Luận tạng Tây Tạng (Tengyur) — Tập 58

ཕྱེད་ཀྱི་ཚད་ལ་ཟུར་བཞི་པའི་རི་མོ་གཉིས་པ་ནི་སྒོ་ལ་མངོན་པར་ཕྱོགས་པར་ཐིག་གདབ་པར་བྱའོ། །རི་མོ་གཉིས་པའི་དབུས་སུ་པདྨའི་ཕྲེང་བ་བྲིས་ལ། ཀ་བ་བརྒྱད་དང་ལྡན་པའི་ཆ་གསུམ་མཉམ་པར་ཐིག་བཏབ་ནས། པདྨ་འདབ་མ་བརྒྱད་པའི་ཐིག་ནི་གདབ་པར་བྱའོ། །དེ་ལ་རེ་ཞིག་
སྲད་བུའི་སྔགས་ནི། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ། དེ་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ལ། མིག་གཡས་པ་དང་། གཡོན་པར་ཡི་གེ་ཧྲཱིཿལས་ཉི་མ་དང་ཟླ་བ་བསྐྱེད་ལ། ཁྲོ་བོའི་ལྟ་བས་ཀུན་ནས་བལྟས་པས་སྒོ་རྣམས་དབྱེའོ། །སློབ་དཔོན་དང་བསྒྲུབ་པའི་གྲོགས་མཆོག་བསྒྱིངས་པའི་
ཚུལ་གྱིས་བསྐོར་ཕྱོགས་སུ་འགྲོ་བར་བྱ་བ་ནི་ཐིག་གི་ཆོ་གའོ། །དེ་ནས་ཚོན་རྩི་བྱིན་གྱིས་བརླབ་པར་བྱ་སྟེ། དེ་ལ་ཚོན་དཀར་པོ་ལ་ཡི་གེ་ཨོཾ་ལས་རྣམ་པར་སྣང་མཛད་སྐུ་མདོག་དཀར་པོ། ཚོན་སྔོན་པོ་ལ་ཡི་གེ་ཧཱུཾ་ལས་མི་བསྐྱོད་པ་སྐུ་མདོག་མཐིང་ག །ཚོན་སེར་པོ་ལ་ཡི་གེ་ཏྲཱཾ་ལས་རིན་ཆེན་འབྱུང་ལྡན་
སྐུ་མདོག་སེར་པོ། ཚོན་དམར་པོ་ལ་ཡི་གེ་ཧྲཱིཿལས་འོད་དཔག་ཏུ་མེད་པ་སྐུ་མདོག་མར་པོ། ཚོན་ལྗང་གུ་ལ་ཡི་གེ་ཨ་ལས་དོན་ཡོད་གྲུབ་པ་སྐུ་མདོག་ལྗང་གུར་བསྐྱེད་ལ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བ་འདི་ཕྱག་རྒྱ་དང་ལྡན་པས་རེ་རེ་ལ་ཡང་ལན་བདུན་བདུན་བཟླ་བར་བྱའོ། །དེ་ལ་ཕྱག་

རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ལས་ནི། །མཛུབ་མོའི་རྩེ་མོ་མཉམ་སྦྱར་བ། །བྱས་ནས་ཚོན་རྩི་ཐམས་ཅད་ནི། །འབར་བའི་ལྟ་བས་དགུག་པར་བྱ། །ཡི་གེ་ཧི་ཞེས་བྱ་བ་མཐར་སྦྱར་བར་བྱའོ། །དེ་ནས་ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བའི་སྙིང་པོ་དང་དབང་ལྡན་གྱི་
ཕྱོགས་ནས་བརྩམས་ཏེ། གཡས་ནས་བསྐོར་བའི་རིམ་པས་གཡོན་པའི་རྡོ་རྗེ་ཁུ་ཚུར་གྱིས་ཚོན་རྩི་ཐོག་མར་བཀྱེ་ལ་ཕྱི་མ་ནི་རྡོ་རྗེ་ཁུ་ཚུར་མེད་ཀྱང་བྱའོ། །རིམ་པ་ནི་འདི་ཡིན་ཏེ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། ཐམས་ཅད་ཀྱི་ནང་དུ་དཀར་པོ་བྱའོ། །དེ་ནས་ཇི་སྐད་དུ་བཤད་
པའི་ཕྱིའི་དཀྱིལ་འཁོར་བྲིས་ལ། ནང་གི་དཀྱིལ་འཁོར་ནི་ཟུར་བཞི་བསྣོལ་བའི་རི་མོ་གཉིས་པ་བྲིས་ལ། རི་མོ་གཉིས་པའི་དབུས་སུ་པདྨའི་ཕྲེང་བ་བྲིས་ལ། པདྨ་འདབ་མ་བརྒྱད་པ་ལྟ་བུའི་ཀ་བ་བརྒྱད་པ་བྲི་བར་བྱའོ། །པདྨ་དེའི་གེ་སར་གྱི་དབུས་སུ། སེང་གེ་དང་པདྨའི་གདན་ལ་ཟླ་བའི་དཀྱིལ་
འཁོར་ལ་བཞུགས་པ་རྣམ་པར་སྣང་མཛད་སྔར་བཤད་པའི་ཚུལ་གྱིས་བྲི་བར་བྱའོ། །དེའི་ཕྱོགས་རྣམས་སུ་པདྨ་དང་ཟླ་བའི་གདན་ལ་ཕྱག་རྒྱ་བཞི་བྲི་བར་བྱའོ། །དེ་ལྟར་འགྲོ་བ་འདུལ་བ་ལ་སོགས་པ་ཡང་ཟླ་བ་དང་པདྨའི་གདན་ལ་བྲི་བ་དང་། བསྐལ་པ་བཟང་པོ་རྣམས་ཀྱང་སྔར་བཤད་པའི་རིམ་
པས་ཕྱིའི་དཀྱིལ་འཁོར་གྱི་ཁྱམས་རྣམས་སུ། བྱམས་པ་ལ་སོགས་པའི་བསྐལ་པ་བཟང་པོ་སྟོང་དུ་བཞིས་མ་ཚང་བ་པདྨ་དང་། ཟླ་བའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་བྲི་བར་བྱའོ། །ཤར་ཕྱོགས་ལ་སོགས་པའི་ཕྱོགས་རྣམས་སུ་མཉམ་པའི་རིམ་པ་བཞིན་དུ་
བྱའོ། །དེ་ནས་ཤར་གྱི་སྣམ་བུ་ལ། སངས་རྒྱས་པདྨ་བཞིན་དུ་པདྨའི་རྡོ་རྗེ་དང་དྲིལ་བུ་བསྣམས་པའོ། །ལྷོ་ཕྱོགས་ཀྱི་སྣམ་བུ་ལ་རྡོ་རྗེ་རིན་པོ་ཆེ་བཞིན་དུ་རིན་ཆེན་པདྨ་བསྣམས་པའོ། །ཡང་ནུབ་ཕྱོགས་ཀྱི་སྣམ་བུ་ལ་རྡོ་རྗེ་ཆོས་བཞིན་དུ་རྡོ་རྗེ་པདྨ་བསྣམས་པའོ། །བྱང་ཕྱོགས་ཀྱི་སྣམ་བུ་
ལ་པདྨ་གར་གྱི་དབང་ཕྱུག་བཞིན་དུ་སྣ་ཚོགས་པདྨ་བསྣམས་པའོ། །དེ་ལ་བཅོམ་ལྡན་འདས་རྣམ་པར་སྣང་མཛད་ནི་སྐུ་མདོག་དཀར་པོ། བྱང་ཆུབ་མཆོག་གི་ཕྱག་རྒྱས་རྡོ་རྗེ་རྩེ་ལྔ་པ་བསྣམས་པ། ཞལ་བཞི་པ། ཞལ་དང་པོ་ཤར་དུ་གཟིགས་པའོ། །རྡོ་རྗེ་སེམས་མའི་གནས་སུ་པདྨས་

མཚན་པའི་རྡོ་རྗེ་རྩེ་ལྔ་པ། རྡོ་རྗེ་རིན་ཆེན་མའི་གནས་སུ་ཡིད་བཞིན་གྱི་ནོར་བུའི་རྩེ་མོ་པདྨ་ཅན། རྡོ་རྗེ་ཆོས་མའི་གནས་སུ་པདྨ་འདབ་མ་བཅུ་དྲུག་པའི་རྡོ་རྗེ་པདྨ། རྡོ་རྗེ་ལས་མའི་གནས་སུ་པདྨ་འདབ་མ་བཞི་པ། ཁ་དོག་སྔོན་པོ་དང་། སེར་པོ་དང་། དམར་པོ་དང་། ལྗང་གུའི་འདབ་མ་
བཞི་པ་ལྟེ་བ་དཀར་པོའོ། །བཅོམ་ལྡན་འདས་འགྲོ་བ་འདུལ་བ་ནི་ཕྱག་གཉིས་པ་སྐུ་མདོག་དཀར་དམར། ཕྱག་གཡོན་པས་པདྨའི་སྡོང་བུ་བཟུང་ནས་ཕྱག་གཡས་པས་ཐུགས་ཀར་པདྨ་འབྱེད་པར་མཛད་པས་བཞུགས་པའོ། །སངས་རྒྱས་པདྨ་ནི་ཤཱཀྱ་ཐུབ་པའི་གཟུགས་ཅན་གསེར་གྱི་
མདོག་མངའ་བ། གཡོན་བསྙེམས་པས་པདྨའི་དྲིལ་བུ་བཟུང་ནས། ཕྱག་གཡས་པས་ཁ་ཊྭཱཾ་ག་པདྨས་མཚན་པའི་རྡོ་རྗེ་རྩེ་ལྔ་པ་གུང་མོའི་རྩེ་མོ་ལ་རང་གི་སྙིང་གར་འདེགས་པའི་ཚུལ་གྱིས་འཛིན་པའོ། །པདྨའི་རྒྱལ་པོ་ནི་སྐུ་མདོག་སེར་པོ་ཕྱག་གཡས་ཀྱི་དང་པོ་ན་རྡོ་རྗེ། གཉིས་པ་ན་རལ་གྲི།
གཡོན་གྱི་དང་པོ་ན་ལྕགས་ཀྱུ། གཡོན་གྱི་གཉིས་པ་ན་པདྨ་བསྣམས་པའོ། །པདྨའི་ཆགས་པ་སྐུ་མདོག་དམར་པོ་པདྨའི་མདའ་གཞུ་འགེངས་པས་སངས་རྒྱས་ཐམས་ཅད་གསོད་པའི་ཚུལ་དུ་མཛད་པའོ། །པདྨ་ལེགས་པ་ནི་མརྒད་ཀྱི་མདོག་ཅན་པདྨའི་སེ་གོལ་བརྡབས་པས་དེ་
བཞིན་གཤེགས་པ་ཐམས་ཅད་མཉེས་པར་མཛད་པའོ། །འཇིག་རྟེན་དབང་ཕྱུག་གི་རལ་པའི་དབུས་ན་འོད་དཔག་ཏུ་མེད་པ་ཕྱག་གཡོན་པས་པདྨ་བསྣམས་པ། ཕྱག་གཡས་པ་ཏིང་ངེ་འཛིན་མཆོག་གིས་བཞུགས་པ། སྐུ་མདོག་དམར་པོ་སངས་རྒྱས་ཐོར་ཚུགས་ཞེས་བརྗོད་པའོ། །
པདྨའི་ཁྲོ་གཉེར་ནི་སྐུ་མདོག་སེར་པོ་ཕྱག་གཡས་པ་པདྨའི་ཁུ་ཚུར་གྱིས་པདྨས་མཚན་པའི་ཡིད་བཞིན་གྱི་ནོར་བུས་དབང་བསྐུར་བའི་གནས་སུ་འཇོག་པའི་ཕྱག་གཡོན་པའི་བསྙེམས་པས་པདྨའི་དྲིལ་བུ་འཛིན་པའོ། །པདྨའི་ཉི་མ་ནི་སྐུ་མདོག་དམར་པོ་ཉི་མ་ལྟ་བུ་ཕྱག་གཡོན་པས་པདྨ་
བསྣམས་ཤིང་། ཕྱག་གཡས་པས་པདྨ་ལ་གནས་པའི་ཉི་མའི་དེ་བཞིན་གཤེགས་པ་ཐམས་ཅད་འོད་ཀྱིས་སྣང་བར་མཛད་པ་བསྣམས་པའོ། །པདྨའི་དཔལ་ཟླ་བའི་མདོག་དང་དེའི་ཆ་བྱད་ཅན་ཕྱག་གཡོན་པས་པདྨས་མཚན་པའི་ཡིད་བཞིན་གྱི་ནོར་བུའི་རྒྱལ་མཚན་བསྣམས་པ། ཕྱག་

གཡས་པས་མཆོག་སྦྱིན་པའོ། །པདྨ་བཞད་པ་སྐུ་མདོག་དཀར་སེར་ཞལ་བཅུ་གཅིག་པ། ཕྱག་བཅུ་གཉིས་པ་ཚངས་པའི་ཆ་བྱད་ཅན་རལ་པའི་ཐོར་ཚུགས་ཀྱིས་བརྒྱན་པ་དང་། རྒྱན་ཐམས་ཅད་ཀྱིས་རྣམ་པར་བརྒྱན་པའོ། །དེ་ལ་ཞལ་དང་པོ་ཞི་བ། དེ་བཞིན་དུ་
ཞལ་གཡས་པ་དང་། གཡོན་པའི་ཕྱོགས་ཀྱང་ཞི་བ་ཡིན་ལ། རྒྱབ་ཀྱི་ཞལ་གཅིག་ནི་མི་སྡུག་པའི་ཉམས་ཅན་ནོ། །ཡང་ཞལ་དང་པོའི་སྟེང་མ་གཅིག་ནི་མཆེ་བ་གཙིགས་པ། དེའི་གཡས་གཡོན་གྱི་ཞལ་གཉིས་ནི་མི་སྡུག་པའི་ཉམས་ཅན། དེའི་རྒྱབ་ནི་མཆེ་བ་རྣམ་པར་གཙིགས་པ།
དེའི་སྟེང་མའི་ཞལ་དང་པོ་ནི་མཆེ་བ་གཙིགས་པ། ཞལ་གཡས་པ་ནི་མཆེ་བ་ཕྱུང་བ། གཡོན་པ་ནི་དྲག་ཅིང་ཆེར་བཞད་པ། དེའི་སྟེང་མ་གཅིག་ནི་རྫོགས་པའི་སངས་རྒྱས་ཀྱི་ཞལ་ལོ། །ཕྱག་དང་པོ་གཉིས་ནི་ཆོས་སྟོན་པའི་ཕྱག་རྒྱའོ། །གཉིས་པ་གཉིས་ནི་མེ་ཏོག་གི་ཐལ་མོ་མཛད་པ། ཕྱག་
གཡས་པ་ན་སོའི་ཕྲེང་བ་པདྨར་ཆུད་པའི་རྡོ་རྗེ་ཅན་གྱིས་མཚན་པ་དེས་དེ་བཞིན་གཤེགས་པ་ཐམས་ཅད་འཛུམ་པ་ལ་ངེས་པར་སྦྱོར་བའོ། །གཡས་ཀྱི་བཞི་པ་དང་། ལྔ་པ་ན་རལ་གྲི་དང་བགྲང་ཕྲེང་བསྣམས་པ། ཕྱག་གཅིག་གིས་སེམས་ཅན་ཐམས་ཅད་དབུགས་འབྱིན་པར་མཛད་པའོ། །ཕྱག་
གཡོན་པས་པདྨ་དང་གླེགས་བམ་དང་ཡིད་བཞིན་གྱི་ནོར་བུ་དང་། རིལ་བ་སྤྱི་བླུགས་བསྣམས་པར་བཞུགས་པའོ། །པདྨའི་ཏིང་ངེ་འཛིན་ནི་བརྒྱ་བྱིན་གྱི་ཆ་ལུགས་ཅན། སྤྱན་སྟོང་དང་ལྡན་པ་སྐུ་མདོག་དམར་པོ་ཏིང་ངེ་འཛིན་མཆོག་གི་ཕྱག་རྒྱའི་ཕྱག་གཡོན་པས་རྡོ་རྗེ་པདྨ་བསྣམས་པ།
པདྨའི་སྒྲོལ་མ་ནི་རྡོ་རྗེ་ཆོས་ཀྱི་གཟུགས་ཅན་ནོ། །གཞོན་ནུ་ནི་གདོང་དྲུག་བཞིན་དུ་སྐུ་མདོག་དམར་པོ་ཕྱག་བཞི་པ། ཕྱག་གཡོན་པ་པདྨའི་ཁུ་ཚུར་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པ། ཕྱག་གཡས་པའི་ཁུ་ཚུར་གྱིས་པདྨའི་རལ་གྲིས་དེ་བཞིན་གཤེགས་པ་
ཐམས་ཅད་གཅོད་པར་མཛད་པའོ། །གཡས་ཀྱི་གཉིས་པ་ན་མདུང་བསྣམས་པ། གཡོན་གྱི་གཉིས་པ་ན་པདྨ་བསྣམས་པའོ། །པདྨའི་རྒྱུ་ཁྱབ་འཇུག་གི་གཟུགས་ཅན། མགྲིན་པ་སྔོན་པོ་སྤྱན་གསུམ་པ་ཕྱག་གཡས་པ་གཉིས་ན་འཁོར་ལོ་དང་བེ་ཅོན་བསྣམས་པ། གཡོན་པ་གཉིས་ན་

པདྨ་དང་དུང་བསྣམས་པ། སྟག་གི་པགས་པའི་ཤམ་ཐབས་ཅན་སྦྲུལ་ནག་པོའི་མཆོད་ཕྱིར་ཐོགས་འཆང་བ། རི་དགས་ཀྱི་པགས་པ་སྟོད་གཡོགས་སུ་བསྣམས་པ། ཞལ་ཆེར་བཞད་པའོ། །པདྨའི་གསུང་ནི་ཚངས་པའི་གཟུགས་ཅན། མདོག་དཀར་དམར་ཞལ་བཞི་པ། ཕྱག་
གཡས་པ་གཉིས་ན་བགྲང་ཕྲེང་དང་དབྱིག་པ། གཡོན་པ་གཉིས་ན་པདྨ་དང་རིལ་བ་སྤྱི་བླུགས་བསྣམས་པའོ། །པདྨ་དོན་ཡོད་པའི་དབང་ཕྱུག་ནི་ལྷ་ཆེན་པོའི་གཟུགས་ཅན་ཞལ་བཞི་པ་སྤྱན་གསུམ་པ་མགྲིན་པ་སྔོ་བ་སྦྲུལ་གྱི་མཆོད་ཕྱིར་ཐོགས་འཆང་བ་སྟག་གི་པགས་པའི་ཤམ་ཐབས་ཅན།
རི་དྭགས་ནག་པོའི་པགས་པ་སྟོད་གཡོགས་སུ་བསྣམས་པ། ཕྱག་གཡས་ཀྱི་དང་པོས་མཆོག་སྦྱིན་པ། གཉིས་པས་པདྨ་བསྣམས་པ། གཡོན་གྱི་དང་པོ་ན་མདུང་རྩེ་གསུམ་པ་གཉིས་པ་ན་རལ་གྲི། ཞལ་སྔོན་པོ་དང་། སེར་པོ་དང་། དམར་པོ་དང་། ལྗང་གུའི་མདོག་ཅན་ནོ། །པདྨ་གར་གྱི་
དབང་ཕྱུག་གར་གྱི་དབང་ཕྱུག་གི་གཟུགས་ཅན། ཕྱག་གཡས་པ་རྣམས་ན་པདྨ་དང་ལྕགས་ཀྱུ་དང་ཞགས་པ་བསྣམས་པ། གཡོན་པ་རྣམས་ན་མདུང་རྩེ་གསུམ་པ་དང་ལྕགས་སྒྲོག་དང་དྲིལ་བུ་བསྣམས་པ་སྐུ་མདོག་དཀར་པོ་སྤྱན་གསུམ་པའོ། །པདྨའི་བསྲུང་བ་ནི་གསེར་གྱི་མདོག་ཅན། ཕྱག་
གཡས་ཀྱི་དང་པོས་མི་འཇིགས་པ་སྦྱིན་པ། གཡོན་གྱི་དང་པོས་པདྨ་བསྣམས་པ། ཕྱག་གཉིས་ཀྱིས་པདྨའི་གོ་ཆ་བསྣམས་པ། དེ་བཞིན་གཤེགས་པ་ཐམས་ཅད་ལ་གོ་བསྐོན་པའོ། །པདྨའི་གནོད་སྦྱིན་ནི་སྐུ་མདོག་ནག་པོ་གསུས་པོ་ཆེ་བ། ཞལ་མཆེ་བ་རྣམ་པར་གཙིགས་པ། པདྨའི་
མཆེ་བ་གཉིས་ཕྱག་གཉིས་ཀྱི་ཁུ་ཚུར་གྱིས་བཟུང་ནས་ཁར་བཞག་པས་དེ་བཞིན་གཤེགས་པ་ཐམས་ཅད་འཇིགས་པར་བྱེད་པའོ། །པདྨའི་ཁུ་ཚུར་ནི་སྐུ་མདོག་སེར་པོ་དམ་ཚིག་གི་པདྨའི་ཁུ་ཚུར་གྱིས་པདྨས་མཚན་པའི་རྡོ་རྗེ་འཚིར་ཞིང་བཞུགས་པའོ། །པདྨའི་སྒེག་མོ་ནི་མདོག་དཀར་མོ་
པདྨའི་ཁུ་ཚུར་གཉིས་ཀྱིས་པདྨས་མཚན་པའི་རྡོ་རྗེ་རྩེ་ལྔ་པ་གཉིས་བཟུང་ནས་བསྙེམས་པའི་ཚུལ་གྱིས་བསམ་པ་གཡོས་པས་འདུད་པའོ། །པདྨའི་ཕྲེང་བ་མ་མདོག་སེར་པོ། པདྨ་རིན་པོ་ཆེའི་ཕྲེང་བས་དེ་བཞིན་གཤེགས་པ་ཐམས་ཅད་ལ་དབང་བསྐུར་བའོ། །པདྨའི་གླུ་མ་ནི་མདོག་དཀར་

དམར་པདྨའི་པི་ཝང་བརྡུང་བའོ། །པདྨའི་གར་མ་ནི་སྣ་ཚོགས་པའི་མདོག་ཅན་པདྨས་མཚན་པའི་རྡོ་རྗེ་རྩེ་གསུམ་བསྣམས་པས་གར་བསྐོར་བའི་ཚུལ་དུ་བྱེད་པའོ། །པདྨའི་བདུག་པ་མ་ནི་སྐུ་མདོག་དཀར་དམར་པདྨའི་སྤོས་ཁང་བསྣམས་ནས་པདྨའི་བདུག་པས་
དེ་བཞིན་གཤེགས་པ་ཐམས་ཅད་ཚིམ་པར་མཛད་པའོ། །པདྨའི་མེ་ཏོག་མ་ནི་སྐུ་མདོག་སེར་པོ། ཕྱག་གཡོན་པས་པདྨའི་མེ་ཏོག་གི་སྣོད་བསྣམས་པ། ཕྱག་གཡས་པས་པདྨའི་མེ་ཏོག་གིས་དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པའོ། །པདྨའི་མར་མེ་མ་ནི་
མདོག་དམར་སྐྱ་པདྨའི་མར་མེའི་སྡོང་བུས་དེ་བཞིན་གཤེགས་པ་ཐམས་ཅད་སྣང་བར་བྱེད་པའོ། །པདྨའི་དྲི་མ་ནི་སྣ་ཚོགས་པའི་མདོག་ཅན། ཕྱག་གཡོན་པས་པདྨའི་དྲིའི་དུང་བསྣམས་པ། ཕྱག་གཡས་པས་པདྨའི་དྲིས་དེ་བཞིན་གཤེགས་པ་ཐམས་ཅད་ལ་མཆོད་ཅིང་བཞུགས་པའོ། །
རྟ་མགྲིན་ནི་མདོག་དམར་སྐྱ། པདྨའི་ལྕགས་ཀྱུས་དེ་བཞིན་གཤེགས་པ་ཐམས་ཅད་འགུགས་པ་དང་། ཞལ་དང་པོའི་མཆེ་བ་རྣམ་པར་གཙིགས་པ། དེའི་སྟེང་དུ་རྟའི་གདོང་མགྲིན་པ་བསྟོད་པ་མདོག་ལྗང་གུའོ། །དོན་ཡོད་པའི་ཞགས་པ་ནི་ཕྱུགས་བདག་གི་གཟུགས་ཅན་སྤྱན་གསུམ་
པ། ཕྱག་བཞི་པ་གཡས་ཀྱི་དང་པོ་ན་ཞགས་པ། གཉིས་པ་ན་མཆོག་སྦྱིན། གཡོན་གྱི་དང་པོ་ན་དབྱིག་པ། གཡོན་གྱི་གཉིས་པ་ན་པདྨ་བསྣམས་པའོ། །པདྨའི་ལྕགས་སྒྲོག་ནི་མདོག་དམར་སྐྱ། པདྨའི་ལྕགས་སྒྲོག་དང་བཅས་པས་དེ་བཞིན་གཤེགས་པ་ཐམས་ཅད་འཆིང་བར་
བྱེད་པའོ། །པདྨ་འབེབས་པ་ནི་ཞལ་དྲུག་པ། གཞོན་ནུ་ཀུན་འགྱེད་ཀྱི་ཆ་ལུགས་ཅན། མདོག་དམར་པོ་ཕྱག་གཡས་ཀྱི་དང་པོ་ན་དྲིལ་བུ། གཉིས་པ་ན་མདུང་། གསུམ་པ་ན་རལ་གྲི། གཡོན་གྱི་དང་པོ་ན་པདྨ། གཉིས་པ་ན་ལྕགས་སྒྲོག །གསུམ་པ་ན་ཁྱིམ་བྱ་བསྣམས་
པས་བཞུགས་པའོ། །དེ་ལ་རྣམ་པར་སྣང་མཛད་དང་། སངས་རྒྱས་ཐོར་ཚུགས་དང་། བསྐལ་པ་བཟང་པོ་རྣམས་ནི་རིན་པོ་ཆེའི་ཅོད་པན་གྱིས་དབང་བསྐུར་བའོ། །ལྷག་མ་རྣམས་ནི་འོད་དཔག་ཏུ་མེད་པའི་པདྨའི་ཕྲེང་བའི་ཅོད་པན་གྱིས་དབང་བསྐུར་བའོ། །རྣམ་པར་སྣང་མཛད་དང་།

སངས་རྒྱས་ཐོར་ཚུགས་དང་། ཏིང་ངེ་འཛིན་པདྨའི་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །འགྲོ་བ་འདུལ་བ་ལ་སོགས་པ་ལྷག་མ་རྣམས་ནི་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །རྣམ་པར་སྣང་མཛད་དང་། སངས་རྒྱས་ཐོར་ཚུགས་དང་། པདྨའི་ཏིང་ངེ་འཛིན་ནི་ཞི་བའི་གཟིགས་པའོ། །
ལྷག་མ་རྣམས་རྡོ་རྗེ་ལྟ་བ་ཅན་ནོ། །དེ་ལྟར་དཀྱིལ་འཁོར་བྲིས་ནས་དགོངས་ཀའི་དུས་སུ་འགྲོ་བ་འདུལ་བའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་བླངས་ལ། རྡོ་རྗེ་ཤུགས་ཀྱིས་དཀྱིལ་འཁོར་དུ་འཇུག་པར་བྱས་ཤིང་། ཨོཾ་ཧཱུཾ་ཧྲཱིཿཧོཿཞེས་ཀྱང་བརྗོད་པར་བྱའོ། །ཡང་དཀྱིལ་འཁོར་ཐམས་ཅད་ཀྱི་ལྷག་པ་
དང་མ་ཚང་བའི་ཉེས་པ་ཞི་བར་བྱ་བའི་ཕྱིར་བལྟས་ལ། རྡོ་རྗེ་དྲིལ་བུ་དཀྲོལ་ཞིང་དཀྱིལ་འཁོར་ལ་ལན་བདུན་བསྐོར་བ་བྱས་ནས་རྡོ་རྗེ་སེམས་དཔའ་ལ་ཕྲེང་བ་དེ་ཕུལ་ཏེ། རྡོ་རྗེ་གར་བྱས་ལ་བླངས་ནས་རང་གི་མགོ་ལ་བཅིང་བར་བྱའོ། །ཨོཾ་ཧཱུཾ་ཧྲཱིཿཧོཿཞེས་རྒྱུན་མི་འཆད་པ་ཁོ་ནར་བཟླས་པར་བྱའོ། །
དེ་ནས་ཡི་གེ་ཧཱུཾ་ལས་བདག་ཉིད་རྡོ་རྗེ་ཧཱུཾ་མཛད་དུ་བསམ་པར་བྱའོ། །དེ་ནས་དབུས་སུ་འདུག་ནས་ནི། །རྡོ་རྗེ་སློབ་དཔོན་མཉམ་གཞག་པས། །རྡོ་རྗེ་སྒོ་ནི་རྣམ་བཞི་པོ། །ཡིད་ཀྱིས་སུ་ནི་དབྱེ་བར་བྱ། །ཨོཾ་བཛྲ་ཨུཏྒྷ་ཊ་ཡ་ས་མ་ཡ་པྲ་བེ་ཤ་ཡ་ཧཱུཾ། དེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་མཛུབ་མོ་གཉིས་
ལེགས་པར། །སྦྱར་ལ་བཀན་ཏེ་བསྡམས་ནས་སུ། །རབ་ཏུ་བྲོས་ནས་དབྱེ་བ་ནི། །སྒོ་དབྱེ་བ་ཡི་མཆོག་ཡིན་ནོ། །དེ་ནས་རིན་པོ་ཆེའམ་ས་ལས་བྱས་པའི་བུམ་པ་རྩ་བ་མི་གནག་པ་གསུས་པ་ཆེ་བ། མགྲིན་པ་རིང་བ། མཆུ་འཕྱང་བ། རིན་པོ་ཆེ་དང་། སྨན་ཐམས་ཅད་དང་། པདྨའི་མེ་ཏོག་ལ་
སོགས་པ་དང་། དྲི་ཞིམ་པོའི་ཆུས་ཡོངས་སུ་བཀང་བ། པདྨས་མཚན་པ། མགུལ་པ་རས་དཀར་པོ་བཟང་པོས་བཅིངས་པ། འདབ་མ་དང་། འབྲས་བུ་དྲི་ཞིམ་པས་ཁ་བརྒྱན་པ། སྤོས་ཆུ་དྲི་ཞིམ་པས་ཀུན་ནས་བྱུགས་ཏེ། མེ་ཏོག་གི་ཕྲེང་བ་བཏགས་པ་ཇི་ལྟ་བ་བཞིན་དུ་ལྷག་པར་གནས་པ་བྱས་
ལ། རྡོ་རྗེ་ཆོས་མས་པདྨའི་མེ་ཏོག་གི་ལྕུག་མ་ཡོངས་སུ་བཟུང་ལ། ཨོཾ་བཛྲ་ཨུ་ད་ཀ་ཧཱུཾ་ཞེས་བྱ་བས་བཟླས་བརྗོད་བརྒྱ་རྩ་བརྒྱད་བྱས་ལ། བཅོམ་ལྡན་འདས་འགྲོ་བ་འདུལ་བའི་སྔགས་ཀྱང་བརྒྱ་རྩ་བརྒྱད་བཟླས་ལ། བུམ་པ་དེ་བཅོམ་ལྡན་འདས་འགྲོ་བ་འདུལ་བའི་སྤྱན་སྔར་གཞག་པར་བྱའོ། །

གཉིས་པ་ལ་འགྲོ་བ་འདུལ་བ་བརྒྱ་རྩ་བརྒྱད་བཟླས་ཏེ། འཇུག་པའི་སྒོར་མངོན་པར་ཕྱོགས་པར་གཞག་པར་བྱ་ཞིང་། ཆུ་དེས་བདག་ཉིད་དང་སློབ་མ་ལ་དབང་བསྐུར་བར་བྱའོ། །འཇུག་པའི་དུས་སུ་རྡོ་རྗེ་སེམས་མའི་ཕྱག་རྒྱ་བཅིངས་ལ། སློབ་མ་ཡང་འཆིང་དུ་
གཞུག་གོ། །རྣམ་པར་སྣང་མཛད་ལ་སོགས་པའི་བུམ་པ་ཡང་སོ་སོ་རང་རང་གི་མཚན་མས་མཚན་པ། དེ་རྣམས་ཀྱི་རང་རང་གི་སྔགས་བརྒྱ་རྩ་བརྒྱད་ཡོངས་སུ་བཟླས་ལ་དཀྱིལ་འཁོར་གྱི་ཕྱི་རོལ་གྱི་ཁྱམས་རྣམས་སུ་གཞག་པ་དང་། དེ་རྣམས་ཀྱི་ཕྱི་རོལ་དུ་བུམ་པ་གང་བའོ། །མ་རྙེད་
པར་གྱུར་ན་བཅོམ་ལྡན་འདས་འགྲོ་བ་འདུལ་བ་ལ་རྣམ་པར་རྒྱལ་བའི་བུམ་པ་དང་། རྣམ་པར་སྣང་མཛད་དང་། སངས་རྒྱས་ཐོར་ཚུགས་དང་། པདྨའི་ཏིང་ངེ་འཛིན་དང་། དོན་ཡོད་དབང་ཕྱུག་རྣམས་ལ་རང་རང་གི་སྔགས་བཟླས་པའི་བུམ་པ་དབུལ་བར་བྱའོ། །ཨོཾ་བཛྲ་ཛྷི་ཞེས་བྱ་བའི་རིགས་
ཀྱི་སྙིང་པོ་འདིས་འགྲོ་བ་འདུལ་བའི་རིགས་ཀྱི་བུམ་པ་ལ་བརྒྱ་རྩ་བརྒྱད་བཟླས་པ་བྱས་ཏེ། འགྲོ་བ་འདུལ་བའི་ལྷ་རྣམས་ལ་དབུལ་བར་བྱའོ། །ཨོཾ་བཛྲ་རཏྣ་མུ་ཀུ་ཊ་ཧཱུཾ་ཞེས་བྱ་བས་སངས་རྒྱས་ཐོར་ཚུགས་ཀྱི་རིགས་ཀྱི་བུམ་པ་ལའོ། །ཨོཾ་དྷརྨྨ་པདྨ་ཧྲཱིཿཞེས་བྱ་བས་པདྨའི་ཏིང་ངེ་འཛིན་གྱི་བུམ་
པ་ལའོ། །ཨོཾ་སརྦྦ་མུ་ཁི་ཧཱུཾ་ཞེས་བྱ་བས་པདྨ་དོན་ཡོད་དབང་ཕྱུག་གི་བུམ་པ་ལ་བརྒྱ་རྩ་བརྒྱད་བཟླས་པ་བྱས་ནས། དོན་ཡོད་དབང་ཕྱུག་གི་རིགས་ཀྱི་ལྷ་རྣམས་ལ་དབུལ་བར་བྱའོ། །དེ་ནས་བདག་པོ་ལྔའི་བུམ་པ་གང་བ་དང་། རིགས་བཞིའི་བུམ་པ་གང་བ་བཞི་དབུལ་བར་བྱ་སྟེ། བྱམས་
པ་ལ་སོགས་པའི་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱི་རང་གི་རིག་པ་ཡོངས་སུ་བཟླས་པའི་བུམ་པ་གང་བར་བྱས་ལ་དབུལ་བར་བྱའོ། །མ་རྙེད་ན་བུམ་པ་རྣམས་དང་བུམ་པ་གང་བ་བཅུ་ལས་ཉུང་བ་དབུལ་བར་མི་བྱའོ་ཞེས་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ།
ཇི་སྐད་བཤད་པ་དེ་དག་བྱས་པའི་རྗེས་ཐོགས་ལའོ། །དེ་ནས་འགྲོ་བ་ཐམས་ཅད་འདུལ་བའི་ཞེས་བྱ་བའི་པདྨའི་དཀྱིལ་འཁོར་གྱི་ཆོ་ག་རྒྱས་པ་བཤད་དོ་ཞེས་བྱ་བ་ནི་ལྷའི་རྣལ་འབྱོར་ནས་བརྩམས་ཏེ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་སློབ་དཔོན་གྱི་ལས་ཀྱི་ཆོ་གའི་བྱེ་བྲག་རྒྱས་པར་ཕྱེའོ། །

དེ་ལ་དང་པོ་ཁོ་ནར་ཞེས་བྱ་བ་ནི། དབབ་པ་ལ་སོགས་པའི་སྔོན་དུ་སོང་བའོ། །པདྨའི་སློབ་དཔོན་ཞེས་བྱ་བ་ནི་འགྲོ་བ་འདུལ་བའི་རྣལ་འབྱོར་ཆེན་པོ་དང་། བྱིན་གྱིས་བརླབས་པའི་སློབ་དཔོན་ནི་པདྨའི་སློབ་དཔོན་ནོ། །རྡོ་རྗེ་དམ་ཚིག་གི་ཕྱག་རྒྱ་བཅིངས་ལ་ཇི་ལྟ་བ་བཞིན་དུ་བཞུགས་ཏེ་ཞེས་བྱ་བ་
ནི་གདོང་གཡོགས་བཅིངས་ལ། ཕྱག་བཞི་བྱས་ཏེ་སྡོམ་པ་བཟུང་ལ། ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ཏེ། སློབ་མ་འཇུག་པའི་ཆོ་ག་བཞིན་དུ་རྡོ་རྗེ་ཆོས་མ་བཅིངས་ལ་འཇུག་པར་བྱའོ་ཞེས་བྱ་བ་འདི་ནི་ཇི་ལྟ་བ་བཞིན་ཞེས་བྱ་བའི་སྒྲའི་དོན་ཡིན་ནོ། །རྡོ་རྗེ་དབྱིངས་
ཀྱི་དཀྱིལ་འཁོར་ཆེན་པོའི་ཚུལ་དུ་ཞེས་བྱ་བ་ནི། དེ་ལས་བཤད་པའི་ཚུལ་གྱིས་དབབ་པ་ལ་སོགས་པའི་ལས་རྣམས་བྱའོ། །སྙིང་པོ་འདིས་ལས་རྣམས་བྱའོ་ཞེས་བྱ་བ་ནི་དབབ་པ་དང་མེ་ཏོག་དོར་བ་དང་། ཕྲེང་བ་བཅིང་བའི་དབང་དང་། གདོང་གཡོགས་དགྲོལ་བ་དང་། དཀྱིལ་འཁོར་
བལྟ་བ་དང་། དབབ་པ་ཉེ་བར་བསྡུ་བ་དང་། ཆུའི་དབང་དང་། ཕྱག་རྒྱའི་དབང་གིས་ཅོད་པན་གྱི་དབང་བསྐུར་བ་དང་། རྡོ་རྗེ་པདྨ་དང་། བདག་པོ་དང་། མིང་གི་དབང་བསྐུར་བ་དང་། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་རྗེས་ཐོགས་ལ། པདྨའི་རིགས་ཀྱི་སྙིང་པོ་རྗེས་ཐོགས་ལ་འཆད་པར་
འགྱུར་བར་བརྗོད་པ་ནི། ཨོཾ་པདྨ་སྤོ་ཊ་ཨ་དྷི་ཏིཥྛ་ཨ་ཞེས་ཕྱོགས་གཅིག་དཔེར་བརྗོད་པ་ཙམ་གྱིས་དེ་དག་གི་སྙིང་པོ་རྣམས་ཀྱང་བསྟན་པ་ཡིན་ནོ། །སྙིང་པོ་འདི་དཔེར་བརྗོད་པ་ཙམ་གྱིས། དེ་རྣམས་ཀྱི་སྙིང་པོའང་ཤེས་པར་བྱ་སྟེ། ལས་རྣམས་བྱའོ་ཞེས་བྱ་བ་བཤད་པ་ཡིན་ནོ། །ཨོཾ་པདྨ་
སྥོ་ཊ་ཨ་དྷི་ཏིཥྛ་ཨ་ཞེས་བྱ་བ་ནི་དབབ་པའི་དོན་ཏོ། །དཀྱིལ་འཁོར་འདིར་དབབ་པའི་སྙིང་པོ་འདི་དང་། རྡོ་རྗེ་པདྨའི་དམ་ཚིག་གི་ཕྱག་རྒྱ་གཉིས་སུ་བྱས་ནས། ཐལ་མོ་སྦྱར་ནས་ལན་བརྒྱའི་བར་དུ་བཟླས་པར་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་གཡོན་པའི་ཁྲོ་བོའི་ཁུ་ཚུར་གྱི་
མཛུབ་མོས། རྡོ་རྗེ་པདྨའི་དམ་ཚིག་གི་ཕྱག་རྒྱའི་གུང་མོ་ལན་བརྒྱའི་བར་དུ་དྲལ་ཞིང་ཨ་ཞེས་བརྗོད་དོ། །དེ་ནས་དེ་བཞིན་དུ་བཀའ་མནོས་ནས་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་མེ་ཏོག་དོར་བ་ལ་སོགས་པ་སྔོན་དུ་འགྲོ་བའི་ཆོ་གའི་གོ་རིམས་ཐམས་ཅད་རྗེས་

སུ་སྤྱད་པས། ཇི་ལྟ་བ་བཞིན་དུ་སློབ་མ་འཇུག་པའི་གནང་བ་མནོས་ཏེ། དེ་ནས་ཡང་དམ་ཚིག་གི་ཕྱག་རྒྱས་བདག་ཉིད་དབང་བསྐུར་ཏེ་ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་དབང་བསྐུར་བར་བཤད་
པ་དེ་བཞིན་དུ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་ཆོས་ཀྱི་ཕྱག་རྒྱས་གང་ལ་འོད་དཔག་ཏུ་མེད་པའི་དབང་བསྐུར་བར་བྱ་སྟེ། སློབ་དཔོན་གྱིས་ཞེས་བྱ་བ་ནི་ལྷག་མའོ། །པདྨོའི་དབྱིབས་བླངས་ནས་ཞེས་བྱ་བ་ནི། སངས་རྒྱས་ཀུན་གྱི་པདྨོའི་དབང་། །དེ་རིང་ཁྱེད་
ལ་བསྐུར་བར་བྱ། །སངས་རྒྱས་ཀུན་གྱིས་རབ་གྲུབ་ཕྱིར། །པདྨོ་འདི་ནི་ཁྱོད་ཀྱིས་ལོང་། །ཞེས་བྱ་བ་དང་། ཤིང་ལས་བྱས་པའི་པདྨ་འདབ་མ་བཅུ་དྲུག་པ་སྡོང་བུ་དང་བཅས་པ། ལྟེ་བའི་དབུས་སུ་རྡོ་རྗེ་རྩེ་ལྔ་པ་སོར་བརྒྱད་པ། པདྨ་འདབ་མ་བརྒྱད་པའི་ནང་དུ་ཆུད་པ། འོག་གི་ཆའི་འདབ་མ་
བརྒྱད་ཁ་གྱེས་པ། སྟེང་གི་ཆའི་ཅུང་ཟད་ཁ་མ་བྱེ་བར་གྱུར་པའི་པདྨའི་དབྱིབས་དང་། པདྨའི་དྲིལ་བུ་དང་བཅས་པ་བླངས་ཏེ་རང་གི་མིང་གི་དབང་བསྐུར་རོ། །རང་གི་པདྨོའི་མིང་ནས་བརྗོད་ལ་ཞེས་བྱ་བ་ནི། བདག་ལ་བྱིན་གྱིས་བརླབས་པ་ལ་སོགས་པ་བྱས་ནས་ལོ་ཀེ་ཤྭ་ར་པདྨ་ཧཾ་ཞེས་པ་འམ།
གཞན་གང་ཡང་རུང་བ་ཇི་ལྟར་ཐོབ་པ་རང་གི་པདྨའི་མིང་གྲགས་པས་ན་བརྗོད་པར་བྱའོ། །པདྨའི་ལྕགས་ཀྱུ་ལ་སོགས་པའི་ལས་རྣམས་བྱའོ་ཞེས་བྱ་བ་ནི། རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་ཆོ་གས་སྤྲུལ་པ་དང་། བསྡུ་བ་བྱས་ལ། པདྨོའི་སེམས་དཔའ་སེམས་དཔའ་ཆེ། །
ཞེས་བྱ་བ་ལ་སོགས་པའི་མཚན་བརྒྱ་རྩ་བརྒྱད་པས་བསྟོད་པ་བྱས་ལ། སྒོ་དབྱེ་བའི་ཕྱག་རྒྱས་སྒོ་ཕྱེ་ལ། རྟ་མགྲིན་ལ་སོགས་པའི་ལས་ཀྱི་ཕྱག་རྒྱས་དཀྱིལ་འཁོར་གྱི་ལྷ་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ། པདྨའི་གནོད་སྦྱིན་གྱིས་བགེགས་
བསྐྲད་ལ། ར་བ་དང་དྲ་བ་བྱས་ཏེ། པདྨའི་ཁུ་ཚུར་གྱི་དམ་ཚིག་གི་ཕྱག་རྒྱས་སྒོ་བཅད་ལ། པདྨའི་བསྲུང་བའི་དམ་ཚིག་གི་ཕྱག་རྒྱས་བསྲུང་བ་ཐམས་ཅད་ཡང་དག་པར་བསྲུངས་ཏེ། དཀྱིལ་འཁོར་གྱི་ལྷ་ཐམས་ཅད་ལ་ཕྱག་བྱས་ཏེ། འགྲོ་བ་འདུལ་བ་ལ་མཆོད་ཡོན་དང་། ཞབས་བསིལ་

ཕུལ་ལ། སྔགས་དང་ཕྱག་རྒྱས་སོ་སོར་དབུལ་བར་བྱའོ། །དེ་ནས་ཆོས་ཀྱི་ཕྱག་རྒྱ་འདི་ཉིད་ཀྱིས་སེམས་དཔའ་ཆེན་པོ་རྣམས་བསྒྲུབ་པར་བྱའོ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་བར་དུ་ཕྱིས་འཆད་པར་འགྱུར་བའི་དམ་ཚིག་གི་ཕྱག་རྒྱ་ཡིན་གྱི། འདིར་
དེའི་ཆོས་ཀྱི་ཕྱག་རྒྱར་མངོན་པར་འདོད་པའི་ཡི་གེ་བདག་ཉིད་ནི་འདི་མ་ཡིན་ཏེ། སྒྲུབ་པའི་དབང་དུ་བྱས་པའི་ཕྱིར་རོ། །གང་གི་ཕྱིར་དམ་ཚིག་གི་ཕྱག་རྒྱས་དངོས་སུ་སྒྲུབ་པར་བཅོམ་ལྡན་འདས་ཀྱིས་བཤད་པ་དེའི་ཕྱིར། སྐབས་འདིར་མངོན་པར་འདོད་པའི་ཆོས་ཀྱི་ཕྱག་རྒྱ་ཡང་མ་ཡིན་ལ། འདིར་
དམ་ཚིག་གི་ཕྱག་རྒྱ་ལ་ཆོས་ཀྱི་ཕྱག་རྒྱས་ཞེས་བརྗོད་པར་མི་བྱའོ་ཞེས་ཀྱང་བརྗོད་པར་མི་ནུས་ཏེ། དེ་སྐད་དུ་ཡང་། རྒྱུད་ཕྱི་མ་ལས་པདྨའི་རིགས་ཀྱི་ཕྱག་རྒྱ་རྣམ་པ་བཞི་ཀ་ལ་ཡང་ཆོས་ཀྱི་ཕྱག་རྒྱར་བརྗོད་ལ་དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམས་ནི་ཕྱག་རྒྱ་ཆེན་པོ་ཞེས་བྱ་ཞིང་།
རྡོ་རྗེ་རིགས་ཀྱི་ཕྱག་རྒྱ་རྣམས་ལ་ནི་དམ་ཚིག་གི་ཕྱག་རྒྱ་ཞེས་བྱ་ལ། ནོར་བུའི་རིགས་ཀྱི་ཕྱག་རྒྱ་བཞི་ཀ་ལ་ཡང་ལས་ཀྱི་ཕྱག་རྒྱ་ཞེས་འཆད་པར་འགྱུར་བའི་ཕྱིར་རོ། །དེ་ནས་དངོས་གྲུབ་རྣམས་ཀྱང་དེ་བཞིན་ནོ་ཞེས་བྱ་བ་ནི། ཇི་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་དམ་ཚིག་གི་ཕྱག་རྒྱ་
དང་། སེམས་དཔའི་རྡོ་རྗེ་ལ་སོགས་པས། །དེ་ལྟར་སེམས་དཔའ་ཆེན་པོ་བསྒྲུབ། །ཛཿཧཱུཾ་བཾ་ཧོཿཞེས་བརྗོད་ཅིང་ཞེས་བྱ་བས་ལྷ་ཐམས་ཅད་ཀྱི་རང་གི་རིག་པས་དངོས་གྲུབ་སྒྲུབ་པའི་རྒྱུར་བཤད་པ་དེ་བཞིན་དུ་འདིར་ཡང་དངོས་གྲུབ་ཀྱི་དོན་དུ་འགྱུར་རོ། །འདི་སྐད་སྟོན་པ་ཡིན་ཏེ། ཇི་སྐད་བཤད་
པའི་ཚུལ་གྱིས་དཀྱིལ་འཁོར་བྲིས་ལ་ཁྲུས་བྱས་ཏེ། དེ་ནས་བདག་ཉིད་རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ལ། ཇི་ལྟ་བ་བཞིན་དུ་སྒོ་དབྱེ་བ་བྱས་ནས་སྔ་མ་བཞིན་དུ་འགྲོ་བ་འདུལ་བའི་རྣལ་འབྱོར་དང་རྣལ་འབྱོར་ཆེན་པོ་དང་ལྡན་པའི་སློབ་དཔོན་གྱིས་གོས་དཀར་མོ་དང་འགྲོ་བ་འདུལ་བའི་རྗེས་སུ་
མཐུན་པའི་རྒྱན་རྣམས་ལ་དྲི་ཞིམ་པོས་བྱུག་པ་དང་། བདུག་པས་བདུགས་ཏེ་པདྨའི་གནོད་སྦྱིན་གྱི་སྔགས་ཀྱིས་གོས་ཐམས་ཅད་ལ་ཡོངས་སུ་བཟླས་ལ་ཟེའུ་ཀ་ལ་སོགས་པ་བཅིངས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱིས་རྒྱན་ཐམས་ཅད་ལ་མངོན་པར་

བསྔགས་ལ་བདག་ཉིད་དང་རྗེས་སུ་མཐུན་པའི་ཅི་རིགས་པའི་རྒྱན་བཏགས་ཏེ། ཡང་སྔགས་གཉིས་ཀྱིས་དེ་བཞིན་གཤེགས་པ་འོད་དཔག་ཏུ་མེད་པ་དང་ལྡན་པའི་པདྨའི་ཕྲེང་བའི་ཅོད་པན་ལ་ཡོངས་སུ་བཟླས་ཏེ། པདྨའི་ཅོད་པན་གྱི་དབང་བསྐུར་བས་བདག་ཉིད་ལ་དབང་
བསྐུར་ཏེ། མཆོད་པ་རྣམ་པ་ལྔས་ཡང་དག་པར་མཆོད་ལ། དཀྱིལ་འཁོར་ཐམས་ཅད་བློས་མངོན་སུམ་ལྟ་བུར་བྱས་ལ་ཕྱག་བྱས་ཏེ། མཆོད་ཡོན་ཕུལ་ནས་མེ་ཏོག་ལ་སོགས་པས་ཡང་དག་པར་མཆོད་དེ། པདྨ་དང་དྲིལ་བུ་བཟུང་ནས་ཡང་གདོང་གཡོགས་དང་གོས་ལ་པདྨའི་གནོད་སྦྱིན་དང་།
རྟ་མགྲིན་ལ་སོགས་པ་སྒོ་སྲུང་རྣམས་ཀྱི་སྔགས་ཡོངས་སུ་བཟླས་ལ། གདོང་གཡོགས་བཅིངས་ནས། མེ་ཏོག་གི་ཕྲེང་བ་བཏགས་ལ་སློབ་དཔོན་གྱིས་ཕྱག་བཞི་བྱའོ། །དེ་ནས་སྡིག་པ་བཤགས་པ་ལ་སོགས་པ་བྱས་ལ། སྡོམ་པ་གཟུང་བར་བྱས་ཏེ། བྱང་ཆུབ་སེམས་ནི་བླ་མེད་པ། །
དམ་པ་བདག་གིས་བསྐྱེད་པར་བགྱི། །ཞེས་བྱ་བ་ནས་བརྩམས་ནས། དབུགས་མ་ཕྱུང་བ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་བྱ་བའི་བར་དུའོ། །དེ་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ལ་རྡོ་རྗེ་པདྨའི་དམ་ཚིག་གི་ཕྱག་རྒྱ་བཅིངས་
ཏེ་འཇུག་པའི་ཆོ་གས་ཞུགས་ཏེ། དེ་ནས་རྡོ་རྗེ་མནའི་ཆུ་འཐུངས་ལ་དབབ་པའི་ཆོ་གས་དབབ་པ་བྱས་ཏེ། ཨོཾ་པདྨ་སྥོ་ཊ་ཨ་དྷི་ཏིཥྛ་ཨ་ཞེས་བྱ་བ་བརྒྱ་དང་ཡང་ཨ་ཞེས་བྱ་བ་ལན་བརྒྱའི་བར་དུ་བཟླ་བར་བྱའོ། །དེ་ནས་མེ་ཏོག་དོར་ལ་རང་གི་སྤྱི་བོར་བཅིངས་ཏེ། གདོང་གཡོགས་བཀྲོལ་ནས་
དཀྱིལ་འཁོར་བལྟས་ལ། དབབ་པ་ཉེ་བར་བསྡུ་བ་བྱས་ནས། །སློབ་དཔོན་དུ་དབང་བསྐུར་བའི་ཆོ་གས་བདག་ཉིད་དབང་བསྐུར་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། མིག་འབྱེད་པ་ལ་སོགས་པའི་ཆོ་ག་རྗེས་སུ་སྤྱད་ལ། ཚིགས་བཅད་གཉིས་ཀྱིས་རྗེས་སུ་གནང་
བ་མནོས་ནས། དེ་ཉིད་ཀྱིས་ནི་པདྨ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །དེ་ནས་བྱིན་གྱིས་བརླབས་ཏེ་འགྲོ་བ་འདུལ་བའི་སྙིང་པོ་བཟླས་ལ། དངོས་གྲུབ་ཀྱི་པདྨའི་བརྟུལ་ཞུགས་བླངས་ཏེ། བཅོམ་ལྡན་འདས་འགྲོ་བ་འདུལ་བའི་སྙིང་པོ་དང་ཕྱག་རྒྱ་

བཞིའི་ཡེ་ཤེས་བསླབས་ནས། གཟེངས་བསྟོད་པ་དང་། ལུང་བསྟན་པ་བླང་བར་བྱའོ། །ཡང་རང་ལ་བྱིན་གྱིས་བརླབས་པ་དང་། ཕྱག་རྒྱ་དང་། ཅོད་པན་དང་། པདྨོ་དང་། བདག་པོ་དང་། མིང་གི་དབང་བསྐུར་བས་རང་ཉིད་ལ་བདག་ཉིད་ཀྱིས་བྱས་ནས། བདག་ཉིད་ཡང་དག་པར་
མཆོད་ལ་བསྒོམ་པར་བྱའོ། །ལོ་ཀེ་ཤྭ་ར་ཨ་ཧཾ་ཞེས་བྱ་བ་ལ་སོགས་པའི་མིང་གང་ཡང་རུང་བ་ནས་བརྗོད་དེ། པདྨ་དང་དྲིལ་བུ་འཛིན་པ་ཉིད་ཀྱིས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། རྣམ་པར་སྣང་མཛད་ཀྱི་གནས་སུ་བུདྡྷ་ཧཱུཾ་ཨ་ཞེས་བྱ་བས་རྣམ་པར་སྣང་མཛད་ཀྱི་པདྨས་མཚན་
པའི་རྡོ་རྗེ་རྩེ་ལྔ་པ་བསམས་ལ། དེ་ནས་བཛྲ་པདྨ་ཨ་ཧཾ་ཞེས་བྱ་བས་དེ་བཞིན་གཤེགས་པའི་ང་རྒྱལ་བསྒོམ་པར་བྱའོ། །རྡོ་རྗེ་དེ་ཉིད་ཏདྱ་ཐཱ་སརྦྦ་ཏ་ཐཱ་ག་ཏ་སཏྟ་ཐཱ་ཨ་ཧཾ་ཞེས་བྱ་བས་རྣམ་པར་སྣང་མཛད་ཀྱི་བདག་ཉིད་དུ་བསྒོམ་པར་བྱའོ། །དེ་བཞིན་དུ་པདྨ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་
ལ་པདྨ་འབེབས་པའི་གནས་སུ། ཨོཾ་ཤཾ་མུ་ཁ། པདྨ་ཀུ་མཱ་ར། བེ་ཤ་དྷ་ར། པདྨ་གྷཎྜ་ཡ། ཨཱ་བི་ཤ་ཡ། སརྦྦ་པདྨ་ཀུ་ལ་ས་མ་ཡཱཾ། སརྦྦ་མུ་དྲཾ། བནྡྷ་ཡ། སརྦྦ་སིདྡྷི་མྨེ་པྲ་ཡཙྪ། པདྨ་ཨཱ་བེ་ཤ་ཨ་ཨ་ཨ་ཨ་ཞེས་བྱ་བས་པདྨ་འབེབས་པའི་གནས་སུ་པདྨ་དྲིལ་བུའི་གཟུགས་སུ་བདག་ཉིད་བསམ་
པར་བྱའོ། །པདྨ་གྷཎྜ་ཨ་ཧཾ་ཞེས་བྱ་བས་ང་རྒྱལ་བསྐྱེད་ལ། པདྨ་ཨཱ་བེ་ཤ་ཨ་ཧཾ་ཞེས་བྱ་བས་དྲིལ་བུའི་གཟུགས་དེ་པདྨ་འབེབས་པའི་བར་བསྒོམ་པར་བྱའོ། །དེ་ལྟར་དཀྱིལ་འཁོར་གྱི་འཁོར་ལོ་ཐམས་ཅད་རྡོ་རྗེས་བསྒྲུབ་པར་འགྱུར་རོ། །དེ་ནས་སྒོ་དབྱེ་བའི་ཕྱག་རྒྱས་སྒོ་ཕྱེ་ལ། བསྡུ་
བ་བྱས་ཏེ་མཚན་བརྒྱ་རྩ་བརྒྱད་པས་བསྟོད་ལ། སྒོ་ཐམས་ཅད་ནས་རྟ་མགྲིན་གྱི་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་ལས་བྱས་ཏེ། དེ་བཞིན་དུ་པདྨའི་གནོད་སྦྱིན་གྱིས་བགེགས་བསྐྲད་ལ་ར་བ་དང་དྲ་བ་བྱས་ཏེ། པདྨའི་ཁུ་ཚུར་གྱིས་དཀྱིལ་འཁོར་གྱི་སྒོ་བཅད་ལ། པདྨའི་
བསྲུང་བས་བསྲུང་བ་ཐམས་ཅད་ཡང་དག་པར་བསྲུངས་ཏེ། འགྲོ་བ་འདུལ་བའི་སྙིང་པོས་དཀྱིལ་འཁོར་བའི་ལྷ་ཐམས་ཅད་ལ་མཆོད་ཡོན་ཕུལ་ལ། ཨོཾ་པྲ་ཝ་ར་སཏྐཱ་རཾ་པྲ་ཏཱིཙྪ་སྭཱ་ཧཱ། ཞེས་བྱ་བའི་རིག་པ་འདིས་ཞབས་བསིལ་དབུལ་བར་བྱའོ། །ཕྱག་རྒྱ་ནི་འདི་ཡིན་ཏེ། གཡས་

པའི་ཁུ་ཚུར་གྱིས་སོར་མོ་ཐམས་ཅད་བསྐུམ་ལ་མཛུབ་མོ་དང་མཐེ་བོ་གཉིས་བསྐུམ་པ་ལྟར་བྱས་ནས་མེ་ཏོག་བླངས་ཏེ། འབུལ་བའི་ཚེ་སོར་མོ་དེ་རྣམས་བརྐྱང་བར་བྱ་སྟེ། ལྷ་ཐམས་ཅད་ཀྱི་ཞབས་ལ་དབུལ་བར་བྱའོ། །དེ་ནས་རྣམ་པར་སྣང་མཛད་ཀྱི་དམ་ཚིག་གི་ཕྱག་
རྒྱ་བཅིངས་ལ། ཤུདྡྷ་ཧཱུཾ་དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་ཧཱུཾ། ས་མ་ཡ་སྟྭཾ། ཨ་ཧཾ་བུདྡྷ་ཧཱུཾ་ཞེས་བྱ་བ་ལན་གསུམ་བརྗོད་ལ་རྣམ་པར་སྣང་མཛད་བསྒྲུབ་པར་བྱའོ། །དེ་བཞིན་དུ་བསྐལ་པ་བཟང་པོའི་མཐར་ཐུག་པའི་དམ་ཚིག་གི་ཕྱག་རྒྱ་བཅིངས་ལ། ཨོཾ་སརྦྦ་སཾ་སྐཱ་ར་པ་རི་ཤུདྡྷ་དྷརྨྨ་ཏེ་ག་ག་ན་ས་
མུངྒ་ཏེ་མ་ཧཱ་ན་ཡ་པ་རི་བཱ་རི་སྭཱ་ཧཱ། དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་ཧཱུཾ། ས་མ་ཡ་སྟྭཾ་ཨ་ཧཾ། ཨོཾ་སརྦྦ་སཾ་སྐཱ་ར་པ་རི་ཤུདྡྷ་དྷརྨྨ་ཏེ་ག་ག་ན་ས་མུངྒ་ཏེ་མ་ཧཱ་ན་ཡ་པ་རི་བཱ་ར་སྭཱ་ཧཱ། ཞེས་བརྗོད་ཅིང་བསྐལ་པ་བཟང་པོ་རྣམས་བསྒྲུབ་པར་བྱའོ། །རྣམ་པར་སྣང་མཛད་ལ་སོགས་པ་ནས། པདྨ་འབེབས་
པའི་བར་གྱི་དམ་ཚིག་གི་ཕྱག་རྒྱ་འཆད་པར་འགྱུར་བ་དང་། བྱམས་པ་ལ་སོགས་པ་བསྐལ་པ་བཟང་པོ་པ་རྣམས་ཀྱི་གཡོན་པ་དེ་བཞིན་གཤེགས་པའི་ཁུ་ཚུར་བཀན་ལ་གཡས་པའི་མཛུབ་མོ་དང་མཐེ་བོང་གཉིས་ཀྱིས་མཐེའུ་ཆུང་ནས་བརྩམས་ཏེ་ཕྱེ་ལ། ཐལ་མོ་ཁོང་སྟོང་དུ་བྱས་པ་ནི་
དམ་ཚིག་གི་ཕྱག་རྒྱའོ། །དེ་ལྟར་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་སྣང་མཛད་ལ་སོགས་པ་བསྒྲུབས་ནས། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་ཀྱང་རྒྱས་བཏབ་ནས། །དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ་མཆོད་ཡོན་སྔོན་དུ་འགྲོ་བའི་མཆོད་པ་ཐམས་
ཅད་ཀྱིས་ཡང་དག་པར་མཆོད་ལ། གོས་དང་རྒྱན་ཐམས་ཅད་ལ་གདུགས་དང་རྒྱལ་མཚན་དང་། བླ་རེ་སྣ་ཚོགས་པ་ལ་ཡང་པདྨ་གནོད་སྦྱིན་དང་། འགྲོ་བ་འདུལ་བ་དང་། ཡི་གེ་ཨོཾ་མངོན་པར་བཟླས་ཏེ་དབུལ་བར་བྱའོ། །དེ་ནས་མེ་ཏོག་གི་ཤིང་བརྒྱའམ་བཞིའམ་མེ་ཏོག་གི་ཤིང་
རྣམས་ལ་མེ་ཏོག་གི་རིག་པ་དང་། དེ་ནས་མར་མེའི་རིག་པས་མར་མེ་དང་། དྲིའི་རིག་པས་དྲི་དང་། བདུག་པའི་རིག་པས་བདུག་པ་དང་། ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པའི་ལྷ་བཤོས་ཀྱི་རིག་པ་དང་། རོལ་མོའི་ཆ་བྱད་ཐམས་ཅད་ལ་རོལ་མོའི་རིག་པ་རྣམས་དང་། དར་དཔྱངས་དཔྱངས་པར་

བྱ་བ་དང་། མེ་ཏོག་གི་ཕྲེང་བ་དང་། རྔ་ཡབ་ཀྱིས་བརྒྱན་ཅིང་། དྲ་བ་དང་དྲ་བ་ཕྱེད་པས་སྤྲས་པ། ཟླ་བ་ཕྱེད་པས་ཉེ་བར་མཛེས་པར་བྱས་པ་དང་། རྟ་དང་། གླང་པོ་ཆེ་དང་། བ་གླང་གི་ཁྱུ་ཤིན་ཏུ་བརྟགས་པ་རྣམས་ཀྱང་དབུལ་བར་བྱའོ། །རྟ་བབས་ཡིད་དུ་འོང་བ་དྲིལ་བུ་ལ་སོགས་པ་དང་
བཅས་པ་ལ་ཡང་། པདྨའི་གནོད་སྦྱིན་དང་། འགྲོ་བ་འདུལ་བ་དང་། ཡི་གེ་ཨོཾ་མངོན་པར་བཟླས་ཏེ་དབུལ་བར་བྱའོ། །དེ་ལ་མཆོད་པ་ཐམས་ཅད་དབུལ་བའི་སྙིང་པོ་ནི་འདི་ཡིན་ཏེ། བཛྲ་སྥ་ར་ཎ་ཁཾ་དེ་ནས་པདྨོའི་སྒེག་མོ་ལ་སོགས་པ་རྣམ་པ་བརྒྱད་ཀྱིས་མཆོད་ལ། པདྨའི་རིགས་ཀྱི་ལས་
ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཀྱང་དཀྱིལ་འཁོར་ཐམས་ཅད་ཡང་དག་པར་མཆོད་དེ། ཡི་གེ་ཨོཾ་མངོན་པར་བཟླས་པའི་རིན་པོ་ཆེ་སྣ་བདུན་དང་། མཆོད་པའི་ཡན་ལག་ཐམས་ཅད་ཀྱིས་ནམ་མཁའི་ཁམས་ཐམས་ཅད་གང་བར་བསམས་ལ། ཨོཾ་སརྦྦ་བིཏྤཱུ་ར་
པཱུ་ར་སུ་ར་སུ་ར་ཨཱ་ཝརྟ་ཡ་ཨཱ་ཝརྟ་ཡ་ཧོཿཨོཾ་བཛྲ་སྥ་ར་ཎ་ཁཾ་ཞེས་བྱ་བ་དང་། ཕྱག་འཚལ་བའི་ཐལ་མོ་སྦྱར་བ་བཅིངས་ལ་ཡང་མཆོད་པར་བྱའོ། །སླར་ཡང་པདྨའི་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞིས་དཀྱིལ་འཁོར་ཐམས་ཅད་ཡང་དག་པར་མཆོད་ལ། ཕྱག་བྱས་ཏེ་
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སློབ་དཔོན་གྱིས་བཅོམ་ལྡན་འདས་དངོས་གྲུབ་ཐམས་ཅད་ཀྱི་ཕྱིར། སེམས་ཅན་ཐམས་ཅད་ཀྱི་དོན་མཛོད་ཅིག་ཅེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གསོལ་བ་གདབ་པར་བྱའོ། །དེ་ནས་རྡོ་རྗེ་དབྱིངས་ཀྱི་དཀྱིལ་
འཁོར་ཆེན་པོ་ལས་བཤད་པའི་ཆོ་གས་གསོལ་བ་བཏབ་ནས། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ཏེ། སློབ་མ་གཞུག་པའི་གནང་བ་ནོད་པར་བྱས་ཏེ། བདག་མིང་འདི་ཞེས་བགྱི་བ་ཡི། །པདྨའི་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་སྨན་སླད་དུ། །
སློབ་མ་རྣམས་ནི་གཞུག་པར་བགྱི། །པདྨའི་སློབ་དཔོན་གྱི་ལས་ཀྱི་ཆོ་ག་རྒྱས་པའོ། །དེ་ནས་པདྨའི་སློབ་མ་རྣམས་གཞུག་པར་བྱ་ཞེས་བྱ་བ་ནི་སློབ་དཔོན་གྱིས་ལས་ཀྱི་དུས་ཕྱིས་སློབ་མ་འགྲོ་བ་འདུལ་བའི་གཟུགས་སུ་བྱིན་གྱིས་བརླབས་ལ། དེ་ནས་པདྨའི་སློབ་མ་གཞུག་པར་བྱའོ། །

དེ་ལ་དང་པོར་ཞེས་བྱ་བ་ནི། སློབ་མ་འཇུག་པའི་སྔོན་དུའོ། །ཇི་སྐད་བཤད་པའི་པདྨའི་སློབ་མའི་སློབ་མ་རྣམས་ཀྱི་དཀྱིལ་འཁོར་ཆེན་པོར་བཅུག་ལ་མནའི་སྙིང་པོ་བྱིན་ལ་འདི་སྐད་ཅེས་བསྒོ་བར་བྱའོ། །དེང་ཁྱོད་ཀྱི་ནི་སྙིང་ག་ནས། །པདྨའི་སེམས་དཔའ་
ཉིད་བཞུགས་ཏེ། །ཞེས་བྱ་བ་ལ་སོགས་པས་མནའ་བསྒག་པར་བྱའོ། །གསང་བའི་ཆོ་ག་རྒྱས་པ་ཞེས་བྱ་བ་ནི། འགྲོ་བ་འདུལ་བའི་དཀྱིལ་འཁོར་ཆེན་པོར་དེ་བཞིན་གཤེགས་པ་ཐམས་ཅད་ཀྱི་གཟུགས་སྦས་ནས། འཕགས་པ་སྤྱན་རས་གཟིགས་དབང་ཕྱུག་གིས་དབང་
ཕྱུག་ཆེན་པོ་ལ་སོགས་པས་འདུལ་བའི་སེམས་ཅན་རྗེས་སུ་གཟུང་བར་གནས་པའི་ཕྱིར་རོ། །གསང་བའི་ཆོ་ག་རྒྱས་པ་ནི་སྣ་ཚོགས་པའི་གཟུགས་ཅན་ནོ། །དེ་བཞིན་དུ་གཞུག་པའི་ཆོ་ག་རྒྱས་པ་ཡང་གསང་བའི་ཆོ་ག་རྒྱས་པ་སྟེ་དམ་ཚིག་མི་ཤེས་པ་ལ་མི་བསྟན་པའི་ཕྱིར་རོ། །
དེ་ནས་སྙིང་པོ་འདིས་དམ་ཚིག་གི་ཕྱག་རྒྱ་བཅིང་བར་བྱའོ་ཞེས་བྱ་བ་ནི། ཇི་སྐད་དུ་བཤད་པའི་གོས་ཀྱི་སྟོད་གཡོགས་དང་སྨད་གཡོགས་དང་། གདོང་གཡོགས་ཀྱང་བཅིངས་ནས་ཕྱག་བཞི་བྱས་ཏེ། ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ། རྡོ་རྗེ་ཆོས་མའི་ཕྱག་རྒྱ་
བཅིངས་ཏེ། དེ་སྐད་དུ་ཡང་། རྡོ་རྗེ་ཆོས་ཀྱི་ཏིང་འཛིན་གྱིས། །དམ་ཚིག་སྐད་ཅིག་གིས་འགྲུབ་འགྱུར། །ཞེས་གསུངས་པས། དམ་ཚིག་ནི་དཀྱིལ་འཁོར་གྱི་དངོས་གྲུབ་སྟེ། དཀྱིལ་འཁོར་དུ་ཞུགས་པ་ལས་བྱུང་བ་ཡིན་ནོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ནི་སློབ་མ་
འཇུག་པའི་གནང་བ་ནོད་པའི་དུས་ཕྱིས་ཕྱག་རྒྱ་བཅིང་བར་མི་བྱ་བའམ། རིམ་པ་ནི་འདི་བཞིན་དུ་མི་བྱའོ། །ལྷག་མ་ནི་གོ་སླའོ། །དེ་ནས་ལས་རྣམས་ཇི་ལྟ་བ་བཞིན་བྱས་ནས་ཞེས་བྱ་བ་ནི། སློབ་དཔོན་གྱི་ལས་ཀྱི་ཆོ་ག་ཇི་སྐད་བཤད་པ་བཞིན་དུ་སློབ་མ་འཇུག་པའི་ཆོ་ག་རྒྱས་པ་ཐམས་ཅད་
ཀྱང་དེ་བཞིན་དུ་བྱའོ་ཞེས་བྱ་བའི་དོན་ཏོ། །པདྨའི་དབྱིབས་ལག་ཏུ་སྦྱིན་ནོ་ཞེས་བྱ་བ་ནི་སྔར་བཤད་པའི་མཚན་ཉིད་ཅན་གྱི་རྡོ་རྗེ་པདྨ་སློབ་མའི་ལག་ཏུ་སྦྱིན་ནོ། །བྱིན་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱང་སྦྱིན་ཏེ། ཨོཾ་པདྨ་ཧསྟ་བཛྲ་དྷརྨྨཱ་ཏྲཾ་པཱ་ལ་ཡ་ཞེས་བྱ་བ་ལ་སོགས་པའོ། །དེ་ལ་རྡོ་རྗེ་

ནི་ཆོས་རང་བཞིན་གྱིས་རྣམ་པར་དག་པའོ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་རྟོགས་པའོ། །དེའི་ཆོས་ནི་གཟུང་བ་དང་འཛིན་པའི་རྣམ་པར་རྟོག་པ་སྤངས་ཏེ་དེ་སྐྱོང་བའོ། །ཡང་དག་པའི་དངོས་པོར་འཛིན་པའི་མངོན་པར་ཞེན་པ་མི་བྱེད་པར་ཆོས་ཐམས་ཅད་རང་བཞིན་གྱིས་རྣམ་པར་
དག་པའོ་ཞེས་བྱ་བ་ཐམས་ཅད་ལ་བསྒོམ་པར་གྱིས་ཤིག་དང་འདི་ནི་པདྨ་ཡོངས་སུ་མི་གཏོང་བའི་མཚན་ཉིད་ཀྱིས་བརྟུལ་ཞུགས་སོ། །དེ་ཉིད་བཤད་པ་ནི། ཇི་ལྟར་པདྨ་དམར་པོ་འདི། །ཞེས་བྱ་བ་སྨོས་ཏེ། ཇི་ལྟར་པདྨ་ཁ་དོག་དམར་པོ་འདི་ཁྱོད་ཀྱིས་ཟུང་ཤིག །རིགས་ཀྱི་ཉེས་པའི་
འདམ་ལ་སོགས་ཆུ་ཡིས་མི་གོས་པ་བཞིན་ནོ། །ཐམས་ཅད་དག་པ་ནི་སྔར་བཤད་པའི་རྡོ་རྗེ་ཆོས་ཀྱི་རང་བཞིན་ནི་བྱང་ཆུབ་ཀྱི་སེམས་བསྐྱེད་ནས་ཆོས་བདག་མེད་པའི་ཆགས་པས་གོས་པས་བྱང་ཆུབ་སེམས་དཔའོ། །བསྒོམ་པ་ནི་གོམས་པར་བྱས་པའོ། །དེ་བཞིན་དུ་གཟུང་བ་དང་འཛིན་
པའི་རྣམ་པར་རྟོག་པའི་དྲི་མའི་ཁམས་གསུམ་པའི་འདོད་ཆགས་ཀྱི་སྡིག་པའི་ཆུས་གོས་པར་མི་འགྱུར་རོ། །དེ་ལ་ཆོས་ཉིད་དེ་ཡིན་ནོ། །ཞེས་བྱ་བ་ནི། ཐོག་མ་མེད་པ་ནས་སྒྲོ་འདོགས་པ་མེད་པའི་རང་བཞིན་ནོ། །འདི་སྐད་སྟོན་པ་ཡིན་ཏེ། ལྷག་པར་གནས་པ་དེ་བཞིན་དུ་བྱས་ནས།
དབང་བསྐུར་བར་འོས་པའི་སློབ་མས་བསླབ་པའི་གཞི་ལྔ་ཡོངས་སུ་གཟུང་བའམ། དགེ་སྦྱོང་དང་དགེ་སློང་གི་སྡོམ་པ་ཡོངས་སུ་བླངས་པ། ལག་ན་མེ་ཏོག་ཐོགས་པའི་སློབ་མས་སློབ་དཔོན་གྱི་ཞབས་གཉིས་ལ་ཕྱག་བྱས་ལ། འདི་སྐད་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་
པས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་དག་ཀྱང་བདག་ལ་སྩོལ། །དེ་ནས་ཇི་སྐད་བཤད་པའི་གོས་ཀྱི་སྟོད་གཡོགས་དང་སྨད་གཡོགས་བསྐོན་
ཞིང་གདོང་གཡོགས་ཀྱང་བཅིངས་ལ་སློབ་མ་ཕྱག་བཞི་བྱེད་དུ་གཞུག་གོ། །ཡང་སྒོ་བཞི་ནས་ཕྱག་བཞི་བྱས་ལ། ལག་ན་མེ་ཏོག་ཐོགས་པའི་སློབ་མས་སློབ་དཔོན་ལ་ཡང་ཕྱག་བྱས་ཏེ། སྔར་བཤད་པའི་རིམ་པའི་རིམ་པ་ཉིད་ཀྱིས་བཤགས་པ་དང་། རྗེས་སུ་ཡི་རང་བ་དང་།

བསྐུལ་བ་དང་། གསོལ་བ་ཡང་བྱས་ལ། འདི་སྐད་ཅེས་བརྗོད་པར་བྱའོ། །གཙོ་བོ་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པ། །སངས་རྒྱས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །སློབ་དཔོན་དབང་དུ་གནས་
པ་ལ། །སངས་རྒྱས་རོལ་མོ་ལས་བྱུང་བའི། །མི་ལྡོག་འཁོར་ལོའི་སྦྱོར་བར་ལྡན། །ཐར་པ་ཆེན་པོ་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བའི་རིགས་མཐོ་ཐམས་ཅད་དུ། །སློབ་དཔོན་ཆེན་པོར་བདག་འཇུག་མཛོད། །མི་ལྡོག་འཁོར་ལོའི་དབང་
བསྐུར་བས། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་པ། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་བ་ནི་རྨད་པོ་ཆེ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་
བདག་ནི་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་དཀྱིལ་འཁོར་གྱི་ལྷ་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །དམ་ཚིག་སྡོམ་དང་གསང་བ་ཡིས། །འཁོར་ལོ་
འདིར་ནི་འཇུག་པར་འཚལ། །དེ་ནས་སློབ་དཔོན་གྱིས་ཡང་འདི་སྐད་ཅེས་བརྗོད་པར་བྱ་སྟེ། གསང་བ་ཆེན་པོ་རིགས་དག་པ། །གསང་བ་ཆེན་པོར་འཛིན་པ་ནི། །བདག་ཉིད་ཆེན་པོར་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱ། །སངས་རྒྱས་ཆོས་དང་དགེ་
འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །
སློབ་དཔོན་དག་ཀྱང་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་བཤད། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་

པ་རྣམ་བཞི་རབ་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་བཤད། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་
ལས་ཀྱང་ཅི་ནུས་བྱ། །དེ་ལས་གཞན་པ་བཅུ་བཞི་ནི། །ཕས་ཕམ་པར་ཡང་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་དེ། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གང་ཚེ་ཉམས་གྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །
ཁྱོད་ཀྱིས་སྲོག་ཆགས་བསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱོད་ཅིང་། །བརྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་ནི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་གཏོགས་པར། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་
བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་རྣམས་དང་། །ཡིད་ཀྱི་རྣམ་པ་གསུམ་རྣམས་ཀྱང་། །ཅི་ནུས་པར་ནི་རྗེས་སུ་སྐྱོང་། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ནི་ཡོངས་
མི་སྤང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་བགོམ་པར་མི་བྱའོ། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་ཀྱང་ནི་རྟག་ཏུ་བསྲུངས། །དེས་ཀྱང་འདི་སྐད་
བརྗོད་བྱ་སྟེ། །སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་དག་བདག་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །ཞེས་བྱ་
བ་ནས། སེམས་ཅན་མྱ་ངན་འདས་ལ་འགོད། །ཅེས་བྱ་བའི་བར་དུ་བརྗོད་པར་བྱའོ། །གང་ཞིག་སྡོམ་པ་མི་འཛིན་པར་བྱེད་པ་དེ་ལ་ནི། དེང་ཁྱོད་ཅེས་བྱ་བ་ལ་སོགས་པ་བརྗོད་པར་མི་བྱ་སྟེ། སློབ་དཔོན་དུ་རྗེས་སུ་གནང་བ་དང་། དབང་བསྐུར་བ་ཡང་མི་བྱའོ། །དེ་ནས་དེ་མ་ཐག་ཏུ།

ཨོཾ་སརྦྦ་ཡོ་ག་ཙིཏྟ་ཨུཏྤ་ད་ཡ་མི་ཞེས་བྱ་བ་འདིས། བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་ནས་སུ། །དེ་ཡི་སྙིང་གར་སྙིང་པོས་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་དེ་འགྲོ་བ་འདུལ་བར་
བྱིན་གྱིས་བརླབས་ཏེ། འགྲོ་བ་འདུལ་བའི་དམ་ཚིག་གི་ཕྱག་རྒྱ་དང་། །རྡོ་རྗེ་པདྨ་ལ་སོགས་པའི་ཕྱག་རྒྱ་བཞིས་བྱིན་གྱིས་བརླབས་ལ། དེ་ནས་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ཏེ། དྲི་དང་མེ་ཏོག་ལ་སོགས་པ་རྣམས་ཀྱིས་མཆོད་ཡོན་གྱི་མཆོག་བླངས་ཏེ། རྡོ་རྗེ་
བརྟུལ་ཞུགས་ཀྱིས་དཀྱིལ་འཁོར་ཆེན་པོར་འཇུག་པར་བྱའོ། །དེ་ལ་དང་པོ་རེ་ཞིག་སློབ་དཔོན་གྱིས། ཨོཾ་བཛྲ་པདྨ་ས་མ་ཡ་སྟྭཾ་ཞེས་བརྗོད་ཅིང་རྡོ་རྗེ་པདྨའི་དམ་ཚིག་གི་ཕྱག་རྒྱ་རང་ཉིད་བཅིངས་ལ་སློབ་མ་ཡང་འཆིང་དུ་གཞུག་པར་བྱའོ། །དེ་ཉིད་ཀྱི་གུང་མོའི་སོར་མོ་གཉིས་ཀྱིས་མེ་ཏོག་གི་ཕྲེང་
བ་འཛིན་དུ་བཅུག་ལ། ཨོཾ་པདྨ་ས་མ་ཡ་ཧཱུཾ་ཞེས་བྱ་བའི་སྙིང་པོ་འདི་དང་། རྟ་མགྲིན་གྱི་ལྕགས་ཀྱུའི་ལས་ཀྱི་ཕྱག་རྒྱས་ཤར་ཕྱོགས་ཀྱི་སྒོ་ནས་བཅུག་ལ་དགུག་པར་བྱའོ། །ལྷོ་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ་དོན་ཡོད་ཞགས་པའི་ལས་ཀྱི་ཕྱག་རྒྱས་གཞུག་པར་བྱའོ། །ཡང་ནུབ་
ཕྱོགས་ཀྱི་སྒོར་བཅུག་ལ་པདྨའི་ལྕགས་སྒྲོག་གི་ལས་ཀྱི་ཕྱག་རྒྱས་བཅིང་བར་བྱའོ། །དེ་ནས་ཡང་བྱང་ཕྱོགས་ཀྱི་སྒོ་ནས་བཅུག་ལ་པདྨ་འབེབས་པའི་ལས་ཀྱི་ཕྱག་རྒྱས་དབང་དུ་བྱའོ། །ཡང་ཤར་ཕྱོགས་ཀྱི་སྒོ་ནས་དེ་བཞིན་དུ་བཅུག་ལ་འདི་སྐད་ཅེས་བརྗོད་པར་བྱ་སྟེ། དེང་ཁྱོད་དེ་བཞིན་
གཤེགས་པ་ཐམས་ཅད་ཀྱི་པདྨའི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་གྲུབ་པ་ཡང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་
ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་ཏ་རེ། དེ་ནས་སློབ་དཔོན་རང་ཉིད་ཀྱིས་རྡོ་རྗེ་པདྨའི་དམ་ཚིག་གི་ཕྱག་རྒྱ་ཁ་ཐུར་དུ་བསྟན་པ་དང་། གྱེན་དུ་བསྟན་པ་བཅིངས་ལ་པདྨ་སློབ་མའི་སྤྱི་བོར་བཞག་ལ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེ་དམ་ཚིག་ཡིན་

གྱིས། གལ་ཏེ་ཚུལ་འདི་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་མནའི་སྙིང་པོ་འདི་ལན་ཅིག་བཟླས་པའི་ཆུས་པདྨའི་སློབ་མ་དེ་འཐུང་དུ་བཅུག་ལ་འདི་སྐད་ཅེས་བརྗོད་པར་བྱའོ། །དེ་ལ་མནའི་སྙིང་པོ་ནི་འདི་ཡིན་ཏེ། པདྨའི་
སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བཛྲ་ཨུ་ད་ཀ་ཋ། དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་ཏེ་ཁྱོད་ཀྱིས་ཕྱག་ན་པདྨོ་ང་ཡིན་གྱིས། ངས་འདི་བྱོས་
ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་ཡང་འདི་སྐད་དུ་བསྒོ་བར་བྱ་སྟེ། གསང་བའི་ཆོ་ག་རྒྱས་པ་འདི་སུ་ལ་ཡང་མ་སྨྲ་ཤིག །ཁྱོད་མི་བདེ་བ་མ་
སྤངས་པར་དུས་བྱས་ནས་སེམས་ཅན་དམྱལ་བར་ལྟུང་བར་གྱུར་ཏ་རེ། དེ་ནས་དེ་བཞིན་གཤེགས་པ་ཐམས་ཅད་ཀྱིས་བདག་ལ་བྱིན་གྱིས་རློབས་ལ། པདྨའི་སེམས་དཔའ་བདག་ལ་འབབ་པར་གྱུར་ཅིག་ཅེས་སྨྲོས་ཤིག་ཅེས་བསྒོའོ། །དེ་ནས་མྱུར་དུ་སློབ་དཔོན་གྱིས་རྡོ་རྗེ་པདྨའི་དམ་ཚིག་
གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དུ་གཞུག་གོ། །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །བཛྲ་ཨཱ་བེ་ཤ་ཨཿཞེས་བྱ་བ་ལན་བརྒྱའི་བར་དུ་བརྗོད་པར་བྱའོ། །དེའི་ཚེ་ཁྲོ་བོའི་ཁུ་ཚུར་བཅིངས་ལ།
རྡོ་རྗེ་པདྨའི་དམ་ཚིག་གི་ཕྱག་རྒྱ་དྲལ་བར་བྱ་ཞིང་། ཨོཾ་ཧཱུཾ་ཧྲཱིཿཧོཿཨ་ཨ་ཨ་ཨ། ཞེས་ལན་བརྒྱའི་བར་བརྗོད་ན་ངེས་པར་འབབ་པར་འགྱུར་རོ། །གང་གི་ཚེ་དེ་ལྟར་བབས་པས་པདྨ། སངས་རྒྱས་ཀྱི་ཕྱག་རྒྱ་འཆིང་བ་དེའི་ཚེ་སློབ་དཔོན་གྱིས་པདྨ་ཁུ་ཚུར་གྱི་ཕྱག་རྒྱ་བཅིང་བར་བྱའོ། །གང་གི་ཚེ་པདྨ་
རྒྱལ་པོའི་ཕྱག་རྒྱ་འཆིང་བ་དེའི་ཚེ། པདྨ་གནོད་སྦྱིན་གྱི་ཕྱག་རྒྱ་བཅིང་བར་བྱའོ། །གང་གི་ཚེ་པདྨ་ཆགས་པའི་ཕྱག་རྒྱ་འཆིང་བ་དེའི་ཚེ། པདྨ་སྲུང་བའི་ཕྱག་རྒྱ་བཅིང་བར་བྱའོ། །གང་གི་ཚེ་པདྨ་ལེགས་པའི་ཕྱག་རྒྱ་འཆིང་བ་དེའི་ཚེ། པདྨ་གར་གྱི་དབང་ཕྱུག་གི་ཕྱག་རྒྱ་བཅིང་བར་བྱའོ། །

གང་གི་ཚེ་པདྨ་ཁྲོ་གཉེར་གྱི་ཕྱག་རྒྱ་འཆིང་བ་དེའི་ཚེ། པདྨ་སྲུང་བའི་ཕྱག་རྒྱའོ། །གང་གི་ཚེ་པདྨ་ཉི་མའི་ཕྱག་རྒྱ་འཆིང་བ་དེའི་ཚེ། པདྨ་རྒྱུའི་ཕྱག་རྒྱའོ། །གང་གི་ཚེ་པདྨ་རྒྱལ་མཚན་གྱི་ཕྱག་རྒྱ་འཆིང་བ་དེའི་ཚེ། པདྨ་རྣོན་པོའི་ཕྱག་རྒྱའོ། །གང་གི་ཚེ་པདྨ་
བཞད་པའི་ཕྱག་རྒྱ་འཆིང་བ་དེའི་ཚེ། པདྨ་སྒྲོལ་མའི་ཕྱག་རྒྱ་བྱའོ། །དེ་ལྟ་བུས་ནི་པདྨའི་སངས་རྒྱས་དགོངས་པ་མཛད་པར་འགྱུར་རོ། །དེ་ནས་བབས་པ་དེའི་ལྕེ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་བསམས་ལ། བཛྲ་ཛི་ཧྭ་ཞེས་བྱ་བས་བྱིན་གྱིས་བརླབས་ལ། འཇིག་རྟེན་
གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་གར་གྱི་ཕྱག་རྒྱ་དང་། ཁྲོ་བོ་རྡོ་རྗེ་བསྲུང་བའི་གནས་སུ་བཞད་པའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། བྲུ་ཧི་བཛྲ་དེ་ནས་ཐམས་ཅད་སྨྲ་བར་འགྱུར་རོ། །དེ་ནས་ཕྲེང་བ་དེ་པྲ་ཏཱིཙྖ་བཛྲ་ཧོཿ
ཞེས་བྱ་བས་དཀྱིལ་འཁོར་ཆེན་པོར་དོར་བར་བྱའོ། །དེ་ནས་ཨོཾ་པྲ་ཏི་གྲྀ་ཧྣ་སྟྭཾ་མི་མཾ་སཏྭ་མ་ཧཱ་བཱ་ལ་ཞེས་བྱ་བས་ཕྲེང་བ་དེ་དེའི་མགོ་ལ་བཅིང་བར་བྱའོ། །དེ་ནས། པདྨའི་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱིད་མཛད་དེ། །རྡོ་རྗེའི་
མིག་ནི་བླ་ན་མེད། །ཧེ་བཛྲ་པཱ་ཤྱ་དེ་ནས་རྟ་མགྲིན་ནས་བརྩམས་ཏེ་བཅོམ་ལྡན་འདས་རྣམ་པར་སྣང་མཛད་ཀྱི་བར་དུ་དཀྱིལ་འཁོར་ཆེན་པོ་བསྟན་པར་བྱའོ། །དེ་ནས་ཏིཥྛ་བཛྲ་དྲྀ་ཌྷོ་མེ་བྷཱ་བ། ཤཱ་ཤྭ་ཏོ་མེ་བྷ་བ། ཧྲྀ་ད་ཡཾ་ཨ་དྷི་ཏིཥྛ་སརྦྦ་སིདྡྷིམྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿཞེས་བྱ་བའི་སྙིང་པོ་འདིས་
དབབ་པའི་ཕྱག་རྒྱ་སྙིང་གར་དགྲོལ་བར་བྱའོ། །དེ་ནས་གང་ལ་མེ་ཏོག་བབས་པའི་ལྷ་དེ་སྐུ་དམ་ཚིག་གི་ཕྱག་རྒྱས་དེ་སྤྲུལ་ལ། རྡོ་རྗེ་ཆོས་ཀྱི་ཕྱག་རྒྱ་དང་། རིགས་ཀྱི་དམ་ཚིག་གི་ཕྱག་རྒྱའི་ཁྱད་པར་གྱིས་སློབ་མ་བྱིན་གྱིས་བརླབས་ལ་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། དེ་ནས་
ནང་གི་དཀྱིལ་འཁོར་གྱི་ཕྱི་རོལ་དུ་ཁ་ཤར་ཕྱོགས་ཀྱི་སྒོ་ལ་མངོན་པར་ཕྱོགས་པའམ། ཕྱི་རོལ་གྱི་དཀྱིལ་འཁོར་གྱི་ཕྱི་རོལ་དུ་པདྨ་དང་ཟླ་བའི་སྟེང་དུ་བཞག་ལ། མཆོད་ཡོན་བྱིན་ནས་མཆོད་པ་རྣམ་པ་ལྔ་དང་། སྒེག་མོ་ལ་སོགས་པ་རྣམས་ཀྱིས་ཡང་དག་པར་མཆོད་ལ། རང་གི་ལྷའི་

བུམ་པས་དབང་བསྐུར་ཞིང་། དེའི་སྔགས་ཀྱང་བརྗོད་པར་བྱའོ། །ཕྱིས་རྣམ་པར་རྒྱལ་བའི་བུམ་པ་ལས་པདྨའི་ཁུ་ཚུར་གྱིས་ཆུ་བླངས་ལ། ཆུ་དེས་དབང་བསྐུར་བ་དང་འཐུང་དུ་ཡང་གཞུག་གོ། །དེའི་སྔགས་ཨོཾ་བཛྲ་ཨ་བྷི་ཥིཉྩ་ཞེས་བརྗོད་པར་བྱའོ། །དེ་ནས་ཡོད་ཅིང་འབྱོར་པར་གྱུར་
ན་སྔར་བཤད་པའི་ཆོ་གས་གོས་དཀར་པོའི་སྟོད་གཡོགས་དང་། སྨད་གཡོགས་དང་། ཟེའུ་ཀ་བཅིངས་པའི་ཕྱིར། དེ་ལ་ཕྱི་ནས་ཟེའུ་ཀ་ལ་སོགས་པ་བྱའོ། །ཨོཾ་བཛྲ་དྷརྨྨཱ་ས་མ་ཡེ་བཛྲ་པདྨི་ནེ་ཧཱུཾ། ཞེས་བྱ་བས་སློབ་མ་ལ་ཆོས་ཀྱི་རྡོ་རྗེའི་དབང་བསྐུར་བར་བྱའོ། །ཕྱག་རྒྱ་ནི་འདི་ཡིན་
ཏེ། རྡོ་རྗེ་ཐལ་མོ་བསྡམས་ནས་ཀྱང་། །གུང་མོ་རྡོ་རྗེ་མཉམ་སྦྱར་བ། །ཆོས་ཀྱི་རྡོ་རྗེ་རབ་གྲགས་པ། །དེ་ཡིས་དབང་བསྐུར་སྦྱིན་པར་བྱ། །ཡི་གེ་ཧྲཱིཿལས་འོད་དཔག་ཏུ་མེད་པ་བསམས་ལ། འདི་དེའི་སྤྱི་བོར་གཞག་པར་བྱའོ། །འདི་ནི་ཆོས་ཀྱི་སྐུའི་ཅོད་པན་གྱིས་དབང་བསྐུར་བ་ཡིན་ནོ། །དེ་
ནས་ཇི་སྐད་བཤད་པའི་མཚན་ཉིད་ཅན་གྱི་རྡོ་རྗེ་པདྨ་དང་། པདྨའི་དྲིལ་བུ་དང་བཅས་པའི་སློབ་མའི་ལག་པ་གཉིས་སུ་བྱིན་ནས། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་སྟྭཾ།
ཨ་བྷི་ཥིཉྩཱ་མི། ཏིཥྛ་བཛྲ་ས་མ་ཡ་སྟྭཾ། དེ་ནས་ཨོཾ་བཛྲ་སཏྭ་ནཱ་མ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ། ཀྱེ་འཇིག་རྟེན་དབང་ཕྱུག་པདྨ་ཞེས་བྱ་བ་ལ་སོགས་པའི་སྔགས་འདིས་མིང་གིས་དབང་བསྐུར་བར་བྱ་སྟེ། སློབ་མ་རྡོ་རྗེ་ཐལ་མོ་བསྐོར་བ་དང་། སློབ་དཔོན་ལ་ཕྱག་བྱེད་དུ་བཅུག་ལ།
ཡོན་གྱི་མཆོག་བླངས་ཏེ། དབང་བསྐུར་ཐམས་ཅད་སྦྱིན་པར་བྱའོ། །དེ་ནས་དྲི་ལ་སོགས་པ་དང་། པདྨའི་སྒེག་མོ་ལ་སོགས་པ་རྣམས་ཀྱིས་སློབ་མ་ལ་མཆོད་པར་བྱའོ། །འདི་ནི་སྡོམ་པ་གཟུང་བ་དང་། སྡོམ་པ་མ་བཟུང་བ་རྣམས་ཀྱི་ཐུན་མོང་གི་དབང་བསྐུར་བ་ཡིན་ནོ། །སློབ་དཔོན་དུ་དབང་བསྐུར་
བར་འོས་པ་རྣམས་ཀྱིས་ཁྱད་པར་བརྗོད་པར་བྱ་སྟེ། རྩ་བའི་དཀྱིལ་འཁོར་ལས་ཁྲུ་གཉིས་ཙམ་དོར་བར་དབུས་མའི་དཀྱིལ་འཁོར་གྱི་ཕྱེད་ཀྱི་ཚད་ཀྱི་ཁྲུ་བཞི་པ་སྒོ་ནུབ་ཏུ་བལྟས་པ། ཤར་ཕྱོགས་ཀྱི་སྒོ་ལ་མངོན་པར་ཕྱོགས་པའི་དཀྱིལ་འཁོར་ཚོན་སྣ་ལྔས་བྲིས་ལ། དེའི་དབུས་སུ་པདྨ་

འདབ་མ་བརྒྱད་པ། དེའི་སྟེང་དུ་རྡོ་རྗེ་པདྨ་འདབ་མ་བཅུ་དྲུག་པ་བྲིས་ལ། རྩ་བའི་དཀྱིལ་འཁོར་བཞིན་དུ་དཀྱིལ་འཁོར་དེ་ཡང་དག་པར་མཆོད་ནས། དེ་ལ་སེང་གེའི་ཁྲིའམ། ཁྲིའུ་པདྨ་དང་། ཟླ་བ་དར་གྱིས་གཡོགས་ལ། པདྨའི་གནོད་སྦྱིན་ཡོངས་སུ་བཟླས་ཏེ་
སློབ་མ་བཞག་ལ། དེའི་སྟེང་དུ་བླ་རེ་བྲེ་བ་དང་། གཡས་ལོགས་སུ་དར་དང་། མེ་ཏོག་གི་ཕྲེང་བས་བརྒྱན་པའི་གདུགས་དཀར་པོ་རིན་པོ་ཆེའི་ཏོག་ཅན་བྱའོ། །གཡོན་ལོགས་སུ་གོས་དཀར་པོ་སྣ་ཚོགས་པའི་རྒྱལ་མཚན་དང་། བ་དན་སྣ་ཚོགས་པ་བཙུགས་ལ་འགྲོ་བ་འདུལ་བ་དང་།
ཡི་གེ་ཨོཾ་ཡོངས་སུ་བཟླ་བར་བྱའོ། །དེ་ནས་སློབ་མ་འགྲོ་བ་འདུལ་བའི་དམ་ཚིག་གི་ཕྱག་རྒྱས་འགྲོ་བ་འདུལ་བའི་གཟུགས་སུ་བསྐྱེད་ལ། དེ་ཕྱག་རྒྱ་ཆེན་པོ་གནས་པ་ལ། སློབ་མའི་ལུས་ལ་རྣལ་འབྱོར་ཆེན་པོ་ལས་བཤད་པའི་གནས་རྣམས་སུ་དམ་ཚིག་གི་ཕྱག་རྒྱ་རྣམས་ཀྱིས་རྣམ་པར་
སྣང་མཛད་དང་། འགྲོ་བ་འདུལ་བ་ནས་བརྩམས་ནས་པདྨ་འབེབས་པའི་མཐར་ཐུག་པའི་དཀྱིལ་འཁོར་པའི་ལྷའི་ཁྱད་པར་ཐམས་ཅད་བཀོད་ལ། ཡང་དེ་ཉིད་ལ་ཡི་གེ་མ་ལས་རྣམ་པར་སྣང་མཛད་ཀྱི་ཅོད་པན་དང་། ཡི་གེ་ང་ལས་བྲང་དུ་མི་བསྐྱོད་པའི་དཔལ་བེའུ་དང་། ཡི་གེ་ཉ་ལས་
སྨིན་མཚམས་ཀྱི་མཛོད་སྤུར་རིན་ཆེན་འབྱུང་ལྡན་དང་། ཡི་གེ་ཎ་ལས་མཆུ་གཉིས་ཀྱི་བར་དུ་འོད་དཔག་ཏུ་མེད་པ་དང་། ཡི་གེ་ན་ལས་སྤྱི་གཙུག་ཏུ་དོན་ཡོད་གྲུབ་པ་དང་། ཡི་གེ་ཡ་ལས་སྙིང་གར་པདྨས་མཚན་པའི་རྡོ་རྗེ་དང་། ཡི་གེ་ར་ལས་དཔྲལ་བར་པདྨས་མཚན་པའི་ཡིད་བཞིན་
གྱི་ནོར་བུ་གཙང་མ་ཞེས་བྱ་བ་དང་། ཡི་གེ་ལ་ལས་ལྐོག་མའི་ཕྱོགས་སུ་རྡོ་རྗེ་པདྨ་དང་། ཡི་གེ་ཝ་ལས་མགོ་བོར་སྣ་ཚོགས་པདྨ་དང་། ཨ་ཨཱ་ཞེས་བྱ་བས་རྣ་བ་གཡས་གཡོན་དུ་པདྨའི་སངས་རྒྱས་དང་། པདྨའི་རྒྱལ་པོ་དང་། ཨི་ཨཱི་ལས་མིག་གཡས་གཡོན་གཉིས་སུ་པདྨའི་
ཆགས་པ་དང་། པདྨའི་ལེགས་པ་དང་། ཨུ་ཨཱུ་ཞེས་བྱ་བ་ལས་འགྲམ་པ་གཉིས་སུ་པདྨའི་ཁྲོ་གཉེར་དང་པདྨའི་ཉི་མ། རྀ་རཱྀ་ཞེས་བྱ་བ་ལས་རྣ་རྩ་གཉིས་སུ་པདྨའི་དཔལ་དང་། པདྨའི་བཞད་པ། ལྀ་ལཱྀ་ཞེས་བྱ་བ་ལས་མཆུ་གཉིས་ལ་པདྨའི་སྒྲོལ་མ་དང་པདྨའི་རྣོན་བོ། ཨེ་ཨཻ་ཞེས་བྱ་

བ་ལས་སྣ་བུག་གཉིས་ལ་པདྨའི་རྒྱུ་དང་པདྨའི་བསྲུང་བའོ། །ཨོ་ཨཽ་ཞེས་བྱ་བ་ལས་ནམ་ཚོང་གཉིས་སུ་པདྨ་གར་གྱི་དབང་ཕྱུག་དང་པདྨའི་བསྲུང་བ། ཨཾ་ཨཱཿཞེས་བྱ་བས་ལྟག་ཁུང་གཡས་གཡོན་དུ་པདྨའི་གནོད་སྦྱིན་དང་པདྨའི་ཁུ་ཚུར་རོ། །ཨོཾ་ཤ་ཥ་ས་ཧ་ཙ་ཚ་ཛ་ཛྷ་ལས་ལྟེ་བ་ལ་
རྡོ་རྗེ་དབྱིངས་ཀྱི་དབང་ཕྱུག་མ་དང་པདྨའི་སྒེག་མོ་དང་། ཕྲེང་བ་མ་དང་། གླུ་མ་དང་། གར་མ་དང་། རྟ་མགྲིན་དང་། དོན་ཡོད་ཞགས་པ་དང་། ལྕགས་སྒྲོག་དང་། འབེབས་པའོ། །ཏྲི་ཀ་ཁ་ག་གྷ་ཞེས་བྱ་བ་ལས་རྒྱབ་ཏུ་རིག་པའི་རྒྱལ་པོ་རྣམས་སོ། །ཊ་ཋ་ཌ་ཌྷ་ཞེས་བྱ་བ་ལས་
དཔུང་པ་གཉིས་དང་ལྷག་པ་གཉིས་ལ་ཁྲོ་བོ་རྣམས་སོ། །ཏ་ཐ་ད་དྷ་ཞེས་བྱ་བ་ལས་རྟགས་དང་མཇུག་ཚོས་གཉིས་དང་རྒྱབ་ཏུ་ཚོགས་ཀྱི་བདག་པོ་རྣམས་སོ། །པ་ཕ་བ་བྷ་ཞེས་བྱ་བ་ལས་བརླ་གཉིས་དང་རྗེ་ངར་གཉིས་ལ་ཕོ་ཉ་རྣམས་སོ། །ཤ་ལཾ་ཀུ་ཀ་ཞེས་བྱ་བ་ལས་རྐང་པའི་ལོང་བུ་
གཉིས་སུ་གཡོག་པོ་རྣམས་སོ། །ཡ་ཧཱུཾ་ར་ཏྲ་ལ་ཧྲི་ཝ་ཨ་ཞེས་བྱ་བ་ལས་ལོང་བུ་གཉིས་དང་རྐང་པ་གཉིས་ལ་པདྨའི་བདུག་པ་མ་དང་། མེ་ཏོག་མ་དང་། མར་མེ་མ་དང་། དྲི་ཆབ་མའོ། །ཙ་ཚ་ཛ་ཛྷ་ཉ་ཞེས་བྱ་བ་ལས་ལག་པ་གཡས་པ་ལ་ལས་བྱེད་ལྔའོ། །ཊ་ཋ་ཌ་ཌྷ་ཎ་ཞེས་བྱ་བ་ལས་
ལག་པ་གཡོན་པ་ལ་ལས་བྱེད་མ་ལྡའོ། །ཀྲཾ་ཀྲི་ཡ་ར་ལ་ཝ་ཀྵ་ཞེས་བྱ་བ་ལས་རྐང་པ་གཡས་པ་ལ་ལས་བྱེད་མ་བདུན་ནོ། །ཤ་ཥ་ས་ཧ་ལཾ་ཞེས་བྱ་བ་ལས་རྐང་པ་གཡོན་པ་ལ་མིང་པོ་གསུམ་དང་། སྲིང་མོ་བཞི་དང་བཅས་པ་དགོད་པར་བྱའོ། །སྔར་ཡིག་འབྲུ་རྣམས་རིམ་གྱིས་བཀོད་
ལ། ཕྱིས་ཕྱག་རྒྱའི་གཟུགས་སུ་བསམས་ཏེ། དེ་ནས་ཡི་གེ་རྣམས་རིམ་པ་ཇི་ལྟ་བ་བཞིན་དུ་བརྗོད་པར་བྱའོ། །དངོས་གྲུབ་ཐམས་ཅད་རྫོགས་པར་བྱ་བའི་ཕྱིར། རིགས་རིགས་སུ་ཡང་རྒྱས་པ་ལ་མངོན་པར་དགའ་བས་ཡིག་འབྲུ་དགོད་པའི་ཆོ་ག་བྱའོ། །དེ་ནས་རྡོ་རྗེ་ཆོས་མས་སློབ་
མའི་སྙིང་གར་བྱིན་གྱིས་བརླབས་ལ། སྨིན་མཚམས་དང་། ལྐོག་མ་དང་སྤྱི་བོར་རྡོ་རྗེ་དང་པདྨ་འབའ་ཞིག་དང་། སྣ་ཚོགས་པདྨ་གསུམ་གྱིས་ཇི་ལྟ་བའི་གནས་སུ་བྱིན་གྱིས་བརླབས་ཏེ། དྲི་ལ་སོགས་པ་རྣམས་ཀྱིས་མཆོད་ལ། གདན་དེ་ལ་འགྲོ་བ་འདུལ་བའི་ཕྱག་རྒྱ་ཆེན་པོས་བཞག་

སྟེ། མཆོད་ཡོན་སྔོན་དུ་འགྲོ་བའི་དྲི་ལ་སོགས་པ་རྣམས་དང་། འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་ལ་བསྐོར་བའི་རོལ་མོའི་ཕྱག་རྒྱ་རྣམས་ཀྱིས་མཆོད་ལ། དཔལ་མཆོག་དང་པོ་
ལས་གསུངས་པའི་རོལ་མོ་བརྒྱ་ཕྲག་སྙེད་ལས་དུང་དང་། རྔ་བོ་ཆེ་དང་། རྫ་རྔ་དང་། རྔ་རིངས་དང་། རྔ་དྲ་བ་ཅན་དང་། རྔ་ཟླུམ་དང་། པི་ཝང་དང་། གླིང་བུའི་བྱེ་བྲག་ཇི་སྙེད་པ་རྣམས་ལ་བྱིན་གྱིས་བརླབས་ཏེ་དབུལ་བ་དང་། སྒེག་མོ་ལ་སོགས་པ་རོལ་མོའི་ཁྱད་པར་རྣམས་ཀྱིས་ཡང་
དག་པར་མཆོད་ལ། བཀྲ་ཤིས་ཀྱི་ཚིགས་སུ་བཅད་པ་གདོན་པར་བྱའོ། །དེ་ནས་རྟ་མགྲིན་གྱི་བུམ་པ་གང་བའི་དབང་བསྐུར་བ་ནས་བརྩམས་ནས། རྣམ་པར་སྣང་མཛད་ཀྱི་བར་གྱི་བུམ་པ་གང་བ་དང་འགྲོ་བ་འདུལ་བའི་བུམ་པ་གང་བས་དབང་བསྐུར་བར་བྱའོ། །དེ་ནས་བུམ་པས་
དབང་བསྐུར་བའི་ཕྱིས་རྣམ་པར་རྒྱལ་བའི་བུམ་པ་ལས་པདྨ་ཁུ་ཚུར་གྱིས་ཆུ་བླངས་ལ། དབང་བསྐུར་བ་དང་། འཐུང་དུ་ཡང་གཞུག་གོ། །ཨོཾ་ཧ་ཡ་གྲྀ་བ་མ་ཧཱ་པདྨ་ཨཾ་ཀུ་ཤ་ཨཱ་ཀཪྵ་ཡ་ཤཱི་གྷྲཾ་སརྦྦ་པདྨ་ཀུ་ལ་པདྨ་ས་མ་ཡཾ་པདྨ་ཨཾ་ཀུ་ཤ་དྷཱ་ར་ཧཱུཾ་ཛ་ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས་དེ་
བཞིན་དུ་ཨོཾ་ཧཱུཾ་ཧྲཱིཿ་ཧོཿབཛྲ་ཨ་བྷི་ཥིཉྩ། ཞེས་བྱ་བའི་སྦྱོར་བ་འདིས་དབང་བསྐུར་བར་བྱའོ། །དེ་ནས་རྡོ་རྗེ་རིན་ཆེན་དང་། པདྨའི་གནོད་སྦྱིན་ཡོངས་སུ་བཟླས་པའི་གོས་དཀར་པོ་དང་རྒྱན་གྱི་བྱེ་བྲག་ཐམས་ཅད་བྱིན་ལ་དྲི་ལ་སོགས་པ་དང་། སྒེག་མོ་ལ་སོགས་པ་རྣམས་ཀྱིས་ཡང་དག་
པར་མཆོད་དེ། སྔར་བཤད་པ་བཞིན་དུ་ཆོས་ཀྱི་རྡོ་རྗེ་བཅིངས་ཏེ། །འོད་དཔག་ཏུ་མེད་པའི་དབང་གིས་དབང་བསྐུར་ལ། ཡང་དེ་བཞིན་གཤེགས་པ་འོད་དཔག་ཏུ་མེད་པ་དང་ལྡན་པའི་པདྨའི་ཕྲེང་བ་དང་བཅས་པའི་རིན་པོ་ཆེའི་ཅོད་པན་གྱི་དར་དཔྱངས་ཀྱི་དབང་གིས་དབང་བསྐུར་བ་དང་།
ཨོཾ་དྷརྨྨཱ་ས་མ་ཡ་བཛྲ་པདྨེ་ནི་ཧཱུཾ། བཛྲ་རཏྣ་ཞེས་ལན་བརྒྱ་རྩ་བརྒྱད་ཡོངས་སུ་བཟླས་ཏེ་དབང་བསྐུར་བར་བྱའོ། །དེ་ནས་རྡོ་རྗེ་པདྨ་དང་། པདྨའི་དྲིལ་བུ་བླངས་ལ་མཚན་མའི་དབང་བསྐུར་བ་དང་། བདག་པོའི་དབང་བསྐུར་བ་ན། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་

བསྐུར་བར་བྱ། །ཞེས་བྱ་བ་ལ་སོགས་པ་སྔ་མ་བཞིན་དུ་སྦྱིན་ནོ། །དེ་ནས་ཨོཾ་པདྨ་མཱ་ལེ་ཨ་བྷི་ཥིཉྩ་ལོ་ཀེ་ཤྭ་ར་ཏེ་སྭ་ར་ཧྲཱི་ཞེས་བྱ་བ་སྟོང་རྩ་བརྒྱད་ཡོངས་སུ་བཟླས་ཏེ། པདྨའི་ཕྲེང་བ་དེ་སྤྱི་བོར་བཅིང་བར་བྱའོ། །དེ་ནས་མིང་གི་དབང་བསྐུར་བྱིན་ལ། མཆོད་པ་རྣམ་པ་ལྔ་དང་པདྨའི་
སྒེག་མོ་ལ་སོགས་པས་ཡང་དག་པར་མཆོད་ལ། ཡི་གེ་པྲས་ཡང་དག་པར་བྱིན་གྱིས་བརླབས་པའི་རིན་པོ་ཆེའི་མིག་ཐུར་རམ། གསེར་ལ་སོགས་པའི་ཐུར་མ་ཐོགས་ལ་མདུན་དུ་འདུག་སྟེ། མིག་འབྱེད་པའི་ཚུལ་དུ་བྱས་ལ་འདི་སྐད་ཅེས་བརྗོད་པར་བྱའོ། །ཇི་ལྟར་མིག་མཁན་
རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་པ་ཏྲ་ལཾ་ཧྲི་དེ་ནས་ཨ་བཛྲ་སཏྭ་ཞེས་བྱ་བས་མེ་ལོང་ལ་ཡོངས་སུ་བཟླས་ལ་ཆོས་ཉིད་ཀྱི་མཚན་ཉིད་བསྟན་པར་བྱའོ། །ཆོས་
རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་རིགས་སུ་སྐྱེ། །
ཡི་གེ་ཧོ་ལས་མདའ་བསྐྱེད་པ། །གཞུ་དང་ལྷན་ཅིག་ཏུ་བྱིན་ནས། འདི་སྐད་ཅེས་བརྗོད་པར་བྱའོ། །འདིས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པར་གྱིས་ལ། ཡི་གེ་ཧོས་ཕྱོགས་བཞི་དང་སྟེང་འོག་ཏུ་མདའ་འཕེན་དུ་གཞུག་པར་བྱའོ། །མེ་ལོང་ལ་ཨ་བཛྲ་སཏྭ་ཞེས་
ཡོངས་སུ་བཟླས་ཏེ་བསྟན་ལ་འདི་སྐད་ཅེས་བརྗོད་པར་བྱའོ། །རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །འདི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་སེམས་གང་ཡིན་
པ་དེ་ནི་འདི་ཡིན་ནོ་ཞེས་ཁོང་དུ་ཆུད་པར་གྱིས་ཤིག་ཅེས་བརྗོད་པར་བྱའོ། །བཛྲ་ཧེ་ཏུ་མཾ་ཞེས་བྱ་བས་འཁོར་ལོ་རྩིབས་བརྒྱད་པ་རྐང་པ་གཉིས་ཀྱི་བར་དུ་དེ་གཞག་པར་བྱ་བ་དང་། །བཛྲ་བྷ་ཥ་རཾ་ཞེས་བྱ་བས་ལག་པ་གཡས་བར་དུད་བྱིན་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་

ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །སྐྱོབ་པ་ཆོས་ཀྱི་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པ། །མ་ལུས་ཀུན་དུ་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་
སེམས་ཀྱིས་ནི། །གསང་སྔགས་སྐྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །ཀུན་དུ་ཁྱོད་ལ་སྲུང་བར་བྱེད། །དེ་ནས་དེ་བཞིན་གཤེགས་པ་ཐམས་ཅད་
ཀྱི་ང་རྒྱལ་གྱིས། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པའི། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་གསང་སྔགས་ཀྱི་ཐེག་པའི་རྗེས་སུ་གནང་བ་བྱིན་ནས། འགྲོ་བ་འདུལ་བའི་རྣལ་འབྱོར་པས།
སླར་ཡང་དཀྱིལ་འཁོར་བྲི་བའི་རྗེས་སུ་གནང་བ་སྦྱིན་པར་བྱའོ། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །པདྨའི་འཁོར་ལོ་རབ་ཏུ་བསྐོར། །ཞེས་བྱ་བ་བརྗོད་ནས། དེ་ནས་དེ་ཉིད་ཀྱིས་པདྨ་གཟུང་
བར་བྱ་སྟེ། དེ་ཉིད་ཀྱིས་ནི་བཅོམ་ལྡན་འདས། །འཇིག་རྟེན་དབང་ཕྱུག་རྫོགས་སངས་རྒྱས། །འདུལ་བར་བྱེད་པའི་ཐབས་ཀྱིས་ནི། །གར་གྱིས་རོལ་པ་རྣམ་པར་དག །འདིས་ཆོས་ཀྱི་དྲིལ་བུ་དཀྲོལ་བར་བྱ་སྟེ། ཇི་ལྟར་པདྨ་རབ་དམར་བ། །ཚོན་གྱི་ཉེས་པས་མི་གོས་བཞིན། །
དེ་བཞིན་ཁམས་གསུམ་དག་པས་ན། །བག་ཆགས་ཉེས་པས་གོས་མི་འགྱུར། །འདིས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་སྟེ། གང་དང་གང་གི་གཟུགས་ཀྱིས་ནི། །འགྲོ་བ་འདུལ་བར་བྱེད་པས་ན། །པདྨ་དག་མཆོག་སྦྱོར་བ་ཡིས། །དེ་དང་དེ་ཉིད་ཀྱིས་
སྦྱང་བྱ། །དེ་ནས་དངོས་གྲུབ་ཀྱི་པདྨའི་བརྟུལ་ཞུགས་སྦྱིན་པར་བྱའོ། །ཨོཾ་པདྨ་ཧ་སྟ་དྷརྨྨ་ཏཾ་པ་ལ་ཡ་དེས་ཀྱང་འདི་སྐད་དུ། རྡོ་རྗེ་ཆོས་ཉིད་ཇི་ལྟ་བུ་ལགས་ཞེས་དྲི་བར་བྱའོ། །དེ་ལ་ཡང་འདི་སྐད་དུ་བརྗོད་པར་བྱ་སྟེ། ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་བཞིན། །

ཐམས་ཅད་དག་པར་བསྒོམས་ནས་ནི། །དེ་བཞིན་སྡིག་པས་གོས་མི་འགྱུར། །དེ་ལ་ཆོས་ནི་འདི་ཡིན་ནོ། །དེ་ནས་སྙིང་པོ་བྱིན་ལ། འགྲོ་བ་འདུལ་བའི་ཕྱག་རྒྱ་བཞིའི་ཡེ་ཤེས་བསླབ་པར་བྱའོ། །རིན་ཆེན་འབྱུང་ལྡན་གྱི་རྣལ་འབྱོར་མངོན་དུ་བྱས་ལ། སློབ་མ་ཐམས་ཅད་
གཟེངས་བསྟོད་པ་དང་། ལུང་བསྟན་པར་བྱའོ། །ཨོཾ་འདི་ནི་ངས་ཁྱོད་ལུང་བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཀུན་དུ་གྲུབ་པའི་ཕྱིར། །སྲིད་པའི་ངན་སོང་རྣམས་ལས་བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བ། དེ་བཞིན་གཤེགས་པ་སརྱ་ས་མ་ཡ་སྟྭཾ་
བྷུར་བྷུ་བ་སྭཿ དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་གཡོན་པ་ཆོས་གོས་འཛིན་པའི་ཚུལ་དུ་བྱས་ལ། གཡས་པ་མཆོག་སྦྱིན་པའི་ཚུལ་དུ་བྱས་པ་འདི་ནི་གཟེངས་བསྟོད་པའི་ཕྱག་རྒྱ་ཡིན་ནོ། །ཆོ་ག་ལྷག་མ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པ་
ལས་ཤེས་པར་བྱའོ། །དེ་ལྟར་སློབ་དཔོན་གྱི་ཆོ་ག་རྒྱས་པ་དང་། སློབ་མ་འཇུག་པ་ལ་སོགས་པ་ཆོ་ག་རྒྱས་པར་བསྟན་ནས། དེ་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བ་ཐོབ་པའི་སློབ་དཔོན་གྱིས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་
དངོས་གྲུབ་ཀྱི་ཡེ་ཤེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བ་ནི་གཞུག་པའི་ཆོ་ག་རྒྱས་པའི་དུས་ཕྱིས་པདྨའི་རིགས་ཀྱི་དཀྱིལ་འཁོར་ཆེན་པོའི་ཕྱག་རྒྱ་དབང་དུ་བྱ་བ་ལ་སོགས་པ་ནི། དེ་མ་ཐག་ཏུ་བསྟན་པར་བྱ་བ་ཡིན་ནོ། །དེར་ངེས་པའི་
ཡེ་ཤེས་ཀྱི་ངོ་བོ་དེ་བསླབ་ཅིང་བསྟན་པར་བྱའོ། །སྙིང་ལ་པདྨོ་བྲིས་ནས་ཀྱང་། །ཞེས་བྱ་བ་ནི་རང་གི་ལྷའི་རྣལ་འབྱོར་བྱས་ལ་སྙིང་ལ་རྡོ་རྗེ་པདྨ་བྲི་བར་བྱའོ། །གང་གིས་བྲི་ཞེ་ན། པདྨོ་བསྒོམས་ནས་ཞེས་བྱ་བ་སྨོས་སོ། །དེ་བྲིས་པ་ཅི་ཞིག་བྱ་ཞེ་ན། པདྨོའི་དཔལ་ཡང་དབང་དུ་བྱེད་པ་སྟེ།
འགྲོ་བ་འདུལ་བའི་རང་གི་རིག་པ་འགྲུབ་པ་དང་། པདྨའི་རིགས་དབང་དུ་བྱེད་པའོ། །གང་ཞེ་ན། བུད་མེད་ཕལ་པའང་སྨོས་ཅི་དགོས། །ཞེས་བྱའོ། །ཨུ་མ་ལ་སོགས་པའི་བུད་མེད་མཆོག་ཏུ་མཛེས་པ་ངེས་པ་ཁོ་ནར་དབང་དུ་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་

བ་ལ་སོགས་པའི་རང་གི་ལྷའི་རྣལ་འབྱོར་བྱས་ལ་ཕྱིས་པདྨ་ཤྲཱི་ཡཾ་བ་ཤ་མ་ནཱ་ཡ་ཧོཿ། ཞེས་བྱ་བ་འདིས་འགྲོ་བ་འདུལ་བ་ལ་སོགས་པར་བདག་ཉིད་བསྐྱེད་ལ། རང་གི་སྙིང་པོ་དང་། སྙིང་པོ་འདིས་རྡོ་རྗེ་པདྨ་བསྒྲུབས་ལ། ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་
མངོན་སུམ་དུ་མཐོང་བར་གྱུར་གྱི་བར་དུ་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་བསྒོམས་ལ། མཐར་མཚན་ཐོག་ཐག་བསྒོམས་ནས་དེ་འཇིག་རྟེན་དབང་ཕྱུག་དང་མཉམ་པར་འགྱུར་རོ། །བུད་མེད་དབང་དུ་བྱེད་པར་འདོད་ན་ཟླ་བ་གཅིག་བསྒོམས་ལ། དེ་ནས་
སྤྲོ་བ་དང་བསྡུ་བའི་སྦྱོར་བས་ཟླ་བ་གཅིག་བྱས་ལ། མཐར་མཚན་ཐོག་ཐག་བསྒོམས་ནས་དེས་པདྨའི་དཔལ་མོའི་གཟུགས་ཅན་ནམ། ཨུ་མ་ལ་སོགས་པ་གནོད་སྦྱིན་མོའི་གཟུགས་ཅན་རྟ་མགྲིན་ལ་སོགས་པ་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་
བྱས་ཏེ། དེ་པདྨའི་འོད་ཟེར་གྱི་ཚོགས་ཀྱིས་བཀང་ནས་འཁྱུད་པར་བསམ་ཤིང་། པདྨ་ཤྲཱི་ཡ་བ་ཤ་མ་ནཱ་ཡ་ཧོཿ། །ཆེ་གེ་མོ་བ་ཤ་མ་ནཱ་ཡ་ཧོཿ། །ཞེས་བཟླས་པས་དེ་དབང་དུ་འགྱུར་རོ། །དཔྲལ་བར་སངས་རྒྱས་གཟུགས་བྲིས་ཏེ། །ཞེས་བྱ་བ་ནི་སྔ་མ་བཞིན་དུ་རང་གི་ལྷའི་གཟུགས་བྱས་ལ་
ཕྱི་ནས་བདག་ཉིད་ཨ་བྷི་ཥེ་ཀ་པྲ་ཡཙྪ་བཾ་ཞེས་བརྗོད་པས་དཔྲལ་བའི་ཕྱོགས་སུ་རྡོ་རྗེ་དེ་བཞིན་གཤེགས་པ་འོད་དཔག་ཏུ་མེད་པ་བསམས་ནས་སྔ་མ་བཞིན་དུ་རྟག་ཏུ་བསྒོམས་ནས། མཐར་མཚན་ཐོག་ཐག་བསྒོམས་ན། ཐོ་རངས་ཁ་རང་གི་ལྷའི་དབང་བསྐུར་བ་ཐོབ་པར་འགྱུར་ཞིང་རང་
གི་དངོས་གྲུབ་ཀྱང་འགྲུབ་པར་འགྱུར་རོ། །ཁ་ཡི་ནང་དུ་ལྕེ་སྟེང་དུ། །སངས་རྒྱས་གཟུགས་ནི་རབ་བསྒོམས་ན། །ཞེས་བྱ་བ་ནི། སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ་རྡོ་རྗེ་ལྕེར་བྱིན་གྱིས་བརླབས་ནས། པདྨ་སྭ་ར་སྭ་ཏེ་ཤོ་དྷ་ཡ་ཧཱུཾ། ཞེས་བྱ་བས་དེ་བཞིན་གཤེགས་པ་འོད་
དཔག་ཏུ་མེད་པ་ལྕེ་ལ་བསམས་ཏེ་སྔ་མ་བཞིན་དུ་དེའི་སྙིང་པོ་བཟླ་བ་དང་། བསྒོམ་པ་ཡང་བྱས་ནས། མཐར་མཚན་ཐོག་ཐག་དེ་ཐུན་བཞིར་བསྒོམས་ན་འཇིག་རྟེན་དབང་ཕྱུག་དང་འདྲ་བར་འགྱུར་རོ། །གཙུག་ཏོར་དབུས་སུ་པདྨོ་ནི། །སྙོམས་པར་ཞུགས་ཏེ་བཞག་ནས་ཀྱང་། །

ཞེས་བྱ་བ་ནི་རང་གི་ལྷའི་རྣལ་འབྱོར་དེ་བཞིན་དུ་བྱས་ནས། ཨོཾ་པདྨོ་ཨུརྠ་དྷཱཾ་གྲཾ་བ་ཤཾ་ཀུ་རུ་ཛ། ཞེས་བྱ་བས། པདྨའི་གཙུག་ཏོར་ཞལ་བཞི་བསྐྱེད་ནས། ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་སྙིང་པོ་བཟླས་ཤིང་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་
ཟླ་བ་གཅིག་བྱས་ན་འགྲུབ་པར་འགྱུར་ཞིང་དེ་བཞིན་གཤེགས་པ་ལྟ་བུའི་འཇིག་རྟེན་གསུམ་གྱི་དབང་ཕྱུག་གི་ལྷ་ལྟ་བུའི་གཙུག་ཏོར་གྱིས་མཁའ་འགྲོ་མ་ཐམས་ཅད་དབང་དུ་འགྱུར་རོ། །རྩིག་པའམ་ཡང་ན་ནམ་མཁའ་རུང་། །ཞེས་བྱ་བ་ལ་སོགས་པ་ནི། རང་གི་ལྷའི་རྣལ་འབྱོར་བྱས་ལ།
ཨོཾ་སརྦྦ་ཛ་གད་བ་ཤི་ཏ་ཛྙཱ་ན་པདྨ་ཨ་བྷི་ཥིཉྩ་ཨ་ཞེས་བྱ་བ་རྡོ་རྗེ་པདྨ་བརྩིགས་པ་ལ་སོགས་པ་ལ་སྤྲུལ་པ་སྙིང་པོ་འདི་བཟླས་ཤིང་ཉིན་རེ་ཞིང་ཐུན་བཞིའི་སྦྱོར་བས། ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བས་ཟླ་བ་
གཅིག་བྱས་ནས། མཐར་མཚན་ཐོག་ཐག་བསྒོམས་ན་དེས་དེ་བཞིན་གཤེགས་པ་ལ་སོགས་པ་ནས། སེམས་ཅན་ལ་པདྨ་སྤྲོ་བར་བསྒོམས་པས་དེས་རང་གི་རིག་པ་སྣང་བར་འགྱུར་ཏེ། དེ་སྐད་དུ། འདིས་ནི་སེམས་ཅན་ཐམས་ཅད་ཀྱང་། །དབང་དུ་བྱེད་པ་དམ་པའོ། །
ཞེས་སྨོས་སོ། །ནམ་མཁའ་འམ་ནི་ཕྱོགས་གཞན་དུ། །ཞེས་བྱ་བ་ནི། སྔ་མ་བཞིན་དུ་ལྷའི་རྣལ་འབྱོར་བྱས་ལ། ཨོཾ་ཛྙཱ་ན་པདྨ་ཏིཥྛ་ཨ་དྲྀ་ཤྱཾ་ཀུ་རུ་བཾ། ཞེས་བྱ་བའི་སྙིང་པོ་འདི་བརྗོད་ཅིང་ནམ་མཁའ་ལ་སོགས་པའི་ཕྱོགས་སུ་རྡོ་རྗེ་པདྨ་སྤྲུལ་ལ། སྙིང་པོ་འདི་ཉིད་བརྗོད་ཅིང་ཉིན་རེར་ཐུན་
བཞིའི་སྦྱོར་བས་ཇི་སྲིད་མངོན་སུམ་དུ་མཐོང་བར་འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས། གང་ཚེ་མཐོང་བ་དེ་ཚེ་བླངས། །ཅི་དགའ་བར་ནི་སྣང་མི་འགྱུར། །ཞེས་བྱའོ། །རྩིག་པ་འམ་ཡང་ན་ནམ་མཁའ་ལ། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་རང་གི་ལྷའི་རྣལ་འབྱོར་
བྱས་ལ། ཨོཾ་ས་མ་དྷི་བི་ཤྭ་པདྨ་ཏིཥྛ་བེ་ཤྭ་རུ་པྱཾ་མིདཪྴ་ཡ་བྷ་ག་བཾ། ཞེས་བྱ་བ་ཡོངས་སུ་ཟློས་ཤིང་རྩིག་པའམ། ཡང་ན་ནམ་མཁའ་ལ་པདྨ་འདབ་མ་བཞི་པ་སྤྲུལ་ལ། འདི་ཉིད་ཡོངས་སུ་བཟླས་ཏེ། ཇི་སྲིད་སྔར་བཤད་པ་བཞིན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །

གང་གི་ཚེ་མཐོང་ནས་བླངས་པ་དེའི་ཚེ་བྱང་ཆུབ་སེམས་དཔའ་ཆེན་པོ་འགྲོ་བ་འདུལ་བའི་གཟུགས་སུ་འགྱུར་རོ། །ནམ་མཁའ་འམ་ནི་ཕྱོགས་གཞན་དུ། །ཞེས་བྱ་བ་ལ་སོགས་པ་སྨོས་ཏེ་སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་ཨོཾ་ས་མ་དྷི་བཛྲ་པདྨ་ཏིཥྛ་
ཨུ་ཏིཥྛ་ཤཱི་གྷྲཾ་ཧྲཱིཿ། ཞེས་བྱ་བས་རྡོ་རྗེ་པདྨོ་ནམ་མཁའ་ལའམ། རྩིག་པ་ལ་སོགས་པའི་གནས་སུ་སྤྲུལ་ལ་སྙིང་པོ་འདི་ཉིད་ཟློས་ཤིང་སྔ་མ་བཞིན་དུ་བསྒོམས་ཏེ། དེས་མཐོང་བར་གྱུར་པ་དང་བླངས་ནས་པདྨའི་རིག་པ་འཛིན་པར་འགྱུར་རོ། །དཀྱིལ་འཁོར་ལ་སོགས་ཐམས་ཅད་དུ། །
སྤྱན་རས་གཟིགས་དབང་བྲིས་ནས་ནི། །ཞེས་བྱ་བ་ལ་སོགས་པ་ནི་འདིར་འཕགས་