Luận tạng Tây Tạng (Tengyur) — Tập 58

༄༅༅། །དེ་ལྟར་ཆོས་ཀྱི་ཕྱག་རྒྱའི་གཙོ་བོར་གྱུར་པའི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་བསྟན་ནས། ད་ནི་ལས་ཀྱི་ཕྱག་རྒྱ་གཙོ་བོར་གྱུར་པའི་འཇིག་རྟེན་གསུམ་གྱི་
འཁོར་ལོའི་ལས་ཀྱི་དཀྱིལ་འཁོར་གྱིས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་
པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །འདིར་དང་པོར་སྦྱོར་བའི་ཏིང་ངེ་འཛིན་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོར་བཤད་པ་ཉིད་གཟུང་བར་བྱའོ། །བཅོམ་
ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཡང་ཞེས་བྱ་བ་ནི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལ་ལྟོས་པས་ན་ཡང་ཞེས་བྱའོ། །དེ་བཞིན་གཤེགས་པ་ཐམས་ཅད་ནི་ལས་
ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །འདིའི་དམ་ཚིག་ནི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་འདི་ཉིད་དོ། །དེ་ལས་བྱུང་བ་ནི་སྐྱེས་པ་སྟེ། རྡོ་རྗེ་ཧཱུཾ་མཛད་ཀྱི་ཐུགས་ལ་གནས་

པའི་རྡོ་རྗེ་རྩེ་ལྔ་པ་འབར་བ་ལས་བྱུང་བའོ། །དེས་བྱིན་གྱིས་བརླབས་པ་ནི་བརྟན་པར་བྱས་པའི་ཏིང་ངེ་འཛིན་གང་ཡིན་པ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ནས། འཇིག་རྟེན་གསུམ་གྱི་འཁོར་ལོའི་
ལས་ཀྱི་དཀྱིལ་འཁོར་སྤྲུལ་པའི་ཕྱིར། ཕྱག་ན་རྡོ་རྗེའི་ཐུགས་ཀར་གནས་པའི་རྡོ་རྗེ་བརྟན་པར་བྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །འདི་ཞེས་བྱ་བ་ནི་བློ་ལ་གནས་པ་སྟེ། བདག་ཉིད་རང་གི་རིག་པ་དམ་
པ་འདི་གསུངས་པ་ནི་བཤད་པའོ། །ཨོཾ་བཛྲ་ཀརྨ་པྲ་བརྟ་ནི་ས་མ་ཡེ་ཧཱུཾ་ཞེས་བྱ་བ་འདི་ནི། འཇིག་རྟེན་གསུམ་གྱི་འཁོར་ལོ་ཐམས་ཅད་ཀྱི་ལས་ཀྱི་དཀྱིལ་འཁོར་བསྐྱེད་པའི་རྒྱུར་གྱུར་པ་ཉིད་ཀྱིས་རིག་པ་ཐམས་ཅད་ཀྱི་ནང་ན་
མཆོག་ཏུ་གྱུར་པས་ན་རིག་པ་དམ་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། རྡོ་རྗེ་བྲན་མོ་རྣམས་ཀྱིའོ་ཞེས་བྱ་བའི་བར་དུ་བསྟན་པ་ནི་གོ་སླའོ། །དེ་ནས་ཡང་བཅོམ་
ལྡན་འདས་ཞེས་བྱ་བ་ནས་བརྩམས་ནས་བྲན་མོ་རྣམས་ཀྱིའོ་ཞེས་བྱ་བའི་བར་དུ་བསྟན་པའི་གཞུང་འདིས་ནི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་

གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་སོགས་པ་བསྟན་པ་ནི། འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འཇིག་རྟེན་གྱི་འཁོར་ལོའི་ལས་ཀྱི་དཀྱིལ་
འཁོར་དུ་དམ་ཚིག་དང་། དབང་བསྐུར་བ་ཐོབ་པ་རྣམས་ཀྱིས་དེ་ལས་གསུངས་པའི་དངོས་གྲུབ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཕྱག་ན་རྡོ་རྗེས་ཞེས་བྱ་བ་ལ་སོགས་པ་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་
ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བ་ནི་སྐབས་སུ་བབ་པའོ། །ཕྱག་ན་རྡོ་རྗེ་ནི་རྡོ་རྗེ་ཧཱུཾ་མཛད་དོ། །ཡང་ཞེས་བྱ་བ་ནི་ཆོས་ཀྱི་འཁོར་ལོ་ལ་ལྟོས་པའོ། །རྡོ་རྗེའི་རིགས་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་དཀྱིལ་འཁོར་འདི་གསུངས་སོ། །དེ་ནས་
ཞེས་བྱ་བ་ནི་དེ་མ་ཐག་པ་སྟེ། སྔར་བསྙེན་པ་བྱས་པའི་རྗེས་ཐོགས་ལ་ཞེས་བྱ་བའི་དོན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དཔལ་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། དེ་ལས་བཤད་པའི་རྣལ་
འབྱོར་ཆེན་པོ་བྱས་ལ། དེ་ནས་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་གསུངས་པའི་རིག་པ་རྣམས་རེ་རེ་ཞིང་ཡང་བཟླས་པ་ཁྲི་བྱའོ། །དེ་ལྟར་བྱས་ན་སྔོན་དུ་བསྙེན་པར་འགྱུར་རོ། །དེ་ནས་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་གསུངས་པའི་ཏིང་
ངེ་འཛིན་གསུམ་བསྒོམ་པ་སྔོན་དུ་འགྲོ་བས་ཞག་བདུན་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་དཀྱིལ་འཁོར་བྲི་བའམ། འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་ལས་གསུངས་པའི་ཏིང་ངེ་འཛིན་རྣམ་པ་གསུམ་བསྒོམ་པ་སྔོན་དུ་འགྲོ་བས་འཇིག་རྟེན་གསུམ་གྱི་འཁོར་
ལོའི་ལས་ཀྱི་དཀྱིལ་འཁོར་ཟླ་བ་གཅིག་གམ་ཟླ་བ་དྲུག་གམ། ལོ་གཅིག་གི་བར་དུ་བསྒོམས་ལ་ཇི་སྲིད་མངོན་སུམ་དུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་འཇིག་རྟེན་

གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་འཇུག་པ་མེད་ན། དེས་འདུལ་བའི་སེམས་ཅན་གྱི་ཁམས་རྣམས་ཀྱི་འདོད་པའི་དོན་གྱི་དངོས་གྲུབ་ཏུ་མི་འགྱུར་བ་དེའི་ཕྱིར། རབ་ཏུ་བཤད་པར་བྱ་ཞིང་རྣམ་པར་དབྱེ་བར་བྱའོ། །ལས་ཀྱི་དཀྱིལ་འཁོར་དམ་པ་སྟེ། །རྡོ་རྗེའི་
དཀྱིལ་འཁོར་ཚུལ་གྱིས་ནི། །དཀྱིལ་འཁོར་ཐམས་ཅད་སྲད་བུས་བྲེ། །ཞེས་བྱ་བ་ནི། འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ནི་རྡོ་རྗེའི་དཀྱིལ་འཁོར་རོ། །འདིར་དེའི་ཚུལ་གྱིས་ལས་ཀྱི་དཀྱིལ་འཁོར་འདི་ཐམས་ཅད་སྲད་བུས་བྲེ་བར་བྱའོ། །དེ་འདིར་བསྟན་པ་ནི།
གྲྭ་བཞི་པ་ལ་བྱང་ཕྱོགས་སྒོ། །ཕྱི་རོལ་དཀྱིལ་འཁོར་སྲད་བུས་བྲེ། །དེ་ཡི་ནང་དུ་དེར་ཡང་ནི། །དེ་བཞིན་སྒོ་ནི་ཤར་ཕྱོགས་གདོད། །ཅེས་བྱ་བ་གསུངས་སོ། །དཀྱིལ་འཁོར་མཆོག་གི་གནས་སུ་ཕྱོགས་བཞིའི་དབུས་ཀྱི་ཆ་ཐམས་ཅད་དུ་སངས་རྒྱས་དབུས་ན་བཞུགས་པར་བྱ། ཞེས་བྱ་བ་
ནི། སངས་རྒྱས་དབུས་ན་བཞུགས་པ་རྣམས་ནི་སངས་རྒྱས་དབུས་ན་བཞུགས་པ་སྟེ། དཀྱིལ་འཁོར་གྱི་མཆོག་གོ། །དེ་ལ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་ཉིད་སངས་རྒྱས་སུ་འདོད་ཀྱི། རྣམ་པར་སྣང་མཛད་ལ་སོགས་པ་ནི་མ་ཡིན་ཏེ། གང་གི་ཕྱིར་
འདིར་རྡོ་རྗེ་ཧཱུཾ་མཛད་ལ་སོགས་པའི་གཟུགས་ཀྱིས་གནས་པའི་ཕྱིར་རོ། །དེ་དག་གིས་ནི་ཞེས་བྱ་བ་ནི། དེ་བཞིན་གཤེགས་པ་བཞིའི་རང་རང་གི་ཕྱོགས་གཉིས་ཀར་རིམ་པ་བཞིན་དུ་བྱའོ། །ཡང་གི་སྒྲ་ནི་ངེས་པར་གཟུང་བ་སྟེ་རིམ་པ་ཉིད་དོ། །སེམས་དཔའ་ཆེན་པོ་རྣམས་ཀྱང་གཞག་
ཅེས་བྱ་བ་ནི། ཁྲོ་བོ་རྡོ་རྗེ་སེམས་དཔའ་ལ་སོགས་པ་ནས། ཁྲོ་བོ་རྡོ་རྗེ་ཁུ་ཚུར་གྱི་བར་དུ་བྲི་བར་བྱའོ། །དེའི་ཞེས་བྱ་བ་ནི། བཤད་མ་ཐག་པའི་ཕྱིར་དཀྱིལ་འཁོར་དེའི་འོ། །དབུས་ནི་ནང་གི་དཀྱིལ་འཁོར་གྱི་ལྟེ་བའི་ཕྱོགས་སུའོ། །རྡོ་རྗེ་རིག་པ་དམ་པ་ཆུང་མ་དང་བཅས་པ་དང་། རྡོ་རྗེ་སྒེག་མོ་ལ་
སོགས་པའི་གསང་བའི་མཆོད་པ་བཞིའོ། །དེ་ཡི་ལྷ་མོ་གོ་རིམས་བཞིན། །རྡོ་རྗེའི་དཀྱིལ་འཁོར་ཚུལ་བཞིན་དུ། །ཞེས་བྱ་བ་ནི། ནང་གི་དཀྱིལ་འཁོར་གྱི་གོ་རིམས་བཞིན་རྡོ་རྗེ་གསེར་ལ་སོགས་པའི་ལྷ་མོ་རྣམས་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་གྱི་ཚུལ་གྱིས་རིམ་

པ་བཞིན་དུ་བྲི་བར་བྱའོ། །ཇི་ལྟ་བུར་གྱུར་པ་ཞིག་བྲི་བར་བྱ་ཞེ་ན། རང་གི་ཕྱག་རྒྱ་ཕྱག་རྒྱ་འདྲ། །གར་བྱེད་པ་ནི་བྲི་བར་བྱ། །ཞེས་བྱ་བ་ནི། དེ་ལ་རྡོ་རྗེ་གསེར་དང་། རྡོ་རྗེ་གཞོན་ནུ་མ་དང་། རྡོ་རྗེ་ཞི་བ་མོ་དང་། རྡོ་རྗེ་ཁུ་ཚུར་དང་། རྡོ་རྗེ་བདུད་རྩི་དང་། རྡོ་རྗེ་མདའ་དང་། རྡོ་རྗེ་དབྱུག་པ་དང་།
རྡོ་རྗེ་རྐེད་བཅིངས་དང་། རྡོ་རྗེ་འཇུ་མ་དང་། རྡོ་རྗེ་ཟབ་མོ་རྣམས་ཀྱི་ཕྱག་རྒྱ་གང་ཡིན་པ་དེ་ནི་དེའི་ཕྱག་རྒྱའོ། །རྡོ་རྗེ་ཆུ་སྲིན་མ་དང་། རྡོ་རྗེ་རུལ་པ་མོ་དང་། རྡོ་རྗེ་དུས་དང་། རྡོ་རྗེ་ཁ་དང་། རྡོ་རྗེ་འཁྱོར་མ་དང་། རྡོ་རྗེ་འབར་མ་དང་། རྡོ་རྗེ་མགྱོགས་མ་དང་། རྡོ་རྗེ་ཕོ་ཉ་མ་དང་། རྡོ་རྗེ་དབང་མོ་དང་། རྡོ་རྗེ་
སྒོ་བ་མ་རྣམས་ཀྱི་ཕྱག་རྒྱ་གང་ཡིན་པ་དེ་ནི་ལན་གྱི་ཕྱག་རྒྱར་བརྗོད་དོ། །ལུགས་སུ་བྱུང་བ་དང་། ལུགས་ལས་བཟློག་པའི་ཚུལ་གྱིས་ཕྱག་རྒྱ་དང་ཕྱག་རྒྱའི་ལན་དུ་ཤེས་པར་བྱའོ། །དེ་ལ་རྡོ་རྗེ་གསེར་གྱི་གར་གྱི་མཆོད་པ་བྱས་ལ། རྡོ་རྗེ་ཆུ་སྲིན་གྱི་གར་གྱི་མཆོད་པས་ཕྱག་རྒྱའི་ལན་བྱའོ། །
དེ་བཞིན་དུ་རྡོ་རྗེ་ཟ་བའི་གར་གྱི་མཆོད་པ་བྱ་སྟེ། རྡོ་རྗེ་སྒོ་བ་མའི་གར་གྱི་མཆོད་པས་ཕྱག་རྒྱའི་ལན་གྱི་བར་དུ་བྱའོ། །དེ་ལྟར་རང་གི་ཕྱག་རྒྱ་དང་། ཕྱག་རྒྱའི་ལན་གྱིས་གར་བྱེད་པའི་ཚུལ་གྱིས་བྲི་བར་བྱའོ། །ཅིའི་ཕྱིར་དེ་ལྟར་བྲི་བར་བྱ་ཞེ་ན། སངས་རྒྱས་རྡོ་རྗེ་ཅན་མཆོད་ཕྱིར། །ཞེས་
བྱ་བ་སྨོས་སོ། །ཇི་ལྟར་བྱ་ཞེ་ན། རྡོ་རྗེ་གར་གྱི་ཚུལ་གྱིས་སོ། །ཞེས་བྱ་བ་སྨོས་ཏེ། གར་བྱེད་པའི་ཚུལ་དུ་བྲི་བར་བྱའོ། །དེ་ལྟར་རྡོ་རྗེ་གར་བྱེད་པའི་ཚུལ་གྱིས་གློག་འགྱུ་བ་ལྟ་བུ་མདུན་དུ་བསྐོར་བ་འདི་ནི་རྡོ་རྗེ་གར་བྱེད་པ་ཞེས་གྲགས་སོ། །གྲྭ་དང་སྒོའི་ཕྱོགས་རྣམས་སུ་འདུག་པ་ལ་སོགས་
པ་རིམ་པ་བཞིན་ཞེས་བྱ་བ་ནི། ཕྱི་རོལ་གྱི་དཀྱིལ་འཁོར་གྱི་མཚམས་རྣམས་སུ་བདུག་པ་མ་ལ་སོགས་པའི་ལྷ་མོ་བཞི་དང་། ནང་གི་དཀྱིལ་འཁོར་གྱི་སྒོར་རྡོ་རྗེ་གླང་སྣ་མ་དང་། ཕྲེང་བ་མ་དང་། ཕྱི་རོལ་གྱི་དཀྱིལ་འཁོར་གྱི་སྒོར་རྡོ་རྗེ་དབང་དང་། རྣམ་པར་རྒྱལ་བའི་རྡོ་རྗེ་དག་འཇིག་རྟེན་གསུམ་
གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་ག་བཞིན་དུ་བྲི་བར་བྱའོ་ཞེས་བྱ་བ་འདི་ནི་རིམ་པ་བཞིན་ཞེས་བྱ་བའི་དོན་ཡིན་ནོ། །འདི་སྐད་སྟོན་པ་ཡིན་ཏེ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའི་ཁ་དོག་གིས་ཐིག་སྐུད་སོ་སོར་ཁ་བསྒྱུར་ལ།

དེ་ཉིད་ཀྱི་རིམ་པ་བཞིན་བཞག་ལ་ཧཱུཾ་ཏྲཱཾ་ཧྲཱིཿ ཨ་ཨཱ་ཞེས་བྱ་བ་དེ་བཞིན་གཤེགས་པ་རྣམ་པ་ལྔའི་ས་བོན་གྱི་ཡི་གེ་དེ་རྣམས་རང་རང་གི་ཁ་དོག་གི་ཐིག་སྐུད་དེ་རྣམས་ལ་རིམ་པ་བཞིན་དུ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་བཀོད་ལ་བར་སྣང་གི་
ཕྱོགས་ན་བཞུགས་པ་རྣམས་ལས་རང་གི་ས་བོན་ལས་བྱུང་བའི་འོད་ཟེར་དང་ཡང་འབར་བའི་ལྟ་བས་བལྟ་ཞིང་བཀུག་ལ་ལག་ན་གནས་པའི་སྔོན་པོ་ལ་སོགས་པའི་ཐིག་སྐུད་དེ་རྣམས་བཀང་ལ། ཨ་ནྱོ་ནྱ་ཨ་ནུ་ག་ཏ་སརྦྦ་དྷརྨྨཱ་སྥར་སྥར་ཨ་ནུ་པྲ་བིཥྚ་སརྦྦ་དྷརྨྨཱ་ཨ་ཏྱན་ཏ་ཨ་ནུ་པྲ་བིཥྚ་སརྦྦ་
དྷརྨཱ། ཨོཾ་སུམྦྷ་ནི་སུམྦྷ་ཧཱུཾ་གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་ཝཱན་བཛྲ་ཧཱུཾ་ཕཊ། ཅེས་བྱ་བས་བསྒྲིལ་བར་བྱའོ། །དེ་ནས་དྲིས་བྱུགས་ལ། གསེར་ལ་སོགས་པའི་སྣོད་དུ་ཐིག་སྐུད་དེ་བཞག་ལ། མེ་ཏོག་གཏོར་བ་དང་། བདུག་པ་ཕུལ་ལ་རྡོ་རྗེ་བསྡམས་པས་བཟུང་
ལ། ཨོཾ་བཛྲ་སཱུ་ཏྲ་ཨཱ་ཀཪྵ་ཡ་སརྦྦ་མཎྜ་ལ་ཧཱུཾ། ཞེས་བྱ་བ་དེས་སྔགས་ལན་བརྒྱ་རྩ་བརྒྱད་བཟླ་བར་བྱའོ། །དེ་ནས་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་ལས་ཀྱི་ཧཱུཾ་མཛད་ཀྱང་བཟླ་བར་བྱའོ། །དེ་ནས་རིམ་པ་ཇི་ལྟ་བ་བཞིན་དུ་གཡོན་པའི་ཁུ་ཚུར་གྱིས་ཐིག་སྐུད་དེ་བླངས་ལ། ཨོཾ་
བཛྲ་སཱུ་ཏྲ་ཨ་ཀཪྵ་ཡ་སརྦྦ་མཎྜ་ལ་ཧཱུཾ་ཞེས་བྱ་བའི་སྙིང་པོ་འདིས་དཀྱིལ་འཁོར་ཐིག་གདབ་པར་བྱའོ། །དང་པོར་རེ་ཞིག་ཚངས་པའི་ཐིག་གཉིས་གདབ་སྟེ། །དེ་ནས་ཕྱིའི་དཀྱིལ་འཁོར་ཟུར་བཞི་པ། བྱང་ཕྱོགས་སུ་སྒོ་བཏོད་པ་ཐིག་བཏབ་ལ་དེའི་ནང་དུ་ཆ་དྲུག་ཏུ་ཕྱེ་བ་ལས་དཀྱིལ་འཁོར་
གཉིས་པ་ཆ་བཞི་པ་སྒོ་ཤར་དུ་བཏོད་པའོ། །དཀྱིལ་འཁོར་གཉིས་པ་དེའི་དབུས་སུ་དེའི་ཕྱེད་ཀྱི་ཚད་རྡོ་རྗེ་རིག་པ་དམ་པའི་གནས་ཐིག་གདབ་པར་བྱའོ། །དེ་ནས་སྲད་བུ་བྲེས་པ་དེར་དག་པའི་ཚོན་གྱིས་དགང་བར་བྱའོ། །ཚོན་རྩི་འདྲི་བའི་སྙིང་པོ་དང་། །གཡོན་པའི་རྡོ་རྗེ་ཁུ་ཚུར་ཆེས། །
ཆོ་ག་བཞིན་དུ་གཟུང་བར་བྱ། །དང་པོ་བྲིས་ནས་ཕྱིས་ཅི་བདེར། །དེ་ལ་འདི་ནི་ཚོན་གྱི་སྙིང་པོ་ཡིན་ཏེ། ཨོཾ་བཛྲ་རཱ་ཀ་ས་མ་ཡ་ཧཱུཾ། ཚོན་རྩི་འདྲི་བ་ནི་ཚོན་རྩི་དཀར་པོ་ལ་ཡི་གེ་ཨ་ལས། དེ་བཞིན་གཤེགས་པ་རྣམ་པར་སྣང་མཛད་ཀྱི་གཟུགས་བརྙན་དཀར་པོ་དང་། སྔོན་པོ་ལ་ཡི་གེ་ཧཱུཾ་ལས་དེ་བཞིན་

གཤེགས་པ་མི་བསྐྱོད་པའི་གཟུགས་བརྙན་སྔོན་པོ་དང་། སེར་པོ་ལ་ཡི་གེ་ཏྲཱཾ་ལས་དེ་བཞིན་གཤེགས་པ་རིན་ཆེན་འབྱུང་ལྡན་གྱི་གཟུགས་བརྙན་སེར་པོ་དང་། དམར་པོ་ལ་ཡི་གེ་ཧྲཱིཿལས་དེ་བཞིན་གཤེགས་པ་འོད་དཔག་མེད་ཀྱི་གཟུགས་བརྙན་དམར་པོ། ལྗང་གུ་ལ་ཡི་གེ་ཨ་ལས། དེ་བཞིན་
གཤེགས་པ་དོན་ཡོད་གྲུབ་པའི་གཟུགས་བརྙན་ལྗང་གུ་བསྐྱེད་ལ། སྔར་བཤད་པའི་ཚོན་རྩི་བྱིན་གྱིས་བརླབ་པའི་ཕྱག་རྒྱ་དང་། ཨོཾ་བཛྲ་རཱ་ཀ་ས་མ་ཡ་ཧཱུཾ། ཞེས་བྱ་བ་འདི་རེ་རེ་ཞིང་ལན་བདུན་བདུན་བཟླས་པར་བྱའོ། །དེ་ལ་དང་པོར་སྔོན་པོ་དང་། དེ་ནས་སེར་པོ་དང་། དེ་ནས་དམར་པོ་དང་།
དེ་ནས་ལྗང་གུ་དང་། དེ་ནས་ཐམས་ཅད་ཀྱི་ནང་དུ་དཀར་པོས་དཀྱིལ་འཁོར་གཉིས་ཚོན་སྣ་ལྔས་བྲི་བར་བྱའོ། །དེ་ལྟར་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་དང་། གཟུངས་ཀྱི་དཀྱིལ་འཁོར་རྣམས་ལ་ཡང་ཤེས་པར་བྱའོ། །དེ་ལྟར་དཀྱིལ་འཁོར་བྲིས་ལ། དཀྱིལ་
འཁོར་དབུས་མའི་དབུས་སུ། རྡོ་རྗེ་རིག་པ་དམ་པ་རང་གི་ཆུང་མ་དང་བཅས་པ་གར་བྱེད་པའི་སྦྱོར་བས་གནས་པ་བྲི་བར་བྱའོ། །དཀྱིལ་འཁོར་དེ་ཉིད་ཀྱི་ཤར་ལྷོའི་མཚམས་ཀྱི་ཆ་ལ་སྒེག་མོ། ལྷོ་ནུབ་ཀྱི་མཚམས་སུ་ཕྲེང་བ་མ། ནུབ་བྱང་གི་མཚམས་སུ་གླུ་མ། བྱང་ཤར་གྱི་མཚམས་སུ་གར་
མ་བྲི་བར་བྱའོ། །དཀྱིལ་འཁོར་གཉིས་པའི་ཤར་ཕྱོགས་ཀྱི་ལྷའི་སྣམ་བུའི་དབུས་སུ་རྡོ་རྗེ་རྩེ་ལྔ་པ་འབར་བ་བྲི་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་གི་ཕྱོགས་སུ་ཡང་བྲི་བར་བྱའོ། །དེ་ནས་ཤར་ཕྱོགས་ཀྱི་རྡོ་རྗེའི་ཕྱག་རྒྱའི་བྱང་གི་ཆ་ལ་རྡོ་རྗེ་གསེར་དང་། རྡོ་རྗེ་
གཞོན་ནུ་མ་གཉིས་བྲི་བར་བྱའོ། །རྡོ་རྗེའི་ཕྱག་རྒྱ་དེ་ཉིད་ཀྱི་ལྷོ་ཕྱོགས་ཀྱི་ཆ་ལ་རྡོ་རྗེ་ཞི་བ་དང་། རྡོ་རྗེ་ཁུ་ཚུར་རོ། །ལྷོ་ཕྱོགས་ཀྱི་རྡོ་རྗེ་ཕྱག་རྒྱའི་ཤར་ཕྱོགས་ཀྱི་ཆ་ལ་རྡོ་རྗེ་བདུད་རྩི་དང་། རྡོ་རྗེ་འོད་དོ། །རྡོ་རྗེའི་ཕྱག་རྒྱ་དེ་ཉིད་ཀྱི་ནུབ་ཕྱོགས་ཀྱི་ཆ་ལ། རྡོ་རྗེ་དབྱིག་པ་དང་། རྡོ་རྗེ་རྐེད་བཅིངས་
མའོ། །ནུབ་ཕྱོགས་ཀྱི་རྡོ་རྗེ་ཕྱག་རྒྱའི་ལྷོ་ཕྱོགས་ཀྱི་ཆ་ལ། རྡོ་རྗེ་ཕོ་ཉ་མ་དང་། རྡོ་རྗེ་མགྱོགས་མའོ། །རྡོ་རྗེའི་ཕྱག་རྒྱ་དེ་ཉིད་ཀྱི་བྱང་ཕྱོགས་ཀྱི་ཆ་ལ། རྡོ་རྗེ་འབར་བ་དང་། རྡོ་རྗེ་འཁྱོར་མའོ། །བྱང་ཕྱོགས་ཀྱི་རྡོ་རྗེ་ནུབ་ཕྱོགས་ཀྱི་ཆ་ལ། རྡོ་རྗེ་ཁ་དང་། རྡོ་རྗེ་དུས་སོ། །རྡོ་རྗེའི་ཕྱག་རྒྱ་དེ་ཉིད་ཀྱི་ཤར་

ཕྱོགས་ཀྱི་ཆ་ལ་རྡོ་རྗེ་རུལ་པ་མོ་དང་། རྡོ་རྗེ་ཆུ་སྲིན་མོ་བྲི་བར་བྱའོ། །དེ་ཉིད་ཀྱི་དཀྱིལ་འཁོར་གཉིས་པ་མེའི་མཚམས་ཀྱི་ཆ་ལ་འཇིགས་མ། བདེན་བྲལ་དུ་དཔལ་མོ། རླུང་དུ་དབྱངས་ཅན་མ། དབང་ལྡན་དུ་དཀའ་བཟློག་མ་བྲི་བར་བྱའོ། །དཀྱིལ་འཁོར་དེ་ཉིད་ཀྱི་
སྒོའི་དབུས་སུ་རྡོ་རྗེ་འཇུ་མ་དང་། རྡོ་རྗེ་ཟ་བ་མའོ། །ཕྱི་རོལ་གྱི་དཀྱིལ་འཁོར་གྱི་ལྷའི་སྣམ་བུའི་ཤར་ཕྱོགས་ཀྱི་དབུས་ཀྱི་ཆ་ལ་རྡོ་རྗེ་ཧཱུཾ་མཛད། དེའི་བྱང་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་སེམས་དཔའ་དང་། ཁྲོ་བོ་རྡོ་རྗེ་རྒྱལ་པོའོ། །རྡོ་རྗེ་ཧཱུཾ་མཛད་དེ་ཉིད་ཀྱི་ལྷོ་ཕྱོགས་ཀྱི་ཆ་ལ་ཁྲོ་བོ་རྡོ་རྗེ་ཆགས་
པ་དང་། ཁྲོ་བོ་རྡོ་རྗེ་ལེགས་པ་བྲིའོ། །དཀྱིལ་འཁོར་དེ་ཉིད་ཀྱི་ལྷོ་ཕྱོགས་ཀྱི་ཆ་ལ་རིན་ཆེན་ཧཱུཾ་མཛད་དང་། དེའི་ཤར་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་རིན་ཆེན་དང་། ཁྲོ་བོ་རྡོ་རྗེ་ཉི་མའོ། །དེ་ཉིད་ཀྱི་ནུབ་ཕྱོགས་ཀྱི་ཆ་ལ་ཁྲོ་བོ་རྡོ་རྗེ་དཔལ་དང་། ཁྲོ་བོ་རྡོ་རྗེ་བཞད་པའོ། །ནུབ་ཕྱོགས་ཀྱི་ལྷའི་
སྣམ་བུའི་དབུས་ཀྱི་ཆ་ལ་ཆོས་ཀྱི་ཧཱུཾ་མཛད། དེའི་གཡས་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་ཆོས་དང་། ཁྲོ་བོ་རྡོ་རྗེ་རྣོན་པོའོ། །དེ་ཉིད་གཡོན་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་རྒྱུ་དང་། ཁྲོ་བོ་རྡོ་རྗེ་སྲུང་བའོ། །དེའི་བྱང་ཕྱོགས་ཀྱི་ལྷའི་སྣམ་བུའི་དབུས་ཀྱི་ཆ་ལ་ལས་ཀྱི་ཧཱུཾ་མཛད། དེའི་
གཡས་ཕྱོགས་ཀྱི་ལོགས་སུ་ཁྲོ་བོ་རྡོ་རྗེ་ལས་དང་། ཁྲོ་བོ་རྡོ་རྗེ་སྲུང་བའོ། །དེའི་གཡོན་ཕྱོགས་ཀྱི་ཆ་ལ་ཁྲོ་བོ་རྡོ་རྗེ་གནོད་སྦྱིན་དང་། ཁྲོ་བོ་རྡོ་རྗེ་ཁུ་ཚུར་བྲི་བར་བྱའོ། །ཕྱིའི་དཀྱིལ་འཁོར་དེ་ཉིད་ཀྱི་མེའི་མཚམས་ཀྱི་ཆ་ལ། རྡོ་རྗེ་བདུག་པ་མ་དང་། འཇིགས་མའི་མཚན་མའི་ཕྱག་རྒྱ་བྲི་
པར་བྱའོ། །བདེན་བྲལ་དུ་རྡོ་རྗེ་མེ་ཏོག་མ་དང་། ལྷ་མོ་དཔལ་མོའི་མཚན་མའི་ཕྱག་རྒྱའོ། །རླུང་དུ་རྡོ་རྗེ་མར་མེ་དང་། དབྱངས་ཅན་མའི་མཚན་མའི་ཕྱག་རྒྱའོ། །དབང་ལྡན་གྱི་མཚམས་ཀྱི་ཆ་ལ་རྡོ་རྗེ་དྲི་མ་དང་། དཀའ་བཟློག་མའི་མཚན་མའི་ཕྱག་རྒྱ་བྲི་བར་བྱའོ། །ཕྱིའི་དཀྱིལ་འཁོར་གྱི་སྒོའི་
དབུས་སུ་རྡོ་རྗེ་སྒོ་བ་མ་དང་། རྡོ་རྗེ་དབང་མོ་དག་བྲི་བར་བྱའོ། །དེ་ལ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོ། འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལས་

བཤད་པའི་རིག་པ་རྣམས་ཀྱིས་བྲི་བར་བྱའོ། །ཁྲོ་བོ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་དྲིལ་བུའི་མཐར་ཐུག་པ་བྲི་བར་བྱའོ། །སྒེག་མོ་ལ་སོགས་པ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོའི་སྔགས་ཀྱིས་བྲི་བར་བྱའོ། །
རྡོ་རྗེ་རིག་པ་མཆོག་ལ་སོགས་པ་ནས་རྡོ་རྗེ་ཆུ་སྲིན་གྱི་མཐར་ཐུག་པ་ནི། འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་བཤད་པའི་ཕྱག་རྒྱ་ཆེན་པོའི་རིག་པ་རྣམས་ཀྱིས་བྲི་བར་བྱའོ། །འཇིགས་མ་ལ་སོགས་པའི། ཨོཾ་སརྦྦ་བཛྲ་ག་མི་ནི་སརྦྦ་བ་ཀྵེ་སཱ་དྷ་ཡ་གུ་ཧྱ་བཛྲི་ཎི་ཧཱུཾ་ཞེས་བྱ་བ་ནི།
འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་མ་མོ་ཐམས་ཅད་ཀྱི་སྤྱིའི་རིག་པ་ཡིན་ནོ། །དེ་ལྟར་དཀྱིལ་འཁོར་བྲིས་ནས། རྡོ་རྗེ་ཧཱུཾ་མཛད་ཀྱི་རྣལ་འབྱོར་པས། ཁྲོ་བོ་ཏི་རཱི་ནྟི་རིའི་ཕྱག་རྒྱ་བཅིངས་ནས། དེས་མེ་ཏོག་གི་ཕྲེང་བ་བླངས་ཏེ། རྡོ་རྗེ་ཤུགས་ཀྱིས་
ཞུགས་ལ། ཧཱུཾ་བཞི་བརྗོད་ཅིང་དཀྱིལ་འཁོར་དུ་ཞུགས་ནས་ལན་བདུན་བསྐོར་བ་བྱས་ཏེ། ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར། རྡོ་རྗེ་དྲིལ་བུ་དཀྲོལ་ཞིང་བལྟ་བར་བྱའོ། །དེ་ནས་བཅོམ་ལྡན་འདས་རྡོ་རྗེ་ཧཱུཾ་མཛད་ལ་མེ་ཏོག་གི་ཕྲེང་བ་ཕུལ་ནས་གར་བྱས་ཏེ་བླངས་ལ་རང་གི་སྤྱི་
བོར་བཅིང་བར་བྱའོ། །དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་སྒོ་དབྱེ་བའི་ཕྱག་རྒྱས་དཀྱིལ་འཁོར་གྱི་སྒོ་གཉིས་ཀ་དབྱེ་བར་བྱའོ། །སྙིང་པོ་ནི་འདི་ཡིན་ཏེ། ཨོཾ་བཛྲ་ཨུཏྒྷ་ཊ་ཡ་ས་མ་ཡ་པྲ་བེ་ཤ་ཤཱི་གྷྲཾ་སྨ་ར་བཛྲ་ས་མ་ཡ་ཧཱུཾ་ཕཊ། དེ་ནས་བུམ་
པ་གཞུག་པ་ལ་སོགས་པའི་ཆོ་ག་རྗེས་སུ་སྤྱད་ནས། སློབ་དཔོན་གྱིས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་རང་ཉིད་འཇུག་པའི་ཆོ་ག་དང་། སློབ་མ་འཇུག་པ་ལ་སོགས་པའི་ཆོ་གའི་ཚུལ་དུ་རྗེས་སུ་སྤྱད་པས་དེ་ནས་བདག་ལ་བྱིན་གྱིས་བརླབ་པ་ལ་སོགས་པ་ཇི་ལྟ་བ་བཞིན་དུ་བྱས་
ཏེ། དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་ནས་བསྡུ་བ་བྱས་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ཀྱི་མཚན་བརྒྱ་རྩ་བརྒྱད་པས་བཅོམ་ལྡན་འདས་རྡོ་རྗེ་ཧཱུཾ་མཛད་ལ་བསྟོད་པར་བྱའོ། །དེ་ནས་ཞེས་བྱ་བ་ནི། དེ་མ་ཐག་པ་སྟེ།

མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ལ་ཞེས་བྱ་བའི་དོན་ཏོ། །འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་འདིར་དགུག་པ་ལ་སོགས་པའི་ལས་བྱས་ནས་ཞེས་བྱ་བ་ནི། དེ་ལ་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་
བཤད་པའི་ཁྲོ་བོ་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱས་དགུག་པའི་ལས་ནི། །དེ་ཉིད་དང་པོར་བྱས་པའི་དགུག་པ་ལ་སོགས་པ་ལས་གང་ཡིན་པ་དེ་བྱེད་པའོ། །འདི་སྐད་སྟོན་པ་ཡིན་ཏེ། ཇི་སྐད་བཤད་པའི་ཁྲོ་བོ་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱས་རྡོ་རྗེ་ཧཱུཾ་མཛད་ལ་སོགས་པ་དགུག་པ་དང་།
དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་ཞགས་པའི་ཕྱག་རྒྱས་དཀྱིལ་འཁོར་དུ་གཞུག་པ་དང་། ལྕགས་སྒྲོག་གི་ཕྱག་རྒྱས་བཅིང་བ་དང་། འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་ཁྲོ་
བོ་རྡོ་རྗེ་འབེབས་པའི་ལས་ཀྱི་ཕྱག་རྒྱས་དབང་དུ་བྱའོ། །དེ་ནས་ཁྲོ་བོ་རྡོ་རྗེ་གནོད་སྦྱིན་གྱིས་བགེགས་བསྐྲད་ལ། ཁྲོ་བོ་རྡོ་རྗེ་ཁུ་ཚུར་གྱིས་སྒོ་བཅད་ནས། ཁྲོ་བོ་རྡོ་རྗེ་གོ་ཆས་བསྲུང་བ་ཐམས་ཅད་ཡང་དག་པར་བསྲུང་བར་བྱའོ། །དེ་ནས་རྡོ་རྗེ་ཧཱུཾ་མཛད་ཀྱིས་མཆོད་ཡོན་ཕུལ་ལ། རང་གི་དམ་
ཚིག་གི་ཕྱག་རྒྱས་རྡོ་རྗེ་ཧཱུཾ་མཛད་ལ་སོགས་པ་ཐམས་ཅད་སྔ་མ་བཞིན་དུ་བསྒྲུབས་ལ། དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། དབང་བསྐུར་ནས་ཕྱི་རོལ་གྱི་མཆོད་པ་དང་རྡོ་རྗེ་སྒེག་མོ་ལ་སོགས་པ་མཆོད་པ་རྣམ་པ་བརྒྱད་དང་། རྡོ་རྗེ་གསེར་ལ་སོགས་པ་ལས་ཀྱི་
ཕྱག་རྒྱ་རྣམས་ཀྱིས་ལས་ཀྱི་དཀྱིལ་འཁོར་ཐམས་ཅད་ཡང་དག་པར་མཆོད་ལ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། སློབ་མ་གཞུག་པའི་གནང་བ་ནོད་པར་བྱའོ། །དེ་ནས་སྔ་མ་བཞིན་དུ་སློབ་མ་ལ་ཕྱག་བཞི་བྱེད་དུ་བཅུག་ལ། རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ཏེ། རྡོ་རྗེ་
ཧཱུཾ་མཛད་ཡོངས་སུ་བཟླས་པའི་ཕྱི་རོལ་ན་གནས་པའི་ཆུས་དབང་བསྐུར་རོ། །རྡོ་རྗེ་འཆང་བའི་ལས་ཀྱི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་བཅིངས་ཏེ་ཞེས་བྱ་བ་ནི། དེ་ལྟར་དབང་བསྐུར་ནས་སློབ་དཔོན་རང་ཉིད་རྡོ་རྗེ་འཆང་བའི་སྔར་བཤད་པའི་མཚན་ཉིད་ཅན་བཅིངས་ལ། སློབ་མ་ཡང་འཆིང་

དུ་གཞུག་གོ། །འདིའི་སྙིང་པོ་ནི། ཨོཾ་སརྦྦ་ཏ་ཐཱ་ག་ཏ་བཛྲ་དྷཱ་ར་གྲྀཧྞ་ས་མ་ཡ་ཧཱུཾ། འདི་སྐད་དུ་སྨྲོས་ཤིག །ཁྱོད་ཀྱིས་ལྷའི་རིགས་མ་མཐོང་བ་དང་། ལས་མི་ཤེས་པ་སུ་ལ་ཡང་གསང་བའི་ལས་འདི་མ་སྨྲ་ཤིག་ཅེས་བྱ་བ་ལས་མི་ཤེས་པའི་ལས་ཀྱི་དཀྱིལ་འཁོར་དུ་མ་ཞུགས་པས།
ལས་ཀྱི་དཀྱིལ་འཁོར་མ་མཐོང་བ་ལས་མི་ཤེས་པ་ཞེས་བརྗོད་དོ། །འདིར་འཆད་པར་འགྱུར་བའི་ལས་ཀྱི་དཀྱིལ་འཁོར་ལས་བཤད་པའི་གསང་བ་དེ་ཐམས་ཅད་བརྗོད་པར་མི་བྱའོ། །ཁྱོད་དམ་ཚིག་ཉམས་པར་གྱུར་ཏ་རེ་ཞེས་བྱ་བ་ནི་གཟིར་བར་འགྱུར་བའོ། །དེ་ནས་ཡོན་གྱི་མཆོག་
བླངས་ལ། རྡོ་རྗེ་འཛིན་མའི་ཕྱག་རྒྱས་མེ་ཏོག་གི་ཕྲེང་བ་འཛིན་དུ་བཅུག་སྟེ། རྡོ་རྗེ་སློབ་དཔོན་རང་གི་ལས་ཀྱི་རྡོ་རྗེ་འཛིན་པའི་དམ་ཚིག་གི་ཕྱག་རྒྱ་བཅིངས་ཏེ་ཞེས་བྱ་བ་ནི། སློབ་དཔོན་རང་ཉིད་ཀྱིས་ལས་ཀྱི་དཀྱིལ་འཁོར་གྱི་རྡོ་རྗེ་འཛིན་མའི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་བཅིངས་ཏེ།
ཁྲོ་བོའི་ལྟ་བས་བལྟ་ཞིང་སློབ་མ་ལ་དབབ་པར་བྱའོ། །སློབ་མ་འདི་སྐད་བརྗོད་དུ་གཞུག་གོ། །ཨོཾ་བཛྲ་ཛིརྱ་ཞེས་བྱ་བ་ལ་སོགས་པ་དེས་འབབ་པར་འགྱུར་རོ། །ཡང་བབས་ན། བདག་ཉིད་ཀྱིས་འཇུག་པར་བྱ་སྟེ། རྡོ་རྗེ་ཤུགས་ཀྱི་སྙིང་པོ་འདིས་འཇུག་པར་བྱའོ། །ཨོཾ་པྲ་བེ་ཤ་
བཛྲ་པྲ་བེ་ཤ་བཛྲ་ཨཱ་བེ་ཤ་བཛྲ་ཨ་དྷི་ཏིཥྛ་བཛྲ་ཧཱུཾ། གལ་ཏེ་སྔ་མའི་འཇུག་པས་བྱའོ་ཞེ་ན། མ་ཡིན་ཏེ་དབབ་པ་ཙམ་ཡིན་པའི་ཕྱིར་རོ། །འདི་ཉིད་ཀྱིས་བབས་ནས་འཇུག་པར་བྱའོ། །དེ་ནས་སྔ་མ་བཞིན་དུ་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱིས་དགུག་པ་དང་། གཞུག་པ་དང་།
བཅིང་བ་དང་། དབང་དུ་བྱའོ། །ཕྱག་རྒྱ་དང་ལན་གྱི་ཕྱག་རྒྱ་རྣམས་ཀྱི་གར་གྱི་མཆོད་པས་མཆོད་པར་བྱའོ་ཞེས་བྱ་བ་ནི་བབས་པའི་མཐུས་མ་བརླབས་པའི་སློབ་མ་རྣམས་ཀྱང་རྡོ་རྗེ་གསེར་གྱི་ཕྱག་རྒྱ་འཆིང་བ་དང་། དེ་ནས་དེ་བཀྲོལ་ན་རྡོ་རྗེ་ཆུ་སྲིན་གྱི་ཕྱག་རྒྱ་འཆིང་བ་དང་། དེ་བཞིན་དུ་རྡོ་རྗེ་
བཟའ་བ་མའི་བར་གྱི་ཕྱག་རྒྱ་བཅིངས་ཏེ། དེ་ནས་དེ་བཀྲོལ་ལ་རྡོ་རྗེ་སྒོ་བ་མའི་ཕྱག་རྒྱ་བཅིང་བར་བྱའོ། །དེ་ལྟར་ན་དེ་ནི་ཕྱག་རྒྱ་དང་ལན་གྱི་ཕྱག་རྒྱ་རྣམས་ཀྱིས་གར་གྱི་མཆོད་པས་མཆོད་པ་ཡིན་ནོ། །དེ་ལྟར་བྱས་པར་གྱུར་ན་དེས་ཅི་ཞིག་ཏུ་འགྱུར་ཞེ་ན་དེང་ཕྱིན་ཆད་ཅེས་བྱ་བ་སྨོས་ཏེ།

དེང་ནས་བརྩམས་ཏེ། ལས་ཐམས་ཅད་ཀྱི་རྡོ་རྗེ་གསེར་ལ་སོགས་པའི་ལས་བྱེད་པར་འགྱུར་རོ། །གང་རྣམས་ཀྱིས་བྱེད་པར་འགྱུར་ཞེ་ན། ལུས་དང་ངག་དང་ལྟ་བ་དང་ཡིད་དང་། རྡོ་རྗེའི་ཕྱག་རྒྱ་རྣམས་ཀྱིས་ཞེས་བྱ་བ་སྨོས་ཏེ། དེ་ལ་ལུས་ཀྱི་ཕྱག་རྒྱ་ནི་རྡོ་རྗེ་
ཧཱུྃ་མཛད་ལ་སོགས་པ་དང་། རྡོ་རྗེ་རིག་པ་དམ་པ་ལ་སོགས་པ་རྣམས་ཀྱི་ཕྱག་རྒྱ་ཆེན་པོའོ། །ངག་གི་ཕྱག་རྒྱ་ནི་དེ་དག་གི་རིག་པའོ། །ལྟ་བའི་ཕྱག་རྒྱ་ནི་ཁྲོ་བོའི་ལྟ་བའོ། །ཡིད་ཀྱི་ཕྱག་རྒྱ་ནི་སྒོམ་པའོ། །རྡོ་རྗེའི་ཕྱག་རྒྱ་ནི་རྡོ་རྗེ་འབར་བ་ལ་སོགས་པ་ནས། ཀླུའི་རྡོ་རྗེ་ཀླུའི་ཞགས་
པའི་ཕྱག་རྒྱའི་མཚན་མའི་ཕྱག་རྒྱའོ། །དེར་འདོད་པ་ཞེས་བྱ་བ་ནི། བསམ་པ་ཉིད་ཀྱིས་བྱེད་པ་སྟེ། འདི་ནི་ཕན་ཡོན་བཤད་པ་ཡིན་ནོ། །དེ་ནས་ཡང་གདོང་གཡོགས་པ་བཀྲོལ་ཏེ་ཞེས་བྱ་བ་ནི། དེ་ནས་དུས་ཕྱིས་གདོང་གཡོགས་བཀྲོལ་བར་བྱའོ། །བཀྲོལ་ནས་དངོས་གྲུབ་ཀྱི་རྡོ་རྗེ་
བརྟུལ་ཞུགས་ཀྱི་བར་གྱི་དབང་བསྐུར་བར་བྱའོ། །དེའི་དོན་ནི་འདི་སྐད་སྟོན་པ་ཡིན་ཏོ། །དེ་ལྟར་གར་བྱ་ཞིང་མཆོད་པ་བྱས་ན་ཡང་། དེ་ནས་སློབ་མ་དེ་ལ་སློབ་དཔོན་གྱིས་འདི་སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་སུ་ཞུགས་ཀྱིས། ངས་ཁྱོད་ལ་
ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་ཀྱི་གྲུབ་པ་ཡང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། ཁྱོད་ཀྱིས་ལས་ཀྱི་དཀྱིལ་འཁོར་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམས་པར་གྱུར་ཏ་རེ། དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་འདི་
སྐད་ཅེས་བརྗོད་དོ། །ཁྱོད་ཀྱིས་ལྷའི་རིགས་མ་མཐོང་བ་དང་ལས་མི་ཤེས་པ་སུ་ལ་ཡང་གསང་བའི་ལས་འདི་མ་སྨྲ་ཤིག་ཁྱོད་དམ་ཚིག་ཉམས་པར་གྱུར་ཏ་རེ་ཞེས་བྱའོ། །དེ་ནས་རྡོ་རྗེ་སློབ་དཔོན་རང་ཉིད་རྡོ་རྗེ་འཛིན་མའི་ཕྱག་རྒྱ་ཁ་ཐུར་དང་། གྱེན་དུ་བསྟན་པ་བཅིངས་ཏེ། སློབ་མའི་སྤྱི་བོར་
བཞག་ལ་འདི་སྐད་ཅེས་བརྗོད་དོ། །འདི་ནི་ཁྱོད་ཀྱི་དམ་ཚིག་རྡོ་རྗེ་ཡིན་གྱིས། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། མནའི་ཆུ་སྙིང་པོས་སྔགས་ལ། སློབ་མ་དེ་འཐུང་དུ་གཞུག་གོ། །དེ་ལ་མནའི་སྙིང་པོ་ནི་འདི་ཡིན་ཏེ། རྡོ་རྗེ་

སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ཏ་ཀ་ཋ་ཞེས་བྱ་བའི་ཚུལ་གྱིས་སོ། །དེ་ནས་སློབ་མ་ལ་འདི་སྐད་བསྒོ་ཤིག །དེང་ཕྱིན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་
ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པ་མ་བྱེད་ཅིག །མི་བདེ་བ་མ་སྤངས་པས་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། འདི་སྐད་དུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་
སྨྲོས་ཤིག་ཅེས་བསྒོའོ། །དེ་ནས་དེ་རྡོ་རྗེ་འབེབས་པའི་ཕྱག་རྒྱ་དང་། བཛྲ་ཨཱ་བེ་ཤ་ཨཿཞེས་བྱ་བའི་སྙིང་པོ་འདིས་དབབ་པ་བསྐྱེད་པར་བྱའོ། །དེ་ནས་མེ་ཏོག་དོར་རོ། །སྙིང་པོ་ནི་འདི་ཡིན་ཏེ། ཨོཾ་པྲ་ཏཱིཙྪ་ཨ་དྷི་ཏིཥྛ་བཛྲ་ཧོ། །དེ་ནས་མེ་ཏོག་གི་ཕྲེང་བ་བླངས་ལ་སྤྱི་བོར་བཅིང་བར་བྱའོ། །སྙིང་པོ་ནི་
འདི་ཡིན་ཏེ། ཨོཾ་པྲ་ཏི་གྲྀཧྞ་སྟྭཾ་མི་མཾ་སཏྭ་མ་ཧཱ་བ་ལ། དེ་ནས་དེ་བཞིན་དུ་གདོང་གཡོགས་དགྲོལ་ལོ། །སྙིང་པོ་ནི་འདི་ཡིན་ཏེ། ཨོཾ་རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །རྡོ་རྗེའི་མིག་ནི་བླ་མེད་པ། །ཐམས་ཅད་མིག་ནི་དེང་འབྱེད་ཤོག །ཧེ་བཛྲ་པཱ་ཤྱ། །དེ་ནས་སྒོ་
སྲུང་ནས་བརྩམས་ནས། རིག་པ་དམ་པའི་བར་དུ་དཀྱིལ་འཁོར་བསྟན་ཏོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ། དེ་སྙིང་གར་བཀྲོལ་དུ་གཞུག་གོ། །ཏིཥྛ་བཛྲ་དྲྀ་ཌྷོ་མེ་བྷཱ་བ་ཤཱ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦྦ་སིདྡྷིམྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོ། །དེ་ནས་ཆུའི་དབང་བསྐུར་བར་
བྱའོ། །འདིའི་སྙིང་པོ་ནི། ཨོཾ་བཛྲ་ཨ་བྷི་ཥེ་ཀ་ཨ་བྷི་ཥིཉྩ་བཛྲ་དྷ་ར་ཏྲི་ས་མ་ཡ་གྲ་གྲ། དེ་ནས་རྡོ་རྗེ་དབྱིངས་སུ་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ་སྔར་བཤད་པའི་རྡོ་རྗེ་རྩེ་གསུམ་པ་ལ་སོགས་པའི་སྙིང་པོས་རྡོ་རྗེ་རིག་པ་དམ་པ་ལ་སོགས་པ་ལ་བྱིན་ལ། མིང་གིས་དབང་བསྐུར་
བར་བྱའོ། །རྡོ་རྗེ་ཧཱུཾ་མཛད་ལ་སོགས་པས་དབང་བསྐུར་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་དུ་བཤད་པའི་ལས་ཀྱི་ཆོ་ག་བྱའོ། །དེ་ལྟར་སློབ་དཔོན་གྱིས་ལས་ཀྱི་ཆོ་ག་དང་། སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་འཇིག་རྟེན་གསུམ་གྱི་

འཁོར་ལོའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་འཇིག་རྟེན་གསུམ་གྱི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་དང་ཕྱིའི་རྡོ་རྗེ་རིགས་ཀྱི་བཟླས་པ་བྱས་ཏེ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་
བཅིང་བའམ་རྡོ་རྗེ་ཆེན་པོའི་རིགས་ཀྱི་རྣལ་འབྱོར་པས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བསྟན་པའི་ཕྱིར་གར་གྱི་མཆོད་པའི་ཕྱག་རྒྱའི་ཡེ་ཤེས་སློབས་ཤིག་ཅེས་གསུངས་སོ། །གར་གྱི་
མཆོད་པ་ནི་གར་གྱི་མཆོད་པ་སྟེ། འདིར་ཕྱག་རྒྱ་བཅིངས་པའི་ཡེ་ཤེས་ཏེ་སློབས་ཤིག་པར་བསྟན་པའོ། །སངས་རྒྱས་རྡོ་རྗེ་འཛིན་སོགས་ཀྱི། །དམ་ཚིག་ཕྱག་རྒྱ་གཉིས་བྱས་ཏེ། །ཞེས་བྱ་བ་ནི། དེ་ལ་སངས་རྒྱས་ནི་རྡོ་རྗེ་ཧཱུྃ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་
དོ། །རྡོ་རྗེ་འཛིན་ནི་ཁྲོ་བོ་རྡོ་རྗེ་སེམས་དཔའོ། །སོགས་པ་སྨོས་པ་ནི། རྡོ་རྗེ་རྒྱལ་པོ་ནས་བརྩམས་ནས། རྡོ་རྗེ་སྒེག་མོ་ལ་སོགས་པའི་མཆོད་པ་བརྒྱད་ཀྱི་མཐར་ཐུག་པའི་བར་དུ་འདིར་གཟུང་བར་བྱའོ། །སངས་རྒྱས་རྡོ་རྗེ་འཛིན་པ་རྣམས་ནི་སངས་རྒྱས་རྡོ་རྗེ་འཛིན་པ་སྟེ། དེ་དང་པོར་བྱས་པ་མ་
ཡིན་པ་དེ་ནི་སངས་རྒྱས་རྡོ་རྗེ་འཛིན་སོགས་ཀྱིའོ། །དེ་དག་སངས་རྒྱས་རྡོ་རྗེ་འཛིན་སོགས་ཀྱིས་ཞེས་བྱ་བར་སྦྱར་རོ། །དམ་ཚིག་མཆོག་ནི་གཉིས་སུ་བྱ། །ཞེས་བྱ་བ་ནི། མཆོད་པའི་ཕྱག་རྒྱར་གྱུར་པའོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་འཇིག་རྟེན་
གསུམ་ལས་རྣམ་པར་རྒྱལ་བ་ལ་སོགས་པའི་དམ་ཚིག་གི་ཕྱག་རྒྱ་ནས་རྡོ་རྗེ་དྲིའི་དམ་ཚིག་གི་ཕྱག་རྒྱའི་མཐར་ཐུག་པའི་དམ་ཚིག་མཆོག་ཅེས་བརྗོད་དོ། །སངས་རྒྱས་དང་རྡོ་རྗེ་འཛིན་པ་གཉིས་སུ་བྱས་པས་ལས་ཀྱི་དཀྱིལ་འཁོར་འདི་རུ་དེ་དག་གི་མཆོད་པའི་ཕྱག་རྒྱར་འགྱུར་རོ། །དེ་
རྣམས་ཀྱིས། །ལས་ཀྱི་དཀྱིལ་འཁོར་མཆོད་པར་བྱ། །ཞེས་བྱ་བར་སྦྱར་རོ། །རྡོ་རྗེ་ལཱ་སྱ་ལ་སོགས་མཆོད། །རྡོ་རྗེ་རིག་པ་དམ་པ་སྟེ། ཞེས་བྱ་བ་ནི། རྡོ་རྗེའི་སྒྲ་ནི་ངེས་པར་གཟུང་བའོ། །རྡོ་རྗེ་སྒེག་མོ་ལ་སོགས་ནི། །གསང་བའི་མཆོད་པའི་ཕྱག་རྒྱའོ། །རྡོ་རྗེ་རིག་པ་དམ་པ་སྟེ། །ཞེས་བྱ་

བ་ནི། ཕྱག་རྒྱ་ལྷག་མ་རྣམས་སོ། །ལྷ་ཐམས་ཅད་མཆོད་པ་བྱེད་པ་ཡིན་ནོ་ཞེས་བསྟན་ཏོ། །རིག་པ་འདི་རྣམས་ཐམས་ཅད་ཀྱང་། །ཞེས་བྱ་བ་ནི་རྡོ་རྗེ་གསེར་ནས་བརྩམས་ནས། རྡོ་རྗེ་ཆུ་སྲིན་གྱི་བར་དུ་གར་གྱིས་མཆོད་པར་བྱེད་པའི་རིག་པ་རྣམས་ཡིན་ནོ་ཞེས་བྱ་བར་སྦྱར་རོ། །ལས་ཀྱི་དཀྱིལ་
འཁོར་མཆོད་པར་བྱ། །ཇི་ལྟར་མཆོད་པར་བྱ་ཞེ་ན། །ལྟག་འོག་གོ་རིམས་ཇི་བཞིན་དུ། །ཞེས་བྱ་བ་སྨོས་ཏེ། སློབ་མའམ་གཞན་ཡང་རུང་བ་རྡོ་རྗེ་གསེར་ལ་སོགས་པ་བྱེད་པ་ན། སློབ་དཔོན་གྱིས་རྡོ་རྗེ་ཆུ་སྲིན་བཅིང་བར་བྱའོ། །དེ་བཞིན་དུ་རྡོ་རྗེ་ཟ་བ་མོ་འཆིང་བར་བྱེད་པ་ན་སློབ་དཔོན་
གྱིས་རྡོ་རྗེ་སྒོ་བ་མོ་བཅིང་བར་བྱའོ་ཞེས་བྱ་བ་ནི། ལྟག་འོག་གོ་རིམས་ཇི་བཞིན་དུ། །ཞེས་བྱ་བ་ནི་སྒྲའི་དོན་ཡིན་ནོ། །སངས་རྒྱས་རྡོ་རྗེ་འཛིན་སོགས་ཀྱི། །དམ་ཚིག་མཆོག་ནི་གཉིས་སུ་བྱ། །མཆོད་པའི་ཕྱག་རྒྱར་འདིར་འགྱུར་རོ། །ཞེས་བཤད་པ་དེ་ནི་མི་ཤེས་ཏེ། ཇི་ལྟར་གཉིས་སུ་
བྱས་ནས་མཆོད་པའི་ཕྱག་རྒྱར་འགྱུར་རོ་ཞེ་ན། དེ་བཤད་པ་ནི། རྡོ་རྗེ་གར་གྱི་ཚུལ་གྱིས་ནི། །ཕྱག་རྒྱ་ཆེན་པོ་མདོར་བསྡུས་སོ། །ཞེས་བྱ་བ་སྨོས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་སྔགས་བརྗོད་ཅིང་། འཇིག་རྟེན་གསུམ་ལས་
རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་གར་བྱའོ། །དམ་ཚིག་མཆོག་ནི་གཉིས་བྱས་ཏེ། ཞེས་བྱ་བ་ནི། ཕྱག་རྒྱ་ཆེན་པོ་མདོར་བསྡུས་པ་དེ་དག་གོ། །རྡོ་རྗེ་ཧཱུྃ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུྃ་མཛད་རྣམས་ཀྱིས་འཇིག་རྟེན་གསུམ་གྱི་འཁོར་ལོའི་ལས་ཀྱི་
དཀྱིལ་འཁོར་ལས་བཤད་པའི་རང་གི་རིག་པ་བརྗོད་ཅིང་དམ་ཚིག་གི་ཕྱག་རྒྱ་གཉིས་སུ་བྱའོ། །ལན་གྱི་ཕྱག་རྒྱ་དགྲོལ་བར་བྱ། །ཞེས་བྱ་བ་ནི། ཁྲོ་བོ་རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་གཉིས་སུ་བྱས་ནས་གང་གི་ཚེ་སློབ་མའམ། གཞན་ཡང་རུང་བ་མཆོད་པ་བྱེད་པར་འགྱུར་བ་དེའི་ཚེ་སློབ་དཔོན་
གྱིས་ཁྲོ་བོ་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་གཉིས་སུ་བྱས་ཏེ། ལས་ཀྱི་དཀྱིལ་འཁོར་མཆོད་པར་བྱའོ། །དེ་ལྟར་ཁྲོ་བོ་རྡོ་རྗེ་བཞད་པའི་དམ་ཚིག་གི་ཕྱག་རྒྱ་གཉིས་སུ་བྱས་ནས། གང་གི་ཚེ་འགའ་ཞིག་གི་ལས་ཀྱི་དཀྱིལ་འཁོར་ལ་མཆོད་པ་བྱེད་པ་དེའི་ཚེ། སློབ་དཔོན་གྱིས་ཁྲོ་བོ་རྡོ་རྗེ་ཆོས་ཀྱི་

དམ་ཚིག་གི་ཕྱག་རྒྱ་གཉིས་སུ་བྱས་ནས། ལས་ཀྱི་དཀྱིལ་འཁོར་ལ་མཆོད་པར་བྱའོ། །གང་གི་ཚེ་འགའ་ཞིག་གིས་རྡོ་རྗེ་ཧཱུྃ་མཛད་ཀྱི་ཕྱག་རྒྱ་གཉིས་སུ་བྱས་ནས་མཆོད་པ་བྱེད་པ་དེའི་ཚེ་སློབ་དཔོན་གྱིས་ལས་ཀྱི་ཧཱུྃ་མཛད་ཀྱི་ཕྱག་རྒྱ་གཉིས་སུ་བྱའོ། །གང་གི་ཚེ་རིན་ཆེན་ཧཱུྃ་མཛད་
ཀྱི་དམ་ཚིག་གི་ཕྱག་རྒྱ་བྱེད་པ་དེའི་ཚེ་སློབ་དཔོན་གྱིས་ཆོས་ཀྱི་ཧཱུྃ་མཛད་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས། ལས་ཀྱི་དཀྱིལ་འཁོར་ལ་མཆོད་པ་བྱའོ། །གང་གི་ཚེ་རྡོ་རྗེ་གསེར་གྱི་ཕྱག་རྒྱ་བྱེད་པ་དེའི་ཚེ། རྡོ་རྗེ་ཆུ་སྲིན་གྱི་ཕྱག་རྒྱ་བསྟན་པར་བྱའོ། །དེ་བཞིན་དུ་གང་གི་ཚེ་འགའ་ཞིག་རྡོ་རྗེ་ཟ་བ་
མོ་འཆིང་བ་དེའི་ཚེ། སློབ་དཔོན་གྱིས་རྡོ་རྗེ་སྒོ་བ་མའི་ར་དུ་ཕྱག་རྒྱ་བསྟན་པར་བྱའོ། །དེ་ལྟར་ན་ལན་གྱི་ཕྱག་རྒྱ་དགྲོལ་བར་བྱ་བ་ཡིན་ནོ། །གར་གྱི་མཆོད་པའི་ཕྱག་རྒྱ་འདི་ཡིས་ནི། །མཆོད་པའི་རྒྱུར་གྱུར་པས་སོ། །གཙོ་བོ་ཐམས་ཅད་ནི་དེ་བཞིན་གཤེགས་པ་ཐམས་ཅད་དོ། །རྡོ་རྗེ་
འཛིན་པ་ཆེ་སོགས་ནི་ཁྲོ་བོ་རྡོ་རྗེ་སེམས་དཔའ་ལ་སོགས་པའོ། །རྡོ་རྗེ་ཧཱུཾ་མཛད་ནས་ཁྲོ་བོ་རྡོ་རྗེ་འབེབས་པའི་བར་གྱི་མཆོད་པ་བྱས་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་གྱུར་པས་ཅིར་འགྱུར་ཞེ་ན། ལས་གྲུབ་པར་ཡང་ངེས་པར་འགྱུར་རོ་ཞེས་བྱ་བ་སྨོས་ཏེ། རྡོ་རྗེ་འཆང་ཆེན་པོ་ལ་སོགས་
པའི་ལས་ཀྱི་དངོས་གྲུབ་རྣམས་ངེས་པར་འགྱུར་རོ། །འདི་སྐད་སྟོན་པ་ཡིན་ཏེ། གང་གི་ཚེ་འགའ་ཞིག་རྡོ་རྗེ་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས། གར་བྱེད་པར་སྟོན་པ་དེའི་ཚེ་སློབ་དཔོན་གྱིས་ལས་ཀྱི་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ། དེ་བཞིན་དུ་གཉིས་སུ་བྱས་
པ་བསྟན་པར་བྱའོ། །དེ་བཞིན་དུ་གང་གི་ཚེ་རིན་ཆེན་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ནས་དེ་བཞིན་དུ་སྟོན་པ་དེའི་ཚེ། སློབ་དཔོན་གྱིས་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་དེ་བཞིན་དུ་གཉིས་སུ་བྱས་ལ་བསྟན་པར་བྱའོ། །དེ་བཞིན་དུ་གང་གི་ཚེ་ཁྲོ་བོ་རྡོ་རྗེ་སེམས་དཔའི་ཕྱག་རྒྱ་གཉིས་སུ་
བྱས་པ་དེའི་ཚེ་ཁྲོ་བོ་རྡོ་རྗེ་ཁུ་ཚུར་གྱི་ཕྱག་རྒྱའོ། །ཁྲོ་བོ་རྡོ་རྗེ་རྒྱལ་པོའི་ཕྱག་རྒྱ་བྱེད་པ་ན་ཁྲོ་བོ་རྡོ་རྗེ་གནོད་སྦྱིན་གྱི་ཕྱག་རྒྱའོ། །ཁྲོ་བོ་རྡོ་རྗེ་ཆགས་པའི་ཕྱག་རྒྱ་བྱེད་པ་ན་ཁྲོ་བོ་རྡོ་རྗེ་སྲུང་བའི་ཕྱག་རྒྱའོ། །རྡོ་རྗེ་ལེགས་པའི་ཕྱག་རྒྱ་བྱེད་པ་ན་རྡོ་རྗེ་ལས་ཀྱི་ཕྱག་རྒྱའོ། །རྡོ་རྗེ་རིན་ཆེན་གྱི་ཕྱག་རྒྱ་བྱེད་པ་ན། རྡོ་རྗེ་

སྲུང་བའི་ཕྱག་རྒྱའོ། །རྡོ་རྗེ་གཟི་བརྗིད་ཀྱི་ཕྱག་རྒྱ་བྱེད་པ་ན། རྡོ་རྗེ་ལྕགས་ཀྱུའི་ཕྱག་རྒྱའོ། །རྡོ་རྗེ་རྒྱལ་མཚན་གྱི་ཕྱག་རྒྱ་བྱེད་པ་ན། རྡོ་རྗེ་རྣོན་པོའི་ཕྱག་རྒྱའོ། །རྡོ་རྗེ་བཞད་པའི་ཕྱག་རྒྱ་བྱེད་པ་ན། །རྡོ་རྗེ་ཆོས་ཀྱི་ཕྱག་རྒྱའོ། །རྡོ་རྗེ་སྒེག་མོ་བྱེད་པ་ན། རྡོ་རྗེ་གར་མ་བྱའོ། །རྡོ་རྗེ་ཕྲེང་བ་མ་
བྱེད་པ་ན། རྡོ་རྗེ་གླུ་མ་བྱའོ། །རྡོ་རྗེ་བདུག་པ་མ་བྱེད་པ་ན། རྡོ་རྗེ་དྲི་ཆབ་མའོ། །རྡོ་རྗེ་མེ་ཏོག་མ་བྱེད་པ་ན། རྡོ་རྗེ་མར་མེ་མ་བྱས་ཏེ། དེ་བཞིན་དུ་གཉིས་སུ་བྱས་ལ་བསྟན་པར་བྱའོ། །དེ་ལྟར་འཇིག་རྟེན་པའི་དམ་ཚིག་གི་ཁུ་ཚུར་གར་བྱས་པ་ལས་བྱུང་བས། རྡོ་རྗེ་གསེར་གྱི་ཕྱག་རྒྱ་བྱེད་པ་ན།
དེ་ནས་རྡོ་རྗེ་ཆུ་སྲིན་གྱི་ཕྱག་རྒྱ་བྱའོ། །རྡོ་རྗེ་གཞོན་ནུ་མའི་ཕྱག་རྒྱ་བྱེད་པ་ན། དེ་ནས་རྡོ་རྗེ་རུལ་པ་མའི་ཕྱག་རྒྱ་བྱའོ། །རྡོ་རྗེ་ཞི་བ་མའི་ཕྱག་རྒྱ་བྱེད་པ་ན། དེ་ནས་རྡོ་རྗེ་དུས་ཀྱི་ཕྱག་རྒྱ་བྱའོ། །རྡོ་རྗེ་ཁུ་ཚུར་གྱི་ཕྱག་རྒྱ་བྱེད་པ་ན། དེ་ནས་རྡོ་རྗེ་ཁའི་ཕྱག་རྒྱ་བྱའོ། །རྡོ་རྗེ་བདུད་རྩིའི་ཕྱག་རྒྱ་བྱེད་པ་ན། དེ་
ནས་འཁྱོར་མའི་ཕྱག་རྒྱ་བྱའོ། །རྡོ་རྗེ་མདངས་ཀྱི་ཕྱག་རྒྱ་བྱེད་པ་ན། རྡོ་རྗེ་འབར་བ་མའི་ཕྱག་རྒྱ་བྱའོ། །རྡོ་རྗེ་དབྱིག་མཆོག་མའི་ཕྱག་རྒྱ་བྱེད་པ་ན། མགྱོགས་མ་རྡོ་རྗེ་མའི་ཕྱག་རྒྱ་བྱའོ། །རྡོ་རྗེ་རྐེད་བཅིངས་མའི་ཕྱག་རྒྱ་བྱེད་པ་ན། རྡོ་རྗེ་ཕོ་ཉ་མོའི་ཕྱག་རྒྱ་བྱའོ། །རྡོ་རྗེ་འཇུ་མའི་ཕྱག་རྒྱ་བྱེད་
པ་ན། རྡོ་རྗེ་དབང་མོའི་ཕྱག་རྒྱ་བྱའོ། །རྡོ་རྗེ་ཟ་བ་མོའི་ཕྱག་རྒྱ་བྱེད་པ་ན། རྡོ་རྗེ་སྒོ་བ་མའི་ཕྱག་རྒྱ་བྱའོ། །འཇིག་རྟེན་པའི་དམ་ཚིག་གི་ཁུ་ཚུར་གཉིས་སུ་བྱས་ན། གར་བྱས་པ་ལས་བྱུང་བའི་ཕྱག་རྒྱ་བཅིང་བར་བྱའོ། །ཁྲོ་བོ་རྡོ་རྗེ་རིག་པ་དམ་པའི་ཕྱག་རྒྱ་བྱེད་པ་ན། རྡོ་རྗེ་མེའི་ཕྱག་རྒྱ་
གཉིས་ཀྱིས་གར་བྱེད་པ་ནི་མཆོད་པའི་ཕྱག་རྒྱ་ཡིན་གྱི་ལན་གྱི་ཕྱག་རྒྱ་ནི་མེད་དོ། །འདི་དག་ནི་གར་གྱི་མཆོད་པའི་ཕྱག་རྒྱའི་ཡེ་ཤེས་སོ། །དེ་ལ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་དང་། རྡོ་རྗེ་རིག་པ་མཆོག་ལ་སོགས་པ་ནས། རྡོ་རྗེ་ཆུ་སྲིན་གྱི་མཐར་ཐུག་པ་ནི་
འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་ཡིན་པར་ཤེས་པར་བྱའོ། །ཁྲོ་བོ་རྡོ་རྗེ་སེམས་དཔའ་ནས་བརྩམས་ནས། ཁྲོ་བོ་རྡོ་རྗེ་དྲིལ་བུ་མའི་མཐར་ཐུག་པ་རྣམས་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་

བཤད་པའི་ཡི་གེ་ཧཱུཾ་ནི་རྡོ་རྗེ་ཧཱུཾ་མཛད་ཀྱི་ཆོས་ཀྱི་ཕྱག་རྒྱའོ། །ཡི་གེ་ཏྲཱྃ་ནི་རིན་ཆེན་ཧཱུཾ་མཛད་ཀྱི་ཆོས་ཀྱི་ཕྱག་རྒྱའོ། །ཡི་གེ་ཧྲཱིཿནི་ཆོས་ཀྱི་ཧཱུཾ་མཛད་ཀྱིའོ། །ཡི་གེ་ཨ་ནི་ལས་ཀྱི་ཧཱུཾ་མཛད་ཀྱིའོ། །ཧཱུྃ་ཧེ་ཏྲྃ་ཏྃ་ཧི་ཧྲི། དེ་ཧ་དྷེ་ག་ཏི། ཧཱུྃ་གྲྃ་ཀེ་བྃ་ཏྲེ་ཨཱ། རྡོ་རྗེ་སེམས་དཔའ་
ལ་སོགས་པ་ནས་རྡོ་རྗེ་ཁུ་ཚུར་གྱི་བར་གྱིའོ། །མ་ཧཱ་ར་ཏི་ཧཱུཾ། རཱུ་པ་ཤོ་བྷེ་ཧཱུཾ། ཤོ་ཏྲ་སཽ་ཁྱ་ཧཱུཾ། སརྦྦ་པཱུ་ཙེ་ཧཱུཾ། པྲ་ཧླཱ་ད་ནི་ཕ་ལ་ག་མི་ཧཱུཾ། སུ་ཏེ་ཛཾ་གྲ་ཧཱུཾ། སཽ་གནྡྷ་གི་ཧཱུཾ། ཞེས་བྱ་བ་སྒེག་མོ་ལ་སོགས་པ་ནས། ཁྲོ་བོ་རྡོ་རྗེ་དྲི་ཆབ་མའི་བར་གྱི་ཆོས་ཀྱི་ཕྱག་རྒྱའོ། །ཕྱི་རོལ་གྱི་རྡོ་རྗེའི་རིགས་རྣམས་
ཀྱི་ནི་རང་གི་རིག་པའོ། །སྔར་བཤད་པའི་གར་བྱེད་པའི་ཕྱག་རྒྱ་ནི་འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་ཀྱི་ལས་ཀྱི་ཕྱག་རྒྱ་ཡིན་ནོ། །རྡོ་རྗེ་ཧཱུཾ་མཛད་ལ་སོགས་པ་དང་། རྡོ་རྗེ་སེམས་དཔའ་ལ་སོགས་པ་རྣམས་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་
ཆེན་པོ་ལས་བཤད་པའི་ཕྱག་རྒྱ་ཆེན་པོ་ཡིན་ནོ། །རྡོ་རྗེ་སྒེག་མོ་ལ་སོགས་པ་གསང་བའི་མཆོད་པ་རྣམས་དང་། རྡོ་རྗེ་རིག་པ་དམ་པ་ལ་སོགས་པ་ནས། རྡོ་རྗེ་ཆུ་སྲིན་ལ་མཐར་ཐུག་གི་བར་དུ་མ་བྷ་མ་དང་བཅས་པས་གར་བྱེད་པ། སྦྱོར་བ་ཅན་ནི་འདིར་ཕྱག་རྒྱ་ཆེན་པོ་ཡིན་ནོ། །འདིའི་
མདོག་དང་ཕྱག་རྒྱ་དང་མཚན་མ་རྣམས་ཀྱི་ངེས་པ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བསྟན་ཟིན་པས་དེ་ཉིད་དུ་ཤེས་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཆོ་ག་ལྷག་མ་རྣམས་ཀྱང་གཟུང་བར་བྱའོ། །
འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། ཕྱི་རོལ་གྱི་རྡོ་རྗེའི་རིགས་ཐམས་ཅད་ཕྱིར་མི་ལྡོག་པའི་ས་ལ་རབ་ཏུ་གཞག་པའི་རྗེས་ཐོགས་ཉིད་ལའོ། །ཕྱག་ན་རྡོ་རྗེ་ནི་རྡོ་རྗེ་ཧཱུཾ་མཛད་དོ། །
རྡོ་རྗེའི་རིགས་དེ་དག་ཐམས་ཅད་ནི་ཕྱི་རོལ་གྱི་རྡོ་རྗེའི་རིགས་ཐམས་ཅད་ཀྱི་སེམས་ཅན་ཐམས་ཅད་ཀྱི་དོན་ལ་ཡང་དག་པར་སྦྱོར་བའོ། །སེམས་ཅན་ཀྱང་ཡིན་ལ་དེ་ཐམས་ཅད་ཀྱང་ཡིན་པས་ན་སེམས་ཅན་དེ་དག་ཐམས་ཅད་ཀྱི་དོན་ཏོ། །འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱིས་

ཇི་ལྟར་མངོན་པར་འདོད་པའི་དངོས་གྲུབ་དེ་བསྒོམ་པ་ནི་སེམས་ཅན་གྱི་དོན་ཏོ། །ཁྱོད་ཀྱིས་དེ་ལྟར་ཡང་དག་པར་ངེས་པར་སྦྱོར་ཞིང་ཡོངས་སུ་མི་གཏོང་བས། དུས་འདི་ནས་ཉེ་བར་བཟུང་སྟེ་སྙིང་པོ་བྱང་ཆུབ་ལ་མཐར་ཐུག་གི་བར་དུ་སེམས་ཅན་གྱི་དོན་མཛད་པའོ། །ཕྱིར་མི་ལྡོག་པའི་ས་ལ་རབ་
ཏུ་གཞག་སྟེ་ཞེས་བྱ་བ་ནི། ཕྱིར་མི་ལྡོག་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་ལམ་ལ་གནས་པ་ཡིན་པ་དེའི་ཕྱིར། འཁོར་བའི་ལམ་ལ་མི་འཇུག་ཅིང་མི་ལྡོག་པ་དེས་ནི་ཕྱིར་མི་ལྡོག་པའི་ཐ་སྙད་དུ་བྱེད་དེ་ཕྱིར་མི་ལྡོག་པ་མེད་ཅིང་མི་ལྡོག་པ་ནི་ཕྱིར་མི་ལྡོག་པའོ། །ས་
དེ་ལ་མངོན་པར་འདུས་བྱས་པས་བྱང་ཆུབ་སེམས་དཔའི་ས་བརྒྱད་པ་རྟོགས་པར་འགྱུར་རོ། །དེས་ན་ཕྱིར་མི་ལྡོག་པའི་ས་ལ་རབ་ཏུ་གཞག་པ། སེམས་ཅན་ལྷག་མ་རྣམས་ཀྱི་དོན་བྱ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་གསང་བ་ལ། བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་
པ་ཐམས་ཅད་ལ་ཞུས་པ་ཡིན་ནོ། །མཁྱེན་བཞིན་དུ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་གསང་བ་མཁྱེན་དུ་ཟིན་ཀྱང་སྒྱུ་མ་རྡོ་རྗེ་ལ་སོགས་པ་བཅོམ་ལྡན་འདས་རྣམ་པར་སྣང་མཛད་ཀྱིས་ལུང་བསྟན་པའི་དེ་བཞིན་གཤེགས་པ་ཐམས་ཅད་ཀྱི་གསང་བ་ཉོན་ཅིག་ཅེས་བྱ་བ་དེ་གང་ལགས།
ཉན་པ་ནི་རང་ཉིད་ཉམས་སུ་ལེན་པ་དང་། གཞན་ལ་གདམས་ངག་སྟོན་པས་ན། བདག་གསང་བ་ཐམས་ཅད་འཛིན་པར་དབང་བསྐུར་ན་ཞེས་བྱ་བ་ནི་བདག་ཉིད་གསང་བ་འཛིན་པའི་རྒྱུ་མཚན་གྱིས་དབང་བསྐུར་བ་ཡིན་པས་རྒྱུ་དེའི་ཕྱིར། དེ་བཞིན་གཤེགས་པ་ཐམས་ཅད་ཀྱི་གསང་བ་དེ་གང་
ལགས། བཀའ་སྩོལ་ཅིག་ཅེས་པ་སྟེ། ཀུན་ནས་བདག་གིས་རྟོགས་པར་བྱེད་པས་ན་དཀའོ། །དེ་ནས་ཞེས་བྱ་བ་ནི། དེ་མ་ཐག་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་དེའི་རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་སྟེ། མ་ཆགས་པ་དང་མ་སྡང་བ་
དང་མ་རྨོངས་པ་དང་། འདོད་ཆགས་ལ་སོགས་པའི་སྤྱོད་པ་བསྟན་ནས། སེམས་ཅན་གྱི་དོན་མཛད་པས་ན་གསང་བའོ། །དེ་ལ་དམིགས་པའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཤིང་མངོན་སུམ་དུ་མཛད་

པའོ། །འདི་ཞེས་བྱ་བ་ནི་བློ་ལ་གནས་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་འདི་གསུངས་པ་ནི་བཤད་པའོ། །ཇི་ལྟ་ཇི་ལྟར་འདུལ་འགྱུར་བ། །ཞེས་བྱ་བ་ནི་གང་དང་གང་གི་གཟུགས་ཀྱིས་འདུལ་ཞིང་ལུང་དང་རྟོགས་པ་ལ་རབ་ཏུ་བཞག་པའོ། །
སེམས་ཅན་རྣམས་ཀྱི་རང་བཞིན་ནི། །ཞེས་བྱ་བ་ནི། རང་གི་བདག་ཉིད་དུ་གྱུར་པའི་ངོ་བོ་ནི་རང་བཞིན་ཏེ། དེ་ལ་རང་གི་བདག་ཉིད་ནི་རང་བཞིན་ནོ། །འདི་སྐད་སྟོན་པ་ཡིན་ཏེ། འདོད་ཆགས་སྤྱོད་པ་ལ་སོགས་པ་གང་ཡིན་པ་དེ་དག་གི་འདོད་ཆགས་ཀྱིས་འདོད་ཆགས་སྤང་བ་དང་། ཞེ་སྡང་
སྤྱོད་པ་གང་ཡིན་པ་དེ་དག་ལ་ཁྲོ་བས་ཁྲོ་བ་སྤང་བ་དང་། གཏི་མུག་ལ་སྤྱོད་པ་གང་ཡིན་པ་དེ་དག་ལ་ཁྱབ་འཇུག་སྒྱུ་མའི་གཟུགས་བསྟན་པ་ལ་སོགས་པས་འདུལ་བར་བྱེད་པ་ཡིན་ནོ། །འདི་ཉིད་བཤད་པ་ནི། དེ་ལྟ་དེ་ལྟར་སེམས་ཅན་དོན། །ཞེས་པ་ལ་སོགས་པ་སྟེ། འདོད་ཆགས་ལ་སོགས་
པའི་སྤྱོད་པ་བསྟན་པ་དེ་དང་དེས། དེ་ལྟ་དེ་ལྟར་སེམས་ཅན་གྱི་དོན་བྱས་པས། སེམས་ཅན་མངོན་པར་འདོད་པའི་དོན་ཡོངས་སུ་རྫོགས་པར་འགྱུར་རོ། །ཇི་ལྟར་བྱེད་ཅེ་ན། འདོད་ཆགས་ལ་སོགས་གཙང་བས་བྱ། །ཞེས་བྱ་བ་གསུངས་ཏེ། ཐུགས་རྗེ་ཆེན་པོ་གཞན་གྱི་དབང་
གིས་མ་ཆགས་པ་དང་། མ་སྡང་བ་དང་མ་རྨོངས་པ་ཡིན་པའི་ཕྱིར་རོ། །སེམས་ཅན་ཀུན་ལ་ཕན་པའི་ཕྱིར་ནི། བདེ་བའི་རྣམ་པར་སྨིན་པའི་ལས་དེའི་ཕྱིར་དང་། སངས་རྒྱས་རྣམས་ཀྱིས་བསྟན་པའི་ཕྱིར་འདི་ལྟར་སེམས་ཅན་ཡོངས་སུ་སྦྱང་བའི་ཕྱིར་ཁྱེད་ཀྱིས་གསད་པར་བྱའོ་ཞེས་
གནང་བ་མཛད་པའི་རྒྱུ་མཚན་འདིས་བསད་པ་ནི་བརྒྱལ་བར་བྱེད་པ་ཉིད་ཡིན་ནོ། །གང་ལ་ཞེ་ན། །སེམས་ཅན་ཐམས་ཅད་ལའོ། །སྲོག་གཅོད་པའི་ཀུན་ནས་སློང་བའི་སྡིག་པས་གོས་པར་མི་འགྱུར་རོ་ཞེས་བྱ་བ་ནི། ཐུགས་རྗེ་གཞན་གྱི་དབང་གིས་ཕན་པ་དང་བདེ་བ་ལ་ངེས་པར་སྦྱོར་བའི་
གསོད་པ་ཡིན་པའི་ཕྱིར་རོ། །སེམས་ཅན་ཐམས་ཅད་ཕན་ཕྱིར་དང་། །ཞེས་བྱ་བ་ནི་སྔ་མ་བཞིན་ནོ། །སངས་རྒྱས་རྣམས་ཀྱི་དོན་ནི་སངས་རྒྱས་དོན་ཏེ། ཕ་རོལ་པོ་ལོངས་སྤྱོད་དང་རྒྱགས་པས་དྲེགས་པའི་ཕྱུག་པ་དེ་ལས་ཉམས་པར་བྱས་ནས་བསྟན་པ་ལ་གནས་པར་བྱ་བའི་ཕྱིར་རོ། །དེའི་དོན་

ལ་སྦྱོར་བས་སངས་རྒྱས་ཀྱི་དོན་དུ་རབ་ཏུ་སྦྱོར་བ་དེའི་ཕྱིར་སངས་རྒྱས་ཀྱི་འབྲས་བུ་ལ་རབ་ཏུ་སྦྱོར་བ་ནི། སངས་རྒྱས་ཀྱི་དོན་དུ་སྦྱོར་བའོ། །ཕ་རོལ་ནོར་རྣམས་ཕྲོགས་པ་ནི། །རྒྱལ་པོ་ལ་སོགས་པའིའོ། །མ་བྱིན་པར་ལེན་པས་ཀུན་ནས་བསླང་བའི་སྡིག་པས་རྣལ་འབྱོར་བ་དེ་ལ་གོས་པར་མི་འགྱུར་
རོ། །འདོད་ཆགས་འདྲ་བའི་བདེ་བ་མེད། །ཅེས་བྱ་བ་ནི། དེ་ལ་འདོད་ཆགས་ནི་ཆོས་བདག་མེད་པའི་ཆགས་པ་སྟེ། མི་དམིགས་པའི་ཐུགས་རྗེ་ཆེན་པོའོ། །དེ་སྐད་དུ་ཡང་། ཆོས་བདག་མེད་པའི་ཆགས་པ་ཡིས། །མཁས་པ་རྣམས་ནི་དགའ་བར་བྱེད། །ཅེས་གསུངས་སོ། །འདྲ་བ་ནི་
མཚུངས་པ་སྟེ་བདེ་བ་གཞན་ན་མེད་པའོ། །དེ་ལྟ་བུར་གྱུར་པའི་བདེ་བ་དེ་རྒྱལ་བ་རྣམས་དང་དེ་བཞིན་གཤེགས་པ་རྣམས་ལ་དེ་ཕུལ་བར་བསྒོམ་པའི་སྟོབས་ཀྱིས་མངོན་སུམ་དུ་བྱས་པའོ། །སེམས་ཅན་གྱི་ཕྱིར་སེམས་ཅན་ཐམས་ཅད་ལ་ཕན་པ་དང་བདེ་བ་དང་དངོས་གྲུབ་དམ་པའི་
རྒྱུའི་ཕྱིར་རོ། །གཞན་གྱི་ཆུང་མ་ནི་གཞན་གྱི་བུད་མེད་དོ། །གཞན་གྱི་བུད་མེད་མཆོག་ཏུ་གྱུར་པ་ནི་ཕྱག་རྒྱ་ཆེན་པོ་དང་དམ་ཚིག་དང་ཆོས་དང་ལས་ཀྱི་ཕྱག་རྒྱའི་གཟུགས་སོ། །བསྟེན་པ་ནི་བསྒོམ་པའོ། །བསོད་ནམས་ཐོབ་པར་འགྱུར་ཞེས་བྱ་བ་ནི་རྙེད་པར་འགྱུར་བའོ། །དེ་ལ་
བསོད་ནམས་ཞེས་བྱ་བ་ནི་དག་བྱེད་ཀྱི་བསོད་ནམས་ཏེ་གཟུང་བ་དང་འཛིན་པའི་དྲི་མ་འཁྲུད་པར་བྱེད་པ་ཞེས་བྱ་བའི་དོན་ཏོ། །དེ་ཡང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བའི་ཏིང་ངེ་འཛིན་འདི་མངོན་པར་འདོད་པའི་ཕྱིར་རོ། །སེམས་ཅན་ཀུན་ལ་ཕན་ཕྱིར་དང་། །སངས་
རྒྱས་རྣམས་ཀྱིས་བསྟན་པའི་ཕྱིར། །ཞེས་བྱ་བ་ནི་སྔ་མ་བཞིན་ནོ། །ལས་རྣམས་ཐམས་ཅད་བྱས་པ་ཡིས། །ཞེས་བྱ་བ་ནི། སྦྱོར་བ་དང་། ཡོངས་སུ་སྦྱོར་བ་དང་། སོར་རྟོག་པ་དང་ནན་ཏན་དུ་བྱེད་པའི་བརྩོན་འགྲུས་ཀྱི་རང་བཞིན་རྣམ་པ་བཞིའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་
ལས་ཐམས་ཅད་ནི་ལས་ཐམས་ཅད་དོ། །ཐམས་ཅད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བ་དང་ཡིད་བདེ་བའི་དངོས་གྲུབ་བྱེད་པའི་རྒྱུའི་ཕྱིར་རོ། །བྱམས་པའི་ཞེས་བྱ་བ་ནི་བསྒོམ་པའོ། །ཤིན་ཏུ་ཕུལ་དུ་བྱུང་བར་འགྱུར་བ་ནམ་མཁའི་ཁམས་ཐམས་ཅད་ཁྱབ་པའི་བསོད་

ནམས་བྱ་བ་ནན་ཏན་གྲུབ་པའི་ཡེ་ཤེས་ཀྱི་མཚན་ཉིད་ཐོབ་ཅིང་རྙེད་པའོ། །ཡང་ན་སྲོག་བཅད་པ་དང་མ་བྱིན་པར་ལེན་པ་རྣམས་ནི་བཅོམ་ལྡན་འདས་ཀྱིས་རྣམ་གྲངས་གཞན་དུ་གསུངས་པ་ལྟར་བཤད་པར་བྱའོ། །དེ་ལ་བྱང་ཆུབ་ཀྱི་སེམས་ཀྱི་མཚན་ཉིད་རྟོགས་པས་སེམས་ཅན་
དུ་འཛིན་པ་བསད་པ་ན་སེམས་ཅན་ཐམས་ཅད་བསད་པའོ། །འདིས་བསད་པའི་སེམས་ཅན་རྣམས་མི་བསྐྱོད་རྡོ་རྗེའི་སངས་རྒྱས་ཀྱི་ཞིང་ཁམས་སུ་རྒྱལ་བའི་སྲས་སུ་འགྱུར་རོ་ཞེས་གསུངས་སོ། །ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་སེམས་ཅན་ཐམས་ཅད་ཀྱི་རྒྱུད་ཀྱི་ཉོན་མོངས་པའི་
བག་ཆགས་ཕྲོགས་པས་ན། ཕ་རོལ་ནོར་རྣམས་ཕྲོགས་པ་སྟེ། །ཉོན་མོངས་སེམས་ཅན་ནོར་ཞེས་བཤད། །ཅེས་གསུངས་སོ། །ཉོན་མོངས་འཇིག་རྟེན་ཁམས་རྣམས་ཀྱི། །དབང་བྱས་ཁྲོ་བོ་ཆར་སྤྲུལ་ནས། །བློ་ལྡན་རྡོ་རྗེ་མགོན་པོ་ཡིས། །རྟོགས་པའི་རྒྱལ་པོ་འདི་གསུངས་སོ། །སེམས་
ཅན་ཁྲོ་བ་རབ་གྲུབ་ཕྱིར། །དྲི་མ་མེད་པའི་དེ་ཉིད་ནི། །སྣང་བྱེད་དགེ་བ་འདི་བཤད་ལས། །བདག་གིས་བསོད་ནམས་གང་བསགས་པ། །དེ་ཡིས་འཇིག་རྟེན་མ་ལུས་པ། །རྡོ་རྗེ་ཁྲོ་ཆེན་ཀུན་དགའ་ཆེ། །སྙིང་པོ་བསམ་མི་ཁྱབ་ཆེན་གཙོ། །རྡོ་རྗེ་ཧཱུཾ་མཛད་གཙོ་གྱུར་ཅིག །དེ་ཁོ་ན་ཉིད་
སྣང་བ་ཞེས་བྱ་བ་ལས་ཕྱི་རོལ་གྱི་རྡོ་རྗེ་རིགས་ཀྱི་བཤད་པ་རྫོགས་སོ།། །།དེ་ལྟར་ཁྲོ་བས་ཁྲོ་བ་སྤང་བའི་ཕྱིར། གནང་བ་ནོད་པས་དེའི་རྗེས་སུ་འཇུག་པའི་རྡོ་རྗེའི་རིགས་ཆེན་པོ་དང་ཕྱིའི་རྡོ་རྗེའི་རིགས་དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དམ་ཚིག་གི་ཕྱག་རྒྱ་
གཙོ་བོར་གྱུར་པ་བསྟན་ནས། ད་ནི་གཏི་མུག་གི་གཉེན་པོར་གྱུར་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་ཕྱག་རྒྱ་གཙོ་བོར་གྱུར་པའི་པདྨའི་རིགས་དེས་འདུལ་བའི་སེམས་ཅན་རྗེས་སུ་གཟུང་བའི་ཕྱིར། དེ་ནས་ཡང་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་པ་ལ།
དེ་ནས་ཞེས་བྱ་བའི་སྒྲ་ནི། དེ་མ་ཐག་པ་སྟེ་དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །འདིར་དང་པོ་སྦྱོར་བའི་ཏིང་ངེ་འཛིན་ནི། རྡོ་རྗེ་དབྱིངས་ལས་གསུངས་པའི་དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་སུ་རྡོ་རྗེ་སེམས་དཔའ་དང་། རྡོ་རྗེ་སྙིང་པོ་དང་། པདྨའི་རིགས་ཀྱི་

བདག་པོ་རྡོ་རྗེ་སྤྱན་དང་། རྡོ་རྗེ་སྤྱན་གཉིས་པ་རྡོ་རྗེ་སྣ་ཚོགས་སྤྲུལ་པས་བསྣན་པ་ཡིན་པར་ཤེས་པར་བྱའོ། །དེ་ལྟར་ཡང་ཇི་ལྟར་ཤེས་ཤེ་ན། གང་གི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་
བཏབ་པའི་ཚིག་ཐོས་ནས། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་ག་ལ་བ་དེར་མངོན་དུ་ཕྱོགས་ཏེ་འདུག་ནས། དེ་ནས་བཅོམ་ལྡན་འདས་ཀྱིས་བྱིན་གྱིས་བརླབས་པའི་རྗེས་ཐོགས་ལ་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་ལྟ་བ་དང་། རྡོ་རྗེ་སྣ་ཚོགས་སུ་བྱིན་གྱིས་
བརླབས་ཏེ། དེ་ནས་དེས་བྱིན་གྱིས་བརླབས་པས་དེ་ཐམས་ཅད་ཐ་དད་པར་གྱུར་ཏོ། །ཐམས་ཅད་ཀྱི་གཟུགས་སྟོན་པའི་ཏིང་ངེ་འཛིན་ལ་སྙོམས་པར་ཞུགས་ནས། པདྨའི་རིགས་སྤྲུལ་པར་མཛད་དོ་ཞེས་དེ་མ་ཐག་ཏུ་འཆད་པར་འགྱུར་བའི་ཕྱིར་རོ། །ཐམས་ཅད་ཀྱང་ཡིན་ལ་དེ་བཞིན་
གཤེགས་པ་ཡང་དེ་ཡིན་པས་ན་དེ་བཞིན་གཤེགས་པ་ཐམས་ཅད་དེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་མོ་དང་མཉམ་པའི་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་ལ་སོགས་པ་སངས་རྒྱས་
བཅོམ་ལྡན་འདས་རྣམས་ཡང་གཅིག་ཏུ་འདུས་ཏེ་ཞེས་བྱ་བ་ནི། སྔར་རྡོ་རྗེའི་རིགས་ཀྱིས་འདུལ་བའི་ཕྱིར་འདུ་བར་མཛད་ནས་རྡོ་རྗེ་སེམས་དཔའ་ལ་གསོལ་བ་བཏབ་པ་ཡིན་ལ། ད་ནི་འཆད་པར་འགྱུར་བ་ལ་ལྟོས་པས་ཡང་གི་སྒྲ་སྨོས་སོ། །འདུ་ཞིང་ཚོགས་པར་མཛད་པ་དེ་ནི་
གཅིག་ཏུ་འདུས་པའོ། །བཅོམ་ལྡན་འདས་ནི་བདུད་བཞི་ལས་རྒྱལ་བའོ། །ཕྱག་ན་རྡོ་རྗེ་དེ་ཉིད་ཅེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་རྡོ་རྗེ་སེམས་དཔའི་གཟུགས་ཅན་རྡོ་རྗེ་འཆང་ཆེན་པོའོ། །ཆོས་ཐམས་ཅད་ཀྱི་བདག་པོ་ནི་ཆོས་ཀྱང་ཡིན་ལ་
ཐམས་ཅད་ཀྱང་དེ་ཡིན་པས་ཆོས་ཐམས་ཅད་དེ་པདྨའི་རིགས་ཀྱི་གཟུགས་ཅན་གྱི་སངས་རྒྱས་ལ་སོགས་པའོ། །དེའི་བདག་པོ་ནི་མངའ་བདག་སྟེ། ཐམས་ཅད་བྱེད་པས་ན་ཆོས་ཀྱི་དབང་ཕྱུག་གོ། །སྤྱན་རས་གཟིགས་ཀྱི་དབང་པོ་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་

རྣམ་པར་དག་པའོ་ཞེས་སོ་སོར་རྟོག་པ་དང་། སེམས་ཅན་ཐམས་ཅད་ཡོངས་སུ་སྐྱོབ་པ་ལ་གཟིགས་པས་ན་སྤྱན་རས་གཟིགས་སོ། །དེ་ལ་དབང་པོ་ནི་སྤྱན་རས་གཟིགས་ཀྱི་མངའ་བདག་ཡིན་པས་ན་སྤྱན་རས་གཟིགས་ཀྱི་དབང་ཕྱུག་གོ། །འདིས་ཞེས་བྱ་བ་ནི་འཆད་
པར་འགྱུར་བ་དེ་བློ་ལ་གནས་པའོ། །དེ་བཞིན་གཤེགས་པས་མཚན་བརྒྱ་རྩ་བརྒྱད་པ་དེས་གསོལ་བ་བཏབ་པ་ནི་དོན་དུ་གཉེར་བའོ། །འདི་སྐད་སྟོན་པ་ཡིན་ཏེ། རྡོ་རྗེ་འཆང་ཆེན་པོ་དེ་ཉིད་སྤྱན་རས་གཟིགས་ཀྱི་དབང་པོའི་གཟུགས་འཛིན་པ་ལ་དེ་བཞིན་གཤེགས་པ་ཐམས་ཅད་ཀྱི་པདྨའི་རིགས་
སྤྲུལ་པའི་ཕྱིར་མཚན་བརྒྱ་རྩ་བརྒྱད་པས་གསོལ་བ་འདེབས་པ་ཡིན་གྱི་ས་ལ་གནས་པའི་བྱང་ཆུབ་སེམས་དཔའ་ནི་མ་ཡིན་ནོ། །པདྨོ་ཞེས་བྱ་བ་ནི་རང་བཞིན་གྱིས་རྣམ་པར་དག་པའོ། །སེམས་དཔའ་ནི་པདྨའི་སེམས་དཔའོ། །པདྨ་ཆེ་ཞེས་བྱ་བ་ནི་རང་བཞིན་གྱིས་རྣམ་པར་དག་པའི་གཟུགས་
དེས་ཐམས་ཅད་དུ་སོང་བས་ན་པདྨ་ཆེན་པོའོ། །འཇིག་རྟེན་དབང་པོ་ཞེས་པ་ནི་འཇིག་རྟེན་དབང་ཕྱུག་གི་གཟུགས་ཀྱིས་བཞུགས་པ་དེའི་འཇིག་རྟེན་དབང་པོའོ། །དབང་ཕྱུག་ཆེ་ཞེས་བྱ་བ་ནི་དབང་ཕྱུག་ཆེན་པོའི་གཟུགས་ཀྱིས་འདུལ་བ་རྣམས་ལ་དོན་ཡོད་པར་ཞགས་པའི་གཟུགས་ཀྱིས་
བཞུགས་པས་ན་དབང་ཕྱུག་ཆེན་པོའོ། །སྤྱན་རས་གཟིགས་དབང་པོ་ཞེས་བྱ་བ་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་གཟིགས་པ་དང་སེམས་ཅན་ལ་གཟིགས་པ་འདི་ལ་མངའ་བས་ན་དེ་ནི་འདིར་སྤྱན་རས་གཟིགས་ཀྱི་དབང་པོ་ཞེས་བྱའོ། །བརྟན་པའི་མཆོག་
ཅེས་བྱ་བ་ནི། །བརྟན་པ་ནི་འཇིགས་པ་མེད་པའོ། །དེ་དག་གི་མཆོག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་གྱི་རང་བཞིན་གྱིས་གཟུང་བ་དང་འཛིན་པའི་རྣམ་པར་རྟོག་པ་སྐྲག་པ་དང་རྟག་ཏུ་བྲལ་བའི་ཕྱིར་རོ། །རྡོ་རྗེ་ཆོས་ཞེས་བྱ་བ་ནི་རྡོ་རྗེ་ནི་སྟོང་པ་ཉིད་ཀྱི་ཏིང་ངེ་འཛིན་ཏོ། །དེའི་ཆོས་
ནི་གཟུགས་སྣ་ཚོགས་བསྟན་ནས། སེམས་ཅན་གྱི་དོན་མཛད་པས་ན་སྤྱན་རས་གཟིགས་དབང་ཕྱུག་སྟེ། རྡོ་རྗེ་ཆོས་ནི་རྡོ་རྗེ་ཆོས་སོ། །ཡང་ན་རྡོ་རྗེ་དང་ཆོས་ནི་རྡོ་རྗེ་ཆོས་ཏེ། སྟོང་པ་ཉིད་ནི་གཟུགས་སོ། །གཟུགས་ཉིད་ནི་སྟོང་པའོ་ཞེས་གསུངས་ཏེ་བདུན་ནོ། །ཆོས་ཀྱི་རྒྱལ་པོ་ཞེས་བྱ་བ་

ནི་ནམ་མཁའ་དང་མཉམ་པའི་ཡེ་ཤེས་ནི་ཆོས་སོ། །དེས་འཇིག་རྟེན་གྱི་ཁམས་ཀྱི་བདག་པོའི་གཟུགས་ཀྱིས་རྒྱལ་པོ་ལྟར་གསལ་བར་བྱེད་པས་ན་ཆོས་ཀྱི་རྒྱལ་པོའོ། །དག་པ་ཆེན་པོ་ཞེས་བྱ་བ་ནི་དེ་ཉིད་ཀྱིས་ནམ་མཁའ་དང་མཉམ་པའི་ཡེ་ཤེས་ཀྱི་གཟུགས་ཀྱིས་ཐམས་ཅད་དུ་སོང་བའི་ཕྱིར་
དང་བག་ཆགས་དང་བཅས་པའི་ཉོན་མོངས་པ་སྤངས་པའི་ཕྱིར། དག་པ་ཡང་ཡིན་ལ་ཆེན་པོ་ཡང་ཡིན་པས་ན་དག་པ་ཆེན་པོའོ། །སེམས་དཔའི་རྒྱལ་པོ་ནི་པདྨའི་རིགས་ཐམས་ཅད་ཀྱི་ལྷ་སེམས་དཔའི་གཟུགས་འཛིན་པའི་རྒྱལ་པོ་ནི་སེམས་དཔའི་རྒྱལ་པོ་སྟེ། དེ་དག་གི་སྤྱི་བོར་འོད་
དཔག་ཏུ་མེད་པའི་གཟུགས་ཀྱིས་བཞུགས་པའི་ཕྱིར་རོ། །བློ་གྲོས་ཆེ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱིས་བཞུགས་པས་ན་དེ་བཞིན་གཤེགས་པ་ཐམས་ཅད་ཀྱི་བློ་གྲོས་ཆེན་པོའོ། །པདྨའི་བདག་ཉིད་ཅེས་བྱ་བ་ནི་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱིས་པདྨ་
ཉིད་དྲི་མ་ཐམས་ཅད་དང་བྲལ་བའི་ཕྱིར། པདྨའི་བདག་ཉིད་ནི་དེའི་རང་བཞིན་དུ་གྱུར་པས་ན་པདྨའི་བདག་ཉིད་དོ། །པདྨ་ཆེ་ཞེས་བྱ་བ་ནི་རང་བཞིན་གྱིས་རྣམ་པར་དག་པའི་གཟུགས་དེ་ཉིད་ཀྱིས་ཐམས་ཅད་དུ་སོང་བའི་ཕྱིར། པདྨ་ཡང་ཡིན་ལ་ཆེན་པོ་ཡང་ཡིན་པས་ན་པདྨ་ཆེན་པོའོ། །པདྨའི་
མགོན་པོ་ཞེས་བྱ་བ་ནི་པདྨའི་རིགས་ཀྱི་པདྨ་དེའི་མགོན་པོ་ནི་པདྨའི་མགོན་པོའོ། །དེས་པདྨའི་རིགས་ལ་སོགས་པ་དབང་དུ་བྱེད་པ་སྟེ། མཚན་བདུན་ནོ། །པདྨ་ལས་བྱུང་ཞེས་བྱ་བ་ནི་པདྨའི་རྒྱུ་ལས་བྱུང་བས་ན་པདྨ་ལས་བྱུང་ངོ་། །པདྨའི་རིགས་ཐམས་ཅད་རྡོ་རྗེ་པདྨའི་གཟུགས་ལས་བྱུང་བའི་ཕྱིར་
རོ། །པད་བཟང་འོད་ཅེས་བྱ་བ་ནི་པདྨའི་རྣམ་པ་ཅན་གྱི་འོད་ཟེར་འབྱུང་བའི་ཕྱིར་རོ། །དེ་སྐད་དུ་ཡང་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་པདྨོ་ལྟ་བུའི་འོད་ཟེར་ཁ་དོག་དང་། གཟུགས་དང་། རྟགས་དང་སྤྱོད་ལམ་རྣམ་པ་དུ་མ་འབྱུང་སྟེ། འཕགས་པ་སྤྱན་རས་གཟིགས་དབང་
པོའི་ཐུགས་ཀར་ཞུགས་སོ་ཞེས་འཆད་པར་འགྱུར་རོ། །པདྨ་དག་པ་ཞེས་བྱ་བ་ནི་པདྨ་ཡིས་དག་པས་ན་པདྨ་དག་པ་སྟེ། རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་དྲི་མ་ཐམས་ཅད་སྤངས་པའི་ཕྱིར་རོ། །རབ་དག་བྱེད་ཅེས་བྱ་བ་ནི་ཤིན་ཏུ་དག་པར་བྱེད་པའི་ཕྱིར་ན་རབ་དག་གོ། །པདྨའི་

ཏིང་ངེ་འཛིན་དེས་རང་དང་གཞན་གྱི་བག་ཆགས་དང་བཅས་པའི་ཉོན་མོངས་པའི་དྲི་མ་འཁྲུད་པར་བྱེད་པའི་ཕྱིར་རོ། །རྡོ་རྗེ་པདྨོ་ཞེས་བྱ་བ་ནི་རྡོ་རྗེ་པདྨའི་གཟུགས་ཀྱིས་སོ། །པད་མཆོག་སྐུ་ཞེས་བྱ་བ་ནི་པདྨ་བཟང་པོ་ནི་པདྨ་མཆོག་སྟེ། བཅོམ་ལྡན་འདས་ཀྱི་ཕྱག་རྒྱའི་
གཟུགས་སོ། །དེའི་སྐུ་མདོག་དཀར་དམར་གྱི་སྐུ་མངའ་བ་ནི་པད་མཆོག་སྐུའོ། །པདྨོ་པདྨོ་ཞེས་བྱ་བ་ནི་བཅོམ་ལྡན་འདས་འོད་དཔག་ཏུ་མེད་པ་པདྨའི་ཏིང་ངེ་འཛིན་ལ་བཞུགས་པ་གང་ཡིན་པ་དེ་ལ་པདྨོའི་པདྨ་ཞེས་ཕྱིས་འཆད་པར་འགྱུར་རོ། །དེ་སྐད་དུ་ཡང་། བདག་ཉིད་ཀྱིས་ནི་བདག་ཉིད་དང་། །
རྡོ་རྗེ་ཆོས་ཀྱི་ཏིང་འཛིན་གནས། །པདྨོའི་པདྨོ་བསྒོམས་ན་ནི། །ཟད་མི་ཤེས་པའི་གོ་འཕང་ཐོབ། །ཅེས་འཆད་པར་འགྱུར་བས་ཏེ་གཟུགས་སུ་བྱ་བ་ཡིན་ཏེ་མཚན་བདུན་ནོ། །སྣ་ཚོགས་ཆེན་པོ་ཞེས་བྱ་བ་ནི་སྣ་ཚོགས་ཀྱང་ཡིན་ལ་ཆེན་པོ་ཡང་ཡིན་པས་ན། སྣ་ཚོགས་ཆེན་པོ་སྟེ་ཐམས་ཅད་
ཀྱི་གཟུགས་འཛིན་པས་འགྲོ་བ་འདུལ་བའི་རང་བཞིན་ནོ། །སྣང་བ་ཆེ་ཞེས་བྱ་བ་ནི་སྣང་བ་ཡང་ཡིན་ལ་ཆེན་པོ་ཡང་དེ་ཡིན་པས་ན་སྣང་བ་ཆེ་སྟེ། པདྨ་ཉི་མའི་འོད་ཀྱིས་ནམ་མཁའ་ཐམས་ཅད་འགེངས་པའོ། །དགོས་པ་ཆེན་པོ་ཞེས་བྱ་བ་ནི་དགོས་པ་ཆེན་པོ་འདི་ལ་མངའ་བས་ན་དགོས་པ་ཆེ་སྟེ།
སེམས་ཅན་གྱི་དོན་དུ་དེས་ཐམས་ཅད་པའི་གཟུགས་བསྟན་ནས་ནམ་མཁའ་ཐམས་ཅད་འགེངས་པའོ། །དེ་དང་མཚུངས་ཞེས་བྱ་བ་ནི་ཆེན་པོ་ནི་དེ་བཞིན་གཤེགས་པའོ། །འདིའི་དཔེ་དེ་དང་མཚུངས་པས་ན་ཆེ་དང་མཚུངས་པ་སྟེ། དེ་བཞིན་གཤེགས་པ་དང་མཚུངས་ཞེས་བྱ་བའི་དོན་
ཏོ། །སྐུ་དང་གསུང་དང་ཐུགས་རྡོ་རྗེ་ལྟར་གྱུར་པ་ནམ་མཁའི་ཁམས་ཐམས་ཅད་དུ་རྟག་ཏུ་བཞུགས་པའི་གཟུགས་དང་མཚུངས་པའོ། །བརྟན་པ་ཆེན་པོ་ཞེས་བྱ་བ་ནི་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ངོ་བོ་དེས་ནམ་མཁའི་ཁམས་ཐམས་ཅད་དུ་ཁྱབ་ཅིང་སྐྲག་པ་མེད་པས་ན་
བརྟན་པ་ཆེན་པོའོ། །དཔའ་བོ་ཆེ་ཞེས་བྱ་བ་ནི་རང་ཉིད་དྲི་མ་མེད་པའི་རྡོ་རྗེ་འཆང་བའི་གཟུགས་ཀྱིས་དམིགས་པ་ཐམས་ཅད་ལ་སྤྱོད་པའི་སེམས་ཅན་སྐྲག་ཅིང་འཇིགས་པར་བྱེད་པས་ན་དཔའ་བོ་ཆེའོ། །དཔའ་ཆེན་ཞེས་བྱ་བ་ནི་དཔའ་བ་ནི་གཟི་བརྗིད་དེ་གཟི་བརྗིད་ཅན་རྣམས་ཀྱི་ནང་ན་གཟི་བརྗིད་

ཆེ་བས་ན་དཔའི་ཆེན་ནོ། །རྡོ་རྗེ་ཉི་མ་འཁོར་ལོས་སྒྱུར་བའི་རྒྱལ་པོའི་གཟུགས་ཀྱིས་རྒྱལ་སྲིད་ཐམས་ཅད་འཕྲོག་པར་བྱེད་པས་ན་དཔའ་བོ་ཆེ་བ་སྟེ་མཚན་བདུན་ནོ། །སེམས་ཅན་བསམ་པ་ཞེས་བྱ་བ་ནི་སེམས་ཅན་ཐམས་ཅད་ཀྱི་སེམས་ཀྱི་འདོད་པ་གང་ཡིན་པ་ལ་བསམ་པ་ཞེས་བཤད་དོ། །ཐེག་
པ་ཆེ་ཞེས་བྱ་བ་ནི་སེམས་ཅན་ཐམས་ཅད་ཀྱི་སེམས་དེ་ཉིད་གོམས་པའི་སྟོབས་ཀྱིས་བྱང་ཆུབ་སེམས་དཔའི་ལམ་གྱི་རང་བཞིན་འབྲས་བུ་དང་བཅས་པར་འགྱུར་བ་དེའི་ཕྱིར་ཐེག་པ་ཆེན་པོའོ། །རྣལ་འབྱོར་ཆེན་པོ་ཞེས་བྱ་བ་ནི་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ནི་རྣལ་འབྱོར་
ཆེའོ། །དེ་སྐད་དུ་ཡང་། ཕྱག་རྒྱ་ཆེན་པོའི་ཏིང་འཛིན་གྱིས། །དེ་ཉིད་ཆེན་པོ་རྗོད་བྱེད་ཅིང་། །ཐམས་ཅད་རེ་རེའང་བདག་ཡིན་པར། །སྒོམ་པ་སེམས་པའི་སྦྱོར་བའོ། །ཞེས་འཆད་པར་འགྱུར་རོ། །ཚངས་པའི་གཟུགས་ཀྱིས་འདུལ་བའི་སེམས་ཅན་རྣམས་འདུལ་བར་བྱེད་པས་ན་མེས་
པོ་ཆེའོ། །བདེ་ཟ་ཞེས་བྱ་བ་ནི་ཤ་མ་ནི་བདེ་བའོ། །དེ་ལ་སྤྱོད་པས་ན་ཟ་བའོ། །ཡང་ན་ལྷ་ཆེན་པོས་འདུལ་བའི་སེམས་ཅན་རྣམས་རྗེས་སུ་གཟུང་བའི་ཕྱིར། དེའི་གཟུགས་སྟོན་པས་ན་བདེ་ཟའོ། །བདེ་བྱེད་ཅེས་བྱ་བ་ནི་བདེ་བར་བྱེད་པས་ན་བདེ་བྱེད་དོ། །དག་པའི་དོན་ཞེས་བྱ་བ་ནི་དག་པ་
ཆོས་ཀྱི་དབྱིངས་དེ་ཉིད་འདི་ལ་མངའ་བས་ན་དག་པའི་དོན་ཏོ། །སངས་རྒྱས་པདྨོ་ཞེས་བྱ་བ་ནི་རྡོ་རྗེ་སེམས་དཔའི་གནས་སུ་འབྱུང་བ་སྟེ། སངས་རྒྱས་ཀྱང་ཡིན་ལ་པདྨ་ཡང་ཡིན་པས་ན་སངས་རྒྱས་པདྨ་སྟེ་མཚན་བརྒྱད་དོ། །ཆོས་ཀྱི་དེ་ཉིད་ནི། པདྨའི་རིགས་ཀྱི་དཀྱིལ་འཁོར་ཏེ། །དེ་རྣམས་
ཀྱང་ཁོ་ན་ཉིད་ནི་ཆོས་ཀྱི་དེ་ཉིད་དོ། །མི་མཉམ་མེད་པས་ཟུར་བཞི་མཉམ། །ཞེས་བྱ་བ་ལ་སོགས་པས་བཤད་ཟིན་པ་དེའི་དོན་ནི་འདིར་ཆོས་ཀྱི་དེ་ཁོ་ན་ཉིད་ཀྱི་དོན་ཏོ། །དམ་པའི་ཆོས་དམ་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་ཡིན་པས་ན་དམ་པའི་ཆོས་ཏེ་པདྨའི་རིགས་ཀྱི་དཀྱིལ་
འཁོར་རོ། །དག་པའི་ཆོས་ཞེས་བྱ་བ་ནི། དཀྱིལ་འཁོར་དེ་ཉིད་ཀྱིས་འདོད་ཆགས་ལ་སོགས་སྤོང་བ་དེའི་ཕྱིར། དག་པ་ཡང་ཡིན་ལ་ཆོས་ཀྱང་དེ་ཡིན་པས་ན་དག་པའི་ཆོས་སོ། །ཆོས་རབ་བྱེད་ཅེས་བྱ་བ་ནི། པདྨའི་རིགས་ཀྱི་དཀྱིལ་འཁོར་དེ་ཉིད་པདྨའི་རིགས་ཀྱི་ཏིང་ངེ་འཛིན་དེས་སྐྱེད་པར་

བྱེད་པའི་ཕྱིར་རོ། །བཟང་པོའི་ཆོས་བྱེད་པའི་ཕྱིར་ཆོས་རབ་བྱེད་དོ། །ཆོས་ཆེན་པོ་ཞེས་བྱ་བ་ནི། པདྨའི་རིགས་ཀྱི་དཀྱིལ་འཁོར་དེ་ཉིད་རྒྱུད་ཕྱི་མ་ཕྱི་མ་ལས་བཤད་པའི་ཚུལ་གྱིས་ཐམས་ཅད་དུ་སོང་བས་ན་ཆོས་ཀྱང་ཡིན་ལ་ཆེན་པོ་ཡང་ཡིན་པས་ན་ཆོས་ཆེན་པོའོ། །
ཆོས་བཟང་མཆོག་ཅེས་བྱ་བ་ནི། ཆོས་དགེ་བའི་ཆོས་ནི་ཆོས་བཟང་པོ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་དེའི་མཆོག་ནི་ཆོས་བཟང་མཆོག་སྟེ་དཀྱིལ་འཁོར་ཉིད་དོ། །ཆོས་ཀྱི་འཁོར་ལོ་ཞེས་བྱ་བ་ནི་པདྨའི་རིགས་ཀྱི་དཀྱིལ་འཁོར་ཐམས་ཅད་ཀྱི་རང་བཞིན་དུ་འགྲོ་བ་ཡིན་པ་དེའི་ཕྱིར།
ཆོས་ཀྱི་འཁོར་ལོ་མཚན་བདུན་ནོ། །སངས་རྒྱས་སེམས་དཔའ་ཞེས་བྱ་བ་ནི་སངས་རྒྱས་ནི་ཉེ་བར་མཚོན་པ་སྟེ། སངས་རྒྱས་ཀྱི་སེམས་དཔའ་ནི་སེམས་ཅན་ནོ། །དེ་བཞིན་གཤེགས་པ་འོད་དཔག་ཏུ་མེད་པའི་སྤྱི་བོ་ན་བཞུགས་པ་དེས་ཉེ་བར་མཚོན་པའི་ཕྱིར་རོ། །སེམས་བཟང་མཆོག་
ཅེས་བྱ་བ་ནི། དག་པའི་སེམས་ནི་སེམས་བཟང་སྟེ། སངས་རྒྱས་པདྨ་ལ་སོགས་པ་དེ་དག་གི་མཆོག་ཏུ་གྱུར་པས་ན་སེམས་བཟང་མཆོག་སྟེ་པདྨའི་རིགས་ཀྱི་བདག་པོའོ། །ཆོས་ཀྱི་སེམས་དཔའ་ཞེས་བྱ་བ་ནི། ཆོས་ཐམས་ཅད་རང་བཞིན་གྱིས་དག་པ་ལས་བྱུང་བའི་ཆོས་ཀྱི་སེམས་ནི་སེམས་
དཔའི་ཆོས་སོ། །སེམས་མཆོག་འཛིན་ཞེས་བྱ་བ་ནི། དགེ་བའི་སེམས་ནི་སེམས་ཀྱི་མཆོག་སྟེ། །སེམས་ཅན་ཀུན་གྱི་སེམས་གང་ཡིན། །བརྟན་ཕྱིར་སེམས་དཔའ་ཞེས་བརྗོད་དོ། །ཞེས་གང་ལ་འཆད་པར་འགྱུར་བ་ནི་འདིར་སེམས་དཔའི་མཆོག་འཛིན་པ་དེས་ན་སེམས་མཆོག་འཛིན་ཞེས་བྱ་
བ། སེམས་དཔའི་དམ་པ་ཞེས་བྱ་བ་བཤད་མ་ཐག་པའི་རྡོ་རྗེ་དང་མཚུངས་པའི་སེམས་དེ་ཉིད་རྡོ་རྗེའི་གཟུགས་ཅན་ཡིན་པས་ན་སེམས་དཔའ་དམ་པའོ། །སེམས་མཆོག་ཅེས་བྱ་བ་ནི་བཤད་མ་ཐག་པའི་སེམས་དཔའ་དམ་པ་དེ་ཉིད་ལེགས་པར་ཤེས་པས་ན་སེམས་མཆོག་ཅེས་སོ། །སེམས་ཅན་
སེམས་དཔའ་ཞེས་བྱ་བ་ནི། རྡོ་རྗེའི་བདག་ཉིད་དུ་བསྒོམས་པས་ཟླ་བའི་དཀྱིལ་འཁོར་གྱི་སྟེང་དུ་སེམས་དཔའི་རྡོ་རྗེར་གྱུར་པ་དེ་ཉིད་སེམས་དཔར་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་གྱུར་པའི་སེམས་ནི་སེམས་ཅན་སེམས་དཔའ་ཞེས་བྱ་སྟེ་མཚན་བདུན་ནོ། །སྤྱན་རས་གཟིགས་དབང་

ཞེས་བྱ་བ་ནི། རང་བཞིན་གྱིས་རྣམ་པར་དག་པའི་སོ་སོར་རྟོག་པར་དེ་བཞིན་གཤེགས་པ་ཐམས་ཅད་ཀྱིས་གཟིགས་པའི་ཕྱིར་སྤྱན་རས་གཟིགས་སོ། །སྤྱན་རས་གཟིགས་ཀྱི་དབང་ཕྱུག་གི་གཟུགས་འཛིན་པས་ན་སྤྱན་རས་གཟིགས་དབང་ངོ་། །མགོན་པོ་མཆོག་ཅེས་བྱ་བ་ནི། བྱང་ཆུབ་སེམས་
དཔའ་སེམས་ཅན་གྱི་སྐྱབས་དང་མགོན་བྱེད་པ་དེ་དག་གི་ནང་ན་མཆོག་ཡིན་པས་ན་མགོན་པོ་མཆོག་གོ། །མགོན་པོ་ཆེན་པོ་ཞེས་བྱ་བ་ནི་མགོན་པོ་ཡང་ཡིན་ལ་ཆེན་པོ་ཡང་ཡིན་པས་ན་མགོན་པོ་ཆེན་པོ་སྟེ། ཐམས་ཅད་ཀྱི་གཟུགས་སུ་བསྟན་ནས་སེམས་ཅན་ཐམས་ཅད་ཡོངས་སུ་སྐྱོབ་པའི་ཕྱིར་
དང་། ཐམས་ཅད་དུ་འགྲོ་བའི་ཕྱིར་རོ། །རྣམ་པར་གཟིགས་ཞེས་བྱ་བ་ནི་བྱེ་བྲག་ཏུ་གཟིགས་པ་ན་རྣམ་པར་གཟིགས་སོ། །གང་ལ་ཡོངས་སུ་བསྐྱབ་པའི་དོན་ཡིན་ཞེ་ན། སྣང་བ་ཞེས་བྱ་བ་སྨོས་ཏེ། ཡེ་ཤེས་ཀྱི་སྣང་བས་སོ། །སེམས་ཅན་དང་སྣོད་ཀྱི་འཇིག་རྟེན་གྱི་གཟུགས་ཀྱིས་སེམས་ཅན་གྱི་
དོན་བྱེད་པས་ན་སྣང་བའོ། །འཇིག་རྟེན་དོན་ཞེས་བྱ་བ་ནི་འཇིག་རྟེན་པས་དོན་དུ་གཉེར་བ་ནི་འཇིག་རྟེན་དོན་ཏོ། །འཇིག་རྟེན་མགོན་ཁྱོད་ཅེས་བྱ་བ་ནི། མིང་གི་སྒོ་ནས་འདི་སྐད་བཏགས་པ་ཡིན་ནོ། །མཚན་བརྒྱད་དོ། །འཇིག་རྟེན་ཡི་གེ་ཞེས་བྱ་བ་ནི། འཇིག་རྟེན་པའི་ཡི་གེ་ནི་འཇིག་རྟེན་ཡི་གེ་
སྟེ། མི་ཟད་པའི་ཕྱིར་ན་ཡི་གེ་ཞེས་བྱ་བའི་ཐ་ཚིག་གོ། །ཡི་གེ་ཆེ་ཞེས་བྱ་བ་ནི། མི་ཟད་པའི་ཕྱིར་ཡི་གེ་ཆེ་སྟེ། ཡི་གེ་ཆེན་པོ་ནི་ཆོས་ཀྱི་དབྱིངས་ཀྱི་རང་བཞིན་གྱིས་ཐམས་ཅད་དུ་སོང་བའི་ཕྱིར་ཞེས་བྱ་བའི་དོན་ཏོ། །ཡི་གེ་མཆོག་ཅེས་བྱ་བ་ནི། འཇིག་རྟེན་པ་འགའ་ཞིག་ཡི་གེ་འགའ་ཞིག་འདོད་
པ་དེ་དག་གི་ནང་ན་མཆོག་ཡིན་པས་ན་མཛེས་པའོ། །ཡི་གེ་འདྲ་ཞེས་བྱ་བ་ནི། དེ་བཞིན་གཤེགས་པ་དེའི་གཟུགས་དང་འདྲ་བའི་ཡི་གེ་དེ་ལ་འདི་སྐད་ཅེས་བརྗོད་དོ། །ཡི་གེའི་ཡི་གེ་ཞེས་པ་ན། དེ་བཞིན་གཤེགས་པའི་སྤྲུལ་པའི་སྐུ་ནི་ཡི་གེའོ། །ཡི་གེ་དེ་དག་གི་ཡི་གེ་ནི་ལོངས་སྤྱོད་རྫོགས་པའི་
སྐུས་རྟག་ཏུ་གནས་པའི་ཕྱིར་རོ། །ཐམས་ཅད་སྤྱན་ཞེས་བྱ་བ་ནི། ཐམས་ཅད་ཀྱི་སྤྱན་ནི་སྤྱན་ལྔ་སྟེ་ཐམས་ཅད་སྤྱན་ཞེས་བྱའོ། །འཁོར་ལོ་ཡི་གེ་ཞེས་བྱ་བ་ནི། གདུལ་བྱའི་སྐྱེ་བོའི་རྒྱུད་ལ་རིམ་གྱིས་འཕོ་བས་ན་འཁོར་ལོ་སྟེ། སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་དང་། རང་

བཞིན་གྱིས་འོད་གསལ་བའི་རྣམ་པར་ཐར་པའི་སྒོ་དེ་ཉིད་མི་ཟད་པས་ན་ཡི་གེ་སྟེ། དེའི་རང་བཞིན་ཉིད་ཡི་གེ་འཁོར་ལོའི་མཚན་བདུན་ནོ། །ཕྱག་ན་པདྨོ་ཞེས་བྱ་བ་ནི་ཕྱག་ན་པདྨོ་མངའ་བ་ནི་ཕྱག་ན་པདྨའོ། །ཕྱག་ཆེན་པོ་ཞེས་བྱ་བ་ནི། ཕྱག་ཆེན་པོ་མངའ་བས་ན་ཕྱག་ཆེན་པོ་སྟེ།
ནམ་མཁའི་ཁམས་ཀྱང་ཕྱག་གིས་ཁྱབ་པའོ། །དབུགས་འབྱིན་པ་ཞེས་བྱ་བ་ནི། ངན་སོང་དུ་སོང་བ་དང་། མྱ་ངན་དང་། ཤི་བ་ལ་སོགས་པའི་འཇིགས་པས་སྐྲག་པའི་སེམས་ཅན་རྣམས་བསྲུང་བའི་ཕྱིར་ན་དབུགས་འབྱིན་པའོ། །སྦྱིན་པ་པོ་ཞེས་བྱ་བ་ནི་ནམ་མཁའི་སྙིང་པོའི་ཏིང་ངེ་འཛིན་གྱིས་
སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པའོ། །སངས་རྒྱས་ཆོས་ཞེས་བྱ་བ་ནི། ཐེག་པ་གསུམ་སྟོན་པའི་ཆོས་ཀྱི་ངོ་བོ་ཡིན་པའི་ཕྱིར་སངས་རྒྱས་རྣམས་ཀྱི་ཆོས་ནི་སངས་རྒྱས་ཆོས་སོ། །སངས་རྒྱས་ཆེ་ཞེས་བྱ་བ་ནི། རྣམ་པར་སྣང་མཛད་ཆེན་པོའི་གཟུགས་ཀྱིས་ཐམས་
ཅད་དུ་སོང་བས་ན། སངས་རྒྱས་ཀྱང་ཡིན་ལ་ཆེན་པོ་ཡང་ཡིན་པས་ན་སངས་རྒྱས་ཆེན་པོའོ། །སངས་རྒྱས་བདག་ཉིད་ཅེས་བྱ་བ་ནི། སངས་རྒྱས་ཐམས་ཅད་ཀྱིས་རྡུལ་ཕྲ་རབ་ལས་བསྒྲུབ་པའི་ཕྱིར་སངས་རྒྱས་བདག་ཉིད་དོ། །མཚན་བདུན་ནོ། །སངས་རྒྱས་གཟུགས་ཞེས་བྱ་བ་ནི། རྡོ་རྗེ་སེམས་
དཔའི་གནས་སུ་པདྨ་སངས་རྒྱས་ཀྱི་གཟུགས་ཀྱིས་བཞུགས་པའི་ཕྱིར་སངས་རྒྱས་གཟུགས་སོ། །གཟུགས་ཆེན་པོ་ཞེས་བྱ་བ་ནི། ཐམས་ཅད་ཀྱི་གཟུགས་ཀྱིས་ནམ་མཁའི་ཁམས་སྤྲོས་པས་ན་གཟུགས་ཆེན་པོའོ། །རྡོ་རྗེའི་གཟུགས་ཞེས་བྱ་བ་ནི། ཐམས་ཅད་ཀྱི་ཕྱག་རྒྱའི་གཟུགས་ཀྱིས་
བཞུགས་པའི་ཕྱིར་རྡོ་རྗེའི་གཟུགས་སོ། །གཟུགས་བཟང་འཆང་ཞེས་བྱ་བ་ནི། གཟུགས་བཟང་པོ་ལྟ་བས་ཆོག་མི་ཤེས་པ་མངའ་བས་ན་གཟུགས་བཟང་འཆང་ངོ་། །ཆོས་ཀྱི་སྣང་བ་ཞེས་བྱ་བ་ནི། ས་དང་ཕ་རོལ་ཏུ་ཕྱིན་པའི་ཆོས་རྣམས་ཀྱིས་སྣང་བར་བྱེད་པས་ན་ཆོས་ཀྱི་སྣང་བའོ། །གཟི་
བརྗིད་མཆོག་ཅེས་བྱ་བ་ནི། དགེ་བའི་གཟི་བརྗིད་ཇི་ལྟ་ཇི་ལྟ་བུའི་གཟི་བརྗིད་མཆོག་དེ་ལྟ་བུ་དེ་ལ་མངའ་བས་ན་གཟི་བརྗིད་མཆོག་གོ། །བྱང་ཆུབ་སེམས་དཔའ་ཆེན་པོ་རྡོ་རྗེ་གཟི་བརྗིད་ནི་འཁོར་ལོས་སྒྱུར་བའི་རྒྱལ་པོའི་གཟུགས་ཀྱིས་རྒྱལ་པོ་ཆོས་ཐམས་ཅད་ཀྱི་གཟི་བརྗིད་ཟིལ་གྱིས་གནོན་པར་བཞུགས་

པའི་ཕྱིར་རོ། །གཟུགས་དེ་ཉིད་ཀྱིས་ཁམས་གསུམ་པ་མ་ལུས་པའི་སེམས་ཅན་དང་སྣོད་ཀྱི་འཇིག་རྟེན་སྣང་བར་བྱེད་པས་ན། འཇིག་རྟེན་སྣང་བྱེད་དོ། །མཚན་བདུན་ནོ། །པདྨོའི་དཔལ་གྱི་མགོན་པོ་ཞེས་བྱ་བ་ནི། པདྨའི་རིགས་སྐྱེད་པར་བྱེད་པའི་པདྨོའི་དཔལ་དེ་ནི་མགོན་པོ་སྟེ་བདག་པོའོ། །མགོན་
པོ་མཆོག་ཅེས་བྱ་བ་ནི། སེམས་ཅན་རྣམས་སྐྱོབ་པས་ན་མགོན་པོའོ། །སངས་རྒྱས་པདྨ་ལ་སོགས་པ་དེ་དག་གིས་འགྲོ་བ་རྣམས་འདུལ་བར་བྱེད་པས་ན་མཆོག་གོ། །ཆོས་དཔལ་མགོན་པོ་ཞེས་བྱ་བ་ནི། ཆོས་སོ་སོ་ཡང་དག་པར་རིག་པ་བཞིའི་རང་བཞིན་གྱི་ཤེས་རབ་ནི་ཆོས་སོ། །དཔལ་ནི་ཕུན་སུམ་
ཚོགས་པའོ། །དེའི་མགོན་པོ་ནི་གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་ལ་གནས་པའི་ངོ་བོ་ཡིན་པ་དེའི་ཕྱིར་དེ་ལས་སྐྱེས་པའོ། །མགོན་ལྡན་པ་ཞེས་བྱ་བ་ནི