Luận tạng Tây Tạng (Tengyur) — Tập 62

ཾ་ཧུ་ལུ་ཧུ་ལུ་ཧཱུྃ་ཕཊ། དེ་ནས་རྡོ་རྗེ་བསྡམས་པས་རྡོ་རྗེའི་དྲ་བ་བྱ་སྟེ། རྡོ་རྗེ་བསྡམས་པ་ནི་རྡོ་རྗེ་བསྡམས་པའི་ཕྱག་རྒྱའོ། །སྔགས་ནི་ཨོཾ་བཛྲ་བནྡྷ། དེ་ནས་དོགས་
པ་མེད་པར་གྱུར་པར་བྱས་ནས་མཆོད་པ་བྱ་སྟེ། རྡོ་རྗེ་ཐལ་མོ་བརྐྱང་ནས་ལུས་ཐམས་ཅད་ཀྱིས་ཕྱག་བྱའོ། །ཨོཾ་སརྦྦ་ཏ་ཐཱ་ག་ཏ་པཱུ་ཛོ་པསྠ་ནཱ་ཡ། ཨཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་སྭ་མཱཾ། དེ་ནས་དེ་བཞིན་དུ་གནས་ལ་རྡོ་རྗེ་ཐལ་མོ་སྙིང་གར་གཞག་

སྟེ་དཔྲལ་བས་ཕྱག་བྱ་སྟེ། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། དེ་ནས་རྡོ་རྗེ་ཐལ་མོ་སྤྱི་བོར་བཞག་ལ་ཁས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ན་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨྨ་པྲ་བརྟ་
ཡ་མཱཾ། དེ་ནས་དེ་བཞིན་དུ་རྡོ་རྗེ་ཐལ་མོ་སྤྱི་བོ་ནས་ཕབ་སྟེ། སྙིང་གར་བཞག་ནས་མགོས་ཕྱག་བྱ་སྟེ། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨྨ་ཎི་ཨཱཏྨ་ནཱཾ་ནིརྱཱ་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་ཀརྨྨ་ཀུ་རུ་མཱཾ། དེས་ནི་མཆོད་པ་བྱེ་བ་བྱས་པར་འགྱུར་རོ། །ལག་པ་གཉིས་རྡོ་རྗེ་བསྡམས་པ་བཅིངས་
ལ། པུས་མོ་གཉིས་ས་ལ་བཙུགས་ཏེ། སྤྱི་བོ་ས་ལ་གཏུགས་པ་ནི་ཕྱག་བྱ་བའི་ཕྱག་རྒྱ་སྟེ། སྔགས་ནི་ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་པཱ་ད་བནྡྷ་ནཾ་ཀ་རོ་མི་ཞེས་བྱའོ། །བདུག་སྤོས་ཀྱི་ཕྱག་རྒྱ་བཅིངས་ལ། ལྷའི་བདུག་པའི་མཆོད་པ་རྣམས་དྲན་བཞིན་དུ་སྔགས་འདི་བརྗོད་དོ། །
ཨོཾ་སརྦ་ཏ་ཐཱ་ག་ཏ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་མེ་ཏོག་གི་ཕྱག་རྒྱ་བཅིངས་ལ། ཐང་ལས་སྐྱེས་པ་དང་ཆུ་ལས་སྐྱེས་པའི་མེ་ཏོག་གི་སྤྲིན་རྣམས་སྤྲོས་ཏེ། ཨོཾ་སརྦྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་མར་མེའི་ཕྱག་རྒྱ་བཅིངས་ལ། ཉི་
མའི་སྣང་བ་དབུལ་བར་བྱ་སྟེ། ཨོཾ་སརྦྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བྱུག་པའི་ཕྱག་རྒྱ་བཅིངས་ལ། ལྷ་ལ་སོགས་པའི་སྤོས་ཀྱི་སྤྲིན་རྣམས་དབུལ་བར་བྱ་སྟེ། ཨོཾ་སརྦ་ཏ་ཐཱ་ག་ཏ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་རིན་པོ་ཆེའི་བྱེ་
བྲག་ལ་སོགས་པ་རྣམས་དབུལ་ཏེ། ཨོཾ་སརྦྦ་ཏ་ཐཱ་ག་ཏ་བོ་དྷྱཾ་ག་རཏྣཱ་ལཾ་ཀཱ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་རྩེད་མོའི་བདེ་བ་ཐམས་ཅད་དབུལ་ཏེ། ཨོཾ་སརྦ་ཏ་ཐཱ་ག་ཏ་ཧཱ་སྱ་ལཱ་སྱ་ཀྲྀ་ཌ་ར་ཏི་སཽ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་གོས་ཀྱི་མཆོད་
པ་རྣམས་དབུལ་ཏེ། ཨོཾ་སརྦྦཏ་ཐཱ་ག་ཏ་བོ་དྷྱཱ་ལཾ་ཀ་ར་བསྟྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་ཏིང་ངེ་འཛིན་གྱི་ཕྱག་རྒྱ་བཅིངས་ཏེ། སེམས་ཅན་ཐམས་ཅད་ཀྱི་ཚངས་པ་ཆེན་པོའི་གནས་བཞི་ཐོབ་པར་གྱུར་ཅིག་ཅེས་བརྗོད་ལ་དེ་དབུལ་ཏེ། ཨོཾ་སརྦ་ཏ་ཐཱ་ག་ཏ་ཙ་ཏུར་མ་ཧཱ་

བྲཧྨ་བི་ཧ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་རྡོ་རྗེ་བསྙེམས་པའི་ཕྱག་རྒྱ་བཅིངས་ཏེ། སེམས་ཅན་ཐམས་ཅད་ཀྱང་བྱང་ཆུབ་ཀྱི་སེམས་ལ་གནས་པར་གྱུར་ཅིག་ཅེས་བརྗོད་ནས་དེ་དབུལ་ཏེ། ཨོཾ་སརྦྦ་ཏ་ཐཱ་ག་ཏ་བོ་དྷི་ཙིཏྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་
མ་ཡེ་ཧཱུྃ། སེམས་ཅན་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་དང་ལྡན་པར་གྱུར་ཅིག་ཅེས་བརྗོད་ལ་དེ་དབུལ་ཏེ། ཨོཾ་སརྦ་ཏ་ཐཱ་ག་ཏ་བཛྲོད་བྷ་བཱ་དཱ་ན་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། སྦྱིན་པའི་ཕ་རོལ་ཏུ་ཕྱིན་པའི་ཕྱག་རྒྱ་ནི་རྡོ་རྗེ་སྒེག་མོའི་ཕྱག་རྒྱའོ། །སེམས་ཅན་
ཐམས་ཅད་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པར་གྱུར་ཅིག་ཅེས་བརྗོད་ལ་དེ་དབུལ་ཏེ། ཨོཾ་སརྦ་ཏ་ཐཱ་ག་ཏ་མ་ཧཱ་བོ་དྷ་དྱ་ཧ་ར་ཤཱི་ལ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཕྱག་རྒྱ་ནི་རྡོ་རྗེ་ཕྲེང་བ་མའི་ཕྱག་རྒྱའོ། །སེམས་ཅན་
ཐམས་ཅད་བཟོད་པའི་ཕ་རོལ་ཏུ་ཕྱིན་པ་དང་ལྡན་པར་གྱུར་ཅིག་ཅེས་བརྗོད་ལ་དེ་དབུལ་ཏེ། ཨོཾ་སརྦྦ་ཏ་ཐཱ་ག་ཏ་དྷརྨྨ་ཨ་བ་བོ་དྷི་ཀྵན་ཏི་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བཟོད་པའི་ཕ་རོལ་ཏུ་ཕྱིན་པའི་ཕྱག་རྒྱ་ནི་རྡོ་རྗེ་གླུ་མཁན་མའི་ཕྱག་རྒྱའོ། །སེམས་ཅན་ཐམས་ཅད་
འཁོར་བ་ཡངས་སུ་སྤོང་བའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པར་གྱུར་ཅིག་ཅེས་བརྗོད་ལ་དེ་དབུལ་ཏེ། ཨོཾ་སརྦ་ཏ་ཐཱ་ག་ཏ་སན་སཱ་རཱ་པཱ་རི་ཏྱཾ་ཀ་བཱིརྱ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཕྱག་རྒྱ་ནི་རྡོ་རྗེ་གར་མཁན་
མའི་ཕྱག་རྒྱའོ། །སེམས་ཅན་ཐམས་ཅད་བསམ་གཏན་བཞི་དང་ལྡན་ཞིང་སེམས་ཞི་བར་གྱུར་ཅིག་ཅེས་བརྗོད་ལ། བདག་གིས་བསམ་གཏན་སངས་རྒྱས་ཐམས་ཅད་ལ་དབུལ་ཏེ། ཨོཾ་སརྦ་ཏ་ཐཱ་ག་ཏ་སཽ་ཁྱ་བི་ཧཱ་ར་དྱ་ན་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བསམ་
གཏན་གྱི་ཕ་རོལ་ཏུ་ཕྱིན་པའི་ཕྱག་རྒྱ་ནི་རྡོ་རྗེ་མེ་ཏོག་མའི་ཕྱག་རྒྱའོ། །སེམས་ཅན་ཐམས་ཅད་ཉོན་མོངས་པ་དང་བྲལ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་ཁོང་དུ་ཆུད་པ་དང་ལྡན་པར་གྱུར་ཅིག་ཅེས་བརྗོད་ལ། སངས་རྒྱས་ཐམས་ཅད་ལ་མཆོད་པའི་ཕྱིར་དེ་དྲན་པར་བྱ་སྟེ།

ཨོཾ་སརྦ་ཏ་ཐཱ་ག་ཏ་ཀླེ་ཤཙྪེ་ད་ས་མནྟ་པྲཛྙཱ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཤེས་རབ་ཀྱི་ཕ་རོལ་ཏུ་ཕྱིན་པའི་ཕྱག་རྒྱ་ནི་རྡོ་རྗེ་བདུག་པ་མའི་ཕྱག་རྒྱའོ། །བདག་ཉིད་འཇིག་རྟེན་གྱི་ཁམས་ཐམས་ཅད་ཀྱི་ཚད་དང་མཉམ་པར་བསམས་ལ་བཏུད་པར་བྱ་སྟེ། ཨོཾ་སརྦ་ཏ་ཐཱ་ག་
ཏ་ཀཱ་ཡ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། འཇིག་རྟེན་གྱི་ཁམས་ཐམས་ཅད་ཀྱི་ཚད་དང་མཉམ་པའི་ལྕེ་བསམས་ལ་བསྟོད་པས་མཆོད་པ་བྱ་སྟེ། ཨོཾ་སརྦ་ཏ་ཐཱ་ག་ཏ་བཱཀ་པྲ་བརྟ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བསོད་ནམས་དེ་རྣམས་བསྡུས་ལ་སེམས་
ཅན་ཐམས་ཅད་ལ་ཉེ་བར་བསྔོ་བར་བྱ་སྟེ། ཨོཾ་སརྦྦ་ཏ་ཐཱ་ག་ཏ་ཙིཏྟ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། མཆོད་པ་ཉི་ཤུ་རྫོགས་སོ། །དེ་ལྟར་མཆོད་པ་བྱས་ནས་དམ་ཚིག་དང་སྡོམ་པ་བླང་བར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་
ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་བྱས་པའི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་
བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། དགེ་བའི་ཆོས་ནི་བསྡུ་བ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །དེ་བཞིན་བརྟན་པར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་
མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤོང་ངོ་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་
ཚིག་ཡིད་དུ་འོང་བ་ལ། །ཉིན་རེ་ཞིང་ནི་དུས་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དམ་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་

ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་ནས་ནི། །སེམས་ཅན་རྣམས་ཀྱི་དོན་གྱི་ཕྱིར། །བདག་གིས་སྡོམ་པ་
མ་ལུས་གཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་གཞག་བགྱི། །སྡོམ་པའི་ཆོ་གའོ། །དེ་ནས་རྡོ་རྗེ་སློབ་དཔོན་གྱིས། དམ་ཚིག་མཆོག་གི་ཕྱག་རྒྱ་
ནི། །ཆོ་ག་བཞིན་བཅིངས་ཞུགས་ནས་ཀྱང་། །སྥོ་ཊའི་ཕྱག་རྒྱས་དབབ་པར་བགྱི། །དེ་ལ་དམ་ཚིག་མཆོག་གི་ཕྱག་རྒྱ་ནི་འདི་ཡིན་ཏེ། ཟླ་བ་ལྟ་བུའི་ལག་གཉིས་ཀྱི། །གུང་མོ་བཏང་བར་གྱུར་པ་ཡི། །མཐེ་བོ་མཐེའུ་ཆུང་སོ་སོར་བསྒྲེང་། །སེམས་དཔའི་རྡོ་རྗེ་རྡོ་རྗེ་བསྒྲེང་། །ཤར་
ཕྱོགས་ཀྱི་སྒོར་རྡོ་རྗེ་ལྕགས་ཀྱུའི་ཕྱག་རྒྱ་བཅིངས་ལ། གསང་སྔགས་འདི་བརྗོད་པར་བྱའོ། །བཛྲ་ཨཾ་ཀུ་ཤ་ཛཿ། ལྷོ་ཕྱོགས་ཀྱི་སྒོར་རྡོ་རྗེ་ཞགས་པས་བསྐུལ་བར་བྱ་སྟེ། བཛྲ་པཱ་ཤ་ཧཱུྃ། ནུབ་ཕྱོགས་ཀྱི་སྒོར་རྡོ་རྗེ་ལྕགས་སྒྲོག་རྗེས་སུ་དྲན་པར་བྱ་སྟེ། བཛྲ་སྥོ་ཊ་བཾ། བྱང་
ཕྱོགས་ཀྱི་སྒོར་རྡོ་རྗེ་དྲིལ་བུ་བརྗོད་པར་བྱ་སྟེ། བཛྲ་ཨཱ་བེ་ཤ་ཨཿ། རྡོ་རྗེ་འབེབས་པ་རྗེས་སུ་དྲན་པས་བསྐོར་བ་ལན་གསུམ་བྱའོ། །ཨོཾ་བཛྲ་བེ་གཱ་ཀྲ་མ་ཧཱུྃ། རྡོ་རྗེ་སེམས་མའི་སྙིང་པོ་ནི། ས་མ་ཡ་སྟྭཾ་ཨོཾ་ས་མ་ཡ་ཧཱུྃ། སྙིང་པོ་འདིས་སྦྱིན་སྲེག་གི་ཁང་པར་རྟག་ཏུ་འཇུག་པར་བྱའོ། །
ཨོཾ་ས་མ་ཡ་པྲ་བེ་ཤ་ཡ་མི་ཧཱུྃ། ཨོཾ་པདྨ་སྥོ་ཊ་ཨ་དྷི་ཏིཥྛ་སྭ་བ་ཨ། གསང་སྔགས་འདི་དང་། རྡོ་རྗེ་སེམས་མའི་ཕྱག་རྒྱ་བཅིང་བ་སྦྱར་བ་བྱས་ལ་ཡེ་ཤེས་བསྐྱེད་པར་བྱའོ། །ཨ་ཞེས་བྱ་བ་ལན་བརྒྱ་བཟླས་ན་བབ་པར་འགྱུར་རོ། །ཐེག་པ་ཆེན་པོ་མངོན་པར་རྟོགས་པ་ཡང་ཅི་འདོད་
པར་བཟླས་པར་བྱའོ། །གསོལ་བ་བཏབ་ལ། ཕྱག་རྒྱ་དེ་སྙིང་གར་བཅིངས་ནས། སྙིང་པོ་འདིས་དགྲོལ་བར་བྱའོ། །ཨོཾ་ཏིཥྛ་བཛྲ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཤཱ་ཤྭ་ཏོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ།

སརྦ་ཀརྨྨ་སུ་ཙ་མེ་ཙི་ཏྟཾ་ཤྲེ་ཡཿཀུ་རུ་ཧཱུྃ་ཧ་ཧ་ཧ་ཧ་ཧོཿ། ད་ནས་ཕྲེང་བ་དེ་ཐབ་ཁུང་དུ་སྙིང་པོ་འདིས་དོར་བར་བྱའོ། །ཨོཾ་པྲ་ཏཱིཙྪ་བཛྲ་ཧོཿདེ་ནས་ཕྲེང་བ་དེ་རང་གི་མགོ་ལ་སྙིང་པོ་འདིས་བཅིང་བར་བྱའོ། །པྲ་ཏཱི་གྲྀཧྞ་སྭཱ་མི་མཾ་སཏྭ་མཧཱ་བ་ལ། དེ་ནས་སྙིང་པོ་འདིས་རང་གི་གདོང་གཡོགས་དགྲོལ་
བར་བྱའོ། །ཨོཾ་བཛྲ་སཏྭ་སྭ་ཡཾ་ཏེ་དྷྱ། ཙཀྵུ་ཨུདྡྷ་ཊ་ན་ཏ་དྷ་བ་ར། ཨུངྒྷ་ཊ་ཡ་ཏེ་སརྦྦ་ཀྵོ་བཛྲ་ཙཀྵུར་ཨ་ནུཏྟ་ར་མ་ཧེ་བཛྲ་པཱ་ཤྱ་དེ་ནས་རྡོ་རྗེས་བྱིན་གྱིས་བརླབས་པའི་བུམ་པའི་སྤོས་ཆུ་དང་། སྙིང་པོ་འདིས་བདག་ཉིད་དབང་བསྐུར་བར་བྱའོ། །ཨོཾ་བཛྲ་ཨ་བྷི་ཥིཉྩ། དེ་ནས་རྡོ་རྗེ་དབྱིངས་
ཀྱི་དབང་ཕྱུག་མ་ལ་སོགས་པའི་སངས་རྒྱས་ཀྱི་ཕྱག་རྒྱ་རྣམས་ཀྱིས་བདག་ཉིད་དབང་བསྐུར་བར་བྱའོ། །དེ་ལ་དེ་རྣམས་ཀྱི་ཕྱག་རྒྱ་ནི་འདི་ཡིན་ཏེ། མཐེ་བོ་གཉིས་ནི་བསྣོལ་ནས་ནི། །མཛུབ་མོ་རྩེ་མོ་བཀུག་ནས་ནི། །གུང་མོ་མཉམ་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་
མོར་བཤད། །དེ་ཉིད་གུང་མོ་རྡོ་རྗེར་བྱ། །གུང་མོ་གཉིས་ནི་ནོར་བུར་བྱ། །པདྨོ་སྲིན་ལག་མཐེའུ་ཆུང་གུང་། ལག་པའི་སོར་མོ་རབ་ཏུ་བརྐྱང་། །དེ་ལ་དེ་རྣམས་ཀྱི་རིག་པ་ནི་འདི་ཡིན་ཏེ། ཨོཾ་བཛྲ་དྷཱ་ཏི་ཤྭ་རི་ཧཱུྃ། ཨོཾ་བཛྲ་བཛྲི་ནི་ཧཱུྃ། ཨོཾ་རཏྣ་བཛྲི་ནི་ཧཱུྃ། ཨོཾ་དྷརྨྨ་བཛྲི་ནི་
ཧཱུྃ། ཨོཾ་ཀརྨ་བཛྲི་ནི་ཧཱུྃ། དེ་ནས་རང་གི་རྡོ་རྗེ་ལག་ཏུ་བཞག་ནས། འདི་སྐད་ཅེས་བརྗོད་པར་བྱའོ། །སངས་རྒྱས་རྣམས་ཀྱི་རྡོ་རྗེའི་དབང་། །དེ་རིང་ཁྱོད་ནི་བསྐུར་བར་འགྱུར། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་ཏྭཾ། ཨ་བྷི་
ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། དེ་ནས་སྙིང་པོ་འདིས་རྡོ་རྗེ་མིང་གི་དབང་བསྐུར་བས་དབང་བསྐུར་རོ། །ཨོཾ་བཛྲ་སཏྭ་ཏྭཾ་མ་ཧཱ་ཨ་བྷི་ཥིཉྩ་མཱཾ་བཛྲ་ན་མ་ཨ་བྷི་ཥེ་ཀ་ཏ་ཧེ་བཛྲ་ནཱ་མ། དེ་ནས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་རྡོ་རྗེའི་བརྟུལ་ཞུགས་བླང་བར་བྱའོ། །འདི་ནི་
སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡཱ་མི། བཛྲ་སཏྭ་ཧི་ཧི་ཧི་ཧི་ཧཱུྃ། བདག་ལ་བྱིན་གྱིས་བརླབ་ལ་སོགས། །ཇི་

ལྟ་བར་ནི་བཀའ་ནོད་དོ། །དེ་ལྟར་བགྱིས་ནས་བདག་མིང་བརྗོད། །དེ་ནས་རྡོ་རྗེ་བསྒྲུབ་པར་བགྱི། །ཞེས་གང་གསུངས་པ་དེ་སླར་ཡང་བཤད་པ་དེ་དག་ཡིན་ནོ། །རྡོ་རྗེ་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །སེ་གོལ་མང་པོ་བརྡབ་
བགྱིས་ལ། །སངས་རྒྱས་ཐམས་ཅད་བསྡུ་བར་བགྱི། །ཛཿཧཱུྃ་བཾ་ཧོཿ། སྙིང་པོ་འདི་ལན་ཉི་ཤུ་རྩ་གཅིག་བཟླས་ན། དེས་སངས་རྒྱས་ཐམས་ཅད་སྲས་དང་བཅས་པ་དང་། འཁོར་གྱི་དཀྱིལ་འཁོར་དང་བཅས་པ་གཤེགས་པར་འགྱུར་ན། གཞན་རྣམས་ལྟ་སྨོས་ཀྱང་ཅི་དགོས།
དེ་ནས་རྡོ་རྗེ་སེམས་དཔའ་ཡི། །ཕྱག་རྒྱ་ཆེན་པོ་སྒོམ་བྱེད་ཅིང་། །མིང་བརྒྱ་རྩ་བརྒྱད་དམ་པ་ནི། །ལན་ཅིག་རབ་ཏུ་བརྗོད་པར་བགྱི། །དེ་ནས་སྒོ་རྣམས་ཐམས་ཅད་དུ། །ལྕགས་ཀྱུ་ལ་སོགས་ལས་བགྱིས་ནས། །ལས་ཆེན་མཆོག་གི་ཕྱག་རྒྱ་ཡིན། །དམ་ཚིག་རྣམས་ནི་
གཞུག་པར་བགྱི། །དམ་ཚིག་མཆོག་གི་ཕྱག་རྒྱ་དང་། །སེམས་དཔའ་རྡོ་རྗེ་ལ་སོགས་པས། །དེ་ལྟར་སེམས་དཔའ་ཆེན་པོ་བསྒྲུབ། །ཛཿཧཱུཾ་བཾ་ཧོཿ། ཞེས་བརྗོད་ཅིང་། དེ་ནས་སངས་རྒྱས་ལ་སོགས་པ། །སེམས་དཔའ་ཆེན་པོ་ཀུན་བསྡུ་བར། །སྤྱན་དྲངས་ནས་ནི་རབ་ཏུ་
བཅུག །བཅིངས་ནས་དེ་ཡི་དབང་དུ་འགྱུར། །དེ་ནས་བདག་ཉིད་ཆེན་པོ་རྣམས། །གསང་བའི་མཆོད་པས་མཉེས་བགྱིས་ལ། །ཐམས་ཅད་དོན་ཀུན་འགྲུབ་པའི་ཕྱིར། །ཐམས་ཅད་མཛོད་ཅེས་གསོལ་བ་བགྱི། །དེ་ནས་སྦྱིན་སྲེག་གི་ཡོ་བྱད་ཐམས་ཅད་རྡོ་རྗེའི་རྩེ་མོའི་
སྔགས་ཀྱིས་བསངས་ལ་གཡས་ཕྱོགས་སུ་གཞག་གོ། །མཆོད་ཡོན་གྱི་སྣོད་ནི་གཡོན་དུ་བཞག་ནས། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ཐམས་ཅད་ཀྱིས་ཡེ་ཤེས་ཀྱི་ངོ་བོ་ཉིད་ཀྱི་གསང་སྔགས་ནི་འདིས་དགང་བླུགས་གསུམ་དབུལ་ལོ། །ཨོཾ་བཛྲ་
ཛྭ་ལ་ཨགྣེ། པྲ་དཱིཔྟ་ཨཱ་ཀཪྵ་ཡ་སརྦྦ་ཏ་ཐཱ་ག་ཏ་མ་ཧཱ་ས་མ་ཡ་བཛྲ་ཧཱུྃ་ཛཿདེ་ནས་ཞི་བའི་སྦྱིན་སྲེག་བྱ་སྟེ། བཅོམ་ལྡན་འདས་རྣམ་པར་སྣང་མཛད་ཐབ་ཀྱི་དབུས་སུ་ཇི་ལྟ་བ་བཞིན་དུ་བསྒོམས་ལ། བྱང་ཆུབ་མཆོག་གི་ཕྱག་རྒྱ་བཅིངས་ནས། ཏིལ་གྱི་སྲེག་བླུགས་

དབུལ་ལོ། །ཡམ་ཤིང་དམར་པོ་རྣམས་ཀྱི་མེ། །རབ་སྦར་རྡོ་རྗེ་ཁྲོ་བོ་ཡི། །མཉམ་པར་གཞག་པར་སྙོམས་ཞུགས་པར། །ཏིལ་བསྲེགས་པས་ནི་སྡིག་བསྲེགས་ཤིང་། །གསང་སྔགས་ནི་འདིས་བྱ་སྟེ། ཨོཾ་སརྦྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཁྱིམ་རྒྱས་པར་འདོད་པས་
བཅོམ་ལྡན་འདས་རིན་ཆེན་འབྱུང་ལྡན་ཐབ་ཀྱི་དབུས་སུ་བསྒོམས་ལ། མར་གྱི་དགང་བླུགས་གསུམ་དབུལ་ལོ། །ཡམ་ཤིང་དེ་དག་ཉིད་ཀྱིས་ནི། །མེ་ནི་རབ་ཏུ་སྤར་ནས་ཀྱང་། །རྟག་ཏུ་འབྲས་ནི་སྲེག་བྱས་ན། །གདོན་མི་ཟ་བར་ཁྱིམ་རྒྱས་འགྱུར། །གསང་
སྔགས་ནི་འདིས་བྱ་སྟེ། ཨོཾ་བཛྲ་པུཥྚཱ་ཡེ་སྭཱ་ཧཱ། དེ་ནས་ཚེ་རིང་བར་འདོད་པས། བཅོམ་ལྡན་འདས་ཚེ་དཔག་ཏུ་མེད་པ་ཐབ་ཀྱི་དབུས་སུ་བསམས་ལ། མར་གྱི་དགང་བླུགས་གསུམ་དབུལ་ལོ། །ཡམ་ཤིང་དམར་པོ་རྣམས་ཀྱིས་ཀྱང་། །མཁས་པས་རྟག་ཏུ་མེ་སྦར་
ཏེ། དཱུར་བའི་མྱུ་གུ་མར་བཅས་པས། །སྦྱིན་སྲེག་བྱས་ན་ཚེ་འཕེལ་འགྱུར། །གསང་སྔགས་ནི་འདིས་བྱ་སྟེ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། དེ་ནས་བདག་གམ་གཞན་རྣམས་བསྲུང་བར་འདོད་པས། བཅོམ་ལྡན་འདས་དོན་ཡོད་གྲུབ་པ་ཐབ་ཀྱི་དབུས་སུ་བསྒོམས་ལ།
ཏིལ་མར་གྱི་དགངས་བླུགས་གསུམ་དབུལ་ལོ། །ཡམ་ཤིང་དེ་དག་ཉིད་ཀྱིས་ནི། །མེ་ནི་རབ་ཏུ་སྤར་བྱས་ལ། །ཀུ་ཤའི་ཡལ་ག་འབྲུ་མར་གྱིས། །སྦྱིན་སྲེག་བྱས་ན་ངེས་པར་བསྲུང་། གསང་སྔགས་ནི་འདིས་བྱ་སྟེ། ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། དེ་ནས་རང་གི་
ལྷ་ཐབ་ཀྱི་དབུས་སུ་བསམས་ལ་ཏིལ་དང་འབྲས་དང་མར་དང་དཱུར་བ་དང་ཏིལ་མར་དང་། ཀུ་ཤའི་མྱུ་གུ་ལ་སོགས་པ་དབུལ་བ་དང་། དགང་བླུགས་དང་པོ་དང་རྫོགས་ཁར་དབུལ་བར་བྱའོ། །ཞི་བ་ཕལ་ཆེར་སྲོད་ལ་བྱའོ། །རྒྱས་པ་སྔ་དྲོ་བྱ་བ་ཡིན། །མངོན་སྤྱོད་ཉི་མ་གུང་ལ་སྟེ།
སྒྲུབ་པ་པོས་ནི་མདོར་བསྡུས་པའོ། །ཞི་ལ་ཁ་དོག་དཀར་པོ་སྟེ། །རྒྱས་ལ་སེར་པོར་སྣང་བ་ཡིན། །རྗེས་སུ་ཆགས་ལ་ཁ་དོག་དམར། །མངོན་སྤྱོད་ལ་ནི་སྔོ་དང་གནག །དེའི་དངོས་གྲུབ་ཀྱི་མཚན་མ་ནི་འདི་དག་ཡིན་ཏེ། རྡོ་རྗེ་ལྕགས་ཀྱུ་མདའ་དགུ་དང་། །རིན་ཆེན་ཉི་མ་རྒྱལ་

མཚན་འཛུམ། །པདྨ་རལ་གྲི་འཁོར་ལོ་གཟུང་། །ལས་དང་གོ་ཆ་འཇིགས་བྱེད་བཅང་། །ཞེས་བྱ་བ་ལ་སོགས་པ་དང་། །དཱུར་བ་དང་དྲིའི་མཚན་མར་གྱུར་པ་རྣམས་ཏེ་དེ་རྣམ་པར་མཐོང་ནས། དགང་བླུགས་ཕུལ་ལ་སྦྱིན་སྲེག་བྱའོ། །སྦྱིན་སྲེག་གི་ལྷ་རྣམས་ཚིམ་པར་
བྱས་ནས་བྱ་བ་ཐམས་ཅད་འགྲུབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་བས་ན་ནུས་པ་མེད་པས་ཀྱང་ཅི་ནུས་པས་སྦྱིན་སྲེག་བྱའོ། །ནུས་པ་མེད་པའི་ཕྱིར་བརྗོད་པར་བྱ་སྟེ། རང་གི་ཁང་པའི་བྱང་ཤར་གྱི་ཕྱོགས་སུ་ཐབ་ཁུང་ཟུར་བཞིའམ། ཟླུམ་
པོར་ཁྲུ་གང་ཙམ་ལ་ཟབས་སུ་མཐོ་གང་ཙམ་བརྐོས་ཏེ་ཐབ་ཀྱི་དབུས་སུ་རྡོ་རྗེ་རྩེ་ལྔ་པ་སོར་བརྒྱད་པའི་ཚད་ལ་དཔངས་སུ་སོར་བཞི་པ་བཞག་ཐབ་ཀྱི་ངོས་ལ་དཔངས་སུ་སོར་བཞི་པའི་གྲྭ་བཞིར་རྡོ་རྗེས་མཚན་པར་བྱའོ། །དེ་ལ་ཕྱག་རྒྱ་མདོར་བསྡུས་པ་ནི་འདི་ཡིན་ཏེ། ཐལ་མོ་
དམ་དུ་སྦྱར་བ་ལས། །སོར་མོ་ཐམས་ཅད་བསྣོལ་བ་ནི། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་ཐལ་མོའི་ཕྱག་རྒྱའོ། །རྡོ་རྗེ་འཆང་ཆེན་པོ་ལ་སོགས་པའི་ཕྱག་རྒྱ་ཡང་དམ་ཚིག་གི་ཕྱག་རྒྱའི་རིམ་པ་རྣམས་ཉེ་བར་བསྟན་ཏེ། རྡོ་རྗེ་བཅིང་བས་ཕྱག་རྒྱ་ཐམས་ཅད་བཅིང་ངོ་།
རྡོ་རྗེ་ཐལ་མོའི་ཕྱག་རྒྱ་དེ་ཉིད་བཅིངས་ནས། རབ་ཏུ་བསྡམས་པ་ནི་རྡོ་རྗེ་བསྡམས་པ་སྟེ་སྙིང་གར་དགྲོལ་ལོ། །བཛྲ་བྷནྡྷ་ཏྲ་ཊ། དེ་ནས་ཕྱག་རྒྱ་ཐམས་ཅད་བཅིངས་ལ་རང་ལ་བྱིན་གྱིས་བརླབ་པ་ནས་ཇི་སྲིད་རྡོ་རྗེ་རྗེས་སུ་དྲན་པ་དང་དགུག་པ་ལ་སོགས་པ་བསྒྲུབ་པའི་བྱེ་བྲག་རྣམས་རང་གི་
ལུས་དང་ངག་ཡིད་རྡོ་རྗེ་ལ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་པར་འགྱུར་རོ། །དེ་ནས་རྡོ་རྗེ་འབེབས་པའི་ཕྱག་རྒྱ་བཅིངས་ལ་སྙིང་པོ་འདི་བརྗོད་པར་བྱའོ། །ཨ་རྡོ་རྗེ་ཁུ་ཚུར་གྱིས་མཛུབ་མོ་སྦྱར་བ་ནི་རྡོ་རྗེ་འབེབས་པའི་དམ་ཚིག་གི་ཕྱག་རྒྱའོ། །
དེ་ནས་ཞུགས་ནས་རང་ལ་བྱིན་གྱིས་བརླབ་པ་ནས་ཇི་སྲིད་སྒྲུབ་པའི་ཁྱད་པར་གྱིས་མཛའ་བོ་ཉིད་དུ་གནས་པར་འགྱུར་རོ། །དེ་ནས་དམ་ཚིག་ཆེན་པོའི་སེམས་དཔའ་རྗེས་སུ་དྲན་ལ། སྙིང་པོ་འདི་བརྗོད་པར་བྱའོ། །ས་མ་ཡ་སཏྭ་ཧཾ། འདིས་ནི་རྡོ་རྗེ་རྒྱལ་པོ་ལ་སོགས་པའི་རྡོ་རྗེའི་

ཕྱག་རྒྱས་དམ་ཚིག་ཆེན་པོའི་སེམས་དཔའ་དང་གཅིག་ཏུ་གྱུར་པ་ཉིད་དུ་འགྱུར་རོ། །ཕྱག་རྒྱ་ཐམས་ཅད་ཀྱི་ཆོ་ག་རྒྱས་པའོ། །དེ་ནས་ཐུན་མོང་གི་སྒྲུབ་པའི་ཆོ་ག་རྒྱས་པ་ནི་འདི་ཡིན་ཏེ། བཅོམ་ལྡན་འདས་དམ་ཚིག་སེམས་དཔའ་ཆེན་པོ་དེ་ཉིད་རང་གི་ལུས་ལ་བརྟེན་ཅིང་ཟླ་བའི་
དཀྱིལ་འཁོར་ཐམས་ཅད་ལ་བཞུགས་ཤིང་། རྡོ་རྗེ་རྒྱལ་པོ་ལ་སོགས་པའི་སྐུ་བདག་ཉིད་དུ་སྙིང་པོ་འདིས་བསྒོམ་པར་བྱའོ། །ས་མ་ཡ་ཧཾ། དེ་ནས་རང་གི་ཕྱག་རྒྱའི་སེམས་དཔར་བདག་ཉིད་རྣམ་པར་བསམས་ལ་སྔགས་འདིས་དེར་བྱིན་གྱིས་བརླབ་པར་བྱའོ། །ས་མ་ཡ་
སཏྭ་ཨ་དྷི་ཏིཥྛ་སྭ་མཱཾ། དེ་ནས་རང་གི་ལྷ་སྔ་མ་བཞིན་དུ་ཐབ་ཀྱི་དབུས་སུ་བསམས་ལ་སྦྱིན་སྲེག་ཇི་ལྟ་བ་བཞིན་དུ་བྱ་སྟེ། མཆོད་ནས་སྙིང་པོ་འདིས་གཤེགས་སུ་གསོལ་ལོ། །བཛྲ་མུཿདེ་ནས་རང་གི་སྙིང་ག་ལས་བྱུང་བའི་རྡོ་རྗེ་རིན་ཆེན་གྱི་ཕྱག་རྒྱ་རང་གི་དབང་བསྐུར་བའི་
གནས་ན་གནས་པས་དབང་བསྐུར་ལ་མཛུབ་མོ་གཉིས་ཀྱི་ཕྲེང་བ་བཅིངས་ཤིང་དེ་བཞིན་དུ་སྙིང་པོ་འདིས་བཅིང་བར་བྱའོ། །ཨོཾ་བཛྲ་རཏྣ་ཨ་བྷི་ཥིཉྩ་སརྦྦ་མུ་དྲ་མཻ་ཏྲི་ཌྷི་ཀུ་རུ་བ་ར་ཀ་པ་ཙེ་ན་བཾ། རིན་ཆེན་སེམས་མའི་ཕྱག་རྒྱ་ནི་འདི་ཡིན་ཏེ། རིན་ཆེན་རྡོ་རྗེ་ལས་མཐེ་བོ་མཉམ་སྟེ་
མཛུབ་མོ་བཀུག་པ་དང་རྩེ་སྦྱར་བའོ། །དེ་ནས་ཡང་གོ་ཆའི་མཐར་ཕྲེང་བ་བཅིང་བ་དེ་བཀྲོལ་ལ་སྙིང་པོ་འདི་དང་མཉམ་པའི་ཐལ་མོས་མཉེས་པར་བྱའོ། །བཛྲ་ཏུ་ཥྱ་ཧོཿ། གོ་ཆ་འདིས་ཕྱག་རྒྱ་དགྲོལ་བ་དང་། དབང་བསྐུར་བ་བཅིང་ཞིང་མཉེས་པར་བྱ་བའམ། རྡོ་རྗེ་སེམས་
དཔས་ཀྱང་རྡོ་རྗེ་ཉིད་དུ་ཉེ་བར་དགྲོལ་བར་འགྱུར་རོ། །དེ་ནས་གསང་བའི་མཆོད་པ་བརྗོད་ལ། གསང་བའི་མཆོད་པ་བཞི་བྱའོ། །རྡོ་རྗེ་འགྱིང་པའི་ཚུལ་གྱིས་སུ། །བསམ་པ་གཡོས་པས་གདུང་བར་བྱ། །ཕྲེང་བ་བཅིང་དང་ཁ་ནས་བྱུང་། །རྡོ་རྗེ་གར་ནི་བསྐོར་བ་ཡིན། །
རྡོ་རྗེ་ཁུ་ཚུར་སྦྱོར་བ་ཡིས། །སྤོས་ལ་སོགས་པ་དེ་བཞིན་དབུལ། །ཐུར་དུ་བླུགས་དང་གྱེན་དུ་གཏོར། །བསྐོར་དང་དེ་བཞིན་བྱུག་པའོ། །བཛྲ་ལཱ་སྱེ། བཛྲ་མཱ་ལེ། བཛྲ་གཱི་ཏི། བཛྲ་ནྲྀ་ཏྱེ། བཛྲ་དྷཱུ་པེ། བཛྲ་པུཥྤེ། བཛྲ་ཨཱ་ལོ་ཀེ། བཛྲ་གནྡྷེ། རྡོ་རྗེ་བསྟོད་པའི་གླུ་ནི་འདི་

ཡིན་ཏེ། ཨོཾ་བཛྲ་སཏྭ་སུ་སཾ་གྲ་ཧཾ། བཛྲ་རཏྣ་མ་ནུཏྟ་རཾ། བཛྲ་དྷརྨྨ་གཱ་ཡ་ནཻ། བཛྲ་ཀརྨྨ་ཀ་རོཏྦྷ་བེ། རྡོ་རྗེ་བསྟོད་པའི་གླུ་འདི་དང་གླུ་བླངས་ལ། ལག་པའི་རྩེ་མོས་གར་བྱས་ནས། །མཆོད་པ་ཐམས་ཅད་བྱའོ། །རབ་དང་འབད་པས་ཁྲུས་བྱས་ཏེ། །རྟག་ཏུ་སྦྱིན་
སྲེག་ཁང་པར་ཞུགས། །ཞེས་ཇི་སྐད་དུ་བཤད་པ་དེ་མ་སྨྲས་སོ་ཞེ་ན། དེ་བརྗོད་པར་བྱ་སྟེ། རྣམ་རྟོག་ཁྲུས་ཀྱི་སྦྱོར་བ་འདི། །རྡོ་རྗེ་སློབ་དཔོན་གྱིས་བཤད་པ། །དེ་ནི་རྣམ་རྟོག་ཙམ་ཡིན་པས། །དེ་ལ་བློ་ནི་འཇུག་མི་བྱ། །དེ་བས་སྔགས་དང་ཕྱག་རྒྱ་ཡིས། །ལེགས་བྱས་
ཁྲུས་ནི་བཤད་པར་བྱ། །རྣམ་རྟོག་ལ་ནི་སྤྱོད་བཞིན་དུ། །གང་གི་བགེགས་ནི་མི་འཇུག་པའོ། །ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ལ་སྙིང་གར་བཞག་སྟེ། ལུས་འབར་བའི་གསང་སྔགས་བཟླའོ། །ཨོཾ་ཀུ་པི་ཀུ་པི་
ཀཱ་ཡ་ཀུ་པི་པྲ་ཛྭ་ལ་ནི་སྭཱ་ཧཱ། དེ་ནས་ཆོ་ག་འདི་དང་། དང་པོའི་ཡི་གེའི་གོ་ཆས་གོ་བགོ་སྟེ་རྡོ་རྗེ་ཁུ་ཚུར་གཉིས་བཅིངས་ཏེ། སྙིང་གར་མཛུབ་མོ་གཉིས་ཀྱིས་མདུད་པ་བྱས་ལ་རྒྱབ་ཏུ་དྲངས་ཏེ་མདུད་པ་བྱ་སླར་ཡང་སྙིང་གར་དྲངས་ཏེ་མདུད་པ་བྱ། དེ་བཞིན་དུ་ལྐོག་
མའི་སྟེང་དུ་མདུད་པ་བྱ་བ་དང་། དཔྲལ་བར་མདུད་པ་བྱ་བ་དང་ལྟག་པར་མདུད་པ་བྱས་ནས། རྣ་བ་གཉིས་ཀྱི་གོང་དུ་མཐའ་ནས་དགྲོལ་བས་དར་དཔྱངས་བྱ་སྟེ། མཉམ་པའི་ཐལ་མོས་མཉེས་པར་བྱའོ། །དེ་ལ་གསང་སྔགས་ནི་འདི་ཡིན་ཏེ། ཨོཾ་ཊུཾ་རྡོ་རྗེ་གནོད་སྦྱིན་
གྱིས་གདུག་པ་ཐམས་ཅད་བཟའ་བར་བྱ་ཞིང་། མཆེ་བའི་ཕྱག་རྒྱ་བཅིངས་ལ། གསང་སྔགས་བརྗོད་པར་བྱའོ། །ཧཱུྃ་དེ་ནས་བདུད་རྩི་ཐབ་སྦྱོར་གྱི་གསང་སྔགས་བརྗོད་དེ། ཨ་བདུད་རྩི་ཐབ་སྦྱོར་གྱི་ཕྱག་རྒྱ་ནི་རྡོ་རྗེ་མཆེ་བའི་ཕྱག་རྒྱའོ། །དེ་ནས་གསང་སྔགས་འདིས་ཆུ་
སྙིམ་པ་གསུམ་གྱེན་དུ་གཏོར་བར་བྱའོ། །ཨོཾ་བྷུར་ཛྭ་ལ་ཧཱུྃ་སྭཱ་ཧཱ། རིག་སྔགས་འདིས་ཆ་གསུམ་དུ་བྱ་སྟེ། གཅིག་གིས་ནི་དགེ་བའི་གཙང་སྦྲ་བྱའོ། །གཉིས་པས་ལུས་ཀྱི་གཙང་སྦྲ་བྱའོ། །གསུམ་པས་ནི་ཁྲུས་དང་ཉེ་རེག་བྱ་ཞིང་། རང་གི་མགོར་རང་གི་གསང་སྔགས་དང་ཕྱག་

རྒྱས་ཆུ་གཏོར་ན། རང་གི་རྣམ་པར་རྟོག་པ་ལས་སྐྱེས་པའི་བགེགས་མི་འབྱུང་སྟེ། སེམས་ཅན་འཚེ་བའམ་སྡིག་པ་དག་ཁྱེད་ལ་མེད་ཀྱི་མ་འཇིགས་ཤིག །རིག་པ་ལས་བྱུང་དགེ་བ་བཞིན། །བགེགས་ནི་རང་གི་སེམས་ལས་བྱུང་། །ཁྲུས་བྱས་ནས་ནི་སྦྱིན་སྲེག་གི། །ཆོ་ག་ཐམས་
ཅད་སྤྱད་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅིངས་ཏེ། སྙིང་པོ་འདིས་གྱེན་དུ་དགྲོལ་ལོ། །ཨོཾ་ཁྱེད་ཀྱིས་འགྲོ་བའི་དོན་ཀུན་མཛད། །དངོས་གྲུབ་ཇི་བཞིན་གསོལ་ལགས་ཀྱིས། །སངས་རྒྱས་ཡུལ་དུ་གཤེགས་སུ་གསོལ། བཛྲ་སཏྭ་མུཿ། དེ་ནས་ཐོག་མ་དང་ཐ་མ་མེད་པའི་
བྱང་ཆུབ་ཀྱི་སེམས་ཆེན་པོ་རྗེས་སུ་དྲན་ལ། ཅི་བདེ་བར་གནས་པར་བྱའོ། །རྡོ་རྗེ་སེམས་དཔའི་མིང་ཙམ་ཞིག །ལན་ཅིག་ཡོངས་སུ་གཟུང་བས་ཀྱང་། །འདི་ནི་བསྲུང་བ་དམ་པ་སྟེ། །མི་ཟད་རྟག་པའི་དངོས་གྲུབ་སྟེར། །མཁས་པ་ངང་པའི་རྒྱལ་པོས་རྟོགས་པར་བྱ་བའི་
ཕྱིར། །འདིར་ནི་སྦྱིན་སྲེག་ཆོ་ག་བྲིས་པས་དགེ་བ་གང་བསགས་པ། དེས་ནི་སྲིད་གསུམ་ཚེར་མ་འབྱིན་ཅིང་ཞི་བཞི་རྟོག་ལྡན་པ། རྒྱལ་བ་ལྔ་ཡི་ཅོད་པན་འཛིན་དང་འགྲོ་བ་རྗེས་སུ་མཉམ་པར་ཤོག །ཀུན་དུ་བཟང་པོ་ཞེས་བྱ་བའི་སྦྱིན་སྲེག་གི་ཆོ་ག་རྫོགས་སོ།། །།
༄། །རབ་ཏུ་གནས་པའི་ཆོ་ག་རབ་གནས་ཀྱི་རྒྱལ་པོ་བཞུགས། ༄༅༅། །བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་རྡོ་རྗེ་སེམས་དཔའ་ལ། །ཀུན་ནས་དང་བས་ཕྱག་འཚལ་ཏེ། །རྒྱུད་རྣམས་ཐམས་ཅད་ལས་བསྡུས་ཏེ། །
རབ་གནས་ཆོ་ག་བཤད་པར་བྱ། །དེ་ལ་དང་པོར་རེ་ཞིག་རྣལ་འབྱོར་པ་དཀྱིལ་འཁོར་དུ་ཞུགས་ཤིང་དབང་ཐོབ་པ། རིག་པའི་སྡོམ་པ་གཟུང་བ། གསང་བའི་མཆོད་པའི་བྱ་བ་ཤེས་པ། དཔའ་ལ་བརྟན་པ་སྤྲོ་བ་ཆེ་བ། དུལ་བ་ཕྲིན་ལས་རྣམ་པ་བཞིའི་སྤྱོད་པ་དང་ལྡན་པ།
གསང་བའི་ཡེ་ཤེས་བསླབས་པ། ཕྱག་རྒྱ་བཞི་བསྒོམ་པར་མོས་པའི་རྣལ་འབྱོར་པ་དང་། སྒྲུབ་པའི་གྲོགས་པོ་བྱང་ཆུབ་ཏུ་སེམས་བསྐྱེད་པ། གསང་བའི་ཆོ་གའི་བྱ་བ་ཤེས་པ། གཙང་མ། གསང་བའི་བྱ་བ་ལ་མཁས་པ། བློ་དང་ལྡན་པ་དང་། སྙིང་སྟོབས་དང་

ལྡན་པའི་རྣལ་འབྱོར་པས། གྲོང་ཁྱེར་རམ་གྲོང་རྡལ་ལམ། ནགས་ཚལ་ལམ། ལྗོངས་སམ། ཀུན་དགའ་ར་བའམ། གཙུག་ལག་ཁང་དུ་ལུགས་སུ་བླུགས་པའམ། འབུར་དུ་བརྐོས་པའམ། རི་མོར་བྲིས་པ་ཞི་བའམ། དབང་ངམ་རྒྱས་པའམ།
མངོན་སྤྱོད་ལ་སོགས་པའི་སྐུ་རབ་ཏུ་གནས་པ་བྱེད་པར་འདོད་ན། དཀྱིལ་འཁོར་གྱི་ས་གཞིའི་ཉེ་འཁོར་དུ་དྲིས་ཉེ་བར་བྱུགས་ནས་དཀོན་མཆོག་གསུམ་དང་། རབ་ཏུ་གནས་པར་བྱེད་པའི་ལྷ་དང་། རྡོ་རྗེ་སློབ་དཔོན་ལ་དམིགས་ཏེ། མཎྜལ་ལྔ་བྱས་ནས་མཆོད་པ་ལྔ་བཤམས་ནས་
སྟོད་གཡོགས་དང་སྨད་གཡོགས་བགོས་ནས་ཅོད་པན་དང་རྒྱན་བཏགས་ཏེ། ཕྲེང་བ་དང་དག་བྱེད་དང་ལྡན་པས། སྐར་མ་རྒྱལ་དང་གཟའ་ཕུར་བུའི་ཉིན་པར་ཁྲུས་བྱས་ཤིང་ཟས་དཀར་གསུམ་ཟོས་པ། གདུགས་དང་རྒྱལ་མཚན་དང་བ་དན་དང་དྲིལ་བུ་རྣམས་བྲིས་ཏེ། གུ་གུལ་
གྱི་དུད་པས་བདུགས་པ་དང་། ཡུངས་ཀར་གྱིས་བགེགས་བཟློག་ནས་བསྙེན་པ་དང་། དེ་ལ་རེ་ཞིག་རྣམ་པར་རྟོག་པ་ཤས་ཆུང་ན། སྟོང་པ་ཉིད་ཀྱིས་ཁྲུས་བྱ་བ། ལྕེ་བྱིན་གྱིས་བརླབ་པ་དང་། ལག་པ་བྱིན་གྱིས་བརླབ་པ་དང་། ཁྲོ་བོ་བཞིའི་ལུས་བསྐྱེད་པ་དང་། ཁྲོ་བོ་
གསུམ་གྱིས་བགེགས་བསལ་བ་དང་། ཁྲོ་བོ་དྲུག་གིས་ཕྱོགས་བཅིང་བ་དང་། ཁྲོ་བོ་གསུམ་གྱིས་ར་བ་དང་དྲ་བ་བྱས་ལ། མཆོད་པ་བྱིན་གྱིས་བརླབས་ནས། རྡོ་རྗེ་འཁོར་ལོས་དཀྱིལ་འཁོར་སྤྲུལ་ལ། མཆོད་པ་དང་ཕྱག་བཙལ་བ་དང་། སྡིག་པ་བཤགས་པ་དང་། རྗེས་
སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། མཆོད་པའི་སྤྲིན་དང་ལུས་དབུལ་བ་དང་། དགེ་བའི་རྩ་བ་བསྔོ་བ་དང་། བྱང་ཆུབ་ཏུ་སེམས་བསྐྱེད་པ་དང་། སྡོམ་པ་གཟུང་བ་དང་། གཟུགས་
བརྙན་གྱི་ལྷར་བསྐྱེད་ནས་མཉམ་པའི་ཐལ་མོ་དང་། རྡོ་རྗེ་ཐལ་མོ་དང་། རྡོ་རྗེ་བསྡམས་པ་དང་། བསྡམས་པ་དྲལ་བ་དང་། ཡེ་ཤེས་དབབ་པ་དང་། དབབ་པ་ཉེ་བར་བསྡུ་བ་དང་། ངན་སོང་དགུག་ཅིང་སྡིག་པ་དྲལ་བ་དང་། དཀྱིལ་འཁོར་སྙིང་གར་བསྡུ་བ་དང་།

མངོན་པར་བྱང་ཆུབ་ལྔས་ལྷར་བསྐྱེད་ལ། བྱིན་གྱིས་བརླབ་པ་དང་། ཏིང་ངེ་འཛིན་གྱི་བསྒོམ་པ་དང་། སྙིང་གར་དབང་བསྐུར་བ་དང་། ཕྲིན་ལས་ཀྱི་རྡོ་རྗེའི་བརྟུལ་ཞུགས་བླང་བ་དང་། རྣལ་འབྱོར་ཆེན་པོ་བསྐྱེད་པ་དང་། རྗེས་སུ་རྣལ་འབྱོར་དེ་བཞིན་གཤེགས་པའི་ཁམས་གཞུག་པ་
དང་། བྱིན་གྱིས་བརླབ་པ་དང་། དབང་བསྐུར་བ་དང་། མཆོད་པ་དང་བསྟོད་པ་བྱས་ལ། བདག་ཉིད་ཐབས་ཀྱི་འཁོར་ལོ་རྫོགས་པར་བྱས་ལ། ཡེ་ཤེས་ཀྱིས་སྦྱོང་བ་སྟོང་པ་ཉིད་བསྒོམས་པ་དང་། རྡོ་རྗེའི་ས་སྦྱང་བ་འབྱུང་བ་རིམ་བརྩེགས་གཞལ་ཡས་ཁང་གདན་དང་བཅས་པ་བསྐྱེད་
པ་དང་། འཆི་བའི་སྲིད་པ་རི་རབ་ཀྱི་རྩེ་མོར་ལུས་གཞག་པ་དང་། སྲིད་པ་བར་མ་དོ་བསམ་གཏན་གཟུགས་མེད་པ་བསྒོམ་པ་དང་། སྐྱེ་བའི་རྣལ་འབྱོར་བྱང་ཆུབ་སེམས་དཔའ་དོན་གྲུབ་ཏུ་བསྐྱེད་པ་དང་། མི་གཡོ་བའི་ཏིང་ངེ་འཛིན་ལས་བསླངས་ནས་དང་པོའི་སྦྱོར་བ་དང་།
དཀྱིལ་འཁོར་རྒྱལ་པོ་མཆོག་དང་། ལས་རྒྱལ་མཆོག་བསྒོམས་ལ། ཡེ་ཤེས་སེམས་དཔའ་ཞུགས་པའི་ལས་བརྒྱད་ཀྱི་ཡེ་ཤེས་སེམས་དཔའ་བཅུག་ལ། རྒྱས་བཏབ་ནས་དབང་བསྐུར་བ་དང་། མཆོད་པ་ཐམས་ཅད་ཀྱིས་མཆོད་ལ། ཇི་ལྟ་བ་བཞིན་དུ་བསྒོམ་པར་བྱའོ། །དེ་ལྟར་
མཚན་མ་མ་ཐོབ་ཀྱི་བར་དུ་བསྒོམ་པའམ། གཙོ་བོ་ལ་འབུམ་དང་། འཁོར་རྣམས་ལ་ཁྲི་ཁྲི་བཟླས་པ་དབུལ་བ་དང་། རྒྱུད་ཕྱི་མའི་ཕྱི་མ་བཞིན་དུ། ཟླ་བ་བཞི་འམ་ཟླ་བ་དྲུག་ཏུ་བསྙེན་པ་བྱའོ། །དེ་ལྟར་བསྙེན་པ་བྱས་ནས་ས་སྦྱང་བའམ། མ་སྦྱངས་པའི་གནས་སའི་ཆོ་ག་ཇི་ལྟ་བ་
བཞིན་དུ་བྱས་ཏེ། ལྷག་པར་གནས་པར་བྱའོ། །དེ་ལ་མཆོད་པ་བཤམ་པ་དང་། རྫས་བསགས་ལ་རྒྱན་ཐམས་ཅད་ཀྱིས་བརྒྱན་ལ་གདོང་དྲི་ཞིམ་པར་བྱས་ལ། མེ་ཏོག་གི་ཕྲེང་བ་བཏགས་ཏེ། རྒྱུ་སྐར་རྒྱལ་གྱི་ཞག་དང་གཟའ་ཕུར་བུ་ལ་སྲུང་བའི་འཁོར་ལོ་རྟེན་དང་བཅས་པ་དང་།
ཚོགས་སོགས་པའི་དམིགས་པའི་ཡུལ་དང་བཅས་པ་དང་། ཚོགས་ཀྱི་ལམ་དངོས་སེམས་བསྐྱེད་པ་དང་བཅས་པ་དང་། རྡོ་རྗེ་དབབ་པ་ཆོ་ག་བཞིན་དུ་བྱ་བ་དང་། ཕྱག་རྒྱ་ཆེན་པོ་ཆོ་ག་བཞིན་དུ་བཅིང་བ་དང་། མདུན་དུ་སེམས་དཔའ་ཆོ་ག་བཞིན་དུ་བསྐྱེད་དེ་བདག་ཉིད་རྫོགས་

པར་བྱས་ནས། འབྱུང་བ་རི་རབ་དང་བཅས་པ་བསྐྱེད་པའི་སྟེང་དུ་སའི་ལྷ་མོ་སྤྱན་དྲངས་ལ། ཆོ་ག་བཞིན་དུ་དེ་ནས་དཔང་དུ་གསོལ་ཏེ་ཇི་ལྟར་བཞིན་དུ་སྤྲོ་བ་བསྐྱེད་པར་བྱའོ། །དེ་ནས་བསམ་གཏན་དང་གཟུགས་མེད་ཀྱི་ཏིང་ངེ་འཛིན་མངོན་སུམ་དུ་བྱས་ནས།
འོག་མིན་དུ་དོན་གྲུབ་ཀྱི་གཟུགས་སུ་སྐྱེས་པར་བསམས་ལ། ཕྱོགས་བཅུའི་སངས་རྒྱས་ཐམས་ཅད་སྤྱན་དྲང་བར་བྱའོ། །དེ་ནས་དང་པོར་སྦྱོར་བ་དང་། དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་བསྒོམས་ལ། བསོད་ནམས་ཀྱི་ཚོགས་སོགས་པའི་ཆོ་ག་ཇི་ལྟ་བ་
བཞིན་དུ་བྱས་ནས། སྒྲུབ་པའི་གྲོགས་ཀྱིས་མཚན་བརྒྱ་རྩ་བརྒྱད་པས་གསོལ་བ་བཏབ་ལ། བདག་ཉིད་འཁོར་ལོས་སྒྱུར་བའི་ཆེད་དུ་བརྗོད་པར་བྱ་སྟེ། དཀྱིལ་འཁོར་ནམ་མཁའ་ལ་ཁྲོ་བོའི་བསྟོད་པ་དང་། བགེགས་ལ་བཀའ་བསྒོ་བ་བྱས་ནས། རྡོ་རྗེའི་ལྟ་བས་ར་བ་དང་།
དྲ་བ་བྱས་ནས། སྟང་སྟབས་ཀྱིས་བགེགས་བསལ་བ་དང་། སྔགས་དང་ཕྱག་རྒྱས་སྲུང་བའི་འཁོར་ལོ་བྱས་ལ། གསང་བའི་དཀྱིལ་འཁོར་བཀུག་ནས། དེའི་ཡན་ལག་ཕུར་བུ་ཇི་ལྟ་བ་བཞིན་དུ་བཏབ་ནས། རྡོ་རྗེ་གནོད་སྦྱིན་གྱིས་བགེགས་བསལ་ལ་དྲིའི་ཐིག་ལེ་དང་མེ་ཏོག་ཚོམ་
བུ་བཀོད་ལ། ལྷ་ལྷག་པར་གནས་པར་བྱའོ། །དེ་ནས་བུམ་པ་ལྷག་པར་གནས་པ་དང་། སྦྱིན་སྲེག་ལྷག་པར་གནས་པ་དང་། གཏོར་མ་ལྷག་པར་གནས་པ་ཇི་ལྟ་བ་བཞིན་དུ་བྱའོ། །དེ་ནས་ཤིང་བུ་གྲུ་གསུམ་གྱི་ནང་དུ་ཁམ་ཕོར་བཞག་ནས། དེར་མེ་བླུགས་ལ་ཟུར་གསུམ་དུ་བག་ཟན་
གྱིས་ཀོང་བུ་གསུམ་བྱས་ཏེ། དེར་མེ་མར་བཏང་ནས་བག་ཟན་གྱི་ཆང་པ་གསུམ་བྱས་ནས། རྡོ་རྗེ་གཙུག་ཏོར་གྱི་སྔགས་སམ། རྡོ་རྗེ་གནོད་སྦྱིན་གྱི་སྔགས་ཀྱིས་ཡུངས་ཀར་གྱིས་བགེགས་བཟློག་པར་བྱའོ། །སྐུ་གཟུགས་སམ་གླེགས་བམ་ལ་སོགས་པ་རབ་གནས་གང་བྱེད་པ་
དེ་རས་ཀྱིས་གཡོགས་ལ། ཧཱུྃ་བྷྲཱུཾ་ཧྲཱིཿགསུམ་གྱིས་བསྲུངས་ནས་གཞག་པར་བྱའོ། །དེ་ནས་སྙན་གསན་དབབ་པར་བྱ་སྟེ། ཇི་ལྟར་སངས་རྒྱས་ཐམས་ཅད་ཀྱིས། །དགའ་ལྡན་དུ་ནི་བཞུགས་པ་ན། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་འདིར་

བཞུགས་ཤིག །འདི་རུ་མགོན་པོ་བརྟན་བཞུགས་ནས། །བྱང་ཆུབ་སེམས་ནི་བསྐྱེད་པ་དང་། །ཆེ་གེ་མོ་ཡི་དོན་སླད་དུ། །བདག་ནི་འབྱོར་པ་ཉིད་ཀྱིས་ནི། །ཅི་འབྱོར་པ་ཡིས་མཆོད་པ་རྣམས། །མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་པ་ལ། རྗེས་
སུ་བརྩེ་བར་དགོངས་སུ་གསོལ། །ཀུན་གྱིས་འདི་ལ་བྱིན་བརླབ་ཅིང་། །དེ་ཉིད་དུ་ནི་བཞུགས་པར་རིགས། །དེ་ནས་ཉི་མ་ཤར་བ་ན་དཀྱིལ་འཁོར་གྱི་ཐིག་བཏབ་ལ། ཚོན་དགྱེ་ཞིང་ལྷ་དགོད་པའི་དཀྱིལ་འཁོར་གྱི་ཆོ་ག་ལས་བཤད་པ་བཞིན་བྱས་ལ། རྫས་བསགས་ནས་དཀྱིལ་འཁོར་གྱི་
མཐར་བཀྲམ་སྟེ། ལྷག་པ་དང་མ་ཚང་བ་བསྐང་ལ། བུམ་པ་གཞུག་པར་བྱའོ། །དཀྱིལ་འཁོར་གྱི་བྱང་ཕྱོགས་སུ་ཁྲུས་ཀྱི་ཁང་པ་ཡིད་དུ་འོང་བ། ཤེལ་གྱི་ས་གཞི་ལ་རིན་པོ་ཆེའི་ཀ་བས་བརྒྱན་པ། མུ་ཏིག་དང་རིན་པོ་ཆེས་སྤྲས་པ་བརྩིགས་པའམ་བྲིས་ལ། རབ་ཏུ་གནས་པ་བྱེད་པར་
འདོད་པས། ཐོག་མར་ཁྲུས་ཀྱི་ཁང་པ་དེར་ལྷ་སྤྱན་དྲངས་ལ། ཁྲིའི་སྟེང་དུ་གཞག་པའམ། རས་རིས་པུསྟི་ལ་སོགས་པ་ཡིན་ན་མདུན་དུ་བཞག་ལ། མེ་ལོང་བསྟན་ལ་བུམ་པ་རྣམས་ཀྱིས་སྐུ་ཁྲུས་གསོལ་བ་བསྟོད་དབྱངས་དང་བཅས་པ་བྱ་སྟེ། དེ་ལ་བསྟོད་དབྱངས་ནི། ཇི་ལྟར་
བལྟམས་པ་ཙམ་གྱིས་ནི། །ལྷ་ཡི་ཆུ་ནི་དག་པ་ཡིས། །དེ་བཞིན་གཤེགས་ཀུན་ཁྲུས་གསོལ་ལྟར། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། དེ་ནས། རྣམ་པ་ཀུན་གྱི་མཆོག་དང་ལྡན་པའི། ལྷ་ཡི་སྐུ་ལ་གནས་གསུམ་དུ། ཡི་གེ་ཨོཾ་ཨཱཿཧཱུྃ་
གསུམ་གྱིས་བྱིན་གྱིས་བརླབས་ལ། གསེར་དངུལ་ལམ་ཟངས་ལས་བྱས་པ་བུམ་པ་ལྟོ་བ་ཡངས་པ་མགྲིན་པ་རིང་བ་མཆུ་འཕྱང་བ། སྨན་དང་འབྲུ་དང་རིན་པོ་ཆེ་ལྔ་དང་ལྡན་པ། རས་སར་པས་མགུལ་པ་བཅིངས་པ། ལྡུ་བཅས་ལྕུག་མས་ཁ་བརྒྱན་ལ། སྔར་བསྙེན་པ་བྱས་པའི་དྲིའི་
ཆུས་གང་བ་སློབ་དཔོན་གྱིས་ཡོངས་སུ་བཟུང་ནས། མེ་ལོང་དྲིའི་ཐིག་ལེ་ལྔ་དང་། ཏིལ་མར་ཐིགས་པ་ལྔ་དང་། མེ་ཏོག་གི་ཚོམ་བུ་ལྔ་དང་། འདག་ཆལ་དང་བཅས་པའི་པིར་གྱིས་སྦྱངས་ལ། བཀྲ་ཤིས་ཀྱི་ཚིགས་སུ་བཅད་པ་དང་། རྫ་རྔ་ལ་སོགས་པ་རོལ་མོའི་སྒྲ་དང་བཅས་

པས་སྐུ་ཁྲུས་གསོལ་བར་བྱའོ། །དེ་ལ་ཏིལ་མར་གྱི་སྔགས་ནི། ཨོཾ་སརྦྦཱ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱ་ཧཱ། དྲིའི་སྔགས་ནི། གནྡྷ་མལ་ཡ་སྭཱ་ཧཱ། དཱུར་བའི་པིར་གྱི་སྔགས་ནི། ཨོཾ་མ་ལཱ་སཾ་ཤོ་དྷ་ནེ་སྭཱ་ཧཱ། དེ་ནས་སྐུ་ཁྲུས་གསོལ་བའི་བསྟོད་དབྱངས་ནི། །
གཟུགས་ཀྱི་ཕུང་པོ་རྣམ་དག་པ། །ཉོན་མོངས་གཏི་མུག་སྦྱོང་བྱེད་པ། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་སྐུ་ཡི་ཁྲུས་གསོལ་ལོ། །ཚོར་བའི་ཕུང་པོ་རྣམ་དག་པ། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ཡོན་ཏན་དབང་
བསྐུར་རོ། །འདུ་ཤེས་ཕུང་པོ་རྣམ་དག་པ། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོག་པའི་ཡེ་ཤེས་ཀྱིས། །དཔལ་ལྡན་གསུང་གི་དབང་བསྐུར་རོ། །འདུ་བྱེད་ཕུང་པོ་རྣམ་དག་པ། །ཉོན་མོངས་ཕྲག་དོག་སྦྱོང་བྱེད་པ། །བྱ་བ་ནན་ཏན་ཡེ་ཤེས་ཀྱིས། །
དཔལ་ལྡན་ཕྲིན་ལས་དབང་བསྐུར་རོ། །རྣམ་ཤེས་ཕུང་པོ་རྣམ་དག་པ། །ཉོན་མོངས་ཞེ་སྡང་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་ཐུགས་ཀྱི་དབང་བསྐུར་རོ། །ཇི་ལྟར་དམ་པ་ཏོག་དཀར་དགའ་ལྡན་ནས། །ལྷ་མཛེས་ལྷུམས་ནས་བལྟམས་ལ་ཁྲུས་
གསོལ་ལྟར། །སྐུ་གདུང་རིང་བསྲེལ་དྲི་མ་མེད་པར་བཅས། །སྤྲུལ་སྐུ་ཡིད་འོང་རྣམས་ལ་ཁྲུས་གསོལ་ལོ། །ཞེས་བྱ་བ་དང་། ཨོཾ་སརྦ་ཏ་ཐཱ་ག་ཏ་སུ་ན་སུ་པྲ་ཏིཥྛ་སྭཱ་ཧཱ། ཞེས་བྱབས་སྲན་ཕྱེ་དང་། བག་ཕྱེའི་ཆལ་དང་། ཡུང་བ་དང་། འབྲས་ཡོས་དང་། ཏིལ་མར་དང་།
སྦྲང་རྩི་དང་། འོ་མ་དང་། གནྡྷ་བྷ་དྲ་དང་བཅས་པ་སྐུ་གཟུགས་ཉིད་དམ། མེ་ལོང་གི་སྟེང་དུ་བཏབ་ལ། ཙནྡ་དང་ག་བུར་གྱི་དྲིའི་ཐིག་ལེ་བྱས་ལ། མེ་ཏོག་དང་བཅས་པ་ལ་ཀུ་ཤའི་པིར་གྱིས་བཀྲུ་བར་བྱའོ། །དེ་ལྟར་སྐུ་ལ་སོགས་པ་ལན་གསུམ་མམ་ལྔ་ལྔར་བཀྲུས་ནས།
གོས་གཙང་མའི་དྲིས་བསྒོས་པས་སྐུ་ཕྱིས་ཏེ། དེ་བཞིན་གཤེགས་པའི་སྐུ་གཟུགས་རྣམས་ལ་ནི། །བླ་གོས་དང་སྣམ་སྦྱར་གསོལ་བར་བྱའོ། །བྱང་ཆུབ་སེམས་དཔའ་རྣམས་ལ་གོས་སྣ་ཚོགས་པ་དང་། ཁྲོ་བོ་རྣམས་ལ་ནི་གོས་སྔོན་པོ་དང་། དམར་པོ་དབུལ་ཞིང་བཀྲ་ཤིས་ཀྱི་ཚིགས་

སུ་བཅད་པ་གདོན་པར་བྱའོ། །དེ་ལ་སྣམ་སྦྱར་གསོལ་བའི་སྔགས་ནི། ཨོཾ་དཱི་བ་པྲ་བ་ཡེ་སྭཱ་ཧཱ། དེ་ལ་དྲི་དབུལ་བའི་སྔགས་ནི། ཨོཾ་བཛྲ་གནྡྷེ་སྭཱ་ཧཱ། དེ་ལ་བྱང་ཆུབ་སེམས་དཔའ་ལ་སོགས་པ་ལ་རྒྱན་དབུལ་བའི་སྔགས་ནི། ཨོཾ་ཨཱ་བ་ར་ཎ་བི་བྷུ་ཥ་ནེ་སྭཱ་ཧཱ། དེ་ནས་དཀྱིལ་འཁོར་ཆེན་
པོ་སྤྱན་དྲངས་ལ་གཙུག་ལག་ཁང་ཡིན་ན་མདུན་ནམ་ཕྱོགས་སུ་མ་ཡོ་ཞིང་དྲང་བར་སྐུ་གཟུགས་མཛེས་པར་བཀོད་ལ། དཀྱིལ་འཁོར་གྱི་ལྷ་རྣམས་གཙོ་བོ་དང་བཅས་པ་མདུན་དེར་བསྟན་ལ་དཀྱིལ་འཁོར་བསྒྲུབས་ནས་བདག་དང་གཙོ་བོ་དང་ཐ་མི་དད་པར་བསྒོམས་ལ་པཱུ་ཛ་བྱའོ། །དེ་
ལྟར་བདག་ཉིད་ཀྱི་དཀྱིལ་འཁོར། པཱུ་ཛ་རྫོགས་པའི་རྗེས་ལ་རབ་གནས་ཀྱི་ལྷ་ལ་པཱུ་ཛ་ལྔ་ཕུལ་ནས་དམ་ཚིག་སེམས་དཔའ་ཡི་གེ་ཧཱུྃ་གིས་བསལ་བར་བྱས་ལ། ཡེ་ཤེས་སེམས་དཔའ་སྤྱན་དྲངས་ཏེ་རྒྱུད་ལས་འབྱུང་བའི་ཕྱག་རྒྱ་བཞིས་རྒྱས་བཏབ་ལ་དབང་བསྐུར་ནས་དངོས་སུ་འབྱོར་པའི་པཱུ་ཛ་
ལྔ་དང་། ཡིད་ཀྱིས་སྤྲུལ་པ་བརྒྱད་དང་། རིག་མ་བཅུ་དྲུག་གིས་མཆོད་པར་བྱའོ། །དེ་ལ་མེ་ཏོག་དབུལ་བའི་ཚིགས་སུ་བཅད་པ་ནི། ཆུ་དང་ཐང་ལས་སྐྱེས་པ་ཡི། །མེ་ཏོག་དམ་པ་མཆོག་འདི་དག །མཆོག་ཏུ་དད་པས་འབུལ་ལགས་ན། །ཁྱོད་ཀྱིས་ཅི་བདེར་བཞེས་སུ་གསོལ། །
ཨོཾ་བཛྲ་པུཥྤེ་ཨཱཿཧཱུྃ། ལྷན་ཅིག་སྐྱེས་དང་སྦྱར་བྱུང་བའི། །ལྷ་རྫས་དམ་པའི་བདུག་པ་འདི། །མཆོག་ཏུ་དད་པས་འབུལ་ལགས་ན། །ཁྱེད་ཀྱིས་ཅི་བདེར་བཞེས་སུ་གསོལ། །ཨོཾ་བཛྲ་དྷཱུ་པེ་ཨཱཿཧཱུྃ། ལྷན་ཅིག་སྐྱེས་དང་སྦྱར་བྱུང་བའི། །ལྷ་དང་མི་ཡི་དྲི་མཆོག་འདི། །
མཆོག་ཏུ་དང་བས་འབུལ་ལགས་ན། །ཅི་བདེར་བར་ནི་བཞེས་སུ་གསོལ། །ཨོཾ་བཛྲ་གནྡྷེ་ཨཱཿཧཱུྃ། བཟའ་དང་བཅའ་བ་ཕུན་ཚོགས་པའི། །ཁ་དོག་དྲི་དང་རོ་ལྡན་པའི། །ཐམས་ཅད་འབྱོར་པའི་ཞལ་ཟས་འདི། །བདག་གིས་འབུལ་གྱིས་བཞེས་སུ་གསོལ། །ཨོཾ་བཛྲ་ནཻ་བི་དྱེ་ཨཱཿཧཱུྃ།
སྒེག་མོ་ལ་སོགས་པའི་ཚིགས་སུ་བཅད་པ་ནི། །རྡོ་རྗེ་སེམས་དཔའ་བསྡུས་པ་ན། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ཀྱི་གླུ་བླངས་པས། །རྡོ་རྗེ་ལས་རྣམས་བྱེད་པར་ཤོག །ཅེས་བརྗོད་ཅིང་། བཛྲ་སཏྭ་སུ་སཾ་གྲ་ཧ་ཏ། ཅེས་པ་ལ་སོགས་པ་གླུ་བླང་བར་བྱའོ། །རྡོ་རྗེ་

དབྱངས་ཀྱི་ལས་ཀྱི་དཀྱིལ་འཁོར་ནས་བྱུང་བའི་རིག་མ་བཅུ་དྲུག་གི་ཕྱག་རྒྱ་དང་བཅས་པས་ཀྱང་མཆོད་པར་བྱའོ། །དེ་ནས་གཟུགས་རིན་ཆེན་སྣ་བདུན་དང་། དཔག་བསམ་གྱི་ཤིང་དང་། བུམ་པ་བཟང་པོ་དང་། འདོད་འཇོའི་བ་དང་། བཀྲ་ཤིས་ཀྱི་རྫས་བརྒྱད་
དང་། སྒྲ་རོལ་མོ་ཆ་བྱད་བཅུ་དང་། དྲིའི་སྣོད་བརྒྱའམ་སྟོང་ངམ། རོའི་སྣོད་བརྒྱའམ་སྟོང་ངམ། རེག་བྱ་རས་ཟུང་བརྒྱའམ་སྟོང་ངམ། ཐ་མ་ཡང་སྤྱིར་ཟུང་གཅིག་དབུལ་ལོ། །དེ་ལྟར་འདོད་པའི་ཡོན་ཏན་ཐམས་ཅད་ཀྱིས་མཆོད་ལ། སྦྱིན་སྲེག་དང་གཏོར་མ་བྱས་ལ། ཉིན་མོ་
ཉལ་ནས། ཕྱི་དེ་ནང་པར་ཉི་མ་ཤར་ཀར་སྤྱན་དབྱེ་བར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །དེ་བཞིན་རྒྱལ་བ་རྣམས་ཀྱི་སྤྱན། །སེམས་ཅན་དོན་དུ་དབྱེ་བར་བགྱི། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། ཞེས་བྱ་བས་
གསེར་ལ་སོགས་པའི་ཐུར་མས་སྤྱན་དབྱེ་བར་བྱའོ། །དེ་ནས་སྙན་དབྱེ་བར་བྱ་སྟེ། གསེར་ལ་སོགས་པའི་རྣ་འབྲུ་ཐོགས་ལ། འགྲོ་རྣམས་ཐོས་པས་ཕོངས་གྱུར་པ། །རྒྱལ་བས་ཆོས་ཀྱི་རྔ་བརྡུངས་ལྟར། །དེ་བཞིན་སེམས་ཅན་དོན་གྱི་ཕྱིར། །རྒྱལ་བའི་སྙན་ནི་དབྱེ་བར་བགྱི། །ཨོཾ་
དཱི་བྱ་ཀརྞ་ཡེ་སྭཱ་ཧཱ། དེ་ནས་ཤངས་དབྱེ་བར་བྱ་སྟེ། གསེར་ལ་སོགས་པའི་སྨང་ཚེར་ཐོགས་ཏེ། ཟག་བཅས་ཕུང་པོ་དྲི་སྤངས་པའི། །འགྲོ་བའི་སེམས་ཅན་དོན་བགྱིད་ཕྱིར། །རྣམ་པར་དག་པ་དྲི་བརྙེས་ལྟར། །རྒྱལ་བའི་ཤངས་ནི་དབྱེ་བར་བྱ། །དཱི་བྱ་གྷ་ཎ་ཡེ་སྭཱ་ཧཱ། དེ་ནས་ཐུར་
མ་ཐོགས་ལ་ཞལ་དབྱེ་བར་བྱ་སྟེ། འགྲོ་བ་ཐམས་ཅད་ཚིམ་མཛད་ལྟར། །རོ་མཆོག་བརྒྱ་ལྡན་ཞལ་ཟས་དམ་པ་འདི། །དབུལ་ཞིང་ཞི་བའི་ཞལ་ནི་དབྱེ་བར་བྱ། །ཨོཾ་དི་བྱ་མོ་ཁ་ཡེ་སྭཱ་ཧཱ། དེ་ནས་སྤུ་གྲི་ཐོགས་ལ། རབ་ཏུ་བྱུང་བའི་གཟུགས་ཡིན་ན། །སྐྲ་བཞར་བ་ལྟར་བྱས་ཏེ།
ཇི་ལྟར་རང་བྱུང་མཆོད་རྟེན་དྲུང་། །སྟོན་པས་ཁྱིམ་པའི་རྟགས་སྤངས་ལྟར། །འགྲོ་བ་སེམས་ཅན་དོན་གྱི་ཕྱིར། །ཁྱིམ་པའི་རྟགས་རྣམས་སྤང་བར་བྱ། །སྣམ་སྦྱར་དང་། ཤམ་ཐབས་དང་། བླ་གོས་གསོལ་ནས། ཇི་ལྟར་སྨན་པའི་རྒྱལ་པོ་འཚོ་བྱེད་ཀྱིས། །རྒྱལ་བའི་སྐུ་

ལ་ན་བཟའ་གསོལ་བ་ལྟར། །དེ་བཞིན་འགྲོ་བ་རྣམས་ལ་ཕན་བྱའི་ཕྱིར། །ངོ་ཚ་ཁྲེལ་ཡོད་གོས་མཆོག་གསོལ་བར་བགྱི། །ཨོཾ་དི་བྱ་བསྟྲ་ཎ་ཡེ་སྭཱ་ཧཱ། ཆུ་ཚགས་དང་། ལྷུང་བཟེད་ཐོགས་ལ། ཨོཾ་ཨི་མུ་ཡུ་ག་ས་པ་རི་ཀར་ཡེ་སྭཱ་ཧཱ། དེ་ནས་ཐུགས་ཀར་རྡོ་རྗེ་བཟུང་ལ། མཚན་
དང་དཔེ་བྱད་ལ་སོགས་བསྐྱེད་པའི་ཕྱིར། །དུང་དང་དཔལ་བེའུ་གཡུང་དྲུང་འཁྱིལ་བ་དང་། །བཀྲ་ཤིས་རྫས་བརྒྱད་དག་གིས་རྣམ་བརྒྱན་པ། །རྒྱལ་བའི་ཐུགས་ལ་རྣམ་པར་བརྒྱན་པར་ཤོག །ཨོཾ་དྭ་ཏྲིཾ་ཤ་ད་མ་ཧཱ་པུ་རུ་ཥ་ལ་ཀྵ་ཎི་ཤི་ཏི་ཨ་ནུ་བྱཉྩ་ནཱ་ཡ་སྭཱ་ཧཱ། པོ་ཏི་དང་གླེགས་བམ་
ཡིན་ན་ཡི་གེ་ཨཱཿཧྲཱིཿལས་རྡོ་རྗེ་ཆོས་སམ་སྣང་བ་མཐའ་ཡས་ཀྱི་སྐུར་བསྐྱེད་པའམ། ཡང་ན་ཡི་གེ་བྷྲཱུཾ་ལས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ཞལ་གཅིག་ཕྱག་གཉིས་པའམ། ཞལ་གཅིག་ཕྱག་བཞི་མ། ཕྱག་དང་པོ་གཉིས་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་འཛིན་པ།
གཡས་ཀྱི་གཉིས་པ་ན་བགྲང་ཕྲེང་། གཡོན་གྱི་གཉིས་པ་ན་པདྨའི་སྟེང་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པ་བསྐྱེད་ལ། ཡེ་ཤེས་སེམས་དཔའ་བཅུག་ནས་རྒྱས་བཏབ་སྟེ། དབང་བསྐུར་ནས་མཆོད་པ་ཐམས་ཅད་ཀྱིས་མཆོད་ལ། བྱང་ཆུབ་
ཀྱི་ཡན་ལག་བདུན་གྱིས་ན་བཟའ་གསོལ་ཏེ། རྒྱ་རིམ་པ་བདུན་གྱིས་གདབ་སྟེ་ཡིག་འབྲུའི་རང་བཞིན་དུ་ཞུ་བར་བསམ་མོ། །དེ་ལ་ན་བཟའ་དབུལ་བའི་སྔགས་ནི། དི་བྱ་བསྟྲ་ཡེ་སྭཱ་ཧཱ། ན་བཟའི་སྟེང་དུ་མདུད་པ་བཏབ་ལ། སྤྲ་ཚིལ་ལས་སིན་དྷུ་རའི་རྒྱས་བཏབ་ལ། ཨོཾ་
བཛྲ་མུ་དྲ་བནྡྷ་ཡ་ཨ་དྷི་ཏིཥྛ་སྭཱ་ཧཱ། ཞེས་བརྗོད་དོ། །ན་བཟའ་དབུལ་བའི་ཚིགས་སུ་བཅད་པ་ནི། བྱང་ཆུབ་ཡན་ལག་རྣམ་དག་པའི། །དམ་ཆོས་གསུང་གི་འོད་ཟེར་གྱིས། །ན་བཟའ་དྲི་མ་མེད་པ་འདི། །དམ་པའི་ཆོས་ལ་དབུལ་བར་བྱ། །ཞེས་བརྗོད་དེ། མཆོད་རྟེན་ཡིན་
ན། རིགས་རྣམ་པ་ལྔའི་སྤྲུལ་པའི་སྐུར་བསྐྱེད་ལ། ཡེ་ཤེས་སེམས་དཔའ་བཅུག་ནས། རྒྱས་བཏབ་ཅིང་དབང་བསྐུར་ནས། མཆོད་པ་ཐམས་ཅད་ཀྱིས་མཆོད་ལ། མཐར་མཆོད་རྟེན་གྱི་ཚུལ་དུ་བཞུགས་པ་ལ། ཨོཾ་ཨཱ་ར་ཛེ་བི་ར་ཛེ་སྭཱ་ཧཱ། ཞེས་བྱ་བས་ས་དཀར་གསོལ་ལོ། །ཨོཾ་ཧ་

ར་མ་ཡེ་སྭཱ་ཧཱ། ཞེས་བྱ་བས་བྲེ་གཟུགས་པར་བྱའོ། །ཙཀྲ་བ་ར་ཙ་ཏ་ནཱ་ཡེ་སྭཱ་ཧཱ། ཞེས་པས་འཁོར་ལོ་གཟུགས་པ་དང་། ཨོཾ་ཙྪ་ཏྲཾ་ཡེ་སྭཱ་ཧཱ། ཞེས་གདུགས་གཟུགས་པ་དང་། ཨོཾ་ཀུཾ་བྷི་ར་དྷྭ་ཛ་ཡེ་སྭཱ་ཧཱ། ཞེས་པས་ཆུ་སྲིན་གྱི་རྒྱལ་མཚན་གཟུགས་པ་དང་། ཨོཾ་
པ་ཏཾ་ཀ་ཡེ་སྭཱ་ཧཱ། ཞེས་པས་བ་དན་གཟུགས་པ་དང་། ཨོཾ་པ་ཊ་ལཾ་བྷ་ཡེ་སྭཱ་ཧཱ། ཞེས་བྱ་བས་དར་དཔྱངས་བཅིངས་པ་དང་། ཨོཾ་པུཥྤ་མཱ་ལ་ཡེ་སྭཱ་ཧཱ། ཞེས་བྱ་བས་མེ་ཏོག་གི་ཕྲེང་བ་གདགས་པ་དང་། ཨོཾ་ཙཱ་མ་ར་ཡ་སྭཱ་ཧཱ། ཞེས་པས་རྔ་ཡབ་ཀྱིས་གཡབ་པར་བྱའོ། །བྱང་ཆུབ་
སེམས་དཔའི་ཆ་ལུགས་ཡིན་ན་སོ་མངས་དང་། ཁབ་དང་། སྙུང་བུ་དང་། གྲི་དང་། ཆུ་གྲི་རྣམས་ཕུལ་ལ། འགྲོ་བ་སེམས་ཅན་ཀུན་ལ་ཕན་པའི་ཕྱིར། །རིག་པའི་གནས་ལྔ་དག་ལ་བསླབ་བྱ་ཞེས། །ཇི་ལྟར་ཐུགས་དམ་རྒྱ་ཆེ་བཞེས་པ་བཞིན། །འཁོར་བའི་ཡོ་བྱད་རྣམས་ནི་དབུལ་བར་
བྱ། །ཨོཾ་ཨ་པ་ཡུ་ཀ་ས་པ་རི་ཀ་ར་ཡེ་སྭཱ་ཧཱ། དེ་ནས་དེ་བཞིན་གཤེགས་པའམ། བྱང་ཆུབ་སེམས་དཔའ་ཐུན་མོང་དུ་རིན་པོ་ཆེ་སྣ་བདུན་དང་། བཀྲ་ཤིས་ཀྱི་རྫས་བརྒྱད་དང་། འཇིག་རྟེན་པ་ལ་བཀྲ་ཤིས་པའི་བིལ་བ་དང་། སྟརྒ་དང་། ཞོ་དང་། རས་ཡུག་དཀར་པོ་དང་། གདུགས་
གསེར་གྱི་ཡུ་བ་ཅན་རྣམས་དབུལ་བར་བྱ་སྟེ། དང་པོར་ལས་ཐམས་ཅད་པའི་ཆུས་བསངས་ལ་དྲིའི་ཐིག་ལེ་དང་། མེ་ཏོག་གི་ཚོམ་བུ་བཀོད་ནས། ཇི་ལྟར་མི་དབང་འཁོར་ལོས་སྒྱུར་བ་ཡིས། །རིན་ཆེན་སྣ་བདུན་ཚོགས་དང་བཅས་པ་ལྟར། །རྒྱལ་བ་རྣམས་དང་བྱང་ཆུབ་སེམས་དཔའ་
ལ། །རིན་ཆེན་སྣ་བདུན་ཚོགས་ནི་དབུལ་བར་བྱ། །ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པར་བགྱིས། །རྒྱལ་བ་རྣམས་དང་བྱང་ཆུབ་སེམས་དཔའ་རྣམས། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། །འཇིག་རྟེན་ཁྱིམ་བདག་
རྣམས་ཀྱིས་དཔལ་རྙེད་ན། །བིལ་བ་སྟརྒ་བུམ་པ་བཟང་དང་བཅས། །མདུན་དུ་བདར་ནས་བཀྲ་ཤིས་བྱེད་པ་ལྟར། །རྒྱལ་བ་སྲས་དང་བཅས་ལ་དབུལ་པར་བགྱི། །དེ་ནས་འབྱོར་པ་ཡོད་ན་སྦྱིན་སྲེག་བྱའོ། །མེད་ན་སྒྱེད་པུ་དཀར་པོ་གསུམ་བཙུགས་ལ། །ས་ལས་བྱས་པའི་

སྣོད་གཙང་མར། །དཀར་གསུམ་དང་། མངར་གསུམ་གྱི་གཞི་ལ་སྨན་སྣ་ཚོགས་བཏབ་སྟེ། སྦྱིན་སྲེག་གི་མེའམ། རིག་པའི་མེ་ལ་ཡི་གེ་བརྒྱ་པ་ཟློས་ཤིང་བསྐོལ་བར་བྱའོ། །དེ་ནས་ཙཱ་རུ་དབུལ་བར་བྱའོ། །དེ་ནས་དཀྱིལ་འཁོར་གྱི་ལྷ་གཤེགས་སུ་གསོལ་བ་ནི། རྫོགས་
སངས་རྒྱས་དང་དེ་ཡི་སྲས། །ཚངས་སོགས་ལྷ་ཡི་ཚོགས་རྣམས་དང་། །གང་དག་ཆོ་ག་མ་ཚང་བ། །དེ་དག་བཟོད་པ་མཛད་པར་རིགས། །ཀུན་དུ་ཞི་དང་རྒྱས་དང་ནི། །ཡོན་བདག་ཚེ་ལ་རབ་མཛད་ནས། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་བྱོན་པར་
མཛད་དུ་གསོལ། །ས་དང་ཆུ་དང་མེ་རླུང་གིས། །ཇི་སྲིད་བསྐལ་པར་འཇིག་པར་དུ། །ལྷ་རྣམས་ཀུན་གྱི་སྐུ་གཟུགས་ལ། །དེ་སྲིད་བཅོམ་ལྡན་བསྲུང་བར་མཛོད། །ཐུགས་བཟང་དགྱེས་པར་གྱུར་པ་ཡིས། །སློབ་དཔོན་སློབ་མར་བཅས་པ་ཡི། །བུ་དང་ཚ་བོ་བསྲུང་མཛད་
ནས། །རང་གནས་དགེ་བར་གཤེགས་སུ་གསོལ། །དེ་ནས་དམ་ཚིག་སེམས་དཔའ་རང་ལ་བསྡུའོ། །དེ་ནས་ཡོན་བདག་དང་སློབ་དཔོན་གཉིས་ཀས་སྐུའི་གདན་ཁྲི་ནས་བཟུང་ནས་མེ་ཏོག་གི་ཕྲེང་བ་ཕུལ་ཏེ། ཇི་སྲིད་མེ་དང་ཆུ་དང་ནི། །རླུང་གིས་བསྐལ་པ་འཇིག་པར་དུ། །
སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་མཛོད། །དེ་ནས་ཕྱོགས་སྐྱོང་ངམ། མ་ཧཱ་ཀཱ་ལ་དང་། ཡུལ་གྱི་བགེགས་ལ་གཏོར་མ་བྱིན་ལ། འགྲོ་བ་སེམས་ཅན་དོན་སླད་དུ། །བདེ་གཤེགས་རྣམས་ནི་བཞུགས་ཀྱི་བར། །བདག་དང་གཞན་གྱི་
དོན་གྱི་ཕྱིར། །སྤྲུལ་པའི་གཟུགས་བརྙན་བསྲུང་བར་མཛོད། །ཅེས་བྱ་བ་དང་། བཅོམ་ལྡན་འདས་ཕྱག་ན་རྡོ་རྗེ་ལ་ཡང་མཆོད་པ་ཕུལ་ལ། བདེ་བར་གཤེགས་པའི་སྤྲུལ་པའི་སྐུ། བསྲུང་བར་ཞལ་གྱིས་བཞེས་པས་ཇི་སྲིད་བཅོམ་ལྡན་བཞུགས་ཀྱི་བར་དུ་སྲུང་བར་མཛད་དུ་གསོལ།
ཞེས་བརྗོད་པ་དང་། རབ་ཏུ་བསྲུང་བའི་གནས་བརྟན་དང་། །ཁྱིམ་པའི་གཙོ་བོ་རྣམས་ལ་ཡང་། །སྙིགས་མ་ལྔའི་དུས་ཀྱི་སྤྲུལ་པའི་སྐུ་ནི་འདི་ཡིན་གྱིས། །འདི་ཁྱོད་ཀྱིས་མཉམས་པར་སྲུངས་ཞེས་བརྗོད་པར་བྱས་ལ། ལུགས་མའམ། རས་རིས་སམ། པུསྟི་ཡིན་ན། ན་

བཟའ་བཟང་པོས་དྲངས་ལ། ཤིང་རྟ་ལ་བསྐྱོན་ནས་དྲིའི་ཐིག་ལེ་བྱས་ཏེ། འགྲོ་བ་རྣམས་དད་པར་བྱ་བའི་ཕྱིར་གྲོང་ཁྱེར་རྣམས་བསྐོར་བར་བྱའོ། །ཡོན་གྱི་བདག་པོ་རྣམས་ཀྱང་གླུ་དང་། གར་དང་། རྒྱན་གདགས་པ་དང་། བཀྲ་ཤིས་པ་རྣམས་
བྱའོ། །དེ་ལ་རབ་གནས་ཀྱི་དུས་ནི། དཔྱིད་ཟླ་ར་བའམ་འབྲིང་པོའམ། ཞེས་པ་ནས། སྐྱེ་དང་སྐྱེ་བ་འགྲུབ་པར་འགྱུར། །ཞེས་པའི་བར་དེ། རྒྱུད་དང་མཐུན་ནོ། །གསང་སྔགས་རྡོ་རྗེ་ཐེག་པ་ལ། །བསྟན་པའི་སྙིང་པོ་མ་ནུས་པས། །རྣལ་འབྱོར་སོ་སོའི་མོས་པ་ཡིས། །
འཛམ་གླིང་འདི་རུ་སྤྲུལ་པའི་སྐུ། །ཇི་ལྟར་འདོད་བཞིན་གཤེགས་པའི་སྐུ། །ལུགས་སྐུ་ལ་སོགས་གཟུགས་བརྙན་ལ། །རབ་ཏུ་གནས་པའི་ཆོ་ག་ནི། །བྱས་པས་སྤྲུལ་སྐུ་ཐོབ་པར་ཤོག །རྣལ་འབྱོར་གྱི་རྒྱུད་ཀྱི་རབ་ཏུ་གནས་པའི་ཆོ་ག །རབ་གནས་ཀྱི་རྒྱལ་པོ་
ཞེས་བྱ་བ་རྫོགས་སོ།། ༄༅༅། །རྒྱ་གར་སྐད་དུ། བཛྲ་དྷཱ་ཏུ་མཧཱ་མཎྜ་ལ་ལོ་པི་ཀ་སརྦ་བཛྲོད་ཡ་ནཱ་མ་པིཎྜཱརྠ། བོད་སྐད་དུ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཆོ་ག་རྡོ་རྗེ་ཐམས་ཅད་འབྱུང་བ་ཞེས་བྱ་བའི་དོན་བསྡུས་པ། དཔལ་རྡོ་རྗེ་སེམས་
དཔའ་ལ་ཕྱག་འཚལ་ལོ། །རང་གི་ལུས་ངག་ཡིད་དག་རྣམ་དག་པས། །བདུད་ཀྱི་འཚེ་བ་གོ་སྐབས་མེད་མཛད་ཅིང་། །བསོད་ནམས་ཚོགས་དང་དེ་བཞིན་ཡེ་ཤེས་ཏེ། །དེ་གཉིས་རབ་རྫོགས་རྒྱུ་དངོས་འགྲོ་ཕན་མཛད། །སྐྱེ་བ་གཅིག་གིས་ཐོགས་དང་སྲིད་མཐའ་བ། །ལེགས་
འགྲོ་དེ་ནས་རང་གི་སེམས་རྟོགས་པ། །སྔོན་འགྲོ་མངོན་པར་བྱང་ཆུབ་རིམ་བཟང་པོས། །ཆོས་རྒྱལ་ཉིད་བརྙེས་བྱམས་པ་ལ་སོགས་ཕྱིར། །དཀྱིལ་འཁོར་སྤྲུལ་མཛད་ཕྱོགས་བཅུའི་དཀྱིལ་འཁོར་པ། །རང་གི་རྣམ་པར་ཐར་པས་ཡང་དག་པར། །འགྲོ་བ་
གདུལ་ཕྱིར་བསྡུས་ཤིང་ལས་ལ་བཞག །རྣམ་པར་ཁྱབ་པ་བསྡུས་པས་རྣམ་འཕྲུལ་བསྟན། །དེ་ནས་འཛམ་བུའི་རྒྱལ་མཚན་མི་རྣམས་ལ། །ཕན་ཕྱིར་ཇི་བཞིན་ཆོ་ག་བཟང་པོ་ཡིས། །ཚོན་གྱི་དཀྱིལ་འཁོར་སྐྱོན་མེད་སྟོན་མཛད་པ། །བདག་དང་གཞན་དོན་

ཕུན་སུམ་གནས་བརྙེས་པ། །དཔལ་ལྡན་རྡོ་རྗེ་སེམས་དཔའ་རྣམ་འདྲེན་པ། །རྣལ་འབྱོར་རྒྱུད་ཀྱི་དབང་ཕྱུག་བདག་ཕྱག་འཚལ། །འདི་ནི་གོ་རིམས་ངེས་པ་ཙམ། །གཙོ་བོར་བྱ་ལ་གཞོལ་བ་ཡིས། །དཀྱིལ་འཁོར་ཆོ་ག་མཆོག་འདི་ཡི། །དོན་བསྡུས་བདག་ཉིད་དྲན་
ཕྱིར་བྲི། །གང་དུ་རྣམ་པར་རྨོངས་པའི་གནས། །དེར་ནི་ཚིག་དོན་འགའ་ཞིག་བརྗོད། །གཞན་དུ་བློ་གྲོས་ངན་པ་རྣམས། །སྒྲ་ཙམ་ལ་ཡང་ལོག་པར་རྟོགས། །དེང་སང་སྔགས་ཀྱི་ཐེག་པ་མཆོག །ཡི་གེའི་དོན་གྱིས་རྣམ་དཀྲུགས་ཤིང་། །བླ་མ་གཅིག་ནས་
གཅིག་འོངས་པའི། །མན་ངག་རིམ་ལ་གུས་དང་བྲལ། །དེ་ཕྱིར་བླ་མའི་མན་ངག་གིས། །འདི་ཡི་སྙིང་པོ་ཅུང་ཟད་བྲི། །འདིར་སློབ་དཔོན་གྱི་ཞལ་སྔ་ནས། །རྣལ་འབྱོར་གྱི་རྒྱུད་ཀྱི་ལུགས་ཀྱིས་སློབ་མ་དབང་བསྐུར་ཏེ། ཚེ་འདི་ཉིད་ལ་དགའ་བ་དང་བདེ་བའི་མཆོག་གི་
མཐར་ཐུག་པ་འཐོབ་པ་ལ་སོགས་པའི་དགོས་པ་གཟིགས་ནས། དཀྱིལ་འཁོར་ཆོ་ག་རྒྱས་པ་བསྡུ་བ་བཞེད་པས། །ཕྱག་འཚལ་དངོས་པོ་ཐམས་ཅད་ཀྱིས། །ཞེས་བྱ་བ་ལ་སོགས་པ་རྒྱ་ཆེར་སྨོས་པ་མཛད་དོ། །དེ་ལ་འདིར་ཅིའི་ཕྱིར་ཕྱག་བཙལ་ཞེ་ན། བདག་ཉིད་དམ་པའི་
སྤྱོད་པ་ཅན་དུ་བསྟན་པའི་ཕྱིར་དང་། འདིའི་བསྒྲུབ་པར་བྱ་བ་དཔལ་རྡོ་རྗེ་སེམས་དཔའ་ལ་དང་བ་ནི་ལེགས་པ་ཐམས་ཅད་ཐོབ་པའི་རྒྱུ་ཡིན་པས་གཞན་དེ་ལ་དང་བ་བསྐྱེད་པའི་ཕྱིར་དང་། བགེགས་ཞི་བར་བྱ་བའི་ཡང་ཕྱིར་རོ། །དེ་ལ་ཕྱག་བཙལ་བ་ནི་འདུད་པ་སྟེ་སྐད་ཀྱི་
བྱིངས་ལས་དེ་སྐད་དུ་བསྟན་པས་སོ། །རབ་ཀྱི་སྒྲ་ནི་མཆོག་ཏུ་གྱུར་པ་སྟེ་དེ་ཡང་ལུས་དང་ངག་དང་ཡིད་ཐམས་ཅད་ཀྱིས་གུས་པ་ཉེ་བར་གནས་པས་སོ། །དེའི་ཕྱིར་དངོས་པོ་ཐམས་ཅད་ཀྱིས་ཞེས་པ་སྟེ། ལུས་ངག་ཡིད་ཐམས་ཅད་ཀྱིས་སོ། །གཞན་དག་འདིར་རིགས་སྤྱི་དང་ཁྱད་
པར་གྱི་ཕྱག་འཚལ་བ་ལྔ་ནི་དངོས་པོ་ཐམས་ཅད་ཀྱིས་ཞེས་ཟེར་ན། འདི་སློབ་དཔོན་གྱིས་དེ་ཁོ་ན་ལྟར་མཛད་ཅེས་གྲུབ་པར་མི་ནུས་པས་བཏགས་པ་ཙམ་དུ་ཟད་དོ། །སུ་ཞིག་ལ་ཕྱག་འཚལ་ཞེ་ན། རྡོར་སེམས་ཁྱབ་བདག་ཆེན་པོ་ལ། །ཞེས་པ་སྟེ། རྡོ་རྗེ་ཟབ་མོའི་ཆ་བརྗོད་པ་སྟེ། འདིར་

བསྐལ་པ་གྲངས་མེད་པ་དེ་སྙེད་དུ་སྤྲོས་པའི་ཚོགས་བོར་ཏེ་ཤིན་ཏུ་བརྟན་པ་དང་། འཕེལ་འགྲིབ་མེད་པར་བྱས་པའི་རྣམ་པར་མི་རྟོག་པའི་ཡེ་ཤེས་ནི་རྡོ་རྗེ་སྟེ། དང་པོའི་བྱེ་བྲག་མ་ལུས་པ་འགེགས་པས་ནོར་བུ་རིན་པོ་ཆེ་རྡོ་རྗེ་དང་འདྲ་བའི་ཕྱིར་རོ། །དེ་ལྟར་ན།
བསྐལ་པ་དུ་མར་རབ་གོམས་བྱས་པ་ཡི། །རྒྱུ་དང་རིགས་པའི་ཚུལ་དང་ས་ལ་མཁས། །གང་གིས་འདུས་བྱས་གྲོང་ཁྱེར་རྣམ་འཇིག་པ། །ཡེ་ཤེས་རྡོ་རྗེ་བརྟན་དེ་འཕགས་བདག་སྩོལ། །ཞེས་གསུངས་སོ། །དེ་ཡང་གློ་བུར་བའི་དྲི་མ་རྣམས་བསལ་བ་ཁོ་ནར་ཟད་ཀྱི། རང་གི་ངོ་བོ་
ཉིད་ཐོག་མ་ནས་རྡོ་རྗེ་ལྟ་བུ་མི་ཕྱེད་པས་ན། རབ་ཏུ་བརྟན་ཞིང་དུས་གསུམ་མི་འགྱུར་བར་གནས་པས་སེམས་དཔའ་སྟེ། སེམས་དཔའ་སྔོན་དང་ཐ་མ་མེད། །རྡོ་རྗེ་སེམས་དཔའ་དེ་བཞིན་གཤེགས། །འདི་ནི་རང་འབྱུང་བཅོམ་ལྡན་འདས། །གཅིག་པུ་རབ་ཏུ་ཆེ་བའི་ལྷ། །ཞེས་
གསུངས་པ་ལྟ་བུའོ། །དེ་ལྟར་ཐོག་མ་དང་ཐ་མ་མེད་པའི་ཕྱིར། །འདི་ནི་སེམས་ཅན་གྱི་གནས་སྐབས་ན་ཡང་བརྟན་པ། སེམས་ཅན་ཀུན་གྱི་སེམས་གང་ཡིན། །རྡོ་རྗེ་ཞེས་ནི་བཤད་པ་སྟེ། །བརྟན་པའི་ཕྱིར་ན་དཔའ་ཞེས་བརྗོད། །ཅེས་གསུངས་ཤིང་། དེ་ཉིད་ཤིན་ཏུ་རྣམ་པར་
དག་པའི་ངོ་བོ་སངས་རྒྱས་ཀྱི་ས་ལ་ཡང་དེ་ལས་ལྷག་པར་མ་གྱུར་པས་ན། རྣམ་པ་ཀུན་མཁྱེན་ཡེ་ཤེས་ནི། །དེ་འདིར་རྡོ་རྗེ་སེམས་དཔའ་སྟེ། །བརྟན་པའི་ཕྱིར་ན་དཔའ་ཞེས་བྱ། །ཞེས་གསུངས་སོ། །དེ་ལྟར་ན་འདི་ནི་ཆོས་ཀྱི་སྐུའི་ངོ་བོ་ཅན་ཏེ། བསྒྲིབས་པ་དང་མ་
བསྒྲིབས་པའི་དུས་དག་ཏུ་ཡང་རང་གི་བདག་ཉིད་ལ་འབྲི་བ་དང་། འཕེལ་བ་སྤངས་པར་མི་འགྱུར་བ་ནི། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་སྟེ། ཆོས་རྣམས་ཀྱི་དེ་བཞིན་ཉིད་དེ། དེ་བཞིན་དུ་གནས་པའོ་ཞེས་གསུངས་པ་བཞིན་ནོ། །དེ་ལྟར་ཆོས་ཀྱི་སྐུའི་
དབང་ལས་གཟུགས་ཀྱི་སྐུ་དཔེ་མེད་པ་འབྱུང་བ་ནི་རྒྱ་ཆེ་བ་སྟེ། ཇི་སྐད་དུ། རྒྱལ་བས་ཆོས་ཉིད་ལུས་མེད་རབ་ཞི་བ། །གཉིས་མེད་རང་བཞིན་མེད་པར་ཐུགས་ཆུད་ནས། །གཟུགས་སྐུ་བཟང་པོ་མཚན་གྱིས་བརྒྱན་པ་ཡིས། །འགྲོ་བ་མ་ལུས་བཀང་ཞིང་སྟོན་པར་མཛད། །ཅེས་

གསུངས་པས་སོ། །དེ་ལྟར་དེ་ལྟ་བུར་ཐམས་ཅད་དུ་ཁྱབ་པ་ནི་ཁྱབ་བདག་སྟེ། བརྟན་པ་དང་གཡོ་བ་ཐམས་ཅད་དུ་སྣང་བ་སྟོན་པས་ཤིན་ཏུ་རྒྱ་ཆེར་གྱུར་ཏོ། །དེ་ལྟར་ཟབ་པ་དང་རྒྱ་ཆེ་བ་འདི་ནི་ཇི་སྐད་དུ། མཚན་ཡང་དག་པར་བརྗོད་པ་ལས། མི་འགྱུར་ཀུན་འགྲོ་ཁྱབ་པ་པོ། །
ཞེས་གསུངས་པས་གསལ་པོར་མཛད་དོ། །དེ་ལྟ་བུ་ནི་བྱང་ཆུབ་སེམས་དཔའ་ས་བཅུ་པའི་བཀོད་པས་ཀྱང་བསྒྲུན་དུ་མེད་པས་ན་ཆེན་པོའི་སྒྲ་ཡིས་བསྟན་པ་སྟེ། རང་བཞིན་དང་། ལས་དང་། རྒྱུ་དག་ཆེ་བས་ན་འདི་ཆེན་པོ་ཡང་ཡིན་ལ་ཁྱབ་བདག་ཀྱང་ཡིན་པས་ན་ཆེན་པོས་
ཁྱབ་བདག་གོ། །དེ་ལྟར་ཟབ་པ་དང་རྒྱ་ཆེ་བའི་བཅོམ་ལྡན་འདས་རྡོ་རྗེ་འཆང་ཆེན་པོ་ལ་ཕྱག་འཚལ་ནས་ང་འདིར་ཅི་ཞིག་བྱེད་ཅེ་ན། དཀྱིལ་འཁོར་ཆོ་ག་བཤད་བྱ་སྟེ། །རྡོ་རྗེ་ཐམས་ཅད་འབྱུང་དགེ་བ། །ཞེས་བྱ་བ་སྨོས་ཏེ། འདི་ནི་འདིར་རྟོགས་པ་དང་ལྡན་པ་དག་འཇུག་པའི་
ཡན་ལག་ཏུ་གྱུར་པ་དགོས་པ་དང་ཐབས་ཕུལ་དུ་བྱུང་བ་དག་བསྟན་ཏེ། རེ་ཞིག་དང་པོ་ཉིད་དུ་འདི་ལ་བརྗོད་པར་བྱ་བ་ཁྱད་པར་ཅན་མེད་དེ། སྨྱོན་པའི་ཚིག་ལས་དུར་ཁྲོད་དང་རི་རྩེ་ཉམས་མི་དགའ་བར་ཡུལ་གྱི་བཟང་མོ་དང་ཕྲད་པ་མེད་པ་ལྟ་བུའོ་སྙམ་དུ་སེམས་པ་དགག་པའི་ཕྱིར།
དཀྱིལ་འཁོར་ཆོ་ག་བཤད་བྱ་སྟེ། །ཞེས་བྱ་བ་སྨོས་ཏེ། འདི་ན་སྔགས་ཀྱི་ཐེག་པ་འདི་ལས་དཀྱིལ་འཁོར་ནི་རབ་ཏུ་གྲགས་པས་ཁྱབ་པའི་དངོས་པོའི་སྟོབས་གོམས་ཤིང་སྐྱེས་བུའི་འདོད་པ་ཙམ་གྱིས་མ་ཕྱེ་བ་ཡིན་ལ། དེ་དང་མཐུན་པའི་བརྗོད་པ་དཀྱིལ་འཁོར་གྱི་ཆོ་ག་བཤད་པར་བྱའོ།
ཞེས་དམ་བཅའ་བ་ནི་སྙིང་ལ་བབས་པས་ན་སྨྱོན་པའི་ཚིག་ལས་འཕགས་པས་ན་འདི་ལ་བརྗོད་པར་བྱ་བ་ཡོད་དམ་ཞེས་རྟོག་པར་འགྱུར་གྱི་འདི་ནི་མི་འཚམ་པའི་དག་གོ་ཞེས་ལྡོག་པའི་ཡན་ལག་མ་ཡིན་པའི་ཕྱིར་རོ། །འདིར་བརྗོད་པར་བྱ་བ་དེ་ཡང་གང་ཞིག་ཡིན། དཀྱིལ་
འཁོར་ནི་འདི་ན་རབ་ཏུ་མང་སྟེ་འདི་ལས་ཕྱི་རོལ་དུ་གྱུར་པའི་དཀྱིལ་འཁོར་ཡང་ཡོད་ལ། དེ་ནི་སྔགས་ཀྱི་རྒྱུད་ལས་བཀག་སྟེ། ཁ་ཅིག་གཞན་གྱི་རིགས་ཀྱི་དཀྱིལ་འཁོར་དུ་འཇུག་པས། ངན་སོང་གི་དཀྱིལ་འཁོར་དུ་འཇུག་པ་དེ་དག་ཅེས་བྱ་བ་ལ་སོགས་པ་གསུངས་

པས་སོ། །ཡང་འདི་ན་བྱ་བའི་རྒྱུད་ལས་རབ་ཏུ་སྡུག་བསྔལ་བའི་དཀའ་ཐུབ་བརྟན་པར་བྱ་བའི་དཀྱིལ་འཁོར་ཡོད་ལ། དེ་ཡང་འདོད་པར་བྱ་བ་མ་ཡིན་ཏེ་རྣམ་པར་གཡེང་བས་ནང་གི་རྣལ་འབྱོར་དང་འགལ་ཞིང་གཅིག་ཏུ་སྡུག་བསྔལ་བས་ན་མི་འདོད་
ལ། དེ་ཡང་དཔལ་མཆོག་དང་པོ་ལས་བཀག་སྟེ། དཀའ་ཐུབ་སྤྱད་པ་མི་བཟོད་པས། །སེམས་གཡེངས་གྱུར་ནས་མ་གྲུབ་པོ། །ཞེས་བྱ་བ་ལ་སོགས་པ་རྒྱ་ཆེར་བསྟན་པས་སོ། །དེ་བཞིན་དུ་འདི་ན་ཁ་ཅིག་དེ་བཞིན་གཤེགས་པའི་དགོངས་ཏེ་གསུངས་པ་ཁོང་དུ་མ་ཆུད་
པས་བུད་མེད་བསྟེན་པ་ལ་སོགས་པ་སྒྲ་ཇི་བཞིན་པར་འཛིན་ཅིང་བུད་མེད་བསྟེན་པའི་དཀྱིལ་འཁོར་དག་ཡོད་ལ། དེ་ཡང་འདོད་པ་མ་ཡིན་ཏེ། རྡོ་རྗེ་རྩེ་མོ་ལ་སོགས་པའི་རྒྱུད་ལས་རིང་དུ་སྤང་བའི་ཕྱིར་རོ། །དེ་ནས་འདི་ལ་བརྗོད་པར་བྱ་བ་ཡོད་ཀྱང་བརྗོད་པར་བྱ་བ་ཁྱད་པར་
ཅན་མ་ཡིན་ནམ་ཞེས་བཟློག་པ་སྲིད་པས་ན་དེ་དགག་པའི་ཕྱིར། རྡོ་རྗེ་ཐམས་ཅད་འབྱུང་ཞེས་བྱ་བ་སྨོས་ཏེ། རྡོ་རྗེ་དབྱིངས་ནས་ཇི་སྲིད་རྡོ་རྗེ་འབེབས་པའི་བར་དུ་ལྷ་སུམ་ཅུ་རྩ་བདུན་སྙེད་ནི་ཐམས་ཅད་རྡོ་རྗེའི་མིང་གི་མཚན་པས་ན་རྡོ་རྗེ་སྟེ། དེ་རྣམས་མ་ལུས་པ་བརྗོད་པ་ནི་ཐམས་
ཅད་དེ། འདི་ཐམས་ཅད་ཀྱང་ཡིན་ལ་རྡོ་རྗེ་ཡང་ཡིན་པས་ན་ཐམས་ཅད་རྡོ་རྗེའོ། །དེ་རྣམས་ཀྱི་འབྱུང་བ་ནི་ཇི་ལྟར་བསྐྱེད་པ་དང་བྱིན་གྱིས་བརླབ་པ་དང་། མཆོད་པ་དང་། བཟླས་བརྗོད་བྱ་བའི་ཐབས་ཀྱིས་རིམ་པ་ཕྱིན་ཅི་མ་ལོག་པར་འབྱུང་བར་བྱེད་སྟོན་པར་བྱེད་ལ་གསལ་བར་
བྱེད་ཅེས་པའི་བར་དུ་སྟེ། དེས་ནི་ཐེ་ཚོམ་ལས་བཟློག་པའི་རྒྱུར་གྱུར་པའི་དཀྱིལ་འཁོར་ཐམས་ཅད་གསལ་བས། ཐུན་མོང་མ་ཡིན་པའི་དཀྱིལ་འཁོར་ངེས་པར་གཟུང་བས་འཇུག་ཏུ་རུང་བར་བྱས་སོ། །དེ་ལྟར་བསྟན་པས་བརྗོད་པར་བྱ་བ་ཡོད་དུ་ཟིན་ཀྱང་བརྗོད་པར་བྱ་བ་བསྟན་
པའི་གཞུང་འདི་ལ་དོན་བྱེད་པ་ཁྱད་པར་ཅན་ཅི་ཡང་མེད་པས་འདི་མི་རྩོམ་སྟེ། བཅོམ་ལྡན་འདས་རྡོ་རྗེ་སེམས་དཔའ་ཉིད་ཀྱིས་རྩ་བའི་རྒྱུད་ལས་དཀྱིལ་འཁོར་གྱི་ཆོ་ག་བཤད་ཟིན་ལ། གདུལ་བྱ་ཆེན་པོ་དག་གིས་ནི་རི་རབ་ཀྱི་རྩེ་མོར་དཀྱིལ་འཁོར་སྤྲུལ་པ་མཐོང་ཟིན་པས་ན་དེའི་ཆོ་

ག་མི་དགོས་སོ་ཞེ་ན། དེའི་ཕྱིར་སྔར་བཤད་བྱ་སྟེ། ཞེས་བྱ་བ་སྨོས་ཏེ། གདུལ་བྱ་ཆེན་པོ་དག་ལ་མ་ཡིན་ཡང་། །ཕྱིས་འབྱུང་བའི་སྐྱེ་བོ་ཕལ་ལ་དཀྱིལ་འཁོར་གྱི་ཆོ་ག་དགོས་ཤིང་། དེ་ཡང་བཅོམ་ལྡན་འདས་རྡོ་རྗེ་འཆང་གིས་ནི་ཟུར་ཙམ་ཞིག་བསྟན་པས་ན་བློ་གྲོས་ཆུང་ངུའི་སྐྱེ་བོ་དག་གིས་ག་
ལ་རྟོགས། དེ་བས་ན་དེ་ནི་མ་བཤད་པ་དང་འདྲ་སྟེ། དོན་བྱ་བ་ལ་མཐུ་ཆེ་བ་མ་ཡིན་པས་སོ། །སློབ་དཔོན་གྱི་ཞལ་སྔ་ནས་འདིར་དེ་གསལ་ཞིང་རྫོགས་པར་རྣམ་པར་ཕྱེ་བས་ཐེ་ཚོམ་མེད་པར་བྱ་སྟེ། དེས་ན་དཀྱིལ་འཁོར་གྱི་ཆོ་ག་བདེ་བླག་ཏུ་རྟོགས་པར་བྱས་པ་ནི་འདི་རྩོམ་མི་དགོས་པ་སྟེ།
འདི་བྱ་རོག་གི་སོ་བརྟག་པའི་བསྟན་བཅོས་ལྟ་བུ་མ་ཡིན་ནོ། །ཁ་ཅིག་འདི་ལ་འབྲེལ་པ་མེད་པར་ཐེ་ཚོམ་ཟ་བས་བརྗོད་བྱ་དེ་འདིས་བརྗོད་པར་བྱེད་དམ་ཅི་མ་ཡིན་ཞེས་རྟོག་པ་སྲིད་ན་འདི་མ་འབྲེལ་བ་ཡོད་དོ། །གང་ཞིག་གང་མེད་ན་མི་འབྱུང་ལ་གང་ཡོད་ན་འབྱུང་བ་དེ་ནི་རྒྱུ་དང་འབྲས་བུར་
འཁྲུལ་པ་མེད་ཅིང་འདི་ལས་གཞན་གྱི་ཇི་ལྟར་ཡང་རྡོ་རྗེ་ཐམས་ཅད་བསྟན་པ་འབྱུང་བ་གསལ་པོར་རྟོག་པ་མི་འབྱུང་ལ། འདི་ལས་ནི་ངེས་པར་དེ་འབྱུང་བས་འདི་དག་ཐབས་དང་། དེ་ལས་བྱུང་བར་ངེས་པས་དེ་ཉིད་ལས་བྱུང་བའི་འབྲེལ་པའོ། །དེ་ན་འཇོག་པོའི་གཙུག་གི་ནོར་བུ་
བླང་བའི་ཡོན་ཏན་གྱི་སྙན་དངགས་ལྟར་འདི་ནུས་པ་མེད་པའི་ངོ་བོ་མ་ཡིན་ནོ། །དེའི་མཚན་ཉིད་ཁོང་དུ་ཆུད་པས་ཀྱང་ཅི་ཞིག་བྱ། མ་བག་མར་བླང་བའི་རིམ་པའི་མན་ངག་ལ་བརྗོད་པར་བྱ་བ་དང་དགོས་པ་དང་འབྲེལ་བ་ཡོད་ཀྱང་དེ་འདོད་པར་བྱ་བ་མ་ཡིན་ནོ་ཞེ་ན། དེ་བསལ་བའི་ཕྱིར་
དགེ་བའི་ཞེས་བྱ་བ་སྨོས་ཏེ། འདིར་དེ་དག་གི་མཚན་ཉིད་བདེ་བླག་ཏུ་རྟོགས་ནས་འཇུག་པར་བྱེད་པ་ནི་ཐུན་མོང་དང་ཁྱད་པར་གྱི་དངོས་གྲུབ་རྣམས་ཐོབ་པས་དགེ་ཞིང་དོན་ཡོད་པར་འགྱུར་ཏེ་དེ་མི་འཆད་པར་འགྱུར་བ་ལས། རྡོ་རྗེ་སེམས་སོགས་སེམས་དཔའ་མཆོག །དངོས་གྲུབ་ཐམས་ཅད་སྦྱིན་
མཛད་པ། ཞེས་གསུངས་སོ། །དེ་བས་ན་འདི་ན་འདི་མངོན་པར་མཐོ་བ་དང་ལེགས་པ་ཐམས་ཅད་འབྱུང་བས་ན་དགོས་པའི་དགོས་པ་གྲུབ་པོ། །དེ་ལྟར་དོན་མཐའ་དག་ལ་ཐེ་ཚོམ་བསྐྱེད་པ་ནི་འཇུག་པའི་ཡན་ལག་སྟེ། འདི་ལ་མཁས་པའི་རང་བཞིན་ཅན་དོན་མེད་པར་ཐེ་ཚོམ་

བསྐྱེད་པ་ནི་ཟློག་པར་བྱེད་དེ། དུག་ཏུ་ཐེ་ཚོམ་ཟ་བ་ལ་ནི་ལོངས་སྤྱོད་པ་ལས་ལྡོག་ལ། ཞིང་པ་ལ་སོགས་པ་དོན་ཡོད་པར་ཐེ་ཚོམ་ཟ་བ་ནི་འཇུག་པར་བྱེད་དེ། དངོས་པོའི་སྟོབས་ཀྱིས་ཞུགས་པ་འདི་དེ་ཁོ་ན་ལྟར་བྱ་བ་བྱས་པར་འགྱུར་གྱི་མི་བྱ་བ་བྱས་པར་ཡང་མི་
འགྱུར་རོ། །དེ་ལྟར་འདི་ལ་རྟོག་པ་དང་ལྡན་པ་དག་འཇུག་པའི་ཡན་ལག་ཏུ་གྱུར་པའི་བརྗོད་པར་བྱ་བ་དང་། དགོས་པ་དང་། ཐབས་དང་། དགོས་པའི་དགོས་པ་དག་བརྗོད་ཅིང་མཐར་ཐུག་པའི་གོ་འཕང་བསྒྲུབ་པར་བྱ་བ་དགོས་པའི་དགོས་པར་རྟོག་པ་ཡང་ཟུར་གྱིས་བསྟན་ནས།
ད་ནི་འདིར། དཀྱིལ་འཁོར་ཆོ་ག་བཤད་བྱ་སྟེ། ཞེས་བྱ་བ་ལས་གླེངས་ཏེ་དཀྱིལ་འཁོར་ནི་ཇི་ལྟ་བུ། དེ་ཇི་སྙེད་ཅིག་ཅིའི་ཕྱིར་དེ་སྐད་ཅེས་བྱ་ཞེས་བྱ་བ་བསམ་པ་དང་། ཆོ་ག་ནི་ཇི་ལྟ་བུ་ཆོ་གའི་སྒྲ་གང་དོན་གང་ཞེས་པ་འདིར་བརྗོད་དེ། གཞུང་འདིའི་བརྗོད་པར་བྱ་བ་ནི་འདི་ཙམ་དུ་
ཟད་དོ། །དེ་ལ་འདིའི་དཀྱིལ་འཁོར་ཞེས་བྱ་བ་ནི་རྣམ་པར་མི་རྟོག་པའི་རང་བཞིན་ཆོས་ཀྱི་དབྱིངས་ཏེ་དེ་ནི་སྙིང་པོར་གྱུར་པས་སོ། །དེ་ལྟར་ནི། ཡན་ལག་ཀུན་ལས་རྣམ་གྲོལ་ཞིང་། །དབྱངས་དང་ཡི་གེ་རྣམ་བྲལ་བ། །འདྲེན་དང་ཚོགས་ལས་ཡང་དག་འདས། །འདི་ནི་དཀྱིལ་
འཁོར་སྙིང་པོ་མཆོག །ཅེས་གསུངས་སོ། །དེ་བཞིན་དུ་ཆོས་ཀྱི་དབྱིངས་དེ་ཇི་ལྟ་བར་རྟོག་པ་རྣམ་པར་མི་རྟོག་པའི་ཡེ་ཤེས་ཀྱང་དཀྱིལ་འཁོར་ཏེ། འདི་ལྟ་བུ་ཡང་བཅོམ་ལྡན་འདས་ཀྱིས་གསུངས་ཏེ། སངས་རྒྱས་ཀུན་གྱིས་བྱང་ཆུབ་སེམས། །བླ་ན་མེད་པ་རྟོགས་གྱུར་པ། །
རྒྱལ་བས་གསུངས་པའི་ཡེ་ཤེས་གང་། །དེ་ནི་དཀྱིལ་འཁོར་སྙིང་པོར་གསུངས། །ཞེས་སོ། །དེ་བཞིན་དུ་སྔོན་གྱི་སྨོན་ལམ་དང་ཚོགས་ཀྱི་མཐུས་ཡུལ་དང་དུས་དང་དེར་དེ་བཞིན་གཤེགས་པ་རྣམས་ཀྱིས་གཟུགས་ཀྱི་སྐུའི་བཀོད་པ་དཔེ་མེད་པ་སྣང་བ་ཡང་དཀྱིལ་འཁོར་ཏེ། སངས་
རྒྱས་དང་བྱང་ཆུབ་སེམས་དཔའ་འཁོར་གྱི་དཀྱིལ་འཁོར་ཐམས་ཅད་བྱ་བ་གསུངས་པས་སོ། །དེ་ཉིད་ནི་སྤྲུལ་པའི་དཀྱིལ་འཁོར་ཞེས་བྱ་སྟེ། གདུལ་བྱའི་ངོར་ངེས་པ་མེད་པར་སྣ་ཚོགས་པའི་སྤྲུལ་པའི་ཕྱིར་རོ། །འདི་ལ་རྣམ་པར་སྨིན་པའང་མེད་པ་མ་ཡིན་ཏེ། ཡུན་རིང་དུ་ཤིན་ཏུ་གོམས་

པར་བྱས་པ་ལས་བྱུང་བའི་ཕྱིར་ཏེ། རང་གི་མི་མཐུན་པའི་ཕྱོགས་དེ་དང་དེ་རྣམ་པར་སྤངས་པས་བརྙེས་པའོ། །འོན་ཀྱང་འདི་ནི་རྟོག་པའི་ལམ་དུ་གྱུར་པ་བཀོད་ལ། སྣ་ཚོགས་པར་སྣང་བ་ནི་མོས་པས་སྤྲུལ་པའི་དཀྱིལ་འཁོར་གཅིག་ཀྱང་སྣ་ཚོགས་པར་བརྗོད་དོ། །དེ་ལྟར་
དཀྱིལ་འཁོར་དེ་དག་ནི་འབྲས་བུའི་ངོ་བོར་གྲུབ་པས་འབྲས་བུའི་དཀྱིལ་འཁོར་ཞེས་རྣལ་འབྱོར་གྱི་རྒྱུད་ཀྱི་ལུགས་ཀྱིས་བསྣན་ཏོ། །དེ་བཞིན་དུ་རྣལ་འབྱོར་པའི་སེམས་དང་སེམས་ལས་བྱུང་བ་ཐ་མལ་པའི་རྣམ་པར་རྟོག་པ་ལས་གྲོལ་བ་ཏིང་ངེ་འཛིན་གྱི་ཁྱད་པར་ཅན་འདི་ལྟ་སྟེ། དེ་བཞིན་
གཤེགས་པ་རྣམས་ཀྱི་གཟུགས་ཀྱི་སྐུ་དང་རབ་ཏུ་འདྲ་བར་བསྒོམ་པའི་དཀྱིལ་འཁོར་འདི་ནི་ཇི་ལྟ་བར་སྤྲུལ་པའི་དཀྱིལ་འཁོར་ཞེས་བྱ་སྟེ། རྣམ་པ་འདྲ་བར་མོས་པའི་ཕྱིར་དང་། དེའི་འབྲས་བུ་ལ་རྒྱུ་དེ་ཇི་ལྟ་བར་སྦྱོར་བའི་ཕྱིར་རོ། །གང་དུ་སྤྲུལ་པའི་དཀྱིལ་འཁོར་དེ་རྗེས་སུ་
དྲན་པའི་རྟེན་གྱུར་པ་དང་རྣམ་པ་འདྲ་བའང་རུང་སྟེ། རྡུལ་ཚོན་དང་བྲིས་སྐུར་བྱས་པ་ལ་སོགས་པ་ཡང་ཇི་ལྟ་བར་སྤྲུལ་པའི་དཀྱིལ་འཁོར་ཞེས་བྱའོ། །དེ་བཞིན་དུ་རྣལ་འབྱོར་པ་རྣམས་ཀྱིས་ཐ་མལ་པའི་གནས་སྐབས་ཀྱི་ཆོས་ཀྱི་དབྱིངས་དག་པ་མ་ཡིན་པ་དང་། བདག་མེད་
པ་གཉིས་ལ་གཞོལ་བའི་ཤེས་རབ་དང་ཏིང་ངེ་འཛིན་ཡང་དཀྱིལ་འཁོར་ཞེས་བྱ་སྟེ། འབྲས་བུ་ཉེ་བར་བརྟགས་པ་ལས་གནོད་པ་མེད་པས་སོ། །དེ་ལྟར་དེ་དག་ནི་རྣམ་པར་མི་རྟོག་པའི་འབྲས་བུའི་དཀྱིལ་འཁོར་ཐོབ་པའི་ཐབས་ཀྱི་དངོས་པོའི་ཕྱིར་ན་དཀྱིལ་འཁོར་ཏེ། ཇི་
སྐད་དུ་དཀྱིལ་ནི་སྙིང་པོའོ། །འཁོར་ནི་ལེན་པའོ་ཞེས་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས་གསུངས་པ་བཞིན་ནོ། །དེ་ལྟར་དེ་དག་ནི་རྒྱུད་བསྡུས་པའི་དཀྱིལ་འཁོར་དུ་བརྗོད་དོ། །དེ་ལྟར་བྱས་ན་དཀྱིལ་འཁོར་ཞེས་བྱ་བ་ནི་སངས་རྒྱས་ཀྱི་ས་དང་། དེའི་
རྒྱུ་རིགས་དང་ལམ་གྱི་བདག་ཉིད་འདི་ཙམ་ཞིག་ལ་བྱའོ། །དེའི་རྣམ་པར་དབྱེ་བ་ཡང་ཇི་ལྟར་བསྟན་པའི་ཕྱོགས་ལས་རྣམ་པ་བདུན་ཏེ། རྒྱས་པར་དབྱེ་བ་ལ་ནི་ཚད་མེད་དོ། །དེའི་མིང་གི་དོན་ཀྱང་སྙིང་པོ་འཛིན་པར་བྱེད་པ་ཞེས་བྱེ་བྲག་མེད་པར་བྱས་ཏེ། ཡང་བྱེ་བྲག་ཏུ་

ན་འབྲས་བུ་ནི་དེའི་རང་བཞིན་འཛིན་པས་སྙིང་པོ་ཉིད་འཛིན་པ་ཞེས་བྱ་བའམ། སྙིང་པོ་ཡང་ཡིན་ལ་འཛིན་པ་ཡང་ཡིན་པས་སྙིང་པོ་འཛིན་པ་ཞེས་བསྡུའོ། །རྒྱུ་ནི་སྙིང་པོའི་ཕྱིར་འཛིན་པའམ། སྙིང་པོ་ལ་ལེན་པ་ཞེས་བསྡུའོ། །དེ་ལྟར་ན་འདིར་འབྲས་བུའི་
དཀྱིལ་འཁོར་ནི་ཐབས་ལས་བྱུང་བ་ཡིན་ལ། རྒྱུའི་བདག་ཉིད་ཀྱི་དཀྱིལ་འཁོར་ནི་དེ་ཐོབ་པའི་ཐབས་ཕུལ་དུ་བྱུང་བ་ཡིན་པས་འདི་དག་ཐབས་དང་ཐབས་ལས་བྱུང་བའི་འབྲེལ་བ་ཁྱད་པར་ཅན་དང་བཅས་པ་སྟེ། འབྲས་བུས་ཀྱང་འགྲོ་བ་མཐའ་དག་ལ་ཇི་སྲིད་ནམ་མཁའ་ལ་གནས་པ་
དེ་སྲིད་དུ་ཕན་པ་དང་བདེ་བ་སྒྲུབ་པས་འདིའི་འབྲས་བུའི་འབྲས་བུ་སྟེ། རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྣམ་པར་རྒྱལ། །ཞེས་པ་དང་། གཞན་དོན་ཕུན་ཚོགས་སངས་རྒྱས་ཀྱི། །འབྲས་བུའི་གཙོ་བོར་འདོད་པ་སྟེ། །སངས་རྒྱས་ཉིད་
སོགས་དེ་ལས་གཞན། །དེ་ཡི་དོན་གྱི་འབྲས་བུར་འདོད། །ཅེས་གསུངས་པས་སོ། །དེ་ལྟ་བས་ན་གཞུང་འདིའི་བརྗོད་པར་བྱ་བ་དཀྱིལ་འཁོར་ཡིན་ལ། དཀྱིལ་འཁོར་དེ་ཡང་རྒྱུ་དང་འབྲས་བུས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་དོན་དུ་འགྱུར་བས་འདི་དོན་ཆེན་པོར་
ཉེ་བར་གནས་པའི་ཕྱིར་འབད་པས་བཤད་པར་རིགས་སོ་ཞེས་བྱ་བ་ནི་ལམ་དང་འབྲས་བུའི་གོ་རིམས་སོམོ། །དེ་ཁོང་དུ་ཆུད་པར་བྱེད་པའི་རིམ་པའི་གཞུང་ནི་འདིར་ཆོ་ག་ཞེས་བྱ་སྟེ། ཉེ་བར་ཁྲིད་པས་ན་ཐབས་ཡིན་ལ། ཐབས་འདི་ཡང་དེ་ལ་ཡོད་པས་ན་ཐབས་ཅན་ཏེ། དཀྱིལ་འཁོར་གྱི་དོན་
མཐའ་དག་ཁོང་དུ་ཆུད་པར་བྱེད་པ་ལ་བློ་འཁྲིད་པའི་ཐབས་ཟབ་མོ་དང་བཅས་པ་ཞེས་བྱ་བའི་དོན་ཏོ། །འོན་ཀྱང་འདིར་དཀྱིལ་འཁོར་མཐའ་དག་མ་བསྟན་པས་ན་གཙོ་བོར་ནི་རྡུལ་ཚོན་གྱི་དཀྱིལ་འཁོར་གྱི་ཆོ་ག་གཟུང་ལ་གཞན་དག་གི་ཆོ་ག་ཡང་ཤུགས་ལས་གོ་བར་བྱའོ། །ད་ནི་སློབ་
དཔོན་གྱི་ཞལ་སྔ་ནས་དཀྱིལ་འཁོར་གྱི་ཆོ་ག་བསྡུ་བར་བྱ་བ་ལ་སུ་ཞིག་སྣོད་དུ་གྱུར་པ་ཡིན་པ་དེ་བསྟན་པའི་ཕྱིར། དེ་ལ་དམ་ཚིག་ལ་སོགས་པ་ཐོབ་པའི་རྣལ་འབྱོར་པའི་ཕྱིར། འཕགས་པ་དེ་ཁོ་ན་ཉིད་བསྡུས་པའི་རྒྱུད་ཆེན་པོའི་ཆོ་གས་དཀྱིལ་འཁོར་གྱི་ཆོ་ག་ཀུན་ལས་བཏུ་བར་བྱའོ་

ཞེས་སྨོས་ཏེ། གཞན་དུ་ན་ཆོ་ག་མི་འགྲུབ་ཅེས་དགོངས་ལ། ཁོ་བོ་ཆོ་ག་ཀུན་ལས་བཏུས་པ་ཙམ་པ་ཡང་དོན་མེད་ཅེས་དགོངས་པའོ། །འདིར་དམ་ཚིག་ལ་སོགས་པ་ཞེས་བྱ་བའི་སྒྲས་ནི་དབང་བསྐུར་བར་བསྡུའོ། །འདི་ན་དམ་ཚིག་ལ་སོགས་པ་ཐོབ་པ་དེ་དག་ཉིད་ཀྱིས་དངོས་གྲུབ་ཀྱི་
ཕྱིར་བསྙེན་པ་བྱེད་པ་ཡང་རུང་། སློབ་མ་མངོན་པར་དབང་བསྐུར་བའི་ཕྱིར་བསྙེན་པའང་རུང་སྟེ། བསྙེན་པའི་དཀྱིལ་འཁོར་བསྒོམ་པའི་ཆོ་ག་ནི་ཇི་ལྟ་བུ་སློབ་མ་དབང་བསྐུར་བའི་ཆོ་ག་ནི་ཇི་ལྟ་བུ་ཞེས་རྟོག་པ་ལ། དང་པོ་བསྙེན་པའི་ཆོ་ག་གསུངས་པས་དེའི་གོ་རིམས་བརྗོད་དེ། འདི་
ན་ཐོག་མ་མེད་པའི་དུས་ནས་བྱས་པའི་ལུས་དང་ངག་དང་ཡིད་ཀྱི་སྤྱོད་པ་ཕྱག་རྒྱ་དང་གསང་སྔགས་དང་ཏིང་ངེ་འཛིན་སྒྲུབ་པ་ལ་བར་དུ་གཅོད་པའི་སྒྲིབ་པ་བསལ་བའི་ཕྱིར། དང་པོར་རེ་ཞིག་བདག་མེད་པ་ལ་ལྷག་པར་མོས་པས་ནང་བདག་ཉིད་ཅན་གྱི་ཁྲུས་བྱས་ལ་ཞེས་བྱ་བ་ལ་སོགས་པས་
ལུས་ངག་ཡིད་གསུམ་རྣམ་པར་དག་པར་བྱའོ། །འཇིག་རྟེན་འདི་ནི་སེམས་ཀྱིས་ཁྲིད། །ཅེས་བྱ་བ་ལ་སོགས་པའི་ཐེག་པ་ཆེན་པོ་འདིར་སེམས་གཙོ་བོར་གྱུར་པས་དེ་སྦྱང་བ་སྔར་བསྟན་ཅིང་། ངག་གི་ཉེས་པ་ནི་སྒྲུབ་སླ་བས་ལུས་ཅན་རྣམས་ལ་རབ་ཏུ་མང་བའི་ཕྱིར་དང་། འདིར་བཟླས་བརྗོད་
ལས་གཙོ་བོར་དངོས་གྲུབ་ཀྱི་མཚན་མ་འདོད་པའི་དབང་དུ་བྱས་པའི་ཕྱིར་དེའི་འོག་ཏུ་ངག་སྦྱང་བར་བསྟན་ཏོ། །མཚན་ཉིད་དེ་གཉིས་ལས་བཟློག་པ་ནི་ལུས་ཡིན་པས་ཐམས་ཅད་ཀྱི་མཇུག་ཏུའོ། །ལུས་དང་ངག་དང་ཡིད་རྣམ་པར་དག་པའི་སྒྲུབ་པ་པོ་ལ་བདུད་ཀྱིས་གླགས་སུ་གྱུར་པ་
སྤང་བའི་ཕྱིར་བསྲུང་བའི་བྱ་བ་ནི། དེ་ནས་ཡི་གེ་ཧཱུྃ་ལས་རྡོ་རྗེ་འབར་བ་ཉི་མའི་མེ་ལྟ་བུར་བདག་ཉིད་སྤྲུལ་ཏེ་ཞེས་བྱ་བ་ལ་སོགས་པ་ཇི་སྲིད་བཛྲ་བནྡྷ་བཾ་ཞེས་པའོ་ཞེས་བྱ་བའི་བར་དུ་སྨོས་པའོ། །སྐབས་འདི་ལ་བསམ་པར་བྱ་བ་འགའ་ཡོད་དེ། ཅིས་ན་བསྲུང་བའི་ཆོ་ག་གཞན་སྟོན་
པར་བྱེད། རྩ་བའི་རྒྱུད་ཉིད་ལས་ནི། རྡོ་རྗེ་སེམས་དཔའི་མཚན་ཙམ་ཞིག །དྲན་ནམ་ཉན་པར་བྱེད་ཀྱང་རུང་། །ཞེས་བྱ་བ་ལ་སོགས་པས་རིགས་སོ་སོའི་བསྲུང་བ་མ་ཡིན་ནམ། དེ་ལྟ་བུ་རང་གི་ཆོ་ག་ངེས་པ་བོར་ན་གཞན་སྟོན་འདི་ནི་མི་འཚམ་མོ་ཞེ་ན། བདེན་མོད་ཀྱིས་འོན་ཀྱང་

ཉེས་པ་མེད་དེ། འདི་ན་གང་ཟག་གཉིས་ཏེ་རང་གི་བྱ་བ་ཙམ་སེམས་ཤིང་མཆོག་ཏུ་མཉམ་པར་གཞག་པ་ནང་གི་བདག་ཉིད་ལ་ལྷག་པར་གཞོལ་བའི་རྣལ་འབྱོར་པ་དང་། དེ་ལས་གཞན་པ་དཀྱིལ་འཁོར་ཆེན་པོ་སྤྲོས་པ་ལ་ཞུགས་པས་སློབ་མའི་དོན་བྱེད་པའོ། །དེ་
ལ་དང་པོའི་དབང་དུ་བྱས་ནས་ནི་རྩ་བའི་རྒྱུད་ལས་ནང་གི་བྱེད་པའི་བསྲུང་བ་ཚེགས་མེད་པ་བསྟན་ཏེ། དེ་ནི་ཆེས་གདམས་པས་དེ་ཙམ་གྱིས་བསྲུང་བར་འགྱུར་ལ། འདི་ནི་གཙོ་ཆེར་དཀྱིལ་འཁོར་ཆེན་པོའི་སྤྲོས་པ་ལ་ཞུགས་པའི་རྡོ་རྗེ་སློབ་དཔོན་གྱི་ནང་དུ་བྱས་པས་ནང་དང་ཕྱི་རོལ་གྱི་
བགེགས་ལྡང་བ་རབ་ཏུ་མེད་པའི་ཕྱིར། སྔགས་དང་ཕྱག་རྒྱ་མཆོག་ཏུ་མི་ཟད་པ་དྲག་ཅིང་རྣོ་བ་དག་གིས་བསྲུང་བ་ཆེན་པོ་བྱ་དགོས་པས་ཉེས་པ་མེད་དོ། །ཡང་ན་བསྲུང་བ་འདི་ལྟ་བུ་ཡང་ཡོད་ཅེས་རྣམ་གྲངས་ལ་མཁས་པར་བྱ་བའི་ཕྱིར་ཏེ། རང་གི་རྒྱུད་ཀྱིས་བསྲུང་བ་ཡང་
སུན་མི་འབྱིན་པས་སོ། །གཞན་དག་ན་རེ་བདག་བསྲུང་བ་བསྒོམ་པ་འདིའི་ནང་དུ་མངོན་པར་སངས་མ་རྒྱས་ཀྱི་བར་དུ་འགྲོ་བར་མི་བྱའོ་ཞེས་དམ་བཅས་པ་ལ་གནས་པའི་བསྲུང་བ་ནི་