Luận tạng Tây Tạng (Tengyur) — Tập 156

ཐུག་གི་བར་དུ་བགས་ཀྱིས་སྤྱོད་ཅིག་ཅེས་བྱིན་ཅིག །དེས་ཀྱང་ལྷུང་བཟེད་ཀྱི་སྣོད་
གཉིས་བྱོས་ལ། གང་བཟང་བའི་ནང་དུ་བྱིན་གྱིས་མ་བརླབས་པའི་ལྷུང་བཟེད་ཆུག་ཅིག །གང་ངན་པའི་ནང་དུ་བྱིན་གྱིས་བརླབས་པ་ཆུག་ཤིག །ཁ་ཟས་བཟང་བ་དང་འཇམ་པ་དང་སྣོད་ལ་མི་གཟན་ན་ནི་བྱིན་གྱིས་མ་བརླབས་པའི་ནང་དུ་ཆུག་ཤིག །ངན་པ་དང་རྩུབ་མོ་ནི་བྱིན་གྱིས་བརླབས་

པའི་ནང་དུ་ཆུག་ཤིག །ཁྱེར་བའི་མི་ཡོད་ན་བྱིན་གྱིས་བརླབས་པ་དེ་ལ་བསྐུར་ཅིག །ལྷན་པ་མེད་པ་ནི་བདག་ཉིད་ཁྱེར་ཅིག །ཁྱེར་བ་མེད་ན་ནི་ཕྲག་པ་གཡས་པ་ལ་ནི་བྱིན་གྱིས་བརླབས་པ་ཁྱེར་ཅིག །ཕྲག་པ་གཡོན་པ་ལ་ནི་མ་གླན་པ་ཐོགས་ཤིག །ཐ་མ་ཆག་པ་སྤྱད་དུ་མི་རུང་བའི་
བར་དུ་ཆོངས་ཤིག །སྤང་བའི་ལྟུང་བ་ཞེས་བྱ་བ་ནི་སྔ་མ་བཞིན་ནོ། །ཉེས་པ་ཇི་ལྟ་བུ་ཞེ་ན་དགེ་སློང་མས་ལྷུང་བཟེད་རྡོལ་བ་ལྷན་པ་གཅིག་གླན་པས་སྤྱད་དུ་བཟོད་པ་མི་གློན་པར་ལྷུང་བཟེད་སྤྱད་དུ་བཟོད་པ་ཡོད་བཞིན་དུ་ལྷུང་བཟེད་གཞན་ཚོལ་ན་ཉེས་བྱས་རྙེད་ན་སྤང་བའི་ལྟུང་བའོ། །དེ་བཞིན་
དུ་ལྷན་པ་ལྔའི་བར་དུའང་དེ་དང་འདྲའོ། །དགེ་སློང་མས་ལྷུང་བཟེད་རྡོལ་བར་གྱུར་ཏེ། ལྷན་པ་གཅིག་གིས་སྤྱད་བཟོད་པ་དེ་གླན་ཏེ། དེ་ལྟར་ལྷུང་བཟེད་སྤྱོད་དུ་ཡོད་བཞིན་དུ་ལྷུང་བཟེད་གཞན་ཚོལ་ན་ཉེས་བྱས་སོ། །རྙེད་པ་སྤང་བའི་ལྟུང་བའོ། །དེ་བཞིན་དུ་ལྷན་པ་བཞིའི་བར་དུ་གོང་མ་
དང་འདྲའོ། །དགེ་སློང་མས་ལྷན་པ་ལྔས་གླན་པའི་རིགས་པ་དེས། གླན་ཀྱང་རུང་། མ་གླན་ཀྱང་རུང་། ལྷུང་བཟེད་གཞན་ཚོལ་ན་ཉེས་པ་མེད་དོ། །རིན་གྱིས་ཉོས་སམ། བརྗེས་ཏེ་རྙེད་ན་ཉེས་པ་མེད། ལས་དང་པོ་པ་ལ་སོགས་པ་ལ་ཉེས་པ་མེད་དོ། །སྤང་བའི་ལྟུང་
བ་བཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེ་ནས་སྦོམ་དགའ་མོ་འདི་སྙམ་དུ་སེམས་ཏེ། སྟོན་པས་བསླབ་པའི་གནས་བཅས་ཏེ་རྙེད་པ་ཅུང་ཟད་ཀྱང་བསྒྲུབ་ཏུ་མེད་དོ་སྙམ་ནས། མཉན་དུ་ཡོད་པའི་ཤར་ཕྱོགས་ཀྱི་སྒོ་ན་ཡུགས་ས་མོ་ལྔ་
བརྒྱ་ཙམ་རས་ཀྱི་སྐུད་པ་འཁལ་ཞིང་འཁོད་དོ། །དེ་དག་གི་ཐད་དུ་སོང་བ་དང་། དེ་དག་གི་ནང་ནས་གཅིག་ལངས་ཏེ་སྟན་བཏིང་ནས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །སྦོམ་དགའ་མོས་དེ་དག་ལ་ཆོས་བཤད་པ་ལ་ཞུགས་ཏེ། ཁྱེད་སྔོན་དགེ་བའི་ལས་བྱས་པས་མིར་
སྐྱེས་ན་དེ་ཡང་འཇིག་རྟེན་ཕྱི་མའི་རྒྱགས་ཟོང་མི་སྒྲུབ་བམ། དེ་དག་གིས་སྨྲས་པ། །འོ་ན་ཅི་ཞིག་བཀའ་སྩལ། ཁྱོད་ཀྱིས་དགེ་འདུན་མ་ལ་བཤོས་སྩོལ་ཞིང་གོས་རེ་རེ་བསྐོན་ནུས་སམ། འཕགས་མ་མི་འབྱོར་ཏོ། །འོ་ན་བཅུ་གཉིས་སྡེ་ལ་དབུལ་ནུས་སམ། འཕགས་མ་མི་

ནུས་སོ། །འོ་ན་ང་གཅིག་པུ་ལ་དབུལ་ནུས་སམ་མི་ནུས་སོ། །འོ་ན་ཁྱེད་ཐམས་ཅད་ཀྱིས་ང་ལ་སྐུད་པ་ཞོ་གཉིས་གཉིས་འབུལ་ནུས་སམ། དེ་ནི་ནུས་སོ་ཞེས་སྨྲས་པ་དང་། དེ་དག་གིས་སྐུད་པ་ཞོ་གཉིས་གཉིས་བྱིན་ཏེ་སྦོམ་དགའ་མོས་ཐ་ག་པ་ཆུང་མར་
བཅས་པ་ཞིག་འདུག་པ་དེ་ལ་རས་དེ་ཐོགས་ཤིག་ཅེས་བྱས་པ་དང་། དེས་ཀྱང་བཏགས་ཏེ་སྦོམ་དགའ་མོ་ལ་བྱིན་ནོ། །སྦོམ་དགའ་མོ་མཉན་དུ་ཡོད་པའི་ལྷོ་དང་བྱང་དང་ནུབ་ཕྱོགས་སུ་སོང་ནས། །དེ་བཞིན་དུ་སྐུད་པ་བླངས་ནས་ཐ་ག་པའི་གན་དུ་སོང་ནས་འཐག་ཏུ་བཅུག་པ་དང་། ཐ་
ག་པས་སྨྲས་པ་རས་སྔ་མ་ཡང་བུ་ལོན་སྐྱིན་པོ་བྱས་ཏེ་ཟོས་པ་ཡང་ད་རུང་མ་འཁོར་བས་ན་འཐག་མི་ནུས་སོ་ཞེས་བྱ་བ་དང་། སྦོམ་དགའ་མོ་ཁྲོས་ནས་བཙུན་མོ་ཕྲེང་ལྡན་མ་ལ་གསོལ་པ་དང་། བློན་པོ་ཆེན་པོ་ཞེས་བྱ་བ་གཏང་ངོ་། །དེ་ནས་ཀྱང་སྐུད་པ་བླང་ནས་རང་རྟ་ལ་བསྐུར་ཏོ། །ཐ་ག་པ་
སྤྱི་ཆེར་འཐག་ཏུ་ཆུག་པ་དང་། ཐ་ག་པས་སྐུད་པ་ངོ་ཤེས་ནས་མི་འཐག་གོ་ཞེས་བྱས་པ་དང་། སྦོམ་དགའ་མོས་བློན་པོ་ཆེན་པོ་ལ་བཙོན་རར་གཞུག་པར་རིགས་སོ་ཞེས་བྱས་པ་དང་། དེས་ཀྱང་དེ་བཞིན་དུ་བཙོན་རར་བཅུག་པ་དང་། ཐ་ག་པ་སྐྲག་ནས་རས་བཏགས་ཏེ་སྦོམ་དགའ་
དགའ་མོ་ལ་བྱིན་པ་དང་། རྔན་པ་བྱིན་དུ་རེ་བ་ལས་མ་བྱིན་པ་དང་སྨོད་ཅིང་མི་སྙན་པ་ཟེར་རོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་བདག་ཉིད་ཀྱིས་བསླངས་པའི་སྐུད་པ་གཉེན་མ་ཡིན་པའི་ཐ་ག་པ་ལ་གོས་འཐག་ཏུ་བཅུག་ན་
སྤང་བའི་ལྟུང་བའོ། །བདག་ཉིད་ཀྱིས་བསླངས་པ་ནི་རང་གིས་བསླངས་པའོ། །སྐུད་པ་ཞེས་པ་ནི་ཁ་ཅིག་གིས་ནི་ཞོ་གཅིག་ཁ་ཅིག་གིས་ནི་སྲང་ཕྱེད་ཁ་ཅིག་གིས་ནི་ཞོ་གཉིས་བྱིན་པའོ། །གོས་ཞེས་བྱ་བ་ནི་བདུན་ལས་གང་ཡང་རུང་བའོ། །འཐག་ཏུ་བཅུག་ཅེས་བྱ་བ་ནི་དངོས་པོ་ཟིན་
པར་བྱེད་པའོ། །ལྟུང་བ་ཇི་ལྟ་བུ་ཞེ་ན་གཉེན་མ་ཡིན་པ་ལས་བསླངས། གཉེན་མ་ཡིན་པ་ལ་འཐག་ཏུ་བཅུག་ན་བསླངས་པའི་ཚེ་ཉེས་བྱས་སོ། །འཐག་པ་ལ་ལྟུང་བ་མེད་དོ། །གཉེན་མ་ཡིན་པ་ལས་བསླངས་བ་དག་གིས་བཏགས་ན་ཉེས་བྱས་གཉིས་སོ། །གཉེན་མ་ཡིན་པས་

བཏགས་ན་སྤང་བའི་ལྟུང་བའོ། །དགེ་སློང་མས་གཉེན་ལ་སྐུད་པ་བསླངས་ཏེ། གཉེན་མ་ཡིན་པས་བཏགས་ན་སྤོང་བའི་ལྟུང་བའོ། །དེས་ཏེ་གཉེན་གྱིས་བཏགས་ན་ཉེས་པ་གཉི་ག་མེད། དེས་ཏེ་བདག་གིས་བཏགས་ན་ཉེས་བྱས་གཅིག་ཏུ་ཟད་དོ། །རྔན་པ་བྱིན་ཏེ་འཐག་ཏུ་
བཅུག་པ་དང་ལས་དང་པོ་པ་ལ་ཉེས་པ་མེད་དོ། །སྤང་བའི་ལྟུང་བ་བཅོ་ལྔ་བ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །སྦོམ་དགའ་མོས་ཁྱིམ་བདག་བཟའ་ཤུག་སྐྱབས་སུ་འགྲོ་བའི་ཚིག་ལ་བཀོད་པ་དང་། དེ་གཉིས་ཀྱིས་འཕགས་མ་སྦོམ་དགའ་མོ་ལ་རས་
ཤིག་བསྐོན་ནོ་སྙམ་ནས་དེ་དག་གིས་ཐ་ག་པ་ལ་སྐུད་པ་བྱིན་ནས་འཐག་ཏུ་བཅུག་པ་སྦོམ་དགའ་མོས་ཐོས་ནས། ཐ་ག་པའི་གནས་སུ་སོང་སྟེ་སྨྲས་པ། བཞིན་བཟངས་རས་འདི་ནི་ཁོ་མོའི་ཕྱིར་འཐག་གིས་ལེགས་པར་ཐོགས་ཤིག་ཅེས་བསྒོའོ། །དེ་ནས་བཙུན་མོ་ཕྲེང་ལྡན་མ་ལ་
བསོད་སྙོམས་བླངས་ནས་དེས་ཀྱང་བདག་ཆོས་བཞིན་དགུས་སྦོམ་དགའ་མོའི་ལྷུང་བཟེད་བཀང་སྟེ་བྱིན་ནོ། །སྦོམ་དགའ་མོས་སོང་སྟེ་ཐ་ག་པ་ལ་བྱིན་ནས་གོས་འདི་ངའི་ཡིན་གྱིས། སྲིད་དང་ཞེང་འདི་ཙམ་བྱོས་ལ་ལེགས་པར་ཐོགས་ཤིག་ཅེས་སྨྲས་ནས་སོང་ངོ་། །དེ་ནས་སྦོམ་
དགའ་མོ་ཉིན་གཅིག་བཞིན་ལན་གསུམ་དེར་འོངས་ཏེ་ཐ་ག་པས་འཕགས་མ་སྐུད་པ་བས་སོ། སྦོམ་དགའ་མོས་སྨྲས་པ་ཁྱིམ་བདག་དེའི་ཁྱིམ་དུ་སོང་ལ་ལོངས་ཤིག་ཅེས་བསྒོ་བ་དང་། ཐ་ག་པས་ཀྱང་སྐུད་པ་བས་སོ་ཞེས་ཁྱིམ་བདག་ལས་ལན་གསུམ་གྱི་བར་དུ་བསླངས་པ་
དང་། ཁྱིམ་བདག་གིས་རས་བཟང་པོ་མཐོང་ནས་སྦོམ་དགའ་མོ་ལ་མི་སྦྱིན་པར་བཤམས་པ་དང་། ཐ་ག་པ་ལ་ང་ཁྱིམ་བདག་གི་ཁྱིམ་དེར་འདུག་པའི་ཚེ་ཁྱེར་ཏེ་ཤོག་ཤིག་ཅེས་སྨྲས་ནས་སྦོམ་དགའ་མོ་ཁྱིམ་བདག་ལ་ཆོས་འཆད་ཅིང་འདུག་གོ། །ཐ་ག་པས་རས་དེ་ཁྱེར་ཏེ་དེར་འོངས་
པ་དང་ཁྱིམ་བདག་གིས་སྐད་ཅིག་མ་འོངས་ཤིག་པའི་བརྡ་བྱས་པ་དང་། ཐ་ག་པས་རས་དེ་སྦོམ་དགའ་མོ་ལ་བསྟན་ནས་དེས་ཀྱང་བླངས་ཏེ་སྦྱིན་པའི་ཚིགས་བཅད་བྱས་པ་དང་། ཁྱིམ་བདག་མོས་ཚུར་སྩོལ་ཚུལ་བཞིན་བགྱིས་ལ་འབུལ་ལོ། །དེས་སྨྲས་པ་ཚུལ་བཞིན་ཇི་ལྟ་བུ།

བཤོས་གསོལ་ལོ། །སྦོམ་དགའ་མོས་ཅི་བདག་ལ་ངན་པ་ཅིག་བསྐོན་པར་སེམས་སམ། འདི་ཁ་དོག་བསྒྱུར་དགོས་ཞེས་བྱས་ནས་རས་ཁྱེར་ཏེ་སོང་ངོ་། །ཐ་ག་པས་ཁྱིམ་བདག་ལ་བདག་ལ་རྔན་པ་བྱིན་ཅིག །དེས་སྨྲས་པ་རས་དེ་སུ་ལ་བྱིན་པ་དེར་རྔན་པ་
སློངས་ཤིག །སྦོམ་དགའ་མོ་ལ་བདག་ལ་རྔན་པ་སྩོལ་ཅིག་བྱས་པ་དང་། སྦོམ་དགའ་མོས་ངའི་བག་ཆོས་དང་། མར་དང་། བུ་རམ་བརྩིས་ན་ཁྱོད་ཀྱིས་སླར་ང་ལ་མང་དུ་འབུལ་བར་འགྱུར་རོ་ཞེས་བྱས་ནས་གཉི་གར་ཡང་རེ་བ་ཆད་ནས་ཐ་ག་པ་འཕྱ་སྟེ། གང་ལ་ཕན་དུ་རེ་སྟེ་
བྱས་པས་དེ་སླར་གནོད་པར་གྱུར་ཏོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །དགེ་སློང་མའི་ཕྱིར་གཉེན་མ་ཡིན་པའི་ཁྱིམ་བདག་གམ་ཁྱིམ་བདག་གི་ཆུང་མ་ཞིག་གིས་གཉེན་མ་ཡིན་པའི་ཐག་པ་ལ་གོས་འཐག་ཏུ་བཅུག་པ་
ལས། དགེ་སློང་མ་དེ་ལ་གལ་ཏེ་སྔར་མ་བསྒོ་བར་དེ་རྣམ་པར་རྟོག་པ་འགའ་ཞིག་བྱུང་ནས་གཉེན་མ་ཡིན་པའི་ཐ་ག་པའི་གན་དུ་སོང་སྟེ་ཚེ་དང་ལྡན་པ་ཐ་ག་པ་ཤེས་པར་གྱིས་ཤིག །གོས་འདི་བདག་གི་ཕྱིར་འཐག་གིས། ཚེ་དང་ལྡན་པ་ཐག་པ་གོས་འདི་ཐག་རན་བཟང་བ་དང་། ཡུག་
ཁྱིམ་ཆེ་བ་དང་། འཇུར་མདུད་མེད་པར་ཐོགས་ལ་བཅགས་ན་ལེགས་སོ། །ཚེ་དང་ལྡན་པ་ཐ་ག་པ་འདི་ལྟ་སྟེ། ངས་བཟའ་བའམ་བཅའ་བའམ་ཟས་ཀྱི་རིན་ཅུང་ཟད་ཅིག་སྦྱིན་ནོ་ཞེས་དེ་སྐད་སྨྲས་ནས། གལ་ཏེ་དགེ་སློང་མ་དེས་གོས་བསྒྲུབ་པའི་ཕྱིར། འདི་ལྟ་སྟེ་བཟའ་བའམ།
བཅའ་བའམ་ཁ་ཟས་ཀྱི་རིན་ཅུང་ཟད་ཅིག་བྱིན་ཏེ། གོས་གྲུབ་ན་སྤང་བའི་ལྟུང་བར་འགྱུར་རོ། །གཞན་ནི་དངོས་སུ་ཟད། སྔར་མ་བསྒོ་ཞེས་པ་ནི་མགྲོན་དུ་མ་བོས་པའོ། །དེ་རྣམ་པར་རྟོག་པ་འགའ་ཞིག་བྱུང་ཞེས་བྱ་བ་ནི་བྲན་མོ་ལས་ཐོས་པའོ། །ཡུག་ཁྱིམ་ཆེ་ཞེས་བྱ་བ་ནི། ཞེང་
འདི་ཙམ་ཆུར་འདི་ཙམ་མོ། །འཇུར་མདུད་མེད་ཅེས་པ་ནི་དངོས་སོ། །ཆོགས་ཤིག་པ་ནི་འཇམ་པ་དང་སྟུག་པ་དང་ཆགས་བཟང་པོའོ། །བཟའ་བ་དང་བཅའ་བ་ཞེས་བྱ་བ་ནི་ལྔའོ། །ཁ་ཟས་ཀྱི་རིན་ཞེས་བྱ་བ་ནི་བཟའ་བ་ལྔའོ། །གོས་བསྒྲུབ་པའི་ཕྱིར་ཞེས་པ་ནི་ཐོབ་པར་བྱའོ། །

གོས་གྲུབ་པ་ཞེས་བྱ་བ་ནི་ཐོབ་པའོ། །ལྟུང་བ་ཇི་ལྟ་བུ་ཞེ་ན། དགེ་སློང་གིས་གོས་བསྒྲུབ་པའི་ཕྱིར་ཆས་ནས་བཟའ་བ་དང་བཅའ་བ་ལ་སོགས་པ་ཐ་ག་པ་ལ་བྱིན་ཏེ་གོས་མ་གྲུབ་ཀྱི་བར་དུ་ཉེས་བྱས་སོ། །གྲུང་ན་སྤང་བའི་ལྟུང་བའོ། །ཕྱོགས་འདི་ལྟ་བུ་ཞིག་ན་གོས་འཐག་གིས་དེ་ལ་བྱོས་
ཤིག་ཅེས་བྱས་ན་ལྟུང་བ་མེད་དོ། །ལས་དང་པོ་པ་ལ་སོགས་པ་ནི་སྔ་མ་བཞིན་ནོ། །སྤང་བའི་ལྟུང་བ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །སྦོམ་དགའ་མོས་སློབ་མ་ལ་གོས་བྱིན་ནས་སྨྲས་པ་ཚུར་ཤོག་ལྷན་ཅིག་ལྗོངས་རྒྱུ་ཞིང་སྤྱོད་དུ་འདོང་
ངོ་ཞེས་བྱ་བ་ལས་དེར་འགྲོར་མི་བཏུབ་ནས་སྦོམ་དགའ་མོས་ཆོས་གོས་ཕྲོགས་སོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་ལ་ཆོས་གོས་བྱིན་ཏེ། དེའི་འོག་ཏུ་ཁྲོས་འཁྲུགས་རྔམས་ཏེ་མི་དགའ་བར་གྱུར་སླར་ཕྲོགས་སམ་འཕྲོག་ཏུ་
བཅུག་ཀྱང་རུང་དགེ་སློང་མ་ཁྱོད་ལ་གོས་འདི་མི་སྦྱིན་གྱིས་སླར་བྱིན་ཅིག་ཅེས་དེ་ལ་དེ་སྐད་ཀྱང་སྨྲས་ན་དགེ་སློང་མ་དེས་ཆོས་གོས་དེའི་ལྷག་མ་ཡོད་པ་སླར་བྱིན་ཏེ་བགོས་ན་སྤང་བའི་ལྟུང་བའོ། །གོས་ཞེས་བྱ་བ་ནི་བལ་ལ་སོགས་པ་བདུན་ནོ། །བྱིན་པ་ཞེས་བྱ་བ་ནི་བྱིན་པའོ། །དེའི་འོག་
ཏུ་ཞེས་བྱ་བ་ནི་དུས་གཞན་དུའོ། །ཁྲོས་འཁྲུགས་རྔམས་ཏེ་ཞེས་བྱ་བ་ནི་འཁྲུག་པ་མ་ཞི་བའོ། །ལྷག་མ་ཡོད་ཅེས་བྱ་བ་ནི་དེ་ལྷག་མ་ཇི་ཙམ་ཡོད་པའོ། །བྱིན་ཅིག་ཅེས་བྱ་བ་ནི་གཏན་སྤང་བའོ། །སྤང་བའི་ལྟུང་བ་ཞེས་བྱ་བ་ནི་སྔ་མ་བཞིན་ནོ། །ལྟུང་བ་ཇི་ལྟ་བུ་ཞེ་ན་ལུས་ཀྱིས་འཕྲོགས་
པ་དང་། ངག་དང་ལུས་གཉི་གས་ཕྲོགས་པའོ། །ལུས་ཀྱིས་དྲངས་ཏེ་གོས་ཀྱི་མཐའ་དང་ལུས་སུ་མ་བྲལ་གྱི་བར་དུ་ཉེས་བྱས་སོ། །ལུས་དང་བྲལ་ན་ལྟུང་བའོ། །ངག་གིས་ཕྲོགས་ན་ཡང་དེ་བཞིན་ནོ། །ཁྱིམ་པ་འཕྲོག་ཏུ་བཅུག་ན་ཉེས་བྱས། ལུས་དང་བྲལ་ན་ལྟུང་བ་དགེ་སློང་མ་གང་
གིས་དགེ་སློང་མ་ལ་བྱིན་པ། དགེ་སློང་མ་གང་གིས་འཕྲོག་ཏུ་བཅུག་ན་ལྟུང་བའོ། །ལུས་དང་མ་བྲལ་གྱི་བར་དུ་ཉེས་བྱས་རེ་རེ། །ལུས་དང་བྲལ་ནས་ཕྲོགས་པ་ནི་ལྟུང་བའོ། །འཕྲོག་ཏུ་བཅོལ་བ་ལ་ཉེས་བྱས། དགེ་སློང་མ་འཕྲོག་ཏུ་བཅུག་ན་ལྟུང་བའོ། །ལུས་དང་མ་བྲལ་ན་གཉི་ག་

ཉེས་བྱས། བྲལ་ན་དགེ་སློང་མ་ལ་ནི་ཉེས་བྱས། འཆོལ་བ་ལ་ནི་ལྟུང་བའོ། །དོན་གཞན་དང་འདུལ་བའི་ཕྱིར་ན་ཉེས་པ་མེད་དོ། །གཞན་གང་ཞེ་ན་སློབ་དཔོན་དང་མཁན་པོས་སློབ་མ་འཇིགས་པ་དང་བཅས་པའི་ས་ཕྱོགས་སམ་དུས་མ་ཡིན་པའམ་ཆུ་ངོགས་
སམ་གཡང་ས་ལྟ་བུར་འགྲོ་བ་ལས་ཆོས་གོས་ཕྲོགས་ན་ཉེས་པ་མེད་དོ། །འདུལ་བའི་ཕྱིར་ཞེས་བྱ་བ་ནི་སློབ་མ་སྡིག་པའི་གྲོགས་པོ་ལ་བརྟེན་ཏམ། དེ་དང་ལམ་དུ་འགྲོ་བར་འགྱུར་བ་ལས་བཟློག་པའི་ཕྱིར་ཆོས་གོས་ཕྲོགས་པ་ལ་ཉེས་པ་མེད། ལས་དང་པོ་པ་ལ་ཉེས་པ་མེད་དོ། །
སྤང་བའི་ལྟུང་བ་བཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་མ་ཨུཏྤ་ལའི་ཁ་དོག་མས་ཁྱིམ་བདག་ཅིག་ལོག་པར་ལྟ་བ་ལས་ཕྲལ་ཏེ། སྐྱབས་སུ་སོང་བའི་བསླབ་ཚིག་ལ་གཞག་གོ། །དགེ་སློང་མ་དག་གིས་འཕགས་མ་ཁྱོད་
ཀྱིས་ཁྱིམ་པ་གང་ཞིག་བསླབ་ཚིག་ལ་གཞག་ཅེས་དྲིས་པ་དང་འདིའོ། །ཁོ་མོ་ཅག་གིས་ནི་དེ་ལ་སྔན་ཆད་བསླངས་པ་གཟར་བུ་གང་ཡང་ཐོབ་མ་མྱོང་ངོ་། །ཨུཏྤ་ལའི་ཁ་དོག་མས་སྨྲས་པ། གལ་ཏེ་ནུས་ན་དགེ་སློང་མའི་དགེ་འདུན་ལ་བཤོས་སྦྱར་དུ་གཞོག་གོ་ཞེས་སྨྲས་ནས། ཁྱིམ་
བདག་དེའི་གན་དུ་སོང་སྟེ་ཁྱོད་ཀྱིས་དགེ་འདུན་མའི་བཤོས་སྦྱོར་ནུས་སམ་ཞེས་སྨྲས་པ་དང་། དེས་ཀྱང་སྦྱོར་རོ་ཞེས་སྨྲས་སོ། །ཨུཏྤ་ལའི་ཁ་དོག་མས་ཅི་གོས་དང་བཅས་པ་སྦྱོར་རམ་གོས་མེད་པར་སྦྱོར་ཞེས་སྨྲས་པ་དང་། ཁྱིམ་བདག་གིས་དགེ་འདུན་བཤོས་གསོལ་ནས་རས་ཡུག་
གཅིག་འབུལ་ལོ་ཞེས་སྨྲས་ནས་དགེ་འདུན་མ་སྤྱན་དྲངས་ཏེ་དེའི་ནུབ་མོ་བཟའ་བ་དང་བཅའ་བ་སྦྱར་རོ། །དེ་ལྟ་བུ་སྦོམ་དགའ་མོས་ཐོས་ནས་རས་ཟུང་གཅིག་པོ་དེ་ངས་མ་ཐོབ་ན་སྦོམ་དགའ་མོ་མ་ཡིན་ནོ་ཞེས་སྨྲས་ནས་ཁྱིམ་བདག་གི་གན་དུ་སོང་ནས་ཕྱིན་པ་དང་། ཁྱིམ་བདག་གིས་ཅི་དང་
ཅི་སྦྱོར་བ་ཞིབ་ཏུ་སྨྲས་པ་དང་། སྦོམ་དགའ་མོས་ཁྱིམ་བདག་ཁྱོད་སྦྱིན་པའི་བསོད་ནམས་ནི་ཡོད་ན། སྤྱད་པའི་བསོད་ནམས་ནི་མེད་མོད་ཀྱི། ཤཱཀྱའི་བུ་རབ་ཏུ་བྱུང་བ་སྡེ་སྣོད་གསུམ་དང་ལྡན་པ་ཅིག་ལ་བྱིན་ཅིག །ཁྱིམ་བདག་གིས་དེ་ལྟ་བུ་ཡོན་ཏན་དང་ལྡན་པ་ནི་ཁྱོད་ལགས་ཀྱིས་

སྣོམས་ཤིག །སྦོམ་དགའ་མོས་བསམས་པ་དེའུ་རེ་བསྐུར་ན་ནི་མི་རིགས་པར་འགྱུར་སྙམ། དགེ་འདུན་མ་ལ་བཤོས་གསོལ་ཟིན་ནས། ཁྱོད་རས་དེ་རྒན་རིམས་ནས་སྟོན་ལ་ཁོ་མོའི་པང་དུ་འོར་ཅིག་ཅེས་བསྒོ་བ་དང་། ཁྱིམ་བདག་གིས་ཀྱང་ཕྱི་དེ་ཉིན་དགེ་སློང་མའི་དགེ་འདུན་བཤོས་གསོལ་
ནས་རྒན་རིམས་ནས་རས་ཟུང་རེ་བསྟན་ནས་སྦོམ་དགའ་མོའི་པང་པར་གཞག་གོ། །དགེ་སློང་མ་གོས་འགེད་པས་སྦོམ་དགའ་མོ་ལ་རས་ཟུང་དེ་ཚུར་སྩོལ་དང་བསྒོ་བར་བྱའོ། །སྦོམ་དགའ་མོས་རས་དེ་ནི་ང་ལ་ཁྱིམ་བདག་གིས་བྱིན་ནོ་ཞེས་སྨྲས་པ་དང་། དགེ་སློང་མ་དག་གིས་ཁྱིམ་བདག་
ལ་སྨྲས་ན་མད་དོ་ཞེས་གསོལ་བ་དང་། དགེ་འདུན་མའི་རྙེད་པ་གང་ཟག་བདག་གིར་བསྔོས་སོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་དགེ་འདུན་ལ་བསྔོས་པའི་རྙེད་པ་གང་ཟག་བདག་གིར་བསྔོས་ན་
སྤང་བའི་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །རྙེད་པ་ཞེས་བྱ་བ་ནི་རྙེད་པ་ལ་རྣམ་པ་གཉིས་ཏེ། ཁ་ཟས་རྙེད་པ་དང་གོས་ཀྱི་རྙེད་པའོ། །སྐབས་འདིར་ནི་གོས་ཀྱི་རྙེད་པ་
ལ་བྱའོ། །བསྔོས་ཞེས་བྱ་བ་ནི་ཡོངས་སུ་གྲུབ་པའོ། །བདག་ཉིད་ཀྱིར་བསྔོས་ཞེས་བྱ་བ་ནི་རང་གི་ཆེད་དུའོ། །སྤང་བའི་ལྟུང་བ་ནི་སྔ་མ་བཞིན་ནོ། །ལྟུང་བ་ཇི་ལྟ་བུ་ཞེ་ན། དགེ་སློང་མས་དགེ་འདུན་ལ་བསྔོས་པའི་རྙེད་པ་གང་ཟག་བདག་གིར་བསྔོས་ན་སྤང་བའི་ལྟུང་བའོ། །གང་
ཟག་གཅིག་ལ་བསྔོས་པ་གང་ཟག་གཞན་ལ་བསྔོས་པ་ནས་གཅིག་ལ་བསྔོས་པ་གཉིས་ཀྱིས་བསྔོས་པ་ལ་སོགས་ཏེ། དགེ་འདུན་སྡེ་གཉིས་གཅིག་ལས་གཅིག་ཏུའམ་ཐུན་མོང་པ་ལས་གཅིག་ཏུའམ། སྐུ་གཟུགས་དང་མཆོད་རྟེན་གྱི་ཡན་ལག་གང་ལ་བསྔོས་ཀྱང་རུང་སྟེ།
གཅིག་ལ་གཅིག་ཏུ་བསྣོར་བ་ནི་བསྔོ་བའི་ཚེ་ཉེས་བྱས། ཐོབ་པ་ཡང་ཉེས་བྱས་དང་པོའོ། །སྤང་བའི་ལྟུང་བར་གྱུར་པ་མ་གཏོགས་པ་གཞན་བསྣོར་བ་ཐམས་ཅད་ཀྱང་སྦྱོར་བའི་ཚེ་ཉེས་བྱས་དང་ཐོབ་ན་ཡང་ཉེས་བྱས་སོ། །དགེ་སློང་མས་ཕམ་བབས་བཟའ་བའི་རྙེད་པ་གཅིག་

ལ་བསྔོས་པ་གཞན་ལ་བསྔོས་པ་དང་། བྱོལ་སོང་གཅིག་ལ་བསྔོས་པ་གཞན་ལ་བསྔོས་ན་ཉེས་བྱས་སུ་འགྱུར་རོ། །བཙལ་ཏེ་མ་རྙེད་ན་ཉེས་པ་མེད་དོ། །བསྐྱིས་པ་ཐང་བཞིན་དུ་བསགས་པ་དང་བརྙན་པོར་བྱིན་པ་ལ་ཉེས་པ་མེད་དོ། །སྤང་བའི་ལྟུང་བ་བཅོ་བརྒྱད་
པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་གཽ་ཏ་མ་སྐྱེ་དགུའི་བདག་མོའི་ལྷན་ཅིག་སྤྱོད་པ་དང་ཉེ་གནས་རྣམས་སྨན་གང་ཡང་རུང་སྟེ། དེ་ནས་བླངས་དེ་ནས་ཡང་སླར་བླངས། ཟས་ཕྱེ་མ་དང་འདྲེས་པ་ཕན་ཚུན་འདྲེས་པ་རང་གི་རྒྱུད་ཀྱིས་མྱགས་ནས་
གང་དབྱེར་མི་རྟོག་པ་དེ་ལྟ་བུ་དུས་དང་དུས་མ་ཡིན་པར་ཟ་བས་ན་དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །བཅོམ་ལྡན་འདས་ཀྱིས་དགེ་སློང་མ་ན་བ་རྣམས་ལ་གང་ཕན་པའི་ཡི་ག་འབྱེད་པའི་སྨན་གསུངས་པ་འདི་ལྟ་སྟེ། མར་དང་། འབྲུ་མར་དང་། སྦྲང་རྩི་དང་།
བུ་རམ་སྟེ་དེ་དག་འདོད་ན་དགེ་སློང་མ་རྣམས་ལ་ཞག་བདུན་དུ་བྱིན་གྱིས་བརླབས་ལ་སྤགས་པ་ཡོངས་སུ་སྤྱད་པ་བཞིན་དུ་བཟའ་བར་བྱའོ། །དེ་ལས་འདས་པར་ཟོས་ན་སྤང་བའི་ལྟུང་བའོ། །དགེ་སློང་མ་ཞེས་བྱ་བ་ནི་ཆོས་འདི་ལ་ཞུགས་པའི་རྣམས་སོ། །ན་བའི་རྣམས་ཞེས་བྱ་བ་ནི་མི་བདེ་བ་རྣམས་
ལའོ། །ཕན་པའི་ཡི་ག་འབྱེད་ཅེས་བྱ་བ་ནི་སྨན་དང་མཐུན་པའོ། །མར་དང་། འབྲུ་མར་དང་། སྦྲང་རྩི་དང་། བུ་རམ་ཞེས་བྱ་བ་ནི་དངོས་སུ་ཟད་དོ། །འདོད་ན་ཞེས་བྱ་བ་ནི་དགོས་པར་གྱུར་པའོ། །དགེ་སློང་མ་དེས་ཞེས་བྱ་བ་ནི་གང་ན་བར་གྱུར་པའོ། །རང་གིས་བྱིན་གྱིས་རློབས་ཤིག་ཅེས་བྱ་བ་
ནི་བདག་ཉིད་ཀྱིས་སོ། །སྤགས་པ་ཡོངས་སུ་སྤྱད་པ་བཞིན་དུ་བཟའ་བར་བྱའོ་ཞེས་བྱ་བ་ནི་ཐོག་མར་བྱིན་ལེན་བྱས་ནས་བཟའ་བར་བྱའོ། །དེ་ལས་འདས་ཞེས་བྱ་བ་ནི་ཞག་བདུན་འདས་པའོ། །དེ་ལས་སྨན་གང་དེ་ནས་བླངས་དེ་ནས་སླར་ཡང་བླངས། །ཟས་ཀྱི་ཕྱེ་མར་འདྲེས་ཏེ་རང་གི་རྒྱུད་ཀྱིས་
མྱགས་ནས་ཕན་ཚུན་འདྲེས་ཏེ་གང་དབྱེར་མི་རྟོག་པ་དེ་ལྟ་བུ་དགེ་སློང་མ་ཁྱིམ་པ་དང་དགེ་སྦྱོང་ལ་བྱིན་ཅིག །དེ་རྣམས་ལས་བཟློག་པ་ནི་དགེ་སློང་མས་བྱིན་ལེན་བྱོས་ལ་དགེ་སློང་མའི་མདུན་དུ་བྱིན་གྱིས་རློབས་ཤིག །འཕགས་མ་དགོངས་ཤིག་བདག་མིང་འདི་ཞེས་བགྱི་བས་སྨན་འདི་བདག་དང་

མཚུངས་པར་སྤྱོད་པའི་ཕྱིར་ཞག་བདུན་དུ་བྱིན་གྱིས་བརླབས་སོ། །དེ་བཞིན་དུ་ལན་གཉིས་ལན་གསུམ་དུ་བརྗོད་པར་བྱའོ། །ཉིན་གཅིག་བཞིན་དུ་ཇི་ལྟར་ཟོས་པ་དེ་ཡང་དགེ་འདུན་ལ་བརྗོད་པར་བྱ་སྟེ། བདག་གིས་དེང་ཞག་གཅིག་འཚལ་ལགས་ཏེ། ཕྱི་ན་ཞག་འདི་སྙེད་ཅིག་ལུས་སོ་
ཞེས་ཞག་རེ་རེ་བཞིན་དུ་བརྗོད་ཅིང་བཟའ་བར་བྱའོ། །ལྟུང་བ་ཇི་ལྟ་བུ་ཞེ་ན་དགེ་སློང་མས་ཚེས་གཅིག་ལ་སྨན་ཞིག་རྙེད་ལ། ཚེས་གཉིས་ལ་ཡང་གཞན་ཞིག་རྙེད་ལ། དགེ་སློང་མས་སྔ་མ་དེའི་ཞག་བདུན་ཚུན་ཆད་ཟོ་ཞིག་ཡང་ན་ཕྱི་མའོ། །ཡང་ན་ཕྱི་མ་སྐུར་ཅིག །ཡང་ན་གཞན་ལ་
བྱིན་ཅིག །མ་བསྐུར་རམ་གཞན་ལ་མ་བྱིན་ཏེ་ཞག་བརྒྱད་པོའི་སྐྱ་རེངས་ཀྱིས་ཆོད་ན་སྤང་བའི་ལྟུང་བའོ། །དེ་བཞིན་དུ་ཚེས་གཉིས་པོ་དང་གསུམ་པོ་ནས་བདུན་པོའི་བར་དུ་དེ་བཞིན་དུ་སྦྱར་རོ། །དགེ་སློང་མས་སྨན་སྤངས་པར་གྱུར་ལ་ཞག་ལོན་པར་མ་བྱས་པ་དང་། ཞག་ལོན་པར་
བྱས་ལ་ལྟུང་བ་མ་བཤགས་པ་དང་། གསུམ་ཆར་མ་བྱས་སམ་གཅིག་མ་བྱས་པ་འདྲ་སྟེ། གཞན་རྙེད་ན་དེ་ཡང་སྔ་མའི་རྒྱུད་ཀྱིས་སྤང་ངོ་། །སྤང་བ་བཅུ་དགུ་པ་རྫོགས་སོ།། །།བསྡུས་པའི་མདོ་སྡེ། ལྷུང་བཟེད་སོགས་བྱེད་སོ་སོ་སྟེ། །སྐྱེ་བོ་མོང་པོ་དགེ་སློང་
མ་ཡང་གཉིས། །ཀུན་དུ་སྦྱོར་བའི་ཚོགས་ནི་བརྗོད་པ་ཡིན། །མདོར་ན། ལྷུང་བཟེད་རྣམས་ནི་སོགས་པ་དང་། །བྱ་བ་ཆོས་གོས་བརྗེ་བ་དང་། །དུས་མིན་ཆོས་གོས་དུས་སུ་དང་། །མཚན་མས་བཏབ་པ་བླང་མི་བྱའོ། །སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་
དགེ་སློང་མ་བཅུ་གཉིས་སྡེ་རྣམས་ལྷུང་བཟེད་གྲུབ་ཅིང་རྙེད་པ་རྣམས་བསགས་ཏེ། བདག་ཅག་ཉིད་ཀྱང་མི་སྤྱོད་དགེ་སློང་མ་གཞན་དག་ལ་ཡང་སྦྱིན་པར་མི་བྱེད་དེ། དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །དགེ་སློང་མས་ལྷུང་བཟེད་ལྷག་པ་རིང་
ན་ཞག་གཅིག་ཏུ་ཆོངས་ཤིག་དེ་ལས་ལྷག་པར་བཅངས་ན་སྤང་བའི་ལྟུང་བའོ། །རིང་ན་ཞག་གཅིག་ཅེས་བྱ་བ་ནི་ཉིན་ཞག་གཅིག་ལས་འདའ་བའོ། །ལྷུང་བཟེད་ལྷག་པ་ཞེས་བྱ་བ་ནི་བྱིན་གྱིས་བརླབས་པའི་ལྷུང་བཟེད་ལས་ལྷག་པའོ། །དེ་ལས་འདས་པར་བཅངས་ན་

ཞེས་བྱ་བ་ནི་དེ་ལས་འདས་པར་བཅངས་པའོ། །ཚེས་གཅིག་ལ་ལྷུང་བཟེད་རྙེད་ནས་གཉིས་ལས་ལྷུང་བཟེད་གཞན་ཞིག་རྙེད་ན་དགེ་སློང་མ་དེས་ཚེས་གཅིག་པོའི་དེ་ཉིད་བྱིན་གྱིས་རློབས་ཤིག་ཕྱི་མ་སྐུར་ཅིག །ཡང་ན་གཞན་ལ་བྱིན་ཅིག །མ་སྐུར་མ་བྱིན་ཏེ། ཕྱི་དེ་ནང་པར་
གྱི་སྐྱ་རེངས་ཀྱིས་ནོན་ན་སྤང་བའི་ལྟུང་བའོ། །ཚེས་གཅིག་ལ་མ་ཡིན་གྱི་ཚེས་གཉིས་ལ་རྙེད་ཚེས་གསུམ་ལ་རྙེད་ན། དགེ་སློང་མ་དེས་ཚེས་གཉིས་པའི་སྔ་མ་དེ་བྱིན་གྱིས་རློབས་ཤིག །ཕྱི་མ་སྐུར་ཅིག །ཡང་ན་གཞན་ལ་བྱིན་ཅིག །མ་སྐུར་རམ་གཞན་ལ་མ་བྱིན་ན་ཕྱི་དེ་ཉིན་མོའི་སྐྱ་
རེངས་ཤར་ན་སྤང་བའི་ལྟུང་བའོ། །དེ་བཞིན་དུ་ཚེས་གཉིས་ནས་བརྒྱད་ཀྱི་བར་དུ་མ་རྙེད་ན། དགུ་ལ་ལྷུང་བཟེད་གཅིག་རྙེད་དེ། ཚེས་བཅུ་ལ་ཡང་ལྷུང་བཟེད་གཞན་ཞིག་དེས་རྙེད་ན་དགེ་སློང་མ་དེས་ཚེས་དགུ་པའི་ལྷུང་བཟེད་སྔ་མ་དེ་བྱིན་གྱིས་རློབས་ལ་ཕྱི་མ་སྐུར་ཅིག །ཡང་ན་གཞན་ལ་
བྱིན་ཅིག །མ་སྐུར་རམ་གཞན་ལ་མ་བྱིན་ཏེ་ཕྱི་དེ་ཉིན་མོའི་སྐྱ་རེངས་ཤར་ན་སྤང་བའི་ལྟུང་བའོ། །དགེ་སློང་མས་ཚེས་གཅིག་ལ་ལྷུང་བཟེད་གཉིས་རྙེད་དེ། ཚེས་གཉིས་ལ་ཡང་དེ་གཞན་ཞིག་རྙེད་ན་དགེ་སློང་མ་དེས་ཚེས་གཉིས་པོའི་སྔ་མའམ་ཕྱི་མ་ལས་གང་ཡང་རུང་། ལྷུང་བཟེད་
གཅིག་བྱིན་གྱིས་རློབས་ཤིག །སྤང་བ་ནི་སྔ་མ་བཞིན་ནོ། །ཚེས་གཅིག་ལ་མ་ཡིན་གྱི་ཚེས་གཉིས་ལའམ་དགུའི་བར་དུ་སྟེ། ཚེས་བཅུ་ལ་ཡང་གཞན་ཞིག་རྙེད་ན་དགེ་སློང་མ་དེས་ཚེས་དགུ་པོའི་སྔ་མ་དེའམ་ཕྱི་མ་ཡང་རུང་། མ་བསྐུར་ན་སྤང་བའི་བར་དུ་སྔ་མ་བཞིན་ནོ། །དགེ་སློང་མས་ཚེས་
གཅིག་གི་ཉིན་མོ་ལྷུང་བཟེད་མང་ཞིག་རྙེད་ལ། ཚེས་གཉིས་ལ་ཡང་དེས་གཞན་ཞིག་རྙེད་ན་སྤང་བའི་བར་དུ་སྔ་མ་བཞིན་ནོ། །ལྷུང་བཟེད་ཆུང་བའམ་ལྷུང་བཟེད་སྐྱ་བོ་ལ་ཉེས་པ་མེད་དོ། །སྤང་བའི་ལྟུང་བ་ཉི་ཤུ་པ་རྫོགས་སོ།། །།ཟླ་བ་ཕྱེད་ཕྱེད་ཅིང་ཞེས་བྱ་བ་ནི་སྟོན་
པ་མཉན་དུ་ཡོད་པ་ན་བཞུགས་སོ། །བུད་མེད་ཀྱི་བུ་དགེ་སློང་མ་རྣམས་དྲན་པ་ཉམས་པ་ན་བདག་གི་སྦྱར་མ་གང་ཡིན། སྟོད་གཡོགས་གང་ཡིན། ནང་གཡོགས་གང་ཡིན། གང་ལུགས་གང་ཡིན་རྔུལ་གཟན་གང་ཡིན་པ་མི་ཤེས་སོ། །དེ་ནས་གཽ་ཏ་མི་སྐྱེ་དགུའི་བདག་མོ་ཆེན་མོ་སྟོན་

པ་ག་ལ་བ་དེར་སོང་སྟེ་ཕྱིན་པ་དང་སྤྱི་བོས་ཕྱག་འཚལ་ནས། དེ་ལྟ་བུར་གྱུར་པ་རྒྱས་པར་གསོལ་པ་དང་། སྟོན་པས་དགེ་སློང་མ་རྣམས་ཀྱིས་ཟླ་བ་ཕྱེད་ཕྱེད་ཅིང་ཆོས་གོས་རྣམས་བྱིན་གྱིས་རློབ་པར་གྱིས་ཤིག་ཅེས་བཀའ་སྩལ་ནས། སྦོམ་དགའ་མོས་ཟླ་བ་ཕྱེད་ཅིང་ཆོས་གོས་བྱིན་གྱིས་
རློབ་པར་མི་བྱེད་དེ། དེ་ལྟར་གྱུར་པ་དགེ་སློང་མ་དག་གིས་སྟོན་པ་ལ་གསོལ་ནས། སྟོན་པས་སྦོམ་དགའ་མོ་རྣམ་པ་དུ་མས་སྨད་ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་ཆོས་གོས་རྣམས་ཟླ་བ་ཕྱེད་ཅིང་བྱིན་གྱིས་མ་བརླབས་ན་སྤང་བའི་ལྟུང་བའོ། །གཞན་ནི་དངོས་
སུ་ཟད་ཆོས་གོས་རྣམས་ཞེས་བྱ་བ་ནི་བྱིན་གྱིས་བརླབས་པ་ལྔ་ལ་བྱ་སྟེ། སྦྱར་མ་དང་། སྟོད་གཡོགས་དང་ནང་གཡོགས་དང་གང་ལུགས་དང་རྔུལ་གཟན་ནོ། །བྱིན་གྱིས་བརླབས་ཞེས་བྱ་བ་ནི་སོ་སོར་བྱིན་གྱིས་བརླབས་པའོ། །དེ་ལ་ཉེས་པ་ཇི་ལྟ་བུ་ཞེ་ན་དགེ་སློང་མས་ཟླ་བ་ཕྱེད་ཕྱེད་
ཅིང་ཆོས་གོས་རྣམས་ལས་གང་ཡང་རུང་བ་བྱིན་གྱིས་མ་བརླབས་ན་སྤང་བའི་ལྟུང་བའོ། །སྤང་པ་ཉི་ཤུ་གཅིག་པ་རྫོགས་སོ།། །།གཏན་པ་ཞེས་བྱ་བ་ནི་སྟོན་པ་མཉན་དུ་ཡོད་པ་ན་བཞུགས་སོ། །སྟོན་པས་དགེ་སློང་མ་རྣམས་ཀྱིས་གཏན་པ་ཕྱུང་ཤིག་ཅེས་བཀའ་སྩལ་པ་
དང་། སྦོམ་དགའ་མོས་དུས་ལ་མ་བབ་པར་གཏན་པ་སྦས་ཏེ་ཅི་ཞིག་བྱས་དབྱུང་ངོ་ཞེས་སྨྲས་པ་དང་། དགེ་སློང་མ་དག་གིས་སྨྲས་པ་འདི་དབྱུང་བའི་དུས་ལ་མ་བབ་བོ། །སྦོམ་དགའ་མོས་གཏན་པའི་དུས་ཞེས་བྱ་བ་གང་ཡིན་ཞེས་སྨྲས་ཏེ་གཏན་པ་ཕྱུང་ངོ་། །དགེ་སློང་མ་དག་ཆོས་གོས་
ལྔ་ཁྱེར་ནས་ལྗོངས་རྒྱུ་ཞིང་དོང་བ་དང་། དགེ་སློང་མ་དག་གིས་ཅི་འཕགས་མ་རྣམས་ཀྱིས་གཏན་པ་མ་བཏིང་ངམ་ཞེས་དྲིས་པ་དང་། དགེ་སློང་མ་དག་གིས་བཏིང་ངོ་ཞེས་སྨྲས་པ་དང་། དེ་ལྟར་བཏིང་ན་ཅིའི་ཕྱིར་ཆོས་གོས་ལྔ་དང་ལྗོངས་རྒྱུ་ཞིང་དོང་། དེ་དེ་ལྟར་གྱུར་པ་སྟོན་པ་ལ་གསོལ་ནས་
བསླབ་པའི་ཚིག་བཅས་སོ། །དགེ་སློང་མ་གང་དུས་མ་ཡིན་པར་གཏན་པ་ཕྱུང་ན་སྤང་བའི་ལྟུང་བའོ། །དུས་ལ་མ་བབ་པར་གཏན་པ་ཕྱུང་ཞེས་བྱ་བ་ནི་གཏན་པའི་དུས་གང་ཡིན་ཞེ་ན། སྟོན་ཟླ་ཐ་ཆུངས་ཉ་ནས་དཔྱིད་ཟླ་འབྲིང་པོའི་བར་དུ་སྟེ། འདི་ནི་གཏན་པའི་གོས་ཀྱི་དུས་སོ། །དེ་ཕན་ཆད་

ནི་དུས་མ་ཡིན་ནོ། །ཕྱུང་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ལ་ལྟུང་བ་བཤགས་པར་བྱ་བའོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་གང་ཅུང་ཟད་གཏན་པ་དུས་ལ་མ་བབ་པར་ཕྱུང་ན་ཐམས་
ཅད་སྤང་བའི་ལྟུང་བར་འགྱུར་རོ། །དགེ་སློང་མ་རྐུན་པོས་བཅོམ་པའི་ཕྱིར་འབྱིན་ན་ཉེས་པ་མེད་དོ། །སྤང་བའི་ལྟུང་བ་ཉི་ཤུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །སྟོན་པས་དགེ་སློང་མ་རྣམས་ལ་དུས་ལ་མ་བབ་པར་གཏན་པ་མ་འབྱིན་ཞེས་བཀའ་
སྩལ་པས་ན། སྦོམ་དགའ་མོ་དུས་ལ་བབ་ཀྱང་གཏན་པ་བྱིན་དུ་མི་བཏུབ་སྟེ་དེ་ཉིད་ཉེས་པའི་དམིགས་སུ་གྱུར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་ཚིག་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དུས་ལ་བབ་ཀྱང་གཏན་པ་མི་འབྱིན་ན་སྤང་བའི་ལྟུང་བའོ། །དགེ་སློང་
མ་གང་ཞེས་བྱ་བ་ནི་སྦོམ་དགའ་མོ་སྟེ་གང་གཞན་ཡང་དེ་དང་འདྲའོ། །དུས་སུ་གཏན་པ་མི་འབྱིན་ན་ཞེས་བྱ་བ་ནི་གཏན་པའི་དུས་གང་ཞེ་ན། སྟོན་ཟླ་ཐ་ཆུངས་ཉ་ནས་དཔྱིད་ཟླ་འབྲིང་པོའི་ཉའི་བར་དུ་ནི་གོས་ཀྱི་དུས་སོ། །མི་འབྱིན་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །སྤང་བའི་ལྟུང་བ་
ཞེས་བྱ་བ་ནི་དངོས་པོ་སྤང་བའི་ལྟུང་བ་བཤགས་པར་བྱའོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་དུས་ལ་བབ་བཞིན་དུ་གཏན་པའི་གོས་མི་འབྱིན་ན་ཐམས་ཅད་དུ་ཡང་སྤང་བའི་ལྟུང་བའོ། །སྤང་བའི་ལྟུང་བ་ཉི་ཤུ་གསུམ་པ་རྫོགས་སོ།། །།མཚན་མས་བཏབ་ཅེས་བྱ་བ་ནི་མཉན་དུ་
ཡོད་པ་ན་གསེར་མགར་ཞིག་ཡོད་དེ། དེས་རིགས་མཉམ་པ་ལས་ཆུང་མ་བླངས་སོ། །གསེར་མགར་གྱིས་བསམ་པ། བདག་གིས་ཆུང་མ་འདི་ཁྱིམ་སོ་ཟིན་ཏམ་མ་ཟིན་བགམ་མོ་སྙམ་ནས། གསེར་གྱི་འཁོར་ལོ་ཞིག་དེའི་མདུན་དུ་གཞག་སྟེ་སོང་ངོ་། །དེ་ནས་སྦོམ་དགའ་མོས་སྔ་དྲོ་བསོད་
སྙེམས་ཀྱི་ཕྱིར་གསེར་མགར་དེའི་ཁྱིམ་དུ་ཞུགས་ནས་དེས་བུ་མོ་ལ་བསོད་སྙོམས་བླངས་ནས་ཕྱིར་བྱུང་བ་དང་། གསེར་གྱི་འཁོར་ལོ་དེ་མཐོང་སྟེ་བཀྲ་མི་ཤིས་པ་འདི་བོར་ཅིག་ཐོང་ཤིག་བདག་གིས་ཐོག་མར་ཁྱེར་ལ་ཟས་ཀྱི་སྨན་བླང་བའི་མི་རིགས་ཀྱི་གསེར་གྱི་སྨན་བླང་གིས་བྱིན་ཅིག་ཅེས་སྨྲས་པ་

བུད་མེད་དེ་ཡང་ཅི་ཡང་མི་སྨྲ་བར་འདུག་གོ། །སྦོམ་དགའ་མོས་ཅང་མི་ཟེར་བ་ནི་ཁས་བླངས་པའི་ཐ་ཚིག་གོ་ཞེས་སྨྲས་ཏེ། གསེར་གྱི་འཁོར་ལོ་ཁྱེར་ཏེ་སོང་ངོ་། །གསེར་མགར་དེ་སླར་འོངས་ཏེ། གསེར་གྱི་འཁོར་ལོ་དེ་ག་རེ་རྨས་ན། བུ་མོ་ན་རེ་རབ་ཏུ་བྱུང་མ་ཞིག་འོངས་ཏེ་དེས་ཁྱེར་ཏེ་སོང་ངོ་ཞེས་
སྨྲས་པ་དང་གསེར་མགར་གྱིས་སྦོམ་དགའ་མོ་བཟུང་སྟེ་ངའི་གསེར་ཅིའི་ཕྱིར་རྐུ། སྦོམ་དགའ་མོ་ན་རེ་ང་ནི་མ་བྱིན་པར་མི་ལེན་ནོ་ཞེས་སྨྲས་ནས་དེའི་གདོང་དུ་བོར་བ་དང་གསེར་མགར་གྱིས་སྦོམ་དགའ་མོའི་གདོང་དུ་ཤིན་ཏུ་བརྡེགས་ནས་འཕྱ་ཞིང་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་
གསོལ་ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་མཚན་མས་བཏབ་པ་སློང་ན་སྤང་བའི་ལྟུང་བའོ། །མཚན་མས་བཏབ་ཅེས་བྱ་བ་ནི་གསེར་དང་དངུལ་ལོ། གཞན་ནི་གོང་མ་དང་འདྲའོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་གག་ཇི་ཙམ་དུ་ཁྱིམ་པའི་དེར་སོང་སྟེ། མཚན་མ་
བཏབ་པ་བླངས་ན་ཐམས་ཅད་ཀྱང་སྤང་བའི་ལྟུང་བར་འགྱུར་རོ། །སྤང་བའི་ལྟུང་བ་ཉི་ཤུ་བཞི་པ་རྫོགས་སོ།། །།མདོར་ན། ཆོས་གོས་སོ་སོ་བྱས་ནས་ནི། །ཕྱི་ཕྱིར་དུ་ནི་མི་གཏོང་བ། །གཞན་ཕྱིར་ཆོས་གོས་མལ་སྟན་གཙུག་ལག་ཁང་། །སྐྱེ་བོ་མང་པོས་རྙེད་དང་དགེ་འདུན་ཕྱིར་སློང་བའོ། །ཆོས་
གོས་ལྕི་བ་ཡང་བར་གྱུར་པ་ཐ་མ་སྟེ། །དགེ་སློང་མ་གཉིས་འདུས་ལ་ལུག་བལ་དྲུག །བཅུ་ལས་འདས་པ་ལྷུང་བཟེད་ཆུང་ངུ་དབྱར། །རས་ཅན་དེ་དག་བྱ་མ་ཡིན། །ལྷག་མ་རྣམས་ནི་བྱ་བའོ། །སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་སྦོམ་དགའ་མོ་ཆོས་གོས་ངན་པར་གྱུར་ཏེ་སྦྱར་
མ་ཡང་ཤིན་ཏུ་རྙིངས་སོ། །སྔ་དྲོ་བཙུན་མོ་ཕྲེང་ལྡན་མའི་དེར་སོང་ནས་ཆོས་བཤད་པ་དང་། བཙུན་མོས་འཕགས་མའི་ཆོས་གོས་ཅིའི་ཕྱིར་ངན། སྦོམ་དགའ་མོས་སྨྲས་པ། བདག་ལ་ཆོས་གོས་སྦྱིན་པའི་ཁྱིམ་ཐབ་དང་བུ་མཆིས་སམ་ཞེས་སྨྲས་པ་དང་། བཙུན་མོ་ཕྲེང་ལྡན་མས་
གོས་ཕྲུག་ཅིག་གཟེབ་ནས་ཕྱུང་སྟེ་སྦོམ་དགའ་མོ་ལ་ཕུལ་བ་དང་། བཙུན་མོ་ཁྱེད་ལ་བཏང་བའི་བསོད་ནམས་ནི་མཆིས་ན་ཡོངས་སུ་སྤྱད་པའི་བསོད་ནམས་མ་མཆིས་ཀྱིས། དྲུབ་པའི་གླ་དང་ཚོན་གྱི་རིན་བྱིན་ཅིག་སྨྲས་པ་དང་། དེས་ཀྱང་བྱིན་ནོ། །སྦོམ་དགའ་མོས་དེ་དག་ཀུན་བཙོངས་ཏེ་ཟོས་

ནས་གོས་ངན་བཞིན་དུ་བཙུན་མོའི་གན་དུ་སོང་ངོ་། །བཙུན་མོས་འཕགས་མ་ཅི་ད་དུང་ཡང་ན་བཟའ་རྣམས་འདི་ལྟར་ངན་བཞིན་དུ་བཞུགས་སམ། སྦོམ་དགའ་མོས་བཙུན་མོ་རྗེས་སུ་ཡི་རང་བར་མཛོད་ཅིག །ཉེས་པ་བརྒྱད་ལས་ཐར་བའི་གཏེར་དུ་བྲུབས་སོ། །དེ་སྐད་ཅེས་
སྨྲས་པ་དང་། བཙུན་མོས་འཕགས་མ་ཇི་སྐད་གསུངས་དྲིས་ནས་སྦོམ་དགའ་མོས་བདག་གི་བུ་ག་འདི་དག་དགབ་པ་གོས་བཟང་པོ་མི་དགོས་ཏེ་ཕྱག་དར་ཁྲོད་པས་ཀྱང་འཚལ་ལོ། །བདག་གི་ལུས་གྲེ་བ་འདི་ནི་དགང་དཀའ་སྟེ། ཤིང་རྟའི་ལྟེ་བའི་མིག་བཞིན་སྣུམ་གྱིས་མ་བསྐུས་ཀྱི་བར་དུ་མི་འཁོར་བ་དང་
འདྲ་སྟེ། འདི་དགང་བའི་ཕྱིར་དེ་དག་བག་ཆོས་སྣ་ཚོགས་སུ་སྦྱར་ཏོ་ཞེས་སྨྲས་པ་དང་བཙུན་མོས་ཐོས་ནས་འཕྱ་སྟེ་ཅིའི་ཕྱིར་ན། དགེ་སློང་མ་འདི་དག་གོས་ལུས་ལ་བགོ་བ་རྣམས་ཁའི་སྒོར་བསྒྲུབ་པ་རིགས་སམ་ཞེས་སྨྲས་པ་དང་། དེ་ལྟར་གྱུར་པ་སྟོན་པ་ལ་གསོལ་ནས་སྔ་མ་བཞིན་དུ་བཅས་སོ། །
ཡང་དགེ་སློང་མ་གང་ཆོས་གོས་ཀྱི་དངོས་པོ་གཞན་ཁའི་སྒོར་སྦྱར་ན་སྤང་བའི་ལྟུང་བའོ། །གོས་ཞེས་བྱ་བ་ནི་ལྡུམ་བུ་ཤ་ན་ཀ་ལ་སོགས་པ་དེ་བདུན་ལས་གང་ཡང་རུང་བའོ། །དངོས་པོ་གཞན་ཞེས་བྱ་བ་ནི་དངོས་པོ་གཞན་དུ་བསྔོས་པའོ། །ཁའི་སྒོར་སྒྲུབ་ཅེས་བྱ་བ་ནི་བཅའ་བ་རྣམ་པ་ལྔ་ལ་སོགས་པ་ཉོས་
ཏེ་མགྲིན་པར་མིད་པའོ། །སྤང་བའི་ལྟུང་བ་ནི་དངོས་པོ་སྤང་བ་ལ་ཉེས་པ་བཤགས་པར་བྱའོ། །ཉེས་པ་ཇི་ལྟ་བུ་ཞེ་ན་དགེ་སློང་མས་གོས་ཀྱི་དངོས་པོ་གཞན་དག་ཀྱང་རུང་། དངོས་པོ་ཆུང་ཟད་ཅིག་ཁའི་སྒོར་བསྒྲུབས་ཏེ་ཟོས་ན་སྤང་བའི་ལྟུང་བའོ། །སྤང་བའི་ལྟུང་བ་ཉི་ཤུ་ལྔ་པ་རྫོགས་སོ།། །།
སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་སྦོམ་དགའ་མོས་ཡང་དེ་བཞིན་དུ་ཆོས་གོས་ངན་པ་དང་སྔ་དྲོ་བསོད་སྙོམས་ལ་ཞུགས་ཏེ་ཁྱིམ་པ་དང་བྲམ་ཟེའི་ཁྱིམ་དུ་སོང་ནས་ཆོས་བཤད་པ་དང་། དེ་དག་གི་ཆུང་མས་འཕགས་མའི་ན་བཟའ་ངན་ཏོ་ཞེས་སྨྲས་པ་དང་། སྦོམ་དགའ་མོས་ཁོ་མོ་ལ་
ཁྱིམ་ཐབ་བམ་བུས་སྦྱར་ཞིང་ཁྱེད་ལ་སྦྱིན་པ་ལྟ་བུ་མེད་དོ། །ཁྱིམ་བདག་གི་ཆུང་མས་དེ་ལྟར་ན་འཕགས་མའི་ན་བཟའ་བདག་གིས་སྦྱར་རོ་ཞེས་སྨྲས་ནས། ལ་ལས་ནི་སྐུད་པ་བྱིན། ལ་ལས་ནི་ཐ་ག་པའི་གླ་བྱིན། ཁ་ཅིག་གིས་ནི་དྲུབས་པའི་གླ་བྱིན། ལ་ལས་ནི་ཚོན་གྱི་རིན་བྱིན་པ་དང་ཐམས་

ཅད་ཟོས་ཏེ་ཉེས་པ་བརྒྱད་ལས་ཐར་པའི་གཏེར་དུ་བྲུབས་སོ། །རྗེས་སུ་ཡི་རང་བར་བྱོས་ཤིག་ཅེས་པའི་བར་དུ་སྔ་མ་བཞིན་ནོ། །དེ་དག་གིས་འཕགས་མ་ཁྱེད་ཀྱིས་ཅི་ཞིག་བགྱིས་ཞེས་དྲིས་པ་དང་། སྦོམ་དགའ་མོས་སྨྲས་པ་ཁོ་མོ་ལ་གོས་བཟང་པོ་ཅི་ཞིག་བྱ། བུ་ག་འདི་དག་མི་སྣང་བ་ཙམ་
གྱིས་ཕྱག་དར་ཁྲོད་ཅི་ལྟ་བུ་ཡང་རུང་སྟེ། ཡོགས་པ་ཙམ་གྱིས་ཆོག་གོ་ཞེས་བྱས་ནས་དགེ་སློང་མས་སོ་སོའི་གོས་ཁའི་སྒོར་སྦྱར་རོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་ཚིག་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་སོ་སོ་ནས་གོས་རྙེད་པ་
ཁའི་སྒོར་བྱས་ན་སྤང་བའི་ལྟུང་བའོ། །སོ་སོའི་གོས་ཞེས་བྱ་བ་ནི་ཁ་ཅིག་གིས་སྐུད་པ། ཁ་ཅིག་གིས་ནི་བཏགས་པའི་གླ། ཁ་ཅིག་གིས་ནི་ཚོན་རིན་བྱིན་པའོ། །རྙེད་པ་ཞེས་བྱ་བ་ནི་རྙེད་པ་ལ་རྣམ་པ་གཉིས་ཏེ། གོས་རྙེད་པ་དང་ཟས་རྙེད་པའོ། །སྐབས་འདིར་ནི་གོས་རྙེད་པ་ལ་བྱའོ། །ཁའི་
སྒོར་སྦྱོར་ཞེས་བྱ་བ་ནི་དེ་བཙོངས་ནས་བཅའ་བ་ལྔ་དང་བཟའ་བ་ལྔ་སྦྱར་བ་སྟེ་མགྲིན་པར་མིད་ན་སྤང་བའི་ལྟུང་བ་སྔ་མ་བཞིན་ནོ། །སྤང་བ་ཉི་ཤུ་དྲུག་པ་རྫོགས་སོ།། །།མལ་སྟན་ཞེས་བྱ་བ་ནི་སྟོན་པ་མཉན་དུ་ཡོད་པ་ན་བཞུགས་སོ། །སྦོམ་དགའ་མོ་དབྱར་ཁང་དུ་འདུག་པ་དང་དེར་
བྲམ་ཟེ་དང་ཁྱིམ་བདག་གི་ཆུང་མ་དག་དེར་ལྷགས་སོ། །སྦོམ་དགའ་མོས་དེ་དག་ལ་ནོར་ལས་བྱུང་བའི་བསོད་ནམས་ཀྱི་དངོས་པོ་རྣམ་པ་བདུན་བརྗོད་དེ་ཆོས་བཤད་པ་དང་དེ་དག་གི་སེམས་དགའ་བར་གྱུར་ཏེ། འཕགས་མ་བདག་ཅག་གིས་ཅི་ཞིག་གྱིས་ཤིག་པ་བཀའ་སྩོལ་ཅིག་སྨྲས་པ་དང་།
ཁོ་མོའི་གཙུག་ལག་ཁང་འདི་ནི་མལ་ཆ་དང་སྟན་མེད་དོ་ཞེས་སྨྲས་པ་དང་། ཁྱིམ་བདག་གི་ཆུང་མ་དག་གིས་མལ་ཆ་དང་སྟན་གྱི་རིན་བྱིན་པ་དང་། སྦོམ་དགའ་མས་དེ་དག་ཐམས་ཅད་ཟོས་སོ། །སྦོམ་དགའ་མོས་དུས་ཕྱི་ཞིག་ན་བྲམ་ཟེའི་ཁྱིམ་བདག་གི་ཆུང་མའི་ཁྱིམ་དུ་སོང་བ་ནས། ཆོས་
བཤད་པ་དང་། ཁྱིམ་བདག་གི་ཆུང་མ་དག་གིས་འཕགས་མ་མལ་སྟན་དེ་དག་མཇལ་ཏམ་ཞེས་སྨྲས་པ་དང་། སྦོམ་དགའ་མོས་ལུས་འདི་ནི་གག་ཏུ་རྩ་བཏིང་བ་ལ་ཡང་གཞན་དུ་རུང་ན་ཟ་འོག་སྟན་གྱིས་ཅི་ཞིག་བྱ། རོ་ལྟ་བུ་འདི་དགང་དཀའ་བ་ནི་ཤིང་རྟའི་ལྟེ་བ་མ་བསྐུས་ན་འགྲོར་མི་བཏུབ་པ་

བཞིན་དུ་འདི་དགོང་བའི་ཕྱིར་ཁུར་བ་ལ་སོགས་པ་ཞིམ་པོ་མང་དུ་སྦྱར་རོ་ཞེས་སྨྲས་པ་དང་། ཁྱིམ་བདག་གི་ཆུང་མ་དག་འཕྱ་སྟེ་ཅིའི་ཕྱིར་ན་དགེ་སློང་མས་འདི་ལྟར་མལ་ཆ་དང་སྟན་གྱི་ཕྱིར་རྙེད་པ་ཁའི་སྒོར་སྦྱར་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་
ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་མལ་ཆ་དང་སྟན་གྱི་ཕྱིར་བསྔོས་པའི་རྙེད་པ་ཁའི་སྒོར་སྦྱར་ན་སྤང་བའི་ལྟུང་བའོ། །མལ་ཆ་དང་སྟན་ཞེས་བྱ་བ་ནི་ཉལ་བ་དང་སྟན་གྱི་ཕྱིར་རོ། །རྙེད་ཅེས་བྱ་བ་ལ་རྣམ་པ་གཉིས་ཏེ། གོས་རྙེད་པ་དང་ཟས་རྙེད་པའོ། །སྐབས་འདིར་མལ་ཆ་
དང་སྟན་རྙེད་པ་ལ་བྱའོ། །ཁའི་སྒོར་སྦྱོར་ཞེས་བྱ་བ་བཙོངས་ཏེ་བཅའ་བ་ལྔ་དང་བཟའ་བ་ལྔར་སྦྱར་ཏེ་མགྲིན་པར་མིད་པའོ། །ཉེས་པ་ཇི་ལྟ་བུ་ཞེ་ན། དགེ་སློང་མས་མལ་ཆ་དང་སྟན་གྱི་རྙེད་པ་གང་ཇི་ཙམ་ཡང་རུང་ཁའི་སྒོར་སྦྱར་ན་སྤང་བའི་ལྟུང་བའོ། །སྤང་བ་ཉི་ཤུ་བདུན་པ་རྫོགས་སོ།། །།སྟོན་པ་
མཉན་དུ་ཡོད་པ་ན་བཞུགས་སོ། །སྦོམ་དགའ་མོས་དགེ་སློང་མའི་གཙུག་ལག་ཁང་ཞིག་པ་སླར་བཅོས་པའི་ཕྱིར་བྲམ་ཟེ་དང་ཁྱིམ་བདག་གི་ཆུང་མ་སྦོམ་དགའ་མོའི་ཐད་དུ་ལྷགས་པ་དེ་དག་ལ་ཆོས་བཤད་ནས་ཁྱིམ་བདག་གི་ཆུང་མ་དག་གིས་གཙུག་ལག་ཁང་སླར་བཅོས་པའི་ཕྱིར་ནོར་བསྡུས་ཏེ་
བྱིན་ནོ། །སྦོམ་དགའ་མོས་དེ་ཐམས་ཅད་ཟོས་སོ། །ཁྱིམ་བདག་གི་ཆུང་མ་དག་ཕྱིས་ཀྱང་དེར་ལྷགས་ཏེ། དབྱར་མོ་ཁང་མ་བཅོས་ཀྱི་ཞིག་ཅིང་འདུག་པ་མཐོང་ནས། འཕགས་མ་ཅིའི་ཕྱིར་དབྱར་མོ་ཁང་མ་བཅོས་ཞེས་དྲིས་པ་དང་། སྦོམ་དགའ་མོས་སྤྱིལ་པོ་དེ་ཙམ་གང་དུའང་རུང་བསྐྱབ་པ་
ཙམ་གྱིས་གནས་པར་རུང་ན། དབྱར་མོ་ཁང་ཆེན་པོས་ཅི་ཞིག་བྱ། དེ་དག་ནི་བདག་གིས་རོ་ཀེང་རུས་བྲེལ་བ་འདིར་བྲུབས་སོ་ཞེས་སྨྲས་པ་དང་། བྲམ་ཟེ་དང་ཁྱིམ་བདག་གི་ཆུང་མ་དག་འཕྱ་སྟེ། ཅིའི་ཕྱིར་ན་དགེ་སློང་མས་དགེ་འདུན་གྱི་རྙེད་པ་བདག་གིར་བཀུར་རོ་ཞེས་མི་སྙེན་པར་འཛེར་
ཏོ། །དེ་ལྟར་གྱུར་པ་དགེ་སློང་མ་དག་གིས་སྟོན་པ་ལ་གསོལ་ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་དབྱར་མོ་ཁང་གི་ཕྱིར་བསྔོས་པའི་རྙེད་པ་ཁ་སྒོར་སྦྱར་ན་ཡང་སྤང་བའི་ལྟུང་བའོ། །དགེ་སློང་མ་ཞེས་བྱ་བ་ནི་སྟོན་པའི་ཉན་ཐོས་མའོ། །རྙེད་ཅེས་བྱ་བ་ནི་རྣམ་པ་གཉིས་ཏེ།

གོས་དང་ཟས་རྙེད་པའོ། །སྐབས་འདིར་ནི་གཙུག་ལག་ཁང་གི་རྙེད་པ་ལ་བྱའོ། །གང་ཟག་བདག་གི་ཕྱིར་ཞེས་བྱ་བ་ནི་རང་གི་ཕྱིར་རོ། །བསྔོས་ཞེས་བྱ་བ་ནི་བདག་ལའོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་གང་ཅི་ཙམ་ཡང་རུང་གནས་ཀྱིར་བསྔོས་པའི་རྙེད་པ་ཁའི་སྒོར་སྦྱར་ན་ཐམས་ཅད་སྤང་བའི་ལྟུང་
བའོ། །སྤང་བ་ཉི་ཤུ་བརྒྱད་པ་རྫོགས་སོ།། །།སྐྱེ་བོ་མང་པོ་ཞེས་བྱ་བ་ནི་སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་མ་མང་ཞིག་ལྗོངས་རྒྱུ་ཞིང་ལྷགས་སོ། །དེ་དག་གི་ཕྱིར་སྦོམ་དགའ་མོས་བྲམ་ཟེ་དང་ཁྱིམ་བདག་གི་ཁྱིམ་དུ་སོང་ནས་བསླང་བ་དང་རྙེད་པ་མང་ཞིག་གྲུབ་བོ། །
དེ་ཐམས་ཅད་བདག་གིར་བྱས་པ་དང་། དགེ་སློང་མ་རྣམས་འཕྱ་སྟེ། ཅིའི་ཕྱིར་ན་དགེ་སློང་མ་སྐྱེ་བོ་མང་པོའི་ཕྱིར་རྙེད་པ་གང་ཟག་ཉིད་ཀྱི་ཕྱིར་བསྔོས་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་དགེ་སློང་མ་དག་གིས་སྟོན་པ་ལ་གསོལ་ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་
སྐྱེ་བོ་མང་པོའི་ཕྱིར་བསྔོས་པའི་རྙེད་པ་གང་ཟག་བདག་གིར་བསྔོས་ན་སྤང་བའི་ལྟུང་བའོ། །སྐྱེ་བོ་མང་པོའི་ཕྱིར་ཞེས་བྱ་བ་ནི་དགེ་སློང་མའི་དགེ་འདུན་གྱི་ཕྱིར་རོ། །རྙེད་ཅེས་བྱ་བ་རྣམ་པ་གཉིས་ཏེ། སྐབས་འདིར་ནི་ཁ་ཟས་རྙེད་པ་ལ་བྱའོ། །གཞན་ནི་དངོས་སུ་ཟད་དོ། །དེ་ལ་ཉེས་པ་
ཇི་ལྟ་བུ་ཞེ་ན་གང་ཇི་ཙམ་དུ་སྐྱེ་བོ་མང་པོའི་ཕྱིར་རྙེད་པ་གང་ཟག་ཉིད་ཀྱི་ཕྱིར་བསྔོས་ན་སྤང་བའི་ལྟུང་བའོ། །སྤང་བ་ཉི་ཤུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དགེ་སློང་མ་སྦོམ་དགའ་མོ་ཡང་དགེ་སློང་མའི་དགེ་འདུན་གྱི་ཕྱིར་རྙེད་པ་དེར་ཁྱེར་ན་བདག་གིས་བྱས་སོ་ཞེས་དགེ་སློང་མས་ཐོས་
ནས་འཕྱ་སྟེ། ཅིའི་ཕྱིར་ན་དགེ་སློང་མས་དགེ་འདུན་གྱི་ཕྱིར་བསྔོས་པའི་རྙེད་པ་གང་ཟག་གི་ཕྱིར་བསྔོའོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་དགེ་འདུན་གྱི་ཕྱིར་རྙེད་པ་གང་ཟག་བདག་ཉིད་ཀྱི་ཕྱིར་བསྔོས་ན་སྤང་
བའི་ལྟུང་བའོ། །དགེ་འདུན་གྱི་ཕྱིར་ཞེས་བྱ་བ་ནི་དགེ་སློང་མའི་དགེ་འདུན་གྱི་ཕྱིར་རོ། །རྙེད་ཅེས་བྱ་བ་ནི་རྣམ་པ་གཉིས་ཏེ། སྐབས་འདིར་ནི་གཉིས་ཀ་ལ་བྱའོ། །བསྔོས་ཞེས་བྱ་བ་ནི་དགེ་འདུན་གྱི་ནང་དུའོ། །གཞན་ནི་ཐམས་ཅད་གོང་མ་བཞིན་ནོ། །སྤང་བ་སུམ་ཅུ་པ་རྫོགས་སོ།། །།

བཅིངས་པ་འགྲོལ་བ་ཞེས་བྱ་བ་ནི་མཉན་དུ་ཡོད་པ་ན་སྟེ། གཙུག་དགའ་མོ་དྲི་འཚོང་བའི་ཁྱེའུ་ལ་ཆགས་ནས་མོ་དེའི་ཚོང་ཁང་དུ་སོང་ནས་རྫས་གང་ཅུང་ཟད་ཉོས་པ་མོ་དེ་ལ་ཆགས་པས་ན་དེས་ཐུམ་བུར་བཅིང་ཞིང་བཅིངས་པ་དང་། ཡང་དང་ཡང་འགྲོལ་ཞིང་དེའི་
ཚིག་ཉམས་སུ་ལེན། ལན་ལྡོན་ཅིང་གཏམ་ཟེར་རོ། །དེ་ལ་དགེ་སློང་མ་དག་གིས་བཟློག་ཀྱང་། དེ་བཞིན་དུ་ཚིག་ཉམས་སུ་ལེན་ནོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་ཚིག་བཅས་སོ། །ཡང་དགེ་སློང་མ་གང་བཅིང་ཞིང་བཅིངས་པའི་ཐུམ་བུ་ཡང་དང་ཡང་འགྲོལ་བར་བྱེད་ན་སྤང་
བའི་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་གཙུག་དགའ་མོའོ། །བཅིང་ཞིང་བཅིངས་པའི་ཐུམ་བུ་ཞེས་བྱ་བ་ནི་ཉོས་པའོ། །འགྲོལ་ཞེས་བྱ་བ་ནི་འགྲོལ་བ་ཡང་བྱེད་པའོ། །ཉེས་པ་ཇི་ལྟ་བུ་ཞེ་ན་གང་ཇི་ཙམ་དུ་བཅིང་ཞིང་བཅིངས་པའི་ཐུམ་བུ་འགྲོལ་ཏེ། དེའི་ཚིག་ཀྱང་ཉམས་སུ་
བླངས་ན་ལྟུང་བར་འགྱུར་རོ། །སྤང་བ་སུམ་ཅུ་གཅིག་པ་རྫོགས་སོ།། །།ལྕི་ལ་རིན་ཆེ་ཞེས་བྱ་བ་ནི་སྟོན་པ་མཉན་དུ་ཡོད་པ་ན་བཞུགས་སོ། །རྒྱལ་པོ་གསལ་རྒྱལ་གྱིས་ཀད་ཤག་ཏི་ལ་ལ་བ་རིན་པོ་ཆེ་རིན་ཐང་ཆེར་རི་བ་ཞིག་བྱིན་ནོ། །དེས་ཀྱང་ལ་བ་དེ་ཆོས་སྦྱིན་མ་ལ་ཕུལ་ལོ། །
ཆོས་སྦྱིན་མས་ཀྱང་ལ་བ་དེ་བླངས་ནས་ཆོས་གོས་ཀྱི་གདང་ལ་བཀལ་ཏེ་གཞག་གོ། །གཙུག་དགའ་མོ་ཆོས་སྦྱིན་གྱི་ཁྱིམ་དུ་འོངས་ནས་ཕྱག་བྱས་པ་དང་། དེས་ལ་བ་རིན་པོ་ཆེ་མཐོང་ནས་འཕགས་མ་ལ་བ་འདི་གང་ནས་འོངས་ཞེས་དྲིས་དྲིས་པ་དང་། དེས་ཀྱང་ཞིབ་ཏུ་སྨྲས་སོ། །གཙུག་དགའ་
མོས་ལྷ་དང་མིས་མཆོད་པ་ཁྱོད་ལ་སུ་ཞིག་མི་སྟེར་ཞེས་སྨྲས་པ་དང་། ཆོས་སྦྱིན་མས་ཅི་འདོད་དམ་ཞེས་སྨྲས་པ་དང་། གཙུག་དགའ་མོས་འཚལ་ལོ་ཞེས་བྱས་པ་དང་། དེ་ལ་ལ་བ་བྱིན་མ་ཐག་ཏུ་བགོས་ནས་བསོད་སྙོམས་ལ་ཞུགས་པ་དང་། བྲམ་ཟེ་དང་ཁྱིམ་བདག་གིས་མཐོང་ནས་
འཕྱ་སྟེ། ཨེ་མའོ་དགེ་སྦྱོང་མ་རྣམས་འདོད་པའི་ཡོན་ཏན་གྱིས་གཟིར་ཏོ། །ཅིའི་ཕྱིར་ན་དགེ་སློང་མ་རྣམས་ཀྱིས་རྒྱལ་པོ་ལ་རིགས་པའི་གོས་བགོས་སོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་ལྕི་

ཞིང་རིན་ཆེ་བའི་གོས་བཅངས་ན་སྤང་བའི་ལྟུང་བའོ། །ལྕི་བ་ཞེས་བྱ་བ་ནི་སྲང་བརྒྱའམ་དེ་ལས་ལྷག་པ་འདས་པའོ། །རིན་ཆེ་ཞེས་བྱ་བ་ནི་ཀཱར་ཥཱ་པ་ཎི་ཉི་ཤུ་འམ་དེ་ལས་འདས་པའོ། །གོས་ཞེས་བྱ་བ་ནི་ཀ་ཤི་ཀའི་ཕྲ་མོ་འམ་སྲིན་བལ་ལས་བྱས་པའོ། །འཆང་ཞེས་བྱ་བ་ནི་བདག་གིར་བྱེད་བའོ། །ཉེས་
པ་ཇི་ལྟ་བུ་ཞེ་ན། དགེ་སློང་མས་གང་ཇི་ཙམ་དུ་ལྕི་ལ་རིན་ཐང་ཆེ་བའི་གོས་བཅངས་ན་སྤང་བའི་ལྟུང་བའོ། །སྤང་བ་སུམ་ཅུ་གཉིས་པ་རྫོགས་སོ།། །།ཡང་ལ་རིན་ཆེ་ཞེས་བྱ་བ་ནི་སྟོན་པ་མཉན་དུ་ཡོད་པ་ན་བཞུགས་སོ། །རྒྱལ་པོ་གསལ་རྒྱལ་གྱིས་རིན་ཆེ་བ་ཞིག་བཙུན་མོ་ཕྲེང་བ་
ཅན་ལ་བྱིན་པ་དང་། དེས་ཀྱང་སྐྱེ་དགུའི་བདག་མོ་ལ་བྱིན་ནས་གོས་ཀྱི་གདང་ལ་བཀལ་ནས་གཞག་པ་དང་གཙུག་དགའ་མོས་མཐོང་ནས། འཕགས་མ་ཡང་ལ་བཟང་བ་འདི་སུའི་ལགས་ཞེས་སྨྲས་པ་དང་། ཅི་འདོད་དམ་འཚལ་ལོ་ཞེས་བྱས་པ་དང་དེ་ལ་བྱིན་ནོ། །དེས་ཡང་བ་དེ་བགོས་ཏེ་བསོད་
སྙོམས་ལ་ཞུགས་པ་དང་། བྲམ་ཟེ་དག་འཕྱ་བ་ནས་བསླབ་པའི་ཚིག་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་གོས་ཡང་ལ་རིན་ཆེ་བ་འཆང་ན་སྤང་བའི་ལྟུང་བའོ། །ཡང་ཞེས་བྱ་བ་ནི་སྲང་ལྔའམ་དེ་ལས་ཆུང་བའོ། །རིན་ཆེ་ཞེས་བྱ་བ་ནི་ཀཱར་ཥཱ་པ་ཎི་ཉི་ཤུ་འམ་དེ་ལས་
ལྷག་པའོ། །གོས་ཞེས་བྱ་བ་ནི་ཀ་ཤི་ཀའི་ཕྲ་མོ་འམ། སྲིན་བལ་ལས་བྱས་པའོ། །འཆང་ཞེས་པ་ནི་བདག་གིར་བྱེད་པའོ། །དེ་ལ་ཉེས་པ་ཇི་ལྟ་བུ་ཞེ་ན། དགེ་སློང་མས་ཇི་ཙམ་དུ་ཡང་ལ་རིན་ཆེ་བའི་གོས་བཅངས་ན་ཐམས་ཅད་སྤང་བའི་ལྟུང་བའོ། །སྤང་བ་སུམ་ཅུ་གསུམ་པ་
རྫོགས་སོ།། །།དགེ་སློང་མ་དང་འབྲེལ་པར་གཉིས། །དྲུག་པོ་དག་དང་ལུག་བལ་དང་། །ལྷུང་བཟེད་རིང་ན་ཞག་བཅུ་དང་། །མ་ཚང་དབྱར་གྱི་རས་ཆེན་དང་། །དེ་དག་འདིར་ནི་བྱ་མ་ཡིན། །ལྷག་མ་རྣམས་ནི་བྱ་བའོ། །དགེ་སློང་དག་གིས་མཚུངས་བཟུང་བ། །དེ་དག་རྣམས་
ཀྱི་ལྷག་མ་ནི། །སུམ་ཅུ་ལས་ནི་རྩ་གསུམ་མོ། །དགེ་སློང་མའི་ཡིད་བསྒྲགས་པ་ཡིན་ནོ། །བདག་གིས་དགེ་སློང་མའི་སྤང་བའི་ལྟུང་བ་སུམ་ཅུ་རྩ་གསུམ་པའི་ཆོས་རྣམས་བཤད་ཟིན་ཏེ། བདག་གིས་དགེ་སློང་མ་རྣམས་ལ་ཅི་ནས་དེ་ལ་ཡོངས་སུ་དག་གམ་ཞེས་ལན་གཉིས་ལན་གསུམ་

དྲིས་ཏེ། འཕགས་མ་རྣམས་ཡོངས་སུ་དག་པས་ན་ཅང་མི་སྨྲ་སྟེ་དེ་དེ་བཞིན་དུ་འཛིན་ཏོ། །དགེ་སློང་མ་རྣམས་འདི་ནི་ལྟུང་བ་བརྒྱ་བརྒྱད་ཅུའི་ཆོས་རྣམས་ཏེ། ཟླ་བ་ཕྱེད་བྱེད་ཅིང་སོ་སོར་ཐར་པའི་མདོ་ལས་འབྱུང་ངོ་། །མདོར་ན། དགེ་སློང་བརྫུན་སྐྱོན་ཕྲ་མ་བྱེད་པ་དང་། །
སྐྱོ་སྔོགས་བྱེད་དང་འཆང་པ་དང་། །ཀློག་དང་གནས་ངན་ལེན་དང་ཆོས། །མཛའ་དང་ཁྱད་དུ་གསོད་པའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དེའི་ཚེ་ན་ཚེ་དང་ལྡན་པ་སྒྲ་གཅན་འཛིན་ཡང་རྒྱལ་པོའི་ཁབ་ཀྱི་ཆུ་དྲོན་གྱི་ཀུན་དགའ་ར་བ་ན་གནས་སོ། །དེའི་ཚེ་ན་
དད་པའི་བྲམ་ཟེ་དང་ཁྱིམ་བདག་དེར་ལྷགས་ནས་སྒྲ་གཅན་འཛིན་སྟོན་པ་ག་ལ་བཞུགས་ཞེས་དྲིས་སོ། །གལ་ཏེ་སྟོན་པ་འོད་མའི་ཚལ་ན་བཞུགས་ན་ནི་དེ་བྱ་རྒོད་ཀྱི་ཕུང་པོ་ནའོ་ཞེས་ཟེར་ཏེ། སྟོན་པ་བྱ་རྒོད་ཕུང་པོ་ན་བཞུགས་ན་ནི་འོད་མའི་ཚལ་ནའོ་ཞེས་ཟེར་ལ་གཞན་ནས་གཞན་དུ་སྟོན་པས་
དེ་དག་གིས་བཙལ་ཀྱང་མ་རྙེད་ནས་ལུས་ངལ་ཆད་དེ། སྒྲ་གཅན་འཛིན་ག་ལ་བ་དེར་སོང་ནས་སྒྲ་གཅན་འཛིན་གྱིས་ཁྱེད་ཅག་གིས་སྟོན་པ་མཐོང་ངམ་བཙུན་པ་མ་མཐོང་ངོ་། །སྒྲ་གཅན་འཛིན་གྱིས་བགད་པ་དང་དེ་དག་སྨོད་ཅིང་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་རྣམ་
གྲངས་དུ་མས་སྨད་དེ། ཚིགས་སུ་བཅད་པ་འདི་དག་གསུངས་སོ། །ཆོས་གཅིག་ལས་ནི་འདས་པ་ཡིས། །བརྫུན་དུ་སྨྲ་བའི་ལུས་ཅན་ནི། །འཇིག་རྟེན་ཕ་རོལ་སྤང་བ་སྟེ། །སྡིག་པ་མི་བྱེད་མེད་པའོ། །ཚུལ་ཁྲིམས་ངན་པ་སྡོམ་མེད་པ། །གྲོང་གི་བསོད་སྙོམས་ཟ་བ་པས། །མེ་
ལྕེ་ཚ་བ་འབར་འདྲ་བའི། །ལྕགས་ཀྱི་ཐུ་ལུམ་ཟ་བ་སླ། །ཞེས་སྨད་དེ་བསླབ་པའི་གནས་བཅས་སོ། །ཤེས་བཞིན་དུ་བརྫུན་དུ་སྨྲ་ན་ལྟུང་བའོ། །ཤེས་བཞིན་ཞེས་བྱ་བ་ནི་བཏགས་པའོ། །བརྫུན་སྨྲ་ན་ཞེས་བྱ་བ་ནི་བརྫུན་ལ་རྣམ་པ་དགུ་ཡང་ཡོད། རྣམ་པ་བརྒྱད་ཀྱང་ཡོད། །རྣམ་པ་
བདུན་ཡང་ཡོད། རྣམ་པ་དྲུག་ཀྱང་ཡོད། རྣམ་པ་ལྔ་ཡང་ཡོད། རྣམ་པ་བཞི་ཡང་ཡོད། རྣམ་པ་གསུམ་ཡང་ཡོད། རྣམ་པ་གཉིས་ཀྱང་ཡོད་དོ། །དེ་ལ་བརྫུན་རྣམ་པ་དགུ་ནི་རྩ་བ་མེད་པར་ཕས་ཕམ་པ་དང་། ལྷག་མ་དང་། ལྟུང་བ་དང་། སོ་སོར་བཤགས་པ་དང་། ཉེས་བྱས་དང་

ཚུལ་ཁྲིམས་དང་། ལྟ་བ་དང་། སྤྱོད་པ་དང་། འཚོ་བ་ལོག་པར་ཞུགས་པའོ། །བརྒྱད་ནི་གོང་མ་ལྔའི་སྟེང་དུ་རྩ་བ་མེད་པར་མཐོང་བ་དང་ཐོས་པ་དང་དོགས་པའོ། །བདུན་ནི་གོང་མ་བཞིའི་སྟེང་དུ་རྩ་བ་མེད་པར་མཐོང་བ་དང་ཐོས་པ་དང་དོགས་པའོ། །དྲུག་ནི་དགེ་སློང་གིས་བརྫུན་དུ་སྨྲ་བར་
འདོད་དེ། འདི་སྙམ་དུ་སེམས་ཏེ་བརྫུན་དུ་སྨྲའོ་སྙམ་དུ་སེམས་པ་དང་། བརྫུན་དུ་སྨྲ་བའི་ཚེ་འདི་སྙམ་དུ་སེམས་ཏེ་བརྫུན་ཟེར་རོ་སྙམ་པ་དང་། སྨྲས་ན་ཡང་འདི་སྙམ་དུ་སེམས་ཏེ་བདག་གིས་བརྫུན་དུ་སྨྲས་སོ་སྙམ་པ་དང་རྩ་བ་མེད་པར་མཐོང་ཐོས་དོགས་པ་གསུམ་དང་དྲུག་གོ། །ལྔ་ནི་དང་པོར་
སྨོས་པ་ལྔའོ། །བཞི་ནི་དང་པོ་བཞི་ལ་བྱའོ། །གསུམ་ནི་གོང་དུ་དྲུག་སྨོས་པའི་གསུམ་པ་གཉིས་ལས་གང་ཡང་རུང་བའོ། །གཉིས་ནི་བརྫུན་དུ་སྨྲ་བའི་ཚེ་འདི་སྙམ་དུ་སེམས་ཏེ་བརྫུན་དུ་ཟེར་རོ་སྙམ་པ་དང་། བརྫུན་དུ་སྨྲས་ནས་ཡང་འདི་སྙམ་དུ་སེམས་ཏེ་བདག་གིས་བརྫུན་དུ་སྨྲས་སོ་
སྙམ་པའོ། བརྫུན་དུ་སྨྲས་པ་གཅིག་པོ་ནི་མེད་དོ། །གཞན་ཡང་བརྫུན་རྣམ་པ་ལྔ་ཡོད་དེ་ཕམ་པའི་བརྫུན་ནི་བརྡ་ཕྲད་པར་ཟད་དོ། །ལྷག་མའི་བརྫུན་ནི་རྩ་བ་མེད་པར་ཕམ་པར་སྐུར་བའོ། །སྦོམ་པོའི་བརྫུན་ནི་དགེ་སློང་མ་དེས་དགེ་འདུན་གྱི་དབུས་སུ་ཆོས་ལ་ཆོས་མ་ཡིན་པ་དང་ཆོས་མ་ཡིན་
པ་ལ་ཆོས་སུ་སྒྲོགས་པའོ། །ཉེས་བྱས་ཀྱི་བརྫུན་ནི་སོ་སོར་ཐར་པར་འདོད་པ་ན་ཡོངས་སུ་དག་པར་གནས་སམ་ཞེས་དྲིས་པ་ན་མ་དག་བཞིན་དུ་མི་སྨྲ་བར་འདུག་པའོ། །འདི་བཞི་མ་གཏོགས་པར་གཞན་བརྫུན་དུ་སྨྲས་པ་ཐམས་ཅད་ལྟུང་བར་འགྱུར་རོ། །ལྟུང་བ་ཞེས་བྱ་བ་ནི་ངན་སོང་ངན་འགྲོ་
བྱོལ་སོང་ཡི་དགས་སེམས་ཅན་དམྱལ་བར་ལྟུང་ཞིང་སྲེག་པ་འཚེད་པར་བྱེད་པའོ། །ཉེས་པ་འདི་མ་བཤགས་སམ་སོ་སོར་མ་བཤགས་ན་དགེ་བའི་ཆོས་ལ་སྒྲིབ་པར་བྱེད་པས་ན་ལྟུང་བ་ཞེས་གསུངས་སོ། །དེ་ལ་ཉེས་པ་གང་ཞེ་ན། མདོར་ན། བརྗེད་དང་ཐེ་ཚོམ་ཟ་བ་དང་། །འདུ་ཤེས་
པ་ནི་ཐ་མའོ། །དེས་མ་མཐོང་མ་ཐོས་མ་ཤེས་རྣམ་པར་མ་ཤེས་བཞིན་དུ་མཐོང་ཐོས་ཤེས་རྣམ་པར་ཤེས་ཟེར་ན་ཚིག་རེ་ལ་ལྟུང་བ་རེ་རེར་འགྱུར་རོ། །དེས་མཐོང་བར་གྱུར་པ་ལས་བརྗེད་དེ་འདུ་ཤེས་སྦས་ནས་ངས་མཐོང་སྟེ་དེ་ཡང་མ་བརྗེད་དོ། །ངས་ཐོས་ངས་ཤེས་ཞེ་འམ་རྣམ་པར་ཤེས་ཞེས་

ཟེར་ན་ཚིག་རེ་རེ་ལ་ལྟུང་བ་རེ་རེར་འགྱུར་རོ། །དེས་མཐོང་བར་གྱུར་ལ་དེ་ཡང་ཐེ་ཚོམ་དུ་གྱུར་ཏེ། དེས་ཐོས་ཤིང་རྣམ་པར་ཤེས་པ་ལས་ཐེ་ཚོམ་དུ་གྱུར་ནས། ངས་མཐོང་རྣམ་པར་ཤེས་པ་ལ་ཐེ་ཚོམ་དུ་གྱུར་ནས་མེད་དོ་ཞེས་ཟེར་ན་ཚིག་རེ་རེ་ལ་ལྟུང་བ་རེ་རེར་འགྱུར་
རོ། །མཐོང་ཡང་མ་མཐོང་བའི་འདུ་ཤེས་སུ་གྱུར། རྣམ་པར་ཤེས་ཀྱང་མི་ཤེས་པའི་འདུ་ཤེས་སུ་གྱུར་ཞེས་པའི་བར་དུ་འདུ་ཤེས་སྦས་ནས། མཐོང་ངོ་རྣམ་པར་ཤེས་སོ་ཞེས་ཟེར་ན་ཚིག་རེ་རེ་ལ་ལྟུང་བ་རེ་རེར་འགྱུར་རོ། །དེ་བཞིན་དུ་རྣམ་པ་འདི་བཞི་ནང་བསྣོར་ཏེ། མཐོང་ལ་ཤེས་ཞེས་
ཟེར་བ་དང་། མཐོང་ལ་བརྗེད་ནས་ཤེས་པ་ནི་མ་བརྗེད་ན་ངས་མཐོང་བ་ནི་མ་བརྗེད་ཀྱིས་ཤེས་པ་ནི་བརྗེད་དོ་ཞེས་ཟེར་ན་ཚིག་རེ་རེ་ལ་ལྟུང་བ་རེ་རེར་འགྱུར་རོ། །དེ་བཞིན་དུ་ཐེ་ཚོམ་དུ་འདུ་ཤེས་ཀྱང་ནང་བསྣོར་ཏེ་བཤད་པར་བྱའོ། །ལྟུང་བ་དང་པོ་རྫོགས་སོ།། །།སངས་རྒྱས་བཅོམ་ལྡན་
འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་བཅུ་གཉིས་སྡེ་དག་དགེ་སློང་མ་རྣམས་ལ་མིའི་སྐྱོན་ནས་སྨྲས་ཏེ། འཕགས་མ་འདི་ནི་ཞར་མའོ་ཞེས་པ་དང་། སྒུར་མོ་དང་། ལྐོག་བློ་དང་། ཐེང་མོ་ཞེས་བོས་པས་དགེ་སློང་མ་རྣམས་བག་འཆུམས་པ་དང་སྤ་གོང་བར་གྱུར་ཏེ།
ལུང་འབོགས་པ་དང་ཁ་ཏོན་ཡིད་ལ་བྱེད་པ་བཏང་ནས། མི་དགའ་བར་གྱུར་ནས་དོན་ཉུང་བའི་དགེ་སློང་མ་དག་འཕྱ་སྟེ། དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །མིའི་སྐྱོན་ནས་སྨྲས་ན་ལྟུང་བའོ། །མིའི་སྐྱོན་ནས་སྨྲས་ཞེས་པ་བརྒྱད་དེ། རིགས་དང་། བཟོ་དང་།
ལས་དང་། མཚན་མ་དང་། ནད་དང་། ལྟུང་བ་དང་། ཉོན་མོངས་པའོ། །དེ་ལ་རིགས་ཀྱི་སྐྱོན་ནི་རྒྱལ་རིགས་དང་། བྲམ་ཟེའི་རིགས་དང་། རྗེའུ་རིགས་དང་། བྲན་རིགས་ལས་རབ་ཏུ་བྱུང་ན་དགེ་སྦྱོང་ག་ལ་ཡོད། ཚངས་པ་ག་ལ་ཡོད་ཅེས་སྨྲས་ན་དེ་དག་སྤ་གོང་ཡང་རུང་མ་
གོང་ཡང་རུང་སྟེ། གོང་མ་གཉིས་ལ་ཉེས་བྱས། འོག་མ་གསུམ་ལ་ལྟུང་བའོ། །དགེ་སློང་མས་མིའི་སྐྱོན་ནས་སྨྲ་བར་བསམས་ཏེ། བྲམ་ཟེ་ལས་རབ་ཏུ་བྱུང་བ་ནས་བྲན་ལས་རབ་ཏུ་བྱུང་ན་ཞེས་པའི་བར་དུ་ཁྱེད་ལ་དགེ་སློང་དང་ཚངས་པ་ག་ལ་ཡོད་རང་གི་བཟོ་སློབས་ཤིག །འདི་ལྟ་

སྟེ། བྲམ་ཟེའི་སྤྱོད་ལམ་དང་། གཙང་སྦྲ་དང་། ཆོ་ག་དང་། ཨོཾ་ཞེས་བྱ་བ་དང་། བྷོ་ཞེས་བྱ་བ་དང་། སྦྱིན་པ་དང་། སློངས་ཤིག་ཅེས་སྨྲས་པ་དང་། རྒྱལ་རིགས་ལས་རབ་ཏུ་བྱུང་བ་རང་གི་བཟོ་སློབས་ཤིག །འདི་ལྟ་སྟེ། གླང་པོ་ཆེའི་གཉའ་བར་ཞོན་པ་དང་། ཤིང་རྟ་ལ་ཞོན་པ་
དང་། འཕོང་བྱ་བ་དང་། རྒྱལ་ཆོས་དང་། རྒྱལ་པོའི་བྱ་བ་རྣམས་སློབས་ཤིག་ཅེས་སྨྲས་པ་དང་། ཁྱེད་རྗེའུའི་རིགས་ལས་རབ་ཏུ་བྱུང་བས་ན། རང་གི་བཟོ་ཞིང་རྨོ་བ་དང་། ཕྱུགས་བཙའ་བ་དང་། ཚོང་བྱ་བ་སློབས་ཤིག་སྨྲས་པ་དང་། དམངས་རིགས་ལས་རབ་ཏུ་བྱུང་བས་ན་
རང་གི་བཟོ་ཟོར་བ་གདབ་པ་དང་། ཁུར་ཤིང་ཐོགས་པ་ལ་སོགས་པ་སློབས་ཤིག །བྲན་རིགས་ལས་རབ་ཏུ་བྱུང་བས་རང་གི་བཟོ་ལུས་ཕྱི་བ་དང་། མཉེ་བ་དང་། བང་ཙེན་དུ་འགྲོ་བ་དང་། གཞན་ཡང་བྲན་གྱི་བཟོ་ལས་སློབས་ཤིག་ཅེས་དེ་སྐད་སྨྲས་ན། སྤ་གོང་ཡང་རུང་
མ་གོང་ཡང་རུང་སྟེ། གོང་མ་གཉིས་ལ་ཉེས་བྱས། འོག་མ་གསུམ་ནི་ལྟུང་བའོ། །ལས་ཀྱི་སྐྱོན་ཡང་ཚིག་གོང་མ་བཞིན་དུ་སྨོས་པ་ལ་ཁྱད་པར་ནི་ལས་ཞེས་སྨོས་ཏེ། ལྟུང་བ་དང་ཉེས་བྱས་ཀྱང་གོང་མ་དང་འདྲའོ། །བཟོ་དང་ལས་ཀྱི་སྐབས་སུ་སྐུད་རིས་དང་། མགར་
བ་དང་། རྫ་མཁན་དང་། འདྲེག་མཁན་ལ་སོགས་པ་ལས་དང་བཟོ་སྣ་ཚོགས་ཀྱང་བརྗོད་པར་བྱའོ། །དགེ་སློང་མས་མིའི་སྐྱོན་ནས་སྨྲ་བར་བསམས་ཏེ་ཚེ་དང་ལྡན་པ་ཁྱོད་ཐེང་པོ་ལས་རབ་ཏུ་བྱུང་ན། དགེ་སྦྱོང་ག་ལ་ཡོད་ཚངས་པ་ག་ལ་ཡོད་ཅེས་སྨྲས་ན་དགེ་སློང་མ་སྤ་གོང་ཡང་
རུང་མ་གོང་ཡང་རུང་སྟེ་ལྟུང་བར་འགྱུར་རོ། །དེ་བཞིན་དུ་ཞར་བ་དང་། སྒུར་པོ་དང་། འཕྱེ་བོ་དང་། གྲུམ་པོ་ལ་སོགས་པ་སྟེ། དེའི་མཚན་མའི་སྐྱོན་དང་སྦྱར་རོ། །གོང་མ་བཞིན་དུ་བརྗོད་ལ་མཛེ་ཅན་དང་། འབྲུམ་བུ་དང་། གཡན་པ་དང་། ཤ་བཀྲ་དང་། རྔོ་དང་རིམས་ལ་
སོགས་པ་སྟེ། སྤ་གོང་ཡང་རུང་མ་གོང་ཡང་རུང་བའི་བར་དུའོ། །དེ་དག་ནི་ནད་ཀྱི་སྐྱོན་དང་སྦྱར་རོ། །དེ་ལ་ལྟུང་བ་ཞེས་པ་ནི་ཚེ་དང་ལྡན་པ་ཁྱོད་ལ་ལྟུང་བ་སྡེ་ལྔ་བྱུང་ཞེས་ཟེར་བའོ། །ཁྱོད་ནི་ཁྲོ་བ་དང་། ཁོན་དུ་འཛིན་པ་དང་། གཡོ་དང་སྒྱུ་དང་ངོ་ཚ་དང་ཁྲེལ་མེད་པ་དེ་ལྟ་བུ་ལས་

རབ་ཏུ་བྱུང་བས་དགེ་སྦྱོང་དང་ཚངས་པ་ག་ལ་ཡོད་ཅེས་སྨྲས་ན་ལྟུང་བར་འགྱུར་ཏེ་འདི་ནི་ཉོན་མོངས་པ་དང་སྦྱར་རོ། །སངས་རྒྱས་མཚོ་ཞེས་བྱ་བ་བྲམ་ཟེ་ལས་རབ་ཏུ་བྱུང་ངོ་ཞེས་བྱ་བ་ལ་སོགས་པ་ནི་ཉེས་པ་མེད་དོ། །ལས་དང་པོ་པ་དང་། སྨྱོས་པ་དང་། སེམས་
འཁྲུགས་པ་དང་། ནད་ཀྱིས་གཟིར་བ་ལ་ཉེས་པ་མེད་དོ། །ལྟུང་བ་གཉིས་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་བཅུ་གཉིས་སྡེ་རྣམས་ཕྲ་མ་ལ་ཞུགས་པས་དགེ་སློང་མ་དག་བག་འཆུམས་པ་དང་སྤ་གོང་ཞིང་འཛེམ་
པར་གྱུར་པས་ལུང་འབོགས་པ་དང་ཁ་ཏོན་དང་རྣལ་འབྱོར་དང་ཡིད་ལ་བྱ་བ་བཏང་སྟེ། དེ་ཡུན་རིང་པོ་ནས་མཛའ་ཞིང་སྡུག་པ་ཆོས་བཞིན་དུ་འཁོད་པ་ཡང་བྱེ་བར་གྱུར་ནས། དོན་ཉུང་ངུ་མ་རྣམས་འཕྱ་ཞིང་མི་སྙན་པར་འཛེར་ཏོ། །དེ་ལྟ་བུར་གྱུར་པ་བཅོམ་ལྡན་འདས་ལ་གསོལ་ནས་རྣམ་གྲངས་
དུ་མས་སྨད་དོ། །དགེ་སློང་མ་དག་སྔོན་བྱུང་བ་ནགས་ཚང་ཚིང་ཞིག་ན་སེང་གེ་མོ་སྦྲུམ་མ་ཞིག་འདུག་སྟེ་ཆོས་ཉིད་ཀྱིས་སེང་གེ་བུ་བྱུང་ཀར་ཤའི་ཚོགས་བྱེད་དོ། །སེང་གེ་མོ་དེ་ཕྱུགས་མང་པོའི་ཕྱི་བཞིན་འབྲངས་ནས། བ་ཞིག་བེའུ་བྱུང་ནས་བེའུ་སྐྱོང་བའི་ཕྱིར་ཁྱུ་ལས་ཡན་ཏེ་ཕྱིར་ལུས་པ་དང་སེང་གེ་མོ་
དེས་བ་བསད་དེ་རང་གི་གནས་སུ་ཁྱེར་བ་དང་། བེའུ་དེ་ཡང་མའི་ཞོ་འདོད་པས་མའི་ཕྱི་བཞིན་དུ་སོང་ངོ་། །སེང་གེ་མོས་བསམས་པ་བེའུ་འདི་ཡང་བསད་དོ་སྙམ་པ་ལས་གལ་ཏེ་བདག་གི་བུ་བྱུང་ན་དེའི་གྲོགས་སུ་རུང་སྙམ་ནས་དེ་མ་བསད་དེ། དེའི་བུ་བྱུང་ནས་རང་གི་བུ་དང་བེའུ་གཉིས་ཀ་
ཞོས་གསོས་ཏེ་སྐྱེས་པ་དང་། སེང་གེ་མོ་ནད་ཀྱིས་བཏབ་སྟེ་འཆི་ཀར་སྨྲས་པ། བུ་ཁྱོད་གཉིས་ངའི་ནུ་མ་འཐུངས་པའི་སྤུན་ཡིན་གྱིས། འཇིག་རྟེན་འདི་ཕྲ་མ་ཅན་གྱིས་གང་བས་ན། ང་ཤི་བའི་འོག་ཏུ་སུ་ཅི་ཟེར་ཡང་ཁྱེད་གཉིས་མ་ཉན་ཅིག་ཅེས་བྱས་ནས་དུས་ལས་འདས་སོ། །སེང་གེ་དེ་
དང་ཁྱུ་མཆོག་གཉིས་ཤ་ཚོན་པོ་དང་རྩི་མཆོག་ལ་ཟ་བས་ཆེར་གྱུར་ཏོ། །སེང་གེ་དེའི་ཕྱི་བཞིན་དུ་ཝ་རྒན་པོ་གཅིག་སྙོགས་ཤིང་དེའི་ལྷག་རོལ་དག་ཟ་ཞིང་འདུག །ཕྱི་བཞིན་དུ་ཡང་འབྲང་། སེང་གེས་རི་དགས་ཚོན་པོ་བསད་དེ་ཤ་ཟོས་ནས་མྱུར་དུ་རང་གི་གནས་སུ་འོངས་ནས་ཁྱུ་མཆོག་

མཆོག་དང་ལྷན་ཅིག་རྩེ་ཞིང་འདུག་གོ། །ཝ་རྒན་པོ་དེས་བསམས་པ། སེང་གེ་གར་འགྲོ་བ་ལྟའོ་སྙམ་ནས། ཕྱི་བཞིན་དུ་སོང་བ་དང་། ཁྱུ་མཆོག་དང་རྩེ་བ་མཐོང་ནས་འདི་ནི་བདག་གི་ལྟོའི་དགྲ་ཡིན་གྱིས་དེ་གཉིས་ཀྱི་བར་དུ་དབྱེན་བྱའོ་སྙམ་ནས། ཁྱུ་མཆོག་གི་མདུན་དུ་རྣ་བ་
ཕབ་ནས་འདུག་པ་དང་། ཁྱུ་མཆོག་གིས་སྨྲས་པ། ཞང་པོ་རླུང་དྲོ་བ་དང་གདུག་པ་མ་ལངས་སམ་གྲང་། དེས་སྨྲས་པ། ཚ་བོ་རབ་ཏུ་འབར་བའི་རླུང་ལངས་སོ། །སེང་གེ་འདི་ན་རེ་ཁྱུ་མཆོག་ཤ་ཁྲག་དང་ལྡན་པ་འདི་ངས་གུད་ནས་ཤ་མ་རྙེད་ན་འདིའི་ཤ་བཟའོ་ཞེས་ཟེར་རོ། །དེས་
སྨྲས་པ། ཞང་པོ་དེ་སྐད་མ་ཟེར་ཅིག །ངེད་ཅག་གཉིས་ཀྱི་མ་འཆི་བའི་ཁར་བསྒོ་བ་ནི། འཇིག་རྟེན་འདི་ན་ཕྲ་མ་ཅན་གྱིས་གང་བས་ཁྱེད་གཉིས་ང་ཤི་བའི་འོག་ཏུ་སུའི་ངག་ཀྱང་མ་ཉན་ཅིག་ཅེས་བསྒོའོ། །དེས་སྨྲས་པ་ཚ་བོའི་ངག་མ་ཉན་པས་ཁྱེད་མ་རུང་བར་གྱུར་ཏོ། །འོ་ན་ཅི་
མངོན། སེང་གེ་རང་གི་གནས་ནས་བྱུང་ནས་རྐང་ལག་རྒྱོང་ངོ་། །དེའི་འོག་ཏུ་གླལ་ལོ། །གླལ་ནས་ཕྱོགས་བཞིར་བལྟས་ཏེ་སེང་གེའི་སྒྲ་གསུམ་བསྒྲགས་པ་ནས་ཁྱེད་ཀྱི་མདུན་དུ་འོངས་དང་། དེ་ན་བདག་འདིས་བསད་དོ་སྙམ་དུ་རིག་པར་བྱོས་ཤིག །དེ་ནས་སེང་གེའི་གན་དུ་སོང་
བ་དང་རྣ་བ་ཕབ་སྟེ་འདུག་པ་དང་། སེང་གེས་ཞང་པོ་རླུང་དྲོ་བ་གདུག་པ་མ་ལངས་སམ་ཞེས་སྨྲས་པ་དང་། ཚ་བོ་རླུང་རབ་ཏུ་ཚ་བ་ལངས་སོ། །དེ་ཅིའི་ཕྱིར་ཞེ་ན། ཁྱུ་མཆོག་ན་རེ་འདིའི་མས་ངའི་མ་བསད་དེ་རྩའི་སེང་གེ་འདི་ངས་མི་འཆོར་གྱིས་ལྟོ་དྲལ་ཏེ་བསད་དོ་ཞེས་ཟེར་བའི་ཕྱིར་རོ། །དེས་
ཞང་པོ་དེ་སྐད་མ་ཟེར་ཅིག་ཅེས་བྱ་བ་ནས་ཁྱེད་གཉིས་སུའི་ངག་ཀྱང་མ་ཉན་ཅིག་ཅེས་བསྒོའོ་ཞེས་པའི་བར་དུ་སྔ་མ་བཞིན་དུ་སྨྲས་པ་དང་། དེས་སྨྲས་པ། ཚ་བོ་བདག་གིས་བསྒོ་བ་མ་ཉན་པས་ཁྱོད་མ་རུང་བར་འགྱུར་རོ། །འོ་ན་ཅི་མངོན་ཁྱུ་མཆོག་རང་གི་གནས་ནས་ཕྱུང་སྟེ་རྐང་ལག་རྐྱོང་ངོ་། །
དེའི་འོག་ཏུ་འབོད་དོ། །བོས་ནས་ས་འཐོར་རོ། །དེ་ནས་སྒྲ་ཕྱུང་སྟེ་ཁྱོད་ཀྱི་གན་དུ་འོང་བ་དང་། དེ་ནས་བདག་འདིས་བསད་དོ་སྙམ་དུ་རིག་པར་བྱོས་ཤིག །དེ་གཉིས་རྟག་ཏུ་ཡང་དེ་བཞིན་བྱེད་མོད་ཀྱི་ནམ་ཡང་མཚན་མར་མ་བཟུང་ངོ་། །དེ་ནས་དུས་གཞན་ཞིག་ན་རི་དགས་ཀྱི་རྒྱལ་པོ་

སེང་གེ་གནས་ནས་བྱུང་ནས་རྐང་ལག་རྐྱོང་གོང་མ་བཞིན་དུ་གླལ། ཕྱོགས་བཞིར་བལྟས། སྒྲ་ཆེན་པོ་གསུམ་ཕྱུང་ནས་ཁྱུ་མཆོག་གི་གནས་སུ་འོང་ངོ་། །ཁྱུ་མཆོག་ཀྱང་གོང་དུ་སྨོས་པ་བཞིན་དུ་སེང་གེའི་མདུན་དུ་འོངས་པ་དང་། ཁྱུ་མཆོག་ཀྱང་འདིས་ནི་
བདག་བསད་དོ་སྙམ་དུ་བསམས། སེང་གེ་ཡང་འདི་ནི་ཝ་ཟེར་བ་བཞིན་དུ་འོངས་པས་ན་འདིས་ནི་བདག་བསད་དོ་སྙམ་ནས། སེང་གེས་ཁྱུ་མཆོག་གི་ནོག་ཏུ་གཅིག་བསྣུན་པ་དང་། ཁྱུ་མཆོག་གིས་ཀྱང་སེང་གེའི་ལྟོར་གཅིག་བསྣུན་ནས་ལྟོ་དྲལ་ཏེ་གཉིས་ཀ་ཤི་ནས་ལྷས་ཚིགས་སུ་
བཅད་དེ་སྨྲས་པ། སྐྱེ་བོ་མ་རབས་བསྟེན་ན་ནི། །མིག་གིས་བཟང་པོ་མཐོང་མི་འགྱུར། །སེང་གེ་ཁྱུ་མཆོག་མཛའ་བ་ལ། །ཝ་ཡིས་ཐ་དད་ཕྱེ་ལ་ལྟོས། །དགེ་སློང་མ་དག་བྱོལ་སོང་དུ་གྱུར་པ་དེ་གཉིས་ཀྱང་ཕྲ་མ་ཞུགས་པ་ལས་གསོད་པའི་སེམས་བྱུང་ན། མི་ལྟ་སྨོས་ཀྱང་ཅི་
དགོས་ཀྱི་དེ་བས་ན་ཕྲ་མ་མ་བྱེད་ཅིག །དགེ་སློང་མས་དགེ་སློང་མ་ལ་ཕྲ་མ་བྱས་ན་འདས་པ་དང་བཅས་པར་འགྱུར་རོ། །དགེ་སློང་མ་དག་སྔོན་བྱུང་བ་ནགས་ཚང་ཚིང་ཞིག་ན་སེང་གེ་ཕྲུ་གུར་བཅས་པ་དང་། སྟག་ཕྲུ་གུར་བཅས་པ་ཞིག་འདུག་པ་ལས་སེང་གེ་མོ་བཟས་ལ་སོང་བ་དང་།
དེའི་ཕྲུ་གུ་དེ་འཁྱམས་པ་ལས་སྟག་གི་ཚང་དུ་འོངས་སོ། །སྟག་གིས་མཐོང་ནས་བསད་དོ་སྙམ་པ་དང་། ཡང་བསམས་པ་འདི་བདག་གི་བུ་འདིའི་གྲོགས་སུ་རུང་གིས་བསད་པར་མི་བྱའོ་སྙམ་ནས་དེས་དེ་ལ་ནུ་མ་སྣུན་པར་བརྩམས་སོ། །སེང་གེ་མོས་ཀྱང་སྤྱོད་ཡུལ་དུ་བརྒྱུས་ནས་འོངས་པ་དང་།
ཕྲུ་གུ་མི་སྣང་ནས་བཙལ་བ་ན་སྟག་མོས་སྣུན་པར་མཐོང་ངོ་། །མཐོང་ནས་རང་ཉིད་སྐྲག་སྟེ་འབྲོས་པར་བརྩམས་པ་དང་། དེ་ལ་སྟག་མོས་སྨྲས་པ། ནུ་མོ་མ་འབྲོས་ཤིག་དང་ལྷན་ཅིག་ཏུ་འཁོད་པར་བྱ་སྟེ། འདི་ལྟར་ཁོ་མོས་སྤྱོད་ཡུལ་དུ་སོང་བ་ན་ཁྱོད་ཀྱིས་ཁོ་མོའི་ཕྲུ་གུ་ལ་མཁོ་
བ་སྟོབས་ཤིག །གལ་ཏེ་ཁྱོད་ཀྱིས་སྤྱོད་ཡུལ་དུ་འགྲོ་བར་གྱུར་ན། ཁོ་མོས་ཀྱང་ཁྱོད་ཀྱི་ཕྲུ་གུ་ལ་མཁོ་བ་བསྟབ་པར་བྱའོ། །དེས་ཀྱང་དེ་སྐད་ཐོས་ནས་དེ་བཞིན་བརྩམས་པར་ཁས་བླངས་ཏེ་ལྷན་ཅིག་ཏུ་འཁོད་དོ། །དེ་གཉིས་ཀྱིས་སེང་གེའི་ཕྲུ་གུའི་མིང་ནི་མཆེ་བཟངས་ཞེས་བྱ་བ་

དང་། སྟག་གི་ཕྲུ་གུའི་མིང་ནི་དཔུང་བཟངས་ཞེས་བྱ་བར་བཏགས་ནས་བསྐྱེད་བསྲིངས་པས་ཆེར་སོན་པར་གྱུར་ཏོ། །དུས་གཞན་ཞིག་ན་སེང་གེ་མོ་དང་སྟག་མོ་གཉིས་ནད་ཀྱིས་བཏབ་ནས་འཆི་ཁར་བུ་གཉིས་ལ་ཁ་ཆེམས་གོང་མ་བཞིན་སྨྲས་ནས་དུས་བྱས་སོ། །སེང་གེ་དང་སྟག་
གཉིས་ནི་རྟག་ཏུ་ཤ་དང་ཁྲག་དག་ཟོས་ཤིང་འཐུངས་ནས། སེང་གེ་ནི་མྱུར་བ་མྱུར་བས་ཚང་དུ་འཇུག་ཅིང་སྟག་ནི་ཡུན་རིང་པོས་ཕྱི་ནས་འོངས་སོ། །དུས་གཞན་ཞིག་ན་སྟག་གིས་ལྷག་རོལ་སྦས་པ་དེ་ཟོས་ནས་མྱུར་དུ་འོངས་པ་དང་། དེ་ལ་སེང་གེས་སྨྲས་པ། ཁྱོད་སྔོན་ཆད་ཡུན་རིང་
པོས་ཕྱི་ནས་འོངས་ལ། དེང་མྱུར་དུ་འོངས་པ་འདི་ལ་རྒྱུ་ཅི་ཡོད་ཅེས་དྲིས་པ་དང་། སྟག་གིས་སྨྲས་པ། ཁོ་བོས་ལྷག་རོལ་སྦས་པར་གྱུར་པ་དག་ཟོས་ནས་འོངས་སོ། །སེང་གེས་སྨྲས་པ། ཁོ་བོས་ནི་རི་དགས་དམ་པ་དག་བསད་ནས་ཤ་དམ་པ་དག་ཟོས་ཤིང་ཁྲག་དམ་པ་དག་འཐུངས་
ནས་ལྟོས་པ་མེད་པར་འགྲོའོ། །སྟག་གིས་སྨྲས་པ། ཁྱོད་ནི་སྟོབས་དང་ལྡན་པ་ཡིན་གྱི། ཁོ་བོས་ནི་དེ་ལྟར་བྱེད་པར་མི་ནུས་སོ། །སེང་གེས་དེ་ལ་བདག་ཅག་ལྷན་ཅིག་འདོང་ངོ་ཞེས་སྨྲས་ནས་ལྷན་ཅིག་འགྲོ་བར་བརྩམས་སོ། །ཡང་སེང་གེ་དེ་ལ་ཝ་རྒན་པོ་ལྷག་མ་ཟ་བ་ཅིག་ཕྱི་
བཞིན་དུ་འབྲང་བ་དེས་བསམས་པ། སྟག་འདི་ནི་བདག་གི་ལྟོའི་དགྲ་ཡིན་གྱིས། འདི་གཉིས་ཀྱི་བར་དུ་དབྱེན་བྱའོ་སྙམ་ནས། སེང་གེའི་མདུན་དུ་འདུག་པ་དང་དྲིས་ལན་སྔ་མ་བཞིན་ལས། སྟག་འདི་ན་རེ་ཁོ་བོའི་རྩ་བའི་སེང་གེ་དེ་གར་སོང་། དེས་ཁོ་བོ་ལ་ལྷག་མ་ཟར་བཅུག་
གིས་ངས་དེ་ངེས་པར་གསད་པར་བྱའོ་ཞེས་ཟེར་རོ། །སེང་གེས་སྨྲས་པ་ཞང་པོ་དེ་སྐད་མ་ཟེར་ཅིག །ངེད་གཉིས་ལ་མ་གཉིས་ཀྱིས་འཆི་བའི་ཁར་བསྒོ་བ་ཞེས་པ་ནས་བདག་འདིས་གསོད་དོ་སྙམ་དུ་རིག་པར་གྱིས་ཤིག་གི་བར་གོང་དུ་ཁྱུ་མཆོག་ལ་སྨྲས་པའི་སྐབས་བཞིན་སྦྱར་རོ། །
དེའི་འོག་ཏུ་ཡང་སྟག་གི་མདུན་དུ་འདུག་པ་དང་དྲིས་ལན་སྔ་མ་བཞིན་ལས། སེང་གེ་འདི་ན་རེ་ཁོ་བོའི་རྩ་བའི་སྟག་དེ་གར་སོང་དེ་ངེས་པར་གསད་པར་བྱའོ་ཞེས་ཟེར་རོ། །སྟག་གིས་སྨྲས་པ། ཞང་པོ་དེ་སྐད་མ་ཟེར་ཅིག །ངེད་གཉིས་ལ་མ་གཉིས་ཀྱིས་འཆི་བའི་ཁར་བསྒོ་

བ་ཞེས་པ་ནས་བདག་འདིས་གསོད་དོ་སྙམ་དུ་རིག་པར་གྱིས་ཤིག་གི་བར་དུ་ཡང་གོང་མ་བཞིན་སྦྱར་རོ། །དེ་གཉིས་རྟག་ཏུ་དེ་བཞིན་བྱེད་མོད་ཀྱི་ནམ་ཡང་མཚན་མར་མ་བཟུང་ངོ་། །དེ་ནས་དུས་གཞན་ཞིག་ན་རི་དགས་ཀྱི་རྒྱལ་པོ་སེང་གེ་དེས་གནས་ནས་བྱུང་ནས་
རྐང་ལག་རྐྱོང་། དེའི་འོག་ཏུ་གླལ། དེ་ནས་བལྟས། སྒྲ་ཆེན་པོ་ཐང་གསུམ་ཕྱུང་ནས་སྟག་གི་མདུན་དུ་འོངས་སོ། །སྟག་གིས་ཀྱང་དེ་བཞིན་དུ་བྱས་ནས། སེང་གེའི་མདུན་དུ་འོངས་པ་ན། གང་གི་ཚེ་རྒྱུད་ལ་དབྱེན་གྱི་ས་བོན་བཏབ་པ་དེས་མཚན་མར་བཟུང་ནས་སེང་གེས་བསམས་པ།
འདིས་ནི་བདག་གསོད་དོ་སྙམ་པ་དང་། སྟག་གིས་ཀྱང་འདིས་ནི་བདག་གསོད་དོ་སྙམ་དུ་བསམས་སོ། །ཡང་སེང་གེས་བསམས་པ། བདག་ནི་སྟོབས་དང་ལྡན་ལ། སྟག་འདི་ནི་དེ་ལྟ་མ་ཡིན་ན་འདིས་བདག་ལ་རྒོལ་མི་ནུས་ཀྱིས་ཇེ་བརྟག་པར་བྱའོ་སྙམ་ནས་ཚིགས་སུ་བཅད་པས་སྨྲས་པ།
ཆུ་ཞེང་ཕུན་སུམ་ཚོགས་པ་དང་། །རྩལ་དང་ཤུགས་དང་ལྡན་པ་ཡི། །མཆེ་བཟངས་ལ་ནི་རྒོལ་བྱེད་པའི། །དཔུང་བཟངས་དེ་ནི་ལེགས་པ་ཡིན། །སྟག་གིས་ཀྱང་སྨྲས་པ། ཆུ་ཞེང་ཕུན་སུམ་ཚོགས་པ་དང་། །རྩལ་དང་ཤུགས་དང་ལྡན་པ་ཡི། དཔུང་བཟངས་ལ་ནི་རྒོལ་བྱེད་པ། །
མཆེ་བཟངས་དེ་ནི་ལེགས་པ་ཡིན། །སེང་གེས་ཁྱོད་ལ་དེ་སྐད་སུ་ཟེར་ཞེས་སྨྲས་པ་དང་། དེས་སྨྲས་པ་ཝ་འདིའོ། །སྟག་གིས་ཁྱོད་ལ་དེ་སྐད་སུ་ཟེར་ཞེས་སྨྲས་པ་དང་། དེས་སྨྲས་པ་ང་ལ་ཡང་ཝ་འདིས་སོ། །སེང་གེས་བསམས་པ་འདི་ནི་ངེད་ཀྱི་དབྱེན་བྱས་སོ་སྙམ་ནས། དེ་ནས་ཝ་དེ་ལ་ཐལ་མོ་ཅིག་
བསྣུན་ཏེ་བསད་པ་དང་། ལྷས་ཚིགས་སུ་བཅད་པ་སྨྲས་པ། གཞན་གྱི་ཚིག་གིས་མཛའ་བོ་སྤང་མི་བྱ། །གཞན་གྱི་སྨྲས་པ་རྣམས་ལ་བརྟག་པར་བྱ། །འབྱེད་པར་འདོད་པ་རྣམས་ནི་སྐབས་ཚོལ་གྱིས། །དེ་བས་དབྱེན་ཅན་སྐྱེ་བོ་བསྟེན་མི་བྱ། །ཝ་འདི་ཐ་མ་ཐ་ཤལ་ཏེ། །ཝ་ནི་བརྫུན་དུ་
སྨྲ་བ་ཡིན། །མཛའ་བོ་འབྱེད་པ་ཕྲ་མ་ཅན། །བསད་པས་གཉི་ག་བདེ་བར་འགྱུར། །དགེ་སློང་མ་རྣམས་སྲོག་ཆགས་བྱོལ་སོང་གི་སྐྱེ་གནས་སུ་གྱུར་པ་དེ་གཉིས་ཀྱང་ཕྲ་མ་ཞུགས་པས་བསད་པའི་སེམས་སུ་གྱུར་ན་མིར་གྱུར་ནས་མིར་གྱུར་པ་ལྟ་ཅི་སྨོས་ཀྱིས། དེ་ལྟ་བས་ན་དགེ་སློང་མས་དགེ་

སློང་མ་ལ་ཕྲ་མར་སྨྲ་བ་ལ་མ་འཇུག་ཤིག །དགེ་སློང་མས་དགེ་སློང་མ་ལ་ཕྲ་མ་སྨྲས་ན་འདས་པ་དང་བཅས་པར་འགྱུར་རོ། །དེ་ནས་སྟོན་པས་རྣམ་པ་དུ་མས་སྨད་ནས་བསླབ་པའི་གནས་བཅས་སོ། །ཡང་དགེ་སློང་མ་གང་དགེ་སློང་མ་ལ་ཕྲ་མ་བྱེད་ན་ལྟུང་བའོ། །ཕྲ་མ་ཞེས་བྱ་
བ་ནི་ཕྲ་མ་བྱ་བར་བསམས་ཏེ་ཚིག་ཏུ་བརྗོད་པའོ། །གཞན་ནི་གོང་མ་བཞིན་ནོ། །ཉེས་པ་ཇི་ལྟ་ཞེ་ན། མདོར་ན། རིགས་དང་བཟོ་དང་ལས་རྣམས་དང་། །མཚན་མ་དག་དང་ནད་དང་ལྔ། །ལྟུང་བ་ཉེ་བའི་ཉོན་མོངས་དང་། །ངན་དུ་སྨྲ་བ་ཐ་མའོ། །ཐ་ག་སྐུད་རིས་གཟོང་མཁན་
དང་། །ལྕགས་དང་མགར་མཁན་ལྷམ་མཁན་དང་། །རྫ་མཁན་འདྲེག་མཁན་ཤིང་མཁན་དང་། །སྨིག་མ་མཁན་དང་བྲན་རིགས་སོ། །དགེ་སློང་མ་ཕྲ་མ་བྱ་བར་བསམས་ནས་ཚེ་དང་ལྡན་པ་ཁྱོད་བྲམ་ཟེ་ལས་རབ་ཏུ་བྱུང་བས་ན། ཁྱོད་ལ་དགེ་སྦྱོང་དང་ཚངས་པ་ག་ལ་ཡོད་
ཅེས་འཛེར་ཏོ། །དགེ་སློང་མ་གང་ལ་མིང་འདི་ཞེས་བྱ་རུས་འདི་ཞེས་བྱའོ་ཞེས་མིང་ནས་བརྗོད་དེ་དེ་སྐད་དུ་སྨྲ་ན་ཉེས་བྱས་སུ་འགྱུར་རོ། །རྒྱལ་རིགས་ཀྱང་དེ་བཞིན་དུ་བཤད་དོ། །རྗེའུ་རིགས་ལ་སོགས་པ་མིང་ནས་བརྗོད་ན་ལྟུང་བར་འགྱུར་རོ། །ཀུན་ལ་ཡང་དེ་བཞིན་དུ་སྦྱར་རོ། །
མདོར་ན་གོང་དུ་དྲུག་པོ་ལས་གང་ཡང་རུང་སྟེ། ཁྱོད་ལ་ཡོད་དོ་ཞེས་ཁ་ཟེར། གཅིག་ལ་གཅིག་ཕྲ་མ་ཟེར་ཞིང་གང་ཟག་འབྱེད་པའོ། །ལྟུང་བ་གསུམ་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་བཅུ་གཉིས་སྡེ་དག་དགེ་
འདུན་མ་མཐུན་པས་ཆོས་བཞིན་རྩོད་པ་སྤང་བར་ཤེས་བཞིན་དུ་སླར་ཡང་ལས་དེ་སྐྱོ་སྔོགས་བྱེད་དོ། །རྩོད་པ་འདི་ནི་ལེགས་པར་མ་སྤངས་ལ་གདོད་སྤང་བར་བྱའོ། །འདི་ནི་ལེགས་པར་མ་སྦྱངས་ཀྱི། སླར་ཡང་སྦྱང་དགོས་སོ། །འདི་ནི་ལེགས་པར་ཞི་བར་མ་བྱས་ཀྱི་སླར་ཡང་ཞི་བར་བྱ་
དགོས་སོ་ཞེས་དགེ་སློང་མ་རྣམས་ལ་རྩོད་པ་ཡང་ལས་ཀྱི་སྐྱོ་སྔོགས་བྱས་པས་བྱ་བ་དང་བྱེད་པ་མང་བར་གྱུར་པས། ཀླག་པ་དང་རྣལ་འབྱོར་དང་ནང་དུ་སེམས་ཞི་བར་བྱ་བ་གཏང་བས་དེ་ལྟ་བུར་གྱུར་པ་དགེ་སློང་མ་དག་གིས་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་

དགེ་སློང་མ་གང་དགེ་སློང་མའི་དགེ་འདུན་མི་མཐུན་པས་ཆོས་བཞིན་དུ་རྩོད་པ་སྤངས་པར་ཤེས་ལ་ཡང་ལས་ཀྱི་སྐྱོ་སྔོགས་བྱེད་ན་ལྟུང་བའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མའོ། །མཐུན་ཞེས་བྱ་བ་ནི་གཅིག་ཏུ་
མཐུན་པའོ། །ཆོས་བཞིན་ཞེས་བྱ་བ་ནི་ཇི་ལྟར་འདུལ་བ་ཇི་ལྟ་བ་དང་། སྟོན་པའི་བསྟན་པ་ཇི་ལྟ་བའོ། །རྩོད་པ་ཞེས་བྱ་བ་ནི་རྣམ་པ་བཞི་སྟེ། འཁྲུག་པའི་རྩོད་པ་དང་། མི་སྟོན་པའི་རྩོད་པ་དང་། ཉེས་པས་རྩོད་པ་དང་། བྱ་བའི་རྩོད་པའོ། །སྤངས་པར་ཞེས་བྱ་བ་ནི་དགེ་འདུན་གྱི་ནང་དུའོ། །
ཤེས་ལ་ཞེས་བྱ་བ་ནི་རང་གིས་རིག་པར་གྱུར་པ་དང་། གཞན་གྱིས་བསྒོ་བའོ། །ཡང་ལས་ཀྱི་སྐྱོ་སྔོགས་བྱེད་ཅེས་བྱ་བ་ནི་སླར་ཡང་བྱེད་པར་འདོད་པའོ། དེ་ལ་ཉེས་པ་ཇི་ལྟ་བུ་ཞེ་ན་དགེ་སློང་མས་འཁྲུག་པའི་རྩོད་པ་ལ་འཁྲུག་པའི་རྩོད་པར་འདུ་ཤེས་ཤིང་སྤངས་པ་ལ་སྤངས་པར་འདུ་ཤེས་པ་དང་།
སྤངས་པ་ལ་ཐེ་ཚོམ་དུ་གྱུར་པ་ཞིག་གིས་ཡང་ལས་ཀྱི་སྐྱོ་སྔོགས་བྱེད་ན་ལྟུང་བར་འགྱུར་རོ། །མ་སྤངས་པ་ལ་སྤངས་པར་འདུ་ཤེས་པ་དང་། མ་སྤངས་པ་ལ་ཐེ་ཚོམ་སྟེ་ཡང་ལས་ཀྱི་སྐྱོ་སྔོགས་བྱེད་ན་ཉེས་བྱས་སོ། །དགེ་སློང་མས་འཁྲུག་པའི་རྩོད་པ་ལ་མི་སྟོན་པར་འདུ་ཤེས་ཤིང་།
སྤངས་པ་ལ་སྤངས་པར་འདུ་ཤེས་པ་དང་སྤང་བ་ལ་ཐེ་ཚོམ་སྟེ། ཡང་ལས་ཀྱི་སྐྱོ་སྔོགས་བྱེད་ན་ལྟུང་བར་འགྱུར་རོ། །མ་སྤངས་པ་ལ་སྤངས་པར་འདུ་ཤེས་པ་དང་། དེ་བཞིན་དུ། ཡང་ལས་ཀྱི་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །དེ་བཞིན་དུ་འཁྲུག་པའི་རྩོད་པ་ལ་མི་སྟོན་པའི་རྩོད་
པར་འདུ་ཤེས་ཀྱང་རུང་། ཉེས་པའི་རྩོད་པ་དང་། བྱ་བའི་རྩོད་པར་འདུ་ཤེས་ཀྱང་རུང་། ལྟུང་བ་གཉིས་དང་ཉེས་བྱས་གཉིས་སོ། །དེ་བཞིན་དུ་མི་སྟོན་པའི་རྩོད་པ་ལ་མི་སྟོན་པའི་རྩོད་པར་འདུ་ཤེས་པ་དང་། མི་སྟོན་པའི་རྩོད་པ་ལ་འཁྲུག་པ་དང་། ཉེས་པ་དང་། བྱ་བའི་རྩོད་པར་
འདུ་ཤེས་པའང་གོང་མ་བཞིན་དུ་བཤད་དོ། །དེ་བཞིན་དུ་ཉེས་པའི་རྩོད་པ་དང་བྱ་བའི་རྩོད་པ་གཉིས་ལ་གཅིག་ཅིང་ཡང་བཞི་བཞི་སྟེ། ལྟུང་བ་དང་ཉེས་བྱས་བཞིན་དུ་སྦྱར་རོ། གང་ཟག་ལྔ་སྟེ། ཡུན་དུ་གནས་པ་དང་། ལས་བྱེད་པ་དང་། དད་པས་འབུལ་བ་དང་། ཇི་ལྟ་བུར་ལྟ་

བ་དང་། གློ་བུར་དུ་ལྷགས་པའི་གང་ཟག་གོ། །ཡུན་དུ་གནས་པ་ནི་རྩོད་པ་དེའི་ཐོག་མ་དང་བར་མ་དང་། ཐ་མ་ཤེས་པའོ། །ལས་བྱེད་པ་ནི་གང་དེའི་ལས་བྱེད་པའོ། །དད་པ་འབུལ་བའི་གང་ཟག་ནི་གང་གིས་རྩོད་པ་དེ་ལ་དད་པ་ཕུལ་བའོ། །ཇི་ལྟར་མཐོང་བའི་གང་ཟག་ནི་རྩོད་པ་གང་ལ་རང་
གིས་ཇི་ལྟར་ལྟ་བ་ལ་སོགས་པར་འདོད་པ་ལ་བཟོད་པ་ལྟ་བུར་སྨྲས་ཏེ། བདག་གིས་ནི་འདི་ལྟར་འདོད་ཅིང་བཟོད་དོ། །འདི་ལྟ་བུར་བལྟ་ཞིང་བྱ་བ་ནི་བདག་གི་འདོད་ཅིང་མི་བཟོད་དོ་ཞེས་ཟེར་བའོ། །གློ་བུར་དུ་འོངས་པའི་གང་ཟག་ནི་རྩོད་པ་དེའི་ཐོག་མ་དང་བར་མི་ཤེས་སོ། །དེ་ལྟར་ན་
གང་ཟག་སྔ་མ་གསུམ་ལ་ནི་ལྟུང་བར་འགྱུར། ཐ་མ་གཉིས་ལ་ནི་རྩོད་པ་སྤང་བ་ལས་སྐྱོ་སྔོགས་བྱེད་ན་ཉེས་བྱས་སོ། །ལྟུང་བ་བཞི་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་མ་སྦོམ་དགའ་མོ་ཡན་ལག་གི་
ནོར་བུ་ཞེས་བྱ་བ་ལ་སོགས་པའི་མཚན་བལྟ་བ་ལ་མཁས་པས་ཁྱིམ་བདག་དང་བྲམ་ཟེའི་ཁྱེའུ་དང་བུ་མོ་ལ་མཚན་བལྟ་ཞིང་། ཁྱེའུ་དང་བུ་མོ་འདི་དང་འདི་ཞེས་བྱ་བ་ནི་སྐྱིད་ཅིང་ལོངས་སྤྱོད་ཆེན་པོ་ལ་སོགས་པའི་དབང་དང་ལྡན། འདི་དང་འདི་ཞེས་བྱ་བ་ནི་དབང་ཐང་མེད་དོ་ཞེས་ལུང་སྟོན་ཅིང་
ཁ་ཀྱལ་པ་དག་ཟེར་གཅིག་པུ་གྲོགས་མེད་པར་ཁྱིམ་བདག་དང་བྲམ་ཟེ་དག་ལ་ཆོས་འཆད་པ་དང་། ཁྱིམ་བདག་དང་བྲམ་ཟེ་དག་དགེ་སྦྱོང་གཽ་ཏ་མའི་ཉན་ཐོས་མ་འདི་དག་ནི་གཅིག་པུ་གྲོགས་མེད་པར་ཁྱིམ་བདག་དང་བྲམ་ཟེ་དག་ལ་ཆོས་འཆད། ཁྱེའུ་དང་བུ་མོ་ལ་སོགས་པའི་མཚན་
བལྟ་ཞིང་ལུང་སྟོན། ཁ་ཀྱལ་པ་དག་ཀྱང་སྨྲའོ་ཞེས་མི་སྙན་པར་འཛེར་ཞིང་འཕྱ་སྨོད། དེ་ལྟར་གྱུར་པ་ཐོས་ནས། དགེ་སློང་མ་རྣམས་ཀྱིས་དགེ་སློང་ལ་སྨྲས་ནས། དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་སྦོམ་དགའ་མོ་ལ་
བཀའ་སྩལ་ནས་ལེགས་པ་བཅུ་གཅིག་གཟིགས་ཏེ། ངའི་ཉན་ཐོས་མ་རྣམས་ལ་འདུལ་བ་ལས་བསླབ་པའི་གནས་བཅའོ་ཞེས་