Luận tạng Tây Tạng (Tengyur) — Tập 156

ོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་མ་ཏི་ཤ་སྲུང་ལ་ལྟུང་བ་
བྱུང་ནས། དེ་ལ་དགེ་སློང་མ་ཕན་པར་འདོད་པ་བདེ་བར་འདོད་པ་དག་གིས་གླེང་དྲན་པར་བྱ་སྟེ། ཕུ་ནུ་མོ་ཁྱོད་འདི་ལྟར་ཤེས་པར་གྱིས་ཤིག །ཁྱོད་ལ་ལྟུང་བ་བྱུང་གིས་བཤགས་པར་བྱོས་ཤིག་ཅེས་བསྒོ་བ་དང་། གང་ལ་ལྟུང་བ་བྱུང་བ་དེ་སླར་བྱེད་གྲང་། ཁྱེད་ལ་བྱུང་ན་གཞན་སུ་ཞིག་བྱེད།
གང་འགྱོད་པར་གྱུར་པའོ། །ཁྱེད་ནི་རུས་དང་རིགས་ཐ་དད་པ་ལས་རབ་ཏུ་བྱུང་སྟེ། དཔེར་ན་ཤིང་ཐ་དད་པའི་འདབ་མ་རླུང་གིས་ཁྱེར་ནས་གཅིག་ཏུ་བསྡུས་གཅིག་ཏུ་སྤུངས་པ་བཞིན་དུ་རུས་དང་རིགས་ཐ་དད་པ་ལས་རབ་ཏུ་བྱུང་སྟེ། ཁྱེད་དགེ་ཡང་རུང་། སྡིག་ཀྱང་རུང་། ཅུང་

ཟད་ཀྱང་བདག་ལ་མ་སྨྲ་ཤིག །བདག་ཀྱང་ཁྱོད་ལ་དགེ་ཡང་རུང་སྡིག་ཀྱང་རུང་ཅུང་ཟད་ཀྱང་མི་སྨྲའོ། །ཁྱེད་བདག་ལ་སྨྲ་བའི་ཚིག་གི་ལམ་ཐོང་ཤིག །ཁྱོད་ཀྱིས་བདག་ལ་སྨྲས་པས་ཆོག་གོ་ཞེས་སྨྲས་པ་དང་། དེ་ལྟར་གྱུར་པ་སྟོན་པ་ལ་གསོལ་ནས་ཚིག་འཇམ་
པོས་བསྒོ་ཤིག་ཅེས་བྱས་པ་ནས་བསླབ་པའི་གནས་བཅས་སོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་མ་འགའ་ཞིག་བཀའ་བློ་མི་བདེ་བའི་རང་བཞིན་ཅན་དུ་གྱུར་ལ། དེ་ལ་བསྟན་པར་གཏོགས་པ་དང་། བདེ་བར་གཤེགས་པའི་མདོ་སྡེར་གཏོགས་པའི་བསླབ་པའི་གནས་ཀྱིས་དགེ་
སློང་མ་དག་གི་ཆོས་དང་མཐུན་པ་འདུལ་བ་དང་མཐུན་པས་བསྒོ་ན། ངག་མི་ཉན་ཏེ། འཕགས་མ་དག་དགེ་ཡང་རུང་སྡིག་ཀྱང་རུང་བདག་ལ་ཅུང་ཟད་ཀྱང་མ་སྨྲ་ཤིག །བདག་ཀྱང་འཕགས་མ་དག་ལ་དགེ་ཡང་རུང་སྡིག་ཀྱང་རུང་ཅུང་ཟད་ཀྱང་མི་སྨྲའོ། །འཕགས་མ་ཁྱོད་ཀྱིས་
བདག་ལ་ཚིག་གི་ལམ་ཕྱིར་མི་ལྡོག་པར་བྱ་བ་བྱོས་ཤིག །བདག་ལ་སྨྲས་པས་ཆོག་གོ་ཞེས་ཟེར་ན། དགེ་སློང་མ་དེ་ལ་དགེ་སློང་མ་དེ་དག་གིས་འཕགས་མ་ཁྱོད་བསྟན་པར་གཏོགས་པ་དང་། བདེ་བར་གཤེགས་པའི་མདོར་གཏོགས་པའི་བསླབ་པའི་གནས་རྣམས་ཀྱིས་དགེ་སློང་མ་
དག་གིས་ཆོས་དང་མཐུན་པ་འདུལ་བ་དང་མཐུན་པས་བསྒོ་ན། བདག་ཉིད་ངག་མི་ཉན་པར་མ་བྱེད་པར་ངག་ཉོན་ཅིག །འཕགས་མ་ལ་དགེ་སློང་མ་རྣམས་ཀྱིས་ཆོས་དང་མཐུན་པ་དང་འདུལ་བ་དང་མཐུན་པས་བསྒོ་སྟེ། འཕགས་མས་ཀྱང་དགེ་སློང་མ་རྣམས་ལ། ཆོས་དང་
མཐུན་པ་དང་འདུལ་བ་དང་མཐུན་པར་སྨྲོས་ཤིག །དེ་ཅིའི་ཕྱིར་ཞེ་ན། འདི་ལྟ་སྟེ། གཅིག་གིས་ངག་གཅིག་ཉན་པ་དང་། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང་། གཅིག་གིས་གཅིག་ལྟུང་བ་ལས་འབྱིན་པས། དེ་ལྟར་ན་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འཁོར་འཕེལ་བར་འགྱུར་རོ། །འཕགས་མ་ཁྱོད་ངག་མི་ཉན་པའི་ལས་ཀྱི་མཐའ་འདི་ལྟ་བུ་ཐོང་ཤིག་ཅེས་བསྒོ་བར་བྱའོ། །དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་བསྒོ་ན། གལ་ཏེ་དངོས་པོ་དེ་གཏོང་ན་ནི་

ལེགས། གལ་ཏེ་མི་གཏོང་ན་དངོས་པོ་དེ་སྤང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་ནས་གལ་ཏེ་དངོས་པོ་དེ་གཏོང་ན་ནི་ལེགས། གལ་ཏེ་མི་
གཏོང་ན་ཆོས་འདི་ཡང་ལན་གསུམ་དུ་དབྱུང་བར་བྱ་སྟེ་དགེ་འདུན་ལྷག་མའོ། །དགེ་སློང་མ་གང་ཞེས་བྱ་བ་ནི་ཏི་ཤ་སྟེ། གཞན་ཡང་དེ་དང་འདྲའོ། །བཀའ་བློ་མི་བདེ་བའི་རང་བཞིན་ཅན་དུ་གྱུར་ཞེས་བྱ་བ་ནི། རིགས་པ་དང་མཐུན་པས་ཉེས་པ་བྱུང་བ་དང་། །ཤོགས་ཤིག་ཅེས་བསྒོ་
བ་ན་བྱེད་དུ་མི་བཏུབ་ཅིང་ལོག་པར་འཛིན་པའོ། །བསྟན་པར་གཏོགས་པ་བསླབ་པའི་གནས་ཞེས་བྱ་བ་ནི་ལྟུང་བ་སྡེ་ལྔ་ལ་བྱའོ། །བདེ་བར་གཤེགས་པའི་མདོར་གཏོགས་པ་ཞེས་བྱ་བ་ནི་སྟོན་པ་ལ་བདེ་བར་གཤེགས་པ་ཞེས་བྱ་སྟེ། དེས་བསྟན་པའི་མདོ་སྡེའམ།
ཡང་ན་མདོ་སྡེ་ཀུན་བསྟན་པའམ། སངས་རྒྱས་ཀྱིས་བསྟན་པའམ། ཉན་ཐོས་ཀྱིས་བསྟན་པའོ། །དགེ་སློང་མ་དག་གིས་ཞེས་བྱ་བ་ནི་ཆོས་འདི་ལ་ཞུགས་པའོ། །ཆོས་དང་མཐུན་པ་འདུལ་བ་དང་མཐུན་པ་ཞེས་བྱ་བ་ནི་ཆོས་དང་འདུལ་བ་དང་སྟོན་པས་བསྟན་པ་བཞིན་དུ་
རིམ་གྱིས་ཕན་པ་ལ་ཞུགས་པའི་ཕྱིར་བསྒོ་བའོ། །བདག་ངག་མི་ཉན་ཅེས་བྱ་བ་ནི་དེ་ལ་གདམས་ཤིང་རྗེས་སུ་བསྟན་པ་ལ་བདག་ཉིད་མ་གཏོགས་པར་བྱེད་པའོ། །འཕགས་མ་དག་དགེ་ཡང་རུང་སྡིག་ཀྱང་རུང་བདག་ལ་ཅུང་ཟད་ཀྱང་མ་སྨྲ་ཤིག་ཅེས་བྱ་བ་ནི་འཕགས་མ་ནི་སྙན་ཚིག་གོ། །དགེ་
བ་ལ་ནི་མ་གཞུག་ཅིག །སྡིག་པ་ལ་ནི་མ་བཟློག་ཅིག་པའོ། །བདག་ལ་ཅུང་ཟད་ཀྱང་མ་སྨྲ་ཤིག་ཅེས་བྱ་བ་ནི་བདག་ཉིད་ཀྱི་ཕྱིར་ཕ་རོལ་གྱི་ཚིག་གི་ལམ་འགོག་པའོ། །བདག་ཀྱང་འཕགས་མ་དག་ལ་དགེ་ཡང་རུང་སྡིག་ཀྱང་རུང་ཞེས་བྱ་བ་ནི། དགེ་བ་ལ་མི་གཟུང་ངོ་། །སྡིག་པ་
ལས་མི་ལྡོག་སྟེ། བདག་ཉིད་ཀྱི་ཕྱིར་གཅིག་ལ་གཅིག་འདོམས་ཤིང་རྗེས་སུ་སྟོན་པས་སྤོང་བར་བྱེད་པའོ། །ཚིག་གི་ལམ་བཟློག་ཤིག་ཅེས་བྱ་བ་ནི་ཞི་བར་བྱོས་ཤིག་ང་ལ་རྗེས་སུ་སྟོན་པར་ཁྱེད་སུས་བསྒོས་ཞེས་བྱ་བའོ། །སྨྲས་པ་ཆོག་གོ་ཞེས་བྱ་བ་ནི་འདི་སྐད་དུ་སྨྲས་པས་

བདག་ལ་འཚེ་ཅི་དགོས་ཆོག་གོ། །ཁྱེད་ཅག་ཉིད་ལ་ཕན་པ་ལ་འཇུག་པར་གྱིས་ཤིག །གཞན་ལ་གླེངས་ཏེ་ཅི་བྱ་ཞེས་པའོ། །དགེ་སློང་མ་དེ་ལ་ཞེས་བྱ་བ་ནི་ཏི་ཤའོ། །དགེ་སློང་མ་རྣམས་ཀྱིས་ཞེས་བྱ་བ་མན་ཆད་ནི་གོང་དུ་བཤད་པ་བཞིན་ནོ། །ལྷག་མ་ཉི་ཤུ་པ་
རྫོགས་སོ།། །།འཕགས་མ་དག་བདག་གིས་དགེ་འདུན་ལྷག་མའི་ཆོས་ཉི་ཤུ་པོ་དག་བཤད་ཟིན་ཏོ་ཞེས་བྱ་བ་ནི་མཇུག་བསྡུ་ཞིང་སྤྲོ་བ་བསྐྱེད་པའོ། །བཅུ་གཉིས་ནི་ཉེས་པ་དང་པོ་དེ་ཉིད་ཀྱིས་སོ་ཞེས་བྱ་བ་ནི་དགེ་འདུན་གྱིས་བཟློག་ཀྱང་རུང་མ་བཟློག་ཀྱང་རུང་། བྱས་མ་ཐག་ཏུ་ཉེས་པ་རྣམ་
པར་གཞག་པའི་ཕྱིར་རོ། །བརྒྱད་པ་ནི་ལན་གསུམ་གྱི་བར་དུའོ་ཞེས་བྱ་བ་ནི་དཀོན་མཆོག་གསུམ་དང་བསླབ་པ་གཏོང་བ་ནས་བཀའ་བློ་མི་བདེ་བའི་བར་བརྒྱད་པོ་རྣམས་ནི་དགེ་འདུན་གྱིས་བཟློག་སྟེ། མི་ལྡོག་ན་ལན་གསུམ་པའི་ཚིག་ཚོགས་མ་ཐག་ཏུ་དགེ་འདུན་གྱིས་བཀའ་བཅག་པས་
ཉེས་པ་རྣམ་པར་གཞག་པའི་ཕྱིར་རོ། །དགེ་སློང་མ་དེ་དག་ལས་ཞེས་བྱ་བ་ལ་སོགས་པ་ནི་ཉེས་པ་ལས་དབྱུང་བའི་ཆོས་རྣམས་སྟོན་ཏེ། འདི་ལ་ཡང་རྣམ་པ་ལྔས་བཤད་དེ། ཉེས་པ་དང་། བསམ་པ་དང་། ཉེས་པའི་ཆད་པའི་ལས་དང་། སྤྱད་པ་དང་། གང་ཟག་བསྟན་
པའོ། །དེ་ལ་ཉེས་པ་བསྟན་པ་ཞེས་བྱ་བ་ནི་དགེ་སློང་མས་དེ་དག་ལ་ཉེས་པ་གང་ཡང་རུང་བ་ཞིག་བྱས་ལ་ཞེས་བྱ་བ་ཡིན་ཏེ། །དེ་དག་ལས་ཉེས་པ་གང་ཡང་རུང་བ་ཞེས་བྱ་བ་ནི་དགེ་འདུན་ལྷག་མ་ཉི་ཤུ་ལས་གང་ཡང་རུང་བའོ། །བསམ་པ་གཏན་པ་ཞེས་བྱ་བ་ནི་ཇི་སྲིད་དུ་ཤེས་བཞིན་
དུ་བཅས་པ་དེ་སྲིད་དུ་མི་འདོད་པ་བཞིན་དུ་ཆད་པ་བྱེད་དུ་གཞུག་གོ་ཞེས་བྱ་བའོ། །དེ་ལ་ཇི་སྲིད་དུ་ཞེས་བྱ་བ་ནི་ཞག་གམ་ཟླ་བའམ་ལོ་ཡང་རུང་ངོ་། །དེ་བཞིན་དུ་ཞེས་བྱ་བ་ནི་ཉེས་པ་བྱུང་ཡང་ཉེས་པར་མི་ཤེས་སམ་དྲན་པ་ཉམས་པ་ཡང་རུང་སྟེ། བཅབས་པའི་སེམས་མེད་པས་ཞག་འདས་
ཀྱང་དེ་ལ་མཚན་མོ་བཅབས་པའི་ཉེས་པ་མེད་པའི་ཕྱིར་རོ། །བཅབས་པ་ཞེས་བྱ་བ་ནི་མཚན་མོ་བཅབས་པ་དང་། སེམས་ཀྱིས་བཅབས་པའོ། །དེ་ལ་མཚན་མོ་བཅབས་པ་ནི་ལྷག་མ་བྱུང་ན་བཅབས་པར་སེམས་བསྐྱེད་དེ་སྐྱ་རེངས་ཀྱིས་ཆོད་པའོ། །སེམས་ཀྱིས་བཅབས་པ་ནི་ཉེས་

པ་བྱུང་ནས་བཅབས་པར་སེམས་བསྐྱེད་གང་ལ་གང་སྐྱ་རེངས་ཀྱིས་མ་ཆོད་པའོ། །སྐབས་འདིར་མི་འདོད་བཞིན་དུ་ཆད་པ་བྱེད་དུ་གཞུག་པ་ནི་འདི་གཉི་ག་གཟུང་ངོ་། །བཤགས་པར་འདོད་པ་ལས་བརྗེད་དེ་མ་བཤགས་ན་བཅབས་པའི་ཉེས་པ་མེད་ཞག་རེས་ཉེས་བྱས་རེ་རེའོ། །འོན་པ་
དང་། སྐད་བརྡ་མི་ཕྲད་པ་དང་། མཚམས་ཀྱི་ཕྱི་རོལ་དུ་གནས་པ་དང་། རང་བཞིན་དུ་གནས་པ་མ་ཡིན་པ་དང་། ཕས་ཕམ་པ་བྱུང་བ་དང་། མཚམས་མེད་པ་ལྔ་བྱས་པ་དང་། ཁྱིམ་དང་། དགེ་ཚུལ་མ་ལ་སོགས་པ་ལ་མཐོལ་ན་མཐོལ་བར་མི་ཆུད་དེ་བཅབས་
པའི་ཉེས་པ་ནི་མེད། ཉེས་བྱས་ནི་ཡོད་དོ། །བཅབས་པ་བཤགས་པར་བསམས་པ་ལས་དྲན་པ་ཉམས་སམ། ཁྱིམ་པར་བབས་ཏེ་སླར་དྲན་པ་རྙེད་ཅིང་རབ་ཏུ་བྱུང་ན། དྲན་པ་ཉམས་པ་དང་། བཅབས་པ་བཀོལ་ཏེ། སྔ་ཕྱི་ཇི་སྲིད་བཅབས་པ་དེའི་ཆད་པ་
བྱེད་དུ་གཞུག་གོ། །ལྷག་མ་གཉིས་དུས་གཅིག་ཏུ་བྱུང་སྟེ། ཟླ་བ་གཉིས་བཅབས་པ་ལས་ཅིག་སྔར་མཐོལ་ཏེ། ཆད་པ་ཟླ་བ་གཉིས་ཚང་བའི་ཚེ་ཅིག་ཤོས་ཀྱང་མཐོལ་ན་ཟླ་བ་གཉིས་ཀྱིས་ཆད་པ་དེ་ཡང་བྲལ་བར་བྱ་སྟེ། དུས་གཅིག་ཏུ་མཐོལ་ན་ཡང་ཆད་པ་ཟླ་བ་གཉིས་
སུ་ཟད་པའི་ཕྱིར་རོ། །ཟླ་བ་གཉིས་བཅབས་པ་ཇི་ལྟ་བར་གཞན་རྣམས་ཀྱང་དེ་བཞིན་དུ་རིག་པར་བྱའོ། །གང་ཉེས་པ་བྱུང་ནས་ཇི་སྲིད་དུ་བཅབས་པའི་ཞག་མི་མངོན་པ་དེས་ནི། གཙང་མའི་མཐའ་ནས་བཟུང་སྟེ་ཆད་པ་བྱེད་དུ་གཞུག་གོ། །ཉེས་པ་བྱུང་ན་བཅབས་པ་ལས་མཐོལ་ནས་སྔ་
མའི་ཆད་པ་བྱེད་པའི་ཚེ། ཉེས་པ་སྔ་མ་དང་འདྲ་བའམ་མི་འདྲ་བ་གཞན་བྱུང་ན་ཆད་པ་སྔ་མ་བླངས་པ་སྤང་ལ་བུབ་སྟེ། ཆད་པ་གཞི་ནས་བླངས་ནས་བྱེད་དུ་གཞུག་སྟེ། འདི་ནི་གཞི་ནས་བླངས་པའི་ཆད་པ་ཞེས་བྱའོ། །གལ་ཏེ་ཆད་པ་དེ་ཉིད་བྱེད་པའི་ཚེ་ཡང་ཉེས་པ་བྱུང་ན་སྔ་མ་སྤང་ལ་
བུབ་སྟེ། ཡང་ཆད་པ་གཞི་ནས་བཟླས་ཏེ་བྱེད་དུ་གཞུག་གོ། །འདི་ནི་གཞི་ནས་བླངས་པ་བཟླས་པའི་ཆད་པ་ཞེས་བྱའོ། །མི་འདོད་བཞིན་དུ་ཆད་པ་བྱེད་དུ་གཞུག་ཅེས་བྱ་བ་ནི་མི་བཏུབ་ན་བཏང་བ་མ་ཡིན་པའི་ཕྱིར་ཏེ། གལ་ཏེ་མི་བཏུབ་ན་གཉེན་པོ་ལ་མི་བརྟེན་པའི་ཕྱིར་དགར་བའི་ལས་

བྱའོ། །ཆད་པ་ཅི་ཞིག་བྱེད་དུ་གཞུག་ཅེ་ན། ཆད་པ་བྱེད་པ་དང་། མགུ་བ་སྤྱོད་པ་གཉིས་ནི་འདྲའོ། །ཆད་པ་དང་མགུ་བ་བྱེད་པའི་ཚུལ་ནི་འདྲ་སྟེ། རང་བཞིན་དུ་གནས་པ་དང་། ཕྱག་བྱ་བ་བདག་གིར་མི་བྱ། སྟན་གཅིག་ལ་འདུག་པར་མི་བྱ། སྟན་མཐོ་བ་འམ་
མཉམ་པ་ཉིད་ལ་མ་ཡིན། བསྟབས་ཏེ་འདུག་པར་མི་བྱ། མདུན་ན་འཆག་པར་མི་བྱ། ཕྱི་ནས་འགྲོ་བའི་དགེ་སྦྱོང་མ་འགྲོ་བར་བྱའོ། །གཡོགས་པ་གཅིག་གི་ནང་དུ་གནས་པར་མི་བྱ། གཞན་རབ་ཏུ་མི་འབྱུང་། བསྙེན་པར་རྫོགས་པར་མི་བྱ། གནས་བཅའ་བ་མི་སྦྱིན། དགེ་ཚུལ་
བསྡུ་བའི་ལས་མི་བྱ། གསོལ་བ་ལ་སོགས་པའི་ལས་བྱེད་པར་མི་བསྐོ། དགེ་སློང་མ་རྣམས་ལ་གླེང་བར་མི་བྱ། རང་བཞིན་དུ་གནས་པ་རྣམས་ཀྱིས་རྐང་བ་བཀྲུ་བ་དང་། སྒོ་དབྱེ་བ་དང་། མེ་མར་འབྱུང་བ་དང་། གཙུག་ལག་ཁང་བསྐུ་བ་དང་། ཕྱག་དར་བྱ་བ་དང་། བཤང་གཅི་སའི་
ཝ་བཀྲུ་བ་དང་། ས་དང་ལོ་མ་དང་། གྲོང་དྲོ་བསལ་བ་རླུང་ཡབ་ཀྱིས་གཡབ་པ་དང་། མལ་སྟན་སྦ་བ་དང་། ལྷུང་བཟེད་ཀྱི་གཞི་བསལ་བར་བྱའོ། །བསྙེན་པར་རྫོགས་པ་ཐམས་ཅད་ཀྱི་ནི་འོག །དགེ་ཚུལ་མ་རྣམས་ཀྱི་གོང་དུ་འདུག་པར་བྱའོ། །སྟོན་པ་འདུག་པ་གསོལ་ཞིང་བསྟོད་
པ་དང་། གཎྜཱི་བརྡུང་བར་བྱ་བ་དང་། དྲི་གཙང་ཁང་ཕྱགས་པ་དང་། ཆག་ཆག་གདབ་པ་དང་། ཚེས་གྲངས་རྣམས་བརྗོད་པར་བྱའོ། །ཆད་པ་དང་མགུ་བ་ཞག་ཏུ་སྤྱད་པ་ཡང་དགེ་འདུན་འདུས་པ་རྣམས་ལ་བརྗོད་པར་བྱ་སྟེ། རེ་རེའི་དྲུང་དུ་ནི་མ་ཡིན་ནོ། །ཆད་པ་དང་མགུ་བ་སྤྱད་པ་
ཡང་། ཆད་པའམ་མགུ་བར་བྱེད་པའམ། ཆད་པ་དང་མགུ་བར་བྱ་བ་བྱས་ཟིན་པའམ། བསླབ་པ་བྱིན་པ་ལ་སོགས་པའི་ཚོགས་ཀྱི་ནང་དུ་མི་བྱའི་གང་ན་རང་བཞིན་དུ་གནས་པ་ཡོད་པ་དེར་སྤྱད་པར་བྱའོ། །འདི་དབྱེ་བ་མང་མོད་ཀྱིས་འདིར་མདོ་ཙམ་ཞིག་བསྟན་ཏོ། །ཉེས་པའི་ཆད་པའི་ལས་
བསྟན་པ་ཞེས་བྱ་བ་ནི་དགེ་སློང་མས་མི་འདོད་བཞིན་དུ་ཆད་པ་བྱས་ནས་དེའི་འོག་ཏུ་དགེ་འདུན་གཉི་ག་མགུ་བར་བྱའོ་ཞེས་བྱ་བ་ཡིན་ཏེ། ཆད་པ་དང་མགུ་བ་སྤྱད་པའི་ཚུལ་ནི་གོང་དུ་བཤད་པ་དང་འདྲ་བས་མ་བཤད་དེ། དེའི་འོག་ཏུ་ཞེས་བྱ་བ་ནི་ཆད་པ་བྱས་པའི་འོག་ཏུའོ། །དགེ་འདུན་གཉི་ག་ཞེས་

བྱ་བ་ནི་དགེ་སློང་ཕའི་དགེ་འདུན་དང་། དགེ་སློང་མའི་དགེ་འདུན་ནོ། །མགུ་བར་བྱའོ་ཞེས་བྱ་བ་ནི་ཟླ་བ་ཕྱེད་ཀྱི་བར་དུ་དགེ་འདུན་གཉི་ག་མགུ་བར་བྱོས་ཤིག་པའོ། །སྤྱོད་པ་བསྟན་པ་ཞེས་བྱ་བ་ནི་དགེ་སློང་མས་མགུ་བར་བྱས་ནས་དབྱུང་བ་ལ་ཐོགས་ཏེ་ཆོས་དང་མཐུན་པར་བྱས་ན་ཞེས་བྱ་བའོ། །དེ་
ལ་དབྱུང་བ་ལ་ཐོགས་ཏེ་ཞེས་བྱ་བ་ནི་ཇི་ལྟར་དུག་མདས་ཕོག་པ་ཇི་སྲིད་དུ་མ་ཕྱུང་བ་དེ་སྲིད་དུ་མི་བདེ་བ་དང་འདྲ་བར་ཉེས་པ་བྱས་པ་འདི་ཡང་དགེ་འདུན་གཉི་གས་གསོལ་བ་དང་བཞིའི་ལས་ཀྱིས་མ་ཕྱུང་ན་ཡུན་རིང་པོར་ངན་སོང་གསུམ་དུ་མི་བདེ་བ་རྣམ་པ་སྣ་ཚོགས་མྱོང་བར་འགྱུར་བའི་ཕྱིར་རོ། །ཆོས་
དང་མཐུན་པར་བྱས་ན་ཞེས་བྱ་བ་ནི་ཉེས་པ་བྱུང་བ་དེས་ཇི་སྲིད་དུ་བཅབས་པའི་ཆད་པ་ཡང་ཆོས་བཞིན་དུ་བཅད། ཟླ་བ་ཕྱེད་ཀྱི་བར་དུ་དགེ་འདུན་གཉི་ག་ལ་མགུ་བ་ཡང་ཆོས་བཞིན་དུ་བྱས་པའོ། །གང་ཟག་བསྟན་པ་ཞེས་བྱ་བ་ནི་གང་ན་དགེ་འདུན་གཉི་གའི་ཚོགས་བཞི་བཅུ་ཡོད་པ་དེར་དགེ་
སློང་མ་དེ་དབྱུང་བར་བྱའོ། །དགེ་འདུན་གཉི་ག་ལས་བཞི་བཅུར་གཅིག་གིས་མ་ཚང་བས་གལ་ཏེ་དགེ་སློང་མ་དེ་ཕྱུང་ན་དགེ་སློང་མ་དེ་ཡང་མ་ཕྱིན་པ་དགེ་འདུན་གཉི་ག་ཡང་སྨད་པར་འགྱུར་ཏེ། དེ་ལ་ནི་དུས་ཡིན་ནོ་ཞེས་བྱ་བ་ཡིན་ཏེ། དེ་ལ་གཉི་གའི་ཚོགས་བཞི་བཅུ་ཞེས་བྱ་བ་ནི་དགེ་འདུན་
མ་ཡང་ཉི་ཤུ་དགེ་འདུན་ཕ་ཡང་ཉི་ཤུ་སྟེ་དེ་ལས་ཉུང་དུ་མི་གནང་བའི་ཕྱིར་བཞི་བཅུ་ཞེས་སྨོས་པར་ཟད་ཀྱི་དེ་ལས་ལྷག་ན་བརྒྱ་སྟེ་ཅི་སྙེད་ཀྱང་རུང་ངོ་། །དགེ་སློང་མ་དེ་དབྱུང་བར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །དེ་ཡང་མ་ཕྱིན་ལ་བྱ་བའི་ཉེས་པ་ལས་སོ། །སྨད་
པར་འགྱུར་ཏེ་ཞེས་བྱ་བ་ནི་དགེ་འདུན་གཉི་ག་ལ་འདས་པ་དང་བཅབས་པའི་ཉེས་བྱས་ཡོད་པའི་ཕྱིར་རོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་དགེ་འདུན་ལྷག་མའི་ཉེས་པ་བྱུང་བའི་གང་ཟག་དེ་ལ་ཚངས་པར་འགྱུར་ཞིང་ཉེས་པ་ལས་ཕྱིན་པའི་དུས་ནི་འབྱིན་པར་བྱེད་པའི་ཆོས་སྔར་བསྟན་པ་
ལས་བྱུང་བ་བཞིན་དུ་བྱས་པ་ཡིན་ནོ་ཞེས་བྱ་བའི་ཐ་ཚིག་གོ། །གང་ཟག་ཆད་པ་དང་མགུ་བ་སྤྱོད་པ་རྣམ་པ་དྲུག་ཡོད་དེ། ཐམས་ཅད་གནག་པ་དང་། ཕལ་ཆེར་གནག་པ་དང་། ཕྱེད་གནག་པ་དང་། ཕྱོགས་གཅིག་གནག་པ་དང་། ཅུང་ཟད་གནག་པ་དང་། ནག་པོ་

མེད་པའོ། །དེ་ལ་ཐམས་ཅད་གནག་པ་ནི་ཆད་པ་རྣམ་པ་གསུམ་དང་། མགུ་བ་རྣམ་པ་གསུམ་དང་། འབྱུང་བ་བདུན་ཏེ་ཐམས་ཅད་ཆོས་བཞིན་མ་ཡིན་པས་བྱས་པའོ། །ཕལ་ཆེར་གནག་པ་ནི་གང་ཆད་པ་ནི་ཆོས་བཞིན་ལ་གཞན་དྲུག་པོ་ཐམས་ཅད་
ཆོས་བཞིན་མ་ཡིན་པའོ། །ཕྱེད་གནག་པ་ནི་གཉིས་ཆོས་བཞིན་ལ། གཞན་ལྔ་པོ་རྣམས་ཆོས་བཞིན་མ་ཡིན་པའོ། །ཕྱོགས་གཅིག་གནག་པ་ནི་གསུམ་ཆོས་བཞིན་ལ་བཞི་ཆོས་བཞིན་མ་ཡིན་པའོ། །ཅུང་ཟད་གནག་པ་ནི་དྲུག་ཆོས་བཞིན་ལ། གཅིག་ཆོས་བཞིན་མ་ཡིན་པའོ། །
ནག་པོ་མེད་པ་ནི་ཐ་མའི་དབྱུང་བ་ཡང་ཆོས་བཞིན་པ་སྟེ། དེ་བས་ན་ནག་པོ་མེད་པས་ནི་ཉེས་པ་ལས་ཕྱུང་བ་ཡིན་གྱི་སྔ་མ་རྣམས་ནི་མ་ཡིན་ནོ། །གང་ཟག་རྣམ་པ་དྲུག་གིས་ནི་དགེ་སློང་མ་གཅིག་གི་མདུན་དུ་བཤགས་པས་ཚང་བར་འགྱུར་ཏེ། དྲུག་གང་ཞེ་ན་མདོ་སྡེ་དང་། འདུལ་བ་དང་། མ་མོ་
ཟད་པར་འཛིན་པ་དང་། ཤིན་ཏུ་ངོ་ཚ་ཡོད་དེ་གང་དག་རྐྱེན་དེས་འཆི་བར་འགྱུར་བ་དང་། དགེ་འདུན་གྱི་གནས་བརྟན་མ་དང་གྲགས་ཤིང་བསོད་ནམས་ཆེ་བ་སྟེ། བསམ་པ་རྣམ་པར་དག་པས་ཉེས་པ་ལས་དབྱུང་བ་ཡིན་གྱི་ཆད་པའི་ལས་ཀྱིས་ནི་མ་ཡིན་པའི་ཕྱིར་རོ། །ཡོངས་སུ་དག་པ་དྲི་བ་
ནི་གོ་སླ་བས་འདིར་བཤད་པ་མ་བྱས་སོ། །ལྟུང་བའི་དངོས་པོ་རྣམས་བསྟན་པ་ལ་སྔར་ཕྱེ་བའི་གཉིས་པ་སྟེ་དགེ་འདུན་ལྷག་མའི་སྡེའི་བཤད་པ་རྣམས་རྫོགས་སོ།། །།ལྟུང་བའི་དངོས་པོ་བསྟན་པ་ལ་ལྔར་ཕྱེ་བའི་གསུམ་པ་སྟེ། ལྟུང་བའི་སྡེ་རྣམས་འདིར་སྟོན་ཏོ། །འདི་ལ་ཡང་
གཉིས་སུ་དབྱེ་སྟེ། སྤང་བའི་ལྟུང་བ་དང་། ལྟུང་བའོ། །དེ་ལ་སྤང་བའི་ལྟུང་བ་ནི་སུམ་ཅུ་རྩ་གསུམ་པའོ། །ལྟུང་བ་ནི་བརྒྱ་བརྒྱད་ཅུ་སྟེ། སྤང་བའི་ལྟུང་བ་རྣམས་བསྟན་པའི་ཕྱིར། མདོར་ན། ཞག་བཅུར་བཅད་དང་བྲལ་བར་མི་བྱ་དང་། །ཟླ་བ་དང་ནི་འབྲུ་དང་མི་བླང་དང་། གཉེན་མིན་
མི་བླང་སྟོད་གཡོགས་དང་། །པགས་པ་གཉིས་དང་ཕོ་ཉ་རིན་བསྐུར་བའོ། །ཞེས་བྱ་བ་གསུངས་ཏེ། དེ་ལ་ཞག་བཅུར་བཅད་དང་ཞེས་བྱ་བ་ནི་སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་སྦོམ་དགའ་མོ་གོས་མང་པོར་གྱུར་ཏེ། བསོད་སྙོམས་ལ་འཇུག་པའི་ཚེ་གོས་གཞན་

གྱོན་ཏེ། དེ་བཞིན་དུ་ཟན་ཟ་བ་དང་། མཁན་མོ་དང་། སློབ་དཔོན་གྱི་དྲུང་དུ་འགྲོ་བ་དང་། མཆོད་རྟེན་ལ་ཕྱག་འཚལ་བའི་ཚེ་གོས་ལེན་རེ་བརྗེ་བས་བྱ་བ་དང་བྱེད་པ་མང་བར་གྱུར་ཏེ། དགེ་བ་སྣ་ཚོགས་ཀྱི་བར་ཆད་དུ་གྱུར་པས་དེ་ལྟ་བུར་གྱུར་པ་སྟོན་པ་ལ་གསོལ་ནས། སྦོམ་དགའ་
མོ་རྣམ་པ་དུ་མས་སྨད་དེ་བསླབ་པའི་གནས་བཅས་སོ། །དགེ་སློང་མས་ཆོས་གོས་ཟིན་ཏེ། གཏན་པ་ཕྱུང་ནས་ཆོས་གོས་ལྔ་ཆོངས་ཤིག་དེ་ལས་ལྷག་པར་འཆང་ན་སྤོང་བའི་ལྟུང་བའོ། །དེ་ལྟར་སྟོན་པས་བསླབ་པའི་གནས་བཅས་པ་དང་། ཁྱིམ་བདག་གི་བུད་མེད་ཞིག་གིས་
བསམས་པ། སྐྱེ་དགུའི་བདག་མོ་ནི་ལྷ་དང་མིའི་མཆོད་གནས་ཡིན་ན། དེ་ལ་བདག་གིས་རིན་ཐང་ཆེན་པོའི་གོས་ཤིག་བསྐོན་ནོ་སྙམ་པ་ལས། དེའི་ཚེ་ཨུཏྤ་ལའི་ཁ་དོག་མ་མཉན་དུ་ཡོད་པར་བསོད་སྙོམས་ལ་ཞུགས་ཏེ། རིམ་གྱིས་བསོད་སྙོམས་རྒྱུ་བ་ལས། ཁྱིམ་
བདག་གི་བུད་མེད་དེའི་གན་དུ་ཕྱིན་པ་དང་དེས་ཕྱག་འཚལ་ནས་འདི་སྐད་ཅེས་སྨྲས་སོ། །འཕགས་མ་སྐྱེ་དགུའི་བདག་མོ་གང་ན་བཞུགས། དེས་སྨྲས་པ་དབྱར་མོ་ཐང་ནའོ། །ཁྱིམ་བདག་གི་བུད་མེད་ཀྱིས་སྨྲས་པ། འཕགས་མ་མཁྱེན་པར་མཛོད་ཅིག །བདག་གིས་ཡུན་
རིང་མོ་ནས་བསམས་པ། སྐྱེ་དགུའི་བདག་མོ་ལ་རིན་ཐང་ཆེན་པོའི་གོས་ཤིག་བསྐོན་སྙམ་ནས་བདག་ཅག་ཁྱིམ་པ་མོ་ནི་བྱ་བ་མང་བས་ན། འཕགས་མས་གོས་འདི་སྐྱེ་དགུའི་བདག་མོ་ལ་བསྐོན་པར་ཅི་གནང་། དེ་ནས་ཨུཏྤ་ལའི་ཁ་དོག་མས་བསམས་པ། མ་བླངས་ན་ནི་སྐྱེ་དགུའི་
བདག་མོའི་རྙེད་པ་ཡང་སྟོར་ལ། བུད་མེད་དེའི་བསོད་ནམས་ཀྱང་འགག་པར་འགྱུར་སྙམ་ནས་གོས་དེ་བླངས་ཏེ་སྐྱེ་དགུའི་བདག་མོའི་གན་དུ་སོང་སྟེ། དེ་ལྟར་གྱུར་པ་རྒྱས་པར་སྨྲས་པ་དང་། དགེ་སློང་མ་དག་གིས་སྟོན་པ་ལ་གསོལ་ནས་བཀའ་སྩལ་པ། སྔ་མ་ནི་བཅས་པའོ། །འདི་
ནི་གནང་བ་སྟེ། ཉན་ཐོས་མ་རྣམས་ལ་བསླབ་པའི་གནས་བཅའོ། །དགེ་སློང་མས་གོས་ཟིན་ཏེ་གཏན་པ་ཕྱུང་ནས། གོས་ལྷག་པ་རུང་བར་མ་བྱས་པ་རིང་ན་ཞག་བཅུའི་བར་དུ་ཆོངས་ཤིག་དེ་ལས་འདས་པར་བཅངས་ན་སྤོང་པའི་ལྟུང་བའོ། །དགེ་སློང་མས་གོས་ཟིན་ཏེ་གཏན་པ་ཕྱུང་

ཞེས་བྱ་བ་ནི་གོས་ཟིན་ལ་གཏན་པ་མ་ཕྱུང་བ་ཡང་ཡོད། གཏན་པ་ཕྱུང་ལ་གོས་མ་ཟིན་པ་ཡང་ཡོད། གོས་ཟིན་ལ་གཏན་པ་ཕྱུང་བ་ཡང་ཡོད། གོས་ཀྱང་མ་ཟིན་ལ་གཏན་པ་ཡང་མ་ཕྱུང་བ་ཡང་ཡོད་དོ། །གོས་ཟིན་ཞེས་བྱ་བ་ནི་བཀྲུས་དྲུབས་ཁ་དོག་བསྒྱུར་
བའོ། །གཏན་པ་ཕྱུང་ཞེས་བྱ་བ་ནི་ཚུལ་ནས་བྱུང་ནས་དགེ་སློང་མ་ཐམས་ཅད་སྤྱིའི་གོས་གཏན་པ་དྲུབས་ནས། ཟླ་བ་ལྔ་ཡུལ་རྒྱུ་ཞིང་གོས་ཚུལ་དུ་དོང་བ་ལས་ཟླ་བ་ལྔ་ལོན་ཏེ་ཕྱིར་ལྷགས་ནས་སྤྱིའི་ཆོས་གོས་ལ་གཏན་པ་ཕྱུང་ནས། སོ་སོའི་ཆོས་གོས་ལ་སྔགས་བཏབ་པའོ། །ཞག་བཅུ་ཞེས་
བྱ་བ་ནི་གོས་ལྷག་རྙེད་པ་ནས་བཟུང་སྟེ་ཞག་བཅུའི་བར་དུའོ། །གོས་ལྷག་ཅེས་བྱ་བ་ནི་བྱིན་གྱིས་བརླབས་པ་ལས་ལྷག་པའོ། །རུང་བར་མ་བྱས་ཞེས་བྱ་བ་ནི་གོས་ལྷག་གི་སྔགས་ཀྱིས་མ་བཏབ་པའོ། །ཆོངས་ཤིག་ཅེས་བྱ་བ་ནི་བདག་གིས་བྱ་བའོ། །དེ་ལས་འདས་པར་བཅངས་ན་
ཞེས་བྱ་བ་ནི་དེ་ལས་ཐལ་བའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ལ་ལྟུང་བ་བཤགས་པའོ། །ཞག་བཅུ་ལ་ཉིན་རེ་གོས་རེ་རེ་སྟེ་གོས་བཅུ་རྙེད་ན། ཐོག་མ་རྙེད་པའི་གོས་ཞག་བཅུ་འདས་ན་དེའི་ཤུགས་ཀྱིས་གཞན་ཞག་མ་ཚང་པ་ཡང་སྤང་ངོ་། །སྔ་ཕྱི་གོས་རེ་རེ་ཞིག་རྙེད་ན་ཕྱི་
ནས་རྙེད་པ་རུང་བར་བྱས་ན། སྔར་རྙེད་པར་རུང་བར་བྱོས་ཤིག །སྔར་རྙེད་པ་རུང་བར་མ་བྱས་ལ་ཞག་བཅུ་འདས་ན་སྔ་མ་ནི་སྤང་། གོས་ཕྱི་མ་རུང་བར་བྱས་པ་ནི་སྤང་མི་དགོས་སོ། །གོས་རྒྱུ་དང་དབྱིབས་བརྟགས་པ་རྣམས་ནི་མཁན་པོ་དང་སློབ་དཔོན་ལ་བསྔོའོ། །མ་བརྟགས་
པ་རྣམས་ནི་ཡོན་བདག་ལ་བསྔོའོ། །ཕྱོགས་བཅུའི་དགེ་འདུན་དང་དཀོན་མཆོག་གསུམ་གྱི་དཀོར་དང་མ་འདྲེས་པ་མཚམས་གཅིག་གི་དགེ་འདུན་གྱི་རྫས་ནི་གཙུག་ལག་ཁང་གཞན་གྱི་དགེ་སློང་ལ་བསྔོའོ། །མ་བསྔོས་ཏེ་ཞག་བཅུ་འདས་ན་དགེ་འདུན་གྱི་རྫས་སྤང་བར་འགྱུར་རོ། །
ཆོས་གོས་སྔགས་ཀྱིས་བཏབ་པ་ནི་བྱིན་གྱིས་བརླབ་པ་ཞེས་བྱ། གོས་ལྷག་སྔགས་ཀྱིས་བཏབ་པ་ནི་རུང་བར་བྱས་པ་ཞེས་བྱ་སྟེ། དགེ་སློང་མས་གོས་ལྷག་མ་སྤངས་ཀྱང་བྲལ་བར་མ་བྱས། བྲལ་བར་བྱས་ཀྱང་ལྟུང་བ་མ་བཤགས་པ་སྟེ། དེ་ལ་གསུམ་ལས་གཅིག་མ་བྱས་

ཀྱང་རུང་། གཉིས་དང་གསུམ་ཆར་མ་བྱས་ཀྱང་རུང་སྟེ། དེའི་ཤུགས་ཀྱིས་ལྷུང་བཟེད་དང་། དེའི་སྣོད་དང་། ཕོར་བུའམ། སྐ་རགས་སམ། དགེ་སྦྱོང་གི་ཡོ་བྱད་གང་ཡང་རུང་། རྫས་ལྷག་སྤང་བ་བྱུང་བའི་སྔོན་རོལ་ན་སྔགས་ཀྱིས་མ་ཐེབས་པ་ཀུན་སྤང་ངོ་། །སྤང་བའི་ལྟུང་བ་
དང་པོ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་མ་རྣམས་གོས་མང་ཞིག་རྙེད་པར་གྱུར་ཏེ། དེ་དག་གིས་གོས་དེ་རྣམས་བཀྲུས་དྲུབས་ཁ་དོག་བསྒྱུར་ཏེ། གཏུར་བུའི་ནང་དུ་བཅུག་ནས་དགེ་སློང་མ་གཞི་ན་འཁོད་པ་རྣམས་སུ་གཏམས་ནས།
ཤམ་ཐབས་དང་བླ་གོས་བགོས་ཏེ། ལྗོངས་རྒྱུ་ཞིང་དོང་བ་དང་། ལུས་མ་ཡོགས་ཤིང་ཤ་སྣང་བར་གྱུར་ལ། དགེ་སློང་མ་གཞི་ན་འཁོད་པ་དག་ཀྱང་དེ་དག་གི་གོས་སྐེམས། འདིང་། སྤྲུག །སྡུད་ཅིང་སྦེད་པས་ན་བྱ་བ་དང་བྱེད་པ་མང་བས་དགེ་བའི་བར་ཆད་དུ་གྱུར་ཏེ། དོན་ཉུང་བའི་དགེ་སློང་མ་
རྣམས་འཕྱ་སྟེ། དེ་ལྟར་གྱུར་པ་སྟོན་པ་ལ་གསོལ་ནས། གསོ་དཀའ་བ་དང་དགང་དཀའ་བའི་ཉེས་པས་སྨད་ནས་ཉན་ཐོས་མ་རྣམས་ལ་བསླབ་པའི་གནས་བཅས་སོ། །དགེ་སློང་མས་གོས་ཟིན་ལ་གཏན་པ་ཕྱུང་ནས་གལ་ཏེ་ནུབ་གཅིག་ཆོས་གོས་ལྔ་ལས་ཆོས་གོས་གང་ཡང་རུང་
བ་ལས་མཚམས་ཀྱི་ཕྱི་རོལ་དུ་བྲལ་ན་སྤང་བའི་ལྟུང་བའོ། །དེ་ལྟར་བསླབ་པའི་གནས་བཅས་ནས་སྟོན་པ་རྒྱལ་པོའི་ཁབ་ན་བཞུགས་སོ། །དེའི་ཚེ་ན་སྐྱེ་དགུའི་བདག་མོ་རྒྱལ་པོའི་ཁབ་དགེ་སློང་མའི་དབྱར་མོ་ཐང་རྒྱལ་པོའི་ཀུན་དགའ་ཞེས་བྱ་བ་ན་འདུག་གོ། །དེ་ནས་སྐྱེ་དགུའི་
བདག་མོ་བཅོ་ལྔའི་གསོ་སྦྱོང་གི་ཚེ། དགེ་སློང་མའི་དགེ་འདུན་དང་གསོ་སྦྱོང་ལ་འདུས་ཤིང་འདུག་གོ། །དགེ་སློང་མ་ཆོས་སྦྱིན་མ་ཡང་གསོ་སྦྱིན་གྱི་གནས་སུ་སོང་བ་ལས་ཆུ་བོ་དབྱར་བཟངས་བྲུག་པས་སྦྱར་མ་གཤེར་ཏེ་སྐམ་པ་ལ་རིང་དུ་ཐོགས་ཏེ། གསོ་སྦྱིན་གྱི་གནས་སུ་སོང་སྟེ་ཕྱིན་པ་དང་
གནས་བརྟན་མ་དག་གིས་བདག་ཅག་ནི་ཁྱོད་མ་འོངས་པ་ལ་རིང་ཞིག་ཐོགས་སོ་ཞེས་བྱས་པ་དང་། ཆོས་སྦྱིན་མས་ཀྱང་ཇི་ལྟ་བུར་གྱུར་པ་སྨྲས་ནས། འཕགས་མ་རྣམས་བདག་ནི་རྒས་ཏེ། སྦྱར་མ་ལྕི་བས་བཀུར་མི་ནུས་ན་ཇི་ལྟར་བགྱི་གྱིས་ཤིག་ཅེས་སྨྲས་པ་དང་། དེ་ལྟར་གྱུར་པ་

སྟོན་པ་ལ་གསོལ་ནས་དགེ་སློང་མ་ཆོས་སྦྱིན་མ་རྒས་པ་སྦྱར་མ་དང་བྲལ་བར་མི་འགྱུར་བའི་སྡོམ་པ་བྱིན་ཅིག་ཅེས་བཀའ་སྩལ་ཏེ། དེ་བས་ན་སྔ་མ་ནི་བཅས་འདན་གནང་བ་སྟེ། དེ་ལྟར་ན་ཉན་ཐོས་མ་རྣམས་ལ་བསླབ་པའི་གནས་བཅས་སོ། །དགེ་སློང་མ་གོས་ཟིན་ཏེ་གཏན་
པ་ཕྱུང་ནས་གལ་ཏེ་ཆོས་གོས་ལྔ་ལས་གང་ཡང་རུང་བ་ཞིག་ནུབ་གཅིག་མཚམས་ཀྱི་ཕྱི་རོལ་དུ་བྲལ་ན་དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བའོ། །གཏན་པ་ཕྱུང་ཞེས་བྱ་བ་ནི་སྔ་མ་བཞིན་ནོ། །ཆོས་གོས་ལྔ་ཞེས་བྱ་བ་ནི་སྦྱར་མ་དང་། སྟོད་ཆགས་དང་། ནང་གཡོགས་
དང་། གོང་ལུགས་དང་། རྔུལ་གཟན་ནོ། །ནུབ་གཅིག་ཅེས་བྱ་བ་ནི་ཞག་གཅིག་གི་སྐྱ་རེངས་ཀྱིས་ཆོད་པའོ། །མཚམས་ཀྱི་ཕྱི་རོལ་ཞེས་བྱ་བ་ནི་གྲོང་ཤིང་ཐགས་ཀྱིས་བསྐོར་བའི་མཚམས་ནི་ཤིང་ཐགས་ནས་གླང་དྲུག་གིས་འདྲེན་པའི་འོད་མའི་ཤིང་རྟའི་ཁོར་ཡུག་དང་བྱ་གག་
འཕུར་བ་ཆུན་ཆད་དོ། །གྲོང་རྩིག་པས་བསྐོར་བའི་གྲོང་ནི་བ་ལང་དང་། ལུག་གི་མིག་རྡུལ་གར་བབས་པ་ཚུན་ཆད་དང་། རང་བཞིན་གྱིས་ངོ་ཚ་བ་བཤང་གཅི་སྐྱེལ་བ་ཚུན་ཆད་དོ། །འོབས་ཀྱིས་བསྐོར་བའི་གྲོང་ནི་འོབས་ནས་སྐས་ཁྲུ་བཅུ་གཉིས་པ་ཚུན་ཆད་དོ། །ཡང་ན་
ཕྱག་དར་གྱི་ཕུང་པོའི་སྟེང་ནས་བོང་བ་འདྲིལ་ནས་གར་ཕྱིན་པ་ཚུན་ཆུད་དོ། །ཚོང་འདུས་ཀྱི་གྲོང་ནི་ཚོང་པ་སྤུན་མ་བགོས་པའི་ཚོང་དུས་ཀྱི་ཕྱི་ནས་འདོམ་གང་ཚུན་ཆད་དོ། །གྲུ་ནི་ཕྱི་རོལ་འདོམ་གང་ཚུན་ཆད་དང་ཡང་ན་ཕུར་པ་བཏབ་སྟེ་གྲུ་འདོགས་པ་ཚུན་ཆད་དོ། །ཤིང་དྲུང་ནི་ལོ་མ་
རླུང་གིས་བསྐྱོད་དེ་གར་ལྷུང་བ་དང་། ཐིགས་པ་ཟགས་པའི་ས་དང་། ཉི་མ་ཕྱེད་ནས་གྲིབ་མ་ཉི་མ་གར་འཁོར་བ་ཚུན་ཆད་དོ། །འབྲོག་དགོན་པ་ནི་འདོམ་གང་ཚུན་ཆད་མཚམས་སོ། །ཤིང་ཕལ་མོ་ཆེའི་ནི་ལོ་མ་འདྲེས་ནས་མཚམས་མ་ཕྱེ་བ་ཚུན་ཆད་དོ། །མ་འབྲེལ་
པ་ལ་ནི་འདོམ་གང་ཚུན་ཆད་དོ། །འདྲོན་པ་ལམ་དུ་ཞུགས་པ་ནི་འདོམ་བཞི་བཅུ་རྩ་དགུ་ཚུན་ཆད་དོ། །མཚམས་ཀྱི་བར་དུ་ནི་ཆོས་གོས་ཀྱི་མཐའ་ལུས་དང་མ་བྲལ་བར་བྱའོ། །མཚམས་དེ་རྣམས་ཀྱི་ཕྱི་རོལ་དུ་ཆོས་གོས་ལུས་ལ་བདག་ནང་དུ་འདུག་གམ་བདག་ཕྱི་རོལ་ན་འདུག་

ལ་ཆོས་གོས་ནང་དུ་ལུས་ཏེ་ཞག་གཅིག་གི་སྐྱ་རེངས་ཀྱིས་ཆོད་ན་སྤང་བར་འགྱུར་རོ། །དགེ་འདུན་གྱིས་གནང་བ་མ་གཏོགས་ཞེས་བྱ་བ་ནི་གནང་བ་བཀོལ་བའོ། །སྤངས་པའི་ལྟུང་བ་ཞེས་བྱ་བ་ནི་དངོས་པོ་སྤངས་ཏེ་ལྟུང་བ་བཤགས་པའོ། །སྤང་བ་གཉིས་པ་རྫོགས་སོ།། །།སྟོན་
པ་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་མ་རྣམས་གོས་སྔོན་པོ་ཞིག་རྙེད་ན་དེ་མི་ལངས་ཏེ་བཞག་ནས་ནམ་འདི་འདྲ་བ་ཞིག་རྙེད་ན་གདོད་གོས་བྱའོ་སྙམ་མོ། །སྔོན་པོ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྡུག་པོ་དང་། སྲབ་མོ་ཡང་ངོ་། །གང་སུ་ཡང་རུང་སྟེ། ཆོས་
གོས་ཚོལ་བས་བྱ་བ་དང་། བྱེད་པ་མང་བས་དགེ་བའི་བར་ཆད་དུ་གྱུར་ནས། དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །དགེ་སློང་མས་ཆོས་གོས་ཟིན་ཏེ་གཏན་པ་ཕྱུང་ནས་དུས་མ་ཡིན་པའི་གོས་རྙེད་ལ་འདོད་ན་དགེ་སློང་མ་དེས་གོས་དེ་ལོངས་ཤིག །བླངས་ནས་
གལ་ཏེ་ལངས་ན་ནི་མྱུར་དུ་གོས་སུ་དྲུབས་ཏེ་ཆོངས་ཤིག །ཁལ་ཏེ་མ་ལངས་ན་གོས་ཁ་མ་ལངས་པར་རྙེད་དུ་རེ་བ་ཡོད་ན་དགེ་སློང་མ་དེས་གོས་དེ་ཟླ་བ་གཅིག་གི་བར་དུ་ཞོག་ཤིག །དེ་ལས་འདས་པར་བཞག་ན་སྤང་བའི་ལྟུང་བའོ། །དགེ་སློང་མས་ཆོས་གོས་ཟིན་ལ་གཏན་པ་ཕྱུང་ཞེས་བྱ་བ་ནི་སྔ་མ་
བཞིན་ནོ། །དུས་མ་ཡིན་པའི་གོས་ཞེས་བྱ་བ་ནི་གཏན་པ་བཏིང་ན་སྟོན་ཟླ་ཐ་ཆུངས་ནས་དཔྱིད་ཟླ་ར་བ་ཉའི་བར་དུ་ཟླ་བ་ལྔ་ནི་དུས་ཞེས་བྱའོ། །དེ་ཕན་ཆད་ནི་དུས་མ་ཡིན་པའོ། །གཏན་པ་མ་བཏིང་ན་ཐམས་ཅད་ཀྱང་དུས་མ་ཡིན་ནོ། །གོས་རྙེད་དུ་རེ་བ་ཡོད་ན་ཞེས་པ་ནི་མ་དང་ཕ་དང་མིང་པོ་
དང་ཕུ་ནུ་མོ་དང་། མཁན་པོ་དང་སློབ་དཔོན་དང་དུས་སྟོན་གྱི་ཚེ་རྙེད་དུ་རེ་བའོ། །ཁ་མ་ལངས་ཞེས་བྱ་བ་ནི་ཆོས་གོས་ལྔའི་ཁ་མི་ལངས་པའི་ཕྱིར་རོ། །སྤངས་པའི་ལྟུང་བ་ཞེས་བྱ་བ་ནི་ལྟུང་བ་བཤགས་པ་ལས་དངོས་པོ་སྤང་བའོ། །ལྟུང་བ་ཇི་ལྟ་བུ་ཞེ་ན། ཚེས་གཅིག་ལ་གོས་ཤིག་
རྙེད་ལ་རེ་མེད་དམ་སྣོན་མི་རྙེད་དུ་དོགས་ན་བྱིན་གྱིས་རློབས་ཤིག །ཡང་ན་རུང་བར་གྱིས་ཤིག །ཡང་ན་བསྐུར་ཅིག །ཡང་ན་གཞན་ལ་བྱིན་ཅིག །དེ་ལྟར་མ་བྱས་ན་ཚེས་བཅུ་གཅིག་གི་སྐྱ་རེངས་ཤར་ན་སྤང་བའི་ལྟུང་བའོ། །ཚེས་གཅིག་ལ་གོས་ཤིག་རྙེད་ན་ཚེས་བཅུ་གཅིག་

ལ་གོས་ཕྱི་མ་རྙེད་ན་སྔ་མའི་ཤུགས་ཀྱིས་ཞག་བཅུར་སྡོད་དུ་མི་སྣང་ངོ་། །ཁ་ལངས་པ་སེར་པོ་ཞིག་རྙེད་དུ་རེ་བ་ལས་ཕྱིས་ཁ་དོག་མི་མཐུན་པ་ཞིག་རྙེད་ན་ཟླ་བ་གཅིག་ཏུ་སྡོད་དུ་མི་གནང་ངོ་། །གཉི་ག་ཁ་མ་ལངས་པ་རྙེད་དུ་རེ་བ་ཡོད་ན་ཟླ་བ་གཅིག་ཏུ་གནང་ངོ་། །
གོས་ལ་རྣམ་པ་ལྔ་སྟེ། བདག་པོ་ཡོད་པ་དང་། བདག་པོ་མེད་པ་དང་། སོང་ནས་ཕྱིར་འོངས་པ་དང་། དུར་ཁྲོད་པ་དང་། ཕྱག་དར་ཁྲོད་པའོ། །ཆོས་གོས་སྦྱར་མ་གསར་བ་ནི་ཉིས་རིམ་དུ་སྦྱར། རྙིང་པ་ནི་བཞི་རིམ་དུ་སྦྱར། ཚེམ་བུ་ནི་དུ་ཡང་རུང་ངོ་། །སྣམ་བུ་དགུ་པ་དང་བཅུ་གཅིག་
པ་དང་བཅུ་གསུམ་པ་ནི་དཀྱིལ་འཁོར་ཕྱེད་དང་གསུམ་པའོ། །བཅོ་ལྔ་པ་དང་བཅུ་བདུན་པ་དང་བཅུ་དགུ་པ་ནི་དཀྱིལ་འཁོར་ཕྱེད་དང་བཞི་པའོ། །ཉི་ཤུ་གཅིག་དང་ཉི་ཤུ་གསུམ་པ་དང་ཉི་ཤུ་ལྔ་པ་ནི་དཀྱིལ་འཁོར་ཕྱེད་དང་ལྔའོ། །སྣམ་བུ་ཉི་ཤུ་ལྔ་ལས་ལྷག་ན་ཚེམ་བུའོ། །ཞིང་ཁྲུ་གསུམ་དང་ཆུར་ཁྲུ་
ལྔའོ། །ཡང་ན་ཁྲུ་ཕྱེད་དང་ལྔ་དང་ཕྱེད་དང་གསུམ་མོ། །ལྔ་པ་ན་ཞིང་ཁྲུ་གསུམ་ཆུར་ཁྲུ་ལྔའོ། །ཡང་ཁྲུ་ཕྱེད་དང་གསུམ་དང་ཆུར་བཞིའོ། །འཁོར་གསུམ་ཡོད་པ་དེས་ཀྱང་ཆུད་དོ། །སྤང་བ་གསུམ་པ་རྫོགས་སོ།། །།བྱང་ཆུབ་སེམས་དཔའ་བཅོམ་ལྡན་འདས་དགའ་
ལྡན་གནས་ནས་རྣམ་པ་ལྔ་ལ་གཟིགས་ཏེ། རིགས་དང་ཡུལ་དང་རུས་དང་དུས་དང་བུད་མེད་ལ་གཟིགས་ནས་ཡུལ་གྱི་དབུས་སེར་སྐྱ། ཡབ་ཟས་གཙང་མ། ཡུམ་སྒྱུ་མའི་ལྷ་མོའི་ལྷུམས་སུ་གཤེགས་ནས་བཙས་པའི་ཉིན་མོ་མཉན་དུ་ཡོད་པར་རྒྱལ་པོ་ཨུ་ར་ཚངས་པས་བྱིན་གྱི་བུ་གསལ་
རྒྱལ་དང་། རྒྱལ་པོའི་ཁབ་ཏུ་པདྨ་ཆེན་པོའི་བུ་གཟུགས་ཅན་སྙིང་པོ་དང་། ཀཽ་ཤཱམྦཱིར་སྡེ་རྒྱལ་གྱི་བུ་ཤར་བ་དང་། གྲོང་ཁྱེར་རབ་རྒྱལ་དུ་མཐའ་ཡས་མུ་ཁྱུད་ཀྱི་བུ་རབ་སྣང་བཙས་ཏེ། རྒྱལ་པོ་དེ་རྣམས་ན་རེ་ས་ཆེན་པོ་གཡོས་པ་ནི་ངེད་ཀྱི་བུའི་ཡོན་ཏན་ཏེ། ཡོན་ཏན་ལས་བུའི་མིང་
རྣམས་ཀྱང་བརྟགས་སོ། །མཚན་མཁན་གྱིས་མཚན་བལྟས་ན། རབ་ཏུ་བྱུང་ན་ནི་མངོན་པར་འཚང་རྒྱའོ། །རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་བདུན་དང་ལྡན་པར་འགྱུར་རོ། །མཚན་ནི་དོན་ཐམས་ཅད་གྲུབ་པར་བཏགས་སོ། །རྒྱལ་པོ་ཆེན་པོ་བཞི་ཡང་སྐྲག་

ནས་དཔྱ་འབུལ་ལོ། །ཤཱཀྱ་ལྔ་བརྒྱ་གཡོག་མོས་པ་ཅན་ལྔ་བརྒྱ་ལྔ་བརྒྱ་དང་རྟ་དང་བ་ལང་ཅང་ཤེས་ལྔ་བརྒྱ་ལྔ་བརྒྱའང་དེ་དང་དུས་གཅིག་ཏུ་བཙས་སོ། །དོན་ཐམས་ཅད་གྲུབ་པས་དཀའ་བ་ལོ་དྲུག་སྤྱད་ནས་དོན་མེད་པར་གཟིགས་ནས་ཡུལ་བདེ་འགྲོར་གྲོང་དཔོན་གྱི་བུ་མོ་དགའ་མོ་དང་དགའ་
སྟོབས་ཀྱིས་ལན་བཅུ་དྲུག་ཏུ་བཞོས་པའི་འོ་མ་སྦྲང་རྩི་ཅན་གྱི་ཐུག་པ་གསོལ་ནས་ཀླུའི་རྒྱལ་པོ་དུས་ཅན་གྱི་རྩྭ་གསེར་གྱི་ཁ་དོག་ལྟ་བུའི་བྱང་ཆུབ་ཀྱི་ཤིང་དྲུང་དུ་བཏིང་སྟེ་སྟེང་དུ་བཞུགས་ནས་ནམ་གྱི་གུང་ཐུན་ལ་བདུད་བཏུལ་ནས་མངོན་པར་སངས་རྒྱས་སོ། །ཐོག་མར་ཡུལ་འཁོར་མོ་འཇིག་
ཏུ་ཉེ་ལྔ་དང་གྲོང་དཔོན་གྱི་བུ་ལྔ་བཅུ་སྡེ་བཏུལ། བ་ལང་གི་གནས་སྟུག་པོར་དྲུག་ཅུ་སྡེ་བཏུལ། བཟང་པོར་མི་ཕྱེད་པ་དང་དགའ་མོ་དང་དགའ་སྟོབས་བདེན་པ་ལ་བཀོད། ལྟེང་རྒྱས་སུ་རལ་པ་ཅན་སྟོང་དང་ག་ཡ་མགོའི་མཆོད་རྟེན་དུ་དགེ་སློང་སྟོང་པོ་ཆོ་འཕྲུལ་གྱིས་བཏུལ། ཡུལ་
མཉམ་དགའི་རྒྱལ་པོ་གཟུགས་ཅན་སྙིང་པོ་ལྷ་སྟོང་ཕྲག་བརྒྱད་ཅུ་དང་བྲམ་ཟེ་བརྒྱ་སྟོང་བདེན་པ་ལ་བཀོད། རྒྱལ་པོའི་ཁབ་ཏུ་མཽད་གལ་གྱི་བུ་དང་ཤཱ་རིའི་བུ་འཁོར་ཉིས་བརྒྱ་ལྔ་བཅུ་རབ་ཏུ་ཕྱུང་མཉན་དུ་ཡོད་པར་གསལ་རྒྱལ་བཏུལ་ནས་མཉན་དུ་ཡོད་པ་ན་བཞུགས་སོ། །ཡབ་ཀྱིས་
འཆར་ཀ་དེར་བཏང་ནས་སྤྱན་དྲངས་སོ། །འཆར་ཀ་བཅོམ་ལྡན་འདས་ཀྱིས་བཀའ་སྩལ་ཏེ། ཤཱ་རིའི་བུས་རབ་ཏུ་ཕྱུང་ངོ་། །དེ་ནས་བཅོམ་ལྡན་འདས་སེར་སྐྱར་གཤེགས་ནས་ཡབ་དང་ཤཱཀྱའི་རིགས་རྣམས་བཏུལ་ཏེ་བདེན་པ་ལ་བཀོད་དོ། །མཉན་དུ་ཡོད་པར་འཆར་ཀ་བསོད་སྙོམས་
ལ་སོང་པ་ཆུང་མ་སྦེད་མས་མཐོང་ནས་ངུད་མོ་བཏབ་སྟེ། ང་བོར་ཏེ་ཅི་བྱ་ཞེས་པ་དང་། ཁྱོད་པས་བྱང་ཆུབ་སེམས་དཔའི་བཙུན་མོ་གྲགས་འཛིན་མ་དང་། མགོ་ཕྱི་ཀ་ལ་སོགས་པ་དྲུག་སྟོང་བོར་ནས་རབ་ཏུ་བྱུང་ན། འདམ་དང་འདྲ་བ་ཁྱོད་ཅིག་ཅེས་ཞེས་པ་དང་། འོ་ན་བདག་ཀྱང་རབ་
ཏུ་འབྱུང་ངོ་། །དེ་བཞིན་དུ་སང་རབ་ཏུ་དབྱུང་ངོ་ཞེས་སྨྲས་སོ། །འཆར་ཀ་འགྱོད་དེ་ད་ལྟར་ལྷུང་བཟེད་ནག་པོ་ཅན་དག་འཕྱ་ཞིང་འདུག་ན་གལ་ཏེ། དགེ་སློང་མ་འདི་རབ་ཏུ་ཕྱུང་ན་དྲུག་སྡེ་པོས་དགེ་སློང་མ་འདི་རབ་ཏུ་ཕྱུང་ངོ་ཞེས་ཇེ་ཐུ་འཕྱ་བར་འགྱུར་རོ་སྙམ་ནས་རྒྱལ་པོའི་ཁབ་ཏུ་བྲོས་ཏེ་ཚུལ་

དུ་ཞུགས་སོ། །སྦེད་མ་ཕྱི་དེ་ཉིན་པར་འཆར་ཀ་ལ་བསྡད་དེ་མེད་ནས་ངུ་ཞིང་འདུག་པ་སྐྱེ་དགུའི་བདག་མོས་མཐོང་ནས་རབ་ཏུ་ཕྱུང་ངོ་། །ཚུལ་ནས་བྱུང་ནས་ཕྱིར་མཉན་དུ་ཡོད་པར་ཕྱིན་ནས་ཁ་ཏོན་ཟེར་ཞིང་འདུག་པ་ལ་སྦེད་མ་ཕྱག་འཚལ་དུ་འོངས་པ་དང་། སྔུན་གྱི་སྤྱད་
པ་རྣམས་དྲན་ནས་འདོད་ཆགས་ལངས་པ་སྦེད་མས་ཤེས་ཏེ་བྲོས་སོ། །འཆར་ཀས་མགོ་རེག་མ་སྡོད་ཅིག་ཅེས་བདས་པ་དང་བརླ་ལ་རེག་སྟེ་ཁུ་བ་གཏོར་རོ། །དེ་ནས་འདོད་ཆགས་ཞི་བ་དང་སྦེད་མ་སླར་ལོག་སྟེ་སྨད་གཡོགས་བཀྲུས་ཏེ་ལྟ་ཞེས་པ་དང་། ཁུ་བ་མཐོང་བ་དང་མོ་འདོད་ཆགས་
ལངས་ཏེ། ཁུ་བ་བཀོག་སྟེ་མངལ་སྒོར་བཅུག་པ་དང་སེམས་ཅན་དང་ལྡན་པར་གྱུར་ཏོ། །དགེ་སློང་མ་རྣམས་ཀྱིས་ཁྱོད་འཆར་ཀ་དང་ཉལ་ལོ་ཞེས་པ་དང་། བདག་འཆར་ཀ་དང་རེག་ཀྱང་མ་རེག་གོ་ཞེས་རྒྱས་པར་བཅོམ་ལྡན་འདས་ལ་གསོལ་ཏོ། །འདི་ཕམ་པར་གྱུར་པ་མ་ཡིན་གྱིས་
དབེན་པར་ཞོག་ལ་ཟས་ཀྱིས་མ་བྲེལ་བར་ཞོག་ཤིག །བུ་ནི་འོད་སྲུངས་གཞོན་ནུ་ཞེས་བྱ་བ་ཕྱིས་དགྲ་བཅོམ་པར་འགྱུར་རོ། །དེ་ནས་སྟོན་པས་དགོངས་པ་གཉེན་མ་ཡིན་པའི་དགེ་སློང་མ་ལ་གོས་འཁྲུར་བཅུག་པའི་ཉེས་དམིགས་སུ་འགྱུར་རོ་སྙམ་ནས་བསླབ་པའི་གནས་བཅས་སོ། །
ཡང་དགེ་སློང་མ་གང་གཉེན་མ་ཡིན་པའི་དགེ་སློང་གོས་རྙིང་འཁྲུ་བའམ་འཚེད་དམ་འཆག་ན་སྤང་བའི་ལྟུང་བའོ། །གཉེན་མ་ཡིན་ཞེས་བྱ་བ་ནི་ཕའི་བརྒྱུད་ཟུང་བདུན། མའི་བརྒྱུད་ཟུང་བདུན་གྱི་བར་དུ་གཉེན་པའོ། །གོས་ཞེས་བྱ་བ་ནི་བལ་དང་སྲིན་བལ་དང་། ཤ་ནའི་ཤུན་པ་ལ་
སོགས་པའོ། །རྙིང་པ་ཞེས་བྱ་བ་ནི་ཟླ་བ་བཞི། འཁྲུ་ཞེས་བྱ་བ་ནི་ཐ་ན་ཆུའི་ནང་དུ་བཅུག་པ་ཙམ་ཡང་ངོ་། །འཚེད་ཅེས་བྱ་བ་ནི་ཚོན་གྱི་ནང་ན་སྨྱུག་པ་ཙམ་ཡང་ངོ་། །འཆག་ཅེས་བྱ་བ་ནི་ལག་མཐིལ་གྱིས་བརྡབས་པའོ། །སྤང་བའི་ལྟུང་བའོ་ཞེས་པ་ནི་དངོས་པོ་སྤངས་ལ་ལྟུང་བ་
བཤགས་པའོ། །ལྟུང་བ་ཇི་ལྟ་བུ་ཞེ་ན་གཉེན་པ་མ་ཡིན་པ་ལ་གཉེན་མ་ཡིན་པར་འདུ་ཤེས་པ་དང་། གཉེན་མ་ཡིན་པ་ལ་ཐེ་ཚོམ་ཟ་བཞིན་འཁྲུ་འཆག་ལ་སོགས་པ་བྱས་ན་ལྟུང་བའོ། །གཉེན་ཡིན་པ་ལ་མ་ཡིན་པར་འདུ་ཤེས་པ་དང་གཉེན་ལ་ཐེ་ཚོམ་ཟ་སྟེ་བྱས་ན་གཉི་ག་ཉེས་

བྱས་སོ། །སྤང་བའི་ལྟུང་བ་བཞི་པ་རྫོགས་སོ།། །།བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་ཁྱིམ་བདག་ཕྱུག་ཅིང་ལོངས་སྤྱོད་ཆེ་བ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་སོ། །དེ་ནས་དུས་ཕྱི་ཞིག་ན་ཁྱིམ་བདག་དེ་ལོངས་སྤྱོད་ཟད་
པར་གྱུར་ཏོ། །ཁྱིམ་བདག་དེས་བདག་ནི་རྒས་ཏེ་ནོར་བསྒྲུབ་མི་ནུས་སོ་སྙམ་ནས་ཆུང་མ་ལ་བཟང་མོ་རབ་ཏུ་འབྱུང་ངོ་ཞེས་སྨྲས་པ་དང་། མོ་ན་རེ་ཇོ་བོ་དེ་ལྟར་བདག་ཀྱང་རབ་ཏུ་འབྱུང་ངོ་ཞེས་བྱས་པ་དང་། དེས་དེ་ལ་དེ་བཞིན་དུ་བྱའོ་ཞེས་ཏེ། གཅིག་ནི་དགེ་སློང་མའི་ནང་ན་རབ་ཏུ་འབྱུང་ངོ་། །ཁྱོད་
ནི་དགེ་སློང་ཕའི་ནང་ན་རབ་ཏུ་འབྱུང་ངོ་། །དུས་ཕྱི་ཞིག་ན་དགེ་སློང་དེ་བསོད་སྙོམས་ལ་ཞུགས་པ་དང་། དེས་གོས་རྙིང་པ་མཐོང་ནས་ཁྱོད་ལ་གོས་ལྟ་ཡོད་དམ་ཞེས་སྨྲས་པ་དང་། བདག་ལ་མ་མཆིས་སོ་ཞེས་སྨྲས་པ་དང་། དགེ་སློང་དེས་རང་གི་སྦྱར་མ་བྱིན་ནོ། །དེས་སྟོན་པས་ཀུན་
དགའ་བོ་ལ་ཁྱོད་སོང་ལ་དགེ་སློང་དག་དེ་བཞིན་གཤེགས་པ་དང་ལྷན་ཅིག་ཏུ་ལྗོངས་རྒྱུ་བར་དད་པ་རྣམས་ཆོས་གོས་དང་ཆོས་ཤིག་ཅེས་བཀའ་སྩལ་པ་དང་། ཀུན་དགའ་བོས་ཀྱང་དེ་བཞིན་དུ་བསྒོ་ནས་སྟོན་པ་འཁོར་དང་བཅས་པ་ལྗོངས་རྒྱུ་ཞིང་གཤེགས་སོ། །དེའི་ཚེ་ན་སྟོན་པ་གླང་པོ་ཆེ་
ལྟར་གཡས་ཕྱོགས་སུ་གཟིགས་ནས། དགེ་སློང་ཞིག་བླ་གོས་ཉི་ཚེ་དང་ལྗོངས་རྒྱུ་ཞིང་འགྲོ་པ་གཟིགས་སོ། །དེ་ནས་ཀུན་དགའ་བོ་ལ། ཀུན་དགའ་བོ་དགེ་སློང་དབྱར་གནས་པ་དག་གིས་གོས་ཀྱི་རྙེད་པ་མེད་དམ། བཙུན་པ་རྙེད་པ་མཆིས་སོ། །འོ་ན་ཅིའི་ཕྱིར་སྦྱར་མ་
མེད་པར་ལྗོངས་རྒྱུར་འགྲོ། བཙུན་པ་དགེ་སློང་འདིས་སྦྱར་མ་དགེ་སློང་མ་ལ་བཙལ་ཏོ། །ཀུན་དགའ་བོ་ཅི་དགེ་སློང་མ་གཉེན་མ་ཡིན་པའི་དགེ་སློང་ལ་གོས་ལེན་ཏམ། བཙུན་པ་ལེན་ཏོ། །དེ་ནས་སྟོན་པས་དགེ་སློང་མ་རྣམས་ལ་སྨད་ནས་བསླབ་པའི་གནས་བཅས་སོ། །ཡང་དགེ་
སློང་མ་གང་གཉེན་མ་ཡིན་པའི་དགེ་སློང་ལས་གོས་བླངས་ན་བརྗེས་པ་མ་གཏོགས་ཏེ་སྤང་བའི་ལྟུང་བའོ། །གཉེན་མ་ཡིན་ཞེས་བྱ་བ་ནི་སྔ་མ་བཞིན་ནོ། །གོས་ཞེས་བྱ་བ་ནི་ལྡུམ་བུ་ཤ་ན་ཀ་ལ་སོགས་པའོ། །ལེན་ཞེས་བྱ་བ་ནི་ཉམས་སུ་བླངས་པའོ། །བརྗེ་བ་མ་གཏོགས་ཞེས་

བྱ་བ་ནི་བརྗེ་བ་བཀོལ་བའོ། །སྤང་བའི་ལྟུང་བ་ཞེས་བྱ་བ་ནི་སྔ་མ་བཞིན་ནོ། །ལྟུང་བ་ཇི་ལྟ་བུ་ཞེ་ན་གཉེན་མ་ཡིན་པ་ལ་གཉེན་མ་ཡིན་པར་འདུ་ཤེས་པ་དང་། གཉེན་མ་ཡིན་ནམ་ཞེས་ཐེ་ཚོམ་ཟ་ཞིང་བླངས་ན་ལྟུང་བའོ། །གཉེན་ཡིན་པ་ལ་མ་ཡིན་པར་འདུ་ཤེས་
པ་དང་། གཉེན་ཡིན་པ་ལ་གཉེན་ཡིན་ནམ་མ་ཡིན་ཞེས་ཐེ་ཚོམ་ཟ་བཞིན་བླངས་ན་ཉེས་བྱས་སོ། །དགེ་འདུན་མ་ལ་དབུལ་བའི་ནང་དུ་གཏོགས་པ་དང་། ཚིག་སྙན་པར་སྨྲས་ཏེ་བྱིན་པ་དང་། བསྙེན་པར་རྫོགས་པར་བྱ་བ་ལ་བྱིན་པ་དང་། རྐུན་པོས་ཕྲོགས་པ་དང་། རིན་གྱིས་འོག་ཏུ་བྱིན་པ་དང་།
བརྗེས་ཏེ་བྱིན་པ་དང་། གྲགས་པ་དང་། བསོད་ནམས་ཆེན་པོ་དང་ལྡན་པ་ལ་འཕགས་མ་ཐུགས་བརྩེ་བའི་སླད་དུ་བཞེས་ཤིག་ཅེས་ཆགས་པ་མེད་པར་ཕུལ་ཏེ་སོང་ན་ལྟུང་བ་མེད་དོ། །སྤང་བའི་ལྟུང་བ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེ་
ནས་སྦོམ་དགའ་མོ་སྔ་དྲོའི་དུས་ལ་བསོད་སྙོམས་ལ་ཞུགས་ཏེ། ཁྱིམ་བདག་གཅིག་གི་ཁྱིམ་དེར་སོང་བ་དེའི་ཆུང་མ་རྒྱན་གྱིས་བཀླུབས་ནས་སྒོ་ཁང་དུ་འདུག་པས། སྦོམ་དགའ་མོ་མཐོང་བ་དང་ཕྱག་འཚལ་ནས་སྦོམ་དགའ་མོས་ཆོས་བཤད་དོ། །དེ་ཡང་དད་པ་སྐྱེས་ནས་རས་ཡུག་ཅིག་གསོལ་
ལོ་ཞེས་བྱས་པ་དང་། སྦོམ་དགའ་མོས་དེ་ལ། སང་དག་འཆི་འམ་སུས་ཤེས་ཀྱིས། །དེ་རིང་ཉིད་དུ་བརྟུལ་ཏེ་བྱ། །འཆི་བདག་སྡེ་ཆེན་དེ་དང་ནི། །བདག་དང་བཤེས་པ་མ་ཡིན་ནོ། །ཞེས་འབྱུང་བ་ཁྱོད་ཀྱིས་མ་ཐོས་སམ་ཞེས་བྱ་བ་ནས། ཁྱིམ་བདག་གི་ཆུང་མའི་བླ་གོས་བླངས་ཏེ་བྱིན་
པའི་ཚིག་བཤད་བྱས་ནས་སོང་ངོ་། །བྲམ་ཟེ་དང་ཁྱིམ་བདག་རྣམས་ཅིའི་ཕྱིར་ན་དགེ་སློང་མ་གང་སྦྱིན་པ་དེས་མ་མགུ་སྟེ། དེའི་གོས་ནན་གྱིས་ཕྲོགས་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །ཡང་དགེ་སློང་མ་གང་གཉེན་མ་
ཡིན་པའི་ཁྱིམ་བདག་གམ། ཁྱིམ་བདག་གི་ཆུང་མ་ལས་གོས་བླངས་ན་སྤང་བའི་ལྟུང་བའོ་ཞེས་བཅས་པ་དང་། དགེ་སློང་མ་མང་ཞིག་ལྗོངས་རྒྱུ་ཞིང་དོང་བ་ལས་རྐུན་བོས་བཅོམ་པ་དང་། དེ་དག་གིས་བསམས་པ། སྟོན་པས་གཉེན་མ་ཡིན་པའི་ཁྱིམ་པ་ལ་སློང་དུ་མ་གནང་སྙམ་

སྟེ། དེ་དག་རིམ་གྱིས་མཉན་དུ་ཡོད་པར་ཕྱིན་པ་དང་། དགེ་སློང་མ་དག་གོས་བསླངས་ནས་དེ་དག་གིས་ཀྱང་སོ་སོ་ནས་གོས་ཀྱིས་བཤུགས་སོ། །དེ་ལྟར་གྱུར་པ་སྟོན་པ་ལ་གསོལ་ནས། བཀའ་སྩལ་པ། དགེ་སློང་མ་རྣམས་སྔ་མ་ནི་བཅས་པའོ། །འདི་ནི་གནང་བ་སྟེ་བསླབ་པའི་
ཚིག་བཅའོ། །དགེ་སློང་མ་གང་གཉེན་མ་ཡིན་པའི་ཁྱིམ་བདག་གམ། ཁྱིམ་པ་དག་གི་ཆུང་མ་ལས་གོས་སློང་ན་དུས་ལ་བབ་པ་མ་གཏོགས་ཏེ་སྤང་བའི་ལྟུང་བའོ། །དེའི་དུས་ནི་འདི་ལྟ་བུ་སྟེ་དགེ་སློང་མའི་གོས་ཕྲོགས་པ་དང་། གོས་བརླག་པ་དང་། གོས་ཚིག་པ་དང་། གོས་རླུང་
གིས་ཁྱེར་བ་དང་། གོས་ཆུས་ཁྱེར་བ་འདི་ལྟ་བུ་ནི་དེའི་དུས་སོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཆུང་མ་ཞེས་བྱ་བ་ནི་བུད་མེད་དོ། །དེ་ཉེ་དུ་མ་ཡིན་ཞེས་པ་ནི་སྔ་མ་བཞིན་ནོ། །གོས་ཞེས་བྱ་བ་ནི་བལ་དང་ཤ་ན་ཀ་ལ་སོགས་པའོ། །དུས་མ་གཏོགས་ཞེས་པ་ནི་དུས་བཀོལ་
བ་སྟེ། རྐུན་པོས་ཁྱེར་ཞེས་པ་ནི་རྐུན་པོའམ་གཡོན་ཅན་གྱིས་ཕྲོགས་པའོ། །བརླག་ཅེས་བྱ་བ་ནི་བརླག་གམ་བརྗེད་པའོ། །ཚིག་པ་དང་རླུང་གིས་ཁྱེར་བ་དང་། ཆུས་ཁྱེར་བ་ཞེས་བྱ་བ་ནི་དེ་ཁོ་ནའོ། །ལྟུང་བར་འགྱུར་བ་ནི་རིན་ཐང་དང་ཁྲུ་དང་ཁ་དོག་སྟེ། རིན་ཐང་ནི་ཀཱར་ཥཱ་པ་ཎ་ལྔ་
རི་བ་ཞིག་བླངས་ཏེ་ལྔ་རི་བ་ཐོབ་ན་སློང་བའི་ཚེ་ཉེས་བྱས། ཐོབ་ན་སྤང་བའི་ལྟུང་བའོ། །ཀཱར་ཥཱ་པ་ཎ་གཞན་ནི་དུ་རི་བ་སློང་བ་དེ་བཞིན་དུ་སྦྱར། ཀཱར་ཥཱ་པ་ཎ་ལྔ་རི་བ་ཞིག་བླངས་པ་ལས་ལྔ་རི་བ་ཞིག་ཐོབ་ན་སློང་བའི་ཚེ་ཉེས་བྱས། ལྷག་པར་ཐོབ་པ་ལ་ཉེས་པ་མེད་དོ། །ཁ་དོག་སྔོན་པོ་
ཞིག་བླངས་ཏེ་སྔོན་པོ་ཐོབ་ན་བླང་པའི་ཉེས་བྱས། ཐོབ་ན་སྤང་བའི་ལྟུང་བའོ། །སྔོན་པོ་ཇི་ལྟ་བ་དེ་བཞིན་ཁ་དོག་གཞན་དང་སྟུག་པོ་དང་སྲབ་མོ་ཡང་དེ་བཞིན་ནོ། །གོས་སྔོན་པོ་ཞིག་བསླངས་པ་ལས་སེར་པོ་ཞིག་ཐོབ་ན་སློང་བའི་ཚེ་ཉེས་བྱས་ཐོབ་ན་ཉེས་པ་མེད་དོ། །ཁྲུ་གཞན་ཡང་དེ་བཞིན་
ནོ། །ཁྲུ་ལྔ་བླངས་པ་ལས་ལྷག་པར་ཐོབ་ན་སློང་བའི་ཚེ་ཉེས་བྱས། ལྷག་པར་ཐོབ་པ་ལ་ལྟུང་བ་མེད་དོ། །ཁ་ཚར་དང་རས་མ་བསླངས་བ་ལས་རས་ཡུག་གམ་རས་ཆེན་ཐོབ་པ་ལ་ལྟུང་བ་མེད་དོ། །སྤང་བ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །

དེ་ནས་དགེ་སློང་མ་མང་ཞིག་རྐུན་པོས་བཅོམ་མོ། །སྦོམ་དགའ་མོས་དེ་དག་ལ་སྨྲས་པ། སྟོན་པས་ནི་དགེ་སློང་མ་རྐུན་པོས་བཅོམ་པའི་ཕྱིར་གོས་སློང་དུ་གནང་ན་ཁྱེད་ཅིའི་ཕྱིར་མི་སློང་། དེ་དག་གིས་སྨྲས་པ། མི་ནུས་སོ། །སྦོམ་དགའ་མོས་འོ་ན་ཁྱོད་ཀྱི་ཕྱིར་ངས་བླང་ངོ་། །
དེ་དག་གིས་སྨྲས་པ། དེ་ལྟར་ན་སློངས་ཤིག་ཅེས་བྱས་པ་དང་། སྦོམ་དགའ་མོས་དེ་དག་གི་ཕྱིར་བྲམ་ཟེ་དང་ཁྱིམ་པ་ལ་ཆོས་བཤད་ནས་གོས་མང་ཞིག་བསླངས་ཏེ་བཟང་པོ་ནི་བདག་གིས་ཁྱེར་ངན་པ་ནི་དགེ་སློང་མ་དག་ལ་བྱིན་ཏེ། དེ་དག་གོས་རྙིང་པ་འཚེམས་ཤིང་འཁོད་པ་དང་དགེ་སློང་མ་དག་
གིས་མཐོང་ནས་སྨྲས་པ། ཁྱོད་ཀྱིས་གོས་མང་ཞིག་ཐོབ་ཅེ་ན། ཅིའི་ཕྱིར་གོས་རྙིང་པ་འཚེམས། དགེ་སློང་མ་དག་གིས་སྨྲས་པ། ཁྱེད་ཀྱིས་ནི་ཐོས་པར་ཟད་ཀྱིས་ངེད་ཀྱིས་ནི་མཐོང་མོད་ཀྱིས་སྦོམ་དགའ་མོས་བཟང་པོ་ནི་ཁྱེར་ངན་པ་ནི་ངེད་ལ་བྱིན་ནོ། །དེ་ལྟར་གྱུར་པ་སྟོན་པ་ལ་གསོལ་ནས།
སྦོམ་དགའ་མོ་རྣམ་པ་དུ་མས་སྨད་དེ་བསླབ་པའི་གནས་བཅས་སོ། །དགེ་སློང་མ་གོས་འཕྲོགས་སམ། གོས་བརླག་གམ། གོས་ཚིག་གམ། གོས་རླུང་གིས་ཁྱེར་རམ་གོས་ཆུས་ཁྱེར་ཡང་རུང་། གཉེན་མ་ཡིན་པའི་ཁྱིམ་བདག་གམ། ཁྱིམ་བདག་གི་ཆུང་མ་ལས་གོས་སློངས་ཤིག །
གལ་ཏེ་བྲམ་ཟེའམ་ཁྱིམ་བདག་དེ་དག་དད་པ་ཅན་ཏེ་དུས་ཀྱི་གོས་མང་པོ་འབུལ་ལ། འདོད་ན་དགེ་སློང་མ་དེས་དེ་ལས་སྟོད་གཡོགས་དང་སྨད་གཡོགས་ལས་གོས་ལྷག་པར་མ་ལེན་ཅིག་དེ་ལས་ལྷག་པར་བླངས་ན་སྤང་བའི་ལྟུང་བའོ། །དགེ་སློང་མ་གོས་རྐུན་མོས་ཁྱེར་རམ་ཆུས་ཁྱེར་
རམ་ཞེས་པ་ནས་ཁྱིམ་བདག་གི་ཆུང་མ་ཉེ་དུ་མ་ཡིན་པའི་བར་དུ་ནི་སྔ་མ་བཞིན་ནོ། །སྟོད་གཡོགས་ལས་ལྷག་པར་ལེན་ཅེས་པ་ནི་རྣམ་པ་གཉིས་ཏེ། དགེ་སློང་མ་དང་ཁྱིམ་པའོ། །ཁྱིམ་པའི་སྟོད་གཡོགས་ནི་རས་ཁྲུ་བཅུ་གཉིས་པའོ། །སྨད་གཡོགས་ཀྱི་རས་ནི་སྲིད་དུ་ཁྲུ་བདུན་ཞེང་དུ་ཁྲུ་
གཉིས་སོ། །དགེ་སློང་མ་སྟོད་གཡོགས་ནི་རས་མ་བསྒོས་པ་ཞིག་ན་ནི་སྦྱར་མ་ཉིས་རིམ་དང་། སྨད་གཡོགས་སྲིད་དུ་ཁྲུ་ལྔ་ཞེང་དུ་ཁྲུ་དོའོ། །དེ་ལས་ལྷག་པར་བསླངས་ཞེས་པ་ནི་དེ་ལས་འདས་པའོ། །སྤང་པའི་ལྟུང་བ་ནི་སྔ་མ་བཞིན་ནོ། །ལྟུང་བ་ཇི་ལྟ་བུ་ཞེ་ན་ཁྱིམ་པའི་སྟོད་

གཡོགས་དང་སྨད་གཡོགས་བླངས་ཏེ། ཁྱིམ་པའི་སྟོད་གཡོགས་ཐོབ་པ་ལས་ལྷག་པར་བླངས་ན་བསླང་བའི་ཚེ་ཉེས་བྱས་ཐོབ་པ་ན་ལྟུང་བའོ། །དགེ་སློང་མ་སྟོད་གཡོགས་དང་སྨད་གཡོགས་ཀྱང་དེ་བཞིན་ནོ། །ཁྱིམ་པའི་སྟོད་གཡོགས་དང་སྨད་གཡོགས་བསླང་བ་སྟེ་ཐོབ་ན་མི་
ལངས་ན་མ་སློངས་ཤོག །ལྷག་མའང་མ་བྱིན་ཅིག །དགེ་སློང་མའི་སྟོད་གཡོགས་དང་སྨད་གཡོགས་བླངས་ཏེ། ཐོབ་ན་མ་ལངས་ན་སློངས་ཤིག །ལྷག་ན་ཕྱིར་བྱིན་ཅིག །གོས་སྤངས་པར་གྱུར་པ་དེ་མ་སྤངས་སམ། ལྟུང་བ་མ་བཤགས་པར་གཞན་ཞིག་རྙེད་ན། དེ་སྔ་མའི་
ཤུགས་ཀྱིས་སྤང་བར་འགྱུར་རོ། །སྤང་བ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེ་ན་ཁྱིམ་བདག་ཅིག་གཞན་གྱི་ཆུང་མ་དང་ཉལ་བ་དང་། ཆུང་མས་མ་ཉལ་ཅིག་ཅེས་བསྒོ་ན་མ་བཏུབ་ནས་ཆུང་མ་ཡང་སྐྱེས་པ་གཞན་དག་དང་ཉལ་བར་གྱུར་ཏེ། ཁྱིམ་
སོ་ཀུན་ནི་ཞིག་ནས་བྲན་མོ་མངགས་གཞུག་པ་གཅིག་ཡོད་པ་ལ། ཁྱིམ་སོ་ཞིག་གོ་ཞེས་ཟེར་ནས་གཉི་གས་རྟག་ཏུ་བརྡེག་སྟེ་སྡུག་བསྔལ་བར་འགྱུར་རོ། །དུས་ཕྱི་ཞིག་ན་སྦོམ་དགའ་མོས་ཁྱིམ་བདག་བཟའ་ཤུག་དེ་གཉིས་ལ་ཆོས་བཤད་ནས་ལོག་པར་སྤྱོད་པ་བཏང་སྟེ་སྐྱབས་སུ་སོང་།
བསླབ་ཚིག་ལ་བཀོད་དེ་ལངས་ཏེ་སོང་ངོ་། །བྲན་མོས་བསམས་པ་ཅུང་ཟད་བདག་ལ་ལེགས་པའི་དཔལ་ཡོན་དུ་གྱུར་པའང་སྦོམ་དགའ་མོའི་དྲིན་ཡིན་ན་དེ་ལ་ཕན་ཞིག་ཕྱའོ་སྙམ་པ་དང་། དེ་ནས་དུས་ཕྱི་ཞིག་ན་ཆུང་མ་ན་རེ་ཇོ་བོ་སྦོམ་དགའ་མོས་ནི་བདག་ཅག་གཉིས་ཀྱི་དགེ་བའི་བཤེས་
གཉེན་བགྱིས་ཏེ་དྲི་མ་དང་ཕྲལ་ནས་བསླབ་ཚིག་ལ་བཀོད་ན་དེ་ལ་ཕན་པ་ཅུང་ཟད་ཅིག་དབུལ་བར་བྱའོ་ཞེས་བྱས་པ་དང་། ཁྱིམ་བདག་གིས་རས་ཡུག་ཅིག་བསྐོན་ནོ་ཞེས་སྨྲས་པ་དང་། བྲན་མོས་ཐོས་ཏེ། སྦོམ་དགའ་མོ་སྔ་དྲོ་བསོད་སྙོམས་ལ་རྒྱུ་ཞིང་ཁྱིམ་བདག་གི་ཁྱིམ་དེར་འོངས་པ་དང་
འཕགས་མ་དགྱེས་པ་སྐྱེད་ཅིག །ཁྱིམ་བདག་ཕོ་མོ་གཉིས་ཀྱིས་ཁྱེད་ལ་རས་ཡུག་ཅིག་སྦྱིན་པར་བྱས་སོ། །དེ་ནས་སྦོམ་དགའ་མོ་བྲན་མོ་ལ་ཡིད་མ་ཆེས་བཞིན་དུ། དེ་གཉིས་ཀྱི་ཁྱིམ་དུ་སོང་ནས་བདག་གིས་ད་དུང་རས་དེ་མ་ཐོབ་པོ་ཞེས་སྨྲས་པ་དང་། ཁྱིམ་བདག་གིས་བདག་

ཅག་གིས་གསང་སྟེ་བགྲོས་ནས་འཕགས་མས་སུ་ལ་གསན་ཞེས་བྱས་པ་དང་། སྦོམ་དགའ་མོས་ང་རབ་ཏུ་བྱུང་ནས་ཡུན་རིང་དུ་ལོན་ན་དེ་ཙམ་ཡང་མི་ཤེས་སམ་ཞེས་པ་དང་། དེ་གཉིས་ཀྱིས་རས་ཡུག་དེ་ཕུལ་བ་དང་། མ་མགུ་ནས་ཁྱེད་གཉིས་རས་ཡུག་འདི་བྱིན་པའི་
བསོད་ནམས་ནི་ཡོད་ལ། སྤྱད་པའི་བསོད་ནམས་ནི་མེད་ཀྱིས་འདི་ཁྱེར་ལ་རས་གཞན་བྱིན་ཅིག་ཅེས་བྱས་པ་དང་། ཁྱིམ་བདག་གི་ཆུང་མས་ཁྱོ་ལ་ཇོ་བོ་ཚོང་དུས་ནས་རས་བཟང་པོ་ཞིག་ལོང་ལ་ཕུལ་ཅིག །ཁྱིམ་བདག་གིས་ཀྱང་སྦོམ་དགའ་མོ་ཁྲིད་ནས་ཚོང་དུས་སུ་རས་རིན་ཐང་ཆེན་པོ་ཞིག་ཚོང་བ་
ལས་ཉོས་ནས་སྦོམ་དགའ་མོ་ལ་ཕུལ་ལོ། །ཚོང་པ་དེ་ཡང་དུས་ཚང་ནས་ཁྱིམ་བདག་དེས་རིན་ཐང་ཆེན་པོ་མ་འཁོར་ནས་ཚོང་པས་བཟུང་བ་དང་། དད་པའི་བྲམ་ཟེ་དང་ཁྱིམ་པ་རྣམས་འཕྱ་ནས་དེ་ལྟ་བུར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །དགེ་སློང་མའི་ཕྱིར་ཁྱིམ་བདག་གམ་ཁྱིམ་བདག་
གི་ཆུང་མ་གཉེན་མ་ཡིན་པས་གོས་ཀྱི་རིན་ཞིག་སྤགས་ནས་བདག་གིས་གོས་ཀྱི་རིན་འདིས་འདི་ལྟ་བུ་འདི་འདྲ་བའི་གོས་ཞིག་ཉོས་ལ་དགེ་སློང་མ་མིང་འདི་ཞེས་བྱ་བ་འོངས་ན། དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས། དེ་ལ་སྔར་མ་བསྒོ་བར་གལ་ཏེ་དགེ་སློང་མ་དེ་རྣམ་པར་རྟོག་པ་འགའ་
ཞིག་བྱུང་སྟེ། ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ལ། བཟང་པོ་འདོད་པའི་ཕྱིར་ཚེ་དང་ལྡན་པ་བདག་གི་ཕྱིར་གང་གོས་ཀྱི་རིན་སྤགས་པའི་གོས་ཀྱི་རིན་དེས་ཚེ་དང་ལྡན་པ་གོས་འདི་ལྟ་བུ་འདི་འདྲ་བ་ཞིག་ཉོས་ལ་གོས་རུང་བ་དུས་སུ་བདག་ལ་བསྐོན་ན་ལེགས་སོ་ཞེས་
སྨྲས་ཏེ་གོས་མངོན་དུ་གྲུབ་ན་སྤང་བའི་ལྟུང་བའོ། །དགེ་སློང་མའི་ཕྱིར་ཞེས་བྱ་བ་ནས་ཁྱིམ་བདག་ཅེས་པའི་བར་དུ་ནི་སྔ་མ་བཞིན་ནོ། །གོས་ཀྱི་རིན་ཞེས་པ་ནི་གསེར་དང་དངུལ་ལ་སོགས་པའོ། །གོས་འདི་ལྟ་བུ་འདི་འདྲ་བ་ཉོས་ཞེས་བྱ་བ་ནི་རྒྱུ་དང་དབྱིབས་བརྟགས་པ་གང་ཡང་རུང་བའོ། །
དགེ་སློང་མ་མིང་འདི་ཞེས་བྱ་བ་འོངས་ན་ཞེས་པ་སྦོམ་དགའ་མོའོ། །དེ་ལ་གོས་རུང་བ་བསྐོན་ནོ་ཞེས་བྱ་བ་ནི་སྤྱད་དུ་བཟོད་པའོ། །སྔར་མ་བསྒོ་ཞེས་བྱ་བ་ནི་སྔར་མ་སྦྲན་པའོ། །རྣམ་པར་རྟོག་པ་འགའ་ཞིག་བྱུང་ཞེས་བྱ་བ་ནི་འདི་ལྟར་སློང་བར་འགྱུར་བའོ། །གོས་ཀྱི་རིན་དེས་གོས་འདི་ལྟ་བུ་

འདི་འདྲ་བ་ཉོས་ཞེས་བྱ་བ་ནི་བདུན་ལས་གང་ཡང་རུང་བའོ། །བཟོང་པོ་འདོད་ཅེས་བྱ་བ་ནི་མཆོག་འདོད་པའོ། །ཉེས་པ་ཇི་ལྟ་བུ་ཞེ་ན་རིན་དང་ཁ་དོག་དང་ཁྲུ་ཚད་དེ་གོང་མ་དང་འདྲའོ། །སྐུད་པ་བླངས་པ་ལས་རས་མ་ཐོབ་བམ་རས་མ་བླངས་པ་ལས་རས་ཆེན་ཐོབ་པ་ལ་ཉེས་པ་མེད་དོ། །སྤང་བ་བརྒྱད་པ་
རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་ཏེ། བསླབ་པའི་གནས་བཅས་སོ་ཞེས་བྱ་བའི་བར་དུ་གོང་མ་བཞིན་ཏེ། ཁྱད་པར་ནི་ཁྱིམ་བདག་གམ་ཁྱིམ་བདག་གི་ཆུང་མས་སོ་སོ་ནས་གོས་ཀྱི་རིན་ཞིག་སྤགས་ཏེ་ཞེས་སྨོས་སོ། །ལྟུང་བ་ལྕི་ཡང་ཁྱད་པར་གོང་མ་དང་
འདྲ་སྟེ། སྤང་བ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་སྦོམ་དགའ་མོ་སྔ་དྲོ་རྒྱལ་པོའི་ཁབ་ཏུ་བསོད་སྙོམས་རྒྱུ་བ་ལས་བློན་པོ་བྲམ་ཟེ་དབྱར་བྱེད་ཀྱི་ཁྱིམ་དུ་སོང་ངོ་། །དེས་དབྱར་བྱེད་ལ་ཆོས་བཤད་པ་དང་། དེ་ཡང་ཆོས་ལ་དགའ་བས་
ཀཱར་ཥཱ་པ་ཎ་དྲུག་ཅུ་གསོལ་ལོ་ཞེས་བྱས་པ་དང་། སྦོམ་དགའ་མོས་སྦྱིན་པའི་ཚིག་བཅད་བྱས་ཏེ་སོང་ངོ་། །དབྱར་ཟླ་བ་གསུམ་འདས་ཏེ་ཆོས་གོས་བྱས་ཏེ་དབྱར་བྱེད་ཀྱི་གན་དུ་སོང་སྟེ་ཕྱིན་པ་དང་། དབྱར་བྱེད་ལ་མཁྱེན་པར་མཛོད་ཅིག་བདག་ནི་མཉན་དུ་ཡོད་པར་སྟོན་པ་ལ་ཕྱག་འཚལ་དུ་མཆིའོ་ཞེས་
སྨྲས་པ་དང་། །འཕགས་མ་རྒྱ་མཚོའི་ཕ་རོལ་དུ་གཤེགས་ཀྱང་པ་ཎ་དྲུག་ཅུ་བསྐུར་རོ་ཞེས་བྱས་པ་དང་། སྦོམ་དགའ་མོས་ཚིགས་བཅད་བྱས་ཏེ་སོང་ངོ་། །མཉན་དུ་ཡོད་པར་ཕྱིན་པ་དང་། དེ་ཉིད་དུ་དགེ་སློང་མའི་དབྱར་མོ་ཐང་ན་འདུག་གོ། །དེ་ནས་དབྱར་བྱེད་ཀྱིས་ཚོང་པ་ལ་པ་ཎ་དྲུག་
ཅུ་བསྐུར་ཏེ། ཚོང་པ་མཉན་དུ་ཡོད་པ་ན་དགེ་སློང་མའི་དབྱར་ཁང་དུ་ཕྱིན་ནས་སྦོམ་དགའ་མོ་བཞུགས་སམ་ཞེས་དྲིས་པ་དང་། དགེ་སློང་མ་དག་གིས་བསོད་སྙོམས་ལ་སོང་ངོ་ཞེས་བྱས་པ་དང་། ཚོང་པ་སླར་ལོག་སྟེ་བདག་གིས་འདི་ལྟ་བུ་ཞིག་ཏུ་བྱོན་ཅིག་གསུངས་ཤིག །དེ་ནས་
སོང་བ་དང་སྦོམ་དགའ་མོས་འོངས་པ་ལ་དགེ་སློང་མ་དག་གིས་རྒྱས་པར་སྨྲས་ནས། སྦོམ་དགའ་མོས་དགེ་སློང་མ་ཞིག་ཁྲིད་དེ་སོང་བ་དང་། ཚོང་པས་རྒྱང་རིང་པོ་ནས་འོངས་པ་མཐོང་ནས་འདི་ནི་རིངས་པར་འོངས་པ་ལས་ན་སྦོམ་དགའ་མོ་ཡིན་པར་ངེས་སོ་སྙམ་མོ། །སྦོམ་དགའ་མོ་

དེར་འོངས་ནས་ཚོང་པ་ལ་ཀཱར་ཥཱ་པ་ཎ་དྲུག་ཅུ་ཁྱེར་ཏེ་འོངས་སམ་སྨྲས་པ་དང་ཚོང་པས་ཀྱང་ཕུལ་ལོ། །དེ་ནས་ཚོང་པའི་ཁྱེའུ་གསར་དུ་དད་པ་སྐྱེས་པ་ཞིག་ལ་གཏམས་ནས་སོང་ངོ་། །ཚོང་པའི་ཁྲིམས་ལས་ཉི་མ་ཤར་ནས་ཚོང་དུས་སུ་མ་གྲམས་ན་ཀཱར་ཥཱ་པ་ཎ་དྲུག་ཅུས་ཆད་པས་
གཅོད་དོ། །སྦོམ་དགའ་མོས་ནང་པར་ཀཱར་ཥཱ་པ་ཎ་བྱིན་ཅིག་ཅེས་བྱས་པ་དང་། ཁྱེའུས་འཕགས་མ་ཅུང་ཟད་བཞེས་ཤིག །སྦོམ་དགའ་མོས་དེ་ལྟར་མི་རུང་གི་བྱིན་ཅིག་ཅེས་གོས་ཀྱི་མཐའ་ནས་བཟུང་བ་དང་། ཁྱེའུ་ཁྲོས་ཏེ་ཀཱར་ཥཱ་པ་ཎ་ཕྱུང་སྟེ་མདུན་དུ་བོར་བ་དང་། སྦོམ་དགའ་མོས་སྨྲས་པ། གྲོངས་
ལ་བྱིན་ཅིག་ཁྱེའུ་བགྲང་བ་ལ་ཞུགས་པ་དང་ཉི་མ་ཤར་ནས་ཀཱར་ཥཱ་པ་ཎ་དྲུག་ཅུ་ཕབ་པོ། །དེ་ནས་ཕ་མས་སྨྲས་པ་ཁྱོད་ཀྱིས་ནོར་ཇི་སྙེད་ཅིག་བསྒྲུབས་ནས་ཀཱར་ཥཱ་པ་ཎ་དྲུག་ཅུ་བཅལ། དེས་སྨྲས་པ་ཤཱཀྱའི་དགེ་སློང་མ་ལ་དད་པ་ནི་དེ་ལྟར་འགྱུར་རོ། །ཁྱིམ་པ་དག་གིས་རིགས་ཀྱི་བུ་དད་པ་སྐྱེས་མ་ཐག་ཏུ་མྱུ་
གུ་བཅད་དོ་ཞེས་འཕྱ་ཞིང་མི་སྙན་པར་བརྗོད་དོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །དགེ་སློང་མའི་ཕྱིར་རྒྱལ་པོའམ་བློན་པོའམ། བྲམ་ཟེའམ། ཁྱིམ་བདག་གམ། གྲོང་རྡལ་གྱི་མིའམ། ལྗོངས་ཀྱི་མིའམ། ནོར་ཅན་ནམ། ཚོང་དཔོན་ནམ།
དེད་དཔོན་གྱིས་ཀྱང་རུང་། ཕོ་ཉའི་ལག་ཏུ་གོས་ཀྱི་རིན་བསྐུར་ཏེ། ཕོ་ཉ་ཁྱོད་ཀྱིས་གོས་ཀྱི་རིན་འདི་འདྲ་བ་འདི་ལྟ་བུ་དུས་སུ་རུང་བའི་གོས་ཤིག་ཉོས་ལ། དགེ་སློང་མ་མིང་འདི་ཞེས་བྱ་བ་འོངས་པ་དང་བསྐོན་ཅིག་ཅེས་བསྒོ་བ་ལས། ཕོ་ཉ་དེ་ཡང་གོས་ཀྱི་རིན་དེ་ཁྱེར་ནས་དགེ་སློང་མ་དེ་ག་ལ་བ་དེར་སོང་
སྟེ་ཕྱིན་པ་དང་། དགེ་སློང་མ་དེ་ལ་འཕགས་མ་མཁྱེན་པར་མཛོད་ཅིག །ཁྱེད་ལ་གོས་ཀྱི་རིན་འདི་དག་ནི་རྒྱལ་པོའམ། བློན་པོའམ། བྲམ་ཟེའམ། ཁྱིམ་བདག་གམ། གྲོང་རྡལ་གྱི་མིའམ། ལྗོངས་ཀྱི་མིའམ། ནོར་ཅན་ནམ། ཚོང་དཔོན་ནམ། དེད་དཔོན་མིང་འདི་ཞེས་བྱ་བས་བསྐུར་
གྱིས་འཕགས་མ་ཐུགས་བརྩེ་བའི་སླད་དུ་འདི་དག་བཞེས་ཤིག་ཅེས་དེ་སྐད་ཟེར་བ་དང་། དགེ་སློང་མ་དེས་ཕོ་ཉ་ལ་ཚེ་དང་ལྡན་པ་ཕོ་ཉ་དགེ་སློང་མ་དག་ནི་གོས་ཀྱི་རིན་ལེན་དུ་མི་རུང་གི་དུས་སུ་རུང་བའི་གོས་ཤིག་རྙེད་ན་ནི་བདག་ཅག་ལེན་ཏོ་ཞེས་དེ་སྐད་སྨྲོས་ཤིག །གལ་ཏེ་ཕོ་ཉ་དེས་དགེ་སློང་མ་དེ་

ལ་གང་འཕགས་མ་རྣམས་ཀྱིས་ཞལ་ཏ་དང་འཕགས་མ་རྣམས་ལ་ཞལ་ཏར་བགྱི་བ་ལྟ་ཅི་མཆིས་སམ། དེ་སྐད་ཟེར་བ་དང་དགེ་སློང་མ་གོས་འདོད་པས་ཞལ་ཏ་བྱེད་པ་བསྟན་ཏེ། ཀུན་དགའ་འམ། དགེ་བསྙེན་ཡང་རུང་། འདི་ནི་དགེ་སློང་མ་རྣམས་ཀྱི་ཞལ་ཏ་བ་སྟེ། འདི་དག་ནི་དགེ་སློང་མ་རྣམས་
ལ་ཞལ་ཏ་བྱེད་དོ་ཞེས་བྱོས་ཤིག །དེ་ནས་ཕོ་ཉ་དེས་གོས་ཀྱི་རིན་དེ་ཁྱེར་ནས་ཞལ་ཏ་བྱེད་པ་ག་ལ་བ་དེར་སོང་སྟེ་ཕྱིན་པ་དང་། ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག །ཁྱོད་ཀྱིས་གོས་ཀྱི་རིན་འདིས་གོས་འདི་ལྟ་བུ་འདི་འདྲ་བ་ཞིག་ཉོས་ལ། དགེ་སློང་མ་མིང་འདི་ཞེས་བྱ་བ་འོངས་པ་དང་གོས་རུང་
བ་དུས་སུ་བསྐོན་ཅིག་ཅེས་དེ་སྐད་སྨྲས་ཏེ། དེ་ནས་ཕོ་ཉ་དེས་ཞལ་ཏ་བྱེད་པ་ལ་ཤིན་ཏུ་ལེགས་པར་བསྒོ་ཞིང་བསྟན་ནས། དགེ་སློང་མ་དེ་ག་ལ་བ་དེར་སོང་སྟེ་ཕྱིན་པ་དང་། དགེ་སློང་མ་དེ་ལ་འཕགས་མས་ཞལ་ཏ་བགྱིད་པ་གང་ལགས་པ་བསྟན་པ་དེ་ལ་བདག་གིས་ལེགས་པར་བསྟན་
གྱིས་དེའི་གན་དུ་བཞུད་ཅིག་དང་། ཁྱེད་ལ་དུས་སུ་རུང་བ་བསྐོན་ནོ་ཞེས་དེ་སྐད་ཟེར་བ་དང་དགེ་སློང་མ་གོས་འདོད་པ་ཞལ་ཏ་བྱེད་པའི་གན་དུ་སོང་ལ་ཚེ་དང་ལྡན་པ་ཞལ་ཏ་པ་ལ་བདག་ལ་གོས་དགོས་སོ། །ཚེ་དང་ལྡན་པ་ཞལ་ཏ་པ་བདག་ལ་གོས་དགོས་སོ་ཞེས་ལན་གཉིས་ལན་གསུམ་དུ་བསྐུལ་ཅིག །དྲན་
པར་གྱིས་ཤིག །ལན་གཉིས་ལན་གསུམ་དུ་བསྐུལ་ཞིང་དྲན་པར་བྱས་ནས་གལ་ཏེ་གོས་གྲུབ་པ་ལྟ་ན་ནི་ལེགས་གལ་ཏེ་མ་གྲུབ་ན་ལན་བཞི་ལན་ལྔ་ལན་དྲུག་གི་འོག་ཏུ་སྣང་བའི་ཕྱོགས་སུ་ཅང་མི་སྨྲ་བར་འདུག་ཅིག །དེ་ལྟར་ལན་བཞི་ལན་ལྔ་ལན་དྲུག་གི་འོག་ཏུ་སྣང་བའི་ཕྱོགས་སུ་ཅང་མི་སྨྲ་བར་
འདུག་ནས། གལ་ཏེ་གྲུབ་ན་ནི་ལེགས་གལ་ཏེ་མ་གྲུབ་ན་དེའི་འོག་ཏུ་ཡང་གོས་གྲུབ་པའི་ཕྱིར་བརྩལ་ཏེ། གོས་གྲུབ་ན་སྤང་བའི་ལྟུང་བའོ། །གལ་ཏེ་མ་གྲུབ་ན་ཕྱོགས་གང་ནས་གོས་ཀྱི་རིན་འོངས་པ་དེར་བདག་འགྲོ་བར་བྱའོ། །ཡང་ན་ཡིད་བརྟན་པའི་ཕོ་ཉ་ཐོང་ལ་ཚེ་དང་ལྡན་པ་ཁྱོད་
ཀྱིས་དགེ་སློང་མ་མིང་འདི་ཞེས་བྱ་བའི་ཕྱིར་གང་གོས་ཀྱི་རིན་བསྐུར་བ་སྟེ། དགེ་སློང་མ་དེའི་གོས་ཀྱི་རིན་ཡང་མ་གྲུབ་ཀྱིས་ཤེས་པར་གྱིས་ཤིག་ཚེ་དང་ལྡན་པ་དག་རང་གི་ནོར་དེ་ཆུད་མ་གསན་ཅིག་ཅེས་བསྒོ་ཤིག་དེ་ལ་དེའི་དུས་ཡིན་ནོ། །རྒྱལ་པོ་ཞེས་པ་ནི་རྒྱལ་རིགས་སྤྱི་བོ་ནས་དབང་བསྐུར་པའོ། །བློན་

པོ་ཞེས་བྱ་བ་ནི་རྒྱལ་པོ་ལ་བློ་དང་གྲོས་ཀྱིས་འཚོ་བའོ། །བྲམ་ཟེ་ཞེས་བྱ་བ་ནི་གཙང་སྦྲ་ཅན་ནོ། །ཁྱིམ་བདག་ནི་ཕྱུག་པོའོ། །ལྗོངས་ཞེས་པ་ནི་ཡུལ་མིའོ། །ནོར་ཅན་ཞེས་པ་ནི་བྱེ་བ་སྙེད་ཀྱི་ཕྱུག་པོའོ། །ཚོང་དཔོན་ཞེས་པ་ནི་ཐབས་བྱིན་པའོ། །དེད་དཔོན་ཞེས་པ་ནི་འདྲོན་
པ་མང་པོའི་དཔོན་པོའོ། །ཕོ་ཉའི་ལག་ཏུ་བསྐུར་ཞེས་པ་ནི་མི་རྣམ་གསུམ་མོ། །གོས་ཀྱི་རིན་ཞེས་པ་ནི་གསེར་དང་དངུལ་ལོ། །དུས་སུ་རུང་བའི་གོས་ཞེས་བྱ་བ་ནི་སྤྱད་དུ་འོས་པའོ་གོས་འདོད་པའི་དགེ་སློང་མ་ཞེས་པ་ནི་གོས་དགོས་པར་གྱུར་པའོ། །ཀུན་དགའ་ར་བ་ཞེས་པ་ནི་རུང་བར་བྱེད་པའོ། །དགེ་བསྙེན་ཞེས་པ་ནི་
སྐྱབས་སུ་སོང་བའོ། །སྣང་བའི་ཕྱོགས་ཞེས་པ་ནི་བཞི་སྟེ། རྫ་མཁན་དང་། འདྲེག་མཁན་གྱི་གནས་དང་། ཁྲོན་པའི་དྲུང་དང་། ཞིང་ལས་བྱེད་པའི་གནས་ཚོང་དུས་དང་བཞིའོ། །བསྐུལ་བའི་སྒོ་དྲུག་སྟེ། ཁྱོད་འདིར་བྱོན་ནམ། དེའི་ཕྱིར་རོ། །བདེ་བར་བྱོན་ཏམ། དོན་དེའི་ཕྱིར་རོ། །གདན་ལ་
བཞུགས། བཅའ་བ་འཆོ། བཟའ་བ་ཟོ། །བཏུང་བ་འཐུང་། དོན་དེའི་ཕྱིར་ཞེས་པ་དང་དྲུག་སྟེ། དེའི་ཕྱིར་དོན་དེ་མ་གོ་ཞེས་ཟེར་ན་དངོས་སུ་སྨྲོས་ཤིག །དོན་དེ་དྲུག་མ་ཐོས་སམ་ཚིག་ཟུར་གྱིས་སྨྲས་པས་ཕ་རོལ་གྱི་ཚིག་མ་གོ་ན་དྲུག་པོ་གོ་བའི་བར་དུ་སྨྲོས་ཤིག །ཡང་ན་བདག་པོ་ཤིག་ཅེས་བྱ་
བ་ནི་ཉེ་གནས་སམ་འགྲོ་བ་དག་འགྲོ་བའོ། །དེ་ལྟར་བྱས་པའི་འོག་ཏུ་ཞལ་ཏ་པས་གོས་ཕུལ་ན་ཐོག་མའི་ནོར་བདག་ཉིད་ལ་ཕུལ་ཅིག་ཅེས་སྨྲོས་ཤིག །གལ་ཏེ་ཞལ་ཏ་པས་དགེ་སློང་མ་དེ་ལ་འཕགས་མས་འདི་བཞེས་ཤིག་དང་བདག་གིས་དེའི་སེམས་མགུ་བར་བྱའོ་ཞེས་ཟེར་ན། དགེ་སློང་མས་གོས་དེ་ལོང་
ཤིག་གལ་ཏེ་དགེ་སློང་མས་རྣམ་པ་འདི་ལྟ་བུ་རྣམས་མ་བྱས་པར་བསླངས་ན་ཐམས་ཅད་དུ་སྤང་བའི་ལྟུང་བར་འགྱུར་རོ། །དེ་ལ་ལྟུང་བ་ཇི་ལྟ་བུ་ཞེ་ན་མི་མ་ཡིན་པས་ཕྱིན་ཏེ། མི་མ་ཡིན་པས་ཕོ་ཉ་བྱས་མི་མ་ཡིན་པས་རུང་བར་བྱས་ན་ཉེས་བྱས་སུ་འགྱུར་རོ། །མི་མ་ཡིན་པས་ཕོ་ཉ་བྱས་མིས་རུང་བར་བྱས་ན་ཉེས་བྱས། མི་
མ་ཡིན་པས་བྱིན་མིས་ཕོ་ཉ་བྱས་མིས་རུང་བར་བྱས་ན་ཉེས་བྱས། མིས་བྱིན་མིས་ཕོ་ཉ་བྱས་མི་མ་ཡིན་པས་རུང་བར་བྱས་ན་ཉེས་བྱས། མི་མ་ཡིན་པས་ཕོ་ཉ་བྱས་མིས་རུང་བར་བྱས་ན་ཉེས་བྱས། མིས་བྱིན་མིས་ཕོ་ཉ་བྱས་མིས་རུང་བར་བྱས་ན་སྤང་བའི་ལྟུང་བའོ། །སྤང་བའི་ལྟུང་བ་བཅུ་པ་དང་པོ་

རྫོགས་སོ།། །།མདོར་བསྟན་པ་ནི། མི་བླང་མཚན་བཏབ་སྣ་ཚོགས་དང་། །ཉོ་ཞིང་ཚོང་བར་བྱེད་པ་དང་། །ལྷན་པ་ལྔ་མེད་ལྷུང་བཟེད་དང་། །བདག་བསླངས་ལེགས་པར་འཐག་འཇུག་དང་། །མི་སྦྱིན་བསྔོས་པ་ཞག་བདུན་པ། །སྟོན་པ་མཉན་དུ་ཡོད་པ་ན་བཞུགས་སོ། །
དེའི་ཚེ་ན་དགེ་སློང་མ་བཅུ་གཉིས་སྡེས་རང་གི་ལག་གིས་ས་ལེ་སྦྲམ་དང་དངུལ་ལེན་ཅིང་ལེན་དུ་འཇུག །ཕུང་པོ་གཅིག་ཏུ་བྱེད། ཕུང་པོ་གཉིས་སུ་བྱེད། ཁྲི་དང་ཁྲིའུའི་སྟེང་དུ་འཇོག་པ་ལ་བྲམ་ཟེ་དང་ཁྱིམ་བདག་འཕྱ་སྟེ། དགེ་སློང་མ་མགོ་རེག་མ་རང་གི་ལག་གིས་ས་ལེ་སྦྲམ་དང་དངུལ་ལེན་
དུ་འཇུག་སྟེ། རབ་ཏུ་བྱུང་བ་དག་ཀྱང་དེ་ལྟར་བྱེད་ན་དེ་དག་ཁྱིམ་པ་དང་ཁྱད་པར་ཅི་ཡོད། དེ་དག་ལ་བསོད་སྙོམས་སྦྱིན་པར་སུ་ཞིག་སེམས་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། །དགེ་སློང་མ་གང་རང་གི་ལག་གིས་ས་
ལེ་སྦྲམ་དང་དངུལ་ལེན་ནམ་ལེན་དུ་འཇུག་ན་སྤང་བའི་ལྟུང་བའོ། །དགེ་སློང་མ་ཞེས་བྱ་བ་ནི་བཅུ་གཉིས་སྡེའོ། །རང་གི་ལག་གིས་ཞེས་པ་ནི་ལག་ནས་ལག་གིས་སོ། །ས་ལེ་སྦྲམ་དང་དངུལ་ཞེས་པ་ནི་གསེར་དང་དངུལ་ལོ། །ལེན་ཞེས་པ་ནི་བདག་ཉིད་དོ། །ལེན་དུ་འཇུག་ཅེས་པ་ནི་གཞན་
གྱི་ལའོ། །སྤང་བའི་ལྟུང་བ་ཞེས་བྱ་བ་ནི་སྔ་མ་བཞིན་ནོ། །ལྟུང་བ་ཇི་ལྟ་བུ་ཞེ་ན། བཅྭ་བརྒྱད་དེ་དེ་ལ་མངོན་སུམ་དུ་གྱུར་པ་དགུ་སྟེ། འདི་ལོང་འདི་ནས་ལོང་འདི་ཙམ་ལོང་། འདི་ཞོག་འདིར་ཞོག་འདི་ཙམ་ཞོག །འདི་ཁྱེར་འདི་ནས་ཁྱེར་འདི་སྙེད་ཅིག་ཁྱེར། འདི་ལོང་ཞེས་བྱ་བ་ནི་གསེར་དང་
དངུལ་ལོ། །འདི་ནས་ལོང་ཞེས་བྱ་བ་ནི་སྒྲོམ་མམ་སྒྲོ་བ་འམ་གཟེབ་ནས་སོ། །འདི་སྙེད་ལོང་ཞེས་བྱ་བ་ནི་སྲང་བརྒྱའམ་སྟོང་ངོ་། །མངོན་སུམ་དུ་གྱུར་པ་འདི་དགུ་ལ་འདི་ལོང་ཞེས་བསྒོ་ན་སྤང་བར་འགྱུར་རོ། །མངོན་སུམ་དུ་མ་གྱུར་པ་དགུ་ཡང་གོང་དུ་མངོན་སུམ་དུ་གྱུར་པ་དགུ་ལ་གོང་
དུ་གསུམ་བཤད་པས་འོག་མ་དྲུག་ཀྱང་དེ་བཞིན་རིག་པར་བྱ་བ་བཞིན་དུ་མངོན་སུམ་དུ་མ་གྱུར་པ་དགུ་ཡང་དེ་བཞིན་དུ་སྦྱར་ཏེ། དེ་ནས་ལོང་ཞེས་བསྒོ་ན་ཉེས་བྱས་སུ་འགྱུར་རོ། །གསེར་དང་དངུལ་དང་མུ་ཏིག་དང་བཻ་ཌཱུརྱ་དང་དུང་དང་ཤེལ་དང་ས་ལེ་སྦྲམ་དང་ཨསྨ་གརྦྷ་ལ་རེག་ན་ལྟུང་བའོ། །

ཟངས་ཀྱི་དོང་ཙེ་མཚན་མས་བཏབ་པ་སྡོམ་པ་ལ་རེག་ན་ཉེས་བྱས། ལྕགས་དང་ཟངས་དང་ཁར་བ་དང་རོ་ཉེ་དང་ཚོན་མོ་སྟེང་ལ་རེག་ན་ཉེས་པ་མེད་དོ། །ཐ་ན་སོག་མའི་ཕྲེང་བ་དང་ནོར་བུ་མ་ཕུག་པ་དང་མཐིང་བུ་ལ་རེག་ན་ཉེས་བྱས་སོ། །སྟོན་པ་མཉན་དུ་ཡོད་པ་ན་
བཞུགས་ཏེ། ཡུལ་ཙམ་པ་ན་ཁྱིམ་བདག་དད་པ་བཟང་པོས་བྱིན་ཞེས་བྱ་བའི་གཙུག་ལག་ཁང་དགེ་སློང་མ་དག་ཅིག་ཚུལ་དུ་ཞུགས་ཏེ། དབྱར་ཚུལ་ནས་འབྱུང་ཀར་བདག་ཅག་ནི་སྟོན་པ་ལ་ཕྱག་འཚལ་དུ་འདོང་གིས་གོས་སྩོལ་ཅིག་ཅེས་པ་དང་། འཕགས་མ་གོས་བཟང་པོ་མ་
མཆིས་ཏེ། ཚོང་པ་འོང་བ་ལ་སྐད་ཅིག་ཅུང་བཞེས་ཤིག །དེ་ལས་བཟང་པོ་འཇལ་ཏེ་གསོལ་ལོ་ཞེས་བྱས་པ་དང་། མེད་ན་གོས་ངན་པའང་རུང་གིས་བྱིན་ཅིག །བདག་ནི་བཟང་པོ་སྦྱིན་ན་ངན་པ་གསོལ་དུ་མི་རུང་སྟེ། ཁྱེད་རིང་ན་ན་བཟའི་རིན་ཀཱར་ཥཱ་པ་ཎ་སྣོམས་ཏེ། བཞུད་ཅིག་
ཅེས་པ་དང་། བདག་ཅག་ཀཱར་ཥཱ་པ་ཎ་ལེན་དུ་བཅོམ་ལྡན་འདས་ཀྱིས་མ་གནང་ངོ་ཞེས་དོང་ངོ་། །དགེ་སློང་མ་རྣམས་ཀྱིས་སྨྲས་པ། ཁྱེད་གོས་ངན་ན་ཅི་ཉེས་ཞེས་པ་དང་། དགེ་སློང་མ་དག་གིས་རྒྱས་པར་སྨྲས་སོ། །དེ་ལྟར་གྱུར་པ་དགེ་སློང་མ་དག་གིས་བཅོམ་ལྡན་འདས་ལ་རྒྱས་པར་
གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་བ། ཁྱིམ་བདག་གམ་བྲམ་ཟེ་ལ་གོས་ཀྱི་རིན་ལོང་ཤིག་བསླངས་ནས་སྦྱིན་བདག་གམ་ཞལ་ཏ་པ་ལ་བསྔོས་ཤིག་པར་རྗེས་སུ་གནང་བ་བཅས་སོ། །ཞལ་ཏ་བྱེད་པ་ཡུལ་གཞན་དུ་སོང་ན་ཡང་དེ་ཉིད་ལ་བརྟེན་པར་བྱའོ། །དགེ་སློང་མས་
མི་རུང་བ་ཞིག་རྙེད་ན་ལོང་ལ་དགེ་སློང་མའི་མདུན་དུ་བྱིན་གྱིས་རློབས་ཤིག་དགོངས་ཤིག་བདག་མིང་འདི་ཞེས་བགྱི་བས་མི་རུང་བའི་དངོས་པོ་འདི་ལྟ་བུ་ཞིག་རྙེད་པས། རུང་བའི་དངོས་པོ་བསྒྲུབས་སོ། །དེ་བཞིན་ལན་གཉིས་ལན་གསུམ་དུའོ། །སྤང་བ་བཅུ་གཅིག་པ་རྫོགས་སོ།། །།
སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་བཅུ་གཉིས་སྡེ་མཚན་མས་བཏབ་པ་སྣ་ཚོགས་ལ་སྤྱོད་དེ། སྦྱོར་བར་བྱེད། སྤེལ་བར་བྱེད། འཕེལ་བར་བྱེད། སྒྱུར་བར་བྱེད། བརྡུངས་པས་བརྡུངས་པ་ཉོ། །བརྡུངས་པས་མ་བརྡུངས་པ་ཉོ་བས་ཁྱིམ་པ་དག་སྨོད་ཅིང་

མི་སྙན་པ་འཛེར་ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་སོ། ཡང་དགེ་སློང་མ་གང་མཚན་མས་བཏབ་པ་མང་པོར་སྒྱུར་བར་བྱེད་ན་སྤང་བའི་ལྟུང་བའོ། །དགེ་སློང་མ་ཞེས་པ་ནི་སྔ་མ་བཞིན་ནོ། །རྣམ་པ་མང་པོ་ཞེས་པ་ནི་མཚན་མས་བཏབ་པའོ། །མང་པོར་
སྤྱོད་པར་བྱེད་ཅེས་པ་ནི་གསེར་དངུལ་ལོ། །སྤང་བའི་ལྟུང་བ་ནི་སྔ་མ་བཞིན་ནོ། །ལྟུང་བ་ཇི་ལྟ་བུ་ཞེ་ན་སྤྱོད་པ་ཞེས་བྱ་བ་ནི་ཡུལ་ཕྱོགས་ཚོལ་ཞིང་རྟ་ཚོལ་ཡུལ་ཕྱོགས་སུ་བྲིན་པའི་ཟོང་རྣམས་རྫོང་ངོ་། །གསེལ་བའི་རྣམས་ཚོལ། གྲོ་བ་དང་རས་ཕྱིས་དང་སྨྱི་གུ་ཚོལ་ཞིང་སྐྱེད་ཚོལ་ནམ་གྲུབ་
ཀྱི་བར་དུ་ཉེས་བྱས། གྲུབ་ན་ལྟུང་བའོ། །སྤེལ་བ་ནི་བརྒྱད་ཀ་དང་བདུན་ཀ་དང་བཅུ་ཀར་གཏོང་ཞིང་གོང་མ་བཞིན་དུ་མ་གྲུབ་ཀྱི་བར་དུ་ཉེས་བྱས། གྲུབ་ན་སྤང་བའོ། །འཕེལ་བར་བྱེད་པ་ན་འཕྲལ་དུ་བ་དང་། རྐང་སོ་དང་གྱུར་དུ་གཏོང་ཞིང་སྣོད་དང་ཡི་གེ་ཚོལ་བའི་བར་དུ་གོང་མ་
བཞིན་ཏེ་ཉེས་བྱས་དང་ལྟུང་བ་ཡང་གོང་མ་དང་འདྲའོ། །སྒྱུར་བར་བྱེད་པ་ནི་ནོར་བུ་བྲེ་གང་མུ་ཏིག་བྲེ་གང་དུ་གཏོང་བ་དང་། མུ་ཏིག་བྲེ་གང་ནོར་བུ་བྲེ་གང་དུ་གཏོང་ཞིང་སྤང་བ་དང་ཞེས་བྱ་བ་ནས་སྤང་བའི་བར་དུ་སྔ་མ་བཞིན་ནོ། །བརྡུངས་པས་བརྡུངས་པ་ཉོ་ཞེས་བྱ་བ་ནི་མཚན་མས་བཏབ་
པའི་གསེར་གྱིས་མཚན་མས་བཏབ་པའི་གསེར་ཚོལ་བ་སྟེ། གཞན་ཡང་དེ་བཞིན་དུ་རིག་པར་བྱའོ། །སྟོན་པས་དེ་ལྟར་བསླབ་པའི་གནས་བཅས་པ་དང་། དགེ་སློང་མའི་གཙུག་ལག་ཁང་ཞིག་པར་གྱུར་ཏེ་སྦྱིན་བདག་འོངས་ནས་འཕགས་མ་ཅིའི་ཕྱིར་གཙུག་ལག་ཁང་ཞིག་པར་གྱུར། དགེ་
སློང་མ་དག་གིས་གཙུག་ལག་ཁང་གི་བདག་པོ་དུས་ལས་འདས་སོ་ཞེས་སྨྲས་པ་དང་། དེ་དག་གིས་དགེ་སློང་མའི་གཙུག་ལག་ཁང་ཞིག་པ་གསོ་བའི་ཕྱིར་མཚན་མས་བཏབ་པ་མང་ཞིག་དགེ་སློང་མ་ལ་ཕུལ་ཏེ། འཕགས་མ་བདག་གིས་མི་ཟད་པར་བགྱི་བ་འདི་སྤེལ་ལ་ཁེ་ཅི་མཆིས་པ་
གཙུག་ལག་ཁང་གི་ལས་གསར་པ་གྱིས་ཤིག་ཅེས་དེ་ལ་བྱིན་ནོ། །དགེ་སློང་མ་དག་གིས་དེ་སྦས་པ་དང་བཀའ་སྩལ་པ། དགེ་སློང་མས་སྤེལ་ཅིག་དེ་དག་གིས་དབུལ་པོ་དག་ལ་བྱིན་པ་དང་། སླར་མ་ཁུགས་ནས་མ་དད་པ་དང་། དགེ་བསྙེན་དབུལ་པོ་ལ་མ་སྦྱིན་པར་གཏའ་ཉི་རིམ་ཞོག་

ལ་ཚེས་གྲངས་ཀྱང་དྲི་བར་བྱོས་ལ་ཟླ་བ་རེ་རེ་ཞིང་སྐྱེད་ཀྱང་ལོངས་ཤིག། དེས་ནི་ལས་སར་པ་བྱོས་ཤིག། དགེ་སློང་མས་ཀུན་ཏུ་སྤྱོད་པའི་ཆོས་བཅས་པ་བཞིན་དུ་མ་བྱས་ན་འདས་པ་དང་བཅས་པར་འགྱུར་རོ། །སྤང་བའི་ལྟུང་བ་བཅུ་གཉིས་བ་རྫོགས་སོ།། །།
སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་བཅུ་གཉིས་སྡེ་མཚན་མས་བཏབ་པ་རྣམ་པ་མང་པོས་ཉོ་ཞིང་ཚོང་པ་ལ་ཞུགས་ཏེ་སྐྱེད་ཅིང་འབྱིན་པར་བྱེད། ཉོ་ཞིང་འཚོང་བར་བྱེད་དོ། །ཇི་ལྟར་སྐྱེད་པར་བྱེད་ཅེ་ན། གལ་ཏེ་གྲོང་དང་གྲོང་ཁྱེར་ན་རིན་ཐང་ཆེ་ལ་ཡུལ་ཕྱོགས་ན་རིན་ཐང་ཆུང་ན་
དེའི་ཚེ་དེ་ནས་ཉོ་ཞིང་འདྲེན་ནོ། །ཇི་ལྟར་འབྱིན་པར་བྱེད་ཅེ་ན། ནམ་གྲོང་ཁྱེར་ན་རིན་ཐང་ཆུང་བར་གྱུར་ལ་ཡུལ་ཕྱོགས་ན་རིན་ཐང་ཆེ་ན་དེའི་ཚེ་དེར་འབྱིན་ཏོ། །དེ་བཞིན་དུ་ལོ་ལེགས་པའི་ཚེ་ཉོས་ལ་མུ་གེ་བྱུང་བའི་ཚེ་འཚོང་བ་དང་། བྲམ་ཟེ་དང་ཁྱིམ་བདག་རྣམས་འཕྱ་ཞིང་མི་སྙན་པར་འཛེར་
ཏོ། །དེ་ལྟར་གྱུར་པ་སྟོན་པ་ལ་གསོལ་ནས་བཅུ་གཉིས་སྡེ་ལ་ཁྱེད་ཀྱིས་དེ་འདྲ་བ་མི་མཛེས་པ་བྱས་པ་བདེན་ནམ་ཞེས་བཀའ་སྩལ་པ་དང་། བཙུན་པ་མད་དོ་ཞེས་གསོལ་ནས་རྣམ་པ་དུ་མས་སྨད་དེ་བསླབ་པའི་གནས་བཅས་སོ། །ཡང་དགེ་སློང་མ་གང་རྣམ་པ་དུ་མར་ཉོ་ཞིང་འཚོང་བར་བྱེད་ན་སྤང་
བའི་ལྟུང་བའོ། །རྣམ་པ་དུ་མ་ཞེས་བྱ་བ་ནི་རྣམ་པ་མང་པོར་ཉོ་ཞིང་འཚོང་བའོ། །བྱེད་ཅེས་བྱ་བ་ནི་དེ་བཞིན་སྦྱོར་བའོ། །གཞན་ནི་གོང་མ་བཞིན་ནོ། །དེ་ལ་ལྟུང་བ་ཇི་ལྟ་བུ་ཞེ་ན་ཁེའི་ཕྱིར་ཉོ་ཁེའི་ཕྱིར་འཚོང་ན་དེ་ལ་ཉོ་བའི་ཚེ་ཉེས་བྱས། འཚོང་ན་སྤང་བའི་ལྟུང་བའོ། །ཁེ་མ་ཡིན་
པའི་ཕྱིར་ཉོས་ལ། ཁེ་མ་ཡིན་པའི་ཕྱིར་འཚོང་ན་ཉེས་པ་མེད་དོ། །ཁེའི་ཕྱིར་ཉོས་ལ་ཁེ་མ་ཡིན་པའི་ཕྱིར་འཚོང་ན་ཉོ་བའི་ཚེ་ཉེས་བྱས་སོ། །འཚོང་བ་ལ་ཉེས་པ་མེད་དོ། །ཁེ་མ་ཡིན་པའི་ཕྱིར་ཉོས་ལ་ཁེའི་ཕྱིར་འཚོང་ན་ཉོ་བའི་ཚེ་ཉེས་པ་མེད་དོ། །འཚོང་ན་སྤང་བའི་ལྟུང་བའོ། །
ཡུལ་གཞན་དུ་སྦྱོར་ཞིང་སྔུན་གྱི་བུ་ལོན་འཇལ་ལོ་སྙམ་པ་ལ་ཉེས་པ་མེད་དོ། །སྤང་བའི་ལྟུང་བ་བཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་སོ། །དེའི་ཚེ་ན་དྲི་འཚོང་བའི་ཁྱེའུ་ཞིག་ལ་ལྷུང་

བཟེད་ཟླུམ་པོ་ཡོངས་སུ་དང་བ་སྤྱད་དུ་བཟོད་པ་ཞིག་ཡོད་དོ། །སྦོམ་དགའ་མོས་མཐོང་ནས་སུའི་ཞེས་སྨྲས་པ་དང་། དྲི་འཚོང་བའི་ཁྱེའུས་འདི་བདག་གི་ལགས་སོ་ཞེས་བྱས་པ་དང་། དེ་ལྟར་ནང་ལ་ཅིའི་ཕྱིར་མི་སྦྱིན། ཁྱེའུ་ན་རེ་རིན་གྱིས་འཇལ་ན་རུང་ངོ་། །ང་ལ་རིན་མེད་ཀྱི་སྐྱེས་བུ་སའི་ལྷུང་
བཟེད་ཀྱིས་གསེར་གྱི་ལྷུང་བཟེད་རྙེད་ན་ད་འགྱོད་དུ་ཅི་ཡོད་ཅེས་འབྱུང་བ་མ་ཐོས་སམ། ཕམ་པར་མི་འགྱུར་གྱིས་ཚུར་ལྟ། ཁྱེའུས་ལྷུང་བཟེད་མ་སྟེར་བ་དང་། ཚོང་དཔོན་ཞིག་དེར་འོངས་པས་ཕྱག་བྱས་པ་དང་། ཁྱོད་ཀྱི་ཕྱག་སྐོམ་པོས་ཅི་རུང་ཞེས་པ་དང་། ཚོང་དཔོན་གྱིས་ལྷུང་བཟེད་
ཀཱར་ཥཱ་པ་ཎ་དྲུག་ཅུས་ཉོས་ཏེ་སྦོམ་དགའ་མོ་ལ་ཕུལ་ལོ། །དེ་ལ་སྦྱིན་པའི་ཚིགས་བཅད་བྱས་ནས་དྲི་འཚོང་བ་ལ་སྐྱེས་བུ་དམ་པ་འདིས་ཀཱར་ཥཱ་པ་ཎ་འདི་སྙེད་ཅིག་བྱུང་བ་ལ་ལྟོས། ཁྱོད་ནི་སེར་སྣ་བྱས་པས་ཡི་དགས་ལྐོག་རློན་པོར་སྐྱེ་བར་འགྱུར་རོ་ཞེས་བྱས་ནས་དབྱར་མོ་ཁང་དུ་སོང་སྟེ་ལྷུང་
བཟེད་སྤྱོམ་ཞིང་འདུག་པ་དང་། དེ་ལྟར་གྱུར་པ་སྟོན་པ་ལ་གསོལ་ནས་བསླབ་པའི་གནས་བཅས་ཏེ་ཡང་དགེ་སློང་མ་གང་ལྷུང་བཟེད་ལྷན་པ་ལྔར་མ་ཚང་བ་རྟག་ཏུ་སྤྱོད་དུ་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར། གཞན་བཙལ་ན་སྤང་བར་འགྱུར་རོ། །དེ་ལྟར་བསླབ་པའི་གནས་
བཅས་པ་དང་། དགེ་སློང་མ་ཞིག་བསོད་སྙོམས་སྤྱོད་པའི་ལྷུང་བཟེད་ཟག་པས་སྦྲང་མ་འདུས་པ་དང་། བུས་པ་དག་གིས་བསྐོར་ནས་འཕགས་མས་འཁོར་མང་པོའི་ལས་བྱས་པ་ལ་ལྟོས་ཞེས་འཛེར་ཏོ། །མགོན་མེད་ཟས་སྦྱིན་གྱིས་མཐོང་ནས་འཕགས་མས་ཞལ་ནས་གསུངས་པ་ནི་
བཟང་ན་མི་བཟང་བར་བྱེད་པ་འདི་ཅི་ཞིག །དགེ་སློང་མས་སྨྲས་པ་ཁྱིམ་བདག་ཁོ་མོས་མི་བཟང་བ་ཅི་བྱས། འོ་ན་ཅིའི་ཕྱིར་ཁྱོད་བུས་པ་རྣམས་ཀྱིས་བསྐོར་ཞིང་འགྲོ། །ཁོ་མོའི་ལྷུང་བཟེད་ཟག་གོ། །གཞན་ཅིའི་ཕྱིར་སྦྱར། སྟོན་པས་ལྷུང་བཟེད་སྤྱད་བཟོད་པ་ཡོད་བཞིན་དུ་གཞན་ཚོལ་དུ་
མ་གནང་ངོ་། །དེ་ལྟར་གྱུར་པ་སྟོན་པ་ལ་གསོལ་ནས་བཀའ་སྩལ་པ། ལྷུང་བཟེད་ཟག་པ་ལྷན་པ་ལྔས་གློན་ཅིག །འཇོག་འཇོག་པོ་དང་གཟེར་བུ་དང་། རུས་སྦལ་གྱི་སོ་ལྟ་བུ་དང་། ལེབ་ལེབ་པོ་དང་། ལྕགས་ཕྱེས་སོ། །ལྕགས་ཕྱེ་ནི་འབྲུ་མར་དང་བསྲེས་ལ་མེ་ལ་བསྲེག་པར་བྱའོ། །

ཞེས་གསུངས་སོ། །དེ་ནས་དགེ་སློང་མ་ཞིག་ལྷུང་བཟེད་དུམ་བུ་ལྔར་གྱུར་པ་དང་། སྐུད་པས་བཙེམས་ནས་རུང་བར་བྱས་ཏེ་བསོད་སྙོམས་ལ་འགྲོའོ། །ཟན་ཟོས་ནས་ཡང་སླར་སྐུད་པ་བཀྲོལ་ཏེ་རུང་བར་བྱས་ཏེ་འཇོག་པ་དང་། དགེ་བའི་བར་ཆད་དུ་གྱུར་པ་དང་། དེ་ལྟར་
གྱུར་པ་སྟོན་པ་ལ་གསོལ་ནས་བཀའ་སྩལ་པ་སྔ་མ་ནི་བཅས་པའོ། །འདི་ནི་རྗེས་སུ་གནང་བའོ་ཞེས་བསླབ་པའི་གནས་བཅས་སོ། །དགེ་སློང་མ་གང་ལྷུང་བཟེད་ལྷན་པ་ལྔ་ལས་ལྷག་པར་རུང་བར་སྤྱད་དུ་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར་ལྷུང་བཟེད་གསར་པ་གཞན་བཙལ་ཏེ་ལྷུང་བཟེད་
གྲུབ་ན་སྤང་བའི་ལྟུང་བའོ། །དགེ་སློང་མ་དེས་ལྷུང་བཟེད་དེ་དགེ་སློང་མའི་འཁོར་དུ་བྲིམས་ལ། དགེ་སློང་མའི་འཁོར་ན་གང་གི་ལྷུང་བཟེད་ཐ་མར་གྱུར་པ་དགེ་སློང་མ་དེ་ལ་དགེ་སློང་མ་ཁྱོད་ཀྱིས་ལྷུང་བཟེད་འདི་ཐ་མར་ཆག་པ་ལ་ཐུག་གི་བར་དུ་བྱིན་གྱིས་བརླབས་པར་མི་བྱ། བསྐུར་བར་མི་བྱ།
གཞན་ལ་སྦྱིན་པར་མི་བྱའི། བགས་ཀྱིས་དལ་བུས་སྤྱོད་ཅིག་ཅེས་སྦྱིན་ཏེ་དེ་ལ་ནི་དུས་ཡིན་ནོ། །ལྷན་པ་ལྔ་ལས་ཉུང་བ་ནི་སྔར་མ་ཆོག་པའོ། །ལྷུང་བཟེད་ཅེས་བྱ་བ་ནི་བྱིན་གྱིས་བརླབས་པ་སྟེ་སྤྱད་དུ་བཟོད་པའོ། །ལྷུང་བཟེད་གཞན་ཚོལ་ཞེས་བྱ་བ་ནི་གཉིས་པའོ། །བཟང་པོ་འདོད་ཅེས་བྱ་
བ་ནི་མཆོག་འདོད་པའོ། །ལྷུང་བཟེད་གྲུབ་ཅེས་བྱ་བ་ནི་ལྷུང་བཟེད་རྙེད་པའོ། །དགེ་སློང་མ་དེས་ཞེས་བྱ་བ་ནི་དགེ་སློང་མ་གང་ཡིན་པའོ། །ལྷུང་བཟེད་ཅེས་བྱ་བ་ནི་ལྷུང་བཟེད་ལྷག་མར་གྱུར་པའོ། །དགེ་སློང་མའི་འཁོར་དུ་ཕུལ་ཅིག་ཅེས་བྱ་བ་ནི་ལྷུང་བཟེད་འབྲིམ་པའི་དགེ་སློང་མ་ཆོས་
ལྔ་དང་ལྡན་པ་གསོལ་བ་དང་གཉིས་ཀྱི་ལས་ཀྱིས་བསྐོས་ལ། གནས་བརྟན་ནས་བྲིམས་ལ་ཀུན་གྱི་ཐ་མར་གྱུར། ལྷུང་བཟེད་དོ་དགེ་སློང་མས་བྱིན་གྱིས་མ་བརླབས་བར་མ་བསྐུར་བར་ཐ་མ་ཆག་པ་ལ་