Luận tạng Tây Tạng (Tengyur) — Tập 156

ོས་གོས་ཕྲོགས་ཏེ་གོས་དཀར་པོ་བསྐོན་ནས་རྒྱལ་པོ་མ་སྐྱེས་དགྲའི་བཙུན་མོའི་ནང་དུ་བཞག་གོ། །རྒྱལ་པོ་
བཟང་མོ་དེའི་གཟུགས་མཐོང་མ་ཐག་ཏུ་འདོད་ཆགས་ཀྱིས་གཟིར་ཏེ། རྒྱལ་པོ་མ་སྐྱེས་དགྲས་ནན་གྱིས་མཐུས་བཟུང་བ་དང་། དེ་ཡང་སྡུག་བསྔལ་ཞིང་མི་བདེ་བས་གཟིར་བར་གྱུར་ཏོ། །དེའི་ཚེ་གཽ་ཏ་མི་སྐྱེ་དགུའི་བདག་མོ་ཆེན་མོ་བཅྭ་ལྔའི་གསོ་སྦྱོང་གི་ཚེ། དགེ་སློང་མའི་
དགེ་འདུན་འདུས་ཤིང་འཁོད་པའི་མདུན་དུ་འདུག་གོ། །དེ་ནས་གཽ་ཏ་མི་སྐྱེ་དགུའི་བདག་མོ་ཆེན་མོས་དགེ་སློང་མའི་དགེ་འདུན་གྱི་ནང་ན་དགེ་སློང་མ་གང་མ་འོངས་ཞེས་ཀུན་ལས་བལྟས་ཏེ་བརྟགས་ན། སེར་སྐྱ་བཟང་མོ་བཙུན་མོའི་ནང་དུ་ཆུད་དེ་སྡུག་བསྔལ་བ་དང་དོགས་པ་དང་
གནོད་པར་གྱུར་པར་མཐོང་ནས་དགེ་སློང་མ་དག་ལ་སེར་སྐྱ་བཟང་མོ་མི་སྣང་ངོ་ཞེས་སྨྲས་སོ། །དེ་ནས་གཽ་ཏ་མི་སྐྱེ་དགུའི་བདག་མོ་ཆེན་མོས། ཨུཏྤ་ལའི་ཁ་དོག་མ་ལ་ཨུཏྤ་ལའི་ཁ་དོག་མ་སེར་སྐྱ་བཟང་མོ་དེ་ལ་སོམས་ཤིག་ཅེས་སྨྲས་སོ། །དེ་སྐད་ཅེས་བསྒོ་བ་དང་།

ཨུཏྤ་ལའི་ཁ་དོག་མ་འདི་ལྟ་སྟེ། སྐྱེས་བུ་མཐུ་བོ་ཆེ་དེའི་དཔུང་པ་བསྐུམ་པ་ལས་བརྐྱང་བརྐྱང་བ་ལས་བསྐུམ་པ་ཙམ་གྱིས་དགེ་སློང་མ་ཨུཏྤ་ལའི་ཁ་དོག་ལ་གཽ་ཏ་མི་སྐྱེ་དགུའི་བདག་མོ་ཆེན་མོ་ལས་མཉན་ཏེ། གསོ་སྦྱོང་གི་གནས་ནས་མི་སྣང་བར་གྱུར་ཏེ། རྒྱལ་པོའི་ཁང་བཟངས་ཀྱི་སྟེང་
ན་འདུག་གོ། །ཨུཏྤ་ལའི་ཁ་དོག་མས་སེར་སྐྱ་བཟང་མོ་སྡུག་བསྔལ་ཞིང་དོགས་པས་གནོད་པར་འགྱུར་བ་མཐོང་ངོ་། །མཐོང་ནས་ཀྱང་སེར་སྐྱ་བཟང་མོ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་ཀྱིས་བདུད་ཀྱི་སྡེ་ཐམས་ཅད་ལ་ཚུགས་ན། མུ་སྟེགས་ཅན་དང་ཐུན་མོང་དུ་བཟུང་
བའི་རྫུ་འཕྲུལ་ཙམ་ཡང་མ་ནུས་སམ། དེ་ནས་ཨུཏྤ་ལའི་ཁ་དོག་མས་དེ་ལ་ལུང་བྱིན་ཏེ། ནུབ་མོ་འདི་དང་འདི་ལྟ་བུ་ཡིད་ལ་བྱོས་ཤིག་ཅེས་བསྒོ་བ་དང་། དེས་ལུང་བླངས་ཏེ། ཡིད་ལ་བྱས་པ་དང་། དེས་རྫུ་འཕྲུལ་གྲུབ་ནས་གོས་དཀར་པོ་དང་བཅས་བཞིན་དུ་སྟེང་གི་ནམ་
མཁའ་ལས་བྱུང་སྟེ་སོང་ངོ་། །ཨུཏྤ་ལའི་ཁ་དོག་མས་བཟང་མོ་ཁྲིད་ནས་གསོ་སྦྱོང་གི་གནས་སུ་འོངས་པ་དང་། དགེ་སློང་མ་བཅུ་གཉིས་སྡེ་མོས་བཟང་མོ་མཐོང་བ་དང་། འཕྱ་ཞིང་སྨོད་དོ། །བདག་ཅག་བཙུན་མོ་དང་ལྷན་ཅིག་ཏུ་གསོ་སྦྱོང་མི་བྱའོ་ཞེས་སྨྲས་སོ། །གཽ་ཏ་མི་
སྐྱེ་དགུའི་བདག་མོ་ཆེན་མོས་དེ་ལ་བུ་མོ་རྒྱལ་པོ་ལ་གསོལ་ཏེ། ཆོས་གོས་གྱོན་ལ་ཤོག་ཤིག་ཅེས་སྨྲས་པ་དང་། བཟང་མོ་སྟེང་གི་ནམ་མཁའ་ལ་བྱུང་ནས་རྒྱལ་པོའི་ཁྱིམ་ག་ལ་བ་དེར་སོང་བ་དང་། རྒྱལ་པོ་གཉིད་ཀྱིས་ལོག་པར་མཐོང་ངོ་། །དེ་ནམ་མཁའ་ལ་འདུག་ནས་སེ་གོལ་གྱི་
སྒྲས་རྒྱལ་པོ་སད་པར་བྱས་སོ། །རྒྱལ་པོས་དེ་མཐོང་བ་དང་འཇིགས་སྐྲག་སྟེ། བ་སྤུ་བུ་ག་ནས་ལངས་བཞིན་དུ་སྨྲས་པ་ཁྱོད་ཅི་ལྷ་མོའམ། གནོད་སྦྱིན་མོའམ། ཀླུ་མོའམ། དྲི་ཟ་མོའམ། ལྷ་མ་ཡིན་མོའམ། ཅི་ཞེས་སྨྲས་པ་དང་། བཟང་མོས་སྨྲས་པ། བདག་
ལྷ་མོ་ཡང་མ་ཡིན། གནོད་སྦྱིན་མོ་ཡང་མ་ཡིན། ཀླུ་མོ་ཡང་མ་ཡིན། དྲི་ཟ་མོ་ལ་སོགས་པ་གང་ཡང་མ་ཡིན་ཞེས་སྨྲས་པ་དང་། རྒྱལ་པོས་སྨྲས་པ། འོ་ན་ཁྱོད་སུ་ཡིན་ཞེས་སྨྲས་པ་དང་། བཟང་མོས་སྨྲས་པ། བདག་ནི་དགེ་སློང་མ་སྟེ། འཇིག་རྟེན་གྱི་སྟོན་པའི་

ཉན་ཐོས་མའོ། །རྒྱལ་པོས་སྨྲས་པ། ཆོས་གོས་མེད་པ་ལྷུང་བཟེད་མེད། །སྐྲ་མ་བྲེགས་མ་དགེ་སློང་མའི། མཚན་མ་ཆ་ལུགས་ཁྱོད་ལ་མི་སྣང་གི །མྱོས་མེད་སྐྱོན་དེ་གཉིས་འགལ་དོན་མེད་སྨྲོས། །བཟང་མོས་རྒྱལ་པོ་ལ་ཐམས་ཅད་རྒྱས་པར་སྨྲས་སོ། །
ཁྱོད་ཀྱི་མི་སྲུན་བློན་པོས་བདག་གཙེས་ཏེ། །ལྷུང་བཟེད་དང་ནི་ཆོས་གོས་ནན་གྱིས་ཕྲོགས། །གསོ་སྦྱོང་བར་ཆད་བྱ་བར་མི་རིགས་ཏེ། །ཕ་དང་མ་ཡི་ནོར་དེ་བདག་སྩོལ་ཅིག །རྒྱལ་པོས་དེ་ཐོས་པ་དང་བརྒྱལ་ཏེ་ས་ལ་འགྱེལ་ནས་ཆུས་གཏོར་ཏེ་སླར་བསླང་ངོ་། །དེ་ནས་རྒྱལ་
པོའི་རྐང་པ་ལ་གཏུགས་ཏེ་དགའ་བར་བྱས་ནས། ཆོས་གོས་དང་ལྷུང་བཟེད་བྱིན་ནོ། །དེས་ཆོས་གོས་དང་ལྷུང་བཟེད་ཐོགས་ནས། གཽ་ཏ་མི་སྐྱེ་དགུའི་བདག་མོ་ཆེན་མོ་ག་ལ་བ་དེར་སོང་བ་དང་། དེ་ལྟ་བུར་གྱུར་པ་དགེ་སློང་མ་དག་གིས་དགེ་སློང་དག་ལ་སྨྲས་
སོ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། དོན་འདི་དང་། དེ་ལྟ་བུར་གྱུར་པ་འདིའི་ཕྱིར་དགེ་སློང་མའི་དགེ་འདུན་རྣམས་བསྡུས་ཏེ། སེར་སྐྱའི་བཟང་མོ་ལ་སྨྲས་པ། དགེ་སློང་
མ་ཁྱོད་ཀྱིས་འདི་འདྲ་བའི་མི་རིགས་པར་བྱས་པ་བདེན་ནམ། བཙུན་པ་མད་དོ། །དགེ་སློང་མ་ཉམས་སུ་བླངས་སམ། བཙུན་པ་བདག་སྔ་ནས་འདོད་ཆགས་དང་བྲལ་བ་ལགས་ན། ག་ལ་ཞིག་ཉམས་སུ་ལེན། བཀའ་སྩལ་པ། དགེ་སློང་མ་འདི་ལ་ཉེས་པ་མེད་
དོ། །དེ་ལྟ་བུ་བྱུང་ཡང་བཅོམ་ལྡན་འདས་ཀྱིས་དེའི་མོད་ལ། ཉན་ཐོས་མ་རྣམས་ལ་འདུལ་བ་ལ་བསླབ་པའི་གནས་མ་བཅས་མོད་ཀྱི། དེ་ལེགས་པར་བཅུ་གཟིགས་པ་ན་ཉན་ཐོས་མ་རྣམས་ལ་བསླབ་པའི་གནས་བཅས་ཏེ། བཅུ་གང་ཞེ་ན། འདི་ལྟ་སྟེ།
དགེ་འདུན་བསྡུ་བའི་ཕྱིར་དང་། དགེ་འདུན་ལེགས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནོང་མི་བསྐུར་བའི་གང་ཟག་རྣམས་ཚར་བཅད་པའི་ཕྱིར་དང་། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང་། མངོན་པར་

མ་དད་པ་རྣམས་མངོན་པར་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་དད་པར་བྱ་བའི་ཕྱིར་དང་། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང་། ཚེ་རབས་ཕྱི་མའི་ཟག་པ་རྣམས་གཞོམ་པའི་ཕྱིར་དང་། ངའི་ཚངས་པར་སྤྱོད་པ་ཡུན་རིང་དུ་གནས་པར་
འགྱུར་ཞིང་ཇི་ཙམ་དུ་ལྷ་དང་མི་དང་། སྐྱེ་བོ་མོང་པོ་ལ་རྒྱ་ཆེར་ཡང་དག་པར་རབ་ཏུ་བཤད་པའོ། །དེ་ལ་དགེ་འདུན་བསྡུ་པའི་ཕྱིར་ཞེས་བྱ་བ་ནི་རྒྱལ་རིགས་ནས་དམངས་རིགས་ཀྱི་བར་གྱི་རིགས་ཀྱི་བུ་དང་། རིགས་ཀྱི་བུ་མོ་དག་ཀྱང་གཟུད་པའོ། །དགེ་འདུན་ལེགས་
པར་བྱ་བའི་ཕྱིར་ཞེས་བྱ་བ་ནི། ཞུགས་པ་རྣམས་ལེགས་པར་གསུངས་པའི་ཆོས་འདུལ་བ་ལ་བརྟེན་ནས། བདེ་བའི་ཆོས་རྣམས་མངོན་པར་འཕེལ་བའོ། །དགེ་འདུན་བདེ་བར་གནས་པར་བྱ་བའི་ཕྱིར་ཞེས་བྱ་བ་ནི། དགེ་བའི་ཆོས་རྣམས་ལ་བརྟེན་ནས་དད་པས་བྱིན་པ་
ཡོངས་སུ་སྦྱང་བར་བྱའོ། །གནོང་མི་བསྐུར་བའི་གང་ཟག་རྣམས་ཚར་བཅད་པའི་ཕྱིར་ཞེས་བྱ་བ་ནི། ངང་ཚུལ་ངན་པ་ཅན་དང་བསླབ་པ་ལ་མི་སློབ་པའི་གང་ཟག་རྣམས་ནན་ཐུར་གྱི་ལས་ཀྱིས་བསྐྲད་པར་བྱའོ། །ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་ཞེས་
བྱ་བ་ནི་ངོ་ཚ་ཤེས་པ་ནི་སོ་སོའི་སྐྱེ་བོའི་དགེ་བ་རྣམས་ཏེ། དེ་དག་མི་འཐབ་པ་དང་། མཚང་མི་འབྲུ་བ་དང་། མི་རྩོད་པ་དང་། མི་འགྱེད་པ་བྱ་བའོ། །མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་ཞེས་བྱ་བ་ནི་ཁྱིམ་པ་དད་པ་མ་རྙེད་པ་རྣམས་དད་པ་རྙེད་
པར་བྱའོ། །མངོན་པར་དད་པ་རྣམས་ཕྱིར་ཞིང་དད་པར་བྱ་བའི་ཕྱིར་ཞེས་བྱ་བ་ནི། དད་པ་རྙེད་པ་རྣམས་ཀྱིས་སེམས་བསྲུང་བར་བྱའོ། །ཚེ་འདིའི་ཟག་པ་རྣམས་བསྡམ་པའི་ཕྱིར་ཞེས་བྱ་བ་ལ་ཚེ་འདིའི་ཟག་པ་རྣམས་ནི་ཀུན་ནས་དཀྲིས་པ་སྟེ་དེ་སྤང་བར་བྱའོ། །ཚེ་རབས་ཕྱི་
མའི་ཟག་པ་རྣམས་གཞོམ་པའི་ཕྱིར་ཞེས་བྱ་བ་ལ། ཚེ་རབས་ཕྱི་མའི་ཟག་པ་ཞེས་བྱ་བ་ནི་བག་ལ་ཉལ་བ་སྟེ། དེ་སྤང་བར་བྱའོ། །ངའི་ཚངས་པར་སྤྱོད་པ་ཡུན་རིང་དུ་གནས་པར་འགྱུར་ཞིང་ཅི་ཙམ་དུ་ལྷ་དང་མི་དང་སྐྱེ་བོ་མང་པོ་ལ་རྒྱ་ཆེར་ཡང་དག་པར་རབ་ཏུ་

བཤད་པ་ཞེས་བྱ་བ་ནི། སྡེ་སྣོད་གཅིག་ནས་གཅིག་ཏུ་བརྒྱུད་པའི་ཚུལ་གྱིས་བསྟན་པ་ཡུན་རིང་དུ་གནས་པའོ་ཞེས་འདུལ་བ་བསྡུས་པ་ལས་འབྱུང་ངོ་། །རྣལ་འབྱོར་སྤྱོད་པའི་ས་རྣམ་པར་བཤད་པ་བསྡུ་བ་ལས་ནི། དགེ་འདུན་བསྡུ་བའི་ཕྱིར་ཞེས་བྱ་བ་ནི། མདོར་
བསྟན་པའི་ཚིག་ཡིན་ནོ། །དགེ་འདུན་ལེགས་པར་བྱ་བའི་ཕྱིར་ཞེས་བྱ་བ་ནི་འདོད་པའི་བསོད་ཉམས་ཀྱི་རྗེས་སུ་བརྩོན་པའི་མཐའ་རྣམ་པར་སྤང་བའི་ཕྱིར་རོ། །དགེ་འདུན་བདེ་བར་གནས་པར་བྱ་བའི་ཕྱིར་ཞེས་བྱ་བ་ནི། བདག་ཉིད་ངལ་བའི་རྗེས་སུ་བརྩོན་པའི་མཐའ་རྣམ་པར་སྤང་
བའི་ཕྱིར་རོ། །གནོང་མི་བསྐུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་ཞེས་བྱ་བ་ནི་ཚུལ་ཁྲིམས་འཆལ་བ་རྣམས་ལ་ནན་ཏུར་དུ་བྱ་བའི་ཕྱིར་རོ། །ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་ཞེས་བྱ་བ་ནི། ཚུལ་ཁྲིམས་དང་ལྡན་པ་རྣམས་འགྱོད་པ་མེད་པར་བྱ་བའི་
ཕྱིར་རོ། །མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་ཞེས་བྱ་བ་ནི། མ་ཞུགས་པ་རྣམས་གཞུག་པའི་ཕྱིར་རོ། །མངོན་པར་དད་པ་རྣམས་ཕྱིར་ཞིང་དད་པར་བྱ་བའི་ཕྱིར་ཞེས་བྱ་བ་ནི་ཞུགས་པ་རྣམས་ཡོངས་སུ་སྨིན་པར་བྱ་བའི་ཕྱིར་རོ། །ཚེ་འདིའི་ཟག་པ་རྣམས་
བསྡམ་པའི་ཕྱིར་ཞེས་བྱ་བ་ནི་ཉོན་མོངས་པའི་ཀུན་ནས་དཀྲིས་པ་རྣམ་པར་གནོན་པ་དང་རྗེས་སུ་མཐུན་པར་བྱ་བའི་ཕྱིར་རོ། །ཚེ་རབས་ཕྱི་མའི་ཟག་པ་རྣམས་གཞོམ་པའི་ཕྱིར་ཞེས་བྱ་བ་ནི་སྨོན་ནས་ཚངས་པར་སྤྱོད་པ་ལ་གནས་པ་གསལ་བར་བྱ་བའི་ཕྱིར་དང་། ཉོན་མོངས་
པའི་བག་ལ་ཉལ་སྤང་བ་དང་རྗེས་སུ་མཐུན་པར་བྱ་བའི་ཕྱིར་རོ། །ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མི་རྣམས་གྱི་བར་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའི་ཕྱིར་ཞེས་བྱ་བ་ནི་བསྟན་པ་རྒྱུན་མི་འཆད་པར་བྱ་བའི་
ཕྱིར་རོ་ཞེས་བཤད་དོ། །རྣལ་འབྱོར་སྤྱོད་པའི་ས་འདུལ་བ་བསྡུས་པ་ལས་ཀྱང་། དེ་ལ་དགེ་འདུན་བསྡུ་བའི་ཕྱིར་ཞེས་བྱ་བ་ནི། རིགས་བཞི་པོ་དད་པས་ལེགས་པ་ཁོ་ནར་ཁྱིམ་ནས་ཁྱིམ་མེད་པར་རབ་ཏུ་བྱུང་བ་རྣམས་བསྡུ་བ་ལས་བརྩམས་པ་བཞིན་ནོ། །དེ་ལྟར་

རབ་ཏུ་བྱུང་བ་རྣམས་གཞི་དང་བཅས། ངེས་པར་འབྱུང་བ་དང་བཅས། ཕ་རོལ་གནོན་པ་དང་བཅས། ཆོ་འཕྲུལ་དང་བཅས་པའི་ཆོས་བསྟན་པ་རྗེས་སུ་འཇུག་པས་ནི་དགེ་འདུན་ལེགས་པར་འགྱུར་བར་རིག་པར་བྱའོ། །དགེ་འདུན་བདེ་བར་གནས་པར་བྱ་བ་ནི་རྣམ་པ་ལྔས་རིག་
པར་བྱ་སྟེ། ཡོ་བྱད་རྐྱེན་དུ་འབབ་པ་དག་ཡོད་པ་དང་། །ཆོས་མི་མཐུན་པའི་གང་ཟག་རྣམ་པར་སྤྲད་པ་དང་། འགྱོད་པ་སྐྱེས་པ་སེལ་བ་དང་། ཉོན་མོངས་པས་ཀུན་ནས་དཀྲིས་པ་རྣམ་པར་གནོན་པ་དང་། ཉོན་མོངས་པའི་བག་ལ་ཉལ་སྤངས་པའོ། །དེ་ལ་བདེ་བར་གནས་
པར་བྱ་བ་དང་པོའི་དབང་དུ་མཛད་ནས་ནི་མངོན་པར་མ་དད་པ་རྣམས་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་དད་པར་བྱ་བའི་ཞེས་གསུངས་སོ། །གཉིས་པའི་དབང་དུ་མཛད་ནས་ནི། གནོང་མི་བསྐུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་ཞེས་བྱ་བའོ། །གསུམ་པའི་
དབང་དུ་མཛད་ནས་ནི། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་ཞེས་བྱ་བའོ། །བཞི་པའི་དབང་དུ་མཛད་ནས་ནི་ཚེ་འདིའི་ཟག་པ་རྣམས་བསྡམ་པའི་ཕྱིར་ཞེས་བྱ་བའོ། །ལྔ་པའི་དབང་དུ་མཛད་ནས་ནི་ཚེ་རབས་ཕྱི་མའི་ཟག་པ་རྣམས་གཞོམ་པའི་ཕྱིར་ཞེས་
བྱ་བའོ། །ཐོབ་པ་རྣམས་བདེ་བར་གནས་པར་བྱ་བ་དང་མ་ཐོབ་མ་ཞུགས་པ་རྣམས་བདེ་བར་འཇུག་པར་བྱ་བའི་ཕྱིར། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ། ཡངས་པར་གྱུར་པ་ལྷ་དང་མི་རྣམས་ཀྱི་བར་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་
བ་ཞེས་བྱ་བ་གསུངས་སོ། །དེ་དག་ཐམས་ཅད་མདོར་བསྡུ་ན་དང་པོ་བསྡུ་བ་དང་། ལེགས་པར་བསྡུ་བ་དང་། བསྡུས་པ་རྣམས་བདེ་བར་གནས་པར་བྱ་བ་དང་། མ་འོངས་པ་མ་བསྡུས་པ་རྣམས་བདེ་བར་འཇུག་པར་འགྱུར་བའི་ཐབས་ཡོངས་སུ་བསྟན་པ་ཡིན་ཏེ། དེ་ནི་
རྣམས་གྲངས་གཞན་ཡིན་ནོ་ཞེས་འབྱུང་བས། དེ་ལྟར་ན་བཅོམ་ལྡན་འདས་ཀྱིས་ལེགས་པ་བཅུ་གཟིགས་པའི་ཕྱིར། ཉན་ཐོས་རྣམས་ལ་འདུལ་བ་ལ་བསླབ་པའི་གནས་བཤད་དོ། །ཡང་དགེ་སློང་མ་གང་དགེ་སློང་མ་རྣམས་དང་ལྷན་ཅིག་བསླབ་པ་མཚུངས་པར་གྱུར་པ་

ལས། བསླབ་པ་མ་ཕུལ་བསླབ་པ་ཉམས་པར་མ་བྱས་པས་མི་ཚངས་པར་སྤྱོད་པ་འཁྲིག་པའི་ཆོས་བྱས་ན། ཐ་ན་བྱོལ་སོང་གི་སྐྱེ་གནས་སུ་སོང་བ་དང་ལྷན་ཅིག་ཀྱང་རུང་། དགེ་སློང་མ་དེ་ཕས་ཕམ་པ་ཡིན་གྱི་གནས་པར་མི་བྱའོ། །དེ་ལ་ཡང་ཞེས་བྱ་
བའི་སྒྲ་ནི་ལས་དང་པོ་པ་ལས་ཉེས་པ་མེད་པར་སྟོན་ཏོ། །དགེ་སློང་མ་གང་ཞེས་བྱ་བ་ནི། དགེ་སློང་མ་ལ་རྣམ་པ་ལྔ་སྟེ། མིང་གི་དགེ་སློང་མ་དང་། ཁས་འཆེ་བའི་དགེ་སློང་མ་དང་། སློང་བའི་དགེ་སློང་མ་དང་། ཉོན་མོངས་པ་དང་བྲལ་བའི་དགེ་སློང་མ་དང་། གསོལ་པ་
དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་མའོ། །སྐབས་འདིར་ནི་གང་གསོལ་བ་དང་། བཞིའི་ལས་ཀྱིས་བསྙེན་པར་རྫོགས་པ་དེ་ནི་དགེ་སློང་མར་དགོངས་ཏེ། དེའི་ཕྱིར་དགེ་སློང་མ་ཞེས་གསུངས་སོ། །དགེ་སློང་མ་དང་ལྷན་ཅིག་པ་ནི། དེ་མ་ཡིན་པ་ཆོས་
མཚུངས་པར་སྤྱོད་པ་རྣམས་སོ། །བསླབ་པ་མཚུངས་པར་གྱུར་ཞེས་བྱ་བ་ནི། གང་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་མས་བསླབ་པ་གང་ལ་བསླབ་པར་བྱ་བ་དེ་ལ། དེའི་ཉིན་མོ་བསྙེན་པར་རྫོགས་པས་ཀྱང་བསླབ་པར་བྱའོ། །འདི་ལ་གང་ཚུལ་ཁྲིམས་དང་
བསླབ་པ་དང་། སོ་སོར་ཐར་པའི་མདོ་བཅད་པ་མཚུངས་པ་འདི་ནི་བསླབ་པའི་མཚུངས་པ་ཞེས་བྱའོ། །བསླབ་པ་མ་ཕུལ་ཞེས་བྱ་བ་ཇི་ཙམ་གྱིས་བསླབ་པ་མ་ཕུལ་བ་ཡིན་ཞེ་ན། ཇི་ལྟར་དགེ་སློང་མས་ཁྲོས་པ་དང་། སྨྱོས་པ་དང་། སེམས་འཁྲུགས་པ་དང་། ནད་
ཀྱིས་གཟིར་ནས་བསླབ་པ་ཕུལ་ན། བསླབ་པ་མ་ཕུལ་ཞེས་བྱའོ། །དེ་རྣམས་དང་ལྡན་པ་ཞིག་ལ་ཕུལ་ན། ཕུལ་བར་མི་ཆུད་དོ། །གླེན་པ་དང་། ལྐུགས་པ་དང་། འོན་པ་དང་། མི་དབེན་པ་ལ་དབེན་པར་འདུ་ཤེས་པ་གསུམ་དང་། གལ་ཏེ་འཕགས་མས་མཐའ་
འཁོབ་མའི་སྐད་དུ། གཞི་རྒྱུད་དུ་སྨྱོས་པ་དང་། གཉིད་ཀྱིས་ལོག་པ་དང་། སྙོམས་པར་ཞུགས་པ་དང་། མི་མ་ཡིན་པ་དང་། ལྷ་དང་། སྤྲུལ་པ་དང་། བྱོལ་སོང་དང་། གཟུགས་དང་། ཅ་ཅོའི་ནང་དུ་བསླབ་པ་ཕུལ་ན། བསླབ་པ་ཕུལ་བ་མ་ཡིན་ནོ། །མདོར་ན་གཏོང་བའི་སེམས་ཀྱང་མེད་ལ་དགེ་

སྦྱོང་དོན་དུ་གཉེར་ཞིང་། ཁྱིམ་པ་དོན་དུ་མི་གཉེར་ལ་བརྡ་སྤྲད་པའི་སྐྱེས་པའམ་བུད་མེད་བརྡ་ཕྲད་པར་མ་བྱས་ན། བསླབ་པ་ཕུལ་བ་མ་ཡིན་ཞེས་བྱའོ། །བསླབ་པ་ཉམས་པར་མ་བྱས་པ་ཞེས་བྱ་བ་ནི་བསླབ་པ་ཉམས་པར་བྱས་ཀྱང་བསླབ་པ་མ་ཕུལ་བ་ཡང་ཡོད། །བསླབ་པ་ཕུལ་ལ་བསླབ་པ་ཉམས་
པར་མ་བྱས་པ་ཡང་ཡོད། བསླབ་པ་ཉམས་པར་བྱས་ལ་བསླབ་པ་ཕུལ་བ་ཡང་ཡོད། བསླབ་པ་ཉམས་པར་མ་བྱས་ལ་བསླབ་པ་མ་ཕུལ་བ་ཡང་ཡོད་དོ། །ཇི་ལྟར་བསླབ་པ་ཉམས་པར་བྱས་ཀྱི། བསླབ་པ་མ་ཕུལ་བ་ཡིན་ཞེ་ན། འདི་ལྟར་དགེ་སློང་མ་ཆགས་པར་གྱུར་ཏམ།
མི་དགའ་འམ། སླར་འབབ་པར་འདོད་དམ། དགེ་སྦྱོང་དོན་དུ་གཉེར་ཏམ། དགེ་སྦྱོང་གི་སྨ་བབ་བམ། ངོ་ཚའམ། ཐེ་ཚོམ་ཟའམ། སྨོད་ཅིང་དགེ་སློང་མའི་གན་དུ་སོང་ནས་འདི་སྐད་ཅེས་འཕགས་མ་མཁྱེན་པར་མཛོད་ཅིག །ཚངས་པར་སྤྱོད་པ་ནི་སྤྱད་པར་
དཀའོ། །རབ་ཏུ་དབེན་པར་བྱ་དཀའོ། །གཅིག་པུར་དགའ་བར་བྱ་དཀའོ། །དགོན་པ་དང་། ནགས་དང་། རི་དང་ཉེ་བ་དང་བས་མཐའི་གནས་སུ་གནས་པར་དཀའོ། །གཅིག་པུར་དགོན་པར་གནས་ན་སྡུག་བསྔལ་བ་སྟེ། ཕ་མ་དང་། ཕུ་ནུ་མོ་དང་། མིང་པོ་དང་།
སློབ་དཔོན་མ་དང་། མཁན་མོ་དྲན་ནོ། །བདག་བཟོ་སློབ་ཏུ་ཆུག་ཅིག །བདག་ལས་བྱེད་དུ་ཆུག་ཅིག །བདག་དགེ་བའི་རིགས་རྣམས་ལ་གཏོད་ཅིང་ཞེས་སྨྲ་ཞིང་ཚིག་གིས་གོ་བར་བྱེད་ཀྱང་བསླབ་པ་འབུལ་ལོ་ཞེས་དེ་སྐད་མ་སྨྲས་ན། དེ་ལྟ་བུ་ནི་བསླབ་པ་ཉམས་པ་ཡིན་ཏེ།
བསླབ་པ་ཕུལ་བ་མ་ཡིན་ནོ། །ཇི་ལྟར་བསླབ་པ་ཕུལ་ཡང་། བསླབ་པ་ཉམས་པར་མ་བྱས་པ་ཡིན་ཞེ་ན། འདི་ལྟར་དགེ་སློང་མ་དགེ་སློང་མའི་གན་དུ་སོང་ནས་འདི་སྐད་ཅེས་འཕགས་མ་དགོངས་ཤིག །བདག་མིང་འདི་ཞེས་བགྱི་བས་བསླབ་པ་ཕུལ་བ་ཞེས་བྱའོ། །དཀོན་
མཆོག་གསུམ་དང་། སྡེ་སྣོད་གསུམ་དང་། མཁན་པོ་དང་། སློབ་དཔོན་མི་འབུལ་ལོ་ཞེ་འམ། བདག་ཁྱིམ་པར་ཟུང་ཤིག་ཅེའམ། ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་མ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱེད་

པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་ཞུགས་པ་དང་། རྐུན་གནས་པ་དང་། ཐ་དད་དུ་གནས་པ་དང་། མི་གནས་པ་དང་། ཐ་ན་འདི་སྐད་དུ་བདག་དང་ཆོས་མཐུན་པ་ཚངས་པ་མཚུངས་པར་
སྤྱོད་པ། ཁྱོད་དང་འགྲོགས་མི་དགོས་སོ་ཞེས་སྨྲ་ན། བསླབ་པ་ཕུལ་བ་ཞེས་བྱའོ། །དེ་ལྟར་བསླབ་པ་ཕུལ་བ་ཡིན་ཡང་། བསླབ་པ་ཉམས་པར་བྱས་པ་མ་ཡིན་ནོ། །ཇི་ལྟར་ན་བསླབ་པ་ཉམས་པར་ཡང་བྱས་ལ། བསླབ་པ་ཕུལ་བ་ཡིན་ཞེ་ན། གོང་དུ་སྨོས་པ་གཉིས་
དང་ལྡན་པ་དེ་ནི། བསླབ་པ་ཉམས་པར་ཡང་བྱས་ལ། བསླབ་པ་ཕུལ་བ་ཡང་ཡིན་ནོ། །ཇི་ལྟར་ན་བསླབ་པ་ཉམས་པར་ཡང་མ་བྱས་ལ། བསླབ་པ་ཕུལ་བ་ཡང་མ་ཡིན་ཞེ་ན། རྣམ་པ་འདི་ལྟ་བུ་མ་གཏོགས་པའོ། །མི་ཚངས་པར་སྤྱོད་ཅེས་བྱ་བ་ནི་གཉིས་ཀྱིས་
གཉིས་ཕྲད་པའོ། །འཁྲིག་པ་ཞེས་བྱ་བ་ནི་གང་མི་ཚངས་པར་སྤྱོད་པ་དེ་ཉིད་འཁྲིག་པའོ། །ཆོས་ཞེས་བྱ་བ་ནི་ཆོས་མ་ཡིན་པ་འདི་ཆོས་ཀྱི་སྒྲར་གསུངས་སོ། །བྱས་ཞེས་བྱ་བ་ནི་སྤྱད་པའོ། །ཐ་ན་བྱོལ་སོང་གི་སྐྱེ་གནས་སུ་སོང་བ་དང་ལྷན་ཅིག་ཅེས་བྱ་བ་ནི་ཕྲ་མོ་འམ་དེ་དང་འདྲ་བ་དག་གོ་
ཞེས་བྱ་བ་ནི་ཉེ་བར་བསྟན་པའི་ཚིག་བླ་དགས་སོ། །དགེ་སློང་མ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའོ། །ཕས་ཕམ་པ་ཞེས་བྱ་བ་ནི་ལྟུང་བ་ཐ་མ་འདི་ལྟ་སྟེ། ཐ་ཤལ་ངན་པ་མི་ཆ་བའི་ཉེས་པ་ཅན་མི་མཚུངས་པ་སྟེ། དེ་ལྟ་བུའི་གནས་ཀྱི་ལྟུང་བ་བྱུང་མ་
ཐག་ཏུ་དགེ་སློང་མ་མ་ཡིན། ཤཱཀྱའི་སྲས་མོ་མ་ཡིན། དགེ་སློང་མའི་དངོས་པོ་དང་བྲལ་བ་ཞེས་བྱ་བ་ནི། དགེ་སློང་མར་བསླད་དུ་མི་རུང་ངོ་ཞེས་བྱ་བའི་བར་དུ་སྟེ། དེས་ཕས་ཕམ་པ་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི། དེ་དང་དགེ་སློང་མ་དག་གསོ་སྦྱོང་དང་།
གསོལ་བའམ། གསོལ་བ་དང་གཉིས་སམ། གསོལ་བ་དང་བཞིའི་ལས་ལ་མི་གནས་པ་སྟེ། གང་ཟག་བཅུ་གཉིས་སུ་བསྐོ་བ་ལ་ཡང་མི་ཆུད་དེ། དེ་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཅི་ལྟ་བུ་ཞེ་ན། དགེ་སློང་མ་རྟེན་པ་ལ་གཞོལ། རྟེན་པ་ལ་

བབ། རྟེན་པ་ལ་བབ་པའི་སེམས་ཀྱིས་སྐྱེས་པ་དང་། མ་ནིང་དང་། མི་མ་ཡིན་པ་དང་། བྱོལ་སོང་ཡང་རུང་སྟེ། གསོན་པོ་མ་ཉམས་པའམ། གལ་ཏེ་གཡོགས་པས་གཡོགས་པའམ། གཡོགས་པས་མ་གཡོགས་པའམ། མ་གཡོགས་པས་མ་གཡོགས་པ་ལ་ཡང་རུང་སྟེ།
མི་ཚངས་པར་སྤྱོད་ན་ཕས་ཕམ་པའི་ལྟུང་བར་འགྱུར་རོ། །གསོན་པོ་ཇི་ལྟ་བ་བཞིན་དུ་ཤི་བ་ལ་མ་ཉམས་པ་ཡང་དེ་བཞིན་དུ་སྦྱར་རོ། །གལ་ཏེ་འདི་རྣམས་གསོན་པོ་ཉམས་པའམ། ཤི་བ་ཉམས་པ་ཡང་རུང་སྟེ། ཐམས་ཅད་ཉེས་པ་སྦོམ་པོར་འགྱུར་རོ། །དགེ་སློང་ཉལ་བ་ལ་དགེ་
སློང་མས་མནན་པ་ལས་གལ་ཏེ་དགེ་སློང་གི་ཐོག་མ་དང་། བར་དང་ཐ་མར་ཡང་མ་ཚོར་ལ་ཤེས་ནས་ཀྱང་ཉམས་སུ་མ་བླངས་ན་གང་གནོན་པ་དེ་མ་རུང་བར་འགྱུར་རོ། །གལ་ཏེ་དགེ་སློང་གིས་གོང་མ་གསུམ་ལྟར་ཚོལ་ལ། ཤེས་ནས་ཀྱང་ཉམས་སུ་བླངས་ན་ནི་གཉི་ག་མ་རུང་བར་འགྱུར་
རོ། །དགེ་སློང་ཇི་ལྟ་བ་བཞིན་དུ་དགེ་ཚུལ་དང་ཁྱིམ་པ་ལ་དེ་བཞིན་ནོ། །དགེ་སློང་ཕ་དང་། དགེ་སློང་མ་དང་། དགེ་ཚུལ་ནི་མ་རུང་བར་འགྱུར་རོ། །ཁྱིམ་པ་དང་། ཁྱིམ་པ་མོའི་བསོད་ནམས་མ་ཡིན་པ་མང་དུ་འཕེལ་ལོ། དགེ་སློང་མས་དགེ་སློང་ཆང་གིས་མྱོས་པར་བྱས་
སམ། ཡང་ན་སྔགས་དང་སྨན་དང་རིག་པས་དེའི་སེམས་དཀྲུགས་སམ། ཡང་ན་མཐུས་བཟུང་ཡང་རུང་སྟེ། མནན་པ་ལས། གལ་ཏེ་དགེ་སློང་གིས་ཐོག་མ་དང་བར་དང་ཐ་མར་ཡང་ཚོར་བའམ་ཡང་ན་ཐོག་མ་དང་བར་མའི་ཚེ་མ་ཚོར་རམ། ཡང་ན་ཐོག་མ་ཚོར་
ལ་བར་མ་དང་ཐ་མའི་ཚེ་མ་ཚོར་རམ་ཡང་ན་དང་པོ་དང་ཐ་མ་མ་ཚོར་ལ་བར་མའི་ཚེ་ཚོར་ལ་ཤེས་ཀྱང་དགའ་བར་མ་བཟུང་བ་ཀུན་འདྲ་སྟེ། གང་གནོན་པ་དེ་མ་རུང་བར་འགྱུར་རོ། །མནན་པ་ལས་གལ་ཏེ་དགེ་སློང་གིས་གསུམ་ཆར་ཡང་ཚོར་ལ་ཤེས་ནས་དགའ་བར་བཟུང་
ན། གཉི་ག་མ་རུང་བར་འགྱུར་རོ། །དགེ་སློང་ལ་ཅི་ལྟ་བ་དགེ་ཚུལ་དང་ཁྱིམ་པ་ཡང་དེ་བཞིན་ནོ། །དགེ་སློང་དང་། དགེ་སློང་མ་དང་། དགེ་ཚུལ་ལ་ནི་མ་རུང་བར་འགྱུར་རོ། །ཁྱིམ་པ་དང་ཁྱིམ་མི་མོ་ནི་བསོད་ནམས་མ་ཡིན་པ་མང་དུ་འཕེལ་ལོ། །ཡན་ལག་དྲུག་དང་

ལྡན་ན་ཕམ་པ་སྟེ། བདག་གི་ལམ་གསུམ་ཡང་ཡིན། ཕ་རོལ་པོ་ཡང་མ་ཉམས་ཕོ་མཚན་ཡང་ཡིན། དེར་ཡང་བཅུག །རེག་ཀྱང་རེག །དགའ་བར་མ་ཚོར་བའོ། །ཕས་ཕམ་པ་དང་པོ་རྫོགས་སོ།། །།དེ་ལ་མ་བྱིན་པ་དང་ཞེས་བྱ་བ་ནི་སྟོན་པ་རྒྱལ་པོའི་ཁབ་
ན་བཞུགས་སོ། །དེའི་ཚེ་ན་དགེ་སློང་མ་ནོར་ཅན་མ་གཞན་གྱིས་ཡོངས་སུ་ཟིན་པའི་རྩི་ཤིང་ལ་སོགས་པ་མ་བྱིན་པར་བླངས་པས་བྲམ་ཟེ་དང་ཁྱིམ་བདག་དག་འཕྱ་སྟེ། ཁྱིམ་བདག་ཀྱང་དེ་ལྟར་བྱེད་ན་ཤཱཀྱའི་དགེ་སྦྱོང་མ་བྲམ་ཟེ་དང་ཁྱིམ་པ་རྣམས་སུ་ཁྱད་པར་ཅི་ཡོད། དགེ་སྦྱོང་མགོ་རེག་
མ་དེ་དག་ལ་སུ་ཞིག་བསོད་སྙོམས་སྦྱིན་པར་སྤྲོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྔ་མ་བཞིན་དུ་དགེ་སློང་དག་གིས་སྟོན་པ་ལ་གསོལ་བ་དང་། སྟོན་པས་ནོར་ཅན་མ་རྣམ་གྲངས་དུ་མས་སྨད་ནས་ཉན་ཐོས་རྣམས་ལ་བསླབ་པའི་གནས་བཅས་པའོ། །ཡང་དགེ་སློང་མ་
གང་གཞན་གྱི་གྲོང་ན་ཡོད་པའམ་དགོན་པ་ན་ཡོད་པ་མ་བྱིན་པར་རྐུ་བའི་གྲངས་སུ་གཏོགས་པ་བླངས་ན། ཇི་ཙམ་མ་བྱིན་པར་བླངས་པས། རྒྱལ་པོའམ་བློན་པོས་བཟུང་ནས་གསོད་དམ་འཆིང་ངམ་བཅུག་ཀྱང་རུང་། དེ་ལ་དགེ་སློང་མ་ཁྱོད་ནི་རྐུན་མའོ་བྱིས་པའོ་བླུན་པའོ། །
རྐུ་བའོ་ཞེས་དེ་སྐད་ཟེར་ན། དགེ་སློང་མ་འདི་ལྟར་མ་བྱིན་པར་ལེན་པ་དེ་ཡང་ཕས་ཕམ་པ་ཡིན་གྱི། གནས་པར་མི་བྱའོ། །ཡང་དགེ་སློང་མ་ཞེས་བྱ་བ་ནོར་ཅན་མ་སྟེ་གཞན་ཡང་དེ་དང་འདྲའོ། །གཞན་དག་གིས་ཞེས་བྱ་བ་ནི་སྐྱེས་པ་དང་། བུད་མེད་དང་མ་ནིང་རྣམས་ཀྱིའོ། །
གྲོང་ན་ཡོད་པ་ཞེས་བྱ་བ་ནི་ར་བའི་ནང་ནའོ། །དགོན་པ་ན་ཡོད་པ་ཞེས་བྱ་བ་ནི་ར་བའི་ཕྱི་རོལ་ནའོ། །མ་བྱིན་པར་ལེན་པ་ཞེས་བྱ་བ་ནི་དེ་ལ་སྐྱེས་པ་དང་བུད་མེད་དང་། མ་ནིང་གིས་མ་བྱིན་པའོ། །རྐུ་བའི་གྲངས་སུ་གཏོགས་ཞེས་བྱ་བ་ནི་མ་བྱིན་པ་དེ་རྐུ་བའི་གྲངས་སུ་གཏོགས་པའོ། །
བླང་ཞེས་བྱ་བ་ནི་ལེན་པའོ། །ཇི་ཙམ་མ་བྱིན་པར་བླངས་པ་ཞེས་བྱ་བ་ནི་མ་ཤ་ལྔའམ་ལྔ་ལས་ལྷག་པའོ། །རྒྱལ་པོས་སམ་ཞེས་བྱ་བ་ནི་འདི་ལྟར་རྒྱལ་རིགས་སྤྱི་བོ་ནས་དབང་བསྐུར་བ་སྟེ་རིགས་རྣམ་པ་བཞི་ལས་གང་ཡང་རུང་སྟེ། རྒྱལ་པོ་རྒྱལ་ཐབས་སྤྱི་བོ་ནས་དབང་བསྐུར་བའོ། །རྒྱལ་པོའི་

བློན་པོ་ཞེས་བྱ་བ་ནི་དབང་པོ་ཆེན་པོ་རྒྱལ་སྲིད་འཛིན་པ་དང་བཀའ་གྲོས་ཀྱིས་འཚོ་བའོ། །གཟུང་ནས་ཞེས་བྱ་བ་ནི་ཟིན་པའོ། །གསོད་པ་ཞེས་བྱ་བ་ནི་འཚོ་བ་དང་ཕྲལ་བའོ། །བཅིངས་པ་ཞེས་བྱ་བ་ནི་བཙོན་རར་བཅུག་པའོ། །སྤྱུགས་པ་ཞེས་བྱ་བ་ནི་ཡུལ་སྤོས་པའོ། །ཀྱེ་དགེ་སློང་
མ་ཁྱེད་རྐུན་མའོ། །བྱིས་པའོ་བླུན་པོའོ་རྐུ་བའོ་ཞེས་བྱ་བ་ནི་གཤེ་བ་དང་བཅས་པའི་ཚིག་གོ། །དེ་ལ་འདི་སྐད་ཅེས་ཀྱང་ཟེར་རོ་ཞེས་བྱ་བ་སྨྲ་བའོ། །དགེ་སློང་མ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའོ། །འདི་ལྟ་བུར་མ་བྱིན་པར་ལེན་པ་ཞེས་བྱ་བ་ནི་
གོང་མ་དང་འདྲའོ། །དེ་ཡང་ཞེས་བྱ་བ་ནི་ཉེ་བར་བསྟན་པའོ། །དགེ་སློང་མ་དེ་ཡང་ཕས་ཕམ་པ་ཡིན་གྱི། གནས་པར་མི་བྱའོ་ཞེས་བྱ་བ་ནི་གོང་མ་བཞིན་དུ་སྦྱར་རོ། །ཡན་ལག་དྲུག་དང་ལྡན་ན་ཕས་ཕམ་པར་འགྱུར་ཏེ། རྐུ་སེམས་དང་། མ་བྱིན་པར་ལེན་པ་དང་། རིན་
ཐང་ཚང་བ་དང་། མིས་ཡོངས་སུ་བཟུང་བ་དང་། མིར་འདུ་ཤེས་པ་དང་། གནས་ནས་གནས་སུ་སྤོས་པའོ། །དགེ་སློང་མས་རྣམ་པ་གསུམ་གྱིས་གཞན་དག་གི་ཡོ་བྱད་དམ་པ་ཞིག་མ་བྱིན་པར་བླངས་ན་ཕས་ཕམ་པའི་ལྟུང་བར་འགྱུར་རོ། །གསུམ་གང་ཞེ་ན་བདག་དང་
ཕོ་ཉ་དང་མངོན་སུམ་དུ་བཅོལ་བས་སོ། །བདག་གིས་ཞེས་བྱ་བ་ཇི་ལྟ་བུ་ཞེ་ན། བདག་གིས་བརྐུས་པ་དང་། བདག་གིས་ཐབས་ཀྱིས་བརྐུས་པ་དང་། བདག་གིས་གནས་ནས་གནས་སུ་སྤོས་པའོ། །ཕོ་ཉ་ལ་ཡང་གསུམ་མོ། །གསུམ་གང་ཞེ་ན། ཕོ་ཉས་བརྐུས་པ་
དང་། ཕོ་ཉས་ཐབས་ཀྱིས་བརྐུས་པ་དང་། ཕོ་ཉས་གནས་ནས་གནས་སུ་སྤོས་པའོ། །མངོན་སུམ་དུ་བཅོལ་བ་ཡང་གསུམ་མོ། །གསུམ་གང་ཞེ་ན་མངོན་སུམ་དུ་རྐུར་བཅུག་པ་དང་། མངོན་སུམ་དུ་ཐབས་ཀྱིས་རྐུར་བཅུག་པ་དང་། མངོན་སུམ་དུ་གནས་ནས་
གནས་སུ་སྦེད་དུ་བཅུག་ན་ཕས་ཕམ་པར་འགྱུར་རོ། །ཕས་ཕམ་པ་གཉིས་པའོ།། །།མི་གསོད་ཅེས་བྱ་བ་ནི། བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དགེ་སློང་པ་ནད་ཀྱིས་བཏབ་ནས་ནད་གཡོག་བྲན་ཅན་བྱེད་དེ། སྨན་པ་ལ་དཔྱད་དྲིས་

ནས་སྨན་ཁྱེར་ཏེ་འོངས་ཀྱི། དེའི་བར་དུ་ཁ་ཟས་མ་ཟ་ཅིག་ཅིས་ཟེར་ཏེ་སོང་ངོ་། དེའི་འོག་ཏུ་དགེ་སློང་གཞན་དག་གིས་ཁ་ཟས་དང་ཐུག་པ་ལ་སོགས་བྱིན་ཏེ་འགྲངས་པར་ཟོས་སོ། །བྲན་ཅན་སྨན་ཁྱེར་ཏེ་འོངས་ནས་སྨན་ཟོ་ཞིག་ཅེས་བྱས་ནས། ང་འགྲངས་ཟིན་གྱི་
ཟ་མི་ནུས་སོ་ཞེས་ཟེར་ནས་ནད་གཡོག་གིས་སྨྲས་པ། ནད་དང་མི་མཐུན་པའི་ཟས་ཟོས་པ་པས་ནི་དུག་འཐུངས་ཀྱང་སླའོ་ཞེས་བྱས་པ་དང་། དེའི་ཆེད་དུ་དུག་རྡོག་གུ་གཅིག་འཆོས་ནས་ཤིའོ། །བྲན་ཅན་གྱིས་བསམས་པ་བདག་གིས་དེ་སྐད་སྨྲས་པའི་ཕྱིར། དེ་ཤི་བས་
བདག་ཕམ་པར་མ་གྱུར་གྲང་སྙམ་ཏེ་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདི་ལ་ནི་ལྟུང་བ་མེད་དེ་ཕྱིན་ཆད་ནད་པ་ཤི་བར་སེམས་པའི་གཏམ་བྱས་ན་འདས་པ་དང་བཅས་པའི་ཉེས་བྱས་སུ་འགྱུར་རོ། །དེར་ཡང་བསླབ་པ་མ་བཅས་སོ། །
བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་མགོ་ཅན་ནད་ཀྱིས་བཏབ་སྟེ། མཆུ་ཅན་ནད་གཡོག་བྱེད་དོ། །མགོ་ཅན་གྱིས་བསམས་པ་འདི་ལྟར་ན་ཞིང་སྡུག་བསྔལ་བས་ནི་ཚུལ་ཁྲིམས་མ་ཉམས་པར་ཤི་ན་མཐོ་རིས་སུ་སྐྱེའོ་ཞེས་བསམས་ནས་
བདག་ནི་ཤི་མི་ནུས་ན་མཆུ་ཅན་གྱི་ཚ་བོ་རྔོན་པ་གཉིས་གསོད་དུ་གཞུག་གོ་སྙམ་ནས། མཆུ་ཅན་ལ་སྨྲས་པ་ཁྱོད་ཀྱི་ཚ་བོ་གཉིས་ཀྱང་ནད་གཡོག་བྱེད་དུ་ཆུག་ཅིག་ཅེས་སྨྲས་པ་དང་། ཚ་བོ་གཉིས་བཀུག་ནས་མགོ་ཅན་གྱིས་སྨྲས་པ་ཚ་བོ་ང་སོད་ཅིག་དང་ལྷར་སྐྱེའོ་
ཞེས་ཟེར་བ་དང་། རལ་གྲིས་མགོ་བཅད་ནས་གོས་ཀྱིས་གཡོགས་ནས་བཞག་ནས་མཆུ་ཅན་ཕྱིར་འོངས་ཏེ་མཐོང་བ་དང་། བདག་གིས་མཚོན་ཐོགས་པ་གཉེར་བར་མ་གྱུར་ཏམ་སྙམ་སྟེ། ཐེ་ཚོམ་སྐྱེས་པ་དང་། བཅོམ་ལྡན་འདས་ལ་གསོལ་བ་དང་། བཀའ་
སྩལ་པ་དགེ་སློང་འདི་ལ་ནི་ལྟུང་བ་མེད་དེ་ཕྱིན་ཆད་ནད་གཡོག་བླུན་པོ་བཞག་ན་འདས་པ་དང་བཅས་པའི་ཉེས་བྱས་སོ། །མཉན་དུ་ཡོད་པ་ན་དགེ་སློང་ཅིག་གིས་ལྷུང་བཟེད་བཙས་ཁྱེར་བ་བཀྲུ་ན་ཅི་ཉེས་ཞེས་བྱས་པ་དང་། བཀྲུ་བའི་ཡོ་བྱད་མི་འབྱོར་རོ་ཞེས་

ཟེར་རོ། །འོ་ན་ལྷུང་བཟེད་མེད་པར་སྤྱོད་དམ་ཞེས་དྲིས་པ་དང་། དེས་སྨྲས་པ་གནས་འདི་ཞེས་བྱ་བ་ན་དགེ་སློང་མ་གཅིག་ན་བ་ཚབས་ཆེ་བ་ཞིག་ཡོད་ཀྱི། དེ་ཤི་ན་ལྷུང་བཟེད་སྤྱོད་དོ་ཞེས་སྨྲས་པ་དང་། དེ་ལྟ་བུར་གྱུར་པ་སྟོན་པ་ལ་གསོལ་ནས་བཀའ་སྩལ་པ། དགེ་སློང་འདི་ལ་ལྟུང་
བ་མེད་དེ། ཕྱིན་ཆད་མ་རུངས་པ་གདོལ་བུའི་སེམས་བསྐྱེད་ན་འདས་པ་དང་བཅས་པར་འགྱུར་རོ། །ཆོས་གོས་ཀྱི་ཕྱིར་བཅས་པའི་རྒྱུད་ཀྱང་ལྷུང་བཟེད་དང་འདྲའོ།། །།མཉན་དུ་ཡོད་པ་ན་ཚོང་དཔོན་ཞིག་འདུག་པ་ཆུང་མ་དང་ཡོངས་སུ་སྤྱད་པ་ལས་བུ་མོ་ཅིག་བཙས་སོ།
དེའི་ཆུང་མ་དུས་ལས་འདས་པ་དང་། དེའི་ཆུང་མ་ཞིག་བླངས་པ་ལས་ཁྱེའུ་ཞིག་བཙས་སོ། །ཆུང་མ་དེས་བུ་མོ་ལ་ཁུ་ཚུར་དང་ཐལ་མོས་རྟག་ཏུ་བརྡེག་གོ། །བུ་མོ་དེས་བསམ་པ། བདག་སྲོག་དང་བྲལ་བར་གདོན་མི་ཟ་བས་རབ་ཏུ་འབྱུང་ངོ་སྙམ་ནས། དགེ་
སློང་མའི་གན་དུ་སོང་སྟེ་རབ་ཏུ་བྱུང་བསྙེན་པར་རྫོགས་ནས། དེས་ཕ་ལ་ཆོས་བསྟན་སྐྱབས་སུ་བཏང་སྟེ། བསླབ་པའི་གནས་སུ་གཞག་གོ། །དུས་ཕྱི་ཞིག་ན་ཕ་ནད་ཀྱིས་བཏབ་པ་དང་དེས་སྨྲས་པ། ཕ་ཁྱོད་ཀྱིས་སྦྱིན་པ་ནི་བྱིན་བསོད་ནམས་བྱས་པས་ཡུལ་གཞན་
དུ་སོང་ན་ལོ་ལེགས་པ་དང་འདྲ། མཐོ་རིས་ནི་རས་ལྟ་བུ། ཐར་པ་ནི་ཡོལ་བ་ལྟ་བུས་ཆོད་དེ་ལུས་དང་བྲལ་ན་སྐྱེའོ་ཞེས་བྱས་པ་དང་། ཕས་བསམས་པའོ་ན་ནི་ནད་ཀྱིས་སྡུག་བསྔལ་བས་མྱུར་དུ་ཚེ་འཕོས་ན་ལེགས་སོ་སྙམ་ནས་བྲན་མོ་བླུན་མོ་སྐྱོང་བ་མོ་ལ་སྨྲས་པ། ངའི་ལུས་ནང་དུ་
དགྲ་ཞིག་ཞུགས་ན་གལ་ཏེ་དེ་སླར་ཕྱིན་ན། ངས་ཁྱོད་ལ་བྱམས་པར་བྱའོ་ཞེས་བྱས་པ་དང་། དེས་རྐང་པ་ནས་མགྲིན་པའི་བར་དུ་བཙིར་བས་མ་བཟོད་ནས་འགུལ་བ་དང་། ཅི་ཐུར་བཙིར་ནས་དུས་ལས་འདས་སོ། །དགེ་སློང་མ་དེས་བདག་གི་ཕ་དུས་ལས་འདས་པ་ཐོས་
ནས། མ་ཡར་མོ་མྱ་ངན་བསང་སྙམ་ནས་དེའི་ཐད་དུ་སོང་བ་དང་། དེས་རྒྱང་ནས་འོངས་པ་མཐོང་སྟེ། དེས་སྨྲས་པ་སྡིག་ཅན་མ་ཁྱོད་སྡེ་སྣོད་གསུམ་དང་ལྡན་ན་ཆོས་བཤད་པ་གཞན་མེད་དམ་ཅི་ཉེས་ན། ཕ་ལ་ཡུལ་གཞན་དུ་ལོ་ལེགས་པ་ན་ལྷར་སྐྱེ་བར་འགྱུར་རོ་ཞེས་

བྱ་བའི་བར་དུ་དེ་ལྟ་བུར་ཆོས་བཤད་པས་ཕ་བསད། ང་ཡང་ཚུར་ཤོག་ང་ལ་སོད་ཅིག་ཅེས་སྨྲས་པ་དང་། དེ་བདག་གིས་ཕ་ལ་འཆི་བར་སེམས་བསྐྱེད་པར་མ་གྱུར་གྲང་སྙམ་ནས་འགྱོད་པ་སྐྱེས་སོ། །དེ་ལྟར་བུར་གྱུར་པ་དགེ་སློང་མ་དག་གིས་དགེ་སློང་ཕ་
ལའོ། །དེ་དག་གིས་སྟོན་པ་ལ་གསོལ་བ་དང་། བཀའ་སྩལ་པ་དགེ་སློང་མ་འདི་ལ་ནི་ལྟུང་བ་མེད་དེ། ཕྱིན་ཆད་ནད་པ་ལ་འཆི་བར་སེམས་པ་འདི་ལྟ་བུའི་ཆོས་བཤད་པར་མ་བྱེད་ཅིག་བྱས་ན་འདས་པ་དང་བཅས་པར་འགྱུར་རོ། །མཉན་དུ་ཡོད་པ་ན་བུད་མེད་ཅིག་ཁྱིམ་
ཐབ་དང་བྲལ་ནས་སྐྱེས་པ་གཞན་དང་འདུས་པས་སེམས་ཅན་དང་ལྡན་པར་གྱུར་ཏོ། །དེ་ལ་ཁྱིམ་ཐབ་ཀྱིས་ང་ནི་རིང་པོར་མི་ཐོགས་པར་འོང་ངོ་ཞེས་ཡི་གེ་སྤྲིང་བ་དེ་ཐོས་ནས་སྤངས་པར་གྱུར་ཏེ། དེ་ལ་གྲོང་དུ་ཉེ་བར་འགྲོ་བའི་དགེ་སློང་མ་ཞིག་ཡོད་དོ། །དེས་དེ་ལ་
འཕགས་མ་བདག་གིས་ཅི་ལྟར་བགྱི་ཞེས་སྨྲས་ན་དེས་ཅང་མི་སྨྲ་བར་འདུག་གོ། དེ་ལ་ཁྱིམ་མི་མོ་མ་ཞིག་ཡོད་དེ་དེས་དགེ་སློང་མ་དེ་ལ་བདག་གིས་ཕྱེ་མ་ཞིག་སྦྱར་འཚལ་ཏེ། གལ་ཏེ་ཁྱོད་ཀྱིས་མིང་དུ་སྨོས་ཏེ། ཁྱིམ་བདག་གི་བུད་མེད་ལ་བྱིན་ཅིག་ཅེས་སྨྲས་པ་དང་། དེས་
ཉམས་སུ་བླངས་སོ། །དེས་དེའི་དྲུང་དུ་སོང་ནས་ཕྱི་མ་འདི་ནི་དགེ་སློང་མས་ཁྱོད་ལ་བསྐུར་གྱིས་ཆུ་དྲོན་པོ་ལས་འཐུངས་ཤིག་བསྒོ་ནས་དེས་འཐུངས་སོ། །དེ་ལ་མཛའ་མོ་གྲོགས་མོ་ཞིག་ཡོད་པས་ཁྱོད་ཀྱི་རུམ་ན་འདུག་པ་དེ་ག་རེ་ཞེས་སྨྲས་པ་དང་། དེས་ཞིབ་ཏུ་སྨྲས་ཏེ་
རུམ་ན་ཡོད་པ་དུམ་བུ་བརྒྱར་ཞིག་གོ་ཞེས་སྨྲས་པ་དང་། བྲམ་ཟེ་དང་། ཁྱིམ་པའི་ཆུང་མ་དག་འཕྱ་སྨད་ནས་དགེ་སྦྱོང་མ་དག་ནི་ཚིག་པའོ། །རུམ་ན་ཡོད་པ་ཡང་བླུགས་པར་བྱེད་དོ་ཞེས་མི་སྙན་པར་བརྗོད་དོ། །དེ་ལྟར་གྱུར་པ་དགེ་སློང་དག་གིས་སྟོན་པ་ལ་གསོལ་
པ་དང་། བཀའ་སྩལ་པ་དེ་ལྟ་བུར་བྱས་པ་བདེན་ནམ། བཙུན་པ་བདག་གིས་རུམ་ན་བླུགས་པར་བགྱིས་པ་ནི་མ་མཆིས་ཀྱི་ཉམས་སུ་ནི་བླངས་སོ། །དེ་ནས་སྟོན་པས་བཀའ་སྩལ་པ། དགེ་སློང་མས་འདི་འདྲ་བའི་གནས་ལ་ཉམས་སུ་མ་ལེན་ཅིག་ཉམས་སུ་

བླངས་ན་ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ཡངས་པ་ཅན་གྱི་ཆུ་བོ་དགའ་སྐྱེད་ཀྱི་འགྲམ་ཐང་ཤིང་གི་ནགས་སྟུག་པོ་ན་བཞུགས་སོ། །དེའི་ཚེ་དགེ་སློང་མ་དག་ལ་མི་གཙང་བ་སྒོམས་ཤིག་པར་ཆོས་བཤད་པ་དང་། དེ་ན་དགེ་སློང་མ་རྣམས་ཀྱང་མི་གཙང་བ་བསྒོམས་པ་
ལས་ལུས་རྣག་ཅན་འདིས་ཡིད་བྱུང་ངོ་། །སྒྱིད་ལུག་སྟེ་རྣམ་པར་སྨོད་ཅིང་མཚོན་གྱིས་འདེབས་དུག་ཀྱང་ཟ་སྲད་བུས་ཀྱང་འགགས་ཏེ་དགེ་སློང་མ་དག་གིས་དགེ་སློང་མ་གསོད་པས་དེའི་ཚེ་ན་དགེ་སློང་མ་རྣམས་ཉུང་ཞིང་འགྲིབས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་
བོ་ལ་ཅིའི་རྒྱུ་ཅིའི་རྐྱེན་གྱིས་དགེ་སློང་མའི་དགེ་འདུན་འདི་དག་ཉུང་བར་གྱུར་ཞེས་སྨྲས་པ་དང་། ཀུན་དགའ་བོས་ཇི་ལྟར་གྱུར་པ་གསོལ་པ་དང་། སྟོན་པས་གླེང་གཞི་འདི་དང་། བྱུང་བ་འདིའི་ཕྱིར་དགེ་སློང་མའི་དགེ་འདུན་བསྡུས་ནས་དགེ་སློང་མ་མང་པོ་ལ་དེ་ལྟར་དགེ་སློང་མས་དགེ་སློང་མ་གསོད་
པ་བདེན་ནམ་ཞེས་སྨྲས་པ་དང་། བཙུན་པ་མད་དོ་ཞེས་གསོལ་ནས་རྣམ་གྲངས་དུ་མས་སྨད་དོ། །ཉན་ཐོས་མའི་དགེ་འདུན་རྣམས་ལ་བསླབ་པའི་གནས་བཅས་སོ། །ཡང་དགེ་སློང་མ་གང་མིའམ་མིར་ཆགས་པ་ལ་ཆེད་དུ་བསམས་ནས། ལག་དར་ཏེ་སྲོག་བཅད་དམ། དེ་ལ་
མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་ལ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། ཀྱེ་མི་ཁྱོད་སྡིག་པ་དང་མི་གཙང་བ་དང་འཚོ་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བ་སླའོ་ཞེས་དེ་སྐད་ཀྱང་ཟེར་ལ། སེམས་
ཀྱིས་འདོད་པ་དང་སེམས་ཀྱིས་ཀུན་དུ་བརྟགས་ནས་རྣམ་གྲངས་དུ་མས་འཆིར་བཅུག་གམ། འཆི་བའི་བསྔགས་པ་བརྗོད་པ་ལས་དེ་ཡང་ཐབས་དེས་འཆི་བའི་དུས་བྱས་ན། དགེ་སློང་མ་འདི་ཕས་ཕམ་པ་ཡིན་གྱི་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་གང་མ་དང་
འདྲའོ། །མི་འམ་ཞེས་བྱ་བ་ནི་གང་མའི་མངལ་དུ་དབང་པོ་དྲུག་ཐོབ་པར་གྱུར་པའོ། །མིར་ཆགས་པ་ཞེས་བྱ་བ་ནི་མའི་མངལ་དུ་དབང་པོ་གསུམ་ཐོབ་པ་སྟེ། ལུས་དང་འཚོ་བ་དང་ཡིད་ཀྱི་དབང་པོའོ། །ཆེད་དུ་བསམས་ཏེ་ཞེས་བྱ་བ་ནི་དཔྱད་པའོ། །ལག་དར་ཏེ་ཞེས་བྱ་བ་ནི་ལག་གིས་བསྣུན་

པའོ། །སྲོག་བཅད་པ་ཞེས་བྱ་བ་ནི་སྲོག་དང་ཕྲལ་བའོ། །མཚོན་བྱིན་ཞེས་བྱ་བ་ནི་རལ་གྲི་དང་སྤུ་གྲི་དང་ཆུ་གྲིའོ། །མཚོན་ཐོགས་པ་གཉེར་ཏམ་ཞེས་བྱ་བ་ནི་བུད་མེད་དང་སྐྱེས་པ་དང་མ་ནིང་ངོ་། །དེ་ལ་འཆིར་གཅུག་ཅེས་བྱ་བ་ནི་རྣམ་པ་གསུམ་སྟེ། ཚུལ་ཁྲིམས་ངན་པ་ཅན་དང་། ཚུལ་
ཁྲིམས་དང་ལྡན་པ་དང་། ནད་པའོ། །ཇི་ལྟར་ན་ཚུལ་ཁྲིམས་ངན་པ་ཅན་ལ་ཞེ་ན། འདི་ལྟར་ཚུལ་ཁྲིམས་ངན་པ་ཅན་གྱི་དགེ་སློང་ངམ་དགེ་སློང་མ་ཡང་རུང་། དེའི་ཆོས་གོས་ལ་སོགས་པ་དགེ་སྦྱོང་གི་འཚོ་བའི་ཡོ་བྱད་འདོད་ནས་དེ་ཇི་སྲིད་དུ་འཚོ་བ་དེ་སྲིད་དུ་ངས་མི་ཐོབ་ཀྱིས་དེ་འཆིར་གཞུག་གོ་སྙམ་ནས་
དེའི་གན་དུ་སོང་སྟེ་འཕགས་མ་ཁྱོད་ཚུལ་ཁྲིམས་ངན་པ་སྡིག་པའི་ཆོས་ཅན་སྒོ་གསུམ་ནས་ངན་དུ་སྤྱོད་དགེ་སྦྱོང་མ་ཡིན་པར་དགེ་སྦྱོང་དུ་འཆེ་བ་ཁྱོད་ཇི་ཙམ་དུ་རིང་དུ་འཚོ་བ་དེ་ཙམ་དུ་བསོད་ནམས་མ་ཡིན་པ་མང་དུ་སྐྱེད་པས་ལུས་དང་བྲལ་ན་ངན་སོང་གསུམ་དུ་ཡུན་རིང་དུ་སྐྱེའོ་ཞེས་སྨྲས་པ་དང་། དེས་དེ་ལ་
འཕགས་མ་འདི་ཅི་ལྟར་བྱ། ཚུར་ཤོག་རང་གིས་རང་སོད་ཅིག་ཅེས་བྱས་པ་དང་། དེས་ཀྱང་རང་གིས་ཀྱང་སྲོག་བཅད་ན་ཕམ་པར་འགྱུར་རོ། །གལ་ཏེ་དགེ་སློང་མ་དེ་འགྱོད་དེ། དེའི་གན་དུ་སོང་ནས་ངས་གྱི་ན་དོན་མེད་པ་མ་བརྟགས་པའི་ཚིག་གིས་སྨྲས་སོ། །བཙུན་པ་ཁྱོད་ཚུལ་ཁྲིམས་
ངན་པ་ཅན་གྱིས་དགེ་བའི་བཤེས་གཉེན་འགའ་ཞིག་རྙེད་ན། དེས་ལུས་དང་ངག་དང་ཡིད་ཡོངས་སུ་མ་དག་པར་སྤྱོད་པ་ལས་བཟློག་ནས། ལུས་དང་ངག་དང་ཡིད་ཡོངས་སུ་དག་པར་ཀུན་ཏུ་སྤྱད་པ་ལ་རབ་ཏུ་འཇུག་སྟེ། ལུས་དང་བྲལ་ན་མཐོ་རིས་སུ་སྐྱེའོ་ཞེས་དེ་སྐད་སྨྲས་པ་དང་། གལ་ཏེ་དེས་
འཕགས་མ་བདག་གིས་ཅི་ཞིག་བྱ་ཞེས་སྨྲས་པ་དང་། དེས་དེ་ལ་ཁྱོད་རང་ལ་མ་གསོད་ཅེས་བྱས་པ་དང་། གལ་ཏེ་དགེ་སློང་མ་དེས་རང་ལ་རང་གིས་མ་བསད་ན། དགེ་སློང་མ་ལ་སྦྱོར་བ་སྔ་མ་ཉིད་ཀྱིས་ཉེས་པ་སྦོམ་པོའོ། །གལ་ཏེ་དགེ་སློང་མ་དེས་འདི་སྐད་ཟེར་མོད་ཀྱིས་འོན་ཀྱང་བདག་རང་ལ་རང་གིས་
རང་སྲོག་བཅད་ན་སྔ་མ་བཞིན་དུ་ཉེས་པ་སྦོམ་པའོ། །ཇི་ལྟར་ན་ཚུལ་ཁྲིམས་དང་ལྡན་པ་ལ་ཞེ་ན། འདི་ལྟར་དགེ་སློང་མས་ཚུལ་ཁྲིམས་དང་ལྡན་པའི་དགེ་སློང་ལ་ཞེས་བྱ་བ་ནས་འཆིར་གཞུག་གོ་སྙམ་ནས་ཞེས་བྱ་བའི་བར་དུ་སྔ་མ་བཞིན་ནོ། །དེའི་གན་དུ་སོང་སྟེ། འཕགས་མ་ནི་

ཚུལ་ཁྲིམས་དང་ལྡན་པ་དགེ་བའི་ཆོས་ཅན་གཏོང་བ་ཕུན་སུམ་ཚོགས་པ་སྟེ། ཁྱོད་ཡུལ་གཞན་དུ་སྐྱེས་ན་ལོ་ལེགས་པ་དང་འདྲ་སྟེ། མཐོ་རིས་ནི་རས་ལྟ་བུས་ཆོད་ཐར་པ་ནི་ཡོལ་བ་ལྟ་བུས་ཆོད་དེ། ལུས་དང་བྲལ་ན་ནི་ལྷར་སྐྱེའོ་ཞེས་པ་དང་སྲིང་མོ་བདག་གིས་ཅི་ཞིག་བྱ་ཞེས་བྱ་
བ་ནས། ཉེས་པ་སྦོམ་པོའི་ལྟུང་བར་འགྱུར་ཞེས་བྱ་བའི་བར་དུ་སྔ་མ་བཞིན་ནོ། །ཇི་ལྟར་ན་ནད་པ་ལ་ཞེ་ན་ནད་པ་སྡུག་བསྔལ་བ་ནད་ཀྱིས་གཟིར་བའི་དགེ་སློང་དེ་ལ་ལྷུང་བཟེད་དམ་ཞེས་བྱ་བ་ནས། དེའི་གན་དུ་སོང་སྟེ་འཆིར་གཞུག་གོ་སྙམ་པའི་བར་དུ་སྔ་མ་བཞིན་ནོ། །དེ་དེའི་གན་དུ་སོང་སྟེ་
འཕགས་མ་ནི་ནད་བུ་ཅན་ནད་ཀྱིས་སྡུག་བསྔལ་བ་སེར་སྣ་ཅན་འཇུངས་པ་སྟེ། ཁྱོད་ཇི་སྲིད་དུ་ཡུན་རིང་དུ་འཚོ་བ་དེ་སྲིད་དུ་སྡུག་བསྔལ་མི་ཟད་པ་མྱོང་ངོ་ཞེས་སྨྲས་པ་དང་། གལ་ཏེ་དེས་སྲིང་མོ་བདག་གིས་འདིར་ཅི་ཞིག་བྱ་ཞེས་དེ་སྐད་སྨྲས་པ་དང་། དེས་དེ་ལ་འཕགས་མ་ཚུར་ཤོག་ལ་རང་
གིས་རང་སོད་ཅེས་པ་ནས། དོན་མེད་པ་ལ་མ་བརྟགས་པར་སྨྲས་སོ་ཞེས་པའི་བར་དུ་སྔ་མ་བཞིན་ནོ། །འཕགས་མ་དགེ་བའི་བཤེས་གཉེན་འགའ་ཞིག་རྙེད་ན། དེས་ཁྱོད་ལ་འཕྲོད་པའི་སྨན་གཏོང་ཞིང་རིང་པོ་མི་ཐོགས་པར་བདེ་བར་ནད་མེད་པར་འགྱུར་རོ་ཞེས་སྨྲས་པ་དང་། དེས་དེ་ལ་སྲིང་
མོ་བདག་གིས་འདིར་ཅི་ཞིག་བྱ་ཞེས་དེ་སྐད་ཟེར་བ་དང་། དེས་དེ་ལ་འཕགས་མ་ཁྱོད་རང་གིས་རང་ལ་མ་གསོད་ཅེས་པ་ནས་སྦོམ་པོར་འགྱུར་ཞེས་བྱ་བའི་བར་དུ་སྔ་མ་བཞིན་ནོ། །དེ་ལ་འཆི་བའི་བསྔགས་པ་བརྗོད་ཅེས་བྱ་བ་ནི། འཆི་བར་འདོད་པའི་མདུན་དུ་འཆི་བའི་བསྔགས་པ་བརྗོད་
པའོ། །ཀྱེ་མི་ཁྱོད་ཅེས་བྱ་བ་ནི་དགེ་སློང་མས་འབོད་པའི་ཚིག་གོ། །སྡིག་པ་དང་མི་གཙང་བ་དང་འཚོ་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བ་སླའོ་ཞེས་བྱ་བ་འདི་དག་ནི་སྨད་པའི་ཚིག་གོ། །དེ་ལ་འདི་སྐད་ཅེས་ཟེར་ཞེས་བྱ་བ་ནི་སྨྲ་བའོ། །སེམས་ཀྱི་འདོད་སེམས་
ཀྱིས་ཀུན་ཏུ་བརྟགས་ནས་ཞེས་བྱ་བ་ནི་ངན་སེམས་ཀྱིས་མངོན་པར་འདོད་པའོ། །རྣམ་གྲངས་དུ་མས་དེ་འཆིར་བཅུག་གམ་ཞེས་བྱ་བ་ནི་རྣམ་གྲངས་མང་པོས་འཆིར་བཅུག་པའོ། །འཆི་བའི་བསྔགས་པ་བརྗོད་ཅེས་བྱ་བ་ནི། འཆི་བར་འདོད་པའི་མདུན་དུ་རྣམ་གྲངས་དུ་མས་འཆི་

བའི་བསྔགས་པ་བརྗོད་ཅིང་། སྣོན་ཏེ་མི་ཟློག་པར་བྱེད་པའི་དོན་ཏོ། །དེ་ཡང་ཐབས་དེས་འཆི་བའི་དུས་བྱས་ཞེས་བྱ་བ་ནི། མེའམ། དུག་གམ། མཚོན་ནམ། གཡང་སའམ། ཐག་པས་འགེགས་པ་འམ། ཆུར་མཆོངས་པ་ལ་སོགས་པའོ། །དགེ་སློང་མ་ཞེས་བྱ་
བ་ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའོ། །དེས་ཡང་ཞེས་བྱ་བ་ནི་ཉེ་བར་བསྟན་པའོ། །ཕས་ཕམ་པ་ཞེས་བྱ་བ་ནི་གོང་མ་བཞིན་ནོ། །གནས་པར་བྱ་བ་མ་ཡིན་ནོ་ཞེས་བྱ་བ་ནི་སྔ་མ་བཞིན་དུ་སྦྱར་རོ། །ལྟུང་བ་གང་ཞེ་ན། ཟིན་པའི་ལུས་སུ་གཏོགས་པ་དང་། ཕྱི་རོལ་
གྱིས་ཀྱང་འཕངས་པ་དང་། གཉིས་དང་ཡང་ལྡན་པའོ། །ཇི་ལྟར་ན་ཟིན་པའི་ལུས་སུ་གཏོགས་པ་ཞེ་ན། དགེ་སློང་མས་མི་རྣམ་གསུམ་ལ་གསོད་སེམས་ཀྱིས་སོར་མོ་ལྔས་བསྣུན་ཏེ། དུས་བྱས་ན་ཕམ་མོ། །དེས་དེ་མ་བྱས་ཀྱི་དེ་ནས་ཕྱི་ཞིག་ན་གྱུར་ན་ཡང་ཕམ་མོ། །དེས་དེའི་ཚེ་ཡང་མ་
ཡིན་ཏེ། ཕྱིས་ཀྱང་མ་ཡིན་ན་སྦྱོར་བ་སྔ་མ་ཉིད་ཀྱིས་སྦོམ་པོའོ། །སོར་མོ་གཅིག་ཇི་ལྟ་བ་བཞིན་དུ་ལུས་ཀྱི་ཡན་ལག་ཐ་ན་རྐང་པའི་མཐེ་བོང་བསྣུན་ཏེ་དུས་བྱས་པ་ཡང་གོང་མ་བཞིན་དུ་སྦྱར་རོ། །ཇི་ལྟར་ན་ཕྱི་རོལ་གྱིས་འཕངས་པ་ཞེ་ན། དགེ་སློང་མས་མི་རྣམ་གསུམ་ལ། གསོད་
སེམས་ཀྱིས་འཕངས་ཏེ། དུས་བྱས་པ་ཡང་མདའ་དང་རྡོ་དབྱིག་ལ་སོགས་པ་ཐམས་ཅད་འདྲའོ། །ཅི་ལྟར་ན་གཉི་ག་དང་ལྡན་པ་ཡིན་ཞེ་ན། དགེ་སློང་མས་མི་རྣམ་གསུམ་ལ་གསོད་སེམས་ཀྱིས་རལ་གྲི་ལ་སོགས་པས་བསྣུན་ཏེ། །འདི་ཐབས་འདིས་འཆི་བའི་དུས་བྱེད་པར་འགྱུར་རོ་
སྙམ་པ་ལས་དེ་ཡང་ཐབས་དེས་དུས་བྱས་པ་ཡང་གོང་མ་བཞིན་དུ་སྦྱར་རོ། །ཡན་ལག་ལྔས་ཕམ་པར་འགྱུར་ཏེ། གཞན་ཡིན་པ་མིར་གྱུར་པ་གསོད་སེམས་དང་ལྡན་པ་དེ་སྦྱོར་བ་དུས་བྱས་པའོ། །ཕས་ཕམ་པ་གསུམ་པའོ།། །།མི་ཆོས་བླ་མར་གྱུར་སྨྲ་ཞེས་བྱ་བ་ནི།
སངས་རྒྱས་བཅོམ་ལྡན་འདས་འོད་མཁན་གྱི་གྲོང་ཕྱོགས་ཤིང་ཤ་པའི་ནང་དུ་བཞུགས་ཏེ། དེའི་ཚེ་ན་མུ་གེ་བྱུང་སྟེ། དགེ་སློང་མ་རྣམས་ཀྱང་ཡངས་པ་ཅན་གྱི་ཉེ་འཁོར་ན་མཛའ་བོ་དག་དང་དབྱར་ཚུལ་དུ་ཞུགས་སོ། །སྟོན་པ་ལ་བསྙེན་བཀུར་བྱེད་པའི་ཕྱིར། ཀུན་དགའ་བོ་ནི་འོད་

མ་ཅན་དེ་ཉིད་དུ་དབྱར་ཚུལ་དུ་ཞུགས་སོ། །དེའི་ཚེ་དགེ་སློང་མ་དེ་དག་གིས་འདི་སྙམ་དུ་བསམས་སོ། །ད་ལྟར་གྱི་དུས་ན་མུ་གེ་བྱུང་བས་སྡུག་བསྔལ་ཏེ། བསོད་སྙོམས་སློང་པས་ཀྱང་རྙེད་པར་དཀའ་སྟེ། ཁྱིམ་པ་དག་གིས་རང་གི་བུའི་ཟས་སྦྱར་བ་ཡང་དཀའ་ན། དགེ་སློང་མ་
རྣམས་ལ་ལྟ་སྨོས་ཀྱང་ཅི་དགོས། བདག་ཅག་རྣམས་ནི་གྲགས་པ་ཆུང་ལ། འཇིག་རྟེན་པ་རྣམས་ནི་ཡོན་ཏན་ལ་དགའ་བས་ཅི་ནས་བདག་ཅག་ཕན་ཚུན་ཡོན་ཏན་བརྗོད་པར་བྱའོ་སྙམ་ནས། བྲམ་ཟེ་དང་ཁྱིམ་བདག་གི་གན་དུ་སོང་ནས་སྨྲས་པ་གྲོང་ཕྱོགས་གང་ན་འདི་འདྲ་བའི་དགེ་
སློང་མའི་དགེ་འདུན་རྣམས་འཁོད་པ་དེ་དག་གིས་བྲམ་ཟེ་དང་ཁྱིམ་བདག་ཁྱེད་ཀྱིས་རྙེད་པ་རབ་ཏུ་རྙེད་དེ། དགེ་སློང་མ་འདིས་ནི་བསམ་གཏན་བཞི་དང་། འདུ་ཤེས་མེད་མིན་སྐྱེ་མཆེད་ཀྱི་བར་དུ་ཐོབ་བོ། །དགེ་སློང་མ་འདིས་ཚད་མེད་པ་བཞི་དང་། མངོན་པར་ཤེས་པ་དྲུག་དང་། དགེ་
སྦྱོང་གི་འབྲས་བུ་བཞི་ཐོབ་པའོ། །དགེ་སློང་མ་འདིས་ནི་དགྲ་བཅོམ་པ་ཐོབ་བོ་ཞེས་བྱ་བ་དང་། འཇིག་རྟེན་པ་ནི་ཡོན་ཏན་དག་ལ་དགའ་བས་བདག་གི་བུ་ལ་སྦྱིན་པ་དང་། སྦྱར་བར་མི་སེམས་སོ། །དེ་དག་དབྱར་ཟླ་གསུམ་འདས་ནས་ཆོས་གོས་ཟིན་ནས་མཉན་དུ་ཡོད་པར་ཕྱིན་ཏོ། །དེ་ནས་
དགེ་སློང་མ་དེ་དག་གིས་འཕགས་མ་ཁྱེད་ཀྱིས་དབྱར་གང་དུ་ཚུལ་དུ་ཞུགས་ཞེས་དྲིས་པ་དང་། འཕགས་མ་དག་བདག་ཅག་ནི་ཡུལ་བྲི་ཛའི་གྲོང་ནའོ། །འོ་ན་བདེ་བ་ལ་རེག་པར་སྤྱོད་དམ་བསོད་སྙོམས་ཀྱིས་མ་བྲེལ་ཏམ་ཞེས་སྨྲས་པ་དང་། དེ་དག་གིས་བདག་ཅག་ནི་བདེ་བ་ལ་རེག་པར་
སྤྱོད་ཅིང་བསོད་སྙོམས་ཀྱིས་ཀྱང་མ་བྲེལ་ཏོ། །འོ་ན་རྒྱུ་གང་རྐྱེན་གང་གིས་བྲེལ་པར་མ་གྱུར་འཇིག་རྟེན་པ་ནི་ཡོན་ཏན་ལ་དགའ་སྟེ། བདག་ཅག་གཅིག་གིས་གཅིག་གི་ཡོན་ཏན་བརྗོད་པའི་ཕྱིར་རོ། །ཅི་བདེན་ནམ་འོན་ཏེ་བརྫུན་དུ་སྨྲས། བརྫུན་དུའོ། །དེ་ལྟར་གྱུར་པ་དགེ་སློང་རྣམས་
ཀྱིས་སྟོན་པ་ལ་གསོལ་ནས། བཀའ་སྩལ་པ། དགེ་སློང་མ་མང་པོ་ལ་ཁྱེད་ཀྱིས་མི་ཆོས་ལས་བླ་མར་གྱུར་པ་སྨྲས་པ་བདེན་ནམ། བཙུན་པ་མད་དོ་ཞེས་གསོལ་པ་དང་། རྣམ་གྲངས་དུ་མས་སྨད་དོ། །ཉན་ཐོས་མ་རྣམས་ལ་འདུལ་བ་ལ་བསླབ་པའི་གནས་བཅས་སོ། །ཡང་དགེ་

སློང་མ་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མེད་པ་མེད་བཞིན་དུ་མིའི་ཆོས་ལས་བླ་མར་གྱུར་པ་དང་། མཐའ་དང་འཕགས་པའི་བྱེ་བྲག་ཐོབ་པ་དང་། ཤེས་པ་དང་མཐོང་བ་དང་། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ་འདི་མཐོང་ངོ་ཞེས་ཁས་
འཆེ་བ་ལས་ཉེས་པ་བྱུང་བ་ཚངས་པར་འདོད་ནས། དེ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་འཕགས་མ་རྣམས་བདག་གིས་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་དེ་དེ་སྐད་ཀྱང་ཟེར་ན་དགེ་སློང་མ་དེ་
ཡང་ཕས་ཕམ་པ་ཡིན་གྱིས་ལྷན་ཅིག་ཏུ་གནས་པར་མི་བྱའོ་ཞེས་དེ་ལྟར་བསླབ་པའི་གནས་བཅས་པ་དང་། དགེ་སློང་མ་མང་ཞིག་རྣལ་འབྱོར་ལ་བརྩོན་པས་ཞི་གནས་ཀྱི་མཚན་མ་ཞིག་ལ་བརྟེན་ནས། འཇིག་རྟེན་གྱི་ལམ་ཡིད་ལ་བྱེད་པས་ཉོན་མོངས་པ་སེལ་ཏེ། འདོད་ཆགས་ལ་
སོགས་པ་མི་སྤྱོད་པས། དེ་དག་ཕན་ཚུན་འཕགས་མ་བདག་གིས་ཐོབ་པར་བྱ། ཉོན་མོངས་པ་འདོད་ཆགས་ལ་སོགས་པ་མི་སྤྱོད་པ་ཐོབ་པར་བྱ་བ་ནི་བདག་གིས་ཐོབ་ཟིན་ཏོ། །སྐྱེ་བ་ནི་ཟད་ཚངས་པར་སྤྱད་པ་ནི་སྤྱོད་བྱ་བ་ནི་བྱས་སྲིད་པ་གཞན་མི་ཤེས་ཏེ། དགྲ་བཅོམ་པ་ཡང་ཐོབ་
པོ་ཞེས་བྱ་བ་ལས་དེ་དག་ཁྱིམ་པ་མོ་དང་། དགེ་ཚུལ་མ་དང་། ལྷན་ཅིག་གནས་པ་ལས་ཉོན་མོངས་པ་སྐྱེས་པ་དང་། དེ་དག་གཅིག་ལ་གཅིག་སྨྲས་པ། བདག་ཅག་ཁྱིམ་པ་མོ་དང་། དགེ་ཚུལ་མ་དང་ལྷན་ཅིག་ཏུ་འདྲེས་ཤིང་གནས་པའི་ཚེ། ཉོན་མོངས་པ་དེ་དག་སླར་སྐྱེས་
ན་སྟོན་པས་ནི་མེད་བཞིན་དུ་མིའི་ཆོས་ལས་བླ་མར་གྱུར་པ་སྨྲས་ན་ཕམ་མོ་ཞེས་གསུངས་ན། བདག་ཅག་ཕམ་པར་མ་གྱུར་གྲང་སྙམ་པ་དང་། དེ་ལྟ་བུར་གྱུར་པ་དགེ་སློང་མས་དགེ་སློང་ཕ་ལ་སྨྲས་པ་དང་། དེ་དག་གིས་སྟོན་པ་ལ་གསོལ་ནས། བཀའ་སྩལ་པ་སྔ་མ་ནི་བཅས་པའོ། །
འདི་ནི་རྗེས་སུ་གནང་བས་ན་ཉན་ཐོས་མ་རྣམས་ལ་འདུལ་བའི་གནས་བཅའོ། །ཡང་དགེ་སློང་མ་གང་མངོན་པར་མི་ཤེས་ཤིང་ཡོངས་སུ་མི་ཤེས་པ་མེད་ལ་མེད་བཞིན་དུ་མིའི་ཆོས་ལས་བླ་མར་གྱུར་པ་དང་། མཐའ་དང་འཕགས་པའི་བྱེ་བྲག་ཐོབ་པ་དང་། ཤེས་པ་དང་མཐོང་བ་

དང་། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་པའོ་འདི་མཐོང་ངོ་ཞེས་ཁས་འཆེ་བ་ལས་ཉེས་པ་བྱུང་བ་ཚངས་པར་འདོད་ནས། དེ་དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་འཕགས་མ་རྣམས་བདག་གིས་ནི་མི་ཤེས་པར་ཤེས་སོ་ཞེས་སྨྲས་སོ། །མ་མཐོང་བར་མཐོང་
ངོ་ཞེས་སྨྲས་ཏེ་གསོབ་གསོག་བརྫུན་དུ་སྨྲས་སོ་ཞེས་དེ་སྐད་ཟེར་ན། མངོན་པའི་ང་རྒྱལ་མ་གཏོགས་ཏེ། དགེ་སློང་མ་དེ་ཡང་ཕས་ཕམ་པ་ཡིན་གྱིས་ལྷན་ཅིག་ཏུ་གནས་པར་མི་བྱའོ། །མངོན་པར་མི་ཤེས་པ་ནི་འཇིག་རྟེན་གྱི་ལམ་མི་ཤེས་པ་དང་། རྗེས་སུ་མཐུན་པའི་སྒོ་ནས་མི་ཤེས་པ་
དང་། མི་རྟག་པ་ལ་མི་རྟག་པར་མི་ཤེས་པ་ལ་སོགས་ཏེ། མི་རྟག་པའི་སྒོ་ནས་མི་ཤེས་པའོ། །ཡོངས་སུ་མི་ཤེས་པ་ནི་འཇིག་རྟེན་ལས་འདས་པའི་ལམ་རྣམ་པར་གྲོལ་བ་མི་ཤེས་པ་དང་། རྗེས་སུ་མི་མཐུན་པའི་སྒོ་ནས་མི་ཤེས་པ་སྟེ། མི་རྟག་པ་ལ་རྟག་པ་མེད་པར་མི་ཤེས་པ་
ནི་རྗེས་སུ་མི་མཐུན་པའི་སྒོ་ནས་མི་ཤེས་པའོ། །མིའི་ཆོས་ཞེས་བྱ་བ་ནི་སྒྲིབ་པ་རྣམ་པ་ལྔ་སྟེ། འདོད་པའི་འདོད་ཆགས་དང་། གནོད་སེམས་དང་། གཉིད་དང་རྨུགས་པ་དང་། འགྱོད་པ་དང་གཡེང་བ་དང་། ཐེ་ཚོམ་མོ། །བླ་མ་ཞེས་བྱ་བ་ནི་འདོད་པའི་ཁམས་ལས་བླ་མའི་གཟུགས་
སོ། །དེའི་བླ་མ་ནི་གཟུགས་མེད་པའི་ཁམས་སོ། །མཐའ་ཞེས་བྱ་བ་ནི་མྱ་ངན་ལས་འདས་པ་ལས་མཐའ་ཞེས་བྱའོ། །འཕགས་མ་ཞེས་བྱ་བ་ནི་དགེ་སློང་གི་འབྲས་བུ་བཞིའོ། །ཤེས་ཞེས་བྱ་བ་ནི་ཡེ་ཤེས་བཅུ་སྟེ། སྡུག་བསྔལ་ལ་ཆོས་སུ་ཡེ་ཤེས་དང་། སྡུག་བསྔལ་རྗེས་སུ་ཤེས་
པའི་ཡེ་ཤེས་ཏེ། དེ་བཞིན་དུ་བདེན་པ་བཞི་ལ་གཅིག་ཅིང་གཉིས་གཉིས་མཐོང་བ་ཞེས་བྱ་བ་ནི་བརྒྱད་དེ། སྡུག་བསྔལ་ལ་ཆོས་སུ་ཤེས་པའི་བཟོད་པ་དང་། སྡུག་བསྔལ་རྗེས་སུ་ཤེས་པའི་བཟོད་པ་དང་། བདེན་པ་བཞི་ལ་དེ་བཞིན་དུ་གཉིས་གཉིས་ཏེ་བརྒྱད་དོ། །རེག་པར་སྤྱོད་པ་
མེད་ལ་ཞེས་བྱ་བ་ནི། མངོན་སུམ་དུ་མ་ཐོབ་པ་ཐོབ་བོ་ཞེས་ཟེར་བའོ། །མེད་བཞིན་དུ་ཞེས་བྱ་བ་ནི་བདག་ལ་དབང་ཡོད་དོ། །ཐོབ་པར་བྱ་བ་ནི་སླ་སྟེ། ཐོབ་པར་བྱ་བའམ་མི་བྱ་བར་ཟད་དོ་ཞེས་ཟེར་བའོ། །འདི་ཤེས་ཞེས་འདི་མཐོང་ཞེས་བྱ་བ་ནི་ལྷ་ལ་སོགས་པའོ། །ཁས་འཆེ་

ཞེས་བྱ་བ་ནི་མི་ཤེས་པར་ཤེས་སོ་ཞེས་ཟེར་བ་དང་། མ་མཐོང་བར་མཐོང་ངོ་ཞེས་ཁས་འཆེ་བའོ། །དུས་གཞན་ཞིག་ན་ཞེས་བྱ་བ་ནི་དུས་ཕྱི་ཞིག་ནའོ། །དྲིས་ཀྱང་རུང་འགྱོད་པ་སྐྱེས་ནས་རང་སྨྲ་བའོ། །འཕགས་མ་རྣམས་བདག་གིས་མི་ཤེས་པར་ཤེས་སོ་ཞེས་སྨྲས། མ་
མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་ཅེས་བྱ་བ་ནི་ཡོན་ཏན་མེད་པར་ཁ་ཟས་དང་གྲགས་པ་མེད་པར་སྨྲ་བའི་ཕྱིར་སྣོད་སྟོང་པ་དང་འདྲའོ། །བརྫུན་ཞེས་བྱ་བ་ནི་འདུ་ཤེས་སྦས་ནས་གཞན་བསླུས་པའོ། །དགེ་སློང་མ་ཞེས་བྱ་བ་ནི་དགེ་སློང་མའི་དངོས་པོ་ཡོད་པའོ། །དེ་
ཡང་ཞེས་བྱ་བ་ནི་ཉེ་བར་བསྟན་པའོ། །ཕས་ཕམ་པར་གྱུར་ཏེ་མིའི་ཆོས་ལ་བླ་མར་གྱུར་པ་དང་། རང་གི་ཚིག་དང་། བདག་གི་ཕྱིར་དང་། གཞན་གྱི་དོན་གོ་བའོ། །དེ་ལ་ལྟུང་བ་ཇི་ལྟ་བུ་ཞེ་ན། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྟོ་འཕྱེ་ཆེན་པོ་དང་། ཡི་དགས་ལ་
སོགས་པ་མ་མཐོང་བ་མཐོང་ངོ་ཞེས་ཟེར་ན་སྦོམ་པོར་འགྱུར་རོ། །དེ་བཞིན་དུ་དེ་དག་གི་སྒྲ་ཐོས་སོ་ཞེས་ཟེར་བ་ཡང་དེ་བཞིན་དུ་བཤད་པར་བྱའོ། །ལྷ་ལ་སོགས་པ་ནས་དུར་ཁྲོད་ཀྱི་ཤ་ཟ་ཡན་ཆད་གོང་དུ་སྨོས་པ་རྣམས་བདག་ལ་ལྟར་འོང་ངོ་ཞེ་འམ་བདག་དེ་དག་ལྟར་ཞེས་པ་དང་།
གོང་མ་བཞིན་དུ་སྦྱར་རོ། །བདག་གིས་འཕགས་པའི་འབྲས་བུ་ཐོབ་པོ་ཞེས་ཟེར་བ་ན་ཕམ། དགེ་སློང་མ་ལས་དེ་ལྟ་བུ་ཐོབ་པ་ཡང་ཡོད་དེ་ཞེས་ཟེར་ན་བདག་ཉིད་མ་སྨོས་ན་སྦོམ་པོར་འགྱུར་ཏེ། ལྟག་འོག་ཀུན་ཀྱང་དེ་བཞིན་དུ་བཤད་པར་བྱའོ། །ཕམ་པ་བཞི་པ་རྫོགས་སོ།། །།
རི་དགས་དགྲའི་བུ་ཞེས་བྱ་བ་ནི། སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་མ་རྣམས་རི་དགས་དགྲའི་བུ་ས་གའི་ཁང་པ་ན་གནས་ཤིང་འཁོད་དོ། །དེ་ཡང་ཉིན་གཅིག་བཞིན་ཕྱག་འཚལ་དུ་འོང་སྟེ་གཟུགས་བཟང་བ་བལྟ་ན་སྡུག་པ་ཞིག་སྟེ།
གཙུག་དགའ་མོས་མཐོང་སྟེ་ཆགས་པར་གྱུར་པས་ན་བའི་ཐབས་སུ་བྱས་ནས། དེར་འོང་བ་སྡོད་པའི་ཕྱིར་གནས་ཁང་དུ་ཞུགས་ནས་ཉལ་ཞིང་འདུག་གོ། །ས་ག་དགེ་སློང་མས་དེར་འོངས་པ་དང་ཐམས་ཅད་བསོད་སྙོམས་ལ་དོང་སྟེ། ཁང་སྐྱོང་གཅིག་པུ་འདུག་པ་ལ་ཕྱག་བྱས་ཏེ་ཕྱིར་བྱུང་བ་

དང་། གཙུག་དགའ་མོས་བདག་ནི་ནའོ་ཞེས་བོས་པ་དང་། དེས་ཀྱང་བདག་ནད་པ་བལྟས་ནས་འགྲོའོ་སྙམ་སྟེ། དེའི་གནས་ཁང་དུ་སོང་སྟེ་ཕྱག་བྱས་ན་ཇི་ལྟར་ན་ཞེས་དྲིས་པ་དང་། མོས་སྨྲས་པ་ཤིན་ཏུ་དཀའ་བ་ཞིག་ཞེས་སྨྲས་སོ། །དེའི་གསོས་ཅིའི་ཕྱིར་མི་མཛད། གཙུག་དགའ་མོས་
སྨྲས་པ། སྨན་མེད་དོ། །ས་གས་རྙེད་པར་དཀའ་བའི་སྨན་དེ་གང་ཞིག་ལགས། གཙུག་དགའ་མོས་རྙེད་དཀའ་བ་ཡང་མ་ཡིན་ཏེ། འོན་ཀྱང་བདག་ཅག་ལྟ་བུ་ལ་ནི་དེ་ལྟ་བུ་རྙེད་པར་དཀའོ། །ས་གས་སྨྲས་པ་བདག་ཀྱང་དད་པ་ཅན་ལགས་ཀྱིས་ཁྱོད་སོས་པར་གྱུར་ན་བདག་གིས་
ཡན་ལག་གི་ཤ་བཅད་དེ་ཡང་ཁྱོད་ལ་སྦྱིན་ནོ་ཞེས་བྱས་པ་དང་། གཙུག་དགའ་མོས་མི་རིགས་པ་བྱ་བསྒུགས་པ་དང་། དེས་འཕགས་མ་དེ་སྐད་མ་གསུངས་ཞེས་རྣ་བ་བཀག་སྟེ་ཕྱིར་བྱུང་བར་བརྩམས་པ་དང་། གཙུག་དགའ་མོས་སྨྲས་པ། དེ་ལྟར་མི་བྱེད་ན་ཚུར་ཤོག་ངའི་
ཡན་ལག་དང་ཉིང་ལག་ཉེས་ཤིག། དེས་དེའི་མགོ་བོ་དང་ཡན་ལག་དང་ཉིང་ལག་མཉེས་པ་དང་། གཙུག་དགའ་མོས་དགའ་བར་ཚོར་རོ། །དེ་དགེ་སློང་མ་རྣམས་ཀྱིས་མཐོང་བ་དང་ས་ག་ཡང་སྐྱེངས་ཏེ། སྤྱི་བོ་སྨད་ནས་ཕྱིར་བྱུང་ངོ་། །དེ་ལྟར་གྱུར་པ་དགེ་སློང་མ་རྣམས་ཀྱིས་དགེ་སློང་ལ་
སྨྲས་པ་དང་། དེ་དག་གིས་སྟོན་པ་ལ་གསོལ་ནས་དགེ་སློང་མའི་དགེ་འདུན་བསྡུས་ནས། གཙུག་དགའ་མོ་ལ་ཁྱོད་ཀྱིས་མི་མཛེས་པ་འདི་འདྲ་བ་བྱས་པ་བདེན་ནམ་ཞེས་སྨྲས་པ་དང་། བཙུན་པ་མད་དོ་ཞེས་གསོལ་ནས་རྣམ་གྲངས་དུ་མས་སྨད་དོ། །ཉན་ཐོས་མ་
རྣམས་ལ་བསླབ་པ་བཅས་སོ། །ཡང་དགེ་སློང་མ་གང་ཆགས་པར་གྱུར་ལ། སྐྱེས་པ་ཆགས་པར་གྱུར་པས་པུས་མོ་ཡན་ཆད་མིག་མན་ཆད་དུ་མནམས་ལ་ཀུན་ཏུ་མནམས་ཏེ། དགའ་བར་ཚོར་ན་དགེ་སློང་མ་དེ་ཡང་ཕས་ཕམ་པ་ཡིན་གྱིས་གནས་པར་མི་བྱའོ། །
ཡང་དགེ་སློང་མ་གང་ཞེས་བྱ་བ་ནི། གཙུག་དགའ་མོ་སྟེ་གང་དེ་དང་འདྲ་བ་གཞན་ཡང་ངོ་། །ཆགས་པར་གྱུར་ཞེས་བྱ་བ་ནི་གང་འདོད་ཆགས་པ་དང་། ཀུན་དུ་འདོད་ཆགས་པ་ཀུན་དུ་དཀྲིས་པ་དང་། འདོད་ཆགས་པའི་འདོད་ཆགས་ཀྱིས་གཟིར་བ་ནི་ཆགས་པ་ཞེས་བྱའོ། །

སྐྱེས་པ་ཞེས་བྱ་བ་ནི་མིའོ། །ཆགས་པ་ཞེས་བྱ་བ་ནི་གོང་མ་དང་འདྲའོ། །ལྷན་ཅིག་ཅེས་བྱ་བ་ནི་ཕྲད་པར་བྱེད་པའོ། །པུས་མོ་ཡན་ཆད་མིག་མན་ཆད་ཅེས་བྱ་བ་ནི་གནས་བསྟན་པའོ། །མནམས་ཀུན་དུ་མནམས་ཞེས་བྱ་བ་ནི་ལུས་ཀྱིས་ལུས་ཕྲད་པའོ། །དགའ་བར་ཚོར་ཞེས་
བྱ་བ་ནི་ཉམས་སུ་ལེན་པར་བྱེད་པའོ། །འདི་ཞེས་བྱ་བ་ནི་མངོན་པར་བསྟན་པའོ། །ཕམ་ཞེས་བྱ་བ་ནས་གནས་པར་མི་བྱ་ཞེས་བྱ་བའི་བར་དུ་སྔ་མ་བཞིན་ནོ། །དེ་ལ་ཉེས་པ་ཇི་ལྟ་བུ་ཞེ་ན་དགེ་སློང་མ་ཆགས་ལ་སྐྱེས་པ་ཆགས་པ་དང་། དགེ་སློང་མ་ཆགས་ལ་སྐྱེས་པ་མ་ཆགས་པ་དང་། དགེ་སློང་མ་མ་
ཆགས་ལ་སྐྱེས་པ་ཆགས་པ་དང་། དགེ་སློང་མ་མ་ཆགས་ལ་སྐྱེས་པ་མ་ཆགས་པས་ལྷན་ཅིག་ཏུ་པུས་མོ་ཡན་ཆད་མིག་མན་ཆད་ཀུན་དུ་རེག་པ་ལས་དགའ་བ་ཚོར་ན་དང་པོ་གཉིས་ནི་ཕམ་པར་གྱུར། གསུམ་པ་ནི་སྦོམ་པོར་འགྱུར་རོ། །ཐ་མ་ནི་ཉེས་བྱས་སོ། །ཉེས་པ་ནི་ལས་དང་
པོ་པ་དང་། སྨྱོས་པ་དང་། སེམས་འཁྲུགས་པ་དང་། ནད་ཀྱིས་གཟིར་བ་རྣམས་ལ་ལྟུང་བ་མེད་དོ། །པུས་མོ་ཡན་ཆད་མིག་མན་ཆད་ཀུན་དུ་རེག་པ་ནི་གོང་མ་བཞིན་དུ་བཤད་དེ། ཁྱད་པར་ནི་སྔ་མ་གཉིས་ནི་སྦོམ་པོའོ། །གསུམ་པ་ནི་ཉེས་སོ། །ཐ་མ་ནི་ཉེས་མེད་དོ། །ཡན་ལག་
བཞིས་ཕམ་སྟེ། རེག་པ་དེ་སྐྱེས་པ་ཡང་ཡིན་དེ་ལ་ཡང་རེག་མིག་མན་ཆད་པུས་མོ་ཡན་ཆད་ཀྱི་གནས་ཀྱང་ཡིན་རེག་པ་བདག་གིས་བྱས་པའོ། །ཕས་ཕམ་པ་ལྔ་པ་རྫོགས་སོ།། །།སྤོས་འཚོང་ཁྱེའུ་ཞེས་བྱ་བ་ནི། སངས་རྒྱས་བཅོམ་ལྡན་འདས་མཉན་དུ་ཡོད་པ་ན་
བཞུགས་སོ། །དེའི་ཚེ་ན་སྤོས་འཚོང་གི་ཁྱེའུ་ཞིག་འདུག་སྟེ། ཆུང་མ་བླངས་ནས་རིང་པོ་མ་ལོན་པ་དེ་སྦོམ་དགའ་མོས་མཐོང་མ་ཐག་ཏུ་ཆགས་པར་གྱུར་ཏེ། ཁྱེའུ་དེ་ལ་ཁྱོད་ཀྱིས་ཆུང་མ་བླངས་ནས་ཇི་སྲིད་ལོན། ཡིད་དུ་འོང་ངམ་དེ་ཡང་ཁྱེད་ལ་དགའ་འམ། ཁྱོད་ཅི་སྙམ་བྱེད་ཅེས་
དྲིས་པ་དང་། འཕགས་མ་བདག་ཅག་ནི་ཁྱིམ་པ་ཁྱེད་ནི་རབ་ཏུ་བྱུང་ན་དེ་ལྟར་དྲིས་ཏེ་ཅི་རུང་། སྦོམ་དགའ་མོས་ཅི་ཁྱོད་དང་ལྷན་ཅིག་ཏུ་མ་འོངས་སམ་ཞེས་སྨྲས་ཏེ། ཁྱོད་དགེ་སློང་མའི་དབྱར་མོ་ཁང་དུ་ཤོག་ཤིག་ཅེས་དུས་བཏབ་བོ། །དེས་འཕགས་མ་གཞན་དག་གིས་ཚོར་བར་

འགྱུར་རོ་ཞེས་བྱས་པ་དང་སྦོམ་དགའ་མོས་ཁྱོད་ལ་དྲིལ་གྱི་ཕྲེང་བ་བཏགས་སམ་ཞེས་སྨྲས་ནས། སྦོམ་དགའ་མོས་བསླུས་ཏེ་ཉི་མ་ནུབ་ནས་དེའི་གནས་སུ་འོངས་ཏེ་ཁྲིའི་འོག་ཏུ་སྦས་ཏེ་གཞག་གོ། །སྦོམ་དགའ་མོས་སློབ་མ་དག་ལ་ཆོས་བསྟན་ནས་གནས་ཁང་དུ་ཞུགས་པ་དང་། དེས་སྦོམ་
དགའ་མོ་མཐོང་ནས་ལངས་པ་དང་མོས་དེ་མཐོང་ནས་རྐུན་པོ་ཞུགས་སོ་སྙམ་ནས་འཇིགས་པར་གྱུར་པ་དང་། དེས་སྨྲས་པ་བདག་ཡིན་ཏེ་ཁྱེད་ཀྱིས་ཁྲིའི་འོག་ཏུ་སྦས་སོ། །སྤོས་འཚོང་གི་ཁྱེའུ་ཆགས་པས་སྦོམ་དགའ་མོ་བཟུང་ནས་ཁྲིའི་སྟེང་དུ་མནན་པ་ལས་སྦོམ་དགའ་མོས་བསམས་
པ་བདག་གིས་དགེ་སློང་མ་དག་མཉེས་པ་ཡང་ཚུལ་ཁྲིམས་ཀྱི་མཐུ་ཡིན་ན་ཚུལ་ཁྲིམས་ཞིག་ན་ཀུན་གྱིས་སྤངས་པར་འགྱུར་རོ་སྙམ་ནས་ཁྱེའུ་ལ་ཐོང་ཤིག་ཅེས་བྱས་པ་དང་། །དེས་ཀྱང་བཏང་བ་དང་སྦོམ་དགའ་མོས་ཁྱེའུ་དེའི་བྲང་དུ་རྡོག་པ་གཅིག་བསྣུན་པ་དང་ཁྲག་སྐྱུགས་སོ། །སྦོམ་
དགའ་མོས་མྱུར་ཞིང་རིངས་པར་བྱུང་སྟེ། འཕགས་མ་རྣམས་བདུད་བཅོམ་མོ། །ཕམ་པར་བྱས་སོ་ཞེས་སྒྲ་ཕྱུང་བ་དང་དགེ་སློང་མ་དག་གིས་ཐོས་ནས་ཅི་ཁྱོད་ཀྱིས་དགྲ་བཅོམ་པ་མངོན་དུ་བྱས་སམ་མ་ཡིན་ནོ་ཞེས་སྨྲས་སོ། །འོ་ན་ཁྱོད་ཀྱིས་ཅི་བྱས་དྲིས་པ་དང་། དེས་ཇི་ལྟ་བུར་གྱུར་
པ་སྨྲས་པ་དང་དགེ་སློང་མ་དག་གིས་དེ་མཐོང་ནས་སྡིག་པ་ཅན་མི་མཛེས་པ་འདི་ལྟ་བུ་བྱས་ན་དེད་ལ་རྗེས་སུ་ཡི་རང་བར་བྱེད་དུ་བཅུག་གོ་ཞེས་འཕྱའོ། །དེ་ལྟར་གྱུར་པ་སྟོན་པ་ལ་གསོལ་ནས་དགེ་སློང་མའི་དགེ་འདུན་བསྡུས་པའི་གནས་བཅས་སོ། །ཡང་དགེ་སློང་མ་གང་ཆགས་
པར་གྱུར་ལ་སྐྱེས་པ་ཆགས་པར་གྱུར་པ་དང་ལྷན་ཅིག་ཏུ་སྟེག་གམ་རྩེའམ། གད་རྒྱངས་བྱེད་དམ་ཙུམ་སླད་བྱེད་དམ། སྙེགས་སམ་ལུས་ལ་འཚོག་ཅིང་དུས་མལ་དང་བརྡ་དང་མཚན་མ་བྱས་ཏེ། སྐྱེས་པ་འོང་བ་དང་འགྲོ་བ་དགའ་བ་ཚོར་ལ་གང་སྐྱེས་པ་དང་བུད་མེད་དང་མཐུན་པ་དེ་ལྟ་
བུའི་ཕྱོགས་སུ་ལུས་བཀན་ཏེ། །དགེ་སློང་མས་དངོས་པོ་བརྒྱད་ཀྱིས་གནས་དེ་ལྟ་བུ་བྱས་ན་དགེ་སློང་མ་དེ་ཡང་ཕས་ཕམ་པ་ཡིན་གྱིས་ལྷན་ཅིག་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོ་སྟེ། དེ་དང་འདྲ་བ་གཞན་ཡང་ངོ་། །ཆགས་པ་ཞེས་

བྱ་བ་ནི་གོང་མ་དང་འདྲའོ། །སྐྱེས་པ་ཞེས་བྱ་བ་ནི་སྤོས་འཚོང་བའི་ཁྱེའུ་འམ་གང་དེ་དང་འདྲ་བ་གཞན་ཡང་ངོ་། །ཆགས་པར་གྱུར་ཅེས་བྱ་བ་ནི་འདོད་ཆགས་ཀྱིས་ཀུན་དུ་དཀྲིས་པའོ། །སྟེག་ཅེས་བྱ་བ་ནི་ཙུམ་སླེད་བྱེད་པའོ། །སྙེགས་ཞེས་བྱ་བ་ནི་རྩེའོ། །ལུས་ལ་
འཚོག་ཅེས་བྱ་བ་ནི་གད་རྒྱངས་བྱེད་པའོ། །དུས་མལ་ཞེས་བྱ་བ་ནི་སྐྱེད་མོས་ཚལ་ལམ་དཔོང་སའམ། ལྷ་ཁང་ཆེ་གེ་མོ་ཞིག་ཅེས་བྱ་བའོ། །བརྡ་ཞེས་བྱ་བ་ནི་སྔ་དྲོའམ་ཉི་མའི་གུང་ངམ་ཕྱི་དྲོའོ། །མཚན་མ་ཞེས་བྱ་བ་ནི་བདག་སྐྲ་བྲེགས་ནས་རིང་པོ་མ་ལོན་པའམ། །སྦྱར་མ་དམར་
སེར་རམ། ལྷུང་བཟེད་ཞ་ཉེས་གླན་པའམ་མར་རམ། འབྲུ་མར་རམ། བུ་རམ་གྱིས་གང་བ་གང་ཡང་རུང་སྟེ། དེ་ལྟ་བུ་མཐོང་བ་དེ་ན་དོན་གྲུབ་བོ་སྙམ་དུ་ཤེས་པར་བྱོས་ཤིག་པའོ། །སྐྱེས་པ་འོང་ངམ་འགྲོ་བར་ཚོར་ཞེས་བྱ་བ་ནི་ཉམས་སུ་མྱོང་བའོ། །གང་ན་སྐྱེས་པ་དང་བུད་
མེད་མཐུན་པ་ཞེས་བྱ་བ་ནི་དབང་དུ་འགྱུར་བའོ། །དེ་ལྟ་བུའི་ཕྱོགས་ཞེས་བྱ་བ་ནི་གནས་བསྒྱུར་དུ་མེད་པའོ། །ལུས་བཀན་ཞེས་བྱ་བ་ནི་ལུས་ཉིད་དོ། །དངོས་པོ་བརྒྱད་ཀྱིས་གནས་འདི་ལྟ་བུ་ཞེས་བྱ་བ་ནི་གང་གནས་བརྒྱད་པོ་བསྟན་པ་དེ་དག་གོ། །ཡང་ཞེས་བྱ་བ་ནི་ཉེ་བར་བསྟན་པའོ། །
དེ་ལ་ཉེས་པ་ཇི་ལྟ་བུ་ཡིན་ཞེ་ན། དགེ་སློང་མ་ཆགས་པར་གྱུར་ལ་སྐྱེས་པ་ཆགས་པར་གྱུར་པ་དང་། ལྷན་ཅིག་ཏུ་སྟེག་པ་དང་། སྙེགས་པ་དང་། ལུས་ལ་འཚོག་པ་དང་། དུས་མལ་འདོར་བ་དང་། བརྡ་དང་མཚན་མ་དང་། སྐྱེས་པ་འོང་བའམ་འགྲོ་བ་ན་ཡང་དགའ་བར་ཚོར་ན་སྦོམ་
པོ་རེ་རེ་སྟེ་བདུན་ནོ། །གང་ན་སྐྱེས་པའམ་བུད་མེད་མཐུན་པར་གྱུར་པ་བསྒྱུར་དུ་མེད་པའི་ཕྱོགས་དེར་ལུས་བཀན་ན་ཕམ་པར་འགྱུར་རོ། །ཡན་ལག་བརྒྱད་ཀྱིས་ཕམ་སྟེ། སྙེགས་པ་དང་། ལུས་ལ་འཚོག་པ་དང་། བསྟན་པ་ཁ་བརྡ་བྱེད་པ། མཚན་མ་བྱེད་པ། སྐྱེས་པ་འོང་བ་བདག་
གིར་བྱེད་པ། འབྱུང་མི་ནུས་པའི་གནས་སུ་ལུས་བོར་བའོ། །ཕམ་པ་དྲུག་པ་རྫོགས་སོ།། །།མཛའ་ཅན་མ་ཞེས་བྱ་བ་ནི། སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །ནམ་དགེ་སློང་མ་གྲོགས་མོས། ཚེ་དང་ལྡན་པ་གྱད་བུ་ནོར་བདེན་པ་མ་ཡིན་པས་

སྐུར་ཏེ། བདག་ཁས་འཆེ་བ་ལས་དགེ་སློང་མ་རྣམས་ཀྱིས་བསྐྲད་པ་ན་བབས་ཏེ་ཁྱིམ་པར་གནས་ཤིང་འདུག་གོ། །དེའི་ནུ་མོ་གྲོགས་མོ་ཅན་ཞེས་བྱ་བས་དགེ་སློང་མ་འཁོར་དང་བཅས་པ་འཁོད་པར་མཐོང་བ་དང་གལ་ཏེ་བདག་གི་ཕུ་ནུ་མོ་བབས་པར་མ་གྱུར་ན་དེ་ཡང་འདི་ལྟ་བུར་འཁོར་དང་བཅས་པར་འགྱུར་བ་ཞིག་
ཅེས་སྨྲས་པ་དང་། དགེ་སློང་མ་རྣམས་ཀྱིས་ཕུ་ནུ་མོ་དགེ་སློང་མ་མ་རུང་བར་གྱུར་པ་དེའི་མིང་ཕྱུང་སྟེ་ཅི་བྱ་ཞེས་སྨྲས་པ་དང་། དེས་སྨྲས་པ་གྱད་བུ་ནོར་ལ་སྐུར་པ་འདེབས་པའི་སྡུན་ལོགས་སུ་ཕས་ཕམ་པའི་ལྟུང་བ་བྱུང་བ་ཁོ་མོས་ཤེས་སོ། །འོན་ཀྱང་མཉེན་སྡུག་པས་ན་མ་བཟླས་སོ་ཞེས་
སྨྲས་པ་དང་། དགེ་སློང་མ་དག་གིས་ཁ་ན་མ་ཐོ་བ་ཤེས་བཞིན་དུ་འཆབ་བམ་ཞེས་སྨྲས་པ་དང་། དེས་སྨྲས་པ་བདག་ནི་དགྲའི་ཁ་ན་མ་ཐོ་བ་ཡང་མི་ཟློས་ན་གཉེན་པ་རྣམས་ལྟ་ཅི་སྨོས། ཁྱེད་དེ་ལྟར་བྱེད་དུ་རུང་ངམ་མི་རུང་ཡང་སླ་སྟེ། བདག་གིས་ནི་བྱས་སོ། །དེ་ལྟར་གྱུར་པ་
དགེ་སློང་མ་དག་གིས་གསོལ་ནས། བཅོམ་ལྡན་འདས་ཀྱིས་ཉན་ཐོས་མ་རྣམས་ལ་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་མ་གང་དགེ་སློང་མ་ཕས་ཕམ་པའི་ལྟུང་བ་བྱུང་བར་སྔ་ནས་ཤེས་ལ་བབས་ནས་དེ་ནས་ཤི་འཕོས་སམ། ཤིའམ། ལྟུང་ངམ། །གཞན་གྱི་ཡུལ་
འཁོར་རམ། ཡུལ་གཞན་དུ་བྲོས་པར་གྱུར་པ་དེའི་འོག་ཏུ་འཕགས་མ་དག་བདག་གིས་ནི་ཅི་ལྟར་དགེ་སློང་མ་དེ་ལ་ཕས་ཕམ་པའི་ལྟུང་བ་བྱུང་བར་སྔ་ནས་ཤེས་སོ་ཞེས་དེ་སྐད་ཟེར་ན་དགེ་སློང་མ་ཁ་ན་མ་ཐོ་བ་འཆབ་པའི་གནས་འདི་ལྟ་བུ་རྣམ་པ་བྱེད་པའི་དགེ་སློང་མ་དེ་ཡང་ཕས་ཕམ་པ་ཡིན་གྱི་ལྷན་
ཅིག་གནས་པར་མི་བྱའོ། །གང་ཡང་དགེ་སློང་མ་གང་ཞེས་བྱ་བ་ནི་གྲོགས་མོ་ཅན་ནམ་གང་དེ་དང་འདྲ་བ་གཞན་ཡང་ངོ་། །ཤེས་སོ་ཞེས་བྱ་བ་ནི་བདག་གིས་མཐོང་ངམ་གཞན་གྱིས་དེ་ལ་སྨྲས་པར་གྱུར་པའོ། །དགེ་སློང་མ་ཞེས་བྱ་བ་ནི་ཆོས་འདི་ལ་གནས་པའོ། །ཕས་ཕམ་པ་
ཞེས་བྱ་བ་ནི་བརྒྱད་ལས་གང་ཡང་རུང་ངོ་། །བཅབས་ཞེས་བྱ་བ་ནི་བརྣགས་པའོ། །ནམ་ཞེས་བྱ་བ་ནི་དུས་ཕྱི་ཞིག་ནའོ། །དགེ་སློང་མ་ཞེས་བྱ་བ་ནི་ཆོས་འདི་ལ་གནས་པའོ། །བྲལ་ལམ་ཞེས་བྱ་བ་ནི་ཆོས་དང་འདུལ་བ་འདི་ལས་སོ། །ཤི་འམ་ཞེས་བྱ་བ་ནི་དེའི་ཚེ་འཚོ་བའི་དབང་པོ་

འགགས་པར་གྱུར་པའོ། །ལྟུང་བ་ཞེས་བྱ་བ་ནི་མུ་སྟེགས་ཅན་གྱི་བསྟན་པ་ལ་གནས་པར་གྱུར་པའོ། །བྲོས་ཞེས་བྱ་བ་ནི་ཡུལ་བོར་ནས་སོང་བར་གྱུར་པའོ། །དེ་ལ་དགེ་སློང་མ་རྣམས་ཞེས་བྱ་བ་ནི་ཆོས་འདི་ལ་གནས་པའི་རྣམས་ལའོ། །འཕགས་མ་བདག་
གིས་ནི་སྔ་ནས་ཤེས་སོ་ཞེས་བྱ་བ་ནི་བདག་གིས་ཐམས་ཅད་སྔ་ནས་ཤེས་ཀྱི་ཁྱོད་ཀྱིས་ནི་ཕྱིས་ཤེས་སོ་ཞེས་བསྒོ་བའི་ཚིག་གོ། །ཅི་ལྟར་དགེ་སློང་མ་དེ་ལ་ཞེས་བྱ་བ་ནི་གྲོགས་མོའོ། །ཕས་ཕམ་ཞེས་བྱ་བ་ནི་བརྒྱད་ལས་གང་ཡང་རུང་ངོ་། །འདི་སྐད་ཟེར་ན་ཞེས་བྱ་བ་ནི་སྨྲ་བའོ། །ཁ་ན་
མ་ཐོ་བ་བཅས་པ་ཞེས་བྱ་བ་ནི་སྡིག་པ་རྣམས་སོ། །གནས་འདི་ལྟ་བུ་ཞེས་བྱ་བ་ནི་རྣམ་པ་དེ་ལྟ་བུར་གྱུར་པའོ། །ཕས་ཕམ་པ་ཞེས་བྱ་བ་དང་གནས་པར་མི་བྱ་བ་ནི་གོང་མ་དང་འདྲ་བ་ནས་འདིར་ཡང་མ་བཤད་དོ། །ཉེས་པ་ཇི་ལྟ་བུ་ཞེ་ན། དགེ་སློང་མས་ཁ་ན་མ་ཐོ་བ་དེ་ལྟ་བུ་དགེ་སློང་མའི་
ཕམ་པ་བརྒྱད་པོ་དེ་ཅི་ཙམ་དུ་ཆུང་ཟད་ཅིག་བཅབས་ན་ཕམ་པར་འགྱུར་རོ། །ཡན་ལག་ལྔས་ཕམ་སྟེ་ཕ་རོལ་དགེ་སློང་མ་ཡང་ཡིན། ཕམ་པ་ཡང་བྱུང་། བདག་གིས་ཀྱང་ཤེས། གཞན་ལ་ཡང་མ་སྨྲས། བཅབ་པའི་སེམས་ཀྱང་ཡོད་པའོ། །དགེ་སློང་མའི་ཕས་ཕམ་པ་བདུན་
པ་རྫོགས་སོ།། །།གྲེ་ལས་སྐྱེས་ཞེས་བྱ་བ་ནི། སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ཚེ་དང་ལྡན་པ་གྲེ་ལས་སྐྱེས་མཉན་དུ་ཡོད་པ་ན་འདུག་སྟེ། དེ་དགེ་སློང་མ་དང་འདྲེས་པར་གནས་སོ། །གལ་ཏེ་གྲེ་ལས་སྐྱེས་ཀྱི་མདུན་དུ་འགའ་
ཞིག་གིས་དགེ་སློང་མའི་ཉེས་པ་བརྗོད་ན་དེ་ཡང་ཁྲོ་ཞིང་ངན་དུ་སེམས་ནས། སྤྱི་བོ་སྨད་ནས་འདུག་སྟེ། མི་དགའ་ཞིང་དགེ་སློང་གི་དགེ་འདུན་ལ་ཡང་རྩོད་པར་བྱེད་དོ། །གྲེ་ལས་སྐྱེས་ལ་འགའ་ཞིག་གིས་ཉེས་པ་བརྗོད་ན་དགེ་སློང་མ་དག་ཀྱང་དེ་བཞིན་དུ་ཁྲོ་བར་གྱུར་པ་ནས་དགེ་སློང་
མའི་དགེ་འདུན་རྣམས་ལ་ཡང་རྩོད་པར་བྱེད་དོ། །དེ་ལྟར་གྱུར་པ་དགེ་སློང་མ་དག་གིས་གསོལ་བ་དང་། གྲེ་ལས་སྐྱེས་སྤང་བའི་ལས་བྱོས་ཤིག་ཅེས་བཀའ་སྩལ་ཏོ། །གང་དེ་དང་འདྲ་བ་གཞན་ཡང་ངོ་། །དེ་ཡང་འདི་ལྟར་བྱ་སྟེ། དགེ་འདུན་ཐམས་ཅད་འདུས་པ་དང་གླེངས་ལ་

དྲན་པར་བྱ་སྟེ། དངོས་པོར་བཅས་པ་ཉིད་ཁས་ལེན་དུ་ཆུག་ལ། གསོལ་བ་དང་བཞིའི་ལས་ཀྱིས་སྤང་བའི་ལས་གྱིས་ཤིག་ཅེས་བཀའ་སྩལ་ཏེ། དགེ་འདུན་གྱིས་གང་ལ་སྤང་བའི་ལས་བྱས་པར་གྱུར་པ་དེ་ལ་དགེ་སློང་མ་དག་གིས་གཏམ་དང་ཕྱག་མ་བྱེད་ཅིག །དེ་མཐོང་མ་ཐག་ཏུ་དགེ་སློང་མ་
སྟན་ལས་ལང་བར་བྱ་བ་མ་གཏོགས་སོ། །དེ་ལྟར་གྱུར་པ་སྐྱེ་དགུའི་བདག་མོ་ཆེན་མོས་མཐོང་ནས་དགེ་སློང་མ་དག་གྲེ་ལས་སྐྱེས་ལ་ཕྱག་བྱ་བར་མི་འོས་པའི་སྡོམ་པ་གསོལ་བ་དང་བཞིའི་ལས་ཀྱིས་སྡོམ་པ་བྱིན་ཅིག་ཅེས་སྨྲས་ནས། དགེ་སློང་གང་ལ་དགེ་སློང་གི་དགེ་འདུན་གྱིས་སྤང་
བའི་ལས་བྱས་པར་གྱུར་ཏེ། དེ་ལ་དགེ་སློང་མའི་དགེ་འདུན་གྱིས་ཀྱང་ཕྱག་མི་བྱ་བའི་སྡོམ་པ་བྱིན་པར་གྱུར་པ་དང་། དེ་ལ་དགེ་སློང་མ་དག་གིས་གཏམ་དང་ཕྱག་མ་བྱེད་ཅིག་མཐོང་ནས་ལྡང་བ་ནི་མ་གཏོགས་སོ། །དེ་ནས་གྲེ་ལས་སྐྱེས་དགེ་འདུན་གྱིས་སྤངས་པ་དང་། དགེ་སློང་མའི་གན་དུ་འོངས་
ནས་གཏམ་དང་ཀུན་དུ་གཏམ་ཟེར་བ་དང་། ལྟ་བར་མི་བྱེད་སྟན་ལས་ལངས་ཏེ་འཁོད་དོ། །གྲེ་ལས་སྐྱེས་ཀྱིས་སྨྲས་པ་དགེ་སློང་གང་གི་དགེ་འདུན་ལ་བདག་གིས་ཉེས་པ་བྱས་པས་ན་དགེ་འདུན་གྱིས་སྤངས་པར་ནི་རིགས་ན། དགེ་སློང་མ་རྣམས་ལ་བདག་གིས་ཉེས་པ་ཅི་བྱས་ན་བདག་ལ་མི་སྨྲ་
ཞིང་ཕྱག་མི་བྱེད་ཅེས་སྨྲས་པ་དང་། སྐྱེ་དགུའི་བདག་མོས་གཞན་ལ་སྨྲ་བ་ལྟར་བྱ་སྟེ། སངས་རྒྱས་བཅོམ་ལྡན་འདས་ནི་བདག་ཅག་གི་སྟོན་པ་དགེ་འདུན་ནི་བདག་ཅག་གི་རྟེན་ཏེ། དགེ་འདུན་ལ་ཉེས་པ་བྱེད་པ་དེ་བདག་ཅག་ལ་ཡང་ཉེས་པ་བྱེད་པ་སྟེ། རིགས་དམན་པ་ལས་རབ་ཏུ་བྱུང་བས་
ཀྱང་སྟོན་པ་མཉེས་པར་བྱེད་ན། གྲེ་ལས་སྐྱེས་ཤཱཀྱའི་རིགས་ལས་རབ་ཏུ་བྱུང་བས་ཅིའི་ཕྱིར་མཉེས་པར་མི་བྱེད། དགེ་སློང་མ་དག་གིས་ཁྱོད་ལ་ཕྱག་མི་བྱ་བའི་སྡོམ་པ་བཅས་ཀྱིས་སོང་ལ་དགེ་འདུན་ལ་བཟོད་པར་གྱིས་ཤིག་ཅེས་བྱས་པ་དང་། དེས་ཀྱང་བཟོད་པ་གསོལ་དུ་འགྲོའོ་སྙམ་དུ་
སོང་བ་ལས་ལམ་གྱི་བར་དུ་སྦོམ་དགའ་མོས་མཐོང་སྟེ་འཕགས་པ་ཕྱག་འཚལ་ལོ་གར་བཞུད་ཅེས་སྨྲས་པ་དང་། དེས་ཀྱང་བཟོད་པར་གསོལ་དུ་འགྲོ་ཞེས་བྱས་པ་དང་སྦོམ་དགའ་མོས་སྨྲས་པ། འཕགས་པ་ཤཱཀྱའི་རིགས་ལས་རབ་ཏུ་བྱུང་ན་ད་ནི་རིགས་ཐ་དད་རུས་ཐ་དད་ལས་རབ་

ཏུ་བྱུང་བ་རྣམས་ཀྱིས་རྐང་པ་ལ་འདྲེ་བ་མི་བཟང་ངོ་། །གྲེ་ལས་སྐྱེས་ཀྱིས་སྨྲས་པ་སྲིང་མོ་དགེ་འདུན་གྱིས་སྤངས་པའི་ལས་བྱས་དགེ་སློང་མ་དག་གིས་ཕྱག་མི་བྱ་བའི་སྡོམ་པ་ཕྱིན་ན་ཅི་ལྟར་བྱ། སྦོམ་དགའ་མོས་སྨྲས་པ་དེ་དག་ཡུལ་ཐམས་ཅད་ནས་སྤངས་པར་གྱུར་
ཅིག །ཁྱོད་དགེ་འདུན་ལ་སྤུ་བསྙལ་ཞིང་འབྱུང་བ་དང་ཉེས་པ་འདོར་བར་མ་གསོལ་ཅིག །བདག་གིས་ཁྱོད་ལ་དགེ་སྦྱོང་གི་ཡོ་བྱད་དང་འཚོ་བའི་ལོངས་སྤྱོད་ཀྱིས་བསྙེན་བཀུར་བྱ་ཞེས་སྨྲས་པ་དང་། གྲེ་ལས་སྐྱེས་ཀྱང་འདུག་གོ། །དེ་ལྟར་གྱུར་པ་སྔ་མ་བཞིན་དུ་སྟོན་པ་ལ་གསོལ་ནས། བཀའ་
སྩལ་པ་དགེ་སློང་མ་ཁྱོད་ཀྱིས་སྦོམ་དགའ་མོ་ལ་ཚིག་འཇམ་པོས་བསྒོ་ཤིག །དགེ་སློང་མ་དག་གིས་དེ་བཞིན་དུ་བསྒོ་ན། འདི་ཉིད་ནི་བདེན་གྱི་གཞན་ནི་གཏི་མུག་གོ་ཞེས་ང་རྒྱལ་བཟུང་སྟེ། མ་མཉན་པ་དང་། དེ་ལྟ་བུར་གྱུར་པ་སྟོན་པ་ལ་གསོལ་ནས། བཀའ་སྩལ་པ། དགེ་སློང་མ་
ཁྱོད་ཀྱིས་སྦོམ་དགའ་མོ་ལ་གསོལ་བ་དང་བཞིའི་ལས་ཀྱིས་བསྒོ་ཤིག་དེ་དང་འདྲ་བ་གཞན་ཡང་ངོ་། །དགེ་སློང་མ་དག་གིས་གསོལ་བ་དང་བཞིའི་ལས་ཀྱིས་བསྒོ་ན་ཡང་འདི་ཉིད་བདེན་པའོ། །གཞན་ནི་གཏི་མུག་གོ་ཞེས་ཏེ། དེ་ཉིད་ལ་མཐུ་བསྐྱེད་ཅིང་སྙེམ་ཞིང་མངོན་དུ་བཟུང་སྟེ་སྤྱད་
པ་དང་དེ་ལྟ་བུར་གྱུར་པ་སྟོན་པ་ལ་གསོལ་ནས། སྟོན་པས་སྦོམ་དགའ་མོ་ལ་ཁྱོད་སྤངས་པའི་རྗེས་སུ་ཕྱོགས་པ་བདེན་ནམ། བཙུན་པ་མད་དོ་ཞེས་གསོལ་ནས་ཉན་ཐོས་མ་རྣམས་ལ་བསླབ་པའི་གནས་བཅས་སོ། །ཡང་དགེ་སློང་མ་གང་གིས་དགེ་སློང་གང་དགེ་འདུན་གྱིས་སྤང་པའི་
ལས་བྱས་པར་གྱུར་ལ། དགེ་སློང་མའི་དགེ་འདུན་གྱིས་ཀྱང་དེ་ལ་ཕྱག་བྱ་བར་མི་འོས་པའི་སྡོམ་པ་ཕྱིན་པར་དགེ་སློང་དེའི་སྐྲ་ལོང་ལོང་པོ་རྡུད་རྡུད་པོར་གྱུར། སྤུ་སྙོལ་བར་བྱེད་འབྱུང་བར་བྱེད་ཕྱག་འཚལ་བར་སྟོན་པ་མཚམས་ཀྱི་ནང་དུ་འདུག་སྟེ་གཡོ་འདོར་བར་གསོལ་བ་འདེབས་པར་ཤེས་
བཞིན་དུ་དེའི་གན་དུ་སོང་ནས་འཕགས་པ་ཁྱོད་སྐྲ་ལོང་ལོང་རྡུད་རྡུད་པོར་གྱུར་ཏེ། དགེ་འདུན་ལ་སྤུ་སྙོལ་བར་མ་བྱེད་ཅིག །འབྱུང་བར་མ་བྱེད་ཅིག །ཕྱག་འཚལ་བར་མ་སྟོན་ཅིག །མཚམས་ཀྱི་ནང་དུ་འདུག་སྟེ་གཡོ་འདོར་བར་གསོལ་བ་མ་འདེབས་ཤིག །འཕགས་པ་ཁྱོད་ལ་བདག་

གིས་ལྷུང་བཟེད་དང་ཆོས་གོས་དང་ལྷུང་བཟེད་ཀྱི་སྣོད་དྲ་བ་དང་། ཕོར་བུ་དང་། སྐ་རགས་དང་། སྟོན་པ་དང་། ཀློག་པ་དང་། ཁ་ཏོན་བྱ་བ་དང་། རྣལ་འབྱོར་དང་། ཡིད་ལ་བྱ་བས་བསྙེན་བཀུར་བྱའོ། །འཕགས་པ་ལ་ཅི་དང་ཅིས་བྲེལ་བ་དེ་དང་དེས་བྲེལ་བར་མི་བྱའོ་ཞེས་དེ་སྐད་ཟེར་ན་དགེ་
སློང་མ་དེ་ཡང་དགེ་སློང་མ་རྣམས་ཀྱིས་འཕགས་མ་ཁྱོད་ཀྱིས་དགེ་སློང་དང་དགེ་འདུན་མཐུན་པས་སྤངས་པའི་ལས་བྱས་པར་གྱུར། དགེ་སློང་མའི་དགེ་འདུན་གྱིས་ཀྱང་དེ་ལ་ཕྱག་བྱ་བར་མི་འོས་པའི་སྡོམ་པ་བྱིན་པར་ཤེས་བཞིན་དུ་དགེ་སློང་དེའི་སྐྲ་ལོང་ལོང་པོ་དང་། རྡུད་རྡུད་པོར་གྱུར་ནས་དགེ་
འདུན་ལ་སྤུ་སྙོལ་བར་བྱེད། འབྱུང་བར་བྱེད། ཕྱག་འཚལ་བར་བྱེད། མཚམས་ཀྱི་ནང་དུ་འདུག་སྟེ་གཡོ་འདོར་བར་གསོལ་བ་འདེབས་པ་འཕགས་མ་ཁྱོད་སྐྲ་ལོང་ལོང་རྡུད་རྡུད་པོར་གྱུར་ཏེ། དགེ་འདུན་ལ་སྤུ་སྙོལ་བར་མ་བྱེད་ཅིག །འབྱུང་བར་མ་བྱེད། ཕྱག་འཚལ་བར་མ་སྟོན་ཅིག །མཚམས་
ཀྱི་ནང་དུ་འདུག་སྟེ་འདོར་བར་གསོལ་བ་མ་འདེབས་ཤིག །བདག་གིས་འཕགས་པ་ཁྱོད་ལ་ལྷུང་བཟེད་དང་། ཆོས་གོས་དང་། ལྷུང་བཟེད་ཀྱི་སྣོད་དྲ་བ་དང་། ཕོར་བུ་དང་། སྐ་རགས་དང་། བཀླག་པ་དང་། ཁ་ཏོན་བྱ་བ་དང་། རྣལ་འབྱོར་དང་། ཡིད་ལ་བྱ་བས་བསྙེན་
བཀུར་བྱའོ། །འཕགས་པ་ལ་ཅི་དང་ཅིས་བྲེལ་བ་དེ་དང་དེས་མི་བྲེལ་བར་བྱའོ་ཞེས་དེ་སྐད་མ་ཟེར་ཅིག །འཕགས་མ་ཁྱོད་སྤངས་པའི་རྗེས་སུ་ཕྱོགས་པའི་གནས་འདི་ལྟ་བུ་ཐོང་ཤིག་ཅེས་བསྒོ་བར་བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་བསྒོ་ནས་གལ་ཏེ་དངོས་
པོ་དེ་གཏོང་བ་ལྟ་ན་ནི་ལེགས་གལ་ཏེ་མི་གཏོང་ན་དངོས་པོ་དེ་སྤོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ། །ཡང་དག་པར་བསྟན་ནས་དངོས་པོ་དེ་གཏོང་ན་ནི་ལེགས་གལ་ཏེ་མི་གཏོང་ན་དངོས་པོ་དེ་སྤང་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།
ཡང་དག་པར་བསྟན་པར་བྱ་ལན་གཉིས་ལན་གསུམ་དུ་ཡང་དག་པར་བསྒོ། །ཡང་དག་པར་བསྟན་ནས་དངོས་པོ་དེ་གཏོང་ན་ནི་ལེགས། གལ་ཏེ་མི་གཏོང་ན་དགེ་སློང་མ་སྤངས་པའི་རྗེས་སུ་ཕྱོགས་པའི་གནས་དེ་ལྟ་བུ་བྱེད་པའི་དགེ་སློང་མ་དེ་ཡང་ཕས་ཕམ་པ་ཡིན་གྱིས་ལྷན་ཅིག་ཏུ་གནས་པར་མི་

བྱའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོ་སྟེ། དེ་དང་འདྲ་བ་ཡང་གཞན་ཡང་ངོ་། །དགེ་སློང་གང་ལ་ཞེས་བྱ་བ་ནི་གྲེ་ལས་སྐྱེས་ལའོ། །དགེ་སློང་གི་དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིས་སོ། །སྤང་བའི་
ལས་བྱས་པར་གྱུར་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །དགེ་སློང་མའི་དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་ནོ། །དེ་ལ་ཞེས་བྱ་བ་ནི་དགེ་སློང་གྲེ་ལས་སྐྱེས་ལའོ། །ཕྱག་བྱ་བར་མི་འོས་པའི་སྡོམ་པ་བྱིན་ཞེས་བྱ་བ་ནི་གསོལ་བ་དང་གཉིས་
ཀྱི་ལས་ཀྱིས་སོ། །སྐྲ་ལོང་ལོང་པོ་དང་རྡུད་རྡུད་པོ་ཞེས་བྱ་བ་ནི་བག་འཆུམས་ཞེས་བྱེད་པ་དང་། སེམས་ཡང་ཞེས་བྱེད་པའོ། །སྤུ་སྙོལ་བར་བྱེད་ཅེས་བྱ་བ་ནི་རྩ་བཏིང་བ་བཞིན་དུ་བྱེད་པའོ། །འབྱུང་བར་བྱེད་ཅེས་བྱ་བ་ནི་བཅོམ་ལྡན་འདས་ཀྱི་ཆོས་ནི་འབྱུང་བ་ཡིན་གྱི་མི་འབྱུང་བ་མ་ཡིན་
བར་སྟོན་ཞེས་བྱ་བ་ནི་ཚིག་སྙན་པ་དང་ཕྱག་བྱེད་པ་དང་ཐལ་མོ་སྦྱར་བའོ། །མཚམས་ཀྱི་ནང་ན་འདུག་སྟེ་གཡོ་འདོར་བར་གསོལ་བ་འདེབས་ཞེས་བྱ་བ་ནི་མཚམས་ཀྱི་ནང་ནི་གང་ན་མཚམས་བཅད་པའི་གནས་སོ། །སྡིག་པའི་ལས་ངན་པར་སྤྱོད་པ་སྤོང་ཞིང་ཕྱིན་ཆད་དེ་ལྟ་བུ་མི་བྱེད་པར་གསོལ་བ་འདེབས་
པ་ནི་གཡོ་འདོར་བར་གསོལ་བ་འདེབས་པ་ཞེས་བྱའོ། །ཤེས་བཞིན་ཞེས་བྱ་བ་ནི་བདག་ཉིད་ཀྱིས་ཤེས་པའམ་གཞན་གྱིས་དེ་ལ་བསྒོ་བར་གྱུར་པའོ། །འཕགས་པ་ཁྱོད་ཅེས་བྱ་བ་