Luận tạng Tây Tạng (Tengyur) — Tập 156

ལས་འབྱུང་བ་ཡང་ཡོད་དེ། ཇི་ལྟར་སྲོག་བཅད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། མྱོས་པའི་ཁུ་བ་འཐུང་བ་དེ་ཉིད་ལ་ཚིག་གིས་ཀྱང་བསྔགས་
པ་ལྟ་བུའོ། །བྱ་བ་ལ་རྩོད་པའི་རྒྱུ་ནི་བརྒྱ་རྩ་གཅིག་ཡོད་དེ། གསོལ་བའི་ལས་ཉི་ཤུ་རྩ་བཞི་དང་། གསོལ་བ་དང་གཉིས་ཀྱི་ལས་བཞི་བཅུ་རྩ་བདུན་དང་། གསོལ་བ་དང་། བཞིའི་ལས་སུམ་ཅུ་པོ་རྣམས་ཏེ། འདི་ནི་རྩོད་པ་དེ་དག་གི་རྒྱུ་བསྟན་པ་ཞེས་བྱའོ།། །།
མི་མཐུན་པར་སྨྲ་བ་ལས་རྩོད་པ་དེ་ནི་དགེ་བ་ཞེས་ཀྱང་བྱ། །མི་དགེ་བ་ཞེས་ཀྱང་བྱ། ལུང་དུ་མི་སྟོན་པ་ཞེས་ཀྱང་བྱ་སྟེ། གང་དགེ་འདུན་གྱི་དོན་དུ་བྱ་བ་དང་། དོན་དུ་སེམས་པ་དང་། དགེ་བའི་དོན་གྱི་ཕྱིར་འཐབ་པ་དང་། གཤེ་བ་དང་། འཁོན་པ་དང་། འཁྲུག་པ་དེ་ནི་
དགེ་བ་ཞེས་བྱའོ། །གང་དགེ་འདུན་གྱི་དོན་དུ་མ་ཡིན་པ་དང་། དོན་དུ་མི་སེམས་པ་དང་། མི་དགེ་བའི་དོན་གྱི་ཕྱིར་འཐབ་པ་ལ་སོགས་པ་དེ་ནི་མི་དགེ་བ་ཞེས་བྱའོ། །གང་དགེ་འདུན་གྱི་དོན་ཡང་མ་ཡིན། དོན་མ་ཡིན་པ་ཡང་མ་ཡིན། དོན་དུ་སེམས་པ་ཡང་མ་ཡིན།
མི་སེམས་པ་ཡང་མ་ཡིན། དགེ་བའི་དོན་དུ་ཡང་མ་ཡིན། མི་དགེ་བའི་དོན་དུ་ཡང་མ་ཡིན་པར་འཐབ་པ་ལ་སོགས་པ་དེ་ནི་ལུང་དུ་མི་སྟོན་པ་ཞེས་བྱའོ། །མི་མཐུན་པར་སྨྲ་བའི་རྩོད་པ་ཇི་ལྟ་བར་ལུང་བསྒོ་བ་མེད་པ་ལ་རྩོད་པ་དང་། ཉེས་པ་ལ་རྩོད་པ་དང་། བྱ་བ་ལ་རྩོད་

པ་རྣམས་ཀྱང་དགེ་བ་དང་མི་དགེ་བ་དང་། ལུང་དུ་མི་སྟོན་པར་རྣམ་པར་གཞག་སྟེ་དགེ་བར་འདོད་པ་དང་མི་དགེ་བར་འདོད་པ་དང་། དེ་གཉི་གར་མི་འདོད་པ་ནི་རིམ་བཞིན་དུ་སྦྱར་ཞིང་བཤད་པར་བྱ་སྟེ། འདི་ནི་རྩོད་པ་དེ་དག་དགེ་བའི་ལ་སོགས་པར་རྣམ་པ་གཞག་པ་བསྟན་པ་ཞེས་
བྱའོ། །དེ་ལ་མི་མཐུན་པར་སྨྲ་བའི་རྩོད་པ་ལ་རྣམ་པ་བཞི་ཡོད་དོ། མི་མཐུན་ལ་རྩོད་པ་མེད་པ་དང་། མཐུན་ལ་རྩོད་པ་དང་། མི་མཐུན་ལ་རྩོད་པ་དང་། མཐུན་ལ་མི་རྩོད་པའོ། །མི་མཐུན་ལ་རྩོད་པ་མེད་པ་ནི་གང་ཐ་དད་དུ་སྨྲ་བ་ནི་ཡོད་ལ། འཐབ་ཅིང་
གཤེ་བ་དང་། འཁོན་པ་ནི་མེད་པའོ། །མཐུན་ལ་རྩོད་པ་ནི་ལུང་བསྒོ་བ་མེད་པ་དང་། ཉེས་པ་དང་བྱ་བའི་རྩོད་པ་ནི་ཡོད་ལ་མི་མཐུན་པར་སྨྲ་བའི་རྩོད་པ་ནི་མེད་པའོ། །མི་མཐུན་ལ་རྩོད་པ་ནི་གང་དགེ་འདུན་ཐ་དད་དུ་སྨྲ་བ་དང་། འཁྲུག་པར་མི་མཐུན་པར་བྱ་བ་དང་།
མ་གུས་པར་བྱེད་པ་དང་། གཅིག་ཏུ་མ་ཡིན་པར་དེ་ལྟ་བུ་ཕྱིར་འཐབ་ཅིང་གཤེ་བ་དང་། འཁོན་པར་གྱུར་པའོ། །མཐུན་ལ་མི་རྩོད་པ་ནི་རྣམ་པ་དེ་དག་མ་གཏོགས་པའོ། །སྐབས་འདིར་ནི་མི་མཐུན་པར་སྨྲ་བ་ལ་རྩོད་པ་ཞེས་བྱ་བ་ནི་གསུམ་པ་བཟུང་ངོ་། །ལུང་བསྒོ་
བ་མེད་པའི་ཕྱིར་རྩོད་པ་ཡང་རྣམ་པ་བཞི་སྟེ། ལུང་མི་བསྒོ་བ་ལ་རྩོད་པ་མེད་པ་དང་། །རྩོད་པ་ལ་ལུང་བསྒོ་བ་དང་། ལུང་ཡང་མི་བསྒོ་ལ་རྩོད་པ་དང་། ལུང་ཡང་བསྒོ་ལ་རྩོད་པ་མེད་པའོ། །དེ་ལ་ལུང་མི་བསྒོ་ལ་རྩོད་པ་མེད་པ་ནི་གང་དགེ་འདུན་ལུང་སྟོན་དུ་མི་འཇུག་པ་
དང་། ལུང་མི་སྟོན་པ་ནི། ཡོད་ལ་འཐབ་པ་ལ་སོགས་པ་ནི་མེད་པའོ། །རྩོད་ལ་ལུང་བསྒོ་བ་ནི་མི་མཐུན་པར་སྨྲ་བ་དང་། ཉེས་པ་དང་བྱ་བའི་རྩོད་པ་ནི་ཡོད་ལ། ལུང་མི་སྟོན་པའི་ཕྱིར་རྩོད་པ་ནི་མེད་པའོ། །ལུང་ཡང་མི་བསྒོ་བ་ལ་རྩོད་པ་ནི་གང་དགེ་འདུན་
ལུང་སྟོན་དུ་མི་འཇུག་པ་དང་། ལུང་མི་སྟོན་པ་དང་། ལུང་སྟོན་དུ་མི་འཇུག་པ་དེའི་ཕྱིར་འཐབ་ཅིང་གཤེ་བ་དང་། འཁོན་ཅིང་འཁྲུག་པར་གྱུར་པའོ། །ལུང་ཡང་བསྒོ་ལ་རྩོད་པ་མེད་པ་ནི་རྣམ་པ་དེ་དག་མ་གཏོགས་པ་སྟེ། སྐབས་འདིར་ལུང་བསྒོ་བ་མེད་པའི་

ཕྱིར་རྩོད་པ་ཞེས་བྱ་བ་ནི་གསུམ་པ་གཟུང་ངོ་། །ཉེས་པའི་ཕྱིར་རྩོད་པ་ལ་ཡང་རྣམ་པ་བཞི་ཡོད་དེ། ཉེས་པ་ཡོད་པ་ལ་རྩོད་པ་མེད་པ་དང་། ཉེས་པ་མེད་པ་ལ་རྩོད་པ་དང་། ཉེས་པ་ཡོད་པ་ལ་རྩོད་པ་དང་། ཉེས་པ་མེད་ལ་རྩོད་པ་མེད་པའོ། །དེ་ལ་
ཉེས་པ་ཡོད་ལ་རྩོད་པ་མེད་པ་ནི་ཕས་ཕམ་པ་ནས་ཉེས་བྱས་ཀྱི་བར་གྱི་ཉེས་པ་ནི་བྱུང་ལ་འཐབ་པ་ལ་སོགས་པ་ནི་མེད་པའོ། །ཉེས་པ་མེད་པ་ལ་རྩོད་པ་ནི་མི་མཐུན་པར་སྨྲ་བ་དང་། ལུང་བསྒོ་བ་མེད་པ་དང་། བྱ་བའི་རྩོད་པ་ནི་ཡོད་ལ་ཉེས་པའི་ཕྱིར་རྩོད་པ་མེད་པའོ། །ཉེས་པ་ཡོད་པ་ལ་
རྩོད་པ་ནི་ཕས་ཕམ་པ་ནས་ཉེས་བྱས་ཀྱི་བར་དུ་བྱུང་ལ། དེའི་ཕྱིར་འཐབ་ཅིང་གཤེ་བ་དང་། འཁོན་ཅིང་འཁྲུག་པར་འགྱུར་བའོ། །ཉེས་པ་མེད་པ་ལ་རྩོད་པ་མེད་པ་ནི། རྣམ་པ་དེ་དག་མ་གཏོགས་པ་སྟེ། འདིར་ཉེས་པའི་རྩོད་པ་ཞེས་བྱ་བ་ནི་གསུམ་བཟུང་ངོ་།། །།བྱ་
བའི་ཕྱིར་རྩོད་པ་ལ་ཡང་རྣམ་པ་བཞི་ཡོད་དེ། བྱ་བ་ཡོད་ལ་རྩོད་པ་མེད་པ་དང་། རྩོད་པ་ཡོད་ལ་བྱ་བ་མེད་པ་དང་། བྱ་བ་ཡང་ཡོད་ལ་རྩོད་པ་དང་། བྱ་བ་མེད་པ་ལ་རྩོད་པའོ། །དེ་ལ་བྱ་བ་ཡོད་ལ་རྩོད་པ་མེད་པ་ནི་གང་གསོལ་བའི་ལས་ལ་སོགས་པའི་བྱ་བ་ནི་ཡོད་ལ། འཐབ་པ་ལ་
སོགས་པའི་བྱ་བ་ནི་མེད་པའོ། །རྩོད་པ་ཡོད་ལ་བྱ་བ་མེད་པ་ནི་མི་མཐུན་པར་སྨྲ་བ་དང་། ལུང་བསྒོ་བ་མེད་པ་དང་། ཉེས་པའི་རྩོད་པ་ནི་ཡོད་ལ་བྱ་བའི་ཕྱིར་རྩོད་པ་ནི་མེད་པའོ། །བྱ་བ་ཡང་ཡོད་ལ་རྩོད་པ་ནི་གང་གསོལ་བ་ལ་སོགས་པའི་ལས་ཀྱི་ཕྱིར་འཐབ་ཅིང་གཤེ་བ་དང་། འཁོན་ཞིང་
འཁྲུག་པར་གྱུར་པའོ། །བྱ་བ་ཡང་མེད་ལ་རྩོད་པ་མེད་པ་ནི་རྣམ་པ་དེ་དག་མ་གཏོགས་པ་སྟེ། འདིར་བྱ་བའི་ཕྱིར་རྩོད་པ་ཞེས་བྱ་བ་ནི་གསུམ་པ་གཟུང་ངོ་། །འདི་ནི་རྩོད་པ་དེ་དག་གི་རྣམ་པར་དབྱེ་བ་བསྟན་པ་ཞེས་བྱ་བ་སྟེ། རྩོད་པའི་གཉེན་པོ་རྣམས་བསྟན་པ་ཞེས་བྱ་བ་ལ་གཉིས་སུ་ཕྱེ་
བའི་དང་པོ་རྩོད་པ་རྣམས་བསྟན་པ་ཞེས་བྱ་བ་བཤད་ཟིན་ཏོ།། །།འདིར་ནི་ཞི་བར་བྱ་བའི་ཆོས་རྣམས་བསྟན་པ་ཞེས་བྱ་བ་བསྟན་ཏོ། །འདི་ལ་ཡང་རྣམ་པ་བཞིར་དབྱེ་སྟེ། ཞི་བར་བྱ་བའི་ཆོས་དེ་དག་གི་གནས་བསྟན་པ་དང་། བསླབ་པའི་དངོས་པོ་སོ་སོའི་མཚན་ཉིད་བསྟན་

པ་དང་། མཇུག་བསྡུ་བ་དང་། ཡོངས་སུ་དག་པ་དྲི་བའོ། །དེ་དག་གི་གནས་བརྟན་པ་ནི། རྩོད་པ་ཞི་བར་བྱ་བའི་ཆོས་བདུན་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་ཞེས་གསུངས་པའོ། །བསླབ་པའི་དངོས་པོ་ཉིད་ཀྱི་མཚན་ཉིད་བསྟན་པ་
ཡང་གཉིས་སུ་དབྱེ་སྟེ། མདོར་བསྟན་པ་དང་། དེ་ཉིད་ཀྱི་རྣམ་པར་བཤད་པའོ། །དེ་ལ་མདོར་བསྟན་པ་ཞེས་བྱ་བ་ནི། མདོར་བསྟན་པ་ནི། མངོན་སུམ་དྲན་པ་མ་མྱོས་དང་། །དེ་བཞིན་གང་མང་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང་། །ཁས་བླང་བར་ཡང་བྱ་བའོ། །
ཞེས་གསུངས་པའོ། །དེ་ཉིད་ཀྱི་རྣམ་པར་བཤད་པ་ཞེས་བྱ་བ་ནི་མངོན་སུམ་དུ་འདུལ་བར་འོས་པ་ལ་མངོན་སུམ་དུ་འདུལ་བ་སྦྱིན་ནོ། །དྲན་པས་འདུལ་བར་འོས་པ་ལ་དྲན་པས་འདུལ་བ་སྦྱིན་ནོ། །མ་མྱོས་པས་འདུལ་བར་འོས་པ་ལ་མ་མྱོས་པས་འདུལ་བ་སྦྱིན་ནོ། །གང་
ཚུལ་ཤིང་མང་པོ་སྦྱིན་པར་འོས་པ་ལ་ཚུལ་ཤིང་མང་པོ་སྦྱིན་ནོ། །དེའི་ངོ་བོ་ཉིད་ཚོལ་དུ་གཞུག་པར་འོས་པ་ལ་དེའི་ངོ་བོ་ཉིད་བཙལ་བར་སྦྱིན་ནོ། །རྩྭ་བཀྲམ་པ་ལྟ་བུར་འོས་པ་ལ་རྩ་བཀྲམ་པ་ལྟ་བུ་སྦྱིན་ནོ། །ཁས་བླང་བར་འོངས་པ་ལ་ཁས་བླང་བར་བྱའོ་ཞེས་གསུངས་པའོ། །
འདི་དག་ཀྱང་གང་གིས་གང་ཞི་བར་བྱ་བ་དང་། སོ་སོའི་མཚན་ཉིད་བསྟན་པས་སྟོན་ཏེ། དེ་ལ་མི་མཐུན་པར་སྨྲ་བས་རྩོད་ན་གཉིས་ཀྱིས་ཞི་བར་བྱ་སྟེ། མངོན་སུམ་དུ་འདུལ་བ་དང་ཚུལ་ཤིང་མང་པོ་ལེན་པས་སོ། །དེ་ལ་མངོན་སུམ་དུ་འདུལ་བ་ཞེས་བྱ་བ་ནི་གང་ཟག་གསུམ་སྟེ། རྒོལ་བ་
དང་། །ལེན་འདེབས་པ་དང་། གཟུ་བོ་མངོན་སུམ་དུ་གྱུར་པའོ། །རྒོལ་བས་དོན་རྣམ་པ་བཅུ་དྲུག་པོ་འདི་ལས་བསམས་ནས་གླེང་བར་བྱ་སྟེ། བདེན་པ་དང་། དུས་དང་། ཚོད་དང་། དོན་དུ་ལྡན་པ་དང་། མཐོང་བ་དང་། ཐོས་པ་དང་། དོགས་པ་དང་། ལུས་དང་
ངག་དང་། གྲོང་དང་། དགོན་པ་དང་། མཚན་མོ་དང་། ཉིན་པར་བྱས་པ་དང་། ལྷག་མ་ལུས་པ་དང་། ལྷག་མ་མ་ལུས་པ་དང་། སློང་བར་ནུས་པའོ། །རྒོལ་བས་གླེངས་ཀྱང་དེའི་ཚིག་མི་བརྩན་པར་རྣམ་པ་ལྔ་སྟེ། དོན་གཏན་ལ་མ་ཕེབས་པ་དང་། གཅིག་

ནས་གཅིག་ཏུ་བརྒྱུད་པའི་ཚིག་དང་། བསྙེན་པར་མ་རྫོགས་པའི་ཚིག་ལས་དོན་དུ་འཛིན་པ་དང་། མདོ་སྡེ་མི་ཤེས་པ་དང་། གནས་མི་ཤེས་པའོ། །སླར་ཟློག་པ་ལྔ་ནི་བརྩན་ནོ། །ལན་འདེབས་པས་ཀྱང་རྣམ་པ་བཅུ་དྲུག་པོ་འདི་རྣམས་ལས་
བསམས་ནས་སྐབས་དབྱེ་བར་བྱ་སྟེ། ཅི་འདི་ཚུལ་ཁྲིམས་དང་ལྡན་པ་ཡིན་ནམ། འགྱོད་པ་ཅན་ནམ། མང་དུ་ཐོས་པའམ། འདུལ་བ་གཏན་ལ་འབེབས་པ་ཡིན་ནམ། ཅི་མཐོང་བ་ལས་གླེང་བར་བྱེད་དམ་ཞེས་བྱ་བ་ལ་སོགས་པ་བཅུ་གཉིས་ནི་སྔ་མ་བཞིན་ནོ། །ལན་
འདེབས་པའི་ཚིག་མི་བརྩན་པར་བྱ་བ་རྣམ་པ་ལྔ་སྟེ། མཚམས་སྦྱོར་བར་མི་སྨྲ་བ་དང་། གཞན་ལས་གཞན་དུ་འགྱུར་བ་དང་། ཕྱོགས་ལ་བརྟེན་ཏེ་ཉེས་པ་ཁས་ལེན་པ་ལས་ཀྱང་མཉེས་པར་སྨོད་པ་དང་། དགེ་སློང་མ་རྣམས་ལ་སྐུར་པ་འདེབས་པ་དང་། རིམ་གྲོ་མེད་པ་
པའོ། །སླར་བཟློག་པ་ལྔ་ནི་བརྩན་པར་བྱའོ། །རྒོལ་བ་དང་ལན་འདེབས་པ་གཉིས་རྩོད་པའི་ཉེས་དམིགས་དེ་ཞི་བའི་ཡོན་ཏན་དུ་སྣང་ན། དེ་གཉིས་ཀྱིས་གཟུ་བོ་ཆོས་བཅུ་དྲུག་དང་ལྡན་པ་བཙལ་བར་བྱ་སྟེ། ཚུལ་ཁྲིམས་དང་ལྡན་པ་དང་། སློབ་པ་ལ་འདོད་པ་དང་། མང་དུ་
ཐོས་པ་དང་། འདུལ་བ་ལ་མཁས་པ་དང་། གཟུ་བོ་ཆོས་བཞིན་མ་འདྲེས་པ་དང་། འདོད་པས་མི་འགྲོ་བ་དང་། ཞེ་སྡང་གིས་མི་འགྲོ་བ་དང་། གཏི་མུག་གིས་མི་འགྲོ་བ་དང་། འཇིགས་པས་མི་འགྲོ་བ་དང་། ལས་བྱས་པ་དང་། མ་བྱས་པར་ཤེས་པ་དང་། འདོད་
ཆགས་ཀྱིས་རྒྱལ་བའི་བཀའ་ལས་མི་འདའ་བ་དང་ཞེ་སྡང་གིས་རྒྱལ་བའི་བཀའ་ལས་མི་འདའ་བ་དང་། མ་བཅས་པ་མི་འཆའ་བ་དང་། བཅས་པ་ལས་མི་འགྱུར་བ་དང་། རྩོད་པ་དེ་ཞི་བར་ནུས་པ་དང་། ཉེས་པ་ལས་སློང་བར་ནུས་པའོ། །གཟུ་བོ་ལ་རྣམ་པ་གསུམ་སྟེ།
ཕྱོགས་གཉི་གའི་ཐད་དུ་བདག་ཉིད་སོང་ནས་དཀྲུགས་པར་བྱེད་པ་དང་། གང་དག་མི་སྡོམ་པ་སྟེ། ཕྲིན་ལས་ལ་སྦྱོར་བ་དང་། ལུས་དང་ངག་གཉི་ག་སྡོམ་པ་སྟེ། གོང་མ་གཉིས་ལས་བཟློག་པའོ། །དེ་བས་ན་ལུས་ངག་གཉིས་སྡོམ་པའི་གཟུ་བོ་བསྒོ་བར་བྱའོ། །སྔ་མ་གཉིས་

གཉིས་ནི་མ་ཡིན་ནོ། །གཞན་ཡང་ཆོས་ལྔ་དང་ལྡན་ན་གཟུ་བོ་བུས་པ་ལྟ་བུ་ཞེས་བྱ་སྟེ། ཆོས་མ་ཡིན་པའི་ཕྱོགས་སུ་འཇུག་པ་དང་། རྩོད་པ་འཕེལ་བར་བྱེད་པ་དང་། གཟུ་བོ་གཞན་ལ་མདོ་སྡེས་བསྡོ་བ་དང་། སོ་སོར་ཐར་པས་དགེ་སློང་མ་རྣམས་ལ་སྨོད་པ་དང་། རིམ་གྲོ་
མེད་པའོ། །དེ་ནས་བཟློག་པ་ནི་གསལ་བའོ། །གཟུ་བོས་རྩོད་པ་ཞི་བར་བྱ་བར་ཁས་བླངས་ན། རྣམ་པ་བརྒྱད་ཀྱི་བདག་ཉིད་ལ་བརྟག་པར་བྱ་སྟེ། ཅི་བདག་གིས་རྩོད་པའི་གཞི་ཐོག་མ་ཅི་ལས་བྱུང་བ་ཤེས་སམ། བདག་གི་གྲོགས་མོ་གཟུ་བོ་ཆོས་བཞིན་བྱེད་པ་ཡིན་ནམ་
སྔོན་འདྲིས་པར་འགྱུར་བ་མ་ཡིན་ནམ། ཅི་བདག་གི་ཚིག་བརྩན་པར་འགྱུར་རམ། ཉེས་པ་དེ་དག་རྣམ་པར་སྦྱང་ནུས་སམ། ལན་གླན་པར་ནུས་སམ། ཆོས་བཞིན་དུ་བྱ་བར་ནུས་སམ། ཅི་མི་དགེ་བ་ལས་སློང་བ་ལ་མཁས་སམ་ཞེས་བརྟག་པར་བྱའོ། །དེ་ནས་རྣམ་པ་བརྒྱད་ཀྱིས་
གཞན་ལ་བརྟག་པར་བྱ་སྟེ། འདི་ན་འདི་ལྟར་རྒྱལ་བའི་གསུང་སྐུང་བ། མདོ་སྡེ་དང་། འདུལ་བ་དང་། མ་མོ་འཛིན་པ་ལྟ་ཡོད་དམ། གང་འཕྱས་ཚོལ་བ་ལ་སླར་ཟློག་པའི་གནས་བརྟན་མ་ཡོད་དམ། དེ་གཉིས་རྒྱལ་པོ་ལ་བརྟེན་པ་མ་ཡིན་ནམ། བློན་པོ་ལ་བརྟེན་
པ་མ་ཡིན་ནམ། ཁྱིམ་བདག་ལ་བརྟེན་པ་མ་ཡིན་ནམ། ཕྱི་རོལ་པ་མ་ཡིན་གྱི་དགེ་འདུན་ཉིད་ལ་ཞི་བར་སྦྱོར་བ་ལྟ་ཡོད་དམ་ཞེས་བརྟག་པར་བྱའོ། །དེ་ནས་གཟུ་བོ་དེ་དག་གིས་མངོན་སུམ་དུ་འདུ་བར་རྩོད་པ་དེ་ཞི་བར་བྱའོ། །མངོན་སུམ་དུ་བྱ་བ་ནི་རྣམ་པ་གཉིས་ཏེ། གང་ཟག་
མངོན་སུམ་དང་། ཆོས་མངོན་སུམ་མོ། །དེ་ལ་གང་ཟག་མངོན་སུམ་དུ་བྱ་བ་ནི་གང་ལ་ཞི་བར་བྱ་བ་དང་། གང་གིས་ཞི་བར་བྱེད་པ་དེ་དག་མངོན་སུམ་དུ་གྱུར་པའོ། །ཆོས་མངོན་སུམ་དུ་བྱ་བ་ན་ཆོས་ཇི་ལྟར་ཆོས་དང་འདུལ་བ་བཞིན་ནོ། །གཟུ་བོ་རྣམས་ཀྱིས་རྒོལ་བ་ལ་རྣམ་པ་བརྒྱད་
དུ་བརྟག་པར་བྱ་སྟེ། ཆོ་ག་དང་། སྤྱོད་ཡུལ་དང་། མཛའ་བོ་དང་། གྲོགས་མོ་དང་། ལུས་ཀྱི་ལས་དང་། ངག་གི་ལས་དང་། འཚོ་བ་དང་། ཐོས་པ་སྟེ། གལ་ཏེ་བརྒྱད་པོ་དེ་དག་སྡིག་པ་ཅན་དུ་གྱུར་པ་ན་མ་སྨྲ་ཤིག་ཅེས་བསྒོ་བར་བྱའོ། །རྒོལ་བ་ལ་ཇི་ལྟར་ལན་

འདེབས་པ་ལ་ཡང་རྣམ་པ་བརྒྱད་དུ་བརྟག་པར་བྱ་སྟེ། གལ་ཏེ་བརྒྱད་པོ་དེ་སྡིག་པ་ཅན་དུ་གྱུར་ན་ཁྱོད་ཀྱི་ལུས་དང་ངག་དང་ཡིད་ཀྱི་ལས་ཐོག་མ་ཇི་ལྟ་བུ་ཡིན་ཞེས་དྲིས་ལ་ཇི་ལྟར་ཁས་བླངས་པ་བཞིན་དུ་བྱེད་དུ་གཞུག་གོ། །ཅི་སྟེ་ཆོ་ག་ལ་སོགས་པ་དགེ་བ་ཅན་
ཞིག་ཡིན་ན་ལན་འདེབས་པ་ལ་ནི་འཇམ་པོར་སྨྲོས་ཤིག །རྒོལ་བ་ལ་ནི་ཤེས་པར་བྱོས་ལ་རྩོད་པ་དེ་ཞི་བར་བྱའོ། །གཞན་ཡང་རྣམ་པ་བཅུ་དྲུག་ཏུ་སྦྱར་བར་བྱ་སྟེ། རྒོལ་བ་ཉིད་རིག་པར་བྱ་བ་དང་། བརྟག་པ་དང་། འབྱུང་བ་དང་། དྲི་བ་དང་། དམ་འཆར་
གཞུག་པ་དང་། སྤྲོ་བར་བྱ་བ་སྟེ་རྒོལ་བ་ལ་དྲུག་ཏུ་སྦྱར་བ་བཞིན་ལན་འདེབས་པ་ལ་ཡང་དྲུག་སྟེ་བཅུ་གཉིས་དང་། ལན་ལྡོན་པས་དམ་བཅས་པ་གཟུང་བ་དང་། མདོ་སྡེ་དང་སྦྱར། འདུལ་བ་དང་སྦྱར། མ་མོ་དང་སྦྱར་ཞིང་རྩོད་པ་རྨ་བར་བྱའོ། །ཆོས་ལྔ་དང་ལྡན་པའི་
གཟུ་བོས་རྩོད་པ་དེ་ཞི་བར་བྱེད་མི་ནུས་ཏེ། རྗེས་སུ་བསྟན་པའི་ཚིག་ལྔ་དང་། མངོན་སུམ་དུ་མི་ཤེས་པའི་ཕྱིར་རོ། །ལྔ་གང་ཞེ་ན་རྒོལ་བ་དང་། ལན་འདེབས་པ་དང་། ཆོས་བཞིན་དུ་བརྟག་པ་དང་། ཆོས་བཞིན་དུ་མ་ཡིན་པར་རྟོགས་པ་དང་། དམ་བཅའ་བ་
བཞིན་མི་འཛིན་པའོ། །གཞན་ཡང་རྣམ་པ་ལྔ་སྟེ། རྩོད་པའི་རང་བཞིན་དང་། འབྱུང་བ་དང་། གཟུང་བ་དང་། གཅད་པ་དང་། ཞི་གནས་པས་མི་འབྱུང་བར་མི་ཤེས་པའོ། །གཞན་ཡང་རྣམ་པ་ལྔ་སྟེ། འཁྲུལ་བ་དང་། གསང་སྟེ་སྨྲ་བ་དང་། ནོར་བར་སྨྲ་བ་དང་།
གློ་བུར་དུ་སྨྲས་པ་འཛིན་པ་དང་། སྨྲས་པ་ཡང་ལན་གསུམ་གྱི་བར་དུ་དམ་འཆའ་བར་མི་འཇུག་པའོ། །གཟུ་བོ་འདུལ་བ་འཛིན་པས་གནས་བཅུ་དྲུག་གིས་འདུལ་བ་ཤེས་པར་བྱས་ནས། གནས་བཅུ་དྲུག་གིས་ཉེས་པ་བརྗོད་པར་བྱ་སྟེ། ལྕི་བ་དང་། ཡང་བ་དང་།
ལྷག་མ་ལུས་པ་དང་། ལྷག་མ་མ་ལུས་པ་དང་། གནས་ངན་ལེན་པ་དང་། ལུས་ཀྱི་དང་། ངག་གི་དང་། དགེ་བ་དང་། མི་དགེ་བ་དང་། ལུང་དུ་མི་སྟོན་པ་དང་། བཅས་པ་དང་། མ་བཅས་པ་དང་། བཤགས་པར་བྱ་བ་དང་། བསྡམ་པར་བྱ་བ་དང་། ངན་དུ་སྨྲས་

པ་དང་། འདུལ་བའི་ལས་འདས་པར་གྱུར་པའི་རྣམ་པ་སྟེ། དེ་ལྟར་གནས་བཅུ་དྲུག་པོ་དེ་དག་གིས་ཉེས་པ་བརྗོད་ནས། གནས་བཅུ་དྲུག་གིས་ཆད་པའི་ལས་ཀྱིས་སྨ་དབབ་པར་བྱའོ། །བཅུ་དྲུག་པོ་ནི་འདི་ལྟ་སྟེ། ཉེས་པ་ངོར་བརྗོད་པ་དང་། འཕྱས་འདོགས་པ་དང་། བསྒོ་
བ་བཞིན་མི་ཉན་པ་དང་། ཅང་མི་སྨྲ་ཞིང་མི་ཉན་པ་དང་། བསྡིགས་པ་དང་། བསྐྲད་པ་དང་། སླར་བསྡུམ་པ་དང་། སྨད་པ་དང་། མ་མཐོང་བའི་ཕྱིར་སྤང་བ་དང་། གཉེན་པོ་ལ་མི་བརྟེན་པའི་ཕྱིར་སྤང་བ་དང་། སྡིག་པའི་ལྟ་བ་མི་གཏོང་བའི་ཕྱིར་སྤང་བ་དང་། ཆད་པ་དང་།
གཞི་ནས་བསློང་བའི་ཆད་པ་དང་། ཡིད་མགུ་བར་བྱ་བ་དང་། གཞི་ནས་བསླང་བའི་ཡིད་མགུ་བ་དང་། གཞི་ནས་བསླངས་ཏེ་སྨོས་པའོ། །དེ་ལྟར་ཆད་པའི་ལས་ཀྱིས་སྨ་ཕབ་ནས། གནས་རྣམ་པ་བཅུ་དྲུག་གིས་ལས་བྱས་ཏེ། མངོན་སུམ་དུ་གྱུར་པ་དང་། སྐབས་
ཕྱེ་བ་དང་། མཐོང་བས་གླེངས་པ་དང་། ཐོས་པས་གླེངས་པ་དང་། དོགས་པས་གླེངས་པ་དང་། མཐོང་བས་དྲན་པར་བྱས་པ་དང་། ཐོས་པས་དྲན་པར་བྱས་པ་དང་། དོགས་པས་དྲན་པར་བྱས་པ་དང་། རང་གིས་ཁས་བླངས་པ་དང་། གཞན་གྱིས་བསྐུལ་ནས་ཁས་བླངས་
པ་དང་། བརྟག་མི་དགོས་པ་དང་། དྲི་བ་དང་། དྲི་མི་དགོས་པ་དང་། ཁས་ལེན་དུ་བཅུག་པ་དང་། ཁས་ལེན་དུ་མ་བཅུག་ཀྱང་རུང་བ་ལས་བྱའོ། །དེ་ལྟར་རྣམ་པ་བཅུ་དྲུག་གིས་རྩོད་པ་ཞི་བར་བྱས་ནས་ལེགས་པར་ཞི་བ་ཡིན་ཏེ། ཆོས་བཞིན་དུ་ལས་བྱས་པ་དང་།
དགེ་འདུན་གྱིས་བསྒོ་བ་དང་། རྒྱལ་བའི་གསུང་བཞིན་མཐུན་པ་དང་། རྒོལ་བ་དང་ལན་འདེབས་པ་ལ་བསྒོ་བ་དང་། རྒོལ་བས་འདུལ་བ་ལས་མི་འགལ་བ་དང་། ཉེས་པ་མི་འཆབ་པ་དང་། བྱུང་བ་དང་བཅས་པ་དང་། རྗེས་སུ་བཅས་པ་དང་། གནང་བ་དང་།
མི་གནང་བ་དང་། མི་གནང་བར་སྦྱོར་བ་དང་། རྒོལ་བ་དང་ལན་འདེབས་པའི་དམ་བཅའ་བ་འཛིན་པ་དང་། མདོ་སྡེ་སྟོན་པ་དང་། འདུལ་བར་མཐུན་པ་དང་། ཆོས་ཀྱི་ཚུལ་འཕེལ་བ་དང་། ཆོས་དང་འདུལ་བ་བཞིན་ཞི་བར་བྱེད་པའོ། །སླར་བཟློག་པ་ནི་

ལེགས་པར་ཞི་བ་མ་ཡིན་ཏེ་མ་ཞི་བའོ། །གལ་ཏེ་དེས་ཀྱང་ཞི་བར་མ་ནུས་ན་དགེ་འདུན་ལ་སླར་དབུལ་བར་བྱ་སྟེ། དགེ་འདུན་གྱིས་མངོན་སུམ་དུ་འདུལ་བས་ཞི་བར་བྱའོ། །དེས་ཀྱང་ཞི་བར་མ་ནུས་ན་ཡང་མང་དུ་ཐོས་པ་གསོལ་བ་ཡོན་ཏན་དང་ལྡན་པའི་
གཟུ་བོ་མཆོག་བསྐོས་ཏེ། དེས་མངོན་སུམ་དུ་འདུལ་བས་ཞི་བར་བྱའོ། །དེ་དག་གིས་ཀྱང་མ་ནུས་ན་མཆོག་གི་ཡང་མཆོག་ལ་གཏད་དེ། དེ་དག་གིས་མངོན་སུམ་དུ་འདུལ་བས་ཞི་བར་བྱའོ། །དེ་དག་གིས་ཀྱང་ཞི་བར་མ་ནུས་ན་སླར་ཡང་དགེ་འདུན་ལ་དབུལ་བར་
བྱའོ། །དེ་ནས་དགེ་འདུན་གྱིས་རྩོད་པ་སྤོ་ཞིང་། གཏོད་པར་བྱེད་པའི་དགེ་སློང་མ་ཆོས་ལྔ་དང་ལྡན་པ་གཅིག་བསྐོ་བར་བྱ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། འཇིགས་པས་མི་འགྲོ་བ་དང་། སྤོས་པ་དང་། མ་སྤོས་པ་ཤེས་པ་ལས་བསྐོ་
ཞིང་དེས་གང་ན་གནས་བརྟན་མ་དང་། སོ་སོར་ཐར་པ་དང་བཅས་པའི་དགེ་འདུན་ལ་ཐོག་མར་ཅི་ལས་རྩོད་པ་རྒྱས་པར་སྨྲོས་ལ་གཏོད་ཅིག །དགེ་འདུན་དེ་དག་གིས་ཀྱང་ཟླ་བ་དྲུག་གི་བར་དུ་དགེ་འདུན་དང་། གང་ཟག་དང་། ཆོས་མངོན་སུམ་གྱིས་ཞི་བར་བྱའོ། །དེ་དག་
གིས་ཀྱང་ཞི་བར་མ་ནུས་ན་རྩོད་པ་སྤོ་བར་བྱེད་པ་ལ་སླར་གཏོད་ཅིག །དེས་ཀྱང་མདོ་སྡེ་ལ་སོགས་པ་འཛིན་པ་ལ་སྤོ་བར་བྱ་སྟེ། དེ་དག་གིས་གང་ཟག་དང་། ཆོས་མངོན་སུམ་གྱིས་འདུལ་ཞིང་ཞི་བར་བྱའོ། །གལ་ཏེ་མ་ནུས་ན་སླར་ཡང་རྩོད་པ་སྤོ་བ་ལ་གཏོད་ཅིག །དེས་
ཀྱང་གང་ན་གནས་བརྟན་མ་གྲགས་པ་དང་ལྡན་པ་ལ་ཐོག་མ་ནས་སྨྲོས་ལ་གཏོད་ཅིག །དེས་ཀྱང་དེ་དག་ལ་ཅི་ཡང་བླང་བར་མི་བྱ། ཁ་ཏོན་ལ་སོགས་པ་ལ་ཡང་སྦྱིན་པར་མི་བྱ། མདུན་ནམ་རྒྱབ་ཏུ་འདུག་ལ། འདི་སྐད་དུ་འཕགས་མ་དག་འཐབ་པར་མ་བྱེད་ཅིག །
གཉི་ག་ལ་རྒྱལ་བར་མི་འགྱུར་གྱི། གཅིག་པུ་ལའོ་ཞེས་སྨྲོས་ཤིག །དེས་ཞི་བར་གྱུར་ན་ལེགས་པར་ཞི་བ་ཞེས་བྱ་སྟེ། དེ་ལྟར་མངོན་སུམ་དུ་འདུལ་བ་ཡིན་ནོ། །གལ་ཏེ་གནས་བརྟན་མས་ཀྱང་ཞི་བར་མ་ནུས་ན་རྩོད་པ་སྤོ་བར་བྱེད་པ་ལ་སླར་གཏོད་ལ། དེས་ཀྱང་དགེ་

འདུན་ལ་སླར་དབུལ་བར་བྱ་སྟེ། དགེ་འདུན་གྱིས་ཀྱང་ཚུལ་ཤིང་མང་པོ་ལེན་དུ་བཅུག་ནས་རྩོད་པ་དེ་ཞི་བར་བྱའོ། །དེ་ལ་ཚུལ་ཤིང་འདྲིམ་པ་ལ་རྣམ་པ་བཞི་སྟེ། གང་ལ་གནས་བརྟན་མ་ཆོས་བཞིན་སྨྲ་བ་མི་མང་ན་དགབ་པར་བྱ་བ་དང་། ཆོས་བཞིན་སྨྲ་བ་མང་ན་དགབ་པར་མི་
བྱ་བ་དང་། རྣ་བར་བཤུབ་པ་སྟེ། ཁྱོད་ཀྱི་མཁན་པོ་དང་སློབ་དཔོན་ལ་སོགས་པས་ནི་ཆོས་བཞིན་གྱི་ཚུལ་ཤིང་བླངས་ཀྱི་ཁྱོད་ཀྱིས་ཀྱང་ལོང་ཤིག་ཅེས་བསྒོ་བ་དང་། གང་ན་ནད་པ་མང་ཞིང་དགེ་འདུན་ཐམས་ཅད་ཀྱི་དང་བཞིའོ། །ཆོས་བཞིན་མ་ཡིན་པར་ཚུལ་ཤིང་ལེན་
པ་རྣམ་པ་བཅུ་ཡོད་དེ། ཆོས་བཞིན་མ་ཡིན་པར་ལེན་པ་དང་། འདུལ་བར་མི་མཐུན་པ་དང་མ་འདུས་པར་ལེན་པ་དང་། ཅུང་ཟད་ཅིག་གི་ཉེས་པ་ཆུང་ངུས་དབྱེ་བར་དོགས་པ་དང་། གནས་བརྟན་མའི་མཐར་མ་ཕྱིན་པ་སྦྱོར་ཟློག་པ་དང་། ཤེས་པར་ལྡན་པ་ཁ་ལོ་སྒྱུར་བར་
མི་བྱེད་ཅིང་འདུལ་བ་འཛིན་པ་ལ་སོགས་པ་ལ་མི་འདྲི་བ་དང་། དགེ་འདུན་དབྱེ་བར་བྱའོ་སྙམ་དུ་སེམས་པ་དང་། ཆོས་བཞིན་མ་ཡིན་པར་སྨྲ་བ་མང་པོར་འདོད་པ་དང་། དགེ་འདུན་དབྱེ་བར་འདོད་པ་དང་། ཆོས་མ་ཡིན་པར་སྨྲ་བར་འགྱུར་རོ་སྙམ་པའོ། །དེ་ལས་ཟློག་
པ་རྣམ་པ་བཅུ་ནི་ཆོས་བཞིན་བླངས་པ་ཞེས་བྱའོ། །ཚུལ་ཤིང་འདྲིམ་པས་ཚུལ་ཤིང་རྣམ་པ་གཉིས་སུ་བྱ་སྟེ། ཆོས་བཞིན་སྨྲ་བའི་ཚུལ་ཤིང་ནི་དབྱིབས་དང་ཁ་དོག་དང་གཟུགས་སུ་ལྡན་པའོ། །ཆོས་མ་ཡིན་པར་སྨྲ་བའི་ཚུལ་ཤིང་ནི་སླར་ཟློག་པའོ། །དེ་ནས་ཚུལ་ཤིང་འདྲིམ་
པས་ཆོས་བཞིན་སྨྲ་བའི་ཚུལ་ཤིང་ནི་ལག་པ་གཡས་པས་ཁྱེར་ཅིག །ཆོས་བཞིན་མ་ཡིན་པར་སྨྲ་བའི་ཚུལ་ཤིང་ནི་ལག་པ་གཡོན་པས་ཁྱེར་ལ། དགེ་འདུན་གྱི་མདུན་དུ་ཆོས་བཞིན་སྨྲ་བའི་ཚུལ་ཤིང་ལ་ནི་བསྔགས་པར་བྱ་སྟེ། འདི་ནི་ཆོས་བཞིན་སྨྲ་བའི་ཚུལ་ཤིང་
སྟེ། དགྱེ་དགུ་མེད་པ། མི་འཁྱོར་བ། དྲང་བ། ཁ་དོག་སྡུག་པ་ཡིན་གྱི་ལོང་ཤིག་ཅེས་བསྒྲགས་པར་བྱའོ། །ཆོས་མ་ཡིན་པར་སྨྲ་བའི་ཚུལ་ཤིང་ལ་ནི་སྨད་པར་བྱ་སྟེ། འདི་ནི་ཆོས་བཞིན་མ་ཡིན་པའི་ཚུལ་ཤིང་སྟེ། དགྱེ་དགུ་ཅན། འཁྱོར་བ། མི་

དྲང་པ། ཁ་དོག་མི་སྡུག་པ། རེག་ན་མི་བདེ་བ་ཡིན་གྱི་ལོང་ཤིག་ཅེས་བརྗོད་པར་བྱའོ། །གང་ཡང་རུང་ཆོས་མ་ཡིན་པའི་ཚུལ་ཤིང་ལག་པ་བརྐྱང་ན་ཚིག་དང་པོ་དང་གཉིས་པ་ལ་མི་བྱིན་པར་གསུམ་པ་ལ་སྦྱིན་པར་བྱ་སྟེ། འདུལ་བ་ལས་འདས་པའི་ཉེས་
བྱས་ཀྱང་འཆགས་སུ་ཆུག་ཤིག །དེ་ནས་སླར་བསྡུས་ཏེ་གྲོངས་ལ་གལ་ཏེ་མཉམ་པར་གྱུར་ན་གནས་བརྟན་ཅང་ཤེས་ཀཽཎྜི་ནྱའི་ཕྱིར་ཚུལ་ཤིང་གཅིག་ལོང་ལ་ཆོས་བཞིན་སྨྲ་བའི་ཚུལ་ཤིང་གི་སྟེང་དུ་མནན་ཏེ། མང་བར་གྱུར་ན་ཆོས་བཞིན་སྨྲ་བ་རྒྱལ་བ་ཡིན་པས། མ་དད་དུ་མི་གནང་
བར་རྩོད་པ་དེ་ཞི་བར་བྱ་སྟེ། གང་གིས་བསྐྱོས་པ་དེ་ལྟུང་བར་འགྱུར་རོ། །གལ་ཏེ་གཅིག་པུ་དེས་བསྣན་ཀྱང་ཆོས་བཞིན་མ་ཡིན་པར་སྨྲ་བའི་མང་བར་གྱུར་ན། དགེ་བའི་ཕྱོགས་སུ་བཏང་ན་རྟག་ཏུ་རྩོད་པར་མི་རིགས་སོ་སྙམ་དུ་སེམས་ལ། སྡིག་པ་ལ་ལྟ་བཞིན་ཞོག་ལ་དེས་ཞི་
བར་བྱོས་ཤིག །གང་གིས་བསྐྱོས་པ་དེའི་ཉེས་བྱས་སོ། །ཞུས་པ་ལས་ནི་བཙུན་པ་བཅོམ་ལྡན་འདས་ཀྱིས་ཚུལ་ཤིང་མ་སྤོས་རྩོད་པ་ཞི་བར་བྱས་པ་ལས། གང་གི་ཕྱོགས་སུ་ཚུལ་ཤིང་གཅིག་གིས་ལྷག་པར་གྱུར་ན། དེའི་ཕྱོགས་དེས་རྣམ་པར་ཞི་བར་བྱའོ་ཞེས་གསུངས་ན།
བཙུན་པ་གལ་ཏེ་ཕྱོགས་གཉི་ག་ཚུལ་ཤིང་མཉམ་པར་གྱུར་ན་གང་གི་དབང་གིས་རྩོད་པ་རྣམས་ཞི་བར་བགྱི། ཨུ་པཱ་ལིའི་ཕྱོགས་གང་གི་དགེ་སློང་དག་མང་དུ་ཐོས་པའོ། །གཉི་ག་ཡང་གཞུང་ལ་མཚུངས་པར་གྱུར་ན་གང་གི་ཚིག་གཟུང་བར་བགྱི། གང་བྱང་བའི་ཡིན་
ནོ། །གལ་ཏེ་གཉི་ག་བྱང་བར་གྱུར་ན། གང་གི་གཟུང་བར་བགྱི། གལ་ཏེ་ཕལ་ཆེར་བྱུང་བའི་ཤས་ཆེ་བ་ཡིན་ནོ་ཞེས་གསུངས་སོ། །ལུང་བསྒོ་བ་མེད་པའི་ཕྱིར་རྩོད་པ་ལ་རྣམ་པ་གསུམ་གྱིས་ཞི་བར་བྱ་སྟེ། མངོན་སུམ་དང་། དྲན་པ་དང་། མ་མྱོས་པས་འདུལ་བའོ། །
དེ་ལ་མངོན་སུམ་དུ་འདུལ་བའི་མཚན་ཉིད་ནི་སྔར་བཤད་པ་བཞིན་ནོ། །དྲན་པས་འདུལ་བ་ནི་ཇི་ལྟར་གྱད་བུ་ནོར་ལ་ས་ཅན་དང་མཛའ་བོས་སྐུར་བ་བཏབ་པ་ལས་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གྱད་བུ་ནོར་ལ་ཉེས་པ་བྱས་པ་དྲན་ནམ་ཞེས་སྨྲས་ན། དྲན་ཏེ་མ་བྱས་

སོ་ཞེས་སྨྲས་པ་དེ་ཉིད་ཀྱིས་རྩོད་པ་དེ་ཞི་བར་གྱུར་པ་ལྟ་བུ་སྟེ། དེ་དང་འདྲ་བ་གཞན་ཡང་བདེན་པ་མཐོང་བའམ། ངོ་ཚ་ཤེས་པ་དང་ལྡན་པའི་གང་ཟག་ཞིག་ལ་གཞན་གྱིས་ཉེས་པ་བྱས་སོ་ཞེས་གླེང་བའི་མི་རིགས་པ་ལ་གླེངས་པར་གྱུར་ན་དགེ་འདུན་གྱིས་དེ་ལ་ཉེས་པ་འདི་ལྟ་བུ་
བྱས་པ་དྲན་ནམ་ཞེས་གསོལ་པ་དང་། གཉིས་ཀྱི་ལས་ཀྱིས་སྨྲ་བར་བྱས་ཏེ། གལ་ཏེ་བདག་གིས་ཉེས་པ་བྱས་པར་མི་དྲན་ནོ་ཞེས་ཟེར་ན། དེ་གཉིས་ཀྱི་རྩོད་པ་ཞི་བར་བྱ་བ་དང་། ཉེས་པ་གཞན་བྱུང་ན་གཞན་གྱིས་གླེངས་པ་དང་། ཉེས་པ་སླར་ཆོས་བཞིན་དུ་བྱས་པ་ལ་
ཡང་བྱའོ། །མ་མྱོས་པས་འདུལ་བ་ནི་ཇི་ལྟར་དགེ་སློང་བྱེ་མ་ཅན་སྨྱོས་པའི་ཚེ་ཉེས་པ་བྱས་པ་གཞན་གྱིས་གླེངས་པའི་ཕྱིར་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བྱེ་མ་ཅན་ལ་ཁྱོད་མྱོས་པ་སངས་ཏེ་དྲན་ཚུན་ཆད་ཉེས་པ་བྱས་པ་དྲན་ནམ་ཞེས་སྨྲས་པ་ལས། སངས་
ཏེ་དྲན་ཚུན་ཆད་ཉེས་པ་བྱས་པ་མེད་དོ་ཞེས་སྨྲས་པ་དེ་ཉིད་ཀྱིས་རྩོད་པ་དེ་ཞི་བར་གྱུར་པ་ལྟ་བུའོ། །གཞན་ཡང་དེ་དང་འདྲ་བ་ལ་དེ་བཞིན་དུ་ཞི་བར་བྱའོ། །ཆོས་བཞིན་མ་ཡིན་པར་དྲན་པས་འདུལ་བ་བྱིན་པ་གསུམ་སྟེ། ཉེས་པ་ཐ་མ་བྱུང་བ་དང་། སྨྱོས་པའི་ཚེ་ཉེས་པ་བྱུང་བ་
དང་། ཉེས་པ་བྱུང་བ་བསྙོན་ཅིང་ཁས་ལེན་པའོ། །དེ་ལ་དང་པོ་ནི་མ་རུང་བར་བྱ་བའི་རིགས། གཉིས་པ་ནི་མ་མྱོས་པས་འདུལ་བ་སྦྱིན་པའི་རིགས། གསུམ་པ་ནི་དེའི་ངོ་བོ་ཉིད་ཚོལ་དུ་གཞུག་པའི་རིགས་པའི་ཕྱིར་རོ། །ཆོས་བཞིན་མ་ཡིན་པར་མ་མྱོས་པས་
འདུལ་བ་སྦྱིན་པ་ནི་གཅིག་སྟེ། གང་སྨྱོས་པ་མ་ཡིན་པ་ལས་བདག་སྨྱོས་སོ་ཞེས་ཁས་ལེན་པ་སྟེ། དེས་ནི་ཉེས་པ་གང་བྱུང་བ་དེ་ཉིད་བྱེད་དུ་གཞུག་པའི་རིགས་པའི་ཕྱིར་རོ། །ཉེས་པའི་ཕྱིར་རྩོད་པ་ལ་རྣམ་པ་བཞིས་ཞི་བར་བྱ་བ་སྟེ། ཁས་བླངས་པ་དང་། མངོན་སུམ་དང་།
དེའི་ངོ་བོ་ཉིད་ཚོལ་དུ་གཞུག་པ་དང་། རྩྭ་བཀྲམ་པ་ལྟ་བུའི་འདུལ་བས་ཞི་བར་བྱ་སྟེ། དེ་ལ་ཁས་བླངས་པས་འདུལ་བ་ནི་ཇི་ལྟར་ཉེས་པ་བྱུང་བ་ལ་གླེངས་ཀྱང་རུང་། དྲན་པར་བྱས་སམ། དྲན་པར་མ་བྱས་ཀྱང་རུང་སྟེ། དགེ་སློང་མའི་མདུན་དུ་ཉེས་པ་འཆགས་ཤིང་ཚུལ་

བཞིན་བྱེད་པའོ། །དེ་ལ་ཆོས་བཞིན་མ་ཡིན་པར་ཁས་ལེན་པ་རྣམ་པ་བཅུ་སྟེ། ཉེས་པའི་རིགས་ལྔ་བྱུང་བ་ལས་མ་བྱུང་ངོ་ཞེས་ཁས་ལེན་པ་དང་། མ་བྱུང་བ་ལས་བྱུང་ངོ་ཞེས་ཁས་ལེན་པ་སྟེ། གོང་མ་ལྔ་ནི་ཁས་བླངས་ཀྱང་ཚངས་པ་སྦྱིན་པའི་
རིགས་པའི་ཕྱིར་རོ། །སླར་ཟློག་པ་བཅུ་ནི་ཆོས་བཞིན་དུ་བྱས་པའོ། །མངོན་སུམ་དུ་འདུལ་བ་ནི་རི་དགས་སྒྲའི་བུ་ནག་པོ་ལས་བརྩམས་ཏེ། འདི་ནི་མཚན་ཉིད་ཀྱང་སྔར་བཤད་པ་བཞིན་ནོ། །དེའི་ངོ་བོ་ཉིད་ཚོལ་དུ་གཞུག་སྟེ། དེའི་ངོ་བོ་ཉིད་ཚོལ་དུ་གཞུག་པ་ནི་དགེ་
འདུན་གྱི་ནང་དུ་གླེང་བ་ཕོས་གླེངས་པའི་ཚེ། ཉེས་པ་ཁས་བླངས་པ་ལས་སླར་བསྙོན་པ་ལ་སླར་ཁས་ལེན། ཁས་ལེན་པ་ལ་ཡང་བསྙོན་ན། དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བསྙོན་དུ་མི་གནང་བར་ཉེས་པའི་ངོ་བོ་ཉིད་གང་ཡིན་པ་ཚོལ་དུ་གཞུག་སྟེ། དེའི་
ངོ་བོ་ཉིད་གཏན་ལ་མ་ཕབ་ཀྱི་བར་དུ་ཁ་ཏོན་དང་། གསོ་སྦྱིན་ལ་སོགས་པ་ཡང་དགག་ཅིང་ནམ་ཉེས་པའི་ངོ་བོ་ཉིད་རྙེད་དེ་ཁས་བླངས་ན་ཆོས་བཞིན་དུ་བྱེད་དུ་གཞུག་པ་སྟེ། དེ་ཉིད་ཀྱིས་ཞི་བར་བྱའོ། །དེ་ལ་རྩྭ་བཀྲམ་པ་ལྟ་བུ་ནི་དགེ་འདུན་ཕྱོགས་གཉིས་སུ་ཆད་དེ་རྩོད་པ་ལས།
ཕྱོགས་ཀྱི་གཙོ་བོ་གཉིས་ཀྱིས་རང་རང་གི་ཕྱོགས་ལ། བདག་ཅག་དགེ་བའི་ཕྱིར་རབ་ཏུ་བྱུང་ན་རྟག་ཏུ་རྩོད་པ་མི་རིགས་པས། ཕྱོགས་ཕ་རོལ་པོ་ལ་བཟོད་པ་བྱོས་ལ་ཉེས་པ་ཡང་བཤགས་པར་བྱའོ་ཞེས་བསྒོ་སྟེ། ནམ་ཕྱོགས་གཅིག་གི་ཕྱོགས་གཉིས་པོ་ལ་སྤུ་ཞོལ་བར་བྱེད།
འབྱུང་བརྩོལ་ཕྱག་འཚལ་བར་སྟོན་ཅིང་། ཕྱོགས་ཅིག་ཤོས་ཀྱིས་ཀྱང་དེ་བཞིན་བྱ་སྟེ། ཕན་ཚུན་ཉེས་པ་གླེང་བར་བྱ་སྟེ། དཔེར་ན་རྩྭ་བཅད་ན་རད་རོད་མེད་ཅིང་བསྣོལ་མར་ཉལ་བ་བཞིན། ཕན་ཚུན་ཉེས་པ་གླེང་བར་མི་བྱེད་པའི་ཕྱིར་རྩྭ་བཀྲམ་པ་ལྟ་བུས་རྩོད་པ་ཞི་བར་བྱས་པ་ཡིན་
ནོ། །བྱ་བའི་ཕྱིར་རྩོད་པ་ནི་གཅིག་པུ་ངེས་པས་དགེ་འདུན་པས་དངོས་པོ་གང་ལ་རྩོད་པ་དེའི་གཉེན་པོ་ཞི་བར་བྱའོ། །ཇི་ལྟར་ཚངས་པ་དེ་ལྟར་གཅིག་པུ་སྟེ། །ཇི་ལྟར་བརྒྱ་བྱིན་དེ་ལྟར་གཉིས་པོ་ཡིན། །ཇི་ལྟར་རྒྱལ་པོ་དེ་ལྟར་གསུམ་པོ་སྟེ། །དེ་ལས་འདས་པ་དག་ནི་ཅ་ཅོ་པའོ། །

ཞུས་པ་ལས་ཞི་བར་བགྱི་བ་བདུན་མ་མཆིས་ཀྱང་རྩོད་པ་ཞི་བར་འགྱུར་བ་མཆིས་སམ། ཡོད་དེ་གལ་ཏེ་གཉིས་ལས་གཅིག་དུས་ལས་འདས་སམ། ཁྱིམ་པ་ལ་སོགས་པར་གྱུར་ཏམ། ནད་ཡུན་རིངས་སུ་བཏབ་བམ། ཡུལ་གཞན་དུ་སོང་བའོ། །དེ་ལྟ་བུས་ན་གང་གིས་
ཚིགས་སུ་བཅད་པ་གཅིག་ཀླགས་ཀྱང་རུང་དེས་ཆོས་ཀྱི་རྙེད་པ་ཡོངས་སུ་སྤྱད་པར་བྱ་སྟེ་དེ་ལ་ཐེ་ཚོམ་མ་བྱེད་ཅིག་ཅེས་གསུངས་སོ། །གང་གིས་གང་ཞི་བར་བྱ་བ་དང་། སོ་སོའི་མཚན་ཉིད་བསྟན་པས་བསླབ་པའི་དངོས་པོ་ཡོད་པ་ཉིད་ཀྱི་མཚན་ཉིད་བསྟན་པ་ཞེས་བྱ་བ་
བཤད་ཟིན་ཏོ། །ད་ནི་མཇུག་བསྡུ་ཞིང་ཡོངས་སུ་དག་པ་དྲི་བའི་ཕྱིར། རྩོད་པ་བྱུང་བར་གྱུར་པའི་རྣམས། རྩོད་པ་ཞི་བར་བྱ་བའི་ཆོས་འདི་དག་གིས་ཆོས་དང་། འདུལ་བ་དང་། སྟོན་པའི་བསྟན་པ་བཞིན་དུ་དུལ་བར་བྱ་ཞི་བར་བྱ་རྣམ་པར་ཞི་བར་བྱའོ་ཞེས་པ་ནས། དེ་དེ་
བཞིན་དུ་འཛིན་ཏོ་ཞེས་བྱ་བའི་བར་དུ་གསུངས་ཏེ་དེ་ནི་གོ་སླ་བས་མ་བཤད་དོ། །རྩོད་པའི་གཉེན་པོ་རྣམས་བསྟན་པ་ཞེས་བྱ་བ་ལ། གཉིས་སུ་ཕྱེ་བའི་ཐ་མ་ཞི་བར་བྱ་བའི་ཆོས་རྣམས་བསྟན་པ་ཞེས་བྱ་བ་བཤད་ཟིན་ཏོ། །སོ་སོར་ཐར་པའི་བསྡུས་པའི་དོན་རྣམ་པ་བརྒྱད་དུ་
ཕྱེ་བའི་གཉིས་པ་བསླབ་པའི་དངོས་པོ་རྣམས་བསྟན་པ་ཞེས་བྱ་བའི་རྒྱ་ཆེར་བཤད་པ་རྣམས་རྫོགས་སོ།། །།ད་ནི་བསླབ་པའི་དངོས་པོ་རྣམས་ཀྱི་དོན་བསྡུ་སྟེ་བསྟན་པ་ཞེས་བྱ་བ་སྟོན་ཏེ། དེའི་ཕྱིར་འཕགས་མ་དག་ཅེས་བྱ་བ་ནས་དགའ་བ་ལ་རབ་ཏུ་བརྩོན་པར་བྱའོ་
ཞེས་བྱ་བའི་བར་དུ་གསུངས་སོ། །འདི་ལ་ཡང་རྣམ་པ་གསུམ་དུ་དབྱེ་སྟེ། སོ་སོར་ཐར་པའི་ལུས་སུ་བསྡུ་བ་དང་། སྟོན་པའི་བསྟན་པར་བསྡུ་བ་དང་རྗེས་སུ་མཐུན་པའི་ཆོས་ལ་ཡང་བསླབ་པར་གཟུད་པའོ། །དེ་ལ་སོ་སོར་ཐར་པའི་ལུས་སུ་བསྡུ་བ་ཞེས་བྱ་བ་ནི།
འཕགས་མ་དག་བདག་གིས་སོ་སོར་ཐར་པའི་མདོ་བཤད་པའི་གླེང་གཞི་བཤད་ཟིན་ཏོ། །ཕས་ཕམ་པའི་ཆོས་བརྒྱད་དང་། དགེ་འདུན་ལྷག་མའི་ཆོས་ཉི་ཤུ་དང་། སྤང་བའི་ལྟུང་བའི་ཆོས་སུམ་ཅུ་རྩ་གསུམ་དང་། ལྟུང་བ་བརྒྱ་བརྒྱད་ཅུ་དང་། སོ་སོར་བཤགས་པར་བྱ་བའི་

ཆོས་བཅུ་གཅིག་དང་། བསླབ་པའི་ཆོས་མང་པོ་དང་། རྩོད་པ་ཞི་བར་བྱ་བའི་ཆོས་བདུན་པོ་དག་བཤད་ཟིན་ཏོ་ཞེས་བྱ་བ་ཡིན་ཏེ་དགེ་སློང་མས་བསླབ་པར་བྱ་བ་ནི་འདི་རྣམས་ཡིན་པས་འདི་ནི་སོ་སོར་ཐར་པའི་ལུགས་ཡིན་ནོ། །དེ་ལྟ་བས་ན་དགེ་སློང་མས་
གང་གི་གླེང་གཞི་ལས་བྱུང་བ་དེའི་མཚན་མ་ཡོངས་སུ་སྤང་བར་བྱའོ། །དེས་ཀྱང་ཞི་བར་མ་ནུས་ན་དུག་གསུམ་གྱི་གཉེན་པོ་ཡིད་ལ་བྱ་བ་དང་། དཀོན་མཆོག་གསུམ་ལ་མཆོད་ཅིང་བསྙེན་བཀུར་གྱི་ལས་བྱས་པ་དང་། ཟས་བསྙུང་བ་ལ་སོགས་པས་དབྲལ་བར་བྱ་སྟེ།
དེས་ཀྱང་མ་ནུས་ན་ཚུལ་ཁྲིམས་རྣམ་པར་མ་དག་བཞིན་དད་པས་བྱིན་པ་ཡོངས་སུ་སྤྱད་པའི་མི་རིགས་ཀྱི་བསླབ་པ་དབུལ་བར་བྱའོ། །སྟོན་པའི་བསྟན་པར་བསྡུ་བ་ཞེས་བྱ་བ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་མདོར་
གཏོགས་ཤིང་མདོར་འདུས་པ་ནི་འདི་སྙེད་དོ་ཞེས་བྱ་བ་ཡིན་ཏེ། དེའི་མདོར་གཏོགས་པ་ཞེས་བྱ་བ་ནི་ཚིག་ཏུ་གཏོགས་པའོ། །མདོར་འདུས་ཞེས་བྱ་བ་ནི་དོན་འདིར་འདུས་པའོ། །འདི་སྙེད་དོ་ཞེས་བྱ་བ་ནི་གོང་དུ་བསྟན་པའི་རྣམས་སོ། །གཞན་ནི་སྔར་བཤད་པ་དང་མཐུན་
པས་མ་བཤད་དོ།། །།རྗེས་སུ་མཐུན་པའི་ཆོས་ལྔ་ལ་ཡང་བསླབ་པར་གཟུད་པ་ཞེས་བྱ་བ་ནི། གང་གཞན་ནས་འབྱུང་བ་ཆོས་ཀྱི་རྗེས་སུ་མཐུན་པའི་ཆོས་དེ་ལ་ཡང་ཁྱེད་རྣམས་འདུན་པ་དང་། མཐུན་པ་དང་། དགའ་བ་དང་། མི་རྩོད་པར་སེམས་ཀུན་དུ་བསྲུང་
བ་དང་། དྲན་པ་དང་། དགའ་བ་ལ་རབ་ཏུ་བརྩོན་པར་བྱའོ་ཞེས་བྱ་བ་ཡིན་ཏེ། དེ་ལ་གང་གཞན་ནས་འབྱུང་བ་ཞེས་བྱ་བ་ནི་འདུལ་བ་དངོས་པོ་ལ་སོགས་པའི་གཞུང་ལས་འབྱུང་བའོ། །ཆོས་ཀྱི་རྗེས་སུ་མཐུན་པའི་ཆོས་དེ་ལ་ཡང་ཞེས་བྱ་བ་ནི་མྱ་ངན་ལས་འདས་པའི་
ཆོས་དང་མཐུན་པ་དེ་དག་ལ་ཡང་ནན་ཏན་དུ་བྱའོ། །ཁྱེད་རྣམས་ཞེས་བྱ་བ་ནི་ཉན་ཐོས་ཀྱི་དགེ་སློང་མ་རྣམས་སོ། །འདུམ་པ་ཞེས་བྱ་བ་ནི་ཆོ་ག་དང་མཚན་མ་མཐུན་པ་ལ་སོགས་པ་ནི་གོང་དུ་སྨོས་པ་དྲུག་པོ་ལས་འབྱུང་བ་བཞིན་དུ་སྒྲུབས་ཤིག་པའོ། །མཐུན་པ་ཞེས་བྱ་བ་ནི་

སྔར་བསྟན་པ་བཞི་སྟེ་ཚུལ་གཅིག་ཏུ་གྱུར་པའོ། །དགའ་བ་ཞེས་བྱ་བ་ནི་དགེ་བའི་ཕྱོགས་མངོན་པར་འཕེལ་བ་ལ་དགའ་བའོ། །མི་རྩོད་པ་ནི་ཕན་ཚུན་ལྟ་བ་དང་ཟང་ཟིང་འདོད་པ་མི་མཐུན་པའི་རྩོད་པ་སྤངས་པའོ། །སེམས་ཀུན་དུ་བསྲུངས་པས་ནི་འདོད་པའི་ཡོན་ཏན་ལྔ་སྟེ།
དབང་པོ་ལྔའི་དམིགས་པ་ལ་སེམས་མི་གཏོང་བའོ། །ཡང་ན་གཅིག་གི་ཡིད་གཅིག་གིས་བསྲུང་བའོ། །དྲན་པ་ནི་བྱ་བའི་རིགས་པ་དང་། མི་རིགས་པའི་རྣམས་ཤེས་ཤིང་རྗེས་སུ་བསྲུང་བའོ། །དགའ་བ་ལ་རབ་ཏུ་བརྩོན་པར་བྱའོ་ཞེས་བྱ་བ་ནི་ཁ་ན་མ་ཐོ་བ་སྤོང་བ་ལ་
ནན་ཏན་རྒྱུན་མི་འཆད་པར་གྱིས་ཤིག་ཅེས་བྱ་བའི་ཐ་ཚིག་གོ། །བཅོམ་ལྡན་འདས་ཀྱིས་ཐོག་མ་ནས་གནང་བ་ཡང་མ་ལགས་སྤངས་པ་ཡང་མ་ལགས་པ་དེ་ལ་ཇི་ལྟ་བུར་བསྒྲུབ་པར་བགྱི། ཇི་ལྟར་འདུལ་བ་མདོ་ཕྲ་མོ་ལས་འབྱུང་བ་འདུལ་བའི་མདོ་བསྡུས་པ་དྲན་པར་བྱ་སྟེ།
དགེ་སློང་མ་རྣམས་ངས་ཐོག་མ་ནས་གནང་བ་ཡང་མེད་སྤངས་པ་ཡང་མེད་པ་དེ་གལ་ཏེ་རུང་བ་དང་མཐུན་ལ་མི་རུང་བ་དང་མི་མཐུན་ན་རུང་བའོ་སྙམ་དུ་སེམས་ལ་སྤྱད་པར་བྱའོ། །མི་རུང་བ་དང་མཐུན་ལ་རུང་བ་དང་མི་མཐུན་ན་ནི་མི་རུང་བའོ་སྙམ་དུ་སེམས་ལ་སྤང་བར་བྱའོ་ཞེས་གསུངས་
སོ། །སོ་སོར་ཐར་པའི་བསྡུས་པའི་དོན་རྣམ་པ་བརྒྱད་དུ་ཕྱེ་བའི་གསུམ་པ་བསླབ་པའི་དངོས་པོ་རྣམས་ཀྱི་དོན་བསྡུ་བ་ཞེས་བྱ་བ་བཤད་ཟིན་ཏོ།། །།སྔོན་གྱི་ཚུལ་བསྟན་པ་ཞེས་བྱ་བ་འདིར་སྟོན་ཏེ། འདི་ཡང་རྣམ་པ་གཉིས་སུ་དབྱེ་སྟེ། སངས་རྒྱས་བདུན་
གྱི་འདུལ་བ་བསྟན་པ་དང་། དེ་དག་སྟོན་པ་གང་དག་གི་གསུང་རབ་ཡིན་པའི་ཁུངས་བསྟན་པའོ། །དེ་ལ་སངས་རྒྱས་བདུན་གྱི་འདུལ་བ་བསྟན་པ་ཞེས་བྱ་བ་ནི། བཟོད་པ་དཀའ་ཐུབ་དམ་པ་བཟོད་པ་ནི། །ཞེས་བྱ་བ་ནས། དྲང་སྲོང་གསུངས་པའི་ལམ་ནི་ཐོབ་
པར་འགྱུར། །ཞེས་བྱ་བའི་བར་དུ་གང་གསུངས་སོ། །བསྐལ་པ་བཟང་པོ་འདིའི་སྔ་རོལ་བསྐལ་པ་དགུ་བཅུ་རྩ་གཅིག་གི་སྔ་རོལ་ན་སྐྱེ་དགུ་རྣམས་ཚེ་ལོ་བརྒྱད་ཁྲི་ཐུབ་པའི་ཚེ་སངས་རྒྱས་རྣམ་པར་གཟིགས་ཞེས་བྱ་བ་འཇིག་རྟེན་དུ་བྱུང་སྟེ། སྟོན་པ་དེའི་རིང་ལ་ཉན་ཐོས་རྣམས་མུ་

སྟེགས་ཅན་གྱི་དཀའ་ཐུབ་སྤྱོད་དེ། དཀའ་ཐུབ་ལ་ནན་ཏན་བྱེད་ཅིང་དེའི་འབྲས་བུ་དང་དཀའ་ཐུབ་སྟོན་པ་ལ་མོས་ཏེ། ལམ་རྙིང་པ་རྣམས་ནི་དཀའ་ཐུབ་ཀྱིས་སྦྱངས། གསར་པ་ནི་མ་བྱས་ཏེ་བཀག་པས་ཆུ་ལོན་བཞིན་ཏེ་དེ་ལྟར་ན་ཚེ་ཕྱི་མར་ཟག་པ་མེད། ཟག་
པ་མེད་པས་ན་སྡུག་བསྔལ་ཟད་ཅིང་མྱ་ངན་ལས་འདའོ་ཞེས་དེ་ལྟ་བུར་སྟོན་པ་ནི་ཡང་དག་པའི་དགེ་སྦྱོང་ཡིན་ནོ་ཞེས་གསུངས་པ་ལ་མོས་ཤིང་གཞན་ལ་ཡང་སྟོན་པར་གྱུར་ཏེ། དཀའ་ཐུབ་ཀྱིས་ཉོན་མོངས་པ་སྤང་བར་མི་ནུས་པས་དེའི་གཉེན་པོར། །བཟོད་པ་དཀའ་ཐུབ་དམ་པ་བཟོད་པ་ནི། །
མྱ་ངན་འདས་པ་མཆོག་ཅེས་སངས་རྒྱས་གསུངས། །རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་གསུངས་སོ། །འདི་ལ་ཡང་རྣམ་པ་གསུམ་དུ་དབྱེ་སྟེ། དཀའ་ཐུབ་ལ་ནན་ཏན་བྱེད་པའི་གཉེན་པོ་དང་། །དེའི་འབྲས་བུ་ལ་
མོས་པའི་གཉེན་པོ་དང་། གཞན་ལ་དཀའ་ཐུབ་སྟོན་པར་མོས་པའི་གཉེན་པོ་བསྟན་པའོ། །དེ་ལ་དཀའ་ཐུབ་ལ་ནན་ཏན་བྱེད་པའི་གཉེན་པོ་བསྟན་པ་ནི། །བཟོད་པ་དཀའ་ཐུབ་དམ་པ་བཟོད་པ་ནི། །ཞེས་བྱ་བ་སྟེ། མུ་སྟེགས་ཅན་ལྟ་བུ་ལུས་ཉོན་མོངས་ཤིང་གདུང་བར་བྱེད་པ་ནི་དཀའ་
ཐུབ་ཀྱི་དམ་པ་མ་ཡིན་གྱི། སེམས་གདུང་བར་བྱ་བ་དེ་གཉིས་ཤིན་ཏུ་དཀའ་བའི་ཕྱིར་དཀའ་ཐུབ་ཀྱི་དམ་པ་ནི་སེམས་ཀྱིས་བཟོད་པ་སྟེ། ཆོས་ལ་རྟོགས་པའི་བཟོད་པའོ། །དཀའ་ཐུབ་དེའི་འབྲས་བུ་ལ་མོས་པའི་གཉེན་པོ་བསྟན་པ་ནི། །མྱ་ངན་འདས་པ་མཆོག་ཅེས་སངས་རྒྱས་
གསུངས། །ཞེས་བྱ་བ་ཡིན་ཏེ། ལུས་ལ་འཚེ་བའི་དཀའ་ཐུབ་ཀྱིས་མྱ་ངན་ལས་མི་འདའ་བའི་ཆོས་ལ་རྟོགས་པར་བཟོད་པ་དེའི་དོན་ནི་མྱ་ངན་ལས་འདས་པ་ཞེས་བྱ་བ་སྟེ། དེ་ལ་བརྟེན་ནས་མྱ་ངན་ལས་འདའ་བའི་ཕྱིར་རོ། །དེ་ལྟ་བས་ན་ཆོས་ལ་རྟོགས་པའི་ཡེ་ཤེས་ཀྱིས་མྱ་ངན་ལས་
འདའ་བ་ཐོབ་པར་འགྱུར་གྱི། །དཀའ་ཐུབ་ཀྱིས་ནི་མ་ཡིན་ནོ་ཞེས་བསྟན་པར་འགྱུར་རོ། །གཞན་ལ་དཀའ་ཐུབ་སྟོན་པར་མོས་པའི་གཉེན་པོ་བསྟན་པ་ནི། །རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་བྱའོ། །དེ་ལ་རབ་ཏུ་

བྱུང་བ་ཞེས་བྱ་བ་ནི་ཁྱིམ་ནས་ཁྱིམ་མེད་པར་རབ་ཏུ་བྱུང་བའོ། །གཞན་ལ་གནོད་པ་ནི་ལུས་ཉོན་མོངས་ཤིང་དོན་མེད་པའི་དཀའ་ཐུབ་ལ་གཞན་དག་འཛུད་ཅིང་ཉོན་མོངས་པའི་ཕྱིར་གཞན་ལ་གནོད་པ་ཞེས་བྱའོ། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་བྱ་བ་ནི་ལོག་པར་
སྦྱོར་བ་ལ་གཞན་དག་འཛུད་ཅིང་ཉོན་མོངས་པར་བྱེད་པ་ཉིད་ཡང་དག་པའི་དགེ་སྦྱོང་མ་ཡིན་པའི་ཕྱིར་རོ། །དགེ་སྦྱོང་ཞེས་བྱ་བ་ནི་སྡིག་པ་ཞི་བར་བྱ་བ་ལ་སྤྱོད་ཅིང་ལེགས་པར་སྦྱོང་བས་ན་དགེ་སྦྱོང་ཞེས་བྱ་སྟེ། དངོས་སུ་ན་འཕགས་པ་རབ་ཏུ་བྱུང་བ་རྣམས་དང་། དེའི་རྗེས་སུ་རབ་
ཏུ་བྱུང་བ་རྣམས་ལ་བྱའོ། །དེ་བས་ན་ཉོན་མོངས་པ་དང་བདེ་བར་སྤྱོད་པའི་མཐའ་གཉིས་སྤངས་པ་ཆོས་ལ་རྟོག་པའི་ཡེ་ཤེས་ཀྱིས་མྱ་ངན་ལས་འདའི་དཀའ་ཐུབ་ཀྱིས་ནི་མ་ཡིན་ཞེས་གསུངས་སོ། །བསྐལ་པ་དགུ་བཅུ་རྩ་གཅིག་གི་སྔ་རོལ་སྐྱེ་དགུ་རྣམས་ཚེ་ལོ་བདུན་ཁྲི་ཐུབ་
པ་ན་སངས་རྒྱས་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་སྟེ། སྟོན་པ་དེའི་རིང་ལ་ཉན་ཐོས་ཕལ་ཆེར་མཐོ་རིས་སུ་སྨོན་ལམ་འདེབས་ཤིང་ཚངས་པར་སྤྱོད་པ་ལ་མོས་པར་གྱུར་ཏེ། མཐོ་རིས་ཉིད་ངན་འགྲོ་ལོག་པར་ལྟུང་བ་ཡིན་པས་དེ་ལས་བཟློག་པར་བྱ་བའི་གཉེན་པོར། མིག་
དང་ལྡན་པས་གཡང་ས་བཞིན། །ཐོབ་པར་བྱ་བ་ཡོད་པས་ན། །མཁས་པས་འཚོ་བར་འཇིག་རྟེན་འདིར། །སྡིག་པ་དག་ནི་ཡོངས་སུ་སྤོང་། །ཞེས་བྱ་བ་གསུངས་ཏེ། ཇི་ལྟར་སྐྱེས་བུ་མིག་དང་ལྡན་པས་གཡང་ས་དང་། །ལམ་མི་བདེ་བ་སྤོང་བར་བྱེད་པ་དེ་བཞིན་དུ། །གང་
དག་ཤེས་རབ་ཀྱི་མིག་དང་ལྡན་པས་ཀྱང་མཐོ་རིས་གཡང་ས་ཡ་ང་བ་དང་འདྲ་བ་སྤོང་ཞིང་ཐོབ་པར་བྱ་བའི་གནས་མྱ་ངན་ལས་འདའ་བའི་གྲོང་ཁྱེར་དུ་འཇུག་པར་བྱའོ་ཞེས་བསྟན་པའི་ཕྱིར། མིག་དང་ལྡན་པས་ཡང་བཞིན། །ཐོབ་པར་བྱ་བ་ཡོད་པས་ན། །ཞེས་བྱ་བ་གསུངས་སོ། །
དེ་ལ་ཤེས་རབ་ནི་མིག་ལྟ་བུའོ། །ལྡན་པ་ཞེས་བྱ་བ་ནི་ཐོབ་པའོ། །བཞིན་ཞེས་བྱ་བའི་སྒྲ་ནི་རྣམ་པ་གཉིས་སུ་འདྲེན་ཏེ། ཤེས་རབ་ནི་མིག་དང་འདྲ་བས་མིག་ཅན་བཞིན་ནོ་ཞེས་ཀྱང་འདྲེན། ཡང་གཅིག་ཏུ་ན་མཐོ་རིས་གཡང་ས་ཡ་ང་བ་བཞིན་ནོ་ཞེས་ཀྱང་འདྲེན་པའི་ཕྱིར་རོ། །

མཁས་པ་ཞེས་བྱ་བ་ནི་ཐབས་ལ་མཁས་པའོ། །འཚོ་བ་ནི་ཚེ་དང་བཅས་པའོ། །འཇིག་རྟེན་ནི་སྔར་བཤད་པ་བཞིན་ནོ། །འདིར་ཞེས་བྱ་བ་ནི་ཚེ་འདི་ཉིད་ལའོ། །སྡིག་པ་དག་ནི་ཡོངས་སུ་སྤོང་། །ཞེས་བྱ་བ་ནི་མཐོ་རིས་སུ་སྨོན་པ་ལས་
སླར་ཟློག་སྟེ། སྡིག་པའི་སྐྱེ་མཆེད་མཐོ་རིས་སུ་མོས་པ་དེ་སྡིག་པ་སྤངས་པ་མ་ཡིན་པའི་ཕྱིར་རོ། །དེ་ལྟ་བས་ན་ཡང་དག་པའི་ཤེས་རབ་ཀྱི་མིག་དང་ལྡན་པས་གཡང་ས་དང་འདྲ་བའི་མཐོ་རིས་དེ་ཐབས་ལ་མཁས་པས་སྤང་བར་བྱའོ་ཞེས་གསུངས་སོ།། །།བསྐལ་པ་
སུམ་ཅུ་རྩ་གཅིག་འདས་པའི་སྔ་རོལ་སྐྱེ་དགུ་རྣམས་ཚེ་ལོ་དྲུག་ཁྲི་ཐུབ་པ་ན། སངས་རྒྱས་ཐམས་ཅད་སྐྱོབ་ཅེས་བྱ་བ་འཇིག་རྟེན་དུ་བྱུང་སྟེ། སྟོན་པ་དེའི་རིང་ལ་ཉན་ཐོས་རྣམས་ཚུལ་ཁྲིམས་ཙམ་གྱིས་ཆོག་པར་འཛིན་ཅིང་། གཞན་དག་ངན་དུ་སྨྲ་བར་ཞུགས་པ་རྣམས་ལ་ངག་གིས་
སྐུར་པ་འདེབས་ཤིང་ཡིད་ཀྱིས་གནོད་པར་བྱེད་དེ། བདག་ཉིད་ཚུལ་ཁྲིམས་ཙམ་གྱིས་ཆོག་པར་འཛིན་པས་ཀྱང་དགེ་སྦྱོང་གི་འབྲས་བུ་ཐོབ་པར་མི་འགྱུར་ལ། གཞན་ལ་ངན་དུ་སྨྲ་ཞིང་གནོད་པར་བྱེད་པ་ཡང་སྐྱེས་བུ་དམ་པའི་ཚུལ་མ་ཡིན་པས་དེ་དག་ལས་བཟློག་པའི་གཉེན་པོར། སྐུར་པ་
མི་གདབ་གནོད་མི་བྱ། །ཞེས་བྱ་བ་ལ་སོགས་པ་གསུངས་སོ། །འདི་ལ་ཡང་རྣམ་པ་གསུམ་དུ་དབྱེ་སྟེ། ངག་གིས་སྐུར་པ་འདེབས་པའི་གཉེན་པོ་དང་། ཡིད་ཀྱིས་གནོད་པར་བྱེད་པའི་གཉེན་པོ་དང་། ཚུལ་ཁྲིམས་ཙམ་གྱིས་དགེ་སྦྱོང་གི་འབྲས་བུ་ཐོབ་པར་འཛིན་པའི་གཉེན་པོ་
བསྟན་པའོ། །དེ་ལ་ངག་གིས་སྐུར་པ་འདེབས་པའི་གཉེན་པོ་བསྟན་པ་ཞེས་བྱ་བ་ནི། སྐུར་པ་མི་གདབ་ཅེས་བྱ་བ་ཡིན་ཏེ། མུ་སྟེགས་ཅན་ལ་སོགས་པ་དང་ཚུལ་ངན་པ་མི་དགེ་བ་སྤྱོད་པ་རྣམས་ལ་ཚུལ་ཁྲིམས་ལ་མི་གནས་ཤིང་། སྡིག་པ་ཅན་ནོ་ཞེས་ངན་དུ་བརྗོད་པར་མི་བྱའོ། །
ཡིད་ཀྱིས་གནོད་པར་བྱེད་པའི་གཉེན་པོ་བསྟན་པ་ཞེས་བྱ་བ་ནི། གནོད་མི་བྱ་ཞེས་བྱ་བ་ཡིན་ཏེ། གཞན་དང་ཚུལ་ངན་པ་ཅན་རྣམས་ལ་ཡིད་ཀྱིས་གནོད་པར་མི་བསམ་པའོ། །ཚུལ་ཁྲིམས་ཙམ་གྱིས་དགེ་སྦྱོང་གི་འབྲས་བུ་ཐོབ་པར་འཛིན་པའི་གཉེན་པོ་བསྟན་པ་ཞེས་བྱ་བ་ནི།

སོ་སོར་ཐར་པའང་བསྡོམ་པར་བྱ། ཟས་ཀྱི་ཚོད་ཀྱང་རིག་པར་བྱ། །བས་མཐའི་གནས་སུ་གནས་པར་བྱ། །ལྷག་པའི་སེམས་ལ་ཡང་དག་འཇུག །འདི་ནི་སངས་རྒྱས་བསྟན་པའོ། །ཞེས་བྱ་བ་ཡིན་ཏེ། དེ་ལ་སོ་སོར་ཐར་པ་ཞེས་བྱ་བ་ནི་མྱ་ངན་ལས་འདས་པའི་ཚུལ་
ཁྲིམས་ཏེ། །ལྟུང་བ་སྡེ་ལྔའི་ཉེས་པ་ལས་བཟློག་པའོ། །བསྡམ་པར་བྱ་བ་ནི་ལུས་དང་ངག་དང་ཡིད་ཀྱི་ཉེས་པ་རྣམས་སོ། །ཟས་ཀྱི་ཚོད་ཀྱང་རིག་པར་བྱ། །ཞེས་བྱ་བ་ནི་འདོད་པ་ལ་བདེ་བར་སྤྱོད་པའི་མཐའ་སྤངས་པ་སྟེ། སོ་སོར་ཐར་པ་བསྡམ་པའི་ཐོག་མར་འགྲོ་
བ་ནི་ཟས་ཀྱི་ཚོད་རིག་པར་བྱ་བ་ཡིན་ཏེ། དེ་ལ་ཟས་ཀྱི་ཚོད་རིག་པར་བྱ་བ་ཇི་ལྟ་བུ་ཞེ་ན། དབང་པོ་རྣམས་བསྡམས་ནས། སོ་སོར་བརྟགས་ཤིང་ཟས་ཟ་བར་བྱེད་ལ། རྣམ་པར་རྟོག་པའི་ཕྱིར་མ་ཡིན། རྒྱགས་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན་གྱི་
ལུས་འདི་གནས་པར་བྱ་བ་དང་། འཚོ་བར་བྱ་བ་དང་། བཀྲེས་པ་བསལ་བ་དང་། ཚངས་པར་སྤྱད་པ་ལ་ཕན་པར་བྱ་བ་དང་། ཚོར་བ་རྙིང་པ་རྣམས་སྤང་བར་བྱ་བ་དང་། གསར་རྣམས་མི་སྐྱེ་བར་བྱ་བ་དང་། བདག་འཚོ་ཞིང་སྟོབས་དང་ལྡན་པ་དང་། ཁ་ན་མ་ཐོ་བ་
མེད་པ་དང་། བདེ་བ་ལ་རེག་པར་གནས་པར་ཡང་འགྱུར་རོ་སྙམ་དུ་སེམས་པ་ཡིན་ཏེ་དེ་ནི་ཟས་ཀྱི་ཚོད་རིག་པ་ཉིད་ཅེས་བྱའོ། །བས་མཐའི་གནས་སུ་གནས་པར་བྱ། །ཞེས་བྱ་བ་ནི་བདག་ཉིད་ཉོན་མོངས་པར་སྦྱོར་བའི་མཐའ་སྤངས་པ་སྟེ། དེ་ལྟར་ཟས་ཀྱི་ཚོད་
རིག་པར་བྱས་ནས་ཀྱང་། འདུ་འཛིའི་ནང་དུ་གནས་པར་བྱ་བ་མ་ཡིན་གྱི་གྲོང་གི་འདུ་འཛི་ལས་རིང་དུ་གྱུར་པ་བས་མཐའི་གནས་སུ་སེམས་དབེན་པར་བྱ་དགོས་པའི་ཕྱིར་ཏེ། དེ་ལ་བས་མཐའི་གནས་སུ་གནས་པར་བྱ་བ་ཇི་ལྟ་བུ་ཞེ་ན། གནས་མལ་དབེན་པ་
དགོན་པ་དང་། ཤིང་དྲུང་དང་། ཁང་སྟོང་དང་། རི་ཁྲོད་དང་། རི་ཕུག་དང་། རྩྭ་གསེབ་དང་། བླ་གབ་མེད་པ་དང་། དུར་ཁྲོད་དང་། ནགས་འདབ་དང་། བས་མཐའི་གནས་མལ་གང་ཡང་རུང་བ་དག་ཏུ་གནས་པར་བྱེད་ཅིང་། སྒྲིབ་པ་ལྔ་

པོ་འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་དག་ལས་སེམས་རྣམ་པར་སྦྱོང་ཞིང་དེ་སྒྲིབ་པ་དེ་དག་ལས་སེམས་རྣམ་པར་སྦྱངས་ནས་སྒྲིབ་པ་མེད་པས་ཏིང་ངེ་འཛིན་གྱི་ཉམས་
བདེ་བ་ལ་ཉེ་བར་གནས་པ་དག་ཡིན་ནོ། །དེ་ལ། བས་མཐའི་གནས་སུ་གནས་པར་བྱ། །ཞེས་སྨོས་པ་ནི་ས་འཛིན་ཙམ་དུ་ཟད་དེ། གོང་དུ་བསྟན་པའི་གནས་མལ་དབེན་པ་གང་ཡང་རུང་བའོ། །ལྷག་པའི་སེམས་ལ་ཡང་དག་འཇུག །ཅེས་བྱ་བ་ལ། ལྷག་པའི་
སེམས་ནི་སོ་སོའི་སྐྱེ་བོའི་སྲིད་པ་དང་བཅས་པའི་སེམས་ལས་ལྷག་པར་གྱུར་པ་སྟེ། ཟག་པ་མེད་པའི་ཏིང་ངེ་འཛིན་ལ་བྱའོ། །ཡང་དག་འཇུག་ཅེས་བྱ་བ་ནི་དེ་སྦྱོར་བར་བྱེད་པའོ། །དེ་ལྟ་བས་ན་མྱ་ངན་ལས་འདའ་བའི་ཚུལ་ཁྲིམས་ལ་གནས་ཏེ་འདོད་པ་ལས་བདེ་བར་སྤྱོད་
པ་དང་། བདག་ཉིད་ཉོན་མོངས་པར་སྦྱོར་བའི་མཐའ་གཉིས་སྤངས་ལ་ཞི་བའི་གནས་སུ་ཞུགས་ཏེ། ཞི་གནས་ལ་བརྟེན་ན་ཐར་པ་ཐོབ་པར་འགྱུར་རོ་ཞེས་བསྟན་པར་འགྱུར་རོ། །འདི་ནི་སངས་རྒྱས་བསྟན་པའོ། །ཞེས་བྱ་བ་ནི་འདི་སྐད་དུ་སྟོན་པ་ཐམས་ཅད་སྐྱོབ་ཀྱིས་
གསུངས་སོ།། །།བསྐལ་པ་བཟང་པོ་འདི་ཉིད་ལ་སངས་རྒྱས་སྟོང་འཇིག་རྟེན་དུ་འབྱུང་བ་ལ། དང་པོ་ནི་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ལོ། །ཐ་མ་ནི་དེ་བཞིན་གཤེགས་པ་མོས་པ་ཞེས་བྱ་བ་འབྱུང་ངོ་། །དེ་ལ་དེ་བཞིན་གཤེགས་པ་
ལོག་པར་དད་སེལ་དང་། གསེར་ཐུབ་དང་། འོད་སྲུངས་དང་། ཤཱཀྱ་ཐུབ་པ་དང་བཞི་ནི་འདས་ཟིན་ཏེ། ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ནི་སྐྱེ་དགུ་རྣམས་ཚེ་ལོ་དྲུག་ཁྲི་ཐུབ་པ་ན་འཇིག་རྟེན་དུ་བྱུང་སྟེ། སྟོན་པ་དེའི་རིང་ལ་ཉན་ཐོས་རྣམས་
ཕལ་ཆེར་རྙེད་པ་དང་བཀུར་སྟི་ལ་ལྷག་པར་ཆགས་པར་གྱུར་པས་དེ་ལས་བཟློག་པའི་གཉེན་པོར། ཇི་ལྟར་བུང་བ་མེ་ཏོག་བཞིན། །ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །ཞེས་གསུངས་སོ། །འདིའི་

དོན་ནི་དཔེ་ལས་རིག་པར་བྱ་སྟེ། ཇི་ལྟར་བུང་བ་མེ་ཏོག་གི་ཁ་དོག་དང་དྲི་ལ་མི་གནོད་པར་ཁུ་བ་ཙམ་བླངས་ནས་དེ་ཉིད་དུ་ཆགས་ཤིང་མི་གནས་པར་སྔོན་གྱི་གནས་སུ་འཕུར་ཞིང་འགྲོ་བ་དེ་བཞིན་དུ། །རབ་ཏུ་བྱུང་བ་རྣམས་ཀྱིས་ཀྱང་སྒོ་གསུམ་བསྒོམ་ཞིང་གྲོང་གི་ལོངས་སྤྱོད་ལ་མི་གནོད་
པར་བསོད་སྙོམས་ཙམ་བླངས་ཏེ། རྙེད་པ་དང་། བཀུར་སྟི་ལ་མི་ཆགས་པར་རང་གི་གནས་སུ་འགྲོ་བར་བྱའོ་ཞེས་པའི་ཐ་ཚིག་གོ། །དེ་ལ་བུང་བ་ཞེས་བྱ་བ་ནི་རབ་ཏུ་བྱུང་བ་རྣམས་སོ། །མེ་ཏོག་ནི་གྲོང་ངོ་། །ཁ་དོག་དྲི་ལ་མི་གནོད་པ་ནི་ཚུལ་ཁྲིམས་ཀྱི་ཁ་དོག་དང་།
ཏིང་ངེ་འཛིན་གྱི་དྲི་ལ་གནོད་པར་མི་བྱ་སྟེ། ཚིག་འདི་གཉིས་ཀྱིས་ནི་རྙེད་པ་དང་། བཀུར་སྟི་ལ་ཆགས་པ་ལས་བཟློག་པར་བསྟན་ཏེ། །དེ་ཡང་རྙེད་པ་ལ་ཆགས་པས་ནི་ཚུལ་ཁྲིམས་ཀྱི་ཁ་དོག་ལ་གནོད་པར་འགྱུར་བ་དང་། བཀུར་སྟི་ལ་ཆགས་པ་ནི་ཏིང་ངེ་འཛིན་གྱི་
དྲི་ལ་གནོད་པར་འགྱུར་བའི་ཕྱིར་རོ། །དེ་བས་རྙེད་པ་ནི་ཁ་དོག་གི་སྒྲར་བསྟན་ལ་བཀུར་སྟི་ནི་དྲིའི་སྒྲར་བསྟན་ཏེ། ཁུ་བ་གཞིབས་ཞེས་བྱ་བ་ནི་གྲོང་གི་ལོངས་སྤྱོད་ལ་མི་གནོད་པར་བསོད་སྙོམས་ཙམ་བླང་བའོ། །འཕུར་བ་ནི་དེ་ཉིད་དུ་མི་གནས་པའོ། །ཐུབ་པ་ཞེས་བྱ་བ་ནི་
ལུས་དང་། ངག་དང་། ཡིད་གསུམ་ཐུབ་པའོ། །གྲོང་དུ་རྒྱུ་ཞེས་བྱ་བ་ནི་ཡོན་ཏན་གོང་མ་རྣམས་དང་ལྡན་པས་གྲོང་གི་བསོད་སྙོམས་བླངས་ཏེ། །དེ་ཉིད་དུ་མི་གནས་པར་གནས་མལ་དབེན་པ་དག་ཏུ་བག་ཡོད་པར་སྒྲུབས་ཤིག་པའོ། །བསྐལ་པ་བཟང་པོ་འདི་གཉིས་
ལ་སྐྱེ་དགུ་རྣམས་ཚེ་ལོ་སུམ་ཁྲི་ཐུབ་པ་ནས། སངས་རྒྱས་གསེར་ཐུབ་ཅེས་བྱ་བ་འཇིག་རྟེན་དུ་བྱུང་སྟེ། སྟོན་པ་དེའི་སྐུའི་རིང་ལ་ཉན་ཐོས་རྣམས་ཕལ་ཆེར་སྐྱེས་བུ་དམ་པའི་ཆོས་མ་ཡིན་པ་ལ་ཞུགས་པར་གྱུར་ཏེ། དེ་དག་བདག་ཉིད་ལ་ནི་སྟོད། གཞན་ལ་ནི་སྨོད་
ཅིང་ཐོས་པའི་ལོངས་སྤྱོད་པ་དང་། ཚུལ་ཁྲིམས་ཀྱི་ལོངས་སྤྱོད་ལ་ཞུགས་ཏེ་གཞན་དག་ལ་མི་མཐུན་པར་བརྗོད་ཅིང་བྱ་བ་དང་མི་བྱ་བར་སྦྱོར་བའི་ཉེས་པ་ལ་རྟོག་པ་ན་དེའི་གཉེན་པོར། བདག་གི་རིགས་དང་མི་རིགས་ལ། །ཞེས་བྱ་བ་ལ་སོགས་པ་གསུངས་སོ། །འདི་ལ་

ཡང་རྣམ་པ་གཉིས་སུ་དབྱེ་སྟེ། ཐོས་པའི་ལོངས་སྤྱོད་ཀྱི་རྗེས་ལ་གཞན་དག་ལ་མི་མཐུན་པར་བརྗོད་པའི་གཉེན་པོ་བསྟན་པ་དང་། ཚུལ་ཁྲིམས་ཀྱི་ལོངས་སྤྱོད་ལ་ཞུགས་ཏེ་དེས་གཞན་དག་ལ་བྱ་བ་དང་། མི་བྱ་བར་སྦྱོར་བའི་ཉེས་པ་ལ་
རྟོག་པའི་གཉེན་པོ་བསྟན་པའོ། །དེ་ལ་ཐོས་པའི་ལོངས་སྤྱོད་ཀྱི་རྗེས་ལ་གཞན་དག་ལ་མི་མཐུན་པར་བརྗོད་པའི་གཉེན་པོ་བསྟན་པ་ཞེས་བྱ་བ་ནི། བདག་གི་རིགས་དང་མི་རིགས་ལ། བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དང་ཞེས་བྱ་བ་ཡིན་ཏེ། །
བདག་གི་རིགས་དང་མི་རིགས་ལ། །བརྟག་པར་བྱ་སྟེ་ཞེས་བྱ་བ་ནི་བདག་གིས་ལེགས་པར་སྤྱད་པ་དང་ཉེས་པར་སྤྱད་པ་ལ་བརྟག་པར་བྱའོ། །གཞན་རྣམས་ཀྱི། མི་མཐུན་པ་དང་ཞེས་བྱ་བ་ནི་བདག་གིས་ཐོས་པ་དང་ཤེས་པའི་ལོངས་སྤྱོད་ནི་བཟང་། གཞན་དག་གིས་
ཐོས་པ་དང་ཤེས་པ་ནི་དེ་ལྟ་བ་མ་ཡིན་ནོ་ཞེས་མི་མཐུན་པ་རྣམས་ལ་འཕྱས་གདགས་པར་མི་བྱའོ། །མིན་ཞེས་བྱ་བ་ནི་འདི་ཡང་ཡོད་པར་སྦྱར་རོ། །ཚུལ་ཁྲིམས་ཀྱི་ལོངས་སྤྱོད་ལ་ཞུགས་ཏེ། དེས་གཞན་དག་ལ་བྱ་བ་དང་མི་བྱ་བར་སྦྱོར་བའི་ཉེས་པ་ལ་རྟོག་པའི་གཉེན་པོ་
བསྟན་པ་ཞེས་བྱ་བ་ནི། གཞན་དག་གིས། བྱས་དང་མ་བྱས་རྣམས་ལ་མིན། །ཞེས་བྱ་བ་ཡིན་ཏེ། བདག་གིས་ཚུལ་ཁྲིམས་བསྲུངས་པ་དང་། མ་བསྲུངས་པ་དང་། དགེ་བ་བྱས་པ་དང་། མ་བྱས་པ་རྣམས་ལ་བརྟག་པར་བྱའི་གཞན་དག་གིས་བསྲུངས་པ་དང་། མ་བསྲུངས་
པ་དང་། བྱས་པ་དང་མ་བྱས་པ་རྣམས་ལ་བརྟག་པར་མི་བྱའོ།། །།བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཚེ་ལོ་ཉི་ཁྲི་ཐུབ་པ་ན། སངས་རྒྱས་འོད་སྲུངས་ཞེས་བྱ་བ་འཇིག་རྟེན་དུ་བྱུང་སྟེ། སྟོན་པ་དེའི་རིང་ལ་ཉན་ཐོས་རྣམས་ལས་ཕལ་ཆེར་སྲེད་པ་དང་བཅས་པའི་
ཏིང་ངེ་འཛིན་གྱི་རོ་ལ་ཆགས་པར་གྱུར་ཏེ། དེས་ཉོན་མོངས་པ་གཏན་ནས་སྤོང་བར་མི་འགྱུར་བས་དེ་ལས་བཟློག་པའི་གཉེན་པོར། ལྷག་པའི་སེམས་ལ་བག་བྱ་སྟེ་ཞེས་བྱ་བ་ལ་སོགས་པ་གསུངས་སོ། །འདི་ལ་ཡང་རྣམ་པ་བཞིར་དབྱེ་སྟེ། སྲེད་པའི་ཏིང་ངེ་འཛིན་གྱི་རོ་

མྱོང་བ་ལས་བཟློག་པ་དང་། བདེན་པ་རྣམས་མངོན་སུམ་དུ་རིག་པར་བྱ་བ་ལ་གཟུད་པ་དང་། བདེན་པ་མཐོང་བའི་ཡོན་ཏན་བསྟན་པ་དང་། ཀུན་དུ་སྦྱོར་བའི་ལྷག་མ་སྤང་བའི་རིམ་པ་བསྟན་པའོ། །དེ་ལ་སྲེད་པའི་ཏིང་ངེ་འཛིན་གྱི་རོ་མྱོང་བ་ལས་བཟློག་པ་ཞེས་བྱ་བ་ནི། ལྷག་པའི་
སེམས་ལ་བག་བྱ་སྟེ། །ཞེས་བྱ་བའོ། །དེ་ལ་ལྷག་པའི་སེམས་ཞེས་བྱ་བ་ནི་སྐྱེ་བོ་མ་རབས་འདུ་འཛི་ཅན་ལས་ལྷག་པ་སྟེ། སྲིད་པ་དང་བཅས་པའི་ཏིང་ངེ་འཛིན་ལ་བྱའོ། །བག་བྱ་སྟེ་ཞེས་བྱ་བ་ནི་དེ་ཟག་པ་དང་བཅས་པའི་རྒྱུ་ཡིན་པའི་ཕྱིར་ཆགས་པར་མི་བྱའོ་ཞེས་བྱ་བའི་
ཐ་ཚིག་གོ། །བདེན་པ་རྣམས་མངོན་སུམ་དུ་རིག་པར་བྱ་བ་ལ་གཟུད་པར་བྱ་ཞེས་བྱ་བ་ནི། ཐུབ་པའི་ཐུབ་གནས་རྣམས་ལ་བསླབ། །ཅེས་བྱ་བ་ཡིན་ཏེ། དེ་ལ་ཐུབ་པ་ཞེས་བྱ་བ་ནི་སྐུ་དང་གསུང་ཐུབ་པའི་ཕྱིར་ཐུབ་པ་ཞེས་བྱ་སྟེ་སངས་རྒྱས་རྣམས་ལ་བྱའོ། །ཐུབ་གནས་
ཞེས་བྱ་བ་ནི་འཕགས་པའི་བདེན་པ་བཞི་སྟེ། དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཀྱི་རྒྱུའམ་ཐུབ་པའི་སྐྱེ་མཆེད་དུ་གྱུར་པའི་ཕྱིར་འཕགས་པའི་བདེན་པ་རྣམས་ལ་ཐུབ་གནས་ཞེས་བསྟན་ཏོ། །བསླབ་ཅེས་བྱ་བ་ནི་མངོན་སུམ་དུ་རིག་པར་བྱའོ། །བདེན་
པ་མཐོང་བའི་ཡོན་ཏན་བསྟན་པ་ཞེས་བྱ་བ་ནི། ཉེར་ཞི་རྟག་ཏུ་དྲན་ལྡན་པ། །སྐྱོབ་པ་མྱ་ངན་མི་མངའོ། །ཞེས་བྱ་བ་ཡིན་ཏེ། དེ་ལ། ཉེར་ཞི་རྟག་ཏུ་དྲན་ལྡན་པ། །ཞེས་བྱ་བ་ནི་དེ་ལྟར་ཐུབ་པའི་སྐྱེ་མཆེད་དུ་གྱུར་པ། འཕགས་པའི་བདེན་པ་རྣམས་ལ་བསླབ་པས་མཐོང་བས་
སྤང་བར་བྱ་བའི་ཉོན་མོངས་པ་རྣམས་ཉེ་བར་ཞི་བའི་ཕྱིར་ཉེར་ཞི་ཞེས་བྱ་ལ། དེ་ལྟར་ཉེ་བར་ཞི་ན་ཁམས་གསུམ་གྱི་མཐོང་བས་སྤང་བར་བྱ་བའི་ཉོན་མོངས་པ་བརྒྱད་ཅུ་སྤངས་ནས། བདེན་པ་མཐོང་བའི་འབྲས་བུ་འཐོབ་པར་འགྱུར་ཏེ། དེ་ནི་མི་བརྗེད་པའི་ཆོས་ཅན་ཡིན་པས་
རྟག་ཏུ་དྲན་ལྡན་པ་ཞེས་བྱའོ། །སྐྱོབ་པ་མྱ་ངན་མི་མངའོ། །ཞེས་བྱ་བ་ནི། མཐོང་བས་སྤང་བར་བྱ་བའི་ཉོན་མོངས་པ་རྣམས་སྤངས་ནས། ཉོན་མོངས་པའི་དབང་དུ་མ་གྱུར་པ་ཉིད་སེམས་ཀྱི་རྒྱུད་སྐྱོབ་པ་ཡིན་ཏེ། དེ་ལ་ནི་མཐོང་བས་སྤང་བར་བྱ་བའི་ཉོན་མོངས་པ་མེད་པའི་ཕྱིར་

རོ། །དེ་བས་ན་དེ་ནི་འདི་སྐད་དུ་ཟག་པ་དང་བཅས་པའི་ཏིང་ངེ་འཛིན་ཐོབ་ཏུ་ཟིན་ཀྱང་དེ་ནི་སྐད་ཅིག་ཉོན་མོངས་པ་མེད་མོད་ཀྱི། ཚེ་ཕྱི་མ་ལ་ཡང་སྐྱེ་ཞིང་ཞི་བར་མི་འགྱུར་བས། དྲན་པ་དང་ལྡན་པ་མ་ཡིན་ཏེ། ཐུབ་པའི་སྐྱེ་མཆེད་དུ་འགྱུར་བའི་འཕགས་པའི་བདེན་པ་
རྣམས་ལ་བསླབས་ནས། རྟག་ཏུ་དྲན་པ་དང་ལྡན་ཞིང་སེམས་ཀྱི་རྒྱུད་བསྐྱབས་པས་སྤང་བར་བྱ་བའི་ཉོན་མོངས་པ་རྣམས་མེད་དོ་ཞེས་བསྟན་པར་འགྱུར་རོ། །ཀུན་དུ་སྦྱོར་བའི་ལྷག་མ་སྤོང་བའི་རིམ་པ་བསྟན་པ་ཞེས་བྱ་བ་ནི། བྱིན་པས་བསོད་ནམས་རབ་ཏུ་འཕེལ། །
ཞེས་བྱ་བ་ལ་སོགས་པ་ཡིན་ཏེ། འདི་ལ་ཡང་ཁམས་ཀྱི་བྱེ་བྲག་གིས་རྣམ་པ་གཉིས་སུ་དབྱེ་སྟེ། འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་ཉོན་མོངས་པའི་གཉེན་པོ་བསྟན་པ་དང་། ཁམས་གོང་མ་གཉིས་ཀྱི་བསྒོམ་པས་སྤང་བར་བྱ་བའི་ཉོན་མོངས་པ་
རྣམས་ཀྱི་གཉེན་པོ་བསྟན་པའོ། །དེ་ལ་འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་ཉོན་མོངས་པའི་གཉེན་པོ་བསྟན་པ་ནི། བྱིན་པས་བསོད་ནམས་རབ་ཏུ་འཕེལ། །བསྡམས་པས་དགྲ་སོགས་མི་འགྱུར་རོ། །དགེ་དང་ལྡན་པས་སྡིག་པ་སྤོང་། །ཞེས་བྱ་བ་སྟེ།
འདི་དག་གིས་ནི་འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་ཉོན་མོངས་པ་འདོད་ཆགས་དང་། ཁོང་ཁྲོ་བ་དང་། མ་རིག་པ་དང་། ང་རྒྱལ་དང་བཞི་སྤོང་སྟེ། དེ་ཡང་ཇི་ལྟར་སྤོང་ཞེ་ན། བྱིན་པས་བསོད་ནམས་རབ་ཏུ་འཕེལ། །ཞེས་བྱ་བ་ནི་འདོད་ཆགས་སྤོང་བར་
བྱེད་དེ། སྦྱིན་པ་ནི་འདོད་ཆགས་ཀྱི་གཉེན་པོ་ཡིན་པས། །སྦྱིན་པ་བྱས་ན་སེར་སྣའི་དྲི་མ་ཀུན་ནས་དཀྲིས་པ་དང་བྲལ་ཞིང་གཏོང་བ་སྐྱེད་དོ། །བསོད་ནམས་འཕེལ་བར་འགྱུར་བའི་ཕྱིར་རོ། །བསྡམས་པས་དགྲ་སོགས་མི་འགྱུར་རོ། །ཞེས་བྱ་བ་ནི་ཁོང་ཁྲོ་བའི་
གཉེན་པོ་ཡིན་པས། ཁོང་ཁྲོ་བ་སྤོང་བར་བྱེད་དེ། ལུས་དང་ངག་དང་ཡིད་གསུམ་བསྡམས་ཤིང་གལ་ཏེ་གཞན་དག་གིས་སྨད་དམ། ཁྲོས་སམ། སྤྱོས་ཀྱང་རུང་། ལག་པ་དང་། བོང་བ་དང་། དབྱུག་པ་དང་། མཚོན་ཆའི་རེག་པ་རྣམས་ཀྱིས་བསྣུན་

ཀྱང་རུང་སྟེ། བདག་ལ་བར་ཆད་དུ་གྱུར་ན་མི་རུང་ངོ་སྙམ་ནས་སེམས་སྡང་བར་མི་བྱེད་ཅིང་སྡིག་པའི་ཚིག་མི་འབྱིན་ཏེ། དེ་ཉིད་ལ་དམིགས་ནས་བྱམས་པ་དང་ལྡན་པའི་སེམས་ཀྱིས་ཕྱོགས་ཐམས་ཅད་དུ་ཁྱབ་པར་བྱས་ཏེ་གནས་ནས། དེ་གཞི་དེས་ཚེ་འདི་ལ་བདག་དང་གཞན་
གྱི་རྒྱུད་ལ་ཡོད་པའི་འཁོན་རབ་ཏུ་ཞི་བར་གྱུར་པ་དང་། ཕྱི་མ་ལ་ཡང་གནོད་པ་མེད་པའི་འཇིག་རྟེན་དུ་སྐྱེ་བར་འགྱུར་ལ། འཁོན་པ་མང་བར་མི་འགྱུར་ཞིང་འགྲན་ཟླ་མང་བར་མི་འགྱུར་ཏེ། འཇིག་རྟེན་གྱིས་མཐོང་ན་དགའ་བར་འགྱུར་ཞིང་། ཞེ་སྡང་གིས་དགྲ་མི་སོགས་པའི་
ཕྱིར་རོ། །དགེ་དང་ལྡན་པས་སྡིག་པ་སྤོང་། །ཞེས་བྱ་བ་ནི་མ་རིག་པ་དང་། ང་རྒྱལ་གཉིས་སྤོང་སྟེ། དེ་ལ་དགེ་བ་དང་ལྡན་པ་ཞེས་བྱ་བ་ནི་ལྷག་པའི་སེམས་ལ་བྱ་སྟེ། མ་རིག་པ་དང་། ང་རྒྱལ་གྱི་བག་ཆགས་ཕྲ་ཞིང་སྤང་དཀའ་བའི་ཕྱིར་ལྷག་པའི་སེམས་
ཀྱིས་སྤོང་ངོ་། །སྡིག་པ་སྤོང་ཞེས་བྱ་བ་ནི་མ་རིག་པ་དང་ང་རྒྱལ་གྱི་བག་ཆགས་ལ་སྡིག་པ་ཞེས་བྱ་སྟེ། །དེ་གཉིས་ཀྱང་ལྷག་པའི་སེམས་ལ་བརྟེན་ནས་ལྷག་པའི་ཤེས་རབ་སྐྱེ་སྟེ། བདེན་པ་མངོན་པར་རྟོགས་པའི་དུས་ན་ངན་སོང་དུ་འགྲོ་བའི་སྡིག་པའི་རྒྱུ་དེ་གཉིས་སྤོང་བར་
འགྱུར་བའི་ཕྱིར་རོ། །ཁམས་གོང་མ་གཉིས་ཀྱི་བསྒོམ་པས་སྤང་བར་བྱ་བའི་ཉོན་མོངས་པ་རྣམས་ཀྱི་གཉེན་པོ་བསྟན་པ་ཞེས་བྱ་བ་ནི། ཉོན་མོངས་ཟད་པས་མྱ་ངན་འདས། །ཞེས་བྱ་བ་ཡིན་ཏེ། འདི་ནི་གཟུགས་དང་གཟུགས་མེད་པའི་ཁམས་ཀྱི་བསྒོམ་པས་སྤང་བར་
བྱ་བའི་ཉོན་མོངས་པ་འདོད་ཆགས་དང་། མ་རིག་པ་དང་། ང་རྒྱལ་ཁམས་གཅིག་ལ་ཡང་གསུམ་གསུམ་སྟེ། དྲུག་སྤོང་བར་བྱེད་དེ། དེ་ཡང་ཁམས་གོང་མ་གཉིས་ཀྱི་བསྒོམ་པས་སྤང་བར་བྱ་བའི་ཉོན་མོངས་པ་རྣམས་འཕགས་པའི་ལམ་གྱིས་ཡོངས་སུ་གཏུགས་ནས་ཕུང་པོའི་
ལྷག་མ་དང་བཅས་པ་དང་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདའ་བར་འགྱུར་བའི་ཕྱིར་རོ། །བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཚེ་ལོ་བརྒྱ་ཐུབ་པ་ན། སངས་རྒྱས་ཤཱཀྱ་ཐུབ་པ་འཇིག་རྟེན་དུ་བྱུང་སྟེ། སྟོན་པ་འདིའི་རིང་ལ་

ཉན་ཐོས་རྣམས་ཕལ་ཆེར་ཉོན་མོངས་པ་མང་བས་སྡིག་པ་རྣམས་སོགས་པར་བྱེད་ཅིང་དགེ་བའི་ཕྱོགས་ཅུང་ཟད་ཙམ་གྱིས་ཆོག་པར་འཛིན་ཏེ། དེས་འབྲས་བུ་ཆེན་པོ་འགྲུབ་པར་འདོད། འདོད་པ་ལ་ཉེ་བར་བསྒྲུབས་ཤིང་སེམས་ནང་དུ་འཇོག་མི་ནུས་པས་
ཉེས་པ་དེ་དག་ལས་བཟློག་པར་བྱ་བ་དང་། གཞན་ཡང་དེ་དང་དེའི་ཉན་ཐོས་རྣམས་ལ་འཕན་གཞན་འབྱུང་བས་ལོ་བཅུ་གཉིས་ཀྱི་བར་དུ་སོ་སོར་ཐར་པའི་མདོ། སྡིག་པ་ཐམས་ཅད་མི་བྱ་སྟེ། །ཞེས་བྱ་བ་ནས། དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བྱ་
བའི་བར་འདི་དག་གསུངས་སོ། །འདི་ལ་ཡང་རྣམ་པ་གསུམ་དུ་དབྱེ་སྟེ། སྡིག་པ་སྤང་བ་དང་། སྡིག་པ་སྤང་བའི་ཐབས་བསྟན་པ་དང་། དེ་ལ་ཞུགས་པ་རྣམས་དྲན་པ་མི་ཉམས་པར་བྱ་བའི་ཐབས་བསྟན་པའོ། །དེ་ལ་སྡིག་པ་སྤང་ཞེས་བྱ་བ་ནི། སྡིག་པ་ཐམས་ཅད་མི་
བྱ་སྟེ། །དགེ་བ་ཕུན་སུམ་ཚོགས་པ་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པའོ། །ཞེས་བྱ་བའོ། །འདི་ལ་ཡང་རྣམ་པ་གསུམ་དུ་དབྱེ་སྟེ། སྡིག་པ་རྣམས་སོགས་པའི་གཉེན་པོ་དང་། དགེ་བའི་ཕྱོགས་ཅུང་ཟད་ཙམ་གྱིས་ཆོག་
པར་འཛིན་ཅིང་དེའི་འབྲས་བུ་ཆེན་པོར་འདོད་པའི་གཉེན་པོ་དང་། འདོད་པ་ལ་ཉེ་བར་བསྒྲུབས་ཤིང་སེམས་ནང་དུ་འཇོག་མི་ནུས་པའི་གཉེན་པོ་བསྟན་པ་སྟེ། འདི་གསུམ་ཚིགས་སུ་བཅད་པའི་རྐང་པ་དང་པོ་གསུམ་དང་རིམ་བཞིན་ནོ། །དེ་ལ་དང་པོ། སྡིག་པ་ཐམས་ཅད་མི་བྱ་
སྟེ། །ཞེས་བྱ་བ་ནི་ལུས་ཀྱི་ཉེས་པ་གསུམ་སྤང་བར་བྱའོ། །དགེ་བ་ཕུན་སུམ་ཚོགས་པར་སྤྱད། །ཅེས་བྱ་བ་ནི་ངག་གི་ཉེས་པ་བཞི་སྤང་བར་བྱ་བའོ། །རང་གི་སེམས་ནི་ཡོངས་སུ་གདུལ། །ཞེས་བྱ་བ་ནི་ཡིད་ཀྱི་ཉེས་པ་གསུམ་སྤང་བའི་ཕྱིར་ལྷག་པའི་སེམས་ལ་བྱའོ། །
འདི་ནི་སངས་རྒྱས་བསྟན་པའོ། །ཞེས་བྱ་བ་ནི་དེ་ལྟར་སྒྲུབས་ཤིག་པའོ། །སྡིག་པ་སྤང་བའི་ཐབས་བསྟན་པ་ཞེས་བྱ་བ་ནི། ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །

ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ཞེས་བྱ་བ་ཡིན་ཏེ། སྔར་བསྟན་པའི་ལུས་དང་ངག་དང་ཡིད་ཀྱི་ཉེས་པ་རྣམས་སྤངས་ཏེ། སྡོམ་པ་དང་ལྡན་ན་སོ་སོའི་ཉེས་པ་ལས་གྲོལ་ཞིང་ཐར་པ་ཐོབ་པར་འགྱུར་བས་ལེགས་སོ་ཞེས་བསྔགས་པའོ། །
དེ་ལ་ཐམས་ཅད་དུ་ནི་སྡོམ་པ་ལེགས། །ཞེས་བྱ་བ་ནི་གཅིག་བསྡམས་ན་ཡང་ལེགས་པ་ཡིན་ན་ཐམས་ཅད་ལྟ་ཅི་སྨོས་ཞེས་བསྟན་པའོ། །གཞན་ནི་གོ་སླ་བས་མ་བཤད་དོ། །དེ་ལ་ཞུགས་པའི་རྣམས་དྲན་པ་མི་ཉམས་པར་བྱ་བའི་ཐབས་བསྟན་པ་ཞེས་བྱ་བ་ནི། ངག་རྣམས་
བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་སྤངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བྱ་བ་ཡིན་ཏེ། དེ་ལ་ངག་རྣམས་བསྲུང་ཞིང་བྱ་བ་ནི་གླེང་གཞིའི་དགེ་སློང་མས་
གླེངས་པའི་ཚེ་ཉེས་པ་ཆོས་བཞིན་དུ་བྱེད་པའོ། །ཡིད་ཀྱིས་རབ་བསྡམས་ཞེས་བྱ་བ་ནི་ཡིད་ཀྱི་ཉེས་པ་རྣམས་བསྡམ་པར་བྱ་ཞིང་གཞན་གྱིས་གཙེས་ན་ཡང་ཁོང་ཁྲོ་བར་མི་བྱེད་པའོ། །ལུས་ཀྱིས་མི་དགེ་བ་དག་མི་བྱེད་ཅེས་བྱ་བ་ནི་སྤྱོད་ཡུལ་མ་ཡིན་པ་ལྔར་མི་འགྲོ་བ་སྟེ་རྒྱལ་པོའི་ཕོ་
བྲང་དང་། །ཆང་འཚོང་བ་དང་། གཟུགས་ཀྱིས་འཚོ་བ་དང་། རོལ་མོ་མཁན་དང་། རིགས་ངན་གྱི་ཁྱིམ་རྣམས་སུ་མི་འགྲོ་བ་དང་། གཞན་ཡང་བསོད་སྙོམས་སྤྱོད་པའི་ཟས་མ་བརྟགས་པ་རྣམས་མི་བླང་བ་དང་། ལུས་ཀྱིས་གཞན་དག་ལ་འཚེ་བར་མི་བྱེད་པའོ། །
ལས་ལམ་གསུམ་ཞེས་བྱ་བ་ལ། དེ་ལ་ལས་ནི་འདུ་བྱེད་སེམས་པ་ཡིན་ཏེ། སེམས་པ་དེ་ཡང་བརྣབ་སེམས་དང་། གནོད་སེམས་དང་། ལོག་པར་ལྟ་བ་གསུམ་གྱི་དབང་དུ་འགྲོ་ཞིང་མངོན་པར་འདུ་བྱེད་པས་ན། འདི་གསུམ་ནི་ལས་ཀྱི་ལམ་ཞེས་བྱའོ། །སྲོག་
གཅོད་པ་ལ་སོགས་པ་ལུས་དང་ངག་གི་ལས་རྣམས་བདུན་ནི་ལས་ཉིད་ཀྱང་ཡིན་ལ་ལས་འདི་རྣམས་སློང་ཞིང་བསྐྱེད་པའི་སེམས་པ་དེ་ཡང་དེ་དག་ལ་བརྟེན་ཅིང་འཇུག་པས་ན་ལས་ཀྱི་ལམ་ཡང་ཡིན་ནོ། །རབ་སྦྱངས་ཞེས་བྱ་བ་ནི་དེ་དག་གི་སྡོམ་པ་དང་ལྡན་པའོ། །དྲང་སྲོང་ཞེས་བྱ་བ་ནི་

སྔར་བཤད་པ་བཞིན་ནོ། །དེ་བཞིན་གཤེགས་པ་རྣམས་ལ་བྱའོ། །ལམ་ཞེས་བྱ་བ་ནི་འཕགས་པའི་ལམ་སྟེ། དེ་ཡང་ལས་ལམ་གསུམ་པོ་དག་སྦྱངས་པས་འཐོབ་པར་འགྱུར་བའི་ཕྱིར་རོ། །སྔོན་གྱི་ཚུལ་བསྟན་པ་ཞེས་བྱ་བ་ལ། རྣམ་པ་
གཉིས་སུ་ཕྱེ་བའི་ཐ་མ་དེ་དག་སྟོན་པ་གང་དག་གི་གསུང་རབ་ཡིན་པའི་ཁུངས་བསྟན་པ་ཞེས་བྱ་བ་འདིར་སྟོན་ཏེ། དེའི་ཕྱིར། སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །ལོག་པར་དད་སེལ་གསེར་ཐུབ་འོད་སྲུངས་དང་། །ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །མི་
འདུལ་ཁ་ལོ་སྒྱུར་བ་བླ་ན་མེད། །འཇིག་རྟེན་མགོན་པོ་སྐྱོབ་པ་མཆོག །སངས་རྒྱས་དཔའ་བོ་བདུན་པོ་དག །གྲགས་ལྡན་རྣམས་ཀྱིས་སོ་སོར་ཐར། །འདི་ནི་རབ་ཏུ་རྒྱས་པར་བཤད། །ཅེས་བྱ་བ་གསུངས་ཏེ། འདི་ནི་ཡང་དག་པར་སྡུད་པར་བྱེད་པས། སྔར་གོང་དུ་
བསྟན་པའི་སངས་རྒྱས་བདུན་གྱི་འདུལ་བ་དེ་དག་སྟོན་པ་གང་དག་གི་གསུང་རབ་ཡིན་པ་མ་འོངས་པའི་སྐྱེ་བོ་རྣམས་ཀྱིས་མི་ཤེས་ཀྱིས་དོགས་པའི་ཕྱིར་སྨོས་ཏེ། སངས་རྒྱས་བདུན་གྱི་འདུལ་བ་སྔར་བསྟན་པ་དང་སྟོན་པ་འདི་བདུན་རིམ་བཞིན་དུ་སྦྱར་རོ་ཞེས་བྱ་བའི་ཐ་ཚིག་གོ། །དེ་
ལས་སངས་རྒྱས་དྲུག་གི་མཚན་བཤད་པ་ནི། གཞན་ནས་འབྱུང་བ་བཞིན་དུ་སྦྱར་རོ། །ཤཱཀྱ་ཐུབ་པ་ཞེས་བྱ་བ་ནི་ནམ་རྒྱལ་བུ་དོན་གྲུབ་ལུམ་བི་ནིའི་ཚལ་དུ་བལྟམས་ཏེ། རིན་པོ་ཆེ་སྣ་བཞི་ལས་བྱས་པའི་ཁྱོགས་ཀྱི་སྟེང་དུ་བཞག་ནས་སྐྱེ་བོ་མང་པོ་དང་ལྷ་དག་
གིས་བསྐོར་ཞིང་བསྟི་སྟང་བྱས་ཏེ། གྲོང་ཁྱེར་སེར་སྐྱའི་གནས་སུ་གཤེགས་པའི་ཚེ། ཤཱཀྱ་རྣམས་ནི་ང་རྒྱལ་ཅན། ཁ་དྲག་པ། མི་འཇིགས་པ་ཡིན་ན། གཞོན་ནུ་གྲོང་ཁྱེར་དུ་གཤེགས་པས་དེ་དག་ཐུབ་པ་བཞིན་དུ་འཁོད་པར་གྱུར་པ་དང་། རྒྱལ་པོ་ཟས་གཙང་
མས་གཞོན་ནུ་འདི་ཤཱཀྱ་རྣམས་ཐུབ་པས་ན། ཤཱཀྱ་ཐུབ་པ་ཞེས་མཚན་གསོལ་བའི་ཕྱིར་རོ། །ཡང་ན་སྐུ་དང་། གསུང་ཐུབ་པའི་ཕྱིར་ཐུབ་པ་ཞེས་བྱའོ། །གཽ་ཏམ་ཞེས་བྱ་བ་ནི་གཽའི་སྒྲ་ལས་དྲངས་ན། ཚིག་དང་། ཕྱོགས་དང་། ས་དང་། འོད་དང་། རྡོ་རྗེ་དང་།

བ་ལང་དང་། མཐོ་རིས་ལ་སོགས་པ་རྣམ་པ་དུ་མ་ལ་སྙེགས་མོད་ཀྱི། སྐབས་འདིར་ནི་རུས་ལ་བྱའོ། །ལྷའི་ལྷ་ཞེས་བྱ་བ་ནི་ལྷ་ལ་རྣམ་པ་གཉིས་ཏེ། རྣམ་པར་དག་པའི་ལྷ་དང་། ཚེའི་ལྷའོ། །དེ་ལ་སངས་རྒྱས་ཐམས་ཅད་ནི་རབ་ཏུ་བྱུང་བའི་ཕྱིར་རྣམ་པར་དག་
པའི་ལྷ་ཞེས་བྱ། དེ་ལས་གཞན་པ་རྣམས་ནི་སྐྱེ་བའི་ཕྱིར་ཚེའི་ལྷ་ཞེས་བྱ་བ་སྟེ། རྣམ་པར་དག་པའི་ལྷ་རྣམས་ཀྱི་ནང་ན་དེ་བཞིན་གཤེགས་པ་ཤཱཀྱ་ཐུབ་པ་ནི་སྙིགས་མ་ལྔ་པོ་སེམས་ཅན་དང་། ཚེ་དང་། བསྐལ་པ་དང་། ཉོན་མོངས་པ་དང་། ལྟ་བ་རྣམས་
རྙོག་པའི་དུས་སུ་གདུལ་དཀའ་བ་རྣམས་གདུལ་ཞིང་ཁ་ལོ་སྒྱུར་བའི་ཕྱིར་ལྷའི་ལྷ་ཞེས་བྱའོ། །ཡང་ན་ཡུམ་གྱི་ལྷུམས་སུ་བལྟམས་པའི་ཚེ་འཇིག་རྟེན་གྱི་ལྷ་ཐམས་ཅད་ཀྱིས་ཕྱག་བྱས་པའི་ཕྱིར་ཡང་ལྷའི་ལྷ་ཞེས་བྱའོ། །ཡང་ལྷའི་ལྷ་ཞེས་བྱ་བ་ནི་ཤཱཀྱ་རྣམས་
ཀྱི་ལྷ་གནོད་སྦྱིན་ཤཱཀྱ་སྐྱེད་པ་ཞེས་བྱ་བ་ཞིག་ཡོད་དེ། ཤཱཀྱ་དག་སུ་ཡང་རུང་བུ་ཕོ་དང་བུ་མོ་དག་བྱུང་ན། དེ་དག་གིས་ཐོག་མར་གནོད་སྦྱིན་ཤཱཀྱ་སྐྱེད་པའི་དྲུང་དུ་དེའི་རྐང་པ་ལ་ཕྱག་འཚལ་བའི་ཕྱིར་ཁྲིད་པར་བྱེད་དེ། ནམ་རྒྱལ་བུ་དོན་གྲུབ་བལྟམས་པའི་དུས་དེ་ན་
ཡང་རྒྱལ་པོ་ཟས་གཙང་མས་བློན་པོ་རྣམས་ལ་ཀྱེ་དེང་ལ། གཞོན་ནུ་འདི་གནོད་སྦྱིན་ཤཱཀྱ་སྐྱེད་པའི་རྐང་པ་ལ་ཕྱག་འཚལ་དུ་ཆུག་ཅིག་ཅེས་བསྒོ་བ་དང་། བློན་པོ་རྣམས་ཀྱིས་ཀྱང་དེ་བཞིན་དུ་དེའི་མདུན་དུ་ཁྲིད་དོ། །དེ་ནས་གནོད་སྦྱིན་ཤཱཀྱ་སྐྱེད་པས་བྱང་ཆུབ་སེམས་དཔའ་
རྒྱང་ནས་མཐོང་བ་དང་། དེ་རྟབས་བཞིན་མྱུར་ཞིང་རིངས་པའི་འགྲོས་སུ་སོང་ནས་བྱང་ཆུབ་སེམས་དཔའི་ཞབས་ལ་ཕྱག་འཚལ་ལོ། །དེ་ནས་རྒྱལ་པོ་ཟས་གཙང་མས་ཀྱེ་གནོད་སྦྱིན་ཤཱཀྱ་སྐྱེད་པས་ཀྱང་གཞོན་ནུ་འདིའི་ཞབས་ལ་ཕྱག་བྱས་པས་འདི་ནི་ལྷའི་ནང་ན་ཡང་ལྷ་སྟེ།
གཞོན་ནུ་འདིའི་མིང་ལྷའི་ལྷ་ཞེས་གདགས་སོ་ཞེས་མཚན་གསོལ་བའི་ཕྱིར་རོ། །དེ་ལ། མི་འདུལ་ཁ་ལོ་སྒྱུར་བ་བླ་ན་མེད། །ཅེས་བྱ་བ་ནི། དེ་བཞིན་གཤེགས་པ་རྣམས་ངན་སོང་རྣམས་འདུལ་བའི་ཕྱིར་ཡང་རྗེས་སུ་འཛིན་མོད་ཀྱི། ངན་སོང་གི་ལུས་དེ་ཉིད་ཀྱིས་

འཕགས་པའི་བདེན་པའི་སྣོད་དུ་མི་འགྱུར་བས་ན། དེ་གདུལ་བ་ཞེས་མ་བཤད་དེ་འཕགས་པའི་བདེན་པ་ཆུད་པའི་གནས་ནི་མི་ཡིན་པས་མི་འདུལ་ཞེས་བསྟན་ཏོ། །དེ་ཡང་ཇི་ལྟར་འདུལ་ཞིང་ཁ་ལོ་སྒྱུར་ཞེ་ན། སོར་མོའི་ཕྲེང་བ་ལ་སོགས་པ་ཞེ་སྡང་ཆེ་
བ་དང་། དགའ་བོ་ལ་སོགས་པ་འདོད་ཆགས་ཆེ་བ་དང་། ལྟེང་རྒྱས་འོད་སྲུངས་ལ་སོགས་པ་གཏི་མུག་ཆེ་བ་འདུལ་བའི་སེམས་ཅན་རྟ་རྒོད་དང་འདྲ་བ་གདུལ་དཀའ་བ་རྣམས་འཇམ་པོས་གདུལ་བར་འོས་པ་ཡང་འཇམ་པོས་བཏུལ། དྲག་པོས་གདུལ་བར་འོས་པ་རྣམས་ཀྱང་
དྲག་པོས་བཏུལ། གཉི་གས་གདུལ་བར་འོས་པ་རྣམས་ཀྱང་གཉི་གས་བཏུལ་ཏེ། ཐབས་བཟང་ཞིང་སླ་བས་ཐབས་བཞིན་དུ་བཏུལ་ནས་སྒྲུབ་པའི་མཆོག་མྱ་ངན་ལས་འདས་པའི་གནས་སུ་ཁ་ལོ་སྒྱུར་ཞིང་འཇོག་པས་ན། མི་འདུལ་ཁ་ལོ་སྒྱུར་བ་བླ་ན་མེད། །ཅེས་བྱའོ། །
བླ་ན་མེད་ཅེས་བྱ་བ་ནི་གོང་ན་མེད་པའི་ཕྱིར་རོ། །འཇིག་རྟེན་མགོན་པོ་སྐྱོབ་པ་མཆོག །ཅེས་བྱ་བ་ནི། བརྒྱ་བྱིན་དང་ཚངས་པ་ལ་སོགས་པ་འཇིག་རྟེན་གྱི་མགོན་པོ་སྐྱོབ་པ་ཡིན་མོད་ཀྱི། དེ་བཞིན་གཤེགས་པ་རྣམས་ནི་སེམས་ཅན་རྣམས་ངན་སོང་གསུམ་ལས་སྐྱོབ་ཅིང་མྱ་
ངན་ལས་འདས་པའི་གནས་སུ་འཇོག་པས་ན་ཁྱད་པར་དུ་བསྟན་པའི་ཕྱིར་སྐྱོབ་པ་མཆོག་ཅེས་བྱའོ། །སངས་རྒྱས་དཔའ་བོ་བདུན་པོ་དག །ཅེས་བྱ་བ་ནི་བདུད་བཞི་ལས་རྒྱལ་བའི་ཕྱིར་ཏེ་རྣམ་པར་གཟིགས་ལ་སོགས་པའོ། །གྲགས་ལྡན་རྣམས་ཀྱིས་སོ་སོར་ཐར། །འདི་ནི་
རབ་ཏུ་རྒྱས་པར་བཤད། །ཅེས་བྱ་བ་ལ་གྲགས་ལྡན་ཞེས་བྱ་བ་ནི་དེ་བཞིན་གཤེགས་པ་བདུན་པོ་དེ་དག་གོ། །གཞན་ནི་གོ་སླ་བས་བཤད་པ་མ་བྱས་སོ། །སོ་སོར་ཐར་པའི་བསྡུས་པའི་དོན་རྣམ་པ་བརྒྱད་དུ་ཕྱེ་བའི་བཞི་པ་སྔོན་གྱི་ཚུལ་བསྟན་པ་ཞེས་བྱ་བ་བཤད་ཟིན་ཏོ།། །།
ད་ནི་སོ་སོར་ཐར་པ་ཉིད་ཀྱི་འབྲས་བུ་བསྟན་པ་ཞེས་བྱ་བ་འདིར་སྟོན་ཏེ། དེའི་ཕྱིར། འདི་ལ་སངས་རྒྱས་རྣམས་དང་གང་། །ཞེས་བྱ་བ་ལ་སོགས་པ་གསུངས་སོ། །འདི་ལ་ཡང་རྣམ་པ་གསུམ་དུ་དབྱེ་སྟེ། སོ་སོར་ཐར་པ་ཉིད་ཀྱི་འབྲས་བུ་མདོར་བསྟན་པ་དང་། སྤྲོ་བ་བསྐྱེད་པ་དང་།

སོ་སོར་ཐར་པ་ཉིད་ལ་ནན་ཏན་བྱེད་པའི་ལེགས་པ་བརྗོད་པའོ། །དེ་ལ་སོ་སོར་ཐར་པ་ཉིད་ཀྱི་འབྲས་བུ་མདོར་བསྟན་པ་ཞེས་བྱ་བ་ནི། །འདི་ལ་སངས་རྒྱས་རྣམས་དང་གང་། །སངས་རྒྱས་ཉན་ཐོས་རྣམས་ཀྱང་གུས། །འདི་ལ་གུས་བཅས་གྱུར་པ་ནི། །འདུས་མ་བྱས་པ་
ཐོབ་པར་འགྱུར། །ཞེས་བྱ་བ་ཡིན་ཏེ། འདི་ལ་ཞེས་བྱ་བ་ནི་སོ་སོར་ཐར་པ་འདི་ཉིད་ལའོ། །སངས་རྒྱས་རྣམས་དང་སངས་རྒྱས་ཀྱི་ཉན་ཐོས་ཀྱང་གུས་ཞེས་བྱ་བ་ནི། སོ་སོར་ཐར་པ་འདི་ཉིད་ལ་དུས་གསུམ་དུ་གཤེགས་པའི་སངས་རྒྱས་རྣམས་དང་དེ་དག་གི་ཉན་ཐོས་རྣམས་
ཀྱང་གུས་པར་མཛད་དེ། ཐམས་ཅད་ཀྱང་འདི་ཉིད་ལ་བརྟེན་ནས་ཆོས་ཀྱི་སྐུ་དང་རྣམ་པར་གྲོལ་བ་བརྙེས་ཤིང་ཐོབ་པར་འགྱུར་བའི་ཕྱིར་རོ། །འདི་ལ་གུས་དང་བཅས་པ་ནི། །འདུས་མ་བྱས་པ་ཐོབ་པར་འགྱུར། །ཞེས་བྱ་བ་ནི་སངས་རྒྱས་དང་ཉན་ཐོས་མ་ཡིན་པ་སུ་ཡང་རུང་
སོ་སོར་ཐར་པ་འདི་ལ་ཞེས་སྐྱེད་དེ་ཉམས་སུ་བླངས་ན་མྱ་ངན་ལས་འདས་པ་རྣམ་པ་གཉིས་ཐོབ་པར་འགྱུར་རོ་ཞེས་སོ་སོར་ཐར་པའི་འབྲས་བུ་མདོར་བསྟན་པའོ། །སྤྲོ་བ་སྐྱེད་པ་ཞེས་བྱ་བ་ནི། བརྩམ་པར་བྱ་ཞིང་དབྱུང་བར་བྱ། །ཞེས་བྱ་བ་ལ་སོགས་པའོ། །འདི་ལ་ཡང་
རྣམ་པ་གསུམ་དུ་དབྱེ་སྟེ། རབ་ཏུ་དབྱུང་བར་བསྐུལ་བ་དང་། མཐོང་བའི་ལམ་བསྐྱེད་པ་དང་། བསྒོམ་པའི་ལམ་བསྐྱེད་པའོ། །དེ་ལ་རབ་ཏུ་དབྱུང་བར་བསྐུལ་བ་ཞེས་བྱ་བ་ནི། བརྩམ་པར་བྱ་ཞིང་དབྱུང་བར་བྱ། །ཞེས་གསུངས་སོ། །བརྩམ་པར་བྱ་ཞེས་བྱ་བ་ནི་རབ་
ཏུ་དབྱུང་བར་བརྩལ་བའོ། །འབྱུང་བར་བྱ་ཞེས་བྱ་བ་ནི་ཁྱིམ་ནས་ཁྱིམ་མེད་པར་རབ་ཏུ་འབྱུང་བའོ། །རབ་ཏུ་འབྱུང་བ་ལ་ཡོན་ཏན་བཅུ་ཡོད་དེ། བུ་དང་ཆུང་མ་དང་ནོར་ལ་སྲེད་པ་མེད་པར་འགྱུར། དེ་འདོད་པ་མེད་པས་ཡོངས་སུ་འཛིན་པར་འགྱུར། དགོན་པར་གནས་པ་ལ་
དགའ་བར་འགྱུར། དཀོན་མཆོག་གསུམ་ལ་རི་མོ་དང་བཅས་པར་འགྱུར། བྱིས་པའི་སྤྱོད་ཡུལ་རྣམ་པར་སྤོང་བར་བྱེད། ངན་འགྲོར་འགྲོ་བའི་ཆོས་རྣམས་སྤོང་བར་བྱེད། །བདེ་འགྲོར་འགྲོ་བའི་ཆོས་རྣམས་ཡོངས་སུ་ཚོལ་བར་བྱེད། ལྷ་དང་མི་རྣམས་ཀྱང་རྟག་ཏུ་

སྨོན་པར་བྱེད། དེ་བཞིན་གཤེགས་པའི་གསུང་རབ་ལ་རབ་ཏུ་བྱུང་བ་རྙེད་པར་འགྱུར། མྱུར་དུ་ཡོངས་སུ་མྱ་ངན་ལས་འདས་པར་འགྱུར་ཏེ། དེ་བས་ན་རབ་ཏུ་བྱུང་བ་ལ་བརྩོན་པར་བྱའོ། །མཐོང་བའི་ལམ་སྐྱེད་པ་ཞེས་བྱ་བ་ནི། སངས་རྒྱས་བསྟན་ལ་
འཇུག་པར་བྱ། །ཞེས་བྱ་བ་ཡིན་ཏེ། དེ་ལྟར་རབ་ཏུ་བྱུང་བས་མི་ཆོག་གི། སངས་རྒྱས་ཀྱི་བསྟན་པ་འཕགས་པའི་བདེན་པ་རྣམས་ལ་འཇུག་ཅིང་མཐོང་བའི་ལམ་སྐྱེས་ནས། མཐོང་བས་སྤང་བར་བྱ་བའི་ཉོན་མོངས་པ་རྣམས་སྤོངས་ཤིག་པའོ། །བསྒོམ་པའི་ལམ་
སྐྱེད་པ་ཞེས་བྱ་བ་ནི། འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱ། །ཞེས་བྱ་བ་ཡིན་ཏེ། ཇི་ལྟར་གླང་པོ་ཆེས་འདམ་བུའི་ཁྱིམ་བརྫིས་ན་རྡུལ་དུ་བཤིག་སྟེ་མེད་པར་བྱེད་པ་དེ་བཞིན་དུ། མཐོང་བའི་ལམ་གྱི་གོང་དུ་བསྒོམ་པའི་ལམ་བསྐྱེད་ནས། འཁོར་
བའི་ཉེས་དམིགས་འཆི་བདག་གི་བདུད་དང་། དེའི་རྒྱུ་མ་རིག་པ་ལ་སོགས་པ་བཅོམ་སྟེ། མྱ་ངན་ལས་འདས་པ་ཐོབ་པར་བྱའོ་ཞེས་བསྟན་པའོ། །དེ་ལ་འཆི་བདག་སྡེ་རྣམས་ཞེས་བྱ་བ་ལ་འཆི་བདག་ནི་གཙོ་བོ་སྟེ་རྒྱལ་པོ་ལྟ་བུའོ། །སྡེ་རྣམས་ཞེས་བྱ་བ་ནི། སྐྱེ་བ་ལ་
སོགས་པ་ཡན་ལག་བཅུ་གཅིག་པོ་རྣམས་ཏེ། དེ་དག་ནི་འཆི་བདག་དེའི་འཁོར་ཡིན་པས་དེ་དག་ཀྱང་སྤང་བར་བྱའོ་ཞེས་བསྟན་པའོ། །སོ་སོར་ཐར་པ་ཉིད་ལ་ནན་ཏན་བྱེད་པའི་ལེགས་པ་བརྗོད་པ་ཞེས་བྱ་བ་ནི། གང་ཞིག་བར་དུ་བག་ཡོད་པར། །ཆོས་འདུལ་འདི་ལ་
སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་གསུངས་སོ། །དེ་ལ་གང་ཞིག་ཅེས་བྱ་བ་ནི་སུ་ཡང་རུང་བའོ། །བག་ཡོད་པར་ཞེས་བྱ་བ་ནི་བག་མེད་པའི་གཉེན་པོ་སྟེ། མ་ཆགས་པ་ནས་བརྩོན་འགྲུས་ཀྱི་བར་ལ་
གནས་ནས་མི་དགེ་བའི་ཆོས་སྤོང་ཞིང་དེའི་གཉེན་པོ་དགེ་བའི་ཆོས་རྣམས་ཀྱང་བསྒོམ་པའོ། །ཆོས་འདུལ་འདི་ལ་སྤྱོད་འགྱུར་བ། །ཞེས་བྱ་བ་ནི། སོ་སོར་ཐར་པའི་ཆོས་འདུལ་བ་འདི་ཉིད་ལའོ། །སྐྱེ་བའི་འཁོར་བ་ཞེས་བྱ་བ་ནི་ཉེ་བར་ལེན་པའི་ཕུང་པོ་རྣམས་སོ། །རབ་

སྤངས་ཞེས་བྱ་བ་ནི་གཏན་དུའོ། །སྡུག་བསྔལ་ཐ་མར་བྱེད་པ་ནི་སྐྱེ་བའི་འཁོར་བ་སྤང་ཞིང་མྱ་ངན་ལས་འདའ་བ་འཐོབ་པར་འགྱུར་བའི་ཕྱིར་རོ། །སོ་སོར་ཐར་པ་བསྡུས་པའི་དོན་རྣམ་པ་བརྒྱད་དུ་ཕྱེ་བའི་ལྔ་པ་སོ་སོར་ཐར་པ་ཉིད་ཀྱི་འབྲས་བུ་བསྟན་པ་ཞེས་བྱ་བ་བཤད་ཟིན་ཏོ།། །།ད་གསོ་
སྦྱོང་གི་དགོས་པ་བསྟན་པ་ཞེས་བྱ་བ་སྟོན་ཏེ། དེའི་ཕྱིར། ཕན་ཚུན་ཚུལ་ཁྲིམས་བསྲུང་བ་དང་། །བསྟན་པ་འཕེལ་བར་བྱ་བའི་ཕྱིར། །སོ་སོར་ཐར་པ་བཤད་པས་ན། །དགེ་འདུན་གྱིས་ནི་གསོ་སྦྱོང་བྱས། །ཞེས་བྱ་བ་གསུངས་སོ། །ཕན་ཚུན་གཅིག་གི་ཉེས་པ་
ལས་གཅིག་འབྱིན་ཅིང་ཚུལ་ཁྲིམས་བསྲུང་བ་དང་། དེ་བཞིན་གཤེགས་པ་རྣམས་ཀྱི་བསྟན་པ་འཇིག་རྟེན་ན་ཡུན་རིང་དུ་གནས་ཤིང་རྒྱས་པར་བྱ་བའི་ཕྱིར། ཟླ་བ་ཕྱེད་ཕྱེད་ཅིང་དགེ་འདུན་འདུས་ཏེ་སོ་སོར་ཐར་པའི་མདོ་བཏོན་ནས་གསོ་སྦྱོ