Luận tạng Tây Tạng (Tengyur) — Tập 58

་བྱང་བར་འགྱུར་རོ། །འཇིག་རྟེན་དབང་ཕྱུག་ཏིང་
འཛིན་དུ། །ཞེས་བྱ་བ་ལ་སོགས་པ་ནི་པདྨ་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་པདྨའི་ཏིང་ངེ་འཛིན་ནམ། དེའི་རིགས་ཀྱི་ལྷ་རྣམས་ཀྱི་ཕྱག་རྒྱ་བཅིངས་ཏེ། དེའི་ང་རྒྱལ་གྱིས་གནས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་དུ་བརྗོད་
ལ། ཨོཾ་སརྦྦ་པཱ་པཾ་པྲ་ཎ་ཤ་ན་དྷརྨྨ་པདྨ། ཞེས་བྱ་བ་བརྗོད་པ་དེ་ལྟ་བུས་ཀྱང་སྡིག་པ་ཐམས་ཅད་རབ་ཏུ་འཇོམས་པར་འགྱུར་རོ། །མདོར་ན་གང་ཡང་རུང་བ་ཡི། །ལས་ཀྱི་ཕྱག་རྒྱ་ལེགས་བཅིངས་ལ། །ཞེས་བྱ་བ་ལ་སོགས་པ་ནི་ལས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་
དབང་ཕྱུག་གམ། དེའི་རིགས་ཀྱི་ལྷ་རྣམས་ཀྱི་ལས་ཀྱི་ཕྱག་རྒྱ་བཅིངས་ལ། དེའི་ང་རྒྱལ་གྱིས་གནས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་དུ་བརྗོད་ཅིང་། ཨོཾ་སརྦྦ་ཀརྨྨཱ་ཨཱ་བ་ར་ཎ་བི་ཤོ་དྷ་ཡ་དྷརྨྨ་ཀརྨྨ་པདྨ་ཞེས་བརྗོད་པ་དེ་ལྟ་བུས་
ལས་ཀྱི་སྒྲིབ་པ་ཀུན་ལས་རྣམ་པར་དག་པར་འགྱུར་རོ། །དེ་ནས་སྒྲིབ་པ་ཐམས་ཅད་ཟད་པར་འགྱུར་བའི་ཡེ་ཤེས་བསླབ་པའོ་ཞེས་བྱ་བ་ལ། དེ་ལ་སྒྲིབ་པ་ནི་རྣམ་པ་བཞི་སྟེ། གཟུང་བ་དང་འཛིན་པ་ཐམས་ཅད་ཀྱི་བག་ཆགས་ཀུན་གཞིའི་རྣམ་པར་ཤེས་པ་དང་ལྷན་ཅིག་གནས་པའི་རྣམ་པར་སྨིན་
པའི་སྒྲིབ་པ་དང་། བདག་ཏུ་རྨོངས་པ་དང་། བདག་ཏུ་ང་རྒྱལ་དང་། བདག་ཏུ་ལྟ་བ་དང་། བདག་ཏུ་ཆགས་པ་རྣམས་ཉོན་མོངས་པ་ཅན་གྱི་ཡིད་དང་བཅས་པའི་ཉོན་མོངས་པའི་སྒྲིབ་པ་དང་། འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་། གཉིད་དང་། རྒོད་བ་དང་། འགྱོད་

པ་དང་། ཐེ་ཚོམ་རྣམས་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པའི་སྒྲིབ་པ་ལྔ་པོ་དང་། མཚམས་མེད་པ་ལྔ་དང་། དམ་པའི་ཆོས་སྤོང་བ་ལ་སོགས་པ་ལུས་དང་ངག་གི་ལས་རྣམས་མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་རྣམས་དང་མཚུངས་
པར་ལྡན་པར་གྱུར་པའི་ལས་ཀྱི་སྒྲིབ་པ་སྟེ་རྣམ་པ་བཞི་ཡིན་ནོ། །སྒྲིབ་པ་རྣམ་པ་བཞི་པོ་དེ་དག་ཡོངས་སུ་ཟད་ཅིང་འཇིག་པར་འགྱུར་བ་དེས་ངེས་པའི་ཡེ་ཤེས་དེ་སློབ་པོ། །འཇིག་རྟེན་དབང་གི་ཕྱག་རྒྱ་ཆེར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་
པའི་འགྲོ་བ་འདུལ་བའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བའི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། དེའི་ཕྱག་རྒྱ་ཆེན་པོའི་རང་བཞིན་ནམ། དེའི་རིགས་ཀྱི་ལྷའི་རང་བཞིན་བདག་
ཉིད་རྣམ་པར་བསམས་ཏེ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་དུ་བརྗོད་ཅིང་། ཤུདྡྷ་ཤུདྡྷ་ཞེས་བརྗོད་ནས། བདག་ཉིད་གཟུགས་བརྙན་དང་མཚུངས་པའི་རྣམ་པར་ཐར་པའི་སྒོ་སྟོང་པ་ཉིད་ཀྱི་རང་བཞིན་དུ་བསམ་པ་དང་། མི་བསྐྱོད་
པ་བསྒོམས་ནས། ཨོཾ་པཱ་པཾ་ཀྵ་ཡ་པདྨ། ཞེས་བྱ་བའི་སྙིང་པོ་བརྗོད་དོ། །དེ་ལྟར་བཟླས་པས་སྟོང་པ་ཉིད་ཀྱི་ཏིང་ངེ་འཛིན་གྱི་གེགས་སུ་གྱུར་པའི་ལས་རྣམས་དང་རྣམ་པར་སྨིན་པའི་སྒྲིབ་པའི་རང་བཞིན་རྣམ་པར་དག་པར་འགྱུར་རོ། །འཇིག་རྟེན་དབང་གི་ཏིང་འཛིན་གྱིས། །ལས་ཀྱི་དམ་ཚིག་བཅིངས་ནས་
ནི། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་གཙུག་ཕུད་སངས་རྒྱས་ཀྱི་རྣལ་འབྱོར་རམ། དེའི་རིགས་ཀྱི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་གཙུག་ཕུད་སངས་རྒྱས་ཀྱི་དམ་ཚིག་གི་ཕྱག་རྒྱའམ། དེའི་རིགས་
ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་ཕྱག་རྒྱ་ནི་སེམས་དཔའི་གཟུགས་ཀྱི་བདག་ཉིད་དུ་བསྒོམས་ནས། ནམ་མཁའ་དང་མཉམ་པའི་ཡེ་ཤེས་རྣམ་པར་ཐར་པའི་སྒོ་མཚན་མ་མེད་པའི་བདག་ཉིད་བསྒོམ་ཞིང་། བུདྡྷ་བུདྡྷ་ཞེས་བཟླས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ལ་སོགས་

པ་སྔ་མ་བཞིན་དུ་བརྗོད་པ་དང་། ཨོཾ་ཨ་བ་ར་ཎ་ཀྵ་ཡ་པདྨ་ཞེས་ལན་གསུམ་དུ་བཟླས་པ་དེ་ལྟ་བུས་ནི་ཉོན་མོངས་པའི་ཡིད་དང་བཅས་པའི་ཉོན་མོངས་པའི་སྒྲིབ་པ་ཇི་སྐད་དུ་བཤད་པའི་ཆགས་པ་དང་། ང་རྒྱལ་དང་། རྨོངས་པ་དང་། ལྟ་བ་ལ་སོགས་པའི་ལས་ཀྱི་སྒྲིབ་པ་རྣམས་རྣམ་པར་དག་པར་འགྱུར་རོ། །
འཇིག་རྟེན་དབང་པོར་སྙོམས་ཞུགས་ལ། །ཞེས་བྱ་བ་ལ་སོགས་པ་ནི། དེ་བཞིན་དུ་ཏིང་ངེ་འཛིན་པདྨའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་བཅིངས་ཏེ། རང་གི་ཕྱག་རྒྱ་སེམས་དཔའི་གཟུགས་ཀྱི་བདག་ཉིད་དུ་བསྒོམས་
ནས་སྔ་མ་བཞིན་དུ་སྡིག་པ་བཤགས་པ་བྱས་ཏེ། དྷི་དྷི་དྷི་དྷི་ཞེས་བྱ་བའི་ཡི་གེ་དྷི་བཞི་བརྗོད་ཅིང་རང་བཞིན་གྱིས་རྣམ་པར་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་སྒོ་མངོན་དུ་བྱས་ནས་ནི་བ་ར་ཎ་ཀྵ་ཡ་པདྨ་ཞེས་ལན་གསུམ་བརྗོད་པ་དེ་ལྟ་བུས་འདོད་པ་ལ་འདུན་པ་དང་། གནོད་སེམས་དང་།
རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་གྱི་མཚན་ཉིད་ཀྱི་སྒྲིབ་པ་རྣམས་རྣམ་པར་ཐར་པའི་སྒོ་སྨོན་པ་མེད་པའི་གེགས་སུ་གྱུར་པའི་སྡིག་པ་རྣམས་སོ་སོར་ཀུན་དུ་རྟོག་པའི་ཡེ་ཤེས་ཀྱིས་སྤོང་བར་འགྱུར་བ་ཡིན་ནོ། །འཇིག་རྟེན་དབང་པོའི་ཏིང་འཛིན་གྱིས། །ལས་
ཀྱི་ཕྱག་རྒྱ་བཅིངས་ནས་ཀྱང་། །ཞེས་བྱ་བ་ལ་སོགས་པ་ལ་སྔ་མ་བཞིན་དུ། འཇིག་རྟེན་དབང་ཕྱུག་གི་རྣལ་འབྱོར་བྱས་ལ་ལས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ཏེ། རང་གི་ཕྱག་རྒྱ་སེམས་དཔའི་གཟུགས་
ཀྱི་བདག་ཉིད་དུ་བསྒོམས་ནས། སྔ་མ་བཞིན་དུ་སྡིག་པ་བཤགས་པ་བྱས་ཏེ། ཡི་གེ་ཧི་བཞི་བརྗོད་དོ། །བདག་ཉིད་རྣམ་པར་ཐར་པའི་སྒོ་འོད་གསལ་བའི་རང་བཞིན་དུ་བསྒོམས་ཏེ། ཨོཾ་ཀརྨྨ་ཀྵ་ཡ་པདྨ། ཞེས་ཟློས་ཤིང་། ཆོས་ཐམས་ཅད་རང་བཞིན་གྱིས་འོད་གསལ་བ་བསྒོམས་ལ། མཚམས་
མེད་པ་ལ་སོགས་པའི་ལས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་བར་དུ་གཅོད་པ་རྣམས་རྣམ་པར་དག་པར་འགྱུར་རོ། །དེ་ལྟར་ལས་ཀྱི་སྒྲིབ་པ་ཐམས་ཅད་སྦྱང་བ་བྱས་ནས། བསོད་ནམས་ཀྱི་ཚོགས་ཡོངས་སུ་རྫོགས་པར་བྱ་བའི་ཕྱིར་མཆོད་པར་བྱ་བ་ཡིན་ནོ། །སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་

འབྱོར་གྱིས་ལས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ཏེ། རང་གི་ཕྱག་རྒྱ་སེམས་དཔའི་བདག་ཉིད་དུ་བསམས་ཏེ། ཡི་གེ་ཨོཾ་ལན་བཞི་བརྗོད་ཅིང་རིན་པོ་ཆེ་སྣ་བདུན་ལ་སོགས་པའི་པདྨའི་སྤྲིན་
སྤྲུལ་ལ། ཨོཾ་ཨཾ་ཀརྨ་པདྨ་ཞེས་བརྗོད་ཅིང་དེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པར་བྱའོ། །འཇིག་རྟེན་དབང་པོའི་ཏིང་འཛིན་གྱིས། །དམ་ཚིག་མཆོག་ནི་བཅིངས་ནས་ཀྱང་། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་འབྱོར་ལ་གནས་ནས།
ལས་ཀྱི་དཀྱིལ་འཁོར་ལས་གསུངས་པའི་གཙུག་ཕུད་སངས་རྒྱས་ཀྱི་དམ་ཚིག་གི་ཕྱག་རྒྱའམ། དེའི་རིགས་ཀྱི་ལྷའི་ཕྱག་རྒྱ་བཅིངས་ལ། ཡི་གེ་བྷུ་རྣམ་པ་བཞི་ལས་རིན་ཆེན་པདྨ་ལ་སོགས་པའི་མཆོད་པའི་སྤྲིན་སྔ་མ་བཞིན་དུ་སྤྲུལ་ལ། ཨོཾ་བྷུ་ཀ་ར་པདྨ་ཞེས་བརྗོད་པས། སངས་རྒྱས་དང་བྱང་
ཆུབ་སེམས་དཔའ་ཐམས་ཅད་དེས་མཆོད་པར་བྱའོ། །འཇིག་རྟེན་དབང་པོར་སྙོམས་ཞུགས་ལ། །ཞེས་བྱ་བ་ལ་སོགས་པ་ལ་སྔ་མ་བཞིན་དུ་འཇིག་རྟེན་དབང་པོའི་རྣལ་འབྱོར་ལ་གནས་ནས། ལས་ཀྱི་དཀྱིལ་འཁོར་ལས་གསུངས་པའི་པདྨའི་ཏིང་ངེ་འཛིན་གྱི་ཕྱག་རྒྱ་ཆེན་པོའམ། དེའི་རིགས་ཀྱི་ཕྱག་
རྒྱ་ཆེན་པོ་བཅིངས་ཏེ། རང་གི་ཕྱག་རྒྱ་སེམས་དཔའི་གཟུགས་ཀྱི་བདག་ཉིད་དུ་བསྒོམས་ལ། ཡི་གེ་ཧེ་རྣམ་པ་བཞི་ལས་རྡོ་རྗེ་པདྨ་ལ་སོགས་པའི་མཆོད་པའི་སྤྲིན་སྤྲུལ་ལ། ཨོཾ་ཧེ་ཀ་ར་པདྨ་ཞེས་བྱ་བ་འདིས་སངས་རྒྱས་ཐམས་ཅད་ལ་དེས་མཆོད་པར་བྱའོ། །པདྨོ་ལས་ཀྱི་ཕྱག་རྒྱ་ནི། །ཤིན་ཏུ་
མཉམ་པར་གཞག་བཅིངས་ན། །ཞེས་བྱ་བ་ནི་སྔ་མ་བཞིན་དུ་འཇིག་རྟེན་དབང་པོའི་རྣལ་འབྱོར་ལ་གནས་ཏེ། ལས་ཀྱི་དཀྱིལ་འཁོར་ལས་བཤད་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་དང་། དེའི་རིགས་ཀྱི་ལས་ཀྱི་ཕྱག་རྒྱ་བཅིངས་ལ། རང་གི་ཕྱག་རྒྱ་སེམས་དཔའི་གཟུགས་
ཀྱི་བདག་ཉིད་དུ་བསྒོམས་ནས། ཡི་གེ་དྷི་རྣམ་པ་བཞི་ལས་སྣ་ཚོགས་པདྨ་ལ་སོགས་པའི་མཆོད་པའི་སྤྲིན་སྤྲུལ་ལ། ཨོཾ་དྷེ་ཀ་ར་ཀ་ར་མ་པདྨ་ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་ལ་མཆོད་པར་བྱའོ། །དེ་ནས་ཞེས་བྱ་བ་ནི་མཆོད་པའི་ཡེ་ཤེས་ཀྱི་རྗེས་ཐོགས་ལའོ། །དངོས་

གྲུབ་ཀྱི་དོན་གྱི་ཡེ་ཤེས་ནི་དངོས་གྲུབ་ཀྱི་ཡེ་ཤེས་ཏེ་སློབ་པར་བྱ་བའོ། །འཇིག་རྟེན་དབང་པོའི་ཕྱག་རྒྱ་ཆེར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་རྣལ་འབྱོར་དང་ལྡན་པའམ། དེའི་རིགས་ཀྱི་རྣལ་འབྱོར་དང་ལྡན་པས་ལས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་
ཕྱག་རྒྱ་ཆེན་པོ་དང་། དེའི་རིགས་ཀྱི་ཕྱག་རྒྱ་ཆེན་པོ་བཅིངས་ལ། རང་གི་ཕྱག་རྒྱ་སེམས་མའི་བདག་ཉིད་དུ་བསྒོམས་ནས། ཡི་གེ་ཧྲི་རྣམ་པ་བཞི་བསམས་ལ། དེ་ནས་ཨོཾ་ཧྲཱི་སིདྡྷྱ་ཞེས་བྱ་བ་བཟླས་པས་དངོས་གྲུབ་འགྲུབ་པར་འགྱུར་རོ། །འཇིག་རྟེན་དབང་པོའི་ཏིང་འཛིན་གྱིས། །དམ་
ཚིག་མཆོག་ནི་བཅིངས་ནས་ནི། །ཞེས་བྱ་བ་ལ་སོགས་པ་སྔ་མ་བཞིན་དུ་འཇིག་རྟེན་དབང་པོའི་རྣལ་འབྱོར་དང་ལྡན་པས་ལས་ཀྱི་དཀྱིལ་འཁོར་ལས་གསུངས་པའི་སངས་རྒྱས་གཙུག་ཕུད་དང་། དེའི་རིགས་ཀྱི་ལྷའི་དམ་ཚིག་གི་ཕྱག་རྒྱ་བཅིངས་ལ། ཡི་གེ་ཤྲི་རྣམ་པ་བཞི་ལས་
བདག་ཉིད་རང་གི་ཕྱག་རྒྱ་སེམས་དཔར་བསྐྱེད་ལ། ཨོཾ་ཤྲི་སིདྡྷྱ་ཞེས་བརྗོད་པས་རང་གི་དངོས་གྲུབ་ཐོབ་པར་འགྱུར་རོ། །འཇིག་རྟེན་དབང་པོ་མཉམ་གཞག་པར། །ཞེས་བྱ་བ་ལ་སོགས་པ་སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་འབྱོར་དང་ལྡན་པས་ལས་ཀྱི་དཀྱིལ་འཁོར་ལས་
གསུངས་པའི་ཏིང་ངེ་འཛིན་པདྨ་དང་། དེའི་རིགས་ཀྱི་ལྷ་རྣམས་ཀྱི་ཕྱག་རྒྱ་ཆེན་པོ་བཅིངས་ལ། ཡི་གེ་དྷི་ཀ་རྣམ་པ་བཞིས་རང་གི་ཕྱག་རྒྱ་སེམས་དཔའི་བདག་ཉིད་དུ་ཁྲོ་བ་དང་ལྡན་པར་བསམས་ལ། དེ་ནས་ཨོཾ་དྷི་ཀ་སིདྡྷྱ་ཞེས་བརྗོད་ཅིང་རང་བཞིན་གྱིས་རྣམ་པར་དག་པ་བསྒོམ་པར་བྱའོ། །
དེ་ལྟར་རང་བཞིན་གྱིས་དག་པའི་ཁྲོ་བོའི་ཏིང་ངེ་འཛིན་གྱིས་དངོས་གྲུབ་འགྲུབ་པར་འགྱུར་རོ། །པདྨ་ཆེན་པོ་དགེ་བ་ཡི། །ལས་ཀྱི་ཕྱག་རྒྱ་བསླབ་པར་བྱ། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་གསུངས་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱའམ། དེའི་རིགས་ཀྱི་ལྷ་རྣམས་ཀྱི་ཕྱག་
རྒྱ་བཅིངས་ཏེ། རང་གི་ཕྱག་རྒྱ་སེམས་དཔའི་བདག་ཉིད་དུ་བྱས་ནས། ཡི་གེ་སི་རྣམ་པ་བཞིས་འོད་གསལ་བའི་རྣམ་པའི་བདག་ཉིད་དུ་བསྒོམས་ལ། ཨོཾ་སི་སིདྡྷྱ་ཞེས་བརྗོད་ཅིང་བདག་ཉིད་དུ་བསྒོམས་ན་དངོས་གྲུབ་ཐོབ་པར་འགྱུར་རོ། །དེ་ནས་གཞན་ཡང་དེ་ནས་ཞེས་བྱ་བ་ལ་སོགས་པས། ལས་ཀྱི་གསང་

བའི་ཕྱག་རྒྱའི་ཡེ་ཤེས་བསྟན་པར་བྱའོ། །གསང་བས་ན་གསང་བ་སྟེ། སེམས་ཀྱི་བྱ་བ་གང་ཡིན་པའོ། །འཇིག་རྟེན་དབང་པོ་སྙོམས་ཞུགས་ལ། །ཞེས་བྱ་བ་ནི་པདྨ་རིགས་ཀྱི་ལྷའི་རྣལ་འབྱོར་རོ། །བུད་མེད་ཀུན་དང་རྩེ་བྱེད་ཅིང་། །ཞེས་བྱ་བ་ནི་རང་གི་རིག་པའི་ལྷའོ། །ཨ་
ཧོ་སུ་ཁ་ཞེས་བརྗོད་ཅིང་སངས་རྒྱས་ཐམས་ཅད་འཇིག་རྟེན་དབང་ཕྱུག་གི་རྣལ་འབྱོར་པས་མཆོད་པར་བྱའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱིས་པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་
ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་འཁོར་ལས་བཤད་པའི་རིག་པ་དང་རང་གི་རིག་པའི་ལྷ་མོ་སྤྲུལ་ལ། བསྡུ་བ་ལ་སོགས་པ་བྱས་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། བདག་ཉིད་གཟུགས་བརྙན་དང་མཚུངས་པ་དང་། དེ་ཡང་གཟུགས་བརྙན་དང་མཚུངས་
པར་བསྒོམས་ལ་ཨ་ཧོ་སུ་ཁ་ཞེས་བརྗོད་ཅིང་། དེ་དང་ལྷན་ཅིག་པའི་སྦྱོར་བ་བསམས་ཏེ། དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དེའི་རང་བཞིན་དུ་བསམས་ལ། ཨོཾ་སརྦྦ་པཱུ་ཛ་པྲ་བརྟ་ན་ཡ་མཾ་ཞེས་བྱ་བ་འདི་བརྗོད་དོ། །དེ་ནས་ཇི་སྲིད་དུ་འདི་ཉིད་བརྗོད་ཅིང་ཐུན་བཞིའི་སྦྱོར་བས་
དེ་སྲིད་དུ་བསྒོམས་ནས། དེའི་རང་བཞིན་མངོན་སུམ་ལྟ་བུར་འགྱུར་རོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །རིག་པ་དེ་ཡང་མངོན་སུམ་དུ་འོངས་ནས་ལྷན་ཅིག་མཉམ་པར་སྦྱོར་བ་བྱས་ནས། དེའི་ལུས་ལ་འཇུག་པར་འགྱུར་བ་དང་། དེ་ནས་འདི་འཇིག་རྟེན་དབང་
ཕྱུག་དང་འདྲ་བར་འགྱུར་རོ། །འཇིག་རྟེན་དབང་པོར་སྙོམས་ཞུགས་ལ། །བུད་མེད་ཀུན་དང་རྩེ་བྱེད་ཅིང་། །ཞེས་བྱ་བ་ནི་སྔ་མ་བཞིན་དུ་ཐམས་ཅད་བྱས་ནས། རང་གི་རིག་མ་དང་ལྷན་ཅིག་ཏུ་མཉམ་པར་སྦྱོར་བར་བསྒོམས་ལ། པྲི་ཡ་པྲི་ཡ་ཞེས་བརྗོད་ཅིང་། དེ་བཞིན་གཤེགས་པ་ཐམས་
ཅད་ཀྱང་དེའི་རང་བཞིན་དུ་བསམས་ཏེ། ཨོཾ་པྲི་ཏི་ཀ་ར་པདྨ་ཧོ་ཞེས་བརྗོད་ནསོ། དེ་བཞིན་གཤེགས་པ་ཐམས་ཅད་ནམ་མཁའ་དང་མཉམ་པར་ལྷག་པར་མོས་ཤིང་དགའ་བ་བསྐྱེད་ལ། ཕྱིས་ཇི་སྲིད་དུ་བདག་ཉིད་རིག་པ་དང་ལྷན་ཅིག་པའི་སྦྱོར་བ་དང་ལྡན་པ་དེ་སྲིད་དུ་བསྒོམས་

ན། དེའི་བདག་ཉིད་མངོན་སུམ་ལྟ་བུར་མཐོང་བར་འགྱུར་རོ། །དེ་ནས་བསྒྲུབས་པ་དང་དེའི་རིག་པའི་ལྷ་མོ་མངོན་སུམ་དུ་འོངས་ནས་ལྷན་ཅིག་ཏུ་མཉམ་པར་སྦྱོར་བ་བྱས་ནས། དེ་ལུས་ལ་འཇུག་པར་འགྱུར་རོ། །སྐད་ཅིག་མ་དེ་ཉིད་ཀྱི་ཚེ་འདི་འཇིག་རྟེན་དབང་ཕྱུག་དང་འདྲ་བར་འགྱུར་རོ། །འཇིག་རྟེན་
དབང་པོར་སྙོམས་ཞུགས་ལ། །བུད་མེད་ཀུན་དང་རྩེ་བྱེད་ཅིང་། །ཞེས་བྱ་བ་ལ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཨ་ཧོ་ར་ཏི་ཞེས་བརྗོད་ཅིང་ལྷ་མོ་དང་ལྷན་ཅིག་མཉམ་པར་སྦྱོར་བ་བསྒོམས་ལ། དེ་བཞིན་གཤེགས་པ་ཐམས་ཅད་ཀྱང་དེའི་རང་བཞིན་དུ་བསྒོམ་མོ། །དེ་ནས་སྣང་བརྙན་ཙམ་གྱི་
རྣལ་འབྱོར་ལ་གནས་ཏེ། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྒོམས་ལ། ཨོཾ་ར་ཏི་པྲ་བརྟ་ན་པདྨ་ཞེས་བརྗོད་ཅིང་། དེ་ཇི་སྲིད་དུ་བདག་ཉིད་དང་ལྷན་ཅིག་ཏུ་མཉམ་པར་སྦྱོར་བའི་བསྒོམ་པ་དང་ལྡན་པ་དེ་སྲིད་དུ་བསྒོམ་པ་ན། དེའི་རང་བཞིན་དུ་བདག་ཉིད་མཐོང་བར་འགྱུར་རོ། །
དེ་ནས་སྔ་མ་བཞིན་དུ་བསྒྲུབ་པར་བྱའོ། །འཇིག་རྟེན་དབང་པོར་སྙོམས་ཞུགས་ལ། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་ཐམས་ཅད་བྱས་ལ། ཆོས་ཐམས་ཅད་རང་བཞིན་གྱིས་རྣམ་པར་དག་པ་འོད་གསལ་བའོ་ཞེས་བྱ་བ་བསྒོམ་ཞིང་། རིག་པའི་ལྷ་མོ་དང་ལྷན་ཅིག་མཉམ་པར་སྦྱོར་
བར་བསྒོམས་ནས། སུ་ཁ་སུ་ཁ་ཞེས་བརྗོད་ཅིང་། དེ་བཞིན་གཤེགས་པ་ཐམས་ཅད་ཀྱང་དེའི་རང་བཞིན་དུ་བསམ་པར་བྱའོ། །ཨོཾ་མ་ཧཱ་སུ་ཁ་པདྨ་དྷིཌྚ་ཧཾ་ཞེས་ལན་གསུམ་བརྗོད་ཅིང་དེ་བཞིན་གཤེགས་པ་ཐམས་ཅད་ལ་དེའི་བདེ་བས་ཡང་དག་པར་མཆོད་ལ། ཕྱིས་གང་གི་ཚེ་སྔ་མ་བཞིན་དུ་བདག་
ཉིད་དང་ལྷན་ཅིག་པར་བསྒོམ་པ་དེའི་ཚེ་མངོན་སུམ་ལྟ་བུར་དེའི་རང་བཞིན་དུ་བདག་ཉིད་མཐོང་བར་འགྱུར་རོ། །དེ་ནས་སྔ་མ་བཞིན་དུ་བསྒྲུབ་པར་བྱའོ། །འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་ནི། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྔ་མ་
བཞིན་དུ་རང་གི་ལྷའི་རྣལ་འབྱོར་གྱི་ཕྱག་རྒྱ་བཞི་པོ་རྣམས་བྱས་ལ། ཕྱིས་འགྲོ་བ་འདུལ་བའི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ་བསྒྲུབ་པར་བྱའོ་ཞེས་བྱ་བ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་ཡེ་ཤེས་བསླབ་

པ་བསྟན་པའི་རྗེས་ཐོགས་ཉིད་ལའོ། །ལས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོ་ནི། ལས་ཀྱི་ཕྱག་རྒྱ་ཆེན་པོ་དེ་དང་དེ་བཅིང་བའི་མཚན་ཉིད་དོ། །ཇི་ལྟ་བ་བཞིན་དུ་བསླབ་པར་བྱའོ་ཞེས་བྱ་བ་ནི་མནའི་སྙིང་པོ་བྱིན་ནས་སོ། །འདི་སྐད་སྟོན་པ་ཡིན་ཏེ། རང་གི་མཚན་མ་དང་བཅས་པའི་ཐལ་མོ་
སྦྱར་ལ། སྙིང་གར་རྩིབ་ལོགས་རྒྱབ་སྦྱོར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་བཞག །རིམ་པ་འདིས་གནས་ཇི་ལྟ་བ་བཞིན་དུ་གཞག་པ་ནི། པདྨ་སངས་རྒྱས་ལ་སོགས་པའི་ལྷ་མོ་ནས། པདྨ་ཁུ་ཚུར་གྱི་ལྷ་མོའི་མཐར་ཐུག་པའི་ལག་པ་བསྒྱུར་
བའི་ཚུལ་གྱིས་མཚོན་པ་ནི། སེམས་མ་བཅུ་དྲུག་གི་ཕྱག་རྒྱ་ཆེན་པོར་འགྱུར་རོ། །ལྷག་མ་རྣམས་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པ་ཉིད་ཡིན་པར་ཤེས་པར་བྱའོ། །དེ་ནས་ཞེས་བྱ་བ་ནི་དམ་ཚིག་གི་ཕྱག་རྒྱ་སྟོན་ཏེ། པདྨའི་ཐལ་མོ་སྦྱར་ཏེ་ཞེས་བྱ་བ་ནི་འགྲོ་བ་འདུལ་བའི་
གཟུགས་ཀྱི་དཀྱིལ་འཁོར་གྱི་རྣམ་པར་སྣང་མཛད་ཀྱི་གནས་ཀྱི་ཕྱག་རྒྱར་བསྟན་པའི་པདྨོའི་ཐལ་མོ་སྦྱར་བ་མཆོག་ཅེས་བྱ་བའི་དེ་ཉིད་འདིར་སངས་རྒྱས་པདྨོ་ལ་སོགས་པའི་ལྷ་མོ་ནས། པདྨའི་ཁུ་ཚུར་གྱི་ལྷ་མོའི་མཐར་ཐུག་པ་རྣམས་ཀྱི་དམ་ཚིག་གི་ཕྱག་རྒྱར་འགྱུར་རོ། །ལས་ཀྱི་དཀྱིལ་འཁོར་ཚུལ་
གྱིས་ནི་ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་དུ་རྡོ་རྗེ་བསྡམས་པའི་ཕྱག་རྒྱ་བཅིངས་ནས། གནས་རྣམས་ཀུན་དུ་གཞག་པར་བྱས་ན་དམ་ཚིག་གི་ཕྱག་རྒྱར་འགྱུར་བ་དེ་བཞིན་དུ་འདིར་ཡང་། ཐལ་མོ་སྦྱར་བའི་ཕྱག་རྒྱ་གནས་རྣམས་ཀུན་དུ་གཞག་པར་བྱས་ན་ལྷ་མོ་ཐམས་ཅད་ཀྱི་དམ་
ཚིག་གི་ཕྱག་རྒྱར་འགྱུར་རོ། །འདི་སྐད་སྟོན་པ་ཡིན་ཏེ། ཇི་སྐད་བཤད་པའི་ཐལ་མོ་སྦྱར་བ་བཅིངས་ལ། སྙིང་གར་རྩིབ་ལོགས་རྒྱབ་སྦྱོར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་བཞག །ཅེས་བྱ་བའི་གོ་རིམས་འདིས་སངས་རྒྱས་པདྨོའི་ལྷ་མོ་
ནས་བརྩམས་ནས། པདྨ་ཁུ་ཚུར་མའི་མཐར་ཐུག་པ་བཅུ་དྲུག་གི་དམ་ཚིག་གི་ཕྱག་རྒྱར་འགྱུར་རོ། །ལྷག་མ་རྣམས་ཀྱི་ནི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་དམ་ཚིག་གི་ཕྱག་རྒྱ་ཉིད་ཡིན་པར་ཤེས་པར་བྱའོ། །གཞན་ཡང་དེ་ནས་ཞེས་བྱ་བ་ལ་སོགས་པ་ནི། པདྨའི་རིགས་ཀྱི་ལས་

ཀྱི་དཀྱིལ་འཁོར་གྱི་ཆོས་ཀྱི་ཕྱག་རྒྱ་དེ་ནི། ཏྲ་ཞེས་བྱ་བ་ནི་བརྗོད་པར་བྱའོ། །རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་ལས་བཤད་པའི་ཆོས་ཀྱི་ཕྱག་རྒྱ་ཉིད་ལ་ཡི་གེ་ཏྲ་ཀུན་གྱི་མཐར་སྦྱར་བར་ཤེས་པར་བྱའོ་ཞེས་བྱ་བའི་དོན་ཏོ། །ལས་ཀྱི་ཕྱག་རྒྱ་གཉིས་བྱས་ལ། །ལས་ཀྱི་ཕྱག་རྒྱ་ཡང་དག་སྦྱར། །ཞེས་
བྱ་བ་ནི་རྐེད་པའི་གནས་སུ་ཐལ་མོ་སྦྱར་བ་གཉིས་སུ་བྱས་ནས། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་པའོ། །ཞེས་བྱ་བ་ལ་སོགས་པའི་ཚུལ་གྱིས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་
གསུངས་པའི་གོ་རིམས་ཀྱི་རྣམ་པར་སྣང་མཛད་ནས་བརྩམས་ནས། པདྨ་འབེབས་པའི་བར་གྱི་མཐར་ཐུག་པའི་ལྷ་མོ་ཐམས་ཅད་ཀྱི་ལས་ཀྱི་ཕྱག་རྒྱར་འགྱུར་རོ། །དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ལས། པདྨའི་རིགས་ཀྱི་ལས་ཀྱི་དཀྱིལ་འཁོར་གྱི་འགྲེལ་པ་རྫོགས་
སོ།། །།དེ་ལྟར་རྒྱས་པ་ལ་དགའ་བའི་སེམས་ཅན་རྗེས་སུ་གཟུང་བར་བྱ་བའི་ཕྱིར། པདྨའི་རིགས་ཀྱི་རང་བཞིན་གྱི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་ཀྱི་དཀྱིལ་འཁོར་རྣམས་བསྟན་ནས། ད་ནི་བར་མ་ལ་དགའ་བའི་སེམས་ཅན་རྗེས་སུ་གཟུང་བར་བྱེད་
པའི་འགྲོ་བ་འདུལ་བའི་དཀྱིལ་འཁོར་ཆེན་པོ་ལ་སོགས་པ་རྣམ་པ་བཞི་བསྡུས་པར་གྱུར་བ་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་
ཞེས་བྱ་བའི་ཐ་ཚིག་གོ། །འདིར་དང་པོར་སྦྱོར་བའི་ཏིང་ངེ་འཛིན་ནི། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་དང་པོར་སྦྱོར་བ་ཉིད་ཡིན་ནོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །འགྲོ་བ་འདུལ་བའི་དཀྱིལ་འཁོར་རྣམ་པ་བཞི་ལ་ལྟོས་ནས་ཡང་ཞེས་བྱ་བ་སྨོས་སོ། །
རྡོ་རྗེ་ཆོས་ཀྱི་དམ་ཚིག་གི་ཕྱག་རྒྱ་ཞེས་བྱ་བ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྡོ་རྗེ་ཆོས་སོ། །དེའི་དམ་ཚིག་ནི་པདྨའི་རིགས་ཀྱི་རང་བཞིན་ཏེ། པདྨའི་རིགས་ཀྱི་ཕྱག་རྒྱ་བཞི་བའི་དཀྱིལ་འཁོར་རོ། །དེ་ཉིད་ཀྱི་ཕྱག་རྒྱ་ནི་སེམས་ཅན་གྱི་ཁམས་ལ་གཟུགས་བརྙན་གྱི་ཚུལ་གྱིས་རྒྱས་འདེབས་པའི་ཕྱིར་རོ། །

དེ་གང་གིས་བྱིན་གྱིས་བརླབས་ཤིང་བསྐྱེད་པའི་ཏིང་ངེ་འཛིན་ཏེ། མིང་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས་ཕྱིས་འཆད་པར་འགྱུར་བའི་ཕྱག་རྒྱ་ཇི་སྐད་དུ་བཤད་པ་བསྐྱེད་པའི་སྙིང་པོ་འདིས་གསུངས་པ་ནི་བཤད་པའོ། འདི་སྐད་སྟོན་པ་ཡིན་ཏེ། བཅོམ་ལྡན་
འདས་རྣམ་པར་སྣང་མཛད་པདྨའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་སྤྲུལ་པའི་ཕྱིར། འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀ་ན་གནས་པའི་པདྨོའི་རྣམ་པ་ལ་ཐུགས་རྩེ་གཅིག་ཏུ་མཛད་ནས་སྙིང་པོ་འདི་གསུངས་སོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་
ལྡན་འདས་རྣམ་པར་སྣང་མཛད་ཀྱི་པདྨའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་སྤྲུལ་ནས་བཅོམ་ལྡན་འདས་རྣམ་པར་སྣང་མཛད་ལ་ཕུལ་ལོ། །དེ་ལྟར་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་ཀྱི་ཕྱག་རྒྱའི་སྙིང་པོ་རྣམས་གསུངས་པ་དང་། བཅོམ་ལྡན་འདས་འཕགས་པ་
སྤྱན་རས་གཟིགས་དབང་ཕྱུག་གིས་འགྲོ་བ་འདུལ་བ་དང་། གཙུག་ཕུད་སངས་རྒྱས་དང་། པདྨའི་ཏིང་ངེ་འཛིན་དང་། པདྨ་ངེས་པའི་དབང་ཕྱུག་རྣམས་ཀྱི་ཕྱག་རྒྱ་བཞི་པའི་དཀྱིལ་འཁོར་ཐུགས་ཀའི་པདྨ་ལས་སྤྲུལ་ནས། དེ་བཞིན་གཤེགས་པ་ཐམས་ཅད་ལ་ཕུལ་ལོ་ཞེས་ཤེས་པར་བྱའོ། །
དེ་ལ་དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་སརྦྦ་མུ་ཁི་ཧཱུཾ་ཞེས་བྱ་བའི་གཞུང་འདི་ཙམ་གྱིས་ནི། པདྨའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་
སོགས་པ་ནི་པདྨའི་རིགས་ཀྱི་ཕྱག་རྒྱ་བཞི་པའི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་སྔ་མ་བཞིན་དུ་ཤེས་པར་བྱའོ། །འགྲོ་བ་འདུལ་བའི་དུམ་བུར་གསུངས་པའི་དངོས་གྲུབ་རྣམས་ནི་པདྨ་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་
བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །འཕགས་པ་སྤྱན་རས་གཟིགས་དབང་པོ་ནི་འགྲོ་བ་འདུལ་བའོ། །འདི་ཞེས་བྱ་བ་ནི་

བློ་ལ་གནས་པའོ། །ཕྱག་རྒྱ་བཞི་པའི་དཀྱིལ་འཁོར་ནི་པདྨའི་རིགས་ཀྱི་རང་བཞིན་ཏེ། བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་པ་ནི་བཤད་པའོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འགྲོ་བ་འདུལ་བའི་རྣལ་འབྱོར་དང་།
དེ་ལས་བཤད་པའི་རྣལ་འབྱོར་ཆེན་པོ་བྱས་ལ། སྔ་མ་བཞིན་དུ་ཕྱག་རྒྱ་བཞི་པའི་དཀྱིལ་འཁོར་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་ཕྱག་རྒྱ་བཞི་
པའི་དཀྱིལ་འཁོར་དུ་ཞུགས་པ་མེད་ན་བར་མ་ལ་དགའ་བའི་སེམས་ཅན་རྗེས་སུ་གཟུང་བར་མི་འགྱུར་བ་དེའི་ཕྱིར་རབ་ཏུ་བཤད་བྱ་བ། ཕྱག་རྒྱ་བཞི་མཆོག་དཀྱིལ་འཁོར་ཏེ། །ཞེས་བྱའོ། །རྡོ་རྗེ་དབྱིངས་དང་འདྲ་བ་དང་། །ཞེས་བྱ་བ་ནི་སྤྲུལ་པའི་ཕྱག་རྒྱ་བཞི་པའི་དཀྱིལ་འཁོར་དང་འདྲ་
བའོ། །དཀྱིལ་འཁོར་ཆེན་པོ་འདྲ་བར་བྱ། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་དང་འདྲ་བའོ། །ཕྱག་རྒྱའི་དཀྱིལ་འཁོར་དབུས་སུ་ནི། །སངས་རྒྱས་གཟུགས་ནི་གཞག་པར་བྱ། །དེ་ཡི་ཕྱོགས་རྣམས་ཐམས་ཅད་དུ། །རྡོ་རྗེ་པདྨོ་ལ་སོགས་བྲི། །ཞེས་བྱ་བ་ནི་འགྲོ་བ་
འདུལ་བའི་དཀྱིལ་འཁོར་ཆེན་པོ་ལས་བཤད་པའི་བྲི་བའི་ཆོ་གས་བཅོམ་ལྡན་འདས་རྣམ་པར་སྣང་མཛད་པདྨ་དང་། སེང་གེའི་གདན་ལ་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོས་བྲི་བར་བྱའོ། །དེའི་ཤར་ཕྱོགས་ཀྱི་ཆ་ལ་འགྲོ་བ་འདུལ་བའི་གནས་སུ་པདྨ་དང་ཟླ་བའི་གདན་ལ་
པདྨས་མཚན་པའི་རྡོ་རྗེ་རྩེ་ལྔ་པ། གཙུག་ཕུད་སངས་རྒྱས་ཀྱི་གནས་སུ་པདྨས་མཚན་པའི་ཡིད་བཞིན་གྱི་ནོར་བུ། པདྨ་ཏིང་ངེ་འཛིན་གྱི་གནས་སུ་རྡོ་རྗེ་པདྨ་འདབ་མ་བཅུ་དྲུག་པ། པདྨ་ངེས་པའི་དབང་ཕྱུག་གི་གནས་སུ་སྔོན་པོ་དང་། སེར་པོ་དང་། དམར་པོ་དང་ལྗང་གུའི་ཁ་དོག་དང་ལྡན་པའི་འདབ་མ་
བཞི་པ་ལྟེ་བ་ནི་དཀར་པོ་སྟེ། འདི་ནི་པདྨ་འདབ་མ་བཞི་པ་ཞེས་བརྗོད་དོ། །འདིར་འགྲོ་བ་འདུལ་བ་ལས་བཤད་པའི་སྙིང་པོ་འདི་ཉིད་ཀྱིས་བྲི་བར་བྱ་སྟེ། དེ་སྐད་དུ། སངས་རྒྱས་ཕྱོགས་ཀུན་བྲི་བ་ནི། །པདྨའི་གནས་སུ་གནས་པ་ནི། །རྡོ་རྗེ་རིན་ཆེན་པདྨོ་དང་། །སྣ་ཚོགས་པདྨོ་དེ་བཞིན་ནོ། །ཞེས་

གསུངས་སོ། །དེ་ལ་སྙིང་པོ་ནི་འདི་ཡིན་ཏེ། ཨོཾ་ཧཱུཾ་དྷེ་ཀྲེ་ཞེས་བྱ་བ་འདི་ཉིད་གཟུང་བར་བྱའོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སློབ་དཔོན་གྱི་ཆོ་གས་སློབ་དཔོན་ཉིད་འཇུག་པའི་ཆོ་ག་རྗེས་སུ་བཅད་ལ་བསྡུ་བ་བྱས་ཏེ།
དེ་ནས་མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ཉིད་ལ་ཕྱག་རྒྱ་བཞི་པའི་དཀྱིལ་འཁོར་འདིར་དགུག་པ་ལ་སོགས་པའི་ཆོ་ག་རྒྱས་པ་བྱ་བའོ། །དེ་ལ་རྟ་མགྲིན་གྱི་ལྕགས་ཀྱུའི་ལས་ཀྱི་ཕྱག་རྒྱ་སྔ་མ་བཞིན་དུ་དགུག་པ་ལ་སོགས་པ་སྨོས་པ་ནི། དོན་ཡོད་ཞགས་པའི་ལས་ཀྱི་ཕྱག་རྒྱས་
གཞུག་པ་ནས་བརྩམས་ནས། སློབ་མ་གཞུག་པའི་གནང་བ་ནོད་པའི་མཐར་ཐུག་པའི་ཆོ་ག་རྒྱས་པ་ཤེས་པར་བྱའོ། །དགུག་པ་དང་པོར་བྱས་པ་གང་ཡིན་པ་ཉིད་ནི་དགུག་པ་ལ་སོགས་པའི་ཆོ་ག་རྒྱས་པ་བྱའོ། །ཇི་ལྟ་བ་བཞིན་དུ་བཅུག་སྟེ། འདི་སྐད་དུ་ཞེས་བྱ་བ་ནི། འགྲོ་བ་འདུལ་བའི་དཀྱིལ་
འཁོར་ཆེན་པོའི་ཚུལ་གྱིས་སློབ་མ་བཅུག་ལ། འདི་ཁྱོད་ཀྱིས་སུ་ལ་ཡང་མ་བརྗོད་ཅིག་ཅེས་བརྗོད་ལ། ལྷག་མ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ཤེས་པར་བྱའོ། །དེ་ལྟར་སློབ་དཔོན་གྱི་ལས་དང་། སློབ་མ་འཇུག་པའི་ཆོ་ག་རྒྱས་པར་བསྟན་ནས། ད་ནི་འགྲོ་
བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་འགྲོ་བ་འདུལ་བའི་དུམ་བུ་ཐམས་ཅད་ལས་བཤད་པའི་དངོས་གྲུབ་རྣམས་སློབ་དཔོན་གྱིས་བསྟན་པར་བྱའོ་ཞེས་བྱ་བའི་དོན་འདི་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་
ཞེས་བྱ་བ་ནི་སློབ་མ་འཇུག་པའི་དུས་ཕྱིས། ཡེ་ཤེས་བསྐྱེད་པར་བྱ་བའི་བསྒོམ་པའི་གདམས་ངག་སྦྱིན་པར་བྱའོ། །ལག་པས་པདྨོ་བཟུང་ནས་ཀྱང་། །ཞེས་བྱ་བ་ནི་ཤིང་ལས་བྱས་པའི་པདྨ་འདབ་མ་བཅུ་དྲུག་པ་དེ་གཟུང་ངོ་། །བསྒོམས་ཏེ་ལེགས་པར་བསྒོམ་པར་བྱ། །ཞེས་བྱ་བ་ནི་ཏིང་
ངེ་འཛིན་གྱི་སྟོབས་ཀྱིས་པདྨའི་དྲི་དེས་དེ་བཞིན་གཤེགས་པ་ཐམས་ཅད་ལ་མཆོད་ན་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་གི་ལྷའི་རྣལ་འབྱོར་བྱས་ལ། ཕྱིས་འགྲོ་བ་འདུལ་བའི་ཕྱག་རྒྱ་ཆེན་པོས་པདྨ་

བླངས་ཏེ། ཨོཾ་གནྡྷ་པཱུ་ཛ་གྲ་གྷྱ་སཱ་དྷ་ཡ་ཧྲི། ཞེས་ཟློས་ཤིང་ཇི་སྲིད་དུ་ཉིན་རེ་ཞིང་ཐུན་བཞིའི་སྦྱོར་བས་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ན། པདྨ་དེ་ལས་གདོན་མི་ཟ་བར་ལྷའི་པདྨའི་དྲི་བྲོ་བར་འགྱུར་རོ། །དེ་ནས་པདྨ་དེ་ཏིང་ངེ་འཛིན་གྱི་སྦྱོར་བས་བསྣམས་ན། དེ་བཞིན་
གཤེགས་པ་ཐམས་ཅད་སྤྱན་རས་གཟིགས་དབང་ཕྱུག་ཏུ་གྱུར་ནས། པདྨ་ལ་ཆེད་དུ་ནོན་པར་བསྣམས་ཏེ། གང་གི་ཚེ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ན་དེས་འཇིག་རྟེན་དབང་ཕྱུག་དང་མཚུངས་པའི་དངོས་གྲུབ་ཏུ་འགྱུར་རོ། །མཉམ་པར་གཞག་པས་གཙུག་ཕུད་
དབུས། །སངས་རྒྱས་གཟུགས་ནི་རབ་གཞག་པ། །ཞེས་བྱ་བ་ནི་འཇིག་རྟེན་དབང་ཕྱུག་གི་རལ་པའི་དབུས་སུ་དེ་བཞིན་གཤེགས་པ་འོད་དཔག་ཏུ་མེད་པ་རབ་ཏུ་གཞག་པར་བྱའོ། །མཉམ་པར་གཞག་པ་ནི་སེམས་གཡེང་བ་མེད་པའོ། །འཇིག་རྟེན་ཐམས་ཅད་དབང་དུ་བྱེད། །ཅེས་བྱ་བ་
ནི་འཇིག་རྟེན་གྱི་ཁམས་ཐམས་ཅད་དུའོ། །ཇི་ལྟར་ཞེ་ན། འགྲོ་ཞིང་བསྒྱིངས་པ་བསྟན་ནས་ནི། །ཞེས་བྱ་བ་སྨོས་ཏེ། དེའི་ང་རྒྱལ་བསྒོམ་ཞིང་བསྒྱིངས་པས་ཕྱོགས་བཅུར་རང་གི་གཟུགས་ཀྱི་རྗེས་སུ་འབྲང་བ་དང་བཅས་པས་སྟོན་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དཀྱིལ་
འཁོར་ཆེན་པོ་ལས་བཤད་པའི་ཚུལ་གྱིས་འཕགས་པ་སྤྱན་རས་གཟིགས་དབང་ཕྱུག་གི་རྣལ་འབྱོར་བྱས་ལ། ཕྱིས་ཨོཾ་པདྨ་མུ་ཀུ་ཊ་ཏ་ཐཱ་ག་ཏ་བ་ཤི་ཀུ་རུ་སརྦྦ་ལོ་ཀེ་ཤྭ་ར་ཨཱ་བེ་ཤ་ཀརྨྨཱ་ཡ་ཧོ། ཞེས་ཟློས་ཤིང་པདྨའི་ཅོད་པན་གྱི་དབུས་སུ་གཙུག་ཕུད་སངས་རྒྱས་མངོན་སུམ་དུ་མཐོང་
བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་ངོ་བོར་བསྟན་པར་བྱས་ལ། དེའི་ངོ་བོ་དེས་འཇིག་རྟེན་གྱི་ཁམས་ཐམས་ཅད་དེའི་རང་བཞིན་དུ་བྱའོ། །པདྨོའི་པདྨོ་གཟུགས་ཆེན་པོར། །ཞེས་བྱ་བ་ནི་བཅོམ་ལྡན་འདས་ཏིང་ངེ་འཛིན་པདྨོ་ནི་པདྨོ་ཡིན་ལ། དེའི་པདྨོ་ནི་པདྨའི་པདྨོའོ། །རྡོ་རྗེ་
པདྨ་འདབ་མ་བཅུ་དྲུག་པ་ཁ་དོག་དམར་པོ་པདྨ་དེས་མཚན་པར་བྱས་པ་ནི་བསྐྱེད་པའོ། །གང་གིས་བྱ་ཞེ་ན། ཏིང་ངེ་འཛིན་གྱིས་ཞེས་བྱ་བ་སྨོས་ཏེ་བསྒོམས་པ་སྤྲུལ་པའོ། །ཇི་བཞིན་ཚུལ་དུ་འདུག་ནས་སུ། །ཞེས་བྱ་བ་ནི་ལྷའི་རྣལ་འབྱོར་བྱས་ནས་སོ། །ཡིད་ཀྱིས་དེ་ནི་གསད་པར་བྱ། །ཞེས་བྱ་བ་ནི་ཏིང་

ངེ་འཛིན་གྱིས་བསྐྱེད་པའི་པདྨ་དེས་འགྲོ་བ་ཐམས་ཅད་ཡིད་ཀྱིས་གསད་པར་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཏིང་ངེ་འཛིན་པདྨའི་རྣལ་འབྱོར་བྱས་ལ། ཨོཾ་པདྨ་པདྨ་མཱ་ར་ཡ་སརྦྦ་པྲ་ཏྱ་ཨརྠི་ཀཱ་ན་ས་མ་དི་ཛྙཱ་ན་དྷྲྀཀ །ཅེས་ཟློས་
ཤིང་རང་གི་ལག་པར་རྣལ་འབྱོར་གྱི་པདྨ་བསམས་ལ། དེ་ནས་སྙིང་པོ་འདི་བརྗོད་པར་བྱའོ། །བདག་ཉིད་པདྨ་ཁྲོ་བོའི་ཏིང་ངེ་འཛིན་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམས་ལ། དེ་ནས་གང་གི་ཚེ་རང་གི་ལུས་ཀྱི་མདུན་དུ་དེ་བཞིན་གཤེགས་པ་ལ་སོགས་པ་འཇིག་རྟེན་གྱི་ཁམས་
ཐམས་ཅད་དུ་སྤྲོས་པ་དེའི་ཚེ། ཉིན་རེ་ཞིང་དེའི་རང་བཞིན་དུ་བསྒོམས་པའི་སྟོབས་ཀྱིས་མཐོང་བར་འགྱུར་རོ། །དེ་ནས་མཐར་མཚན་ཐོག་ཐག་པདྨ་ཁྲོ་བོའི་ཏིང་ངེ་འཛིན་བསྒོམས་ན་འགྲུབ་པར་འགྱུར་ཏེ། པདྨའི་ཏིང་ངེ་འཛིན་དང་མཚུངས་པར་འདོད་ཆགས་ལ་སོགས་པ་དང་བྲལ་བར་འགྱུར་རོ། །དེ་
བས་ན་གང་གི་ཚེ་ན་པདྨ་དེས་སེམས་ཅན་འགའ་ཞིག་ལ་རེག་པ་དེའི་ཚེ་ཡང་པདྨའི་ཁྲོ་བོའི་ཏིང་ངེ་འཛིན་གྱི་སྟོབས་ཀྱིས་སྒྲིབ་པ་ཐམས་ཅད་དང་བྲལ་བར་འགྱུར་རོ། །དེ་ལྟར་ན་སྔ་མའི་གནས་སྐབས་ལས་འཕོས་པ་ལས་གསད་པར་བྱ་ཞེས་བྱ་བའི་ཐ་ཚིག་གོ། །པདྨའི་རྒྱ་གྲམ་ཉིད་དང་ནི། །ཞེས་བྱ་བ་ནི།
ཇི་སྐད་བཤད་པའི་མཚན་ཉིད་དང་ལྡན་པའི་སྣ་ཚོགས་པདྨའི་རྒྱ་གྲམ་མོ། །ཤིང་ལ་སོགས་པ་ལ་པདྨ་རྒྱ་གྲམ་གྱི་བཟོ་བྱས་ལ་ལག་པས་བཟུང་ནས། དེ་བསྐོར་བས་དབབ་པ་ལ་སོགས་པའི་ལས་ཐམས་ཅད་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་
པོ་ལས་བཤད་པའི་ཆོ་གས་པདྨ་ངེས་པའི་དབང་ཕྱུག་གི་རྣལ་འབྱོར་བྱས་ལ། ཨོཾ་བི་ཤྭ་པདྨ་སརྦྦ་ཀརྨྨ་ཀ་རོ་བྷ་བ་ལ་ལིའུ་ལེ་ལེ་ལི་ཧཱུཾ་ཕཊ། ཅེས་བརྗོད་ཅིང་ཇི་སྐད་བཤད་པའི་པདྨ་ངེས་པའི་དབང་ཕྱུག་གི་ལས་ཀྱི་ཕྱག་རྒྱ་བཟུང་ལ། གང་གི་ཚེ་སྙིང་པོ་འདི་ཟློས་ཤིང་། ཟླ་བ་གཅིག་གམ་ཟླ་བ་དྲུག་གི་བར་
དུ་བྱས་ནས་མཐར་མཚན་ཐོག་ཐག་བསྒོམས་ན། དེ་ནས་དེའི་ཚེ་པདྨ་དེ་འགྲུབ་པར་འགྱུར་རོ། །དེ་ནས་ལས་ཀྱི་དུས་སུ་སྔ་མ་བཞིན་དུ་ལྷའི་རྣལ་འབྱོར་བྱས་ལ། བདེན་པའི་བྱིན་གྱི་རླབས་ཀྱིས་པདྨ་དེ་ལན་གསུམ་མངོན་པར་བཟླས་ནས་བསྐོར་ནས། སྣོད་ལ་གཞུག་པ་ལ་སོགས་པའི་ལས་ཐམས་ཅད་

བསམས་པ་ཙམ་གྱིས་འགྲུབ་པར་འགྱུར་རོ། །དེ་ནས་ཕྱག་རྒྱ་གསང་བའི་ཡེ་ཤེས་བསླབ་པོ་ཞེས་བྱ་བ་ལ་གསང་བའི་དམ་ཚིག་དང་ཆོས་དང་ལས་ལ་སོགས་པའི་མཚན་ཉིད་ཀྱིས་བྱ་བའོ། །ཆགས་པས་དགོས་པ་ཐམས་ཅད་ནི། །ཞེས་བྱ་བ་འདི་ནི་འདི་གསང་བའོ། །དེ་ཉིད་ཀྱི་ཕྱག་རྒྱ་དེར་ངེས་པའི་ཡེ་
ཤེས་དེ་བསླབ་པ་ནི་བསྟན་པའོ། །འདི་ཉིད་འཆད་པ་ནི་ཆགས་པ་ཞེས་བྱ་བ་ལ་སོགས་པ་ནི། ཆོས་བདག་མེད་པའི་ཆགས་པས་ཆགས་པ་མངའ་བ་ནི་གསང་བའི་དམ་ཚིག་སྟེ། ཆོས་དང་ལས་ལ་སོགས་པའི་ཕྱག་རྒྱ་ཐམས་ཅད་བསྒྲུབ་ཅིང་སྐྱེད་པར་བྱེད་པའོ། །ཅིའི་ཕྱིར་ཞེ་ན། གང་ཕྱིར་འདའ་
བར་མི་འགྱུར་བ། །ཕྱག་རྒྱ་དམ་ཚིག་ཅེས་སུ་བསྒྲགས། །ཞེས་བྱ་བའོ། །བསྒྲུབ་པར་དཀའ་བའི་ཕྱག་རྒྱ་ཡང་། །རྣལ་འབྱོར་གྱིས་ནི་མྱུར་དུ་འགྲུབ། །ཅེས་བྱ་བ་ནི་ཤིན་ཏུ་ཆགས་པ་བསྒོམ་དགོས་པའི་རྣལ་འབྱོར་འདི་ནི་བསྒྲུབ་པར་དཀའ་བ་སྟེ། གདུལ་བྱ་མ་ཡིན་པའི་རིགས་མེད་པའི་
སྒྲུབ་པ་པོས་ཀྱང་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཤིན་ཏུ་ཆགས་པའི་རྣལ་འབྱོར་བསྒོམ་པའི་སྟོབས་ཀྱིས་སྐད་ཅིག་གིས་ནི་མྱུར་བ་ཉིད་དུ་འགྲུབ་པའོ། །དེ་ལ་འདིར་ཕྱག་རྒྱ་ཐམས་ཅད་ཀྱི་དམ་ཚིག་ནི་འདི་ཡིན་ཏེ། བདག་ཉིད་ཆེན་པོ་གང་དག་གིས། །
ཕྱག་རྒྱ་གང་དང་གང་བཅིངས་པ། །བཟླས་པའི་སྙིང་པོའི་དོན་དུ་ནི། །དེར་ནི་བདག་ཉིད་བསྒོམ་པར་བྱ། །དེ་ལ་གསང་བ་འདི་ཡིན་ཏེ། །རང་གི་དབང་པོ་བཤིག་ནས་ནི། །རྡོ་རྗེ་བཅིངས་པ་བཟུང་ནས་སུ། །དེ་ཡིས་ཕྱག་རྒྱ་གང་རེ་བ། །དེ་མ་ཐག་ཏུ་དེ་དབང་འགྱུར། །དེ་ལ་ཕྱག་རྒྱ་ཐམས་ཅད་ཀྱི་
ཆོས་ནི་འདི་ཡིན་ཏེ། རྡོ་རྗེ་ཕྲ་མོའི་ཚུལ་སྦྱར་ལ། །ཡེ་ཤེས་ཕྱག་རྒྱ་བཅིང་བར་བྱ། །ཆོ་ག་འདི་ཡི་ཚུལ་གྱིས་ནི། །ཡེ་ཤེས་ཕྱག་རྒྱ་དབང་དུ་འགྱུར། །དེ་ལ་ཕྱག་རྒྱ་ཀུན་གྱི་ལས་ནི་འདི་ཡིན་ཏེ། གླུ་དང་གར་དང་ཟས་དང་བློ། །སྤྱོད་པ་ལ་སོགས་བདེ་བ་རྣམས། །སངས་རྒྱས་རྣམས་ལ་ཕུལ་ན་
ནི། །ལས་ཀྱི་ཕྱག་རྒྱ་དབང་དུ་འགྱུར། །དེ་ནས་དཀྱིལ་འཁོར་ཐམས་ཅད་བསྒྲུབ་པའི་གསང་བའི་ཕྱག་རྒྱ་བསླབ་པར་བྱའོ། །མཚན་མ་བསྟན་པར་རང་གྱུར་ནས། །དཀར་པོར་གྱུར་པའི་རས་ལ་གནས། །མཚན་མ་མཆོད་རྟེན་བྱིན་བརླབས་ཏེ། །བདག་ཉིད་འགྲོ་བ་འདུལ་བར་བསྒོམ། །

ཞེས་བྱ་བ་ལ་སོགས་པའོ། །འདི་སྐད་སྟོན་པ་ཡིན་ཏེ། གང་རྒྱ་ཆེ་བས་བསྒྲགས་པའི་འགྲོ་བ་འདུལ་བའི་ཏིང་ངེ་འཛིན་རྣམ་པ་གསུམ་བསྒོམ་པའི་དཀྱིལ་འཁོར་གྱི་བརྟུལ་ཞུགས་སྤྱོད་པ་ལ་སྤྲོ་བ་མེད་པ་གང་ཡིན་པ་དེས། ཉིན་རེ་བཞིན་དུ་ཁྲུས་བྱ་བ་དང་། བདག་ཉིད་
བསྲུང་བ་སྔོན་དུ་འགྲོ་བས་སྡོམ་པ་གཟུང་བ་དང་། ཕྱག་རྒྱ་དགྲོལ་བ་དང་སྡིག་པ་དྲལ་ལ། དེ་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། སྙིང་པོ་བཟླས་ལ་པདྨའི་རྒྱུའི་ལས་ཀྱི་ཕྱག་རྒྱས་འགྲོ་བ་འདུལ་བའི་དཀྱིལ་
འཁོར་ཆེན་པོ་སྤྲུལ་ལ། བདག་ཉིད་འགྲོ་བ་འདུལ་བའི་གཟུགས་སུ་བྱིན་གྱིས་བརླབས་ལ། རང་གི་སྙིང་གར་གནས་པའི་དཀྱིལ་འཁོར་དེར་རྡོ་རྗེ་པདྨའི་དམ་ཚིག་གི་ཕྱག་རྒྱ་བཅིངས་ལ། ཇི་ལྟ་བ་བཞིན་དུ་འཇུག་པར་བྱའོ། །ཞུགས་ནས་མེ་ཏོག་གི་ཕྲེང་བ་རང་གི་སྤྱི་བོར་དོར་རོ། །དེ་ནས་ཕྲེང་བ་
ཇི་ལྟ་བ་བཞིན་དུ་བླངས་ཏེ། རང་གི་མགོ་ལ་ཕྲེང་བའི་དབང་བསྐུར་བའི་སྔགས་ཀྱིས་བཅིངས་ནས་དངོས་གྲུབ་ཀྱི་པདྨའི་བརྟུལ་ཞུགས་བླང་བའི་མཐར་ཐུག་པའི་རང་གི་ཆོ་ག་རྗེས་སུ་སྤྱད་ལ། དེ་ནས་དཀྱིལ་འཁོར་དེའི་སྙིང་གའི་ཟླ་བ་ཞུ་བར་བསམས་ཏེ། རྣལ་འབྱོར་ཆེན་པོ་བྱས་ལ། རང་གི་སྙིང་གར་སྟོང་
གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་ཚད་དང་མཉམ་པར་ཟླ་བའི་དཀྱིལ་འཁོར་དེའི་སྟེང་དུ། ཨོཾ་བཛྲ་དྷརྨྨ་པདྨ་ཧཱུཾ། ཨོཾ་བཛྲ་ཛྫ། ཨོཾ་བཛྲ་རཏྣ་མུ་ཀུ་ཊ་ཧཱུཾ། ཨོཾ་དྷརྨྨ་པདྨེ་དྷི། ཨོཾ་སརྦྦ་མུ་ཁི་ཧཱུཾ། ཞེས་བྱ་བའི་པདྨ་རིགས་ཀྱི་སྙིང་པོ་འདི་རྣམས་དང་། རྣམ་པར་སྣང་མཛད་དང་། རྡོ་རྗེ་སེམས་དཔའ་
དང་། ནམ་མཁའི་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་ཀྱི་ཕྱག་རྒྱ་ཆེན་པོ་དང་བཅས་པ་རྣམས་ཀྱིས་འགྲོ་བ་འདུལ་བའི་དཀྱིལ་འཁོར་ཆེན་པོ་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་སྤྲུལ་ལ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་
ཚིག་ཙམ་གྱིས་རང་རང་གི་གནས་རྣམས་སུ་བཞག་ལ། རྣམ་པར་སྣང་མཛད་ལ་སོགས་པ་ནས་པདྨ་འབེབས་པའི་མཐར་ཐུག་པ་རྣམས་སྐུ་དང་། གསུང་དང་ཐུགས་རྡོ་རྗེའི་རང་བཞིན་དུ་བདག་ཉིད་ཀྱིས་བསམས་ཏེ། སྙིང་པོ་འདི་ཉིད་ལན་གསུམ་བརྗོད་པར་བྱའོ། །ཨོཾ་བཛྲ་ཨཱཏྨ་ཀོ྅ཧཾ། དེ་ནས་རང་བཞིན་

གྱིས་རྣམ་པར་དག་པར་བདག་ཉིད་བསྒོམས་ལ། ཨོཾ་སྭ་བྷཱ་བ་ཤུདྡྷོ྅ཧཾ། དེ་ནས་བདག་མེད་པའི་མཉམ་པ་ཉིད་ཀྱིས་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་དང་། སེམས་ཅན་ཐམས་ཅད་བདག་ཉིད་མཉམ་པ་ཉིད་བསྒོམས་ལ། ཨོཾ་སརྦྦ་ས་མོ་ཧཾ། ཨོཾ་སཱ་དྷ་ཨ་
པདྨ་རཱ་ག་ས་མ་ཡ་ཨ། ཞེས་ལན་གསུམ་བརྗོད་དོ། །དེ་ནས་འགྲོ་བ་འདུལ་བའི་རང་བཞིན་གྱི་དཀྱིལ་འཁོར་ནི་བདག་ཉིད་རང་ཡིན་ནོ་ཞེས་ང་རྒྱལ་བསྐྱེད་ལ། ཨོཾ་ཧཱུཾ་ཧྲི་ཧོ། ཞེས་བརྗོད་ཅིང་། འགྲོ་བ་འདུལ་བའི་དཀྱིལ་འཁོར་ཆེན་པོའི་རང་བཞིན་དུ་ཐུན་བཞིའི་སྦྱོར་བས་ཟླ་བ་གཅིག་གམ་ཟླ་བ་
དྲུག་གམ། ལོ་གཅིག་ཏུ་འགྲོ་བ་འདུལ་བའི་དཀྱིལ་འཁོར་ཆེན་པོའི་གཟུགས་སུ་བདག་ཉིད་མཐོང་བར་གྱུར་པ་དེ་སྲིད་ཀྱི་བར་དུ་བདག་ཉིད་ཀྱིས་བསྒོམ་པར་བྱའོ། །དེ་ལྟར་འགྲོ་བ་འདུལ་བའི་དཀྱིལ་འཁོར་ཆེན་པོ་རབ་ཏུ་བསྒྲུབས་ནས། ཕྱིས་ཏིང་ངེ་འཛིན་རྣམ་པ་གསུམ་སྒོམ་པ། སྔོན་དུ་འགྲོ་
བ་ཞག་བདུན་བྱས་ནས་འགྲོ་བ་འདུལ་བའི་དཀྱིལ་འཁོར་ཆེན་པོ་བསྒོམས་ནས་བྲི་བར་བྱའོ། །གལ་ཏེ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་བསྒྲུབ་པར་འདོད་ན། དེ་ནས་སྔ་མ་བཞིན་དུ་སྙིང་པོ་ལྔས་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་རིག་པ་རྣམས་ཀྱིས་ཇི་ལྟ་བའི་གནས་
རྣམས་སུ་གཟུངས་རྣམས་བཞག་ལ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ྅ཧཾ། ཨོཾ་སརྦ་ས་མོ་ཧཾ། ཨོཾ་སཱ་དྷ་ཡ་པདྨ་རཱ་ག་ས་མ་ཡ་ཨ། ཞེས་བྱ་བ་སྔ་མ་བཞིན་དུ་བརྗོད་པ་དང་། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་རང་བཞིན་དུ་བདག་ཉིད་བསྒོམས་ལ་འདི་སྐད་ཅེས་བརྗོད་
དོ། །འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་རང་བཞིན་ནི་བདག་རང་ཡིན་ནོ་ཞེས་བྱའོ། །དེ་ནས་བཟུང་ཏེ་རེ་རེ་དང་ཡང་ལྷན་ཅིག་བདག་ཉིད་དང་ཐ་མི་དད་པར་བསམས་ཏེ། རེ་རེ་ཞིང་ཡང་བཟླས་པ་ཁྲི་བྱ་བ་དེ་ལྟ་བུས་ཀྱང་གཟུངས་ཀྱི་དཀྱིལ་འཁོར་འགྲུབ་པར་འགྱུར་རོ། །དེ་ནས་སྔ་
མ་བཞིན་དུ་བྲི་བར་བྱའོ། །གལ་ཏེ་ཆོས་ཀྱི་དཀྱིལ་འཁོར་བསྒྲུབ་པར་འདོད་ན། སྔ་མ་བཞིན་དུ་ཐམས་ཅད་བྱས་ལ། སྔར་བཤད་པའི་སྙིང་པོ་དང་རང་གི་སྙིང་པོས་ཆོས་ཀྱི་དཀྱིལ་འཁོར་སྤྲུལ་ཏེ། རྡོ་རྗེ་ཕྲ་མོའི་སྦྱོར་བས་སྙིང་ག་ནས་བཏེག་ལ་སྣ་བུག་ནས་བྱུང་ནས་སྣའི་རྩེ་མོར་བསམ་པར་བྱའོ། །

དེ་ནས་ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་རྣམ་པར་སྣང་མཛད་ལ་སོགས་པ་ནས། པདྨ་འབེབས་པའི་མཐར་ཐུག་པ་རྣམས་རང་རང་གི་གནས་སུ་དགོད་པར་བྱའོ། །སྔ་མ་བཞིན་དུ་སྙིང་པོ་གསུམ་བརྗོད་ཅིང་། དོན་རྣམ་པ་གསུམ་བསྒོམས་ལ། དྷརྨྨ་མཎྜ་
ལ་ཨ་སྭ་བྷཱ་བ་ཧཾ་སྭ་ཡཾ། ཞེས་ཀྱང་དེ་སྐད་དུ་བརྗོད་པར་བྱའོ། །དེ་ནས་ཆོས་ཀྱི་དཀྱིལ་འཁོར་ལས་གསུངས་པའི་འགྲོ་བ་འདུལ་བའི་སྔགས་བརྗོད་ཅིང་། ཟླ་བ་གཉིས་སྣའི་རྩེ་མོར་ཆོས་ཀྱི་དཀྱིལ་འཁོར་བསྒོམ་པར་བྱའོ། །ཉིན་རེ་ཞིང་སྐྱོ་བར་གྱུར་ན་སྣ་བུག་ནས་རང་གི་སྙིང་གར་བཅུག་
ལ། བཛྲ་དྷི་ཌྷ་ཏིཥྛ་ཞེས་བྱ་བས་བརྟན་པར་བྱའོ། །ཡང་ཟླ་བ་གཅིག་སྤྲོ་བ་དང་བསྡུ་བའི་སྦྱོར་བས་བསྒོམ་པ་དེ་ལྟ་བུས་ཆོས་ཀྱི་དཀྱིལ་འཁོར་འགྲུབ་པར་འགྱུར་རོ། །གལ་ཏེ་ལས་ཀྱི་དཀྱིལ་འཁོར་བསྒྲུབ་པར་འདོད་ན། སྔ་མ་བཞིན་དུ་ཐམས་ཅད་བྱས་ལ། རྡོ་རྗེ་དབྱིངས་ཀྱི་ལས་
ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་དང་། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་སྔགས་ཀྱིས་སྣ་ཚོགས་པདྨ་རྒྱ་གྲམ་བླངས་ལ། རང་གི་སྙིང་པོ་དང་སྔར་བཤད་པའི་སྙིང་པོ་ལྔས་ལས་ཀྱི་དཀྱིལ་འཁོར་སྤྲུལ་ལ། ལས་ཀྱི་དཀྱིལ་འཁོར་ལས་བཤད་པའི་
རིག་པ་རྣམས་ཀྱིས་ལྷ་རྣམས་ཇི་ལྟ་བའི་གནས་སུ་བཞག་ལ་ཆོ་ག་ཐམས་ཅད་རྗེས་སུ་སྤྱད་ལ། ལས་ཀྱི་དཀྱིལ་འཁོར་གྱི་རང་བཞིན་ནི་བདག་ཡིན་ནོ་ཞེས་ང་རྒྱལ་བསྐྱེད་ནས། རེ་རེ་ཞིང་ཡང་རིག་པ་ཁྲི་ཟློས་ཤིང་རེ་རེའི་རྣལ་འབྱོར་བྱའོ། །དེ་ལྟ་བུས་ལས་ཀྱི་དཀྱིལ་འཁོར་འགྲུབ་པར་འགྱུར་རོ། །
འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པོ་རྣམས་ཀྱིས། རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། ཕྱག་རྒྱ་ཆེན་པོ་ལ་
སོགས་པའི་ཕྱག་རྒྱ་ཐམས་ཅད་བཅིང་བ་དང་། འཆིང་བའི་མཚན་ཉིད་ཐམས་ཅད་བསླབ་ཅིང་བསྟན་པར་བྱའོ། །དེ་ལ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བསྟན་པ་ཉིད་ཀྱིས་རྣམ་པར་སྣང་མཛད་དང་། ཆོས་ཀྱི་རྡོ་རྗེ་མ་དང་། སངས་རྒྱས་དབང་བསྐུར་མ་དང་། པདྨའི་པདྨོ་དང་།

སྣ་ཚོགས་མཆོག་མ་རྣམས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་འདིའི་ཡང་ཡིན་པར་ཤེས་པར་བྱའོ། །ཇི་ལྟར་རྣམ་པར་སྣང་མཛད་ཀྱི་པདྨའི་རིགས་ཀྱི་ཕྱག་རྒྱ་བཞི་པོའི་དཀྱིལ་འཁོར་བཞིན་དུ་འགྲོ་བ་འདུལ་བའི་ཕྱག་རྒྱ་བཞི་པོའི་དཀྱིལ་འཁོར་ལ་སོགས་པའི་
དཀྱིལ་འཁོར་ཐམས་ཅད་དཀྱིལ་འཁོར་ཆེན་པོའི་ཚུལ་གྱིས་བྲི་བར་བྱའོ། །རང་རང་གི་ཕྱག་རྒྱ་རྣམས་ཀྱིས་དངོས་གྲུབ་ཐམས་ཅད་སྟེར་བར་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དབུས་སུ་བྲིས་ལ། འགྲོ་བ་འདུལ་
བའི་གནས་ཀྱི་ཤར་ཕྱོགས་ཀྱི་པདྨའི་འདབ་མ་ལ་སངས་རྒྱས་པདྨའི་པདྨས་མཚན་པའི་རྡོ་རྗེ་རྩེ་ལྔ་པ་པདྨ་དང་ཟླ་བ་ལ་བྲི་བར་བྱའོ། །གཙུག་ཕུད་སངས་རྒྱས་ཀྱི་གནས་ལྷོ་རུ་པདྨའི་རྒྱལ་པོའི་པདྨའི་ལྕགས་ཀྱུ། པདྨའི་ཏིང་ངེ་འཛིན་གྱི་གནས་ནུབ་ཏུ་པདྨ་ལེགས་པའི་པདྨའི་ཁུ་ཚུར་
གཉིས། པདྨ་ངེས་པའི་དབང་ཕྱུག་གི་གནས་སུ་བྱང་དུ་པདྨ་ཆགས་པའི་པདྨའི་མདའ་གཞུ་བྲི་བར་བྱའོ། །དེ་ལ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་དང་། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོས་བྲི་བར་བྱའོ། །སངས་རྒྱས་པདྨ་ལ་
སོགས་པའི་ཕྱག་རྒྱ་ནི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་ཉིད་བརྗོད་པར་བྱའོ། །སྔ་མ་བཞིན་དུ་གཙུག་ཕུད་སངས་རྒྱས་ཀྱི་ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོ་དང་། དཀྱིལ་འཁོར་ཆེན་པོ་ལས་བཤད་པའི་དབུས་སུ་བྲི་བར་བྱའོ། །འགྲོ་བ་འདུལ་བའི་
གནས་སུ་པདྨའི་ཁྲོ་གཉེར་གྱི་མཚན་མ། པདྨས་མཚན་པའི་ཡིད་བཞིན་གྱི་ནོར་བུའི་ཕྱག་རྒྱའོ། །གཙུག་ཕུད་སངས་རྒྱས་ཀྱི་གནས་སུ་པདྨ་ཉི་མའི་ཕྱག་རྒྱ། པདྨ་ཏིང་ངེ་འཛིན་གྱི་གནས་སུ་པདྨ་བཞད་པའི་ཕྱག་རྒྱ། པདྨ་ངེས་པའི་དབང་ཕྱུག་གི་གནས་སུ་པདྨའི་དཔལ་གྱི་ཕྱག་རྒྱ། དཀྱིལ་
འཁོར་ཆེན་པོ་ལས་བཤད་པའི་སྙིང་པོ་ཉིད་ཀྱིས་བྲི་བར་བྱའོ། །སྔ་མ་བཞིན་དུ་པདྨའི་ཏིང་ངེ་འཛིན་གྱི་དཀྱིལ་འཁོར་ཆེན་པོ་ལས་བཤད་པ་དང་། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོ་དབུས་སུ་བྲི་བར་བྱའོ། །འགྲོ་བ་འདུལ་བའི་གནས་སུ་པདྨ་སྒྲོལ་མའི་ཕྱག་རྒྱ།

གཙུག་ཕུད་སངས་རྒྱས་ཀྱི་གནས་སུ་པདྨ་རྣོན་པོའི་ཕྱག་རྒྱ། པདྨ་ཏིང་ངེ་འཛིན་གྱི་གནས་སུ་པདྨ་གསུང་བའི་ཕྱག་རྒྱ། པདྨ་ངེས་པའི་དབང་ཕྱུག་གི་གནས་སུ་པདྨ་རྒྱུའི་ཕྱག་རྒྱ། དཀྱིལ་འཁོར་ཆེན་པོ་ལས་བཤད་པའི་སྙིང་པོས་བྲི་བར་བྱའོ། །སྔ་མ་བཞིན་དུ་པདྨ་ངེས་པའི་དབང་
ཕྱུག་གི་དཀྱིལ་འཁོར་ཆེན་པོ་ལས་བཤད་པའམ། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་སྙིང་པོས་བྲི་བ་དང་། འགྲོ་བ་འདུལ་བའི་གནས་སུ་པདྨ་གར་གྱི་དབང་ཕྱུག་གི་ཕྱག་རྒྱ། གཙུག་ཕུད་སངས་རྒྱས་ཀྱི་གནས་སུ་པདྨ་བསྲུང་བའི་ཕྱག་རྒྱ། པདྨ་ཏིང་ངེ་འཛིན་གྱི་
གནས་སུ་པདྨ་ཁུ་ཚུར་གྱི་ཕྱག་རྒྱ། པདྨ་ངེས་པའི་དབང་ཕྱུག་གི་གནས་སུ་པདྨ་གནོད་སྦྱིན་གྱི་ཕྱག་རྒྱ་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་བྲི་བར་བྱའོ། །འདི་དག་གི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་
པོ་ལས་བཤད་པ་ཁོ་ན་ཉིད་གཟུང་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་འགྲེལ་པ། དེ་ཁོ་ན་ཉིད་སྣང་བར་བྱེད་པ་ལས་ཕྱག་རྒྱ་བཞི་པའི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་བར་མ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། ཕྱག་
རྒྱ་བཞི་པའི་དཀྱིལ་འཁོར་བཤད་ནས། མདོར་བསྡུས་པ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་ནི། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་
ཐོགས་ཉིད་ལའོ། །འདིར་དང་པོར་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་ཕྱག་རྒྱ་ཆེན་པོ་ཁང་བུ་བརྩེགས་པ་དང་། གདན་བསྐྱེད་པའི་མཐར་ཐུག་པའི་བར་དུ་ཤེས་པར་བྱའོ། །འཕགས་པ་སྤྱན་རས་གཟིགས་དབང་པོ་ནི་འགྲོ་བ་འདུལ་བའོ། །འདི་ཞེས་བྱ་བ་ནི་བློ་ལ་གནས་པའོ། །
འཇིག་རྟེན་གྱི་ཁམས་ཐམས་ཅད་ཀྱི་འགྲོ་བ་དེ་ཐམས་ཅད་གདུལ་བར་བྱ་བ་དང་། དམ་པའི་དོན་གྱི་དངོས་གྲུབ་ཐམས་ཅད་ཐོབ་པར་བྱ་བ་དང་། གང་གིས་ལུང་དང་རྟོགས་པའི་བདག་ཉིད་ལ་རབ་ཏུ་འཇོག་པ་དེ་ནི་འགྲོ་བ་འདུལ་བའི་སྟེ། སྤྱན་རས་གཟིགས་དབང་ཕྱུག་དེར་ངེས་པའི་ཡེ་ཤེས་

སོ། །དེ་སྟོན་པར་བྱེད་པའི་སྒྲའི་ཚུལ་ལ་ཡང་རྒྱུ་ལ་འབྲས་བུ་བཏགས་ནས་འགྲོ་བ་ཐམས་ཅད་འདུལ་བའི་རང་གི་སྙིང་པོ་ཞེས་བྱ་བ་སྟེ། བཅོམ་ལྡན་འདས་ཀྱིས་རང་གི་སྙིང་པོ་འདི་གསུངས་པ་ནི་བཤད་པའོ། །ཨོཾ་སརྦྦ་ཛཱ་གད་བི་ན་ཡ་ཞེས་བྱ་བ་ལ་སོགས་པའོ། །འདི་སྐད་སྟོན་པ་ཡིན་ཏེ།
བྱང་ཆུབ་སེམས་དཔའ་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་བྲི་བར་འདོད་པ་ན། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་འགྲོ་བ་འདུལ་བའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་
ཆེན་པོ་ཇི་ལྟ་བ་བཞིན་དུ་བྱས་ནས། ཁང་བུ་བརྩེགས་པ་ནས་གདན་རྣམ་པ་གཉིས་བསྐྱེད་ལ། ནམ་མཁའི་ཕྱོགས་ནས་བབས་ཏེ། སྔ་མ་བཞིན་དུ་པདྨ་དང་ཟླ་བའི་སྟེང་དུ་ཕྱག་རྒྱ་ཆེན་པོ་བཅིངས་ཏེ་འདུག་པར་བྱའོ་ཞེས་བྱ་བ་འདི་ཙམ་གྱིས་ནི་དང་པོར་སྦྱོར་བ་མཆོག་གི་ཏིང་ངེ་འཛིན་ཏོ། །
བཤད་མ་ཐག་པའི་འགྲོ་བ་འདུལ་བའི་སྙིང་པོས་མདུན་དུ་གནས་པའི་པདྨ་དང་ཟླ་བ་ལ། རང་གི་སྙིང་པོས་འགྲོ་བ་འདུལ་བ་སྤྲུལ་ལ་གཞག་པར་བྱའོ་ཞེས་བྱ་བ་འདི་ནི་འདིར་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་
གཉིས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ནས་བརྩམས་པ་ནི། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་ཐམས་ཅད་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་
འཁོར་དུ་དམ་ཚིག་དང་དབང་བསྐུར་བས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་པོས་ཞེས་བྱ་བ་ལ་སོགས་པས་ཕྱག་རྒྱ་གཅིག་པའི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་
རྒྱས་པ་འདི་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །འཕགས་པ་སྤྱན་རས་གཟིགས་ཀྱི་དབང་པོ་ནི་འགྲོ་བ་འདུལ་བའོ། །འདི་ཞེས་བྱ་བ་ནི་འཆད་པར་འགྱུར་བའོ། །འགྲོ་བ་ཐམས་ཅད་འདུལ་བས་ན་འཕགས་པ་སྤྱན་རས་གཟིགས་དབང་ཕྱུག་མཚོན་པ་ཡིན་ནོ། །

འགྲོ་བ་ཐམས་ཅད་འདུལ་བ་ཞེས་བྱ་བའི་དཀྱིལ་འཁོར་གསུངས་པ་ནི་བཤད་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་བརྗོད་པ་སྟེ། སྔོན་དུ་བསྙེན་པའི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བས་ནི་ཕྱག་
རྒྱ་གཅིག་པའི་ཏིང་ངེ་འཛིན་གསུམ་བསྒོམ་པ་སྔོན་དུ་འགྲོ་བས་འགྲོ་བ་འདུལ་བའི་དཀྱིལ་འཁོར་ཇི་སྲིད་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ལ་དཀྱིལ་འཁོར་འདི་ཉིད་བྲི་བར་བྱ་བའམ། ཡང་ན་དཀྱིལ་འཁོར་ཆེན་པོའི་ཆོ་གས་རྣལ་འབྱོར་ཆེན་པོ་བྱས་ལ།
རེ་རེ་ཞིང་ཡང་སྔགས་འབུམ་བཟླས་པར་བྱས་ཏེ། དེ་ནས་ཏིང་ངེ་འཛིན་རྣམ་གསུམ་ཞག་བདུན་བསྒོམས་པའི་རྗེས་ཐོགས་ལ་དཀྱིལ་འཁོར་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་གྱི་དོན་ཏེ། གང་གི་ཕྱིར་ཕྱག་རྒྱ་གཅིག་པའི་དཀྱིལ་འཁོར་དུ་འཇུག་པ་མེད་ན་མདོར་བསྡུས་པ་ལ་དགའ་
བའི་སེམས་ཅན་རྗེས་སུ་གཟུང་བར་མི་འགྱུར་བ་དེའི་ཕྱིར། དེ་ནས་རབ་ཏུ་བཤད་བྱ་བ། །འགྲོ་བ་འདུལ་བའི་དཀྱིལ་འཁོར་ཏེ། །ཞེས་བྱའོ། །དཀྱིལ་འཁོར་ཆེན་པོའི་ཚུལ་དུ་ནི། །ཞེས་བྱ་བ་ནི། འགྲོ་བ་འདུལ་བའི་དཀྱིལ་འཁོར་ཆེན་པོའི་ཚུལ་གྱིས་ཡང་དག་པར་བྲི་བའོ། །ཕྱི་ཡི་དཀྱིལ་
འཁོར་བྲི་བར་བྱ། །ཞེས་བྱ་བ་ལ་སོགས་པ་ནི་གོ་སླའོ། །དེར་ནི་འདབ་མ་ཀུན་ཁྱབ་པ། །སྣ་ཚོགས་གཟུགས་ནི་བྲི་བར་བྱ། །ཞེས་བྱ་བ་ནི། དེ་ལ་དཀྱིལ་འཁོར་གྱི་དབུས་སུ་འདབ་མ་ཀུན་ལ་པདྨའི་རིགས་དེས་ཁྱབ་ཅིང་སྤྲུལ་པའི་ངང་ཚུལ་གང་ལ་མངའ་བ་དེ་ནི་འདིར་འདབ་མ་ཀུན་ཁྱབ་པའོ། །རྣམ་
པ་སྣ་ཚོགས་པ་དུ་མ་སངས་རྒྱས་པདྨ་ལ་སོགས་པའི་གཟུགས་གང་ལ་མངའ་བ་འདི་ནི་སྣ་ཚོགས་སོ། །འདབ་མ་ཀུན་ལ་ཁྱབ་པ་ཡང་ཡིན་ལ་སྣ་ཚོགས་པའི་གཟུགས་ཀྱང་འདི་ཡིན་པས་ན། པདྨ་ཀུན་ལ་ཁྱབ་པ་སྣ་ཚོགས་པའི་གཟུགས་ཏེ། འགྲོ་བ་འདུལ་བ་དེ་བྲི་བར་བྱའོ། །དེའི་དོན་ནི་འདི་ཡིན་
ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་བཞིན་དུ་ཕྱི་དང་ནང་གི་དཀྱིལ་འཁོར་དེ་བྲིས་ལ། དཀྱིལ་འཁོར་གྱི་ལྟེ་བར་ཡི་གེ་ཧྲཱི་ལས་པདྨ་དེའི་སྟེང་དུ་ཡི་གེ་ཨ་ལས་ཟླ་བའི་དཀྱིལ་འཁོར་བསྐྱེད་ལ། ཨོཾ་སརྦྦ་ཛ་གད་བི་ན་ཡ་མ་ཧཱ་སཏྭ་ཨཱ་གཙྪ་ཤཱི་གྷྲཾ་བི་ཤྭ་རཱུ་བཾ་དཪྴ་ཡ་མ་མ་ཙ་སརྦྦ་སིདྡྷི་ཡ་པྲ་ཡཙྪ་ཧྲཱི།

ཞེས་བརྗོད་པས། བཅོམ་ལྡན་འདས་འགྲོ་བ་འདུལ་བའི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་ཀྱི་དཀྱིལ་འཁོར་ལས་གསུངས་པའི་ལྷའི་གཟུགས་ཀྱི་སྤྱི་གཙུག་ནས་བརྩམས་ནས་རྐང་མཐིལ་གྱི་བར་དུ་འོད་ཟེར་གྱི་ཚུལ་གྱིས་འབྱིན་པ་བྲིས་ལ། ནམ་མཁའི་ཕྱོགས་
ནས་ཕབ་སྟེ། གཟུགས་བརྙན་དང་གཅིག་ཏུ་བསྲེ་བར་བྱའོ། །དེ་ནས་ཞེས་བྱ་བ་ནི་རྗེས་ཐོགས་ཉིད་ལའོ། །འགྲོ་བ་འདུལ་བའི་དཀྱིལ་འཁོར་ཆེན་པོའི་ཚུལ་གྱིས་རང་གི་ཆོ་ག་ཐམས་ཅད་རྗེས་སུ་སྤྱད་ལ། རང་ལ་བྱིན་གྱིས་བརླབ་པ་ལ་སོགས་པ་ཡང་བྱས་ལ། པདྨ་ཆེ་གེ་མོ་ཞེས་རང་གི་མིང་ནས་
བརྗོད་ནས། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཛྫ་གད་བི་ན་ཡ་མ་ཧཱ་སཏྭ་ཨཱ་གཙྪ་ཤཱི་གྷྲཾ་བི་ཤྭ་རཱུ་བཾ་དཪྴ་ཡ་མ་མ་ཙ་སརྦྦ་སིདྡྷི་ཡ་པྲ་ཡཙྪ་ཧྲཱི་ཨ་ཞེས་བརྗོད་པས། འགྲོ་བ་འདུལ་བའི་དཀྱིལ་འཁོར་གྱི་དབུས་སུ་རྡོ་རྗེ་པདྨོ་བསམ་པར་བྱའོ། །དེ་ནས་བཛྲ་པདྨོ་ཨ་ཧཾ་ཞེས་
བརྗོད་ཅིང་། རྡོ་རྗེ་པདྨའི་ང་རྒྱལ་བསྒོམ་པར་བྱའོ། །ཛ་གད་བི་ན་ཡོ་ཨ་ཧཾ་ཞེས་བརྗོད་པས་པདྨ་དེ་ཉིད་འགྲོ་བ་འདུལ་བའི་རང་བཞིན་དུ་བདག་ཉིད་བསྒོམ་པར་བྱའོ། །དེ་ནས་བསྡུ་བ་བྱས་ལ་མཚན་བརྒྱ་རྩ་བརྒྱད་པས་བསྟོད་དེ། རྟ་མགྲིན་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་དགུག་པ་
དང་། གཞུག་པ་དང་། བཅིང་བ་དང་། དབང་དུ་བྱས་ལ། པདྨའི་གནོད་སྦྱིན་གྱིས་བགེགས་བསལ་ལ་ར་བ་དང་དྲ་བ་བྱས་ཏེ། པདྨའི་ཁུ་ཚུར་གྱིས་སྒོ་བཅད་ལ། པདྨ་སྲུང་བའི་ཕྱག་རྒྱས་བསྲུང་བ་ཐམས་ཅད་ཡང་དག་པར་བསྲུངས་ལ། འགྲོ་བ་འདུལ་བའི་སྙིང་པོས་མཆོད་ཡོན་ཕུལ་ནས། ཞལ་
བསིལ་གྱི་སྔགས་དང་། ཕྱག་རྒྱས་ཞལ་བསིལ་དབུལ་ལོ། །དེ་ནས་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། དབང་བསྐུར་བའི་ཕྱག་རྒྱས་དབང་བསྐུར་ལ། ཡང་མཆོད་ཡོན་ཕུལ་ནས་མཆོད་པ་
ཐམས་ཅད་ཀྱིས་ཡང་དག་པར་མཆོད་དེ་གནང་བ་ནོད་པའི་རྗེས་ཐོགས་ཁོ་ན་ལ། འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་འདིར་ཆོ་ག་རྒྱས་པ་ཐམས་ཅད་ཀྱིས་ཇི་ལྟ་བ་བཞིན་དུ་བཙུད་ནས་ཞེས་བྱ་བ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་འཇུག་པའི་ཆོ་

གས་པདྨའི་སློབ་མ་གཞུག་པར་བྱའོ་ཞེས་བྱ་བའི་དོན་ཏོ། །དེ་བཞིན་དུ་བསྒོ་སྟེ་ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོའི་ཆོ་ག་རྒྱས་པ་ཐམས་ཅད་ཇི་ལྟ་བ་བཞིན་དུ་བྱས་ནས། པདྨའི་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་སློབ་མ་ལ་བཤད་པ་བཞིན་དུ་འདིར་ཡང་
བསྒོ་བར་བྱའོ་ཞེས་བྱ་བའི་ཐ་ཚིག་གོ། །གཞུང་འདི་ཙམ་གྱིས་ནི་སློབ་དཔོན་གྱི་ལས་དང་སློབ་མ་འཇུག་པའི་ཆོ་ག་རྒྱས་པ་དེ་ལྟར་བསྟན་ནས། ད་ནི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་དངོས་གྲུབ་ཀྱི་ཡེ་ཤེས་བསྒྲུབ་པར་བྱའོ་
ཞེས་བསྟན་པའི་ཕྱིར། འགྲོ་བ་འདུལ་བའི་ཡེ་ཤེས་བསླབ་པོ་ཞེས་བྱ་བ་གསུངས་ཏེ། འགྲོ་བ་འདུལ་བ་ནི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གོ། །དེར་ངེས་པའི་ཡེ་ཤེས་དེ་བསླབ་པའོ། །འགྲོ་བ་འདུལ་བའི་ཞེས་བྱ་བ་ནི། དཀྱིལ་འཁོར་ལེགས་པར་བྲིས་
ནས་ཀྱང་། །ཞེས་བྱ་བ་ནི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་བྲི་བའོ། །ཕྱག་རྒྱ་ཆེན་པོ་བསྒོམས་ན་ནི། །སྣ་ཚོགས་འཆང་དང་འདྲ་བར་འགྱུར། །ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་འཇུག་པའི་ཆོ་ག་དང་། འདིར་སློབ་དཔོན་རང་ཉིད་ཀྱི་ཆོ་ག་རྗེས་སུ་སྤྱད་
ལ་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ་བསྒོམས་ན། འགྲོ་བ་འདུལ་བ་དང་འདྲ་བར་འགྱུར་རོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་འགྲོ་བ་འདུལ་བའི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། ཕྱིས་ཕྱག་
རྒྱ་གཅིག་པའི་དཀྱིལ་འཁོར་ལས་བཤད་པའི་སྔགས་དང་བཤད་མ་ཐག་པའི་འགྲོ་བ་འདུལ་བའི་སྙིང་པོས་ཏིང་ངེ་འཛིན་རྣམ་པ་གསུམ་ཇི་ལྟ་བ་བཞིན་དུ་སྒོམ་པ་སྔོན་དུ་འགྲོ་བས་བསྐྱེད་ལ། ཉིན་རེ་ཞིང་ཐུན་བཞིའི་སྦྱོར་བས་ཐུན་རེ་རེ་ཡང་ཇི་སྲིད་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་
བྱའོ། །དེ་ནས་ཟླ་བ་ཉ་ལ་དེའི་དཀྱིལ་འཁོར་བྲིས་ནས། ཆོ་ག་ཐམས་ཅད་རྗེས་སུ་སྤྱད་ལ། བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། སློབ་དཔོན་རང་ཉིད་ཀྱི་མིང་ནས་བརྗོད་ནས་རྡོ་རྗེས་བསྒྲུབ་པར་བྱའོ། །པདྨའི་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །

སེ་གོལ་མང་པོ་བརྡབ་བགྱིས་ལ། །སངས་རྒྱས་ཐམས་ཅད་བསྡུ་བར་བྱ། །དེ་ནས་པདྨའི་སེམས་དཔའ་ཡི། །མིང་བརྒྱ་རྩ་བརྒྱད་དམ་པ་ནི། །ལན་ཅིག་རབ་ཏུ་བརྗོད་པར་བགྱི། །དེ་ནས་རྟ་མགྲིན་ལ་སོགས་པ་ལས་ཀྱི་ཕྱག་རྒྱས་བཅོམ་ལྡན་འདས་དགུག་པ་དང་། གཞུག་པ་དང་། བཅིང་
བ་དང་། དབང་དུ་བྱ་བ་དང་། སྔ་མ་བཞིན་དུ་མཆོད་པ་དང་ཕྱག་བྱ་བའི་མཐར་ཐུག་པའི་ཆོ་ག་རྗེས་སུ་སྤྱད་ལ། འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ཏེ། འགྲོ་བ་འདུལ་བའི་ཕྱག་རྒྱ་གཅིག་པའི་སྙིང་པོ་བཟླས་ཤིང་མཚན་ཐོག་ཐག་བསྒོམ་པ་བྱས་ན། དེས་འགྲོ་བ་འདུལ་བ་དང་མཚུངས་པར་
འགྱུར་རོ། །དེ་ནས་འགྲོ་བ་འདུལ་བའི་གསང་བའི་ཕྱག་རྒྱའི་ཡེ་ཤེས་བསླབ་པར་བྱའོ་ཞེས་བྱ་བ་ནི། ཕྱག་རྒྱའི་ཡེ་ཤེས་བསླབ་པའི་དུས་ཕྱིས་འགྲོ་བ་འདུལ་བ་ནི་འཕགས་པ་སྤྱན་རས་གཟིགས་དབང་ཕྱུག་གོ། །ཕྱག་རྒྱ་གཅིག་པ་དང་། ལས་ཀྱི་དཀྱིལ་འཁོར་ལ་གནས་པའི་རྣལ་
འབྱོར་པ་དག་པ་གཅིག་ཏུ་གྱུར་པར་ལྷག་པར་མོས་པའི་ཕྱག་རྒྱ་ནི་གསང་བའི་ཕྱག་རྒྱའོ། །དེར་ངེས་པའི་ཡེ་ཤེས་བསླབ་པ་ནི་བསྟན་པའོ། །སྣ་ཚོགས་གཟུགས་ཀྱི་ཏིང་འཛིན་དང་། །མཉམ་པར་གཞག་པ་བསྒོམས་ནས་ཀྱང་། །ཞེས་བྱ་བ་ནི་འགྲོ་བ་འདུལ་བའི་ཏིང་ངེ་འཛིན་གྱིས་ཏིང་ངེ་
འཛིན་སྣ་ཚོགས་ཀྱི་གཟུགས་སུ་དེ་བསྒོམས་པའོ། །ལེགས་པར་མཉམ་པར་གཞག་པའི་མཚན་མ་ཐོབ་ནས། དང་པོ་གཉིས་ནི་སྦྱར་བར་བྱ། །ཞེས་བྱ་བ་ནི་བཅོམ་ལྡན་འདས་འགྲོ་བ་འདུལ་བའི་དཀྱིལ་འཁོར་གྱི་སྐུ་གང་ཡིན་པ་དང་། རྣལ་འབྱོར་པའི་ལུས་གང་ཡིན་པ་གཅིག་ཏུ་གྱུར་པར་
ལྷག་པར་མོས་པ་ནི་དབང་པོ་གཉིས་མཉམ་པར་སྦྱོར་བའོ། །དཀྱིལ་འཁོར་དེར་སྔར་བཤད་པའི་ཚུལ་གྱིས་བྱས་ན། རྣལ་འབྱོར་པས་མྱུར་དུ་དངོས་གྲུབ་ཐོབ་པར་འགྱུར་རོ་ཞེས་བྱ་བའི་དོན་ཏོ། །འགྲོ་བ་འདུལ་བའི་དུམ་བུ་ལས་བཤད་པའི་དངོས་གྲུབ་ཐམས་ཅད་ནི་འགྲོ་བ་འདུལ་བའི་དཀྱིལ་
འཁོར་ཆེན་པོ་ལས་བཤད་པའི་རང་གི་ལྷའི་ཕྱག་རྒྱ་བཞི་པོ་རྣམས་ཀྱིས་ཇི་ལྟ་བ་བཞིན་དུ་རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་གསང་བའི་ཡེ་ཤེས་བསྟན་པའི་དུས་ཕྱིས་ཕྱག་རྒྱ་

ཆེན་པོ་ལ་སོགས་པ་ཕྱག་རྒྱ་བཅིང་བ་རྣམས་བསླབ་པར་བྱའོ་ཞེས་བྱ་བ་ནི་ཕྱག་རྒྱ་ཆེན་པོ་དང་པོར་བྱས་པའི་ཕྱག་རྒྱ་བཅིང་བ་གང་ཡིན་པ་འདི་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིང་བ་སྟེ། དེ་བསླབ་པར་བྱའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་
འཁོར་ཆེན་པོ་ལས་བཤད་པའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་། ལས་རྣམས་ཉིད་འདིར་གཟུང་བར་བྱའོ། །དངོས་གྲུབ་རྣམས་ཀྱང་དེ་བཞིན་ནོ་ཞེས་བྱ་བ་ནི་ཇི་ལྟར་དཀྱིལ་འཁོར་ཆེན་པོ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བཤད་པ་དེ་བཞིན་དུ་
འདིར་ཡིན་ནོ་ཞེས་བྱ་བའི་དོན་ཏོ། །ཇི་ལྟར་དཀྱིལ་འཁོར་ལ་དངོས་གྲུབ་ཏུ་འགྱུར་བ་དེ་བཞིན་དུ་རས་སམ། རྩིག་པའམ། སྐུ་གཟུགས་སམ། ནམ་མཁའ་ལ་བརྟགས་པའི་དཀྱིལ་འཁོར་ལ་ཡང་དམ་ཚིག་དང་དབང་བསྐུར་བ་དང་། ཕྱག་རྒྱ་ཆེན་པོའི་དངོས་གྲུབ་ཏུ་འགྱུར་རོ་ཞེས་བསྟན་པའི་
ཕྱིར། དེ་བཞིན་དུ་རས་ལ་སོགས་པ་ཡང་ཞེས་བྱ་བ་སྨོས་སོ། །ཇི་ལྟར་ཕྱག་རྒྱ་གཅིག་པའི་དཀྱིལ་འཁོར་དུ་ཕྱག་རྒྱ་ཆེན་པོ་བྲི་བའི་ཆོ་གའི་ཚུལ་དུ་གསུངས་པ་དེ་བཞིན་དུ་དམ་ཚིག་གི་ཕྱག་རྒྱ་ཆེན་པོ་བྲི་བའི་ཆོ་ག་ཡང་ཤེས་པར་བྱའོ་ཞེས་བསྟན་པའི་ཕྱིར། ཕྱག་རྒྱ་གཞན་རྣམས་ཀྱང་ཕྱག་རྒྱ་གཅིག་
པའི་དཀྱིལ་འཁོར་གྱི་ཚུལ་གྱིས་དེ་བཞིན་དུ་འགྲུབ་པར་འགྱུར་རོ་ཞེས་བྱ་བ་ནི། ཕྱག་རྒྱ་གཅིག་པའི་དཀྱིལ་འཁོར་ལས་བཤད་པའི་དངོས་གྲུབ་ཐམས་ཅད་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་དམ་ཚིག་
ནི་པདྨའི་རིགས་སྟོན་པར་བྱེད་པའི་སྒྲའི་ཚོགས་ལ་ཡང་མིང་དེ་སྐད་ཅེས་བྱའོ། །བརྟག་པ་ལས་བྱུང་བའི་ཕྱིར་རྟོག་པའོ། །ཆེན་པོ་ཡང་ཡིན་ལ་རྟོག་པ་ཡང་དེ་ཡིན་པས་ན་རྟོག་པ་ཆེན་པོའོ། །དེ་གཞན་ལས་ཁྱད་པར་དུ་གྱུར་པས་རྒྱལ་པོ་སྟེ་མཛེས་ཤིང་འབར་བའི་ཕྱིར་རོ། །རྫོགས་སོ་ཞེས་
བྱ་བ་ནི་རྩ་བའི་རྒྱུད་ཀྱི་མཐར་ཐུག་པའོ། །པདྨའི་རིགས་འདི་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ལས་བྱུང་བས་རྒྱུ་ལ་འབྲས་བུ་བཏགས་ནས་ཆོས་ཀྱི་ཕྱག་རྒྱ་ཞེས་བརྗོད་དོ། །དེ་སྐད་དུ་ཡང་། སོ་སོར་རྟོག་པའི་འགྲོ་བ་ཀུན། །གཏི་མུག་རྒྱ་མཚོ་ལས་བསྒྲལ་ཕྱིར། །བློ་ལྡན་

འཇིག་རྟེན་དབང་ཕྱུག་གིས། །རྟོག་པའི་རྒྱལ་པོ་འདི་གསུངས་སོ། །ཞེས་བྱ་བ་འདི་གསུངས་པ་ཡིན་ནོ། །རྣམ་དག་ཆོས་ནི་རྟོགས་བྱའི་ཕྱིར། །དྲི་མ་མེད་པ་དེ་ཉིད་ནི། །སྣང་བྱེད་དགེ་བ་འདི་བཤད་ལས། །བདག་གིས་བསོད་ནམས་གང་བསགས་པ། །དེ་ཡིས་འཇིག་རྟེན་མ་ལུས་པ། །
སྙིང་རྗེ་ལས་བྱུང་ཀུན་དགའ་ཆེ། །སྙིང་པོ་བསམ་མི་ཁྱབ་ཆེན་གཙོ། །པདྨ་ལས་བྱུང་རྒྱལ་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་འགྲེལ་པ། དེ་ཁོ་ན་ཉིད་སྣང་བར་བྱེད་པ་ཞེས་བྱ་བ་པདྨའི་རིགས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་ལོག་
པར་ལྟ་བའི་གཉེན་པོར་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་ཕྱག་རྒྱའི་རང་བཞིན་པདྨའི་རིགས་བསྟན་ནས། ད་ནི་སེར་སྣ་ཅན་གྱི་གཉེན་པོར་གྱུར་པ། སེམས་ཅན་ཐམས་ཅད་ཀྱི་བསམ་པའི་ལས་ཡོངས་སུ་རྫོགས་པར་བྱེད་པའི་ནོར་བུའི་རིགས་ནི། དེ་ནས་ཞེས་བྱ་བ་ལ་སོགས་པ་
གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །འདིར་དང་པོ་སྦྱོར་བའི་ཏིང་ངེ་འཛིན་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དང་པོ་སྦྱོར་བའི་ཏིང་ངེ་འཛིན་གྱི་སྟེང་དུ་རྡོ་རྗེ་སེམས་དཔའ་དང་།
རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་སྤྲུལ་པའི་མཐར་ཐུག་པ་ཡིན་པར་ཤེས་པར་བྱའོ་ཞེས་བྱ་བ་དེ་དག་འདིར་བཤད་པ་ཡིན་ནོ། །དེ་བཞིན་གཤེགས་པ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་
དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པ་ལ་སོགས་པའོ། །ཡང་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ནས་ཞེས་བྱ་བ་ལ་ཡང་གི་སྒྲ་ནི་ཟློས་པའི་དོན་ཏོ། །སྔར་ནི་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས། གཅིག་ཏུ་འདུས་པར་
མཛད་པ་ཡིན་ལ་ད་ལྟར་ནི་ནམ་མཁའི་སྙིང་པོ་ལ་མཚན་བརྒྱ་རྩ་བརྒྱད་པས་གསོལ་བ་གདབ་པའི་ཕྱིར། གཅིག་ཏུ་ཚོགས་ཤིང་འདུས་པར་བྱས་པ་ཡིན་ནོ། །དེ་བཞིན་གཤེགས་པ་ཐམས་ཅད་དབང་བསྐུར་བ་ནི་རིན་པོ་ཆེའི་རིགས་སུ་དེའི་རྒྱུ་ཡིན་པས་རིན་པོ་ཆེ་བསྐྱེད་པར་མཛད་པ་ཡིན་ནོ། །གང་གི་ཕྱིར་

འཕགས་པ་ནམ་མཁའི་སྙིང་པོའི་ཐུགས་ལས་རིགས་ཐམས་ཅད་འདིར་བསྐྱེད་པར་མཛད་པ་ཡིན་ནོ། །རྡོ་རྗེ་འཛིན་པ་དེ་ཉིད་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་སེམས་དཔའ་རྡོ་རྗེའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ནམ་
མཁའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ནམ་མཁའི་སྙིང་པོའི་གཟུགས་འཛིན་པ་ལ་འཆད་པར་འགྱུར་བའི་མཚན་བརྒྱ་རྩ་བརྒྱད་པ་འདིས་གསོལ་བ་བཏབ་པ་ཅིའི་དོན་དུ་གཉེར་བ་ཡིན་ནོ། །དོན་དུ་གཉེར་བའི་རྒྱུ་ཡོད་པའི་གསོལ་བ་འདེབས་པའི་
ཕྱིར་ལྡན་པར་བཤད་དོ། །ནམ་མཁའི་སྙིང་པོ་ཞེས་བྱ་བ་ནི། དེ་ལ་ནམ་མཁའི་སྒྲས་ནི་འདིར་རྣམ་པར་སྣང་མཛད་ཀྱི་ཕྱག་ན་གནས་པའི་རྡོ་རྗེ་རིན་པོ་ཆེ་ལས་དེ་བཞིན་གཤེགས་པ་ཐམས་ཅད་བསྐྱེད་པར་བརྗོད་པ་ཡིན་ཏེ། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ལས་བྱུང་བ་ནམ་མཁའ་
ཡང་ཡིན་ལ་སྙིང་པོ་ཡང་འདི་ཡིན་པས་ན་ནམ་མཁའི་སྙིང་པོས་ཏེ་དེ་བཞིན་གཤེགས་པ་དེ་རྣམས་བྱང་ཆུབ་སེམས་དཔའ་ཆེན་པོ་ནམ་མཁའི་སྙིང་པོས་བསྐྱེད་པ་ཡིན་ནོ། །སེམས་ཅན་དོན་ཞེས་བྱ་བ་ནི་སེམས་ཅན་གྱི་དོན་དུ་གཉེར་བས་ན་སེམས་ཅན་དོན་ནོ། །སེམས་དཔའ་ཆེན་པོ་ཞེས་བྱ་བ་ནི།
སེམས་དཔའ་ཡང་ཡིན་ལ་ཆེན་པོ་ཡང་དེ་ཡིན་པས་སེམས་དཔའ་ཆེན་པོ་སྟེ། བྱང་ཆུབ་ཀྱི་སེམས་ཀྱི་རང་བཞིན་གྱིས་ཐམས་ཅད་དུ་ཁྱབ་པའོ་ཞེས་བྱ་བའི་དོན་ཡིན་ནོ། །གཟི་བརྗིད་ཆེན་པོ་ཞེས་བྱ་བ་ནི། གཟི་བརྗིད་ཆེན་པོ་འདི་ལ་མངའ་བས་ན་གཟི་བརྗིད་ཆེན་པོ་སྟེ། མདངས་དང་ལྡན་པའི་གཟི་
བརྗིད་ཀྱིས་ནམ་མཁའ་ཐམས་ཅད་ཁྱབ་པའོ། །རིན་པོ་ཆེ་ཆེན་པོ་ནི་རྡོ་རྗེ་རིན་ཆེན་གྱི་གཟུགས་ཀྱིས་ནམ་མཁའ་ཁྱབ་པས་ན་རིན་པོ་ཆེའོ། །རིན་ཆེན་མཆོག་ནི་རིན་པོ་ཆེ་བཟང་པོ་རྣམས་ལས་ཀྱང་ཆེས་བཟང་བའི་རིན་པོ་ཆེའོ། །རིན་པོ་ཆེས་མཚན་པ་ལ་སོགས་པའི་མཚན་མའི་རང་བཞིན་དེ་དག་
ལས་གཙོ་བོ་མཆོག་ཡིན་ཏེ། རིགས་ཀྱི་བདག་པོའི་མཚན་མའི་གཟུགས་ཡིན་པའི་ཕྱིར་རོ། །རྡོ་རྗེ་རིན་ཆེན་ཞེས་བྱ་བ་ནི། རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་ནི་རྡོ་རྗེ་རིན་ཆེན་ཏེ་མཚན་བདུན་ནོ། །དབང་བསྐུར་བྱིན་ཞེས་བྱ་བ་ནི། རིན་པོ་ཆེའི་རིགས་ཀྱི་རང་བཞིན་ཡིན་པའི་ཕྱིར་རོ། །

རིན་ཆེན་ཞེས་བྱ་བ་ནི། རིན་པོ་ཆེའི་རིགས་དེས་ནམ་མཁའ་ཁྱབ་པའོ། །དག་པ་ཆེ་ཞེས་བྱ་བ་ནི། རིན་པོ་ཆེའི་རིགས་ཀྱི་གཟུགས་དེས་བག་ཆགས་དང་བཅས་པའི་ཉོན་མོངས་པའི་དྲི་མ་འཁྲུད་པའི་ཕྱིར་དག་པ་ཆེའོ། །དགེ་བ་ཆེ་ཞེས་བྱ་བ་ནི་རྣམ་པར་ཐར་པའི་རང་བཞིན་ཡིན་པས་ན་དགེ་བ་ཆེའོ། །
སངས་རྒྱས་རིན་ཆེན་ཞེས་བྱ་བ་ནི། རིན་པོ་ཆེའི་རིགས་དེས་དབང་བསྐུར་བའི་ངོ་བོ་ནི་སངས་རྒྱས་བཅོམ་ལྡན་འདས་རྣམས་ལས་གཞན་ན་མེད་པའི་ཕྱིར་སངས་རྒྱས་རིན་ཆེན་ཞེས་བརྗོད་དོ། །རྣམ་དག་སྐུ་ཞེས་བྱ་བ་ནི། ལུས་ལ་དྲི་མ་མི་མངའ་བས་ན་རྣམ་དག་སྐུའོ། །རིན་ཆེན་རིན་ཆེན་ཞེས་བྱ་བ་
ནི། ནམ་མཁའི་སྙིང་པོའི་ཕྱག་ན་གནས་པ་སྟེ་མཚན་བདུན་ཡིན་ནོ། །ནམ་མཁའ་ཞེས་བྱ་བ་ནི། ནམ་མཁའི་འོད་ཟེར་གྱི་གཟུགས་ཀྱིས་སྤྲོ་བའི་ཕྱིར་ནམ་མཁའོ། །ནམ་མཁའ་ལས་བྱུང་ཞེས་བྱ་བ་ནི། ནམ་མཁའི་འོད་ཟེར་དང་གཅིག་ཏུ་གྱུར་ནས། རྡོ་རྗེ་རིན་ཆེན་བསྐྱེད་པའི་ཕྱིར་ནམ་
མཁའ་ལས་བྱུང་བའོ། །ནམ་མཁའི་ཁམས་ཐམས་ཅད་ཅེས་བྱ་བ་ནི། ནམ་མཁའི་ཁམས་ཐམས་ཅད་འོད་ཟེར་གྱི་རང་བཞིན་དུ་གྱུར་ནས་ངེས་པར་འབྱུང་བའི་ཕྱིར་ནམ་མཁའ་ཐམས་ཅད་དོ། །འོད་ཆེ་ཞེས་བྱ་བ་ནི། ནམ་མཁའི་འོད་ཟེར་དེ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་དུ་
སྣང་བའོ། །ཀུན་རྫོབ་ཀྱི་བདག་ཉིད་ཀྱིས་ནམ་མཁའི་ཁམས་ཐམས་ཅད་དུ་འོད་ཆེན་པོ་སྣང་བ་དེས་ནམ་མཁའ་ཁྱབ་པའོ་ཞེས་བྱ་བའི་དོན་ཏོ། །ནམ་མཁའི་དབྱིངས་ཞེས་བྱ་བ་ནི། རྡོ་རྗེ་རིན་ཆེན་བསྐྱེད་པའི་རྒྱུ་ཡིན་པའི་ཕྱིར་ནམ་མཁའི་དབྱིངས་སོ། །ཕྱོགས་ཀུན་ཞེས་བྱ་བ་ནི་ཕྱོགས་བཅུའི་རང་
བཞིན་ཡིན་པའི་ཕྱིར་ཕྱོགས་ཀུན་ནོ། །རེ་ཀུན་མཆོག་ཅེས་བྱ་བ་ནི། འདི་ལྟར་ནམ་མཁའི་རང་བཞིན་གྱི་ཕྱོགས་ཐམས་ཅད་དུ་གྱུར་པའི་ཆོས་འདིས་ཕྱོགས་ཐམས་ཅད་ལས་གོང་ན་མེད་པའི་ཕྱིར་རེ་བ་ཀུན་གྱི་མཆོག་སྟེ་མཚན་བདུན་ཡིན་ནོ། །རིན་ཆེན་མཛོད་སྤུ་ཞེས་བྱ་བ་ནི། རིན་པོ་ཆེའི་མཛོད་སྤུ་འདི་ལ་
མངའ་བས་ན་རིན་ཆེན་མཛོད་སྤུའོ། །རིན་ཆེན་འབྱུང་ཞེས་བྱ་བ་ནི། རིན་པོ་ཆེ་ལས་བྱུང་བའི་དེ་བཞིན་གཤེགས་པའི་རང་བཞིན་ཡིན་པའི་ཕྱིར་རིན་ཆེན་འབྱུང་བའོ། །སངས་རྒྱས་མཛོད་སྤུ་ཞེས་བྱ་བ་ནི་སྐྱེས་བུ་ཆེན་པོའི་མཚན་སྨིན་མཚམས་ཀྱི་ཕྱོགས་སུ་གནས་པའི་ཕྱིར་དེ་བཞིན་གཤེགས་པའི་

མཛོད་སྤུའོ། །བདེ་གཤེགས་རབ་ཅེས་བྱ་བ་ནི་ཤིན་ཏུ་དགེ་ཞིང་བཟང་བར་དེ་བཞིན་གཤེགས་པའི་སངས་རྒྱས་ནི་བདེར་གཤེགས་རབ་བོ། །རིན་ཆེན་ཐམས་ཅད་ཅེས་བྱ་བ་ནི། རིན་པོ་ཆེའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་གཟུགས་ཀྱིས་རིན་པོ་ཆེའི་རིགས་ཐམས་ཅད་
བསྡུས་པའི་རང་བཞིན་ཡིན་པའི་ཕྱིར་རིན་ཆེན་ཐམས་ཅད་དོ། །རབ་ཀུན་མཆོག་ཅེས་བྱ་བ་ནི་རིན་པོ་ཆེའི་རིགས་ཀྱི་ལས་ཀྱི་ཕྱག་རྒྱའི་གཟུགས་ཀྱིས་མཚུངས་པ་མེད་པའི་ཕྱིར་རབ་ཀུན་མཆོག་གོ། །རིན་ཆེན་དགོས་པ་ཞེས་བྱ་བ་ནི། རིན་པོ་ཆེའི་འབྲས་བུ་ནི་རིན་པོ་ཆེའི་དགོས་པ་སྟེ། རིན་པོ་ཆེའི་
རིགས་ཀྱི་ལས་ཀྱི་དཀྱིལ་འཁོར་དེའི་རང་བཞིན་ཡིན་པའི་ཕྱིར། རིན་ཆེན་དགོས་པ་ཁྱོད་དེ་མཚན་བདུན་ཡིན་ནོ། །རིན་ཆེན་ཞེས་བྱ་བ་ནི་རིན་པོ་ཆེའི་རང་བཞིན་ཡིན་པའི་ཕྱིར་རིན་ཆེན་ནོ། །རིན་ཆེན་མཆོག་ཅེས་བྱ་བ་ནི་རིགས་ཀྱི་བདག་པོའི་གཟུགས་འཛིན་པའི་ཕྱིར་རིན་ཆེན་མཆོག་གོ། །རིན་ཆེན་
དྲག་ཅེས་བྱ་བ་ནི། བདག་པོའི་གཟུགས་ཀྱིས་རིན་ཆེན་ཐམས་ཅད་ཟིལ་གྱིས་མནན་ནས་གནས་པའི་ཕྱིར་རིན་ཆེན་དྲག་གོ། །དེ་བཞིན་གཤེགས་པ་ཀུན་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རང་བཞིན་ཡིན་པའི་ཕྱིར་དེ་བཞིན་གཤེགས་པ་ཀུན་ནོ། །རིན་ཆེན་ནི་རིན་པོ་ཆེ་
ཆེའི་སྐུར་གྲུབ་པའོ། །རིན་ཆེན་དམ་པ་ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་ནང་དུ་བྱང་ཆུབ་ཀྱི་སེམས་རིན་པོ་ཆེའི་གཟུགས་ཀྱིས་དམ་པར་གྱུར་པའི་ཕྱིར་རོ། །ནམ་མཁའ་ཆེ་ཞེས་བྱ་བ་ནི། ནམ་མཁའ་ཡང་ཡིན་ལ་ཆེན་པོ་ཡང་ཡིན་པ་དེ་བས་ནམ་མཁའ་ཆེན་པོའོ། །
རྫས་ཐམས་ཅད་ཀྱི་གཟུགས་ནུབ་པ་དེའི་རང་བཞིན་ཡིན་པའི་ཕྱིར་ནམ་མཁའ་ཆེའོ། །མཁའ་མཉམ་ཞེས་བྱ་བ་ནི་མཉམ་པ་ཡིན་ཏེ་ནམ་མཁའ་ཡང་དེ་ཡིན་པས་མཁའ་མཉམ་ནི་རྫས་དང་རྫས་མ་ཡིན་པ་ཐམས་ཅད་ལ་ནམ་མཁས་ཁྱབ་པའི་རང་བཞིན་ཡིན་པའི་ཕྱིར་མཁའ་མཉམ་སྟེ་མཚན་བརྒྱད་
ཡིན་ནོ། །རྒྱན་ཡིན་པས་ན་ཞེས་བྱ་བ་ནི་སྤུད་པའོ། །མཛེས་པ་ཆེ་ཞེས་བྱ་བ་ནི་མཛེས་པ་ཆེན་པོ་འདི་ལ་མངའ་བས་ན་མཛེས་པ་ཆེའོ། །མཛེས་པའི་འབྱུང་གནས་ཞེས་བྱ་བ་ནི། མཛེས་པ་ལས་འབྱུང་བས་ན་མཛེས་པའི་འབྱུང་གནས་ཏེ། སྐྱེ་བའི་གནས་ཞེས་བྱ་བའི་ཐ་ཚིག་གོ། །རབ་མཛེས་

མཛད་ཅེས་བྱ་བ་ནི་ཤིན་ཏུ་མཛེས་པར་མཛད་པའོ། །དོན་ཀུན་ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་དོན་ཐམས་ཅད་ཀྱི་རང་བཞིན་ཡིན་པའི་ཕྱིར་དོན་ཀུན་ནོ། །དག་ཅིང་ཞེས་བྱ་བ་ནི་དྲི་མ་ཐམས་ཅད་དང་བྲལ་བའི་ཕྱིར་ན་དག་པའོ། །དག་པའི་དོན་ཞེས་བྱ་བ་ནི། ཆོས་ཀྱི་དབྱིངས་རྣམ་
པར་དག