Luận tạng Tây Tạng (Tengyur) — Tập 156

ས་མ་བསྒོ་བར་སོང་ན་འདོམ་བཞི་བཅུ་རྩ་དགུ་ཚུན་ཆད་ནི་ཉེས་བྱས། དེ་ལས་རིང་དུ་སོང་ན་ལྟུང་བའོ། །བར་ཆད་བརྒྱད་བྱུང་ན་ཉེས་མེད་དོ། །ལྟུང་བ་དགུ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས་
ཁྱིམ་བདག་གཙང་སྦྲ་ལ་དགའ་བ་ཞིག་གི་སྒོར་ཕྱིན་ཏེ། །ཁྱིམ་བདག་དེའི་མལ་སྒོ་ཁྱམས་ན་འདུག་པ་བུ་མོ་ཞིག་བསྲུང་ཞིང་མིས་རེག་པ་ལྟ་ཅི་སྨོས་ཏེ། ཆུང་ངུ་ན་སྦྲང་མ་ཡང་འདུག་ཏུ་མི་རུང་སྟེ་སྐྲོད་པ་ལས་སྦོམ་དགའ་མོས་སྨྲས་པ། མཚན་བཟངས་མོ་བསོད་སྙོམས་བྱིན་ཅིག་ཅེས་
སྨྲས་པ་དང་། བུ་མོས་སྨྲས་པ་བདག་ནི་མལ་འདི་སྲུང་ངོ་། །སྦོམ་དགའ་མོས་སྨྲས་པ་བསོད་སྙོམས་ཁྱེར་ཤོག །དེའི་བར་དུ་སྲུང་ངོ་ཞེས་ནས་བུ་མོས་བསོད་སྙོམས་ལེན་དུ་སོང་བའི་འོག་ཏུ་སྦོམ་དགའ་མོས་རྐང་པ་མ་བཀྲུས་པ་ཁྱིམ་བདག་དེའི་མལ་ཐོག་ཏུ་འདུག་པ་ལས། ཁྱིམ་བདག་དེ་མ་
དད་ཅིང་འཕྱ་བ་ལས་བཅས། ཡང་དགེ་སློང་མ་མ་བསྒོ་བར་ཁྱིམ་པའི་ཁྱིམ་དུ་སྟན་ལ་འདུག་ན་ལྟུང་བའོ། །དགེ་སློང་མས་ཁྱིམ་པ་འདུག་པ་ལ་མ་དྲིས་པར་ཁྱིམ་པའི་སྟན་ལ་འདུག་ན་ལྟུང་བའོ། །ལྟུང་བ་དགུ་བཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་
ཅིག་ལྗོངས་རྒྱུར་དོང་བ་ལས་ཕྱེམ་རེད་དགོངས་སུ་ཁྱིམ་བདག་པོ་ནི་མེད། ཁྱིམ་བདག་མོ་ལ་དྲིས་ནས་དེར་ཉལ་བ་ལས་ཁྱིམ་བདག་ཀྱང་ཕྱིས་འོངས་ཏེ། དེ་ཆུང་མ་དང་ཡོངས་སུ་སྤྱོད་པ་ལས། དེའི་ཆུང་མ་ཉོར་ཞིང་སྐད་མི་སྙེན་པར་ཟེར་བ་ལས་དགེ་སློང་མ་དེ་དག་གིས་ཐོས་ཏེ་དགེ་སློང་
མ་གཞོན་ནུ་མ་ཞིག་གིས་གད་མོ་ཤོར་ནས། ཁྱིམ་བདག་དེ་ལ་འཕྱ་ཞིང་མི་སྙན་པར་ཟེར་བ་ལས་བཅས་སོ། །ཡང་དགེ་སློང་མ་གང་ཁྱིམ་བདག་ལ་མ་དྲིས་པར་གནས་པར་བྱེད་ན་ལྟུང་བའོ། །དགེ་སློང་མས་ཇི་ཙམ་དུ་ཁྱིམ་བདག་པོ་ལ་མ་དྲིས་པར་ཁྱིམ་བདག་གི་ཁྱིམ་དུ་ཞག་ལོན་པར་བྱེད་
ན་ལྟུང་བའོ། །བུད་མེད་དབང་ཆེ་བ་ཡུགས་ས་མོ་ལ་དྲིས་པ་ལ་ཉེས་པ་མེད་དོ། །ལྟུང་བ་དགུ་བཅུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་ལྗོངས་རྒྱུ་ཞིང་དོང་བ་ལས། ཁྱིམ་བདག་གི་གྲོང་དུ་ཕྱིན་ཏེ། དེ་ན་སྔ་ན་དགེ་སློང་

མ་འཁོད་པ་གང་གིས་ཁྱིམ་པའི་ཐ་སྙད་ཀྱིས་བསུ་བ་དང་། ཕྱག་བྱས་པ་ལ་སོགས་པ་མ་བྱས་པས་སྦོམ་དགའ་མོ་ཁྲོས་ཏེ། དེ་དག་བསྐྲད་ནས་བདག་ཉིད་དེར་གནས་པ་ལ་བཅས། ཡང་དགེ་སློང་མ་གང་ཁྱིམ་པའི་ཁྱིམ་ན་སྔོན་གནས་པ་སྐྲོད་ན་ལྟུང་བའོ། །
ཡང་དགེ་སློང་མ་གང་གིས་ཁྱིམ་པའི་ཁྱིམ་ན་དགེ་སློང་མ་སྔ་ན་གནས་པ་ལས་བདག་ཕྱིས་འོངས་ཏེ་ཁྲོས་ནས་སྐྲོད་པར་བྱེད་ན་ལྟུང་བའོ། །དེ་ལ་ཉེས་པ་མེད་པ་ནི་གནས་དེ་ནས་མ་བསྐྲད་ན་སྲོག་ལ་སྨན་པའམ། ཚངས་པར་སྤྱོད་པའི་བར་ཆད་དུ་འགྱུར་བ་ཙམ་གྱི་ཚོད་ན་ཉེས་པ་མེད་དོ། །ལྟུང་བ་དགུ་
བཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་སློབ་མ་དང་ཉེ་གནས་དག་སྔར་བསྙེན་ནས། ཕྱིས་ནད་ཀྱིས་བཏབ་པར་གྱུར་པ་ལ་ནད་གཡོག་དང་སྨན་དང་ཟས་དག་མ་བྱིན་པ་ལས་བཅས། ཡང་དགེ་སློང་མ་གང་ལྷན་ཅིག་གནས་པ་
དང་། ཉེ་གནས་བསྙེན་པ་ལ་ནད་ཀྱིས་བཏབ་ནས་གྲོགས་མི་བྱེད་ན་ལྟུང་བའོ། །དགེ་སློང་མས་དགེ་སློང་མ་དང་ཉེ་གནས་རབ་ཏུ་བྱུང་ཞིང་བསྙེན་པར་རྫོགས་པར་བྱས་ལ་དེའི་འོག་ཏུ་ན་བར་གྱུར་ལ་ནད་གཡོག་མི་བྱེད་ན་ལྟུང་བའོ། །སྨན་མི་བྱེད་ན་ཡང་ལྟུང་བའོ། །ཁ་ཟས་ལ་སོགས་པས་
གསོ་བར་མི་བྱེད་ན་ཡང་ལྟུང་བའོ། །བདག་ལ་མེད་ན་གཞན་ལས་བཙལ་ཏེ་སྦྱིན་ནོ། །བདག་མི་ཁོམ་ན་གཞན་ལ་ཡང་བཅོལ་ཏེ་ནད་གཡོག་བྱེད་དུ་གཞུག་གོ། །ཡོ་བྱད་མ་རྙེད་པའམ། མེད་པའམ་བར་ཆད་བརྒྱད་བྱུང་ན་ཉེས་པ་མེད་དོ། །ལྟུང་བ་བརྒྱ་པ་རྫོགས་སོ།། །།
སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བསམས་པ། སྐྱེ་དགུའི་བདག་མོ་ཆེན་མོ་ནི་སྤང་བ་ཕུན་སུམ་ཚོགས་པ་དང་ལྡན་པས་དེ་དང་ལྷན་ཅིག་གནས་པར་ཡང་བདག་གིས་མི་ནུས། ཆོས་སྦྱིན་མ་ནི་འཁོར་མང་བས་དེ་དང་གནས་པར་ཡང་བདག་གིས་མི་ནུས་ཏེ། གཽ་ཏ་མ་
རིད་དེ་མ་དང་ལྷན་ཅིག་ཏུ་གནས་སོ་སྙམ་ནས། དེ་དང་ལྷན་ཅིག་ཏུ་གནས་པར་གྱུར་པ་ལས། སྲོད་ཀྱི་དུས་སུ་སྦོམ་དགའ་མོ་ཟས་བཟང་པོའི་གཏམ་དང་། ཟས་ཞིམ་པོའི་གཏམ་མང་དུ་བྱེད་ཅིང་དེ་འབའ་ཞིག་གིས་ནམ་ནངས་པར་བྱེད་དེ། སློབ་མ་དག་ལ་ཆོས་མི་སློབ་བོ། །དེ་ནས་སྔ་དྲོའི་

དུས་སུ་བསོད་སྙོམས་ལ་འཇུག་པར་བྱེད་དོ། །སྦོམ་དགའ་མོ་རྟག་པར་ཡང་དེ་ལྟར་བྱེད་པ་ལས་གཽ་ཏ་མ་རིད་དེ་མས་དེའི་འཁོར་རྣམས་མི་དགེ་བ་ལས་བཟློག་སྟེ་དགེ་བ་ལ་བཙུད་པ་ལས་སྦོམ་དགའ་མོ་ཁྲོས་འཁྲུགས་རྔམས་ནས་གཽ་ཏ་མ་རིད་དེ་མ་འདི་སྔོན་བུ་ཤ་ཟ་བ་ཡིན་ནོ་ཞེས་འཛེར་ཅིང་བསྐྲད་
པ་ལས་བཅས། ཡང་དགེ་སློང་མ་གང་དབྱར་མོ་ཁང་ནས་དགེ་སློང་མ་སྐྲོད་ན་ལྟུང་བའོ། །དགེ་སློང་མས་ཇི་ཙམ་དུ་ཁྲོས་འཁྲུགས་རྔམས་ཏེ། དགེ་སློང་མའི་གཙུག་ལག་ཁང་ནས་དགེ་སློང་མ་སྐྲོད་དམ་སྐྲོད་དུ་འཇུག་གམ་བར་ཆད་བརྒྱད་བྱུང་ན་ཉེས་པ་མེད་དོ། །ལྟུང་བ་བརྒྱ་རྩ་
གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་རིད་དེ་དང་ཨ་རི་སྟ་གཉིས་ཁྲི་གཅིག་གི་སྟེང་མཐང་སྤྲད་ཅིང་ཉལ་བ་ལས། དོན་ཉུང་ངུ་བའི་དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་དགེ་སློང་མ་དང་ལྷན་ཅིག་ཁྲི་གཅིག་གི་
སྟེང་དུ་ཉལ་ན་ལྟུང་བའོ། །ཡང་དགེ་སློང་མས་ཆེད་དུ་བསམས་ཏེ་ཁྲི་གཅིག་གི་སྟེང་དུ་གོས་གཅིག་གི་ནང་དུ་མཐང་སྤྲད་དེ་ཉལ་ན་ལྟུང་བའོ། །རྗེས་སུ་གནང་བ་ནི་དགེ་སློང་མ་དག་ཅིག་ལྗོངས་རྒྱུ་ཞིང་དོང་བ་ལས། ཁྱིམ་བདག་གི་གྲོང་དུ་གནས་པར་གྱུར་པ་ལས། ཁྱིམ་བདག་
གི་མལ་ཁྲི་དག་བརྙན་པོར་བྱིན་པ་དང་། ཁྱིམ་པའི་དེ་ན་ཁྲི་ཉུང་བས་བཅོམ་ལྡན་འདས་ཀྱིས་ཁྲི་གཅིག་གི་སྟེང་དུ་ཉལ་དུ་མ་གནང་ངོ་ཞེས་ཁ་ཅིག་ས་ལ་ཉལ་བར་གྱུར་པ་དང་། ཕྱིས་བཀའ་སྩལ་པ་ཁྲི་ཉུང་ཞིང་དགེ་སློང་མ་མང་ན་ཁྲི་གཅིག་གི་སྟེང་དུ་གཉིས་ཉལ་བར་གནང་སྟེ། བར་དུ་
གཏུར་བུ་དང་། ཆོས་གོས་ཀྱིས་ཆོད་ཅིག་དང་ཉེས་པ་མེད་དོ་ཞེས་བཀའ་སྩལ་ཏོ། །ལྟུང་བ་བརྒྱ་རྩ་གཉིས་པ་རྫོགས་སོ།། །།མདོར་བསྟན་པ་ནི། དབྱར་མ་ཚང་བར་མི་འགྲོ་དང་། །དབྱར་གནས་དེ་ནས་འགྲོ་བ་དང་། །དོགས་དང་བཅས་པའི་ཡུལ་འཁོར་གཉིས། །ལྷ་རྟེན་
ཁང་པ་ཐ་མ་ཡིན། །ལོ་ནི་བཅུ་གཉིས་མ་ལོན་དང་། །ལོན་ཡང་བསྐོས་པ་མ་ཡིན་གྱིས། །ཁྱིམ་སོ་བཟུང་ན་བཅུ་གཉིས་དང་། །དེ་ཡང་དགེ་འདུན་མ་བསྐོས་ནའོ། །སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་དབྱར་ཚུལ་དུ་ཞུགས་པ་ལས། ཟླ་བ་མ་ཚང་བར་

ཚུལ་དྲལ་ཏེ། ལྗོངས་རྒྱུ་ཞིང་འགྲོ་བ་ལ་བཅས། ཡང་དགེ་སློང་མ་གང་དབྱར་མ་ཚང་བར་ལྗོངས་རྒྱུ་ཞིང་འགྲོ་ན་ལྟུང་བའོ། །དགེ་སློང་མས་དབྱར་ཚུལ་དུ་ཞུགས་ན་ཟླ་བ་གསུམ་གྱི་བར་དུ་ཚང་བར་ཚུལ་བསྲུང་བར་བྱའོ། །ཟླ་བ་གསུམ་མ་ཚང་བར་ཚུལ་
དྲལ་ན་ལྟུང་བའོ། །བར་ཆད་བརྒྱད་བྱུང་ན་ཉེས་པ་མེད་དོ། །ལྟུང་བ་བརྒྱ་རྩ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཚུལ་བྱུང་བའི་འོག་ཏུ་ལྗོངས་རྒྱུ་བ་སྤྱོད་ཅིག་ཅེས་གསུངས་པ་ལས་
བཅས། ཡང་དགེ་སློང་མ་དབྱར་གནས་ནས་ལྗོངས་རྒྱུ་ཞིང་མི་འགྲོ་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་གང་གཞན་ཡང་དེ་དང་འདྲ་བ་དག་གོ། །དབྱར་གནས་ཞེས་བྱ་བ་ནི། དབྱར་ཟླ་བ་གསུམ་དུ་ཚུལ་བསྲུངས་པའོ། །ལྗོངས་རྒྱུ་ཞིང་མི་འགྲོ་ན་ཞེས་བྱ་བ་ནི་ཚུལ་ནས་བྱུང་བའི་
འོག་ཏུ་ལྗོངས་རྒྱུ་ཞིང་མི་སྤྱོད་པའོ། །དགེ་སློང་མས་ཚུལ་ནས་བྱུང་བའི་འོག་ཏུ་ཐ་ན་ཉིན་ཞག་ཙམ་ཡང་ལྗོངས་རྒྱུ་བ་མི་སྤྱོད་ན་ལྟུང་བར་འགྱུར་རོ། །ལྟུང་བ་བརྒྱ་རྩ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་དགེ་སློང་མ་ལྗོངས་རྒྱུ་བ་སྤྱོད་ཅིག་ཅེས་
བཀའ་སྩལ་པ་ལས། སྦོམ་དགའ་མོས་ཡུལ་དོགས་པ་དང་བཅས་པ། འཇིགས་ཤིང་བག་ཚ་བ་དང་བཅས་པའི་ཕྱོགས་སུ་ལྗོངས་རྒྱུ་བ་ལས་མི་རྒོད་དག་གིས་བཅོམ་པ་ལས་བཅས། ཡང་དགེ་སློང་མ་གང་ཡུལ་འཁོར་དོགས་པ་དང་བཅས་པར་ལྗོངས་རྒྱུ་ཞིང་འགྲོ་ན་ལྟུང་བའོ། །
དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དོགས་པ་དང་བཅས་ཞེས་བྱ་བ་ནི་མི་རྒོད་དག་ཡོད་པར་དོགས་པའོ། །འཇིགས་པ་དང་བཅས་ཞེས་བྱ་བ་ནི་མི་རྒོད་དག་གིས་བཅོམ་པར་མངོན་དུ་སྣང་ངོ་། །བག་ཚ་བ་དང་བཅས་ཞེས་བྱ་བ་ནི་གཅན་གཟན་གཏུམ་པོ་མི་ལ་ཟ་བ་དག་གནས་
པའོ། དགེ་སློང་མས་ཇི་ཙམ་དུ་ཤེས་བཞིན་དུ་དེ་འདྲ་བའི་ཡུལ་འཁོར་དུ་ལྗོངས་རྒྱུ་ཞིང་འགྲོ་ན་ལྟུང་བའོ། །བར་ཆད་བརྒྱད་བྱུང་སྟེ་དེར་མི་འགྲོར་མི་རུང་ན་ཉེས་པ་མེད་དོ། །ལྟུང་བ་བརྒྱ་རྩ་ལྔ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དགེ་སློང་མ་ཞིག་ལྗོངས་རྒྱུ་

ཞིང་དོང་བ་ལས། ཕ་རོལ་པོ་གཞན་དག་འཁྲུགས་ཤིང་དམག་འགྱེད་པའི་ནང་དུ་ཕྱིན་ཏེ། དེ་དག་གིས་མི་ཚངས་པར་སྤྱད་ནས་ཚངས་པར་སྤྱོད་པའི་བར་ཆད་དུ་གྱུར་པ་ལས་བཅས། ཡང་དགེ་སློང་མ་གང་ཡུལ་འཁོར་འཁྲུགས་པར་ལྗོངས་རྒྱུ་ཞིང་འགྲོ་ན་ལྟུང་བའོ། །ཡང་དགེ་སློང་མ་
ཤེས་བཞིན་དུ་ཡུལ་འཁྲུགས་པའི་ནང་དུ་འགྲོ་ན་ལྟུང་བར་འགྱུར་རོ། །འཁྲུགས་པ་དེའི་ནང་དུ་རྒྱལ་པོ་འམ་བློན་པོ་དག་གིས་ནན་གྱིས་བཀུག་ན་ཉེས་པ་མེད་དོ། །ལྟུང་བ་བརྒྱ་རྩ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་ཁྱིམ་པ་རྣམས་ལ་བཀའ་
སྩལ་པ། འཇིག་རྟེན་གྱི་ལྷ་ལ་མཆོད་ཅིག་དང་། ལྷ་དགའ་ན་འགོ་ཞིང་སྟོན་པར་འགྱུར་ཞེས་གསུངས་པ་ལས། དགེ་སློང་མ་དག་ཀྱང་མ་མོའི་ཚོགས་དང་འཇིག་རྟེན་པའི་ལྷ་ལ་བརྟེན་ལ་ཕྱག་འཚལ་ཞིང་མཆོད་པ་བྱེད་པ་དང་། བཀའ་སྩལ་པ་ང་ཁྱིམ་པ་རྣམས་ལ་ལྷ་མཆོད་པར་
གསུངས་ཀྱི་རབ་ཏུ་བྱུང་བ་ལ་མ་ཡིན་ནོ་ཞེས་གསུངས་པ་དང་། ཕྱིས་དྲུག་སྡེ་པོ་དང་བཅུ་གཉིས་སྡེ་རྣམས་ལྷའི་རྟེན་ཁང་དུ་སོང་ནས་ལ་ལ་ལྷ་ལ་སྨོད་ཅིང་མི་སྙན་པར་ཟེར་རོ། །དེ་ལ་མི་དགའ་བར་གྱུར་པ་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དགེ་སློང་མ་རྣམས་
ལ་བཀའ་སྩལ་པ། ལྷའི་རྟེན་ཁང་དུ་སོང་ནས་མི་སྙེན་པར་ཟེར་ཅིང་སྨྲ་ན་ལྟུང་བའོ་ཞེས་བཅས། ཡང་དགེ་སློང་མ་གང་ལྷ་ཁང་རྣམས་སུ་སོང་ནས་སྨྲ་བར་བྱེད་ན་ལྟུང་བའོ། །དགེ་སློང་མས་འཇིག་རྟེན་པའི་ལྷའི་རྟེན་ཁང་དུ་སོང་ནས་སྨོད་ཅིང་མི་སྙན་པར་ཟེར་ན་ཐམས་ཅད་དུ་ལྟུང་
བར་འགྱུར་རོ། །དགེ་སློང་མས་རྟེན་ཁང་དུ་ཕྱིན་ནས་སེ་གོལ་བརྡབས་ཏེ་ཞལ་ནས་གསུངས་པའི་ཚིགས་སུ་བཅད་པ་རྒྱུད་གཉིས་སམ་གསུམ་བརྗོད་པར་བྱའོ། །དེ་ལྟར་མ་བྱས་ན་འང་ཉེས་བྱས་སོ། །ལྟུང་བ་བརྒྱ་རྩ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་
ན་སྟེ། དགེ་སློང་མ་སྦོམ་དགའ་མོ་བདག་བསྙེན་པར་རྫོགས་ནས་ལོ་བཅུ་གཉིས་མ་ལོན་པར་གཞན་དག་རབ་ཏུ་འབྱིན་ཅིང་བསྙེན་པར་རྫོགས་པའི་མཁན་མོ་བྱེད་པ་ལས། །དོན་ཉུང་ངུ་མས་འཕྱ་བ་ལས་བཅས་ཡང་དགེ་སློང་མ་གང་ལོ་བཅུ་གཉིས་མ་ལོན་པར་རབ་ཏུ་འབྱིན་པ་བསྙེན་

པར་རྫོགས་པར་བྱེད་ན་ལྟུང་བའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ལོ་བཅུ་གཉིས་མ་ལོན་པར་ཞེས་པ་ནི་བདག་བསྙེན་པར་རྫོགས་ནས་ལོ་བཅུ་གཉིས་མ་ལོན་པའོ། །རབ་ཏུ་འབྱིན་བསྙེན་པར་རྫོགས་པར་བྱེད་ཅེས་པ་ནི་གཞན་གྱི་མཁན་མོ་བྱེད་པའོ། །
དེ་ལ་དགེ་སློང་མས་བདག་ལོ་བཅུ་གཉིས་མ་ལོན་པར་ཤེས་བཞིན་དུ་རབ་ཏུ་འབྱིན་པ་དང་། བསྙེན་པར་རྫོགས་པར་བྱེད་ན་ལྟུང་བའོ། །ལོ་བཅུ་གཉིས་ལོན་ཀྱང་ཆོས་ལྔ་དང་མི་ལྡན་བཞིན་དུ་རབ་ཏུ་འབྱིན་པ་དང་བསྙེན་པར་རྫོགས་པའི་མཁན་མོ་བྱེད་ན་ལྟུང་བའོ། །ཆོས་ལྔ་དང་ལྡན་
ཡང་ལོ་མ་ཚང་ན་ལྟུང་བའོ། །ལྟུང་བ་བརྒྱ་རྩ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ལོ་བཅུ་གཉིས་ལོན་ནོ་ཞེས་ནས་གཞན་རབ་ཏུ་འབྱིན་པ་དང་བསྙེན་པར་རྫོགས་པར་བྱེད་དེ། །འཁོར་འཆང་བའི་སྡོམ་པ་དགེ་འདུན་ལས་མ་ཐོབ་བཞིན་
དུ་བདག་ཉིད་ཀྱིས་སློབ་མའི་འཁོར་འཆང་པ་ལས་བཅས། ཡང་དགེ་སློང་མ་གང་དགེ་འདུན་ལས་འཁོར་འཆང་དུ་གནང་བའི་སྡོམ་པ་མ་ཐོབ་པར་འཁོར་འཆང་ན་ལྟུང་བའོ། །དགེ་སློང་མ་བསྙེན་པར་རྫོགས་ནས་ལོ་བཅུ་གཉིས་ལོན་ལ་ཆོས་ལྔ་དང་ལྡན་པར་གྱུར་ཀྱང་རབ་ཏུ་འབྱིན་པ་དང་བསྙེན་
པར་རྫོགས་པའི་མཁན་མོ་བྱེད་ཅིང་འཁོར་འཆང་བའི་སྡོམ་པ་དགེ་འདུན་ལ་གསོལ་ཅིག །དགེ་འདུན་གྱིས་སྡོམ་པ་སྦྱིན་པར་བྱའོ། །འཁོར་འཆང་བའི་སྡོམ་པ་མ་གསོལ་ཏམ། དགེ་འདུན་ལ་སྡོམ་པ་མ་ཐོབ་བཞིན་དུ་འཁོར་འཆང་ན་ལྟུང་བའོ། །ལྟུང་བ་བརྒྱ་རྩ་དགུ་པ་རྫོགས་
སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་བུད་མེད་ཁྱིམ་སོ་མྱོང་བ་རབ་ཏུ་བྱུང་བ་རྣམས་ལོ་བཅུ་ལོན་ལ་ལོ་གཉིས་ཀྱི་བར་དུ་བསླབ་པའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་བྱིན་ལ། ལོ་བཅུ་གཉིས་ལོན་ཀྱང་བསྙེན་པར་རྫོགས་པར་གྱིས་ཤིག་ཅེས་གསུངས་པ་
ལས། སྦོམ་དགའ་མོས་ཁྲིམས་མ་ཕོག་པར་ལོ་བཅུ་གཉིས་ཀྱང་མ་ལོན་པར་ཐལ་བྱུང་བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་ཁྱིམ་སོ་བཟུང་བ་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་ན་ལྟུང་བའོ། །ཡང་དགེ་སློང་མ་བུད་མེད་བག་མ་མྱོང་བ། བར་

ཁྲིམས་མ་ཕོག །ལོ་བཅུ་གཉིས་ཀྱང་མ་ལོན་པར་ཤེས་བཞིན་དུ་བསྙེན་པར་རྫོགས་པར་བྱེད་ན་ལྟུང་བའོ། །ལྟུང་བ་བརྒྱ་རྩ་བཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་ཁྱིམ་སོ་བཟུང་བ་ལོ་བཅུ་གཉིས་ལོན་ཀྱང་བསླབ་པའི་ཆོས་དྲུག་དང་།
རྗེས་སུ་མཐུན་པའི་ཆོས་དྲུག་མ་བྱིན་པར་ཐལ་བྱུང་དུ་བསྙེན་པར་རྫོགས་པར་བྱས་པ་ལ་བཅས། ཡང་དགེ་སློང་མ་གང་ཁྱིམ་སོ་བཟུང་བ་ལོ་བཅུ་གཉིས་ལོན་ན་ཡང་བསླབ་པའི་སྡོམ་པ་མ་བྱིན་པར་བསྙེན་པར་རྫོགས་པར་བྱེད་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲའོ། །ལྟུང་བ་བརྒྱ་རྩ་
བཅུ་གཅིག་པ་རྫོགས་སོ།། །།མདོར་བསྟན་པ་ནི། མང་པོ་སྡོམ་པ་བྱས་པ་དང་། །སྦྲུམ་མ་དང་ནི་མི་སློབ་དང་། །བསྡུས་ནས་ཡལ་བར་དོར་བ་དང་། །བཀར་བར་བྱ་བ་ཐ་མའོ། །ལོ་ནི་ཉི་ཤུ་མ་ལོན་དང་། །ལོན་ཡང་སྡོམ་པ་མ་བྱིན་དང་། །གཏུམ་མོ་མྱ་ངན་གཟིར་བ་དང་། །
ཆོས་དྲུག་རྣམས་ལ་མ་བསླབ་པའོ། །སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་བདག་ཉིད་ཀྱིས་སློབ་མ་དང་ཉེ་གནས་ཀྱི་འཁོར་མང་དུ་བསྡུས་ཤིང་དེའི་ཐོག་ཏུ་གཞན་གྱི་སློབ་མ་དང་ཉེ་གནས་དག་འཁོར་དུ་བསྡུས་པས་མང་ཆེས་ཏེ། དེ་དག་ལ་ཆོས་ཀྱང་མི་སྟོན།
ཁ་ཏོན་གྱི་ལུང་ཡང་མི་འབོགས་པ་ལས། དེ་དག་གིས་ཆོས་དག་མ་ལོབས་པ་ལས་བཅས། ཡང་དགེ་སློང་མ་གང་འཁོར་མང་པོ་འཆང་བར་དགེ་འདུན་ལས་སྡོམ་པ་མ་ཐོབ་པར་འཁོར་འཆང་ན་ལྟུང་བའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །འཁོར་མང་དུ་འཆང་
ཞེས་བྱ་བ་ནི་སློབ་མ་དང་ཉེ་གནས་མང་དུ་སྡུད་པའོ། །སྡོམ་པ་མ་ཐོབ་ཅེས་བྱ་བ་ནི་དགེ་འདུན་ལས་སོ། །དགེ་སློང་མས་འཁོར་མང་དུ་འཆང་བའི་སྡོམ་པ་མ་ཐོབ་བཞིན་དུ་འཁོར་མང་པོ་འཆང་ཞིང་འཆད་པ་དང་། ཁ་ཏོན་ལ་སོགས་པའི་ལུང་མི་འབོགས་ན་ལྟུང་བར་འགྱུར་རོ། །ལྟུང་བ་བརྒྱ་རྩ་
བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་ལྗོངས་རྒྱུ་ཞིང་སོང་བ་ལས། བུད་མེད་སྦྲུམ་མ་ཅིག་དང་ཕྲད་དེ་དེའང་རབ་ཏུ་བྱུང་ནས་ཕྱི་བཞིན་དུ་ཁྲིད་པ་ལས་ལམ་དུ་བུ་བྱུང་བ་དང་། ཁྱིམ་བདག་རྣམས་ཀྱིས་མཐོང་སྟེ་དགེ་སློང་མ་འདི་དག་

ནི་མི་ཚངས་པར་སྤྱོད་དོ་ཞེས་འཕྱ་ཞིང་མ་དད་པ་ལས་བཅས། ཡང་དགེ་སློང་མ་གང་སྦྲུམ་མ་རབ་ཏུ་འབྱིན་ན་ལྟུང་བའོ། །དགེ་སློང་མས་བུད་མེད་སྦྲུམ་མར་ཤེས་བཞིན་དུ་རབ་ཏུ་འབྱིན་ན་ལྟུང་བའོ། །སྦྲུམ་མར་མི་ཤེས་ན་ཉེས་པ་མེད་དོ། །ལྟུང་བ་བརྒྱ་རྩ་བཅུ་
གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་སློབ་མ་ལ་ཆོས་མ་བསྟན་ཅིང་ཡལ་བར་བོར་བ་ལས་བཅས། ཡང་དགེ་སློང་མ་གང་རབ་ཏུ་བྱུང་བསྙེན་པར་རྫོགས་པར་བྱས་ནས་མི་སྟོན་ན་ལྟུང་བའོ། །དགེ་སློང་མས་སློབ་མ་ཉེ་གནས་རབ་ཏུ་བྱུང་
བསྙེན་པར་རྫོགས་པར་བྱས་ལ་ཚུལ་ཁྲིམས་ལ་སོགས་པ་མ་བསྟན་ཏམ། ཆོས་གཞན་ཡང་མ་བསྟན་ན་ལྟུང་བར་འགྱུར་རོ། །བདག་ཉིད་འཆད་མི་ཤེས་ན་ཡང་གཞན་མཁས་པ་དག་ལ་བཅོལ་བར་བྱའོ། །མ་བཅོལ་ན་ཡང་ཉེས་བྱས་སོ། །ལྟུང་བ་བརྒྱ་རྩ་བཅུ་བཞི་པ་རྫོགས་
སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སློབ་མ་ཉེ་གནས་དག་བསྙེན་པར་རྫོགས་པར་བྱས་ནས་ན་བར་གྱུར་པ་ལ་ནད་གཡོག་ཀྱང་མི་བྱེད། སྨན་དང་ཟས་ལ་སོགས་པ་ཡང་མི་སྟོབས་པ་ལས་དེ་དག་ཚངས་པར་སྤྱོད་པའི་བར་ཆད་དུ་གྱུར་ཏེ། དོན་ཉུང་ངུ་བའི་
དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་རབ་ཏུ་བྱུང་བསྙེན་པར་རྫོགས་པར་བྱས་ནས་ཡལ་བར་བོར་ན་ལྟུང་བའོ། །དགེ་སློང་མས་སློབ་མ་ན་བར་གྱུར་པ་དག་ལ་ནད་གཡོག་མི་བྱེད་ན་ལྟུང་བར་འགྱུར་རོ། །ཟས་དང་སྨན་གྱིས་མི་སྟོབས་ནའང་ལྟུང་བའོ། །བདག་
ལ་མེད་ནའང་གཞན་ལ་བཙལ་ཏེའང་སྦྱིན་པར་བྱའོ། །དེ་ལྟར་མ་བྱས་ན་ཉེས་བྱས་སོ། །ལྟུང་བ་བརྒྱ་རྩ་བཅོ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་ཁྱིམ་བདག་མོ་ཞིག་ཁྱོ་ལམ་རིང་པོར་སོང་བའི་འོག་ཏུ་རབ་ཏུ་བྱུང་བ་ལས།
ཕྱིས་ཁྱོ་སླར་འོངས་པ་དང་ཆུང་མ་སླར་ཕྲོགས་ཏེ་ཚངས་པར་སྤྱོད་པའི་བར་ཆད་དུ་གྱུར་པ་ལས་བཅས། ཡང་དགེ་སློང་མ་གང་རབ་ཏུ་བྱུང་ནས་མ་བཀར་ན་ལྟུང་བའོ། །དགེ་སློང་མས་གཞན་གྱི་བུད་མེད་རབ་ཏུ་བྱུང་ལ། དེ་ལ་གནོད་པའམ། ཚངས་པར་སྤྱོད་པའི་བར་ཆད་དུ་འགྱུར་བ་ལ་

སྐྱབས་མ་བྱས་སམ་གུད་དུ་མ་བཀར་ན་ལྟུང་བར་འགྱུར་རོ། །དེ་ལྟར་མི་ཤེས་པ་ལ་ཉེས་པ་མེད་དོ། །ལྟུང་བ་བརྒྱ་རྩ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བུད་མེད་ཁྱིམ་སོ་མ་བཟུང་བ་ལོ་བཅོ་བརྒྱད་ལོན་ན་ལོ་གཉིས་སུ་བར་ཁྲིམས་སྲུང་དུ་
བཅུག་ལ། ལོ་ཉི་ཤུ་ལོན་ན་བསྙེན་པར་རྫོགས་པར་གྱིས་ཤིག་ཅེས་བཀའ་སྩལ་པ་ལས། སྦོམ་དགའ་མོས་ལོ་ཉི་ཤུ་མ་ལོན་པར། བར་ཁྲིམས་ཕོག་སྟེ་ཐལ་བྱུང་བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་གཞོན་ནུར་གྱུར་པ་ལོ་ཉི་ཤུ་མ་ལོན་པར་བསྙེན་པར་རྫོགས་
པར་བྱས་ན་ལྟུང་བའོ། །དགེ་སློང་མས་བུད་མེད་ཁྱིམ་སོ་མ་བཟུང་བ་ལོ་བཅོ་བརྒྱད་ལོན་པ་ལ་ལོ་གཉིས་ཀྱི་བར་དུ་བར་ཁྲིམས་ཕོག་ལ་ལོ་ཉི་ཤུ་ན་བསྙེན་པར་རྫོགས་པར་བྱ་བའི་རིགས་པ་ལས། དེ་ལྟར་མ་བྱས་པར་ཤེས་བཞིན་དུ་བསྙེན་པར་རྫོགས་པར་བྱེད་ན་ལྟུང་བའོ། །ལྟུང་བ་བརྒྱ་རྩ་
བཅུ་བདུན་པ་རྫོགས་སོ།། །།བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །སྐྱེ་དགུའི་བདག་མོ་ཆེན་མོས་གསོལ་བ། དགེ་སློང་ཕ་དང་དགེ་སློང་མ་གཉིས་བསྙེན་པར་རྫོགས་པར་བྱ་བ་ལ་རིམ་པ་དང་ཁྱད་པར་ཅི་མཆིས་ཞེས་གསོལ་བ་དང་བཀའ་སྩལ་པ་གཞོན་ནུ་མ་ལོ་བཅོ་
བརྒྱད་ལོན་པ་ལོ་གཉིས་ཀྱི་བར་ཁྲིམས་ཀྱང་བསྲུངས་ལ། ལོ་ཉི་ཤུ་ལོན་པ་ཞིག་བསྙེན་པར་རྫོགས་པར་བྱེད་ན་དགེ་སློང་མ་དག་གིས་སྟན་རྣམས་ཐིང་ལ་གཎྜཱི་བརྡུངས་ཏེ། དགེ་འདུན་ཐམས་ཅད་འདུས་ནས་གསོལ་བ་དང་ལས་ཀྱིས་ཚངས་པར་སྤྱོད་པའི་ཉེ་གནས་ཀྱི་སྡོམ་པ་དགེ་
སློང་མ་རྣམས་ཀྱིས་བྱིན་ཅིག །དེའི་འོག་ཏུ་དགེ་སློང་མ་གཉི་གའི་ཚོགས་འདུས་ལ། གསོལ་བ་དང་བཞིའི་ལས་ཀྱིས་དགེ་སློང་མ་བསྙེན་པར་རྫོགས་པར་གྱིས་ཤིག་ཅེས་གསུངས་པ་ལ། ཕྱིས་དགེ་སློང་མ་དག་གིས་ཚངས་པར་སྤྱོད་པའི་ཉེ་གནས་ཀྱི་སྡོམ་པ་མ་བྱིན་པར་ཤེས་བཞིན་དུ་
བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་གཞོན་ནུར་གྱུར་པ་ལོ་ཉི་ཤུ་ལོན་པ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་བྱིན་པར་བསྙེན་པར་རྫོགས་པར་བྱེད་ན་ལྟུང་བའོ། །དགེ་སློང་མ་ཚངས་པར་སྤྱོད་པའི་ཉེ་གནས་ཀྱི་སྡོམ་པ་སྔར་མ་བྱིན་པར་བསྙེན་

པར་རྫོགས་པར་བྱེད་ན་ལྟུང་བའོ། །ལྟུང་བ་བརྒྱ་རྩ་བཅོ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས་བུད་མེད་གཉིས་ཤིག་འཐབ་མོ་འགྱེད་པ་མཐོང་སྟེ། དེ་གཉིས་
ལས་སྐེ་རྩ་སྒྲེང་ཞིང་གྲོགས་ཀྱི་གཡོ་མཚང་མང་དུ་འདྲུ་བ་ལས། སྦོམ་དགའ་མོས་བསམས་པ། བུད་མེད་འདི་རབ་ཏུ་བྱུང་ན་བདག་འཐབ་མོ་བྱེད་པའི་གྲོགས་སུ་རུང་ངོ་ཞེས་དེ་རབ་ཏུ་ཕྱུང་ནས་ཕྱི་བཞིན་དུ་ཁྲིད་དོ། །ཕྱིས་སྦོམ་དགའ་མོ་དགེ་སློང་མ་གཞན་དག་དང་འཐབ་པར་གྱུར་པའི་ཚེ།
དགེ་སློང་མ་དེ་ཅང་མི་ཟེར་བར་འདུག་གོ། །སྦོམ་དགའ་མོས་སྨྲས་པ། ཁྱོད་ངའི་འཐབ་མོའི་གྲོགས་སུ་འགྱུར་བར་བྱ་བའི་ཕྱིར་རབ་ཏུ་བྱུང་ན་ཅིའི་ཕྱིར་བསམ་གཏན་བཞི་ལ་སྙོམས་པར་ཞུགས་པ་བཞིན་དུ་ཅང་མི་སྨྲ་བར་འདུག །དེས་སྨྲས་པ་སྔོན་ཁྱིམ་མི་མོ་དེ་དག་གི་གཡོ་མཚང་ནི་ངས་
ཀྱང་ཤེས་ཀྱི། དགེ་སློང་མ་འདི་དག་གི་གཡོ་མཚང་ནི་ངས་ཀྱང་མི་ཤེས་སོ་ཞེས་སྨྲས་པ་དང་སྦོམ་དགའ་མོས་སྨྲས་པ་སྐྱེ་དགུའི་བདག་མོ་ཆེན་མོ་ནི་ལྕི་བ་བརྒྱད་ཁས་བླངས་པ་ལས་བསྙེན་པར་རྫོགས་པ་ཡིན། ཨུཏྤ་ལའི་ཁ་དོག་མ་ནི་གྲོང་ཁྱེར་ཆེན་པོ་དྲུག་ཏུ་སྨད་འཚོང་མ་བྱེད་པ་ཡིན།
གཽ་ཏ་མ་རིད་དེ་མ་ནི་སྔོན་བུ་ཤ་ཟོས་པ་ཡིན་ནོ་ཞེས་དགེ་སློང་མ་དག་གི་གཡོ་མཚང་བསྟན་པ་དང་། ཕྱིས་དགེ་སློང་མ་དག་འཐབ་མོ་བྱུང་བའི་ཚེ་དེ་དག་གི་གཡོ་མཚང་སྨྲ་ཞིང་དེ་སྐད་ཟེར་བ་ལས་བཅས། ཡང་དགེ་སློང་མ་གང་བུད་མེད་གཏུམ་མོ་རབ་ཏུ་ཕྱུང་ནས་བསྙེན་པར་རྫོགས་པར་
བྱེད་ན་ལྟུང་བའོ། །དགེ་སློང་མས་བུད་མེད་གཏུམ་མོ་འཐབ་མོ་རྒོད་པར་ཤེས་བཞིན་དུ་རབ་ཏུ་ཕྱུང་ན་ལྟུང་བའོ། །དེ་ལྟར་མི་ཤེས་ན་ཉེས་པ་མེད་དོ། །ལྟུང་བ་བརྒྱ་རྩ་བཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་སོང་བ་ལས་བུད་
མེད་དང་ཁྱིམ་ཐབ་དང་བུ་དག་ཤི་བའི་མྱ་ངན་གྱིས་གཟིར་ཞིང་ངུ་བ་རབ་ཏུ་ཕྱུང་བ་ལས། དེ་རབ་ཏུ་ཕྱུང་ཡང་རྟག་ཏུ་ངུ་ཞིང་མྱ་ངན་བྱེད་པར་གྱུར་ཏེ། ཆུང་ངུ་ན་རྨི་ལམ་དུ་ཡང་སྟོན་ཅིག་ཅེས་ཟེར་རོ། །དེ་ལྟར་གྱུར་པ་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་མྱ་ངན་གྱིས་གཟིར་པའི་

བུད་མེད་རབ་ཏུ་བྱུང་ན་ལྟུང་བའོ། །དགེ་སློང་མས་བུད་མེད་མྱ་ངན་གྱིས་མནན་པ་མྱ་ངན་མ་སངས་པར་ཤེས་བཞིན་དུ་རབ་ཏུ་བྱུང་ན་ལྟུང་བའོ། །ལྟུང་བ་བརྒྱ་ཉི་ཤུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བསྙེན་པར་རྫོགས་པར་འདོད་པ་ལ་ལོ་གཉིས་ཀྱིས་
བར་དུ་ཁྲིམས་མ་ཕོག་ཀྱང་ལོ་གཉིས་མ་བསྲུངས་པར་ཐལ་བྱུང་བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་ལོ་གཉིས་སུ་ཆོས་དྲུག་དང་མཐུན་པའི་ཆོས་དྲུག་ལ་མ་བསླབས་པར་བསྙེན་པར་རྫོགས་པར་བྱེད་ན་ལྟུང་བའོ། །དགེ་སློང་མས་ཆོས་དྲུག་དང་མཐུན་པའི་ཆོས་དྲུག་ལ་མ་
བསླབས་པར་ཤེས་བཞིན་དུ་ཐལ་བྱུང་བསྙེན་པར་རྫོགས་པར་བྱེད་ན་ལྟུང་བའོ། །དེ་ལ་ཆོས་དྲུག་ཅེས་པ་ནི་གཅིག་པུ་ལམ་དུ་མི་འགྲོ་བ་དང་། གཅིག་པུ་ཆུ་མི་རྒལ་བ་དང་། སྐྱེས་པ་ལ་རེག་པར་མི་བྱ་བ་དང་། སྐྱེས་པ་དང་ཁྱིམ་གཅིག་གི་ནང་དུ་ཞག་ལོན་པར་མི་བྱ་བ་དང་། སྨྱན་མི་བྱ་བ་
དང་། གྲོགས་ཀྱི་ཁ་ན་མ་ཐོ་བ་ཕས་ཕམ་པའམ་ལྷག་མ་བྱུང་བ་མཐོང་ན་མི་བཅབ་བོ། །རྗེས་སུ་མཐུན་པའི་ཆོས་དྲུག་ནི་གསེར་དངུལ་ལ་རེག་པར་མི་བྱ་བ་དང་། གསང་བའི་སྤུ་མི་བྲེག་པ་དང་། ས་མི་བརྐོ་བ་དང་། རྩྭ་སྔོན་མོ་མི་གཅད་པ་དང་། བྱིན་ལེན་བྱ་བ་དང་། སྤངས་པའི་
ཁ་ཟས་མི་བཟའ་བའོ། །ལྟུང་བ་བརྒྱ་ཉི་ཤུ་གཅིག་པ་རྫོགས་སོ།། །།མདོར་བསྟན་པ་ནི། ཆོས་དྲུག་རྣམས་ལ་བསླབ་པ་དང་། །ཁྱིམ་ཐབ་ཀྱིས་ཀྱང་མ་བཏང་དང་། །གལ་ཏེ་བདག་ལ་གོས་བྱིན་དང་། །ཕྱི་ནས་ཁྱོད་ནི་མི་དགའ་དང་། །ལོ་རེ་བཞིན་དུ་མ་གནང་
དང་། །ཞག་གིས་ཆོད་པའི་དད་པ་དང་། །ཟླ་བ་ཕྱེད་ཅིང་གདམས་པ་དང་། །དགེ་སློང་མེད་པའི་གསོ་སྦྱིན་ནོ། །སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་མ་རྣམས་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལོ་གཉིས་བསླབས་ནས་བསྙེན་
པར་རྫོགས་པར་གྱིས་ཤིག་ཅེས་བཀའ་སྩལ་ན། སྦོམ་དགའ་མོའི་སློབ་མ་རྣམས་ལོ་གཉིས་སུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་བསླབས་ཀྱང་ད་དུང་བསྙེན་པར་རྫོགས་པར་བྱེད་དུ་མི་བཏུབ་པས་དོན་ཉུང་ངུ་བས་འཕྱ་བ་ལས་བཅས། ཡང་དགེ་སློང་མ་གང་ལོ་གཉིས་སུ་ཆོས་

དྲུག་དང་རྗེས་སུ་མཐུན་པའི་ཆོས་དྲུག་བསླབ་པར་ཤེས་ལ་བསྙེན་པར་རྫོགས་པར་མི་བྱེད་ན་ལྟུང་བར་འགྱུར་རོ། །དགེ་སློང་མས་བདག་ཉིད་ཀྱི་སློབ་མ་བར་ཁྲིམས་མནོས་ནས་ལོ་གཉིས་ལོན་པར་ཤེས་བཞིན་དུ་བསྙེན་པར་རྫོགས་པར་མི་བྱེད་ན་ལྟུང་བར་འགྱུར་རོ། །
སློབ་མ་དེ་ཉིད་ན་བར་གྱུར་ཏམ་བར་ཆད་བརྒྱད་གཅིག་བྱུང་ན་ཉེས་མེད་དོ། །ལྟུང་བ་བརྒྱ་ཉི་ཤུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་སོང་བ་ལས། ཁྱོ་ཤུག་གཉིས་ཤིག་འཐབ་པ་མཐོང་ནས། སྦོམ་དགའ་མོས་
དེའི་ཆུང་མ་ལ་ཁྱོད་རབ་ཏུ་བྱུང་ཤིག་ཅེས་བསྒོ་ནས་དེའི་ཁྱོ་མ་དད་བཞིན་དུ་རབ་ཏུ་བྱུང་བ་ལས་བཅས། ཡང་དགེ་སློང་མ་གང་ཁྱིམ་ཐབ་ཀྱིས་མ་བཏང་བར་ཤེས་བཞིན་དུ་བུད་མེད་རབ་ཏུ་འབྱིན་ན་ལྟུང་བའོ། །དགེ་སློང་མས་གཞན་གྱི་བུད་མེད་ཁྱིམ་ཐབ་ཀྱིས་མ་བཏང་བར་ཤེས་བཞིན་དུ་རབ་ཏུ་
འབྱིན་ན་ལྟུང་བའོ། །ཁྱིམ་ཐབ་རིང་པོར་སོང་སྟེ་ཐལ་བྱུང་མ་འཁོར་བའམ་བུད་མེད་རང་དབང་ཡོད་ན་ཉེས་མེད་དོ། །ལྟུང་བ་བརྒྱ་ཉི་ཤུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ལ་སློབ་མ་དག་གིས་བདག་ཅག་བསྙེན་པར་རྫོགས་པར་
བྱ་བར་གསོལ་ཞེས་བྱས་པ་དང་། སྦོམ་དགའ་མོས་སྨྲས་པ་དང་། ང་ལ་ཆོས་གོས་བྱིན་ཅིག་དང་གདོད་བསྙེན་པར་རྫོགས་པར་བྱའོ་ཞེས་ནས་དེ་དག་ཆོས་གོས་བྱིན་ནས་དེའི་འོག་ཏུ་གདོད་བསྙེན་པར་རྫོགས་པར་བྱས་པ་དང་དོན་ཉུང་ངུ་པས་འཕྱ་བ་ལས་བཅས། ཡང་དགེ་སློང་མ་
གང་བསྙེན་པར་རྫོགས་འདོད་པ་ལ་གལ་ཏེ་ང་ལ་ཆོས་གོས་བྱིན་ན་དེའི་འོག་ཏུ་ཁྱོད་བསྙེན་པར་རྫོགས་པར་བྱའོ་ཞེས་དེ་སྐད་ཟེར་ན་ལྟུང་བའོ། །དགེ་སློང་མས་སློབ་མ་བསྙེན་པར་རྫོགས་པར་འདོད་པ་ལ་རྔན་པ་ཆོས་གོས་དག་ལེན་ན་ལྟུང་བར་འགྱུར་རོ། །སློབ་མ་ཆོས་གོས་མང་ལ་སེར་སྣ་ཅན་
ཞིག་ན་སེར་སྣ་དང་དབྲལ་བའི་ཕྱིར་ཐབས་དེས་བསླངས་ན་ཉེས་མེད་དོ། །ལྟུང་བ་བརྒྱ་ཉི་ཤུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། གཽ་ཏ་མ་རིད་དེ་ཁྱིམ་པ་མོ་དག་ལ་ཆོས་བཤད་པའི་རྗེས་ལ་ཁྱོད་ཁྱིམ་གྱི་བྱ་བ་རྣམས་ཐོང་ཤིག་དང་ཕྱིས་རབ་ཏུ་བྱུང་ངོ་ཞེས་

སྨྲས་ནས། དེ་དག་གིས་ཁྱིམ་གྱི་བྱ་བ་རྣམས་བཏང་སྟེ། བདག་ཅག་རབ་ཏུ་དབྱུང་དུ་གསོལ་ཞེས་བྱས་པ་དང་། དེས་རབ་ཏུ་མ་ཕྱུང་ངོ་། །དེས་རབ་ཏུ་མ་ཕྱུང་བ་དང་ཁྱིམ་མི་མོ་རྣམས་འཕྱ་བར་གྱུར་ཏེ། བདག་ཅག་གིས་ཁྱིམ་གྱི་བྱ་བ་རྣམས་ཀྱང་བཏང་བ་ལས་རབ་ཏུ་མ་ཕྱུང་ངོ་ཞེས་འཕྱ་བ་ལས་བཅས།
ཡང་དགེ་སློང་མ་གང་ཁྱིམ་བདག་མོ་ཁྱིམ་སོ་ཐོང་ཤིག་དང་ཕྱིས་ཁྱོད་རབ་ཏུ་དབྱུང་བ་མི་དཀའོ་ཞེས་དེ་སྐད་སྨྲས་ལ། དེའི་འོག་ཏུ་རབ་ཏུ་མི་འབྱིན་ན་ལྟུང་བའོ། །དགེ་སློང་མས་ཁྱིམ་མི་མོ་ལ་ཁྱིམ་སོ་ཐོང་ཤིག་དང་ཕྱིས་རབ་ཏུ་དབྱུང་ངོ་ཞེས་སྨྲས་པ་ལས་དེའི་འོག་ཏུ་མ་ཕྱུང་ན་ཐམས་ཅད་དུ་འོང་ལྟུང་བར་འགྱུར་རོ། །
བར་ཆད་བརྒྱད་ལ་སོགས་པའི་གློ་བུར་བ་བྱུང་བ་ལ་ཉེས་མེད་དོ། །ལྟུང་བ་བརྒྱ་ཉི་ཤུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་བུད་མེད་མང་པོས་རབ་ཏུ་འབྱིན་པར་གསོལ་བ་ལ་དེ་དག་ཅིག་ཅར་རབ་ཏུ་འབྱིན་པར་མི་བྱེད་ཅིང་ཀུན་ཀྱང་ལོ་རེ་རེ་ཞིང་རེ་
རེ་བསྔོས་ལ། མིང་ཡང་ལོ་གཅིག་མ་ལོ་གཉིས་མ་ཞེས་བཏགས་ཤིང་འབོད་པ་དང་། དགེ་སློང་མ་གཞན་དག་གིས་ཁྱོད་ཅིའི་ཕྱིར་དེ་སྐད་འབོད་ཅེས་དྲིས་ན། དེ་དག་གི་མིང་ནི་ལོབས་དཀའ་སྟེ་དེ་སྐད་དུ་འབོད་ན་བདེའོ་ཞེས་དེ་སྐད་དུ་སྨྲས་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་
དགེ་སློང་མ་གང་ལོ་རེ་ཞིང་རབ་ཏུ་འབྱིན་ན་ལྟུང་བའོ། །དགེ་སློང་མས་བུད་མེད་རབ་ཏུ་འབྱུང་བར་གསོལ་བ་ལས་ཅིག་ཅར་དུ་རབ་ཏུ་མི་འབྱིན་ཞིང་ལོ་རེ་ཞིང་རེ་རེ་འབྱིན་པར་བྱེད་ན་ལྟུང་བའོ། །གཉིས་ཀ་མིང་མཐུན་པ་ལས་ལོ་གཅིག་མ་ཞེས་འབོད་པ་དང་ལོ་རེ་བཞིན་དུ་གསོལ་དུ་འོངས་པའི་ཐད་ཀར་
རབ་ཏུ་འབྱིན་པ་ལ་ཉེས་མེད་དོ། །ལྟུང་བ་བརྒྱ་ཉི་ཤུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས། སྦོམ་དགའ་མོ་ཟླ་བ་ཕྱེད་ཀྱི་ཚེ་དགེ་སློང་ཕ་ལ་ལུང་སྟོན་པར་གསོལ་བའི་དད་པ་བླངས་ནས་དགེ་སློང་མའི་གསོ་སྦྱིན་གྱི་དུས་སུ་དད་པ་མི་ལེན་པ་དང་། དགེ་སློང་མ་གཞན་
གྱིས་ཅིའི་ཕྱིར་དད་པ་མི་ལེན་ཅེས་དྲིས་པ་དང་། གསོ་སྦྱིན་སྔ་མའི་ཚེ་དད་པ་བླངས་པས་ཆོག་མོད་ཅེས་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཞིག་གིས་མཆོད་པའི་དད་པ་བྱིན་ན་ལྟུང་བའོ། །དགེ་སློང་མས་གསོ་སྦྱིན་གྱི་དུས་སུ་དད་པ་མི་ལེན་པར་གསོ་སྦྱིན་སྔ་མའི་

དད་པས་ཆོག་གོ་ཞེས་ཟེར་ན་ལྟུང་བར་འགྱུར་རོ། །ལྟུང་བ་བརྒྱ་ཉི་ཤུ་བདུན་པ་རྫོགས་སོ།། །།ནམ་བཅོམ་ལྡན་འདས་ཀྱིས་དགེ་སློང་མ་རྣམས་ལ་ཟླ་བ་ཕྱེད་ཕྱེད་ཅིང་དགེ་འདུན་པ་ལ་ཆོས་བསྟན་པ་ལུང་ནོས་ཤིག་ཅེས་གསུངས་པ་ལས། དགེ་སློང་མ་
བཅུ་གཉིས་སྡེ་རྣམས་བདག་ཅག་སྡེ་སྣོད་གསུམ་དང་ལྡན་པས་ལུང་ནོད་མི་དགོས་སོ་ཞེས་ལུང་མི་ནོད་པ་ལས་བཅས། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་གདམས་པ་དང་རྗེས་སུ་བསྟན་པ་མི་ཉན་ན་ལྟུང་བའོ། །དགེ་སློང་མས་ཟླ་བ་ཕྱེད་ཕྱེད་ཅིང་ཆོས་བཤད་པའི་རིགས་པ་ལས་ཆོས་བཤད་པའི་
ལུང་མི་ནོད་ན་ལྟུང་བར་འགྱུར་རོ། །གདམས་པ་ཞེས་བྱ་བ་ནི་མདོ་ཙམ་བསྟན་པའོ། །རྗེས་སུ་བསྟན་པ་ཞེས་བྱ་བ་ནི་རྒྱས་པར་འཆད་པའོ། །ལྟུང་བ་བརྒྱ་ཉི་ཤུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། །དགེ་སློང་མ་དག་ཅིག་ལྗོངས་
རྒྱུར་དོང་བ་ལས། དགེ་སློང་མེད་པའི་གནས་སུ་གསོ་སྦྱིན་བྱས་ཏེ། དོན་ཉུང་ངུ་བས་འཕྱ་བ་ལས་བཅས། ཡང་དགེ་སློང་མ་གང་དགེ་སློང་མེད་པར་གསོ་སྦྱིན་བྱེད་ན་ལྟུང་བའོ། །དགེ་སློང་མས་ཆེད་དུ་བསམས་ཏེ་དགེ་སློང་མེད་པའི་གནས་སུ་གསོ་སྦྱིན་བྱས་ན་ལྟུང་བར་འགྱུར་
རོ། །ལམ་རིང་པོར་འགྲོ་བའི་ཚེ་གསོ་སྦྱིན་གྱི་དུས་ལ་བབ་ན་དགེ་སློང་མེད་ནའང་ཉེས་མེད་དོ། །གང་ན་དགེ་སློང་གི་དགེ་འདུན་ཡོད་པ་ལ་སེམས་ཀྱིས་དམིགས་ཤིང་བྱིན་གྱིས་བརླབ་པར་བྱའོ། །ལྟུང་བ་བརྒྱ་ཉི་ཤུ་དགུ་པ་རྫོགས་སོ།། །།མདོར་བསྟན་པ་ནི། དགེ་སློང་མེད་པར་
དབྱར་མི་གནས། །དབྱར་གནས་ནས་ཀྱང་སྐབས་དབྱེ་དང་། །ཚོགས་ལའང་ཁང་ན་མི་སྨྲ་དང་། །མི་སྙན་ཟེར་དང་སེར་སྣ་ལྔ། །སྤངས་ནས་བཟའ་བར་མི་བྱ་དང་། །རྒྱུད་ཀྱང་གཞག་པར་མི་བྱའོ། །སྟོན་པ་མཉན་དུ་ཡོད་པ་ན་དགེ་སློང་མ་དག་ཅིག་དགེ་སློང་མེད་པའི་གཙུག་ལག་ཁང་
དུ་ཚུལ་དུ་ཞུགས་པ་ལས་བཅས། ཡང་དགེ་སློང་མ་གང་དགེ་སློང་མེད་པའི་གཙུག་ལག་ཁང་དུ་དབྱར་གནས་ཤིང་ཚུལ་དུ་འཇུག་ན་ལྟུང་བའོ། །དགེ་སློང་མ་དབྱར་ཚུལ་དུ་འཇུག་པའི་ཚེ་དགེ་སློང་པ་ལ་བརྟེན་ནས་ལུང་མ་ནོས་ཤིང་ཚུལ་དུ་འཇུག་དགོས་པ་ལས། ཆེད་དུ་དགེ་སློང་ཕ་མེད་པའི་

གནས་སུ་སོང་སྟེ། དགེ་སློང་མ་འབའ་ཞིག་ཚུལ་དུ་འཇུག་པར་བྱེད་ན་ལྟུང་བར་འགྱུར་རོ། །ཚུལ་དུ་འཇུག་པའི་ཐད་ཀར་དགེ་སློང་ཐམས་ཅད་བབས་སམ་ཤི་བར་གྱུར་ན་ཉེས་མེད་དོ། །ལྟུང་བ་བརྒྱ་སུམ་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་
ཀྱིས་བཀའ་སྩལ་པ། དགེ་སློང་མ་ཚུལ་ནས་བྱུང་བའི་ཚེ་དགེ་འདུན་སྡེ་གཉིས་ལ་མཐོང་བ་དང་ཐོས་པ་དང་དོགས་པ་གསུམ་གྱི་སྒོ་ནས་གླེང་བ་གསོལ་ཅིག་ཅེས་བཀའ་སྩལ་པ་ལས། ཕྱིས་སྦོམ་དགའ་མོ་ཚུལ་ནས་བྱུང་བའི་ཚེ་དགེ་འདུན་གཉིས་ཀ་ལ་གླེང་བ་མི་གསོལ་པ་ལས་བཅས།
ཡང་དགེ་སློང་མ་གང་དབྱར་གནས་ནས་དགེ་འདུན་གཉི་ག་ལས་གནས་གསུམ་པོ་དག་གི་སྐབས་མི་འབྱེད་ན་ལྟུང་བའོ། །ཇི་ཙམ་དུ་དགེ་སློང་མས་ཚུལ་ནས་འབྱུང་བའི་ཚེ་དགེ་འདུན་སྡེ་གཉིས་ལས་མཐོང་བ་དང་། ཐོས་པ་དང་། དོགས་པ་གསུམ་གྱི་སྒོ་ནས་གླེང་བར་མི་གསོལ་ཞིང་། དགེ་
སློང་མ་ཉི་ཚེ་ཚུལ་ལས་འབྱུང་བར་བྱེད་ན་ཀུན་ལ་ལྟུང་བར་འགྱུར་རོ། །ཉེས་མེད་པ་ནི་གོང་མ་དང་འདྲའོ། །གོང་མ་དང་གཉི་ག་ལའང་ལྕི་བའི་ཆོས་སུ་གཏོགས་སོ། །ལྟུང་བ་བརྒྱ་སུམ་ཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་དགེ་སློང་
མའི་དགེ་འདུན་ལ་ཚིག་མི་སྙན་པ་སྣ་ཚོགས་ཀྱིས་བསྡིགས་པར་བྱེད་པ་དང་། དོན་ཉུང་ངུ་བས་འཕྱས་པ་ལས་བཅས། ཡང་དགེ་སློང་མ་གང་ཚོགས་ལ་ངན་དུ་ཟེར་ན་ལྟུང་བའོ། །དགེ་སློང་མས་ཆེད་དུ་བསམས་ཏེ་དགེ་འདུན་འདུས་པའི་ཚོགས་ལ་ཚིག་ངན་པ་སྣ་ཚོགས་ཀྱིས་སྐྲག་
པའམ་འཇིགས་པར་བྱ་བའི་ཕྱིར་བསྡིགས་ན་ལྟུང་བའོ། །དགེ་སློང་མ་དེ་ཐམས་ཅད་ཆོས་མ་ཡིན་པ་ལ་ཕྱོགས་པར་གྱུར་ཏེ། གཏོང་དུ་མི་བཏུབ་པ་ལས་བསྡིགས་པས་ནི་ཉེས་མེད་དོ། །ལྟུང་བ་བརྒྱ་སུམ་ཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་
དགའ་མོ་དག་དགེ་འདུན་མའི་ཚོགས་ལ་མྱ་ངན་གྱི་ཚིག་སྨྲ་བ་ལས་དོན་ཉུང་ངུ་བས་འཕྱ་བ་ལས་བཅས། ཡང་དགེ་སློང་མ་གང་ཚོགས་ལ་མི་སྙན་པར་ཟེར་ན་ལྟུང་བའོ། །དགེ་སློང་མས་དགེ་འདུན་མའི་ཚོགས་ལ་མྱ་ངན་གྱི་ཚིག་ཏུ་སྨྲ་བ་ལ་སོགས་པ་ནི་སྦྱར་མ་འདི་ཞེས་བྱ་བ་ལ་

སོགས་ཏེ། མྱ་ངན་གྱི་ཚིག་ཏུ་འགྱུར་རོ་ཅོག་གང་སྨྲས་ཀྱང་ལྟུང་བའོ། །ལྟུང་བ་བརྒྱ་སུམ་ཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་དག་ལྗོངས་རྒྱུ་བ་ལས་དེ་དག་གིས་ཁྱིམ་བདག་དག་ལ་སྐྱེ་དགུའི་བདག་མོ་ལ་སོགས་
པ་དགྲ་བཅོམ་པ་དག་གི་ཡོན་ཏན་བརྗོད་དེ། སྐྱེ་དགུའི་བདག་མོ་ཆེན་མོ་ནི་བཅོམ་ལྡན་འདས་ཀྱིས་ཉན་ཐོས་མའི་ནང་ན་མཆོག་གནས་བརྟན་རྒྱལ་མོ་ལྟ་བུར་གསུངས། ཨུཏྤ་ལའི་མདོག་ནི་ཐོས་པ་འཛིན་པའི་མཆོག་ཏུ་གསུངས། ཆོས་སྦྱིན་མ་ནི་མདོ་སྡེ་རྣམ་པར་འཛིན་པའི་ནང་ན་མཆོག་ཏུ་
གསུངས། གཽ་ཏ་མ་རིད་དེ་མ་ནི་འདུལ་བ་འཛིན་པའི་མཆོག་ཏུ་གསུངས་ཏེ། དེ་ལ་སོགས་པའི་ཀུན་གྱི་ཡོན་ཏན་བསྔགས་པ་ལས། སྦོམ་དགའ་མོས་ཐོས་པར་གྱུར་པ་དང་ཕྲག་དོག་སྐྱེས་ནས་དེ་དག་དེ་མ་ཡིན་ཏེ། སྐྱེ་དགུའི་བདག་མོ་ནི་ལྕི་བའི་ཆོས་བརྒྱད་ཁས་བླངས་པ་ལས་རབ་ཏུ་
བྱུང་བ་ཡིན། ཨུཏྤ་ལའི་ཁ་དོག་ནི་གྲོང་ཁྱེར་ཆེན་པོ་དྲུག་ཏུ་སྨད་འཚོང་བར་བྱེད་པ་ཡིན། ཆོས་སྦྱིན་མ་ནི་འཕྲིན་གྱིས་རབ་ཏུ་བྱུང་བ་ཡིན། གཽ་ཏ་མ་རིད་དེ་མ་ནི་བུ་ཤ་ཟོས་པ་ཡིན་ནོ་ཞེས་བསྔགས་པ་ལས་སེར་སྣ་བྱེད་ཅིང་མི་སྙན་པར་བསྒྲགས་པ་ལས། ཁྱིམ་བདག་གིས་འཕྱ་བ་ལས་
བཅས། ཡང་དགེ་སློང་མ་གང་བསྔགས་པ་ལ་སེར་སྣ་བྱེད་ན་ལྟུང་བའོ། །དགེ་སློང་མས་དགེ་སློང་མ་གཞན་གྱི་ཡོན་ཏན་བསྔགས་པ་ཐོས་ན་ཕྲག་དོག་གི་སེམས་ཀྱིས་དེ་ལ་མི་སྙན་པར་སྒྲོགས་ན་ལྟུང་བར་འགྱུར་རོ། །ལྟུང་བ་བརྒྱ་སུམ་ཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་
པ་ན་སྟེ། དགེ་སློང་མ་སྦོམ་དགའ་མོ་གྲོང་མི་དག་ཅིག་ལ་ཆོས་བཤད་ནས་དེ་དག་དད་པར་གྱུར་པ་དང་། ཕྱིས་དགེ་སློང་མ་གཞན་དག་གྲོང་དེར་བསོད་སྙོམས་ལ་འགྲོ་བ་དང་། དེ་ལ་འགོག་པར་བྱེད་དེ། གྲོང་འདི་དག་ང་ཉིད་ཀྱིས་དད་པར་བྱས་པ་ཡིན་པས་ཁྱེད་སུ་ཡང་དེར་མ་འདོང་ཤིག་
ཅེས་འགོག་པ་ལས་བཅས། ཡང་དགེ་སློང་མ་གང་ཁྱིམ་ལ་སེར་སྣ་བྱེད་ན་ལྟུང་བའོ། །དགེ་སློང་མས་དགེ་སློང་གཞན་བསོད་སྙོམས་ལ་འཇུག་པའི་ཚེ། གྲོང་ལ་སེར་སྣ་བྱེད་ཅིང་གཞན་ལ་འགོག་པར་བྱེད་ན་ལྟུང་བའོ། །དགེ་སློང་མ་སྡིག་ཅན་དུ་གྱུར་པས་གྲོང་མི་དེ་དག་སྔར་བདག་

གིས་དད་པར་བྱས་པ་མི་དད་པར་འགྱུར་གྱིས་དོགས་པ་ལ་ཉེས་མེད་དོ། །ལྟུང་བ་བརྒྱ་སུམ་ཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་གནས་ཁང་མང་དུ་བརྩིགས་ཏེ། དགེ་སློང་མ་གསར་དུ་འོངས་པ་གནས་ཁང་མེད་པ་དག་ལ་འང་བརྙན་པོར་མི་སྟེར་
བ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་གནས་ཁང་ལ་སེར་སྣ་བྱེད་ན་ལྟུང་བའོ། །དགེ་སློང་མ་གནས་ཁང་ལ་སེར་སྣ་བྱེད་ཅིང་ཚངས་པ་མཚུངས་པར་སྤྱོད་པ་གསར་དུ་འོངས་པའམ། གནས་མེད་པ་དག་ལ་གནས་འཆུགས་པར་མི་བྱེད་ན་ལྟུང་བར་འགྱུར་རོ། །གནས་ཁང་
དོག་པར་གྱུར་ན་གདིང་བ་ཙམ་གྱི་ཚད་དུ་ཡང་ངས་གཞི་བགོ་བར་བྱའོ། །དེ་ལྟར་མ་བྱས་ན་ཡང་ལྟུང་བར་འགྱུར་རོ། །ལྟུང་བ་བརྒྱ་སུམ་ཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་གཞན་གྱིས་སྔར་བསོད་སྙོམས་བསླངས་ཀྱིས་དོགས་པའི་ཕྱིར་ནང་པར་སྔ་རབ་ཏུ་
བསོད་སྙོམས་ལ་འོངས་པ་ལས། བྲམ་ཟེ་དག་བཀྲ་ཤིས་བྱས་པའི་སྒོར་ཕྱིན་པ་དང་དགེ་སྦྱོང་མ་མགོ་རེག་མ་འདི་དག་མཐོང་བས་ལྟས་ངན་ཏོ་ཞེས་ཤིན་ཏུ་བརྡེགས་ཏེ། མིག་དག་ཀྱང་སྐྲངས་ནས་སླར་གནས་སུ་ཕྱིན་པ་དང་དགེ་སློང་མ་དག་གིས་ཅིའི་ཕྱིར་མིག་སྐྲངས་ཞེས་དྲིས་པ་དང་དེས་ཀྱང་ཞིབ་ཏུ་
སྨྲས་སོ། །དེ་ལྟ་བུར་གྱུར་པ་དོན་ཉུང་ངུ་པས་འཕྱ་བ་ལས་བཅས། ཡང་དགེ་སློང་མ་གང་རྙེད་པ་ལ་སེར་སྣ་བྱེད་ན་ལྟུང་བའོ། །རྙེད་པ་ཞེས་བྱ་བ་ལ་རྣམ་པ་གཉིས་ཏེ། ཟས་ཀྱི་རྙེད་པ་དང་། གོས་ཀྱི་རྙེད་པའོ། །སྐབས་འདིར་ཟས་ཀྱི་རྙེད་པ་དང་སྦྱར་རོ། །དགེ་སློང་མས་ཟས་ཀྱི་རྙེད་པ་ལ་ཕྲག་
དོག་བྱ་བའི་ཕྱིར་དགེ་སློང་མ་གཞན་དག་བསོད་སྙོམས་ལ་འདོང་བ་ལ་ངས་མ་བསླངས་ཀྱི་བར་དུ་ཁྱེད་མ་སློང་ཤིག་ཅེས་བསྒོ་ན་འང་ལྟུང་བར་འགྱུར་རོ། །གཞན་པས་སྔར་སོང་སྟེ་བདག་ཉིད་ཀྱིས་བསླངས་ཏེ་ཟས་གྲུབ་ན་འང་ལྟུང་བའོ། །ལྟུང་བ་བརྒྱ་སུམ་ཅུ་བདུན་པ་རྫོགས་སོ།། །།སྟོན་པ་
མཉན་དུ་ཡོད་པ་ན་སྟེ། སྦོམ་དགའ་མོས་སློབ་མ་དང་ཉེ་གནས་དག་ལ་ཆོས་མི་སློབ་ཅིང་རྒུན་འབྲུམ་དང་བལ་པོ་སེའུ་དག་མཉེད་ཅིང་ལས་ངན་པ་མང་དུ་བྱེད་དུ་བཅུག་པ་ལས་སློབ་མ་དག་གིས་ཆོས་བཤད་པར་གསོལ་བ་དང་། སྦོམ་དགའ་མོས་སྨྲས་པ་ངས་འཕགས་པ་དྲུག་སྡེ་པ་རྣམས་

ལ་ཆོས་ཀྱི་ཕྱིར་བལ་པོ་སེའུ་དང་རྒུན་འབྲུ་དག་མཉེད་མཉེད་དེ་ནི་ལག་པ་ཆུ་བུར་གྱིས་གང་། ཕྱག་འཚལ་འཚལ་ནས་ཀླད་པའི་སྐྲ་བྱི་ཞིང་པུས་མོ་འང་རྡོལ། ཐེ་ཚོམ་འདྲི་འདྲི་སྟེ་ཁ་ཆུ་བུར་གྱིས་གང་སྟེ། དེ་ལྟ་བུ་དཀའ་བ་མང་པོ་སྤྱད་པས་ཆོས་ཐོས་པ་དེ་དང་ཁྱེད་ཀྱིས་
ལས་མང་པོ་མ་བྱས་པར་ཅིའི་ཕྱིར་ཆོས་བསྟན་ཞེས་ཟེར་བ་ལས་བཅས། ཡང་དགེ་སློང་མ་གང་ཆོས་ལ་སེར་སྣ་བྱེད་ན་ལྟུང་བའོ། །དགེ་སློང་མས་སློབ་མ་དང་ཉེ་གནས་དག་ཆོས་འདྲིའམ་གཞན་དག་ཆོས་འདྲི་ཡང་རུང་སྟེ་ཕྲག་དོག་དང་སེར་སྣའི་བསམ་པས་མི་སྟོན་ན་ལྟུང་བར་འགྱུར་རོ། །
བདག་ལ་ཀླན་ཀ་ཚོལ་ལམ་ཤེས་སམ་མི་ཤེས་བགམ་པའི་ཕྱིར་འདྲི་བ་ལ་མ་བསྟན་ན་འང་ཉེས་མེད་དོ། །ལྟུང་བ་བརྒྱ་སུམ་ཅུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་བཅུ་གཉིས་སྡེ་རྣམས་ཁ་ཟས་བྱིན་ལེན་བྱས་ནས་མདུན་དུ་བཞག་སྟེ་ཟ་བའི་ཚེ།
ཟ་བཞིན་དུ་ལངས་ཤིང་ལས་བྱེད། དེ་ནས་ཡང་སླར་འདུག་ཅིང་ཟ་བ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཟས་ཟོས་ཏེ་སྤངས་ནས་ཟོས་ན་ལྟུང་བའོ། །ལྷག་མར་མ་བྱས་པའི་ཟས་ཟོས་ནའང་ལྟུང་བར་འགྱུར་རོ་ཞེས་གོང་དུ་བཤད་པ་དང་ཁྱད་པར་ཅི་ཡོད་ཅེ་ན།
གོང་མ་ནི་སྤྱོད་ལམ་ལས་ཀྱང་ཉམས་སེམས་ཀྱི་རྒྱུད་ཀྱིས་ཀྱང་མི་བཟའ་བར་བཅད་ནས་ཁ་ཟས་ཞིག་རྙེད་དེ་ཟ་བར་འདོད་ན་ལྷག་མར་གྱིས་ཏེ་ཟོ་ཤིག་ཅེས་གསུངས། འདིར་ནི་ཁ་ཟས་ཟ་བའི་ཚེ་སེམས་ཀྱི་རྒྱུད་ཀྱིས་མ་བཅད་པར་འཕྲལ་དུ་སྤྱོད་ལམ་ལས་ཉམས་པར་བྱེད་ཅིང་། ཡང་ཟ་ཡང་
འདུག་པར་བྱེད་པ་ལས་ལྟུང་བར་འགྱུར་རོ། །ལྟུང་བ་བརྒྱ་སུམ་ཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་སྔ་དྲོའི་དུས་སུ་བསོད་སྙོམས་ལ་ཞུགས་པ་དང་ཁྱིམ་བདག་མོ་ཞིག་གི་སྒོར་བསོད་སྙོམས་བསླངས་པ་ལས། ཁྱིམ་བདག་
མོ་དེ་ངུ་བ་མཐོང་ནས་སྦོམ་དགའ་མོས་ཅིའི་ཕྱིར་ངུ་ཞེས་དྲིས་པ་དང་། དེས་བདག་གི་བུ་ཐོན་བུ་བྱུང་བས་བུའི་བྱ་བ་དག་མ་འཚལ་ཏེ་ཁྱོད་ཀྱིས་མཁྱེན་ནམ་ཞེས་དྲིས་པ་དང་། སྦོམ་དགའ་མོས་སྨྲས་པ་ཁྱོད་ནི་ཁབ་ཁྲིན་དང་འདྲ་སྟེ་ལས་གཅིག་པུ་བྱེད་ཤེས་པར་འགྱུར་གྱི། ངས་ནི་ལས་ཀྱི་གནས་

དང་བཟོའི་གནས་ཐམས་ཅད་ཤེས་ཀྱི་ང་ལ་བསོད་སྙོམས་བྱིན་ཅིག །ངའི་མཁན་མོ་བྱིན་ནམ་ཚངས་པ་མཚུངས་པར་སྤྱོད་པ་དང་མཛའ་མོའི་བསོད་སྙོམས་ཀྱང་བྱིན་ཅིག །ཁྱོད་ཀྱི་བུའི་བྱ་བ་ངས་བྱའོ་ཞེས་སྨྲས་ནས་ཁྱིམ་བདག་མོ་དེས་ཀྱང་བསོད་སྙོམས་མང་དུ་བྱིན་ནོ། །དེ་ནས་སྦོམ་དགའ་
མོས་བུ་དེ་ལེགས་པར་བཀྲུས་ལེགས་པར་ཕྱིས་ནས། མཚོག་མ་སྲ་བར་བྱ་བའི་ཕྱིར་ས་ལྕི་བའི་འཇི་བས་བསྐུས། གནོད་པ་བསྲུང་བའི་ཕྱིར་སྒོ་ཀའི་ས་ལས་དཔྲལ་བར་ཐིག་ལེ་གསུམ་བྱས་ནས་བསོད་སྙོམས་མང་དུ་ཁྱེར་ཏེ་སོང་ངོ་། །དེའི་འོག་ཏུ་དེའི་ཁྱིམ་ཐབ་ཀྱང་འོངས་ནས་བུའི་
བྱ་བ་བྱས་པ་མཐོང་ནས་ཆུང་མ་ལ་སྨྲས་པ། བཟང་མོ་བུའི་བྱ་བ་བདག་ལེགས་པར་བྱས་པ་ནི་ལེགས་སོ་ལེགས་སོ་ཞེས་སྨྲས་པ་དང་། དེས་སྨྲས་པ་བདག་གིས་ནི་མ་འཚལ་གྱི་སྦོམ་དགའ་མོས་བགྱིས་སོ་ཞེས་སྨྲས་པ་དང་། དེས་སྨྲས་པ་ཕྱིས་ཀྱང་དགེ་སློང་མ་དག་འོངས་པ་དང་བྱེད་དུ་
ཆུག་ཤིག་ཅེས་སྨྲས་སོ། །དུས་གཞན་ཞིག་ན་སྐྱེ་དགུའི་བདག་མོ་ཆེན་མོ་བསོད་སྙོམས་ལ་ཞུགས་པ་ལས་ཁྱིམ་དེའི་སྒོར་ཕྱིན་ནོ། །ཁྱིམ་བདག་མོ་དེས་སྨྲས་པ། འཕགས་མ་བུའི་བྱ་བ་བྱོས་ཤིག་ཅེས་སྨྲས་པ་དང་། སྐྱེ་དགུའི་བདག་མོས་སྨྲས་པ་སྔོན་བྱང་ཆུབ་སེམས་དཔའ་ལྷུམས་
ནས་བྱུང་བ་མ་གཏོགས་པར་གཞན་གྱི་བུའི་བྱ་བ་བྱེད་ངས་མ་མྱོང་བའི་སྟེང་དུ། དགེ་སློང་མས་ཁྱོད་ཀྱི་བུའི་བྱ་བ་བྱས་ན་ནི་ཁྱོད་ལ་བསོད་ནམས་མ་ཡིན་པ་མང་དུ་འཕེལ་ལོ་ཞེས་སྨྲས་པ་དང་། ཁྱིམ་བདག་མོ་དེས་སྔོན་སྦོམ་དགའ་མོས་བུའི་བྱ་བ་བྱེད་པ་དག་ཞིབ་ཏུ་སྨྲས་པ་དང་། ཁྱིམ་
བདག་མོ་དེས་ཐོས་ནས་དགེ་སློང་མ་རྣམས་འཕྱ་ཞིང་མི་སྙན་པ་ཟེར་བ་ལས་བཅས། ཡང་དགེ་སློང་མ་གང་རྒྱུད་འཇོག་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །རྒྱུད་ཅེས་བྱ་བ་ནི་བུས་པ་ཆུང་ངུ་ལ་བྱ་སྟེ་རིགས་ཀྱི་རྒྱུད་ལ་བྱའོ། །འཇོག་ཅེས་བྱ་བ་ནི་འཁྲུ་བ་
དང་འཕྱི་བ་དང་། གོས་བསྐོན་པ་དང་། ཟས་བསྙོད་ཅིང་རྩེད་མོ་ལ་སོགས་པའོ། །དགེ་སློང་མས་གཞན་གྱི་བུ་ཆུང་ངུ་འཁྲུ་བར་བྱེད་དམ་འཕྱི་བར་བྱེད་དམ་གོས་བསྐོན་ནམ་ཟས་བསྙོད་ན་ཐམས་ཅད་དུ་ལྟུང་བར་འགྱུར་རོ། །གཉེན་དུ་འོངས་པ་ལ་ཉེས་མེད་དོ། །ལྟུང་བ་བརྒྱ་བཞི་བཅུ་

པ་རྫོགས་སོ།། །།མདོར་བསྟན་པ་ནི། ཁྲུས་རས་བཅང་བར་བྱ་བ་དང་། །ཆོས་གོས་བཀྲུ་བར་བྱ་བ་དང་། །སྦྱར་མ་དང་ནི་བརྗེ་བ་དང་། །དགེ་སྦྱོང་ཆོས་གོས་སྦྱིན་པ་དང་། །སྨེ་གབ་དང་ནི་ཚོགས་ཀྱི་གོས། །དབུལ་པོ་ཡི་རང་བྱེད་པ་དང་། །གཏན་པ་
དབྱུང་བར་བྱ་བ་དང་། །ཆོས་གོས་བགོ་བཤའ་བྱ་བའོ། །སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ཆུ་བོ་ཨ་ཙིར་བ་ར་ཏའི་ནང་ན་ཁྱིམ་མི་མོ་དག་དང་ལྷན་ཅིག་ཁྲུས་བྱེད་པའི་ཚེ་དེ་དག་ལ་རྨོངས་བསྟན་ནས་ངའི་སྤུ་ཕྱོགས་གཅིག་ཏུ་འཁྱིལ་ཞིང་ལྕང་ལོ་ཅན་དུ་འདུག་པ་ལྟོས་ཞེས་དེ་
དག་ལ་ངོམ་པ་དང་། དགེ་སློང་མ་གཞན་དག་འཕྱ་བར་གྱུར་པ་ལས་བཀའ་སྩལ་པ། ཕྱིན་ཆད་ཁྲུས་བྱེད་ན་ཁྲུས་རས་གྱོན་ལ་ཁྲུས་གྱིས་ཤིག་ཅེས་བཅས། ཡང་དགེ་སློང་མ་གང་ཁྲུས་རས་མི་འཆང་ན་ལྟུང་བའོ། དགེ་སློང་མས་ཁྲུས་རས་མེད་པར་ཁྲུས་བྱེད་ན་འབབ་ཆུའམ་
ལྟེང་ཀའི་ནང་ནའང་རུང་སྟེ། དང་པོར་ཆུར་ཞུགས་ནས་ལྟེ་བར་མ་ཕྱིན་གྱི་བར་དུ་ནི་ཉེས་བྱས། ལྟེ་བ་འདས་ན་ལྟུང་བའོ། །ཆུ་བཅུས་པ་ཞིག་ལ་ཁྲུས་བྱེད་ནའང་དང་པོ་མགོ་ནས་ཡས་བླུགས་ནས་ལྟེ་བར་མ་ཕྱིན་གྱི་བར་དུ་ཉེས་བྱས། ལྟེ་བ་ལས་བླངས་འདས་ན་ལྟུང་བར་འགྱུར་རོ། །གཅིག་
པུར་ཁང་པ་དབེན་པ་ན་ཁྲུས་བྱེད་ན་ཁྲུས་རས་མེད་ནའང་ཉེས་མེད་དོ། །ལྟུང་བ་བརྒྱ་བཞི་བཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ཤམ་ཐབས་ཁྲག་གིས་ཕོག་པ་ཁྱེར་ནས་ཁྲུས་མཁན་གྱི་ནང་དུ་སོང་སྟེ། བཞིན་བཟངས་ངའི་
འདི་ཁྲུས་ཏེ་བྱིན་ཅིག་ཅེས་སྨྲས་པ་དང་། དེས་སྨྲས་པ་གོས་ཕལ་འཁྲུ་བའི་ནང་དུ་ཆུག་ཤིག་ཅེས་བསྒོ་བ་དང་སྦོམ་དགའ་མོས་ཀྱང་དེར་བཅུག་གོ། །དེའི་འོག་ཏུ་ཁྲུས་མཁན་དེས་གོས་བཀྲུ་བར་བཤམས་པ་དང་། སྦོམ་དགའ་མོའི་ཤམ་ཐབས་དེ་ཁྲག་གིས་ཕོག་པ་མཐོང་ནས་
འདིས་ངའི་གོས་ཐམས་ཅད་མི་གཙང་བས་འཕགས་ཏེ་མ་རུང་བར་གྱུར་ཏོ་ཞེས་དེ་ཡང་ཁྲོས་པར་གྱུར་པ་ལས་བཅས། ཡང་དགེ་སློང་མ་གང་བཙོ་བླག་མཁན་ལ་ཆོས་གོས་འཁྲུར་བཅོལ་ན་ལྟུང་བའོ། །དགེ་སློང་མས་ཁྲུས་མཁན་ལ་གོས་རྙིང་པ་འཁྲུར་བཅོལ་ན་ཐམས་ཅད་དུ་ལྟུང་བར་འགྱུར་

རོ། །ལྟུང་བ་བརྒྱ་བཞི་བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྟེ་སྤང་བའི་སྐབས་ན་བཤད་པ་དང་མཐུན། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་ཆོས་གོས་བྱིན་གྱིས་མི་རློབ་ན་ལྟུང་བའོ། །སྡོམ་གྱི་ཚིགས་སུ་བཅད་པ་ལས་ཀྱང་མི་
འབྱུང་བས་ལྷག་མ་འདྲ་ནས་ལྟུང་བའི་གྲངས་སུ་མ་སྩལ་ཏོ། །སྟོན་པ་མཉན་དུ་ཡོད་པ་ན་སྟེ། ཁྱིམ་བདག་ཅིག་ལ་བུ་མིང་སྲིང་གཉིས་བདོག་པ་དང་། ཁྱིམ་བདག་དེ་དུས་ལས་འདས་པའི་འོག་ཏུ་བུ་མིང་སྲིང་གཉིས་མ་དང་གསུམ་རབ་ཏུ་བྱུང་ངོ་། །དེའི་མིང་པོའི་མིང་ནི་མོས་པ་ཅན་
ཞེས་བྱ། སྲིང་མོའི་མིང་ནི་མོས་མ་ཅན་ཞེས་བྱ་སྟེ། དུས་ཕྱི་ཞིག་ན་མོས་པ་ཅན་དེ་སྦྱར་མ་བཟང་པོ་ཅིག་གྱོན་ཏེ། དགེ་སློང་མའི་དབྱར་མོ་ཁང་དུ་འོངས་པ་དང་། མོས་མ་ཅན་གྱིས་ཆོས་གོས་སྦྱར་མ་དེ་བླངས་ཏེ་ཁྱེར་ནས་བདག་གི་རྙིང་པ་ནི་མོས་པ་ཅན་ལ་བྱིན་ནོ། །མོས་པ་ཅན་
གྱིས་ཆོས་གོས་རྙིང་པ་དེ་ཡང་ལེགས་པར་བཀྲུས། ལེགས་པར་ཁ་དོག་བསྒྱུར་ཏེ་བཟང་པོར་བྱས་ནས་དབྱར་མོ་ཁང་དུ་སོང་བ་དང་། མོས་མ་ཅན་གྱིས་མཐོང་ནས་སྨྲས་པ། ཁྱོད་བདག་གི་ཆོས་གོས་སླར་ཁྱེར་ལ་ང་བདག་གི་བྱིན་ཅིག་མོས་སྨྲས་པ་དང་། དེས་ཀྱང་བྱིན་ནོ། །
དགེ་སློང་མ་གཞན་དག་གིས་མོས་མ་ཅན་ལ་སྨྲས་པ། ཁྱོད་གཙང་མའི་རིས་ཀྱི་ལྷ་བཞིན་དུ་རྟག་ཏུ་གོས་བཟང་པོ་ཤེ་དག་གིས་ཆ་བར་བྱེད་ན་ག་ལས་རྙེད་ཅེས་སྨྲས་ན། དེས་ཀྱང་ཞིབ་ཏུ་སྨྲས་ནས། དགེ་སློང་མ་དེ་དག་འཕྱ་བ་ལས་བཅས། ཡང་དགེ་སློང་མ་གང་འཁོར་གྱི་གཙོ་
བོ་དང་སྦྱར་མ་རྗེ་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་མོས་མ་ཅན་ལྟ་བུའོ། །འཁོར་གྱི་གཙོ་བོ་ཞེས་བྱ་བ་ནི་དགེ་སློང་ཕའོ། །སྦྱར་མ་ཞེས་བྱ་བ་ནི་ཆོས་གོས་གསུམ་གང་ཡང་རུང་སྟེ་བརྗེས་ན་ལྟུང་བའོ། །ལྟུང་བ་བརྒྱ་བཞི་བཅུ་གསུམ་པ་རྫོགས་སོ།། །།སྟོན་པ་རྒྱལ་པོའི་ཁབ་ན་སྟེ། ཀླུ་
རི་བོ་དང་། སྐྱས་ཀྱི་དུས་སྟོན་བྱེད་པའི་ཚེ། ལྷོ་ཕྱོགས་ནས་གར་མཁན་དག་ཅིག་ལྷགས་ཏེ། དྲུག་སྡེ་པོའི་ཚུལ་དུ་གར་བྱ་བའི་ཕྱིར་སྦོམ་དགའ་མོའི་གན་དུ་སོང་སྟེ། ཆོས་གོས་རྣམས་བརྙས་ནས་སྦོམ་དགའ་མོས་གླ་མང་དུ་བླངས་སོ། །དེ་ནས་གར་མཁན་དེ་དག་གིས་

ཆོས་གོས་བགོས་ཤིང་དྲུག་སྡེའི་ཚུལ་དུ་གར་བྱས་པ་དང་། དྲུག་སྡེ་པོ་དག་ཁྲོས་ནས་སྦོམ་དགའ་མོ་ལ་སོགས་པ་བཅུ་གཉིས་སྡེ་དག་བརྡེགས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མས་དགེ་སྦྱོང་གི་གོས་ཁྱིམ་པ་ལ་འཚོང་ན་
ལྟུང་བའོ་ཞེས་བཅས། ཡང་དགེ་སློང་མ་གང་དགེ་སྦྱོང་གི་གོས་ཁྱིམ་པ་ལ་བྱིན་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སྦྱོང་གི་གོས་ཞེས་བྱ་བ་ནི་ཆོས་གོས་ལྔ་ལས་གང་ཡང་རུང་བའོ། །ཁྱིམ་པ་ལ་འཚོང་ཞེས་བྱ་བ་ནི། ཟས་སམ་གོས་ཀྱི་རིན་དུ་འཚོང་
བ་སྟེ། དགེ་སློང་མས་འཚོང་ན་ཐམས་ཅད་དུ་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཀའ་སྩལ་པ། དགེ་སློང་མས་སྨེ་གབ་ཆོངས་ཤིག་ཅེས་བཀའ་སྩལ་པ་དང་། སྦོམ་དགའ་མོས་སྔ་དྲོ་བསོད་སྙོམས་ལ་ཞུགས་
པའི་ཚེ་ཁྲག་གིས་བྱིན་པ་ལ་ཕོག་པ་ཁྱིམ་པ་དག་གིས་མཐོང་སྟེ། དེ་དག་གིས་ཅི་ཡིན་ཞེས་དྲིས་པ་དང་། སྦོམ་དགའ་མོས་སྨྲས་པ་ཅི་ཡིན་པ་མི་ཤེས་ན་མ་ལ་དྲིས་ཤིག །སྲིང་མོ་ལ་དྲིས་ཤིག་ཅེས་སྨྲས་པ་དང་། དེ་དག་འཕྱ་བ་ལས་བཅས། ཡང་དགེ་སློང་མ་གང་སྨེ་གབ་མི་འཆང་ན་
ལྟུང་བའོ། །དགེ་སློང་མས་སྨེ་གབ་མི་འཆང་ན་ཐམས་ཅད་དུ་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བཙུན་མོ་ཕྲེང་ལྡན་མའི་གན་དུ་ཕྱིན་པ་དང་བཙུན་མོ་ཕྲེང་ལྡན་མའི་དགེ་སློང་མ་སྨེ་གབ་འཆང་ན་གནང་
བར་ཐོས་ནས། དགེ་སློང་མ་སྤྱི་ལ་སྨེ་གབ་ཀྱི་རྒྱུ་གོས་སྣ་ཚོགས་ལས་མང་དུ་བསྐུར་བ་དང་། དེ་དག་ཐམས་ཅད་སྦོམ་དགའ་མོས་བདག་གིར་བྱེད་པ་ལས་བཅས། ཡང་དགེ་སློང་མ་གང་ཚོགས་ཀྱི་གོས་བདག་གིར་བྱེད་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་
མོའོ། །ཚོགས་ཞེས་བྱ་བ་ནི་དགེ་སློང་མའི་དགེ་འདུན་ནོ། །གོས་ཞེས་བྱ་བ་ནི་སྨེ་གབ་ཀྱི་གོས་སོ། །དགེ་སློང་མས་དགེ་འདུན་གྱི་སྤྱི་ལ་བསྔོས་པར་ཤེས་བཞིན་དུ་བདག་གིར་བྱས་ན་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་དྲུག་པ་རྫོགས་སོ།། །།སྟོན་པ་མཉན་དུ་

ཡོད་པ་ན་སྟེ། སྦོམ་དགའ་མོས་ཚུལ་ནས་བྱུང་བའི་འོག་ཏུ་གཏན་པ་གདིང་བའི་དུས་ལ་བབ་པ་དང་། ཁྱིམ་བདག་དབུལ་པོ་ནད་པ་ཞིག་གི་གན་དུ་སོང་སྟེ། བཞིན་བཟངས་དགེ་འདུན་ལ་གཏན་པའི་གོས་ཕུལ་ཞེས་བསྒོ་བ་དང་། དེས་སྨྲས་པ་བདག་ནི་དབུལ་ཞིང་ནད་པ་བས་ཆོས་གོས་
མི་འབྱོར་ཏེ་ཞེས་སྨྲས་པ་དང་། སྦོམ་དགའ་མོས་སྨྲས་པ་ཚོང་པ་ལས་སྔ་སྐྱིན་གྱིས་ལ་རིན་ཕྱིས་བཅོལ་ཞེས་སྨྲས་ནས། ཚོང་པའི་གན་དུ་ཁྲིད་དེ་གཏུགས་ནས་རས་རིན་པོ་ཆེ་ཞིག་ཁྱེར་རོ། །དེ་ནས་དུས་ཕྱི་ཞིག་ན་ཁྱིམ་བདག་ནད་པ་དེས་རས་རིན་མ་འཁོར་ནས། དེས་བཟུང་སྟེ་ཉི་ཚན་
ལ་བཏགས་པས་མ་དད་ཅིང་འཕྱ་བ་ལས་བཅས། ཡང་དགེ་སློང་མ་གང་དབུལ་པོའི་རྒྱུད་གོས་ཀྱི་སྦྱིན་པ་ཡང་དག་པར་འཛིན་དུ་འཇུག་ན་ལྟུང་བའོ། །དགེ་སློང་མས་གཏན་གདིང་བའི་གོས་ཁྱིམ་ལ་དབུལ་པོ་འམ་ནད་པ་སྦྱོར་མི་བཟོད་པ་ལ་སློང་ཞིང་སྦྱོར་དུ་འཇུག་ན་ལྟུང་བར་འགྱུར་རོ། །ལྟུང་བ་
བརྒྱ་བཞི་བཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཀའ་སྩལ་པ། དགེ་སློང་མ་དག་ཆོམ་པོ་དག་གིས་བཅོམ་སྟེ། གློ་བུར་དུ་ལྷགས་ན་གཏན་པ་གློ་བུར་དུ་ཕྱུང་ལ་དགེ་སློང་མ་དེ་དག་ལའང་གོས་བྱིན་ཅིག །གཏན་པ་འབྱིན་པའི་ཚེའང་དགེ་སློང་མ་ཐམས་
ཅད་འདུས་ཤིག་ཅེས་བཀའ་སྩལ་པ་ལས། སྦོམ་དགའ་མོ་འདུར་མི་བཏུབ་པ་ལས་བཅས། ཡང་དགེ་སློང་མ་གང་གཏན་པ་འབྱིན་པར་མི་འདུ་ན་ལྟུང་བའོ། །དགེ་སློང་མ་དགེ་འདུན་གློ་བུར་དུ་གཏན་པ་འབྱིན་པའི་ཚེ་མི་འདུ་ན་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་བརྒྱད་པ་རྫོགས་
སོ།། །།སྟོན་པ་མཉན་དུ་ཡོད་པ་ན་སྟེ། བཀའ་སྩལ་པ། ཟླ་བ་ལྔ་ཚང་ཡང་དུས་སུ་གཏན་པ་ཕྱུང་ལ་དགེ་སློང་མ་ཐམས་ཅད་འདུས་ཏེ་རྙེད་པ་བགོས་ཤིག་ཅེས་གསུངས་པ་ལས། སྦོམ་དགའ་མོ་འདུར་མི་བཏུབ་པ་ལས་བཅས། ཡང་དགེ་སློང་མ་ཆོས་གོས་ཀྱི་རྙེད་པ་བགོ་བཤའ་
བྱེད་པར་མི་འདུ་ན་ལྟུང་བའོ། །གཏན་པ་ཕྱུང་བའི་འོག་ཏུ་གོས་ཀྱི་རྙེད་པ་བགོ་བཤའ་བྱེད་པར་མི་འདུ་ན་ལྟུང་བའོ། །ལེན་པར་མི་འདོད་ན་མ་འདུས་ཀྱང་ཉེས་པ་མེད་དོ། །ལྟུང་བ་བརྒྱ་བཞི་བཅུ་དགུ་པ་རྫོགས་སོ།། །།མདོར་བསྟན་པ་ནི། ཚུར་ཤོག་རྣམ་པར་ཞི་བྱ་དང་། །

བོར་ནས་འགྲོ་བར་བྱེད་པ་དང་། །གཙུག་ལག་བསླབ་པར་མི་བྱ་དང་། །མི་སྦྱིན་ཁ་ཟས་མི་བཙོང་དང་། །ཁྱིམ་གྱི་སོ་ནམ་མི་བྱ་དང་། །ཁྲི་འདུག་བསྙེན་བཀུར་བྱེད་པ་དང་། །བལ་བཀལ་བར་ཡང་མི་བྱ་དང་། །གདུགས་དང་མཆིལ་ལྷམ་མི་བཅང་ངོ་། །
སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སློབ་མ་དང་ཉེ་གནས་དག་གི་འཐབ་གཅུགས་བྱས་ནས་དེ་དག་འཐབ་པར་གྱུར་པ་དང་། སླར་གཅུགས་པར་མི་བྱེད་དོ། །དགེ་སློང་མ་དག་གིས་འཐབ་པ་ཅིའི་ཕྱིར་མི་གཅུགས་ཞེས་བྱས་ན། སྦོམ་དགའ་མོས་སྨྲས་པ།
འདི་དག་འཐབ་འདོད་ན་ཅིའི་ཕྱིར་མགོས་མགོ་བོ་མི་རྡུང་། འཐབས་ཀྱང་སླའོ་ཞེས་ཟེར་བ་དང་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་གཅུགས་ནུས་ལ་འཐབ་མོ་ཞི་བར་མི་བྱེད་ན་ལྟུང་བའོ། །དགེ་སློང་མས་སློབ་མ་དང་ཉེ་གནས་གང་འཐབ་ཀྱང་རུང་སྟེ།
གཅུགས་ནུས་བཞིན་དུ་གཅུགས་པར་མི་བྱེད་དམ། ཆེད་དུ་གཅུགས་བྱས་ཏེ་འཐབ་ནའང་ལྟུང་བའོ། །ལྟུང་བ་བརྒྱ་ལྔ་བཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་གཙུག་ལག་ཁང་སྒོ་བཅད་དེ་ལྡེ་མིག་ཀྱོག་པོ་ཐོགས་བཞིན་དུ་
ལྗོངས་རྒྱུར་སོང་བ་ལས། དགེ་སློང་མ་གཞན་གྱིས་སྒོ་མ་ཕྱེད་དེ་མེ་ཤོར་བ་ལས་བཅས། ཡང་དགེ་སློང་མ་གང་དབྱར་མོ་ཁང་བོར་ཏེ་འགྲོ་ན་ལྟུང་བའོ། །དགེ་སློང་མས་གཙུག་ལག་ཁང་སྒོ་བཅད་དེ། ལྡེ་མིག་གཞན་ལ་མ་བཞག་པར་ལྗོངས་རྒྱུར་འགྲོ་ན་ལྟུང་བའོ། །ལྡེ་མིག་བཞག་པ་
བརྗེད་དམ་བར་ཆད་བརྒྱད་བྱུང་བ་ལ་ཉེས་མེད་དོ། །ལྟུང་བ་བརྒྱ་ལྔ་བཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས། སྤོས་འཚོང་གི་ཁྱེའུ་འཇིག་རྟེན་གྱི་རིག་པ་སློབ་པ་མཐོང་བ་དང་དེ་ལ་ཆགས་པར་གྱུར་ནས་
བདག་ལ་རིག་པ་སློབས་ཤིག་ཅེས་སྨྲས་པ་དང་། སྤོས་འཚང་གི་ཁྱེའུས་མོ་ལ་བསླབས་ཏེ། སི་རི་བྷུ་སི་རི་བྷུ་སི་རི་བྷུ་སི་རི་སྭཱཧཱ། སྦོམ་དགའ་མོ་ཡང་ལོབས་བཞིན་དུ་ད་དུང་ང་ལ་སློབས་ཤིག་ཅེས་ཡང་ནས་ཡང་དུ་སློབ་པ་ལས་སྤོས་འཚོང་གི་ཁྱེའུ་ཡང་ཁྲོས་ནས། གཏུམ་མོ་མགོ་རེག་

མ་ཁྱོད་དགོས་པ་མེད་དོ་ཞེས་སྨྲས་ཤིང་ལངས་ཏེ་སོང་ངོ་། །དགེ་སློང་མ་གཞན་དག་གིས་སྨྲས་པ་ཅིའི་ཕྱིར་ལོབས་བཞིན་དུ་ཡང་སློབ་ཅེས་དྲིས་པ་དང་། དེ་ལ་ཆགས་པས་ན་ལྷན་ཅིག་འདུག་ན་བདག་དགའོ་ཞེས་ཟེར་བ་ལས་འཕྱ་སྟེ་བཅས། ཡང་དགེ་སློང་མ་གང་ཁྱིམ་པ་ལས་
གཙུག་ལག་སློབ་ན་ལྟུང་བའོ། །དགེ་སློང་མས་སྐྱེས་པ་ལ་ཆགས་པའི་ཕྱིར་དེ་ལ་བདག་ཉིད་རིག་པ་སློབ་ན་ལྟུང་བའོ། །ལྟུང་བ་བརྒྱ་ལྔ་བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྐྱེས་པ་གཞན་ཞིག་དང་ཕྲད་པ་དང་དེ་ལ་ཆགས་ནས་ཚུར་
ཤོག་ངས་ཁྱོད་ལ་རིག་པ་བསླབ་པོ་ཞེས་སྔར་ལོབས་པ་དེ་སྐྱེས་པ་དེ་ལ་ཡང་སློབ་པོ། །དེས་སྨྲས་པ་བདག་ལོབས་སོ་ཞེས་བྱས་པ་དང་མོས་སྨྲས་པ། ད་དུང་ཡང་སློབས་ཤིག་ཅེས་བྱས་པ་དང་། དེ་ཡང་ཁྲོས་ནས་མགོ་རེག་མ་གཏུམ་མོ་ཁྱོད་དང་རིག་པ་འདི་གཉི་ག་ང་ལ་དགོས་པ་མེད་དོ་ཞེས་སྨྲས་
ཏེ་སོང་བ་ལས་བཅས། ཡང་དགེ་སློང་མ་གང་སྐྱེས་པ་ལ་གཙུག་ལག་སློབ་ན་ལྟུང་བའོ། །དགེ་སློང་མ་གང་སྐྱེས་པ་ལ་ཆགས་པའི་ཕྱིར་རིག་པ་སློབ་ཏུ་འཇུག་ན་ལྟུང་བའོ། །ལྟུང་བ་བརྒྱ་ལྔ་བཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་
བསོད་སྙོམས་མང་དུ་རྙེད་ནས། ཁ་ཟས་གཤེར་བ་དག་ནི་ཟ། ཕྱེ་མ་ལ་སོགས་པ་སྐམ་པོ་དག་གིས་གོས་དག་ཉོ་བར་བྱེད་པ་ལས་དོན་ཉུང་ངུ་བའི་དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་ཁ་ཟས་འཚོང་ན་ལྟུང་བའོ། །དགེ་སློང་མས་ཕྱེ་ལ་སོགས་པ་བསོད་
སྙོམས་ཀྱི་ཁ་ཟས་ཀྱིས་གོས་ཉོ་བར་བྱེད་ན་ལྟུང་བའོ། །ལྟུང་བ་བརྒྱ་ལྔ་བཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སྔ་དྲོ་བསོད་སྙོམས་ལ་ཞུགས་པ་དང་། ཁྱིམ་པ་ཞིག་གི་སྒོར་ཕྱིན་པ་དང་བུད་མེད་གཞོན་ནུ་མ་ཞིག་ངུ་ཞིང་འདུག་པ་མཐོང་
ནས། ཁྱོད་ཅིའི་ཕྱིར་ངུ་ཞེས་དྲིས་པ་དང་། བདག་ནི་ཁྱིམ་གསར་དུ་ཕུབ་པ་ཞིག་ཁྱིམ་གྱི་བྱ་བ་དག་མ་འཚལ་ཏེ་ངུའོ་ཞེས་སྨྲས་པ་དང་། སྦོམ་དགའ་མོས་སྨྲས་པ། ང་ལ་བསོད་སྙོམས་མང་དུ་བྱིན་ན་ཁྱིམ་གྱི་བྱ་བ་རྣམས་ངས་བྱའོ་ཞེས་སྨྲས་པ་དང་། དེས་ཀྱང་བསོད་སྙོམས་

མང་དུ་བྱིན་ནས་སྦོམ་དགའ་མོས་ཀྱང་དེའི་ཁྱིམ་ཕྱག་དར་བྱས་ཆག་ཆག་གིས་བཏབ་སྣོད་སྤྱད་དག་བཀྲུས་ཏེ་ལེགས་པར་གཞག་ནས་སླར་བསོད་སྙོམས་ཁུར་ཏེ་སོང་ངོ་། །ཕྱིས་སྐྱེ་དགུའི་བདག་མོ་ཡང་བསོད་སྙོམས་ལ་ཞུགས་པ་དང་ཁྱིམ་བདག་མོ་དེས་སྨྲས་པ་
འཕགས་མ་ཁྱིམ་གྱི་བྱ་བ་དག་མཛོད་ཅིག་ཅེས་བྱས་པ་དང་། སྐྱེ་དགུའི་བདག་མོས་སྨྲས་པ། སྔོན་རབ་ཏུ་མ་བྱུང་བའི་ཚེ་རྒྱལ་པོ་ཟས་གཙང་མའི་ཁྱིམ་གྱི་བྱ་བ་རྣམས་ངས་བྱས་པ་མ་གཏོགས་པར་གཞན་གྱི་ཁྱིམ་གྱི་བྱ་བ་བྱེད་མ་མྱོང་བའི་སྟེང་དུ། དགེ་སློང་མས་ཁྱོད་ཀྱི་ཁྱིམ་གྱི་བྱ་བ་
བྱེད་ན་ཁྱོད་ལ་བསོད་ནམས་མ་ཡིན་པ་མང་དུ་འཕེལ་ལོ་ཞེས་སྨྲས་པ་དང་། དེས་སྨྲས་པ། འོ་ན་སྦོམ་དགའ་མོས་ངའི་ཁྱིམ་གྱི་བྱ་བ་མང་དུ་བྱས་སོ་ཞེས་རྒྱས་པར་སྨྲས་སོ། །དེ་ནས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཁྱིམ་གྱི་བྱ་བ་བྱེད་ན་ལྟུང་བའོ། །དགེ་
སློང་མས་ཁྱིམ་གྱི་བྱ་བ་བྱེད་ན་ལྟུང་བར་འགྱུར་རོ། །བདག་གི་གཉེན་ཡིན་ན་ཉེས་མེད་དོ། །ལྟུང་བ་བརྒྱ་ལྔ་བཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ཉིན་མོ་གནས་པའི་སར་ཁྲིའུ་དང་ཁྲི་སྟན་དག་སློབ་མ་དང་ཉེ་གནས་དག་ལ་བསྐུར་ཞིང་དེ་ལ་
བདག་འདུག་ན་བསྙེན་བཀུར་བྱེད་པ་བདག་གིར་བྱེད་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཁྲི་ལ་འདུག་ཅིང་བསྙེན་བཀུར་བྱེད་པ་བདག་གིར་བྱེད་ན་ལྟུང་བའོ། །དགེ་སློང་མས་དགེ་སློང་མ་དང་ཉེ་གནས་དང་སློབ་མ་དག་ཁྲི་སྟན་ཡང་མང་དུ་སྐྱེད་ཅིང་དེ་ལ་
བདག་འདུག་པར་བྱེད་དམ། དེ་ལ་བདག་གིར་བསྙེན་བཀུར་ཉམས་སུ་ལེན་ན་ལྟུང་བའོ། །ན་བ་དང་རྒན་མོ་ལ་ཉེས་མེད། ལྟུང་བ་བརྒྱ་ལྔ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། གཙུག་དགའ་མོ་ལས་བཅས་ཏེ། དེའི་གླེང་གཞི་ཡང་གོང་མ་ཁྱིམ་གྱི་
བྱ་བ་བྱེད་པ་དང་འདྲ་སྟེ། དགེ་སློང་མས་བལ་འཁལ་ན་ལྟུང་བར་འགྱུར་རོ། །ལྐོག་ཏུ་དབེན་པར་འདུག་སྟེ། རྒྱ་ཅང་དང་། ལྕག་པོད་དང་གླེགས་ཐག་ཙམ་འཁལ་ཞིང་འཐག་སྟེ། དགེ་སློང་ཕའི་བྱ་བར་བསམས་ན་ཉེས་མེད་དོ། །ཡང་དགེ་སློང་མ་བལ་འཁལ་ན་ལྟུང་བའོ། །ལྟུང་བ་

བརྒྱ་ལྔ་བཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་གདུགས་ཐོགས་ཤིང་གྲོང་དུ་འཇུག་པ་ལས་ཁྱིམ་པས་འཕྱ་སྟེ་བཅས། ཡང་དགེ་སློང་མ་གང་གདུགས་འཆང་ན་ལྟུང་བའོ། །དགེ་སློང་མས་གདུགས་ཐོགས་ཤིང་གྲོང་དུ་འགྲོ་ན་ལྟུང་བའོ། །
ལྟུང་བ་བརྒྱ་ལྔ་བཅུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་མཆིལ་ལྷམ་རྩེག་མ་རི་མོ་ཁྲ་བོས་བྲིས་པ་གྱོན་ནས་ཁྱིམ་པའི་གྲོང་དུ་འཇུག་པ་ལས་ཁྱིམ་པས་འཕྱ་སྟེ་བཅས། ཡང་དགེ་སློང་མ་གང་མཆིལ་ལྷམ་ཁྲ་བོ་བྱས་ཏེ་འཆང་
ན་ལྟུང་བའོ། །དགེ་སློང་མས་མཆིལ་ལྷམ་རྩེག་མ་རི་མོ་ཅན་ཁྲ་བོར་བྱས་ཏེ་འཆང་ངམ་གྱོན་ན་ལྟུང་བར་འགྱུར་རོ། །ལྟུང་བ་བརྒྱ་ལྔ་བཅུ་དགུ་པ་རྫོགས་སོ།། །།མདོར་བསྟན་པ་ནི། ལག་པ་འབྲུམ་བུ་བྱུང་བ་དང་། །དགེ་སློང་མ་ཡི་འཕྱོན་མ་དང་། །དགེ་སློང་མ་ནི་ཕྱིར་མི་
གཞུག །དགེ་སློང་མ་དང་དགེ་ཚུལ་མ། །ཁྱིམ་བདག་མོ་ཡང་ཕྱིར་མི་གཞུག །ཀུན་དུ་རྒྱུ་མོ་དེ་བཞིན་ནོ། །སྤོས་དང་ཏིལ་གྱི་ཚིགས་མས་སྐུད། །རྟག་ཏུ་བསུག་པར་མི་བྱའོ། །སྟོན་པ་ཡུལ་མཉན་དུ་ཡོད་པ་ན་སྟེ། དེའི་དུས་ན་དགེ་སློང་མ་གཙུག་དགའ་མོ་དཔུང་པ་ལ་
རྨ་ཞིག་བྱུང་བ་ལས། དེ་སྨན་པ་ལ་འཆིང་དུ་བཅུག་པ་ལས་སྨན་པ་དེ་ལ་ཆགས་ཏེ། ཡང་དང་ཡང་འཆིང་ཞིང་འགྲོལ་དུ་བཅུག་པ་ལས། སྨན་པ་ཁྲོས་ཏེ་མགོ་རེག་མ་ཁྱོད་ལ་སྨན་བྱེད་པ་སུ་སྤྲོ་ཞེས་ལངས་ཏེ་སོང་ངོ་། །དེ་ནས་དགེ་སློང་མ་དག་གིས་གཙུག་དགའ་མོ་ལ་ཁྱོད་ཅིའི་ཕྱིར་
དེ་ལྟར་བྱེད་ཅེས་དྲིས་པ་དང་། དེས་སྨྲས་པ་སྐྱེས་པ་དང་ཅུང་ཞིག་ལྷན་ཅིག་འདུག་ཅིང་རེག་ན་བདེའོ་ཞེས་སྨྲས་པ་དང་། དོན་ཉུང་ངུ་བའི་དགེ་སློང་མ་དག་ཁྱོད་གཙུབ་ཤིང་དང་འདྲ་སྟེ། འདི་ལྟར་ཆགས་སོ་ཞེས་འཕྱ་བ་ལས་བཅས། ཡང་དགེ་སློང་མ་ལག་པ་ལ་འབྲུམ་བུ་བྱུང་བ་
སྐྱེས་པ་ལ་ཡང་དང་ཡང་བཅིངས་པ་འགྲོལ་དུ་བཅུག་ན་ལྟུང་བའོ། །དགེ་སློང་མས་ལུས་ལ་རྨ་བྱུང་བ་ཆགས་པའི་སེམས་ཀྱིས་སྐྱེས་པ་ལ་ཡང་དང་ཡང་བཅིངས་པ་འགྲོལ་དུ་བཅུག་ན་ཐམས་ཅད་དུའང་ལྟུང་བར་འགྱུར་རོ། །ཕ་དང་བུ་དང་གཉེན་ལ་གཉེན་པའི་དྲན་པས་འཆིང་དུ་

བཅུག་ན་ཉེས་མེད་དོ། །ལྟུང་བ་བརྒྱ་དྲུག་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བུད་མེད་སྨད་འཚོང་མ་གཅིག་རབ་ཏུ་བྱུང་ངོ་། །དེ་ནས་བུད་མེད་དེ་རབ་ཏུ་བྱུང་ངོ་ཞེས་སྔོན་རྩེ་རྩེ་བའི་སྐྱེས་བུ་དག་ཐོས་པ་དང་། ད་ནི་གོས་དང་ཟས་ཀྱང་སྦྱར་
མི་དགོས་པར་ཡོངས་སུ་སྤྱད་དོ་ཞེས་དགེ་སློང་མའི་དབྱར་མོ་ཁང་དུ་འོངས་ནས་དེ་དང་སྟེག་ཅིང་དུས་དག་འདེབས་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་བུད་མེད་འཕྱོན་མ་རབ་ཏུ་འབྱིན་ན་ལྟུང་བའོ། །མི་ཤེས་པ་ལ་ཉེས་མེད་དེ་རབ་ཏུ་ཕྱུང་བའི་འོག་ཏུ་ཡུལ་གཞན་དུ་
བཀར་བར་བྱའོ། །ལྟུང་བ་བརྒྱ་དྲུག་ཅུ་གཅིག་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། སྦོམ་དགའ་མོས་དགེ་སློང་མ་གྲོགས་མོ་བདག་གི་ལུས་མར་དང་བག་ཕྱེས་ཕྱིར་བཅུག་པ་དང་། དེ་དག་གིས་ཅི་བྱ་ཞེས་དྲིས་ན། འདི་ལྟར་ཕྱིས་ན་ལུས་འཇམ་ཞིང་དཀར་
བས་འདོད་པ་ཅན་དག་གི་སྙིང་དགར་གཞུག་གོ་ཞེས་སྨྲས་པ་དང་དོན་ཉུང་ངུ་མ་དག་གིས་འཕྱ་བ་ལས་བཅས། ཡང་དགེ་སློང་མ་གང་དགེ་སློང་མ་ལུས་ཕྱིར་འཇུག་ན་ལྟུང་བའོ། །དགེ་སློང་མས་བཟང་དུ་འདོད་པའི་ཕྱིར་དགེ་སློང་མ་ལུས་ཕྱིར་འཇུག་ན་ལྟུང་བའོ། །ལྟུང་བ་བརྒྱ་དྲུག་ཅུ་གཉིས་པ་
རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་དགེ་སློང་མ་ལུས་འཕྱིར་བཅུག་པ་ལས་བཅས། ཡང་དགེ་སློང་མ་གང་དགེ་སློང་མ་ལུས་འཕྱིར་འཇུག་ན་ལྟུང་བའོ། །འདི་ཡང་ལྟུང་བའི་ཁྱད་པར་གོང་མ་དང་འདྲའོ། །ལྟུང་བ་བརྒྱ་དྲུག་ཅུ་གསུམ་པ་རྫོགས་སོ།། །།
སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་དགེ་ཚུལ་མ་ལུས་འཕྱིར་འཇུག་པ་ལས་བཅས། ཡང་དགེ་སློང་མ་གང་ལུས་འཕྱིར་འཇུག་ན་ལྟུང་བའོ། །འདི་ཡང་ལྟུང་བའི་ཁྱད་པར་གོང་མ་དང་འདྲའོ། །ལྟུང་བ་བརྒྱ་དྲུག་ཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་
དགའ་མོས་བསམས་པ། དགེ་སློང་མ་དང་དགེ་སློབ་མ་དང་དགེ་ཚུལ་མ་ལས་འཕྱིར་འཇུག་ཏུ་ནི་བཅོམ་ལྡན་འདས་ཀྱིས་མ་གནང་ན། ཁྱིམ་བདག་མོ་འཕྱིར་གཞུག་ན་ཉེས་མེད་སྙམ་དུ་བསམས་ཏེ། ཁྱིམ་བདག་མོ་ལུས་འཕྱིར་བཅུག་པ་དང་། དགེ་སློང་མ་དག་གིས་ཅི་བྱ་ཞེས་དྲིས་ན། སྦོམ་

དགའ་མོས་སྨྲས་པ། ཁྱིམ་མི་མོས་ཕྱིས་པ་ལ་ཉེས་མེད་དོ་ཞེས་སྨྲས་པ་དང་། དོན་ཉུང་ངུ་མ་དག་གིས་འཕྱས་ཏེ་བཅས་སོ། །ཡང་དགེ་སློང་མ་གང་ཁྱིམ་བདག་མོ་འཕྱིར་འཇུག་ན་ལྟུང་བའོ། །དགེ་སློང་མས་ཁྱིམ་བདག་མོ་ལ་འཕྱིར་འཇུག་ནའང་ལྟུང་བའོ། །བཟང་དུ་རེ་བའི་བསམ་བས་ཕུ་
ནུ་མོ་དག་འཕྱིར་འཇུག་ན་ལྟུང་བའོ། །མ་དང་ཕུ་ནུ་མོ་དང་བུ་མོ་བདག་ན་བ་ལ་ཕན་པས་འཕྱིར་བཅུག་པ་ལ་ཉེས་མེད། ལྟུང་བ་བརྒྱ་དྲུག་ཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་ཀུན་དུ་རྒྱུ་མོ་ལ་ལུས་འཕྱིར་བཅུག་པ་ལས་བཅས། ཡང་དགེ་སློང་མ་གང་ཀུན་
དུ་རྒྱུ་མོ་ལ་འཕྱིར་བཅུག་ན་ལྟུང་བའོ། །འདིའི་ཁྱད་པར་ཡང་གོང་མ་དང་འདྲའོ། །ཀུན་ཏུ་རྒྱུ་མོ་ཞེས་བྱ་བ་ནི་མུ་སྟེགས་གྲངས་ཅན་ལས་རབ་ཏུ་བྱུང་བའོ། །ལྟུང་བ་བརྒྱ་དྲུག་ཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་ལུས་ལ་སྤོས་ཀྱིས་བསྐུས་པ་དང་།
དགེ་སློང་མ་དག་གིས་སྤོས་ཉུག་སྟེ་ཅི་བྱ་ཞེས་དྲིས་པ་དང་། སྦོམ་དགའ་མོས་སྨྲས་པ། །ངས་སྐྱེས་པ་དག་འདོད་པ་སྐྱེད་དུ་གཞུག་གོ་ཞེས་སྨྲས་པ་དང་དོན་ཉུང་ངུ་མ་དག་འཕྱ་བ་ལས་བཅས། ཡང་དགེ་སློང་མ་གང་སྤོས་ཀྱིས་ཉུག་ན་ལྟུང་བའོ། །དགེ་སློང་མ་ལུས་ལ་སྤོས་བསྐུས་
ན་ཐམས་ཅད་དུ་ལྟུང་བར་འགྱུར་རོ། །ན་བ་ལ་ཕན་པའམ་ཧ་ཅང་དྲི་མི་ཞིམ་པར་གྱུར་པ་ལ་ཉེས་མེད་དོ། །ལྟུང་བ་བརྒྱ་དྲུག་ཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་ཏིལ་གྱི་ཚིགས་མས་ལུས་བསྐུས་ཤིང་མཉེས་པ་དང་། དགེ་སློང་མ་དག་གིས་
ཅི་བྱ་ཞེས་དྲིས་པ་དང་། འདིས་བསྐུས་ན་ལུས་མཉེན་ཅིང་གཞན་དག་འདོད་པ་སྐྱེད་དུ་གཞུག་གོ་ཞེས་སྨྲས་པ་དང་། དོན་ཉུང་ངུ་མ་དག་གིས་འཕྱ་བ་ལས་བཅས། ཡང་དགེ་སློང་མ་གང་ཏིལ་གྱི་ཚིགས་མས་ཉུག་ན་ལྟུང་བའོ། །དགེ་སློང་མས་ཏིལ་གྱི་ཚིགས་མས་ལུས་ལ་ཉུག་
ན་ལྟུང་བའོ། །ནད་པ་ལ་ཕན་ན་ཉེས་མེད་དོ། །ལྟུང་བ་བརྒྱ་དྲུག་ཅུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་བཅུ་གཉིས་སྡེ་དག་ཁྲུས་བྱེད་ཅིང་དྲག་ཏུ་ཡང་ནས་ཡང་དུ་བསུག་གོ། །དེ་ལྟར་བྱེད་པ་དགེ་སློང་མ་དག་གིས་ཅི་བྱ་ཞེས་དྲིས་པ་དང་། གོང་དུ་

སྨོས་པ་མར་དང་བག་ཕྱེ་དང་ཏིལ་གྱིས་བསྐུར་ནི་བཅོམ་ལྡན་འདས་ཀྱིས་མ་གནང་སྟེ། དེ་ཆུས་དྲག་ཏུ་བསུག་ཅིང་བཀྲུས་ལ་ལུས་འཇམ་ཞིང་དཀར་པོར་བྱའོ་ཞེས་སྨྲས་པ་དང་དོན་ཉུང་ངུ་མ་དག་འཕྱ་བ་ལས་བཅས། ཡང་དགེ་སློང་མ་གང་དྲག་ཏུ་བསུག་ན་ལྟུང་བའོ། །
དགེ་སློང་མས་ལུས་དཀར་པོར་བྱ་བའི་ཕྱིར་ཆུས་དྲག་ཏུ་བསུག་ཅིང་བཀྲུས་ན་ལྟུང་བའོ། །ལྟུང་བ་བརྒྱ་དྲུག་ཅུ་དགུ་པ་རྫོགས་སོ།། །།མདོར་བསྟན་པ་ནི། སྐབས་མ་ཕྱེ་བར་འདྲི་བ་དང་། །ཁྱིམ་པ་རྒྱན་རྣམས་མི་བཅང་དང་། །ལག་པ་སྦྲེལ་ཞིང་འཁྲུ་བ་དང་། །གར་བྱེད་གླུ་ལེན་རོལ་
མོ་དཀྲོལ། །དགེ་སློང་མ་ཡི་གནས་ཁང་ནས། །གཅིག་པུ་སྤ་བྲང་བྱེད་མི་འགྲོ། །ཨུ་ཤི་ར་དང་སོ་མངས་དང་། །སྨྱིག་བཤད་ཆོས་ཀྱི་རྒྱན་མི་བཅང་། །སྟོན་པ་མཉན་དུ་ཡོད་པ་ན་སྟེ། །སྦོམ་དགའ་མོས་དགེ་སློང་ཕའི་གནས་ཁང་དུ་སོང་ནས་དགེ་སློང་ཅིག་ལ་དེས་སྐབས་མ་ཕྱེ་བར་ཆོས་
དག་དྲིས་ནས་དགེ་སློང་དེས་ལན་མ་ཐེབས་ཏེ་སྨ་བབ་པར་གྱུར་པ་བཅོམ་ལྡན་འདས་ཀྱི་སྙན་དུ་བདས་ནས། ད་ཕྱིན་ཆད་དགེ་སློང་མས་སྐབས་མ་ཕྱེ་བར་དགེ་སློང་ཕ་ལ་ཆོས་མ་འདྲི་ཞིག་ཅེས་བསླབ་པ་བཅས་སོ། །ཡང་དགེ་སློང་མ་གང་སྐབས་མ་རྙེད་པར་དགེ་སློང་ཕ་ལ་དྲི་བ་འདྲི་ན་ལྟུང་བའོ། །དགེ་
སློང་མས་དགེ་སློང་གིས་ཆོས་བཤད་པར་གནང་བའི་སྐབས་མ་ཕྱེ་བར་ཤེས་བཞིན་དུ་ཆོས་འདྲི་ན་ལྟུང་བར་འགྱུར་རོ། །སྔར་བཤད་པར་གསོལ་ཏེ་གནང་བ་ལས་ཆོས་བརྟགས་ཤིང་འདྲི་རྟོག་བྱེད་པ་ལ་ཉེས་མེད་དོ། །ལྟུང་བ་བརྒྱ་བདུན་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ།
སྦོམ་དགའ་མོ་སྔ་དྲོ་བསོད་སྙོམས་ལ་སོང་བ་ལས། ཁྱིམ་བདག་ཕྱུག་པོ་ཅིག་གི་སྒོར་ཕྱིན་པ་ནས་ཁྱིམ་བདག་དེ་དག་གི་རྒྱན་བཀྲོལ་ཏེ་བཞག་པ་མཐོང་ནས་བླངས་ཏེ། བདག་གི་ལུས་བརྒྱན་པ་དང་། ཁྱིམ་བདག་གིས་ངེད་ཀྱི་རྒྱན་དག་གིས་བརྒྱན་ཏེ་ཅི་བྱ་ཞེས་དྲིས་པ་དང་། སྦོམ་དགའ་
མོས་སྨྲས་པ། ངས་ཅི་ཙམ་དུ་བཟང་བ་ལྟའོ་ཞེས་བྱས་པ་དང་། མགོ་རེག་མ་ཁྱོད་ལ་རྒྱན་ཅི་དགོས་རྒྱན་ཡང་བཟང་བ་མེད་ཅེས་འཕྱ་ཞིང་མ་དད་པ་ལས་བཅས། ཡང་དགེ་སློང་མ་གང་ཁྱིམ་པའི་རྒྱན་འཆང་ན་ལྟུང་བའོ། །དགེ་སློང་མ་ཁྱིམ་པའི་ནང་དུ་འགྲོ་ཞིང་རྒྱན་གྱིས་བརྒྱན་ན་

ཐམས་ཅད་དུ་འང་ལྟུང་བར་འགྱུར་རོ། །རྒྱན་ཞེས་བྱ་བ་ནི་མགོ་རྒྱན་དང་དཔུང་རྒྱན་དང་རྒྱན་སྣ་ཚོགས་ལ་བྱའོ། །ལྟུང་བ་བརྒྱ་བདུན་ཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅུ་གཉིས་སྡེ་དག་ཁྱིམ་མི་མོ་ལྷན་ཅིག་ཆུ་བོ་ཨ་ཙི་ར་རར་དིར་ཁྲུས་རས་མེད་པར་ཆུའི་ནང་དུ་
ཞུགས་ཏེ། ལག་པ་དག་སྦྲེལ་ཞིང་ཁྲུས་བྱེད་དེ། ཁྱིམ་མི་མོ་དེ་དག་གིས་མོ་མཚན་ལ་མཛུབ་ཚུགས་དག་བྱེད་ཅིང་གཅིག་ལ་གཅིག་འཕྱས་བཏགས་པ་ལས། ཁྱིམ་མི་མོ་རྣམས་མ་དད་ཅིང་འཕྱ་བ་ལས་བཅས། ཡང་དགེ་སློང་མ་གང་ལག་སྦྲེལ་ཏེ་ཁྲུས་བྱེད་ན་ལྟུང་བའོ། །དགེ་སློང་
མས་ཁྱིམ་མི་མོ་དང་ལྷན་ཅིག་ཁྲུས་བྱེད་ན་ལྟུང་བར་འགྱུར་རོ། །ལྟུང་བ་བརྒྱ་བདུན་ཅུ་གཉིས་པ་རྫོགས་སོ།། །།སྟོན་པ་རྒྱལ་པོའི་ཁབ་ན་སྟེ། དེའི་དུས་ན་རྒྱལ་རིགས་དང་བྲམ་ཟེའི་རིགས་མཛའ་སྟེ་དེ་དག་འདུས་ཤིང་རྩེ་སྟེ། འཕོང་རྩལ་དང་། ལས་སྣ་ཚོགས་དག་གིས་འགྲན་ནོ། །
དེ་ལྟར་འགྲན་པ་ལས་རྒྱལ་རིགས་རྣམས་ནི་དམག་འགྱེད་པ་ལ་མཁས་སོ། །བྲམ་ཟེའི་རིགས་རྣམས་ནི་གླུ་དང་གར་ལ་མཁས་སོ། །དེ་ནས་རྒྱལ་རིགས་རྣམས་བྲམ་ཟེ་ལ་གར་མ་ཐུབ་ནས་དེ་དག་སྦོམ་དགའ་མོའི་གན་དུ་དོང་སྟེ། འཕགས་མ་གར་མཁྱེན་ནམ་ཞེས་དྲིས་སོ། །སྦོམ་དགའ་
མོས་ངས་ཤེས་སོ་ཞེས་སྨྲས་པ་དང་། དེ་དག་གིས་བདག་ཅག་ལ་བསླབ་ཏུ་གསོལ་ཞེས་བྱས་པ་དང་། ང་ལ་རྔན་པ་ཡོད་ན་རུང་ངོ་ཞེས་སྨྲས་པ་དང་། དེ་དག་གིས་ཀྱང་རྔན་པ་མང་དུ་བྱིན་ནོ། །དེ་ནས་སྦོམ་དགའ་མོས་གར་ཤ་རྫ་ག་དང་། ཀེའུར་ལ་སོགས་པ་སྣ་ཚོགས་བསླབས་པས།
རྒྱལ་རིགས་ཀྱིས་བྲམ་ཟེ་ལ་འགྲན་ཐུབ་པས། བྲམ་ཟེ་རྣམས་སྦོམ་དགའ་མོ་ལ་འཕྱ་ཞིང་མ་དད་པ་ལས་བཅས། ཡང་དགེ་སློང་མ་གང་གར་བྱེད་ན་ལྟུང་བའོ། །དགེ་སློང་མས་བདག་གར་བྱེད་ན་ལྟུང་བའོ། །གཞན་གར་བྱེད་དུ་བཅུག་ནའང་ལྟུང་བའོ། །གར་བྱེད་པ་ལ་ལྟ་ནའང་ལྟུང་
བའོ། །དཀོན་མཆོག་གསུམ་ལ་མཆོད་པའི་ཕྱིར་བྱེད་དུ་བཅུག་པ་ལ་ཉེས་མེད། ལྟུང་བ་བརྒྱ་བདུན་ཅུ་གསུམ་པ་རྫོགས་སོ།། །།སྟོན་པ་རྒྱལ་པོའི་ཁབ་ན་སྟེ། སྦོམ་དགའ་མོས་རྒྱལ་རིགས་དག་ལ་གླུ་བསླབས་པ་ལས། བྲམ་ཟེ་དག་མ་དད་དེ་འཕྱ་བ་ལས་བཅས། ཡང་

དགེ་སློང་མ་གང་གླུ་ལེན་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲའོ། །དར་མ་ཀློག་པའི་ཚེ་གཏང་རག་སྙེན་པར་ཟེར་བ་ཉེས་མེད། ལྟུང་བ་བརྒྱ་བདུན་ཅུ་བཞི་པ་རྫོགས་སོ།། །།སྟོན་པ་རྒྱལ་པོའི་ཁབ་ན་སྟེ། སྦོམ་དགའ་མོས་རྒྱལ་རིགས་
རྣམས་ལ་རོལ་མོའི་ཆ་སྤྱད་དཀྲོལ་ཞིང་ལེན་པ་སྣ་ཚོགས་བསླབས་པ་ལས་བྲམ་ཟེ་རྣམས་མ་དད་ནས་བཅས། ཡང་དགེ་སློང་མ་གང་རོལ་མོའི་ཆ་བྱད་དཀྲོལ་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲའོ། །ལྟུང་བ་བརྒྱ་བདུན་ཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་
སྟེ། དགེ་སློང་མ་གཙུག་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས། དེས་སྐྱེས་པ་ཅིག་བསྡུས་ཏེ་དབྱར་མོ་ཁང་དུ་དུས་བཏབ་པོ། །དེ་ནས་སྐྱེས་པ་དེ་དེའི་ནུབ་མོ་དབྱར་མོ་ཁང་དུ་འོངས་པ་དང་། དེར་མ་བདེ་ནས་གཙུག་དགའ་མོས་སྨྲས་པ་