Luận tạng Tây Tạng (Tengyur) — Tập 58

འབྱོར་པས་དམ་ཚིག་ཆེན་པོའི་སེམས་
དཔའི་ང་རྒྱལ་བསྐྱེད་པར་བྱའོ། །དེ་ནས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ་ས་མ་ཡོ྅ཧཾ་ཞེས་བརྗོད་ཅིང་། དམ་ཚིག་གི་སེམས་དཔའི་ང་རྒྱལ་བསྐྱེད་ལ། དེ་ཉིད་རང་གི་ལྷའི་དམ་ཚིག་གི་ཕྱག་རྒྱས་སྙིང་ག་དང་། མཛོད་སྦུ་དང་། ལྐོག་མ་དང་། སྤྱི་བོར་ས་མ་
ཡ་སཏྭ་ཨ་དྷི་ཏིཥྛ་སྭ་མཾ་ཞེས་བརྗོད་ཅིང་བྱིན་གྱིས་བརླབ་པར་བྱའོ། །རང་གི་རིགས་ཀྱི་དམ་ཚིག་གི་ཕྱག་རྒྱས་སྙིང་ག་དང་། མཛོད་སྤུ་དང་། ལྐོག་མ་དང་། སྦྱི་བོར་ཟླ་བའི་དཀྱིལ་འཁོར་ལ་གནས་པའི་མཚན་མ་བཞི་བསྐྱེད་པས་བསམ་པར་བྱའོ། །དེ་ནས་རང་གི་ལྷའི་ཕྱག་རྒྱ་ཆེན་པོ་

བཅིང་བར་བྱའོ། །དེ་བཞིན་གཤེགས་པ་ལ་སོགས་པའི་རིགས་ཐམས་ཅད་པའི་རྣལ་འབྱོར་རྣམས་ཀྱི་རང་གི་སེམས་ཡོངས་སུ་སྦྱོང་བའི་ཡེ་ཤེས་ནི་འདི་ཡིན་ནོ་ཞེས་བཅོམ་ལྡན་འདས་ཀྱིས་གསུངས་པས་ཐེ་ཚོམ་མི་བྱའོ། །དེ་བཞིན་གཤེགས་པའི་རྣལ་འབྱོར་པས་སྔ་མ་བཞིན་དུ་
སྡིག་པ་དྲལ་ཞིང་མཐར་ཐུག་པའི་ཆོ་ག་རྗེས་སུ་སྤྱད་ལ། རྡོ་རྗེ་སྐྱིལ་མོ་ཀྲུང་བཅས་ཏེ། ལག་པ་གཉིས་རྡོ་རྗེ་བསྡམས་པ་བཅིངས་ལ་པང་བར་བཀན་ཏེ། རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསམས་ཏེ། རྡོ་རྗེ་དབུས་སུ། ཨོཾ་ཙིཏྟ་པྲ་ཏི་བེ་དྟཾ་ཀཱ་རོ་མི་ཞེས་བྱ་བ་ཡིད་ཀྱིས་བྲིས་
ཏེ། མངོན་པར་བྱང་ཆུབ་པ་ལྔའི་རིམ་པ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ནས་རང་གི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་བཅིངས་ཏེ། ས་མ་ཡ་ཧཾ་ཞེས་བྱ་བས་དམ་ཚིག་གི་སེམས་དཔའི་ང་རྒྱལ་བསྒོམ་པར་བྱའོ། །དེ་ནས་དེ་བཞིན་གཤེགས་པའི་དམ་
ཚིག་གི་ཕྱག་རྒྱ་དེ་ཉིད་སྙིང་ག་དང་མཛོད་སྤུ་དང་། ལྐོག་མ་དང་། སྤྱི་བོར་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བརྗོད་ཅིང་བྱིན་གྱིས་བརླབ་པར་བྱའོ། །དེའི་རྗེས་ལ་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིང་བར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་
རིགས་ཐམས་ཅད་ཀྱི་ཕྱག་རྒྱ་ཆེན་པོ་སྒྲུབ་པའི་ཕྱིར་དང་དེ་བཞིན་གཤེགས་པ་ལ་སོགས་པ་ཐམས་ཅད་ཀྱི་རྣལ་འབྱོར་པ་ལ་བསྒོམ་པའི་གདམས་ངག་སྦྱིན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དེ་ཁོ་ན་ཉིད་གསལ་བར་བྱེད་པའི་གསང་བའི་དངོས་གྲུབ་ཀྱི་རྒྱུད་བཤད་ནས།
ད་ནི་རྣལ་འབྱོར་པའི་རང་གི་སེམས་ཡོངས་སུ་སྦྱང་བར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པའི་རིགས་ཐམས་ཅད་ཀྱི་ཕྱག་རྒྱ་མངོན་པར་བརྗོད་པའི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་ཇི་སྐད་དུ་
བཤད་པ་དེ་དག་གོ། །མཚན་མ་ནི་རྡོ་རྗེ་ལ་སོགས་པའི་གཟུགས་སོ། །དེ་མངོན་པར་འདོད་པ་ནི་དོན་དེའི་མིང་མངོན་པར་བརྗོད་པས་ན་མངོན་པར་བརྗོད་པ་ཞེས་བྱ་བའི་དོན་ཏོ། །དེའི་དངོས་གྲུབ་ནི་བསྐྱེད་པའོ། །མཚན་མ་ནི་ཕྱག་རྒྱའི་མིང་གི་དོན་གྱི་ངེས་པ་ནི་རྡོ་རྗེ་

དབྱིངས་ཀྱི་དབང་ཕྱུག་མ་ལ་སོགས་པ་གཟུངས་རྣམས་རྟོགས་པ་ཡིན་ནོ་ཞེས་བྱ་བའི་དོན་ཏོ། །བཅོམ་ལྡན་སེམས་དཔའ་དེ་ཉིད་ནི། །ཞེས་བྱ་བ་ནི་རིགས་ཐམས་ཅད་ཀྱི་དེ་ཁོ་ན་ཉིད་བསྐྱེད་པ་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་ཉིད་དུ་བཤད་ཟིན་པ་
གང་ཡིན་པའོ། །བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་ནི་དེ་བཞིན་གཤེགས་པའི་མཚན་མ་མངོན་པར་བརྗོད་པའི་གསང་བའི་དངོས་གྲུབ་བོ། །ཇི་ལྟར་གྱུར་པ་ཡིན་ཞེ་ན། རྡོ་རྗེ་སེམས་དཔའ་སྟེ་ཟླ་བ་ཞེས་བྱ་བའི་དོན་ཏོ། །གང་དུ་གནས་པ་ཡིན་ཞེ་ན། ཐུགས་ལ་གནས་ཞེས་
བྱ་བ་སྨོས་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་ཐུགས་ལ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རྩེ་ལྔ་པའི་གཟུགས་ཀྱིས་གནས་པ་ནི་ཐུགས་ལ་གནས་པའོ། །མཉམ་པར་གཞག་པས་ཏིང་འཛིན་ཏེ། །ཞེས་བྱ་བ་ནི་མཉམ་པར་གཞག་པའི་ཏིང་ངེ་འཛིན་
རྩེ་གཅིག་པ་ཡིན་པ་དེའི་ཕྱིར་ཏིང་ངེ་འཛིན་དེའི་རྒྱུ་ནི་མཉམ་པར་གཞག་པར་བྱའོ། །འདི་ལས་ཅི་ཞིག་བྱེད་ཅེ་ན། སངས་རྒྱས་བྱང་ཆུབ་རབ་སྒྲུབ་བྱེད། །ཅེས་བྱ་བ་སྨོས་ཏེ། སངས་རྒྱས་རྣམས་ཀྱི་བྱང་ཆུབ་ནི་སངས་རྒྱས་ཀྱི་བྱང་ཆུབ་སྟེ། དེ་རབ་ཏུ་སྒྲུབ་ཅིང་སྐྱེད་པར་བྱེད་དོ། །
འདི་སྐད་སྟོན་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་བཅོམ་ལྡན་འདས་རྡོ་རྗེ་འཛིན་པའོ། །ཐབས་དང་ཤེས་རབ་ཀྱི་རང་བཞིན་གྱི་ཟླ་བ་རྡོ་རྗེའི་རང་བཞིན་དུ་རྗེས་སུ་དྲན་པའི་ཏིང་ངེ་འཛིན་གྱིས་སྐྱེད་པར་བྱེད་པ་ནི། རྡོ་རྗེ་དབྱིངས་ཀྱི་
དབང་ཕྱུག་མ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་མཚན་མའི་སྒྲའི་དོན་ཡིན་ཏེ། དེ་ལྟར་དེ་བཞིན་གཤེགས་པའི་སྒྲའི་མཚན་མའི་མངོན་པར་བརྗོད་པ་བསྟན་ནས། དེ་བཞིན་གཤེགས་པའི་རིགས་ཀྱི་རབ་ཏུ་རྟོགས་ཕྱིར་རྡོ་རྗེ་ཞེས་བྱ་བ་ལ་སོགས་པ་གསུངས་ཏེ།
རྡོ་རྗེ་ཞེས་བྱ་བའི་ཐ་ཚིག་གོ། །ཅིའི་ཕྱིར་རྡོ་རྗེ་སེམས་དཔའི་མཚན་མ་ཡིན་ཞེ་ན། རབ་ཏུ་རྟོགས་ཕྱིར་ཞེས་བྱ་བ་སྨོས་ཏེ། ཤིན་ཏུ་རབ་ཏུ་རྟོགས་པས་ན་རབ་ཏུ་རྟོགས་པ་སྟེ། བྱང་ཆུབ་པའི་མཚན་ཉིད་ཅན་གྱི་སེམས་ཁོང་དུ་ཆུད་པས་ན་རབ་ཏུ་རྟོགས་པའོ། །དེའི་ངོ་བོ་ཉིད་རབ་ཏུ་

རྟོགས་པ་ཉིད་ཡིན་པ་དེ་བས་ན་རབ་ཏུ་རྟོགས་ཕྱིར་རོ། །ལྕགས་ཀྱུ་ཡིན་ཞེས་བྱ་བ་ནི་རྡོ་རྗེ་རྒྱལ་པོའི་མཚན་མའོ། །ཅིའི་ཕྱིར་ལྕགས་ཀྱུར་བརྗོད་ཅེ་ན། གཟུང་བའི་ཚུལ་གྱིས་ཞེས་བྱ་བ་སྨོས་ཏེ། གཟུང་བའི་ཚུལ་གྱིས་བསྡུ་བའི་དངོས་པོས་སེམས་ཅན་རྣམས་བསྡུ་བའི་དངོས་པོར་སྦྱར་
བ་དང་། དེ་བཞིན་གཤེགས་པ་རྣམས་སྤྱན་འདྲེན་པའི་ཚུལ་གྱིས་སོ། །མདའ་ཡིན་ལ་ཞེས་བྱ་བ་ནི་རྡོ་རྗེ་ཆགས་པའི་མཚན་མའོ། །རྒྱུད་གང་ཡིན་ཞེ་ན། ཕྲ་མོ་རྟོགས་ཕྱིར་ཞེས་བྱ་བ་སྨོས་ཏེ། ཕྲ་བ་ནི་ཆོས་ཀྱི་དབྱིངས་དེ་རྟོགས་པའི་ཕྱིར་ཕྲ་མོ་རྟོགས་པའོ། །དེའི་དངོས་པོ་ཕྲ་
མོ་རྟོགས་པ་དེའི་རྒྱུད་ཆོས་ཀྱི་དབྱིངས་མངོན་སུམ་དུ་བྱེད་དོ་ཞེས་བྱ་བའི་དོན་ཏོ། །ལེགས་ཞེས་བྱ་བ་ནི་རྡོ་རྗེ་ལེགས་པའི་མཚན་མའོ། །ཅིའི་ཕྱིར་ཞེ་ན་མགུ་བར་གྱུར་ཕྱིར་ཞེས་བྱ་བ་སྨོས་ཏེ། ཡོངས་སུ་མགུ་བ་ཞེས་བྱ་བའི་དོན་ཏོ། །ཆོས་ཀྱི་དབྱིངས་མངོན་སུམ་དུ་བྱེད་པའི་
རབ་ཏུ་དགའ་བ་གང་ཡིན་པ་དེ་ནི་ཡོངས་སུ་མགུ་པས་ན་ལེགས་པར་བྱེད་པ་ཞེས་བྱའོ། །རིན་ཆེན་གསུངས་ཞེས་བྱ་བ་ནི་རྡོ་རྗེ་རིན་ཆེན་གྱི་མཚན་མའོ། །ཅིའི་ཕྱིར་ཞེ་ན། སྤྲས་པའི་ཕྱིར་ཞེས་བྱ་བ་སྨོས་ཏེ། ནམ་མཁའ་དང་མཉམ་པའི་ཡེ་ཤེས་ཀྱིས་སེམས་ཅན་ཐམས་ཅད་ཀྱི་
བསམ་པ་ཐམས་ཅད་དེ་ཡོངས་སུ་རྫོགས་པའོ། །དེ་སྐད་དུ་ཡང་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་རིགས་རྣམས་སྤྲོས་པ་བསྐྱེད་པར་བྱའོ་ཞེས་གསུངས་པ་ཡིན་ནོ། །ཉི་མ་སྟེ་ཞེས་བྱ་བ་ནི་རྡོ་རྗེ་གཟི་བརྗིད་ཀྱི་མཚན་མའོ། །ཅིའི་ཕྱིར་ཞེ་ན། གཟི་བརྗིད་
ཚུལ་གྱིས་ཞེས་བྱ་བ་སྨོས་ཏེ། གཟི་བརྗིད་ནི་གཟི་བརྗིད་ཀྱི་ཚུལ་གྱིས་སོ། །གཟི་བརྗིད་ཀྱི་ཚུལ་གྱིས་གཟི་བརྗིད་རབ་ཏུ་རྟོགས་པ་དེ་དང་དེ་ནི་གཟི་བརྗིད་ཀྱི་ཚུལ་ཅན་ནོ། །འདི་སྐད་སྟོན་པ་ཡིན་ཏེ། ཇི་ལྟར་ཉི་མའི་དཀྱིལ་འཁོར་གྱིས་མུན་པ་ཐམས་ཅད་འོད་ཟེར་གྱི་སྣང་བས་ཟིལ་
གྱིས་གནོན་པར་བྱེད་པ་དེ་བཞིན་དུ་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་ཉི་མས་བག་ཆགས་དང་བཅས་པའི་ཉོན་མོངས་པ་སྤངས་ནས་ཕྱི་དང་ནང་གི་མུན་པ་ཟིལ་གྱིས་མནན་ཏེ། མི་འཇིགས་པ་སྦྱིན་པའི་འོད་ཟེར་གྱིས་རང་དང་གཞན་གྱི་མུན་པ་སེལ་བར་བྱེད་པའོ། །རྒྱལ་

མཚན་ཞེས་བྱ་བས་ཅི་ཞིག་སྟོན་པར་འགྱུར་ཞེ་ན། རྒྱལ་མཚན་ལེགས་པར་གསུངས་ཞེས་བྱ་བ་སྨོས་ཏེ། ཉེས་པའི་དྲི་མ་ཐམས་ཅད་སྤངས་པ་ཉིད་དང་། དམིགས་པ་མེད་པའི་བྱམས་པའི་སྦྱིན་པས་ཁམས་གསུམ་པོ་མ་ལུས་པ་ཟིལ་གྱིས་གནོན་པར་བྱེད་
ཅེས་བྱ་བའི་དོན་ཏོ། །འཛུམ་པ་ཞེས་བརྗོད་པས་ཅི་ཞིག་བརྗོད་པ་ཡིན་ཞེ་ན། འཛུམ་པ་བཞད་པར་གྲགས་པ་ཡིན། །ཞེས་བྱ་བ་སྨོས་ཏེ། བཞད་པ་རྣམས་ནི་བཞད་པའོ། །འདི་སྐད་སྟོན་པ་ཡིན་ཏེ། མི་དམིགས་པའི་བྱམས་པའི་ཆོས་སྦྱིན་པའི་མཐུས་དེ་བཞིན་གཤེགས་པའི་སྟོབས་
དང་། མི་འཇིགས་པ་ལ་སོགས་པ་ཆོས་ཀྱི་སྦྱིན་པས་སེམས་ཅན་གྱི་ཁམས་རྣམས་ཚིམ་པར་བྱེད་པའི་མགུ་བ་ཐོབ་པ་ནི་འཛུམ་པ་ཞེས་བྱ་བའི་དོན་ཏོ། །ཅིའི་ཕྱིར་པདྨོ་ཡིན་ཞེས་བྱ་བར་བརྗོད་ཅེ་ན། འདོད་ཆགས་དག་ཕྱིར་ཞེས་བྱ་བ་སྨོས་ཏེ། ཐུགས་རྗེ་ཆེན་པོས་དེའི་འདོད་ཆགས་
དག་པས་ན་འདོད་ཆགས་དག་པའོ། །འདོད་ཆགས་དག་པའི་དངོས་པོ་ནི་འདོད་ཆགས་དག་པའི་ཕྱིར་རོ། །འདོད་ཆགས་དག་པའི་པདྨོ་ཡིས། །ཞེས་བྱ་བ་དེས་དྲི་མ་མེད་པར་ཆོས་མཐུན་པའོ། །རལ་གྲི་ཞེས་བརྗོད་པ་ནི་རྡོ་རྗེ་རྣོན་པོའི་མཚན་མའོ། །ཅིའི་ཕྱིར་ཞེ་ན། ཉོན་མོངས་
དགྲ་གཅོད་ཕྱིར་ཞེས་བྱ་བ་སྨོས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་རལ་གྲིས་ཆོས་ཐམས་ཅད་མ་སྐྱེས་པའོ་ཞེས་བསྒོམས་པའི་སྟོབས་ཀྱིས་རྟོགས་པས་ཉོན་མོངས་པ་ཉིད་ཀྱི་དགྲ་དེ་དག་གཅོད་པས་ན་དེ་དག་དགྲ་གཅོད་ཕྱིར་རོ། །འཁོར་ལོ་སྟེ་ཞེས་བྱ་བ་ནི་རྡོ་རྗེ་རྒྱུའི་མཚན་མའོ། །
ཅིའི་ཕྱིར་ཞེ་ན། དཀྱིལ་འཁོར་གྱི་ཚུལ་གྱིས་ཞེས་བྱ་བ་སྨོས་ཏེ། དཀྱིལ་འཁོར་གྱི་ཚུལ་ནི་དཀྱིལ་འཁོར་གྱི་སྦྱོར་བ་ཡིན་པ་དེའི་ཕྱིར་དཀྱིལ་འཁོར་གྱི་སྦྱོར་བའི་རྒྱུ་ནི་འཁོར་ལོའི་མཚན་མ་ཡིན་ནོ་ཞེས་བྱ་བའི་དོན་ཏོ། །གང་གི་ཚེ་རྡོ་རྗེ་དབྱིངས་ཀྱི་དཀྱིལ་འཁོར་དང་འབྲེལ་པ་དེའི་ཚེ་
དེ་དང་དེ་ལ་བརྟེན་པའི་འཁོར་ལོའི་ཚུལ་ནི་འཁོར་ལོའོ། །སྨྲ་ཞེས་བྱ་བ་ནི་རྡོ་རྗེ་གསུངས་པའི་མཚན་མའི་ཕྱག་རྒྱའོ། །ཅིའི་ཕྱིར་ཞེ་ན། ཚིག་གི་བརྗོད་པས་ཞེས་བྱ་བ་སྨོས་ཏེ། སྒྲ་འདོན་ཅིང་ངག་གི་ལམ་དེ་ལས་ཆོས་བརྗོད་པ་དག་གི་ཆོས་བརྗོད་པའི་ཐ་ཚིག་གོ། །ཀུན་རྡོ་རྗེ་ནི་རྩེ་

མོ་བཅུ་གཉིས་པའི་རྡོ་རྗེ་སྟེ། རྡོ་རྗེ་ལས་ཀྱི་མཚན་མའོ། །ཅིའི་ཕྱིར་རྡོ་རྗེ་ཀུན་ཞེས་བརྗོད་ཅེ་ན། སྣ་ཚོགས་ཕྱིར་ཞེས་བྱ་བ་སྨོས་ཏེ། སངས་རྒྱས་ཀྱི་སྤྲུལ་པ་དང་། སེམས་ཅན་གྱི་དོན་བྱེད་པའི་ཕྱིར་ཐམས་ཅད་དུ་སོང་བ་ཡིན་ནོ་ཞེས་བྱ་བའི་དོན་ཏོ། །གོ་ཆ་ཞེས་བྱ་བ་ནི་རྡོ་རྗེ་གོ་ཆ་མའི་མཚན་མ་ལ་
བྱ་སྟེ། ཅིའི་ཕྱིར་ཞེ་ན། མི་ཚུགས་ཚུལ་གྱིས་ཞེས་བྱ་བ་སྨོས་ཏེ། སྡུག་བསྔལ་གྱིས་དུབ་པར་མི་ནུས་པས་ན་མི་ཚུགས་པའོ། །དེའི་སྦྱོར་བ་ནི་མི་ཚུགས་པའི་སྦྱིན་པ་སྟེ། དེའི་ཕྱིར་མི་ཚུགས་པའི་ཚུལ་ནི་ཡོངས་སུ་སྦྱོང་བའི་བརྩོན་འགྲུས་ཀྱི་ངོ་བས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་ཕྱིར་མི་ལྡོག་པའི་དོན་ཏོ། །མཆེ་བ་ནི་རྡོ་རྗེ་གནོད་སྦྱིན་གྱི་མཚན་མ་སྟེ། ཅིའི་ཕྱིར་ཞེ་ན། འཇིགས་བྱེད་ཚུལ་གྱིས་ཞེས་བྱ་བ་སྨོས་ཏེ། འཇིགས་པར་བྱེད་པ་འཇིགས་པ་བསྐྱེད་པའི་ཚུལ་ནི་སོ་སོར་རྟོག་པའི་བརྩོན་འགྲུས་ཀྱི་ཆོས་ཐམས་ཅད་རང་བཞིན་གྱིས་འོད་གསལ་བ་
ཡོངས་སུ་ཤེས་པས་སྣང་བ་མེད་པར་དམིགས་པ་ནི་འཇིགས་པའོ། །དེ་ལས་སྐྱེས་པའི་ཁྲོ་བོ་ཐམས་ཅད་ཀྱི་ངོ་བོ་བདུད་ལ་སོགས་པ་གདུག་པ་རྣམས་ལ་འཇིགས་པ་བསྐྱེད་པའོ། །བསྡམས་པ་ནི་རྡོ་རྗེ་ཁུ་ཚུར་གྱི་མཚན་མའོ། །ཅིའི་ཕྱིར་ཞེ་ན། ཕྱག་རྒྱའི་ཚུལ་གྱིས་ཞེས་བྱ་བ་སྨོས་ཏེ། ཕྱག་རྒྱ་རྣམས་
འདྲེན་པའི་ཕྱག་རྒྱ་སྦྱོར་ཚུལ་ལོ། །དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་ཕྱག་རྒྱ་སྒྲུབ་པ་ནན་ཏན་དུ་བྱེད་པའི་བརྩོན་འགྲུས་ཀྱི་ཆོས་ཐམས་ཅད་རང་བཞིན་གྱིས་འོད་གསལ་བར་བྱེད་པའི་ཕྱག་རྒྱའི་སྦྱོར་བ་དེས་འཆིང་བ་བརྗོད་པ་ནི་དེའི་མཚན་མའོ། །དེ་ལྟར་མཚན་མའི་ཕྱག་རྒྱའི་སྒྲས་མངོན་
པར་བརྗོད་པའི་དོན་ངེས་པར་བྱེད་པའི་རྣལ་འབྱོར་པ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ། །ཇི་ལྟར་བཅོམ་ལྡན་འདས་རྟག་པ། །ཞེས་བྱ་བ་ནི་མི་འགྱུར་བའོ། །དེ་གང་ཡིན་ཞེ་ན། རྡོ་རྗེ་སེམས་དཔའ་ཀུན་འགྲོ་བ། །ཞེས་བྱ་བ་སྨོས་ཏེ། རྡོ་རྗེ་རྒྱལ་པོ་ལ་སོགས་པའི་
གདུལ་བྱ་རྣམས་ལ་སྔ་མའི་བསྒོམ་པའི་ཚུལ་གྱིས་ཐམས་ཅད་དུ་འགྲོ་བས་ན་ཀུན་འགྲོ་བའོ། །ཇི་ལྟར་རྡོ་རྗེ་རྒྱལ་པོ་ལ་སོགས་པའི་རྒྱུས་འདི་ཐམས་ཅད་དུ་འགྲོ་བ་དེ་བཞིན་དུ། རྡོ་རྗེ་མཚན་མ་ལ་སོགས་ཞེས་བྱའོ། །ལྕགས་ཀྱུ་ལ་སོགས་པའི་མཚན་མ་ལས་དང་པོར་བྱས་པའི་མཚན་མ་ལ་

སོགས་པའོ། །དེའི་བསྒོམ་པ་ནི་བདག་གི་རྣལ་འབྱོར་གྱི་དུས་སུ་དེ་ལྟར་ངེས་པ་བསྐྱེད་པས་རྣལ་འབྱོར་པ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྡོ་རྗེ་རྒྱལ་པོ་ལ་སོགས་པའི་སྙིང་པོ་བརྗོད་ཅིང་ཆོས་ཐམས་ཅད་བདག་མེད་པར་བསྒོམས་
ཏེ། ཟླ་བའི་དཀྱིལ་འཁོར་གྱི་སྟེང་དུ་སྙིང་པོ་དེ་ཉིད་ཀྱིས་རྡོ་རྗེ་རྩེ་ལྔ་པ་ཇི་ལྟ་བ་བཞིན་དུ་རྣམ་པར་བསམས་ཏེ། དེ་ཉིད་ལས་རྡོ་རྗེ་ལྕགས་ཀྱུ་ལ་སོགས་པའི་གཟུགས་སུ་རྣམ་པར་བསྒོམ་པའོ། །དེ་ལྟར་ན་རྡོ་རྗེ་དང་པོར་བྱས་པའི་མཚན་མ་ཐམས་ཅད་ནི་ཀུན་དུ་འགྲོ་བ་ཞེས་བྱ་བ་ཡིན་ནོ། །སེམས་
དཔའ་བྱིན་གྱིས་བརླབས་པའི་སྦྱོར་བ་དེས་རྡོ་རྗེ་སེམས་དཔའི་གཟུགས་སུ་བསྒོམས་ལ་རྡོ་རྗེ་སེམས་དཔའི་གཟུགས་དེ་ལས་རང་གི་ལྷའི་ཕྱག་རྒྱ་ཆེན་པོའི་གཟུགས་སུ་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་མཚན་མ་མངོན་པར་བརྗོད་པའི་
གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་རང་གི་སེམས་ཡོངས་སུ་སྦྱོང་བའི་དོན་ནི། དེ་ནས་ཞེས་བྱ་བ་ལ་སོགས་པ་སྟེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་བསྐྱེད་པའི་གསང་བའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་
ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཕྱག་རྒྱ་ཆེན་པོ་ལ་སོགས་པ་ཐམས་ཅད་བཅིང་བའོ། །དེ་སྐྱེ་བ་ནི་གཟུགས་བརྙན་གྱི་སྦྱོར་བ་ལ་སོགས་པས་སྒྲུབ་པ་པོའི་རྒྱུད་ལ་དེ་བཞིན་གཤེགས་པ་ལ་སོགས་པའི་རྣམ་པར་
བསྐྱེད་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་རྫོགས་པའོ། །དེ་ཉིད་ཀྱི་གསང་བ་དེ་སྟོན་པར་བྱེད་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །རྡོ་རྗེ་སྐྱིལ་མོ་ཀྲུང་བཅས་ལ། །ཞེས་བྱ་བ་ནི་བཅས་པ་ནི་བཅིངས་པའོ། །ལག་གཉིས་
རྡོ་རྗེ་བསྡམས་པ་ལས། །ཞེས་བྱ་བ་ནི་རྡོ་རྗེ་བསྡམས་པ་བཅིངས་ལ་པང་བར་དེ་གཞག་པའི་རྣམ་པ་དེ་ལྟ་བུས་རྡོ་རྗེ་བསྡམས་པ་དང་། རྡོ་རྗེ་སྐྱིལ་མོ་ཀྲུང་བཅིངས་པ་དང་བཅས་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་རང་གི་སྙིང་གར་སེམས་དཔའི་

རྡོ་རྗེར་བསྒོམས་པ་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །དེ་ལ་རབ་ཏུ་གནས་པ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་པའོ། །མྱུར་དུ་སངས་རྒྱས་ཉིད་དུ་འགྲུབ། །ཅེས་བྱ་བ་ནི་སེམས་དཔའི་ཏིང་ངེ་འཛིན་དེས་ཕྱག་རྒྱ་ཐམས་ཅད་བཅིངས་ཤིང་བསྐྱེད་པས་མྱུར་ཞིང་རིངས་པར་
སངས་རྒྱས་ཉིད་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། དེ་བཞིན་གཤེགས་པའི་རྣལ་འབྱོར་པ་རྡོ་རྗེ་སྐྱིལ་ཀྲུང་བཅས་ཏེ། དེའི་སྟེང་དུ་རྡོ་རྗེ་བསྡམས་པ་བཀན་ཏེ་བཞག་ལ་རང་
གི་སྙིང་གར་སེམས་དཔའི་རྡོ་རྗེ་ཇི་ལྟ་བ་བཞིན་དུ་རྣམ་པར་བསམས་ཏེ། རྡོ་རྗེའི་དབུས་སུ། ཨོཾ་ཙིཏྟ་པྲ་ཏེ་བེ་དྷཾ་ཀཱ་རོ་མི་ཞེས་བྱ་བ་མངོན་པར་བརྗོད་ཅིང་། མངོན་པར་བྱང་ཆུབ་ལྔ་ཇི་ལྟ་བ་བཞིན་བསྒོམ་པར་བྱའོ། །དེ་ལྟར་དེ་བཞིན་གཤེགས་པའི་ཕྱག་རྒྱ་བཅིངས་པ་བསྐྱེད་པ་
བསྟན་ནས། ད་ནི་དེ་བཞིན་གཤེགས་པའི་རིགས་ནི་དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་རྒྱལ་པོ་ཞེས་བྱ་བ་ལ་སོགས་པ་སྨོས་ཏེ། དཔེར་ན་འཁོར་ལོས་སྒྱུར་བའི་རྒྱལ་པོ་གསེར་གྱི་བྱང་བུ་ལ་སོགས་པ་ལ་བྲིས་པའི་རང་གི་ཕྱག་རྒྱའི་ཁྲིམས་ལ་དེ་
དག་གིས་རྒྱས་འདེབས་པ་དེ་བཞིན་དུ་རྡོ་རྗེ་སེམས་དཔའ་ལ་སོགས་པའི་འཁོར་ལོས་སྒྱུར་བའི་ཕྱག་རྒྱ་ཆེན་པོ་ལ་སོགས་པའི་གཟུངས་ཀྱི་སྒྲུབ་པ་པོའི་སྐྱེ་བོ་ལ་རྒྱས་འདེབས་པར་བྱེད་པའོ། །ཇི་ལྟར་རྒྱས་འདེབས་པར་བྱེད་ཅེ་ན། སྐུ་གསུང་ཐུགས་ཀྱི་རྡོ་རྗེ་ཡིས། །
གཟུགས་བརྙན་གྱི་ནི་ཚུལ་དུ་ཡང་། །ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་གཟུགས་བརྙན་གྱི་རྣམ་པར་བསྒོམ་པའི་སྦྱོར་བ་དེས་གཟུགས་བརྙན་གྱི་རྣམ་པར་ཚུལ་དུ་བྱེད་པའོ། །ཇི་ལྟར་ལུས་དང་ངག་དང་ཡིད་རྡོ་རྗེའི་གཟུགས་བརྙན་གྱི་
ཚུལ་དུ་བྱེད་ཅེ་ན། བདག་ཉིད་ཆེ་ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ལ་སོགས་པར། ཕྱག་རྒྱ་ཆེར་ཞེས་བྱ་བ་དེ་ལྟ་བུའི་དོན་ནི་ཆེན་པོ་ཡང་ཡིན་ལ་ཕྱག་རྒྱ་ཆེར་རོ། །ཐོག་མ་དང་ཐ་མ་མེད་པ་ཀུན་དུ་འགྲོ་བའི་ཆོས་ཀྱི་དབྱིངས་སུ་གྱུར་པ་ཉིད་ཀྱིས་ཕྱག་རྒྱ་ཆེན་པོ་ལ་སོགས་པ་ནི་ཐམས་ཅད་

དུ་སོང་བའོ། །དེ་ལྟར་ན། རྣམ་པར་རིག་ཅིང་བསྐྱེད་པས་ན། །གང་ཤེས་ནས་དངོས་གྲུབ་ཐོབ་པར་འགྱུར་ཞེས་བྱ་བའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པའི་སྐུ་དང་། གསུང་དང་། ཐུགས་རྡོ་རྗེ་ལྷག་པར་མོས་པས་རྣལ་འབྱོར་པས་
གཞན་གང་ཡང་རུང་བའི་ལུས་དང་། ངག་དང་། ཡིད་ལ་རྡོ་རྗེའི་ཕྱག་རྒྱ་བཅིངས་ཏེ། ངེས་པ་བསྐྱེད་ནས་གང་གི་ཚེ་ཕྱག་རྒྱ་བཅིང་བར་བྱེད་པ་རང་ངམ་གཞན་ལ་རྒྱས་བཏབ་པར་འགྱུར་རོ། །ཇི་ལྟར་དམ་ཚིག་དམ་པ་ཡི། །ཞེས་བྱ་བ་ལ་སོགས་པ་ལ་སྐྱེས་བུ་གང་ཞིག་ལ། དམ་ཚིག་ནི་
མནའི་དངོས་གྲུབ་འདི་ལས་ཁྱེད་འདའ་བར་མ་བྱེད་ཅིག །འདས་ན་མྱུར་དུ་འཆི་བའི་དུས་བྱེད་པར་འགྱུར་རོ་ཞེས་བྱ་བས་བཅིང་བར་བྱའོ། །ཇི་ལྟར་མནའི་རྗེས་སུ་འབྲང་བར་བྱས་པ་ལས་འདས་པའི་འཇིག་རྟེན་པ་དེས་དེ་རང་རྒྱུན་དུ་སྤྱད་པར་བྱའོ། །དེ་ལྟར་དེ་བཞིན་གཤེགས་
ཀུན་གྱི། །ཞེས་བྱ་བ་ནི་རྡོ་རྗེ་ཧཱུཾ་མཛད་ལ་སོགས་པའི་ཁྲོ་བོའི་དམ་ཚིག་གི་ཕྱག་རྒྱ་བཅིངས་པའི་མཆོག་བཅིངས་པ་ལས་མནའི་བར་དུ་སྒྲུབ་པ་པོས་འདའ་བར་མི་བྱའོ། །སྒྲུབ་པ་པོས་ཕྱག་རྒྱ་བཅིང་བ་ལས་ངེས་པ་བསྐྱེད་ནས་རང་དང་གཞན་གྱི་རྒྱུད་ལ་རྡོ་རྗེ་རིགས་ཀྱི་ཕྱག་རྒྱ་ཆེན་
པོ་ལ་སོགས་པ་གདོན་མི་ཟ་བར་རྒྱས་གདབ་པར་བྱའོ། །འདའ་བར་བྱ་བ་མ་ཡིན་ཏེ། །ཞེས་བྱ་བ་ལ་སོགས་པ་ལ། རྒྱས་པ་ལ་ནི་ཨོཾ་པུཥྚིཾ་ཀུ་རུ་ཧཱུཾ། བདེ་བ་དང་ཡིད་དགའ་བ་ལ་ནི་ཧྲིཿགཟུགས་སྣ་ཚོགས་སྟོན་པ་ལ་ནི་ཧོ། །དབང་དུ་བྱེད་པ་ལ་སོགས་རྡོ་རྗེའི་བཀའ་ལས་རྣམ་
པ་ཐམས་ཅད་ནས་ཐམས་ཅད་དུ་འདའ་བར་མི་བྱའོ། །ཅིའི་ཕྱིར་འདའ་བར་མི་བྱ་བ་ཞེ་ན། མདོར་ན་རྒྱལ་བས་རྡོ་རྗེ་གསང་། །ཞེས་བྱ་བ་སྨོས་ཏེ། དེ་བཞིན་གཤེགས་པའིའོ། །འདི་ནི་བཅིངས་པར་ཤེས་ནས་ཀྱང་། །དེས་ནི་ཆོས་ཀྱི་དངོས་གྲུབ་འགྱུར། །ཞེས་བྱ་བ་ནི་
རྒྱལ་བ་ཐམས་ཅད་ཀྱི་རྡོ་རྗེ་བཀའ་གང་ཡིན་པ་འདི་ལས་མི་འདའ་བར་བྱའོ་ཞེས་དོན་ངེས་པར་བྱས་ནས་དེ་བཞིན་གཤེགས་པ་རྣམས་ཀྱི་བཅིངས་པ་ལས་འགལ་བར་མི་བྱའོ། །པདྨའི་རིགས་ཀྱི་རྣལ་འབྱོར་པས་དེ་བཞིན་གཤེགས་པ་དང་འབྲེལ་བའི་སྔགས་ཀྱི་ཡི་གེས་དོན་གྱི་དངོས་གྲུབ་

ཏུ་སྟེར་བ་ཡིན་ནོ་ཞེས་པ་བསྐྱེད་ནས། གང་གི་ཚེ་པདྨའི་རིགས་ཀྱི་རྣལ་འབྱོར་པས་ཕྱག་རྒྱ་འཆིང་བར་བྱེད་པ་དེའི་ཚེ་པདྨའི་རིགས་ཀྱི་ལྷ་དེ་རྣམས་ཀྱི་ཕྱག་རྒྱ་ཆེན་པོ་ལ་སོགས་པའི་གཟུགས་བརྙན་དུ་བསྐྱེད་པ་དང་། དེས་པདྨའི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་ཆོས་ཀྱི་དངོས་
གྲུབ་ཏུ་འགྱུར་རོ་ཞེས་བྱའོ། །འདི་ལས་འདའ་བར་དཀའ་བས་ན་རྡོ་རྗེའི་བཀའ་སྟེ། འཕགས་པ་ནམ་མཁའི་སྙིང་པོས་ཁྱེད་རྣམས་ལ་དབང་བསྐུར་བའི་རིགས་ཀྱི་རང་བཞིན་དུ་བྱའོ་ཞེས་བཀའ་སྩལ་པ་ལས་སོ། །འདི་ལྟར་སེམས་ཅན་གྱི་ཁམས་ཐམས་ཅད་ཀྱི་བསམ་པ་ཐམས་ཅད་ཡོངས་སུ་
རྫོགས་པར་བྱེད་པའི་ལས་དེ་ཉིད་ནི་ལས་མང་རྣམས་སོ། །ནམ་མཁའ་ཐམས་ཅད་ཁྱབ་པའི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ལས་ནི་མང་པོ་སྟེ། རབ་ཏུ་རྒྱས་པའོ། །དེ་སུའི་ལས་སུ་འགྱུར་ཞེ་ན། བཀའ་དང་ལྡན་པའི་ཞེས་བྱ་བ་སྨོས་ཏེ།
བཀའ་དང་ལྡན་པའི་བཀའ་ལ་གནས་པའམ། ནོར་བུ་ཆེན་པོའི་རིགས་ཀྱི་རྣལ་འབྱོར་བསྒོམ་པ་ཞེས་བྱ་བའི་དོན་ཏོ། །དེའི་བཀའ་དང་ལྡན་པའི་སྒྲུབ་པ་པོས་ནམ་མཁའ་ཐམས་ཅད་ཁྱབ་པའི་ནོར་བུའི་རིགས་ཀྱི་ལས་དེ་བྱེད་པར་ངེས་པ་བསྐྱེད་པའོ། །དེ་ནས་མྱུར་དུ་འགྲུབ་པར་འགྱུར། །
ཞེས་བྱ་བ་ནི་ནོར་བུའི་རིགས་ཀྱི་ཕྱག་རྒྱ་བཅིངས་པས་དངོས་གྲུབ་བསྐྱེད་པའོ། །འདི་ཡང་བདག་གིས་ཡོངས་སུ་གཟུང་ཞིང་བྱིན་གྱིས་བརླབས་སོ་ཞེས་བྱ་བ་ནི་དཀྱིལ་འཁོར་ཆེན་པོས་བྱིན་གྱི་རླབས་ཀྱིས་དབང་དུ་བྱས་ནས་བཤད་པ་འབའ་ཞིག་ཏུ་མ་ཟད་ཀྱི་རྒྱུད་ཕྱི་མ་ལས་བདག་གིས་ཡོངས་སུ་གཟུང་ཞིང་སློབ་
དཔོན་བརྒྱུད་པས་གཏད་པའི་ཡུན་རིང་དུ་གནས་པ་ནི་བྱིན་གྱིས་བརླབས་པས་བདག་གིས་ཡོངས་སུ་བཟུང་ཞིང་བྱིན་གྱིས་བརླབས་སོ་ཞེས་བྱའོ། །ཡང་ཞེས་བྱ་བ་ནི་གསུངས་པ་སྡུད་པའོ། །སེམས་ཀྱི་གསང་བ་གཙོ་བོར་གྱུར་པ་གཟུངས་ཀྱི་དཀྱིལ་འཁོར་གྱི་དབང་དུ་བྱས་པས་རྡོ་རྗེ་འཆང་བས་གསོལ་བ་མ་བཏབ་ཀྱང་བཅོམ་
ལྡན་འདས་རྣམ་པར་སྣང་མཛད་རང་ཉིད་ཀྱིས་ཡོངས་སུ་བཟུང་ཞིང་བྱིན་གྱིས་བརླབས་པས། སངས་རྒྱས་ཀྱི་བཀའ་རབ་ཏུ་བསྟན་པ་ཡིན་ནོ་ཞེས་བྱ་བའི་དོན་ཏོ། །འཕགས་པ་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལས་གཟུངས་ཀྱི་དཀྱིལ་འཁོར་གྱི་དབང་དུ་བྱས་པའི་བཤད་པ་རྫོགས་སོ།། །།

དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་རྟོག་པ་གསང་བའི་ཆོ་ག་རྒྱས་པའི་དངོས་གྲུབ་ཀྱི་ཆོ་གའི་རྒྱུད་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་
ཕྱག་རྒྱ་བཞི་བསྒོམས་ན་རང་གི་རིགས་ཀྱི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞི་མཐར་ཐུག་པ་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་ནས་ཕྱིས་རང་གི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིང་
བ་ནི་རྒྱུད་ཕྱི་མ་ཡང་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་ཅད་ཀྱི་ཆོས། དམ་པའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་དེ་བཞིན་
གཤེགས་པ་ཐམས་ཅད་ཀྱི་རིགས་ཏེ། དེ་དག་དང་འབྲེལ་བའི་ཆོས་ཀྱི་དཀྱིལ་འཁོར་ལ་རག་ལས་པ་སྟེ། དམ་པའི་དངོས་གྲུབ་ནི་ཕྱག་རྒྱ་ཆེན་པོའི་དངོས་གྲུབ་བོ། །དེ་སྟོན་པར་བྱེད་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །སངས་རྒྱས་རྣམས་
ནི་ཆོས་ཀྱི་སངས་རྒྱས་སོ། །ཆོས་ནི་ཆོས་ཀྱི་དཀྱིལ་འཁོར་རོ། །དེའི་ཏིང་ངེ་འཛིན་ནི་དེ་བཞིན་གཤེགས་པའི་ཕྱག་རྒྱ་ཆེན་པོའོ། །དེ་བསྒོམས་པ་ནི་ཡང་དང་ཡང་མངོན་དུ་བྱས་པའོ། །ཇི་ལྟར་བྱེད་ཅེ་ན། མཉམ་པར་བཞག་པས་ཞེས་བྱ་བ་སྟེ། སེམས་རྣམ་པར་གཡེང་བ་མེད་པའོ། །
ཚུལ་གང་གིས་ཤེ་ན། སངས་རྒྱས་རྗེས་དྲན་ཚུལ་གྱིས་ཞེས་བྱ་བ་སྨོས་ཏེ། རང་གི་དེ་བཞིན་གཤེགས་པ་བསྒོམས་པའི་སངས་རྒྱས་རྗེས་སུ་དྲན་པའི་ཚུལ་དེས་དངོས་གྲུབ་དམ་པ་ཐོབ་པར་འགྱུར་བ་དེས་སངས་རྒྱས་ཐོབ་ཅེས་བྱ་བའི་དོན་ཏོ། །རྡོ་རྗེ་དབྱིངས་ལ་སོགས་པའི་དཀྱིལ་
འཁོར་ཆེན་པོ་ལས་བཤད་པའི་ཚུལ་གྱིས་དེ་བཞིན་གཤེགས་པའི་རྣལ་འབྱོར་བྱས་ལ། ཕྱག་བཞི་བྱ་བའི་ཆོ་ག་མཐར་ཐུག་པའི་ཆོ་ག་རྗེས་སུ་སྤྱད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་རྡོ་རྗེ་

ལ་རང་གི་སྔགས་བཀོད་ནས། དེ་བཟླས་ཤིང་རང་གི་དེ་བཞིན་གཤེགས་པའི་བདག་ཉིད་བསྒོམ་པར་བྱའོ། །སེམས་དཔའ་ཡང་ཡིན་ལ་ཀུན་ཡང་དེ་ཡིན་པས་ན་སེམས་དཔའ་ཀུན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་ཆོས་ཀྱི་དཀྱིལ་འཁོར་ལས་བཤད་པའི་
སེམས་དཔའ་བཅུ་དྲུག་གོ། །དེའི་ཏིང་ངེ་འཛིན་ནི་དེ་དག་གི་ཕྱག་རྒྱ་ཆེན་པོའོ། །དེ་རྣམས་ལ་གནས་པ་ནི་སེམས་ཅན་ཀུན་གྱི་ཏིང་ངེ་འཛིན་ལ་གནས་པའོ། །རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་དམིགས་པ་ནི་གནས་པ་ཞེས་བྱ་བའི་དོན་ཡིན་ནོ། །བསྒོམས་པས་ནི་གོམས་པའོ། །ཇི་ལྟར་བྱ་
ཞེ་ན། མཉམ་པར་གཞག་པ་ཞེས་བྱ་བ་སྨོས་པ་ནི་གོ་སླའོ། །གང་གི་ཚུལ་གྱིས་ཤེ་ན། ཆགས་པ་རྗེས་སུ་དྲན་ཚུལ་གྱིས། །ཞེས་བྱ་བ་སྨོས་ཏེ། དེ་ལ་ཆགས་པ་ནི་མི་དམིགས་པའི་ཐུགས་རྗེ་ཆེན་པོའི་ངོ་བོ་རྡོ་རྗེ་སེམས་དཔའ་ལ་སོགས་པ་རྗེས་སུ་དྲན་པའོ། །ཆོས་ཐམས་ཅད་རང་
བཞིན་གྱིས་རྣམ་པར་དག་པས་གཟུགས་བརྙན་དང་མཚུངས་པའི་ཕྱིར་རོ་ཞེས་བསྒོམས་པ་དེ་ཉིད་ཀྱི་སྦྱོར་བ་དེ་ནི་ཆགས་པ་རྗེས་སུ་དྲན་པའི་ཚུལ་གྱིས་སོ། །དེས་ཅིར་འགྱུར་ཞེ་ན། དངོས་གྲུབ་དམ་པ་ཐོབ་པར་འགྱུར། །ཞེས་བྱ་བ་སྨོས་ཏེ། ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་
སེམས་དཔའ་ལ་སོགས་པའི་ཕྱག་རྒྱ་ཆེན་པོ་ཐོབ་པོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། ཕྱིས་
ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་ལ་རང་གི་སྔགས་རྣམ་པར་བསམས་ཏེ། རང་གི་སྔགས་ལན་གསུམ་བརྗོད་ཅིང་ཆོས་ཐམས་ཅད་རང་བཞིན་གྱིས་རྣམ་པར་དག་པའི་གཟུགས་བརྙན་དང་
མཚུངས་པའི་ཕྱིར་རོ་ཞེས་རྣམ་པར་བསྒོམས་ནས་ཕྱིས་རང་གི་ལྷའི་ཕྱག་རྒྱ་ཆེན་པོ་བསྒོམ་པར་བྱའོ། །འཇིག་རྟེན་གསུམ་རྒྱལ་ཆ་ལུགས་སུ་ནི་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེའི་རིགས་ཀྱི་ལྷའི་ཕྱག་རྒྱ་ཆེན་པོའི་རང་བཞིན་ནོ། །དེ་

བསྒོམ་པ་ནི་ཁམས་གསུམ་རྣམ་པར་རྒྱལ་བའི་བསྒོམ་པའོ། །ཅི་བདག་ཉིད་ནས། གཞན་དང་ལྷན་ཅིག་ཏུ་བསྒོམ་ཞེ་ན། འོན་ཀྱང་དྲན་བྱེད་མདུན་དུའང་དེ་བཞིན་ཏེ། །ཞེས་བྱ་བ་སྨོས་ཏེ། ཇི་ལྟར་བདག་ཉིད་ཆོས་ཀྱི་དཀྱིལ་འཁོར་ལས་བཤད་པའི་འཇིག་
རྟེན་གསུམ་ལས་རྣམ་པར་རྒྱལ་བའི་ཆ་ལུགས་སུ་བསྒོམ་པ་དེ་བཞིན་དུ་མདུན་དུ་ཡང་བསྒོམ་པ་དེ་ཉིད་བསྒོམ་པར་བྱའོ། །ཕྱག་ན་རྡོ་རྗེའི་མཐུར་གྱུར་ནས། །ཐམས་ཅད་རྣམ་པར་རྒྱལ་བར་འགྱུར། །ཞེས་བྱ་བ་ནི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་རང་བཞིན་དུའོ། །
དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ལ། སྒེག་མོ་ལ་སོགས་པའི་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་ལ་སྔ་མ་བཞིན་དུ།
དེ་ཉིད་ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ཕྱག་རྒྱ་ཆེན་པོ་བཅིངས་ཏེ། རས་ལ་སོགས་པ་ལ་རང་གི་ཁྲོ་བོ་སྤྲུལ་ལ་བསྡུ་བ་ལ་
སོགས་པའི་ཆོ་ག་རྗེས་སུ་སྤྱད་ནས། ཆོས་ཀྱི་དཀྱིལ་འཁོར་ལས་གསུངས་པའི་རང་གི་ཕྱག་རྒྱ་བཞི་པོ་རྣམས་ཀྱིས་རྒྱས་བཏབ་སྟེ། དབང་བསྐུར་བའི་ཕྱག་རྒྱས་དབང་བསྐུར་ལ། ཆོས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་ལས་ཀྱི་ཕྱག་རྒྱ་རྣམ་པ་བརྒྱད་དང་། ལས་ཀྱི་དཀྱིལ་
འཁོར་ལས་གསུངས་པའི་ལས་ཀྱི་ཕྱག་རྒྱ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། སྔ་མ་བཞིན་དུ་རང་གི་ཁྲོ་བོའི་ཕྱག་རྒྱ་ཆེན་པོ་བཅིངས་ནས་སྔ་མ་བཞིན་དུ་རང་གི་སྔགས་རྡོ་རྗེའི་དབུས་སུ་བསམས་ལ། དེ་ཉིད་ཟློས་པ་འདི་ནི་རྣལ་འབྱོར་ཉིས་ལྡབ་ཏུ་འགྱུར་རོ། །འགྲོ་བ་འདུལ་བའི་
ཆོས་སུ་ནི། །ཞེས་བྱ་བ་ནི་པདྨ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་འགྲོ་བ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་འགྲོ་བ་འདུལ་བའི་ཆོས་དེ་བསྒོམ་པ་ནི་བདག་ཉིད་དམ་མདུན་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་པདྨའི་རིགས་ཀྱི་གདུལ་བྱ་རྣམས་ཀྱིས་མངོན་

སུམ་དུ་བྱེད་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་པདྨའི་སྒེག་མོ་ལ་སོགས་པའི་གསང་བའི་མཆོད་པ་རྣམ་བཞིས་བདག་ཉིད་ཡང་དག་པར་མཆོད་ལ། དེ་ཁོ་ན་ཉིད་དང་།
ཆོས་དང་། དམ་ཚིག་གི་རྡོ་རྗེ་པདྨ་དང་། དྲིལ་བུ་ཕྱག་རྒྱ་ཆེན་པོས་བླངས་ཏེ། ཕྱིས་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྔགས་བརྗོད་ཅིང་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷ་སྤྲུལ་ལ། བསྡུ་བ་ལ་སོགས་
པའི་ཆོ་ག་རྗེས་སུ་སྤྱད་ནས། ཕྱག་བཞི་བྱས་ནས། རང་གི་ཕྱག་རྒྱ་ཆེན་པོ་ཡང་བཅིངས་ལ་དེའི་སྔགས་བརྗོད་ཅིང་ཟུང་གི་རྣལ་འབྱོར་བསྒོམ་པར་བྱའོ། །དེ་ལྟར། །རྣམ་པ་ཀུན་གྱི་མཆོག་ལྡན་པར། །གདུལ་བྱ་དེ་ནི་རབ་བྱེད་དོ། །ཞེས་བྱའོ། །དོན་ཀུན་གྲུབ་པའི་སྐུར་ཡང་ནི། །ཞེས་བྱ་བ་ནི་
ནོར་བུ་ཆེན་པོའི་རིགས་བཤད་པའི་རང་གི་ལྷའི་ཕྱག་རྒྱ་ཆེན་པོའི་གཟུགས་སུ་བྱའོ། །བསྒོམས་ནས་མདུན་དུའང་དེ་བཞིན་ཏེ། །ཞེས་བྱ་བ་ནི་བཤད་ཟིན་ཏོ། །རྣམ་པ་ཀུན་གྱི་མཆོག་ལྡན་པའི། །ཕུན་སུམ་ཆོགས་དོན་དེ་ཐོབ་བོ། །ཞེས་བྱ་བ་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་
བཤད་པའི་རང་གི་ལྷའི་ཕྱག་རྒྱ་ཆེན་པོའི་དངོས་གྲུབ་བོ། །དེའི་དོན་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་ཆེན་པོ་བྱས་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ནོར་བུའི་རིགས་ཀྱི་ཆོས་ཀྱི་དཀྱིལ་
འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ལ། དེའི་སྔགས་བརྗོད་ཅིང་། དེའི་མདུན་དུ་སྤྲུལ་ལ། བསྡུ་བ་ལ་སོགས་པའི་ཆོ་ག་བྱས་ནས། ཕྱག་བཞི་བྱས་ཏེ། ཡང་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་བཅིངས་ལ། དེ་ཉིད་ཀྱི་སྔགས་བརྗོད་
ཅིང་ཟུང་གི་རྣལ་འབྱོར་བསྒོམ་པར་བྱའོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་

འཁོར་ལས་བཤད་པའི་ཆོས་ཀྱི་དཀྱིལ་འཁོར་གྱི་དམ་ཚིག་ནི་དམ་ཚིག་གི་ཕྱག་རྒྱའོ། །དེའི་དངོས་གྲུབ་ནི་བསྐྱེད་པའོ། །དེའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །སངས་རྒྱས་རྗེས་སུ་འགྱུར་ལ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་
ཆེན་པོ་ལ་སོགས་པ་ལས་བཤད་པའི་ཆོ་གས་དེ་བཞིན་གཤེགས་པའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། དེའི་རྗེས་ལ་ཆོས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་ལ་རང་གི་
སྔགས་རྣམ་པར་བསམས་ལ་དེ་ཉིད་བརྗོད་ཅིང་དེ་བཞིན་གཤེགས་པའི་བདག་ཉིད་དུ་བསྒོམས་ཏེ། བཛྲ་བཛྲ་ཞེས་བརྗོད་པར་བྱའོ། །དེ་ལྟར། སངས་རྒྱས་རྗེས་སུ་དྲན་པའི་ཕྱིར། །བཛྲ་བཛྲ་ཞེས་བརྗོད་ན། །སངས་རྒྱས་དངོས་གྲུབ་ཐོབ་པར་འགྱུར། །སྦྱོར་བ་གང་གིས་ཤེ་ན། རྡོ་རྗེ་ཕྲ་མོའི་ཚུལ་གྱིས་
ནི། །ཞེས་བྱ་བ་སྨོས་ཏེ། རྡོ་རྗེ་ཕྲ་མོ་བསྒོམས་པ་དེས་སངས་རྒྱས་ཀྱི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་ཅིང་རྙེད་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོས་ཀྱི་དཀྱིལ་འཁོར་
ལས་བཤད་པའི་དམ་ཚིག་གི་ཕྱག་རྒྱ་བཅིངས་ཏེ། དེ་བཞིན་གཤེགས་པའི་བདག་ཉིད་དུ་རྣམ་པར་བསྒོམས་ནས། བཛྲ་བཛྲ་ཞེས་བྱ་བའི་སྔགས་ཀྱི་ཡི་གེ་མདུན་དུ་རྣམ་པར་བསམས་ལ། རང་གི་ལུས་ཀྱི་ནང་དུ་ཞུགས་པས་ལུས་དང་ངག་དང་ཡིད་རྣམས་ཆུ་དང་འོ་མ་བཞིན་གཅིག་ཏུ་
ངེས་པར་བྱས་ལ། ཆོས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་སྔགས་བརྗོད་ཅིང་ཇི་སྲིད་དུ་དེ་བཞིན་གཤེགས་པ་དང་། བདག་ཉིད་གཅིག་ཏུ་གྱུར་པ་དེ་སྲིད་ཀྱི་བར་དུ་ཟླ་བ་གཉིས་བསྒོམས་ལ། དེ་ནས་གཞན་ཡང་ཟླ་བ་གཅིག་སྤྲོ་བ་དང་བསྡུ་བ་བསྒོམ་
པར་བྱའོ། །དེ་ནས་མཚན་ཐོག་ཐག་དེ་བཞིན་གཤེགས་པ་ནམ་མཁའི་ཁམས་གང་བར་བསྒོམས་ན་དེ་བཞིན་གཤེགས་པར་འགྱུར་རོ། །རྡོ་རྗེ་སེམས་དཔའི་ཏིང་འཛིན་དུ། །རྡོ་རྗེ་ཕྲ་མོ་སྒོམ་བྱེད་ཅིང་། །ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་ཆོས་ཀྱི་དཀྱིལ་འཁོར་ལས་

བཤད་པའི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པ་ནི་རྡོ་རྗེ་སེམས་དཔའིའོ། །དེ་དག་གི་ཏིང་འཛིན་ནི་དམ་ཚིག་གི་ཕྱག་རྒྱའོ། །ཇི་ལྟར་དེ་བསྒོམ་ཞེ་ན། རྡོ་རྗེ་ཕྲ་མོ་བསྒོམ་པར་བྱའོ། །རྡོ་རྗེ་སེམས་དཔའ་ཉིད་འགྲུབ་བོ། །ཞེས་བྱ་བ་ནི་ཆོས་ཀྱི་དཀྱིལ་འཁོར་
ལས་བཤད་པའི་རྡོ་རྗེ་སེམས་དཔའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་བོ་ཞེས་བྱ་བའི་དོན་ཏོ། །ཅི་ཞིག་བརྗོད་ཅིང་ཞེ་ན། བཛྲ་སཏྭ་ཞེས་བརྗོད་ན། །ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ཞེས་བྱ་བ་ནི་བཤད་ཟིན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་
གས་རྡོ་རྗེ་སེམས་དཔའ་ལ་སོགས་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིང་སྟེ། རང་གི་སྙིང་གའི་རྡོ་རྗེ་ལ་རང་གི་སྔགས་རྣམ་པར་བསམས་
ཏེ། དེ་ཉིད་བརྗོད་ཅིང་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། །བཛྲ་སཏྭ་ཞེས་བྱ་བའི་ཡི་གེ་མདུན་དུ་བསམས་ལ། དེ་ཉིད་བརྗོད་ཅིང་རང་གི་ལུས་ལ་དེ་བཅུག་སྟེ། སྔ་མ་བཞིན་དུ་རང་གི་ལུས་དང་ངག་དང་། སེམས་བྱིན་གྱིས་བརླབས་ལ། རྩ་བའི་རྒྱུད་
ལས་བཤད་པའི་ཆོ་གས་རྡོ་རྗེ་ཕྲ་མོ་ཟླ་བ་གསུམ་བསྒོམ་པར་བྱའོ། །དེ་ནས་མཐར་མཚན་ཐོག་ཐག་བྱའོ། །དེ་ལྟར་ན་ཡང་ཉིན་རེ་ཞིང་རང་ལ་བྱིན་གྱིས་བརླབས་པ་ལ་སོགས་པ་བྱས་ནས། ཆོས་ཀྱི་དཀྱིལ་འཁོར་ལས་བཤད་པའི་སྔགས་ཟློས་ཤིང་། རང་གི་ལྷའི་དམ་ཚིག་གི་ཕྱག་རྒྱ་
བཅིངས་ལ། རང་གི་ལྷའི་གཟུགས་སུ་བསམ་པར་བྱའོ། །བཛྲ་སཏྭ་ཞེས་བྱ་བས་སྔ་མ་བཞིན་དུ་བྱིན་གྱིས་བརླབས་ཏེ། ཆོས་ཀྱི་དཀྱིལ་འཁོར་ལས་བཤད་པའི་སྔགས་བཟླས་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ་བསྒྲུབ་པར་བྱའོ། །འཇིག་རྟེན་གསུམ་རྒྱལ་ཆ་ལུགས་སུ། །
དྲན་བྱེད་མདུན་དུ་དེ་བཞིན་དུ། །ཞེས་བྱ་བ་ནི་རྡོ་རྗེའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ལྷའི་གཟུགས་ཅན་འཇིག་རྟེན་གསུམ་ལས་རྣམ་པར་རྒྱལ་བའི་ཆ་ལུགས་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཆ་ལུགས་སུ་བྱས་ནས། ཡང་དག་པར་དྲན་ཞིང་བསྒོམ་

པར་བྱའོ། །མདུན་དུ་ནི་རང་གི་རྒྱུད་དུ་གཏོགས་པ་ཇི་ལྟ་བ་དེ་བཞིན་དུ་མདུན་དུ་ཡང་བསྒོམ་པར་བྱའོ། །ཅི་ཞིག་ཟློས་ཤིང་ཞེ་ན། ཧཱུཾ་ཧཱུཾ་ཧཱུཾ་ཧཱུཾ་ཞེས་ཡི་གེ་ཧཱུཾ་བཞི་ཟློས་ཤིང་། རྡོ་རྗེའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་ཆོས་ཀྱི་དཀྱིལ་འཁོར་ལས་
བཤད་པའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ཏེ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། དེ་ཁོ་ན་ཉིད་དང་། དམ་
ཚིག་དང་། ཆོས་དང་། བདག་ཉིད་དུ་བསྐྱེད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། དེའི་སྔགས་སྙིང་གར་བསམས་ཏེ། དེ་ཉིད་བརྗོད་ཅིང་མདུན་དུ་རང་གི་ལྷ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས།
ཆོས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམ་པ་བརྒྱད་དང་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཇི་ལྟ་བ་བཞིན་དུ་ཡང་དག་པར་མཆོད་ལ། ཕྱག་བཞི་བྱས་ཏེ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། ཧཱུཾ་བཞི་མདུན་དུ་སྤྲུལ་ལ། དེ་ཉིད་བརྗོད་ཅིང་
དེས་རང་གི་ལུས་དང་། ངག་དང་། ཡིད་རྣམས་བྱིན་གྱིས་བརླབས་ནས་རང་གིས་སྔགས་བརྗོད་ནས་རྣལ་འབྱོར་ཉིས་ལྡབ་ཏུ་འགྱུར་བ་ཡིན་ནོ། །འགྲོ་བ་འདུལ་བའི་གཟུངས་ཀྱིས་ནི། །ཞེས་བྱ་བ་ལ་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷ་དེའི་གཟུགས་སུ་བསྒོམ་
པར་བྱའོ། །ཇི་ལྟར་བྱ་ཞེ་ན། རྡོ་རྗེ་ཕྲ་མོས་ཞེས་བྱ་བ་སྨོས་ཏེ། རྡོ་རྗེ་ཕྲ་མོ་བསྒོམ་པར་བྱས་ནས་ཞེས་བྱ་བའི་དོན་ཏོ། །ཅི་ཞིག་བརྗོད་ཅིང་ཞེ་ན། ཤུདྡྷ་ཤུདྡྷ་ཞེས་བརྗོད་ན། །ཞེས་བྱ་བ་སྨོས་སོ། །ཅིར་འགྱུར་ཞེ་ན། དངོས་གྲུབ་དམ་པ་ཐོབ་པར་འགྱུར་རོ་ཞེས་བྱ་བ་སྨོས་ཏེ། པདྨའི་
རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་འགྱུར་རོ་ཞེས་བྱ་བའི་དོན་ཏོ། །དེའི་དོན་ནི་འདི་ལྟར་ཤེས་པར་བྱ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་

ཐུག་པའི་ཆོ་ག་རྗེས་སུ་སྤྱད་ནས། དེ་ཁོ་ན་ཉིད་དང་། ཆོས་དང་། དམ་ཚིག་གི་བདག་ཉིད་དུ་བསྐྱེད་དེ། དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། སྙིང་གའི་རྡོ་རྗེ་པདྨ་ལ་སྔགས་རྣམ་པར་བསམས་ཏེ། དེ་ཉིད་ཟློས་ཤིང་རང་གི་ལྷའི་ང་རྒྱལ་བསྐྱེད་དེ།
བུདྡྷ་བུདྡྷ་ཞེས་བརྗོད་པས་སྔ་མ་བཞིན་དུ་རང་གི་ལུས་དང་། ངག་དང་། ཡིད་རྣམས་བྱིན་གྱིས་བརླབས་ཏེ། རང་གི་སྔགས་བརྗོད་པར་བྱའོ། །སྔར་བཤད་པའི་ཆོ་གས་རྡོ་རྗེ་ཕྲ་མོ་ཟླ་བ་གསུམ་བསྒོམས་ལ། དེ་ནས་མཚན་ཐོག་ཐག་བསྒོམ་པར་བྱའོ། །དེའི་རྗེས་ལ་ཡང་དེ་བཞིན་དུ་རང་
གི་ལུས་དང་། ངག་དང་། ཡིད་བྱིན་གྱིས་བརླབས་ཏེ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། སྔགས་བརྗོད་ཅིང་བསྒོམ་པར་བྱའོ། །དོན་ཀུན་གྲུབ་པའི་གཟུངས་ཀྱིས་ནི། །རྡོ་རྗེ་ཕྲ་མོ་བསྒོམས་ནས་ཀྱང་། །ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་
འཁོར་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་ནས། རིན་ཆེན་འབེབས་པའི་མཐར་ཐུག་པའི་གཟུགས་ནི་དོན་ཐམས་ཅད་གྲུབ་པའི་གཟུགས་སོ། །དེ་བསྒོམ་པ་ནི་ཕྲ་མོའི་རྡོ་རྗེ་སྒོམ་པར་བྱེད་པའོ། །ཅི་ཞིག་བརྗོད་ཅིང་ཞེ་ན། སིདྡྷྱ་སིདྡྷྱ་ཞེས་བརྗོད་ན། །ཞེས་བྱ་བ་སྨོས་
སོ། །ཅི་ཞིག་ཏུ་འགྱུར་ཞེ་ན། དོན་གྱི་དངོས་གྲུབ་མཆོག་ཏུ་འགྱུར། །ཞེས་བྱ་བ་སྨོས་ཏེ། ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ནི་དོན་གྱི་དངོས་གྲུབ་སྟེ། དེ་ནི་མཆོག་དམ་པར་གྱུར་པའོ། །འདི་སྐད་སྟོན་པ་ཡིན་ཏེ།
དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ། སིདྡྷྱ་སིདྡྷྱ་ཞེས་བརྗོད་ཅིང་རང་གི་ལུས་དང་། ངག་དང་།
ཡིད་རྣམས་བྱིན་གྱིས་བརླབས་ལ། སྔར་བཤད་པའི་ཆོ་གས་ཟླ་བ་གསུམ་རྡོ་རྗེ་བསྒོམས་ནས། མཐར་མཚན་ཐོག་ཐག་བསྒོམ་པར་བྱའོ། །དེ་ལྟར་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས། ལུས་དང་། ངག་

དང་། ཡིད་རྣམས་བྱིན་གྱིས་བརླབས་ཏེ། རང་གི་སྔགས་སྙིང་གའི་རྡོ་རྗེ་རིན་པོ་ཆེའི་དབུས་སུ་རྣམ་པར་བསམས་ལ། དེ་ཉིད་བཟླས་ཤིང་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་ཆོས་ཀྱི་དཀྱིལ་འཁོར་ལས་བཤད་པའི་རིགས་
ཀྱི་དམ་ཚིག་གི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་དམ་པའི་ཆོས་ཀྱི་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་སོ། །དམ་པའི་
ཆོས་ནི་དམ་པའི་ཆོས་ཏེ། ཆོས་ཀྱི་དཀྱིལ་འཁོར་གྱི་ཆོས་ཀྱི་ཕྱག་རྒྱའོ། །དེའི་ཡེ་ཤེས་ནི་ངེས་པའོ། །དེའི་དངོས་གྲུབ་ནི་སངས་རྒྱས་དང་བྱང་ཆུབ་སེམས་དཔའ་ཐོབ་པའོ། །དེ་སྟོན་པར་བྱེད་པ་ནི་རྒྱུད་དོ། །བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །ཨ་ལ་
སོགས་པ་ཡི་གེ་དེ་མེད་པའོ། །དམ་པའི་ཆོས་ནི་བདག་མེད་པའི་ངོ་བོ་རང་བཞིན་གྱིས་རྣམ་པར་དག་པའོ། །དེ་སྟོན་པར་བྱེད་པ་ཆོས་ཀྱི་ཕྱག་རྒྱའི་ངོ་བོ་ཡང་ཡི་གེ་མེད་པའོ། །ཡི་གེ་མེད་པར་སྟོན་པ་ཉིད་ཡིན་ནོ། །ཏིང་འཛིན་ཡེ་ཤེས་འབྱུང་བ་སྟེ། །ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་
རྣམ་པར་དག་པའོ་ཞེས་སེམས་རྩེ་གཅིག་པའི་ཏིང་ངེ་འཛིན་ཏོ། །དེ་ལ་ཡེ་ཤེས་ནི་ཏིང་ངེ་འཛིན་གྱི་ཡེ་ཤེས་ལས་བྱུང་བ་གང་ཡིན་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །ཨ་ཞེས་པ་དེས་ཆོས་རྣམས་ཀྱི། །སྐྱེ་བ་མེད་པར་བཤད་པ་ཡིན། །ཞེས་བྱ་བ་ནི་ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱ་དྱ་
ནུཏྤ་ནྣ་ཏྭཱཏ་ཅེས་བྱ་བས་གཏན་ཚིགས་སྟོན་པའི་རྒྱུ་དེས་ཡི་གེ་ཨ་ཉིད་ཀྱིས་སྐྱེ་བ་མེད་པར་བཤད་པ་ཡིན་ནོ་ཞེས་སྒྲའི་དོན་ཡིན་ནོ། །དེ་ལྟར་བཤད་པ་ནི་བསྟན་པའོ། །ཕྱག་རྒྱ་འདི་ཡིས་ཚུལ་གྱིས་ནི། །ཤེས་རབ་ཀྱིས་བསྒོམས་དེ་ནི་གང་། །ཞེས་བྱ་བ་ལ་སོགས་པ་ཆོས་ཐམས་ཅད་མ་སྐྱེས་
པའོ་ཞེས་བྱ་བ་དེས་ཆོས་ཀྱི་དབྱིངས་ཀྱི་ཕྱག་རྒྱ་དེའི་ཚུལ་བསྒོམས་པ་ནི། ཕྱག་རྒྱ་འདིའི་ཚུལ་གྱིས་བསྒོམས་པས་དེས་ཡང་དང་ཡང་མངོན་དུ་བྱས་པ་ནི་བསྒོམས་པའོ། །ཤེས་རབ་ཀྱིས་ནི་ཆོས་ཐམས་ཅད་གདོད་མ་ནས་མ་སྐྱེས་པར་རང་བཞིན་གྱིས་རྣམ་པར་དག་པའོ་ཞེས་ལྷག་

པར་མོས་པའི་ཤེས་རབ་འདིས་བསྒོམས་པའོ། །ཡི་གེ་ཀུན་གྱི་ཡེ་ཤེས་དངོས། །བདེ་གཤེགས་སྐད་ཀྱིས་འགྲུབ་པར་འགྱུར། །ཞེས་བྱ་བ་ནི་མི་ཟད་པས་ན་ཡི་གེའོ། །དེ་བཞིན་གཤེགས་པ་ཐམས་ཅད་རྟག་ཏུ་མི་འཇིགས་པས་ན་ཐམས་ཅད་མི་ཟད་པའོ། །རང་བཞིན་གྱིས་རྣམ་པར་དག་པའི་
ཆོས་ཀྱི་ཡེ་ཤེས་ནི་དེ་བཞིན་གཤེགས་པ་ལྔའོ། །དེའི་དངོས་པོ་ནི་དེའི་རང་བཞིན་གྱིས་ཡེ་ཤེས་སུ་འགྲུབ་པ་སྟེ་དེ་ཉིད་བསྟན་པའོ། །བདེ་བར་གཤེགས་པ་བྱ་ཞེས་བྱ་བ་ནི་མཛེས་པར་གཤེགས་པ་སྟེ། བག་ཆགས་དང་བཅས་པའི་ཉོན་མོངས་པ་སྤངས་པའི་ཕྱིར། བདེ་བར་གཤེགས་པ་ནི་
སངས་རྒྱས་བཅོམ་ལྡན་འདས་ཏེ། དེ་དག་ནི་འདིར་མཛེས་པར་གཤེགས་པའོ། །དེས་དུས་ཅི་ཞིག་གིས་འགྲུབ་ཅེ་ན། སྐད་ཅིག་གིས་ཞེས་བྱ་བ་སྨོས་ཏེ། མཚན་མ་ཐོབ་པར་གྱུར་པ་གང་ཞིག་གིས་མངོན་པར་ཤེས་པ་ལྔ་བསྐྱེད་དེ། དཀྱིལ་འཁོར་བྲིས་ལ་ཆོ་གས་ཐམས་ཅད་རྗེས་སུ་སྤྱད་དེ།
བསྒོམས་ན་སྐད་ཅིག་མ་དེ་ཉིད་ལ་འགྲུབ་པར་འགྱུར་རོ། །ལུས་གཞན་ལ་མི་ལྟོས་པའི་ཕྱིར་རོ། །དེ་ལྟར་གང་ཞིག་གིས་གསུངས་ཤེ་ན། བཅོམ་ལྡན་འདས་འཇམ་དཔལ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་ནི། རྡོ་རྗེ་འཆང་ཆེན་པོ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་རང་
བཞིན་གྱི་འཇམ་དཔལ་དེ་བཞིན་གཤེགས་པ་ཐམས་ཅད་ཀྱིས་གསུངས་སོ། །དེ་སྐད་དུ་ཡང་། དེ་བཞིན་གཤེགས་པ་ཐམས་ཅད་ནི། །ཤེས་རབ་དབྱངས་ཀྱི་རྗེས་འགྲོར་བཤད། །ཅེས་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་པའི་རྣལ་
འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་གའོ། །དེ་ཁོ་ན་ཉིད་དང་། ཆོས་དང་། དམ་ཚིག་ཀྱང་བླངས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ། སྙིང་གར་རྡོ་རྗེ་ལ་ཆོས་ཀྱི་ཡི་གེ་ཡང་བསམ་པར་བྱའོ། །ཨ་
ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱདྱ་ནུཏྤ་ནྣ་ཏྭཱཏ་ཅེས་བྱ་བ་སྒྱུ་མ་ལྟ་བུར་ངེས་པར་བྱས་ནས། དེ་བཞིན་གཤེགས་པའི་བདག་ཉིད་ཆོས་ཀྱི་ཡི་གེ་ཟློས་ཤིང་བསྒོམ་པར་བྱའོ། །དེ་བཞིན་གཤེགས་པ་ཐམས་ཅད་ནི་དེ་བཞིན་གཤེགས་པ་འདི་ཐམས་ཅད་དོ། །འདི་གང་ཡིན་ཞེ་ན། དེ་ཉིད་ཀྱིས་

ཞེས་བྱ་བ་སྨོས་ཏེ། དོན་དམ་པར་རྒྱུ་དང་འབྲས་བུའི་དེ་ཁོ་ན་ཉིད་སྟོན་པའི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་མདོ་སྡེ་འདི་འདོད་པས་སོ། །དད་པས་གཞུང་གི་དོན་བཅིངས་པ་ནི་ཁོང་དུ་ཆུད་པའོ། །ཀླགས་པ་ནི་དད་པས་གླེགས་
བམ་འདོན་པའོ། །དེ་བཞིན་གཤེགས་པའི་ཡོན་ཏན་ལ་དད་པས་ལྷག་པར་མོས་པ་དང་ལྡན་པའི་ཕྱིར་རོ། །དེ་སྐད་དུ་ཡང་། དེ་བཞིན་གཤེགས་པའི་ཡོན་ཏན་ལ་དད་པས་ལྷག་པར་མོས་པའི་ཕྱིར་རོ་ཞེས་གསུངས་སོ། །དངོས་གྲུབ་བླ་མེད་ཐོབ་པར་འགྱུར། །ཞེས་བྱ་བ་ནི་དེ་
བཞིན་གཤེགས་པའི་རིགས་ཀྱི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་སྒྲུབ་པར་
འདོད་པས། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་མདོ་སྡེ་འདི་ལ་དད་པར་བྱའོ། །དེའི་གཞུང་གི་དོན་བཅང་བར་བྱའོ། །དོན་དྲན་ཞིང་གླེགས་བམ་བཀླག་པར་ཡང་བྱའོ། །དེ་ནས་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱའོ། །
ཐོས་པ་དང་བསམ་པ་དག་གིས་ངེས་པ་བསྐྱེད་ནས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་ཡི་
གེ་ཧཱུཾ་ལས་རྡོ་རྗེ་དཀར་པོ་བསམས་ལ་བསྒོམ་པར་བྱའོ། །དེ་ནས་སྙིང་གའི་རྡོ་རྗེ་ལ་རང་གི་ལྷའི་ཆོས་ཀྱི་ཡི་གེ་རྣམ་པར་བསམས་ཏེ། དེ་ཉིད་བརྗོད་ཅིང་གཟུགས་བརྙན་དང་མཚུངས་པའི་རང་བཞིན་གྱིས་རྣམ་པར་དག་པའི་རང་གི་ལྷའི་གཟུགས་སུ་བསྒོམ་པར་བྱའོ། །སྡིག་པའི་སེམས་
ཅན་ཕན་གདགས་ཕྱིར། །སངས་རྒྱས་ཡེ་ཤེས་བྱེད་འདོད་པས། །ཞེས་བྱ་བ་ནི་བཤད་ཟིན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་

ཐུག་པའི་ཆོ་ག་རྗེས་སུ་སྤྱད་ནས། དེ་ཁོ་ན་ཉིད་དང་། ཆོས་དང་། དམ་ཚིག་གི་ཕྱག་རྒྱ་རྣམས་ཀྱིས་བདག་ཉིད་བྱིན་གྱིས་བརླབས་ཏེ། ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ཏེ། ཡང་ཐུགས་ཀ་ལ་རང་གི་ལྷའི་ཆོས་ཀྱི་ཡི་གེ་བཀོད་ལ། དེ་ཉིད་
བརྗོད་ཅིང་སེམས་ཅན་གྱི་ཁམས་ཐམས་ཅད་རྡོ་རྗེའི་རིགས་ཀྱི་རང་བཞིན་དུ་བྱས་ཏེ། གཟུགས་བརྙན་དང་མཚུངས་པའི་རང་བཞིན་གྱིས་རྣམ་པར་དག་པ་བསྒོམ་པར་བྱའོ། །རང་བཞིན་དག་པར་ཤེས་ནས་ནི། །ཞེས་བྱ་བ་ནི་རྟོགས་པ་ཉིད་དོ། །ཇི་ལྟར་ཤེས་ཤེ་ན། དམ་པའི་ཆོས་ནི་ཡིན་
པར་བཤད། །ཅེས་བྱ་བ་སྨོས་ཏེ། རང་བཞིན་གྱིས་རྣམ་པར་དག་པའི་མཚན་ཉིད་ཀྱི་དོན་གང་ཡིན་པ་འདི་ནི་དོན་དམ་པ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་སོ། །ཤེས་ནས་འདི་བསྒོམས་པ་ནི་རང་བཞིན་གྱིས་རྣམ་པར་དག་པའི་མཚན་ཉིད་ཀྱི་དངོས་པོ་ཐོག་མ་དང་ཐ་མ་མེད་
པར་རྣམ་པར་དག་པའི་མཚན་ཉིད་ཀྱིས་དངོས་པོ་འདི་གོམས་པར་བྱས་པའོ། །ཐོག་མ་ཞེས་བྱ་བ་ནི་དེ་བཞིན་གཤེགས་པ་རྣམས་བྱུང་ཡང་རུང་དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། རང་བཞིན་གྱིས་གནས་པའི་ཕྱིར་རོ། །རང་བཞིན་གྱིས་རྣམ་པར་དག་པའི་མཚན་ཉིད་ཀྱི།
ཆོས་དེ་ལྟ་བུར་གྱུར་པ་གདུལ་བྱ་རྣམས་ལ། དངོས་གྲུབ་མྱུར་ཞིང་རིང་བར་ཐོབ་ཅིང་རྣལ་འབྱོར་པས་ཆོས་ཀྱི་ཕྱག་རྒྱ་འགྲུབ་བོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་འཇིག་རྟེན་དབང་ཕྱུག་གི་རྣལ་འབྱོར་བྱས་
ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་ལྕེ་ལ་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་རྣམ་པར་བསམས་ཏེ། དེ་ཉིད་ཟློས་ཤིང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་ནས། གཟུགས་བརྙན་
དང་མཚུངས་པའི་ལྷའི་ངོ་བོ་བདག་ཉིད་དུ་བསྒོམ་པར་བྱའོ། །སེམས་ཅན་ཡང་ཡིན་ལ་ཀུན་ཡང་ཡིན་པས་ན་སེམས་ཅན་ཀུན་ཏེ། དེ་བཞིན་གཤེགས་པ་ལ་སོགས་པ་དེ་དག་ཐམས་ཅད་ཀྱི་དོན་སྦྱིན་པར་བྱེད་པ་ན་རིན་པོ་ཆེའི་རིགས་ཀྱི་རྟོག་པ་བསྐྱེད་པ་དང་། རིན་པོ་ཆེའི་

རིགས་ཀྱི་གཟུགས་སུ་བསྐྱེད་པའོ། །ཅིའི་ཕྱིར་ཞེ་ན། བསམ་པ་ཐམས་ཅད་རྫོགས་བྱེད་ཅིང་། །ཞེས་བྱ་བ་སྨོས་ཏེ། ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱའི་དངོས་གྲུབ་ནི་རང་དང་གཞན་གྱི་བསམ་པ་ཐམས་ཅད་
ཡོངས་སུ་རྫོགས་པར་བྱེད་པའོ། །དེའི་དོན་ནི་སེམས་ཅན་ཀུན་གྱི་དོན་ཏེ། དེ་ནི་སེམས་ཅན་ཀུན་གྱི་དོན་སྦྱིན་བྱེད་དོ། །ཆོས་གོམས་འདི་ནི་ནོར་བུ་ཡི། །ཞེས་བྱ་བ་ནི་སེམས་ཅན་ཀུན་ལ་དོན་སྦྱིན་པའི་ནོར་བུའི་རིགས་ཀྱི་ཆོས་ཀྱི་ཚུལ་ལོ། །ཇི་ལྟར་འདིའི་ཆོས་ཡིན་ཡང་རྣལ་
འབྱོར་པ་ལ་འདི་ཅི་ཞིག་ཏུ་འགྱུར་ཞེ་ན། རིགས་ཀྱི་ཡང་ནི་དངོས་གྲུབ་འགྱུར། །ཞེས་བྱ་བ་སྨོས་ཏེ། ཆོས་འདི་བསྒོམས་པས་ཆོས་ཀྱི་ཕྱག་རྒྱའི་དངོས་གྲུབ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་
པའི་རང་གི་ལྷའི་རྣལ་འབྱོར་བྱས་ལ། ཆོས་ཐམས་ཅད་རྗེས་སུ་སྤྱད་དེ། དེ་ཕྱིས་ནོར་བུའི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་ཇི་ལྟ་བ་བཞིན་དུ་བསམས་ཏེ། དེ་ཉིད་སྙིང་གའི་དབུས་སུ་མིང་བཀོད་ལ། དེ་ཉིད་བརྗོད་ཅིང་དེ་བཞིན་གཤེགས་
པ་ལ་སོགས་པའི་སེམས་ཅན་གྱི་ཁམས་ཐམས་ཅད་ནོར་བུ་ཆེན་པོའི་རིགས་ཀྱི་ལྷའི་དབང་བསྐུར་ཏེ། ནོར་བུའི་རིགས་ཀྱི་རང་བཞིན་དུ་བསམས་ལ་སྤྲུལ་པ་དང་མཚུངས་པའི་རང་བཞིན་གྱིས་རྣམ་པར་དག་པའི་རང་གི་ལྷའི་ངོ་བོ་བདག་ཉིད་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་
ཐམས་ཅད་ལ་སོགས་པའི་རིགས་ཐམས་ཅད་ཀྱི་དམ་པའི་ཆོས་ཀྱི་ཡེ་ཤེས་དངོས་གྲུབ་ཀྱི་ཆོ་ག་ཐམས་ཅད་རྒྱས་པའི་རྒྱུད་བསྟན་ནས། །ད་ནི་དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་ལས་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་
ནོ། །དེ་བཞིན་གཤེགས་པ་ཐམས་ཅད་ནི་རིགས་སོ། །ཏིང་ངེ་འཛིན་གྱི་ལས་ནི་བསྒོམ་པའོ། །དེའི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམས་བསྐྱེད་པའོ། །དེ་སྟོན་པར་བྱེད་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་

པའོ། །ཏིང་ངེ་འཛིན་གྱི་ལས་ནི་ཏིང་ངེ་འཛིན་གྱི་ལས་ཏེ། ཏིང་ངེ་འཛིན་བསྒོམ་པའོ། །གང་དང་སྦྱར་ཞེ་ན། སངས་རྒྱས་ཞེས་བྱ་བ་སྨོས་ཏེ། ཅིར་འགྱུར་ཞེ་ན། སངས་རྒྱས་བྱང་ཆུབ་རབ་བསྒྲུབ་པ། །ཞེས་བྱ་བ་སྨོས་ཏེ། སངས་རྒྱས་རྣམས་ཀྱི་བྱང་ཆུབ་ནི་སངས་རྒྱས་བྱང་ཆུབ་
སྟེ། དེ་རབ་ཏུ་སྒྲུབ་པར་བྱེད་པའོ། །གང་གིས་ཤེ་ན། འདི་ནི་བསྒོམ་པར་བྱ་ན་ཡང་། །ཞེས་བྱ་བ་སྨོས་ཏེ། གང་གི་ཕྱིར་ཏིང་ངེ་འཛིན་གྱི་ལས་འདི་རྣལ་འབྱོར་པས་བསྒོམས་ནས་དངོས་གྲུབ་ཀྱི་མཆོག་དམ་པ་ཆོས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱའི་དངོས་གྲུབ་ཐོབ་པར་
འགྱུར་ཏེ། དེའི་དོན་ནི་འདི་ལྟར་ཤེས་པར་བྱ་སྟེ། སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གར་རྡོ་རྗེ་རྩེ་ལྔ་པ་ལ་
སྔགས་རྣམ་པར་བཀོད་ནས། དེ་ཟློས་ཤིང་དེ་བཞིན་གཤེགས་པའི་བདག་ཉིད་དུ་བསམ་པར་བྱའོ། །སེམས་ཅན་གྱི་ཁམས་ཐམས་ཅད་སངས་རྒྱས་ཀྱི་བྱང་ཆུབ་ལ་རབ་ཏུ་བཞག་ནས་རང་བཞིན་གྱིས་འོད་གསལ་བར་སྤྲུལ་པ་དང་མཚུངས་པའི་དེ་བཞིན་གཤེགས་པའི་བདག་ཉིད་དུ་བསྒོམ་
པར་བྱའོ། །རྡོ་རྗེ་སེམས་དཔའ་ནི་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱི་རང་བཞིན་ནོ། །དེ་དག་གི་ཏིང་ངེ་འཛིན་ནི་ཆོས་ཀྱི་དཀྱིལ་འཁོར་ལས་བཤད་པའི་ལས་བསྒོམ་
པའོ། །རྡོ་རྗེ་སེམས་དཔའི་ཏིང་ངེ་འཛིན་དེ་དག་གི་བླ་ན་མེད་པའི་ལས་ནི་བྱང་ཆུབ་ཀྱི་སེམས་བསྐྱེད་པའོ། །མང་པོ་ནི་ནམ་མཁའ་ཁྱབ་པའོ། །སེམས་དཔའ་ཀུན་འགྱུར་ཐམས་ཅད་ཀྱང་། །ཞེས་བྱ་བ་ལ་སེམས་དཔའ་ནི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་
པའི་མཐར་ཐུག་པ་དེ་དག་བསྐྱེད་པ་ནི། སེམས་དཔའ་ཀུན་གྱི་རྣམ་པར་བརྟན་པ་དང་གཡོ་བ་སྣ་ཚོགས་པ་ཐམས་ཅད་ཀྱི་དངོས་པོའི་རང་གི་ངོ་བོ་ཐམས་ཅད་དུ་སོང་བས་ན་རྡོ་རྗེ་སེམས་དཔའ་ལ་སོགས་པ་བསྐྱེད་པའོ། །དེ་ལྟར་སྐྱེ་བ་དང་འཇིག་པ་ཤེས་པ་ཕུན་སུམ་ཚོགས་པ་འགྲུབ་པར་

འགྱུར་རོ། །ཆོས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱའི་དངོས་གྲུབ་ཏུ་འགྱུར་རོ། །དེའི་དོན་ནི་འདི་ལྟར་ཤེས་པར་བྱ་སྟེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ཆོས་ཀྱི་
དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ལ་རང་གི་ལྷའི་སྔགས་རྣམ་པར་བསམས་ནས། དེ་ཉིད་བརྗོད་ཅིང་དངོས་པོ་ཐམས་ཅད་བདག་ཡིན་ནོ་ཞེས་བསྒོམས་ནས། བརྟན་པ་དང་གཡོ་བའི་དངོས་པོའི་བདག་ཉིད་ཐམས་ཅད་རང་ཡིན་ནོ་ཞེས་
ངེས་པར་བྱས་ནས་སྤྲུལ་པ་དང་མཚུངས་པའི་རང་བཞིན་གྱིས་འོད་གསལ་བའི་ལྷའི་ངོ་བོ་ནི་བདག་ཡིན་ནོ་ཞེས་བསྒོམ་པར་བྱའོ། །སྡིག་པ་དག་པའི་རྒྱུ་ཡི་ཕྱིར། །ཞེས་བྱ་བ་ནི་ཇི་ལྟར་ངན་སོང་གསུམ་གྱི་སྡིག་པ་དག་པའི་རྒྱུའི་ཕྱིར་རོ། །སྡིག་ཀུན་རབ་ཏུ་འདུལ་བྱེད་པ་ནི་བསད་
པས་འདུལ་བར་བཅོམ་ལྡན་འདས་ཀྱིས་གསུངས་པས་ན། དེ་བཞིན་དུ་མཚམས་མེད་པ་ལ་སོགས་པ་ལ་འཇུག་པའི་སེམས་ཅན་ཐམས་ཅད་སྡིག་པ་དག་པའི་རྒྱུ་མཚན་གྱིས་བསད་པའོ། །དད་པར་གྱུར་ན་འགྲུབ་པར་འགྱུར། །ཞེས་བྱ་བ་ནི་དད་པར་གྱུར་པས་སོ། །འདི་སྐད་
སྟོན་པ་ཡིན་ཏེ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ནས། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་
བཅིངས་ཏེ། སྙིང་གའི་རྡོ་རྗེ་ལ་སྔགས་ཀྱི་ཡི་གེ་རྣམ་པར་བཀོད་ནས། དེ་བརྗོད་ཅིང་ཡིད་ཀྱིས་སེམས་ཅན་ཐམས་ཅད་ཀྱི་ཁམས་ཐམས་ཅད་རྣམ་པར་སྦྱངས་ཏེ། ཐུགས་རྗེ་ཆེན་པོ་ཐབས་ཀྱི་ཁྲོ་བོས་བཅོམ་ནས་རྡོ་རྗེའི་རིགས་ཀྱི་རང་བཞིན་དུ་བསྐྱེད་པར་བྱའོ། །སྡིག་ཀུན་རྣམ་པར་
དག་པའི་བདག །ཅེས་བྱ་བ་ནི་ལས་དང་ཉོན་མོངས་པ་ལ་སྡིག་པ་ཀུན་ཞེས་བྱ་བའི་སྒྲ་ནི་བརྗོད་པ་ཡིན་ནོ། །སྡིག་པ་ཐམས་ཅད་རྣམ་པར་དག་པའི་བདག་ཉིད་དུ་བསམས་པ་གང་ཡིན་པ་དེ་ནི་སྡིག་པ་ཀུན་རྣམ་པར་དག་པའི་བདག་ཉིད་དེ། ལས་དང་ཉོན་མོངས་པ་སྤངས་པའོ། །ལས་ཀུན་

དག་པས་དགོས་པ་ཀུན། །ཞེས་བྱ་བ་ནི་སྐྱེས་བུ་གང་ཞིག་སྡིག་པ་ཐམས་ཅད་སྤངས་པས་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་པའོ། །དགོས་པ་ཀུན་དོན་ཐམས་ཅད་གྲུབ་པར་མཛད་པ་ལ་སོགས་པ་གཟུགས་དུ་མར་མཛད་པའོ། །རྣལ་འབྱོར་པ་དེའི་ལས་
ནི་འདི་ཡིན་ནོ་ཞེས་ལས་འདི་ཉིད་རང་བཞིན་གྱིས་རྣམ་པར་དག་པར་ལྷག་པར་མོས་པ་བྱེད་པ་ཡིན་གྱི། གཞན་གྱི་ནི་མ་ཡིན་ནོ་ཞེས་དེ་ལྟར་ངེས་པ་བསྐྱེད་པའི་བསམ་པས་བསྒོམས་ན་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་
ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིང་སྟེ། སྙིང་གའི་རྡོ་རྗེ་པདྨ་ལ་རང་གི་སྔགས་རྣམ་པར་བསམས་ཏེ། དེ་ཉིད་བརྗོད་ཅིང་ཆོས་ཐམས་ཅད་
རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་པས། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་པདྨའི་རིགས་ཀྱི་ངོ་བོར་ཡིད་ཀྱིས་སྤྲུལ་ཏེ་རང་བཞིན་གྱིས་རྣམ་པར་དག་ཅིང་གཟུགས་བརྙན་དང་མཚུངས་པའི་རང་གི་ལྷའི་གཟུགས་
སུ་བདག་ཉིད་བསྒོམ་པར་བྱའོ། །ནོར་བུ་ཆེན་པོའི་རིགས་ཀྱི་རིགས་དེ་ལ་སྲེད་པ་ནི་དེ་ཐོབ་པར་འདོད་པའོ། །དེ་གང་ལ་ཡོད་པ་དེ་དག་ཐམས་ཅད་ནི་སྲེད་ལྡན་ནོ། །དེ་དག་ཐམས་ཅད་ལ་སྲེད་པས་ཅི་ཞིག་ཏུ་འགྱུར་ཞེ་ན། དབུལ་བ་ཞེས་བྱ་བ་སྨོས་ཏེ། ནོར་བུའི་རིགས་ཀྱི་དབུལ་བའི་སྡུག་
བསྔལ་དེ་དག་བསལ་ནས་ནོར་བུའི་རིགས་ལ་མངོན་པར་དད་པས་དེ་བསྒོམ་པ་དང་རབ་ཏུ་ལྡན་པར་དེ་རྟོགས་པས་སྤངས་པ་ཡིན་ནོ། །བསམ་པ་ཀུན་བསྐང་བ་ནི་ནོར་བུའི་རིགས་ཀྱི་འདོད་པ་གྲུབ་པའོ། །རྟག་ཏུ་ནི་དུས་ཐམས་ཅད་དུའོ། །དོན་ཀུན་གྲུབ་པས་ཀུན་བདག་ནི་ནོར་
བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བསྒོམ་པ་དང་རབ་ཏུ་ལྡན་པས་ན་དོན་ཀུན་གྲུབ་ཅིང་ཀུན་གྱི་བདག་ཉིད་དོ། །དེ་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།

ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་རིན་པོ་ཆེ་ལས་སྔགས་རྣམ་པར་བསམས་ནས་དེ་ཉིད་ཟློས་ཤིང་། ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་
བཤད་པའི་ལྷའི་ངོ་བོར་བདག་ཉིད་ངེས་པ་བསྐྱེད་ནས། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ནོར་བུའི་རིགས་ཀྱིས་དབང་བསྐུར་ནས། ནོར་བུའི་རིགས་ཀྱི་ངོ་བོ་བསྐྱེད་དེ། དེའི་རྗེས་ལ་རང་བཞིན་གྱིས་འོད་གསལ་བ་སྤྲུལ་
པ་དང་མཚུངས་པར་བདག་ཉིད་རྣམ་པར་བསམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པ་ནོར་བུའི་རིགས་ཐམས་ཅད་ཀྱི་ཏིང་ངེ་འཛིན་གྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་
སོགས་པ་བསྒོམས་པས་གང་གི་ཚེ་མཚན་མ་ཐོབ་པར་གྱུར་པ་དེའི་ཚེ་རྡོ་རྗེ་ཕྲ་མོ་བསྒོམས་པས་མངོན་པར་ཤེས་པ་ལྔ་བསྐྱེད་པར་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་ཅད་ཕྲ་མོའི་ཡེ་ཤེས་ཀྱི་དངོས་གྲུབ་ཀྱི་
རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ནི་རིགས་སོ། །ཕྲ་མོའི་ཡེ་ཤེས་ནི་རྡོ་རྗེ་ཕྲ་མོའི་ཏིང་ངེ་འཛིན་ཏེ། མངོན་པར་ཤེས་པ་ལྔ་བསྐྱེད་པའོ། །དེའི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །
དེ་སྟོན་པར་བྱེད་པའི་རྒྱུད་གསུངས་པ་ནི། བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཕྲ་མོ་བསྒོམ་པའོ། །རྟག་ཏུ་ནི་གཏན་དུའོ། །སྦྱོར་བ་ནི་བསྒོམ་པའོ། །འབད་པ་ཀུན་གྱིས་ནི་བྱ་བ་ཐམས་ཅད་སྤངས་ཏེ། དེ་ལ་གཞོལ་བའི་སེམས་ཀྱིས་
ཀུན་དུ་བསྒོམ་པའོ། །རྣམ་པའི་མཆོག་ནི་ཀུན་ལྡན་པ། །ཞེས་ཇི་ལྟར་བཤད་པའི་མངོན་ཤེས་ལྔ་ནི་ཐོབ་པར་འགྱུར་ཞས་བྱའོ། །འདི་སྐད་སྟོན་པ་ཡིན་ཏེ། གང་གི་ཆོས་ཀྱི་དཀྱིལ་འཁོར་གྱི་རྣལ་འབྱོར་པས་མཚན་མ་ཐོབ་པར་གྱུར་པ་དེའི་ཚེ་མངོན་པར་ཤེས་པ་བསྐྱེད་པའི་ཕྱིར། རྡོ་རྗེ་

ཕྲ་མོ་བསྒོམ་པ་བྱས་ན་སྔ་མ་བཞིན་དུ་མངོན་པར་ཤེས་པ་ལྔར་འགྱུར་རོ། །སློབ་དཔོན་མ་ཡིན་གཞན་དང་ནི། །ཞེས་བྱ་བ་ལ་སོགས་པ་ནི་དེ་ལ་དེ་བཞིན་གཤེགས་པ་ཐམས་ཅད་ཀྱི་དེ་བཞིན་གཤེགས་པ་དང་། རྡོ་རྗེའི་རིགས་ལ་སོགས་པ་རྣམས་ཀྱི་དམ་ཚིག་ལ་སྤྱོད་པས་ན་སློབ་དཔོན་ནོ། །
དེ་ཉིད་དམ་གཞན་པའི་ལུགས་རྣམས་ལ་སློབ་པས་ན་སློབ་དཔོན་ནོ། །དེའི་སློབ་དཔོན་མ་ཡིན་པ་ནི། སློབ་དཔོན་མ་ཡིན་གཞན་དང་ནི། །ཞེས་བྱ་སྟེ། མདོ་སྡེ་པ་དང་། མུ་སྟེགས་ཅན་རྣལ་འབྱོར་གྱི་རྒྱུད་ཀྱི་སློབ་དཔོན་དུ་མི་འགྱུར་བ་གང་ཡིན་པ་དེ་ནི་གཞན་ཡིན་ནོ། །གཞན་གྱི་མདུན་
དུ་ཕྱག་རྒྱ་མི་བརྗོད་དེ། རྣལ་འབྱོར་གྱི་རྒྱུད་འདིར་དབང་བསྐུར་བའམ། སློབ་དཔོན་གྱི་མདུན་དུ་བསྟན་པར་བྱའོ། །སློབ་མིན་ལ་ཞེས་བྱ་བ་ནི། རབ་ཏུ་བྱུང་བ་ལ་སོགས་པ་དང་འབྲེལ་བའི་སློབ་མ་དེ་ལ་བསྟན་པར་བྱ་བ་ཐོབ་པར་འགྱུར་རོ་སྙམ་ནས་བུ་མིན་པ་ཞེས་བྱ་བ་སྨོས་ཏེ། རྣལ་
འབྱོར་གྱི་རྒྱུད་ཀྱི་ཆོ་གས་འདིར་བཅུག་པའི་བུའོ། །བུ་མ་ཡིན་པ་ནི་དེའི་བུ་མ་ཡིན་པའོ། །དེ་ནི་འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རིགས་ཀྱི་ཆོས་ཀྱི་དཀྱིལ་འཁོར་གྱི་རྣལ་འབྱོར་པས་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་སྒྲུབ་པར་འདོད་པས་
རྣལ་འབྱོར་གྱི་རྒྱུད་ཀྱི་དཀྱིལ་འཁོར་ཆེན་པོར་འཇུག་པའི་སློབ་མ་རྣམས་དང་། རྣལ་འབྱོར་གྱི་རྒྱུད་དུ་དབང་བསྐུར་བ་ཐོབ་པའི་སློབ་དཔོན་རྣམས་ལ་ཕྱག་རྒྱ་དང་སྔགས་བསྟན་པར་བྱའོ། །དེ་ལས་གཞན་པ་རྣམས་ལས་ནི་མ་ཡིན་ནོ། །དེ་ལྟར་གདམས་ངག་ཐོབ་པས་ཆོས་ཀྱི་དཀྱིལ་
འཁོར་གྱི་རང་གི་ལྷའི་ཕྱག་རྒྱ་ཆེན་པོ་ལ་སོགས་པ་སྒོམ་པར་བྱེད་པ་ནི་ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རྡོ་རྗེ་ཕྲ་མོ་བསྒོམས་པས་མངོན་པར་ཤེས་པ་ལྔ་བསྐྱེད་ལ། ཕྱིས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་མཚན་ཐོག་
ཐག་བསྒོམས་ན་འགྲུབ་པར་འགྱུར་རོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཕྲ་མོ་བསྒོམས་པའོ། །རྡོ་རྗེ་ཕྲ་མོའི་སྦྱོར་བ་དེས། །སྣ་ནས་ཧཱུཾ་བྱུང་ལྡན་གྱུར་ན། །ཞེས་བྱ་བ་ནི་སྣ་རྩེ་ལས་འབྱུང་བ་ནི་ཧཱུཾ་ནི་སྣ་ནས་ཧཱུཾ་བྱུང་ངོ་། །སྣ་ལས་བྱུང་བའི་ཧཱུཾ་གང་ཡིན་པ་དེ་ནི་ལྡན་གྱུར་པའོ། །དེའི་རྗེས་

ལ་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པ་རྡོ་རྗེ་ཁྲོ་བོ་དེ་དག་གི་ཏིང་ངེ་འཛིན་ཏོ། །དེ་ལ་གནས་པ་ནི་ཕྱག་རྒྱ་ཆེན་པོ་དང་། ཆོས་དང་ལས་དང་དམ་ཚིག་གི་ཕྱག་རྒྱ་ལ་གནས་པའི་རང་གི་ཁྲོ་བོའི་ཏིང་ངེ་འཛིན་ལ་གནས་ནས་ལས་ཐམས་ཅད་
བསྒྲུབས་ལ། རྡོ་རྗེ་རིགས་ཀྱི་མངོན་པར་ཤེས་པ་ལྔ་བསྐྱེད་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པ་རང་གི་ལྷའི་སྒྲུབ་པ་པོས་རང་གི་ལྷའི་ཕྱག་རྒྱ་ཆེན་པོ་བསྒོམས་ཏེ། ཇི་སྲིད་མཚན་
མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྣའི་རྩེ་མོར་སྣ་ནས་བྱུང་བའི་ཧཱུཾ་ལས་ཕྲ་མོའི་རྡོ་རྗེ་རྣམ་པར་བསམས་ཏེ། ཧཱུཾ་ཟློས་ཤིང་ཇི་སྲིད་དུ་མངོན་པར་ཤེས་པ་ལྔ་བསྐྱེད་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེའི་རྗེས་ལ་ཕྱག་རྒྱ་ཆེན་པོ་ལ་སོགས་པ་བསྒྲུབས་པས་མཚན་
ཐོག་ཐག་བསྒོམ་པར་བྱའོ། །རྡོ་རྗེ་ལྟ་བས་བལྟས་ན་ནི། །ཞེས་བྱ་བ་ནི་བཤད་ཟིན་ཏོ། །དེའི་ཏིང་ངེ་འཛིན་ནི་རྡོ་རྗེ་ལྟ་བའི་སྙིང་པོས་བསྐྱེད་པའོ། །རྡོ་རྗེ་ཕྲ་མོའི་ཚུལ་གྱིས་ནི། །རྡོ་རྗེ་ཕྲ་མོ་བསྒོམས་པའོ། །དེ་བས་ན་དེ་ནི་པདྨ་ཆེན་པོའི་ཏིང་ངེ་འཛིན་གནས་ཞེས་བྱའོ། །པདྨའི་
རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བ་ལ་སོགས་པ་དེ་དག་ནི་པདྨ་ཆེན་པོ་སྟེ། དེ་ལས་བཤད་པའི་ཕྱག་རྒྱ་ཆེན་པོ་ནི་པདྨའི་ཏིང་ངེ་འཛིན་ཏོ། །དེ་ལ་གནས་པ་ནི་པདྨ་ཆེན་པོའི་ཏིང་ངེ་འཛིན་ལ་གནས་པའོ། །འདོད་ཆགས་དངོས་གྲུབ་ཐོབ་པར་འགྱུར། །ཞེས་བྱ་
བ་ལ་འདོད་ཆགས་ནི་པདྨའི་རིགས་སོ། །དེའི་དངོས་གྲུབ་ནི་པདྨའི་རིགས་ཀྱི་མངོན་པར་ཤེས་པ་ལྔ་བསྐྱེད་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། པདྨའི་རིགས་སུ་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། གང་གི་ཚེ་མཚན་མ་ཐོབ་
པར་གྱུར་པ་དེའི་ཚེ་ཕྲ་མོའི་རྡོ་རྗེ་བསྒོམས་ལ་ཇི་སྲིད་པདྨའི་རིགས་ཀྱི་མངོན་པར་ཤེས་པ་ལྔ་བསྐྱེད་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་ཕྱག་རྒྱ་ཆེན་པོ་ལ་སོགས་པ་བསྒོམས་ཏེ། ཇི་སྲིད་དུ་པདྨའི་རིགས་ཀྱི་ཆོས་ཀྱི་དཀྱིལ་འཁོར་ལས་

བཤད་པའི་ཕྱག་རྒྱ་ཆེན་པོ་ལ་སོགས་པ་དངོས་གྲུབ་འགྲུབ་པར་འགྱུར་བ་དེ་སྲིད་ཀྱི་བར་དུ་བྱའོ། །ཤིན་ཏུ་ཕྲ་བའི་འབར་ལྟ་བས། །ཞེས་བྱའོ། །འབར་བའི་ལྟ་བ་གང་ལ་ཡོད་པ་ནི་འབར་བའི་ལྟ་བའི་རྣམ་པའོ། །དེས་དོན་ཐམས་ཅད་འདྲེན་པར་འགྱུར་རོ། །འབར་བའི་ལྟ་བ་
དང་ལྡན་པ་གང་ཡིན་པ་དེས་དོན་ཐམས་ཅད་འདྲེན་པའི་ཁྱད་པར་ཇི་ལྟ་བ་ཞིག་བསྒོམ་པར་བྱ་ཞེ་ན། ཤིན་ཏུ་ཕྲ་བའི་འབར་བའི་ལྟ་བས་ཞེས་བྱ་བ་སྨོས་ཏེ། ཤིན་ཏུ་ཕྲ་བ་ནི་རབ་ཏུ་ཕྲ་བའོ། །ཏིང་ངེ་འཛིན་གང་གིས་འགྲུབ་པར་འགྱུར་ཞེ་ན། རྡོ་རྗེ་རིན་ཆེན་ཏིང་འཛིན་གྱིས། །ཞེས་བྱ་བ་སྨོས་ཏེ། ནོར་
བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་དེ་དག་ནི་རྡོ་རྗེ་རིན་ཆེན་ནོ། །དེའི་ཏིང་ངེ་འཛིན་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་རྡོ་རྗེ་རིན་པོ་ཆེའི་ཏིང་ངེ་འཛིན་དེ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་
རྒྱ་ཆེན་པོ་ལ་སོགས་པའི་རྣལ་འབྱོར་གྱིས་ཞེས་བྱ་བའི་དོན་ཏོ། །རྡོ་རྗེ་ཕྲ་མོའི་ཚུལ་གྱིས་ནི། །ཞེས་བཤད་ཟིན་ཏོ། །རྡོ་རྗེ་ཕྲ་མོའི་ཚུལ་གྱིས་ནི། །དོན་ནི་ཐམས་ཅད་འདྲེན་པར་འགྱུར། །ཞེས་བྱ་བ་སྟེ། དོན་ཡང་ཡིན་ལ་ཐམས་ཅད་ཀྱང་དེ་ཡིན་པས་ན་དོན་ཐམས་ཅད་དེ། ནོར་བུའི་
རིགས་ཀྱི་མངོན་པར་ཤེས་པ་ལྔའོ། །དེའི་འདྲེན་པ་ནི་རྟོགས་པའོ། །དེ་ནི་འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒོམས་ནས་གང་གི་ཚེ་མཚན་མ་ཐོབ་པར་གྱུར་པ་དེའི་ཚེ། རྡོ་རྗེ་ཕྲ་མོ་བསྒོམས་
ལ་ཇི་སྲིད་མངོན་པར་ཤེས་པ་ལྔ་ཐོབ་པར་གྱུར་པ་དེ་སྲིད་ཀྱི་བར་དུ་བྱའོ། །དེ་ལྟར་དེ་བཞིན་གཤེགས་པ་ལ་སོགས་པས་རིགས་ཐམས་ཅད་ཀྱི་ཕྲ་མོའི་ཡེ་ཤེས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་
སོགས་པ་བསྒོམ་པ་ན་མཚན་མ་འདི་དག་བྱུང་བར་གྱུར་ན་མངོན་པར་ཤེས་པ་ལྔ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་སྤྱན་གྱི་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །

དེ་བཞིན་གཤེགས་པ་ཐམས་ཅད་ནི་རིགས་སོ། །སྤྱན་གྱི་ཡེ་ཤེས་ནི་སྐར་མའི་རྣམ་པ་ལ་སོགས་པ་མཐོང་བའོ། །དེའི་དངོས་གྲུབ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྐྱེད་པའོ། །རྒྱུད་ནས་སྟོན་པས་ན་རྒྱུད་དེ། བཅོམ་
ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །གང་གི་ཚེ་ཕྱག་རྒྱའམ་ཏིང་ངེ་འཛིན་ཞེས་བྱ་བ་ལ་སོགས་པ་གང་གི་ཚེ་ནི། དུས་གང་ཞིག་གི་ཚེ་ནའོ། །ཕྱག་རྒྱ་ནི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའོ། །ཏིང་ངེ་འཛིན་ནི་རྡོ་རྗེ་ཕྲ་མོའི་དབྱེ་བ་
རྣམ་པ་ཉི་ཤུའོ། །སྒྲུབ་པའི་རྩོལ་བར་གྱུར་པ་དེ། །ཞེས་བྱ་བ་ནི་བསྒྲུབ་པའི་དོན་མངོན་སུམ་དུ་བྱེད་པའི་དོན་ཏོ། །རྩོལ་བར་གྱུར་པ་ནི་ཉེ་བར་མཁོ་བའོ། །གང་གི་ཚེ་ན་དུས་དེའི་ཚེའོ། །མཁའ་ནི་ནམ་མཁའོ། །མཁའ་ནི་རྡུལ་ཕྲ་རབ་བོ། །དཀར་པོར་གྱུར་པ་དེ་མཐོང་བ་ནི་འོད་ཟེར་
དཀར་པོའོ། །རྣམ་པ་ཅི་འདྲ་བ་ཞིག་ཅེ་ན། སྐར་མ་དང་འདྲ་ཞེས་བྱ་བ་སྨོས་ཏེ། རྣལ་འབྱོར་པ་དེས་མཐོང་བའོ། །དེའི་ཚེ་ནི་དུས་དེ་ནའོ། །བློ་ལྡན་ནི་ཤེས་པ་དང་ལྡན་པའམ། ཤེས་ཤིང་བློ་གྲོས་དང་ལྡན་པའོ། །ཅི་ཞིག་ཤེས་ཤེ་ན་སངས་རྒྱས་ཀྱི། སྤྱན་ནི་བདག་གིས་ཐོབ་པར་ཤེས། །
ཞེས་བྱ་བ་སྨོས་ཏེ། སངས་རྒྱས་རྣམས་ཀྱི་སྤྱན་ནི་སངས་རྒྱས་ཀྱི་སྤྱན་ཏེ། ཐམས་ཅད་མཁྱེན་པའི་ཡེ་ཤེས་སོ། །དེ་ཐོབ་པར་བྱེད་པའི་རྒྱུ་མཚན་ཡིན་པའི་ཕྱིར་འདི་ལས་ཀྱང་སངས་རྒྱས་ཀྱི་སྤྱན་ཞེས་བཤད་དོ། །དེ་ཕྱིན་ཆད་ནི་སངས་རྒྱས་ཀྱི། རྟོག་པ་ཀུན་ལས་བསྒྲུབ་པར་བྱ། །ཞེས་བྱ་བ་
ནི་མངོན་པར་ཤེས་པ་ལ་སོགས་པ་བསྐྱེད་པའོ། །ཇི་སྙེད་དངོས་པོ་ཡོད་གྱུར་པ། །ཞེས་བྱ་བ་ལ་སོགས་པ་ལ། ཇི་སྙེད་པ་ནི་བརྟན་པ་དང་གཡོ་བའི་དངོས་པོའོ། །ཡོད་པ་ནི་བདག་པོ་སྟེ། ཁམས་གསུམ་པ་དེ་སྙེད་པ་ཐམས་ཅད་དེ་བཞིན་གཤེགས་པའི་གཟུགས་བརྙན་གྱི་རྣམ་པ་
རྣལ་འབྱོར་པས་མཁའ་ལ་རྒྱུག་པ་མཐོང་བར་འགྱུར་རོ། །ཇི་ལྟར་རྒྱུག་ཅེ་ན། འགྲོ་བ་དང་ནི་འོང་བའང་རུང་། །ཞེས་བྱ་བ་སྨོས་ཏེ། གཟུགས་བརྙན་དེ་དང་དེ་དག་མཐོང་ཞིང་ཤེས་པའོ། །རྡོ་རྗེ་སྤྱན་ནི་རྣམ་པར་དག །ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་བྱང་ཆུབ་ཀྱི་

སེམས་ལ་སོགས་པའི་ངོ་བོར་བསྐྱེད་པ་ནི་རྡོ་རྗེའི་སྤྱན་རྣམ་པར་དག་པའོ། །དེ་དང་ལྡན་པ་ནི་རྡོ་རྗེའི་སྤྱན་རྣམ་པར་དག་པ་དང་ལྡན་པ་སྟེ། དེའི་རྡོ་རྗེ་སྤྱན་རྣམ་པར་དག་པའོ། །རྡོ་རྗེ་སྤྱན་རྣམ་པར་དག་པ་སྟེ། ཐོབ་པའི་གྱུར་གྱུར་པ་ཤེས་པའི་རྣལ་འབྱོར་པ་ནི་རྡོ་རྗེ་སེམས་དཔའ་ལ་སོགས་
པའི་མཆོད་པ་སོ་སོར་སྣང་བ་ཐོབ་པར་གྱུར་པ་དེས། མཆོད་པའི་དངོས་གྲུབ་ཐོབ་པར་གྱུར། །ཞེས་བྱའོ། །གཡས་པའམ་ནི་གཡོན་ཕྱོགས་ཀྱི། །ཞེས་བྱ་བ་ནི་གཡས་ཕྱོགས་དང་གཡས་ཕྱོགས་མ་ཡིན་པ་ཐམས་ཅད་དེ། ལ་ལར་ནི་གཡས་པ་ནི་གཡས་ཡིན་ལ་གཡས་པ་མ་ཡིན་པ་
རྣམས་གཡོན་ཞེས་བརྗོད་དོ། །གཡས་ཕྱོགས་དང་གཡས་ཕྱོགས་མ་ཡིན་པའི་ལོགས་སུ་གནས་པའི་ངང་ཚུལ་གང་ལ་ཡོད་པ་ནི་གཡས་དང་གཡོན་གྱི་ཕྱོགས་ཀྱི་ནམ་མཁའ་ལ་དེ་མིག་གིས་མཐོང་བར་འགྱུར་རོ། །ནམ་མཁའ་དབྱིངས་ཉིད་ནི་རྡུལ་ཕྲ་རབ་ཀྱི་ཆ་ཤས་
སོ། །ཁྱད་པར་ཇི་ལྟ་བུ་ཞེ་ན། སྤྲིན་འདྲ་མྱུར་དུ་འཁོར་བ་ནི། །ཞེས་བྱ་བ་ཡིན་ཏེ། །སྤྲིན་སྔོན་པོ་དང་མཚུངས་པར་དེ་མཐོང་ཡང་རྣལ་འབྱོར་པས་འཇིགས་པར་མི་འགྱུར་བས་ན་འཇིགས་པར་མི