Luận tạng Tây Tạng (Tengyur) — Tập 58

། མགོན་པོ་རྣམ་པར་སྣང་མཛད་དེ། དེས་བྱིན་གྱིས་བརླབས་པའི་སྟོབས་ཀྱིས་པདྨའི་རིགས་བསྐྱེད་པའི་ཕྱིར་རོ། །
དེའི་ཕྱིར་མགོན་པོ་དེ་ལ་མངའ་བས་ན་མགོན་ལྡན་པའོ། །ཚངས་པའི་མགོན་པོ་ཞེས་བྱ་བ་ནི། ཚངས་པ་ནི་བསམ་གཏན་དང་པོ་བསྐྱེད་པ་སྟེ། སྟོང་གསུམ་པའི་བདག་པོ་ཚངས་པའི་གཟུགས་ཀྱིས་བདག་པོ་མཛད་པས་ན་ཚངས་པའི་མགོན་པོའོ། །ཚངས་པ་ཆེན་པོ་ཞེས་བྱ་བ་ནི། དེ་ཉིད་ཚངས་པ་
མགོན་པོའི་གཟུགས་ཀྱིས་ཚངས་པ་ཐམས་ཅད་ཀྱི་གཟུགས་ལས་མཆོག་ཏུ་གྱུར་པས་ན་ཚངས་པ་ཆེན་པོའོ། །ཚངས་སྲས་ཞེས་བྱ་བ་ནི། ཚངས་པས་བསྐྱེད་པའི་དྲང་སྲོང་ནི་ཚངས་པའི་སྲས་ཏེ། དེས་འདུལ་བའི་སེམས་ཅན་གྱི་ཁམས་རྣམས་འདུལ་བར་བྱེད་པའི་གཟུགས་དེ་འཛིན་པས་ན་ཚངས་
པའི་སྲས་ཏེ་མཚན་བདུན་ཡིན་ནོ། །སྣང་བ་ཞེས་བྱ་བ་ནི་སྨོན་ལམ་གྱི་ཕ་རོལ་ཏུ་ཕྱིན་པའི་སྣང་བས་ཕྱི་དང་ནང་དུ་བཅས་པའི་མུན་པ་རྣམས་སེལ་བའི་ཕྱིར། སྒྲོན་མ་ལྟ་བུ་ཡིན་པས་ན་སྒྲོན་མ་སྣང་བའོ། །སྣང་མཆོག་ཅེས་བྱ་བ་ནི། གཟུགས་དེ་ཉིད་ཀྱིས་འཇིག་རྟེན་པའི་སྣང་བའི་ནང་ནས་མཆོག་ཏུ་གྱུར་
པས་ན་སྣང་བ་མཆོག་གོ། །སྣང་བའི་གཙོ་བོ་ཞེས་བྱ་བ་ནི། བག་ཆགས་དང་བཅས་པའི་ཉོན་མོངས་པ་དེ་སྤོང་བའི་གཟུགས་ཀྱིས་སྨོན་ལམ་གྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་སྣང་བ་རྣོ་བའི་ཕྱིར་སྣང་བའི་གཙོ་བོའོ། །སྣང་གསལ་ཞེས་བྱ་བ་ནི། པདྨ་སྣང་ཞིང་གསལ་བས་ཕྱི་རོལ་གྱི་སྣང་བའི་གསལ་

བ་ཆེས་གསལ་བར་བྱེད་པའོ། །ཤིན་ཏུ་སྣང་བ་ཞེས་བྱ་བ་ནི། ཤིན་ཏུ་སྣང་བས་རབ་ཏུ་གསལ་བར་བྱེད་པ་པདྨའི་སྣང་བའི་གཟུགས་དེ་ཉིད་ཀྱིས་དངོས་པོ་ཐམས་ཅད་གསལ་བར་བྱེད་པའི་ཕྱིར་ཤིན་ཏུ་སྣང་བའོ། །སྣང་བའི་མགོན་པོ་ཞེས་བྱ་བ་ནི། པདྨའི་སྣང་ཞིང་གསལ་
བ་ཐམས་ཅད་ཀྱི་བདག་པོ་ཡིན་པས་ན་མགོན་པོའོ། །སྣང་བ་ཆེ་ཞེས་བྱ་བ་ནི། པདྨ་སྣང་ཞིང་གསལ་བས་ནམ་མཁའ་ཁྱབ་པས་སྣང་བ་ཆེའོ། །སངས་རྒྱས་སྣང་ཁྱོད་ཅེས་བྱ་བ་ནི། བཤད་མ་ཐག་པའི་སྣང་བ་ཐམས་ཅད་ཀྱི་ནང་ནས་སངས་རྒྱས་བཅོམ་ལྡན་འདས་གང་ཡིན་པ་དེ་ནི་སངས་
རྒྱས་སྣང་བ་སྟེ། མཚན་བརྒྱད་ཡིན་ནོ། །སངས་རྒྱས་དབང་བསྐུར་བ་ཞེས་བྱ་བ་ནི། ཁྱོད་དམ་པའི་ཆོས་ཀྱི་འཁོར་ལོ་བསྐོར་ཞིག་པར་དབང་བསྐུར་བ་ནི་སངས་རྒྱས་ཀྱི་དབང་བསྐུར་བའོ། །སངས་རྒྱས་མཆོག་ཅེས་བྱ་བ་ནི། མཉམ་པ་ཉིད་ཀྱི་ཡེ་ཤེས་ཀྱི་ངོ་བོས་སྤྲུལ་པའི་སྐུའི་རང་བཞིན་སངས་
རྒྱས་རྣམས་ཀྱི་མཆོག་ནི་སངས་རྒྱས་མཆོག་གོ། །སངས་རྒྱས་སྲས་པོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་སྐྱེས་པ་ན་སངས་རྒྱས་སྲས་སོ། །མཁས་ཆེན་པོ་ཞེས་བྱ་བ་ནི། ཐམས་ཅད་མཁྱེན་པའི་ཡེ་ཤེས་ཀྱི་རྣལ་འབྱོར་ཆེན་པོས་དོན་ཐམས་ཅད་ཡོངས་སུ་
མཁྱེན་པ་ནི་མཁས་པ་ཆེན་པོའོ། །སངས་རྒྱས་དབང་བསྐུར་བ་ཞེས་བྱ་བ་ནི། ནམ་མཁའི་སྙིང་པོ་རིན་པོ་ཆེའི་ཅོད་པན་གྱི་གཟུགས་ཀྱིས་དབང་བསྐུར་བ་ནི། སངས་རྒྱས་དབང་བསྐུར་རོ། །གཙུག་གི་མཆོག་ཅེས་བྱ་བ་ནི་པདྨའི་རིགས་ཀྱི་ལྷ་རྣམས་ཀྱི་གཟུགས་ཀྱི་སྤྱི་གཙུག་ན། དེ་བཞིན་གཤེགས་
པ་འོད་དཔག་ཏུ་མེད་པ་འཆང་བའམ། གཞན་ཡང་རུང་བ་རྣམས་ནི་མཆོག་སྟེ། གཙུག་གི་མཆོག་གོ། །སངས་རྒྱས་ཞེས་བྱ་བ་ནི། པདྨའི་རིགས་ཀྱི་ལྷ་རྣམས་ཀྱི་གཟུགས་དེ་དག་ལ་སངས་རྒྱས་ཀྱི་རང་བཞིན་གྱི་སྤྱི་བོར་བཞུགས་པས་ན་སངས་རྒྱས་སངས་རྒྱས་ཁྱོད་དེ། འཇིག་རྟེན་དབང་ཕྱུག་
ཉིད་ལ་སྣང་བ་མཐའ་ཡས་ཞུགས་པ་ཡང་ཡིན་པས་མཚན་བདུན་ཡིན་ནོ། །སངས་རྒྱས་སྤྱན་ཞེས་བྱ་བ་ནི། སངས་རྒྱས་རྣམས་ཀྱི་སྤྱན་ཡིན་པས་ན་སངས་རྒྱས་ཀྱི་སྤྱན་ཏེ། ཐམས་ཅད་མཁྱེན་པའི་ཡེ་ཤེས་སོ། །སྤྱན་ཆེན་པོ་ཞེས་བྱ་བ་ནི། ལྷའི་སྤྱན་ཡང་དེ་ཡིན་ལ། ཆེན་པོ་ཡང་དེ་ཡིན་

པས་ན་སྤྱན་ཆེན་པོའོ། །ཆོས་སྤྱན་ཞེས་བྱ་བ་ནི། ཡུལ་ཡོངས་སུ་མ་སྤངས་པར་མཁྱེན་ནས་ཆོས་སྟོན་པ་གང་ཡིན་པ་དེ་ནི་ཆོས་སྤྱན་ནོ། །གཟིགས་པ་ཆེན་པོ་ཞེས་བྱ་བ་ནི། ཤེས་རབ་ཀྱི་སྤྱན་གྱིས་ངོ་བོ་ལ་གཟིགས་པ་ཆེན་པོ་འདི་ལ་མངའ་བས་ན་གཟིགས་པ་ཆེན་པོའོ། །ཏིང་ངེ་འཛིན་གྱི་ཡེ་ཤེས་
ཞེས་བྱ་བ་ནི། ཏིང་ངེ་འཛིན་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་ཡེ་ཤེས་སུ་ངེས་པའོ། །ཐམས་ཅད་པ་ཞེས་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱིས་སངས་རྒྱས་བཅོམ་ལྡན་འདས་རྣམས་ཀྱི་ཐམས་ཅད་པ་ནི་ཁྱོད་དོ། །རྡོ་རྗེ་སྤྱན་ཞེས་བྱ་བ་ནི།
ཤའི་སྤྱན་གྱི་ངོ་བོ་ནི་རྡོ་རྗེ་སྤྱན་ཏེ། རྡོ་རྗེ་སྤྱན་དེས་ཉེ་བར་མཚོན་པ་ནི་རྡོ་རྗེ་སྤྱན་ཞེས་བཤད་པ་སྟེ་མཚན་བདུན་ཡིན་ནོ། །དེ་ལྟར་མཚན་བརྒྱ་རྩ་བརྒྱད་པས་བསྟོད་པའི་ཕན་ཡོན་གསུངས་པ་ནི་བདག་ཉིད་ཀུན་གྱིས་ཞེས་བྱ་བ་སྨོས་ཏེ། འགའ་ཞིག་བཤད་མ་ཐག་པ་འདིས་བདག་ཉིད་ཀུན་གྱིས་དངོས་པོ་
ཐམས་ཅད་ཀྱི་སྒོ་ནས་སོ། །ཡོན་ཏན་གྱི་རྒྱུ་མཚན་གྱི་ཡོན་ཏན་ནོ། །ཁྱོད་ཀྱི་མཚན་བརྒྱ་རྩ་བརྒྱད་པ་རྣམས་ནི་ཁྱོད་ཀྱི་མཚན་བརྒྱ་རྩ་བརྒྱད་པ་ཡང་དག་པར་བརྗོད་པའོ། །བསྟོད་དམ་ནི་བསྟོད་པའི་བསམ་པས་བསྟོད་པར་འདོད་པའོ། །སྒོམ་པར་བྱེད་པ་ནི་དོན་མངོན་དུ་བྱེད་པ་གང་ཡིན་པ་དེས་
ཀྱང་འཇིག་རྟེན་གྱི་དབང་པོ་དང་མཚུངས་པར་འགྱུར་རོ། །དཔའ་བོ་ཁྱོད་ལ་གསོལ་བཏབ་པ། །ཞེས་བྱ་བ་ནི། གུས་པ་སྔོན་དུ་འགྲོ་བས་དོན་དུ་གཉེར་བས་གསོལ་བ་འདེབས་པ་ནི་དོན་གྱི་ཆེད་ཀར་གསོལ་བ་འདེབས་པའོ། །དམིགས་པ་ཐམས་ཅད་ལས་རྣམ་པར་རྒྱལ་བས་ན་དཔའ་བོའོ། །
རང་གི་རིགས་ནི་བསྐྱེད་ནས་ཀྱང་། །ཞེས་བྱ་བ་ནི་པདྨའི་རིགས་བསྐྱེད་པའོ། །ཆོས་ཀྱི་དཀྱིལ་འཁོར་དམ་པ་ནི། །ཞེས་བྱ་བ་ནི་ཆོས་ཀྱི་དཀྱིལ་འཁོར་གྱི་རང་གི་བདག་ཉིད་མཆོག་ཏུ་གྱུར་པ་ཁྱོད་ཀྱིས་བཤད་དུ་གསོལ་ཞེས་དེ་བཞིན་གཤེགས་པ་རྣམས་ཀྱིས་གསོལ་བ་འདེབས་པའོ། །ཐུབ་པ་
ཆེན་པོས་བཤད་དུ་གསོལ། །ཞེས་བྱ་བ་ནི་ལུས་དང་ངག་དང་ཡིད་གསུམ་ཐུབ་པ་དང་ལྡན་པས་ན་ཐུབ་པའོ། །ཐུབ་པ་རྣམས་ཀྱི་ནང་ན་ཐུབ་པ་ཡིན་པས་ན་ཐུབ་པ་ཆེན་པོའོ། །དེ་ལ་ལུས་ཐུབ་པ་ནི། ལུས་ཀྱི་མི་དགེ་བའི་ལས་ཀྱི་ལམ་རྣམ་པ་གསུམ་དང་བྲལ་བའོ། །ངག་གི་ལས་ཀྱི་ལམ་

རྣམ་པ་བཞི་དང་བྲལ་བས་ངག་ཐུབ་པའོ། །ཡིད་ཀྱི་མི་དགེ་བའི་ལས་ཀྱི་ལམ་རྣམ་པ་གསུམ་དང་བྲལ་བས་ན་ཡིད་ཐུབ་པའོ། །དེ་ནས་ཞེས་བྱ་བ་ལ་སོགས་པ་ལ། དེ་ནས་ཀྱི་སྒྲ་ནི་དེ་མ་ཐག་པའོ། །དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་རྗེས་
ཐོགས་ཉིད་ལ་སྤྱན་རས་གཟིགས་ཀྱི་དབང་པོ་ཕྱག་ན་རྡོ་རྗེའི་གཟུགས་འཛིན་པས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་ཐོས་ནས། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་ག་ལ་བ་དེར་མངོན་དུ་ཕྱོགས་ཏེ་འདུག་ནས་སོ། །འདུག་ནས་ཅི་ཞིག་བྱེད་ཅེ་ན།
རྡོ་རྗེ་པདྨོ་དེ་རང་གི་ཐུགས་ཀར་བཞག་སྟེ། ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བ་ནི། དང་པོར་སྦྱོར་བའི་ཏིང་ངེ་འཛིན་རྫོགས་པའི་དུས་སུ་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་སྐུའི་དབང་བསྐུར་བ་གང་ཡིན་པ་དེས་དབང་བསྐུར་རོ། །དེ་ནས་རང་གི་ཐུགས་ཀའི་ཕྱོགས་སུ་ཕྱག་གཡོན་
པ་བརྐྱང་བའི་ཚུལ་གྱིས་བཟུང་ནས་གནས་པ་ལ། ཕྱག་གཡས་པས་འབྱེད་པའི་ཚུལ་དུ་མཛད་ནས་འདི་ཆེད་དུ་བརྗོད་དོ། །ཨེ་མའོ་ཞེས་བྱ་བ་ནི་ངོ་མཚར་བའོ། །རབ་ཏུ་དག་པའི་ས་ཞེས་བྱ་བ་ནི། མཆོག་ཏུ་གྱུར་པས་ན་རབ་ཏུའོ། །ཅིའི་ཕྱིར་འདི་རབ་ཏུ་དག་པ་ཡིན་ཞེ་ན། གང་གི་ཕྱིར་དྲི་མ་ཐམས་ཅད་དང་
བྲལ་བས་ན་དག་པའི་ཐ་ཚིག་གོ། །དེ་སུའི་ཡིན་ཞེ་ན། རྡོ་རྗེ་པདྨོ་འདི་དག་གི །ཞེས་སྨོས་ཏེ། འདིར་ཅིའི་ཕྱིར་ངོ་མཚར་ཆེ་ཞེ་ན། ཕ་ཡིན་བདག་གི་བུ་ཡང་ཡིན། །ཞེས་བྱ་བ་སྨོས་ཏེ། ཕ་ནི་རྡོ་རྗེ་པདྨའི་སྟེ། འདི་ཡང་བདག་ཉིད་ཡིན་ལ་བུ་ཡང་བདག་ཡིན་པས་ན། བསྐྱེད་པར་བྱ་བ་ཡིན་པའི་ཕྱིར་འདི་ངོ་
མཚར་བའོ། །འདི་སྐད་སྟོན་པ་ཡིན་ཏེ། འདི་གང་ཡིན་པ་ཡང་བདག་ཡིན་ལ་བདག་གང་ཡིན་པའང་འདི་ཡིན་པས་ན་རྡོ་རྗེ་པདྨས་འདུལ་བ་རྣམས་ཀྱིས་དེ་ལྟར་མཐོང་བ་ཡིན་ནོ། །འཇིག་རྟེན་དབང་ཕྱུག་ལས་པདྨ་འབྱུང་ལ། དེ་ལས་ཀྱང་འཇིག་རྟེན་དབང་ཕྱུག་ཏུ་བྱུང་བ་འདི་ངོ་མཚར་བའོ། །རིགས་
འདི་བྱིན་གྱིས་བརླབ་པར་མཛོད། །ཅེས་བྱ་བ་ནི། རང་གི་རིགས་བྱིན་གྱིས་བརླབས་ནས་གང་གིས་སེམས་ཅན་གྱི་དོན་བྱེད་པའི་ཕྱིར་བདག་ལ་གཏད་པའོ། །རིགས་འདི་ནི་ཞེས་བྱ་བ་ནི་རང་གི་ཐུགས་ཀར་བཞག་པ་གང་ཡིན་པ་འདིའོ། །དེའི་དོན་ནི་འདི་སྐད་སྟོན་པ་ཡིན་ཏེ། འདི་ལྟར་བཅོམ་ལྡན་འདས་

ཁྱེད་ཀྱི་ཐུགས་ལ་རྡོ་རྗེ་འཆང་ཆེན་པོའི་གཟུགས་ཀྱིས་པདྨའི་རིགས་སུ་རྣམ་པར་གནས་པ་གང་ཡིན་པ་དེ་བདག་ཅག་གི་རིགས་ཀྱི་ནུས་པ་བསྐྱེད་པའི་ཕྱིར། བདག་ལ་དེ་གཏད་པ་ཡིན་གྱི་གཞན་དུ་ནི་མ་ཡིན་ནོ། །དེའི་ཕྱིར་རང་གི་རིགས་འདི་བྱིན་གྱིས་བརླབ་པར་མཛོད་ཅེས་བྱ་བ་ཡིན་ནོ། །དེ་ནས་ཞེས་
བྱ་བ་ནི་དེ་མ་ཐག་པ་སྟེ། གསོལ་བ་བཏབ་པའི་རྗེས་ཐོགས་ཉིད་ལ་བྱའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའོ། །དེའི་དམ་ཚིག་ནི་ཧྲཱིཿཞེས་བྱ་བ་ཐུགས་ལ་གནས་སོ། །དེ་ལས་བྱུང་བ་ནི་རྣམ་པར་སྣང་མཛད་ཀྱི་ཐུགས་ལ་གནས་པའི་སེམས་
དཔའི་རྡོ་རྗེ་གང་ལས་པདྨ་ལྟ་བུར་བྱུང་བ་དེ་སྐད་དུ་བཤད་པ་དེས་བྱིན་གྱིས་བརླབས་ཤིང་བརྟན་པར་མཛད་ནས། པདྨོ་ལྟ་བུ་ལ་དམིགས་པའི་ཏིང་ངེ་འཛིན་གང་ཡིན་པ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས་སོ། །འདི་ཞེས་བྱ་བ་ནི་བློ་ལ་གནས་པའོ། །དེ་བཞིན་
གཤེགས་པ་ཐམས་ཅད་ཀྱི་ཆོས་ནི་པདྨའི་འོད་ཟེར་གྱི་གཟུགས་ཅན་ནོ། །དམ་ཚིག་ཅེས་བྱ་བ་ནི་རྒྱུའོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་ནི་རང་གི་ཐུགས་ལ་གནས་པའི་ཐུགས་ཀའི་སེམས་དཔའི་རྡོ་རྗེ་ལས་བྱུང་བ་ནི་ངེས་པར་བྱུང་བའོ། །འདི་སྐད་སྟོན་པ་ཡིན་ཏེ། པདྨའི་རིགས་སྤྲུལ་
བའི་ཕྱིར་དང་པདྨའི་རྣམ་པའི་འོད་ཟེར་ལས་འཕགས་པ་སྤྱན་རས་གཟིགས་དབང་ཕྱུག་ཏུ་བྱིན་གྱིས་བརླབས་པའི་ཕྱིར་སེམས་དཔའི་རྡོ་རྗེ་བྱིན་གྱིས་བརླབས་པའི་རྣམ་པར་ཐུགས་རྩེ་གཅིག་ཏུ་མཛད་ནས་བཅོམ་ལྡན་འདས་རྣམ་པར་སྣང་མཛད་ཀྱིས་རྣམ་པར་སྣང་མཛད་ཆེན་པོ་ལ་བསྐུལ་བར་གྱུར་པ་ཡིན་ནོ། །དེ་བཞིན་གཤེགས་པ་
ཐམས་ཅད་ཀྱི་ཐུགས་ཀ་ནས་ཞེས་བྱ་བ་ནི། བསྡུ་བས་བྱིན་ནས་རྣམ་པར་སྣང་མཛད་ལ་སོགས་པའི་ཐུགས་ལས་སོ། །པདྨ་ལྟ་བུ་ནི་པདྨའི་རྣམ་པར་རོ། །ཁ་དོག་དུ་མ་ནི་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའི་ཁ་དོག་གོ། །གཟུགས་དུ་མ་ནི་དབྱིབས་སྣ་ཚོགས་
པའོ། །རྟགས་དུ་མ་ན་མཚན་མ་སྣ་ཚོགས་པའོ། །སྤྱོད་ལམ་དུ་མ་ནི་གནས་པ་དང་། འགྲོ་བ་དང་། འཆག་པ་དང་། འདུག་པ་དང་། ཉལ་བའི་རང་བཞིན་གྱི་པདྨ་ལྟ་བུའི་འོད་ཟེར་བྱུང་ནས། འདོད་ཆགས་ལ་སོགས་པ་རྣམ་པར་དག་པ་དང་ཞེས་བྱ་བ་ནི། དེ་ལ་མི་དམིགས་པའི་ཐུགས་

རྗེ་ཆེན་པོ་ཆགས་པའོ། །སོགས་པ་སྨོས་པ་ནི་བྱང་ཆུབ་ཀྱི་སེམས་ལ་སོགས་པ་སྔར་བཤད་པ་རྣམས་གཟུང་བའོ། །འདོད་ཆགས་དང་པོར་བྱས་པ་གང་ཡིན་པ་ནི་འདོད་ཆགས་ལ་སོགས་པའོ། །དེ་ཉིད་རྣམ་པར་དག་པ་དང་། ཆོས་ཉིད་ཀྱི་ཡེ་ཤེས་ཀྱིས་འདོད་ཆགས་ལ་
སོགས་པ་བག་ཆགས་དང་བཅས་པའི་ཉོན་མོངས་པ་སྤངས་པའི་ཕྱིར་རོ། །དེར་ངེས་པའི་ཡེ་ཤེས་ཀྱི་གཟུགས་ཀྱིས་དེ་རྣམས་ཡང་དག་པར་སྦྱང་ཞིང་དག་པ་ལས་འཕགས་པ་སྤྱན་རས་གཟིགས་ཀྱི་དབང་པོའི་ཡེ་ཤེས་ལ་སོགས་པ་གདུལ་བྱ་ལ་བསྐྱེད་པར་བྱ་ཞེས་བྱ་བའི་དོན་ཏོ། །ཡང་སླར་
ལོག་སྟེ་འཕགས་པ་སྤྱན་རས་གཟིགས་དབང་པོའི་ཐུགས་ཀར་ཞུགས་སོ་ཞེས་བྱ་བ་ནི། འོད་ཟེར་ཞུགས་པའོ། །འཕགས་པ་སྤྱན་རས་གཟིགས་དབང་ཕྱུག་འདིས་པདྨའི་རིགས་སྤྲུལ་པར་བྱིན་གྱིས་རློབ་པ་ཡིན་ནོ་ཞེས་གསུངས་པ་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་ཆོས་ཀྱི་དམ་ཚིག་ཅེས་བྱ་བ་ནི། འཕགས་པ་སྤྱན་རས་གཟིགས་ཀྱི་དབང་པོར་བྱིན་གྱིས་བརླབས་པའི་རྗེས་ཐོགས་ཉིད་ལ། བཅོམ་ལྡན་འདས་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བའི་པདྨའི་རིགས་ཀྱི་ལྷ་རྣམས་
སོ། །དེ་དག་གི་ཆོས་ནི་པདྨའི་རིགས་ཀྱི་རྟེན་དང་བརྟེན་པའི་དཀྱིལ་འཁོར་རོ། །དེའི་དམ་ཚིག་ནི་སྐྱེད་པར་བྱེད་པའི་རྒྱུའོ། །མིང་དེ་སྐད་ཅེས་བྱ་བ་གང་ཡིན་པ་དེ་རིག་པ་དམ་པ་འདི་གསུངས་སོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་རྣམས་ཀྱིས་དེ་བཞིན་
གཤེགས་པ་ཐམས་ཅད་ཀྱི་ཆོས་ཀྱི་དམ་ཚིག་གི་རིག་པ་དམ་པ་འདི་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་པའོ། །འཕགས་པ་སྤྱན་རས་གཟིགས་ཀྱི་དབང་པོ་ནི་རྡོ་རྗེ་ཆོས་སོ། །པདྨའི་རིགས་སྤྲུལ་ཅིང་བྱིན་གྱིས་བརླབས་པའི་ཕྱིར། གཟུགས་ཀྱང་དེ་ཡིན་ལ་ཐམས་ཅད་ཀྱང་དེ་ཡིན་པས་
ན་གཟུགས་ཐམས་ཅད་པ་སྟེ། པདྨའི་སངས་རྒྱས་ལ་སོགས་པའོ། །དེས་འདུལ་བའི་རྒྱུད་ལ་ཡང་དག་པར་སྟོན་པས་ན། གཟུགས་ཐམས་ཅད་སྟོན་པའོ། །རྒྱུ་མཚན་དེས་མིང་དེ་སྐད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་པ་ཡིན་ནོ་ཞེས་བྱ་བ་འདི་ནི་ཐུགས་ལ་

གནས་པའོ། །འགྲོ་བ་ཐམས་ཅད་འདུལ་བའི་དམ་ཚིག་ཅེས་བྱ་བ་ནི། སེམས་ཅན་གྱི་ཁམས་ཀྱི་འགྲོ་བ་ཐམས་ཅད་འདིས་འདུལ་བར་བྱེད་པས་འགྲོ་བ་ཐམས་ཅད་འདུལ་བའོ། །པདྨའི་རིགས་དེའི་དམ་ཚིག་གི་རྒྱུར་གྱུར་པ་སྟེ་སྐྱེད་པར་བྱེད་པའི་སྙིང་པོ་ནི་སྒྲའི་གཟུགས་ཏེ། འགྲོ་བ་ཐམས་
ཅད་འདུལ་བའི་དམ་ཚིག་ཅེས་བྱ་བ་འདི་གསུངས་ཤིག་པའོ། །འཕགས་པ་སྤྱན་རས་གཟིགས་དབང་པོའི་ཐུགས་ལས་ཞེས་བྱ་བ་ནི། གཟུང་བ་དང་འཛིན་པའི་རྣམ་པར་རྟོག་པ་ཐམས་ཅད་ལས་འཕགས་ཤིང་རིང་དུ་སོང་བས་ན་འཕགས་པའོ། །སེམས་ཅན་གྱི་ཁམས་རྣམས་འདུལ་བར་
བྱེད་པ་གང་ཡིན་པ་དང་། རང་གི་རིགས་ལ་གཟིགས་པས་ན་སྤྱན་རས་གཟིགས་སོ། །དེ་ལ་དབང་པོ་ནི་མངའ་བདག་སྟེ། འཕགས་པ་སྤྱན་རས་གཟིགས་ཀྱི་དབང་པོའོ། །དེའི་ཐུགས་ལ་ཞེས་བྱ་བ་ནི། སྙིང་གའི་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་པདྨའི་འཕགས་པ་སྤྱན་རས་གཟིགས་
དབང་ཕྱུག་གི་ཐུགས་དེ་ལས་སོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཅེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་སེམས་དཔའ་རྡོ་རྗེའི་གཟུགས་ནི་རྡོ་རྗེ་འཆང་ཆེན་པོའོ། །འཕགས་པ་སྤྱན་རས་གཟིགས་ཀྱི་དབང་པོའི་གཟུགས་འཛིན་པ་ཞེས་བྱ་བ་ནི།
སངས་རྒྱས་པདྨོ་ནས་བརྩམས་ནས་པདྨ་འབེབས་པའི་མཐར་ཐུག་པ་དེའི་ནང་ནས་གང་ལ་འཕགས་པ་སྤྱན་རས་གཟིགས་དབང་པོའི་གཟུགས་འཛིན་པ་དེ་ནི་འཕགས་པ་སྤྱན་རས་གཟིགས་དབང་པོའི་གཟུགས་འཛིན་པའོ། །པདྨའི་གདན་ལ་ཟླ་བའི་དཀྱིལ་འཁོར་གྱི་སྟེང་དུ་བཞུགས་པས་
ན་པདྨ་ལ་བཞུགས་པའོ། །རྡོ་རྗེ་རྩེ་ལྔ་པ་ལ་སོགས་པ་ནས་དྲིལ་བུའི་མཐར་ཐུག་པ་པདྨས་མཚན་པའི་མཚན་མའི་ཕྱག་རྒྱ་འཛིན་པའི་ཕྱིར་ན། ཕྱག་རྒྱའི་མཚན་མ་པདྨ་འཛིན་པའོ། །ཁ་དོག་སྣ་ཚོགས་པ་ནི་སྔོན་པོ་དང་སེར་པོ་ལ་སོགས་པའོ། །གཟུགས་ནི་དབྱིབས་རིང་བ་དང་ཐུང་བ་ལ་སོགས་
པའོ། །ཆ་ལུགས་ནི་སངས་རྒྱས་པདྨ་ལ་སོགས་པ་ནས་པདྨ་འབེབས་པའི་བར་ནི་ཆ་བྱད་དོ། །དེ་ཉིད་ཀྱི་རྒྱན་ནི་བཏགས་པའོ། །ཁ་དོག་དང་གཟུགས་དང་། ཆ་བྱད་དང་། རྒྱན་སྣ་ཚོགས་པ་གང་ཡིན་པ་དེ་དག་ནི་སྣ་ཚོགས་པའི་གཟུགས་ཀྱི་ཆ་བྱད་དང་རྒྱན་ནོ། །དེ་བཞིན་གཤེགས་པ་ལ་

སོགས་པ་ཞེས་བྱ་བ་ནི་སངས་རྒྱས་པདྨ་ལ་སོགས་པའོ། །སེམས་དཔའ་ཐམས་ཅད་ཀྱི་གཟུགས་འཛིན་པ་ཞེས་བྱ་བ་ནི། དེ་བཞིན་གཤེགས་པ་ལ་སོགས་པ་སེམས་དཔའ་ཐམས་ཅད་ཀྱི་གཟུགས་འཛིན་པའོ། །དེ་ལྟར་གྱུར་པའི་བྱང་ཆུབ་སེམས་དཔའ་ཆེན་པོའི་
ལུས་སུ་གྱུར་ནས་བྱུང་སྟེ། ཟླ་བའི་དཀྱིལ་འཁོར་རྣམས་ལ་འཁོད་ནས་ཆེད་དུ་བརྗོད་པ་ནི་ཆེད་དུ་བརྗོད་དོ་ཞེས་བྱ་བར་སྦྱར་རོ། །ཅི་ཞིག་བྱས་ནས་ཆེད་དུ་བརྗོད་པ་འདི་ཆེད་དུ་བརྗོད་ཅེ་ན། འཇིག་རྟེན་གྱི་ཁམས་ཐམས་ཅད་དུ་ཞེས་བྱ་བ་སྨོས་ཏེ། འཇིག་རྟེན་གྱི་ཁམས་ཐམས་ཅད་དུ་རྣམ་པར་གནས་
པའི་སེམས་ཅན་གང་ཡིན་པ་དེ་དག་ལ་གང་དང་གང་གི་གཟུགས་ཀྱིས་འདུལ་བར་གྱུར་པ་དེ་དང་དེའི་གཟུགས་ཀྱིས་དེ་དག་རང་གི་གཟུགས་སུ་བསྟན་ནས་འདུལ་བར་བྱས་ཏེ། སླར་ལོག་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་དུ་བཅོམ་ལྡན་འདས་ཤཱཀྱ་ཐུབ་པ་རྣམ་པར་སྣང་མཛད་ལ་སོགས་
པའི་ཕྱོགས་དང་མཚམས་སུ་དེ་བཞིན་གཤེགས་པ་ལ་སོགས་པ་དང་། སེམས་དཔའ་ཐམས་ཅད་ཀྱི་གཟུགས་ཀྱིས་ཟླ་བའི་དཀྱིལ་འཁོར་རྣམས་ལ་འཁོད་དེ་པདྨ་དང་ཟླ་བའི་དཀྱིལ་འཁོར་ལ་འདུག་ནས་ཆེད་དུ་བརྗོད་པ་གསུངས་སོ། །ཨེ་མའོ་ཞེས་བྱ་བ་ནི་ངོ་མཚར་བའོ། །སྐལ་བ་ཇི་ལྟ་བའི་
སེམས་ཅན་འདུལ་བའི་ཕྱིར། སངས་རྒྱས་པདྨ་ལ་སོགས་པའི་གཟུགས་བསྟན་པ་ནི་སངས་རྒྱས་ཐམས་ཅད་ཀྱི་ཐབས་སོ། །སྙིང་རྗེའི་བདག་ཉིད་ནི་དམིགས་པ་མེད་པའི་ཐུགས་རྗེའི་རང་བཞིན་ནོ། །འདིར་ཅི་ཞིག་ངོ་མཚར་ཞེ་ན། གང་དུ་ཐབས་ཀྱིས་འདུལ་མཛད་ན། །ཞེས་བྱ་བ་སྨོས་
ཏེ། དམིགས་པའི་ཐུགས་རྗེ་ལ་གནས་ནས་ལྷ་རྣམས་སུ་ཡང་གྱུར་པ་ཡིན་ནོ། །འཁོར་བའི་ཕུང་པོ་ཐམས་ཅད་ལས་བཟློག་ནས། ལས་དང་ཉོན་མོངས་པ་བག་ཆགས་དང་བཅས་པ་སྤངས་སུ་ཟིན་ཀྱང་ལྷ་ཆེན་པོ་ལ་སོགས་པ་ལྷའི་གཟུགས་སུ་ཡང་འགྱུར་བ་འདི་ནི་ངོ་མཚར་བའོ། །
འདི་སྐད་སྟོན་པ་ཡིན་ཏེ། ཆོས་ཀྱི་དབྱིངས་ཀྱི་རང་བཞིན་གྱི་དེ་བཞིན་གཤེགས་པ་ནི་གཟུགས་ཀྱི་སྐུ་མ་ཡིན་ཡང་ལྷ་ལ་སོགས་པའི་གཟུགས་ཀྱིས་འདུལ་བ་ལ་མོས་པ་རྣམས་ཀྱིས་མཐོང་བ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཅེས་བྱ་བ་ནས། ལྷ་རྣམས་སུ་ཡང་གྱུར་པ་

ཡིན་ཞེས་བྱ་བའི་བར་གྱི་གཞུང་འདི་ཙམ་གྱིས་འགྲོ་བ་འདུལ་བའི་དཀྱིལ་འཁོར་ཆེན་པོའི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པ་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་
པ་ཡིན་པར་ཤེས་པར་བྱའོ། །འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་དངོས་གྲུབ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བས་བསྒྲུབ་པར་བྱའོ་ཞེས་བསྟན་པའི་ཕྱིར། །དེ་ནས་ཡང་བཅོམ་ལྡན་འདས་ཞེས་བྱ་བ་ལ་སོགས་པ་
གསུངས་པ་ནི་སློབ་དཔོན་གྱི་ལས་དང་སློབ་མ་འཇུག་པའི་ཆོ་ག་རྒྱས་པ་ཡིན་ནོ། །རང་གི་རིགས་ཀྱི་དཀྱིལ་འཁོར་སྤྲུལ་པའི་ཕྱིར། དེ་བཞིན་གཤེགས་པ་ཐམས་ཅད་ལ་ཕུལ་ནས། འགྲོ་བ་འདུལ་བའི་དཀྱིལ་འཁོར་ཆེན་པོ་འདི་བཤད་དོ་ཞེས་བྱ་བར་སྦྱར་རོ། །སེམས་ཅན་ཐམས་ཅད་
ཅེས་བྱ་བ་ལ་སོགས་པ་དགོས་པའི་དོན་ཅི་ཞིག་ཡིན་ཞེ་ན། སེམས་ཅན་ཐམས་ཅད་ལ་ངན་སོང་དུ་ལྟུང་བ་དང་འཆི་བ་ལ་སོགས་པས་མི་འཇིགས་པ་ནི། མི་འཇིགས་པ་སྦྱིན་པ་དང་དོན་ཐོབ་པའོ། །དངོས་གྲུབ་དམ་པ་ནི་དེ་སངས་རྒྱས་དང་བྱང་ཆུབ་སེམས་དཔའ་གྲུབ་པའོ། །རྡོ་རྗེ་ཆོས་ཉིད་
ནི་པདྨའི་རིགས་རྡོ་རྗེ་གསང་བའི་རང་བཞིན་ནོ། །དེའི་ཡེ་ཤེས་ནི་ངེས་པའོ། །མངོན་པར་ཤེས་པ་ནི་དྲུག་གོ། །སེམས་ཅན་དེ་ཐམས་ཅད་ལ་མི་འཇིགས་པ་སྦྱིན་པ་དང་། དོན་དང་དངོས་གྲུབ་དམ་པ་དང་། རྡོ་རྗེ་ཆོས་ཉིད་དང་། ཡེ་ཤེས་དང་། མངོན་པར་ཤེས་པའི་འབྲས་བུ་རྙེད་པའི་རྒྱུ་དེའི་
ཕྱིར་ཕུལ་ལོ། །འདི་ཞེས་བྱ་བ་ནི་བློ་ལ་གནས་པའོ། །འགྲོ་བ་ཐམས་ཅད་འདུལ་བའི་ཞེས་བྱ་བ་ཕྱག་རྒྱ་ཆེན་པོ་གཙོ་བོར་གྱུར་པའི་དཀྱིལ་འཁོར་ཏེ། དཀྱིལ་འཁོར་ཆེན་པོ་དེ་གསུངས་ཤིང་བཤད་པའོ། །དེ་ནས་ཞེས་བྱ་བ་ནི་དེ་མ་ཐག་པ་དེ་སྔོན་དུ་བསྙེན་པའི་རྗེས་ཐོགས་ལའོ། །དེ་ནས་
ཞེས་བྱ་བ་ནི་རྒྱུ་དེའི་ཕྱིར་ཏེ་གང་གི་ཕྱིར་འགྲོ་བ་འདུལ་བའི་དཀྱིལ་འཁོར་ཆེན་པོར་འཇུག་པ་མེད་པར་དེས་འདུལ་བའི་སེམས་ཅན་གྱི་ཁམས་རྣམས་ལ་དེ་ལས་གསུངས་པའི་དངོས་གྲུབ་ཏུ་མི་འགྱུར་བ་དེའི་ཕྱིར་རབ་ཏུ་བཤད་པར་བྱ་བ་སྟེ། རབ་ཏུ་ཕྱེ་ནས་ཡང་དག་པར་བཤད་པར་བྱའོ། །

དཀྱིལ་འཁོར་ཆེན་པོ་དམ་པ་སྟེ། །ཞེས་བྱ་བ་ནི་མཆོག་ཏུ་གྱུར་པའོ། །རྡོ་རྗེ་དབྱིངས་དང་འདྲ་བ་ནི། །ཞེས་བྱ་བ་ལ་སྤྲུལ་པའི་དཀྱིལ་འཁོར་དང་འདྲ་བས་ན། འགྲོ་བ་འདུལ་བའི་དཀྱིལ་འཁོར་ཆེན་པོའོ། །མཚན་གང་ཡིན་ཞེ་ན། འགྲོ་བ་འདུལ་བ་ཞེས་བྱ་བ་སྟེ། འགྲོ་
བ་འདུལ་བ་ཞེས་མིང་དུ་བཏགས་པའོ། །དེ་ཅི་འདྲ་བ་ཞིག་ཅེ་ན། གྲུ་བཞི་པ་ལ་སྒོ་བཞི་པ། །ཞེས་བྱ་བ་ནི་དེ་དབྱིབས་བཤད་པ་ཡིན་ནོ། །དེ་ཡི་ནང་དུ་སྲད་བུས་ནི། །གྲུ་བཞི་པ་ནི་བྲི་བར་བྱ། །ཞེས་བྱ་བ་ནི་ཕྱིའི་དཀྱིལ་འཁོར་དེ་ཉིད་ཀྱི་ནང་དུ་ནང་གི་སྲད་བུ་གྲུ་བཞི་བར་དེ་ལྟར་བྲི་བར་བྱའོ། །
དེ་ལྟར་ཡིན་ན་ནི་ཅི་ཞིག་ཏུ་འགྱུར་ཞེ་ན། གཉིས་པའི་གྲྭར་ནི་སྒོ་བཏོད་ཅིང་། །ཞེས་བྱ་བ་སྨོས་ཏེ། དཀྱིལ་འཁོར་གཉིས་པ་ཞེས་བྱ་བའི་ཐ་ཚིག་གོ། །གཉིས་པ་དེ་གྲུ་བཞི་བར་བྲི་བར་བྱས་ནས་དཀྱིལ་འཁོར་གཉིས་པ་དེའི་གྲྭ་བཞི་ཕྱིའི་དཀྱིལ་འཁོར་གྱི་སྒོ་ལ་མངོན་དུ་ཕྱོགས་
པར་བྱས་ཏེ། གཉིས་པའི་གྲྭར་ནི་སྒོ་བཏོད་ཅིང་། །ཞེས་བྱ་བ་བཤད་པ་ཡིན་ནོ། །གྲྭ་སྒོ་ལ་མངོན་དུ་ཕྱོགས་པ་གང་ཡིན་པ་དེ་ནི་དེར་ཡང་པདྨའི་རྣམ་པས་ཟུར་སྒོར་བཏོད་པ་ཡིན་ནོ། །པདྨ་འདབ་མ་འདྲ་བར་བྱ་བ་ཡིན། །ཞེས་སྨོས་སོ། །དེ་ཡང་ཇི་ལྟར་བྲི་བར་བྱ་ཞེ་ན། ཀ་བ་བརྒྱད་
ཀྱི་ཚུལ་དུ་ནི། །པདྨ་འདབ་མ་བརྒྱད་པ་བྲི། །ཞེས་བྱ་བ་སྨོས་ཏེ། ཆ་གསུམ་མཉམ་པར་ཐིག་བཏབ་ལ། །ཕྱོགས་དང་མཚམས་རྣམས་སུ་པདྨའི་འདབ་མ་བཞི་བཞི་བྲིས་ལ། འདབ་མ་རྣམས་ལ་རྡོ་རྗེ་བྲིའོ། །དེ་ཡི་གེ་སར་དབུས་སུ་ནི། །སངས་རྒྱས་ཀྱི་ནི་སྐུ་གཟུགས་གཞག །
ཅེས་བྱ་བ་ནི་དཀྱིལ་འཁོར་གཉིས་པ་དེའི་པདྨའི་ལྟེ་བའི་དབུས་སུ་རྣམ་པར་སྣང་མཛད་བྲི་བར་བྱའོ། །སངས་རྒྱས་ཕྱོགས་ཀུན་བྲི་བ་ནི། །པདྨའི་དབུས་སུ་གནས་པ་ཡི། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་དེ་ཉིད་ཀྱི་པདྨའི་ལྟེ་བའི་ཕྱོགས་བཞིའི་པདྨའི་གདན་ལ་བྲི་བར་
བྱའོ། །ཅི་ཞིག་བྲི་ཞེ་ན། རྡོ་རྗེ་རིན་ཆེན་པདྨ་དང་། །སྣ་ཚོགས་པདྨོ་དེ་བཞིན་ནོ། །ཞེས་བྱ་བ་སྨོས་ཏེ། རྡོ་རྗེ་སེམས་མའི་གནས་སུ་རྡོ་རྗེ་རྩེ་ལྔ་པས་མཚན་པའི་པདྨའོ། །རྡོ་རྗེ་རིན་ཆེན་མའི་གནས་སུ་ཡིད་བཞིན་གྱི་ནོར་བུ་རིན་པོ་ཆེ་པདྨ་འབའ་ཞིག་གིས་མཚན་པའོ། །རྡོ་རྗེ་ཆོས་མའི་

གནས་སུ་པདྨ་འདབ་མ་བཅུ་དྲུག་པའི་རྡོ་རྗེ་པདྨའོ། །རྡོ་རྗེ་ལས་མའི་གནས་སུ་སྣ་ཚོགས་པདྨ་འདབ་མ་བཞི་པ་བྲི་བར་བྱའོ། །རྡོ་རྗེ་ཤུགས་ཀྱིས་བརྒལ་ནས་ནི། །ཞེས་བྱ་བ་ནི་བཤད་ཟིན་ཏོ། །འགྲོ་བ་འདུལ་བའི་དཀྱིལ་འཁོར་དུ། །ཞེས་བྱ་བ་ནི། སེམས་ཅན་གྱི་ཁམས་ཀྱི་འགྲོ་བ་དེ་འདུལ་བར་
བྱེད་པ་འདི་ནི་འགྲོ་བ་འདུལ་བ་སྟེ་འཇིག་རྟེན་དབང་ཕྱུག་གོ། །གཟུགས་རྣམས་ཐམས་ཅད་འབྱིན་པ་ནི། །ཏིང་ངེ་འཛིན་ལ་བཞུགས་པའོ། །དཀྱིལ་འཁོར་གྱི་ཤར་ཕྱོགས་ཀྱི་པདྨའི་འདབ་མ་ལ་དེར་ནི་སྤྱན་རས་གཟིགས་དབང་ཕྱུག་བྲི་བར་བྱའོ། །གཟུགས་རྣམས་ནི་སངས་རྒྱས་པདྨ་ལ་
སོགས་པ་ནས། པདྨ་འབེབས་པའི་མཐར་ཐུག་པའོ། །འབྱིན་པ་ནི་རང་གི་གཟུགས་ཀྱི་སྤྱི་གཙུག་ལ་སོགས་པའི་གནས་རྣམས་ནས། འོད་ཟེར་གྱི་ཚོགས་འབྱིན་པའོ། །འཕགས་པ་སྤྱན་རས་གཟིགས་དབང་ཕྱུག་དེའི་ཕྱོགས་ནི། ཐམས་ཅད་དུ་ནི་ཕྱོགས་བཞིར་རོ། །རྡོ་རྗེ་འགྱིང་
ལ་སོགས་ཚུལ་དུ། །ཞེས་བྱ་བ་ནི་རྡོ་རྗེ་དབྱིངས་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་ཚུལ་གྱིས་སོ། །སངས་རྒྱས་ལ་སོགས་སེམས་དཔའ་ཆེ། །མཚན་མ་པདྨོ་འཆང་བ་བྲི། །ཞེས་བྱ་བ་ནི་བྲིའོ་ཞེས་བྱ་བར་ཤེས་པར་བྱའོ། །དེ་ལ་སངས་རྒྱས་ནི་སངས་
རྒྱས་པདྨོ་ལ་སོགས་པ་སྨོས་པས་ནི་པདྨའི་ལྕགས་ཀྱུ་དང་པདྨ་ཆགས་པ་དང་། པདྨ་ལེགས་པ་རྣམས་གཟུང་བར་བྱའོ། །སངས་རྒྱས་དང་པོར་བྱས་པ་གང་ཡིན་པ་དེ་ནི། སངས་རྒྱས་ལ་སོགས་སེམས་དཔའ་ཆེ་སྟེ། བྲི་བར་བྱ་ཞེས་བྱ་བའི་དོན་ཏོ། །སངས་རྒྱས་ལ་སོགས་པ་དེ་དག་
ཇི་ལྟར་བྲི་བར་བྱ་ཞེ་ན། མཚན་མ་པདྨ་འཆང་བ་བྲི། །ཞེས་བྱ་བ་སྨོས་ཏེ། པདྨོའི་རྟགས་ཀྱི་མཚན་མ་ཅན་གྱི་རྡོ་རྗེ་ལ་སོགས་པ་འཆང་བ་ནི་མཚན་མ་པདྨོ་འཆང་བ་སྟེ། པདྨའི་མཚན་མ་ཅན་གྱི་སངས་རྒྱས་ལ་སོགས་པ་བྲི་བར་བྱའོ། །ཐམས་ཅད་དུ་རང་གི་སྙིང་པོ་བརྗོད་ཅིང་། སྙིང་པོའི་དོན་
བྲི་བར་བྱའོ། །དེ་ཡི་དབུས་སུ་བྲི་བ་ནི། །ཞེས་བྱ་བ་ནི་ལྷོ་ཕྱོགས་ཀྱི་པདྨའི་འདབ་མའི་དབུས་སུའོ། །ཐོར་ཚུགས་དབུས་ནའང་དེ་བཞིན་གཤེགས། །ཞེས་བྱ་བ་ནི་འཇིག་རྟེན་དབང་ཕྱུག་གི་རལ་པའི་ཐོར་ཚུགས་བྲིས་ལ། དེའི་དབུས་སུ་དེ་བཞིན་གཤེགས་པ་འོད་དཔག་ཏུ་མེད་པ་བྲི་བར་བྱའོ། །

དེའི་ཕྱོགས་ནི་ཐམས་ཅད་དུ་ནི་ཐོར་ཚུགས་ཀྱི་ཕྱོགས་བཞིར་རོ། །ཁྲོ་གཉེར་ལ་སོགས་ཚུལ་དུ་ནི། །ཞེས་བྱ་བ་ནི་དེ་ལ་པདྨའི་ཁྲོ་གཉེར་ནི་བཅོམ་ལྡན་འདས་ནམ་མཁའི་སྙིང་པོའོ། །མཚན་མར་པདྨོ་འཆང་བ་ནི་པདྨའི་ཁུ་ཚུར་དེའི་སྦྱོར་བས་གཡོན་བསྙེམས་པ་དང་བཅས་
པས་པདྨའི་དྲིལ་བུ་བཟུང་ལ། དེ་བཞིན་དུ་ཕྱག་གཡས་པའི་ཁུ་ཚུར་གྱིས་པདྨས་མཚན་པའི་ཡིད་བཞིན་གྱི་ནོར་བུ་དབང་བསྐུར་བའི་གནས་སུ་འཇོག་པའོ། །སོགས་པ་སྨོས་པས་ནི། པདྨའི་ཉི་མ་དང་། དཔལ་དང་བཞད་པ་རྣམས་གཟུང་བར་བྱའོ། །ཁྲོ་གཉེར་ལ་སོགས་པའི་ཚུལ་ཅན་ནི་ཁྲོ་
གཉེར་ལ་སོགས་པའི་ཚུལ་ཏེ། ཁྲོ་གཉེར་ལ་སོགས་པའི་སྦྱོར་བ་དེས་མཚན་མ་པདྨོ་འཆང་བ་བྲི་བར་བྱའོ། །མཚན་མ་དེ་དག་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བསྟན་པ་གང་ཡིན་པ་དེ་ཐམས་ཅད་པདྨའི་མཚན་མ་ཅན་དུ་བྱའོ་ཞེས་བྱ་བའི་དོན་ཏོ། །ལྟག་འོག་གོ་རིམས་ཇི་བཞིན་དུ། །
ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཤད་པའི་ཆོ་གས་བྲིའོ་ཞེས་བྱ་བའི་ཐ་ཚིག་གོ། །དཀྱིལ་འཁོར་གསུམ་པའང་དེ་བཞིན་ཏེ། །ཞེས་བྱ་བ་ནི་ནུབ་ཕྱོགས་ཀྱི་པདྨའི་འདབ་མ་ནི་དཀྱིལ་འཁོར་གསུམ་པའོ། །དེ་བཞིན་དུ་ཞེས་བྱ་བའི་རྣམ་པ་འདི་ནི་རྡོ་རྗེ་དབྱིངས་ལས་བཤད་པའི་
ཆོ་ག་ཉིད་ཀྱིས་བྱའོ་ཞེས་བྱ་བའི་དོན་ཏོ། །སེམས་དཔའ་ཆེན་པོ་སྙོམས་ཞུགས་པའི་ཏིང་ངེ་འཛིན་མཆོག་གི་ཕྱག་རྒྱས་བཞུགས་པ་ནི། སེམས་དཔའ་ཆེན་པོ་སྙོམས་པར་ཞུགས་པར་བྲིའོ། །གང་དུ་ཞེ་ན། པདྨའི་སྟེང་དུའོ། །སོགས་ཞེས་བྱ་བ་དེ་ནི་སྔ་མ་བཞིན་ནོ། །པདྨོ་གཟིགས་སོགས་
ཚུལ་དུ་ནི། །ཞེས་བྱ་བ་ནི་དེ་ལ་རྡོ་རྗེ་ཆོས་ཀྱི་ཏིང་ངེ་འཛིན་གྱི་སྦྱོར་བས་པདྨ་ལ་གཟིགས་ནས། པདྨའི་འདབ་མཁའ་བྱེད་པར་མཛད་པའོ། །སོགས་པ་སྨོས་པས་ནི། དེ་བཞིན་གཤེགས་པ་ཐམས་ཅད་གཅོད་པ་ལ་སོགས་པ་གཟུང་ངོ་། །དཀྱིལ་འཁོར་བཞི་པའང་དེ་བཞིན་ཏེ། །ཞེས་བྱ་བ་ནི་
བྱང་ཕྱོགས་ཀྱི་པདྨའི་འདབ་མའོ། །དེར་ནི་པདྨོ་ཞལ་བཞི་པ། །པདྨ་མདུང་རྩེ་ཐོགས་པ་བྲི། །ཞེས་བྱ་བ་ནི་སྤྱན་རས་གཟིགས་དབང་ཕྱུག་ཆེན་པོའི་གཟུགས་འཛིན་པ་ཞལ་བཞི་པ། པདྨའི་མདུང་བསྣམས་པ་བྲི་བར་བྱའོ་ཞེས་བྱ་བའི་དོན་ཏོ། །དེ་ཡི་ཕྱོགས་ནི་ཐམས་ཅད་དུ། །ཞེས་བྱ་བ་ནི་

སྔ་མ་བཞིན་ནོ། །རྡོ་རྗེ་གར་སོགས་ཚུལ་དུ་ནི། །ཞེས་བྱ་བ་ནི་བཅོམ་ལྡན་འདས་པདྨ་གར་གྱི་དབང་ཕྱུག་གི་གར་གྱིས་བཞུགས་པ་ནི་རྡོ་རྗེ་གར་རོ། །དེ་ཉིད་ཐོག་མར་བྱས་པ་གང་ཡིན་པ་དེ་ནི་རྡོ་རྗེ་གར་ལ་སོགས་པའོ། །དེ་དག་གི་ཚུལ་གྱིས་ལེགས་པར་བཞུགས་པའི་སྦྱོར་བ་དེས་དཀྱིལ་འཁོར་དེ་
ལ་མཚན་མར་པདྨོ་འཛིན་པ་བྲིའོ། །གྲྭ་རྣམས་ཀུན་དུ་བྲི་བ་ནི། །ཞེས་བྱ་བ་ལ་སོགས་པ་ནི་རྡོ་རྗེ་དབྱིངས་ལས་གསུངས་པའི་ཆོ་གས་ཤེས་པར་བྱའོ། །དེ་བཞིན་དུ་པདྨ་ལ་སོགས་པ་མཆོད་པ་བཞི་ཞེས་བྱ་བ་ནི་བདུག་པ་མ་ལ་སོགས་པའོ། །དེ་ནས་ཚོགས་ལ་སོགས་པ་ཀུན། །ཞེས་བྱ་བ་ནི་
གནས་ཀྱི་ངེས་པ་ཙམ་ཡང་ཤེས་པར་བྱའོ། །ཡང་། དེ་ནས་རབ་ཏུ་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །ཞེས་བྱ་བ་ལ་སོགས་པ་ནི་དོན་རྒྱས་པ་བརྗོད་པར་བྱ་སྟེ། ཇི་ལྟར་བཅོམ་ལྡན་འདས་ཀྱིས་བཤད་པའི་མཛད་པ་བཞིན་དུ་བྱའོ། །དེ་ལ་རེ་ཞིག་དཀྱིལ་འཁོར་བྲི་བར་འདོད་
པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་བདག་ཡིན་ནོ་ཞེས་བསྒོམས་ལ་ནང་གི་བདག་ཉིད་ཅན་གྱིས་ཁྲུས་བྱས་ཏེ། སྙིང་པོ་བྱང་ཆུབ་ལ་ཐུག་གི་བར་དུ་དངོས་པོར་འཛིན་པའི་མངོན་པར་ཞེན་པ་མི་བྱའོ། །ཕྱིའི་ཁྲུས་ལ་མངོན་པར་ཞེན་པ་ཡིན་ན་ཡང་ཁྲུས་ཀྱི་ཆོ་ག་ཡིན་པས་ཁྲུས་
བྱའོ། །དེ་ལ་ལྷའི་ཁང་པ་དང་ཉེ་བ་ན་རྐང་པ་དང་ལག་པ་བཀྲུ་སྟེ། ལྷའི་ཁང་པའི་བགེགས་བསྐྲད་ནས། ལྷའི་ཁང་པར་ཞུགས་ལ། བདག་ཉིད་བསྲུང་བ་དང་། གནས་བསྲུང་བ་བྱས་ལ་པདྨའི་རྒྱུའི་ཕྱག་རྒྱས་འགྲོ་བ་འདུལ་བའི་དཀྱིལ་འཁོར་ཆེན་པོ་སྤྲུལ་ལ། མངོན་སུམ་ལྟ་བུར་དམིགས་
ཏེ། མེ་ཏོག་ལ་སོགས་པས་ཡང་དག་པར་མཆོད་ལ་ཕྱོགས་ཐམས་ཅད་ནས་དཀྱིལ་འཁོར་ལྔ་པ་དང་། ཨོཾ་སརྦྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མྱ་ན་བཛྲ་བནྡ་ནཾ་ཀ་རོ་མི། ཞེས་བྱ་བའི་སྙིང་པོ་འདིས་ཕྱག་བྱས་ལ་དེ་ནས་ཕྱག་བཞི་བྱ་སྟེ། འདི་ལྟར་ཤར་ཕྱོགས་ནས་རྡོ་རྗེ་ཐལ་མོ་བརྐྱང་ལ་ལུས་ཐམས་
ཅད་ཕབ་སྟེ། ཨོཾ་སརྦྦ་ཏ་ཐཱ་ག་ཏ་པཱུ་ཛོ་པསྠཱ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི་སརྦྦ་ཏ་ཐཱ་ག་ཏ་བཛྲ་སཏྭ་ཨདྷི་ཏིཥྛཱ་སྭ་མཱཾ། ཞེས་བྱ་བ་འདིས་ཕྱག་བྱའོ། །དེ་ནས་ལྷོ་ཕྱོགས་ནས་དེ་བཞིན་དུ་གནས་པ་ལས་རྡོ་རྗེ་ཐལ་མོ་སྙིང་གར་སྦྱར་ཏེ། དཔྲལ་བ་ས་ལ་རེག་པར་བྱས་ལ། ཨོཾ་སརྦྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀཱ་ཡ་ཨཱཏྨ་ནཱཾ་

ནིརྱཱ་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ཞེས་བྱ་བ་འདིས་ཕྱག་བྱའོ། །དེ་ནས་ནུབ་ཕྱོགས་ནས་དེ་བཞིན་དུ་གནས་པ་ལས། ཇི་ལྟ་བའི་རྡོ་རྗེ་ཐལ་མོ་སྤྱི་བོར་བཞག་སྟེ་ཁ་ས་ལ་རེག་པ་དང་། ཨོཾ་སརྦྦ་ཏ་ཐཱ་ག་ཏ་པཱུ་ཛ་པྲ་བརྟ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་དྷརྨྨ་
པྲ་བརྟ་ཡ་མཱཾ། ཞེས་བྱ་བ་འདིས་ཕྱག་བྱའོ། །དེ་ནས་བྱང་ཕྱོགས་ནས་དེ་བཞིན་དུ་གནས་པ་ལས་རྡོ་རྗེ་ཐལ་མོ་སྤྱི་བོ་ནས་ཕབ་སྟེ། སྙིང་གར་སྦྱར་ལ་སྤྱི་བོ་ས་ལ་རེག་པར་སྦྱར་ཏེ། ཨོཾ་སརྦྦ་ཏ་ཐཱ་ག་ཏ་པཱུ་ཛ་ཀརྨ་ཎེ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱཾ། ཞེས་བྱ་བ་འདིས་ཕྱག་བྱའོ། །པུས་
མོ་གཡས་པའི་ལྷང་ས་ལ་བཙུགས་ཏེ། རྡོ་རྗེ་ཐལ་མོ་སྙིང་གར་སྦྱར་ལ་སྡིག་པ་ཐམས་ཅད་བཤགས་པར་བྱའོ། །ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་ཞུགས་པ་ཐམས་
ཅད་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་བདག་ལ་དགོངས་སུ་གསོལ། བདག་མིང་རྡོ་རྗེ་ཆེ་གེ་མོ་ཞེས་བྱ་བ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་།
ལས་ཀྱི་རིགས་སུ་བཞུགས་པ་ཐམས་ཅད་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་སོ་སོར་བཤགས་པས་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་དང་བྱང་ཆུབ་
སེམས་དཔའ་རྣམས་དང་། རང་སངས་རྒྱས་རྣམས་དང་། འཕགས་པ་ཉན་ཐོས་ཡང་དག་པར་སོང་བ་རྣམས་དང་། ཡང་དག་པར་ཞུགས་པ་རྣམས་དང་། སེམས་ཅན་གྱི་ཚོགས་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་
བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་མཛད་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་གང་ཡིན་པ་དེ་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་

ལོ། །དེ་ནས་མེ་ཏོག་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་མེ་ཏོག་གི་བྱེ་བྲག །ཡིད་ལས་བྱུང་བའམ། ཆུ་ལས་སྐྱེས་པའམ། ཐང་ལས་སྐྱེས་པ་
གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། ཕྱག་རྒྱ་དང་། གསང་སྔགས་
དང་། རིག་སྔགས་ཀྱི་ལྷ་ཐམས་ཅད་ལ་དབུལ་བར་བགྱིའོ། །ཨོཾ་སརྦྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་པ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་
ཅད་ན། ལྷ་དང་མི་རྣམས་ཀྱི་བདུག་པའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཞེས་བྱ་བ་ལ་སོགས་པ་དང་།
ཨོཾ་སརྦྦ་ཏ་ཐཱ་ག་ཏ་དྷཱུ་བེ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། མར་མེའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་སྣང་བའི་བྱེ་བྲག་ཅེས་བྱ་བ་ལ་སོགས་
པས་དབུལ་བར་བྱའོ། །ཨོཾ་སརྦྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དྲིའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་ཕྱོགས་བཅུའི་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་
ཀྱི་དྲིའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐལ་མོ་ཁོང་སྟོང་དུ་སྦྱར་བ་བཅིངས་ལ། འདི་སྐད་ཅེས་བརྗོད་པར་བྱ་སྟེ། གང་

ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། རིན་པོ་ཆེའི་རི་བོ་འམ། རྒྱ་མཚོ་ལས་བྱུང་བའི་རིན་པོ་ཆེའི་ཚོགས་གང་དག་ཡོད་པ་དེ་རྣམས་འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་བོ་དྷྱཾ་ག་
རཏྣ་ཨཱ་ལཾ་ཀ་ར་པཱུ་ཛ་མི་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་ཐམས་ཅད་ཀྱི་དགོད་པ་དང་། སྒེག་པ་དང་། དགའ་བ་དང་། རྩེ་འཇོའི་བདེ་བའི་བྱེ་བྲག་གང་དག་ཡོད་པ་དེ་རྣམས་
འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་ཧཱ་སྱ་ལཱ་སྱ་ར་ཏ་ཀྲི་ཌི་སཽ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། དཔག་བསམ་གྱི་ཤིང་གང་དག་ཡོད་པ་དེ་རྣམས་
འདི་ལྟ་སྟེ་ཞེས་བྱ་བ་ལ་སོགས་པ་དང་། ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་བོ་དྷྱཾ་ཨཱ་ལཾ་ཀ་ར་ཝ་སྟྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཀྱིས་འཁོར་བའི་སྡུག་བསྔལ་རྗེས་སུ་དྲན་པར་
བྱས་ནས། སྙིང་རྗེའི་དབང་གིས་སེམས་ཅན་ཐམས་ཅད་བསྒྲལ་བར་བྱ་བའི་ཕྱིར་བྱང་ཆུབ་ཏུ་སེམས་བསྐྱེད་དེ། མ་བསྒྲལ་བ་རྣམས་བསྒྲལ་བར་བྱ་བའི་ཕྱིར་དང་། མ་གྲོལ་བ་རྣམས་དགྲོལ་བར་བྱ་བའི་ཕྱིར་དང་། དབུགས་མ་ཕྱིན་པ་རྣམས་དབུགས་འབྱིན་པར་བྱ་བའི་ཕྱིར་དང་། ཡོངས་
སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་བསྒྲལ་བར་བྱ་བའི་ཕྱིར། བྱང་ཆུབ་ཏུ་སེམས་བསྐྱེད་པར་བགྱིའོ། །ཨོཾ་སརྦྦ་ཏ་ཐཱ་ག་ཏ་བཛྲ་བོ་དྷི་ཙིཏྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་
སྒེག་མོའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཡོ་བྱད་ཐམས་ཅད་ཀྱིས་ཡང་དག་པར་འབྱོར་ཅིང་། ཕུན་སུམ་ཚོགས་པ་ཐམས་ཅད་འདོད་པ་ཙམ་ལ་རག་ལས་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་མ་ཧཱ་བཛྲོད་བྷ་བ་དཱ་ན་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་

མ་ཡེ་ཧཱུཾ། རྡོ་རྗེ་ཕྲེང་བ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མི་དགེ་བའི་ལུས་དང་། ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་པར་བྲལ་བར་གྱུར་ཅིག །དགེ་བའི་ལུས་དང་ངག་དང་། ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་
པར་ལྡན་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བོ་དྷི་ཧ་ར་ཤཱི་ལ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་གླུ་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མཚན་དང་དཔེ་བྱད་ཐམས་ཅད་ཀྱིས་ཡང་དག་པར་བརྒྱན་པར་བྱས་པ་དང་། རྟག་
ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་ཞུགས་ཤིང་། མིག་དང་ཡིད་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་དང་ལྡན་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཀྵནྟི་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གར་མཁན་མའི་ཕྱག་རྒྱ་བཅིངས་ལ་འདི་སྐད་
ཅེས་བརྗོད་པར་བྱ་སྟེ། སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ལ་མངོན་པར་བརྩོན་པ་དང་ལྡན་པ་དང་། སངས་རྒྱས་ཉིད་དུ་ཡོངས་སུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་འགྲུས་དང་ལྡན་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་སན་ས་རཱ་བ་རི་ཏྱཾ་ག་ཨ་ནུཏྟ་ར་མ་ཧཱ་བིརྱཱ་པཱ་ར་མི་ཏཱ་
པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་བྲལ་བར་གྱུར་ཅིག །བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་། མངོན་པར་
ཤེས་པ་རྣམས་དང་། རིག་པ་ཐམས་ཅད་དབང་དུ་གྱུར་པ་ཕུན་སུམ་ཚོགས་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་སཽ་ཁྱ་བི་ཧཱ་ར་དྷ་ན་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་པ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་འཇིག་རྟེན་དང་
འཇིག་རྟེན་ལས་འདས་པའི་ཤེས་རབ་དང་ཡེ་ཤེས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཐོབ་སྟེ། བཟོ་དང་བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་ལྡན་ལ་གསང་བའི་ཆོ་ག་ཤེས་པ་དང་། དེ་ཁོ་ན་ཉིད་མཐོང་སྟེ། ཉོན་མོངས་པ་དང་། ཤེས་བྱའི་སྒྲིབ་པ་

ཐམས་ཅད་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་ཀླེ་ཤ་ཙྪེ་ད་མ་ཧཱ་པྲཛྙཱ་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། ལུས་ཀྱིས་བསྙེན་བཀུར་བྱ་བའི་ཕྱིར། བདག་ཉིད་ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་དེ་
བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་ལྷག་པར་མོས་པར་བྱས་ལ། ཨོཾ་སརྦྦ་ཏ་ཐཱ་ག་ཏ་ཀཱ་ཡ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐམས་ཅད་དུ་ལྕེ་བརྒྱ་སྟོང་སྙེད་ཀྱི་སྒོ་ནས། མཉམ་ཉིད་མི་གཡོ་ཞེས་བྱ་བའི་བསྟོད་པས་མཆོད་པར་ལྷག་པར་མོས་པ་བྱས་ལ། ཨོཾ་སརྦྦ་
ཏ་ཐཱ་ག་ཏ་ཝཱཀ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བྱང་ཆུབ་སེམས་དཔའ་ཐམས་ཅད་དང་བསམ་པ་གཅིག་པའི་སྦྱོར་བས་ཆོས་ཐམས་ཅད་མཉམ་པ་ཉིད་ལ་ལྷག་པར་མོས་པ་བྱས་ལ། ཨོཾ་སརྦྦ་ཏ་ཐཱ་ག་ཏ་ཙིཏྟ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཆོས་ཐམས་ཅད་སྟོང་པ་ཉིད་དང་།
མཚན་མ་མེད་པ་དང་། སྨོན་པ་མེད་པ་དང་། དངོས་པོ་མེད་པའི་ངོ་བོ་ཉིད་ཀྱིས་རྣམ་པར་དག་པར་མོས་པ་བྱས་ལ། ཨོཾ་སརྦྦ་ཏ་ཐཱ་ག་ཏ་གུ་ཧྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་བརྗོད་པར་བྱའོ། །དེ་ལྟར་མཆོད་པ་ཉི་ཤུས་མཆོད་ནས། དེ་བཞིན་གཤེགས་པ་ཐམས་ཅད་ལ་བདག་ཉིད་དབུལ་
གྱིས་བདག་དུས་ཐམས་ཅད་དང་། རྣམ་པ་ཐམས་ཅད་དུ་སོ་སོར་བཞེས་སུ་གསོལ། ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས་དམ་ཚིག་ཆེན་པོའི་དངོས་གྲུབ་བདག་ལ་སྩལ་དུ་གསོལ། ཞེས་བརྗོད་ལ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ་དགེ་བའི་རྩ་
བ་འདི་དག་གིས། བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པའི་བདེ་བ་ཉིད་དང་ཡིད་བདེ་བ་ཉིད་ཀྱིས་མིའི་མཆོག་ཏུ་སེམས་
ཅན་ཐམས་ཅད་གྱུར་ཅིག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་གྲོལ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ལ་

སྡོམ་པ་གཟུང་བར་བགྱིའོ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱིས་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །
སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤོང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་
བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་
དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་
གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་གྲོལ་བ་རྣམས་དགྲོལ་བར་བགྱི། །མ་བསྒྲལ་བ་ནི་བསྒྲལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་བརྗོད་དོ། །དེ་ནས་བཛྲ་
ཨཉྩ་ལི་ཞེས་བྱ་བས་རྡོ་རྗེ་ཐལ་མོ་བཅིང་བར་བྱའོ། །བཛྲ་བནྡྷ་ཞེས་བྱ་བས་རྡོ་རྗེ་བསྡམས་པ་བཅིང་བར་བྱའོ། །བཛྲ་བནྡྷ་ཏྲཊ་ཞེས་བྱ་བས་རྡོ་རྗེ་བསྡམས་པ་སྙིང་གར་དགྲོལ་བར་བྱའོ། །བཛྲ་ཨཱ་བེ་ཤ། ཞེས་བྱ་བས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། ཨ་ཞེས་བྱ་བས་བདག་ཉིད་ལ་
དབབ་པར་རིག་པར་བྱའོ། །ཏིཥྛ་བཛྲ་དྲྀ་དྷོ་མེ་ཞེས་བྱ་བ་ལ་སོགས་པས་དབབ་པ་དེ་ཡང་བརྟན་པར་བྱའོ། །བཛྲ་མུཥྚི། ཞེས་བྱ་བས་རྡོ་རྗེ་དབྱིངས་ལས་གསུངས་པའི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་སནྡྷི་བཾ་ཞེས་བརྗོད་དོ། །ཨོཾ་སརྦྦ་ཨ་བ་ཡ་ཨཱ་ཀཪྵ་ཎ་བི་ཤོ་དྷ་

ནེ་བཛྲས་མ་ཡ་ཧཱུཾ་ཕཊ། ཅེས་བྱ་བ་ཕྱག་རྒྱ་དང་བཅས་པས་ངན་འགྲོ་ཐམས་ཅད་དགུག་པར་བྱའོ། །རྡོ་རྗེ་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་ཀྱང་། །ལེགས་པར་གྱེན་དུ་འཕངས་པ་ནི། །ལྟུང་བ་སློང་བའི་དམ་པའོ། །ཞེས་བྱ་བའི་ཕྱག་རྒྱས་
ངན་སོང་རྣམས་བཀུག་ལ། དེ་ནས་དེ་རྣམས་ལ་གསུམ་ལ་སྐྱབས་སུ་འགྲོ་བ་སྦྱིན་ནོ། །དུས་འདི་ནས་བཟུང་སྟེ། ཇི་སྲིད་སྙིང་པོ་བྱང་ཆུབ་ལ་འདུག་གི་བར་དུ་ཡང་དག་པར་རྫོགས་པའི་སངས་རྒྱས་དང་། ཆོས་དང་། དགེ་འདུན་དང་། ཕྱག་རྒྱ་དང་བཅས་པ་ལ་སྐྱབས་སུ་མཆིའོ། །དེ་ནས་
སྡིག་པ་བྲལ་བའི་ཕྱག་རྒྱ་བསྟན་ལ། ཨོཾ་བཛྲ་པཱ་ཎི་བི་སྤོ་ཊ་ཡ་སརྦྦ་ཨ་པ་ཡ། བནྡྷ་ཎི་པྲ་མོ་ཀྵ་ཡ། སརྦྦ་ཨ་པ་ཡ་ག་ཏེ་བྷྱ་སརྦྦ་སཏྭ་ན་སརྦྦ་ཏ་ཐཱ་ག་ཏ་བྷ་བ་ཏ་བཛྲ་ས་མ་ཡ་ཏྲཊ། ཅེས་བརྗོད་ཅིང་། རྡོ་རྗེ་བཅིངས་པ་དམ་བཅས་ཏེ། །གུང་མོ་གཉིས་ཀ་སྦྱར་ནས་ནི། །ཐ་མ་བཞི་ཡི་རྩེ་མོ་སྦྱར། །སྡིག་
པ་འཇོམས་པར་གྲགས་པ་ཡིན། །དེ་ནས་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་རྣམས་ཀྱི་དམ་ཚིག་གི་ཕྱག་རྒྱ་བཅིངས་ལ། སརྦྦ་ཤུདྡྷོ་ཞེས་བརྗོད་པར་བྱའོ། །སྔགས་དེ་ལན་གསུམ་བརྗོད་ཅིང་བཛྲ་མུཿཞེས་བྱ་བ་འདིས་རང་གི་སྙིང་གར་གཞུག་པར་
བྱའོ། །དེའི་ཚེ་ཨོཾ་ཧཱུཾ་ཧྲཱིཿཧོཿཞེས་བྱ་བའི་སྙིང་པོ་རང་གི་སྙིང་གར་ཟླ་བ་ལ་གནས་པའི་པདྨའི་སྟེང་དུ་བསམ་པར་བྱ་ཞིང་། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ཆོས་ཐམས་ཅད་བདག་མེད་པར་བསྒོམས་ལ། དེའི་སྙིང་པོ་ཡང་ཡིད་ཀྱིས་བརྗོད་པར་བྱའོ། །དེ་ནས་སྙིང་
པོ་དེ་ཉིད་དབྱངས་ཡིག་བཅུ་དྲུག་དང་བཅས་པའི་ཟླ་བའི་དཀྱིལ་འཁོར་གྱི་རྣམ་པར་རང་གི་སེམས་བསམ་པར་བྱའོ། །དེ་ནས་དེའི་སྟེང་དུ་སྙིང་པོ་དེ་ཉིད་དང་ཡི་གེ་ཀ་ལ་སོགས་པ་ནས། ཀྵའི་མཐར་ཐུག་པ་དང་བཅས་པ་ལས་ཟླ་བའི་དཀྱིལ་འཁོར་གཉིས་པར་བསམ་མོ། །ཟླ་བའི་
དཀྱིལ་འཁོར་གཉིས་པ་དེ་ཉིད་བཤད་མ་ཐག་པའི་སྙིང་པོ་དང་བཅས་པ་ལས་རྡོ་རྗེ་རྩེ་ལྔ་པ་སྙིང་པོ་དེ་ཉིད་བརྗོད་པས་རྡོ་རྗེ་དེ་བཅོམ་ལྡན་འདས་འགྲོ་བ་འདུལ་བ་སྣ་ཚོགས་པདྨར་བསམ་པར་བྱའོ། །དེ་ནས་དེའི་དབུས་སུ་སྙིང་པོ་བཀོད་ལ་བི་ཤྭ་པདྨ་ཨ་ཧཾ་ཞེས་ཕྱག་རྒྱའི་ང་རྒྱལ་བསྐྱེད་

པར་བྱའོ། །ཕྱག་རྒྱའི་གཟུགས་དེ་སེམས་དཔར་བྱིན་གྱིས་བརླབ་པའི་སྦྱོར་བས་རྡོ་རྗེ་སེམས་དཔར་བསྒོམས་ལ། བཛྲ་ས་ཏྭ་ཨ་ཧཾ་ཞེས་བརྗོད་པར་བྱའོ། །དེ་ནས་བསྙེམས་པ་དང་བཅས་པས་རྡོ་རྗེ་གསོར་ཞིང་འདི་སྐད་བརྗོད་དོ། །བཛྲ་སཏྭ་ཨ་ཧཾ་ཞེས་བྱ་བ་དང་། ཨོཾ་ཧཱུཾ་ཧྲཱིཿཧོཿཛ་གད་
བི་ན་ཡ་ཨ་ཧཾ་ཞེས་བརྗོད་ལ། རྡོ་རྗེ་སེམས་དཔའ་དེ་འགྲོ་བ་འདུལ་བའི་བདག་ཉིད་དུ་བསམ་པར་བྱའོ། །མ་ཧཱ་ས་མ་ཡ་ས་ཏྭ་ཨ་ཧཾ་ཞེས་བརྗོད་དོ། །དེ་ནས་འགྲོ་བ་འདུལ་བའི་དམ་ཚིག་གི་ཕྱག་རྒྱ་བཅིངས་ལ། ས་མ་ཡ་ཨ་ཧཾ་ཞེས་བྱའོ། །དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་དཔྲལ་བ་
དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །ས་མ་ཡ་སཏྭ་ཨ་དྷི་ཏིཥྛ་སྭ་མཱཾ་ཞེས་བྱའོ། །དེ་ནས་སྣ་ཚོགས་པདྨ་འཛིན་པའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ཏེ། དེའི་སྙིང་པོ་བརྗོད་ལ། སྐུ་དང་གསུང་དང་ཐུགས་རྡོ་རྗེ་རྣམས་འགྲོ་བ་འདུལ་བའི་བདག་ཉིད་དུ་བསྒོམ་པར་
བྱའོ། དེ་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་ཞུགས་ལ། པདྨའི་རྒྱུའི་ཕྱག་རྒྱས་སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པའི་འགྲོ་བ་འདུལ་བའི་དཀྱིལ་འཁོར་ཆེན་པོར་སྤྲུལ་ལ་རིགས་ཀྱི་དམ་ཚིག་གི་ཕྱག་རྒྱ་བཅིངས་ནས། མེ་ཏོག་གི་ཕྲེང་བ་བླངས་ཏེ།
ཇི་ལྟ་བ་བཞིན་དུ་ཞུགས་ནས་རང་གི་སྤྱི་བོར་མེ་ཏོག་གི་ཕྲེང་བ་དོར་ཏེ་བཅིང་བར་བྱས་ན། དངོས་གྲུབ་ཀྱི་པདྨ་བརྟུལ་ཞུགས་ཀྱི་བར་དུ་སྤྱད་ལ་དཀྱིལ་འཁོར་དེ་མངོན་སུམ་དུ་གྱུར་པ་ལྟ་བུར་བསྒོམ་པར་བྱའོ། །ཡང་བཅོམ་ལྡན་འདས་འགྲོ་བ་འདུལ་བའི་ཕྱག་རྒྱ་བཅིངས་ཏེ། རང་གི་ལུས་ལ་ལྷ་
ཐམས་ཅད་ཀྱི་གནས་རྣམས་སུ་ཡི་གེ་ཧྲཱིཿལས་པདྨའི་གདན་བསྐྱེད་ལ། ཡང་དེ་རྣམས་ལ་ས་མ་ཡ་ཨ། ཞེས་བྱ་བས་ཟླ་བའི་དཀྱིལ་འཁོར་བསམས་ཏེ། ཡིད་ཀྱིས་རང་གི་ལུས་ཀྱི་གནས་སུ་འདུག་ལ། རང་གི་ལུས་ལས་ཕྱི་རོལ་གྱི་མདུན་དུ། ཨོཾ་ཧཱུཾ་ཧྲཱིཿཧོཿཨ། ཞེས་བྱ་བ་འདིས་ཟླ་
བའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་འགྲོ་བ་འདུལ་བའི་སྣ་ཚོགས་པདྨ་སྤྲུལ་ལ་པདྨོ་ཨ་ཧཾ་ཞེས་པ་པདྨོའི་ང་རྒྱལ་བསྒོམ་པར་བྱའོ། །དེ་ནས་ཛ་གད་བི་ན་ཡ་ཨ་ཧཾ་ཞེས་བྱ་བས་འགྲོ་བ་འདུལ་བར་བདག་ཉིད་བསམས་ལ། དེ་ཉིད་ལ་རྟ་མགྲིན་ལ་སོགས་པའི་ལས་ཀྱི་ཕྱག་

རྒྱ་རྣམས་ཀྱིས་བཅོམ་ལྡན་འདས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱའོ། །ཨོཾ་ཧཱུཾ་ཧྲཱིཿཧོཿདྲྀ་ཤྱ་ཞེས་བྱ་བ་དང་། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་བཅོམ་ལྡན་འདས་ལ་བལྟས་ཏེ། ཛཿཧཱུཾ་བཾ་ཧོཿ། ཞེས་བརྗོད་པ་དེ་ཉིད་ཀྱིས་རང་གི་ལུས་
ཀྱི་གནས་སུ་གནས་པ་ལ་གཞུག་པར་བྱའོ། །ས་མ་ཡ་སྟྭཾ་ཞེས་བརྗོད་པས་འོད་ཀྱི་དཀྱིལ་འཁོར་གྱི་རྣམ་པར་བསྒོམས་ལ། དེས་གྲུབ་པ་དང་ས་མ་ཡ་སྟྭཾ་ཨ་ཧཾ། ཨོཾ་ཧཱུཾ་ཧྲཱིཿཧོཿཞེས་བརྗོད་པས་བཅོམ་ལྡན་འདས་ལ་ཞུགས་པ་དང་། བདག་ཉིད་དང་ལྷན་ཅིག་ཐ་མི་དད་པར་བསྒོམ་པར་བྱའོ། །
དེ་བཞིན་དུ་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ་ཡིད་ཀྱིས་རང་གི་ལུས་ཀྱི་གནས་སུ་འདུག་སྟེ། རང་གི་ལུས་ལས་ཕྱི་རོལ་གྱི་མདུན་དུ་པདྨ་འབེབས་པའི་ཡི་གེ་ཨའི་མཐའ་ཅན་གྱི་སྔགས་ཀྱིས་ཟླ་བའི་དཀྱིལ་འཁོར་གྱི་སྟེང་དུ་པདྨའི་དྲིལ་བུ་བསྐྱེད་ལ་པདྨོ་གྷནྚ་ཨ་ཧཾ། ཞེས་པདྨའི་
དྲིལ་བུའི་ང་རྒྱལ་བྱའོ། །པདྨ་ཨཱ་བེ་ཤ་ཨ་ཧཾ། ཞེས་བྱ་བ་དེས་པདྨ་འབེབས་པའི་གཟུགས་སུ་བསྒོམས་ལ། དེ་ནས་པདྨ་འབེབས་པ་དེ་ཉིད་ལ་རྟ་མགྲིན་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱས་ཏེ། རང་གི་དམ་ཚིག་གི་ཕྱག་རྒྱས་
བལྟས་ལ། དེའི་སྔགས་བརྗོད་ཅིང་དྲྀ་ཤྱ་ཞེས་ཀྱང་བརྗོད་དོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། ཛཿཧཱུཾ་བཾ་ཧོཿཞེས་བརྗོད་པས་རང་གི་ལུས་ལ་བཅུག་ལ། ས་མ་ཡ་སྟྭཾ་ཞེས་བྱ་བས་འོད་ཀྱི་དཀྱིལ་འཁོར་དབབ་པ་དང་། ས་མ་ཡ་སྟྭཾ་ཨ་ཧཾ། ཞེས་པ་དང་སྔགས་བརྗོད་པས་པདྨ་འབེབས་
པ་དང་། བདག་ཉིད་ལྷན་ཅིག་ཏུ་གྱུར་པར་བསམ་པར་བྱའོ། །དེ་ནས་འགྲོ་བ་འདུལ་བ་ལ་སོགས་པའི་རྟེན་དང་། བརྟེན་པའི་ལུས་ལ་རྣམ་པར་སྣང་མཛད་དང་། མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཛཿཧཱུཾ་བཾ་ཧོཿཞེས་བརྗོད་ཅིང་། ཡིད་ཀྱིས་ལེགས་པའི་སྦྱོར་བ་ཡིས།
དམ་ཚིག་གི་ཕྱག་རྒྱ་རྣམས་ཀྱིས་གཞུག་ཅིང་བསྒྲུབ་པར་བྱའོ། །དེ་ནས་དེ་བཞིན་གཤེགས་པ་ལ་སོགས་པ་ནས། པདྨ་འབེབས་པའི་མཐར་ཐུག་པའི་བར་དུ་ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་དང་རྡོ་རྗེ་སེམས་མ་དང་། རིན་

ཆེན་དང་། ཆོས་དང་། རྡོ་རྗེ་ལས་མའི་ཕྱག་རྒྱ་རྣམས་ཀྱིས་དེ་བཞིན་གཤེགས་པ་རྣམས་བྱིན་གྱིས་བརླབ་པ་དང་། འགྲོ་བ་འདུལ་བ་ལ་སོགས་པ་ནས། པདྨ་འབེབས་པའི་བར་དུ་རྡོ་རྗེ་པདྨའི་དམ་ཚིག་གི་ཕྱག་རྒྱས་རང་གི་ལུས་ཀྱི་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་
རིམ་པ་བཞིན་དུ་བྱིན་གྱིས་བརླབས་ཏེ། སྙིང་གའི་པདྨའི་ཕྱོགས་རྣམས་སུ་རྡོ་རྗེ་པདྨ་སངས་རྒྱས་ཀྱིས་དབང་བསྐུར་བ་དཔྲལ་བའི་ཕྱོགས་རྣམས་ཀྱི་རྡོ་རྗེ་རིན་ཆེན་མའི་གནས་སུ་བཤད་ཟིན་པའི་རིན་པོ་ཆེ་པདྨའོ། །ལྐོག་མའི་ཕྱོགས་རྣམས་ཀྱི་རྡོ་རྗེ་ཆོས་མའི་གནས་སུ་བཤད་ཟིན་པའི་པདྨོའི་རྡོ་རྗེ་
པདྨའོ། །ཐམས་ཅད་ཀྱི་སྤྱི་བོའི་ཕྱོགས་ཀྱི་རྡོ་རྗེ་ལས་མའི་གནས་སུ་བཤད་ཟིན་པའི་སྣ་ཚོགས་པདྨ་དང་ཟླ་བའི་གདན་རྣམས་ལ་སྣ་ཚོགས་པདྨ་རེ་རེ་ཞིང་རིམ་གྱིས་བསྐྱེད་པར་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་དེ་བཞིན་གཤེགས་པ་རྣམས་ལ་
དབང་བསྐུར་ལ་འགྲོ་བ་འདུལ་བ་ལ་སོགས་པ་ནས། པདྨ་འབེབས་པའི་མཐར་ཐུག་པའི་བར་དུ། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ཆོས་མའི་ཕྱག་རྒྱས་དབང་བསྐུར་བར་བྱའོ། །དེ་ནས་རྡོ་རྗེ་པདྨའི་ཕྱག་རྒྱས་དབང་བསྐུར་བ་དང་། བདག་པོའི་དབང་
བསྐུར་བ་དང་། མིང་གི་དབང་བསྐུར་བ་དང་། དངོས་གྲུབ་ཀྱི་པདྨའི་བརྟུལ་ཞུགས་བླངས་ལ། པདྨའི་སྒེག་མོ་ལ་སོགས་པ་རྣམས་ཀྱིས་མཆོད་པ་དང་། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ཡང་དག་པར་མཆོད་ལ། དེ་ཉིད་ཀྱིས་ན་པདྨ་གཟུང་། །
ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེ། །བྱིན་གྱིས་བརླབས་ནས་སྙིང་པོ་བཟླ། །དེ་ནས་ཨོཾ་བཛྲ་ཨཱཏྨ་ཀོ྅ཧཾ། ཞེས་བརྗོད་པས་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་རང་བཞིན་དུ་བདག་ཉིད་བསྒོམ་པར་བྱའོ། །ཨོཾ་སྭ་བྷཱ་ཝ་ཤུདྡྷོ྅ཧཾ། ཞེས་བྱ་བས་གཟུགས་
བརྙན་དང་མཚུངས་པའི་སྟོང་པ་ཉིད་ཀྱི་རང་བཞིན་དུ་མོས་པ་དང་། ཨོཾ་སརྦ་ས་མོ་ཧཾ་ཞེས་བྱ་བས་བདག་གཉིས་སུ་མེད་པའི་ཡེ་ཤེས་སུ་བསྐྱེད་པར་བྱའོ། །ལྷ་ཐམས་ཅད་ཀྱི་ངོ་བོ་ཉིད་བདག་ཡིན་ནོ་སྙམ་དུ་བསམས་ལ་འདི་ཙམ་གྱིས་ནི་རྣལ་འབྱོར་ཆེན་པོ་རྫོགས་པར་འགྱུར་བ་ཡིན་ནོ། །ད་ནི་

གནས་ཀྱི་ངེས་པ་བརྗོད་པར་བྱ་སྟེ། དེ་ལ་སྔགས་པའི་སྙིང་གར་གནས་པའི་ཟླ་བ་ལ་ཟླ་བ་དང་པདྨའི་གདན་གྱི་དབུས་སུ་འགྲོ་བ་འདུལ་བའི་མདུན་དུ་པདྨའི་སངས་རྒྱས། གཡས་སུ་པདྨའི་རྒྱལ་པོ། གཡོན་དུ་པདྨའི་ཆགས་པ། རྒྱབ་ཏུ་པདྨའི་ལེགས་པ། མཛོད་
སྤུའི་ཕྱོགས་སུ་གཙུག་ཕུད་སངས་རྒྱས་དང་། པདྨའི་ཁྲོ་གཉེར་རིག་པའི་རྒྱལ་པོའོ། །མགོ་བོའི་རྒྱབ་ཏུ་པདྨའི་ཉི་མ། ཕྲག་པ་གཉིས་སུ་པདྨའི་དབལ། སོའི་ཕྲེང་བ་གཉིས་ལ་པདྨའི་བཞད་པ། ལྐོག་མའི་ཕྱོགས་སུ་དབུས་ཀྱི་ཆ་ལ་པདྨའི་ཏིང་ངེ་འཛིན། དེའི་མདུན་དུ་པདྨའི་སྒྲོལ་མ།
རྣལ་འབྱོར་པའི་ནུ་མ་གཉིས་ལ་པདྨ་རྣོན་པོའོ། །ལྟེ་བར་པདྨའི་རྒྱུ། ལྕེ་ལ་པདྨའི་བསྲུང་བ། སྤྱི་གཙུག་ཏུ་པདྨ་དོན་ཡོད་པའི་དབང་ཕྱུག །དེའི་མདུན་དུ་པདྨ་གར་གྱི་དབང་ཕྱུག །རྣལ་འབྱོར་པའི་ནམ་འཚང་གཉིས་སུ་པདྨའི་བསྲུང་བ། ཁར་པདྨའི་གནོད་སྦྱིན། རྐེད་པར་པདྨའི་ཁུ་ཚུར།
སངས་རྒྱས་པདྨའི་གཡོན་ལོགས་སུ་པདྨའི་སྒེག་མོ་དང་། པདྨའི་ཁྲོ་གཉེར། རིག་པའི་རྒྱལ་པོའི་གཡོན་ལོགས་སུ་པདྨའི་ཕྲེང་བ་མ། པདྨ་སྒྲོལ་མའི་གཡོན་ལོགས་སུ་པདྨའི་གླུ་མ། པདྨ་གར་གྱི་དབང་ཕྱུག་གི་གཡོན་ལོགས་སུ་པདྨའི་གར་མ། རྣལ་འབྱོར་པའི་སྣམ་ལོགས་ཀྱི་
གསང་བའི་གནས་སུ་པདྨའི་བདུག་པ་མ། མགོ་ལ་པདྨའི་མེ་ཏོག་མ། མིག་ལ་པདྨའི་མར་མེ་མ། ནུ་མ་དང་བྲང་དང་། སྙིང་གར་པདྨའི་བྱུག་པ་མ། བརླ་གཡས་པ་ལ་རྟ་མགྲིན། བརླ་གཡོན་པ་ལ་དོན་ཡོད་པའི་ཞགས་པ། བྱིན་པ་གཡས་པ་ལ་པདྨའི་ལྕགས་སྒྲོག །བྱིན་པ་གཡོན་
པ་ལ་པདྨའི་འབེབས་པ། དེ་བཞིན་གཤེགས་པ་རྣམས་ནི་རྟེན་དང་བརྟེན་པའི་ལུས་ཀྱི་ཡན་ལག་ཐམས་ཅད་ལ་ཏིལ་དང་ཏིལ་མར་གྱི་ཚུལ་གྱིས་བཞུགས་སོ། །ཉིན་རེ་ཞིང་རྣལ་འབྱོར་ཆེན་པོ་ལན་རེ་བསྒྲུབ་པར་བྱའོ། །དེ་ལྟར་རྣལ་འབྱོར་ཆེན་པོ་བྱས་ནས། ཐུན་བཞིའི་སྦྱོར་བས་ཐམས་ཅད་
ཀྱི་སྔགས་བཟླས་བརྗོད་འབུམ་བྱ་བའམ། ཡང་ན་རང་གི་སྙིང་གར་འཆད་པར་འགྱུར་བའི་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་ཚུལ་གྱིས་དཀྱིལ་འཁོར་སྤྲུལ་ལ་ཟླ་བ་གཅིག་གམ། ཟླ་བ་དྲུག་དྲུག་གམ། ལོ་གཅིག་གི་བར་དུ་ཇི་སྲིད་རྒྱུན་མི་འཆད་པར་

དཀྱིལ་འཁོར་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །ཡང་ན་དང་པོར་སྦྱོར་བ་དང་། དཀྱིལ་འཁོར་ཆེན་པོ་རྒྱལ་མཆོག་དང་། ལས་ཀྱི་རྒྱལ་མཆོག་བསྒོམས་ལ། ཉིན་རེ་ཞིང་ཐུན་བཞིའི་སྦྱོར་བ་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གི་བར་དུ་དཀྱིལ་འཁོར་བསྒོམ་པར་བྱའོ། །
དེ་ལྟར་སྔ་མ་བཞིན་དུ་རྣལ་འབྱོར་ཆེན་པོ་བསྒོམས་ནས། ས་སྦྱང་བ་དང་། ས་གཟུང་བར་བྱའོ། །དེ་ནས་བདག་ཉིད་ཁྲུས་བྱས་ལ་ལུས་དྲིས་བྱུགས། ཇི་སྙེད་པའི་རྒྱན་གདགས་ཤིང་། ཤིན་ཏུ་དཀར་བའི་གོས་བསྒོ་ཞིང་། མེ་ཏོག་ཕྲེང་བས་གདོང་ཡང་བརྒྱན། ཞག་བདུན་གྱི་བར་དུ་ཏིང་ངེ་འཛིན་
གསུམ་ནས་བརྩམས་ཏེ། དཀྱིལ་འཁོར་བསྒོམས་ནས། དེ་ནས་དཀྱིལ་འཁོར་གྱི་སའི་དབུས་སུ་བདག་དང་གནས་བསྲུང་བ་བྱས་ལ། སྔར་བཤད་པའི་པདྨའི་རྒྱུའི་ལས་ཀྱི་ཕྱག་རྒྱས་དཀྱིལ་འཁོར་སྤྲུལ་ཏེ། ཕྱག་བྱ་བ་ལ་སོགས་པ་སྔོན་དུ་འགྲོ་བས་སྡོམ་པ་བླང་བ་དང་། རྣལ་འབྱོར་ཆེན་པོ་བྱས་
ལ། དེ་ནས་སྔ་མ་བཞིན་དུ། དེ་ཉིད་ཀྱིས་ནི་པདྨ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་སྙིང་པོ་གསུམ་བརྗོད་ཅིང་། །དོན་གསུམ་ནི། རྡོ་རྗེའི་བདག་ཉིད་དང་། ནམ་མཁའ་དང་མཚུངས་པ་དང་། ཆོས་བདག་
མེད་པར་མཉམ་པ་ཉིད་ཀྱིས་སེམས་ཅན་ཐམས་ཅད་དང་མཚུངས་སོ་ཞེས་བསྒོམ་པར་བྱའོ། །དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། ནམ་མཁའི་ཕྱོགས་སུ་གནས་པ་དང་། ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ། ཨཱ་དྱ་ནུཏྤནྣ་ཏྭཱཏ་ཅེས་ཡིད་ཀྱིས་བརྗོད་ལ། སྟོང་གསུམ་པའི་སངས་རྒྱས་
ཀྱི་ཞིང་གི་ནམ་མཁའི་ཚད་དང་མཉམ་པར་བསམ་པར་བྱའོ། །དེ་ནས་ནམ་མཁའི་ཕྱོགས་དེར། དང་པོར་ཡི་གེ་ཡཾ་ཡོངས་སུ་གྱུར་པ་ལས། རླུང་གི་དཀྱིལ་འཁོར། དེའི་སྟེང་དུ་ཡི་གེ་བཾ་ལས་འོ་མའི་རྒྱ་མཚོ། དེའི་སྟེང་དུ་ཡི་གེ་ལཾ་ལས་གསེར་གྱི་དཀྱིལ་འཁོར། དེའི་སྟེང་དུ་བཾ་ཡོངས་སུ་
གྱུར་པ་ལས་འོ་མའི་རྒྱ་མཚོ་བསམ་པར་བྱའོ། །དེའི་དབུས་སུ་ཧཱུཾ་སུཾ་ཧཱུཾ་ཞེས་བྱ་བ་ལས་རི་རབ་ཆེན་པོ་ཟུར་བཞི་པ། རིན་པོ་ཆེ་སྣ་བཞིའི་རང་བཞིན་ཅན། རིན་པོ་ཆེས་བརྒྱན་པ། སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པར་བསྒོམ་མོ། །ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦྦཾ་སྭཱ་ཧཱ།

ཞེས་བརྗོད་ཅིང་རྡོ་རྗེ་བསྡམས་པ་བརྐྱང་སྟེ། ས་ལ་བཞག་ནས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེའི་སྟེང་དུ་པདྨའི་རྒྱུའི་ལས་ཀྱི་ཕྱག་རྒྱས་འགྲོ་བ་འདུལ་བའི་ཁང་བུ་བརྩེགས་པ་རྩེ་མོ་རྡོ་རྗེ་དང་ནོར་བུ་རིན་པོ་ཆེ་ལས་བྱས་པ་སྤྲུལ་ལ། པདྨའི་ཁང་བུ་བརྩེགས་
པའི་དབུས་སུ་ཨ་སི་ཨཾ་ཞེས་བྱ་བས་སེང་གེའི་གདན་དང་། ལྷ་ལྷག་མ་རྣམས་ཀྱི་གནས་སུ་ཡི་གེ་ཧྲཱིཿལས་པདྨའི་གདན་དང་། སེང་གེའི་གདན་ལ་སོགས་པ་དེ་རྣམས་ལ་ས་མ་ཡ་ཨ་ཞེས་བྱ་བས་ཟླ་བའི་དཀྱིལ་འཁོར་སྤྲུལ་ལ། དཀྱིལ་འཁོར་གྱི་སའི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ་
བདག་ཉིད་སྤྲོ་བ་བསྐྱེད་པར་བྱའོ། །དེང་དུས་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པར་ཡང་ནི་ཐེ་ཚོམ་མེད། །བྱང་ཆུབ་སེམས་དཔའ་སེམས་གཅིག་པས། །མི་ལྡོག་པར་ནི་བདག་གྱུར་ཏེ། །པདྨ་ཆེན་པོའི་རིགས་སུ་
ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོག་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པ། །དེང་བདག་འདུས་པའི་མཆོག་ཡིན་ནོ། །དེ་ནས་ཡན་ལག་ཐམས་ཅད་ཀྱིས་ཕྱག་བྱས་ལ། སྤོས་སྣོད་ལག་ཏུ་ཐོགས་ཏེ། སངས་རྒྱས་ཐམས་ཅད་སྤྱན་དྲང་
བར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་ཆེ་གེ་ཞེས་བགྱི་བས། །པདྨ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཞེས་བརྗོད་ལ། དང་པོའི་སྦྱོར་བ་དང་། དཀྱིལ་
འཁོར་རྒྱལ་མཆོག་དང་། ལས་ཀྱི་རྒྱལ་མཆོག་རྣམས་བསྒོམས་ལ། དེ་ནས་འགྲོ་བ་འདུལ་བའི་གནས་སུ་འགྲོ་བ་འདུལ་བའི་ཕྱག་རྒྱ་ཆེན་པོར་གནས་ཏེ། དེའི་སྔགས་ཟློས་པ་ལ་བརྩོན་པའི་རྣལ་འབྱོར་པ་ལ་སྒྲུབ་པའི་གྲོགས་མཆོག་དེ་བཞིན་གཤེགས་པའི་ང་རྒྱལ་དང་ལྡན་པས་དཀྱིལ་འཁོར་བྲི་
བའི་ཕྱིར། འགྲོ་བ་འདུལ་བའི་མཚན་བརྒྱ་རྩ་བརྒྱད་པས་གསོལ་བ་གདབ་པར་བྱའོ། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་བྱས་ལ་དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་གང་བར་མངོན་དུ་བསམས་ལ། བདག་ནི་རང་ཉིད་པདྨ་ཅན། །པདྨའི་

སེམས་དཔར་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཅན་པདྨ་ཅན་བདག་ཡིན། །བདག་ནི་རྣལ་འབྱོར་དབང་ཕྱུག་རྒྱལ། །ཕྱག་ན་པདྨོ་བརྟན་བདག་ཡིན། །བདག་པོ་པདྨོ་ཆེན་པོ་བདག །བྱིན་གྱིས་བརླབས་པ་མི་འདོར་རོ། །ཨོཾ་ཧཱུཾ་ཧྲཱིཿཧོཿཞེས་བརྗོད་ལ་ང་རྒྱལ་བསྐྱེད་དེ། བཛྲ་
དྲྀ་ཤྱ་ཕཊ། ཅེས་བྱ་བའི་མིག་གཉིས་སུ་བཀོད་ལ་ཡི་གེ་ཨཿལས་རྐང་མཐིལ་དུ་སྣ་ཚོགས་རྡོ་རྗེ་བསྐྱེད་ལ་བདག་ཉིད་སྣ་ཚོགས་པདྨའི་ཕྱག་རྒྱ་བཅིངས་ལ། ཨོཾ་ཧཱུཾ་ཧྲཱིཿཧོཿབཛྲ་ཨདྷི་ཏིཥྛ་མཎྜ་ལ་ཨུ་ཐ་ཡ་ཞེས་བརྗོད་ཅིང་དཀྱིལ་འཁོར་ནམ་མཁའི་ཕྱོགས་སུ་གདེག་པར་བྱའོ། །དེ་ནས་ཕྱག་རྒྱ་དེས་བདག་ཉིད་
ལ་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ཏེ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །ཨོཾ་ཧཱུཾ་ཧྲཱིཿཧོཿཞེས་བརྗོད་ནས། །བསྒྱིངས་པའི་ཚུལ་གྱིས་རབ་ཏུ་བསྐོར། །དེ་ནས་བགེགས་བསལ་བ་ལ་སོགས་པ་བྱས་ནས། ཡང་སྒོ་དབྱེ་བའི་ཕྱག་རྒྱས་
སྒོ་ཕྱེ་ལ་སྔགས་དང་ཕྱག་རྒྱ་འདི་དང་ལྡན་པས་གསང་བའི་དཀྱིལ་འཁོར་དགུག་པར་བྱའོ། །ཨོཾ་བཛྲ་མཎྜལ་ཧཱུཾ་ཛཿདེའི་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེ་བོ་གཉིས་རྡོ་རྗེར་བྱས་ལ། དཀྱིལ་འཁོར་ཐམས་ཅད་དགུག་པར་བྱེད་པ་ནི་རྡོ་རྗེ་འཁོར་ལོའི་ཕྱག་རྒྱའོ། །ཨོཾ་མ་ཧཱ་
བཛྲ་ཙཀྲ་ཨ་དྷི་ཏིཥྛ་སིད་ཏྱཱ་ཧཱུཾ་ཞེས་བྱ་བ་ཕྱག་རྒྱའི་སྦྱོར་བ་འདིས་ཡང་དཀྱིལ་འཁོར་བྱིན་གྱིས་བརླབ་པར་བྱའོ། །རྡོ་རྗེ་དབྱིངས་ཀྱི་རྡོ་རྗེ་རྒྱུའི་ལས་ཀྱི་ཕྱག་རྒྱ་ནི་འདིའི་ཕྱག་རྒྱ་ཡིན་ནོ། །དེ་ནས་ལག་པ་གཡས་པའི་མཐེ་བོས་རང་གི་མཐེ་ཆུང་གི་སེན་མོ་མནན་ལ། སོར་མོ་ལྷག་མ་རྣམས་རྩེ་གསུམ་པ་
ལྟར་བྱས་ལ་གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་པ་བླངས་ཏེ། དབང་ལྡན་གྱི་ཕྱོགས་ནས་བརྩམས་ནས་བསྐོར་ཏེ། མཚམས་བཞི་རུ་གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་བཟུང་ལ། མཐའ་ཡས་དང་རྣམ་པར་རྒྱལ་བ་དང་སྤྲིན་སྒྲ་དང་གསུས་པོ་ཆེ་ཞེས་བྱ་བ་ཕུར་བུའི་རྣམ་པ་ལྟ་བུ་གྲྭ་བཞིར་བསྐྱེད་
ནས། ལག་པ་གཡས་པ་རྡོ་རྗེ་རྩེ་གསུམ་པ་ལྟར་བྱས་ནས་བརྡུང་ཞིང་། འདི་སྐད་ཅེས་སྙིང་པོ་བཟླ་བར་བྱའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦྦ་དུཥྚཱཾ་ཕཊ། ཀཱི་ལ་ཡ་ཀཱི་ལ་ཡ། སརྦྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་བྱ་བའམ། འཇིག་རྟེན་གསུམ་གྱི་

དཀྱིལ་འཁོར་ཆེན་པོ་ལས་བཤད་པའི་སྔགས་ཀྱིས་བྱའོ། །སེང་ལྡེང་ལས་བྱས་པའི་ཕུར་བུ་དཀྱིལ་འཁོར་གྱི་ཟུར་བཞི་དང་ལྟེ་བར་མངོན་པར་བསྔགས་ལ་གདབ་པར་བྱའོ། །དེ་ནས་རྡོ་རྗེ་གནོད་སྦྱིན་གྱིས་ཡོངས་སུ་བགེགས་བསྐྲད་ལ་ར་བ་དང་དྲ་བ་བྱས་ནས་རྡོ་རྗེ་ཁུ་ཚུར་གྱིས་སྒོ་
བཅད་ལ། རྡོ་རྗེ་གོ་ཆས་བསྲུང་བ་ཐམས་ཅད་ཡང་དག་པར་བསྲུངས་ལ། པདྨའི་གནོད་སྦྱིན་གྱིས་ཡོངས་སུ་བཟླས་པའི་ཆུའི་བུམ་པ་དཀྱིལ་འཁོར་གྱི་སྒོར་བཞག་ལ་རྡོ་རྗེ་རྩེ་མོ་ཡོངས་སུ་བཟླས་པའི་དྲིའི་ཆུས་མཆོད་པ་ཐམས་ཅད་བསངས་ཏེ། རྡོ་རྗེ་མེ་ལན་གསུམ་བཟླས་ལ། ཨོཾ་བཛྲ་པུཥྤེ་ཧཱུཾ་ཞེས་
བྱ་བ་ལ་སོགས་པའི་སྔགས་ཀྱིས་ཡང་ལན་གསུམ་དུ་བཟླ་བར་བྱའོ། །དེ་ལ་རྡོ་རྗེ་རྩེ་མོ་ལ་སོགས་པའི་ཕྱག་རྒྱ་དང་སྔགས་ནི་འདི་ཡིན་ཏེ། ཨོཾ་བཛྲ་ཤི་ཁ་རེ་རུ་ཊ་མ་ཊ། རྡོ་རྗེ་རྩེ་མོའི་སྔགས་སོ། །ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། རྡོ་རྗེ་མེའི་སྔགས་སོ། །བཛྲ་པུཥྤེ་
ཧཱུཾ་ཞེས་བྱ་བ་མེ་ཏོག་གི་སྔགས་སོ། །ཨོཾ་བཛྲ་གནྡྷེ་ཞེས་བྱ་བ་དྲིའི་སྔགས་སོ། །ཨོཾ་བཛྲ་དྷཱུ་པེ་ཧཱུཾ་ཞེས་བྱ་བ་བདུག་པའི་སྔགས་སོ། །ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ། ཨཱདྱ་ནུཏྤནྣ་ཏྭཱཏ་ཅེས་པ་ལྷ་བཤོས་ཀྱི་སྔགས་སོ། །ཨོཾ་བཛྲ་ཨཱ་ལོ་ཀེ་ཞེས་བྱ་བ་མར་མེའི་སྔགས་སོ། །རྡོ་རྗེ་ཁུ་ཚུར་གཉིས་རི་བོ་
འདེགས་པའི་ཚུལ་དུ་བྱེད་པ་ནི་རྡོ་རྗེ་རྩེ་མོའིའོ། །རྡོ་རྗེ་བསྡམས་པ་ནང་དུ་བཅིངས་ལ་སོར་མོ་འབར་བ་ལྟ་བུ་ལས་མཐེ་བོ་གཉིས་རྡོ་རྗེར་བསྒྲེང་བ་ནི་རྡོ་རྗེ་ཁྲོ་བོ་ཏི་རཱི་ནྟི་རིའི་ཕྱག་རྒྱ་ཞེས་བྱ་བ་འདི་རྡོ་རྗེ་མེའི་ཕྱག་རྒྱ་ཡིན་ནོ། །རྡོ་རྗེ་ཁུ་ཚུར་གཉིས་བཅིངས་ལ་གྱེན་དུ་འཐོར་བའི་ཚུལ་དུ་བྱེད་པ་ནི་མེ་ཏོག་གི་
ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ལ་དྲིས་བྱུག་པའི་ཚུལ་དུ་བྱེད་པ་ནི། དྲིའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་བདུག་པ་འཐུལ་བའི་ཚུལ་དུ་བྱེད་པ་ནི་བདུག་པའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་རལ་གྲི་འདེབས་པའི་ཚུལ་དུ་བྱེད་པ་ནི་ལྷ་བཤོས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་
བཅིངས་ལ་མཐེ་བོ་གཉིས་གཤིབས་ཏེ་བསྒྲེང་ནས་མར་མེའི་སྡོང་བུ་ལྟར་བྱེད་པ་ནི་མར་མེའི་ཕྱག་རྒྱའོ། །ཨོཾ་ཧཱུཾ་ཧྲཱིཿཧོཿཞེས་བྱ་བ་མེ་ཏོག་གི་རྡོ་རྗེ་ཐལ་མོ་བཅིངས་ལ། མཐེ་བོ་གཉིས་བརྐྱང་སྟེ་ཐལ་མོ་འབྱེད་པའི་ཚུལ་གྱིས་ཡོན་ཆབ་ལ་སྔགས་ལན་བདུན་ནམ་ཉི་ཤུ་རྩ་གཅིག་ཏུ་བཟླས་ལ་གཞག་པར་བྱའོ། །

དེ་ནས་དཀྱིལ་འཁོར་གྱི་གནས་ཐམས་ཅད་རྡོ་རྗེ་རྩེ་མོ་ཡོངས་སུ་བཟླས་པའི་དྲི་ཆུ་དང་། པདྨའི་གནོད་སྦྱིན་ཡོངས་སུ་བཟླས་པའི་ཆུས་བྱུགས་ལ། དེ་ཉིད་ཡོངས་སུ་བཟླས་པའི་དྲིའི་ཆུས་ལྷ་རྣམས་ཀྱི་གནས་སུ་དཀྱིལ་འཁོར་བྱའོ། །དེ་ནས་དཀྱིལ་འཁོར་ཐམས་ཅད་ཀྱི་གནས་རྣམས་སུ་ཡིད་ཀྱིས་བཞག་
ལ་རྣམ་པར་སྣང་མཛད་ལ་སོགས་པའི་སྔགས་ལན་བདུན་བཟླས་ཏེ། དྲིའི་དཀྱིལ་འཁོར་རྣམས་ལ་རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་མཐར་ཐུག་པ་ནམ་མཁའི་ཕྱོགས་ནས་ཕབ་སྟེ། རང་རང་གི་སྔགས་ཀྱིས་གཞག་པར་བྱའོ། །བསྐལ་པ་བཟང་པོ་པ་རྣམས་ཀྱང་རང་གི་
གནས་རྣམས་སུ། ཨོཾ་སརྦྦ་སཾ་སྐཱ་ར་པ་རི་ཤུདྡྷ་དྷརྨྨ་ཏེ་ག་ག་ན་ས་མུངྒ་ཏེ། མ་ཧཱ་ན་ཡ་པ་རི་བཱ་རེ་སྭཱ་ཧཱ། ཞེས་བྱ་བས་གཞག་པར་བྱའོ། །དེ་ནས་རྣམ་པར་རྒྱལ་བའི་བུམ་པར་དྲིའི་ཆུ་ཅུང་ཟད་ཅིག་བླུགས་ལ། རྡོ་རྗེ་མེ་དང་། པདྨའི་གནོད་སྦྱིན་དང་། འགྲོ་བ་འདུལ་བའི་སྔགས་རེ་རེ་ཞིང་བརྒྱ་རྩ་
བརྒྱད་བཟླས་ལ་ལྷའི་རང་བཞིན་དུ་དེ་བསྒོམས་ནས། མཆོད་ཡོན་གྱི་སྔགས་དང་རེ་རེ་ཞིང་མཆོད་ཡོན་ཕུལ་ལ། མཆོད་པ་ཐམས་ཅད་ཕྱག་རྒྱ་དང་བཅས་པས་ཡང་དག་པར་མཆོད་ལ་རང་གི་དམ་ཚིག་གི་ཕྱག་རྒྱས་མེ་ཏོག་གི་ལྕུག་མ་བཟུང་སྟེ། རེ་རེ་ཞིང་སྔགས་བརྒྱ་རྩ་བརྒྱད་མངོན་པར་བཟླས་ལ།
ཡང་བདུག་པས་བདུགས་ལ་ཉིན་ཞག་གཉིས་པ་ལ་དེ་བཞིན་དུ་བཟླས་པར་བྱའོ། །བུམ་པ་དེ་ཡང་ལྷག་པར་གནས་པ་ནི་བཅོམ་ལྡན་འདས་འགྲོ་བ་འདུལ་བའི་སྤྱན་སྔར་གཞག་པར་བྱའོ། །ལྷག་པར་གནས་པ་ཐམས་ཅད་ཇི་ལྟ་བ་བཞིན་དུ་རྗས་སུ་སྤྱད་ལ་དེ་ནས་ཉི་མ་འཆར་ཀའི་དུས་སུ་རྡོ་རྗེ་སློང་
བའི་ཕྱག་རྒྱ་དེ་ཉིད་ཀྱི་དཀྱིལ་འཁོར་ནམ་མཁར་བཞག་ལ་ཐིག་གདབ་པར་བྱའོ། །དེ་ལ་དང་པོར་རེ་ཞིག་ཚོན་རྩི་སྔོན་པོ་དང་སེར་པོ་དང་། དམར་པོ་དང་། ལྗང་གུ་དང་། དཀར་པོ་དྲི་ཞིམ་པ་བསྒོས་ལ། སྲད་བུ་སོ་སོར་ཁ་བསྒྱུར་ལ་གོ་རིམས་འདི་ཉིད་ཀྱིས་བཞག་སྟེ། ཧཱུཾ་ཏྲཱཾ་ཧྲཱིཿཨ་ཨོཾ་ཞེས་
བྱ་བའི་ས་བོན་གྱིས་མི་བསྐྱོད་པ་ལ་སོགས་པ་སྲད་བུ་དེ་རྣམས་ལ་བཀོད་དེ། ཨོཾ་དཱིཔྟ་དྲྀཥྚི་ཨཾ་ཀུ་ཤ་ཛཿཞེས་མིག་གཉིས་སུ་བཀོད་ལ། རབ་ཏུ་གཡོ་ཞིང་འབར་བའི་མིག །མིག་གི་རྫི་མ་འདྲེན་པ་ནི། །ཞེས་བྱ་བའི་འབར་བའི་ལྟ་བས་མི་བསྐྱོད་པ་ལ་སོགས་པ་བསྐུལ་ཞིང་འདི་སྐད་ཅེས་

བརྗོད་དེ། བཅོམ་ལྡན་འདས་དཀྱིལ་འཁོར་ཆེན་པོའི་ཐིག་གདབ་པར་བྱ་བའི་ཕྱིར། རྡོ་རྗེའི་ཐིག་བདག་ལ་སྩོལ་ཅིག་ཅེས་བྱ་བས་ཀྱང་བསྐུལ་བར་བྱའོ། །དེ་ནས་རང་གི་ས་བོན་གྱི་འོད་ཀྱིས་བསྐུལ་བའི་མི་བསྐྱོད་པ་ལ་སོགས་པའི་དེ་བཞིན་གཤེགས་པས་བཏང་བའི་སྲད་བུ་
འབར་བའི་ལྕགས་ཀྱུས་བཀུག་སྟེ། རང་གི་ལག་ན་གནས་པའི་སྲད་བུ་དེ་གང་བར་བྱས་ལ། ཨ་ནྱོ་ནྱ་ཨ་ནུ་ག་ཏ་སརྦྦ་དྷརྨྨ་སྥ་ར་སྥ་ར་ཨ་ནུ་པྲ་བིཥྚ་སརྦྦ་དྷརྨྨ། ཨ་ཏྱན་ཏ་ཨ་ནུ་པྲ་བིཥྚ་སརྦྦ་དྷརྨྨཱ་ཨོཾ་ཧཱུཾ་ཧྲཱིཿཧོཿ། ཞེས་བྱ་བ་ཟློས་ཤིང་བསྒྲིལ་བར་བྱའོ། །བསྒྲིལ་ནས་མིག་གཡས་དང་གཡོན་དུ་མ་དང་ཊ་
ལས་ཉི་མ་དང་ཟླ་བ་བསྐྱེད་ལ་བཛྲ་དྲྀཥྚ་ཕཊ་ཅེས་བྱ་བས་བརྟན་པར་བྱས་ལ། སྲད་བུ་དེ་དྲིས་བྱུགས་ལ་གསེར་ལ་སོགས་པའི་སྣོད་དུ་བཞག་ནས། དྲི་དང་མེ་ཏོག་དང་། བདུག་སྤོས་ཀྱིས་མཆོད་ལ། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བྱ་བ་རྡོ་རྗེ་བསྡམས་པས་བཟུང་སྟེ། ལན་བརྒྱ་རྩ་བརྒྱད་བཟླ་
བར་བྱའོ། །དེ་ནས་རྣམ་པར་སྣང་མཛད་དང་། འགྲོ་བ་འདུལ་བ་དང་། སངས་རྒྱས་ཐོར་ཚུགས་དང་། པདྨའི་ཏིང་ངེ་འཛིན་དང་། པདྨ་དོན་ཡོད་དབང་ཕྱུག་དང་སེམས་དཔའ་བཅུ་དྲུག་དང་། རྡོ་རྗེ་གནོད་སྦྱིན་བཟླས་པའི་དྲིས་དཀྱིལ་འཁོར་གྱི་ས་གཞི་ཡང་བྱུགས་ལ་མེ་ཏོག་གིས་མཛེས་པར་བྱས་ནས་
བར་སྣང་ན་བཞུགས་པའི་ལྷ་ཐམས་ཅད་ལ་ཕྱག་བྱས་ཏེ། ཨོཾ་ཧཱུཾ་ཧྲཱིཿཧོཿཞེས་བྱ་བས་མཆོད་ཡོན་ཕུལ་ལ། དཀྱིལ་འཁོར་གྱི་ལྷ་ཐམས་ཅད་ལ་མཆོད་པ་རྣམ་པ་ལྔ་དང་། སྒེག་མོ་ལ་སོགས་པས་ཡང་དག་པར་མཆོད་ལ། མིག་གཡས་གཡོན་དུ་ཡི་གེ་ཛཿསེར་པོ་བཀོད་ལ། ཉི་མ་དང་ཟླ་བ་སེར་པོའི་
སྣང་བ་བསྐྱེད་དེ། གླུ་དང་རོལ་མོ་ལ་སོགས་པའི་མཆོད་པ་དང་བཅས་པས་དཀྱིལ་འཁོར་བརྟག་པར་བྱའོ། །དེ་ལ་རེ་ཞིག་སྔར་ས་མངོན་པར་བཟླས་པའི་ཁ་དོག་དཀར་པོ་དྲི་ཞིམ་པར་སྲད་བུ་མངོན་པར་སྦངས་ལ། དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ་ཨོཾ་ཧཱུཾ་ཧྲཱིཿཧོཿཞེས་བྱ་བ་འདིས་རང་
གི་སྙིང་གའི་པདྨ་ལས་གྲུབ་པའི་གྲོགས་པོ་པདྨ་གར་གྱི་དབང་ཕྱུག་གི་གཟུགས་ཀྱིས་ཕྱུང་ལ། གཡོན་པའི་རྡོ་རྗེ་ཁུ་ཚུར་གྱིས་སྲད་བུ་དེ་བཟུང་སྟེ། ཛཿཞེས་བྱ་བས་བསྒྲུབ་པའི་གྲོགས་པོའི་ལག་ཏུ་སྲད་བུ་དེ་གཏད་ལ། ཕྱོགས་ཐམས་ཅད་མཉམ་པ་ཉིད་དུ་བསྒོམ་ཞིང་ཤར་ཕྱོགས་སུ་ཁ་བལྟས་ཏེ། ཚངས་

པའི་ཐིག་གདབ་པར་བྱའོ། །ཛཿཛཿཛཿཞེས་བྱ་བ་བསྒྲུབ་པའི་གྲོགས་པོས་ཡི་གེ་ཛཿགསུམ་གྱིས་ཐིག་སྐུད་དྲང་བར་བྱའོ། །ཡང་སློབ་དཔོན་ལྷོ་རུ་འདུག་ལ་བྱང་དུ་བལྟས་ཏེ། ཚངས་པའི་ཐིག་གཉིས་པ་གདབ་པར་བྱའོ། །དེ་ནས་མེའི་ཆར་གནས་ལ་བྱང་ཕྱོགས་སུ་བལྟས་ཏེ་ཕྱིའི་དཀྱིལ་འཁོར་གྱི་ཤར་གྱི་
ཐིག་གདབ་བོ། །རླུང་གི་ཕྱོགས་སུ་གནས་ལ་ལྷོ་ཕྱོགས་སུ་བལྟས་ཏེ་ནུབ་ཀྱི་ཐིག་གདབ་བོ། །དེ་ཉིད་དུ་འདུག་སྟེ་ཤར་དུ་བལྟས་ནས་བྱང་གི་ཕྱོགས་ཀྱི་ཐིག་གདབ་བོ། །ཡང་མེའི་མཚམས་སུ་འདུག་སྟེ་ནུབ་ཏུ་བལྟས་ལ་ལྷོ་ཕྱོགས་ཀྱི་ཐིག་གདབ་བོ། །དེ་བཞིན་དུ་ལྷའི་སྣམ་བུ་དང་། ཁ་ཁྱེར་གྱི་ཐིག་ཀྱང་
གདབ་པར་བྱའོ། །ཡང་མེའི་མཚམས་སུ་གནས་ཏེ་རླུང་གི་ཕྱོགས་ཀྱི་མཚམས་ཀྱི་བར་དུ་ཐིག་གདབ་པ་དང་། ཡང་བདེན་བྲལ་གྱི་མཚམས་སུ་གནས་ཏེ། དབང་ལྡན་གྱི་མཚམས་ཀྱི་བར་དུ་ཐིག་གདབ་པ་དང་། དེ་ནས་སྒོ་དང་། རྟ་བབས་ཀྱི་ཐིག་ཀྱང་བཏབ་ལ་དེའི་ནང་དུ་སྔར་བཤད་པའི་ཚུལ་གྱིས་ཕྱིའི་
དཀྱིལ་འཁོར་གྱི་