Luận tạng Tây Tạng (Tengyur) — Tập 156

འདིར་ནི་མི་བདེའོ་ཞེས་བྱས་པ་དང་། སྐྱེས་
པ་ན་རེ་ངའི་ཁང་པར་འདོང་ཞེས་ཟེར་རོ། །གཙུག་དགའ་མོས་སྨྲས་པ་ཁྱོད་ཀྱི་གཉའ་བར་བསྐྱོན་ན་དེར་འདོད་ཞེས་བྱས་པ་དང་། དེས་ཀྱང་གཉའ་བར་བསྐྱོན་ནོ། །དེ་ནས་གཙུག་དགའ་མོས་བསམས་པ། ད་ལྟར་བཙུན་པར་བྱ་ཞིང་ཁ་དྲག་བྱ་བ་ཡང་ཚུལ་ཁྲིམས་འདི་ཡོད་པའི་ཕྱིར་བྱ་
བར་ཟད་དེ། ཚུལ་ཁྲིམས་མེད་ན་ཀུན་གྱིས་བརྙས་སྨད་པར་འགྱུར་ཞེས་བསམས་ནས། ད་ནི་རྐུན་པོས་ཁྱེར་རོ་ཞེས་ཀུས་བཏབ་པ་དང་། བྱི་བོའང་ཁྲོས་ནས་ཤིན་ཏུ་བརྡེགས་ཏེ་སོང་ངོ་། །དེ་ནས་དགེ་སློང་མ་དག་གིས་ཅི་ཉེས་སྨྲས་པ་དང་། ཇི་ལྟར་གྱུར་བ་ཞིབ་ཏུ་སྨྲས་པ་དང་། དོན་ཉུང་དུ་མ་
དག་གིས་འཕྱ་བ་ལས་བཅས། ཡང་དགེ་སློང་མ་གང་གཅིག་པུ་ཕྱི་རོལ་གྱིས་ཕྱོགས་སུ་འགྲོ་ན་ལྟུང་བའོ། །དགེ་སློང་མ་གཅིག་པུ་ཕྱི་རོལ་དུ་འགྲོ་ན་ཆུང་ངུ་ན་ནམ་ཕྱི་སར་སོང་ནའང་ལྟུང་བའོ། །ཁང་པ་རྩེག་མའི་ཡང་ཏོག་ཏུ་གཅིག་པུ་འགྲོ་ན་ཉེས་པ་མེད་དོ། །ལྟུང་བ་བརྒྱ་བདུན་ཅུ་དྲུག་པ་
རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅུ་གཉིས་སྡེ་དག་ཨུ་ཤི་རའི་སོ་མངས་འཆང་ཞིང་སྐྲ་བཤད་དེ་ཕྱིལ་ཕྱིལ་པོར་བྱས་པ་ལས། དགེ་སློང་མ་དག་གིས་ཅིའི་ཕྱིར་དེ་ལྟར་བྱེད། གཞན་དག་འདོད་པ་སྐྱེད་སྐྱེད་པའི་ཕྱིར་རོ་ཞེས་བྱས་པ་དང་། དོན་ཉུང་ངུ་མ་དག་འཕྱ་བ་ལས་

བཅས། ཡང་དགེ་སློང་མ་གང་ཨུ་ཤི་རའི་སོ་མངས་འཆང་ན་ལྟུང་བའོ། །དགེ་སློང་མས་ཨུ་ཤི་རའི་སོ་མངས་འཆང་ན་ལྟུང་བ་སྟེ། ཨུ་ཤི་ར་ཞེས་བྱ་བ་ནི་གྲེས་མའི་རྩ་བ་ལས་བྱས་པའོ། །ལྟུང་བ་བརྒྱ་བདུན་ཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅུ་གཉིས་
སྡེ་མོ་རྣམས་ཨུ་ཤི་རའི་སོ་མངས་འཆང་དུ་མི་སྟེར་བ་དང་སོ་མངས་གཞན་དག་བཅངས་པ་ལས་བཅས། ཡང་དགེ་སློང་མ་གང་སོ་མངས་འཆང་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲ་བས་བཤད་པ་མ་བྱས་སོ། །ལྟུང་བ་བརྒྱ་བདུན་ཅུ་བརྒྱད་པ་རྫོགས་སོ།། །།སྟོན་པ་མཉན་དུ་
ཡོད་པ་ན་སྟེ། བཅུ་གཉིས་སྡེ་མོ་རྣམས་སོ་མངས་སྔ་མ་དེ་དག་མ་གནང་བ་དང་སྨྱིག་བཤད་བཅངས་ན་ཉེས་པ་མེད་དོ་སྙམ་དུ་བསམས་ཏེ་འཆང་བ་ལས་བཅས་སོ། །ཡང་དགེ་སློང་མ་གང་སྨྱིག་བཤད་འཆང་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲ་སྟེ། སྨྱིག་བཤད་ཅེས་བྱ་བ་ནི་སྨིག་མའི་རྩ་
བ་ཤད་ཤད་པོ་ལ་བྱའོ། །ལྟུང་བ་བརྒྱ་བདུན་ཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བསམས་པ། བདག་གིས་སྔན་ཆད་གཞན་ནི་ཅི་ཡང་བྱས་ན་ཆོས་ཀྱི་རྒྱན་གྱིས་མ་བརྒྱན་ཏོ་སྙམ་ནས་དེས་བདག་གི་ལུས་བསྐུ་བྱུག་ལ་སོགས་པ་བྱས་ཏེ་བརྒྱན་ནས་
ཁང་པའི་སྒོར་སྨད་འཚོང་མའི་རྒྱལ་མཚན་བསྒྲེང་བ་དང་། དེར་སྐྱེས་པ་དག་འོངས་ཏེ་ཀྱེ་བཟང་མོ་ཉིན་གླ་ཇི་ཙམ་ཞེས་དྲིས་པ་དང་། དེས་སྨྲས་པ་ཀཱར་ཥཱ་པ་ཎ་ལྔ་བརྒྱའོ་ཞེས་བྱས་པ་དང་། དེ་དག་གིས་ཀཱར་ཥཱ་པ་ཎ་ལྔ་བརྒྱ་བྱིན་ནས་ཁང་པའི་ནང་དུ་འདོང་ཞེས་བྱས་པ་དང་། སྦོམ་དགའ་མོས་
བསམས་པ། བདག་ད་ལྟར་ཀུན་གྱིས་བཙུན་པར་བྱ་ཞིང་བསྙེན་བཀུར་བྱེད་པ་ཐམས་ཅད་ཀྱང་ཚུལ་ཁྲིམས་འདི་ཡོད་པའི་ཡོན་ཏན་ཏེ། གལ་ཏེ་ཚུལ་ཁྲིམས་འདི་དྲལ་ན་ནི་ཀུན་གྱིས་སྨད་ཅིང་བརྙས་པར་འགྱུར་རོ་སྙམ་བསམས་ནས། ཀཱར་ཥཱ་པ་ཎ་ཁྱེར་བཞིན་དུ་བྲོས་པ་ལས་དེ་དག་གིས་
བསྙེགས་ཏེ་ཟིན་ནས་ཐོར་ཏོ་ལས་དྲངས་པ་དང་སྐྲ་བརྙན་ལྷུང་བས་མགོ་རེག་མ་མ་རུངས་མ་འདི་ཞེས་མི་སྙན་པ་ཟེར་བ་ལས་དགེ་སློང་མ་དག་གིས་ཐོས་ནས་འཕྱ་བ་ལས་བཅས་སོ། །ཡང་དགེ་སློང་མ་གང་ཆོས་ཀྱི་རྒྱན་འཆང་ན་ལྟུང་བའོ། །དེ་ལ་ཆོས་ཀྱི་རྒྱན་ཞེས་བྱ་བ་ནི་སྐྲ་བརྙན་ལ་བྱ་སྟེ། དགེ་

སློང་མས་སྐྲ་བརྙན་འཆང་ངམ་བྱས་ན་ལྟུང་བར་འགྱུར་རོ། །ལྟུང་བ་བརྒྱ་བརྒྱད་ཅུ་པ་རྫོགས་སོ།། །།བརྒྱ་རྩ་བརྒྱད་པོ་འདི་དག་ལ། །གཞན་ཡང་བདུན་ཅུ་གཉིས་ཀྱིས་བསྣན། །དགེ་སློང་ལྟུང་བ་བསྡོམས་ན་ནི། །བརྒྱ་དང་བརྒྱད་ཅུར་འདྲེས་པ་ཡིན། །སྐྲོད་པ་
དང་ནི་ཡང་ཡང་དང་། །བཟང་པོ་གནས་དང་སྨན་བྱེད་གནས་གཉིས་དང་། །གདེང་མེད་ལོ་མ་ཚང་དང་རས་ཆེན་དང་། །དགུ་བཅུ་པོ་ལས་བཅོ་བརྒྱད་འདི་བཀོལ་ཏེ། །བུད་མེད་ཀྱི་དང་ཐུན་མོང་མ་ཡིན་ནོ། །ལྷག་མ་འདི་དག་བྱ་བར་བྱའོ། །ཞེས་བྱ་བ་ནི་དགེ་སློང་མའི་ལྟུང་བ་བརྒྱ་བརྒྱད་ཅུར་
གཞག་པ་དེ། དགེ་སློང་གི་ལྟུང་བ་དགུ་བཅུ་དགུ་ལས་ལོགས་ཤིག་ཏུ་ཐུན་མོང་མ་ཡིན་པའི་ལྟུང་བ་བརྒྱ་རྩ་བརྒྱད་ཡོད་པར་བསྟན་ཞིང་། དགེ་སློང་དག་གི་ལྟུང་བ་དགུ་བཅུ་ལས། གང་དག་ནི་དགེ་སློང་མའི་བསླབ་པ་ཡིན། གང་དག་ནི་མ་ཡིན་པར་དབྱེ་ཞིང་བརྒྱ་བརྒྱད་ཅུར་བསྡུ་བའི་ཚུལ་བསྟན་
པའི་ཕྱིར་ཚིགས་སུ་བཅད་པ་འདི་དག་སྨོས་སོ། །དེ་ལ་བརྒྱ་རྩ་བརྒྱད་པོ་འདི་དག་ལ། །གཞན་ཡང་བདུན་ཅུ་གཉིས་ཀྱིས་བསྣན་ཞེས་བྱ་བ་ནི་དགེ་སློང་གི་བསླབ་པ་དང་ཐུན་མོང་མ་ཡིན་པ་སྒོག་སྐྱ་ཟ་ན་ལྟུང་བར་འགྱུར་བ་མན་ཆད་བརྒྱ་རྩ་བརྒྱད་ཡོད་པའི་སྟེང་དུ། དགེ་སློང་གི་ལྟུང་བ་དགུ་བཅུ་ལས་
བཅོ་བརྒྱད་བཏོན་ཏེ་བདུན་ཅུ་གཉིས་ཀྱིས་བསྣན་ན། བརྒྱ་བརྒྱད་ཅུར་བསྟན་པ་ཡིན་ཏེ། ལྟུང་བ་དགུ་བཅུ་ལས་བཅོ་བརྒྱད་བཏོན་ན་ནི་ཐུན་མོང་མ་ཡིན་པ་ལ་བརྒྱ་རྩ་བརྒྱད་དུ་མེད་དེ། ཅིའི་ཕྱིར་ཞེ་ན། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་ཆོས་གོས་བྱིན་གྱིས་མི་རློབ་ན་ལྟུང་བའོ་ཞེས་པ་དེ།
སྔར་གོང་དུ་སྤང་བའི་ལྟུང་བའི་སྐབས་སུ་ཡང་བཤད་ཟིན་ལ། དེ་ཉིད་སྡོམ་གྱི་ཚིགས་སུ་བཅད་པ་ལས་ཀྱང་མི་འབྱུང་སྟེ། ལྟུང་བ་དེ་གཅིག་ལྷག་པའི་ཕྱིར་བརྒྱ་རྩ་བརྒྱད་དུ་མེད་དོ། །འོག་ནས་གདེང་མེད་གཏོགས་པར་བཅོ་བརྒྱད་བཀོལ་ལོ་ཞེས་འབྱུང་མོད་ཀྱི་གདེང་མེད་ནི་བཀོལ་དུ་མི་
རུང་སྟེ། ཅིའི་ཕྱིར་ཞེ་ན་གོང་དུ་སྡོམ་གྱི་ཚིགས་སུ་བཅད་པ་ལས་ཀྱང་འབྱུང་ལ། ལྷག་མ་མེད་པའི་ཕྱིར་ཏེ་དེ་ལྟར་ན་ཐུན་མོང་མ་ཡིན་པ་བརྒྱ་རྩ་བདུན་གྱི་སྟེང་དུ་ཐུན་མོང་གི་ལྟུང་བ་བདུན་ཅུ་རྩ་གསུམ་གྱིས་བསྣན་ཅིང་བརྒྱ་བརྒྱད་ཅུར་བསྐང་དགོས་སོ། །སྐྲོད་པ་དང་ནི་ཡང་ཡང་དང་།

བཟང་པོའི་གནས་དང་སྨན་བྱེད་གནས་གཉིས་དང་། །གདེང་མེད་ལོ་མ་ཚང་དང་རས་ཆེན་དང་། །དགུ་བཅུ་པ་ལས་བཅོ་བརྒྱད་འདི་བཀོལ་ཏེ། །ཞེས་བྱ་བ་ནི་དགེ་སློང་གི་ལྟུང་བ་དགུ་བཅུ་ལས་བཅུ་ཕུང་གཉིས་པ་དགེ་སློང་མའི་ཚོགས་ཀྱི་སྟེང་དུ་བརྒྱད་པོ་འདི་བསྣན་ཏེ། སྤྱིར་བཅོ་བརྒྱད་བཀོལ་
བར་བྱའོ་ཞེས་བསྟན་པ་སྟེ། གདེང་མེད་བཀོལ་དུ་མི་རུང་བའི་གཏན་ཚིགས་ནི་སྔར་བཤད་པ་བཞིན་ནོ། །ཅིའི་ཕྱིར་འདི་རྣམས་བཀོལ་ཞེ་ན། དེའི་ཕྱིར་བུད་མེད་ཀྱི་དང་ཐུན་མོང་མ་ཡིན་ནོ་ཞེས་བྱ་བ་ཡིན་ཏེ། བཅོ་བརྒྱད་པོ་དེ་དག་དགེ་སློང་མ་དང་ཐུན་མོང་མ་ཡིན་པའི་ཕྱིར་རོ་ཞེས་བསྟན་པའོ། །
ལྷག་མ་འདི་དག་བྱ་བ་བྱའོ་ཞེས་བྱ་བ་ནི་བཅོ་བརྒྱད་པོ་དེ་དག་ལས་གཞན་པ་རྣམས་ནི་དགེ་སློང་མའི་བསླབ་པར་གཏོགས་པར་བསྟན་པའོ། །འཕགས་མ་དག་བདག་གིས་ལྟུང་བ་བརྒྱ་བརྒྱད་ཅུ་དག་བཤད་ཟིན་ཏོ་ཞེས་བྱ་བ་ནི་མཇུག་བསྡུ་ཞིང་ཉན་པའི་འཁོར་རྣམས་སྤྲོ་བ་སྐྱེད་པའོ། །དེ་ལ་བདག་
གིས་འཕགས་མ་དག་ལ་ཅི་འདི་ན་ཡོངས་སུ་དག་པར་གནས་སམ་ཞེས་དྲིའོ། །ཅི་འདི་ནི་ཡོངས་སུ་དག་པར་གནས་སམ་ཞེས་ལན་གཉིས་ལན་གསུམ་དུ་དྲིའོ། །འདི་ན་འཕགས་མ་དག་ཡོངས་སུ་དག་ན་གང་གི་ཕྱིར་ཅང་མི་སྨྲ་བར་དེ་བཞིན་དུ་འཛིན་ཏོ་ཞེས་བྱ་བ་ནི་ཡོངས་སུ་དག་པ་དྲི་བ་སྟེ་གོ་སླ་
བས་མ་བཤད་དོ། །ལྟུང་བའི་དངོས་པོ་རྣམས་བསྟན་པ་ལ་རྣམ་པ་ལྔར་ཕྱེ་བའི་གསུམ་སྟེ། ལྟུང་བའི་སྡེའི་བཤད་པ་རྣམས་རྫོགས་སོ།། །།ལྟུང་བའི་དངོས་པོ་བསྟན་པ་ལ་རྣམ་པ་ལྔར་ཕྱེ་བའི་བཞི་པ་སྟེ། སོ་སོར་བཤགས་པའི་སྡེ་ཞེས་བྱ་བ་འདིར་སྟོན་ཏེ། དེའི་
ཕྱིར་མདོར་བསྟན་པ་ནི། འོ་མ་ཞོ་དང་མར་སར་དང་། །མར་དང་འབྲུ་མར་བུ་རམ་དང་། །སྦྲང་རྩི་དང་ནི་ཤ་དང་ཉ། །ཤ་སྐམ་སློབ་པ་དེས་བྱས་པའོ། །ཞེས་གསུངས་ཏེ། དེ་ལ་འོ་མ་ཞེས་བྱ་བའི་གླེང་གཞི་ནི་སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་བཅུ་གཉིས་སྡེ་མོ་དག་
བུད་མེད་ཀྱི་ཡེབ་རྔམ་གྱིས། གཞན་གྱི་ཁྱིམ་ནས་འོ་མ་བླངས་ཏེ་ཡོངས་སུ་སྤྱོད་དོ། །དེ་ལ་འོ་མ་སློང་བའི་ཕྱིར་ལུང་འབོགས་པ་དང་ཀློག་པ་དང་ཁ་ཏོན་དང་རྣལ་འབྱོར་དང་ཡིད་ལ་བྱེད་པ་དང་རང་གི་སེམས་ཀྱི་ཞི་གནས་གཏོང་བར་གྱུར་ནས། དོན་ཉུང་ངུ་མའི་དགེ་སློང་མ་དག་འཕྱ་བར་

གྱུར་པའི་བར་དུ་སྟེ། དེ་ལྟ་བུའི་རྣམ་པ་དག་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། བསླང་བར་མི་བྱའོ། །ཕྱིས་ཉོ་བར་བྱེད་དེ། དེ་ཉིད་ཉེས་པར་གྱུར་ཏེ། བཅོམ་ལྡན་འདས་ཀྱིས་བཀའ་སྩལ་པ། ཉོ་བར་མི་བྱའོ་གཉེན་རྣམས་
ལ་སློང་བར་བྱེད་པ་དང་། །དེ་ཉིད་ཉེས་པའི་དམིགས་སུ་གྱུར་ནས་བཀའ་སྩལ་པ། བླང་བར་མི་བྱའོ་ཞེས་པ་ནས་དགེ་སློང་མ་ནད་པ་གཞན་ཞིག་སྨན་པས་འོ་མ་འཐུངས་ཤིག་ཅེས་བསྒོ་བ་དང་། དེས་སྨྲས་པ། བཞིན་བཟངས་བདག་ཤིའོ། །སྨན་པས་སྨྲས་པ་ཅིའི་ཕྱིར། །དེས་སྨྲས་པ། བཅོམ་ལྡན་
འདས་ཀྱིས་མ་གནང་ངོ་། །སྨན་པས་སྨྲས་པ། ཁྱོད་ཀྱི་སྟོན་པ་ནི་ཐུགས་རྗེ་ཅན་ཏེ་གནང་བར་འགྱུར་རོ། །དེ་ལྟ་བུའི་རྣམ་པ་དགེ་སློང་མ་གང་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ན་བར་གྱུར་ན་སྨན་པའི་ལུང་གིས་སྨན་ནི་ཡོངས་སུ་སྤྱད་པར་བྱའོ་
ཞེས་བྱ་བའི་བར་དུའོ། །དེ་ནས་སྦོམ་དགའ་མོ་ནའང་རུང་མི་ནའང་རུང་གཞན་གྱི་ཁྱིམ་ནས་འོ་མ་བླངས་ཏེ་ཡོངས་སུ་སྤྱད་དོ། །དེ་ལྟ་བུའི་རྣམ་པ་བཅོམ་ལྡན་འདས་ལ་གསོལ་བ་ནས། བཅོམ་ལྡན་འདས་ཀྱིས་བྱུང་བ་འདི་ནས་བསླབ་པ་བཅས་པའི་བར་དུ་སྟེ། ཡང་དགེ་སློང་མ་གང་མིན་པར་
བདག་གི་ཕྱིར་གཞན་གྱི་ཁྱིམ་ནས་འོ་མ་བླངས་ཏེ་འཐུངས་ན་དགེ་སློང་མ་དེ་དགེ་སློང་མའི་དབྱར་མོ་ཁང་དུ་སོང་སྟེ། །དགེ་སློང་མ་རྣམས་ལ་འཕགས་མ་དག་བདག་སྨད་པའི་གནས་སུ་གྱུར་ནས་མི་རིགས་པ་སོ་སོར་བཤགས་པའི་ཆོས་དེ་སོ་སོར་བཤགས་པར་བྱའོ་ཞེས་སོ་སོར་བཤགས་པར་བྱ་སྟེ་
ཆོས་འདི་སོ་སོར་བཤགས་པར་བྱའོ། །ཡང་དགེ་སློང་མ་ཞེས་བྱ་བ་ནི་སྦོམ་དགའ་མོའོ། །བདག་གི་ཕྱིར་ཞེས་བྱ་བ་ནི་ལུས་ཀྱི་ཕྱིར་རོ། །མི་ན་བ་ནི་ནད་མེད་པའོ། །ཁྱིམ་ནི་བྲམ་ཟེ་དང་། ཁྱིམ་བདག་གི་གནས་སོ། །འོ་མ་ནི་འོ་མ་ལྔ་སྟེ། བའི་འོ་མ་དང་། མ་ཧེའི་འོ་མ་དང་། རྔ་མོ་དང་།
ར་དང་། ལུག་གི་འོ་མ་དང་ལྔའོ། །བསླངས་པ་ནི་གསོལ་བ་བཏབ་པའོ། །འཐུངས་ཞེས་བྱ་བ་ནི་མིད་པར་མིད་པའོ། །དགེ་སློང་མ་དེ་ཞེས་པ་ནི་གང་དགེ་སློང་མར་གྱུར་པའོ། །དབྱར་མོ་ཁང་དུ་སོང་ཞེས་པ་ནི་གཙུག་ལག་ཁང་དུའོ། །དགེ་སློང་མ་རྣམས་ལ་ཞེས་པ་ནི་ཆོས་འདི་ལ་སོ་སོར་

བཤགས་པར་བྱ་བའོ། །བདག་སྨད་པའི་གནས་སུ་གྱུར་ཅེས་བྱ་བ་ནི་འདི་དགེ་སློང་མས་བྱ་བ་མ་ཡིན་པས་སོ། །མི་རིགས་པ་ནི་དགེ་སློང་མས་བྱས་པར་མི་རིགས་པའོ། །སོ་སོར་བཤགས་པར་བྱ་བའི་ཆོས་དེ་སོ་སོར་བཤགས་པར་བྱའོ་ཞེས་སོ་སོར་བཤགས་པར་བྱ་སྟེ་ཞེས་པ་ནི་ཀུན་ལས་བཤགས་
པའི་ཕྱིར་རོ། །ཆོས་འདི་སོ་སོར་བཤགས་པར་བྱའོ་ཞེས་པ་ནི་ངེས་པར་བཤགས་པར་བྱ་བའི་ཕྱིར་རོ། །དེ་ལ་ཉེས་པ་ཇི་ལྟ་བུར་འགྱུར་ཞེ་ན། དགེ་སློང་མས་ཇི་ཙམ་དུ་འོ་མ་བླངས་པས་ཐམས་ཅད་དུ་ཉེས་བྱས་སུ་འགྱུར་རོ། །ཐོབ་ན་ཉེས་བྱས་སོ། །ཡོངས་སུ་སྤྱད་ན་ཉེས་པ་སོ་སོར་བཤགས་
པར་འགྱུར་རོ། །ལས་དང་པོ་པ་དང་སྨྱོས་པ་དང་སེམས་འཁྲུགས་པ་དང་ཚོར་བས་ཉེན་པ་རྣམས་ལ་ཉེས་མེད་དོ།། །།གླེང་གཞི་ནི་སྟོན་པ་མཉན་དུ་ཡོད་པ་ན་སྟེ། ནམ་བཅོམ་ལྡན་འདས་ཀྱིས་དགེ་སློང་མ་རྣམས་ལ་འོ་མ་མ་གནང་བ་དེ་ན་ཕྱིས་ཞོ་སློང་བར་བྱེད་པ་ནས་བསླབ་པ་བཅས་པའི་
བར་དུ་སྟེ། ཞོ་སློང་དུ་མི་གནང་བ་ཡང་སྔར་སྨོས་པ་བཞིན་ནོ། །དེ་ལ་འོ་མ་ལྔ་ནི་འདིར་ཞོ་ལྔར་རྒྱས་པར་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། དེ་བཞིན་དུ་མར་སར་སློང་བ་ལས་བསླབ་པ་བཅས་པའི་བར་དུ་སྟེ། མར་སར་ལྔ་ཡང་གོང་དུ་སྨོས་པའི་འོ། །གླེང་གཞི་ནི་མཉན་དུ་ཡོད་པ་ན་སྟེ།
མར་སློང་བར་གྱུར་པ་ལས་བསླབ་པ་བཅས་ཏེ། མར་རྣམ་པ་ལྔ་ཡང་གོང་དུ་སྨོས་པའི་འོ། །གླེང་གཞི་ནི་མཉན་དུ་ཡོད་པ་ན་སྟེ། འབྲུ་མར་སློང་བ་ལས་བཅས་ཏེ། འབྲུ་མར་ནི་འབྲུའི་མར་རོ། །གླེང་གཞི་ནི་མཉན་དུ་ཡོད་པ་ན་སྟེ། བུ་རམ་སློང་བར་གྱུར་པ་ལས་བཅས་ཏེ། བུ་རམ་ནི་བུ་རམ་
ཉིད་དོ། གླེང་གཞི་ནི་མཉན་དུ་ཡོད་པ་ན་སྟེ། ཕྱིས་སྦྲང་རྩི་སློང་བར་གྱུར་པ་ལས་བཅས་ཏེ། སྦྲང་རྩི་ནི་མངར་བའོ། །གླེང་གཞི་ནི་མཉན་དུ་ཡོད་པ་ན་སྟེ། ཕྱིས་ཉ་ཤ་སློང་བར་གྱུར་པ་ལས་བཅས་ཏེ། ཉ་ཤ་ནི་ཆུ་ལ་སྤྱོད་པ་རྣམས་ཀྱིའོ། །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་ཕྱིས་
ཤ་གཞན་སློང་བར་གྱུར་པ་ལས་བསླབ་པ་བཅས་ཏེ། ཤ་ནི་ཕྱུགས་ལ་སོགས་པའི་ཤའོ། །གླེང་གཞི་ནི་མཉན་དུ་ཡོད་པ་ན་སྟེ། ཕྱིས་ཤ་སྐམ་སློང་བར་གྱུར་པ་ལས་བཅས་ཏེ། ཤ་སྐམ་ནི་ཤ་སྐམ་པོའོ། །བཏུང་པའི་རིམ་པ་དང་གཞན་ནི་འོ་མའི་སྐབས་སུ་སྨོས་པ་དང་མཐུན་ནོ། །

ཡུལ་ཡངས་པ་ཅན་ན་ནམ་གྱི་ཚེ་དེད་དཔོན་སེང་གེ་བདེན་པ་མཐོང་ནས། བཅོམ་ལྡན་འདས་ཀྱིས་བཀའ་སྩལ་ཏེ། དགེ་འདུན་གྱིས་ཀྱང་སྡོམ་པ་བཅས་པའི་བར་དུའོ། །དེ་ནས་བཅུ་གཉིས་སྡེ་མོ་དེ་དག་ཁྱིམ་དེར་འགྲོ་ཞིང་བསོད་སྙོམས་ལེན་པར་བྱེད་དོ། །དེ་ནས་དགེ་སློང་མ་
དག་གིས་ཆེ་ཞེ་དག་བཅོམ་ལྡན་འདས་ཀྱིས་ཁྱིམ་འདིར་བསླབ་པའི་སྡོམ་པ་མ་བཅས་སམ་སྨྲས་པ་དང་། དེ་དག་གིས་འདི་སྐད་ཅེས་སྨྲས་སོ། །དགེ་སློང་རྣམས་ལ་བཅས་ཀྱི་དགེ་སློང་མ་ལ་ནི་མ་ཡིན་ནོ། །དེ་ནས་དོན་ཉུང་ངུ་མའི་དགེ་སློང་མ་དག་འཕྱ་བར་གྱུར་ནས་དེ་ལྟ་བུར་གྱུར་པ་བཅོམ་ལྡན་འདས་
ལ་གསོལ་ཏོ། །བཅོམ་ལྡན་འདས་ཀྱིས་བྱུང་བ་དེ་ལས་བསླབ་པ་བཅས་པའི་བར་དུ་སྟེ། གང་དགེ་འདུན་གྱི་སློབ་པའི་ཁྱིམ་འདི་འདྲ་བར་བསླབ་པའི་སྡོམ་པ་བྱིན་པ་ཤེས་པ་རྣམས་སུ་སྔར་མ་བོས་པར་སོང་སྟེ། རང་གི་ལག་གིས་བཅའ་བ་དང་བཟའ་བ་བསླངས་ནས་འཆོས་སམ་ཟོས་ན་དགེ་སློང་
མ་དེ་དག་དགེ་སློང་མའི་དབྱར་མོ་ཁང་དུ་སོང་སྟེ། དགེ་སློང་མ་རྣམས་ལ་འཕགས་མ་དག་བདག་སྨད་པའི་གནས་སུ་གྱུར་པ་མི་རིགས་པར་སོ་སོར་བཤགས་པར་བྱ་བའི་ཆོས་ཏེ། སོ་སོར་བཤགས་པར་བྱའོ་ཞེས་སོ་སོར་བཤགས་པར་བྱ་སྟེ་ཆོས་འདི་ཡང་སོ་སོར་བཤགས་པར་བྱའོ། །
གང་ཞེས་བྱ་བ་ནི་བཅུ་གཉིས་སྡེའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །སློབ་པའི་ཁྱིམ་ཞེས་བྱ་བ་ནི་བདེན་པ་མཐོང་བའོ། །བསླབ་པའི་སྡོམ་པ་བྱིན་པ་ཤེས་པ་ནི་གསོལ་བ་དང་གཉིས་སོ། །སྔར་མ་བོས་པ་ནི་སྦྱིན་བདག་གིས་མ་བོས་པའོ།
སོང་སྟེ་ཞེས་བྱ་བ་ནི་སློབ་མའི་ཁྱིམ་དུའོ། །རང་གི་ལག་གིས་ཞེས་བྱ་བ་ནི་བདག་ཉིད་ཀྱི་ལག་གིས་སོ། །བཅའ་བ་དང་བཟའ་བ་ནི་བཅའ་བ་ལྔ་དང་བཟའ་བ་ལྔའོ། །འཆོས་སམ་ཟོས་པ་ནི་མིད་པར་མིད་པའོ། །དགེ་སློང་མ་དེ་ཞེས་བྱ་བ་ནི་གང་དགེ་སློང་མར་གྱུར་པའོ། །དབྱར་མོ་ཁང་
དུ་ཞེས་པ་ནི་གཙུག་ལག་ཁང་དུའོ། །དགེ་སློང་མ་རྣམས་ལ་ཞེས་བྱ་བ་ནི་ཆོས་འདི་ལ་ཞུགས་པའོ། །འཕགས་མ་དག་བདག་སྨད་པའི་གནས་སུ་གྱུར་པ་ཞེས་བྱ་བ་ནི་དགེ་སློང་མས་བྱ་བ་མ་ཡིན་པའི་ཕྱིར་རོ། །མི་རིགས་པ་ཞེས་བྱ་བ་ནི་དགེ་སློང་མ་ལ་རིགས་པར་མི་འགྱུར་བའི་ཕྱིར་ཏེ་རང་བཞིན་

ལྟར་མི་འཇུག་པའོ། །གཞན་ནི་གོང་དུ་བཤད་པ་བཞིན་ནོ། །དེ་ལ་ཉེས་པ་ཇི་ལྟ་བུ་ཞེ་ན། ཅི་ཙམ་དུ་དགེ་སློང་མས་སློབ་པའི་ཁྱིམ་དུ་བསླབ་པའི་སྡོམ་པ་བྱིན་པར་ཤེས་བཞིན་དུ་སྔར་མ་བོས་པར་བདག་ཉིད་སོང་སྟེ་བཅའ་བ་དང་བཟའ་བ་འཆོས་སམ་ཟོས་ན་ཐམས་ཅད་སོ་སོར་བཤགས་པར་
འགྱུར་རོ། །གལ་ཏེ་སྔར་བོས་སམ་བསླབ་པའི་སྡོམ་པ་བཤིག་པར་གྱུར་པ་དང་། ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ནད་ཀྱིས་གཟིར་བ་ལ་ཉེས་པ་མེད་དོ། །འཕགས་མ་དག་བདག་གིས་སོ་སོར་བཤགས་པར་བྱ་བའི་ཆོས་བཅུ་གཅིག་པོ་དག་བཤད་ཟིན་ཏོ་
ཞེས་བྱ་བ་ལ་སོགས་པ་གོ་སླ་བས་མ་བཤད་དོ། །ལྟུང་བའི་དངོས་པོ་བསྟན་པ་ལ་རྣམ་པ་ལྔར་ཕྱེ་བའི་བཞི་པ་སྟེ་སོ་སོར་བཤགས་པར་བྱ་བའི་སྡེའི་བཤད་པ་རྣམས་རྫོགས་སོ།། །།ལྟུང་བའི་དངོས་པོ་རྣམས་བསྟན་པ་ལ་རྣམ་པ་ལྔར་བྱེ་བའི་ཐ་མ་སྟེ། ཉེས་བྱས་ཀྱི་སྡེ་བསླབ་པའི་ཆོས་མང་
པོ་རྣམས་འདིར་སྟོན་ཏེ། དེའི་ཕྱིར། མདོར་བསྟན་པ་ནི། ཆོས་གོས་བསྡམས་པ་གཡོགས་པ་དང་། །མཆོང་བ་དང་ནི་ལུས་བསྒྱུར་དང་། །འདུག་པར་བྱ་དང་རྐང་པ་དག །མང་པོ་ཡང་དག་བསྡུས་པ་ཡིན། །ཞེས་བྱ་བ་གསུངས་སོ། །སངས་རྒྱས་བཅོམ་ལྡན་འདས་ཡུལ་ན་ཏི་ཀའི་
འོལ་མ་སེའི་གནས་ན་བཞུགས་ཏེ། དེ་ན་སྐྱེ་དགུའི་བདག་མོ་ཆེན་མོ་གཽ་ཏ་མི་དང་ཤཱཀྱ་མོ་ལྔ་བརྒྱ་ཙམ་སྐྲ་བྲེགས་ནས་གོས་ངུར་སྨྲིག་གྱོན་ཏེ་ཡུལ་ན་ཏི་ཀ་གང་ན་བ་དེར་རྒྱུ་ཞིང་སོང་ངོ་། །རིམ་གྱིས་སྤྱོད་པ་སྤྱོད་ཅིང་ཡུལ་ན་ཏི་ཀའི་འོལ་མ་སེར་ཕྱིན་ཏོ། །ནམ་གྱི་ཚེ་བཅོམ་ལྡན་འདས་ཀྱིས་སྐྱེ་
དགུའི་བདག་མོ་གཽ་ཏ་མི་ལ་བརྟེན་ནས་ཆོས་དང་འདུལ་བ་འདི་ལ་དགེ་སློང་མ་རྣམས་རབ་ཏུ་བྱུང་བསྙེན་པར་རྫོགས་པར་གནང་བ་དེ་ན། དེ་དག་བདག་ཅག་གིས་གོས་ཇི་ལྟར་བགོ་བ་མི་ཤེས་ནས་དེ་ལྟ་བར་གྱུར་པ་དགེ་སློང་རྣམས་ལ་སྨྲས་སོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས།
བཅོམ་ལྡན་འདས་ཀྱིས་བཀའ་སྩལ་པ། ཤམ་ཐབས་ཧ་ཅང་རྩེངས་པ་མ་ཡིན་པ་དང་། ཧ་ཅང་འཇོལ་བ་ཡང་མ་ཡིན་པ་དང་། ཟླུམ་པོར་བགོ་བར་བསླབ་པར་བྱའོ། །ནམ་གྱི་ཚེ་བཅོམ་ལྡན་འདས་ཀྱིས་ཤམ་ཐབས་འདི་ལྟ་བུར་བགོ་བར་བྱའོ་ཞེས་བཀའ་སྩལ་པ། དེ་ན་སྐྱེ་དགུའི་བདག་མོ་ལ་སོགས་

པ་དགེ་སློང་མ་རང་བཞིན་དུ་གནས་པ་རྣམས་ནི་དེ་བཞིན་དུ་གྱོན་ནོ། །དེ་ནས་དུས་གཞན་ཞིག་ན་དགེ་སློང་མ་བཅུ་གཉིས་སྡེ་མོ་དག་ཤམ་ཐབས་ཧ་ཅང་རྩེངས་པར་གྱོན་པ་དང་། དེ་ལ་དགེ་སློང་མ་དག་གིས་ཅིའི་ཕྱིར་ཁྱེད་ཅག་ཧ་ཅང་རྩེངས་པར་གྱོན་ཞེས་སྨྲས་པ་དང་།
དེ་དག་གིས་སྨྲས་པ། ཁྱིམ་ན་གནས་པ་ནས་བདག་ཅག་འདི་ལྟར་གོམས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཤམ་ཐབས་ཧ་ཅང་རྩེངས་པར་ཡང་བགོ་བར་མི་བྱའོ། །དེ་བཞིན་དུ་ཧ་ཅང་འཇོལ་བར་ཡང་བགོ་བར་མི་བྱའོ་ཞེས་བསླབ་པ་བཅས་པ་དང་། དེ་དག་དཔྱི་མགོ་ལས་
དམའ་བར་ཤམ་ཐབས་གྱོན་པ་དང་། དགེ་སློང་མ་དག་གིས་ཅིའི་ཕྱིར་ཁྱེད་དཔྱི་མགོ་ལས་དམའ་བར་ཤམ་ཐབས་གྱོན་ཞེས་སྨྲས་པ་དང་། དེ་དག་འདི་སྐད་དུ་ཁྱིམ་མི་མོ་རྣམས་འདི་ལྟར་གྱོན་ནོ། །དགེ་སློང་མ་དེ་དག་གིས་ཅི་ཁྱེད་ཁྱིམ་མི་མོའམ་ཞེས་སྨྲས་སོ། །དེ་ལྟ་བུར་གྱུར་པ་དགེ་
སློང་མ་རྣམས་ཀྱིས་བཅོམ་ལྡན་འདས་ལ་གསོལ་ནས་བཀའ་སྩལ་པ། ཧ་ཅང་རྩེངས་པ་ཡང་མ་ཡིན། ཧ་ཅང་འཇོལ་བ་ཡང་མ་ཡིན་པ་དང་། དཔྱི་མགོ་ལས་ཤམ་ཐབས་དམའ་བར་མི་བགོ་བ་དང་། ཟླུམ་པོར་བགོ་བར་བསླབ་པར་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་
བཅུ་གཉིས་སྡེ་མོ་དག་ཤམ་ཐབས་གླང་པོ་ཆེའི་སྣ་ལྟར་བགོས་པ་དང་། དགེ་སློང་མ་དག་གིས་ཅིའི་ཕྱིར་ཆེ་ཞེ་ཁྱེད་ཤམ་ཐབས་གླང་པོ་ཆེའི་སྣ་ལྟར་གྱོན་ཞེས་པ་དང་། དེ་དག་འདི་སྐད་དུ་ནོར་ཅན་དང་ཚོང་དཔོན་དང་དེད་དཔོན་རྣམས་འདི་ལྟར་གྱོན་ནོ་ཞེས་སྨྲས་པ་ནས་བཅོམ་ལྡན་འདས་ཀྱིས་
བཀའ་སྩལ་པའི་བར་དུ་སྟེ། གླང་པོ་ཆེའི་སྣ་ལྟར་མ་ཡིན་པ་དང་། ཏ་ལའི་ལོ་མ་ལྟར་མ་ཡིན་པ་དང་། ནས་ཅན་གྱི་ཕུར་མ་ལྟར་མ་ཡིན་པ་དང་། སྦྲུལ་མགོའི་གདེངས་ཀ་ལྟར་མ་ཡིན་པར་ཤམ་ཐབས་བགོ་བར་བསླབ་པར་བྱའོ། །ཆོས་གོས་ཀྱང་ཤམ་ཐབས་ཀྱི་གླེང་གཞི་
དང་མཐུན་པར་སྦྱར་རོ། །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་བཅུ་གཉིས་སྡེ་མོ་དག་དཔུང་པ་སྒྲེན་མོར་ཕྱུང་སྟེ་ཁྱིམ་གྱི་ནང་དུ་འགྲོ་བ་དང་། དེ་ལ་དགེ་སློང་མ་དག་གིས་སྨྲས་པ། ཆེ་ཞེ་ཁྱོད་ཅིའི་ཕྱིར་དཔུང་པ་སྒྲེན་མོར་ཕྱུང་སྟེ་འགྲོ། །དེ་དག་ལ་འདི་སྐད་ཅེས་སྨྲས་སོ། །འཕྱོན་

མ་འདི་དག་གིས་མཐོང་ན་སྙིང་དགའ་བའི་ཕྱིར་རོ་ཞེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བསྡམས་ཏེ་ཁྱིམ་དུ་འགྲོ་བར་བསླབ་པར་བྱའོ་ཞེས་པའི་བར་དུའོ། །ཁྱིམ་གྱི་ནང་དུ་ཡང་སྒྲ་མཐོན་པོ་དང་སྒྲ་ཆེན་པོར་བྱེད་ཅིང་འགྲོ་བ་དང་། བཅོམ་ལྡན་འདས་ཀྱིས་བཀའ་
སྩལ་པ། སྒྲ་བསྐྱུངས་ཏེ་འགྲོ་བར་བྱའོ། །དེ་ནས་ཕྱིས་ཕན་ཚུན་ལྟ་ཞིང་འགྲོ་བ་དང་། བཅོམ་ལྡན་འདས་ཀྱིས་བཀའ་སྩལ་པ། མིག་ཕབ་སྟེ་འགྲོ་བར་བྱའོ། །དེ་ནས་མདུན་གྱིས་མི་མཐོང་བར་འགྲོ་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བསྡམས་
ཏེ་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ། །ལེགས་པར་བགོས་པ་དང་། སྒྲ་བསྐྱུངས་པ་དང་། མིག་གཟུམ་པར་མི་བྱ་བ་དང་། གཉའ་ཤིང་གང་ཙམ་དུ་ལྟ་ཞིང་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ་ཞེས་བྱའི་བར་དུའོ། །དེ་ནས་བཅུ་གཉིས་སྡེ་མོ་དག་ཁྱིམ་གྱི་ནང་དུ་
མགོ་གཡོགས་ཏེ་འགྲོ་བ་དང་དེ་ལ་ཁྱེད་ཅིའི་ཕྱིར་འདི་ལྟར་འགྲོ་ཞེས་དྲིས་པ་དང་། དེ་དག་གིས་འདི་སྐད་ཅེས་སྨྲས་སོ། །ངེད་སྔོན་གྱི་བག་སར་དུ་གྱུར་པ་ན་འདི་འདྲ་བའི་ཕྱིར་རོ། །དེ་དག་གིས་སྨྲས་པ་ཅི་ཁྱེད་ད་ལྟར་ཡང་ཁྱིམ་གྱི་བག་སར་མོའམ། དེ་དག་གིས་སྨྲས་པ། ཁྱེད་གང་མི་ཤེས་
པ་དེ་བསལ་བར་འགྱུར་ཞིང་ཁྱེད་ཀྱང་བསླབ་པ་ལ་སློབ་པ་འགྱུར་རོ་ཞེས་པ་ནས་བཅོམ་ལྡན་འདས་ཀྱིས་བཀའ་སྩལ་པ། མགོ་མི་གཡོགས་པར་ཁྱིམ་གྱི་ནང་དུ་འགྲོ་བར་བྱའོ་ཞེས་བྱ་བའི་བར་དུའོ། །དེ་ནས་བཅུ་གཉིས་སྡེ་མོ་རྣམས་ལག་པ་གཉིས་ཀྱིས་གོང་ལུགས་བརྫེས་ཏེ་འགྲོ་
བ་དང་། དེ་དག་གིས་ཅིའི་ཕྱིར་ཁྱེད་འདི་ལྟར་འགྲོ་ཞེས་དྲིས་པ་དང་། དེ་དག་གིས་འདི་སྐད་ཅེས་སྨྲས་སོ། །བག་སར་མོ་དག་འདི་ལྟར་འགྲོའོ། །དེ་དག་གིས་སྨྲས་པ་ཅི་ཁྱེད་བག་སར་མོའམ། བཅུ་གཉིས་སྡེ་མོ་དག་གིས་འདི་སྐད་ཅེས་སྨྲས་སོ། །གང་མི་ཤེས་པ་དེ་སྤངས་པར་འགྱུར་ཞིང་
ཁྱེད་ཀྱང་བསླབ་པ་ལ་སློབ་པར་འགྱུར་བར་བྱ་བའི་ཕྱིར་རོ་ཞེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། བརྫེས་ཏེ་ཁྱིམ་གྱི་ནང་དུ་འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཆོས་གོས་ཕྲག་པ་ལ་གཟར་ཏེ་འགྲོ་བ་ནས། ཕྱུགས་རྫི་ལ་སོགས་པ་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་

ལྡན་འདས་ཀྱིས་བཀའ་སྩལ་པ་ནས་གཟར་བར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཆོས་གོས་གཉའ་གོང་དུ་བསྣོལ་ཏེ་ཁྱིམ་དུ་འགྲོ་བ་ནས། བྱིས་པ་དག་བྱིས་པའི་སློབ་པ་ན་སློབ་པའི་ཚེ་འདི་ལྟར་བྱེད་ཅེས་པའི་བར་ཏེ། བཅོམ་ལྡན་འདས་ཀྱིས་
བཀའ་སྩལ་པ། གཉའ་གོང་དུ་མི་བསྣོལ་བར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཕྲག་པ་གཉི་ག་ལ་གཟར་ཏེ་ཁྱིམ་དུ་འགྲོ་བ་ནས། ཞམ་འབྲིང་བ་དག་འདི་ལྟར་འགྲོའོ་ཞེས་སྨྲས་པའི་བར་དུ་ནས། བཅོམ་ལྡན་འདས་ཀྱིས་བཀའ་སྩལ་པ། མགོ་མི་གཡོགས་པ་དང་།
མི་བརྫེ་བ་དང་། མི་གཟར་བ་དང་། གཉའ་གོང་དུ་མི་བསྣོལ་བ་དང་། ཕྲག་པ་ལ་གཟར་བ་དང་། ཕྲག་པ་གཉི་ག་ལ་མི་གཟར་བར་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཁྱིམ་གྱི་ནང་དུ་རྐང་པའི་བྲང་བས་འགྲོ་བ་ནས་ནལ་གྱི་བུ་དག་འདི་
ལྟར་འགྲོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། བྲང་བས་འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཁྱིམ་གྱི་ནང་དུ་འཇལ་ཐབས་སུ་འགྲོ་བ་ནས་ཤིང་རྐང་ཅན་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་
པ། འཇལ་ཐབས་སུ་འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཁྱིམ་གྱི་ནང་དུ་ཙོག་པུས་འགྲོ་བ་ནས། ཐུན་བུ་ཐུབ་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་
གཉིས་སྡེ་མོ་དག་ཁྱིམ་གྱི་ནང་དུ་སྒུ་སྟེ་འགྲོ་བ་ནས་ཁྱིམ་ཕུག་པ་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཁྱིམ་གྱི་ནང་དུ་དཀུར་བརྟན་ཏེ་འགྲོ་བ་ནས་ནོར་ཅན་དང་ཚོང་དཔོན་དག་
ནི་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། བྲང་བས་མ་ཡིན་པ་དང་། འཇལ་ཐབས་སུ་མ་ཡིན་པ་དང་ཙོག་པུས་མ་ཡིན་པ་དང་། སྒུ་སྟེ་མ་ཡིན་པ་དང་། དཀུར་མི་བརྟན་པར་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་

གཉིས་སྡེ་མོ་དག་ལུས་བསྒྱུར་ཞིང་འགྲོ་བར་བྱེད་པ་ནས། བ་གླང་མོ་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ་དང་། ལུས་མི་བསྒྱུར་བར་ཁྱིམ་གྱི་ནང་དུ་འགྲོ་བར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལག་པ་ཀྱོག་ཅིང་ཁྱིམ་
གྱི་ནང་དུ་འགྲོ་བ་ནས། ནོར་ཅན་དང་ཚོང་དཔོན་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་མགོ་བསྒྱུར་ཞིང་ཁྱིམ་གྱི་ནང་དུ་འགྲོ་བ་ནས། སྲོག་ཆགས་རྩངས་པ་དག་ནི་འདི་ལྟར་བྱེད་
དོ་ཞེས་པའི་བར་དུ་སྟེ། །བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཕྲག་པ་སྤྲད་ཅིང་ཁྱིམ་དུ་འགྲོ་བ་ནས། ནེའུ་ལྡངས་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། འགྲོ་
བར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལག་པ་སྦྲེལ་ཏེ་ཁྱིམ་དུ་འགྲོ་བ་ནས། ནལ་གྱི་བུ་དག་འདི་ལྟར་འགྲོའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། །ལུས་མི་བསྒྱུར་བ་དང་། ལག་པ་མི་ཀྱོག་པ་དང་། མགོ་མི་བསྒྱུར་བ་དང་།
ཕྲག་པ་མི་སྤྲད་པ་དང་། ལག་པ་མི་སྦྲེལ་བར་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་བྲམ་ཟེ་དང་ཁྱིམ་བདག་གི་ཁྱིམ་དུ་མ་བསྒོ་བར་སྟན་ལ་འདུག་པར་བྱེད་པ་དང་། དེ་དག་འཕྱ་བར་གྱུར་པ་ནས། བཅོམ་ལྡན་འདས་ཀྱིས་བཀའ་
སྩལ་པ། འདུག་པར་མི་བྱའོ་ཞེས་པའི་བར་དུའོ། །བཅོམ་ལྡན་འདས་ཀྱིས་ཨུ་ད་ཡི་ལ་བརྟེན་ཏེ་མ་བརྟགས་པར་སྟན་ལ་འདུག་པར་མི་བྱའོ་ཞེས་བསླབ་པའི་ཚིག་བཅས་པའི་ཚེ། དེ་ནས་བཅུ་གཉིས་སྡེ་མོ་དག་ཁྱིམ་གྱི་ནང་དུ་སྟན་ལ་མ་བརྟགས་པར་འདུག་པ་ནས། བཅོམ་ལྡན་འདས་
ཀྱིས་བཀའ་སྩལ་པ། འདུག་པར་མི་བྱའོ་ཞེས་པའི་བར་དུའོ། །ནམ་བཅོམ་ལྡན་འདས་ཀྱིས་སེར་སྐྱའི་གནས་སུ་ཨུ་ད་ཡི་ཉིད་ལ་བརྟེན་ཏེ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ་འདུག་པར་མི་བྱ་བའི་བསླབ་པའི་ཚིག་བཅས་པའི་ཚེ་བཅུ་གཉིས་སྡེ་མོ་དག་ཁྱིམ་པའི་ཁྱིམ་དུ་ལུས་ཐམས་ཅད་ཀྱི་

ལྗིད་ཀྱིས་ཕབ་སྟེ་འདུག་པ་ལས་བཅོམ་ལྡན་འདས་ཀྱིས་བཀའ་སྩལ་པ། འདུག་པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་རྐང་པས་རྐང་པ་དག་མནན་ཏེ་ཁྱིམ་པའི་ཁྱིམ་དུ་འདུག་པ་ནས། ནལ་གྱི་བུ་དག་འདི་ལྟར་འདུག་གོ་ཞེས་པའི་བར་དུ་སྟེ།
བཅོམ་ལྡན་འདས་ཀྱིས་བཀའ་སྩལ་པ། འདུག་པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་བརླ་གོང་དུ་བརླས་མནན་ཏེ། ཁྱིམ་གྱི་ནང་དུ་འདུག་པར་བྱེད་པ་ནས་ནོར་ཅན་ཚོང་དཔོན་འདི་ལྟར་འདུག་གོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། འདུག་
པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལོང་བུས་ལོང་བུ་མནན་ཏེ་འདུག་པ་ནས་མྱ་ངན་ཅན་འདི་ལྟར་འདུག་གོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། །འདུག་པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་རྐང་པ་བཀུག་
སྟེ་ཁྱིམ་གྱི་ནང་དུ་འདུག་པ་དང་། བྲམ་ཟེ་དང་ཁྱིམ་བདག་གི་ཆུང་མ་དག་འོངས་ཏེ་རྐང་པ་ལ་ཕྱག་བྱས་པ་དང་། དེ་རྐང་པ་བཀུག་པས་དེ་དག་མགོ་ས་ལ་ཐུག་པར་གྱུར་པ་ནས་འཕྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། རྐང་པ་བཀུག་ཏེ་འདུག་པར་མི་བྱའོ་ཞེས་པའི་བར་
དུའོ། །དེ་ནས་བཅུ་གཉིས་སྡེ་མོ་དག་ཁྱིམ་པའི་ཁྱིམ་དུ་རྐང་པ་གདངས་ཏེ་འདུག་པ་དང་། བྲམ་ཟེ་དང་ཁྱིམ་བདག་གི་ཆུང་མ་དག་ལྷགས་ཏེ། རྐང་པ་ལ་ཕྱག་བྱས་ནས་བཅུ་གཉིས་སྡེ་མོ་དེ་དག་ཨ་རོག་གྱ་ཕྱེད་ལས་མི་སྟེར་ཏོ། །དེ་དག་གིས་འདི་སྐད་ཅེས་སྨྲས་སོ། །ཅིའི་ཕྱིར་ཨ་རོག་
གྱ་རྫོགས་པར་མི་ཟེར། བཅུ་གཉིས་སྡེ་མོས་སྨྲས་པ་ཁྱེད་ཅིའི་ཕྱིར་རྐང་པ་གཅིག་ལ་ཕྱག་འཚལ། དེ་དག་རྐང་པ་གཉིས་པོ་ལ་ཕྱག་འཚལ་ཞིང་འཕྱ་བར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། རྐང་པ་གདངས་ཏེ་འདུག་པར་མི་བྱའོ་ཞེས་པའི་བར་དུའོ། །དེ་ནས་
བཅུ་གཉིས་སྡེ་མོ་དག་ཁྱིམ་པའི་ཁྱིམ་དུ་མདོམས་སྣང་བར་སྟན་ལ་འདུག་པ་ནས་བྲམ་ཟེ་དང་ཁྱིམ་བདག་གི་ཆུང་མ་དག་ཕྱག་བྱེད་པའི་ཚེ་འཕྱ་བར་གྱུར་པའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། མ་བསྒོ་བར་ཁྱིམ་པའི་ཁྱིམ་དུ་སྟན་ལ་མི་འདུག་པ་དང་། སྟན་ལམ་

བརྟགས་པར་དང་། ལུས་ཐམས་ཅད་ཀྱི་ལྗིད་ཀྱིས་མི་དབབ་པ་དང་། རྐང་པ་མི་བསྣོལ་བ་དང་། བརླ་མི་བསྣོལ་བ་དང་། ལོང་བུའི་སྟེང་དུ་ལོང་བུ་མི་གཞག་པ་དང་། རྐང་པ་མི་དགུག་པ་དང་། རྐང་པ་མི་གདངས་པ་དང་། མདོམས་མི་སྣང་བར་ཁྱིམ་པའི་ཁྱིམ་དུ་སྟན་ལ་འདུག་པར་
བྱའོ་ཞེས་པའི་བར་དུའོ། །མདོར་བསྟན་པ་ནི། ལེགས་པར་བྱས་དང་མ་འོངས་དང་། །ཙུག་ཙུག་འབྲུ་བྱེད་ཁུར་བ་སྦེད། །ལག་པ་དང་ནི་འཕྱས་འདོགས་དང་། །མ་བཏིང་བ་དང་འགྲེང་སྟེ་མིན། །སངས་རྒྱས་བཅོམ་ལྡན་འདས་ཡུལ་བརྒ་ན་སྦལ་ཀར་རིའི་ནགས་ཚལ་འཇིགས་འཇིགས་
ལྟན་བཞུགས་ཏེ། དེའི་ཚེ་ན་རྒྱལ་བུ་རྟོགས་ལྡན་གྱིས་སྦལ་ཀར་རིའི་ཁང་བཟངས་སར་པ་ཀོ་ཀ་ན་ད་ལྟ་བུ་བྱས་ཏེ། དེར་སངས་རྒྱས་བཅོམ་ལྡན་འདས་དགེ་སློང་དང་དགེ་སློང་མ་ཐབས་ཅིག་ཏུ་སྤྱན་དྲངས་ཏེ་དེ་ནས་རྒྱལ་བུ་རྟོགས་ལྡན་གྱི་ཁྱིམ་ཚེས་མ་དད་པ་ཤ་དག་སྟེ། དེ་དག་གིས་
འབྲས་ཆན་གྱི་གོང་བུས་དགེ་སློང་མ་རྣམས་ལྷུང་བཟེད་ལག་ནས་ཤོར་བའི་ཚུལ་བྱེད་དོ། །དེ་ནས་གནས་དེ་ན་བཅུ་གཉིས་སྡེ་མོ་དག་འཁོད་དོ། །དེ་དག་ཕན་ཚུན་དུ་འདི་སྐད་ཅེས་སྨྲས་སོ། །ཅི་དགའ་མོ་དང་བསྙེན་དགའ་མོ་དག་བུ་གསོད་མའི་བུ་འདི་དག་བདག་ཅག་གིས་བསྐྱང་བར་བྱའོ། །
གང་གི་ཚེ་ཁ་ཟས་འདྲིམ་པ་དེའི་ཚེ་ལྷུང་བཟེད་བཟེད་པ་ལྟར་བྱ་སྟེ། ཁ་ཟས་ཀྱིས་འབྲས་ཆན་གྱི་གོང་བུ་དེ་ཡང་ས་ལ་ལྟུང་ངོ་། །དོན་ཉུང་ངུ་མའི་དགེ་སློང་མ་དག་འཕྱ་བར་གྱུར་པ་ནས་བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཟས་བླང་བར་བྱའོ་ཞེས་པའི་བར་དུའོ། །དེ་བཞིན་དུ་གཞན་
ཞིག་གི་ཁྱིམ་དུ་སྤྱན་དྲངས་པ་ནས། འབྲས་ཆན་དང་ཚོད་མ་ལྷུང་བཟེད་ནས་ས་ལ་བོ་བའི་ཕྱིར་ཞེས་པའི་བར་དུའོ། །མུ་དང་ཁ་ད་ཆད་དུ་མ་ཡིན་པར་ཟས་བླང་བར་བྱའོ་ཞེས་པའི་བར་དུའོ། །མཉན་དུ་ཡོད་པ་ན་ཁྱིམ་བདག་གཞན་ཞིག་གིས་ཞེས་པ་ནས། ཁྱིམ་གྱི་ནང་དུ་སྤྱན་དྲངས་ཏེ་བཅུ་
གཉིས་སྡེ་མོ་དག་ལ་འབྲས་ཆན་དང་ཚོད་མ་མཉམ་པར་བྲིམས་པ་ལས་ཕྱིས་ཀྱང་སློང་བར་བྱེད་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ཟས་ཚོད་མ་དང་རན་པར་བཟའ་བར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཁྱིམ་བདག་གཞན་ཞིག་གི་ཁྱིམ་

དུ་ཟས་ཟ་བའི་ཚེ། ཚོད་མ་དག་འདྲིམ་པ་མི་ལེན་ཏེ་ཕྱིས་རིང་དུ་སོང་བ་དང་བོས་ནས་བླངས་པས་ཚོད་མ་འཁྲུལ་པར་གྱུར་ཏེ། མི་དགའ་བར་གྱུར་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ཟས་མཐར་ཆགས་སུ་བསླང་བར་བྱའོ་ཞེས་པའི་བར་དུའོ། །
དེ་ནས་བཅུ་གཉིས་སྡེ་མོ་དག་བཅའ་བ་དང་བཟའ་བ་མ་འོངས་པར་ལྷུང་བཟེད་བཟེད་པར་བྱེད་ནས་མ་དད་པ་འཕྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། བཅའ་བ་དང་བཟའ་བ་མ་འོངས་པར་ལྷུང་བཟེད་བཟེད་པར་མི་བྱའོ་ཞེས་པའི་བར་དུ་སྟེ། །དེ་ནས་བཅུ་གཉིས་སྡེ་མོ་དག་
བཟའ་བ་དང་བཅའ་བའི་སྟེང་དུ་ལྷུང་བཟེད་གཞག་པར་བྱེད་པ་ནས། དད་པའི་ཁྱིམ་བདག་དག་གཙང་སྦྲར་མི་རུང་ངོ་ཞེས་འཕྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། བཅའ་བ་དང་བཟའ་བའི་སྟེང་དུ་ལྷུང་བཟེད་མི་ཟེད་པར་བྱའོ་ཞེས་པའི་བར་དུའོ། མཉན་དུ་ཡོད་པ་
ན་ཁྱིམ་བདག་གཞན་ཞིག་གིས་ཁྱིམ་གྱི་ནང་དུ་སྤྱན་དྲངས་པ་ལས་དེ་ན་འབྲས་ཆན་ནི་མང་ཚོད་མ་ནི་ཉུང་ངུ་གྱུར་ནས་འབྲས་ཆན་གྱིས་ཚོད་མ་བཀབ་སྟེ་ཕྱིས་ཡང་སློང་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འབྲས་ཆན་གྱིས་ཚོད་མ་མི་དགབ་པར་བྱའོ་ཞེས་པའི་བར་
དུའོ། །དེ་བཞིན་དུ་གཞན་ཞིག་ཏུ་ཚོད་མ་ནི་མང་འབྲས་ཆན་ནི་ཉུངས་པར་གྱུར་པ་དང་། ཡང་འདོད་པའི་ཕྱིར་ཚོད་མས་འབྲས་ཆན་དགབ་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཚོད་མས་འབྲས་ཆན་མི་དགབ་པར་བསླབ་པར་བྱའོ་ཞེས་པའི་བར་དུའོ། །མཉན་དུ་
ཡོད་པ་ན་སྟེ། དེ་ནས་བཅུ་གཉིས་སྡེ་མོ་དག་སླེ་མ་འཕྱོ་ཞིང་ཟན་ཟ་ནས་དད་པའི་ཁྱིམ་བདག་གིས་འདི་བཞིན་དུ་ནི་གཟུགས་གྱིས་འཚོ་བ་དག་ཟ་སྟེ་མི་རིགས་སོ་ཞེས་འཕྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཟས་བཟའ་བར་བསླབ་པར་བྱའོ་ཞེས་
པའི་བར་དུའོ། །དེ་ནས་བཅུ་གཉིས་སྡེ་མོ་དག་འབྲས་ཆན་གཅིག་གམ་གཉིས་ནས་འབྲུམ་བུས་ཁར་འཇུག་པ་ནས། ཡི་ག་འཆུས་པ་དག་ཟས་ཟ་ན་འདི་ལྟར་བྱེད་དོ་ཞེས་སྨྲས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ཁམ་ཧ་ཅང་ཆུང་བ་མ་ཡིན་ནོ་ཞེས་པའི་བར་

དུའོ། །དེ་ནས་བཅུ་གཉིས་སྡེ་མོ་དག་ཁམ་ལྷག་པར་བསྐྱེད་དེ་ཁར་བཅུག་པ་ནས། ཞིང་པ་དག་འདི་ལྟར་ཟའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ཁམ་ཧ་ཅང་ཆེན་པོ་ཡང་མ་ཡིན་པ་དང་། ཁམ་རན་པར་བཟའ་བར་བསླབ་པར་བྱའོ་ཞེས་པའི་བར་
དུའོ། །དེ་ནས་བཅུ་གཉིས་སྡེ་མོ་དག་གྲོང་དུ་ཟས་ཟ་བའི་ཚེ། དགེ་སློང་མ་རབ་ཏུ་བྱུང་མ་རྒན་མོ་ཞིག་ཁ་གདངས་ཤིང་འདུག་པར་གྱུར་པ་དང་། དེ་ནས་སྦོམ་དགའ་མོས་དེའི་ཁར་བོང་པ་བཅུག་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཁམ་མ་གཟས་པར་ཁ་མི་གདངས་པར་
བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཟ་ཞིང་སྨྲ་བར་བྱེད་དེ། དེ་ནས་དགེ་སློང་མ་དག་གིས་སྨྲས་པ། ཆེ་ཞེ་ཁྱེད་ཅིའི་ཕྱིར་དེ་ལྟར་བྱེད། དེ་དག་གིས་སྨྲས་པ་མིང་བརྗེད་པར་མི་འགྱུར་བར་བྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ཁམ་
གྱིས་བཀང་སྟེ་མི་སྨྲ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཙུག་ཙུག་བྱེད་ཅིང་ཟས་ཟ་བ་དང་། དེ་ནས་དགེ་སློང་མ་དག་གིས་ཁྱེད་ཅིའི་ཕྱིར་དེ་ལྟར་བྱེད་ཅེས་སྨྲས་པ་དང་། དེ་དག་གིས་སྨད་འཚོང་མ་དག་འདི་ལྟར་ཟའོ་ཞེས་བྱ་བའི་བར་དུ་སྟེ། བཅོམ་ལྡན་
འདས་ཀྱིས་བཀའ་སྩལ་པ། ཙུག་ཙུག་མི་བྱ་བར་ཟས་བཟའ་བར་བསླབ་པར་བྱའོ་ཞེས་པའི་བར་དུའོ། །མཉན་དུ་ཡོད་པ་ན་སྟེ། ཁྱིམ་བདག་གཞན་ཞིག་གིས་སྤྱན་དྲངས་པ་ལས་ཁྱིམ་བདག་དེ་སྣོད་ཉུང་བས་འབྲས་ཆན་སྒྲོམ་དུ་བླུགས་པ་དང་དབྱར་གྱི་དུས་སུ་དྲོད་ཆེ་བར་གྱུར་ཏོ། །བཅུ་
གཉིས་སྡེ་མོ་དག་གིས་དེ་བསྟིང་བའི་ཕྱིར་འབྲས་ཆན་འདི་གྲང་གི་དབུགས་ཀྱིས་བསྲོའོ་ཞེས་པ་ནས། ཁྱིམ་བདག་དེས་ཐོས་ནས་སྐྱེངས་ཤིང་མི་དགའ་བར་གྱུར་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ཧུ་ཧུ་མི་བྱ་བར་བསླབ་པར་བྱའོ་ཞེས་པའི་བར་དུའོ། །དེ་བཞིན་དུ་
ཁྱིམ་བདག་གཞན་ཞིག་གིས་སྤྱན་དྲངས་པ་ལས་ཁྱིམ་བདག་དེ་དབུལ་པོ་ཞིག་སྟེ། དེས་དགུན་གྱི་དུས་སུ་ཁ་ཟས་གྲང་མོ་བྲིམས་པ་དང་། དེ་དག་གིས་བསྟིང་བའི་ཕྱིར་ཕུ་ཕུ་ཞེས་བྱ་སྟེ་ཟའོ། །དེ་ནས་ཁྱིམ་བདག་དེ་མགོ་སྨད་ནས་འདི་སྐད་ཅེས་སྨྲས་སོ། །འཕགས་མ་དག་བདག་

གིས་འཚལ་མོད་ཀྱི། བདག་དབུལ་བས་ཇི་ལྟར་བགྱི་ཞེས་པ་ནས་བཅོམ་ལྡན་འདས་ཀྱིས་བཀའ་སྩལ་པ། ཕུ་ཕུ་མི་བྱ་བར་ཟས་བཟའ་བར་བྱ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་གཞན་ཞིག་གིས་སྤྱན་དྲངས་པ་དང་། དེས་
དེ་དག་ལ་ཁ་ཟས་ངན་པ་ཞིག་བྱིན་པ་དང་། དེ་དག་དེ་ལ་ཁ་ཟས་ཀྱི་བསྔགས་པ་བརྗོད་དོ། །གཞན་ཞིག་གིས་དེ་དག་ལ་ཁ་ཟས་བཟང་པོ་ཞིག་བྱིན་པ་དང་། དེ་ལ་འཕྱས་འདོགས་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། བསྔགས་པ་དང་འཕྱས་མི་གདགས་
པར་ཟས་བཟའ་བར་བསླབ་པའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་མཎྜལ་གྱི་སྟེང་དུ་ཁ་ཟས་གཏོར་ཏེ་འབྲུམ་བུ་རེ་རེ་ནས་བཏུས་ཏེ་ཁར་བཅུག་པ་དང་། དགེ་སློང་མ་དག་གིས་ཅིའི་ཕྱིར་འདི་ལྟར་བྱེད་ཅེས་དྲིས་པ་དང་། དེ་དག་གིས་སྨྲས་པ་ཁྱིམ་བྱ་དག་འདི་ལྟར་གཏོར་བ་ལ་
ཐུའོ་ཞེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། འབྲུ་ནས་ཐ་དད་དུ་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཁམ་ཕྱེད་ཙམ་བལྡད་དེ་ལྕེའི་རྩེ་མོར་བཞག་ནས་གཅིག་ལ་གཅིག་སྟོན་ཏེ་ཡང་བལྡད་དམ་ཞེས་ནས། བཅོམ་ལྡན་འདས་ཀྱིས་བཀའ་སྩལ་པ།
ལྕེ་ཕྱུང་སྟེ་ཟས་བཟའ་བར་མི་བྱའོ་ཞེས་པའི་བར་དུའོ། །བཅུ་གཉིས་སྡེ་མོ་དག་རྐན་གཏོག་ཅིང་ཟན་ཟ་བས། བཅོམ་ལྡན་འདས་ཀྱིས་བཀའ་སྩལ་པ། རྐན་གཏོགས་ཏེ་ཟན་མི་བཟའ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཟན་ཁམ་གྱིས་གཅོད་
ཅིང་ཟ་སྟེ། དེ་དག་ཁམ་གཅིག་ནི་ཁར་བཅུག །གཉིས་པ་ནི་ལག་པ་ན། གསུམ་པ་ནི་ལྷུང་བཟེད་ན་འདུག་པ་ནས། བཅོམ་ལྡན་འདས་ཀྱིས་བཀའ་སྩལ་པ་དང་། ཁམ་འཕྲོར་མི་གཅད་པར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ཟས་ཟ་བའི་
ཚེ་མཁུར་བ་ནས་མཁུར་བར་སྤྱོད་པ་ནས། ནད་པ་འདི་དག་འདི་ལྟར་ཟའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། མཁུར་བར་མི་སྤོ་བར་ཟས་བཟའ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལྗོངས་རྒྱུ་ཞིང་སྤྱོད་པ་ལས་ཆུ་འགྲམ་ཞིག་

གི་དྲུང་དུ་ཕྱིན་ཏེ། དེ་དག་གིས་གནས་དེར་ཆོས་གོས་དག་སྤྲུགས་རྐང་ལག་བཀྲུས་ཏེ་ཟས་ཀྱི་བྱ་བ་བྱེད་པ་ལ་ཞུགས་སོ། །དེ་ནས་ཆུ་འགྲམ་གྱི་ཕ་རོལ་དུ་གཅེར་བུ་མ་དག་ཅིག་ཀྱང་ཕྱིན་ཏེ། ཟས་ཀྱི་བྱ་བ་བྱེད་པ་ལ་ཞུགས་པའི་བར་དུ་སྟེ། དེ་ནས་བཅུ་གཉིས་སྡེ་མོ་དག་རྩེ་བར་བྱ་བའི་
བསམ་པས་འོད་སྲུངས་རྫོགས་བྱེད་ཀྱི་མིང་ནས་ཕྱུང་སྟེ། ཟན་གྱི་མཆོད་རྟེན་བྱས་ནས་ལ་ཕུག་གི་སྲོག་ཤིང་བཙུགས་ཏེ་གཅེར་བུ་མ་དེ་དག་ལ་ཁྱེད་ཀྱི་སྟོན་པའི་མཆོད་རྟེན་འདི་ཡིན་ནོ་ཞེས་སྨྲས་སོ། །དེ་ནས་མཆོད་རྟེན་དེ་ལ་བཅད་ཅིང་ཟ་སྟེ། ཚིག་གཅིག་ཏུ་འདི་སྐད་ཅེས་རྫོགས་བྱེད་ཀྱི་
མཆོད་རྟེན་གཞིག་གོ། །དེ་ནས་གཅེར་བུ་མ་དེ་དག་ཡིད་མི་དགའ་བ་སྐྱེས་ཏེ། བདག་ཅག་གི་སྟོན་པ་དུས་ལས་འདས་སོ་ཞེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མཆོད་རྟེན་འདྲ་བར་སྦྲུས་ཏེ་མི་བཟའ་བར་བསླབ་པར་ཟས་བཟའ་བར་བྱའོ་ཞེས་པའི་བར་དུའོ། །
དེ་ནས་བཅུ་གཉིས་སྡེ་མོ་དག་ཁ་ཟས་ཡོད་བཞིན་དུ་ལག་པ་ལྡག་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་མི་ལྡག་པར་ཟས་བཟའ་བར་བསླབ་པར་བྱའོ་ཞེས་པའི་བར་དུའོ། །དེ་བཞིན་དུ་ལྷུང་བཟེད་བྱོག་པར་བྱེད་པ་དང་། བཅོམ་ལྡན་འདས་ཀྱིས་བཀའ་
སྩལ་པ། ལྷུང་བཟེད་བྱོག་པར་མི་བྱའོ་ཞེས་པའི་བར་དུའོ། །དེ་ནས་སྦོམ་དགའ་མོས་ཁམ་ཁར་བཅུག་ཏེ་ལག་པ་སྤྲུགས་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་སྤྲུག་པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་བདག་ཁྱིམ་གཞན་ཞིག་ཏུ་སྤྱན་
དྲངས་པ་དང་། དེ་ནས་སྦོམ་དགའ་མོས་ཕྱེ་ཞིག་ཐོབ་ནས་ལྷུང་བཟེད་བསིགས་ཏེ་ངའི་ལྷུང་བཟེད་ཀྱིས་བསླངས་པའི་ཚད་འདི་ཡིན་གྱི་ད་རུང་བྱིན་ཅིག་ཅེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་མི་བསྐྱོམ་པར་ཟས་བཟའ་བར་བསླབ་པར་བྱའོ་ཞེས་པའི་བར་དུའོ། །དེ་ནས་
ཁྱིམ་བདག་གཞན་ཞིག་གིས་ཁྱིམ་དུ་དགེ་སློང་མའི་དགེ་འདུན་སྤྱན་དྲངས་ཏེ། དེ་ནས་བཟའ་བ་དང་བཅའ་བ་མང་དུ་སྦྱར་ཏེ་བྲིམས་སོ། །དེ་ནས་བཅུ་གཉིས་སྡེ་མོ་དག་གི་ནང་ན་དགེ་སློང་མ་རྒན་ཞུགས་ཞིག་ཀྱང་འདུག་པར་གྱུར་ཏོ། །ཁྱིམ་བདག་དེས་ཀྱང་ཐོག་མར་དགེ་སློང་མའི་

དགེ་འདུན་ལ་མར་དང་ཕྱེ་བྲིམས་ཏེ། དེ་ནས་བཅུ་གཉིས་སྡེ་མོ་དག་གིས་ཕྱེ་མང་དུ་བསླངས་སོ། །དེ་ནས་ཁྱིམ་བདག་དེས་ཀྱང་རྒན་རིམས་སུ་ཁ་ཟས་སྣ་ཉི་ཤུ་རྩ་བརྒྱད་བྲིམས་སོ། །དེ་ནས་རྒན་ཞུགས་དེ་རྒན་རིམས་རྣམས་ལ་ལྟ་བར་བྱེད་པ་དང་། བཅུ་གཉིས་
སྡེ་མོ་དག་གིས་རྒན་ཞུགས་དེའི་མདུན་དུ་ཟན་གོང་སྤུངས་ཏེ་བཞག་ནས་འདི་སྐད་ཅེས་སྨྲས་སོ། །རྒྱལ་པོ་ང་ལ་བྱིན་གྱི་ཚེ་རིན་པོ་ཆེའི་ཆར་བབ་ཅེས་གྲག་ན་ཁྱོད་ཀྱང་བསོད་ནམས་ཅན་ཞིག་སྟེ། ཟན་གོང་གི་ཆར་བབ་པོ་ཞེས་པ་ནས། བཅོམ་ལྡན་འདས་ཀྱིས་བཀའ་སྩལ་པ།
ལྷུང་བཟེད་ལ་བརྟགས་ཏེ་ཟས་བཟའ་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་དྲུང་ན་འདུག་པའི་དགེ་སློང་མའི་ལྷུང་བཟེད་ལ་བལྟས་འདི་ལ་ནི་མང་དུ་བྱིན་ནོ། །ངེད་ལ་ནི་ཉུང་ངུ་བྱིན་ནོ་འཁོད་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། དྲུང་ན་
འདུག་པའི་དགེ་སློང་མའི་ལྷུང་བཟེད་ལ་འཕྱས་གདགས་པའི་ཕྱིར་བལྟ་བར་མི་བྱའོ་ཞེས་པའི་བར་དུའོ། །དེ་ནས་ཁྱིམ་བདག་གཞན་ཞིག་གིས་དགེ་སློང་མའི་དགེ་འདུན་སྤྱན་དྲངས་ཏེ། མོས་པ་དང་བསྙེན་དགའ་མོ་དག་གི་ནང་དུ་དགེ་སློང་མ་གཞན་ཞིག་སྦྱར་མ་ངུར་ཁ་གྱོན་པ་
ཞིག་འདུག་པ་དང་དེ་དག་གིས་ལྷུང་བཟེད་བཀྲུས་པའི་ཆུས་སྦྱར་མ་མ་རུང་བར་བྱས་པ་ནས་འཕྱས་གདགས་པའི་བར་དུ་སྟེ། དེ་དག་གིས་སྨྲས་པ་ཉོན་མོངས་པ་ངན་པ་ཁྱོད་འབའ་ཞིག་ལ་སྦྱར་མ་འདི་ལྟ་བུ་ཡོད་དམ་ཞེས་པ་ནས། བཅོམ་ལྡན་འདས་ཀྱིས་བཀའ་སྩལ་པ།
ཟས་ལ་འབགས་པའི་ཆུས་དྲུང་ན་འདུག་པའི་དགེ་སློང་མ་ལ་མི་གཏོར་བར་བསླབ་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལག་པ་ཟས་དང་འབགས་པས་ཆུ་སྣོད་ལ་འཛིན་པར་བྱེད་པ་དང་། ཟས་ཀྱིས་བསྒོས་པས་སྦྲང་མ་དག་འདུ་བར་བྱེད་པ་དང་། ཁྱིམ་
པ་དག་གིས་མཐོང་ནས་འཕྱ་བར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་ཟས་དང་འབགས་པས་ཆུ་སྣོད་ལ་མི་གཟུང་བར་བསླབ་པར་བྱའོ་ཞེས་པའི་བར་དུའོ། །ནམ་གྱི་ཚེ་སྦལ་ཀར་རིར་ཁང་བཟངས་ཀོ་ཀ་ན་ད་ལས་གླེངས་ཏེ། ཁྱིམ་གྱི་ནང་དུ་ཟས་དང་

འབགས་པའི་ཆུ་དོར་དུ་མི་གནང་བ་དང་། ཁྱིམ་བདག་གཞན་ཞིག་ལ་བརྟེན་ན་ཁྱིམ་བདག་ཡོད་པ་ལ་དྲིས་ནས་དོར་དུ་རུང་བར་གནང་བ་ལས། དེ་ནས་བཅུ་གཉིས་སྡེ་མོ་དག་མ་དྲིས་པར་ཁྱིམ་གྱི་ནང་དུ་དོར་བ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་འདུག་པ་
ལ་མ་དྲིས་པར་ཆུ་ཟས་དང་འབགས་པ་ཁྱིམ་དུ་མི་དབོ་བར་བསླབ་པར་བྱའོ་ཞེས་པའི་བར་དུའོ། །མཉན་དུ་ཡོད་པ་ན་བྲམ་ཟེའི་བུ་ཞིག་སེམས་འཁྲུགས་པར་གྱུར་པ་ལས་ཛེ་ཏའི་ཚལ་དུ་ཕྱིན་ནས་དགེ་སློང་གཞན་ཞིག་གི་ལྷུང་བཟེད་ཀྱི་ཆུས་གཏོར་བ་དང་། དེ་སླར་རང་གི་
སེམས་རྙེད་པར་གྱུར་ཏོ། །དེ་ནས་བྲམ་ཟེ་གཞན་ཞིག་གི་བུ་ཡང་སེམས་འཁྲུགས་པར་གྱུར་ནས། དེ་ནས་བྲམ་ཟེ་དེ་བྲམ་ཟེའི་ལས་ཐོབ་ནས། དགེ་སློང་མའི་དབྱར་མོ་ཁང་དུ་སོང་བ་ནས། སྦོམ་དགའ་མོ་ལས་ལྷུང་བཟེད་ཀྱི་ཆུ་བླངས་པའི་བར་དུ་སྟེ། དེས་ཀྱང་
དགེ་འདུན་མའི་ཟས་ཀྱི་ལྷག་མས་བཀང་སྟེ་ཕྱུང་བ་དང་། བྲམ་ཟེ་དེས་ཀྱང་བླངས་ཏེ་ངའི་བུ་ཤི་ཡང་བླའི་བཙོག་པར་མི་བྱའོ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་ཀྱི་ནང་དུ་ལྷག་མ་བླུགས་ཏེ་མི་དོར་བར་བསླབ་པར་བྱའོ་ཞེས་པའི་བར་
དུའོ། །བཅུ་གཉིས་སྡེ་མོ་དག་འོག་གཞི་མེད་པའི་ས་ལ་ཡང་ལྷུང་བཟེད་འཇོག་པ་ནས། བཅོམ་ལྡན་འདས་ཀྱིས་བཀའ་སྩལ་པ། འོག་གཞི་མེད་པའི་ས་ཕྱོགས་སུ་ལྷུང་བཟེད་མི་གཞག་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་འགྲེང་སྟེ་ལྷུང་
བཟེད་དབྱུང་བ་ནས། བཅོམ་ལྡན་འདས་ཀྱིས་བཀའ་སྩལ་པ། འགྲེང་སྟེ་ལྷུང་བཟེད་མི་དབྱུང་བར་བསླབ་པར་བྱའོ་ཞེས་པའི་བར་དུའོ། །དགེ་སློང་མ་གཞོན་ནུ་མ་གཞན་ཞིག་འགྲེང་སྟེ་ལྷུང་བཟེད་འཁྲུ་བ་དང་། དགེ་སློང་མ་དག་གིས་སྨྲས་པ། ཕུ་ནུ་མོ་འགྲེང་སྟེ་ལྷུང་བཟེད་མ་
འཁྲུ། དེས་སྨྲས་པ་ཅིར་འགྱུར། ལྷུང་བཟེད་འཁྲུ་བ་ལས་ལག་པ་ནས་ལྷུང་སྟེ། ལྷུང་བཟེད་ཆག་པ་དང་། དེ་དག་གིས་དེ་ལྟར་འགྱུར་རོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འགྲེང་སྟེ་ལྷུང་བཟེད་བཀྲུ་བར་མི་བྱའོ་ཞེས་པའི་བར་དུ་སྟེ། དེ་ནས་

བཅུ་གཉིས་སྡེ་མོ་དག་ལྷུང་བཟེད་ལམ་ཀར་གཞག་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་ལམ་ཀར་གཞག་པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལྷུང་བཟེད་གད་ཀར་གཞག་པ་དང་། ད་ནས་ལྷུང་བཟེད་
ཆག་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་གད་ཀར་གཞག་པར་མི་བྱའོ་ཞེས་པའི་བར་དུའོ། །དེ་བཞིན་གཡང་སར་འཇོག་པ་དང་། དཀན་གཟར་པོར་འཇོག་པ་དང་། བཀྲུ་བ་དང་། སྐེམས་པ་དང་། འབབ་ཆུ་དྲག་པོའི་རྒྱུན་ལས་
བཟློག་སྟེ་ལྷུང་བཟེད་ཀྱིས་ཆུ་བཅུ་བར་བྱེད་པ་ལས། བཅོམ་ལྡན་འདས་ཀྱིས་བཀའ་སྩལ་པ། གད་ཀར་མ་ཡིན་པ་དང་། གཡང་སར་མ་ཡིན་པ་དང་། དཀན་གཟར་པོར་མ་ཡིན་པར་ལྷུང་བཟེད་གཞག་པ་དང་། བཀྲུ་བ་དང་། བསྐམ་པ་དང་། འབབ་ཆུ་དྲག་པོའི་རྒྱུན་ལས་
བཟློག་སྟེ་ལྷུང་བཟེད་ཀྱིས་ཆུ་མི་བཅུ་བར་བསླབ་པར་བྱའོ་ཞེས་པའི་བར་དུའོ། །མདོར་བསྟན་པ་ནི། འགྲེང་སྟེ་མ་ཡིན་མགོ་གཡོགས་མིན། །གླང་ཆེན་དོ་ཀེར་ལག་ན་མིན། །རྩྭ་དང་ཆུ་ལ་བཤང་མི་བྱ། །ཤིང་ལ་མི་གང་མཐོར་མི་འཛེག །དེ་ནས་བཅུ་གཉིས་སྡེ་མོ་དག་
འགྲེང་སྟེ་འདུག་པ་ལ་ཆོས་བཤད་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། བཤད་པར་མི་བྱའོ་ཞེས་པ་ནས། ནད་པ་འོངས་ཏེ་བཀའ་སྩལ་པ། མི་ན་བར་འདུག་པ་ལ་འགྲེང་སྟེ་ཆོས་བཤད་པར་མི་བྱའོ་ཞེས་པའི་བར་དུའོ། །དེ་བཞིན་དུ་འདུག་སྟེ་ཉལ་བ་ལ་ཆོས་
བཤད་པ་ནས་བཀའ་སྩལ་པ་མི་ན་བར་ཉལ་བ་ལ་འདུག་སྟེ་བཤད་པར་མི་བྱའོ་ཞེས་པའི་བར་དུའོ། །དེ་བཞིན་དུ་སྟན་དམའ་ནས་མཐོན་པོ་ལ་འདུག་པ་ལ་ཆོས་བཤད་པ་ནས་བཀའ་སྩལ་པ། མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ། ཆོས་མི་བཤད་
པར་བསླབ་པར་བྱའོ་ཞེས་པའི་བར་དུའོ། །དེ་བཞིན་དུ་ལམ་དུ་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་སྟོན་པ་ལས། བཀའ་སྩལ་པ། ལམ་དུ་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ནད་པ་མ་ཡིན་པ་ལ་ཆོས་བཤད་པར་མི་བྱའོ་ཞེས་པའི་བར་དུའོ། །དེ་བཞིན་དུ་མདུན་དུ་

འགྲོ་བ་ལ་ཕྱི་ནས་འགྲོ་ཞིང་ཆོས་བཤད་པ་ལས་བཀའ་སྩལ་པ། མི་ན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་བཤད་པར་མི་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་མགོ་གཡོགས་པ་ལ་ཆོས་བཤད་པར་བྱེད་པ་ནས། བཀའ་སྩལ་པ། མི་ན་བར་
མགོ་གཡོགས་པ་ལ་ཆོས་བཤད་པར་མི་བྱའོ་ཞེས་པ་ནས་མིག་ནད་ཅན་འོངས་ཏེ་བཀའ་སྩལ་པ། ནད་པ་ལ་ཆོས་བཤད་པར་བྱའོ་ཞེས་པའི་བར་དུའོ། །དེ་བཞིན་དུ་བརྫེས་པ་ལ་ཆོས་བཤད་པར་མི་བྱེད་པ་ནས་བཀའ་སྩལ་པ། བརྫེས་པ་ལ་ཆོས་བཤད་པར་མི་བྱའོ་ཞེས་པ་
ནས། བརྫེས་པ་ན་བ་དག་འོངས་ནས་བཀའ་སྩལ་པ། ནད་པ་ལ་བཤད་པར་བྱའོ་ཞེས་པའི་བར་དུའོ། །དེ་བཞིན་དུ་གཟར་བ་དང་། གཉའ་གོང་དུ་བསྣོལ་བ་དང་། ཕྲག་པ་གཉི་ག་ལ་གཟར་བ་ལ་ཆོས་བཤད་པར་མི་བྱའོ་ཞེས་པ་ནས་ལག་པ་ན་བ་དག་འོངས་ནས་
བཀའ་སྩལ་པ། ནད་པ་ལ་བཤད་པར་བྱའོ་ཞེས་པའི་བར་དུའོ། །དེ་ནས་བཅུ་གཉིས་སྡེ་མོ་དག་དོ་ཀེར་ཅན་ལ་བཤད་པ་དང་བཀའ་སྩལ་པ། དོ་ཀེར་ཅན་ལ་ཆོས་བཤད་པར་མི་བྱའོ་ཞེས་པའི་བར་དུ་སྟེ། རྒྱལ་པོ་དག་འོངས་ནས་བཀའ་སྩལ་པ། བཤད་པར་
བྱའོ་ཞེས་པའི་བར་དུའོ། །དེ་བཞིན་དུ་ཞྭ་གོན་པ་དག་ལྷགས་ནས་ཆོས་བཤད་པ་དང་། བཀའ་སྩལ་པ། ཞྭ་གོན་པ་ལ་བཤད་པར་མི་བྱའོ་ཞེས་པ་ནས་ནད་པ་དག་འོངས་ཏེ། བཀའ་སྩལ་པ། ནད་པ་ལ་ཆོས་བཤད་པར་བྱའོ་ཞེས་པའི་བར་དུའོ། །དེ་བཞིན་དུ་ཅོད་པན་ཅན་
དག་ལྷགས་ནས་ཆོས་བཤད་པ་དང་། བཀའ་སྩལ་པ། ཅོད་པན་ཅན་ལ་བཤད་པར་མི་བྱའོ་ཞེས་པ་ནས། བཀའ་སྩལ་པ། ཚང་དཔོན་ནད་པ་ལ་བཤད་པར་བྱའོ་ཞེས་པའི་བར་དུའོ། །དེ་བཞིན་དུ་མགོ་ཕྲེང་བ་ཅན་དག་ལྷགས་ནས་ཆོས་བཤད་པ་དང་། བཀའ་
སྩལ་པ། མགོ་ཕྲེང་བ་ཅན་ལ་བཤད་པར་མི་བྱའོ་ཞེས་པ་ནས་ནད་པ་ལ་བཤད་པར་བྱའོ་ཞེས་པའི་བར་དུའོ། །དེ་བཞིན་དུ་ཐོད་བཅིངས་པ་དག་ལྷགས་ནས་ཆོས་བཤད་པ་དང་། བཀའ་སྩལ་པ། ཐོད་བཅིངས་པ་མིན་པ་ལ་ཆོས་མི་བཤད་པར་བསླབ་པར་བྱའོ་ཞེས་པ་ནས།

ནད་པ་ལ་ཆོས་བཤད་པར་བྱའོ་ཞེས་པའི་བར་དུའོ། །གླང་པོ་ཆེ་ལ་ཞོན་པ་དག་ལ་ཆོས་བཤད་པས། བཀའ་སྩལ་པ། མི་ན་བར་གླང་པོ་ཆེ་ཞོན་པ་ལ་ཆོས་བཤད་པར་མི་བྱའོ་ཞེས་པ་ནས། དེ་ནས་གླང་པོ་ཆེ་ཞོན་པ་དམག་འགྲོ་བ་དག་ཅིག་ཆོས་བཤད་
པར་གསོལ་པ་དང་། དེ་དག་གིས་བོབས་དང་བཤད་དོ་ཞེས་པ་ལས། དེ་དག་གིས་སྨྲས་པ་བདག་ཅག་ལ་གསོད་པའི་ཕྱིར་རྒོལ་བ་ཕྱི་བཞིན་དུ་འོང་ངོ་ཞེས་པ་ནས། བཀའ་སྩལ་པ། ནད་པ་ཞེས་བྱ་སྟེ། ཆོས་བཤད་པར་བྱའོ་ཞེས་པའི་བར་དུའོ། །དེ་བཞིན་དུ་རྟ་
ཞོན་པ་དང་ཁྱོགས་དང་བཞོན་པ་གང་ཡང་རུང་བའི་སྟེང་ན་འདུག་པ་དང་། ལྷམ་མཐོན་པོ་གྱོན་པ་ལ་ཆོས་བཤད་པ་དང་། བཀའ་སྩལ་པ། རྟ་ཞོན་པ་དང་། ཁྱོགས་ན་འདུག་པ་དང་། བཞོན་པའི་སྟེང་ན་འདུག་པ་དང་། ལྷམ་མཐོན་པོ་གྱོན་པ་ལ་ཆོས་མི་བཤད་པར་
བསླབ་པར་བྱའོ་ཞེས་པ་ནས་བརྟད་པ་དང་ནད་པ་ལ་བཤད་པར་བྱའོ་ཞེས་བཀའ་སྩལ་པའི་བར་དུའོ། །དེ་ནས་བཅུ་གཉིས་སྡེ་མོ་དག་ལག་ན་དབྱིག་པ་ཐོག་པ་ལ་ཆོས་བཤད་པ་དང་། བཀའ་སྩལ་པ། མི་ན་བར་ལག་ན་དབྱིག་པ་ཐོགས་པ་ལ་ཆོས་བཤད་པར་མི་བྱའོ་ཞེས་པ་ནས་
ནད་པ་དང་རྒན་མོ་འཁར་བ་མེད་པར་འགྲོ་མི་ནུས་པས་དེ་དག་ལ་ཆོས་བཤད་པར་བྱའོ་ཞེས་པའི་བར་དུའོ། དེ་བཞིན་དུ་དེ་དག་གིས་ལག་ན་གདུགས་ཐོགས་པ་ལ་སོགས་པ་ལ་ཆོས་བཤད་པས། བཀའ་སྩལ་པ། ལག་ན་གདུགས་ཐོགས་པ་དང་། ལག་ན་མཚོན་ཆ་
ཐོགས་པ་དང་། གོ་ཆ་གོན་པ་ལ་ཆོས་མི་བཤད་པར་བསླབ་པར་བྱའོ་ཞེས་པ་ནས། ནད་པ་དང་དགྲ་ལ་རྒོལ་དུ་འགྲོ་བ་རྣམས་ལ་བཤད་པར་བྱའོ་ཞེས་པའི་བར་དུའོ། །བཅུ་གཉིས་སྡེ་མོ་དག་འགྲེང་སྟེ་བཤང་གཅི་བྱེད་པས། མི་ན་བར་འགྲེང་སྟེ་བཤང་གཅི་མི་བྱ་བར་
བསླབ་པར་བྱའོ་ཞེས་བསླབ་པ་བཅས་ཏེ། ནད་པ་དག་འདུག་མི་ནུས་པས་ནད་པ་ལ་རྗེས་སུ་གནང་ངོ་། །གླེང་གཞི་སེར་སྐྱ་ན་སྟེ། སྦོམ་དགའ་མོས་རང་གི་བཙོ་བླག་མཐོང་ནས། ཀྱེ་ང་རབ་ཏུ་མ་བྱུང་ན་ཁྱེད་ཀྱིས་ང་ལ་ཇི་སྐད་དུ་འབོད། དེས་སྨྲས་པ་ཇོ་མོ་ཞེས་འབོད་

དོ། །འོ་ན་ད་ངའི་ཆོས་གོས་ཅིའི་ཕྱིར་མི་བཀྲུ། ཁྱོད་རབ་ཏུ་བྱུང་བ་དང་བདག་བྱ་བ་མི་གཅིག་གོ་ཞེས་བཀྲུར་མ་བཏུབ་པ་དང་། སྦོམ་དགའ་མོས་དེ་ལ་གནོད་པར་བྱ་བའི་ཕྱིར་བཀྲུ་སྨན་འཐུངས་ནས་དམྱངས་པས་གྱོ་རལ་བཀང་སྟེ། གོས་འཁྲུ་བའི་རྫིང་དུ་བླུགས་སོ། །དེ་ནས་
བཙོ་བླག་མཁན་གྱིས་དེར་གོས་བཀྲུས་པ་དང་། གོས་ཀུན་མནམ་ཞིང་མ་རུང་བར་གྱུར་ཏོ། །སྦོམ་དགའ་མོ་དེར་འོངས་ནས། ཀྱེ་ནང་རྗེ་ཁྱོད་ཀྱི་གོས་དེ་དག་ཅི་ཉེས་དྲི་རེ་ཞིམ། དེས་སྨྲས་པ་འཕགས་མས་མ་བགྱིས་སམ། བཀྲེན་པ་ཁྱོད་དེ་ལྟར་མི་དགའ་བར་བྱའོ་
ཞེས་པ་དང་། དགེ་སློང་མ་དག་འཕྱ་བ་ལས་བཅས་ཏེ། མི་ན་བར་ཆུའི་ནང་དུ་བཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། སྣ་ནས་ཟགས་པ་མི་དོར་བར་བསླབ་པར་བྱའོ་ཞེས་བཀའ་སྩལ་པ་ནས། ནད་པ་ལ་རྗེས་སུ་གནང་བའི་བར་དུའོ། །
གླེང་གཞི་སྔ་མ་བཞིན་ཏེ། ལྡུམ་པ་ལ་ཅིའི་ཕྱིར་ཁྱོད་ང་ལ་ཚོད་མ་དང་། མེ་ཏོག་དང་ཤང་ཚེ་དག་འབུལ་བར་མི་བྱེད། དེས་སྨྲས་པ། ནམ་ཁྱོད་ཀྱིས་བདག་ལ་འཚལ་མ་དང་རད་པ་སྩལ་པའི་དུས་ན་བདག་གིས་ཀྱང་ཕྱག་རྗེད་བགྱིས་ན། ད་ཁྱོད་ནི་རབ་ཏུ་བྱུང་། བདག་ནི་
ཁྱིམ་པ་ལགས་པས་ཞམ་རིང་རྔོ་མི་ཐོགས་པས་མི་འབུལ་ལོ་ཞེས་བྱས་པ་དང་། སྦོམ་དགའ་མོས་དེ་ལ་གནོད་པར་བྱ་བའི་ཕྱིར་སྔ་མ་བཞིན་དུ་དམྱངས་པས་གྱོ་རལ་བཀང་ནས་ཕྱགས་མ་ཐོགས་ཏེ། ལྡུམ་རར་སོང་ནས་ལྡུམ་ར་ཐམས་ཅད་མི་གཙང་བས་བསྐུས་སོ། །མི་གཙང་
བའི་དྲི་དེས་ཝ་དང་ཁྱི་དག་ལྷགས་ཏེ། དེར་འགྲེས་པས་ལྡུམ་ཀུན་མ་རུང་པར་བྱས། ལྡུམ་པ་མི་དགའ་བར་གྱུར་པ་སྦོམ་དགའ་མོས་དེར་སོང་སྟེ། ཀྱེ་ཁྱོད་ཀྱི་ལྡུམ་ར་དྲི་རེ་ཞིམ། ལྡུམ་དང་ཤང་ཚེ་དང་མེ་ཏོག་དག་རེ་མང་། དེས་སྨྲས་པ། འདི་ནི་འཕགས་
མ་ཁྱོད་ཀྱིས་བགྱིས་སོ། །དེས་བགད་དེ་དེ་ལྟར་ཁྱོད་ཤེས་པར་བྱའོ་ཞེས་སྟོན་པ་ལ་གསོལ་ནས། བཀའ་སྩལ་པ། མི་ན་བར་སྔོན་པོ་ཡོད་པའི་ས་ཕྱོགས་སུ་བཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། སྣ་ནས་ཟགས་པ་མི་དོར་བར་བསླབ་

པར་བྱའོ་ཞེས་པ་ནས་ནད་པ་ལ་རྗེས་སུ་གནང་བའི་བར་དུའོ། །བཅོམ་ལྡན་འདས་ཀྱིས་མཉན་དུ་ཡོད་པར་ཁང་སྐྱོང་ལས་གླེངས་ནས་ཤིང་ལ་འཛེག་ཏུ་མི་གནང་བའི་བསླབ་པ་བཅས་པ་ལས། ཕྱིས་སྦོམ་དགའ་མོས་དོན་ཅུང་ཟད་ཙམ་གྱི་ཕྱིར་ཡང་ཤིང་ལ་
འཛེག་པས་དགེ་སློང་མ་དག་གིས་ཆེ་ཞེ་བཅོམ་ལྡན་འདས་ཀྱིས་བསླབ་པ་མ་བཅས་སམ། དེས་སྨྲས་པ། དེ་ཡང་དགེ་སློང་དག་ལ་བཅས་ཀྱི་དགེ་སློང་མ་དག་ལ་མ་ཡིན་ནོ་ཞེས་ཟེར། སྟོན་པ་ལ་གསོལ་ནས་བཀའ་སྩལ་པ། གནོད་པ་བྱུང་བ་མ་གཏོགས་པར་ཤིང་ལ་མི་
གང་ཙམ་ལས་མཐོར་མི་འཛེག་པར་བསླབ་པར་བྱའོ་ཞེས་གསུངས་སོ། །འཕགས་མ་དག་བདག་གིས་བསླབ་པའི་ཆོས་མང་པོ་རྣམས་བཤད་ཟིན་ཏོ་ཞེས་བྱ་བ་པ་ལ་སོགས་པའི་བཤད་པ་ནི་སྔ་མ་བཞིན་ནོ། །ལྟུང་བའི་དངོས་པོ་རྣམས་བསྟན་པ་ལ་རྣམ་པ་ལྔར་ཕྱེ་བའི་ཐ་མ་ཉེས་
བྱས་ཀྱི་སྡེ་བསླབ་པའི་ཆོས་མང་པོ་རྣམས་ཀྱིས་བཤད་པ་རྫོགས་ཏེ། ལྟུང་བའི་དངོས་པོ་རྣམས་བསྟན་པ་ཞེས་བྱ་བ་བཤད་ཟིན་ཏོ།། །།འདི་མན་ཆད་ནི་བསླབ་པའི་དངོས་པོ་རྣམས་བསྟན་པ་ཞེས་བྱ་བ་ལ་རྣམ་པ་གཉིས་སུ་ཕྱེ་བའི་གཉིས་པ་སྟེ། རྩོད་པའི་གཉེན་པོ་རྣམས་
བསྟན་པ་ཞེས་བྱ་བ་སྟོན་ཏོ། །འདི་ལ་ཡང་རྣམ་པ་གཉིས་སུ་དབྱེ་སྟེ། རྩོད་པ་རྣམས་བསྟན་པ་དང་། ཞི་བར་བྱ་བའི་ཆོས་རྣམས་བསྟན་པའོ། །དེ་ལ་རྩོད་པ་རྣམས་བསྟན་པ་ཞེས་བྱ་བ་ལ་རྣམ་པ་ལྔར་དབྱེ་སྟེ། རྩོད་པ་རྣམས་ཀྱི་གླེང་གཞི་དང་། དེ་དག་གི་མཚན་ཉིད་དང་།
དེ་དག་གི་རྒྱུ་དང་། དེ་དག་དགེ་བ་ལ་སོགས་པར་རྣམ་པར་གཞག་པ་དང་། དེ་དག་གི་རྣམ་པར་དབྱེ་བ་བསྟན་པའོ། །དེ་ལ་རྩོད་པ་རྣམས་ཀྱི་གླེང་གཞི་ནི་སྟོན་པ་སེར་སྐྱའི་གནས་ནྱ་གྲོ་དྷའི་ཚལ་ན་སྟེ། བཅོམ་ལྡན་འདས་ཀྱིས་ཤཱཀྱ་བདེན་པ་ལ་བཀོད་པ་དེ་ན། དེ་དག་བཅོམ་
ལྡན་འདས་བལྟ་བའི་ཕྱིར་དུས་གསུམ་དུ་འོངས་པས། བཅོམ་ལྡན་འདས་ཀྱིས་ཀྱང་རྟག་ཏུ་ཆོས་བཤད་དོ། །རྒྱལ་པོ་ཟས་གཙང་མ་ཡང་ཤཱཀྱ་བ་དག་གིས་བསྐོར་ནས། དུས་གསུམ་དུ་བཅོམ་ལྡན་འདས་ལ་བལྟ་བའི་ཕྱིར་རྟག་ཏུ་འདོང་བར་གོམས་ཏེ་དུས་གཞན་

ཞིག་ན་བཅོམ་ལྡན་འདས་ཀྱིས་འཁོར་བརྒྱ་ཕྲག་དུ་མའི་མདུན་དུ་ཚ་བའི་ཚེ་སྦྲང་མ་ཕྲ་མོའི་སྦྲང་རྩི་ཚིགས་མ་མེད་པ་ལྟ་བུའི་ཆོས་བཤད་པས། དེ་དག་ཀྱང་མངར་བའི་ཆོས་བཤད་པ་ལ་མིག་གི་དབང་པོ་མི་འཛུམས་པར་ཉན་ཏོ། །དེ་ནས་རྒྱལ་པོ་ཟས་གཙང་མ་ལ་སོགས་པ་ཆོས་ཉན་
ནས་སླར་དོང་བ་དང་། ཤཱཀྱ་མིང་ཆེན་གྱིས་རང་གི་ཁྱིམ་དུ་ཕྱིན་ནས། ཨེ་མའོ་སངས་རྒྱས་ཆོས་དགེ་འདུན། སངས་རྒྱས་འབྱུང་བ་ནི་བདག་ཅག་གི་འབྲས་བུར་གྱུར་ཏོ་ཞེས་སྨྲས་པ་དང་། དེའི་ཆུང་མས་དྲིས་པ། །འཕགས་པའི་སྲས་དེ་ཅི་ལགས། དེ་རིང་བཅོམ་ལྡན་འདས་
ཀྱིས་ཆོས་བཤད་པས་སྲོག་ཆགས་བརྒྱ་སྟོང་དུ་མ་ཁྱད་པར་ཆེན་པོ་ཆུད་པར་གྱུར་ཏོ་ཞེས་སྨྲས་སོ། དེའི་ཆུང་མས་སངས་རྒྱས་བྱུང་བས་བདག་ཅག་གི་འབྲས་བུར་གྱུར་ཏོ་ཞེས་སྨྲས་པ་དེ་ནི་མད་དེ། ཁྱེད་ཅག་ལ་ནི་འབྲས་བུར་གྱུར་གྱི་བདག་ཅག་ལ་ནི་མ་ལགས་སོ། །དེ་ཅིའི་
ཕྱིར་ཞེ་ན། སྐྱེས་པ་རྣམས་ཀྱི་ཕྱིར་བཅོམ་ལྡན་འདས་འཇིག་རྟེན་དུ་བྱུང་གི་བུད་མེད་ཀྱི་ཕྱིར་ནི་མ་ཡིན་ནོ། །དེས་སྨྲས་པ་དེ་སྐད་མ་ཟེར་ཅིག །བཅོམ་ལྡན་འདས་ནི་སེམས་ཅན་ཐམས་ཅད་ལ་ཕན་པ་དང་། རྗེས་སུ་བརྩེ་བ་ཡིན་གྱི་ཁྱེད་ཅག་ཀྱང་དེང་ཆོས་ཉོན་ཅིག་ཅེས་བྱས་པ་དང་།
ལྷ་དག་ནི་ཤཱཀྱ་མང་པོས་བསྐོར་ནས་བཅོམ་ལྡན་འདས་ལ་གཟིགས་པར་བཞུད་པས། བདག་ཅག་བུད་མེད་ལྷའི་སྤྱན་སྔར་ཆོས་ཉན་དུ་ངོ་ཚ་ན། དེས་ཏེ་ལྷ་དག་ནི་སྔ་དྲོ་ཆོས་ཉན། བདག་ཅག་ནི་སླད་དྲོ་ཆོས་ཉན་པར་གནང་ན་འཆིའོ། །དེ་ནས་མིང་ཆེན་གྱིས་བསམས་པ་
བདག་གིས་རྒྱལ་པོ་ཟས་གཙང་མ་ལ་སྨྲས་པ་ནི་མཉན་པར་མི་འགྱུར་བས་སྐྱེ་དགུའི་བདག་མོ་ཆེན་མོ་ལ་བཅོལ་ལོ་སྙམ་ནས་དེ་ལ་བཅོལ་བ་དང་། དེས་ཀྱང་རྒྱལ་པོ་ལ་གསོལ་ནས་དེ་བཞིན་གནང་ངོ་། །དེ་ནས་སྐྱེ་དགུའི་བདག་མོ་ཆེན་མོ་ཤཱཀྱའི་ཆུང་མ་ལྔ་བརྒྱས་བསྐོར་ཏེ། ཆོས་ཉན་
པའི་ཕྱིར་ནྱ་གྲོ་དྷའི་ཀུན་དགའ་ར་བར་དོང་ངོ་། །དེའི་ཚེ་ཤཱཀྱ་མིང་ཆེན་གྱི་ཆུང་མ་རྒྱན་ཐམས་ཅད་ཀྱིས་བརྒྱན་ནས་དེ་དག་དང་ལྷན་ཅིག་སོང་བ་དང་། དེ་གཟུགས་བཟང་ཞིང་གཞོན་པ་རྒྱན་ཐམས་ཅད་ཀྱིས་བརྒྱན་པས་ན། འདོད་ཆགས་དང་མ་བྲལ་བ་དག་ཡིད་འཕྲོག་པར་

བྱེད་པ་ཚེ་དང་ལྡན་པ་ཀུན་དགའ་བོས་མཐོང་ནས། སྲིང་མོ་ཁྱེད་ནི་ཡོངས་ཀྱིས་ཀྱང་དབྱིབས་ལེགས་ལ་བལྟ་ན་སྡུག་ཅིང་བཟང་ན་རྒྱན་ཐམས་ཅད་ཀྱིས་བརྒྱན་པ་ལྟ་ཅི་སྨོས་ཏེ། ཁྱེད་རྒྱན་གྱིས་ཀླུབས་ཏེ་འོངས་པ་ནི་མ་ལེགས་སོ། །དེ་ཅིའི་ཕྱིར་ཞེ་ན། མཐུ་
བོ་ཆེ་འདི་དག་ཐམས་ཅད་ནི་འདོད་ཆགས་དང་བྲལ་བ་མ་ཡིན་ནོ་ཞེས་བྱས་པ་དང་། དེ་ངོ་ཚ་བར་གྱུར་ནས་རྒྱན་ཐམས་ཅད་འཕོག་སྟེ་དེ་ལ་བུ་མོ་མངག་གཞུག་མ་སྐུང་བ་ཅན་ཞེས་བྱ་བ་ཆོས་ཉན་པའི་ཕྱིར་དེ་དང་ལྷན་ཅིག་འོངས་པ་རྒྱན་འདི་དག་ཁྱིམ་དུ་སྐྱོལ་ཅིག་བྱས་པ་དང་། དེས་ཀྱང་
བསྐྱལ་ནས་སླར་འོངས་སོ། །དེ་ནས་བཅོམ་ལྡན་འདས་ཀྱིས་ཆོས་བཤད་པ་དང་། ཤཱཀྱ་མོ་གཞོན་ནུ་མ་ཞིག་ཆོས་འཆད་པའི་ཚེ་རང་གི་མགུལ་ན་ཡོད་པའི་མུ་ཏིག་གི་སེ་མོ་དོ་ལ་ཆགས་པས་ཡང་དང་ཡང་དུ་ལྟ་ཞིང་ལག་པས་ཀྱང་ནོམ་མོ། །དེ་ནས་བཅོམ་ལྡན་འདས་ཀྱིས་
མི་རྟག་པའི་ཆོས་བཤད་ན་ཡང་འོན་ཀྱང་མ་བཏང་བ་དང་། མིང་ཆེན་གྱི་ཆུང་མས་གཞོན་ནུ་མ་དེ་རང་གི་སེ་མོ་དོ་ལ་ཆགས་པར་མཐོང་ནས་འདི་སྙམ་དུ་བསམས་ཏེ། སྟོན་པས་འདུས་བྱས་མི་རྟག་པར་བཤད་པ་ན་ཡང་འདི་རང་གི་སེ་མོ་དོ་ལ་རབ་ཏུ་ཆགས་ནས་ཡང་དང་ཡང་དུ་བལྟ་
ན། འདིས་གལ་ཏེ་བདག་གི་སེ་མོ་དོ་དེ་མཐོང་ན་ནི། དེའི་དྲེགས་པ་ཐམས་ཅད་མེད་པར་འགྱུར་རོ་སྙམ་དུ་ཤེས་ནས་མངག་གཞུག་མ་སྐུང་བ་ཅན་ལ་ངའི་མུ་ཏིག་གི་སེ་མོ་དོ་ལོང་ཤིག་ཅེས་བསྒོ་བ་དང་། དེ་ཆོས་ཉན་པའི་སྐབས་མེད་པར་གྱུར་ནས་ཡིད་ལ་འདི་སྙམ་དུ་
བསམས་སོ། །ཨེ་མའོ་བདག་ཆོས་འདི་ལྟ་བུ་བཤད་པ་ལས་རྗེ་མོས་མངགས་ཏེ་བཏང་བས་བར་ཆད་དུ་གྱུར་ཏེ་བྲན་དུ་གྱུར་པ་ནི་དཀའ་བར་ཤེས་ནས་སྡུག་བསྔལ་ཞིང་ཡིད་བློང་སྟེ་སྨྲེ་སྔགས་བཏོན་ནས་ཚིགས་སུ་བརྗོད་དེ་སྨྲས་པ། བྲན་གྱུར་ངན་པ་སྡུག་བསྔལ་མང་ལ་
གཞན་གྱི་དབང་། །བདག་འཚོ་ངན་པ་སྔོན་བྱས་ཆོས་ཀྱང་ཐོབ། །སྡིག་པས་རྒྱལ་བའི་ཞལ་ལ་བལྟར་མ་གྱུར། །དྲི་མེད་ཆོས་ནི་བདེ་གཤེགས་ལས་མ་ཐོས། །ཞེས་སྨྲས་པ་དང་། བཅོམ་ལྡན་འདས་ཀྱིས་དགོངས་པ་འདི་ཡང་སྔོན་སངས་རྒྱས་ལ་བྱ་བ་བྱས་པ་ཞིག་སྟེ།

ཚེ་ཐུང་བས་འཁོར་བར་རྒྱུ་བ་ལས་དབྱུང་བར་བྱའོ་སྙམ་ནས་རྫུ་འཕྲུལ་གྱིས་ཚིགས་སུ་བཅད་པ་གཅིག་གྲོ་ག་ལ་བྲིས་ཏེ་དེ་ལ་བྱིན་ནོ། །སྐྱེ་བ་རྣམས་ནི་འཇིག་པར་འགྱུར། །དགེ་མས་ཚེ་ཡང་རིག་པར་བྱོས། །ནན་ཏན་འདུག་སྟེ་དགེ་ལ་ཉོན། །ང་བདག་གིས་ནི་བཤད་པ་ལའོ། །
བུ་མོ་དེ་ཡང་དགའ་ནས་ཚིགས་བཅད་དེ་ཟློས་ཤིང་སངས་རྒྱས་དྲན་བཞིན་དུ་སོང་བ་ལས། ཚེ་ཐུང་བའི་ལས་ཀྱིས་དུས་ལ་བབ་པས་ལམ་དུ་བ་དྲུས་མ་ཞིག་གིས་འཚོ་བ་དང་བྲལ་ལོ། །དེ་སངས་རྒྱས་དྲན་བཞིན་དུ་འཆི་བའི་དུས་བྱས་པས་སིང་ག་ལའི་གླིང་དུ་སིང་ག་ལའི་རྒྱལ་པོའི་
བུ་མོར་སྐྱེས་སོ། །དེ་བལྟམས་པ་དང་བཙས་པའི་ཚེ་མུ་ཏིག་གི་ཆར་བབ་པས་མིང་ཡང་མུ་ཏིག་མར་བཏགས་སོ། །དེ་ནས་དུས་གཞན་ཞིག་ན་མཉན་དུ་ཡོད་པའི་ཚོང་པ་ཅིག་རྒྱ་མཚོའི་གླིང་དུ་གྲུ་ཆེན་པོ་བཤམས་ཏེ་རྒྱ་མཚོར་ཞུགས་པ་ལས་རླུང་གི་མཐུས་སིང་ག་ལའི་གླིང་དུ་
ཕྱིན་ཏོ། །དེ་ནས་རྒྱལ་པོའི་ཕོ་བྲང་དང་མི་རིང་བ་ཞིག་ན་གནས་ཏེ། དེ་ནས་ཐོ་རངས་ལ་གླེང་གཞི་དང་བདེན་པ་མཐོང་བ་དང་། གནས་བརྟན་དང་། གནས་བརྟན་མའི་ཚིགས་སུ་བཅད་པ་དང་། ཐུབ་པའི་ཚིགས་སུ་བཅད་པ་དང་། དོན་མང་པོའི་མདོ་སྡེ་དག་རྒྱས་པར་དབྱངས་ཀྱིས་
ཁ་ཏོན་དུ་བྱས་པ་དང་མུ་ཏིག་མ་ཁྱིམ་ན་འདུག་པ་སྐར་ཁུང་ནས་ཐོས་ནས་རྒྱལ་པོ་ལ་ཡབ་དབུས་ཀྱི་ཡུལ་ན་མཆིས་པ་དག་ནི་གླུ་རབ་ཏུ་མཁས་སོ་ཞེས་གསོལ་ཏོ། །དེ་ནས་དེ་དག་བཀུག་སྟེ་གླུ་ལོང་ཞེས་བྱས་པ་དང་། ལྷ་མོ་བདག་ཅག་ནི་གླུ་མཁན་མ་ལགས་ཀྱི་སངས་རྒྱས་ཀྱི་
ཚིགས་སུ་བཅད་པ་ཁ་ཏོན་བགྱིས་པ་ལགས་སོ། །མུ་ཏིག་མས་སངས་རྒྱས་ཞེས་བྱ་བ་སྔོན་མ་ཐོས་པས་ཐོས་མ་ཐག་ཏུ་སྤུ་ཟིང་ཞེས་བྱེད་དེ་ཐེ་ཚོམ་སྐྱེས་ནས་སངས་རྒྱས་ཞེས་བྱ་བ་ཅི་ཞེས་དྲིས་སོ། །དེ་དག་གིས་ཀྱང་སངས་རྒྱས་ཀྱི་ཆེ་བའི་ཡོན་ཏན་བསྔགས་པ་ལ་ཞུགས་ཏེ། ལྷ་
མོ་གངས་ཀྱི་རི་དང་ཉེ་བ་ན་ཆུ་བོ་བ་གི་ར་ཏའི་ངོགས་སེར་སྐྱའི་གནས་དྲང་སྲོང་ངལ་བསོ་བའི་གནས་ནས་མི་རིང་བ་ཞིག་ན་ཤཱཀྱ་ལས་གཞོན་ནུ་ཞིག་བྱུང་སྟེ། །བྲམ་ཟེ་དང་ལྟས་མཁན་དང་སྐར་མཁན་དག་གིས་ལུང་བསྟན་པ་ནི་དེ་སྟེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་

པོར་འགྱུར། རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བར་འགྱུར་རོ་ཞེས་སྒྲ་གྲགས་པ་དེ་ནི་འདི་ལྟར་སངས་རྒྱས་ཞེས་བྱའོ་ཞེས་སྨྲས་པ་དང་། མུ་ཏིག་མས་དེ་དག་ལ་ཁྱེད་ནམ་འདོད་པའི་ཚེ་བདག་ལ་སྦྲོན་ཅིག །
དེ་དག་འགྲོ་ཀར་སྦྲན་པ་དང་། དེ་ནས་བཅོམ་ལྡན་འདས་ལ་སྦྲིང་ཡིག་བྲིས་ཏེ་གསོལ་པ་དང་། ལྷ་མ་ཡིན་དང་ལྷ་མིས་ཕྱག་བྱས་པ། །སྐྱེ་དང་ན་བའི་འཇིགས་ལས་མངོན་དུ་བྲལ། །གྲགས་པ་ཆེན་པོ་བསྔགས་པ་ཀུན་ཏུ་གྲགས། །དྲང་སྲོང་བདུད་རྩིའི་དངོས་པོ་
མཉམ་མེད་བདག་ལའོ། །དེ་ནས་ཚོང་པ་དེ་དག་གིས་སྤྲིང་ཡིག་དེ་ཁྱེར་ནས་བཅོམ་ལྡན་འདས་ལ་ཕུལ་བ་དང་། བཀའ་སྩལ་པ། ཚོང་པ་ཁྱེད་ནམ་སིང་ག་ལའི་གླིང་དུ་འགྲོ་བའི་ཚེ་ང་ལ་སྦྲོན་ཅིག །དེ་དག་འགྲོ་ཀར་གསོལ་པ་དང་། བཅོམ་ལྡན་འདས་ཀྱིས་ཉིད་ཀྱི་སྐུའི་
ཚད་རི་མོར་བྲིས་ཏེ། །དེའི་འོག་ཏུ་གསུམ་ལ་སྐྱབས་སུ་འགྲོ་བ་དང་། བསླབ་པའི་དངོས་པོ་ལྔ་དང་། རྟེན་ཅིང་འབྲེལ་པར་འབྱུང་བ་ལུགས་དང་མཐུན་པ་དང་། མི་མཐུན་པ་དང་། འཕགས་པའི་ལམ་གྱི་ཡན་ལག་རྣམས་བྲིས་ནས་གོང་དུ་ཚིགས་སུ་བཅད་པ། བརྩམ་པ་
པར་བྱ་ཞིང་དབྱུང་བར་བྱ། །ཞེས་བྱ་བ་ནས། སྡུག་བསྔལ་མཐའ་མར་འབྱིན་པར་འགྱུར། །ཞེས་བྱ་བའི་བར་དུ་བྲིས་ནས་བསྐུར་རོ། །དེ་ནས་མུ་ཏིག་མ་འདི་ཅི་ཡིན་ཞེས་ཚོང་པ་དག་ལ་སྨྲས་པ་དང་། དེ་དག་གིས་རེ་རེ་ནས་ཞིབ་ཏུ་སྨྲས་སོ། །མུ་ཏིག་མས་རྟེན་ཅིང་འབྲེལ་པར་འབྱུང་
པའི་ཡན་ལག་བཅུ་གཉིས་རྗེས་སུ་སེམས་པ་ལ་ཞུགས་ཏེ། ལན་གསུམ་དུ་མ་བཟླས་པར་བདེན་པ་མཐོང་བར་གྱུར་ཏེ། ཚིགས་སུ་བཅད་དེ་སྨྲས་པ། །སངས་རྒྱས་རིང་ན་བཞུགས་བཞིན་དུ། །ཤེས་རབ་ཀྱིས་ནི་མིག་སྦྱངས་ཏེ། །གང་གི་མིག་ནི་འདི་འདྲ་བ། །སྨན་མཁས་དེ་
ལ་ཕྱག་འཚལ་ལོ། །སངས་རྒྱས་རིང་ན་བཞུགས་བཞིན་དུ། །ལྟ་བའི་ཟུག་རྔུ་རྩ་ནས་ཕྱུང་། །ཟུག་རྔུ་འབྱིན་པར་བྱེད་པ་ཅན། །སྨན་མཁས་དེ་ལ་ཕྱག་འཚལ་ལོ། །ཞེས་སྨྲས་ནས། ཚོང་པ་དག་ལ་ཁྱེད་ནམ་འགྲོ་བ་ན་བདག་ལ་གྱིས་ཤིག །དེ་དག་གིས་སྦྲན་པ་

དང་། མུ་ཏིག་མས་དེ་དག་ལ་བདག་གི་ཚིག་གིས་བཅོམ་ལྡན་འདས་ཀྱི་ཞབས་ལ་ཕྱག་བགྱིས་ཏེ་འདི་སྐད་དུ་གསོལ་ཅིག །མི་བདེ་བ་ཆུང་ངམ་མྱུར་དུ་བཞེངས་སམ། གནོད་པ་མ་མཆིས་སམ། མཐུ་དང་ལྡན་ནམ། བདེ་བར་སྤྱོད་དམ་ཞེས་སྨོས་ལ། ཡང་འདི་
སྐད་དུ་གསོལ་ཅིག །བཙུན་པ་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་པས་ན། བདག་སེམས་ཅན་དམྱལ་བ་དང་། བྱོལ་སོང་དང་ཡི་དགས་ལས་ནི་ཕྱུང་། ལྷ་དང་མིའི་གནས་སུ་ནི་བཞག །འཁོར་བ་ནི་མཐར་བགྱིས། མཆི་མ་དང་ཁྲག་གི་རྒྱ་མཚོ་ནི་སྐམས། རུས་པའི་
རི་ལས་ནི་རྒལ། ཐོག་མ་མ་མཆིས་པ་ཚུན་ཆད་བསགས་པ་འཇིག་ཚོགས་མང་པོར་ལྟ་བའི་རྩེ་མོ་ནི་ཡེ་ཤེས་རྡོ་རྗེས་བཅོམ་ནས། རྒྱུན་དུ་ཞུགས་པའི་འབྲས་བུ་མངོན་དུ་བགྱིས་ཏེ། བཙུན་པ་བདག་རྒལ་ཏོ། །མངོན་དུ་རྒལ་ཏོ། །ད་ནི་བཅོམ་ལྡན་འདས་དང་། ཆོས་དང་། དགེ་སློང་གི་དགེ་
འདུན་ལ་སྐྱབས་སུ་མཆི་ཡིས། ནམ་འཚོའི་བར་དུ་བདག་དགེ་བསྙེན་མར་གཟུང་དུ་གསོལ། མུ་ཏིག་བྲེ་གསུམ་པོ་འདི་ཡང་ཁྱེར་ལ་སངས་རྒྱས་དང་ཆོས་དང་དགེ་འདུན་ལ་ཕུལ་ཅིག །དེ་ནས་དེ་དག་གིས་དེ་བཞིན་དུ་བཅོམ་ལྡན་འདས་ལ་གསོལ་ནས། མུ་ཏིག་ཀྱང་ཕུལ་ལོ། །བཅོམ་
ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཤཱཀྱ་མིང་ཆེན་གྱི་བྲན་མོ་སྐུར་བ་ཅན་ང་ལས་ཆོས་ཉན་ཏེ་སོང་བ་ལས་ལམ་དུ་བས་བསད་པ་མཐོང་ངམ། བཙུན་པ་མཐོང་ངོ་། །དེ་ང་ལ་སེམས་དད་བཞིན་དུ་དུས་ལས་འདས་ཏེ། སིང་ག་ལའི་རྒྱལ་པོའི་བུ་མོར་སྐྱེས་
ནས་མིང་མུ་ཏིག་མར་བཏགས་ཏེ། བདེན་པ་མཐོང་བ་དེས་སྐྱེས་འདི་བསྐུར་རོ། །འདི་ལ་སངས་རྒྱས་ཀྱི་སྐུ་སྐལ་གྱིས་ནི་དྲི་གཙང་ཁང་དུ་སྐྱང་ནུལ་བྱོས་ཤིག །ཆོས་ཀྱི་སྐུ་སྐལ་ནི་ཆོས་འཛིན་པའི་གང་ཟག་རྣམས་ལའོ། །དགེ་འདུན་གྱིས་ནི་དགེ་འདུན་འདུས་ལ་གོས་ཤིག །སྟོན་
པས་ཆོས་ཀྱི་སྐུ་སྐལ་གང་ཡིན་པ་དེ་ཆོས་འཛིན་པའི་གང་ཟག་རྣམས་ལའོ་ཞེས་གསུངས་པ་དང་། དེའི་ཚེ་མདོ་སྡེ་འཛིན་པ་རྣམས་བདག་ཅག་ནི་བཅོམ་ལྡན་འདས་ཀྱིས་མདོ་སྡེ་མ་ལུས་པར་འཛིན་པས་ན་རྙེད་པ་འདི་བདག་ཅག་དབང་ངོ་ཞེས་ཟེར། འདུལ་བ་འཛིན་པ་རྣམས་ནི་བདག་

ཅག་བཅོམ་ལྡན་འདས་ཀྱི་ནང་གི་མཛོད་སྲུང་བ་ཡིན་ཏེ་འདུལ་བ་མ་ལུས་པར་འཛིན་པས་རྙེད་པ་འདི་བདག་ཅག་དབང་ངོ་ཞེས་ཟེར། མ་ལྟ་བུ་འཛིན་པ་དག་གིས་བདག་ཅག་ནི་མདོ་སྡེ་དང་འདུལ་བ་དག་གི་རང་དང་སྤྱིའི་མཚན་ཉིད་འཛིན་པས་རྙེད་པ་འདི་བདག་ཅག་དབང་ངོ་ཞེས་
ཟེར་བས། མདོ་སྡེ་དང་། འདུལ་བ་དང་། མ་མོ་འཛིན་པ་དག་དེའི་ཚེ་འཐབ་ཅིང་གཤེ་བ་དང་། ཁོན་ཅིང་འཁྲུག་པར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་བ། དགེ་སློང་དག་འཐབ་ཅིང་སྨོད་པར་མ་བྱེད་ཅིག །ཁོན་ཅིང་འཁྲུག་པར་མ་བྱེད་ཅིག །དགེ་སློང་དག་
རྩོད་པ་ལ་རྣམ་པ་བཞི་སྟེ། མི་མཐུན་པར་སྨྲ་བ་ལས་རྩོད་པ་དང་། ལུང་བསྒོ་བ་མེད་པ་ལས་རྩོད་པ་དང་། ཉེས་པ་ལས་རྩོད་པ་དང་། བྱ་བ་ལས་རྩོད་པའོ་ཞེས་གསུངས་ཏེ། འདི་ནི་གླེང་གཞིའོ།། །།དེ་ལ་མི་མཐུན་པར་སྨྲ་བའི་ཕྱིར་རྩོད་པ་ཞེས་བྱ་བ་ནི། །གང་གིས་ཆོས་སྨྲ་བ་
ལས་ཟང་ཟིང་ཞིག་རྙེད་ན། ཁ་ཅིག་འདི་ཆོས་ཀྱི་ཕྱིར་ཕུལ་བས་ཆོས་དབང་ངོ་ཞེ་འམ་ཆོས་སྨྲ་བའི་གང་ཟག་ཕུལ་བས་ཆོས་འཆད་པའི་གང་ཟག་དབང་ངོ་ཞེས་ཟང་ཟིང་གི་ཕྱིར་རྩོད་པར་གྱུར་པའམ། ཆོས་ཀྱི་ལྟ་བ་ལ་སོགས་པའི་མི་མཐུན་པར་སྨྲ་བ་ལས་རྩོད་པར་གྱུར་པའོ། །ལུང་བསྒོ་བ་
མེད་པ་ལས་རྩོད་པ་ཞེས་བྱ་བའི་གང་ཟག་གཙང་མ་ཉེས་པ་མེད་པ་ལ། གླེང་བའི་མི་རིགས་པ་ལས་ཉེས་པ་བྱས་སོ་ཞེས་ངན་པར་གླེངས་པས་ན། མཁན་པོ་སློབ་དཔོན་གྱིས་དེ་ལས་ཀློག་པ་དང་། ཁ་ཏོན་ལ་སོགས་པའི་ལུང་སྟོན་པ་མེད་པ་ལས་རྩོད་པར་གྱུར་པ་སྟེ། ཇི་ལྟར་གྱད་བུ་
ནོར་ལས་ཅན་དང་མཛའ་བོས་སྐུར་པ་བཞིན་ནོ། །ཉེས་པ་ལས་རྩོད་པ་ཞེས་བྱ་བ་ནི་ལྟུང་བ་སྡེ་ལྔའི་ཉེས་པ་བྱུང་ནས་གླེང་བའི་དགེ་སློང་གིས་གླེངས་པ་ལས་ཁས་མི་ལེན་མི་འཆགས་པའམ། ཉེས་པ་གཞན་ལ་གཞན་གྱིས་གླེངས་པའི་ཕྱིར་རྩོད་པའི་གླེང་གཞིར་གྱུར་པའོ། །བྱ་བ་ལས་
རྩོད་པ་ཞེས་བྱ་བ་ནི་གསོལ་བའི་ལས་ལ་སོགས་པ་བརྒྱ་རྩ་གཅིག་ལས་གང་ཡང་རུང་བ་ཞིག་བྱེད་པའི་ཚེ་རྩོད་པའི་གླེང་གཞིར་གྱུར་པ་སྟེ། འདི་ནི་རྩོད་པ་རྣམས་ཀྱི་མཚན་ཉིད་བསྟན་པ་ཞེས་བྱའོ། །དེ་ལ་མི་མཐུན་པར་སྨྲ་བ་ལས་རྩོད་པའི་རྒྱུ་ནི་ཉི་ཤུ་སྟེ། འཁྲུག་པའི་རྩ་བ་དྲུག་

དང་དབྱེན་བྱེད་པའི་དངོས་པོ་བཅུ་བཞིའོ། །དེ་ལ་འཁྲུག་པའི་རྩ་བ་དྲུག་ནི་ཁྲོ་ཞིང་ཁོན་དུ་འཛིན་པ་དང་། འཆབ་ཅིང་འཚིག་པ་དང་། ཕྲག་དོག་ཅིང་སེར་སྣ་བྱེད་པ་དང་། སྒྱུ་དང་གཡོ་བྱེད་པ་དང་། ངོ་ཚ་མི་ཤེས་ཤིང་ཁྲེལ་གྱིས་མི་དོགས་པ་དང་། སྡིག་པ་ལ་མོས་ཤིང་ལོག་
པར་ལྟ་བ་བདག་ཏུ་སྨྲ་བ་བསྙེམས་པའོ། །དབྱེན་བྱེད་པའི་དངོས་པོ་བཅུ་བཞི་ནི་ཆོས་སོ་ཞེས་སྨྲ་བ་དང་། ཆོས་མ་ཡིན་ནོ་ཞེས་སྨྲ་བ་དང་། དེ་བཞིན་དུ་འདུལ་བའོ། །འདུལ་བ་མ་ཡིན་ནོ། །ཉེས་པའོ། །ཉེས་པ་མེད་པའོ། །ལྕི་བའོ། །ཡང་བའོ། །ལྷག་མ་ལུས་པའོ། །
ལྷག་མ་མ་ལུས་པའོ། །བསྡམ་པར་བྱ་བའོ། །བཤགས་པར་བྱ་བའོ། །འདུལ་བ་ལས་འདའ་བའོ། །ངན་པར་སྨྲ་བར་འགྱུར་བའོ་ཞེས་བྱ་བ་རྣམས་ཏེ། མི་མཐུན་པར་སྨྲ་བའི་ཕྱིར་རྩོད་པ་ཐམས་ཅད་ནི་དྲུག་དང་བཅུ་བཞིའོ། །འདི་དག་ལས་བྱུང་བའི་ཕྱིར་རྒྱུ་ཞེས་
བྱའོ། །ལུང་བསྒོ་བ་མེད་པ་ལ་རྩོད་པའི་རྒྱུ་ནི་གཅིག་སྟེ་ལུང་མི་སྟོན་པ་ཉིད་ལ་བྱའོ། །དེ་ནི་དགེ་འདུན་ལ་ལུང་མ་སྟོན་ཅིག་ཅེས་ཟེར་བ་དང་། ལུང་མི་སྟོན་པ་དང་། ལུང་མི་སྟོན་པར་འཇོག་པ་སྟེ། དེ་ལྟ་བུའི་ཕྱིར་འཐབ་ཅིང་གཤེ་བ་དང་། ཁོན་ཅིང་འཁྲུག་པ་འདི་ནི་ལུང་
བསྒོ་བ་མེད་པ་ལ་རྩོད་པའི་རྒྱུ་བ་མི་སྟོན་པ་འཇོག་པ་སྟེ། དེ་ལྟ་བུའི་ཕྱིར་འཐབ་ཅིང་གཤེ་བ་དང་། ཁོན་ཅིང་འཁྲུག་པ་འདི་ནི་ལུང་བསྒོ་བ་མེད་པ་ལ་རྩོད་པའི་རྒྱུ་བ་ཞེས་བྱའོ། །ཉེས་པ་ལས་རྩོད་པའི་རྒྱུ་ནི་ལྔ་སྟེ། ལྟུང་བ་སྡེ་ལྔ་པོ་ཕས་ཕམ་པ་ནས་ཉེས་བྱས་ཀྱི་བར་དུ་གང་
ཡང་རུང་བ་ཞིག་བྱས་པའོ། །རྒྱུ་ལྔ་པོ་དེ་དག་ཀྱང་ངག་དང་སེམས་ཀྱིས་མ་ཡིན་གྱི་ལུས་འབའ་ཞིག་ལས་འབྱུང་བ་ཡང་ཡོད་དེ། ཇི་ལྟར་བསྙེན་པར་མ་རྫོགས་པའི་གང་ཟག་ཕྱིར་མ་བྱུང་བ་ལས་ཕྱིར་བྱུང་བར་འདུ་ཤེས་ཏེ་ཉལ་བའམ། ཉལ་བའི་འོག་ཏུ་སྐྱེས་པ་ཕྱིས་འོངས་ནས་ཁྱིམ་ཅིག་ཏུ་ཉལ་
བའམ། གཉིད་ལོག་པ་ལས་མལ་སྟན་ཆེན་པོའི་སྟེང་དུ་གཞག་པ་ལྟ་བུ་ལུས་དང་སེམས་ཀྱིས་མ་ཡིན་གྱི་ངག་འབའ་ཞིག་ལས་བྱུང་བ་ཡང་ཡོད་དོ། །ཇི་ལྟར་སྐྱེས་པ་ལ་མ་བསམས་བཞིན་དུ་ཚིག་དྲུག་གམ་བདུན་ལས་འདས་པར་ཆོས་བཤད་པ་ལྟ་བུའོ། །ངག་གི་མ་ཡིན་གྱི་ལུས་

དང་སེམས་གཉི་ག་ལས་བྱུང་བ་ཡང་ཡོད་དོ། །ཇི་ལྟར་དགེ་སློང་མས་བྱོལ་སོང་དུ་གྱུར་པའི་སྲོག་ཆགས་འཚོ་བ་དང་ཕྲལ་ན་ཇི་ལྟར་བདག་གིས་བསད་པ་བཞིན་དུ་གཞན་ལ་སྲོག་ཆགས་འཚོ་བ་དང་ཕྲོལ་ཅིག་ཅེས་ཚིག་ཏུ་ནི་མི་སྨྲ་ལ། དེ་ལྟར་བསད་ན་ལེགས་པར་
བསད་པ་ཡིན་ནོ་སྙམ་དུ་སེམས་པ་སྟེ། དེ་བཞིན་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། མྱོས་པའི་ཁུ་བ་འཐུང་པའི་ཚེ་ཚིག་ཏུ་མི་སྨྲ་བ་ལྟ་བུའོ། །ལུས་ཀྱི་མ་ཡིན་གྱི་ངག་དང་སེམས་གཉི་ག་ལས་འབྱུང་བ་ཡང་ཡོད་དེ། ཇི་ལྟར་བསམས་པ་བཞིན་དུ་
སྐྱེས་པ་ལ་ཚིག་བདུན་ལས་འདས་པར་ཆོས་བཤད་པ་ལྟ་བུའོ། །ལུས་དང་ངག་དང་སེམས་གསུམ་ཆར་