Luận tạng Tây Tạng (Tengyur) — Tập 58

ཕྱིས་གཟུངས་ཀྱི་དཀྱིལ་
འཁོར་ལས་བཤད་པ་དེའམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། བཛྲ་རཏྣ་བིམྦ་ཀུ་རུ་ཞེས་ཟློས་ཤིང་། དེས་རས་ལ་བྲིས་ནས་རྡོ་རྗེ་རིན་ཆེན་དང་ལྷན་ཅིག་བདག་ཉིད་ཐ་མི་དད་པས་རིན་ཆེན་ཆར་འབེབས་སམ། དེའི་རིགས་ནོར་བུའི་མཆོད་པའི་རང་བཞིན་དུ་བསྒོམ་པར་བྱའོ། །དེ་ནས་སྔ་མ་
བཞིན་དུ་བསྒྲུབ་པ་བྱས་ན་རིན་ཆེན་ཆར་འབེབས་མ་དེའི་རིགས་ཀྱི་ངོ་བོའི་ལས་ཀྱི་བདག་པོར་འགྱུར་རོ། །གསེར་རམ་ཡང་ན་དངུལ་ཡང་རུང་། །རྡོ་རྗེ་རིན་ཆེན་བཅང་གྱུར་ཏམ། །ཞེས་བྱ་བ་ལ་སོགས་པ་ནི་བཟོ་བོ་མཁས་པས་གསེར་ལ་སོགས་པ་ལས་བྱས་པའི་རྡོ་རྗེ་རྩེ་ལྔ་པས་མཚན་པའི་ཡིད་བཞིན་
གྱི་ནོར་བུ་རིན་པོ་ཆེ་བྱས་ཏེ། དེ་ནས་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ་ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པ་དང་། དེའི་རིགས་ཀྱི་ཕྱག་རྒྱ་ཆེན་པོ་
བཅིངས་པ་དེ་དང་། ཨོཾ་བཛྲ་རཏྣ་ཧྲྀ་ད་ཡ་མ་བྷཱ་ར་ཎི་ཧཱུཾ། ཞེས་བྱ་བའི་སྙིང་པོ་འདིས་རིན་པོ་ཆེ་དེ་བླང་བར་བྱའོ། །རང་གི་སྙིང་གའི་ཟླ་བ་ལ་རིན་པོ་ཆེ་དེ་དེ་བཞིན་དུ་བསམས་ནས་བསྒོམ་པར་བྱའོ། །དེ་ནས་སྔ་མ་བཞིན་དུ་བསྒྲུབ་པ་བྱས་ན་དོན་ཐམས་ཅད་གྲུབ་པས་དབང་བསྐུར་བ་དང་། དེའི་རིགས་ཀྱི་

དབང་བསྐུར་བས་བཅོམ་ལྡན་འདས་དབང་བསྐུར་བར་འགྱུར་རོ། །རྡོ་རྗེ་རིན་ཆེན་བླ་ན་མེད། །གསེར་རམ་རིན་ཆེན་གཞན་ལས་བྱ། །ཞེས་བྱ་བ་ལ་སོགས་པ་ནི་དེ་བཞིན་དུ་གསེར་ལ་སོགས་པ་ལས་བྱས་པའི་རྡོ་རྗེ་རིན་པོ་ཆེ་བྱས་ལ། དོན་ཐམས་ཅད་གྲུབ་པའི་དཀྱིལ་འཁོར་
ཆེན་པོ་ལས་བཤད་པའི་རིན་ཆེན་ལྟ་བའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། དེ་དང་ཨོཾ་བཛྲ་རཏྣ་ཨ་བྷི་ཥེ་ཀ་མ་ཧཱ་སརྦྦ་པྲ་དྷ་ཞེས་བྱ་བའི་སྙིང་པོ་འདིས་རིན་པོ་ཆེ་བླང་བར་བྱའོ། །དེ་ནས་
ཕྱག་རྒྱ་དེ་ཉིད་དཔྲལ་བའི་བར་དུ་འཇོག་ཅིང་དབང་བསྐུར་བའི་གནས་སུ་ཟླ་བའི་དཀྱིལ་འཁོར་བསམས་ཏེ། བསྒོམས་ན་དེ་ནས་སྔ་མ་བཞིན་དུ་བསྒྲུབས་ན་ནོར་ཆེན་པོའི་རྒྱལ་པོར་འགྱུར་རོ། །གསེར་རམ་རིན་ཆེན་གཞན་དག་གིས། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་དོན་ཐམས་ཅད་གྲུབ་
པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་དེའམ་དེའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་བཅིངས་ཏེ། ཨོཾ་བཛྲ་རཏྣ་ཝ་ཙཱ་ཡ་སྟེ། ཞེས་བྱ་བས་ནི་རིན་པོ་ཆེ་བསྐྱེད་དེ། རང་གི་ཁར་བཅུག་ནས་བསྒོམ་
པར་བྱའོ། །དེ་ནས་སྔ་མ་བཞིན་དུ་བསྒྲུབ་པ་བྱས་ཏེ་བསྒོམས་ན་ཚིག་ལ་དབང་བར་འགྱུར་རོ། །གསེར་རམ་རིན་ཆེན་གཞན་དག་གིས། །ཞེས་བྱ་བ་ལ་སོགས་པ་ནི་དེ་བཞིན་དུ་བཟོ་བོ་མཁས་པས་རྡོ་རྗེ་རིན་པོ་ཆེ་བྱས་ལ། དེ་ནས་སྔ་མ་བཞིན་དུ་རིན་ཆེན་ཆར་འབེབས་སམ། དེའི་རིགས་ཀྱི་རྣལ་
འབྱོར་བྱས་ཏེ། ཕྱིས་གཟུངས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། ཨོཾ་བཛྲ་རཏྣ་གརྦྷ་མ་ཧཱ་ཀརྨྨ་པ་ཏེ། ཞེས་བྱ་བའི་སྙིང་པོ་འདིས་ཕྱག་རྒྱ་དེ་བསྐྱེད་ལ་ལས་ཀྱི་ཕྱག་རྒྱས་གཟུགས་ཏེ། གཙུག་ཏོར་གྱི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་
བསམས་ནས་བསྒོམ་པར་བྱའོ། །དེ་ནས་སྔ་མ་བཞིན་དུ་བསྒྲུབས་ན་ལས་རྣམས་ཀུན་གྱི་བདག་པོ་རིན་ཆེན་ཆར་འབེབས་ཀྱི་ཏིང་ངེ་འཛིན་ཐོབ་པའམ། དེའི་རིགས་ཀྱི་ཏིང་ངེ་འཛིན་ཐོབ་པར་འགྱུར་རོ། །དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་ཤེས་བསྟན་པའི་དུས་ཕྱིས་སོ། །ནོར་བུའི་

རིགས་ཀྱི་གཟུངས་ཀྱི་དཀྱིལ་འཁོར་གྱི་དམ་ཚིག་གི་ཕྱག་རྒྱ་རྣམས་ནི་གཟུངས་ཀྱི་ཕྱག་རྒྱ་སྟེ། གསང་བའི་ཡེ་ཤེས་ལ་ཡང་དག་པར་བསྐོར་བའི་བསྒོམ་པར་ངེས་པ་དེ་བསླབ་ཅིང་བསྟན་པའོ། །ཕྱག་རྒྱ་ཆེན་པོ་བསྒོམས་ནས་ནི། །རྡོ་རྗེ་ནོར་བུ་ཆེ་བཅིངས་ལ། །ཞེས་བྱ་བ་ནི་ནོར་བུའི་རིགས་ཀྱི་གཟུངས་ཀྱི་
དཀྱིལ་འཁོར་ལས་བཤད་པའི་སེམས་མ་རྡོ་རྗེ་མའི་གནས་ཀྱི་རྡོ་རྗེ་ནོར་བུ་ཆེན་མོའི་དམ་ཚིག་གི་ཕྱག་རྒྱ་དེ་འདིར་བཅིངས་ལ། དེས་ནོར་བུ་བུད་མེད་ཀྱི་བུ་གར་དེ་བཞིན་དུ་ཞུགས་ཏེ། རྡོ་རྗེ་ནོར་བུ་ཆེན་མོ་ཡིས། །ནོར་བུ་དེ་ནི་དེའི་ནོར་བུ་སྟེ། སྒྲུབ་པ་པོའི་མཚན་མའི་ནོར་བུ་དེའི་རིག་པའི་ལྷ་མོའི་མཚན་
མར་ཡིད་ཀྱིས་གཞུག་ཅིང་ཕྱག་རྒྱ་ཆེན་པོ་བསྒོམས་ན་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་
བཤད་པ་དེའམ། དེའི་རིགས་ཀྱི་ཕྱག་རྒྱ་བཅིངས་ཏེ། དེ་ནས་སྟན་གཅིག་ལ་རང་གི་གཟུགས་སྤྲུལ་ལ་བསྡུ་བ་སྔོན་དུ་འགྲོ་བ་དང་། ཕྱག་རྒྱ་བཞིས་རྒྱས་བཏབ་སྟེ། རྡོ་རྗེ་རིན་པོ་ཆེ་མྱུ་གུས་དབང་བསྐུར་བའི་རིན་པོ་ཆེ་སྒེག་མོ་ལ་སོགས་པ་རྣམས་ཀྱིས་ཡང་དག་པར་མཆོད་ནས་ཕྱག་བྱས་ཏེ། རྡོ་རྗེ་
རིན་པོ་ཆེ་དམ་ཚིག་གི་ཕྱག་རྒྱ་བཅིངས་ནས། ཨོཾ་མ་ཧཱ་སིདྡྷཿཞེས་བྱ་བ་ཟློས་ཤིང་། དེ་ནས་ལྷན་ཅིག་ཏུ་མཉམ་པར་སྦྱོར་བ་བསྒོམས་ནས་ཇི་སྲིད་ཉིན་རེ་ཞིང་ཐུན་བཞིའི་སྦྱོར་བས་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བྱའོ། །དེ་ནས་མཚན་ཐོག་ཐག་བསྒོམ་པ་ན་དེའི་རྗེས་ལ་དེ་འོངས་
པ་དང་ལྷན་ཅིག་མཉམ་པར་སྦྱོར་བ་བྱས་ནས་དེའི་ལུས་ལ་ཞུགས་པར་བྱའོ། །ཡང་དེ་ནས་དོན་ཐམས་ཅད་གྲུབ་པ་དེ་དང་འདྲ་བར་འགྱུར་རོ། །དམ་ཚིག་མཆོག་ནི་རང་གི་ལྷའི་རྣལ་འབྱོར་རོ། །ནོར་བུ་ནི་རང་གི་མཚན་མའོ། །བཅུ་པ་ནི་བཞག་པའོ། །དེ་སྐད་དུ་ཡང་། བཅུ་པས་བཞག་ལ་ཞེས་
སུ་བརྗོད། །ཅེས་གསུངས་སོ། །གང་དུ་གཞག་ཅེ་ན། བུད་མེད་བུ་གར་ཞེས་བྱ་བ་སྨོས་ཏེ། རང་གི་རིག་པའི་ལྷ་མོའི་མཚན་མར་རོ། །དམ་ཚིག་མཆོག་ནི་རང་གི་དམ་ཚིག་ཕྱག་རྒྱའོ། །བཅིང་བ་ནི་ལྷན་ཅིག་ཏུ་གྱུར་པའོ། །དབང་བསྐུར་བའི་དངོས་གྲུབ་ཏུ་འགྱུར་བ་ནི་དབང་བསྐུར་

བའི་མཚན་མ་ཐོབ་པའོ། །ཐམས་ཅད་ནི་རིན་ཆེན་ལྟ་བའི་རིགས་ལ་སོགས་པ་ཐམས་ཅད་དོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ལྟ་བའམ། དེའི་རིགས་དེ་བཞིན་གཤེགས་པ་ཐམས་ཅད་ཀྱིས་དབང་
བསྐུར་བའི་ཕྲེང་བ་ལ་སོགས་པའི་རྣལ་འབྱོར་བྱས་ལ། དེ་ནས་གཟུངས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་སྤྱན་ནས་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ནས་ཕྱིས་སྟན་གཅིག་ལ་རང་གི་གཟུགས་སྤྲུལ་ལ་བསྡུ་བ་ལ་སོགས་པ་སྔོན་དུ་འགྲོ་བའི་ཆོ་ག་ཐམས་
ཅད་རྗེས་སུ་སྤྱད་ལ། ཨོཾ་མ་ཧཱ་ས་མ་ཡ་ཨ་བྷི་ཥེ་ཀ་སིདྡྷིཿཞེས་བྱ་བ་ཟློས་ཤིང་། གཟུངས་ཀྱི་དཀྱིལ་འཁོར་ལས་བཤད་པའི་རང་གི་དམ་ཚིག་གི་ཕྱག་རྒྱ་བཅིངས་ཏེ། དེ་དང་ལྷན་ཅིག་ཏུ་མཉམ་པར་སྦྱོར་བས་དེ་བཞིན་དུ་བསྒོམ་པར་བྱའོ། །དེ་ནས་མཚན་ཐོག་ཐག་བྱས་པ་དང་། དེའི་རྗེས་ལ་
དེ་འོངས་པ་དང་། དེ་དང་ལྷན་ཅིག་མཉམ་པར་སྦྱོར་བ་བྱས་ཏེ། དེའི་ལུས་ལ་འཇུག་པར་བྱའོ། །དེ་ནས་རིན་ཆེན་སྤྱན་ལ་སོགས་པ་དང་འདྲ་བར་འགྱུར་རོ། །རྡོ་རྗེ་ནོར་བུ་ཆེ་བཅིངས་ལ། །ཞེས་བྱ་བ་ནི་སྔ་མ་བཞིན་ནོ། །ཆོས་ཀྱི་ཕྱག་རྒྱ་བསྒོམ་ཞེས་བྱ་བ་ནི་རིན་ཆེན་པདྨའམ། དེའི་
རིགས་ཀྱི་ཕྱག་རྒྱ་ཆེན་པོ་བསྒོམས་པའོ། །དེའི་ནོར་བུ་ཞེས་བྱ་བ་ནི་རང་གི་མཚན་མའོ། །དེ་ནི་བུད་མེད་བུ་གར་བཅུག །ཅེས་བྱ་བ་ནི་སྔ་མ་བཞིན་ནོ། །བླ་ན་མེད་པའི་དངོས་གྲུབ་འགྱུར། །ཞེས་བྱ་བ་ནི་རིན་ཆེན་པདྨའམ། དེའི་རིགས་ཀྱི་ཕྱག་རྒྱ་ཆེན་པོ་འགྲུབ་པ་སྟེ། བླ་ན་མེད་པའི་དངོས་གྲུབ་
འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་
ལས་ཀྱི་ཕྱག་རྒྱ་བཅིངས་ཏེ། གདན་གཅིག་ལ་རང་གི་གཟུགས་སྤྲུལ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་བཅིངས་ལ། ཨོཾ་དྷརྨྨ་སིདྡྷིཿཞེས་ཟློས་ཤིང་། རང་གི་གཟུགས་དང་ལྷན་ཅིག་མཉམ་པར་སྦྱོར་བ་བསྒོམ་མོ། །

དེ་ནས་དེ་བཞིན་དུ་མཚན་ཐོག་ཐག་བསྒོམས་ལ། དེའི་རྗེས་ལ་དེ་འོངས་པ་དང་། དེ་དང་ལྷན་ཅིག་ཏུ་མཉམ་པར་སྦྱོར་བ་བྱས་ནས་དེའི་ལུས་ལ་འཇུག་པར་བྱའོ། །དེ་ནས་དེ་རིན་པོ་ཆེ་པདྨ་ལ་སོགས་པ་དང་འདྲ་བར་འགྱུར་རོ། ལས་ཀྱི་ཕྱག་རྒྱའི་ནོར་བུ་ནི་ལས་ཀྱི་ཕྱག་རྒྱའི་ནོར་བུ་སྟེ། རིན་
ཆེན་ཆར་འབེབས་དང་། དེའི་རིགས་ཀྱི་ཕྱག་རྒྱ་ཆེན་པོའོ། །ནོར་བུ་ནི་ཇི་སྐད་བཤད་པའི་ནོར་བུའི་མཚན་མ་དེ་བཅིངས་པའོ། །བུད་མེད་བུ་གར་རིན་ཆེན་ཆར་འབེབས་ཀྱི་ལས་ཀྱི་ཕྱག་རྒྱ་བཅིངས་པའམ། དེའི་རིགས་ཀྱི་ཕྱག་རྒྱ་བཅིངས་ན་དངོས་གྲུབ་ཏུ་འགྱུར་རོ། །ལས་ཀུན་ནི་རིན་ཆེན་
ཆར་འབེབས་ལ་སོགས་པའི་ལས་ཐམས་ཅད་ཀྱི་མཚན་མ་བསྐྱེད་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཆར་འབེབས་དང་དེའི་རིགས་ཀྱི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་
པའི་རིན་ཆེན་ཆར་འབེབས་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། སྟོང་གསུམ་པའི་སངས་རྒྱས་ཀྱི་ཞིང་དང་མཉམ་པའི་ཟླ་བའི་དཀྱིལ་འཁོར་ལ་རང་གི་གཟུགས་སྤྲུལ་ལ་ཆོ་ག་ཐམས་ཅད་རྗེས་སུ་སྤྱད་དེ། གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ལས་
ཀྱི་ཕྱག་རྒྱ་བཅིངས་ཏེ། ཨོཾ་ཀརྨྨ་སིདྡྷིཿཞེས་ཟློས་ཤིང་ལྷན་ཅིག་མཉམ་པར་སྦྱོར་བར་བསྒོམས་ལ། དེ་ནས་བསྒྲུབ་པ་བྱའོ། །དེའི་རྗེས་ལ་ལྷ་མོ་དེ་དང་མཉམ་པར་སྦྱོར་བ་བྱས་ནས་དེའི་ལུས་ལ་འཇུག་པར་བྱའོ། །དེ་ནས་སྒྲུབ་པ་པོ་དེ་རིན་ཆེན་ཆར་འབེབས་ལ་སོགས་པ་དང་འདྲ་བར་
འགྱུར་རོ། །རིག་པའི་བུད་མེད་ཐམས་ཅད་ཀྱི་བདག་པོ་དང་འདོད་པ་ཐམས་ཅད་ཀྱི་དབང་ཕྱུག་ཏུ་འགྱུར་རོ་ཞེས་གསུངས་སོ། །དེ་ལྟར་ནོར་བུའི་ཡེ་ཤེས་བསྟན་ནས། ད་ནི་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་དོན་ཐམས་ཅད་གྲུབ་པའི་དཀྱིལ་
འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ལ། སྒྲུབ་པ་དང་དཀྱིལ་འཁོར་ལ་སོགས་པའི་གཟུངས་རྣམས་སྤྱན་དྲངས་ཏེ། ཕྱག་རྒྱ་བཞིས་རྒྱས་བཏབ་པོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བའི་སྒྲས་ནི་དེ་མ་ཐག་

པ་སྟེ་དངོས་གྲུབ་ཀྱི་ཡེ་ཤེས་བསླབ་པའི་རྗེས་ཐོགས་ལའོ། །དཀྱིལ་འཁོར་འདིར་ཞེས་བྱ་བ་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་དུ་ཕྱག་རྒྱ་ཆེན་པོ་བཅིངས་པ་འབྱུང་སྟེ། སྐུ་སྟོན་པར་བྱེད་པའི་ཕྱག་རྒྱ་རྣམས་འཆིང་བའི་མཚན་ཉིད་ཡིན་ནོ་ཞེས་བྱ་བའི་ཐ་ཚིག་
གོ། །རིན་ཆེན་རྡོ་རྗེ་མྱུ་གུ་བཅིང་། །གུང་མོ་སྲིན་ལག་མཐེ་ཆུང་རྣམས། །སོར་མོ་བརྐྱང་བ་བྱས་ནས་ནི། །སྤྱི་བོར་བཞག་པ་གྲུབ་མཆོག་སྦྱིན། །ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་པོ་ཆེ་མྱུ་གུའི་གུང་མོ་དང་། སྲིན་ལག་དང་། མཐེའུ་
ཆུང་རྣམས་སོ་སོར་བརྐྱང་སྟེ། སྤྱི་བོར་གཞག་པ་ནི་རྣམ་པར་སྣང་མཛད་ཀྱི་ཕྱག་རྒྱ་ཆེན་པོའོ། །རིག་པ་ནི་འདི་ཡིན་ཏེ། ཨོཾ་བཛྲ་རཏྣ་དྷཱུ་པེ་ཧཱུཾ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣམ་པར་སྣང་མཛད་ཀྱི་རྣལ་འབྱོར་བྱས་ལ་ཕྱིས་ཕྱག་རྒྱ་བཅིང་བ་དང་རིག་པ་འདིས་རྣམ་པར་སྣང་
མཛད་རབ་ཏུ་བསྒྲུབས་ན་རྣམ་པར་སྣང་མཛད་དང་འདྲ་བར་འགྱུར་རོ། །རྡོ་རྗེ་བསྡམས་པ་བྱས་ནས་ཀྱང་། །མཛུབ་མོ་གཉིས་མདུད་མཐེབ་གཉིས་དང་། །སྲིན་ལག་རྡོ་རྗེ་བསྒྱུར་ནས་ནི། །མཛོད་སྤུར་བཞག་པ་དབང་བསྐུར་ཐོབ། །ཅེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་གཉིས་ཕན་ཚུན་
ལྕགས་སྒྲོག་ཏུ་སྦྲེལ་ལ། མཐེ་བོ་དང་སྲིན་ལག་གཉིས་ལུ་གུ་རྒྱུད་ལྟར་བྱས་ནས་ཡོངས་སུ་བསྒྱུར་ཏེ་མཛོད་སྤུར་གཞག་པ་ནི་ཕྱག་ན་རྡོ་རྗེའི་ཕྱག་རྒྱའོ། །རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་བྱས་ལ་འདི་ཉིད་བཅིངས་ཏེ། ཨོཾ་ཨ་བྷི་ཥེ་ཀ་མ་ལེ་ཨ་བྷི་ཥིཉྩ་ས་མ་ཡ་ཧཱུཾ།
ཞེས་ཟློས་ཤིང་རྡོ་རྗེ་སེམས་དཔའ་བདག་ཉིད་ཇི་ལྟ་བ་བཞིན་དུ་བསྒོམས་ནས་བསྒྲུབས་ན་དེ་ནས་རྡོ་རྗེ་སེམས་དཔའ་དང་འདྲ་བར་འགྲུབ་པར་འགྱུར་རོ། །རྡོ་རྗེ་རིན་ཆེན་ཚུལ་བྱས་ལ། །དེ་ཉིད་ཡོངས་སུ་བསྒྱུར་ནས་ནི། །མཛུབ་མོ་གཉིས་རྩེ་གདོང་སྤྲད་པ། །འདི་ནི་དབང་བསྐུར་ཐམས་ཅད་བྱེད། །
ཅེས་བྱ་བ་ནི་བཤད་མ་ཐག་པའི་ཕྱག་ན་རྡོ་རྗེའི་ཕྱག་རྒྱ་ཉིད་ལས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བྱས་ཏེ། མཛོད་སྤུར་གཞག་པ་འདི་ནི་རྡོ་རྗེ་སྙིང་པོའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སྙིང་པོའི་རྣལ་

འབྱོར་བྱས་ལ་འདི་ཉིད་བཅིངས་ཏེ། ཨོཾ་བཛྲ་རཏྣ་ཨ་བྷི་ཥེ་ཀ་ཧཱུཾ་ཞེས་བརྗོད་ཅིང་སྔ་མ་བཞིན་དུ་རྡོ་རྗེ་སྙིང་པོར་བདག་ཉིད་བསྒོམས་ནས་བསྒྲུབ་པར་བྱའོ། །དེ་ནས་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ཉིད་མཐེབ་གཉིས་མཛུབ་གཉིས་ནི། །ཆོས་ཀྱི་རྡོ་རྗེའི་ཚུལ་དུ་ཡང་། །བཅིངས་ནས་དཔྲལ་
བར་བཞག་ནས་ནི། །ཆོས་སྤྱན་གྱི་ནི་དབང་བསྐུར་སྦྱིན། །ཞེས་བྱ་བ་ལ་བཤད་མ་ཐག་པ་ཉིད་ཀྱི་རྡོ་རྗེ་སྙིང་པོའི་ཕྱག་རྒྱ་ལས་མཐེ་བོ་དང་མཛུབ་མོ་གཉིས་པདྨར་བྱས་པ་དཔྲལ་བར་གཞག་པ་འདི་ནི་རྡོ་རྗེ་སྤྱན་གྱིའོ། །རྡོ་རྗེ་དབྱིངས་ལས་བཤད་པའི་རྡོ་རྗེ་སྤྱན་གྱི་རྣལ་འབྱོར་བྱས་ལ། འདི་
ཉིད་བཅིངས་ཏེ། ཨོཾ་བཛྲ་དྷརྨ་ཨ་བྷི་ཥིཉྩ་མཱཾ་ཞེས་བརྗོད་ཅིང་བདག་ཉིད་རྡོ་རྗེ་སྤྱན་དུ་བསྒོམས་ནས་སྔ་མ་བཞིན་དུ་བསྒྲུབ་པར་བྱའོ། །དེ་ནས་རྡོ་རྗེ་སྤྱན་དང་འདྲ་བར་འགྲུབ་པར་འགྱུར་རོ། །རིན་ཆེན་འབྱུང་བའི་ཕྱག་རྒྱ་ནི། །རྡོ་རྗེ་དབྱིངས་སྐྱེས་དམ་ཚིག་ཀྱང་། །བསྒྱུར་བས་དཔྲལ་བ་ཉིད་དུ་
ཡང་། །བཞག་ན་དབང་ནི་བསྐུར་བར་འགྱུར། །ཞེས་བྱ་བ་ནི་སེམས་མ་རྡོ་རྗེ་མ་བསྟན་པར་བྱས་ཏེ། གུང་མོ་གཉིས་བསྒྲེང་བ་ནི་རྒྱབ་ཏུ་མཛུབ་མོ་གཉིས་བསྐུམ་ལ་རྡོ་རྗེའི་རྣམ་པ་ལྟར་གཞག་པ་འདི་ནི་ལས་ཀྱི་རྡོ་རྗེ་སྟེ་སྣ་ཚོགས་ཀྱིའོ། །རྡོ་རྗེ་དབྱིངས་ལས་བཤད་པའི་རྡོ་རྗེ་སྣ་ཚོགས་ཀྱི་རྣལ་འབྱོར་
བྱས་ཏེ། འདི་ཉིད་བཅིངས་ལ། ཨོཾ་སརྦྦ་ཨ་བྷི་ཥེ་ཀ་པཱུ་ཛ་ས་མ་ཡེ་ཧཱུཾ། ཞེས་ཟློས་ཤིང་བདག་ཉིད་རྡོ་རྗེ་སྣ་ཚོགས་སུ་བསྒོམས་ལ་སྔ་མ་བཞིན་དུ་བསྒྲུབ་བོ། །དེ་ནས་རྡོ་རྗེ་སྣ་ཚོགས་དང་འདྲ་བར་འགྲུབ་པར་འགྱུར་རོ། །རིན་ཆེན་འབྱུང་བའི་ཕྱག་རྒྱ་ནི། །རྡོ་རྗེ་དབྱིངས་སྐྱེས་དམ་ཚིག་ཀྱང་། །
བཅིངས་ནས་རིན་ཆེན་གནས་དག་གི །དཔྲལ་བར་བཞག་ན་དབང་བསྐུར་འགྱུར། །ཞེས་བྱ་བ་ལ་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་མ་བཅིངས་ཏེ། དཔྲལ་བའི་ཕྱོགས་སུ་གཞག་པ་འདི་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་གཉིས་པའོ། །འདིའི་རིག་པ་
ནི་འདི་ཡིན་ཏེ། ཨོཾ་ཏྲཱཾ་ཞེས་བྱ་བ་འདིས་དཀྱིལ་འཁོར་དུ་བཅོམ་ལྡན་འདས་ལ་རྒྱས་གདབ་པར་བྱའོ། །མཐེབ་གཉིས་ཕན་ཚུན་བསྣོལ་ནས་ནི། །མཛུབ་མོ་གཉིས་ཀྱི་རྩེ་མོ་ཡང་། །ནོར་བུ་འདྲ་བར་དགུག་པ་ནི། །རྡོ་རྗེ་ནོར་བུ་ཆེན་པོ་ཐོབ། །ཅེས་བྱ་བ་ནི་ལག་པ་གཉིས་ཀྱི་མཐེ་བོང་

གཉིས་ཕན་ཚུན་བསྣོལ་ནས་མཛུབ་མོ་གཉིས་ནོར་བུར་བྱས་པ་ནི་སེམས་མ་རྡོ་རྗེ་མའི་གནས་ཀྱི་ནོར་བུར་བྱས་པའི་ཕྱག་རྒྱ་དང་། དཔྲལ་བའི་གནས་སུ་བཞག་པ་འདི་ནི་རྡོ་རྗེ་རིན་ཆེན་མའི་གནས་ཀྱི་ནོར་བུ་ཕྲེང་བ་མའི་ཕྱག་རྒྱའོ། །རྡོ་རྗེ་བསྡམས་པ་བྱས་ནས་ནི། །གུང་
མོ་ནོར་བུ་འདྲར་བྱས་ལ། །མཛུབ་མོ་སྲིན་ལག་གཉིས་པདྨོ། །ཁ་དབྱེ་འདྲ་བར་བྱས་པས་འགྲུབ། །ཅེས་བྱ་བ་ནི་རྡོ་རྗེ་བསྡམས་པ་ལས་གུང་མོ་གཉིས་ནོར་བུར་བྱས་ལ་མཛུབ་མོ་དང་སྲིན་ལག་གཉིས་སོ་སོར་པདྨ་ལྟར་བྱས་པ་ནི་ཆོས་ཀྱི་རྡོ་རྗེ་མའི་གནས་ཀྱི་ནོར་བུ་རིན་ཆེན་པདྨའིའོ། །གུང་
མོ་གཉིས་ནི་ནོར་བུ་བཅིང་། །སོར་མོ་ཐམས་ཅད་བསྒྲེང་བ་རྣམས། །ནོར་བུ་ཉིད་དུ་བསྒོམས་ན་ནི། །འཁོར་རྣམས་མཆོག་དང་ལྡན་པར་འགྱུར། །ཞེས་བྱ་བ་ནི་ལག་པ་གཉིས་གཅིག་ཏུ་སྦྱར་ཏེ། གུང་མོ་གཉིས་རིན་པོ་ཆེར་བྱས་ནས་སོར་མོ་ལྷག་མ་རྣམས་བརྐྱང་བའི་ཕྱག་རྒྱ་སྤྱི་བོར་
བཞག་སྟེ། སོར་མོ་ཐམས་ཅད་ཀྱི་རྩེ་མོ་རིན་པོ་ཆེའི་གཟུགས་སུ་བསྒོམས་པ་འདི་ནི་རྡོ་རྗེ་ལས་མའི་གནས་ཀྱི་རྡོ་རྗེ་རིན་ཆེན་ཆར་འབེབས་མའིའོ། །རྡོ་རྗེ་རིན་ཆེན་ཚུལ་བཅིངས་ནས། །གུང་མོ་མཐེ་བོ་སྦྱར་བ་དང་། །སྲིན་ལག་མཐེ་ཆུང་བསྙམས་པ་རྣམས། །ཁར་བཞག་ལྕེ་སྟེང་ནོར་རབ་
སྟེར། །ཞེས་བྱ་བ་ནི་ལག་པ་གཉིས་བརྐྱང་ནས་གུང་མོ་གཉིས་དང་མཐེ་བོང་གཉིས་རིན་པོ་ཆེ་ལྟར་བྱས་ལ། །སྲིན་ལག་དང་མཐེའུ་ཆུང་གཉིས་བརྐྱང་སྟེ། ལྕེ་བཞིན་དུ་ཁར་གཞག་པ་འདི་ནི་དོན་ཐམས་ཅད་གྲུབ་པའི་གནས་ཀྱི་དོན་ཀུན་གྲུབ་པ་རབ་ཏུ་སྟེར་བ་མའིའོ། །དེ་ལས་མཛུབ་
གཉིས་རྡོ་རྗེར་བྱ། །ཞེས་བྱ་བ་ནི་ཀུན་གྲུབ་པར་རབ་ཏུ་སྟེར་བའི་ཕྱག་རྒྱ་ཉིད་ལས་མཛུབ་མོ་གཉིས་མྱུ་གུ་ལྟར་བྱས་ནས་སྙིང་གར་གཞག་པ་ནི་ནོར་བུ་མཚན་མའི་གནས་ཀྱི་ནོར་བུ་རིན་ཆེན་འདྲེན་མའིའོ། །དེ་གཉིས་དེ་བཞིན་ལྕགས་ཀྱུར་བྱ། །ཞེས་བྱ་བ་ནི་ནོར་བུ་རིན་ཆེན་འདྲེན་པའི་ཕྱག་རྒྱ་
ཉིད་ལས་མཛུབ་མོ་གཉིས་ལྕགས་ཀྱུ་ལྟར་བྱས་པ་འདི་ནི་རིན་ཆེན་རྒྱལ་པོའི་གནས་ཀྱི་རིན་ཆེན་དམ་ཚིག་ལྕགས་ཀྱུ་མའིའོ། །མཛུབ་མོས་མཛུབ་མོ་དྲང་བར་བྱ། །ཞེས་བྱ་བ་ནི་དོན་ཀུན་གྲུབ་པ་སྟེར་བའི་ཕྱག་རྒྱ་ཉིད་ལས་གཡས་པས་གཡོན་པའི་མཛུབ་མོ་འདྲེན་པའི་ཕྱག་རྒྱ་ཉིད་

ལས་མཛུབ་མོ་གཉིས་ལྕགས་ཀྱུ་ལྟ་བུའི་ཚུལ་དུ་བྱེད་པ་འདི་ནི་ནོར་བུ་ཆགས་པའི་གནས་ཀྱི་ནོར་བུ་ཆགས་པའི་དམ་ཚིག་མའིའོ། །དེ་ཉིད་མགོ་ལ་རབ་སྦྱིན་པའོ། །ཞེས་བྱ་བ་ནི་ནོར་བུ་ཆགས་པའི་དམ་ཚིག་གི་ཕྱག་རྒྱ་ཉིད་ཀྱིས་མཛུབ་མོ་དང་མཐེ་བོ་གཉིས་ལེགས་སོ་སྦྱིན་པའི་
ཚུལ་དུ་བྱེད་པ་འདི་ནི་ནོར་བུ་ལེགས་པའི་གནས་ཀྱི་ནོར་བུ་ལེགས་པ་མའིའོ། །གུང་མོ་གཉིས་ནི་ནོར་བུར་བཅིང་། །མཛུབ་གཉིས་ངོས་ལ་བཀུག་པ་ཡི། །ཞེས་བྱ་བ་ནི་ལག་པ་གཉིས་བརྐྱང་ལ་གུང་མོ་གཉིས་ནོར་བུར་བྱས་ནས་མཛུབ་མོ་གཉིས་ལྕགས་ཀྱུ་ལྟར་བྱས་ཏེ། མཐེ་བོང་གི་
རྩེ་མོ་ལ་སྦྱར་ནས་བཞག་པ་འདི་ནི་རིན་ཆེན་ལྟ་བའི་གནས་སུ་རྡོ་རྗེ་ནོར་བུ་རིན་ཆེན་སྤྱན་མའིའོ། །སྲིན་ལག་ངོས་གཉིས་མདུད་པ་ལ། །མཐེ་བོང་གཉིས་ནི་བཀབ་པ་སྟེ། །ཞེས་བྱ་བ་ནི་རྡོ་རྗེ་ནོར་བུ་རིན་ཆེན་སྤྱན་གྱི་ཕྱག་རྒྱ་ཉིད་ལས་སྲིན་ལག་གཉིས་ནང་དུ་བཅུག་ནས་ཕན་ཚུན་མདུད་ལ་
མཛུབ་མོ་གཉིས་ལྕགས་ཀྱུར་བྱས་པ་མཐེ་བོ་གཉིས་ཀྱིས་བཀབ་སྟེ། དཔྲལ་བའི་གནས་སུ་འཇོག་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་ཕྲེང་བའི་གནས་སུ་རྡོ་རྗེ་རིན་ཆེན་ཕྲེང་བ་མའིའོ། །དེ་ཉིད་རྡོ་རྗེ་ཉི་མ་བསྐོར། །ཞེས་བྱ་བ་ནི་རྡོ་རྗེ་རིན་ཆེན་ཕྲེང་བ་མའི་ཕྱག་རྒྱ་ཉིད་
སྙིང་གར་ཉི་མའི་ཚུལ་གྱིས་བསྐོར་བ་འདི་ནི་ནོར་བུ་ཉི་མའི་གནས་ཀྱི་ནོར་བུ་རིན་ཆེན་ཉི་མའིའོ། །དཔུང་པ་སྤྱི་བོར་བརྐྱང་བར་བྱ། །ཞེས་བྱ་བ་ནི་རིན་ཆེན་ཕྲེང་བ་མའི་ཕྱག་རྒྱ་ཉིད་ལས་དཔུང་པ་བརྐྱང་ནས་སྤྱི་བོར་གཞག་པ་འདི་ནི་ནོར་བུ་དང་ལས་ཀྱི་གནས་སུ་ནོར་བུའི་རྒྱལ་མཚན་གྱི་རྩེ་མོའི་དཔུང་
རྒྱན་གྱི་ནོར་བུ་ཟླ་བའི་རྒྱལ་མཚན་མཆོག་མའི་འོ། །བཞད་པའི་ཚུལ་དུ་ཞེས་བྱ་བ་ནི་རྡོ་རྗེ་རིན་ཆེན་ཕྲེང་བ་མའི་ཕྱག་རྒྱ་ཉིད་ལས་བཞད་པའི་ཚུལ་དུ་ཡོངས་སུ་བསྐོར་བ་ནི་ནོར་བུ་རིན་ཆེན་བཞད་པའི་གནས་སུ་ནོར་བུ་རིན་ཆེན་བཞད་པ་མའིའོ། །རྡོ་རྗེ་བསྡམས་པ་བྱས་ནས་ཀྱང་། །མཛུབ་མོ་
སྲིན་ལག་གྱེན་དུ་བསྒྲེང་། །དེ་དག་པདྨ་འདྲ་བར་བྱས། །གུང་མོ་གཉིས་ནི་ནོར་བུར་བྱས། །རྡོ་རྗེ་བསྡམས་པ་ལས་མཛུབ་མོ་གཉིས་དང་སྲིན་ལག་གཉིས་པདྨ་འདྲ་བར་བྱས་ལ་གུང་མོ་གཉིས་ནོར་བུར་བྱས་པ་འདི་ནི་རིན་ཆེན་པདྨའི་གནས་སུ་ནོར་བུ་ཏིང་ངེ་འཛིན་པདྨའི་འོ། །དེ་ལས་ཐ་མ་

རབ་སྦྱིན་བྱ། །ཞེས་བྱ་བ་ནི་ནོར་བུའི་ཏིང་ངེ་འཛིན་པདྨའི་ཕྱག་རྒྱ་ཉིད་ལའང་ཐ་མ་སྦྱིན་པ་གཏོང་བའི་ཚུལ་དུ་བྱེད་པ་འདི་ནི་གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོའི་གནས་ཀྱི་ནོར་བུ་རིན་ཆེན་གཏོང་བའི་དམ་ཚིག་མའི་འོ། །རྡོ་རྗེ་རལ་གྲི་སྦྱར་བ་དང་། །ཞེས་བྱ་བ་ནི་ནོར་བུའི་ཏིང་
ངེ་འཛིན་པདྨའི་ཕྱག་རྒྱ་ཉིད་ལས་རལ་གྲིས་གཅོད་པའི་ཚུལ་དུ་བྱེད་པ་འདི་ནི་རིན་ཆེན་རྣོན་པོའི་གནས་སུ་རིན་ཆེན་དམ་ཚིག་རལ་གྲི་མའི་འོ། །རྡོ་རྗེ་འཁོར་ལོའི་ཚུལ་དུ་བྱ། །ཞེས་བྱ་བ་ནི་ནོར་བུ་ཏིང་ངེ་འཛིན་པདྨའི་ཕྱག་རྒྱ་ཉིད་ལས་མགལ་མེའི་འཁོར་ལོ་བཞིན་བསྐོར་བ་འདི་ནི་ནོར་བུ་འཁོར་ལོ་
མའི་གནས་སུ་ནོར་བུ་དམ་ཚིག་གི་འཁོར་ལོ་མའི་འོ། །དེ་ཉིད་ཁ་ནས་དབྱུང་བར་བྱ། །ཞེས་བྱ་བ་ནི་ནོར་བུ་ཏིང་ངེ་འཛིན་པདྨའི་ཕྱག་རྒྱ་ཉིད་ལས་ཚིག་འབྱིན་པའི་ཚུལ་གྱིས་ཁ་གྱེན་དུ་འདྲེན་པ་ནི་ནོར་བུ་གསུང་བའི་གནས་ཀྱི་ནོར་བུ་གསུང་མཆོག་མའི་འོ། །རྡོ་རྗེ་རིན་ཆེན་མྱུ་གུར་བཅིང་། །སོར་མོ་
ཐམས་ཅད་བརྐྱང་བ་དང་། །དེ་དག་སྤྱི་བོར་བཞག་པ་ནི། །རིན་ཆེན་ཆར་གྱི་ཆར་འབེབས་སོ། །ཞེས་བྱ་བ་ནི་རྡོ་རྗེ་སེམས་མ་བཅིངས་ལ། རྡོ་རྗེ་རིན་ཆེན་གྱི་མཐེ་བོང་དང་། མཛུབ་མོ་གཉིས་ཁ་སྦྱར་བ་འདི་ནི་རྡོ་རྗེ་རིན་པོ་ཆེའི་མྱུ་གུ་སྟེ། དེ་བཅིངས་པ་ལས་མཐེ་བོང་དང་། གུང་མོ་དང་། སྲིན་ལག་
དང་། མཐེའུ་ཆུང་རྣམས་བརྐྱང་བའི་ཕྱག་རྒྱ་སྤྱི་བོར་བཞག་ལ་སོར་མོའི་རྩེ་མོ་ནོར་བུའི་གཟུགས་སུ་བསྒོམས་ནས་རིན་པོ་ཆེའི་ཆར་འབེབས་པའི་ལྷ་མོ་བསམས་པ་འདི་ནི་རིན་ཆེན་ཆར་འབེབས་ཀྱི་གནས་སུ་རིན་ཆེན་ཆར་རྒྱུན་མའི་ཕྱག་རྒྱའོ། །དེ་ཉིད་འཁོར་ལོའི་ཚུལ་དུ་ནི། །ཞེས་བྱ་བ་ནི་རིན་
ཆེན་ཆར་རྒྱུན་མའི་ཕྱག་རྒྱ་ཉིད་མགལ་མེའི་འཁོར་ལོ་བཞིན་དུ་གར་གྱི་ཚུལ་བསྟན་པ་འདི་ནི་ནོར་བུ་མཆོད་པའི་གནས་སུ་ནོར་བུ་མཆོད་པའི་དམ་ཚིག་མའིའོ། །སྙིང་གར་རིན་ཆེན་གཉིས་བྱས་པ། །ཞེས་བྱ་བ་ནི་རིན་ཆེན་ཆར་རྒྱུན་མའི་ཕྱག་རྒྱ་ཉིད་ཁ་གཉིས་སུ་བྱས་པ་འདི་ནི་ནོར་བུ་ཆོ་ག་མའི་
གནས་སུ་ནོར་བུ་དམ་ཚིག་བསྲུང་བ་མའིའོ། །ནོར་བུ་འཛིན་རྩེ་མཆེ་བ་ཡིན། །ཞེས་བྱ་བ་འདི་ནི་རིན་ཆེན་ཆར་འབེབས་མའི་ཕྱག་རྒྱ་ལས་མཛུབ་མོ་གཉིས་བསྐུམ་ལ་མཆེ་བ་བཞིན་དུ་ཁར་འཇོག་པ་འདི་ནི་ནོར་བུ་གནོད་སྦྱིན་གྱི་གནས་སུ་ནོར་བུ་མཆེ་བ་གཙིགས་མའི་འོ། །དབུས་སུ་མཉམ་པ་

ཁུ་ཚུར་རོ། །ཞེས་བྱ་བ་ནི་རིན་ཆེན་ཆར་རྒྱུན་མའི་ཕྱག་རྒྱའི་དབུས་སུ་མཛུབ་མོ་གཉིས་དང་། རང་གི་མཐེ་བོ་གཉིས་ཁ་སྦྱར་བར་བྱས་པ་འདི་ནི་ནོར་བུའི་ཁུ་ཚུར་གྱི་གནས་སུ་ནོར་བུ་དམ་ཚིག་ཁུ་ཚུར་འཛིན་མའི་ཕྱག་རྒྱ་ཆེན་པོའོ། །རིན་ཆེན་སྒེག་མོ་ལ་སོགས་པ་ནས་རིན་ཆེན་འབེབས་པའི་
མཐར་ཐུག་པ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་འདིར་ཕྱག་རྒྱ་ཆེན་པོར་འགྱུར་རོ། །དེ་ནས་ཞེས་བྱ་བ་ནི་ཕྱག་རྒྱ་ཆེན་པོ་ལས་བཤད་པའི་རྗེས་ཐོགས་ཉིད་ལ་དམ་ཚིག་གི་ཕྱག་རྒྱའི་ཡེ་ཤེས་ཏེ། དམ་ཚིག་གི་ཕྱག་རྒྱ་འཆིང་
བའི་མཚན་ཉིད་ངེས་པར་བསླབ་ཅིང་བསྟན་པར་བྱའོ། །ཕྱག་རྒྱ་ཆེན་པོ་དེ་དག་ཉིད། །སྙིམ་སྦྱར་བྱས་ཏེ་བཅིངས་ནས་ནི། །ཞེས་བྱ་བ་ལ་ཐལ་མོ་སྦྱར་ལ་མཐེ་བོ་གཉིས་དང་གུང་མོ་གཉིས་བརྐྱང་མཛུབ་མོ་གཉིས་བཀུག་ནས་རིན་པོ་ཆེ་ལྟ་བུར་བྱས་པའི་ཕྱག་རྒྱ་དཔྲལ་བར་གཞག་པ་འདི་ནི་རྣམ་པར་
སྣང་མཛད་ཀྱི་ཕྱག་རྒྱའོ། །ཐལ་མོ་སྦྱར་བ་མཐེ་བོ་གཉིས་བསྣོལ་ལ་མཛུབ་མོ་གཉིས་ནོར་བུར་བྱས་པ་འདི་ནི་རྡོ་རྗེ་ནོར་བུ་ཆེན་པོའི་དམ་ཚིག་གི་ཕྱག་རྒྱ་ཡང་འདི་ཡིན་ནོ། །སྙིམ་པ་སྦྱར་ཏེ་མཛུབ་མོ་གཉིས་དང་མཐེ་བོ་གཉིས་ཀྱི་གདོང་སྦྱར་ནས་གུང་མོ་གཉིས་ནོར་བུ་འདྲ་བར་བྱས་པ་ཕྱག་རྒྱ་དཔྲལ་བར་
གཞག་པ་འདི་ནི་རིན་ཆེན་ཕྲེང་བ་མའི་འོ། །སྙིམ་པ་སྦྱར་ལ་གུང་མོ་ནོར་བུར་བྱས་ནས་མཛུབ་མོ་དང་སྲིན་ལག་བརྐྱང་སྟེ་པདྨ་འདྲ་བར་བྱས་པ་འདི་ནི་ནོར་བུའི་རིན་ཆེན་པདྨའིའོ། །སྙིམ་པ་སྦྱར་ལ་གུང་མོ་གཉིས་རིན་པོ་ཆེ་འདྲ་བར་བྱས་ནས་སོར་མོ་ལྷག་མ་བརྐྱང་བའི་ཕྱག་རྒྱ་སྤྱི་གཙུག་ཏུ་བཞག་ལ་སོར་མོ་
ཐམས་ཅད་ཀྱི་རྩེ་མོ་ནོར་བུའི་གཟུགས་སུ་བསྒོམ་པ་འདི་ནི་རྡོ་རྗེ་རིན་ཆེན་ཆར་འབེབས་མའི་འོ། །སྙིམ་པ་སྦྱར་ལ་གུང་མོ་གཉིས་དང་མཐེ་བོ་གཉིས་རིན་པོ་ཆེ་ལྟར་བྱས་ཏེ། སྲིན་ལག་གཉིས་དང་མཐེ་ཆུང་གཉིས་བརྐྱང་སྟེ། ལྕེ་བཞིན་དུ་ཁར་གཞག་པ་འདི་ནི་དོན་ཀུན་གྲུབ་པར་རབ་སྦྱིན་མའི་འོ། །དོན་
ཀུན་གྲུབ་པར་རབ་སྦྱིན་མའི་ཕྱག་རྒྱ་ཉིད་ལས་མཛུབ་མོ་གཉིས་མྱུ་གུ་ལྟར་བྱས་ཏེ། སྙིང་གར་གཞག་པ་འདི་ནི་ནོར་བུ་རིན་ཆེན་འགུགས་མའི་འོ། །ནོར་བུ་རིན་ཆེན་འགུགས་པ་མའི་ཕྱག་རྒྱ་ཉིད་ལས་མཛུབ་མོ་གཉིས་ལྕགས་ཀྱུར་བྱས་པ་འདི་ནི་རིན་ཆེན་དམ་ཚིག་ལྕགས་ཀྱུ་མའི་འོ། །དོན་

ཀུན་གྲུབ་པར་རབ་ཏུ་སྟེར་མའི་ཕྱག་རྒྱ་ལས་གཡས་པའི་མཛུབ་མོས་གཡོན་པའི་མཛུབ་མོ་བཟུང་སྟེ་འཕེན་པའི་ཚུལ་དུ་བྱེད་པ་འདི་ནི་ནོར་བུ་ཆགས་པའི་དམ་ཚིག་མའི་འོ། །ནོར་བུ་ཆགས་པའི་དམ་ཚིག་གི་ཕྱག་རྒྱ་ལས་མཛུབ་མོ་དང་མཐེ་བོ་ལེགས་སོ་སྦྱིན་པའི་ཚུལ་དུ་བྱེད་པ་
འདི་ནི་ནོར་བུ་ལེགས་པ་མའིའོ། །སྙིམ་པ་སྦྱར་ལ་གུང་མོ་གཉིས་ནོར་བུར་བྱས་ནས་མཐེ་བོའི་ལོགས་སུ་བྱས་ནས་གཞག་པ་འདི་ནི་རྡོ་རྗེ་ནོར་བུ་རིན་ཆེན་ལྟ་བའིའོ། །རྡོ་རྗེ་ནོར་བུ་རིན་ཆེན་ལྟ་བའི་ཕྱག་རྒྱ་ཉིད་ལས་སྲིན་ལག་དང་། མཐེའུ་ཆུང་གཉིས་ནང་དུ་བཅུག་ནས་ཕན་ཚུན་ནང་དུ་ཁ་སྦྱར་
ཏེ་བཅིངས་ལ་མཛུབ་མོའི་ལྕགས་ཀྱུ་གཉིས་མཐེ་བོ་གཉིས་ཀྱིས་བཀན་ཏེ་དཔྲལ་བར་གཞག་པ་འདི་ནི་རྡོ་རྗེ་རིན་ཆེན་ཕྲེང་བ་མའི་འོ། །རྡོ་རྗེ་རིན་ཆེན་ཕྲེང་བ་མའི་ཕྱག་རྒྱ་ཉིད་སྙིང་གར་ཉི་མའི་ཚུལ་གྱིས་བསྐོར་བ་ནི་ནོར་བུ་ཉི་མའིའོ། །རྡོ་རྗེ་ནོར་བུ་ཕྲེང་བ་མའི་ཕྱག་རྒྱ་ཉིད་ལས་དཔུང་པ་བརྐྱང་ནས་སྤྱི་བོར་
གཞག་པ་འདི་ནི་ནོར་བུ་ཟླ་བ་རྒྱལ་མཚན་གྱི་རྩེ་མོའི་འོ། །ནོར་བུ་རིན་ཆེན་ཕྲེང་བ་མའི་ཕྱག་རྒྱ་ཉིད་བཞད་པའི་ཚུལ་གྱིས་ཡོངས་སུ་བསྐོར་བ་འདི་ནི་ནོར་བུ་བཞད་པ་མའིའོ། །སྙིམ་པ་སྦྱར་ནས་མཛུབ་མོ་གཉིས་དང་སྲིན་ལག་གཉིས་པདྨར་བྱས་ལ་གུང་མོ་གཉིས་རིན་པོ་ཆེར་བྱེད་པ་འདི་ནི་ནོར་བུ་
ཏིང་ངེ་འཛིན་པདྨའི་འོ། །ནོར་བུ་ཏིང་ངེ་འཛིན་གྱི་ཕྱག་རྒྱ་ཉིད་ལས་མཐེའུ་ཆུང་སྦྱིན་པ་གཏོང་བའི་ཚུལ་དུ་བྱེད་པ་འདི་ནི་གཏོང་བ་དམ་ཚིག་མའིའོ། །ནོར་བུ་ཏིང་ངེ་འཛིན་པདྨའི་ཕྱག་རྒྱ་ཉིད་ལས་རལ་གྲིས་གཅོད་པའི་ཚུལ་དུ་སྦྱོར་བ་འདི་ནི་ནོར་བུ་དམ་ཚིག་གི་རལ་གྲི་མའི་འོ། །ནོར་བུ་ཏིང་ངེ་འཛིན་
པདྨའི་ཕྱག་རྒྱ་ཉིད་མགལ་མེའི་འཁོར་ལོ་བཞིན་དུ་བསྐོར་བ་འདི་ནི་ནོར་བུ་དམ་ཚིག་གི་འཁོར་ལོ་མའིའོ། །ནོར་བུའི་ཏིང་ངེ་འཛིན་པདྨའི་ཕྱག་རྒྱ་ཉིད་ཚིག་འབྱིན་པའི་ཚུལ་གྱིས་ཁ་ནས་འདྲེན་པར་བྱེད་པ། འདི་ནི་ནོར་བུ་གསུང་བ་མཆོག་མའི་འོ། །སྙིམ་པ་སྦྱར་ལ་གུང་མོ་གཉིས་མྱུ་གུ་ལྟར་བརྟན་པར་
བྱས་ལ་མཐེ་བོ་གཉིས་གཤིབས་ཏེ། མཛུབ་མོའི་རྩེ་མོ་དང་སྦྱར་ནས་རིན་པོ་ཆེར་བྱས་ལ་མཐེ་བོ་དང་གུང་མོ་དང་། སྲིན་ལག་དང་། མཐེའུ་ཆུང་གི་སོར་མོ་རྣམས་བརྐྱང་སྟེ་སོར་མོ་ཐམས་ཅད་ཀྱི་རྩེ་མོ་ནོར་བུའི་གཟུགས་སུ་བསམས་ཏེ། རིན་པོ་ཆེ་ཆར་འབེབས་མའི་ལྷ་མོ་བསྒོམ་པ་འདི་ནི་རིན་ཆེན་

ཆར་རྒྱུན་མའིའོ། །རིན་ཆེན་ཆར་རྒྱུན་མའི་ཕྱག་རྒྱ་ཉིད་མགལ་མེའི་འཁོར་ལོ་བཞིན་དུ་གར་གྱི་སྦྱོར་བས་སྟོན་པ་ནི་ནོར་བུ་མཆོད་པའི་དམ་ཚིག་མའིའོ། །རིན་ཆེན་ཆར་རྒྱུན་མའི་ཕྱག་རྒྱ་ཉིད་གཉིས་སུ་བྱས་ནས་སྙིང་གར་འཛིན་པ་ནི་ནོར་བུ་དམ་ཚིག་བསྲུང་བ་མའིའོ། །རིན་ཆེན་ཆར་རྒྱུན་མའི་ཕྱག་
རྒྱ་ལས་མཛུབ་མོ་གཉིས་བསྐུམ་སྟེ་མཆེ་བ་བཞིན་དུ་ཁར་འཇོག་པ་འདི་ནི་ནོར་བུ་མཆེ་བ་གཙིགས་པ་མའིའོ། །རིན་ཆེན་ཆར་རྒྱུན་མའི་ཕྱག་རྒྱའི་དབུས་སུ་མཛུབ་མོ་གཉིས་དང་རང་གི་མཐེ་བོ་གཉིས་ཀྱི་རྩེ་མོར་སྦྱར་བར་བྱས་པ་འདི་ནི་ནོར་བུ་དམ་ཚིག་གི་ཁུ་ཚུར་གྱི་གཟུངས་ཀྱི་དམ་ཚིག་གི་ཕྱག་རྒྱའོ། །
རིན་ཆེན་སྒེག་མོ་ལ་སོགས་པ་ནས་རིན་ཆེན་འདེབས་པའི་གཟུངས་ཀྱི་མཐར་ཐུག་པ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་གཟུང་བར་བྱའོ། །མདོར་བསྡུས་གསང་བའི་གསང་བ་སྟེ། །དངོས་གྲུབ་བཞི་འགྱུར་སྦྱིན་པར་བྱ། །ཞེས་བྱ་བ་ནི་
ནོར་བུའི་རིགས་ཀྱི་གསང་བའི་དཀྱིལ་འཁོར་ནི་གསང་བ་སྟེ། དམ་ཚིག་གི་ཕྱག་རྒྱ་ནི་གསང་བའི་གསང་བའོ། །མདོར་བསྡུས་ནས་ཕྱི་རོལ་གྱི་བྱ་བ་ལ་མི་ལྟོས་པ་བསྒོམ་པ་གཙོ་བོར་གྱུར་པ་ཡིན་ནོ་ཞེས་བྱ་བར་དགོངས་སོ། །སྒྲུབ་པ་པོ་མངོན་པར་འདོད་པའི་འབྲས་བུ་སྟེར་བས་ན་དངོས་གྲུབ་སྟེར་
བའོ། །གལ་ཏེ་ཕྱག་རྒྱ་གཞན་ཟླ་བ་བཞིས་དངོས་གྲུབ་སྟེར་ན་འདི་ནི་ཟླ་བ་གཅིག་གིས་འགྱུར་རོ། །གཞན་ཞག་བཞིས་འགྲུབ་ན་འདི་ཞག་གཅིག་གིས་འགྲུབ་ཅེས་བྱ་བ་དེའི་ཕྱིར་དངོས་གྲུབ་བཞི་འགྱུར་སྦྱིན་པར་བྱེད་དེ། གསང་བའི་གསང་བ་དམ་ཚིག་གི་ཕྱག་རྒྱས་སོ། །དེ་ལྟར་རྡོ་རྗེ་གསང་
བ་བཞིན། །དུས་ཀུན་དུ་ནི་སྦྱོར་མི་བྱ། །ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་དུ་གསང་བའི་དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་དུས་ཀུན་དུ་བཅིང་བར་མི་བྱ་བ་དེ་བཞིན་དུ་འདིར་ཡང་གསང་བའི་གསང་བ་ཁུ་ཚུར་ལས་བྱུང་བའི་ལས་ཀྱི་ཕྱག་
རྒྱ་དུས་ཐམས་ཅད་དུ་བཅིང་བར་མི་བྱ་སྟེ། གསང་བའི་གསང་བ་དམ་ཚིག་གི་ཕྱག་རྒྱ་མི་བཅིང་ངོ་། །དགག་པ་དེས་དམ་ཚིག་གི་ཕྱག་རྒྱ་མེད་ན་དམ་ཚིག་གི་ཕྱག་རྒྱ་དེས་ལྷ་བསྒྲུབ་པར་མི་བྱའོ་ཞེས་སྔར་བསྟན་ཟིན་ཏོ། །དེ་ནས་ཞེས་བྱ་བ་ནི་དེའི་རྗེས་ལ་ཞེས་བྱ་བའི་དོན་ཏོ། །ཧཱུཾ་ནི་རྣམ་པར་སྣང་

མཛད་ཀྱི་ལྕགས་ཀྱུ་ལ་ཆོས་ཀྱི་ཕྱག་རྒྱར་བསམ་པར་བྱའོ། །ཏྲེ་ནི་དོན་ཀུན་གྲུབ་པ་སྦྱིན་པ་དང་། ནོར་བུ་རིན་ཆེན་འགུགས་མ་དང་། ནོར་བུ་དམ་ཚིག་གི་གཟུངས་ཀྱིའོ། །གྷེ་ནི་ནོར་བུའི་དམ་ཚིག་གི་རིན་ཆེན་ལྕགས་ཀྱུ་མའིའོ། །ཧྲེ་ནི་ནོར་བུ་ཆགས་པའི་དམ་ཚིག་མའིའོ། །སྭེ་ནི་
ནོར་བུ་ལེགས་པ་མའི་འོ། །ཀྱེ་ནི་རྡོ་རྗེ་ནོར་བུ་རིན་ཆེན་སྤྱན་དང་། རྡོ་རྗེ་རིན་ཆེན་ཕྲེང་བ་མ་དང་། ནོར་བུ་རིན་ཆེན་ཕྲེང་བའི་དབང་བསྐུར་བའི་གཟུངས་རྣམས་ཀྱིའོ། །ཁཾ་ནི་ནོར་བུ་རིན་ཆེན་ཉི་མའིའོ། །དྷྲེ་ནི་ནོར་བུ་ཟླ་བ་རྒྱལ་མཚན་གྱི་རྩེ་མོ་མའི་འོ། །ཧྱེ་ནི་ནོར་བུ་བཞད་པ་མའི་འོ། །དྲཻ་ནི་ནོར་བུ་རིན་ཆེན་
པདྨ་མོ་དང་། ནོར་བུ་རིན་ཆེན་གཏོང་བའི་དམ་ཚིག་མ་དང་། ནོར་བུ་ཏིང་ངེ་འཛིན་པདྨ་རྣམས་ཀྱིའོ། །དྱཻ་ནི་ནོར་བུ་དམ་ཚིག་རལ་གྲི་མའིའོ། །ཀཻ་ནི་ནོར་བུ་དམ་ཚིག་འཁོར་ལོ་མའིའོ། །བཻ་ནི་ནོར་བུ་གསུང་བ་མཆོག་མའིའོ། །ཀྲུ་ནི་ནོར་བུ་རིན་ཆེན་ཆར་འབེབས་མ་དང་། མཆོད་པ་ཆེན་མོའི་དམ་
ཚིག་མ་དང་། ནོར་བུ་རིན་ཆེན་ཆར་གྱི་རྒྱུན་མ་རྣམས་སོ། །རཻ་ནི་ནོར་བུ་དམ་ཚིག་བསྲུང་བའིའོ། །ཡྱ་ནི་ནོར་བུ་མཆེ་བ་གཙིགས་མའིའོ། །མཱི་ནི་ནོར་བུ་དམ་ཚིག་ཁུ་ཚུར་གྱི་གཟུངས་ཏེ། ལྕེ་རྣམས་ལ་བསམ་པར་བྱའོ། །རིན་ཆེན་སྒེག་མོ་ལ་སོགས་པ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
ལས་བཤད་པ་ཡིན་ནོ། །གསང་བ་གཟུངས་ཀྱི་དཀྱིལ་འཁོར་རོ། །མཆོག་ནི་དམ་པའོ། །གསང་བ་གསང་བའི་ཁུ་ཚུར་མའིའོ། །ནོར་བུའི་དམ་ཚིག་གི་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱ་དེ་རྣམས་ཁུ་ཚུར་གཉིས་སུ་བྱིན་ནས་ལས་ཀུན་བྱེད་པ་སྟེ་ལས་ཀྱི་ཕྱག་རྒྱ་ཞེས་བྱ་བའི་དོན་
ཏོ། །འདི་སྐད་སྟོན་པ་ཡིན་ཏེ། ནོར་བུའི་དམ་ཚིག་གི་ཁུ་ཚུར་གྱི་གཟུངས་ཀྱི་ཕྱག་རྒྱ་ཆེན་པོ་གཉིས་སུ་བྱས་ནས་རྡོ་རྗེ་དབྱིངས་ཀྱི་ཚུལ་གྱིས་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་གཟུངས་ཀྱི་མཐར་ཐུག་པ་རྣམས་ཀྱི་ལས་ཀྱི་ཕྱག་རྒྱ་བཅིང་བར་བྱའོ། །གཞན་ཡང་ནོར་བུའི་
དམ་ཚིག་གི་ཁུ་ཚུར་གྱི་གཟུངས་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་གཟུངས་ཀྱི་མཐར་ཐུག་པ་རྣམས་རྡོ་རྗེ་དབྱིངས་ཀྱི་ཚུལ་གྱིས་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་འདིར་རྡོ་རྗེ་དབྱིངས་ཀྱི་སྦྱོར་བས། གཡོན་པའི་རྡོ་རྗེ་མཛུབ་མོ་

ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་ཆེ། །སངས་རྒྱས་བྱང་ཆུབ་སྦྱིན་བྱེད་པའོ། །བསྒྱིངས་བཅས་གསོར་བ་གཉིས་ཀ་ཡིས་ནི་ནོར་བུ་རིན་ཆེན་འདྲེན་པ་དང་ནོར་བུ་དམ་ཚིག་གི་གཟུངས་ཀྱི་ལས་ཀྱི་ཕྱག་རྒྱའོ། །ལྕགས་ཀྱུ་འཛིན་ལྟར་གནས་པ་ནི་ནོར་བུ་
རིན་ཆེན་དམ་ཚིག་གི་ལྕགས་ཀྱུའོ། །མདའ་འཕང་བའི་ཚུལ་ནི་ནོར་བུ་ཆགས་པའི་དམ་ཚིག་མའིའོ། །ལེགས་སོ་སྦྱིན་པ་སྙིང་གར་གཞག་པ་ནི་ནོར་བུ་ལེགས་པ་མའིའོ། །དབང་བསྐུར་བའི་རིན་ཆེན་གཉིས་ནི་དོན་ཡོད་གྲུབ་པ་རབ་ཏུ་སྟེར་མ་དང་། རྡོ་རྗེ་ནོར་བུ་རིན་པོ་ཆེའི་སྤྱན་མ་དང་། རྡོ་རྗེ་རིན་
ཆེན་ཕྲེང་བ་མ་དང་། ནོར་བུ་རིན་ཆེན་ཕྲེང་བ་མ་རྣམས་ཀྱིའོ། །སྙིང་གར་ཉི་མ་བསྟན་པ་ནི་ནོར་བུ་རིན་ཆེན་ཉི་མའིའོ། །གཡོན་པ་ལ་ནི་གྲུ་མོ་གཟུགས་ནི་ནོར་བུ་ཟླ་བའི་རྒྱལ་མཚན་གྱི་རྩེ་མོ་མའིའོ། །དེ་བཞིན་ཁ་ཕྱོགས་བསྐོར་བར་བྱ་བ་ནི་ནོར་བུ་བཞད་པ་མའིའོ། །གཡས་པའི་ནི་གཡོན་པ་དབྱེ་བ་ནི་
ནོར་བུ་ཏིང་ངེ་འཛིན་པདྨ་དང་། ནོར་བུ་རིན་ཆེན་གཏོང་བའི་དམ་ཚིག་མ་དང་། ནོར་བུ་རིན་ཆེན་པདྨ་རྣམས་ཀྱིའོ། །སྙིང་གར་གཡོན་པ་རལ་གྲི་མདུང་ནི་ནོར་བུ་དམ་ཚིག་མའི་རལ་གྲི་མའིའོ། །མགལ་མེའི་འཁོར་ལོ་བསྐོར་བ་ནི་ནོར་བུ་དམ་ཚིག་གི་འཁོར་ལོ་མའིའོ། །ནོར་བུ་གཉིས་ཀ་ཁ་ནས་དབྱུང་
བ་ནི་ནོར་བུ་གསུང་བའི་མཆོག་མའིའོ། །རྡོ་རྗེ་གར་བསྐོར་བཀྲོལ་བ་ཡིས། །ཐལ་མོ་འགྲམ་པ་སྤྱི་བོར་གཞག་པ་ནི་རིན་ཆེན་ཆར་འབེབས་མ་དང་། མཆོད་པ་ཆེན་པོ་དམ་ཚིག་མ་དང་། ནོར་བུ་རིན་ཆེན་ཆར་འབེབས་ཀྱི་དམ་ཚིག་མ་རྣམས་ཀྱིའོ། །གོ་ཆ་ནི་ནོར་བུ་དམ་ཚིག་བསྲུང་མའིའོ། །
མཐེ་ཆུང་མཆེ་བ་ནི་རྡོ་རྗེ་ནོར་བུ་མཆེ་བ་གཙིགས་པ་མའིའོ། །ཁུ་ཚུར་གཉིས་ནི་མནན་པའོ་ནི་ནོར་བུ་དམ་ཚིག་གི་ཁུ་ཚུར་གྱི་གཟུངས་ཀྱི་ལས་ཀྱི་ཕྱག་རྒྱའོ། །རིན་ཆེན་འགྱིང་བའི་ཚུལ་གྱིས་ནི། །བསམ་པ་གཡོན་པས་མདུད་པར་བྱ་བ་ནི་རིན་ཆེན་སྒེག་མོའི་གཟུངས་ཀྱིའོ། །ཕྲེང་བ་བཅིང་དང་ནི་
རིན་ཆེན་ཕྲེང་བའི་གཟུངས་ཀྱིའོ། །ཁ་ནས་དབྱུང་བ་ནི་རིན་ཆེན་གླུ་མའི་གཟུངས་ཀྱིའོ། །རིན་ཆེན་གར་ནི་བསྐོར་བ་ཡིན་ནི་རིན་ཆེན་གར་མའི་གཟུངས་ཀྱིའོ། །རིན་ཆེན་ཁུ་ཚུར་ཚུལ་གྱིས་ནི། །བདུག་པ་ལ་སོགས་དེ་བཞིན་སྦྱིན། །སངས་རྒྱས་ཀུན་ལ་མཆོད་པ་ནི། །ཕྱག་རྒྱའི་མཆོད་པ་བྱེད་

པའོ། །མཛུབ་མོའི་ལྕགས་ཀྱུ་བཅིང་བ་ནི། །མཐེ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་ལ་མཛུབ་གཉིས་མདུད། །རྒྱབ་གཉིས་ཀྱང་ནི་བསྙམས་ཏེ་མནན། །རིན་པོ་ཆེ་ནི་ནོར་བུའི་རིགས་སོ། །གསང་བའི་ཕྱག་རྒྱ་ནི་གཟུངས་ཀྱི་ཕྱག་རྒྱ་སྟེ། དེའི་དཀྱིལ་འཁོར་གྱི་ཆོ་གའི་
བྱེ་བྲག་རྒྱས་པ་དེ་རྫོགས་པ་ནི་མཐར་ཐུག་པའོ། །ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་དམ་ཚིག་གི་ཕྱག་རྒྱ་གཙོ་བོར་གྱུར་པ་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར་བསྟན་ནས། ད་ནི་
ཆོས་ཀྱི་ཕྱག་རྒྱ་གཙོ་བོར་གྱུར་པའི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་གྱི་དོན་གྱི་ཕྱིར་དེ་ནས་ཡང་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་དེ་མ་ཐག་པ་སྟེ། དང་པོ་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལའོ། །འདིར་དང་པོར་སྦྱོར་བའི་
ཏིང་ངེ་འཛིན་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དང་པོར་སྦྱོར་བ་ལྟ་བུ་ཉིད་ཡིན་ནོ། །ཡང་ཞེས་བྱ་བ་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལ་ལྟོས་པས་ཡང་ཞེས་བྱ་བ་སྨོས་སོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་
ཐམས་ཅད་ཀྱི་དབང་བསྐུར་བ་ཞེས་བྱ་བ་ནི་ནོར་བུ་རིན་པོ་ཆེའི་རིགས་སོ། །དེའི་ཡེ་ཤེས་ནི་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་མཐར་ཐུག་པ་སྟེ། རང་བཞིན་གྱིས་ནི་འོད་གསལ་བ། །གདོད་ནས་དག་པ་མཁའ་དང་མཚུངས། །བྱང་ཆུབ་མེད་ཅིང་མངོན་རྟོགས་མེད། །བྱང་ཆུབ་ཚུལ་
འདི་བསྟན་པའོ། །ཞེས་བྱ་བར་ངེས་པའོ། །དེའི་དམ་ཚིག་ནི་བཅོམ་ལྡན་འདས་རྣམ་པར་སྣང་མཛད་ཀྱི་ནོར་བུ་རིན་ཆེན་གྱི་ནང་དུ་གཏོགས་པའི་ཆོས་ཀྱི་དཀྱིལ་འཁོར་རོ། །དེ་ལས་བྱུང་བའི་འཕགས་པ་ནམ་མཁའི་སྙིང་པོའི་ཐུགས་ཀའི་རྡོ་རྗེ་ནོར་བུ་རིན་པོ་ཆེ་གང་ཡིན་པ་དེ་ལས་བྱུང་བ་དེ་ལ་དེ་སྐད་ཅེས་
བྱའོ། །དེས་བྱིན་གྱིས་བརླབས་པ་ནི་དཀྱིལ་འཁོར་བསྐྱེད་པའི་ནུས་པ་དང་ལྡན་པའི་བྱ་བ་གང་གིས་དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་མིང་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས་རང་གི་བདག་ཉིད་ཀྱི་རིགས་དམ་པ་འདི་ཞེས་བྱ་བ་བློ་ལ་གནས་པ་གསུངས་

ཤིང་བཤད་པའོ། །དེ་ནས་ཕྱག་ན་རྡོ་རྗེས་དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་དང་། རྡོ་རྗེ་སྙིང་པོས་རིན་ཆེན་ལྟ་བའི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་དང་། རྡོ་རྗེ་སྤྱན་གྱིས་རིན་ཆེན་པདྨའི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་དང་། རྡོ་རྗེ་སྣ་ཚོགས་ཀྱིས་རིན་ཆེན་ཆར་
འབེབས་ཀྱི་ཆོས་ཀྱི་དཀྱིལ་འཁོར་སྤྲུལ་པའི་ཕྱིར་རང་གི་རིག་པ་དམ་པ་འདི་རྣམས་གསུངས་སོ། །དེ་ནས་བཅོམ་ལྡན་འདས་དོན་ཐམས་ཅད་གྲུབ་པས་རང་གི་སྙིང་གའི་རྡོ་རྗེ་རིན་པོ་ཆེ་ལས་ཆོས་ཀྱི་དཀྱིལ་འཁོར་སྤྲུལ་ནས། དེ་བཞིན་གཤེགས་པ་ཐམས་ཅད་ལ་སྔ་མ་བཞིན་ཡིན་ནོ་ཞེས་ཤེས་པར་བྱའོ། །
དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ནས། ཨོཾ་སརྦྦ་ཨ་བྷི་ཥེ་ཀ་ཛྙཱ་ན་ཧཱུཾ་ཞེས་བྱ་བའི་བར་གྱི་གཞུང་འདི་ཙམ་གྱིས་ནི་ནོར་བུ་ཆེན་པོའི་རིགས་ཀྱི་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་སྔ་མ་བཞིན་དུ་བསྡུ་བ་
དང་བྱིན་གྱིས་བརླབ་པ་ལ་སོགས་པ་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་
དུ་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཞེས་བྱ་བ་ལ་སོགས་པའི་གཞུང་གིས་སློབ་དཔོན་དང་སློབ་མ་འཇུག་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་
བྱ་བའི་སྒྲ་ནི་སྔ་མ་བཞིན་ནོ། །འདི་ཞེས་བྱ་བ་ནི་བློ་ལ་གནས་པའོ། །རང་གི་རིགས་ནི་ནོར་བུ་ཆེན་པོའི་རིགས་སོ། །ཡེ་ཤེས་ཀྱི་དཀྱིལ་འཁོར་ནི་ཆོས་ཀྱི་ཕྱག་རྒྱའི་དཀྱིལ་འཁོར་ཏེ་དེ་གསུངས་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པའི་དོན་བརྗོད་པ་སྟེ། སྔོན་དུ་བསྙེན་པའི་རྗེས་ཐོགས་ལའོ། །
འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ་ཕྱིས་ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་བཅིངས་

ཏེ། །སྔ་མ་བཞིན་དུ་སྣའི་རྩེ་མོར་འཆད་པར་འགྱུར་བའི་དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་ཆོ་གས་ཆོས་ཀྱི་འཁོར་ལོ་བསྒོམ་པར་བྱའོ། །དེ་ནས་ཆོས་ཀྱི་འཁོར་ལོ་ལས་བཤད་པའི་ཏིང་ངེ་འཛིན་རྣམ་པ་གསུམ་བསྒོམ་པའི་ཕྱིར་ཞེས་བྱ་
བས་ཞག་བདུན་ཆོས་ཀྱི་དཀྱིལ་འཁོར་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་གཏན་ཚིགས་སྟོན་པ་སྟེ། གང་གི་ཕྱིར་ཆོས་ཀྱི་དཀྱིལ་འཁོར་དུ་འཇུག་པ་མེད་ན་དེས་འདུལ་བའི་སེམས་ཅན་གྱི་ཁམས་རྣམས་ཀྱི་མངོན་པར་འདོད་པའི་དངོས་གྲུབ་ཏུ་མི་
འགྱུར་བ་དེ་ལྟ་བས་ན། དེ་ནས་རབ་ཏུ་བཤད་བྱ་བ། །ཡེ་ཤེས་དཀྱིལ་འཁོར་དམ་པ་སྟེ། །ཞེས་བྱའོ། །རྡོ་རྗེ་དབྱིངས་དང་འདྲ་བ་ལ། །ཞེས་བྱ་བ་ནི་སྤྲུལ་པའི་ཆོས་ཀྱི་དཀྱིལ་འཁོར་དང་འདྲ་བའོ། །རིན་ཆེན་ཡེ་ཤེས་ཞེས་བཤད་དོ། །ཞེས་བྱ་བ་ནི་བཤད་ཟིན་ཏོ། །དཀྱིལ་འཁོར་ཆེན་པོའི་ཚུལ་དུ་ནི། །
ཞེས་བྱ་བ་ལ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་དབྱིངས་སུའོ། །དཀྱིལ་འཁོར་ཐམས་ཅད་སྲད་བུ་བྲེ། །ཞེས་བྱ་བ་ནི་དེའི་ཕྱི་རོལ་དང་ནང་བཞིན་དུ་འདིའི་ཡང་ཕྱི་རོལ་དང་ནང་གི་དཀྱིལ་འཁོར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་ཇི་ལྟར་རྣམ་པར་སྣང་མཛད་ལ་སོགས་
པ་བྲིས་པ་དེ་བཞིན་དུ་འདིར་ཡང་བྲི་བར་བྱའོ་ཞེས་དེ་ལྟར་བསྟན་པའི་ཕྱིར། ཆོས་ཀྱི་དཀྱིལ་འཁོར་དམ་པ་སྟེ། །སྙིང་གའི་མཚན་མ་བྲི་བར་བྱ། །ཞེས་བྱ་བའོ། །འདི་ལྟར་རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་དུ་ཟླ་བའི་དཀྱིལ་འཁོར་གྱི་སྟེང་དུ། རྡོ་རྗེ་རྩེ་ལྔ་པ་དེའི་ལྟེ་བར་བཅོམ་ལྡན་འདས་རྣམ་
པར་སྣང་མཛད་ལ་སོགས་པ་ནས་བསྐལ་པ་བཟང་པོའི་མཐར་ཐུག་པ་རྡོ་རྗེ་སྐྱིལ་མོ་ཀྲུང་གིས་བཞུགས་པ། རང་གི་མཚན་མ་ནས་འབྲས་ཙམ་གྱི་སྙིང་གའི་ཕྱི་རོལ་དུ་བསྣམས་ནས་རྡོ་རྗེ་བསྡམས་པ་བཀན་ཏེ། སྐྱིལ་མོ་ཀྲུང་གི་སྟེང་དུ་གཞག་པ་དེ་བཞིན་དུ་འདིར་ཡང་བྲི་བར་བྱའོ། །དེ་ནས་དཀྱིལ་
འཁོར་འདིའི་ཡེ་ཤེས་ཀྱི་སྙིང་པོ་ནི་འདི་རྣམས་སོ་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཡེ་ཤེས་ཀྱི་སྙིང་པོ་ནི་འདི་དག་ཡིན་ཏེ། ཡེ་ཤེས་ཀྱི་སྙིང་པོ་དེ་སྟོན་པར་བྱེད་པའི་སྒྲའི་གཟུགས་སུ་བཞུགས་པ་དེ་དག་བསྒྲུབས་པས་ལས་ཐམས་ཅད་སྒྲུབ་པར་བྱེད་པའི་སྔགས་ཡིན་ནོ་ཞེས་བྱ་བའི་དོན་ཏོ། །

འདི་སྐད་སྟོན་པ་ཡིན་ཏེ། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་ཛྙཱན་ཨུཏྟ་མ་ཧཱུཾ། ཞེས་བྱ་བའི་སྔགས་འདིས་རྣམ་པར་སྣང་མཛད་ལ་སོགས་པ་ནམ་མཁའི་ཕྱོགས་ནས་ཕབ་སྟེ་གཟུགས་བརྙན་ལ་གཞུག་པའམ། ཡང་ན་འདིས་བཅོམ་ལྡན་འདས་བྲི་བར་བྱའོ། །ཨོཾ་བཛྲ་མ་ཎི་ཧཱུཾ། ཞེས་བྱ་བ་ནི་རྡོ་རྗེ་ནོར་
བུ་ཆེན་མོའིའོ། །ཨོཾ་བཛྲ་རཏྣ་ཨཾ་ཀུ་ར་ཧཱུཾ། ཞེས་བྱ་བ་ནི་རྡོ་རྗེ་རིན་ཆེན་མྱུ་གུ་མའིའོ། །ཨོཾ་བཛྲ་བཛྲ་རཏྣ་པདྨ་ཧཱུཾ། ཞེས་བྱ་བ་ནི་རྡོ་རྗེ་རིན་ཆེན་པདྨའི་འོ། །ཨོཾ་བཛྲ་རཏྣ་བཪྵ་ཧཱུཾ། ཞེས་བྱ་བ་ནི་རིན་ཆེན་ཆར་འབེབས་མའི་འོ། །ཨོཾ་སརྦྦ་ཨརྠ་སིདྡྷི་ཛྙཱ་ན་ཧཱུཾ། ཞེས་བྱ་བ་ནི་དོན་ཐམས་ཅད་གྲུབ་པའིའོ། །ཨོཾ་མ་ཎི་
ཛྙཱ་ན་ཧཱུཾ། ཞེས་བྱ་བ་ནི་ནོར་བུའི་མཚན་མའིའོ། །ཨོཾ་མ་ཎི་ཙིནྟཱ་ཨཾ་ཀུ་ཤ་ཞེས་བྱ་བ་ནི་རིན་ཆེན་རྒྱལ་པོ་སྟེ། དེ་ནས་བརྩམས་ནས། ཨོཾ་མ་ཎི་ཛྙཱ་ན་མུ་ཥི་ཧཱུཾ། ཞེས་བྱ་བའི་བར་དུ་བྲིས་ལ་ནམ་མཁའི་ཕྱོགས་ནས་ཕབ་སྟེ་རང་གི་ཕྱོགས་སུ་གཞག་པར་བྱའོ། །དེ་ནས་དོན་ཐམས་ཅད་གྲུབ་པའི་དཀྱིལ་
འཁོར་ཆེན་པོ་ལས་བཤད་པའི་རིན་ཆེན་སྒེག་མོ་ལ་སོགས་པ་ནས་རིན་ཆེན་ཆར་འབེབས་མའི་བར་གྱི་སྔགས་ཀྱིས་གཞག་པར་བྱའོ། །དེའི་རྗེས་ལ་བསྐལ་པ་བཟང་པོ་རྣམས་ནི་རང་གི་རིག་པས་སོ། །དེ་ནས་དཀྱིལ་འཁོར་འདིར་ཆོ་ག་རྒྱས་པ་ཇི་ལྟ་བ་བཞིན་བྱས་ནས་ཞེས་བྱ་བ་ནི་དོན་ཐམས་ཅད་
གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་དང་། རང་གི་ཆོ་ག་རྗེས་སུ་སྤྱད་ལ། སློབ་དཔོན་གྱིས་རང་ལ་བྱིན་གྱིས་བརླབ་པ་ལ་སོགས་པ་བྱའོ། །དེ་ནས་རང་གི་མིང་ནས་བརྗོད་པར་བྱས་ལ། དཀྱིལ་འཁོར་ཐམས་ཅད་རྡོ་རྗེར་བསྒྲུབས་ཏེ། དེ་ནས་བསྡུ་བ་བྱས་ནས་མཚན་
བརྒྱ་རྩ་བརྒྱད་པས་བསྟོད་དེ་བསྒོ་ཞིང་ལས་བྱ་བ་དང་། བགེགས་བསྐྲད་པ་ལ་སོགས་པ་དང་། མཆོད་ཡོན་དང་། ཞབས་བསིལ་དབུལ་བ་བྱས་ནས་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་སྣང་མཛད་ལ་སོགས་པ་བསྒྲུབས་ཏེ། དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་
བཏབ་ལ། རྡོ་རྗེ་རིན་ཆེན་གྱི་ཕྱག་རྒྱས་རྣམ་པར་སྣང་མཛད་ལ་སོགས་པ་དབང་བསྐུར་ཏེ། རྡོ་རྗེ་རིན་པོ་ཆེ་མྱུ་གུ་དོན་ཐམས་ཅད་གྲུབ་པ་ལ་སོགས་པ་ནོར་བུའི་རིགས་ཐམས་ཅད་གྲུབ་པའི་དབང་བསྐུར་བར་བྱའོ། །དེ་ནས་ཕྱག་བྱ་བ་དང་། མཆོད་ཡོན་ཕུལ་ལ། མཆོད་པ་ཐམས་ཅད་ཀྱིས་དེ་བཞིན་

གཤེགས་པ་ལ་སོགས་པ་ཐམས་ཅད་ཡང་དག་པར་མཆོད་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་འཇུག་པའི་ཆོ་ག་ཇི་ལྟ་བ་བཞིན་སློབ་མ་འཇུག་པར་བྱའོ་ཞེས་བྱ་བ་འདི་ནི་ཆོ་ག་རྒྱས་པ་ཇི་ལྟ་བ་བཞིན་དུ་བྱས་ནས་ཞེས་བྱ་བའི་སྒྲའི་དོན་ཡིན་ནོ། །སློབ་མ་ལ་འདི་
སྐད་བསྒོ་བར་བྱ་སྟེ་ཞེས་བྱ་བ་ནི་གོ་སླའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ་ནས་འབྲས་ཙམ་གྱིས་རྡོ་རྗེ་ནོར་བུ་དང་། རྡོ་རྗེ་ནོར་བུ་རིན་པོ་ཆེའི་དྲིལ་བུ་བྱིན་ནས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་སློབ་མའི་ཆོ་ག་ཐམས་ཅད་བྱ་བ་ཡིན་ནོ། །སློབ་དཔོན་གྱི་ལས་དང་སློབ་མ་
འཇུག་པའི་ཆོ་ག་རྒྱས་པའི་གཞུང་ཙམ་ཉིད་ཀྱིས་བཤད་པ་ཡིན་ནོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་དོན་ཐམས་ཅད་གྲུབ་པའི་ཆོ་གའི་དཀྱིལ་འཁོར་དུ་དམ་ཚིག་དབང་བསྐུར་བ་ཐོབ་པ་རྣམས་ལ་ཇི་ལྟར་མངོན་པར་འདོད་པའི་དེ་ལས་གསུངས་
པའི་དངོས་གྲུབ་རྣམས་སློབ་དཔོན་གྱིས་བཤད་པར་བྱའོ་ཞེས་བྱ་བའི་དོན་བསྟན་པའི་ཕྱིར་ནོར་བུའི་རིགས་ཀྱི་ཆོས་ཀྱི་ཡེ་ཤེས་བསྐྱེད་པར་བྱའོ་ཞེས་བྱ་བ་གསུངས་སོ། །ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་ཡེ་ཤེས་ནི་ནོར་བུའི་ཆོས་ཀྱི་ཡེ་ཤེས་སོ། །ནོར་བུ་དོན་དུ་གཉེར་བ་ལ་སོགས་པའི་
ངོ་བོ་དེ་བསྐྱེད་པར་བྱའོ། །རྡོ་རྗེ་སྙིང་པོ་ཞེས་བྱ་བ་ནི་དོན་ཐམས་ཅད་གྲུབ་པ་དང་དེའི་རིགས་ཀྱི་གཟུགས་སོ། །ཏིང་ངེ་འཛིན་གྱིས་རས་སམ། རྩིག་པའམ། སྤང་ལེབ་ལ་སོགས་པ་ལ་དེ་བྲིས་ནས་སོ། །རྩེ་གཅིག་པའི་སེམས་ཀྱིས་བསྒོམས་ནས་ཡང་དང་ཡང་མངོན་དུ་བྱེད་པའོ། །དོན་ནི་སླར་བྱས་
ན་ཞེས་བྱ་བ་ནི་དོན་ཐམས་ཅད་གྲུབ་པ་ལ་སོགས་པ་འཇིག་རྟེན་ལས་འདས་པའམ་འཇིག་རྟེན་པ་སྟེ། ཇི་ལྟར་མངོན་པར་འདོད་པའོ། །ཇི་ལྟར་བྱ་ཞེ་ན་བྱིན་ཅིག་བྱིན་ཅིག་ཅེས་བརྗོད་ཅེས་བྱ་བ་སྨོས་ཏེ་ཚིག་གིས་བརྗོད་ཅིང་ངོ་། །འདི་སྐད་སྟོན་པ་ཡིན་ཏེ། རས་སམ་རྩིག་པའམ། སྤང་ལེབ་ལ་སོགས་
པ་ཐམས་ཅད་ལ། ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའི་ཕྱག་རྒྱ་ཆེན་པོ་གཟུགས་དེའམ། ནོར་བུའི་མཚན་མ་ལ་སོགས་པ་དེའི་རིགས་ཀྱི་གཟུགས་བྲི་བར་བྱའོ། །དེ་ནས་དེའི་མདུན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་

གྲུབ་པའི་རྣལ་འབྱོར་དང་། དེའི་རིགས་ཀྱི་རྣལ་འབྱོར་བྱས་ལ་ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་དེ་རས་ལ་སོགས་པ་ལ་བྲིས་ལ། རྡོ་རྗེ་སྙིང་པོ་སྤྲུལ་ཏེ་བསྡུ་བ་བྱས་ལ་མཚན་བརྒྱ་རྩ་བརྒྱད་པས་
བསྟོད་དེ། རིན་ཆེན་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། ཕྱག་རྒྱ་བཞིས་རྒྱས་བཏབ་ནས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱས་ཏེ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ་དེའི་རིགས་
ཀྱི་ཕྱག་རྒྱ་ཆེན་པོ་བཅིངས་ལ་མངོན་པར་འདོད་པའི་དོན་འགྲུབ་པའི་ཕྱིར། བྱིན་ཅིག་བྱིན་ཅིག་ཅེས་བྱ་བ་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སརྦ་ཨརྠ་བྷ་ག་ཝཱན་བཛྲ་གརྦྷ་ཞེས་ཟློས་ཤིང་། ཇི་སྲིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་བཟླས་པར་བྱའོ། །དེ་ནས་སྐྱོ་བར་གྱུར་ན། སྔ་མ་བཞིན་
དུ་མཚན་བརྒྱ་རྩ་བརྒྱད་པས་བསྟོད་པ་དང་། མཆོད་པ་དང་། ཕྱག་བྱ་བ་དང་། ཇི་ལྟ་བ་བཞིན་དུ་གཤེགས་སུ་གསོལ་བར་བའོ། །དེ་ལྟར་ཉིན་རེ་ཞིང་ཐུན་བཞིའི་སྦྱོར་བ་བྱས་པས་ཇི་སྲིད་དུ་མངོན་སུམ་ལྟ་བུར་གྱུར་པ་དེ་སྲིད་དུ་བསྒོམས་ན་ཉིན་རེ་བཞིན་དུ་ཐུན་བཞིར་བཅོམ་ལྡན་འདས་མཐོང་བར་འགྱུར་
རོ། །ཟླ་བ་ཉ་ལ་མཚན་ཐོག་ཐག་བསྒོམས་ན་འདོད་པའི་དོན་ཐམས་ཅད་འགྲུབ་པར་འགྱུར་རོ། །ཏིང་ངེ་འཛིན་གྱིས་རས་སོགས་ལ། །རྡོ་རྗེ་སྙིང་པོ་བྲིས་ནས་ནི། །བསྒོམས་ནས་རིན་ཆེན་དོན་འབྱིན་ཞེས། །ཚིག་ཏུ་སྨྲ་ཞིང་གསོལ་བ་གདབ། །ཅེས་བྱ་བ་ནི་ཆོས་ཀྱི་དཀྱིལ་འཁོར་ལས་གསུངས་པའི་རིན་ཆེན་
ལྟ་བའམ་དེའི་རིགས་ཀྱི་ཕྱག་རྒྱ་ཆེན་པོ་རས་ལ་སོགས་པ་ལ་བྲིས་ཏེ། དེའི་མདུན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་སྤྱན་ནམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་ལྟ་བའམ། དེའི་ཕྱག་རྒྱ་ཆེན་པོ་
བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་ལྟ་བའམ། དེའི་རིགས་ཀྱི་སྔགས་བརྗོད་ཅིང་། ཇི་ལྟར་རས་ལ་བྲིས་པ་ལ་རིན་ཆེན་ལྟ་བའམ། དེའི་རིགས་སྤྲུལ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་དབང་བསྐུར་བའི་རིན་པོ་ཆེ་ལ་སོགས་པ་ཇི་ལྟར་འདོད་པ་རྣམས་མངོན་པར་

འདོད་པའི་དོན་བྱིན་ཅིག་ཅེས་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སརྦྦ་རཏྣ་བྷ་ག་ཝཱན་བཛྲ་གརྦྷ། ཞེས་བྱ་བའི་སྙིང་པོ་འདི་ཟློས་ཤིང་སྔ་མ་བཞིན་དུ་བསྒྲུབས་ནས་དབང་བསྐུར་བ་ལ་སོགས་པའི་རིན་པོ་ཆེ་ཐམས་ཅད་ཐོབ་པར་འགྱུར་རོ། །རྡོ་རྗེ་སྙིང་པོ་རས་
སོགས་ལ། །ཞེས་བྱ་བ་ལ་སོགས་པ་ནི་ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་པདྨའམ། དེའི་རིགས་ཀྱི་ཕྱག་རྒྱ་ཆེན་པོ་རས་ལ་སོགས་པ་རྣམས་ལ་བྲི་བར་བྱའོ། །དེའི་སྤྱན་སྔར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་བཅོམ་ལྡན་འདས་རིན་ཆེན་པདྨའམ་
དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་རང་གི་སྔགས་ཟློས་ཤིང་སྤྲུལ་པ་སྔ་མ་བཞིན་དུ་ཆོ་ག་ཐམས་ཅད་
རྗེས་སུ་སྤྱད་ལ། ཡང་ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་པདྨའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རིན་པོ་ཆེ་པདྨ་ལ་སོགས་པའི་ཏིང་ངེ་འཛིན་གྱི་ཆོས་ཀྱི་ཡེ་ཤེས་བྱིན་ཅིག་ཅེས་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སརྦྦ་
དྷརྨྨཱ་བྷ་ག་ཝཱན་བཛྲ་གརྦྷ་ཞེས་ཟློས་ཤིང་། སྔ་མ་བཞིན་དུ་བསྒྲུབས་ན་རིན་ཆེན་པདྨ་ལ་སོགས་པའི་ཏིང་ངེ་འཛིན་ཐོབ་ཅིང་གྲུབ་པར་གྱུར་ནས་རིན་ཆེན་པདྨ་ལ་སོགས་པ་དང་འདྲ་བར་འགྱུར་རོ། །རྡོ་རྗེ་སྙིང་པོ་རས་སོགས་ལ། །མཉམ་པར་གཞག་པས་བྲིས་ནས་ཀྱང་། །ཞེས་བྱ་བ་ནི་ཆོས་ཀྱི་དཀྱིལ་འཁོར་
ལས་གསུངས་པའི་རིན་ཆེན་ཆར་འབེབས་སམ་དེའི་རིགས་ཀྱི་ཕྱག་རྒྱ་ཆེན་པོ་རྣམས་རས་ལ་སོགས་པ་རྣམས་ལ་བྲི་བར་བྱའོ། །དེ་ནས་དེའི་སྤྱན་སྔར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ཆར་འབེབས་སམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་
འཁོར་ལས་བཤད་པའི་རིན་ཆེན་ཆར་འབེབས་དང་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་རང་གི་སྔགས་ཀྱིས་རིན་ཆེན་ཆར་འབེབས་དང་དེའི་རིགས་རྣམས་ཇི་ལྟར་རས་ལ་བྲིས་པ་ལ་སྤྲུལ་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། རིན་ཆེན་ཆར་

འབེབས་དང་དེའི་རིགས་རྣམས་ཡང་དང་ཡང་མངོན་དུ་བྱས་ཏེ། རྩེ་གཅིག་པའི་སྦྱོར་བས་སྙོམས་པར་ཞུགས་པར་རིན་ཆེན་ཆར་འབེབས་ལ་སོགས་པའི་དམ་པའི་ལས་བྱིན་ཅིག་བྱིན་ཅིག་ཅེས་བཅོམ་ལྡན་འདས་ལ་ལན་གསུམ་གྱི་བར་དུ་གསོལ་བ་གདབ་པར་བྱའོ། །དེ་ནས་ཨོཾ་དེ་ཧི་སད་ཀརྨ་བྷ་ག་ཝཱན་བཛྲ་
གརྦྷ་ཞེས་ཟློས་ཤིང་སྔ་མ་བཞིན་དུ་བསྒྲུབ་པར་བྱའོ། །དེ་ནས་རིན་ཆེན་ཆར་འབེབས་ལ་སོགས་པའི་ལས་དམ་པ་བྱེད་པ་འགྲུབ་པར་འགྱུར་རོ། །ནམ་མཁའི་ཕྱོགས་སམ་ཕྱོགས་གཞན་དུ། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་སྦྱོར་བ་རྣམ་པ་བཞི་པོ་ཉིད་ཀྱིས་བྱའོ། །ཁྱད་པར་ནི་འདི་ཡོད་དེ་འདི་
བྲི་བ་སྤངས་པའོ། །རྡོ་རྗེ་སྙིང་པོ་སྙིང་གར་བྲི། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པའི་དོན་ཐམས་ཅད་གྲུབ་པར་སྤྲུལ་པའམ་དེའི་རིགས་
ཀྱི་ཕྱག་རྒྱ་ཆེན་པོ་བཅིངས་ཏེ། ཨོཾ་ཧྲྀ་ད་ཡ་བྷ་ག་བ་ཏཱི་ཧྲི་ད་ནཱ་མ། ཞེས་བྱ་བའི་སྙིང་པོ་འདིས་རང་གི་སྙིང་གའི་ཟླ་བ་ལ་ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའམ་དེའི་རིགས་ཀྱི་གཟུགས་སུ་སྤྲུལ་ལ་འདི་བརྗོད་ཅིང་ཉིན་རེ་བཞིན་དུ་ཐུན་བཞིའི་སྦྱོར་བས་ཇི་སྲིད་དུ་སྙིང་ག་འགུལ་བར་
འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་བཅོམ་ལྡན་འདས་རྡོ་རྗེ་སྙིང་པོས་དེའི་རང་གི་ཏིང་ངེ་འཛིན་ལ་སོགས་པའི་ནོར་བུའི་དངོས་གྲུབ་སྟེར་བར་འགྱུར་རོ། །རྡོ་རྗེ་སྙིང་པོ་དཔྲལ་བར་ནི། །བྲིས་ཏེ་རྣམ་པར་བསྒོམས་ནས་ཀྱང་། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་
འཁོར་ལས་བཤད་པའི་བཅོམ་ལྡན་འདས་རིན་ཆེན་ལྟ་བ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་དཔྲལ་བར་ཨོཾ་རཏྣ་ཨ་བྷི་ཥེ་ཀ་ཨ་བྷི་ཥིཉྩ། ཞེས་བྱ་བས་བཅོམ་ལྡན་འདས་རིན་ཆེན་ལྟ་བ་དང་།
དེའི་རིགས་རྣམས་སྤྲུལ་ལ། དེ་ཉིད་ཀྱི་སྙིང་པོ་བརྗོད་ཅིང་སྔ་མ་བཞིན་དུ་ཇི་སྲིད་མགོ་བོ་འགུལ་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རིན་ཆེན་ལྟ་བ་ལ་སོགས་པའི་དབང་བསྐུར་བའི་རྣལ་འབྱོར་དེས་འགྲུབ་ཅིང་ཐོབ་པར་འགྱུར་རོ། །རྡོ་རྗེ་སྙིང་པོ་ཁར་བཅུག་ལ། །དེ་ཉིད་དུ་ནི་བསྒོམས་ནས་

ཀྱང་། །ཞེས་བྱ་བ་ལ་སོགས་པའི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་པདྨའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་ལྕེ་ལ་རིན་ཆེན་
པདྨ་དང་། དེའི་རིགས་ཀྱི་སྙིང་པོ་འདི་བསམ་པར་བྱའོ། །ཨོཾ་བྷ་ག་རཏྣ་གརྦྷ་སིདྡྷཿ། དེ་ནས་སྙིང་པོ་འདི་བརྗོད་ཅིང་། སྔར་བཤད་པའི་ཚུལ་གྱིས་ཇི་སྲིད་དུ། ཁ་རང་བྱེ་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །ཁ་རང་གི་ངང་གིས་བྱེ་བར་འགྱུར་རོ་ཞེས་བྱ་བའི་དོན་ཏོ། །དེ་ནས་རྣལ་འབྱོར་པ་སོ་སོ་
ཡང་དག་པར་རིག་པ་བཞི་ཐོབ་པར་འགྱུར་རོ། །དེ་ཉིད་ནི། གང་ཚེ་དེ་ཉིད་བྱེད་གྱུར་པ། །དེ་ཚེ་དེ་ནི་ངག་གྲུབ་བོ། །ཞེས་གསུངས་སོ། །རྡོ་རྗེ་སྙིང་པོ་བདག་སྤྱི་བོར། །རབ་ཏུ་བཞག་སྟེ་བསྒོམས་ནས་ཀྱང་། །ཞེས་བྱ་བ་ལ་སོགས་པ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་
པའི་རིན་ཆེན་ཆར་འབེབས་སམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་ཆར་འབེབས་སམ་དེའི་རིགས་ཀྱི་གཟུངས། ཨོཾ་རཏྣ་གརྦྷ་ཨུཥྞཱི་ཥ་
ཨཱ་ཀཪྵཱ་གཙྪ་ཞེས་བྱ་བའི་སྙིང་པོ་འདི་རང་གི་སྤྱི་བོར་བསམ་པར་བྱའོ། །དེ་ནས་འདི་ཉིད་ཟློས་ཤིང་སྔར་བཤད་པའི་ཚུལ་གྱིས་ཇི་སྲིད་དུ་འབར་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྐད་ཅིག་མ་དེ་ཉིད་ལ་ནམ་མཁའི་སྙིང་པོར་འགྱུར་རོ། །དེ་ཉིད་ནི། གང་ཚེ་དེ་ཉིད་འབར་གྱུར་པ། །
དེ་ཚེ་འཕང་དུ་ལྡིང་བར་འགྱུར། །ཞེས་གསུངས་སོ། །རྡོ་རྗེ་སྙིང་པོ་ཕྱག་རྒྱ་ཆེ། །མཉམ་པར་གཞག་པ་བསྒོམ་པ་ནི། །ཞེས་བྱ་བ་ལ་སོགས་པ་ལ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་
འཁོར་ལས་བཤད་པ་དེ་ཉིད་དམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་རང་གི་སྔགས་ཀྱི་མདུན་དུ་བཅོམ་ལྡན་འདས་དོན་ཐམས་ཅད་གྲུབ་པའམ། དེའི་རིགས་སྤྲུལ་ལ་སྔ་མ་བཞིན་དུ་བསྡུ་བ་ལ་སོགས་པ་ཆོ་ག་ཐམས་ཅད་རྗེས་སུ་སྤྱད་ལ། ཨ་ལྀ་རཏྣ་ཞེས་

བརྗོད་ཅིང་། བཅོམ་ལྡན་འདས་དངོས་གྲུབ་བདག་ལ་སྩོལ་ཅིག་ཅེས་ལན་གསུམ་གསོལ་བ་གདབ་པར་བྱའོ། །དེ་ནས་ཨོཾ་ཨི་ལྀ་ཞེས་བྱ་བའི་སྙིང་པོ་བརྗོད་ཅིང་སྔ་མ་བཞིན་དུ་གང་གི་ཚེ་བསྒོམས་པ་དེའི་ཚེ་དོན་ཐམས་ཅད་གྲུབ་པ་ལ་སོགས་པའི་དངོས་གྲུབ་འགྲུབ་པར་འགྱུར་རོ། །ནམ་མཁའི་སྙིང་པོའི་
དམ་ཚིག་ནི། །མཉམ་པར་གཞག་པས་བཅིངས་ནས་ཀྱང་། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་རིན་ཆེན་ལྟ་བ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། དེ་ནས་བཅོམ་ལྡན་འདས་རིན་ཆེན་
ལྟ་བ་དང་། དེའི་རིགས་རྣམས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་མདུན་དུ་སྤྲུལ་ལ། སྔ་མ་བཞིན་དུ་བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ལ། ཡང་ཆོས་ཀྱི་དཀྱིལ་འཁོར་ལས་གསུངས་པ་དེའམ་དེའི་རིགས་ཀྱི་དམ་ཚིག་གི་ཕྱག་རྒྱ་བཅིངས་ཏེ། མི་ལྀ་རཏྣ་ཞེས་ལན་
གསུམ་བརྗོད་ཅིང་། རིན་ཆེན་ལྟ་བ་ལ་སོགས་པས་དབང་བསྐུར་བར་གསོལ་བ་གདབ་པར་བྱའོ། །དེ་ནས་ཨོཾ་མི་ལྀ་ཞེས་སྙིང་པོ་བརྗོད་ཅིང་། སྔ་མ་བཞིན་དུ་གང་གི་ཚེ་བསྒོམས་པ་དེའི་ཚེ་རིན་ཆེན་ལྟ་བ་ལ་སོགས་པའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་སྙིང་པོ་ཏིང་འཛིན་དང་། །མཉམ་
པར་གཞག་པར་བསྒོམས་ནས་ནི། །ཞེས་བྱ་བ་ནི་སྔ་མ་བཞིན་དུ་རིན་ཆེན་པདྨ་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའམ། དེའི་རིགས་ཀྱི་ཕྱག་རྒྱ་བཅིངས་ཏེ། ཆོས་ཀྱི་དཀྱིལ་འཁོར་གྱི་སྔགས་ཀྱིས་བཅོམ་ལྡན་འདས་རིན་ཆེན་པདྨའམ། དེའི་རིགས་
རྣམས་མདུན་དུ་སྤྲུལ་ལ། སྔ་མ་བཞིན་དུ་བསྡུ་བ་ལ་སོགས་པའི་ཆོ་ག་བྱས་ནས། ཙི་ལྀ་རཏྣ་ཞེས་ལན་གསུམ་བརྗོད་ཅིང་། རིན་ཆེན་པདྨ་ལ་སོགས་པའི་ཆོས་ཀྱི་ཏིང་ངེ་འཛིན་གྱི་ཆོས་སྩོལ་ཅིག་ཅེས་བཅོམ་ལྡན་འདས་ལ་གསོལ་བ་གདབ་པར་བྱའོ། །དེ་ནས་ཙི་ལ་ཞེས་བྱ་བའི་སྙིང་པོ་བརྗོད་ཅིང་།
སྔ་མ་བཞིན་གང་གི་ཚེ་བསྒོམས་པར་གྱུར་པ་དེའི་ཚེ། །རིན་ཆེན་པདྨ་ལ་སོགས་པའི་ཏིང་ངེ་འཛིན་གྱི་ཆོས་ཐོབ་པར་འགྱུར་རོ། །ནམ་མཁའི་སྙིང་པོ་ལས་ཀྱི་མཆོག །མཉམ་པར་གཞག་པ་བཅིངས་ནས་ནི། །ཞེས་བྱ་བ་ལ་སོགས་པ་ལ། སྔ་མ་བཞིན་རིན་ཆེན་ཆར་

འབེབས་དང་། དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པ་དེའམ། དེའི་རིགས་ཀྱི་ཆོས་ཀྱི་ཕྱག་རྒྱ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་རིན་ཆེན་ཆར་
འབེབས་དང་། རིགས་རྣམས་མདུན་དུ་སྤྲུལ་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། ཡང་ཆོས་ཀྱི་དཀྱིལ་འཁོར་ལས་བཤད་པའི་བཅོམ་ལྡན་འདས་རིན་ཆེན་ཆར་འབེབས་སམ། དེའི་རིགས་རྣམས་ཀྱི་ལས་ཀྱི་ཕྱག་རྒྱ་བཅིངས་ལ། བཅོམ་ལྡན་འདས་རིན་ཆེན་ཆར་འབེབས་ལ་སོགས་
པ་ལ། ཀཱི་ལི་རཏྣ་ཞེས་ལན་གསུམ་བརྗོད་ཅིང་། རིན་པོ་ཆེ་ཐམས་ཅད་སློང་བའི་གསོལ་བ་གདབ་པར་བྱའོ། །དེ་ནས་ཀཱི་ལི་ཞེས་བྱ་བའི་སྙིང་པོ་བརྗོད་ཅིང་། སྔ་མ་བཞིན་དུ་གང་གི་ཚེ་བསྒོམས་པར་གྱུར་པ་དེའི་ཚེ་རིན་ཆེན་ཆར་འབེབས་ལ་སོགས་པའི་རིན་པོ་ཆེ་ཐམས་ཅད་ཐོབ་པར་འགྱུར་རོ། །དེ་ནས་
ཞེས་བྱ་བ་ནི་དེ་མ་ཐག་པ་སྟེ། ནོར་བུའི་ཡེ་ཤེས་ནི་ནོར་བུ་ཆེན་པོའི་རིགས་ཀྱི་ཡེ་ཤེས་ཀྱི་ཆོས་ཀྱི་དཀྱིལ་འཁོར་རོ། །གསང་བའི་ཕྱག་རྒྱ་ནི་རྡོ་རྗེ་སྙིང་པོའི་མདུན་དུ་གནས་པ་དང་ལྷན་ཅིག་ཏུ་གྱུར་པར་ལྷག་པར་མོས་པའོ། །དེའི་ཡེ་ཤེས་ནི་ངེས་པ་སྟེ། དེ་བསླབ་པའོ། །དབང་པོ་གཉིས་ནི་མཉམ་སྤྲད་
ནས། །ཞེས་བྱ་བ་ནི་བཤད་ཟིན་ཏོ། །དེ་ལྟར་བྱས་ནས་རྡོ་རྗེ་སྙིང་པོ་དང་ནམ་མཁའི་སྙིང་པོ་བསྒོམས་ཏེ། ཡང་དང་ཡང་དུ་བྱའོ། །གང་དུ་ཞེ་ན། ནམ་མཁའི་ཕྱོགས་སམ་ཕྱོགས་གཞན་དུ། །ཞེས་བྱ་བ་སྨོས་སོ། །ཅི་ཞིག་ཐོབ་པར་འགྱུར་ཞེ་ན། །དངོས་གྲུབ་མཆོག་ནི་ཐོབ་པར་འགྱུར། །ཞེས་
བྱ་བ་སྨོས་ཏེ། མཆོག་ནམ་མཁའི་སྙིང་པོ་ཐོབ་པར་གྱུར་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དཀྱིལ་འཁོར་ཆེན་པོ་ལས་བཤད་པའི་དོན་ཐམས་ཅད་གྲུབ་པའམ། ནོར་བུའི་མཚན་མ་ལ་སོགས་པ་དེའི་རིགས་ཀྱི་རྣལ་འབྱོར་བྱས་ལ་ཕྱིས་ཆོས་ཀྱི་དཀྱིལ་འཁོར་ལས་བཤད་པའི་དོན་
ཐམས་ཅད་གྲུབ་པའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱིས་བཅོམ་ལྡན་འདས་མདུན་དུ་སྤྲུལ་ཏེ་བསྡུ་བ་ལ་སོགས་པའི་ཆོ་ག་སྔ་མ་བཞིན་དུ་རྗེས་སུ་སྤྱད་ལ། ཡང་ཆོས་ཀྱི་དཀྱིལ་འཁོར་ལས་བཤད་པའི་དོན་ཐམས་ཅད་གྲུབ་པའམ་

དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཨཱ་ཀཱ་ཤ་གུ་ཧྱ་ཛྙཱ་ན་སཱ་དྷ་ཡ་ཧཱུཾ། ཞེས་བརྗོད་ཅིང་། བཅོམ་ལྡན་འདས་དོན་ཐམས་ཅད་གྲུབ་པའམ་དེའི་རིགས་དང་ལྷན་ཅིག་ཏུ་དབང་པོ་གཉིས་མཉམ་པར་སྦྱོར་བ་རྒྱུན་མི་འཆད་པར་བསྒོམས་ནས་སྔར་བཤད་པའི་ཚུལ་གྱིས་ཇི་སྲིད་མངོན་སུམ་དུ་མངོན་པར་
གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ན་དེའི་རྗེས་ལ་བཅོམ་ལྡན་འདས་ནམ་མཁའི་སྙིང་པོ་མངོན་སུམ་དུ་བྱོན་ནས་སྒྲུབ་པ་པོའི་ལུས་ལ་ཞུགས་པར་གྱུར་པ་དང་། དེ་ནས་སྒྲུབ་པ་པོའི་དེ་དང་འདྲ་བར་འགྱུར་རོ། །དབང་པོ་གཉིས་ནི་མཉམ་སྦྱར་ན། །ཞེས་བྱ་བ་
ནི་སྔ་མ་བཞིན་ནོ། །གཞི་ལ་རི་མོ་བྲིས་པ་བཞིན། །ཞེས་བྱ་བ་ནི་རས་སམ། རྩིག་པའམ། སྤང་ལེབ་ལ་བྲི་བའོ། །འདི་སྐད་སྟོན་པ་ཡིན་ཏེ། ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་ལྟ་བ་དང་། དེའི་རིགས་ཀྱི་ལྷའི་གཟུགས་རྣམས་རས་ལ་སོགས་པ་ལ་བྲིས་ཏེ། མདུན་དུ་བཞག་
ལ་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རིན་ཆེན་ལྟ་བའམ་དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པ་དེའམ་དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་
རིན་ཆེན་ལྟ་བའམ་དེའི་རིགས་རིས་ལ་སོགས་པ་ལ་ཇི་ལྟ་བ་བཞིན་དུ་བྲིས་པའི་གཟུགས་ལ་སྤྲུལ་ཏེ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་དེ། ཙི་ཏྲ་གུ་ཧྱ་ཛྙཱ་ན་ཨ་བྷི་ཥིཉྩ་ཧཱུཾ། ཞེས་བརྗོད་ཅིང་སྔ་མ་བཞིན་དུ་དེས་རས་ལ་སོགས་པ་དང་ལྷན་ཅིག་ཏུ་མཉམ་པར་སྦྱོར་བ་བསྒོམས་ལ།
སྔར་བཤད་པའི་ཆོ་གས་ཇི་སྲིད་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་བསྒྲུབས་ན་དེ་བཞིན་དུ་འགྲུབ་པར་འགྱུར་ན། དེའི་རྗེས་ལ་རིན་ཆེན་སྤྱན་ལ་སོགས་པའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་སྙིང་པོ་བསྒོམས་ནས་ནི། །དབང་པོ་གཉིས་ནི་མཉམ་སྦྱར་
ལ། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྡུག་པ་དེ་དག་གང་རྩེས་པ། །ཞེས་བྱ་བ་ནི་རིན་ཆེན་པདྨ་ལ་སོགས་པ་དང་། རྡོ་རྗེ་སྙིང་པོས་གང་རྩེས་པའོ། །རིན་ཆེན་པདྨ་ལ་སོགས་པ་ཉིད་ཀྱི་ཆོས་ཀྱི་ཕྱག་རྒྱའི་རང་བཞིན་དང་། རྡོ་རྗེ་སྙིང་པོ་གཉིས་རྩེ་ཞིང་སྒྲུབ་པར་བྱེད་པའོ། །དེ་སྐད་དུ་ཡང་། རྩེ་

བ་བསྒྲུབ་པར་འདོད་པ་ཡིན། །ཞེས་གསུངས་སོ། །འཇིག་རྟེན་ཀུན་གྱིས་དེ་དགར་བྱེད། །ཅེས་བྱ་བ་ནི་སེམས་ཅན་གྱི་ཁམས་ཐམས་ཅད་རིན་ཆེན་པདྨ་ལ་སོགས་པ་བསྒྲུབ་ཅིང་རང་རིག་པས་དེ་དགའ་བར་བྱེད་པའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་
འཁོར་ཆེན་པོ་ལས་བཤད་པའི་རིན་ཆེན་པདྨ་དང་། གཏོང་བ་ཏིང་ངེ་འཛིན་ཡེ་ཤེས་ཀྱི་སྙིང་པོ་ལ་སོགས་པ་དེའི་རིགས་ཀྱི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རིན་ཆེན་པདྨ་དང་། དེའི་རིགས་ཀྱི་ཆོས་ཀྱི་ཕྱག་རྒྱ་བཅིངས་ཏེ། དེ་ནས་ཆོས་ཀྱི་དཀྱིལ་འཁོར་ལས་བཤད་པའི་
རང་གི་རིགས་ཀྱི་བཅོམ་ལྡན་འདས་རིན་ཆེན་པདྨ་དང་། དེའི་རིགས་རྣམས་སྤྲུལ་ལ་བསྡུ་བ་ལ་སོགས་པའི་ཆོ་ག་བྱས་ཏེ། བཅོམ་ལྡན་འདས་རིན་ཆེན་པདྨ་དང་། དེའི་རིགས་རྣམས་དང་ལྷན་ཅིག་ཏུ་གྱུར་པར་བསྒོམས་ཤིང་། པྲི་ཡཾ་ཨ་ནུ་སྨྲྀ་ཏེ་ཛྙཱ་ན་གུ་ཧྱ་སརྦྦ་ཀ་ལཾ་མ་ཎི་ར་ཡ་ཧཱུཾ་ཞེས་བྱ་བ་འདིས་བརྗོད་
པར་བྱའོ། །དེ་ནས་སྔ་མ་བཞིན་དུ་མཚན་ཐོག་ཐག་བསྒོམས་ནས་རིན་ཆེན་པདྨ་ལ་སོགས་པའི་འཇིག་རྟེན་ཀུན་གྱིས་དེ་དགའ་བར་བྱེད་པར་འགྱུར་རོ། །ནམ་མཁའ་ཀུན་གྱི་རྡུལ་དབྱིབས་ཀྱི། །ཞེས་བྱ་བ་ནི་ནམ་མཁའ་ཡིན་ལ་ཐམས་ཅད་ཀྱང་དེ་ཡིན་པས་ཕྱོགས་བཅུའི་ནམ་མཁའི་ཀུན་གྱི་
རྫས་ཀྱི་དངོས་པོའི་རང་བཞིན་ནོ། །དེ་ལ་རྡུལ་ནི་ནམ་མཁའ་ཀུན་གྱི་རྡུལ་གྱི་ཚོགས་ཏེ། དེའི་དབྱིབས་ཅན་ནི་ནམ་མཁའ་ཀུན་གྱི་རྡུལ་གྱི་དབྱིབས་དང་ལྷན་ཅིག་པའོ། །ནམ་མཁའི་ཁམས་ཐམས་ཅད་རྡུལ་ཕྲ་རབ་ཇི་སྙེད་པའི་ཚོགས་དེ་དང་དེ་ནི་ནམ་མཁའི་སྙིང་པོའི་གཟུགས་བརྙན་དུ་བསམས་
ནས། དེ་ནས་དེ་དང་ལྷན་ཅིག་ཏུ་གྱུར་པར་བསྒོམ་པར་བྱའོ། །དེ་ལྟར་གྱུར་པས་ཅི་ཞིག་ཏུ་འགྱུར་ཞེ་ན། ནམ་མཁའི་རྡུལ་ཀུན་གྱི་རྡུལ་གྱི་དབྱིབས་ཀྱི་ཞེས་བྱ་བ་སྨོས་ཏེ། རིན་ཆེན་ཆར་འབེབས་ལ་སོགས་པ་ཐམས་ཅད་གྲུབ་པ་དེའི་སྒྲུབ་པ་པོར་འགྱུར་རོ་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་
པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རིན་ཆེན་ཆར་འབེབས་དང་། དེའི་རིགས་ནོར་བུའི་མཆོད་པ་ལ་སོགས་པ་དེ་ལས་བཤད་པའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་གསུངས་པའི་རིན་ཆེན་ཆར་འབེབས་

སམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། དེ་ནས་ཆོས་ཀྱི་དཀྱིལ་འཁོར་ལས་བཤད་པའི་རང་གི་སྔགས་ཀྱིས་རིན་ཆེན་ཆར་འབེབས་སམ། དེའི་རིགས་མདུན་དུ་སྤྲུལ་ལ། སྔ་མ་བཞིན་དུ་བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ནས་ཆོས་ཀྱི་དཀྱིལ་འཁོར་ལས་གསུངས་
པའི་རིན་ཆེན་ཆར་འབེབས་སམ། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། སརྦྦ་གུ་ཧྱ་ཛྙཱ་ན་སརྦྦ་སིདྡྷི་མྨ་པྲ་ཡཙྪ་ཧཱུྃ། ཞེས་བརྗོད་ཅིང་། བཅོམ་ལྡན་འདས་རིན་ཆེན་ཆར་འབེབས་སམ། དེའི་རིགས་རྣམས་དང་ལྷན་ཅིག་ཏུ་གྱུར་པ་ཉིན་རེ་ཞིང་ཐུན་བཞིའི་སྦྱོར་བས་བསྒོམས་ལ་ཇི་སྲིད་དུ་ཉིན་རེ་
ཞིང་ཐུན་བཞིར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་ཚོགས་དེའི་རང་བཞིན་དུ་རྣམ་པར་བསམས་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་ཚོགས་དང་མཉམ་པའི་རིན་ཆེན་ཆར་འབེབས་
ཀྱི་དབྱིངས་སམ། དེའི་རིགས་ཀྱི་དབྱིབས་སུ་ལྷན་ཅིག་མཉམ་པར་སྦྱོར་ཞིང་། ཇི་སྲིད་བདག་ཉིད་དེའི་རང་བཞིན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རིན་ཆེན་ཆར་འབེབས་ལ་སོགས་པ་ཐམས་ཅད་གྲུབ་པར་འགྱུར་རོ། །དེ་ལྟར་དངོས་གྲུབ་ཀྱི་བྱེ་བྲག་རྣམ་པ་ཉི་ཤུ་
བསྟན་ནས་ད་ནི་དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ལ། ཆོས་ཀྱི་
དཀྱིལ་འཁོར་གྱི་ལྷ་རྣམས་ཕྱག་རྒྱ་བཞིས་རྒྱས་བཏབ་ནས་དཀྱིལ་འཁོར་དང་པོར་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་ཤེས་བསྟན་པའི་རྗེས་ཐོགས་ལའོ། །ཕྱག་རྒྱ་ཆེན་པོ་འདི་ཇི་ལྟ་བ་བཞིན་
བཅིང་བར་བྱའོ་ཞེས་བྱ་བ་ནི་བྲིས་པ་དང་རྗེས་སུ་མཐུན་པར་འགྱུར་རོ། །ཇི་ལྟར་བྲི་བའི་ཆོ་གར་ཕྱག་རྒྱ་ཆེན་པོའི་མཚན་ཉིད་བཤད་པ་དེ་བཞིན་དུ་འདིར་ཡང་རྣམ་པར་སྣང་མཛད་ནས་བརྩམས་ཏེ། བསྐལ་པ་བཟང་པོའི་བར་དུ་ཕྱག་རྒྱ་ཆེན་པོ་བཅིང་བར་བྱའོ་ཞེས་བྱ་བའི་དོན་ཏེ། དངོས་གྲུབ་ཀྱང་

དེ་དང་འདྲའོ་ཞེས་བྱ་བ་ནི་རྡོ་རྗེ་དབྱིངས་ཀྱི་ཆོས་ཀྱི་དཀྱིལ་འཁོར་ཅི་འདྲ་བའི་ཕྱག་རྒྱ་ཆེན་པོ་བཤད་པ་དེ་འདྲ་བ་འདིར་ཡང་ཡིན་ནོ། །དེ་ནས་རྡོ་རྗེ་ནོར་བུ་བཅིངས་ལ་རྡོ་རྗེ་ཡེ་ཤེས་ཀྱི་དཀྱིལ་འཁོར་གྱི་ཚུལ་དུ་གཞག་པར་བྱའོ་ཞེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་གཉིས་ཀྱིས་
རྒྱབ་བསྐུམས་ནས་མཐེ་བོ་གཉིས་རྡོ་རྗེར་བཅིངས་པ་འདི་ནི་རྡོ་རྗེ་ནོར་བུའི་ཕྱག་རྒྱའོ། །འདི་བཅིངས་ནས་རྡོ་རྗེ་དབྱིངས་ཀྱི་དཀྱིལ་འཁོར་གྱི་ཚུལ་གྱིས་ཇི་ལྟ་བ་བཞིན་གྱི་གནས་རྣམས་སུ་གཞག་པར་བྱའོ། །དེ་བཞིན་དུ་ནོར་བུའི་མཚན་མ་ལ་སོགས་པ་ནས་ནོར་བུའི་ཁུ་ཚུར་གྱི་མཐར་
ཐུག་པའི་དམ་ཚིག་གི་ཕྱག་རྒྱར་ཡང་འགྱུར་རོ། །དེ་ལ་རྡོ་རྗེ་ཡེ་ཤེས་ཀྱི་དཀྱིལ་འཁོར་གྱི་ཚུལ་དུ་ཞེས་བྱ་བ་འདི་ཡིན་ཏེ། སྐྱིལ་མོ་ཀྲུང་འདུག་གན་རྐྱལ་དུ། །གཡས་གཅུས་དེ་བཞིན་སླར་གཅུས་པ། །སྙིང་གར་གནས་པ་བཞི་པ་སྟེ། །ཞེས་བྱ་བ་ནི་ནོར་བུའི་མཚན་མ་ལ་སོགས་པའི་དཀྱིལ་
འཁོར་རོ། །དཔྲལ་བར་གཞག་དང་ལྟག་པ་དང་། །ཕྲག་པར་ཡང་ནི་དགོད་པར་བྱ། །ཁར་གཞག་སྙིང་གར་རལ་གྲི་དང་། །སྙིང་གར་རྒྱས་དང་ཁ་ནས་དབྱུང་། །སྤྱི་བོ་ཐོད་པ་ཁར་གཞག་པ། །མཛུབ་མོ་གཉིས་བཀུག་མདུན་དེ་བཞིན། །ཞེས་བྱ་བའོ། །ལྷག་མ་རྣམས་ནི་དཀྱིལ་
འཁོར་ཆེན་པོ་ལས་བཤད་པའི་དམ་ཚིག་གི་ཕྱག་རྒྱ་ཉིད་ཡིན་པར་ཤེས་པར་བྱའོ། །ཧཱུྃ་རྣམ་པར་སྣང་མཛད་ཀྱི་ཆོས་ཀྱི་ཕྱག་རྒྱའོ། །ས་ནི་རྡོ་རྗེ་ནོར་བུ་མ་དང་། ནོར་བུའི་མཚན་མ་དང་། དོན་ཐམས་ཅད་གྲུབ་པའི་གནས་རྣམས་ཀྱིའོ། །ར་ནི་རིན་ཆེན་རྒྱལ་