Luận tạng Tây Tạng (Tengyur) — Tập 58

་འགྱུར་བའོ། །རྒྱུ་ཅིའི་ཕྱིར་ཞེ་ན། རྡོ་རྗེ་ལས་བྱུང་ཕྱག་རྒྱ་དེ། །ཞེས་
བྱ་བ་སྨོས་ཏེ། ཕྱག་ན་དེ་ཡང་བཟུང་ན་ནི། །ཕྱག་རྒྱའི་མིག་ནི་འགྲུབ་པར་འགྱུར། །ཞེས་བྱ་སྟེ། མིག་གི་རྣམ་པར་ཤེས་པ་དེས་ཡོངས་སུ་དཔྱད་པས་ན་བཟུང་བའོ། །ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་དེ་བཟུང་ན་ཕྱག་རྒྱ་
འགྲུབ་པར་འགྱུར་རོ། །གང་འགྲུབ་པར་འགྱུར་ཞེ་ན། མིག་གི་ཕྱག་རྒྱ་ཞེས་བྱ་བ་སྨོས་ཏེ། ནམ་མཁའི་སྤྲིན་སྔོན་པོ་དང་མཚུངས་པ་ནི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་གྱི་ཕྱག་རྒྱའོ། །དེར་སྣང་བའི་མིག་ནི་མིག་གི་རྣམ་པར་ཤེས་པ་སྟེ། མིག་གི་ཕྱག་རྒྱ་དེ་གང་ལ་ཡོད་
པའི་རྣལ་འབྱོར་པ་དེ་ནི་མིག་གི་ཕྱག་རྒྱ་ཅན་ནོ། །དེ་ལྟར་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་གྱི་རྣལ་འབྱོར་པའི་མིག་གི་ཤེས་པ་བསྟན་ནས། ད་ནི་པདྨའི་རིགས་ཀྱི་རྣལ་འབྱོར་བསྟན་པ་ནི། གང་ཚེ་སྐྱ་དམར་དཀར་བ་དང་། །ཞེས་བྱ་བ་ལ་སོགས་པ་སྟེ། པདྨའི་རིགས་

ཀྱི་རྣལ་འབྱོར་པས་གང་གི་ཚེ་སྐྱེ་བ་ནི་ཁ་དོག་དཀར་བའོ། །དམར་བ་ནི་ཁ་དོག་དམར་བའོ། །དཀར་བ་ནི་དྲི་མ་མེད་པའོ། །སྣ་ཚོགས་ནི་ཁ་དོག་ལྔ་པ་སྟེ། དཀྱིལ་འཁོར་ནི་ཆོས་ཀྱི་དཀྱིལ་འཁོར་རོ། །མཐོ་བ་ནི་མཁའ་ལའོ། །དེའི་ཚེ་ནི་དུས་དེར་རོ། །དགོས་པ་ཉིད་
འགྱུར་ཞིང་ནི་པདྨའི་རིགས་ཀྱི་ཆོས་ཀྱི་དཀྱིལ་འཁོར་གྱི་གཟུགས་ཀྱིས་སོ། །འགྲུབ་པར་འགྱུར་བ་ནི་རྣལ་འབྱོར་པས་སོ། །མངོན་པར་ཤེས་པ་ལྔ་བསྐྱེད་ཅིང་བསྒྲུབ་པས་ཅིར་འགྱུར་ཞེ་ན། འཁོར་ལོའི་སྤྱན་ནི་ཞེས་བྱ་བ་སྨོས་ཏེ། འཁོར་ལོ་ནི་དཀྱིལ་འཁོར་རོ། །སྤྱན་ནི་དེའི་རྣམ་
པ་ཅན་གྱི་མིག་གི་རྣམ་པར་ཤེས་པ་སྟེ། འཁོར་ལོའི་སྤྱན་རྣལ་འབྱོར་པ་གང་ལ་ཡོད་པ་འདི་ནི་སྤྱན་ནོ། །འགྲུབ་པ་ནི་དེའི་དཀྱིལ་འཁོར་ཇི་ལྟ་བ་བཞིན་དུ་མཐོང་བའོ། །དེ་ལྟར་པདྨའི་རིགས་ཀྱི་སྤྱན་གྱི་ཡེ་ཤེས་ཀྱི་དངོས་གྲུབ་བསྟན་ནས། ད་ནི་ནོར་བུའི་རིགས་ཀྱི། མཁའ་ལ་
རིན་ཆེན་འདྲ་བ་དང་། །ཞེས་བྱ་བ་ལ་སོགས་པ་སྨོས་ཏེ། ནམ་མཁའ་ནི་གྲགས་པར་ཟད་དོ། །ནམ་མཁའ་དེ་ལ་པདྨ་རཱ་ག་ལ་སོགས་པ་ནོར་བུ་དང་འདྲ་བ་དང་། དབྱིག་ལ་སོགས་དང་འདྲ་བར་ནི། །ཞེས་བྱ་བ་ནི་དབྱིག་ནི་དོང་ཚེ་ལ་སོགས་པའི་ཟོང་སྟེ་དེ་དང་འདྲ་བའོ། །གང་གི་ཚེ་
ནི་དུས་གང་གི་ཚེའོ། །ནོར་བུའི་རིགས་ཀྱི་རྣལ་འབྱོར་པས་ནམ་མཁའ་ལ་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་མཐོང་བར་འགྱུར་རོ། །དེའི་ཚེ་མཁའ་མིག་འགྲུབ་པར་འགྱུར། །ཞེས་བྱ་བ་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ནི་རྣམ་པར་དག་པའོ། །མིག་ནི་
མིག་གི་རྣམ་པར་ཤེས་པ་སྟེ། རྣལ་འབྱོར་པ་གང་ལ་ནམ་མཁའི་མིག་ཡོད་པ་དེས་འགྲུབ་པར་འགྱུར་ཏེ། ནོར་བུའི་རིགས་ཀྱི་དངོས་གྲུབ་ཏུ་འགྱུར་ཞིང་ནོར་བུའི་རིགས་ཀྱི་དཀྱིལ་འཁོར་ཐུན་མཚམས་ཐམས་ཅད་ཀྱི་ཚེ་ལན་ཅིག་མ་ཡིན་པར་མཐོང་བར་འགྱུར་རོ། །འཕགས་པ་
དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལ་དེ་བཞིན་གཤེགས་པ་ཐམས་ཅད་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་གྱི་རྒྱུད་ཕྱི་མའི་བཤད་པ་རྫོགས་སོ།། །།དེ་ལྟར་དེ་བཞིན་གཤེགས་པ་ལ་སོགས་

པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་གྱི་རྒྱུད་ཕྱི་མ་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་ནི་རང་གི་རིགས་ཀྱི་དཀྱིལ་འཁོར་ཆེན་པོ་གསུངས་པའི་རང་གི་ལྷའི་རྣལ་འབྱོར་
བྱས་ལ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་རང་གི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིང་བ་ནི་རྒྱུད་ཕྱི་མ་བསྒྲུབ་པའི་ཚེ་ཡང་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་
གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལས་ཀྱི་དམ་པའི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེ་དག་གི་ལས་ནི་ལས་ཀྱི་དཀྱིལ་
འཁོར་རོ། །དམ་པའི་དངོས་གྲུབ་ནི་ཕྱག་རྒྱ་ཆེན་པོའི་དངོས་གྲུབ་བོ། །དེ་སྟོན་པར་བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །ཆོས་ཀྱི་དཀྱིལ་འཁོར་ཚུལ་དུ་ནི། །འདོད་ཆགས་བདེ་བ་རྣམ་སྨིན་ཕྱིར། །གཙོ་བོ་ཐམས་ཅད་མཆོད་བྱས་
ནས། །ཞེས་བྱ་བ་ནི་ལས་ཀྱི་དཀྱིལ་འཁོར་ལ་སྤྲུལ་ལ། ལས་ཀྱི་དཀྱིལ་འཁོར་གྱི་རྣལ་འབྱོར་པས་དེས་དེ་བཞིན་གཤེགས་པ་ཐམས་ཅད་མཆོད་ན། སངས་རྒྱས་དངོས་གྲུབ་ཐོབ་པར་འགྱུར། །ཞེས་བྱའོ། །དོན་གང་གི་ཕྱིར་ཞེ་ན། འདོད་ཆགས་བདེ་བ་རྣམ་སྨིན་ཕྱིར། །ཞེས་བྱ་བ་སྨོས་
ཏེ། ཆོས་བདག་མེད་པའི་ཆགས་པས་འདོད་ཆགས་བདེ་བའོ། །དེའི་རྣམ་པར་སྨིན་པ་ནི་རང་གི་རིགས་འབྱུང་བའོ། །དེའི་ཕྱིར་ནི་རྣལ་འབྱོར་པས་གཙོ་བོ་ཐམས་ཅད་མཆོད་པའི་ཕྱིར། སངས་རྒྱས་དངོས་གྲུབ་ནི་དེ་བཞིན་གཤེགས་པ་ལྔའི་ལས་ཀྱི་དཀྱིལ་འཁོར་ལས་བཤད་པའི་
ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པ་ཐམས་ཅད་ཀྱི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ལས་ཀྱི་དཀྱིལ་འཁོར་

ལས་བཤད་པའི་རང་གི་ལྷའི་སྙིང་པོ་བརྗོད་ཅིང་སྤྲོས་ལ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཆོད་པ་རྣམས་ཀྱིས་ཡང་
དག་པར་མཆོད་ལ། སྔར་བཤད་པའི་ཚུལ་གྱིས་བདག་ཉིད་ཡོངས་སུ་བསྐོར་ནས་ཡིད་ཀྱིས་གཞག་པར་བྱའོ། །དེ་ནས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་རྣམ་པ་བཅུ་དྲུག་གིས་བདག་ཉིད་ཡང་དག་པར་མཆོད་ལ། དེའི་རྗེས་ལ་ཕྱག་རྒྱ་ཆེན་པོ་བཅིངས་ཏེ། དེ་
བཞིན་གཤེགས་པའི་བདག་ཉིད་དུ་བསྒོམ་པར་བྱའོ། །ལས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་ལས་ཀྱི་ཕྱག་རྒྱ་བཞིས་གསང་བའི་མཆོད་པ་རབ་ཏུ་མཆོད་པར་བྱ་སྟེ། འདོད་ཆགས་བདག་ཅེས་སྒོམ་བྱེད་ཅིང་། །ཆོས་བདག་མེད་པའི་ཆགས་པའི་རང་བཞིན་
དུ་གཟུགས་བརྙན་དང་མཚུངས་པའི་རྡོ་རྗེ་སེམས་དཔའ་ལ་སོགས་པ་ཕྱག་རྒྱ་ཆེན་པོའི་བདག་ཉིད་ཡིན་ནོ་ཞེས་བསྒོམ་པར་བྱའོ། །དངོས་གྲུབ་དམ་པ་ཐོབ་པར་འགྱུར། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །
ཅི་ཞིག་ཏུ་འགྱུར་ཞེ་ན། རྡོ་རྗེ་འདོད་པས་གཟི་ཅན་འགྱུར། །ཞེས་བྱ་བ་སྨོས་ཏེ། རྡོ་རྗེ་འདོད་པ་ནི་ཆོས་བདག་མེད་པའི་འདོད་ཆགས་སོ། །གཟི་ཅན་མཉམ་ཞེས་བྱ་བ་ནི་འོད་ཅན་དེ་དང་མཉམ་པ་སྟེ། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་གཟུགས་སོ། །འདི་
སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་ཆེན་པོ་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་ཕྱིས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་
ག་ལས་སྒེག་མོ་ལ་སོགས་པའི་གསང་བའི་མཆོད་པ་བཞི་སྤྲུལ་ལ་བདག་ཉིད་མཆོད་དེ། ཡང་དེའི་རྗེས་ལ་ཕྱག་རྒྱ་ཆེན་པོ་བསྒོམ་པར་བྱའོ། །གསང་བའི་མཆོད་པ་རབ་བྱས་ན། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཁྲོ་བོ་བདག་ཅེས་སྒོམ་བྱེད་ཅིང་། །ཞེས་བྱ་བ་ནི་ཁྲོ་བོ་རྡོ་རྗེ་

ཧཱུཾ་མཛད་ནས་ཁྲོ་བོ་རྡོ་རྗེ་འབེབས་པའི་བར་གྱི་ཁྲོ་བོ་ནི་བདག་ཡིན་ནོ་ཞེས་ཡང་དང་ཡང་དུ་མངོན་དུ་བྱེད་པའོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཆོ་ག་ཐམས་ཅད་སྔ་མ་
བཞིན་དུ་རྗེས་སུ་སྤྱད་ནས། ཕྱིས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་ག་ནས་སྒེག་མོ་ལ་སོགས་པའི་གསང་བའི་མཆོད་པ་བཞི་སྤྲུལ་ལ། བདག་ཉིད་མཆོད་པར་བྱས་ནས་དེའི་རྗེས་ལ་བསྒོམ་པར་བྱའོ། །ནང་དུ་སོང་བའི་
ཡིད་ཀྱིས་ནི། །འདོད་པ་དག་པར་སྒོམ་བྱེད་ཅིང་། །ཞེས་བྱ་བ་ནི་ཤིན་ཏུ་མཉམ་པར་གཞག་པའི་སེམས་ཀྱིས་རང་གི་ལྷའི་རྣལ་འབྱོར་རང་བཞིན་གྱིས་དག་པའི་གཟུགས་བརྙན་དང་མཚུངས་པར་བསྒོམ་པར་བྱའོ། །དབྱངས་ལྡན་ཐིག་ལེ་སངས་རྒྱས་རྣམས། །མཆོད་ན་དངོས་གྲུབ་
ཐོབ་པར་འགྱུར། །ཞེས་བྱ་བ་ནི་དེའི་འདོད་པ་རྣམ་པར་དག་པ་ནི་རང་གི་ལྷ་དང་མཉམ་པར་སྦྱོར་བས་རང་བཞིན་གྱིས་རྣམ་པར་དག་པ་སེམས་ཀྱིས་བསྒོམ་མོ། །དེ་དང་མཉམ་པར་སྦྱོར་བའི་རྩའི་ཐིག་ལེ་བྱུང་ནས་ནམ་མཁའི་ཁམས་བཀང་སྟེ། སེམས་ཅན་གྱི་ཁམས་ཐམས་ཅད་ཀྱི་འཇིག་རྟེན་
དབང་ཕྱུག་གི་རང་བཞིན་གྱི་ཕྱག་རྒྱ་ཆེན་པོ་རྫས་ཀྱི་ཐིག་ལེའི་ནང་དུ་ཚུད་པར་བྱས་ལ། ཐིག་ལེ་དེས་རེག་པར་གྱུར་པ་དེའི་ཚེ་འཇིག་རྟེན་དབང་ཕྱུག་ཏུ་གྱུར་པར་བསམ་པར་བྱའོ། །དེ་ལྟར་སེམས་ཅན་ཐམས་ཅད་ཀྱི་རང་བཞིན་དུ་སངས་རྒྱས་ཐམས་ཅད་ལ་མཆོད་པས། ལས་ཀྱི་
དཀྱིལ་འཁོར་ལས་བཤད་པའི་རང་གི་འཇིག་རྟེན་གསུམ་དབང་ཕྱུག་གི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་ཆེན་པོ་བྱས་ལ། ཆོ་ག་ཐམས་ཅད་རྗེས་སུ་
སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་པདྨའི་སྒེག་མོ་ལ་སོགས་པའི་ལྷ་མོ་བཞི་སྤྲུལ་ལ། བདག་ཉིད་མཆོད་ནས་རང་གི་ལྷ་དང་མཉམ་པར་སྦྱོར་ཞིང་རང་བཞིན་གྱིས་རྣམ་པར་དག་པའི་གཟུགས་བརྙན་དང་མཚུངས་པར་

བསྒོམས་ན་རྫས་ཀྱི་ཐིག་ལེ་ཕྱུང་སྟེ། སེམས་ཅན་གྱི་ཁམས་ཐམས་ཅད་ལ་རེག་པས་འཇིག་རྟེན་དབང་ཕྱུག་གི་གཟུགས་སུ་བསྐྱེད་ནས། རང་གི་ལྷ་མོ་དང་མཉམ་པར་སྦྱོར་བའི་འཇིག་རྟེན་དབང་ཕྱུག་གི་བདག་ཉིད་དུ་བསྒོམ་པར་བྱའོ། །བསམ་པ་གཡོས་པས་
འདུད་ནས་ནི། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ནོར་བུའི་རིགས་ཀྱི་
རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་ག་ལས་རིན་ཆེན་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞི་སྤྲུལ་ལ་བདག་ཉིད་ཡང་དག་པར་མཆོད་པར་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་
ཏེ། དོན་ཐམས་ཅད་གྲུབ་པ་ལ་སོགས་པའི་དེ་བཞིན་གཤེགས་པ་ཐམས་ཅད་ལ་དད་པ་ཁྱད་པར་ཕུལ་དུ་བྱུང་བས་ཕྱག་བྱའོ། །དེ་ལྟར་རྡོ་རྗེ་སྙིང་པོར་མཉམ་བཞག་ལ། བསམ་པ་གཡོས་པས་འདུད་པར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་
ཆེན་པོ་བཅིངས་ཏེ། མཆོག་ཏུ་ཕྱག་འཚལ་བར་བསྒོམ་པར་བྱའོ། །དེ་ལྟར་བྱས་པས་ཅིར་འགྱུར་ཞེ་ན། དབང་བསྐུར་བ་ནི་ཐོབ་པར་འགྱུར། །ཞེས་བྱ་བ་སྨོས་ཏེ། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་
རོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བཤད་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དམ་ཚིག་གི་གསང་བའི་རྒྱུད་གསུངས་པ་
ཡིན་ནོ། །དེ་བཞིན་གཤེགས་པ་ཐམས་ཅད་ནི་རིགས་རྣམས་སོ། །ལས་ཀྱི་དཀྱིལ་འཁོར་གྱི་དམ་ཚིག་གི་རྒྱུད་ནི་དམ་ཚིག་གི་ཕྱག་རྒྱའོ། །དེའི་གསང་བ་ནི། འདོད་ལ་སོགས་པའི་བདེ་བ་ཀུན། །རྟག་ཏུ་བདག་ནི་སྙིང་ལ་གནས། །ཞེས་བྱ་བ་ལ་སོགས་པའི་བསྒོམས་པ་དེས་འགྲུབ་པའོ། །ལས་

ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་མངོན་སུམ་དུ་བྱེད་པ་ནི། དེའི་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །འདོད་ལ་སོགས་པ་ཞེས་བྱ་བ་ནི་དེ་ལ་འདོད་པ་ནི་བཅོམ་ལྡན་འདས་བྱང་ཆུབ་ཀྱི་མཚན་ཉིད་ཀྱི་རྡོ་རྗེ་སེམས་དཔའོ། །དེ་
ཉིད་དང་པོར་བྱས་པའི་འདོད་པ་ལ་སོགས་པ་གང་ཡིན་པ་ནི་རྡོ་རྗེ་རྒྱལ་པོ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའོ། །དེ་སྐད་དུ་ཡང་། བཅོམ་ལྡན་འདས་རྡོ་རྗེ་སེམས་དཔའ་ནི་འདོད་པ་ཡིན་ཞེས་བྱ་བ་གསུངས་སོ། །དེ་ཉིད་བདེ་བ་ཀུན་ཏེ། རྟག་ཏུ་བདག་གི་སྙིང་ལ་གནས། །ཞེས་བྱ་
བ་ནི་ནམ་མཁའི་དབྱིངས་ཐམས་ཅད་སྐུ་དང་། གསུང་དང་ཐུགས་རྡོ་རྗེས་རྟག་ཏུ་བཞུགས་པའི་རྣམ་པར་སྣང་མཛད་ཆེན་པོའི་རང་བཞིན་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་འཁོར་བ་ཇི་སྲིད་ཀྱི་བར་དུ་བཞུགས་པ་ནི་དེ་ཉིད་ཀྱི་སྙིང་ལ་གནས་པའོ། །ཨེ་མའོ་ཞེས་བྱ་བ་ནི་ངོ་
མཚར་བའོ། །སེམས་ཅན་གྱི་དོན་གྱི་སྙིང་པོ་ནི་སེམས་ཅན་གྱི་དོན་ཏེ། ཉན་ཐོས་དང་རང་རྒྱལ་བའི་ཐེག་པར་མོས་པའི་སེམས་ཅན་རྣམས་གདུལ་བའི་ཕྱིར་ཉན་ཐོས་དང་། རང་རྒྱལ་བའི་ཐེག་པ་སྟོན་པ་དང་། སེམས་ཅན་གྱི་དོན་བྱེད་པ་ཞེས་གང་ཡིན་པའོ། །དེ་ལ་འདིར་ངོ་མཚར་བ་ཅི་ཞིག་
ཡོད་ཅེ་ན། སྐྱོ་བར་གྱུར་པས་གང་འདོད་སྨད། །ཅེས་བྱ་བ་སྟེ། བྱང་ཆུབ་ཀྱི་སེམས་ཆེན་པོ་ལ་སོགས་པ་མངར་ཟིན་ཡང་སྦས་ནས་བྱང་ཆུབ་ཀྱི་སེམས་ཆེན་པོ་ལ་སོགས་པ་ཆགས་པ་དང་བྲལ་བ་མི་མངའ་བའི་ངོ་བོ་ལ་ཡོངས་སུ་བརྟགས་ནས། ཉན་ཐོས་དང་རང་རྒྱལ་གྱི་རིགས་ཅན་
ནི་སེམས་ཅན་གྱི་ཁམས་ལ་ཉན་ཐོས་དང་། རང་རྒྱལ་བའི་ལམ་གྱི་རང་བཞིན་ཆགས་པ་དང་བྲལ་བར་སྟོན་པ་དེ་ནི་ངོ་མཚར་གང་ཡིན་འདི་ནི་ཞེས་བྱ་བ་ནི་བྱང་ཆུབ་སེམས་ལ་རྟོག་པ་སྟོན་པའོ། །ནི་ཞེས་བྱ་བ་ནི་གང་གི་ཕྱིར་གྱི་དོན་ཏེ་ལས་ཀྱི་དཀྱིལ་འཁོར་གྱི་དམ་ཚིག་ནི་ལས་ཀྱི་དམ་ཚིག་
སྟེ། མི་མངའ་བ་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། གང་གི་ཕྱིར་བྱང་ཆུབ་སེམས་ལ་སོགས་པའི་རང་གི་རང་བཞིན་འདི་ནི་ལས་ཀྱི་དཀྱིལ་འཁོར་གྱི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་སྒྲུབ་པར་བྱེད་པ་ལས་མི་འདའ་བ་ཡིན་པ་དེའི་ཕྱིར་འདིའི་ངོ་

བོ་བསྒོམ་པར་བྱའོ། །བསྒོམ་པར་བྱ་བའི་ཏིང་ངེ་འཛིན་དེ་གང་ཡིན་ཞེ་ན། དེ་བཞིན་གཤེགས་པའི་ཏིང་ངེ་འཛིན་དུ་ཞེས་བྱ་བ་སྨོས་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་རྣལ་འབྱོར་ནི་དེ་བཞིན་གཤེགས་པའི་ཏིང་ངེ་འཛིན་ཏེ། དེ་བཞིན་
གཤེགས་པའི་ཏིང་ངེ་འཛིན་དེ་འདིར་བསྒོམས་པའོ། །བསྒོམས་ནས་སངས་རྒྱས་མཆོད་པ་ནི། །ཞེས་བྱ་བ་ནི་ལས་ཀྱི་དམ་ཚིག་དེ་བསྒོམ་པའི་རྣལ་འབྱོར་པས་མཆོད་པ་ནི་རྟོགས་པའི་སངས་རྒྱས་ལ་མཆོད་པའོ། །དངོས་གྲུབ་དམ་ཚིག་ཐོབ་པར་འགྱུར། །ཞེས་བྱ་བ་ནི་མཆོད་པ་
འདིས་སངས་རྒྱས་ལ་མཆོད་ན་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་དེ་བཞིན་གཤེགས་
པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་དམ་ཚིག་གི་ཕྱག་རྒྱ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་མཆོད་པ་ཐམས་ཅད་ཀྱིས་སྔ་མ་བཞིན་དུ་བདག་ཉིད་ཡང་དག་པར་མཆོད་ལ། ཡང་དེ་ཉིད་
ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་སྙིང་གའི་རྡོ་རྗེ་ལ་རང་གི་རིག་པའི་ཡི་གེ་རྣམ་པར་བཀོད་ནས། རྡོ་རྗེ་སེམས་དཔའ་ལ་སོགས་པའི་རང་བཞིན་གྱི་རྡོ་རྗེ་སྙིང་གར་རྣམ་པར་བསམས་ཏེ་བསྒོམ་པར་བྱའོ། །ཀུན་དུ་བཟང་པོ་བདག་ཡིན་ཏེ། །ཞེས་བྱ་བ་ནི་བཤད་ཟིན་ཏོ། །དེ་ཉིད་
འདོད་པ་ནི་མངོན་པར་འདོད་པའོ། །སེམས་ཅན་ཀུན་ལ་བདེ་སྦྱིན་པ། །ཞེས་བྱ་བ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་ཀུན་དུ་བཟང་པོ་འདོད་པའི་སྐལ་བ་དང་ལྡན་པའི་རྣལ་འབྱོར་པ་ལ་འཇིག་རྟེན་དང་འཇིག་རྟེན་ལས་འདས་པའི་བདེ་བ་དེ་བསྐྱེད་པའི་ཕྱིར། སེམས་
ཅན་ཀུན་ལ་བདེ་སྦྱིན་བའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་དེ་དག་ནི་རྡོ་རྗེ་སེམས་དཔའི་ཏིང་ངེ་འཛིན་ཏེ། ལས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་བསྒོམས་པ་དེ་ལ་རབ་ཏུ་གནས་

པ་ན། རྡོ་རྗེ་སེམས་དཔའི་ཏིང་ངེ་འཛིན་གནས་སོ། །མཆོད་ན་དངོས་གྲུབ་ཐོབ་འགྱུར་ཞེས་བྱ་བ་ལ། རྡོ་རྗེ་སེམས་དཔའི་ཏིང་ངེ་འཛིན་ནི། ཀུན་དུ་བཟང་པོ་འདོད་པའི་བདག །སེམས་ཅན་ཀུན་ལ་བདེ་བ་སོགས། །ཞེས་བྱ་བ་བསྒོམ་པའི་མཚན་ཉིད་ཅན་གྱི་རྟོགས་པའི་མཆོད་པས་མཆོད་ན། ལས་
ཀྱི་དཀྱིལ་འཁོར་ལས་གསུངས་པའི་རྡོ་རྗེ་སེམས་དཔའ་ལ་སོགས་པའི་དམ་ཚིག་གི་ཕྱག་རྒྱ་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། ཆོ་ག་ཐམས་
ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། ཇི་ལྟ་བ་བཞིན་དུ་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམས་ཀྱིས་ཡང་དག་པར་མཆོད་དེ། ཀུན་དུ་བཟང་པོའི་མཆོད་པའི་བདག །སེམས་ཅན་ཀུན་ལ་བདེ་
སྩོལ་བ། །ཞེས་བསྒོམས་ན་སེམས་ཅན་གྱི་ཁམས་ལ་བྱང་ཆུབ་ཀྱི་སེམས་ལ་སོགས་པ་བསྐྱེད་ཅིང་བསྒྲུབས་ཏེ། རང་གི་སྙིང་གའི་རྡོ་རྗེ་ལ་རིག་པའི་ཡི་གེ་རྣམ་པར་བཀོད་ལ་དེ་ཉིད་བརྗོད་ཅིང་བསྒོམ་པར་བྱའོ། །ཀུན་དུ་བཟང་པོ་ཞེས་བྱ་བ་ནི་སྔ་མ་བཞིན་ནོ། །ཀུན་དུ་བཟང་པོ་དེ་ཉིད་ཁྲོ་བོའོ། །
ཅིའི་ཕྱིར་ཀུན་དུ་བཟང་པོའི་རང་བཞིན་ཁྲོ་བོ་ཡིན་ཞེ་ན། གང་གི་ཕྱིར། སེམས་ཅན་ཀུན་ལ་ཕན་བྱེད་པ། །ཞེས་བྱ་བ་ལ་སོགས་པ་སྨོས་ཏེ། ལས་དང་རྣམ་པར་སྨིན་པ་བདེ་བ་བསྐྱེད་པ་ནི་སེམས་ཅན་ཀུན་ལ་བདེ་བས་ཕན་པའོ། །ཕན་པ་ནི་སེམས་ཅན་ཀུན་ལ་ཕན་འདོགས་པར་བྱེད་པའོ། །རྡོ་རྗེ་
ཧཱུཾ་མཛད་རྣལ་འབྱོར་གྱིས། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱ་བསྒོམ་པ་ནི་རྡོ་རྗེ་ཧཱུཾ་མཛད་ཀྱི་རྣལ་འབྱོར་རོ། །རྡོ་རྗེ་ཧཱུཾ་མཛད་ཀྱི་རྣལ་འབྱོར་གྱི་རྣལ་འབྱོར་དེས་མཆོད་ཅིང་།
སེམས་ཅན་ཀུན་ལ་ཕན་བྱེད་པ། །ཀུན་བཟང་ཁྲོ་བོ་བདག་ཡིན་ཏེ། །ཞེས་བསྒོམས་པས་དངོས་གྲུབ་ཐོབ་པར་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་

འགྱུར་རོ། །འདི་སྐད་སྟོན་པ་ནི། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ཁྲོ་བོའི་རྣལ་འབྱོར་བྱས་ལ། སྔར་བཤད་པའི་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་འཇིག་རྟེན་གསུམ་ལས་
རྣམ་པར་རྒྱལ་བའི་ལས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་ལ་རང་གི་རིག་པའི་ཡི་གེ་རྣམ་པར་བསམས་ལ། སེམས་ཅན་གྱི་ཁམས་ཐམས་ཅད་ཁྲོ་བོས་བཅོམ་ནས་རྡོ་རྗེ་རིགས་ཀྱི་རང་བཞིན་དུ་
རྣམ་པར་བསམས་ཏེ། སེམས་ཅན་ཀུན་ལ་ཕན་བྱེད་པའི། །ཀུན་བཟང་ཁྲོ་བོ་བདག་ཡིན་ཏེ། །ཞེས་ང་རྒྱལ་བསྐྱེད་དེ་བསྒོམ་པར་བྱའོ། །ཀུན་བཟང་འདོད་པ་བདག་ཡིན་ཏེ། །ཞེས་བྱ་བ་ནི་དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ནི་འདོད་པའོ། །འགྲོ་བ་འདུལ་
བ་ལ་སོགས་པ་ནས་པདྨ་འབེབས་པའི་མཐར་ཐུག་པའི་བདེ་བ་གང་ཡིན་པ་དེ་ནི་བདེ་བ་ཐམས་ཅད་དོ། །དེ་སྟེར་བར་བྱེད་པས་ན་བདེ་བ་ཐམས་ཅད་རབ་སྦྱིན་པའོ། །རྣལ་འབྱོར་པས་བདག་ཉིད་འགྲོ་བ་འདུལ་བའི་སྐུར་གནས་པས་འགྲོ་བ་འདུལ་བའི་སྐུར་གནས་པའོ། །པདྨའི་རིགས་
ཀྱི་ལས་ཀྱི་དཀྱིལ་འཁོར་གྱི་དམ་ཚིག་གི་ཏིང་ངེ་འཛིན་ལ་གནས་པའོ། །མཆོད་ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དམ་ཚིག་གི་ཕྱག་རྒྱའི་ཏིང་ངེ་འཛིན་འདིས། བདེ་བ་ཐིམ་ནས་རབ་སྦྱིན་པའི། །ཀུན་བཟང་འདོད་པ་བདག་ཡིན་ཏེ། །ཞེས་བྱ་བ་བསྒོམ་པའི་མཆོད་པས་
མཆོད་ནས་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ཏེ། ཆོ་ག་
ཐམས་ཅད་རྗེས་སུ་སྤྱད་ལ་ཕྱིས་འགྲོ་བ་འདུལ་བའི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་པདྨ་ལ་བཟླས་པའི་ཡི་གེ་རྣམ་པར་བཀོད་ནས། དེ་ཉིད་བརྗོད་ཅིང་། ཐམས་ཅད་དུ་པདྨའི་རིགས་ཀྱི་ལས་ཀྱི་དཀྱིལ་འཁོར་སྤྲོས་པས་སེམས་

ཅན་གྱི་ཁམས་ཐམས་ཅད་པདྨའི་རིགས་ཀྱི་རང་བཞིན་དུ་བསྐྱེད་དེ། བདེ་བ་ཐམས་ཅད་རབ་སྦྱིན་པའི། །ཀུན་བཟང་འདོད་པ་བདག་ཡིན་ཏེ། །ཞེས་ང་རྒྱལ་བསྐྱེད་དེ་བསྒོམ་པར་བྱའོ། །ཀུན་བཟང་རྒྱལ་པོ་བདག་ཡིན་ཏེ། །ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་གཟུགས་ཀྱི་ཁམས་
གསུམ་པ་ཐམས་ཅད་ཀྱི་ཆོས་ཀྱི་རྒྱལ་སྲིད་ཐོབ་པས་ན་རྒྱལ་པོའོ། །སེམས་ཅན་ཀུན་ལ་དོན་ཆེན་སྦྱིན། །ཞེས་བྱ་བ་ནི་དེ་བཞིན་གཤེགས་པ་ལ་སོགས་པ་དང་། སེམས་ཅན་ཐམས་ཅད་ནོར་བུའི་རིགས་ཀྱིས་དབང་བསྐུར་བ་དང་། ནོར་བུ་ཆེན་པོའི་རིགས་ཀྱི་གཟུགས་སུ་ཏིང་ངེ་
འཛིན་གྱིས་བསྐྱེད་པ་ནི། །དོན་ཀུན་གྲུབ་པའི་གཟུགས་ཀྱིས་ནི། །ཞེས་བྱ་བ་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ལྷ་རྣམས་ཀྱི་དམ་ཚིག་གི་ཕྱག་རྒྱ་བསྒོམ་པ་ནི་དོན་ཐམས་ཅད་གྲུབ་པའི་གཟུགས་ཀྱིས་སོ། །མཆོད་པ་དངོས་གྲུབ་ཐོབ་པར་འགྱུར། །ཞེས་བྱ་བ་ནི་
སེམས་ཅན་ཀུན་ལ་དོན་ཆེན་སྦྱིན། །ཀུན་བཟང་རྒྱལ་པོ་བདག་ཡིན་ཏེ། །ཞེས་བྱ་བ་ནི་དོན་ཐམས་ཅད་གྲུབ་པའི་གཟུགས་སུ་དེ་བསྒོམས་ཏེ། མཆོད་པས་མཆོད་ན་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་ཚིག་གི་ཕྱག་རྒྱའི་དངོས་
གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་དམ་
ཚིག་གི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་རིན་པོ་ཆེ་ལ་རིག་པའི་ཡི་གེ་རྣམ་པར་བསམས་ནས། དེ་ཉིད་ཟློས་ཤིང་ནོར་བུའི་རིགས་ཀྱི་དཀྱིལ་འཁོར་ཐམས་ཅད་དུ་སྤྲོས་པས་དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་དབང་བསྐུར་བས་ནོར་བུའི་རིགས་ཀྱི་རང་
བཞིན་དུ་བསྐྱེད་པར་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དམ་ཚིག་གི་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བཤད་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ཐམས་

ཅད་ཀྱི་ལས་ཀྱི་ཆོས་ཀྱི་དམ་པའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལས་ནི་ལས་ཀྱི་དཀྱིལ་འཁོར་རོ། །དེ་ལ་ཆོས་ནི་བསྲུང་བ་ལ་སོགས་པ་བསྐྱེད་པའོ། །དེའི་དམ་པའི་དངོས་གྲུབ་ནི་ལས་ཀྱི་
དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་རྣམས་མངོན་སུམ་དུ་བྱེད་པའོ། །དེ་སྟོན་པར་བྱེད་པ་ན་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། གཡས་པའི་མཛུབ་མོ་མདུད་ནས་ནི། །ཞེས་བྱ་བ་ལ་སོགས་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་
བཤད་པའི་རང་གི་དེ་བཞིན་གཤེགས་པའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་ལྷའི་ལྗགས་ལ་ལས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་རྣམ་པར་བསམས་ཏེ། གཡས་པའི་ཁྲོ་བོའི་ཁུ་ཚུར་གྱི་རྩེ་མོས་སྙིང་ག་དང་།
མགྲིན་པ་དང་། རྒྱབ་དང་། ཡང་སྙིང་ག་དང་། ནུ་མ་གཉིས་དང་། ཡང་སྙིང་ག་དང་། མགྲིན་པ་དང་། རྒྱབ་དང་། དབང་བསྐུར་བའི་གནས་སུ་གོ་ཆ་བཅིངས་པའི་ཚུལ་གྱིས་སྤྱི་གཙུག་ཏུ་བཀོད་ལ། རང་གི་དེ་བཞིན་གཤེགས་པའི་ཆོས་ཀྱི་ཡི་གེ་བསྐྱེད་ལ། དེ་ནས་
རང་གི་སྙིང་གའི་རྡོ་རྗེ་ལ་ཆོས་ཀྱི་ཡི་གེ་རྣམ་པར་བསམས་ནས། དེ་ཉིད་བརྗོད་ཅིང་བསྒོམ་པར་བྱའོ། །དེ་ལྟར་དེ་བཞིན་གཤེགས་པའི་ལས་ཀྱི་ཆོས་བསྟན་ནས། དེ་བཞིན་གཤེགས་པའི་རིགས་ཀྱི་དཀྱིལ་འཁོར་གསུངས་པ་ནི། རྩིག་པ་ལ་ནི་ལྡན་འདྲ་བ། །ཞེས་བྱ་བ་ལ་
སོགས་པ་ལ་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་ལས་ཀྱི་དཀྱིལ་འཁོར་ལས་བཤད་པའི་རང་གི་བསྒྲུབ་བྱའི་རིག་པའི་ལྷ་མོ་གཅེར་བུའི་གཟུགས་ཀྱིས་ས་ལ་བྲི་བར་བྱའོ། །རི་མོ་བྲིས་ནས་མཚན་བསྒྲེང་སྟེ། ཞེས་བྱ་བ་ནི་བདག་
ཉིད་ཀྱི་མཚན་མས་བུད་མེད་བསམས་པ་གང་ཡིན་པ་ལ་མཚན་མ་བསྒྲེངས་ཏེ་གཞུག་པར་བྱའོ། །ལས་ཀྱི་དཀྱིལ་འཁོར་ལས་བཤད་པའི་རིག་པའི་ལྷ་མོ་གང་ཡིན་པ་ཆུང་མའི་གཟུགས་སུ་བསམ་ཞིང་བསྒོམས་ན་རང་གི་མཚན་མ་བསྒྲེང་སྟེ། བུད་མེད་གཅེར་བུ་གཟུགས་བརྙན་རྩིག་

པ་ལ་བྲིས་ལ་དེའི་བྷ་གར་ཞུགས་པར་བསྒོམས་ལ། སེན་མོ་བཙུགས་ན་སྒྲུབ་པ་པོ་དེའི་འདི་ཆུང་མར་འགྱུར་རོ། །དེ་བས་ན་དེ་འདིར་དབང་དུ་བྱེད་པར་འགྱུར་རོ་ཞེས་གསུངས་སོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་
སོགས་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བཀོད་དེ། རང་གི་རིག་པ་དང་ལྷ་མོའི་ཆོས་ཀྱི་ཕྱག་རྒྱས་རྩིག་པ་ལ་གཟུགས་
བརྙན་བྲིས་ཏེ་སྤྲུལ་པ་བསྡུ་བ་ལ་སོགས་པ་བྱས་ཏེ། དེ་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཕྱག་བཞི་བྱས་ཏེ། ཉིན་རེ་ཞིང་ཐུན་བཞིའི་སྦྱོར་བས་ཆོས་ཀྱི་ཕྱག་རྒྱར་བརྗོད་ཅིང་། དེ་དང་ལྷན་ཅིག་ཏུ་མཉམ་པར་སྦྱོར་བས་ཇི་སྲིད་མངོན་སུམ་མཐོང་བར་གྱུར་པ་དེ་སྲིད་
ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་དང་ལྷན་ཅིག་ཏུ་མཚན་མ་བསྒྲེང་བར་བྱས་ནས། མཉམ་པར་སྦྱོར་བ་བྱས་ལ་ཆོས་ཀྱི་ཕྱག་རྒྱའི་ཡི་གེ་ཧོ་བཟླ་བར་བྱའོ། །དེ་ནས་མངོན་སུམ་དུ་སོང་ནས་སྒྲུབ་པ་པོ་དང་ལྷན་ཅིག་མཉམ་པར་སྦྱོར་ཞིང་སྒྲུབ་པ་པོའི་ཆུང་མར་
འགྱུར་རོ། །སྦྱོར་བ་འདིས་གནོད་སྦྱིན་མོ་ལ་སོགས་པ་སྒྲུབ་པ་དེ་དོན་དུ་གཉེར་བར་བྱེད་པ་ན་ས་ལ་གནོད་སྦྱིན་གྱི་གདོང་བྲིས་ལ་ཞེས་བྱ་བ་སྨོས་ཏེ། རས་སམ་སྤང་ལེབ་བམ་རྩིག་པ་ལ་རྡོ་རྗེ་ཧཱུཾ་མཛད་ལ་སོགས་པ་ནས་ཁྲོ་བོ་རྡོ་རྗེ་འབེབས་པའི་མཐར་ཐུག་པའི་རྣལ་འབྱོར་བྱས་ལ། གནོད་
སྦྱིན་གྱི་གདོང་གི་ཚད་ཙམ་དུ་བྲི་བར་བྱའོ། །མཛུབ་མོའི་སེན་མོས་བཙུགས་ན་ཡང་། །ཞེས་བྱ་བ་ནི་གནོད་སྦྱིན་གྱི་གདོང་དེ་ལ་གཡོན་པའི་སྡིགས་མཛུབ་བམ་གཡས་པའི་སྡིགས་མཛུབ་ཀྱི་སེན་མོ་བཙུགས་ནས་བསྒྲུབ་པར་བྱའོ། །གནས་གང་དུ་ཞེ་ན། མིག་གི་ཕྱོགས་སུའོ། །ཅི་ཞིག་ཏུ་འགྱུར་ཞེ་ན། བུད་
མེད་མཆོག་ནི་འདྲེན་པར་འགྱུར། །ཞེས་བྱ་བ་སྨོས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་རིག་པའི་ལྷ་མོ་རྣམས་འདྲེན་པར་བྱེད་ཅེས་བྱ་བའི་དོན་ཏོ། །དེ་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་

བཤད་པའི་རང་གི་ཁྲོ་བོའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ནས། རྡོ་རྗེ་ཧཱུཾ་མཛད་ལ་སོགས་པའི་ང་རྒྱལ་བསྐྱེད་དེ། ཆོས་ཀྱི་
དཀྱིལ་འཁོར་ལས་བཤད་པའི་རིག་པས་རྡོ་རྗེ་ཧཱུཾ་མཛད་ལ་སོགས་པ་རང་གི་ལྷ་མོའི་གཟུགས་ཇི་ལྟ་བ་བཞིན་དུ་བྲིས་ཏེ། སྤྲུལ་པ་བསྡུ་བ་ལ་སོགས་པ་སྔོན་དུ་འགྲོ་བ་ལས་ཀྱི་དཀྱིལ་འཁོར་ལས་བཤད་པའི་ཆོ་ག་ཐམས་ཅད་རྗེས་སུ་སྤྱད་ནས། མཆོད་པ་ཐམས་ཅད་
ཀྱིས་རང་གི་ཁྲོ་བོ་ལ་ཡང་དག་པར་མཆོད་དེ། ཕྱག་བཞི་བྱས་ནས། ཇི་སྲིད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །ལས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ལས་ཀྱི་རྣལ་འབྱོར་བྱས་ལ་ཕྱག་རྒྱ་བཅིངས་ཏེ། ཡང་བྱིན་གྱིས་བརླབས་པ་ལ་
སོགས་པའི་ཆོ་ག་ཐམས་ཅད་རྗེས་སུ་སྤྱད་ནས། བསྡུ་བ་ལ་སོགས་པ་སྔ་མ་བཞིན་དུ་བྱས་ལ། གནོད་སྦྱིན་གྱི་གདོང་དེའི་མིག་གི་ཕྱོགས་སུ་མཛུབ་མོའི་སེན་མོ་བཙུགས་ཏེ། ལས་ཀྱི་དཀྱིལ་འཁོར་ལས་བཤད་པའི་རང་གི་ཁྲོ་བོའི་ཡི་གེ་ཛཿདང་། ཆོས་ཀྱི་ཕྱག་རྒྱ་བརྗོད་
ཅིང་ཇི་སྲིད་དུ་རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷ་དགུག་པ་དང་། གནོད་སྦྱིན་མོ་འགུགས་པ་དེ་སྲིད་ཀྱི་བར་དུ་བྱའོ། །དེ་ནས་སྒྲུབ་པ་པོའི་ཆུང་མར་འགྱུར་རོ། །ཆོས་ཀྱི་ཕྱག་རྒྱ་བརྗོད་ཅིང་ཆེ་གེ་མོ། ཨཱ་ཀཪྵ་ཛཿཞེས་བྱ་བས་གནོད་སྦྱིན་གྱི་གདོང་ལ་
རབ་ཏུ་སྦྱར་ལ། གནོད་སྦྱིན་མོ་འགུགས་པར་འགྱུར་རོ། །ལག་པ་གཉིས་སུ་པདྨོ་བླངས། །ཞེས་བྱ་བ་ལ་སོགས་པ་ལ། ཇི་སྐད་དུ་བཤད་པའི་རྡོ་རྗེ་པདྨ་གཡོན་བསྙེམས་པས་བླངས་ལ། ལག་པ་གཡས་པ་སྙིང་གར་དེའི་པདྨ་ཁ་འབྱེད་པར་བྱེད་པའོ། །ཇི་ལྟར་པདྨ་དམར་བ་
ཡང་། །ཚོན་གྱི་ཉེས་པས་མི་གོས་བཞིན། །ཐམས་ཅད་རྣམ་དག་བསྒོམས་པས་ན། །དེ་བཞིན་སྡིག་པས་གོས་མི་འགྱུར། །ཞེས་བྱ་བ་ལ་བལྟས་ནས་ཀྱང་ནི་འདོད་ཆགས་དགག་པར་འགྱུར་རོ། །ལྟ་བ་གང་ཡིན་ཞེ་ན། རྡོ་རྗེ་ལྟ་བས་ཞེས་བྱ་བ་སྨོས་ཏེ། རྡོ་རྗེ་ལྟ་བའི་མཚན་ཉིད་ནི་བཤད་

ཟིན་ཏོ། །དེས་བུད་མེད་རྣམས་དང་སྦྱོར་ཞིང་ཆགས་པར་བྱེད་ན་དེ་བཞིན་དུ་འགྱུར་རོ། །པདྨའི་རིགས་ཀྱི་ལས་ཀྱི་དཀྱིལ་འཁོར་གྱི་རྣལ་འབྱོར་པས་པདྨའི་རིགས་ཀྱི་ལས་ཀྱི་དཀྱིལ་འཁོར་གྱི་རིག་པའི་ལྷ་མོའི་བུད་མེད་ལ་བལྟས་ན་འདོད་ཆགས་རྣམ་པར་དག་པར་འགྱུར་རོ། །པདྨའི་རིག་
པའི་ལྷ་མོའི་བུད་མེད་ཀྱི་གཟུགས་ལ་ཆགས་ཤིང་མངོན་པར་དགའ་བས་དེ་ལ་མངོན་དུ་ཕྱོགས་པ་ཉིད་ནི་དེ་བཞིན་གཤེགས་པའི་བསྒྲུབ་པའི་བྱེ་བྲག་གོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་
རྣལ་འབྱོར་སྔ་མ་བཞིན་དུ་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་པདྨའི་རིགས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་རྣམ་པར་བསམས་ལ། རང་གི་ལས་ཀྱི་དཀྱིལ་འཁོར་ལས་བཤད་པའི་ལྷ་མོའི་རིག་པའི་དེ་ཉིད་བརྗོད་ཅིང་སྤྲུལ་ལ། བསྡུ་བ་ལ་སོགས་པ་བྱས་ནས་
མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བཞི་བྱས་ནས། ཕྱག་ན་གནས་པའི་གསང་བའི་པདྨ་ལ་བལྟས་ན་འདོད་ཆགས་རྣམ་པར་དག་པར་འགྱུར་རོ། །རྡོ་རྗེ་ལྟ་བུས་བུད་མེད་ལ། །བལྟས་ན་ཡང་ནི་དགའ་བར་འགྱུར། །ཞེས་བྱ་བས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་
རྒྱ་ཡི་གེ་ཧོ་བཟླས་པ་ཡིན་པར་ཤེས་པར་བྱའོ། །རྡོ་རྗེ་རིན་ཆེན་ཏིང་འཛིན་གནས། །ཞེས་བྱ་བ་ནི་ནོར་བུའི་རིགས་ཀྱི་རང་གི་ལྷའི་ཏིང་ངེ་འཛིན་ལ་གནས་པའོ། །ལག་པ་གཉིས་ཀྱིས་ནོར་བུ་བཟུང་། །ཞེས་བྱ་བ་ནི་མིག་གཉིས་ཀྱི་ལྟ་བ་དང་ལྡན་པས་ཡིད་བཞིན་གྱི་ནོར་བུ་རྡོ་རྗེ་རྩེ་ལྔ་པས་མཚན་པ་བཟུང་ལ།
འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཧཱུཾ་མཛད་ཀྱི་རྣལ་འབྱོར་པས་བུད་མེད་ཀུན་ལ་འདུད་བྱེད་དོ་ཞེས་བྱའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པ་རང་གི་ལྷའི་
རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ནོར་བུའི་རིགས་ཀྱི་རང་གི་ལྷའི་ཆོས་ཀྱི་ཕྱག་རྒྱ་ལྕེ་ལ་བསམས་ཏེ། དེ་ཉིད་བརྗོད་ཅིང་དོན་ཐམས་ཅད་གྲུབ་པ་ལ་སོགས་པ་རང་གི་སེམས་དཔའ་ཆེན་པོ་ཉིད་དུ་ངེས་པར་བྱས་ནས་ལས་ཀྱི་དཀྱིལ་འཁོར་ལས་

བཤད་པའི་རང་གི་རིག་པའི་ལྷ་མོ་མདུན་དུ་སྤྲུལ་ལ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བཞི་བྱས་ནས། ཡང་རང་གི་ལྷའི་ཆོས་ཀྱི་ཕྱག་རྒྱའི་སྙིང་གའི་རྡོ་རྗེ་རིན་པོ་ཆེ་ལ་རྣམ་
པར་བཀོད་དེ། དེ་ཉིད་བརྗོད་ཅིང་ཇི་སྲིད་དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །ལན་གཅིག་ལན་གཉིས་ལན་གསུམ་མམ། ལན་བཞིའམ། ལན་ལྔའམ། ལན་དྲུག་གམ། ལན་བདུན་གྱི་བར་དུ་
བསྒྲུབས་ཀྱང་མ་གྲུབ་ན་རིན་ཆེན་ཧཱུཾ་མཛད་ཀྱི་རྣལ་འབྱོར་པས་འཇིག་རྟེན་གསུམ་ལས་རྣམ་པར་རྒྱལ་བའི་འཇིག་རྟེན་གསུམ་གྱི་འཁོར་ལོར་བཤད་པའི་ཡི་གེ་ཧཱུཾ་གི་སྔགས་དེས་དེ་ལ་འདུད་བྱས་ན་དེ་ལྟར་འཇིགས་པ་དང་བཅས་པའི་དངོས་གྲུབ་སྩོལ་བར་འགྱུར་རོ། །དེ་ལྟར་དེ་
བཞིན་གཤེགས་པ་ལ་སོགས་པའི་དཀྱིལ་འཁོར་ལས་བཤད་པའི་རིགས་ཐམས་ཅད་ཀྱི་ཆོས་ཀྱི་ཕྱག་རྒྱའི་དངོས་གྲུབ་བསྟན་ནས། ད་ནི་དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལས་ཀྱི་དངོས་པོའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་
གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེའི་ལས་ནི་ལས་ཀྱི་དཀྱིལ་འཁོར་རོ། །དེའི་དགོས་པ་ནི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་རྒྱུད་དེ་གྲུབ་པའོ། །དེ་སྟོན་པར་བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་
གསུངས་ཤིང་བཤད་པའོ། །མཆོད་པའི་ལས་ཀྱི་ཆོ་ག་སྦྱར། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་མཆོད་པའི་ཕྱག་རྒྱ་རྣམ་པ་བཅུ་དྲུག་བྱེད་པའོ། །གང་དང་གང་གིས་དགོས་བསམས་པ། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་
རྣམས་ཀྱི་ལས་ཀྱི་ཕྱག་རྒྱའི་དངོས་གྲུབ་གང་ཡིན་པ་དེ་ཡིན་ནོ་ཞེས་བྱ་བའི་དོན་ཏོ། །དེ་དང་དེ་ནི་གསོལ་བཏབ་སྟེ། །མཁས་པས་ཕྱག་རྒྱ་བསྒྲུབ་པར་བྱ། །ཞེས་བྱ་བ་ནི་དེ་དང་དེའི་ལས་ཀྱི་ཕྱག་རྒྱའི་དངོས་གྲུབ་ཀྱི་མཚན་ཉིད་ཀྱི་དགོས་པའོ། །ཆོས་ཐམས་ཅད་རང་བཞིན་གྱིས་འོད་གསལ་བར་སྤྲུལ་པ་

དང་མཚུངས་པ་གང་ཡིན་པའི་བདེན་པ་དེ་དང་། བདེན་པ་དེས་དགོས་པ་འདི་དག་གྲུབ་པར་གྱུར་ཅིག་ཅེས་གསོལ་བ་བཏབ་ནས། ལས་ཀྱི་ཕྱག་རྒྱ་བསྒྲུབ་པར་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ། སྔ་མ་བཞིན་དུ་
ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་ལ་རིག་པའི་ཡི་གེ་རྣམ་པར་བསམས་ནས། དེ་ཉིད་བརྗོད་ཅིང་དེ་བཞིན་གཤེགས་པའི་བདག་ཉིད་དུ་རྣམ་པར་བསམས་ཏེ། ལས་ཀྱི་དཀྱིལ་འཁོར་ལས་བཤད་པའི་ལྷ་མོ་བཅུ་དྲུག་སྤྲུལ་ལ།
ལས་ཀྱི་ཕྱག་རྒྱ་རྣམས་ཀྱིས་བདག་ཉིད་ཡང་དག་པར་མཆོད་ལ། ཕྱག་བཞི་བྱས་ནས། སྔ་མ་བཞིན་དུ་གསོལ་བ་གདབ་པར་བྱའོ། །དེ་ནས་ལས་ཀྱི་ཕྱག་རྒྱ་བཅིངས་ལ། རང་གི་རིག་པ་བཟླས་ཤིང་བསྒོམ་པར་བྱའོ། །གསང་བའི་མཆོད་པ་ཆོ་ག་སྦྱར། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་སྒེག་མོ་
ལ་སོགས་པ་ལས་ཀྱི་ཕྱག་རྒྱ་རྣམ་པ་བཞིས་མཆོད་པར་བྱའོ། །རྡོ་རྗེ་སེམས་དཔའི་ཏིང་འཛིན་གྱིས། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་བར་གྱི་ལས་ཀྱི་ཕྱག་རྒྱ་བསྒོམ་པ་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །རྡོ་རྗེ་སེམས་དཔའ་ལ་
སོགས་པའི་ཏིང་ངེ་འཛིན་གྱི་དགོས་པ་གང་ཡིན་སྨྲས་པ་དེ། མྱུར་དུ་དངོས་གྲུབ་ཐོབ་པར་འགྱུར། །ཞེས་བྱ་བས་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་ལས་ཀྱི་དངོས་གྲུབ་ཀྱི་དགོས་པ་རྣམ་པ་དེ་ལྟ་བུ་ཆེ་གེ་མོའི་ལས་ཀྱི་ཕྱག་རྒྱའི་དགོས་པ་གྲུབ་པར་གྱུར་ཅིག་ཅེས་རྣལ་
འབྱོར་པས་བརྗོད་པ་གང་ཡིན་པ་དེ་ཉིད་ཀྱི་དགོས་པའི་དངོས་གྲུབ་མྱུར་དུ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་
ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་མཆོད་པ་བཞིས་རང་གི་སྙིང་གའི་སེམས་དཔའི་རྡོ་རྗེ་ལས་སྤྲུལ་ལ། དེའི་ལས་ཀྱི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་

མཆོད་ལ་ཕྱག་བཞི་བྱས་ཏེ། མངོན་པར་འདོད་པའི་ལས་ཀྱི་ཕྱག་རྒྱའི་དངོས་གྲུབ་དོན་དུ་གཉེར་བ་ཉིད་ཀྱིས་སླར་ཡང་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་བཅིངས་ཏེ། རང་གི་རིག་པ་ཟློས་ཤིང་བསྒོམ་པར་བྱའོ། །རིགས་ཀྱི་གསང་
བའི་མཆོད་ཆེན་བྱས། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་གསང་བའི་མཆོད་ཆེན་ཏེ་ཞེས་བྱས་པའོ། །ཏིང་ངེ་འཛིན་གང་གིས་བྱེད་ཅེ་ན། ཁྲོ་བོའི་ཏིང་ངེ་འཛིན་ཞེས་བྱ་བ་སྨོས་ཏེ། ལས་ཀྱི་
དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ལས་ཀྱི་ཕྱག་རྒྱའི་སྦྱོར་བ་ནི་ཁྲོ་བོའི་ཏིང་ངེ་འཛིན་ཏོ། །མཁས་པས་ཅུང་ཟད་གང་བསམས་པ། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་ལས་ཀྱི་ཕྱག་རྒྱའི་དངོས་གྲུབ་ཀྱི་མཚན་ཉིད་
དགོས་པ་ཅུང་ཟད་བསམས་པ་སྟེ། ཐམས་ཅད་མྱུར་དུ་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས།
ཕྱིས་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། རང་གི་སྙིང་ག་ལས་སྒེག་མོ་ལ་སོགས་པའི་ལྷ་མོ་བཞི་སྤྲུལ་ལ། དེའི་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམ་པ་བཞིས་བདག་
ཉིད་ཡང་དག་པར་མཆོད་ནས། ཕྱག་བཞི་བྱས་ཏེ། ཡང་སྙིང་གའི་རྡོ་རྗེ་འབར་བའི་དབུས་སུ་རིག་པའི་ཡི་གེ་རྣམ་པར་བསམས་ཏེ། དངོས་གྲུབ་དོན་དུ་གཉེར་བས་དེ་ཉིད་ཟློས་ཤིང་བསྒོམ་པར་བྱའོ། །འགྲོ་བ་འདུལ་བ་ལ་སོགས་པའི་རྣལ་འབྱོར་པས་སེམས་ཅན་ཐམས་ཅད་ཀྱི་
དོན་དང་སངས་རྒྱས་མཆོད་པའི་ཡིད་ཀྱིས་མཆོད་པ་མ་ལུས་པར་བྱས་ལ། འཇིག་རྟེན་དབང་པོའི་ཏིང་འཛིན་གྱིས། །ཞེས་བྱ་བ་ལ། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱའི་རྣལ་འབྱོར་པས་འཇིག་རྟེན་དབང་ཕྱུག་གི་ཏིང་ངེ་འཛིན་དེས་བྱའོ། །

ཡིད་ཀྱིས་མཆོད་པ་བྱས་ནས་ཀྱང་། །མཁས་པས་དགོས་པ་གང་བསམས་པ། །དེ་ཡིས་དངོས་གྲུབ་ཐམས་ཅད་འཐོབ། །ཅེས་བྱ་བ་ནི་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་དངོས་གྲུབ་དགོས་པ་གང་བསམས་པ་དེས། དངོས་གྲུབ་ཐམས་ཅད་
ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གིས་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་
ཕྱག་རྒྱ་བཅིངས་ཏེ། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་ལྷ་མོ་རྣམས་རང་གི་སྙིང་གའི་པདྨ་ལ་སྤྲུལ་ལ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ལ་མཆོད་པ་བྱས་ནས། ཕྱིས་སྒེག་མོ་ལ་སོགས་པ་རྣམ་པ་བཞིས་མཆོད་
ལ། ཕྱག་བཞི་བྱས་ཏེ། ཡང་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་བཅིངས་ཏེ། སྙིང་གའི་རྡོ་རྗེ་པདྨ་ལ་རང་གི་རིག་པའི་ཡི་གེ་རྣམ་པར་བཀོད་ནས། དེ་ཉིད་བརྗོད་ཅིང་བསྒོམ་པར་བྱའོ། །བདུག་པ་ལ་སོགས་མཆོད་བྱས་ན། ཞེས་བྱ་བ་ནི་ནོར་བུའི་རིགས་
ཀྱི་དཀྱིལ་འཁོར་ལས་བཤད་པའི་བདུག་པ་ལ་སོགས་པའི་ལས་ཀྱི་ཕྱག་རྒྱ་བཞིས་བདག་ཉིད་མཆོད་པར་བྱའོ། །རྡོ་རྗེ་སྙིང་པོའི་ཏིང་འཛིན་གྱིས། །ཞེས་བྱ་བ་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱའི་རྣལ་འབྱོར་ནི་རྡོ་རྗེ་སྙིང་པོའི་
ཏིང་ངེ་འཛིན་ཏོ། །རྡོ་རྗེ་སྙིང་པོའི་ཏིང་ངེ་འཛིན་དེས། །ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་མཚན་ཉིད་བསམ་ཞིང་། མངོན་པར་འདོད་པའི་དངོས་གྲུབ་གང་ཡིན་པ་དེ་ཐམས་ཅད་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་
ཅད་གྲུབ་པའི་ལས་ཀྱི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པ་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ནོར་བུའི་རིགས་ཀྱི་རང་གི་ལས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་

བཅིངས་ཏེ། རིན་ཆེན་བདུག་པ་མ་ལ་སོགས་པའི་རྣམ་པ་བཞི་སྙིང་གའི་རྡོ་རྗེ་རིན་པོ་ཆེ་ལས་རྣམ་པར་སྤྲུལ་ལ། བདག་ཉིད་ཡང་དག་པར་མཆོད་དེ། ཕྱག་བཞི་བྱས་ནས། ཡང་ནོར་བུའི་རིགས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་ཀྱི་ཕྱག་རྒྱ་
བཅིངས་ཏེ། སྙིང་གའི་རྡོ་རྗེ་རིན་པོ་ཆེ་ལ་རང་གི་རིག་པའི་ཡི་གེ་རྣམ་པར་བཀོད་དེ། དེ་ཉིད་ཟློས་ཤིང་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱ་བསྒྲུབ་པ་བཤད་ནས། ད་ནི་དེ་བཞིན་
གཤེགས་པ་ལ་སོགས་པ་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཡང་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱིས་བྱིན་གྱིས་བརླབས་པའི་རྣལ་འབྱོར་གྱིས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་
པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་བསྒོམ་པའི་དངོས་གྲུབ་ཀྱི་རྒྱུད་གསུངས་པ། དེ་བཞིན་གཤེགས་པ་ཐམས་ཅད་དང་རིགས་རྣམས་ཀྱི་ཕྱག་རྒྱ་ནི་ཕྱག་རྒྱ་ཆེན་པོའོ། །དེ་བསྒོམ་པ་ནི་ཡང་དང་ཡང་མངོན་དུ་བྱེད་པའོ། །དེའི་དངོས་གྲུབ་ཕྱག་རྒྱ་ཆེན་པོ་འགྲུབ་
པའོ། །དེ་སྟོན་པར་བྱེད་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་ནི་བརྟན་པར་བྱའོ། །རྣལ་འབྱོར་ནི་བསྒོམ་པར་བྱས་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་མངོན་དུ་བྱེད་པའོ། །རྡོ་རྗེ་ཕྲ་མོའི་ཚུལ་
གྱིས་ནི། །རྡོ་རྗེ་ཕྲ་མོ་བསྒོམས་པའོ། །དེ་སྔར་བཤད་པའི་ཚུལ་གྱིས་ཟླ་བ་གསུམ་བསྒོམས་ལ། ཕྱིས་སེམས་སོ་སོར་རྟོག་པ་ལ་སོགས་པའི་རིགས་ཀྱིས་ཡ་ཐ་སརྦ་ཏ་ཐཱ་ག་ཏ་ཏསྠ་ཨ་ཧཾ། ཞེས་བྱ་བའི་ང་རྒྱལ་བསྒོམ་པར་བྱའོ། །སངས་རྒྱས་རྣལ་འབྱོར་ཏིང་འཛིན་གྱིས། །ཞེས་
བྱ་བ་ནི་སེམས་རྣམ་པར་གཡེང་བ་མེད་པའོ། །དངོས་གྲུབ་དམ་པ་ཐོབ་པར་འགྱུར། །ཞེས་བྱ་བ་ནི་སངས་རྒྱས་ཉིད་ཀྱིའོ། །གང་གིས་ཤེ་ན། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་སྟེ། རྣལ་འབྱོར་པས། སངས་རྒྱས་ཕྱག་རྒྱ་རབ་བསྒྲུབ་པའོ། །སེམས་དཔའ་

ཞེས་གྲགས་ཀུན་བདག་ཉིད། །ཅེས་བྱ་བ་ནི་རྡོ་རྗེ་སེམས་དཔའོ། །ཞེས་ཀྱི་སྒྲ་ནི་གང་གི་ཕྱིར་གྱི་དོན་ཏོ། །གང་གི་ཕྱིར་རྡོ་རྗེ་སེམས་དཔའ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་རང་བཞིན་ཡིན་པའི་ཕྱིར་དང་། སེམས་ཅན་ཐམས་ཅད་ཀྱི་རྒྱུད་ཀྱི་རྗེས་སུ་སོང་བ་ཡིན་
པ་དེའི་ཕྱིར་རོ། །གྲགས་པའི་སྒྲ་ནི་ལྐོག་ཏུ་མ་གྱུར་པའོ། །ཀུན་ཞེས་བྱ་བ་ནི་སེམས་ཅན་ཐམས་ཅད་ཀྱི་ཁམས་དང་སེམས་ལས་བྱུང་བའི་རང་བཞིན་ནི། །བདག་གི་ལུས་ལ་གནས་པ་སྟེ། །ཞེས་བྱ་བ་ནི་བདག་ཉིད་ཀྱང་བདག་ཉིད་ཀྱིས་དེའི་བདག་ཉིད་དུ་རབ་ཏུ་ཞུགས་པའི་སྦྱོར་བས་
ཡང་དག་པར་གནས་པའོ། །དེ་ལྟར། སེམས་དཔའ་བདག་ཅེས་བྱིན་བརླབས་པས། །ཞེས་བྱ་བ་ནི་མངོན་དུ་བྱས་པའོ། །རྡོ་རྗེ་སེམས་དཔའ་བདག་ཡིན་ནོ། །ཞེས་ང་རྒྱལ་བསྐྱེད་ནས། རྡོ་རྗེ་སེམས་དཔའི་བདག་ཉིད་དུ་བསྒོམས་ན་འགྲུབ་པར་འགྱུར་ཞེས་བྱ་བ་ནི་རྣལ་འབྱོར་པས་དངོས་
གྲུབ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་མཉམ་པའི་ཐལ་མོ་དང་། རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་པ་དང་། རྡོ་རྗེ་བསྡམས་པ་དྲལ་བ་དང་། དེ་ནས་དབབ་པ་བསྐྱེད་པ་དང་། རྡོ་རྗེ་ཁུ་ཚུར་གྱིས་དམ་ཚིག་གི་ཕྱག་རྒྱ་
བཅིངས་པ་དང་སྡིག་པ་དྲལ་བའི་ཕྱག་རྒྱ་བཅིངས་པ་དང་། རང་གི་སྙིང་གའི་རྡོ་རྗེ་ལ་རང་གི་ལྷའི་སྙིང་པོ་ཡིད་ཀྱིས་བྲིས་ལ། དེ་ཉིད་བརྗོད་ཅིང་ཆོས་བདག་མེད་པར་བསྒོམས་ཏེ། དེ་ནས་རང་གི་ལྷའི་སྙིང་པོ་དེ་ཉིད་དང་དབྱངས་ཀྱི་ཡི་གེ་བཅུ་དྲུག་ལས་སྙིང་གར་ཟླ་བའི་དཀྱིལ་འཁོར་གྱི་རྣམ་
པར་བསམ་པར་བྱ་སྟེ། དེ་ནས་དེའི་སྟེང་དུ་སྙིང་པོ་དེ་ཉིད་དང་། ཡི་གེ་ཀ་ལ་སོགས་པ་དང་བཅས་པ་ལ་སྔ་མ་བཞིན་དུ་ཟླ་བའི་དཀྱིལ་འཁོར་གཉིས་པ་བསམ་མོ། །ཟླ་བའི་དཀྱིལ་འཁོར་གཉིས་པ་དེ་ཉིད་རང་གི་ལྷའི་སྙིང་པོ་དང་བཅས་པ་ལ་རྡོ་རྗེ་རྩེ་ལྔ་པ་ཉིད་རང་གི་ལྷའི་མཚན་མའི་
གཟུགས་སུ་བསྒོམ་པར་བྱའོ། །དེ་ནས་རང་གི་ལྷའི་མཚན་མའི་དབུས་སུ་རང་གི་ལྷའི་སྙིང་པོ་རྣམ་པར་བསམས་ཏེ། རང་གི་ལྷའི་ཕྱག་རྒྱའི་ང་རྒྱལ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ཉིད་བཛྲ་སཏྭ་ཨ་ཧཾ་ཞེས་བརྗོད་པས་རྡོ་རྗེ་སེམས་དཔའི་གཟུགས་སུ་བདག་ཉིད་བསྒོམ་པར་བྱའོ། །དེ་ནས་

བསྙེམས་པ་དང་བཅས་པས་རྡོ་རྗེ་གསོར་ཞིང་། ཡང་བཛྲ་སཏྭ་ཨ་ཧཾ་ཞེས་བསྒོམས་ལ། དེ་ནས་དེ་ཉིད་རྡོ་རྗེ་སེམས་དཔའི་ལྷའི་ངོ་བོར་བདག་ཉིད་སྔ་མ་བཞིན་དུ་བསྒོམ་པར་བྱའོ། །རྡོ་རྗེ་སེམས་དཔའི་རྣལ་འབྱོར་པའི་བསྒོམས་པ་ནི་སྔར་དེ་ཁོ་ན་ཉིད་སྟོན་པའི་རྒྱུད་དུ་བཤད་
ཟིན་ཏོ། །སེམས་དཔའ་ཇི་བཞིན་རྒྱ་དེ་བཞིན། །ཞེས་བྱ་བ་ནི་ཇི་ལྟར་རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་སེམས་དཔར་གྱུར་པ་དེ་བཞིན་དུ་རྡོ་རྗེ་ཧཱུཾ་མཛད་ལ་སོགས་པའི་མཚན་མའི་ཕྱག་རྒྱ་ཡང་བྱའོ། །ཇི་ལྟར་ཕྱག་རྒྱ་དེ་བཞིན་བདག །ཅེས་བྱ་བ་ནི་ཇི་ལྟར་རྡོ་རྗེ་ཧཱུཾ་མཛད་ལ་སོགས་པ་དང་
རྡོ་རྗེ་འབར་བ་ལ་སོགས་པའི་ཕྱག་རྒྱ་རྡོ་རྗེ་ཧཱུཾ་མཛད་ལ་སོགས་པའི་རང་བཞིན་དུ་བདག་ཡིན་ཞེས་གཟུགས་དང་ཐ་མི་དད་པར་ང་རྒྱལ་བསྐྱེད་ཅིང་བསྒོམ་པར་བྱའོ། །བསྒོམ་པ་འདི་ཡི་ཚུལ་གྱིས་ནི། །རྡོ་རྗེ་རིགས་ཀྱི་ཕྱག་རྒྱ་བསྒྲུབ་པར་བྱའོ་ཞེས་བྱ་བ་ཡིན་ནོ། །དེའི་ཆོ་ག་འདི་སྐད་
སྟོན་པ་ཡིན་ཏེ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་རྗེས་སུ་སྤྱད་ལ། སྙིང་གའི་རྡོ་རྗེ་འབར་བ་ལ་རང་གི་ཁྲོ་བོའི་ལྷའི་སྙིང་པོ་རྣམ་པར་བསམས་ཏེ། དེ་ཉིད་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །སྔ་མ་བཞིན་དུ་ཟླ་བའི་དཀྱིལ་འཁོར་ལ་སོགས་པའི་
རིམ་པས་ཟླ་བའི་དཀྱིལ་འཁོར་གྱི་སྟེང་དུ་རང་གི་ལྷའི་མཚན་མ་བསྐྱོད་ལ། དེའི་དབུས་སུ་སྙིང་པོ་བཀོད་ནས། སེམས་དཔའ་ཇི་བཞིན་རྒྱ་དེ་བཞིན། །ཕྱག་རྒྱ་ཇི་བཞིན་དེ་བཞིན་བདག །ཅེས་བྱ་བས་ཕྱག་རྒྱ་དང་ལྷན་ཅིག་ཏུ་ཐ་མི་དད་པའི་བདག་ཉིད་དུ་ཟླ་བའི་དཀྱིལ་འཁོར་ལ་སོགས་པ་བསྒོམས་ཏེ།
དེའི་རིགས་ཐམས་ཅད་ཕྱག་རྒྱ་དེ་ལས་སྤྲུལ་ལ། གདུག་པ་ཐམས་ཅད་བཏུལ་ནས་དེ་ཐམས་ཅད་ཀྱི་ཕྱག་རྒྱའི་གཟུགས་དེ་ལས་བསམ་པར་བྱའོ། །ཆོས་ཀྱི་ཕྱག་རྒྱ་ནི་པདྨའི་རིགས་ཀྱི་ཕྱག་རྒྱ་ཆེན་པོའོ། །དེའི་ཚུལ་ནི་རང་གི་ལྷའི་མཚན་མའི་ང་རྒྱལ་བསྒོམ་པར་བྱའོ། །ཇི་ལྟར་བྱ་ཞེ་ན། རྡོ་རྗེ་
ཕྲ་མོ་བསྒོམ་བྱས་ལ། ཞེས་བྱ་བ་སྨོས་ཏེ། སྔར་བཤད་པའི་ཚུལ་གྱིས་རྡོ་རྗེ་ཕྲ་མོ་ཟླ་བ་གསུམ་བསྒོམས་ལ། ཕྱིས་ཆོས་ཀྱི་ཕྱག་རྒྱའི་སྦྱོར་བ་བསྒོམ་པར་བྱའོ། །གང་གི་ཕྱག་རྒྱ་དེ་དག་ཀུན། །སེམས་དཔའ་ཆེན་པོའི་ཏིང་ངེ་འཛིན། །ཞེས་བྱ་བ་ནི་སྙིང་པོའི་ཕྱག་རྒྱའི་སྔགས་ཀྱི་རིག་པ་

ཐམས་ཅད་ཀྱིས་རང་གི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བསྒོམ་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་གཟུགས་སུ་བདག་ཉིད་བསྒོམས་ལ་སྙིང་གའི་ཕྱག་རྒྱ་ལ་
སྔགས་ཀྱི་རིག་པ་བཟླ་བར་བྱའོ། །སངས་རྒྱས་ཀུན་ལ་དབང་བསྐུར་དང་། །ཞེས་བྱ་བ་ནི། རིན་པོ་ཆེའི་ཅོད་པན་གྱིས། །སངས་རྒྱས་ཀུན་ལ་དབང་བསྐུར་རོ། །མཆོད་པའི་གདུགས་དང་། རྒྱལ་མཚན་དང་། བ་དན་དང་། རིན་པོ་ཆེ་སྣ་བདུན་པོ་དེ་དག་ཉིད་ཀྱིས་སངས་རྒྱས་ཐམས་ཅད་
ལ་མཆོད་པའོ། །དམ་ཚིག་གི་དངོས་གྲུབ་རྣམས་ནི་ནོར་བུའི་རིགས་ཀྱི་དཀྱིལ་འཁོར་ཐམས་ཅད་ཀྱི་དངོས་གྲུབ་བོ། །རྡོ་རྗེ་ལས་རྣམས་འགྲུབ་པར་བྱེད། །ཅེས་བྱ་བ་ནི་སངས་རྒྱས་ཀུན་ལ་དབང་བསྐུར་བ་དང་། མཆོད་པའི་དམ་ཚིག་གི་ལས་རྣམས་ཐ་མི་དད་པར་བསྒྲུབས་པས།
བཅོམ་ལྡན་འདས་འཕགས་པ་ནམ་མཁའི་སྙིང་པོའི་བདག་ཡིན་ནོ་ཞེས་ངེས་པར་བསྒོམ་པར་བྱའོ། །དེ་ནས་ནོར་བུའི་རིགས་ཀྱི་ལྷ་མོའི་དངོས་གྲུབ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཟླ་བའི་དཀྱིལ་འཁོར་གྱི་སྟེང་དུ་ལྷའི་ཕྱག་
རྒྱའི་མཚན་མ་རྣམ་པར་བསམས་ལ། ཕྱག་རྒྱའི་དབུས་སུ་བཟླས་པའི་ཡི་གེ་བཀོད་ནས་སྙིང་པོ་བརྗོད་ཅིང་། བདག་གི་མཚན་མའི་ཕྱག་རྒྱའི་གཟུགས་སུ་བསྒོམས་ལ། མཚན་མའི་ཕྱག་རྒྱ་དེ་ལས་ནོར་བུའི་རིགས་ཐམས་ཅད་སྤྲུལ་ཏེ། དེས་དེ་བཞིན་གཤེགས་པ་ལ་སོགས་
པ་སེམས་ཅན་གྱི་ཁམས་ཐམས་ཅད་དབང་བསྐུར་བས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ནོར་བུ་ཆེན་པོའི་རིགས་ཀྱི་རང་བཞིན་དུ་བྱས་ནས། ཕྱག་རྒྱ་དེ་ལ་གཞུག་པར་བྱའོ། །དེ་ནས་ཕྱག་རྒྱའི་གཟུགས་དེ་སེམས་དཔར་བྱིན་གྱིས་བརླབས་
པའི་སྦྱོར་བས་རྡོ་རྗེ་སེམས་དཔར་བསྒོམས་ལ། གང་གི་ལྷའི་ཕྱག་རྒྱ་ཆེན་པོའི་གཟུགས་སུ་ཡང་བསྒོམ་པར་བྱའོ་ཞེས་བྱ་བ་འདི་ནི་དེ་ཁོ་ན་ཉིད་མ་ཡིན་པ་ལ་མོས་པའི་རྣལ་འབྱོར་པའི་རིམ་པ་ཡིན་ནོ། །གང་ཞིག་ཤིན་ཏུ་དེ་ཁོ་ན་ཉིད་ལ་མོས་པའི་རྣལ་འབྱོར་པ་ནི། དེའི་ཕྱག་རྒྱ་

བཅིངས་ལ། སེམས་དཔའ་བྱིན་གྱིས་བརླབ་པའི་སྦྱོར་བ་ཙམ་སྔོན་དུ་བྱས་ལ། རང་གི་ལྷའི་ང་རྒྱལ་བསྐྱེད་ཅིང་བསྒོམ་པར་བྱའོ། །དེ་ལ་དེ་ཁོ་ན་ཉིད་ལ་མོས་པའི་རྣལ་འབྱོར་པའི་མཚན་ཉིད་ཡིན་ཏེ། གང་གི་ཚེ་ལས་དང་པོ་པའི་རྣལ་འབྱོར་པས་རང་ལ་བྱིན་གྱིས་
བརླབ་པ་ལ་སོགས་པའི་ཆོ་ག་རྒྱས་པ་ནས་བརྩམ་པར་བྱ་བའི་ཚོགས་ཐམས་ཅད་ཐུན་བཞིའི་སྦྱོར་བས་ཉིན་རེ་ཞིང་མཚན་མ་ཐོབ་པར་འགྱུར་བའམ། སྐྱེ་བ་གཞན་ལས་གོམས་པའི་མཐུས་སྐྱེས་བུའམ་འགའ་ཞིག་དགེ་བའི་བཤེས་གཉེན་ལས་ཐོབ་པའི་རྣལ་འབྱོར་པ་གདམས་ངག་བསྒོམས་
ནས། ཐོག་མ་བརྩམས་པ་ནས་བཟུང་ནས་རྒྱུན་མི་འཆད་པ་ཉིད་དུ་མཚན་མ་ཉེ་བར་སྐྱེ་བར་འགྱུར་རོ། །དེ་དག་གི་སྟོབས་ཀྱིས་ཕྱག་རྒྱ་བཅིངས་པ་ལ་སོགས་པ་རྣམས་ལ་མངོན་པར་ཞེན་པ་མེད་པར་བསྒོམས་པས་འགྱུར་བ་འདི་ནི་དེ་ཁོ་ན་ཉིད་ལ་གོམས་པའི་རྣལ་འབྱོར་པ་ཡིན་ཏེ། དང་པོར་ལྷག་པར་
མོས་པ་ཙམ་གྱིས་ནི་མ་ཡིན་ནོ། །དེ་སྐད་དུ་ཡང་། དེ་ཉིད་དམན་པའི་རྣལ་འབྱོར་པས། །ལྷ་ལ་དམིགས་པར་འགྱུར་བས་ན། །ལུགས་མ་ལ་སོགས་དག་པ་ལ། །གཟུགས་བརྙན་རྣལ་འབྱོར་ཉེ་བར་བསྐྱེད། །སྐུའམ་རས་རིས་མཆོད་རྟེན་རྣམས། །ཤིན་ཏུ་མཉམ་གཞག་རྣལ་འབྱོར་པས། །མངོན་
སུམ་དུ་ནི་མཐོང་བ་ན། །དེ་ནི་རྫོགས་པ་ཡིན་པར་བཤད། །དཀར་དང་སེར་པོའི་དཀྱིལ་འཁོར་ནི། །འོད་ཟེར་ཕྲེང་བ་འཁྲིགས་པ་ཡི། །ངོ་མཚར་བར་ནི་འགྱུར་བ་དེ། །བློ་ལྡན་གྱིས་ནི་མཁའ་ལ་མཐོང་། །བློ་ལྡན་ཁ་དོག་སྣ་ཚོགས་དེས། །གང་གིས་ཡིད་ནི་མཚོན་པར་བྱ། །
དཀར་པོ་དགེ་བར་ཤེས་པར་བྱ། །མི་ཤེས་པ་ལ་ནག་པོར་སྣང་། །ཆགས་ཅན་ཤིན་ཏུ་དམན་པར་བཤད། །ཤིན་ཏུ་དགའ་ལ་དེ་བཞིན་སེར། །སྤྲིན་གྱིས་ནོན་པ་ལྟ་བུ་ནི། །མཁས་པས་རྨོངས་པར་ཤེས་པར་བྱ། །བདག་ཉིད་ཡོངས་སུ་དག་པའི་ཆོ་གའོ། །མཚན་མ་འབྱུང་བར་འགྱུར་བ་
ན། །སེམས་ནི་བརྟན་པར་ཤེས་པར་བྱ། །དེ་ལྟར་མཚན་མ་ཉིད་རྣམས་ནི། །སངས་རྒྱས་རྒྱལ་བའི་བདེ་མཆོག་གི། །རྡོ་རྗེ་རིན་ཆེན་ཆུ་སྐྱེས་དང་། །སྣ་ཚོགས་ལྕགས་ཀྱུ་ཉི་མ་དང་། །རལ་གྲི་གོ་ཆ་མདའ་གཞུ་དང་། །རིན་ཆེན་རྒྱལ་མཚན་རྣམས་ཀྱིས་བརྒྱན། །འཁོར་ལོ་མཆེ་བ་དེ་བཞིན་མགུ། །

བཞད་པས་གསུངས་པ་ཁུ་ཚུར་བཅངས། །སྒེག་མོ་དེ་བཞིན་ཕྲེང་བ་མོ། །གླུ་མ་དང་ནི་གར་མ་བདག །མེ་ཏོག་བདུག་པ་མར་མེ་དང་། །དེ་བཞིན་དྲི་ཆབ་ལ་སོགས་ཚོགས། །མེ་ཏོག་ཀུན་དགའ་དྲི་གཙང་ཁང་། །དགེ་སློང་དེ་བཞིན་དགེ་སློང་མ། །དངོས་གྲུབ་དྲང་སྲོང་གཉེན་རྣམས་དང་། །རྒྱལ་
རིགས་སྐྱེ་བོས་བསྔགས་པ་དང་། །བུ་མོ་གཞོན་ནུས་བརྒྱན་པ་དང་། །ཆུ་བོ་རྒྱ་མཚོ་ནེའུ་སིང་དང་། །གདུགས་དང་རྒྱལ་མཚན་བ་དན་དང་། །རོལ་མོ་སྣ་ཚོགས་བརྡུང་བ་དང་། །ཤེས་རབ་ཕ་རོལ་ཕྱིན་ལ་སོགས། །ཤེས་པའི་སྒྲ་ནི་དྲི་མ་མེད། །ཉི་ཟླའི་དབྱིབས་དང་འདྲ་བ་ནི། །པདྨ་ས་གཞི་འོད་
དང་བཅས། །ནམ་མཁའི་གློག་ནི་སྣ་ཚོགས་མཚུངས། །རྣལ་འབྱོར་པ་ལ་རྟག་ཏུ་སྐྱེ། །དེ་དག་ཐམས་ཅད་རྣམ་སྤངས་པས། །མཚན་མ་མེད་ཅིང་འགྲིབ་པ་མེད། །རྟོག་པ་ཐམས་ཅད་རྣམ་སྤངས་ནས། །རྣལ་འབྱོར་རྟོག་པ་མེད་ལ་གནས། །དེ་ནས་རྣལ་འབྱོར་པ་དེ་ལ། །དགའ་བ་རྣམ་པ་ལྔ་
བསྐྱེད་དེ། །སྐད་ཅིག་ཐང་ཅིག་རྒྱུན་དག་ལ། །དེ་བཞིན་མཐར་ཐུག་འགྱུར་བ་དང་། །ཆོས་རྣམས་ཐམས་ཅད་ངེས་པས་ནི། །སངས་རྒྱས་ཀུན་ཞེས་རབ་ཏུ་གྲགས། །དེ་ལ་སྐད་ཅིག་མའི་དགའ་བ་ནི། །གང་ཚེ་སྐད་ཅིག་རེ་རེ་སེམས། །དམིགས་པ་ལ་ནི་གནས་པ་ན། །གཡེང་བ་འགོག་
པ་མེད་པས་ན། །དེ་ཕྱིར་སྐད་ཅིག་ཅེས་གྲགས་སོ། །དེ་ལ་ཐང་ཅིག་ཅེས་བྱ་བའི་བར་དུ་དགའ་བ་ནི། །གང་ཚེ་སྦྲང་མའི་ཁ་དག་ནས། །སྦྲང་རྩི་འབྱུང་བ་མྱངས་པ་ཡིས། །རྐང་པ་སྤྱི་བོའི་མཐར་ཐུག་པའི། །ལུས་ལ་ཁྱབ་པར་མཉམ་གཞག་པར། །བཀྲེས་དང་ནང་འབྱུང་བསལ་
ནས་ནི། །དེ་བཞིན་ལུས་ནི་ལས་རུང་དང་། །སེམས་ནི་དམིགས་པ་ལ་ཆགས་ནས། །རྟག་ཏུ་བརྟན་པར་གནས་པར་འགྱུར། །དེ་ལ་རྒྱུན་དུ་དགའ་བ་ནི། །དགའ་བས་མཆི་མ་འབྱུང་བ་དག། །མ་བསམས་ལུས་ལ་འབྱུང་བར་འགྱུར། །མགུ་བ་ཡི་ནི་ཏིང་ངེ་འཛིན། །དེ་ནི་རྒྱུན་ཞེས་བྱ་
བར་བཤད། །དེ་ནས་མཐར་ཐུག་པའི་དགའ་བ་ནི། གང་ཚེ་དམིགས་པ་ལ་ཆགས་པའི། །རྣལ་འབྱོར་པ་ལ་སེམས་འབྱུང་བ། །དེ་ཚེ་དགའ་བའི་ཁྱད་པར་ནི། །དོན་གཞན་ཉེ་བར་སྐྱེ་བར་འགྱུར། །གང་ཚེ་ལུས་ལ་སྐྱེས་པའི་རླུང་། །ལྷག་པར་རབ་ཏུ་ཞུགས་གྱུར་ན། །སེམས་ནི་རྣམ་པར་འཁྲུལ་

བ་དང་། །གཡེང་བ་སྐྱེ་བར་མི་འགྱུར་བ། །དེ་ཚེ་རྣལ་འབྱོར་སེམས་རིག་པས། །སྲང་མདའི་ཚུལ་དུ་སྦྱང་བར་བྱ། །དགེ་བ་སྲུང་བའི་ཚུལ་དུ་ནི། །ཇི་ལྟ་བ་བཞིན་ངེས་པར་སྦྱར། །དེ་ལ་ཆོས་ཐམས་ཅད་དུ་ངེས་པའི་དགའ་བ་ནི། སོས་ཀའི་ཚ་བས་གདུངས་པ་ཡི། །
ཇི་ལྟར་ལམ་དུ་འཇུག་པའི་མི། །གངས་ཀྱི་ཆུ་ནི་ལེན་པའི་ཚེ། །ཚ་བའི་དུས་ཀྱིས་སྡུག་བསྔལ་ཏེ། །གང་ཞིག་འགོག་པར་བྱེད་པ་ན། །ཐམས་ཅད་རྣམ་པར་འཇིགས་པར་འགྱུར། །དགའ་ཞིང་བདེ་བའི་ཁྱད་པར་ནི། །ཡང་དང་ཡང་དུ་འཕེལ་བར་གཞག །རྣམ་པ་ཐམས་ཅད་ངེས་པ་ན། །
ཆོས་རྣམས་བླ་ན་མེད་པ་འཐོབ། །ལུས་ནི་ཤིན་ཏུ་སྤངས་པ་དང་། །ཉོན་མོངས་གསུམ་ནི་རྣམ་དག་པས། །བསམ་གཏན་དགའ་བའི་ཏིང་ངེ་འཛིན། །གཟུགས་རྣམས་ཀྱང་ནི་བསགས་པ་དང་། །ས་དང་ཕ་རོལ་ཕྱིན་པ་དང་། །མངོན་ཤེས་རྣམས་ནི་འབྱུང་བ་དང་། །འདོད་ཆགས་
ལ་སོགས་ཉེས་པ་ཆེ། །ཞིག་འགྱུར་དེ་ཚེ་རྣལ་འབྱོར་པས། །དང་པོའི་སྤྱོད་པ་ལ་ཞུགས་པས། །འགྲུབ་འགྱུར་འདི་ནི་ཐེ་ཚོམ་མེད། །ཉོན་མོངས་དགྲ་རྣམས་ཞི་ཕྱིར་དང་། །ཏིང་འཛིན་འཕེལ་བར་བྱ་བའི་ཕྱིར། །རང་ལྷའི་རྣལ་འབྱོར་ལ་གནས་ནས། །དེ་ནས་སྦྱིན་སྲེག་བརྩམ་
པར་བྱ། །ཟླ་བའི་དཀྱིལ་འཁོར་དབུས་སུ་ནི། །བདག་ཉིད་རྟག་ཏུ་བསམ་པར་བྱ། །དེ་ཡི་ལུས་ཀྱི་སྙིང་ག་ལས། །འོད་ཟེར་འབར་བའི་ཚོགས་གསལ་བའི། །འོད་ཀྱི་དཀྱིལ་འཁོར་ཕྲེང་བ་ཡིས། །ཕྱོགས་བཅུར་བཞུགས་པའི་རྒྱལ་བ་དང་། །སྟོང་གསུམ་རྡུལ་དང་མཚུངས་པ་
ཡི། །ཁ་དོག་དཀར་པོ་ལ་སོགས་པ། །བསྡུས་ནས་ལུས་ལ་གཞུག་པར་བྱ། །ཞི་བའི་སྦྱིན་སྲེག་ཅེས་སུ་བཤད། །རྒྱས་པའི་ཆོ་ག་སེམས་ཅན་རྣམས། །མགུ་བའི་གཟུགས་སུ་བསམ་པར་བྱ། །ཤིན་ཏུ་ཉོན་མོངས་ཞི་བའི་ཕྱིར། །ཁྲོ་བོའི་གཟུགས་ཀྱི་ཁྱད་པར་བྱ། །རྗེས་སུ་ཆགས་པ་
བུད་མེད་ནི། །སྣ་ཚོགས་གཟུགས་ཅན་བསམ་པར་བྱ། །ལས་དང་པོ་པའི་སྦྱིན་སྲེག་འདི། །གཙོ་བོས་སྔར་ནི་བསྟན་པ་ཡིན། །དེ་ལྟར་བརྟན་པར་བྱས་ནས་ནི། །ཏིང་འཛིན་ཉམས་པར་མི་འགྱུར་རོ། །གཞན་ཡང་བཤད་པ། དེ་ཉིད་བསམས་པའི་རྣལ་འབྱོར་པས། །ལྷ་ལ་དམིགས་པར་

འགྱུར་བ་ན། །རྣལ་འབྱོར་རང་གི་དམ་ཚིག་བདག །དམ་པའི་ཡི་གེ་འགྲུབ་པར་འགྱུར། །ལུགས་མ་ལ་སོགས་གཟུགས་བརྙན་ལ། །རྣལ་འབྱོར་སྐྱེ་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་པས། །དེ་ལས་རྣལ་འབྱོར་ལྷར་འགྱུར་རོ། །བྱང་ཆུབ་སེམས་ཀྱི་རྡོ་རྗེ་འདི། །སངས་རྒྱས་
ཀུན་གྱི་བདག་ཉིད་དེ། །དེ་ཕྱིར་རྣལ་འབྱོར་ཀུན་བདག་གིས། །སངས་རྒྱས་ཐམས་ཅད་ཐོབ་པར་འགྱུར། །བདག་ཉིད་སངས་རྒྱས་ཀུན་དང་ནི། །གཟི་ཅན་ཀུན་དུ་ངེས་འགྱུར་བས། །རང་གི་ལྷ་ཡི་སྦྱོར་བ་ཡིས། །དེ་ཕྱིར་བདག་ཉིད་བསྒྲུབ་པར་བྱ། །འདི་ནི་སངས་རྒྱས་ཐམས་ཅད་
དང་། །གཟི་ཅན་ཐམས་ཅད་ཉིད་དང་ནི། །རྡོ་རྗེ་འཛིན་པ་ཐམས་ཅད་དུ། །ཚེ་འདི་ཉིད་ལ་འགྲུབ་པར་འགྱུར། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །དེ་བཞིན་གཤེགས་པའི་རིགས་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་གྱི་
བཤད་པ་རྫོགས་སོ།། །།འཕགས་པ་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བའི་རྒྱུད་ཕྱི་མའི་བཤད་པའོ། །དེ་ལྟར་མཆོག་ཏུ་གྱུར་པའི་སེམས་ཅན་རྣམས་རྗེས་སུ་གཟུང་བའི་ཕྱིར་རྒྱུད་ཕྱི་མ་བཤད་ནས། ད་ནི་བསྒོམས་པས་འཇིགས་ཤིང་
སྐྲག་པའི་བྱ་བ་ལ་མངོན་པར་ཞེན་པའི་སེམས་ཅན་ཐམས་ཅད་རྗེས་སུ་གཟུང་བའི་ཕྱིར། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་གསུངས་པ་ཡིན་ནོ། །འདིར་ཡང་རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མར་ནི་རང་གི་རིགས་ཀྱི་དཀྱིལ་འཁོར་ཆེན་པོ་མཐོང་བ་ཙམ་གྱིས་རང་གི་རིགས་ལས་མཐོང་
བའི་སྙིང་པོ་དང་། ཕྱག་རྒྱ་དང་། སྔགས་དང་། རིག་སྔགས་བསྒྲུབ་པ་ནི་ཕྱག་རྒྱ་ཆེན་པོས་འཇིགས་ཤིང་སྐྲག་པ་བསོད་ནམས་ཆུང་བའི་སེམས་ཅན་རྗེས་སུ་གཟུང་བའི་ཕྱིར། བཅོམ་ལྡན་འདས་ཀྱིས་རྗེས་སུ་གནང་བར་མཛད་པ་ཡིན་ནོ། །རང་གི་རིགས་ཀྱི་དཀྱིལ་འཁོར་ཆེན་པོ་ལས་
གསུངས་པའི་བསྒྲུབ་པར་བྱ་བའི་དངོས་པོ་ཐམས་ཅད་ཀྱི་སྒྲ་ནི་སྙིང་པོ་ཞེས་བྱ་བའོ། །རང་གི་རིགས་ཀྱི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཐམས་ཅད་ཀྱི་སྒྲ་ནི་ཕྱག་རྒྱའོ། །རང་གི་རིགས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བའི་དངོས་

གྲུབ་ཐམས་ཅད་ཀྱི་སྒྲ་ནི་སྔགས་སོ། །རང་གི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བའི་དངོས་གྲུབ་ཐམས་ཅད་ཀྱི་སྒྲ་ནི་རིགས་པ་ཡིན་ཞེས་བཅོམ་ལྡན་འདས་ཀྱིས་བསྟན་ཏོ། །དེ་ལ་དཀྱིལ་འཁོར་ཆེན་པོ་མཐོང་བའི་དུས་
ངེས་པ་དང་། བཟླས་པའི་གྲངས་དང་། རས་རིས་དང་། ཕྱིའི་མཆོད་པ་རྣམ་པ་ལྔ་ལ་སོགས་པའི་མཆོད་པ་དང་། ཕྱག་རྒྱའི་མཆོད་པ་དང་། སྐྱིལ་མོ་ཀྲུང་ལ་སོགས་པའི་ངེས་པ་ནི་ཡོ་བྱད་དེ། དེ་ལ་མངོན་པར་ཞེན་པ་རྣམས་ཀྱི་དོན་བསྟན་པའི་ཕྱིར། དེ་ནས་ཞེས་བྱ་བ་
ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པ་སྟེ། ལྟ་བ་ངན་པ་ལ་སོགས་པའི་སེམས་ཅན་རྗེས་སུ་གཟུང་བའི་སྐབས་སུ་བབ་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ལྟ་བ་ངན་པ་ནི་བྱ་བ་ཙམ་གྱིས་ཀུན་ལ་སྨད་པ་ཟབ་མོའི་ཆོས་ལ་མི་མོས་པའོ། །ཆགས་
བྲལ་ནི་གསང་བ་བསྒོམ་པ་རབ་ཏུ་སྤོང་བར་བྱེད་པ་དེ་ལྟ་བུར་གྱུར་པ་དེ་དག་རྒྱུད་ཕྱི་མ་ལས་བཤད་པའི་གསང་བ་འདི་ནི་མི་རིགས་ཏེ། ལྷག་པར་མོས་པའི་དོན་མི་འགྲུབ་པའི་ཕྱིར་རོ། །དེ་དག་སེམས་ཅན་ཀུན་ལ་ཕན་དོན་དུ་ནི་དེ་བཞིན་དུ་བདེ་བའི་འབྲས་བུ་ཐོབ་པའི་ཕྱིར་རོ། །དེ་བཞིན་ཆོ་ག་
བཤད་པར་བྱའོ་ཞེས་བྱ་བ་ནི། ཇི་ལྟར་མཆོག་ཏུ་གྱུར་པའི་སེམས་ཅན་རྗེས་སུ་གཟུང་བའི་ཕྱིར། མཆོག་ཏུ་གྱུར་པའི་སེམས་ཅན་དང་མཐུན་པའི་ཆོ་ག་བྱ་བ་བསྟན་ནས། དེ་ནས་ཡོངས་སུ་མ་སྨིན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར། ལས་དང་པོ་པའི་སེམས་ཅན་དང་
རྗེས་སུ་མཐུན་པའི་ཆོ་ག་བཤད་པར་བྱའོ་ཞེས་བྱ་བའི་ཐ་ཚིག་གོ། །དེ་ནས་ཡང་ཞེས་བྱ་བའི་སྒྲ་ནི་དེ་མ་ཐག་པའོ། །ཕྱག་ན་རྡོ་རྗེ་ནི་རྡོ་རྗེ་སེམས་དཔའོ། །ཡང་གི་སྒྲ་ནི་རྒྱུད་ཕྱི་མ་ལ་ལྟོས་པའོ། །དེ་བཞིན་གཤེགས་པ་ཐམས་ཅད་ཀྱི་སྒྲ་ནི་བཤད་ཟིན་ཏོ། །རིགས་ནི་ཇི་སྐད་དུ་བཤད་པའི་
རིགས་རྣམས་སོ། །ཡོ་བྱད་ནི་དཀྱིལ་འཁོར་ཆེན་པོར་བསྟན་པའི་མཆོད་པ་ལ་སོགས་པ་དེ་དག་སྒྲུབ་པར་བྱེད་པའོ། །དེའི་ཆོ་ག་རྒྱས་པ་ནི་རྣམ་པ་སྣ་ཚོགས་པ་སྟེ། འདི་གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པའོ། །འདི་

ཞེས་བྱ་བ་ནི་འཆད་པར་འགྱུར་བའི་བློ་ལ་གནས་པ་སྟེ། དཀྱིལ་འཁོར་ཆེན་པོར་བཤད་པའི་མཆོད་པ་ལ་སོགས་པའི་ཡོ་བྱད་དོ། །དེ་བཞིན་གཤེགས་པ་ཐམས་ཅད་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཡོ་བྱད་དང་། ཆོ་ག་ཐམས་ཅད་རྒྱས་པར་གྱུར་
པ་ནི་བསྟན་པའོ། །དེ་ནས་ཞེས་བྱ་བ་ནི་དམིགས་ཀྱིས་དགར་བའོ། །དེ་བཞིན་གཤེགས་པ་ལ་སོགས་པའི་རིགས་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིགས་རྣམས་ཀྱི་ནང་ནས་རེ་ཞིག་དེ་བཞིན་གཤེགས་པ་རྣམས་དེའི་རིགས་ཀྱི་སྙིང་པོའི་ཡོ་བྱད་འབྱུང་བ་ཡིན་ནོ། །དཀྱིལ་འཁོར་
ཆེན་པོ་མཐོང་ནས་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སྔར་བཤད་པའི་ཆོ་ག་མཐོང་ནས་བདུག་པ་དང་མེ་ཏོག་དང་། མར་མེ་དང་། དྲིའི་ཕྱག་རྒྱ་རྣམས་ཀྱིས་མཆོད་པར་བྱ་སྟེ་ཞེས་བྱ་བ་ནི་རྡོ་རྗེ་བདུག་པ་མ་ལ་སོགས་པའི་ལས་ཀྱི་ཕྱག་རྒྱ་རྣམ་པ་བཞི་གང་ལས་བྱུང་བས་བདག་ཉིད་ཡང་
དག་པར་མཆོད་ལ། རྡོ་རྗེ་བཟླས་པས་བརྩམ་པར་བྱའོ་ཞེས་ཤེས་པར་བྱའོ། །ཇི་ལྟར་འདུག་སྟེ་ཞསབྱ་བ་ནི་དེ་བཞིན་གཤེགས་པའི་ཟློས་པ་པོས་བྱང་ཆུབ་ཀྱི་སྙིང་པོ་ལ་སོགས་པར་འདུག་པ་དང་། རྡོ་རྗེ་སེམས་དཔའ་ལ་སོགས་པ་ནི་ཀུན་དགའ་ར་བ་ལ་སོགས་པ་སྟེ། དེ་སྐད་དུ་ཡང་།
དེ་བཞིན་གཤེགས་པ་ཐམས་ཅད་འདུས་ནས་ཞེས་བྱ་བ་ལ་སོགས་པ་རྒྱུད་ལས་བཤད་པས་སོ། །དེ་ལ་ཇི་སྐད་བསྟན་པའི་གནས་སུ་གནས་པ་ནི་ཇི་ལྟ་བ་བཞིན་དུ་གནས་པའོ། །དུས་ཇི་ཙམ་ཞིག་ཏུ་གནས་ཤེ་ན། ཟླ་བ་བཞིར་ཞེས་བྱ་བ་སྨོས་ཏེ། ཟླ་བ་བཞིར་གནས་ཇི་ལྟ་བ་བཞིན་དུ་
འདུག་ཅིང་། དེ་ཟློས་ཤིང་གནས་ཏེ། དུས་བཞིར་བདུག་པ་ལ་སོགས་པས་མཆོད་པ་བྱའོ་ཞེས་བྱ་བ་ནི་སྔ་དྲོ་དང་། ཉི་མ་ཕྱེད་དང་། དགོངས་ཀ་དང་། མཚན་ཕྱེད་ཀྱི་དུས་སུ་བདུག་པ་ལ་སོགས་པའི་ཕྱག་རྒྱ་བཞིས་བདག་ཉིད་དང་། དེ་བཞིན་གཤེགས་པ་ཐམས་ཅད་ལ་ཡང་དག་པར་མཆོད་
པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་མཚན་བརྒྱ་རྩ་བརྒྱད་པ་ཕྱིས་འཆད་པར་འགྱུར་བའི་དེ་བཞིན་གཤེགས་པའི་མཚན་བརྒྱ་རྩ་བརྒྱད་པས་དེ་བཞིན་གཤེགས་པའི་རྣལ་འབྱོར་པས་དེ་བཞིན་གཤེགས་པ་ཐམས་ཅད་ལ་བསྟོད་པར་བྱའོ། །

རྡོ་རྗེ་སེམས་དཔའ་ལ་སོགས་པའི་ཟློས་པ་པོས་ནི་སྔར་བཤད་པའི། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་ལ་སོགས་པ་རྡོ་རྗེ་སེམས་དཔའི་མཚན་བརྒྱ་རྩ་བརྒྱད་པས་བསྟོད་པར་བྱའོ། །ཕྱག་བཞིས་ཕྱག་བྱ་བའི་ཚུལ་གྱིས་ཕྱག་བྱས་ལ་ལུས་འབུལ་
བའི་མཆོད་པ་ཡང་བྱའོ་ཞེས་བཤད་པ་ཡིན་ནོ། །དེ་ལྟར་ཕྱག་རྣམ་པ་བཞི་བྱས་ནས། བཟླས་པའི་ཕྲེང་བ་བླངས་ཏེ་འདོད་པའི་ཡོན་ཏན་ཐམས་ཅད་ལ་ཆགས་པ་དང་བྲལ་བས་ཇི་ལྟ་བ་བཞིན་དུ་བཟླས་ན་མྱུར་དུ་དངོས་གྲུབ་ཏུ་འགྱུར་རོ་ཞེས་བྱ་བར་སྦྱར་རོ། །དེ་ནས་སྒེག་མོ་ལ་སོགས་པ་མཆོད་
པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་ནི་འདོད་པའི་ཡོན་ཏན་ཐམས་ཅད་དོ། །ཁ་ཟས་ཀུན་དང་ཞེས་བྱ་བ་ནི་ཉ་ཤ་དང་། ཤ་དང་། སྒོག་པ་དང་། བཙོང་དང་། ལྷག་མ་དང་། ལོག་སྲིད་ཀྱི་ལྷ་བཤོས་དང་། དཀོན་མཆོག་གསུམ་གྱི་
བཤོས་གཙང་སྤངས་པ་དང་། ཁ་ན་མ་ཐོ་བ་མེད་པ་ནི་བཟའ་བ་ཐམས་ཅད་དོ། །དེ་བཞིན་དུ་འདོད་པ་ཀུན་ལ་ཉེ་བར་སྤྱོད་ཀྱང་གང་ལ་ཡོང་ཁ་ན་མ་ཐོ་བའི་ཉེས་པར་མི་འགྱུར་རོ། །རང་གི་ལྷ་ནས་བརྩམས་ནས་སྒེག་མོ་ལ་སོགས་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་
པ་བཅུ་དྲུག་གིས་མཆོད་ལ་བསྒོམ་པ་ནི། ཀུན་ལ་ཉེ་བར་ལོངས་སྤྱོད་ཅིང་ངོ་། །སྙིང་པོའི་དོན་དུ་ཞེས་བྱ་བ་ནི། བཛྲ་དྷཱ་ཏུ་ཞེས་བྱ་བ་དེ་བཞིན་གཤེགས་པ་ལྔའི་སྙིང་པོའི་དོན་འདི་ལ་ལྷག་པར་མོས་པའོ། །བདག་ཉིད་དང་སངས་རྒྱས་ཀྱི་མདུན་དུ་ཚིག་ཙམ་གྱིས་ཀྱང་བསྒོམས་ལ་ཞེས་བྱ་བ་ནི་
བདག་ཉིད་དམ་རང་གི་དེ་བཞིན་གཤེགས་པ་དེ་མདུན་དུ་བསྒོམས་པའམ། རང་ཉིད་དེ་བཞིན་གཤེགས་པར་བསྒོམས་ནས་བཟླས་ན་མྱུར་བར་དངོས་གྲུབ་ཏུ་འགྱུར་རོ། །གང་ཞིག་དེ་བཞིན་གཤེགས་པ་རྣམ་པར་སེམས་རྩེ་གཅིག་པར་མི་ནུས་པ་དེ་ནི་ཚིག་ཙམ་གྱིས་ཀྱང་བདག་ཉིད་དེ་
བཞིན་གཤེགས་པར་བསྒོམས་པའམ་མདུན་དུ་བྱས་ལ། ཅི་དགར་བྱེད་ཅིང་ཞེས་བྱ་བ་ནི་སྟན་མི་འདྲ་བ་དང་། བཀྲེས་པ་མེད་པ་དང་། སྐོམ་པ་མེད་པ་དང་། སྐྱིགས་བུ་དང་། སྒྲེགས་པ་ལ་སོགས་པ་དང་། ཉེས་པར་མི་འགྱུར་རོ་ཞེས་བསྟན་པའི་ཕྱིར་རོ། །རྡོ་རྗེའི་ཚིག་གིས་ལེན་

བརྒྱ་རྩ་བརྒྱད་བཟླས་ནས། མྱུར་དུ་དངོས་གྲུབ་ཏུ་འགྱུར་ཞེས་བྱ་བ་ནི་བརྒྱ་རྩ་བརྒྱད་ནི་བརྒྱ་ལས་བརྒྱད་ལྷག་པའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པའི་རྣལ་འབྱོར་པས་རང་ལ་བྱིན་གྱིས་བརླབས་པ་ལ་སོགས་པ་བྱས་
ནས། དེ་བཞིན་དུ་བདུག་པ་ལ་སོགས་པའི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཞལ་ཡས་ཁང་དང་གདན་ཇི་ལྟ་བ་བཞིན་དུ་སྤྲུལ་ལ། རང་གི་གདན་ལ་སྔ་མ་བཞིན་དུ་ཕྱག་རྒྱ་ཆེན་པོས་འདུག་སྟེ། རང་གི་དེ་བཞིན་གཤེགས་པའི་མདུན་དུ་ཡོངས་སུ་
བརྟགས་ནས་རྣལ་འབྱོར་གྱི་གནས་ལ་བཛྲ་དྷཱ་ཏུ་ཞེས་བརྗོད་ཅིང་སྤྲུལ་ལ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ་ཕྱིའི་མཆོད་པ་རྣམ་པ་ལྔ་དང་། སྒེག་མོ་ལ་སོགས་པའི་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་དག་ཅིང་བདེ་བ་མ་ལ་སོགས་པ་མཆོད་
པ་རྣམ་པ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། གཡོན་པའི་ཁུ་ཚུར་གྱིས་ཆོས་གོས་འཛིན་པའི་ཚུལ་ཅན་གྱིས་དེ་བཞིན་གཤེགས་པའི་རྡོ་རྗེ་བླངས་ལ། ལག་པ་གཡས་པས་བགྲང་ཕྲེང་སྙིང་གར་བཟུང་ནས་བཟླས་པའི་དོན་གྱི་དེ་བཞིན་གཤེགས་པ་ཐམས་ཅད་ཀྱི་
བདག་ཉིད་དུ་བསྒོམས་ནས་བརྒྱ་རྩ་བརྒྱད་དམ་སྟོང་རྩ་བརྒྱད་ཟློས་ཤིང་དེ་བཞིན་གཤེགས་པ་མདུན་དུ་བསྒོམ་པར་བྱའོ། །ཆོ་ག་འདི་ནི་དེའི་གཟུགས་བརྙན་ལ་གུས་པས་གསོལ་བ་འདེབས་པར་འཇུག་པའམ། ལྟ་བའམ་ཐུན་བཞི་རུ་བཟླས་ན་རིང་པོ་མི་ཐོགས་ཞེས་བྱའོ། །ལྷག་
མ་ནི་ཕྱིས་འཆད་པར་འགྱུར་བས་ཤེས་པར་བྱའོ། །རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའམ། དེ་བཞིན་གཤེགས་པའི་རིགས་རྣམས་ནི་རང་ཉིད་ཀྱི་གཡོན་པའི་ཁུ་ཚུར་གྱིས་དང་པོའི་རྡོ་རྗེ་བླངས་ལ། ལག་པ་གཡས་པས་བགྲང་ཕྲེང་བགྲང་
ཞིང་བཟླས་པར་བྱའོ། །ཁྱད་པར་འདི་ཡིན་ཏེ། འདི་ལྟར་དེའི་རྣལ་འབྱོར་པས་སྒེག་མོ་ལ་སོགས་པའི་མཆོད་པ་རྣམ་པ་བཞིས་བདག་ཉིད་མཆོད་པར་བྱའོ། །དེ་ལྟར་ཟླ་བ་བཞི་བསྙེན་པ་བྱས་ནས། མཚན་ཐོག་ཐག་བསྒྲུབས་ན་དེའི་རྗེས་ལ་ལས་ཀྱི་དངོས་གྲུབ་འགྲུབ་པར་

འགྱུར་རོ། །དེ་ལ་དེའི་ལས་ནི་འདི་ཡིན་ཏེ། །སངས་རྒྱས་རྗེས་སུ་དྲན་འགྲུབ་ན། །སངས་རྒྱས་ཉིད་དུ་མྱུར་དུ་འགྱུར། །སེམས་དཔའི་རྡོ་རྗེ་མ་གྲུབ་ན། །ཕྱག་རྒྱ་ཀུན་གྱི་བདག་པོར་འགྱུར། །རྡོ་རྗེ་རིན་ཆེན་མའི་ཕྱག་རྒྱས། །དེའི་ནི་རྡོ་རྗེ་ཀུན་
དབང་འགྱུར། །ཆོས་ཀྱི་རྡོ་རྗེ་མ་གྲུབ་ན། །སངས་རྒྱས་ཆོས་ནི་འཛིན་པར་འགྱུར། །ལས་ཀྱི་རྡོ་རྗེ་མའི་ཕྱག་རྒྱས། །རྡོ་རྗེ་ལས་ནི་བྱེད་པར་འགྱུར། །སེམས་དཔའི་ཕྱག་རྒྱ་བཅིངས་པ་ཡིས། །རྡོ་རྗེ་སེམས་དཔའ་འགྲུབ་པར་འགྱུར། །རྡོ་རྗེ་འདྲེན་པའི་ཆོ་ག་ཡིས། །རྡོ་རྗེ་
འཛིན་པ་སྤྱན་འདྲེན་འགྱུར། །རྡོ་རྗེ་འདོད་པའི་ཕྱག་རྒྱ་ཡིས། །སངས་རྒྱས་ཐམས་ཅད་རྗེས་མཉེས་བྱེད། །རྡོ་རྗེ་ལེགས་པའི་ཆོ་ག་ཡིས། །སངས་རྒྱས་ཐམས་ཅད་དགྱེས་པར་བྱེད། །རིན་ཆེན་ཕྱག་རྒྱའི་ཆོ་ག་ཡིས། །སངས་རྒྱས་དབང་བསྐུར་སྦྱིན་པར་བྱེད། །རྡོ་རྗེ་གཟི་
བརྗིད་ཆོ་ག་ཡིས། །རྡོ་རྗེ་གཟི་བརྗིད་མྱུར་དུ་འགྲུབ། །རྡོ་རྗེ་དཔལ་འཛིན་བསྟེན་པས་ན། །རེ་བ་རྣམས་ནི་ཡོངས་སུ་སྐོང་། །རྡོ་རྗེ་བཞད་པའི་ཆོ་ག་ཡིས། །སངས་རྒྱས་ཀུན་དང་མཉམ་པར་བཞད། །རྡོ་རྗེ་ཆོས་ཀྱི་ཆོ་ག་ཡིས། །རྡོ་རྗེ་ཆོས་ནི་འཛིན་པར་འགྱུར། །རྡོ་རྗེ་རྣོན་པོའི་
ཆོ་ག་ཡིས། །སངས་རྒྱས་ཀུན་གྱི་ཤེས་རབ་མཆོག །རྡོ་རྗེ་འཁོར་ལོ་འཛིན་བསྟེན་ནས། །ཆོས་ཀྱི་འཁོར་ལོ་བསྐོར་བར་འགྱུར། །རྡོ་རྗེ་གསུངས་པའི་ཆོ་ག་ཡིས། །སངས་རྒྱས་གསུང་གི་དངོས་གྲུབ་ཐོབ། །རྡོ་རྗེ་ལས་མཆོག་བསྒྲུབས་པས་ན། །རྡོ་རྗེའི་ལས་
སུ་མྱུར་དུ་འགྲུབ། །རྡོ་རྗེ་གོ་ཆ་བསྐོན་པས་ན། །རྡོ་རྗེ་སྐུ་ནི་ཐོབ་པར་འགྱུར། །རྡོ་རྗེ་གནོད་སྦྱིན་བསྒྲུབས་པས་ན