་བྱས་ནས་རེ་རེ་ལ་ཡང་གཉིས་གཉིས་ཏེ་དྲུག་ཏུ་འགྱུར་རོ། །དེ་ལ་མངོན་པར་སྨྲ་བ་ནི་
ཁྱོད་འོངས་སམ་ཞེས་ཟེར་བ་ལ། དེའི་ཕྱིར་རོ་ཞེས་ཟེར་བ་དང་། ལེགས་པར་འོངས་སམ་ཞེས་ཟེར་བ་ལ་དེའི་ཕྱིར་རོ་ཞེས་ཟེར་བའོ། །ལེགས་པར་སྦྱོར་བ་ནི་སྟན་འདི་ལ་འདུག་ཤིག་ཅེས་ཟེར་བ་ལ། དེའི་ཕྱིར་རོ་ཞེས་ཟེར་བ་དང་། རྐང་པ་ཁྲུས་ཤིག་ཅེས་ཟེར་བ་ལ་དེའི་ཕྱིར་རོ་ཞེས་ཟེར་བ་
ལ། ཟན་སྐོམ་གྱི་དབང་དུ་བྱས་པ་ནི། ཟན་ཟོ་ཤིག་ཅེས་ཟེར་བ་ལ་དེའི་ཕྱིར་རོ་ཞེས་ཟེར་བ་དང་། སྐོམ་འཐུང་ཤིག་ཅེས་ཟེར་བ་ལ་དེའི་ཕྱིར་རོ་ཞེས་ཟེར་བའོ། །དེ་དག་ཐམས་ཅད་ཀྱང་སོ་སོར་དབྱེ་བར་བྱ་སྟེ་སྦྱོར་བ་གཅིག་གིས་བྱས་ན་ནི་དྲུག་པོ་ཐམས་ཅད་ཀྱང་བསྐུལ་བའི་སྒོ་གཅིག་
ཁོ་ནར་འགྱུར་བས་དེའི་ཕྱིར་སོ་སོར་དབྱེ་བར་བྱའོ། །མ་གྲུབ་ན་ལན་གཉིས་སུ་ཡང་ངོ་ཞེས་བྱ་བ་ནི། བསྐུལ་བ་དང་པོ་དེས་གོས་ཐོག་མར་མ་གྲུབ་ན་ལན་གཉིས་སུ་ཡང་བསྐུལ་བར་བྱའོ། །ལན་གསུམ་དུ་ཡང་ངོ་ཞེས་བྱ་བ་ནི་ལན་གཉིས་སུ་བསྐུལ་བ་དེས་ཀྱང་མ་གྲུབ་ན་ལན་གསུམ་དུ་

ཡང་བསྐུལ་བར་བྱ་བའོ། །དེའི་འོག་ཏུ་ལན་གསུམ་གྱི་བར་དུ་ཕྱོགས་སུ་བསྡད་པར་བྱའོ་ཞེས་བྱ་བ་ནི། ལན་གསུམ་བསྐུལ་བས་གོས་ཀྱི་རྙེད་པ་མ་གྲུབ་ན་དེའི་འོག་ཏུ་དགེ་སློང་དེས་ལན་གསུམ་གྱི་བར་དུ་ནོར་སྦྱིན་པའི་ཞལ་ཏ་བྱེད་པ་དེ་གནས་གང་ན་འདུག་པའི་ཕྱོགས་སུ་མཚན་མའི་དངོས་
པོ་ཙམ་གྱིས་ཅང་མི་སྨྲ་བར་བསྡད་པར་བྱའོ། །འོ་ན་རྣམ་པར་འབྱེད་པ་ལས་ལན་བཞི་འམ་ལན་ལྔ་འམ་དྲུག་གི་བར་དུ་ཅང་མི་སྨྲ་བར་ཕྱོགས་སུ་བསྡད་པར་བྱའོ་ཞེས་གསུངས་ལ། འདིར་ཇི་ལྟར་ལན་གསུམ་གྱི་བར་དུ་ཕྱོགས་སུ་བསྡད་པར་བྱ་ཞེས་བཤད་ཅེ་ན། རྣམ་པར་འབྱེད་པ་
ལས་ནི་བསྐུལ་བ་གཅིག་གམ་གཉིས་སམ་གསུམ་དང་བཅས་པའི་གྲངས་ཀྱིས་གྲངས་དེ་སྐད་གསུངས་ཀྱི། ཕྱོགས་སུ་བསྡད་པ་འབའ་ཞིག་ཏུ་དེ་སྐད་གསུངས་པ་ནི་མ་ཡིན་ནོ། །འདིར་ནི་གནས་གྲགས་པ་གང་ན་ཀུན་ནས་སྡོད་པ་དེ་ཡིན་པར་རིག་པར་བྱའོ། །མ་གྲུབ་ན་སྦྱིན་པར་བྱེད་པ་ལ་
བསྒྲག་པར་བྱའོ་ཞེས་བྱ་བ་ནི། ཇི་སྐད་བསྟན་པའི་རྣམ་པ་དེ་དག་གིས་གོས་ཀྱི་རྙེད་པ་མ་གྲུབ་ཅིང་རེ་བ་མེད་པར་གྱུར་ན་སྦྱིན་པར་བྱེད་པའི་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས་ཁྱོད་ཉིད་ཤེས་པར་གྱིས་ཤིག་ཅེས་བསྒྲག་པར་བྱ་བའོ། །དེ་ལྟར་སྤངས་པར་གྱུར་ཟིན་པ་ན་འབུལ་
བར་བྱེད་ན་སྤངས་པ་སྨྲས་ཏེ་སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་ཁས་ལེན་པ་ལས་བླང་བར་བྱའོ་ཞེས་བྱ་བ་ལ། དེ་ལྟར་ཞེས་བྱ་བ་ནི། སྔར་བསྟན་པའི་རིམ་པ་ལྟར་རོ། །སྤངས་པར་གྱུར་ཞེས་བྱ་བ་ནི་བཏང་བར་གྱུར་པའོ། །ཟིན་པ་ན་ཞེས་བྱ་བ་ནི། དེ་ལྟར་སྤངས་པར་
གྱུར་པའི་མཐར་ཐུག་པར་གྱུར་ཟིན་པ་ནའོ། །འབུལ་བར་བྱེད་ན་ཞེས་བྱ་བ་ནི། ཞལ་ཏ་བྱེད་པས་དེའི་འོག་ཏུ་ཕྱིས་དགེ་སློང་དེ་ལ་གོས་འབུལ་བར་བྱེད་ན་སྟེ། འབུལ་བར་བྱེད་ན་དེ་ལས་དགེ་སློང་གིས་གོས་བླང་བར་བྱའོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཅན་ཞིག་ལས་ཤེ་ན། དེའི་ཕྱིར་
སྤངས་པ་སྨྲས་ཏེ་ཞེས་བྱ་བ་སྨྲས་ཏེ། དགེ་སློང་དེས་ཞལ་ཏ་བྱེད་པ་ལ་ཁོ་བོས་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས། ཁྱོད་ཉིད་ཤེས་པར་གྱིས་ཤིག་ཅེས་བསྒྲགས་ཟིན་ཏོ་ཞེས་སྨྲས་པ་སྟེ། དེ་སྐད་གང་ལ་སྨྲས་པའི་ཞལ་ཏ་བྱེད་པ་དེ་ལས་སོ། །གཞན་ཡང་

སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་ཁས་ལེན་པ་ལ་སྟེ། སྦྱིན་པར་བྱེད་པའི་སེམས་ནི་སྦྱིན་བདག་གི་སེམས་སོ། །དེ་བསྡུ་བར་རྗེས་སུ་བསྒྲུབ་པ་ཁས་ལེན་པ་ནི་ཞལ་ཏ་བྱེད་པ་གང་གིས་སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་དགེ་
སློང་ལ་ཁས་ལེན་པ་སྟེ། དེ་ལས་དགེ་སློང་དེས་གོས་དེ་བླང་བར་བྱའོ། །འདི་སྐད་བསྟན་ཏེ། དགེ་སློང་གིས་སྔར་ཇི་སྐད་བསྟན་པའི་རྣམ་པ་དེ་དག་གིས་ཞལ་ཏ་བྱེད་པ་ལས་གོས་ཀྱི་རྙེད་པ་མ་གྲུབ་ཅིང་རེ་བ་མེད་པར་གྱུར་ནས་སྦྱིན་པར་བྱེད་པའི་སྦྱིན་བདག་ལ་ཞལ་ཏ་བྱེད་པས་བདག་ལ་
ཅི་ཡང་མ་བྱིན་གྱིས་ཁྱོད་ཉིད་ཤེས་པར་གྱིས་ཤིག་ཅེས་བསྒྲགས་ཤིང་སྤངས་པར་གྱུར་ཟིན་པའི་འོག་ཏུ་ཕྱིས་ཞལ་ཏ་བྱེད་པས་དགེ་སློང་ལ་གོས་འབུལ་བར་བྱེད་ན། དེའི་ཚེ་དགེ་སློང་དེས་ཞལ་ཏ་བྱེད་པ་ལ་འདི་སྐད་ཅེས་ཁོ་བོས་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས་
ཁྱོད་ཉིད་ཤེས་པར་གྱིས་ཤིག་ཅེས་གོས་སྤངས་པ་སྨྲས་ཟིན་ཏོ་ཞེས་རྗེས་སུ་བསྒྲག་པར་བྱའོ། །དེ་ལྟར་གོས་སྤངས་པ་ཤེས་པར་བྱས་ཀྱང་གལ་ཏེ་ཞལ་ཏ་བྱེད་པ་དེ་འདི་སྐད་ཅེས་འཕགས་པས་བདག་ལ་གོས་འདི་ལོང་ཤིག་དང་། བདག་གིས་སྦྱིན་བདག་གི་སེམས་བསྡུ་བར་བྱའོ་ཞེས་
ཁས་ལེན་པར་བྱེད་ན། དེའི་ཚེ་དགེ་སློང་དེས་ཞལ་ཏ་བྱེད་པ་དེ་ལས་གོས་དེ་བླང་བར་བྱའོ། །ཇི་ལྟར་བསྐུལ་བ་ལ་སོགས་པའི་བྱ་བ་བསྟན་ནས། ད་ནི་ལེན་པའི་སྔོན་རོལ་དུ་ཅི་ཞིག་རྗེས་སུ་སྒྲུབ་པར་བྱེད་ན་བསྐུལ་བའི་སྤང་བར་འགྱུར་བ་བསྟན་པའི་ཕྱིར། བསྐུལ་བ་དང་སྡུད་པ་
ལྷག་གམ་ཁས་མ་བླངས་ནའོ་ཞེས་བྱ་བ་སྨྲས་ཏེ། བསྐུལ་བ་ལྷག་པ་ཞེས་བྱ་བ་ནི་ལན་གསུམ་ལས་ལྷག་པར་བསྐུལ་ནའོ། །བསྡད་པ་ལྷག་པ་ཞེས་བྱ་བ་ཡང་དེ་བཞིན་དུ་ལན་གསུམ་ལས་ལྷག་པར་ཕྱོགས་སུ་བསྡད་ནའོ། །ཁས་མ་བླངས་ནའོ་ཞེས་བྱ་བ་ནི་སྤངས་པར་གྱུར་པ་ན་སྦྱིན་པར་
བྱེད་པའི་སེམས་བསྡུ་བར་རྗེས་སུ་བསྒྲུབ་པ་ཁས་མ་བླངས་ནའོ། །བསྐུལ་བའི་སྒོ་དྲུག་པོ་གང་དག་གསུངས་པ་དེ་དག་ལས་གསུམ་ནི་ཚིག་གི་བདག་ཉིད་དོ། །གསུམ་ནི་ཕྱོགས་སུ་སྡོད་པའི་བདག་ཉིད་དེ་དེ་དག་ལ་གོ་རིམས་ནི་མེད་དོ། །གལ་ཏེ་སྔར་ཕྱོགས་ན་སྡོད་པར་བྱེད་ལ་ཕྱིས་སྐུལ་

བར་བྱེད་ན་དེ་ལྟ་ན་ཡང་ཉེས་པ་མེད་དོ། །དེ་བཞིན་དུ་གལ་ཏེ་བསྐུལ་བ་གཉིས་བྱེད་ཅིང་སྡོད་པ་བཞི་བྱེད་ན་ཡང་དེ་ལྟ་ན་ཡང་ཉེས་པ་མེད་དེ། སྡོད་པའི་གནས་སྐབས་དམན་པའི་ཕྱིར་རོ། །དེ་ལས་བཟློག་པ་ནི་མི་བྱའོ། །ལེན་པའི་སྔོན་རོལ་གྱི་ཆར་གྱུར་པའི་རྗེས་སུ་བསྒྲུབ་པ་བསྟན་ནས། ད་ནི་
དུས་སུ་གཏོགས་པའི་རྗེས་སུ་བསྒྲུབ་པ་བརྗོད་པར་བྱ་སྟེ། ཅི་ཞིག་བྱས་ན་སྤང་བར་འགྱུར་ཞེ་ན། དེའི་ཕྱིར་བླངས་ནའོ་ཞེས་བྱ་བ་སྨྲས་ཏེ། གོས་ཞེས་བྱ་བའི་ཐ་ཚིག་གོ། །སྦྱིན་པར་བྱེད་པ་དང་ཕོ་ཉ་དང་། ཞལ་ཏ་བྱེད་པ་དག་ཅི་ལྟ་བུ་ཞིག་ཡིན་ཞེ་ན། དེའི་ཕྱིར་གསུམ་ཆར་མི་ཉིད་དང་ཁྱིམ་པ་ཉིད་
ཡིན་ནའོ་ཞེས་བྱ་བ་སྨྲས་ཏེ། སྦྱིན་པར་བྱེད་པ་དང་ཕོ་ཉ་དང་། ཞལ་ཏ་བྱེད་པ་ཞེས་བྱ་བ་གསུམ་ཆར་མི་ཉིད་དང་ཁྱིམ་པ་ཉིད་ཡིན་ནའོ། །འདི་སྐད་བསྟན་ཏེ། གལ་ཏེ་སྦྱིན་པར་བྱེད་པ་དང་ཕོ་ཉ་དང་། ཞལ་ཏ་བྱེད་པ་དག་མིའི་འགྲོ་བར་གཏོགས་པ་དང་། ཁྱིམ་པ་ཡང་ཡིན་ལ། སྔར་བསྟན་པའི་
འགལ་བ་བྱེད་པ་ཐམས་ཅད་ཀྱང་ཡོད་ཅིང་། ཞལ་ཏ་བྱེད་པ་ལས་གོས་ཀྱང་བླངས་པར་གྱུར་ན་སྤང་བ་ཞེས་བྱ་བའི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །གཞན་དུ་ན་ནི་འགལ་ན་ཡང་ཉེས་བྱས་སུ་འགྱུར་རོ། །འདིར་གཞུང་ནི་མི་མ་ཡིན་པས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་
དང་མི་མ་ཡིན་པས་རུང་བར་བྱེད་ན་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མིས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མིའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་
སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མིའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མིས་རུང་བར་བྱེད་ན་ཡང་ཉེས་བྱས་
སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མིའི་ཕོ་ཉ་དང་མིས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མིའི་ཕོ་ཉ་དང་མིས་རུང་བར་བྱེད་ན་ནི་སྤང་བའི་ལྟུང་བྱེད་དུ་འགྱུར་ཏེ། བསྡུ་བའི་ཚིགས་སུ་བཅད་པ་ནི། མི་མ་ཡིན་པ་གསུམ་གཅིག་དང་། །

གཉིས་པ་གསུམ་དུ་བྱས་པ་ཡིན། །མི་ཡིས་གཉིས་པ་གསུམ་དག་དང་། །གསུམ་གཅིག་དེ་དག་མུ་བརྒྱད་དོ། །ཞེས་བྱ་བ་གསུངས་པ་ཡིན་ནོ། །མ་སྨྲས་ན་ཉེས་བྱས་སོ་ཞེས་བྱ་བ་ནི། གལ་ཏེ་ཕོ་ཉས་བྱུང་བའི་མཐའ་རྗེས་སུ་བརྗོད་པ་སྔར་བྱས་པ་མ་སྨྲས་པར་
དགེ་སློང་གིས་ཞལ་ཏ་བྱེད་པ་ལ་སྐུལ་བར་བྱེད་ན་དེ་ལས་ཉེས་བྱས་སུ་འགྱུར་རོ། །མ་སྤངས་པ་ལའོ་ཞེས་བྱ་བ་ནི། རུང་བ་མ་ཡིན་པ་དབྱིག་ལ་སོགས་པ་ཆོས་གོས་ཀྱི་རིན་དགེ་སློང་དེས་ཕོ་ཉ་དེ་ལ་འདི་སྐད་ཅེས་ཚེ་དང་ལྡན་པ་ཕོ་ཉ་དགེ་སློང་དག་ནི་གོས་ཀྱི་རིན་དག་ལེན་དུ་མི་རུང་སྟེ་ཞེས་བྱ་བ་ལ་
སོགས་པའི་ཚིག་གིས་མ་སྤངས་པར་ལེན་ན་ཉེས་བྱས་སོ། །བསྐུལ་བ་བྱས་པ་དང་། ཕྱོགས་སུ་བསྡད་པ་བྱས་པས་སྤང་བ་བྱས་པ་ན་ཞལ་ཏ་བྱེད་པས་གོས་སྦྱིན་པར་བྱེད་པ་ན་ཁོ་བོས་འདི་ཡོངས་སུ་སྤངས་ཀྱིས་སོང་ལ་སྦྱིན་བདག་ཉིད་ལ་ཕྱིར་བྱིན་ཅིག་ཅེས་དེ་སྐད་དུ་སྤོང་བར་མི་བྱེད་པར་ལེན་ན་
ཡང་ཉེས་བྱས་ཁོ་ནའོ། །འདིར་ཁ་ཅིག་འདི་སྐད་ཅེས་ཟེར་ཏེ། གོས་ཀྱི་རིན་གསེར་ལ་སོགས་པ་རུང་བར་མ་བྱས་པ་དག་ནི་རིགས་པ་འདི་ཉིད་ཀྱིས་ཉེ་བར་སྦྱར་བར་བྱའོ། །གོས་ཀྱི་རིན་གསེར་ལ་སོགས་པ་རུང་བར་བྱས་པ་དག་ནི་བླངས་ཀྱང་ཉེས་པ་མེད་དེ་དེ་སྐད་དུ་ཡང་བཅོམ་
ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་ཀྱང་སྦྱིན་བདག་དེ་ཉིད་ལ་ཡིད་བརྟན་ཏེ་བཅང་བར་བྱའོ་ཞེས་གསུངས་པ་ཡིན་ནོ་ཞེས་ཟེར་རོ། །ཁོ་བོ་ནི་འདི་སྐད་ཟེར་ཏེ། གལ་ཏེ་སྦྱིན་བདག་གིས་གོས་ཀྱི་རིན་གྱི་བསམ་པས་སྦྱིན་པར་བྱེད་ཅིང་། དགེ་སློང་ལ་ཡང་གོས་ཀྱི་
དགོས་པ་ཡོད་ན་དེའི་ཚེ་གོས་ཀྱི་རིན་སྔར་བསྟན་པའི་རིམ་པ་འདི་ཉིད་ཀྱིས་ཉེ་བར་སྦྱར་བར་བྱའོ། །ཇི་སྟེ་སྤྱིའི་བསམ་པས་སྦྱིན་པར་བྱེད་ཅིང་། དགེ་སློང་ལ་ཡང་སངས་རྒྱས་མཆོད་པ་ལ་སོགས་པ་དང་དགེ་འདུན་མཆོད་སྟོན་གསོལ་བ་ལ་སོགས་པ་དག་ལ་དགོས་པ་ཡོད་ན་བཅོམ་ལྡན་འདས་ཀྱིས་
གསུངས་པའི་རུང་བ་བྱས་ནས་བདག་གིར་བྱའོ། །མ་དྲིས་པར་སྟོན་ན་ཡང་ངོ་ཞེས་བྱ་བ་ནི། དགེ་སློང་ལ་ཕོ་ཉས་མ་དྲིས་པར་ཞལ་ཏ་བྱེད་པ་སྟོན་ན་ཉེས་བྱས་སོ། །འདི་སྐད་བསྟན་ཏེ། ཕོ་ཉ་དེས་དགེ་སློང་དེ་ལ་འདི་སྐད་ཅེས་འཕགས་པ་རྣམས་ཀྱི་ཞལ་ཏ་བགྱིད་པ་འཕགས་པ་རྣམས་ཀྱི་

ཞལ་ཏ་ཉམས་སུ་ལེན་པ་གང་ལགས་པ་འགའ་ཞིག་མཆིས་སམ་ཞེས་མ་དྲིས་པ་ཁོ་ནར་དགེ་སློང་གིས་ཕོ་ཉ་ལ་ཞལ་ཏ་བྱེད་པ་སྟོན་པར་བྱེད་ན་དེ་ལ་ཡང་ཉེས་བྱས་ཁོ་ནར་འགྱུར་བའོ། །རེ་བ་མེད་པ་ཉིད་ན་མ་སྦྲན་ན་ཡང་ངོ་ཞེས་བྱ་བ་ནི། ཞལ་ཏ་བྱེད་པའི་ལག་ནས་གོས་འཐོབ་པའི་ཕྱིར་རེ་བ་མེད་
པ་ཉིད་ན་སྦྱིན་པར་བྱེད་པ་ལ་མ་སྦྲན་ན་ཡང་ཉེས་བྱས་སུ་འགྱུར་བའོ། །བསྐུལ་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།སྲིན་བལ་གྱི་སྟན་གྱི་སྤང་བ་བརྗོད་པར་འདོད་ནས། སྟན་བཅང་བར་བྱའོ་ཞེས་བྱ་བ་སྨྲས་ཏེ། སྟན་ནི་རྣམ་པ་གཉིས་ཏེ། ནང་ཚངས་ཅན་དང་བླིངས་
པའོ། །དེ་གཉིས་ཀྱི་མིང་གི་རྣམ་གྲངས་ནི་རས་བལ་ཅན་དང་དབྱམ་པོ་ཞེས་ཀྱང་བྱའོ། །སྤྱིར་སྟན་ཞེས་སྨོས་པ་འདིས་གཉི་ག་ཡང་བཟུང་བ་ཉིད་ཡིན་ནོ། །ནང་ཚངས་ཅན་ཞེས་བྱ་བའི་ཚིག་གིས་ཕྱི་ཤུན་གྱི་རྫས་ཀྱང་སྟན་ཉིད་ཀྱི་ཁོངས་སུ་གཏོགས་པ་ཉིད་ཡིན་ཏེ། དེའི་ཕྱིར་སྟན་དེ་ཉིད་
ཕྱི་ཤུན་གྱི་རྫས་འཆད་པ་ལ་ནི་སྤང་བ་ཉིད་དུ་མི་འགྱུར་རོ། །གདིང་བ་ནི་སྟན་མ་ཡིན་ཏེ། འདི་ལྟར་གདིང་བ་ནི་གོས་ཀྱི་ངོ་བོ་ཉིད་ཡིན་ཏེ། ཆིག་རྐྱང་དང་སྦྱར་མ་ཞེས་བྱ་བ་ལ་སོགས་པར་བརྗོད་པའི་ཕྱིར་རོ། །སྟན་ནི་ནང་ཚངས་ཅན་དང་བླིངས་པའི་ངོ་བོ་ཉིད་ཡིན་ནོ། །དགོས་པ་ཐ་དད་པའི་
ཡང་ཕྱིར་ཏེ་སྟན་ནི་གྲང་བའི་གཉེན་པོ་ཡིན་ཏེ། འདི་ལྟར་འབྲོག་ཕྱོགས་དག་ཏུ་གྲང་བས་གནོད་པར་གྱུར་པ་དག་གི་དབང་དུ་མཛད་ནས་སྟན་རྗེས་སུ་གནང་བ་ཡིན་ལ། གདིང་བ་ནི་མལ་སྟན་གཡོགས་པའི་ཕྱིར་དང་། ཀུན་དུ་བསྲུང་བའི་ཕྱིར་གནང་བ་ཡིན་ཏེ། དེ་ལྟ་བས་ན་གདིང་བ་ལས་
སྟན་ཐ་དད་པ་ཡིན་པར་རིག་པར་བྱའོ། །རྣམ་པར་འབྱེད་པ་ལས་ཀྱང་གདིང་བ་ནི་སོ་སོར་གདིང་བ་ཞེས་རྒྱ་ཆེར་གསུངས་སོ། །མདོ་སྡེ་ལས་ཀྱང་གདིང་བ་ཕྲག་པས་བླངས་ནས་ཞེས་འབྱུང་སྟེ། ལམ་དུ་འགྲོ་བས་དབྱམ་པོ་འམ་རས་བལ་ཅན་ཕྲག་པས་བླངས་ནས་ཁྱེར་བ་ནི་ཚུལ་མ་ཡིན་
པས་དེའི་ཕྱིར་གདིང་བ་དང་སྟན་ནི་ཐ་དད་དོ། །སྟན་གྱི་ཚད་ནི་གདིང་བ་དང་འདྲ་བར་རིག་པར་བྱ་སྟེ། འཁོར་གསུམ་ཁེབས་པའི་མཐར་ཐུག་པའི་ཚད་དེ་ཙམ་གྱིས་ན་ལྟུང་བའི་དངོས་གཞིར་འགྱུར་བ་ཡིན་ནོ། །དེ་བས་ཆུང་ན་ནི་ཉེས་བྱས་སུ་འགྱུར་རོ། །སྟན་གྱི་ཚད་ནི་བཅོམ་ལྡན་

འདས་ཉིད་ཀྱིས་གསུངས་པ་ཡིན་ཏེ། བཙུན་པ་སྟན་གྱི་ཚད་གང་ལགས། ཉེ་བ་འཁོར་གསུམ་སྟེ། སྟན་ཆེན་པོ་དང་། འབྲིང་དང་ཆུང་ངུའོ། །དེ་ལ་ཆེན་པོ་ནི་ཁྲུ་ཕྱེད་དང་ལྔའོ། །ཆུང་ངུ་ནི་ཁྲུ་ཕྱེད་དང་གསུམ་མོ། །འབྲིང་ནི་དེ་གཉིས་ཀྱི་བར་རོ། །ཞེང་གི་ཚད་ནི་གདིང་
བའི་ཚད་དང་མཉམ་མོ། །ཅི་ཞིག་བྱས་ན་སྲིན་བལ་གྱི་སྤང་བར་འགྱུར་ཞེ་ན། དེའི་ཕྱིར་སྲིན་བལ་གྱི་བྱས་སམ་བྱེད་དུ་བཅུག་ནའོ་ཞེས་བྱ་བ་སྨྲས་ཏེ། སྲིན་བལ་གྱི་ཞེས་བྱ་བ་ནི། སྲིན་བལ་གྱི་སྟན་ནང་ཚངས་ཅན་ནམ་བླིངས་པའོ། །བྱས་སམ་ཞེས་བྱ་བ་ནི་རང་གིས་སོ། །བྱེད་དུ་བཅུག་ནའོ་
ཞེས་བྱ་བ་ནི། གཞན་ལ་བཅོལ་བ་སྟེ། དེས་ན་སྲིན་བལ་གྱི་སྤང་བར་འགྱུར་རོ། །བྱས་པ་དང་བྱེད་དུ་བཅུག་པ་གཉིས་ཀྱི་གྲུབ་པ་བསྟན་པའི་ཕྱིར། སྟན་ལ་ནི་བཀྲམ་པ་ཉིད་བྱེད་པ་མཐར་ཐུག་པའི་དང་པོ་ཡིན་ནོ་ཞེས་བྱ་བ་སྨྲས་ཏེ། སྟན་བྱེད་པ་ལ་དེར་དགོས་པའི་སྲིན་བལ་གྱི་མཐའ་
དག་བཀྲམ་པ་ཉིད་གང་ཡིན་པ་དེ་ནི་བྱེད་པ་མཐར་ཐུག་པ་དང་པོ་ཡིན་པར་རིག་པར་བྱའོ། །བྱེད་པ་ཞེས་བྱ་བ་ནི་སྟན་བྱེད་པའོ། །བྱེད་པ་མཐར་ཐུག་པ་ཞེས་བྱ་བ་ནི་ཟིན་པ་སྟེ། བྱེད་པ་མཐར་ཐུག་པ་བྱས་ཟིན་པ་དེའི་དང་པོ་ནི་བཀྲམ་པ་ཉིད་ཅེས་བྱ་བ་སྲིན་བལ་གྱི་བལ་བཏིང་བ་ཉིད་ཡིན་པར་རིག་
པར་བྱའོ། །འདི་སྐད་བསྟན་ཏེ། དེ་ཙམ་བྱས་ན་དངོས་གཞིར་འགྱུར་རོ། །དེ་ཕྱིན་ཆད་གང་བྱེད་པ་དེ་ནི་དེའི་ཁོངས་སུ་འདུས་པ་ཡིན་ཏེ། རྩོམ་པ་གཅིག་ཏུ་གྱུར་པའི་ཕྱིར་རོ། །འདིར་གཞུང་ནི་ཞུ་བ་ཁ་ཅིག་ལས་ཇི་ཙམ་གྱིས་ན་ལྟུང་བ་རྫོགས་པར་འགྱུར། གང་ཚུན་ཆད་བཀྲམ་པར་
གྱུར་ནའོ་ཞེས་གསུངས་པ་ཡིན་ནོ། །བྱས་ཟིན་པ་རྙེད་པ་དང་ཡོངས་སུ་ལོངས་སྤྱོད་པ་དང་མངོན་པར་འདུ་བྱེད་པ་དག་ལ་ནི་ལྟུང་བ་མེད་དོ་ཞེས་བྱ་བ་ནི། བྱས་ཟིན་པ་རྙེད་པ་དང་། གཞན་གྱིས་བྱས་ཟིན་པ་ལ་ཡོངས་སུ་ལོངས་སྤྱོད་པ་དང་། རྙིང་པའི་བྱི་དོར་མངོན་པར་འདུ་བྱེད་པ་དག་ལ་ནི་ལྟུང་
བ་མེད་དེ། འདི་ལྟར་བདག་གིར་བྱེད་པ་དང་། ཡོངས་སུ་ལོངས་སྤྱོད་པ་ལ་ནི་ཉེས་པ་མེད་ཀྱི་རྩོམ་པ་དང་རྗེས་སུ་བསྒྲུབ་པ་གཉིས་ལ་ཉེས་པར་འགྱུར་བར་བཞེད་པའི་ཕྱིར་རོ། །སྲིན་བལ་གྱི་སྤང་བ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པ་ལས་འབྱུང་བ་བཤད་ཟིན་ཏོ།། །།

ཞུ་བའི་སྐབས་ནས་འབྱུང་བ་བསྡུ་བའི་ཕྱིར། ཉུང་ངུ་དང་བསྲེས་པ་ཉིད་ན་ན་སྨད་པ་ཉིད་དོ་ཞེས་བྱ་བ་སྨྲས་ཏེ། སྲིན་བལ་དང་བལ་དཀར་པོའམ། ཤ་ནའི་རས་བལ་ལམ། གསོ་བལ་ལ་སོགས་པའི་རྫས་ཉུང་ངུ་དང་བསྲེས་ཏེ་སྟན་བྱེད་པ་ཉིད་ན་ན་སྨད་པ་ཉིད་དེ། ཁ་ན་མ་ཐོ་བ་ན་
སྨད་པ་ཉིད་དེ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ། །དེ་ནི་སྟན་ཐམས་ཅད་ཀྱི་དབང་དུ་བྱས་པ་ཡིན་ནོ། །རྫས་ཉམས་པ་ཉིད་ལ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་སྒྲས་ནི་ན་སྨད་པ་ཉིད་དོ་ཞེས་བྱ་བའི་རྗེས་སྙེགས་པར་བྱེད་དོ། །རྫས་ཉམས་པ་ཉིད་ཅེས་བྱ་བ་ནི།
སྲིན་བལ་ཉམས་པ་ཉིད་དེ་རྫས་དེ་ལས་སྟན་བྱེད་དམ་དེ་དང་བསྲེས་ཏེ་བྱེད་ན་ཡང་ན་སྨད་པ་ཉིད་དེ་ཉེས་བྱས་ཉིད་དོ། །བལ་ལ་སོགས་པ་ལ་ཡང་དེ་བཞིན་དུ་ཤེས་པར་བྱ་སྟེ། ལྟུང་བ་རྣམ་པར་གཞག་པ་འདྲ་བའི་ཕྱིར་རོ། །ཆ་མཉམ་པར་བསྲེས་པ་ཉིད་ལ་ནི་ཁ་ན་མ་ཐོ་བ་རྫོགས་པར་འགྱུར་
ཏེ། འདི་ལྟ་སྟེ། སྲིན་བལ་གྱི་བལ་དང་བལ་ནག་པོ་ཆ་མཉམ་པར་བསྲེས་ཏེ་སྟན་བྱེད་ན་སྤང་བ་ཁོ་ནར་འགྱུར་རོ། །སྲིན་བལ་གྱི་སྤང་བ་ཞུ་བའོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །སྲིན་བལ་གྱི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།བལ་ནག་པོ་འབའ་ཞིག་གི་སྤང་བ་བརྗོད་པར་བྱ་སྟེ། སྲིན་བལ་གྱི་
སྤང་བའི་རྣམ་པ་སྔར་བསྟན་མ་ཐག་པ་ཁས་བླངས་ནས། སྲིན་བལ་ཞེས་བྱ་བ་དེའི་གནས་སུ་བལ་ནག་པོ་འབའ་ཞིག་པའི་མིང་གཞན་བརྗོད་པར་བྱ་སྟེ། དེའི་ཕྱིར་ལུག་གི་བལ་ནག་པོ་འབའ་ཞིག་དག་གོ་ཞེས་བྱ་བ་སྨྲས་སོ། །འདི་སྐད་བསྟན་ཏེ། ལུག་གི་བལ་ནག་པོ་འབའ་ཞིག་དག་ལས་
སྟན་བྱས་སམ་བྱེད་དུ་བཅུག་ན་སྤང་བར་འགྱུར་རོ། །ཅི་ཞིག་གིས་བལ་ནག་པོར་གྱུར་པ་ཡིན། རང་བཞིན་གྱིས་སམ། ཁ་བསྒྱུར་བས་སམ། གཉི་གས་ཤེ་ན། དེའི་ཕྱིར་རང་བཞིན་གྱིས་སོ་ཞེས་བྱ་བ་སྨྲས་ཏེ། གཞན་གྱིས་མ་ཡིན་ནོ། །སྔོན་པོ་དང་འདམ་ཁ་དང་ཁམ་པ་དག་ཀྱང་དེ་
ཉིད་དོ་ཞེས་བྱ་བ་ནི་སྔོན་པོ་ལ་སོགས་པ་དག་ཀྱང་དེ་ཉིད་དེ། བལ་ནག་པོ་འབའ་ཞིག་ཉིད་དང་འདྲ་བར་རིག་པར་བྱའོ་ཞེས་བྱ་བའི་ཐ་ཚིག་གོ། །བལ་ནག་པོ་འབའ་ཞིག་གི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཆ་གཉིས་བསྲེ་བའི་སྤང་བ་བརྗོད་པར་བྱ་སྟེ། བལ་ནག་པོ་

བས་དཀར་པོ་དང་འཁོབ་བལ་དག་དམན་པས་དེའི་ཕྱིར་དམན་པ་ཉིད་དམ། དམན་པ་དང་བསྲེས་པ་ཉིད་ཅེས་བྱ་བའི་རྣམ་པས་དཀར་པོ་དང་འཁོབ་བལ་དམན་པ་དང་བལ་ནག་པོའི་རྫས་བསྲེས་པ་དེ་ལས་སྟན་བྱེད་ན་ཉེས་བྱས་སུ་ཐལ་བར་འགྱུར་བ་བསལ་བའི་ཕྱིར། ཆ་
གཉིས་བསྲེ་བའི་སྤང་བ་བཅའ་བ་མཛད་དོ། །གང་གི་ཚེ་ཤ་ནའི་རས་བལ་དང་། གསོ་བལ་ལ་སོགས་པའི་རྫས་དམན་པ་དག་དང་། བལ་ནག་པོར་སྲེ་བར་བྱེད་ན་ནི་དེའི་ཚེ་བལ་ནག་པོ་འབའ་ཞིག་གི་སྤང་བར་གཏོགས་པའི་ཉེས་བྱས་སུ་འགྱུར་རོ། །གང་གི་ཚེ་དཀར་པོ་དང་འཁོབ་བལ་གྱི་
རྫས་ཚད་པས་ཉུང་བ་དག་དང་སྲེ་བར་བྱེད་ན་ནི་དེའི་ཚེ་ཆ་གཉིས་བསྲེ་བའི་སྤང་བར་འགྱུར་རོ། །འདིར་ཡང་སྔར་བསྟན་པའི་ཆོ་ག་ཁས་བླངས་ནས་ཚད་ཀྱི་བྱེ་བྲག་འབའ་ཞིག་བརྗོད་པར་བྱ་སྟེ། དེ་དག་ཕྱེད་པས་ལྷག་པ་ཉིད་ནའོ་ཞེས་བྱ་བ་ནི། ལུག་གི་བལ་ནག་པོ་དེ་དག་ཕྱེད་ཀྱི་ཆ་བས་ལྷག་པ་ཉིད་ན་
ཆ་གཉིས་བསྲེ་བའི་སྤང་བར་འགྱུར་རོ་གང་གི་ཚེ་དཀར་པོ་དང་འཁོབ་བལ་དག་ནི་ལྷག་པར་གྱུར་ལ། ལུག་གི་བལ་ནག་པོ་དག་ནི་ཉུང་བའམ། མཉམ་པར་གྱུར་ན་ནི་དེའི་ཚེ་ལྟུང་བ་མེད་དོ། །ཕྱེད་དཀར་པོ་དང་འཁོབ་བལ་དག་ལས་ཆ་མཉམ་པ་ཉིད་དུའོ་ཞེས་བྱ་བ་ནི། བལ་ནག་པོ་ནི་དཀར་པོ་
དང་འཁོབ་བལ་དག་ནི་སོ་སོའི་ཆ་བས་ལྷག་པར་བྱ་སྟེ། སྤྱིར་ཕྱེད་ཀྱི་ཆ་ནི་ནག་པོ་ལས་བྱའོ། །ཕྱེད་ནི་དཀར་པོ་དང་འཁོབ་བལ་ལས་ཆ་མཉམ་པ་ཉིད་དུ་བྱའོ། །འདི་སྐད་བསྟན་ཏེ། སྤྱིའི་ཚོམས་ལས་ཕྱེད་ནི་ལུག་གི་བལ་ནག་པོ་ལས་བྱའོ། །བཞི་ཆ་གཅིག་ནི་དཀར་པོ་ལས་བྱའོ། །
བཞི་ཆ་གཅིག་ནི་འཁོབ་བལ་ལས་བྱའོ། །གང་གི་ཚེ་འཁོབ་བལ་བས་དཀར་པོ་ལྷག་པར་བྱེད་ན་ནི་དེའི་ཚེ་ཉེས་བྱས་སོ། །ཅི་སྟེ་དཀར་པོ་བས་འཁོབ་བལ་ལྷག་པར་བྱེད་ན་ནི་དེའི་ཚེ་ལྟུང་བ་མེད་དེ་མོད་པ་དང་རིན་ཆུང་བའི་ཕྱིར་རོ། །ཡུལ་གང་ན་བལ་དཀར་པོ་རིན་ཆེ་ཞིང་ཤིན་ཏུ་
དཀོན་ལ་སྲིན་བལ་གྱི་བལ་ནི་རིན་ཆུང་ཞིང་ཤིན་ཏུ་མོད་པ་དེར་ནི་སྲིན་བལ་གྱི་གནས་སུ་བལ་དཀར་པོར་རིག་པར་བྱའོ། །ནག་པོ་ལ་ཡང་དེ་བཞིན་དུ་སྦྱར་བར་བྱའོ། །དེ་ལྟར་ན་སྲིན་བལ་ལ་ནི་ལྟུང་བ་མེད་ལ། བལ་ལ་ནི་ལྟུང་བར་འགྱུར་བ་དང་། བལ་ནག་པོ་འབའ་ཞིག་ལ་ནི་

ལྟུང་བ་མེད་ལ། དཀར་པོ་ལ་ནི་ལྟུང་བར་འགྱུར་རོ། །ལུག་གི་བལ་དཀར་པོ་ནི་གང་ཡིན། འཁོབ་བལ་ནི་གང་ཡིན་ཞེ་ན། དེའི་ཕྱིར་གློ་དང་རྒྱབ་དང་གཉའ་བ་ནས་སྐྱེས་པ་ནི་སྔ་མའོ་ཞེས་བྱ་བ་སྨྲས་ཏེ། གློ་དང་རྒྱབ་དང་གཉའ་བ་ནི་དེ་དག་ཉིད་དེ། གློ་དང་རྒྱབ་དང་གཉའ་བ་ནས་སྐྱེས་
པ་ནི་བལ་སྔ་མ་སྟེ། དཀར་པོ་ཡིན་པར་རིག་པར་བྱའོ། །མགོ་དང་རྐང་པ་དང་ལྟོ་ནས་སྐྱེས་པ་ནི་ཕྱི་མའོ་ཞེས་བྱ་བ་ནི། འཁོབ་བལ་ལོ་ཞེས་བྱ་བའི་ཐ་ཚིག་གོ། །ཆ་གཉིས་བསྲེ་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ལོ་དྲུག་ཏུ་བཅང་བའི་སྤང་བ་བརྗོད་པར་འདོད་ནས།
མ་དག་པ་གསོལ་བར་མི་བྱའོ། །རང་དག་རྟོག་ཏུ་འདོང་བར་བྱའོ། །ཡང་ན་དགེ་སློང་བསྐོས་པ་དག་གོ། །སྟན་ལ་ཡང་དེ་བཞིན་ནོ་ཞེས་སྔར་ཁང་པའི་དགེ་འདུན་ལྷག་མ་རྣམ་པར་འབྱེད་པའི་སྐབས་སུ་འདྲ་བར་བསྟན་པ་དག་འདིར་ཡང་དྲན་པར་བྱ་སྟེ། སྟན་བརྟག་པར་བྱ་བ་ལ་རྟོག་པར་བྱེད་པའི་དགེ་
སློང་དག་གིས་གང་བྱ་བ་དེ་བརྗོད་པར་བྱ་སྟེ། ཆུ་དང་ཞེང་གཉི་གར་ལྷག་པ་ཉིད་ཡིན་ན་གཅད་པར་བྱའོ་ཞེས་བྱ་བ་ནི། ཆུ་དང་ཞེང་ནི་ཆུ་དང་ཞེང་སྟེ། ཆུ་དང་ཞེང་གཉི་གར་དེ་ལྷག་པ་ཉིད་ཡིན་ཏེ། ཚད་ལས་འདས་པ་ཉིད་ཡིན་ན་དགེ་སློང་དེ་དག་གིས་གཅད་པར་བྱའོ། །ཐུང་བ་ཉིད་དང་དོག་
པ་ཉིད་དག་ནི་བསྐྱེད་པར་བྱའོ་ཞེས་བྱ་བ་ནི། ཐུང་བ་ཉིད་དང་དོག་པ་ཉིད་ནི་ཐུང་བ་ཉིད་དང་དོག་པ་ཉིད་དེ་དེ་གཉིས་ནི་བསྐྱེད་པར་བྱའོ། །འདི་སྐད་བསྟན་ཏེ། གལ་ཏེ་ཆུ་ཞེང་གཉི་གར་ལྷག་པ་ཉིད་ཡིན་ན་ནི་དེའི་ཚེ་གཅད་པར་བྱའོ། །གལ་ཏེ་ཐུང་བ་ཉིད་དང་། དོག་པ་ཉིད་ཡིན་ན་ནི་དེའི་ཚེ་བསྐྱེད་
པར་བྱ་སྟེ། མདོ་སྔ་མ་གཉི་གའི་བསྡུས་པའི་དོན་ནི་དེ་ཡིན་ནོ། །རལ་ན་བཙེམ་པར་བྱའོ་ཞེས་བྱ་བ་ནི། སྟན་རལ་ན་དྲུབ་པ་ལ་སོགས་པས་བཙེམ་པར་བྱའོ། །འདི་སྐད་བསྟན་ཏེ། གལ་ཏེ་རལ་བར་གྱུར་ན་དེའི་ཚེ་དྲུབ་པས་བཙེམ་པར་བྱའོ། །བུག་རྡོལ་དུ་གྱུར་ཏམ་ཤ་ཟད་པ་དག་
ནི་སྦྱར་བར་བྱའོ་ཞེས་བྱ་བ་ནི། བུག་རྡོལ་དུ་གྱུར་པ་དང་། ཤ་ཟད་པ་ནི་བུག་རྡོལ་དུ་གྱུར་པ་དང་ཤ་ཟད་པ་སྟེ། དེ་གཉིས་ལ་ནི་སྦྱར་བས་གླན་པར་བྱའོ། །གལ་ཏེ་བུག་རྡོལ་དུ་གྱུར་ཏེ་བར་སྐབས་བར་སྐབས་སུ་བུག་རྡོལ་བྱུང་བར་གྱུར་ཏམ་ཤ་ཟད་པར་གྱུར་ཏེ། སྲབ་མོར་གྱུར་ན་དེའི་ཚེ་སྟན་བུག་རྡོལ་

དུ་གྱུར་ཏམ་ཤ་ཟད་པར་གྱུར་ན་དེ་ལ་སྦྱར་བ་ཞེས་བྱ་བ་རིམ་གཅིག་གིས་གླན་པར་བྱའོ་ཞེས་བྱ་བའི་ཐ་ཚིག་གོ། །བཅོས་དཀའ་བ་ཉིད་ཡིན་ན་སྦྱིན་ནོ་ཞེས་བྱ་བ་ལ། བཅོས་དཀའ་བ་ཉིད་ཅེས་བྱ་བ་ནི། དཀའ་བས་ཕྱིར་བཅོས་པར་མི་ནུས་པ་སྟེ། དེའི་དངོས་པོ་ནི་དེ་ཉིད་
དོ། །བཅོས་དཀའ་བ་ཉིད་དེ་ལ་ནི་གནང་བ་སྦྱིན་ནོ། །འདི་སྐད་བསྟན་ཏེ། གལ་ཏེ་སྔར་བསྟན་པའི་བཅོས་པའི་ཐབས་ཀྱིས་ཕྱིར་བཅོས་པར་མི་ནུས་པ་ཡིན་ན་དེའི་ཚེ་སྟན་གཞན་བྱ་བའི་ཕྱིར་གནང་བ་སྦྱིན་པར་བྱའོ། །འདི་ལྟར་ལག་གི་བླའི་ཕྱིར་གསུངས་པ་ནི་གླེང་གཞིའི་དབང་གི་ཕྱིར་
ཡིན་གྱི་གཞན་ལ་ཡང་ཉེ་བར་སྦྱར་དུ་རུང་བའི་ཕྱིར་སྤྱིར་མདོར་བྲིས་སོ། །ཅི་ཞིག་བྱས་ན་ལོ་དྲུག་ཏུ་བཅད་པའི་སྤང་བར་འགྱུར་ཞེ་ན། དེའི་ཕྱིར་གནང་བ་མ་ཐོབ་པ་གཞན་ཡོད་པའམ་རང་དགར་བཏང་བས་ལོ་དྲུག་མ་ལོན་པར་སྟན་བྱས་པ་ཉིད་ནའོ་ཞེས་བྱ་བ་སྨྲས་ཏེ། དགེ་སློང་གང་གིས་
སྟན་བྱ་བའི་ཕྱིར་དགེ་འདུན་ལས་གནང་བ་མ་ཐོབ་པ་དེ་ནི་གནང་བ་མ་ཐོབ་པ་སྟེ་དེས་སོ། །གཞན་ཡོད་པའམ་ཞེས་བྱ་བ་ནི། སྟན་གཞན་ཡོད་པའོ། །རང་དགར་བཏང་བས་ཞེས་བྱ་བ་ནི། རང་གི་མོས་པས་ཡོངས་སུ་བཏང་བའོ། །ལོ་དྲུག་མ་ལོན་པར་ཞེས་བྱ་བ་ནི། གང་གིས་སྟན་
གཞན་བྱས་ནས་སམ་རང་དགར་བཏང་ནས་ལོ་དྲུག་མ་ལོན་པ་སྟེ། དེའི་ཚེའོ། །སྟན་བྱས་པ་ཉིད་ནའོ་ཞེས་བྱ་བ་ནི། དེའི་ཚེ་སྟན་ཟིན་པར་བྱས་པ་ཉིད་ན་སྤང་བའི་ལྟུང་བྱེད་དུ་འགྱུར་བའོ། །འདི་སྐད་བསྟན་ཏེ། གལ་ཏེ་དགེ་སློང་ལ་རང་གི་སྟན་ཡོད་དམ། འོན་ཏེ་རང་དགར་དེ་ཡོངས་སུ་
གཏོང་བར་བྱེད་ཅིང་ལོ་དྲུག་ཀྱང་མ་ལོན་ལ་དགེ་འདུན་ལས་གནང་བ་ཡང་མ་ཐོབ་པའི་བར་དུ་སྟན་གཞན་བྱེད་ན་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ། །བླིངས་པའི་སྟན་གྱི་ལྟུང་བའི་དབང་དུ་བྱས་པ་ཡིན་པར་བལྟ་བར་བྱའོ། །བརྩམས་པ་ཉིད་ན་རྩོམ་ན་ཟིན་པ་
དང་འདྲའོ་ཞེས་བྱ་བ་ལ། བརྩམས་པ་ཉིད་ན་ཞེས་བྱ་བ་ནི། སྟན་དང་པོ་བརྩམས་པ་ཉིད་ནའོ། །རྩོམ་ན་ཞེས་བྱ་བ་ནི། བརྩམས་པ་དེ་ཉིད་དང་ལྷན་ཅིག་ཏུའམ། ཕྱིས་སྟན་གཞན་རྩོམ་ནའོ། །ཟིན་པ་དང་འདྲའོ་ཞེས་བྱ་བ་ནི། སྔ་མ་ཤོས་བྱས་ཟིན་ནས་ཅིག་ཤོས་རྩོམ་པ་དང་འདྲ་སྟེ་

ཉེས་བྱས་སུ་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་སྟན་རྩོམ་པར་བྱེད་ཅིང་བརྩམས་པ་དེ་ཉིད་དང་ལྷན་ཅིག་ཏུའམ་ཕྱིས་སྟན་གཉིས་པ་རྩོམ་པར་བྱེད་ན་ཇི་ལྟར་སྔ་མ་ཤོས་ཟིན་ནས་གཞན་རྩོམ་པ་ན་ཉེས་བྱས་སུ་འགྱུར་བ་དེ་བཞིན་དུ་སྟན་བརྩམས་ནས་ལྷན་ཅིག་ཏུའམ་ཕྱིས་
གཉིས་པ་ཡང་ཉེས་བྱས་ཁོ་ནར་འགྱུར་རོ། །མཐར་ཐུག་ན་སྦྱོར་བའི་ལྟུང་བར་མི་འགྱུར་བ་ཉིད་མ་ཡིན་ནོ་ཞེས་བྱ་བ་ནི། སྟན་ཕྱིས་བརྩམས་པ་ཤོས་སྔར་མཐར་ཐུག་སྟེ་ཟིན་པར་གྱུར་ན་ཡང་སྦྱོར་བའི་ལྟུང་བར་མི་འགྱུར་བ་ཉིད་མ་ཡིན་ཏེ། སྦྱོར་བའི་ལྟུང་བ་ཉེས་བྱས་སུ་འགྱུར་བ་ཁོ་ན་ཡིན་ནོ། །འདི་
སྐད་བསྟན་ཏེ། གལ་ཏེ་དགེ་སློང་གིས་སྔར་སྟན་གཅིག་རྩོམ་པར་བྱེད་ཅིང་ཕྱིས་གཉིས་པ་རྩོམ་པར་བྱེད་ལ་ཕྱིས་བརྩམས་པ་ཤོས་སྔར་ཟིན་པར་བྱེད་ན་དེའི་ཚེ་དངོས་གཞིའི་ལྟུང་བར་མི་འགྱུར་ཏེ་དེའི་ཚེ་ན་གཉིས་པ་ཟིན་པ་མེད་པའི་ཕྱིར་རོ། །ཕྱི་མ་ཤོས་རྩོམ་པའི་དུས་ཉིད་ན་སྦྱོར་བའི་ལྟུང་བ་ཉེས་བྱས་
ཉིད་དུ་ནི་འགྱུར་རོ། །འདི་ལྟར་གང་ཁོ་ན་ལས་སྦྱོར་བའི་ལྟུང་བར་འགྱུར་བ་དེ་ཁོ་ན་ལས་དངོས་གཞིའི་ལྟུང་བར་འགྱུར་བ་དེ་ལྟར་ནི་རིག་པར་མི་བྱ་སྟེ། སྟན་གཉིས་པ་ཟིན་པའི་གནས་སྐབས་ལ་དངོས་གཞིའི་ལྟུང་བར་འགྱུར་བའི་ཕྱིར་རོ། །རབ་ཏུ་བྱུང་བ་གཞན་གྱི་ནི་ཐ་དད་པ་ཉིད་དོ་ཞེས་བྱ་
བ་ནི། སྔོན་དང་ཕྱིས་རབ་ཏུ་བྱུང་བ་གཉིས་ནི་ཐ་དད་པ་ཉིད་དེ། རྒྱུན་ཐ་དད་པ་ཉིད་དོ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། དགེ་སློང་གིས་རབ་ཏུ་བྱུང་བ་སྔ་མའི་ཚེ་སྟན་རྩོམ་པར་བྱེད་དམ། ཟིན་པར་བྱེད་ཅིང་དེ་ནས་རབ་ཏུ་བྱུང་བ་ཕྱི་མའི་ཚེ་སྟན་གཞན་རྩོམ་མམ་བྱེད་ན། དུས་ཡོངས་སུ་
རྫོགས་པའི་སྔོན་རོལ་ཡིན་དུ་ཟིན་ཀྱང་། དེ་ལྟ་མོད་ཀྱི་ཉེས་པ་མེད་དེ་རབ་ཏུ་བྱུང་བ་གཞན་ནི་ཐ་དད་པ་ཡིན་པའི་ཕྱིར་རོ། །ཁྱིམ་པའི་གནས་སྐབས་བཞིན་ཏེ། ཇི་ལྟར་ཁྱིམ་པས་སྟན་རྩོམ་མམ་བྱེད་ཀྱང་རུང་སྟེ། ཕྱིས་རབ་ཏུ་འབྱུ