Luận tạng Tây Tạng (Tengyur) — Tập 156

ནི་ཞེ་སའི་ཚིག་གོ། །སྐྲ་ལོང་ལོང་པོ་དང་རྡུད་རྡུད་པོར་གྱུར་ཏེ་དགེ་འདུན་ལ་ཞེས་བྱ་བ་ནི་དེ་བཞིན་གཤེགས་
པའི་ཉན་ཐོས་ཀྱི་དགེ་འདུན་ལའོ། །སྤུ་སྙོལ་བར་མ་བྱེད་ཅིག །འབྱུང་བར་མ་བྱེད་ཅིག །ཕྱག་འཚལ་བར་མ་སྟོན་ཅིག །མཚམས་ཀྱི་ནང་དུ་འདུག་སྟེ་གཡོ་འདོར་བར་གསོལ་བ་མ་འདེབས་ཤིག་ཅེས་བྱ་བ་ནི་སླར་བཟློག་པའོ། །འཕགས་པ་ཁྱོད་ལ་བདག་གི་ལྷུང་བཟེད་དམ་ཞེས་
བྱ་བ་ནི་ལྕགས་སམ་སའི་ལྷུང་བཟེད་སྦྱིན་ནོ་ཞེས་ཟེར་བའོ། །ཆོས་གོས་ཞེས་བྱ་བ་ནི་བལ་ལ་སོགས་པ་རྣམ་བདུན་ལས་གང་ཡང་རུང་ངོ་། །དྲ་བ་ཞེས་བྱ་བ་ནི་ལྷུང་བཟེད་ཀྱི་སྣོད་དོ། །ཕོར་བུ་ཞེས་བྱ་བ་ནི་ལྷུང་བཟེད་ཆུང་ངུའོ། །སྐ་རག་ཅེས་བྱ་བ་ནི་རྒྱ་ཅང་ངམ་ལྕགས་པོད་དམ་ལྷས་

མའོ། །སྟོན་པ་ཞེས་བྱ་བ་ནི་ཀློག་པའི་ཟུར་ཕྱིན་པའོ། །ཀློག་པ་ཞེས་བྱ་བ་ནི་ཀློག་པ་ཉིད་དོ། །ཁ་ཏོན་ཞེས་བྱ་བ་ནི་འདོན་དུ་འཇུག་པའོ། །རྣལ་འབྱོར་ཞེས་བྱ་བ་ནི་སེམས་རྩེ་གཅིག་པའོ། །ཡིད་ལ་བྱེད་པ་ཞེས་བྱ་བ་ནི་ཞི་གནས་དང་ལྷག་མཐོང་ངོ་། །བསྙེན་བཀུར་བྱའོ་ཞེས་བྱ་བ་ནི་སྟོབས་
པའོ། །ཅི་དང་ཅིས་བྲེལ་བར་མ་གྱུར་པ་དེ་དང་དེས་མི་བྲེལ་བར་བྱའོ་ཞེས་བྱ་བ་ནི་ཡོ་བྱད་ཐམས་ཅད་ཀྱིས་སྟོབས་པའོ། །དགེ་སློང་མ་དེས་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་རྣམས་ཞེས་བྱ་བ་ནི་ཆོས་འདི་ལ་ཞུགས་པའོ། །ཚིག་འཇམ་པོ་ལ་སོགས་པས་བསྒོ་བར་བྱ་བ་
ཡང་གོང་མ་དང་འདྲའོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་དགེ་སློང་གང་ལ་ལ་སྤང་བའི་ལས་བྱས་པ་དེ་ལ་ཡོ་བྱད་ཀྱིས་བསྙེན་བཀུར་བྱེད་ཅིང་སྤངས་པའི་རྗེས་སུ་ཕྱོགས་ན་ཉེས་བྱས་སོ། །ཚིག་འཇམ་པོས་བསྒོ་བའི་ཚེ་མི་གཏོང་ན་སྦོམ་པོ་གཅིག །གསོལ་བ་བྱེད་པའི་
ཚེ་མི་གཏོང་ན་སྦོམ་པོ་གཉིས། ལས་དང་པོ་པའི་ཚེ་མི་གཏོང་ན་སྦོམ་པོ་གསུམ། ལས་གཉིས་པའི་ཚེ་མི་གཏོང་ན་སྦོམ་པོ་བཞི། ལས་གསུམ་པ་མ་རྫོགས་པར་དངོས་པོ་དེ་གཏོང་ན་ལེགས། གལ་ཏེ་མི་གཏོང་ན་ཕས་ཕམ་པར་འགྱུར་རོ། །ཡན་ལག་བརྒྱད་དང་ལྡན་ན་ཕས་ཕམ་
པར་འགྱུར་ཏེ། སྤངས་པ་དེ་དགེ་སློང་ཡང་ཡིན། དགེ་འདུན་རྣམས་ཀྱང་དེ་ལ་ཕྱག་མི་བྱ་བའི་སྡོམ་པ་ཡང་བཅས་དེ་ཡང་འདུ་ཤེས། དགེ་སློང་དེ་དགེ་འདུན་ལ་འབྱུང་བར་གསོལ་ཞིང་བཟོད་པ་གསོལ་བར་འདོད་པ་ཡང་ཡིན། འབྱུང་བ་མ་གསོལ་ཅིག་ཅེས་ཀྱང་བྱས། དགེ་འདུན་
མས་ཀྱང་དེ་ལ་དེ་ལྟར་མ་བྱེད་ཅིག་ཅེས་བསྒོ། དེས་དགེ་འདུན་གྱིས་བཀའ་ཡང་བཅག །ལས་གསུམ་རྫོགས་པ་དང་བརྒྱད་དོ། །ཕས་ཕམ་པ་བརྒྱད་པ་རྫོགས་སོ།། །།འཕགས་མ་དག་བདག་གིས་ཕས་ཕམ་པའི་ཆོས་བརྒྱད་པོ་དག་བཤད་ཟིན་ཏོ་ཞེས་བྱ་བ་ནི་མཇུག་
བསྡུ་ཞིང་ཉན་པའི་འཁོར་རྣམས་སྤྲོ་བ་བསྐྱེད་པའོ། །དགེ་སློང་མས་ཉེས་པ་དེ་དག་ལས་གང་ཡང་རུང་བ་ཞིག་བྱས་ན་ཐོག་མ་ཇི་ལྟ་བ་ཕྱིས་ཀྱང་དེ་བཞིན་ཕས་ཕམ་པ་ཡིན་ཏེ། དགེ་སློང་མ་རྣམས་དང་ལྷན་ཅིག་གནས་ཤིང་སྤྱོད་དུ་མི་དབང་གིས་གནས་པར་མི་བྱའོ་ཞེས་བྱ་བ་ལ་ཉེས་པ་དེ་

དག་ལས་གང་ཡང་རུང་བ་ཞེས་བྱ་བ་ནི་ཕས་ཕམ་པ་བརྒྱད་ལས་གང་ཡང་རུང་བ་ཞིག་བྱས་པའོ། །ཐོག་མ་ཇི་ལྟ་བར་ཕྱིས་ཀྱང་དེ་བཞིན་ཞེས་བྱ་བ་ནི་ཕས་ཕམ་པ་བརྒྱད་ལས་གང་ཡང་རུང་བ་ཞིག་བྱས་ན་ཇི་ལྟར་སྔོན་རབ་ཏུ་མ་བྱུང་ཞིང་བསྙེན་པར་མ་རྫོགས་པའི་ཚེ་ཁྱིམ་པ་ཡིན་པ་དེ་
བཞིན་དུ། ང་ཡང་སྔོན་བཞིན་དུ་ཁྱིམ་པ་ཡིན་ནོ་ཞེས་བསྟན་པའོ། །ཁ་ཅིག་ན་རེ་ཐོག་མ་ཇི་ལྟ་བར་ཕྱིས་ཀྱང་དེ་བཞིན་ཞེས་བྱ་བ་ནི་ཇི་ལྟར་སྟོན་པ་འཇིག་རྟེན་ན་བཞུགས་པའི་ཚེ། བརྒྱད་པོ་དེ་དག་ལས་གང་ཡང་རུང་བ་ཞིག་བྱས་ན་ཕས་ཕམ་པར་གསུངས་པ་དེ་དེ་བཞིན་དུ་མ་འོངས་པའི་དུས་ན་བྱས་པ་
རྣམས་ཀྱང་དེ་བཞིན་ནོ་ཞེས་གསུངས་པའི་ཕྱིར་དེ་སྐད་བསྟན་པ་ཡིན་ནོ་ཞེའོ། །ཡོངས་སུ་དག་པ་འདྲི་བ་ནི་གླེང་གཞིའི་སྐབས་སུ་བཤད་པ་དང་འདྲ་བས་འདིར་ཡང་བཤད་པ་མ་བྱས་སོ། །ལྟུང་བའི་དངོས་པོ་རྣམས་བསྟན་པ་ཞེས་བྱ་བ་ལ་རྣམ་པ་ལྔར་ཕྱེ་བའི་དང་པོ་སྟེ། ཕས་ཕམ་པའི་སྡེ་བཤད་པ་
རྣམས་རྫོགས་སོ།། །།ད་འདིར་ནི་ལྟུང་བའི་དངོས་པོ་རྣམས་བསྟན་པ་ཞེས་བྱ་བ་ལ་རྣམ་པ་ལྔར་ཕྱེ་བའི་རྣམ་པ་གཉིས་ཏེ། དགེ་འདུན་ལྷག་མའི་སྡེ་ཞེས་བྱ་བ་བསྟན་པའི་ཕྱིར། དགེ་སློང་མའི་དགེ་འདུན་ལྷག་མའི་ཆོས་ཉི་ཤུ་སྟེ། མདོར་ན། སྨྱན་དང་རྩ་བ་མེད་པ་དང་། །གསུམ་
པོ་བག་ཙམ་ཡོད་པ་དང་། །བཞི་པོ་དེ་ནི་ཆུང་ཟད་ཡིན། །ལྔ་པོ་ཆགས་པ་མེད་པ་སྟེ། །མཚན་མོ་ཉིན་པར་ལམ་དག་དང་། །ཀླུང་གི་ཕ་རོལ་བཏང་བ་དང་། །ཤི་བའི་ཆགས་པ་ལེན་པ་དང་། །དགེ་སློང་མ་ཡི་བཟོད་བྱེད་དང་། །སངས་རྒྱས་ཆོས་དང་དགེ་འདུན་དང་། །དད་པ་ཞེ་སྡང་འཇིགས་པ་དང་། །
གཉིས་པོ་འདུས་པས་སྦྱོར་བ་དང་། །དེ་ཡི་རྗེས་སུ་ཕྱོགས་བྱེད་དོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་བཅུ་གཉིས་སྡེ་མོ་དག་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་སྨྱན་བྱེད་པར་ཞུགས་པ་དང་། བྲམ་ཟེ་དང་། ཁྱིམ་
བདག་རྣམས་ཀྱིས་དགེ་སྦྱོང་མ་འདིས་ནི་སྐྱོ་མི་ཤེས་ཏེ། བུད་མེད་ལ་སྐྱེས་པའི་ཚིག་གིས་སྨྱན་བྱེད་བྲམ་ཟེ་དང་ཁྱིམ་བདག་གི་བུད་མེད་ཀྱང་དེ་ལྟར་སྨྱན་བྱེད་ན། དེ་དག་བྲམ་ཟེ་དང་ཁྱིམ་བདག་གི་བུད་མེད་རྣམས་དང་ཁྱད་ཅི་ཡོད། དེ་དག་ལ་སུ་ཞིག་བསོད་སྙོམས་སྦྱིན་པར་སྤྲོ་ཞེས་སྨོད་ཅིང་

མི་སྙེན་པར་འཛེར་ཏོ། །དེ་ལྟ་བུར་གྱུར་པ་སྟོན་པ་ལ་གསོལ་བ་དང་། བཀའ་སྩལ་པ། བཅུ་གཉིས་སྡེ་ལ་ཁྱོད་ཀྱིས་སྨྱན་བྱས་པ་བདེན་ནམ། བཙུན་པ་མད་དོ་ཞེས་གསོལ་ནས། རྣམ་གྲངས་དུ་མས་སྨད་དེ། ཉན་ཐོས་མ་རྣམས་ཀྱི་ཕྱིར་འདུལ་བ་ལ་བསླབ་པའི་གནས་བཅས་སོ། །ཡང་
དགེ་སློང་མ་གང་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་འམ་མཛའ་ན་མོར་སྨྱན་བྱེད་ན་ཐ་ན་སྐད་ཅིག་པ་དེ་ཉིད་ཀྱང་རུང་སྟེ། ཆོས་འདི་ནི་ཐོག་མ་ཉིད་ཀྱིས་ལྟུང་བར་འགྱུར་ལ་འབྱུང་བར་བྱས་ཏེ་དགེ་འདུན་གྱི་ལྷག་མའོ། །ངེས་པ་ནི་རྣམ་པ་གསུམ་སྟེ། བདག་པོ་ངེས་
པ་དང་། དངོས་པོ་ངེས་པ་དང་། དུས་ངེས་པའོ། །དེ་ལ་བདག་པོ་ངེས་པ་ནི་གཅིག་ལ་གཅིག་འཕྲིན་སྐྱེལ་བའོ། །དངོས་པོ་ངེས་པ་ནི་སྐྱེས་པ་དང་བུད་མེད་དོ། །དུས་ངེས་པ་ནི་ཐ་ན་སྐད་ཅིག་ཕྲད་པའོ། །དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་སྟེ། དེ་དང་འདྲ་བ་གཞན་
ཡང་ངོ་། །བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་ཅེས་བྱ་བ་ནི་གཅིག་ལ་དུས་འཕྲིན་སྐྱེལ་ཞིང་དུས་འདེབས་པའོ། །ཆུང་མའམ་མཛའ་ན་མོ་ཞེས་བྱ་བ་ནི་ཆུང་མ་བདུན་དང་མཛའ་ན་མོ་བཅུའོ། །ཆུང་མ་བདུན་གང་ཞེ་ན་འདི་ལྟ་སྟེ། ཆུ་ལས་བྱིན་པ་དང་། ནོར་གྱིས་ཉོས་
པ་དང་། རྒྱལ་མཚན་གྱིས་འཕྲོགས་པ་དང་། དགའ་བས་གནས་པ་དང་། དགབ་པས་གནས་པ་དང་། མཉམ་དུ་འཚོ་བ་དང་། དེའི་སྐད་ཅིག་པའོ། །མཛའ་ན་མོ་བཅུ་ལ་ཕ་དང་མ་དང་། མིང་པོ་དང་། ཕུ་ནུ་མོ་དང་། སྒྱུག་མོ་དང་། གྱོས་པོ་དང་། གཉེན་དང་རིགས་དང་།
རུས་ཀྱིས་བསྲུངས་པ་དང་། འཁྲུགས་པ་མེད་པ་ཅན་དང་བཅུའོ། །མས་བསྲུངས་པའི་མཛའ་ན་མོ་གང་ཞེ་ན། བུད་མེད་གཞོན་ནུ་མ་གང་ཁྱིམ་ཐབ་དུས་ལས་འདས་སམ། སྨྱོས་སམ། སེམས་འཁྲུགས་སམ། དགྲའི་ཡུལ་ལམ། གཞན་དུ་བྲོས་པར་གྱུར་ནས་དེ་མའི་དྲུང་ན་
གནས་ཏེ། དེ་ལ་གཞན་ཞུགས་ཀྱིས་དོགས་པའི་ཕྱིར་བསྲུངས་ཤིན་ཏུ་བསྲུངས་སྦས། ཤིན་ཏུ་སྦས་པའོ། །མིང་པོས་བསྲུངས་པའི་བར་དུ་སྔ་མ་བཞིན་ནོ། །སྒྱུག་མོ་དང་། གྱོས་པོས་བསྲུངས་པ་ནི་ཕ་མ་དང་ཁྱིམ་ཐབ་དུས་ལས་འདས་པ་ཡང་སྔ་མ་བཞིན་ནོ། །གཉེན་གྱིས་བསྲུངས་པ་ནི་

རབས་བདུན་ཚུན་ཆད་ཀྱི་རིགས་སུ་གནས་པ་ནི་གཉེན་ནོ། །དེ་ཕན་ཆད་ནི་གཉེན་མ་ཡིན་ནོ། །རིགས་ཀྱིས་བསྲུངས་པ་ནི་རིགས་རྣམ་པ་བཞིའོ། །རུས་ཀྱིས་བསྲུངས་པ་ནི་ཀཽ་སྱ་དང་། བད་སྱ་དང་། གཽ་ཏ་མ་ལ་སོགས་ཏེ། ཕ་མ་དང་། ཁྱིམ་ཐབ་དུས་འདས་པ་
ཞེས་བྱ་བ་ནི་སྔ་མ་བཞིན་ནོ། །འཁྲུལ་པ་མེད་པ་ནི་མུ་སྟེགས་ཅན་གྱི་དགེ་སྦྱོང་ངམ་ཁྱིམ་ཐབ་གཅིག་ལས་གཞན་མི་ཚོལ་བའམ་མུ་སྟེགས་ཀྱི་དགེ་བསྙེན་ཡང་རུང་བའོ། །ཆོས་ཞེས་བྱ་བ་ཆོས་མ་ཡིན་པ་དེ་ཆོས་ཀྱི་སྒྲར་གསུངས་སོ། །ཐོག་མ་ཉིད་ཀྱི་ལྟུང་བར་འགྱུར་ཞེས་བྱ་བ་ནི་བྱས་མ་ཐག་ཏུའོ། །དབྱུང་བར་བྱ་བ་
ནི་འབྱུང་བར་བྱེད་པའོ། །དགེ་འདུན་གྱི་ལྷག་མ་ཞེས་བྱ་བ་ནི་དགེ་འདུན་གྱི་དབང་དུ་གྱུར་དགེ་འདུན་ལ་རག་ལས་དགེ་འདུན་གྱི་དབང་བྱ་བ་སྟེ། ལྟུང་བ་འདི་ལ་དགེ་འདུན་གྱིས་དབྱུང་བར་འགྱུར་གྱི་གང་ཟག་མ་ཡིན་ཞིང་ཕས་ཕམ་པ་བརྒྱད་ནི་ལྷག་མ་མ་ལུས། འདི་ནི་དགེ་འདུན་གྱིས་གསོ་བའི་ལྷག་མ་ལུས་པའི་
ཕྱིར་དགེ་འདུན་གྱི་ལྷག་མའོ། །དེ་ལ་ལྟུང་བ་གང་ཞེ་ན་བདག་ཉིད་ཀྱིས་འཕྲིན་བླངས་ལ་བདག་ཉིད་ཀྱིས་བཟླུགས་པ། བདག་ཉིད་ཀྱིས་བསྐྱལ་བའམ། དགེ་སློང་མ་བདག་ཉིད་ཀྱིས་འཕྲིན་བླངས། འཕྲིན་པ་ལ་བཟླུགས། འཕྲིན་པ་ལ་བསྐྱལ་པའམ། འཕྲིན་པ་འབའ་ཞིག་ལས་
གོང་མ་བཞིན་དུ་བྱས་པ་དང་། ཡང་འཕྲིན་གྱི་བར་དུ་ལན་གསུམ་གྱི་ཐ་མར་ལྷག་མར་འགྱུར་རོ། །དབང་ཡོད་པ་ལས་འཕྲིན་བླངས་པ་ཡང་ལན་གསུམ་གྱི་ཐ་མར་ལྷག་མར་འགྱུར་རོ། །དབང་མེད་པ་ལ་འཕྲིན་བླངས། དབང་མེད་པ་ལ་བཟླུགས། དབང་ཡོད་པ་ལ་ལན་བསྐྱལ་ན་ཉེས་
བྱས་གཉིས་དང་། སྦོམ་པོ་གཅིག །དགེ་སློང་མས་དབང་མེད་པ་ལ་འཕྲིན་བླངས། དེ་ལ་བཟླུགས་དེ་ལ་ལན་བསྐྱལ་ན་ཉེས་བྱས་གསུམ་སྟེ། གཞན་ཡང་དེ་བཞིན་དུ་སྦྱར་རོ། །ཆུང་མ་དང་པོ་གསུམ་འཐབས་པ་ལས་བསྡུམས་པ་ལ་རྣམ་པ་བདུན་ཏེ། འཐབས་མ་ཐག་པ་
བསྡུམས་ན་ཉེས་བྱས་གཅིག །ཅུང་ཟད་ལོན་པ་བསྡུམས་ན་ཉེས་བྱས་གཉིས། རྩ་བཅད་པ་ལ་ཉེས་བྱས་གསུམ་རྡོ་བོར་བ་ལ་ཉེས་བྱས་གསུམ་དང་སྦོམ་པོ་གཅིག །བརྩད་པ་ལ་ཉེས་བྱས་གསུམ་དང་སྦོམ་པོ་གཉིས། ཆུང་མ་མ་ཡིན་པ་ཞེས་བསྒྲགས་པ་ལ་ཉེས་བྱས་གསུམ་སྦོམ་པོ་གསུམ་

ལྷག་མ་གཅིག །དྲིལ་བརྡུངས་པ་ལས་བསྡུམས་ན་ཉེས་བྱས་གསུམ་སྦོམ་པོ་བཞི་ལྷག་མ་གཉིས། ཆུང་མ་བཞི་དང་མཛའ་ན་མོ་བཅུ་ནི་འཐབས་མ་ཐག་ཏུ་བསྡུམས་ན་ལྷག་མར་འགྱུར་རོ། །དགེ་སློང་མ་ཁྱིམ་པའི་དེར་སོང་སྟེ། བུ་མོ་འདི་ཅིའི་ཕྱིར་བག་མར་མི་གཏོང་ཞེ་འམ།
ཁྱེའུ་འདིའི་ཆུང་མ་ཅིའི་ཕྱིར་མི་བླང་ཞེ་ན། ཁྱེའུ་འདི་གྱོས་སྒྱུག་གི་ཁྱིམ་དུ་ཅིའི་ཕྱིར་མི་འགྲོ་ཞེས་བྱས་རུང་། བུ་མོ་འདི་ཁྱིམ་ཐབ་ཀྱི་ཁྱིམ་དུ་ཅིའི་ཕྱིར་མི་འགྲོ་ཞེས་དྲིས་ན་ཉེས་བྱས་སུ་འགྱུར། ཡན་ལག་བཞིས་ལྷག་མར་འགྱུར་ཏེ་མིའི་བུད་མེད་དཔྱད་བཟོད་པ་སྔར་མ་འདུས་པ་འདུས་
པར་ཡང་གྱུར་པའོ། །ལྷག་མ་དང་པོ་རྫོགས་སོ།། །།སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་སྦོམ་དགའ་མོས་འཐབ་པ་དང་། འཁྲུགས་པ་དང་། རྩོད་པའི་ཚེ་དགེ་སློང་མ་རྣམས་ལ་རྩ་བ་མེད་པར་ཕས་ཕམ་པའི་ཆོས་ཀྱིས་སྐུར་
པར་བྱེད་དེ། དེས་ན་དགེ་སློང་མ་རྣམས་བག་འཆུམས་པ་དང་སྤ་གོང་པར་གྱུར་པས་ཀླག་པ་དང་ཁ་ཏོན་དང་ཡིད་ལ་བྱ་བ་རྣམས་ཉམས་པར་གྱུར་ཏེ་མི་དགའ་ཞིང་འཁོད་དོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་ཞེ་སྡང་ཅན་ཞིག་
ཁྲོས་ནས་གནོད་པར་བྱེད་དེ་ཇི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་མ་གཙང་མ་མ་ཉེས་པ་ལ་རྩ་བ་མེད་པར་ཕས་ཕམ་པའི་ཆོས་ཀྱིས་སྐུར་པ་ལས་དེ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཡང་རྩ་བ་མེད་པར་གྱུར་ལ། དགེ་སློང་མ་ཡང་ཞེ་སྡང་
ལ་གནས་པ་ཞིག་པས་ཁྲོས་ཏེ་སྨྲས་སོ་ཞེ་ན་ཡང་ཆོས་འདི་གཉིས་ཀྱིས་ལྟུང་བར་གྱུར་ལ་འབྱུང་བར་བྱ་སྟེ། དགེ་འདུན་གྱི་ལྷག་མའོ། །ཡང་དགེ་སློང་མ་ཞེས་བྱ་བ་ནི་སྦོམ་དགའ་མོའོ། །ཞེ་སྡང་ཞེས་བྱ་བ་ནི་འཁྲུག་པའོ། །ཁྲོས་ནས་གནོད་པར་བྱེད་ཅེས་བྱ་བ་ནི་ཡི་མ་རངས་ཏེ་
འཁྲུག་པ་མ་བཏོང་ངོ་། །ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ཞེས་བྱ་བ་ནི་ཅི་ནས་ཀྱང་འདི་དགེ་སྦྱོང་གི་ལས་འབྲལ་པར་བྱེད་པའོ། །དགེ་སློང་མ་གཙང་མ་ཞེས་བྱ་བ་ནི་ཆོས་འདི་ལ་ཞུགས་པའོ། །ཉེས་པ་མེད་ཅེས་བྱ་བ་ནི་ལྟུང་བ་མ་བྱུང་བའོ། །རྩ་བ་མེད་པར་

ཞེས་བྱ་བ་ནི་མཐོང་བ་དང་ཐོས་པ་དང་དོགས་པ་མེད་པའོ། །ཕས་ཕམ་པ་ཞེས་བྱ་བ་ནི་བརྒྱད་པོ་ལས་གང་ཡང་རུང་བའོ། །ཆོས་ཀྱི་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་བསྒྲགས་སོ། །སྐུར་པ་ཞེས་བྱ་བ་ནི་སླང་བཏབ་པའོ། །དུས་གཞན་ཞིག་ན་ཞེས་བྱ་བ་ནི་དུས་
ཕྱིས་ཞིག་ནའོ། །དྲིས་ཀྱང་རུང་ཞེས་བྱ་བ་ནི་གཞན་གྱིས་སོ། །མ་དྲིས་ཀྱང་རུང་ཞེས་བྱ་བ་ནི་བདག་ཉིད་འགྱོད་པ་སྐྱེས་ནས་རབ་ཏུ་འགྱོད་པའོ། །རྩོད་པ་དེ་ཡང་རྩ་བ་མེད་པར་གྱུར་ཞེས་བྱ་བ་ནི་རྩོད་པ་ལ་རྣམ་པ་བཞི་སྟེ། འཁྲུག་པའི་རྩོད་པ་དང་། མི་འདོམས་པའི་རྩོད་པ་དང་། ལྟུང་བའི་
རྩོད་པ་དང་། བྱ་བའི་རྩོད་པའོ། །རྩ་བ་མེད་ཅེས་བྱ་བ་ནི་གོང་མ་བཞིན་ནོ། །དགེ་སློང་མ་ཡང་ཞེ་སྡང་ལ་གནས་ཞེས་བྱ་བ་ནི་སྐུར་པ་གདབ་པར་འདོད་པའོ། །ཁྲོ་ཞེས་བྱ་བ་ནི་སྐུར་པ་འདེབས་པའོ། །ཆོས་འདི་ཡང་ཞེས་བྱ་བ་ནི་གོང་མ་བཞིན་ནོ། །ཐོག་མ་ཉིད་ཀྱིས་ལྟུང་བར་འགྱུར་ལ་ཞེས་བྱ་བ་ནི་
ལྟུང་བ་བྱུང་མ་ཐག་པས་སོ། །དབྱུང་བར་བྱ་བ་ནི་འབྱུང་བར་འགྱུར་བའོ། །དགེ་འདུན་གྱི་ལྷག་མ་ཞེས་བྱ་བ་ནི་གོང་མ་བཞིན་ནོ། །དེ་ལྟུང་བ་གང་ཞེ་ན། དགེ་སློང་མ་གཙང་མ་ལ་སྐུར་ན་རྣམ་པ་བཅུས་ལྟུང་བར་འགྱུར་རོ། །རྣམ་པ་ལྔས་ན་ལྟུང་བར་མི་འགྱུར་རོ། །དགེ་སློང་མ་མི་གཙང་བ་ལ་
སྐུར་ན་རྣམ་པ་བཅུ་གཅིག་གིས་ལྟུང་བར་འགྱུར་རོ། །རྣམ་པ་དྲུག་གིས་ལྟུང་བར་མི་འགྱུར་རོ། །དེ་ལ་གཙང་མ་ལ་སྐུར་ན་བཅུས་ཉེས་པར་འགྱུར་བ་ནི་དེས་མ་མཐོང་མ་ཐོས་མི་དོགས་པར་འདུ་ཤེས་སྦས་ནས་མཐོང་ཐོས་དོགས་ཞེས་ཟེར་བ་དང་། སྔོན་ཐོས་པ་དང་དོགས་པ་ལས་བརྗེད་ནས་ངས་
ཐོས་ནས་ངས་ཐོས་དོགས་ཏེ་མ་བརྗེད་དོ་ཞེས་ཟེར་བ་དང་། ཐོས་ལ་ཡིད་ཆེས་པ་དང་། ཐོས་ལ་ཡིད་མ་ཆེས་པར་མཐོང་ངོ་ཞེས་ཟེར་བ་དང་། ཐོས་ལ་དོགས་པ་དང་། ཐོས་ལ་མི་དོགས་པར་ངས་མཐོང་ངོ་ཞེས་པ་དང་། དོགས་ལ་དོགས་བཞིན་དུ་ངས་མ་མཐོང་ངོ་ཞེས་ཟེར་བ་རྣམ་པ་བཅུ་
གང་ལྟར་སྨྲས་ན་ཡང་རུང་སྟེ། རེ་རེ་ལ་ཡང་ལྷག་མ་རེ་རེར་འགྱུར་རོ། །རྣམ་པ་ལྔས་ན་ལྟུང་བར་མི་འགྱུར་བ་གང་ཞེ་ན། དེས་མ་མཐོང་མི་ཐོས་མི་དོགས་ལ་འདུ་ཤེས་མ་སྦས་ཏེ། ངས་མ་མཐོང་མ་ཐོས་མི་དོགས་ཞེས་ཟེར་བ་དང་། ཐོས་དོགས་པ་ལ་བརྗེད་ནས་འདུ་ཤེས་མ་སྦས་ཏེ།

ཐོས་དོགས་དེ་བརྗེད་དོ་ཞེས་ཟེར་བ་སྟེ་དེ་ལྟར་ན་རྣམ་པ་ལྔས་ལྟུང་བ་མེད་དོ། །དེ་བཞིན་དུ་དགེ་སློང་གཙང་མ་ལ་མི་གཙང་བའི་ཚུལ་དུ་སྣང་བ་ལ་སྐུར་བ་ཡང་དེ་བཞིན་དུ་སྦྱར་ཏེ། དགེ་སློང་མ་མི་གཙང་བ་ལ་སྐུར་ན་བཅུ་གཅིག་གིས་ཉེས་པར་འགྱུར་བ་དང་དྲུག་གིས་ཉེས་པར་འགྱུར་བ་ཡང་གོང་མ་
བཞིན་དུ་བཤད་དེ། སྐབས་འདིར་ནི་མཐོང་བ་ལས་བརྗེད་ནས་མ་བརྗེད་ཅེས་ཟེར་བས་ཉེས་པར་འགྱུར་བ་དང་། མཐོང་བ་ལས་བརྗེད་ནས་བརྗེད་དོ་ཞེས་ཟེར་བས་ཉེས་པ་མེད་པ་དེ་གཉིས་ཀྱིས་བསྣན་ཏེ། བཅུ་གཅིག་དང་དྲུག་ཏུ་བཞག་སྟེ། ཅིའི་ཕྱིར་ཞེ་ན་གཙང་མ་ལ་ནི་མཐོང་བ་ལས་བརྗེད་པ་
དང་མ་བརྗེད་པ་མེད་པའི་ཕྱིར་རོ། །དགེ་སློང་མ་མི་གཙང་བ་ལ་སྐུར་ན་བཅུ་གཅིག་གིས་ཉེས་པར་འགྱུར་བ་དང་དྲུག་གིས་ཉེས་པར་མི་འགྱུར་བ་དེ་བཞིན་དུ། དགེ་སློང་མ་མི་གཙང་བ་ལ་གཙང་བའི་ཚུལ་དུ་སྣང་བ་ལ་སྐུར་པ་ཡང་དེ་བཞིན་དུ་སྦྱར་རོ། །དྲིལ་བརྡུངས་པ་དང་རི་མོར་བྲིས་པ་དང་
བདག་གིས་ཤེས་པ་བཞིན་དུ་ཀུན་གྱིས་ཤེས་ན་ཉེས་པ་མེད་དོ། །ཡན་ལག་བཞིས་ལྷག་མར་འགྱུར་ཏེ། བྲལ་བར་འདོད་པ། འདུ་ཤེས་སྦས་པ། སྐུར་བ་བཏབ་པ། གཞན་གྱི་དོན་གོ་བའོ། །ལྷག་མ་གཉིས་པ་རྫོགས་སོ།། །།སངས་རྒྱས་བཅོམ་ལྡན་འདས་
མཉན་དུ་ཡོད་པ་ན་བཞུགས་སོ། །དེའི་ཚེ་ན་སྦོམ་དགའ་མོས་བག་ཙམ་གྱི་ཆ་ལས། དགེ་སློང་མ་རྣམས་ལ་སྐུར་བ་འདེབས་པ་དང་དེ་ལྟ་བུར་གྱུར་པ་དགེ་སློང་དག་གིས་གསོལ་པ་དང་། བཅོམ་ལྡན་འདས་ཀྱིས་བསླབ་པའི་གནས་བཅས་སོ། །ཡང་དགེ་སློང་མ་གང་ཞེ་སྡང་ཅན་ཞིག་ཁྲོས་ནས་
གནོད་པར་བྱེད་དེ་ཅི་ནས་ཀྱང་ཚངས་པར་སྤྱོད་པ་དང་དབྲལ་ལོ་སྙམ་ནས། དགེ་སློང་མ་གཙང་མ་མ་ཉེས་པ་ལ་གཞན་གྱི་ཆ་མ་ཡིན་པ་ཕས་ཕམ་པའི་ཆོས་ཀྱིས་སྐུར་པ་ལ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཡང་གཞན་གྱི་ཆ་མ་ཡིན་པར་གྱུར་ལ་གཞན་གྱི་ཆ་མ་ཡིན་པས་
རྩོད་པ་དེ་ཡང་བག་ཙམ་གྱི་ཆ་ལས་ཆོས་འགའ་ཞིག་བླངས་པར་ཟད་ལ། དགེ་སློང་མ་ཡང་ཞེ་སྡང་ལ་གནས་པ་ཞིག་ཁྲོས་ཏེ་སྨྲས་སོ་ཞེ་ན་ཡང་ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ། འབྱུང་བར་བྱ་སྟེ་དགེ་འདུན་གྱི་ལྷག་མའོ། །གཞན་ནི་གོང་མ་དང་འདྲ། གཞན་

གྱི་ཆ་མ་ཡིན་ཞེས་བྱ་བ་ནི་དངོས་པོ་གཞན་ལ་དེ་ལས་ཆར་བླངས་ཏེ་གཞན་ལ་སྐུར་པའོ། །ཡང་གཞན་ཞེས་བྱ་བ་ནི་འཁོར་བ་ལས་གཞན་པ་སྟེ། འཁོར་བ་དང་མི་མཐུན་པ་ནི་མྱ་ངན་ལས་འདས་པ་སྟེ་མྱ་ངན་ལས་འདས་པའི་ཆ་མ་ཡིན་པ་ཕས་ཕམ་པ་བརྒྱད་ཀྱིས་སྐུར་པའོ། །
རྩོད་པ་དེ་ཡང་གཞན་གྱི་ཆ་མ་ཡིན་པར་གྱུར་ལ་ཞེས་བྱ་བ་ནི་རྩོད་པ་བཞི་སྟེ། མི་མཐུན་པའི་ཕྱིར་རྩོད་པ་དང་། ལུང་བསྒོ་བ་མེད་པའི་ཕྱིར་རྩོད་པ་དང་། ཉེས་པའི་ཕྱིར་རྩོད་པ་དང་། བྱ་བའི་ཕྱིར་རྩོད་པའོ། །གཞན་གྱི་ཆ་མ་ཡིན་པས་རྩོད་པ་དེ་ཡང་བག་ཙམ་གྱི་ཆ་ལས་ཆོས་འགའ་
ཞིག་བླངས་པར་ཟད་ལ་ཞེས་བྱ་བ་ནི་འདི་ལྟ་སྟེ། རི་དགས་ཕོ་དང་རི་དགས་མོའོ། །ཡན་ལག་ནི་གོང་མ་དང་འདྲ་ལྟུང་བ་ཇི་ལྟ་བུ་ཞེ་ན། དགེ་སློང་མས་དགེ་སློང་མ་ལ་ཕས་ཕམ་པའི་ལྟུང་བ་བྱུང་བར་མཐོང་ན། དེས་དེ་ཕམ་པ་མ་ཡིན་སྙམ་དུ་བསམས་པ་ལས་དེས་འདུ་ཤེས་སྦས་ནས་
དགེ་སློང་མ་ལ་ཕས་ཕམ་པ་བྱུང་བ་བདག་གིས་མཐོང་ངོ་ཞེ་ན་ལྷག་མར་འགྱུར་རོ། །དེ་བཞིན་དུ་དགེ་སློང་མ་ལ་ཕས་ཕམ་པ་བྱུང་བ་ལས་ལྷག་མ་ཡིན་ནོ་སྙམ་དུ་སེམས་ཏེ། ཕས་ཕམ་པས་སྐུར་པ་དང་། དགེ་སློང་མ་ལ་ཕས་ཕམ་པ་བྱུང་བ་ལྟུང་བ་ཡིན་ནོ་སྙམ་པ་ལས་ཕམ་པས་སྐུར་པ་དང་།
དེ་བཞིན་དུ་ཕས་ཕམ་པ་བྱུང་བ་ལས་སོ་སོར་བཤགས་པ་ཡིན་ནོ་སྙམ་དུ་བསམ་ཀྱང་རུང་ཉེས་བྱས་ཡིན་ནོ་སྙམ་དུ་བསམས་ཀྱང་རུང་སྟེ། ཕས་ཕམ་པས་སྐུར་ན་ལྷག་མར་འགྱུར་རོ། །དགེ་སློང་མའི་ལྷག་མ་གསུམ་པ་རྫོགས་སོ།། །།སངས་རྒྱས་བཅོམ་ལྡན་འདས་
མཉན་དུ་ཡོད་པ་ན་བཞུགས་སོ། །མཉན་དུ་ཡོད་པ་དེ་ན་སྤོས་འཚོང་པའི་ཁྱེའུ་གཟུགས་བཟང་བ་བལྟ་ན་སྡུག་པ་ཞིག་འདུག་སྟེ། གཙུག་དགའ་མོས་ཉོ་ཞིང་འཚོང་བའི་རྣམ་པ་དེ་ལ་བྱེད་དོ། །གཙུག་དགའ་མོ་སྤོས་འཚོང་པ་དེ་ལ་ཆགས་ཏེ། ཁྱེའུ་དེས་ཀྱང་རིན་ཉུང་ཡང་རྫས་
མང་དུ་སྟེར་རོ། །དགེ་སློང་མ་གང་ལ་ཉོ་བ་ཅུང་ཟད་ཅིག་ཡོད་ན་དེ་དག་གཙུག་དགའ་མོ་ལ་བཅོལ་ཏེ། དེ་ཡང་ཅུང་ཟད་ཅིག་བདག་གིར་ལེན་ཏོ། །དེ་ལྟ་བུར་གྱུར་པ་སྟོན་པ་ལ་གསོལ་ནས་རྣམ་པ་དུ་མས་སྨད་ནས་བསླབ་པའི་གནས་བཅས་སོ། །ཡང་དགེ་སློང་མ་གང་

ཆགས་པར་གྱུར་ལ་སྐྱེས་པ་ཆགས་པར་མ་གྱུར་པ་ལས་ཅུང་ཟད་ཅིག་བླངས་ན། ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ་འབྱུང་བར་བྱ་སྟེ་དགེ་འདུན་ལྷག་མའོ། །ཆགས་པར་གྱུར་ཞེས་བྱ་བ་ནི་ཆགས་པའོ། །ཀུན་དུ་དཀྲིས་པའོ། །ཅུང་ཟད་
ཅེས་བྱ་བ་ནི་ཅུང་ཟད་པའོ། །བླངས་ཞེས་བྱ་བ་ནི་ལེན་པའོ། །ཆོས་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་སོ། །ཐོག་མ་ཉིད་ཀྱིས་ལྟུང་བའོ་ཞེས་བྱ་བ་ནི་ལྟུང་བ་བྱུང་མ་ཐག་པའོ། །ཉེས་པ་ཇི་ལྟ་བུ་ཞེ་ན་དགེ་སློང་མ་ཆགས་པས་སྐྱེས་པ་ཆགས་པ་ལས་ཅུང་ཟད་ཅིག་
བླངས་ན་ལྷག་མར་འགྱུར་རོ། །དགེ་སློང་མ་ཆགས་ལ་སྐྱེས་པ་མ་ཆགས་པ་དང་། །དགེ་སློང་མ་མ་ཆགས་ལ་སྐྱེས་པ་ཆགས་པ་ལས་ཅུང་ཟད་ཅིག་བླངས་ན་ཉེས་པ་སྦོམ་པོའོ། །གཉི་ག་མ་ཆགས་ལ་ཅུང་ཟད་ཅིག་བླངས་ན་ཉེས་བྱས་སོ། །ལྷག་མ་བཞི་པ་རྫོགས་སོ།། །།སངས་
རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །ནམ་བཅོམ་ལྡན་འདས་ཀྱིས་དགེ་སློང་མ་ཆགས་པས་སྐྱེས་པ་ཆགས་པ་ལ་ཅུང་ཟད་ཀྱང་མ་ལོན་པར་བསླབ་པའི་གནས་བཅས་པས་ན་གཙུག་དགའ་མོ་ཕྱིས་ཀྱང་དེར་འགྲོ་སྟེ། དེ་ལ་དགེ་སློང་མ་དག་གིས་ཁྱོད་གང་ནས་
འོངས་ཞེས་དྲིས་ན། དེས་བདག་ཅུང་ཟད་ཅིག་གི་ཕྱིར་སོང་ངོ་ཞེས་སྨྲས་སོ། །དགེ་སློང་མ་དག་གིས་འོ་ན་ཅི་སྟོན་པས་བསླབ་པའི་གནས་མ་བཅས་སམ་ཞེས་དེ་སྐད་སྨྲས་པ་དང་། སྦོམ་དགའ་མོས་གཙུག་དགའ་མོ་ལ། ཀྱེ་ཁྱོད་ཆགས་པར་མ་གྱུར་ན་ཅུང་ཟད་ཅིག་བླངས་ཀྱང་སླའོ་
ཞེས་སྨྲས་པ་དང་། དེ་ཡང་དེ་བཞིན་དུ་འགྲོའོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་དགེ་སློང་མ་ཞིག་ལ། ཀྱེ་ཁྱོད་ཆགས་པར་མ་གྱུར་ན་ཆགས་པ་མེད་པས་སྐྱེས་པ་ཆགས་པར་གྱུར་པ་ལས་ཅུང་ཞིག་བླངས་ཏེ་ཁྱོད་ལ་
སླའོ་ཞེས་ཟེར་ན་ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ་དགེ་འདུན་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་ལ་ཞེས་བྱ་བ་ནི་ཆོས་འདི་ལ་ཞུགས་པའོ། །འདི་སྐད་ཅེས་བྱ་བ་ནི་སྨྲ་བའོ། །ཀྱེ་ཁྱོད་ཆགས་པར་མ་གྱུར་ཞེས་བྱ་བ་ནི་

མ་ཆགས་པའོ། །ཆགས་པ་མེད་པ་ཞེས་བྱ་བ་ནི་ཆགས་པར་མ་གྱུར་པའོ། །སྐྱེས་པ་ཆགས་པར་གྱུར་པ་ལས་ཅུང་ཟད་ཅིག་བླངས་ན་སྐྱེས་པ་ཆགས་པར་གྱུར་པ་ལས་སོ། །ཅུང་ཟད་ཅིག་བླངས་ཞེས་བྱ་བ་ནི་དངོས་སུ་ཟད་དོ། །ཁྱོད་ལ་སླའོ་ཞེས་བྱ་བ་ནི་
ཆགས་པ་མེད་པས་སླའོ། །གཞན་ནི་གོང་མ་དང་འདྲའོ། །ཉེས་པ་ཇི་ལྟ་བུ་ཞེ་ན། དགེ་སློང་མས་ཇི་ཙམ་དུ་དགེ་སློང་མ་ལ། ཀྱེ་ཁྱོད་ཆགས་པ་མེད་ན་སྐྱེས་པ་ཆགས་པ་ལས་ཅུང་ཟད་ལོང་ཤིག་ཅེས་ཟེར་ན་ལྷག་མར་འགྱུར་རོ། །ལྷག་མ་ལྔ་པ་རྫོགས་སོ།། །།སངས་
རྒྱས་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །ནམ་དགེ་སློང་མ་མཛའ་མོས་ཚེ་དང་ལྡན་པ་གྱད་བུ་ནོར་ལ་མི་བདེན་པས་སྐུར་ཏེ་དགེ་སློང་མ་རྣམས་ཀྱིས་བསྐྲད་པས། །དེར་སོང་ནས་རང་གི་ཁྱིམ་ན་གནས་པ་ལས་ནད་ཀྱིས་བཏབ་བོ། །དེ་ལ་ནུ་མོ་དགེ་སློང་མ་གྲོགས་མོ་ཅན་ཞེས་བྱ་བ་
ཞིག་ཡོད་དོ། དེ་འཆི་བའི་འཁོར་དེ་ལ་ཕྲད་ཀྱིས་མྱུར་དུ་ཤོག་ཅིག་པར་སྤྲིང་ངོ་། །དེ་ཡང་སོང་སྟེ་མཛའ་མོ་དེའི་ནུབ་མོ་དུས་ལས་འདས་སོ། །གྲོགས་མོ་ཅན་ཡང་དེ་ཉིད་དུ་ཞག་ལོན་ནོ། །མཛའ་མོའི་ཁྱིམ་ཐབ་ཀྱིས་མཛའ་བོ་ཞིག་ཁྱིམ་དུ་སོང་བ་དེ་ལ་དེས་བུས་པ་འདི་དག་སུས་བསྐྱང་
བར་བྱ་ཞེས་སྨྲས་པ་དང་། དེས་གྲོགས་མོ་ཅན་དེ་ཉིད་ལ་ཚོལ་ཅིག་དང་། བུས་པ་རྣམས་སྐྱོང་བར་བྱེད་དོ་ཞེས་སྨྲས་པས་མོས་ཐོས་ནས་འདི་སྙམ་དུ་བསམས་སོ། །གལ་ཏེ་བདག་གིས་ཚིག་གི་ལན་སྨྲས་ན་ནི་ཚངས་པར་སྤྱོད་པ་ལས་བྲལ་ལོ་སྙམ་ནས་ཅང་མི་སྨྲ་བར་འདུག་གོ། །ནམ་
ལངས་ནས་གྲོགས་མོ་འགྲོ་བར་ཆས་པ་དང་མཛའ་མོའི་ཁྱིམ་ཐབ་གྱིས་གར་འགྲོ་བུས་པ་འདི་དག་སུས་བསྐྱང་ཞེས་སྨྲས་ནས་དེས་དེ་ལ་བཟུང་བར་བྱས་པ་དང་། གྲོགས་མོ་ཅན་གྱིས་ཁྱོད་བུས་པ་དང་བཅས་ཏེ་མེ་དོང་དུ་ལྷུང་ཞིག་སྨྲས་ཏེ་བྲོས་སོ། །དགེ་སློང་མ་དག་གིས་ཁྱོད་མཚན་
གཅིག་ཏུ་གང་དུ་ཉལ་ཞེས་དྲིས་པ་དང་། དེ་བཞིན་དུ་སྨྲས་སོ། །འོ་ན་ཁྱོད་ཀྱི་གྲོགས་སུ་ཡིན་ཞེས་སྨྲས་པ་དང་། གྲོགས་མོ་ཅན་གྱིས་གང་ཡང་མེད་དོ་ཞེས་སྨྲས་པ་དང་། དགེ་སློང་མ་དག་གིས་ཁྱོད་ནི་སྟོབས་དང་ལྡན་པ་འགའ་ཞིག་གིས་ཟིན་ན་ཚངས་པར་སྤྱོད་པ་དང་བྲལ་ན་ཇི་ལྟར་

བྱ་ཞེས་སྨྲས་པ་དང་། དེ་ལྟར་གྱུར་པ་སྔ་མ་བཞིན་དུ་སྟོན་པ་ལ་གསོལ་པ་དང་། ཉན་ཐོས་མ་རྣམས་ལ་བསླབ་པའི་ཚིག་བཅས་སོ། །ཡང་དགེ་སློང་མ་གང་གཅིག་པུ་མཚན་མོ་དབྱར་མོ་ཐད་ནས་བྱུང་ནས་ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ་དབྱུང་བར་བྱ་སྟེ་དགེ་འདུན་ལྷག་མའོ། །
ཡང་དགེ་སློང་མ་གང་ཞེས་བྱ་བ་ནི་གྲོགས་མོ་ཅན་ནོ། །གཅིག་པུ་ཞེས་བྱ་བ་ནི་ཟླ་མེད་པའོ། །དབྱར་མོ་ཐང་ནས་བྱུང་ཞེས་བྱ་བ་ནི་མཚན་མོ་གཞན་དུ་སྐྱ་རེངས་ཀྱིས་ཆོད་པའོ། །གཞན་ནི་གོང་དུ་བཤད་པ་དང་འདྲའོ། །དེ་ལ་ཉེས་པ་ཇི་ལྟ་བུ་ཞེ་ན་ཡང་དགེ་སློང་མ་གང་གཅིག་པུ་དབྱར་མོ་ཐང་གི་
ཕྱི་རོལ་དུ་སྐྱ་རེངས་ཀྱིས་ནོན་པར་བྱེད་ན་ཐམས་ཅད་ལ་འང་དགེ་འདུན་ལྷག་མའི་ལྟུང་བར་འགྱུར་རོ། །དགེ་ཚུལ་མ་དང་ལྷན་ཅིག་གཞན་དུ་སྐྱ་རེངས་ཀྱིས་ནོན་པར་བྱེད་ན་ཉེས་པ་སྦོམ་པོར་འགྱུར་རོ། །དགེ་སློང་མ་དང་གཞན་དུ་སྐྱ་རེངས་ཀྱིས་ནོན་པར་བྱེད་ན་ཉེས་བྱས་ཀྱི་ལྟུང་བར་འགྱུར་རོ། །གལ་
ཏེ་ཕྱི་བཞིན་འོང་བའི་དགེ་སློང་མ་དེས་སྨྲས་སམ། ཤིའམ། ཁྲིམས་རལ་ལམ། ཉམས་སམ། བབས་སམ། ཕ་རོལ་གྱི་འཁོར་ཏམ། ཡུལ་གཞན་དུ་བྲོས་པར་གྱུར་པ་དང་། བར་ཆད་བརྒྱད་པོ་ལས་བར་ཆད་གང་ཡང་རུང་སྟེ་བྱུང་བར་གྱུར་ན་ཉེས་པ་མེད་དོ། །ལྷག་མ་དྲུག་
པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་སྦོམ་དགའ་མོས་ཉིན་པར་གཅིག་པུ་སོང་ནས་བྲམ་ཟེ་དང་ཁྱིམ་བདག་གི་ཁྱིམ་དུ་ཆོས་བཤད་དོ། །དེ་ལ་དགེ་སློང་མ་དག་གི་སི་ཁྱོད་གཅིག་པུ་མ་འགྲོ་ཤིག་ཚངས་པར་སྤྱད་
པའི་བར་ཆད་དུ་གྱུར་ཏ་རེ་ཞེས་སྨྲས་པ་དང་། སྦོམ་དགའ་མོས་ངས་སྤོས་འཚང་གི་ཁྱེའུ་རྡོག་པས་བསྣུན་ཏེ། གན་ཏ་ལོག་ཏུ་བོར་ནས་ཁྲག་སྐྱུགས་སུ་བཅུག་པ་མ་མཐོང་ངམ་ཞེས་སྨྲས་པ་དང་། དེ་དག་གིས་ཐམས་ཅད་སྤོས་འཚོང་གི་ཁྱེའུ་མི་འདྲའོ་ཞེས་སྨྲས་སོ། །དེ་ལྟར་གྱུར་
པ་སྔ་མ་བཞིན་དུ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་གཅིག་པུ་དབྱར་མོ་ཐང་ནས་སོང་ན་ཆོས་འདི་ཐོག་མ་ཉིད་ཀྱིས་ལྟུང་བར་འགྱུར་ལ། འབྱུང་བར་བྱ་སྟེ། དགེ་འདུན་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །

གཅིག་པུ་ཉིན་མོ་ཞེས་བྱ་བ་ནི་ཟླ་མེད་པའོ། །དབྱར་མོ་ཐང་ནས་སོང་ན་ཞེས་བྱ་བ་ནི་གཞན་དུ་ཉི་མ་ནུབ་པར་གྱུར་པའོ། །གཞན་ནི་སྔ་མ་བཞིན་ནོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་ཇི་ཙམ་དུ་དབྱར་མོ་ཐང་ནས་གཅིག་པུ་སོང་ལ་གཞན་དུ་ཉི་མ་ནུབ་པར་
གྱུར་ན་ཐམས་ཅད་ལ་འང་ལྷག་མར་འགྱུར་རོ། །དགེ་ཚུལ་མ་དང་ལྷན་ཅིག་དབྱར་མོ་ཐང་ནས་སོང་སྟེ། གཞན་དུ་ཉི་མ་ནུབ་ན་ཉེས་པ་སྦོམ་པའོ། །དགེ་སློང་མ་དང་ལྷན་ཅིག་དབྱར་མོ་ཐང་ནས་སོང་སྟེ། གཞན་དུ་ཉི་མ་ནུབ་ན་ཉེས་བྱས་སོ། །གལ་ཏེ་ཁྲིམས་ཟླ་དམས་སམ་ཤི་བ་
འམ། བབས་སམ། ཕ་རོལ་གྱི་འཁོར་ཏམ། ཡུལ་གཞན་དུ་བྲོས་པར་གྱུར་ཏམ། བར་ཆད་བརྒྱད་ལས་གང་ཡང་རུང་བ་ཞིག་བྱུང་ན་ཉེས་པ་མེད་དོ། །ལས་དང་པོ་པ་ལ་སོགས་པ་ལ་ཉེས་པ་མེད་དོ། །ལྷག་མ་བདུན་པ་རྫོགས་སོ།། །།སངས་རྒྱས་བཅོམ་
ལྡན་འདས་མཉན་དུ་ཡོད་པ་ན་བཞུགས་སོ། །སྦོམ་དགའ་མོས་རྒྱལ་པོའི་ཁབ་ཏུ་འོང་བའི་འདྲོན་པོ་མང་པོ་དང་ལྷན་ཅིག་ཏུ་ཆས་ཏེ། གཅིག་པུ་གྲོང་ཁྱེར་དྲུག་ཏུ་སོ་སོར་འདོང་བའི་འདྲོན་པོ་མང་པོ་དང་ལྷན་ཅིག་ཏུ་དང་ནས་ངལ་ཆད་དེ་རིམ་གྱིས་སླར་དགེ་སློང་མའི་དབྱར་མོ་ཐང་དུ་འོངས་སོ། །དེ་ནས་
དགེ་སློང་མ་དག་ལ་ལུས་མཉེར་བཅུག་ཅིང་ངལ་སོས་པར་བྱེད་དོ། །དགེ་སློང་མ་དག་གིས་ཁྱེད་གང་ནས་འོངས་ཞེས་དྲིས་པ་དང་། བདག་གྲོང་ཁྱེར་ཆེན་པོ་དྲུག་གི་ལམ་བགྲོད་དེ་འདིར་འོངས་སོ། །དགེ་སློང་མ་དག་གིས་སྨྲས་པ་ཁྱོད་ནི་མཐུ་དང་ལྡན་པ་འགའ་ཞིག་གིས་ཟིན་
ན་ཚངས་པར་སྤྱད་པའི་བར་ཆད་དུ་མི་འགྱུར་བའམ། སྦོམ་དགའ་མོས་སྨྲས་པ། སྤོས་འཚོང་གི་ཁྱེའུ་ཁྲག་དྲོན་པོ་སྐྱུགས་པ་མ་ཐོས་སམ་ཞེས་གོང་མ་བཞིན་དུ་སྨྲས་པ་དང་། དགེ་སློང་མས་སྨྲས་པ་ཐམས་ཅད་སྤོས་འཚོང་གི་ཁྱེའུ་འདྲ་བར་འགྱུར་རམ་ཞེས་བྱས་པ་དང་།
དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་གཅིག་པུ་ལམ་དུ་ཞུགས་ཤིང་འགྲོ་ན་ཆོས་འདི་ལ་ཐོག་མ་ཉིད་ཀྱིས་ལྟུང་བར་འགྱུར་ལ་འབྱུང་བར་བྱས་ཏེ། དགེ་འདུན་གྱི་ལྷག་མའོ། །དགེ་སློང་མ་གཅིག་པུ་ཞེས་བྱ་བ་ནི་གོང་མ་དང་

འདྲའོ། །ལམ་ཞེས་བྱ་བ་ནི་དགོན་པའི་ལམ་མོ། །གཞན་ནི་སྔར་བཤད་པ་བཞིན་ནོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མ་ཇི་ཙམ་དུ་གཅིག་པུ་ལམ་དུ་ཞུགས་ཤིང་སོང་ན་ལྷག་མར་འགྱུར་རོ། །དགེ་ཚུལ་མ་དང་དགེ་སློང་མ་དང་ལྷན་ཅིག་ལམ་དུ་ཞུགས་ཏེ་སོང་ན་ཉེས་པའི་ཁྱད་
པར་ནི་གོང་མ་བཞིན་ནོ། །དགེ་སློང་མ་གཅིག་པུ་གྲོང་ཁྱེར་གྱི་བར་དུ་ནི་རྒྱང་གྲགས་གཅིག་ལས་འདས་ན་ལྷག་མ་དགོན་པ་ཡང་དེ་བཞིན་ནོ། །རྒྱང་གྲགས་གཅིག་ཙམ་དུ་ཕྱིན་ནས་ཕྱིར་ལྡོག་གོ་སྙམ་སྟེ་སོང་བ་ལས་ཕྱིར་ལྡོག་ན་སྦོམ་པོའོ། །ལྷག་མ་བརྒྱད་པ་རྫོགས་སོ།། །།སངས་
རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དགེ་སློང་མ་མང་ཞིག་ལྗོངས་རྒྱུར་དོང་བ་ལས་ཆུ་བོ་ཁྱིམ་ལྡན་གྱི་འགྲམ་དུ་ཕྱིན་པ་དང་གྲུ་ཕ་རོལ་དུ་འདུག་གོ། །དེ་ནས་དགེ་སློང་མ་ནག་མོ་ཞེས་བྱ་བ་སྔོན་མཉན་པ་མོ་ཡིན་ཏེ། དེས་བདག་གིས་ཕ་རོལ་དུ་བརྒལ་ནུས་ཀྱིས་སོང་
ལ་གྲུ་ཕ་གི་ཚུར་ཁྲིད་དེ་འོང་ངོ་ཞེས་སྨྲས་ཏེ་གྲུ་ཕྱིར་རྐྱལ་བ་དང་ངལ་ནས་ཤི་ལ་ཐུག་སྟེ། དགེ་སློང་མ་དག་གིས་ནག་མོ་མ་འཇིགས་མ་སྔངས་པར་སྐྱོལ་ཅིག་ཅེས་བོས་སོ། །ནག་མོ་ཡང་ཉོན་མོངས་ཤིང་དེའུ་མ་བརྒལ་བ་ལས་ཕ་རོལ་གྱི་ངོགས་སུ་ཕྱིན་ནོ། །དེ་ལྟར་གྱུར་པ་སྟོན་པ་ལ་
གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་གཅིག་ཕུ་ཀླུང་གི་ཕ་རོལ་དུ་བརྒལ་ན་ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ་དབྱུང་བར་བྱ་བ་སྟེ། དགེ་འདུན་གྱི་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་ནག་མོའོ། །གཅིག་པུ་ཞེས་བྱ་བ་ནི་ཟླ་མེད་
པའོ། །ཀླུང་གི་ཕ་རོལ་བརྒལ་ཞེས་བྱ་བ་ནི་རྐྱལ་བའོ། །ལྷག་མ་ཞེས་བྱ་བའི་བར་དུ་ནི་སྔ་མ་བཞིན་ནོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མ་གཅིག་པུ་ཀླུང་གི་ཕ་རོལ་དུ་བརྒལ་ཏམ་རྐྱལ་ཏེ་བརྒལ་ན་ལྷག་མའོ། །རྩང་ལག་གི་ཕ་རོལ་ཏུ་བརྒལ་ན་ཉེས་བྱས་སོ། །དགེ་ཚུལ་དང་
ལྷན་ཅིག་འགྲོགས་ན་སྦོམ་པོའོ། །དགེ་སློང་མ་དང་ལྷན་ཅིག་འགྲོགས་ན་ཉེས་བྱས་སོ། །ལྷག་མ་དགུ་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་རྒྱལ་པོ་གསལ་རྒྱལ་གྱི་དམག་དཔོན་ཀནྟ་ཤཀ་ཏི་ཀ་ཞེས་བྱ་བ་

དམག་ལ་འདོང་བའི་འོག་ཏུ་དེ་དག་གི་ཆུང་མ་སྐྱེས་པ་གཞན་དག་དང་ཡོངས་སུ་སྤྱོད་དོ། །དེ་དག་དམག་ལས་སླར་ལྷགས་ནས་ཐོས་པ་དང་དེ་དག་བཅིངས་ནས་ལྕག་གིས་ཀྱང་གཞུས་སོ། །དེ་ལྟར་བྱས་ཀྱང་གཏོང་དུ་མ་བཏུབ་ནས་དེ་དག་གིས་བསམས་པ་རི་
བྲགས་ཀྱི་གྲོང་རྣམས་དབང་དུ་གྱུར་ན་བདག་ཅག་གི་ཆུང་མ་དབང་དུ་མ་ཁུགས་སྙམ་ནས་རྒྱལ་པོ་གསལ་རྒྱལ་གྱི་དྲུང་དུ་དོང་ནས་ལྷ་མཁྱེན་པར་མཛོད་ཅིག། བདག་གི་བུད་མེད་ཁྲིམས་ལས་འགལ་བར་བགྱིད་པས་ཆད་པས་བཅད་པའི་ཁྲིམས་བཅས་སོ་ཞེས་གསོལ་བ་དང་། རྒྱལ་པོས་
ཀྱང་རྗེས་སུ་ཡི་རང་ངོ་། །དུས་ཕྱི་ཞིག་ན་དམག་དཔོན་མེ་ན་ཞེས་བྱ་བའི་བུ་མོ་མེ་ནི་ཀ་ཞེས་བྱ་བ་དེ་ཁྲིམས་དང་འགལ་ཏེ། དེ་མང་པོས་ཆད་པ་བཅད། ཁྱིམ་ཐབ་ཀྱིས་ནི་ཡོངས་སུ་བཏང་། རྒྱལ་པོས་ནི་བསྒོ་བ་དང་། དེས་མང་པོ་ལ་གསོལ་ནས་འཕྲལ་དུ་མི་གསད་ཅིང་ཞག་བདུན་ནས་
བསད་པར་གནང་བ་དང་། དེ་ཡང་ངུ་ཞིང་འདུག་སྟེ། སྦྱིན་པ་ནི་བྱིན་བསོད་ནམས་ནི་བྱེད་དོ། །སྦོམ་དགའ་མོ་བསོད་སྙོམས་ལ་སོང་སྟེ། མེ་ནེ་ཀའི་ཁྱིམ་དུ་ཕྱིན་པ་དང་ཁྱོད་ཅིའི་ཕྱིར་དུ་ཞེས་དྲིས་པ་དང་དེས་ཀྱང་ཞིབ་ཏུ་སྨྲས་སོ། །སྦོམ་དགའ་མོས་འོ་ན་ཅིའི་ཕྱིར་རབ་ཏུ་མི་འབྱུང་། དེས་
སྨྲས་པ་སུ་ཞིག་གིས་བདག་རབ་ཏུ་འབྱིན་སྦོམ་དགའ་མོས་ངས་རབ་ཏུ་དབྱུང་ངོ་ཞེས་སྨྲས་ནས། དེ་རབ་ཏུ་ཕྱུང་བ་དང་། ཀནྟ་ཤག་ཏི་ཀས་ཐོས་ནས་དེ་ལྟར་མི་གནང་གིས་ཞག་བདུན་ཚང་བ་དང་བསད་དོ་ཞེས་སྨྲས་པ་སྦོམ་དགའ་མོས་ཐོས་ནས་མེ་ནེ་ཀ་ཁྲིད་དེ་བཙུན་མོ་ཕྲེང་ལྡན་མ་ལ་གསོལ་པ་དང་།
དེས་སྨྲས་པ་ཅི་བུད་མེད་ཟད་དམ་དེ་ལྟ་བུ་རབ་ཏུ་དབྱུང་བ་མི་རིགས་མོད་ཀྱི་ངས་རྒྱལ་པོ་ལ་གསོལ་ཞེས་བྱས་ནས་དེ་ལྟ་བུར་གྱུར་པ་རྒྱལ་པོ་གསལ་རྒྱལ་ལ་གསོལ་པ་དང་། རྒྱལ་པོས་བློན་པོ་ལ་བསྒོ་བ་རབ་ཏུ་བྱུང་བ་བསད་ན་ང་ལ་མི་སྙན་གྱིས་མ་བསད་ཅིག་ཅེས་བྱས་པ་དང་། ཀནྟ་ཤཀ་ཏི་ཀ་
འཕྱ་སྟེ་དེ་ལྟ་བུ་ཅིའི་ཕྱིར་རབ་ཏུ་འབྱིན་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་གིས་བུད་མེད་མང་པོ་མཐུན་པས་བཅད་ཅིང་ཁྱིམ་ཐབ་ཀྱིས་ཡོངས་སུ་བཏང་ལ། །རྒྱལ་པོས་ཀྱང་བསྒོ་བར་ཤེས་བཞིན་

དུ་རབ་ཏུ་ཕྱུང་ན་ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ་དབྱུང་བར་བྱ་བ་སྟེ་དགེ་འདུན་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །བུད་མེད་གང་ཞེས་བྱ་བ་ནི་མེ་ནེ་ཀའོ། །མང་པོས་མཐུན་པས་བཅད་ཅེས་བྱ་བ་ནི་རྒྱལ་རིགས་ཀནྟ་ཤཀ་ཏིའི་སྡེ་རྣམས་ཀྱིས་སོ། །ཁྱིམ་
ཐབ་གྱིས་ཡོངས་སུ་བཏང་ཞེས་བྱ་བ་ནི་ཁྱོས་སོ། །རྒྱལ་པོས་ཀྱང་བསྒོ་ཞེས་བྱ་བ་ནི་གྲོས་མཐུན་པར་བྱས་པའོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་ཤེས་སམ། གཞན་གྱིས་བསྒོ་བར་གྱུར་པའོ། །རབ་ཏུ་བྱུང་ན་ཞེས་བྱ་བ་ནི་ལེགས་པར་གསུངས་པའི་ཆོས་འདུལ་བ་ལའོ། །དེ་ལ་
ཉེས་པ་ཇི་ལྟ་བུ་ཞེ་ན། དགེ་སློང་མས་ཅི་ཙམ་དུ་དེ་དང་འདྲ་བ་ཡིན་པར་ཤེས་བཞིན་དུ་རབ་ཏུ་ཕྱུང་ན་ཡང་ཐམས་ཅད་ལ་འང་དགེ་འདུན་ལྷག་མའི་ལྟུང་བར་འགྱུར་རོ། །ལྷག་མ་བཅུ་པ་རྫོགས་སོ།། །།མཉན་དུ་ཡོད་པ་ན་ཁྱིམ་བདག་ཕྱུག་པོ་ཞིག་འདུག་སྟེ། དེ་ནད་ཀྱིས་བཏབ་ནས་འཆི་
བའི་ཁར་དགེ་སྦྱོང་དང་བྲམ་ཟེ་དང་ཕོངས་པ་རྣམས་ལ་སྦྱིན་པ་ནི་བྱིན། བསོད་ནམས་ནི་བྱས་སོ། །སྦོམ་དགའ་མོ་ཡང་བསོད་སྙོམས་ལ་སོང་སྟེ་ཁྱིམ་བདག་དེའི་ཁྱིམ་དུ་འོངས་ཏེ་ཁྱིམ་བདག་ནད་མེད་ཅིག་ཇི་ལྟ་ཞིང་འདུག་བདེ་བར་འཚོའམ་ཞེས་སྨྲས་པ་དང་། དེས་ཀྱང་ཇི་ལྟར་གྱུར་པ་ཞིབ་ཏུ་སྨྲས་
སོ། །སྦོམ་དགའ་མོས་སྨྲས་པ་ཁྱིམ་བདག་ཁྱེད་ཀྱིས་སྦྱིན་པ་བྱིན་པ་རྗེས་སུ་ཡི་རང་ན། བུད་མེད་ཀྱི་བུས་པ་ནི་རྙེད་པ་ཆུང་ན། བདག་ལ་སྐལ་བ་བྱིན་པར་གྱིས་ཤིག་ཅེས་སྨྲས་པ་དང་། །ནད་པས་སྨྲས་པ། ཐམས་ཅད་བཏང་ལགས་སོ་ཞེས་སྨྲས་པ་དང་། སྦོམ་དགའ་མོས་ཁྱོད་
ཀྱི་ཁྱིམ་ནས་མ་རྙེད་པར་འགྲོ་བ་མི་རིགས་སོ། །ཁྱིམ་བདག་དེ་ལ་བུ་ལོན་གྱི་ཆགས་རྒྱ་ཙམ་ཞིག་ཡོད་དེ་དེ་སྦོམ་དགའ་མོ་ལ་བསྟན་ཏེ། འདི་ལས་མ་ལུས་ཏེ་བཞེད་ན་སྣོམས་ཤིག །དེས་ཀྱང་ཆགས་རྒྱ་ཁྱེར་རོ། །ནད་པས་སྨྲས་པ། རིགས་ཀྱི་བུ་དེ་དབུལ་མོད་ཀྱིས་བརྫུན་མི་
མཆི་བས་ཅི་ཕུལ་བ་ལོང་ལ་དེ་སྙོན་མ་རྨོངས་ཤིག་ཅེས་སྨྲས་སོ། །སྦོམ་དགའ་མོས་བདག་ཅག་ནི་སྡོམ་པ་ལ་གནས་པས་དེ་ལྟར་ག་ལ་བྱེད་ཅེས་སྨྲས་ནས། །ཁྱིམ་བདག་དེ་དུས་འདས་པ་དང་། སྦོམ་དགའ་མོས་རིགས་ཀྱི་བུ་དེ་བཟུང་ནས་ཉོན་མོངས་པ་དང་ཁྱིམ་བདག་དག་འཕྱ་སྟེ། ཅིའི་

ཕྱིར་ན་དགེ་སློང་མས་ཤི་བའི་ནོར་དད་པར་བྱེད་ཅེས་མི་སྙན་པར་བརྗོད་དོ། །དེ་ལྟར་གྱུར་པ་སྟོན་པ་ལ་གསོལ་ནས། བསླབ་པའི་གནས་བཅས་སོ། །ཡང་དགེ་སློང་མ་གང་ཤི་བའི་ནོར་ཆགས་པ་འདས་ན་ཆོས་འདི་ཡང་ཐོག་མ་ཉིད་ཀྱིས་ལྟུང་བར་འགྱུར་ལ་དབྱུང་བར་བྱ་བ་
སྟེ་དགེ་འདུན་ལྷག་མའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཤི་ཁའི་ནོར་ཆགས་པ་བདའ་ཞེས་བྱ་བ་ནི་བདག་གིས་བྱས་པའོ། །དེ་ལ་ཉེས་པ་ཇི་ལྟ་བུ་ཞེ་ན་དགེ་སློང་མས་ཇི་ཙམ་དུ་ཤི་བའི་ནོར་རབ་ཏུ་བྱུང་བའམ་གཉེན་བཤེས་ལ་སོགས་པ་གཞན་གྱིས་བྱིན་ཡང་རུང་སྟེ།
ཤི་བའི་ནོར་ཉོན་མོངས་པར་བྱས་ཏེ་བདས་ན་བླངས་མ་ཐག་ཏུ་ལྷག་མར་འགྱུར་རོ། །གལ་ཏེ་དགེ་འདུན་གྱི་འམ་ཉོན་མ་མོངས་པ་ཞིག་ཏུ་ཁུགས་ན་ཉེས་པ་མེད་དོ། །ལྷག་མ་བཅུ་གཅིག་པ་རྫོགས་སོ།། །།མཉན་དུ་ཡོད་པ་ན་དགེ་སློང་མ་རྣམ་པར་འཁྱམ་པ་ཞེས་བྱ་བ་ཞིག་
ཡོད་དེ། །ཁ་ངན་ཅན་ཁོང་ཁྲོ་བ་མང་དུ་སྨྲ་བ་ཞིག་སྟེ། དེས་དགེ་སློང་མ་ཐམས་ཅད་མི་དགའ་བར་བྱས་སོ། །དེ་བསོད་སྙོམས་ལ་སོང་བའི་འོག་ཏུ་དགེ་སློང་མ་རྣམས་དེ་ལ་ཇི་ལྟ་བུར་གྱུར་པ་མི་སྙན་པར་སྨྲའོ། །རྣམ་པར་འཁྱམ་པའི་བུ་མོ་གཙུག་མོ་ཞེས་བྱ་བ་ཞིག་ཡོད་དེ། དེས་མ་
འོངས་པ་དང་ཐམས་ཅད་བཟླས་ཏེ། དེ་ཐོས་པ་དང་། དགེ་སློང་མ་རྣམས་ལ་ཚིག་གདུག་པས་ཤིན་ཏུ་གནོད་པར་བྱེད་དོ། །དགེ་སློང་མ་དག་གིས་ཇི་ལྟར་གཙུག་མོས་ཐོས་པ་ཐམས་ཅད་བཟླས་པར་ཤེས་ན། དེ་དག་གིས་གཙུག་མོ་སྤང་བའི་ལས་བྱས་སོ། །དེ་ཡང་ངུ་བཞིན་དུ་མ་ལ་
བདག་ལ་དགེ་སློང་མ་དག་གིས་སྤང་བའི་ལས་བྱས་སོ་ཞེས་སྨྲས་པ་དང་མས་ཐོས་ནས་ཁྲོས་ཏེ། དེ་དག་ཉིད་ཡུལ་འདི་ནས་གཞན་དུ་སྤོང་བར་ཤོག་ཤིག་ཅེས་སྨྲས་ཏེ། བུ་མོ་ཁྲིད་ནས་མཚམས་ཀྱི་ཕྱི་རོལ་དུ་དབྱུང་བར་བྱས་སོ། །དགེ་སློང་མ་དག་གིས་ཁྱོད་ཀྱི་བུ་མོ་དེད་ཀྱིས་སྤང་བའི་ལས་བྱས་སོ་
ཞེས་སྨྲས་པ་དང་དེ་ཁྲོས་ནས་འདི་ངས་ཕྱུང་ངོ་། །དགེ་སློང་མ་དག་གིས་གང་དུ་ཇི་ལྟར་ཕྱུང་། དེས་སྨྲས་པ་མཚམས་ཀྱི་ཕྱི་རོལ་དུའོ། །དགེ་སློང་མ་དག་གིས་མཚམས་ཀྱི་ཕྱི་རོལ་དུ་དེ་ལྟར་དབྱུང་དུ་རུང་ངམ། དེས་སྨྲས་པ་རུང་ངམ་མི་རུང་ཡང་སླ་སྟེ་ངས་ཕྱུང་ངོ་ཞེས་སྨྲས་པ་དང་དེ་ལྟར་གྱུར་

པ་སྟོན་པ་ལ་གསོལ་ནས་དགེ་སློང་མ་རྣམས་ལ་བསླབ་པའི་གནས་བཅས་སོ། །ཡང་དགེ་སློང་མ་དག་གིས་དགེ་སློང་མ་གང་ལ་དགེ་སློང་མའི་དགེ་འདུན་གྱིས་སྤང་བའི་ལས་བྱས་པ་ཤེས་བཞིན་དུ་དེ་མཚམས་ཀྱི་ཕྱི་རོལ་དུ་སོང་ནས་གཡོ་འདོར་བར་བྱས་ན་ཆོས་འདི་ཡང་ཐོག་མར་ཉིད་ཀྱིས་ལྟུང་བར་འགྱུར་
ལ་དབྱུང་བར་བྱ་བ་སྟེ་དགེ་འདུན་གྱི་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་རྣམ་པར་འཁྱམ་པའོ། །དགེ་སློང་མ་གང་ལ་ཞེས་བྱ་བ་ནི་གཙུག་དགའ་མོའོ། །དགེ་སློང་མའི་དགེ་འདུན་ཞེས་བྱ་བ་ནི་སྔ་མ་བཞིན་ནོ། །སྤང་བའི་ལས་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །
ཤེས་བཞིན་ཞེས་བྱ་བ་ནི་བདག་གིས་ཤེས་སམ་གཞན་གྱིས་སྨྲས་པའོ། །མཚམས་ཀྱི་ཕྱི་རོལ་དུ་སོང་ནས་གཡོ་འདོར་བར་བྱས་ཞེས་བྱ་བ་ནི་དགེ་འདུན་ལ་བཟོད་པར་གསོལ་ཞིང་ཉེས་པ་འདོར་བའོ། །གཞན་ནི་སྔ་མ་བཞིན་ནོ། །ཉེས་པ་ཇི་ལྟ་བུ་ཞེ་ན་དགེ་སློང་མས་ཇི་ཙམ་དུ་ཤེས་བཞིན་དུ་མཚམས་
ཀྱི་ཕྱི་རོལ་དུ་གཡོ་འདོར་བར་བྱས་ན་དགེ་འདུན་གྱི་ལྷག་མར་འགྱུར་རོ། །ལྷག་མ་བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་སྔོན་མུ་སྟེགས་བྱེད་ལས་རབ་ཏུ་བྱུང་བ་དགེ་སློང་མ་དུས་ཅན་ཞེས་བྱ་བ་དེ། དགེ་སློང་མ་དག་དང་འཐབ་ཅིང་རྩོད་པར་གྱུར་ཏེ།
ཐབ་མོ་བྱུང་བའི་ཚེ་སངས་རྒྱས་དང་ཆོས་དང་དགེ་འདུན་བཏང་ངོ་། །འདི་ལྟ་སྟེ་ཤཱཀྱའི་དགེ་སྦྱོང་ཉི་ཚེ་ཚུལ་ཁྲིམས་དང་ལྡན་ཡོན་ཏན་དང་ལྡན་པར་མ་ཟད་དེ། དགེ་སྦྱོང་ཚུལ་ཁྲིམས་ལ་སོགས་པ་དང་ལྡན་པ་གཞན་དག་ཀྱང་ཡོད་ཀྱིས་དེ་དག་གི་དྲུང་དུ་ཚངས་པར་སྤྱད་པ་སྤྱད་དོ་ཞེས་དེ་སྐད་ཟེར་བ་དང་། དེ་
ལྟར་གྱུར་པ་སྟོན་པ་ལ་གསོལ་ནས་བཀའ་སྩལ་པ་དགེ་སློང་མ་ཁྱོད་ཀྱིས་ཚིག་འཇམ་པོར་བསྒོ་ཤིག །དགེ་སློང་མ་དག་གིས་དེ་བཞིན་དུ་བསྒོ་བ་དང་། དེ་ཉིད་བདེན་གྱི་གཞན་ནི་གཏི་མུག་གོ་ཞེས་སྡིག་པའི་ལྟ་བ་མི་གཏོང་ནས་དེ་ལྟར་གྱུར་པ་སྟོན་པ་ལ་གསོལ་ནས་གསོལ་བ་དང་བཞིའི་ལས་ཀྱིས་བསྒོ་
ཤིག་ཅེས་བཀའ་སྩལ་ནས། དགེ་སློང་མ་དག་གིས་དེ་བཞིན་དུ་བསྒོ་བ་དང་སྔ་མ་བཞིན་དུ་མཉན་ནས་དེ་ལྟར་གྱུར་པ་སྟོན་པ་ལ་གསོལ་ནས་སྔ་མ་བཞིན་དུ་བསླབ་པའི་གནས་བཅས་སོ། །ཡང་དགེ་སློང་མ་གང་རྩོད་པར་གྱུར་འཐབ་པར་གྱུར། མཚང་འབྲུ་བར་གྱུར། འགྱེད་པར་གྱུར། སངས་

རྒྱས་གཏོང་ངོ་། །ཆོས་གཏོང་ངོ་། །དགེ་འདུན་གཏོང་ངོ་། །འདི་ལྟ་སྟེ། ཤཱཀྱའི་སྲས་དགེ་སྦྱོང་རྣམས་ཀྱི་ཉི་ཚེའི་ཚུལ་ཁྲིམས་དང་ལྡན། ཡོན་ཏན་དང་ལྡན་པ་དེས་པ་དགེ་བའི་ཆོས་དང་ལྡན་པའི་དགེ་སྦྱོང་དུ་མ་ཟད་དེ། དགེ་སྦྱོང་ཚུལ་ཁྲིམས་དང་ལྡན་པ། ཡོན་
ཏན་དང་ལྡན་པ། དེས་པ་དགེ་བའི་ཆོས་དང་ལྡན་པ་གཞན་དག་ཀྱང་ཡོད་ཀྱིས། དེ་དག་གི་དྲུང་ན་ཚངས་པར་སྤྱད་པ་སྤྱོད་དོ་ཞེས་དེ་སྐད་ཟེར་ན་དགེ་སློང་མ་དེ་ལ་དགེ་སློང་མ་རྣམས་ཀྱིས་འཕགས་མ་ཁྱོད་རྩོད་པར་གྱུར། མཚང་འབྲུ་བར་གྱུར། འཐབ་པར་གྱུར། འགྱེད་པར་གྱུར་པའི་ཚེ།
སངས་རྒྱས་གཏོང་ངོ་། །ཆོས་གཏོང་ངོ་། །དགེ་འདུན་གཏོང་ངོ་། །འདི་ལྟ་སྟེ། ཤཱཀྱའི་སྲས་ཀྱི་དགེ་སྦྱོང་རྣམས་ཉི་ཚེ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དེས་པ་དགེ་བའི་ཆོས་དང་ལྡན་པའི་དགེ་སྦྱོང་དུ་མ་ཟད་དེ། དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ།
དེས་པ་དགེ་བའི་ཆོས་དང་ལྡན་པ་གཞན་ཡང་ཡོད་ཀྱིས། དེ་དག་གི་དྲུང་དུ་ཚངས་པར་སྤྱོད་པ་སྤྱད་དོ་ཞེས་དེ་སྐད་མ་ཟེར་ཅིག །འཕགས་མ་ཁྱོད་སྡིག་པ་ལ་ལྟ་བར་གྱུར་པ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས་གལ་ཏེ་
དངོས་པོ་དེ་གཏོང་ན་ནི་ལེགས་གལ་ཏེ་མི་གཏོང་ན་དངོས་པོ་དེ་སྤང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ་ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་ནས་དངོས་པོ་གཏོང་ན་ནི་ལེགས་གལ་ཏེ་མ་བཏང་ན་
ཆོས་འདི་ནི་ལན་གསུམ་པ་དབྱུང་བར་བྱ་སྟེ། དགེ་འདུན་གྱི་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་དུས་ཅན་མའོ། །སངས་རྒྱས་དང་ཆོས་དང་དགེ་འདུན་གཏོང་ངོ་ཞེས་བྱ་བ་ནི་རྐང་གཉིས་ཀྱི་ནང་ན་མཆོག་དང་། འདོད་ཆགས་དང་བྲལ་བའི་མཆོག་དང་། མང་དུ་འདུས་པའི་ནང་ན་
མཆོག་གོ། །འདི་ལྟ་སྟེ། ཤཱཀྱའི་དགེ་སྦྱོང་ཉི་ཚེ་ཚུལ་ཁྲིམས་དང་དགེ་བའི་ཆོས་དང་ལྡན་པར་མ་ཟད་དོ་ཞེས་བྱ་བའི་བར་དུ་སྡིག་པ་ལས་ལྟ་བར་བྱེད་པ་དང་བསླབ་པ་ཉམས་པར་བྱེད་པའོ། །དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དགེ་བའི་ཆོས་དང་ལྡན་པ་གཞན་ཡང་ཡོད་དོ་ཞེས་

བྱ་བ་ནི་འདི་ལས་ཕྱི་རོལ་གྱི་དགེ་སྦྱོང་དང་བྲམ་ཟེ་རྣམས་ཡོད་པའི་ཐ་ཚིག་གོ། །དེ་དག་གི་དྲུང་དུ་ཚངས་པར་སྤྱོད་པ་སྤྱད་དོ་ཞེས་བྱ་བ་ནི་བསླབ་པ་འབུལ་བར་མངོན་སུམ་དུ་སྟོན་པའོ། །དེ་སྐད་ཟེར་ཞེས་བྱ་བ་ནི་སྨྲ་བའོ། །དགེ་སློང་མ་དེ་ལ་ཞེས་བྱ་བ་ནི་དུས་ཅན་ནོ། །དགེ་སློང་མ་རྣམས་ཀྱིས་དེ་སྐད་
བསྒོ་བར་བྱའོ་ཞེས་བྱ་བ་ནི་ཚིག་འཇམ་པོས་བསྒོ་བར་བྱ་སྟེ། སྔར་བསྒོ་བ་བཞིན་ནོ། །ཚིག་འཇམ་པོས་བསྒོ་བ་ལས་དངོས་པོ་དེ་གཏོང་ན་ནི་ལེགས་ཞེས་བྱ་བ་དེ་ལྟར་ན་བཟང་པོའོ། །གལ་ཏེ་མི་གཏོང་ན་གསོལ་བ་དང་བཞིའི་ལས་ཀྱིས་བསྒོ་བར་བྱ་སྟེ། སྔར་བསྒོ་བ་བཞིན་ནོ། །གཞན་
ནི་སྔ་མ་བཞིན་ནོ། །ཉེས་པ་ཇི་ལྟ་བུ་ཞེ་ན། ཚིག་འཇམ་པོས་བསྒོ་བའི་ཚེ་མ་བཏང་ན་ཉེས་བྱས་སོ། །གསོལ་བ་བྱེད་པའི་ཚེ་མ་བཏང་ན་སྦོམ་པའོ། །ལས་དང་པོའི་ཚེ་མ་བཏང་ན་སྦོམ་པོ་གཉིས། ལས་གཉིས་པའི་ཚེ་མ་བཏང་ན་སྦོམ་པོ་གསུམ། ལས་གསུམ་པ་མ་རྫོགས་པར་
དངོས་པོ་དེ་གཏོང་ན་ནི་ལེགས་མི་གཏོང་ན་ལྷག་མར་འགྱུར་རོ། །ཆོས་ལྟར་མ་ཡིན་ན་འདུལ་བ་ལྟར་མ་ཡིན་པར་བསྒོ་བ་དང་། ཆོས་བཞིན་དུ་བྱེད་ལ་དགེ་འདུན་མ་འདུས་པ་དང་། །ཆོས་བཞིན་མི་བྱེད་ལ་དགེ་འདུན་འདུས་པ་དང་། ཆོས་དང་འདུལ་བ་དང་སྟོན་པས་བསྟན་པ་བཞིན་དུ་མ་བསྒོ་
ན་ལྟུང་བ་མེད་དོ། །ཆོས་དང་འདུལ་བ་བཞིན་དུ་བསྒོ་བ་ལས་མ་བཏང་ན་ལྷག་མའོ། །དགེ་སློང་མ་དེ་སྟན་ལ་འདུག་བཞིན་དུ་འཕགས་མ་དག་བདག་ལ་ལྷག་མ་བྱུང་ངོ་ཞེས་མ་སྨྲས་ན་བཅབས་པར་འགྱུར་ཏེ། དེ་མ་བཤགས་པར་གསོལ་བ་དང་། གསོལ་བ་དང་གཉིས་ཀྱི་ལས་
དང་། གསོལ་བ་དང་བཞིའི་ལས་མྱོང་བར་གྱུར་ན་ཐམས་ཅད་དུ་ཡང་ཉེས་བྱས་སོ། །ལྷག་མ་བཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་སྦོམ་དགའ་མོ་དགེ་སློང་མ་དག་དང་ལྷན་ཅིག་ཏུ་འཐབ་ཅིང་རྩོད་པ་དང་མཚང་འབྲུ་བར་གྱུར་པ་
དེ་ལ་དགེ་སློང་མ་དག་གིས་དེ་ལྟར་མ་བྱེད་ཅིག་པར་བསྒོ་ན། དེ་འདི་སྐད་དུ་འདི་ན་དགེ་སློང་མ་ཁ་ཅིག་ནི་འདོད་པ་དང་ཞེ་སྡང་དང་གཏི་མུག་དང་འཇིགས་པས་འགྲོའོ། །འདི་ལྟར་དགེ་སློང་མ་ཁ་ཅིག་ནི་རྩོད་པ་ལས་བཟློག། ཁ་ཅིག་ནི་མ་བཟློག་གོ་ཞེས་ཟེར་བ་དང་། དེ་ལྟར་གྱུར་པ་སྟོན་པ་

ལ་གསོལ་ནས་བཀའ་སྩལ་པ། དགེ་སློང་མ་ཁྱེད་ཀྱིས་སྦོམ་དགའ་མོ་ལ་ཚིག་འཇམ་པོས་བསྒོ་ཞིག་ཅེས་བྱ་བ་ནས་གསོལ་བ་དང་བཞིའི་ལས་ཀྱིས་བསྒོ་ཤིག་ཅེས་བྱ་བའི་བར་དུ་སྔ་མ་བཞིན་ནོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་
སོ། །ཡང་དགེ་སློང་མ་གང་དགེ་སློང་མ་རྣམས་དང་རྩོད་པར་གྱུར། མཚང་འབྲུ་བར་གྱུར། འཐབ་པར་གྱུར། འགྱེད་པར་གྱུར་ཅིང་འདུག་པ་ལ་དགེ་སློང་མ་རྣམས་ཀྱིས་འཕགས་མ་མ་རྩོད་ཅིག །མཚང་མ་འབྲུ་ཞིག །མ་འཐབ་ཅིག །མ་འགྱེད་ཅིག་ཅེས་བསྒོ་སྟེ་བཟློག་ན་འདི་
སྐད་ཅེས་འདི་ན་དགེ་སློང་མ་ཁ་ཅིག་ནི་འདོད་པས་འགྲོའོ། །ཞེ་སྡང་གིས་འགྲོའོ། །གཏི་མུག་གིས་འགྲོའོ། །འཇིགས་པས་འགྲོའོ། །འདི་ལྟར་དགེ་སློང་མ་ཁ་ཅིག་ནི་རྩོད་པ་ལས་བཟློག་ཁ་ཅིག་ནི་མ་བཟློག་གོ་ཞེས་དེ་སྐད་ཟེར་ན་དགེ་སློང་མ་དེ་ལ། དགེ་སློང་མ་རྣམས་ཀྱིས་འཕགས་
མ་ཁྱོད་མ་རྩོད་ཅིག། མཚང་མ་འབྲུ་ཞིག། མ་འཐབ་ཅིག། མ་འགྱེད་ཅིག་ཅེས་དགེ་སློང་མ་རྣམས་ཀྱིས་བསྒོ་ན། འདི་ན་དགེ་སློང་མ་ཁ་ཅིག་ནི་འདོད་པས་འགྲོ། །ཞེ་སྡང་གིས་འགྲོ། །གཏི་མུག་གིས་འགྲོ། །འཇིགས་པས་འགྲོ་སྟེ། འདི་ལྟར་དགེ་སློང་མ་ཁ་ཅིག་
ནི་རྩོད་པ་ལས་བཟློག །ཁ་ཅིག་ནི་མ་བཟློག་གོ་ཞེས་དེ་སྐད་མ་ཟེར་ཅིག །འཕགས་མ་ཁྱོད་འདོད་པས་འགྲོའོ་ཞེས་བྱ་བའི་ཚིག་གི་ལམ་དང་། ཞེ་སྡང་གིས་འགྲོ །གཏི་མུག་གིས་འགྲོ། །འཇིགས་པས་འགྲོའོ་ཞེས་བྱ་བའི་ཚིག་གི་ལམ་དེ་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །
དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་བསྒོ་བ་ལས་གལ་ཏེ་དངོས་པོ་དེ་གཏོང་ན་ནི་ལེགས་གལ་ཏེ་མི་གཏོང་ན་དངོས་པོ་དེ་སྤང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ་ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་
དག་པར་བསྟན་པ་ལས་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་ཆོས་འདི་ཡང་ལན་གསུམ་དུ་དབྱུང་བར་བྱ་སྟེ་དགེ་འདུན་གྱི་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་རྣམས་ཞེས་བྱ་བ་ནི་ཆོས་འདི་ལ་ཞུགས་པའོ། །མ་རྩོད་ཅིག་མ་འཐབ་

ཅིག་ཅེས་བྱ་བ་ནི་དེ་ལས་བཟློག་པའོ། །འདི་ན་དགེ་སློང་མ་ཁ་ཅིག་ནི་འདོད་པས་འགྲོའོ་ཞེས་བྱ་བ་ནི་འདོད་པས་སོ། །ཞེ་སྡང་གིས་འགྲོའོ་ཞེས་བྱ་བ་ནི་ཞེ་སྡང་གིས་སོ་ཞེས་སྨྲ་བའོ། །གཏི་མུག་གིས་འགྲོའོ་ཞེས་བྱ་བ་ནི་གཏི་མུག་གོ་ཞེས་སྨྲའོ། །འཇིགས་པས་འགྲོའོ་ཞེས་བྱ་བ་ནི་འཇིགས་སོ་
ཞེས་སྨྲ་བའོ། །འདི་སྐད་ཟེར་ཞེས་བྱ་བ་ནི་སྨྲ་བའོ། །དགེ་སློང་མ་དེ་ལ་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་ལ་ཞུགས་པའོ། །འདི་སྐད་བསྒོ་བར་བྱའོ་ཞེས་བྱ་བ་ནི་ཚིག་འཇམ་པོས་བསྒོ་བར་བྱ་སྟེ་སྔ་མ་བཞིན་ནོ། །ཚིག་འཇམ་པོས་བསྒོ་བ་
ལས་དངོས་པོ་དེ་གཏོང་བ་ལྟ་ན་ནི་ལེགས། གལ་ཏེ་མི་གཏོང་ན་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །དེ་ལས་ཉེས་པ་ཇི་ལྟ་བུ་ཞེ་ན་དགེ་སློང་མ་ལ་ཚིག་འཇམ་པོས་བསྒོ་བའི་ཚེ་མ་བཏང་ན་ཉེས་བྱས་སོ། །གཞན་ནི་ཐམས་ཅད་གོང་དུ་བཤད་པ་བཞིན་ནོ། །ལྷག་མ་བཅུ་བཞི་
པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་མ་རིཥྚ་དང་ཨུ་པ་རིཥྚ་འདུས་ཤིང་འཁོད་པ་ལས་འཕྱར་སྙེགས་ལུས་ལ་རྡེག་པར་བྱེད་ནས། དེ་དག་ལ་དགེ་སློང་མ་དག་གིས་དེ་ལྟར་མ་བྱེད་པར་སོ་སོ་ན་འཁོད་པར་གྱིས་ཤིག །འོན་ཀྱང་དགེ་བའི་
ཆོས་འཕེལ་བར་འགྱུར་གྱིས་འགྲིབ་བར་མི་འགྱུར་རོ་ཞེས་བསྒོ་ན་ཡང་། ཉན་དུ་མི་བཏུབ་པས་དེ་ལྟར་གྱུར་པར་སྟོན་པ་ལ་གསོལ་ནས་བཀའ་སྩལ་པ། དགེ་སློང་མ་ཁྱོད་ཀྱིས་དགེ་སློང་མ་འདི་གཉིས་ལ་ཚིག་འཇམ་པོས་བསྒོ་ཤིག་ཅེས་བཀའ་སྩལ་ཏོ། །དགེ་སློང་མ་དག་གིས་དེ་ལྟར་བསྒོ་
ན་ཉན་དུ་མ་བཏུབ་པ་དང་། གསོལ་བ་དང་བཞིའི་ལས་ཀྱིས་བསྒོ་ཤིག་ཅེས་པ་ནས་བསླབ་པའི་གནས་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་འདུས་ཤིང་འཁོད་པས་འཕྱར་སྙེགས་ལུས་ལ་རྡེག་པར་བྱེད་ན། དགེ་སློང་མ་དེ་དག་ལ་དགེ་སློང་མ་རྣམས་ཀྱིས་ཕུ་ནུ་མོ་
དག་ཁྱེད་འདུ་ཞིང་མ་འཁོད་ཅིག །ཁྱེད་འདུ་ཞིང་འཁོད་པས་དགེ་བའི་ཆོས་རྣམས་འབྲི་བར་འགྱུར་གྱིས་འཕེལ་བར་མི་འགྱུར་བར་ཤེས་པར་བྱའོ། །ཕུ་ནུ་མོ་ཁྱེད་སོ་སོ་མ་འཁོད་ཅིག །ཁྱེད་ཅག་སོ་སོ་ན་འཁོད་དང་དགེ་བའི་ཆོས་རྣམ་པར་འཕེལ་བར་འགྱུར་གྱི་འབྲི་བར་མི་འགྱུར་

བར་ཤེས་པར་བྱའོ་ཞེས་བསྒོ་ཤིག །དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས་གལ་ཏེ་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་དངོས་པོ་དེ་སྤང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ་ཡང་དག་པར་བསྟན་པར་
བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་ནས། དངོས་པོ་དེ་གཏོང་ན་ནི་ལེགས་གལ་ཏེ་མི་གཏོང་ན་ཆོས་འདི་ཡང་ལན་གསུམ་པ་དབྱུང་བར་བྱ་སྟེ་དགེ་འདུན་གྱི་ལྷག་མའོ། །དགེ་སློང་མ་གང་ཞེས་བྱ་བ་ནི་རིཥྚ་དང་། ཨུ་པ་རིཥྚའོ། །འདུ་ཞིང་འཁོད་
ཅེས་བྱ་བ་ནི་གཅིག་ཏུ་འདུས་པའོ། །འཕྱར་སྙེགས་ལུས་ལ་རྡེག་ཅེས་བྱ་བ་ནི་རྡེག་པའོ། །སྙེགས་ཞེས་བྱ་བ་ནི་རྩེད་མོ་བྱེད་པའོ། །ལུས་ལ་རྡེག་པ་ནི་གད་མོ་འདོན་པའོ། །དགེ་སློང་མ་དེ་དག་ཅེས་བྱ་བ་ནི་རིཥྚ་དང་། ཨུ་བ་རིཥྚའོ། །དགེ་སློང་མ་རྣམས་ཞེས་བྱ་བ་ནི་ཆོས་འདི་ལ་ཞུགས་
པའོ། །དེ་སྐད་བསྒོ་བར་བྱ་ཞེས་བྱ་བ་ནི་ཚིག་འཇམ་པོས་སོ། །གཞན་ནི་གོང་དུ་བཤད་པ་བཞིན་ཏེ་ལྟུང་བའི་ཁྱད་པར་ཉེས་བྱས་གཅིག་དང་སྦོམ་པོ་གསུམ་དང་ལྷག་མ་གཅིག་བྱུང་བ་ཡང་གོང་མ་དང་འདྲའོ། །ཆོས་བཞིན་དུ་ལས་མ་བྱས་ན་ལྷག་མར་མི་འགྱུར་བ་དང་། སྟན་ལས་མ་ལངས་པར་བདག་
ལ་ལྷག་མ་བྱུང་ངོ་ཞེས་མ་སྨྲས་ན་བཅབས་པའི་ཉེས་པར་འགྱུར་བ་ཡང་སྔ་མ་བཞིན་དུ་བཤད་དེ། །འོག་ནས་འབྱུང་བ་རྣམས་ཀྱང་ཐམས་ཅད་དེ་བཞིན་དུ་བཤད་པར་རིག་པར་བྱའོ། །ལྷག་མ་བཅོ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ།། །།ནམ་དགེ་སློང་
མ་ཨ་རིཥྚ་དང་ཨུ་པ་རིཥྚ་འདུ་ཞིང་འཁོད་པ་ལས། གསོལ་བ་དང་བཞིའི་ལས་ཀྱིས་བསྒོ་ནས་སོ་སོ་ནས་འཁོད་པར་གྱུར་པ་དང་། སྦོམ་དགའ་མོ་དེ་གཉིས་ཀྱི་གན་དུ་སོང་སྟེ་ཕྱིན་ནས་འདི་སྐད་སྨྲས་ཏེ། ཁྱོད་ཅིའི་ཕྱིར་ན་སོ་སོ་ན་འཁོད་ཚུར་ཤོག །ཁྱེད་འདུས་ཏེ་འཁོད་ན་དགེ་བའི་ཆོས་
འཕེལ་བར་འགྱུར་གྱི་འགྲིབ་པར་མི་འགྱུར་རོ་སྨྲས་པ་དང་། དེ་ལྟར་གྱུར་པ་སྟོན་པ་ལ་གསོལ་ནས་ཚིག་འཇམ་པོས་བསྒོ་ཤིག་ཅེས་བྱས་ནས་བསླབ་པའི་གནས་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་སློང་མ་དག་སོ་སོ་ནས་འཁོད་པར་ཤེས་ལ། སོ་སོ་ན་འཁོད་པ་དེ་

དག་གི་གན་དུ་སོང་ནས་ཕུ་ནུ་མོ་ཁྱེད་ཅག་སོ་སོར་མ་གནས་ཤིག །ཁྱེད་སོ་སོར་གནས་པས་དགེ་བའི་ཆོས་རྣམ་པར་འཕེལ་བར་མི་འགྱུར་གྱིས་འགྲིབ་པར་འགྱུར་བར་ཤེས་པར་བྱའོ། །ཕུ་ནུ་མོ་ཁྱེད་འདུས་ཏེ་འཁོད་ཅིག་ཁྱེད་འདུས་ཏེ་འཁོད་པ་དང་། དགེ་བའི་ཆོས་རྣམས་འཕེལ་བར་འགྱུར་གྱི་
མི་འབྲི་བར་ཤེས་པར་བྱའོ་ཞེས་དེ་སྐད་ཟེར་ན་དགེ་སློང་མ་དེ་ལ་དགེ་སློང་མ་རྣམས་ཀྱིས་འཕགས་མ་ཁྱེད་དགེ་སློང་མ་གང་དེ་དག་སོ་སོ་ན་གནས་པར་ཤེས་ལ། སོ་སོ་ན་གནས་པ་དེ་དག་གི་གན་དུ་སོང་ནས་ཕུ་ནུ་མོ་ཁྱེད་སོ་སོར་མ་གནས་ཤིག །ཁྱེད་སོ་སོ་ན་འཁོད་པས་དགེ་བའི་ཆོས་རྣམས་
འཕེལ་བར་མི་འགྱུར་གྱི་འབྲི་བར་འགྱུར་བར་ཤེས་པར་བྱའོ། །ཁྱེད་ཅག་འདུས་ཏེ་འཁོད་ཅིག་འདུས་ཏེ་འཁོད་དང་དགེ་བའི་ཆོས་རྣམས་འཕེལ་བར་འགྱུར་གྱི་འབྲི་བར་མི་འགྱུར་བར་ཤེས་པར་བྱའོ་ཞེས་དེ་སྐད་མ་ཟེར་ཅིག །འཕགས་མ་ཁྱོད་དངོས་པོ་འདི་ལྟ་བུ་ཐོང་ཤིག་ཅེས་དེ་སྐད་བསྒོ་བར་
བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས། གལ་ཏེ་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་ནི་དངོས་པོ་སྤང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ་ཡང་དག་པར་བསྟན་པར་བྱའོ། །ལན་གཉིས་ལན་གསུམ་
དུ་ཡང་དག་པར་བསྒོ་ཡང་དག་པར་བསྟན་ནས་དངོས་པོ་དེ་བཏང་ན་ནི་ལེགས་གལ་ཏེ་མི་གཏོང་ན་ཆོས་འདི་ལ་ལན་གསུམ་པས་དབྱུང་བར་བྱ་སྟེ་དགེ་འདུན་གྱི་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་གང་དག་སོ་སོ་ནས་འཁོད་ཅེས་བྱ་བ་ནི་ཐ་དད་དུ་གནས་
པའོ། ཤེས་ལ་ཞེས་བྱ་བ་ནི་བདག་ཉིད་ཀྱིས་ཤེས་པའམ་གཞན་གྱིས་བསྟན་པའོ། །དེ་དག་གི་གན་དུ་སོང་ཞེས་བྱ་བ་ནི་དེའི་དྲུང་དུ་སོང་བའོ། །སོ་སོ་ན་མ་གནས་ཞེས་བྱ་བ་ནི་ཐ་དད་དུ་མ་འདུག་ཅིག་པའོ། །ཁྱེད་སོ་སོར་གནས་པས་དགེ་བའི་ཆོས་རྣམས་འཕེལ་བར་མི་འགྱུར་གྱི་
འབྲི་བར་འགྱུར་བར་ཤེས་པར་བྱའོ་ཞེས་བྱ་ནི་དགེ་བའི་ཆོས་སྐྱེ་བར་མི་འགྱུར་བའོ། །ཁྱེད་འདུས་ཏེ་འཁོད་ཅིག་ཅེས་བྱ་བ་ནི་གནས་གཅིག་ཏུ་འདུས་ཤིག་པའོ། །དགེ་བའི་ཆོས་འཕེལ་བར་འགྱུར་གྱི་མི་འབྲི་བར་ཤེས་པར་བྱའོ་ཞེས་བྱ་བ་ནི་སྐྱེ་བར་འགྱུར་བའི་དོན་ནོ། །འདི་སྐད་ཟེར་ཞེས་བྱ་

བ་ནི་སྨྲ་བའོ། །དགེ་སློང་མ་དེ་ལ་ཞེས་བྱ་བ་ནི་སྦོམ་དགའ་མོའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་ལ་ཞུགས་པའོ། །འདི་སྐད་བསྒོ་ཞེས་བྱ་བ་ནི་ཚིག་འཇམ་པོས་སོ། །གཞན་ནི་གོང་མ་དང་འདྲའོ། །ལྷག་མ་བཅུ་དྲུག་པ་རྫོགས་སོ།། །།སྟོན་
པ་རྒྱལ་པོའི་ཁབ་ན་བཞུགས་སོ། །དེའི་ཚེ་ན་ཉན་ཐོས་ཆེན་མོ་གཽ་ཏ་མ་རི་དེ་མ་དང་། ཨུཏྤ་ལའི་ཁ་དོག་དང་སྐྱེ་དགུའི་བདག་མོ་ཆེན་མོ་ལ་སོགས་པ་དབྱར་རྒྱལ་པོའི་ཁབ་ཏུ་ཚུལ་དུ་བཞུགས་སོ། །དེའི་ཚེ་ན་མུ་གེ་བྱུང་སྟེ། བསོད་སྙོམས་སློང་བས་རྙེད་དཀའ་བ་ནི་མི་ངན་བཞིན་ནོ། །དེའི་ཚེ་
ན་སྦོམ་དགའ་མོ་དགེ་སློང་མ་རྣམས་དང་འཐབ་ཅིང་རྩོད་པར་གྱུར་ཅིང་འདུག་གོ། །སྦོམ་དགའ་མོས། དགའ་མོ་དང་། ཉེ་དགའ་མོ་དང་། གཙུག་དགའ་མོ་དག་ལ་སྨྲས་པ། དགའ་མོ་ཉེ་དགའ་མོ་ཚུར་ཤོག་དགེ་སློང་མའི་དགེ་འདུན་དབྱེའོ། །འཁོར་ལོ་ཡང་དབྱེ་བར་བྱའོ་ཞེས་
སྨྲས་པ་དང་། སྦོམ་དགའ་མོ་སྟོན་པའི་ཉན་ཐོས་མ་རྣམས་ནི་རྫུ་འཕྲུལ་ཆེ་ཕ་རོལ་གྱི་སེམས་ཤེས་པས་ན་བདག་ཅག་གཡོས་པ་ཡང་ཤེས་པ་ཡོད་ན་མི་ནུས་པ་སྙམ། དགའ་མོ་དེ་ལ་ཐབས་ཡོད་དོ། །སྦོམ་དགའ་མོས་ཐབས་གང་ཡིན། དགའ་མོ་ཚུར་ཤོག །བདག་གིས་
གནས་བརྟན་དག་ཆོས་གོས་དང་ཟས་དང་ཡོ་བྱད་དག་གིས་བསྟབས་པར་བྱ། དགེ་སློང་མ་རྣམས་ནི་ཉེ་བར་བཅར་ལ་ལྷུང་བཟེད་དང་ཆོས་གོས་ལ་སོགས་པ་དང་། ཀླག་པ་དང་། ཁ་ཏོན་དང་། ཡིད་ལ་བྱེད་པ་རྣམས་ཀྱིས་བསྡུ་ཞིང་དབང་དུ་དགུག་གོ། །སྦོམ་དགའ་མོ་ཐབས་དེ་ནི་
རུང་ངོ་ཞེས་ཏེ། དེ་དག་སྦྱོར་བ་ལས་དགེ་སློང་མ་དག་གིས་ཚོར་ནས། དེར་གྱུར་པ་སྟོན་པ་ལ་གསོལ་ནས་ཚིག་འཇམ་པོས་བསྒོ་ཤིག་ཅེས་བྱ་བ་ནས། གསོལ་བཞིའི་ལས་ཀྱིས་བསྒོ་བ་དང་། འདི་ནི་བདེན་གྱི་གཞན་ནི་གཏི་མུག་གོ་ཞེས་དོན་དེ་ཉིད་ལ་མཐུ་བསྐྱེད་དེ་མངོན་དུ་བཟུང་
སྟེ་འདུག་གོ། །དེའི་གྲོགས་མོ་རྗེས་སུ་ཕྱོགས་པ་དགའ་མོ་དང་བསྙེན་དགའ་མོ་དང་གཙུག་དགའ་མོ་དག་གིས་སྨྲས་པ། འཕགས་མ་ཁྱེད་ཀྱིས་དགེ་ཡང་རུང་སྡིག་ཀྱང་རུང་དགེ་སློང་མ་འདི་ལ་ཅང་མ་ཟེར་ཅིག །དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བའོ། །དགེ་སློང་མ་འདི་ནི་ཆོས་དང་འདུལ་བ་

བཟུང་ནས་རབ་ཏུ་འཛིན་ཅིང་སྤྱོད་པའོ། །དགེ་སློང་མ་འདི་ཤེས་བཞིན་དུ་སྨྲའི་མི་ཤེས་པར་མ་ཡིན་ནོ། །དགེ་སློང་མ་འདི་གང་ལ་དད་ཅིང་བཟོད་པ་དག་ཀྱང་དེ་ལ་དད་ཅིང་བཟོད་དོ་ཞེས་བྱ་བ་དང་། དེ་ལྟར་གྱུར་པ་སྟོན་པ་ལ་གསོལ་ནས་བཀའ་སྩལ་པ། དགེ་སློང་མ་ཁྱོད་ཀྱིས་དགའ་མོ་དང་བསྙེན་
དགའ་མོ་དང་གཙུག་དགའ་མོ་དག་ཚིག་འཇམ་པོས་བསྒོ་ཤིག་ཅེས་བྱ་བ་ནས། བསླབ་པ་བཅས་སོ་ཞེས་བྱ་བའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་འདུན་ལ་དབྱེ་བའི་ཕྱིར་ཞུགས་ཏེ། དབྱེ་བར་བྱ་བའི་ཕྱིར་རྩོད་པ་ཡང་དག་པར་རབ་ཏུ་བཟུང་ནས་རབ་ཏུ་འཛིན་ཅིང་འདུག་ན།
དགེ་སློང་མ་དེ་ལ། དགེ་སློང་མ་རྣམས་ཀྱིས་འཕགས་མ་ཁྱོད་དགེ་སློང་མའི་དགེ་འདུན་མཐུན་པ་ལ་དབྱེ་བའི་ཕྱིར་མ་འཇུག་ཅིག། དབྱེ་བར་བྱ་བའི་ཕྱིར་རྩོད་པ་ཡང་དག་པར་བཟུང་ནས་རབ་ཏུ་འཛིན་ཅིང་མ་འཇུག་ཅིག །འཕགས་མ་དགེ་སློང་མའི་དགེ་འདུན་དང་ལྷན་ཅིག་མཐུན་པ་དང་། དགེ་
སློང་མའི་དགེ་འདུན་དང་མཐུན་པ་དང་། དགེ་སློང་མའི་དགེ་འདུན་དང་སྡུམ་པ་དང་། མི་ཕྱེད་པ་དང་། ཀུན་དགའ་བ་དང་། མི་རྩོད་པ་དང་། རྩེ་གཅིག་པ་དང་། འདོན་པ་མཚུངས་པ་དང་། ཆུ་དང་འོ་མ་གཅིག་ཏུ་འདྲེས་པ་བཞིན་དུ་སྟོན་པའི་བསྟན་པ་རྒྱས་པར་བྱ་བའི་ཕྱིར་བདེ་བ་ལ་རེག་
པར་གནས་པར་གྱིས་ཤིག །འཕགས་མ་ཁྱོད་ཀྱིས་དགེ་འདུན་དབྱེ་བར་བྱ་བའི་དངོས་པོ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས་གལ་ཏེ་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་དངོས་པོ་དེ་སྤང་བར་བྱ་བའི་ཕྱིར་ལན་
གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། །ཡང་དག་པར་བསྟན་པ་ལས་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་ཆོས་འདི་ལ་ལན་གཉིས་ལན་གསུམ་དུ་དབྱུང་བར་བྱ་སྟེ་དགེ་འདུན་ལྷག་
མའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །མཐུན་ཞེས་བྱ་བ་ནི་ཡིད་གཅིག་པའོ། །དབྱེ་ཞེས་བྱ་བ་ནི་གཉིས་སུ་འབྱེད་པའོ། །ཞུགས་ཞེས་བྱ་བ་ནི་ཕྱིར་བརྟུན་པའོ། །དབྱེ་བར་བྱ་བའི་ཕྱིར་

ཞེས་བྱ་བ་ནི་དབྱེ་བར་བྱ་བའི་དངོས་པོ་བཅུ་བཞི་ལས་གང་ཡང་རུང་སྟེ། ལེགས་པར་ཤིན་ཏུ་བཟུང་བའོ། །རྩོད་པ་ཞེས་བྱ་བ་ནི་བཞི་སྟེ། འཁྲུག་པས་རྩོད་པ་དང་། མི་སྟོན་པས་རྩོད་པ་དང་། ལྟུང་བའི་རྩོད་པ་དང་། བྱ་བའི་རྩོད་པའོ། །འདི་སྐད་བསྒོ་
ཤིག་ཅེས་བྱ་བ་ནི་ཚིག་འཇམ་པོས་སོ། །གཞན་ནི་སྔར་བཤད་པ་བཞིན་ནོ། །ལྷག་མ་བཅུ་བདུན་པ་རྫོགས་སོ།། །།དེ་ནས་སྟོན་པ་གདན་དེ་ལ་བཞུགས་བཞིན་དུ་ཉན་ཐོས་མ་རྣམས་ལ་བསླབ་པའི་གནས་བཅའ་བར་དགོངས་ནས་དགེ་སློང་མ་དག་ལ་གསུངས་པ། དགེ་སློང་མའི་དགེ་
འདུན་ལ་བྱ་བ་ཅུང་ཟད་ཅིག་ཡོད་ཀྱིས་མ་ལྡང་ཞིག །དགེ་སློང་མ་དེ་ལ་གྲོགས་དགེ་སློང་མའི་རྗེས་སུ་ཕྱོགས་པ། དབྱེན་དུ་སྨྲ་བ་གཅིག་གམ། གཉིས་སམ་མང་པོའང་རུང་སྟེ། གལ་ཏེ་དེ་དག་དགེ་སློང་མ་རྣམས་ལ་དགེ་སློང་མ་ཁྱེད་ལ་དགེ་སློང་མ་ལ་དགེ་ཡང་རུང་སྡིག་ཀྱང་རུང་ཅུང་ཟད་ཀྱང་མ་
ཟེར་ཅིག །དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་སྨྲ་བའོ། །འདུལ་བ་སྨྲ་བའོ། །དགེ་སློང་མ་འདི་ནི་ཆོས་དང་འདུལ་བ་ཡང་དག་པར་བཟུང་ནས་རབ་ཏུ་འཛིན་ཅིང་སྤྱོད་པའོ། །དགེ་སློང་མ་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་ཏེ། དགེ་སློང་མ་འདི་གང་ལ་དད་ཅིང་བཟོད་པ་
བདག་ཅག་ཀྱང་དེ་ལ་བཟོད་དོ་ཞེས་དེ་སྐད་ཟེར་ན་དགེ་སློང་མ་དེ་ལ་དགེ་སློང་མ་རྣམས་ཀྱིས་དགེ་སློང་མ་ཁྱོད་དགེ་སློང་མ་གང་དགེ་སློང་མའི་དགེ་འདུན་མཐུན་པ་ལ་དབྱེ་བར་ཞུགས་ཏེ། དབྱེ་བར་བྱ་བའི་ཕྱིར་རྩོད་པ་ཡང་དག་པར་བཟུང་ནས་རབ་ཏུ་འཛིན་ཅིང་འདུག་པར་ཤེས་བཞིན་དུ་དེའི་གྲོགས་སུ་འགྱུར་ཏེ།
རྗེས་སུ་ཕྱོགས་ནས་དབྱེན་དུ་སྨྲ་བར་བྱེད་དེ། དགེ་སློང་མ་རྣམས་ལ་དགེ་སློང་མ་འདི་ནི་ཆོས་སྨྲའོ། །འདུལ་བ་སྨྲའོ། །དགེ་སློང་མ་འདི་ནི་ཆོས་དང་འདུལ་བ་ཡང་དག་པར་བཟུང་ནས་རབ་ཏུ་འཛིན་ཅིང་སྤྱོད་པའོ། །དགེ་སློང་མ་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་ཏེ། དགེ་
སློང་མ་འདི་གང་ལ་དད་ཅིང་བཟོད་པ་དེ་ལ་བདག་ཅག་ཀྱང་དད་ཅིང་བཟོད་དོ་ཞེས་དེ་སྐད་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་མ་འདི་ནི་ཆོས་མ་ཡིན་པར་སྨྲའོ། །དགེ་སློང་མ་འདི་ནི་ཆོས་མ་ཡིན་པ་འདུལ་བ་མ་ཡིན་པ་ཡང་དག་པར་བཟུང་ནས་རབ་ཏུ་འཛིན་ཅིང་སྤྱོད་པའོ། །དགེ་སློང་མ་

འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་གྱིས། དགེ་སློང་མ་འདི་གང་ལ་དད་ཅིང་བཟོད་པ་དེ་ལ་ཁྱེད་དད་ཅིང་བཟོད་པར་མ་བྱེད་པར་ཁྱེད་དགེ་འདུན་དང་མཐུན་པ་དང་། འདུམ་པ་དང་། མི་ཕྱེད་པ་དང་། མི་རྩོད་པ་དང་། རྩེ་གཅིག་པ་དང་། འདོན་པ་མཚུངས་པ་དང་། ཆུ་དང་འོ་མ་
གཅིག་ཏུ་འདྲེས་པ་བཞིན་སྟོན་པའི་བསྟན་པ་རྒྱས་པར་བྱ་བའི་ཕྱིར་བདེ་བ་ལ་རེག་པར་གནས་པར་གྱིས་ཤིག །དགེ་སློང་མ་ཁྱེད་དགེ་འདུན་དབྱེ་བ་འདི་འདྲ་བ་རྗེས་སུ་ཕྱོགས་ནས་དབྱེན་དུ་སྨྲ་བ་ཐོང་ཤིག་ཅེས་དེ་སྐད་བསྒོ་ཤིག །དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས། གལ་ཏེ་
དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་དངོས་པོ་དེ་སྤོང་བར་བྱེད་པའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ་ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། །ཡང་དག་པར་བསྟན་པ་ལས། གལ་ཏེ་དངོས་པོ་དེ་གཏོང་ན་ནི་ལེགས།
གལ་ཏེ་མི་གཏོང་ན་ཆོས་འདི་ཡང་ལན་གསུམ་པ་དབྱུང་བར་བྱ་སྟེ། དགེ་འདུན་གྱི་ལྷག་མའོ། །དགེ་སློང་མ་དེའི་ཞེས་བྱ་བ་ནི་སྦོམ་དགའ་མོའོ། །གྲོགས་དགེ་སློང་མ་ཞེས་བྱ་བ་ནི་དགའ་མོ་དང་། བསྙེན་དགའ་མོ་དང་གཙུག་དགའ་མོའོ། །རྗེས་སུ་ཕྱོགས་ཞེས་བྱ་བ་ནི་གཅིག་ཏུ་དད་ཅིང་གཅིག་
ཏུ་སྦྱོར་བའོ། །དབྱེན་དུ་སྨྲ་ཞེས་བྱ་བ་ནི་དབྱེ་བར་སྨྲ་བའོ། །གཅིག་གམ་གཉིས་སམ་མང་པོ་ཞེས་བྱ་བ་ནི་གཉིས་ཡན་ཆད་མང་པོའོ། །དགེ་སློང་མ་དག་ཅེས་བྱ་བ་ནི་ཆོས་འདི་ལ་ཞུགས་པའོ། །དེ་སྐད་ཅེས་བྱ་བ་ནི་སྨྲ་བའོ། །དགེ་སློང་མ་ཁྱེད་ཀྱིས་དགེ་སློང་མ་འདི་ལ་ཅང་མ་ཟེར་ཅིག་
ཅེས་བྱ་བ་ནི་སྦོམ་དགའ་མོ་ལའོ། །དགེ་འམ་སྡིག་པ་ཡང་རུང་ཞེས་བྱ་བ་ནི་དགེ་བ་ལ་འཇུག་པར་མི་བྱ་ཞིང་། སྡིག་པ་ལས་བཟློག་མི་དགོས་ཞེས་ཟེར་བའོ། །དགེ་སློང་མ་འདི་ནི་ཆོས་སྨྲ་བ་འདུལ་བ་སྨྲ་བའོ་ཞེས་བྱ་བ་ནི་ཆོས་དང་འདུལ་བ་དང་སྟོན་པའི་བསྟན་པ་བཞིན་དུ་སྨྲ་བའོ། །དགེ་སློང་མ་
འདི་ཞེས་བྱ་བ་ནི་སྦོམ་དགའ་མོའོ། །གང་ལ་དད་ཅིང་བཟོད་པ་དེ་ལ་བདག་ཅག་ཀྱང་དད་ཅིང་བཟོད་དོ་ཞེས་བྱ་བ་ནི་དངོས་སུ་ཟད་དོ། །གཞན་ནི་གོང་དུ་བཤད་ཟིན་པ་དང་འདྲའོ། །ལྷག་མ་བཅོ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་

སྲིན་བུའི་རི་ཞེས་བྱ་བ་ན་དགེ་སློང་མ་བཅུ་གཉིས་སྡེ། དགའ་མོ་དང་། བསྙེན་དགའ་མོ་དང་། སྦོམ་དགའ་མོ་ལ་སོགས་པ་འཁོར་དེ་དག་ཀྱང་ཁྱིམ་སུན་འབྱིན་པའི་ཆོས་ཀུན་ཏུ་སྦྱོར་ཏེ། སྐྱེས་པ་དང་སྟེག །གད་རྒྱངས་བྱེད། སྟན་གཅིག་ལ་འདུག །སྣོད་
གཅིག་གི་ནང་དུ་ཟ། ཕོར་བུ་གཅིག་གི་ནང་ན་ཆང་སྣ་མང་པོ་འཐུང་། གར་བྱེད་གླུ་ལེན། ལེན་དུ་འཇུག་རོལ་མོ་མཁས་པ་རྣམས་ལ་བྱ་དགའ་སྦྱིན། གོས་བརྫེ། བང་རྒྱུག །གླང་པོ་ཆེ་ལ་སོགས་པ་སྟེ་བྱོལ་སོང་སྣ་ཚོགས་ཀྱི་སྐད་འབྱིན། དེ་དག་འཐབ་པ་ལྟར་ཡང་བྱེད། བྱེད་
དུ་འཇུག་སྟེ། དགེ་སྦྱོང་གི་ལས་མ་ཡིན་པ་འདི་དག་དང་གཞན་དག་ཀྱང་བྱེད་ཅིང་བྱེད་དུ་འཇུག་པས་སྲིན་བུའི་རི་དེར་དགེ་སློང་མ་མ་འོངས་པ་རྣམས་ནི་མི་འོང་། འོངས་པ་རྣམས་ཀྱང་དགེ་སློང་མ་སྡིག་ཅན་གྱི་གནས་སོ་ཞེས་སྤོང་ངོ་། །དེ་ནས་དགེ་སློང་མ་མང་ཞིག་ལྗོངས་རྒྱུ་ཞིང་དོང་བ་
ལས་སྲིན་བུའི་རིར་ཕྱིན་ཏེ། དེ་དག་སྔ་དྲོ་སྲིན་བུའི་རིར་བསོད་སྙོམས་ལ་ཞུགས་པ་དང་། དེ་དག་ཇི་ལྟར་ལྷུང་བཟེད་བཀྲུས་པ་བཞིན་དུ་སླར་བྱུང་སྟེ། བསོད་སྙོམས་ཅུང་ཟད་ཀྱང་མ་རྙེད་ནས་དེ་དག་གིས་བསམས་པ། སྲིན་བུའི་རི་འདིར་སྔོན་འབྱོར་པ་རྒྱས་པ་སྐྱེ་བོ་མང་པོས་གང་སྟེ་བསོད་
སྙོམས་ཀྱང་རྙེད་ན་ད་ནི་བདག་ཅག་ལྷུང་བཟེད་སྟོང་པར་སླར་ལོག་ལ་སྟོན་པའི་ཉན་ཐོས་བྱིས་པ་ལྟ་བུ་མི་གསལ་བ་མི་མཁས་པ་དག་གིས་རིགས་ཀྱི་སྐྱེས་པ་དང་བུས་པ་དག་ལ་ཁ་ངན་མང་དུ་སྨྲས་གྲང་སྙམ་མོ། །དེའི་ཚེ་ན་སྲིན་བུའི་རིའི་བྲམ་ཟེ་དང་ཁྱིམ་བདག་མང་པོ་དག་གནས་བཟང་པོ་ཞིག་ན་དོན་
ཞིག་གི་ཕྱིར་འདུས་ཤིང་འཁོད་དོ། །དེའི་ཚེ་ན་དགེ་བསྙེན་ཆུར་འཇུག་ཅན་ཞེས་བྱ་བ་དེས་དགེ་སློང་མ་མང་པོས་བསོད་སྙོམས་མ་རྙེད་པ་མཐོང་ནས་དེ་དག་ལ་ཇི་ལྟ་བུར་གྱུར་པ་སྨྲས་སོ། །འཕགས་མ་དག་བདག་ལ་རྗེས་སུ་བརྩེ་བའི་ཕྱིར་མཉན་དུ་ཡོད་པར་བཞུད་ལ་ཇི་ལྟར་གྱུར་པ་སྟོན་པ་ལ་གསོལ་
ཅིག་ཅེས་བྱ་བ་དང་། དགེ་སློང་མ་དག་གིས་ཀྱང་དེ་བཞིན་དུ་ཁས་བླངས་སོ། །དེ་ནས་དགེ་སློང་མ་རྣམས་དགེ་བསྙེན་དེས་བཟའ་བ་དང་། བཅའ་བས་ཚིམ་པར་བྱས་ནས་སྟན་ལས་ལངས་ཏེ་དོང་ངོ་། །དེ་ནས་མཉན་དུ་ཡོད་པར་ཕྱིན་པ་དང་། ཇི་ལྟར་གྱུར་པ་དགེ་སློང་མ་དག་ལ་སྨྲས་པ་

དང་། སྔ་མ་བཞིན་དུ་སྟོན་པ་ལ་གསོལ་པ་དང་། བཀའ་སྩལ་པ། སྐྱེ་དགུའི་བདག་མོ་དགེ་སློང་མ་ལྔ་བརྒྱ་དང་སོང་ལ་དེ་དག་བསྐྲད་པའི་ལས་གྱིས་ཤིག་ཅེས་བཀའ་སྩལ་ནས། དེ་དག་ཀྱང་སྟོན་པས་གསུངས་པ་བཞིན་དུ་ལམ་གྱི་བར་དུ་འཁོད་ཅིང་གླེང་བ་པོ་ཆོས་ལྔ་དང་ལྡན་པ་བསྐོས་ཏེ།
འཁོར་ལྔ་བརྒྱ་དང་སྲིན་བུའི་རིར་ཕྱིན་པ་དང་། བཅུ་གཉིས་སྡེས་སྐྱེ་དགུའི་བདག་མོ་ལ་སོགས་པ་བདག་ཅག་ལ་བསྐྲད་པའི་ལས་བྱེད་དུའང་ཞེས་ཐོས་ནས་བཟང་མོ་དང་། མཛེས་མ་དང་། རྒྱལ་མཐའ་དག་གིས་བསམས་པ་སྐྱེ་དགུའི་བདག་མོས་དེ་དག་ལ་བསྐྲད་པའི་ལས་བྱས་ན་བདག་ཅག་ལའང་
བྱེད་དུ་འོང་ངོ་སྙམ་ནས་ནུབ་ཕྱོགས་ཀྱི་སྒོར་བྱུང་སྟེ། མཉན་དུ་ཡོད་པར་ཕྱིན་པ་དང་། དེ་དག་གིས་བཤགས་པ་དང་བསྡམ་པར་བྱ་བ་རྣམས་བྱས་ནས་དགེ་སློང་མ་རང་བཞིན་དུ་གནས་པ་དང་ལྷན་གཅིག་ཏུ་གནས་སོ། །དེ་ནས་སྐྱེ་དགུའི་བདག་མོ་ཆེན་མོ་འཁོར་དང་བཅས་པས་དེ་དག་བསྐྲད་པའི་ལས་བྱས་
ནས་དེ་དག་སླར་ལོག་སྟེ། མཉན་དུ་ཡོད་པར་ཕྱིན་པ་དང་། ཇི་ལྟར་གྱུར་པ་སྟོན་པ་ལ་གསོལ་ནས་སོང་ངོ་། །དེ་ནས་དགེ་སློང་མ་དགའ་མོ་ལ་སོགས་པས་བསམས་པ་གང་ས་ཉིད་ལས་གྲེད་པ་དེ་ནི་ས་ཉིད་ལ་བརྟེན་ཏེ་ལྡང་ངོ་། །བདག་ཅག་ཀྱང་སྟོན་པ་དང་དགེ་སློང་མའི་དགེ་འདུན་ལ་བཟོད་པར་
གསོལ་ལོ་ཞེས་མཉན་དུ་ཡོད་པར་དོང་སྟེ་ཕྱིན་པ་དང་སྟོན་པས་བཀའ་སྩལ་པ་བཞིན་དུ་དགེ་སློང་མ་དག་ཀྱང་ཁྱིམ་སུན་འབྱིན་པའི་དགེ་སློང་མ་དག་གིས་ཕྱག་བྱས་པ་དང་། གཏམ་ཡང་མི་ཟེར་ཕྱག་ལན་ཡང་མི་སྟེར་ནས་དེ་དག་མཛེས་དགའ་མོ་དག་དང་ཕྲད་ན་ཡང་སྔ་མ་བཞིན་དུ་གཏམ་དང་ཕྱག་
ལན་མི་སྟེར་བ་དང་། དེ་དག་གིས་སྨྲས་པ་གཞན་དག་གིས་བདག་ཅག་ལ་མི་སྨྲ་བ་ནི་ཡུས་ན། མཛེས་དགའ་མོ་དང་བདག་ཅག་གིས་ཁྱིམ་སུན་འབྱིན་པའི་ལས་བྱས་པར་འདྲ་ན་ཁྱེད་ཅག་ཅིའི་ཕྱིར་བདག་ཅག་ལ་མི་སྨྲ་དེ་དག་གིས་སྨྲས་པ་ཁྱེད་ཟེར་བ་ཡང་བདེན་མོད་ཀྱིས། ངེད་ཀྱིས་ཉེས་པ་
བཤགས་ཟིན་པས་ན་གནས་ངན་ལེན་ཁྱེད་དང་ལྷན་ཅིག་མི་སྤྱད་དོ་ཞེས་བྱ་བ་དང་། དེ་དག་གིས་སྨྲས་པ་འདི་ན་དགེ་སློང་མ་ཁ་ཅིག་ནི་འདོད་པ་དང་། ཞེ་སྡང་དང་། གཏི་མུག་དང་འཇིགས་པས་འགྲོ་སྟེ། ཉེས་པ་འདྲ་བ་ལས་ཁ་ཅིག་ནི་བསྐྲད་ཁ་ཅིག་ནི་མ་བསྐྲད་ཅེས་བྱ་བ་དང་། དེ་ལྟར་

གྱུར་པ་སྟོན་པ་ལ་གསོལ་ནས། ཚིག་འཇམ་པོས་བསྒོ་ཤིག་ཅེས་བྱ་བ་ནས་བསླབ་པའི་གནས་བཅས་སོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་མ་གང་ཞིག་གྲོང་ངམ་གྲོང་རྡལ་ཞིག་ན་གནས་ཤིང་འཁོད་པ་དེ་དག་ཀྱང་རིགས་སུན་པ་དང་། སྡིག་པའི་ཆོས་ཀུན་ཏུ་
སྤྱོད་དེ། དེ་དག་རིགས་སུན་པར་སྣང་ངམ་ཐོས་སམ་རབ་ཏུ་ཤེས་སམ་དེ་དག་གིས་སྡིག་པའི་ཆོས་ཀྱང་ཀུན་ཏུ་སྤྱོད་པར་སྣང་ངམ་ཐོས་སམ་རབ་ཏུ་ཤེས་ན་དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དགེ་སློང་མ་ཁྱེད་རིགས་སུན་པ་དང་། སྡིག་པའི་ཆོས་ཀུན་དུ་སྤྱོད་དེ། ཁྱེད་ཀྱིས་རིགས་སུན་པར་སྣང་
ངོ་། །ཐོས་སོ། །རབ་ཏུ་ཤེས་སོ། །ཁྱེད་ཀྱིས་སྡིག་པའང་ཀུན་ཏུ་སྤྱོད་པར་སྣང་ངོ་ཐོས་སོ་རབ་ཏུ་ཤེས་སོ། །དགེ་སློང་མ་ཁྱེད་འདི་ན་གནས་པས་ཆོག་གིས་གནས་འདི་ནས་དེང་ཤིག་ཅེས་དེ་སྐད་བསྒོ་བར་བྱའོ། །གལ་ཏེ་དེ་དག་དགེ་སློང་མ་རྣམས་ལ་འདི་ན་དགེ་སློང་མ་ཁ་ཅིག་ནི་འདོད་པས་འགྲོའོ། །
ཞེ་སྡང་གིས་འགྲོའོ། །གཏི་མུག་གིས་འགྲོའོ། །འཇིག་པས་འགྲོ་སྟེ། ལྟུང་བ་བྱུང་བར་འདྲ་བ་ལས་དགེ་སློང་མ་ཁ་ཅིག་ནི་བསྐྲད། ཁ་ཅིག་ནི་མ་བསྐྲད་དོ་ཞེས་དེ་སྐད་ཟེར་ན། དགེ་སློང་མ་དེ་དག་ལ་དགེ་སློང་མ་རྣམས་ཀྱིས་དགེ་སློང་མ་ཁྱེད་འདི་ན་དགེ་སློང་མ་ཁ་ཅིག་ནི་འདོད་པས་
འགྲོའོ། །ཞེ་སྡང་གིས་འགྲོའོ། །གཏི་མུག་གིས་འགྲོའོ། །འཇིགས་པས་འགྲོ་སྟེ། ལྟུང་བ་བྱུང་བ་འདྲ་བ་ལས་དགེ་སློང་མ་ཁ་ཅིག་ནི་བསྐྲད། ཁ་ཅིག་ནི་མ་བསྐྲད་ཅེས་དེ་སྐད་ཅེས་མ་ཟེར་ཅིག །དགེ་སློང་མ་ཁྱེད་རིགས་སུན་པ་དང་སྡིག་པའི་ཆོས་ཀུན་ཏུ་སྤྱོད་དེ། ཁྱེད་ཀྱིས་རིགས་སུན་པར་
སྣང་ངོ་། །ཐོས་སོ་རབ་ཏུ་ཤེས་སོ། །སྡིག་པ་ཡང་ཀུན་ཏུ་སྤྱོད་པར་སྣང་ངོ་ཐོས་སོ་རབ་ཏུ་ཤེས་སོ། །དགེ་སློང་མ་འདོད་པས་འགྲོའོ་ཞེས་བྱ་བའི་ཚིག་གི་ལམ་དང་། ཞེ་སྡང་གིས་འགྲོའོ་ཞེས་བྱ་བའི་ཚིག་གི་ལམ་དང་། གཏི་མུག་གིས་འགྲོའོ་འཇིགས་པས་འགྲོའོ་ཞེས་བྱ་བའི་ཚིག་གི་ལམ་
དེ་ལྟ་བུ་འདི་ཐོང་ཤིག་ཅེས་བསྒོ་བར་བྱའོ། །དེ་དག་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས། གལ་ཏེ་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་དངོས་པོ་དེ་སྤང་བར་བྱ་བའི་ཕྱིར་དེ་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་

པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ་ཡང་དག་པར་བསྟན་ནས་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་ནི་ཆོས་འདི་ཡང་ལན་གསུམ་དུ་དབྱུང་བར་བྱ་སྟེ་དགེ་འདུན་ལྷག་མའོ། །དགེ་སློང་མ་མང་ཞིག་ཅེས་བྱ་བ་ནི་གཉིས་ལས་ལྷག་པ་ནི་མང་བའོ། །གྲོང་
ངམ་གོང་རྡལ་ཞིག་ན་གནས་ཤིང་འཁོད་ན་ཞེས་བྱ་བ་ནི་སྲིན་བུའི་རིའོ། །དེ་དག་ཀྱང་རིགས་སུན་པར་ཞེས་བྱ་བ་ནི་རྣམ་པ་གཉིས་ཀྱི་ཕྱིར་རིགས་སུན་པ་ཞེས་བྱ་སྟེ། གནས་དང་ལོངས་སྤྱོད་གཅིག་པའོ། །གནས་པ་གང་ཞེ་ན། སྐྱེས་པ་དང་ལྷན་ཅིག་སྟེག་པ། རྩེན་པ། གད་རྒྱངས་
བྱེད་པ་ཡིན་ཏེ། དེ་ལྟར་ན་གནས་པའོ། །ལོངས་སྤྱོད་གཅིག་པ་གང་ཞེ་ན། ཟང་ཟིང་དང་མེ་ཏོག་དང་འབྲས་བུ་དང་ལོ་ཤིང་ལ་སོགས་པ་སྟེ། དེ་ལྟར་ན་ལྷན་ཅིག་སྤྱོད་པའོ། །སྡིག་པའི་ཆོས་ཀུན་དུ་སྤྱོད་ཅེས་བྱ་བ་ནི་ཁ་ན་མ་ཐོ་བའི་ཆོས་ཀུན་དུ་སྤྱོད་པའོ། །དེ་དག་གིས་རིགས་
སུན་པར་ཀུན་དུ་སྣང་ཞེས་བྱ་བ་ནི་མིག་གིས་སོ། །ཐོས་སོ་ཞེས་བྱ་བ་ནི་རྣ་བས་སོ། །རབ་ཏུ་ཤེས་ཞེས་བྱ་བ་ནི་ཡིད་ཀྱིས་སོ། །སྡིག་པའི་ཆོས་ཀུན་དུ་སྤྱོད་པར་སྣང་ངོ་། །ཐོས་སོ་རབ་ཏུ་ཤེས་སོ་ཞེས་པ་ནི་སྔ་མ་བཞིན་ནོ། །དགེ་སློང་མ་དེ་དག་ལ་ཞེས་བྱ་བ་ནི་དགའ་མོ་ལ་སོགས་
པའོ། །དགེ་སློང་མ་རྣམས་ཞེས་བྱ་བ་འདི་ཆོས་འདི་ལ་ཞུགས་པའོ། །འདི་སྐད་ཅེས་བྱ་བ་ནི་ཚིག་འཇམ་པོས་སོ། །གཞན་ནི་སྔ་མ་བཞིན་ནོ། །ལྷག་མ་བཅུ་དགུ་པ་རྫ