Luận tạng Tây Tạng (Tengyur) — Tập 58

ནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་
བྱའོ། །རྡོ་རྗེ་ལས་ཀྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་བསྲུང་བ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་བསྲུང་བའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་བསྲུང་བའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་གནོད་
སྦྱིན་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་གནོད་སྦྱིན་གྱི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་གནོད་སྦྱིན་གྱི་དཀྱིལ་འཁོར་རོ། །རྡོ་རྗེ་དབྱིངས་ཀྱི་དཀྱིལ་འཁོར་དེ་ཉིད་ཀྱི་དབུས་སུ། བཅོམ་ལྡན་འདས་རྡོ་རྗེ་ཁུ་ཚུར་རང་གི་གཟུངས་
ཀྱི་རིགས་པས་བྲི་བར་བྱའོ། །རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ཁུ་ཚུར་གྱི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ཁུ་ཚུར་གྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་སེམས་དཔའི་གཟུངས་འཛིན་པའི་རྡོ་རྗེ་སེམས་མ་དབུས་སུ་བྲིས་ལ། འདི་ནི་རྡོ་རྗེ་
སེམས་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་རིན་ཆེན་མ་རྡོ་རྗེ་སྙིང་པོའི་གཟུངས་འཛིན་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་རིན་ཆེན་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་རིན་ཆེན་མའི་དཀྱིལ་འཁོར་རོ། །བཅོམ་

ལྡན་འདས་རྡོ་རྗེ་ཆོས་ཀྱི་གཟུངས་འཛིན་པའི་ཆོས་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་ཆོས་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་ཆོས་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་ལས་ཀྱི་གཟུངས་འཛིན་
པའི་རྡོ་རྗེ་ལས་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་ལས་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་ལས་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་སྒེག་མོ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། སྒེག་
མོའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་སྒེག་མོའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་ཕྲེང་བ་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་ཕྲེང་བ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་ཕྲེང་བ་མའི་དཀྱིལ་
འཁོར་རོ། །བཅོམ་ལྡན་འདས་མ་རྡོ་རྗེ་གླུ་མ་དབུས་སུ་བྲིས་ལ། རྡོ་རྗེ་འབེབས་མའི་གནས་སུ་དེའི་ཕྱག་རྒྱ། རྡོ་རྗེ་གླུ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་གླུ་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་གར་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་
དེའི་ཕྱག་རྒྱ། རྡོ་རྗེ་གར་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་གར་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་བདུག་པ་མ་དབུས་སུ་བྲིས་ལ། །རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་བདུག་པ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །
རྡོ་རྗེ་བདུག་པ་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་མེ་ཏོག་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་མེ་ཏོག་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་མེ་ཏོག་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་མར་མེ་མ་
དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་མར་མེ་མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་མར་མེ་མའི་དཀྱིལ་འཁོར་རོ། །བཅོམ་ལྡན་འདས་མ་རྡོ་རྗེ་དྲི་ཆབ་མ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་དྲི་ཆབ་

མའི་གནས་སུ་རྡོ་རྗེ་སེམས་མའི་ཕྱག་རྒྱ་བྲི་བར་བྱའོ། །རྡོ་རྗེ་དྲི་ཆབ་མའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ལྕགས་ཀྱུ་དབུས་སུ་བྲིས་ལ། རྡོ་རྗེ་སེམས་མའི་གནས་སུ་དེའི་ཕྱག་རྒྱ། རྡོ་རྗེ་ལྕགས་ཀྱུའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ལྕགས་ཀྱུའི་དཀྱིལ་
འཁོར་རོ། །བཅོམ་ལྡན་འདས་རྡོ་རྗེ་ཞགས་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ཞགས་པའི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ཞགས་པའི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་ལྕགས་སྒྲོག་དབུས་སུ་བྲིས་ལ། རྡོ་རྗེ་
སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་ལྕགས་སྒྲོག་གི་གནས་སུ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་ལྕགས་སྒྲོག་གི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་འབེབས་པ་དབུས་སུ་བྲིས་ལ། རྡོ་རྗེ་སེམས་དཔའི་གནས་སུ་དེའི་ཕྱག་རྒྱ། རྡོ་རྗེ་འབེབས་པའི་གནས་སུ་རྡོ་རྗེ་
སེམས་དཔའི་ཕྱག་རྒྱ་བྲི་བར་བྱའོ། །རྡོ་རྗེ་འབེབས་པའི་དཀྱིལ་འཁོར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་གཟུངས་ཀྱི་དཀྱིལ་འཁོར་སྒྲུབ་པ་པོས་དཀྱིལ་འཁོར་བྲིས་ལ། རྩ་བའི་རྒྱུད་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་འཇུག་པ་ལ་སོགས་པའི་ཆོ་ག་རྗེས་སུ་
སྤྱད་ལ། གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིངས་ཏེ། གཟུངས་ཀྱི་དཀྱིལ་འཁོར་གྱི་རིག་པ་ཟློས་ཤིང་བསྒྲུབ་པར་བྱའོ། །ཁམས་གསུམ་རྣམ་རྒྱལ་འདྲ་བ་ནི། །ཞེས་བྱ་བ་ལ་སོགས་པ་ནི་འཇིག་རྟེན་གསུམ་ལས་
རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དང་འདྲ་བའོ། །རྡོ་རྗེ་ཀུན་གྱི་རིགས་རྣམས་ནི། །ཞེས་བྱ་བ་ནི་རྡོ་རྗེ་རིན་པོ་ཆེའི་རིགས་དང་། ཕྱི་རོལ་གྱི་རྡོ་རྗེའི་རིགས་རྣམས་སོ། །དཀྱིལ་འཁོར་ཐམས་ཅད་ཚུལ་དུ་ཡང་། །ཞེས་བྱ་བ་ནི་རྩ་བའི་རྒྱུད་ལས་བཤད་པ་ཉིད་ཀྱི་ཚུལ་
གྱིས་འཁོར་ལོ་ལྔ་དང་ལྡན་པས་སོ། །མཁས་པས་རབ་ཏུ་བྲི་བར་བྱ། །ཞེས་བྱ་བ་ནི་མཁས་པས་ཡང་དག་པར་ཕྱིན་ཅི་མ་ལོག་པར་བྲི་བར་བྱའོ། །དེར་ཞུགས་ནས་ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་

བའི་དཀྱིལ་འཁོར་ལས་བཤད་པའི་རྡོ་རྗེ་རིགས་ཀྱི་རྣལ་འབྱོར་བྱས་ཏེ། བསྒོམས་ནས་རང་གི་གཟུངས་ཀྱི་ཚུལ་གྱིས་ཕྱག་རྒྱ་ཆེན་པོ་ལ་སོགས་པ་ཇི་སྲིད་མཚན་མ་ཐོབ་པར་གྱུར་པའི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་ལ། དེའི་རྗེས་ལ་
འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་རྣམ་པ་གསུམ་ཇི་ལྟ་བ་བཞིན་
དུ་བསྒོམས་ཏེ། རྩ་བའི་རྒྱུད་ཀྱི་གཟུངས་ཀྱི་དཀྱིལ་འཁོར་ལས་ཇི་ལྟ་བ་བཞིན་དུ་བཤད་པའི་ཚུལ་གྱིས་བྲིས་ལ། དཀྱིལ་འཁོར་དབུས་ཀྱི་ལྟེ་བ་ལ་བཅོམ་ལྡན་འདས་རྡོ་རྗེ་ཧཱུཾ་མཛད་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་
པོའི་གཟུངས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་རིག་པ་བྲི་བར་བྱའོ། །ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་གས་བསྐལ་པ་བཟང་པོའི་མཚན་མའི་ཕྱག་རྒྱའི་ཚོགས་ཀྱི་མཐར་ཐུག་པའི་ཕྱག་རྒྱའི་
ཚོགས་ཐམས་ཅད་ཇི་ལྟ་བའི་གནས་རྣམས་སུ་བྲི་བར་བྱའོ། །འདི་ནི་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་རོ། །བཅོམ་ལྡན་འདས་རྡོ་རྗེ་རིན་ཆེན་ཧཱུཾ་མཛད་འདི་ཉིད་དཀྱིལ་འཁོར་གྱི་དབུས་སུ་རང་གི་གཟུངས་ཀྱི་རིགས་པས་བྲི་བར་བྱའོ། །རྡོ་རྗེ་ཧཱུཾ་མཛད་ཀྱི་གནས་སུ་དེའི་ཕྱག་རྒྱ་རིན་ཆེན་ཧཱུཾ་
མཛད་ཀྱི་གནས་སུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བྲི་བར་བྱའོ། །རིན་ཆེན་ཧཱུཾ་མཛད་ཀྱི་དཀྱིལ་འཁོར་རོ། །བཅོམ་ལྡན་འདས་ཆོས་ཀྱི་ཧཱུཾ་མཛད་དབུས་སུ་བྲིས་ལ། རྡོ་རྗེ་ཧཱུཾ་མཛད་ཀྱི་གནས་སུ་དེའི་ཕྱག་རྒྱ། ཆོས་ཀྱི་ཧཱུཾ་མཛད་ཀྱི་གནས་སུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བྲིའོ། །ཆོས་ཀྱི་ཧཱུཾ་མཛད་
ཀྱི་དཀྱིལ་འཁོར་རོ། །བཅོམ་ལྡན་འདས་ལས་ཀྱི་ཧཱུཾ་མཛད་དབུས་སུ་བྲིས་ལ། རྡོ་རྗེ་ཧཱུཾ་མཛད་ཀྱི་གནས་སུ་དེའི་ཕྱག་རྒྱ། ལས་ཀྱི་ཧཱུཾ་མཛད་ཀྱི་གནས་སུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བྲི་བར་བྱའོ། །ལས་ཀྱི་ཧཱུཾ་མཛད་ཀྱི་དཀྱིལ་འཁོར་རོ། །བཅོམ་ལྡན་འདས་ཁྲོ་བོ་རྡོ་རྗེ་སེམས་དཔའ་

དབུས་སུ་བྲི་བར་བྱའོ། །ཁྲོ་བོ་རྡོ་རྗེ་སེམས་དཔའི་དཀྱིལ་འཁོར་རོ། །བཅོམ་ལྡན་འདས་ཁྲོ་བོ་རྡོ་རྗེ་རྒྱལ་པོ་དབུས་སུ་བྲིས་ལ། ཁྲོ་བོ་རྡོ་རྗེ་རྒྱལ་པོའི་གནས་སུ་ཁྲོ་བོ་རྡོ་རྗེ་སེམས་དཔའི་ཕྱག་རྒྱ་བྲི་བར་བྱའོ། །ཁྲོ་བོ་རྡོ་རྗེ་རྒྱལ་པོའི་གཟུངས་སྒྲུབ་པའི་དཀྱིལ་འཁོར་རོ། །ཁྲོ་བོ་རྡོ་རྗེ་ཆགས་
པ་ལ་སོགས་པ་ལྷག་མ་རྣམས་ཀྱི་དཀྱིལ་འཁོར་ནི་རྡོ་རྗེ་ཆགས་པ་ལ་སོགས་པའི་དཀྱིལ་འཁོར་གྱི་རྗེས་སུ་འབྲང་བར་ཤེས་པར་བྱའོ། །ཕྱིའི་རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་རྣམས་ལ་ཡང་རྡོ་རྗེ་རིག་པ་མཆོག་ཆུང་མ་དང་བཅས་པ་དབུས་སུ་བྲི་བར་བྱའོ། །དེ་བཞིན་དུ་
དཀྱིལ་འཁོར་གཞན་ཐམས་ཅད་ཀྱང་ཤེས་པར་བྱའོ། །དཀྱིལ་འཁོར་དེ་ཉིད་ཀྱི་དབུས་སུ་སྒྱུ་མ་རྡོ་རྗེ་བྲིས་པ་ནི་སྒྱུ་མ་རྡོ་རྗེའི་དཀྱིལ་འཁོར་རོ། །དཀྱིལ་འཁོར་དེ་ཉིད་ཀྱི་དབུས་སུ་རྡོ་རྗེ་དྲིལ་བུ་བྲིས་ལ། སྒྱུ་མ་རྡོ་རྗེའི་གནས་སུ་དེའི་ཕྱག་རྒྱ། རྡོ་རྗེ་དྲིལ་བུའི་གནས་སུ་སྒྱུ་མ་རྡོ་རྗེའི་
ཕྱག་རྒྱ་བྲི་བར་བྱའོ། །རྡོ་རྗེ་དྲིལ་བུའི་དཀྱིལ་འཁོར་རོ། །དཀྱིལ་འཁོར་དེ་ཉིད་ཀྱི་དབུས་སུ་ཐུབ་པ་རྡོ་རྗེ་བྲིས་ལ། སྒྱུ་མ་རྡོ་རྗེའི་གནས་སུ་དེའི་ཕྱག་རྒྱ། ཐུབ་པ་རྡོ་རྗེའི་གནས་སུ་སྒྱུ་མ་རྡོ་རྗེའི་ཕྱག་རྒྱ་བྲི་བར་བྱའོ། །ཐུབ་པ་རྡོ་རྗེའི་དཀྱིལ་འཁོར་རོ། །དཀྱིལ་འཁོར་དེ་ཉིད་ཀྱི་དབུས་སུ་རྡོ་
རྗེ་མཚོན་ཆ་བྲིས་ལ་སྒྱུ་མ་རྡོ་རྗེའི་གནས་སུ་དེའི་ཕྱག་རྒྱ། རྡོ་རྗེ་མཚོན་ཆའི་གནས་སུ་སྒྱུ་མ་རྡོ་རྗེའི་ཕྱག་རྒྱ་བྲི་བར་བྱའོ། །རྡོ་རྗེ་མཚོན་ཆའི་དཀྱིལ་འཁོར་དེ་ཉིད་བཞིན་དུ་གཞན་ཡང་ཞེས་བྱ་བ་ཡིན་ནོ། །དེ་ལྟར་རྡོ་རྗེ་ཧཱུཾ་མཛད་ལ་སོགས་པའི་སྒྲུབ་པའི་དཀྱིལ་འཁོར་བྲིས་ནས་འཇིག་རྟེན་
གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དུ་འཇུག་པའི་ཆོ་གས་ཞུགས་ལ་འདི་སྐད་ཅེས་བརྗོད་པར་བྱའོ། །འདོད་ཆགས་ལས་ནི་ཁྱོད་བྱུང་ཞེས་བྱ་བ་དང་། དེ་ནས་དེའི་རྗེས་ལ། ཆོ་ག་ཐམས་ཅད་རྗེས་སུ་སྤྱད་ནས་བསྒྲུབས་ཏེ། གནང་བ་མནོས་ནས་གཟུངས་ཀྱི་
རིག་པ་ཇི་ལྟ་བ་བཞིན་དུ་ཟློས་ཤིང་། ཕྱག་རྒྱ་ཆེན་པོ་ལ་སོགས་པ་བཅིངས་ཏེ་བསྒོམས་ལ་རང་གི་གཟུངས་བསྒྲུབ་པར་བྱའོ། །འགྲོ་བ་འདུལ་བའི་ཚུལ་དུ་ནི། །ཞེས་བྱ་བ་ལ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་རྣམ་པས་སོ། །པདྨོའི་རིགས་ནི་ཐམས་ཅད་ཀྱི། །

ཞེས་བྱ་བ་ནི་འགྲོ་བ་འདུལ་བ་ནས་བརྩམས་ནས་པདྨ་འབེབས་པའི་མཐར་ཐུག་པའི་བར་དུ་པདྨའི་རིགས་རྣམས་ཀྱི་མཚན་མ་ཐོབ་པས་སྒྲུབ་པའི་དཀྱིལ་འཁོར་བྲི་བར་བྱའོ། །དེར་ཞུགས་ནས་ཞེས་བྱ་བ་ལ་སོགས་པ་ནི་གོ་སླའོ། །དེའི་ནི་འདི་སྐད་སྟོན་པ་ཡིན་ཏེ། འགྲོ་བ་
འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ནས་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་གཟུངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་དང་། ཕྱག་རྒྱ་རྣམས་བཅིངས་ཏེ་ཇི་སྲིད་
དུ་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་དེ། འགྲོ་བ་འདུལ་བའི་རྣལ་འབྱོར་པས་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ཏིང་
ངེ་འཛིན་རྣམ་པ་གསུམ་བསྒོམས་ཏེ། དེ་ནས་རྩ་བའི་རྒྱུད་ལས་བཤད་པའི་ཆོ་ག་ཇི་ལྟ་བས་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་བྲི་བར་བྱའོ། །དེ་ནས་བཅོམ་ལྡན་འདས་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོའི་གཟུངས་ཀྱི་ཚུལ་གྱིས་གཟུངས་ཀྱི་
རིག་པ་བརྗོད་ཅིང་བྲི་བར་བྱའོ། །བསྐལ་པ་བཟང་པོའི་མཚན་མའི་ཕྱག་རྒྱའི་ཚོགས་ཀྱི་མཐར་ཐུག་པའི་ཕྱག་རྒྱའི་ཚོགས་ལྷག་མ་ཐམས་ཅད་ནི་རྩ་བའི་རྒྱུད་ལས་བཤད་པ་ཉིད་ཀྱི་ཕྱོགས་བྲི་བར་བྱའོ། །འདི་ནི་འགྲོ་བ་འདུལ་བའི་གཟུངས་བསྒྲུབས་པའི་དཀྱིལ་འཁོར་རོ། །དཀྱིལ་
འཁོར་དེ་ཉིད་ཀྱི་དབུས་སུ་བཅོམ་ལྡན་འདས་སངས་རྒྱས་པདྨ་རང་གི་གཟུངས་ཀྱི་ཕྱག་རྒྱ་བརྗོད་པར་བྱའོ། །ལྷག་མ་ནི་སྔ་མ་བཞིན་ཏེ། སངས་རྒྱས་པདྨའི་དཀྱིལ་འཁོར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་རྗེས་སུ་འབྲངས་ནས་པདྨ་འབེབས་པའི་མཐར་ཐུག་པའི་པདྨའི་རིགས་
ཐམས་ཅད་ཀྱི་དཀྱིལ་འཁོར་ཡང་ཤེས་པར་བྱ་བ་ཡིན་ནོ། །དེ་ལྟར་དཀྱིལ་འཁོར་བྲིས་ནས། འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་གས་ཞུགས་ནས་འདི་སྐད་བརྗོད་པར་བྱའོ། །འདོད་ཆགས་ཆོས་དེ་པདྨོ་ཆེ། །ཁྱབ་པས་བདག་ཉིད་དངོས་གྲུབ་ཐོབ། །

ཅེས་བྱ་བ་ནི་དེ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ་བསྒྲུབ་པའི་གནང་བ་ནོས་ཏེ། རང་གི་ལྷའི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། གཟུངས་ཀྱི་རིག་པ་ཟློས་ཤིང་བསྒྲུབ་པར་བྱའོ། །དོན་ཀུན་གྲུབ་པའི་ཚུལ་དུ་ཡང་། །ཞེས་བྱ་བ་ནི་དོན་ཐམས་ཅད་གྲུབ་པའི་གཟུངས་
ཀྱི་དཀྱིལ་འཁོར་གྱི་གནས་རྣམས་སུའོ། །དཀྱིལ་འཁོར་ལེགས་པར་བྲིས་ནས་ནི། །ཞེས་བྱ་བ་ལ། དོན་ཐམས་ཅད་གྲུབ་པ་ལ་སོགས་པ་ནས་ནོར་བུ་འབེབས་པའི་སྒྲུབ་པའི་དཀྱིལ་འཁོར་བྲི་བར་བྱའོ། །འདོད་ཆགས་ནི་ནོར་བུའི་རིགས་སོ། །དེ་ལ་བསམས་པའི་དངོས་གྲུབ་ནི་
ནོར་བུའི་རིགས་ཀྱི་གཟུངས་ཀྱི་དངོས་གྲུབ་བོ། །དངོས་གྲུབ་མཆོག་ཅེས་བྱ་བ་ནི། གཟུངས་ཀྱི་དངོས་གྲུབ་སྒྲུབ་པའོ། །དེ་ཉིད་ཀྱི་གསང་བའི་མཆོད་པ་བླ་ན་མེད་པ་ནི་མཆོག་སྟེ། ནོར་བུའི་རིགས་ཀྱི་གཟུངས་ཀྱི་ངོ་བོར་གྲུབ་པའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་
པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིངས་ཏེ། རང་གི་གཟུངས་
ཀྱི་རིག་པ་བཟླས་ཤིང་སྔ་མ་བཞིན་དུ་མཚན་མ་ཐོབ་པས་མངོན་པར་ཤེས་པ་ལྔ་ཇི་ལྟ་བ་བཞིན་དུ་བསྐྱེད་དེ། དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་བཤད་པའི་ཆོ་གས་དོན་ཐམས་ཅད་གྲུབ་པའི་རྣལ་འབྱོར་པས་གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་
གསུམ་བསྒོམས་ཏེ། གཟུངས་ཀྱི་དཀྱིལ་འཁོར་ཇི་ལྟ་བ་བཞིན་བྲིས་པ། བཅོམ་ལྡན་འདས་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོའི་གཟུངས་ཀྱི་ཚུལ་གྱིས་དཀྱིལ་འཁོར་གྱི་དབུས་སུ་རང་གི་གཟུངས་ཀྱི་རིག་པ་བརྗོད་ཅིང་བྲི་བར་བྱའོ། །
ལྷག་མ་ཐམས་ཅད་བྲི་བའི་ཆོ་ག་ནི་དོན་ཐམས་ཅད་གྲུབ་པའི་དཀྱིལ་འཁོར་ཉིད་གཟུང་བར་བྱའོ། །འདི་ནི་དོན་ཐམས་ཅད་གྲུབ་པའི་གཟུངས་སྒྲུབ་པའི་དཀྱིལ་འཁོར་དེ་ཉིད་ཀྱི་དབུས་སུ་བཅོམ་ལྡན་འདས་རིན་ཆེན་ལྟ་བ་རང་གི་གཟུངས་ཀྱི་རིག་པས་བྲིས་ལ། དོན་ཐམས་

ཅད་གྲུབ་པའི་གནས་སུ་དེའི་ཕྱག་རྒྱ། རིན་ཆེན་ལྟ་བའི་གནས་སུ་དོན་ཐམས་ཅད་གྲུབ་པའི་ཕྱག་རྒྱ་བྲི་བར་བྱའོ། །རིན་ཆེན་ལྟ་བའི་དཀྱིལ་འཁོར་དུ་སྔ་མའི་རྗེས་སུ་འབྲངས་ནས་རིན་ཆེན་འབེབས་པའི་མཐར་ཐུག་པའི་ནོར་བུའི་རིགས་ཀྱི་དཀྱིལ་འཁོར་རྣམས་ཤེས་པར་བྱའོ། །
དེ་ལྟར་དཀྱིལ་འཁོར་བྲིས་ནས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་འཇུག་པའི་ཆོ་གས་ཞུགས་ལ་འདི་སྐད་ཅེས་སྨྲ་བར་བྱ་སྟེ། བསམ་པ་ཀུན་གྱི་དངོས་གྲུབ་པ། །འདོད་ཆགས་བསམ་པ་དངོས་གྲུབ་མཆོག །བཀྲ་ཤིས་གྲུབ་ཅིག་སེམས་དཔའ་ཆེ། །བཅོམ་
ལྡན་ཐམས་ཅད་གྲུབ་པ་པོ། །དེ་ནས་སྔ་མ་བཞིན་དུ་རང་གི་ཆོ་གས་ཐམས་ཅད་རྗེས་སུ་སྤྱད་ལ། གཟུངས་སྒྲུབ་པའི་གནང་བ་ནོད་པར་བྱའོ། །རང་གི་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་བཅིངས་ཏེ། གཟུངས་ཀྱི་རིག་པ་ཟློས་ཤིང་། དེ་ནས་
ཐམས་ཅད་དུ་ནི་ཞུགས་གྱུར་ན། །ཞེས་བྱ་བ་ལ་སོགས་པ་ནི་ཕན་ཡོན་གསུངས་པ་ཡིན་ནོ། །ཇི་སྐད་དུ་བཤད་པའི་བསྐུལ་བའི་དུས་སུ་གནང་བ་ནོས་པའི་དངོས་གྲུབ་ཀྱི་བདག་ཉིད་ཀྱི་རྣལ་འབྱོར་པས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་རང་བཞིན་
ཞེས་བྱ་བའི་དོན་ཏོ། །ཇི་ལྟར་བསྒྲུབ་པར་བྱ་ཞེ་ན། ཡང་དང་ཡང་དུ་བསྒོམ་ཞིང་། ཕྱག་རྒྱ་ཆེན་པོ་ལ་སོགས་པ་རྟག་ཏུ་རྣལ་འབྱོར་པ་བདག་ཉིད་ཀྱིས་འགྲུབ་པར་འགྱུར་རོ། །དུས་ནམ་གྱི་ཚེ་བསྐུལ་བར་བྱ་ཞེ་ན། གང་ཚེ་མྱུར་དུ་མི་འགྲུབ་ན་གང་གི་ཚེ་རྣལ་འབྱོར་པ་མཚན་མ་
ཐོབ་པའམ། མངོན་པར་ཤེས་པས་མཚན་ཐོག་ཐག་བསྒོམས་པ་ཙམ་གྱིས་མྱུར་དུ་དངོས་གྲུབ་ཐོབ་པར་མ་གྱུར་པ་དེའི་ཚེ་བསྒྲུབ་པའི་དཀྱིལ་འཁོར་བྲིས་ལ། ཇི་སྐད་བཤད་པའི་དེ་ཁོ་ན་ཉིད་བསྐུལ་བའི་ཚུལ་གྱིས་ཡང་དག་པར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་
ཀྱི་རིགས་ཀྱི་དཀྱིལ་འཁོར་གྱི་འཁོར་ལོ་ཡོངས་སུ་སྦྱངས་པའི་གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་སྒྲུབ་པ་དང་པོས་མ་གྲུབ་ན་སྒྲུབ་པ་གཉིས་པ་ལ་ཡང་དེ་ཁོ་ན་ཉིད་བསྐུལ་བས་ཡང་དག་པར་བསྐུལ་ལ། གཟུངས་ཀྱི་དཀྱིལ་འཁོར་བསྒྲུབ་པར་བྱའོ་ཞེས་བྱ་བའི་དོན་

བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་ཐམས་ཅད་གསང་བའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་ཐམས་ཅད་ནི་གཟུངས་ཀྱི་ཕྱག་རྒྱ་ཐམས་ཅད་དོ། །
དེའི་གསང་བ་ནི། དེ་ཡི་གསང་བའི་ལྷ་མོ་ཆེ། །ཞེས་བྱ་བ་ལ་སོགས་པ་སྦ་བར་བྱ་བའི་དོན་ཏོ། །དེའི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་ཐོབ་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་
ཤིང་བཤད་པའོ། །དེ་བཞིན་གཤེགས་པའི་ལྷ་མོ་ཆེ། །ཞེས་བྱ་བ་ནི་དེ་བཞིན་གཤེགས་པ་རྣམ་པར་སྣང་མཛད་ལ་སོགས་པ་དེ་ལྷ་མོ་ཆེན་མོ་སྟེ། རྡོ་རྗེ་སེམས་མ་དང་། རྡོ་རྗེ་རིན་ཆེན་མ་དང་། རྡོ་རྗེ་ཆོས་མ་དང་། ལས་ཀྱི་རྡོ་རྗེ་མ་རྣམས་སོ། །དེའི་ཁྱད་པར་ཅི་ལྟ་བུ་ཞིག་ཅེ་ན།
སྡུག་ཅིང་ཞེས་བྱ་བ་སྨོས་ཏེ། ཟག་པ་མེད་པའི་བདེ་བ་དང་། ཡིད་བདེ་བའི་ངོ་བོ་རྒྱུན་མི་འཆད་པར་བདེ་བ་སྟེར་བའོ། །འདི་ཉིད་བཤད་པ། བདེ་བ་ཀུན་སྦྱིན་པ་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱི་བདེ་བ་སྟེ། ཡིད་བདེ་བ་རབ་ཏུ་སྟེར་བའོ། །བདེ་བ་
ལས་བྱུང་བའི་ཚོགས་བདེན་པས་ཞེས་བྱ་བ་ནི་དེ་བཞིན་གཤེགས་པའི་ལྷ་མོ་གང་ཡིན་པ་འདི། སྡུག་ཅིང་བདེ་བ་ཀུན་སྦྱིན་པ། །ཞེས་བྱ་བ་བཤད་མ་ཐག་པའི་བདེན་པ་ལས་བྱུང་བའི་ཚིག་གིས་རྗེས་སུ་འཇུག་པའི་དབྱིངས་སོ། །བདེན་པ་ནི་ཕྱིན་ཅི་མ་ལོག་པ་དང་།
མི་བརྫུན་པས་ན་དེ་ལས་བྱུང་བ་ནི་དེའི་རྗེས་སུ་འཇུག་པ་སྟེ། བདེན་པའི་ཚིག་ཉིད་ཅེས་བྱ་བའི་ཐ་ཚིག་གོ། །བདེན་པས་ནི་མི་མངའ་བའོ། །དེ་བཞིན་གཤེགས་པའི་ལྷ་མོ་ཆེན་མོ་སྡུག་ཅིང་བདེ་བ་ཐམས་ཅད་སྦྱིན་པ་ཞེས་བྱ་བ་རྣམ་པ་གསུམ་གྱི་བདེན་པ་དང་། གཟུངས་ཀྱི་ལྷ་
མོ་ཐམས་ཅད་བསྒྲུབ་པའོ། །ཅིའི་ཕྱིར་བསྐུལ་ཞེ་ན། བསྒྲུབས་ཀྱང་དེས་ནི་མ་གྲུབ་ནའོ། །ཞེས་བྱ་བ་སྨོས་ཏེ། སྒྲུབ་པ་པོ་གང་གིས་དེ་ཁོ་ན་ཉིད་བསྐུལ་བ་མེད་ན་འགྲུབ་པར་མི་འགྱུར་བ་དེས་ན་ཇི་སྐད་དུ་བཤད་པའི་རྣམ་པ་གསུམ་གྱི་བདེན་པས་བསྐུལ་ཞིང་བསྒྲུབ་

པར་བྱ་སྟེ། ཇི་སྐད་བཤད་པའི་གཟུངས་དེ་རྣམས་བསྒྲུབ་པར་བྱའོ་ཞེས་ཤེས་པར་བྱའོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་གཟུངས་ཀྱི་སྒྲུབ་པ་པོའི་རྣལ་འབྱོར་པས་སྒྲུབ་པའི་དཀྱིལ་འཁོར་བྲིས་ལ། གང་གི་ཚེ་གཟུངས་བསྒྲུབ་པར་འདོད་པ་
ན་གྲུབ་པར་མ་གྱུར་པ་དེའི་ཚེ། དེ་ཁོ་ན་ཉིད་བསྐུལ་བས་ཡང་དག་པར་བསྐུལ་ཏེ་དེས་བསྒྲུབ་པར་བྱའོ། །ཕྱག་རྒྱ་ཆེན་པོ་བཅིངས་ནས་ནི། །ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའི་དེ་བཞིན་གཤེགས་པའི་རིགས་ཀྱི་གཟུངས་རྣམས་ཀྱི་ཕྱག་
རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ནི་ཕྱག་རྒྱ་ཆེན་པོ་སྟེ། དེ་བཅིངས་པའོ། །ལྟག་འོག་གོ་རིམས་ཇི་བཞིན་དུ། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་ནས། སྔོན་དུ་
བསྙེན་པ་བྱས་ཏེ། སྔ་མ་བཞིན་དུ་མངོན་པར་ཤེས་པ་བསྐྱེད་ལ། ཡང་རྡོ་རྗེ་སེམས་དཔའི་རྣལ་འབྱོར་བྱས་ནས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་ཆེན་པོ་བྱས་ཏེ། གཟུངས་ཀྱི་དཀྱིལ་འཁོར་ལས་བཤད་པའི་ཏིང་ངེ་འཛིན་རྣམ་པ་གསུམ་ཇི་ལྟ་
བ་བཞིན་དུ་བསྒོམས་ལ། སྒྲུབ་པའི་དཀྱིལ་འཁོར་བྲིས་ཏེ། སྔར་བཤད་པའི་སྒྲུབ་པའི་ཆོ་གས་ཐམས་ཅད་བྱས་ནས་གང་གི་ཚེ་འགྲུབ་པར་མ་གྱུར་པ་དེའི་ཚེ་སླར་ལ་གཟུངས་ཀྱི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིང་བར་བྱ་བ་འདི་ནི། ལྟག་
འོག་གོ་རིམས་ཇི་བཞིན་དུ། །ཞེས་བྱ་བའི་སྒྲའི་དོན་ཡིན་ནོ། །ཕྱག་རྒྱ་ཆེན་པོ་བཅིངས་ནས་ཅི་བྱེད་ཅེ་ན། འདི་ནི་དེ་ཉིད་གསང་བ་ཡི། །ཞེས་བྱ་བ་ལ་སོགས་པ་སྨོས་ཏེ། འདི་ཞེས་བྱ་བ་ནི་བློ་ལ་གནས་པའི་རྡོ་རྗེ་སེམས་དཔའ་ནི་བདག་རང་ཡིན་ནོ་ཞེས་བྱ་བ་ལ་སོགས་པའོ། །དེ་
ཉིད་ནི་ཕྱིན་ཅི་མ་ལོག་པའི་རབ་ཏུ་དགའ་བ་ཉིད་དང་། ཀུན་དུ་བཟང་པོ་ཉིད་དོ། །གསང་བའི་ཞེས་བྱ་བ་ནི་གསང་བར་གྱུར་པས་ན་གསང་བ་སྟེ། རང་གི་ལྷ་དང་ལྷན་ཅིག་ཏུ་མཉམ་པར་སྦྱོར་བ་གང་ཡིན་པ་དེས། བདག་ནི་རྡོ་རྗེ་སེམས་དཔའ་ཉིད། །ཅེས་བྱ་བ་ཐབས་དང་ཤེས་རབ་ཀྱི་

རང་བཞིན་གྱི་སེམས་དཔའ་ནི་རྡོ་རྗེ་སེམས་དཔའོ། །དེ་བདག་རང་ཡིན་པ་ནི་རྣལ་འབྱོར་པས་ང་རྒྱལ་བསྐྱེད་པར་བྱའོ། །ཁྱོད་ཀྱི་ཆུང་མ་སྙིང་ལ་གནས། །ཞེས་བྱ་བ་ནི་ཐ་མི་དད་པའི་སེམས་དེས་བདག་ཉིད་ཀྱི་བློ་ལ་གནས་པའི་རྡོ་རྗེ་སྙིང་པོའི་གཟུངས་སོ། །ལུས་ཀུན་ལས་ནི་འཁྱུད་
ནས་ཀྱང་། །ཞེས་བྱ་བ་ནི་ཀྱེའི་རྡོ་རྗེ་འགྱིང་བ་ལས་འཁྱུད་པས། བསྒྱིངས་པ་དང་བཅས་ནམ་མཁའ་ལ་ཞུགས་ཤིག་པའོ། །རྡོ་རྗེ་འགྱིང་བ་ལྷ་མོ་ཆེ། །ཞེས་བྱ་བ་ལ་སོགས་པ་ནི་གོ་སླའོ། །ལུས་ཀུན་ལ་ནི་བརྟེན་གྱུར་ན། །ཞེས་བྱ་བ་ནི་སྒྲུབ་པ་པོའི་ལུས་དང་ཆུ་དང་འོ་མ་བཞིན་དུ་
གཅིག་ཏུ་འདྲེས་པར་གྱུར་པས་ཅི་ཞིག་མྱུར་དུ་འགྲུབ་པར་འགྱུར་ཞེས་བྱའོ། །དེ་ཉིད་བསྐུལ་བ་ནི་ཡང་དག་པར་བསྐུལ་བའོ། །ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་བཅིངས་ནས་ཕྱག་རྒྱའི་རིག་པ་ཟློས་ཤིང་བསྒོམས་པ་འདི་ནི་ཇི་བཞིན་ཞེས་
བྱ་བའི་སྒྲ་ནི་དོན་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་རྣལ་འབྱོར་པས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ་ཕྱག་བཞི་བྱས་ཏེ། གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་དུ་མཚན་མ་ཐོབ་པར་གྱུར་
པ་དེ་སྲིད་ཀྱི་བར་དུ་བཟླས་པར་བྱའོ། །དེ་ནས་མངོན་པར་ཤེས་པ་བསྐྱེད་ནས་རྡོ་རྗེ་སེམས་དཔའི་རྣལ་འབྱོར་ཆེན་པོ་བྱས་ནས་བསྒྲུབ་པའི་དཀྱིལ་འཁོར་ཇི་ལྟ་བ་བཞིན་དུ་བྲིས་ཏེ། འཇུག་པའི་ཆོ་ག་རྗེས་སུ་སྤྱད་ལ། སྔ་མ་བཞིན་དུ་བསྒོམ་པར་བྱའོ། །གལ་ཏེ་མ་གྲུབ་པར་ཤེས་
ན་གཟུངས་ཀྱི་ལྷ་མོ་མདུན་དུ་རྣམ་པར་བསམས་ལ་དེའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། བདག་ནི་རྡོ་རྗེ་སེམས་དཔའ་ཉིད། །ཁྱོད་ངའི་ཆུང་མ་སྙིང་ལ་གནས། །ལུས་ཀུན་ལ་ནི་འཁྱུད་པ་དང་། །རྡོ་རྗེ་འགྱིངས་པས་འགྱིངས་པར་བརྗོད། །ཅེས་བརྗོད་ལ། དེ་ནས་དེའི་
རིག་པ་ཟློས་ཤིང་དེ་དང་བདག་ཉིད་འཁྱུད་པས་བུད་མེད་ཀྱི་ལོངས་སྤྱོད་དང་ལྡན་པར་བསམས་ཏེ་བསྒོམ་པར་བྱའོ། །དེ་ནས་དེའི་རྗེས་ལ་མངོན་སུམ་དུ་འོངས་ནས་སྒྲུབ་པ་པོ་དང་ལྷན་ཅིག་ཏུ་མཉམ་པར་སྦྱོར་བ་བྱས་ཏེ། སྒྲུབ་པ་པོའི་ལུས་ལ་འཇུག་པར་བྱའོ། །དེ་ནས་འདི་

རྡོ་རྗེ་འཛིན་པ་ཆེན་པོ་ཉིད་དུ་འགྱུར་རོ། །སིདྡྷྱ་སིདྡྷྱ་ས་མ་ཡེ་ཞེས་བྱ་བ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་རྡོ་རྗེ་རིགས་ཀྱི་ཕྱག་རྒྱ་ཐམས་ཅད་དོ། །དམ་ཚིག་དེ་འཆིང་བའི་དང་པོར། སིདྡྷྱ་སིདྡྷྱ་ས་མ་ཡེ་ས་མ་ཡོ྅ཧཾ། ཏྲཾ་པྲཾ་ཡ་མཾ་ཞེས་
བརྗོད་ཅིང་། རྡོ་རྗེ་ཧཱུཾ་མཛད་ལ་སོགས་པ་རྡོ་རྗེའི་རིགས་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་དམ་ཚིག་གིས་གསུངས་སོ། །དེའི་རང་བཞིན་བདག་ཡིན་ནོ་ཞེས་ང་རྒྱལ་བསྐྱེད་ལ། ཁྱོད་སྡུག་བདག་གི་ཆུང་མའོ། །ཞེས་བརྗོད་པར་བྱའོ། །དེ་ལྟར་གཟུངས་ཀྱི་རྣལ་འབྱོར་པ་དེ་ཁོ་
ན་ཉིད་བརྗོད་ཅིང་། བསྐུལ་བར་གྱུར་པས་མྱུར་དུ་རྗེས་སུ་ཆགས་པས་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཕྱག་བཞི་བྱས་
པའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་རིགས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་དེ། སྔ་མ་བཞིན་དུ་གཟུངས་སྒྲུབ་པའི་དཀྱིལ་འཁོར་བྲིས་ཏེ།
འཇུག་པ་ལ་སོགས་པ་ཆོ་ག་རྗེས་སུ་སྤྱད་དེ་བསྒྲུབ་པར་བྱའོ། །གང་གི་ཚེ་བསྒྲུབས་ཀྱང་དངོས་གྲུབ་ཀྱི་མཚན་མ་མཐོང་བ་དེའི་ཚེ་མདུན་དུ་རང་གི་གཟུངས་ཀྱི་ལྷ་མོ་རྣམ་པར་བསམས་ཏེ། དེ་ཁོ་ན་ཉིད་བསྐུལ་བས་བསྐུལ་བར་བྱའོ། །ཞེས་སིདྡྷྱ་སིདྡྷྱ་ས་མ་ཡོ྅ཧཾ་ཏྲཾ་པྲཾ་ཡ་མཾ། དེའི་རྗེས་ལ་
དེས་རྗེས་སུ་ཆགས་པའི་སྒྲུབ་པ་པོས་ལྷན་ཅིག་མཉམ་པར་སྦྱོར་བར་བྱའོ། །དེས་བུད་མེད་ལ་ལོངས་སྤྱོད་པ་བཞིན་དུ་ཡན་ལག་ཐམས་ཅད་ཀྱིས་འཁྱུད་པའི་བདེ་བ་བསྒོམ་པར་བྱའོ། །དེ་ནས་མངོན་སུམ་དུ་འོངས་ནས་སྒྲུབ་པ་པོ་དང་ལྷན་ཅིག་མཉམ་པར་སྦྱོར་བར་བྱས་པས་
སྒྲུབ་པ་པོའི་ལུས་ལ་ཞུགས་པར་འགྱུར་རོ། །དེ་ནས་འདི་རྡོ་རྗེ་ཧཱུཾ་མཛད་ལ་སོགས་རྡོ་རྗེ་རིགས་ཀྱི་རང་བཞིན་དུ་འགྱུར་རོ། །བུདྡྷ་བུདྡྷ་མ་ཧཱ་ས་ཏི་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ཁོང་དུ་ཆུད་ནས། ང་ཡི་ཆུང་མ་ཁྱོད་སྡུག་པ། །ཞེས་བྱ་བ་ལ་

སོགས་པ་ནི་བཤད་ཟིན་ཏོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་མཚན་མ་
ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་པར་ཤེས་པ་ལྔ་བསྐྱེད་དེ། སྔར་བཤད་པའི་ཚུལ་གྱིས་གཟུངས་སྒྲུབ་པའི་དཀྱིལ་འཁོར་བྲིས་ལ། འཇུག་པ་ལ་སོགས་པའི་ཆོ་ག་རྗེས་སུ་སྤྱད་ལ་བསྒོམ་པར་བྱའོ། །གང་གི་ཚེ་དངོས་གྲུབ་ཀྱི་མཚན་མ་ཐོབ་པར་
མ་གྱུར་པ་དེའི་ཚེ་མདུན་དུ་རང་ལྷ་མོ་བུད་མེད་ཀྱི་རྣམ་པར་བསམ་པར་བྱའོ། །བུདྡྷ་བུདྡྷ་མ་ཧཱ་སད་ཏི་བྷརྱ་ཏྭ་མེ་ཨ་ཏི་པྲི་ཡ། དེ་ནས་སྒྲུབ་པ་པོ་དང་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །དེའི་རྗེས་ལ་དེ་འོངས་ནས་སྒྲུབ་པ་པོའི་ལུས་ལ་ཞུགས་པར་གྱུར་ཏེ། དེ་ནས་སྐད་ཅིག་
དེ་ཉིད་ལ་སྒྲུབ་པ་པོ་འཇིག་རྟེན་དབང་ཕྱུག་ཏུ་འགྱུར་རོ། །སརྦྦ་ཀརྨྨཱ་ནི་ནོར་བུའི་རིགས་ཀྱི་གཟུངས་རྣམས་ཀྱི་ཕྱག་རྒྱ་ཆེན་པོ་ལ་སོགས་པའི་ལས་དེ་རྣམས་སྒྲུབ་པར་བྱེད་པའོ། །ཀ་རི་ནི་ལས་བྱེད་པའི་གཟུངས་ཀྱི་རིག་པའི་ལྷ་མོའི་གཟུགས་ཅན་ནི་བྷརྱའོ། །རྟག་ཏུ་སྐྱེ་བའམ་དེ་བཞིན་
གཤེགས་པ་རྣམས་སྐྱེ་བ་མེད་པར་ཞུགས་པས་ན་ཨ་དྷེ་བཛྲ་ནི་བཅད་དུ་མེད་ཅིང་དབྱེར་མེད་པའི་ཕྱིར་རོ། །དེ་ལྟ་བུའི་དེ་ཁོ་ན་ཉིད་བསྐུལ་བས་རྗེས་སུ་ཆགས་པས་འགྲུབ་པར་འགྱུར་ཞེས་བྱའོ། །དེ་ནི་འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་
ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། རང་གི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མངོན་
པར་ཤེས་པ་ལྔ་བསྐྱེད་དེ། སྔར་བཤད་པའི་ཚུལ་གྱིས་རང་གི་གཟུངས་ཀྱི་སྒྲུབ་པའི་དཀྱིལ་འཁོར་བྲིས་ཏེ། ཇི་ལྟ་བ་བཞིན་དུ་བསྒྲུབ་པར་བྱའོ། །དེས་གལ་ཏེ་དངོས་གྲུབ་ཀྱི་མཚན་མ་ཐོབ་པར་མ་གྱུར་ན། མདུན་དུ་རང་གི་གཟུངས་བུད་མེད་ཀྱི་རྣམ་པར་བསམས་ལ་སརྦྦ་

ཀརྨྨཱ་ཀ་རི་བྷརྱ་ཏྲཾ་མེ་སིདྡྷྱ་རྱ་བཛྲི་ནི་ཞེས་བྱ་བས་བསྐུལ་བར་བྱའོ། །དེ་ནས་དེ་དང་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །དེའི་རྗེས་ལ་དེ་འོངས་ནས་སྒྲུབ་པ་པོ་དང་ལྷན་ཅིག་མཉམ་པར་སྦྱོར་བ་བྱས་ཏེ། སྒྲུབ་པའི་ལུས་ལ་ཞུགས་པར་འགྱུར་ཏེ། དེ་ནས་
སྒྲུབ་པ་པོ་ནམ་མཁའི་སྙིང་པོར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ཀྱི་གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་སྔོན་དུ་བསྙེན་པ་ལ་སོགས་པའི་དུས་སུ་ཡང་། མུ་སྟེགས་རྣམས་ལ་ཕན་བཏགས་ཕྱིར། །རི་མོའི་ཕྱག་རྒྱའི་ཚུལ་དུ་
ནི། །སངས་རྒྱས་བཙུན་མོ་རབ་སྦས་པར། །ཞེས་བྱ་བ་ལ་སོགས་པར་གསང་བའི་ཡེ་ཤེས་ཀྱི་གཟུངས་ཀྱི་ཕྱག་རྒྱ་བསྐྱེད་དེ་བསྒོམ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་གསང་བའི་དངོས་
གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ཀྱི་དམ་ཚིག་གི་གཟུངས་ཀྱི་ཕྱག་རྒྱའོ། །དེའི་གསང་བ་ནི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ལྷའི་གཟུངས་དང་། བྱང་ཆུབ་ཀྱི་སེམས་ལ་སོགས་པའི་རང་བཞིན་མཆོད་རྟེན་གྱི་ནང་དུ་ཆུད་པའོ། །
དེའི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །དེ་སྟོན་པར་བྱེད་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །མུ་སྟེགས་ཅན་ནི་ཉན་ཐོས་དང་། རང་རྒྱལ་བ་དང་། སངས་རྒྱས་ཀྱི་
ཐེག་པ་ལ་མོས་པ་མདོ་སྡེ་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཐེག་པ་ཙམ་ལ་ཞུགས་པ་ནི་གཞན་མུ་སྟེགས་ཅན་ཏེ། རྡོ་རྗེ་ཐེག་པའི་མུ་ལ་མི་བསྟེན་པའི་ཕྱིར་རོ། །དེ་དག་ལ་ཕན་འདོགས་པའི་ཕྱིར་ནི་དམ་པའི་ཆོས་སྤངས་པས་དམྱལ་བར་ལྟུང་བར་མ་གྱུར་ཅིག་སྙམ་དུ་སེམས་
པའོ། །གལ་ཏེ་དེ་བཞིན་གཤེགས་པ་ལ་བཙུན་མོ་མངའ་བ་དེ་ལྟ་ན་ནི་དེ་བཞིན་གཤེགས་པ་ལ་འདོད་ཆགས་མངའ་བར་གྱུར་པས་སོ། །དེས་ན་འདི་ནི་བདུད་ཀྱིས་གསུངས་པ་ཡིན་ནོ་ཞེས་པས་རབ་ཏུ་སྤངས་ན་དམྱལ་བར་ལྟུང་བར་འགྱུར་བས། དེ་ལྟའི་ཉེས་པར་མ་གྱུར་ཅིག་སྙམ་པས། དེ་བཞིན་

གཤེགས་པའི་རིག་པའི་ལྷ་མོས་འདུལ་བའི་སེམས་ཅན་གྱི་ཁམས་འདུལ་བར་བྱེད་པ་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ལྷ་མོའི་གཟུངས་རྣམས་སྦས་ཏེ། མཆོད་རྟེན་ལ་སོགས་པའི་གཟུགས་ཀྱིས་བཞུགས་པའོ། །དེའི་ཕྱིར་རི་མོའི་ཕྱག་རྒྱའི་ཚུལ་དུ་ནི་མཆོད་རྟེན་ལ་སོགས་པའི་གཟུགས་ཀྱི་དཀྱིལ་
འཁོར་རམ། རས་སམ། རྩིག་པ་ལ་སོགས་པ་ལ་བྲི་བའམ། སྐལ་བ་དང་ལྡན་པ་ལ་རིག་པའི་ལྷ་མོའི་གཟུངས་སུ་བྱའོ། །དེ་ལྟར་ཤེས་པ་ནི་ངེས་པ་བསྐྱེད་པའོ། །ཕྱག་རྒྱ་ཆེན་པོ་ལ་སོགས་པ་དེ་བསྒོམས་ན་མྱུར་དུ་འགྲུབ་པར་འགྱུར་གྱི་གཞན་དུ་མ་ཡིན་ནོ། །དེ་ལྟར་དེ་བཞིན་
གཤེགས་པའམ་གཟུངས་ཀྱི་སྒྲུབ་པ་པོས་ཕྱག་རྒྱ་རིག་པའི་ལྷ་མོས་ངེས་པར་བྱས་ནས། ད་ནི་དེ་བཞིན་གཤེགས་པའི་རིགས་ཀྱི་གཟུངས་ཀྱི་རྣལ་འབྱོར་པ་རྣམས་ཀྱིས་ཀྱང་ཕྱག་རྒྱ་རྣམས་རིག་པའི་ལྷ་མོར་ངེས་པར་བསྐྱེད་ནས། དོན་འདི་བསྒོམ་པར་བྱ་བ་ནི། སེམས་ཅན་
ཀུན་གྱི་ཡིད་ཁྱབ་པ། །ཞེས་བྱ་བ་ལ་སོགས་པ་སྨོས་ཏེ། དེ་ལ་འཁོར་བའི་སེམས་ནི་སེམས་ཅན་ཀུན་གྱི་ཡིད་ཅེས་བརྗོད་པ་དེ་དེས་ཁྱབ་པའི་ངང་ཚུལ་མངའ་བ་འདི་ནི་སེམས་ཅན་ཀུན་གྱི་ཡིད་ལ་ཁྱབ་པ་སྟེ། རྡོ་རྗེ་འཛིན་པ་ཆེན་པོ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་
ཀྱི་རང་བཞིན་ནོ། །ཇི་ལྟར་སེམས་ཅན་ཀུན་གྱི་ཡིད་ལ་ཁྱབ་པ་ཡིན་ཞེ་ན། གང་གི་ཕྱིར་དེ་དག་སེམས་ཅན་ཀུན་གྱི་སེམས་དང་ཡིད་ལ་སོགས་པ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་སོ། །སེམས་ཅན་ཀུན་ལ་བདེ་སྦྱིན་པ། །ཞེས་བྱ་བ་ནི་དེས་ན་ཆོས་ཀྱི་དབྱིངས་ཀྱི་རང་བཞིན་ཐོས་
པ་དང་། བསམ་པ་དང་། བསྒོམ་པའི་ཤེས་པ་གོམས་པའི་ཡིད་ཀྱིས་འཇིག་རྟེན་དང་འཇིག་རྟེན་ལས་འདས་པའི་བདེ་བ་སེམས་ཅན་ཐམས་ཅད་ལ་ཉེ་བར་བསྐྱེད་པ་དེ་ནི་འདིར། སེམས་ཅན་ཀུན་ལ་བདེ་སྦྱིན་ཞིང་། །སེམས་ཅན་ཀུན་གྱི་ཡབ་ཉིད་དེ། །ཞེས་བྱ་བ་ནི་བྱང་
ཆུབ་ཀྱི་མཚན་ཉིད་ཅན་གྱི་སེམས་སམ། དེ་བཞིན་གཤེགས་པའི་སེམས་རྣམས་བསྐྱེད་པ་དེའི་ཕྱིར། སེམས་ཅན་ཀུན་གྱི་ཡབ་ཉིད་དོ། །དམ་ཚིག་མཆོག་གི་འདོད་པ་མཆོག །ཅེས་བྱ་བ་ནི་འདོད་པར་བྱ་བ་ཡིན་པས་ན་འདོད་པ་སྟེ། སྨོན་པ་དང་འཇུག་པའི་བྱང་

ཆུབ་སེམས་ཀྱི་མཚན་ཉིད་དོ། །དེ་ཉིད་ཀྱི་མཆོག་ཡིན་པ་དེའི་ཕྱིར་བར་ཆད་མེད་པའི་ལམ་གྱི་ངོ་བོས་ཆགས་པ་དང་བཅས་པའི་ཉོན་མོངས་པ་སྤངས་པ་ནི་རྡོ་རྗེ་འཛིན་པ་ཆེན་པོའི་རང་བཞིན་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་གང་ཡིན་པ་དེ་ནི་མཆོག་ཏུ་གྱུར་
པས་ན་དམ་པའོ། །དེ་ཇི་ལྟ་བུ་ཞེ་ན། དེ་བཞིན་གཤེགས་པ་རྣམས་ལས་གཞན་མ་ཡིན་པས་ན་དམ་ཚིག་མཆོག་གོ། །འདི་སྟོན་པ་ཡིན་ཏེ། རྡོ་རྗེ་ལ་སོགས་པའི་མཚན་མའི་ཕྱག་རྒྱའི་གཟུགས་གང་ཡིན་པ་དེ་དང་། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་རིག་པའི་ལྷ་
མོའི་གཟུགས་གང་ཡིན་པ་དང་། གཞན་ཡང་རྣམ་པར་སྣང་མཛད་ལ་སོགས་པའི་གཟུགས་གང་ཡིན་པ་དེ་དག་རང་བཞིན་གྱིས་གདོད་མ་ནས་མ་སྐྱེས་པས། སྒྱུ་མ་ལྟ་བུར་ཤེས་ནས་མཉམ་པར་སྦྱོར་བ་ལ་སོགས་པ་སྒོམ་པར་བྱེད་པ་དེ་ལྟ་བུས་ཐབས་དང་ཤེས་རབ་ཟུང་དུ་འཇུག་
པའི་བྱང་ཆུབ་སེམས་དཔའི་ལམ་ལ་བཞོན་པར་བསྒོམ་པར་བྱའི། གཞན་དུ་ནི་མ་ཡིན་ནོ། །འདོད་ཆགས་ནི་སེམས་ཅན་སྨིན་ཅིང་གྲོལ་བར་བྱེད་པའི་མཚན་ཉིད་དོ། །དེའི་དག་པ་ནི་གཟུང་བ་དང་འཛིན་པའི་ངོ་བོས་དམིགས་པ་མེད་པའི་ཐུགས་རྗེ་ཆེན་པོའོ། །དེ་དག་པ་ནི་དག་
པའི་དོན་ཏེ། མི་དམིགས་པའི་ཐུགས་རྗེ་ཆེན་པོ་མངོན་སུམ་དུ་བྱས་ཞེས་བྱ་བའི་དོན་ཏོ། །ཉན་ཐོས་དང་། རང་རྒྱལ་བ་ཆགས་པ་དང་བྲལ་བ་དེ་དག་ཅིའི་ཕྱིར་གཞན་ཞིག་ཏུ་འགྱུར་ཞེ་ན། མུ་སྟེགས་ལྟ་བར་བྱས་བདག་ལ། །ཞེས་བྱ་བ་སྨོས་ཏེ། བདག་དང་། བདག་གི་དང་། རྟག་
པ་དང་། ཆད་པ་ལ་སོགས་པ་དེས་མུ་སྟེགས་ཅན་གྱི་ལྟ་བ་ངེས་བྱས་ཏེ། མངོན་པར་འདུས་བྱས་པའོ། །བདག་ལ་ནི་མུ་སྟེགས་ཅན་གྱི་ལྟ་བ་ཅན་གྱིས་བྱས་པའི་བདག་ཉིད་ཁོ་ན་བདེན་པ་ཡིན་གྱི་གཞན་ནི་མ་ཡིན་ནོ་ཞེས་ངེས་པར་སེམས་པ་ནི། རྨོངས་པ་ཞེས་བྱ་བའི་ཐ་ཚིག་
གོ། །དེ་ལྟར་གྱུར་པ་དེ་རྣམས་སྦྱངས་ནས་མི་དམིགས་པའི་ཐུགས་རྗེ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇོག་པ་ནི་གསོད་པའི་དམ་ཚིག་མཆོག་ཡིན་ནོ། །དེ་ལྟར་གྱུར་པ་དེ་སྒྲུབ་པ་པོས་ཤེས་པས་ཅི་ཞིག་ཏུ་འགྱུར་ཞེ་ན། དེ་ལྟར་ཤེས་ནས་

འགྲུབ་པར་འགྱུར། །ཞེས་བྱ་བ་སྨོས་ཏེ། ཐུགས་རྗེ་ཆེན་པོས་གཞན་གྱི་དབང་གིས་དེ་ལྟར་ངེས་པ་བསྐྱེད་ནས་ཞེ་སྡང་མེད་པའི་ཁྲོ་བོས་སེམས་ཅན་གྱི་ཁམས་ཐམས་ཅད་ཐལ་བར་བྱས་ཏེ། རྡོ་རྗེ་རིགས་ཀྱི་རང་བཞིན་དུ་བསྐྱེད་ནས་གང་གི་ཚེ་གཟུངས་ཀྱི་ཕྱག་རྒྱས་བསྒྲུབ་པ་དེའི་ཚེ་
འགྲུབ་པར་འགྱུར་རོ། །འབྱུང་བ་ཡང་ཡིན་ལ་ཆེན་པོ་ཡང་དེ་ཡིན་པས་ན་འབྱུང་བ་ཆེན་པོ་སྟེ། ཁམས་གསུམ་པའི་རྣམ་པར་དག་པ་གང་ཡིན་པའི་ཀུན་དུ་རྟོག་པ་དེ་ལས་བྱུང་བ་ནི་འབྱུང་བ་ཆེན་པོ་ལས་བྱུང་བའོ། །ཐམས་ཅད་ནི་ཁམས་གསུམ་པའོ། །མི་གཙང་
ཞེས་ནི་ཅིའི་ཕྱིར་བརྗོད། །ཅེས་བྱ་བ་ནི། ཅིའི་ཕྱིར་ཞེས་བྱ་བ་ནི་སྤོང་བའི་དོན་ཏོ། །འདི་སྐད་སྟོན་པ་ཡིན་ཏེ། ཁམས་གསུམ་པའི་རྣམ་པ་ནི་ཡང་དག་པ་མ་ཡིན་པའི་ཀུན་དུ་རྟོག་པ་ནི་དོན་དམ་པར་ན་མ་སྐྱེས་པ་སྟེ། དེ་ལས་བྱུང་བས་ན་ཁམས་གསུམ་པའོ། །གདོན་མི་ཟ་
བར་མ་སྐྱེས་པ་དེའི་ཕྱིར་ཆོས་ཅན་མེད་པས་ཆོས་མི་གཙང་བའི་མཚན་ཉིད་དང་། གཙང་བའི་དངོས་པོ་ཡང་མེད་པ་དེའི་ཕྱིར་ཆོས་ཅན་རང་བཞིན་གྱིས་རྣམ་པར་དག་པའོ་ཞེས་ངེས་པ་བསྐྱེད་ནས། མཉམ་པར་སྦྱོར་བ་ལ་སོགས་པའི་བསྒོམ་པ་ནི་གཟུགས་བརྙན་དང་མཚུངས་
པར་བྱའོ། །དངོས་པོ་མངོན་པར་ཞེན་པ་མེད་པས་འཇུག་པར་བྱའོ་ཞེས་བྱ་བའི་དོན་ཏོ། །མུ་སྟེགས་ཅན་རྣམས་གཞོམ་པའི་ཕྱིར། །ཞེས་བྱ་བ་ནི་མུ་སྟེགས་ཅན་དངོས་པོར་འཛིན་པའི་མངོན་པར་ཞེན་པའོ། །རང་དང་གཞན་གྱི་རྒྱུད་དུ་རྟོགས་པའི་སེམས་དང་སེམས་
ལས་བྱུང་བ་དེ་དག་གཞོམ་པ་ནི་དངོས་པོར་འཛིན་པ་འདི་སྤངས་པའོ། །དེའི་དོན་བརྗོད་པ་ནི་བཤད་མ་ཐག་པའི་དོན་བརྗོད་པས་ངེས་པར་དངོས་གྲུབ་ཐོབ་པར་འགྱུར་བའོ། །བུད་མེད་ནི་ནོར་བུ་ཆེན་པོའི་རིགས་དེའི་གཟུངས་རྣམས་སོ། །ཆགས་པ་ནི་ཕུལ་དུ་བྱུང་བའི་
ཆགས་པའོ། །རྣལ་འབྱོར་དང་། རྗེས་སུ་རྣལ་འབྱོར་དང་། ཤིན་ཏུ་རྣལ་འབྱོར་དང་། སེམས་ཅན་གྱི་རྣལ་འབྱོར་བསྒོམ་པ་དེ་རྣམས་སོ། །བུད་མེད་ལ་ཆགས་པ་དེའི་ཕྱིར་ལྷན་ཅིག་ཏུ་གྱུར་པའི་རྒྱུས་སོ། །རིན་ཆེན་རྣམས་ནི་ནོར་བུ་ཆེན་པོའི་རིགས་ཀྱི་རང་བཞིན་རྣམས་སོ། །རྟག་ཏུ་ལེགས་

པར་བསགས་པར་བྱ། །ཞེས་བྱ་བ་ནི་ནོར་བུ་ཆེན་པོའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་ཀྱི་རིན་པོ་ཆེ་རྣམས་བསགས་པ་ནི་རྟོགས་པའོ། །བྱམས་པ་ནི་བསྐྱེད་པའོ། །གང་གི་ཕྱིར། བུད་མེད་བླ་མེད་རིན་ཆེན་
རྣམས། །ཞེས་བྱ་བ་ཡིན་པ་དེའི་ཕྱིར་བསམ་པ་ནི་ངེས་པ་བསྐྱེད་པའོ། །ནོར་བུ་ཆེན་པོའི་རིགས་ཀྱི་གཟུངས་ཀྱི་དཀྱིལ་འཁོར་གྱི་རྣལ་འབྱོར་བསྒོམས་ན་འགྲུབ་པར་འགྱུར་ཏེ། ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་
དམ་ཚིག་གི་རིགས་ཀྱི་གསང་བའི་དངོས་གྲུབ་ཀྱི་རྒྱུད་བསྟན་ནས། ད་ནི་གཟུངས་ཀྱི་མཉམ་པར་སྦྱོར་བའི་བསྒོམས་པ་ལས་བྱུང་བའི་བདེ་བ་ཕུལ་བའི་ཡང་དག་པར་སྦྱོར་བ་བསྒོམ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་
ཀྱི་རིགས་ཀྱི་མཆོད་པའི་གསང་བའི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་ལྷ་མོ་དང་མཉམ་པར་སྦྱོར་བ་བསྒོམས་པ་ལས་བྱུང་བའི་བདེ་བས་མཆོད་པར་བྱ་སྟེ། དེ་ཉིད་ནི་གསང་བའོ། །དེའི་དངོས་གྲུབ་ནི་དེ་བཞིན་གཤེགས་པ་རྣམས་
ལ་ཕུལ་བས་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་དང་། ཕྱག་རྒྱ་ཐམས་ཅད་རྫོགས་ཤིང་མངོན་སུམ་དུ་བྱེད་པའོ། །བུད་མེད་རྣམས་ཀྱིས་ཡོངས་བསྐོར་ལ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་གཟུངས་ཀྱི་བུད་མེད་དེ་རྣམས་ཀྱིས་
ཡོངས་སུ་བསྐོར་བར་གྱུར་པའོ། །ཀུན་ནས་བརྩེ་བའི་བདེ་བ་ཡིས། །ཞེས་བྱ་བ་ནི་གཟུངས་ཀྱི་ལྷ་མོ་དང་མཉམ་པར་སྦྱོར་བའི་བསྒོམས་པ་ལས་བྱུང་བའི་བདེ་བ་ནི་ཀུན་ནས་བརྩེ་བའི་བདེ་བའོ། །སངས་རྒྱས་མཆོད་ཕྱིར་ཕུལ་ན་ཡང་། །ཞེས་བྱ་བ་ནི་གཟུངས་ཀྱི་ལྷ་མོ་
དང་མཉམ་པར་སྦྱོར་བའི་བསྒོམས་པ་ལས་བྱུང་བའི་བདེ་བ་དེ་བཞིན་གཤེགས་པ་རྣམས་ལ་ཕུལ་བ་ནི་སངས་རྒྱས་ལ་ཕུལ་བའི་རྒྱུས་སངས་རྒྱས་ཉིད་ཐོབ་བོ། །རྒྱུར་འགྱུར་རོ་ཞེས་བྱ་བའི་དོན་ཏོ། །དེ་ཅི་ཞིག་ཏུ་འགྱུར་ཞེ་ན། མཆོད་པའི་དངོས་གྲུབ་ཐོབ་པར་འགྱུར། །ཞེས་

བྱ་བ་སྨོས་ཏེ། མཆོད་པར་གྱུར་པ་ནི་མཆོད་པའི་དངོས་གྲུབ་སྟེ། གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་རྣམས་རྟོགས་པ་ཡིན་ནོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་འབྱོར་བ་གཟུངས་ཀྱི་སྒྲུབ་པ་པོས་སྔ་མ་བཞིན་དུ་ཆོ་ག་
ཐམས་ཅད་རྗེས་སུ་སྤྱད་ལ། གཟུངས་ཀྱི་སྙིང་པོ་བརྗོད་ཅིང་རིག་པའི་ལྷ་མོའི་གཟུགས་ཀྱིས་བདག་ཉིད་ཡོངས་སུ་བསྐོར་ཞིང་བཞག་ལ། མཉམ་པར་སྦྱོར་བ་བསྒོམ་པས་ལོངས་སྤྱད་ལ་དེ་ནས་དེ་བསྒོམས་ཏེ། དེ་དང་དེ་བསྒོམས་པ་ལས་སྐྱེས་པའི་བདེ་བ་གང་ཡིན་ལ་དེས་
སེམས་ཅན་གྱི་ཁམས་ཐམས་ཅད་བདག་ཉིད་དང་མཚུངས་པར་བསྒོམས་ལ་དེ་ལྟ་བུའི་བདེ་བ་དེ་སངས་རྒྱས་ལ་མཆོད་པའི་ཕྱིར་དབུལ་བར་བྱའོ། །རབ་དགའ་གང་དེ་སྐྱེས་པ་ན། །རབ་དགའ་ལས་བྱུང་བདེ་བ་དེ། །ཕྱག་བཞི་པོས་ནི་མཆོད་པའི་ཕྱིར། །ཕུལ་ན་མྱུར་དུ་
འགྲུབ་པར་འགྱུར། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་པས་རང་གི་གཟུངས་དང་། མཉམ་པར་སྦྱོར་བར་བསྒོམས་པ་ལས་བྱུང་བའི་དགའ་བས་ངལ་ཞིང་སྐྱོ་ན་དེའི་བདེ་བ་དེས་ངལ་ཞིང་སྐྱོ་བའོ། །དེ་བསྒོམས་པ་ལས་བྱུང་བའི་བདེ་བ་ནི་རབ་ཏུ་
དགའ་བའི་བདེ་བ་ཉིད་དེ། ཕྱག་བཞི་པོ་ཡིས་མཆོད་པའི་ཕྱིར་ངེས་པར་ཕུལ་ནས། དེ་བཞིན་གཤེགས་པ་ཐམས་ཅད་མྱུར་དུ་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་
ཀྱི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་དེ། རང་གི་གཟུངས་ཀྱི་ཕྱག་རྒྱ་བཅིངས་ནས་རང་གི་གཟུངས་ཀྱི་དཀྱིལ་འཁོར་སྤྲུལ་པ་ཐམས་ཅད་དང་ལྷན་ཅིག་མཉམ་པར་སྦྱོར་བར་བསྒོམས་ལ། ཇི་སྲིད་དུ་སྐྱོ་ཞིང་ངལ་བར་མ་གྱུར་པ་དེ་སྲིད་ཀྱི་
བར་དུ་བྱའོ། །སྐྱོ་བར་གྱུར་ན་ཕྱག་བཞི་བྱས་ལ་དེ་ནས་ངལ་བསོ་བར་བྱའོ། །དེ་ལྟར་ཡང་དང་ཡང་དུ་བསྒོམས་ནས་ཡང་དང་ཡང་དུ་བསྒོམ་ཞིང་ཕྱག་བྱ་སྟེ་བསྙེན་པ་སྔོན་དུ་འགྲོ་བས་བསྒྲུབ་པར་བྱའོ། །རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་

ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་ནི་ཧཱུཾ་གི་དམ་ཚིག་གོ། །དེ་བཅིངས་ནས། སྐྱེ་བོ་བུད་མེད་འཁྱུད་ནས་ཀྱང་། །ཞེས་བྱ་བ་ནི་རང་གི་གཟུངས་ཀྱི་ལྷ་མོ་དང་མཉམ་པར་སྦྱོར་བར་བསྒོམས་ལ། དེ་དང་འཁྱུད་པར་གྱུར་བའི་བདེ་བ་དེ། ཕུལ་ནས་དེ་ནི་འགྲུབ་པར་
འགྱུར། །ཞེས་བྱ་བ་ནི་སེམས་ཅན་ཐམས་ཅད་ཀྱི་ཁམས་ཐམས་ཅད་རང་གི་རང་བཞིན་དུ་བྱས་ལ། དེ་ལྟ་བུའི་བདེ་བ་དེ་ཕུལ་ན་དེ་འགྲུབ་པར་འགྱུར་རོ། །འཇིག་རྟེན་དབང་པོར་བདག་བསྒོམས་ལ། །ཞེས་བྱ་བ་ལ་སོགས་པ་ནི་འགྲོ་བ་འདུལ་བ་ལ་སོགས་པ་རྣལ་འབྱོར་སྔ་མ་བཞིན་དུ་བྱས་
ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། འཇིག་རྟེན་དབང་ཕྱུག་བདག་ཡིན་ནོ་ཞེས་བྱ་བའི་ང་རྒྱལ་བསྐྱེད་པར་བྱའོ། །པདྨའི་རིགས་ཀྱི་གཟུངས་ཀྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་གཟུངས་ཀྱི་ལྷ་ལ་སྔ་མ་བཞིན་དུ་རྡོ་རྗེ་ལྟ་བས་བལྟས་པ་དེ་
བསྒོམས་པ་ལས་བྱུང་བའི་བདེ་བས་ཚིམ་པ་དེས་སེམས་ཅན་གྱི་ཁམས་ཐམས་ཅད་ཡིད་ཀྱིས་འཇིག་རྟེན་དབང་ཕྱུག་ཏུ་བྱས་ཏེ། སྡུག་པའི་གདོང་དུ་བལྟས་ཤིང་ངེས་པར་བསམས་ལ། ཕྱིས་ལྷན་ཅིག་ཏུ་མཉམ་པར་སྦྱོར་བར་བསྒོམ་པར་བྱའོ། །ནོར་བུའི་རིགས་ཆེན་པོའི་ཕྱག་རྒྱ་
ཐམས་ཅད་ཀྱང་གཟུངས་ཀྱི་ཕྱག་རྒྱ་ཐམས་ཅད་ནི་ལས་ཀྱི་ཕྱག་རྒྱའོ། །དེའི་ཕྱག་རྒྱ་ཆེན་པོ་ལ་སོགས་པ་གཟུངས་ཀྱི་ཕྱག་རྒྱ་བཅིངས་པ་ནི་ལས་ཀྱི་ཕྱག་རྒྱ་འཛིན་པར་གྱུར་པའོ། །རྒྱན་རྣམས་ཀུན་གྱིས་ནི་དོན་ཐམས་ཅད་གྲུབ་པ་ལ་སོགས་པའི་རྒྱན་གང་ཡིན་པ་དེ་རྣམས་
ཀྱིས་བདག་ཉིད་ལ་ཡིད་ལས་བྱུང་བའོ། །ཡོད་ན་ཕྱི་རོལ་གྱི་རྒྱན་ཀུན་གྱིས་རྣམ་པར་བརྒྱན་པའོ། །བུད་མེད་འཁྱུད་པའི་ལོངས་སྤྱོད་ནི། །ཞེས་བྱ་བ་ལ། རང་གི་གཟུངས་ཀྱི་ལྷ་མོ་དང་མཉམ་པར་སྦྱོར་བས་འཁྱུད་པར་བསྒོམ་པར་བྱའོ། །མཆོད་པའི་ཕྱིར་ནི་མཆོད་
པའི་རྒྱུ་མཚན་ནོ། །དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་རྣམས་རང་གི་ངོ་བོར་བསྐྱེད་ལ། དེ་ཉིད་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ལ་ཕུལ་ན་ནོར་བུ་ཆེན་པོའི་རིགས་ཀྱི་གཟུངས་ཀྱི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་

བསྒྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ནོར་བུ་ཆེན་པོའི་རིགས་ཀྱི་རྣལ་འབྱོར་བྱས་ནས། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་
པ་བཅིངས་ལ། རང་གི་གཟུངས་ཀྱི་ལྷ་མོ་མདུན་དུ་བསམས་ཏེ། ཇི་ལྟ་བ་བཞིན་དུ་འཁྱུད་པས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་རང་གི་རང་བཞིན་དུ་བྱའོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་ཀྱི་མཆོད་པའི་གསང་
བའི་དངོས་གྲུབ་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་མཆོད་པའི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་མཆོད་པ་ནི་སྒེག་མོ་ལ་སོགས་པའི་
མཆོད་པའོ། །དེ་རྣམས་ཀྱི་དངོས་གྲུབ་ནི་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་ཐོབ་པའོ། །ཅི་ནས་སུས་ཀྱང་མི་ཚོར་བར། །གཞན་གྱི་བུད་མེད་རྩེ་བྱེད་ན། །ཞེས་བྱ་བ་ལ་སོགས་པ་ནི་གཞན་གྱི་བུད་མེད་ནི། གཞན་མཆོག་ཏུ་
གྱུར་པའི་བུ་མོ་ནི་གཞན་གྱི་བུད་མེད་དེ། གཟུངས་ཀྱི་ལྷ་མོ་དེ་དེ་དང་རྩེ་བར་བྱེད་པ་ནི་མཉམ་པར་སྦྱོར་བ་སྒོམ་པའི་སྦྱོར་བས་དེ་བསྟེན་པའོ། །ཅི་ནས་སུས་ཀྱང་མི་ཚོར་བ་ནི་རང་གི་རྒྱུད་དང་རྗེས་སུ་མཐུན་པའི་ཡུལ་ནི་སྐྱེ་བོ་ཐམས་ཅད་ཀྱི་མངོན་སུམ་མ་ཡིན་པའོ། །འདི་སྐད་
སྟོན་པ་ཡིན་ཏེ། གཟུངས་ཀྱི་སྒྲུབ་པ་པོ་སློབ་དཔོན་འབའ་ཞིག་གམ། ཡིད་ཆེས་པ་དང་བྱ་བ་ཡིན་གྱིས། གཞན་དང་ནི་མ་ཡིན་ནོ། །སངས་རྒྱས་སུ་ནི་བདག་བསྒོམས་ལ། །ཞེས་བྱ་བ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པར་བདག་ཉིད་བསྒོམ་
པར་བྱའོ། །མཆོད་པའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་ནི་མཆོད་པའི་དངོས་གྲུབ་དེ་ཐོབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ། དཀྱིལ་འཁོར་ཆེན་པོ་ལས་བཤད་པའི་

བདུག་པ་མ་ལ་སོགས་པའི་ཕྱག་རྒྱ་རྣམས་ཀྱིས་ཡང་དག་པར་མཆོད་ལ་ཕྱག་བཞི་བྱའོ། །ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། གཟུངས་ཐམས་ཅད་སྤྲུལ་ལ། གཟུངས་ཀྱི་དཀྱིལ་འཁོར་ལས་བཤད་པའི་
སྒེག་མོ་ལ་སོགས་པའི་མཆོད་པ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཟུངས་ཀྱི་ལྷ་མོ་ཐམས་ཅད་དང་མཉམ་པར་སྦྱོར་བར་བསྒོམ་པར་བྱའོ། །རྡོ་རྗེ་འཇོམས་བྱས་ནས་ཀྱང་ཞེས་བྱ་བ་ལ་སོགས་པ་ནི་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་
པའི་ཆོ་གས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་གའི་རྗེས་སུ་སྤྱད་ནས། གཟུངས་ཀྱི་དཀྱིལ་འཁོར་ལས་བཤད་པའི་རང་གི་གཟུངས་ཀྱི་ཕྱག་རྒྱ་ཆེན་པོའམ། དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་བཅིངས་
ཏེ། །རང་གི་སྙིང་པོས་རང་གི་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་དཀྱིལ་འཁོར་ལས་གསུངས་པའི་སྒེག་མོ་ལ་སོགས་པའི་གསང་བའི་མཆོད་པ་བཞི་ལས་ཀྱི་ཕྱག་རྒྱའི་གར་ལས་བྱུང་བའི་བདག་ཉིད་ཡང་དག་པར་མཆོད་པར་བྱའོ། །དེ་ནས་འདོད་
པ་ནི་དེ་བཞིན་གཤེགས་པའི་རིགས་ཀྱི་རྒྱུད་ལ་ཆགས་པའོ། །དགའ་བ་ནི་དེ་བཞིན་གཤེགས་པའི་རིགས་ཀྱི་ཐབས་དང་ཤེས་རབ་བསྒོམས་པ་ལས་བྱུང་བ་མགུ་བའོ། །འདི་ཉིད་བསྒོམ་པའི་རྣལ་འབྱོར་པས་ནམ་མཁའ་དང་མཉམ་པའི་དེ་བཞིན་གཤེགས་པའི་རིགས་
རྟོགས་པས་དབང་བསྐུར་བའོ། །དེ་ཉིད་བསྒོམ་པའི་རྣལ་འབྱོར་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་སྒྲ་བརྙན་དང་མཚུངས་པའི་སྒྲ་ལ་བཟོད་པ་གང་ཡིན་པ་འདི་ནི་གླུ་མའོ། །དེ་ཉིད་བསྒོམས་པས་རང་བཞིན་གྱིས་འོད་གསལ་བའི་ཆོས་གདོད་
མ་ནས་དག་པ་ནི་ནམ་མཁའ་དང་མཚུངས་པ་ཡིན་ནོ་སྙམ་པའི་བརྩོན་འགྲུས་ནི་གར་མའོ། །དེ་རྣམས་གོམས་པའི་སྟོབས་ལས་བྱུང་བའི་བདེ་བ་ནི་འདོད་པ་དགའ་བས་དབང་བསྐུར་བ་མཆོག་གླུའི་གར་གྱིས་བདེ་བའོ། །དེ་ལས་ནི་དེ་ལྟར་གྱུར་པ་དེ་ལས་སོ། །

བདེ་བ་གཞན་ནི་ཡོད་མིན་ཏེ། །ཞེས་བྱ་བ་ནི་གསང་བའི་མཆོད་པ་བཞིར་བརྗོད་པ་དེ་ལས་སོ། །དེ་ལྟར་བདག་ཉིད་ཡང་དག་པར་མཆོད་ལ། གཟུངས་ཀྱི་ལྷ་མོ་ཐམས་ཅད་དང་མཉམ་པར་སྦྱོར་བར་བསྒོམ་པར་བྱའོ། །ཆོ་ག་ཇི་བཞིན་ཚུལ་དུ་ཡང་། །ཞེས་བྱ་བ་ལ་སོགས་པ་སྔ་མ་
བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་རང་གི་ཕྱག་རྒྱ་
བཅིངས་ཏེ། རང་གི་སྙིང་པོས་གཟུངས་ཀྱི་དཀྱིལ་འཁོར་སྤྲུལ་ནས། གཟུངས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་ལ། རྡོ་རྗེ་ཧཱུཾ་མཛད་ཀྱི་དམ་ཚིག་གི་ཕྱག་རྒྱ་བཅིངས་ཏེ། འཁྱུད་པས་
གཟུངས་ཀྱི་སྐྱེ་བོ་སྡུག་པ་ཐམས་ཅད་དང་མཉམ་པར་སྦྱོར་བ་བསྒོམ་པར་བྱའོ། །གསང་བའི་ཚུལ་ནི་ཇི་བཞིན་པར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞི་བྱ་
བའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱིས་གཟུངས་ཀྱི་དཀྱིལ་འཁོར་ལས་བཤད་པའི་འགྲོ་བ་འདུལ་བ་ལ་སོགས་པའི་ཕྱག་རྒྱ་བཅིངས་ཏེ། རང་གི་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པའི་
གསང་བའི་མཆོད་པ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཟུངས་ཐམས་ཅད་དང་མཉམ་པར་སྦྱོར་བར་བསྒོམ་པར་བྱའོ། །གསང་བའི་ཚུལ་ནི་ཇི་བཞིན་པར། །ཞེས་བྱ་བ་ལ་སོགས་པ་ལ། སྔ་མ་བཞིན་དུ་ནོར་བུའི་རིགས་ཀྱི་རྣལ་འབྱོར་བྱས་ལ།
ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་དེ། ཕྱིས་རང་གི་གཟུངས་ཀྱི་ཕྱག་རྒྱ་བཅིངས་ལ་རང་གི་གཟུངས་ཀྱི་དཀྱིལ་འཁོར་ལ་རང་གི་སྙིང་གའི་རིན་པོ་ཆེ་ལས་སྤྲུལ་ནས་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རིན་ཆེན་སྒེག་མོ་

ལ་སོགས་པའི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་མཆོད་པར་བྱའོ། །དེ་ལྟར་ལས་ཀྱི་ཕྱག་རྒྱ་རྣམས་ཀྱིས་རབ་ཏུ་མཆོད་ལ། དོན་ཐམས་ཅད་གྲུབ་པའི་རྣལ་འབྱོར་དང་། ནམ་མཁའི་སྙིང་པོའི་རྣལ་འབྱོར་པས་གཟུངས་ཀྱི་དཀྱིལ་འཁོར་ལས་བཤད་པའི་
སྒེག་མོ་ལ་སོགས་པའི་གསང་བའི་མཆོད་པ་རྣམས་ཀྱིས་མཆོད་པར་བྱས་ནས། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པར་འགྱུར་རོ། །སྔར་བཤད་པའི་ཚུལ་གྱིས་གཟུངས་ཐམས་ཅད་དང་མཉམ་པར་སྦྱོར་བར་བསྒོམས་ཏེ། ཡང་ན་རང་གི་གཟུངས་ཀྱི་དཀྱིལ་
འཁོར་སྤྲུལ་ལ་རང་གི་གཟུངས་རེ་རེ་ཞིང་མདུན་དུ་བཞག་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་དེ། ཕྱག་རྒྱ་བཞིས་རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ། གཟུངས་ཀྱི་དཀྱིལ་འཁོར་ལས་བཤད་པའི་སྒེག་མོ་ལ་སོགས་པ་རྣམས་བརྒྱད་ཀྱི་ཕྱག་
རྒྱ་དང་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་བསྒོམ་པར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་གསང་བའི་མཆོད་པའི་དངོས་གྲུབ་ཀྱི་ཆོ་ག་
རྒྱས་པའི་རྒྱུད་བསྟན་ནས། ད་ནི་སེམས་ཡོངས་སུ་སྦྱོང་བའི་ལས་ཀྱི་ཡེ་ཤེས་དང་། གཟུངས་ཀྱི་ཡེ་ཤེས་ཉིད་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྣལ་འབྱོར་པས་དཀྱིལ་འཁོར་ཆེན་པོ་ལས་བཤད་པའི་ལྷ་བསྐྱེད་པའི་རྒྱུར་གྱུར་པའི་དེ་བཞིན་གཤེགས་
པ་ཐམས་ཅད་ཀྱི་རིགས་ཀྱི་དེ་ཁོ་ན་ཉིད་བརྗོད་པའི་རྒྱུ་ནི། དེ་ནས་སངས་རྒྱས་བྱང་ཆུབ་སེམས་དཔའ་ཕྱག་ན་རྡོ་རྗེས་ཞེས་བྱ་བ་ལ་སོགས་པ་གསུངས་སོ། །དེ་བཞིན་གཤེགས་པ་ཐམས་ཅད་དང་། རིགས་ཐམས་ཅད་ཀྱི་དེ་ཁོ་ན་ཉིད་ནི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་
དོ། །དེ་དག་བརྗོད་པ་ནི་གསལ་བར་བྱེད་པའོ། །དེ་ཉིད་ནི་གསང་བ་སྟེ། དེའི་དངོས་གྲུབ་ནི་དཀྱིལ་འཁོར་ཆེན་པོར་བཤད་པའི་ལུས་ཀྱི་ཕྱག་རྒྱ་ཐམས་ཅད་བསྐྱེད་པའོ། །དེ་སྟོན་པར་བྱེད་པ་ནི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །མདོར་ན་ཏིང་

འཛིན་ཡེ་ཤེས་གནས། །ཞེས་བྱ་བ་ནི་ཏིང་ངེ་འཛིན་ཡེ་ཤེས་སུ་གྱུར་པ་ནི་སངས་རྒྱས་སོ། །ཏིང་ངེ་འཛིན་ནི་སེམས་རྩེ་གཅིག་པའོ། །དེ་ལྟར་གྱུར་པའི་ཏིང་ངེ་འཛིན་ངེས་པ་ནི་ཡེ་ཤེས་དེ་ལས་བྱུང་ཞིང་བསྐྱེད་པའོ། །དེ་གང་ཞེ་ན། སངས་རྒྱས་ཉིད་དོ། །སངས་རྒྱས་ཉིད་ནི་ཡང་
དག་པར་རྫོགས་པའི་སངས་རྒྱས་སོ། །ནི་ཞེས་བྱ་བའི་སྒྲ་ནི་ངེས་པར་གཟུང་བའོ། །ཏིང་ངེ་འཛིན་གྱི་ཡེ་ཤེས་ལས་བྱུང་བ་ཁོ་ན་སངས་རྒྱས་ཉིད་དོ། །མདོར་ན་ནི་མདོར་བསྡུས་པའོ། །མདོར་ན་ཏིང་ངེ་འཛིན་ཡེ་ཤེས་ཀྱི་གནས་དེ་གང་ཡིན་ཞེ་ན། འོན་ཀྱང་སེམས་ཅན་རྣམས་ལ་
ཆགས་ཚུལ་གྱིས། །ཞེས་བྱ་བ་སྨོས་ཏེ། སངས་རྒྱས་རྣམས་ཀྱིས་སེམས་ཅན་ཀུན། །ཐམས་ཅད་གཟི་ཅན་ཉིད་དུ་ནི། །ཇི་ལྟ་བ་བཞིན་འདུལ་བ་ཡིས། །ལས་རྣམས་ཐམས་ཅད་གྲུབ་པར་བྱེད། །ཅེས་བྱ་བ་བསྒོམས་པ་འདི་ནི་སེམས་ཅན་ལ་ཆགས་པའི་རྣལ་འབྱོར་
རོ། །སེམས་ཅན་ལ་ཆགས་པའི་སྦྱོར་བ་དེས་མྱུར་ཞིང་མགྱོགས་པར་བླ་ན་མེད་པ་ཐོབ་པར་འགྱུར་རོ་ཞེས་བཅོམ་ལྡན་འདས་དེ་བཞིན་གཤེགས་པས་གསུངས་སོ། །འདི་སྐད་སྟོན་པ་ཡིན་ཏེ། ཨོཾ་ཙིཏྟ་པྲ་ཏི་བེ་དྷཾ་ཀཱ་རོ་མི་ཞེས་བརྗོད་ཅིང་། ཆོས་ཐམས་ཅད་བདག་མེད་པར་
བསྒོམས་པས་གཟུང་བ་དང་འཛིན་པའི་རྣམ་པར་རྟོག་པ་སྤངས་ཏེ། སེམས་རྩེ་གཅིག་པའི་ཏིང་ངེ་འཛིན་དེར་འགྱུར་རོ། །དེའི་རྗེས་ལ་ཟླ་བའི་དཀྱིལ་འཁོར་གྱི་རྣམ་པར་བསྐྱེད་ནས་བརྩམས་ཏེ། ཨོཾ་བོ་དྷི་ཙིཏྟ་ཨུཏྤཱ་ད་ཡ་མི། ཨོཾ་ཏིཥྛ་བཛྲ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་ཡ་ཐ་
སརྦྦ་ཏ་ཐཱ་ག་ཏ་ཏིཥྛ་ཧཾ། ཞེས་བྱ་བའི་སྙིང་པོ་བཞི་བརྗོད་ཅིང་། དེའི་དོན་བཞི་ལ་ངེས་པའི་ཡེ་ཤེས་དེ་ལྟ་བུར་གྱུར་པའི་ཏིང་ངེ་འཛིན་གྱི་ཡེ་ཤེས་དག་ལས་བྱུང་བའི་སངས་རྒྱས་སུ་ངེས་པར་བྱས་ཏེ། ཕྱག་བཞི་པའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས་དེ་བཞིན་
གཤེགས་པའི་ལས་ཀྱི་ཕྱག་རྒྱ་བཅིངས་ཏེ། སེམས་ཅན་གྱི་ཁམས་ཐམས་ཅད་ལ་དེ་བཞིན་གཤེགས་པ་ཉིད་ལ་སོགས་པ་སྟེར་བར་རྣམ་པར་བསམས་ལ། ཕྱག་རྒྱ་ཆེན་པོ་ལ་སོགས་པ་བསྒོམས་པ་དེ་ལྟ་བུས་དེ་བཞིན་གཤེགས་པ་ཉིད་ཐོབ་པར་འགྱུར་རོ། །སེམས་ཅན་ཐོག་

མ་ཐ་མ་མེད། །ཅེས་བྱ་བ་ལ། ཐོག་མ་ནི་དང་པོ་སྐྱེ་བ་སྟེ། ཐ་མ་ནི་ཉིང་མཚམས་སྦྱོར་བ་དང་འཇོག་པའོ། །དེ་མེད་པས་ཐོག་མ་དང་ཐ་མ་མེད་པ་གང་ཡིན་པ་འདི་ནི་ཐོག་མ་དང་ཐ་མ་མེད་པའོ། །དེ་གང་ཡིན་ཞེ་ན། སེམས་ཅན་ནོ་ཞེས་བྱ་བ་སྨོས་ཏེ། རྡོ་རྗེ་སེམས་
དཔའ་ཞེས་བྱ་བའི་དོན་ཏོ། །གང་ལ་ཐོག་མ་ཐ་མ་འདི་མེད་ན། ཇི་ལྟར་དེ་ནི་སྐྱེ་བ་རྣམ་པར་འཇོག་པར་བྱེད་ཅེ་ན། ནམ་མཁའ་ལས་བྱུང་མཚན་ཉིད་དེ། །ཞེས་བྱ་བ་སྨོས་ཏེ། དཔེར་ན་རྩིག་པ་འགའ་ཞིག་པས་ནམ་མཁའ་བྱའོ་ཞེས་བྱ་བ་བཞིན་དུ་རྩིག་པ་བཤིག་པར་
བཤད་པ་ནི། རྩིག་པ་བསལ་བས་ནམ་མཁའ་བྱ། །ཞེས་བྱ་བ་བཤད་དོ། །དེ་ལྟར་ཡང་དག་པ་མ་ཡིན་པའི་ཀུན་དུ་རྟོག་པ་ནི་རྩིག་པའི་དབྱིབས་དང་མཚུངས་པ་བཤིག་ནས། ཆོས་བདག་མེད་པའི་ཡེ་ཤེས་ཀྱིས་སྐྱེས་བུའི་དབྱིབས་ཀྱི་ཚུལ་དུ་སྐྱེས་པས་ན་སེམས་ཅན་ནི་
རྡོ་རྗེ་སེམས་དཔའོ་ཞེས་ཤེས་པར་བྱའོ། །ཀུན་དུ་བཟང་པོ་ནི་བྱང་ཆུབ་ཀྱི་སེམས་ནམ་མཁའི་ཁམས་ཐམས་ཅད་དུ་རྟག་ཏུ་གནས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་དང་མཚུངས་པར་གྱུར་པ་ནི་ཀུན་དུ་བཟང་པོའོ། །དེ་སྐད་དུ་ཡང་།
ཐོག་མ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཞེས་བཤད་དོ། །ཀུན་བདག་ཉིད་ཅེས་བྱ་བ་ནི་ཁམས་གསུམ་པོ་ཐམས་ཅད་ན་ཀུན་དུ་སྤྱོད་པའི་སེམས་ཅན་གྱི་རང་བཞིན་གྱི་བདག་ཉིད་ནི། ཀུན་བདག་ཉིད་དེ་ཁམས་གསུམ་པ་རྡོ་རྗེ་སེམས་དཔའི་
གཟུགས་དང་ཆོས་ཉིད་ཀྱིས་སོ། །འདོད་པ་ནི་འདོད་པར་བྱ་བས་ན་འདོད་པ་སྟེ། བྱང་ཆུབ་ཆེན་པོའི་མཚན་ཉིད་ཅན་གྱི་རྡོ་རྗེ་སེམས་དཔའོ། །བྱང་ཆུབ་མངོན་དུ་གཉེར་བའི་རྣལ་འབྱོར་པ་རྣམས་ཀྱིས་ཐོས་པ་དང་། བསམ་པ་དང་། བསྒོམ་པའི་ཤེས་པ་བསྟན་པ་ཡིན་ནོ་ཞེས་
བྱ་བའི་དོན་ཏོ། །འགྲོ་བ་ཀུན་བདག་པོ་ཞེས་བྱ་བ་ནི་སེམས་ཅན་དང་སྣོད་ཀྱི་འཇིག་རྟེན་གྱི་འགྲོ་བ་ཐམས་ཅད་རྡོ་རྗེ་རྒྱལ་པོ་ལ་སོགས་པའི་རིགས་བརྒྱའི་དབྱེ་བས་ཕྱེ་བའོ། །སེམས་ཅན་དང་སྣོད་ཀྱི་འཇིག་རྟེན་དེ་ཡང་རྡོ་རྗེ་རྒྱལ་པོ་ལ་སོགས་པའི་དེ་དང་དེར་སྐྱེས་པའོ། །

དེ་ལྟར་རྡོ་རྗེ་འཛིན་པ་ཆེན་པོའི་རང་བཞིན་བཤད་ན། ད་ནི་དེ་ཐོབ་པར་བྱེད་པའི་ཐབས་ཀྱི་སེམས་ཡོངས་སུ་སྦྱོང་བའི་ལས་ཀྱི་ཡེ་ཤེས་གསུངས་པ་ནི། སེམས་ཅན་ཀུན་གྱི་སེམས་གང་ཡིན། །ཞེས་བྱ་བ་ལ་སོགས་པ་སྨོས་པའོ། །ཇི་སྐད་བཤད་པའི་མཚན་ཉིད་ཅན་གྱི་དེ་ལྟ་བུའི་
རང་བཞིན་དེ་གང་ཡིན་ཞེ་ན། སེམས་ཅན་ཀུན་གྱི་སེམས་གང་ཡིན། །ཞེས་བྱ་བ་སྨོས་ཏེ། ཀུན་གཞིའི་རྣམ་པར་ཤེས་པ་ལ་སོགས་པའི་རང་བཞིན་སེམས་ཅན་ཀུན་གྱི་སེམས་གང་ཡིན་པ་དེ་ཉིད་ནི་བསྟན་པའི་ཕྱིར་ནི་སེམས་དཔའ་ཞེས་བརྗོད་དོ། །ཆོས་བདག་མེད་པ་བསྒོམས་
པས་གཟུང་བ་དང་འཛིན་པའི་རྣམ་པར་རྟོག་པ་སྤངས་པ་ནི་སྲོག་ཆགས་དང་སྲོག་ཆགས་མ་ཡིན་པ་དང་། གཟུང་བ་དང་། འཛིན་པའི་རྣམ་པར་རྟོག་པ་རྣམས་ཀྱིས་མི་གཡོ་བའི་ཕྱིར་རོ་ཞེས་བྱ་བའི་དོན་ཏོ། །རྡོ་རྗེ་མཉམ་པར་མཉམ་བཞག་ནས། །ཞེས་བྱ་བ་ནི་མཉམ་པར་
གཞག་པའི་སེམས་རྩེ་གཅིག་པའི་ཏིང་ངེ་འཛིན་ཏོ། །དེའི་རྩེ་གཅིག་པའི་རྣལ་འབྱོར་གྱིས་རྡོ་རྗེ་དང་མཉམ་པར་སྦྱོར་བ་ནི་དེ་བཞིན་ཉིད་དེ། དེ་བཞིན་ཉིད་དང་རྣམ་པར་མཚུངས་པའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སེམས་ཅན་གྱི་རང་བཞིན་ཀུན་རྫོབ་ཏུ་བསྟན་པར་གྱུར་
པ་གང་ཡིན་པ་དེ་ཉིད་དེ་བཞིན་ཉིད་དང་། རོ་གཅིག་པར་སེམས་རྩེ་གཅིག་པའི་ངོ་བོ་ཉིད་ཡིན་པས་ན་རྡོ་རྗེ་དང་མཉམ་པ་ནི་དེ་བཞིན་ཉིད་དང་མཚུངས་པའོ། །འདི་ལྟར་དེ་བཞིན་ཉིད་ནི་དོན་གྱི་དངོས་པོ་ཐམས་ཅད་ཀྱི་རང་བཞིན་ཏེ། དེ་བཞིན་གཤེགས་པ་རྣམས་བྱུང་ཡང་
རུང་མ་བྱུང་ཡང་རུང་སྟེ། མ་སྐྱེས་ཤིང་མི་སྐྱེ་བར་ཡང་མི་འགྱུར་རོ། །ཆོས་གང་ཡང་སྐྱེ་བ་མེད་པ་དེ་ལ་རེས་འགའ་ཞིག་ཀྱང་འགག་པར་མི་འགྱུར་བ་དེའི་ཕྱིར་དེ་རྡོ་རྗེའོ། །དེ་བཞིན་ཉིད་དང་རོ་གཅིག་པའི་ཡེ་ཤེས་ནི་རྣམ་པར་རྟོག་པ་ཐམས་ཅད་ཀྱིས་མི་བསྐྱོད་པ་དེ་བས་ན་རྡོ་རྗེ་དང་མཚུངས་
པས་ན་རྡོ་རྗེ་ཞེས་བྱ་སྟེ། དེ་བས་ན་རྡོ་རྗེ་དང་མཉམ་པའོ། །ངེས་པར་རྡོ་རྗེ་ཉིད་འགྱུར་ཏེ། །ཞེས་བྱ་བ་ནི་ཟླ་བའི་དཀྱིལ་འཁོར་གྱི་རྣམ་པར་ངེས་པ་དེའི་སྟེང་དུ་ཟླ་བ་གཉིས་པ་དང་བཅས་པའི་རང་གི་ལྷའི་སྙིང་པོ་ལས་རྡོ་རྗེ་རྩེ་ལྔ་པར་ངེས་པར་བྱའོ། །དེ་ནས་རྡོ་རྗེའི་ང་རྒྱལ་བསྒོམས་ནས།

ཨོཾ་བཛྲ་ཨ་ཧཾ་ཞེས་བྱ་བ་ལན་གསུམ་ངེས་པར་བྱའོ། །དེ་ལྟར་ལན་གསུམ་ངེས་པ་ལས་རྡོ་རྗེ་བསྒོམས་པས་ནི་རྡོ་རྗེ་ཉིད་དུ་འགྱུར། རྡོ་རྗེ་རྩེ་ལྔ་པའི་གཟུགས་བརྙན་ཉིད་ཀྱིས་བཤད་མ་ཐག་པ་གང་ཡིན་པ་ནི་རྡོ་རྗེ་དང་མཚུངས་པའི་སེམས་ཀྱི་ཁྱད་པར་ཐོབ་པར་འགྱུར་རོ། །
སེམས་དཔའི་བྱིན་རླབས་ཚུལ་གྱིས་ནི། །རྡོ་རྗེ་སེམས་དཔའ་ཉིད་དུ་འགྱུར། །ཞེས་བྱ་བ་ལ། རྡོ་རྗེ་སེམས་དཔའ་ནི་རྡོ་རྗེ་སེམས་དཔའོ། །དེས་བྱིན་གྱིས་བརླབས་པ་ནི་བསྐྱེད་པའོ། །སེམས་དཔའ་བྱིན་གྱིས་བརླབས་པའི་སྦྱོར་བ་དེ་དག་ནི་ཚུལ་ལོ། །དེའི་དོན་ནི་འདི་སྐད་སྟོན་
པ་ཡིན་ཏེ། བཤད་མ་ཐག་པའི་དེ་ཉིད་ཀྱིས་རྡོ་རྗེར་གྱུར་པའི་སེམས་ཀྱི་ཁྱད་པར་གྱིས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་སུ་བསྐྱེད་ལ། བཛྲ་སཏྭ་ཨ་ཧཾ་ཞེས་ཡིད་ཀྱིས་བརྗོད་ཅིང་། རྣལ་འབྱོར་པས་རྡོ་རྗེ་སེམས་དཔར་མོས་པ་གང་ཡིན་པ་དེ་ནི། སེམས་དཔར་
བྱིན་རླབས་ཚུལ་གྱིས་ནི། །ཞེས་བྱའོ། །སེམས་དཔར་བྱིན་གྱིས་བརླབས་པའི་སྦྱོར་བ་དེས་རྡོ་རྗེར་གྱུར་པའི་རྣལ་འབྱོར་པས་རྡོ་རྗེ་དང་དྲིལ་བུ་བསྣམས་པ་རྡོ་རྗེ་སེམས་དཔའ་ཉིད་དུ་རྫོགས་པར་འགྱུར་རོ་ཞེས་བྱ་བའི་དོན་ཏོ། །ཡང་གི་སྒྲ་ནི་རྡོ་རྗེའི་བདག་ཉིད་ཀྱི་གཟུགས་ལ་
ལྟོས་པའོ། །དེ་ལྟར་ན་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་ཡོངས་སུ་བརྟག་ཅིང་། སངས་རྒྱས་སུ་བྱས་པ་ནི་ཆོས་ཀྱི་དབྱིངས་ཀྱི་ངོ་བོ་ཉིད་དོ། །དེ་ལྟར་རྣལ་འབྱོར་པས་རིགས་ཐམས་ཅད་ཀྱི་ལྷའི་སྐུའི་གསང་བ་
བསྐྱེད་པའི་རྒྱུར་གྱུར་པ་སེམས་དཔར་བྱིན་གྱིས་བརླབས་པའི་སྦྱོར་བ་བཤད་ནས། ད་ནི་དེ་བཞིན་གཤེགས་པ་བསྒོམས་པས་ཀྱང་དེ་བཞིན་གཤེགས་པའི་གཟུགས་སུ་ཡོངས་སུ་བརྟགས་ཤིང་བསྒྲུབས་པས་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་བསྒོམ་པར་བྱའོ་ཞེས་བྱ་བའི་
དོན་བསྟན་པའི་ཕྱིར། དེ་ཉིད་ཅེས་བྱ་བ་ལ་སོགས་པ་གསུངས་ཏེ། བཅོམ་ལྡན་སེམས་དཔའ་དེ་ཉིད་ནི། །ཞེས་བྱ་བ་ནི་ཐོག་མ་དང་ཐ་མ་མེད་པའི་སེམས་དཔའོ། །བདུད་བཞི་བཅོམ་པས་ན་བཅོམ་ལྡན་འདས་སོ། །འདི་ལྟར་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་

མཚན་ཉིད་དེ་ནི་བཅོམ་ལྡན་འདས་རྡོ་རྗེ་འཆང་ཆེན་པོས་ཐམས་ཅད་དུས་ཐམས་ཅད་ཀྱི་རྣམ་པ་ཐམས་ཅད་དུ་ཉོན་མོངས་པ་དང་ལྷའི་བུ་དང་། ཕུང་པོ་དང་། འཆི་བདག་གི་བདུད་ཐམས་ཅད་འཇོམས་པས་ཐོག་མ་དང་ཐ་མ་མེད་པའི་གཟུགས་ཉིད་ཀྱིས་དེ་དང་དེ་དག་གི་སྐབས་མི་དབྱེ་བའི་ཕྱིར་རོ། །
སེམས་དཔའ་ཞེས་བྱ་བ་ནི་རྡོ་རྗེ་སེམས་དཔའ་ཉིད་རྡོ་རྗེ་འཆང་ཆེན་པོའོ། །རྡོ་རྗེ་འདོད་པ་ཞེས་བྱ་བ་ནི་རྡོ་རྗེ་ཡང་ཡིན་ལ་འདོད་པ་ཡང་དེ་ཡིན་པས་ན་རྡོ་རྗེ་འདོད་པ་སྟེ། བྱང་ཆུབ་ཆེན་པོ་ཞེས་བྱ་བའི་དོན་ཏོ། །འདོད་པ་དེ་དག་གང་ཡིན་ཞེ་ན། དེ་བཞིན་གཤེགས་ཞེས་བྱ་བ་སྨོས་ཏེ།
དོན་ཅི་ལྟ་བ་བཞིན་དུ་རྣམ་པར་གནས་པའི་དངོས་པོ་དང་དངོས་པོ་མེད་པའི་ངོ་བོ་ཉིད་ཇི་ལྟ་བ་བཞིན་དུ་རྟོགས་པའི་སངས་རྒྱས་ནི་དེ་བཞིན་གཤེགས་པའོ། །གཤེགས་པའི་དོན་ནི་མཁྱེན་པའི་དོན་ཏོ། །དེ་ཇི་ལྟར་དེ་བཞིན་གཤེགས་པ་ཡིན་ཞེ་ན། རང་སེམས་སོ་སོར་རྟོགས་ལ་སོགས། །
སངས་རྒྱས་བྱང་ཆུབ་ཆོ་ག་བཞིན། །ཞེས་བྱ་བ་ནི་རང་གི་སེམས་ཀྱི་བདག་ཉིད་ནི་རང་གི་སེམས་ཏེ། རང་གི་རྣམ་པར་ཤེས་པ་དེ་སོ་སོར་རྟོགས་པས་སྒྱུ་མ་ལྟ་བུ་ཉིད་དུ་མངོན་སུམ་དུ་མཛད་པའོ། །དེ་ཉིད་དང་པོར་བྱས་པ་གང་ཡིན་པ་དེ་ནི་སངས་རྒྱས་བྱང་ཆུབ་སྟེ། རང་སེམས་
སོ་སོར་རྟོགས་པའི་བྱང་ཆུབ་བོ། །རང་གི་སོ་སོར་རྟོགས་པ་ལ་སོགས་པའི་བྱང་ཆུབ་དེ་ཇི་ལྟ་བ་ཡིན་ཞེ་ན། སངས་རྒྱས་བྱང་ཆུབ་ཆོ་ག་བཞིན། །ཞེས་བྱ་བ་སྨོས་ཏེ། ཨོཾ་ཙིཏྟ་པྲ་ཏི་བེ་དྷཾ་ཀཱ་རོ་མི། ཨོཾ་བོ་དྷི་ཙིཏྟ་ཨུཏྤཱ་ད་ཡ་མི། ཨོཾ་ཏིཥྛ་བཛྲ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་ཡ་ཐ་སརྦྦ་ཏ་ཐཱ་ག་ཏ་ཏསྠ་ཨ་ཧཾ། ཞེས་བྱ་
བའི་སྙིང་པོ་ལྔ་བརྗོད་ཅིང་། དོན་རྣམ་པ་ལྔ་བསྒོམས་པས་སངས་རྒྱས་ཀྱི་རྣམ་པར་རྟོག་པ་ནི་ཆོ་ག་ཇི་བཞིན་ཞེས་བྱ་བ་ནི་སྒྲའི་དོན་བརྗོད་པ་ཡིན་ནོ། །གང་གི་ཕྱིར་དེ་ལྟར་སངས་རྒྱས་ཀྱིས་རྣམ་པ་ལྔ་བསྒོམས་པའི་འབྲས་བུའི་ངོ་བོ་ནི་དེ་ཉིད་བཅོམ་ལྡན་འདས་དེ་བཞིན་གཤེགས་པ་
ཞེས་བྱ་བ་ཡིན་ནོ། །མངོན་པར་བྱང་ཆུབ་པ་ལྔའི་རིམ་པ་འདི་ཉིད་ཀྱིས་རྡོ་རྗེ་ཆེན་པོ་སེམས་དཔར་བྱིན་གྱིས་བརླབས་པའི་སྦྱོར་བས། རྡོ་རྗེ་སེམས་དཔའ་ལ་སོགས་པ་དེ་བཞིན་དུ་སྤྱོད་པར་མི་བྱའོ་ཞེས་བཤད་པར་བྱའོ། །དེ་ཉིད་བཅོམ་ལྡན་དེ་བཞིན་གཤེགས། །ཐམས་

ཅད་ཀྱི་ནི་རིགས་སུ་འགྱུར། །ཞེས་བྱ་བ་ནི་མངོན་པར་བྱང་ཆུབ་པ་རྣམ་པ་ལྔ་བསྒོམས་པའི་འབྲས་བུའི་དེ་བཞིན་གཤེགས་པ་ཐམས་ཅད་དོ། །བཤད་མ་ཐག་པ་དེ་དག་དང་འབྲེལ་པའི་དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་ཀྱི་ངོ་བོར་བསྐྱེད་
པའི་ཕྱིར་རིགས་སུ་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་དེ་བཞིན་གཤེགས་པ་རྣམས་ཀྱི་རིགས་སོ་ཞེས་ཤེས་པར་བྱའོ། །གང་གི་ཕྱིར་དེ་ལྟར་རིགས་ཐམས་ཅད་ཀྱི་གཟུགས་སུ་བསྐྱེད་པ་འདི་ནི་རྡོ་རྗེ་འཆང་ཆེན་པོ་ཡིན་པ་དེའི་ཕྱིར། དེ་བཞིན་གཤེགས་པའི་
རིགས་དེ་ཉིད་རྒྱུད་གཞན་ཡིན་ནོ། །དེ་ལྟར་རྡོ་རྗེ་དང་། པདྨ་དང་། ནོར་བུའི་རིགས་དེ་ཉིད་ཀྱིས་བསྡུས་པ་ཡིན་ནོ། །དེ་ལྟར་གང་གིས་གསུངས་ཤེ་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་ལོས་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་
ལ་འཁོར་ལོས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་སྟེ། རྡོ་རྗེ་འཆང་ཆེན་པོའི་འཁོར་ལོ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་འཁོར་གྱི་དཀྱིལ་འཁོར་རོ། །རྡོ་རྗེ་འཆང་ཆེན་པོ་དེའི་ངོ་བོ་ཡིན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་
ཞེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྒྱུ་དང་འབྲས་བུའི་དོན་དམ་པའི་དེ་ཁོ་ན་ཉིད་ཇི་སྐད་གསུངས་པ་དེ་དག་རབ་ཏུ་གསལ་བར་བཤད་དོ། །དེ་ཉིད་ནི་གསང་བ་སྟེ། དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །དེའི་ཆོ་ག་རྒྱས་
པ་ནི་བསྒོམ་པའི་བྱེ་བྲག་སྣ་ཚོགས་པའོ། །འདི་སྐད་སྟོན་པ་ཡིན་ཏེ། རྡོ་རྗེ་ཐལ་མོ་དང་། རྡོ་རྗེ་བསྡམས་པ་ལ་སོགས་པ་ཉིད་ཇི་ལྟ་བ་བཞིན་དུ་བཅིངས་ཏེ། རྡོ་རྗེ་བསྡམས་པ་དྲལ་ལ། དེ་ནས་རྡོ་རྗེ་འབེབས་པ་བསྐྱེད་ལ། དམ་ཚིག་གི་རྡོ་རྗེ་ཁུ་ཚུར་བཅིང་བར་བྱའོ། །དེའི་རྗེས་ལ་
སྡིག་པ་ཐམས་ཅད་དྲལ་ཞིང་དེ་ནས་དེ་བཞིན་གཤེགས་པ་དང་། རྡོ་རྗེའི་རིགས་དག་ནི་རྣལ་འབྱོར་པས་རང་གི་སྙིང་གའི་ཟླ་བ་ལ་རྡོ་རྗེ་བསམ་པར་བྱའོ། །པདྨའི་རིགས་ཀྱི་རྣལ་འབྱོར་པས་པདྨ་དང་ནོར་བུའི་རིགས་ཀྱི་རྣལ་འབྱོར་པས་རྡོ་རྗེ་རིན་པོ་ཆེ་བསམ་པར་བྱའོ། །རང་གི་

མཚན་མ་དེ་རྣམས་ཀྱི་དབུས་སུ་རང་གི་བཟླས་པའི་ཡི་གེ་དེ་རྣམས་བཀོད་ལ་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿཞེས་བྱ་བས་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་
སེམས་དཔའ་ཆེན་པོ་རྣམས་ཀྱིས་དབྱངས་ཡིག་བཅུ་དྲུག་གི་ས་བོན་གྱི་ཡི་གེ་རྣམས་བཟླས་པའི་ཡི་གེ་དང་བཅས་པ་ལས་རང་གི་སེམས་ཟླ་བའི་དཀྱིལ་འཁོར་གྱི་རྣམ་པར་བསམ་པར་བྱའོ། །དེའི་སྟེང་དུ་ཡང་བཟླས་པའི་ཡི་གེ་དང་། ཡི་གེ་ཀ་ལ་སོགས་པ་སྐར་མའི་རྣམ་པ་ལྟ་བུ་
གཅིག་ཏུ་གྱུར་པ་ལས་ཟླ་བའི་དཀྱིལ་འཁོར་ཡོངས་སུ་གང་བ་གཉིས་པ་རྣམ་པར་སྣང་མཛད་ལ་སོགས་པའི་དགེ་བའི་ཆོས་རྣམ་པར་སྣང་མཛད་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པའི་དགེ་བའི་སྨན་འཕེལ་བར་བྱེད་པ་དེ་དག་སྒྲུབ་པའི་རྒྱུར་གྱུར་པར་བསམ་པར་བྱའོ། །ཡང་
ན་ཡི་གེ་མ་ནི་རྣམ་པར་སྣང་མཛད་བསྐྱེད་པའི་རྒྱུར་གྱུར་པའི་ས་བོན་ནོ། །ད་ཉ་ཎ་ན་ནི་མི་བསྐྱོད་པ་ལ་སོགས་པའོ། །ཡ་ར་ལ་ཝ་ནི་རྡོ་རྗེ་སེམས་མ་ལ་སོགས་པ་རྣམས་ཀྱིའོ། །ཤ་ཥ་ས་ཧ་ནི་སྒེག་མོ་ལ་སོགས་པ་རྣམས་ཀྱིའོ། །ཡང་ཡ་ར་ལ་ཝ་ནི་བདུག་པ་མ་ལ་སོགས་པ་
རྣམས་ཀྱིའོ། །ཙ་ཚ་ཛ་ཛྷ་ནི་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱིའོ། །ཀ་ཁ་ག་གྷ་ནི་སྒྱུ་མ་རྡོ་རྗེ་ལ་སོགས་པ་ནས་དབང་པོའི་མཐར་ཐུག་པ་རྣམས་ཀྱིའོ། །ཌ་ཋ་ཌ་ཌྷ་ནི་ཁྲོ་བོ་རྣམས་ཀྱིའོ། །ཏ་ཐ་ད་དྷ་ནི་ཚོགས་ཀྱི་བདག་པོ་རྣམས་ཀྱིའོ། །པ་ཕ་བ་བྷ་ནི་ཕོ་ཉ་རྣམས་ཀྱིའོ། །
ལ་མ་ཀྵ་ཨ་རྣམས་ནི་བྲན་རྣམས་ཀྱི་སྟེ། ཀླུ་མཐར་ཐུག་པའི་བསྐྱེད་པའི་རྒྱུར་གྱུར་པའི་ས་བོན་ནོ། །དེ་ཉིད་ཀྱི་ཕྱིར་ཟླ་བའི་དཀྱིལ་འཁོར་གཉིས་པ་འདི་ནི་འཇིག་རྟེན་པ་དང་འཇིག་རྟེན་ལས་འདས་པའི་ལྷ་ཐམས་ཅད་བསྐྱེད་པའི་རྒྱུར་གྱུར་བའི་ཕྱིར་དགེ་བའི་ཆོས་ཡོངས་
སུ་རྫོགས་པ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་སོ། །ཡང་ཟླ་བའི་དཀྱིལ་འཁོར་གཉིས་པ་དེ་ཉིད་བཟླས་པའི་ཡི་གེ་དང་བཅས་པ་ལས་རྡོ་རྗེ་རྩེ་ལྔ་པ་བསམ་པར་བྱའོ། །རྡོ་རྗེ་དེ་ཉིད་རྡོ་རྗེ་རྒྱལ་པོ་ལ་སོགས་པའི་མཚན་མའི་གཟུགས་སུ་གྱུར་པར་བྱའོ། །

རྡོ་རྗེ་སེམས་དཔའི་རྣལ་འབྱོར་པས་རྡོ་རྗེ་ཉིད་ཇི་ལྟར་བསམ་ཞིང་བསྒོམས་པ་དེ་བཞིན་དུ་ཁྲོ་བོ་རྡོ་རྗེ་ཧཱུཾ་མཛད་ཀྱི་རྣལ་འབྱོར་པས་རྡོ་རྗེ་ཉིད་བསྒོམ་པར་བྱའོ། །དེ་ནས་རང་གི་མཚན་མ་དེའི་དབུས་སུ་བཟླས་པའི་ཡི་གེ་རྣམ་པར་བཀོད་པ་འདི་ཉིད་བརྗོད་ཅིང་། རང་
གི་མཚན་མའི་ཕྱག་རྒྱ་བསྒོམ་པར་བྱའོ། །རང་གི་མཚན་མ་ལས་བྱུང་བའི་རང་གི་རིགས་སྤྲུལ་ལ། ཕྱོགས་བཅུའི་སེམས་ཅན་གྱི་ཁམས་ཐམས་ཅད་ཀྱི་དེའི་རང་བཞིན་དུ་བསྐྱེད་ལ། དེ་ནས་དེ་རང་གི་མཚན་མ་ལ་གཞུག་པར་བྱའོ། །རང་གི་མཚན་མ་དེ་ལ་
རང་གི་རིགས་ཀྱི་ལྷའི་རྡུལ་ཕྲ་རབ་བསགས་པ་ལས་བདག་ཉིད་བསྐྱེད་དེ། སེམས་དཔར་བྱིན་གྱིས་བརླབས་པའི་སྦྱོར་བས། བཛྲ་སཏྭ་ཨ་ཧཾ་ཞེས་བརྗོད་ཅིང་། རང་གི་མཚན་མ་རྡོ་རྗེ་སེམས་དཔར་བདག་ཉིད་བསྐྱེད་ལ་བསྙེམས་པ་དང་བཅས་པས་རྡོ་རྗེ་གསོར་ཞིང་ཡང་འདི་
སྐད་ཅེས་བརྗོད་པར་བྱའོ། །བཛྲ་སཏྭ་ཨ་ཧཾ། དེ་བཞིན་བཛྲ་རཱ་ཛ་ཨ་ཧཾ་ཞེས་བྱ་བ་ལ་སོགས་པ་རང་གི་སྙིང་པོ་བརྗོད་ཅིང་། རྡོ་རྗེ་སེམས་དཔའ་འམ། རྡོ་རྗེ་རྒྱལ་པོ་ལ་སོགས་པའི་གཟུགས་སུ་བདག་ཉིད་བསྒོམ་པར་བྱའོ། །རྡོ་རྗེ་སེམས་དཔའི་རྣལ་འབྱོར་པས་རྡོ་རྗེ་
གསོར་བ་ལ་མཐར་ཐུག་པ་ཉིད་ཀྱི་རྡོ་རྗེ་ལས་བྱུང་བའི་རྡོ་རྗེ་སེམས་དཔའ་བདག་ཉིད་བསྒོམ་པར་བྱའོ། །དེ་ལྟར་བདག་ཉིད་ང་རྒྱལ་བསྐྱེད་དེ། མ་ཧཱ་ས་མ་ཡ་སཏྭ་ཨ་ཧཾ་ཞེས་བྱ་བ་སྤྱིའི་སྙིང་པོ་བརྗོད་ཅིང་། རིགས་ཐམས་ཅད་ཀྱི་རྣལ་